The New Testament of our Lord and Saviour Jesus Christ
Jesu Khrist Khanggui
1 Jesu Khrist, Abraham Tapa, David Tapa khanggui lehkhabu: 2 Abraham in Isak ahing a, Isak in Jakob ahing a, Jakob in Juda leh a sanggamte ahing hi. 3 Juda in Tamar toh Perez leh Zara ahing a, Perez in Hezrom ahing a, Hezrom in Aram ahing hi. 4 Huleh Aram in Aminadab ahing a, Aminadab in Nasson ahing a, Nasson in Salmon ahing hi. 5 Salmon in Rahab toh Boaz ahing a, Boaz in Ruth toh Obed ahing a, Obed in Jesse ahing hi. 6 Huleh Jesse in kumpipa David ahing a, kumpipa David in Uriah ji anahi toh Solomon ahing hi. 7 Solomon in Rehoboam ahing a, Rehoboam in Abia ahing a, Abia in Asa ahing hi. 8 Asa in Jehosaphat ahing a, Jehosaphat in Joram ahing a, Joram in Uziah ahing hi. 9 Uziah in Jotham ahing a, Jotham in Ahaz ahing a, Ahaz in Hezekiah ahing hi. 10 Hezekiah in Manasseh ahing a, Manasseh in Amon ahing a, Amon in Josia ahing hi. 11 Babylon gam a puimanga aum laiun Josia in Jekonia leh a sanggamte ahing hi. 12 Babylon gam a puimang ahih nungun Jekonia in Sheltiel ahing a, Sheltiel in Zerubbabel ahing hi. 13 Zerubbabel in Abiud ahing a, Abiud in Eliakim ahing a, Eliakim in Azor ahing hi. 14 Azor in Zadok ahing a, Zadok in Akim ahing a, Akim in Eliud ahing hi. 15 Eliud in Eleazar ahing a, Eleazar in Mathan ahing a, Mathan in Jakob ahing hi. 16 Huleh Jakob in Mari pasal Joseph ahing a, hu Mari apatin Khrist kichi Jesu chu ahung piangta hi. 17 Huchiin Abraham apat David chiang khang zousiah chu khang sawmleli ahi. Huleh David apat Babylon gam a puimang ahih chiang uh khang sawmleli, huleh Babylon gam a puimang ahih vapat Khrist chiang khang sawmleli ahi.
Jesu Khrist Pianna
18 Jesu Khrist pian daan chu hi chi ahi: a nu Mari chu Joseph toh akikhaam nung un, aumkhawm maun, Hagau Siangthou apat gaai chih akihedohta hi. 19 Hizongleh a pasal Joseph chu midihtat ahi a, zapi heet-a um diing uut louin aguuha khuul atumta hi. 20 Hizongleh amah in hi thute angaihtuah laiin, a mang in Lalpa angel a kawmah ahung kilaah a, "David tapa Joseph, Mari na ji diinga laah lau sin. Ajiahchu a nau paai hi Hagau Siangthou apat ahi. 21 Tapa ahung nei diinga huleh a min Jesu na sa diing hi. Ajiahchu Amah in a mite a sualnate vapat ahundam diing hi," achi hi. 22 Hi silte zousiah chu Lalpa'n zawlnei kam a hichibanga anasoite ataangtun theihna diingin ahi, 23 "Ngai un, nungaah siangthou agaai diing a, Tapa anei diing a, huleh a min Immanuel achi diing uh," huchu, "I kawmah Pathian aum," chihna ahi. 24 Huin Joseph chu ihmu athou a, Lalpa angel in thu apiaah banga bawlin, a ji chu akiteenpihta a, 25 hizongleh Mari in a Tapa masapeen ahung neihkhiah masiah aluppih sih a, huleh amah in a min Jesu asata hi.
Mipilte 'n Avehna
1 Huchiin kumpipa Herod lal laia Judia gam a Bethlehem khua a Jesu ahung pianin, ngai un, suahlam apat mipil aahsi lama siamte Jerusalem ah ahung va, 2 "Judate Kumpipa hung piang chu khoiah aum ei? Ajiahchu suahlam ah Amah aahsi ka mu va, Amah be diinga hung ka hi uh," achi uhi. 3 Kumpipa Herod in huchu ajaah tahin alungdong a, Jerusalem a mi zousiah zong amah toh alungdong uhi. 4 Siampu lalte leh daanjilsahtute zousiah akou khawm a, Khrist pianna diing khoitah ahiai chih adong hi. 5 Huleh amah un a kawmah, "Judia gam a Bethlehem khua ah, ajiahchu zawlnei in hichibangin anagial hi, 6 'Nang, Juda gam a Bethlehem, Juda gamoptute lahah na neupeen hial sih hi. Ajiahchu ka mi Israel veengtu diing nang apatin Optu liantah ahungdoh diing hi,'" achi uhi. 7 Huin Herod in mipil aahsi lam a siamte aguuh kouh a, aahsi kilat hun adongchianta hi. 8 Huleh amahuh chu Bethlehem ah asawl a, "Chiah unla, naungeh thu chu chiantahin vakankhia un. Na muh tahchiangun keima'n zong ka hung biahve theihna diingin thu hung hilh kiit un," achi hi. 9 Huleh amah un kumpipa thu ajaah zohun akipankheta va, ngai un, suahlam a amuh uh aahsi chu naungeeh umna tung jawn atun a, akhawl masiah a ma vah apai jeel hi. 10 Amah un aahsi chu amuh tahun nasatahin akipaah uhi. 11 Huleh inn sungah aluut va, a nu Mari toh um naungeeh chu amu va, abohkhup va, abeta uhi. Huin a goubawmte uh hongin a kawmah silpiaah sana leh begaw leh murrah apia uhi. 12 Huleh Herod kawma kilehkiit lou diinga a mang va hilha aum jiahun lampi tuam juiin a kho lamvah achiahta uhi.
Aigupta Gam a Taaina
13 Huleh amahuh achiah nungun, en un, Lalpa angel chu Joseph kawmah a mang in akilaah a, "Thou inla, naungeeh leh a nu pui inla Aigupta gam ah taai in. Huleh ka hung hilh kiit masiah hutah ah um zing in. Ajiahchu Herod in naungeeh chu suhlup diinga hawl pah diing ahi," achi hi. 14 Joseph chu athou a, naungeeh leh a nu chu apui a, ajaan ajaanin Aigupta lamah achiahta uhi. 15 Lalpa'n zawlnei kam a, "Aigupta gam apat ka Tapa ka koudohta," chia asoi ahung taangtun theihna diingin Herod asih masiah hutah ah aum zing uhi.
Herod in Naupangte Athahna
16 Huin Herod in aahsi lam a siamte'n aheem uh chih aheet tahin nasatahin alungthahta hi. Huchiin mi asawl a, aahsi lam a siamte kawma a hun thu adohchian bangtahin Bethlehem leh a kiimveel zousiah a pasal naupang kum nih leh a nuailam zousiah athatta hi. 17 Zawlnei Jeremia in hichibanga anasoi chu ahung taangtungta hi, 18 "Rama khua ah thawm akija, numei misi ngaia kap leh maauna nasatah bang, Rachel in a tate akah a, aum nawn louh jiahun koima hamuan diing auut sih hi," achih chu.
Nazareth a Achiahna
19 Herod asih phetin, ngai in, Lalpa angel khat Joseph kawmah a mang in Aigupta gam ah akilaah a, 20 "Thou inla, naungeeh leh a nu chu pui inla Israel gam ah chiah in, ajiahchu naungeeh thah tumte asita uhi," achi hi. 21 Huin amah chu athou a, naungeeh leh a nu chu apui a, Israel gam ah ahungta hi. 22 Arkelaos chu Judia gam a a pa Herod mun ah alal hi chih ajaah tahin hu lamah achiah ngamta sih hi. A mang a hilha aum jiahin Galili gam lamah akilehheita hi. 23 Huleh zawlneite'n, "Amah chu Nazareth mi achi diing uh," chia asoi uh ataangtun theihna diingin Nazareth kichi khua khat ah ahung tung va, ateengta uhi.
Baptistu Johan leh a Thuhilh
1 Hu hun laiin Baptistu Johan chu Judia gamdaai ah taangkouin ahung a, 2 "Kisiih un, ajiahchu vaan lalgam anaita hi," chia soiin. 3 Ajiahchu amah ahi zawlnei Isai in, "Gamdaai a mi kikou aw in, 'LALPA lamlian sial unla, a lampite hihtang un,' achi hi," chia anasoipa chu. 4 Hu Johan in chu sangawngsau mul puan asilh a, a kawng savun kawnggaah in agaah a, huleh a an chu khaukhup leh gam khuaizu ahi. 5 Huleh Jerusalem leh Judia gam pumpi leh Jordan kiimveel a umte zousiah a kawmah achiah va, 6 huleh a sualte uh kiphuangin Jordan ah Johan in abaptis hi. 7 Ama'n Pharisaite leh Sadukaite tampi a kawma baptisma tang diinga hung amuh tahin, a kawmvah, "Guul suante aw! Lungthahna hung tung pah diing taaisan diingin kuan ahung thuhilh ei? 8 Hujiahin kisiihna toh kituaah gah suang un. 9 'Abraham ka pu uh ahi,' chiin kingaihtuah sih un. Ajiahchu Pathian in hi suangte haw Abraham tate in adingsah thei hi, chih ka hung hilh ahi. 10 Tuin zong singbul chin ah heita koih ahita hi. Hujiahin singkung gah hoih suang lou photmah chu phuuh ahi a, mei ah paihluutin aum hi. 11 Ke'n chu kisiihna diingin tui in ka hung baptis ngeei hi. Hizongleh ka nunga hung paipa chu kei saangin aloupijaw a, a keengtophah tawi taah zong ka hi sih hi. Ama'n chu Hagau Siangthou leh mei in nanguh ahung baptis diing hi. 12 A khut in a pasiseep atawi a, a phual chu ajaap siang tinten diing hi. Huleh a buhte chu a pang ah akoih khawm diing hi. Hizongleh a sii chu mei mittheilou in ahaaltum diing," achi hi.
Jesu Baptisma Tanna
13 Huin Jesu chu baptisma tang diingin Galili gam apatin Jordan ah Johan kawmah ahung hi. 14 Hizongleh Johan in, "Kei na hung baptis kiphamoh jaw hi ing a, nang kei kawma hung na hi maw?" chiin Amah anakhaam hi. 15 Jesu'n adawng a, a kawmah, "Tuin chu huchih diing lemsa haam in. Ajiahchu huchibang a dihtatna zousiah bawl bukim chu ei diinga poimoh ahi," achi hi. Huin lem asata hi. 16 Jesu chu baptisma atan zohin tui apatin apawtdoh pah hi. Huleh ngai un, vaan Amah lamah ahung kihong a, Pathian Hagau chu vakhu banga hung kumsuhin a tunga hung tu chu amu hi. 17 Huleh ngai un, vaan apatin aw khat ahung ging a, "Hichu ka Tapa deihtah ahi a, a tungah ka kipaah mahmah hi," achi hi.
Jesu Heema Aumna
1 Hu nungin Jesu chu diabol heema um diingin gamdaai ah Hagau in apuita hi. 2 Huleh suun sawmli leh jaan sawmli an ngawla aum nungin a gil ahung kialta hi. 3 Huin heemtu chu a kawmah ahung a, "Pathian Tapa na hih leh, hi suangte tanghou suaah diingin thu pia in," achi hi. 4 Hizongleh Ama'n adawng a, "'Mihing tanghou chauhin ahing sih diing a, hizongleh Pathian kam apat thu pawt chin in ahing jaw diing uh,' chih gelh ahi," achi hi. 5 Huchiin diabol in Amah chu khopi siangthou ah apuitou a, Pathian biahinn tung sangpeen ah akoih hi. 6 Huleh a kawmah, "Pathian Tapa na hih leh, kekhesuh in, ajiahchu, 'Ama'n na tungtaang thu ah a angelte thu ape diing,' huleh 'A khut un ahung na dom diing uh, huchilou inchu na keeng suang ah na tat kha diing,' chia gelh ahi," achi hi. 7 Huin Jesu'n a kawmah, "'LALPA na Pathian na je-et louh diing ahi,' chih gelh ahi jeel hi," achi hi. 8 Huleh diabol in Amah chu taang sangpi khat tungah apui kiit a, khovel lalgam zousiah leh a loupina uh aensah hi. 9 Huleh diabol in a kawmah, "Khupbohin hung be lehchin hite zousiah ka hung pe diing hi," achi hi. 10 Huin Jesu'n a kawmah, "Hitah apatin chiah mang in, Setan! 'LALPA na Pathian chu na biah diing a, Amah nna chauh natoh diing ahi,' chih gelh ahi," achi hi. 11 Huzohin diabol in Amah anuseta a, huleh en un, angelte ahung va a nna atohsahta uhi.
Galili a Jesu Thusoina
12 Huchiin Johan suangkul ah akhum uh chih Jesu'n ajaah tahin, Galili gam ah achiahta hi. 13 Huleh Nazareth khua nusiain, Zebuloh leh Naphtali gamkaih sunga um diil geia Kapernaum khua ah chiahin avateengta hi, 14 huchia zawlnei Isai in hichibanga anasoite ahung taangtun theihna diingin. 15 "Jentelte Galili, Jordan gaal a Diil lampi a um Zebulon gam leh Naphtali gam a: 16 mial a tou mite'n vaah loupitah amu uh, huleh sihna gam leh liim a toute tungah vaah ahung suaahta hi," achih chu. 17 Hu hun apatin Jesu'n, "Kisiih un, ajiahchu vaan lalgam anaita hi," chiin thusoi apanta hi.
Nungjui Masate Kouhna
18 Huleh Jesu'n Galili Diil geia avaah laiin, unau nih Simon kichi Peter leh a sanggampa Andru diil a leensep-a um amu hi, ajiahchu amahuh ngamanmi ahi uhi. 19 Huleh Ama'n a kawmvah, "Hung jui un, mihing mantuin ka hung siam diing," achi hi. 20 Huleh amah un a leente uh nusiain Amah ajui pah uhi. 21 Huleh Amah chu hu apat chiah jeelin, unau dang nih, Zebedi tapate Jakob leh a sanggampa Johan chu a pa uh Zebedi toh kuang sunga a leente uh phoha um amu a, amahuh akou hi. 22 Huleh amah un a pa uh leh a kuang uh nusiain Amah ajui pahta uhi.
Galili Gam a Jesu Natohna
23 Huleh Jesu chu Galili gam pumpi ah avaah lehleh a, sinagogte bang ah thu ahilh a, lalgam tanchinpha soiin mite laha natna chinteng leh damlouhna chinteng asudam jeel hi. 24 Huleh Syria gam pumpi ah a min athangta hi. Huleh amah un natna chituamtuam a damlou zousiah leh dawi matte, sibup veite leh jengte a kawmah ahung pui va, Ama'n anasudam jeel hi. 25 Huleh Amah chu Galili, Dekapoli, Jerusalem, Judia leh Jordan gaal lam apat hung mipi nasatahin ajui uhi.
Hamphatnate
1 Huin mipite amuhin Amah chu taang ah akal a, huleh atou zohin a nungjuite a kawmah ahung uhi. 2 Huleh Ama'n a kam akaah a, amahuh thu ahilh a: 3 "Hagau a gentheite ahampha uhi, vaan lalgam amahuh a ahih jiahin. 4 Lungngaite ahampha uhi, hamuana um diing ahih jiahun. 5 Thunuaigolhte ahampha uhi, leigou luah diing ahih jiahun. 6 Dihtatna lam a gilkiala dangtaahte ahampha uhi, taisaha um diing ahih jiahun. 7 Khotuah theite ahampha uhi, khotuahna tang diing ahih jiahun. 8 Lungsim siangthoute ahampha uhi, Pathian mu diing ahih jiahun. 9 Lemna siamtute ahampha uhi, Pathian tate chiha um diing ahih jiahun. 10 Dihtatna jiaha suhduhdaha umte ahampha uhi, vaan lalgam amahuh a diing ahih jiahin. 11 "Mi'n keimah jiaha ahung housiat va, ahung suhduhdah va, juau a gilou chinteng a ahung heeh hun chiangun na hampha uhi. 12 Kipaah unla, nasatahin nuam un, vaan ah na kipaahman diing uh atam ngaala, ajiahchu na ma va zawlnei umte zong hitobangin anasuduhdahta uhi.
Chi leh Thaumei Tehkhinthu
13 "Lei chi na hi uh, hizongleh chi chu data hileh, bangin akisu-al kiitta diai? Huchia'n a panna aumta sih diing a, paihdoh a, mite totchil diing ahi giapta hi. 14 "Nanguh khovel mite vaah na hi uh, taang tunga khopi um chu akiphual thei sih hi. 15 Huleh mi'n thaumei dein loh akhuhkhum ngei sih va, a tunna ah akoih jaw uhi. Huchiin inn sunga mi um zousiah asalhvaah hi. 16 Hutobangin na vaah uh mi mitmuhin vaah heh, huchiin amah un na natoh hoihte uh amu thei diing va, na Pa uh vaan a um chu apaahtawi diing uhi.
Khrist in Daan Sutaangtung
17 "Daan thu aha, Zawlneite Lehkhabute aha suse diinga hung ka hi chiin hung ngaihtuah sih un. Suse diinga hung ka hi sih a, sutaangtung diinga hung ka hijaw hi. 18 Chihtahzetin na kawmvah ka soi ahi, vaan leh lei aman masiah daan thu a sutvom neucha aha thaivom neuchakhat zong amang sih diing hi, a bawna ataangtun kim masiahin. 19 Hujiahin koipouh hi thupiaah neupeente laha khat mei zong susia a, hutobanga bawl diinga mite hilh chu vaan lalgam ah mi neupeen ahi diing hi. Hizongleh koipouh in jui a, hutobanga bawl diinga mite hilhtu chu vaan lalgam ah milian chih ahi diing hi. 20 Ka hung hilh ahi, na dihtatna un daanjilsahtute leh Pharisaite dihtatna akhuup louh inchu, vaan lalgam ah na luut top sih diing uhi.
Lungthahna, Tualthahna leh Kilepna
21 "Malai mite kawma, 'Tual na thah louh diing ahi, huleh koipouh tualthat in chu vaihawmna atuaah diing hi,' kichi daan na jata uhi. 22 Hizongleh ke'n chu na kawmvah ka soi ahi, koipouh ajiah beia a unau tunga lungthah chu vaihawmsahin aum diing hi. Huleh koipouh a unau kawma, 'Raka!' chitu in chu vaihawmtute vaihawmna atuaah diing hi. Huleh koipouh, 'Mingol!' chitu chu gawtmun meidiil a luut theihna lauhhuai ah aum diing hi. 23 Hujiahin maitaam bul a silpiaah diing tawia na hung laitaha na unau in na tungah lungkimlouhna anei chih na heetdoh leh, 24 na silpiaah diing chu hu maitaam ma ah nusia inla chiah in. Huleh na unau toh kilem masaphot inla, huzoh chiangin hung inla, na silpiaah diing chu laan in. 25 Na langpa toh lampi a na chiah laiin kilem zoh in, huchilou inchu na langpa'n vaihawmtu ahung mansah diing a, huleh vaihawmtu'n thuneitulian kawmah ahung pekhe diing a, thuneitulian in suangkul ah ahung khum kha diing hi. 26 Chihtahzetin ka hung hilh ahi, paisa san khat tan a na piaah kim masiah hu apatin na pawtdoh het sih diing hi.
Aangkawmna
27 "Malai mite kawma, 'Aang na kawm louh diing ahi,' chia anakisoi daan na jata uhi. 28 Hizongleh ke'n chu na kawmvah ka soi ahi. Koipouh numei enlahtaha entu in a lungsim in amahnu toh aang akawm zouta ahi. 29 Huleh na mit jiatlam in ahung puuhsah leh kheidoh inla paai mei in. Ajiahchu na tahsa pumpi gawtmun a paih ahih saangin na tahsa peeng khat manthaai chu nang diingin ahoihjaw hi. 30 Huleh na khut jiatlam in ahung kipuuhsah leh saattan inla paai mei in. Ajiahchu na tahsa pumpi gawtmun a paih ahih saangin na tahsa peeng khat manthaai chu nang diingin ahoihjaw hi.
Kikhuulna
31 "'Mi koipouh in a ji akhuul leh khuulna lehkha pia heh,' daan in anachi hi. 32 Hizongleh ke'n chu na kawmvah ka soi ahi, koipouh in mi toh lupkhawm jiah hiloua a ji akhuul leh, amahnu chu a-aangkawmsah a, huleh koipouh hu khuulsanu kiteenpih chu aangkawm ahi.
Kichiamna
33 "Huchiangleh malai mite kawma, 'Dihloutahin kihaahsial sih un. Amahvaang na kihaahsialnate Lalpa kawmah taangtun jaw in,' chia anakisoi daan na jata uhi. 34 jjizongleh ke'n chu na kawmvah ka soi ahi, kihaahsial mawngmawng sih un, vaan louin kihaahsial sih un, ajiahchu Pathian laltouphah ahi. 35 Huleh lei louin kihaahsial sih un, ajiahchu hichu a keeng ngahna ahi. Huleh Jerusalem louin kihaahsial sih un, ajiahchu hichu Kumpipa loupitah khopi ahi. 36 Na lutang louin kihaahsial sin, ajiahchu samjang khat zong na kaang sahin na vomsah thei sih hi. 37 Hizongleh 'Hi' na chih uh chu 'Hi' hi heh, huleh 'Hilou' na chih uh chu 'Hilou' hi heh. Ajiahchu hi vaal chu giloupa apat hung pawt ahi.
Phubalaahna
38 "'Mit luanga mit, ha luanga ha,' chia anakisoi daan na jata uhi. 39 Hizongleh ke'n chu na kawmvah ka soi ahi, migilou chu kikhinpih sih un, koipouh in na ngeiphe jiatlam abeh leh, a lehlam zong doh jaw in. 40 Huleh mi koipouh in vaihawmna mun a ahung pui a na puannaah laah atup leh, na puannaah tual zong lasah ngaal in. 41 Mi koipouh meel khat chiah diinga hung phuut photmah kawmah amah toh meel nih chiah khawm un. 42 Na kawma hung ngeentu chu pia inla, huleh ahung thunglaah uut chu kiheimangsan sin.
Meelmate Lungsiatna
43 "'Na innveengte lungsiat inla, na meelmate hua in,' chia anakisoi daan chu na jata uhi. 44 Hizongleh ke'n chu na kawmvah ka soi ahi, na meelmate uh lungsiat unla, haamsia hung lohte vangpiaah unla, ahung mudahte diingin sil hoih bawlsah un. Huleh ahung bawlsete leh ahung suduhdahte diingin haamteisah un. 45 Huchiin na Pa uh vaan a um tate na hi thei diing uhi. Ajiahchu Ama'n migiloute leh mihoihte tungah ni asuaahsah a, huleh midihtatte leh midihtatloute tungah zong guah ajusah hi. 46 Ajiahchu nanguh hung lungsiatte chauh na lungsiat uh leh, kipaahman bang ahiai na muh diing uh? Siahdongte'n zong huchibanga bawlve hilou ahi viaimah? 47 Huleh na unaute uh chauh chibai na buuh uh leh, midang saanga bang ahiai na bawl tam tuan uh? Siahdongte'n zong huchibanga bawlve hilou ahi viaimah? 48 Hujiahin vaan a um na Pa uh ahoih bukim mahbangin nanguh zong hoih bukim un.
Kilungsiatna Silpiaah
1 "Mi na panpihna va na sil hoih bawlte uh mi muh diinga a ma va bawl ldu diingin pilvaang un. Huchilou inchu na Pa uh vaan a um kawmah muh diing kipaahman na nei sih diing uhi. 2 Hujiahin mi gentheite kawma sil na piaah chiangun milepchiahte'n mi phat aloh theihna diingva sinagogte bang leh kholai kotzingte bang a ahih veu bangun, na ma vah peengkuul muut sih un. Chihtahzetin ka hung hilh ahi, amah un a kipaahman uh amuzouta uhi. 3 Hujiahin nang chu mi kawma sil na piaah chiangin, na khut jiatlam hih chu na khut veilam hesah sin. 4 Huchiin na silpiaah chu aguuha pia na hi diing a, huleh na Pa aguuha hung mupa in phuanglaahtahin ahung dit diing hi.
Lalpa Haamteina
5 "Huleh na haamtei chiangun milepchiahte bangin na hih diing uh ahi sih. Ajiahchu amah un mi'n amuh theihna diingin sinagogte leh kotzing ningkawite bang a dingin ahaamtei uut sese uhi. Chihtahzetin ka hung hilh ahi, amah un a kipaahman uh amuta uhi. 6 Hizongleh nang chu na haamtei chiangin na pindan sungah luut inla, na kot khaah inla, aguuha um na Pa kawmah haamtei in. Huchiin na Pa aguuha hung mupa in phuanglaahtahin ahung dit diing hi. 7 Hizongleh na haamtei chiangun Jentelte bangin umjebeiin na soisa uh soi nonnon sih un, ajiahchu amah un chu ahaam tam jiahva jaaha um diingin akingaihtuah uhi. 8 "Hujiahin amahuh bang sih un, ajiahchu na Pa un a kawma na nget maun bang silte ahiai na mamoh uh ahe hi. 9 Hujiahin nanguh chu hichibangin haamtei un: ka Pa uh vaan a um, na min kizahtaat heh. 10 "Na lalgam hung tung heh. Na deihjawng vaan a akibawl bangin lei ah zong kibawl heh. 11 "Ka niteng neehkhop uh ni chinin hung pia in. 12 "Ka leibate uh ka ngaihdam bang un, ka batte uh hung ngaidam in. 13 "Heemna ah hung puiluut sinla, huleh giloupa apat hung hunkhe jaw in. Ajiahchu lalgamte, silbawltheihnate, loupinate, kumtuanga nang a ahih jiahin, Amen, chiin. 14 "Mi a tatsualnate uh na ngaihdam uh leh, na Pa uh vaan a um in zong nanguh ahung ngaihdam diing hi. 15 Hizongleh mi na ngaihdam louh uh leh vaan a um na Pa un zong na tatsualnate uh ahung ngaihdam sih diing hi.
An Ngawl Thu a Hilhna
16 "Huleh an na ngawl chiangun milepchiahte bangin ngui meel po sih un. Amah un chu an ngawla akilat theihna diingun a maaisuah uh atuamsah veu uhi. Chihtahzetin ka hung hilh ahi, amah un a kipaahman uh amuta uhi. 17 Hizongleh nang chu an na ngawl chiangin na lu sathau nuh inla, na maai phiat in. 18 Huchia na Pa aguuha um mitmuh ah loungaal mihing mitmuh a an ngawl na bat louhna diingin; huleh na Pa aguuha hung mupa in phuanglaah tahin ahung dit diing hi.
Gou Kholna Dih
19 "Leikha leh tuieeh in aneehsiatna ah leh gutate'n akalhsiat va, aguuh theihna uh lei ah gou kikhol sih unla, 20 hizongleh leikha leh tuieeh in aneehsiat louhna leh gutate'n akalhsiat va, aguuh louhna uh vaan ah gou kikhol jaw un. 21 Ajiahchu na gou uh umna phot ah na lungsim uh zong aum diing hi. 22 "Sapum vaahna thaumei chu mit ahi. Hujiahin na mit ahoih chiangin na sapum avaah veh diing hi. 23 Hizongleh na mit ahoih louh inchu, na sapum avehin amial diing hi. Hujiahin na sunga vaah chu mial hitaleh, hu mial chu nasa nameiinchia! 24 "Mi koima in pu nih nna atong kop thei sih hi, ajiahchu khat huain khat alungsiat diing hi, ahihlouhleh khat gumin khat amusit diing hi. Pathian nna leh sum nna na tong khawm thei sih diing uhi.
Pathian Muanna
25 "Hujiahin na kawmvah ka hung hilh ahi, bang ahiai ka neeh diing, bang ahiai ka dawn diing, chiin na hinna diingun lunghimoh sih un; bang ahiai ka silh a, ka teen diing, chiin na tahsa uh diingin lunghimoh saam sih un. Neeh diing saangin hinna aluuljaw sih in, huleh silh leh teen saangin tahsa aluuljaw sih eimah? 26 Tungleeng vate en un, buh atuh sih va, aat zong a-at sih va, buhinn ah zong asung luut sih uhi. Ahihvaangin na Pa uh vaan a um in amahuh avaah hi. Nanguh chu amahuh saanga nasataha luuljaw hilou na hi viaimah? 27 Nanguh lahah koi in ahiai lunghihmoh jiaha a dung tong khat a behlap thei? 28 "Huleh silhleteen thu a bang diinga lunghimoh na hi viai? Gam a lili paahte khandaan ngaihtuah un, tong lah atonggim sih va, pat zong akheeh sih uhi. 29 Hizongleh ka hung hilh ahi, Solomon ngeei zong a loupina zousiah a akizepin hi lili paahte khat tuhin zong jepmawi ahi zou sih hi. 30 Huchia gam a hampa tunia hing a, jiing a meikhuuh a paihluut diing bawn Pathian in ahuchijep leh, Aw nanguh ginna haatloute, Ama'n nanguh hu saangin ahung jeemjaw tham sih diaimah? 31 "Hujiahin; 'Bang ahiai i neeh diing?' ahihlouhleh 'Bang ahiai i dawn diing?' ahihlouhleh 'Bang ahiai i silh diing?' chiin lunghimoh sih un. 32 Ajiahchu Jentelte'n hi silte zousiah lawptahin ahawl va, hi silte zousiah na mamoh uh chih na Pa uh vaan a um in ahe hi. 33 Hizongleh nang un chu Pathian lalgam leh a dihtatna hawl masa un, huleh hi silte zousiah piaahbeh na hi diing uhi. 34 Hujiahin jiing a diingin lunghimoh sih un. Ajiahchu jiingin amah a diing ahung kingaihtuah tawm diing hi. Ni khat a buaina chu a ni a diingin ahuntawh ahi.
Midangte Demna Thu
1 "Demsiata na um louhna diingun mi demse sih un. 2 Ajiahchu na demsiat bangmah un demsiatin na um diing va, huleh na tehna bangmah un ahung tehsah kiit diing uhi. 3 Bang diinga na mit a singtum ngaihtuah lou a, na unau mit a niinthem um muthei na hiai? 4 Ahihlouhleh ngai in, nang mit ngeei ah singtum aum a bangchiin ahiai na unau kawma, 'Na mit a niinthem hung lakhesah in,' na chih theih diing? 5 Nang milepchiah, na mit apat singtum chu lakhe masa in. Huchiin na unau mit a niinthem laahdoh diing chu chiangtahin na mu thei diing hi. 6 "Uite kawmah silsiangthou pe sih unla, voh ma ah zong na tuikep suang uh paai sih un. Huchilou inchu amah un hute chu a keeng un achilse diing va, huleh hung kiheiin nanguh ahung philjaah kha diing uhi.
Haamtei Diinga Hasotna
7 "Ngeen un, piaahin na um diing uh; hawl un, na mu diing uh; kiu un, honsahin na um diing uhi. 8 Ajiahchu angeen taphot in atang va, ahawl taphot in amu va, huleh a kiu taphot chu honsahin aum diing hi. 9 Huleh na lahvah koi in ahiai a tapa in tanghou ngeen henla hileh, suang pe diing? 10 Ahihlouhleh nga ngeen henla hileh, guul pe diing? 11 Huchi ahihleh, nanguh migilou in bawn na tate uh sil hoih piaahnataang na heet uh leh, na Pa uh vaan a um in a kawma ngeente sil hoih naahpiaah tham lou diing ahiai mah!
Daan Hoih leh Lampi Nihte
12 "Hujiahin sil zousiah mi'n na tungva abawl diing na deih photmah uh, nang un zong hutobangin a tungvah bawl un, ajiahchu huchu Daan thu leh Zawlneite Lehkhabute thuhilh ahi. 13 "Kot geeng ah luut un, ajiahchu manthaaina lam a paina chu a kot agol a, a lampi zong alian hi. Huleh hutah a luutte chu tam zong atam uhi. 14 Ajiahchu hinna a chiahna kot chu ageeng a, a lampi zong ahahsa a, huleh a mute zong atawm uhi.
Singkung leh a Gah
15 "Zawlnei tahlou, na lahva belaam vun silha hung, hizongleh a sunglam va ngei hangsantah hingaalte lahah pilvaang un. 16 Amahuh chu a gah un na he diing uhi. Mi'n lingnoh lahah grep gah alou ngei viai mah, ahihlouhleh lingkung ah zong theipi alou ngei viaimah? 17 Huchibangmahin singkung hoih photmah in gah hoih asuang jeel a, hizongleh singkung sia photmah in gah hoih lou asuang veu hi. 18 Singkung hoih in gah hoihlou asuang thei sih a, singkung sia in zong gah hoih asuang thei boh sih hi. 19 Gah hoih lou suang singkung photmah chu aphuuh va, mei ah apaai uhi. 20 Hujiahin amahuh chu a gah un na he diing uhi.
Innbul Nihte
21 "'Lalpa, Lalpa,' hung chi zousiah nazong vaan lalgam ah aluut sih diing uhi. Hizongleh ka Pa vaan a um deihjawng bawlte chu aluut diing uhi. 22 Hu ni chiangleh mitampi'n, 'Lalpa, Lalpa, naminin thu ka soilawh uh hilou ahiaimah? Na min in dawite ka nohdoh un, na min in silmah bawltheihna ka nei uh hilou ahiaimah?' achi diing uhi. 23 Huchianginke'nakawmvah, 'Nanguh bangchihmahin ka hung he ngei sih hi. Nanguh daan poisaloua gamta haw, ka kawm apatin chiah mang un!' ka chi diing hi. 24 "Hujiahin koipouh hi ka thusoite ja ajui chu mipil suangpi tunga inn bawl toh ka tehkhin diing hi. 25 Quah ahung ju a, tui ahung lian a, huih ahung nung a, hu inn chu haattahin ahung muut hi. Himahleh suangpi tunga leptouh ahih jiahin apuuh sih. 26 "Huleh mi koipouh hi ka thusoite ja a, juilou photmah chu sehneel tunga inn bawl mingol toh ka tehkhin diing hi. 27 Quah ahung ju a, tui ahung lian a, huih ahung nung a, hu inn chu haattahin ahung muut a, apuuhta hi. Huleh hu inn apuuhdaan chu anasa ngeel hi," achi hi. 28 Huleh hichi ahung hi a, Jesu'n hite asoi zohin mipite'n a thuhilh chu limdang asa mahmah uhi. 29 Ajiahchu Ama'n daanjilsahtute bang hi louin, thuneitah bangin amahuh thu ahilh hi.
Phaah Suhdamna
1 Huleh taang apat ahung pai suhin mipi nasatahin Amah ajui uhi. 2 Huleh en in, mi phaah khat a kawmah ahung a, a ma a bohkhupin chibai abuuh a, "Lalpa, na uut inchu, na hung susiangthou thei hi," achi hi. 3 Huin Jesu'n a khut a zamin amah chu akhoih a, "Ka uut hi, siangthouta in," achi hi. Huin aphaah chu asiang pah ngaal hi. 4 Huleh Jesu'n a kawmah, "Koimah na hilh louh diing ahi, hizongleh chiah inla siampu vakimusah in, huleh amahuh heetsahna diinga Mosi thupiaah silpiaah lat diing chu valaan in," achi hi.
Sepaih Zahoutu Ginna
5 Huleh Jesu Kapernaum a aluut in, a kawmah sepaih zahoutu khat ahung a, Amah ahung ngeen a, 6 "Lalpa, ka suaahpa chu jengin inn ah alum a, nasatahin suhnatin aum hi," achi hi. 7 Huin Jesu'n a kawmah, "Ka hung diinga ka sudam diing," achi hi. 8 Himahleh sepaih zahoutu'n adawng a, "Lalpa, ka innsung na hung luut diing chu ka chin sih hi. Himahleh thu chauh soi in, huchiin ka suaahpa chu adam mei diing hi. 9 Ajiahchu kei zong thuneihna nuaia um ka hi a, ka nuaiah sepaihte aum uhi. Huleh khat kawmah, 'Chiah in,' ka chih leh achiah a, adang kawmah, 'Hung in,' ka chih leh ahung hi; huleh ka suaahpa kawmah, 'Hi bawl in,' ka chih leh abawl jeel hi," achi hi. 10 Jesu'n hi thu ajaah tahin limdang asa a, huleh Amah juite kawmah, "Chihtahzetin ka hung hilh ahi, Israelte lahah zong hichilawma ginna haat ka mu kha sih hi. 11 Huleh ka hung hilh ahi, suahlam leh tumlam apatin mi tampi ahung diing va, vaan lalgam ah Abraham, Isak leh Jakob toh atou khawm diing uhi. 12 Hizongleh lalgam tate chu polam mial ah paihdohin aum diing uhi. Hutah ah chu kah leh hagawi aum diing," achi hi. 13 Huin Jesu'n sepaih zahoutu kawmah, "Chiahta in, na gintaat bangin na tungah hung tungta heh," achi hi. Huleh a suaahpa chu hu daah mahin adamta hi,
Peter Sungnu leh Midang Tampi Suhdamna
14 Huleh Jesu chu Peter inn sunga ahung luutin, a sungnu khosih a lum amu hi. 15 Huin Ama'n amahnu khut akhoih a, huin a khosih in anuseta hi. Huin amahnu chu ahung thou a, a nna uh atohsahta hi. 16 Huleh nitaahlam ahung hihin a kawmah dawipaai tampi ahung pui va, Ama'n thu in dawite anohdoh a, damlou zousiah asudamta hi, 17 huchia zawlnei Isai in, "Amah ngeei in i haatlouhnate ala a, i natnate apua hi," chia asoi chu ataangtun theihna diingin.
Nungjui diingte Etkhiahna
18 Huin Jesu'n a kiimveel a mipi nasatah amuhin, diil gaal lehlam a chiah diing thu apia hi. 19 Huchiin daanjilsahtu khat ahung a, a kawmah, "Houtupa, na chiahna phot ah ka hung jui diing," achi hi. 20 Huleh Jesu'n a kawmah, "Si-aalte'n kua anei va, tungleeng vate'n bu anei uhi. Hizongleh Mihing Tapa'n a lu ngahna diing mun anei sih," achi hi. 21 Huin a nungjuite laha midang khat in a kawmah, "Lalpa, va chiaha ka pa vavui hung phalsah masa phot in," achi hi; 22 Hizongleh Jesu'n a kawmah, "Hung jui in, misite'n a misi uh kivui uh heh," achi hi.
Huihpi Suhdaihna
23 Huleh kuang tunga atuan in, a nungjuite'n Amah ajui uhi. 24 Huleh ngai in, diil ah huihpi nasatahin anung a, hu tuikinawh in kuang chu ahung tuum a, hizongleh Amah chu a-ihmu hi. 25 Huin a nungjuite chu a kawma hungin Amah aphawng va, "Lalpa, hung hundoh in! Beimang diing ka hi uh!" achi uhi. 26 Huin Ama'n a kawmvah, "Ginna haatloute haw, bang diinga lau na hi viai?" achi hi. Huin athou a, huihpi leh diil chu ataai a, ahung daaikeeita hi. 27 Huin mite'n chu limdang asa mahmah va, "Huih leh diil nasan in a thu amang uh hi Pa hi bangchibang mi ahiai?" achi uhi.
Dawipaaite Suhdamna
28 Huleh diil gaal lehlam Gadara mite gam atunin, dawipaai mi nih haante apat hungin Amah ahung tuaah va, a gilou huaisia mahmah va, hujiahin hu lam chu koimah in atawn thei sih uhi. 29 Huleh thakhatin amah un, "Jesu, nang Pathian Tapa, keiuh leh nang in bang kizopna i nei viai? Hun chiam tunma a keiuh gawt diinga hitaha hung na hi maw?" chiin akikou uhi. 30 Huleh a umna vapat gamla sim ah voh hon tampi ataa uhi. 31 Huchiin dawite'n a kawma ngeenin, "Na hung nohdoh leh, voh hon sunga luut hung phalsah in," achi uhi. 32 Huin Ama'n a kawmvah, "Chiah un," achi hi. Huchiin amahuh chu ahung doh va voh hon sungah aluut uhi. Huleh thakhatin, hu voh hon chu kawl ah ataai khesuh va diil ah ataai luut va, hu tui ah asigamta uhi. 33 Huin achingtute ataai va, khopi ah achiah va, sil zousiah leh dawipaai tunga sil hung tungte bang ahilhta uhi. 34 Huleh ngai un, a kho pumpiun Jesu mu diingin ahung pawt va; huleh Amah amuh tahun, a gam vapat pawt diingin nasatahin angeen uhi.
Jeng Suhdamna
1 Huin Amah chu kuang sunga luutin agaalkaai a, Amah ngeei khopi ah aluutta hi. 2 Huin ngai in, mijeng lupna a lum khat a kawmah ahung jawng uhi. Huleh Jesu'n a ginna uh amuhin jeng a damloupa kawmah, "Tapa, hamuangtahin um in, na sualnate ngaihdam ahita," achi hi. 3 Huleh daanjilsahtute khenkhat in a lungsim un, "Hi Pa'n Pathian asoisia hi," chiin angaihtuah uhi. 4 Hizongleh Jesu'n angaihtuah uh chu hein, "Bang diinga na lungtang va silgilou ngaihtuah na hi viai? 5 Ajiahchu, 'Na sualte ngaihdam ahita,' chih leh 'Thou inla, keeng in chiahta in,' chih khoi abaihlam jaw ei? 6 Hizongleh Mihing Tapa'n leitung ah sualnate ngaihdam theihna diing thuneihna anei chih na heetna diingun," achi a, huin jeng a damloupa kawmah, "Thou inla, na lupna la inla, na inn ah chiahta in," achi hi. 7 Huin amah chu athou a, a inn ah achiahta hi. 8 Mipite'n huchu amuh tahun thumah asa va, huchibang thuneihna mihingte kawma petu Pathian apaahtawita uhi.
Mathai Kouhna
9 Huleh Jesu chu hu apat apai laiin, mi khat a min Mathai siahdonna mun a toulai amu a, a kawmah, "Hung jui in," achi a, huin Mathai chu athou a Amah ajuita hi. 10 Huleh hichi ahung hi a, Jesu chu an ne diinga inn a atou laiin, en in, siahdongtu tampi leh misualte tampi hung in Amah leh a nungjuite toh ankuang auum khawm uhi. 11 Huleh Pharisaite'n huchu amuh tahun a nungjuite kawmah, "Bang diinga nahoutupa un siahdongte leh misualte toh an ne khawm ahiai?" achi uhi. 12 Hizongleh Jesu'n huchu ajaah tahin a kawmvah, "Mi chidamte'n daktor amamoh sih va, hizongleh damloute'n amamoh uhi. 13 Hizongleh chiah unla, 'Kithoihna deihlouin khotuahna ka deih hi,' chih umjia vajil un. Ajiahchu midihtatte kou diinga hung ka hi sih a, himahleh misualte kisiihsah diinga koua hung ka hijaw hi," achi hi.
An ngawl Thu a Dohna
14 Huin Johan nungjuite a kawmah ahung va, "Keiuh leh Pharisaite'n an ngawl ung a, hizongleh bang diinga na nungjuite'n angawl louh uh ahiai?" achi uhi. 15 Huin Jesu'n a kawmvah, "Moupa a kawmva aum laisiah moupuite adah ngei uh maw? Hizongleh moupa a lah vapat a laahmang ni ahung tung diing a, hu chiangin an angawl diing uhi. 16 Mi koimah in puan lui puan thah them in aphoh ngei sih uhi. Ajiahchu a phohna thah in puan lui chu akaikeeh diing a, huleh ahung keehjaw seem diing hi. 17 Mi koimah in uain thah savun thawl lui ah athun ngei sih uhi. Huchilou inchu savun thawlte chu apawhkeeh diing a, uain akibo diing a, savun thawlte zong asegawp diing hi. Hujiahin uain thah chu savun thawl thah ah athun jaw va, huchiin anihun abit tuaah hi," achi hi.
Misi Kaihthohna
18 Hi silte Ama'n a kawmva asoi laiin, ngai in, vaihawmtu khat ahung a, a ma a bohkhupin chibai ahung buuh a, "Ka tanu tutahin asi hi, hizongleh hung inla a tungah na khut nga lehchin ahing mei diing," achi hi. 19 Huin Jesu chu athou a, Amah leh a nungjuite'n hu mipa chu ajuita uhi. 20 Huleh ngai in, numei khat kum sawmlenih sipawt a damlou, a nung ah ahung pai a, a puan mong akhoih hi. 21 Ajiahchu amahnu'n a lungsim in, "A puan chauh khoih leng, suhdamin ka um mei diing," chiin angaihtuah hi. 22 Huin Jesu chu akinunghei a, amahnu amu a, "Tanu, hamuangtahin um in, na ginna in ahung damsahta hi," achi hi. Huleh hu numeinu chu hu daah apat adamta hi. 23 Huleh Jesu chu vaihawmtupa inn sungah aluut a, theile kimuut leh mipi maau vengvung amu a, 24 a kawmvah, "Pawtdoh un, ajiahchu naupangnu chu asi ahi sih a, ihmu ahijaw," achi hi. Huin Amah anuihsan giap uhi. 25 Mipite sawldoha aum nungin aluut a, huleh amahnu chu a khut in atu a, huchiin naupangnu chu ahung thouta hi. 26 Huin hi thu chu hu gam pumpi ah athangsuaahta hi.
Mittaw Nih Suhdamna
27 Huleh Jesu hutah apat apawtin, mittaw nih in ajui va, "David Tapa, hung khotuah in," chiin akikou uhi. 28 Huleh inn sunga aluut tahin, hu mittawte chu a kawmah ahung va, huin Jesu'n a kawmvah, "Hikhu bawl theiin na hung gingta uh maw?" achi hi. Amah un a kawmah, "Gingta e, Lalpa," achi uhi. 29 Huin Ama'n a mit uh akhoih a, "Na ginna bangun na tungvah tungta heh," achi hi. 30 Huleh a mit uh ahung vaahta a, huin Jesu'n, "Koimah hesah sih un," chiin amahuh naahtahin akhapta hi. 31 Hizongleh amahuh chu apawt va, hu gam pumpi ah a min asoithangta uhi.
Haamtheilou Suhdamna
32 Huchia amahuh apawt laiun, en in, mi haam theilou dawipaai khat Amah kawmah ahung pui uhi. 33 Huleh dawi chu anohdoh tahin, haam theiloupa chu ahung haamta hi. Huin mipite'n thumah asa mahmah va, "Israel gam ah hitobang sil akimu ngei sih," achi uhi. 34 Hizongleh Pharisaite'n chu, "Amah in dawimangpa jaala dawite anohdoh ahi," achi uhi.
Khrist in Mipite Ahehpihna
35 Huin Jesu chu khopi leh khota zousiah ah avaah kiimveel a, sinagogte bang ah thu ahilh a, lalgam tanchinpha chu soiiii, damlouhna chinteng leh natna chinteng asudam hi. 36 Huleh Ama'n mipite amuhin achingtu bei belaam hon banga chau leh kithehdalha aum jiahun alainat mahmah hi. 37 Huin Ama'n a nungjuite kawmah, "Buh laah diing atam mahmah a, hizongleh a natongtute atawm uhi. 38 Hujiahin a buh la diinga natongtute hung sawldoh diingin buh neitu Lalpa kawmah ngeen un," achi hi.
Nungjui Sawmlenihte Sawlkhiahna
1 Huleh Ama'n a nungjui sawmlenihte akouh zohin, a kawmvah hagau niinte nohdoh theihna leh damlouhna chinteng lehnatna chinteng suhdam theihna thuneihna apia hi. 2 Huleh apostol sawmlenihte min chu hite ahi: amasapeenin Peter kichipa Simon leh a sanggampa Andru, Zebedi tapa Jakob leh a sanggampa Johan, 3 philip leh Bartholomai, Thomas leh siahdongtu Mathai, Alphai tapa Jakob leh Lebbai, a min dang chu Thaddai. 4 Kanaan mi Simon leh Amah mansahtu Juda Iskariot. 5 Hi sawmlenihte chu Jesu'n hi thu piain asawldoh a, "Jentelte lahah chiah sih unla, Samariate khopi khatmah ah zong luut hial sih un. 6 Hizongleh Israel innkuan belaam mangte kawmah chiah jaw un. 7 Na chiah kawm-un, 'Vaan lalgam anaita hi,' chiin taangkoupihun. 8 Damloute sudam unla, phaahte susiang unla, misite kaithou unla, dawite nohdoh un. Athawnin na mu va, athawnin pia un. 9 Na dangka-ip sung vah, sana, dangka ahihlouhleh sum-eng bangma guang sih un. 10 Na zinna va diingin sakhau aha, puannaah nih aha, keengtophah aha, chiang aha keng sih un, ajiahchu natongtu chu a neeh diing mu taah ahi. 11 Huleh khopi sung hiin khota sung hitaleh, na luutna phot vah na tunna taah diing uh mi kandoh unla, na chiahkhiah masiah uh hutah ah umzing un. 12 Huchia inn sung khat a na luut chiangun chibai buuh un. 13 Hu inn chu na tunna taah uh ahihleh, na hamuanna uh chu a tungah um heh. Himahleh hu inn sung in ataah louh leh, na hamuanna uh chu na kawmvah hung kihkiit hen. 14 Koipouh nanguh hung kipaahpih lou a, na thute uh ngaikhe lou chu hu inn aha, hu khopi aha apat na pawt chiangun, na keengtaw va leivui thingkhia un. 15 Chihtahzetin ka hung hilh ahi, vaihawm ni chiangin hu khopi thuaah diing saangin Sodom leh Gomorrah thuaah diing chu adaan aum jaw diing hi. 16 Ngai in, ngei hon laha belaam bangin ka hung sawl ahi. Hujiahin guul bangin pil unla, vakhu banga poikhoihlouin um un.
Hahsatna Hung Tung Diing
17 "Hizongleh mite lahah kiveeng un, ajiahchu amah un vaihawmte kawmah ahung pedoh diing va huleh sinagogte bang ah ahung vosah diing uhi. 18 Huleh keimah jiahin gamoptute leh kumpipate ma ah, amahuh leh Jentelte ma ah heetpihtu diingin ahung pui diing uhi. 19 Hizongleh ahung piaahkhiah chiangun bangchi soi diing ahihlouhleh bang soi diing ka hiai, chiin lunghimoh sih un. Ajiahchu na soi diing uh hu huntahin hilh na hi diing uhi. 20 Ajiahchu a soitu chu nanguh na hi sih diing va, na Pa uh Hagau in nanguh ah asoi jaw diing hi. 21 Sanggampa in sanggampa, huleh pa in a ta thah diingin apedoh diing a, huleh tate'n zong a nulepate uh adou diing va, athatsah diing uhi. 22 Huleh ka min jiahin mi zousiah huat na hi diing uhi. Hizongleh atawp donga thuaah mualsuaah chu hutdamin aum diing uhi. 23 Hizongleh khopi khat a ahung suhduhdah chiangun, adang ah taailuut un. Ajiahchu chihtahzetin ka hung hilh ahi, Mihing Tapa hung main Israel khopite na tuan suaah sih diing uhi. 24 Nungjui chu a houtupa tungah aum ngei sih a, suaah zong a pu tungah aum ngei sih hi. 25 Nungjui chu a houtupa banga ahung um a, huleh suaah chu a pu banga ahung um ahuntawh ahi. Amah un inn neitupa bawn Beelzebul achih uh leh, a innkote chu bangchituhin ahiai achihtaah diing uh!
Koi ahiai Lau Jawh Diing
26 "Hujiahin amahuh haw lau sih un. Ajiahchu kilang lou diinga kiphual bangma aum sih a, huleh heetlouh diinga iim zong bangmah aum sih hi. 27 Mial a nanguh ka hung hilh chu vaah ah soi unla, huleh na bil kawmva na jaah uh chu inntungvuumte ah taangkoupih un. 28 Huleh tahsa that thei a himahleh hagau that theilou haw chu lau sih un. Hizongleh hagau leh tahsa a nih a gawtmun a sumang theitu Amah chu lau jaw un. 29 Kawlgiit nih paisa khat in akijuaah veu hilou maw? Ahihvaangin a lahva khatmah zong na Pa uh phalna louin ake sih diing hi. 30 Hizongleh na lutung va samjangte nasan sim veh ahi. 31 Hujiahin lau sih un, kawlgiit tampi saangin na luuljaw uh ahi. 32 Hujiahin koipouh mite ma a kei hung gum photmah chu, ke'n zong vaan a um ka Pa ma ah amah ka gum diing hi. 33 Hizongleh koipouh mite ma a hung kiheetmohbawl chu, ke'n zong vaan a um ka Pa ma ah ka kiheetmohbawl diing hi.
Lemna Hilou, Temsau
34 "Leitung a lemna leengsah diinga hung hungsa sih un. Lemna leengsah diinga hung ka hi sih a, naamsau leengsah diinga hung ka hijaw hi. 35 Ajiahchu 'tapa in a pa, tanu in a nu, huleh mou in a innpinu dousah diinga' hung ka hijaw hi; 36 huleh 'mi a meelma chu amah innkote ngeei ahi diing hi.' 37 Koipouh a nu aha, a pa aha keimah saanga lungsiat jaw chu ka mi hitaah ahi sih hi. A tapa aha, a tanu aha keimah saanga lungsiat jaw chu ka mi hitaah ahi sih hi. 38 Koipouh a kros pua a, hung jui lou chu ka mi hitaah ahi sih hi. 39 Koipouh a hinna mu in ataan diing a, huleh koipouh keimah jiaha a hinna taan in amu diing hi.
Kipaahmante
40 "Koipouh nanguh hung kipaahpih chu kei hung kipaahpih ahi a, huleh koipouh keimah hung kipaahpih chu kei hung sawlpa kipaahpih ahi. 4 lKoipouh zawlnei chu zawlnei ahih jiaha kipaahpih in zawlnei kipaahman amu diing hi. Huleh midihtat chu midihtat ahih jiaha kipaahpih in midihtat kipaahman amu diing hi. 42 Huleh chihtahzetin ka hung hilh ahi, koipouh nungjuitu khat min a hi mi neute laha khat tuisih nou khat mei chauh zong petu in chu a kipaahman muh diing chu ataan hial sih diing hi," achi hi.
Baptistu Johan Thupotute
1 Huleh Jesu'n a nungjui A sawmlenihte kawma thu ahilh zohin, a khopite va thuhilh diing leh thusoi diingin achiahdohta hi. 2 Huin Johan in suangkul sung apat Khrist natohte anajaah tahin, amah nungjuite nih asawl a, 3 a kawmah, "Ahung diingpa na hiai mah, ahihlouhleh midang ngaah nalai diing ka hi viaimah?" avachisah hi. 4 Jesu'n adawng a, a kawmvah, "Chiah unla, na jaah uh leh na muh uh Johan vahilh un: 5 mittawte mit ahung vaahta a, keengbaite apaitheita va,phaahte ahung siangta va, bilngongte'n khua ajatheita va, misite kaihthohin aumta va, huleh migentheite kawmah tanchinpha soiin aumta hi. 6 Huleh koipouh keimah a kipalpuuh lou chu ahampha hi," achi hi.
Baptistu Johan Paahtawina
7 Huleh amahuh achiah tahun, Jesu'n mipi kawmah Johan tungtaang thu asoi panta a, "Bang en diinga gamdaai a chiahdoh na hi viai? Sialluang huih muut liing maw? 8 Ahihlouhleh bang en diinga chiahdoh na hi viai? Puan neem silh mi khat maw? Tahzetin, puan neem silhte chu kumpipate inn ah ahi aum uh. 9 Ahihlouhleh bangpeen en diinga chiahdoh na hi viai? Zawlnei en diingin maw? Ahi, ka hung hilh ahi, zawlnei saanga loupijaw ahi. 10 Ajiahchu, 'Ngai in, ka thangkou na ma ah ka sawl a, ama'n na ma ah na lampi asial diing hi,' chia a tungthu kigial chu amah ahi. 11 Chihtahzetinkahunghilhahi, numei sunga piang lahah Baptistu Johan saanga loupijaw apiang nai sih hi. Ahihvaangin vaan lalgam a mi neupeen chu amah saangin aloupijaw hi. 12 Huleh Baptistu Johan apat tutanin vaan lalgam in hiamngamna athuaah a, hiamngamte'n thagum in ala uhi. 13 Ajiahchu Zawlneite Lehkhabute zousiah leh Daan thu in Johan hung um tanphain anasoilawhta hi. 14 Hi silte nang un na pom nuam uh leh, Johan ngeei chu ahung diing Elijah chu ahi. 15 Koipouh jaahna diinga bil neiinjaheh. 16 "Hizongleh hi khang hi bang toh ka tehkaah diai? Hichu naupang dawlmun a toua a lawmte kou a, 17 'Theile hung muutsah ung a, lah laam lou uh chin a; huleh kahla sa ung a, lah kapin na hung maaupih sihuh,' chite bang ahi uh. 18 Ajiahchu Johan ahung a, nein adawn sih a; huleh amah un, 'Dawi nei ahi,' achi uhi. 19 Mihing Tapa ahung a, anein adawn a, amah un, 'En un, an haipa leh uain haipa, siahdongte leh misualte lawmpa!' achi uh. Huleh pilna chu adih ahi chih a natohte'n siam atan hi," chiin.
Ginglou Khopite Tunggihna
20 Huin akisiih louh jiahun, a silmahbawl tamna peen khopite chu ataaita hi. 21 "Korazin, na tung agih hi! Bethsaida, na tung agih hi! Ajiahchu nanguh a silmah kibawlte Tura leh Sidon khua a kibawl hileh, sawtin sai-ip puan silha vut khuhin akisiih zouta diing uhi. 22 Hizongleh ka hung hilh ahi, vaihawm ni chiangin nanguh thuaah diing saangin Tura leh Sidon thuaah diing adaan aum jaw diing hi. 23 Huleh nang Kapernaum, vaan tan a tawisanga um chu, Misi Khua tan a paihkhiahin na um diing hi, ajiahchu nangmah a silmah kibawlte Sodom a kibawl hileh, tuni tanin aum nalai diing hi. 24 Hizongleh ka hung hilh ahi, vaihawm ni chiangin nang thuaah diing saangin Sodom thuaah diing chu adaan aum jaw diing," achi hi.
Jesu Kipaahthu Soina
25 Huchihlaiin Jesu'nasoi a, "Pa Aw, lei leh vaan Lalpa, nangma'n mipil leh misiamte kawmah hi thute na iim a, naupangte kawma na phuan jiahin ka hung paahtawi hi. 26 Ahi, a, huchibang chu na kipaahna mahmah ahi. 27 Ka Pa'n sil zousiah ka kawmah ahung pekheta hi; huleh Pa chauh louin koima'n Tapa chu ahe sih uhi. Tapa chauh louin koima'n Pa ahe sih a, huleh Tapa'n a kawma aphuan nuamnate loungaal chu koima'n ahe sih hi. 28 Nanguh tonggim leh puaahgih pote zousiah ka kawmah hung un, keima'n khawldamna ka hung pe diing hi. 29 Ka ngawngkol pua unla, ka kawmah jil un, ajiahchu jaineemtah leh lungtang a kingaingiamtah ka hi a, huchiin na hagau diingun khawldamna na mu diing uhi. 30 Ajiahchu ka ngawngkol anuam a, ka puaah zong ajaang hi," achi hi.
1 Huchihlaiin Jesu chu Sabbath ni in buhlei lai tawnin achiah hi. Huleh a nungjuite a gil uh akial a, buhvuite asihtan va ane panta uhi. 2 Hizongleh Pharisaite'n hichu amuhun a kawmah, "En in, na nungjuite'n Sabbath ni in daan in aphallouh abawl uh," achi uhi. 3 Hizongleh Ama'n a kawmvah, "David in agilkial laia a kawma umte toh asilbawl uh, 4 huchia Pathian inn a aluut a, amah leh a kawma umte'n daan in aphallouh siampute chauh neeh theih tanghou siah aneeh uh thu sim kha lou na hi viaimah? 5 Ahihlouhleh Sabbath ni a Pathian biahinn a siampute'n Sabbath ni asuhbuaahun zong siamlouh atang sih uh chih Daanbu ah na sim sih uh maw? 6 Hizongleh hi mun ah Pathian biahinn saanga loupijaw khat aum hi chih ka hung hilh ahi. 7 Ahihvaangin nang un, 'Kithoihna deih louin zahngaihna ka deih,' chih umjia heta hileh uh chin, mohna neilou chu siamlouhtangsah lou diing hi uh chin a. 8 Ajiahchu Mihing Tapa chu Sabbath ni Lalpa ahi," achi hi.
Khut Jeng Suhdamna
9 Huleh Amah chu hutah apatin achiah a, sinagog ah aluut hi. 10 Huleh en in, hutah ah mi khut jeng khat aum a, huchia amah un aheeh theihna diingun, "Sabbath ni a suhdam asiang ei?" chiin Amah adong uhi. 11 Huin Ama'n a kawmvah, "Na lahva kuan ahiai belaam khat nei henla, huleh Sabbath ni in kokhuuh ah keta 12:9 sinagog: Judatekfldiopnairmahi. leh, huchu vatu lou diing leh kaidoh lou diing um? 12 Huchi ahihchiangin belaam saanga mihing chu bangchitaha luuljaw atai mah? Hujiahin Sabbath ni a sil hoih bawl asiang hi," achi hi. 13 Huin hupa kawmah, "Na khut zandoh in," achi hi. Huchiin azandoh a, a langkhat bangin ahung damta hi. 14 Huzohin Pharisaite apawt va, Amah suhlup theihna diing ngaihtuahin akihouta uhi.
Mi Tampi'n Jesu Jui
15 Hizongleh Jesu'n hichu aheetin hu apatin apaidohta hi. Huleh mipi nasatahin Amah ajui va, huleh Ama'n anasudam veh hi. 16 Huleh Amah koi ahiai chih phuangdoh lou diingin amahuh athuhilh hi. 17 Huchu zawlnei Isai in hichibanga anasoite ahung taangtun theihna diingin ahi: 18 "En in, ka suaah ka teel, ka deihtah chu! Amah ah ka lungkim mahmah hi! Ka Hagau a tungah ka koih diing a, Ama'n Jentelte kawmah vaihawmna dih thu asoi diing hi. 19 Ama'n chu anial sih diing a, kikou zong akikou sih diing hi. Huleh mi koimah in kholai dung ah a aw aja sih diing uh. 20 Ama'n gualzou diinga vaihawmna dih ahung tut masiah sialluang gawpsa asutan sih diing a, pat meikhu zong asumit sih diing hi. 2 lHuleh Amah min ah Jentelte'n kinepna anei diing uh," achih chu.
Jesu leh Beelzebul
22 Huin dawipaai, mittaw leh haamtheilou khat Jesu kawmah ahung pui va, Ama'n anasudam a, huchiin haamtheilou chu hung haamtheiin khua ahung muta hi. 23 Huleh mipi zousiah in thumah asa va, "Hi Pa hi David Tapa ahi diai maw?" achi uhi. 24 Hizongleh Pharisaite'n hi thu ajaah tahun, "Hi Pa'n dawimangpa Beelzebul jiah loungaalin dawite anohdoh sih diing," achi uhi. 25 Hizongleh Jesu'n angaihtuah uh ahe a, a kawmvah, "Lalgam kilangkhena amah leh amah kidou photmah chu amangthaai hi. Huleh khopi aha inn sung aha kilangkhen zong ading thei sih diing hi. 26 Huleh Setan in Setan mah nohdohta leh, amah leh amah kidoua kikhen ahita hi; ahihleh bangchiin a lalgam adingta diai? 27 Huleh keima'n Beelzebul jaala dawite nohdoh ka hih leh, na tapate un koi jaala anohdoh uh ahiai? Hujiahin amahuh chu nanguh hung vaihawmsah diingte ahi uhi. 28 Hizongleh ke'n Pathian Hagau vaanga dawite nohdoh ka hih leh, Pathian lalgam chu na tungvah hung tung ahita hi. 29 Mi koimah in mihaatpa akaantom masat louhngaal leh, bangchiin mi haatpa inn a luutin a neihlelamte alaahsah thei diai? A kaantom nung chiangin a neihlelamte alaahsah mei diing hi. 30 Koipouh ka lama pang lou chu ahung dou ahi, huleh koipouh ahung laahkhawmpih lou in asudalh ahi. 31 Hujiahin ka hung hilh ahi, mi a sualna zousiah uh leh Pathian asoisiatna zousiah uh ngaihdam ahi diing uhi. Hizongleh Hagau soisia chu ngaihdamin aum sih diing hi. 32 Huleh koipouh Mihing Tapa kalha thusoi chu ngaihdam ahi diing a, hizongleh koipouh Hagau Siangthou kalha soisia chu hi hun ah zong, huleh hun hung um kiit diing ah zong ngaihdamin aum sih diing hi.
Singkung leh a Gah
33 "Singkung enkol hoih leh uh chin, a gah zong ahoih diing, ahihlouhleh singkung bawlse leh uh chin, a gah ase diing hi; ajiahchu singkung chu a gah apat heet ahi. 34 Guul suante haw! Na giitlouh pum-un bangchiin thu hoih na soi thei diviai? Ajiahchu lungtang dolh vaal chu kam in asoi veu hi. 35 Mi hoih in lungtang goubawm hoih apatin sil hoihte ahung suahkhia hi. Huleh migilou in a lungtang goubawm hoihlou apatin sil hoihlou ahung suahkhe veu hi. 36 Hizongleh ka hung hilh ahi, mite'n thulimlou asoi photmah uh vaihawm ni chiangin ajiah asoi diing uhi. 37 Ajiahchu na thusoi in siamtansahin na um diing a, na thusoi mah in siamlouh tansahin na um diing," achi hi.
Jonah Chiamchihna
38 Huin Pharisaite leh daanjilsahtute hunkhop in adawng va, "Houtupa, nangmah apatin chiamchihna ka mu nuam uh," achi uhi. 39 Hizongleh Ama'n adawng a, a kawmvah, "Khang gilou leh aangkawm haatte'n chiamchihna ahawl uhi. Hizongleh zawlnei Jonah chiamchihna loungaal chiamchihna dang piaah ahi sih diing uhi. 40 Ajiahchu Jonah suun thum leh jaan thum ngapi gil sunga aum bangin, Mihing Tapa zong suun thum leh jaan thum leigil sungah aum diing hi. 41 Nirievi khua a mite chu vaihawm ni chiangin hi khang a mite toh ahung thou diing va amahuh siamlouh atangsah diing uhi, ajiahchu Jonah thusoi jiahin amahuh akisiih uhi. Huleh en un, Jonah saanga loupijaw hitah ah aum hi. 42 Huleh simlam kumpinu chu vaihawm ni chiangin hi khang a mite toh ahung thou diing a, hi khang a mite chu siamlouh atangsah diing hi, ajiahchu Solomon pilna ngaikhe diingin kawlmong apat ahung hi. Huleh en un, Solomon saanga loupijaw hitah ah aum hi.
Dawi Niin Hung Kihkiitna
43 "Huleh hagau niin chu mi khat sung apat apawtdohin tui um louhna mun chin ah khawlna diing hawlin avaah lehleh a, amu zou sih hi. 44 Huin ama'n, 'Ka pawtdohna inn mah ah ka kihkiit mei diing,' achi hi. Huchia ahung tahin huchu a-awng a, phiatsiang leh zephoihin amu hi. 45 Huin avachiah a, amah saanga gilou jaw dawi dang sagih ahung pui a, a sungah aluut va, ateengta uhi. Huin hupa umdaan nunung chu amasa saangin asejaw seemta hi. Hi khang giloute zong hutobangin aum diing uh," achi hi.
Jesu Tanau Dihtah
46 Huchia Ama'n mipite kawma thu asoi laiin, ngai in, a nu leh a sanggamte chu Amah houpih nuamin inn pua ah ading uhi. 47 Huin mi khat in a kawmah, "En in, na nu leh na sanggamte nang hung houpih nuamin inn pua ah ading uh," achi hi. 48 Hizongleh Ama'n adawng a, Amah hilhpa kawmah, "Ka nu koi hi a huleh ka sanggamte zong koi hi ahiai?" achi hi. 49 Huin a nungjuite lamah a khut ajaah a, "En un, ka nu leh ka sanggamte! 50 Ajiahchu koipouh vaan a um ka Pa deihjawng bawl taphot chu ka sanggampa leh ka sanggamnu leh ka nu ahi uh," achi hi.
Haichithehtu Tehkhinthu
1 Hu ni mahin inn apatin Jesu achiahdoh a diil geiah atou hi. 2 Huleh a kawma mipi nasatah ahung kikhop jiahin Amah chu kuang khat a luutin atou a, mipi zousiah chu luuipiau ah ading uhi. 3 Huin Ama'n a kawmvah tehkhinthu in thu tampi asoi a: "Ngai un, haichithehtu khat haiehi thehin akuan hi. 4 HuIeh atheh laiin akhen lam geiah atu va, vate hungin atom beita uhi. 5 Huleh khenkhat suangsilei munte ah atu a, lei asah louh jiahin ahung pou pah uhi. 6 Hizongleh ni ahung satin nisa in akaang a, zung aneih louh jiahin agawgawpta uhi. 7 Huleh khenkhat louling lahah atu va, ling chu ahung khanglian a, adeepmangta hi. 8 Hizongleh adang chu lei hoih ah atu va, khenkhat aleh za bangin, khenkhat aleh sawmguup bangin, huleh khenkhat aleh sawmthum bangin ahung gahta uhi. 9 Koipouh jaahna diinga bil nei in ja heh," achi hi.
Tehkhinthu Kizatna Jiah
10 Huin nungjuite ahung va, a kawmah, "Bang diinga a kawmva tehkhinthu a na soi ahiai?" achi uhi. 11 Ama'n adawng a, a kawmvah, "Ajiahchu vaan lalgam thukiphualte chu nanguh heet diinga phal ahi a, hizongleh amahuh heet chu phal ahi sih hi. 12 Ajiahchu koipouh anei chu piaah beh ahi diing a, ahau seem diing hi; hizongleh koipouh anei lou chu aneihsun zong laahsah ahi diing hi. 13 Hujiahin a kawmvah tehkhinthu in ka soi ahi; ajiahchu amah un mu napiin amu sih va, huleh ja napiin aja sih va, he zong ahesiam ngei sih uhi. 14 Huleh zawlnei Isai in anasoilawh chu a tungvah ahung taangtungta ahi: 'Jaah chu na ja ngeei diing va hizongleh na hesiam sih diing uh, huleh muh chu na mu ngeei diing va hizongleh na theisiam sih diing uh. 15 Ajiahchu hi mite lungtang amo gawpta a, a bil uh angong gawpta a, huleh a mit uh asiingta uhi; huchilou inchu a mit un amu kha diing va, a bil un aja kha diing va, a lungtang un ahung hesiam kha diing va, ahung kiheikiit kha diing va, ke'n amahuh ka na sudam kha diing hi,' chi a, anachih chu. 16 Hizongleh nanguh mit chu amuh jiahin ahampha a, huleh na bil uh zong ajaah jiahin ahampha hi. 17 Ajiahchu chihtahzetin ka hung hilh ahi, zawlnei tampi leh midihtat tampi'n zong na sil muhte uh muh auut va, ahihvaangin amu sih uh, huleh na jaahte uh zong aja nuam va, hizongleh aja sih uhi.
Tehkhinthu Hilhchetna
18 "Hujiahin haichithehtu tehkhinthu hilhchianna chu ngai un: 19 koipouh in lalgam thu ajaah a aheetsiam louh leh, migiloupa ahung a, a lungtang a kithehsa chu alaahsah veu hi. Hichu lam geia tupa chu ahi. 20 Huleh suangsilei laha tupa chu, thu chu ja a, kipaahtaha pom pah ngaalpa ahi. 21 Ahihvaangin amah a zung aneih louh jiahin, tomkhat chauh aum hi. Huleh thu jiaha gimthuaahna bang, suhduhdahna bang ahung um chiangin apuuh pah veu hi. 22 Huleh louling laha tupa in thu chu aja a, ahihvaangin hi khovel awlmohna leh hauhsatna heemna in thu chu adeepmangta a, huchiin amah chu gah nei louin ahung umta hi. 23 Hizongleh lei hoih tunga tupa in chu thu chu aja a, ahesiam pah hi: huchu gah zong agah a, khenkhat aleh za bang, khenkhat aleh sawmguup bang, khenkhat aleh sawmthum bangin apung hi," achi hi.
Buhlemte Tehkhinthu
24 Tehkhinthu dang Ama'n a kawmvah asoi kiit a: "Vaan lalgam chu lou a chi hoih theh mi khat toh tehkhin ahi. 25 Huleh mite a-ihmut kaal un a meelmapa chu ahung a, buh lahah buhlem atheh a, achiahmangta hi. 26 Hizongleh buh chu ahung pou a, ahung vuui a, buhlemte zong ahung kilangta hi. 27 Huchiin lou neitu suaahte chu ahung va, a kawmah, 'Pu, na lou a chi hoih theh hilou na hiaimah? Buhlemte khoi apat hung um ahiai?' achi uhi. 28 Ama'n a kawmvah, 'Meelmapa khat in anabawl ahi,' achi hi. A suaahte'n a kawmah, 'Ahihleh vachiahin hute chu valakhawm leh ung na uut ei?' achi uhi. 29 Hizongleh ama'n, 'Uut lou e, ajiahchu huchi hileh buhlemte na laahkhawmna lam vah buhte zong na botkhawm kha diing uhi. 30 Buh laah dongin poukhawm uh heh, huleh buh laahhun tahchiangin buh aatte kawmah, "Buhlemte lakhawm masa unla, haal diingin alom lomin gaah un, hizongleh buh chu ka buhpang sungah koih luut un," ka chi diing,'" achi hi.
Ankamtang leh Tol Tehkhinthu
31 Tehkhinthu dang Ama'n a kawmvah asoi kiit a: "Vaan lalgam chu ankam tang khat mi'n alaah a, a lou a atheh bang ahi. 32 Huchu haichi laha neu peenpeen ahi; hizongleh ahung khanlet chiangin, hampa lahah alianpeen a, singkung ahung suaah a, huchiin tungleeng vate ahung va, a baate giahna in anei uhi," achi hi. 33 Xehkhinthu dang a kawmvah asoi kiit a: "Vaan lalgam chu numei in tol alaah a, taangbuang tehna thum lahah, a bawna athoh veh masiaha aphuum bang ahi," achi hi. 34 Hi silte zousiah chu Jesu'n tehkhinthu in mipite kawmah asoi hi; huleh tehkhinthu louin a kawmvah bangmah asoi sih hi, 35 huchia zawlnei in, "Tehkhinthu in ka kam ka kaah diing a, khovel pianchiil apat sil kilangloute chu ka soi diing hi," chia asoi chu ahung taangtun theihna diingin.
Buhlem Tehkhinthu Hilhchianna
36 Huin Jesu'n mipite asawlmang a, inn sungah aluut a, huchiin nungjuite a kawmah ahung va, "Lou a buhlem tehkhinthu chu hung hilhchian in;," achi uhi. 37 Ama'n adawng a, a kawmvah: "Hu chi hoih thehtti chu Mihing Tapa ahi. 38 Lou chu khovel ahi, chi hoihte chu lalgam tate ahi va, huleh buhlemte chu giloupa tate ahi uhi. 39 Meelma buhchi thehtu chu diabol ahi a, buh laahhun chu hun tawpna diing ahi a, huleh a aattute chu angelte ahi uhi. 40 Huchia buhlemte chu lakhawma mei a akihaal bangin, hi hun tawp hun chiangin aum diing hi. 41 Mihing Tapa'n a angelte asawlkhe diing a, kipalpuuhna umsah tengteng leh daan poisaloua gamtate zousiah chu a lalgam apatin akhawmdoh diing uhi. 42 Huleh haaltuina mei ah apaai diing va, hutah ah chu kah leh hagawi aum diing hi. 43 Huzohchiangin midihtatte chu a Pa uh lalgam ah ni bangin ataang diing uhi. Koipouh jaahna diinga bil nei in ja heh.
Tuikepsuang, Gou leh Leen Tehkhinthu
44 "Huleh vaan lalgam chu lou laia gou kiguuh phuum tobang ahi. Huchu mi khat in amudoh a aphual a, huin kipaah jiahin achiah a, a neih zousiah ajuaah a, hu lou alei bang ahi. 45 Huleh vaan lalgam chu sumkawlvei mi tuikepsuang hoihtah hawl tobang ahi Mit hi. 46 Ama'n chu tuikepsuang man tamtah khat amu a, achiah a aneih zousiah ajuaah a aleita hi. 47 Huleh vaan lalgam chu leen tuipi a sep a, nga chinteng huuikhawm tobang ahi. 48 Huchu adim chiangin luuipiau ah akaidoh va, touin a hoihte chu bawmte ah akhum va, hizongleh ahoihloute chu apaai uhi. 49 Hun tawp chiangin hutobangin aum diing hi Angelte chu ahung diing va, migiloute chu midihtatte lah apat akhenkhe diing uhi. 50 Huleh amahuh chu haaltuina mei ah apaai diing uhi. Hutah ah chu kah leh hagawiin aum diing uh," achi hi.
Gou Lui leh Gou Thah
51 Jesu'n a kawmvah, "Hi silte zousiah na hesiam viai?" achi hi. Amah un a kawmah, "Hi, Lalpa," achi uhi. 52 Huin Ama'n a kawmvah, "Hujiahin daanjilsahtu, vaan lalgam tungtaang thu hilha um photmah chu inn neitu, a goubawm apat a sil lui leh sil thah pholhkhetu bang ahi," achi hi.
Nazareth a Jesu Huatna
53 Huleh hichi ahung hi a, Jesu'n hi tehkhinthute asoi zohin hu apatin achiahdohta hi. 54 Huin Jesu chu Amah khua ngeei ah ahung a, sinagog ah amahuh thu ahilh hi. Huchiin amah un thumah asa mahmah va, "Hi Pa'n hi pilna leh silmah bawltheihna khoia amuh ahiai? 55 Hi Pa hi sing bawlpa tapa hilou ahiaimah? A nu Mari kichi khu hilou ahiaimah? Huleh a sanggamte chu Jakob, Joseph, Simon leh Juda hilou ahi viaimah? 56 Huleh a sanggamnute zong i kawmva um veh hilou uh maw? Hu ahihleh Hipa'n khoi apat hite zousiah amuh ahiai?" achi uh. 57 Huchiin Amah tungah alunghita sih uhi. Hizongleh Jesu'n a kawmvah, "Zawlnei amah gam sung leh amah innsung chihlouh ah zahbawl louhin aum ngei sih hi," achi hi. 58 Huleh agintaat louh jiahun Ama'n hutah ah silmah tampi abawl sih hi.
Baptistu Johan Sihna
1 Hu hun laiin gambung vaihawmtu Herod in Jesu tanchin ajaahin, 2 a suaahte kawmah, "Hichu Baptistu Johan ahi. Amah chu misi lah apat kaihthoha um a, hujiaha hi silmah bawltheihnate'n amah a nna tong ahita ve," achi hi. 3 Ajiahchu Herod in a sanggampa Philip ji Herodia jiahin, Johan chu mansahin anakaan a, suangkul ah anakhumta hi. 4 Ajiahchu Johan in a kawmah, "Amahnu na kiteenpih daan in aphal sih," achi hi. 5 Huleh Herod in amah chu thah uut mahleh, mipite alau hi, ajiahchu amah un Johan chu zawlnei chiin agingta uhi. 6 Hizongleh Herod pian ni ahung tunin, Herodia tanu chu a ma vah alaam a, Herod chu akipaahsahta hi. 7 Hujiahin amahnu chu anget photmah pe diinga kihaahsialin thu achiamta hi. 8 Huleh amahnu'n chu a nu thuhilh bangin, "Baptistu Johan lutang kuang khat in hitah ah hung pia in," achi hi. 9 Huin kumpipa Herod chu alungdongta a; ahihvaangin a kihaahsialnate leh a ankuang umpihte jiahin, amahnu silnget chu piaah diingin thu apia hi. 10 Huchiin mi asawl a, suangkul sunga Johan ngawng atansahta hi. 11 Huleh a lutang chu kuang khat in ahung dom a, naupangnu chu apia va, huleh ama'n a nu kawmah ahung tawita hi. 12 Huin Johan nungjuite ahung va, a luang chu lain avui va, huleh chiahin Jesu avahilhta uhi.
Saang Ngaa Vaahna
13 Jesu'n hu thu ajaah tahin, hu apatin kuang a kitawlin munsip ah achiah tuamta hi. Huleh mipite'n ajaah tahun, khopite apat a keeng va chiahin ajuita uhi. 14 Huleh Jesu kuang a ahung paikhiah in, mipi nasatah amuhin alainat mahmah a, huin a damloute uh asuhdamsah hi. 15 Huleh nitaahlam ahung hihin a nungjuite a kawmah ahung va, "Hi munsip ahi a, huleh nitaahlam anaihtaah jiahin khuate a chiah a, neeh diing avalei theihna diingun mipite sawlkheta in," achi uhi. 16 Hizongleh Jesu'n a kawmvah, "Amahuh achiah mang uh angai sih hi. Nang un neeh diing pia un," achi hi. 17 Huin amah un a kawmah, "Hitah ah tanghou ngaa leh nga nih chauh i nei uhi," achi uhi. 18 Ama'n, "Hitah ah ka kawmah hung tawi un," achi hi. 19 Huin Ama'n mipite chu hampa tunga tou diingin thu apia hi. Huin tanghou beu ngaa leh nga nih chu ala a, vaan lam enin, avangpiaah a, abalkeeh a, tanghoute chu a nungjuite apia a, huleh nungjuite'n mipite kawmah apia uhi. 20 Huchiin a bawnun ane va, avah chiatta uhi. Huleh a neehvaal uh a neng bawm sawmlenihnungjuite'naluaahdim uhi. 21 Huleh a nete chu numei leh naupang simlouhin piching saang ngaa veel ahi uhi.
Jesu Tui Tunga Paina
22 Huleh Jesu'n mipite asawlkhiah kaal a, anachiah a diil gaal lehlam anakaai masa diingin a nungjuite kuang ah kintahin atuangsah hi. 23 Huleh mipite chu asawlkhiah zohin, haamtei diingin taang ah atuamin achiah tou hi. Huleh nitaahlam ahung hihin hutah ah atangin aumta hi. 24 Hizongleh kuang chu diil lailung ah aum a, huih in alehmuut jiahin tuikinawh in aseep lehleh hi. 25 Huleh jaanveen lina laiin, Jesu'n chu tuipi tunga paiin a kawmlam uh juanin achiah hi. 26 Huleh nungjuite'n Amah chu diil tunga apai amuhun, "Siha ahi!" chiin abuaita va, lauin akikouta uhi. 27 Hizongleh Jesu'n amahuh ahung houpih pah a, "Hamuangtahin um un! Keimah ka hi; lau sih un," achi hi. 28 Huin Peter in adawng a, "Lalpa, nang na hih leh, tui tunga na kawma hungna diing thu hung pia in," achi hi. 29 Huin Jesu'n, "Hung in," achi hi. Huin Peter chu kuang apatin akum a, Jesu kawma chiah diingin tui tungah keeng in apaita hi. 30 Hizongleh huih nung chu amuh tahin alau a, tum diingin akisa a, "Lalpa, hung hunkhia in," chiin akikouta hi. 31 Huin Jesu'n a khut ladohin azam pah a, a kawmah, "Nang ginna haatloupa, bang diinga ginglel na hiai?" achi hi. 32 Huleh amahuh kuang sunga atuan tahun huih chu asipta hi. 33 Huin kuang a umte hungin, "Pathian Tapa tahzet na hi," chiin Amah abia uhi.
Mi Tampi Suhdamna
34 Huleh gaal lehlam akaai tahun, Genesaret gam ahung tungta uhi. 35 Huleh hu mun a mite'n Amah thu aheet tahun, hu kiim a gam chin ah mi asawl va, damlou zousiah a kawmah ahung pui uhi. 36 Huleh a puanmong beeh khoih theih angeen va, huchiin akhoih photmah adam jeel uhi.
Upate Thugousiah
1 Huin Jerusalem a um daanjilsahtute leh Pharisaite Jesu kawmah ahung va, 2 "Bang diinga na nungjuite upate tawndaan kalha taleeh veu ahi viai? Ajiahchu an aneeh chiangun a khut uh asil ngei sih uhi," achi uhi. 3 Hizongleh Ama'n adawng a, a kawmvah, "Nang un zong bang diinga na pulepate tawndaan jiaha Pathian thupiaah a taleeh na hi viai? 4 Ajiahchu Pathian in, 'Na nu leh na pa zahtaat in,' huleh, 'Koipouh a nu aha, a pa aha haamsiat chu suhlupin um heh,' achi hi. 5 Hizongleh nang un chu, 'Koipouh a nu aha, a pa aha kawma, "Kei apat panpihna silpiaah na muh diing photmah chu Pathian kawma piaah ahita," chi photmah in, 6 a nu ahihlouhleh a pa azah diing ahi sih,' na chi uhi. Huchibangin na pulepate uh tawndaan jiahin Pathian thupiaah bangmalou na suaahsahta uhi. 7 Nanguh milepchiahte aw! Isai in na tungtaang thu uh anasoilawh dih ngeel hi: 8 'Hu mite'n a kam un ahung naih va, a muuh un ahung zahbawl uhi. Hizongleh a lungtang uh kei apat agamla hi. 9 Mihing thupiaah chu Pathian thuhilhna banga ahilh jiahun ahung be thawn uhi,' anachih chu," achi hi.
Ahung Subuaahthei Silte
10 Huin Ama'n mipite a kawmah akou a, a kawmvah, "Ngai unla, hesiam un: 11 kam sunga luutin mi asubuaah sih a, hizongleh kam apat pawt, hu ngeei in mi asubuaah ahi," achi hi. 12 Huin a nungjuite ahung va, a kawmah, "Pharisaite'n hi thu ajaah va alunghihlouh uh na he ei?" achi uhi. 13 Hizongleh Ama'n adawng a, "Singkung chin ka Pa vaan a um suan louh chu bolikhiahin aum diing hi. 14 Hite haw ngaihsah sih un; amahuh chu mittaw lamkaite ahi uhi. Mittaw in mittaw mah apui inchu, kokhuuh ah akekhawm diing uh," achi hi. 15 Huin Peter in adawng a, a kawmah, "Hi tehkhinthu ka kawmvah hung hilh chian in," achi hi. 16 Huin Jesu'n, "Tutan a nanguh zong heetsiamna beia um na hi uh maw? 17 Kam a luut photmah gil sung ah aluut a, huleh daileenna ah paihkhiahin aum, chih na theisiam nai sih uh maw? 18 Hizongleh kam apat pawtte chu lungtang apat hung pawt ahi a, hute'n chu mi asubuaah hi. 19 Ajiahchu lungtang akipatin ngaihtuahna giloute, tualthahnate, aangkawmnate, kingaihna thaanghuaite, guuhtaatnate, heetpihna tahloute, soisiatnate ahung pawt hi. 20 Hite chu ahi mihing subuaah, hizongleh khut sillouha an neehin mi asubuaah sih," achi hi.
Kanaan Numeinu Ginna
21 Huin Jesu hu apatin apawt a, Tura leh Sidon gam lamah achiahta hi. 22 Huleh ngai in, hu gam mah apatin Kanaan numei khat ahung pawt a, kikouin a kawmah, "Aw Lalpa, David Tapa, hung khotuah in! Ka tanu dawipaaiin agim mahmah hi," achi hi. 23 Hizongleh Jesu'n chu kam khat in zong adawng sih hi. Huin a nungjuite ahung va, a kawmah, "Amahnu hi sawlmang in, ajiahchu i nung ah akikoukou hi," chiin angeen uhi. 24 Ama'n adawng a, "Israel nam belaam mangte kawm chauh loungaal ah sawl ka hi sih hi," achi hi. 25 Huin amahnu ahung a, "Lalpa, hung panpih in," chiin abia hi. 26 Hizongleh Ama'n adawng a, "Tate tanghou laahsaha uite kawma piaah akilawm sih," achi hi. 27 Huin amahnu'n, "Lalpa, hihjaw ahi a, ahihvaangin uite'n zong a pu uh dohkaan apat tanghou them kia ane saam uhi," achi hi. 28 Huin Jesu'n adawng a, a kawmah, "Numei, na ginna thupi hina mei e! Na deih bangtahin na tungah um heh," achi hi. Huchiin a tanu chu hu hun ngeeiin adamta hi.
Mipite'n Jesu Misuhdam LimdangAsah uh
29 Huleh Jesu chu hu apatin achiah a, Galili Diil kawm ahung tung a, huin taang ah achiah tou a, hutah ah atouta hi. 30 Huin niipi nasatah, keengbaite, mittawte, haam theiloute, piangsualte leh midang tampi hung puiin Amah kawmah ahung uhi. Amahuh chu Jesu keengbul ah akoih va, huleh Ama'n anasudam hi. 31 Huchia haam theiloute ahung haam va, piangsualte ahung bukim va, keengbaite keeng a ahung pai uh lehmittawte'nahungmuhtheihtaah daan uh mipite'n amuh tahun thumah asa va, huchiin Israelte Pathian chu apaahtawita uhi.
Mi Saang Li Vaahna
32 Huin Jesu'n a nungjuite a kawmah akou a, "Mipite tuin ka kawmah ni thum umta ahihjiah uh leh neeh diing bangmah nei lou ahihjiahun ka lainat mahmah hi. Huleh amahuh an ngawlin ka sawl kiit uut sih hi, huchilou inchu lamkaal ah asawlsam kha diing uh," achi hi. 33 Huin a nungjuite'n a kawmah, "Mipi hizah tate vahna thamzet tanghou hu jaatpi gamdaai ah khoi apatin i mu diai?" achi uhi. 34 Huin Jesu'n a kawmvah, "Tanghou beu bangzah na nei viai?" achi hi. Huin amah un, "Beu sagih leh nga tawmtakhat," achi uhi. 35 Huchiin Ama'n mipite chu tual a tou diingin thu apia hi. 36 Huin tanghou beu sagih leh ngate chu lain kipaahthu asoi a, abalkeeh a, a nungjuite kawmah apia a, huin a nungjuite'n mipite kawmah apia uhi. 37 Huchiin a bawnun ane va, avah chiatta uhi. Huleh aneehvaal uh paalbawm sagih aluaah dim uhi. 38 Huleh anete chu numei leh naupang sim louhin, piching saang li ahi uhi. 39 Huin Ama'n mipite chu asawlmang a, kuang ah atuang a, Magdala gam lamah ahungta hi.
Chiamchihna Ngetna
1 Huin Pharisaite leh Sadukaite ahung va, Amah je-etna diingin vaan akipan chiamchihna amahuh ensah diingin angeen uhi. 2 Hizongleh Ama'n adawng a, a kawmvah, "Nitaahlam chiangin, 'Khua apha diing hiinteh ajiahchu mei san asuaah,' na chi veu uhi. 3 Huleh jiingkaal chiangin, 'Tuni'n khua ase diing hiinteh ajiahchu mei san asuaah a, amial hi,' na chi veu uhi. Nanguh milepchiahte aw! Vaan umdaan na hesiam va, hizongleh hun chiamchihna na he sih uhi. 4 Khang gilou leh aangkawm haatte'n chiamchihna ahawl uhi. Hizongleh zawlnei Jonah chiamchihna loungaal chiamchihna dang piaah ahi sih diing uhi," achi hi. Huleh Ama'n amahuh anusia a, achiahta hi.
Pharisaite leh Sadukaite Tol
5 Huleh a nungjuite'n diil gaal lehlam atun un, tanghou apo mangngilh uhi. 6 Huin Jesu'n a kawmvah, "Pharisaite leh Sadukaite tol lahah kiveeng unla pilvaang un," achi hi. 7 Huleh amahuh leh amahuh chu, "Tanghou i puaah louh jiahin ahi," chiin akingaihtuah uhi. 8 Huleh Jesu'n angaihtuah uh ahe a, a kawmvah, "Ginna haatloute aw, tanghou na neih louh jiah uh hia bang diinga kingaihtuah na hi viai? 9 Mi saang ngaa vaahna tanghou beu ngaa leh bawm bangzah na luaah uh chih tu nasan a hesiam nailoua na lungsim va zong hezing lou na hi viaimah? 10 Ahihlouhleh mi saang li vaahna tanghou beu sagih leh a neng vaal paalbawm bangzah na luaah uh, chih hezing lou na hi viaimah? 11 Na kawmvah tanghou thu ka soi sih chih bang diinga hesiamlou na hi viai? Hizongleh Pharisaite leh Sadukaite tol lahah kiveeng un," achi hi. 12 Huin amah un tanghou tolsoh lahah kiveeng un, chi hilouin Pharisaite leh Sadukaite thuhilhna lah a pilvaang diingin ahijaw, chih ahung theita uhi.
Peter in Khrist Aphuanna
13 Jesu chu Kaisaria Philippi gam ahung tunin a nungjuite kawmah, "Mite'n kei Mihing Tapa hi koi ahi ahung chi viai?" chiin adong hi. 14 Huleh amah un, "Khenkhat in Baptistu Johan ahi ahung chi va, khenkhat in Elijah, adangte'n Jeremia ahihlouhleh zawlneite laha khat ahi ahung chi-uh,". achi uhi. 15 Ama'n chu a kawmvah, "Ahihleh nang un kei koi ka hi na hung chi viai?" achi hi. 16 Huin Simon Peter in adawng a, "Khrist, Pathian hing Tapa chu na hi," achi hi. 17 Huleh Jesu'n adawng a, a kawmah, "Simon, Jonah tapa, na hampha hi, ajiahchu mihing tahsa leh sisan in ahung heetsah na hi sih a, vaan a um ka Pa hung heetsah ahijaw hi. 18 Huleh ke'n zong na kawmah nang Peter na hi, chih ka hung hilh hi. Huleh hi suangpi tungah ka kouhtuam ka lemdoh diing a, huchu Misi Khua kulh kotkhaahte'n bangmah alohbut sih diing hi. 19 Huleh na kawmah vaan lalgam chabite ka hung pe diing a, lei a na kaan photmah chu vaan ah kaan ahi diing a, huleh lei a na phel photmah chu vaan ah phel ahi diing," achi hi. 20 Huin Ama'n a nungjuite'n Jesu chu Khrist ahi chih koima hilh lou diingin nguntahin thu apia hi.
Jesu'n Asih Diing leh Athohkiit Diing Asoilawhna
21 Hu nungsiah chu Jesu'n Jerusalem a achiah diing bang, upate leh siampu lalte leh daanjilsahtute khut apat sil tampi athuaah diing daan bang, thaha aum diing bang, huleh ni thum ni a athohkiit diing bang a nungjuite ahesah panta hi. 22 Huin Peter in Amah puituamin ataaihilh a, "Lalpa, na tungah hung tung dah hen! Na tungah atung hial sih diing," achi hi. 23 Hizongleh Amah chu akihei a Peter kawmah, "Setan, ka nung ah um in! Kei diingin kipalpuuhna na hi, ajiahchu nangma'n Pathian silte na ngaikhawh sih a, hizongleh mihing silte na ngaikhawh jaw hi," achi hi.
Hinkho Mandaan Dih
24 Huin Jesu'n a nungjuite kawmah, "Mi koipouh in ahung juih nuam inchu, amah leh amah kiheetmohbawlin a kros puain hung jui heh. 25 Ajiahchu koipouh a hinna huumbit tumin ataan diing a, hizongleh koipouh keimah jiaha a hinna taan in amu diing hi. 26 Mi'n khovel apumin nei henla, a hinna taanta leh, amah diingin bang aphatuam diai? Ahihlouhleh mi'n a hinna luangin bang ahiai apiaah diing? 27 Ajiahchu Mihing Tapa chu a Pa loupina a kithuamin a angelte toh hung pah diing ahita a, huchiangin mi chin a natoh bangjeelin athuh chiat diing hi. 28 Chihtahzetin na kawmvah ka soi ahi, hia dingte khenkhat chu Mihing Tapa a lalgam a hung amuh masiah uh sihna chiam lou diing aum uhi," achi hi.
Taang a Meel Kilimdanna
1 Huin ni guup nungin Jesu'n Peter, Jakob leh a sanggampa Johan atonpih a, a tuamin taang sang tung khat ah apuitou hi. 2 Huleh ama vah a meel ahung limdangta hi. A maai ni bangin ahung taangta a, a puansilhte chu vaah bangin ahung vaam hi. 3 Huleh en in, Mosi leh Elijah a kawmva hung kilaahin Amah toh akihou uhi. 4 Huin Peter in Jesu ahoupih a, a kawmah, "Lalpa, eiuh diingin hitaha um ahoih hi. Na uut leh hitah ah puanbuuh thum i bawl diing a, nang a diingin khat, Mosi a diingin khat, huleh Elijah a diingin khat," achi hi. 5 Asoi laitahin, en in, meilum vaahtah in amahuh ahung khuhta hi. Huleh en in, hu meilum lah apatin aw khat in, "Hichu ka Tapa deihtah ahi, Amah ah ka kipaah mahmah hi. Amah thu ngai un," achi hi. 6 Huleh nungjuite'n huchu ajaah un, bohkhupin apuuh va, alau mahmah uhi. 7 Huin Jesu ahung a, amahuh akhoih a, "Thou unla, lau sih un," achi hi. 8 Huleh adaahdoh uh leh Jesu chauh lou chu koima dang amu sih uhi. 9 Huleh taang apat ahung kumsuh tahun, Jesu'n amahuh thu apia a, "Mihing Tapa misi lah apat athohkiit masangsiah hi na sil muh uh koima hilh sih un," achi hi. 10 Huin a nungjuite'n a kawmah, "Ahihleh bang diinga daanjilsahtute'n, Elijah hung masa teeiteei diing ahi, chi ahi viai?" chiin adong uhi. 11 Huleh Jesu'n adawng a, "Elijah chu ahung masa ngeei diing a, sil bangkim abawl thah diing hi. 12 Hizongleh ka hung hilh ahi, Elijah chu ahung zouta a, amah ahe sih va, a tungah auut uut un ahih zouta uhi. Huchibangmahin Mihing Tapa in zong a lahvah athuaah pahta diing," achi hi. 13 Huin a nungjuite'n Baptistu Johan thu a kawmva soi ahi chih ahung heta uhi.
Naupang Dawimat Suhdamna
14 Huleh mipi lah ahung tun un, koiaha mi khat Amah kawmah ahung a, a ma a khuupdinin, 15 "Lalpa, ka tapa khotuah in, amah hi sibup vei ahi a, agim mahmah hi. Mei lahah apuuh a tui ah ake veu hi. 16 Huleh na nungjuite kawmah ka hung pui a, hizongleh asudam thei sih uhi," achi hi. 17 Jesu'n adawng a, "Ginna neilou leh khang paisual aw, bangtan ahiai ka hung umpih diing? Bangtan ahiai ka hung thuaahtheih diing? Amah chu hitah ah ka kawmah hung pui un," achi hi. 18 Huin Jesu'n dawi chu ataai a, a sung akipatin dawi apawtta hi; huleh naupang chu hu hun ngeeiin adamta hi. 19 Huin nungjuite chu aguuhin Jesu kawmah ahung va, "Bang diinga kei un nohdoh theilou ka hi viai?" achi uhi. 20 Huin Jesu'n a kawmvah, "Na ginlouh jiahun ahi. Chihtahzetin ka hung hilh ahi, ankam tang khat bang ginna na neih uh leh, hi taang kawmah, 'Hi apatin hu lamah kituan in,' na chi diing va, akituan mei diing hi. Nanguh diingin sil bawltheihlouh mawngmawng aum sih diing hi. 21 Bang hitaleh hichibang jaw haamteina leh an ngawlna loungaalin apawtdoh sih hi," achi hi.
Jesu'n a Sih Diing leh Thohkiit Diing Asoilawh Nihveina
22 Huleh Galili gam a aum laiuri Jesu'n a kawmvah, "Mihing Tapa hi mite khut ah matsahin aum pah diing hi; 23 huleh Amah chu athat diing va, a ni thum ni'n kaihthohin aum diing," achi hi. Huin amahuh alungkham mahmahta uhi.
Jesu leh Biahinn Siah
24 Huleh Kapernaum ahung tunun, biahinn siah dongte Peter kawmah ahung va, "Na Houtupa un biahinn siah pe lou ahi maw?" achi uhi. 25 Peter in, "Pia e," achi hi. Huleh amah chu inn sunga avaluut leh Jesu'n a kawmah, "Simon, bang na chi ngaih ei? Lei a lalte'n sumlam siah hiin siah hitaleh koite lahah ahiai alaah jeel uh, a tate uh lahah ahiai, ahihlouhleh gamdang mi lahah?" chiin anadong hi. 26 Peter in a kawmah, "Gamdang mi lahah," achi hi. Jesu'n a kawmah, "Huchi ahihleh tate a-awl uhi. 27 Hizongleh nang diil ah vachiah inla, ngakuai vakhai inla, huleh nga na khaidoh masatpeen la inla, a kam keeh lechin shekel khat na mu diing hi. Huchu la inla, kei leh nang a diingin a kawmvah pia in, huchilou inchu amahuh i kipalpuuhsah kha diing," achi hi.
Kingaihngiam Tungtaang a Thuhilhna
1 Hulaitahin nungjuite Jesu kawmah ahung va, "Vaan lalgam ah koi alianpeen diai?" achi uhi. 2 Huin Jesu'n naupangneu khat a kawmah akou a, amah chu a lahvah adingsah a, 3 "Chihtahzetin ka hung hilh ahi, na kihen va naupang neute bang na hung hihlouh uh leh, vaan lalgam ah na luut het sih diing uhi. 4 Hujiahin koipouh hi naupangneu banga kingaingiam mi chu vaan lalgam ah alianpeen ahi diing hi. 5 Huleh mi koipouh hitobang naupang neu khat keimah min a saang chu kei hung saang ahi. 6 Hizongleh koipouh keimah hung gingta mineute laha khat zong puuhsah chu a ngawng ah suangsumheeh lianpi ohsahin tuikhanglian thuuhtah ah kheluut leh uh, amah diingin ahoihjaw diing hi.
Heemna Thu a Hilhna
7 "Kipuuhna bawltute jiahin khovel tung agih hi, puuhnate chu hung um diing mawng ahi a, hizongleh puuhna umsahtu tung agih hi! 8 Hiileh na khut aha, na keeng aha in ahung suhpuuh leh saattan inla paaimang in. Khut nih aha, keeng nih aha neia kumtuang mei a paiha um saangin, piangsuala ahihlouhleh keengbaia hinna a luut chu nang a diingin ahoihjaw hi. 9 Huleh na mit in ahung suhpuuh leh kheikhia inla paimang in. Mit nih neia gawtmun mei a paiha na um saangin, mit khat neia hinna a luut nang a diingin ahoihjaw hi. 10 Hi naupangte laha khat zong simmoh lou diingin pilvaang un, ajiahchu a angelte un vaan a um ka Pa meel aen zing uhi, chih ka hung hilh ahi.
Belaam Mang Tehkhinthu
11 "Ajiahchu beimangte hundam diingin Mihing Tapa ahung hi. 12 Bang na chi ngaih viai? Mi khat in belaam za nei henla, alahvah khat vaahmangta leh, sawmkuah leh kuahte chu nusiain, taangte a chiahin avaahmang peen vahawl lou diing ahiaimah? 13 Huleh vamu kiitta henla hileh, chihtahzetin ka hung hilh ahi, sawmkuah leh kuah vaahmang loute saangin hu belaam peen tungah akipaah jaw diing hi. 14 Huchibangmahin hi naupangte laha khat zong amanthaai diing chu na Pa uh vaan a um deihlam ahi sih hi.
Unau Tatkhelhna
15 "Huleh na unau na tunga atatleeh leh, chiah inla nang leh amah chauh heetin a khelhna chu vahilh in. Ama'n na thu angaih leh, na unau na zou ahi diing hi. 16 Hizongleh angaihkhiah louh inchu 'heetpihtu nih ahihlouhleh thum kam a thu akichetna diingin' mi khat aha nih aha tonpih in. 17 Huleh amahuh angaihkhiah nuam louha ahihleh, kouhtuamte kawmah tut in. Kouhtuamte thu zong angaihkhiah saam louh inchu, amah chu nang a diingin Jentel leh siahdong mi bang hi heh. 18 Chihtahzetin ka hung hilh ahi, leitung a na kaan photmah uh chu vaan ah kaan ahi diing a, huleh leitung a na phel photmah uh chu vaan ah phel ahi diing hi.
Kituaaha Haamteina
19 "Na kawmvah ka soi kiit hi, leitung a na lahva mi nih a silnget pouh va akithutuaah uh leh, ka Pa vaan a um bawlsahin aum diing uhi. 20 Ajiahchu mi nih aha thum aha ka min a akikhopna phot vah a lahvah ka um jeel ahi," achi hi.
Ngaihdamna
21 Huin Peter chu Jesu kawmah ahung a, "Lalpa, ka unau in ka tunga akhelh leh, bang jaatvei ahiai ka ngaihdam diing? Sagihvei tanin ahi diai?" achi hi. 22 Jesu'n a kawmah, "Sagihvei chiang ka hung chi sih hi. Sawmsagih mun sagihvei tanchiang ka hung chi jaw ahi.
Ngaidam Theilou Suaahpa Tehkhinthu
23 "Ajiahchu vaan lalgam chu kumpi koiaha a suaahte kawma sum hisaap suhfel tum toh tehkhin ahi. 24 Ahung suhfel pat a ahihleh, mi khat talent siing khat ba a kawmah ahung pui uhi. 25 Hizongleh ama'n piaah diing aneih louh jiahin a pu in a suaahte kawmah amah leh a ji leh a tate toh aneih zousiah toh juaaha dit diing thu apia hi. 26 Hujiahin suaahpa in chu khupbohin abia a, 'Pu, ka tungah thuaah thei tadih inla, a bawnin ka hung dit diing,' achi hi. 27 Huin hu suaahpa pu in amah chu alainat mahmah a, ahahkhia a, a bat angaidamta hi. 28 Hizongleh hu suaahpa chu apawt a, a suaah hihpihte laha khat amah dinari za khat ba chu avamu a, amah chu aman a, 'Na bat hung pia in!' chiin a lawl ameeh hi. 29 Huchiin asuaah hihpihpa chu a keeng bul ah apuuh a, 'Ka tungah thuaahthei tadih in, ka hung dit veh diing,' chiin angeen hi. 30 Ahihvaangin amah aut sih a, a bat aditzoh masangsiah suangkul ah avakhumta hi. 31 A suaah hihpihte'n a silbawl chu amuh tahun, apona mahmah va, huleh ahung va sil umtan zousiah a pu uh ahung hilhta uhi. 32 Huphetin a pu in a suaahpa chu akou a, a kawmah, 'Aw suaah giloupa, na hung nget nguutnguut jiaha na bat zousiah hung ngaidam ing a, 33 ke'n ka hung hehpih banga nang zong na suaah hihpih na hehpih saam diing hilou maw?' achi hi. 34 Huin a pu chu alungthahta a, abat zousiah aditzoh masiah migawttu kawmah apeta hi. 35 Nanguh koipouh in na lungtang tah va na unaute a tatleehna uh na ngaihdam louh uh leh, vaan a um ka Pa in zong huchibangin na tungvah abawl ve diing hi," achi hi.
Kikhuul Thu a Hilhna
1 Huleh hichi ahung hi a, Jesu'n hi thute asoi zohin Galili gam apatin apawt a, Jordan gaal Judia gam lamah ahungta hi. 2 Huleh mipi nasatahin ajui va, huleh Ama'n hutah ah amahuh anasudam hi. 3 Pharisaite zong a kawmah ahung va, Amah je-etin a kawmah, "Bangjiah pouhin mi'n a ji akhuul daan in aphalsah ei?" achi uhi. 4 Huin Jesu'n adawng a, a kawmvah, "Achiil apatin Pathian in 'numei leh pasal in asiam a,' 5 huleh 'Hi jiahin pasal in a nu leh a pa anuse diinga huleh a ji ah abehta diing a, huleh anihun sapum khat ahung hita diing uh,' chih na sim kha sih uh maw? 6 Huchiin amahuh chu nih ahi nawnta sih va, sapum khat ahita uhi. Hujiahin Pathian in agawmsa chu mihing in khen sih heh," achi hi. 7 Amah un a kawmah, "Ahihleh bang diinga Mosi in kikhuulna lehkha piaaha khuul diing ahi, chia thu apiaah ahiai?" achi uhi. 8 Jesu'n a kawmvah, "Na lungtang uh khauh jiaha na jite uh khuul Mosi in ahung phalsah ahi. Hizongleh achiil apatin huchibang ahi sih hi. 9 Hizongleh ke'n ka hung hilh ahi, koipouh aangkawmna jiah hilou a, ji khuul a, adang nei chu aangkawm ahi a, huleh khuulsa numei nei photmah zong aangkawm ahi," achi hi. 10 A nungjuite'n a kawmah, "Pasal a ji toh kaal thu huchi ahihleh, kiteen ahoih lou ahi," achi uhi. 11 Hizongleh Ama'n a kawmvah, "Hi thukisoimizousiah in apom thei sih uh, a kawmva piaahte loungaalin. 12 Ajiahchu michilgeh khenkhat a nu uh suul apat huchibanga piang mawng aum va; huleh michilgeh khenkhat mihing gehthuh zong aum a, huleh michilgeh, vaan lalgam jiaha michilgeha kisiamtawmte zong aum hi. Koipouh apomthei in pom uh heh," achi hi.
Jesu'n Naupangte Avangpiaahna
13 Hulaiin a tungva a khut nga a ahaamteisah diingin Amah kawmah naupang neute ahung pui va, hizongleh nungjuite'n anataai uhi. 14 Hizongleh Jesu'n, "Naupang neute chu ka kawma ahung diing uh phalsah unla, khap sih un; ajiahchu vaan lalgam chu huchibang mite a diing ahi," achi hi. 15 Huleh a tungva a khut angah zohin, hu apatin achiahta hi.
Tangvaal Hausa
16 Huleh en in, mi khat ahung a, a kawmah, "Houtupa hoih, kumtuang hinna ka neih theihna diingin bang silpha ahiai ka bawl diing?" achi hi. 17 Huin Jesu'n a kawmah, "Bang diinga mi hoih hung chi na hiai? Pathian chihlouh mi hoih dang aum sih hi. Bangteng hitaleh hinna a na luut nuam leh, thupiaahte jawm in," achi hi. 18 Ama'n a kawmah, "Akhoi haw e?" achi hi. Jesu'n adawng a, "'Tual na thah louh diing ahi,' 'Aang na kawm louh diing ahi,' 'Na guuh louh diing ahi,' 'Heetpihtu dihlou in pang sin,' 19 'Na nu leh na pa zahtaat in,' huleh 'Nangmah na kilungsiat banga na veengte zong na lungsiat diing ahi,'" achi hi. 20 Tangvaalpa'n chu a kawmah, "Hihaw zousiah chu ka khangdawn lai apat ka juih ahita hi. Bang ka sam nalai ei?" achi hi. 21 Jesu'n a kawmah, "Hoihbukim keei ning na chih leh, chiah inla na neih zousiah juaah inla, migentheite kawmah pia in, huchiin vaan ah gou na nei diing hi. Huleh hung inla, hung jui in," achi hi. 22 Hizongleh tangvaalpa in chu hu thu ajaah tahin lungkhamtahin achiah mangta hi, neihlelam tampi nei ahih jiahin. 23 Huin Jesu'n a nungjuite kawmah, "Chihtahzetin ka hung hilh ahi, mi hausa diingin vaan lalgam luut ahahsa hi. 24 Huleh ka hung hilh kiit ahi, mi hausa Pathian lalgam a aluut saangin sangawngsau phin bilvang a aluut paisuaah abaihlam jaw hi,' achi hi. 25 A nungjuite'n hu ajaah tahun limdang asa mahmah va, "Huchi ahihleh koi hutdamin aum zou diai?" achi uhi. 26 Himahleh Jesu'n amahuh aen a, a kawmvah, "Hichu mihing diingin bawl gual ahi sih a, hizongleh Pathian diingin chu bangkim ahithei veh hi," achi hi. 27 Huin Peter in adawng a, a kawmah, "En in, kei un bangkim nusiain nang ka hung juita va, bang ka mu diing viai leh?" achi hi. 28 Huin Jesu'n a kawmvah, "Chihtahzetin ka hung hilh ahi, khovel thah ah Mihing Tapa a loupina laltouphah a atou chiangin nanguh kei hung juite chu Israel phung sawmlenihte vaihawmin laltouphah sawmlenih ah na tou diing uhi. 29 Huleh mi chin ka min jiaha innte aha, sanggam pasalte aha, sanggam numeite aha, pa aha, nu aha, ji aha, tate aha, gamte aha nusia in chu aleh za amu diing va. huleh kumtuang hinna atang diing uhi. 30 Hizongleh mi tampi amasapeente chu anunungpeen diing va, huleh anunungpeente chu amasapeen diing uhi.
Grephuan a Natongtute
1 "Ajiahchu vaan lalgam chu lou neitu a grephuan a natong diinga mi chial diinga jiingkaalapawt bang ahi. 2 Huleh ama'n natongtute toh ni khat a dinari khat loh diinga akilem tahun, a grephuan ah asawlta hi. 3 Amah chu daah thumna veelin apawtdoh a, midang dawlmun a ding meimeite amu a, 4 huleh a kawmvah, 'Nanguh zong grephuan ah vakuan un, akilawm hun ka hung pe diing,' achi hi. Huin amahuh chu achiahta uhi. 5 Huleh daah guupna leh daah kuahna veel diingin, avapawt kiit a, huchibangmahin abawl kiit hi. 6 Huleh daah sawmlekhat veelin avapawt kiit a, a kawmvah, 'Bang diinga ding meimei na hi viai?' achi hi. 7 Amah un a kawmah, 'Koimah in ahung goih louh jiahin,' achi uhi. Ama'n a kawmvah, 'Nanguh zong grephuan ah va kuan un, akilawm bangjeel na mu diing uh,' achi hi. 8 Huin nitaahlam ahung hihin, grephuan neitu'n a enkoltu kawmah, 'Natongtute kou inla anunungpeen apatin a masapeen tanin aloh uh pia in,' achi hi. 9 Huin daah sawmlekhat veela agoihte ahung uh leh dinari khat chiat amuta uhi. 10 Huin amasate ahung tahun muh tamdeuh akineem uhi. Hizongleh amah un zong dinari khat chiat mah amuta uhi. 11 Huleh hichu akilaah zohun lou neitu tungah aphunta va, 12 'Hi anunungte'n daah khat sung chauh atong va, keiuh nisa hahlai thuaaha tonggimte toh akibangin na bawlta mei a,' achi uhi. 13 Hizongleh ama'n chu alahva khat adawng a, 'Lawm, na tungah bangmah ka sukhial sih hi. Dinari khat loh diinga kihoutuaah hilou i maw? 14 Nang a chu kilaah inla chiahta in, hi anunungpeente kawmah zong nang ka hung piaah jaatmah ka pe uut hi. 15 Ka neihsa ka uut uut-a ka bawl theih hilou amaw? Huleh ka hoih jiahin na thangsia ahi maw?' achi hi. 16 Hutobangin anunung chu amasa diing a, amasa chu anunung diing hi. Ajiahchu tampi kouh ahi a, hizongleh tawmchakhat teel ahi," achi hi.
Jesu'n a Sih diing Asoilawh Thumveina
17 Huleh Jesu Jerusalem a achiah touh laiin nungjui sawmlenihte lampi ah apuituam a, a kawmvah, 18 "Ngai un, Jerusalem juanin i chiah tou uh ahi, huleh Mihing Tapa chu siampu lalte leh daanjilsahtute khut ah matsahin aum diing a, huleh amah un si diingin siamlouh atangsah diing uhi. 19 Huleh Amah chu chiamnuih bawlna diing leh jeep diing leh kros a khetbeh diingin Jentelte khut ah apedoh diing uhi. Huleh a ni thum ni in athou kiit diing hi," achi hi.
Midang Nna Tohsah Diinga Ngetna
20 Huin Zebedi tate nu chu a tapate toh hungin Jesu maai a khupbohin bang sil aha angeen hi. 21 Huin Ama'n a kawmah, "Bang ahiai na deih?" achi hi. Amahnu in a kawmah, "Na lalgam ah hi ka tapa tegeel khat na jiatlam ah, khat na veilam ah atou theihna diing uh thu pia in," achi hi. 22 Hizongleh Jesu'n adawng a, "Na nget uh na he sih uhi. Nang un ka nou dawn diing na dawn thei viai, huleh ka baptisma tan diing na tang thei diing viai?" achi hi. Amah un a kawmah, "Hihthei e," achi uhi. 23 Huin Ama'n a kawmvah, "Ka dawn diing nou chu na dawn ngeei diing va, ka baptisma tan diing zong na tang ngeei diing uhi, hizongleh ka jiatlam leh ka veilam a tousah diing thu chu keimah piaah diing ahi sih a, himahleh ka Pa'n abawlsahte kawmah piaah ahi diing," achi hi. 24 Huleh sawmte'n huchu ajaah tahun, unau nihte tungah alungthah mahmahta uhi. 25 Hizongleh Jesu'n amahuh chu a kawmah akou a, "Jentel vaihawmte chu a tungvah kilalsahtahin aum va, huleh milian milalte'n a tungvah thu aneih khum uh chih na he uhi. 26 Hizongleh nanguh lahah chu huchi ahi sih diing, koipouh na lahva let uut chu na suaah un aum diing ahi. 27 Huleh na lahva amasapeen a pan uut chu na suaah un apang diing hi. 28 Mihing Tapa hiilhial zong natohsaha um diingin ahung sih a, hizongleh natong diing leh mi tampi tatna diinga a hinna pe diingin ahung jaw ahi," achi hi.
Mittaw Mitvaahna
29 Huleh Jeriko apat apawt un, mipi nasatahin Amah ajui uhi. 30 Huleh en in, mittaw nih lam geia toute'n Jesu lampi ah achiah hi chih ajaah tahun, "Aw Lalpa, David Tapa, hung khotuah in," chiin akikou uhi. 31 Huleh mipite'n adaihna diingun ataai va, hizongleh amahuh chu, "Aw Lalpa, David Tapa, hung khotuah in," chiin akikou seemseem uhi. 32 Huin Jesu akhawl a, amahuh akou a, "Na tungvah bang bawlleng na uut viai?" achi hi. 33 Amah un a kawmah, "Lalpa, mitvaah ka uut uh," achi uhi. 34 Huin Jesu'n alainat mahmah a, a mit uh akhoih a, huchiin amuthei pah ngaal va, huin Amah ajuita uhi.
Jesu Jerusalem a Luutna
1 Huleh Jerusalem ahung tun kuan uh, Olive Taang a Bethphage khua atun tahun, Jesu'n nungjuite nih asawl a, 2 a kawmvah, "Na majawn va khua ah vachiah unla, huleh sabiltung kikhit a kawma a talgual khat toh na vamu pah diing va; hute chu suut unla, ka kawmah hung kai un. 3 Huleh mi koiaha in na kawmva soi aneih' leh, 'Lalpa'n amahuh amamoh hi, na chi diing va, huchiin ama'n ahung sawl pah diing hi," achi hi. 4 Hite zousiah chu zawlnei kam tungtawna anakisoi ataangtun theihna diingin ahi: 5 "Zion tanu chu hilh inla, 6 En in, na Kumpipa chu kingaingiamtahin sabiltung tungah, sabiltung talgual tungah tuangin na kawmah ahung hi,'" achihchu. 6 Huin nungjuite chu achiah va, Jesu'n thu apiaah bangin abawl uhi. 7 Huleh sabiltung leh a talgual chu ahung kai ya, a tungah a puante uh aphah va, a tungah Jesu atousah uhi. 8 Huleh mipi tamtah in lampi ah a puante uh aphah va; adangte'n singbawh asaatkhia va, lampi ah aphah uhi. 9 Huchiin mipi a ma a chiahte leh a nunga juite'n kikouin: "David Tapa kawmah, Hosanna! 'LALPA min a hung paipa chu ahampha hi!' Tungnungpeen ah Hosanna!" achi uhi. 10 Huleh Jerusalem sung aluut tahin, "Hi Pa koi ahiai?" chiin a khopi pumpi aliing hial uhi. 11 Huleh mipite'n, "Hi Pa hi zawlnei Jesu, Galili gam a Nazareth khua a mi ahi," achi uhi,
Biahinn Suhsiangna
12 Huin Jesu chu Pathian biahinn ah aluut a, Pathian biahinn a sil juaah leh lei zousiah chu adelhdoh a, huleh sum hengtute dohkaan haw leh vakhu juaahte tounahaw asawnpuuhsah hi. 13 Huleh a kawmvah, "'Ka inn chu haamteina inn akichi diing,' chih gelh ahi, hizongleh nang un suammangte umna kua in na siam uh," achi hi. 14 Huin Pathian biahinn ah mittawte leh keengbaite a kawmah ahung va, huleh Ama'n amahuh chu anasudam hi. 15 Hizongleh siampu lalte leh daanjilsahtute'n a silmah bawlte leh Pathian biahinn a, "David Tapa kawmah, Hosanna1 '!" chia naupang kikoute amuh tahun alungkim sih mahmah va, 16 huleh a kawmah, "Hite'n bang ahiai asoi uh na ja ei?" achi uhi. Huleh Jesu'n a kawmvah, "Hi, 'Naungeehte leh nawiteep nalaite kam a pawt in paahtawina na sukimta,' chih na sim ngei sih uh maw?" achi hi. 17 Huleh amahuh nusiain khopi apat apawt a, Bethani ah achiah a, hutah ah agiahta hi.
Theipi Kung Apat Ginna Thu Kihilhna
18 Huin ajiing a khopi lam a akilehkiitin, a gil ahung kialta hi. 19 Huleh lam geiah theipi kung amu a, a bul a avachiah leh a nah loungaal bangmah amuta sih a, huin theipi kung kawmah, "Tu apat kumtuangin anagah kiit nawn sin," achi hi. Huleh theipi kung chu avul pah ngaal hi. 20 Huleh nungjuite'n huchu amuh tahun, "Bangchidaan ahiai theipi kung avul pah mei?" chiin thumah asa mahmah uhi. 21 Huin Jesu'n adawng a, a kawmvah, "Chihtahzetin ka hung hilh ahi, ginna na neih va, na ginlelh louh uh leh, theipi kung a bawl bang chauh na bawl sih diing va, hizongleh hi taang kawmah zong, 'Kisuandoh inla tuikhanglian ah kipaai in,' chi leh uh chin, na chih bangun aum diing hi. 22 Huleh bangkim gingta a haamtei a na nget phot uh na mu diing uhi," achi hi.
Jesu Thuneihna Aginlelhna uh
23 Huleh Amah Pathian biahinn ah aluut a, thu ahilh laiin, siampu lalte leh vaantaang upate a kawmah ahung va, "Bang thuneihna in ahiai hi silte na bawl? Huleh koi in ahiai hi thuneihna ahung piaah?" achi uhi. 24 Hizongleh Jesu'n adawng a, a kawmvah, "Ke'n zong thu khat ka hung dong diing a, hukhu na hung hilh uh leh, ke'n zong koi thu in ahiai hi sil ka bawl ka hung hilh ve diing hi. 25 Johan baptisma hi khoi apatin ahiai? Vaan apatin ahiai, ahihlouhleh mihing apat?" achi hi. Huleh amahuh akingaihtuah va, "'Vaan apatin/ chilei lah, 'Huchi ahihleh bang diinga amah gingta lou?' achi diing hi. 26 Hizongleh, 'Mihing apatin,' chilei lah mipite i lau ngaala, mi zousiah in Johan chu zawlnei hia aseh jiahun," achi uhi. 27 Huchiin Jesu adawng va, "Ka he sih uh," achi uhi. Huleh Amah in zong a kawmvah, "Ke'n zong bang thuneihna in ahiai hi silte ka bawl chih ka hung hilh sih diing.
Tapa Nih Tehkhinthu
28 "Hizongleh nang un bang na chi ngaih viai? Mi koiaha in tapa nih anei a, huleh akhatna kawmah ahung a, 'Tapa, tuni in ka grephuan ah nna vatong in,' achi hi. 29 Ama'n adawng a, 'Uut sing,' achi a, hizongleh a khonungin a lungsim ahengta a, avakuanta hi; 30 Huin anihna kawmah ahung a, huchibangmahin achi hi. Huleh ama'n adawng a, 'Pu, ka chiah diing hi,' achi a, hizongleh achiahta sih hi. 31 Amahuh geel koi jaw in a pa uh deihlam abawl viai leh?" achi hi. Amah un a kawmah, "Amasajaw in," achi uhi. Jesu'n a kawmvah, "Chihtahzetin ka hung hilh ahi, siahdongte leh nohchijuaahte'n Pathian lalgam ahung luut khelh diing uhi. 32 Ajiahchu Johan chu dihtatna lam thu ah na kawmvah ahung a, amah na gingta sih uhi; hizongleh siahdongte leh nohchijuaahte'n amah agingta uhi. Huleh nang un hu na muh tahun, amah na gintaatna diingun na kisiih nuam tuan sih uhi.
Grephuan Tehkhinthu
33 "Tehkhinthu dang ngaikhia un: Lou neitu mi koiaha khat aum a, hupa'n chu grephuan abawl a, daai in auum kiimveel a, hu sungah grep suuhna kokhuuh alaai a, buuhsang alam hi. Huleh loubawl mite kawmah hohloh diingin apekhia a, gamdang ah achiahta hi. 34 Huleh a. gah loh hun diing kuanin a suaahte chu a gah la diingin loubawl mite kawmah asawl hi. 35 Huleh a loubawl mite'n a suaahte chu aman va, khat avua va, khat athat va, khat suang in asep uhi. 36 Huin ama'n a suaah dangte amasa haw saanga tamjaw asawl kiit a, amahuh tungah zong huchimahin anabawl uhi. 37 Atawp ah, 'Ka tapa azahtaat kha diing uh,' chiin a tapa chu asawl hi. 38 Hizongleh a loubawl mite'n a tapa chu amuh tahun, 'Hi pa gouluahtu diing ahi, hung un, i that diing va, a gouluah diing chu i kitan diing uh,' achi uhi. 39 Huin amah chu aman va, grephuan pua ah apaaidoh va, athatta uhi. 40 Hujiahin grephuan neitupa ahung tahchiangin hu lou bawltute chu bang alohta diai?" achi hi. 41 Amah un a kawmah, "Ama'n hu migiloute chu bawlgentheitahin asumang diing a, grephuan chu lou bawltu dang a gah loh hun chin a, a gahte a kawma pe jeel diingte kawmah akeemsah diing," achi uhi. 42 Jesu'n a kawmvah, "Pathian Lehkhathu ah: 'Innlamtute suang deihlouh ngeei chu aning a suang poimohpeen ahung hita hi. Hichu LALPA bawl ahi a, huleh i mitmuh vah athumah ahi,' chih thu na sim kha ngei sih uh maw? 43 Hujiahin ka hung hilh ahi, Pathian lalgam chu na kawm vapat laahsah ahi diing a gah suang diing nam dang kawmah piaah ahi diing hi. 44 Huleh koipouh hi suang tunga puuh chu akeehjaah diing a; hizongleh akiaahkhum photmahte chu agawijaan diing hi," achi hi. 45 Huin siampu lalte leh Pharisaite'n a tehkhinthu ajaah tahun, amahuh tung thu soi ahi chih akihe uhi. 46 Hizongleh Amah chu mat atup uh leh mipite alau uhi, amah un zawlnei hia angaih jiahun.
Kiteenna Ankuang Tehkhinthu
1 Huleh Jesu'n adawng a, a kawmvah tehkhinthu in asoi kiit a: 2 "Vaan lalgam chu kumpi koiaha khat a tapa diinga kiteenna ankuang lui tobang ahi a, 3 huleh kiteenna ankuang luina a chialte kou diingin a suaahte asawl a, huleh amahuh ahung nuam sih uhi. 4 Ama'n a suaah dangte asawldoh kiit a, 'Chialte kawmah vachiah unla, "En in, ka nitaah ankuang ka bawl zouta hi, ka bawngtalte leh ka gan vaahthaute thah ahi a, sil zousiah bawlzohsa ahita. Kiteenna ankuang ah hungta un, vachi un," achi hi.' 5 Hizongleh amah un angaihsah sih va, khat a lou ah, khat a sumdawnna ah akichiah mangta uhi. 6 Huleh midangte'n a suaahte chu aman va, musittahin abawl va, athatta uhi. 7 Hizongleh kumpipa'n huchu ajaah tahin alungthahta hi. Huleh sepaihte asawl a, hu tualthatte chu asumang a, huleh a khopi uh zong ahaalsahta hi. 8 Huin ama'n a suaahte kawmah, 'Kiteenna ankuang bawlzoh ahita, hizongleh ka chialte lah ne taah ahi sih uhi. 9 Hujiahin lamka thuamte ah chiah unla, mi na muh taphot uh kiteenna an ne diingin hung chial un,' achi hi. 10 Huchiin hu suaahte chu apawt va, lamka thuamte ah vachiahin amuhphaah tan uh, misia leh mipha, a bawnun akou khawm va, kiteenna mun chu michialte in ahung dimta hi. 11 Hizongleh kumpipa chu riiichialte en diinga ahung luut tahin, kiteenna puan silh lou mi khat amuta hi. 12 Huin ama'n a kawmah, 'Lawm, bangchidaan ahiai kiteenna puan silh loua hia na hung luut?' achi hi. Huin amah chu ahaam keei sih hi. 13 Huin kumpipa'n a suaahte kawmah, 'A khut leh a keeng kaan unla, podoh unla, polam mial ah paaita un, hutah ah kah leh hagawi aum diing hi,' achi hi. 14 Ajiahchu tampi kouh ahi a, hizongleh tawmtakhat teel ahi uh," achi hi.
Siah Thu a Dohna
15 Huin Pharisaite chu achiahdoh va, a thusoi apat Amah amat theihna diing daan uh avakihou uhi. 16 Huleh amah un a nungjuite uh leh Herod pawlte Amah kawmah asawl va, hute'n a kawmah, "Houtupa, midihtat na hi a, dihtahin Pathian lam thu na hilh a, mi koimah doptuam na nei sih chih ka he uhi; ajiahchu mihing koimah maaizah na nei sih hi. 17 Hujiahin, bangchi na sa ei, hung hilh in? Kaisar kawma siah tawi dih ahiai, ahihlouhleh dihlou?" achi uhi. 18 Hizongleh Jesu'n a lungsim uh giitlouh daan chu ahe a, "Milepchiahte, bang diinga hung je-et na hi viai? 19 Siah sum chu hung ensah un," achi hi. Huin a kawmah dinari khat ahung tawi uhi. 20 Huin Ama'n a kawmvah, "Hi koi lim leh koi min ahiai?" achi hi. 21 Amah un a kawmah, "Kaisar a," achi uhi. Huin Ama'n a kawmvah, "Hujiahin Kaisar silte chu Kaisar kawmah pia unla, huleh Pathian silte chu Pathian kawmah pia un," achi hi. 22 Amah un hi thute ajaah tahun thumah asa mahmah va, Amah nusiain achiahmangta uhi.
Thohkiitna Thu a Dotna
23 Hu ni mahin Sadukaite, misi thohkiitna aum sih chite, a kawmah ahung va, 24 "Houtupa, Mosi in mi ta neiloua asih leh, a sanggampa'n a ji luahin, a sanggampa diingin chi ahaahsah diing ahi, achi hi. 25 Tuin ka kawmvah unau pasal sagih aum va; aupapeen in ji anei a, asita a, chi ahaah louh jiahin a ji chu a sanggampa anuutsiatta hi. 26 Huchibangmahin anihna zong ta beiin asi a, athumna in aluah a, asagihna tan in anei chiat uhi. 27 Huleh atawp ah hu numei zong asita hi. 28 Hujiahin thohkiitna ah amahnu chu sagihte laha koipeen ji ahita diai? A bawnun lah anei chiat ngaalva," chiin adong uhi. 29 Jesu'n amahuh dawngin a kawmvah, "Pathian Lehkhathu leh Pathian silbawltheihna na heet louh jiahun na bawlkhial uhi. 30 Ajiahchu thohkiitna ah akiteeng nawn sih va, teeng zong akiteengsah nawn sih uh, himahleh vaan angelte tobang ahi uhi. 31 Hizongleh misi thohkiitna thu a Pathian in na kawmva asoi, 32 'Kei chu Abraham Pathian, Isak Pathian, huleh Jakob Pathian ka hi,' achih khu sim kha lou na hi uh maw? Pathian chu misi Pathian ahi sih a, ahingte Pathian ahijaw," achi hi. 33 Huleh mipite'n huchu ajaah tahun, a thuhilh chu thumah asa mahmah uhi.
Thupiaah Lianpeen Thu a Dohna
34 Hizongleh Jesu'n Sadukaite adongkhaah zou chih ajaah tahun Pharisaite chu akikhawm uhi. 35 Huin a lahva daansiam khat in Jesu je-etin thu khat adong a, 36 "Houtupa, daan thu ah bang ahiai thupiaah lianpeen?" achi hi. 37 Jesu'n a kawmah, "'LALPA na Pathian chu na lungtang zousiah in, na hagau zousiah in, na lungsim zousiah in na lungsiat diing ahi.' 38 Hichu thupiaah masa leh lianpeen ahi. 39 Huleh anihna chu hibangmah ahi: 'Nangmah na kilungsiat bangin na innveengte na lungsiat diing ahi.' 40 Hi thupiaah nihte ah Daan thu leh Zawlneite Lehkhabute zousiah akikhaikhawm veh hi," achi hi.
David Tapa Thu a Dohna
41 Pharisaite akikhop laiun, Jesu'n amahuh thu adong a, 42 "Khrist chu bangchiin na ngai viai? Koi Ta ahiai?" achi hi. Amah un a kawmah, "David Tapa," achi uhi. 43 Ama'n a kawmvah, "Ahihleh bangchi daana David in Hagau a Amah chu 'Lalpa,' chi a, 44 'LALPA'N ka Lalpa kawmah, "Na meelmate na keeng ngahna a ka bawl masiah ka jiatlam ah tou in,'" achih ahiai? 45 Huchia David in Amah chu 'Lalpa' achih leh, bangchidaana a Tapa hi ahiai?" achi hi. 46 Huin koima'n Amah chu kam khat in zong adawng thei sih va, hu ni akipatin koima'n thu dang mawngmawng adong kiit ngamta sih uhi.
Jesu'n Daanjilsahtute leh Pharisaite Ademna
1 Huin Jesu'n mipite leh a nungjuite kawmah thu asoi a, 2 "Daanjilsahtute leh Pharisaite chu Mosi touphah ah atou va; 3 hujiahin juih diing chia ahung hilh photmah uh, jui unla bawl jeel un, hizongleh amahuh silbawl bang chu bawl sih un, ajiahchu amah un asoi va, abawl tuan sih uhi. 4 Ajiahchu vangih puaah hah tahtah asiam va, mi liangkou ah akoih va, hizongleh amah un lah a khutzung khat un zong akhoihtaang nuam sih uhi. 5 Hizongleh amah un abawl zousiah uh chu mi muh diinga bawl ahi uhi. A silbuh uh leh a puanmong khipte uh asulian va, a puan mongte uh atualsah uhi. 6 Ankuang luinate ah mun poimohpeen leh sinagog ah touna poimohpeen bang adeih va, 7 dawlmunte a mite'n chibai abuuh uh bang, 'Rabbi, Rabbi,' chia akouh uh bang aut uhi. 8 Hizongleh nanguh chu 'Rabbi' chihin um sih un; ajiahchu na Houtupa uh khat, Khrist ngeei chu aum a, huleh na bawnun unau na hi uhi. 9 Leitung ah koima pa chi sih un, ajiahchu na Pa uh khat ahi a, Amah chu vaan a um ahi. 10 Huleh houtute chihin um sih un; ajiahchu na Houtupa uh khat aum, Khrist chu. 11 Hizongleh na lahva loupipeen chu na suaah un aum diing ahi. 12 Huleh koipouh akiliansah chu suhngiam ahi diing a, huleh koipouh kingaingiam chu tawisangin aum diing hi.
Jesu'n Pharisaite Ademna
13 "Hizongleh nanguh daanjilsahtute leh Pharisaite leh lepchiahte haw, na tunguh agih hi! Ajiahchu vaan lalgam a luut diing mite na khaahsah uh; ajiahchu nanguh lah na luut sih va, mi aluut diingte lah na luutsah sih uhi. 14 Nanguh daanjilsahtute, Pharisaite leh lepchiahte haw, na tunguh agih hi! Ajiahchu meithaite inn haw na negam va, kibawltawmin sawt pipi na haamtei uhi. Hujiahin siamlouhtanna lianseem na mu diing uhi. 15 Nanguh daanjilsahtute, Pharisaite leh lepchiahte haw, na tunguh agih hi! Ajiahchu mi khat Juda sahkhua a kiheisah diingin tuikhanglian leh gam ah na chiah kiimveel va, huleh huchia na siam zoh chiangun amah chu nanguh saanga alehniha gawtmun ta hiin na siam veu uhi. 16 Nanguh puitu mittawte haw, 'Koipouh Pathian biahinn loua kichiam chu bangma ahi sih a, hizongleh koipouh Pathian biahinn sana loua kichiam in chu ataangtun diing ahi,' chite haw, na tunguh agih hi! 17 Nanguh mingol leh mittawte haw! Ajiahchu sana ahihlouhleh sana siangthousah Pathian biahinn akhoi loupijaw ahiai? 18 Huleh, 'Koipouh maitaam loua kichiam chu bangmah ahi sih; hizongleh a tunga um silpiaah loua kichiam in ataangtun diing ahi,' na chi uh. 19 Nanguh mingol leh mittawte haw! Ajiahchu silpiaah ahihlouhleh silpiaah siangthousah maitaam chu khoi loupijaw ahiai? 20 Hujiahin koipouh maitaam loua kichiam phot in, maitaam leh a tunga um zousiah louin akichiam ahi. 21 Koipouh Pathian biahinn loua kichiam chu, Pathian biahinn leh a sunga teeng zousiah louin akichiam ahi. 22 Huleh vaan loua kichiam phot chu, Pathian laltouphah leh a tunga toupa loua kichiam ahi. 23 Nanguh daanjilsahtute, Pharisaite leh lepchiahte haw, na tunguh agih hi! Ajiahchu nang un pudina, anethon leh kummin bang sawm-a-khat na pia va, huleh daan thu poimoh jaw: thukhen dihna bang, zahngaihna bang huleh ginumna bang na ngaihsah sih uh; hite chu ahi na bawl diing uh, adangte zong bawllou tuanlouin. 24 Nanguh puitu mittawte, thousi hisiang a sangawngsau valhte haw! 25 Nanguh daanj ilsahtute, Pharisaite leh lepchiahte haw, na tunguh agih hi! Ajiahchu nang un nou leh kuang polam na susiang va, hizongleh a sung lah suammangna leh kisuumlouhna in adim hi. 26 Nang Pharisai mittaw, nou leh kuang sung lam susiang masa in, huchiin apolam zong ahung siang thei diing hi. 27 Nanguh daanjilsahtute, Pharisaite leh lepchiahte haw, na tunguh agih hi! Ajiahchu nanguh hi haan kinuhvaam a polam mawitaha kilang a, hizongleh a sunglam lah misi guh leh silbuaah a dim bang na hi uhi. 28 Hutobangin nanguh zong polam a mihing mitmuhin dihtat bangin na lang va, hizongleh na sunglam uh chu lepchiahna leh daan poisaloua gamtatna in adim hi. 29 Nanguh daanjilsahtute leh Pharisaite leh lepchiahte haw, na tunguh agih hi! Ajiahchu zawlneite haan na bawl va huleh midihtat haante zong zahtahin na jeem va, 30 huleh, 'Ka pulepate uh dam laia ana-um hileh ung, zawlneite sisan a suahna va tel lou diing hi ve ung,' na chi uhi. 31 Hujiahin zawlneite thatte tate na hi uh chih na kihesah uhi. 32 Huchiin, na pulepate uh mohna tehna sudim un. 33 Nanguh guulte, nanguh guul suante haw! Bangchiin ahiai gawtmun siamlouhtanna na pelh theih diing uh? 34 Hujiahin, ngai un, na kawmvah, zawlneite, mipilte leh daanjilsahtute ka hung sawl ahi: alahva khenkhat na that diing va, kros ah na kilhbeh diing va, huleh khenkhatte chu sinagog ahnajeep diing va, khopi khat apat khopi ah na suduhdah diing uh, 35 huchu midihtat Abel sisan kisuah apat Barakia tapa Zakaria Pathian biahinn leh maitaam kikaal a na thah uh sisan tanpha, leitung a midihtat sisan kisuah zousiah na tungva ahung tun theihna diingin ahi. 36 Chihtahzetin ka hung hilh ahi, hi silte zousiah hi khang a mite tungah ahung tung diing hi.
Jesu yn Jerusalem Akahkhumna
37 "Aw Jerusalem, Jerusalem, zawlneite anathat a, a kawma kisawlte suang a anaseplumtu! Aahpi'n a noute a ha nuaia aopkhum bangin ke'n zong na tate bangzahvei ahiai kouhkhawm ka tupta a, hizongleh na uutlouh! 38 En un! Na inn uh chu taihsana umin ahawmsuaahta hi; 39 ajiahchu ka hung hilh ahi, 'LALPA min a hung paipa chu ahampha hi,' na chih masiah uh na hung mu nawn sih diing uh," achi hi.
Jesu 'n Hun Hungtung Diing Asoilawhna
1 Huin Jesu chu Pathian biahinn apat pawtin achiahta a, Pathian biahinn kibawl daante ensah diingin a nungjuite a kawmah ahung uhi. 2 Huleh Jesu'n a kawmvah, "Hi sil zousiah na mu sih uh maw? Chihtahzetin ka hung hilh ahi, suhchip louha suang kithuap mawngmawng hitah ah khat zong aum sih diing," achi hi. 3 Huin Jesu Olive Taang tunga atou laiin, nungjuite a kawmah atuamin ahung va, "Hi silte bangchihchiangin ahung um diai? Na hung kiitna diing leh hun tawpna diing chiamchihna bang adiai? hung hilh in," achi uhi. 4 Huleh Jesu'n adawng a, a kawmvah, "Mi koimah in ahung heem louhna diingin pilvaang un. 5 Ajiahchu mi tampi ka min in ahung diing va, 'Khrist ka hi,' chiin mi tampi ahung heem diing uhi. 6 Huleh kidou leh kidou thuthangte na ja pah diing uhi. Na lungdon louhna diingun pilvaang un; ajiahchu hi silte zousiah hung um diing mawng ahi a, hizongleh atawpna ahi nai sih diing hi. 7 Ajiahchu nam tuam leh nam tuam akidou diing va, huleh lalgam tuam leh lalgam tuam akidou diing uhi. Huleh mun tuamtuam ah kial bang atung diing a, hii bang aleeng diing a, jiil bang aliing diing hi. 8 Hite zousiah chu nauvei nat kipatnaahi. 9 "Hu hun chiangin nanguh chu suhgim diingin ahung pedoh diing va, ahung that diing va, huleh ka min jiahin nam zousiah huatin na um diing uhi. 10 Huleh mi tampi apuuh diing va, khat leh khat akimansah diing va, khat leh khat akimudah diing uhi. 11 Huleh zawlnei tahlou tampi ahung pawt diing va mi tampi aheem diing uhi. 12 Huleh daan poisaloua gamtatna apun diing jiahin, mi tampite lungsiatna chu ahung daai diing hi. 13 Hizongleh atawp donga thuaah mualsuaah mi chu hutdamin aum diing hi. 14 Huleh hi lalgam tanchinpha chu nam zousiah heetsahna diingin khovel pumpi ah taangkoupihin aum diing a, huzoh chiangin atawpna chu ahung tung diing hi. 15 "Hujiahin zawlnei Daniel in anasoi 'Sumangtu kihdahum' chu mun siangthou a ding na muh chiangun" asim phot in hesiam uh heh, 16 "huchih hun chiangin Judia gam a umte taangte ah taai uh heh. 17 Inn tunga um chu a inn sungah bang aha ladoh diingin hung kumsuh sih heh. 18 Lou a um zong a puan la diingin hung kihkiit sih heh. 19 Hizongleh hu hun a gaaite leh naungeeh nawiteep neite tung agih hi! 20 Huleh na taai hun uh phalbi lai ahihlouhleh Sabbath ni ahih louhna diingin haamtei un. 21 Ajiahchu hu hun chiangin gimthuaahna nasatah um diing ahi, hutobanga gimthuaahna loupi chu khovel siam chiil apat tutanin aum ngei nai sih a, um zong aum nawn sih diing hi. 22 Huleh hu hun chu suhtom hilou hileh, mihing mawngmawng koimah hingin asuaahta sih diing hi, hizongleh teelte jiahin hu nite chu suhtom ahi diing hi. 23 Hu hun chiangin khat pouh in na kawmvah, 6 En in, hitah ah Khrist aum,' ahihlouhleh 'Hutah ah aum,' chi zongleh, tahsang sih un. 24 Ajiahchu khrist tahloute leh zawlnei tahloute ahung pawt diing va, chiamchihna leh sil loupi tahtah miheemna diingin ahung ensah diing va, huchiin ahihtheih leh, teelte ngeei zong ahung heem diing uhi. 25 Ngai un, amain ka hung hilhlawhta ahi.
Mihing Tapa Hungna Diing
26 "Hujiahin na kawmvah, 'En un, gamdaai ah aum,' ahung chih uh leh chiahdoh sih un. 'En un, pindan sunggil ah aum,' ahung chih uh leh tahsang sih un. 27 Ajiahchu suahlam a kawl ahung phet a, tumlam tan asalh vaah bangin, Mihing Tapa hung kiitna zong huchi mahbang ahi diing hi. 28 Ajiahchu saluang umna phot ah mulukolhte zong aum khawm diing hi. 29 Gimthuaahna hun zohchiangin ni chu suhmialin aum diing a, ha chu avaah nawn sih diing a, vaan apatin aahsite ahung ke diing va, vaan silbawltheihna chu suhliing ahi diing hi. 30 Hu hun chiangin vaan ah Mihing Tapa chiamchihna chu ahung kilang diing a, huleh leitung a nam zousiah in asuun diing va, huleh Mihing Tapa chu silbawltheihna leh gualzohna loupi toh vaan meipi tunga hung amu diing uhi. 31 Huleh Ama'n a angelte chu peengkuul ging nasatah toh asawl khe diing a, huleh amah un a teelte chu kawlmong ning li akipan, vaan tawp akipan alehlam tawp tanphain akhawm diing uhi. 32 "Huchiin theipi kung ah tehkhinthu jil un: A baa ahung meen a, a nah ahung sel chiangin nipi anaita chih na he uhi. 33 Huchibangmahin nang un zong hi silte na muh chiangun, Amah anaita a, kotbul mahmah ah aumta chih he un. 34 Chihtahzetin ka hung hilh ahi, hi silte tengteng atunkim masiah hi khang a mite amang sih diing uhi. 35 Vaan leh lei abeimang diing a, hizongleh ka thu amang hial sih diing hi.
Kiging Zing Diinga Hasotna
36 "Hizongleh hu ni leh ahun diing chu ka Pa chauh loungaal koimah in, vaan a angelte'n zong ahe sih uhi. 37 Hizongleh Noah damlai nite bangin, Mihing Tapa hung kiitna zong ahi diing hi. 38 Ajiahchu tuijiin tun matengin, Noah kuang a aluut ni tanin, aneun adawn va, ji leh pasalin akinei va, 39 huleh tuijiin atun a, a bawnva alaahmang masiah bangma ahe sih uh; Mihing Tapa hung kiitna zong huchi bangmah ahi diing hi. 40 Hu hun chiangin lou ah mi nih aum diing va; khat chu laahmangin aum diing a, khat chu nuutsiatin aum diing hi. 41 Numei nih buhgawina ah buh gawiin aum diing va; khat chu laahmangin aum diing a, khat nuutsiatin aum diing hi. 42 Hujiahin kigingzing un, na Lalpa uh bang chih hun a ahung diing chih na heet louh jiahun. 43 Hizongleh hichu he un, inn neitupa in guta hung diing hun he leh, aveeng diing a, a inn aluhsah sih diing hi. 44 Hujiahin nanguh zong kiging zingin um un, ajiahchu na ngaihtuah louh laitah va Mihing Tapa chu hung diing ahi. 45 "Suaah ginum leh piltah, a pu in a innkuanpihte tunga ahun chin a a an diing uh pe diinga houtu a akoih chu koi ahiai? 46 A pu ahung pai chianga huchibanga anabawl ahung muh diing hu suaah chu ahampha hi. 47 Chihtahzetin ka hung hilh ahi, ama'n amah chu aneih zousiah tunga houtu in asiam diing hi. 48 Hizongleh suaah gilou in a lungsim in, 'Ka pu chu hung baih lou diing ahi,' chi henla, 49 huleh a suaah hihpihte anavuain, zukham ankhamte kawmah nein anadawnta leh, 50 hu suaahpa pu chu agintaat louh ni, akiveen louh hun laitahin ahung diing a, 5 lhuleh amah chu atanbong diing a, milepchiahte tan bang atangsah diing hi. Huah chu kah leh hagawi aum diing hi.
Moupa Dawn Nungaah Sawmte Tehkhinthu
1 "Hu hun chiangin vaan lalgam chu nungaah siangthou sawm, a thaumei uh kenga moupa dawn diinga pawtkhete toh tehkhin ahi diing. 2 Huleh a lahvah mi ngaa apil va, ngaa angol uhi. 3 Huh angolte'n chu a thaumei uh akeng va, thautui akeng tel sih uhi. 4 Hizongleh apilte'n chu a thaumei uh toh a uum ah a tui zong akeng tel uhi. 5 Hizongleh moupa chu ahung vaaigeih jiahin a bawnun alusu va, ana-ihmu vehta uhi. 6 Huleh jaankhang laiin, 'En in, moupa ahung hi, adawn diingin pawtdoh un!' chia kikou ging aumta hi. 7 Hutahin hu nungaah siangthoute chu athou veh va, a thaumei uh adeta uhi. 8 Huleh angolte'n apilte kawmah, 'Na thautui uh hung hawm un, ajiahchu ka thaumeite uh mit diing ahita hi,' achi uhi. 9 Hizongleh apilte'n adawng va, 'Keiuh leh nanguh diing akidaih sih diing hi; hizongleh ajuaahte kawmah vachiah unla vakilei un,' achi uhi. 10 Huleh amahuh alei diinga avachiah kaalun, moupa chu ahungta a, huleh kigingsa a ana-umte chu amah toh moulopna inn ah aluut khawmta va; huin kot chu akikhaahta hi. 11 Hu nungin hu nungaah siangthou dangte zong ahung va, 'Lalpa, Lalpa, kot hung hon in!' achi uhi. 12 Hizongleh ama'n adawng a, 'Chihtahzetin ka hung hilh ahi, nanguh ka hung he sih,' achi hi. 13 Hujiahin kigingzing un, ajiahchu Mihing Tapa hung diing ni leh ahun na he sih uhi.
Talent Tehkhinthu
14 "Ajiahchu vaan lalgam chu mi khat in a suaahte kou khawm a, a neihlelamte a khut va keemsah a, khual gamlataha zinmang tobang ahi. 15 Huleh ama'n a suaah khat kawmah talent ngaa, a suaah dang khat kawmah talent nih, huleh a suaah dang khat kawmah talent khat apia a; amah un ahih theih hun diing chiat un apia a, amah chu azin pah ngaal hi. 16 Huin talent ngaa tangpa chu kuanin avasumdawng pah a, talent ngaa dang mah amuh beh hi. 17 Huleh huchibangmahin talent nih tang pa'n zong talent nih amuh beh hi. 18 Hizongleh talent khat tangpa chu chiahin lei atou a, huleh a pu dangka chu aphuumta hi, 19 Hun sawttah nungin hu suaahte pu chu ahung tunga amahuh toh sum asutuaahta hi. 20 Huin talent ngaa tangpa ahung a, talent ngaa dang ahung tawi beh a, 'Pu, nang talent ngaa na hung keemsah a; en in, talent ngaa dang ka muh beh hi,' achi hi. 21 A pu in a kawmah, 'Suaah hoih leh ginum, na bawl hoih hi; sil tawmtakhat tungah na ginum a, sil tampi tungah thuneituin ka hung koih diing hi. Na pu kipaahna ah luut in,' achi hi. 22 Talent nih tangpa zong ahung a, 'Pu, nang talent nih na hung keemsah a; en in, talent nih ka muh beh hi,' achi hi. 23 A pu in a kawmah, 'Suaah hoih leh ginum, na bawl hoih hi; sil tawmtakhat tungah na ginum a, sil tampi tungah thuneituin ka hung koih diing hi. Na pu kipaahna ah luut in,' achi hi. 24 Huin talent khat tangpa chu ahung a, 'Pu, mi kheltah na hi a, na tuh louhna ah na aat a, na theh louhna ah zong na khawm jeel chih ka hung he hi. 25 Huleh ka hung lau a, vachiahin na talent chu lei nuaiah ka vaphuum hi. En in, hitah ah nang a mah na kimuh kiitta hi,' achi hi. 26 Hizongleh a pu in adawng a, a kawmah, 'Nang suaah gilou leh thasepa, ka tuh louhna ah ka aat a, huleh ka theh louhna ah ka lakhawm veu hi chih na he maw? 27 Huchi ahihleh ka dangka chu suminn ah na vakoih diing a, huchia ka hung chianga ka sum chu apung toh ka muh kiit diing ahi. 28 Hujiahin a talent chu amah apat laahsah unla, talent sawm neitu kawmah pia un. 29 Ajiahchu koipouh anei chu piaah beh ahi diing a, tampi ahung nei diing; hizongleh koipouh anei lou chu aneihsun ngeei zong laahsah ahi diing hi. 30 Huleh suaah manlouh chu polam mial ah paaikhia un. Hu ah chu kah leh hagawi aum diing hi,' achi hi.
Vaihawmna Ni
31 "Mihing Tapa chu angel siangthou zousiah toh a loupina a ahung chiangin, Amah chu a loupina laltouphah tungah atou diing hi. 32 A ma ah nam zousiah khopkhawm ahi diing a, Ama'n amahuh haw chu belaampu in keel lah apat belaamte akhenkhiah bangin akhen diing hi. 33 Huleh belaamte chu a jiatlam ah akoih diing a, hizongleh keelte chu a veilam ah akoih diing hi. 34 Huchiangin Kumpipa in chu a jiatlam-ate kawmah, 'Nanguh ka Pa deihsahte, hung unla khovel siam chiil apat a nanguh diinga kibawl lalgam chu luah un. 35 Ajiahchu ka gil akialin an na hung pia va; ka dang ataahin dawn diing na hung pia va; mikhual ka hihin na hung zintun va; 36 Saguaaha ka umin puan na hung silhsah va; damloua ka umin na hung veh va; suangkul a ka taanin ka kawmah na hung uh,' achi diing hi. 37 Huchiangin midihtatte'n, 'Lalpa, bangchihin ahiai gilkial a ka hung muh va an ka hung piaah uh, ahihlouhleh dangtaaha ka hung muh va dawn diing ka hung piaah uh? 38 Bangchiin ahiai mikhual a ka hung muh va ka hung na zintun uh, ahihlouhleh saguaaha ka hung muh va puan ka hung silhsah uh? 39 Ahihlouhleh bangchihin ahiai china aha ahihlouhleh suangkul a na taan aha ka hung muh va na kawma ka hung uh?' chiin adawng diing uhi. 40 Huleh Kumpipa'n chu adawng diinga a kawmvah, 'Chihtahzetin ka hung hilh ahi, hi ka unaute laha neupeen khat tunga na bawl uh chu ka tunga bawl na hi uh,' achi diing hi. 41 Huzoh chiangin a veilam a umte kawmah, 'Nanguh haamsethuaahte, ka kawm apat chiahmang unla, kumtuang mei, diabol leh a angelte diinga kibawl ah luutta un. 42 Ajiahchu ka gilkialin an na hung pe sih va; ka dangtaahin dawn diing na hung pe sih va; 43 mikhual ka hihin na hung zintun sih va, saguaah ka hihin puan na hung silhsah sih va, ka chinat a suangkul a ka taan in na hung veh sih uhi,' achi diing hi. 44 Huchiangleh amah un zong adawng diing va, 'Lalpa kei un bangchihin ahiai gilkial aha, dangtaah aha, mikhual aha, saguaah aha, damlouaha, suangkul taang aha a ka hung muh va, na nna ka hung tohsah louh uh?' achi diing uhi. 45 Huchiangin Ama'n adawng diing a, 'Chihtahzetin ka hung hilh ahi, hite laha neupeen khat tunga na bawl louh uh chu ka tunga bawl lou na hi uhi,' achi diing hi. 46 Huleh hute chu kumtuang gawtmun ah achiahta diing va, hizongleh midihtatte chu kumtuang hinna ah achiahta diing uh," achi hi.
Jesu Thah tum a Thuphialna
1 Huleh hichi ahung hi a, Jesu'n hi thute asoi zohin a nungjuite kawmah, 2 "Ni nih zoh chiangin Chiahkaan Kuut aum diing a, huleh Mihing Tapa chu kilhbeh diinga matsahin aum diing chih na he uhi," achi hi. 3 Huin siampu lalte leh daanjilsahtute leh mipi upate chu siampu lalpeen Kaiapha achih uh innpi ah akikhawm va, 4 huleh Jesu chu dohabawla man a athah theihna diingun akihou khawm uhi. 5 Hizongleh, "Kuut laiin hihdah heh, huchilou inchu mipite lahah buaina ahung um kha diing," achi uhi.
Bethani a Jesu Thaunuhna
6 Huleh Jesu chu Bethani khua a miphaah anahi Simon inn a aum laiin, 7 numei khat alabaster buuh a thau namtuui luultah tawiin a kawmah ahung a, ankuang a atou laiin a lu ah aleih hi. 8 Hizongleh a nungjuite'n hichu amuh tahun, alungkimta sih va, "Bang diinga hikhu mathaanga subei ahiai? 9 Ajiahchu hi thau hi man tamtaha juaaha mi gentheite kawma piaah theih ahi ngaala," achi uhi. 10 Hizongleh Jesu'n hichu aheetin akawmvah,"Bangdiingahinumei nu subuai na hi viai? Ajiahchu amahnu'n ka tunga sil hoihtah bawl ahi. 11 Ajiahchu migentheite na kawmvah aum zing va, hizongleh kei chu na kawmva um zing ka hi sih hi. 12 Ajiahchu hi thau namtuui ka tunga aleih chu vuia ka um ni a diingin ahih ahi. 13 Chihtahzetin ka hung hilh ahi, khoimun ah zong khovel pumpi ah hi tanchinpha kisoina phot ah, hi numeinu silbawl zong amahnu heetzingna diingin akisoi diing hi," achi hi.
Juda Lepchiahna
14 Huin sawmlenihte laha khat, Juda Iskariot achih uh chu siampu lalte kawmah avachiah a, 15 huleh a kawmvah, "Jesu ka hung pekhe diinga bang na hung pe diviai?" avachi hi. Huleh amah un dangka sawmthum piaah diingin akihoulempihta uhi. 16 Huchiin hu nungsiah chu Juda in Amah matsahna diing lemtaang ahawlta hi.
Chiahkaan Kuut Kisingsahna
17 Huchiin Tolsohlouh Tanghou Kuut ni masapeen in nungjuite Jesu kawmah ahung va, a kawmah, "Chiahkaan an na neehna diing khoimun ah hung guatsah leh ung na deih ei?" achi uhi. 18 Huleh Ama'n "Khopi ah valuut unla mi khat kawmah, 'Houtupa'n, "Ka hun anaita a, ka nungjuite toh na inn ah Chiahkaan an ka ne khawm diing uh," achi hi,' vachi un," achi hi. 19 Huchiin a nungjuite'n Jesu'n ahilh bangin abawl va, Chiahkaan an chu abawl zouta uhi.
Nitaah Ankuang Nunungpeen
20 Huin nitaahlam ahung hihin, nungjui sawmlenihte toh ankuang auum uhi. 21 Huleh aneeh laiun Ama'n, "Chihtahzetin ka hung hilh ahi, na lahva khat in kei ahung mansah diing hi," achi hi. 22 Amahuh chu alungdong mahmahta va a kawmah, "Lalpa, kei ka hi maw?" achi chiatta uhi. 23 Huin Ama'n adawng a, "A khut a kuang hung sawhpihpa ngeei in kei ahung mansah diing hi. 24 Mihing Tapa chu a tanchin kigial bangjeelin apai diing a, hizongleh Mihing Tapa mansah diingpa tung agih hi! Hu mi chu anapianglou hileh amah diingin ahoihjaw diing hi," achi hi. 25 Huin amansahtupa Juda in adawng a, "Rabbi, kei ka hi maw?" achi hi. Ama'n a kawmah, "Nangma'n na chita hi," achi hi. 26 Huleh an aneeh laiun, Jesu'n tanghou ala a, avangpiaah a, abalkeeh a, huleh nungjuite apia a, "La unla, ne un; hichu ka tahsa ahi," achi hi. 27 Huin nou ala a kipaahthu asoi zohin, a kawmvah apia a, "Na bawnun dawn un. 28 Ajiahchu hichu sualnate ngaihdamna diinga mi tampite diinga pawt thuhun thah a ka sisan chu ahi. 29 Hizongleh ka hung hilh ahi, ka Pa lalgam a nanguh toh athaha ka dawn ni atun masiah, tukal greptui ka dawn kiit nawn sih diing hi," achi hi.
Nungjuite Kiheetmohbawl Diing Soilawhna
30 Huleh amah un la khat asah zoh un, apawt va Olive Taang ah achiahta uhi. 31 Huin Jesu'n a kawmvah, "Tu jaan chiangin kei jiahin na bawnun puuhsah vehin na um diing uhi; ajiahchu, 'Belaampu ka jeep diing a, belaam hon chu adalhjaah diing uh,' chih gelh ahi. 32 Hizongleh ka thohkiit nung chiangin Galili gam ah na ma vah ka na chiah masa diing hi," achi hi. 33 peter in adawng a, a kawmah, "Mi zousiah nang jiahin puuhsahin um zongleh uh, kei chu ka puuh het sih diing," achi hi. 34 Jesu'n akawmah, "Chihtahzetin ka hung hilh ahi, tu jaan ngeeiin aah khuan main thumvei na hung kiheetmohbawl diing," achi hi. 35 Peter in a kawmah, "Nang toh si khawm diing hi zongleng, ka hung kiheetmohbawl hial sih diing hi!" achi hi. Humah bangin nungjuite zousiah in zong achi chiat uhi.
Jesu Gethsemani Huan ah
36 Huin Jesu chu amahuh toh mun khat Gethsemani achih uh atung a, huleh Ama'n a nungjuite kawmah, "Paam a ka vahaamtei kaalin hitah ah anatou un," achi hi. 37 Huleh Ama'n Peter leh Zebedi tapate nih apui a, lungkhamin amangbangta mahmah hi. 38 Huin Ama'n a kawmvah, "Ka hinna sihna khop hialin alungngai hi. Hitah ah um unla hung veenpih un," achi hi. 39 Huin Amah chu themkhat chiah gamla deuhin akhupboh a, "Aw ka Pa, ahihtheih leh, hi nou hung peelsah in; ahihvaangin keimah thu hilouin, hizongleh nangmah thuthu hijaw heh," chiin ahaamtei hi. 40 jiuin nungjuite kawmah ahung a, amahuh chu ihmuin ahung mu a, huleh Peter kawmah, "Nang un daahkaal khat zong hung veenpih zoulou na hi uh maw? 41 Heemna a na luut louhna diingun kigingzing unla haamtei un. Tahzetin hagau in chu apeih a, hizongleh tahsa chu achau hi," achi hi. 42 Anihveina ah Amah avachiah kiit a, "Pa Aw, ka dawn louha hi nou in hung peel theilou ahihleh, nang thuthu hita heh," chiin ahaamtei hi. 43 Huleh ahung a, amahuh ihmuin ahung mu kiit a, ajiahchu a ihmut uh asuaah mahmah hi. 44 Huchiin amahuh anusia a achiah kiit a, athumveina ah asoi ngei soiin ahaamtei kiit hi. 45 Huin a nungjuite kawmah ahung a, a kawmvah, "Nanguh ihmu a tawldam nalai na hi uh maw? En un, ahun ahung tungta a, Mihing Tapa chu misualte khut ah matsah ahita. 46 Thou un, i chiah diing uh; en un, kei hung mansahtu chu ahungta hi," achi hi.
Jesu Matsahna
47 Huleh thu asoi zing laiin, en un, sawmlenihte laha khat, Juda chu siampu lalte leh upate kawm apat mipi nasatahmei naamsau leh khetbuuh tawite toh ahungta uhi. 48 Huin amansahtu diing pa in amahuh chiamchihna ahilh masa a, "Ka tawp peenpeen Amah ahi diing hi, Amah chu man un," achi hi. 49 Huin ama'n chu Jesu ahung juan pah a, "Chibai, Rabbi!" achi a, huin Amah chu atawp hi. 50 Jesu'n a kawmah, "Lawm, bang diinga hung na hiai?" achi hi. Huin amahuh ahung va Jesu tungah khut aha va, amanta uhi. 51 Huleh thakhatin, Jesu umpihte laha mi khat in a khut zamin a naamsau azandoh a, siampu lalpeen suaahpa asaat a, a bil asaatkhiahsah hi. 52 Huin Jesu'n a kawmah, "Na naamsau a paai ah koih kiit in, ajiahchu naamsau pan photmah naamsau mah a si diing ahi uhi. 53 Huleh tu mahmah a zong ka Pa kawma ngeen a, Ama'n angel legion sawmlenih saanga tamjaw hung sawl theilou sa na hi uh maw? 54 Hizongleh huchi hitaleh, Pathian Lehkhathu hitobanga hung um ngeei diing chu bangchiin ataangtung theita diai?" achi hi. 55 Hu daahkaal mahin Jesu'n mipite kawmah, "Suammangtu man diing bang hialin naamsau leh khetbuuhte toh kei man diingin na hung kuan uh maw? Ni chinin nanguh toh Pathian biahinn ah thuhilhin ka tou a na hung man sih uhi. 56 Hizongleh zawlneite Lehkhathu ahung taangtun theihna diinga hite zousiah hung um ahi," achi hi. Huin hungjuite zousiah in Amah chu anusia va ataaita uhi.
Jesu Siampu Lalpeen Ma a Dinna
57 Huleh Jesu mantute'n Amah chu siampu lalpeen Kaiapha inn a daanjilsahtute leh upate umkhawmna ah apui uhi. 58 Hizongleh Peter in siampu lalpeen innpi dongin agaal juih hi. Huleh avaluut a, atawpna heet tumin suaahte lahah avatou hi. 59 Huin siampu lalte leh upate leh vaihawmte zousiah in Jesu athah theihna diingun Amah kalha heetpihtu dihlou ahawl va; 60 hizongleh amu sih uhi. Heetpihtu dihlou tamtah ahimg vaangun, amu tuan sih uhi. Hizongleh atawp ah heetpihtu dihlou nih ahung va, 61 "Hi Pa'n, 'Pathian biahinn susia a, ni thum sunga bawlkiit thei ka hi,' achi hi," achi uhi. 62 Huleh siampu lalpeen chu adingdoh a, a kawmah, "Bangma dawnglou diing maw? Hite'n nang ahung heehnate uh bangchidaan ahiai?" achi hi. 63 Hizongleh Jesu chu ahaam keei sih hi. Huin siampu lalpeen in a kawmah, "Pathian hing min in ka hung kichiamsah ahi: Pathian Tapa Khrist na hih leh hihlouh hung hilh in," achi hi. 64 Jesu'n a kawmah, "Na chita hi. Ahihvaangin, ka soi kiit ahi, tunung chiangleh Mihing Tapa chu Silbawltheihna jiatlam a tou a, huleh vaan meipi tunga hung na mu diing uhi," achi hi. 65 Huin siampu lalpeen in a puan abotkeeh a, "Pathian asoisia hi! Heetpihtu dang bang diing i chi nalai diai? Ngai un, Pathian a soisiatna chu tuin na jata uhi. 66 Bang na chi ngaih viai?" achi hi. Amah un adawng va, "Si taah ahi," achi uhi. 67 Huin a maaitang a chil siatin atuum va, adangte'n a khutpeeh un abeeng va, 68 "Nang Khrist, hung hilh in! Koi ahiai ahung beeng?" achi uhi.
Peter in Jesu Akiheetmohbawlna
69 Huin Peter chu polam a huang sungah atou a, huleh a kaWmah suaah numei khat ahung a, "Nang zong Galili mi Jesu toh lawikhat na hi," achi hi. 70 Hizongleh ama'n chu, "Na thusoi ka he sih," chiin a bawnva ma ah akiheetmohbawl hi. 71 Huleh innliim a avapawt tahin numei dang khat in amah chu anamu a, hu mun a umte kawmah, "Hi pa zong Nazareth Jesu toh lawikhat ahi," achi hi. 72 Huin ama'n, "Hupa jaw ka he sih," chia kichiamin akiheetmohbawl kiitta hi. 73 Huleh tomkhat zouin hu mun a dingte ahung va, Peter kawmah, "Nang zong a lahva khat na hi tahzet hi, ajiahchu na haam in zong akihe hi," achi uhi. 74 Huin ama'n, "Hupa chu ka he sih!" chiin haamsia kilohin akichiamta hi. Huleh aah akhuang pah ngaal hi. 75 Huleh Peter in Jesu thusoi, "Aah khuan main thumvei na hung kiheetmohbawl diing," achih chu ahung hedohta a, huin polam ah apawt a, hah kahin akapta hi.
Vaihawmpawl Ma ah Jesu
1 Jiingkaal ahung hihin siampu lalte leh vaantaang upate zousiah Jesu thahna diingin akihoukhawm uhi. 2 Huin Amah chu akaan zohun, apui va gamoptu Pontia Pilat kawmah apekheta uhi.
Juda Sihna
3 Huin amansahtu Juda in Jesu siamlouh atangsah uh chih aheetin akisiih a, hu dangka sawmthum chu siampu lalte leh upate kawmah ahung tawi kiit a, 4 "Mohnabei sisan ka matsah jiahin ka sual ahi," achi hi. Huleh amah un, "Hu keiuh diingin bang akhawh diai? Nang na lohloh kilohta in," achi uhi. 5 Huin ama'n dangka chu Pathian biahinn sunga sepluutin apawt a, chiahin avakikhailumta hi. 6 Hizongleh siampu lalte 'n dangka chu ala va, "Sisan man ahih jiahin hichu thohlawm bawm a koih asiang sih hi," achi uhi. 7 Huleh akihoukhawm va, mikhual vuina diingin hu sum in beelkhengtu mun aleita uhi. 8 Hujiahin hu mun chu tutanin Sisan Mun achi uhi. 9 Huchiin zawlnei Jeremia thusoi, "Israel tate lahah Amah man diing koite aha in anasahsa uh dangka sawmthum chu ala va, 10 huleh LALPA'N kei ahung thuhilhtaah bangin, beelkhengtu mun man leina diingin azangta uhi," chih chu hung taangtung ahita hi.
Jesu Pilat Ma ah
11 Huin Jesu chu gamoptu ma ah ading a, huleh gamoptu'n, "Judate Kumpipa na hi maw?" chiin adong a, huchiin Jesu'n a kawmah, "Na soi bangin ahi," achi hi. 12 Huleh siampu lalte leh upate'n Amah aheeh laiun, bangmahin adawng sih hi. 13 Huin Pilat in a kawmah, "Ahung heehna zoujaai uh ja lou na hi maw?" achi hi. 14 Himahleh Ama'n kam khat in zong adawng sih a, huphetin gamoptu'n thumah asa mahmah hi.
Jesu Kilhbeh Diinga Piaahkhiahna
15 Huleh gualvaah ni chianga gamoptu'n suangkul taang khat mipite'n ateel peenpeen uh ahahsah ngeina ahi hi. 16 Hulaiin Barabba achih uh suangkul taang giloutah khat aum hi. 17 Hujiahin amahuh ahung kikhop tahun Pilat in a kawmvah, "Koijaw ka hung hahdohsah na deih viai? Barabba ahiai, ahihlouhleh Jesu Khrist kichipa?" achi hi. 18 Ajiahchu thangsiat jiaha amatsah uh ahi chih ahe hi. 19 Vaihawmna touphah a atou laiin, a ji in a kawmah mi asawl a, "Hu Mi dihtat tungah bangmah bawl sin, ajiahchu Amah jiahin tuni'n ka mang in sil tampi ka thuaah hi," avachisahta hi. 20 Hizongleh siampu lalte leh upate'n Barabba chu ngeen a Jesu chu sulum diingin mipite athuzoh uhi. 21 Hizongleh gamoptu'n adawng a, a kawmvah, "Nihte lah a koijaw hung hahkhe leng chi na hi viai?" achi hi. Amah un, "Barabba!" achi uhi. 22 Pilat in a kawmvah, "Ahihleh Khrist kichi Jesu bang ka lohta diai?" achi hi. Amah un a bawnun a kawmah, "Kros ah kilhbehin um heh," achi uhi. 23 Huin gamoptu'n, "Bang jiahin eimaw, bang bawlsual anei ei?" achi hi. Amah un a bawnun, "Kros ah kilhbehin um heh," chiin akikou seem uhi. 24 Pilat in bangmah loh theihlouh leh buaina seemseem hi diing ahi chih amuh tahin, tui ala a mipi ma ah a khut silin, "Hi midih sisan ah mohna bei ka hi. Nang un na lohloh kiloh un," achi hi. 25 Huleh mipi zousiah in adawng va, "A sisan phuba chu keiuh tung leh ka tate uh tungah tu heh," achi uhi. 26 Huin ama'n Barabba chu a kawmvah ahahdohsahta a; huleh Jesu chu ajeep zohin kilhbeh diingin apedohta hi.
Sepaihte'n Jesu Asimmohbawlna uh
27 Huin gamoptu sepaih honte'n Jesu chu Praitoriam ah apuiluut va, a kawmah sepaih hon a bawnun akhawm uhi. 28 Huleh Amah puan ahawhkhiahsah va, puansandup asilhsahuhi. 29 Huinlinglukhuh aphan va, akhuhsah va, a khut jiatlam ah sialluang atawisah uhi. Huleh a ma ah akhuupdin va, "Chibai, Judate Kumpipa!" chiin chiamnuih bawlna in anei uhi. 30 Huin Amah chu chil aphih khum va, sialluang chu laahsahin a lu jeepna in anei uhi. 31 Huin chiamnuih bawlna a aneih zoh un, puan sandup chu ahawhkhiahsah va, Amah puan ngeei asilhsah kiit va, huleh kilhbeh diingin apuita uhi.
Jesu Kikilhbehna
32 Huleh ahung pawtdoh tahun, Kureni mi a min Simon kichi mi khat amu va, amah chu a kros po diingin apawngbawl uhi. 33 Huleh Golgotha kichi mun ahung tun un, huchu Luguh Mun, chihna ahi a, 34 Amah chu uain thuuh, silkha toh kihal dawn diingin apia uhi. Hizongleh Ama'n huchu achiam a, adawn nuamta sih hi. 35 Huin Amah chu kros ah akilh va, aisaanin a puansilhte chu akihawm uh, zawlnei in, "Ka puante chu akihawm va, ka puannaah tungah ai asaan uh," chia anasoi ataangtunna diingin. 36 Huleh hutah ah atou va Amah chu aveengta uhi. 37 Huin akiheehna, HICHU JUDATE KUMPIPA JESU AHI, chia kigial chu a lu tungah ataah uhi. 38 Huin Amah toh suamhaat mi nih zong akilhbeh va, a jiatlam ah khat, a veilam ah khat. 39 Huleh mi vaahleh phot in a lu uh thingin chiamnuihin asoisia va, 40 "Nang9 Pathian biahinn susia a ni thum sunga bawlkiit diingpa, nang leh nang kihundamta'n! Pathian Tapa na hihleh, kros dawn apat hung kum khia in," achi uhi. 41 Humah bangin siampu lalte'n zong chiamnuihin, daanjilsahtute leh upate toh, 42 "Ama'n midang ahundam a, Amah leh Amah lah akihundam thei sih hi. Israelte Kumpipa ahihleh, kros dawn apat hung kumkhia heh, huchileh ka gingta mei diing uhi. 43 Ama'n Pathian amuang vele; Amah deih ahihleh, tuin hunkheta hen, 'Pathian Tapa ka hi,' achi ngaala," achi uhi. 44 Hu suamhaatte, Amah toh kikilhbehte'n zong huchibangmahin ahousia uhi.
Jesu Sihna
45 Huleh daah guup apatin daah kuahna tandongin leitung pumpi ahung mialta hi. 46 Huin daah kuahna diing veelin Jesu chu aw ngaihtahin akikou a, "Eli, Eli, lama sabakthani?" achi hi, huchu, "Ka Pathian, ka Pathian, bang diinga hung taaisan na hiai?" chihna ahi. 47 Amah kawma ding khenkhatte'n huchu ajaah tahun, "Hi Pa'n Elijah akou ahi," achi uhi. 48 A lahva mi khat ataai pah a, spanji ala a, uain thuuh ah adiah a, sialluang mong ah ataah a, adawn diingin ape tou hi. 49 Adangte'n chu, "Huchisah in; Amah hundam diingin Elijah ahung na eimah i en diing uh," achi uhi. 50 Jesu chu aw ngaihtahin akikou kiit a, a hagau ahahta hi. 51 Huleh en in, Pathian biahinn a puanjaah chu atunglam apat anuailam tanin keeh nih ahung kisuah hi; huleh jiil ahung liing a, suangpite ahung pawhkeeh a, 52 huleh haante ahung kihong a; misiangthou ihmusate sapum tampi kaihthohin aumta va; 53 huleh Amah thohkiit nungin haante apat hung pawtdohin khopi siangthou ah aluut va, mi tampi kawmah akilaah uhi. 54 Huin sepaih zahoutu leh a kawma Jesu veenga umte'n jiilliing leh sil hung umte amuh tahun nasatahin alauta va, "Hichu Pathian Tapa tahzet ahi," achi uhi. 55 Huleh Galili gam apat Amah nna atohsah jeel kawmva Jesu hung jui numei tamtah hu mun ah aum va, gaal gamlatah apatin aen zing va, 56 hute lahah chu Mari Magdalini, Jakob leh Jose nu Mari, huleh Zebedi tate nu chu aum uhi.
Jesu Vuina
57 Huleh nitaahlam ahung hihin, Jesu nungjui hive, Arimathia khua a um a min Joseph kichi, mihausa khat ahung hi. 58 Hi pa chu Pilat kawmah achiah a Jesu luang angeen hi. Huin Pilat in a luang chu piaah diingin thu apia hi. 59 Huleh Joseph in Jesu luang chu ala a, puan neem siangtahin atuam a, 60 huleh a haan thah suang khuaah hawm ah asial a, huleh haan kot ah suang lianpi khat aliihluut a, achiahta hi. 61 Huleh Mari Magdalini leh Mari dang hutah ah, haan majawn ah touin aum uhi.
Haan Veengtu Kikoihna
62 Huleh ajiingni, huchu khawlni diinga Kisahkhawl ni jiingni ahi a, siampu lalte leh Pharisaite chu Pilat kawmah ahung khawm va, 63 "pu? hu miheem haatpa'n adam laia, 'Ni thum nungin ka thoukiit diing,' achih ka hezing uhi. 64 Hujiahin haan chu ni thum ni tan hoihtaha veen diingin thu pia in, huchilou inchu jaan chiangin a nungjuite hungin a luang avagu diing va, mipi lahah 'Misi lah akipatin athoukiitta hi,' achi kha diing uhi. Huchileh heembawlna masa saangin heembawlna nunung asejaw kha diing hi," achi uhi. 65 Plat in a kawmvah, "Veengtu mi na nei uh ahi sih maw; chiah unla na theih patawp un veeng hoihsahta un," achi hi. 66 Huchiin achiah va haan chu hoihtahin aenchian va, a suang achiamchih va veengtu akoihta uhi.
Jesu Thohkiitna
1 Huin Sabbath ni beizoh, hapta ni masapeen diing khua ahung vaah kuanin, Mari Magdalini leh Mari dang chu haan en diingin ahung uhi. 2 Huleh en in, jiil nasatahin ahung liing hi; ajiahchu Lalpa angel khat vaan apatin ahung kumsuh a, haan kot apat suang aliih khia a, a tungah atouta hi. 3 A meel kilat daan chu kawlphe bangmai ahi a, huleh a paunsilh chu vuuh bangin avaam hi. 4 Huleh amah alauh jiahun veengtute chu akithing va, misi bangin ahung umta uhi. 5 Hizongleh angel in numeite ahoupih a, a kawmvah, "Lau sih un, Jesu kilhbeha um chu na hawl uh, chih ka he hi. 6 Amah hitah ah aum sih, ajiahchu Ama'n asoi bangin athouta hi. Hung unla, Lalpa lupna mun hung enmah un. 7 Huleh kintahin chiah unla nungjuite kawmah misi lah apatin Amah athoukiitta hi, chih vahilh un, huleh ngai un, Galili gam lamah na ma vah achiah hi; hu mun ah Amah na mu diing uh. Ngai un, ka hung hilh zouta hi," achi hi.
Numeite Kawma Jesu Kilaahna
8 Huchiin amahuh chu lau leh kipaah mahmah kawmin haan apatin kintahin achiah va, a nungjuite vahilh diingin ataaita uhi. 9 Huleh a nungjuite vahilh diinga achiah laiun, en in, Jesu'n amahuh anatuaah a, "Chibai," achi hi. Huin amahuh ahung va, a keengte tuin abia uhi. 10 Huin Jesu'n a kawmvah, "Lau sih un; chiah unla ka unaute Galili gam a chiah diingin vahilh un, huleh hu mun ah ahung mu diing uhi," achi hi.
Sepaihte Golhguuhna
11 Huin amahuh achiah laiun, en in, veengtute khenkhat khopi sungah ahung va siampu lalte kawmah sil umdaan zousiah avahilh uhi. 12 Huleh upate toh akikhop va akihoutuah zohun, sepaihte kawmah sum tampi apia va, 13 a kawmvah, "'Jaan in ka ihmut kaal un a nungjuite ahung va, Amah anaguta uh,' chi un. 14 Huleh gamoptu'n anajaah leh, kei un amah ka thuzoh diingva nanguh ka hung hunkhe na diing uh," achi uhi. 15 Huchiin sum chu ala va amahuh ahilh bang ngeeiun abawlta va; huleh hi thu chu Judate lahah adalhjaah a tuni tanin akisoi nalai hi.
Thupiaah Tawpna
16 Huin nungjui sawmlekhatte chu Galili gam ah Jesu'n aguatsah taang ah achiah uhi. 17 Huleh Amah amuh tahun abia va, hizongleh khenkhat in aginglel uhi. 18 Huin Jesu chu a kawmva hungin amahuh ahoupih a, "Vaan leh lei a thuneihna zousiah ka kawmah piaah ahita. 19 Hujiahin chiah unla, nam chin laha mi nungjuiin siam unla, Pa leh Tapa leh Hagau Siangthou min in baptis unla, 20 thu ka hung piaah zousiah jui diingin thuhilh un; huleh ngai un, kei bangchihtanin khovel tawp dongin na kawmvah ka um zing diing hi," achi hi. Amen.
Baptistu Johan leh a Thupuaah
1 Pathian Tapa, Jesu Khrist tanchinpha hung kipatna; 2 Zawlneite Lehkhabute ah hichiin anakigial hi: "En in, ka thangkou na ma ah ka sawl a, Ama'n na lampi asial diing hi." 3 "Gamdaai a kikou aw in: 'LALPA lamlian sial unla, a lampite hihtang un,'" chiin. 4 Johan in gamdaai ah abaptis a, sualte ngaihdamna diinga kisiihna baptis thu ataangkoupih hi. 5 Huleh Judia Gam mi zousiah leh Jerusalem a umte chu apawt va, a kawmah avachiah va, a sualte uh kiphuangin Jordan Luui ah baptisma atang chiat uhi. 6 Huleh Johan in sangawngsau mul a kibawl puan asilh a, a kawng chu savun kawnggaah in agaah a, huleh khaukhup leh gam khuaizu ane hi. 7 Huleh, "Ka nung ah kei saanga lianjaw khat ahung a, kei chu kuuna a keengtophah khau suut taah zong ka hi sih hi. 8 Ke'n chu tui ah ka hung baptis ngeei a, hizongleh Ama'n chu Hagau Siangthou in nanguh ahung baptis diing," chiin ataangkoupih hi.
Jesu Baptisma Tanna
9 Hu hun laiin hichi ahung hi a, Jesu chu Galili gam a Nazareth apatin ahung a, Jordan ah Johan in baptisma atangsah hi. 10 Huleh Jesu tui lah apat ahung pawt tahin, vaan kihong leh Hagau vakhu banga a tunga hung kumsuh amu pah hi. 11 Huin vaan apatin aw khat ahung ging a, "Nang ka Tapa deihtah na hi a, na tungah ka kipaah mahmah hi," achi hi.
Jesu Heema Aumna
12 Huleh Hagau in kintahin Amah chu gamdaai ah asawldoh pah hi. 13 Huleh ni sawmli gamdaai ah Setan in aheem a, gamsate lahah aum a, angelte'n a nna atohsah uhi.
Galili a Jesu Thusoina
14 Huin Johan suangkul a khuma aum zohin, Jesu chu Pathian lalgam tanchinpha soiin Galili gam ah ahung a, 15 huleh, "Ahun atungta a, Pathian lalgam anaita hi. Kisiih unla tanchinpha gingta un," achi hi.
Nungjui Masate Kouhna
16 Huleh Galili Diil geia avaahna ah Simon leh a sanggampa Andiu diil a leen sep amu hi, ajiahchu amahuh ngamanmi ahi uhi. 17 Huin Jesu'n a kawmvah, "Hung jui un, mihing mantuin ka hung siam diing," achi hi. 18 Huleh amah un a leente uh nusiain Amah ajui pah uhi. 19 Hu apat Amah themkhat achiah gamlaat leh Zebedi tapa Jakob leh a sanggampa Johan amu hi, amahuh zong a leen uh phoh a kuang a um mah ahi uhi. 20 Huleh Ama'n amahuh akou pah a, huin amah un a pa uh Zebedi toh a thalaahte uh kuang a nusiain Amah ajuita uhi.
Dawi Niin Paai Suhdamna
21 Huin amahuh chu Kapernaum ah aluut va, huleh Amah chu Sabbath ni'n sinagog ah aluut pah a, thu ahilh hi. 22 Huleh amah un a thuhilh chu limdang asa mahmah uhi, ajiahchu Ama'n daanjilsahtute bang hilouin, thuneitahin amahuh thu ahilh hi. 23 Huin sinagog ah hagau niin paai mi khat ana-um a, huleh amah chu akikoudoh a, 24 "Nazareth Jesu, ka tangun hung umsah in! Nang leh kei un bang kizopna ahiai i neih? Kei uh sumang diinga hung na hi maw? Nang koi na hiai chih ka hung he hi, Pathian Misiangthou na hi!" chiin. 25 Hizongleh Jesu'n amah ataai a, "Sip inla, a sung apatin hung pawt in," achi hi. 26 Huleh hagau niin in mipa chu alohliing vah a, hah koua kikouin a sung apat ahung pawtta hi. 27 Huin a bawnun limdang asa mahmah va, huchiin, "Hi bang ahita ei leh? Bangchibang thuhilhna thah ahita ei? Ajiahchu Ama'n thuneitahin dawi niinte nasan thu apia a, huchiin a thu amang uhi," chiin akidong tuah uhi. 28 Huleh Galili gam kiimveel zousiah ah a tanchin athangsuaah pahta hi.
Simon Sungnu leh Midang Tampi Suhdamna
29 Huin sinagog apat ahung pawt tahun Simon leh Andru inn ah Jakob leh Johan toh aluut pah uhi. 30 Huleh Simon sungnu chu khosih a chinain analum a, huleh amah un amahnu tanchin chu Amah anahilh pah uhi. 31 Huchiin Ama'n amahnu chu a khut a vatuin aphong a, huin a khosih in anuse pah hi. Huleh amahnu'n a nna uh atohsah hi. 32 Huleh nitaah, ni tum zohin, damlou zousiah leh dawipaaite a kawmah ahung pui uhi. 33 Huleh khopi sunga mi zousiah chu inn kotbul ah akikhawm uhi. 34 Huin Ama'n mi tampi natna tuamtuam a nate asudam a, dawi tampi anohdoh a, huleh dawite'n Amah aheet jiahun dawite haam diing Ama'n aphal sih hi.
Jesu Haamteina
35 Huleh jiingkaal in, khovaah ma daihin athou a, apawt a huleh munsip ah avachiah a; hutah ah ahaamtei hi. 36 £uleh Simon leh a kawma umte'n Amah ahawl uhi. 37 Amah amuh tahun a kawmah, "Mi zousiah in nang ahung hawl uhi," achi uhi. 38 Hizongleh Ama'n a kawmvah, "Khopi nai lahte ah zong thu ka soi theihna diingin i chiah diing uh; hu diing maha hung kuan ka hih jiahin," achi hi. 39 Huleh Ama'n Galili gam pumpi a sinagogte ah thu asoi a, huleh dawite anohdoh jeel hi.
Miphaah Suhdamna
40 Huin mi phaah khat Amah kawmah ahung a, a ma a khuupdinin, "Na uut inchu, na hung susiang thei hi," chiin angeen hi. 41 Huleh Jesu'n alainat mahmah a, a khut a zamin akhoih a, a kawmah, "Ka uut hi, siangta in," achi hi. 42 Asoi zoh tahin, a phaahna in anuse pah a ahung siangta hi. 43 Huleh Ama'n akhapchat a asawlmang pah hi. 44 Huleh Jesu'n a kawmah, "En in, koima kawmah bangma soi het sin; hizongleh chiah inla, siampu kawmah vakimusah inla, na sian thu amah uh heetsahna diinga Mosi in thu apiaah silte valaan in," achi hi. 45 Hizongleh amah chu achiahdoh a, hu thu nasatahin ataangkoupih a aphuangdalh panta hi, huchiin Jesu chu langtangtahin khopi sung ah aluut theita sih hi. Hizongleh khopolam gamdaai munte ah aum jawta a; huleh mun chin apatin a kawmah mite ahung uhi.
Jeng Suhdamna
1 Huleh ni bangzah aha nungin Kapernaum ah aluut kiit a, huleh inn ah aum chih thu ahung thangta hi. 2 Huin kotkhaah kiim tanpha a, umna diing umlou khopin mi tampi ahung kikhawm pah uhi. Huleh Ama'n a kawmvah thu asoi hi. 3 Huin mijeng khat mi li in hung jawngin a kawmah ahung pui uhi. 4 Mipi jiaha a kawm nai a ahung theih louh tahun a umna inn tung ahawhkhia uhi. Huchia asuhvang zohun, mijeng chu a jawnna lupna toh akhaikhesuh uhi. 5 Jesu'n a ginna uh amuhin mijeng kawmah, "Tapa, na sualnate ngaihdam ahita," achi hi. 6 Hizongleh daanjilsahtute khenkhat hu mun a tou aum va, a lungsim un hichiin angaihtuah uhi, 7 "Hi Pa'nbang diinga Pathian soisia a hichibang thu asoi ahiai? Pathian chauh loungaal koi ahiai sualnate ngaidam thei?" chiin. 8 Huleh Jesu'n a lungtang un huchibangin angaihtuah uh chih a lungsim in anahe pah a, a kawmvah, "Bang diinga hi thute na lungtang va ngaihtuah na hi viai? 9 Mijeng kawma, 'Na sualnate ngaihdam ahita,' chih leh, 'Thou inla, na lupna la inla, keeng in chiahta in,' chih khoi abaihlam jaw ei? 10 Hizongleh Mihing Tapa'n leitung ah sualnate ngaihdam theihna diing thuneihna anei chih na heetna diingun," achi hi. Huin Ama'n mijeng kawmah, 11 "Thou inla, na lupna la inla, na inn lamah chiahta in ka hung chi ahi," achi hi. 12 Huleh amah chu athou pah a, a lupna lain a bawnva mitmuh ah achiahdohta hi. Huchiin a bawnun limdang asa va, "Huchibang mawngmawng i mu ngei sih," chiin Pathian apaahtawi uhi.
Levi Kouhna
13 Huin Amah chu diil geiah achiahdoh kiit a; huleh mipi zousiah a kawmah ahung va, amahuh thu anahilh hi. 14 Huleh Amah apai laiin Alphai tapa Levi, siahdonna mun a toulai amu a, a kawm ah, "Hung jui in," achi hi. Huin Levi athou a, Amah ajuita hi. 15 Huin Jesu chu Levi inn ah an ne diingin dohkaan ah atou a, siahdongtu tampi leh misualte chu Jesu leh a nungjuite toh an ne diingin atou khawm uhi; ajiahchu tampi ahi va, huleh Jesu nung ajui uhi. 16 Huleh daanjilsahtute leh Pharisaite'n siahdongtute leh misualte toh Jesu an nekhawmlai amuh tahun, a nungjuite kawmah, "Bang diinga Ama'n siahdongtute leh misualte toh nea dawn khawm ahiai?" achi uhi. 17 Jesu'n huchu ajaah tahin a kawmvah, "Mi chidamte'n daktor amamoh sih va, hizongleh damloute'n amamoh uhi. Midihtatte kou diinga hung ka hi sih a, hizongleh misualte kisiihsah diinga koua hung ka hijaw hi," achi hi.
An ngawl Thu a Dotna
18 Huleh Johan nungjuite leh Pharisaite'n an angawl uhi. Huin a kawma hungin hi thu asoi va, "Johan nungjuite leh Pharisaite nungjuite'n an angawl va, hizongleh bang diinga na nungjuite'n angawl louh uh ahiai?" chiin. 19 Huchiin Jesu'n a kawmvah, "Moupa moupuite kawma aum laisiah moupuite'n an angawl thei ngei viaimah? Moupa a kawmva aum laisiah an angawl thei sih diing uhi. 20 Hizongleh moupa a lah vapat a puimang hun ahung tung diing a, hu ni chiangin angawl diing uhi. 21 "Mi koimah in puan lui puan thah them in aphoh ngei sih uhi. Phohta leh uh, a phohna puan thah in a puan lui chu akaikeeh diing a, huleh ahung keehjaw seem diing hi. 22 Huleh mi koimah in uain thah chu savun thawl lui ah athun ngei sih uh; thunta leh uh, uain thah in savun thawl lui chu aphukeeh diing a, uain akibo diing a, savun thawl chu asegawp diing hi. Hizongleh uain thah chu savun thawl thah a thunjawh diing ahi," achi hi.
Khawlni Tan Thu a Dotna
23 Huleh hichi ahung hi a, Sabbath ni in buhlei lai tawnin achiah va; a nungjuite'n achiah kawm-un buhvuite asihtan panta uhi. 24 Huin Pharisaite'n a kawmah, "En in, bangjiaha amah un Sabbath ni a daan in aphallouh bawl ahi viaimah?" achi uhi. 25 Hizongleh Ama'n a kawmvah, "David leh a kawma umte'n ataahsap va, huleh agilkial laiva asilbawl uh: 26 bangchidaana Abiathar siampu lalpeen ahihlai a Pathian inn a luut a, siampute chauh in aneeh siang tanghou siah avaneeh a, a kawma umte kawma zong apiaah ahiai chih na sim kha ngei sih viaimah?" achi hi. 27 Huleh Ama'n a kawmvah, "Sabbath chu mihing a diinga bawl ahi a, mihing chu Sabbath a diinga bawl ahi sih hi. 28 Hujiahin Mihing Tapa chu Sabbath ni Lalpa zong ahi," achi hi.
Khut Jeng Suhdamna
1 Huleh Amah chu sinagog ah aluut kiit a, hutah ah mi khut jeng khat ana-um hi. 2 Huleh Amah aheeh theihna diingun, Sabbath ni a asuhdam leh asuhdam louh aensim uhi. 3 Huin Ama'n khut jengpa kawmah, "A lahvah dingdoh in," achi hi. 4 Huleh Ama'n a kawmvah, "Sabbath ni in sil hoih bawl asiang ei ahihlouhleh sil hoihlou bawl? Hinna hutkhiah asiang ei, ahihlouhleh suhlup?" achi hi. Hizongleh amahuh asip chiat uhi. 5 Huchiin a lungtang uh khauh jiaha lungsim na leh lungthah pumin amahuh aenveel a, hu mipa kawmah, "Na khut zandoh in," achi hi. Hupa'n a khut azandoh a, a khut chu alang khat lam tobangin adamta hi. 6 Huin Pharisaite chu apawtdoh va, Amah asuhlup theih daan diing uh ngaihtuahin Herod pawlte toh akihoukhawm pah uhi.
Mi Tampi'n Jesu Jui
7 Hizongleh Jesu chu a nungjuite toh diil lamah achiah mang hi. Huleh Galili gam apat mipi nasatahin amah ajui va, huleh Judia gam 8 leh Jerusalem leh Idumai leh Jordan gaallam apat, huleh Tura leh Sidon kiim apat bangin mipi nasatahte'n a silbawl loupi daante ajaah tahun Amah kawmah ahung uhi. 9 Huleh mipi atam jiahin Amah diinga kuang neu khat guatsa a koih diingin a nungjuite ahilh hi, huchilou inchu Amah anehthop kha diing uhi. 10 Ajiahchu mi tampi asudamta a, huchiin natna nei photmah in Amah akhoih theihna diingun aboh lutlut uhi. 11 Huleh dawi niinte'n Amah amuh un, a ma ah bohkhupin, "Nang Pathian Tapa na hi," chiin akikou uhi. 12 Hizongleh Ama'n a tanchin phuangdoh lou diingin amahuh khauhtahin akhap hi.
Jesu'n Sawmlenihte Ateelna
13 Huleh taang tungah achiahtou a adeihtuamte a kawmah akou hi. Huleamahuh a kawmah achiah tou uhi. 14 Huin sawmlenihte chu a kawma um diing leh thusoia asawlkhiah theihna diing leh 15 damloute asuhdam va dawite anohdoh theihna diingva thuneihna aneih theihna diingun aguatta hi. 16 Simon kawmah min dang apia a, huchu Peter ahi; 17 Zebedi tapa Jakob leh Jakob sanggampa Johan kawmah min dang apia a, amahuh chu Bonerge asa a, huchu, "Vaanpi ging tate," chihna ahi a; 18 Andru, Philip, Bartholomai, Mathai, Thomas, Alphai tapa Jakob, Thaddai, Kanaan mi Simon; 19 huleh Jesu mansahpa Juda Iskariot zong atel hi. Huleh innsung khat ah aluut uhi.
Jesu leh Beelzebul
20 Huleh an nasan ne thei lou khopin mipi nasatah ahung kikhawm kiit uhi. 21 Hizongleh Amah mite'n hichu ajaah tahun Amah pui diingin akuan uhi, ajiahchu amah un, "Amah angol ahita," achi uhi. 22 Huleh daanjilsahtute khenkhat Jerusalem apat a hung suhte'n, "Amah chu Beelzebul in akol ahi a," huleh, "dawimangpa jiaha dawite anohdoh ahi," achi uhi. 23 Huchiin Ama'n amahuh akou a, a kawmvah tehkhinthu in asoi a: "Bangchiin Setan in Setan anohdoh thei diai? 24 Lalgam khat kilangkhenin kidou leh, hu lalgam chu ading thei sih diing hi. 25 Innkuan khat kilangkhenin kidou leh, hu innkuan zong ading thei sih diing hi. 26 Setan zong amah leh amah kidoua akilangkhen leh, ading zou sih diing a, amangthaai jaw diing hi. 27 Mi koimah in mihaatpa akaantom masat louhngaal leh, mihaatpa inn a luutin a neihlelamte alaahsah thei sih a, huleh akaantom nung chiangin a neihlelamte alaahsah mei diing hi.
Ngaihdam Theihlouh Sual
28 "Chihtahzetin ka hung hilh ahi, mihing tate chu a sualna zousiah uh leh Pathian asoisiatna sualna zousiah uh ngaihdamsah ahi diing a; 29 hizongleh koipouh Hagau Siangthou kalha soisia chu ngaihdamin aum ngei sih diing a, kumtuang siamlouhtanna lauhuai atang diing hi. " 30 Ajiahchu amah un, "Ama'n hagau niin anei ahi," achih jiahun.
Jesu Tanau Dihtah
31 Huin a sanggamte leh a nu ahung va, inn pua a dingin Amah kou diingin mi asawl uhi. 32 Huleh a kiim ah mipihon atou va; amah un a kawmah, "En in, innpua ah na nu leh na sanggamte'n ahung hawl uh," achi uhi. 33 Hizongleh Ama'n adawng a, a kawmvah, "Ka nu leh ka sanggamte koite ahiai?" achi hi. 34 Huin akiim a toute aenveel a, "En un, ka nu leh ka sanggamte! 35 Ajiahchu koipouh Pathian deihjawng bawl photmah chu ka sanggampa leh ka sanggamnu leh ka nu ahi," achi hi.
Haichithehtu Tehkhinthu
1 Huleh Ama'n diil pangah thu ahilh pan kiitta a, huleh mipi nasatah a kawma ahung kikhop jiahun diil tunga kuang ah akal a, atouta a, mipi zousiah chu diil pangah aum uhi. 2 Huin amahuh chu tehkhinthu in thu tampi ahilh a, huleh a thuhilhna ah a kawmvah: 3 "Ngaikhia un! En un, haichithehtu khat haichi thehin akuan hi. 4 Huleh hichi ahung hi a, atheh laiin, khenkhat lam geiah atu a, huleh hute chu tungleeng vate ahung va ane zouta uhi. 5 Khenkhat suangsilei lahah atu a, huleh lei asah louh jiahin apou pah hi. 6 Hizongleh ni ahung satin nisa in akaang a, huleh zung aneih louh jiahin agawgawpta hi. 7 Huleh khenkhat chu louling lahah atu a, ling ahung khanglian a, adeepmangta a, huleh gah aneita sih hi. 8 Hizongleh khenkhat chu lei hoih ah atu a, apou doh a, akhanglian a huleh agah hi: khenkhat aleh sawmthum bang, aleh sawmguup bang leh aleh za bangin ahung pungta hi," achi hi. 9 Huleh Ama'n a kawmvah, "Koipouh jaahna diinga bil nei in ja heh," achi hi.
Tehkhinthu Kizatna Jiah
10 Hizongleh a tanga aum laiin a kiim a sawmlenihte toh umte'n tehkhinthu tungtaang adong uhi. 11 Huleh Ama'n a kawmvah, "Pathian lalgam thukiphual chu nanguh heet diinga phal ahi a, hizongleh polam mite diingin chu sil zousiah tehkhinthu a soi ahi. 12 Huchiin, 'Amah un muh chu amuh ngeei va hizongleh atheihsiam louhna diingun, huleh jaah chu ajaah ngeei va hizongleh aheetsiam louhna diingun; huchilou inchu a lungsim uh ahung heikiit diing va, a sualnate uh ngaihdam ahi kha diing,'" achi hi. 13 Huin Ama'n a kawmvah, "Hi tehkhinthu na hesiam sih uh maw? Huchi ahihin tehkhinthu zousiah bangchiin na hesiamta diviai? 14 Haichithehtu in chu thu atheh hi. 15 Huleh lam geia thu kithehnate chu hite ahi uhi. Thu ajaah tahun Setan ahung pah a, a lungtang va thu kitheh chu alamang hi. 16 Huleh huchibangmahin hite chu suangsi lei a kithehte ahi uh, thu chu ajaah tahun kipaahtahin apom pah va; 17 hizongleh amah vah zung anei sih va, tomtakhat chauh aum uhi. Hu nunga thu jiaha gimthuaahna leh suhduhdahna atuaah chiangun, apuuh pah uhi. 18 Huleh louling laha kitheh chu hite ahi uh; hute'n chu thu aja va, 19 hizongleh khovel awlmohnate leh hauhsat uutna a heemnate leh sildang dang deihgohnate hung luutin thu chu adeepmangta a, gahlouin ahung umta uhi. 20 Hizongleh lei hoih a chi kitheh chu hite ahi uhi: thu chu jain apom va, aleh sawmthum bang, aleh sawmguup bang leh aleh za bangin agah uhi," achi hi.
Thaumei Tehkhinthu
21 Huleh Ama'n a kawmvah, "Thaumei loh nuai aha, ahihlouhleh lupna nuai aha ah koih diingin akila ngei eimah? Hu saangin a tunna ah akikoih jaw sih diaimah? 22 Ajiahchu kiphuang lou diinga iim bangmah aum sih a, kilang lou diinga phual zong bangmah aum sih a, hizongleh vaah ah puaahdoh ahi diing hi. 23 Mi koipouhin jaahna diinga bil aneih leh, ja heh," achi hi. 24 Huleh Ama'n a kawmvah, "Bang ahiai na jaah uh pilvaang un. Na tehna ngeimah un ahung tehsah diing va; huleh nanguh angaikhete kawmah ahung piaah behlap diing uhi. 25 Ajiahchu koipouh anei chu a kawmah piaahbeh ahi diing a; hizongleh koipouh aneilou chu aneihsun zong laahsah ahi diing," achi hi.
Buh Khandaan Tehkhinthu
26 Huleh Ama'n, "Pathian lalgam chu mi'n lei ah haichi tuh henla, 27 huleh jaan chiangin ihmuin suun chiangin thou henla, haichi chu hung pouin khangdoh henla, amahpa'n lah bangchibanga hung khang ahiai chih he sih leh, hutobang ahi. 28 Ajiahchu lei in amah in gah ahung suah jeel a: amasain a nah, huin a vuui, huin a vuui ah a tangching asuah hi. 29 Hizongleh a gah chu ahung min chiangin, buhlaah ahuntaah jiahin kawite in a-at pahta hi," achi hi.
Ankam Tang Tehkhinthu
30 Huleh Ama'n, "Pathian lalgam chu bang toh i tehkhinta diai? Ahihlouhleh bang toh tehkhin a soi diing i hi viai? 31 Hichu ankam tang khat lei a akituh chiangin, haichi zousiah saangin aneupeen a, 32 hizongleh atuh nungin ahung pou a, loupa zousiah saangin ahung lianjaw a, baa lian pipi ahung nei a, huchiin tungleeng vate a liim ah agiah uh," achi hi. 33 Huleh hichibang tehkhinthu tampi in amahuh heettheih khamkham in a kawmvah thu asoi hi. 34 Hizongleh tehkhinthu louin a kawmvah thu asoi sih hi. Huleh amahuh ngen a aum chiangun, Ama'n a nungjuite kawmah sil zousiah ahilhchian jeel hi.
Jesu'n Tuikinawh Asuhdaihna
35 Hu ni mahin, nitaahlam mialjui ahung hih tahin, Ama'n a kawmvah, "Diil gaal lehlam ah i kaai diing uh," achi hi. 36 Huin amah un mipite asawlkhiah zoh tahun, kuang a Amah ana-um bangbangin Amah apaipihta uhi. Huleh a kawmah kuang neu dangte zong aum hi. 37 Huleh huihpi nasatah ahung nungta a, tuikinawh in kuang chu ahung nawh zuizui a, kuang ah tui chu ahung luut panta hi. 38 Hizongleh Amah chu kuang mei lamah taangkhap khapin, ihmuin aum hi. Huleh aphawng va, a kawmah, "Houtupa, ka manthaai uh poisa lou na hi maw?" achi uhi. 39 Huin Amah ahung thou a, huih chu ataai a, tuipi kawmah, "Daai inla, um kinken in!" achi hi. Huin huihnung chu akhawlta a, ahung daaikeeita hi. 40 Hizongleh Ama'n a kawmvah, "Bang diinga lau na hi viai? Bangachia ginna neilou nalai na hi viai?" achi hi. 41 Huin amah un alau mahmah va, khat leh khat kihouin, "Amah hi bangtobang mi ahiai, huih leh tuipi tanpha in zong a thu amang uh!" akichituah uhi.
Gadarami Dawi Paaipa Damna
1 Huin diil gaal, Gadara mite gam ahung tungta uhi. 2 Huleh kuang apat ahung pawt tahin, haante apat hung pawt hagau niin paai mi khat in Amah anakituaahpih a, 3 hupa chu haante a teeng ahi a; huleh mi koima'n akaan thei sih a, khainiang in zong atutaang zou sih hi, 4 ajiahchu koi buhin khainiang in anakaanta uhi. Huleh khainiangte chu abottan a, kolte asugawp a, mi koima'n athunun zou sih uhi. 5 Suun teh jaan in taangte leh haante a um zingin akikou a, suang in amah leh amah akijiih keeh hi. 6 Hizongleh ama'n gamlatah apat Jesu amuh tahin, ataai a bohkhupin avabia hi. 7 Huleh aw ngaihtaha kikouin, "Jesu, nang Pathian Tungnungpeen Tapa, kei leh nang in bang kizopna i nei ei? Hung soisa lou diingin Pathian min in ka hung ngen hi," achi hi. 8 Ajiahchu Jesu'n a kawmah, "Nang hagau niin, hi pa sung apat hung pawt in," anachihtaah jiahin. 9 Huin Ama'n, "Na min bang ahiai?" chiin adong hi. Huleh ama'n, "Ka min chu legion ahi, ajiahchu tampi ka hi uh," chiin adawng hi. 10 Huleh hu gam apat amahuh sawlmang lou diingin Jesu kawmah hah ngetin angeen hi. 11 Huin taang pang ah voh hon tampi ataa hi. 12 Huleh hagau niinte zousiah in, "Voh sung ah hung sawl in, a sungva ka luut theihna diingun," chiin a kawmah angeen uhi. 13 Huleh Jesu'n amahuh aphalsah pah hi. Huin hagau niinte chu apawt va, voh sung ah aluut va, huleh voh hon saang nih phial chu keen ah, tuipi lamah hah taaiin ataaisuhta va; huchiin tui ah akelumta uhi. 14 Huin voh chingtute chu ataai va, khopi sung leh khota ah hi siltung avahilh uhi. Huleh amahuh chu bang sil hung um ahita eimah, chia en diingin ahung uhi. 15 Huin Jesu kawm ahung tun tahun, dawimat, legion paaipa chu puan silh a, lungsim ngeina pua a hoihtaha anatou chu ahung mu va, huin alauta uhi. 16 Huleh amute'n dawi matpa tunga sil tun daan leh voh umtan chu mipite anahilh veh uhi. 17 Huin amah un a gam uh nuse diingin Jesu angeenta uhi. 18 Huleh Amah chu kuang a aluut zohin, dawi paaipa'n Jesu kawma aum theihna diingin angeen hi. 19 Hizongleh Jesu'n aphal sih a, a kawmah, "Na inn ah chiah inla na lawmte kawmah Lalpa'n nang diinga sil loupi ahung bawlsah daante leh nang ahung lainat daante vahilh in," achi jawta hi. 20 Huin achiah a, Jesu'n amah diinga sil loupi abawlsah daante Dekapoli gam ah ataangkoupihta a, huleh mi zousiah in limdang asa mahmah uhi.
Numei Sipawt Suhdamna leh Jaira Tanu Kaihthohna
21 Huin Jesu kuang a diil gaalkhat lama ahung kaai kiit zohin mipi tampi a kawmah ahung paikhawm va, Amah chu diil pangah aum hi. 22 Huleh en in, sinagog a vaihawmte laha mi khat a min Jaira kichi ahung hi. Huleh Jesu amuh tahin a keeng bul ah abohkhup a, 23 "Ka tanu naupang neucha asi dehdeh hi. Hung inla atung ah na khut hung nga in, amahnu adam a, huleh ahin theihna diingin," chiin hah ngetin angeen hi. 24 Huchiin Jesu chu amah toh achiahta a, huleh mipi nasatah in Amah juiin atuam hut-hut uhi. 25 Huin numei khat kum sawmlenih sipawt a damlou aum a, 26 huleh daktor tampi etkolna nuaiah naahtahin anathuaahta hi. Amahnu'n a neih zousiah anaseeng zouta a, hizongleh bangma phatuam louin akhawh jawseem hi. 27 Amahnu'n Jesu tanchin anajaah tahin, anung ah mipi lahah ahung pai a, a puan akhoih hi. 28 Ajiahchu a lungsim in, "A puan chauh tham kha zongleng, ka dam mei diing," chiin angaihtuah hi. 29 Huin a sipawt chu akang pah a, huleh a natna apat adamta chih a tahsa ah akiheet hi. 30 Huleh Jesu'n a sung apat silbawltheihna apawt chih ahe pah a, mipi lahah akihei kiimveel a, "Koi ahiai ka puan khoih?" achi hi. 31 Hizongleh a nungjuite'n a kawmah, "Mipite'n ahung tuam hut-hut uh na mu a, 'Koi ahiai ahung khoih?' na chih," achi uhi. 32 Huleh Ama'n hu sil bawlnu chu muh tumin aen kiimveel hi. 33 Hizongleh numeinu'n a tunga sil tung hein, lau leh liing pumin ahung a, a ma ah abohkhup a, a kawmah thudih zousiah ahilhta hi. 34 Huin Ama'n amahnu kawmah, "Tanu, na ginna in ahung damsahta hi. Hamuangtahin chiah inla, na natna apatin damta in," achi hi. 35 Ama'n huchia asoi laiin, sinagog a vaihawmtupa inn apatin mi ahung a, "Na tanu asita hi. Bang diinga Houtupa subuai nalai na hiai?" ahung chi hi. 36 Jesu'n hi thu kisoi ajaah tahin, sinagog a vaihawmtu kawmah, "Lau sin, gingta mei in," achi hi. 37 Huleh Ama'n Peter, Jakob leh Jakob sanggampa Johan chihlouh in Amah ajuih uh aphal sih hi. 38 Huin sinagog a vaihawmtu inn avatung a, anabuai vengvung leh kapa anamaau jeenjuunte avamu hi. 39 Amah ahung luut zohin, a kawmvah, "Bang diinga kap a hichi buai na hi viai? Naupangnu chu asi ahi sih, hizongleh ihmu ahi," achi hi. 40 Huin amah un Amah chu anuihsan uhi. Hizongleh amahuh chu a bawnun apawtsah a, naupangnu nu leh pa leh a tonpihte apui a, naupangnu lupna ah aluut uhi. 41 Huin Ama'n naupangnu chu a khut in atu a, a kawmah, "Talitha kumi," achi a, huchu "Naupangnu, thou in, ka hung chi ahi," chihna ahi. 42 Huin naupangnu chu athou pah a, apai hi, ajiahchu amah chu kum sawmlenih mi ahita hi. Huleh amah un nasatahin limdang asa uhi. 43 Hizongleh Ama'n koima hi thu hesah lou diingin amahuh khauhtahin athuhilh a, amahnu chu neeh diing bang aha piaah diing thu apia hi.
Nazareth a Jesu Ahuatna uh
1 Huin hu apat apawtin Amah khua ngeei ah ahung a, huleh a nungjuite'n Amah ajui uhi. 2 Sabbath ni ahung hihin, sinagog ah thu ahilh panta hi. Huleh athuhilh ja mi tampite'n limdang asa va, "Hi Pa'n hi thute khoi apat amuh ahiai? A kawma pilna kipia bang pilna hi ahiai, a khut a hichitaha silmahte abawltaah mei! 3 Amah chu Mari tapa, Jakob, Josse, Juda leh Simon sanggampa, sing bawlpa khu hilou maw? A sanggam numeite hitah ah i kawma um hilou ahi uh maw?" achi uhi. Huchiin Amah tungah alunghita sih uhi. 4 Hizongleh Jesu'n a kawmvah, "Zawlnei amah gam sung leh amah tanaute lah leh amah inn sungah chihlouh zahbawl louhin aum ngei sih hi," achi hi. 5 Tuin mi damlou tawmchakhatte tunga khut nga a asuhdam chihlouh hutah ah sil loupi dang abawl sih hi. 6 Huleh agintaat louh jiahun Ama'n limdang asa mahmah hi. Huin khota haw a chiah kiimveelin thu ahilh jeel hi.
Nungjui Sawmlenihte Natohna
7 Huleh Ama'n nungjui sawmlenihte a kawmah akou a, nih nih in asawldoh a, hagau niinte tunga thuneihna zong apia hi. 8 Ama'n amah un akhualzinna va chiangphut chihlouh bangmah, kawljaal hileh tanghou hileh dangka-ip sung a zong sum keng lou diingin thu apia a, 9 hizongleh keengtophah chu but unla, huleh puannaah nih silh sih un, chiin thu apia hi. 10 Ama'n a kawmvah, "Khoi mun ah zong na tunna inn phot vah, hu apat na pawt masiah uh umden un. 11 Huleh koi hizongleh ahung tunsah louh va, na thu uh zong angaihkhiah louh uh leh, hu apat na pawt chiangun amahuh heetsahna diingin na keengtaw va leivui thingkhia un. Chihtahzetin ka hung hilh ahi, vaihawm ni chiangin hu khopi thuaah diing saangin Sodom leh Gomorrah thuaah chu adaan aum jaw diing!" achi hi. 12 Huchiin akuandoh va mite chu akisiih theihna diingun thu ataangkoupih uhi. 13 Huleh dawi tampi anohdoh va, damlou tampi thau nuhin asudam jeel uhi.
Baptistu Johan Sihna
14 Huin a min athantaah jiahin kumpipa Herod in a tanchin anajata hi. Huin ama'n, "Hichu Baptistu Johan ahi. Amah chu misi lah apat kaihthoha um a, hujiaha hi silmah bawltheihnate'n amah a nna tong ahita veh," achi hi. 15 Midangte'n, "Elijah ahi," achi uhi. Huleh khenkhatte'n, "Zawlnei ahi, ahihlouhleh zawlneite laha khat ahi," achi uhi. 16 Hizongleh Herod in ajaah tahin, "Hichu a ngawng ka tansahpa, Johan ngeei ahi, amah chu misi lah apat kaihthohkiit ahita," achi hi. 17 Ajiahchu Herod in a sanggampa Philip ji Herodia akiteenpih a, Herodia jiahin mi asawl a, Johan chu amansah a, huleh amah chu kaanin suangkul ah akhumta hi. 18 Ajiahchu Johan in Herod kawmah, "Na sanggampa j i na kiteenpih daan in aphal sih," anachi hi. 19 Hujiahin Herodia in Johan chiamchihin thah auut a, hizongleh athat thei sih hi, 20 ajiahchu Herod in Johan chu midihtat leh misiangthou ahi chih aheet jiahin alau a, ahuumbit jeel hi. Ama'n a thu ajaah tahin alungdong a, hizongleh kipaahtahin angaikhe jeel hi. 21 Huin Herod in a pianni lawma a miliante leh a sepaih houtuliante leh Galili gam a miliante a diinga ankuang alui laiin lemtaan ni khat ahung tung hi. 22 Huleh Herodia tanu ahung luut a, a ma vah alaam a, huleh Herod leh a kawma toute akipaahsah mahmah hi. Hujiahin kumpipa'n naupangnu kawmah, "Na deihdeih ngeen in, ka hung pe diing," achi hi. 23 Amahnu kawmah, "Na hung nget photmah, ka lalgam kimkhat tanin ka hung pe diing," chiin zong akihaahsial hi. 24 Huchiin amahnu chu apawt a, a nu kawmah, "Bang ka ngeen diai?" achi hi. Huleh a nu'n, "Baptistu Johan lutang!" anachi hi. 25 Huin amahnu chu kumpipa kawmah kintahin ahung luut pah a, "Baptistu Johan lutang tu mahmahin kuang khat in hung pe lehchin ka uut," chiin angeen hi. 26 Huin kumpipa chu alungkham mahmah a; hizongleh a kihaahsialnate leh a ankuang umpihte jiahin anial nuam sih hi. 27 Huleh kumpipa'n mithattu khat asawl pah a, a lutang hung tawi diingin thu apia hi. Huleh amah chu chiahin suangkul sungah a ngawng avatanta a, 28 a lutang chu kuang khat in ahung tawi a, naupangnu apia a, naupangnu'n a nu kawmah apia hi. 29 Huleh Johan nungjuite'n hichu ajaah tahun, ahung va a luang ahung la va, haan ah avuita uhi.
Saang Ngaa Vaahna
30 Huin apostolte chu Jesu kawmah ahung kikhawm va a silbawlte uh leh a thuhilhte uh ahung hilh uhi. 31 Huleh Ama'n a kawmvah, "Nanguh chauhin hung unla, munsip ah tomkhat hung khawl phot un," achi hi. Ajiahchu hutah ah mi ahung pai lehleh atam jiahin an nasan ane man sih uhi. 32 Huchiin amahuh chu kuang a kitawlin munsip ah atuam chiahta uhi. 33 Hizongleh mipite'n achiah lai uh amu va, mi tampi in Amah hein khopi zousiah apat keeng in ahung taai uhi. Amah un anamakhelh va a kawmah ahung khawmta uhi. 34 Huleh Jesu'n kuang apat ahung pawtdohin mipi nasatah amu a, achingtu bei belaam bang ahih jiahun alainat mahmah hi. Huchiin thu tampi ahilh panta hi. 35 Huinniavaigeihmahmahtaah jiahin a nungjuite Amah kawmah ahung va, "Hi munsip ahi a, ni lah tum diing ahita hi. 36 I kiimveel a munte leh khuate a avachiah va, an neeh diing akilei theihna diingun amahuh sawldoh in, neeh diing bangma lah anei sih ngaal va," achi uhi. 37 Hizongleh Ama'n adawng a, a kawmvah, "Nang un neeh diing pia un," achi hi. Huin amah un a kawmah, "Tanghou dinari za nih man valei in neeh diing ka pe diing uh maw?" achi uhi. 38 Hizongleh Ama'n a kawmvah, 'Tanghou beu bangzah na nei viai? Chiah unla, vaen dihvua," achi hi. Huin amah un aneih zah uh aheet tahun, "Beu ngaa leh nga nih," achi uhi. 39 Huin Ama'n mi zousiah hampa hing tunga ahon hon a tousah diingin thu apia hi. 40 Huchiin amahuh a gualgual in, zakhat khat bang, sawmngaa ngaa bangin atouta uhi. 41 Huin Ama'n hu tanghou beu ngaa leh nga nih chu ala a vaan lam enin avangpiaah a, tanghoute chu abalkeeh a, a ma va luisah diingin anungjuite kawmah apiahi. Huleh nga nihte zong a bawnva lahah ahawm suaahsah hi. 42 Huchiin a bawnun ane va, avah chiatta uhi. 43 Huleh a neehvaal uh tanghou neng leh nga neng chu bawm sawmlenih dimin aluaah uhi. 44 Huleh tanghou nete chu pasal piching saang ngaa veel ahi uhi,
Jesu Tui Tunga Apaina
45 Huleh Ama'n mipite asawlkhiah kaala a nungjuite chu diil gaal lehlam a Bethsaida khua a anachiah masa diingin kuang ah atuangsah pah hi. 46 Huleh mipite asawlkhiah zohin, haamtei diingin taang ah achiahta hi. 47 Huleh jaan ahung hihin, kuang chu diil laiah aumta a, Amah chu angenin a piau ah aum hi. 48 Huin Ama'n amahuh chu huih in alehmuut jiaha kuang theihtawpa jaap a, amangbat daan uh amu hi. Huleh jaanveen lina khovaah kuan lamin Amah chu diil tungah a keeng in apai a, a kawm lam uh ahung juan a, amahuh paipeel atum hi. 49 Huchiin Amah un Amah chu diil tunga pai amuh tahun siha khat hiinteh chiin, akikou doh uhi; 50 ajiahchu a bawnun Amah amu va, amangbangta uhi. Hizongleh Ama'n amahuh ahoupih pah a, "Hamuangtahin um un! Keimah ka hi; lau sih un," achi hi. 51 Huin kuang ah a kawmvah atuangdoh a, huih chu atawpta hi. Huin amah un soi theihlouh khopin limdang asa uhi. 52 Ajiahchu amah un tanghou tungtaang silmahte ahesiam nawn sih uhi, a lungtang uh ataah jiahin.
Mi Tampi Suhdamna
53 Huleh gaal lehlam akaai tahun, Genesaret gam atung va, hutah ah a kuang uh akhit uhi. 54 Huleh kuang apat apawtdoh tahun, mite'n Amah anahe pah va, 55 hu gam sung pumpi ah ataai kiimveel va, Amah aum hi chih ajaahna lamlam adelh va, damloute a lupna un ahung jawng uhi. 56 Huleh khotate leh khopite, ahihlouhleh gamningkawi lah bang ah khoi mun ah zong aluutna phot ah damloute chu vanjuaahna kotzing bang ah alumsah va, a puanmong beeh khoih theih angeen va, huchiin akhoih photmah adam jeel uhi.
Jesu'n Pharisaite leh Daanjilsahtute Ataaina
1 Huin Jerusalem apat hung pai Pharisaite leh daanjilsahtute khenkhat a kawmah ahung uhi. 2 Huleh amah un a nungjuite khenkhat in khut niin pum a, chih chu khut silloua an aneeh uh amuhun, dih asa sih uhi. 3 Ajiahchu Pharisaite leh Judate zousiah in upate tawndaan ajuih zing jiahun, a khut uh pilvaangtah a sillouin an ane ngei sih uhi. 4 Huleh dawlmun apat ahung chiangun, kisusiang louin an ane sih uhi. Huleh sildang tampi juih diinga amuh uh aum a, hute chu noute, beelte, sumbeelte, leh lupna suhsiang bang ahi. 5 Huin Pharisaite leh daanjilsahtute'n, "Bang diinga na nungjuite upate tawndaan banga umlou a, khut silloua an ne ahi viai?" chiin Amah adong uhi. 6 Ama'n adawng a, a kawmvah, "Isai in nanguh milepchiahte thu anasoilawh dihten hi: 'Hi mite'n a muuh un ahung zahbawl va, hizongleh a lungtang uh kei apatin agamla hi. 7 Mihing thupiaahte chu ginna thuhilhna banga ahilh jiahun ahung be thawnuhi,' chih gelh bangin. 8 Ajiahchu nang un Pathian thupiaah paampaihin, mihing tawndaan na tu va, huchu beel leh noute sil bang, huleh adang tampi huchibang silte na bawl uhi," achi hi. 9 Huleh Ama'n a kawmvah, "Na tawndaan uh na juih theihna diingun Pathian thupiaah paampaih daan na siam ten uhi. 10 Ajiahchu Mosi in 'Na nu leh na pa zah in,' huleh 'Koipouh a nu aha, a pa aha haamsiat chu suhlupin um heh,' achi hi. 11 Hizongleh nang un, 'Mi'n a nu aha, a pa aha kawma, "Kei apat panpihna silpiaah na muh diing photmah chu Korban ahita, achih inchu,'" huchu Pathian kawma pia, chihna ahi a, 12 huchiin ama'n a nu aha, a pa aha diinga bangma abawlsah na phal sih va, 13 na kipiaah sawn jeel uh na tawndaan uh jiahin Pathian thu bangmahlou na suaahsah uhi. Huleh huchibang sil tampi na bawl uhi," achi hi. 14 Huin Ama'n mipi zousiah a kawmah akou a, a kawmvah, "Na bawnun ka thu ngaikhia unla, hesiam un: 15 mihing polam apata a sunga luut a, amah subuaah thei bangma aum sih a, hizongleh amah apata hung pawt silte, hute ngeei chu mihing subuaah ahijaw hi. 16 Mi koipouh jaahna diinga bil nei in ja heh," achi hi. 17 Huleh Ama'n mipi nusia a inn sunga aluut zohin, a nungjuite'n hu tehkhinthu Amah adong chian uhi. 18 Huchiin Ama'nakawmvah, "Nanguhzong huchilawma heetsiamna bei na hi uh maw? Bang sil hitaleh polam apat a mihing sunga luut in amah asubuaah thei sih hi, 19 ajiahchu neeh photmah lungtang sungah aluut sih a, gil sunga luutin, an zousiah asusiang a, daileenna ah apawtkhe mei ahi chih na he sih uh maw?" achi hi. 20 Huleh Ama'n, "Mihing sung apat a hung pawt, hu ngeei in mihing asubuaah hi," achi hi. 21 Ajiahchu sunglam a mihing lungtang apatin ngaihtuahna giloute, aangkawmnate, kingaihna thaanghuaite, tualthahnate, 22 guuhtaatnate, eennate, giitlouhnate, heemhaatnate, ganta banga huuhnate, kimitsiipnate, soisiatnate, kiletsahnate leh ngolhuainate bang ahung pawt veu hi. 23 Hi silgilou zousiah chu sunglam apat ahung pawt va mihingte asubuaah veu uhi," achi hi.
Jentel Numei Tanu Suhdamna
24 Huin Amah athou a hu apatin Tura leh Sidon gam sungah achiah hi. Huleh inn khat ah koima heet diing uutlouin aluut a, hizongleh akiphual zou tuan sih hi. 25 Ajiahchu numei khat a tanu hagau niin paai in a tanchin anaja a, huleh ahung a, a keeng bul ah abohkhup hi. 26 Hu numeinu chu Jentel mi ahi a, jaat lam thu ah chu Sirophoniki mi ahi a, huleh amah nu'n a tanu sunga dawi niin nohdohsah diingin angeen hi. 27 Hizongleh Jesu'n amahnu kawmah, "Tate suhtaiin um masa phot heh, ajiahchu tate tanghou laahsah a uite kawma piaah akilawm sih," achi hi. 28 Hizongleh amahnu'n adawng a, a kawmah, "Lalpa, hih jaw ahi a, ahihvaangin dohkaan nuaiah uite'n zong tate tanghou neng kia ane saam uhi," achi hi. 29 Huin Ama'n amahnu kawmah, "Na thusoi jiahin chiahta in; dawi chu na tanu sung apatin apawtta hi," achi hi. 30 Huleh amahnu a inn ahung tunin dawi chu anapawtdohta a, a tanu lupna a lum ahung muta hi.
Mipite'n Jesu Misuhdam Limdang Asa uh
31 Huleh Tura leh Sidon gam sung apat pawt kiitin, Dekapoli gam lai tawnsuaah pehin Galili Diil ahung tungta hi. 32 Huin mi bilngong haam zong haam chiang theilou khat a kawmah ahung pui va, a tunga khut nga diingin angeen uhi. 33 Huin Ama'n mipi lah apatin amah apui tuam a, a khut zung in a bil sungte akhoih a, huleh a chil asiat a, a lei akhoih hi. 34 Huin vaan lam enin akhuaisa a, a kawmah, "Ephphatha," achi a, huchu "Kihong in," chihna ahi. 35 Huin a bilte ahung vang pah a, a lei kaanna gui ahung kiphel a, huleh chiangtahin ahaamtheita hi. 36 Huin Ama'n koima hilh lou diingin amahuh akhap a; hizongleh akhap naah pouhleh aphuangdalh jawseem uhi. 37 Huleh soi theihlouh khopin limdang asa va, "Ama'n sil zousiah abawlhoihta, bilngong natan ajasah a, huleh haamtheilou zong ahaamsahta," achi uhi.
Mi Saang li Vaahna
1 Huchih hun laiin mipi atam mahmah kiit va, neeh diing bangmah aneih louh jiahun Jesu'n a nungjuite a kawma kouin a kawmvah, 2 "Mipite tuin ka kawmah ni thum umta ahihjiah uh leh neeh diing bangmah nei lou ahihjiahun ka lainat mahmah hi. 3 Huleh an ngawlin a inn vah sawl kiit leng, lamkaal ah asawlsam kha diing uh; ajiahchu khenkhatte hung kipatna agamla mahmah hi," achi hi. 4 Huin a nungjuite'n Amah adawng va, "Koi in hi gamdaai ah mihing hizahpi vahna khop tanghou khoia la diing ahiai?" achi uhi. 5 Ama'n a kawmvah, "Tanghou beu bangzah na nei viai?" chiin adong hi. Huleh amah un, "Sagih," achi uhi. 6 Huin Ama'n mipite chu tual a tou diingin thu apia hi. Huleh tanghou beu sagih chu ala a kipaahthu asoi a, abalkeeh a huin a ma va lui diingin a nungjuite kawmah apia a, huin amah un mite ma ah aluita uhi. 7 Huleh nga tawmtakhat zong anei va; Ama'n avangpiaah a, hute zong a ma va lui diingin thu apia hi. 8 Huchiin ane va avahta uhi; huleh aneeh vaal uh a neng paalbawm sagih aluaah dim uhi. 9 Huin a nete chu mi saang li veel ahi uhi. Huleh amahuh asawlmangta hi. 10 Huleh Amah chu a nungjuite toh kuang sung ah atuang pah a, Dalmanutha gam ah ahungta hi.
Chiamchihna Ngetna
11 Huleh Pharisaite hungin Amah ahung kinialpih panta va, Amah je-etna in vaan apat chiamchihna angeen uhi. 12 Hizongleh Amah chu a hagau in akhuaisa a, "Bang diinga hi khang a mite'n chiamchihna hawl ahi viai? Chihtahzetin ka hung hilh ahi, hi khang a mite kawmah chiamchihna mawngmawng akipe sih diing," achi hi. 13 Huin amahuh anusia a, kuang ah aluut kiit a, gaal lehlam ah achiahta hi.
Pharisaite leh Herod Tol
14 Huin nungjuite'n tanghou apo mangngilh va, tanghou beu khat chauh chihlouh kuang ah tanghou dang mawngmawng anei sih uhi. 15 Huin Ama'n a kawmvah, "Pharisaite leh Herod tol lahah kiveeng unla, pilvaang un," achi hi. 16 Huchiin amahuh leh amahuh chu, "Tanghou i neih louh jiah uh ahi," chiin akingaihtuah uhi. 17 Huleh Jesu'n hikhu hein a kawmvah, "Bang diinga tanghou na neih louh jiah uh hia kingaihtuah na hi viai? Tutan a he thei lou leh hesiam nailou na hi uh maw? Na lungtang uh taah nalai ahi maw? 18 Mit nei ngaala mulou na hi viaimah? Bil nei ngaala ja lou na hi viaimah? Huleh hezing lou na hi viaimah? 19 Mi saang ngaa laha tanghou beu ngaa ka balkeeh laiin a neng vaal bawm bangzah atai na luaahdim uh?" achi hi. Huin amah un a kawmah, "Sawmlenih," achi uhi. 20 "Huleh mi saang li laha sagih ka balkeeh laiin a neng vaal paalbawm bangzah atai na luaahdim uh?" achi hi. Amah un, "Sagih," achi uhi. 21 Huchiin Ama'n a kawmvah, "Bangchidaana tutan a hesiam nailou na hi viai?" achi hi.
Bethsaida a Mittaw Suhdamna
22 Huin Bethsaida ah ahung tung a, huleh a kawmah mittaw khat ahung pui va, Jesu'n akhoih diingin angeen uhi. 23 Huchiin Ama'n mittawpa chu a khut in atu a kho polam ah apuidoh hi. Huleh amit a chil siatin a tungah a khut akoih a, khua amu thei ei chiin adong hi. 24 Huin amahpa chu adaahdoh a, "Mite chu sing banga paiin ka mu," achi hi. 25 Huin a khutte chu a mitte tungah akoih kiit a, adaahdohsah hi. Huleh khua ahung mu theita a, mi zousiah chiantahin amu theita hi. 26 Huleh Ama'n amah chu, "Kho sung ah luut sinla, khua a mi koima zong hilh het sin," chiin a inn lamah asawlta hi.
Peter in Jesu chu Khrist ahi chih Aphuanna
27 Huin Jesu leh a nungjuite chu Kaisaria Philippi khuate ah achiah va; huleh lampi ah a nungjuite kawmah, "Mite'n kei hi koi ahi ahung chi viai?" chiin adong hi. 28 Huleh amah un, "Baptistu Johan ahi, ahung chi uh, hizongleh khenkhatte'n, Elijah ahi, ahung chi uh; huleh adangte'n zawlneite laha khat ahi, ahung chi uh," chiin adawng uhi. 29 Ama'n a kawmvah, "Ahihleh nang un kei koi ka hi na hung chi viai?" achi hi. Huin Peter in adawng a, a kawmah, "Khrist chu na hi," achi hi. 30 Huin Jesu'n a tanchin koima hilh lou diingin amahuh thu apia hi.
Jesu Vi Asih diing leh Athohkiit diing Asoilawhna
31 Huleh Ama'n a kawmvah Mihing Tapa in sil tampi athuaah diing bang, upate leh siampu lalte leh daanjilsahtute nuala aum diing bang, thaha aum diing bang, huleh ni thum ni a athohkiit diing haw bang ahilh panta hi. 32 Ama'n hu thute chu phuanglaahtahin asoi hi. Huin Peter in Amah apuituam a ataaihilhta hi. 33 Hizongleh Amah chu kihei veelin a nungjuite aen a, Peter chu ataai a, "Setan, ka nung ah pai in! Ajiahchu nangma'n Pathian silte ngaikhawh louin, hizongleh mihing silte na ngaikhawh jaw hi," achi hi. 34 Huleh Ama'n mipite leh a nungjuite akou a, a kawmvah, "Mi koipouh in ahung juih nuam inchu, amah leh amah kiheetmohbawlin a kros puain hung jui heh. 35 Ajiahchu mi koipouh a hinna huumbit tumin ataan diing a, hizongleh mi koipouh keimah leh tanchinpha jiaha a hinna taan in ahuumbit diing hi. 36 Ajiahchu mi'n khovel a pumin nei henla, a hinna taanta leh, amah diingin bang aphatuam diai? 37 Ahihlouhleh mi'n a hinna luangin bang ape diai? 38 Hujiahin mi koipouh hi aangkawm haat leh gilou khang a mite laha keimah leh ka thu zumpih chu Mihing Tapa in zong angel siangthoute toh a Pa loupina a ahung chiangin, amah chu azumpih ve diing hi," achi hi.
1 Huleh Ama'n a kawmvah, "Chihtahzetin na kawmvah ka soi ahi, hia dingte khenkhat chu Pathian lalgam silbawltheihna toh hung tung amuh masiah uh sihna chiam lou diing aum uhi," achi hi.
Taang a Meel Kilimdanna
2 Huin ni guup nungin Jesu'n Peter, Jakob leh Johan apui a, huleh atuamin taang sang tung khat ah amahuh chu apui tou a; a ma vah a meel ahung limdangta hi. 3 Huchiin a puansilh chu ahung taang a, vuuh bangin angou a, leitung a puansawptu koima'n huchibangin asawp ngou thei sih diing hi. 4 Huleh Elijah leh Mosi a kawmah ahung kilang va, Jesu toh akihou khawm uhi. 5 Huchiin Peter in Jesu adawng a, a kawmah, "Rabbi, eiuh diingin hitah a um ahoih hi; huleh puanbuuh thum i bawl diing va; nang a diingin khat, Mosi a diingin khat, huleh Elijah a diingin khat," achi hi. 6 Ajiahchu alau mahmah jiahun asoi diing peen zong Peter in ahe sih hi. 7 Huleh meilum lom khat in amahuh ahung khuh a; meilum lah apatin aw ahung ging a, "Hichu ka Tapa deihtah ahi; a thu ngai un!" chiin. 8 Kintaha a kiimveel uh aet pah uh leh Jesu chihlouh a kawmvah midang koima amu nawnta sih uhi. 9 Huin taang apat ahung kumsuh laiun, Mihing Tapa misi lah apat athohkiit masiah a sil muhte uh koima hilh lou diingin Ama'n thu apia hi. 10 Huchiin hi thu chu a lungsim vah avom zing va, misi lah apat a thohkiit chih peen bang chihna hi diing adiai chiin akidongtuah uhi. 11 Huleh amah un, "Bang diinga daanjilsahtute'n Elijah ahung masa ngeeingeei diing ahi chi ahi viai?" chiin Amah adong uhi. 12 Huin Ama'n adawng a, a kawmvah, "Elijah chu hung masa a, sil zousiah abawl hoih diing mawng ahi. Ahihleh Mihing Tapa in sil tampi athuaah diing a, huleh nualin aum ngeei diing ahi, chia a tanchin bangchi daana kigial adiai? 13 Hizongleh ka hung hilh ahi, hu Elijah chu ahung zouta a, huleh a tanchin kigelh bang ngeeiin a tungah auut uut uh abawl zouta uhi," achi hi.
Naupang Dawimat Suhdamna
14 Huleh Amah a nungjuite kawm ahung tunin, akiim va mipi nasatah um amu a, huleh daanjilsahtute toh amahuh anakinial uhi. 15 Mipi zousiah in Amah amuh tahun limdang asa mahmah va, a kawmva taaiin chibai avabuuh uhi. 16 Huin Ama'n daanjilsahtute kawmah, "Amahuh toh bangjiaha kinial na hi viai?" chiin adong hi. 17 Huin mipi laha khat in adawng a, a kawmah, "Houtupa, ka tapa dawipaai jiahin na kawmah ka hung pui hi. 18 Huleh amatna mun phot ah tual ah aheeh puuh jeel a; huchiin a chilphuan buain, a ha bang agawi a, akhauh veu hi. Huchiin na nungjuite kawmah hung nohdohsah un ka chi a, hizongleh abawl thei sih uh," achi hi. 19 Huin Ama'n amah adawng a, "Ginna neilou khang a mite haw, na kawmva bangtan ahiai ka um diing? Bangtan ahiai ka hung thuaahtheih diing? Amah chu ka kawmah hung pui un," achi hi. 20 Huchiin naupang chu a kawmah ahung pui uhi. Huleh ama'n Jesu chu amuh tahin dawi in naupang chu nasatahin asoisa pah a, huchiin tual ah apuuh a, a chilphuan bo zengzungin akitaal lehleh hi. 21 Huchiin Ama'n a pa kawmah, "Hichibang ahung hihna bangtan ahita ei?" chiin adong hi. Huin ama'n, "Anaupan lai apatin ahita. 22 Huleh amah that diingin mei lah leh tui lahah asawn luut veu hi. Hizongleh nang in bang aha na bawl theih leh hung lainat inla, hung panpih in," achi hi. 23 Jesu'n a kawmah, "Na gintaat phot leh, a gingtate diingin sil zousiah ahithei hi," achi hi. 24 Huin naupangpa pa chu akikou pah a; huleh mit-hi luang pumin, "Lalpa, ka gingta a; ka ginlahna hung panpih in," achi hi. 25 Huin Jesu'n mipi hung taaikhawm amuh tahin hagau niin chu ataai a, "Nang haamtheihlouhna leh bilngonna hagau, thu ka hung pia hi, a sung apat hung pawt inla, a sungah luut kiit nawn sin," achi hi. 26 Huin dawi chu akikou a, nasatahin asoisa a, huzohin ahung pawtta hi. Huleh naupang chu mi tampite'n, "Asi ahita," achih diing khop un ahung umta hi. 27 Hizongleh Jesu'n amah chu a khut a tuin aphong a, ahung thouta hi. 28 Huleh inn sunga ahung luutin a nungjuite'n, "Bang diinga kei un nohdoh theilou ka hi viai?" chiin aguuh dot uhi. 29 Huchiin Ama'n akawmvah, "Hitobangte chu haamteina leh an ngawlna loungaalin apawt thei sih hi," achi hi.
Jesu Sih diing leh Thohkiit diing Soilawh Nihveina
30 Huin hu apatin achiahdoh va Galili gam atawn peh va, koima heet diing auut sih hi. 31 Ajiahchu a nungjuite thu ahilh a, a kawmvah, "Mihing Tapa chu mite khut ah akipedoh diing a, athat diing uhi. Huleh athah nung uh ni thum ni in athoukiit diing," achi hi. 32 Hizongleh amah un a thusoi chu ahesiam sih va, dot diing lah alau uhi.
Kingaihngiamna Tungtaang
33 Huin Amahchu Karpernaum ahung tung hi. Huleh inn sunga aum laiin a kawmvah, "Lampi a hu na kikupna uh bang ahiai?" chiin adong hi. 34 Hizongleh amahuh chu asipkeei uhi, ajiahchu lampi ah koi ahiai lianpeen diing, chiin ahung kikum zouta uhi. 35 Huin Amah chu atou a, sawmlenihte akou a, akawmvah, "Mi koipouh amasapeen hih uut chu, anunungpeen leh mi zousiah natohsahtu ahih phot ngeeingeei diing ahi," achi hi. 36 Huin Ama'n naupangneu khat akai a, a lailung vah adingsah hi. Huleh Ama'n apom zohin a kawmvah, 37 "Mi koipouh ka min a hitobang naupangneu khat saang chu kei hung saang ahi. Huleh koipouh kei hung saang chu, kei hung saang hilouin ahung sawlpa saang ahijaw hi," achi hi.
Nungjuite'n Jesu Min Zat Aphallouhna uh
38 Huin Johan in, "Houtupa, kei uh hung jui lou mi khat na min a dawite nohdoh ka mu va, huleh keiuh ahung juih louh jiahin ka khapta uhi," achi hi. 39 Hizongleh Jesu'n, "Khap sih un, ajiahchu ka min a silmah bawl ngaala, kei hung soise thei mi aum sih hi. 40 Ajiahchu eiuh hung dou lou photmah chu eiuh lama pang ahi. 41 Ajiahchu mi koipouh Khrist a na hih jiahva, ka min a tuisih nou khat dawn diinga hung petu in chu, chihtahzetin ka hung hilh ahi, a kipaahman muh diing ataan hial sih diing hi.
Heemna Thu aHilhna
42 "Huleh koipouh kei hung gingta hi naupangneute laha khat zong supuuh chu, a ngawng ah suang sumheeh gihtah kiohsah henla, tuikhanglian sungah kipaai luut leh amah diingin ahoihjaw diing hi. 43 Huleh na khut in ahung suhpuuh leh, saattan in. Khut nih neia gawtmun mei mit theilou a na chiah saangin, khut kimlou a hinna a luut nang a diingin ahoihjaw hi, 44 'A than uh asih louhna leh meikuang amit louhna ah.' 45 Huleh na keeng in ahung suhpuuh leh, saattan in. Keeng nih neia gawtmun mei mit theilou a paiha na um saangin, keengbaia hinna a luut nang a diingin ahoihjaw hi, 46 'A than uh asih louhna leh meikuang amit louhna ah.' 47 Huleh na mit in ahung suhpuuh leh, khei khia in. Mit langnih neia gawtmun meikuang a paiha na um saangin mit lang khat neia Pathian lalgam a luut nang a diingin ahoihjaw hi, 48 'A than uh asih louhna leh meikuang amit louhna ah.' 49 "Ajiahchu mi chin meikuang a soh-al in aum diing a, kithoihna chinteng chi a soh-alin aum diing hi. 50 Chi chu ahoih a, hizongleh chi chu data hileh, bangchiin na alsah kiitta diviai? Nanguh ngeei ah chi kineih unla, huleh khat leh khat kilemin um un," achi hi.
Kikhuul Thu a Hilhna
1 Huin Jesu'n hu mun anusia a, Judia gam kualsung Jordan gaal lampeh ahung tungta hi. Huleh mipite a kawmah ahung kikhawm kiit va, huchiin ahih ngeimah bangin amahuh thu ahilh kiit hi. 2 Pharisaite a kawmah ahung va, Amah je-etna diingin, "Mi'n a ji akhuul hi daan in aphal ei?" chiin adong uhi. 3 Huleh Ama'n adawng a, a kawmvah, "Mosi'n nanguh bang thu ahung pia ei?" achi hi. 4 Amah un, "Mosi'n kikhuulna lehkha giala kikhuul aphal hi," achi uhi. 5 Huin Jesu'n adawng a, a kawmvah, "Na lungtang uh khauh jiahin ahi ama'n hi thupiaah nanguh diinga ahung na gelhsah. 6 Hizongleh leilung kisiam chiil apatin Pathian in 'amahuh numei leh pasal in asiamhi. ' 7 'Hi jiahin pasal in a nu leh a pa anuse diinga huleh a ji ah abehta diing a, 8 huleh anihun sapum khat ahung hita diing uh;' huchiin nih hi nawn louin, hizongleh sapum khat ahung hi jawta diing uhi. 9 Hujiahin Pathian in agawmsa chu mihing in khen sih heh," achi hi. 10 Huleh inn sung ah a nungjuite'n hu thu mah Amah adong kiit uhi. 11 Huchiin Ama'n a kawmvah, "Mi koipouh in a ji akhuul a ji dang aneih leh, aangkawm ahi. 12 Huleh numei in a pasal akhuul a pasal dang aneih leh, aangkawm ahi," achi hi.
Jesu'n Naupang neute Avangpiaahna
13 Huin akhoih theihna diingin naupang neute a kawmah ahung pui va, himahleh a nungjuite'n ahung puite anataai uhi. 14 Hizongleh Jesu'n hu amuhin, alungkim sih mahmah a, a kawmvah, "Naupangneute ka kawmah ahung diing uh phalsah unla,khap sihun; ajiahchu Pathian lalgam chu huchibang mite a diing ahi. 15 Chihtahzetin ka hung hilh ahi, mi koipouh naupang neu banga Pathian lalgam saang lou chu, a sungah aluut het sih diing," achi hi. 16 Huin Ama'n amahuh apom a, a tungvah a khut akoih a, avangpiaahta hi.
Tangvaal Hausa khat in Kumtuang Hinna Ahawlna
17 Huin lampi a chiah diinga apawt laiin, mi khat ahung taai a, ama a khuupdin in a kawmah, "Houtupa hoih, kumtuang hinna ka tan theihna diingin bang ahiai ka bawl diing?" chiin adong hi. 18 Huin Jesu'nakawmah, "Bang diinga hoih hung chi na hiai? Pathian chauh loungaal koima ahoih aum sih hi. 19 Thupiaahte na he vele: 'Aangkawm sin,' 'Tualthat sin,' 'Gu sin,' 'Heetpihtu dihlouin pang sin,' 'Mi heem sin,' Na nu leh na pa zahtaat in,' chihte," achi hi. 20 Huin ama'n adawng a, a kawmah, "Houtupa, hihaw zousiah chu ka khangdawn lai apat ka juih ahita," achi hi. 21 Huin Jesu'n amah aen a, alungsiat a, a kawmah, "Sil khat na sam nalai hi: Chiah inla, na neih photmah juaah inla migentheite kawmah pia in, huchiin vaan ah gou na nei diing; huleh hung inla, kros puain hung jui in," achi hi. 22 Hizongleh neihlelam tampi nei mi ahih jiahin amahpa chu hu thu ah a maai ahung mualta a, huleh lungkhamtahin achiah mangta hi. 23 Huin Jesu'n aen kiimveel a, a nungjuite kawmah, "Mi hausate diingin Pathian lalgam a luut hahsa hina mei e!" achi hi. 24 Huleh a nungjuite'n chu a thusoite thumah asa mahmah uhi. Hizongleh Jesu'n adawng kiit a, a kawmvah, "Tate haw, hauhsatna muangte diingin Pathian lalgam a luut hahsa hina mei e! 25 Mi hausa Pathian lalgam a aluut saangin, sangawngsau phin bilvang a aluut paisuaah abaihlam jaw hi," achi hi. 26 Huin amah un soitheih louh khopin thumah asa va, "Huchi ahihleh, koi hutdamin aum zou diai?" akichi tuah uhi. 27 Hizongleh Jesu'n amahuh aen a, "Mihing diingin hichu bawl gual louh ahi a, hizongleh Pathian diingin ahi sih; ajiahchu Pathian diingin bangkim ahithei veh hi," achi hi. 28 Huin Peter in a kawmah, "En in, kei un bangkim nusiain nang ka hung jui uh," chiin asoi panta hi. 29 Huchiin Jesu'n adawng a, "Chihtahzetin ka hung hilhahi, mi koipouh keimah leh tanchinpha jiaha inn aha, sanggam pasalte aha, sanggam numeite aha, nu aha, pa aha, ji aha, tate aha, huleh gam aha nusia chu, 30 tu damsung hun ngeeia innte leh sanggam pasalte leh sanggam numeite leh nute leh tate leh gamte haw leh suhduhdahnate toh, aleh za a mu lou diing aum sih uh, huleh khovel hung tung diing ah kumtuang hinna toh. 31 Hizongleh mi tampi amasapeente chu anunungpeen diing va, huleh anunungpeente amasapeen diing uhi," achi hi.
Jesu'n Asih diing Asoilawh Thumveina
32 Huin amahuh chu Jerusalem a chiahtouin lampi ah aum va, huleh Jesu chu ama vah apai a, amah un limdang asa mahmah uhi. Huleh ajuih pum-un alau uhi. Huin Ama'n sawmlenihte apui kiit a, a tunga sil hung tung pah diingte ahilh panta hi: 33 "Ngai un, Jerusalem a chiahtou diing i hi va, Mihing Tapa chu siampu lalte leh daanjilsahtute kawmah apekhe diing va, huleh Amah chu si diingin siamlouh atangsah diingva Jentelte khut ah apekhe diing va; 34 huleh amah un chiamnuih bawlna in azang diing va, ajeep diing va, chil asiatkhum diing va, athat diing uhi. Huleh a ni thum ni in athou kiit diing," achi hi.
Midang Nna Tohsah Diinga Thuhilhna
35 Huin Zebedi tapate Jakob leh Johan ahung va a kawmah, "Houtupa, na kawma ka deih phot uh hung bawlsah lehchin ka chi uhi," achi uhi. 36 Huleh Ama'n a kawmvah, "Nanguh diingin bang hung bawlsah leng na chi viai?" anachi hi. 37 Amah un a kawmah, "Na loupina ah, khat na jiatlam ah huleh khat na veilam ah hung tousah in," achi uhi. 38 Hizongleh Jesu'n a kawmvah, "Bang ahiai na nget uh na he sih uhi. Ka nou dawn diing na dawn thei diviai? Huleh ka baptisma tan diing zong na tang thei diviai?" achi hi. 39 Huin amah un a kawmah, "Hihthei e," achi uhi. Huleh Jesu'n a kawmvah, "Ka dawn diing nou na dawn ngeei diing va, huleh ka baptisma tan zong na tang ngeei diing uh; 40 hizongleh ka jiatlam leh ka veilam a tou diing chu kei piaah diing ahi sih a, a diingva kiguatsate kawmah piaah ahijaw diing hi," achi hi. 41 Huleh sawmte'n huchu ajaah tahun, Jakob leh Johan tungah alungkim sih mahmah uhi. 42 Himahleh Jesu'n amahuh akou a, a kawmvah, "Jentelte tunga vaihawm diinga kiguatte chu a tungvah akilalsah mahmah va, a miliante un a tungvah thu anei mahmah mei chih na he uhi. 43 Hizongleh nanguh lahah huchibang ahi sih diing a; koipouh na lah va let uut chu na natongtu un apang diing hi. 44 Huleh mi koipouh na lahva lianpeen hih uut chu mi zousiah suaahin apang diing hi. 45 Ajiahchu Mihing Tapa hiilhial zong natohsaha um diingin ahung sih a, hizongleh natongtu diing leh mi tampi tatna diinga a hinna pe diingin ahung jaw hi," achi hi.
Mittaw Suhdamna
46 Huin Jeriko ahung tung uhi. Huleh Amah chu a nungjuite leh mipi tampi toh Jeriko apat apawtdoh laiun Timai tapa Bartimai mittaw chu lam geiah khutdohin anatou hi. 47 Huleh Nazareth Jesu ahi chih ajaah tahin, "Jesu, David Tapa, hung khotuah in!" chiin akikou hi. 48 Huin mi tampi'n amah chu sip diingin akhap va; hizongleh ama'n chu, "David Tapa, hung khotuah in!" chiin akihahkou seem hi. 49 Huchiin Jesu chu akhawl a amahpa kouh diingin thu apia hi. Huin amah un mittawpa chu akou va, a kawmah, "Hamuangtahin um in. Thou in, Ama'n ahung kou hi," achi uhi. 50 Huin amah chu a puansilh paaiin athou a, Jesu kawmah ahungta hi. 51 Huleh Jesu'n adawng a, a kawmah, "Na tungah bang bawl leng na uut ei?" achi hi. Huin mittawpa in a kawmah, "Rabboni, muhtheih ka uut hi," achi hi. 52 Huin Jesu'n a kawmah, "Chiahta in; na ginna in ahung damsahta hi," achi hi. Huleh amit ahung vaah pah a lampi ah Jesu ajuita hi.
Gualzoutah a Jesu Jerusalem Aluutna
1 Huleh Jerusalem kawm, Olive Taang kawma Bethphage leh Bethani atun tahun, Jesu'n a nungjuite laha mi nih asawl a; 2 huleh a kawmvah, "Na majawn va khua ah vachiah unla, huleh a sunga na luut tahchiangun sabiltung talgual kikhit, a tunga koima tuan ngeilouhna khat na mu pah diing uhi. Huchu hung suut unla hung kai un. 3 Huleh mi koiaha in na kawmva, 'Bang diinga na suut uh ahiai?' ahung chih leh, 'Lalpa'n amamoh ahi, hitah mun ah ahung thahkiit pah diing,'chi un," achi hi. 4 Huchiin amahuh chu achiah va, inn pua kot bul a lampi kawma sabiltung talgual kikhit chu amu va, huleh asuut uhi. 5 Huleh hutah a ding koite aha in a kawmvah, "Bang diinga sabiltung talgual suut na hi viai?" achi uhi. 6 Huchiin amah un a kawmvah Jesu'n thu apiaah bangin asoi uhi. Huchiin achiahsahta uhi. 7 Huin amah un sabiltung talgual chu Jesu kawmah ahung pui va, a tungah a puan silhte uh aphah va, huleh Amah chu a tungah atuangta hi. 8 Huin mi tampi'n lampi ah a puante uh aphah va, adangte'n sing a sawlbawh saatin lampi ah aphah uhi. 9 Huleh malam a paite leh nunglam a juite'n, "Hosanna! 'LALPA min a hung paipa chu ahampha hi!' 10 Lalpa min a hung tung diing i pu David lalgam chu ahampha hi! Tungnungpeen ah Hosanna!" chiin akikou uhi. 11 Huin Jesuchu Jerusalema Pathian biahinn ah aluut hi. Huchiin sil zousiah aen kiimveel a, nitaahlam ahihtaah jiahin, sawmlenihte toh Bethani ah achiahta hi.
Pathian Biahinn Suhsiangna
12 Huleh ajiingin Bethani apat ahung un, a gil akialta hi. 13 Huleh theipi kung nah nei gaal apatin amu a, neehtheih khat amuh khaah leh chiin avajuan hi. Huleh amun atunin, a nah loungaal bangma amu sih hi, ajiahchu theipi gah hun ahi sih hi. 14 Huin Jesu'n singkung kawmah, "Tunungsiah bangchihtanin koima'n nang apat gah ne nawn sih heh," achi hi. Huleh a nungjuite'n huchu aja uhi. 15 Huchiin Jerusalem ahung tung uhi. Huleh Jesu chu Pathian biahinn ah aluut a biahinn sunga sil juaah leh leite anohdoh panta a, huleh sum hengtute dohkaante leh vakhu juaahte touna asawnpuuhsah hi. 16 Huleh Pathian biahinn tawn a juaahsil puaah aphal sih hi. 17 Huin Ama'n a kawmvah, "'Ka inn chu nam chin diinga haamteina inn akichi diing,' chia kigial hilou ahiaimah? Hizongleh nang un 'suammangte umna kua in' na siamta uh," chiin ahilh hi. 18 Huleh daanjilsahtute leh siampu lalte'n hichu aja va Amah thahna diing lampi ahawlta uh; mi zousiah in a thuhilh limdang asah jiahun Amah alauta uhi. 19 Huleh nitaahlam ahung hihin khopi apatin apawtta uhi.
Theipi Kung Apat Ginna Thu Kihilhna
20 Huin jiingkaal a ahung paikawm un theipi kung chu a zung tanpha a gawgawp chu ahung mu uhi. 21 Huleh Peter in hezingin a kawmah, "Rabbi, endua, theipi kung na haamsiat chu agawgawpta hi," achi hi. 22 Huin Jesu'n adawng a, a kawmah, "Pathian gingta un. 23 Ajiahchu chihtahzetin ka hung hilh ahi, mi koipouh in hi taang kawmah, 'Kituandoh inla tuikhanglian ah kipaai in,' chia a lungtang a ginglel lou hial a asoi chu ahung tung ngeei diing a, asoi photmah bawlsah ahi diing hi. 24 Hujiahin ka hung hilh ahi, sil bangpouhmah na nget chiangun, amuin kingai un, huchiin na mu diing uhi. 25 Huleh haamtei a na din chiangun, koi tung hitaleh thupoi bang aha na neih un chu ngaidam un, na Pa uh vaan a um in zong na tatsualnate uh ahung ngaihdam theihna diingin. 26 Hizongleh na ngaihdam louh un chu, na Pa uh vaan a um in zong na tatsualnate uh ahung ngaidam sih diing hi," achi hi.
Jesu Thuneihna Aginlelhna uh
27 Huin Jerusalem ah aluut kiit uhi. Huleh Pathian biahinn sunga avaah lehleh laiin, siampu lalte leh daanjilsahtute leh upate a kawmah ahung uhi. 28 Huleh amah un a kawmah, "Bang thuneihna in ahiai hi silte na bawl? Huleh hi silte bawlna diingin hi thuneihna koi in hung pia ahiai?" achi uhi. 29 Hizongleh Jesu'n adawng a, a kawmvah, "Ke'n zong thu khat ka hung dong diing a, hung dawng un, huchiin bang thuneihna in ahiai hi silte ka bawl, ka hung hilh diing hi: 30 Johan baptisma hi vaan apat ahiai, mihing apat? Hung dawng un," achi hi. 31 Huin amahuh akingaihtuah va, "'Vaan apat,' kichi le lah, 'Bang diinga amah gingta lou?' ahung chi diing hi. 32 Hizongleh, 'Mihing apat' chi lei lah," achi va, mipite alau ngaal uhi, ajiahchu mi zousiah in Johan chu zawlnei hitahzetin asep uhi. 33 Huchiin amah un adawng va Jesu kawmah, "Ka he sih uh," achi uhi. Huin Jesu'n adawng a, a kawmvah, "Ke'n zong bang thuneihna a hi silte bawl ka hih ka hung hilh diaah sih diing," achi hi.
Grephuan Tehkhinthu
1 Huin Ama'n a kawmvah tehkhinthu in thu asoi panta a: "Mi koiaha in grephuan abawl a, huleh daai in auum kiimveel a, greptui suuhna kokhuuh alaai a, a veenna diing buuh sang alam hi. Huleh lou bawlte kawmah hohloh diingin apia a, khual gamlapi ah achiahta hi. 2 Huleh a gah loh hun in huan a gah atan diing chu lou bawltu kawm apat vala diingin lou bawlte kawmah suaah khat asawl hi. 3 Huleh amahpa chu anaman va, avua va, khutguaahin asawl kiit uhi. 4 Ama'n suaah dang khat asawl kiit a, amah chu suang in anasep va, a lutang anasuliam va, zumhuaitaha anabawlin asawlmangta uhi. 5 Huin ama'n adang khat asawl kiit a, amah chu anathat va; huleh hutobangmahin midang tampi zong khenkhat avua va, khenkhat athat uhi. 6 "Hujiahin ama'n tapa deihtah khat aneih naahlai jiahin, 'Ka tapa chu azahtaat diing uh,' chiin anunungpeenin amah zong a kawmvah asawlta hi. 7 "Hizongleh hu lou bawlte'n, 'Hichu a gouluah diingpa ahi. Hung un, amah i that diing uh, huchiin a gouluah diing chu ei a ahi mei diing,' achi uhi. 8 Huin amah chu manin athat va, huleh grephuan pua ah apaaidohta uhi. 9 "Hujiahin grephuan neitu in bang alohta diai? Amah chu ahung diinga lou bawlte chu asumang diing a, huleh grephuan chu midangte kawmah ape diing hi. 10 Hi Pathian Lehkhathu ah sim kha ngeilou na hi viaimah: 'Inn lamtute suang deihlouh ngeei chu aning a suang poimohpeen ahung hita hi. 11 Hichu LALPA bawl ahi a; huleh i mitmuh vah athumah ahi'?" chiin. 12 Huin hu tehkhinthu chu amahuh demna a soi ahi chih aheet jiahun, Amah chu mat atum uhi. Hizongleh mipite alau va, huchiin Amah chu nusiain achiahta uhi.
Siahtawi Thu a Dotna
13 Huin amah un a thusoite a man diingin Pharisaite hunkhop leh Herod pawlte hunkhop a kawmah asawl uhi. 14 Jesu kawm ahung tun tahun, a kawmah, "Houtupa, nang midihtat na hi a, mi koimah doptuam na nei sih chih ka he uhi; ajiahchu mihing koima maaizah na nei sih a, hizongleh dihtahin Pathian lampi thu na hilh jeel, chih ka he uhi. Kaisar kawma siah tawi dih ahiai, ahihlouhleh dihlou? 15 Pe diing ka hi viai, ahihlouhleh pe lou diing ka hi viai?" achi uhi. Hizongleh Ama'n alepchiah daan uh ahe a, a kawmvah, "Bang diinga hung je-et na hi viai? dinari khat hung tawi un, ka en diing," achi hi. 16 Huchiin ahung tawi uhi. Huleh Ama'n a kawmvah, "Hi koi lim leh koi min ahiai?" achi hi. Huin amah un, "Kaisar a," achi uhi. 17 Huin Jesu'n adawng a, a kawmvah, "Kaisar silte chu Kaisar kawmah pia unla, huleh Pathian silte chu Pathian kawmah pia un," achi hi. Huleh amah un limdang asa mahmah uhi.
Thohkiitna Thu a Dotna
18 Huin Sadukaite khenkhat, misi thohkiitna aum sih chite a kawmah ahung va: 19 "Houtupa, Mosi in, mi khat chu a sanggampa sita henla, a ji ta neilouin nuse leh, a sanggampa a ji aluah diing a, a sanggampa diingin chi ahaahsah diing ahi, chiin ahung gelh sah hi. 20 Huleh unau pasal sagih. aumta uhi. A upapeen in ji anei a, huleh chi haah nei louin asita hi. 21 Huin anihna in amahnu anei a, chihaah neilou mahin asi jeel hi. Huleh athumna pa zong huchibangmahin aum hi. 22 Huchiin asagih un akiteenpih chiatva chihaah nei louin asi vehta uhi. Atawp ah numeinu zong asita hi. 23 Hujiahin, thohkiitna ni a ahung thohkiit chiangun a lahva koipeen ji ahita diai? Ajiahchu asagih un akiteenpih kha chiat uhi," chiin adong uhi. 24 Jesu'n amah uh adawng a, a kawmvah, "Pathian Lehkhathu leh Pathian silbawltheihna na heet louh jiahun bawlkhial hilou na hi uh maw? 25 Ajiahchu misi lah apat athohkiit chiangun, akiteeng nawn sih va, teeng zong akiteengsah sih diing uh, hizongleh vaan a angelte bang ahita uhi. 26 Hizongleh misite kaihthoha aum diing uh thu, Mosi Lehkhabu ah, sawlbawh laha Pathian in, 'Kei Abraham Pathian, Isak Pathian leh Jakob Pathian ka hi,' chia ahoupih daan simlou na hi viaimah? 27 Amah chu misite Pathian ahi sih a, hizongleh ahingte Pathian ahijaw hi. Hujiahin na bawlkhial mahmah uhi," achi hi.
Thupiaah Lianpeen Thu a Dotna
28 Huin daanjilsahtute laha khat ahung a, akinial uh aja a, Jesu'n amahuh dihtahin adawng chih aheetin, "Thupiaah zousiah laha lianpeen khoikhu ahiai?" chiin adong hi. 29 Jesu'n adawng a, "Thupiaah zousiah laha lianpeen chu: 'Aw Israel, ngai un, LALPA i Pathian uh chu LALPA khat ahi. 30 Huleh LALPA na Pathian chu na lungtang zousiah a, na hinna zousiah a, na lungsim zousiah a, huleh na haatna zousiah a na lungsiat diing ahi.' Hichu thupiaah poimohpeen ahi. 31 Huleh anihna chu hi ahi: 'Nangmah na kilungsiat banga na innveengte zong na lungsiat diing ahi.' Hite saanga lianjaw thupiaah dang mawngmawng aum sih hi," achi hi. 32 Huchiin daanjilsahtupa'n a kawmah, "Ahi, Houtupa, na soi dih hi. Thutahnasoihi, ajiahchuPathian khat chauh aum a, Amah chihlouh adang aum sih hi. 33 Huleh Amah chu lungtang zousiah a, heetsiamna zousiah a, hinna zousiah leh haatna zousiah a lungsiat diing ahi. Huleh eimah i kilungsiat banga i innveengte lungsiat chu haaltum sillat leh kithoihna zousiah saangin ahoihjaw hi," achi hi. 34 Huchiin amah in piltahin adawng chih Jesu'n amuhin a kawmah, "Pathian lalgam akipatin na gamla sih hi," achi hi. Huleh hu nungsiah chu koima'n thu mawngmawng adong ngamta sih uhi.
David Tapa thu a Dotna
35 Huin Jesu'n Pathian biahinn a thu ahilh laiin, amahuh adawng a, "Daanjilsahtute'n Khrist chu David Tapa ahi, bangchidaana achih uh ahiai? 36 Ajiahchu David ngeei in Hagau Siangthou in: 'LALPA'N ka Lalpa kawmah, "Na meelmate na keeng ngahna a ka bawl masiah ka jiatlam ah tou in," achi hi.' 37 Hujiahin David ngeei in Amah chu 'Lalpa' chiin akou hi; huchi ahihleh bangchidaana a Tapa hi ahiai?" achi hi. Huleh mi tamtahin kipaahtahin a thu angaikhia uhi.
Jesu yn Pharisaite Ademna
38 Huin Ama'n a thuhilhna ah a kawmvah, "Daanjilsahtute lahah kiveeng un, amahuh chu puantual silha vaah lehleh dawlmunte a mite'n chibai abuuh uh bang auut va, 39 sinagog a touna poimohpeen leh gualvaahna a mun hoihpeen bang angaina va, 40 meithaite inn haw anegam va, huleh bawltawmin sawt pipi ahaamtei uhi. Amah un chu siamlouhtanna lian seem amu diing uhi," achi hi.
Meithainu Thohlawm
41 Huin Jesu chu sumkholna jawn ah atou a, mipite'n sumkholna a sum akhiah daan uh aen hi. Huleh mi hausa tamtahte'n tampipi akhia uhi. 42 Huin meithainu gentheitah khat ahung a, paisa lepton nih akhia a, huchu paisa san khat ahi. 43 Huchiin Ama'n a nungjuite akou a, a kawmvah, "Chihtahzetin ka hung hilh ahi, sumkholna bawm a sum khe tengteng saangin, hi meithai gentheitahnu'n akhe tampeen hi; 44 ajiahchu amahuh zousiah in aneih vaal uh akhia va, hizongleh hi meithainu in chu aneih zousiah, akitunhingna diing teng akhiah veh ahi," achi hi. _
Jesu'n Hun Hungtung Diing Asoina
1 Huin Jesu Pathian biahinn apat apawt dohin a nungjuite laha khat in a kawmah, "Houtupa, endua, asuangte bang tobanga limdang a, a innte haw bangchitaha loupi ahita eimah!" achi hi. 2 Huleh Jesu'n adawng a, a kawmah, "Hi inn loupite na mu maw? Suhchip louha suang kithuap mawngmawng hitah ah khat zong aum sih diing," achi hi. 3 Huin Olive Taang a Pathian biahinn jawna atou laiin Peter, Jakob, Johan leh Andru te'n aguuhin a kawmah adong va, 4 "Hung hilh in, hi silte bangchihchiangin ahung tung diai? Huleh hi silte hung tun diing chiangin chiamchihna bang ahung um diai?" chiin. 5 Huleh Jesu'n, amahuh adawng a, a kawmvah, "Koima'n ahung heem louhna diingin pilvaang un. 6 Ajiahchu mi tampi ka min in ahung diing va, 'Amah chu ka hi,' achi diing va, huleh mi tampi aheem diing uhi. 7 Huleh gaal thute leh kidou thuthangte na jaah hun chiangun, lungdong sih un; ajiahchu hute chu tung diing mawng ahi a, hizongleh atawpna chu ahi nai tadih sih diing. 8 Ajiahchu nam tuam leh nam tuam akidou diing va, huleh lalgam tuam leh lalgam tuam akidou diing uhi. Huleh mun tuamtuam ah jiil akiliing diing a, kial leh buaina aum diing hi. Hite chu numei nauvei nat kipatna ahi. 9 "Hizongleh pilvaang un, ajiahchu vaihawmtute khut ah ahung pedoh diing va, sinagogte ah ahung vo diing uhi. Huleh keimah jiahin gamoptute leh kumpipate ma ah heetpihtuin na ding diing uhi. 10 Huleh tanchinpha chu nam zousiah kawmah soi masat ahi diing hi. 11 Hizongleh ahung mat va, ahung piaahdoh hun chiangun bang soi diing ka diai chiin lunghimoh sih un. Hizongleh ahuntaha hung kipia chu soi jaw un, ajiahchu asoitu nanguh hilouin, Hagau Siangthou ahijaw hi. 12 "Huin sanggampa in a sanggampa thah diingin apedoh diing a, huleh pa in a ta; huleh tate'n a nulepate uh adou diing va, athatsah diing uhi. 13 Huleh ka min jiahin mi zousiah huatin na um diing uhi. Hizongleh atawp donga thuaah mualsuaah mi chu hutdamin aum diing hi. 14 "Hizongleh zawlnei Daniel in anasoi, 'Sumangtu kihdahum' chu adin louhna diinga ding na muh chiangun" (asim phot in hesiam heh), "hu hun tahchiangin Judia gam a umte taang ah taai uh heh. 15 Huleh inn tunga um zong kum sih heh, a inn sunga thuampua umte ladoh diingin zong vakum sih heh. 16 Lou a um zong a puan la diingin hung kihkiit sih heh. 17 Hizongleh hu hun laia gaaite leh naungeeh nawiteep neite tung agih hi! 18 Huleh hu hun chu phalbi lai ahihlouhna diingin haamtei un. 19 Ajiahchu hu hun ah gimthuaahna aum diing a, hutobang gimthuaahna chu Pathian in leilung asiam chiil apat aum kha nai sih a, um zong aum nawn sih diing hi. 20 Huleh Lalpa'n hu hun sutom lou hileh, mi mawngmawng asuaahta sih diing hi; hizongleh a miteel, teeltuamte jiahin a nite chu asutomta hi. 21 Hu hun chiangin mi khat pouh in na kawmva, 'En un, hitah ah Khrist aum!' ahihlouhleh 'En un, hutah ah aum,' achih uh leh, tahsang sih un. 22 Ajiahchu khrist tahloute leh zawlnei tahloute ahung pawt diing va, hute'n chu chiamchihnate leh sil loupite ensahin, hithei leh houh, teelte nasan aheemkhe diing uhi. 23 Hizongleh pilvaang un, ngai un, sil zousiah ka hung hilhlawhta hi.
Mihing Tapa Hungna diing
24 "Hizongleh hu hun ah, hu gimthuaahna tun zoh chiangin, ni chu amialta diing a, huleh ha in a vaahna ape nawn sih diing a; 25 Vaan apat aahsite chu ahung ke diing a, huleh vaan a um silbawltheihnate chu akiliing diing hi. 26 "Hutah chiangin Mihing Tapa chu silbawltheihna nasatah leh loupina toh meipi laha hung amu diing uhi. 27 Huleh huzoh chiangin Ama'n a angelte asawlkhe diing a, ateelte chu kawlmong ning li akipan, lei tawp akipanin vaan tawp dongin akhawm khawm diing hi. 28 "Huchiin theipi kung ah tehkhinthu jil un: A baa a ahung meen a, a nah ahung sel chiangin, nipi anaita chih na he uhi. 29 Huchiin nang un zong, hi silte ahung tun na muh chiangun Amah ahung naita a, kotkhaah bul ngeei ah ahung tungta, chih he un. 30 Chihtahzetin ka hung hilh ahi, hi silte zousiah atun kim masiah hi khang a mite abei sih diing uhi. 31 Vaan leh lei abeimang diing a, hizongleh ka thu amang hial sih diing hi.
Kigingzing diinga Hasotna
32 "Hizongleh hu ni leh ahun diing chu Pa chauh loungaal koimah in, vaan a um angelte'n zong, Tapa in zong ahe sih hi. 33 Ahun diing na heetlouh jiahun pilvaang unla, kiging zinga umin haamtei un. 34 Hichu mi khat a inn nusia a, a suaahte kawma thuneihna pia a, a natoh diing uh pe chiat a, kot veengtu chu pilvaang diinga hilh a, gamlapi a khualzindoh tobang ahi. 35 "Hujiahin kigingzing un, ajiahchu inn neitupa hung diing hun, nitaahlam aha, jaankhanglai aha, aah khuan in aha, ahihlouhleh jiingkaal in aha chih na he sih uhi, 36 huchilou inchu thakhat- a hungin ihmuin ahung mu kha diing hi. 37 Huleh na kawmva ka soi chu mi zousiah kawma ka soi ahi: Kigingzing un!" achi hi.
Jesu Thah Tum a Thuphialna
1 Chiahkaan Kuut leh Tolsohlouh Tanghou Kuut umna diing ni nih chauh aumta a, huleh siampu lalte leh daanjilsahtute'n Jesu dohabawla mat a, thah theihna diing daan ahawl uhi. 2 Hizongleh, "Kuut laiin hihdah heh, huchilou inchu mipi buaina aum kha diing," achi uhi.
Bethani a Jesu Thaunuhna
3 Bethani khua a, mi phaah anahi Simon inn ah aum a, ankuang a atou laiin, numei khat alabaster buuh spainard thau gimtuui man tamtah tawiin ahung a, amahnu'n abawm chu atatkeeh a, Jesu lutung ah aleihta hi. 4 Huleh a lahvah lungkim lou khenkhat aum va amah leh amahuh akihou va, "Bang diinga thau gimtuui kimawh suhbei ahiai? 5 Ajiahchu hichu dinari za thum saanga tamjaw a juaah a, migentheite kawma piaah theih diing ahi," achi uhi. Huchiin amahnu tung ah aphunta uhi. 6 Huin Jesu'n, "Amahnu chu aum umin umsah un, bang diinga tohbuai na hi viai? Ka tung ah nna hoih atong hi. 7 Ajiahchu migentheite na kawmvah aum zing va, na uut hun tengun na panpih thei uhi, hizongleh kei chu na kawmvah ka um zing sih hi. 8 Amahnu'n abawl theihtawp abawlta ahi, ka sapum vui diing thau ahung nuh masa ahi. 9 Chihtahzetin ka hung hilh ahi, khovel pumpi a hi tanchinpha kisoina phot ah hi numeinu silbawl zong amahnu heetzingna diingin akisoi diing hi," achi hi.
Juda Lepchiahna
10 Huin sawmlenihte laha khat, Juda Iskariot chu Amah mansah diingin siampu lalte kawmah avachiah hi. 11 Hikhu ajaah tahun amahuh akipaah va, huleh amah chu sum piaah achiamta uhi. Huin ama'n amatsahna diing hun lemtaang ahawlta hi.
Chiahkaan Kuut Kisingsahna
12 Huleh Tolsohlouh Tanghou Kuut ni masapeen, Chiahkaan Kuut belaamnou alat ni un a nungjuite'n a kawmah, "Chiahkaan an na neeh theihna diingin khoia vachiahin vabawl leh ung na deih ei?" achi uhi. 13 Huin Ama'n a nungjuite nih asawldoh a, a kawmvah, "Khopi ah valuut unla, huchiin pasal tuibeel pua khat in ahung tuaah diing a, amah chu jui un. 14 Huleh aluutna peenpeen hu inn neitupa kawmah, 'Houtupa'n, "Ka nungjuite toh Chiahkaan an ka neehna diing uh mikhual pindan khoitah ahiai?" achi hi,' chi un. 15 Huchiin ama'n pindan tungnung liantah, van umsa leh guatsa diam ahung ensah diing a; hutah ah eiuh diing ankuang vabawl khawl un," achi hi. 16 Huin a nungjuite achiah va, khopi sung ah aluut va, huleh a kawmva asoi bangin amuta va, huchiin Chiahkaan an chu abawlta uhi.
Nitaah Ankuang Nunungpeen
17 Huin nitaahlam ahung hihin Amah chu sawmlenihte toh ahung hi. 18 Huleh tou a aneeh laiun Jesu'n, "Chihtahzetin ka hung hilh ahi, an ka neeh khawmpih na lahva khat in ahung mansah diing hi," achi hi. 19 Huin amahuh chu alungkham panta va, a kawmah, khat khat in, "Kei ka hi maw?" achi va, abaan baanin, "Kei ka hi maw?" chiin adongta uhi. 20 Huin Ama'n adawng a, a kawmvah, "Sawmlenihte laha khat, kuang a ka an sawh khawmpih ahi. 21 Mihing Tapa chu a tanchin kigial bang ngeeiin apai diing ahi a, hizongleh Mihing Tapa mansah diingpa tung agih hi! Hu mi chu anapianglou hileh amah diingin ahoihjaw diing hi," achi hi. 22 An aneeh laiun Jesu'n tanghou ala a, avangpiaah a, huleh abalkeeh a, a kawmvah apia a, "La unla, ne un; hichu ka tahsa ahi," achi hi. 23 Huin nou ala a, huleh kipaahthu asoi zohin, a kawmvah apia a, a bawnun adawn chiat uhi. 24 Huleh ama'n a kawmvah, "Hichu thuhun thah a ka sisan, mi tampite diinga luangdoh chu ahi. 25 Chihtahzetin ka hung hilh ahi, Pathian lalgam a athah a ka dawn ni atun masiah greptui ka dawn kiit nawn sih diing," achi hi. 26 Huleh amah un la khat asah zohun apawtdoh va, Olive Taang ah achiahta uhi.
Nungjuite Kiheetmohbawl Diing Soilawhna
27 Huin Jesu'n a kawmvah, "Tujaan chiangin kei jiahin na bawnun puuhsah vehin na um diing uhi, ajiahchu, 'Belaampu kajeep diing a, belaam hon chu adalhjaah diing uhi,' chih gelh ahi. 28 "Hizongleh ka thohkiit nung chiangin Galili gam ah na ma vah ka na chiah masa diing hi," achi hi. 29 Hizongleh Peter in chu a kawmah, "Mi zousiah puuhsahin um zongleh uh, kei chu ka puuh sih diing," achi hi. 30 Huin Jesu'n a kawmah, "Chihtahzetin ka hung hilh ahi, tuni in, tujaan ngeeiin aah nihvei akhuan main thumvei na hung kiheetmohbawl diing," achi hi. 31 Hizongleh Peter in khauh seemin, "Nang toh si khawm diing hizongleng, ka hung kiheetmohbawl hial sih diing," achi hi. Huchibangmahin a bawnun achi chiat uhi.
Jesu Gethsemani Huan ah
32 Huleh amahuh chu Gethsemani kichi mun khat ahung tungta va; huleh Ama'n a nungjuite kawmah, "Ka haamtei sung hitah ah na tou un," achi hi. 33 Huleh Peter leh Jakob leh Johan apui a, nasataha thaphaangin amangbang panta hi. 34 Huchiin a kawmvah, "Ka hinna sihna khop hialin alungngai hi, hitah ah ana-um unla, kiging un," achi hi. 35 Huin malam ah themkhat achiah gamla deuh a, tual ah apuuh a, ahihtheih leh, hu hun in Amah apelh theihna diingin ahaamtei hi. 36 Huin "Abba, Pa, sil zousiah nang a diingin ahithei hi, hi nou hi kei apatin lamang in; hizongleh keimah thu hilouin, nangmah thuthu hijaw heh," achi hi. 37 Huin ahung a, amahuh chu ihmuin ahung mu a, huchiin Peter kawmah, "Simon ihmu na hi maw? Daahkaal khat zong kiging a umzou lou na hi maw? 38 Heemna a na luut louhna diingun kiging zing unla haamtei un. Hagau in chu apeih a, hizongleh tahsa chu achau hi," achi hi. 39 Huleh achiah mang kiit a, ahaamtei a, asoi ngeimah avachi hi. 40 Huin ahung kiit a, a ihmut uh asuaah mahmah jiahin amahuh chu ihmuin ahung mu jeel a, huleh Amah dawnna diing zong ahe sih uhi. 41 Huin a thumveina in ahunga a kawmvah, "Nanguh ihmu a tawldam nalai na hi uh maw? Ahunta hi, a hun atungta; en un, Mihing Tapa chu misualte khut ah matsah ahita. 42 Thou un, i chiah diing uh; en un, kei hung mansahtu chu ahungta hi," achi hi.
Jesu Matsahna
43 Huleh thu asoi laiin, sawmlenihte laha khat, Juda chu thakhatin a kawmah ahung tung a, siampu lalte leh daanjilsahtute leh upate hung sawl mipi tamtah naamsau leh khetbuuh tawiin a kawmah aum uhi. 44 Huleh Amah mansahpa in amahuh chiamchihna ahilh masa a, "Ka tawp peenpeen chu Amah ahi, man unla, bittahin puimang un," achi hi. 45 Huchiin ahung tun tahin avanaih pah a, "Rabbi, Rabbi!" chiin Amah atawp hi. 46 Huin amah un a tungah khut aha va, amanta uhi. 47 Huleh a kawmva dingte laha khat in a naamsau azandoh a, siampu lalpeen suaahpa asaat a, a bil asaatkhiahsah hi. 48 Jesu'n amahuh adawng a, a kawmvah, "Suammangtu man diing bang hialin naamsau leh khetbuuhte toh kei man diingin na hung kuan uh maw? 49 Ni chinin, Pathian biahinn ah thuhilhin ka um zing a, na hung man sih uhi. Hizongleh Pathian Lehkhathu ataangtung ngeei diing ahi," achi hi. 50 Huin nungjuite'n a bawnun Amah anusia va, ataaita uhi. 51 Huleh tangvaal koiaha khat in, puan neem chauh silhin Amah ajui a, huleh tangvaalte'n amah aman uhi. 52 Huin a puan neem chu nusiain, a saguaahin a kawm vakipatin ataaita hi.
Jesu Siampu Lalpeen Ma a Dinna
53 Huin Jesu chu siampu lalpeen ma ah apui va; huleh amah toh siampu lalte leh upate leh daanjilsahtute zousiah ahung kikhawm uhi. 54 Peter in siampu lalpeen huangsung tandongin agaal juih a; huleh hutah a biahinn veengtute toh atoukhawm a, mei a-awi khawm uhi. 55 Huleh siampu lalte leh Judate vaihawmnainn a um zousiah in Jesu athah theihna diingun aheetpihtu diing ahawl va, amu sih uhi. 56 Mi tamtah in juauthu in aheeh va, hizongleh a heehna haw uh akituaah sih hi. 57 Mi khenkhat adingdoh va dihloutahin aheeh va, 58 "'Hi khut a bawl Pathian biahinn ka suse diing a, ni thum sungin khut a bawl louh adang khat ka lam diing,' Ama'n achih ka ja uh," achi uhi. 59 Hizongleh huchiin zong a heehna uh akituaah thei tuan sih hi. 60 Huin siampu lalpeen a laivah adingdoh a, Jesu kawmah, "Bangma dawng lou diing maw? Hite'n nang ahung heehnate uh bangchidaan ahiai?" chiin adong hi. 61 Hizongleh Amah chu asip bihbeh a, bangma in adawng sih hi. Siampu lalpeen in, "Nang Hampha Tapa, Khrist chu na hi maw?" chiin adong kiit hi. 62 Jesu'n, "Ka hi mah hi. Huleh Mihing Tapa chu Silbawltheihna jiatlam a tou a, vaan meipi toh hung na mu diing uhi," achi hi. 63 Huin siampu lalpeen in a puante abotkeeh a, "Heetpihtu dang bang diing i chi nalai diai? 64 Pathian asoisiat daan na jata uhi; bangchi na sa viai?" achi hi. Huin a bawnun Amah chu si taahin siamlouh atangsahta uhi. 65 Huin khenkhat in chil asiat khum panta va, a maai atuamsah va, khuttum in asu va, "Soi in!" achi uhi. Huleh houtute'n zong khut in abeeng uhi.
Peter in Jesu Akiheetmohbawlna
66 Huleh Peter chu nuailama innpi huang a aum laiin, siampu lalpeen suaah numeite laha khat ahung hi. 67 Amahnu'n Peter mei awia um amuh in, aen a, "Nang zong Nazareth Jesu toh kilawi na hi," achi hi. 68 Hizongleh ama'n chu kiheetmohbawlin, "Ka he sih, na soi zong angaihna ka he sih," achi hi. Huleh inn liim ah avapawtdoh a, huchiin aah akhuangta hi. 69 Hu suaahnu mah in amah amu kiit a, a kawma dingte kawmah, "Hi pa a lahva khat ahi," achi jeel hi. 70 Hizongleh akiheetmohbawl kiit a, huin tomkhat zouin a kawma dingte'n Peter kawmah, "Nang zong a lahva khat na hi tahzet hi, ajiahchu Galili mi na hi a, na haam in zong akihe hi," achi uhi. 71 Hizongleh ama'n, "Na soi uh hi Pa ka he kha sih," chiin haamsia louin akichiamta hi. 72 Huleh anihveina in aah ahung khuang pahta a, huin Peter in Jesu'n a kawma, "Aah nihvei akhuan main thumvei na hung kiheetmohbawl diing hi," achih thu ahedoh a, huchu angaihtuahin akapta hi.
Vaihawmpawl Ma ah Jesu
1 Jiingkaal matahin siampu lalte chu upate leh daanjilsahtute leh vaihawmtute zousiah toh akihou khawm pah va, Jesu chu kaanin apui va, Pilat kawmah apedohta uhi.
Jesu Pilat Ma a Mohsahna
2 Huin Pilat in, "Judate Kumpipa na hi maw?" chiin adong hi. Huin Ama'n adawng a, a kawmah, "Na chih bangin ahi," achi hi. 3 Siampu lalte'n sil tampi in aheeh va, hizongleh Ama'n bangmah in adawng sih hi. 4 Huin Pilat in adong kiit a, "Bangma dawng lou maw? En in, ahung heehna zoujaaite uh," achi hi. 5 Hizongleh Jesu'n bangmah in adawng tuan sih a, huchiin Pilat in limdang asa hi.
Jesu Kilhbeh Diinga Piaahkhiahna
6 Kuut ni a mipite nget peenpeen suangkultaang khat Pilat in ahahkhiah jeel ngeina ahi. 7 Huleh a min Barabba kichi, helna lama a helpihte toh tualthat a koltaang khawm khat aum hi. 8 Huleh mipite chu kikouin, amahuh diinga abawlsah veu banga bawl diingin angeen uhi. 9 Hizongleh Pilat in adawng a, a kawmvah, "Judate Kumpipa hung hahdohsah leng na uut viai?" achi hi. 10 Ajiahchu siampu lalte'n thangsiatna jiahin Jesu apedoh uh ahi chih ahe hi. 11 Hizongleh siampu lalte'n chu Barabba hung hahdohsah jaw in chia ngeen diingin mipite achiil zouta uhi. 12 Huin Pilat in adawng a, a kawmvah, "Ahihleh Judate Kumpipa na chihpa uh hi bang ka lohta diai?" achi kiit hi. 13 Huin amah un, "Kros ah kilhbeh in!" chiin akikou kiit uhi. 14 Huin Pilat in a kawmvah, "Bang jiahin eimaw, bang bawlsual anei a ahiai?" achi hi. Hizongleh amahuh chu, "Kros ah kilhbeh in!" chiin akihahkou seem uhi. 15 Huchiin Pilat in mipi suhlungkim auut a, Barabba chu a kawmvah ahahdohsah a, huleh Jesu chu ajeep zohin kros a kilhbeh diingin apedohta hi.
Sepaihte'n Jesu Asimmohbawlna uh
16 Huin sepaihte'n Amah chu vaihawmna innpi sung, Praitoriam achih vah apui va, huleh sepaih hon khat akou khawm uhi. 17 Huleh Amah chu puan sandup asilhsah va, ling lukhuh aphan va, akhuhsahta uhi. 18 "Chibai, Judate Kumpipa!" chiin chibai abuuh uhi. 19 Huleh sialluang in a lu asaat va, chil asiatkhum va, khuupdinin abia uhi. 20 Huin chiamnuih bawlna a aneih zohun, puan sandup chu ahawhkhiahsah va, Amah puan ngeei asilhsah kiit va, huleh kros a kilhbeh diingin apuita uhi.
Jesu Kikilhbehna
21 Huleh mi lampailai khat, gam lam apat a hung, Kureni gam mi Simon, Alexandar leh Rufa pa chu a kros po diingin apawngbawlta uhi. 22 Huin Jesu chu Golgotha mun ah apui va, huchu, Luguh mun, chihna ahi. 23 Huin murrah toh kihal uain dawn diingin apia va, hizongleh Ama'n asaang sih hi. 24 Kros ah akilhbeh va, atan diing chiat uh heetna diinga aisaanin a puansilhte chu akihawmta uhi. 25 Huleh akilhbeh hun uh chu daah thumna ahi. 26 Amah kiheehna: JUDATE KUMPIPA, chih thugelh chu a tungah akitaah hi. 27 Amah toh suamhaat mi nih akilhbeh va; khat a jiatlam ah, khat a veilam ah. 28 Huchiin Pathian Lehkhathu in, "Amah chu daan botsete toh simkhawm ahi," achih chu ataangtungta hi. 29 Huleh mi vaahleh phot in soisiain a lu uh athinkhum va, "Chei le! Nang Pathian biahinn susia a ni thum a sadohkiit diingpa, 30 nangmah kihunkhia inla, huleh kros apat hung kumkhia in," achi uhi. 31 Huchibangmahin siampu lalte leh daanjilsahtute'n amahuh laha kichiamnuihin Jesu aeenghou va, "Ama'n midang ahundam a, Amah leh Amah akihundam thei sih. 32 I muh va, i gintaat theihna diingun Israelte Kumpipa Khrist chu tuin kros apat hung kumkhia heh," achi uhi. Huleh kros a Amah toh kikilhbeh khawmte nasan in zong Amah aelhou uhi.
Jesu Sihna
33 Daah guupna ahung hihin, gam pumpi tungah sim ahung jiing a, daah kuahna tandongin khua amialta hi. 34 Daah kuahna ah Jesu chu aw ngaihtahin akikou a, "Eloi, Eloi, lama sabakthani?" chiin. Huchu, "Ka Pathian, ka Pathian, bang diinga hung taaisan na hiai?" chihna ahi. 35 A kawma dingte khenkhat in hu ajaah tahun, "Ngai un, Elijah akou," achi uhi. 36 Huin mi khat ataai a, spanji khat uain thuuh a diah dimin, sialluang chiang dawn ah ataah a, dawn diingin apia a, "Ngaihsah sih un; Amah lakhe diingin Elijah ahung ngeei eimah i en diing uh," achi hi. 37 Huin Jesu chu aw ngaihtahin akikou a, a hagau ahahta hi. 38 Huleh Pathian biahinn a puanjaah chu a tunglam apat a nuailam tandongin keeh nih ahung kisuahta hi. 39 Huleh a majawn a ding sepaih zahoutu in, hutobanga kikou doh leh a hagau hah amuhin, "Hi Pa hi Pathian Tapa ahi tahzet hi," achi hi. 40 Hutah ah numeite'n zong gaal apat enin aum va, hute lahah Mari Magdalini leh Jakob a Neupa leh Jose nu Mari, huleh Salomi atel uhi. 41 Amahuh chu Galili gam a aum laia, Amah jui a, a nna natohsahte zong ahi uh. Huleh numei dang tampi Jerusalem a Amah toh kitontoute zong aum uhi.
Jesu Vuina
42 Nitaahlam ahung hihin, Kisahkhawl ni ahih jiahin, huchu Sabbath ma a ni ahi hi. 43 Arimathia khua a Joseph, vaihawmtu zahumtah, Pathian lalgam ngaah zinga umpa chu ahung a, hangsantahin Pilat kawmah aluut a, Jesu luang chu avangeenhi. 44 HulehAmah sizou anahihtaah chu Pilat in thumah asa mahmah a, huchiin sepaih zahoutu kouin a kawmah asihna asawtta eimah chih adong hi. 45 Sepaih zahoutu apat aheetchian phetin a luang chu Joseph apeta hi. 46 Huin ama'n puan neem alei a, Jesu chu alakhia a, puan neem in atuam a, suang hawtkuaah haan sung ah asial a, huchiin suang khat haankot ah aliihkhumta hi. 47 Huleh Mari Magdalini leh Jose nu Mari in asialna uh aen uhi.
Jesu Thohkiitna
1 Huleh Sabbath ni abei phetin, Mari Magdalini leh Jakob nu Mari leh Salomi in Amah luang avanuh diingun sil gimtuui alei uhi. 2 Huleh hapta ni masapeen ni jiingkaal matahin haan ah ni suaah zoh geihin ahung uhi. 3 Huleh amahuh leh amahuh kihouin, "Haan kot apat suang koi in ahung liihkhiahsah diing adiai?" akichi uhi. 4 Huleh aet uh leh suang lian mahmah chu liihdohsain amuta uhi. 5 Huleh haan sunga aluut uh leh tangvaal khat puan vaam tualtah silh a, jiatlam panga tou amu va, alau mahmah uhi. 6 Huin ama'n a kawmvah, "Lau sih un. Kros a kikilhbeh Nazareth Jesu na hawl uh ahi. Amah chu athoukiitta a, hitah ah aum nawn sih hi. A sialna mun uh enmah un. 7 Hizongleh chiah unla, a nungjuite leh Peter kawmah, Galili gam ah na ma vah anachiah masa hi; na kawmva asoi bangin Amah na mu diing uh, chiin vahilh un," achi hi. 8 Huin amahuh chu kintahin apawt va, haan apatin ataai va, thumah asah jiahun akiliing uhi. Huleh alau jiahun koima kawmah bangmah asoi sih uhi.
Jesu Kilaahna
9 Huin hapta ni masapeen baihtah a Jesu athoh zohin, Mari Magdalini, a sung apat dawi sagih anohdoh nu kawmah akilaah masapeen hi. 10 Amahnu chu achiah a, Jesu umpih veute, Amah suun a kapte chu hu thu avahilhta hi. 11 Huleh Amah chu ahingta a huleh amahnu in amu ahi chih thu ajaah tahun, agingta sih uhi.
Gingtu Nih Kawma Jesu Kilaahna
12 Huleh hu nungin a lahva mi nihte gamlam juan a apai laiun, meeltuam puain Amah chu a kawmvah akilaah hi. 13 Huin amahuh chu achiah va, nungjui dangte avahilh va, amah un zong anatahsang sih uhi.
Thomas Kawma Jesu Kilaahna
14 Hunung lamin ankuang a atou laiun sawmlekhatte kawmah akilaah a, huleh athohkiit nunga Amah mute thu agintaat louh jiahun agintaat louhna uh leh a lungtang khauhna thu vah ataaihilh hi.
Thupiaah Tawpna
15 Huin Ama'n a kawmvah, "Khovel zousiah ah chiah unla, silsiam chinteng kawmah tanchinpha soi un. 16 Koipouh agingta a baptisma tang chu hutdamin aum diing a; hizongleh agingta lou chu siamlouh tansahin aum diing hi. 17 A gingtate chu hi chiamchihnate in ajui diing: Ka min in dawite anohdoh diing va, haam thahte in ahaam diing uhi. 18 Guulte khut in ala diing va; sih theihna sil bangchibang dawn zongleh uh, bangma achi sih diing va; damloute tungah khut anga diing va, adam jeel diing uhi," achi hi.
Jesu Vaan a Kaltouhna
19 Huchia Lalpa'n a kawmva thu asoi zohin, Amah chu vaan a puitouhin aum a, huleh Pathian jiatlam ah atouta hi. 20 Nungjuite chu akuandoh va, mun chin ah thu asoita va, Lalpa'n amahuh atonpih a, chiamchihna in juiin a thu chu asukip jeel hi. Amen.
1 I lahva chiantaha bukima um hu silte mi tampite'n baanneitaha anagelhkhiah bangun, 2 achiil apat a mit a mutute leh thu natongtute'n ahung na hilh bangun, 3 zahumpeen Theophil, abul apat sil zousiah pilvaangtaha suuichetna ka neih zouin, abaan baan a na kawma gelh hoih ka sa hi. 4 Huchu tuma a nang hung na kihilh thute adih ngeei hi chih na heet bukimna diingin ahi.
Baptistu Johan Plan Diing Soilawhna
5 Judia kumpipa Herod damlaiin, a min Zakaria kichi, Abia pawla mi siampu natong khat aum a, a ji chu Aaron tanute laha khat ahi a, a min chu Elizabeth ahi. 6 Amahuh geel chu soiseel beiin, Lalpa thupiaah leh a daan zousiah juiin Pathian mitmuhin adihtat uhi. 7 Hizongleh Elizabeth achiin jiahin ta anei sih va, anih un ateeh tuaah mahmahta uhi. 8 Huleh hichi ahung hi a, Zakaria in ahun tan dungjuia Pathian ma a siampu nna atoh laiin, 9 siampu tawndaan dungjuia Lalpa biahinn a gimnamtuui haal diingin amah chu aisaan a teelin aum hi. 10 Huleh gimnamtuui kihaal sungin mipite chu a bawnun inn pua ah anahaamtei uhi. 11 Huleh Lalpa angel khat gimnamtuui haalna maitaam jiatlam a dingin, a kawmah ahung kilaah a, 12 Zakaria in amah amuh tahin, launa in adimta hi. 13 Hizongleh angel in a kawmah, "Zakaria, lau sin, ajiahchu na haamteina jaah ahita hi; na ji Elizabeth in tapa ahung neihsah diing a, a min Johan nasa diing hi. 14 Huleh nang chu nuamin na kipaah diing a, mi tampi amah pian in akipaah diing uhi. 15 Ajiahchu Lalpa mitmuhin amah chu milian ahi diing a, uain ahihlouhleh khamtheih uain mawngmawng adawn sih diing hi. Huleh a nu sung apat ngeeiin Hagau Siangthou in adim diing hi. 16 Huleh ama'n Israel tate tampi Lalpa a Pathian uh lamah akihei kiitsah diing hi. 17 'Pate lungtang tate lam ngasah diing,' leh thumangloute midihtat pilna lam ngasah diingin, huleh Lalpa diinga mihon khat kipeihsa a um diinga bawlkhawl diingin, Elijah lungsim leh silbawltheihna toh Lalpa ma ah apai diing," achi hi. 18 Huleh Zakaria in angel kawmah, "Hikhu bangchiin ka he thei diai? Ajiahchu kei lah teehsia hita ing a, huleh ka ji zong ateeh mahmahta hi," achi hi. 19 Huin angel in adawng a, a kawmah, "Kei Gabriel, Pathian ma a ding chu ka hi, na kawma thusoi diing leh hi thu kipaahhuaite hilh diinga sawl ka hi. 20 Huleh ngai in, hi silte ataangtun masiah haamtheilouin na um diing hi, ajiahchu a hun ngeeia suhtaangtunga um diing ka thusoite na gingtaat louh jiahin," achi hi. 21 Huleh mipite'n Zakaria chu angaah va, Pathian biahinn sunga sawt aum beeh jiahin limdang asa mahmah uhi. 22 Huleh ahung pawtin a kawmvah thu asoi theita sih hi. Huin Pathian biahinn sunga kilaahna mu ahi chih aheta uhi. Huleh a kawmvah heetsahna abawl a, haam theilouin aumta hi. 23 A natohna ani achin tahin a inn ah achiahta hi. 24 Hu hun nungin a ji Elizabeth chu ahung gaaita a, ha ngaa sung akibu a, 25 "Mite laha ka minse lamang diingin, Lalpa'n ahung muhin ahehpihna hichibangin ka tungah abawlta hi," chiin.
Jesu Pian Diing Soilawhna
26 Huleh a ha guupna ah Pathian in angel Gabriel chu Galili gam a khua khat, a min Nazareth kichi ah, 27 nungaah siangthou khat, David suan a mi, a min Joseph kichipa ji diinga kikhaamnu kawmah asawl hi. Hu nungaah siangthou min chu Mari ahi. 28 Huleh angel chu a kawmah aluut a, "Chibai, nasataha deihsahnu! Lalpa na kawmah aum hi. Numei laha hamphanu na hi," achi hi. 29 Himahleh amahnu'n amahl amuhin a thusoite ah alunghimoh mahmah a, hi bangtobang chibai buuhna hita diing ade aw, chiin angaihtuah hi. 30 Huin angel in a kawmah, "Mari lau sin, ajiahchu Pathian apat deihsahna na tang hi. 31 Ngai in, na gaai diing a, Tapa na nei diing a, a min Jesu na sa diing hi. 32 Amah chu milian ahi diing a, Tungnungpeen Tapa akichi diing hi. Lalpa Pathian in Amah kawmah a pa David laltouphah ape diing hi. 33 Jakob haahte tungah kumtuangin alal diing a, huleh a lalgam in beini anei sih diing hi," achi hi. 34 Huin Mari in angel kawmah, "Hi bangchiin ahi thei diai? pasal toh lah kipawl kha lou ing a," achi hi. 35 Huin angel in adawng a, "Hagau Siangthou na tungah ahung tung diing a, Tungnungpeen silbawltheihna in ahung liahkhuh diing hi. Hujiahin Mi Siangthou nang a hung piang diing zong Pathian Tapa chih ahi diing hi. 36 Huleh ngai in, na sanggamnu Elizabeth in zong a teeh nungin tapa khat apaaita hi, achiing achihnu uh, tu a ha guupna ahita hi 37 Ajiahchu Pathian diingin ahitheilou bangmah aum sih diing hi," achi hi. 38 Huin Mari in, "Lalpa suaahnu chu en in! Na soi bangin ka tungah hung tungta hen," achi hi. Huin angel in amahnu achiahsanta hi.
Mari in Elizabeth Avehna
39 Huleh huin Mari chu athou a, kintahin Juda gam sunga singtaang khopi khat ah achiahta hi. 40 Huleh Zakaria inn ah aluut a, Elizabeth chibai abuuh hi. 41 Huleh hichi ahung hi a, Elizabeth in Mari chibaibuuhna ajaah tahin a sunga nau chu adiang a, Elizabeth chu Hagau Siangthou in ahung dimta hi. 42 Huleh aw ngaihtahin ahung haamdoh a, "Numei lahah hamphanu na hi. Na gil a gah zong ahampha hi. 43 Ahihleh ka Lalpa nu ka kawma na hung bangchi daan ahita ei? 44 Ajiahchu ngai in, na chibaibuuh gin ka bil a aluut tahin, ka sunga naungeeh chu nuamin adiang hi. 45 Huleh agingtanu zong ahampha hi. Lalpa'n a kawma a thusoite taangtun diing ahih jiahin," achi hi.
Mari Paahtawina La
46 Huin Mari in, "Ka hinna in Lalpa apaahtawi a, 47 huleh ka hagau chu ka Hundampa Pathian ah anuam hi. 48 Ajiahchu Ama'n a suaahnu dinmun ngiamdaan angaihsah a, huchiin ngai in, tu apatin khang zousiah in hamphanu ahung chita diing uhi. 49 Ajiahchu Amah Silbawltheipa'n ka tungah sil loupitah abawlta a, huleh a min zong siangthou ahi. 50 Huleh Amah laute tungah a khotuahna akhang akhangin aum peh hi. 51 A baantha in ahaat daan aensah a, mikiliansahte chu a lungtang suangtuahna uh asuhdalhsah hi. 52 Vaihawmtute chu a laltouna vapatin alakhia a, mingiamte chu atawisangta hi. 53 Gilkialte chu sil hoih in asutai a, huleh mihausate chu khut guaahin asawlmangta hi. 54 A khotuahna heetzingna in a suaah Israel apanpih hi. 55 I pulepate, Abraham leh a chihaahte kawma kumtuanga anasoi bang ngeeiin," achi hi. 56 Huleh Mari chu a kawmah ha thum veel ataam a, huin a inn ah achiah kiitta hi.
Baptistu Johan Pianna
57 Huin Elizabeth chu a nau neih hun ahung tungta a, huchiin tapa ahung neita hi. 58 Huleh a innveengte leh a sanggamte'n, Lalpa'n khotuahna loupitah a tungah asulang chih anaja va, akipaahpih uhi. 59 A ni giat ni in naungeeh zehtan diingin ahung va, a min diingin a pa min lain Zakaria sah atum va, 60 huin a nu'n adawng a, "Huchi hi sih inteh, Johan chih jawh diing ahi," achi hi. 61 Huleh amah un a kawmah, "Na beh na phung lahah hi min a kikou koimah um loupi," achi uhi. 62 Huin amah un a pa kawmah, a min bang na hisah nuam ei? chiin heetsahna abawl uhi. 63 Huin ama'n gelhna suangpeeh angeen a, "A min chu Johan ahi," chiin agial hi. Huleh a bawnun thumah asa mahmah uhi. 64 Huin a kam ahung kihong pah a, a lei ahung kiphel a, ahung haam a, Pathian apaahtawita hi. 65 Huleh a kawmva teeng zousiah chu ahung lauta uhi. Huleh hi thute chu Judia singtaang gam zousiah ah athangsuaahta hi. 66 Huleh aja kha zousiah in a lungtang vah ageel chiat va, "Hi naungeeh bangchibang ahung hitaphet de aw?" chiin. Ajiahchu Lalpa khut in amah aumpih tahzet hi.
Zakaria Thusoilawh
67 Huleh a pa Zakaria chu Hagau Siangthou in ahung dim a, huleh thu ahung soilawhta a, 68 "Israel Lalpa Pathian chu paahtawiin um heh, ajiahchu Ama'n a mite ahung kan a, ahung tanta hi. 69 A suaah David innkote lahah hutdamna kii ei a diingin ahung siamta hi, 70 leilung pianchiil apat zawlnei siangthoute kam a anasoi bangin, 71 huchia i meelmate lah leh ahung mudah zousiah khut apat hutdama i umna diing uh chu, 72 i pulepate kawma khotuahna anachiam chu bawl diing leh a thuhun siangthou hezing diingin, 73 Amah in i pa uh Abraham kawma kihaahsialna anachiam chu: 74 I meelmate khut apat ahung hutkhiah zoh chianga lau loua Amah nna i toh theihna diing leh 75 i damsung teng Amah mitmuh a siangthou leh dihtattaha a nna i toh theihna diing uh chu ahi. 76 Huleh nang naungeeh, Tungnungpeen zawlnei ahung kichi diing hi; ajiahchu a lampite bawl diingin Lalpa ma ah na pai diing, 77 a mite kawma a sualnate uh ngaihdamna tungtawna hutdamna heetna pe diingin, 78 i Pathian uh khotuahna neemtah jiahin, hu ngeei in tunglam apatin Nisuaah in ahung veh hi. 79 Mial nuai leh sihna liim nuaia toute taanvaah diing leh hamuanna lampi a i keengte hung puisah diingin," achi hi. 80 Huleh naungeeh chu ahung khanglian a, hagau ah ahung haat deuhdeuh a, Israelte kawma akilaah masiah gamdaai ah aum zing hi.
Jesu Pianna
1 Hulaiin Kaisar Augusta in khovel pumpi kisimpina diing thu asuah hi. 2 Hichu Syria gam a Kurenia gamoptu ahihlaia kisimpina masapeen ahi. 3 Mi zousiah chu kisimpina min gial diingin amahuh khopi chiat vah achiahta uhi. 4 David innkote leh a suante laha mi ahih jiahin Joseph zong Galili gam a Nazareth khua apatin Judia gam a David khopi Bethlehem achih vah achiah tou hi. 5 Mari, a ji khaam nau nei diing kuan toh, min gelh diingin achiah uhi. 6 Hutah a aum laiun a nau neih hun ahung tungta hi. 7 Huleh a Tapa masa chu ahung neikheta a, puanneem in atuam a, amahuh diinga zinbuuh a mun aum louh jiahin gankuang ah asialta hi.
Belaampute Paahtawina
8 Hu gam mah ah belaampute a belaamte uh veenga jaan a gam a giah aum uhi. 9 Huleh en in, Lalpa angel khat a kawmvah ahung a, Lalpa loupina in a kiimveel uh ataanvah a, huleh amahuh chu alau mahmah uhi. 10 Huin angel in a kawmvah, "Lau sih unla, ngai un, ajiahchu mi chin a diingin thupha kipaah huai mahmah nanguh ka hung puaah hi. 11 Ajiahchu tuni in nanguh diingin David khua ah Hundampa apiangta, Khrist Lalpa chu. 12 Huleh hikhu nanguh diingin chiamchihna ahi diing: Naungeeh puanneem a tuam, gankuang a lum chu na mu diing uh," achi hi. 13 Huleh thakhatin hu angel kawmah vaan mipite ahung khawm va, Pathian aphat va, 14 "Tungnungpeen ah Pathian loupitahin um henla, leitung a Amah kipaahpih mihingte lahah lemthu leeng heh!" chiin. 15 Angelte'n vaan lama apaisan tahun belaampute kihoutuahin, "Tuin Bethlehem khua tanpha in i chiah pah diing va, Lalpa'n thu ahung hilh hung tung chu i vaen diing uh," akichi uhi. 16 Huin kintahin ahung va, Mari leh Joseph leh gankuang a lum naungeeh chu avamu uhi. 17 Amuh zohun hi naungeeh tungtaang thu amahuh heetsaha um chu asoithangta uhi. 18 Aja kha taphot in hu belaampute thusoi chu limdang asa chiat uhi. 19 Hizongleh Mari in hi thu zousiah a lungtang ah avom zing a, angaihtuah zingta hi. 20 Huleh belaampute chu amahuh kihilh bang ngeeia sil zousiah ajaah va amuh jiahun Pathian paahtawia phat kawmin akihkiitta uhi.
Pathian Biahinn a Jesu Kilatna
21 A zehtanna diing ni giat ahung chinin hu naungeeh chu a min diingin suul a aum ma daiha angel in apiaahsa Jesu asata uhi. 22 Mosi daan thu dungjuia amahnu kisuhsiang ni ahung tunin, Lalpa ma a lat diingin Amah chu Jerusalem ah ahung pui uhi. 23 "Ta pasal suul hong photmah chu LALPA diingin siangthou akichi diing hi," chia Lalpa daan thu a kigial dungjuiin. 24 Lalpa daan thu a kisoi dungjuia, "Vakhu kop khat aha vapaal nou nih aha," kithoihna a laan diingin Jerusalem ah ahung pui uhi.
Simeon Paahtawina La
25 Huleh en in, Jerusalem ah pasal khat a min Simeon kichi aum a, amah chu midihtat leh Pathian ngaihsahtah ahi. Israelte Hamuanna diing chu angaah zing a, huleh Hagau Siangthou a tungah aum hi. 26 Lalpa Thaunuh amuh masiah asi sih diing chih Hagau Siangthou in ahesah a, 27 Hagau in Pathian biahinn ah amah ahung pui luut a, huleh naungeeh Jesu chu a nulepa'n daan thu ngeina banga hihsah diinga ahung pomluut tahun, 28 ama'n Amah chu ana-aangpom a, Pathian apaahtawi a, 29 hichiin achi hi, "Lalpa, tuin na suaah chu na thu dungjuiin hamuangtahin chiahsahta in. 30 Ajiahchu ka mit in na hutdamna chu amuta hi. 31 Huchu mi zousiah maaima ah nana bawlkhawlta hi. 32 Amah chu Jentelte salhvaah diing vaah leh na mi Israelte loupina diing ahi. " 33 Joseph leh a nu'n naungeeh tungtaanga thu kisoite chu thumah asa mahmah uhi. 34 Simeon in amahuh avangpiaah a, a nu Mari kawmah, "En in, hi naungeeh hi Israelte laha mi tampite puuhna diing leh din kiitna diinga guat ahi a, Amah ahi chiamchihna anialkalh diing uh chu, 35 mi tampite lungtang ngaihtuahna suhlat ahihtheihna diingin, ahi, naamsau in na hinna ngeei asun pailet diing hi," achi hi.
Anna Kipaahthu Soina
36 Huleh Asher phung a mi, Phanuel tanu Anna kichi numei zawlnei khat aum hi. Amahnu chu teehsia ahita a, pasal aneih zohin kum sagih a pasal toh ateengkhawm hi. 37 Huzoh kum sawmgiat leh li tanin amah chu meithai ahita a, Pathian biahinn paisan louin suun leh jaan a an ngawl puma haamteiin Pathian nna atong hi. 38 Amahnu chu huchih laitahin ahung a, Pathian kawmah kipaahthu asoi a, Jerusalem a tatna diing lamen photmah kawmah Jesu tanchin asoi hi.
Nazareth a Paikiitna
39 Lalpa daan thu dungjuia sil zousiah abawl zohun Galili gam ah amahuh khua ngeei Nazareth ah apaikiitta uhi. 40 Huleh naungeeh chu ahung khanglian deuhdeuh a, hagau in ahung haat deuhdeuh a, pilna in ahung dimta a; huleh Pathian hehpihna chu Amah tungah aumta hi.
Naupang Jesu Jerusalem ah
41 Kum chinin a nulepa chu Chiahkaan Kuut chiangin Jerusalem ah achiah veu uhi. 42 Huleh Jesu kum sawmlenih ahung hihin kuut mangdaan ngeinain Jerusalem ah achiah tou uhi. 43 Gualvaahna nite abei zoha ahung kileh kiit laiun, naupang Jesu chu Jerusalem ah aumdenta hi. Huleh Joseph leh a nu in hichu ahe sih uhi. 44 Huin amah un a lawite laha um hina inteh chiin ni khat lam apaita va, a sanggamte uh leh a meelheette uh lah ahawl uhi. 45 Huleh amuh louh tahun Amah hawlin Jerusalem ah akinungleh kiitta uhi. 46 Huin ni thum zohin Pathian biahinn ah houtute laha tou amu va, a thu uh angaikhia a, huleh amahuh thu adong hi. 47 A thu ja phot in aheetdaan leh adawn daan limdang asa mahmah uhi. 48 A nulepa'n Amah amuh tahun limdang asa mahmah va, a nu'n a kawmah, "Bawi, bang diinga hichibanga hung bawl na hiai? Na pa leh ke'n lungkhamtahin ka hung hawl uhi," achi hi. 49 Huin Ama'n a kawmvah, "Bang diinga hung hawl na hi viai? Ka Pa nna ka toh diing mawng ahi chih helou na hi uh maw?" achi hi. 50 Huleh amah un a kawmva a thusoi chu ahesiam sih uhi. 51 Huin amahuh Nazareth khua ah ajui suh a, a thuthu un aum hi. Himahleh a nu'n hi sil kisoi zousiah a lungtang ah avom zing hi. 52 Huleh Jesu chu pilna ah leh tahsa ah ahung khanglian deuhdeuh a, Pathian leh mihing deihsahin aum deuhdeuhta hi.
Baptistu Johan leh a Thupuaah
1 Tiberia Kaisar vaihawm kum sawmlengaa kum in Pontia Pilat chu Judia gamoptu ahi. Herod chu Galili gambung vaihawmtu ahi a, a sanggampa Philip chu Ituria leh Trakoniti gambung vaihawmtu ahi. Lisania chu Abilene gambung vaihawmtu ahi. 2 Anna leh Kaiapha chu siampu lalpeente ahi uhi. Hulaiin gamdaai a Zakaria tapa Johan kawmah Pathian thu ahung tung hi. 3 Amah chu Jordan kiim gam zousiah ah ahung a, Johan in gamdaai ah abaptis a, sualnate ngaihdamna diinga kisiihna baptis thu ataangkoupih hi, 4 zawlnei Isai in lehkhabu a, "Gamdaai a kikou aw ging in, 'LALPA lamlian sial unla, a lampite sutang un. 5 Guam chin dipdim ahi diing a, huleh taang leh mual chin suhngiam ahi diing; huleh a kawite chu suhtang ahi diing a, lampi phonte suhnal ahi diing; 6 huleh mi zousiah in Pathian hutdamna amu diing uh,'" chia kigial bangin. 7 Huin baptisma tang diinga hung mipite kawmah ama'n hichiin anachi hi, "Guul suante haw, lungthahna hung tung pah diing taaisan diinga koi in ahiai hung vauhilh? 8 Hujiahin kisiihna toh kituaah gah suang un. 'Abraham ka pa uh ahi,' chiin na lungsim un ngaihtuah sih un. Ajiahchu Pathian in hi suangte haw Abraham tate in adingsah thei hi, chih ka hung hilh ahi. 9 Huleh tuin zong singbulte ah heita koih ahita hi. Singkung gah hoih suang lou photmah chu phuuh ahi a, mei ah paihluutin aum hi," chiin. 10 Huin mipite'n a kawmah, "Ahihleh kei un bang ka bawlta diing viai?" chiin adong uhi. 11 Ama'n adawng a, a kawmvah, "Koipouh puannaah nih nei in anei lou kawmah pia heh; huleh neeh diing nei in zong huchibangmahin bawl heh," achi hi. 12 Huin siahdongtute zong baptisma tang diingin ahung va, a kawmah, "Houtupa, kei un bang ka bawl diing viai?" achi uhi. 13 Huleh ama'n a kawmvah, "Ahung chiamsah vaal uh phuut sihun," achi hi. 14 Huleh sepaihte'n zong huchibangmahin a kawmah, "Kei un bang ka bawl diing viai?" chiin adong va, ama'n a kawmvah, "Huhamtahin sum dawng sih unla, dihloutahin zong koimah heeh sih un. Na loh vah lungkim un," achi hi. 15 Huleh mipite chu kineema aum va, mi zousiah in Johan chu Khrist houh ahi de aw chia a lungtang va angaihtuah laiun, 16 Johan in adawng a, a kawmvah, "Ke'n chu tui ah ka hung baptis ngeei hi; hizongleh kei saanga loupijaw, a keengtophah khau suut taah zong ka hihlouh mi khat ahung diing hi. Ama'n chu Hagau Siangthou leh mei in nanguh ahung baptis diing hi. 17 A phual jaap siang tinten diingin a khut ah pasiseep atawi a, a buhte a buhpang ah asungkhawm diing a; hizongleh asi chu mei mittheilou in ahaaltum diing hi," chiin. 18 Huleh Johan in thudang tampi in mite ahasot a, a kawmvah tanchinpha asoi jeel hi.
Herod in Johan Amatna
19 Gambung vaihawmtu Herod in a sanggampa Philip ji Herodia akiteenpih jiahin Johan in asalh hi. Huleh silgilou dang abawlte jiahin zong asalh hi. 20 A silsual bawl zousiah behlapna in Herod in Johan chu suangkul ah akhumta hi.
Jesu Baptisma Tanna
21 Johan in mi zousiah chu abaptis zohin Jesu zong abaptis a, huleh Jesu ahaamtei laiin vaan ahung kihong a, 22 Hagau Siangthou chu tahsa nei vakhu bangin ahung kumsuh a, atung ah atuta hi. Huleh vaan apatin aw ahung suaah a, "Nang ka Tapa deihtah na hi a, na tungah ka kipaah mahmah hi," achi hi.
Jesu Khrist Khanggui
23 Huleh Jesu'n a natoh apatchiil laiin Amah chu kum sawmthum veel ahita hi. Mipite'n Joseph tapa hi diingin angaihtuah uhi. Amah chu Heli tapa ahi a, 24 amah chu Matthat tapa ahi a, amah chu Levi tapa ahi a, amah chu Melki tapa ahi a, amah chu Janna tapa ahi a, amah chu Joseph tapa ahi a, 25 amah chu Mattathia tapa ahi a, amah chu Amos tapa ahi a, amah chu Nahum tapa ahi a, amah chu Esli tapa ahi a, amah chu Naggai tapa ahi a, 26 amah chu Maath tapa ahi a, amah chu Mattathia tapa ahi a, amah chu Semei tapa ahi a, amah chu Joseph tapa ahi a, amah chu Juda tapa ahi a, 27 amah chu Joanna tapa ahi a, amah chu Rhesa tapa ahi a, amah chu Zerubbabel tapa ahi a, amah chu Sheltiel tapa ahi a, amah chu Neri tapa ahi a, 28 amah chu Melki tapa ahi a, amah chu Addi tapa ahi a, amah chu Kosam tapa ahi a, amah chu Elmodam tapa ahi a, amah chu Er tapa ahi a, 29 amah chu Joshua tapa ahi a, amah chu Eliezer tapa ahi a, amah chu Jorim tapa ahi a, amah chu Matthat tapa ahi a, amah chu Levi tapa ahi a, 30 amah chu Simeon tapa ahi a, amah chu Juda tapa ahi a, amah chu Joseph tapa ahi a, amah chu Jonan tapa ahi a, amah chu Eliakim tapa ahi a, 31 amah chu Melia tapa ahi a, amah chu Menan tapa ahi a, amah chu Mattatha tapa ahi a, amah chu Nathan tapa ahi a, amah chu David tapa ahi a, 32 amah chu Jesse tapa ahi a, amah chu Obed tapa ahi a, amah chu Boaz tapa ahi a, amah chu Salmon tapa ahi a, amah chu Nasson tapa ahi a, 33 amah chu Aminadab tapa ahi a, amah chu Aram tapa ahi a, amah chu Hezrom tapa ahi a, amah chu Perez tapa ahi a, amah chu Juda tapa ahi a, 34 amah chu Jakob tapa ahi a, amah chu Isak tapa ahi a, amah chu Abraham tapa ahi a, amah chu Terah tapa ahi a, amah chu Nahor tapa ahi a, 35 amah chu Seruk tapa ahi a, amah chu Ragau tapa ahi a, amah chu Phalek tapa ahi a, amah chu Hebar tapa ahi a, amah chu Shela tapa ahi a, 36 amah chu Kainan tapa ahi a, amah chu Arphaksat tapa ahi a, amah chu Sem tapa ahi a, amah chu Noah tapa ahi a, amah chu Lamek tapa ahi a, 37 amah chu Mathuselah tapa ahi a, amah chu Enok tapa ahi a, amah chu Jared tapa ahi a, amah chu Mahalalel tapa ahi a, amah chu Kainan tapa ahi a, 38 amah chu Enos tapa ahi a, amah chu Seth tapa ahi a, amah chu Adam tapa ahi a, amah chu Pathian tapa ahi.
Jesu Heema Aumna
1 Huleh Jesu chu Hagau Siangthou a dimin Jordan apatin akilehkiit a, huleh Hagau in gamdaai ah apui a, 2 ni sawmli sung diabol in aheem hi. Hu hun sungin bangmah ane sih a, hu nite abeiin a gil ahung kialta hi. 3 Huin diabol in a kawmah, "Pathian Tapa na hihleh, hi suang hi tanghou suaah diingin thu pia in," achi hi. 4 Huin Jesu'n, "'Mihing tanghou chauhin ahing sih diing a, hizongleh Pathian thu chin in ahing jaw diing,' chih gelh ahi," chiin adawng hi. 5 Huin diabol in Amah chu taang sang khat tungah apuitou a, mitphet kaallouin khovel lalgam zousiah aensah hi. 6 Huin diabol in a kawmah, "Hi zousiah tunga thuneihna leh a loupina chu ka hung pe diing, ka kawma piaahkhiah ahita ngaala, huleh ka piaah nuam taphot kawmah ka pe veu hi. 7 Hujiahin kei na hung biah phot inchu, a bawnin nang a ahi diing," achi hi. 8 Huin Jesu'n adawng a, a kawmah, "Setan, ka nung lamah um in! 'LALPA na Pathian chu na biah diing a, Amah nna chauh na toh diing ahi,' chih gelh ahi," achi hi. 9 Huin diabol in Amah chu Jerusalem ah apui a, Pathian biahinn tungzum ah akoih a, a kawmah, "Pathian Tapa na hih leh, hitah apat ke khesuh in. 10 Ajiahchu, 'Ama'n nang hung veeng diingin a angelte thu ape diing hi.' 11 Huleh, 'amahun a khut un ahung na dom diing uh, huchilou inchu na keeng suang ah na tat kha diing,' chih gelh ahi," achi hi. 12 Huin Jesu'n adawng a, a kawmah, "'LALPA na Pathian na je-et louh diing ahi,' chih ahi," achi hi. 13 Huin diabol in a heemna diing tenga aheem zohin hun lemtaang khat a diingin apaisanta hi.
Galili a Jesu Thusoina
14 Huleh Jesu chu Hagau silbawltheihna in Galili gam ah akilehkiitta a, huleh a tanchin chu hu gam kiim zousiah ah athangsuaahta hi. 15 Huleh sinagog ah thu ahilh jeel a, mi zousiah paahtawiin aumta hi.
Jesu Nazareth Aumna
16 Huin a khanletna khua Nazareth ahung tungta a, huleh ahihdaan ngeina bangin Sabbath ni in sinagog ah aluut a, Pathian thu sim diingin ading hi. 17 A kawmah zawlnei Isai Lehkhabu apia va, huin Ama'n hu lehkhabujial chu ahong a, hi thu kigelhna laitah amu a: 18 "LALPA Hagau chu ka tungah aum hi, migentheite kawma tanchinpha ka soi theihna diinga Ama'n sathau ahung nuh jiahin. Ama'n chu lungtang hasete sudam diingin, saltaangte kawma suahtaatna thu phuang diingin, mittawte kawma mitvaah kiitna thu soi diing leh bawlsiatna thuaahte zaleensah diingin ahung sawl hi; 19 LALPA lungdam kum thu bang soi diingin ahung sawl hi," chih chu. 20 Huin Ama'n lehkhabujial chu ajial a, natongtu kawmah ape kiit a, atouta hi. Huleh sinagog a um mi zousiah mit chu a tungah atu vehta hi. 21 Huin Ama'n a kawmvah, "Tuni'n hi Pathian Lehkhathu chu na jaah un ahung taangtungta ahi," achi hi. 22 Huleh mi zousiah in a thu aheetpih va, a kam a pawt hehpihna thute chu limdang asa mahmah uhi. Huleh amah un, "Hi Pa hi Joseph tapa hilou ahiaimah?" achi uhi. 23 Huleh Ama'n a kawmvah, "'Daktor nang leh nang kisudam in! Kapernaum khua a silbawl ka na jaahte zousiah uh, hitah ah nangmah khua ah zong bawl in,' chih thupil chu ka kawmah na hung chi ngeei diing uh," achi hi. 24 Huin Ama'n, "Chihtahzetin ka hung hilh ahi, zawlnei koimah amah gam sung ah kipaahpihin aum ngei sih hi. 25 Hizongleh thutah ka hung hilh ahi, Elijah damlaiin kum thum leh ha guup vaan akikhaah a, gam pumpi a kial nasatah atun laiin Israel gam ah meithai tampi aum uhi; 26 ahiinlah Sidon gam a Sarepta khua a meithainu khat kawmah chihlouh a lahva koima kawmah Elijah sawl ahi sih hi. 27 Huleh zawlnei Elisha damlai in Israel gam ah phaah tampi aum uhi, hizongleh Syria mi Naaman chihlouh koimah suhsiangin aum sih uhi," achi hi. 28 Huleh sinagog a um zousiah in hi thute ajaah tahun athangtawm mahmahta uhi. 29 Huin adingdoh va, Amah chu khua apatin adelhdoh va, a kho kawldawn va sawnkhiah diingin apui uhi. 30 Hizongleh Amah chu a lahvah kigelhmangin achiahta hi.
Dawi Niin Paai Suhdamna
31 Huleh Amah chu Galili a khopi khat, Kapernaum ah ahung suh a, Sabbath nite in amahuh thu ahilh hi. 32 Huleh thuneitaha thu asoi jiahin a thuhilh chu limdang asa mahmah uhi. 33 Huleh sinagog ah dawi niin hagau nei mi khat aum a, huleh aw ngaihtahin akikou a, 34 "Ka tangun hung umsah in! Nazareth Jesu, nang leh kei un bang kizopna ahiai i neih? Keiuh sumang diinga hung na hi maw? Nang kua na hiai chih ka hung he hi, Pathian Misiangthou na hi," achi hi. 35 Hizongleh Jesu'n ataai a, "Sip inla, a sung apatin hung pawt in," achi hi. Huin dawi in amah chu a laai va asuhpuuh zohin a sung apatin ahung pawt a, amah asuna sih hi. 36 Huleh a bawnun limdang asa mahmah va, "Hikhu bang thu ahita ei! Ajiahchu thuneitah leh silbawltheitahin dawi niinte thu apia a, apawt mei uh," chiin akihou uhi. 37 Huin hu kiim gam mun chin ah a tanchin athangta hi.
Simon Sungnu leh Midangte Suhdamna
38 Huin Jesu'n sinagog apawtsan zohin Simon inn ah aluut a, hutah ah Simeon sungnu chu nasatahin anakhosih hi. Huchiin amahnu diingin ana-ngetsah uhi. 39 Huin Jesu chu amahnu geiah ading a, khosih chu ataai a, huchiin khosih in anuse pahta hi. Huchiin ahung thou pah a, a nna uh atohsahta hi. 40 Huleh nitum kuan ahung hihin natna tuamtuam a anadamlou zousiah a kawmah ahung pui va; huin Ama'n atung chiat vah khut anga a, asudamta hi. 41 Huleh dawite zong, "Nang Khrist Pathian Tapa na hi!" chia kikouin mi tampite sung apatin ahung pawtdoh va, Ama'n amahuh ataai a, Khrist ahi chih aheet jiahun dawite haam diing Jesu'n aphal sih hi.
Galili a Jesu Thusoina
42 Huleh khua ahung vaahin apawt a, munsip ah achiah hi. Huin mipite'n Amah ahawl va, a kawmah ahung va, amahuh nuse lou diingin ahou uhi. 43 Hizongleh Ama'n a kawmvah, "Pathian lalgam tanchinpha thu chu kho dang ah zong ka soi diing ahi; hu diing maha sawl ka hi him ahi," achi hi. 44 Huleh Ama'n Galili gam a sinagogte ah thu asoi jeel hi.
Nungjui Masate Kouhna
1 Ni khatchuPathianthuangaih theihna diingun mipite'n Jesu anoh va, Genesaret Diil geiah ading hi. 2 Diil geiah kuang nih um amu a, hizongleh ngamantute chu a kuang uh nusia a, a leente uh sawpin aum uhi. 3 Huleh Amah chu kuangte laha khat Simon a peen ah atuangdoh a, a kawmah piau gei apat themkhat tolh deuh diingin angeen hi. Huleh atou a, mipite chu kuang tung apatin thu ahilhta hi. 4 Ama'n thu asoi zohin Simon kawmah, "Lithuuh lam naih inla, nga man diingin na leente sep in," achi hi. 5 Huleh Simon in adawng a, a kawmah, "Houtupa, jaan khovaahin gimtahin ka pang va, bangmah ka man sih uh; hizongleh na thu in leen chu ka sep diing hi," achi hi. 6 Hichu abawl zohin, nga tampi akhuh kha va, a leen chu keeh diingin akisa hi. 7 Huleh kuang danga tou, a lawite uh hunga amahuh panpih diingin akhutjaap va, huin amahuh ahung va, kuang tegeel chu asudim uhi. Huchiin tum diingin akisa hialta hi. 8 Simon Peter in hikhu amuhin Jesu keengbul ah apuuh a, "Lalpa, hung chiahsan in, ajiahchu kei misual ka hi," achi hi. 9 A nga matdoh uh amah leh a lawmte'n limdang asah mahmah jiahun ahi; 10 huleh Simon kithuahpihte Zebedi tate Jakob leh Johan in zong limdang asa mahmah uhi. Huin Jesu'n Simon kawmah, "Lau sin, tu apatin mihing na manta diing," achi hi. 11 Huleh a kuangte luuipang a ahung tawldoh zohun, bangkim anusia va Amah ajuita uhi.
Phaah Khat Suhdamna
12 Huin Jesu khopi khat a aum laiin, en in, mi khat a pumtanga phaah aum a, ama'n Jesu amuhin leisiin abohkhup a, "Lalpa na uut inchu, na hung susiang thei hi," chiin angeen hi. 13 Huin Ama'n a khut a zamin, amah chu akhoih a, "Ka uut hi, siangta in," achi hi. Huin a phaah in thakhatin anuse pah hi. 14 Huleh Ama'n koimah hilh lou diingin thu apia a, "Hizongleh vachiah inla, siampu kawmah vakilah inla, huleh na sian thu mite heetsahna diingin Mosi thupiaah bangin na siarma diingin sil valaan in," achi hi. 15 Hizongleh a tanchin chu athang nasa seem a, huleh mipi nasatah a thu ngaikhe diing leh a natna uh kisudamsah diingin ahung uhi. 16 Huleh Amah chu gamdaai ah achiah tuam a, ahaamteita hi.
Jeng Khat Suhdamna
17 Huleh ni khat chu thu ahilh laiin hichi ahung hi a, Galili leh Judia kho chinteng leh Jerusalem apat hung Pharisaite khenkhat leh daanjilsahtute khenkhat a kawmah atou va, amahuh suhdamna diingin Lalpa silbawltheihna chu Amah ah aum hi. 18 En in, mite'n jeng khat lupna in ahung jawng va, huleh ajawn luut theihna diingun leh a ma a akoih theihna diing angaihtuah uhi. 19 Mipi jiaha jawn luutna diing lampi amuh louh tahun inn tungah akaltou va, huleh inntung hawhkhiain a laitah ah Jesu ma ah a lupna toh akhaikhesuh uhi. 20 Huin Ama'n a ginna uh amuhin, a kawmah, "Lawm, na sualnate ngaihdam ahita," achi hi. 21 Huin daanjilsahtute leh Pharisaite'n, "Hi Pathian soisia koi ahiai? Pathian chauh loungaal koi in ahiai sual ngaidam thei?" chiin angaihtuah uhi. 22 Hizongleh Jesu'n angaihtuah uh aheetin adawng a, a kawmvah, "Bang diinga na lungsim va hitobang ngaihtuah na hi viai? 23 'Na sualnate ngaihdam ahita,' chih leh, 'Thou inla, keeng in chiahta in,' chih khoi abaihlam jaw ei? 24 Hizongleh Mihing Tapa in leitung ah sualnate ngaihdam theihna thuneihna anei hi chih na heetna diingun, hichu ka bawl ahi," achi a, mijengpa kawmah, "Thou inla, na lupna la inla, na inn ah chiahta in, ka hung chi ahi," achi hi. 25 Huleh a ma vah athoukhe pah a, a lupna ala a, Pathian paahtawi kawmin a inn lamah achiahta hi. 26 Huin a bawnun limdang asa mahmah va, Pathian apaahtawi va, huleh "Tuni'n sil limdangtah mei i mu uhi," chiin alau mahmah uhi.
Levi Kouhna
27 Huzouin Amah chu apawtkhia a, siahdonna mun a tou, a min Levi kichi siahdongtu khat amu hi. Huleh a kawmah, "Hung jui in," achi hi. 28 Huin Levi in bangkim anusia a, athou a, Amah ajuita hi. 29 Huleh Levi in a inn ah Jesu diingin ankuang loupitah alui a, hutah ah chu siahdongtu tampi leh midang tampite'n ankuang auumpih uhi. 30 Hizongleh daanjilsahtute leh Pharisaite chu a nungjuite tungah aphun va, "Bang diinga siahdongtute leh misualte toh ne a dawn khawm na hi viai?" achi uhi. 31 Huin Jesu'n adawng a, a kawmvah, "Michidamte'n daktor amamoh sih va, hizongleh damloute'n amamoh uhi. 32 Midihtatte kou diinga hung ka hi sih a, misualte kisiihsah diinga koua hung ka hijaw hi," achi hi.
An ngawl Thu a Dohna
33 Huin amah un Jesu kawmah, "Johan nungjuite'n an angawl va huleh ahaamtei veu uh, huleh Pharisaite nungjuite'n zong huchibangmahin abawl uhi; hizongleh nang nungjuite'n bang diinga ne a dawn ahi viai?" achi uhi. 34 Huleh Jesu'n a kawmvah, "Moupa moupuite kawma aum laisiah moupuite an na ngawlsah thei viaimah? 35 Hizongleh moupa a lah vapat laahmang hun ahung tung diing a, hu ni chiangin angawl diing uhi," achi hi. 36 Huin Ama'n a kawmvah tehkhinthu khat zong asoi a: "Koima'n puan thah apat athem kaikhiain puan lui aphoh ngei sih, phohta henla hileh puan thah akaihkeeh angai diing a, a thah them peen chu a lui toh akituaah sih diing hi. 37 Huleh koima'n uain thah chu savun thawl lui ah athun ngei sih. Thunta henla hileh, uain thah in savun thawl lui chu apawhkeehsah diing a, akibo diing a, huleh a thawlte zong asegawp diing hi. 38 Hizongleh uain thah chu savun thawl thah a thun diing ahi, huchiin anih un abit diing hi. 39 Mi koima'n zong uain lui adawn zoh nungin athah aduh pah ngei sih, 'Alui mah tui jaw,' achi veu uhi," achi hi.
Khawlni Tan Thu
1 Huleh hichi ahung hi a, Sabbath ni masapeen zoha anihnapeen ni in Jesu chu buhlei lai ah apaisuaah hi. A nungjuite'n buhvui asihtan va, a khut va nuaiin ane uhi. 2 Pharisai khenkhatte'n a kawmah, "Bangjiaha Sabbath ni a bawl phallouh na bawl uh ahiai?" achi uhi. 3 Huleh Jesu'n adawng a, "David in agilkial laia a kawma umte toh asilbawl sim kha lou na hi viaimah? 4 Pathian inn ah aluut a, Pathian kawma alat zousa uh tanghou chu ane hi. Daan in siampute loungaal in neeh phallouh achih chu ama'n ane a, huleh a kawma umte zong apia hi," achi hi. 5 Huleh Ama'n a kawmvah, "Mihing Tapa chu Sabbath ni Lalpa zong ahi," achi hi.
Khut Jeng Suhdamna
6 Sabbath ni dang khat in Jesu chu sinagog ah aluut a, thu ahilh hi. Hutah ah mi khut jeng khat ana-um hi. 7 Daanjilsahtute leh Pharisaite'n aheehna diing amuh theihna diingun, Sabbath ni a asuhdam leh asuhdam louh aensim uhi. 8 Hizongleh Ama'n angaihtuah uh ahe a, khut jengpa kawmah, "Thou inla dingdoh in," achi hi. Huin amah chu athou a adingdohta hi. 9 Huin Jesu'n a kawmvah, "Sil khat ka hung dong diing hi, Sabbath ni a sil hoih bawl asiang ei, ahihlouhleh sil hoihlou bawl? Hinna hutkhiah asiang ei, ahihlouhleh suhlup?" achi hi. 10 A kiim a umte zousiah aenveel a, hupa kawmah, "Na khut zandoh in," achi hi. Ama'n huchiin abawl a, a khut chu alang khat lam bangin adamta hi. 11 Himahleh amahuh chu alungthah mahmah va, Jesu tunga bang bawl diing ahiai chiin khat leh khat akihouta uhi.
Nungjui Sawmlenihte Teelna
12 Ni khat chu Jesu taang ah haamtei diingin achiah a, Pathian kawmah jaan khovaahin ahaamtei hi. 13 Huin khua ahung vaah phetin a nungjuite akou a, a lah vapat sawmlenih ateel a, a min uh zong apostolte ahisah hi: 14 Simon, Ama'n Peter zong achih leh a sanggampa Andru, Jakob leh Johan, Philip leh Bartholomai, 15 Mathai leh Thomas, Alphai tapa Jakob, huleh Simon Zelot achih uh, 16 huleh Jakob tapa Juda, huleh amansahtu Juda Iskariot zong ahi uhi.
Jesu Thuhilhna leh Suhdamna
17 Huleh Jesu chu amahuh toh akitonsuh a, mun jaang ah ading a, huleh a nungjui tampite toh, hutah a thungai diing leh a damlouhnate uh suhdama um diing uutin Judia gam zousiah leh Jerusalem apat leh tuipi geia Tura leh Sidon lam apat a kawmah mipi nasatah ahung paikhawm uhi. 18 Huleh hagau niinte'n asuhgentheihte zong ahung va, Ama'n asudam veh hi. 19 Amah apat silbawltheihna apawt jiaha amahuh zousiah asuhdam jiahin mipite zousiah in Amah khoih auut uhi. 20 Huin a nungjuite aen a, hichiin achi hi: "Nanguh migentheite na hampha uhi, ajiahchu Pathian lalgam nanguh a ahi. 21 Nanguh tua gilkialte na hampha uhi, ajiahchu taisaha um diing na hi uhi. Nanguh tua kapte na hampha uhi, ajiahchu nui diing na hi uhi. 22 Mihing Tapa jiaha mite'n ahung muhdah va, ahung delhdoh va, ahung housiat va, huleh na min uh chu migilou banga anual chiangun na hampha uhi. 23 Hu ni in kipaah unla, nuamin kidiang un, ajiahchu ngai un, vaan a na kipaahman uh aloupi hi. Ajiahchu huchibangmahin a pulepate un zawlneite anabawl uhi. 24 Hizongleh nanguh mihausate na tunguh agih hi, ajiahchu nang un nopsahna a bawnin na kimuh zouta uhi. 25 Nanguh tua gilvahte na tunguh agih hi, ajiahchu kial diing na hi uhi. Nanguh tua nuite na tunguh agih hi, ajiahchu maaua kap diing na hi uhi. 26 Mi zousiah in ahung phat chiangun na tunguh agih hi, ajiahchu huchibangmahin a pulepate un zawlnei tahloute anaphat uhi.
Meelmate Lungsiat Diing
27 "Hizongleh nanguh ka thu ngaikhete kawmah ka hung hilh ahi: Na meelmate uh lungsiat unla, ahung mudahte hoih bawl un. 28 Haansia hung lohte vangpiaah unla, ahung simmoh bawlte diingin haamteisah un. 29 Na ngeiphe hung behsahtu kawmah a langkhat lam zong doh in. Huleh na puannaah tual uh hung laahsahtu kawmah na puannaah nuai uh alaah zong nial sih un. 30 Na kawmva hung ngeen photmah kawmah pia unla, huleh na thuampua uh hung laahsahtu kawmah ngeen kiit nawn sih un. 31 Huleh mi'n na tungva abawl diinga na deih bang ngeeiun, nang un zong amahuh tungah bawl un. 32 Ajiahchu nanguh hung lungsiatte chauh na lungsiat uh leh, bang paahtaat na loh diviai? Misualte'n zong amahuh lungsiatte alungsiat uhi. 33 Huleh na tungva hoihte tung chauha na hoih uh leh, bang paahtaat na loh diviai? Ajiahchu misualte'n zong huchibangmahin abawl uhi. 34 Huleh muh kiit na kinepnate uh kawm chauha na thunglaahsah uh leh, bang paahtaat na loh diviai? Ajiahchumisualte'nzongazahmah muh kiit diingin misualte kawmah athunglaahsah uhi. 35 Hizongleh nang un chu na meelmate uh lungsiat unla, hoihbawl unla huleh bangmah muhkiit kineem louin thunglaahsah un. Huchileh na kipaahman uh aloupi diinga Tungnungpeen tate na hi diing uhi. Ajiahchu kipaahnataang heloute leh migiloute tungah Amah aching hi. 36 Hujiahin na Pa uh mizahngaithei ahih bangin, nanguh zong zahngaithei un.
Midangte Vaihawmsahna Thu
37 "Mi demse sih un, huchiin demsiatin na um sih diing uhi. Mohpaih sih un, huchiin mohpaihin na um sih diing uhi. Ngaidam un, huchiin ngaihdamin na um diing uhi. 38 pja un, huchiin piaahin na um diing uh; hoihtaha tehin, sawndetin, lohhalin pia un, huchiin adimleetin na aangsung vah piaahin na um diing uhi. Ajiahchu na tehna bangbangun mite'n ahung tehsah kiit diing uhi," achi hi. 39 Huleh hi tehkhinthu zong a kawmvah asoi hi: "Mittaw in mittaw mah apui thei diai? Puita henla hileh, anih va kokhuuh a kekhawmta lou diing ahi viaimah? 40 Nungjui chu a houtupa tungah aum ngei sih hi, hizongleh mi chin hoihtaha jilsaha um chu a houtupa bang ahung hi diing hi. 41 Bang diinga na mit a singtum ngaihtuah lou a, na unau mit a niinthem um muthei na hiai? 42 Nangmah mit a singtum mulou pi a na unaupa kawma, 'Unaupa, na mit a niinthem um hung lakhesah in,' bangchidaana chithei na hiai? Nang milepchiah, na mit a singtum um chu lakhe masa in. Huchiangin na unaupa mit a niinthem laahkhiah diing chu chiangtahin na mu thei diing hi.
Singkung leh a Gah
43 "Ajiahchu singkung hoih a gah ase ngei sih a, huleh singkung sia in zong gah hoih asuang thei boh sih hi. 44 Ajiahchu singkung chin a gah a heet ahi, ajiahchu mi'n lingkung ah theipi alou ngei sih va, huleh lingnoh lahah zong grep alou ngei sih uhi. 45 Mihoih in a lungtang goubawm hoih apatin sil hoih ahung suahkhia hi. Huleh migilou in a lungtang goubawm sia apatin sil hoihlou ahung suahkhe veu hi. Ajiahchu lungtang a dimleet chu a kam in asoi ahi.
Innbul Nihte
46 "Huleh nang un bang diinga ka soite bawl lou a, 'Lalpa, Lalpa,' hung chi na hi viai? 47 Koipouh ka kawma hung a, ka thusoite ja a, huleh jui chu bangtobang mi ahi viai chih ka hung ensah diing hi. 48 Amah chu inn bawlmi, lei thuuhtaha tou a, suangpi tunga innbul lem toh kibang ahi. Huleh tui ahung leetin tui khauh in hu inn chu ahung khoh a, suangpi tunga bawl ahih jiahin asuliing but sih hi. 49 Hizongleh ja ngaal a, juilou chu innbul kiptah lemlou a, leitung mei a innbawlmi bang ahi; huchu tui khauh in ahung khoh a apuuh pah hi. Huleh hu inn asiatdaan chu anasa ngeei hi," achi hi.
Sepaih Zahoutu Suaahpa Suhdamna
1 Huleh Jesu'n hi thute zousiah mipite kawma asoi zohin, Kapernaum ah aluut hi. 2 Huin sepaih zahoutu koiaha khat suaah deihtah chu damlouin asi dehdeh hi. 3 Huin ama'n Jesu tanchin ajaah tahin a kawmah ahung a, a suaahpa hung sudam diinga ngeen diingin Juda upate Amah kawmah asawl hi. 4 Jesu kawm avatun tahun naahtahin angetsah va, amah chu hi sil na bawlsah taah ahi, 5 "Ajiahchu ama'n ka nam uh angaina a, ka sinagog uh zong ahung bawlsah hi," achi uhi. 6 Huin Jesu chu amahuh toh ahungta a, inn apat gamlalou ahung geiin, hu sepaih zahoutu'n a kawmah a lawite asawl a, "Lalpa kisugim nuam dah mei in, ajiahchu ka innsung na hung luut diing chu keimah in ka chin sih hi. 7 Hujiahin kei zong na kawma hung taahin ka kingai sih hi. Hizongleh a thu in soi lehchin ka suaahpa chu adam mei diing hi. 8 Ajiahchu kei zong mi thuneihna nuaia um ka hi a, ka nuaiah sepaihte aum va, khat kawma, 'Chiah in,' ka chih leh achiah a, huleh adang kawma, 'Hung in,' ka chih leh ahung a, huleh ka suaahpa kawma, 'Hi bawl in,' ka chih leh abawl jeel hi," chiin. 9 Jesu'n hi thute ajaah tahin, amahpa chu limdang asa mahmah a, huleh akinunghei a, mipi Amah juite kawmah, "Na kawmvah ka soi ahi, Israelte lah ngeei ah zong hichilawma ginna haat ka mu kha sih," achi hi. 10 Huin a mi sawlte chu inn lamah achiah kiit va, suaah damloupa chu damin amuta uhi.
Nain Khua a Meithainu Tapa Kaihthohna
11 Huleh ajiingni in Jesu chu Nain kichi khopi khat ah achiah a, a nungjuite tamtah leh mipi tampite'n Amah ajui uhi. 12 Huleh Amah chu khopi kotkhaah kawm ahung tunin, en in, misi khat ahung jawngdoh va, a nu tapa neihsun ahi. Amahnu chu meithai ahi a, huleh hu khua a mipi tampi a kawmah aum uhi. 13 Lalpa'n amahnu amuh tahin ahehpih mahmah a, huchiin a kawmah, "Kap sin," achi hi. 14 Huin ahung a, a haan kuang chu akhoih a, a jawngtute chu adingta uhi. Huin Ama'n, "Tangvaal thou in, ka hung chi ahi," achi hi. 15 Misi chu ahung toudoh a, ahung haamta hi. Huin Ama'n amah chu a nu kawmah apeta hi. 16 Huin mi zousiah ahung lauta va, Pathian apaahtawi va, "I lahvah zawlnei loupitah ahung suaahta," huleh "Pathian in a mite ahung vehta ahi," chiin. 17 Huleh hi tungtaang thu chu Judia gam pumpi leh a kiimveel gam zousiah ah athangsuaahta hi.
Johan in a Nungjuite Jesu Kawma Asawlna
18 Huin Johan nungjuite'n hi thu zousiah Johan ahilh uhi. 19 Huin Johan in a nungjuite laha mi nih akou a, Jesu kawmah asawl a, "Ahung diingpa na hiaimah? Ahihlouhleh midang ngaah nalai diing ka hi viaimah?" chiin. 20 Hute chu a kawm ahung tunun, "Baptistu Johan in, 'Ahung diingpa na hiaimah? Ahihlouhleh midang ngaah nalai diing ka hi viaimah?' chia na kawma ahung sawl ka hi uh," achi uhi. 21 Hulai ngeeiin Ama'n mi tampi, damloute, hiiveite, dawimatte asudam a, huleh mittaw tampite mit asuhvaahsah hi. 22 Huin. Jesu'n adawng a, a kawmvah, "Chiah unla, na sil muh uh leh na jaahte uh Johan vahilh un: mittawte mit avaahta a, keengbaite apai theita va, mi phaahte asiangta va, bilngongte'n khua ajata va, misite kaihthohin aumta va, huleh migentheite kawmah tanchinpha soiin aumta hi. 23 Huleh koipouh keimah a kipalpuuh lou chu ahampha hi," achi hi. 24 Huleh Johan mi sawlte apai nungun Ama'n mipite kawmah Johan tungtaang thu asoi panta a, "Bang en diinga gamdaai a chiahdohnahi viai? Sialluanghuih muut liing maw? 25 Ahihlouhleh bang en diinga chiahdoh na hi viai? Puan neem silh mi khat maw? Ngai un, puan loupi silh leh minuamsate chu kumpi inn ah ahi aum uh. 26 Ahihlouhleh bangpeen en diinga chiahdoh na hi viai? Zawlnei maw? Ahi, ka hung chi ahi, zawlnei saanga loupijaw ahi. 27 'En in, ka thangkou na ma ah ka sawl a, ama'n na ma ah na lampi asial diing,' chia a tungthu kigial chu amah ahi. 28 "Numei sung apat piang lahah Baptistu Johan saanga loupijaw, zawlnei aum sih hi. Hizongleh Pathian lalgam a mineupeen zong amah saangin aloupijaw hi, chih ka hung hilh ahi," achi hi. 29 Huleh mipi zousiah leh siahdongte'n hi thu ajaah tahun Pathian siam atan uhi, ajiahchu Johan khut a baptisma tang ahi uhi. 30 Hizongleh Pharisaite leh daansiamte'n Johan baptisma apom louh jiahun Pathian in amahuh diinga alemguatsah chu anualta uhi. 31 Huin Lalpa'n, "Hi khang a mite bang toh ka tehkhin diai? Huleh bang tobang ahi viai? 32 Amahuh chu dawlmun a tou naupang, khat leh khat kikou tuah a, 'Theile hung muutsah ung a, lah laam lou uh chin a; huleh kahla sa ung a, lah kapin na hung maaupih sihuh,' kichite bang ahi uhi. 33 Ajiahchu Baptistu Johan chu ahung in an ane sih a, uain zong adawn sih a; huleh nang un amah chu 'Dawi nei ahi,' na chi uhi. 34 Mihing Tapa ahung a, nein adawn a, nang un, 'En un, an haipa leh uain haipa, siahdongtute leh misualte lawmpa!' na chi jeel uhi. 35 Hizongleh pilna chu a tate zousiah in siam atan uhi," achi hi.
Jesu Keeng Thaunuhna
36 Pharisaite laha khat in Amah toh an neehkhawm auut hi. Huin Amah chu Pharisaipa inn ah aluut a, ankuang ah atouta hi. 37 En in, hu khopi a um numei sual khat in Jesu Pharisaipa inn ah an nein atou chih aheetin alabaster buuh in thau gimtuui ahung tawi hi. 38 a nung ah a keeng bul ah kap kawmin ading a, Jesu keengphaangte chu a mittui in asukawt a, a sam in asiaah hi. A keengpeeh atawp a, thau gimtuui anuh hi. 39 Huleh Amah chialtu Pharisaipa in hikhu amuh tahin a lungsim in, "Hi Pa, zawlnei ahihleh hi akhoihnu koi ahi a, huleh bangchibang mi ahiai chih he leh kilawm a, amah lah misual ahi ngaala," achi hi.
Sumbatu Nihte Tehkhinthu
40 Huchiin Jesu'n adawng a, a kawmah, "Simon, na kawmah soinuam khat ka nei hi," achi hi. Huin ama'n, "Houtupa, soi in," achi hi. 41 "Huleh sum thunglaahsahtu koiaha khat in leibatu nih anei a, khat in dinari za ngaa aba a, huleh khat in sawmngaa aba hi. 42 Aditna diing aneih louh tahun anihun angaihdam tuaahta hi. Hujiahin hung hilh in, a lahva koijaw in amah alungsiat naah jaw diai?" achi hi. 43 Simon in adawng a, "Angaihdam tamjawpa hi diingin ka gingta hi," achi hi. Huin Ama'n a kawmah, "Na chi dih hi," achi hi. 44 Huzohin Ama'n numeinu lam anga a, Simon kawmah, "Hi numeinu na mu ei? Na inn sungah ka hung luut a, nang ka keeng silna diing tui na hung pe sih a, hizongleh amahnu'n a mittui in ka keengpeeh asil a, a sam in asiaah hi. 45 Nang chu tawp zong na hung tawp sih a, hizongleh hi numeinu'n chu ka hung luut apatin ka keengpeehte tawp akhawl nai sih hi. 46 Nang in ka lu sathau na hung nuh sih a, hizongleh hi numei in chu ka keengpeehte thau gimtuui ahung nuh hi. 47 Hujiahin ka hung hilh ahi, a lungsiat naah mahmah jiahin a sualna tampi chu ngaihdam ahita hi. Hizongleh tawm ngaihdamnate'n alungsiat tawm uhi," achi hi. 48 Huin Ama'n numeinu kawmah, "Na sualte ngaihdam ahita," achi hi. 49 Amah toh ankuang a toukhawmte'n a lungsim un, "Sualnate ngeei zong ngaidam, Hi Pa hi koi ahiai?" achi uhi. 50 Huin Ama'n numeinu kawmah, "Na ginna in ahung hundamta hi, hamuangtahin chiahta in," achi hi.
Jesu Natohsah Numeite
1 Hute zohin Jesu'n thusoi kawm leh Pathian lalgam tanchinpha soi kawmin khopi leh khotate atuansuaah hi. Huleh sawmlenihte chu a kawmah aum uhi. 2 Huleh numei hunkhop dawipaai damkiit leh natnate apat damkiit a kawmah aum va, Mari Magdalini achih uh, a sung apat dawi sagih pawtdohna nu toh. 3 Huleh Herod innsung enkoltu Chuza ji Joanna toh, Susanna toh huleh midang tampite toh ahi va, hute'n chu a silneihsa un Amah nna atohsah jeel uhi.
Haichithehtu Tehkhinthu
4 Huleh mipi nasatah ahung paikhawm va, huleh khopi chin a mi Amah kawma ahung tahun tehkhinthu in asoi hi: 5 "Haichithehtu khat chu haichi thehin akuan a, huleh atheh laiin khenkhat lampi geiah atu a, huchu akituanchil a, tungleeng vate'n atom beita hi. 6 Khenkhat suang tung ah atu a, a lei anom louh jiahin, ahung pou patpat in agawgawp pahta hi. 7 Khenkhat chu louling lahah atu a, ling toh ahung pou khawm a, ling in adeepmangta hi. 8 Huleh khenkhat chu lei hoih ah atu a, ahung pou a, aleh za in agahta hi," achi hi. Huleh hi thute asoi zohin akikou a, "Koipouh jaahna diinga bil nei injaheh," achi hi.
Tehkhinthu Kizatna Jiah
9 Huleh a nungjuite'n, "Hi tehkhinthu hi bangchihna ahiai?" chiin Amah adong uhi. 10 Huin Jesu'n, "Pathian lalgam thukiphualte chu nanguh diinga heet phal ahi a, hizongleh midang kawmah chu tehkhinthu a soi ahi; huchibanga 'Amuh va atheihsiam louhna diingun, huleh ajaah va aheetsiam louhna diingun,' achi hi. 11 "Hu tehkhinthu hilhchetna chu hih ahi: Haichi chu Pathian thu ahi. 12 Lampi geia tute chu thu jatute ahi va; huin diabol chu ahung a, agintaat va hutdama aum louhna diingun, thu chu a lungtang vapat alamang hi. 13 Suang tunga tute chu hichibangte ahi uh, ajaah tahun thu chu kipaahtahin apom uhi. Huleh hite'n chu zung anei sih va, tomkhat sung agingta va, heemna atuaah chiangun apuuh veu uhi. 14 Huleh louling laha tute chu hichibangte ahi uh: thu ajaah nungun achiah va, khosah diing daan ngaihtuahnate, hauhsatnate leh damsung nopsahnate'n adeepmangta a, agah piching ngei sih uhi. 15 Hizongleh lei hoih a tute chu hichibangte ahi uhi: lungtang siangthou leh hoih in thu chu aja va, apom va, huleh kuhkaltahin gah asuang uhi.
Thaumei Tehkhinthu
16 "Mi koimah in thaumei adet chiangin kuang akhuhkhum ngei sih, ahihlouhleh lupna nuaiah zong akoih ngei sih hi. Hizongleh aluut photmah in amuh theihna diingin atunna ah akoih jaw hi. 17 Ajiahchu kiphuang lou diinga seel bangmah aum sih a, huleh heet louh diing leh kilang lou diinga phual zong bangmah aum sih hi. 18 Hujiahin bangchiin ahiai na jaah uh pilvaang un. Ajiahchu koipouh anei chu piaahbeh ahi diing a; huleh koipouh aneilou chu neia akingaih nasan zong laahsah ahi diing," achi hi.
Jesu Tanau Dihtah
19 Hulaiin ami leh a sanggamte chu Amah mu diingin ahung va, huleh mipi jiahin a kawm atung thei sih va, 20 "Na nu leh na sanggamte nang hung mu nuamin inn pua ah ading uh," chiin koiaha in ahilh hi. 21 Huin Ama'n adawng a, a kawmvah, "Ka nu leh ka sanggamte chu Pathian thu ngaikhia a juite ahi uh," achi hi.
Jesu'n Tuikinawh Asuhdaihna
22 Ni khat chu a nungjuite toh kuang ah atuang a, Ama'n a kawmvah, "Diil gaal lehlam ah i kaai diing uh," achi hi. Huin akitawlta uhi. 23 Hizongleh akitawl laiun Amah chu a-ihmuta a, huleh hu diil tungah huihpi ahung nungsuh a, a kuang vah tui ahung luutta a, lauhhuai ah aumta uhi. 24 A nungjuite a kawma hungin aphawng va, "Houtupa, Houtupa, beimang diing ka hita uh," achi uhi. Huin Amah chu ahung thou a, huih leh tui kinawh chu ataai a, huin akhawlta va, ahung daaita hi. 25 Huin Ama'n a kawmvah, "Na ginna uh khoia um ahiai?" achi hi. Amah un chu lauin limdang asa mahmah va, "Hi Pa hi bangtobang mi hi ahiai? Ajiahchu huih leh tui nasan thu apia a, amang mei uh!" akichi uhi.
Gadara Gam a Dawi Niin Paai Suhdamna
26 Galili gaal jawna um Gadara mite gam ah akitawl luut uhi. 27 Huleh gam a akaaidoh tahun hun sawtpi dawi anapaai koiaha khat in khopi apat Amah anakituaahpih hi. Ama'n chu puan asilh sih a, huleh inn mawngmawng ah zong aum sih a, haan munte lahah aum veu hi. 28 Ama'n Jesu amuh tahin akikou a, a ma ah apuuh a, aw ngaihtahin, "Jesu, Pathian Tungnungpeen Tapa, kei leh nang in bang kizopna i nei ei? Hung sugim lou diingin ka hung ngeen ahi," achi hi. 29 Ajiahchu Ama'n hagau niin chu hi pa sung apat pawt diingin thu anapeta hi. Tampivei dawi niin in amah chu amankhata a, khainiang leh koi buhsahin aum hi. Huleh ama'n a kikaannate chu aphutan a, gamdaai ah dawi puimangin aum veu hi. 30 Huleh Jesu'n a kawmah, "Na min bang ahiai?" chiin adong hi. A sunga dawi tampi aluut jiahin, ama'n "Legion," achi hi. 31 Huleh dawite'n kokhuuh thuuh a chiah diinga thu pelou diingin Amah angeen uhi. 32 Hu mun ah taang ah voh hon tampi ataa va, amah un hute sunga aluut uh phalsah diingin angeen uhi. Huleh Ama'n aphalsah hi. 33 Huin dawite chu hu mipa sung apat pawtin voh hon sungah aluut uhi. Voh hon chu diil lamah munkeen ah ataaisuh hut-hut va, tui ah akelumta uhi. 34 Huin voh chingtute'n sil umdaan amuh tahun ataai va, hi thu khopi leh khoneute ah avasoi uhi. 35 Huin bang thu ahita ei chih en diingin ahung pawt va, huleh Jesu kawm ahung tun tahun dawi in anuutsiatpa chu puan silh a, lungsim ngeina pua a hoihtaha Jesu keengbul a tou amu va, huleh alauta uhi. 36 Huleh amute'n dawimatpa suhdama ahung umdaante amahuh anahilh uhi. 37 Huin Gadara gam kiimveel a mi zousiah in alau mahmah jiahun Amah chu a kawm vapat chiahmang diingin angeen uhi. Huin Amah chu kuang sungah aluut a, amahuh anuseta hi. 38 Huleh a sung apat dawite hung pawtnapa in chu Amah kawma aum theihna diingin angeenta hi. Hizongleh Jesu'n amah chu asawlkhia a, 39 "Na inn ah chiah kiit inla, Pathian in nang diinga bangchituha sil loupi hung bawlsah ahita eimah, chih vaphuang in," achi hi. Huin amah chu achiahta a, Jesu'n sil loupitah amah diinga abawlsah chu khopi pumpi ah ataangkoupihta hi.
Numei Sipawt Suhdamna leh Jaira Tanu Kaihthohna
40 Huleh Jesu chu ahung kinunglehkiit in mipite'n Amah nasatahin anakipaahpih uhi, ajiahchu a bawnva Amah ana-ngaah zing ahi uhi. 41 Huleh en in, pasal khat a min Jaira kichi sinagog a vaihawmtu ahung a, huleh Jesu keengbul ah akhupboh a, a inn a chiah diingin angeen hi. 42 Ajiahchu ama'n tanu khat chauh kum sawmlenih veel diing anei a, amah chu laitatin alum hi. Hizongleh hichia Jesu achiah tahin mipite'n atuam hut-hut uhi. 43 Huleh numei khat kum sawmlenih sipawt, aneih zousiah daktorte kawma zang beita a, hizongleh koima'n asuhdam zohlouh uh aum hi. 44 Huin Jesu nung ah ahung pai a, a puan mong akhoih a, huin thakhatin a sipawt chu akangta hi. 45 Huin Jesu'n, "Koi ahiai ahung khoih?" achi hi. Mi zousiah in kei ka hi sih achih chiat phetun, Peter leh a lawite'n, "Houtupa, mihonpi in hung tuam a, hung neh hut-hut a, 'Koi ahiai ahung khoih?' na chih" achi uhi. 46 Jesu'n, "Koiaha khat in ahung khoih hi, ajiahchu silbawltheihna kei apatin apawt hi chih ka he hi," achi hi. 47 Huin numeinu'n akiphual theihlouh amuh tahin kiliing pumin ahung a, a ma ah apuuh a, mipi zousiah maai ah a kawmah akhoih nasan leh ahung dam pah daan aphuangta hi. 48 Huin Jesu'n a kawmah, "Tanu, kipaahtahin um in, na ginna in ahung damsahta hi, hamuangtahin chiahta in," achi hi. 49 Ama'n huchia asoi laiin, sinagog vaihawmtupa inn apatin mi khat ahung a, "Na tanu asita hi. Houtupa suhbuai nawn dah mei in," achi hi. 50 Hizongleh Jesu'n hi thu ajaah tahin adawng a, a kawmah, "Lau sin, gingta mei in, huchiin amahnu chu adamdoh kiit diing," achi hi. 51 Huleh inn sunga aluut tahin Peter, Jakob, Johan leh naupangnu nulepa chihlouh koimah luut aphal sih hi. 52 A bawnun amahnu kahin anamaau jeenjuun va, hizongleh Ama'n, "Kap sih un, amahnu asi sih hi, a-ihmu ahijaw," achi hi. 53 Huin amah un amahnu asita chih aheet jiahun Amah chu anuihsan uhi. 54 Huleh Ama'n a bawnun asawldoh veh a, amahnu chu a khut in atu a, "Naupangnu, thou in" chiin akou hi. 55 Huin a hagau ahung kiit a athoudoh pai a, huin amahnu chu neeh diing pe diingin thu apia hi. 56 A nulepa'n limdang asa mahmah va, hizongleh hu sil kibawl chu koimah hilh lou diingin Ama'n amahuh akhapta hi.
Sawmlenihte Natohna
1 Huzohin Jesu'n a nungjui sawmlenihte akoukhawm a, dawi zousiah tunga silbawltheihna leh thuneihna, huleh natnate suhdam theihna apia hi. 2 Huleh amahuh chu Pathian lalgam thu soi diing leh damloute sudam diingin asawldohta hi. 3 Huleh Ama'n a kawmvah, "Na zinna diingun chiang aha, sakhau aha> tanghou aha, sum aha bangmah keng sih un; huleh puannaah thuah nih nei sih un. 4 Na luutna inn vah tungden unla, huleh hu apatin kipankhia un. 5 Mi ahung kipaahpih lou photmah chu hu khopi apat na pawt chiangun amahuh heetsahna diingin na keengtaw va leivui thingkhia un," achi hi. 6 Huin achiahta va, tanchinpha soi kawm leh mun chin a mite sudamin akhua akhua ah achiahta uhi.
Herod Lungjiinna
7 Hu hun laiin gambung vaihawmtuHerodinJesusilbawl zousiah anaja a, alungjiingta hi, ajiahchu khenkhat in Johan chu misi lah apat kaihthoha um ahita achi uhi. 8 Khenkhat in, Elijah ahung kilaah ahita achi uhi. Huleh midangte'n malai zawlneite khat hung thou kiit ahita achi uhi. 9 Herod in, "Johan lah a ngawng tanta ing a, hizongleh hichilawma a thu ka jaah hi koi ahita ei?" achi hi. Huchiin Amah chu muh auutta hi.
Saang Ngaa Vaahna
10 Huleh apostolte'n ahung kiit tahun asilbawl zousiah uh Amah ahilh uhi. Huin Jesu'n amahuh apui a, Bethsaida kichi kho geia munsip khat ah achiah tuampih hi. 11 Mipite'n huchu aheet tahun Amah ajuita va, huleh Ama'n amahuh anakipaahpih a, a kawmvah Pathian lalgam thu ahilh a, suhdam ngaite asudam hi. 12 Huin nitum kuan ahung hihin sawmlenihte chu ahung va, a kawmah, "I kiimveel a khopi leh khoneute a chiah a, giahna leh neeh diing hawl diingin mipite sawlkhia in; ajiahchu hia munsip khat a um i hi uhi," achi uhi. 13 Hizongleh Ama'n a kawmvah, "Nang un neeh diing pia un," achi hi. Amah un, "Mipi hijaat zoujaai neeh diing i valeisah louh leh, tanghou ngaa leh nga nih chauh loungaal bangmah i nei sih uh," achi uhi. 14 Ajiahchu amahuh mi saang ngaa veel ahi uhi. Huin Ama'n a nungjuite kawmah, "Sawmngaa jeelin ahon hon in tousah un," achi hi. 15 Huleh amah un huchiin abawl va, a bawnun atousahta uhi. 16 Huin Amah in hu tanghou ngaa leh nga nih chu ala a, vaan lam entouin avangpiaah a, abalkeeh a, a nungjuite kawmah mipite ma a lui diingin apia hi. 17 Huleh ane va, avah chiat uhi. Huleh aneehvaal uh aneng bawm lian sawmlenih aluaah dim uhi.
Peter in Khrist Aphuanna
18 Huleh hichi ahung hi a, Jesu angena ahaamtei laiin a nungjuite'n Amah avazop va, huin Ama'n a kawmvah, "Mipite'n kei hi koi ahi ahung chi viai?" chiin adong hi. 19 Amah un adawng va, "Baptistu Johan ahi, ahung chi uh, hizongleh khenkhat in, Elijah ahi, ahung chi uh; huleh adangte'n, zawlnei malai-ate laha khat hung thou kiit ahi, ahung chi uh," achi uhi. 20 Ama'n a kawmvah, "Ahihleh nang un kei koi ka hi na hung chi viai?" achi a, Peter in adawng a, "Pathian apat Khrist chu na hi," achi hi.
Jesu 'n Asih diing leh Athohkiit diing Asoilawhna
21 Huin Ama'n hu thu chu koimah hilh lou diingin amahuh thu apia a; 22 "Mihing Tapa'n chu sil tampi athuaah ngeei diing hi; upate leh siampu lalte leh daanjilsahtute'n anual diing va, athat diing va, huleh ni thum ni in kaihthohin aum diing hi," chiin. 23 Huleh Ama'n a bawnva kawmah, "Mi koipouh in ahung juih nuam inchu, amah leh amah kiheetmohbawlin ni chin in a kros puain hung jui heh. 24 Ajiahchu koipouh a hinna huumbit tumin ataan diing a, hizongleh keimah jiaha a hinna taan in ahuumbit diing hi. 25 Ajiahchu mi'n khovel apumin nei henla, amah kisusiain ahihlouhleh kisumang leh, amah diingin bang aphatuam diai? 26 Hujiahin mi koipouh keimah leh ka thute zumpih chu Mihing Tapa'n a loupina toh, a Pa loupina toh, huleh angel siangthoute loupina toh ahung chiangin amah chu azumpih diing hi. 27 Hizongleh thutah ka hung hilh ahi, hia dingte khenkhat Pathian lalgam amuh masiah uh sihna chiam lou diing aum uh," achi hi.
Taang a Meel Kilimdangna
28 Huleh hite asoi nung ni giat diing bangin Ama'n Peter leh Johan leh Jakob apui a, taang ah haamtei diingin achiah uhi. 29 Ahaamtei laiin a meel umdaan ahung limdangta a, a puansilhte chu avaam a, ate selsel hi. 30 Huleh ngai in, mi nih Amah toh akihou va, hute chu Mosi leh Elijah ahi uhi. 31 Amahuh chu loupina in ahung kilaah va, hi khovel Ama'n apaisan diing thu asoi va, huchu Ama'n Jerusalem ah asubukim diing hi. 32 Hizongleh Peter leh a kawma umte chu a ihmut uh asuaah mahmah a, huleh ahung halh tahun, Jesu loupina leh a kawma ding mi nihte amuta uhi. 33 A kawm akipat apaikhiah laiun, bang ahiai asoi zong helouin, Peter in Jesu kawmah, "Houtupa, eiuh diingin hitaha um ahoih hi, puanbuuh thum i lam diing va, nang a diing khat, Mosi a diing khat, huleh Elijah a diing khat," achi hi. 34 Huchia asoi laiin meilum ahung kaai a, amahuh ahung khuh a, huleh meilum laha aluut phetun alauta uhi. 35 Huleh meilum lah apatin aw ahung ging a, "Hichu ka Tapa deihtah ahi; a thu ngai un," chiin. 36 Huleh aw adaih tahin Jesu chauh muhin aumta hi. Huin asip vengveng va, hulaiin a sil muhte uh koimah ahilh sih uhi.
Naupang Dawimat Suhdamna
37 Huleh ajiingni a taang apat ahung suh tahun mipi nasatahin Amah analamtuaah uhi. 38 Huleh en in, mipi lah apat mi khat hung kikouin, "Houtupa, ka hung ngeen ahi, ka tapa en in, ka tapa neihsun ahi ngaala. 39 Ngai in, hagau khat in aman a, thakhat khatin akikoudoh a, huleh chilphuan bo khopin abawlgim veu hi. Naahpiihtaha susidupin anuse veu hi. 40 sja nungjuite kawmah delhdoh diingin ka ngeen a, adelhdoh thei sih uhi," achi hi. 41 Huin Jesu'n adawng a, "Ginna neilou leh khang paisual aw, bangtan ahiai ka hung umpih a, huleh ka hung thuaahtheih diing? Na tapa hitah ah hung pui in," achi hi. 42 Huleh amah chu ahung pai laiin dawi in anasupuuh a asibup hi. Huin Jesu'n hagau niin chu ataai a, naupang chu asudam a, a pa kawmah apeta hi. 43 Huleh a bawnun Pathian silbawltheihna loupina chu limdang asa mahmah uhi.
Jesu 'n Asih Diing Asoilawh Nihveina
Hizongleh mi chin in Jesu silbawl zousiah limdang asah laiun Ama'n a nungjuite kawmah thu asoi a, 44 "Hi thu kisoite na bil sungvah luut heh, ajiahchu Mihing Tapa chu mite khut a matsaha um pah diing ahi," achi hi. 45 Hizongleh amah un hi a thusoi chu ahe sih uh, aheet siam louh diingva iim ahih jiahin; huleh a thusoi tungtaang Amah dot diing lah alau uhi.
Kingaihngiamna Tungtaang
46 Huin a lahva koi ahiai lianpeen diing chia kinialna ahung neita uhi. 47 Hizongleh Jesu'n a lungtang va angaihtuah uh ahe a, naupangneu khat akai a, a kawmah adingsah a, 48 a kawmvah, "Mi koipouh ka min a hi naupang saang chu kei hung saang ahi; huleh kei hung saang chu ahung sawlpa saang ahi. Ajiahchu na bawnva laha neupeen chu alianpeen diing," achi hi.
Nungjuite'n Jesu Min Zat Akhapna uh
49 Huin Johan in adawng a, "Houtupa, mi khat na min a dawite nohdoh ka mu va, ka hung juihna va atel louh jiahin ka khapta uh," achi hi. 50 Hizongleh Jesu'n a kawmah, "Amah chu khap sih un, ajiahchu ei hung doulou photmah chu ei lama pang ahi," achi hi.
Jesu Nungjuih Man Tamdaan
51 Huin hichi ahung hi a, puitouha aum diing hun atunin Ama'n Jerusalem a chiah diing atum tintenta hi. 52 Huleh a ma ah mi asawl masa a, huchiin amahuh chu anachiahin Amah diinga guatsa diama anakoih diingin Samariate khua khat ah aluut uhi. 53 Huleh amah un Jerusalem lama chiah ahih jiahin anakipaahpih sih uhi. 54 A nungjuite Jakob leh Johan in hi aheet tahun, "Lalpa, Elijah bawl bangin amahuh kaangmang diingin vaan apatin mei koukhe lei hoih na sa diai?" achi uhi. 55 Hizongleh Amah chu akihei a, amahuh ataai a, "Bangchibang hagau po mi na hih uh kihelou na hi uh. 56 Ajiahchu Mihing Tapa chu mihingte hinna suse diinga hung hilouin hundam diinga hung ahijaw hi," achi hi. Huin kho dang ah achiahta uhi. 57 Huleh lampi a achiah laiun mi khat in a kawmah, "Lalpa, na chiahna phot ah ka hung jui diing," achi hi. 58 Huleh Jesu'n a kawmah, "Si-aalte'n kua anei va, tungleeng vate'n buuh anei uh; hizongleh Mihing Tapa'n a lu ngahna diing mun anei sih," achi hi. 59 Huleh Ama'n midang khat kawmah, "Hung jui in," achi hi. Hizongleh ama'n, "Lalpa, vachiah a, ka pa vavui hung phalsah masa phot in," achi hi. 60 Jesu'n, "Misite'n a misi uh kivui uh heh; hizongleh nang chu chiah inla Pathian lalgam thu mun chin ah vasoi in," achi hi. 61 Huleh midang khat in zong, "Lalpa, ka hung jui diing; hizongleh ka inn a mite kampha in hung vahasah masa phot in," achi hi. 62 Jesu'n a kawmah, "Mi koipouh lei let diinga laangkawn tuzinga nung lam en chu, Pathian lalgam mi hitaah ahi sih," achi hi.
Nungjui Sawmsagih Sawlkhiahna
1 Hi silte nungin Lalpa'n midang sawmsagih zong aguat a, Amah ngeei hungna diing khopi chin leh mun chin ah a ma ah nih nih in asawl hi. 2 Hujiahin Ama'n a kawmvah, "Buh laah diing atam mahmah a, hizongleh a natongtute atawm uhi; hujiahin buh la diinga natongtute hung sawldoh diingin buh neitu Lalpa kawmah ngeen un. 3 Chiah unla, ngai un, ngei hon laha belaamnoute bangin ka hung sawl hi. 4 Dangka-ip aha, sakhau aha, keengtophah aha keng sih unla, huleh lampi ah koimah chibai buuh sih un. 5 "Inn na luutna phot vah amasapeenin, 'Hi inn ah hamuanna tung heh,' chi un. 6 Hu a hamuanna taah aum leh, na hamuanna uh chu a tungah aum diing a, aum louh leh, na kawmvah ahung kihkiit diing hi. 7 Hu inn ah um zing unla, ahung piaah phot uh nein dawn un, ajiahchu natongtu chu loh mutaah ahi. Inn khat apat inn khat ah tuan lehleh sih un. 8 "Khopi na luut na phot va ahung na kipaahpih uh leh, na ma va alui photmah uh ne un. 9 Hu a damlou umte chu sudam unla, a kawmvah, 'Pathian lalgam na kawm naih uh ahung tungta,' chi un. 10 Hizongleh khopi na luutna phot va ahung na kipaahpih louh uh leh, a kho kotzing ah chiah unla, 11 'Na kho leivui ngeei uh ka keengtaw va baang nasan nanguh kalhna in ka thingkhia uhi. Ahihvaangin Pathian lalgam na kawm naih uh ahung tungta, chih he un,' chi un. 12 Hizongleh ka hung hilh ahi, hu Ni chianga hu khopi thuaah diing saangin Sodom khopi thuaah diing chu adaan aum jaw diing hi.
Kisiihlou Khopite Tunggihna
13 "Korazin, na tung agih hi! Bethsaida, na tung agih hi! Ajiahchu na sungva silmah kibawlte Tura leh Sidon khua a kibawl hileh, sawtin sai-ip puan silhin vut laha touin sawtpi in akisiih zouta diing uhi. 14 Hizongleh vaihawm ni chiangin nanguh thuaah saangin Tura leh Sidon thuaah diing chu adaan aum jaw diing hi. 15 Huleh nang Kapernaum vaan tana paahtawia um diinga kisa, Misi Khua ah paihkhiahin na um diing hi. 16 Koipouh na thusoi uh ngai chu kei thu ngai ahi uh; koipouh nanguh hung nuai chu kei hung nuai ahi uh; huleh kei hung nuai chu ahung sawlpa nuai ahi uh," achi hi.
Nungjui Sawmsagihte Kinunglehna
17 Huleh sawmsagihte chu kipaahtahin ahung tung kiit va, "Lalpa, na min jaalin dawite nasan ka thu un aum uhi," achi uhi. 18 Ama'nakawmvah, "Setan vaan apat a kawlphe banga hung kia ka mu hi. 19 Ngai un, guulte leh mom-aaite totdeen theihna leh meelma silbawltheihna zousiah tungah thuneihna ka hung pia hi, huleh bangmah in ahung suna het sih diing hi. 20 Hizongleh dawite na thuthu va aum jiahun kipaah sih unla, hizongleh vaan a na min uh gelh ahih jiahin kipaah jaw un," achi hi.
Jesu Kipaahna
21 Hu hun laitahin Jesu chu Hagau in akipaah a, "Aw Pa, vaan leh lei Lalpa, nangma'n mipil leh misiamte kawmah hi thute na iim a, naungeehte kawma na phuan jiahin ka hung paahtawi hi. Ahi Pa, huchibang chu na kipaahna mahmah ahi. 22 Ka Pa'n sil zousiah ka kawmah ahung pekheta hi. Tapa koi ahiai chih Pa loungaal koima'n ahe sih, huleh Pa koi ahiai chih Tapa leh a kawmva Tapa'n aphuan nuamnate loungaal koima'n ahe sih," achi hi. 23 Huin Ama'n a nungjuite lam anga a, aguuhin, "Na sil muhte uh muhna mitte ahampha hi; 24 ajiahchu ka hung hilh ahi, zawlnei tampi leh kumpi tampite'n na sil muhte uh muh anauut va, hizongleh amu sih uh; huleh na jaahte uh zong jaah anauut va, hizongleh aja sih uhi," achi hi.
Daan Siam Khat Kumtuang Hinna Hawlna
25 Huchiin en in, daansiam mi khat adingdoh a, Amah je-etna in, "Houtupa, kumtuang hinna ka neih theihna diingin bang ahiai ka bawl diing?" achi hi. 26 Ama'n a kawmah, "Daan ah bang akigial ei? Bangchiin na sim kha ei?" achi hi. 27 Ama'n adawng a, "'LALPA na Pathian chu na lungtang zousiah a, na hagau zousiah a, na haatna zousiah a, huleh na lungsim zousiah a na lungsiat diing ahi,' huleh 'nangmah na kilungsiat banga na innveengte zong na lungsiat diing ahi,' chiin," achi hi. 28 Huin Jesu'n a kawmah, "Na dawng dih mahmah hi; hikhu bawl in, huchiin na hing diing hi," achi hi. 29 Hizongleh ama'n siamkitan uutin Jesu kawmah, "Ka innveeng koi ahiai?" achi hi.
Samaria Mihoihpa Tehkhinthu
30 Jesu'n adawng a, "Mi koiaha khat Jerusalem apatin Jeriko ah achiah suh a, suammangte atuaah kha hi. Hute'n a puansilh asuutsah va, avoliam va, silouphetin anusia uhi. 31 Huin siampu khat hu lampi ah achiah suh a, amah amuh tahin lampi gei langkhat ah apeelta hi. 32 Huleh hichi mahbangin Levi mi khat hi mun ahung tung a, aen a, lampi gei lang khat ah apeel hi. 33 Hizongleh Samariami khat khualzin lai chu hupa umna mun ahung tung a, amah amuh tahin alungsiat mahmah hi. 34 Huin a kawmah achiah a, a liamnate thau leh uain sun khumin atuam a; amah gan tunga tuangsahin zinbuuh ah achiahpih a, aenkolta hi. 35 Huleh ajiingni a achiah diingin dinari nih aladoh a, zinbuuh neitu kawmah apia a, 'Amah anaenkol inla, hi baan ah na seen zahzah chu ka hung kiit chiangin ka hung pe kiit diing,' achi hi. 36 Tuin hi mi thumte lahah a koipeen chu gutate tuaahpa innveeng hi diingin na ngaihtuah ei?" achi hi. 37 Ama'n, "A tunga khotuahna neipa," achi hi. Huin Jesu'n a kawmah, "Chiah inla, nang zong huchibangin vabawl in," achi hi.
Martha leh Mari
38 Huin Jesu leh a nungjuite achiah laiun khua khat ah aluut va, numei khat a min Martha kichi in a inn ah atungsah hi. 39 Huleh amahnu'n Mari kichi nau numei khat anei a, amah chu Jesu keengbul ah atou a, a thusoi angai hi. 40 Hizongleh Martha chu neehbawlin abuai mahmah a, Jesu kawmah ahung a, "Lalpa, ka sanggamnu'n kei chauh neeh bawla ahung set khawhsa lou na hiaimah? Hung huh diingin sawl in," achi hi. 41 Hizongleh Jesu'n adawng a, a kawmah, "Martha, Martha, sil tampi na ngaihtuaha buai na hi. 42 Hizongleh sil khat chauh apoimoh hi, Mari in tan hoih ateelta a, huchu laahsah louh diing ahi," achi hi.
Lalpa Haamteina
1 Huleh hichi ahung hi a, A mun khat a Jesu ahaamtei laiin, ahaamtei zohin a nungjuite khat in a kawmah, "Lalpa, Johan in a nungjuite ahilh bangin haamtei daan hung hilh in," achi hi. 2 Ama'n a kawmvah, "Na haamtei chiangun, 'Ka Pa uh vaan a um, na min kizahtaat heh. Na lalgam hung tung heh. Na deihjawng vaan a akibawl bangin lei ah zong kibawl heh. 3 Ka ni teng neehkhop uh ni chinin hung pia in. 4 Ka leibate uh ka ngaihdam bangun, ka sualnate uh hung ngaidam in. Heemna ah hung puiluut sinla, huleh giloupa apat hung hunkhe jaw in,' chi un," achi hi.
Haamtei Kuhkalna
5 Huleh Ama'n a kawmvah, "Na lahva koi ahiai lawm khat nei a, jaankhang laia a kawma vachiah a, 'Lawm, tanghou beu thum hung thunglaah sah in; 6 ajiahchu ka lawmpa khualzin ka kawmah ahung a, a ma ah lui diing bangma ka nei sih hi,' vachi a; 7 huphet-a a lawmpa'n inn sung apat a, 'Hung subuai sin, kot khaah ahita a, ka tate zong ka kawmah lupna ah alumta uhi. Hung thouin ka hung pe thei sih,' chia anadawng, lawm khat nei kua ahiai? 8 Ka hung hilh ahi, a lawm ahih jiaha vathoua vape diing hi sih mahzongleh, anget teeiteei jiahin thouin adeih zahzah avape diing hi. 9 "Ka hung hilh ahi, ngeen un, piaahin na um diing uh; hawl un, na mu diing uh; kiu un, honsahin na um diing uhi. 10 Ajiahchu angeen taphot in atang va, ahawl taphot in amu va, huleh akiu taphot chu honsahin aum diing hi. 11 "Na lahva pa koiaha a tapa in tanghou ngeen leh, kuan ahiai suang pe diing? Ahihlouhleh nga ngeen leh, nga luangin guul ape diaimah? 12 Ahihlouhleh aahtui ngeen leh mom-aai ape diaimah? 13 Huchia nanguh migilou in bawn na tate uh sil hoih piaahnataang na heet uh leh, na Pa uh vaan a um in a ngeentute kawmah Hagau Siangthou naah piaah tham lou diing ahiaimah?" achi hi.
Jesu leh Beelzebul
14 Huleh Ama'n dawi haam theilou khat anohdoh a, huleh hichi ahung hi a, dawi apawt phetin haam theiloupa chu ahung haamta hi; huchiin mipite'n limdang asa mahmah uhi. 15 Hizongleh a lahva khenkhat in, "Dawimangpa Beelzebul jaala dawite anohdoh ahi," achi uhi. 16 Adangte'n Amah je-etna in vaan apatin chiamchihna angeen uhi. 17 Hizongleh Amah in, angaihtuah uh aheetin a kawmvah, "Lalgam kilangkhena amah leh amah kidou photmah, amangthaai veu a, huleh innsung khat zong kilangkhena akidou leh, apuuh veu hi. 18 Setan zong amah leh amah akikhen leh, bangchiin a lalgam ading thei diai? Beelzebul vaihawmna jaala dawite nohdoh ahi na hung chi ngaalva. 19 Huleh ke'n Beelzebul jaala dawite nohdoh ka hih leh, na tapate un koi jaala anohdoh uh ahiai? Hujiahin amahuh chu nanguh hung vaihawmsah diingte ahi uhi. 20 Hizongleh ke'n Pathian khut zung vaanga dawite ka nohdoh ahihleh, Pathian lalgam na tungvah ahung tung tahzet ahi. 21 "Mihaat in hiamlethal tawia a inn aveen chiangin a neihlelamte abit hi. 22 Hizongleh amah saanga haatjaw khat ahung a, ahung zoh chiangin akimuarma gaalthuam zousiah alaahsah a, huleh agaallaah silte chu ahawmjaah veu hi. 23 Koipouh ka lama pang lou chu ahung dou ahi a, huleh koipouh ahung laahkhawmpih lou in chu asudalh ahi.
Dawi Niin Luutkiitna
24 "Hagau niin chu mi khat sung apat apawtkhiahin tui um louhna mun chin ah khawlna diing hawlin avaah lehleh a; huin amuh louh phetin, 'Ka pawtna inn mah ah ka chiah kiit mei diing,' achi hi. 25 Huleh hutah ahung tunin phiat sianga zep hoiha um amu hi. 26 Huin achiah a, amah saanga giloujaw hagau dang sagih ahung pui a, a sung ah aluut va, ateengta uhi. Huin hupa umdaan nunung chu amasa khu saangin ahung sejaw seemta hi," achi hi.
Hamphatna Dihtah
27 Huleh hichi ahung hi a, Ama'n hi thute asoi laiin mipi lah apat numei koiaha ahung kikou doh a, a kawmah, "Nang hung kipaaina gil ahampha hi, huleh nawi na teepte toh," chiin. 28 Hizongleh Ama'n chu, "Ahi mah hi, himahleh Pathian thuja a juite ahamphajaw uh," achi hi.
Jonah Chiamchihna
29 Huleh mipi ahung kikhop khawm laiun Ama'n a kawmvah thu asoi a, "Hi khang chu khang giloutah ahi uhi. Chiamchihna ahawl va, hizongleh zawlnei Jonah chiamchihna loungaal chiamchihna dang piaah ahi sih diinguhi. 30 Ajiahchu Jonah Ninevi kho mite diinga chiamchihna ahih bangin Mihing Tapa zong hi khang a diingin chiamchihna ahi diing hi. 31 Simlam kumpinu chu vaihawm ni chiangin hi khang a mite toh ahung thou diing a, siamlouh atangsah diing hi, ajiahchu Solomon pilna ngaikhe diingin kawlmong apat ahung hi. En un, Solomon saanga loupijaw hitah ah aum hi. 32 Ninevi kho mite chu vaihawm ni chiangin hi khang a mite toh athou diing va, siamlouh atangsah diing uh, ajiahchu Jonah thusoi jiahin amahuh akisiih uhi. En un, Jonah saanga loupijaw hitah ah aum hi.
Thaumei Apat Thuhilhna
33 "Mi koima'n thaumei avaah chiangin mun kiphual ahihlouhleh loh nuaiah akoih ngei sih uh; ahung luutte'n avaah amuh theihna diingun, thaumei tunna ah akoih jaw uhi. 34 Sapum vaahna thaumei chu mit ahi. Hujiahin na mit ahoih chiangin na sapum zong a bawnin avaah suaah hi. Hizongleh na mit ahoih louh chiangin na sapum zong amial veh hi. 35 Hujiahin na sungva vaah um chu mial ahih louhna diingin pilvaang un. 36 Hujiahin na tahsa pumpi avaah a, a mialna mun aum louh leh, thaumei vaahtahin ahung taanvaah bangin avaah suaah veh diing hi," achi hi.
Pharisaite leh Daanjilsahtute Demna
37 Huleh Jesu'n thu asoi zohin Pharisai koiaha khat in a kawma an ne diingin Amah achial hi. Huin aluut a, an ne diingin atouta hi. 38 Huin an neeh ma a Ama'n a khut asil louh chu amuhin Pharisaipa'n limdang asa mahmah hi. 39 Huin Lalpa'n a kawmah, "Nanguh Pharisaite'n nou leh kuang apolam na silsiang ngeei uhi, hizongleh na sunglam uh chu suammangna leh giitlouhna in adim hi. 40 Nanguh mingol haw, apolam siamtu'n a sung lam zong siamlou ahiaimah? 41 Hizongleh sunglam a um na silneihte uh migentheite kawmah pe jaw un, huleh ngai un, sil zousiah nanguh diingin asiang hi. 42 "Hizongleh Pharisaite, na tunguh agih hi! Ajiahchu nang un pudinate, peganon leh huan haichi tuamtuam sawm-a-khat na pia va, vaihawmna dih leh Pathian lungsiatna na thudon sih uhi. Hite chu ahi na bawl diing uh, adangte zong bawllou tuanlouin. 43 Nanguh Pharisaite, na tunguh agih hi! Ajiahchu nang un sinagog ah touna poimoh peenpeente leh dawlmunte ah mi'n chibai ahung buuh diing na deih uhi. 44 Nanguh daanjilsahtute leh Pharisaite leh lepchiahte haw, na tunguh agih hi! Ajiahchu nanguh chu haankhuuh kimulou mi'n haan ahihlam heloua atunga avapai veunate bang na hi uh," achi hi. 45 Huin daansiamte laha khat in adawng a, a kawmah, "Houtupa, hichibanga na thusoi in keiuh zong hung taai na hi," achi hi. 46 Ama'n, "Nanguh daansiamte zong, na tunguh agih hi! Ajiahchu nang un vangih tahtah mi na posah va, nang un lah hu vangihte na khut zung khat un zong na khoihtaang nuam sih uhi. 47 Na tunguh agih hi! Ajiahchu nang un zawlneite haan na lam va, amahuh lah na pulepate uh thah ahi. 48 Na pulepate uh silbawl ahoih hi chiin na heetpih tahzet uhi; ajiahchu amah un amahuh anathat va, nang un a haan uh na lamsah uhi. 49 Hujiahin Pathian pilna in zong, 'A kawmvah zawlneite leh apostolte ka sawl diing a, a lahva khenkhat anathat diing va, khenkhat asuduhdah diing uhi.' 50 Khovel siam chiil apat a kisuah zawlnei zousiah sisan phuba chu hi khang tungah phuut theih ahi diing hi. 51 Abel sisan kisuah apat maitaam leh Pathian biahinn kikaal a kithat Zakaria sisan tanin. Chihtahzetin ka hung hilh ahi, hi phuba chu hi khang tungah akila diing hi. 52 "Nanguh daansiamte, na tunguh agih hi! Ajiahchu nang un heetna chabi lamangin nanguh lah na luut sih va, mi aluut diingte lah na khaam veu uhi," achi hi. 53 Huleh Ama'n hi thute asoi laiin daanjilsahtute leh Pharisaite'n Amah chu thu tampi soisah tumin hahphinin aphin panta uhi. 54 siamlouh atansah theihna diingun ahaam khelhna mat tumin Amah ataang zing uhi.
Vauhilhna leh Thuhilhna
1 Huchih laiin mipi simseenglouh, khat leh khat kituanchil khop hiala ahung kikhop laiun, Jesu'n amasapeenin a nungjuite ahoupih a, a kawmvah, "Pharisaite tol lahah kiveeng un, huchu lepchiahna ahi. 2 Kilang lou diinga kiphual bangmah aum sih a, huleh heetlouh diinga iim zong bangmah aum sih hi. 3 Hujiahin mial a na soi photmah uh vaah ah jaahin aum diing a, huleh innsung tawng a bilbul a na soi uh chu inntungvuumte ah taangkoupihin aum diing hi. 4 "Huleh nanguh ka lawmte aw, ka hung hilh ahi, tahsa that theia huzohchianga bangmah dang bawltheih nei nawnloute lau sih un. 5 Hizongleh koi ahiai na lau diing uh, ka hung hilh lawh diing hi: Athah nunga zong gawtmun a paihtheihna thuneitupa Amah chu lau un; ahi, ka hung hilh ahi, Amah chu lau un. 6 Kawlgiit ngaa paisa nih in ajuaah veu sih viaimah? Ahiinlah a lahva khatmah zong Pathian ma ah mangngilhin aum sih hi. 7 Ahi, na lutung va samjangte nasan sim veh ahi. Hujiahin lau sih un, kawlgiit tampi saangin na luuljaw uhi. 8 "Ka hung hilh ahi, koipouh mite ma a kei hung gum photmah chu Mihing Tapa in zong Pathian angelte ma ah amah agum diing hi. 9 Hizongleh mite ma a kei hung kiheetmohbawl chu Pathian angelte ma ah kiheetmohbawlin aum diing hi. 10 Koipouh Mihing Tapa kalha thusoi chu ngaihdam ahi diing a, hizongleh koipouh Hagau Siangthou kalha soisia chu ngaihdamin aum sih diing hi. 11 "Huleh nanguh sinagogte ah leh thukhentute leh thuneitute ma a ahung pui tahchiangun bangchia bang thu in ka dawng diai, ahihlouhleh bang ka soi diai chiin lunghimoh sih un. 12 Ajiahchu Hagau Siangthou in ahuntahin na soi diing uh ahung hilh diing hi," achi hi.
Mihausa Ngolpa Tehkhinthu
13 Huleh mipi laha khat in Amah kawmah, "Houtupa, ka unaupa kawma gou hung kihoppih diingin soi in," achi hi. 14 Hizongleh Ama'n a kawmvah, "Mihing, koi in ahiai kei na tungva vaihawmtu aha, tanhawmtu aha a hung bawl?" achi hi. 15 Huin Ama'n a kawmvah, "Pilvaang unla, eenna chinteng lahah kiveeng un, ajiahchu mihing damsan sil tampi neih ahi sih," achi hi. 16 Huleh Ama'n a kawmvah, tehkhinthu khat asoi a, "Mihausa koiaha khat chu a lou a piang ahung pung mahmahta hi. 17 Huchiin a lungsim in akingaihtuah a, 'Ka buhlebaal koihna diing lah ka nei sih a, bangloh diing ka diai?' achi hi. 18 "Huin, 'Hikhu ka bawl diing: Ka buhinn ka phel diing a, alianjaw ka lam diing a, huleh hutah ah ka buhlebaalte leh ka thuampua zousiah ka koih diing hi. 19 Huleh ka hinna kawmah, "Hinna, kum tampi sunga diing thuampua tampi na neita a, kitawlnga inla, nein, dawnin huleh nuamtahin um in," ka chi diing,' achi hi. 20 Hizongleh Pathian in a kawmah, 'Nang mingol! Tujaan leh na hinna hung kilaahsah diing ahi. Hu na sil kholkhawmte koi a diing ahita diai?' achi hi. 21 Amah chauh diinga gou kikhol a, Pathian lama hausa lou chu huchi ahi veu hi," achi hi.
Lunghihmohna leh Pathian Muanna
22 Huin Ama'n a nungjuite kawmah, "Hujiahin ka hung hilh ahi, bang ahiai ka neeh diing chiin na hinna diing uh leh bang ahiai ka silh diing chiin na tahsa diingun lunghimoh sih un. 23 Ajiahchu hinna chu neeh diing saangin, huleh tahsa zong puansilh saangin athupi jaw hi. 24 Va-aahte ngaihtuah un, buh lah atuh sih va, aat zong a-at sih uh, buhpang leh buhinn zong anei sih uh; hizongleh Pathian in amahuh avaah hi. Nanguh vate saanga bangchituha luuljaw na hita viaimah? 25 Huleh nanguh lahah koi in ahiai lunghihmoh jiaha a dung tong khat a behlap thei? 26 Huchia nang un hu sil neupatawp zong na bawl theihlouh uh leh, bang diinga sildangte tungtaanga lungkham na hi viai? 27 "Lili paah khan daan ngaihtuah un: nna lah atonggim sih va, pat zong akheeh sih uhi; hizongleh ka hung hilh ahi, Solomon ngeei zong a loupina zousiah a akizepin hi lili paahte laha khat banga zepmawi ahi zou sih hi. 28 Huchia gam a hampa tunia hing a, a jiinga meikhuuh a paih mei diing bawn Pathian in hichituha azep inchu, Aw nanguh ginna haatloute, bangchituha nanguh silhsaha um diing na hita viaimah? 29 Huleh na neeh diing uh aha, na dawn diing uh aha hawl sih unla, bangmah in lunghimoh sih un. 30 Ajiahchu khovel a namte'n hihaw zousiah lawptahin ahawl uh; huleh na Pa un hi silte na mamoh uh chih ahe hi. 31 Hizongleh nang un chu Pathian lalgam hawl jaw un, huchiin hi silte piaah beh na hi diing uhi. 32 Pawl tawmte lau sih un, ajiahchu na kawmva lalgam piaah diing chu na Pa uh kipaahna jawngtah ahi.
Gou Kholna Dih
33 "Na neih teng uhjuaah unla, migentheite kawmah pia un. Vaan ah guta naih phaah louhna leh leikha neehsiat louhna ah dangka-ip lui theilou leh gou setheilou kikhol jaw un. 34 Ajiahchu na gou uh umna phot ah na lungsim uh zong aum diing hi.
Suaah Ginum leh Ginumlou Tehkhinthu
35 "Na kawng uh gaah unla, na thaumei uh zong kuangsah zing un. 36 Mi a pu uh kiteenna ankuang luina apat hung pai a kotkhaah ahung kiuh tah chianga anahonsah thei diinga ngaah zing bangin um un. 37 A pu uh ahung tahchianga amah ana-ngaah zinga amuh suaahte ahampha uhi. Chihtahzetin ka hung hilh ahi, a kawng agaah diinga amahuh chu ankuang ah atousah diing a, aneeh uh abawlsahta diing hi. 38 Huleh jaanveen nihna in ahiai, jaanveen thumna in ahiai hung leh, huchibanga ahung muh inchu, hu suaahte chu ahampha uhi. 39 Hichu he un, guta hung diing hun inn neitupa in he henla hileh, aveeng diing a, a inn asuvangsah sih diing hi. 40 Hujiahin nanguh zong kiging zingin um un. Ajiahchu na ngaihtuah louh laitah va Mihing Tapa chu hung diing ahi," achi hi. 41 Huin Peter in a kawmah, "Lalpa, hi tehkhinthu hi keiuh kawm chauha na soi ahiai, ahihlouhleh mi zousiah kawmah zong?" achi hi. 42 Lalpa'n, "Neihlelam enkoltu ginum leh piltah, a pu in a innkuanpihte tunga ahun china a an tan diing uh pe diinga houtu a akoih diing chu koi ahiai? 43 a pu ahung pai chianga huchibanga anabawl ahung muh diing hu suaah chu ahampha hi. 44 Chihtahzetin ka hung hilh ahi, ama'n amah chu aneih zousiah tunga houtuin asiam diing hi. 45 Hizongleh hu suaahpa'n a lungsim in, 'Ka pu hung zohlou diing hita,' chiin asuaah numei leh pasalte anajeepin, huleh nea dawnin anakhamta leh, 46 hu suaahpa pu chu agintaat louh ni khat in, aheet louh kaalin ahung diing a, atumtan diing a, ginglou mite tan bang atangsah diing hi. 47 "Huleh suaah a pu deihjawng he ngaal a, anakiginglou leh a deihjawng banga bawl lou chu tampivei vuaah ahi diing hi. 48 Hizonglehhelou a, vuaahna taah hiai sil bawl chu tawmtakhatvei vuaah ahi diing hi. Ajiahchu koipouh tampi kipiaahna kawmah, tampi akiphuut diing hi; huleh mi'n tampi akolsah uh kawmah atamjaw seem aphuut diing uhi.
Jesu'n Kikhenna Um Diing Asoina
49 "Leitung a mei khesuh diinga hung ka hi, ruin zong kaang panta leh chi hina mei ing e! 50 Hizongleh baptisma tan diing khat ka nei hi, hu ka taangtun masiah ka ngaih muanglou hina mei e! 51 Leitung a lemna leengsah diinga hung hungsa na hi viaimah? Hilou hiai, ka hung hilh ahi, kikhenna umsah diinga hung ka hijaw hi. 52 Ajiahchu tu apatin innsung khat a mi ngaa um chu nih lang ah thum, huleh thum lang ah nih pangin akikhen diing uhi. 53 Pa in a tapa, huleh tapa in a pa, nu in a tanu, huleh tanu in a nu, innpinu in a mounu huleh mounu in a innpinu adou diing," achi hi.
Heetsiamna
54 Huleh Ama'n mipite kawmah zong, "Nang un nitumna lama mei hung kaai na muh chiangun, 'Guah ju diing ahi,' na chi pah ngaal uhi, huleh huchiin ahung um ngeei hi. 55 Huleh sim huih hung nung na heet chiangun, 'Khua lum diing ahi,' na chi va, huchiin ahung um ngeei hi. 56 Nanguh milepchiahte aw! Lei leh vaan umjia lah na hesiam va, bang diinga tulai hun umjia hesiam lou na hi viai?
Na Meelma toh Kilemin
57 "Huleh bang diinga nang un dihna chu bang ahiai chih ngaihtuah lou na hi viai? 58 Thukhentu ma a na langpa toh na chiah chiangin lamkaal ah amah apat suahtaatna diing hawl haamhaam in. Huchilou inchu vaihawmtu ma ah ahung tut diing a, vaihawmtu in thuneitulian kawmah ahung pekhe diing hi. Huleh thuneitulian in suangkul ah ahung khum kha diing hi. 59 Ka hung hilh ahi, paisa lepton khat tan a na ditbei keei masiah hu apatin na pawt hiai sih diing hi," achi hi.
Kisiihna ahihlouhleh Manthaaina
1 Huchih hun laiin, Galili gam a mite Pilat in athah a, a sisan uh kithoihna sa toh ahalkhawmsah uh thu Amah kawma hung hilh mi hunkhop aum uhi. 2 Huin Jesu'n adawng a, a kawmvah, "Huchibang silte athuaah jiahun hu Galili mite chu Galili gam a mite zousiah saanga sual diaahkhola ngaihtuah na hi viaimah? 3 Hilou e, ka hung hilh ahi, nanguh zong na kisiih louh un chu, huchibangmahin na mangthaai veh diing uhi. 4 Ahihlouhleh Siloam irmsang in apuuhkhum a anetlup mi sawmlegiatte zong Jerusalem a um zousiah saanga sual diaahkhol hia ngaihtuah na hi viaimah? 5 Ka hung hilh ahi, hilou e; nanguh zong na kisiih louh un chu, huchibangmahin na mangthaai veh diing uhi," achi hi.
Theipi Kung Gahlou Tehkhinthu
6 Huleh Ama'n hi tehkhinthu zong asoi a: "Mi koiaha in a grephuan ah theipi kung khat anei a, huin agah ahung hawl a, khat zong amu sih hi. 7 Huin ama'n grephuan enkoltu kawmah, 'En in, kum thum sung hi theipi kung ah a gah ka hung hawl a, khat zong ka mu sih hi. Phuuh in, bang diinga mun luaha um zing ahiai?' achi hi. 8 Ama'n adawng a, a kawmah, 'Pu Aw, tu kum zong umsah nalai in, a kiimkot ka tohkuaah a lei hoih a ka phungvuh masiah in. 9 Ahung gah taah leh, apha ahi diing a; ahung gahlouh leh, huchian na phuuh na diing,'" achi hi.
Numei Keengbai Suhdamna
10 Huleh Ama'n Sabbath ni in sinagog khat ah thu ahilh hi. 11 Huleh en in, kum sawmlegiat haatlouhna dawi in amat numei khat aum hi. Anung akuul khiukheu a, huleh adingtang thei himhim sih hi. 12 Huin Jesu'n amah amuh tahin akou a, a kawmah, "Numei, na haat louhna apat hahkhiah na hita," achi hi. 13 Huleh atung ah a khut akoih a, huchiin amahnu chu thakhatin ahung tang pah a, Pathian apaahtawita hi. 14 Huin Sabbath ni a Jesu'n mi asuhdam jiahin sinagog houtupa chu alungthah mahmah a, mipite kawmah, "Mihing natohna diing ni guup aum a, hu sungin hung unla, hung kisudamsahta un, Sabbath ni a hilouin," achi hi. 15 Huphetin Lalpa'n amah adawng a, "Nang milepchiah, Sabbath ni in na bawng uh aha, na sabiltung uh aha, a khihna apat suutin tui dawnsah diingin na puikhe veu uh hilou ahiaimah? 16 Hi numei Abraham tanu ahih toh, en in, Setan in kum sawmlegiat sung amat chu Sabbath ni a a gaahna suutsah louh diing ahiaimah?" achi hi. 17 Huleh Ama'n hi thute asoi tahin a meelmate zousiah chu azumta va, mipite chu a sil loupi bawl zousiah jiahin akipaah chiat uhi.
Ankam Tang Tehkhinthu
18 Huin Amah in, "Pathian lalgam chu bang tobang ahiai? Huleh bang toh tehkhin diing ka hiai? 19 Hichu mi'n ankam tang khat alaah a, a huan a apaihluut bang ahi. Huchu ahung pou a, akhang a, sing lianpi ahung suaah a, huleh tungleeng vate'n a baate giahna in anei uh," achi hi.
Tol Tehkhinthu
20 Huleh Amah in, "Pathian lalgam chu bang toh tehkhin diing ka diai? 21 Hichu numei in tol alaah a, taangbuang tehna thum dim laha a bawna athoh veh masiah aphuum bang ahi," achi kiit hi.
Kot Geeng
22 Huleh Ama'n thuhilh kawmin Jerusalem lam juanin khopite leh khotate tawn jeelin achiah hi. 23 Huin mi khat in a kawmah, "Lalpa, hutdama um diingte tawmtakhat hi uh maw?" achi hi. 24 Huin Ama'n a kawmah, "Kot geeng ah luut tum teeiteei un, ajiahchu ka hung hilh ahi, mi tampi'n luut atum diing va, aluut thei sih diing uhi. 25 Inn neitupa khatvei athoh a, kot akhaah tahchiangin, nanguh inn pua a dingin, 'Lalpa, Lalpa, kot hung hon in,' chia kot na kiuh chiangun Ama'n na kawmvah, 'Khoilam mi na hi viai mah ka hung he sih,' chiin ahung dawng diing hi. 26 Hutahchian nang un, 'Na ma ah ka ne un, ka dawn va, huleh ka kotzingte vah thu na hilhta hi,' na chi diing uhi. 27 Hizongleh Ama'n, 'Ka hung hilh ahi, khoilam mi na hi viai mah ka hung he sih. Nanguh silgilou bawlte zousiah, ka kawm apat paimang un,' ahung chi diing hi. 28 "Abraham, Isak, Jakob leh zawlneite zousiah Pathian lalgam a um na muh va, nanguh polam a paihkhiaha um na hih uh na hung kiheet chiangun, hutah ah kah leh hagawi aum diing hi. 29 Huleh suahlam leh tumlam apat leh simlam leh maallam apatin mi ahung diing va, Pathian lalgam ah atou khawm diing uhi. 30 Huleh ngai un, anunungpeente amasapeen a pang diing aum uhi. Huleh amasapeente zong anunungpeen a pang diing aum uh," achi hi.
Jerusalem Kahkhumna
31 Hu ni mahin Pharisai khenkhat ahung va, a kawmah, "Pawt inla hi mun apat chiahmang in, ajiahchu Herod in thah hung tum ahi," achi uhi. 32 Ama'n a kawmvah, "Chiah unla hu si-aal kawmah hi thu vasoi un, 'Ngai in, tuni leh jiing chiangin dawite nohdohin natnate ka sudam diing a, huleh ni thum ni in ka siltupte zoh ahita diing hi.' 33 Hizongleh tuni toh, jiing chiang toh ajiing kiit toh ka pai jeel diing hi, ajiahchu Jerusalem polam ah zawlnei asi ngei sih hi. 34 "Aw Jerusalem, Jerusalem, zawlneite anathat a, a kawma kisawlte suang a anaseplumtu! Aahpi'n a noute a ha nuaia aopkhum bangin na tate bangzahvei ahiai kouhkhawm ka tupta a, hizongleh na uutlouh! 35 En un, na inn uh chu taihsana umin ahawmsuaahta hi! Huleh chihtahzetin ka hung hilh ahi, 'LALPA min a hung paipa chu ahampha hi,' na chih masiah uh na hung mu sih diing uh," achi hi.
Chipawm a Damlou Suhdamna
1 Huleh hichi ahung hi a, Sabbath ni a Pharisai houtu khat inn a an ne diinga Jesu achiah tahin hoihtahin aenkhia uhi. 2 Huleh en in, a ma ah chipawm damlou mi khat aum hi. 3 Huin Jesu'n daansiamte leh Pharisaite ahoupih a, a kawmvah, "Sabbath ni a suhdam daan in phal ahiai, phal lou?" achi hi. 4 Amahuh chu asip chiat va, huin Ama'n damlou chu atu a, asudam a, achiahsahta hi. 5 Huin a kawmvah, "Na lahva koi in ahiai na sabiltung uh aha, na bawngtal uh aha kokhuuh ah keta leh, Sabbath ni a zong kaidoh lou diing?" achi hi. 6 Huleh amah un hi thute adawng thei kiitta sih uhi.
Kingaihngiamna Tehkhinna
7 Huleh Ama'n a mi kouhte un mun sangpeen ateel veu uh chih amuh tahin, a kawmvah tehkhinthu asoi hi: 8 "Kiteenna gualvaahna a koiaha in ahung kouh chiangin touna poimohpeen ah tou sih un. Huchilou inchu nang saanga mi zahtaathuai jaw anakou kha diing a, 9 nang hung koutu leh amah chu na kawma hungin, 'Hi pa touna diing ot in,' ahung chi diing a, nang chu zumtahin mun hoihlou peen ah na vatou panphiing diing hi. 10 Hizongleh ahung kikouh chiangin chiah inla mun ngiampeen ah vatou jaw in, huchiin ahung koutu ahung chiangin na kawmah, 'Lawm, asang deuh ah hung tou in,' ahung chi thei diing hi. Hutahchian na an neehpihte ma ngeei ah zahbawlin na um diing hi. HAjiahchu koipouh amah kingaisang chu angiam diing a, huleh amah kingaingiam chu tawisangin aum diing hi," chiin. 12 Huin Ama'n a chialtupa kawmah zong, "Suun ankuang aha, jaan ankuang aha na lui chiangin na lawmte leh na sanggamte leh na unaute leh na innveeng mihausate haw kou sin. Huchilou inchu amah un zong ahung kou ve diingva, huleh thuhkiitin na um kha diing hi. 13 Hizongleh ankuang na lui chiangin tagahte, piangsualte, keengbaite leh mittawte kou jaw in. 14 Huchiin na hampha diing hi; ajiahchu amah un ahung thuh zou sih diing va, midihtatte thohkiit chiangin thuhin na um diing hi," achi hi.
Ankuang Loupitah Tehkhinthu
15 Huleh a an neehpihte khat in hi thute ajaahin a kawmah, "Pathian lalgam a an ne diing mi chu ahampha hi," achi hi. 16 Huin Ama'n a kawmah, "Mi koiaha khat in ankuang luina loupitah abawl a, mi tampi achial hi. 17 Huleh aneeh hunin a mi chialte kawmah, 'Hung un, tuin bangkim akimanta,' vachi diingin a suaahpa asawl hi. 18 Hizongleh amah un suanlam anei chiat va, amasapeen in a kawmah, 'Lou ka leita a, aen diinga ka chiah akiphamoh hi. Na hung ngaihsiam ka hung ngeen hi,' achi hi. 19 Adang in, 'Bawngtal tuah ngaa ka leita a, asiat aphat en diinga ka chiah akiphamoh hi. Na hung ngaihsiam ka hung ngeen hi,' achi hi. 20 Huleh adang khat in, 'Ji ka neita a, hujiahin ka hung thei sih hi,' achi hi. 21 "Huchiin hu suaahpa chu ahung a, hu thute a pu ahung hilh hi. Huin hu inn neitupa chu lungthahin hu suaahpa kawmah, 'Kotzingte leh khopi kawmkaal lahte ah kintahin chiah inla, tagahte, piangsualte, mittawte leh keengbaite hitah ah hung puiluut in,' achi hi. 22 Huin a suaahpa'n, 'Pu, na hung thupiaah bangin ka bawl zouta a, hizongleh mun a-awng nalai hi,' achi hi. 23 Huin a pu in a suaahpa kawmah, 'Lamliante leh daaipaamte ah chiahdoh inla, ka inn adim theihna diingin mi hung sawl luut teeiteei in. 24 Ajiahchu ka hung hilh ahi, ka mi chialte khatmah in zong ka ankuang lui achiam sih diing uh,'" achi hi.
Nungjui Hihna Man
25 Huleh mipi nasatahin Amah atonpih va, Amah chu akinunghei a, a kawmvah, 26 "Mi koipouh ka kawma hung in a nu, a ji, a tate, a sanggampa, a sanggamnu leh amah hinna nasan ahuat louh leh, ka nungjuitu ahi thei sih diing hi. 27 Huleh koipouh amah kros kipuaah a, ka nung hung jui lou chu ka nungjui ahi thei sih diing hi. 28 "Ajiahchu nanguh koipouh innsang leptum in alep zohna diing aneih leh neih louh heetna diinga tou masa phot a aluut diing zah ngaihtuah lou diing koi na um viai? 29 Huchilou inchu innbul alep zoh nungin lamzou theita sih leh, amu zousiah in nuihsanin, 30 'Hi pa'n inn alempan ngaala, azou theita sih,' achi kha diing uhi. 31 "Ahihlouhleh kumpi koi ahiai kumpi dang dou diinga kuan diing in, amah dou diinga mi siing nih toh hung kuanpa khu mi siing khat toh anadouzou diing adiai chih tou masa phot a ngaihtuah lou diing um? 32 Ahihlouh vaanglah leh, adangpeen gamlapi a aum laiin kilemna thuchiam ngeen diingin palai asawl diing hi. 33 Huchibangmahin nanguh lahah koipouh aneih zousiah paisan lou chu ka nungjuitu ahi thei sih diing hi.
Chi Tungtaang
34 "Chi chu ahoih a, hizongleh chi chu data hileh, bangin akisu-al kiitta diai? 35 Lei a diingin lah ahoih sih diing a, eehneel diingin zong ahoih boh sih diing a, mi'n apaaidoh jaw veu uhi. Koipouh jaahna diinga bil nei in ja heh," achi hi.
Belaam Mang Tehkhinthu
1 Huin siahdongtute leh misualte zousiah in a thu ngaikhe diingin Amah kawm ahung juan uhi. 2 Pharisaite leh daanjilsahtute'n, "Hi Pa'n misualte akipawlpih a, an bang aneehpih," chiin aphunchiaah uhi. 3 Huin Ama'n hi tehkhinthu a kawmvah asoi a: 4 "Nanguh laha mi koiaha in belaam za nei henla, a lahah khat mangsah leh, sawmkuah leh kuahte gamdaai a nusia a, amang peen amuh masiah vahawl lou diing koi na hi viai? 5 Huleh amuhkiit tahin kipaahtahin a liangkou ah apua hi. 6 Huin inn atun tahin a lawmte leh a innveengte akou khawm a, a kawmvah, 'Hung kipaahpih un, ajiahchu ka belaam mang ka mu kiitta hi,' achi hi. 7 Ka hung hilh ahi, huchibangmahin kisiihna tuan diing neilou midihtat sawmkuah leh kuahte tungah saangin misual khat kisiiha lunghei tungah vaan ah kipaahna alianjaw diing hi.
Dangka Mang Tehkhinthu
8 "Huleh numei koi ahiai dangka siih sawm nei in khat mangsahta leh, thaumei de a, inn phiat a, amuh kiit masiah nguntaha hawl lou diing? 9 Huleh amuh kiit chiangin a lawmte leh a innveengte akou khawm a, 'Hung kipaahpih un, ajiahchu ka dangka siih khat mansah ka mu kiitta hi,' achi hi. 10 Ka hung hilh ahi, huchibangmahin Pathian angelte ma a misual kisiih khat tungah kipaahna aum hi," achi hi.
Tapa Taaimang Tehkhinthu
11 Huin Ama'n, "Mi koiaha khat in tapa nih anei a, 12 a lahva naupangjawpa'n a pa kawmah, 'Pa, kei goutan diing teng hung pia in,' achi hi. Huchiin a pa'n agou chu amahuh ahawmsahta hi. 13 Huleh ni sawt lou nungin tapa naupangjawpa'n atan teng ala a, khual gamlapi ah azinta hi. Huleh hu mun ah aneih teng pahtattahin avazang zou pahta hi. 14 Huleh a bawna azat bei zoh veh tahin hu gam ah kial nasatah ahung tungta a, neeh diing ahung kitasamta hi. 15 Huleh amah chu achiah a, hu gam a mi khat avabeelta hi. Ama'n amah chu voh an pe diingin a lou lamah anasawlta hi. 16 Huleh vohte neeh be hawngte in a gil suhvah auut mahmah a, koima'n lah bangma neeh diing ape sih hi. 17 "Huleh ahung kiphawhkhiah tahin, 'Kapakawmakiloh suaahte an neeh seenglouh nei atam meijeen uh toh, kei lah gilkiala si diing ka hita hi! 18 Ka thou diing a, ka pa kawmah ka chiah diing a, a kawmah, "Pa, vaan leh nangmah mitmuhin sil ka bawl sualta hi. 19 Na tapa chihtaah zong ka hi nawn sih hi. Na kawma kiloh na suaahte khat bangin hung bawl in," ka chi diing,' achi hi. 20 Huin athou a, a pa kawmah ahungta hi. Huleh gamlapi a aum laiin a pa'n anamu a, alainat mahmah a, ataai a, angawng kawi a, atawpta hi. 21 Huin a tapa'n a kawmah, Ta aw, vaan leh nangmah mitmuhin sil ka bawl sualta hi. Na tapa chihtaah zong ka hi nawn sih,' achi hi. 22 "Hizongleh a pa'n chu a suaahte kawmah, 'Puan hoihpeen hung ladoh unla, silhsah un, a khut ah zungbuh butsah unla, a keeng ah keengtophah butsah un. 23 Huleh bawngnou vaahthau hung la unla that un. Huchiin i ne diing va, kipaahtahin i um diing uhi; 24 ajiahchu hi ka tapa chu asi a, ahung hing kiitta hi; amang a, akimu kiitta hi,' achi hi.
Huchiin kipaahtahin alawm uhi.
25 "Hizongleh a tapa upajaw chu lou ah aum a, inn ahung tun kuanin sil tumging leh laamthawm ajata hi. 26 Huin a suaahte khat akou a, hite bang ahita ei chiin adong hi. 27 Ama'n a kawmah, 'Na naupa ahung tung a, dam leh hoiha amuh kiit jiahin na pa'n bawngnou vaahthau athat ahi,' achi hi. 28 "Huin amahpa chu alungthahta a, inn ah aluut nuamta sih hi. Hujiahin a pa chu ahung pawt a ahung jawl hi. 29 Huin ama'n adawng a, a pa kawmah, 'Ngai in, kum hizahpi na nna tong ing a, khatvei mah zong na thupiaah jui khial lou ing a, huchiin zong ka lawite toh nop ka bawlna diing keelnou khat zong na hung pe ngei sih hi. 30 Hizongleh na tapa, nohchijuaahte toh na sum teng vazang zou veh pa ahung tun tahin amah diingin bawngnou vaahthau na gohsah pah hi,' achi hi. 31 "Huin a pa'n a kawmah, 'Tapa, nang ka kawmah na um zing a, huleh ka neih zousiah zong nang a ahi. 32 Hi na naupa asi a, ahung hing kiitta a, amang a, i mu kiitta hi, hujiahin kipaahtah leh nuamtahin i um diing ahi,'" achi hi.
Neihlelam Enkoltu Tehkhinthu
1 Huleh Ama'n a nungjuite kawmah hi thu zong asoi a, "Mihausa koiaha in neihlelam enkoltu khat anei hi. Amahpa'n a neihlelam amawh thaangzat sah chiin a kawmah aheeh uhi. 2 Huin amah chu akou a, a kawmah, 'Na tungthu ka jaah hi bangchi ahiai? Na neihlelam koi hisaap hung pia in, ajiahchu neihlelam enkoltu a pang nawn lou diing na hi,' achi hi. 3 Huin neihlelam koltupa'n a lungsim in, 'Bangchi diing ka hita diai? Ka pu in lah ka mohpuaahna hung tawpsah diing ahita hi. Lei lah tou zou lou ing a, khutdoh diing lah ka zum hi. 4 Mohpuaahna ahung tawp sah chianga amah un a inn va ahung umsah theihna diingun ka bawl daan diing ka heta hi,' achi hi. 5 Huchiin a pu leibate chu akou chiat a, amasapeen kawmah, 'Ka pu a bangjaat ahiai na bat?' achi hi. 6 Ama'n 'Thau tehna za khat,' achi hi. Huin ama'n a kawmah, 'Na lehkha la inla, tou kin inla, sawmngaa gial in,' achi hi. 7 Huleh adang khat kawmah, 'Nang bangjaat ahiai na bat?' achi hi. Ama'n a kawmah, 'Kor za khat,' achi hi. Huin ama'n, 'Na lehkha la inla, sawmgiat gial in,' achi hi. 8 "Hu neihlelam enkoltu dihtatloupa'n piltaha abawl jiahin a pu in aphatta hi. Ajiahchu hi khovel tate chu amahuh khang ah vaah tate saangin apiljaw uhi. 9 Ka hung hilh ahi, amanthaai hun chianga kumtuanga aumna a nanguh ahung umsah theihna diingun dihtatlouhna sum in na lawm diing kibawl un. 10 "Koipouh tawmtakhat tunga ginum chu tampi tungah zong aginum ahi. Huleh koipouh tawmtakhat tunga dihtatlou chu tampi tungah zong adihtat sih uhi. 11 Hujiahin dihtatlouhna sum tunga bawn na ginum louh uh leh kuan ahiai nanguh dihtatna sum tah hung kolsah diing? 12 Huleh midang a tunga bawn na ginum louh uh leh kuan ahiai nanguh a tah hung pe diing? 13 Suaah khat in pu nih nna atong kop thei sih hi, ajiahchu khat huain khat alungsiat diing hi, ahihlouhleh khat gumin khat amusit diing hi. Pathian nna leh sum nna na tong kop thei sih diing uhi," achi hi.
Jesu'n Pharisaite Ataaina
14 Huleh sum ngaina Pharisaite'n zong hi thu zousiah aja va, Amah anuihsan uhi. 15 Ama'n a kawmvah, "Mite mitmuh a siamtan tumte na hi uhi. Hizongleh Pathian in na lungtang uh ahe hi. Ajiahchu mihing laha paahtawia um chu Pathian mitmuhin sil kihdahhuaitah ahi. 16 Daan thu leh Zawlneite Lehkhabute chu Johan hung um tanchiang aum a, hu kalsiah chu Pathian lalgam tanchinpha akisoi a, huleh mi chin in hutah ah pawngluut haam asawm uhi. 17 Huleh daan thu thaivom khat man saangin lei leh vaan abei abaihlam jaw hi. 18 Koipouh a ji khuula adang kiteenpih chu aangkawm ahi, huleh a pasal in akhuulsa kiteenpih chu aangkawm ahi.
Mihausapa leh Lazar
19 "Mihausa koiaha aum a, puan sandup leh puan malngaat asilh a, ni chinin nuamsatahin aum hi. 20 Huleh a min Lazar kichi apumtanga meima a dim khat kotkhaah bul a alupsah veu uh khutdoh khat aum hi. 21 Mihausapa dohkaan apat khateneng kia pouh neehvah auut hi. Hulou zong uite ahung a, a meimate aliaahsah veu hi. 22 "Huleh hichi ahung hia, hu khutdohpa chu asi a, angelte'n Abraham aangsung ah apui uhi. Huleh mihausapa zong asi a, vuiin aumta hi. 23 Huleh gawtmun ah gimthuaahin aum a, adaah tou a, gamlapi a Abraham leh a aangsung a Lazar um chu amuta hi. 24 Huin akou a, 'Pa Abraham, hung khotuah inla, Lazar chu a khut zung muuh tui a diahkawt a, ka lei hung suvot diingin hung sawl in; ajiahchu hi meikuang ah ka gim mahmah hi,' achi hi. 25 uHizongleh Abraham in, 'Tapa, nangma'n na damlaiin sil hoihte na kimuh a, huchibangin Lazar in sil hoihloute amu chih geeldoh in. Hizongleh tuin amah chu hitah ah hamuanin aum a, nang chu gimthuaahsahin na um ahi. 26 Huleh hite lou zong, hilam apat na kawmva hung tumte ahung theihlouhna diing uh leh hulam apat keiuh kawma hung tumte ahung theihlouhna diingun, keiuh leh nanguh kikaal ah guam liantah aum hi,' achi hi. 27 "Huin ama'n, 'Ahihleh Pa, amah chu ka pa inn ah sawl diingin ka hung ngeen hi, 28 ajiahchu sanggam pasal ngaa ka nei a, amahuh vahilh heh, huchilou inchu amahuh zong hi gimthuaahna mun ah ahung kha diing uh,' achi hi. 29 Abraham in a kawmah, 'Amah un Mosi leh zawlneite anei uh, hute thu ngaikhia uh heh,' achi hi. 30 Huin ama'n, 'Hilou e, pa Abraham, misi laha mi khat a kawmvah vachiah leh, akisiih diing uh,' achi hi. 31 Ama'n a kawmah, 'Mosi leh zawlneite thu angaihkhiah nuam louh uh leh, misi lah apat mi khat thou kiit mahzongleh atahsang tuan sih diing uh,'" achi hi.
Sualna, Ginna leh Nasep
1 Huin Ama'n a nungjuite kawmah, "Puuhnate um lou thei ahi sih hi, hizongleh puuhnate umsahtu tung agih hi! 2 Hi mineute laha khat zong asuhpuuh saangin a ngawng ah suangsumheeh ohsahin tuikhanglian sung ah kipaai luut leh, amah diingin ahoihjaw diing hi. 3 pilvaang un, na unaupa'n na tunga sil abawl sual leh, taai in; huleh akisiih leh, ngaidam in. 4 Ni khat sunga na tunga sagihvei sil abawl sual a, sagihvei na kawma, 'Ka kisiih hi' chia nang lama ahung kiheikiit leh, na ngaidam in," achi hi. 5 Huleh apostolte'n Lalpa kawmah, "Ka ginna uh khangsah in," achi uhi. 6 Huin Lalpa'n, "Ankam tang khat bang ginna na neih uh leh, hi singtheimin kung kawmah, 'Kibotdoh inla, tuilianpi ah kisuan in,' na chi diing va, na thu amang diing hi. 7 "Nanguh laha koi na hi viai loukai aha, belaam ching aha, suaah khat nei a, lou apat ahung tun chiang a, 'Hung pah inla an vane in,' anachi diing? 8 Hizongleh, 'Ka neeh diing hung bawlsah inla, na taai gaah inla, ka neeh a, ka dawn zoh masiah hung zen in, huzoh chiangin nang nein na dawn diing,' chi jaw lou diing ahiaimah? 9 Ama'n hu suaahpa chu a kawmah thu kipiaah banga abawl jiahin apaahta eimah? Ka gingta sih hi. lOHuchibangmahin nang un zong na kawmva thupiaah zousiah na bawlzoh chiangun, 'suaah hitaahlou ka hi uh, ka bawl diing mawng uh ahi ka bawl uh,' chi un," achi hi.
Phaah Sawm Suhdamna
11 Huleh hichi ahung hi a, Jerusalem juana achiah laiin Samaria leh Galili gam tawnin achiah hi. 12 Huleh Amah chu khua khat a aluut leh phaah sawm in analamtuaah va, amahuh chu gamlapi ah ading uhi. 13 Huleh aw ngaihtahin akikou va, "Jesu, Houtupa, hung khotuah in," achi uhi. 14 Huleh amahuh amuh tahin Ama'n a kawmvah, "Chiah unla, siampute vakiensah un," achi hi. Huleh hichi ahung hi a, achiah laiun ahung siangta uhi. 15 Huleh a lahva khat in adamta chih ahung kiheet tahin aw ngaihtaha Pathian paahtawiin ahung kihkiit hi. 16 Huleh Jesu keeng bul ah abohkhup a, kipaahthu asoi hi. Huleh amah chu Samariami ahi. 17 Huin Jesu'n adawng a, "Sawm hilou maw suhsianga um, hizongleh kuahte khoia um ahita viai? 18 Hi namdang mipa chihlouh Pathian paahtawi diinga hung kihkiit koima akimu sih maw?" achi hi. 19 Huin Ama'n a kawmah, "Thou inla chiahta in, na ginna in ahung damsahta hi," achi hi.
Jesu Hung Kiitna diing
20 Huleh Pharisaite'n Pathian lalgam hung tung hun diing adoh tahun Ama'n adawng a, a kawmvah, "Pathian lalgam chu muhtheihin ahung tung sih hi. 21 Huleh, 'En un, hitah ah,' ahihlouhleh, 'En un, hutah ah' zong achi sih diing uhi. Ajiahchu, ngai un, Pathian lalgam chu na kawmvah aum hi," achi hi. 22 Huin Ama'n a nungjuite kawmah, "Mihing Tapa damlai nite ni khat beeh mu nuam mahmah ngaala, na muh theihlouh hun uh ahung tung diing hi. 23 Huchiin na kawmvah, 'En un hitah ah,' ahihlouhleh, 'En un hutah ah,' ahung chi diing va, chiah sih unla, a nung uh zong jui sih un. 24 Ajiahchu kawlphe vaan nuai langkhat a aphet a, vaan nuai lehlam tanpha asalhvaah mahbangin Mihing Tapa zong a ni chiangin hubang ahi diing hi. 25 Hizongleh hu main sil tampi Ama'n athuaah diing a, hi khang a mite nualin aum diing hi. 26 "Noah damlai a sil umdaan bangin Mihing Tapa ni chiangin zong ahi diing hi. 27 Noah kuang a aluut a, tuiziin ahung tun a, a bawnva asuhlup ni atun masiah ane un adawn va, ji anei va, huleh jileta in akipetuah uhi. 28 "Huchibangmahin Lot damlai in zong aum a, ane un adawn va, alei un ajuaah va, huleh asuan va, alam uhi. 29 Hizongleh Sodom apat Lot apawt ni in vaan apatin mei leh kaat aju a, a bawnun asulumta hi. 30 "Huchibangmahin Mihing Tapa hung kilaah ni chiangin ahi diing hi. 31 Hu ni chiangin koipouh inn tunga um chu inn sunga a thuampua la diingin kum sih heh. Huleh huchibangmahin koipouh lou a um zong hung kihkiit sih heh. 32 Lot ji hezing un. 33 Mi koipouh a hinna huumbit tumin ataan diing a, huleh koipouh a hinna taan in ahuumbit diing uhi. 34 Ka hung hilh ahi, hu jaan in lupna khat ah mi nih aum diing a, khat laahin aum diing a, khat nuutsiatin aum diing hi. 35 Numei nih in mun khat ah buh agawi khawm diing va, khat chu laahin aum diing a, khat nuutsiatin aum diing hi. 36 Lou ah mi nih aum diing va, khat chu laahin aum diing a, khat nuutsiatin aum diing hi," achi hi. 37 Huin amah un adawng va, a kawmah, "Khoiah e, Lalpa?" achi uhi. Ama'n a kawmvah, "Saluang umna phot ah mulukolhte zong aum khawm diing uh," achi hi.
Meithainu leh Vaihawmtu Dihtatlou Tehkhinthu
1 Huleh Ama'n amahuh lungkeloua ahaamtei zing diing uh ahi chih heetna diingin a kawmvah tehkhinthu khat asoi a: 2 "Khopi khat ah Pathian lau lou leh mihing zong bangmaha simlou vaihawmtu khat aum hi. 3 Huleh hu khopi sungah meithai khat mah aum a, amahnu chu a kawmah ahung gige a, 'Ka langpa tungah dihtahin thu hung khensah in,' ahung chi hi. 4 "Huleh amah chu tomkhat sung auut sih a, hizongleh anungin a lungsim in, 'Pathian lau louin mihing bangmahin sim sih mahleng, 5 hi meithainu'n ahung suhbuai jiahin atung ah dihtahin thu ka khensah diing hi, huchilou inchu ahung thithena in ahung sutawl kha diing hi,' achi," achi hi. 6 Huleh Lalpa'n, "Vaihawmtu dihtatlou thusoi chu ngai un. 7 Pathian in a miteel suun leh jaan a Amah koutute tungah dihtahin thu akhen sih diai mah, amahuh tungah khongai sawt jiangzongleh? 8 Ka hung hilh ahi, Ama'n kintahin dihtahin vai ahawmsah diing hi. Hizongleh Mihing Tapa ahung chiangin leitung ah ginna ahung mu na diai?" achi hi.
Pharisaipa leh Siahdongtu Tehkhinthu
9 Huleh Ama'n mi amahuh midihtat hia kingaihtuah a, midangte musit koite aha kawmah hi tehkhinthu asoi a: 10 "Mi nih Pathian biahinn ah haamtei diingin achiah tou va, khat chu Pharisai ahi a, huleh khat chu siahdongtu ahi. 11 Pharisaipa chu ading a, amah chauhin ahaamtei a, 'Aw Pathian, midang negute, dihtatloute, aangkawmte ahihlouhleh hi siahdongtu ngeei bang ka hih louh jiahin na tungah ka kipaah hi. 12 Hapta khat in an nihvei ka ngawl a, ka neih zousiah apat sawm-a-khat ka pia hi,'achi hi. 13 "Huleh siahdongtu in chu agaal a dingin vaan lam zong aen ngam sih a, hizongleh, 'Aw Pathian, kei misual tungah zahngai in,' chiin a awm atuum hi. i4 "Ka hung hilh ahi, khat peen saangin hi pa chu siamtangin a inn ah achiahta hi, ajiahchu mi amah kingailoupi photmah suhngiam ahi diing a, huleh amah kingaingiam photmah chu tawisangin aum diing," achi hi.
Jesu'n Naupang Neute Avangpiaahna
15 Huleh akhoih diingin Amah kawmah naupangte ahung pui va, hizongleh nungjuite'n amuh tahun amahuh anataai uhi. 16 Hizongleh Jesu'n amahuh akou a, "Naupangneute ka kawma ahung diing uh phalsah unla, khap sih un, ajiahchu Pathian lalgam chu huchibang mite a diing ahi. 17 Chihtahzetin ka hung hilh ahi, mi koipouh Pathian lalgam naupangte banga pomlou chu a sungah aluut hiai sih diing," achi hi.
Vaihawmtu Hausa Khat in Kumtuang Hinna Ahawlna
18 Huleh vaihawmtu koiaha khat in Amah kawmah, "Houtupa hoih, kumtuang hinna ka tan theihna diingin teng ahiai ka bawl diing?" chiin adong hi. 19 Huin Jesu'n a kawmah, "Bang diinga hoih hung chi na hiai? Pathian chauh loungaal koima ahoih aum sih hi. 20 Nang 'Aangkawm sin,' 'Tualthat sin,' 'Gu sin,' 'Heetpihtu dihlouin pang sin,' 'Na nu leh na pa zahtaat in,' chih thupiaahte na he hi" achi hi. 21 Ama'n, "Hihaw zousiah chu ka khangdawn lai apat ka juih ahita hi," achi hi. 22 Jesu'n hi thute ajaah tahin a kawmah, "Sil khat na sam nalai hi. Na neih zousiah juaah inla, migentheite kawmah hawm in, huchiin vaan ah gou na nei diing hi; huleh hung inla, hung jui in," achi hi. 23 Huleh ama'n hichu ajaahin alungkham mahmah hi, ajiahchu mihausa mahmah ahi. 24 Huin Jesu'n alungkham mahmah chih amuhin, "Mihausate diingin Pathian lalgam a luut hahsa hina mei e! 25 Ajiahchu mihausa Pathian lalgam a aluut saangin sangawngsau phin bilvang a aluut paisuaah abaihlamjaw hi," achi hi. 26 Huin hi thu jatute'n, "Huchi ahihleh koi hutdamin aum zou diai?" achi uhi. 27 Huin Ama'n, "Mihing diinga sil hitheilou chu Pathian diingin ahithei hi," achi hi. 28 Huin Peter in, "En in, kei un bangkim nusiain nang ka hung jui uhi," achi hi. 29 Jesu'n a kawmvah, "Chihtahzetin ka hung hilh ahi, Pathian lalgam jiaha inn aha, nulepa aha, sanggamte aha, ji aha, tate aha nusia chu, 30 tu damsung ngeeia aleh tampi leh hun hung tung diinga kumtuang hinna toh mulou diing koima aum sih hi," achi hi.
Jesu'n Asih Diing Asoilawh Thumveina
31 Huin Ama'n sawmlenihte apuituam a, a kawmvah, "Ngai un, Jerusalem a chiah tou diing i hi va, Mihing Tapa tungtaang thu a zawlneite thugelh zousiah ahung taangtung diing hi. 32 Ajiahchu Amah chu Jentelte kawmah piaahkhiah ahi diing a, chiamnuih bawlna in azang diing va, zumhuaitaha bawlin chil asiat khum diing uhi. 33 Huleh Amah chu avo diing va, athat diing uhi. Huleh ni thum ni in athou kiit diing," achi hi. 34 Amah un hi silte chu ahesiam sih va, hi thu chu a lahvah phualin aum a, thu kisoite zong ahe sih uhi.
Mittaw Suhdamna
35 Huleh hichi ahung hi a, Amah chu Jeriko atun kuanin mittaw koiaha khat lam geiah khutdohin anatou hi. 36 Ama'n mipi pai thawm ging ajaahin, bangchi thu ahita ei chiin adong hi. 37 Amah un Nazareth Jesu apai ahi chiin ahilh uhi. 38 Huin ama'n, "Jesu, David Tapa, hung khotuah in," chiin akikou hi. 39 Huleh amasate'n amah chu sip in chiin ataai va, hizongleh amah chu, "David Tapa, hung khotuah in," chiin akihahkou seem hi. 40 Huin Jesu akhawl a, amah chu a kawma hung pui diingin thu apia hi. Huleh a kawm ahung tunin anadong a, 41 "Na tungah bang hung bawlsah leng na uut ei?" achi hi. Ama'n, "Lalpa, muhtheih ka uut hi," achi hi. 42 Jesu'n a kawmah, "Mutheita in, na ginna in ahung damsahta hi," achi hi. 43 Huleh thakhatin ahung mutheita a, Pathian paahtawi kawmin Amah ajuita hi. Huleh mi zousiah in hu amuh tahun Pathian aphatta uhi.
Zakai Pianthahna
1 Huleh Jesu chu Jeriko ah aluut a, apaisuaah hi. 2 Huleh en in, a min Zakai kichi siahdongtu lian aum a, amah chu mihausa ahi. 3 Huleh ama'n Jesu chu bangtobang mi ahiai chih muh atum a, hizongleh mipite leh a din ngiam jiahin amu thei sih hi. 4 Huchim ataaikhelh a, anaen diingin theipi dawn ah akal hi, Ama'n hu lampi hung tawn pah diing ahih jiahin. 5 Huleh Jesu hu mun ahung tunin adaahtou a, amah chu amu a, a kawmah, "Zakai kintahin hung kum in, aj iahchu tuni 'n na inn a tung diing ka hi," achi hi. 6 Huin kintahin ahung kum a, kipaahtahin Amah chu azintunta hi. 7 Huleh amah un huchu amuh tahun, "Misual khat kawma zintung diingin achiah ve," chiin aphun uhi. 8 Huleh Zakai chu ading a, Lalpa kawmah, "Lalpa, ngai in, ka neihlelam kimkhat gentheite kawmah ka pe diing hi; huleh mi thuampua bang aha dihloutaha ka laah aum leh, aleh li in ka dit diing," achi hi. 9 Huin Jesu'n a kawmah, "Tuni in hi inn sungah hutdamna ahung tungta hi, amah zong Abraham tapa ahi ngaala. 10 Ajiahchu beimangte hawl diing leh hundam diinga Mihing Tapa chu hung ahi," achi hi.
Talent Tehkhinthu
11 Huleh hi thute angaihkhiah laiun Jerusalem anaihtaah jiah leh Pathian lalgam hung lang pah diinga angaihtuah jiahun Ama'n tehkhinthu khat asoibeh hi. 12 Ama'n hujiahin asoi a, "Miloupi koiaha khat lalgam dang khat vaneia hung kilehkiit diingin khua gamlatah ah achiah hi. 13 Huleh ama'n a suaahte sawm akou a, mina sawm a kawmvah apia a, huleh 'Ka hung kiit masiah hikhu in sumkawl anavei un,' achi hi. 14 "Hizongleh a mite'n amah chu ahua va, 'Hi pa ka tungva vaihawmtu diingin ka deih sih uh,' chiin a nung ah palai asawl uhi. 15 Huleh hichi ahung hi a, lalgam chu avanei a, ahung kilehkiitin a sum veipung zah uh heetna diingin a suaah sum apiaahte chu a kawmah akousah hi. 16 Khatnapa chu ahung a, 'Lalpa, na mina khat chu mina sawm in apung hi,' achi hi. 17 Huin ama'n a kawmah, 'Hoih e, nang suaah hoih, sil tawmtakhat tunga na ginum jiahin khopi sawm tungah vaihawmtu in pang in,' achi hi. 18 Huin anihnapa ahung a, 'Lalpa, na mina ngaa in apung hi,' achi hi. 19 Ama'n huchibangmahin a kawmah, 'Nang zong khopi ngaa tungah vaihawmtu in pang in,' achi hi. 20 Huleh adang ahung a, 'Lalpa, en in, na mina khat chu hitah ah aum hi, puanthem a tuunin ka koih heh hi. 21 Ajiahchu migumtat na hi a, ka hung lau hi. Na koih louhna bang ah na la a, huleh na tuh louhna bang ah na aat hi,' achi hi. 22 Ama'n, 'Nang suaah gilou, na kam suaah ngeei in siamlouh ka hung tangsah diing. Migumtat ka hih a, ka koih louhna a ka laah veu a, huleh ka tuh louhna a ka aat veu na he maw! 23 Huchi ahihleh ka hung tun chianga ka sum apung ka laah theihna diinga bangchidaana ka sum chu suminn a anakoih lou na hiai?' achi hi. 24 Huin ama'n a kawma dingte kawmah, 'A mina chu laahsah unla, mina sawm neipa kawmah pia un,' achi hi. 25 Huin amah un a kawmah, 'Lalpa, ama'n mina sawm anei hi,' achi uhi. 26 "Ka hung hilh ahi, anei taphot chu piaah beh ahi diing a, hizongleh koipouh anei lou chu aneihsun zong laahsah ahi diing hi. 27 Hizongleh hu ka meelmate a tungva ka vaihawm diing deihloute chu hung pui unla, ka ma ah that un," achi hi.
Jesu Jerusalem Aluutna
28 Huleh Ama'n huchia asoi zohin amakaih a, Jerusalem lam juanin achiah tou uhi. 29 Huleh hichi ahung hi a, Olive kichi taang a Bethphage leh Bethani kho kawm naih ahung tun tahun, Ama'n a nungjuite laha mi nih asawl a, 30 "Na majawn va khua ah vachiah unla, na luut tahchiangun sabiltung talgual koimah tuan ngei nailouhna na vamu diing uhi. Huchu hung suut unla hung kai un. 31 Huleh mi koiaha in, 'Bang diinga na suut uh ahiai?' chia ahung dot leh, 'Lalpa'n amamoh hi,' chiin a kawmah soi un," achi hi. 32 Huleh a sawlte avachiahta va, a kawma asoi bang ngeeiin avamu uhi. 33 Huleh sabiltung talgual chu asuut tahun, aneite'n a kawmvah, "Sabiltung talgual bang diinga na suut uh ahiai?" achi uhi. 34 Amah un, "Lalpa'n amamoh hi," achi uhi. 35 Huin Jesu kawmah ahung kai va, sabiltung talgual tungah a puante uh aphah va, Jesu atuangsah uhi. 36 Huleh Amah achiah laiin lampi ah a puante uh aphah uhi. 37 Huleh Amah chu Olive Taang liamsuhna diing tah ahung tun kuan in, a nungjui mipi zousiah in a silmahbawlte tengteng amuh jiahun akipaah va, aw ngaihtahin Pathian apaahtawi va, 38 "LALPA min a hung Kumpipa chu ahampha hi! Vaan ah lemthu leng henla, tungnungpeen ah loupina um heh!" chiin. 39 Huin mipi laha Pharisai khenkhat in Amah kawmah, "Houtupa, na nungjuite taai in," achi uhi. 40 Hizongleh Ama'n adawng a, a kawmvah, "Ka hung hilh ahi, hite asip un chu, suangte akikoudoh pah diing uh," achi hi. 41 Huleh atun kuan-un Ama'n khopi chu amu a, akahkhum a, 42 "Aw nang, nangmah in tuni in lemna hung tut silte hung heta mei lehchin maw! Hizongleh tuin chu na mit apat akiphualta hi. 43 Ajiahchu na gaalte'n na kiimveel a kulh bawl a, ahung uumbichilh a, taaikhiahna diing umloua ahung uumkhumna nite na tungah ahung tung diing hi. 44 Huleh nang leh na sunga na tate tual saatna in ahung nei diing va, na sungah suang khatbeeh kithuapin anuse sih diing uh, ahung kiveh lai nite na heetlouh jiahin," achi hi.
Pathian Biahinn Suhsiangna
45 Huin Amah chu Pathian biahinn ah aluut a, sil juaahte leh leite anohdoh a, 46 A kawmvah, "'Ka inn chu haamteina inn ahi,' chih gelh ahi, hizongleh nang un 'suammangte umna kua' in na siamta uh," achi hi. 47 Huleh Amah in ni chinin Pathian biahinn ah thu ahilh a; hizongleh siampu lalte leh daanjilsahtute leh mipi houtute'n Amah thahatum uhi. 48 Hizongleh mipi zousiah in phatuamngaitaha a thu angaihkhiah zing jiahun alohna daan diing ahe sih uhi.
Jesu Thuneihna Adohna uh
1 Huleh hichi ahung hi a, Jesu'n Pathian biahinn a mite thu ahilh a, tanchinpha asoi laiin ni khat chu siampu lalte leh daanjilsahtute leh upate chu Amah langin Amah kawmah ahung va, 2 huchiin a kawmah, "Bang thuneihna in ahiai hi silte na bawl? Ahihlouhleh koi ahiai hi thuneihna hung pia? Hung hilh in," achi uhi. 3 Hizongleh Ama'n adawng a, a kawmvah, "Ke'n zong sil khat ka hung dong diing, hung dawng un: 4 Johan baptisma hi vaan apat ahiai, mihing apat?" achi hi. 5 Huin amahuh chu akingaihtuah va, "'Vaan apat,' chilei lah, Ama'n, 'Ahihleh bang diinga gingta lou?' ahung chi diing hi. 6 Hizongleh, 'Mihing apat,' chilei lah, mipi zousiah in suang in ahung sep diing uhi, ajiahchu Johan hi zawlnei ahi chih agingta ngaalva," achi uhi. 7 Huin amah un khoi apat chih ka soi thei sih uh chiin adawng uhi. 8 Huleh Jesu'n a kawmvah, "Ke'n zong bang thuneihna a hi silte bawl ka hiai chih ka hung hilh sih diing hi," achi hi.
Grephuan Tehkhinthu
9 Huin Ama'n mipite kawmah hi tehkhinthu asoi a, "Mi koiaha khat in grephuan abawl a, huan bawlmite kawmah hohloh diingin apia a, huleh gam tuam ah sawtpi taam diingin achiahta hi. 10 Huleh a gah loh hun in grephuan gah chu anapiaah diingun huan bawlmite kawmah suaah khat asawl hi. Hizongleh huan bawlmite 'n amah chu anavua va, khutguaahin asawlmangta uhi. 11 Huin ama'n suaah dang asawl kiit a, amah zong zumhuaitahin abawl va, khutguaahin asawlmangta uhi. 12 Huin ama'n athumna asawl kiit a, amah zong anasuliam va, apaaidoh uhi. 13 "Huin grephuan neitu in, 'Bang chi bawl diing ka diai? Ka tapa deihtah ka sawl diing hi, amah anazahtaat khamoh sih diing uh,' achi hi. 14 Hizongleh huan bawlmite'n anamuh tahun, 'Hi pa gou luahtu diing chu ahi, a gou i tan theihna diingun i that diing uh,' chiin akihou uhi. 15 Huin grephuan apatin apaaidoh va, athat uhi. Ahihleh grephuan neitu in a tungvah bangchiin abawl diai? 16 Ahung diinga huan bawlmite chu asumang diing hi. Huleh grephuan chu midangte kawmah ape diing hi," achi hi. Amah un hi ajaah tahun, "Huchi lawmlawm jaw tun dah heh," achi uhi. 17 Huin amahuh aen a, "Ahihleh, 'innlamtute suang deihlouh ngeei chu aning a suang poimohpeen ahung hita hi,' chia kigial khu bang ahiai? 18 "Koipouh suang tunga kipuuh chu akeehjaah diing a; huleh akiaahkhum photmahte chu agawijaan diing hi," achi hi. 19 Huleh hulai mahin siampu lalte leh daanjilsahtute'n Amah mat atum va, hizongleh mipite alau uhi; ajiahchu hu tehkhinthu amahuh demna a asoi ahi chih ahe uhi.
Siahtawi Thu a Dotna
20 Huin Amah chu ataang va, gamoptu vaihawmna leh thuneihna a atut theihna diingun a thu soikhial man diingin midih kipang enkhetu asawlkheta uhi. 21 Huleh amah un a kawmah, "Houtupa, dihtahin thu na soiin na hilh veu a, koimah khentuam neilouin Pathian lampi dihtahin na hilh hi, chih ka he uhi. 22 Keiuh diingin Kaisar kawma siah tawi dih ahiai, ahihlouhleh dihlou?" chiin adong uhi. 23 Hizongleh Ama'n adohabawl uh ahe a, a kawmvah, "Bang diinga hung je-et na hi viai? 24 Dinari khat hung ensah un. Koi lim leh koi min atuang ei?" achi hi. Amah un adawng va, "Kaisar a," achi uhi. 25 Ama'n a kawmvah, "Hujiahin Kaisar silte chu Kaisar kawmah pia unla, huleh Pathian silte chu Pathian kawmah pia un," achi hi. 26 Huin mipite ma ah a thu soikhial mat diing amu sih va, a dawnna chu limdang asa mahmah va, asipta uhi.
Thohkiitna Thu a Dotna
27 Huzohin misi thohkiitna aum sih chi Sadukaite laha hunkhop a kawmah ahung va, Amah chu adong va, 28 "Houtupa, Mosi'n koipouh a sanggampa in ji nei a, ta beia asihsan leh, a sanggampa'n a ji aluah diing a, a sanggampa diingin chi ahaahsah diing ahi, chiin ahung gelhsah hi. 29 Huchiin unau pasal sagih aum a, a-upapeen in ji anei a, ta neilouin asi hi. 30 Huin anihna in aluah a, ta neilouin asi hi. 31 Huin athumna in aluah a, huchibangmahin a sagih un anei va, ta neilouin asi chiatta uhi. 32 Atawpin numeinu zong asita hi. 33 Hujiahin thohkiitna ni chiangin amahnu chu koipeen ji ahita diai? A sagih un ji in anei chiat ngaalva," achi uhi. 34 Huin Jesu'n adawng a, a kawmvah, "Hi khang tate chu akiteeng va, jileta in akipia uhi. 35 Hizongleh hu khang luah taah diing leh misi lah apat thohkiitna a tel taah diinga guatte chu akiteeng nawri sih va, teeng zong akiteengsah sih uhi. 36 Amahuh chu si zong asi thei nawn sih uh, ajiahchu angelte bang ahi va, huleh thohkiitna tate ahih jiahun Pathian tate ahi uhi. 37 Huchiin misi kaihthohin aum chih Mosi'n zong sawlbawh lahah Lalpa chu 'Abraham Pathian, Isak Pathian leh Jakob Pathian' achih laiin ahesah ahi. 38 Huchiin Amah chu misi Pathian ahi sih a, ahingte Pathian ahijaw hi, ajiahchu Amah ah mi zousiah ahing ahi," achi hi. 39 Huin daanjilsahtu koite aha in adawng va, "Houtupa, na soi dih ngeei hi," achi uhi. 40 Hu nungin amah un thudang mawngmawng adong ngam nawnta sih uhi.
David Tapa Thu a Dotna
41 Huleh Ama'n a kawmvah, "Khrist chu David Tapa ahi bangchidaana achih uh ahiai? 42 Ajiahchu David ngeei in Phatna Late Lehkhabu ah, 'LALPA'N ka Lalpa kawmah, 43 "Na meelmate na keeng ngahna a ka bawl masiah ka jiatlam ah tou in,"' achi hi. 44 Huchia David in Amah chu 'Lalpa' achih leh, bangchidaana a Tapa hi ahiai?" achi hi.
Daanjilsahtute Apat Pilvaang Diinga Thuhilhna
45 Huzohin Ama'n mipi kikhawmte zousiah jaahin a nungjuite kawmah, 46 "Puannaah tual silha vaahleh uut a, dawlmunte a chibai buuh bang, sinagogatouna poimohpeente leh gualvaahna a mun hoihpeente tan ngaina, daanjilsahtute lahah pilvaang un, 47 meithaite inn haw anegam va, bawltawmin sawt pipi ahaamtei uhi. Amah un chu siamlouhtanna lian seem amu diing uhi," achi hi.
Meithainu Thohlawm
1 Huleh Amah chu adaahdoh a, mihausate'n sumkholna a sum akhiah lai uh amu hi. 2 Huleh Ama'n meithainu gentheitah khat in paisa lepton nih akhiah lai zong amu hi. 3 Huin Ama'n, "Chihtahzetin ka hung hilh ahi, amahuh zousiah saangin hi meithai gentheitahnu'n akhe tamjaw hi; 4 ajiahchu hite zousiah in aneih vaal uh Pathian thohlawm ah akhia uhi, hizongleh amahnu'n chu a hinna diinga aneihsun teng akhe veh hi," achi hi.
Jesu'n Hun Hungtung diing Asoilawhna
5 Huin koite aha in Pathian biahinn thu, suang hoih tahtahte leh silpiaahte a zep hoih ahihdaan asoi laiun, Ama'n, 6 "Hi na sil muhte uh ahihleh suhchip louha suang kithuap mawngmawng hitah ah khat zong aum louhna diing nite ahung tung diing hi," achi hi. 7 Amah un> "Houtupa, hi silte bangchihchian ahung um diai? Huleh hi silte ahung tun diing chiangin chiamchihna bang ahung um diai?" chiin adong uhi. 8 Huin Ama'n, "Heema na um louhna diingun pilvaang un. Ajiahchu, 'Khrist ka hi,' huleh 'A hun chu anaita,' chiin mi tampi ka min in ahung diing uhi. Hujiahin amahuh jui sih un. 9 Hizongleh kidou thu leh kiphin buai thute na jaah chiangun lau sih un; ajiahchu hi silte hung tung masa diing mawng ahi, hizongleh a tawpna in ajui pah nai sih diing hi," achi hi. 10 Huzohin Ama'n a kawmvah, "Nam tuam leh nam tuam akidou diing va, huleh lalgam tuam leh lalgam tuam akidou diing uhi. 11 Huleh mun tuamtuam ah jiil nasatah aliing diing a, kialte hung tungin hiite ahung leeng diing hi; huleh vaan apatin sil lauhuaite leh chiamchihna huaisetahte ahung um diing hi. 12 Hizongleh hi silte zousiah atun main nanguh ahung man diing va, sinagog leh suangkulte ah hung puiin ahung suduhdah diing uhi. Ka min jiahin kumpipate leh gamoptute ma ah ahung pui diing uhi. 13 Huleh hichu nanguh diingin heetpihtua panna hun lemchang ahi diing hi. 14 Hujiahin bangchi dawn diing chih ngaihtuah masa lou diingin na lungtang vah kisukip un; 15 ajiahchu meelma zousiah in ahung dou va, ahung soiseel theihlouh diing uh kam leh pilna ka hung pe diing hi. 16 Hizongleh nanguh chu na nulepate uh, na sanggamte uh, na behte uh leh na lawmte ngeei un zong ahung pedoh diing va, na lahva khenkhat chu ahung that diing uhi. 17 Huleh ka min jiahin mi zousiah huatin na um diing uhi. 18 Hizongleh na lu va samjang khat zong amangthang sih diing hi. 19 Na thuaah mualsuahzohna un na hinna uh na huumbit diing uhi. 20 "Huleh sepaihte'n Jerusalem auumkhum uh na muh chiangun a manthaaina diing anaita chih he un. 21 Hu hun chiangin Judia gam a umte taang ah taaimang uh heh, hu khopi sunga umte zong pawtdoh uh heh, huleh gam lama umte zong hu khopi sungah luut sih uh heh. 22 Ajiahchu thu kigelh zousiah ataangtunna diinga hu nite chu phubalaahna ni ahi diing hi. 23 Hizongleh hu hun a gaaite leh naungeeh nawiteep neite tung agih hi! Ajiahchu gam sungah hahsatna nasatah leh hi mite tungah lungthahna tung diing ahi. 24 Huleh amahuh chu naamsau hiam in asi diing va, nam chin kawmah suaaha puiin aum diing uhi. Huleh Jentelte hun ataangtun masiah Jerusalem chu Jentelte totdeenin aum diing hi.
Mihing Tapa Hungna diing
25 "Huleh ni leh ha leh aahsite bang ah chiamchihna aum diing a, tuikhanglian kinoh leh maau vengvungte'n leitung ah nam chin hahsatna leh mangbatna atun diing hi. 26 Mite chu launa jiaha khovel a sil hung tung diingte ngaihtuahna jiahin asidang diing uh, ajiahchu vaan silbawltheihnate akisuliing diing hi. 27 Hutahchiangin amah un Mihing Tapa chu silbawltheihna leh loupina nasatah toh meipi laha hung amu diing uhi. 28 Huleh hi silte ahung tun pat chiangin entou unla, daahdoh un, ajiahchu na tatna uh anaita hi," achi hi. 29 Huin Ama'n a kawmvah tehkhinthu khat asoi a, "Theipi kung leh sing kung zousiah en un. 30 A nah ahung sel tahchiangin nipi ahung naita chih na mu va, na kiheet uhi. 31 Huchibangmahin hi silte ahung tun na muh chiangun Pathian lalgam ahung naita chih heun. 32 "Chihtahzetin ka hung hilh ahi, sil zousiah ataangtun veh masiah hi khang amang sih diing uhi. 33 Vaan leh lei abeimang diing a, hizongleh ka thu chu bangchihmahin amang sih diing hi.
Kigingzing Diinga Hasotna
34 "Neehvah taatluat leh zukham leh damsung khosah ngaihtuahna in na lungtang uh asuhbuai louhna diingin, huleh na heetlouh kaal va hu Ni ahung tunguih louhna diingin pilvaang un. 35 Ajiahchu thaang kipel banga leitung pumpi a umte zousiah tunga tung diing ahi. 36 Hujiahin hi sil hung tung pah diing zousiah peel taah leh Mihing Tapa ma a ding taah na hih theihna diingun bangchihlaipouhin haamtei unla, kigingzing un," achi hi, 37 Huleh Ama'n suun laiin Pathian biahinn ah thu ahilh a, jaan chiangin apawtdoh a, Olive kichi taang ah ava-um veu hi. 38 Huleh mipi zousiah chu jiingkaal matahin Amah kawmah Pathian biahinn ah a thu ngaikhe diingin ahung uhi.
Juda Lepchiahna
1 Huleh Tolsohlouh Tanghou Kuut, huchu Chiahkaan Kuut achih uh ahung naita hi. 2 Siampu lalte leh daanjilsahtute'n Amah athah theihna diing uh angaihtuah va, mipite lah alau uhi. 3 Huin sawmlenihte laha tel Juda Iskariot achih uh sungah Setan aluut hi. 4 Huchiin apawtdoh a, Jesu bangchiin amansah theih diai chih ngaihtuahin siampu lalte leh houtute avakikuppih hi. 5 Huin amahuh chu akipaah va, amah chu sum piaah lem asa uhi. 6 Huleh ama'n lem asa a, mipi um louh kaal khat a Amah matsahna diing hun lemtaang ahawlta hi.
Chiahkaan Kuut Kisingsahna
7 Huin Chiahkaan belaamnou latna ni diing Tolsohlouh Tanghou Kuut ni ahung tungta a, 8 Ama'n Peter leh Johan asawl a, "Chiah unla, Chiahkaan an i neeh diingun vabawl un," achi hi. 9 Huin amah un a kawmah, "Khoitah ah vabawl leh ung na deih ei?" achi uhi. 10 Ama'n a kawmvah, "Ngai un, khopi sunga na luut chiangun tuibeel pua pasal khat in ahung na tuaah diing a, aluutna inn juiluut un. 11 Huleh a inn neitupa kawmah, 'Houtupa'n, "ka nungjuite toh Chiahkaan an ka neehna diing uh mikhual pindan khoitah ahiai?" ahung chi hi,' na chi diing uhi. 12 Huleh ama'n pindan tungnung lianpi, guatsa diam khat ahung ensah diing a, hutah ah vabawl un," achi hi. 13 Huin achiah va, a kawmva asoi bangin amuta va, Chiahkaan an chu abawlta uhi.
Nitaah Ankuang Nunungpeen
14 Huleh a hun ahung chin tahin Amah atouta a, apostol sawmlenihte'n zong atoupih uhi. 15 Huin Ama'n a kawmvah, "Ka thuaah main hi Chiahkaan an nanguh toh neehkhawm ka uut mahmah hi; 16 ajiahchu ka hung hilh ahi, Pathian lalgam a hikhu ataangtun masiah ka ne nawn sih diing hi," achi hi. 17 Huleh nou ala a, kipaah thu asoi zohin, "Hi la unla, kihawm un; 18 ajiahchu ka hung hilh ahi, Pathian lalgam ahung tun masiah greptui ka dawn kiit nawn sih diing hi," achi hi. 19 Huin tanghou ala a, kipaahthu asoi zohin abalkeeh a, a kawmvah apia a, "Hichu ka tahsa, nanguh diinga piaah chu ahi, na hung heetzingna diingun hichu bawl un," achi hi. 20 Huchibangmahin nitaah an neeh zohin nou zong ala a, "Hi nou chu ka sisan a thuhun thah nanguh diinga luangkhia chu ahi. 21 Hizongleh ngai un, ahung mansahtu diing khut chu ka kawmah dohkaan tungah aum hi. 22 Tahzetin Mihing Tapa chu akiguatsa bangjeelin apai hi; hizongleh amansahtu tung agih hi!" achi hi. 23 Huin amahuh chu hitobang bawl diingpa a lahva koipeen hi diing ahiai chiin akidong tuahta uhi. 24 Huleh amahuh lahah koiaha lianpeen a seh diing chia kinialna zong aum hi. 25 Huin Ama'n a kawmvah, "Jentel kumpipate chu a tungvah kilalsahtahin aum va, huleh a tungva vaihawmtute chu 'mi hoihna diing bawltute' achi uhi. 26 Hizongleh nanguh chu huchibang na hi sih diing uh; na lahva lianpeen chu naupangjaw bangin um heh, huleh houtu lianpeen chu sawltawn anhawmtu bangin um jaw heh. 27 Ajiahchu ankuang uumtu leh anhawmtu koi ahiai lianjaw? Ankuang uumtu hijaw lou diing maw? Hizongleh kei chu na lahvah anhawmtu bangin ka um hi. 28 Nanguh chu heemna ka tuaah sung siah hung umpihtute na hi uhi. 29 Huleh ka Pa'n kei lalgam ahung guatsah bangin nanguh diingin lalgam ka hung guatsah hi; 30 huchia ka lalgam a ka dohkaan a na neeh va, na dawn va, huleh Israel nam sawmlenihte vaihawmsaha laltouphah a na tou theihna diingun," achi hi.
Peter Kiheetmohbawl Diing Soilawhna
31 Huin Lalpa'n, "Simon, Simon, ngai in, Setan in buh banga ahung seep theihna diingin ahung ngeen hi. 32 Hizongleh na ginna aman louhna diingin ka hung haamteisah hi, na kiheikiit chiangin na unaute sukip in," achi hi. 33 Hizongleh ama'n a kawmah, "Lalpa nang toh suangkul leh sihna a zong chiah ka ngaap hi," achi hi. 34 fjuin Ama'n, "Peter, ka hung hilh ahi, ke'n Amah ka he kha sih chia thumvei na hung kiheetmohbawl masiah tuni'n aah akhuang sih diing," achi hi. 35 Huin Ama'n a kawmvah, "Nanguh dangka-ip bei a, sakhau bei a, huleh keengtophah bei a ka hung sawl laiin sil khat beeh na kitasam viaimah?" achi hi. Amah un, "Tasamlou," achi uhi. 36 Huin Ama'n a kawmvah, "Hizongleh tuin chu dangka-ip nei in keng henla, huchibangmahin sakhau nei in zong; huleh naamsau neilou in a puan juaah henla, lei heh. 37 Ajiahchu ka hung hilh ahi,' Amah chu daan botsetute lahah asimtel uh' chih gelh chu ka tungah ataangtung diing him ahi. Ajiahchu ka tungtaang thute tungkim ahita," achi hi. 38 Huin amah un, "En in Lalpa, hi ah naamsau nih aum hi," achi uhi. Ama'n a kawmvah, "Ahun hi," achi hi.
Olive Taang a Huan a Jesu Haamteina
39 Huin Jesu apawtdoh a, angeina bangin Olive Taang ah achiah a, huleh a nungjuite'n zong ajui uhi. 40 Huleh amun atun un Ama'n a kawmvah, "Heemna a na luut louhna diingun haamtei un," achi hi. 41 Huin Amah chu suang a sehphaah tan diing bang ah achiah tuam a, khuupdin in ahaamtei a, 42 "Pa, lem na saha ahihleh, hi nou hi kei apatin suanmang in; ahihvaangin keimah thu hilouin, hizongleh nangmah thuthu hijaw heh," achi hi. 43 Huin vaan apatin angel khat a kawmah ahung kilaah a, Amah ahung suhaat hi. 44 Huin Amah chu agim mahmah a, phatuamngai jawseemin ahaamtei hi. Huchiin a khosa chu sisan vat bangin lei ah avakheta hi. 45 Huleh Amah ahaamtei zoha ahung thohdoh tahin nungjuite kawmah ahung a, amahuh chu lungngaih jiaha ihmuin amu hi. 46 Huin, "Bang diinga ihmu na hi viai? Heemna a na puuh louhna diingun thou unla haamtei un," achi hi.
Jesu Matsahna
47 Huleh Ama'n thu asoi laitahin, en un, mipi hon khat ahung va, huleh sawmlenihte laha khat, Juda achih uh ahung makai a, tawp tumin Jesu kawm anaih hi. 48 Hizongleh Jesu'n a kawmah, "Juda, Mihing Tapa hi tawp a mansah na hi maw?" achi hi. 49 Akiim a mi umte'n sil hung um diing chu amuhun, "Lalpa, naamsau in ka saat diviai?" achi uhi. 50 Huleh a lahva mi khat in siampu lalpeen suaahpa asaat a, a bil jiatlam asaatkhiahsah hi. 51 Huin Jesu'n ahoupih a, "Hichi chiang chu phal un," achi hi. Huin a bil chu akhoih a, asudamta hi. 52 Huin Jesu'n a kawma hung siampu lalte leh Pathian biahinn veengtute leh upate kawmah, "Suammangtu man diing bang hialin naamsau leh khetbuuhte toh na hung kuan uh maw? 53 Na kawmva ni chin a Pathian biahinn a ka um laiin ka tungah khut na ha hiai sih uhi. Hizongleh tu hun leh mial thuneihna hi nanguh a ahi," achi hi.
Peter in Jesu Akiheetmohbawlna
54 Huin Amah chu aman va, apui va siampu lalpeen inn sungah apuiluut uhi. Huleh Peter in gamlatahin agaal juih hi. 55 Huleh amah un huan sung laiah mei achih va, atoukhawm va, Peter chu a lahvah avatou hi. 56 Huleh mei kawma atou laiin suaah nungaah koiaha in amu a, nguntahin aen a, "Hi pa zong Amah kawma um him ahi," achi hi. 57 Huin ama'n, "Numei, Amah ka he sih hi," chiin akiheetmohbawl hi. 58 Huleh tomkhat zouin midang khat in amu kiit a, "Nang zong a lahva mi na hi," achi hi. Huin Peter in, "Ka hi sih, mihing," achi hi. 59 Huleh daah kaal khat veel nungin midang khat in, "Hi pa zong Amah kawma um himah tham ve aw, Galili mi ahi ngaala," achi tinten hi. 60 Peter in, "Mihing, na thusoi ka he sih," achi hi. Huin a thusoi laitahin thakhatin aah ahung khuangta hi. 61 Huin Lalpa chu akihei a, Peter aen a, "Tuni'n aah khuan main thumvei na hung kiheetmohbawl diing," chia Lalpa'n a kawma asoi chu Peter in ahung hedohta hi. 62 Huin Peter chu polam ah apawtdoh a, hah kahin akapta hi. 63 Huleh Jesu mantute'n Amah chu chiamnuih bawlna a nei in, avua va, 64 huleh amaaikaan zohun a maai abeeng va, "Koi ahiai hung vua? Hung hilh in," chiin adong uhi. 65 Huleh thudang tampi a Amah soisia in akawh uhi.
Vaihawmpawl Ma ah Jesu
66 Huleh kho vaah tahin vaantaang upate leh siampu lalte leh daanjilsahtute ahung kikhawm va, a vaihawmna ma vah apuiluut va, 67 "Khrist na hih leh, hung hilh in," achi uhi. Himahleh Ama'n a kawmvah, "Hung hilh zongleng, na gingta sih diing uhi. 68 Huleh ke'n zong nanguh thu hung dong leng, na hung dawng saam sih diing va, chiah lah na hung chiahsah sih diing uhi. 69 Tu kalsiah Mihing Tapa chu Pathian silbawltheihna jiatlam ah atouta diing hi," achi hi. 70 Huin a bawnun, "Ahihleh Pathian Tapa na hi maw?" achi uhi. Ama'n a kawmvah, "Na hung chih bangun ka hi," achi hi. 71 Huin amah un, "Heetsahna dang bang i ngai nawn tuan eimah? Ajiahchu eimah ngeei in a kamsuah i jata uh," achi uhi.
Jesu Pilat Ma Ah
1 Huin mipite chu a bawnun ading va, Amah chu Pilat kawmah apui uhi. 2 Huin amah un Hi Pa'n, "Amah leh Amah Khrist, Kumpipa ka hi kichiin Kaisar kawma siahtawi akhap a, huleh ka namte uh atohbuai ka he uh," chiin aheehta uhi. 3 Huin Pilat in, "Judate Kumpipa na hi maw?" chiin adong hi. Ama'n adawng a, "Na chih bangin ahi," achi hi. 4 Huin Pilat in siampu lalte leh mipite kawmah, "Hi Pa tungah sualna bangma ka mu sih," achi hi. 5 Huin amah un, "Ama'n Galili gam apatin hi mun tanin Judia gam kho chin ah thu hilhin mipite atohbuai veu hi," chiin ahahpan seem uhi.
Jesu Herod Ma a Adinna
6 Galili thu ajaah tahin Pilat in hu Mi chu Galili mi ahihleh hihlouh adong hi. 7 Huleh Amah chu Herod vaihawmna nuaia um ahi chih aheet tahin Herod kawmah asawl a, hulaiin amah zong Jerusalem a um ahi. 8 Huleh Herod in Jesu amuh tahin akipaah mahmah a, a tanchin tampi anajaah jiahin hun sawttah apat akimuhpih uut mawng ahi; huleh a chiamchihna bawl bang aha beeh muh zong akineem hi. 9 Huin ama'n a kawmah thu tampi adong a, hizongleh Ama'n bangmah in adawng sih hi. 10 Huin siampu lalte leh daanjilsahtute adingkhia va, nasatahin Amah aheeh uhi. 11 Huin Herod leh a sepaihte'n Jesu chu asimmohbawl va, chiamnuih bawlna a azat nungun puan loupi asilhsah va, Pilat kawmah asawlkiitta uhi. 12 Huleh hu ni mahin Herod leh Pilat lawmta ahung hita uhi, hu masiah chu kilungdou zing anahi uhi.
Jesu Kilhbeh Diinga Piaahkhiahna
13 Huin Pilat in siampu lalte leh houtute leh mipite akoukhawm a, 14 a kawmvah, "Hi Pa'n mite atohbuai chia ka kawma na hung pui uh ahi hi. Huleh en un, na ma va hoihtaha ka etchian nungin na heehna thu vah Amah tungah bangmah dihlouhna ka mu sih hi. 15 Herod in zong amu sih, ajiahchu nanguh a kawmah ka hung sawl a, huleh ngai un, sihna khop hiai bangma abawl sih hi. 16 Hujiahin ka jeep diing a, ka hah mei diing," achi hi. 17 Ajiahchu kuut ni a ama'n mi khat a kawmva ahahkhiahsah teeiteei diing ahi hi. 18 Huin amahuh thakhatin akikou va, "Hi Pa sumangthaai inla, Barabba hung hahdohsah in," achi uhi. 19 Hi pa chu khopi sunga helna bang aha jiah leh tualthah jiaha suangkul taang ahi hi. 20 Hujiahin Pilat in Jesu ahahdoh nuam a, a kawmvah thu asoi kiit hi. 21 Hizongleh amahuh chu akikou va, "Kros ah kilhbeh in, kros ah kilhbeh in," achi uhi. 22 Huin ama'n a thumveina diingin a kawmvah, "Bangjiahin ei maw? Bang bawlsual anei a ahiai? Sihna khop hiai a tungah bangma ka mu sih hi. Hujiahin ka jeep diing a, ka hahdoh mei diing," achi hi. 23 Huleh amah un aw ngaihtah in kros a kilhbeh diingin angeen teeiteei va, huin amahuh aw leh siampu lalte aw in aneh zoujawta hi. 24 Huin Pilat in anget bangva bawl diingin thu atan hi. 25 Huleh helna leh tualthahna jiaha suangkul taang angetpa uh chu ahahdoh a, Jesu ahihleh auut uutva bawl diingin apekheta hi.
Jesu Kikilhbehna
26 Huleh Amah apui laiun khota lam apat a hung, Kureni gam mi Simon chu aman va, Jesu nunga kros chu apuaahpih theihna diingin a tungah angata uhi. 27 Huleh mipi nasatah leh Amah kah a maau jeenjuun numei hon in ajui uhi. 28 Hizongleh Jesu'n amahuh lam hung ngain, "Jerusalem tanute, kei hung kah sih unla, nanguh leh na tate uh diingin kap jaw un. 29 Ajiahchu ngai un, hichibang nite ahung tung diing a, hu ni chiangin, 'Chiingte leh naupaai ngeilouhna gilte, huleh naungeeh teep ngeilouh nawite ahampha uh,' achi diing uhi. 30 Hu him chiangin amah un 'taangte kawmah, "Hung netkhum un," huleh mualte kawmah, "Hung khuhkhum un,'" achi diing uhi. 31 "Ajiahchu sing hing a bawn hi silte abawl uh leh, sing gaw ah bang akibawl taphet diai?" achi hi. 32 Huleh midang migilou nih zong Amah toh suhlup diingin apui uhi. 33 Huleh Kalvari achih mun uh atun tahun, hu ah Amah chu kros ah akilhbehta va, migiloute toh, khat a jiatlam ah, khat a veilam ah akilhbeh uhi. 34 Huin Jesu'n, "Pa, amahuh ngaidam in; ajiahchu asilbawl uh ahe lou uh ahi," achi hi. Huin aisaanin a puansilhte akihawm uhi. 35 Huleh mipite'n dingin aen zing va, houtute'n zong, "Midang bawn ahundam vele, Pathian miteel, Khrist ahih ngeei leh, Amah leh Amah kihundam leh aveleh," chiin aeenghou uhi. 36 Sepaihte'n zong chiamnuih bawlna in anei va, a kawma hungin uain thuuh apia va, 37 huleh, "Judate Kumpipa na hih leh, nangmah kihundam in," achi uhi. 38 Huleh a lutung jawn ah Grik, Latin leh Hebrai haam in, HICHU JUDATE KUMPIPA AHI, chia thugelh akitaah hi. 39 Huleh migilou kikhaite laha khat in Amah asoisia a, "Khrist na hih leh, nangmah kihundam inla, keiuh zong hung hundamta'n," achi hi. 40 Hizongleh khatpeen in chu amah taai kawmin adawng a, "Nang banggiap toh kibanga mohpaih ahih mei chu, Pathian lau lou na hiaimah? 41 Ei chu gawt taah mawng i hi hi, ajiahchu i silbawlte man dihtah mu i hi; hizongleh hi Pa'n chu bangma asusual sih hi," achi hi. 42 Huin ama'n Jesu kawmah, "Lalpa, na lalgam na tun chiangin hung hezing in aw!" achi hi. 43 Jesu'n a kawmah, "Chihtahzetin ka hung hilh ahi, tuni'n ka kawmah Paradis ah na um diing hi," achi hi.
Jesu Sihna
44 Huleh hichu daah guupna veel diing ahi a, daah kuahna tandongin leitung zousiah ahung mialta hi. 45 Huleh ni ahung mialta a, Pathian biahinn a puanjaah chu akimlai ah ahung keehta hi. 46 Huleh Jesu chu aw ngaihtahin akikou a, "Pa, 'na khut ah ka hagau ka hung keemsah hi,'" achi hi. Huleh huchu achih zohin a hagau ahahta hi. 47 Huleh sepaih zahoutu in sil umdaan amuh tahin, "Hi Pa chu chiantahin Mi dihtat ahi ngeei mei!" chiin Pathian apaahtawita hi. 48 Huleh hu etnop en diinga hung khawm mipi zousiah in sil umdaan amuh tahun a awm uh tuum kawmkawmin achiah kiitta uhi. 49 Huleh a meel heette zousiah leh Galili gam apat Amah hung jui numeite chu gaal ah ading va, hi silte aenzing uhi.
Jesu Vuina
50 Huleh ngai un, mi khat a min Joseph kichi vaihawmtu khat aum a, amah chu mihoih leh midihtat ahi. 51 Ama'n chu avaihawm uh leh asilbawl uh zong lem anasahpih sih hi. Amah chu Judate khopi Arimathia mi ahi a, Pathian lalgam ngaah zinga um ahi. 52 Hi pa chu Pilat kawmah achiah a Jesu luang avangeen hi. 53 Huin alakhia a, puanneem in atuam a, koimah sial ngei nailouhna suang kikhuaah haan khat ah asialta hi. 54 Huleh hu ni chu Kisahkhawl ni ahi a, Sabbath ni kipan diing ahita hi. 55 Huleh numeite, Galili gam apat Amah toh hung kitonte'n zong anung ajui va, a haan leh a luang kisial daan amu uhi. 56 Huin achiah kiit va, silgimnamte leh thau gimtuuite asiam va, daan dungjuiin Sabbath ni in akhawlta uhi.
Jesu Thohkiitna
1 Huleh hapta ni masa ni in, jiingkaal matahin a gimtuui bawlte uh tawiin, amahuh toh numei dang koite aha haan ah ahung uhi. 2 Huleh suang chu haan apat liihdoha um amu uhi. 3 Huin a sung ah aluut va, Lalpa Jesu luang chu amuta sih uhi. 4 Huleh hichi ahung hi a, hujiaha alungbuai laiun, en un, mi nih puan vaamtah mei silhin a kawmvah ahung ding uhi. 5 Huleh amahuh laua lei a abohkhup laiun amah un a kawmvah, "Bang diinga misi laha mihing hawl na hi viai? 6 Hitah ah Amah aum nawn sih a, himahleh athou kiitta hi. Galili a aum laia na kawmva asoi hezing un: 7 'Mihing Tapa chu misualte khut ah matsahin aum diing a, kros ah akilhbeh diing va, huleh ni thum ni'n athou kiit diing,' achih chu," achi uhi. 8 Huin amah un a thusoite ahung hedohta uhi. 9 Huleh haan apatin amahuh anungchiah kiit va, hi silte zousiah sawmlekhatte leh midang teng kawmah ahilhta uhi. 10 Amahuh chu Mari Magdalini leh Joanna leh Jakob nu Mari leh a kawmva um numei dangte toh ahi va, hi silte chu apostolte kawmah ahilhta uhi. 11 Huleh a thusoi uh chu mawh thu maiin angai va, anatahsang sih uhi. 12 Huin Peter chu adingdoh a, haan ah avataai a, huleh kuuna aet leh puan neemte chauh um chu amu a, sil um daante chu limdangsatahin inn lamah achiahta hi.
Emmau Lampi a Jesu Kilaahna
13 Huleh ngai in, hu ni mahin a lahva mi nih Emmau kichi khua khat, Jerusalem apat kilometar sawmlekhat banga gamla ah achiah uhi. 14 Amahuh chu hi sil hung tung zousiah thu ah ahoulim va, 15 huleh hichi ahung hi a, houlima akidottuah laiun Jesu ngeei in ahung naih a, amahuh toh achiah khawmta hi. 16 Hizongleh Amah aheet theihlouhna diingun amit uh suhvaihin aum hi. 17 Huin Ama'n a kawmvah, "Na chiah kawmva na kihoulimna uh bang ahiai? achi hi. Huleh dahmeel potahin ading den uhi. 18 Huin khatpa a min Kleopa kichipeen in adawng a, Amah kawmah,' Tulai a hutah a sil tungte helou a um, Jerusalem a mikhual nang chauh na hiaimah?" achi hi: 19 Ama'n"a kawmvah, "Bang silte eimaw?" achi hi. Huin amah un a kawmah, "Nazareth Jesu, Pathian leh mi zousiah mitmuh a silbawl leh thusoi a Zawlnei minthangtah tungtaang thu, 20 huleh Amah chu siampu lalte leh ka houtute un sitaaha siamlouh tansah diinga apiaahkhiah va, kros a akilhbeh uh thute ahi. 21 Hizongleh kei un chu Israelte tantu diing Amah ahi chih ka kineem uhi. Huleh hi haw lou zong hi silte tun kalsiah tuni a ni thum ni ahita hi. 22 Hizongleh ka lawi lahva numei khenkhat haan ah mataha vachiahte'n thumah satahin ahung koih uhi. 23 Huleh a luang amuh louh phetun ahung kihkiit va, ahing kiitta chia hung hilh angelte zong ka mu uh, achi uhi. 24 Huin ka umpihte lahva khenkhat haan ah avachiah va, numeite soi bangngeeiin amu va, hizongleh Amah amu tuan sih uhi," achi uhi. 25 Huin Ama'n a kawmvah, "Aw mingolte leh zawlneite thusoi zousiah tahsang diinga lungngongte! 26 Khrist in hi silte thuaah a, a loupina a aluut diing him hilou ahiaimah?" achi hi. 27 Huin Mosi leh Zawlneite Lehkhabute zousiah apanin Pathian Lehkhathu pumpi a Amah tungtaang kigialte a kawmvah ahilhchianta hi. 28 Huleh achiahna diing khua uh tung diing ahita va, Amah chu chiahsuaah tum bangin aum hi. 29 Hizongleh amah un Amah chu ahou va, "Ka kawmvah um meita in, nitaahlam ahita a, huleh ni zong tum diing ahita hi," achi uhi: Huin Amah chu a kawmva um diingin aluutta hi. 30 Huleh hichi ahung hi a, amahuh toh ankuang a touin tanghou ala a, avangpiaah a, huleh abalkeeh a, a kawmvah apia hi. 31 Huin amit uh ahung vaahta a, Amah aheta va, huin, Amah chu a mitmuh vapat amangta hi. 32 Huin amah un, "Lampi a ahung houpih a, Pathian Lehkhathu ahung hilhchian laiin i sungah i lungtang akuang hiai hilou ahiaimah?" achi uhi. 33 Huleh hulaitah mahin adingdoh va, Jerusalem ah akinungleh va, sawmlekhat umkhawmte leh a kawmva umte chu amu uhi. 34 Amah un, "Lalpa chu athou kiit tahzet ahi, Simon kawmah zong akilaahta," anachi uhi. 35 Huin amah un zong lampi a sil hung umte leh tanghou abalkeeh a, Amah aheetdoh daante uh ahilh uhi.
Nungjuite Kawma Jesu Kilaahna
36 Huleh hichia asoi laiun, Jesu ngeei chu a lahvah ahung ding a, a kawmvah, "Na tungvah hamuanna um heh," achi hi. 37 Hizongleh amahuh chu achija mahmah va, alau va, hagau khat muin akingaihtuah uhi. 38 Huin Ama'n a kawmvah, "Bang diinga mangbang na hi viai? Huleh bang jiaha na lungtang va ginlahna um ahiai? 39 Ka khutte, ka keengpeehte en un, keimah mah hilou ka hiaimah? Hung khoih unla, en un, ajiahchu keimah in hite neia na hung muh bangun hagau in sa leh guh anei sih hi," achi hi. 40 Huleh Ama'n huchia asoi zohin a khutte leh a keengpeehte amahuh alah hi. 41 Huleh akipaah taahluat jiahva agintaat louh uh leh limdang asah laiun Ama'n a kawmvah, "Hitah ah neeh diing bang aha na nei viai?" achi hi. 42 Huin amah un a kawmah nga kikang gaw khat leh khuaizu khal khat apia uhi. 43 Ama'n huchu ala a, a ma vah aneta hi.
Tanchinpha Soi Diinga Vaihaahna
44 Huleh Ama'n a kawmvah, "Mosi Daan thu leh Zawlneite Lehkhabute leh Phatna Late a ka tungtaang kigial zousiah ahung taangtun diing daan nanguh toh ka umkhawm laia na kawmva ka thusoite chu hi haw ahi," achi hi. 45 Huin Pathian Lehkhathu aheet theihna diingun a lungtang uh ahonsahta hi. 46 Huleh Ama'n a kawmvah, "Hichibanga gelh ahi, Khrist in gim athuaah diing a, a ni thum ni in misi lah apat athoukiit diing a, 47 huleh kisiihna leh sual ngaihdamna chu Amah min in Jerusalem apatin nam chin lahah soi ahi diing hi. 48 Nanguh hi silte heetpihtute na hi uhi. 49 Huleh ngai un, ka Pa sil chiam na tungvah ka hung sawl diing hi; hizongleh tunglam apat silbawltheihna a thop na hih masiah uh Jerusalem khopi ah um kinken un," achi hi.
Jesu Vaan a Akalna
50 Huin Jesu'n amahuh chu Bethani tanphain apuidoh a, huin a baan ajaah a, amahuh avangpiaah hi. 51 Huleh hichi ahung hi a, avangpiaah laitahin amahuh apaisanta a, vaan ah puitouhin aumta hi. 52 Huin amah un Amah abia va, kipaah mahmahin Jerusalem ah akihkiitta uhi. 53 Huleh Pathian biahinn ah Pathian phat leh paahtawiin aum zingzingta uhi. Amen.
Jesu Khrist Pathian Hihna
1 Achiil in Thu aum a, Thu chu Pathian kawmah aum a, huleh Thu chu Pathian ahi. 2 Amah chu achiil in Pathian kawmah aum hi. 3 Sil zousiah Amah tungtawna siam ahi a, silsiam himhim Amah siam louh bangmah aum sih hi. 4 Amah ah hinna aum a, hu hinna chu mihingte vaahna ahi. 5 Vaah chu mial ah ahung vaah a, mial in huchu ahe sih hi.
Vaah Heetpihtu
6 Pathian apat a sawl mi khat aum a, a min chu Johan ahi. 7 Mi zousiah in amah jaala agintaat theihna diingun hu Vaah heetpih diingin amah chu heetpihtuin ahung hi. 8 Amah chu hu Vaah ahi sih a, hizongleh hu Vaah heetpihtu diinga sawl ahijaw hi. 9 Huchu Vaah dihtah, khovel a hung mi zousiah hihvaahtu ahi.
Khrist Nualna
10 Amah chu khovel ah aum a, khovel Amah siam ahi, hizongleh khovel in Amah ahe sih hi. 11 Amah chu a mite kawmah ahung a, Amah chu a mite'n anapom sih uhi.
Khrist Pomte Pathian Tate
12 Hizongleh Amah anapom photmahte chu a kawmvah Pathian tate hihtheihna diing thuneihna apia hi, Amah min gingtate chu: 13 hute chu sisan a piang ahi sih va, tahsa deihdaan a piang zong ahi sih va, mihing deihdaan a piang zong ahi het sih uh, hizongleh Pathian deihdaan a piang ahijaw uhi.
Khrist Tahsa Suaahna
14 Huleh Thu chu tahsa ahung hi a, i lahah aum hi. Pa ta khat neihsun loupi bangin, a loupi jia i mu uhi, Amah chu hehpihna leh thutah a dim ahi. 15 Johan in Amah thu heetpihin, a kikou a, "Amah ahi, 'Ka nunga hung paipa chu ka ma a um mawng ahih jiahin kei saangin adeihhuaijaw hi,' chia a thu ka soipa chu," achi hi. 16 Amah bukimna apat hehpihna tunga hehpihna i tang chiat uhi. 17 Ajiahchu daan chu Mosi zanga piaah ahi a, hizongleh hehpihna leh thutah chu Jesu Khrist jiahin ahung um hi. 18 Koima'n bangchihmahin Pathian amu ngei sih; Tapa tang neihsun. Pa aang sunga umpa in Amah chu ahilhchianta hi.
Baptistu Johan Heetpihna
19 Huleh hichu Judate'n Jerusalem apat siampu leh Levi mite, "Koi na hiai?" chia dong diinga asawl laiva Johan theihchetna ahi. 20 Huleh amah chu ki-iim louin akiphuang a, "Khrist chu ka hi sih" chiin akiphuang hi. 21 Huin amah un, "Ahihleh koi na hiai? Elijah na maw?" chiin adong uhi. Ama'n, "Ka hi sih" achi hi. "Hu Zawlneipa na hiaimah?" achi va, ama'n "Hilou" chiin adawng hi. 22 Huin amah un a kawmah, "Ahung sawlte ka dawn theihna diingun hung hilh in. Koi na hiai? Nang leh nang koi kichi na hiai?" achi uhi. 23 Ama'n, "Kei chu Zawlnei Isai in asoi banga, '"LALPA lampi sial tang un," chia gamdaai a kikou aw chu,'chia asoipa chu ka hi" achi hi. 24 Ami sawlte uh chu Pharisaite laha mi ahi uhi. 25 Huleh amah adong va, a kawmah, "Khrist lah hilou, Elijah lah hilou, hu Zawlnei lah hilou na hih leh, bang diinga na baptis ahiai?" achi uhi. 26 j0 han in amahuh adawng a, "Ke'n chu tui ah ka baptis a, hizongleh na heetlouh uh khat na lahvah ading hi. 27 Amah ahi ka nunga hung paipa, kei saanga deihhuai jawpa chu ahi a, a keengtophah khau suut taah zong ka hih sih hi," achi hi. 28 Hu silte chu Jordan gaala Bethani a, Johan in abaptisna mun a siltung ahi.
Pathian Belaamnou
29 Ajiingni'n Johan in Jesu a kawm lama hung amu a, "En un, Pathian Belaamnou khovel sualna pomangpa chu! 30 Hichu ahi, 'Ka nung ah Mi khat ahung pai a, ka ma a um mawng ahih jiahin kei saangin alianjaw hi,' chia ka na Soipa chu. 31 Ke'n Amah ka na he sih hi. Hizongleh Israelte kawma akisuhlat theihna diingin tui a baptis in ka hung ahi," achi hi. 32 Huleh Johan in a thu aheetpih a, "Hagau vakhu banga vaan apat hung kumsuh a, a tunga tuangden ka mu hi. 33 Ke'n Amah ka na he sih a, hizongleh tui a baptis diinga hung sawlpa Amah mah in ka kawmah, 'Koi tungah zong Hagau hung kumsuh a, a tunga tuangden na muh peenpeen, Amah chu Hagau Siangthou a baptis diingpa chu ahi,' ahung chi hi. 34 Huchu ka mu a, Hi Pa chu Pathian Tapa ahi chih ka heetpih hi," achi hi.
Jesu Nungjui Masate
35 A jiing kiit in Johan chu a nungjuite nih toh ading a, 36 huleh Jesu lampai lai amu a, "En un, Pathian Belaamnou!" achi hi. 37 Hu nungjui nihte'n a thusoi aja va, Jesu ajuita uhi. 38 Huin Jesu akihei a, ahung juih uh amuh in a kawmvah, "Bang ahiai na hawl uh?" achi hi. Amah un a kawmah, "Rabbi", (huchu Houtupa chihna ahi) "khoiah ahiai na teen?" achi uhi. 39 Ama'n a kawmvah, "Hung unla en un," achi hi. Huin amahuh chu ahung va, a teenna aen va, huleh a kawmah hu ni aum uhi, daah sawmna ahih jiahin. 40 Johan thusoi ja, Jesu jui tegeel laha khat chu Simon Peter sanggampa Andru ahi. 41 Ama'n amasapeenin amah ngeei sanggampa Simon amudoh a, a kawmah, "Messiah" (huchu Khrist chihna ahi) "kichipa chu ka muta uh," achi hi. 42 Huleh Andru in Simon chu Jesu kawmah ahung pui a, Jesu'n amah aen a, "Nang chu Jonah Tapa Simon na hi a, Kepha ahung kichita diing hi," achi hi (huchu Suang, chia let ahi).
Philip leh Nathanael Kouhna
43 Huleh ajiingni'n Jesu'n Galili gam ah chiah atum a, Philip amu a, a kawmah, "Hung jui in," achi hi. 44 Philip chu Andru leh Peter teenna khopi Bethsaida a teeng ahi. 45 Philip in Nathanael amu a, a kawmah, "Mosi in Daan Lehkhabu a a tungtaang anagelh leh Zawlneite Lehkhabute in anagelh uh Nazareth Jesu, Joseph tapa chu ka muta uh," achi hi. 46 Huin Nathanael in akawmah, "Nazareth apatin sil hoih apiang thei eimah?" achi hi. Philip in a kawmah, "Hung en in," achi hi. 47 Jesu'n Nathanael a kawm lam juana hung amu a, a kawmah, "En un, heembawlna neilou Israel mitah chu," achi hi. 48 Huin Nathanael in a kawmah, "Bang na hung chi heet ahiai?" achi hi. Jesu'n adawng a, a kawmah, "Philip in nang ahung kouh main, theipi kung nuaia na um laiin ka hung mu hi," achi hi. 49 Nathanael in adawng a, a kawmah, "Rabbi, Pathian Tapa na hi, Israelte Kumpipa na hi," achi hi. 50 Jesu'n adawng a, a kawmah, "'Theipi kung nuaiah ka hung mu,' na kawma ka chih jiaha gingta na hi maw? Hi silte saanga loupijaw na hung mu diing hi," achi hi. 51 Huleh Jesu'n a kawmah, "Chihtahzetin, chihtahzetin ka hung hilh ahi, tu apatin vaan kihonga Pathian angelte Mihing Tapa tunga kai leh kum na muta diing uhi," achi hi.
Kana Khua a Kiteenna
1 Huleh ni thum ni'n Galili gam a Kana ah kiteenna khat aum a, hutah ah chu Jesu nu aum hi. 2 Huleh Jesu leh a nungjuite zong kiteenna ah chial ahi uhi. 3 Huleh uain ahung kitaahsap tahun Jesu nu in a kawmah, "Uain anei nawn sih uh," achi hi. 4 Jesu'n a kawmah, "Numei, nang hung heetsah diing bang aum ei? Ka hun atung nai sih hi," achi hi. 5 A nu'n suaahte kawmah, "Ama'n na kawmva asoi photmah bawl un," achi hi. 6 Huleh Judate tawndaan dungjuia kisuhsiangthouna suangtuibeel guup, litar sawmsagih leh guup apat za leh sawmleli dawi akitung hi. 7 Jesu'n a kawmvah, "Tuibeelte ah tui sungdim un," achi hi. Huin beelngawng tan chiatin asung dim uhi. 8 Huleh Ama'n a kawmvah, "Tuin thaal unla, gualvaah vaihawmtu kawmah tawi un," achi hi. Huchiin amah un atawi uhi. 9 Gualvaah vaihawmtu'n uain hung suaah chu achepin khoi apat hung um ahih ahe sih a (ahihvaangin suaah tui thaalte'n chu ahe va), gualvaah vaihawmtu in moupa chu akou a, 10 a kawmah, "Mi chin in achiil in uain hoih asungkhia va, huleh tamdeuh ahung dawn nung chiangun ahoihloujaw atungkhia uhi. Nang in chu tutanphain uain hoih na koih nalai hi," achi hi. 11 Hi chiamchihna kipatna chu Jesu'n Galili gam a Kana a abawl ahi a, Amah loupi daan asulang hi. Huleh a nungjuite'n Amah agingta uhi. 12 Huzohin Amah chu Kapernaum ah achiahsuh a, Amah toh, a nu toh, a sanggamte toh, huleh a nungjuite toh hutah ah ni bangzah aha khat ataam uhi.
Pathian Biahinn Suhsiangthouna
13 Huleh Judate Chiahkaan Kuut ahung naita a, Jesu chu Jerusalem ah achiah tou hi. 14 Huleh Pathian biahinn a bawngtal leh belaam leh vakhu juaahte leh sumhengtute tou chu amu hi. 15 Huin jeepna khauhual abawlzohin Pathian biahinn apatin belaamte leh bawngtalte anohdoh veh a; huleh sumhengtute dangka asunbuaahsah a, a dohkaan uh asawnpuuhsah hi. 16 Huleh Ama'n vakhu juaahte kawmah, "Hi silte hitah apatin lamang un! Ka Pa inn sumdawnna inn in bawl sih un!" achi hi. 17 Huin a nungjuite'n, "Na inn a diinga ka phatuamngaihna in ahung ne zouta," chih gelh chu ahung hedoh uhi. 18 Hujiahin Judate'n adawng va a kawmah, "Hi silte bawl theihna diingin thuneihna na nei hi chih etsahna diingin chiamchihna bang ahiai na hung muhsah theih?" achi uhi. 19 Jesu'n adawng a, a kawmvah, "Hi Pathian biahinn chu susia un, ni thum sungin ka tung ding kiit diing," achi hi. 20 Hujiahin Judate'n, "Kum sawmli leh guup hi Pathian biahinn bawlna in aluut a, nang in ni thum sungin na tung ding kiit diing maw?" achi uhi. 21 Ahihvaangin Ama'n hu biahinn chu a tahsa asoina ahi. 22 Hujiahin misi lah apat Amah athoh kiit nungin, a nungjuite'n a kawmvah hi thute asoita ngeei ahi chih ahung hedohta va; huin Pathian Lehkhathu leh
Jesu thusoi agingtata uhi.
23 Hizongleh Chiahkaan Kuut Jerusalem a aum laiin chiamchihna abawlte amuh tahun, mi tampite'n a min agingta uhi. 24 Hizongleh Jesu chu a kawmvah akituluut nuam sih hi, ajiahchu Ama'n mi zousiah ahe a; 25 huleh Ama'n mihing sunga um aheet jiahin mihing thu koimah hilhchet akiphamoh sih hi.
Jesu leh Nikodem Kihoulimna
1 Pharisaite laha mi, a min Nikodem kichi, Judate vaihawmtu khat aum hi. 2 Amah chu jaan in Jesu kawmah ahung a, a kawmah, "Rabbi, Pathian apat a thuhilhtu diinga hung na hi chih ka he uhi; ajiahchu Pathian a kawma aum louh leh, na chiamchihna silmah bawlte koima'n abawl thei sih diing," achi hi. 3 Jesu'n adawng a, a kawmah, "Chihtahzetin, chihtahzetin ka hung hilh ahi, mi koipouh in apian thah louh leh, Pathian lalgam amu sih diing hi," achi hi. 4 Nikodem in a kawmah, "Mi ateeh nungin bangchiin apiang thei diai? A nu sunga luutkiitin apiang thei diing maw?" achi hi. 5 Jesu'n adawng a, "Chihtahzetin, chihtahzetin ka hung hilh ahi, mi koipouh tui leh Hagau apat apian louh leh, Pathian lalgam ah aluut sih diing hi. 6 Tahsa a piang phot chu tahsa ahi a, Hagau a piang photmah chu hagau ahi. 7 'Na pian thah ngeeingeei diing ahi,' chia na kawma ka soi limdangsa sin. 8 Huih a uutna pouh ah anung a, a gin na ja a, hizongleh khoi apat a hung a, khoilama chiah diing chih na he sih hi. Koipouh Hagau a piang phot chu huchibang ahi," achi hi. 9 Nikodem in adawng a, a kawmah, "Hi silte bangchiin ahi thei diai?" achi hi. 10 Jesu'n adawng a, a kawmah, "Israelte houtu na hi a, hi silte na he sih maw? 11 Chihtahzetin, chihtahzetin ka hung hilh ahi, kei un chu ka heet uh ka soi va, ka muh uh ka hesah uhi, hizongleh nang un ka thu heetsah uh na pom sih uhi. 12 Leitung silte ka hung hilh bawn gingta lou na hih uh leh, vaan lam silte hung hilh leng bangchiin na gingta diviai? 13 Vaan apat hung kumsuh Mihing Tapa vaan a um chihlouh kuamah vaan ah akal ngei nai sih hi. 14 Mosi in gamdaai a guul akhaikaang mahbangin Mihing Tapa zong khaikaangin aum ngeei diing hi. 15 Koipouh Amah gingta in abeimang louha kumtuang hinna aneih jawhna diingin. 16 Ajiahchu Pathian in khovel alungsiat mahmah a, huchiin a Tapa tangkhat neihsun apia, koipouh Amah gingta in abeimang louh a, hizongleh kumtuang hinna aneih jawhna diingin. 17 Ajiahchu khovel siamlouhtangsah diingin Pathian in a Tapa khovel ah asawl sih, hizongleh khovel Amah jaala hutdam ahih theihna diingin asawl jaw hi. 18 Amah gingta chu siamlouh tansahin aum sih; hizongleh agingta lou chu siamlouhtansah zoh ahita, Pathian Tapa tangkhat neihsun min agintaat louh jiahin. 19 Hichu siamlouhtanna ahi: vaah khovel ah ahung a, hizongleh a silbawlte uh agiitlouh jiahin mite'n vaah saangin mial alungsiat jaw uhi. 20 Ajiahchu koipouh sil gilou bawl in vaah ahaw veu va, huleh vaah ah zong ahung sih uh, huchilou inchu asil bawlte uh alang kha diing hi. 21 Hizongleh a silbawlte uh Pathian a bawl ahi chih alat theihna diingin, koipouh sildih bawl chu vaah ah ahung uhi," achi hi.
Johan in Jesu Aheetpihna
22 Hi silte nungin Jesu chu a nungjuite toh Judia gam ah ahung va, hutah ah amahuh toh aum zing a, abaptis hi. 23 Huleh Johan in zong tui atam jiahin Salim kawm Ainon ah abaptis hi. Huleh mipite ahung va, baptisma atang uhi. 24 Ajiahchu hulaiin Johan chu suangkul ah khum ahi nai sih hi. 25 Huin Johan nungjuite leh Judate kikaal ah kisuhsiangthouna thu ah kinialna ahung umta hi. 26 Amahuh chu Johan kawmah ahung va, a kawmah, "Rabbi, Jordan gaal a na umpih, a tanchin na heetpihpa'n, ngai in, Ama'n baptisma abawl a, mi zousiah Amah kawmah ahung uh," achi uhi. 27 Johan in adawng a, "Vaan apat a piaah ahih louh leh, mihing in bangmah anei thei sih hi. 28 'Kei Khrist chu ka hi sih a,' hizongleh 'Amah ma a sawl ka hi jaw,' ka chih khu nanguh mah in na hung heetpih uhi. 29 Mounu neipa chu moupa ahi a, hizongleh moupa lawmpa, a kawma ding a, a thu ngaikhia chu moupa aw jiahin nasatahin anuam hi. Huchiin hi ka nuamna chu abukimta hi. 30 Amah chu alian deuhdeuh diing a, kei chu ka kiamsuh diing hi. 31 Tunglam apat a hung chu sil bangkim tunga um ahi a; lei a piang chu leimi ahi a, huleh lei thu asoi veu hi. Vaan apat a hung chu sil bangkim tunga um ahi. 32 Huleh amuh leh ajaah chu Ama'n ahesah hi, huleh koimah in a thuheetsah apom sih uh. 33 Koipouh a thuheetsah pom in Pathian chu adih hi chiin anamdet hi: 34 Ajiahchu Pathian sawl in Pathian thu asoi veu hi, ajiahchu Pathian in Hagau chu teh detdetin ape sih hi. 35 pa in Tapa alungsiat a, huleh a khut ah sil zousiah apeta hi. 36 Koipouh Tapa gingta in kumtuang hinna aneita. Koipouh Tapa nuai in hinna amu sih diing a, hizongleh Pathian lungthahna a tungah aum zing hi," achi hi.
Jesu leh Samaria Numei Kihouna
4 Hujiahin Johan saangin Jesu'n nungjui asiam in abaptis tamjaw chih Pharisaite'n aja uh chih Lalpa'n aheet tahin, 2 (Ahihvaangin Jesu hiai in chu abaptis sih a, a nungjuite'n abaptis jaw uhi,) 3 Judia gam anusia a, Galili gam ah achiah kiitta hi. 4 Huchiin Samaria gam tawna pai chu Amah diingin akuul hi. 5 Huin Amah chu Samaria khopi khat, Sykar achih uh, Jakob in a tapa Joseph kawma a mun piaah kawm ahung tungta hi. 6 Hutah ah Jakob tuitohdoh aum a, Jesu chu a khualzin gim jiahin tuitohdoh geiah atou a, huchu daah guupna veel diing ahi hi. 7 Huin Samaria numei khat tuitawi diingin ahung a, Jesu'n a kawmah, "Tui dawn diing hung pia in," achi hi. 8 A nungjuite lah neeh diing leiin khopi ah achiahta ngaalva. 9 Samaria numeinu'n a kawmah, "Bangchidaana nang Judami in kei Samaria numei kawma tui dawn diing na hung nget ahiai?" achi hi. Ajiahchu Judate'n Samaria mite toh kizopna bangmah anei sih uhi. 10 Jesu'n adawng a, a kawmah, "Pathian silthawnpiaah leh na kawma, 'Tui dawn diing hung pia in,' chipa koi ahiai chih he lehchin jaw, nang in a kawma ngeen diing chin a, Ama'n nang tui hing hung pe diing hi a," achi hi. 11 Numeinu'n a kawmah, "Pu, athaaldohna diing bangma na nei sih a, tuitohdoh lah athuuh ngaala. Khoi apatin ahiai tui hing na laah diing? 12 Ka pu uh Jakob in hi tuitohdoh ahung pia a, amah ngeei in zong adawn a, a tate leh a gangualte'n zong adawn va, amah saanga lianjaw na hiaimah?" achi hi. 13 Jesu'n amahnu adawng a, "Koipouh hi tuitohdoh dawn chu adangtaah kiit diing a; 14 hizongleh ke'n a kawma ka piaah diing tui dawn photmah chu bangchihtanin adangtaah sih diing uhi. A kawmva ka piaah diing tui chu tuinaah ahung hi diing a, kumtuang hinna phain akikhohdoh diing hi," achi hi. 15 Numeinu'n a kawmah, "Pu, ka dang ataah louhna diing leh tuitawi diinga hitaha ka hung nawn louhna diingin, hi tui hung pia in," achi hi. 16 Jesu'n amahnu kawmah, "Pai inla, na pasal va kou inla, hitah ah hung kiit in," achi hi. 17 Huin amahnu'n adawng a, "Pasal ka nei sih," achi hi. Jesu'n a kawmah, "'Pasal ka nei sih,' na chih chu na chi dih mahmah hi. 18 Ajiahchu pasal ngaa na neita a, tua na neih zong na pasal ahi sih, hi thu na soi dih hi," achi hi. 19 Numeinu'n a kawmah, "Pu, zawlnei na hi chih ka hung he thei hi. 20 Ka pulepate un hi taang ah Pathian abe veu va, hizongleh nang un chu mite'n Pathian a biahna mun diing chu Jerusalem ahi na chi uh," achi hi. 21 Jesu'n a kawmah, "Numei, hung gingta in, hi taang leh Jerusalem khel lou a Pa na biah hun uh hung tung diing ahita. 22 Nang un na heetlouh uh na bia uh; kei un chu ka biah uh ka he uh, ajiahchu hutdamna Judate a hung kipan ahi. 23 Hizongleh Pa chu abe tahtahte'n hagau leh thutah a abiah diing hun chu hung tung diing ahita, tuin zong atung zing ahi; ajiahchu huchibanga Pathian bemite Pa'n ahawl ahi. 24 Pathian chu Hagau ahi a, huleh abe mite'n hagau leh thutah a abiah diing uh ahi," achi hi. 25 Numeinu'n a kawmah, "Messiah" (Khrist kichi) "ahung diing chih ka he hi. Amah ahung chiangin sil bangkim ahung hilh veh diing hi," achi hi. 26 Jesu'n a kawmah, "Kei, na kawma thusoi chu Amah ka hi," achi hi.
Nungjuite Thuhilhna
27 Huleh hulaitahin a nungjuite ahungtungva,numeinuakihoupih chu limdang asa mahmah uhi. Hizongleh koima'n, "Bang hawl na hiai?" ahihlouhleh, "Amahnu bang diinga na kihoupih ahiai?" achi sih uhi. 28 Huin numeinu'n a tuibeel ataaisan a, khopi ah achiah a mite kawmah, 29 "Ka sil bawl zousiah hung hilh thei Mi khat aum a, hung unla, hung en dihvua, Khrist hilou diing ahiaimah?" achi hi. 30 Huin amahuh chu khopi apat apawtdoh va, a kawmah ahungta uhi. 31 Huchihlaiin a nungjuite'n "Rabbi, an ne in," achi uhi. 32 Hizongleh Ama'n a kawmvah, "Nanguh heetlouh neeh diing an ka nei," achi hi. 33 Hujiahin a nungjuite akihou va, "Koiaha in aneeh diing ahung tawisah diing adiai?" achi uhi. 34 Jesu'n a kawmvah, "Ka an chu ahung sawlpa deihjawng bawl leh a nna tohzoh ahi. 35 Nang un, 'Ha li zoh chiangin buh laahhun ahung tung diing,' na chi sih viaimah? Ngai un, ka hung hilh ahi, daah unla loute en un, laahhun in amin vehta hi. 36 Koipouh ala in loh amu a, atuhpa leh alapa akipaah khawm theihna diingun, kumtuang hinna tan a um diing gah akikhol veu hi. 37 Huchiin 'Khat in atuh a, adang in ala' chih thu hitah ah adih ngeei hi. 38 Na tohgim louh uh la diingin ka hung sawl hi, midangte'n anatong va, nang un atoh uh na phattuampih uh ahi," achi hi.
Samaria Mite Ginna
39 Huleh, "Ama'n ka bawl zousiah hung hilh," chih heetpih numeinu jiahin hu khopi a Samariami tampi'n Jesu agingta uhi. 40 Huchiin Samariate chu Jesu kawm ahung tun tahun a kawmva um diingin angeen va, huleh Amah chu hutah ah ni nih anituang hi. 41 Huleh Amah thusoi jiahin midang tampi'n agintaat behlap uhi. 42 Huleh numeinu kawmah, "Tuin nang soi jiaha gingta ka hi sih uh; ajiahchu keiuh ngeei in a thu ka jaah va, huleh Hi Pa chu khovel Hundampa Khrist ahi chih ka heet uh ahi," achi uhi.
Galili a Jesu Thusoina
43 Huleh ni nih nungin hu apat in apawt a, Galili gam ah achiahta hi. 44 Ajiahchu Jesu ngeei in zawlnei a gam ah paahtawiin aum ngei sih chih ahesahta hi. 45 Huin Galili gam ahung tunin, Jerusalem a kuut manna a asilbawlte zousiah amuh jiahun Galili mite'n Amah anakipaahpih uhi; ajiahchu amahuh zong hu kuut ah avachiah uhi.
Miloupi Khat Tapa Suhdamna
46 Hujiahin Jesu chu tui uain asuaahsahna Galili gam a Kana khua ahung tung kiit hi. Huleh hutah ah miloupi khat a tapa Kapernaum khua a china aum hi. 47 Jesu Judia gam apat hung pawtin Galili gam ah ahung chih ajaah tahin, a kawmah achiah a, hung suh a, a tapa sudam diingin Amah angeen hi, ajiahchu amahpa si dehdeh a china ahi. 48 Jesu'n a kawmah, "Chiamchihna leh sil loupite na muh louh uh leh, na gingta sih diing uhi," achi hi. 49 Miloupipa'n a kawmah, "Pu, ka tapa sih main hung suh in," achi hi. 50 Huin Jesu'n a kawmah, "Chiahta in, na tapa adamta hi," achi hi. Huleh hu mipa'n Jesu'n a kawma a thusoi chu agingta a, achiahta hi. 51 Huleh apai suh laiin a suaahte 'n anakituaahpih va, "Na tapa adamta," chiin anahilh uhi. 52 Huin ama'n ahung dam pat lai hun a kawmvah adong a, amah un a kawmah, "Jaan ni, daah sagih hun in a khosih in anuseta hi," achi uhi. 53 Huchiin a pa in huchu Jesu'n a kawma, "Na tapa adamta," achih hun laitah ahi chih aheta hi. Huleh amah leh a innkuanpih teng in agingta uhi. 54 Huchu Jesu'n Judia gam apat ahung pawt a, Galili gam a ahung laia chiamchihna silmah abawl nihveina ahi.
Bethesda Diil a Mijeng Suhdamna
1 Hi nungin Judate kuut khat aum a, Jesu chu Jerusalem ah achiah tou hi. 2 Huleh Jerusalem ah Belaam Kotkhaah kawmah diil khat, Hebrai haam a Bethesda kichi inn liim ngaa nei aum hi. 3 Hutah ah damloute, mittawte, keengbaite leh jengte atam a tam aum va, tui kiloh angaah uhi. 4 Ajiahchu hun chihkhat chiangin angel khat hu diil ah achiah suh a, tui avatohliing veu hi. Koipouh tui kitohliing nung a luut masapeen peen chu bangchibang natna nei hizongleh suhdamin aum veu hi. 5 Huleh hutah ah kum sawmthum leh giat damlou mi khat aum hi. 6 Jesu'n amah lum amuh a, huleh hutobanga hun sawtpi um ahita chih aheet tahin Ama'n a kawmah, "Suhdam na uut ei?" achi hi. 7 Damloupa'n, "Pu, tui akitohliing chiangin diil a hung koih diing mi ka nei sih a, ka chiah chiangin midang in ahung makhelh veu hi," achi hi. 8 Jesu'n a kawmah, "Thou inla, na lupna la inla, keeng in paita in," achi hi. 9 Huleh thakhatin amah chu ahung damta a, a lupna ala a, apaita hi. Huleh hu ni chu Sabbath ni ahi. 10 Hujiahin Judate'n suhdama umpa kawmah, "Sabbath ni ahi a, na lupna na puaah daan hilou ahi," achi uhi. 11 Ama'n adawng a, a kawmvah, "Ahung sudampa'n ka kawmah, 'Na lupna la inla, pai in,' ahung chi hi," achi hi. 12 Huchiin amah una kawmah, "'Na lupna la inla, pai in,' hung Chipa koi ahiai?" chiin adong uhi. 13 Hizongleh suhdama umpa'n koi ahiai chih ahe sih hi, ajiahchu hu mun ah mipi tamtah aum a, Jesu lah achiahmangta hi. 14 A nunglamin Jesu'n amah chu Pathian biahinn ah amu a, a kawmah, "Ngai in, suhdamin na umta hi, sual kiit nawn sin, huchilou inchu sil hoihlou seem na tungah ahung tung kha diing hi," achi hi. 15 Huin hu mipa chu achiahta a, amah sudampa chu Jesu ahi chih Judate avahilhta hi.
Tapa Tungtawna Hinna
16 Hujiahin hi silte chu Sabbath ni a abawl jiahin Judate'n Jesu chu agawtbawl va, thah asawmta uhi. 17 Hizongleh Jesu'n amahuh adawng a, "Ka Pa in tutanin nna atong zing a, huleh ke'n zong ka tong zing," achi hi. 18 Huchiin Sabbath ni abohsiat chauh hilou a, Pathian ka Pa ahi achih a, Pathian toh kibanga akibawl jiahin Judate'n Amah chu thah atum seem uhi. 19 Huin Jesu'n adawng a, a kawmvah, "Chihtahzetin, chihtahzetin ka hung hilh ahi, Pa in abawl amuhte loungaal Tapa in Amah thuin bangmah abawl thei sih hi; ajiahchu Ama'n abawl photmah hute chu Tapa in zong abawl veu hi. 20 Ajiahchu Pa in Tapa alungsiat a, a silbawl zousiah Amah amusah veu hi; huleh thumah nasah diing uh hite saanga nna loupijaw amusah diing hi. 21 Pa in misite akaihthoh a, asuhhing mahbangin Tapa in zong auut pouhmah hinna ape thei hi. 22 Ajiahchu Pa in koima vai ahawmsah sih, hizongleh vaihawmna zousiah Tapa kawmah apekheta hi, 23 huchia Pa azahbawl bangva mi zousiah in Tapa zong azahbawl theihna diingun. Koipouh Tapa zahbawl lou in Pa, Amah sawlpa zong azahbawl lou ahi. 24 "Chihtahzetin, chihtahzetin ka hung hilh ahi, koipouh ka thu ja a, ahung sawlpa gingta in kumtuang hinna aneita; vaihawmkhumin aum sih diing a, hizongleh sihna apat hinna ah aluut jawta ahi. 25 Chihtahzetin, chihtahzetin ka hung hilh ahi, misite'n Pathian Tapa aw ajaahna diing uh hun hung tung diing ahita a, tuin zong atung zing hi, huleh aja photmah ahing diing uhi. 26 Ajiahchu Pa in Amah a hinna akineih bangin, Tapa in zong Amah a hinna akineih diingin apeta hi. 27 Huleh Mihing Tapa ahih jiahin a kawmah vaihawmna thu zong apeta hi. 28 "Hikhu thumahsa sih un, ajiahchu haan a um zousiah in a aw ajaahna diing uh him chu hung tung diing ahita a, 29 huleh haan apat ahung pawtdoh diing va, sil hoih bawlte chu athoudoh diing va, hinna anei diing uh, huleh silgilou bawlte chu siamlouhtangin athoukiit diing uhi. 30 Ke'n ka thu in bangmah ka bawl thei sih, ka jaah bangin vai ka hawm veu hi; huleh ka vaihawm chu adih hi, ajiahchu keimah deihjawng hawl louin, Pa, ahung sawlpa deihjawng ka hawl jaw hi.
Jesu Tanchin Heetpihna
31 "Ke'n keimah leh keimah tanchin kiheetpih hitaleng, ka kiheetpihna chu adih sih hi. 32 Kei hung heetpih khat aum, huleh ka tanchin Ama'n aheetpih chu adih ahi chih ka he hi. 33 Nang un Johan kawmah mi na sawl uh, ama'n thutah chu aheetpih hi. 34 Mihing thu heetsahna ka pom sih, hizongleh hutdama na um theihna diingun hi silte ka soi ahi. 35 Johan chu thaumei kuang leh taang bang ahi a, huleh nang un a vaah ah tomkhat nopsah taahdih na uut uhi. 36 Hizongleh Johan a saanga heetpihna lianjaw ka nei hi, ka Pa'n ka toh zoh diinga ahung piaah ka natohte mah in Pa in ahung sawl chih ahung heetpih hi. 37 Huleh Pa ahung sawlpa ngeei in kei ahung heetpih hi. Nang un bangchihmahin a aw na ja ngei sih va, a meel zong na mu ngei sih uhi. 38 Huleh Amah ahung sawlpa na gintaat louh jiahun a thu na lung sungvah na vom sih uhi. 39 pathian Lehkhathu na sim ngun ngeei uhi, ajiahchu hute sungah kumtuang hinna neiin na kingaihtuah uh; hute chu ka tanchin heetpihtu ahi uhi. 40 Ahiinlah hinna na neihna diingun ka kawmah na hung nuam sih uhi. 41 Mihing paahtawina ka pom sih hi. 42 Hizongleh Pathian lungsiatna nanguh ah aum sih chih ka hung he hi. 43 Ka Pa min in ka hung a, nang un na hung pom sih uh, midang khat amah mah min in kihung leh lah, na pom diing uhi. 44 Nanguh, khat leh khat kipaahtawi tuahna ngaina a, Pathian chauh apat a hung pawt paahtawina hawl loute'n bangchiin na gingta diviai? 45 "Pa kawma nanguh hung heeh diingin hung ngaihtuah sih un; nanguh hung heehtu khat aum, amah chu na muan uh Mosi ahi. 46 Ajiahchu Mosi anagingta hita uh lehchin, kei zong na hung gingta diing uhi; ajiahchu ama'n ka tanchin ahi anagelh. 47 Hizongleh amah thugelhte na gintaat louh uh leh, bangchiin kei thute na gingta diviai?" achi hi.
Mi Saang Ngaa Vaahna
1 Hi silte nungin Jesu chu Galili Diil gaal, Tiberia Diil zong kichi lamah achiahta hi. 2 Huleh natna veite tunga a silmah bawlte amuh jiahun mipi nasatah in Amah ajui uhi. 3 Jesu chu taang ah achiah tou a, hutah ah a nungjuite toh atou hi. 4 Huleh Chiahkaan Kuut, Judate kuut chu anaita hi. 5 Huin Jesu adaah a, mi tampi a kawm lam hung juan amuhin Philip kawmah, "Hite neeh diing tanghou khoia lei diing i hiai?" achi hi. 6 Hizongleh Ama'n hichu Philip etkhiahna diinga asoi ahi, ajiahchu bang ahiai abawl pah diing Ama'n akiheet hi. 7 Philip in adawng a, a kawmah, "Mi chin in themkhat chiat a atan diing uh zong dinari za nih man tanghou in adaih sih diing hi," achi hi. 8 A nungjuite laha khat, Simon Peter sanggampa Andru in a kawmah, 9 "Hitah ah barley buh tanghou pheeng ngaa leh nga nih nei naupang khat aum hi, ahihvaangin mi hizahpi lahah bangtham ahi diai?" achi hi. 10 Jesu'n, "Mipite tousah un," achi hi. Huleh hutah ah hampa tampi aum hi. Huchiin pasalte chu atouta va, atam lam uh chu saang ngaa veel ahi uhi. 11 Huin Jesu'n tanghou chu ala a, huleh avangpiaah zohin nungjuite kawmah ahawm a, nungjuite'n atoute kawmah, huchibangmahin ngate zong adeihkhop un ahawm uhi. 12 Huin akham nungun Ama'n a nungjuite kawmah, "Bangmah manglou diingin a neehvaal nengte uh luaah un," achi hi. 13 Hujiahin aluaahkhawm va, barley buh tanghou pheeng ngaa nete neehvaal a neng bawm sawmlenih aluaah dim uhi. 14 Huin Jesu chiamchihna bawl amuh tahun hu mipite'n, "Tahzetin Hi Pa chu khovel a Zawlnei hung diingpa ahi ngeei mei," achi uhi. 15 Huin mipite'n Amah chu kumpipa a bawl diinga pawngmat pah diing ahi uh chih Jesu'n aheet tahin Amah ngenin taang lamah achiahtuamta hi.
Jesu Tui tunga Paina
16 Huleh nitaah ahung hihin a nungjuite diil ah achiahsuh va, 17 kuang khat ah atuang va, Kapernaum lam juanin diil tungah achiah uhi. Huleh khua amialta a, Jesu lah a kawmvah ahung nai sih hi. 18 Huin huihpi haattahin diil chu anawh sang hulhul hi. 19 Huchiin kilometar ngaa aha guup aha ajaap nungun Jesu diil tunga pai a, kuang lam hung naih amu va, amahuh alau uhi. 20 Hizongleh Ama'n a kawmvah, "Keimah ka hi, lau sih un," achi hi. 21 Huin amah un kipaahtahin Amah chu kuang ah atuangsahta va, huleh kuang chu kintahin azot gam uh atung pahta hi.
Jesu Hinna Tanghou
22 Ajiingni in diil gaal lehlam a ding mipite'n a nungjuite tuanna loungaal kuang neu dang aum sih chih leh Jesu a nungjuite toh kuang ah achiah sih a, a nungjuite angen un achiah uh chih aheta uhi. 23 Ahihvaangin Tiberia apatin Lalpa'n avangpiaah nunga tanghou aneehna mun kawmah kuang neu dang ahung tung hi. 24 Hujiahin, mipite'n Jesu leh a nungjuite aum nawn sih uh chih ahung heet tahun amahuh zong kuang ah atuang va, Jesu hawlin Kapernaum ahung tung uhi. 25 Huleh Amah chu diil gaal lehlam a amuh tahun a kawmah, "Rabbi, bangchiha hitah tung na hiai?" achi uhi. 26 Jesu'n adawng a, a kawmvah, "Chihtahzetin, chihtahzetin ka hung hilh ahi, chiamchihnate na muh jiahva hung hawl na hi sih va, hizongleh tanghou na neeh va, na vah jiahun na hung hawl uh ahijaw hi. 27 An mangthang mei diingin tonggim sih unla, kumtuang hinna donga um zing diing an, Mihing Tapa in ahung piaah diing hawlin tonggim jaw un, ajiahchu Pa Pathian in Amah achiamchihta hi," achi hi. 28 Huin amah un a kawmah, "Pathian nna ka toh theihna diingun bang ahiai ka bawl diing uh?" achi uhi. 29 Jesu'n adawng a, a kawmvah, "Amah, ahung sawlpa na gintaat uh, hichu Pathian natohna ahi," achi hi. 30 Hujiahin amah un a kawmah, "Ahihleh ka muh va, ka hung gintaat theihna diingun bang chiamchihna na hung ensah diai? Bang na tong diai? 31 Ka pulepate un gamdaai ah manna ane uh; 'Ama'n vaan apatin neeh diing tanghou apia,' chia kigelh bangin," achi uhi. 32 Huin Jesu'n a kawmvah, "Chihtahzetin, chihtahzetin ka hung hilh ahi, vaan apat a tanghou hung petu Mosi ahi sih a, hizongleh vaan apat a tanghou hung petu chu ka Pa ahijaw hi. 33 Ajiahchu Pathian tanghou chu vaan apat hung kumsuh, khovel kawma hinna pepa chu ahi," achi hi. 34 Huin amah un a kawmah, "Lalpa, hu tanghou chu hung pe zingzing in," achi uhi. 35 Jesu'n a kawmvah, "Kei hinna tanghou chu ka hi. Koipouh ka kawma hung chu agilkial ngei sih diing a, huleh koipouh kei hung gingta chu adangtaah ngei sih diing hi. 36 Hizongleh ka hung hilh ahi, nang un na hung muh un zong na hung gingta sih uhi. 37 Ka Pa'n ahung piaah zousiah ka kawmah ahung diing a, huleh ka kawma hung photmah chu bangchi zongleh ka nohdoh het sih diing hi. 38 Ajiahchu keimah deihjawng bawl lou a, ahung sawlpa deihjawng bawl diinga vaan apat hungsuh ka hijaw hi. 39 Huleh Pa ahung sawlpa deihjawng chu: Ama'n ahung piaah zousiah khat beeh mangsah lou a, hizongleh ni tawpni chianga ka kaihthoh chu ahi. 40 Huleh hichu ahung sawlpa deihjawng ahi, koipouh Tapa mu a gingta in kumtuang hinna aneih a, huleh ke'n ni tawpni chianga ka kaihthoh diing chu ahi," achi hi.
Judate'n Jesu Vaan a Kuan Ahih Agintaatlouhna uh
41 Huin Ama'n, "Kei vaan apat hung kumsuh tanghou ka hi," achih jiahin Judate a tungah aphun uhi. 42 Huleh amah un, "Hi Pa hi Jesu, Joseph tapa, a pa leh a nu zong i heet uh hilou ahiaimah? 'Vaan apat hung kumsuh ka hi,' bangchidaana achih ahiai?" achi uhi. 43 Hujiahin Jesu'n adawng a, a kawmvah, "Phunphun sih un. 44 Pa, kei hung sawlpa'n ahiip louh leh, koimah ka kawmah ahung thei sih; huleh ke'n amah nitawp ni chiangin ka kaithou diing hi. 45 Zawlneite Lehkhabute ah, 'Pathian hilhin aum veh diing uh,' chih gelh ahi. Hujiahin mi chin Pa thu ja a, he photmah ka kawmah ahung veu hi. 46 Pathian apat a hungpa loungaal mi koimah in Pa amu ngei sih, Ama'n chu Pa amuta hi. 47 Chihtahzetin, chihtahzetin ka hung hilh ahi, koipouh kei hung gingta in kumtuang hinna aneita. 48 Kei hinna tanghou chu ka hi. 49 Na pulepate un gamdaai ah manna ane va, hizongleh asi uhi. 50 Hichu vaan apat hung kumsuh tanghou, mi'n aneeh a, asih louhna diing uh chu ahi. 51 Kei vaan apat hung kumsuh tanghou hing chu ka hi. Mi koipouh in hi tanghou aneeh inchu, kumtuangin ahing diing uh; huleh ka tanghou piaah diing chu khovel hinna diinga ka piaah ka tahsa ahi," achi hi. 52 Hujiahin Judate hah nialin akinial va, "Bangchidaana Hi Pa'n a tahsa neeh diinga pe thei diing ahiai?" achi uhi. 53 Huin Jesu'n a kawmvah, "Chihtahzetin, chihtahzetin ka hung hilh ahi, Mihing Tapa tahsa na neeh va, huleh a sisan na dawn louh uh leh, nanguh ah hinna na nei sih uhi. 54 Koipouh ka tahsa ne a, huleh ka sisan dawn in kumtuang hinna aneita a, huleh ke'n amah chu ni tawpni chiangin ka kaithou diing hi. 55 Ajiahchu ka tahsa hi an ahi tahzet a, huleh ka sisan zong dawn diing ahi tahzet hi. 56 Koipouh ka tahsa ne a, ka sisan dawn chu kei ah aum zing a, huleh kei amah ah ka um zing hi. 57 Pa hingzing in ahung sawl a, Pa jiaha ka hin bangmahin koipouh kei hung ne chu kei jiahin amah zong ahing diing hi. 58 flichu vaan apat a tanghou hing hung kumsuh chu ahi. Na pulepate un manna aneeh va asih bang uh hilouin, koipouh hi tanghou ne chu kumtuangin ahing diing hi," achi hi. 59 Hi thute Ama'n Kapernaum khua a aum laiin sinagog a athusoina a asoi ahi.
Ginglah Nungjuite
60 Hujiahin a nungjuite tampi'n hi thu ajaah tahun, "Hichu thu hahsa ahi, kuan ahiai ngai thei diing?" achi uhi. 61 Huin Jesu'n hi thu ah a nungjuite aphun uh chih a lungsim a aheetin a kawmvah, "Hi thu in nanguh ahung lunghilousah maw? 62 Mihing Tapa tuma a aumna ngei a akaltouh mu leh uh chin bang na loh diviai? 63 Suhingtu chu Hagau ahi a, tahsa chu bangmah aphatuam sih. Na kawmva ka thusoite chu hagau ahi a, hinna zong ahi. 64 Hizongleh na lahvah gingtalou khenkhat na um uh," achi hi. Ajiahchu Jesu'n atuung apat agingtaloute leh Amah mansah diingpa aheetsa ahi. 65 Huleh Ama'n, "Hujiahin ka Pa'n ahung piaah louh leh, koimah ka kawmah ahung thei sih chiin na kawmvah ka soi ahi," achi hi. 66 Hu hun apatin a nungjuite tampi anungpaita va, Amah ajui nawnta sih uhi.
Peter in Jesu Khrist Agintaat Aphuanna
67 Huin Jesu'n sawmlenihte kawmah, "Nanguh zong na paimang nuam uh maw?" achi hi. 68 Huchiin Simon Peter in adawng a, a kawmah, "Lalpa, koi kawmah ahiai ka chiah diing uh? Nang in kumtuang hinna thute na nei hi. 69 Huleh nang chu hu Pathian hing Tapa Khrist chu na hi chih ka gingta va, he zong ka he uhi," achi hi. 70 Jesu'n amahuh adawng a, "Nanguh sawmlenihte ka hung teel na hi sih viaimah? Huleh na lahva khat diabol ahi," achi hi. 71 Hizongleh Ama'n Simon tapa, Juda Iskariot thu asoi ahi. Ajiahchu amah hi sawmlenihte laha telve, Amah mansah diingpa chu ahi.
Jesu leh a Sanggamte Kihouna
1 Hi silte nungin Jesu chu Galili gam ah avaah lehleh a, Judate'n thah atup jiahun Judia gam apha nuam sih hi. 2 Huleh Judate Bawhta Kuut ahung naita hi. 3 Hujiahin a sanggamte'n a kawmah, "Na nungjuite'n na natohte amuh theihna diingun, hi apatin Judia gam ah chiahmang in. 4 Ajiahchu minthanna diing hawl mi koima'n aguuhin bangmah abawl ngei sih hi. Hi silte bawl na hih leh, khovel kawmah kimusah in," achi uhi. 5 Ajiahchu a sanggamte ngeei in zong Amah agingta sih uhi. 6 Huin Jesu'n a kawmvah, "Ka hun atung nai sih, hizongleh nanguh hun chu bangchihlaipouhin atung zing hi. 7 Khovel in nanguh ahung ho thei sih a, hizongleh kei chu ahung hua uhi, a natohte uh agilou chih ka heetsah jiahin. 8 Nanguh hi kuut ah chiahtou un, kei chu hi kuut ah ka hungtou nai sih diing hi, ajiahchu ka hun atung bukim nai sih hi," achi hi. 9 Hi thute a kawma asoi zohin Amah chu Galili gam ah aum zing nalai hi.
Gualvaahna a Jesu Thuhilhna
10 Hizongleh a sanggamte kuut mangna a achiah touh nungun Amah zong vaantaang heetlouhin, aguuhin achiah tou hi. 11 Huin Judate'n kuut mangna ah Amah ahawl va, 'Khoia um ahiai?' achi uhi. 12 Huchiin Amah tungtaang ah mipite lahah phunna nasatah aumta hi. Ajiahchu khenkhat in, "Mihoih ahi," achi va; adang in, "Adih sih, mite puikawi ahijaw," achi uhi. l3 Ahihvaangin Judate lau jiahin koima'n atung thu alangtangin asoi ngam sih uhi. 14 Huleh kuut kimang saan laitahin Jesu chu Pathian biahinn ah achiah tou a, thu ahilh hi. 15 Huleh Judate'n thumah asa va, "Hi Pa'n jil ngeiloupi-a bangchidaana lehkha he ahiai?" achi uhi. 16 Huin Jesu'n amahuh adawng a, "Ka thuhilh chu keimah a hung kuan ahi sih a, ahung sawlpa a hung kuan ahijaw hi. 17 Mi koipouh in Amah deihjawng abawl uut inchu, thuhilhna chu Pathian apat ahiai, ahihlouhleh keimah phuaahthuh ka soi ahiai chih ahe diing uhi. 18 Koipouh amah phuaahthuh thusoi chu amah kipaahtawina diing deih ahi, hizongleh a sawlpa paahtawi diing deih chu, Amah ngeei chu midih ahi a, huleh Amah ah dihtatlouhna aum sih hi. 19 Mosi in nanguh daan thu ahung pe sih eimah? Hizongleh na lahva koima'n daan thu na jui sih uhi. Bang diinga thah hung tum na hi viai?" achi hi. 20 Mipite'n adawng va, "Dawipaai na hi ve, koi in ahiai nang thah hung tum?" achi uhi. 21 Jesu'n adawng a, a kawmvah, "Nna khat ka tong a, na bawnun thumah na sa uhi. 22 Huchiin Mosi in zehtan thu nanguh ahung pia a (zehtan thu Mosi jiaha piaah ahi sih a, pulepate a hung kipan ahijaw hi), huleh Sabbath ni in mi zeh na tan uhi. 23 Mosi daan thu botse loua Sabbath ni a mi'n zeh atan theih leh, keima'n Sabbath ni a mi khat ka damsiangsah jiaha bang diinga ka tunga lungthah na hi viai? 24 Alatdaan bangin thu khen sih unla, dihtattahin khen jaw un," achi hi.
Jesu Messiah Hihna
25 Hujiahin Jerusalem apat mi khenkhat in, "Hi Pa hi thah atup pa uh hilou ahiaimah? 26 Endih vua, hangtahin thu asoi a, amah un lah a kawmah bangmah asoi sih uh. Amah hi Khrist chu ahi chih vaihawmtute'n ahe tahtah uh adiai? 27 Hizongleh enlah hi Pa khoia hung kipan ahiai chih i he ngaala, hizongleh Khrist ahung chiangin koima'n khoi apat ahih ahe sih diing hi," achi uhi. 28 Huin Jesu chu Pathian biahinn ah thuhilhin akikou a, "Nang un kei na hung he va, huleh khoia hung kipan ka hiai chih zong na hung he uhi. Keimah thu a hung ka hi sih a, hizongleh kei hung sawlpa chu adih ahi, nang un Amah na he sih uhi. 29 Hizongleh ke'n Amah ka he hi, ajiahchu Amah apat a hung ka hi a, Amah hung sawl ka hi," achi hi. 30 Hujiahin Amah mat atum va, hizongleh ahun atun nailouh jiahin koima'n a tungah khut aha sih uhi. 31 Huleh mipi tamtahin Amah agingta va, "Khrist ahung chiangin Hi Pa bawl saanga tamjaw chiamchihna abawl diai?" achi uhi.
Houtute'n Jesu Mat Atup uh
32 pharisaite'n atung thu ah mipite hutobanga aphun uh aja va, huleh Pharisaite leh siampu lalte'n Amah man diingin houtute asawl uhi. 33 Huin Jesu'n a kawmvah, "Tomchakhat na kawmvah ka um diing ay huzohchian ahung sawlpa kawmah ka chiah diing hi. 34 Nang un na hung hawl diing va, na hung mu sih diing uh, huleh ka umna ah na hung thei sih diing uh," achi hi. 35 Hujiahin Judate amahuh kihouin, "I muh louh diinga khoia chiah diing ade aw? Grikte laha kithehdalhte kawma chiaha Grikte thu vahilh diing ahiai? 36 'Na hung hawl diing va, na hung mu sih diing uh, huleh ka umna ah na hung thei sih diing uh,' chih thu hi bang achihna ahiai?" achi uhi.
Tuihing Luui
37 Huleh kuut ni loupi, ni nunungpeen ah Jesu chu ading a, akikou a, "Koipouh adang ataah leh, ka kawmah hung henla, dawn heh. 38 Koipouh kei hung gingta chu Pathian Lehkhathu in asoi bangin a sung apatin tuihing luuite aluangdoh diing," achi hi. 39 Hizongleh hichu Ama'n Amah gingtate'n amuh diing uh Hagau asoina ahi, ajiahchu Hagau Siangthou piaah ahi nai sih hi, Jesu paahtawia aum nai louh jiahin.
Mipi Lah a Kilangkhenna
40 Hujiahin mipi tamtahte'n hi thu ajaah tahun, "Tahzetin Hi Pa Zawlnei ahi," achi uhi. 41 Adangte'n, "Khrist ahi," achi uhi. Hizongleh khenkhatte'n, "Khrist chu Galili gam ah ahung piang diaimah? 42 Pathian Lehkhathu in, Khrist chu David chihaahte laha leh David teenna khua Bethlehem ah ahung piangdoh diing, achi sih eimah?" achi uhi. 43 Huchiin Amah jiahin mite lahah kikhenna aumta hi. 44 Huleh a lahva khenkhat in Amah mat atum va, hizongleh koima'n a tungah khut aha sih uhi.
Thuneitute Laha Ginlahna
45 Huin houtute chu siampu lalte leh Pharisaite kawmah ahung va, amah un houtute kawmah, "Bang diinga Amah hung puilou?" anachi uhi. 46 Houtute'n adawng va, "Hi Pa thusoi bangin koima'n thu asoi ngei himhim sih," achi uhi. 47 Huin Pharisaite'n adawng va, "Nanguh zong puimanga um na hita uh maw? 48 Vaihawmtute leh Pharisaite lahah Amah gingta mi aumkhata eimah? 49 Hizongleh daan thu helou hi mipite chu haamsethuaah ahi uh," achi uhi. 50 Nikodem, jaan a Jesu kawma hung, a lahva telpa'n a kawmvah, 51 "I daan thu un mi amah kam a thu jaah ahih ma leh a silbawlte heet main siamlouh atangsah ngei eimah?" achi hi. 52 Amah un adawng va, a kawmah, "Nang zong Galili mi na hi maw? Hawl inla, kan in, ajiahchu Galili gam ah zawlnei himhim apiang ngei sih hi," achi uhi. 53 Huin mi chin a inn chiat vah achiahta uhi.
Numei Aangkawm LaiAmatna Uh
1 Hizongleh Jesu chu Olive Taang ah achiahta hi. 2 Huleh jiingkaal matahin Pathian biahinn ah ahung kiit a, mi zousiah a kawmah ahung va; huin Ama'n touin amahuh thu ahilh hi. 3 Huleh daanjilsahtute leh Pharisaite'n numei khat, a-aangkawm laia amat uh a kawmah ahung pui va, a laiva adinsah zohun, 4 a kawmah, "Houtupa, hi numei hi a-aangkawm laitaha kiman ahi. 5 Daan Lehkhabu ah Mosi in hitobang mi chu suang a sehlup diing thu ahung pia hi. Hizongleh nang bang na chi ngaih ei?" achi uhi. 6 Hichu Amah heehna diing amuh theihna diingva aje-etna va asoi uh ahi. Hizongleh Jesu chu akuun a, a khut zung in lei agial hi. 7 Huchia adoh mun jiahun ahung dingtang a, a kawmvah, "Na lahva sualna nei het loupeen in amahnu chu suang in sep masa heh," achi hi. 8 Huin akuun kiit a, lei agial jeel hi. 9 Hizongleh amah un hi thu ajaah tahun a sialepha heetna un siamlouhtangsahin, a upapeen apat atawptanin khat khat in achiahmangta va, Jesu chauh leh a laia ding hu numeinu aum hi. 10 Huin Jesu ading a, numeinu chihlouh midang amuh louh tahin a kawmah, "Numei, nang hung heehte khoia um ahita viai? Koima'n siamlouh ahung tangsah sih maw?" achi hi. 11 Amahnu'n, "Koima'n hung tangsah lou, Lalpa," achi hi. Huin Jesu'n a kawmah, "Ke'n zong siamlouh ka hung tangsah sih hi, chiah inla sual kiit nawn sin," achi hi.
Jesu Khovel Vaah Ahihdaan
12 Huin Jesu'n a kawmvah, "Kei khovel vaah ka hi, koipouh kei hung jui chu mial ah akhohei sih diing a, hizongleh hinna vaah anei jaw diing hi," achi hi. 13 Hujiahin Pharisaite'n a kawmah, "Nangma'n nangmah tanchin na kisoi a, na thusoi adih sih," achi uhi. 14 Jesu'n adawng a, a kawmvah, "Keimah in keimah tanchin soi hitaleng, ka heetpihna chu adih hi, ajiahchu khoi apat hung ka hih leh, khoia chiah diing ka hih ka he hi; hizongleh nang un khoi apat hung ka hih leh khoia chiah diing ka hih na he sih uhi. 15 Nang un tahsa daan in vai na hawm uh, ke'n koima vai ka hawmsah sih. 16 Huleh vaihawmsah hita zongleng, ka vaihawm chu adih hi; ajiahchu kei ngen ka hi sih a, kei leh kei hung sawlpa ka Pa toh ka hijaw uhi. 17 Na daan vah zong mi nih thuheetpih chu adih ahi chih gelh ahi. 18 Kei chu keimah leh keimah thuheetpih ka hi a, huleh Pa ahung sawlpa'n ka thu ahung heetpih hi," achi hi. 19 Huin amah un a kawmah, "Na pa khoiah aum ei?" achi uhi. Jesu'n adawng a, "Nang un kei lah na hung he sih va, ka Pa zong na he sih uhi. Kei hung he hileh uh chin, ka Pa zong na he diing uh," achi hi. 20 Hi thute Jesu'n Pathian biahinn a thu ahilh laiin sumkoihna mun ah asoi a, huleh a hun atun nailouh jiahin koima'n a tungah khut aha sih hi. Jesu 'n Asih Diing Asoilawhna 21 Huin Jesu'n a kawmvah, "Ka chiahmang diing a, nang un na hung hawl diing va, na sualna vah na si diing uhi. Ka chiahna ah na hung thei sih diing uh," achi hi. 22 Hujiahin Judate'n, "Ama'n, 'Ka chiahna diing ah na hung thei sih diing uh,' achih jiahin Amah leh Amah akithat diing adiai?" achi uhi. 23 Huleh Ama'n a kawmvah, "Nanguh chu nuailam akipan na hi va, kei chu tunglam akipan ka hi. Nanguh hi khovel a na hi va, kei chu hi khovel a ka hi sih. 24 Hujiahin na sualna vah na si diing uh chih na kawmvah ka soi ahi; ajiahchu kei Amah ka hi chih na gintaat louh uh leh, na sualna vah na si diing uh," achi hi. 25 Huin amah un a kawmah, "Nang koi na hiai?" achi uhi. Jesu'n a kawmvah, "Achiil apat a na kawmva ka soi khu mah ka hi. 26 Na tungthu vah soi diing leh vaihawmsah diing tampi ka nei hi, hizongleh ahung sawlpa chu adih hi; huleh Amah apat ka jaahte chu khovel kawmah ka soi veu hi," achi hi. 27 Ama'n Pa tungtaang a kawmvah asoi ahi chih amah un ahe sih uhi. 28 Huin Jesu'n a kawmvah, "Mihing Tapa na khaikaang zoh chiangun Amah ka hi chih leh keimah thuin bangmah ka bawl sih a, hizongleh ka Pa'n ahung hilh bangin hi thute ka soi jaw ahi, chih na he diing uh. 29 Amah ahung sawlpa ka kawmah aum hi. Pa in ka ngenin ahung nuse sih, ajiahchu akipaah jawng silte ka bawl zing hi," achi hi. 30 Hi thute asoi laiin mi tampi'n Amah agingta uhi.
Thutah in Asuaahtaatsahna
31 Huin Jesu'n amah gingta Judate kawmah, "Ka thu a na um zing uh leh, ka nungjuite na hi tahzet diing uhi. 32 Huleh thutah na he diing va, thutah in nanguh ahung jaleensah diing hi," achi hi. 33 Amah un, "Abraham chihaahte ka hi va, bangchihmahin koima salin ka taang ngei sih uh. Bangchidaana, 'Na jaleen diing uh,' na chih ahiai?" chiin adawng uhi. 34 Jesu'n amahuh adawng a, "Chihtahzetin, chihtahzetin ka hung hilh ahi, koipouh sual bawl chu sual suaah ahi. 35 Suaah chu kumtuangin inn ah aum zing sih, hizongleh Tapa chu kumtuangin aum zing hi. 36 Hujiahin Tapa in ahung jaleensah inchu, na jaleen tahzet diing uhi. 37 Abraham chihaahte na hi uh chih ka hung he hi, hizongleh ka thu nanguh a aum louh jiahin, nang un kei thah diing na hung tum uhi. 38 Ke'n ka Pa kawma ka muhte ka soi a, nang un zong na pa kawmva na muhte uh na bawl uh," achi hi.
Abraham Tate leh Diabol Tate
39 Amah un adawng va, a kawmah, "Abraham chu ka pa uh ahi," achi uhi. Jesu'n a kawmvah asoi a, "Abraham tate hita leh uh chin, Abraham natohte na tong diing uhi. 40 Hizongleh tuin kei, Pathian kawma ka jaah thutah na kawmva hung Hilhpa, thah na hung tum va, Abraham in hitobangin anabawl sih hi. 41 Nang un chu na pa uh silbawlte na bawl uhi," achi hi. Huin amah un a kawmah, "Kingaihna thaanghuai apat piang ka hi sih uh, Pa khat ka nei uh, Amah chu Pathian ahi," achi uhi. 42 Jesu'n a kawmvah, "Pathian na Pa uh hitaleh chu keimah na hung lungsiat diing uhi, ajiahchu Pathian apat a hung pawt ka hi a, keimah thuin ka hung sih a, Ama'n ahung sawl jawh ahi. 43 Bangchidaana ka soi hesiam lou na hi viai? Ka thu na jaah theih louh jiahun ahi. 44 Nanguh chu na pa uh diabol apat hung na hi va, huleh na pa uh deihjawng sual na bawl uut uhi. Amah chu achiil apat tualthattu ahi a, amah ah thutah aum louh jiahin thutah ah aum sih hi. Juau asoiin zong amah hihna ngeei apat asoi ahi, ajiahchu amah mijuau ahi a, huleh juauna pa zong ahi. 45 Thutah ka soi jiahin nang un na hung gingta sih uhi. 46 Na lahva kua na hi viai sual thu a siamlouh hung tangsah? Thutah ka soi leh bang diinga hung gingtalou na hi viai? 47 Mi, Pathian a in chu Pathian thu angaikhe veu a, Pathian a na hihlouh jiahun nang un chu na ngaikhe sih uhi," achi hi.
Jesu'n Amah Tungtaang Asoichianna
48 Hujiahin Judate'n adawng va, a kawmah, "Samariami na hi a, huleh dawipaai na hi ka hung chih uh chu ka chi dih mahmah sih viaimah?" achi uhi. 49 Jesu'n adawng a, "Dawipaai ka hi sih a, hizongleh ka Pa ka paahtawi a, huleh nang un kei na hung paahtawi sih uhi. 50 Keimah loupina diing ka hawl sih, hukhu hawl leh vaihawmtu khat aum hi. 51 Chihtahzetin, chihtahzetin ka hung hilh ahi, mi koipouh in ka thu azop leh kumtuangin sihna amu ngei himhim sih diing," achi hi. 52 HujiahinJudate'nakawmah, "Tuin chu dawipaai na hi chih ka hung heta uh, Abraham a sita a, huleh zawlneite zong a sita uh, hizongleh nang in, 'Mi koipouh in ka thu azop leh, sihna achiam ngei himhim sih diing,' na chi hi. 53 Asita ka pu uh Abraham saanga loupijaw na hiai? Huleh zawlneite lah asita va, nang banga kingai na hiaimah?" achi uhi. 54 Jesu'n adawng a, "Kei leh kei kipaahtawi hitaleng, ka kipaahtawina bangmah ahi sih diing, ahung paahtawi chu ka Pa, nang un ka Pathian uh ahi, na chih uh khu ahi. 55 Hizongleh nang un Amah na he sih uh, ke'n chu Amah ka he hi. Huleh 'Amah ka he sih chita leng,' nanguh banga mijuau ka hita diing hi; hizongleh Amah ka he a huleh a thu zong ka zop hi. 56 Na pu uh Abraham in ka ni amuh diing chu anuam mahmah a, huleh amu ngeei a, akipaah mahmah hi," achi hi. 57 Huin Judate'n a kawmah, "Nang kum sawmngaa zong ching nailou chin a, Abraham na mu kha maw?" achi uhi. 58 Jesu'n a kawmvah, "Chihtahzetin, chihtahzetin ka hung hilh ahi, Abraham um ma a um KA HI," achi hi. 59 Hujiahin amah un asehna diingin suang ala va, hizongleh Jesu chu akiphual a, Pathian biahinn apat apawt a, a lahva paisuaahin achiahta hi.
Mittaw Khat Suhdamna
1 Huleh Jesu'n apai kawmin a pian apat mittaw khat amu hi. 2 A nungjuite'n a kawmah, "Rabbi, hi pa mittaw a apian, kuan ahiai sil sual bawl, hi pa'n ahiai, ahihlouhleh a nulepa in?" chiin adong uhi. 3 Jesu'n adawng a, "Hi pa lah asual sih a, a nulepa lah asual sih uh, hizongleh Pathian natohte amah a akilat theihna diingin ahijaw hi. 4 Suun ahihlaiin ahung sawlpa nna ka toh ngeeingeei diing ahi. Jaan hung tung diing ahita, hu hun chiangin koima'n nna atong thei sih diing uh. 5 Khovel a ka um sung teng khovel vaah ka hi," achi hi. 6 Huchia asoi zohin Ama'n lei ah a chil asiat a, hu chil in tungman abawl a, huleh hu tungman chu mittawpa mit ah anuh a, 7 huleh a kawmah, "Chiah inla, Siloam diil ah vasil in," achi hi (Siloam chu Sawl chihna ahi). Huchiin achiah a, asil a, huleh mutheiin ahung kiit hi. 8 Hujiahin a innveengte leh ma a mittaw ahih lai musate'n, "Hi pa hi khutdoha tou veupa hilou ahiaimah?" achi uhi. 9 Khenkhatte'n, "Amah ahi," achi uhi. Adangte'n, "Akibatpih ahi," achi uhi. Hizongleh ama'n, "Amah chu ka hi," achi hi. 10 Hujiahin amah un a kawmah, "Bangchiin ahiai na mit ahung vaah?" achi uhi. 11 Ama'n adawng a, "Jesu kichi Mi khat in tungman abawl a, ka mit ahung nuhsah a, huleh ka kawmah, 'Siloam diil ah chiah inla vasil in,' ahung chi hi. Huchiin ka chiah a, ka sil a, ka mutheita hi," achi hi. 12 Huin amah un a kawmah, "Amah khoiah aum ei?" achi uhi. Ama'n, "Kahe sih," achi hi.
Pharisaite'n Suhdam Thu Asuina Uh
13 Huleh a ma a mittawpa chu Pharisaite kawmah ahung pui uhi. 14 Jesu'n tungman bawl a, a mit asuhvaah ni chu Sabbath ni ahi a, 15 Pharisaite'n zong a mit hung vaah daan a kawmah adong kiit uhi. Ama'n a kawmvah, "Ka mit ah tungman anuh a, ka vasil a, ka muta hi," achi hi. 16 Hujiahin Pharisaite khenkhat in, "Hi Pa Pathian apat ahi sih, ajiahchu Sabbath ni atang sih hi," achi uhi. Adangte'n, "Bangchiin misual in hitobangin chiamchihna abawl thei diai?" achi uhi. Huin a lahvah kikhenna aumta hi. 17 Huin amah un mittawpa kawmah, "Na mit ahung suhvaahsah jiahin Amah tungtaang nang bang na chi ngaihtuah ei?" achi kiit uhi. Ama'n, "Zawlnei ahi," achi hi. 18 Hujiahin Judate'n a mit hung vaahpa nulepa akouh masiah uh, mittaw anahi a, ahung vaahta ahi chih a tungtaang thu agingta sih uhi. 19 Huleh amah un a nulepa kawmah adong va, "Hi, na tapa uh ahi maw, mittawa piang na chihpa uh? Bang chiin ahiai tua ahung muh theih taah?" achi uhi. 20 A nulepate'n amahuh adawng va, "Hi ka tapa uh ahi a, huleh mittawin apiang chih ka he uh. 21 Hizongleh bangchidaana tua ahung muhtheih taah ka he sih uh, huleh koi in a mit asuhvaahsah zong ka he sih uh. Mipiching ahi a, amah dong un, amah tungtaang ama'n akisoi mei diing," achi uhi. 22 A nulepate'n Judate alau jiahun hi thute asoi uhi; ajiahchu Judate'n Amah chu Khrist ahi chia phuang aum leh, sinagog apat nohdoh diing chia thu analemsah uh ahita hi. 23 Hujiahin ahi a nulepate'n, "Mipiching ahi a, amah dong un," achih uh. 24 Huin amah un mittawpa chu akou kiit va, a kawmah, "Pathian loupina pia in! Hi Pa jaw misual ahi chih ka he uh," achi uhi. 25 Hujiahin ama'n adawng a, "Amah misual ahihleh hihlouh ka he sih, sil khat ka he hi, mittaw anahi hizongleng, tuin ka mu theita hi," achi hi. 26 Huin amah un a kawmah, "Ama'n na tungah bang ahiai abawl? Na mit bang ahung chi suhvaahsah ei?" achi kiit uhi. 27 Ama'n, "Ka hung hilhta a, hizongleh na ja uut sih uh, bang diinga ja uut kiit na hi viai? Nanguh zong a nungjui hih na uut uh maw?" chiin adawng hi. 28 Hujiahin amah hahtaaiin ataai va, "Nang Amah nungjui na hi a, keiuh chu Mosi nungjuite ka hi uh. 29 pathian in Mosi kawmah thu asoi chih ka he uh, hizongleh Hi Pa ahihleh khoi apat a hung ahih ka he sih uh," achi uhi. 30 Amahpa'n adawng a, a kawmvah, "Khoi apat a hung ahih na heetlouh uh, hikhu mah ahi athumahna, Ama'n lah ka mit ahung suhvaahsah ngaala, 31 Pathian in misualte thu angaikhe ngei sih chih i he uhi. Hizongleh mi koipouh Pathian bia a, a deihjawng bawl chu Pathian in angaikhe veu hi. 32 Khovel um tuung akipan koima'n mittawa piang a mit asuhvaahsah chih akijangei sih. 33 HiPa Pathian apat ahihlouh inchu, bangmah abawl thei sih diing," achi hi. 34 Amah un adawng va, a kawmah, "Nang sual lumlet a piang in keiuh na hung hilh vial maw?" achi uhi. Huin amah chu anohdohta uhi.
Hagaulam a Mittaw
35 Amah anohdoh uh chih Jesu'n aja a, huleh amah amuhin a kawmah, "Pathian Tapa na gingta ei?" achi hi. 36 Ama'n adawng a, a kawmah, "Ka gintaat theihna diingin, Lalpa, Amah koi ahiai?" achi hi. 37 Jesu'n a kawmah, "Amah na muta a, nang hung houpihpa ahi," achi hi. 38 Huin ama'n, "Lalpa, ka gingta hi," achi a, huin bohkhupin Amah abeta hi. 39 Huleh Jesu'n, "Muthei loute'n ahung muh theihna diing uh leh mitvaahte mit ahung tawt theihna diingin vaihawm diingin khovel ah ka hung ahi," achi hi. 40 A kawma um Pharisai khenkhatte'n hi thute ajaah tahun a kawmah, "Keiuh zong mittaw ka hi viaimah?" achi uhi. 41 Jesu'n a kawmvah, "Mittaw hileh uh chin sualna neilou diing hi uh chin a; hizongleh tuin, 'Ka mu thei uh,' na chi uhi. Hujiahin na sualna uh aum zing hi.
Jesu Belaampu Hoih Hihna
1 "Chihtahzetin, chihtahzetin ka hung hilh ahi, koipouh kotkhaah a luut loua lam tuama kai a, belaam huang a luut chu guta leh suammang ahi. 2 Hizongleh koipouh kotkhaah a luut chu belaampu ahi. 3 Amah chu kotkhaah ngaahpa'n ana-honsah a, belaamte'n a aw aja uhi. Huleh ama'n belaamte chu a min un akou a, apuidoh veu hi. 4 Huleh a belaamte apawtdohsah chiangin a ma vah apai a, a aw aheet jiahun belaamte'n a nung ajui uhi. 5 Midang chu ajui sih diing va, ataaimangsan jaw diing uhi, ajiahchu midang aw ahe thei sih uhi," achi hi. 6 Hi tehkhinthu Jesu'n a kawmvah asoi a, hizongleh amah un a kawmva bang thu ahiai asoi chih ahe sih uhi. 7 Hujiahin Jesu'n a kawmvah, "Chihtahzetin, chihtahzetin ka hung hilh ahi, kei belaam kotkhaah chu ka hi. 8 Ka ma a hung pai zousiah chu gutate leh suammangte ahi uh, hizongleh belaamte'n a thu uh angai sih uhi. 9 Kei kotkhaah chu ka hi, koipouh keimah a aluut leh, hutdamin aum diing a, huleh luutin apawt diing a, neeh diing amu diing hi. 10 Guta chu gu diing leh that diing leh suse diing loungaalin ahung sih. Kei chu amah un hinna a neihna diing uh leh tamtah aneihna diingva hung ka hi. 11 "Kei belaampu hoih chu ka hi, belaampu hoih in a belaamte diingin a hinna apia hi. 12 Hizongleh kiloh, belaampu hilou, belaam neitu hilou in chu ngei hung amuh chiangin belaamte anusia a, ataai veu hi; huleh ngei in amahuh aman a asudalh veu hi. 13 Kiloh chu ataai veu hi kiloh ahih jiahin, huleh belaamte angaihsah sih hi. 14 "Kei belaampu hoih chu ka hi, huleh ka belaamte ka he a, amah un zong kei ahung he uhi. 15 Pa'n kei ahung heet bangin ke'n zong Pa ka he hi; huleh belaamte diingin ka hinna ka pia hi. 16 Huleh hi belaam huang a lou belaam dang ka nei hi; amahuh zong ka hung pui diing a, ka aw aja diing va, huleh belaampu khat toh hon khat ahung hi diing uhi. 17 Hujiahin ka Pa'n ahung lungsiat hi, laah kiit diinga ka hinna ka piaah jiahin. 18 Koima'n ahung laahsah ahi sih a, ka thuin ka pia ahijaw hi. Piaah theihna leh laah kiit theihna thu ka nei hi. Hi thupiaah ka Pa apat ka muta hi," achi hi. 19 Hujiahin hi thute jiahin Judate lahah kikhenna aum kiitta hi. 20 Hizongleh a lahva tampi'n, "Dawipaai ahi, angol ahi, bang diinga Amah thu ngaikhia na hi viai?" achi uhi. 21 Adangte'n, "Hi thu kisoite dawipaai mi thusoi ahi sih, dawi in mittaw mit asuvaah thei eimah?" achi uhi.
Belaampu in a Belaamte Ahe
22 Huleh Jerusalem a Latna Kuut lai ahi a, phalbi lai ahi. 23 Jesu chu Pathian biahinn ah Solomon Innliim ah avaah lehleh hi. 24 Hujiahin Judate Amah kiimveel ah ahung va, a kawmah, "Bangtan ahiai lungawpkaia na hung koih diing? Khrist na hih leh, chiangtahin hung hilh in," achi uhi. 25 Jesu'n amahuh adawng a, "Ka hung hilhta a, na gingta sih uh. Ka Pa min a ka natohte'n ka tanchin ahung heetpih uhi. 26 Hizongleh na kawmva ka soitaah bangmahin ka belaamte na hihlouh jiahun na gingta sih uhi. 27 Ka belaamte'n ka aw aja uh, ke'n amahuh ka he a, amah un ahung jui uhi. 28 Huleh keima'n a kawmvah kumtuang hinna ka pia hi, kumtuangin amangthaai sih diing va, koima'n ka khut apat ahung laahsah thei sih diing hi. 29 Ka Pa, amahuh kei hung pepa mi zousiah saangin alianjaw hi. Koima'n ka Pa khut apat ahung laahsah thei sih diing hi. 30 Kei leh Pa chu khat ka hi uh," achi hi. 31 Huin Judate'n a sehna diingun suang ala kiit uhi. 32 Jesu'n amahuh adawng a, "Nna hoih tampi ka Pa akipanin nanguh ka hung musah a, hu natohte laha khoipeen jiahin ahiai suang a na hung seh tum uh?" achi hi. 33 Judate'n adawng va, "Natoh hoih jiahin suang in seh ka hung tum uh ahi sih, hizongleh Pathian na soisiat jiah leh nang Mihing hi ngaala, Pathian banga na kibawl jiahin ahijaw," achi uhi. 34 Jesu'n amahuh adawng a, "Na daan vah, "pathiante na hi uh," ka chi,' chih gelh hilou ahiaimah? 35 pathian thu tunnate bawn pathiante chih ahihleh (Pathian Lehkhathu koima'n asuse thei sih diing hi), 36 'Pathian Tapa ka hi' ka chih jiahin Pa in asuhsiang a khovel a asawlpa tungah, 'Pathian na soisia' na hung chi uh ahi maw? 37 Ka Pa natohte ka toh louh leh, hung gingta sih un. 38 Hizongleh ka toh a ahihleh, kei hung gingta sih mahzongleh uh chin, natohte gingta un, Pa keimah ah aum a, kei Amah ah ka um chih na heet va, na gintaat theihna diingun," achi hi. 39 Hujiahin Amah mat atum kiit va, hizongleh a khut vapat akiheem khia hi. 40 Huin Johan in achiil a baptis abawlna mun, Jordan gaal ah achiah kiit a, hutah ah ava-umta hi. 41 Huleh mi tampi a kawmah ahung va, "Johan in chiamchihna bangmah bawl anei sih a, hizongleh hi Pa tungtaanga Johan in asoi zousiah adih veh hi," achi uhi. 42 Huleh hutah ah mi tampite'n Amah agingta uhi.
Lazar Sihna
1 Huleh Mari leh a sanggamnu Martha teenna Bethani khua a mi khat Lazar kichi chu achina hi. 2 Hu Mari chu Lalpa thau namtuui nuh a, a sam a a keeng siahsahnu ahi a, a sanggampa Lazar chu achina hi. 3 Hujiahin a sanggamnute'n Jesu kawmah, "Lalpa, ngai in, na lungsiatpa achina hi," chiin mi asawl uhi. 4 Jesu'n hu thu ajaahin, "Hi natna chu sihna diing hiai ahi sih a, hizongleh hi jiaha Pathian Tapa paahtawia aum theihna diinga Pathian loupina diing ahijaw hi," achi hi. 5 Jesu'n Martha leh a sanggamnu leh Lazar alungsiat hi. 6 Huchiin Lazar achina chih ajaahin aumna mun mah ah ni nih aum nalai hi. 7 Huzohin Ama'n nungjuite kawmah, "Judia gam ah i chiah kiit diing uh," achi hi. 8 Nungjuite'n a kawmah, "Rabbi, tuma deuh mahin Judate'n suang in seh ahung tum va, hutah ah chiah na sawm kiit maw?" achi uhi. 9 Jesu'n adawng a, "Suun khat sungin daahkaal sawmlenih aum sih eimah? Mi koi zong suun a apai inchu, hi khovel vaah amuh jiahin akisui ngei sih hi. 10 Hizongleh amah a vaah aum louh jiahin, mi koi zong jaan a apai inchu, akisui veu hi," achi hi. 11 Hi thute asoi zohin a kawmvah, "I lawmpa uh Lazar a-ihmuta a, hizongleh a ihmutna apat phawng diingin ka chiah diing," achi hi. 12 Huin a nungjuite'n, "Lalpa, ihmu ahih inchu, adamkiit na diing hi," achi uhi. 13 Ahiinlah Jesu'n Lazar sih thu asoi ahi a, hizongleh amah un ihmu a khawldam thu soi hiin angaihtuah uhi. 14 Hujiahin Jesu'n chiantahin a kawmvah, "Lazar asita hi. 15 Huleh na gintaat theihna diingun, nanguh vaanga hutah a ka um louh ka kipaah hi. Hizongleh a kawmah i chiah diing uh," achi hi. 16 Huin Thomas Diduma kichipa'n a nungjui hihpihte kawmah, "Amah toh i sih khawm theihna diingin eiuh zong i chiah diing uh," achi hi.
Jesu Hinna leh Thohkiitna Ahi
17 Huin Jesu ahung tunin Lazar chu haan ah ni li ana-umta chih ahung he hi. 18 Bethani chu Jerusalem kho kawm naih, kilometar thum veela gamla ahi. 19 Huleh Martha leh Mari chu a sanggampa uh sihna tunga hehneem diingin Judate tampi a kawmvah ahung uhi. 20 Hujiahin Jesu ahung chih ajaah tahin Martha chu achiah a, Amah avalamtuaah a, hizongleh Mari chu inn sungah atou nalai hi. 21 Huin Martha in Jesu kawmah, "Lalpa, hitaha um hilehchin chu, ka sanggampa si lou diing hi a, 22 hizongleh tuin zong Pathian kawma na nget photmah Pathian in ahung pe diing chih ka he hi," achi hi. 23 Jesu'n amahnu kawmah, "Na sanggampa athou kiit diing hi," achi hi. 24 Martha in a kawmah, "Ni tawpni a thohkiitna ah athou kiit diing chih chu ka he hi," achi hi. 25 Jesu'n amahnu kawmah, "Kei thohkiitna leh hinna ka hi. Koipouh kei hung gingta chu si mahzongleh ahing diing hi. 26 Huleh koi hizongleh hing a huleh kei hung gingta photmah chu kumtuangin bangchihtanin asi sih diing hi. Hikhu na gingta ei?" achi hi. 27 Amahnu'n a kawmah, "Hi, Lalpa, nang chu Khrist, Pathian Tapa khovel a hung diingpa chu na hi chih ka gingta hi," achi hi.
Jesu Kahna
28 Huchia asoi zohin achiah a, a sanggamnu Mari chu a guuhin akou a, "Houtupa ahung a, ahung kou," achi hi. 29 Mari in hu ajaahin kintahin athou a, a kawmah ahung hi. 30 Jesu chu khosung ahung tung nai sih a, Martha in avalamtuaahna mun ah aum nalai hi. 31 Huin Judate, inn sunga amah hehneema amah toh umte'n Mari chu kintaha thoua pawtdoh amuh tahun, "Haan ah kap diingin achiah," chiin a nung ajui uhi. 32 Huin Mari in Jesu umna mun ahung tun a, Amah amuhin a keengbul ah apuuh a, a kawmah, "Lalpa hitaha um hilehchin chu ka sanggampa si lou diing hi a," achi hi. 33 Hujiahin Mari kap a, amah toh hung Judate zong kapa um Jesu'n amuhin hagau in amaau a, amangbangta hi. 34 Huleh, "Amah khoiah na sial viai?" achi hi. Amah un a kawmah, "Lalpa, hung inla, en in," achi uhi. 35 Jesu akapta. 36 Hujiahin Judate'n, "Endih vua, lungsiat hina mei e!" achi uhi. 37 Khenkhat in, "Hi Pa, mittawte mit suhvaahsahpa'n hi pa zong silousah theilou adiai?" achi uhi.
Lazar Kaihthohna
38 Hujiahin Jesu chu a lungsim a maau kiitin haan ah ahung a, haan chu kohawm ahi a, suang a sit ahi. 39 Jesu'n, "Suang ladoh un," achi hi. Misipa sanggamnu Martha in a kawmah, "Lalpa, tuin chu auihta diing hi, ajiahchu a sihna ni li ahita hi," achi hi. 40 Jesu'n amahnu kawmah, "Na gintaat a ahihleh, Pathian loupina na mu diing, na kawmah ka chi sih eimah?" achi hi. 41 Huin amah un misi umna apat suang chu aladoh va, huleh Jesu chu avaandaah a, "Pa, ka thu na ngaihkhiah jiahin na tungah ka kipaah hi. 42 Huleh na hung ngaikhe zingzing chih zong ka he hi, hizongleh ka kiim a ding mipite jiahin hikhu ka chi hi, huchia nangma'n na hung sawl ahi chih agintaat theihna diingun," achi hi. 43 Huin hute asoi zohin aw ngaihtahin, "Lazar, hung pawtdoh in," chiin akikou hi. 44 Huin misi chu a khut a keeng haan puan a kituamin ahung pawtdoh a; a maai chu puan a tuam ahi hi. Jesu'n a kawmvah, "Phel unla, paisah un," achi hi.
Jesu Thah Sawmna
45 Huchiin Mari kawma hung, Jesu silmah bawl mu Judate laha tampite'n Jesu agingtata uhi. 46 Hizongleh khenkhat chu Pharisaite kawmah achiah va, Jesu silbawlte avahilh uhi. 47 Hujiahin siampu lalte leh Pharisaite'n vaihawmtute akoukhawm va, "Bang i lohta diai? Ajiahchu Hi Pa'n chiamchihna tampi abawl hi. 48 Hichibanga i hahzan un chu, mi zousiah in Amah agingta diing va, huleh Romte ahung diing va, i mun leh i nam ahung laahsah diing uh," achi uhi. 49 Huin a lahva mi khat, hu kum a siampu lalpeen Kaiapha in a kawmvah, "Bangmacha na he sih uh, 50 i nam pumpi aman louhna diinga mipi luanga mi khat asih eiuh diingin ahoih chih zong na ngaihtuah sih uh," achi hi. 51 Hichu ama'n amah phuaahthuhin asoi ahi sih hi; hizongleh hu kum a siampu lalpeen ahih jiahin hu nam diinga Jesu asih diing asoilawh ahi. 52 Huleh hu nam chauh hilouin, Pathian ta kithehdalhte zousiah pawl khat a apuikhawm theihna diingin zong ahi. 53 Hujiahin hu ni apatin Amah thahna diing ngaihtuahin akihou khawm zingta uhi. 54 Hujiahin Jesu chu Judate lahah alangtangin avaah nawn sih a, hizongleh hu apat a gamdaai naih lamah Ephraim kichi khopi khat ah achiah a, hutah ah a nungjuite toh aum zingta uhi. 55 Huleh Judate Chiahkaan Kuut chu ahung naita a, mi tampite gam apatin kisusiang diingin Jerusalem ah Chiahkaan Kuut hun main achiah tou uhi. 56 Huin amah un Jesu ahawl va, Pathian biahinn a ding kawmin akihou va, "Bangchiin na ngaihtuah viai? Kuut a hung lou diing adiai?" achi uhi. 57 Siampu lalte leh Pharisaite'n Amah amat theihna diingun mi koipouh in a umna aheet leh, asoi lat diing ahi chih thu apeta uhi.
Bethani a Jesu Thaunuhna
1 Hujiahin Chiahkaan Kuut umna diing ni guup main Jesu chu misi lah apat akaihthoh Lazar umna Bethani khua ahung tung hi. 2 Hujiahin hutah ah Jesu diingin nitaah an abawl va, Martha in neeh abawl a, hizongleh Lazar chu Amah toh ankuang uumte laha khat ahi. 3 Huin Mari in spainard thau namtuui man tamtah litra khat ahung tawi a, Jesu keeng anuh a, a sam in a keengte chu asiaah a, huleh thau gim in inn chu ajeelsuaahta hi. 4 Huleh nungjuite laha khat, Amah mansah diingpa Juda Iskariot, Simon tapa in, 5 "Bang diinga hi thau gimtuui dinari za thum a juaaha gentheite kawma kipelou ahiai?" achi hi. 6 Hichu ama'n gentheite akhawhsahpih jiah hilouin, guta ahi a, dangka-ip akol a, a sunga kikoih alaah veu jiahin asoi ahijaw hi. 7 Huin Jesu'n, "Ka kivui ni a diinga ama'n akoih theihna diingin amahnu subuai sih un. 8 Ajiahchu migentheite na kawmvah aumzing va, hizongleh kei chu na kawmvah ka umzing sih diing hi," achi hi. 9 Hujiahin Judate tampi in Amah hutah ah aum chih aheta va, Jesu jiah chauh hilouin, misi lah apat akaihthoh Lazar zong amuhnop jiahun ahung uhi. 10 Hizongleh Lazar zong athah theihna diingun siampu lalte chu akihou uhi. 11 Ajiahchu amah jiahin Judate tampi apaimang va, Jesu agingtata uhi.
Gualzoutaha Jesu Jerusalem a Luutna
12 Ajiingni in kuut a hung mi tampite'n Jesu Jerusalem ah ahung diing ahi chih ajaah tahun, 13 tuum nahte atawi va, Amah lamtuaah diingin apawtdoh uhi. Huleh, "Hosanna! 'LALPA min a hung paipa chu ahampha hi!' Israelte Kumpipa ngeei chu!" achi uhi. 14 Huleh Jesu'n sabiltung tal gual khat amu a, a tungah atuang hi; i5 "Lau sin, Zion tanu, en in, na Kumpipa chu sabiltung talgual tunga tuangin ahung hi," chia gelh bangin. 16 Nungjuite'n hi silte a tuungin ahesiam sih uhi; hizongleh Jesu paahtawia aum nungin hi thute Amah tungtaanga kigial ahi a, huleh a tungah hi silte abawl uh ahi chih ahung hedohta uhi. 17 Hujiahin haan apat Lazar akouhdoh a, misi lah apat akaihthoh laia a kawma umte'n a thu aheetpih uhi. 18 Hikhu jiahin mipite'n zong hi chiamchihna abawl chih ajaah jiahun Amah analamtuaah uhi. 19 Hujiahin Pharisaite akihou va, "Bangma na loh thei sih uh chih na he viai? En un, khovel in Amah ajuita hi!" chiin.
Grikmi Khenkhatte 'n Jesu Muh Atupna uh
20 Huleh Pathian be diinga kuut a hungte lahah Grikmi hon khat aum va, 21 hujiahin amahuh chu Galili gam a Bethsaida khua a um Philip kawmah ahung va, "Pu, Jesu muh ka uut uh," chiin angeen uhi. 22 Philip chu ahung a, Andru ahilh a, Andru leh Philip in Jesu ahilh uhi. 23 Huleh Jesu'n amahuh adawng a, "Mihing Tapa paah-tawia aumna diing hun atungta hi. 24 Chihtahzetin, chihtahzetin ka hung hilh ahi, buhtang khat lei a akiaah a, asih louh leh, a ngenin aum zing hi; hizongleh asih inchu, tampiin agah veu hi. 25 Koipouh a hinna iit in ataan diing a, huleh koipouh hi leitung a a hinna hua in kumtuang hinna dongin ahuumbit diing hi. 26 Koipouh in ka nna atoh leh, hung jui heh; huleh ka umna ah ka suaahpa zong aum diing ahi. Mi koipouh in ka nna atoh leh, ka Pa in amah akipaahpih diing hi.
Jesu'n Asih Diing Asoilawhna
27 "Tuin ka hinna amangbang hi, bang ahiai ka soi diing? 'Pa, hi hun lahah hung hunkhia in,' ka chi diing adiai? Himahleh hikhu diing jiaha hi hun a hung ka hi ngaala. 28 Pa, na min paahtawi in," achi hi. Huin vaan apat aw ahung suaah a, "Ka paahtawita a, ka paahtawi kiit diing hi," chiin. 29 Hujiahin a kawma ding mipi leh hukhu jate'n vaan ging ahi, achi va; adangte'n lah, "Angel in Amah ahoupih ahi," achi uhi. 30 Jesu'n adawng a, "Hi aw chu kei diinga hung suaah ahi sih a, nanguh diinga hung suaah ahijaw hi. 31 Tu chu hi khovel vaihawm lai ahi, hi khovel lai chu tuin paihkhiah ahi diing hi. 32 Huleh kei chu lei apat khaikaanga ka um leh, mi zousiah ka kawmah ka hiip diing hi," achi hi. 33 Hichu Ama'n bangtobang sihna in ahiai asih diing chih heetsahna a asoi ahi. 34 Mipite'n Amah adawng va, "Khrist chu kumtuangin aum zing diing chih daan thu apat ka ja uhi. Bangchidaana nang in, 'Mihing Tapa khaikaanga aum ngeei diing ahi,' na chih ahiai? Mihing Tapa chu koi ahiai?" achi uhi. 35 Huin Jesu'n a kawmvah, "Hun tomchakhat vaah na lahvah aum hi. Vaah na neih laiun mial in ahung lap louhna diingin khohei un; ajiahchu koipouh mial a khohei in khoilama pai ahih ahe sih hi.
Ginglel Mipite
36 "Vaah tate na hung hih theihna diingun vaah na neih laiun vaah chu gingta un,"achi hi. Hi thute Jesu'n asoi zohin apawt a, amahuh apat akibuta hi. 37 Hizongleh a ma vah chiamchihna tampi bawl zongleh Amah agingta tuan sih uhi. 38 Zawlnei Isai in, "Lalpa, ka thusoi uh koi in ahiai gingta? Huleh LALPA khut zong koi kawmah ahiai akilat?" chia asoi ahung taangtun theihna diingin. 39 Hujiahin agingta thei sih uh, ajiahchu Isai in, 40 "Ama'n a mit va amuh theihlouhna diingun a mit uh asuhtawtsah a, a lungtang va aheetsiam louhna diingun a lungtang uh asuhkhauhsah ahi, huchilou inchu a lungtang un ahesiam diingva ahung kiheikiit kha diing va, huchiin ke'n amahuh ka na suhdam kha diing hi," achi kiit hi. 41 Hi thute chu Isai in Lalpa loupina amuh laia asoi ahi a, huleh Amah tungtaang thu asoina ahi. 42 Ahihvaangin vaihawmtu lamkaite lahah zong tampi'n Jesu agingta va, hizongleh Pharisaite jiahin Amah asoiphuang ngam sih uhi; huchilou inchu sinagog apat nohdohin aum kha diing uhi. 43 Ajiahchu amah un Pathian kipaahpiha um saangin mihingte kipaahpiha um adeihjaw uhi.
Jesu Thuhilhna Tomkim
44 Hizongleh Jesu chu akikou a, "Koipouh kei hung gingta chu, kei hung gingta ahi sih a, ahung sawlpa gingta ahijaw hi. 45 Huleh koipouh kei hung mu chu ahung sawlpa mu ahi. 46 Koipouh ahung gingta chu mial a aum zing louhna diingin vaah diinga khovel a hung ka hi. 47 "Mi koipouh in ka thusoite jain gingta sih mahzongleh, ke'n ka vaihawm sih hi; ajiahchu khovel vaihawm diinga hung ka hi sih a, khovel hundam diinga hung ka hijaw hi. 48 Koipouh kei hung deihlou a, ka thusoite zong pomlou in siamlouhtangsahtu khat anei hi, ka thusoite mahmah in ni tawpni chiangin amah siamlouh atangsah diing hi. 49 Ajiahchu keimah phuaahtawmin ka soi sih a, hizongleh Pa, kei hung sawlpa'n ka soi diing leh ka hilh diing thu ahung pia hi. 50 Huleh a thupiaah chu kumtuang hinna ahi chih ka he hi. Hujiahin ka soi pouhmah chu Pa in ka kawma asoi bangin ka soi ahi," achi hi.
Jesu'n Nungjuite Keeng Asilna
Huleh Chiahkaan Kuut O main, Jesu'n hi khovel apat paimanga Pa kawma achiah diing hun ahung tungta chih aheet tahin, khovel a um a mite chu analungsiatta a, amahuh chu a tawp tanin alungsiat hi. 2 Huin nitaah an neeh laiin diabol in Simon tapa Juda Iskariot lungtang ah Jesu matsah diing angaihtuahsah zouta hi. 3 Jesu'n Pa in sil bangkim a khut ah apeta chih leh Pathian apat a hung a, Pathian kawma chiah kiit diing ahih daan hein, 4 nitaah an uumlaiin ading a, a puansilh akoih a, kisiaahna puan lain ateeng hi. 5 Huleh kisilna kuang sunga tui asun zohin a nungjuite keeng asilsah a, kisiaahna puan ateen in asiaah jui peh hi. 6 Huin Simon Peter kawmah ahung a, Peter in a kawmah "Lalpa, nang in maw ka keeng na sil diing?" achi hi. 7 Jesu'n adawng a, a kawmah, "Ka silbawl nang tuin na he sih a, hizongleh tuming chiangin na hung he diing hi," achi hi. 8 Peter in a kawmah "Ka keeng na sil hiai sih diing,' achi hi. Jesu'n adawng a, "Ka hung sil louh leh, ka kawmah tan bangmah na nei sih diing," achi hi. 9 Simon Peter in a kawmah. "Lalpa, ka keeng chauh hilouin, ka khut leh ka lu zong hung sil in," achi hi. 10 Jesu'n a kawmah, "Koipouh kisilsa in a keeng loungaal sil amamoh sih hi; huleh nanguh chu na siang uhi, hizongleh na bawnun chu hilouin," achi hi. 11 Ajiahchu Ama'n amansah diingpa ahe a, hujiahin "Na bawnva siang veh lou na hi uh," achih ahi. 12 Huchiin a keeng uh asil zoh a, puansilh la a, atou kiit zohin a kawmvah, "Na tungva ka silbawl bang ahiai na he viai? 13 Nang un kei chu Houtupa leh Lalpa na hung chi va, na hung chi dih ngeei uh, ajiahchu ka hi him ahi. 14 Kei, Lalpa leh Houtupa in na keeng uh ka sil leh, nanguh zong khat leh khat keeng na kisilsah diing uh ahi. 15 Na tungva ka bawl banga na bawlna diingun na etton diing uh ka hung pia ahi. 16 Chihtahzetin, chihtahzetin ka hung hilh ahi, suaah chu a pu saangin alianjaw sih a, huleh thupotu zong a sawltu saangin alianjaw sih hi. 17 Hi silte hein bawl hileh uh chin, mihampha na hi diing uhi. 18 "Na bawnva thu ka soi sih, ka teelte ke'n ka he hi; hizongleh huchu 'Ka tanghou nepa ngeei in ka tungah a khetuul alehta hi,' chih Pathian Lehkhathu ataangtun theihna diing ahi. 19 "Ahung tun chiangaAmahka hi chih na gintaat theihna diingun ahung tun main tuin ka hung hilh ahi. 20 Chihtahzetin, chihtahzetin ka hung hilh ahi, koipouh ka mi sawl taphot pom chu kei hung pom ahi; huleh koipouh kei hung pom in ahung sawlpa apom ahi," achi hi.
Nitaah Ankuang Nunungpeen
21 Jesu'nhiasoizohinalungsim amangbang a, "Chihtahzetin, chihtahzetin ka hung hilh ahi, na lahva khat in ahung mansah diing," chiin ahesahta hi. 22 Nungjuite'n koipeen ahiai asoi chih helouin akientuah uhi. 23 Huleh a nungjuite laha khat, Jesu'n alungsiatpa chu Jesu aanga kingaiin aum hi. 24 Hujiahin Simon Peter in koi thu ahiai asoi chih dong diingin amah chu mitmei in ahoupih hi. 25 Huin Jesu kawma nungjui kingaipa'n a kawmah, "Lalpa, koipeen ahiai?" achi hi. 26 Jesu'n amah adawng a, "Tanghou them ka diah a, ka piaah peenpeen chu amah ahi," achi hi. Huin tanghou them adiah zohin Simon tapa Juda Iskariot kawmah apia hi. 27 Huleh tanghou them apiaah zohin Setan chu a sungah aluutta a, Jesu'n a kawmah, "Na bawl diing chu kintahin bawl in," achi hi. 28 Hizongleh dohkaan kiim a toute koimah in bang chihna a hu thu a kawma asoi ahiai chih ahe sih uhi. 29 Ajiahchu Juda in dangka-ip akol jiaha Jesu'n a kawma, "Kuut a i mamoh diing silte lei in," chi ahihlouhleh gentheite kawma bang aha khat apiaah diing chi aha hiin a lahva khenkhat in angaihtuah uhi. 30 Huin tanghou them alaah zohin amah chu apawtdoh pah a, hu hun chu jaan ahi.
Peter Kiheetmohbawl Diing Soilawhna
31 Hujiahin Juda apawtdoh nungin Jesu'n, "Tuin chu Mihing Tapa paahtawiin aumta, huleh Pathian zong Amah ah paahtawiin aum hi. 32 Amah a Pathian paahtawia aum inchu, Pathian in Amah ngeei ah Amah apaahtawi diing a, apaahtawi pahngaal diing hi. 33 "Ta deihtahte, tomchakhat na lahvah ka um tadih hi. Nang un na hung hawl diing va, Judate kawmah, 'Ka chiahna ah na hung thei sih diing uh,' ka chih mahbangin, tuin na kawmvah ka chi ahi. 34 Thupiaah thah na kawmvah ka hung pia hi, khat leh khat kilungsiat un; ke'n nanguh ka hung lungsiat bangin nanguh zong khat leh khat kilungsiat un. 35 Khat leh khat na kilungsiat uh leh, mi zousiah in ka nungjuite na hi uh chih ahe diing uhi," achi hi. 36 Simon Peter in Amah kawmah, "Lalpa, khoiah ahiai na chiah diing?" achi hi. Jesu'n amah adawng a, "Ka chiahna diing ah tuin na hung jui thei sih diing uh, himahleh tuming chiangin na hung jui thei diing uhi," achi hi. 37 Peter in a kawmah, "Lalpa, bangjiahin ahiai tua ka hung juih theih louh diing? Nang diingin ka hinna ka pe diing hi," achi hi. 38 Jesu'n amah adawng a, "Keimah jiahin na hinna na pe diing maw? Chihtahzetin, chihtahzetin ka hung hilh ahi, nangma'n thumvei na hung kiheetmohbawl main aah akhuang sih diing hi.
Pa Kawm Tunna Lampi
1 "Na lungtang uh mangbangsah sih un, Pathian na gingta uh, kei zong hung gingta un. 2 Ka Pa inn ah umna tampi aum; umlou hileh, ka hung hilhta diing hi. Ajiahchu nanguh diinga mun bawla chiah diing ka hi. 3 Huleh ka chiah a, nanguh diinga mun ka bawl leh, ka hung kiit diing a huleh ka umna a nanguh zong na um theihna diingun ka kawmah nanguh ka hung la diing hi. 4 Khoia ka chiah diing na he va, a lampi zong na he uh," achi hi. 5 Thomas in a kawmah, "Lalpa, khoia na chiah diing ka he sih uh, a lampi bangchiin ka he diviai?" achi hi. 6 Jesu'n a kawmah, "Kei lampi leh thutah leh hinna chu ka hi. Keimah a pailouin koimah Pa kawm atung ngei sih hi. 7 Kei hung he hileh uh chin, ka Pa zong na heta diing uh; huleh tu apat Amah na he va, muh zong na muta uhi," achi hi. 8 Philip in a kawmah, "Lalpa, Pa chu keiuh hung musah in, huchiin keiuh diingin ahuntawh diing," achi hi. 9 Jesu'n akawmah, "Philip, hi tan veipi na kawmah ka um a, huchiin zong na hung he nai sih maw? Koipouh kei hung mu in Pa amu ahi, bangchidaana 'Pa chu keiuh hung musah in,' na chih ahiaimah? 10 Kei Pa ah ka um a, Pa kei ah aum chih gingta lou na hiaimah? Na kawmva ka thusoite, keimah thu in ka soi sih a, hizongleh Pa kei a um in, nna atong hi. 11 Kei Pa ah ka um a, Pa kei ah aum chih hung gingta un, ahihlouhleh silbawlte jiah beeh in hung gingta un. 12 Chihtahzetin, chihtahzetin ka hung hilh ahi, koipouh kei hung gingta in chu ka silbawlte ama'n zong abawl ve diing hi; ka Pa kawma ka chiah diing jiahin, hite saanga loupijaw zong abawl diing hi. 13 Tapa a Pa chu paahtawia aum theihna diingin, ka min a na nget photmah uh, huchu ka bawl diing hi. 14 Ka min a bangpouh na nget un chu, ka bawl diing hi.
Hagau Siangthou Piaah diing Chiamna
15 "Kei na hung lungsiat uh leh, ka thupiaahte jui un. i6 Huleh na kawmva kumtuanga um diingin Pa ka ngeen diing a, Ama'n Panpihtu dang ahung pe diing hi, 17 khovel in aneih theih louh thutah Hagau ngeei chu, ajiahchu Amah amu sih va, he zong ahe sih uhi; ahihvaangin nang un chu Amah na he uh, ajiahchu na kawmvah aum a huleh na sungvah aum diing hi. 18 Tagah bangin ka hung nuse sih diing a, na kawmvah ka hung diing hi. 19 Tomchakhat nungin khovel in kei ahung mu nawn sih diing hi, hizongleh nang un chu na hung mu diing uhi. Kei ka hing jiahin, nanguh zong na hing diing uhi. 20 Hu ni chiangin kei ka Pa ah ka um a, nanguh kei ah na um uh chih leh kei nanguh ah ka um chih na he diing uhi. 21 Koipouh ka thupiaahte nei a, jui chu kei hung lungsiat ahi. Huleh koipouh kei hung lungsiat chu ka Pa lungsiatin aum diing a, ke'n amah ka lungsiat diing a, a kawmah ka kisulang diing hi," achi hi. 22 Iskariot hiloupeen Juda in a kawmah, "Lalpa, keiuh kawmah kisulang a, khovel kawma na kisuhlat louh diing bangchidaan ahiai?" achi hi 23 Jesu'n adawng a, a kawmah, "Mi koipouh in ahung lungsiat leh, ka thu ajui diing hi; huleh ka Pa'n amah alungsiat diing a, a kawmah ka hung diing va, amah toh ka umkhawm zing diing uhi. 24 Koipouh ahung lungsiat louin ka thusoite ajui sih hi; thu na jaahte uh keimah a ahi sih a, Pa kei hung sawlpa a ahijaw hi. 25 "Na kawmva ka um taahdih sungin hi thute na kawmvah ka soi ahi. 26 Hizongleh Pa'n ka min a ahung sawl diing Panpihtu, Hagau Siangthou in sil zousiah nanguh ahung hilh diing a, huleh thu na kawmva ka soisa photmah nanguh ahung hedohsah diing hi. 27 Hamuanna ka hung nuutsiat hi, ka hamuanna ka hung pia hi; khovel in apiaah bangin ke'n nanguh ka hung pe sih. Na lungtang uh mangbangsah sih unla, lau zong lausah sih un. 28 "'Ka chiahmang diing a, na kawmvah ka hung kiit diing,' chia na kawmva ka soi na jata uhi. Kei na hung lungsiat un chu, 'Pa kawmah ka chiah diing,' ka chih jiahin na nuam diing uh, ajiahchu ka Pa kei saangin alianjaw hi. 29 A hun atun chianga na gintaat theihna diingun tuin ahung tun main ka hung hilhta hi. 30 Tu kalsiah na kawmvah thu tampi ka soi nawn sih diing hi, ajiahchu hi khovel vaihawmtu ahung hi, ama'n keimah ah bangmah anei sih hi. 31 Hizongleh khovel in keima'n Pa ka lungsiat ahi chih aheet theihna diingun, Pa in ahung thupiaah bangin ka bawl ahi. Thou un, hi apatin i chiah diing uhi.
Grepgui leh a Baate
1 "Kei grepgui dihtah chu ka hi, huleh ka Pa chu a huan enkoltu ahi. 2 Keimah a baa gahlou photmah chu alamang veu a, agah tam seem theihna diingin agah photmah chu ahahsiang veu hi. 3 Tuin nanguh chu na kawmva ka thusoi tungtawnin na siangzouta uhi. 4 Keimah ah um ngiitngeet un, kei zong nanguh ah ka um ngiitngeet diing hi. Baa in grepgui a aum ngiitngeet louhngaal leh, amah ngen a agah theih louh mahbangin, nanguh zong keimah a na um ngiitngeet louh uh leh na gah thei sih diing uhi. 5 "Kei grepgui chu ka hi, nanguh a baate na hi uh, koipouh keimah a aum ngiitngeet leh, kei amah a ka um ngiitngeetnapa chu tampi in agah veu hi; ajiahchu keimah louin bangma na bawl thei sih uhi. 6 Mi koipouh keimah a aum ngiitngeet louh leh, baa bangin paihdohin aum a, avuai veu hi; huleh mite'n amahuh atomkhawm va mei ah apaai va, akaang veu uhi. 7 Keimah a na um ngiitngeet va, huleh ka thu zong nanguh a aum ngiitngeet inchu, na uut-uut uh na ngeen diing va, huchu ahung kibawlsah diing hi. 8 Tampi a na gahna vah, ka Pa paahtawiin aum hi; huchiin ka nungjuite na hi diing uhi. 9 "Pa'n kei ahung lungsiat bangin ke'n nanguh ka hung lungsiat hi; ka lungsiatna ah um ngiitngeet un. 10 Ke'n ka Pa thupiaahte ka juih a, a lungsiatna a ka um ngiitngeet mahbangin, nang un ka thupiaahte na juih uh leh, ka lungsiatna ah na um ngiitngeet diing uhi. 11 Ka kipaahna nanguh a aumden theihna diing leh na kipaahna uh abukim theihna diingin hi thute na kawmvah ka soi ahi. 12 Ke'n nanguh ka hung lungsiat bangin nanguh zong khat leh khat kilungsiat un, chih hi ka thupiaah ahi. 13 Mi'n a lawmte diinga a hinna apiaah saanga lianjaw lungsiatna koima'n anei sih hi. 14 Thu ka hung piaah photmah na bawl un chu, ka lawmte na hi diing uhi. 15 Suaahte ka hung chi nawn sih diing hi, ajiahchu suaah in a pu in bang abawl ahe sih hi; lawmte ka hung chi jawta diing hi, ajiahchu ka Pa kawma ka jaah zousiah na kawmvah ka hung hesahta hi. 16 Nang un kei na hung teel sih va, hizongleh chiah a gah diing leh na gah uh umzing diingin ke'n nanguh ka hung teelin ka hung guatjaw hi, huchia ka min a Pa kawma na nget photmah uh ahung piaah theihna diingin. 17 Hi thute ka hung pia hi, khat leh khat kilungsiat un.
Gingtute leh Khovel
18 "Khovel in nanguh ahung huat leh, nanguh ahung huat main kei ahung haw zouta chih he un. 19 Khovel a hileh uh chin, khovel in amah a alungsiat diing hi. Hizongleh khovel a hilou a, khovel apat a ka hung teeldoh na hihjawh jiahun khovel in nanguh ahung hua ahi. 20 'Suaah a pu saangin alianjaw sih,' chih na kawmva ka thusoi hezing un. Amah un kei ahung suhduhdah un chu, nanguh zong ahung suduhdah diing uhi; ka thusoite ajuih uh leh, na thusoite uh zong ajui diing uhi. 21 Hizongleh ahung sawlpa aheet louh jiahun ka min jiahin hi silte zousiah na tungvah abawl diing uhi. 22 Kei hung loua a kawmva thu soi lou hileng, sualna neilou diing hi va, hizongleh tuin chu a sualna uh ngaihdamna diing aneita sih uhi. 23 Koipouh kei hung hua in ka Pa zong ahua ahi. 24 Midang koima bawl ngeilouh natohte a lahva bawllou hileng, sualna neilou diing hi va, hizongleh tuin chu muh zong ahung muta va, huleh kei leh ka Pa ka nih un hua zong ahung hua uhi. 25 Hizongleh hichu, 'Amah un ajiah beiin ahung mudah uh,' chih a daanbu va kigial thu ataangtunna diinga hung um ahi.
Hagau Siangthou Piaah Chiamna
26 "Hizongleh Pa kawm apat na kawmva ka hung sawl diing, Pa apat hung pawt, Panpihtu, thutah Hagau ahung tun chiangin, Ama'n ka tanchin ahung heetpih diing hi. 27 Huleh achiil apat a ka kawma umna hih jiahun nanguh zong heetpihtuin na pang diing uhi.
1 "Kipalpuuhsaha na um louhna diingun hi thute na kawmvah ka soi ahi. 2 Sinagogte ah ahung nohdoh diing va; ahi, koipouh nanguh hung that in Pathian natong banga akingaihtuah hun uh ahung tung diing hi. 3 Huleh Pa leh kei ahung heet louh jiahun hi silte na tungvah abawl diing uhi. 4 Hizongleh ahun ahung tun chianga hute ka hung hilhta chih na heetdohna diingun hi silte nanguh ka hung hilhta ahi. Na kawmva ka um jiahin hi thute achiil in na kawmvah ka soi sih hi.
Hagau Siangthou Natohna
5 "Hizongleh tuin chu ahung sawlpa kawma chiah diing ka hi a, koimah in, 'Khoia chiah diing na hiai?' chiin na hung dong sih uhi. 6 Hizongleh hi thute na kawmva ka soi jiahin na lungtang uh lungkhamna in adimta hi. 7 Hizongleh thutah ka hung hilh hi, nanguh diingin ka chiahmang ahoihjaw hi; ajiahchu ka chiahmang louh leh, Panpihtu na kawmvah ahung sih diing hi; ka chiah inchu, na kawmvah Amah ka hung sawl diing hi. 8 Amah ahung tun chiangin sualna lam leh dihtatna lam leh vaihawmna lam tungtaang ah khovel siamlouh daan ahesah diing hi. 9 Kei ahung gintaat louh jiahun sual thu ah siamlouh atangsah diing hi. 0Ka Pa kawma chiah a, na hung muh nawn louh diing jiahun, dihtatna thu ah siamlouh atangsah diing hi. 11 Hi khovel lai chu vaihawmsaha aumtaah jiahin vaihawmna thu ah siamlouh atangsah diing hi. 12 "Na kawmvah soi diing tampi ka nei a, hizongleh tuin na po zou nai sih uhi. 13 Hizongleh thutah Hagau ahung tun chiangin Ama'n nanguh thutah zousiah he diingin ahung pui diing hi; ajiahchu Ama'n phuaahthuh in thu asoi sih diing a, hizongleh ajaah photmah chu asoi jaw diing hi; huleh sil hung tung diingte ahung musah diing hi. 14 Ama'n kei ahung paahtawi diing hi, ajiahchu kei a ala diing a nanguh ahung musah diing hi. 15 Pa sil neih zousiah kei a ahi. Hujiahin Ama'n keimah a ala diing a, nanguh kawmah ahung phuangdoh diing ka chi hi.
Jesu'n a Sih Diing leh Athohkiit Diing Asoina
16 "Pa kawma ka chiah diing jiahin tomchakhat nung chiangin nang un na hung mu nawn sih diing uh, huleh tomchakhat nung chiangin na hung mu kiit diing uhi," achi hi. 17 Huin a nungjuite khenkhat in, "'Tomchakhat nung chiangin kei na hung mu nawn sih diing uh; huleh tomchakhat nung chiangin kei na hung mu kiit diing uhi,' achih khu toh, 'Pa kawm a ka chiah diing jiahin,' i kawma achih khu bang achihna adiai?" chiin akihou uhi. 18 Hujiahin amah un, "Hi a thusoi, 'Tomchakhat nung chian,' achih bang achihna ahiai? i he sih uh," achi uhi. 19 Huchiin Amah adong nuam uh chih Jesu'n ahe a, a kawmvah, "'Tomchakhat nung chian na hung mu nawn sih diing uh; huleh tomchakhat nung chian na hung mu kiit diing uh,' chia ka soi na kidongtuah uh ahi maw? 20 Chihtahzetin, chihtahzetin ka hung hilh ahi, nanguh na kap diing va, na maau diing uh, hizongleh khovel akipaah diing; nanguh chu na lunggim diing va, hizongleh na lunggimna uh kipaahna suaahsah ahi diing hi. 21 Numei in a nau avei laiin na athuaah hi; hizongleh ahun atuntaah jiahin mihing khat khovel a ahung pian kipaahna jiahin nau asuaah zoh tahin hu hahsatna chu ahe nawn sih hi. 22 Hujiahin tuin lunggimna na nei uh ahi; hizongleh nanguh ka hung mu kiit diing a, na lungtang uh akipaah diing a, huleh na kipaahna uh koima'n ahung laahsah sih diing hi. 23 Hu ni chiangin nang un bangmah na hung dong sih diing uhi. Chihtahzetin, chihtahzetin ka hung hilh ahi, ka min a Pa kawma na nget photmah uh Ama'n nanguh ahung pe diing hi. 24 Tutanin ka min in bangmah na ngeen nai sih uhi. Na kipaahna uh akimna diingin, ngeen un, na mu diing uhi.
Nungjuite Diinga Hamuanna
25 "Hi thute etsahna in na kawmvah ka soi ahi; hizongleh etsahna a na kawmva thu soi nawn lou a, Pa tungtaang chiantaha ka hung heetsah diing hun tung diing ahita. 26 Hu ni chiangin ka min in na hung ngeen diing uh, huleh nanguh diingin Pa kawmah ka ngeen diing ka chi ahi sih hi. 27 Ajiahchu nang un kei na hung lungsiat va, Pathian apat hung ka hi chih na gintaat jiahun Pa ngeei in nanguh ahung lungsiat hi. 28 Pa apat hung a khovel a hung ka hi. Huleh khovel nusia a Pa kawma chiah kiit diing ka hi," achi hi. 29 A nungjuite'n a kawmah, "Ngai in, tuin chu etsahna in na soi sih a, chiantahin na soita hi. 30 Tuin chu silbangkim na he a, koimah in ahung dot na kiphamoh sih chih ka hechianta uhi. Hikhu jiahin Pathian akipan a hung pawt na hi chih ka gingta uhi," achi uhi. 31 Jesu'n amahuh adawng a, "Tuin na gingta uh maw? 32 Ngai un, a hun ahung tung diing ahi, tuin zong atungta, mi chin na inn chiat vah na kithehdalh diing va, ka ngenin na hung nuse diing uhi. Ahihvaangin Pa ka kawma aum jiahin ka tang ka hi sih hi. 33 Keimah a hamuanna na neihna diingun hi thute na kawmvah ka soi ahi. Khovel ah gimthuaahna na nei uh, hizongleh hamuangtahin um un, ke'n khovel ka zouta hi," achi hi.
Jesu Haamteina
1 Hi thute Jesu'n asoi zohin, vaanlam aentou a, "Pa, a hun atungta; na Tapa paahtawi in, na Tapa'n zong nangmah ahung paahtawi theihna diingin. 2 Nangma'n mi na hung piaahte tunga thuneihna na hung piaah bangin, mi na hung piaah zousiah tungah kumtuang hinna ka pe diing hi. 3 Huleh hichu ahi kumtuang hinna, nang Pathian tah chauh leh na sawl Jesu Khrist aheet theihna diing uh chu. 4 Leitung ah ka hung paahtawita a, bawl diinga na hung piaah nna ka tong zouta hi. 5 Tuin aw Pa, khovel um ma a na kawma ka neih loupina toh, nang ngeei toh hung paahtawi khawm in.
Nungjuite Diinga Haamteina
6 "Khovel apat a na hung piaahte kawmah na min ka sulangta hi. Amahuh nang a ahi va, kei kawmah na hung pia a, huleh na thu ajuita uhi. 7 Nangma'n ka kawma na hung piaahte photmah nangmah apat ahi chih tuin aheta uhi. 8 Ajiahchu nang in thu na hung piaahte a kawmvah ka peta hi; huleh amah un apomta va, tahzetin nang apat a hung ka hi chih aheta uh; huleh na hung sawl ahi chih agingtata uhi. 9 Amahuh diingin ka ngetsah hi. Khovel a diingin ka ngetsah sih hi, hizongleh nang in na hung piaahte diingin ka ngetsah jaw hi, ajiahchu amahuh nang a ahi uhi. 10 Kei a zousiah nang a ahi a, nang a zousiah kei a ahi, huleh amah vah paahtawiin ka um hi. 11 Tuin kei khovel ah ka um nawn sih diing a, hizongleh hite khovel ah aum diing va, huleh kei na kawmah ka hung diing hi. Pa siangthou, ei pumkhat i hih mahbanga amahuh zong pumkhat ahih theihna diingun, nang na hung piaahte na min in keem in. 12 Khovel a amahuh toh ka um sungin ka kawma na hung piaahte na min in ka keem hi. Amahuh ka keemta a, Pathian Lehkhathu ataangtun theihna diingin mangthang tapa loungaal khat beeh amangthang sih uhi. 13 Tuin na kawmah hung diing ka hita, huleh amahuh a ka kipaahna abukim theihna diingin hi silte khovel ah ka soi ahi. 14 Na thu amahuh ka peta a, kei khovel a ka hihlouh mahbanga amahuh khovel a ahihlouh jiahun, khovel in amahuh ahua hi. 15 Amahuh khovel apat a lamang diingin ka hung ngeen ahi sih a, hizongleh migiloupa apat veeng diingin ka hung ngeen ahijaw hi. 16 Amahuh khovel a ahi sih uh, kei khovel a ka hihlouh mahbangin. 17 Na thutah in amahuh koihsiangthou in, na thu chu thutah ahi. 18 Kei khovel a na hung sawl mahbangin, ke'n zong amahuh khovel ah ka sawl hi. 19 Thutah a amahuh zong suhsiangthou ahih theihna diingun, amahuh jiahin ka kisusiangthou hi.
Gingtu Zousiah Diinga Jesu Haamteina
20 "Hite a diing chauhin ka ngeen sih a, hizongleh a thu jiahva kei hung gingta diingte a diingin zong ka hung ngeen hi, 21 huchia pumkhat ahih theihna diingun, Pa, nang keimah a na um a, kei nangmah a ka um banga amahuh zong eimah a pumkhat ahih theihna diingun; huleh nang in na hung sawl chih khovel in agintaat theihna diingin. 22 Huleh ei pumkhat i hih banga amahuh zong pumkhat ahih theihna diingun nang in na hung piaah loupina amahuh ka peta hi: 23 kei amahuh ah, nang kei ah, huchia amahuh kipumkhat-a suhbukim ahihtheihna diingun, huleh khovel in nang in kei na hung sawl chih aheetna diing leh kei na hung lungsiat banga khovel in amahuh alungsiat theihna diingin. 24 "Pa Aw, kei na hung piaah loupina amah un amuh theihna diingun, kei na hung piaahte zong ka umna a kei toh aum diing uh ka deih hi; ajiahchu khovel siam ma pehin kei na hung lungsiatta hi. 25 Aw Pa dihtat, khovel in nang ahung he sih a, hizongleh ke'n chu ka hung he hi; huleh nang na hung sawl chih hite'n aheta uhi. 26 Huleh keimah na hung lungsiatna a kawmva aum theihna diing leh kei amahuh a ka um theihna diingin, a kawmvah na min ka hesahta a, ka hesah jeel diing hi," achi hi.
Jesu Matsahna
1 Jesu'n hi thute asoi zohin a nungjuite toh Kidron Luuita gaal ah achiah va, hutah ah huan khat aum a, hutah ah a nungjuite toh aluut uhi. 2 Huleh amansahpa Juda in zong a mun ahe hi, Jesu a nungjuite toh hu lamah avaah veu uh chih aheet jiahin. 3 Huin Juda in siampu lalte leh Pharisaite apat biahinn veengtu houtute leh sepaih pawl puiin thaumeite leh meiselte leh gaalvante tawiin hutah ah ahungta hi. 4 Huj iahin Jesu'n a tunga siltung diing zousiah hein apawtdoh a, a kawmvah, "Koi ahiai na hawl uh?" achi hi. 5 Amah un adawng va, "Nazareth Jesu," achi uhi. Jesu'n a kawmvah, "Kei ka hi," achi hi. Huleh amansahpa Juda zong ading hi. 6 Huin, "Kei ka hi," achih tahin anungtawl va, lei ah apuuh uhi. 7 Huin Ama'n, "Koi ahiai na hawl uh?" chiin adong kiit hi. Amah un, "Nazareth Jesu," achi uhi. 8 Jesu'n adawng a, "Kei ka hi chiin ka hung hilhta hi. Hujiahin kei hung hawl na hih uh leh, hi mite chiahsah un," achi hi. 9 Huchiin, "Nang na hung piaahte khatmah zong ka mangsah sih hi," chia Ama'n asoi ataangtun theihna diingin. 10 Huin Simon Peter in naamsau khat anei a, azandoh a, siampu lalpeen suaahpa asaat a, a bil jiatlam asaatkhiahsah hi. Hu suaahpa min chu Malka ahi. 11 Huin Jesu'n Peter kawmah, "Na naamsau a paai ah siat in. Ka Pa'n nou ahung piaah chu ka dawn sih diaimah?" achi hi.
Siampu Lalpeen Ma ah Jesu
12 Huin sepaih pawlte leh sepaih houtu leh biahinn veeng houtute'n Jesu chu aman va, akaan uhi. 13 Amasapeenin Anna kawmah apui uhi, ajiahchu amah hu kum a siampu lalpeen Kaiapha sungpa ahi. 14 Huleh Kaiapha chu mipite luanga mi khat sih ahoihjaw hi, chia Judate kawma hilhpa ahi.
Peter Kiheetmobawlna
15 Huleh Simon Peter in Jesu ajui a, huchibangmahin nungjui dang khat in zong ajui hi. Hu nungjuipa chu siampu lalpeen meelheet ahi a, siampu lalpeen innhuang sungah Jesu toh aluut khawm hi. 16 Hizongleh Peter chu polam ah kotkhaah bul ah ading hi. Huin nungjui khatpeen, siampu lalpeen meelheetpa chu avapawt a, kotkhaah ngaahnu kawmah asoi a, Peter ahung puiluut hi. 17 Huchiin kotkhaah ngaah suaah nungaahnu'n Peter kawmah, "Nang zong hi Pa nungjuite laha khat hilou na hi maw?" achi hi. Ama'n, "Ka hi sih," achi hi. 18 Huleh suaahte leh houtute hutah ah ading va, avot jiahin suangmeihol achih va, a-awi uhi. Huleh Peter in zong amahuh toh ding khawmin mei a-awi hi. 19 Huin siampu lalpeen in Jesu kawmah a nungjuite tungtaang leh a thuhilhna tungtaang adong hi. 20 Jesu'n amah adawng a, "Alangtangin khovel kawmah thu ka soi a, Judate umkhawm zingna sinagogte leh Pathian biahinn ah thu ka hilh zing a, aguuhin bangmah ka soi sih hi. 21 Bang diinga nang un kei hung dong na hi viai? Ka thusoi jate kawmah dong un, ngai un, amah un ka soi ahe uhi," achi hi. 22 Hutobang asoi zohin a kawma ding houtute laha khat in Jesu abeeng a, "Siampu lalpeen bang huchiin na dawng maw?" achi hi. 23 Jesu'n amah adawng a, "Thu dihlou ka soi leh, ka dihlouhna hung hesah in; hizongleh ahoih ka soi leh, bang diinga hung beeng na hiai?" achi hi. 24 Huin Anna in Amah chu kaansain siampu lalpeen Kaiapha kawmah asawlta hi.
Peter in Jesu Akiheetmobawlna
25 Simon Peter in chu dingin mei a-awi hi. Hujiahin amah un a kawmah, "Nang zong nungjuite laha khat hilou na hi maw?" achi uhi. Ama'n akiheetmohbawl a, "Ka hi sih," achi hi. 26 Peter in a bil asaatkhiahsahpa sanggam, siampu lalpeen suaahte khat in, "Huan ah Amah toh na um khawm uh ka hung mu sih eimah?" achi hi. 27 Peter in akiheetmohbawl kiit a, huleh aah akhuang pahta hi.
Jesu Pilat Ma Ah
28 Huin amah un Jesu chu Kaiapha inn apat Praitoriam ah apuita va, huchu jiingkaal matah ahi; huleh amahuh chu Praitoriam sungah aluut sih uhi, huchilou inchu akisubuaah kha diing va, Chiahkaan an ane thei sih kha diing uhi. 29 pjiat chu a kawmvah ahung pawt a, "Hi Pa heehna bang ahiai na neih uh?" achi hi. 30 Amah un adawng va, a kawmah, "Amah migilou hi sih leh, na kawma hung pekhe het lou diing ka hi uh," achi uhi. 31 Huin Pilat in a kawmvah, "Pui unla, na daan dungjuiun vaihawmsah un," achi hi. Judate'n a kawmah, "Keiuh diingin mi suhlup daan ahi sih hi," achi uhi. 32 Hichu bangchibanga asih diing thu Jesu'n asoi ataangtun theihna diingin ahi. 33 Huin Pilat chu Praitoriam sungah aluut kiit a, Jesu akou a, a kawmah, "Judate Kumpipa na hi maw?" achi hi. 34 Jesu'n adawng a, "Hikhu nangmah lungsim a suaah na soi ahiai? Ahihlouhleh midang in ka tungtaang thu ahung hilh ahiai?" achi hi. 35 Pilat in adawng a, "Kei Juda mi ka hiaimah? Na chipihte leh siampu lalte'n nang ka kawmah ahung pekhia uhi. Bang ahiai na bawltaah?" achi hi. 36 Jesu'n adawng a, "Ka lalgam hi khovel a ahi sih. Ka lalgam hi khovel a hitaleh, Judate khut a piaahkhiah ka hih louhna diingin ka suaahte'n adou diing uhi; hizongleh ka lalgam chu hitah ahi nai sih hi," achi hi. 37 Hujiahin Pilat in a kawmah, "Ahihleh kumpipa na hi maw?" achi hi. Jesu'n adawng a, "Kumpipa na chih chu ka hi. Huleh hikhu diinga piang ka hi a, thutah heetpih diinga khovel a hung ka hi. Koipouh thutah a hi photmah in ka aw aja uhi," achi hi.
Jesu Kilhbeh Diinga Piaahkhiahna
38 Pilat in a kawmah, "Thutah chu bang ahiai?" achi hi. Huleh hikhu asoi zohin Judate kawmah apawt kiit a, a kawmvah, "Amah ah dihlouhna ka mu het sih hi. 39 Hizongleh Chiahkaan Kuut ni a mi khat ka hung hahdohsah diing ahi chih tawndaan khat na nei uhi. Hujiahin Judate Kumpipa hung hahdohsah leng na uut viai?" achi hi. 40 Huin a bawnun, "Hi Pa hilouin, Barabba jawh!" chiin akikou uhi. Barabba ahihleh suammang ahi.
1 Hujiahin Pilat in Jesu chu puiin ajeepta hi. 2 Huleh sepaihte'n ling lukhuh aphan va, a lu ah akhuhsah va, puan sandup asilhsah uhi. 3 Huin, "Chibai, Judate Kumpipa!" achi va, a khut unabeenguhi. 4 Huin Pilat chu apawt kiit a, a kawmvah, "En un, Amah ah dihlouhna ka mu sih chih na heetna diingun na kawmvah ka hung puidoh hi," achi hi. 5 Hujiahin Jesu chu linglukhuh khuh leh puan sandup silhin ahung pawtdoh a, Pilat in a kawmvah, "En un, a Mihing chu!" achi hi. 6 Huin siampu lalte leh houtute'n Amah amuh tahun, "Kros ah kilhbeh in, Kros ah kilhbeh in," chiin akikou uhi. Pilat in a kawmvah, "Nang un pui unla, kros ah kilhbeh un, ajiahchu keima'n Amah ah dihlouhna ka mu sih hi," achi hi. 7 Judate'n amah adawng va, "Daan khat ka nei uh, Pathian Tapa a akibawl jiahin ka daan dungjuiun Amah chu sitaah ahi," achi uhi. 8 Hujiahin Pilat in hu thu ajaah tahin alau seemta hi. 9 Huleh Praitoriam ah aluut kiit a, Jesu kawmah, "Khoia hung kuan na hiai?" achi hi. Hizongleh Jesu'n adawng sih hi. 10 Hujiahin Pilat in a kawmah, "Ka kawmah thu na soi sih maw? Kros a kilhbeh theihna leh hahkhiah theihna nei ka hi chih helou na hiaimah?" achi hi. 11 Jesu'n adawng a, "Tunglam akipan piaah hi sih lehchin, ka tungah bangmah bawl theih na nei sih diing hi. Hujiahin na kawma kei hung pekhepa in sualna anei lianjaw hi," achi hi. 12 Hu nungsiah Pilat in hahdohna diing lampi ahawl a, hizongleh Judate'n, "Hi Pa na chiahsaha ahihleh, Kaisar lawm na hi sih hi. Koipouh amah leh amah kumpi a kibawl chu Kaisar dou ahi," chiin akikou uhi. 13 Hujiahin Pilat in hu thu ajaah tahin Jesu ahung puidoh a, huleh vaihawmna touphah, Suanglep kichi, hizongleh Hebrai haam a Gabbatha kichi tungah atou hi. 14 Huleh hu ni chu Chiahkaan Kuut ni diinga Kisahkhawl ni ahi a, daah guupna veelin ama'n Judate kawmah, "En un, na Kumpipa uh!" achi hi. 15 Hizongleh amahuh chu akikou va, "Sumang in, sumang in, kros ah kilhbeh in," achi uhi. Pilat in a kawmvah, "Na Kumpipa uh ka kilhbeh diing maw?" achi hi. Siampu lalte'n, "Kaisar loungaal kumpi dang ka nei sih uh," chiin adawng uhi. 16 Hujiahin Pilat in Jesu chu kros a kilhbeh diingin a kawmvah apekheta a, sepaihte'n Jesu chu atu va, apuita uhi.
Jesu Kros a Kilhbehna
17 Huleh Amah chu a kros kipuaahin Luguh mun kichi, Hebrai haam a Golgotha kichi mun ah achiah a, 18 hutah ah Amah chu midang nih toh kros ah akilhbehta va, a gei geel ah khat tuaah, Jesu alai ah. 19 Huleh Pilat in heetsahna khat agial a, kros tungah ataah a, akigial chu: NAZARETH JESU, JUDATE KUMPIPA, chih ahi. 20 Huchiin Jesu akilhbehna uh khopi naih ahih jiahin hu heetsahna chu Judami tampite'n asim uhi. Huleh hichu Hebrai haam, Grik haam leh Latin haam a kigial ahi. 21 Huin Judate siampu lalte'n Pilat kawmah, "'Judate Kumpipa,' chiin gial sinla, 'Amah in, "Judate Kumpipa ka hi" achi,' chiin gial jaw in," achi uhi. 22 Pilat in adawng a, "Ka gelhzoh chu, ka gelhzoh ahi mei," achi hi. 23 Huin Jesu chu kros a akilhbeh zohun sepaihte'n a puansilhte ala va, khat chiat a atan diingun phel li asuah va, huleh a puannaah zong ala uhi; a puannaah chu akhuina bei ahi a, a ngawng apat apuma gat veh ahi. 24 Hujiahin amah un, "I botkeeh sih diing a, kuan tang diing ahiai ai i saan diing uh," chiin akihou uhi. Pathian Lehkhathu in, "Ka puansilhte a lahvah ahawm va, ka silhleteen diingin ai asaan uhi," achih ataangtunna diingin. Hujiahin hi silte sepaihte'n abawl uhi. 25 Huleh Jesu kros kawmah a nu leh a nu sanggamnu, Kleopa ji Mari leh Mari Magdalini ading uhi. 26 Huin Jesu'n a nu leh nungjui alungsiatpa a kawma ding amuh tahin, a nu kawmah, "Numei, en in, na tapa!" achi hi. 27 Huin a nungjuipa kawmah, "En in, na nu," achi hi. Hu hun apatin hu nungjuipa'n amahnu chu a inn ah apuita hi.
Jesu Sihna
28 Hi nungin Jesu'n sil bangkim tuin bawlzoh veh ahita chih hein Pathian Lehkhathu ataangtunna diingin, "Ka dang ataah," achi hi. 29 Hutah ah beel uain thuuh a dim khat akitung a, spanji khat uain thuuh in asudim uhi. Huleh hussop chiang in ataah va, a kam ah akoihtou uhi. 30 Huin Jesu'n uain thuuh achep zohin, "Zoh ahita," achi hi. Huin a lu akuun a, a hagau ahahta hi. 31 Huleh Kisahkhawl ni ahih jiahin a luangte uh Sabbath ni a kros dawn a aum louhna diingin Pilat kawmah a keengte uh suhgawpsah a, a luang uh lamang diingin angeen uhi, ajiahchu Sabbath ni chu ni loupi ahi. 32 Hujiahin sepaihte ahung va, akikilhbehpih masapeenpa leh a khatpa a keeng uh asuhgawpsah uhi. 33 Hizongleh Jesu kawm ahung phaah tahun Amah anasi zouta chih ahung muh un, a keengte asuhgawpsah sih uhi. 34 Hizongleh sepaihte laha khat in teipi in a naah asun a, hutah ah sisan leh tui ahung pawtdoh pah hi. 35 Huleh hikhu mupa'n aheetpihta a, a sil heetpih chu adih ahi; huleh na gintaat theihna diingun ama'n thutah asoi hi chih ama'n ahe hi. 36 Ajiahchu Pathian Lehkhathu in, "A guh khat zong suhgawp ahi sih diing," achih chu ataangtun theihna diingin hi silte ahung umta ahi. 37 Huleh Pathian Lehkhathu dang in, "Amah un asutpa uh aen diing uh," achi hi.
Jesu Vuina
38 Hi nungin Joseph, Arimathia mi, Jesu nungjui, hizongleh Judate alauh jiaha aguuha juipa in, Jesu luang alaah theihna diingin Pilat kawmah avangeen a, Pilat in anaphal hi. Hujiahin amah chu ahung a, Jesu luang alata hi. 39 Huleh Nikodem, a tuung a jaan a Jesu kawma hung pa zong ahung a, murrah leh aloe thau litra za khat veel ahung tawi hi. 40 Huin Jesu luang ala va, Judate kivui ngeina bangin silgimtuui toh puan malngaat in atuam uhi. 41 Huleh kros a akilhbehna mun vah huan khat aum a, hu huan ah haan thah khat koimah kivui ngeilouhna aum hi. 42 Huchiin Judate Kisahkhawl ni ahih jiah leh haan anai jiahin hutah ah Jesu chu asialta uhi.
Jesu Thohkiitna
1 Huin hapta ni masapeen in, jiingkaal khua mial nalaiin Mari Magdalini chu haan ah ahung a, huleh haan apat suang kiladoh amuta hi. 2 Huin ataai a, Simon Peter leh Jesu'n alungsiat nungjui khatpeen kawmah ahung a, a kawmvah, "Haan apatin Lalpa alamangta va, khoitaha akoih uh akihe sih," achi hi. 3 Hujiahin Peter chu apawtdoh a, nungjui dang khatpeen toh, haan lam juanin ahung uhi. 4 Huchiin anihun ataai khawm va, nungjui khatpeen in Peter amakhelh a, haan ahung tung masa hi. 5 Ama'n kuunin aen a, puan malngaat amu a, ahihvaangin a sungah aluut sih hi. 6 Huleh Simon Peter chu a nungin ahung tung a, haan sungah aluut a, puan malngaatte amu hi. 7 Huleh a lu tuamna puan chu puan malngaat toh umkhawm lou a, atuama kijiala mun khat a um amu hi. 8 Huin haan tung masa nungjui dangpeen zong a sungah aluut a, amu a agingtata hi. 9 Ajiahchu amah un misi lah apat Amah athoukiit diing ahi chih Pathian Lehkhathu ahe nai sih uhi.
Mari Magdalini Kawma Jesu Kilaahna
10 Huin nungjuite chu a inn lamvah achiah kiitta uhi. 11 Hizongleh Mari chu haan pua ah kapin ading a, huleh akah pumin akuun a, haan sung aen a, 12 huleh Jesu luang kisialna mun ah puanvaam silh angel nih, khat a lu lamah, khat a keeng lamah touin amu hi. 13 Amah un a kawmah, "Numei, bang diinga kap na hiai?" achi uhi. Amahnu'n a kawmvah, "Ka Lalpa alamangta va, huleh a koihna uh ka heet louh jiahin ahi," achi hi. 14 Huchia asoi zohin akinunghei a, Jesu ding amu a, hizongleh Jesu ahih ahe sih hi. 15 Jesu'n a kawmah, "Numei, bang diinga kap na hiai? Koi ahiai na hawl?" achi hi. Amahnu'n huan veengtupa sain a kawmah, "Pu, hitah apat Amah na puaahmang ahihleh, na koihna hung hilh in, huchiin ka la diing," achi hi. 16 Jesu'n a kawmah, "Mari!" achi hi. Amahnu chu akihei a, a kawmah, "Rabboni!" achi hi, (huchu, Houtupa chihna ahi). 17 Jesu'n a kawmah, "Hung tuzing sin, ajiahchu ka Pa kawmah ka chiahtou nai sih hi; hizongleh ka unaute kawmah chiah inla a kawmvah, 'Ka Pa leh na Pa uh, ka Pathian leh na Pathian uh kawmah ka chiahtou diing hi,' vachi in," achi hi. 18 Mari Magdalini chu ahung a, nungjuite kawmah Lalpa amuh thu leh hi silte Ama'n a kawmah asoi hi chih ahilhta hi.
Nungjuite Kawma Jesu Kilaahna
19 Hu ni mah, hapta ni masapeen nitaah in, Judate lau jiaha nungjuite umna kotte akikhaah nungin Jesu ahung a, a laivah ading a, a kawmvah, "Na tungvah hamuana um heh," achi hi. 20 Huchia asoi zohin a khutte leh a naah chu a kawmvah alah a, hujiahin nungjuite'n Lalpa amuh tahun akipaahta uhi. 21 Huin Jesu'n a kawmvah, "Na tungvah hamuanna um heh! Ka Pa'n ahung sawl mahbangin nanguh zong ka hung sawl hi," achi kiit hi. 22 Hikhu asoi zohin a tungvah huu ahaihkhum a, a kawmvah, "Hagau Siangthou tangta un. 23 Koi sualna zong na ngaihdam phot uh ngaihdam ahi diing a; koi sualna zong na ngaihdam louh phot uh ngaihdam louh ahi diing," achi hi.
Thomas Kawma Jesu Kilaahna
24 Hizongleh Thomas, Diduma kichi, sawmlenihte laha khat chu Jesu hung laiin akawmvah aumsih hi. 25 Hujiahin nungjui dangte'n a kawmah, "Lalpa ka muta uh," achi uhi. Hizongleh ama'n a kawmvah, "A khut siihkilhna pawnte ka muh a, siihkilhna pawn sunga ka khutzung ka guan a, huleh a naah a ka khut ka thun louh leh, ka gingta sih diing," achi hi. 26 Huleh ni giat nungin nungjuite inn sungah aum kiit va, Thomas zong a kawmvah aum hi. Huin kot kikhaah hi ngaalin Jesu ahung a, a laivah ading a, "Na tungvah hamuanna um heh," achi hi. 27 Huin, Ama'n Thomas kawmah, "Na khutzung in hung sawh inla, ka khutte en in, huleh na khut in baan inla, ka naah sawh in, gingta louin um sinla, gingtata in," achi hi. 28 Thomas in adawng a, a kawmah, "Ka Lalpa leh ka Pathian!" achi hi. 29 Jesu'n a kawmah, "Thomas, nang in chu na hung muh jiahin na gingta ahi a, muloua gingtate ahampha uhi," achi hi.
Johan Tanchinpha Kigelhna Jiah
30 Huleh hi lehkhabu a kigial lou chiamchihna dang tampi Jesu'n a nungjuite ma ah abawl hi. 31 Hizongleh hite chu nang un Jesu chu Khrist, Pathian Tapa ahi chih na gintaatna diing uh leh na gintaat jiahva a min a hinna na neihna diingva kigial ahi.
Tiberia Diil a Jesu Kilaahna
1 Hi silte nungin Jesu chu Tiberia Diil ah, a nungjuite kawmah akilaah kiit a, hitobangin akilaah hi: 2 simon Peter toh, Thomas, Diduma kichi toh, Galili gam a Kana khua a um Nathanael toh, Zebedi tate toh, huleh a nungjui dang nih umkhawn ahi uhi. 3 Simon Peter in a kawmvah, "Ngamanin ka chiah diing," achi hi. Amah un a kawmah, "Keiuh zong na kawmah ka hung diing uh," achi uhi. Huin achiahdoh va, kuang khat sungah atou pah va, hu jaan in bangmah aman sih uhi. 4 Hizongleh jiingkaal ahung hihin Jesu chu diil pangah ading a, ahihvaangin nungjuite'n Jesu ahi chih ahe sih uhi. 5 Huin Jesu'n a kawmvah, "Naute, neeh diing bang aha na nei viai?" achi hi. Amah un, "Nei lou," chiin adawng uhi. 6 Huin Jesu'n a kawmvah, "Kuang jiatlam ah sep leh uh chin, na man diing uh," achi hi. Huin amah un asep va, huchiin nga atam mahmah jiahin akaidoh zouta sih uhi. 7 Hujiahin Jesu'n a lungsiatpa'n Peter kawmah, "Lalpa ahi," achi hi. Huin Simon Peter in Lalpa ahi chih ajaah tahin a puannaah tungnung asilh a (ajiahchu saguaaha um ahi), huin diil ah atawmluutta hi. 8 Huleh nungjui dangte chu leen a nga awhte kai kawmin, kuang neu khat in ahung uhi, ajiahchu piaugaw apat gamlataha um ahi sih va, fit za thum giap ahi. 9 Huin piaugaw ahung tun tahun amah un suangmeihol kichih leh a tunga nga leh tanghou kikoih amu uhi. 10 Jesu'n a kawmvah, "Tua na nga matte uh khenkhat hung tawi un," achi hi. 11 Simon Peter chu achiah tou a, nga lianpipi za leh sawmngaa leh thum a dim leen chu piaugaw ah ahung kaidoh hi. Huchilawma tam hizongleh leen chu akeeh sih hi. 12 Jesu'n a kawmvah, "An hung ne un," achi hi. A nungjuite'n Lalpa ahi chih aheet jiahun koimah in, "Koi na hiai?" achi ngam sih uhi. 13 Hujiahin Jesu ahung a, tanghou ala a, a kawmvah apia a, hutobangmahin ngate zong apia hi. 14 Huchu Jesu'n sihna apat athohkiit nunga a nungjuite kawma akilaah a thumveina ahi. 15 Huchiin an aneeh zohun Jesu'n Simon Peter kawmah, "Simon, Jonah tapa, hite saangin kei na hung lungsiat jaw ei?" achi hi. Ama'n a kawmah, "Hi, Lalpa; ka hung lungsiat ahi chih na he hi," achi hi. Jesu'n, "Ka belaamnoute vaah in," achi hi. 16 Jesu'n anihveina in a kawmah, "Simon, Jonah tapa, na hung lungsiat ei?" achi hi. Simon in a kawmah, "Hi, Lalpa; ka hung lungsiat ahi chih na he hi," achi hi. Jesu'n a kawmah, "Ka belaamte ching in," achi hi. 17 Jesu'n a thumveina in a kawmah, "Simon, Jonah tapa, na hung lungsiat ei?" achi hi. Jesu'n a kawma thumvei, "Na hung lungsiat ei?" achih jiahin Peter chu alungkham hi. Huin ama'n a kawmah, "Lalpa, nang in sil zousiah na he a; ka hung lungsiat ahi chih na he hi," achi hi. Jesu'n a kawmah, "Ka belaamte vaah in. 18 Chihtahzetin, chihtahzetin ka hung hilh ahi, na naupan laiin nang leh nang na kawng na kigaah a, na uutna lamlam ah na chiah veu hi. Hizongleh na hung upat chiangin chu na khut na jaah diing a, midang in ahung gaah diing a, na uutlouhna lamlam ah ahung pui diing hi," achi hi. 19 Hichu Ama'n bangtobang sihna in ahiai ama'n Pathian apaahtawi diing chih heetsahna diinga asoi ahi. Huleh hikhu asoi zohin Ama'n a kawmah, "Hung jui in," achi hi. 20 Huleh Peter akinunghei a, Jesu'n alungsiat nungjuipa in amahuh hung juiin amu hi. Hi pa chu nitaah an neehna a Jesu aang a kingaai a, "Lalpa, koi ahiai nang hung mansah diing?" chipa ahi. 21 Peter in amah amuh tahin Jesu kawmah, "Lalpa, hi pa bangchi diing ahiai?" achi hi. 22 Jesu'n a kawmah, "Ka hung masiaha amah um diinga ka deih leh, hukhu nang diingin bang ahiai? Nang hung jui in," achi hi. 23 Hujiahin hu nungjuipa chu asi sih diing chiin unaute lahah hi thu kisoi chu athang vengvungta hi. Jesu'n lah a kawmah amah asi sih diing, achi sih a, hizongleh, "Ka hung masiaha amah um diinga ka deih leh, hukhu nang diingin bang ahiai?" chi ahijaw hi. 24 Hi silte heetpih leh gelhtu chu hi nungjuipa ahi a, huleh a heetpihna chu adih ahi chih ka he uhi. 25 Huleh Jesu'n abawl sildang tampi zong aum hi. Hute gelh kim veh diing hitaleh, lehkhabu kigial diingte chu khovel in zong dawllou diingin ka ngaihtuah hi. Amen.
Hagau Siangthou Chiamna
1 Aw Theophil, tuma a ka lehkhabu ah, Jesu silbawl leh a thuhilhte zousiah, 2 ateeltuam apostolte kawma Hagau Siangthou tungtawna thupisaahte apiaah zoh a, vaan lam a laahtouha aum ni tan tanchin ka hung gialta hi. 3 Hu apostolte kawmah gentheihna athuaah nungin heetchianna tamtah toh apostolte kawmah hingin Amah akiensah a, ni sawmli zet a kawmvah akilaah a, Pathian lalgam thu asoi zing hi. 4 Amahuh toh akimuhkhawmna khat ah, Ama'n Jerusalem nuse lou diingin, hizongleh Pa silchiam khu ana-ngaah diingin thu apia a, "Hu ka soi na ja uhi; 5 ajiahchu Johan in tui ah abaptis ngeei a, hizongleh nanguh chu ni sawtlou sungin Hagau Siangthou in baptis-in na um diing uhi," achi hi.
Jesu Vaan a Kaltouhna
6 Huleh amah un ahung kikhop tahun a kawmah, "Lalpa, tuin ahiai Israelte kawma lalgam na tunding kiit diing?" chiin adong uhi. 7 Huleh Ama'n a kawmvah, "Pa'n a hun leh a ni Amah thuthu a um diinga aguat chu, nang un na heet diing uh ahi sih hi. 8 Hizongleh na tungva Hagau Siangthou ahung tun chiangin silbawltheihna na nei diing uhi; huchiin Jerusalem ah, Judia leh Samaria gam zousiah ah, huleh khovel kawlmong tanpha in zong ka thu heetpihtute na hi diing uh," achi hi. 9 Huleh Ama'n hi thute asoi zohin, amuh ngeeiun vaan a puitouhin aum a; meilum in amuh phaahlouh vah apuitouta hi. 10 Apai touh lai a, amah un vaan lam aetzing laiun, en in, mi nih puan vaam silhin a kawmvah ahung ding va; 11 hute'n chu, "Nanguh Galili gam a mite bang diinga vaan lam en zinga ding na hi viai? Hi Jesu na kawm vapat a vaan a puitouha um hi, vaan a achiah na muh mahbangun, Amah ngeei ahung kiit diing hi," achi uhi.
Matthia Teelna
12 Huin Olive kichi taang apatin Jerusalem ah akihkiitta va; huchu Jerusalem kawm ahi a, Sabbath ni a chiah theihna tan ahi. 13 Huleh a umna uh pindan tungnung a chiahtouin aluut va, hutah a umte chu Peter, Jakob, Johan, Andru, Philip, Thomas, Bartholomai, Mathai, Alphai tapa Jakob, Simon Zelot leh Jakob tapa Juda ahi uhi. 14 Amahuh chu numeite leh Jesu nu Mari toh, a sanggamte toh lungsim munkhat puain phatuamngaitaha ngetsah leh haamteiin aum zing uhi. 15 Hu hun laiin Peter chu nungjuite lai ah ading a (a bawnun za leh sawmnih veel ahi va), 16 "Ulenaute, Hagau Siangthou in Jesu mantute lamkaipa Juda thu David kam a anasoilawh hi Pathian Lehkhathu khu ahung taangtung diing mawng ahi; 17 ajiahchu, amah hi i lahva simtel anahi a, huleh hi natohna ah tanvou ananei hi." 18 (Hi pa'n a dihtatlouhna man in gam khat alei a, a bungbuin akia a, alai ah apawhkeeh a, a gil zousiah apawt vehta hi. 19 Hu thu chu Jerusalem a umte zousiah in anahe va, huchiin hu gam chu amahuh haam in Akeldama, achi uhi, huchu Sisan Mun, chihna ahi.) 20 "Ajiahchu Phatna Late ah hi thu gelh ahi, 'A teenna hawmsuaah henla, a sungah kuamah teeng sih heh'; huleh 'A natohna mun midang in tang heh,' chih ahi. 21 Hujiahin, Lalpa Jesu i lahva hun chintenga aum lai hun zousiah a, 22 j0 han baptisma apat i lah vapat vaan a puitouha aum ni tanpha a ahung na kithuahpihte laha mi khat, a thohkiitna hung theihpihtu diing aum ngeeingeei diing ahi," achi hi. 23 Huin mi nih aguat uhi: Joseph, Barsaba kichi, Jasta chiha zong akouhpa uh leh Matthia ahi uhi. 24 Huleh ahaamtei va, "Nang, Lalpa, mihing zousiah lungtang hetu, mi nihte lahakuajaw ahiai na teel, hung hesah in, 25 hichu Juda in amah mun azot theihna diinga apuuhsansa natohna leh apostol hihna mun chu luah diingin," achi uhi. 26 Huleh ai asaansah va, a aisaan uh chu Matthia tungah atu a; huchiin amah chu apostol sawmlekhatte toh simtel ahita hi.
Hagau Siangthou Piaahna
1 Huleh Pentikost ni ahung tun tahin, lungsim munkhat puain a bawnun mun khat ah aum khawm uhi. 2 Huleh thakhatin vaan akipanin thawm ging, huihpi nasatah nung bangin ahung um a, hukhu in chu a touna inn uh asudim veh hi. 3 Huleh meikuang lei tobangte chu amah leh amah kihawmkhenin a kawmvah ahung kilang a, a tung chiat vah ahung umta hi. 4 Huleh a bawnun Hagau Siangthou in adimta va, Hagau in ahaamsah bangjeelin haam dang in ahung haam panta uhi. 5 Vaan nuai a jaat zousiah lah apat Pathian ngaihsah Juda haw Jerusalem ah aum uhi. 6 Huleh hu ging ajaah tahun mipi ahung kikhawm va, huleh ahaam uh mi zousiah in amahuh haam chiat a ajaah jiahun limdang asa uhi. 7 A bawnun amangbang va, thumah asa mahmah va, akihoutuah va, "Endihvua hia haam haw zousiah Galili gam a mi ngen hilou ahi uh maw? 8 Bangchidaan ahiai i bawnva i pianpih haam a i jaah chiat uh? 9 Khenkhat Parthiate, Mediate, Elamte, Mesopotamia gam a teengte, Judia leh Kappadosia, Ponta leh Asia, 10 Phrigia, Pamphilia, Aigupta, huleh Kureni kho kawm veela Libya gam a umte i hi va, huleh khenkhat Rom khua apat hung zinte, Judate leh Juda sahkhua a kiheite, 11 Krit mite leh Arab mite bang i hi ngaal va, hizongleh Pathian silbawl loupite asoi uh eimah haam chiatin i ja uh," achi uhi. 12 Huleh a bawnun thumah asa va, angaihna ahe sih va, "Bangchihna ahita ei?" achi uhi. 13 Khenkhat in anuihsan va, "Uain thah kham hi uh e," achi uhi.
Mipi Ma a Peter Thusoi
14 Hizongleh Peter chu sawmlekhatte toh ading khawm a, aw ngaihtahin a kawmvah asoi a, "Nanguh Judia mite leh Jerusalem a um zousiahte haw, hi thu he unla, ka thu zong ngai un. 15 Ajiahchu amah un na gintaat bangun akham sih uhi, daah thumna ahi pan hi. 16 Hizongleh hite zawlnei Joel in anasoi chu ahi: 17 'Pathian in, ni nunungte ah hichi ahung hi diing, mi zousiah tungah ka Hagau ka leih diing a, na tapate leh na tanute un zawlnei bangin thu asoi diing va, na tangvaalte un kilaahna amu diing va, huleh na teehsete un mang aman diing uhi. 18 Huleh hu hun chiangin ka suaahpate leh ka suaahnute tungah zong ka Hagau ka leih diing a, zawlnei bangin thu asoi diing uhi. 19 Huleh tunglam vaan ah sil loupite, nuailam lei ah chiamchihnate ka musah diing a, sisan leh mei leh meikhu lompi toh. 20 LALPANi chijaathuai leh loupi chu ahung tun main, ni chu suhmial ahi diing a, ha chu sisan suaahsah ahi diing hi. 21 Huleh hichi ahung hi diing a, LALPA min kou photmah chu hutdamin aum diing hi,' achih bangin. 22 Nanguh Israel mite, hi thute ngai un, Nazareth Jesu chu Pathian in Amah zanga na lahva silmahte, silloupite leh chiamchihna abawlte apatin Pathian kipaahpih Mi ahi chih ahesah hi, huchu nang un zong na he uhi; 23 Amah chu Pathian lemguat mawng leh heetlawh bangin piaahkhiah ahi a, misualte khut in kros ah na kilhbeh va, na sulumtauh; 24 sihna tuuhden gual ahihlouh jiahin Amah chu Pathian in sihna natna phelsahin, akaithouta hi. 25 Ajiahchu David in a tungthu asoi a: 'LALPA chu bangchihlaipouhin ka ma ah ka mu zing a; suhliinga ka um louhna diingin Amah chu ka jiatlam ah aum hi. 26 Hujiahin ka lungtang akipaah a, ka lei zong anuam a; hulou ah ka tahsa zong kineemtahin ahing diing hi. 27 Ajiahchu ka hagau Misi Khua ah na nuse sih diing a, na Misiangthou chu muatna mu diingin na phal saam sih diing hi. 28 Nangmah in hinna lampi na hung hesah a, na ma ah kipaahna in na hung sudim zing diing,' chiin. 29 Ulenaute, nampa David thu hi kimuangtahin na kawmvah ka soi thei hi. Amah chu asi a, vui zong avuita va, a haan zong tuni tanin i kawmvah aum nalai hi. 30 Hujiahin zawlnei ahihjiah leh Pathian in kichiam a amah kawma thu anachiamta tahsa daana amah tahsa ngeei chihaah, a laltouphah a tou diingin Khrist akaithou diing chih atheih jiahin, 31 ama'n hichu anamulawh a, Khrist thohkiit diing thu asoi ahi, Khrist hagau Misi Khua ah nuutsiatin aum sih a, a tahsa in zong muatna amu sih hi, chiin. 32 Hi Jesu chu Pathian in akaithou kiitta a, huchu ka bawnun heetpihtute ka hi uhi. 33 Hujiahin Pathian khut jiatlam a paahtawia aum zohin, huleh Pa apat chiamsa Hagau Siangthou amuh zohin, Ama'n tua na muh uh leh na jaah uh chu ahung leih ahi. 34 Ajiahchu David chu vaan ah akaltou sih a, hizongleh amah ngeei in, 'LALPA'N ka Lalpa kawm ah, "Ka jiatlam ah tou in, 35 na meelmate na keeng ngahna a ka bawl masiah, achi hi," achi jaw hi.' 36 Hujiahin hi Jesu na kilhbeh ngeei uh chu Pathian in Lalpa leh Khrist hi khawmin abawlta chih, Israel nam zousiah in chiantahin he uh heh," achi hi.
Gingtu Masate
37 Huleh hi thu ajaah tahun a lungtang va sut bang ahung hita va, Peter leh apostol dangte kawmah, "Ulenaute, bangchibangin ka bawlta diing viai?" achi uhi. 38 Huin Peter in a kawmvah, "Kisiihin lunghei unla, na sual uh ngaihdam ahihna diingin Jesu Khrist min in baptisma tang chiat un, huchiin Hagau Siangthou silpiaah na tang diing uhi. 39 Ajiahchu a thuchiam chu nanguh diing zong, na tate uh diing zong, gamlataha um zousiah a diingin zong Lalpa i Pathian in a kawma akouh photmahte a diing zong ahi," achi hi. 40 Huleh thudang tamtah in ahilhchian a, "Hi khang paisualte lahah kihuumbit un," chiin ahasuan hi. 41 Huin a thu kipaahtaha pom photmah in baptisma atang va; hu ni in mi saang thum veela behlapin aum uhi.
Kouhtuam Masate Kipawlkhawm Daan
42 Huleh apostolte thuhilhna leh kipawlkhawmna ah, tanghou balkeehin haamteiin phatuamngaitahin aum zingzing uhi. 43 Huleh mi zousiah in alauta va; apostolte'n silmahte leh chiamchihna tamtah abawl uhi. 44 Huleh agingta zousiah akipumkhat va, silbangkim a neih uh akikop uhi. 45 Huleh a silneih uh leh a van uh ajuaah va, a kisapna bangun a bawnva lahah ahawm jeel uhi. 46 Huin ni chinin lungsim munkhat in Pathian biahinn ah aum jeel va, a inn lam haw vah zong tanghou balkeehin kipaahtah leh lungsim siangtahin a an uh ane jeel va; 47 pathian apaahtawi va, mi zousiah deihsahin aum uhi. Huleh hutdamna hung mu photmahte Lalpa'n ni chinin a kikhopna vah abehlapsahjeelhi.
Khutdoh Keengbai Suhdamna
1 Huleh ni khat chu Peter leh Johan chu daah kuah in, haamtei hun laiin, Pathian biahinn ah achiah tou uhi. 2 Huleh koiaha pasal khat, a pian chiil apat keengbai ahung jawng va, hu pa chu Pathian biahinn a luutte kawma khutdoh diingin, biahinn kotkhaah Kilawm achih uh bul ah ni chinin alumsah veu uhi. 3 Huchiin Peter leh Johan Pathian biahinn a luut diing amu a, khut anadoh hi. 4 Huin Peter in Johan toh amah hah etin aen va, Peter in, "Kei uh hung en in," achi hi. 5 Ama'n amahuh apat bang aha muh kineemin amahuh aen hi. 6 Huin Peter in, "Dangka leh sana bangmah ka nei sih, hizongleh ka neihsun ka hung pe diing: Nazareth Jesu Khrist min in thou inla keeng in chiah in," achi hi. 7 Huin a khut jiatlam a tuin akaithou a, thakhatin a keengte leh a siaahguhte ahung haat pahta hi. 8 Huchiin amah chu adiangdoh a, ading a, keeng in apai hi; huleh keeng a paiin leh kidiangin Pathian paahtawi kawm jeelin, amahuh toh Pathian biahinn ah aluutta hi. 9 Keeng a apai leh Pathian apaahtawi mi zousiah in amu uhi. 10 Amah un Pathian biahinn Kotkhaah Kilawm bul a khutdoha tou veupa ahi chih ahe va, huleh a tunga sil tung limdang asa mahmah uhi.
Solomon Innliim a Peter Thusoi
11 Huleh keengbai hung dampa'n Peter leh Johan atuuh laiin, mi zousiah in limdang asa mahmah va, Solomon innliim achih uh mun ah ahung taaikhawm uhi. 12 Peter in hu amuh tahin, mite ahoupih a, "Nanguh Israel mite, hikhu bang diinga limdangsa na hi viai? Ahihlouhleh keiuh silbawltheihna leh Pathian ka ngaihsah jiahva amah ka paisah uh bang hiala bang diinga hung en zing na hi viai? 13 Abraham, Isak, Jakob Pathian, i pulepate Pathian in, a Suaah Jesu atawisangta hi. Amah na mansah va, Pilat in hah atupin zong Pilat ma ah na nuai uhi. 14 Misiangthou leh Dihtat chu na nuai va, tualthatpa chu na kawmva piaah na ngeen jawta uhi. 15 Hinna Lai chu na that va; hizongleh Pathian in Amah chu misi lah apat akaithou kiit a, hu heetpihtute ka hi uhi. 16 Jesu min ginna jiahin, tu a na muh uh leh na heet uh hi pa chu Amah min in asuhaat ahi; huleh Amah tungtawna ginna hung kuan khu in na bawnva mitmuh ah hi pa asudam bukimta hi. 17 "Tuin unaute, na heetlouh jiahun hi na bawl uh ahi chih ka he a, na vaihawmtute un zong hichibangin anabawl uhi. 18 Hizongleh Pathian in a zawlnei zousiah kam a Khrist in athuaah ngeei diing chia anaphuanlawhsa chu, huchibangin ataangtungsahta hi. 19 Hujiahin kisiih unla, na sualte uh nawtmang ahih theihna diingin kiheikiit un, huchiin Lalpa kawm apat halh hunte ahung tung thei diing a, 20 huchiangin hun paisa a na kawmva phuandoha um Jesu Khrist ahung sawl diing hi. 21 sil bangkim siamhoihna hun atun masiah Amah chu vaan in akol tadih diing hi, hu siamhoihna hun diing chu Pathian in leilung pianchiil apat a zawlnei siangthoute kam in asoi zouta hi. 22 Ajiahchu Mosi ngeei in i pulepate kawmah, 'LALPA Pathian in keimah ahung tundoh bangin na unaute lahah Zawlnei khat ahung tungdoh diing hi. Ama'n na kawmva asoi zousiah chu na ngaihkhiah ngeeingeei diing uh ahi. 23 Huleh hichi ahung hi diing a, mi kuapouh hu Zawlnei thu ngaihsahlou chu mite lah apat suhmangthaai ahi diing uhi,' achi hi. 24 "Ahi, Samuel apat zawlnei zousiah leh a nung va thu anasoi photmahte'n huchibangin, tulai hun tanchin anasoilawh chiat uhi. 25 Nanguh chu zawlneite tate leh Pathian in thuhun anabawlpih i pulepate uh tate na hi uh, Abraham kawmah, 'Na chihaah jaalin khovel a innkuan zousiah vangpiaahin aum diing uh,' achi hi. 26 pathian in a Suaah Jesu kaithouin, na giitlouhnate vapat hung kiheisah diing leh vaang hung pe diingin nanguh kawmah ahung sawl masapeen ahi," achi hi.
Peter leh Johan Vaihawmtute Ma ah
1 Huleh Peter leh Johan in mite kawma thu asoi laiun, siampute leh Pathian biahinn houtute leh Sadukaite ahung va, 2 mi athuhilh jiah uh leh Jesu jaala misi lah apat a thohkiitna thu ahilh jiahun alungkimta sih uhi. 3 Huin aman va, nitaahlam ahih jiahin ajiingni tanphain suangkul ah akhumta uhi. 4 Hizongleh thu ngaikhete laha tamtahin agingta va; atamdaan uh chu pasal ngen zong saang ngaa veel apha uhi.
Vaihawmtute Ma a Peter Thusoi
5 Huleh hichi ahung hi a, ajiingni in, a houtute uh leh upate leh daanjilsahtute leh 6 siampu lalpeen Anna leh Kaiapha leh Johan leh Alexandar leh siampu lalpeenchipihtampichuJerusalem ah akikhawm uhi. 7 Huleh Peter leh Johan chu a laivah adingsah va, "Bang silbawltheihna in ahiai, ahihlouhleh koi min in ahiai hibang na bawl uh?" chiin adong uhi. 8 Huin Peter chu Hagau Siangthou in adim a, a kawmvah, "Nanguh mipi houtute leh Israel upate haw, 9 kei un mihaatlou khat tunga sil hoih ka bawl va, ahung dam jiaha, tuni a etkhiaha ka um uh leh, 10 na bawnun he unla, Israelmi zousiah in zong he un, huchu Nazareth Jesu Khrist, kros a na kilhlup uh, Pathian in misi lah apat akaithouta a, Amah min ngeei in hi pa chu na ma vah damin adingta ahi. 11 Hi Jesu chu 'nanguh innlamtute'n na suang deih louh uh, aning a suang poimohpeen ahung hita hi.' 12 "Midang kuamah kawmah hutdamna aum sih; ajiahchu vaan nuai a mihingte kawma kipia min lahah hung hundam diing min dang mawngmawng aum sih," achi hi.
Jesu Min a Thuhilh Akhap uh
13 HulehPeterlehJohanhaansan daan amuh va, lehkhasiamlou leh siamna neilou ahi uh chih aheet tahun, thumah asa mahmah va, huleh Jesu toh ana-umta uh chih aheta uhi. 14 Huleh suhdama umpa a kawmva ding amuhun bangmah asoiseel thei tuan sih uhi. 15 Hizongleh a vaihawmna vapat, pawtdoh diinga thu apiaah nungun akihou va, 16 "Hi mite bang i lohta diai? Ajiahchu chiamchihna heet thamtah amah uh tungtawna kibawl chu Jerusalem a um zousiah kawmah alang chiang mahmah a, ei un zong i nial thei tuam sih uhi. 17 Hizongleh mi kawma akithan seem louhna diingin, tukalsiah hi min a koimah kawma thu asoi nawn louhna diingun i vau diing uh," achi uhi. 18 Huchiin amahuh akou va, Jesu min a thu soi kiit het lou diing leh thu hilh kiit nawnlou diingin thu apia uhi. 19 Hizongleh Peter leh Johan in adawng va huleh a kawmvah, "Pathian mitmuhin Pathian thuman saangin nanguh thuman adih ahi diai, nang un ngaihtuah un. 20 Ajiahchu kei un jaw ka sil muh uh leh ka jaahte uh soi louin ka vom thei sih uh," achi uhi. 21 Huin amahuh naahtaha avau zohun, mipi jiah leh gawtna diing san amuhlouh jiahun ahahta uhi, ajiahchu hu siltungte jiahin mi zousiah in Pathian apaahtawi uhi. 22 Ajiahchu chiamchihna a suhdama umpa chu kum sawmli saanga tamjaw ahita hi. Gingtute'n Hangsanna Angetna uh 23 Huleh Peter leh Johan hahdoha aum tahun a lawite uh kawmah achiah va, siampu lalte leh upate'n asoi zousiah uh ahilh uhi. 24 Huleh amah un ajaah tahun, kituaahtah leh aw ngaihtahin Pathian kawmah, "Lalpa, nang chu vaan leh leite, tuipi leh a sunga um zousiah siamtu Pathian na hi. 25 Nang in na suaahpa David kam in hi thu na soi hi: 'Bang diinga Jentelte hel ahi viai? Huleh bang diinga mite'n sil phatuamlou suangtuah ahi viai? 26 Leitung kumpipate akisa suausuau va, huleh vaihawmtute'n zong LALPA leh a Khrist tungah thu aphial uhi,' chiin. 27 "Ajiahchu na Suaah siangthou, na thaunuh Jesu kalhin Herod leh Pontia Pilat chu Jentelte leh Israel mite toh akikhawm tahzet uh, 28 na silbawltheihna khut leh na lungsim a hung tung diinga na guatlawh taphot bawl diingin. 29 Huleh tuin, Lalpa, ahung vaudaan uh en in, na suaahte'n hangsanna zousiah toh na thu asoi theihna diing uh pia in, 30 mite sudam diinga na khut na zandohin, na Suaah siangthou Jesu min jaalin chiamchihna leh sil loupite ahung um hi," achi uhi. 31 Ahaamtei zohun aum khawmna uh ahung kiliing a; a bawnun Hagau Siangthou in ahung dim vehta va, huchiin Pathian thu chu hangsantahin asoita uhi.
Jerusalem Kouhtuam
32 Huleh agingta mipite chu, lungtang munkhat leh lungsim munkhat in aum uhi; a lahva khat in zong a silneih chu kei a tuam ahi achi sih a, himahleh sil zousiah akikop jaw uhi. 33 Apostolte'n silbawltheihna thupitah toh Lalpa Jesu thohkiitna thu chu ahilh zing va, a bawnva tung ah hehpihna nasatah aum hi. 34 a lahvah tasam koimah zong aum sih uhi, ajiahchu gam ahihlouhleh inn neite'n ajuaah va, a sil juaahte uh man ahung tawi va, 35 apostolte keengbul ah akoih jeel va, mi chin kawmah a mamoh daanun ahawm uhi. 36 Huleh Jose, Levi mi, Kupra gam mi, apostolte'n Barnaba achih uh, hu min umjia chu Hamuanna tapa chihna ahi a, 37 ama'n a gam neih chu ajuaah a, a man ahung tawi a, apostolte keengbul ah akoihta hi.
Anania leh Saphira Sualna leh Sihna
1 Hizongleh mi khat a min Anania kichi in a ji Saphira toh a neih uh ajuaah va, 2 huleh a ji heetin a man khenkhat a-iimta a, khenkhat hung tawiin apostolte keengbul ah akoih hi. 3 Hizongleh Peter in, "Anania, Hagau Siangthou heem diing leh gam man khenkhat iim diingin bang diinga Setan in na lungsim sudim ahiai? 4 Juaaha aum mateng nang a hi zing lou ahiaimah? Na juaah nungin zong na thuthuin aum sih eimah? Bang diinga hi thute na lungtang a ngaihtuah na hiai? Mihing heem na hi sih a, Pathian heem na hi jaw," achi hi. 5 Anania in hu thu ajaah tahin apuuh a, asita hi. Hu thu ja zousiah tungah lauhna nasatah ahung tungta hi. 6 Tangvaalte'n thoudohin amah atuam va, ajawngdoh va, avuita uhi. 7 Huleh daah kaal thum diing veel nungin, a ji sil umdaan heloupiin ahung luut hi. 8 Huin Peter in a kawmah, "Hung hilh in, gam hizah chauhin ahi maw na juaah uh?" achi hi. Huin ama'n, "Hi, hijaat chauhin ahi," achi hi. 9 Huin Peter in a kawmah, "Bang diinga Lalpa Hagau je-et diinga kithutuaah na hi viai? En in, na pasal vuite keeng kotkhaahbul ah aumta hi, huleh nang zong ahung jawng doh diing uh," achi hi. 10 Huin thakhatin a keengbul ah apuuh pah a, asita hi. Huin tangvaalte ahung luut va, amahnu chu si in ahung mu va, ajawngdoh va, a pasal geiah avuita uhi. 11 Huin kouhtuam zousiah leh hu thuja pouhmahte'n alau mahmah uhi.
Apostolte Chiamchihna
12 Apostolte khut tungtawn in mipite lahah chiamchihna leh sil loupi tamtah bawlin aum hi. Huin amahuh a bawnun lungsim mun khatin Solomon Innliim ah aum uhi. 13 Huleh mite'n amahuh angaisang mahmah va, himahleh kuamah a lahvah atel ngam sih uhi. 14 Numei leh pasal gingthah tampitah Lalpa kawmah ahung kibehlap deuhdeuh uhi. 15 Huchiin Peter achiah kawma a liim khenkhatte tunga atuh theihna diing chiin damloute ahung pui va, lupnate leh pheehte bang ah kotzing vai ah alumsah uhi. 16 Jerusalem kiim a khuate apatin mipite zong damloute leh hagau niin suhgimte hung puiin ahung khawm va, hute zong ahung dam vehta uhi.
Apostolte Suhduhdahna
17 Huin siampu lalpeen leh a lawite zousiah ahung va, thangsiatna in adim va, hute chu Sadukaipawl ahi uhi. 18 Apostolte chu aman va, vaantaang suangkul ah akhumta uhi. 19 Hizongleh Lalpa angel in jaan in suangkul kotkhaahte hung hongin amahuh apuidoh a, 20 "Chiah unla, Pathian biahinn ah vading unla, mite kawmah hi hinna thu zousiah vasoi un," achi hi. 21 Hu thu ajaah tahun jiingkaal matahin Pathian biahinn ah avaluut va, thu avahilh uhi. Hizongleh siampu lalpeen leh a lawite ahung va, vaihawmte leh Israel suan upate zousiah akoukhawm va, apostolte vapui diingin suangkul ah mi asawl uhi. 22 Hizongleh houtute avachiah va, suangkul ah amahuh avamuta sih va, ahung kihkiit uhi. 23 uSuangkul bittaha kikhaahin a veengtute zong kotkhaahbul a dingin ka mu ngaalva, hizongleh ka hon uh leh a sung ah koimah ka mu sih uh," chiin asoi uhi. 24 Siampu lalpeen leh Pathian biahinn veengtu lamkaipa leh siampu lalte'n hu thute aheet tahun hikhu bang chiphetin ahung thangta de aw, chiin a thu ah amangbang mahmah uhi. 25 Huin mi khat ahung a, a kawmvah, "Ngai un, suangkul a na mi khumte un Pathian biahinn ah dingin mite thu ahilh uh," chiin ahung soi hi. 26 Huchiin houtute lamkaipa chu houtute toh avachiah va, mipite'n suang a aseh diing uh alau jiahun bawlse louin ahung pui uhi. 27 Huleh amahuh ahung puitung phetun, vaihawmte ma ah adingsah va, huin siampu lalpeen in a kawmvah, 28 "Hi min a thu hilh kiit nawn lou diingin thu khauhtahin ka hung peta uh hilou maw? Ngai un, na thuhilh un Jerusalem khua na sudim vehta va, huleh hi Pa sisan hung khuhsah tum na hi uh!" achi hi. 29 Huin Peter leh apostol dangte'n, "Mihing thu saangin Pathian thu ka man jawh ngeeingeei diing uh ahi. 30 Jesu nang un singdawn a na khai va, na suhluppa uh, i pulepate Pathian in akaithouta hi. 31 Israelte kawma kisiihna leh sual ngaihdamna pe diingin, Amah ngeei chu Pathian in Lai leh Hundampa diingin a jiatlam ah atawisangtahi. 32 Huleh keiuh hi thute heetpihtute ka hi uhi, huchibangmahin Pathian in a thujui photmahte kawma apiaahta Hagau Siangthou zong heetpihtu ahi," chiin adawng uhi. 33 Huleh hu thu ajaah tahun a lung uh akhoih mahmah a, asuhlup tumta uhi. 34 Huin mi khat a min Gamaliel, Pharisai, daansiam, mi zousiah in azahtaat khat vaihawmtute lahah ahung ding a, hu apostolte chu puidoh tadih diingin thu apia hi. 35 Huin a kawmvah, "Nanguh Israel mite aw, hi mite tunga na silbawl tup uh pilvaang un. 36 Ajiahchu tumain zong, Theoda, milian ka hi chiin ahung um a, hupa chu pasal ja li veel in anajui va, amah chu suhlupin aumta hi. Huleh amah thumang photmah a bawnun adalhjaahta va, bangmah ahita sih uhi. 37 Hupa nungin kisimpi laiin, Galili gam mi Juda ahung um kiit a, huleh a kawmah mi hunkhop ahiip hi. Hizongleh amah zong asita a, a thumang zousiah zong adalhjaahta uhi. 38 Tuin ka hung hilh ahi, hi mite khoih dah unla, huchiin umsah mei un. Hi a siltup uh leh a silbawl uh mihing apat ahih inchu, suhsiatin aum diing hi. 39 Hizongleh Pathian apat ahih inchu, amahuh na sumang thei sih diing uhi, huchilouin jaw Pathian dou na hi kha diing uh," achi hi. 40 A thusoi chu lem asata va, huchiin apostolte chu akou va, ajeep va ajeep zohun, Jesu min a thu soi kiit het lou diingin thu apia va, ahahta uhi. 41 Amahuh chu vaihawmtute lah apatin apawtkhia va, Jesu min jiaha zumna thuaahtaaha ngaih ahih jiahun akipaah mahmah uhi. 42 Huleh ni chinin Pathian biahinn leh inn chin ah Jesu chu Khrist ahi chia tanchinpha thu hilh leh soi atawp sih uhi.
Dikon Masate Teelna
1 Huleh nungjuite apun touh jeel laiun, a ni chin neehletaah hawmna va a meithaite uh angaihsah louh jiahun, Grik haam zang Judate chu Hebraite tungah aphunta uhi. 2 Huin sawmlenihte'n nungjui mipite akou va, "Pathian thu tawpsana neehletaah ka buaipih un chu, ahoih sih diing hi. 3 Hujiahin unaute, na lahva Hagau Siangthou leh pilna a dim, mi min hoih ngen sagih teel un. Amahuh chu hi natohna mohpo diingin i guat diing uhi. 4 Keiuh chu haamtei leh thu natongin ka um zom zing jaw diing uh," achi uhi. 5 Huin hu thu in mi zousiah akipaahsah hi. Huchiin Stephen, ginna leh Hagau Siangthou a dim, Philip, Prokora, Nikanor, Timon, Parmena, leh Antiok khua a mi Juda sahkhua a kihei Nikola toh ateel uhi. 6 Amahuh chu apostolte ma ah adingsah va, ahaamtei zohun a tungvah a khut uh anga uhi. 7 Huleh Pathian thu ahung dalh a, Jerusalem ah nungjuite apungta mahmah uhi. Huleh siampute lahah zong mi tamtah ginna lamah athumangta uhi.
Stephen Vaihawmtute Ma a Dinna
8 Huleh Stephen, ginna leh silbawltheihna a dimin mi lahah silmah leh chiamchihna loupitahte abawl veu hi. 9 Hizongleh Kureni, Alexandria, Silisia leh Asia gamte apat Jaleenpawl Sinagog kichi pawl khat a telte lah apat mi khenkhatte ahung kisa va, Stephen ahung kinialpih uhi. 10 Hizongleh a pilna leh a soipihtu Hagau chu anialkhe theita sih uhi. 11 Huin hute'n chu, "Mosi leh Pathian asoisiat ka ja uh," chi diingin mite achiilgu uhi. 12 Huleh mite, upate leh daanjilsahtute achiilsia va, Stephen chu asual va, aman va, vaihawmtute kawmah apui uhi. 13 Huleh heetpihtu dihloute abawltawm va, hute'n chu, "Hi pa'n hi mun siangthou leh daan thu soisiat atawp sih hi. 14 Ajiahchu hi Nazareth Jesu'n hi mun asuse diing a, Mosi in tawndaan ahung piaahsawnte asulimdang diing, chia asoi ka ja uh," achi uhi. 15 Huin vaihawmna a toute zousiah in Stephen aensaal chiat va, a meel chu angel meel bangin amu uhi.
Vaihawmtute Ma a Stephen Thusoi
1 Huin siampu lalpeen in, "Hi thute adihna eimah?" achi hi. 2 Huin Stephen in, "Ulenaute leh pate aw, ngai un: I pu uh Abraham chu Haran khua a aum ma a, Mesopotamia gam a aum laiin, loupina Pathian a kawmah ahung kilaah a, 3 a kawmah, 'Na gam apat leh na chipihte lah apat pawt inla, gam ka hung etsah diing lamah hung pai in,' achi hi. 4 "Amah chu Kaldaite gam apat apawt nungin Haran ah ateeng hi. A pa sih nungin Pathian in hu apatin, hi tua na teenna gam vah apeem luutsahta hi. 5 Huleh hitah ah chu mun luah diing bangmah, a keeng ngahna diing khop zong ape sih hi. Hizongleh Abraham in ta aneih ma thamin Pathian in amah leh a nunga a chihaahte tanpha a gou diingin gam chu piaah achiamta hi. 6 Huleh Pathian in hichibangin asoi hi: a chihaahte mi gam ah ataam diing va, salin anei diing va, kum za li abawl genthei diing uhi. 7 Huleh Pathian in, 'Suaaha aumna diing uh nam chu keima'n ka vaihawm diing a, huzoh chiangin ahung pawt diing va, hi mun ah ka nna atong diing uhi,' achi hi. 8 Huleh Pathian in a kawmah zehtan thuhun apia a; huchiin Abraham in Isak ahung hing a, a ni giat ni in a zeh atan hi. Isak in Jakob ahung hing a, Jakob in nampa sawmlenihte ahung hing hi. 9 "Huleh nampate'n Joseph chu athangsiat va, Aigupta ah ajuaahta uhi. Hizongleh Pathian chu a kawmah aum hi. 10 A gimthuaahnate zousiah apat ahundoh a, Aigupta gam kumpipa Pharaoh mitmuh ah deihsahna leh pilna apia hi. Huchiin amah chu Aigupta gam leh a innsung mi zousiah tungah gamoptuin abawlta hi. 11 "Huin Aigupta leh Kanaan gam zousiah ah kial ahung tungta a, gimthuaahna nasatah ahung umta a, i pulepate un neeh diing amuta sih uhi. 12 Hizongleh Jakob in Aigupta gam ah buh aum chih ajaah tahin i pute uh achiah masatpeenna uh diingin asawlta hi. 13 A nihvei chiahna vah, Joseph chu a sanggamte akihesah a, Joseph innkuante chu Pharaoh kawmah heetsahin aumta uhi. 14 Huin Joseph in a pa Jakob leh a innkuanpihte zousiah amah kawmah hung diingin achial a, a bawnun sawmsagih leh ngaa ahi uhi. 15 Huchiin Jakob chu Aigupta gam ah achiah suh a, amah leh i pute uh asita uhi. 16 Huleh a luang uh Shekem khua ah apotung va, Abraham in Shekem a Emmor tapate apat dangka sum a alei haan ah avuita uhi. 17 "Hizongleh Pathian in Abraham kawma a thuchiam atun hun ahung nai tahin hu mite chu Aigupta gam ah hung pungin ahung tam deuhdeuhta uhi, 18 Joseph helou kumpi dang ahung um masiahin. 19 Hu mipa'n i chipihte adohabawl a, i pulepate uh asuduhdah a, a naungeehte uh hinglou diingin apaihdohsah hi. 20 "Hulaiin Mosi ahung piang a, Pathian mitmuhin a meel ahoih a, a pa inn ah ha thum etkolin aum hi. 21 Amah akoihdoh tahun, Pharaoh tanu in ala a, amah tapa diingin avaahta hi. 22 Huleh Mosi chu Aigupta mite pilna zousiah jilsahin aum a, huchiin thu leh natoh ah sil abawlthei mahmah hi. 23 "Huleh ama'n chu kum sawmli ahung hihin, a unaute, Israel tate chu kan ahung uutta hi. 24 Huleh a lahva mi khat dihloutaha suhgima um amuh in, ahundoh a, Aiguptami chu sulumin suhduhdaha umpa phuba alaahsah hi. 25 Huleh ama'n amah khut in Pathian in amahuh hundoh diing ahi, chih a unaute'n he diing asa a, hizongleh amah un ahe sih uhi. 26 Huleh a jiing in a lahva mi nih akisual laiun a kawmvah ahung a, 'Lawmte, unau na vevua; bang diinga dihloutaha kibawl na hi viai?' chiin lep atum hi. 27 "Hizongleh a innveengpa tunga silgilou bawl jawpa'n Mosi chu asawndoh a, 'Kuan nang ka tungva houtu leh vaihawmtu diingin ahung bawl ei? 28 Jaanni a Aiguptami na thah banga hung thah tum na hi maw?' achi hi. 29 Huin hi thu jiahin Mosi chu ataaimangta a, Midian gam ah mikhual in ataamta a, hutah ah tapa nih avanei hi. 30 "Kum sawmli abei nungin, Sinai Taang gamdaai ah, sawlbawh a meikuang lahah, Lalpa angel khat a kawmah ahung kilaah hi. 31 Mosi in hi amuhin a silmuh chu limdang asa a; en diinga avanaih laiin Lalpa aw in a kawmah, 32 'Kei, na pulepate Pathian chu ka hi, Abraham Pathian, Isak Pathian, Jakob Pathian,' achi hi. Huin, Mosi chu akithing a, aen ngamta sih hi. 33 "'HuinLALPA'Nakawmah, "Na keeng apat na keengtophah suut in, ajiahchu na dinna chu mun siangthou ahi. 34 Aigupta gam a ka mi umte gentheih daan chu chiantahin ka mu zing hi. Huleh a thuum leh maau uh zong ka jata a, amahuh hundoh diinga hung suh ka hi. Hungin, Aigupta gam ah ka hung sawl diing,'" achi hi. 35 "Hi Mosi, 'Kuan nang ka tungva houtu leh vaihawmtu diingin ahung bawl ei?' chia anual uh chu, sawlbawh laha a kawma hung kilaah angel kithuahpihna toh, Pathian in amah ngeei chu houtu leh hundohtu hi kawm diingin asawlta hi. 36 Ama'n chu Aigupta gam ahte, Tuipi San ahte leh gamdaai ahte kum sawmli sung sil loupi leh chiamchihnate amuhsah nungin, amahuh apuidohtahi. 37 "israel tate kawma, 'LALPA na Pathian un na unaute lah a Zawlnei khat kei tobang atungding diing a, Amah thu na ngaikhe diing uhi,' chitu chu hi Mosi ahi. 38 Gamdaai a mipungkhawmte laha ana-um, Sinai Taang a amah kawma thusoi angel toh, i pulepate uh toh ana-umpa chu amah ahi; amah chu eite ahung piaah diinga Pathian thu hing latupa ahi. 39 "I pulepate'n a thu jui uut louin anual va, Aigupta gam alunggulh kiit uhi. 40 Aaron kawmah, 'I mapui diingin pathiante hung bawlsah in, ajiahchu hi Mosi Aigupta apat a hung puidohpa lah a tanchin ka he nawnta sih uh,' achi uhi. 41 Huleh hulaiin bawngnou lim abawl va, hu milem ah akithoih va, amahuh khutsuaah tungah anuamta uhi. 42 Huin Pathian in akiheisan a, vaan a aahsite abiah theihna diingun amahuh apedohta hi. Zawlneite Lehkhabute a, 'Israel innkuante aw, gamdaai ah kum sawmli sung sa leh kithoihnate ka kawmah na hung laanta uh maw? 43 Molok biahbuuh leh na pathian uh Remphan aahsi biah diinga a lim na bawlte uh zong na jawng uhi. Hujiahin keima'n nanguh Babylon gaal lamah ka hung thotmang diing,' chih gelh bangin. 44 "A lim amuh banga bawl diinga Mosi hilhtu in aguat bangin i pulepate un hu gamdaai ah heetsahna biahbuuh anei uhi. 45 Huleh hu biahbuuh aneih tahun, Pathian in i pulepate ma a namte adelhdohsah laiin, i pulepate'n Joshua nuaiah hu biahbuuh chu anapoluut uhi. Huchu David hun tanphain hu ah aum zing hi. 46 David in Pathian mitmuhin deihsahna amu a, Jakob Pathian diing biahbuuh bawlsah diingin angeen hi. 47 Hizongleh hu inn chu Solomon in abawl jawta hi. 48 "Ahihvaangin, Tungnungpeen chu khut a bawl biahinnte bang ah aum sih hi, zawlnei in, 49 "'Vaan ka touphah ahi a, lei ka keeng ngahna ahi; inn bangchi bangin na hung bawlsah diing viai? LALPA'N achi, ahihlouhleh ka khawlna mun zong bang ahiai? 50 Ka khut in hi sil zousiah abawl hilou amaw? achi hi,' chia asoi bangin. 51 "Miluhlul leh lungtang leh bil zehtanlouhte aw, Hagau Siangthou na doudaal zing uhi. Na pulepate uh bawl bangin na bawl zing uhi. 52 Na pulepate un zawlneite laha kua ahiai asuhduhdah louh uh? Huleh Midihtat hung diing thu soilawhte chu asulum va, hu Midihtat mansahtu leh thattute tuin nanguh ngeei na hi uhi. 53 Daan thu angelte tungtawnin na mu va, himahleh na jui tuan sih uhi," achi hi.
Stephen Sihna
54 Hi thute ajaah tahun a lung uh athah mahmah a, Stephen chu ha agialkhum uhi. 55 Hizongleh ama'n chu Hagau Siangthou a dimin vaanlam aen den a, Pathian loupina leh Pathian jiatlam a Jesu ding amu a, 56 "En un, vaan kihong ka mu a, Pathian jiatlam a Mihing Tapa ding zong ka mu hi!" achi hi. 57 Huin amahuh chu aw ngaihtahin akikou va, a bil uh ahuum va, thakhatin akidelhhuan uhi. 58 Khopi apatin adelhdoh va, suang in asep va, huleh a heetpihtute'n tangvaal khat a min Saul keengbul ah a puannaah tualte uh akoih uhi. 59 Stephen in, "Lalpa Jesu, ka hagau la in," chia Pathian akouh laiin suang in akisehhuan uhi. 60 Huin amah chu akhuupdin a, aw ngaihtahin akikou a, "Lalpa, hi a sualna moh uh posah sin," achi hi. Huleh hi thu asoi zohin a-ihmutahi.
Kouhtuamte Suhduhdahna leh Dalhna
1 Huleh Saul in zong Stephen sih chu lem asa hi. Hu hun laiin Jerusalem a kouhtuam tungah suhduhdahna nasatah aum panta hi. Huchiin apostolte chihlouh chu Judia leh Samaria gam zousiah ah adalhjaah vehta uhi. 2 Huleh Pathian ngaihsah kuate aha in Stephen chu avui va, nasatahin asuun uhi. 3 Saul in ahihleh inn chin a luutin, numei pasal akaidoh a, suangkul a khumin, kouhtuam asuduhdah mahmah hi.
Samaria a Philip Natoh
4 Huleh suhdalha umte'n chu a chiahna phot vah tanchinpha asoita uhi. 5 Huin Philip chu Samaria khopi ah achiah suh a, a kawmvah Khrist thu asoi hi. 6 A silmah bawlte ajaah va amuh tahun, mipite'n Philip thusoi chu lungsim munkhatin angaikhia uhi. 7 Dawi niinte chu aw ngaihtaha kikouin mi tampi amatte uh sung apat ahung pawt uhi. Huleh jeng leh keengbai tamtahte zong ahung damta uhi. 8 Huleh hu khopi ah kipaahna nasatah aumta hi.
Dawisiam Simon
9 Hizongleh a min Simon kichi mi khat aum a, ama'n chu milian ka hi chiin, tuma lamin hu khopi ah mitphialdawi zangin Samaria mite chu limdangsatahin akoih veu hi. 10 Mi zousiah in, a neupeen apat a lianpeen tanphain, "Hi mipa ahi Pathian silbawltheihna loupi kichi chu," chiin a thu angaihsah vehta uhi. 11 Huleh mitphialdawi a hun sawttah limdangsataha anakoihtaah jiahin, a thu angaihsah uhi. 12 Hizongleh amah un chu Pathian lalgam leh Jesu Khrist min tanchinpha Philip in asoi agintaat tahun, anumei apasal in baptisma atangta uhi. 13 Huin Simon nasan in zong ahung gingta a, baptisma atan nungin Philip kawmah aum zing a, chiamchihna leh silmah nasatah kibawlte amuhin, limdang asa thei mahmah hi.
Peter leh Johan Samaria ah
14 Huin Jerusalem a um apostolte in Samariate'n Pathian thu a-awita uh chih aheet tahun, a kawmvah Peter leh Johan asawl va, 15 hu mite chu avatunsuh tahun Hagau Siangthou atan theihna diingun ahaamteisah uhi. 16 Humain chu a lahva kuamah tungah Hagau Siangthou atung nai sih hi. Himahleh Lalpa Jesu min a baptisma tang chauh ahi nalai uhi. 17 Huin Peter leh Johan in a tungvah a khut uh anga va, Hagau Siangthou atangta uhi. 18 Huleh Simon in apostolte khut ngah jiah a, Hagau Siangthou piaah ahi chih amuhin, sum apia a, 19 "Hitobang thuneihna hung pe ve un, kua tungah hizongleh khut ka ngahna phot in Hagau Siangthou amuhvena diingun," achi hi. 20 Hizongleh Peter in a kawmah, "Pathian silpiaah dangka sum a lei na tup jiahin, na sum nangmah toh mangkhawm heh. 21 Hi thu ah tel lah na tel sih a, tan zong na nei ngaal sih hi, ajiahchu na lungtang Pathian muhin adih sih hi. 22 Hujiahin na giitlouhna kisiih inla, Pathian kawmah nasatahin haamtei in, huchiin na lungtang a na ngaihtuah hi ahung ngaidam khamoh sih diing hi. 23 Ajiahchu khaatna in na lungtang agaah a, huleh dihtatlouhna sal a taang na hi," achi hi. 24 Huin Simon in adawng a, "Na sil soite uh bangmah ka tunga atun louhna diingin nang un Lalpa kawmah nasatahin hung haamteisah un," achi hi. 25 Huin amah un Lalpa thu aheetsah leh asoi zoh nungun, Jerusalem ah achiah kiitta va, Samaria khua tamtah ah tanchinpha asoita uhi.
Philip leh Ethiopia Mi
26 Lalpa angel in Philip ahoupih a, "Thou inla, simlam a Jerusalem apat Gaza pai suhna lampi ah chiah in," achi a, huchu gamdaai a um ahi. 27 Huchiin amah chu athou a, achiahta hi. Huleh ngai in, Ethiopia mi, Ethiopia kumpinu Kandake nuaia michilgeh thunei liantah, amahnu gou teng keemtu chu Jerusalem a Pathian be diingin ahung a, 28 apaikiit lamin a kangtalai a toukawmin zawlnei Isai Lehkhabu asim hi. 29 Huin Hagau in Philip kawmah, "Hu kangtalai vanaih inla, a kawmah vaum in," achi hi. 30 Huin Philip chu a kawmah avataai a, zawlnei Isai Lehkhabu asim aja a, "Na sim chu na hesiam na eimah?" achi hi. 31 Huleh ama'n chu, "Kuamah hung hilhchet louhin bang chiin ka hesiam diai?" achi hi. Huin ama'n Philip chu kaldohtou a, a kawma tou diingin ajawn hi. 32 Pathian Lehkhathu asim chu: "Thah diing belaam bangin Amah chu apui va; belaamnou a mulmeettu ma a asip khiinkhian bangin, Ama'n zong a kam akeeh sih; 33 Amah kimuhsitna ah dihtaha vaihawmna chu laahmangin aum hi. A haahte tanchin kuan ahiai hung soi diing? Ajiahchu leitung apatin a hinna laahsahin aum ngaal a," chih ahi. 34 Huleh michilgeh in Philip ahoupih a, a kawmah, "Ka hung ngeen hi, hi thu khu zawlnei in koi thu asoina ahiai? Amah thu ahiai, midang thu?" achi hi. 35 Huin Philip in a kam akaah a, hu Pathian Lehkhathu ngeei apanin a kawmah Jesu thu asoita hi. 36 Lampi a apai laiun tui mun khat ahung tung va, michilgeh in, "Endua, hi ah tui aum, baptisma ka tanna diing bangin ahung daal ei?" achi hi. 37 Huin Philip in, "Na lungtang zousiah a na gintaat leh, na tang thei hi," achi hi. Huleh ama'n adawng a, "Jesu Khrist chu Pathian Tapa ahi chih ka gingta hi," achi hi. 38 Huin kaangtalai chu akhawlsah a; Philip leh michilgeh chu tui lahah achiah suh khawm va, huin Philip in amah chu baptisma atangsah hi. 39 Huleh tui apat apawtdoh touh phetun, Lalpa Hagau in Philip chu alamangta a, michilgeh in Philip chu amu nawnta sih hi. Huleh a lampi ah nuamtahin apai jeelta hi. 40 Hizongleh Philip chu Azota khua a um ahi chih akihedohta a; huin paisuaah pehin Kaisaria khua atun masiah kho chin ah tanchinpha chu ataangkoupihta hi.
Saul Pianthahna
1 Hulaiin Saul in chu Lalpa nungjuite thah diingin avau zing a, siampu lalpeen kawmah avachiah a, 2 Damaska a sinagogte a diingin lehkha angeen hi, huchia mi koipouh, pasal hiin numei hitaleh hi Lampi pawl a mite amuh photmah kaansa a Jerusalem a ahung pui theihna diingin. 3 Azin laiin Damaska kawm ahung tung a, thakhatin vaan akipanin vaah a kiim vah ahung taang hi. 4 Huin lei ah apuuh a, "Saul, Saul, nang bang diinga hung suduhdah na hiai?" chiin aw aja hi. 5 Huin ama'n, "Lalpa, koi na hiai?" achi hi. Huin Lalpa'n, "Na suhduhdah Jesu ka hi. Vuaahna siihzum peeh nang diingin ahahsa hi," achi hi. 6 Huleh ama'n kithing kawm leh limdangsatahin, "Lalpa, bang bawl diingin na hung deih ei?" achi hi. Huin Lalpa'n a kawmah, "Thou inla khopi sungah luut in, huchiin na bawl diing chu hilhin na um diing hi," achi hi. 7 Huleh amah toh zin khawmte chu soi diing beiin ading va, aw chu aja va, hizongleh koimah amu sih uhi. 8 Huin Saul chu lei apatin athou a, a mit hah mahzongleh bangmah amuthei sih hi. Huchiin a khut in akai va, Damaska ah apuiluut uhi. 9 Huleh ni thum kho mulouin aum a, bangmah ane in adawn sih hi. 10 Huleh Damaska ah a min Anania kichi nungjui khat aum a; Lalpa'n kilaahna in a kawmah, "Anania," achi hi. Ama'n, "En in, Lalpa, hi ah ka um," achi hi. 11 Huleh Lalpa'n a kawmah, "Thou inla, kotzing Tang achih vah chiah inla, Juda inn a um, Tarsa khua a mi, a min Saul kichi kandoh in; ajiahchu, ngai in, ahaamtei laitah ahi. 12 Huleh ama'n kilaahna in mi khat a min Anania kichi hung luut a, a mit suvaah diinga a tunga khut ngain amuta hi," achi hi. 13 Huin Anania in, "Lalpa, hi pa'n Jerusalem a na misiangthoute tunga sil hoihlou tamtah abawl daante mi tampi kam apat ka ja hi. 14 Huleh hi ah zong na min lou zousiah kaanna diingin siampu lalte kawm akipatin thu amu hi," achi hi. 15 Hizongleh Lalpa'n a kawmah, "Chiah in, ajiahchu hi pa hi Jentelte leh kumpipate leh Israel tate kawma ka min poluuttu diinga ka beel teel ahi. 16 Ajiahchu ka min vaanga gimna bangchituha thuaah diing ahiai, chih a kawmah ka hesah diing hi," achi hi. 17 Huin Anania chu avachiah a, inn ah aluut a, a tunga a khut ngain, "Unaupa Saul, na mit vaahna diing leh Hagau Siangthou a na dim theihna diingin Lalpa, na hungna lampi a na kawma kilaah Jesu ngeei in ahung sawl ahi," achi hi. 18 Thakhatin a mit apat phulip tobang ake pah a; huleh a mit ahung vaah a, huin athou a, baptisma atangta hi. 19 Huleh an ane a, suhhaatin aumta hi. Huin Saul chu Damaska a nungjui umte kawmah ni bangzah aha aum hi.
Saul in Damaska ah Khrist Ataangkoupih
20 Huleh sinagogte ah Khrist chu Pathian Tapa ahihdaan ataangkoupih pah ngaal hi. 21 Huleh a thu jate zousiah in limdang asa mahmah va, "Hi pa Jerusalem a hi min loute suduhdah veupa hilou amaw? Huleh kaansa a siampu lalte kawma pui tuma hitah a hung hilou maw?" achi uhi. 22 Hizongleh Saul chu ahung haat seem a, hi Jesu chu Khrist ahi tahtah hi chih hilhchianin, Damaska a Juda umte chu angaihna helouin akoih hi.
Judate Apat Saul Asuaahtaatna
23 Huleh ni tamtah nungin, amah thah tumin Judate akihou uhi. 24 Hizongleh Saul in a siltup uh anahe hi. Huleh amah un amah thah tumin kulh kotkhaah suun leh jaan in ataang uhi. 25 Hizongleh nungjuite'n amah chu jaan in apui va, kulh baang ah bawm in akhaikheta uhi.
Jerusalem ah Saul
26 Huleh Saul Jerusalem atun in nungjuite kithuahpih atum a; hizongleh amah un nungjui ahihve agintaat louh jiahun alau chiat uhi. 27 Hizongleh Barnaba in amah apui a, apostolte kawmah ahung tonpih hi. Huleh ama'n lampi a Lalpa amuh a, Lalpa'n ahoupih daan bang leh Damaska a Jesu min a hangsantaha thu asoi daante bang asoita hi. 28 Huchiin amah chu Jerusalem ah a kawmvah luut jeel pawt jeelin aum a, hangsantahin Lalpa Jesu min in thu asoi hi. 29 Huleh amah in Grik haam zang Judate anial a; hizongleh amah un thah atum uhi. 30 Huchu unaute'n aheet tahun, Kaisaria ah apuisuh va, Tarsa ah asawlmangta uhi. 31 Huin Judia gam, Galili gam leh Samaria gam veel ah kouhtuamte'n hamuanna anei va huleh suhkhangin aumta uhi. Huleh Lalpa lauin ahing va, Hagau Siangthou hamuanin aum va, ahung pung deuhdeuhta uhi.
Ainia Suhdamna
32 Hichi ahung hi a, Peter in amahuh vehsuaah kawmin, Lidda khopi a misiangthou um zousiah kawmah zong achiah suh hi. 33 Huleh hutah ah a min Ainia, kichi, ajeng jiaha kum giat lupna a lum zing khat amu hi. 34 Huleh Peter in a kawmah, "Ainia, Jesu Khrist in ahung sudam hi, thou inla na puanphah jial in," achi hi. Huchiin amah chu athou pah hi. 35 Huleh Lidda leh Sharon a umte zousiah in amah chu amu va, Lalpa lam angata uhi. 36 Huleh Joppa khua ah a min Tabitha kichi nungjui khat aum a, Tabitha umjia chu Dorka ahi, hi numei in silbawl hoih leh khotuahna silpiaah ahau mahmah hi. 37 Hichi ahung hi a, hulaiin a chi ana a, asita a; asil zohun pindan tungnung ah alumsah uhi. 38 Huleh Lidda khua chu Joppa kho kawm ahih jiahin, nungjuite'n Peter hutah ah aum chih aja uhi. Sawt halloua a kawmva hung diinga va-ngeen diingin a kawmah mi nih asawl uhi. 39 Huin Peter chu athou a, amahuh geel toh akitonta uhi. Ahung tunin, amah chu pindan tungnung ah apuitouta uhi. Meithai zousiah a kawma dingin, Dorka in a kawmva a damlai a a puannaahtual bawlte leh a puan bawlte lah pumin akap uhi. 40 Hizongleh Peter in a bawnun apawtsah a, akhuupdin a, ahaamteita a; a luang lam ngat in, "Tabitha, thou in," achi hi. Huleh amahnu'n chu amit ahung hah a, Peter amuh tahin athouta hi. 41 Huleh Peter in a khut apia a, akaithouta a, misiangthoute leh meithaite akou a, amahnu chu damin apeta hi. 42 Huleh hu thu Joppa khua zousiah in ahe veh va, mi tampi'n Lalpa agingta uhi. 43 Huleh hichi ahung hi a, Peter chu Joppa khua ah savun bawlpa Simon inn ah ni tampi ataamta hi.
Peter leh Kornelia
1 Huleh Kaisaria khua ah a min Kornelia kichi mi khat aum a, Italy Pawl achih va sepaih zahoutu ahi. 2 pathian ngaihsah mi ahi a, a innkuante zousiah toh Pathian lau daan asiam uhi. Mite kawmah khotuahna tampi apia a, Pathian kawmah zong ahaamtei zing hi. 3 Daah kuah veelin ama'n kilaahna in Pathian angel khat a kawma hung luut a, "Kornelia!" hung chi khat chiangtahin amu hi. 4 Hizongleh Kornelia in amah aet leh alau a, "Lalpa, bang ahita ei?" achi hi. Huin angel in a kawmah, "Na haamteinate leh na silpiaahte heetzing diingin Pathian ma ah ahung tungtouta hi. 5 Huchiin tuin, Joppa khua ah mi sawl inla, mi khat Peter chih a akouh uh, Simon chu vakousah in. 6 Amah chu tuikhanglian geia teeng, savun bawlpa Simon inn a tung ahi. Ama'n na bawl diing ahung hilh diing hi," achi hi. 7 Huleh angel Kornelia houpih khu apai tahin, Kornelia in a suaahte laha mi nih leh amah natohsah zingte laha Pathian ngaihsah sepaih khat akou hi. 8 Thu zousiah a kawmva ahilh zohin, Joppa khua ah asawlta hi.
Peter in Vaan Apat Sil Hung Kikhaikhia Amuhna
9 A jiing a apai laiun, khopi atun kuan-un daah guup veelin, Peter chu haamtei diingin inn tungah akaltou hi. 10 Huleh a gil ahung kial mahmah a, an neeh auut a, hizongleh neeh diing abawl laiun zelhin ahung umta hi. 11 Huleh vaan kihongin, sil bang aha khat, puan liantah bang, a ning li a khih, lei a hung kikhai khesuhin amu hi. 12 Hu sungah chu leitung a keeng li nei ganhing chi chinteng leh gamsate leh silhing bohvaahte leh tungleeng vate aum uhi. 13 Huleh a kawmah aw ahung ging a, "Peter, thou in, that inla ne in," achi hi. 14 Hizongleh Peter in, "Hilou e, Lalpa, ajiahchu asianglou leh abuaah photmah bangmah ka ne ngei sih hi," achi hi. 15 Huleh aw in anihveina in, "Pathian in asuhsiangthousa, nang in sianglou chi sin," achi hi. 16 Huchibangin thumvei ahung um a; huin sil chu vaan a khaitouhin aum kiitta hi. 17 Peter in kilaahna a amuh khu limdangsa a, bangchihna ahiai chia nasataha abuai laiin, en in, Kornelia mi sawlte'n Simon inn akandohta va, kotkhaahbul ah anading uhi. 18 Huleh akou va, Simon, Peter chiha akouh uh azintun leh tun louh anadong uhi. 19 Peter in kilaahna a a sil muh chu angaihtuah laiin, Hagau in a kawmah, "Ngai in, mi thum in ahung hawl uhi. 20 Huchiin thou in, kumkhia inla, bangma ginglel louin amahuh jui in; ajiahchu amahuh chu ka sawl ahi uh," achi hi. 21 Huin Peter chu Kornelia mi sawlte kawmah achiah suh a, a kawmvah, "Ngai un, na hawl uh chu ka hi. Bang ahiai na hung nasan uh?" achi hi. 22 Amah un, "A inn a na hung theihna diing leh na thusoi diingte ajaah theihna diingin Kornelia, sepaih zahoutu, midihtat, Pathian lau leh Judami zousiah soiphatpa chu angel siangthou khat in thu apia hi," achi uhi. 23 Huin amahuh akou luut a, agiahsahta hi. Huleh a jiing in Peter chu amahuh toh achiah a, Joppa khua a unau kuate aha in amah akitonpih uhi.
Kornelia Inn ah Peter
24 Huleh a jiingkiit in Kaisaria khua ah aluutta uhi. Huleh Kornelia in a tanaute leh a lawm deihtahte koukhawmin, amahuh ana-ngaah zing hi. 25 Huleh Peter ahung luut kuanin Kornelia in analamtuaah a, a keengbul ah bohkhupin anabia hi. 26 Hizongleh Peter in amah chu akaithou a, "Ding in, kei zong mihing ka hi," achi hi. 27 Huleh amah toh kihoulim kawmin, inn sungah aluut a, mi tamtah umkhawm chu amuta hi. 28 Huleh a kawmvah, "Judami namdang toh kipawl a, a kawmva chiah chu daan kalh ahi chih na he uhi. Hizongleh kuamah daan kalh leh buaahbaang ka chih diing ahi sih, chih Pathian in ahung hesah hi. 29 Hujiahin na hung kouh tahun, nial louin ka hung pah ahi; hujiahin na hung kouhna san uh bang ahiai chih ka hung dong ahi," achi hi. 30 Huin Kornelia in, "Ni li paita tu hun in ka inn sunga an ngawl a, daah kuahna a ka haamtei laiin, ngai in, mi khat puanvaam tah silhin ka ma ah ahung ding a, 31 huleh ama'n, 'Kornelia, na haamteina jaahin aumta, mi kawma na khotuahna silpiaah zong Pathian in ahezing hi. 32 Hujiahin Joppa khua ah mi sawl inla, Simon, Peter chiha akouh uh chu na kawmah kou in; amah chu tuikhanglian pang a savun bawlpa Simon inn a tung ahi; amah ahung chiangin thu ahung hilh diing hi,' achi hi. 33 Hujiahin na kawmah mi ka hung sawl pah a, na hung hi ahoih hi. Hujiahin tuin Pathian in na kawma ahung thupiaah zousiah ja diingin Pathian mitmuhin ka bawnun hi ah ka um uhi," achi hi.
Kornelia Inn a Jentelte Kawma Peter Thusoi
34 Huin Peter in asoi a, "Pathian in mi deihsahtuam anei sih hi, chih chiangtahin ka he hi. 35 Ahihvaangin, nam chin laha koipouh amah lau a, dihtaha gamta photmah chu apaahtaat mi ahi veu uhi. 36 Pathian in Israel tate kawma thu athot, Jesu Khrist tungtawna hamuanna tanchinpha soi chu, Amah chu mi zousiah Lalpa ahi chih ahi, 37 Johan in ataangkoupih baptisma khuh nungin, Galili gam apat ahung thang pan a, Judia gam zousiah ah athangsuaah a, hu thu chu nang un na he uhi. 38 Pathian in Nazareth Jesu chu Hagau Siangthou leh silbawltheihna a athopdaan na he uhi. Amah chu sil hoih bawl leh diabol thuneihna nuaia um zousiah sudamin avaahleh hi, ajiahchu Pathian in Amah aumpih hi. 39 Huleh Judate gam leh Jerusalem a asilbawl zousiah heetpihtu ka hi uh, Amah chu singdawn a khai in asulumta uhi. 40 Himahleh Amah chu Pathian in misi lah apatin ni thum ni'n akaithou a, phuanglaahtaha muhtheihin abawlta hi. 41 Mi zousiah kawmah ahi sih a, hizongleh Pathian in heetpihtu ateelte kawmah chauh ahi, misi lah apat athohkiit nunga Amah kawma nea dawn keiuh kawm ah zong. 42 Huleh mite kawma thu soi diing leh Amah chu mihing leh misite tunga Vaihawmtu diinga Pathian guat ahi chih heetpih diingin Pathian in thu ahung pia hi. 43 Koipouh Amah gingta in a min jaalin sualnate ngaihdamna amu diing uh chih a tanchin chu zawlnei zousiah in anaheetsahsa uh ahi," achi hi.
Jentel Gingtute Kawma Hagau Siangthou Piaah Ahihna
44 Peter in hi thute asoi laitahin, a thu ja zousiah tungah Hagau Siangthou ahung tungta hi. 45 Huleh zehtante laha gingtute, Peter toh hung zousiahte'n, Hagau Siangthou piaah chu Jentelte tunga zong leih ahih jiahin thumah asa mahmah uhi. 46 Amahuh chu haam dangte a thusoi leh Pathian phatin aja ngaal va. Huin Peter in, 47 "Hi mite, eimah banga Hagau Siangthou tangve chu baptisma atan louhna diingun mi'n tui zat akhaam thei diviaimah?" achi hi. 48 Huchiin Lalpa min a baptisma tang diingin thu apia hi. Huin ni bangzah aha taam diingin angeenta uhi.
Peter in a Silbawl Agupna
1 Huleh Judia gam a apostolte leh unau umte'n Jentelte'n zong Pathian thu apomta uh chih ajata uhi. 2 Peter chu Jerusalem atun touh tahin zehtante'n a kawmah, 3 "Zehtanlouhte inn ah na luut a, amahuh toh na ne hi," chiin akalh uhi. 4 Hizongleh Peter in sil umdaan abul akipatin kizom jeelin a kawmvah ahilhchian hi, hichia chiin, 5 "Joppa khopi ah haamtei in ka um a, huleh zelhin ka um a, manglam bangin bang aha bawm, puan liantah bang a ning li a khih, vaan apat hung kikhaikhia ka mu a, ka kawm ngeei ah ahung tung hi. 6 Huchu en den in ka ngaihtuah a, lei a gamsa keeng li neite, gamsate, ganhing bohvaahte leh tunga leeng vate ka mu hi. 7 Huleh aw in, 'Peter, thou in, that inla ne in,' hung chiin ka ja hi. 8 Hizongleh ke'n, 'Lalpa, hilou e, ajiahchu abuaahbaang leh asianglou photmah ka kam ah aluut ngei sih,' ka chi hi. 9 Hizongleh vaan akipanin aw in, 'Pathian in asuhsiangsa nang sianglou chi sin,' ahung chi kiit hi. 10 Huleh huchibang ngenin thumvei ahung um a, huin a bawnin vaan ah khaitouhin aum kiitta hi. 11 "Ngai in, mi thum Kaisaria apat ka kawma ahung sawlte uh ka umna inn ah anatung uhi. 12 Hagau in ginglel lou leh koimah khentuam neilou a, amahuh jui diingin ahung sawl hi. Hi unau guupte'n zong ahung jui va, hu mipa inn ah ka luut uhi. 13 Ama'n ka kawmah, a inn a angel kilaah amuh daan leh angel in a kawma, 'Joppa khua ah mi sawl inla, Simon, Peter achih uh chu vakousah in, 14 ama'n thu ahung hilh diing a, hu thu in nang leh na innkuanpihte zousiah hutdamin na um diing uh,' achih daan zong ahung hilh hi. 15 "Thu ka soi pat tahin, Hagau Siangthou i tunga ahung tun chiil lai mahbangin, a tungvah ahung tungta hi. 16 Huin Lalpa thu, 'Johan in tui ah mi abaptis veu a, hizongleh nang un chu Hagau Siangthou in baptisma na hung tang diing uh,' achih chu ka hung hedoh kiitta hi. 17 Huchiin eiuh Lalpa Jesu Khrist gingtate kawma, Pathian in silpiaah ahung piaah bang a kawmva apiaah leh, kei bang giap hi Pathian nial gual ka hiaimah?" achi hi. 18 Hu thu chu ajaah tahun asipta va, "Huchi ahihleh, Pathian in Jentelte zong hing diinga akisiih uh phal ahita ve," chiin Pathian aphatta uhi. Antiok Khua a Jentel Kouhtuam 19 Huin Stephen tungtaang toh kisaia suhduhdahna ahung um jiaha taaithaangte chu Phinisia gamte, Kupra gamte, Antiok khuate tanpha ah atung va, Judate kawm chauh ah thu asoi uhi. 20 Hizongleh a lahva khenkhat chu Kupra gam leh Kureni khua a mite ahi uhi. Hu mite'n Antiok khua atun tahun Grik haam zang Judate zong ahoupih va, Lalpa Jesu tanchinpha ahilhta uhi. 21 Lalpa khut in amahuh panpihin mi tamtahin agingta va, Lalpa lam ahung ngatta uhi. 22 Huin a tanchin uh Jerusalem khua a kouhtuam umte'n aja va, Antiok khua tung diingin Barnaba asawlkhia uhi. 23 Huleh amah avatun a, Pathian hehpihna avamuhin akipaah mahmah a, a bawnun Lalpa a munkhat a um diingin ahasuan hi. 24 Ajiahchu amah chu mihoihtah, Hagau Siangthou leh ginna a dim ahi. Huleh mi tamtah Lalpa kawmah atelbehta uhi. 25 Huin Barnaba chu Saul hawl diingin Tarsa khua ah achiah hi. 26 Amah amuhin, Antiok khua ah ahung pui hi. Huleh hichi ahung hi a, kum khat kouhtuamte kikhopna ah atel va, mi tampi thu ahilh uhi. Antiok khua ah nungjuite chu Khristian chiha kouh ahi masapeen uhi.
Antiok Kouhtuamte'n Panpihna Athotna uh
27 Huleh hulaiin zawlnei koite aha Jerusalem apatin Antiok ah ahung suh uhi. 28 Huleh a lahva mi khat, a min Agaba kichi ading a, khovel zousiah ah kial loupitah tung diing ahi chih, Hagau hilhin ahesah hi. Hu kial chu Klaudias Kaisar lai laiin ahung tung hi. 29 Huin nungjuite'n ahihtheih daan chiatun, Judia gam a umte kawmah panpihna thot atum uhi. 30 Huchu abawlta ngeei va, Barnaba leh Saul khut ah, upate kawmah athotta uhi.
Jakob Thahna leh Peter Matna
1 Hulai veelin kumpipa Herod in kouhtuamte laha khen khat bawl gentheih tumin aman a, 2 Johan sanggampa Jakob chu naamsau in asaatlum hi. 3 Hikhu in Judate akipaahsah chih amuh jiahin, Peter zong mat atum sawn hi. Hulai chu Tolsohlouh Tanghou Kuut lai ahi. 4 Amah amat tahin suangkul ah akhum a, sepaih hon li li chiat jeelin akiveen kheel sah a, Chiahkaan Kuut zoh chianga mipite kawmah puidoh atum hi.
Peter Suahtaatna diinga Haamteina
5 Hujiahin Peter chu suangkul ah akoih tadih a, hizongleh kouhtuamte'n amah diingin phatuamngaitahin Pathian kawmah ahaamteisah zing uhi. 6 Peter chu Herod puidoh diing ni tun ma jaan in, sepaih nih kikaal ah khainiang nih bulhin a-ihmu a, huleh a veengtute zong kotkhaahbul ah aum va suangkul chu aveeng uhi. 7 Huleh en in, Lalpa angel khat a kawmah ahung a, suangkul sungah vaah ahung taangta a; Peter chu apang beengin aphawng a, "Thou kin in," achi hi. Huleh khainiangte a khut apat aketa hi. 8 Huin angel in a kawmah, "Na kawng gaah inla, na keengtophah but in," achi hi. Huleh ama'n huchibangin abawl hi. Huin angel in a kawmah, "Na puan silh inla, hung jui in," achi hi. 9 Huin Peter chu apawt a, ajuita hi. Angel silbawl chu atah ahih ahe sih a, hizongleh kilaahna amuh asa jaw hi. 10 Huleh veengtu masa leh anihna apelh nungun, khopi luutna siihkot chu atungta va, huchu amahuh diingin amah leh amah in ahung kihongta hi. Huleh apawt va, kotzing khat apaipeel va, huin, angel in apaisan pahta hi. 11 Huleh Peter chu ahung halh tahin, ama'n "Lalpa'n angel ahung sawl a, Herod khut leh Juda mite kinepna zousiah apatin ahung hundohta chih tuin chiantahin ka heta," achi hi. 12 Hu sil angaihtuah zohin, Johan, Mark achih uh nu Mari inn ah avachiah a, hutah ah chu haamteina neiin mi tamtah ana-umkhawm uhi. 13 Peter in kotkhaah akiuh tahin, a min Rhoda kichi suaah nungaah nou khat adawng diingin ahung hi. 14 Peter aw ahih aheet tahin akipaah jiahin kot chu hong louin ataailuut kiit jawta a, Peter kotkhaahbul ah ading chih avasoi hi. 15 Amah un a kawmah, "Lungbuai hi teh," achi uhi. Hizongleh ama'n chu thudih ahi chiin apang teeiteei hi. Huin amah un, "Hichu a angel ahi," achi uhi. 16 Hizongleh Peter in kot akiu ngatngat a, huleh kot ahon tahun amah amu va, limdang asa mahmah uhi. 17 Hizongleh ama'n asipna diingun a khut in ajaap a, Lalpa'n suangkul apat amah apuidoh daan chu ahilhta hi. Huleh ama'n, "Hi thute Jakob leh unaute kawmah vahilh un," achi hi. Huin apawt a, mun dang ah achiahta hi. 18 Ni asuaah tahin, sepaih haw chu Peter khoia um ahiai, chiin buai chihtahin abuaita uhi. 19 Herod in ahawl a, amuh louh tahin, a veengtute chu aendih a, thah diingin thu apeta hi. Huin Herod chu Judia gam apat Kaisaria khua ah achiah suh a, hutah ah aum zingta hi. Herod Sihna 20 Huleh Herod chu Tura leh Sidon khua a mite tungah alungthah mahmah a, himahleh amah un kumpipa lupna pindan enkoltu Blasta chu athuzoh va, thukhat a luangin a kawmah ahung uhi, ajiahchu a khomite uh chu kumpipa gam a neehletaah a kinga ahih jiahun kilemna angeen uhi. 21 Huleh a ni chiam ni in Herod in a lalpuan asilh a, a laltouphah tungah atou a, a kawmvah thu asoi hi. 22 Huleh mipi chu kikouin, "Hichu pathian aw ahi, mihing a ahi sih" achi uhi. 23 Huleh Pathian kawma paahtawina apiaah louh jiahin, Lalpa angel in amah aman pah ngaal a, huut in ane a, asita hi. 24 Hizongleh Pathian thu chu adalh a, apung jeel hi. 25 Huleh Barnaba leh Saul in a natoh uh azohun Jerusalem apat akihkiitta va Johan, Mark zong kichi chu a kawmvah apui uhi.
Paul leh Barnaba Sawlkhiahna
1 Antiok khua a kouhtuam umte lahah, zawlneite leh thuhilhtute aum uhi. Hute chu Barnaba leh Nigar achih uh Simeon leh Kureni a um Lukia leh gambung vaihawmtu Herod toh khang khawm Manaen leh Saul chihte ahi uhi. 2 Huleh Lalpa natong a an angawl laiun, Hagau Siangthou in, "Barnaba leh Saul keimah nna seem diinga ka kouh chu hung khenkhiahsah un," achi hi. 3 Huleh an angawlva ahaamtei zohun, a tungvah a khut uh anga va, asawlta uhi.
Kupra a Thusoina
4 Huchiin Hagau Siangthou sawldohin achiah va, Seliukia khopi ah achiah suh va, hu akipatin Kupra tuikulhgam lamah kuang in achiahta uhi. 5 Huleh Salamis a aum laiun, Judate sinagogte ah Pathian thu asoi va; Johan zong apanpih diingin apui uhi. 6 Huleh hu tuikulhgam chu tawnsuaahin Paphos ah atung va, hutah ah dawisiam, zawlnei tahlou, Judami khat amu va, a min chu Bar-Jesu ahi. 7 Hu mi chu gamoptu Sergia Paulas mipiltah kawma um ahi. Hu gamoptu'n Saul leh Barnaba chu akou a, Pathian thu jaah auut hi. 8 Hizongleh dawisiampa Elima (a haam va hu umjia chu dawisiam chihna mah ahi) in gamoptu chu ginlouhsah tumin, amahuh chu anadoudaal hi. 9 Huin Saul, Paul achih uh, chu Hagau Siangthou in adim a, amah chu aensaal a, 10 huin, "Aw nang miheem leh lepchiahna chinteng a dimpa, nang diabol tapa, nang dihtatna zousiah meelmapa, Lalpa lam dihtahte suhsiat tawplou diing na hi maw? 11 Tuin ngai in, Lalpa khut na tungah atu ahi, na mit ahung taw diing a, bangtan aha khovaah mulouin na um diing," achi hi. Huin thakhatin meikaai leh mial a tungah ahung Ida a; khut a kaitu diing hawlin avaah lehlehta hi. 12 Huin gamoptu in hu sil kibawl chu amu a, Lalpa thuhilh chu limdang asa mahmah a, agingtata hi.
Pisidia Antiok ah Paul leh Barnaba
13 Huin Paul chu amah toh umte toh Paphos khua apatin achiah va, Pamphilia gam a Perga khua atung va, huleh Johan in amahuh nusiain Jerusalem ah akihkiitta hi. 14 Hizongleh amahuh chu Perga khua apat achiah jeel va, Pisidia gam a Antiok khua atung va, huleh Sabbath ni'n sinagog ah aluut va, atou uhi. 15 Huleh Daan Lehkhabu leh Zawlneite Lehkhabute asim zohun sinagog a vaihawmte'n a kawmvah mi asawl va, "Ulenaute, mite hasotna thu soi diing na neih uh leh soi un," achi uhi. 16 Huin Paul ading a, a khut a jaapin asoi a, "Israelmite leh nanguh Pathian laute, ngai un. 17 Hi Israel namte Pathian in i pulepate uh ateel a, Aigupta gam a aum laiun asuloupi a, tungnung khut haat in hu akipatin apuidohta hi. 18 Kum sawmli hun sung veel chu Ama'n gamdaai ah a silbawlte uh athuaah thei hi. 19 Huleh Kanaan gam a nam sagihte asuhmang zohin, a gam uh a kawmvah goutan in ahawmsah hi. 20 Hu nungin Ama'n kum za li leh sawmngaa sung vaihawmtute apia a, zawlnei Samuel chiangtanin. 21 Huleh hu nungin kumpi angeen va; huchiin kum sawmli sung diingin Pathian in Saul, Kis tapa Benjamin phung a mi, amahuh apia hi. 22 Huleh Ama'n amah asuanmang nungin a kumpipa diingun David atungdohta hi. Pathian in amah tungtaang ah hichu asoi a, 'David, Jesse tapa, ka lungtang bang pua mi ka muta, ama'n chu ka deihlam phot abawl diing,' achi hi. 23 "Hi mipa chihaahte lahah Pathian in a thuchiam dungjuiin Israel mite kawmah Hundampa Jesu ahung tungdohta hi. 24 Ahung main Johan in kisiihna baptisma thu Israel mi zousiah kawmah anahilh masa hi. 25 Huleh Johan in a lam ajuih zoh kuan laiin, 'Nang un kua hi diingin na hung gingta viai? Amah chu hilou ka hi. Hizongleh ngai un, ka nung ah mi khat hung diing ahi, kei chu a keengtophah suut taah zong ka hi sih hi,'achi hi. 26 "uienaute, Abraham suan tate haw, na lahva Pathian lau zousiahte haw, na kawmvah hi hutdamna thu ahung kithot hi. 27 Jerusalem a umte leh a lamkaite un Sabbath ni chin a asim uh zawlneite aw leh Amah chu ahe sih va, siamlouhtangsahin, hu thute anasutaangtungta uhi. 28 A sihna diing khop a tungah bangma amuh louh-un zong, Pilat kawmah hihlum diingin angeen uhi. 29 Huleh Amah tungtaang thu anakigelhsa zousiah asuhtaangtung zohun, sing dawn apatin alakhia va, haan ah asialta uhi. 30 Hizongleh Amah chu Pathian in misi lah apat akaithou kiitta hi. 31 Huleh Amah toh Galili gam apat a Jerusalem khua a chiah toute kawmah ni tampi sung akilaah veu a, hu mite chu tuin mite kawmah a thu heetpihtute ahi uhi. 32 "Huleh kei un zong i pulepate uh kawma chiamsa, hu thuchiam tanchinpha kipaah huai ka hung hilh uhi. 33 Pathian in Jesu akaihthoh kiitna ah, huchu, ei a tate uh kawmah asutaangtung ahi. Phatna Late nihna ah, 'Nang chu ka Tapa na hi a, tuni in ka hung hingkhetahi,' chih gelh bangin. 34 "Huleh muatna mun a pai kiit talou diinga Pathian in Amah misi lah apat akaihthoh diing daan thu chu hichiin asoi hi, 'David kawma ka piaah khotuahna muanhuai chu nangmah ka hung pe diing,' chiin. 35 "Hujiahin Ama'n Phatna Latedangah, 'Na Misiangthou chu muatna mu diingin na phal saam sih diing hi,' achi kiit jeel hi. 36 "Ajiahchu David in chu Pathian vaihawmsah banga amah khang a mite nna atoh zohin, a-ihmuta hi. Huleh a pulepate kawmah asial va, amuat mangta hi. 37 Himahleh Pathian in akaihthohpa'n chu muatna amu sih hi. 38 "Hujiahin hichu he un, mite leh unaute, hi Pa vaanga sual ngaihdamna thu na kawmva kisoi ahi. 39 Kuapouh Amah gingta phot chu, Mosi daan thu a siam na tan zohlouhna vapat sil zousiah ah siamtansahin aum uhi. 40 Hujiahin pilvaang un, huchilou inchu Zawlneite Lehkhabute a hu thu kisoi na tungvah ahung tung kha diing hi: 41 'Nanguh musittute, ngai un, limdangsa unla, mangthaai un. Ajiahchu na damsung un nna khat ka tong hi. Hu nna chu mi'n nanguh hung hilh mahleh uh, na gingta top sih diing uhi,' chih chu," achi hi. 42 Huleh sinagog apat Judate apawt tahun, Jentelte'n Sabbath ni kiit chianga hu thute chu a kawmva soi diingin angeen uhi. 43 Huleh kikhawmte chu akikhen jaah tahun, Juda tamtahte leh Juda sahkhua a kihei Pathian ngaihsah mi tamtahte'n Paul leh Barnaba ajui va, amah un amahuh chu anahoupih va, Pathian hehpihna a um zing diingin athuzoh uhi.
Apostolteyn Jentelte Lam Angat uh
44 Huleh Sabbath ni kiit in a khopi pumpi phial un Pathian thu ngaikhe diingin ahung kikhawm uhi. 45 Hizongleh Judate'n mipite amuh tahun, athangse mahmah va, Paul thusoi chu akalh va, asoisia uhi. 46 Huin Paul leh Barnaba in hangsantahin asoi va, "Pathian thu hi nanguh kawma soi masat diing mawng ahi. Hizongleh na khinkhiah va, kumtuanga hing taahlou a na kikoih nungun, Jentelte lam ka ngatta uhi chih he un. 47 Ajiahchu Lalpa'n hichi bangin kei uh thu ahung pia hi: 'Jentelte vaah hi diingin ka hung guat a, kawlmong tanpha a hutdamna hi diingin,' chih gelh bangin," achi hi. 48 Huleh Jentelte'n hu thu ajaah tahun akipaah va, Lalpa thu chu atawisang va; kumtuanga hing diinga guat taphot in agingta uhi. 49 Huleh Lalpa thu chu hu gam pumpi ah adalhta hi. 50 Hizongleh Judate'n Pathian ngaihsah numei zahtaathuaite leh khopi sunga mipoimohte achiilsia va, Paul leh Barnaba chu asuduhdah va, a gam vapat adelhdohta uhi. 51 Huin amah un a tungvah a keengpeeh va leivui athing khia va, Ikoniam ah achiahta uhi. 52 Huleh nungjuite chu kipaahna leh Hagau Siangthou in adimta uhi.
Paul leh Barnaba Ikoniam ah
1 Huleh Ikoniam ah hichi ahung hi a, Judate sinagog ah aluut khawm va, thu asoi uhi. Huchiin Judate leh Grikte tamtah in zong agingta uhi. 2 Hizongleh gingtalou Judate'n Jentelte achiilsia va, unaute amudahsahta uhi. 3 Hujiahin Lalpa ah hangsantaha thu soiin hutah ah sawttah aum uhi. Ama'n chiamchihnate leh sillimdangte a khut va hihsahin, a hehpihna thu ahesah jeel hi. 4 Hizongleh khopi sunga mipite chu akilangkhen uhi: khenkhat in Judate agum va, khenkhat in apostolte agum uhi. 5 Huin Jentelte leh Judate'n a houtute uh toh kithuaha apostolte zumhuaitaha bawl diing leh suang a seh diing angaihtuah va, 6 amah un hichu anahe va, Lukaonia gam a khopite Lystra, Derbe ah leh a kiimveel gamte ah ataaidohta uhi. 7 Hutah ah chu tanchinpha asoita uhi.
Lystra leh Derbe ah
8 Huleh Lystra ah keeng zoi koiaha mi khat atou a, a pian tung apat jeng mawng ahi a, keeng in apai ngei sih hi. 9 Hu mi in Paul thusoi angaikhia a; Paul in guntahin aen den a, a damna diingin ginna anei chih ahe a, 10 aw ngaihtahin, "Na keeng in ding tang in," achi hi. Huin amah chu akitawm a, a keeng in apaita hi. 11 Huleh mipite'n Paul silbawl chu amuh tahun, ngaihtaha kikouin, Lukaonia haamin, "Mihing banga pathiante chu i kawmva hung suh ahi uh," achi uhi. 12 Huleh Barnaba chu Zeus, achi va, Paul chu thusoipeen ahih jiahin, Hermi, achi uhi. 13 Huin khopi kot maai a milem biahinn a Zeus siampupa'n bawngtalte leh paahkhi chu kotpi bul ah ahung tawi a, mipite toh amahuh geel biahna in lat atumta hi. 14 Hizongleh apostolte, Barnaba leh Paul in hichu atheih tahun, a puan uh abotkeeh va, mipi laha tawmluutin akikou va, 15 "Unaute, bang diinga hi silte bawl na hi viai? Keiuh zong nanguh toh pianken kibang mihing ka hi uhi. Hi sil thulimloute na kiheisan va, vaan leh lei, tuikhanglian leh a sunga sil um zousiah bawlpa Pathian hing kawma na hung kihei theihna diingun tanchinpha ka hung tut uh ahi. 16 Huleh Pathian in chu nidanglaiin nam chin amahuh lampi chiat a achiah uh anaphal hi. 17 Ahihvaangin Amah tungtaang heetsahna bawllouin ana-umsah sih hi. Huchiin sil hoih abawl jeel a, vaan apat guahtui leh gahpha bangkim ahung pia a, i lungtang uh neeh diing leh kipaahna in asudim zing hi," achi uhi. 18 Huleh hi thute soiin, mipite'n amahuh biahna diinga gan agoh diing uh akhap zou haamhaam uhi. 19 Huleh Antiok leh Ikoniam khua apat Judate hutah ah ahung va, mipite chu athuzoh zou va, huchiin Paul chu suang in asep va, si a agintaat jiahun khopi gei lamah akaidoh uhi. 20 Ahihvaangin nungjuite a kiim a adin laiun, ahung thou a, khopi sungah ahung luut kiitta hi. Huleh a jiing in Barnaba toh Derbe khua ah achiahta uhi.
Antiok ah Akihkiit uh
21 Amah un hu khopi ah tanchinpha asoi va, nungjui tampi asiam va, Lystra, Ikoniam leh Antiok khua ah akihkiitta va, 22 "Gimna tampi thuaahin Pathian lalgam ah i luut diing mawng ahi," chiin nungjuite lungsim akipsah va, ginna a um zingzing diingin ahasot uhi. 23 Kouhtuam chin a upate ateel va, an ngawla ahaamtei zohun, amahuh chu agin uh Lalpa kawmah akeemsahta uhi. 24 Pisidia gam chu atawnsuaah va, Pamphilia gam atung uhi. 25 perga khua a thu asoi zohun, Attalia ah achiah suh uhi. 26 Hutah apatin kuang in akitawl va, hu a natoh zohte uh tong diinga Pathian hehpihna a kepsaha aumna mun uh Antiok ah akilehkiitta uhi. 27 Huleh ahung tunun, kouhtuamte chu akoukhawm va, Pathian in amahuh zanga sil abawl zousiah leh Jentelte diinga ginna kotkhaah ahonsah daante ahilh uhi. 28 Huchiin nungjuite toh sawttah aum khawmta uhi.
Jentel Khristiante leh Mosi Daan
1 Huleh mi bangzah aha Judia gam apatin ahung suh va, "Mosi daan banga zeh na tan louh uh leh hutdam na hi thei sih diing uh," chiin unaute ahilh uhi. 2 Huleh huchia Paul leh Barnaba chu amahuh toh kikhinga hahniala akinial phetun, Paul leh Barnaba chu a lahva mi bangzah aha toh hu thubuai tungtaang ah, Jerusalem a apostolte leh upate kawma chiah tou diingin aguat uhi. 3 Huin kouhtuamte'n amahuh chu asawl va, amah un Jentelte kisiih kiit daan thu soi jeelin, Phinisia gam leh Samaria gam tawnin apai va, huchiin unaute zousiah nasatahin akipaahsah uhi. 4 Huleh Jerusalem atunun kouhtuamte leh apostolte leh upate'n amahuh anakipaahpih va; huin Pathian in amahuh zanga a silbawlte zousiah asoi uhi. 5 Hizongleh Pharisai pawl a gingtu koite aha ading va, "Jentelte'n zeh atan uh akuul a, huleh Mosi daan jui diinga hilh diing ahi uh," achi uhi.
Jerusalem a Khawmpi
6 Huin apostolte leh upate chu hu thu ngaihtuah diingin akikhawm uhi. 7 Sawttah akinial nungun, Peter ading a, a kawmvah, "Ulenaute, Jentelte'n keimah kam a tanchinpha j a a, a gintaatna diingva Pathian in nidanglaia, i lah vapat ahung guatdaan na he uhi. 8 Huleh lungsim hetu Pathian in eihaw ahung piaah bangmahin Hagau Siangthou a kawmva piain, aheetpihta hi. 9 Huleh eihaw leh amahuh khentuam neilouin, ginna in a lungsim uh ahih siangthou hi. 10 Huchiin i pulepate leh eihawn zong i zohlouhsa uh namkol chu tuin nungjuite ngawng a baat tuma bang diinga Pathian je-et na hi viai? 11 Hizongleh amahuh tobangin, eihaw zong Lalpa Jesu Khrist hehpihna a hutdam diing hiin i kigingta uhi," achi hi. 12 Huin mipi zousiah asipta va, Barnaba leh Paul in Pathian in amahuh zanga Jentelte laha chiamchihna leh sil loupi abawl thu asoi uh angaikhia uhi. 13 Asoi zohun, Jakob in asoi a, "Ulenaute, ka thu ngai un. 14 Pathian in Amah min po diingin a lah vapat mi hon khat ladoh diingin amasain Jentelte aveh hi chih thu Simon in asoita hi. 15 Huleh hi thu leh Zawlneite Lehkhabute thu akituaah hi: 16 'Hizoh chiangin ka hung kiit diing a, David biahbuuh puuhsa ka bawl kiit diing; a siatna ka bawl kiit diing a, huchiin ka tungding diing hi. 17 Midangte leh Jentelte ka min a kikou zousiahte'n LALPA ahawlna diingun, hi silte zousiah bawlpa LALPA'N achi hi,' chih gelh bangin. 18 "Pathian in a silbawlte zousiah chu kumtuang apat aheet ahi. 19 "Hujiahin Jentelte laha Pathian lama kiheite chu hihbuai dah lei chih ka ngaihdaan ahi. 20 Milem biahna, sil sianglou neehte, kingaihna thaanghuai, akiheehlup thoh sa leh sisan neeh chihte tawpsan diingin a kawmvah gial lehhang, ka chi jaw hi. 21 Ajiahchu sinagogte a Sabbath ni tenga amah thu chu sim ahih jiahin, nidanglai apatin khopi chin ah Mosi in amah tungtaang soitu anei hi," achi hi.
Jentel Khristiante Kawma Lehkhathot
22 Huin apostolte leh upate'n kouhtuam zousiah toh, a lahva mi teel a Paul leh Barnaba toh Antiok khua a chiahsah hoih asa uhi. Ateelte uh min chu Barsaba kichi Juda, achih uh leh Sila ahi va, amahuh chu unaute laha houtu ahi uhi. 23 Hichibanga kigial lehkhathot chu a khut vah athot uhi: Apostolte leh upate leh unaute' n Antiok khua leh Syria leh Silisia gam a um Jentel unaute kawmah: Chibai. 24 Ka lah vakipatin mi khenkhat, "Zeh na tan va, daan thu zong na juih diing uh ahi," chia thu soiin nanguh hung subuaiin, na lungsim uh amangbangsah chih ka he va, a kawmvah lah thu bangmah ka pe ngaal sih uhi. 25 Hujiahin ka kithugual zohun, mi teeldoh a, ka deihtah uh Barnaba leh Paul, 26 Lalpa Jesu Khrist min jiaha sih khawhsaloua um tegeel toh, na kawmva mi hung sawl chu hoih ka sa uhi. 27 Huchiin Juda leh Sila ka hung sawl va, amah un zong hi thu kam in ahung hilh diing uhi. 28 Ajiahchu Hagau Siangthou leh kei un hi thu poimohte chihlouh puaahgih dang bangmah na tungvah ngahlouh hoih ka sa uhi: 29 milem biahna sa neeh bang, sisan neeh bang, akiheehlup thoh sa neeh bang leh kingaihna thaanghuai bang tawp leh uh chin ka chi uhi. Hi haw na tawp uh leh, nanguh diingin ahoih diing hi. Damtahin um un, chiin. 30 Huchiin asawlkheta va, Antiok khua atun tahun mipi akoukhawm va, lehkhathot chu apeta uhi. 31 Huchu asim zohun, hamuanna thu jiahin akipaah mahmahta uhi. 32 Juda leh Sila zong zawlnei ahi va, thu tamtah in unaute chu ahamuan va, asukip uhi. 33 Huleh hutah a sawttah aum nungun amahuh chu hamuangtahin unaute lah apat apostolte kawmah achiahsahta uhi. 34 Sila in chu hu mun a umtaahdih hoih asa hi. 35 Paul leh Barnaba chu Antiok ah Lalpa thu hilh leh soiin midang tamtah toh aum zing uhi.
Paul leh Barnaba Kikhenna
36 Ni bangzah aha nungin Paul in Barnaba kawmah, "I chiahkiit diing a, kho chin a Lalpa thu i soina zousiah a unaute vaveh ni, bangchiin aum viai chih i vaen diing," achi hi. 37 Huleh Barnaba in Mark kichi Johan chu a kawmvah pui atumhi. 38 Hizongleh Pamphilia gam a amahuh kiihsan a, natohna a amahuh toh anachiah loupa chu a kawmva pui diing Paul in hoih asa sih hi. 39 Huchiin nasataha kinialin akikhen uhi. Barnaba in Mark apui a, Kupra gam ah kuang in achiahta hi. 40 Huleh Paul in Sila ateel a, unaute'n Pathian hehpihna a akolsah nungun achiahdohta hi. 41 Huleh kouhtuamte sukip jeelin Syria leh Silisia gam tawnin achiah uhi.
Timothi in Paul leh Sila Ajuihna
1 Huin amah chu Derbe leh Lystra ah ahung a; ngai in, hutah ah Timothi kichi, nungjui khat aum hi. Amah chu gingtu, Juda numei koiaha tapa ahi a, hizongleh a pa chu Grikmi ahi. 2 Amah chu Lystra leh Ikoniam aum unaute'n asoiphat mahmah uh ahi. 3 Paul in amah chu tonpih diingin adeih a, apui hi. Hu kiimveel a Juda umte jiahin a zeh atansah hi, amah un a pa Grikmi ahi chih aheet jiahun. 4 Khopite tawna apai kawm-un, amah un Jerusalem a um apostolte leh upate'n anamdet uh thupuuhnate chu a kawmvah juih diingin apekhiauhi. 5 Huchiin kouhtuamte chu ginna ah asukipta va, ni chin in apung deuhdeuhta uhi.
Kilaahna a Paul in Makedonia Mi Amuhna
6 Asia gam a thusoi diing Hagau Siangthou in akhap jiahin amah un Phrigia gam leh Galatia gam atawnsuaah va, 7 Mysia gam kawm atun tahun, Bithunia gam ah luut atum va, hizongleh Hagau in aphal sih hi. 8 Huchiin Mysia gam akhen va, Troas ah achiahsuhta uhi. 9 Huleh jaan laiin Paul in kilaahna amu a, Makedonia gam a mi khat dingin, "Makedonia gam ah hung gaalkaai inla, hung panpih in," chia ngeenin amu hi. 10 Huleh hu kilaahna amuh zohin a kawmva tanchinpha soi diingin Lalpa'n ahung kou ahi chih ka heetun, Makedonia gam ah chiah ka tum pah uhi.
Lidia Pianthahna
11 Huchiin Troas khua apat kuang in ka pawt va, zangtahin Samothrake tuikulhgam ah ka chiah va, a jiing in Niapoli ah ka chiah jeel uhi. 12 Hu apatin Philippi ah ka chiah va, huchu Makedonia gam a kho poimoh khat ahi a, Rom mite teenna veeng ahi. Hu khopi ah ni bangjaat aha ka taam uhi. 13 Sabbath ni in khopi polam a luuipang ah haamteina mun hia ka gintaat vah ka chiah uhi. Huin ka tou va, numei hung paikhawmte kawmah thu ka soi uhi. 14 Huleh numei khat a min Lidia, puan sandup juaah, Thiateira khopi a um, Pathian be mi in ka thu uh aja a, Paul thusoi jui diingin Lalpa'n a lungtang asuhvaahsah hi. 15 Huleh amah leh a innkote'n baptisma atan zohun, "Lalpa a ginuma na hung ngaih uh leh, ka inn ah hung unla hung tung un," chiin ahung kou hi. Huchiin ahung houtaang teeiteeita hi.
Paul Leh Sila Suangkul Taanna
16 Huleh hichi ahung hi a, haamteina mun a ka chiah laiun, suaah nungaah kua aha aisaansiam jawl in ahung kituaahpih hi. Ama'n chu a aisaan jiahin a pute sum tamtah amuhsah veu hi. 17 Hu mi in chu Paul leh keiuh kikouin ahung jui a, "Hi mite, hutdamna lampi hung hilhte hi Tungnungpeen Pathian suaahte ahi uh," achi hi. 18 Huchiin ni tamtah huchibangin ahih a, huin Paul in jadah mahmahin akihei a, dawi kawmah, "Jesu Khrist min in a sung apat pawt diingin thu ka hung pia ahi," achi hi. Huleh amah chu hu laitahin apawt pah hi. 19 Huleh a pute'n summuh akinepna uh abei, chih aheet tahun, Paul leh Sila aman va dawlmun ah thukhentute ma ah akailuut uhi. 20 xhukhentute kawmah apui va, "Hite hi Judami ahi va, ka khopi uh atohbuai mahmah uhi. 21 Ei Rom mite'n i laah va i zop sianglou tawndaante juihsah ahung tum uhi," achi uhi. 22 Huchiin mipite chu amahuh sual diingin ahung kipan uhi. Thukhentute'n a puan uh abohkeehsah va chiangpum ajeep diingin thu apia uhi. 23 Tampivei ajeep zohun, suangkul ah akhum va, a suangkul veengtu kawmah bittaha veeng diingin thu apia uhi. 24 Huchitaha thu apiaah jiahun, ama'n chu suangkul sungnung jaw ah akhum a, a keengte vah singkol abutsah hi.
Paul leh Sila Suangkul apat Suaahtaatna
25 Hizongleh jaankhang laiin Paul leh Sila chu ahaamtei va, Pathian kawmah phatna la asa va, huleh mitaangte'n angaikhia uhi. 26 xhakhatin jiil nasatahin ahung kiliing a, huchiin suangkul irmbulte ahung liing a, kot zousiah chu kihong pahin, mi chin kolbuhte ahung kiphel vehta hi. 27 Huin suangkul veengtu chu ihmu ahung halh a, suangkul kotkhaahte kihong amuhin mitaangte chu taaimangta uh asa a, a naamsau adoh a, kithah atum hi. 28 Hizongleh Paul chu aw ngaihtahin akikou a, "Bangmah kiloh sin, ajiahchu ka bawnun hi ah ka um uhi," achi hi. 29 Huin a veengtu'n chu thaumei akan a, atawmluut a, kithing kawma hungin, Paul leh Sila ma ah akhupbohta hi. 30 Huleh amahuh chu ahung puidoh a, "Pute, hutdama umna diingin bang ahiai ka bawl diing?" achi hi. 31 Huin amah un, "Lalpa Jesu Khrist gingta in, huchiin hutdamin na um diing, nang leh na innkuante," achi uhi. 32 Huin amah un a kawm leh a inn a um zousiah kawmah Lalpa thu asoita uhi. 33 Ama'n amahuh chu hu jaan hu daah mahin apui a, ajeepna golhte uh asilsiang hi. Huin amah leh a innkote zousiah in baptisma atang pah ngaal uhi. 34 Amahuh chu a inn sungah apui a, a ma vah an alui a, Pathian agintaat jiahun a innkote zousiah toh akipaah uhi. 35 Ni asuaah in, thukhentute'n, "Hu mite hah in," chiin mimantute asawl uhi. 36 Suangkul veengtu in Paul kawmah hu thu ahilh a, "Thukhentute'n nanguh hah diingin mi ahung sawl uhi; hujiahin tuin pawt unla hamuangtahin chiah un," achi hi. 37 Hizongleh Paul in a kawmvah, "Rom khualetui hihna nei mite ka hi ngaalva, ka tungthu uh atanna umlouin vaantaang mitmuhin ahung jeep va, suangkul ah ahung khum uhi. Tuin aguuha hung delhkhiah sawm ahi uh maw? Hithei ngeilou diing! Amahuh mahmah hung uh henla hung puidoh uh heh," achi hi. 38 Huleh mimantute 'n hu thute chu thukhentute kawmah ahilh uhi. Rom khualetui hihna nei mite ahi uh chih ajaah tahun alauta uhi. 39 Huin amahuh ahung va, ajawl va, apuidoh va, khopi nuse diingin angeen uhi. 40 Huleh amahuh chu suangkul apat apawt va Lidia inn ah aluut va; unaute amuh tahun ahasot va, apawtta uhi.
Thessalonika ah
1 Huleh Amphipoli leh Apollonia apaipeel va, Thessalonika atungta va, hutah ah chu Judate sinagog aum hi. 2 Paul chu amah ngeinain, a kawmvah aluut a, Sabbath ni thumvei Pathian Lehkhathu apat akikuppih a, 3 Khrist chu gimthuaah diing mawng ahihdaan bang, huleh misi lah apat thou kiit ngeei diing ahihdaan hilhchianin, "Hi na kawmva ka soi Jesu chu Khrist ahi" chiin ahilhchian a, asulang hi. 4 Huchiin a lahva mi khenkhat in agingta va Paul leh Sila chu azopta uhi, Pathian ngaihsah Grik mipi nasatah leh numei lamkai tamtahte toh. 5 Hizongleh ginglou Judate'n ahuphulh jiahun dawlmun a migilou thasia kuate aha a kawmva pui in mipi akoukhawm va, khopi sung teng asubuaita uhi. Huin Jason inn aluh va, amahuh chu vaantaang laha puikhiah atum uhi. 6 Huleh amahuh amuh louh phetun, Jason leh unau dang kuate aha khopi sung thukhentute kawmah akailuut va, kikouin, "Hi khovel hihbuai lumlette hi ah zong ahung uh; 7 Jason in anazintungsah a, hite zousiah in kumpi dang, a min Jesu aum hi, chiin Kaisar thuphuan kalhin aum uhi," achi uhi. 8 Mipite leh khopi sung thukhentute'n hu thu ajaahun abuaita uhi. 9 Huleh amah un Jason leh midangte kawm apatin a luangva heen diing sil alaah zohun, amahuh ahahta uhi.
Paul Leh Sila Beria Khua ah
10 Huleh unaute'n ajaan ajaan in Paul leh Sila chu Beria ah asawlkhe pah uhi. Hutah avatun tahun Judate sinagog ah aluut uhi. 11 Hu mite chu Thessalonika a mite saangin a lungsim uh anakihong jaw va, lungsim kilawptahin thu chu apom va, a thusoi uh chu adih leh dihlouh heetna diingin ni chinin Pathian Lehkhathu ah ahawl uhi. 12 Hujiahin amahuh laha tamtah in agingta uhi, Grik numei leh pasal zahum tampite toh. 13 Hizongleh Thessalonika khua a Judate'n Paul in Beria khua ah Pathian thu asoita chih aheet tahun, hutah ah zong ahung va, mipite ahung tohbuai uhi. 14 Huin kintahin unaute 'n Paul chu tuikhanglian tan a chiah diingin asawlkhe pah va, hizongleh Sila leh Timothi chu hutah ah aum denta uhi. 15 Paul puitute'n chu Athen tanin apui va; Sila leh Timothi chu akintheipatawpa a kawma hung diinga a thuhaah chu puain achiahta uhi.
Athen Khua ah Paul
16 Paul in Athen a amahuh ana-ngaah laiin, hu khopi chu milem pathiante a dimin amu a, a lungsim asuna hi. 17 Hujiahin sinagog ah Judate leh Pathian ngaihsahte ahoulimpih a, dawlmun ah zong ana-um photmahte chu ni chinin ahoulimpih jeel hi. 17 Huin Epikuriamite leh Stoikmite laha mipil kuate aha in zong amah ahung kinialpih uhi. Huleh khenkhat in, "Hi thasia kamtam in bang ahiai asoi tup?" achi uhi. Akhen dangte'n, Jesu thu leh thohkiitna tanchinpha asoi jiahin, "Amah chu gam dang pathiante thusoitu ahihtuaah hi," achi uhi. 19 Huleh amah chu apui va Areopaga ah atut va, a kawmah, "Hi thuhilhna thah na soi hi na hung hesah thei diai? 20 Silmah bang aha ka bil vah na hung tut ahi; hujiahin hi silte umjia ka he uut uhi," achi uhi. 21 Ajiahchu Athenmi haw zousiah leh a khua va zin umte'n zong, ahun uh sildang bangmaha zang louin thu thah taphot soiin aha, angaikhe beehin aha aum veu uhi.
Areopaga a Paul Thusoi
22 Huin Paul chu Areopaga mual laitah ah ading a, thu asoi hi, "Nanguh Athen mite haw, bangkim ah sahkho ngaihsahtah mi na hi uh chih ka he hi. 23 Ajiahchu ka vaahleh kawm a, na biahte uh ka et leh maitaam khat tungah, HEETLOUH PATHIAN A DIING, chia kigial ka mu hi. Hujiahin heloupi-a na biah uh, hu Amah chu ka hung hilh ahi. 24 "Pathian, khovel leh a sunga sil zousiah siamtu chu, vaan leh lei Lalpa ahihjiahin, khut a bawl biahinnte bang ah aum ngei sih hi. 25 Amah chu sil tasam bangin mihing khut a natohsahin zong aum ngei sih hi. Ajiahchu Amah ngeei chu bangkim kawmah hinnate, haihna leh sil zousiah petu ahijaw hi. 26 Leitung zousiah a teeng diingin sisan khat apatin nam chin a mihingte Ama'n asiam hi. Amahuh diingin hunbiihte aguat a, a teenna gamgi uh zong akhamsah hi. 27 Amah chu eite chiat apat gamla sih zongleh, amah un Lalpa ahung hawl va, amai amai va Amah ahung muhna diing uh ahi. 28 Ajiahchu Amah ah i hing va, i taang va, i um uhi, na laphuaahsiam uh kuate aha in zong, 'Ei zong Amah haahte i hi ngaalva,' chia asoi bangun. 29 "Huchiin Pathian haahte i hih jiahun, Pathian Pianken Umdaan chu sana pouh, dangka pouh, suang pouh, mihing khutsiam leh suhtuaha kheen milem tobang ahi, chih i ngaihtuah diing uh ahi sih. 30 Pathian in i heetlouh laite uh akiheetmohbawl a, hizongleh tuin chu mun chin a mi zousiah kisiih diingin thu apeta hi. 31 Ajiahchu Ama'n Mi aguatpa tungtawna khovel dihtatna a avaihawmna diing ni chu aguatta hi; huchiin Ama'n misi lah apat Amah akaihthohna ah a silguat muanhuaina mi zousiah kawmah alangsahta hi," chiin. 32 Huleh amah un misi lah apat thohkiitna thu ajaah tahun, khenkhat in anuihsan va, adang in, "Hi thu na kawmah ka ngaikhe kiit diing uh," achi uhi. 33 Huchiin Paul chu a lah vakipat apawtta hi. 34 Hizongleh mi khenkhatte'n amah azop va huleh agingta uhi. Huleh amahuh laha khenkhat chu Areopaga pawl a mi Dionisia leh numei khat, a min Damari ahi a, huleh a kawmva midangte toh ahi uhi.
Paul Korinth Khua ah
1 Hu silte zohin Paul chu Athen apat apawt a, Korinth ah achiahta hi. 2 Huleh a min Akuila, Judami khat amu a, hu mi chu Ponta gam a piang ahi a, Klaudias in Judate zousiah Rom apat pawt diingin thu apiaah jiaha a ji Prisilla toh Italy gam apat hung tungpan phet ahi va; Paul chu a kawmvah ahung hi. 3 A natoh uh kibang ahih jiahin a kawmvah atung a, a natoh uh chu puanbuuh bawl ahih jiahin atongkhawmta uhi. 4 Sabbath ni chinin sinagog ah thu asuutpih a, Judate leh Grikte chu thuzoh atum hi. 5 Huleh Sila leh Timothi chu Makedonia apat ahung tunun, Hagau in Paul chu thusoi diingin aphuut a, huleh Jesu chu Khrist ahi chih Judate kawmah ahilhchian veu hi. 6 Hizongleh amah un amah chu kalhin asoisia va, Paul in a puan athing a, a kawmvah, "Na sisan moh uh na tungvah kituh heh; na sisan vapat kei ka siang ahi. Tu kalsiah Jentelte kawmah ka chiahta diing hi," achi hi. 7 Hu apatin achiah a, mi khat a min Jasta achih uh inn ah aluut a, hu mi'n chu Pathian abe veu a, a inn zong sinagog toh kizom ahi. 8 Huleh Krispa, sinagog houtu in a innkuante zousiah toh Lalpa agingta uhi. Korinth a mi tamtah in zong jain agingta va, baptisma atangta uhi. 9 Huin jaanin Lalpa chu Paul kawmah manglam bangin akilaah a, "Lau sinla, sip louin thu soi jeelin. 10 Ajiahchu na kawmah ka um zing ahi, hung suna diingin kuamah in na tungah khut aha sih diing uh, hi khopi ah mi tampi ka nei ngaala," achi hi. 11 Huleh Paul chu hutah ah a lahva Pathian thu hilhin kum khat leh ha guup aumta hi.
Ngaihsampa Gallio leh Paul
12 Huleh Gallio, Akaia gamoptu ahih laiin, Judate'n kithutuaahin Paul asual va, vaihawmna touphah ma ah atut va, 13 "Hi pa soplai in daan kalh jawngin Pathian be diingin mi aheem puuh hi," achi uhi. 14 Huleh Paul in dawng diinga akisah laitahin, Gallio in Judate kawmah, "Aw nanguh Judate, hi haw hi sil dihlou thu aha, sil hihsual thu aha beeh hileh, ka hung ngaihsahna diing jiah aum diing hi. 15 Hizongleh thute, minte, nanguh daan thute giap ahihleh vaang, nang un kingaihtuah jaw un; ajiahchu ke'n huchibang thu ka ngaihtuah uut sih hi," achi hi. 16 Huleh vaihawmna touphah apatin amahuh adelhmangta hi. 17 Huin Grikmi zousiah in sinagog houtu Sostheni aman va, vaihawmna touphah ma ah avua uhi. Himahleh Gallio in hu a silbawlte uh poi asa sih hi.
Paul Syria ah Akihkiit
18 Huleh hu nungin Paul chu ni sawttah ataam nalai hi. Huzohin unaute chu kampha in akhen a, Prisilla leh Akuila toh Syria gam lamah kuang in achiahta uhi. Kichiamna aneih jiahin, Kenkria ah Paul in a sam ameet hi. 19 Huin Ephesi atung a, amahuh hutah ah anuseta hi; hizongleh amah chu sinagog ah aluut a, Judate toh thu asuutkhawmta uhi. 20 Huleh amah un a kawmva sawt deuh taam diingin angeen va, amah auut sih a, 21 hizongleh kampha in akhen a, "Jerusalem a kuut um diing ah tel ngeei ka tum hi. Pathian in aphal leh, na kawmvah ka hung kiit diing hi," achi hi. Huleh Ephesi akipatin kuang in achiahta hi. 22 Huleh Kaisaria ahung kaaiin, achiah tou a, kouhtuamte chibai abuuh a, Antiok ah achiahsuhta hi. 23 Huleh hutah ah ni tam lou aum nungin, achiah kiit a, nungjuite zousiah sukip diingin Galatia gam leh Phrigia gam zousiah atuansuaah hi.
Apollo Ephesi Khua ah
24 Huleh Judami khat a min Apollo, Alexandria khua a piang, thusoi siam leh Pathian Lehkhathu he deuh mei, Ephesi ah achiah hi. 25 Hu mi chu Lalpa lampi thu jilsiamsahsa ahi a, Johan baptisma chauh he hizongleh, hagau a guntuhtaha Lalpa tanchin dihtaha soiin ahilh jeel hi. 26 Huleh sinagog ah hangsantahin thu asoi panta hi. Prisilla leh Akuila in a thusoi ajaah tahun a inn vah apui va, a kawmah Pathian lampi thu kichian seemin ahilh chianta uhi. 27 Huleh ama'n Akaia gam a chiah peh atup phetin, unaute'n ahasuan va, amah anakipaahpihna diingun nungjuite kawmah lehkha athotta uhi. Amah atun tahin, hehpihna jaala gingtate nasatahin apanpih hi. 28 Ajiahchu ama'n silbawltheitahin vaantaang heetin Judate anialdong a, Pathian Lehkhathu zangin Jesu chu Khrist ahi, chih ahilhchian hi.
Baptistu Johan Nungjuite
1 Huleh hichi ahung hi a, Apollo hi Korinth a aum kaaiin Paul chu khosah gamte tuansuaah zouin Ephesi ahung tung hi. Huleh nungjui kuate aha ahawldoh hi. 2 Ama'n a kawmvah, "Na gintaat laitahun Hagau Siangthou na tang viai?" achi hi. Amah un a kawmah, "Hagau Siangthou aum chih zong ka ja kha ngei mawngmawng sih uh," achi uhi. 3 Huin ama'n a kawmvah, "Bang baptisma ahiai na tan uh?" achi hi. Amah un, "Johan baptisma," achi uhi. 4 Huin Paul in, "Johan in chu mi kawmah a nunga hung diing Khrist Jesu chu na gintaat diing uh ahi, chiin kisiihna baptisma in abaptis ahi," achi hi. 5 Amah un hichu ajaah tahun, Lalpa Jesu min in baptisma atangta uhi. 6 Huleh Paul in a tungva a khut angah tahin, Hagau Siangthou a tungvah ahung tungta a, haamdangte in ahaam va, zawlnei bangin thu asoilawh uhi. 7 Huleh a bawnun pasal sawmlenih veel ahi uhi.
Paul Ephesi Khua ah
8 Huleh Paul chu sinagog ah aluut a, ha thum sung diing hangsantahin thu asoi a, Pathian lalgam tungtaang thu ah houlimpihin mi ajawl tuuntuun jeel hi. 9 Hizongleh khenkhat in a lungtang uh akhauhsah va thu amang sih va, mipi ma a hu Lampi chu asoisiat tahun, amahuh achiahsan hi. Nungjuite apuituam a, Tiranna skul ah ni chinin akihoulimpihta hi. 10 Huleh hichibangin kum nih sung aum a; huchiin Asia gam a um zousiah, Judate leh Grikte'n Lalpa Jesu thu ajata uhi. 11 Huleh Pathian in Paul khut in silmah tungtuang tahtahte abawlsah hi. 12 Huchiin a sa tung apatin puan themte aha teenthuahte aha bang damloute kawmah ahung tawi va, anatnate uh adam jeel a, huleh a sung vapat dawite zong apawt jeel uhi. 13 Huin dawite nohdoh siam Judami vaah lehleh khenkhat in, "Paul in a thu ataangkoupih veu Jesu min in ka hung vau uhi," chiin dawipaaite tungah Lalpa Jesu min alou veu vial uhi. 14 Huleh Judami, siampu lai khat, Skeva in hutobang bawl tapa sagih anei hi. 15 Hizongleh dawi gilou in chu adawng a, "Jesu ka he hi, Paul zong ka he hi, himahleh nanguh koite na hi viai?" achi hi. 16 Huin dawipaai pa'n chu amahuh ahung boh a, azou a, anuaisiahta a; huchiin hu inn apatin saguaah leh liamin ataaidohta uhi. 17 Huleh hichu Ephesi khua a teeng zousiah, Judate leh Grikte kawmah athangta a; lauhna chu a bawnva tungah ahung tung a, Lalpa Jesu min chu tawisangin aumta hi. 18 Huleh agingta zong tamtah ahung va, a silbawlte uh thupha atawi va, akiphuangta uhi. 19 Mitphialdawi tawi mi tampi in zong a lehkhabu uh ahung tawi khawm va, mi zousiah mitmuhin ahaalta va; aman asuut va, dangka saang sawmngaa apha hi. 20 Huchiin loupitahmaiin Lalpa thu chu nasatahin akithehdalh a, agualzoujeelhi.
Paul Siltup
21 Hu silte abawlzoh nungin, Paul in Hagau in, Makedonia gam leh Akaia gam atotsuaah zoh chianga Jerusalem a chiah atum a, "Hu a ka chiah zoh chiangin, Rom zong ka vapha teeiteei diing," achi hi. 22 Huchiin amah panpihtute mi nih Timothi leh Erasta chu Makedonia gam ah asawl a, hizongleh amah chu Asia gam ah hun tomkhat aum tadih hi.
Ephesi Khua a Buaina
23 Hulai veelin hu Lampi thu jiahin mi abuai nasaten uhi. 24 Ajiahchu mi khat a min Demetria, dangka siih kheengtu, dangka siih a Artemis milem biahinn bawltu in khutsiamte kawmah kilohna tampi ape jeel hi. 25 Hu mipa'n a natoh banguh tongte toh amahuh akoukhawm a, huin a kawmvah, "Pute aw, hi natohna hi i hauhna uh ahi, chih na thei uhi. 26 Hi Ephesi chauh ah hilouin, Asia gam pumpi phial ah zong, khut a bawlte chu pathiante ahi sih uh, chiin hi Paul in mi tampi athuzoh a, akiheisah zouta hi chih, nanguh ngeei in na mu un na ja uhi. 27 Huchiin i kiveina uh manlouh ahung suah diing lauhuai chauh zong ahi sih a, pathiannu loupi Artemis biahinn zong simmohin ahung um kha diing a, huleh Asia gam pumpi leh khovel in abiah uh amahnu ngeei zong a loupina apat suhngiamin ahung um kha diing chih alauhuai ahi," achi hi. 28 Huleh hu thute ajaah tahun athangtawm mahmah va, "Ephesi mite Artemis chu aloupi hi!" chiin akikou uhi. 29 Huin a kho pumpi abuai vehta va, Gaia leh Aristarka, Makedonia gam a mi, Paul in a khualzinna a atonpih tegeel chu aman va, kituaahtahin etnop inn ah ataailuutpihta uhi. 30 Paul in mi laha luut atup leh nungjuite'n aphal sih uhi. 31 Huleh Asia gam a houtute laha Paul lawmte khenkhat in a kawmah mi asawl va, etnop inn a luut het lou diingin angeen uhi. 32 Khenkhat thu khatin akikou va, khenkhat thudang in akikou uhi, ajiahchu kikhawmte chu abuai va, mi tamjaw in a kikhopna san uh zong ahe sih uhi. 33 Huleh mipi lah apat Alexandar akaidoh va, Judate'n amah chu ama lamah asawn uhi. Alexandar in a khut in ajaap a, mipite kawmah a siamna thu soi atum hi. 34 Hizongleh amah Judami ahi chih aheet tahun, daah kaal nih sung diing veel aw kituaahtahin, "Ephesi mite Artemis chu aloupi hi!" chiin akikou kou uhi. 35 Huleh khopi lehkhagialtu in mipi adaihsah zohin, "Nanguh Ephesi mite, Ephesi hi Artemis pathiannu loupi biahinn keemtu khopi ahi chih leh a lim vaan apat hung kesuh khu keemtu ahi chih helou koi aum ei? 36 Huchiin hi thu nial gual ahihlouh nungin, na sip khiinkhian diing uh ahi. Kin hehuin bangma na bawl diing uh ahi sih hi. 37 Ajiahchu hi na hung mipuite uh hi biahinn luhmi lah ahi sih va, na pathiannu soisete zong ahi sih uhi. 38 Demetria leh a tohpih khutsiam haw in mi kua tung aha a thubuai aneih uh leh, vaihawmna innte akihong zing a, gamoptute zong aum uhi. Khat leh khat kiheeh uh heh. 39 Hizongleh sildang a buaina nei na hih uh leh daan banga kikhopna ah lep diing ahi. 40 Tuni a buaina jiahin i tungvah thu ahung um diing lauthawng ahuai hi, i kikhopna san peen hih ahi chih theih diing lah aum sih ngaala," achi hi. 41 Huleh ama'n huchia asoi zohin kikhopna chu atawpsahta hi.
Paul Makedonia, Greece leh Troas Khua ah
1 Huleh buaina adaih nungin, Paul in nungjuite a kawmah akou a, amahuh ahasot a, kampha in aha a, Makedonia gam a diingin achiahta hi. 2 Huleh hu gam veel atotsuaah a, a kawmva hasotna thu tampi asoi zohin, Greece gam atungta hi. 3 Huleh hutah ah ha thum ataam a, Syria gam lama kuang a apai sawm laiin, Judate'n amah aguuh taan jiahun, Makedonia gam lehtot kiit atumta hi. 4 Huleh Beria khua a Sopater, Thessalonika khua a Aristarka leh Sekunda, Derbe khua a Gaia leh Timothi, huleh Asia gam a Tikika leh Trophima, amah un Asia gam dongin atonpih uhi. 5 Hite chu ka ma vah anachiah va, Troas ah ahung na ngaah uhi.
Eutika Kaihthohna
6 Huleh kei uh chu Tolsohlouh Tanghou nite zohin Philippi apat kuang in ka pai va, ni ngaa nungin a kawmvah Troas khua ah ka tung va, hutah ah ni sagih ka taam uhi. 7 Hapta ni masapeenin, nungjuite tanghou balkeeh diinga ahung kikhop laiun Paul in ajiingni a pai atup jiahin a kawmvah thu asoi a, huleh jaankhang dongin asoi hi. 8 Huleh pindan tungnung a ka kikhopna vah thaumei tampi aum hi. 9 Huleh a min Eutika kichi khangdawng khat kotta ah atou a, tuuitahin ana-ihmu hi. Paul in thu asoi sawt taahluat jiahin, ana-ihmu kha a, innsawng thumna apatin akesuh a, a sisain atawm uhi. 10 Huleh Paul akumsuh a, a tungah abohkhum a, akawi a, "Mangbang sih un, ajiahchu amah ah hinna aum nalai hi," achi hi. 11 Huin pindan tungnung a akaltouh kiit phetin, tanghou abalkeeh a, ane a, sawttah khovaah dongin a kawmvah thu soiin ahoulim a, huchiin achiahta hi. 12 Huleh amah un tangvaalpa chu ahingin ahung pui va, huleh amahuh chu nasataha hamuanin aumta uhi.
Mileta a Zinna
13 Huleh keiuh chu long lamah ka na chiah masa va, Asso khopi juanin kuang in ka paita va, hutah ah Paul tuansah diing ka sawm uhi; ajiahchu ama'n a keeng a chiah tumin huchi bangin achi mawng ahi. 14 Huleh Asso a ahung kituaahpih tahin ka tuangsahta va, Mitylene ka tungta uhi. 15 Huleh hu apatin kuang in ka chiah kiit va, ajiingni in Kios tuikulhgam lehlam jawn ka tung uhi. Huleh ajiingni in Samos tuikulhgam ka tung va, Trogiliam ah ka taam uhi. Ajiingni in Mileta ka tung uhi. 16 Ajiahchu Paul in Asia gam a um sawt autlouh jiahin Ephesi chu kuang a paikheel atupsa him ahi a, ahihtheih leh Jerusalem ah Pentikost ni a um atup jiahin akin pai hi.
Paul Vaihaahna Thusoi
17 Huleh Mileta akipatin Ephesi ah mi asawl a, kouhtuam upate avakousah hi. 18 Huleh amahuh a kawma ahung tun tahun, ama'n a kawmvah, "Asia gam a ka hung chiil ni masa apat na kawmva ka um sung siaha ka umdaan na he uhi. 19 Kingaingiamtah leh Judate'n thah diinga thu aphial jiahva mittui tampi leh sil hahsa ka tunga hung tungte thuaah kawmin Lalpa nna ka tong hi. 20 Huleh nanguh phattuamna diing sil bangmah phuangdoh louin ka iim sih a, ka hung hesah veh a, vaantaang lah leh inn chin ah ka hung thuhilh veu hi. 21 Judate leh Grikte kawmah zong Pathian lama lungsim kisiih thu leh i Lalpa Jesu Khrist ginna thu ka hesah jeel hi. 22 "Huleh tuin ngai un, hagau in Jerusalem a chiahtou diingin ahung phuut hi. Hu mun a ka tunga sil hung tung diingte ka he sih hi. 23 Kaanna leh hahsatna in ahung ngaah hi, chia khopi chin a Hagau Siangthou in ahung heetsah veute chauh ka he hi. 24 Hizongleh ka kitaaidemna kipaahtaha ka taaitung theihna diing leh Lalpa Jesu apat ka muh Pathian hehpihna tanchinpha heetsah diing natohna ka tohzoh theihna diingin hi silte khat beeh in ahung hihliing sih a, ka hinna zong iit taahin ka ngai sih hi. 25 "Huleh tuin, nanguh zousiah in ngai un, Pathian lalgam thu soia ka vaahlehnate'n ka meel na mu nawn sih diing uh, chih ka he hi. 26 Hujiahin mi zousiah sisan ah ka siang ahi chih tuni in ka hung hesah hi. 27 Ajiahchu Pathian thuguat zousiah na kawmvah phuandoh louha iim ka nei sih hi. 28 Hujiahin Pathian kouhtuam, Amah sisan a aleite vaah diingin, Hagau Siangthou in houtu a ahung siamna belaam pawlte zousiah leh nanguh tungah pilvaang un. 29 Ajiahchu ka chiah nung chiangin ngei huhamte na lahvah ahung luut diing va, belaam pawlte ahawi sih diing uh chih ka he hi. 30 Nanguh lah ngeei ah zong nungjui pawlte amahuh lama kaimang diingin thu heikawi na hung um diing uhi. 31 Hujiahin kiveeng un, kum thum sung zet mittui luang puma suun leh jaan a mi chin taaihilh ka tawp louh daan hezing un. 32 "Huleh tuin unaute, Pathian kawmah leh nanguh hung khangsah thei leh nanguh suhsiangthousate tengteng kawma goutan hung pe theitu Pathian hehpihna thu ah ka hung keemsah hi. 33 Kuamah dangka, sana silhleteen ka eeng ngei sih hi. 34 Hi khutte'n keimah leh ka lawite taahsap atongdoh jeel chih nanguh ngeei in na he uhi. 35 Hitobanga tonggimin haatloute na panpih diing uh ahi chiin sil zousiah ah ka hung ensahta hi. Lalpa Jesu ngeei in, 'Laah saangin, piaah hi vangpiaahna sangjaw ahi' chia asoi khu hezing un," achi hi. 36 Huleh huchibang thu asoi zohin akhuupdin a, a bawnun ahaamtei khawm uhi. 37 Huleh a bawnun hah kahin akap va, Paul angawngkawi va, atawp va, 38 a meel amuh nawn louh diing uh thu asoi chu alungkhampih diaah uhi. Huleh long mun tanphain avahata uhi.
Paul Mileta Apat Tura ah
1 Huleh hichi ahung hi a, amahuh toh ka kikhen zohun, long in ka chiah va, zangtahin Kos tuikulhgam ka tung uhi. Huleh a jiing in Rhode tuikulhgam ka tung va, hu apatin Patara khopi ka tung uhi. 2 Phinisia gam tawn diing long khat ka mu va, ka tuang va, ka chiah jeel uhi. 3 Kupra tuikulhgam ka muh un, hu gam chu veilam pang ah ka peel va, Syria gam lamah ka chiah jeel va, huleh Tura ah ka kinga uhi, hu mun a long a vante suahkhiah diing ahih jiahin. 4 Huleh nungjuite ka hawldoh va, hutah ah ni sagih ka taam uhi. Amah un Hagau a heetsahna in Paul chu Jerusalem a chiah lou diingin ahilh uhi. 5 Ka um hun diing tan uh ka um zohun, ka kipandoh va, ka chiahna diing uh ka juanta uhi. Huleh amah un a bawnun, a jite leh a tate uh toh khopi gei dongin ahung ha uhi. Huin tuikhanglian geiah ka khuupdin va, ka haamtei uhi. 6 Kampha a ka kihaah zohun, keiuh long ah ka tuang va, amahuh inn lamah akihkiitta uhi. 7 Tura khua apat kuang a chiahin Tolemai khua ka tung va, unaute chibai ka buuh va, a kawmvah ni khat ka taam uhi.
Paul Kaisaria leh Jerusalem ah
8 Ajiingni in keiuh Paul lawite teng ka kipandoh va, Kaisaria ka tung uhi. Dikon sagihte laha khat, sawlleh Philip inn ah ka luut va, amah toh ka um uhi. 9 Hu mipa'n ta nungaah siangthou li anei a, amah un thu asoilawh jeel uhi. 10 Hu a ni bangzah aha ka taam laiun, Judia gam apat a min Agaba kichi zawlnei khat ahung suh hi. 11 Amah ka kawmvah ahung a, Paul kawnggaah ala a, a khutte leh a keengte a kikaanin, "Hichu Hagau Siangthou in achih ahi: 'Hi kawnggaah neitu hi Jerusalem a Judate'n hichi bangin akaan diing va, Jentelte khut ah apekhe sawn diing uh,'" achi hi. 12 Hi thu ka jaah tahun, keiuh leh hu mun a umte'n Paul chu Jerusalem a chiah lou diingin ka ngeen uhi. 13 Huin Paul in, "Bang diinga na kah va, ka lung na natsah uh ahiai? Ajiahchu Jerusalem a kaan chauh hi louin, Lalpa Jesu min in sih zong ka ngaap ahi," chiin adawng hi. 14 Huleh houhzoh gual ahihlouh tahin ka sipta va, "Lalpa deihjawng bawl hihen," ka chita uhi. 15 Hu hun nungin ka vante uh ka siam va, Jerusalem ah ka chiah touta uhi. 16 Kaisaria apatin nungjuite khenkhat in ahung jui va, ka tunna diing uh Kupra a nungjui masa Mason inn ah ahung pui uhi. 17 Huleh Jerusalem ka hung tun tahun, unaute'n kipaahtahin ahung na dawn uhi.
Paul in Jakob Avehna
18 Huleh ajiingni in Paul leh kei un Jakob ka vaveh va, hutah ah kouhtuam upate zousiah aum uhi. 19 Huleh Paul in amahuh chibai abuuh zohin, a natohna zanga Pathian in Jentelte laha sil abawlsah zousiah chu abaan baan in asoi hi. 20 Huleh amah un hu thu ajaah tahun, Lalpa apaahtawi va, huin Paul kawmah, "Unaupa, Judate lahah gingtute saang tamtah na mu a, huleh a bawnun daan tungtaang ah phatuam angai uhi. 21 Nang Jentelte laha Juda um haw zousiah kawma a tate uh zehtan louh diing leh tawndaan banga um louh diing, chiin Mosi daan paihkhiahna diing thu na hilh jeel chih mi kam apatin na tanchin ahe uhi. 22 Bang i bawlta diai le? Mipi ahung paikhawm ngeei diing uhi, ajiahchu na hung tung chih lah ja ngeei diing ahi uhi. 23 Hujiahin na kawma ka soi bangun bawl in: Kichiamna nei pasal li ka nei uhi. 24 Hu mite pui inla, amahuh toh kisusiang inla a sam uh a meetna diing uh sum tuaah in, huchiin mi zousiah in mi kam a na thu ajaah teng uh bangmahlou ahi chih leh nang chu daan juiin kijentahin na umjaw chih ahe diing uhi. 25 jentelte laha gingtute tungtaang thu chu, milem biahna sil neeh apat, sa sisan neeh apat, heehlup sa neeh apat, huleh kingaihna thaanghuai apat, akihepkhiah louhngaal uh sildang ajuih uh angai sih, chiin thupuuhna ka la va, ka gialta uhi," achi uhi. 26 Huin Paul in ajiingni in kichiamna nei pasal lite chu apui a, amahuh toh kisusiang zouin, kisiansahna ni bei hun diing leh amahuh chiat a diinga a sillat hun diing uh vakihesah diingin Pathian biahinn ah aluut hi.
Jerusalem a Buaina leh Paul Amatna uh
27 Huleh ni sagih achin diing kuan tahin, Asia gam a Judate'n Pathian biahinn a Paul amuh tahun mipi zousiah achiilsia va, amah tungah khut aha va, 28 akikou va, "Israel mite, hung panpih un, gam chin a mi zousiah kawma i mite, daan thute leh hi mun soisia chu hi pa ahi. Hulou zong Pathian biahinn ah Grikte aluutpih a, hi mun siangthou ahihbuaah zoutal hi," achi uhi. 29 Ajiahchu amah un hu main Paul leh Ephesi khua a mi Trophima umkhawm in khopi ah amu va, Pathian biahinn ah Paul in amah chu hung pui zouta in angaihtuah uhi. 30 Huin khopi zousiah abuaita va, mipite chu ataaikhawm va, Paul chu aman va, Pathian biahinn apat akaidoh va, kotkhaahte akhaah pah ngaal uhi. 31 Amah thah atup laitahun, Jerusalem a mi zousiah abuai uh chih thu sepaih pawl houtulian kawm atung hi. 32 Ama'n sepaihte leh sepaih zahoutute apui pah ngaal a, a kawmvah ataai suh uhi Huin amah un sepaih houtulian leh sepaihte amuh tahun, Paul avuaah uh chu atawpta uhi. 33 Huin houtulian in ahung naih a, Paul atu a, khainiang nih a khih diing thu apia hi. Huleh koi hi a bang bawl kha ahiai, chih adong hi. 34 Mipi lahah akhen thukhatin akikou va, akhen thudang in akikou uhi. Huleh buai jiahin thudih ahe thei sih a, sepaihte giahbuuh a puiluut diingin thu apia hi 35 Huleh Paul chu kalbi atun laiin, mipi asousang nasat jiahun sepaihte'n amah adomkaang uhi. 36 Mipite'n, "Sumangthaai un,' chia kikouin ajui lutlut ngaal uhi.
Paul in a Dihna Thu Asoina
37 Huleh Paul chu sepaihte giahbuuh kulh a apuiluut diing kuan-un, ama'n sepaih houtulian kawmah, uNa kawmah thu themkhat ka soi thei diai?" achi hi. Ama'n, "Grik haam na he maw? 38 Tuma a mite buaina bawla mihel saang li gamdaai a puikhetu, Aiguptami hilou na hi maw?" achi hi. 39 Hizongleh Paul in, "Judami, Silisia gam a Tarsa khua a mi ka hi, khopi nameilou a khualetui hihna nei ka hi. Hung lungsiat inla, mi zousiah kawmah thusoi hung phalsah diingin ka hung ngeen hi," achi hi. 40 Huleh lem asah tahin, Paul chu kalbi ah ading a, mipi lam a khut in ajaap a, asip duam tahun, a kawmvah, Hebrai haam in thu asoi a:
1 "Ulenaute leh pate haw, tuin na kawmvah ka siamna thu ka soi diing hi, ngai un," achi hi. 2 Huleh a kawmva Hebrai haam a thu asoi ajaah tahun, asipta seem va, huin ama'n, 3 "Kei chu Juda mi ka hi a, Silisia gam a Tarsa khopi a piang, hizongleh hi khopi a khanglian ka hi. Huleh Gamaliel nuaia i pulepate uh daan thu khauhtah dungjuia jilsaha um, tunia nanguh zousiah banga Pathian lama anaphatuamngai ka hi. 4 Huleh hi Lampi pawl a mite hi sihna khopin ka suduhdah jeel a, numei pasal in ka kaan a suangkul ah ka khum jeel hi. 5 Huin siampu lalpeen leh upate zousiah in zong hu thu chu ahung heetpih uhi. Amahuh kawm apat unaute piaah diingin lehkha ka mu a, amahuh sawisa diingin Damaska khopi tana umte, Jerusalem a kaansa a hung pui diingin ka chiah hi.
Paul in a Pianthah Thu Asoina
6 "Huleh hichi ahung hita a, ka chiah a, Damaska gei ka tunin, suunkim veel tahin, thakhatin vaan apat vaah nasatah ka kiim ah ahung vaahsot hi. 7 Huleh kei chu tual ah ka puuh a, aw khat in, 'Saul, Saul, nang bang diinga hung suduhdah na hiai?' chiin ka ja hi. 8 Huleh ke'n, 'Lalpa, koi na hiai?' chiin ka dawng hi. Huleh Ama'n ka kawmah, 'Nazareth Jesu, na suhduhdah chu ka hi,' achi hi. 9 Huleh ka kawma umte'n vaah chu amu va alau uhi, hizongleh ka kawma thusoitu aw chu ahesiam sih uhi. 10 Huleh ke'n, 'Bang ka bawl diai, Lalpa?' ka chi hi. Lalpa'n ka kawmah, 'Thou inla Damaska ah chiah inla, hutah ah sil zousiah na bawl diinga kiguatte chu hilhin na um diing hi,' achi hi. 11 Huleh hu vaah loupi jiahin khua ka mu thei nawnta sih a, ka lawite'n khut in ahung kai va, Damaska ah ka luutta hi. 12 "Huleh mi khat Anania, daan toh kituaahtah a Pathian ngaihsah leh hu a um Judate zousiah in azahtaat uh, 13 ka kawmah ahung a ka kawma ding in, 'Unaupa Saul, khua muta in,' ahung chi hi. Huleh huchih laitahin amah chu ka muta hi. 14 Huleh ama'n, 'I pulepate uh Pathian in a deihlam he diing leh Midihtat chu mu a, a kam a suaah aw ja diinga ahung guat na hita hi. 15 Ajiahchu na muh leh na jaah thu ah mi zousiah kawmah Amah thu heetpihtu na hi diing hi. 16 Huleh bang diinga khongai nalai na hiai? Thou inla baptisma tang in, huleh Lalpa min kouin na sualna kisusiang in,' ahung chi hi.
Paul chu Jerusalem Pawtsan diingin Lalpa'n Ahilhlawhna
17 "Hichi ahung hi a, Jerusalem a ka chiah kiit a, Pathian biahinn a ka haamtei laiin, zelhin ka um a, 18 'Kin inla Jerusalem apat kintahin pawt in, ajiahchu ka tanchin na soi diing pomlou diing ahi uh,' hung chiin Amah chu ka mu hi. 19 Huleh keima'n, 'Lalpa, amah un sinagog a umte suangkul a ka khum a, nang hung gingtate ka vuaah veu ahe uhi. 20 Na thu hetu Stephen sisan asuah laiun, kei zong a kawmah ka ding a, suhlup diing lemsatu ka hi a, amah thattute puante zong ka na keem ahi,' ka chi hi. 21 Ama'n ka kawmah, 'Chiah in, gamlataha Jentelte kawmah ka hung sawl diing ahi,' ahung chita," achi hi.
Paul in Rom Mi Ahihna Asulang
22 Huleh amah un hi tanchiang a thusoi angaikhia va, huin aw ngaihtahin, "Hitobang phet mi hi khovel akipatin suchimit un, ajiahchu hingtaah ahi sih hi," achi uhi. 23 Huleh akikou va, a puante uh asepkhia va, vaanlam a leivui atheh laiun, 24 sepaih houtulian in Paul chu sepaihte giahbuuh a puiluut diingin thu apia a, a tunga hutobang lawma akikouna san uh aheetna diingin jeep a dohchian diing achi hi. 25 Hizongleh savun khau a akaan zohun, Paul in a kawma ding sepaih zahoutu kawmah, "Rom khualetui hihna nei mite mawngmawng siamlouh tansahna bei a vuaah phal ahiaimah?" achi hi. 26 Sepaih zahoutu'n hu ajaah tahin, sepaih houtulian kawmah achiah a, "Na silbawl diing pilvaang in, ajiahchu hi pa Rom khualetui hihna nei ahi," chiin ahilh hi. 27 Huin sepaih houtulian ahung a, a kawmah, "Hung hilh in, Rom mi na hi maw?" achi hi. Ama'n, "Hi e," achi hi. 28 Huleh sepaih houtulian in, "Hi khualetui hihna ke'n sum tampi a ka lei ahi," chiin adawng hi. Huleh Paul in, "Kei chu Rom mi mawnga piang ka hi," achi hi. 29 Hujiahin dotchian tumte'n amah achiahsan pah va, sepaih houtulian in zong Rom mi ahi chih aheettahin, amah mah in akaansah ahih jiahin alauta hi.
Juda Lamkaite Ma ah Paul
30 Ajiingni in, Judate'n bang jiahin ahiai Paul aheeh uh chih heetchian auut jiahin, sepaih houtulian in amah akaanna vapat aphel hi. Siampu lalte leh vaihawmtute zousiah kikhawm diingin thu apia a, Paul ahung pui va, a ma vah adingsahta uhi.
1 Huleh Paul in vaihawmtute aen teentaan a, "Ulenaute, tuni tanin Pathian mitmuhin sialepha heetna hoihtah zousiah toh ka um zing hi," achi hi. 2 Huin siampu lalpeen Anania in Paul kawma dingte'n a kam behsah diingin asawl hi. 3 Huin Paul in a kawmah, "Nang, baang kinuh vaampa, Pathian in nang ahung beeng jaw diing hi. Nang daan thu banga ka thu ngaihtuah diingin na tou a, daanlou banga kei beh diingin na hung chi maw?" achi hi. 4 Huleh a kawma dingte'n, "Nang in Pathian siampu lalpeen na soisia maw?" achi uhi. 5 Huin Paul in "Unaute, siampu lalpeen ahih ka he sih a ahi; ajiahchu, 'Na mite uh tunga vaihawmtu soise sin,' chih gelh ahi," achi hi.
Paul in Pharisaite Kawma Anget Thahna
6 Hizongleh Paul in, khenkhat Sadukaite ahi va adang Pharisaite ahi uh chih aheet tahin, vaihawmtute lahah akikou a, "Ulenaute, kei chu Pharisai, Pharisai khat tapa ka hi, misite kinepna leh thohkiitna thu ah vaihawmsaha um ka hi," achi hi. 7 Huleh ama'n hichia asoi zohin, Pharisaite leh Sadukaite kaal ah kinialna ahung um a, mi paikhawmte chu akilangkhenta uhi. 8 Ajiahchu Sadukaite'n misi thohkiitna mawngmawng aum sih, angelte zong aum sih, hagau zong aum sih, achi va; hizongleh Pharisaite'n hute chu aum veh hi chih apom uhi. 9 Nasatahin abuaita va, Pharisai pawl laha daanjilsahtute khenkhat in dingdohin anial va, "Hi mi a giitlouhna bangma i mu sih uh; hagau in aha, angel in aha a kawmah thu soi ahihtaah leh, Pathian i dou sih diing uh," achi uhi. 10 Huleh ahung kinial naah deuhdeuh phetun, sepaih houtulian in Paul chu aloihtel khaah diing uh alau a, sepaihte chu vachiah suh a, a lah vapat a Paul chu thagum a ladoh a, sepaihte giahbuuh a hung pui ngeei diingin thu apia hi.
Lalpa Khotuahna Paul Kawmah
11 A jaan in Lalpa chu Paul kawmah ading a, "Paul, hamuangtahin um in, Jerusalem a ka thu na heetsah bangin, Rom ah zong na hesah diing hi," achi hi.
Paul That Diinga Judate Kihoukhawmna
12 Huleh khua ahung vaah tahin Judate hunkhop akithukum va, Paul athah masiah va bangmah ne lou leh dawn lou diingin akichiamta uhi. 13 Huleh mi thah sawma kithukumte chu sawmli saanga tamjaw ahi uhi. 14 Huleh amahuh chu siampu lalte leh upate kawmah achiah va, "Paul ka thah masiah va bangma ne lou diingin nasatahin haamsia louin ka kichiam uhi. 15 Hujiahin nang un vaihawmtute toh a thu kichian seem a ngaihtuah diing kipangin na kawmva puikhe diingin sepaih houtulian kawmah vasoi un; huleh ama'n na kawm uh ahung phaah ma a anathat diinga mansa ka hi uhi," achi uhi. 16 Huleh Paul tupa, asanggamnu tapa in aguuh taan thu uh anaja a, sepaihte giahbuuh ah avaluut a Paul avahilhta hi. 17 Huin Paul in sepaih zahoutute laha khat a kawmah akou a, "Hi tangvaal chu sepaih houtulian kawmah pui in, a kawmah soi diing bang aha anei hi," achi hi. 18 Huchiin ama'n sepaih houtulian kawmah apui a, "Paul mitaangpa in a kawmah ahung kou a, hi tangvaal in na kawma soi diing bang aha aneih jiahin na kawma hung pui diingin ahung ngeen hi," achi hi. 19 Huin sepaih houtulian in a khut in atu a, atuamin apuidoh a, "Ka kawma na soi diing chu bang ahiai?" chiin aguuhin adong hi. 20 Huleh ama'n, "Paul thu kichian seema ngaihtuah tum bangin, jiing chianga vaihawmtute kawma puisuh diingin Judate'n hung nget lem asata uhi. 21 Hizongleh a thu uh na zop sin, ajiahchu a lahva mi sawmli saanga tamjaw in aguuh taan va, hu mite'n amah athah masiah va bangma ne lou diing leh dawn lou diingin akichiam uhi; huleh tuin na thu ngaahin mansain aum uhi," achi hi. 22 Huchiin sepaih houtulian in tangvaal chu achiahsah a, "Hi thute na hung hesahta chih koimah hilh sin," chiin thu apia hi.
Paul Kaisaria ah
23 Huleh sepaih zahoutute laha nih akou a, "Jaan daah thum chianga Kaisaria tana chiah diingin sepaih za nih toh, sakol tungtuang mi sawmsagih toh, teitawi mi za nih toh kimansain koih un; 24 huleh gamoptu Felix kawma bittaha aluut theihna diingin Paul tuanna diing sakol zong guatsah un," achi hi. 25 Huleh ama'n hichibangin lehkhathot agial hi: 26 "Klaudias Lisias in gamoptu zahumpeen Felix chibai abuuh hi. 27 Hi mi Judate'n amat va athah diing kuan-un, kei chu sepaihte toh ka vachiah a, amah hi Rom mi ahi chih ka heetin ka hundohta hi. 28 Huleh a heehna jiah peen uh heet ka uut a, a vaihawmtute uh kawmah ka pui hi. 29 Amah chu a daan thu uh bang aha a kiheeh ahi chih ka he a, hizongleh a heehna thu vah sihna leh kaanna diing khop bangma aum sih, chih ka kandoh hi. 30 Huleh Judate'n amah ataang uh chih hilh ka hih tahin, na kawmah amah ka hung sawl ngaal hi; huleh amah heehte'n a tunga thubuai aneih phot uh na ma a soi diingin thu ka pia hi. Mangpha." chiin. 31 Huchiin sepaihte'n a thupiaah bangin Paul chu jaan in apui va, Antipatri atunpih uhi. 32 Ajiingni in sakol tungtuang mite amah toh akitonsah va, sepaihte chu amahuh giahbuuh ah ahung kiihta uhi. 33 Amahuh Kaisaria khopi atung va, gamoptu kawmah lehkhathot chu apia va, Paul zong ama ah adingsah uhi. 34 Huleh gamoptu in lehkhathot asim zohin, Paul umna gam adong hi. Huleh Silisia gam apat ahi chih aheet tahin, 35 "Nang hung heehte ahung tun chiangun, na thu ka ngaikhe diing," achi hi. Huleh Herod Praitoriam sunga koih diingin thu apia hi.
Paul Felix Ma ah
1 Huleh ni ngaa nungin siampu lalpeen Anania toh, upate khenkhat leh thusoi siam Tartulla toh ahung suh va, Paul tunga thubuai chu gamoptu kawmah asoi uhi. 2 Huleh Paul akouhdoh tahun, Tartulla in Felix ma ah Paul aheehpanta a, "Nangmah vaanga lemna nasatah ka neih jiah uh leh na lunggeelsiamna a hi gam a kisiamhoihnate ahung tun jiahin, 3 bangchihtanin khoimun pouh ah lungkimtahin ka kipaah zing uhi, zahumtah Felix. 4 Ahihvaangin, nang diinga chimtaahhuai talua hih ka uut sih, na migiitna a ka thu uh themkhat hung ngaihkhiahsah diingin ka hung ngeen ahi. 5 "Ajiahchu kei un hi mihuathuaitah, mun chin a vaahleh a, khovel a Judate zousiah tohbuaitu leh Nazarethmite pawl a a makaipeen uh khat ahih ka he uhi. 6 Pathian biahinn suhbuaah zong atum a, huin amah chu ka man va, ka daan thu bangun vaihawmsah ka tum uhi. 7 Hizongleh sepaih houtulian Lisias ka kawmvah ahung a, ka khut vakipatin ngongtattahin alamangta a, 8 amah heehtute na kawma hung diing thu apia hi. Nang ngeei in amah dong chianin ka heehna thute zousiah uh na he thei diing hi," achi hi. 9 Huleh Judate'n zong hu thu chu huchibang ahi chiin apanpih uhi.
Paul in a Dihna Asoina
10 Huin gamoptu'n thusoi diinga khut a ajaap tahin, Paul in, "Nang chu kum tamtah hi nam vaihawmsahtu na hih ka heet jiahin kipaahtahin ka dihna thu ka soi diing hi. 11 Jerusalem a Pathian be diinga ka chiah touh nung ni sawmlenih vaal ahi nai sih diing chih na he thei diing hi. 12 Huleh Pathian biahinn a mi toh ka kinial aha, ahihlouhleh sinagog leh khopi sunga mipi ka chiilsiatna bangma amu sih uhi. 13 Tuin zong ahung heehnate uh kichiantahin abul asuikhe thei sih uhi. 14 Hizongleh hichu na kawmah ka soidoh ahi: amah un biahdaan tuam achih uh Lampi juiin ka pulepate uh Pathian ka bia hi, Daan leh Zawlneite Lehkhabute a kigial zousiah gingta kawmin. 15 Huleh midihtatte leh dihtatloute thohkiitna aum diing chia amah un zong agintaat uh, huchu ke'n Pathian lamah ka kineppih ahi. 16 Hujiahin Pathian lam leh mihing lama sialepha heetna chu soiseelbeia um diingin bangchihlaipouhin ka kihahbawl hi. 17 "Tuin kum bangzah aha nungin ka namte uh kawma silpiaah diing leh lat diing hung tawiin ka hung hi. 18 Hu sil ka piaah laiin, Asia gam a hung kipan Judami koite aha in mipi tellou leh buailouin Pathian biahinn a ka kihihsiangthou chu ahung mu uhi. 19 Hute'n ka tunga thubuai nei hileh uh, hi ah na ma ah umin ahung heeh diing uhi. 20 Ahihlouhleh vaihawmtute ma a ka din laiin hi mite ngeei in, ka suhkhelh muh aneih uh leh, soi uh heh. 21 A lahva ding a, 'Misi thohkiitna thu ah tuni'n na ma ah vaihawmsahin ka um ahi,' chia ka kikou khiah jiah ahih louhngaal leh," chiin adawng hi.
Felix in Ahun Asonna
22 Huleh Felix in hi thute ajaah tahin hu Lampi thu chu ahechian deuh a, amahuh kawmah, "Sepaih houtulian Lisias ahung tun suh chiangin na thu uh ka ngaihtuah veh diing," chiin kikhopna atawpsah phot hi. 23 Huleh ama'n Paul chu veeng a, thuthawl deuh a umsah a, a lawite'n a nna atohsah uh khaplou diingin sepaih zahoutu khat kawmah thu apia hi. 24 Hulehni bangzah ahanungin, Felix chu a ji Juda numei Drusilla toh ahung va, Paul akousah a, Khrist a ginna thu angaikhia hi. 25 Huleh Paul in dihtatna thute, kideehna thute leh vaihawmna hung tung pai diingte asoi leh Felix chu lauin akithing a, "Tuin chiah kiit phot in, hun lem ka neih tahchiangin ka hung kou diing," achi hi. 26 Huleh ahahkhiahna diinga Paul in sum apiaah bang akineem a, akousah mun sim a, ahoupih thimthem hi. 27 Huleh kum nih nungin Porkia Festa in Felix chu ahung hengta a, hizongleh Felix in Judate Iripaahsah aut jiahin Paul chu suangkul a khumin anuseta hi.
Paul Festa Ma ah
1 Huchiin Festa chu hu gam ahung tun ni thum nungin, Kaisaria apatin Jerusalem ah achiah tou hi. 2 Huin siampu lalpeen leh Juda lamkaite'n a kawmah Paul tungthu ahiloulam in ahesah uhi. 3 Huleh Paul kalha deihsahna atan va, lampi a anaguuh taan va, anathah theihna diingun a kawmah Paul chu Jerusalem a vapui tousah diingin angeen uhi. 4 Hizongleh Festa in Paul chu Kaisaria ah kep ahih daan leh amah zong hu lamah chiah pah diing ahihdaan ahilh hi. 5 Huchiin ama'n, "Hu mipa'n giitlouhna nei ahih heetna diingin, na lahva thu neithei photmah in hung juisuh uh henla heeh uh heh," chiin adawng hi. 6 Huleh a lahva ni sawm vaal ataam nung in Kaisaria ah achiahsuh a; a jiing in vaihawmna touphah ah atou a, Paul chu hung pui diingin thu apia hi. 7 Amah ahung tunin, Jerusalem apat hung suh Judate chu a kiim ah ading va, Paul tungah thubuai tampi soiin, setahin aheeh va, hizongleh a heehna thu dihtah asulang thei tuan sih uhi. 8 Paul in a dihna thu asoi a, "Judate daan thu ah hiin, Pathian biahinn thu hita henla, Kaisar tungah hitazongleh, sil mawngmawng ka hihkhial sih hi," achi hi. 9 Hizongleh Festa in Judate deihjawng bawl auut a, Paul kawmah, "Jerusalem a chiahtouh a hutah a ka ma a hi thute ngaihtuah hileh na uut ei?" chiin adong hi. 10 Huin Paul in, "Vaihawmsah a ka umna diing mah, Kaisar vaihawmna touphah ma ah ka ding hi. Nang in zong chiantaha na heet bangin, Judate tungah bangma ka hihkhial sih hi. 11 Migilou ka hih a, sihna khopa sil hihkhial ka hih leh, sih zong ka nial sih; hizongleh hite'n ahung heehna teng uh adihtah aum louh leh, koima'n a kawmvah ahung pekhe thei sih diing hi. Kaisar kawmah ka tut ahi," achi hi. 12 Huin Festa in vaihawmtute ahoupih kiimveel zohin, "Kaisar kawmah na tutta a, Kaisar kawmah na tung ngeei diing hi," chiin adawng hi.
Kumpipa Agrippa Ma ah
13 Huleh ni bangzah aha nungin, kumpipa Agrippa leh Berniki chu Kaisaria a hungin Festa chibai abuuh uhi. 14 Huleh amahuh hu a ni bangzah aha ataam nungun, Festa in Paul tungthu kumpipa kawmah asoi a, "Felix in mi taang khat anusia a; 15 Jerusalem a ka umlaiin siampu lalte leh Judate upate'n a thu ahung hesah va, siamlouhtangsah diingin ahung ngeen uhi. 16 "Ke'nakawmvah, 'Aheehpa uh leh a heehte akimaaituah va, a heehna thu va ama'n adihna thu soina lemtaang aneih main, mi kuamah gawt diinga piaahkhiah Rom mite daan ahi sih hi,' chiin ka dawng hi. 17 Hujiahin amahuh hitah ahung tunun, sawt hallouin ajiingni in vaihawmna touphah ah ka tou a, hi mi chu hung pui diingin thu ka pia hi. 18 Huleh a heehtute adin laiun, ka gintaat bangtahin a tungah giitlouhna thubuai bangmah lah asoi sih uhi. 19 Hizongleh amahuh biahdaante leh mi khat, Jesu asisa, Paul in ahing kiit chia asoi thu ah kinialna nei ahijaw uhi. 20 Huleh ke'n hutobang kinialnate khendaan ka heetlouh jiahin Jerusalem a chiah a, hutah a hu thu khen auut leh uutlouh ka dong hi. 21 Hizongleh Paul in Augusta thupuuhna diinga siit anget jawh jiahin Kaisar kawma ka sawl theih masiah veeng diingin thu ka pia hi," achi hi. 22 Huin Agrippa in Festa kawmah, "Ke'n zong hupa thusoi ka ngaikhe uut," achi hi. Ama'n, " Jiingchiangin a thusoi na ngaikhe diing," achi hi.
Agrippa Ma ah Paul
23 Hujiahin ajiingni in Agrippa leh Berniki chu loupitahin ahung va, sepaih houtuliante leh khopi a miliante toh thusoina inn ah ahung luut va, Festa thupiaahna jiahin Paul chu ahung pui uhi. 24 Huin Festa in, "Kumpipa Agrippa leh hi mun a ka kawmva um zousiahte'n hi pa na mu uhi, amah chu Juda mipi zousiah in Jerusalem ah leh hi mun ah ka kawmah aheeh va, hing taah ahi sih chiin ngaihtahin akikou uhi. 25 Hizongleh sihna diing khop hiai bangmah abawl sih chih ka he a, ama'n Augusta kawma thu atut jiahin sawl ka sawm ahita. 26 Hizongleh amah tungtaang ah bangmah ka lalpa kawma gelh diing lah ka thei sih hi. Hujiahin na ma vah ka hung puikhia ahi; ajiahchu a thu dotveel nunga gelh diing neu khat beeh ka muh theihna diingin, kumpipa Agrippa Aw, nang ma a hung pui ka hi diaahkhol hi. 27 Mitaang khat vaihawm diinga sawl a, a tunga a heehna thu uh heetsah louh ngolhuai hiin ka he ngaala," achi hi.
Agrippa Ma ah Paul in a Dihna Asoina
1 Huin Agrippa in Paul kawmah, "Na dihna thu na soi thei hi," achi hi. Huin Paul in a khut ajaah a, adihna thu asoi a: 2 "Kumpipa Agrippa, Judate'n ahung heehna zousiah ah ka dihna thu tuni a na ma a ka soi diing jiahin ka kipaah hi, 3 ajiahchu Judate tawndaan zousiah leh thubuaihuai thute na heet mahmah jiahin. Hujiahin thuaahtheitaha na hung ngaihkhiahsah ka hung ngeen hi. 4 "Ka naupan lai apat, amasapeen a ka chipihte lah leh Jerusalem a ka umdaan Judate zousiah in ahe uhi. 5 Achiil apat a ka sahkho daanva akhauhpeen dungjuia Pharisai anahi ka hi chih ka tanchin ahe va, auut uh leh ahung soipih thei uhi. 6 Huleh tuin ka pulepate uh kawma Pathian thuchiam chu kineppihna jiahin hitah ah vaihawmsahin ka ding ahi. 7 Hu thuchiam kinepna chu, ka nam uh sawmlenihte'n suun leh jaan a Pathian nna phatuamngaitaha tongin muh akineem uhi. Kumpipa Agrippa hu kinepna jiahin Judate'n ahung heeh uh ahi. 8 Pathian in misite akaithou chih bang diinga gintaat huailoua ngai na hi viai? 9 "Ke'n zong Nazareth Jesu min kalh jawngin sil tampi bawl leng hoih diingin ka na gingta veu hi. 10 Hu bang chu Jerusalem ah zong ka na bawl hi. Huleh siampu lalte kawm apat thuneihna ka laah nungin, misiangthoute laha mi tampi suangkul a ka khum chauh hilouin, amahuh athah laiun lemsa lamah ka na pang jeel hi. 11 Huleh sinagog chin ah amahuh ka gawt zing a, Jesu min soisiatsah ka tum hi. A tungvah ka gilou mahmah a, gam dang a khopite tanpha ah ka suduhdah hi.
Paul in a Pianthah ThuAsoina
12 "Hutobang bawl diingin, siampu lalte thupiaah mu a, a phalna lehkha uh tawia Damaska a ka chiah laiin, 13 Aw kumpipa, suun laitahin, vaan akipan vaah, ni saanga vaahjaw kei leh ka tonpihte kiim ah vaahin ka mu hi. 14 Huleh ka bawnun tual ah ka puuh va, Hebrai haam in, 'Saul, Saul, nang bang diinga hung suduhdah na hiai? Vuaahna siihzum peeh nang diingin ahahsa hi,' chiin aw khat ka ja hi. 15 "Huleh ke'n, 'Lalpa, kua na hiai?' ka chi hi. Huin Ama'n, 'Na suhduhdah Jesukahi. 16 Hizongleh thou inla ding in; ajiahchu na sil muhte leh na kawma ka hung phuandoh diingte seem diing leh heetpihtu diinga nang hung guat diingin na kawmah ka hung kilaah ahi. 17 Judate leh tua ka hung sawlna Jentelte khut apat ka hung hundoh diing hi, 18 Jentelte mit suvaah diing leh mial apat vaah lam ngatsah diingin, huleh kei ahung gintaat jiahva suhsiangte laha gou aluah theihna diingun, Setan thuneihna apat Pathian lama akihei theihna diing uh leh sual ngaihdamna amuhna diingun ka hung sawl hi,' achi hi. 19 "Hujiahin, Aw kumpipa Agrippa, vaanlam kilaahna thu chu ka nial sih hi. 20 Huchiin amasain Damaska khua a mite kawmah, huleh Jerusalem khua a mite kawmah, huleh Judia gam zousiah a mite kawmah leh Jentelte kawmah zong, huchia akisiih va, Pathian kawm azot va, kisiihna toh kiphu nna atohna diingun ka hesahta hi. 21 Hite jiahin Judate'n Pathian biahinn ah ahung man va, thah ahung tum uh ahi. 22 pathian akipan panpihna ka muh jiahin, tuni tanin aneu leh aliante kawmah thu hesahin ka um nalai hi. Zawlneite leh Mosi in hung tung diing achih uh thu chauh loungaal thu dang ka soi sih hi; 23 huchu Khrist in gim athuaah diing a, misite lah apat thoukiit masapeen ahi diing a, Judate leh Jentelte kawmah vaah chu ataangkoupih diing achih thu uh," achi hi. 24 Huleh huchia adihna thu asoi laiin, Festa in aw ngaihtahin, "Paul, angol hita teh! Na lehkhasiam taahluatna in hung sungol ahi," achi hi. 25 Hizongleh ama'n, "Zahumpeen Festa, angol ka hi sih hi, thu dihtah leh pilna thu ka soi ahijaw hi. 26 Hi thute kumpipa'n ahe hi, hujiahin a kawmah zong kimuangtahin ka soi ahi. Hi silte bangma a kawmah heet louh aum sih chih ka he hi, ajiahchu hi silte ningkawm khat a kibawl ahi sih hi. 27 Kumpipa Agrippa, zawlneite thu na gingta ei? Na gingta chih ka he hi," achi hi. 28 Huin Agrippa in Paul kawmah, "Hun tomkhat sunga Khristian a hung thuzoh tum na hi," achi hi. 29 Huleh Paul in, "Hun tomkhat hiin hun sawtpi hitaleh, nang chauh hilouin tunia ka thuja zousiah keimah banga um diingin Pathian kawmah ka ngeen hi, hi koite ahihleh but louin," achi hi. 30 Huleh Paul in huchia asoi zohin, kumpipa leh gamoptu leh Berniki chu a kawmva toute toh ading chiat uhi. 31 Huleh achiahdoh tuam tahun, akihou va, "Hi mipa'n sihna leh kolbuhna khop hiai sil bangmah abawl sih hi," achi uhi. 32 Huin Agrippa in Festa kawmah, "Hi pa'n Kaisar kawmah a thu tut lou hileh, hahkhiah theih mei diing hi a," achi hi.
Rom Khua a Paul Zinna
1 Huleh Italy gam a kuang a ka chiah diing uh thu suhpuuh ahih phetin, Paul leh mitaang dang khenkhat chu Augusta Pawl a mi sepaih zahoutu, a min Julias kichi akeemsah uhi. 2 Huleh Asia gam tuipi geia khua umte tawn diing Adramittiam khopi long ah ka tuang va, ka kitawlta uhi. Makedonia gam, Thessalonika khua a um Aristarka in kou ahung tonpih hi. 3 Ajiingni in Sidon khopi ka tung va, Julias in Paul ahoih bawl a, a poimoh asepsah theihna diingin a lawite kawmah achiahsah hi. 4 Hu apatin long in ka chiah kiit va, huih alehnun jiahin Kupra tuikulhgam liah lamah ka kitawl uhi. 5 Silisia gam leh Pamphilia gamjuul tuilianpi ka khen nungun, Lykia gam a Myra khopi ka tung uhi. 6 Hutah ah sepaih zahoutu in Italy gam juan diing Alexandria khopi long amu a, hutah ah ahung tuangsah hi. 7 Awl-awlin ni tampi ka kitawl va, hahsatahin Knida khopi jawn ka gei haamhaam va, huih in ahung nan jiahin Salmoni juanin Krit tuikulhgam liah ah ka kitawl va, 8 hahsataha kitawlin Lasia khopi kawma um Kuangkhawlna Kilawm achih mun uh ka tungta uhi. 9 Huin ni tampi abeita a, huleh An ngawlna Ni abeitaah jiahin long a pai alauhuai a, hujiahin Paul in amahuh athuhilh a, 10 a kawmvah, "Pute aw, tua long a paina ah siatna leh manna nasatah tung diing ahi chih ka he a, thuampua leh long tung chauh ah hilouin, i hinna uh nasan diingin zong lauhuai ahi," achi hi. 11 Ahihvaangin, sepaih zahoutu in Paul soi saangin longpu leh long neitu thu agingtajaw hi. 12 Huleh phalbi hun a umna diinga kuang khawlna mun akijen louh jiahin a tamjaw in hu apat a kitawldoh a, Phinix khopi tun teeiteei kineemin, hutah a phalbi sung um asawmta va; Phinix chu Krit tuikulhgam a kuang khawlna mun khat ahi a, sim tumlam leh maal tumlam ngat tuaah ahi.
Huihpi leh Guahpi Atuaah uh
13 Huleh sim huih awl-awla ahung nun tahin, adeihjawng uh mu kisain siihka chu akaitou va, Krit tuikulhgam ning juuljuul ah akitawl uhi. 14 Hizongleh tomkhat zohin hu apatin Euroklidon achih uh huihpi haattah ahung nung suhta hi. 15 Long ahung phukhata a, huih lam anawt theih taahlouh jiahin ka mawh hahta va, ahung toh lehlehta hi. 16 Klauda achih uh tuikulhgam khat juul ah ka taai va, hahsatahin bitna kuang neu chu ka bitsah thei haamhaam uhi. 17 Akaihdoh zohun apanpihna khaute zangin, long nuai lamah avial va; huin ajawhleh Sirti sehneel phu kha inteh chih lauin puanjaahna bangkim akai ngiam va, huchiin ahung mawh toh lehlehta hi. 18 Tuikinawh in ahung vawh nasat jiahin, ajiingni in long a thuampuate tui ah apaikhia uhi. 19 A ni thum ni'n ka khut ngeei un kuang van ka paikhia uhi. 20 Ni tampi, ni leh aahsi akilang sih a, huihpi namei in ahung nuai sih a, hin diing mawngmawng ka kineem nawnta sih uhi. 21 Hizongleh sawttah an neloua um nungin, Paul a lahvah ading a, "Pute aw, ka thusoi nana juih jawh diing va, Krit apat kitawlkhe loua um a, huleh hibang siatna leh manna tuaah louh diing hi jeen a. 22 Huleh tuin, lungmuangtaha um diingin ka hung hasuan ahi, ajiahchu na lahva kuamah in hinna ataan sih diing uh, long chu se diing ahi. 23 Ajiahchu amah a ka hih a, a nna zong ka toh Pathian angel tujaanin ka kawmah ahung ding a, 24 'Lau sin, Paul, Kaisar ma ah na ding ngeei diing ahi; en in, long a na tuanpihte zousiah zong Pathian in ahung piaah na hita,' ahung chi hi. 25 Hujiahin pute aw, lungmuang tahin um un; ajiahchu Pathian ka gingta a, ahung hilh bangin aum diing hi. 26 Ahihvaangin tuikulhgam khat ah ahung sepdoh ngeei diing hi," achi hi. 27 Hizongleh Adria Tuilianpi a huih in adung avaai a ahung muut leengna a jaan sawmleli jaan in, jaan kimlai diingin longpute'n gam khat tung diing bangin akiheta uhi. 28 Huin tui thuuh daan ateh va, fit za leh sawmnih hiin ahe va, themkhat kitawl gamla deuhin ateh kiit va, fit sawmkuah hiin ahe uhi. 29 Huin suang lah phu kha inteh chih alau va, long nung lamah siihka nei li akhia va, khovaah ngaahin ahaamteita uhi. 30 Huleh longpute'n chu kuang ma lama long siihkate khia kipangin, bitna kuang neu chu tuilianpi ah akhaikhia va, long chu taihsan atum uhi. 31 Paul in sepaih zahoutu leh sepaihte kawmah, "Hite long a aum zing louh uh leh na bit thei sih diing uh," achi hi. 32 Huin sepaihte'n bitna kuang neu khaute asaattan va ahahta uhi. 33 Khovaah kuanin, Paul in a bawnun an ne diingin ahasuan hi, "An ngawla na ngaah va bangmah neloua na umna uh tuni ni sawmleli ahita. 34 Hujiahin an ne diingin ka hung hasuan hi, ajiahchu hi na damna diing uh ahi a, na lahva kuamah a samjang khat zong amang sih diing," achi hi. 35 Huleh hu thu asoi zohin, tanghou ala a, amahuh zousiah ma ah Pathian kawmah kipaahthu asoi a, abalkeeh zohin ane panta hi. 36 Huin amahuh zousiah lungmuangtahin aum va, an zong aneta uhi. 37 Huleh long sunga um mi chu ka bawnun za nih leh sawmsagih leh guup ka hi uhi. 38 Huleh an aneehkham zohun, an chu tui lahah apaai va, long asuzangta uhi.
Kuang Siatna leh Suahtaatna
39 Huleh khovaah phetin a gam chinchaai aheta sih va; hizongleh sehneel piau nei khat amu va hutah ah chu ahihtheih leh long tawlluut atum uhi. 40 Huleh long siihka haw chu ahahkhia va, tuilianpi ah anusia va, long heehna kaanna aphel va, long puanjaah chu huih seh jawngin akaitou va, piau taah ajuanta uhi. 41 Huleh tuilianpi nih kisuhtuahna mun ah ka luut kha va, long in lei asuta a; huin long malam chu akiphut detta a, hihliing zohlouhin aum a, a meilam chu tuikinawh ahaat jiahin akeehta hi. 42 Huleh sepaihte'n mitaangte chu tui liau gaalkaaia taaimang khat um kha unteh, chiin thah atumta uhi. 43 Hizongleh sepaih zahoutu in Paul bitsah auut a, a siltup uh akhaam a; tuiliau siam photmah tuilianpi a tawmkhia a, piaugaw a kaai masa diingin thu apia hi. 44 Midang khenkhat singpeeh tungah, khenkhat long keehphel tung banga gaalkaai diingin thu apia hi. Huchiin a bawnun piaugaw ah bittahin agaalkaai vehta uhi.
Malta Khua a Guul Tuhna Silmah
1 Huleh bittaha asuaahtaat phetun, hu tuikulhgam chu Malta ahi chih aheta uhi. 2 A gam mite'n lungsiat tahzetin ahung na lungsiat va; guah ajut jiah leh adap jiahin mei achih va, ka bawnun ahung na kipaahpih uhi. 3 Huleh Paul in sing lom khat atom a, mei a avah leh meisa hul jiahin guulngaan khat ahung pawtdoh a, a khut ah akikhai denta hi. 4 Huleh a gam mite'n a khut a guul kikhaiden amuh un, "Hi pa hi tualthat ahi ngeei diing, tuilianpi apat bittahin suaahta mahleh, thudih khenna in ahin phal nawnlou ahita," achi uhi. 5 Huleh ama'n guulsia chu mei ah athing khia a, bangmah achi sih hi. 6 Ahihvaangin, amah un chu ahung pawm aha, ahihlouhleh thakhat a puuha si pah diinga gingtain angaah uhi. Hizongleh sawtpi angaah va bangmah achih louh tahin, a lungsim uh aheng va amah chu pathian ahi, achi jawta uhi.
Poblio Pa Suhdamna
7 Hu mun chu hu tuikulhgam hausapa, a min Poblio achih uh gam ahi a, hupa'n ahung na kipaahpih a, ngainatahin ni thum ahung zintungsah hi. 8 Huleh hichi ahung hi a, Poblio pa chu khosih leh eehsiih in analum a, Paul a kawmah avaluut a, ahaamtei a, a tungah a khut anga a, asudamta hi. 9 Huchibanga abawl zohin, hu tuikulhgam a midang natna nei zousiah zong ahung va, adam chiatta uhi. 10 Amah un nasatahin ahung paahtawi va; ka chiah diingun ka poimoh zousiah uh ahung pia uhi.
Rom Juan a Chiahna
11 Huleh ha thum nungin Alexandria long, a luvuum a Unau Phiit lim kitaah, hu tuikulhgam a phalbi sung teng taamta khuh ah ka chiahta uhi. 12 Huleh Syrakusa ah ka kinga va, hutah ah ni thum ka taam uhi. 13 Huleh hu apatin ka pai kual va, Rhegiam khopi ka tung uhi. Ni khat nungin sim huih ahung nung a, a jiing kiit in Putioli khopi ka tung uhi. 14 Hutah ah unaute ka mu va, a kawmvah ni sagih taam diingin ahung ngeen uhi. Huchiin Rom lam juanin ka chiah jeelta uhi. 15 Unaute'n ka tanchin uh ajaah tahun, hu akipatin Appi Dawlmun leh Zinbuuh Thumte khopi chianga hung dawn diingin ahung uhi. Paul in amahuh amuhin, Pathian kawmah kipaahthu asoi a, ahamuangta hi. 16 Huleh Rom ka tunun, sepaih zahoutu in mitaangte chu veengtu sepaih houtu kawmah apekhia a; hizongleh Paul chu aveengtu sepaih khat toh amah chauh a aum aphalsah hi.
Rom Khua a Paul in Judate Akimuhpihna
17 Huleh hichi ahung hi a, ni thum nungin Paul in Juda houtu haw akoukhawm a; amahuh ahung kikhop tahun a kawmvah, "Ulenaute, i mipite ahihlouhleh i pulepate uh tawndaan tungah bangmah ka bawlsiat aum louh vaangin, Jerusalem apatin Rom mite kawmah mitaanga piaahkhiah ka hita hi. 18 Ahung etdih zohun, sihna khop hiai ka tunga bangma aum louh jiahin hahkhiah ahung sawm uhi. 19 Hizongleh Judate'n huchu anial jiahun Kaisar kawmah ka thu tut lou thei ka hita sih hi; ka chipihte heehna a bawl chu hilouin. 20 Hujiahin hi thu jiaha nanguh toh kimuhtuah a, kihoulim diingin ka hung ngeen ahi, Israelte kinepna jiaha hi khainiang a kaan ka hi ngaala," achi hi. 21 Amah un a kawmah, "Na tanchin Judia gam apatin lehkhathot in ka mu sih va, unaute koima'n zong hi a hungin na tung thubuai bangmah ahung ensah sih va, asoi zong ahung soise ngei sih uhi. 22 Hizongleh na ngaihdaan chu nangmah apat ka ja nuam uhi; ajiahchu hi pawl hi gam chin a soisiat a aum uh ka he uhi," achi uhi. 23 Huleh ni aguat va, hu atun ni in a kawmvah mi tampi ahung va, jiingkaal apat nitaahlam dongin a kawmvah Pathian lalgam thu hilhchianin ahesah a, Mosi Daan thu leh Zawlneite Lehkhabute thu in, Jesu lamah amahuh ajawl tuuntuun hi. 24 Khenkhat in thu kisoi chu agingta va, khenkhat in agingta sih uhi.
Paul in Jentelte Lam Angatna
25 Huleh amahuh akithugual theih louh phetun, Paul in thu khat asoi zohin apawtkheta uhi, a thusoi chu hih ahi: "Hagau Siangthou in zawlnei Isai kam a i pulepate uh kawma asoi chu adih ngeei mei, 26 'Hi mite kawmah chiah inla vasoi in, "Ja chu naja diing va, angaihna na he sih diing uh; mu chu na mu diing va, hizongleh heetsiamna na nei sih diing uhi; 27 ajiahchu hi mite lungtang ataahta a, a bil uh angongta a, a mit uh asiingtauhi; huchilou inchu a mit un amu kha diing va, a bil un aja kha diing va, a lungtang un ahesiam kha diing va, huchiin ahung kiheikiit kha diing va, ke'n ka na sudam kha diing hi,"' achih chu. 28 Hujiahin Pathian hutdamna thu chu Jentelte kawma sawl ahita chih he un, amah un zong angaikhe diing uhi," achi hi. 29 Hi thute asoi zohin, Judate chu apawtkheta va, amahuh lahah nasataha kinialna anei uhi.
Rom ah Kum Nih Aumna
30 Huleh Paul chu kum nih pumluum inn luahman kipiaahin aum a, a kawma chiah photmah anakipaahpih hi. 31 Pathian lalgam thu asoi a, Lalpa Jesu Khrist thu jaleentahin ahilh jeel a, koimah in amah akhaam sih uhi.
Chibaibuuhna
1 Paul, Jesu Khrist suaah, apostol hi diinga kouh, Pathian tanchinpha diinga sehtuam in, 2 hu tanchinpha Pathian in malai peha zawlneite kam a Pathian Lehkhathu Siangthou a anachiamsa, 3 huchu tahsa daan a David suan a piang, a Tapa Jesu Khrist i Lalpa uh tungtaang, 4 huleh Amah chu misi lah apat thohkiitna jaalin sianthouna Hagau dungjuiin silbawltheihna toh Pathian Tapa ahi chiin phuandohin aumta hi, i Lalpa uh Jesu Khrist chu. 5 A min jiaha nam chin laha mi ginna lama thumangsah diingin Amah vaangin hehpihna leh apostol hihna ka tangta uhi. 6 Hute lahah nanguh zong Jesu Khrist a kouhte na hi uhi. 7 Pathian deihtahte, misiangthou hi diinga kouhte, Rom khua a um zousiah kawmah, i Pa uh Pathian leh Lalpa Jesu Khrist kawm apat hehpihna leh hamuanna na kawmvah um hen.
Rom a Zin Atupna
8 Khovel pumpi a na ginna uh athansuaah jiahin na bawnva tunga ka kipaahna thu, amasapeenin Jesu Khrist tungtawnin ka Pathian kawmah ka soi hi. 9 Huchi ahih jiahin ka haamteina ah na min uh ka lou ngiitngeet chih a Tapa tanchinpha a ka hagau a a nna ka tohsah zing Pathian chu ahung heetpihtu ahi. 10 Bangchidaan aha khat a tu beeha na kawmva ka hungna diing Pathian deihdaan a lampi ka muhtheiha ahihleh chiin ka ngeen hi. 11 Ajiahchu na detna diingva hagaulam silpiaahbang ahakahung piaah theihna diingin nanguh hung muh ka uut hi; 12 huchu na ginna uh leh ka ginna a nanguh leh kei i kisuhhaattuah theihna diingin ka chihna ahi. 13 Huleh unaute, Jentel dangte kawma ka tohgimna gah ka muhtaah bangmaha nanguh laha zong ka muh theihna diingin na kawmvah tampivei hung ka tumta a, hizongleh tu dongin daalin ka um zing chih na heetlouh uh ka deih sih hi. 14 Grikte leh Grik hiloute kawmah bat ka nei hi, mipil leh mipilloute kawmah zong. 15 Huchiin nanguh Rom khua a umte kawmah zong tanchinpha soi diingin ka kithalawp zing hi.
Tanchinpha Silbawltheihna
16 Bangjiahin ahiai i chih leh Khrist tanchinpha chu ka zumpih sih hi, ajiahchu agingta photmah diingin hichu hutdamna diinga Pathian silbawltheihna ahi: Judate diingin ahi masa a, huleh Grikte diingin zong ahi. 17 Ajiahchu hikhu ah Pathian dihtatna chu ginna apat ginna ah suhlatin aumta hi; "Midihtat chu ginna in ahing diing," chih gelh bangin.
Jentelte Giitlouh daan Phuanna
18 Ajiahchu thutah dihtatlouhna a daaltu, mihingte Pathian ngaihsahlouhna leh dihtatlouhna zousiahtungah Pathian lungthahna chu vaan apatin suhlatin aumta hi. 19 Pathian in aheetsahtaah jiahin Pathian tanchin heet diing chu amahuh ah suhlatin aumta hi. 20 Ajiahchu khovel siam chiil apat a sil muhtheihlouhte, a kumtuang silbawltheihna leh a Pathian jia natan chiang silsiam ah akilang a, chiantaha muhin aum a, hujiahin suanlam diing anei sih uhi. 21 Ajiahchu Pathian he ngaalin Pathian bangin apaahtawi sih va, kipaahthu zong asoi sih va, himahleh a ngaihtuahna uh chu thulimlou ahung suaahta a, huleh a lungtang ngol uh chu ahung mialta hi. 22 Pil kisain mingol ahung suaahta va, 23 sitheilou Pathian loupina chu sithei mihingte, vate, keenglinei sate leh aboh a vaah ganhingte lim ah atangsahta uhi. 24 Hujiahin Pathian in amahuh chu a sapum uh zumhuaitaha kibawltuah diing leh a lungtang uh uutjawng banga sil niin abawl uh phalin apedohta hi. 25 Hute'n chu Pathian thutah juau a tangsahin, kumtuanga phattaah a Siamtu saangin a silsiam biain a nna atohsah jawta uhi. Amen. 26 Hujiahin Pathian in zumhuaitaha ahuuh uh phalin apedohta hi. Ajiahchu a numeite uh nasan in zong a pianken umdaan ngeina uh daanlou banga um diingin akibawl limdang uhi. 27 Hutobangmahin pasalte'n zong numei zatdaan ngeina tawpsanin huuhin khat leh khat akienlah va, pasal leh pasal kilawmloutahin akibawl va, apaikhial man muh diing uh chu amahuh ah akimuh uhi. 28 Huleh a lungsim va Pathian aheet uutlouh jiahun, Pathian in sil kilawmloute bawl diinga lungsim manlouh aneih uh phalin apedohta hi; 29 dihtatlouhna, numei leh pasal kaala thaanghuaina, giitlouhna, duhaamna, kimuhdahna zousiah a dimin; thangsiatnate, tualthahnate, kinialnate, kiheemnate, mi siatna diing ngaihtuahnate in adim va; amahuh chu misoisiathaatte, 30 miheehsete, Pathian mudahte, kihau haatte, kiliansahte, kichapousahte, silgilou pandohtute, nulepa thumangloute, 31 heetsiamna neiloute, ginumloute, pianpih lungsiatna neiloute, kilem uutloute, zahngaihna neiloute ahi uhi; 32 amah un hutobang sil bawlte chu sitaah ahi chih Pathian vaihawmna he ngaalun, amahuh chauh bawl zong hilouin hizongleh midang hutobang bawlte zong akipaahpih uhi.
Jentel Sahkhomite Siamlouhna
1 Hujiahin, aw mihing, mi soiseel haat koi hitazongleh chin, suanlam diing himhim neilou na hi, ajiahchu midang na soiseelna tah ah nangmah siamlouh na kitangsah ahi; nang asoiseeltu in zong hutobang silte na bawl thou jiahin. 2 Hizongleh Pathian vaihawmna chu hutobang sil bawlte tungah thutah dungjuiin atu ahi chih i he hi. 3 Aw mihing, hutobang sil bawlte soiseel a, nang lah hute mah bawl thou ngaal, Pathian vaihawmna peel diinga kigingta na hiaimah? 4 Ahihlouhleh Pathian hoihna in kisiih diingin nang ahung pui chih helouin, a hoihna leh a jaidoh daan leh a thuaahtheihna hauhdaante simmoh na hiaimah? 5 Hizongleh na lungtang khauh jiah leh na kisiih nuamlouh jiahin, Pathian lungthahna ni leh vaihawmna dihtat hung kilat ni chianga diingin na tungah lungthahna na kikholkhawm ahi. 6 Ama'n chu "mi chin a silbawl bang jeelun athuhkiit diing": 7 sil hoih bawla kuhkaltaha pang a, loupina leh paahtawina leh manthaai theihlouhna hawl mite kawmah kumtuang hinna ape diing hi. 8 Hizongleh soihah a thutah juilou a, dihtatlouhna juite tungah chu lungthahna leh thangtawmnate aum diing a, 9 thuaahgimna leh lungngaihna nasatah chu silgilou bawl zousiah tungah aum diing hi, Judate tungah aum masa diing a huleh Grikte tungah zong aum diing hi; 10 hizongleh sil hoih bawl photmahte kawmah chu loupinate, paahtawinate leh hamuannate piaah ahi diing hi: Judate kawmah piaah masat ahi diing a, huleh Grikte kawmah zong piaah ahi diing hi. 11 Ajiahchu Pathian ah deihsahtuamna aum sih hi. 12 Koipouh daan neiloua sil bawlsual chu daan louin amangthaai diing a, koipouh daan neia sil bawlsual chu daan a vaihawmsahin aum diing hi. 13 Ajiahchu daan thu ja mi hih chauh chu Pathian mitmuhin siamtang ahi sih a, hizongleh daan banga gamta chu midih ahi diing uhi. 14 Ajiahchu daan neilou Jentelte'n a pianken lungtang un daan silte abawl va, daan nei sih mahleh uh, hite chu daan in akineihtawm jeel uhi. 15 A lungtang vah daan silbawl gelh ahi chih aensah va, huchu a sialepha heetna un aheetpih a, a lungsimte uh kinialin siam leh siamlouh akitangsah lehleh uhi, 16 ka tanchinpha soi dungjuia Pathian in Jesu Khrist zanga mihing thukiphualte vai ahawmsah ni chiangin.
Judate leh Daan
17 Ngai in, nang chu Judami kichi na hi a, daan na muang a, Pathian na suang a, 18 huleh a deihjawng na he a, daan a hilha na um jiahin sil hoih jawte na khenthei a, 19 huleh nangmah ngeei chu mittawte puitu leh mial a umte diinga vaah hiin na kimuang a, 20 daanbu a heetna leh thutah um chu nei a kikoihin, mingolte leh naungeehte hilhtu hiin na kigingta hi. 21 Hujiahin nang, midangte hilhtu, nang leh nang kihilhlou na hiaimah? Nang guuhtaat louh diing ahi chia thusoitu, na gu veu maw? 22 Nang, "Aangkawm sin," chia hilhtu, aang na kawm veu maw? Nang milem hopa, milem biahna inn a silte na gu veu maw? 23 Nang, daan suangpa, na daan bohsiat jiahin Pathian na suminse veu maw? 24 Ajiahchu, "Pathian min chu nanguh jiahin Jentelte lahah soisiatin aumta hi," chia gelh bangin. 25 Ajiahchu daan juitu na hih inchu, zehtan aphatuam ngeei a; himahleh daan bohsetu na hih inchu, na zehtan chu tanlouh bang ahung hita hi. 26 Hujiahin zehtanlou mi'n daan thusehte ajuih leh, a zehtanlouh chu tan banga ngaih ahi sih diaimah? 27 Huleh piandaana zehtanlou mi'n daan ajuih leh, nang, lehkhathu leh zehtan daan nei ngaala daan bohsetu chu ahung soiseel sih diaimah? 28 Ajiahchu apolaang chauh a Judami hi chu Judami tah ahi sih a, akilanga tahsa chauha zehtan zong zehtan ahi sih hi. 29 Hizongleh a sungnung lama Judami hi chu Judami tah ahi; huleh zehtan tah chu lungsim lama tan ahi a, lehkha thu mei a hilouin, Hagau ah ahi; amah paahtaat loh chu mihing apat ahi sih a, hizongleh Pathian apat ahijaw hi.
1 Bang ahiai Judami in hamphatna aneih tuan? Ahihlouhleh zehtan zong bang ahiai aphattuamna? 2 Lam chinteng ah aphatuam hi. Apipeenin, Pathian kamsuahte a kawmva kolsaha aum jiahin ahi. 3 Ajiahchu khenkhatte'n gingta sih mahleh uh bang achi tuan diai? A gintaatlouhna un Pathian ginumna bangmalou asuaahsah diaimah? 4 Suaahsah lou hiai! Pathian chu adih a, hizongleh mi chin ajuau uhi: "Na thusoi a siamtanga na um a, vaihawmsaha na um chianga zong na zoh theihna diingin," chia gelh bangin. 5 Hizongleh i dihtatlouhna in Pathian dihtatna asuhlat leh, bang i soi diai? Pathian in mi agawtin dihtatlou ahiai? (Mihing bangin ka soi ahi). 6 Hilou hiai! Ajiahchu huchi hitaleh Pathian in khovel vai bangchiin ahawmta diai? 7 Ahihvaangin ka juau soi jiaha Pathian thutahna Amah loupina diinga apun seem leh, bang diinga kei zong misual banga siamlouh tansaha um nalai ka hiai? 8 Huleh bang diing a, ahung heeh va khenkhat in ka soi louhpi na hung soisah bangva, "Sil hoih ahung pawt theihna diingin sil hoihlou i bawl diing uh" chia soi jaw lou i hi viai? Hutobang mite'n siamlouh atan uh adih ahi.
Vaan Nuai Pumpi Siamlouhtanna
9 Ahihtaahleh bang? Amahuh saangin i hoihjaw tuanva ahiaimah? Hoihjaw himhim lou. Ajiahchu Judate leh Grikte anihun sual nuaia um veh ahi uh chih ama in i kawhchianta hi. 10 Hichia gelh bangin, "Koimah midihtat mawngmawng aum sih, khatmah zong aum sih. 11 Koimah hesiam mawngmawng aum sih, koimah Pathian hawl mawngmawng aum sih. 12 Ahilou lamah apeet zou vehta va, bangmah phatuamlou ahung suaah vehta uhi. Koimah sil hoih bawl mawngmawng aum sih, khatmah zong aumsihhi." 13 "A lawl uh haan kihong ahi a, a lei un heemthu asoi va"; "A muuh vah guulsia gu aum hi"; 14 "Akamuh haanse lohna leh khaatna in adim hi. " 15 "Akaluh sisan suah diingin akin suan uhi. 16 Manthaaina leh gentheihna a lampi vah aum a; 17 huleh hamuanna lampi zong ahe sih uhi." 18 "A mit hah vah Pathian launa mawngmawng aum sih hi," chih chu. 19 Huchiin daan in sil bangpouh asoi photmah chu, kam chinteng hup ahih theihna diing leh khovel zousiah Pathian ma a mohtanga aum theihna diingun, daan nuaia umte kawma asoi ahi chih i he uhi. 20 Ajiahchu daan silbawlte jiahin koimah Pathian mitmuhin siamtangin aum sih diing uh; ajiahchu daan jiahin sual kiheetna ahung um hi.
Khrist Gintaat Jaala Dihtatna
21 Hizongleh tuin chu Daan leh Zawlneite Lehkhabute in aheetsah bangin, daan tellouin Pathian dihtatna chu suhlatin aumta hi. 22 Huchu Jesu Khrist gintaatna jiaha a gingta photmahte diinga suhlat-a um Pathian dihtatna chu ahi; ajiahchu a kilimdanna bangmah aum sih hi. 23 Ajiahchu mi zousiah in sil abawlsualta va, Pathian loupina aching zouta sih uhi, 24 Khrist Jesu a um tatna jaalin a hehpihna in athawn a siamtansahin aum va, 25 pathian thuaahtheihna jaala malaia a sualnate uh kiheetmohbawla aum jiahin, a dihtatna suhlatna diingin Khrist Jesu chu ginna tungtawna a sisan jaala sual thuphatawina hi diingin Pathian in aguat a, 26 tulai hun a a dihtatna sulang diingin, huchia Amah chu midihtat ahihtheihna diing leh Jesu gingta photmahte siamtangsahpa ahihtheihna diingin. 27 Ahihleh kisahtheihna diing khoiah aum ei? Aum thei mawngmawng sih hi. Bang daan in ahiai siam i tan uh? Silbawl daan in ahiai? Hilou, ginna daan in ahijaw hi. 28 Hujiahin mi khat chu daan silbawlte jiah hilouin ginna jiahin siamtansah ahi chih i gingta uhi. 29 Pathian chu Judate Pathian chauh ahiaimah? Jentelte Pathian zong hilou maw? Hi e, Jentelte Pathian zong ahi. 30 Zehtante ginna jiaha siamtangsah diing leh zehtanlouhte zong huh ginna tungtawn mah a siamtangsah diing Pathian chu khat ahi ngaala. 31 Ahihleh ginna jaala daan chu bangmalou i suaahsah uh ahiai? Suaahsah lou hiai! Husaangin, daan i sukipjaw uh ahi.
Abraham a Etsahna
1 Ahihleh tahsa daan a i pu uh Abraham in amuh bang ahiai i soi diing uh? 2 Ajiahchu natoh jiaha Abraham siamtansaha aum leh suan diing anei hi, hizongleh Pathian lamah chu anei sih hi. 3 Ajiahchu Pathian Lehkhathu in bang ahiai asoi? "Abraham in Pathian agingta a, huchu amah diinga dihtatna a ngaih ahi," achi hi. 4 Huleh natongtu loh chu hehpihna silpiaah a ngaih ahi sih a, bat a ngaih ahijaw hi. 5 Hizongleh nna tonglou a, Pathian ngaihsahloute siamtangsahpa gingta jaw mi ginna chu dihtatna a ngaih ahi, 6 Pathian in natoh telloua midihtat a aseh mi hamphatdaan David in zong anasoi a: 7 "Atatleehnauh ngaihdama um a, a sualnate uh khuha umte chu ahampha uhi; 8 LALPA'N sualna neia aseh louh diing mi chu ahampha hi," chia asoitaah bangin. 9 Ahihleh hu hamphatna zehtante tung chauha um ahiai, ahihlouhleh zehtanlouhte tungah zong? Ginna chu Abraham a diinga dihtatna a ngaih ahi i chi ngaala. 10 Ahihleh huchu bangchi kingaih ahiai? Azehtan nungin ahiai, ahihlouhleh azehtan main? Azehtan nungin ahi sih a, azehtan main ahijaw hi. 11 Huleh zehtanlouha aum laia ginna a amuh dihtatna heetna zehtan chiamchihna chu amu a; zehtanlouh hizongleh uh agingta zousiah pa ahih theihna diingin, dihtatna chu amahuh diinga zong seha aum theihna diingin, 12 huleh zehtanlouhte a diinga zehtante pa chauh ahi sih a, i pu uh Abraham zehtanlouha aum laia a ginna neih banga neite pa zong ahi.
Ginna Jaala Pathian Thuchiam Heetdohna
13 Ajiahchu Abraham aha, ahihlouhleh a chihaah kawmah khovel gouluahtu ahi diing chih daan jiaha chiam ahi sih a, hizongleh ginna a dihtatna jiahin ahijaw hi. 14 Ajiahchu daan a mite gouluahtute ahih un chu, ginna bangmalou ahita diing a, thuchiam zong panna bei ahita diing hi. 15 Ajiahchu daan in lungthahna asiam hi, ajiahchu daan um louhna ah bohsiatna zong aum sih hi. 16 Hujiahin hehpihna dungjuia ahih theihna diingin ginna jiahin ahi a, chihaahte zousiah in thuchiam chu peelloua amuhna diingun, daan nei mite chauh hilouin, hizongleh i bawnva i pu uh Abraham banga ginna nei zousiah in zong amuh theihna diingun, 17 ("Nam tampite pa in ka hung bawlta hi," chia gelh bangin) misite suhingtu leh sil umloute um banga soitu Pathian agintaatpa mitmuh ah. 18 Kinephuai a aum louhin zong ama'n chu kineemtahin agingta hi, nam tampite pa ahung hihtheihna diingin, "Huchibangin na chihaah ahung hi diing," chia kisoi dungjuiin. 19 Huleh ginna a haatlou hi louin, a sapum sisa banga um leh amah chu kum za khat veel diing mi ahi a, Sarah achiing ahih zong angaihtuah sih hi. 20 Ginlelhna jaalin Pathian thuchiam tahsanglouin aum sih a, hizongleh ginna ah ahaat a, Pathian loupina apia hi. 21 Huleh Ama'n thu achiam phot chu ataangtungsah thei hi chih hechianin agingta tinten hi. 22 Hujiahin a ginna chu "amah a diinga dihtatna a ngaih ahita hi." 23 Huleh a ginna chu a dihtatna a ngaih ahi chih amah diing chauha gelh ahi sih a, 24 hizongleh eiuh diingin zong ahi. Misi lah apat a i Lalpa uh Jesu kaithoupa i gintaat un chu eiuh diingin zong dihtatna a ngaih ahi diing hi. 25 Hu Jesu chu i tatsualnate jiahin piaahkhiahin aum a, huleh siam i tanna diingun kaihthohin aum hi.
Ginna Gahsuahte
1 Hujiahin ginna jiaha siamtansaha umin, i Lalpa uh Jesu Khrist jaalin Pathian toh kilemin i um uhi. 2 Amah jaal mahin i dinna uh hi hehpihna ah ginna jaalin luuttheihna i neita va, huleh Pathian loupina a kineemin kipaahin zong i um uhi. 3 Huleh huchauh zong hilouin, gimthuaahna in kuhkalna asiam chih hein gimthuaahna ah zong i kipaah va; 4 huleh kuhkalna in heetchianna asiam a, heetchianna in kinepna asiam hi. 5 Huleh kinepna in chu alungkesah sih, ajiahchu hu Hagau Siangthou i kawma ahung piaah in Pathian lungsiatna i lungtang vah aleihleetta hi.
Pathian Lungsiatna LatsahinAum
6 Ajiahchu haatna beia i um laiin, a huntahin Khrist chu Pathian ngaihsahloute luangin ahung sita hi. 7 Bangjiahin ahiai i chih leh midihtat luanga sih mi auut khoi sih diing a, ahiinlah mi hoih luanga sih chu mi khenkhat in angaap meithei hi. 8 Hizongleh misualte i hih laia Khrist i luangva ahung sihna ah Pathian in ahung lungsiatna chu alangsahta hi. 9 Hu saangmahin, tuin, a sisan a siamtansaha i um nungin Amah jaalin lungthahna apatin hutdamin i um diing uhi. 10 Ajiahchu meelma i hihlaia bawn a Tapa sihna jiaha Pathian toh kilemta i hih un chu, kilema i um zoh nungun a hinna jiahin hutdamin i um diaahkhol diing uhi. 11 Hu chauh hilouin, tua Pathian toh kilepna i muhna uh i Lalpa Jesu Khrist jaalin Pathian ah zong i kipaah uhi.
Khrist Jaala Hinna
12 Hujiahin, mi khat jiaha sual khovel a ahung luut a, sual jiaha sihna ahung luut mahbangin, mi zousiah anasualtaah jiahin sihna in mi zousiah ajeelsuaahta hi, 13 Ajiahchu daan umma tanin sual khovel ah aum a, hizongleh daan um louh laiin sual chu suala ngaih ahi sih hi. 14 Hizongleh Adam apat Mosi tanphain Adam sualna banga sil bawlsual loute tungah zong sihna in vai ahawm hi; Adam chu ahung diingpa Jesu etsahna ahi. 15 Hizongleh silthawnpiaah chu giitlouhna toh kibang ahi sih hi. Ajiahchu mi khat giitlouh jaala bawn mi tampi asih va ahihleh, Pathian hehpihna leh Mi khat, Jesu Khrist hehpihna jiaha silthawnpiaah chu mi tampite tungah suhpungin aum ngeei diing hi. 16 Huleh hi silthawnpiaah chu mi sual khat tungtawna hung kuan khu toh akibang sih hi, bangjiahin ahiai i chih leh mi khat sualna jiahin vaihawmna chu ahung um a hu in siamlouhtanna atun hi, hizongleh sualna tampi lahah silthawnpiaah ahung um a hu in siamtansahna atun hi. 17 Ajiahchu mi khat giitlouh jiaha sihna in hu mi khat jiah maha vai ahawm leh, hehpihna nasatah leh dihtatna silthawnpiaah mute'n Mi khat, Jesu Khrist jiahin hinna ah vai ahawm ngeei diing uhi. 18 Hujiahin mi khat giitlouh jiahin siamlouh tansahna chu mi zousiah tungah ahung um hi. Huchi bangmahin Mi khat dihtatna silbawl jiahin hinna siamtansahna chu mi zousiah tungah ahung um hi. 19 Ajiahchu mi khat thumanlouh jiaha mi tampite misual akihihsah mahbangin, Mi khat thuman jiahin mi tampite midihtat hihsah ahi diing uhi. 20 Huleh giitlouhna atam seemna diingin daan ahung um hi. Hizongleh sual apunna phot ah hehpihna zong apung jawseem hi, 21 huchia sual in sihna a vai ahawm mahbanga, hehpihna in dihtatna jaala kumtuang hinna tanna diinga i Lalpa uh Jesu Khrist jiaha vai ahawm theihna diingin.
Khrist toh Kipumkhatna leh Sualna Kituahlouh Daan
1 Ahihleh bang i soita diai? Hehpihna apun seemna diingin sual ah i um zing diing uh adiai? 2 Um zing lou hiai diing! Eiuh sual lama sisate bangchiin sual ah i hing thei nalai lai diai? 3 Eiuh Khrist Jesu a baptis a um photmahte chu a sihna ah baptis-in i um uh ahi chih helou na hi viaimah? 4 Hujiahin Pa loupina jaala Khrist chu misi lah apat kaihthoh ahih bangin eihaw zong hinna thah a i hin theihna diingun baptisma tungtawnin sihna ah Amah toh vuiin i um uhi. 5 Ajiahchu a sihna kibatpiha Amah toh i na kizoptaah uh leh, a thohkiitna kibatpihin zong i kizop diing uh, 6 huchia sualna sapum suhjawngkhaala aum theihna diingin, tu apat sual suaaha i um nawn louhna diingun i mihing lui uh Amah toh kilhbehin aumta hi chih theiin. 7 Ajiahchu koipouh asitasa chu sual apatin ajaleenta hi. 8 Huleh Khrist toh i sihtaah a ahihleh, Amah toh hin zong i hinkhawm diing uh ahi chih i gingta hi. 9 Khrist chu misi lah apat kaihthohin aum a, asi nawn sih diing chih hein. Sihna in Amah tungah thu anei nawnta sih hi. 10 Ajiahchu a sihna chu sual lam thu ah setden diingin khatvei asita a; hizongleh ahin lam thu ahihleh Pathian lamah ahing ahi. 11 Huchibangmahin nanguh zong sual lam thu ah sitain kingai unla, hizongleh Pathian lamah i Lalpa uh Jesu Khrist ah hingin kingai un. 12 Hujiahin na sapum uh uutjawng na juihna diingun na sapum sithei vah sual in vaihawm sih heh. 13 Na sapum hiangte uh zong dihtatlouhna vanzat diingin sual kawmah pephal sih un, hizongleh misi lah akipat hing kiit bangin Pathian kawmah kipia un; huleh na sapum hiangte uh zong dihtatna vanzat diingin Pathian kawmah pia un. 14 Ajiahchu sual in na tungvah thu aneita sih diing hi, bangjiahin ahiai i chih leh daan nuaia um na hi sih va, hizongleh hehpihna nuaia um na hijaw uhi.
Sual Suaah apat Pathian Suaah
15 Ahihleh bang chita diing? Daan nuaia um hilou a hehpihna nuaia um i hih jiahin i sual diing uh ahi diai? Sual hiai lou diing! 16 Mi khat kawma suaah banga thumang diinga na kipiaah chiangun, na thuman pa uh suaahte na hi va, nanguh chu sihna tuntu sual suaahte aha, ahihlouhleh dihtatna tuntu thumanna suaahte hijaw aha, na hi uh chih helou na hi viaimah? 17 Hizongleh Pathian kawmah kipaahthu um heh, sual suaah anahi himahzongleh uh chin, nanguh hung kipia kihilhna daan thu chu lungtang tah in na juita uhi. 18 Sual apat hahdoha umin, dihtatna suaahte na hung hita uhi. 19 Na tahsa uh haatlouh jiahin mihing daanin ka soi ahi. Na sapum hiangte uh daan bohsiatna tuntu dihtatlouhna leh giitlouhna suaah diinga nana piaah bangun, huchibangmahin tuin na sapum hiangte uh sianthouna tuntu dihtatna suaah diingin pia un. 20 Ajiahchu sual suaahte na hih laiun dihtatna lam ah nana jaleenta uhi. 21 Ahihleh tua na sil zumpihte vah hulaiin gah bang ahiai leh na neih uh? Hu silte tawpna lah sihna ahi ngaala. 22 Hizongleh tuin sual apat jaleensaha um a, Pathian suaahte na hung hih nungun, sianthouna khopin na gah uh na nei va, huleh a tawpna ah kumtuang hinna toh na nei uhi. 23 Ajiahchu sual man sihna ahi a, hizongleh Pathian silthawnpiaah chu i Lalpa uh Jesu Khrist jaalin kumtuang hinna ahi.
Sual Tawpsan Thu Kiteenna Umdaan apat Etsahna
1 Unaute, daan in mi a damsung teng a tungah thu aneihkhum ahi chih na he sih viai mah (daan he mite kawmah ka soi ahi)? 2 Ajiahchu numei pasal nei chu a pasal damsung siah daan a a pasal a kaanin aum ahi. Hujiahin a pasal asih inchu, pasal lam thu ah daan apat hahkhiahin aum hi. 3 Huchiin a pasal dam zinga midang akiteenpih inchu, aangkawmnu akichi diing hi. Hizongleh a pasal asih inchu, hu daan thu apatin ajaleenta a, midang toh kiteeng zongleh aangkawmnu ahi sih diing hi. 4 Hujiahin, ka unaute, midang khat, sihna apat kaihthoha umpa na kiteenpih theihna diingun, daan thu lamah Khrist sapum tungtawnin asi na hung hita uhi, huchia Pathian lama gah i suah theihna diingun. 5 Ajiahchu tahsa a i um laiin, daan in atohthou i sual uutnate'n sihna tun diinga gah suang diingin i sapum hiangte ah nna atong uhi. 6 Hizongleh tuin eiuh hung kaantu chu sihsan zouin, daan apat hahkhiahin i umta uhi, huchia lehkhagelh lui bangphet hilou a Hagau hinna thah a nna i toh theihna diingin.
Daan leh Sualna
7 Ahihleh bang i soita diai? Daan chu sualna hi adiai? Hilou hiai! Aleh lamah, daan jiahin hilou leh chu, sual kichi helou diing hi ing a. Ajiahchu daan in, "Na een louh diing ahi," na chi sih leh, een kichi helou diing ka hi. 8 Hizongleh sual in thupiaah tungtawnin hun lemtaang muin ka sungah eenna chinteng aumsah hi. Ajiahchu daan umlouin sual chu asi ahi. 9 Huleh tumalamin kei chu daan louin ka na hing a, hizongleh thupiaah ahung um tahin sual ahung hingdoh a huleh kei ka sita hi. 10 Huleh hinna hung po diing thupiaah chu sihna diing ahung hita chih ka hung hedohta hi. 11 Ajiahchu sual in thupiaah jiaha hun lemtaang muin ahung heem a, hukhu zangin ahung sulumta hi. 12 Hujiahin daan chu asiangthou a, huleh thupiaah zong asiangthou a huleh adihtat a huleh ahoih hi. 13 Ahihleh sil hoih khu kei diinga sihna hung hita adiai? Hilou hiai! Hizongleh sual chu sual a akilat theihna diingin sual in sil hoih tungtawnin keimah ah sihna ahung tongdoh hi. Hujiahin sual chu thupiaah tungtawna sual nasatah ahung hihtheihna diingin.
Mihing Umje Nihte Kikalhna
14 Ajiahchu daan chu hagaulam sil ahi chih i he hi, hizongleh kei chu sami, sual suaaha khotsa ka hi. 15 Ajiahchu sil ka bawl peen ka hesiam sih hi. Ajiahchu sil ka bawl uutpeen chu ka bawl sih a; hizongleh ka uutlouh peen ka bawl hi. 16 Ka bawl uutlouh peen ka bawl inchu, daan ahoih hi chia pom ka hita diing hi. 17 Huchiin tuin a bawltu chu kei ka hita sih a, hizongleh sual keimah a um bawl ahijaw hi. 18 Ajiahchu keimah ah (chih chu ka tahsa ah) sil hoih mawngmawng ateeng sih chih ka he hi; abawl uutna peen chu keimah ah aum a, hizongleh hu a hoih bawl theihna keimah ah ka mu sih hi. 19 Ajiahchu sil hoih ka bawl uut peen ka bawl sih a; hizongleh sil hoihlou ka bawl uutlouh peen ka bawljaw hi. 20 Ka uutlouh peen ka bawl inchu, a bawltu keimah ka hita sih a, sual keimah a um bawl ahijaw hi. 21 Huchiin hi daan ka hung hedohta, sil hoih ka bawl uut laiin giitlouhna ka kawmah aum hi. 22 Ajiahchu ka mihing lungsim sunglam ah Pathian daan tungah ka kipaah hi. 23 Hizongleh ka tahsa hiangte ah daan tuam khat aum chih ka he hi. Hukhu in ka lungsim daan adou a, huleh ka tahsa hiangte a um sualna daan kawmah suaahin ahung pui veu hi. 24 Migenthei hina meijeen ing e! Hi sihna sapum lah apat koi in ahiai hung suaahtasah diing? 25 I Lalpa uh Jesu Khrist jaalin Pathian kawmah kipaahthu ka soi hi. Huchiin keimah tah in chu ka lungsim in Pathian daan ka tong a, hizongleh tahsa in chu sualna daan ka tong hi.
Hagau a Umna Hinkhua
8 Hujiahin tuin chu Khrist Jesu a umte, tahsa daan a hing lou a, hizongleh Hagau daan a hingte diingin siamlouhtansahna mawngmawng aumta sih hi. 2 Ajiahchu Khrist Jesu a um hinna Hagau daan in sual leh sihna daan apat ahung jaleensahta hi. 3 Daan in tahsa tungtawna a haatlouh jiaha abawl guallouh chu, Pathian in a Tapa ngeei chu sual tahsa tobang pua a sual jiaha ahung sawlna ah, tahsa sual chu siamlouh atangsahta hi, 4 huchia tahsa daan a hing lou a, himahleh Hagau daan a hingjaw eihaw tunga dihtatna daan poimohte suhtaangtunga aum theihna diingin. 5 Ajiahchu tahsa daan a umte'n tahsa lam silte alunggulh va, hizongleh Hagau daan a umte'n chu Hagau silte alunggulh uhi. 6 Ajiahchu tahsa lam silte ngaihtuah chu sihna ahi a, hizongleh Hagau silte ngaihtuah chu hinna leh hamuanna ahi. 7 Ajiahchu tahsalam lungsim chu Pathian toh kimeelmaatna ahi; bangjiahin ahiai i chih leh huchu Pathian daan nuaiah aum sih a, um zong aum theilou him ahi. 8 Huchiin tahsa a umte'n Pathian akipaahsah thei sih uhi. 9 Hizongleh Pathian Hagau nanguh a aum tahzet inchu, tahsa a um na hi sih va hizongleh Hagau a um na hijaw uhi. Hizongleh mi koipouh in Khrist Hagau aneih louh inchu, Amah a ahi sih hi. 10 Huleh Khrist nanguh a aum leh, sapum chu sual jiahin asi ahi; hizongleh Hagau chu dihtatna jiahin ahing ahi. 11 Hizongleh misi lah akipat Jesu kaithoupa Hagau nanguh a aum inchu, misi lah akipat Khrist kaithoupa'n nanguh a um Hagau tungtawnin na sapum uh sitheite zong asuhing diing hi. 12 Hujiahin unaute, bat nei i hi uhi, tahsa a hilouin, tahsa daan a hing diing hi louin. 13 Ajiahchu tahsa daan a na um un chu, na si diing va; hizongleh sapum silbawlte Hagau a na suhlup jeel un chu, na hing diing uhi. 14 Ajiahchu Pathian Hagau puia um photmahte chu Pathian tate ahi uhi. 15 Lau a um kiit diingin suaah hihna hagau na mu uh ahi sih a, hizongleh ta hihna Hagau na mu uh ahijaw a, hu Hagau jiahin "Abba, Pa," chiin i kikou uhi. 16 Hagau ngeei in eimah hagau toh Pathian tate i hi chih ahung heetpih hi. 17 Huleh tate i hih-un chu, gouluahtute i hi; Amah toh i thuaahgim tahzet un chu Pathian gouluahtute leh Khrist gouluahpihtute i hi uhi; huchia eite zong Amah kawma paahtawia i um theihna diingun.
Loupina Hungtung diing
18 Ajiahchu tulaia thuaahgimnate chu ijawchianga eiuh a loupina suhlat-a um diing toh tehkaahthamin ka ngai sih hi. 19 Ajiahchu silsiam zousiah in kineem mahmahin Pathian tate kilatna diing angaahlah mahmah uhi. 20 Ajiahchu silsiam zousiah chu umjebei a umsahin aumta uh, amahuh uutthu hilouin, kinepna neia amahuh a thu nuaia umsahpa jiahin ahijaw hi. 21 Ajiahchu silsiam zousiah zong siatna suaah apat suahtaatsaha umin Pathian tate jaleenna loupi ah aluut diing uhi. 22 Ajiahchu silsiam zousiah tutan dongin thuum leh nauvei na thuaahin aum uh chih i he uhi. 23 Huleh amahuh chauh hilouin, Hagau gah masa nei eihaw ngeei zong ta hihna, i sapum uh tatna muhna diing, ngaahlah mahmahin lungsim in i maau uhi. 24 Ajiahchu kinepna a hutdamin i um uhi; hizongleh muhsa zinga kinep chu kinepna ahi sih hi, mi'n amuhsa zing ah bang diingin akineem nalailai diviai? 25 Hizongleh i muhlouh i kineppih inchu, kuhkaltahin i ngaah hi. 26 Hutobangmahin, Hagau in zong i haatlouhnate ah ahung panpih hi. Ajiahchu bangchi banga haamtei diing i hiai chih i he sih a; hizongleh Hagau in thuumna soi guallouhin ahung ngetsah zing hi. 27 Huleh Pathian deihjawng banga misiangthoute diinga angetsah jiahin, Amah lungtang entu in Hagau lungsim bang ahiai chih ahe hi. 28 Huleh Pathian lungsiatte, Ama'n aguat banga akouhte diingin sil zousiah chu a hoihna diingun atongkhawm chiat hi chih i he uhi. 29 Ajiahchu aheetlawhte chu Amah Tapa banga um diingin agiiatlawh hi, a Tapa chu unau tampite laha tachiil ahung hihtheihna diingin. 30 Huleh Ama'n aguatlawhte chu kouh zong akou a; akouhte chu siam atangsah a; siam atansahte chu apaahtawi hi.
Pathian Lungsiatna Nasatdaan
31 Ahihleh hi thute ah bang i soita diai? Pathian i lama apan leh, koi in ahiai hung dou thei diing? 32 Amah Tapa ngeei zong hawilou a, hizongleh i bawnva diinga hung pedohpa in bang diingin sil zousiah athawnin Amah toh ahung pekhawm lou diai? 33 pathian miteelte koi in ahiai heeh diing? Siamtangsahtu Pathian ahi ngaala. 34 Koi in ahiai siamlouhtangsah diing? Asi chu Khrist ahi ngaala; ahi, athoukiit jawta a, Pathian jiatlam ah aum a, eiuh diinga hung ngetsahtu zong ahi. 35 Khrist lungsiatna akipan koi in ahiai hung khen diing? Gimthuaahna in ahiai, lungngaihna in ahiai, suhduhdahna in ahiai, kial in ahiai, saguaahna in ahiai, lauhuaina in ahiai, naamsau in ahiai hung khen diing? 36 "Nangmah jiahin nitumin thahin ka um va, goh diing belaam banga ngaih ka hi uhi," chia gelh bangin. 37 Khenlou hiai diing, hite zousiah ah ahung lungsiattu jaalin gualzoute saanga tungtuang jaw i hi uhi. 38 Ajiahchu sihna aha, hinna aha, angelte aha, lalnate aha, silbawltheihnate aha, sil umzingte aha, sil hung um diingte aha, 39 saanna aha, thuuhna aha, ahihlouhleh silsiam dang mawngmawng in zong i Lalpa uh Khrist Jesu a um Pathian lungsiatna akipan eite ahung khen thei sih diing chih chiantahin ka he hi.
Israelte Ginlouhna Jiaha Paul Lungkhamna
1 Khrist ah thutah ka soi ahi, ka juau sih, Hagau Siangthou ah ka sialepha heetna in zong ahung heetpih hi, 2 ka lungtang ah hahsatna daaitheilou leh lungngaihna nasatah ka nei hi. 3 Bangjiahin ahiai i chih leh ka unaute, tahsa lama ka chipihte luangin keimah Khrist kawm apat koihtuam khopa haamse thuaahin um leng chiin ka haamtei hi. 4 Israelmi ahi ngaalva; ta hihnate, loupinate, thuhunte, daan thu piaahnate, Pathian biahinn a natohnate leh thuchiamte bang amahuh neih ahi. 5 Pulepate amahuh a ahi a, tahsa lam thu ah Khrist zong amahuh lah apat a hung pawt ahi a, Amah chu sil zousiah tunga um kumtuanga paahtawi taah Pathian ahi. Amen.
Israelte Kawma Pathian Thuchiam Athawn Sih
6 Hizongleh Pathian thu bangmalou banga umta ahi sih hi. Ajiahchu Israel haahte a bawnun Israel mi ahi veh sih uhi. 7 Abraham chihaahte ahih jiahun zong a bawnun tate ahi veh tuan sih uh; hizongleh, "Isak ah na haahte akichi diing," chih ahijaw hi. 8 Hu tahsa tate chu Pathian tate ahi sih va; hizongleh thuchiam tate chu chihaah a ngaih ahijaw uh chihna ahi. 9 Ajiahchu hikhu thuchiam ahi: "Tu bang hun in ka hung diing a, Sarah in tapa anei diing," chih chu. 10 Huleh hi chauh hilouin, Rebekah in, mi khat, i pu uh Isak tungtawna nau apaai laiin, 11 (naupangte chu piang nailouin, sil hoih leh silsia zong bawl nailouin, teel lam thu a Pathian siltupnajiah adet theihna diingin, silbawl jiah hilou a hizongleh a koutu deih jiah hijawin), 12 a kawmah, "A upajaw in a naupangjaw nna atohsah diing," Pathian in achi hi. 13 "Jakob ka lungsiat a, hizongleh Esau chu ka mudah hi," chih gelh bangin.
Pathian ah Dihtatlouhna Aum Sih
14 Ahihleh bang i soita diai? Pathian ah dihtatlouhna aum a adiai? Hilou hiai! 15 Ajiahchu Ama'n Mosi kawmah, "Ka khotuah uut photmah ka khotuah diing a, ka lainat uut photmah ka lainat diing," chiin anasoita hi. 16 Huchiin adeihpa jiahin ahi sih a, muhsawma taaipa jiahin zong ahi diaah sih, hizongleh akhotuahtu Pathian jiahin ahijaw hi. 17 Ajiahchu Pathian Lehkhathu in Pharaoh kawmah hichiin achi, "Hi jiah tahin ka hung tungding a, nangmah a ka silbawltheihna ka etsah theihna diing leh leitung pumpi a ka min phuana aum theihna diingin," achi hi. 18 Hujiahin Pathian in auut photmah akhotuah a, auut photmah zong asoihahsah veu hi.
Pathian Bangkim tunga Thunei Ahihna
19 Nang in ka kawmah, "Bang diinga Ama'n i dihlouhna hung kawh ahiai? A deihjawng koi in akalh ei?" na chi ahi meithei. 20 Hizongleh tahzetin, Aw mihing, nang Pathian dawng vialtu koi na hiai? Silsiam in a siamtu kawmah, "Bang diinga hitobanga hung siam na hiai?" achi diaimah? 21 Beelkhengtu in beel leitang khat apat beel khat phatuam a zattaaha kheeng diing leh beel khat zattaahloua kheeng diingin, beel leitang tungah thu anei sih eimah? 22 Pathian in a lungthahna leh silbawltheihna suhlat auut a, manthaaina tuaah diinga kiguatsa lungthahna beelte tunga athuaahzoh haamhaam leh, bang akhawh diai? 23 Huleh Ama'n malai apat loupina tang diinga aguatlawhsa hi khotuahna beelte tunga a loupina hauhsatna asuhlat theihna diinga, 24 judate lah apat chauh hilou a, hizongleh Jentelte lah apat akouhdoh eite tungazong athuaahzohhaamhaam leh, bang akhawh diai? 25 Hosea Lehkhabu a, "Ka mi hi ngeiloute chu ka mite ka chi diing a, lungsiat ngeilouh mite zong ka lungsiatte ka chi diing hi. 26 Huleh hichi ahung hi diing a, a kawmvah, 'Ka mite na hi sih uh,' chiha umna ngeei ah, Pathian hing tate chihin aum diing uh," anachih bangmahin. 27 Huleh Isai in zong Israelte tungtaang thu anataangkoupih a: "Israel tate jaw tuikhanglian sehneel bangin tam zongleh uh, agawtmawh chauh hutdamin aum diing uh. 28 Ajiahchu LALPA'N leitung a nna tomkhat abawl diing jiahin, Ama'n hu nna chu azou diing a, dihtatna in asutom diing hi" chiin. 29 Huleh Isai mah in, "Sepaihte LALPA'N chihatu diing hung na hawisahlou hileh, Sodom bangin i umta diing va, Gomorrah banga bawlin i umta diing uhi," chia anasoilawh bangin.
Israelte Chitlouhna Jiah
30 Ahihleh bang i soita diai? Dihtatna delhlou Jentelte'n dihtatna aphata uh ahi, ginna jiaha dihtatna chu. 31 Hizongleh daan a dihtatna deih Israelte'n hu dihtatna daan chu aphazouta sih uhi. 32 Bang jiahin? Ginna in adelh sih va, daan silbawlte a muhtheih banga adelh jiahun ahi. Ajiahchu puuhna suang ah apuuhta uhi. 33 "Ngai in, Zion ah puuhna suang leh daalna suangpi ka koih hi, koipouh Amah gingta chu azahtasah sih diing hi," chia gelh bangin.
1 Unaute, Israelte diinga ka lungtang deihpeen leh Pathian kawma ka haamteina peen chu hutdama ahung um theihna diing uh ahi. 2 Ajiahchu Pathian lamah phattuam ngaihna anei uh chih ka heetpih hi, ahihvaangin heetna dungjuiin chu ahi sih hi. 3 Ajiahchu Pathian dihtatna helouin, amahuh dihtatna tundoh tumin, Pathian dihtatna ah akituluut nuam sih uhi. 4 Ajiahchu agingta photmahte diingin Khrist chu dihtatna muhna diingin daan suhtawpna ahi.
Hutdamna chu Mi Zousiah a Diing ahi
5 Ajiahchu daan a kuan dihtatna tungtaang Mosi in agial hi, "Hu silte juitu chu hute in ahing diing," chiin. 6 Hizongleh ginna a dihtatna in chu hichiin achi hi, "Na lungsim in, 'Vaan ah koi akaltou diai?' chi sin" (huchu, tunglam apat Khrist puikhiah diing chihna ahi), 7 "ahihlouhleh, 'Lei nuaiah koi akumsuh diai?'" chi sin (huchu, misi lah apat Khrist puitouh diing, chihna ahi). 8 Hizongleh bang ahiai asoi? "Thu in ahung naih hi, na kam leh na lungtang ah aum hi" (huchu ginna thu ka soi uh chu ahi): 9 huchu na kam a Jesu chu Lalpa ahi chia na phuan a, misi lah apat Pathian in Amah akaithou chih na lungtang a na gintaat leh, hutdamin na um diing hi. 10 Ajiahchu mi'n lungtang in agingta a dihtatna amu hi, huleh kam in aphuang a hutdamna amu hi. 11 Ajiahchu Pathian Lehkhathu in, "Koipouh Amah gingta chu azahtasah sih diing," achi hi. 12 Ajiahchu Judate leh Grikte kilimdanna bangma aum sih hi, ajiahchu a bawnva tunga Lalpa chu khat ahi a, Amah kou zousiah tungah ahausa hi. 13 Ajiahchu "LALPA min kou photmah chu hutdamin aum diing hi." 14 Ahihleh Amah agintaat louhpi uh bangchiin akou diviai? Huleh a thu ajaah louhpi uh bangchiin agingta diviai? Huleh a soitu umlouin bangchiin aja diviai? 15 Huleh sawl ahihlouh uh leh bangchiin thu asoi diviai? "Hamuanna tanchinpha leh sil hoih kipaah huai hung tutte keeng kilawm hina mei e!" chia gelh bangin. 16 Hizongleh tanchinpha a bawnun ajom veh sih uhi. Ajiahchu Isai in, "Lalpa, ka thusoi uh kua in ahiai gingta?" anachi hi. 17 Huchiin ginna chu jaahna jiahin ahung um a, huleh jaahna chu Pathian thu tungtawnin ahung um hi. 18 Hizongleh ka chi ahi, amah un aja sih va ahiaimah? Ja tham e: "A aw uh leitung pumpi ah athangsuaah a, a thu uh kawlmong tanphain athangta hi." 19 Hizongleh ka chi ahi, Israelte'n ahe sih va ahiaimah? Amasapeenin Mosi'n, "Nam zong hiloute zangin ka hung thangsesah diing a, heetsiamna neilou namte zangin ka hung sulungthah diing hi," anachi hi. 20 Huleh Isai in hangsantahin, "Ahung hawl loute in ahung mu va; ahung kou loute kawmah suhlatin ka umta hi," achi hi. 21 Hizongleh Israelte kawmah chu, "Mithumangloute leh soihahte diingin suun nitum in ka baan ka jaah hi," chiin asoi hi.
Israelte chu Paihkhiahden Diing ahi Sih uh
1 Ahihleh Pathian in a mite paaikheta ahiaimah? Paaikhe lou hiai! Ajiahchu kei zong Israelmi, Abraham chihaah, Benjamin phung a mi ka hi. 2 Pathian in a mi aheetlawhte apaaikhe sih hi. Pathian Lehkhathu in Elijah thu asoi na he sih viaimah? Ama'n Israelte tungthu Pathian kawmah atut a, 3 "LALPA, na zawlneite athat va, na maitaamte asuchim va, keimah tangin ka um a, kei zong thah ahung tum uhi," chiin. 4 Hizongleh Pathian in a dawnna in bangchiin asoi ei? "Baal lim ma a khuupdin ngeilou mi saang sagih keimah diingin ka koih hi," chiin adawng hi. 5 Hutobangin tulaiin zong Pathian hehpihna a teel ahih dungjuiin gawtmawh hon khat aum nalai hi. 6 Huleh hehpihna jiah ahih inchu, natoh jiah ahita sih hi; huchilou inchu hehpihna chu hehpihna ahita sih diing hi. Hizongleh natoh jiah ahih inchu, hehpihna ahita sih diing; huchilou inchu natoh zong natoh ahita sih diing hi. 7 Ahihleh bang ahita diai? Israelte'n ahawl uh amu sih va; hizongleh teelte'n chu amu uh, adang zousiah chu suhtawtin aumta uhi. 8 "Pathian in tuni dongin a kawmvah motna hagau apia hi, amuh theihlouhna diing uh mitte leh ajaah theihlouhna diing uh bilte toh," chih gelh bangin. 9 Huleh David in, "A dohkaan uh chu amahuh diingin thaang leh pial hung suaah henla, puuhna leh phubalaahna hung suaah heh. 10 Khua amuh louhna diingun a mitte uh hung mial henla, huleh a kawng uh kuunsah zing in, achi hi.
Jentelte Hutdamna
11 Ahihleh ka chi ahi, a puuhna diingun akisui viai? Kisui lou hiai! Hizongleh a giitlouhna jiahva Jentelte athangsiat theihna diingun Jentelte kawmah hutdamna ahung tung jawta hi. 12 Huleh a giitlouhna uh bawn khovel suhhauhsatna ahih a, huleh a lohsapna uh zong Jentelte hauhsatna ahih inchu, a buchinna uh bangchipheta hauhsatna ahita diai mah! 13 Ajiahchu nanguh Jentelte kawmah ka soi ahi, kei Jentelte apostol ka hih jiahin ka natohna ka paahtawi hi, 14 bangchijawng ahakhat-a ka chipihte ka thangsiatsah a, a lahva khenkhatte beeh ka hutdam theih khaah leh chiin. 15 Ajiahchu amahuh paihkhiahna bawn khovel toh Pathian kilepna ahihleh, amahuh pomkiitna chu sihna apat hinna loungaal bang ahi diai? 16 Ajiahchu a gahmasa asianthouin chu, a lom pumpi zong huchibangmahin asiangthou hi; huleh a zung asianthouin chu, a baate zong huchibangmahin asiangthou hi. 17 Olive sing tah baa khenkhatte saattanin um henla, huleh nang olive tahlou a lahvah phuhluutin um lehchin, olive zung hauhsatna kikoppihtu na hung hita diing a, 18 baate tungah kiuangsah sin. Hizongleh kiuangsah zongleh chin a zung chawmtu nangmah na hi sih a, a zung chu nang hung chawmtu ahijaw hi, chih he in. 19 Ahihleh nang in, "Phuhluut-aka um theihna diingin baate suhtana um ahi," na chi ahi diing. 20 Ahi, agintaatlouh jiahun ahi suhtana aum uh, huleh nang na ginna jiahin na ding ahi. Kiuangsah sinla, hizongleh lau jaw in. 21 Ajiahchu Pathian in pianpih baa tahte bawn ahawi louh inchu, nang zong ahung hawi tuam sih diing hi. 22 Hujiahin Pathian hoihdaan leh thukhauhdaan en in: apuuhte tungah chu akhauh a; hizongleh a hoihna a na umzing leh, nang tungah chu ahoih diing hi. Huchi ahihlouh inchu, nang zong saatkhiahin na um ve diing hi. 23 Huleh amahuh zong gingtaloua aum zing louh un chu, phuhluutin aum diing uhi, ajiahchu Pathian in amahuh aphutluut thei hi. 24 Ajiahchu nang, pianken a olive tahlou apat saatkhiah bawn pianken loutaha olive sing hoih a phuhluut-a na um leh, hi pianken mawnga baa tahte chu amahuh olive sing ngeei ah bangchituha phuhluut seemin aumta diviai?
Israelmi Zousiah Hutdamin Aum diing uh
25 Ajiahchu unaute, na kipilsah louhna diingun hi thukiphual, Jentelte bukimna ahung tun tokaalin Israelte tungah lungngonna hunkhop chiang ahung tung tadih ahi, chih na heetlouh uh ka deih sih hi. 26 Huchiin Israel zousiah hutdamin aum diing uhi, "Zion apatin Hundampa ahung diing a, Jakob apatin Pathian ngaihsahlouhna asumang diing hi. 27 Ajiahchu a sualnate uh ka laahmang tahchianga a kawmva ka thuhun diing chu hikhu ahi," chih gelh bangin. 28 Tanchinpha lam ngaihtuahin chu nanguh jiahin meelma ahi uhi, hizongleh teel thu lam ngaihtuahin chu pulepate jiahin deihtahte ahi uhi. 29 Ajiahchu Pathian silthawnpiaahte leh a kouhna chu henlamdang theihlouh ahi. 30 Ajiahchu nang un nidanglaia Pathian thu na manlouh bang va, hizongleh tua amahuh thumanlouhna jiaha khotuahna na muh bangun, 31 hutobangmahin tuin amah un agingta sih uh, huchia nang un khotuahna na muhta jiahva amah un zong khotuahna amuh theihna diingun. 32 Ajiahchu Pathian in akhotuah veh theihna diingin, amahuh zousiah chu thumanlouhna nuaiah akhum vehta hi. 33 Aw, Pathian pilna leh heetna thuuh hina lawmlawm e! A lemguatnate hawl guallouh leh a lampite muh guallouh hina meijeen e! 34 "Ajiahchu LALPA lungsim koi in ahiai he? Ahihlouhleh kua ahiai Amah lemguatpihtu a pang ngei?" 35 "Ahihlouhleh aditkiit diinga zong koi in ahiai Amah kawma sil pe masa phot?" 36 Ajiahchu Amah akipan leh Amah jaalin leh Amah diinga sil zousiah um ahi. Amah kawmah kumtuangin loupina um hen. Amen.
Kithoihna Hing
1 Hujiahin unaute, na sapum uh kithoihna hing leh siangthou leh pomtaah hi diinga Pathian kawma kilaan diingin Pathian khotuahna jiahin ka hung ngeen hi, huchu na natoh diingva kilawm him ahi. 2 Huleh hi khovel daan bangin um sih unla, himahleh Pathian deihjawng hoih leh pomtaah leh hoihbukim bang ahiai chih na heetchian theihna diingun na lungsim uh a thaha umin hung limdang jawta un.
Hagau Silpiaahte Zatdaan Dih
3 Ajiahchu ka kawma hung kipia hehpihna jaalin ka soi ahi, na lahva mi koimah in akingaihsang diing huntawh vaalin kingaisang sih hen, hizongleh Pathian in mi chin kawma ginna apiaah hun bang jeela dihtaha ngaihtuah jaw diingin ka chi ahi. 4 Ajiahchu sapum khat ah hiang tampi i nei va, hizongleh hiang zousiah natoh akibang veh sih hi. 5 Huchiin eihaw tampi hizonglehhang, Khrist ah sapum khat i hi va, khat leh khat i kihiangtuah chiat uhi. 6 I kawma Pathian hehpihna hung kipia dungjuiin silpiaah tuamtuam i nei chiat va, hute i zang diing uhi: thusoilawhna ahihleh, i ginna uh toh kihunin i soi diing uhi; 7 natohsahna ahihleh, i tong diing uh; thuhilhtu in zong hilh jeel heh. 8 Hasot theihna tangtu in zong hasot jeel henla, silpetu in zong iit het louin pia heh. Makaitu in taimatahin ma kai henla, mi khotuahtu in kipaahtahin khotuah heh.
Khristian Hinkhua Zatdaan Dih
9 Lungsiatna chu heem bawlna tellouin hi heh. Gilou photmah hua unla, ahoih lam photmah tu tinten un. 10 Unau kilungsiatna in khat leh khat kilainat tuah chiat un. Kizahbawlna lamah khat leh khat kideihsah tuah chiat un. 11 Taimaatna lamah thase sih unla, hagau lamah chihtahtah suahin Lalpa nna tong un; 12 kinepna a kipaah zingin, gimthuaahna a hahkatin, haamteina a kuhkal zingin; 13 misiangthoute taahsapna panpih unla, mikhualte kipaahpih zing un. 14 Ahung suduhdahte vangpiaah un; vangpiaah unla huleh haamsiat sih un. 15 Kipaahte kipaahpih unla, huleh kapte kahpih un. 16 Khat leh khat ngaihtuah kibangin um un. Kiliansah sih unla, hu saangin mikingaingiamte toh kilawi jaw un. Nangmah ngaih in kipilsah sin. 17 Koimah giitlouhna giitlouh in thuh sih un. Mi zousiah mitmuh ah sil kilawm bawl diing tum un. 18 Ahihtheih inchu, na hihtheih laisiah uh mi zousiah toh kituaahin um un. 19 Unau deihtahte, phuba kila sih un, hizongleh lungthahna chu Pathian ot jaw un; ajiahchu hichibanga gelh ahi, "Phubalaah chu kei a ahi, keima'n ka thuh diing hi," Lalpa'n achi hi chih gelh ahi. 20 Hujiahin, "Na meelma agilkial leh, neeh diing pia in; adangtaah leh, dawn diing pia in. Ajiahchu huchibanga na bawl leh, a lutung ah meiaam na sekhawm ahi diing hi." 21 Giitlouhna kizousah sih unla, hoihna in gilou zou jaw un.
Khovel Vaihawmtute Thu Mang Diing Ahihdaan
1 Mi chin a tunga vaihawmtute nuaiah kituluut heh. Ajiahchu Pathian thu louin koimah vaihawm aum sih hi. Vaihawmtu a umte chu Pathian guat ahi uhi. 2 Hujiahin koipouh vaihawmtu nial chu Pathian silguat doudaal ahi a, huleh adoudaaltute'n amahuh tung mah ah siamlouhtansahna amu diing uhi. 3 Vaihawmtute chu sil hoih bawlte diingin lauhuai ahi sih va, hizongleh mi giloute diingin lauhuai ahi uhi. Vaihawmtu lau loua umna uut ei? Sil hoih bawl in, huchiin vaihawmtu paahtaat na loh diing hi. 4 Ajiahchu vaihawmtu chu na hoihna diinga Pathian natongtu ahi. Hizongleh silgilou na bawl inchu, lau in; ajiahchu ama'n naamsau ajiah beiin atawi sih hi; ajiahchu amah Pathian natongtu ahi a, silgilou bawlte tunga lungthahna phubalatu ahi. 5 Hujiahin lungthahna lau jiah chauh hilouin, na sialepha heetna jiahin zong vaihawmtu nuaia na kituhluut diing mawng ahi. 6 Ajiahchu hikhu jiahin siah zong na pia uh ahi, ajiahchu amahuh chu hi sil ngeei bawl diinga Pathian natongtu mah ahi uhi. 7 Hujiahin a kawmvah atan diing lawm zousiah uh pia un: siah piaahna diingpa kawmah siah pia un; leiman tawina diingpa kawmah leiman tawi un; lau diingpa chu lau unla; zahbawl diinga umpa chu zahbawl un.
Unau Kilungsiatna
8 Kilungsiat tuahna loungaal chu koimah bangmah ba sih un, ajiahchu amah midang lungsiatpa in daan ajuikim veh ahi. 9 Bangjiahin ahiai i chih leh hi thupiaahte, "Aang na kawm louh diing ahi, Tual na thah louh diing ahi, Na guuh louh diing ahi, Heetpihtu dihloua na pan louh diing ahi, Na een louh diing ahi," chih haw leh hulou thupiaah dang mawngmawng aum leh, hute chu, "Nangmah na kilungsiat banga na innveengte na lungsiat diing ahi," chih in akhaikhawm veh hi. 10 Lungsiatna in a innveengte abawlse sih hi; hujiahin lungsiatna chu daan zuihkimna ahi. 11 Hun umdaan hein hite bawl un, ihmu khanloh ahun mahmahta hi; ajiahchu i gintaat chiillai saangin i hutdamna uh anai jawta hi. 12 Jaan abei dehdehta a, khua vaah diing ahita hi. Hujiahin mial a silbawlte paaiin vaah gaalthuam in i kithuam diing uhi. 13 Suun a um bangin dihtahin i um diing uh, thaangtatin leh zukham buaia umlouin, huuh leh kingaihna thaanghuai a umlouin, kihaau leh kithangsiat-a um louin. 14 Hizongleh Lalpa Jesu Khrist in kithuam unla, huleh tahsa uutna supiching diingin bangmah kibawl sih un.
Ginna a Ahaat leh Achaute Kiheetsiam Diing Daan
1 Ginna a haatlou mi chu, a ginlahnate soiseel louin pomdaan siam un. 2 Mi khat in bangkim ne theiin akigingta a, hizongleh mi haatlou in chu anteh louhing chauh ane hi. 3 Anete'n aneloute simmoh sih henla, aneloute'n zong anete soiseel sih hen; ajiahchu Pathian in amah apomta hi. 4 Midang khat suaah soiseeltu nang koi na hiai? A pu a diingin ading ahihlouhleh apuuh ahi. Ahi, amah chu dinsahin aum diing hi, ajiahchu Pathian in amah adingsah thei hi. 5 Mi khat in ni khat chu ni dang saangin angai poimoh tuam a; midang in ni zousiah kibang chiatin angai hi. Mi chin in amahuh lungsim chiat ah chiangtahin kiheet uh heh. 6 Ni tangtu in Lalpa a diingin atang a, huleh ni tangloutu in Lalpa a diingin atang lou ahi. Anetu in Pathian kawmah kipaahthu soiin Lalpa a diingin ane a, huleh ane loutu in zong Pathian kawmah kipaahthu soiin Lalpa a diinga ne lou ahi. 7 Ajiahchu koimah amah a diinga hing ahi sih a, huleh koimah amah a diinga si zong ahi sih hi. 8 Ajiahchu i hin leh, Lalpa a diingin i hing a; huleh i sih leh, Lalpa a diingin i si uh ahi. Hujiahin i hin in zong, i sih in zong, Lalpa a i hi uhi. 9 Bangjiahin ahiai i chih leh misite leh mihingte Lalpa ahih theihna diingin Khrist chu asi a, athoukiit a huleh suhhingin aum ahi. 10 Hizongleh nang bang diinga na unau soiseel na hiai? Ahihlouhleh nang bang diinga na unau simmoh na hiai? Ajiahchu i bawnva Khrist vaihawmna touphah ma a ding diing i hi uhi. 11 Ajiahchu, "Keimah ka hin jiahin, khuup chinteng ka ma ah akhuupdin diing va, lei chinteng zong Pathian kawmah akiphuang diing uh, LALPA'N achi hi," chih gelh ahi. 12 Huchiin i bawnun Pathian kawmah eimah tanchin chiat i soi diing uhi. 13 Hujiahin khat leh khat i kisoiseel nawn sih diing uh, hizongleh koipouh in a unau kisuihna diing aha, ahihlouhleh kipuuhna diing bangmah abawl louhna diing ngaihtuah tinten jaw hen. 14 Sil amah a sianglou mawngmawng aum sih chih, Lalpa Jesu ah ka hechian a, ka muang mahmah hi; hizongleh sil khat siangloua ngaitu diingin, huchu amah diingin sianglou ahi. 15 Na sil neeh jiaha na unau lungsim anat inchu, lungsiatna daan in na gamtalou ahi. A luanga Khrist si zouta mi khat chu na sil neeh in sumang sin. 16 Hujiahin na hoihna uh mi'n gilou a asoisiat diingin umsah sih un; 17 ajiahchu Pathian lalgam chu neeh leh dawn thu ahi sih a, himahleh dihtatna, hamuanna leh Hagau Siangthou a kipaahna bang ahijaw hi. 18 Ajiahchu koipouh hi silte a Khrist natong chu Pathian pomtaah leh mihing pomin aum veu uhi. 19 Hujiahin kilepna diing leh khat leh khat khantouhna diing silte i deih diing uhi. 20 An jiahin Pathian natohna suse sin. Sil zousiah chu asiangthou ngeei a, hizongleh a sil neeh a mi khat puuhna bawl chu amah diingin sual ahi. 21 Na unau puuhna diing aha ahihlouhleh lunghihmohna diing aha ahihlouhleh suhjawngkhaalna diing aha ahih inchu, sa neehlouh leh uain dawn louh leh sil bangmah bawllouh ahoih hi. 22 Ginna na nei ei? Pathian ma ah nangmah chauhin kineih in. Amah hoihsah lama amah leh amah siamlouh kitangsahlou mi chu ahampha hi. 23 Hizongleh gingleltu in aneeh inchu, ginna a aneeh louh jiahin siamlouhtangin aum hi; ajiahchu ginna loua bawl photmah chu sual ahi.
1 Huchiin ei a haatte'n eimah chauh nopsahna diing hawllouin, a haatloute haatlouhna i thuaahpih diing uh ahi. 2 Ajiahchu mi chin in i innveengte a khantouhna diingun, a hoihna diingun i sulungkim diing uhi. 3 Ajiahchu, "Nang hung housete housiatna chu ka tungah atuta hi," chia gelh bangin Khrist in zong Amah nopsahna diing angaihtuah sih hi. 4 Ajiahchu malai a anakigial photmah chu Pathian Lehkhathu a kuhkalna leh hamuanna tungtawna eite'n kinepna i neih theihna diinga eiuh kihilhna diinga gelh ahi. 5 Huchiin thuaahtheihna leh hamuanna Pathian in Khrist Jesu mahbangin khat leh khat lungsim kibang neiin hung umsah hen, 6 huchia Pathian, i Lalpa uh Jesu Khrist Pa ngeei chu lungsim munkhat pua leh aw khat suaha na paahtawi theihna diingun.
Judate leh Jentelte Diingin Tanchinpha Kibang
7 Hujiahin Khrist in zong Pathian loupina diinga ahung kipaahpihmahbanginkhatlehkhat kipaahta chiat un. 8 Tuin huchu na kawmvah ka soi ahi, pulepate kawma thuchiamte sukip diingin Khrist Jesu chu Pathian thudih heetsahna diingin zehtante suaah ahung hita hi, 9 huchia khotuahna jiaha Jentelte'n Pathian apaahtawi theihna diingun, "Hikhu jiahin Jentelte lahah na min ka hung paahtawi diing a, na min phatin la ka sa diing hi," chih gelh bangin. 10 Huleh ama'n, "Nanguh Jentelte, a mite toh kipaah un," achi kiit hi. 11 Huleh, "Nanguh Jentelte zousiah, LALPA chu phat un, huleh mi zousiah in zong Amah phat un," achi kiit hi 12 Huleh Isai in, "Jesse Zungpi aum diing a, huleh Amah chu Jentelte tunga vaihawm diingpa ahi a, Jentelte'n Amah ah kinepna anei diing uhi" chiin asoi kiit hi. 13 Hagau Siangthou silbawltheihna jiaha kinepna na hauh theihna diingun kinepna Pathian in ginna a kipaahna leh hamuanna chinteng in hung sudim hen.
Paul in Haangsantaha Agelhna Jiah
14 Ka unaute, nanguh chu hoihna in na dim va, heetna in na dim va, khat leh khat na kihasuantuah thei uh chih keimah mah in zong ka muang hi. 15 Ahihvaangin, unaute, Pathian in ahung piaah hehpihna jiahin nanguh hung heetdohsahna diingin hangsantahin sil khenkhat tungtaang ka gial ahi, 16 Jentelte kawma Jesu Khrist thunatongtu ka hihtheihna diingin Pathian tanchinpha nna ka tong hi, huchia Hagau Siangthou a suhsiangthou Jentelte sillatte chu pomtaah ahih theihna diingin. 17 Hujiahin Pathian lam silte ah Jesu Khrist ah kiletsahna diing ka nei ahi. 18 Khrist in Jentelte thuawisahna diinga thusoi leh natoh a keimah tungtawna abawlte loungaal bangmah ka soi ngam sih hi, 19 chiamchihna leh sil loupite in, Pathian Hagau silbawltheihna in, huchiin Jerusalem khua leh a kiimveel gam apat Illyrikum gam tanpha in Khrist tanchinpha kimtahin ka soi zouta hi. 20 Huchiin midang innbul phuhsa tunga inn bawl ka hihlouhna diingin, Khrist min kiloh nailouhna mun a tanchinpha soi chu ka siltup ahi, 21 hizongleh, "A tanchin kisoi ngei louhnate'n amu diing va, huleh aja ngei nailoute'n ahung hesiam diing uh," chia gelh bangin,
Paul in Rom Veh Atupna
22 Hikhu jiahin na kawmva hung diing tampivei daalin ka umta hi. 23 Hizongleh tuin chu hi gam kiimveel ah mun ka neita sih a, huleh kum tampi na kawmva hung nuamin zong ka umta a, 24 Spain gam a ka chiah hunhun chiangin, na kawmvah ka hung diing hi. Ajiahchu ka hung zin chiangin nanguh toh kithuahkhawm theihna hun tomkhat ka neihtheih masat leh, nanguh hung muh ka kineem a, huleh ka zinna lampi ah na hung panpih uh ka kineem hi. 25 Hizongleh tuin chu misiangthoute natohsah diingin Jerusalem a chiah phot diing ka hi. 26 Ajiahchu Makedonia leh Akaia gam a mite'n Jerusalem a misiangthoute laha migentheite diingin kipaahtahin thohlawm athohkhawm uhi. 27 Ahi, lungkimtahin ahih uhi, huleh a leiba uh zong ahi mawng uhi. Ajiahchu Jentelte'n a hagaulam silte uh akikoppih ngaal un chu, tahsa lam silte a amahuh apanpihve uh chu ahih diing mawng uh ahi. 28 Hujiahin, hi ka bawl zoh a, hi gah zong chiantaha ka muhsah zoh chiangin nanguh hung tawnin Spain gam ah ka chiah diing hi. 29 Huleh na kawmva ka hung chiangin Khrist tanchinpha vangpiaahna kim toh ka hung diing chih ka he hi. 30 Unaute, i Lalpa Jesu Khrist min leh Hagau lungsiatna jaala Pathian kawma na hung haamteisahna vah chihtahzet hung suahpih diingin ka hung ngeen hi, 31 huchia Judia gam a gingloute laha ka suaahtaat theihna diing leh Jerusalem khua a diinga ka natohna hi misiangthoute diinga pomtaah ahih theihna diingin, 32 huchia Pathian deihjawng banga, kipaahtaha na kawmva ka hung a, i kisuhhalh khawm chiat theihna diingun. 33 luin hamuanna Pathian na bawnva kawmah um hen. Amen.
Paul Chibaibuuhna
1 Kenkria a kouhtuam natongtu i sanggamnu uh Phibi na kawmvah meellaahna ka hung bawl hi, 2 Lalpa min a misiangthoute banga nana pom va, na panpih uh angaihna photmah a na panpih diingun; ajiahchu ama'n zong mi tampi anapanpihta a, keimah ngeei zong ahung panpihta hi. 3 Khrist Jesu a ka natoh khawmpih Prisilla leh Akuila chibai hung buuhsah un. 4 Amah un ka hinna a diingin a ngawng uh adohta uhi, amahuh kawma kei chauh in kipaah thu ka soi hilouin, Jentel kouhtuam zousiah zong a tungvah akipaah uhi. 5 Huchibangmahin a inn va kouhtuam kikhawmte zong chibai hung buuhsah un. Akaia gam a Khrist a gah masapeen ka deihtah Epaineta chibai hung buuhsah un. 6 Eiuh diinga tonggim Mari chibai hung buuhsah un. 7 Ka chipihte leh ka koltaanpih, apostol laha minthang tah, Khrist a zong kei saanga um masajaw Andronika leh Junia chibai hung buuhsah un. 8 Lalpa a ka deihtah Amplia chibai hung buuhsah un. 9 Khrist a i natohpih Urbana leh ka deihtah Staki chibai hung buuhsah un. 10 Khrist a pom Apelle chibai hung buuhsah un. Aristobulu innkuan a mite chibai hung buuhsah un. 11 Ka chipih Herodion chibai hung buuhsah un. Lalpa a um Narkissa innkuan a mite chibai hung buuhsah un. 12 Lalpa a natong, Triphaina leh Triphosa chibai hung buuhsah un. Lalpa a nna hahtoh mahmah, deihtah Persi chibai hung buuhsah un. 13 Lalpa a teel Rufa, leh a nu huleh kei nu zong hive, chibai hung buuhsah un. 14 Asunkrita, Phlegon, Herma, Patroba, Hermi leh a kawmva um unaute chibai hung buuhsah un. 15 Philologa leh Julia, Neria leh a sanggamnu, huleh Olimpa leh a kawmva misiangthou umte zousiah chibai hung buuhsah un. l6 Tawp siangthou in chibai kibuuh tuah un. Khrist kouhtuam zousiahte'n chibai ahung buuh uhi. 17 Tuin ka unaute, kihilhna daan nanguh hung kihilh louh jawnga kikhenna leh puuhna siamdohtute chiamchih diing leh kiheisan diingin ka hung ngeen hi. 18 Ajiahchu hutobang mite'n i Lalpa uh Jesu Khrist nna atong sih uh, hizongleh amahuh gilpi nna atong jaw uhi, huleh dangnaal jiah leh maaitangphat kamsiamna in heetna tawmte lungsim aheem uhi. 19 Na thuman daan uh mi zousiah lahah akithangta hi. Hujiahin na tungvah ka kipaah hi; hizongleh sil hoih lama na pil va, huleh silgilou lama na mawl uh ka deih hi. 20 Huleh hamuanna Pathian in Setan chu tomkaallouin na keeng nuaivah ahung tuandeensah diing hi. I Lalpa uh Jesu Khrist hehpihna na tungvah um hen. Amen. 21 Ka natohpih Timothi leh ka chipihte Lukia, Jason leh Sosipater in chibai ahung buuh uhi. 22 Keimah Tartia, hi lehkhathot gialpa'n Lalpa min in chibai ka hung buuh hi. 23 Gaia, kei leh kouhtuam zousiah zintunnapa in chibai ahung buuh hi. Khopi sung sumkoltu Erasta leh unaupa Kuarta in chibai ahung buuh uhi. 24 i Lalpa uh Jesu Khrist hehpihna na bawnva tungah um hen. Amen.
Thutawpna
25 Tuin, ka tanchinpha leh Jesu Khrist thu taangkoupihna dungjuia, khovel siam chiil apat phuala um, 26 hizongleh tua suhlat hita, ginna lama thumanna diinga zawlneite Pathian Lehkhathu jaala nam zousiah kawma heetsaha um, hu thukiphual kiphuandohna dungjuia, huleh kumtuang Pathian thupiaah dungjuia nang hung tungding thei, 27 Amah chauh apil Pathian kawmah Jesu Khrist jaalin kumtuangin loupina um hen. Amen.
Chibaibuuhna
1 Paul, Pathian deihdaan a Jesu Khrist apostol diinga kouh leh i unaupa uh Sosthene in, 2 Korinth khua a Pathian kouhtuam umte, Khrist Jesu a suhsiangthou diinga kouhte kawm leh mun china i Lalpa Jesu Khrist min lou amahuh leh eite zousiah kawmah: 3 I Pa uh Pathian leh Lalpa Jesu Khrist kawm apat hehpihna leh hamuanna na kawmvah um hen. 4 Na tungva Jesu Khrist a Pathian hehpihna hung kipia jiahin ka Pathian tungah ka kipaah zingzing hi; 5 huchiin silbangkim ah, thusoina chinteng leh heetna chinteng ah Amah ah suhhauhsatin na umta uhi, 6 huchia Khrist thu heetpihna nanguh a suhkipa aumtaah bangin, 7 huchiin silpiaah ah tasam louin, i Lalpa uh Jesu Khrist hung kilaahna diing ngaahlahtahin nana ngaah uhi, 8 Ama'n i Lalpa Jesu Khrist ni chianga soiseelbeia na um theihna diingun a tawp dongin zong ahung sukip diing hi. 9 Pathian chu a ginum hi, Ama'n a Tapa i Lalpa uh Jesu Khrist toh kipawlkhawmna ah nanguh ahung kou luutta hi.
Kouhtuam Sunga Kikhenna
10 Tuin unaute, na bawnva thukhat a na um va huleh na lahvah kikhenna aum louh a, hizongleh lungsim kibang leh ngaihdaan kibanga soiseelbeia na kizop jawhna diingun i Lalpa uh Jesu Khrist min in ka hung ngeen hi. 11 Ajiahchu ka unaute, na lahvah kihauna aum chih na tungtaang thu uh Kleo innkuanpihte'n ahung hilh uhi. 12 Tuin hikhu ka soi hi, nanguh mi chin in, "Kei Paul lawi ka hi," huleh "Kei Apollo lawi ka hi," "Kei Kepha lawi ka hi," "Kei Khrist lawi ka hi," na chi uhi. 13 Khrist hawmkhenin aum eimah? Paul nanguh diingin kilhbehin aum eimah? Ahihlouhleh Paul min in baptisma na tang viaimah? 14 Krispa leh Gaia chihlouh na lahva khat beeh ka hung baptis louh jiahin Pathian kawmah kipaahthu ka soi hi. 15 Huchilou inchu khenkhat in keimah min a baptisma tang na kichi kha diing uhi. 16 Huleh Stephana innkuante zong ka baptis a, hute chihlouh midang ka baptis lamka he sih hi. 17 Ajiahchu Khrist in baptis diingin ahung sawl sih a, hizongleh tanchinpha soi diingin ahung sawl jaw hi; pilna thu a soi louin, huchilou inchu Khrist kros bangmalou asuaah kha diing hi.
Khrist chu Pathian Pilna leh Silbawltheihna ahi
18 Ajiahchu kros thu chu mangthaaite diingin ngolhuai ahi a, hizongleh eiuh hutdama umte diingin chu Pathian silbawltheihna ahi. 19 Ajiahchu, "Mipil pilna ka suse diing a, huleh lemhetu lemheetna ka koihmang diing hi," chih gelh ahi. 20 Mipil khoiah aum ei? Daanjilsahtu khoiah aum ei? Hi khang anialhaatmi khoiah aum ei? Pathian in hi khovel pilna ngolhuai asuaahsah sih eimah? 21 Ajiahchu Pathian pilna ah, khovel in pilna tungtawna Pathian aheet louh nungun, thu kisoi ngolhuai tungtawna agingtate hutdam diing chu Pathian kipaahpih ahita hi. 22 Ajiahchu Judate'n chiamchihna angeen va, Grikte'n pilna ahawl uh; 23 hizongleh kei un chu Khrist kilhbeha um thu ka soi uhi, huchu Judate diingin puuhna, huleh Grikte diingin ngolna ahi; 24 hizongleh Judate hiin Grikte hitazongleh, kouhte diingin Khrist chu Pathian silbawltheihna leh Pathian pilna ahi. 25 Ajiahchu Pathian ngolna mihing saangin apiljaw a, huleh Pathian haatlouhna zong mihing saangin ahaatjaw hi. 26 Ajiahchu unaute, kouh na hihna uh ngaihtuah dihvua. Tahsa lama mipil tampite, mihaat tampite, milian tampite kouh ahihlouh daan uh. 27 Hizongleh Pathian in mipilte azahtaatsahna diingin khovel sil ngolhuaite ateel jawta a, huleh sil haatte azahtaatsahna diingin khovel sil haatloute ateel jawta hi; 28 huleh khovel sil ngiamte leh sil muhsithuaite Pathian in ateel a, huleh sil umlou tanin ateel hi, sil umte bangmalou asuaahsah theihna diingin, 29 huchia Pathian ma a koimah akiuahsah theihlouhna diingin. 30 Hizongleh nanguh chu Amah vaangin Khrist Jesu ah na um uhi, Jesu chu Pathian apat eiuh diingin pilna, dihtatna, suhsiangthouna leh tatdohna ahung hita hi. 31 Huchia, "Akisuang phot chu LALPA ah kisuang heh" chia kigial bangin.
Khrist Kilhbeha Aum Thu Phuanna
1 Huleh unaute, kei chu na kawmva Pathian thu heetpihna phuanga ka hung laiin, thusoi siamna sangtah leh pilna toh hung ka hi sih hi. 2 Ajiahchu ke'n Jesu Khrist leh Amah kilhbeha um thu chauh lou chu na lahvah bangma dang heet ka tum sih hi. 3 Huleh kei chu haatlou leh lauin, nasataha kithing kawmin na lahvah ka um hi. 4 Ka kamsuahte leh ka thusoite chu mihing pilna a jawlsiamna thu ahi sih a, hizongleh Hagau leh silbawltheihna suhlatna in ahijaw, 5 huchia na ginna uh mihing pilna a kinga lou a, Pathian silbawltheihna a akingah jawhna diingin.
Pathian Apat Pilna Dih
6 Ahiinlah pichingte lahah chu pilna thu zong ka soi jeel uhi, ahihvaangin hi khang pilna thu ahi sih a, hi khang vaihawmtu hung mangthaai diingte pilna thu zong ahi sih hi. 7 Hizongleh kei un chu Pathian pilna thukiphual, Pathian in khovel um ma a i loupina diingva anaguatlawhsa pilna kiphualgu thu ka soi jaw uhi. 8 Huchu hi khang vaihawmtute khatbeeh in ahe sih uhi; ajiahchu anahe hita uh leh, loupina Lalpa chu anakilhbeh sih diing uhi. 9 Hizongleh, "Mit a muh ngeilouh, bil ajaah ngeilouh, huleh mihing lungtang a zong luut ngeilou, Pathian in Amah lungsiatte diinga abawlsah silte chu," chia gelh bangin. 10 Hizongleh Pathian in hute chu a Hagau in i kawmah ahung hesahta hi. Ajiahchu Hagau in sil bangkim ahawldoh a, ahi, Pathian sil thuuhtahte zong. 11 Ajiahchu mihing silte chu mihing a um hagau loungaal koi ahiai he diing? Huchibangmahin Pathian silte zong Pathian Hagau loungaal koimah in ahe sih hi. 12 Huchiin Pathian in athawna ahung piaah silte i heettheihna diingun ei un chu khovel hagau hilouin, hizongleh Pathian a kuan Hagau chu i tang uh ahi. 13 Hi silte chu mihing pilna a soi louin, hizongleh Hagau Siangthou thuhilhna in hagaulam silte chu hagaulam thute a hilhchian in ka soi jaw uhi. 14 Hizongleh tahsa mi in chu Pathian Hagau silte apom thei sih hi, ajiahchu amah ngaihin hute chu ngolhuai ahi; hite chu hagau a heet ahih jiahin he zong ahe thei sih hi. 15 Hizongleh hagau mi in chu sil zousiah ahechian veu a, amah ahihleh koima'n ahechian sih hi. 16 Ajiahchu "Amah thuhilh thei diinga LALPA lungsim koi in ahiai he?" Hizongleh ei un chu Khrist lungsim i pua uhi.
Kipawlkhenna Thu a Dotna
1 Huleh unaute, hagau mite kawma soi bangin na kawmvah thu ka soi thei sih a, hizongleh tahsa mite kawma soi bangin, Khrist a naungeehte kawma soi bangin ka soi ahi. 2 An gum hilouin nawitui in ka hung vaah hi; ajiahchu na ne thei nai sih va, huleh tutanin zong na ne thei nai sih uhi; 3 ajiahchu nanguh na tahsami nalai uhi. Na lahva kithangsiatna, kinialna leh kipawlkhenna aum jiahin, tahsami hi nalai leh mihing meimei banga khosa nalai hilou na hi uh maw? 4 Ajiahchu khat in, "Kei Paul lawi ka hi," huleh adang in, "Kei Apollo lawi ka hi," na chih laisiah uh tahsami hilou na hi viaimah? 5 Ahihleh Paul koi ahiai, huleh Apollo koi ahiai? Hizongleh Lalpa'n apiaah bangjeela amahuh tungtawna na gintaat uh thunatongtute hilou ahi viaimah? 6 Keima'n ka suan a, Apollo in tui abuaah a, hizongleh Pathian in akhangsah hi. 7 Huchiin asuantu zong bangmah ahi sih a, tui buaahtu zong bangmah ahi sih, akhangsahtu Pathian chauh loungaal chu. 8 Huleh asuantu leh tui buaahtu chu akibang ahi va, mi chin in atohgim bang jeelun kipaahman akimuh chiat diing uhi. 9 Ajiahchu keiuh chu Pathian natohkhawmpihte ka hi uh; nanguh chu Pathian louma na hi va, Pathian inn na hi uhi. 10 Pathian hehpihna kei hung kipia dungjuiin, innlamtu siamtah bangin ke'n innbulphuh chu ka lemta a, midang in a tungah inn alam uhi. Hizongleh mi chin hu a tunga a innlam daan vah pilvaang chiat uh heh. 11 Ajiahchu innbulphuh lepsa loungaal innbulphuh dang kuama'n alem thei nawn sih hi, hu innbulphuh chu Jesu Khrist ahi. 12 Tuin hi innbulphuh tungah mi koipouh in sana in, dangka in, suangmantam in, sing in, hampa in, buhpawl in lamta leh, 13 mi chin natoh chu ahung kisulang diing hi; ajiahchu mei a suhlat hi diing ahih jiahin a Ni in aphuangdoh diing hi; huleh mei in mi chin natoh chu bangchi bang ahiai chih asuchian diing hi. 14 Innbulphuh tunga koi natoh zong aum zing leh, amah in kipaahman amu diing hi. 15 Koi natoh zong akaah inchu, manna athuaah diing hi; hizongleh amah tah chu hutdamin aum diing a, ahihvaangin mei a paisuaah bang ahi diing hi. 16 Pathian inn na hi va, huleh na sungvah Pathian Hagau ateeng chih helou na hi viaimah? 17 Mi koipouhin Pathian inn asuhbolhhoh inchu, Pathian in amah asuse diing hi. Ajiahchu Pathian inn chu asiangthou a, hu inn chu nanguh na hi uhi. 18 Mi koimah amah leh amah kiheem sih heh. Na lahva mi koiaha hi khang a pil akisah leh, ahung pil theihna diingin mingol hung suaah heh. 19 Ajiahchu hi khovel pilna chu Pathian ngaihin ngolna ahi. Ajiahchu, "Amah in mipilte a pil lepchiahna vah aman hi," chih gelh ahi. 20 Huleh hubaan ah, "LALPA'N mipil ngaihtuahnate ahe a, hute chu bangmalou ahi," chia gelh bangin. 21 Hujiahin mi koimah mihing ah kisuang sih heh. Ajiahchu sil zousiah nanguh a ahi: 22 paul hiin Apollo hiin Kepha hizongleh, ahihlouhleh khovel hiin hinna hiin sihna hizongleh, sil um nalaite hiin sil hung um diingte leh sil zousiah chu nanguh a ahi. 23 Huleh nanguh chu Khrist a na hi va, huleh Khrist chu Pathian a ahi.
Apostolte Mohpuaahna
1 Huchiin mi'n keiuh chu Khrist suaahte leh Pathian thukiphual enkoltute bangin hung he uh heh. 2 Hubaan ah, hitah a enkoltute chu mi ginum ahih uh apoimoh hi. 3 Hizongleh nang un na hung etkhiah uh aha ahihlouhleh mihing thukhenna a na hung etkhiah uh chu kei diingin sil neutakhat ahi. Adihtahin kei leh kei zong ka kienkhe sih hi. 4 Ajiahchu keimah ah ahung awimohtu bangmah umin ka he sih hi, ahiinlah huin siam ahung tangsah ahi tuan sih; hizongleh ahung enkhetu chu Lalpa ahi hi. 5 Hujiahin a hun main Lalpa hung masiahin bangmah enkhe sih un. Ama'n chu mial a sil kiphualte vaah ah ahung podoh diing a, huleh lungtang a ngaihtuahte zong ahung sulang diing hi. Hu hun chiangin mi chin in paahtawina chu Pathian apat atang chiat diing uhi. 6 Unaute, tuin hi silte chu nang un akigialta khu kheellam bangma na ngaihtuah louh diing uh chih keiuh apat na jil theihna diing uh leh huchia nanguh koimah in khat na kiuahsahpih va, khat na kalh louhna diingun, na phattuamna diingun keimah leh Apollo tungah etsahna thu in ka kizang ahi. 7 Ajiahchu kuan ahiai nang midang apat hung tuamsah? Huleh na muh louh bang ahiai na neih? Tuin amuta ngeei na hih leh, bang diinga mulou banga kisathei na hiai? 8 Tuin na kichingta uh! Na hung hausata uhi! Keiuh louin kumpipate na hung hita uh, huleh huchia keiuh zong nanguh toh ka lai theihna diingun, adihtahin kumpipate na hih uh ka deih hi! 9 Ajiahchu Pathian in keiuh apostolte chu si diinga guatsa bangin anunungpeen a hung koih hiin ka ngaihtuah hi. Ajiahchu khovel mitmuhin, angelte leh mihingte mitmuhin etnop a et ka hung hita uhi. 10 Keiuh chu Khrist a diinga mingol ka hi va, hizongleh nanguh chu Khrist ah mipil na hi uhi! Keiuh chu ka haat sih va, hizongleh nanguh chu na haat uhi! Nanguh chu na zahum va, hizongleh keiuh chu simmohin ka um uhi! 11 Tu daahkaal dongin ka gilkialun ka dangtaah va, silhleteen tasamin ka um va, mite vuaahthop leh teenna mumal beiin ka um uhi. 12 Huleh ka khut un nna ka tong uhi. Housiata ka um un ka vangpiaah va, suhduhdaha ka um un ka thuaah teeiteei uhi. 13 Soisiat-a ka um un neemtahin ka dawng uhi. Tutanin khovel niinnoh, sil zousiah bolhhoh bang ka hung hita uhi.
Pa Banga Thuhilhna
14 Na zahtaatna diingun hi thute ka gial ahi sih a, hizongleh ka ta deihtahte bangin ka hung taaihilh ahijaw hi. 15 Ajiahchu nang un Khrist ah hilhtu saang sawm nei zongleh uh chin, pa chu tampi na nei sih uhi; ajiahchu tanchinpha jaalin Khrist Jesu ah nanguh ka hung hingkhia hi. 16 Huchihjiahin ka umdaan juitute hi diingin ka hung hasot hi. 17 Hikhu diing jiahin Lalpa a ka ta deihtah leh ginum Timothi na kawmvah ka hung sawl hi. Ama'n chu gam chin a kouhtuam zousiah ka thuhilh bangin, Khrist a ka umdaan nanguh ahung hesah kiit diing hi. 18 Na kawmva hung nawnlou diing banga hung na ngaihtuahin na lahvah khenkhat anakiuangsah uhi. 19 Hizongleh Lalpa'n lem achih leh, na kawmvah ka hung baih diing a, huchiin kiuangsahte chu a thusoi uh hilouin a silbawltheihna uh ka heta diing hi. 20 Ajiahchu Pathian lalgam chu thu ah aum sih a, silbawltheihna ah aum jaw hi. 21 Bang ahiai na deih uh? Na kawmvah chiang tawiin ka hung diai, ahihlouhleh lungsiatna leh lungneemna hagau toh ka hung diai?
Aangkawmnu ThuaHilhna
1 Na lahvah kingaihna thaanghuai aum chih athang vengvung a, huchibang kingaihna thaanghuai Jentelte lahah zong aum ngei sih, huchu mi khat in a pa ji akiteenpih hi. 2 Huleh huchibang silbawlpa chu na lah vapat nohdoh diinga lungngaih naahsaangin na kiuahsahpih jaw uhi. 3 Ajiahchu keimah tahsa a ka tel louh vaangin hagau in ka tel a, na lahva tel tobangin hutobanga gamtapa chu atung vai ka hawm zouta hi. 4 I Lalpa uh Jesu Khrist min in, ka hagau toh i Lalpa uh Jesu Khrist silbawltheihna toh na kikhopkhawm chiangun, 5 huchibang mi chu Lalpa Jesu Ni chianga a hagau hutdama aum theihna diingin, a tahsa suhmangna diingin Setan kawmah pedoh un. 6 Na kisahtheihna uh ahoih sih hi. Tol themchakhat in tanghou beu a pumin ajeelsuaah veu hi chih na he sih uh maw? 7 Hujiahin tolsohlouh na hih ngeei bangmah un, tanghou beu thah na hihtheihna diingun, tol lui chu paaimang un. Ajiahchu adihtahin i Chiahkaan uh Khrist chu ei a diingin latin aumta hi. 8 Hujiahin tol lui toh hilouin, giitlouhna leh suhsiat tupna tol toh zong hilouin, hizongleh chihtahna leh thutahna tolsohlouh tanghou toh kuut chu i nei diing uhi. 9 Kingaihna thaanghuai a kibualte kithuahpih lou diingin ka lehkhathon ah ka hung gialta hi. 10 Hi khovel a kingaihna thaanghuai a kibualte toh aha, mihuaihamte toh aha, leepgute toh aha, ahihlouhleh milem bete toh aha kithuah het louh diing ahi chi chu ka hi sih hi, ajiahchu huchi diing hileh khovel apat na chiahdoh uh ngai diing ahi. 11 Hizongleh tuin chu koipouh unau chih hingaala kingaihna thaanghuai aha, huaiham aha, milem bia aha, soisiat haat aha, zukham haat aha, leepguuh haat aha, huchibang mi chu kithuahpih lou diing leh neeh tanpha ne khawm lou diingin na kawmvah tuin ka hung gialta hi. 12 Ajiahchu polam mite keimah in ka vaihawm diing bang aum ei? Nang un a sunga umte vaihawm lou na hi viai mah? 13 Hizongleh polam a mite chu Pathian in avaihawm hi. Hujiahin "na lah vapatin hu migiloupa chu koihdoh un."
Khristiante Dinga Kiheeh Awilouh
1 Na lahva koiaha khat in midang tungah thubuai neita leh uh chin, misiangthoute ma a tut louin, daan a heeh diingin midihtatloute ma ah na tut ngam diviaimah? 2 Misiangthoute' n khovel vaihawm diing ahi uh chih na he sih viaimah? Huleh khovel vaihawm diing na hih uh leh, sil neupeente vaihawm diinga taahlou na hi uh maw? 3 Angelte tunga vaihawm diing i hi chih na he sih viaimah? Huchi ahih inchu, hi damsung silte giap i vaihawm taahluat diing hilou maw? 4 Huchi ahihleh hi damsung silte tungtaang a vaihawmna na neih uh leh, kouhtuam a mi zahumlou peente vaihawm diingin na tousah viaimah? 5 Hichu na zumna diingun ka soi ahi. Na lahvah mipil, a unaute kikaal a vaihawm thei khat beeh umlou ahiaimah? 6 Himahleh unau in unau daan ah na heeh va, hu zong gingloumite ma ah ahi nalai hi! 7 Huchi ahih jiahin khat leh khat daan a na kiheehtuah uh chu na guallelhna lianpi uh ahi. Bang diinga amohjaw hi a kikoih meilou na hi viai? Bang diinga dihloutaha bawlna thuaah jaw meilou na hi viai? 8 Hilou, nanguh mah in na bawl sual va na heem uh, huleh hu zong na unaute uh tungah ahi na bawl uh! 9 Midihtatloute'n Pathian lalgam aluah sih diing uh chih na he sih viaimah? Heemzohin um sih un. Kingaihna thaanghuai a bualte aha, milem bete aha, aangkawmte aha, mihuuhte aha, tohuuhte aha, 10 gutate aha, eenhaatte aha, zukham haatte aha, misalh haatte aha, huleh leepgute aha in Pathian lalgam aluah sih diing uhi. 11 Huleh na lahva khenkhat huchibang nana hi uhi. Hizongleh nanguh chu silsiang leh suhsiangthou na hita uh, nanguh chu Lalpa Jesu min leh i Pathian uh Hagau a siamtansah na hita uhi.
Silsianglou Bawl leh Khristiante Hindaan Kituahlouhna
12 Sil zousiah bawl kei diingin phal ahi a, hiziongleh sil zousiah bawl chu ahoihkim sih hi. Sil zousiah bawl kei diingin phal ahi a, hizongleh bangmah in thuneihna ka tunga aneih ka phal sih hi. 13 Ante chu gilpi a diing ahi a, huleh gilpi zong an a diing ahi, hizongleh anihun Pathian in asumang diing hi. Huleh sapum chu kingaihna thaanghuai a diing ahi sih a, hizongleh Lalpa a diing ahijaw a, huleh Lalpa chu sapum a diing ahi. 14 pathian in Lalpa chu akaithou a, huleh eiuh zong a silbawltheihna in ahung kaithou diing hi. 15 Na sapum uh Khrist hiangte ahi chih na he sih viaimah? Ahihleh Khrist hiangte chu lain nohchijuaahte hiang in ka bawl diing ahiaimah? Bawllou hiai diing! 16 Ahihleh nohchijuaah toh kizop photmah chu amahnu toh sapum khat ahi uh chih helou na hi viaimah? Ajiahchu Ama'n, "Anihun sapum khat ahung hita diing uh," achi hi. 17 Hizongleh Lalpa toh kizop photmah chu Amah toh hagau a pumkhat ahi uhi. 18 Kingaihna thaanghuai taaisan un. Mihing sualna zousiah chu sapum polam ahi a, hizongleh kingaihna thaanghuai a sual bawl in chu amah sapum tungah sil abawlsual ahi. 19 Ahihlouhleh na sapum uh chu Pathian apat na neih uh, Hagau Siangthou inn ahih daan leh na sapum uh nanguh a ahihlouh daan na he sih viaimah? 20 Ajiahchu man a leisa na hi uhi; hujiahin na sapum uh leh na hagau un Pathian paahtawi un, huchu Pathian a ahi.
Kiteenna leh Kikhuul Thu a Hilhna
1 Huleh ka kawma na hung sil gelhte uh thu ah: Pasal in numei suhkhaah louh ahoih hi. 2 Ahihvaangin kingaihna thaanghuai aum jiahin, pasal chin in ji kineih chiat henla, huleh numei chin in zong pasal kineih chiat heh. 3 Pasal in a ji kawmah a tan diing chu pia heh, huleh huchibangmahin numei in zong a pasal kawmah pia heh. 4 Ji in amah sapum tungah thu anei sih a, a pasal in anei jaw hi. Huleh huchibangmahin pasal in zong amah sapum tungah thu anei sih a, a ji in anei jaw hi. 5 An ngawl leh haamteina a na kipumpiaah theihna diingva hun tomkhat a diinga na kilungtuaah uh ahih louhngaal leh, khat in khat tan diing dawi kikhaam sih un; huleh na kisuum zohlouh jiahva Setan in ahung heem louhna diingin hung umkhawm kiit un. 6 Hizongleh hi thu chu thupiaah banga soi louin, phalsah thuin ka soi jaw ahi. 7 Ajiahchu mi zousiah keimah bang chiat uh leh ka deih hi. Hizongleh mi chin in Pathian apat silpiaah tuam chiat anei uh, khat in hitobangin, adang in hutobangin anei chiat uhi. 8 Hujiahin kiteeng nailoute leh meithaite kawmah hichiin ka chi hi: Keimah bangin um uh leh amahuh diingin ahoih diing hi. 9 Ahihvaangin akisuum zohlouh uh leh chu kiteeng uh heh, ajiahchu tahsa uutna a kisuumzohlouh saangin kiteen ahoihjaw hi.
Kikhuul Thu a Hilhna
10 Tuin kiteengsate kawmah thu ka pia hi, kei piaah hilouin Lalpa piaah ahijaw hi: Ji in a pasal paisan sih heh. 11 Hizongleh apaisan inchu, pasal neilouin umzing jaw heh, ahihlouhleh a pasal toh kilem kiit uh heh. Huleh pasal in a ji khuul sih heh. 12 Hizongleh adangte kawmah chu, Lalpa'n asoi hilouin, ke'n ka soi hi: Unau koiaha in gingloumi ji a aneih a, amahnu a kawma aum nuam zing leh, khuul sih heh. 13 Huleh gingloumi pasal a nei in chu a pasal in a kawma um zing auut leh, nuse sih heh. 14 Ajiahchu ginglou pasal chu a ji jiahin suhsiangthouin aum a, huleh ginglou ji zong a pasal jiahin suhsiangthouin aum hi. Huchi hilou hileh chu na tate uh asiang sih diing uh, hizongleh tuin chu asiangthou uhi. 15 Hizongleh a ginglou jaw in akhen leh, khen mei heh. Unaupa aha, unaunu aha chu huchibang thu ah kaanin aum sih hi. Hizongleh Pathian in eiuh chu kituaaha um diingin ahung kou hi. 16 Ajiahchu Aw Ji, na Pasal na hutdam diing leh diing louh bang na he ei? Ahihlouhleh Aw pasal, na ji na hutdam diing leh diing louh bangchiin na he ei? 17 Hizongleh Pathian in mi chin kawma ahawmsahtaah bangin, Lalpa'n mi chin akouhtaah bangin, huchiin um heh. Huleh huchibangin keimah in kouhtuam chin ah thu ka pia hi. 18 Zehtansa a kouh mi aum ei? Zehtanlouh hung hi tuan sih heh. Zehtanlouh a kouh mi aum ei? Zehtan hi tuan sih heh. 19 Zehtan bangmah ahi sih a, zehtan louh zong bangmah ahi sih hi, hizongleh apoimoh chu Pathian thupiaahte juih khu ahi. 20 Mi chin kouha aumna mah vah um zing uh heh. 21 Suaah hihlai a kouh na hiai? Poisa sin; hizongleh suahtaatsah theih na hihin chu, suaahta mei in. 22 Ajiahchu suaah hihlai a Lalpa a kouh chu Lalpa mi jaleen ahi. Huchibangmahin jaleen hihlai a kouh zong Khrist suaah ahi. 23 Man a leisa na hi uh; mite suaah hi sih un. 24 Unaute, mi chin kouha aumna bang chiatin hutah ah Pathian toh umzing uh heh. 25 Huchiangleh nungaah siangthoute tungtaang ahihleh Lalpa thupiaah bangmah ka nei sih hi. Hizongleh ginum diinga Lalpa hehpihna tang ka hih jiahin, ka ngaihdaan ka soi diing hi. 26 Huchiin tulai hahsatna jiahin hichu hoih diingin ka ngaihtuah hi, huchu mi aum ngeia aum zing chu ahoih hi, ka chi hi. 27 Ji a kaan na hiaimah? Kisuutkhiah tum sin. Ji apat kaan nawnlouh na hiaimah? Ji neih tum sin. 28 Hizongleh ji na neih zongleh sil bawlsual na hi sih; huleh nungaah siangthou in zong pasal nei mahleh sil bawl sual ahi sih hi. Ahihvaangin huchibang mite'n leitung khosahna ah buaina athuaah diing uhi; hizongleh ke'n chu na thuaah louh uh ka deih hi. 29 Hizongleh unaute, hikhu ka soi ahi, hun atomta hi, huchiin ji neite chu neilou bangin, 30 huleh kapte kaplou bangin, kipaahte chu kipaahlou bangin, sil leite chu aneilou bangin, 31 huleh khovel sil zangte chu azang nuamlou bangin um uh heh. Ajiahchu hi khovel umdaan hi abeimang zing hi. 32 Hizongleh ke'n chu lungkhamna beia na um uh ka hung deihsah hi. Ji neilou in chu Lalpa akipaahsah theihna diingin, Lalpa lam silte angaihsah hi. 33 Himahleh ji nei in chu a ji akipaahsah theihna diingin khovel silte angaihsah hi. 34 pasal nei leh nungaah siangthou zong akibang sih hi. Pasal neilou in chu tahsa leh hagau a siangthoutaha aum theihna diingin Lalpa lam silte angaihsah hi. Hizongleh pasal nei in chu a pasal akipaahsah theihna diingin khovel lam silte angaihsah hi. 35 Huleh hite chu na hoihna diingva ka soi ahi. Nanguh deihjawng khap tuma ka soi ahi sih a, himahleh umdaan kilawm hun a na um theihna diing uh leh Lalpa nna buailoua na toh theihna diingva ka soi ahijaw hi. 36 Hizongleh mi koipouh in a ta nungaah siangthou akuul donga aleensah a, a tunga dihlou kisa a, a pasal neih diing khawh asah leh, hoih asah bangin bawl heh. Abawl sual sih; pasal neisah mei heh. 37 Ahihvaangin lungsim dettah pua a, phamohsahna neilou a, amah lungsim uutna kithunun zou a, a ta nungaah siangthou kepzing a lungtang a tumpa in chu abawl hoih hi. 38 Huchiin a ta nungaah siangthou pasal neisahpa in abawl hoih a, hizongleh pasal neisahloupa in abawl hoihjaw hi. 39 Ji chu a pasal adamsung siah daan thu a kaan ahi. Hizongleh a pasal asih inchu, Lalpa a um mi chauh, adeih photmah akiteenpih thei hi. 40 Hizongleh kei ngaihtuah daanin chu aum ngeiin um leh nuam asajaw diing hi; huleh keimah in Pathian Hagau neiin zong ka kingaihtuah hi.
Kithoihna Saneeh Thu a Hilhna
1 Huleh milemte biahna kithoihna sil latte tungtaang ahihleh koipouh in heetna i nei chiat uh chih i he uhi: Heetna in mi achapousah a, himahleh lungsiatna in mi asiamhoih hi. 2 Mi koiaha in bangkim he a akingaihtuah inchu, aheet diing bangin ahe nailou ahi. 3 Hizongleh mi koiaha in Pathian alungsiat inchu, hu mi mah chu Pathian heetinaumhi. 4 Hujiahin milem biahna kithoihna silte neeh lam thu ahihleh, khovel ah milem kichi bangmah ahi sih chih leh khat chauh loungaal Pathian dang aum sih chih i he uhi. 5 Ajiahchu pathian tampi leh lalpa tampi aum mahbangin, pathian chia minvohte vaan ah aha ahihlouhleh lei ah aha um zongleh uh, 6 ahihvaangin eiuh diingin chu Pa, Pathian khat chauh aum a, Amah apat sil zousiah ahung um a, huleh eiuh chu Amah diingin i hing uhi; huleh Lalpa khat, Jesu Khrist aum a, Amah tungtawnin sil zousiah aum a, huleh Amah tungtawnin eiuh i hing uhi. 7 Ahiinlah hu heetna chu mi teng in anei sih hi; himahleh khenkhatte in chu tutan chiangah milem biahna toh akingeinaseh jiahun, milem kawma kilaanta banga geelin hu an chu ane va; huleh a sialepha heetna uh ahaatlouh jiahin suhbolhhohin aumta hi. 8 Hizongleh neeh in Pathian paahtaat ahung lohsah sih hi; ajiahchu i neeh jiahun i hoihjaw uh ahi sih a, ne sih zonglei i sejaw uh ahi tuan sih hi. 9 Hizongleh pilvaang un, huchilou inchu hi na jaleenna uh bangchi ahain mi haatloute diingin puuhna ahung suaah kha diing hi. 10 Ajiahchu heetna nei nang mi koiaha in milem biahna ankuang uum a tou hung muta leh, amah sialepha heetna haatloupa chu milem biahna silte ne diinga haansanloh talou diing ahiaimah? 11 Huchiin na unau haatlou, amah luanga Khrist sita chu na heetna jiahin amangthaai diing adiai? 12 Huleh huchia unaute tunga na sual va, a sialepha heetna haatlou uh na suhliamsah chiangun Khrist tungah na sual uh ahi. 13 Hujiahin neeh in ka unau asuhpuuh inchu, sa ka ne nawn mawngmawng sih diing hi, huchilou inchu ka unau ka supuuh kha diing hi.
Apostol Tanvoute
1 Apostol hilou ka hiaimah? Jaleen hilou ka hiaimah? I Lalpa uh Jesu Khrist ka mu sih eimah? Nanguh Lalpa a ka natoh gah hilou na hi viaimah? 2 Midangte diingin apostol hi sih zongleng, nanguh diingin chu ka hi ngeei mei hi. Ajiahchu nanguh chu Lalpa a ka apostol hihna chiamchihna na hi uhi. 3 Kei hung enkhetute kawma ka kiveenna chu hikhu ahi: 4 Neeh theihna diing leh dawn theihna diing jaleenna neilou ka hi viaimah? 5 Apostol dangte leh Lalpa unaute leh Kepha banga gingtu khat ji a nei a, kipuileh theilou ka hi viaimah? 6 Ahihlouhleh kei leh Barnaba chauh in nna tong lou diinga thuneihna neilou ka hi viaimah? 7 Sepaih koi ahiai amah neihsa seenga gaal kuan ngei? Grephuan bawl ngaala a gah ne lou koi aum ei? Ahihlouhleh gan hon khawi ngaala a nawi dawn lou koi aum ei? 8 Hi thute mihing ngaihdaan chauh a soi ka hiaimah? Ahihlouhleh daan thu in zong humah asoi sih eimah? 9 Ajiahchu Mosi daan bu ah, "Bawngtal in buh achil laiin a muuh kaan sin," chih gelh ahi. Pathian in bawngtalte diing angaihtuah ahiaimah? 10 Ahihlouhleh Ama'n eiuh diing jiah maha soi ahiaimah? Eiuh diing jiaha gelh ahi tahzet hi, huchu lei lettu in kineemtahin alet diing ahi a, huleh kineem puma buh votu in zong a kinepna chu amuh diing mah ahi. 11 Kei un na kawmva hagaulam silte tuh ka hih uh leh, nanguh apat na tahsa lam silte uh aat leh ung sil loupi ahiaimah? 12 Midangte'n na tungvah hi thuneihna tang ahih uh leh, kei un zong ka tangjaw tham sih diviaimah? Ahihvaangin hi thuneihna ka zang sih va, hizongleh sil zousiah ka thuaah uh; huchilou inchu Khrist tanchinpha ka daal kha diing uhi. 13 Pathian biahinn a natongte'n biahinn a silte ane va, huleh maitaam a natongte'n maitaam a silte ah tan anei uh chih na he sih viaimah? 14 Huchibangmahin tanchinpha soitute chu tanchinpha mah a ahin diing uh ahi chiin Lalpa'n aguatta hi. 15 Hizongleh ke'n chu hi silte khatbeeh ka zang sih a, huleh hi silte ka tungah kibawl leh chia gelh zong ka hi sih hi; ajiahchu koiaha in ka kisuanna peen bangmalou a abawl saangin kei diingin sih ahoihjaw hi. 16 Ajiahchu tanchinpha soi zong leng suan diing bangmah ka nei sih hi, bawllouh theihlouh ka tunga kinga ahih jiahin; ahi, tanchinpha soi sih leng ka tung gih diing ahi! 17 Ajiahchu hi sil thanuamtaha bawl ka hih leh, kipaahman muh diing ka nei hi; hizongleh ka uut thu lou a bawl ka hihin chu, tanchinpha keemtu hihna mohpuaahna chu piaah ka hita him hi. 18 Huchi ahihleh ka kipaahman bang ahita diai leh? Huchu tanchinpha a ka thuneihna ka zatkhial louhna diinga Khrist tanchinpha ka soi chianga a manbeia ka soi theihna diingin. 19 Ajiahchu mi zousiah apat jaleen himahleng, mi tam seem ka laahluut theihna diingin mi zousiah suaah in ka kibawl hi. 20 Judate ka laahluut theihna diingin Judate kawmah Judami bangin ka um hi. Daan nuaia umte ka laahluut theihna diingin, daan nuaia umte kawmah daannuaiaumte bangin ka um hi. 21 Daan neiloute ka laahluut theihna diingin, daan neiloute kawmah daan neilou bangin ka um hi, Pathian daan nuaia umlou tuanlouin, hizongleh Khrist daan nuaia um ngaalin. 22 Mi haatloute ka laahluut theihna diingin, mi haatloute kawmah haatlou bangin ka um hi. Bangchijawng aha a mi khenkhat beeh ka hutdam theihna diingin mi zousiah kawmah sil bangkimin ka kibawl hi. 23 Nanguh toh tan ka neih theihna diingin tanchinpha jiahin hichu ka bawl ahi.
Gingtute Kitaaidemna
24 Kitaaidemte chu a bawnun ataai va, hizongleh khat chauh in kipaahman amu veu uh chih na he sih viaimah? Na tan theihna diingun taai un. 25 Huleh koipouh kitaaidemna a kipaahman muh tum mi chu sil zousiah ah akideeh veu uhi. Amah un vaang lallukhuh sethei muhna diingin abawl uh ahi, hizongleh eite'n chu lallukhuh setheilou diingin i bawl uhi. 26 Hujiahin tup bei hilouin, huchibangmahin ka taai a, huih guaah lahpi tuum hilouin ka pang ahi. 27 Hizongleh ka tahsa ka sawi a, ka thu nuaiah ka koih hi, huchilou inchu midangte kawma tanchinpha ka soi zoh nungin keimah houh paihkhiahin ka um kha diing hi.
Israelte Tanchin Apat Vaulawhna
1 Hubaan ah, unaute, hite na heetlouh uh ka deih sih hi, huchu i pulepate a bawnun mei nuaia ana-um va, huleh a bawnun tuipi akaan va, 2 huleh a bawnun mei leh tuipi a Mosi kawma baptis-in aum va, 3 a bawnun hagaulam an kibang ane va, 4 huleh a bawnun hagaulam dawn diing kibang adawn chiat uhi. Ajiahchu amah un amahuh juitu hagaulam Suangpi apat adawn chiat va, hu Suangpi chu Khrist ahi. 5 Hizongleh a lahva mi tamjawte tungah Pathian alungkimta sih a, hujiahin gamdaai ah a luang uh apuuhlum gamta uhi. 6 Huchia silgilou alunggulh bangva i lunggulh louhna diingun, hite chu i etton diingva siltung ahi. 7 A lahva khenkhatte chu milem bemi ahih bangun milem bemi hi sih un. "Mipite chu ne diing leh dawn diingin atou va, huleh nopleninga um diingin ading jeel uh," chih gelh bangin. 8 A lahva khenkhat in kingaihna thaanghuai abawl va, ni khat a saang sawmnih leh saang thum apuuhloh bangun, ei un kingaihna thaanghuai i bawl sih diing uhi. 9 A lahva khenkhat in aje-et va, guulte a suhmanga aum bangun, ei un jaw Khrist i je-et sih diing uhi. 10 A lahva khenkhat aphun va, sumangtu suhmanga aum bangun, i phun sih diing uhi. ll Huchiin hite zousiah chu etton diingin a tungvah anatung ahi a, huleh eiuh huntawp hung tunnate kawma thuhilhna diinga gelh ahi. 12 Hujiahin dinga kingaihtuah chu pilvaang heh, huchilou inchu apuuh kha diing hi. 13 Mihing diinga heemna taangpi chihlouh heemna bangmahin ahung man kha nai sih hi; hizongleh Pathian chu aginum hi, Ama'n na thuaahzoh vaal uh heemna na tuaah diing uh aphal sih diing; hizongleh na thuaahzohna diingun heemna toh kitonin taaikhiahna lampi zong ahung siamsah diing hi.
Milem Biahna Ankuang leh Lalpa Ankuang
14 Hujiahin ka deihtahte, milem biahna taaisan un. 15 Mipilte kawma thusoi bangin ka soi ahi; ka thusoi ngaihtuah un. 16 Vangpiaahna nou i dawn uh Khrist sisan kipawlkhawmpihna hilou ahiaimah? Tanghou i balkeeh uh Khrist tahsa i kikoppihna hilou ahiaimah? 17 Ajiahchu eiuh tampi hizonglehhang tanghou beu khat leh tahsa khat i hi uhi; ajiahchu hu tanghou beu khat ah tan i nei khawm chiat uhi. 18 Tahsa daan a Israelte en un: kithoihna sa nete maitaam toh tan nei khawm ahi sih viaimah? 19 Ahihleh bang ahiai ka soi? Milem chu sil bang ahakhat ahiai, ahihlouhleh milem biahna a sil kilaante zong sil bang aha khat ahiai? 20 jentelte kithoihna chu Pathian kawmah hilouin, dawite kawmah akithoih uh chih soi ka hijaw a, huleh nanguh dawite toh na kipawlkhawm uh ka deih sih hi. 21 Lalpa nou leh dawite nou na dawnkhawm thei sih diing uh; Lalpa dohkaan a leh dawite dohkaan a zong na nekhawm thei sih diing uhi. 22 Ahihlouhleh Lalpa thangsiat diinga suhlungthah tum i hi viai? Amah saanga haatjaw i hi viaimah?
Gingtute Jaleenna
23 Sil zousiah bawl kei diingin phal ahi a, hizongleh sil zousiah ahoihkim veh sih hi. Sil zousiah kei diingin phal ahi a, hizongleh sil zousiah in asiamhoih sih hi. 24 Mi koimah in amah ngen hoihna diing hawl sih henla, hizongleh mi chin in midang hoihna diing hawl jaw heh. 25 Dawl a sa kijuaah photmah chu sialephaheetnajiahinbangma dongse louin ne un. 26 Ajiahchu, "Leilung leh a sunga um zousiah LALPA a ahi. " 27 Ginglou mite laha koiaha in an ne diinga ahung chial a, huleh chiah na uut ngaal inchu, na ma va alui phot uh sialepha heetna jiahin bangma dongse louin ne mei un. 28 Hizongleh mi koiaha in, "Hichu kithoihna ahi," chia ahung hilh leh, amah ahung hilhpa jiah leh sialepha heetna jiahin ne sih un; ajiahchu "leilung leh a sunga um zousiah LALPA a ahi." 29 Nangmah sialepha heetna chi ka hi sih a, hizongleh midang sialepha heetna chi ka hijaw hi. Ajiahchu midang sialepha heetna in bang diinga ka jaleenna hung vaihawm diing ahiai? 30 Ajiahchu kipaahtaha ka neeh leh, bang diinga kipaahthu ka soina an tunga soisiat-a um ka hiai? 31 Hujiahin na neeh un hileh, na dawn un hitaleh, na bawl photmah uh Pathian loupina diingin bawl veh un. 32 Judate aha Jentelte aha ahihlouhleh Pathian kouhtuamte aha lungnatna diing bangmah bawl sih un, 33 huchia amahuh hutdam ahih theihna diingva, keimah phattuamna diing chauh hawllou a, hizongleh mi tampite phattuamna diing ka hawljawh mahbangin.
1 Kei Khrist umdaan juitu A ka hih mahbangin nanguh ka umdaan juitute hi un.
Kouhtuam Kikhopna a Numeite Umdaan diing
2 Huleh unaute, sil zousiah a na hung heetzing va, thugousiah ka hung piaahsawn bang jeela na kolzing jiahun ka hung paahta hi. 3 Hizongleh pasal photmah lutang chu Khrist ahi a, numei lutang chu pasal ahi a, huleh Khrist lutang chu Pathian ahi chih na heet uh ka hung deih hi. 4 Pasal a lu khuh puma haamtei aha, ahihlouhleh thusoi aha photmah in a lu azahbawl lou ahi. 5 Hizongleh numei a lu khuh loua haamtei aha, ahihlouhleh thusoi photmah in a lu azahbawl lou ahi; ajiahchu huchibanga bawl chu a sam kimeet kiau toh kibang giap ahi. 6 Ajiahchu numei in a lu akhuh louhngaal inchu, meetkiau mei heh. Ahihvaangin numei diinga sammeet ahiai mah, ahihlouhleh meetkiau azumhuai jiahin khuh heh. 7 Ajiahchu pasal hi Pathian lim leh loupina ahihjiahin a lu akhuh louh diing mawng ahi; hizongleh numei chu pasal loupina ahi. 8 Ajiahchu pasal chu numei apat siam ahi sih a, hizongleh numei ahihleh pasal apat siam ahijaw hi, 9 Pasal chu numei a diinga siam ahi sih a, hizongleh numei chu pasal a diinga siam ahijaw hi. 10 Hikhu jiahin numei in a lu tunga thuneihna chiamchihna angelte jiahin aneih ngeeingeei diing ahi. 11 Ahihvaangin Lalpa ah chu numei apat pasal ajaleen thei sih a, pasal apat numei zong ajaleen thei diaah sih hi. 12 Ajiahchu numei hi pasal apat siam ahih mahbangin, pasal zong numei tungtawnin apiang hi; hizongleh sil zousiah chu Pathian apat ahi veh hi. 13 Nang un kingaihtuah un. Numei in a lu khuhloua Pathian kawma ahaamtei akilawm eimah? 14 Pasal in sam sau aneih leh, amah diingin azumhuai hi chih pianken ngeinadaan in zong ahung hesah sih eimah? 15 Hizongleh numei in sam sau aneih inchu, amah diingin loupina ahijaw hi; ajiahchu a sam chu a khuhna diinga piaah ahi. 16 Hizongleh mi koiaha in anial nuam inchu, huchibang tawndaan i nei sih va, Pathian kouhtuamte'n zong anei sih uhi.
Lalpa Nitaah An Neeh Thu a Hilhna
17 Hizongleh nanguh hi thu ka hung hilhna ah ka hung phat thei sih hi, ajiahchu a hoihjawhna diingin na kikhawm sih va, asiatjawh seemna diingin na kikhawm veu uhi. 18 Ajiahchu amasapeenin kouhtuam a na kikhop chiangun na lahvah kilangkhennate aum chih ka ja a, huleh gin zong gingtaatna khat ka nei hi. 19 Ajiahchu na lahva midih a pomte heetdoh ahih theihna diingun, na lahvah kilangkhennate zong aum diing mawng ahi. 20 Hujiahin na kikhop chiangun Lalpa nitaah an ne diinga hung na hi sih uhi. 21 Ajiahchu na neeh chiangun mi chin in midangte main nanguh nitaah an na kineeh chiat va; huchiin khat agilkial a, adang in akham hi. 22 Bangchidaan ahiai? Neehna diing leh dawnna diing inn kineih lou na hi viaimah? Ahihlouhleh Pathian kouhtuamte na musit-un bangma neiloute na selphou uh ahiaimah? Na kawmvah bang ahiai ka soi diing? Hi thu ah ka hung paahta diing adiai? Ka hung paahta hiai sih hi. 23 Ajiahchu Lalpa kawm apat ka muh chu nanguh ka hung hilhsawn ahi: huchia Lalpa Jesu'n matsaha aum jaanin tanghou ala a, 24 huleh kipaahthu asoi zohin abalkeeh a, "La unla, ne un; hichu ka tahsa nanguh diinga kibalkeeh chu ahi; na hung heetzingna diingun hichu bawl un," achi hi. 25 Huchibangmahin an aneeh zohin nou zong ala a, "Hi nou chu thuhun thah a ka sisan ahi. Na dawn tengva na hung heetzingna diingun hichu bawl un", achi hi. 26 Ajiahchu hi tanghou na neeh va hi nou na dawn tengun, ahung kiit masiah Lalpa sihna na phuangdoh jeel uh ahi. 27 Hujiahin mi koipouh taahloupi-a Lalpa tanghou ne leh nou dawn in chu Lalpa tahsa leh sisan tungah siamlouh atang diing hi. 28 Hulehmi amah kienchianjaw heh, huchiin tanghou chu ne henla, nou chu dawn heh. 29 Ajiahchu Lalpa tahsa hesiam lou a ne taahlou leh dawn taahloupi-a ne leh dawn in chu amah siamlouh kitanna diingin anein adawn hi. 30 Hikhu jiahin na lahvah mi tampi na jawngkhaal va huleh na china va, huleh tampi na ihmuta uhi. 31 Ajiahchu ei leh ei dihtaha i kietchian leh, vaihawmsahin i um sih diing uhi. 32 Hizongleh vaihawmkhuma i um chiangun khovel toh siamlouhtanga i um louhna diingun Lalpa taaihilhin i um veu uhi. 33 Hujiahin ka unaute, ne diinga na kikhop chiangun, khat leh khat kingaah chiat un. 34 Hizongleh mi koipouh a gil akial leh a inn lamah ne heh, huchia vaihawmna na thuaahna diingva hung kikhawm na hihlouhna diingun. Huleh thu dangte chu ka hung chiangin ka lemtuaah veh na diing hi.
Hagaulam Silpiaahte
1 Huleh unaute, hagaulam silpiaahte tungtaang heloua na um uh ka deih sih hi. 2 Jentelte na hih laiun puia na um bang jeelun, milem haamtheiloute lamah puimangin na um uh chih na he uhi. 3 Hujiahin koima'n Pathian Hagau a thu soiin Jesu chu haamse thuaah ahi, achi ngei sih a, huleh koima'n Hagau Siangthou jaal louin Jesu chu Lalpa ahi, achi thei ngei sih, chih ka hung hesah hi. 4 Huchiin silpiaah tuamtuam aum a, hizongleh Hagau kibang ahi. 5 Huleh thunatohna tuamtuam aum a, hizongleh Lalpa kibang ahi. 6 Huleh natohna tuamtuam aum a, hizongleh bangkim a bangkim bawltu Pathian khat ahi. 7 Hizongleh mi zousiah phattuampih diingin Hagau natoh kilatna chu mi chin kawmah piaahin aum hi. 8 Ajiahchu mi khat kawmah Hagau tungtawnin pilna thu piaah ahi a, huleh midang kawmah hu Hagau tungtawn mah in heetna thu piaah ahi; 9 midang kawmah hu Hagau mah in ginna piaah ahi a, huleh midang kawmah hu Hagau mah in suhdamtheihna silpiaahte piaah ahi; 10 midang kawmah silmah bawltheihnate piaah ahi a, midang kawmah thusoilawhtheihna piaah ahi a, huleh midang kawmah hagaute heetkhentheihna piaah ahi a, midang kawmah haam tuamtuamte a thusoitheihna piaah ahi a, midang kawmah haam tuamtuamte lehdohtheihna piaah ahi. 11 Hizongleh hute zousiah chu Hagau khat mah in hi silte zousiah chu atongdoh a, mimal chin kawmah adeih bangjeelin ahawm hi.
Mihing Sapum Apat Etsahna
12 Ajiahchu sapum chu khat ahi a, hizongleh hiang tampi anei hi; hiang zousiah chu tam mahleh uh sapum khat ahih bangun, Khrist ah zong hutobangmah ahi. 13 Ajiahchu eiuh Judate hiin Jentelte hitalei, suaah hiin suaah lou hilei, i bawnun sapum khat a um diingin Hagau khat a baptis-in i um va, huleh i bawnun Hagau khat mah a dawnsahin i umta uhi. 14 Ajiahchu sapum chu hiang khat chauh ahi sih a, hizongleh hiang tampi ahijaw hi. 15 Keeng in, "Khut ka hihlouh jiahin sapum a pang ka hi sih," chi leh, hijiahin sapum a panglou ahi diaimah? 16 Huleh bil in, "Mit ka hihlouh jiahin sapum a pang ka hi sih," chi leh, hijiahin sapum a panglou ahi diaimah? 17 Sapum chu a pumpi in mit hitaleh, khojaahna khoiah aumta diai? A pumpi in khojaahna hitaleh, gimnamheetna khoiah aumta diai? 18 Hizongleh Pathian in hiang chinteng chu pha asah bangin sapum ah akoih hi. 19 Huleh a bawnun hiang khat chauh hitaleh uh, sapum khoiah aumta diai? 20 Hizongleh tuin hiang tampi aum a, ahiinlah sapum khat chauh ahi. 21 Huleh mit in khut kawmah, "Bangmahin ka hung mamoh sih," achi thei sih a, lutang in zong keeng kawmah, "Bangmahin ka hung mamoh sih," achi thei tuan sih hi. 22 Chitheilou chauh hi thamlouin, sapum hiang haatloua kilangte chu apoimohjaw mahmah hi. 23 Huleh i sapum hiang zahtaat thamlouh a i ngaihte tungah zahna lianjaw i pia va, huleh i hiang suhlat thamlouhte'n naahpiihtahin kilawmna aneijaw uhi. 24 Hizongleh i hiang suanhuaite'n huchibang amamoh sih uhi. Hizongleh Pathian in poimoh thamlou hiangte chu zahna lianjaw piain, sapum chu alemkhawm hi, 25 huchia sapum a kikhenna aum louh a, hizongleh hiangte chu khat leh khat akingaihsah chiat theih jawhna diingun. 26 Huleh hiang khat in athuaahin zong, hiang zousiah in athuaahpih hi; huleh hiang khat paahtawia aum leh, hiang dang zousiah in akipaahpih uhi. 27 Tuin nanguh chu Khrist sapum na hi va, a mimal malin a hiangte na hi uhi. 28 Huleh Pathian in kouhtuam ah hite akoih hi: amasapeenin apostolte, anihna ah zawlneite, athumna ah thuhilhtute, hubaan ah silmah bawltute, huzohin suhdamtheihna silpiaahte, panpihtheihnate, vaihawm siamnate, haam tuamtuamte a haamtheihnate. 29 A bawnun apostol ahi viai? A bawnun zawlnei ahi viai? A bawnun thuhilhtu ahi viai? A bawnun silmah bawltute ahi viai? 30 A bawnun suhdamtheihna silpiaahte anei viai? A bawnun haamdangte in thu asoi viai? A bawnun haam aletthei viai? 31 Hizongleh silpiaah hoihpeente chu lunggulh jaw un. Huleh lampi hoihjaw ka hung musah nalai diing hi.
Lungsiatna Silpiaah
1 Mihing haamte leh angel haamte in thu soi mahleng, lungsiatna ka neih louhin chu, sum-eng tumging aha ahihlouhleh daah khutbeh ging aha bang ka hi giap hi. 2 Huleh thusoilawhtheihna silpiaah nei in, thukiphual zousiah leh heetna zousiah hesiam veh mahleng, taang kisuantheihna khop ginna zousiah nei mahleng, lungsiatna ka neih louh inchu, bangmah ka hi sih hi. 3 Huleh ka neih zousiah migentheite vaahna diingin pedoh vehin, huleh ka sapum haaltum diingin pedoh zongleng, lungsiatna ka neih louh inchu, bangma ka phattuampih sih hi. 4 Lungsiatna in athuaahthei a huleh aching hi; lungsiatna in athangse sih; lungsiatna chu akiphat sih a, akiuangsah sih hi; 5 akilawmlouin agumtat sih a, amah deihjawng chauh angaihtuah sih a, alungthah baih sih a, silgilou angaihtuah sih hi; 6 dihtatlouhna ah akipaah sih a, hizongleh thutah ah akipaah hi; 7 sil zousiah puaah daan asiam a, sil zousiah agingta a, sil zousiah alamen a, sil zousiah athuaah mualsuaah hi. 8 Lungsiatna chu bangchihmahin abei sih diing hi. Hizongleh thusoilawhtheihnate um mahzongleh, ahung bei diing hi; haamdangte um mahleh, ahung tawp diing hi; heetnate um mahleh, ahung mang diing hi. 9 Ajiahchu akimlouin i he a, akimlouin i soilawh uhi. 10 Hizongleh abukim chu ahung tun chiangin akimlou chu suhbei ahita diing hi. 11 Ka naupan laiin naupang haam in ka haam a, naupang heet in ka he a, naupang ngaihtuah in ka ngaihtuah hi; hizongleh ka hung pichin phetin naupanlai silte ka paaikheta hi. 12 Ajiahchu tuin liimlang a et bangin chianloutahin i mu hi, hizongleh hu hun chiangin chu kimaaituahin i muta diing hi. Tuin chu akimlouin ka he a, hizongleh hu hun chiangin chu kei hung kiheet bangin ka heta diing hi. 13 Huleh tuin ginna, kinepna leh lungsiatna hi teng thum aum zing hi; hizongleh hi teng laha lianpeen chu lungsiatna ahi.
Thusoilawhtheihna leh Haam Tuam Silpiaah
1 ungsiatna chu deih jeel unla huleh hagaulam silpiaahte lunggulh un, adiaahkholin thusoilawhtheihna diing lunggulh un. 2 Ajiahchu haam tuam khat a haam in chu mi kawma thusoi hilouin, Pathian kawmah asoi ahijaw hi, koimah in asoi aheetlouh jiahin; ahiinlah hagau ah chu thukiphual asoi ahi. 3 Hizongleh thusoitu in chu mihing kawmah siamhoihna thute, hasotna thute leh hamuanna thute asoi ahi. 4 Haamdang a thusoi in chu amah chauh akisiamhoih a, hizongleh thusoitu in chu kouhtuamte asiamhoih hi. 5 Na bawnva haamdangte a na haam uh chu ka hung deihsah hi, hizongleh hu saangin thu na soitheih uh ka hung deihsahjaw hi; ajiahchu kouhtuam in siamhoihna atan theihna diinga aletdoh louhngaal leh, haamdangte a haam saangin thusoi mi chu aloupijaw hi. 6 Tuin unaute, haamdangte a thusoiin na kawmvah hungta leng, thuphuandoh in aha, heetna in aha, thusoilawhtheihna in aha, ahihlouhleh thuhilhna in aha na kawmvah soi sih leng, bang in ka hung suphatuam diai? 7 Sil hinna neilou gingthei theile aha ahihlouhleh tingtang aha ngeei zong umjia neia agin louh leh, bang kimuut a, bang kitum ahiai chih bang achi kiheet theih diai? 8 Ajiahchu peengkuul mumal beiin kimuut leh, koi ahiai gaal kuan diinga kisa diing? 9 Huchibangmahin nang un zong haam heettheih diinga na soi louh uh leh, bang kisoi ahiai chih bang achi kiheet diai? Ajiahchu huih laha haam na hi giap diing uhi. 10 Khovel ah haam chi tuamtuam tampi aum ahi mei thei, hizongleh umje neilou khatmah zong aum sih hi. 11 Hujiahin, hu haam umjia ka heetlouh inchu, hu thusoipa diingin kei chu gamdangmi ka hi a, huleh kei diingin a soipa zong gamdangmi ahi diing hi. 12 Huchi mahbanga nang un zong hagaulam silpiaahte na lunggulh jiahun, kouhtuam siamhoihna diinga na hung khantouh theihna diing uh hawl un. 13 Hujiahin haamdang khat a thusoitu in alehdoh theihna diingin haamtei heh. 14 Ajiahchu haamdang khat in haamteita leng, ka hagau chu ahaamtei a, hizongleh ka heetna chu asuphatuam sih hi. 15 Ahihleh a thutawpna bang ahita diai? Hagau in ka haamtei diing a, heetsiamna toh zong ka haamtei diing hi. Hagau in la ka sa diing a, heetsiamna toh zong la ka sa diing hi. 16 Huchilou inchu, hagau a kipaahthu na soi chiangin bangma hesiam loupa in na kipaahthu soi ah bangchiin na thusoi heloupiin, "Amen," achi thei diai? 17 Ajiahchu nang in chu kipaahthu na soi hoih ngeei a, hizongleh midang chu asiamhoih tuan sih hi. 18 Nanguh zousiah saanga haam dangte a thu ka soi tam jawh jiahin Pathian kawmah kipaahthu ka soi ahi. 19 Ahiinlah kouhtuam lahah chu haam dang khat a thu saang sawm ka soi saangin, ka thusoi a midangte ka hilh theihna diingin ka heetsiamna toh thu teng ngaa soi ka uut jaw hi. 20 Unaute, heetsiamna lamah naupang sih unla, ahiinlah giitlouhna lamah chu naupang un; huleh heetsiamna lamah piching un. 21 Daan Lehkhabu ah, "Haam dang mite leh gamtuam mite kam in hi mite kawmah thu ka soi diing a; huchiin zong ka thu angaikhe tuan sih diing uhi," Lalpa'n achi, chih gelh ahi. 22 Hujiahin haam dangte chu gingtute diingin hilouin hizongleh gingloute diingin chiamchihna ahi; hizongleh thusoilawhna chu gingloute diingin ahi sih a, gingtute diingin ahijaw hi. 23 Hujiahin kouhtuam pumpi mun khat a na kikhopna vah mi zousiah haam dangte in haamta leh uh chin, hutah ah ahe nailoute ahihlouhleh gingloumite hungta leh, nanguh chu mingol ahung chi sih diviaimah? 24 Hizongleh mi zousiah in thu soilawhta leh uh, ginglou ahiai ahihlouhleh heloumi khat hutah ah hung leh, amah chu mi zousiah in misual ahihdaan ahesah diing va, misual ahi chiin amah leh amah akihedohsah diing uhi. 25 Huchiin a lungtang thuguuhte chu suhlatin aumta diing a, huleh khupboha puuhin Pathian abe diing a, na lahvah Pathian aum tahzet hi chih asoisawn diing hi.
Biahna Daan Kijen
26 Bangchih diing ahita diai, unaute? Na hung kikhop tengun mi chin in phatna la bang, thuhilhna bang, haam tuam bang, thuphuandoh bang, haam lehdohna bang na nei chiat uhi. Sil zousiah chu siamhoihna diinga bawl hi heh. 27 Mi koipouh in haam tuam khat a thu asoi leh, nih aha ahihlouhleh atam tawpin thum in aha soi heh, hu zong kikheel jeelin hi henla, huleh mi khat in letdoh heh. 28 Alettu diing aum louh leh, amah chu biahinn ah sipkhianin um henla, huleh amah leh Pathian kaal ah kisoi heh. 29 Thusoilawhtute nih aha thum aha in soi uh henla, adangte in asoi uh ngaihtuah uh heh. 30 Hizongleh a kawma tou thusoilawh dang khat kawma thuphuandoh ahung um leh, amasapeen sip heh. 31 Ajiahchu mi zousiah in ajil va, mi zousiah hasot-a aum theihna diingin na bawnun khat khat in thu na soilawh thei uhi. 32 Huleh zawlneite hagau chu zawlneite thuthu in aum uhi. 33 Ajiahchu Pathian chu buaina Pathian ahi sih a hizongleh hamuanna Pathian ahijaw hi, misiangthoute kouhtuam tengteng a ahih mahbangin. 34 Na numeite uh chu kouhtuam kikhopnate ah sip uh heh, ajiahchu amahuh diingin thusoi phal ahi sih hi; hu thamlouin daan Lehkhabu in zong asoi bangin akituhluut diing uh ahi. 35 Huleh bang aha heet nuam aneih un chu, inn lamah a pasalte uh dong uh heh; ajiahchu kouhtuam kikhopna a numei thusoi chu azumhuai hi. 36 Ahihlouhleh Pathian thu achiil a nanguh apat hung suaah ahiaimah? Ahihlouhleh nanguh kawm chauha hung tung ahiaimah? 37 Mi koipouh in thusoilawhtu ahiai ahihlouhleh hagaumi ahiaimah hia akingaihtuah leh, na kawmva ka thugelhte chu Lalpa thupiaah ahi chih he uh heh. 38 Hizongleh mi koipouh ahelou aum leh, amah chu helouin um mei heh. 39 Hujiahin unaute, thusoilawh theihna chu lunggulh unla, haam dangte a haam zong khap sih un. 40 Sil zousiah hoihtah leh kituuptaha bawl hi heh.
Khrist Thohkiitna
1 Hubaan ah, unaute, na kawmva ka tanchinpha hung soi, pom zong na pom va huleh humah ngeei zong na dinna uh hi chu ka hung hesah ahi, 2 na kawmva ka hung soi thu na pomdet uh leh, humah a hutdam zong na hi uhi, huchi ahihlouh inchu, athawnin na gingta uh ahi. 3 Ajiahchu amasapeenin keimah in zong ka muh chu nanguh ka hung hilh sawn ahi: huchu Pathian Lehkhathu dungjuiin Khrist chu i sualnate jiahin asi a, 4 huleh Amah chu vuiin aum a, Pathian Lehkhathu dungjuiin ni thum ni in kaihthohin aumta a, 5 huleh Kepha kawmah akilaah a, huzohin apostol sawmlenihte kawmah. 6 Hunungin unau za ngaa saanga tamjawte kawmah khatvei thuin akilaah a, amahuh chu atamjaw tutanin adam nalai va, hizongleh khenkhat chu a-ihmuta uhi. 7 Hunungin Jakob kawmah akilaah a, huin apostol zousiah kawmah. 8 Huleh atawppeenin ahun loua piang kei kawmah zong akilaah hi. 9 Ajiahchu apostolte laha aneupeen ka hi, Pathian kouhtuamte ka suhduhdah jiahin apostol minvoh taah zong ka hi sih hi. 10 Hizongleh Pathian hehpihna jiahin tua ka hihna chu ka hita a, huleh a hehpihna ahung piaah chu athawnin aum sih hi; hizongleh amahuh haw zousiah saangin ka tonggimjaw hi, ahihvaangin kei toh ahi sih a, Pathian hehpihna ka kawma umin atong jaw ahi. 11 Hujiahin kei hiin amahuh hitaleh, huchiin ka soi va, nang un na gingta uhi.
Misite Thohkiitna
12 Ahihleh tuin Khrist chu misi lah apat athoukiit chih akisoi ngaal leh, bangchidaana na lahva mi khenkhat in misi thohkiitna aum sih na chih uh ahiai? 13 Hizongleh misi thohkiitna umlou ahih inchu, Khrist zong kaihthoha umlou ahi diing hi. 14 Huleh Khrist kaihthoha umlou ahih inchu, ka thusoi uh athawn ahi a, na ginna uh zong athawn ahi hi. 15 Ahi, misite thoukiit lou ahih un chu, Pathian in Khrist akaihthou louhpi akaithou hi chia ka heetpihtaah jiahun, keiuh chu Pathian heetpihtu dihlou hia ngaihin ka umta diing uhi. 16 Ajiahchu misite athohkiit louh un chu, Khrist zong kaihthoh ahi sih diing hi. 17 Huleh Khrist kaihthoha aum louh inchu, na ginna uh athawn ahi diing a, na sualna vah na um nalai diing uhi. 18 Huchiangleh Khrist a ihmute amangthaai ahita diing uhi. 19 Tu damsung chauha Khrist a kinepna i neih un chu, mi zousiah laha mi lungsiathuai peen i hi diing uhi. 20 Hizongleh tuin Khrist chu misi lah apat kaihthohin aumta a, ihmute gahmasa ahung hita hi. 21 Ajiahchu mihing jiaha sihna ahung um jiahin, Mihing jiah mahin misi thohkiitna zong ahung umta hi. 22 Ajiahchu Adam a mi zousiah asih mahbangin, Khrist ah mi zousiah suhhingin aum diing uhi. 23 Hizongleh mi chin chu amahuh hun chiat ah ahi diing va: Khrist chu gahmasapeen ahi a, huchiin ahung kiit chiangin Khrist a te hun ahi diing hi. 24 Huchiin Ama'n lalgam Pa Pathian kawma apiaahkhiah chiangin, vaihawmna zousiah leh thuneihna zousiah leh silbawltheihna zousiah asuhmang chiangin, a tawpna ahung tung diing hi. 25 Ajiahchu Ama'n a meelmate zousiah a keeng nuaia akoih masangsiah vai ahawm ngeei diing ahi. 26 Meelma nunungpeen suhmanga um diing chu sihna ahi. 27 Ajiahchu "Ama'n sil zousiah a keeng nuaiah akoihta hi." Himahleh "sil zousiah a thu nuaiah akoih" achih khu in a thu nuaia sil zousiah koihtu chu ahuam sih chih akilang hi. 28 Huleh sil zousiah a thu nuai a aum chiangin, Pathian chu bangkim a bangkim ahihtheihna diingin, Tapa ngeei zong sil zousiah a thu nuaia koihpa nuaiah akituluutta diing hi. 29 Huchilou inchu, misite thoukiit mawngmawng lou ahihleh, misite a diinga baptisma tangte'n bang abawlta diviai? Ahihleh bang diinga misite a diinga baptisma atansah uh adiai? 30 Huleh bang diinga eite zong daahkaal chin a lauhhuai dinmun a umzing i hi viai? 31 I Lalpa uh Jesu Khrist a ka hung suanna jiahin nitengin ka si chih tahzetin ka soi ahi. 32 Mihing hihdaan banga Ephesi a gamsate kisualpih ka hih leh, kei diingin bang aphatuam diai? Misite thoukiit lou ahihleh, "Nein i dawn diing uh, ajiahchu jiing chianga si diing i hi!" 33 Heemin um sih un: "Lawm gilou in umdaan hoih asusia hi." 34 Dihtatna lamah halh unla, sual sih un; ajiahchu khenkhat in Pathian heetna anei sih uhi. Hichu na zahtaatna diingva ka soi ahi.
Thohkiitna Tahsa
35 Hizongleh mi khenkhat in, "Misite bangchiin kaihthoh ahi diing viai? Bangchi bang sapum neiin ahung pawt diviai?" achi ahi diing. 36 Nang mingol, na haichi tuh zong asih louh leh, ahingdoh sih hi. 37 Huleh na tuhin a kung hung um diing khu na tuh sih a, gehu hiin haichi dangdang hitaleh, a tang mah ahi na tuh. 38 Hizongleh Pathian in pha asah bangjeelin a kung apia a, huleh haichi chin kawmah amah kung chiat apia hi. 39 Jahsa zousiah chu tahsa kibang ahi sih a, hizongleh mihing tahsa jaat tuam ahi a, gamsate tahsa jaat atuam a, ngate tahsa jaat atuam a, vate tahsa jaat atuam hi. 40 Vaanlam sapum aum a, leilam sapum zong aum hi; hizongleh vaanlam sapum loupina atuam a, leilam sapum loupina atuam hi. 41 Nisa loupina tuam khat aum a, ha loupina tuam aum a, huleh aahsite loupina tuam aum hi; ajiahchu aahsi leh aahsite zong loupina daan ah akibang sih uhi. 42 Huchibangmahin misi thohkiitna zong ahi. Sapum chu muattheia tuhin aum a, muattheiloua kaihthohin aum hi. 43 Simmoh umtaha tuhin aum a, loupitaha kaihthohin aum hi. Haatloutaha tuhin aum a, silbawltheitaha kaihthohin aum hi. 44 Pianpih sapuma tuhin aum a, hagaulam sapum neia kaihthohin aum hi. Pianpih sapum aum a, hagaulam sapum zong aum hi. 45 Huleh hichia gelh ahi, "Mi masa Adam chu hinna nei mi ahung hita hi." Adam nunung chu hinna petu Hagau ahung hita hi. 46 Ahihvaangin, hagaulam chu aum masa sih a, hizongleh tahsalam aum masa a, huleh hunungin hagaulam ahung um hi. 47 Mihing masa chu lei a siam, leivui apat ahi a; Mihing nihna chu vaan apat Lalpa ahi. 48 Lei a siam mite chu lei a kisiampa bang ahi va, vaanlam mite chu vaan a Mi bang ahi uhi. 49 Huleh lei a kisiampa meel i puaah bangun, vaan Mi meel zong i po diing uhi. 50 Unaute, tuin hi ka soi ahi, tahsa leh sisan in Pathian lalgam aluah thei sih a, muatthei in zong muattheihlouhna aluah thei sih hi.
Misiangthoute Laahmang Chianga Sil Umdaan Diing
51 Ngai un, thukiphual ka hung hilh ahi: I bawnun i ihmu veh sih diing va, hizongleh i bawnun suhlimdangin i um veh diing uhi, 52 thakhatin, mitphet kaallouin, peengkuul nunungpeen gin chiangin. Ajiahchu peengkuul ahung ging diing a, huleh misite chu muattheiloua kaihthohin aum diing va, eite zong suhlimdangin i umta diing uhi. 53 Ajiahchu hi muatthei in muattheihlouhna asilh diing a, huleh hi sithei in sihtheihlouhna asilh ngeei diing hi. 54 Huchia hi muatthei in muattheihlouhna asilh a, huleh hi sithei in sihtheihlouhna asilh hun tahchiangin, "Sihna chu zohna ah valhin aumta. 55 Aw sihna, na gu khoiah aum tai? Aw haankhuuh, na gualzohna khoiah aum tai?" chia kigialte chu ahung taangtungta diing hi. 56 Sihna gu chu sual ahi a, huleh sual silbawltheihna chu daan thu ahi. 57 Hizongleh i Lalpa uh Jesu Khrist jaala gualzohna hung pepa Pathian kawmah kipaahthu um heh. 58 Hujiahin ka unau deihtahte, dettahin, suhliing guallouhin, Lalpa natoh phatuamngaitaha tong gigein um un, na tohgimna uh chu Lalpa ah athawn sih diing chih na he ngaalva.
Misiangthoute Diinga Thohlawm
1 Huleh misiangthoute diinga thohlawm tungtaang thu chu, Galatia gam a kouhtuamte ka thupiaah bangin nang un zong bawl un. 2 Ka hung chianga thohlawm donna aum nawn louhna diingin, hapta ni masapeen in na neih bang jeelun, mi chin in na khut vah na koih khawl chiat un. 3 Huleh ka hung chiangin koi hitaleh pha na sahsahte uh chu na hehpihna silpiaah uh vathah diingin lehkhathonte toh Jerusalem ah ka sawl diing hi. 4 Huleh kei zong ka chiah alem leh, kei toh kitonin achiah diing uhi.
Mimal Ngetna
5 Makedonia gam tawna ka pai chiangin na kawmvah ka hung diing hi, ajiahchu Makedonia gam tawna pai diing ka hi. 6 Huleh ka khualzinna diing photmah a na hung panpih theihna diingun na kawmvah tomkhat, ahihlouhleh phalbi sung siah aha, ka taam meithei hi. 7 Ajiahchu zin kawma hung muh malam ka uut sih hi; hizongleh Lalpa'n lem asah leh, sawt deuh na kawmva taam ka kineem hi. 8 Hizongleh Pentikost dongin Ephesi khua ah ka taam diing hi. 9 Ajiahchu phatuamtaha natohna diing kot lianpi kei diingin akihong a, doutute zong tampi aum uhi. 10 Huchiin Timothi ahunga ahihleh, lauthawng loua na lahva aum theihna diing ngaihtuah un; ajiahchu kei tobangin ama'n Lalpa nna atong hi. 11 Hujiahin koima'n musit sih heh. Hizongleh ka kawma ahung theihna diingin a khualzinna ah lungmuangtahin sawl jaw un; ajiahchu unaute toh ka kawma ahung uh ka kineem mahmah hi. 12 Tuin unaupa Apollo thu ahihleh unaute toh na kawmva hung diingin ka phuut a, hizongleh tutaha hung diing chu amah deihdaan ahi sih hi; ahiinlah hun lemtaang aneih chiangin ahung diing hi. 13 Kiveeng un, ginna ah dingkip un, hangsan unla, haattahin um un. 14 Na silbawl photmah uh lungsiatna toh bawl hi heh. 15 Unaute, Stephena innkuanpihte chu Akaia gam a gah masapeen ahi va, misiangthoute natohna diingin akipia uh chih na he uhi. 16 huchibangte kawm leh mi chin keiuh hung tohpiha tonggimte kawma kituluut diingin ka hung ngeen hi. 17 Stephena, Fortunata leh Akaika hung chu ka kipaah hi, ajiahchu amah un na umlouh awng uh ahu uhi. 18 Ajiahchu amah un kei lungsim leh nanguh lungsim ahung suhhalhsah uhi. Hujiahin huchibang mite chu ahihna uh heetpih un.
Chibaibuuhna
19 Asia gam a kouhtuamte'n chibai ahung buuh uhi. Akuila leh Prisilla in a inn va kouhtuam kikhawmte toh Lalpa ah tahzetin chibai ahung buuh uhi. 20 Unaute zousiah in chibai ahung buuh uhi. Tawp siangthou in khat leh khat chibai kibuuh tuah un. 21 Kei Paul in hi chibai buuhna chu keimah khut ngeei a ka gelh ahi. 22 Mi koipouh in Lalpa Jesu alungsiat louh leh, haamse thuaahin um heh. Maranatha. 23 I Lalpa uh Jesu Khrist hehpihna na kawmvah um hen. 24 Khrist Jesu a ka hung lungsiatna na bawnva kawmah um hen. Amen.
Chibaibuuhna
1 Paul, Pathian deihlama Jesu Khrist apostol leh i unaupa uh Timothi in, Korinth khua a um Pathian kouhtuamte leh Akaia gam pumpi a misiangthoute zousiah kawmah: 2 Pathian i Pa uh leh Lalpa Jesu Khrist kawma kipan hehpihna leh hamuanna na kawmvah um hen.
Kipaahthu Soina
3 Pathian leh i Lalpa uh Jesu Khrist Pa, lainatna Pa leh hamuanna zousiah Pathian chu paahtawiin um hen, 4 Pathian in ahung hamuanna khu mah a ei un zong hahsatna a um photmahte i hamuan theihna diingun, Pathian in eiuh hahsatna zousiah ah ahung hamuan hi. 5 Ajiahchu Khrist gimthuaahnate i tungva adimleet bangin, i hamuanna uh zong Khrist jiahin adimleet hi. 6 Huleh gimthuaaha ka um un chu, nanguh hehnepna diing leh hutdamna diingin ahi a, huchu gimthuaahna ka thuaah bang uh kuhkaltaha thuaahzohna diingin aphatuam hi. Ahihlouhleh hamuana ka um uh leh, nanguh hehpihna diing leh hutdamna diingin ahi. 7 Huleh ka gimthuaah uh hung thuaahpihtute na hih bangva, ka hehnepna uh tangtute zong na hi uh chih ka heet jiahun, na tungva ka kinepna uh adet hi. 8 Ajiahchu unaute, Asia gam a ka tungva gimthuaahna hung tung chu na heetlouh uh ka deih sih uh: huchu hin zong kineem zou nawn lou khopa um in, ka haatna un azoh guallouh puaahgih nasatah guanin ka um uhi. 9 Hizongleh keiuh jeh keiuh kimuang loua misi kaithouthei Pathian ka muan jawhna diingun tahzetin si diinga thupuuhkhumna chu keiuh ah ka kineih uhi. 10 Ama'n chu huchituha sihna nasatah lah apat ahung hundohta a, huleh ahung hundoh zing hi; ahung hundoh nalai diing chiin Amah ah ka kineem uhi. 11 Mi tampite apat silpiaah ka muh jiah va, mi tampi in keiuh luanga kipaahthu asoi theihna diingun, nang un zong keiuh diinga na hung haamteisahna un na hung panpih uhi.
Khualzin Diing Tawpkiitna
12 Ka kisuanna uh chu hikhu ahi: ka sialephaheetna un ahung heetpih, huchu tahsa pilna daan hilou himahleh Pathian hehpihna jaal jaw a khovel a siangthou leh Pathian laua chihtaha ka gamtat uh khu ahi a, nanguh kawmah huchibangin ka gamta diaahkhol uhi. 13 Ajiahchu na sim va huleh pom zong na pom uh khu loungaal na kawmvah thu dang bangma ka gial sih uhi. Huleh atawp donga na heetsiam zing uh ka kineem hi 14 (tua heetna chiang na hung neih bangun), Lalpa Jesu Ni chiangin nanguh zong ka kisuanpihte uh na hih bangun, keiuh chu na kisuanpihte uh ka hi diing uhi. 15 Huleh hi gintaatnatah neiin phattuamna nihveina na tan theihna diingun na kawmva hung masat ka tum hi. 16 Huleh nanguh hung tawn malamin Makedonia gam a chiah suaahin, Makedonia gam apat ha kawmva hung kiitm, nang un Judia gam lama ka chiahna diing ah hung thah ulehchin ka chi hi. 17 Hujiahin huchibang ka ngaihtuah laiin, ngaihsamtaha bawl ka hiaimah? Ahihlouhleh ka sil guanggalhna ah tahsalam daana "Hi hi" chih leh "Hilou hilou" chihkhawm lehleh ka hiaimah? 18 Hizongleh Pathian aginum bangin, nanguh lama ka thu uh chu Ahi chih leh Hilou chih ahi khawm sih hi. 19 Ajiahchu na lahva keiuh, keimah ngeei leh Silvana leh Timothi in, a thu ka Soi uh Pathian Tapa Jesu Khrist chu Ahi chih leh Hilou chih ahi khawm sih a, Amah ah chu Ahi chih ahijaw hi. 20 Ajiahchu Pathian thuchiam zousiah chu Amah ah Ahi chih ahi a, hujiahin Pathian loupina diingin Amah ah Amen ka chi uhi. 21 Huleh Khrist a nanguh toh hung sukiptu leh keiuh thau hung nuhtu chu Pathian ahi. 22 Ama'n chu chiam zong ahung chiamchihta a huleh i lungtang vah khaamna Hagau ahung peta hi. 23 Himahleh ka hinna tunga heetpihtu diingin Pathian ka kou ahi, huchia nanguh ka hung hawi theihna diingin Korinth ah ka hung nawn sih hi. 24 Na ginna tungva thu hung neihkhum hilouin, na kipaahna diingva na tohpihte uh ka hijaw uhi; ajiahchu ginna ah na dingdet uhi.
1 Hizongleh nanguh lung suna diingin na kawmvah ka hung kiit sih diing chih keimah ngeei in kanathupuuhtahi. 2 Ajiahchuke'n nanguh hung sulungkham leng, ka suhlungkhamte mah chihlouh koi in ahiai kei hung kipaahsah diing? 3 Huleh na kawmvah hi thu mah ahi ka hung gelh, huchilou inchu, ka hung chiangin ka kipaahna diingte lahah lungkhamna ka mu jaw kha diing hi, ka kipaahna chu na bawnva kipaahna hi diingin ka muang ngaala. 4 Ajiahchu lunggimna leh lungkhamna nasatah apat mittui tampi toh ka hung gelh ahi; suhlungkhama na um louh va, hizongleh na tungvah lungsiatna nasatah ka nei hi chih na heet jawhna diingun ka gial jaw hi.
Silsual Bawlpa Ngaihdamna
5 Hizongleh mi koipouh in lungkhamna asiam leh, kei ahung sulungkham sih a, hizongleh soiuang taahluat louhin, bangtan ahain na bawnun ahung sulungkham hi. 6 Huchibang mi a diingin chu mi tampi in apiaah uh hi gawtna ahuntawh hi. 7 Huchiin na ngaihdam diing va huleh na hamuan jawh diing uh ahi, huchilou inchu huchibang mi chu alungkham taahluatna in atuumzou kha diing hi. 8 Huchi ahih jiahin amah lama na lungsiatna uh hesah thah diingin ka hung hasot hi. 9 Hukhu jiah mahin zong ka gial ahi, huchu sil zousiah a thu na man uh leh na manlouh uh ka heetchianna diingin. 10 Bangma pouha mi na ngaihdam uh chu, ke'n zong ka ngaidam hi. Ajiahchu sil bangpouh ka ngaihdam leh, hi ka ngaihdam mi chu nanguh jiahin Khrist ma ah ka ngaidamta hi. 11 Huchilou inchu Setan in eiuh ah hun lemtaang amu kha diing hi, ajiahchu a guuha a lungtupte i haih sih uhi.
Tanchinpha Jiaha Thuaahna leh Gualzohna
12 Huleh Khrist tanchinpha soi diinga Troas khua a ka hung laiin Lalpa'n kei diingin kot khat ahung honsah hi. 13 Ka unaupa Tita ka muhlouh jiahin ka ha amuang thei sih hi; hizongleh amahuh hakhiain hu apatin Makedonia gam ah ka chiahta hi. 14 Hizongleh Khrist a gualzohna hung pe zingtu leh keiuh zanga Amah heetna gimnamtuui mun chin a phuangdohtu Pathian kawmah kipaahthu um hen. 15 Ajiahchu hutdama umte leh mangthaaite lahah Pathian a diingin Khrist gimnamtuui ka hi uhi. 16 Khenkhat kawmah sihna diinga sihna gimnam ka hi va, huleh khenkhat kawmah hinna diinga hinna gimnam ka hi uhi. Huleh hi silte diinga chingzou koi ahiai? 17 Ajiahchu Pathian thu chu mi tamtah in sumkawlveina a azat bangun kei un chu ka zang sih uhi; hi saangin chihtahna toh Pathian apat bang jawin Khrist ah Pathian mitmuh in thu ka soi uh ahi.
Gingtute Lehkhathon toh Tehkaahna
1 Keiuh leh keiuh kisoiphat pankiit ka hita viaimah? Ahihlouhleh kei un midangte bangin na kawmvah soiphatna lehkha ahihlouhleh nanguh apat soiphatna lehkha poimoh ka hi viaimah? 2 Nanguh chu ka lehkhathot uh ka lungtang va gelh, mi zousiah heet leh sim na hi uh; 3 Khrist lehkhathot, keiuh etkol, lehkhatui a gelh hilou a, Pathian hing Hagau a gelh, suangpeeh a gelh hiloua tahsa lungtang peeh a gelh na hijaw uh chih chiantaha suhlat ahi. 4 Huleh huchibang muanna chu Khrist jaalin Pathian lamah ka nei hi. 5 Sil bang aha khat keiuh apat ahi chi diingin keiuh chauhin ka chin sih va, ka chitna uh chu Pathian apat ahijaw hi.
Thuhun Thah Loupina
6 Ama'n chu thuhun thah natongtute hithei diingin keiuh ahung chinsah a, lehkhajeem a natongtute hilouin hizongleh Hagau a natongtute diingin ahijaw; ajiahchu lehkhajeem in asulum a, hizongleh Hagau in chu hinna apia hi. 7 Suangpeeh a sut a gelh, sihna natohna chu hichilawma loupina toh ahung a, hu loupina hung kiam hiaihiai chu Mosi maaitanga aum jiaha Israel tate'n a maaitang aet ngam louhva ahihleh, 8 Hagau natohna chu bangchiin aloupijaw lou thei diai? 9 Ajiahchu siamlouh tansahna natohna bawn aloupi inchu, dihtatna natohna chu nasatahin aloupijaw hi. 10 Ajiahchu loupina ummasa chu loupina nasajaw in akhuumkheel jiahin hilam thu ah loupina anei nawn sih hi. 11 Ajiahchu ahung kiam hiaihiai bawn aloupia ahihleh, aum zing khu chu nasatahin aloupijaw seem hi. 12 Hutobang kinepna ka neih jiahun, hangtaha thusoi ngamna ka nei uhi. 13 Huleh akiam hiaihiai vaah chu Israel tate'n aet tang theihlouhna diingva a maaitang puan khuh Mosi bang chu ka hi sih hi. 14 Hizongleh a lungsim uh suhkhauhin aum hi. Ajiahchu tuni tanin Thuhun Lui asim chiangun hu maaikhuhna chu hawhkhiah louhin aum zing hi, hu maaikhuhna chu Khrist chauh a suhbeia um ahih jiahin. 15 Hizongleh tuni tanphain Mosi Lehkhabu asim chiangun a lungtang vah maaikhuhna aum zinghi. 16 AhihvaanginLalpalama akihei chiangun hu maaikhuhna chu laahmang ahi diing hi. 17 Tuin Lalpa chu Hagau ahi; huleh Lalpa Hagau umna phot ah jaleenna aum hi. 18 Hizongleh eiuh chu i bawnun, maai khuhlouha liimlang a en bangin Lalpa loupina chu en zingin, hu meel bang ngeei po diingin loupina apat loupina ah ahung sulimdang zing hi, Lalpa Hagau apat bang ngeeiin.
Leibeel a Gou
1 Hujiahin hehpihna ka tan bangva hi natohna ka tan jiahun ka lungke sih uhi. 2 Hizongleh sil zumhuai kiphualte ka paampaihta uh; doha lungsim a hing louin, Pathian thu mi heemna a zang louin, hizongleh Pathian mitmuh ah thutah suhlatna jiahin mi chin sialepha heetna ah keiuh leh keiuh adih hiin ka kisoipha jaw uhi. 3 Hizongleh ka tanchinpha uh phuala aum leh, mangthaaite kawmah ahi phuala aum. 4 Pathian lim batpih Khrist tanchinpha loupina vaah in amahuh asalhvaah theihlouhna diingin, hi khovel pathian in agingtaloute lungsim asuhmialsahta hi. 5 Ajiahchu keiuh leh keiuh ka kisoithang sih va, Khrist Jesu chu Lalpa ahi chih leh keiuh chu Jesu jiahin na suaahte ka hi uh chih ka soi jaw uhi. 6 Ajiahchu mial lah apat a vaah hung vaahdoh diing, chia thupetu chu Pathian ahi a, Ama'n Jesu Khrist meel a Pathian loupina heetna vaah ahung piaahna diingin ka lungtang uh asalhvaahta hi. 7 Hizongleh silbawltheihna haattah chu kei uh apat hilou a, Pathian apat ahihjawh theihna diingin hu gou chu lei beel ah ka keem uhi. 8 Lehlam lehlam ah nehthopin ka um va, hizongleh ka chimoh nai sih uhi. Lungdongin ka um va, hizongleh ka lungke tuan sih uhi. 9 Suhduhdahin ka um va, hizongleh taihsanin ka um sih uhi; sawn puuhin ka um va, hizongleh suhmangin ka um sih uhi. 10 Jesu hinna ka sapum va suhlat-a aum theihna diingin, bangchihlaipouhin Jesu sihna ka sapum vah ka po lehleh uhi. 11 Ajiahchukatahsauh sithei a Jesu hinna zong suhlat-a aum theihna diingin keiuh ahing nalaite chu bangchihlaipouhin Jesu a diingin sihna kawmah piaahkhiahin ka um uhi. 12 Huchiin keiuh ah sihna in atong a, hizongleh nanguh ah chu hinna in atong hi. 13 "Ka gingta a hujiahin ka soita hi," chih gelh bangin, ginna hagau ngeei ka nei jiahun, kei un zong ka gingta va hujiahin ka soi uh ahi; 14 ajiahchu Lalpa Jesu kaithoukiitpa in keiuh zong Jesu toh ahung kaithou diing a, nanguh toh a maaima ah ahung tut diing chih ka he uhi. 15 Ajiahchu mi tampi tunga hawmjaaha um hehpihna in Pathian loupina diinga kipaahthu soina aluangleetsah theihna diingin, sil zousiah chu nanguh phattuamna diinga um ahi.
Ginna a Hinna
16 Huchihjiahin ka chau sih uhi; ka polam mihing uh kiam hiaihiai zongleh, ka sunglam mihing uh chu ni chin a siamthahin aum zing hi. 17 Ajiahchu mitphetkaal sung chauh ka gimthuaahna uh jaangtakhat in kumtuang loupina gih tungtuang jaw ahung bawlsah zing hi. 18 Sil muhtheihte enlouin, hizongleh sil muhtheihlouhte ka enj aw uhi. Aj iahchu sil muhtheihte chu tomtakhat sunga diing ahi a, hizongleh sil muhtheihlouhte chu kumtuang a diing ahijaw hi.
1 Bangjiahin ahiai i chih leh hi puanbuuh, i lei inn uh suhsiatin um mahzongleh, Pathian apat khut a bawl hilou kumtuang inn det vaan ah i nei uh chih i he uhi. 2 Ajiahchu vaan apat i inn diing uh silhthuahsaha um uut mahmahin hi puanbuuh sungah i maau zing uhi. 3 Huchibanga silhthuahsaha i um inchu, saguaahin i um sih diing uhi. 4 Ajiahchu eiuh hi puanbuuh a umte chu puaahgih puain i maau zing uhi, silhloua i um uut jiah uh hilouin, silhthuahsaha i um uut jiahun ahijaw hi, huchia sithei chu hinna in avalhzoh theihna diingin. 5 Huleh hikhu diinga eiuh hung siamtu chu Pathian ahi a, huleh khaamna Hagau hung petu zong Amah ahi. 6 Huchiin bangchihlaipouhin muangtahin i um uhi, sapum inn a i um laisiah uh Lalpa inn a umlou i hih uh hein. 7 Ajiahchu muh theiha pailouin, ginna in i pai jaw uhi. 8 Muangtahin i um va, ahi, sapum a umloua Lalpa kawma um i uut jaw tham uhi. 9 Huchihjiahin inn ah umin umlou zonglehhang, Amah kipaahpih jawng hih chu tuppeenin i nei uhi. 10 Ajiahchu mi chin in a sapum a asilbawlte asia apha abawl bangbanga amuh theihna diingin Khrist vaihawmna touphah ma ah i bawnun i ding diing uhi.
Khrist Lungsiatna leh Siltup
11 Hujiahin Lalpa lauhuai daan hein mite ka jawl teeiteei uhi; hizongleh Pathian kawmah suhlatin ka um va, huleh na sialepha heetna va suhlat-a ka um uh zong ka kineem hi. 12 Ajiahchu na kawmvah ka hung kisoipha kiit uh ahi sih, hizongleh lungtang a hiloua apolaang a kisuangte kawma dawnna na neih theihna diingun keiuh jiaha kisuan theihna hunlemtaang hung pia ka hijaw uhi. 13 Ajiahchu ka ngol uh leh, Pathian a diingin ahi a; ka pil uh leh, nanguh diingin ahi. 14 Ajiahchu mi zousiah sih luanga mi khat asih inchu, mi zousiah si ahita hi chia ka ngaihtuah jiahun, Khrist lungsiatna in ahung sawl teeiteei hi. 15 Huleh a hingte zong amahuh diinga ahin nawn louh va, asih luangva si a thoukiitpa a diinga ahin jawhna diingun Amah chu mi zousiah diingin asi ahi. 16 Huchihjiahin tukalsiah chu tahsa lamah kuamah ka he nawn sih uhi. Tahsa daanin Khrist anaheta zongleh ung, tuin chu hutobangin ka he nawn sih uhi. 17 Hujiahin mi koipouh Khrist a aum inchu, silsiam thah ahita hi; sil luite abeita a, ngai un, sil zousiah ahung thah vehta hi. 18 Huleh sil zousiah chu Pathian apat ahi a, Ama'n Jesu Khrist jiahin Amah toh kilemin ahung bawl a, ka kawmvah kilepna natohna ahung pia hi. 19 Huchiin Pathian chu Khrist a umin, khovel Amah toh kilemin abawl a, a tatsualnate uh tatsualna a sehsah louin, ka kawmvah kilepna thu ahung kolsahta hi. 20 Hujiahin kei uh chu Khrist palaite ka hi va, Pathian in kei uh manga nanguh ahung nget bangin, Pathian toh kilem un, chiin Khrist luangin ka hung ngeen uhi. 21 Ajiahchu Amah ah Pathian dihtatna i hung hih theihna diingun, sual mawngmawng helou Amah chu Pathian in eiuh jiahin sualin abawlta hi.
1 Huleh keiuh Amah toh tongkhawmte'n Pathian hehpihna chu phattuamna beia na muh louhna diingun ka hung hasot uhi. 2 Ajiahchu Ama'n, "Hun kipaah huai ah ka hung ngaikhia a, hutdamna ni ah ka hung panpih hi," achi hi. Ngai un, tu hun kipaah huai ahi; ngai un, tu hutdamna ni ahi.
Paul Hahsatna Thuaahte
3 Ka thunatohna uh dema aum louhna diingin sil bangmah ah puuhna diing ka bawl sih uhi. 4 Himahleh Pathian thunatongtute ka hi uh chih sil zousiah ah ka suchian uhi: kuhkal mahmahna ah bang, hahsatna ah bang, taahsapna ah bang, lungkhamna ah bang, 5 jeepna ah bang, suangkul taanna ah bang, buaina ah bang, tohgimna ah bang, ihmut louhna ah bang, an ngawlna ah bang; 6 sianthouna in, heetna in, thuaahtheihna in, chitna in, Hagau Siangthou in, lungsiatna dihtah in, 7 thutah thu in, Pathian silbawltheihna in, jiatlevei a dihtatna gaalvan in, 8 zahbawlna leh zahbawllouhna in, soisiatna leh soiphatna in; mi heemtute banga ngaihin, mi dihtah hingaalin; 9 mi heetlouhin, minthangtah hingaalin; si diing bangin, huleh ngai un, ka hing uhi; vuaahthop bangin, thah chu hilouin; 10 lungkhamtah bangin, kipaah zing ngaalin; genthei bangin, mi tampi suhausa ngaalin; bangma neilou bangin, huleh sil zousiah nei ngaalin. 11 Aw nanguh Korinthte, na kawmvah kihongtahin ka soi va, ka lungtang uh ka hong lian uhi. 12 Nanguh ka hung khaah uh ahi sih a, himahleh nanguh ngeei in na hung lainatna uh na khaah uh ahijaw hi. 13 Huleh tate kawma soi bangin ka soi ahi, nanguh ka hung piaah banga na hung piaah theihna diingun, nang un zong na lungtang uh hong lian un.
KisusiangthouDiinga Ngetna
14 Gingloumite toh kituaahlouin ngawngkol pokhawmin um sih un. Ajiahchu dihtatna leh dihtatlouhna in bang kikopna anei ei? Huleh mial leh vaah in bang kithuahna anei viai? 15 Huleh Khrist leh Belial in bang kituaahna anei viai? Ahihlouhleh gingtu leh gingloumi in bang tankhawm anei viai? 16 Huleh Pathian biahinn leh milemte in bang kilemna anei viai? Ajiahchu nanguh chu Pathian hing biahinn na hi uhi. Pathian in, "Amahuh ah ka teeng diing a, amahuh lahah ka vaahleh diing a; huleh a Pathian uh ka hi diing a, amahuh ka mite ahi diing uh," achih bangin. 17 Hujiahin, "A lahva kipan hung pawtdoh unla, atuamin um un, Lalpa'n achi. Huleh sil sianglou khoih sih un, huchiin ka hung pom thei diing hi. 18 Huleh nanguh diingin na Pa uh ka hi diing a, nanguh chu ka tapate leh ka tanute na hi diing uh, Bangkimbawlthei LALPA in achi," achih bangin.
1 Hujiahin unau deihtahte, hi thuchiamte i neih jiahun, Pathian launa a sianthouna su-bukimin, tahsa leh hagau bolh-hohna zousiah apat i kisusiangthou diing uhi.
Kouhtuamte Kisiiha Lungheina
2 Keiuh hung pom un. Koimah alam louin ka bawl sih uh, koimah ka suse sih uh, koimah ka heembawl sih uhi. 3 Nanguh siamlouh tansahna diinga hi thu ka soi ahi sih; ajiahchu i sih leh si khawm a, i hin leh hing khawm diingin ka lungtang vah na teeng uh chih tumain ka soita hi. 4 Nanguh lama thu ka soi ngam daan aloupi a, nanguh a ka kisuanna aloupi hi. Lungmuanna in ka dim a; ka gimthuaahna zousiah vah nasatahin ka kipaah ahi. 5 Ajiahchu Makedonia gam ka hung tun tin, ka tahsa un khawldamna anei sih a, lehlam lehlam ah suhgimin ka um jaw uhi. Polam ah kihaunate aum a, sunglam ah launate aum hi. 6 Hizongleh lungkete hamuantu Pathian in Tita hungna jiahin ahung hamuanta hi. 7 Huleh amah hungna jiah chauh hilouin, ama'n nanguh a hamuanna aneih daan, nang un kei na hung ngaih daan uh, na hung hasiatpih daan uh, kei diinga na phattuamngaih daan uh ahung hilh phetin ahung hamuangsahta a, huchiin ka kipaah seemta hi. 8 Ajiahchu keima'n ka lehkhathot in hung sulungkham zongleng tuin ka kisiih sih hi, anakisiihta himahleng. Ajiahchu hu lehkhathot in nanguh tomtakhat sung chauh ahung sulungkham chih ka he hi. 9 Tuin chu ka kipaah ahi, suhlungkhama na um jiahuh hilouin, na lungkhamna un kisiihna ahung tutjaw jiahin ahi. Ajiahchu nang un kei uh jiaha manna bangma na tan louhna diingva Pathian deihjawnga suhlungkhama um na hi uhi. 10 Ajiahchu Pathian deihjawnga lungkhamna in hutdamna umna diingin kisiihna atun a, huchu adahhuai sih hi; hizongleh khovel lungkhamna in chu sihna atun hi. 11 Ajiahchu ngai un, Pathian deihjawnga lungkhamna ngeei in nanguh ah bang atun ei en un: bang thanopnate, dihtatna deih jiaha bang lunghihlouhnate, bang launate, bang lunggulhnate, bang phattuamngaihnate, bang thudih bawl deihnate atun eimah! Hi silte zousiah ah na siang uh chih na suchianta uhi. 12 Huchiin na kawmvah gial zongleng, adihlou bawlpa jiah aha ahihlouhleh dihloutaha thuaahpa jiaha ka gelh zong ahi sih hi, hizongleh na tungva ka phattuamngaih daan uh Pathian mitmuh a na kawmva suhlat-a aum theihna diinga ka gelh ahijaw hi. 13 Hujiahin na hamuanna vah ka hamuangta uhi. Na bawnva Tita lungsim na tohhalhsah jiahun, amah kipaahna ah ka kipaah tungtuang uhi. 14 Ajiahchu Tita kawma nanguh ka hung kisuanpihna photmah ah suhzumin ka um sih hi. Hizongleh thutah a sil zousiah na kawmva ka soi bangun, nanguh tungtaang Tita ma a ka hung suanna uh zong thutah ahi ngeei hi. 15 Huleh nanguh na bawnva na thuman daante uh, lau leh kittling puma amah nana saan daante uh ageeldoh chiangin, a lungsung ah nanguh ahung lungsiatna azual deuhdeuh hi. 16 Hujiahin sil zousiah a na tungva muanna ka neih jiahin ka kipaah hi.
Silphal Diinga Hasotna
1 Huchiangleh unaute, Makedonia gam a kouhtuamte tunga Pathian hehpihna piaaha um chu ka hung hesah uut uhi: 2 huchu suhgimna je-etna nasatah laha a kipaahna uh kichindaan leh a jawn mahmahna va kiphalna ahauh daan uh ahi. 3 Ajiahchu ahihzoh bangun, huleh ahihzoh saangva zong nasajawin uuttahin apia uh chih ka heetpih hi. 4 Amah un hi hehpihna silpiaah chu pomsah diingin leh misiangthoute panpihna natohna a atel theihna diingun hah ngetin ahung ngeen uhi. 5 Huleh hichu ka na lamet bang uh hilouin, Pathian deihlamin amahuh mahmah Lalpa kawmah leh keiuh kawmah akipe masa phot uhi. 6 Huchiin tuma a apattaah banga hu hehpihna chu na lahva bawlzou diingin Tita ka ngeen uhi. 7 Hujiahin silbangkim a na hauh bangun, ginna ah, thusoitheihna ah, heetna ah, phattuamngaihna zousiah ah leh keiuh na hung lungsiatna va na hauh bangun, hi hehpihna ah zong na hauhna diing uh ngaihtuah un. 8 Thupiaah bangin chu ka soi sih a, midangte phattuamngaihna tungtawna na lungsiatna uh tahjia etna diingin ka soi jaw hi. 9 Ajiahchu i Lalpa uh Jesu Khrist hehpihna chu na he uh, a gentheihna jiaha na hung hauhsat theihna diingun, Amah chu hausa mahzongleh, nanguh jiahin ahung gentheita hi. 10 Huleh hitah ah ka ngaihdaan ka soi hi: Nang un kum khat paita a hikhu bawl diinga nana kipat uh chauh hilouin, bawl diing nana lunggulh him jiahun hichu nanguh diingin ahoih ahi. 11 Hujiahin tuin bawl taangtung un, uut diinga kipeihna aum banga, na neih bang jeelva na piaah kim theihna diingun. 12 Ajiahchu uutna lungsim aum masat phot leh, mi a neihlouh daan dungjui hilouin a neih daan dungjuia pomsah ahi. 13 Ajiahchu midangte thadamtaha um a, nanguh gihtaha um diing hung chi ka hi sih; 14 hizongleh kibatgualna diingin ka chi ahijaw hi, huchia tu huntah a na neih vaal uh chu amahuh taahsap awnghuhna ahung hih a, amahuh neih vaal zong nanguh taahsap awnghuhna ahung hih theihna diingin ahi, huchia kibatgualna ahung um theihna diingin. 15 "Alakhawmtam in avaalin anei sih a, alakhawmtawm in lah atasam tuan sih," chih gelh bangin.
Tita leh Midangte Natohna
16 Hizongleh nanguh diinga ka phattuamngaihna toh kibanga Tita lungtang a phattuamngaihna umsahtu Pathian kawmah kipaahthu um heh. 17 Ajiahchu keiuh ngetna apom chauh hilouin, amah mawnga phatuamngai a, amah uutthu a na kawmva hung ahi. 18 Huleh Tita toh unaupa khat, tanchinpha lam thu a kouhtuam zousiah in asoiphat uh, ka hung sawl uhi. 19 Huleh huchi chauh zong hilouin, amah chu kouhtuamte'n keiuh toh hi silpiaah toh zinkhawm diinga aguat uh zong ahi a, hu silpiaah chu Lalpa ngeei loupina diing leh na lungsim kipeih daan uh suhlatna diinga kei un ka guanggalh uh ahi a, 20 hi silpiaah tamtah ka hawmna vah koima'n ahung dem louhna diingin ka pilvaang uhi. 21 Lalpa mitmuh chauh ah hilouin, mihing mitmuh ah zong dihtaha bawl ka ngaikhawh uhi. 22 Huleh amahuh toh i unaupa uh ka sawl va, amah chu sil tampi a aphattuamngaihdaan tamveitah ka muchianta va, tu diahin na tungva tahsanna liantah aneih jiahin phatuam angai nasa seem ahi. 23 Tita tungtaang thu ahihleh, amah hi nanguh lam thu a ka kithuahpih leh ka natohpih ahi. Huleh i unaute uh ahihleh, kouhtuamte thupotute ahi va, Khrist loupina ahi uhi. 24 Hujiahin amahuh kawm leh kouhtuamte ma ah, na lungsiatna uh heetchianna leh nanguh ka hung suanna uh chuensahun.
1 Ajiahchu misiangthoute diinga panpihna toh kisai na kawmva ka hung gelh angai sih hi. 2 Bangjiahin ahiai i chih leh na lungsim kipeih daante uh ka he a, hu thu ah Akaia gam kipeihsa a aumna kum khat ahita, chiin Makedonia gam mite kawmah ka hung suang a, huleh na phattuamngaihna un mi tamjawte asuthathou hi. 3 Ahihvaangin hichilam thu a nanguh ka hung suanna athawn ahih louhna diingin unaute ka hung sawl hi; huchia ka soi bangtaha kipeihsa a na um theihna diingun; 4 huchilou inchu Makedonia gam a mi khatpouh kei toh hungin, nanguh kimansalouin hung muta leh ung, nanguh soi louh, keiuh zong nanguh ka hung suanna lamvah ka mualphou kha diing uhi. 5 Hujiahin tuma a nana chiamsa uh silpiaah chu laahsah thoh hilou a, phaltaha pe jaw a, mansa diama na koihna diingun, ahun main unaute chu na kawmva hung masa diingin hasot ngaiin ka ngaihtuah hi.
Pathian Kipaahpih Thohlawm
6 Hizongleh hichu ka soi ahi: Atheh tawm in a-at tawm diing a, atheh tam in a-at tam diing hi. 7 Phallou sasa a, ahihlouhleh piaahlouh theihlouha ngaia pelouin, mi chin in a lungtang a atup bangjeelin pia heh, ajiahchu Pathian in kiphaltaha petu chu alungsiat hi. 8 Huleh Pathian in hehpihna zousiah na tungvah ahung vuh thei hi, huchia nanguh bangchihlaipouha sil hoih zousiah a buchinga um zing a, nna hoih chinteng na toh theihna diingun. 9 "Ama'n ahawmjaah a, migentheite kawmah apia a, a dihtatna chu kumtuangin aum zing hi," chih gelh bangin. 10 Huleh athehtupa kawma haichi petu leh neeh diinga tanghou hung pepa in, na haichi theh diing uh hung piain, apungsah diing a, huleh na dihtatna gahte uh akhangsah diing hi. 11 Na silphalna jiahun bangkim ah suhhauhsatin na umta va, hukhu ngeei in keiuh tungtawnin Pathian kawmah kipaahthu soina aumsah hi. 12 Ajiahchu hi natohna in misiangthoute taahsap awng ahuhsah chauh ahi sih a, Pathian kawma kipaahthu soina tamtah ah aluangleet hi. 13 Hi natohna suhchetna tungtawnin, Khrist tanchinpha na phuanna va na thumanna jiah uh leh amahuh leh mi zousiah tunga na kiphalna jiahun, amah un Pathian apaahtawi uhi. 14 Huleh amah un zong nanguh diinga ahung haamteisahna jiahun, nanguh a Pathian hehpihna loupitah um khu jiahin ahung ngai mahmah uhi. 15 A silthawnpiaah soiseeng guallouh jiahin Pathian kawmah kipaahthu um hen!
Paul in a Natohna Agupna
1 Huleh na lahva nunneem leh na um louhna va khauh kei, Paul in, Khrist nunneemna leh jaidamna in ka hung ngeen ahi. 2 Hizongleh tahsa daan banga gamta a keiuh hung ngaihtuah khenkhatte tunga khauh diing ahi chia ka ngaihtuah banga, na kawmva ka um chianga huchia ka khauh louhna diingin ka hung ngeen hi. 3 Ajiahchu tahsa in um mahleh ung, tahsa daan in ka dou sih uhi. 4 Ajiahchu ka gaaldouna gaalvan uh chu tahsa daan ahi sih a, kulhpi dettahte suhchimna diinga Pathian a silbawltheihna ahijaw hi. 5 Suangtuahnate leh Pathian heetna doudaala kisangkoihna chintengte ka supuuh va, ngaihtuahna chinteng Khrist thumanna suaahin ka pui uhi. 6 Huleh na thumanna uh suhbukim ahih chianga thumanglou zousiah gawt diingin kimansain ka um uhi. 7 Nang un sil apolama kilatdaan a en na hi viaimah? Mi koipouh in Khrist a hia amah leh amah akimuan a ahihleh, hichu ama'n ngaihtuah kiit heh, amah Khrist a ahih bangin keiuh zong Khrist a ka hi uhi. 8 Ajiahchu nanguh suhsiatna diing hilouin, khantouhna diing jawa Lalpa hung piaah ka thuneihna uh neukhat suang deuh zong leng, ka zum sih diing hi, 9 huchia lehkhathonte a nanguh hung suhlau tum banga ka kilat louhna diingin. 10 Ajiahchu amah un, "A lehkhathonte jaw agihin akhauh a, hizongleh amun ah tahsa a aumna ah ajawngkhaal a, a thusoi zong amuhsithuai hi," achi uhi. 11 Huchibang mi in hikhu ngaihtuah heh, na kawmva ka umlouh laiva lehkha thugelh a ka hihna bangbang un, na kawmva ka um chiangun zong natoh ah ka hi diing uhi. 12 Ajiahchu keiuh chu amah leh amah kiphatte lahah ka kisimtel ngam sih va, amahuh toh teh zong ka kitehkaah ngam sih uhi. Hizongleh amahuh chu amahuh leh amahuh kitehtuahin, huleh amahuh leh amahuh akitehkaah va, heetsiamna beiin aum uhi. 13 Hizongleh keiuh chu ka tehna hun vaal un ka kisuang sih diing uhi, hizongleh Pathian hung guatsah, nanguh zong huap diinga tehna hu bangjeelin ka kisuang jaw diing uhi. 14 Ajiahchu nanguh kawm hung tungpha lou banga keiuh hung kigolhsau talua ka hi sih uhi; ajiahchu Khrist tanchinpha toh nanguh kawm tan ka hungta uhi. 15 Ka tehna vaal va kisuang hilouin, chih chu midangte tohsa a kisuang louin, hizongleh na ginna uh akhan dungjuiin na lahva ka kizatna bial uh nasatahin na hung keehletsah diing uh chih kinepna ka nei uhi, 16 huchia na gam kallam va tanchinpha ka soi theihna diingun, huleh midang bialsung a natohsa tunga ka kisuang louhna diingun. 17 Hizongleh, "Akisuang phot chu LALPA ah kisuang heh. " 18 Ajiahchu amah leh amah kisoipha chu pomin aum sih a, hizongleh Lalpa'n asoiphat mi chu pom ahijaw hi.
Paul leh Apostol Dihloute
1 Ka ngol deuhna ah nang un na hung thuaah theih uh ka deih hi, huleh na hung thuaah thei ngeei uhi. 2 Ajiahchu Pathian thangsiatna in na tungvah ka thangsia hi; Ajiahchu Khrist kawtoa nungaah siangthou banga ka hung piaah theihna diingin na pasal diing uh khat ka hung hualsah hi. 3 Hizongleh guul in a doha zanga Evi aheem bangin, Khrist kawma na kipiaahna uh tahna leh sianthouna apat na lungsim uh suhsiatin aum kha diing chih ka lauthawng hi. 4 Ajiahchu koiaha khat ahung a ka soi louh uh Jesu dang asoi leh, ahihlouhleh na tan ngeilouh uh hagau dang na tan va, ahihlouhleh na tan ngeilouh uh tanchinpha dang na tanva ahihleh, napombaih talua uh ahi! 5 Ajiahchu apostol lianpeente saanga nengtakhat a zong neujawin ka kingaihtuah sih hi. 6 Himahleh thusoi ah siam sih zong leng, heetna lamah chu ka huchi sih hi. Tahzetin huchu sil bangkim ah na lahvah ka sulangta uhi. 7 Na kawmva Pathian tanchinpha athawna ka soi jiaha, tawisanga na um theihna diingva kakingaihngiamna ah sil bawlsual ka hiaimah? 8 Nanguh nna ka hung tohsah theihna diingin amahuh apat loh lain kouhtuam dangte chu a neih uh ka laahsah hi. 9 Huleh na kawmva ka um laia ka taahsapin koimah a diingin puaahgih ka hi sih hi, ajiahchu Makedonia gam apat hung unaute'n ka taahsap awng teng ahung huhsah uhi. Huleh sil bangkim ah nanguh puaahgih hilou diingin ka kibawl a, huchibangin ka kibawl jeel diing hi. 10 Khrist thutah keimah a aum bangin, Akaia gam sunga hi ka kisuanna chu koima'n ahung sutawp sih diing hi. 11 Bangjiahin? Nanguh ka hung lungsiat louh jiahin maw? Pathian in ahe hi! 12 Hizongleh a kisuanna silte va keiuh banga ngaiha aum theihna diingva hunlemtaang deihte apat hunlemtaang ka laahmang theihna diingin ka bawl chu ka bawl jeel diing hi. 13 Ajiahchu huchibang mite chu Khrist apostolte hia kibawlthuh, natongtu heemhaatte, apostol tahloute ahi uhi. 14 Huleh hichu alimdang sih hi, ajiahchu Setan ngeei zong vaah angel in akibawlthuh hi. 15 Huchihjiahin a natongtute zong dihtatna natongtute banga akibawlthuh uh leh, huchu sil limdang ahi sih hi. A tawpna uh chu a natoh bang dungjuiun ahi diing hi.
Paul leh amah Doutute Kitehkaahna
16 Ka soi kiit ahi, koima'n mingol in hung ngaihtuah sih heh. Ahihlouh vaanglah leh, keimah neukhat beeh ka kisuang theihna diingin mingol bangin hung pom un. 17 Ka thusoi chu Lalpa soi diing bangin ka soi sih a, hi kisahtheihna ah ngoltah bangin ka soi jaw hi. 18 Mi tampi tahsa lama akisuan jiahun kei zong ka kisuang diing hi. 19 Ajiahchu nanguh mipil na hi va, mi ngolte kipaahtahin na thuaah zou jeel uhi! 20 Ajiahchu mi khat in suaahin hung bawl leh, hung ne gam leh, amahuh lawhna diingin nanguh hung zang leh, amah leh amah kiliansah leh, na maai vah hung beeng leh, na thuaah zou jeel uhi. 21 Ka zumna diingin haatlou ka hi uh chiin ka soi ahi! Hizongleh mingol bangin ka soi ahi, midang hangsanna ah chu kei zong ka hangsan ahi. 22 Hebraimi ahi uh maw? Kei zong ka hi. Israelmi ahi uh maw? Kei zong ka hi. Abraham chihaahte ahi uh maw? Kei zong ka hi. 23 Khrist natongtute ahi uh maw? (Mingol bangin ka soi ahi.) Kei ka hi seem hi; tohgimna bang ah atamjaw seemin, vuaahna bang ah atuang avaalin, suangkul taanna bang ah mun seemin, sihna bang ah tampivei. 24 Judate lahah vuaahna sawmli chinna diing khat a sam ngaavei ka tuaah hi. 25 Thumvei chiangpum a jeepin ka um a, khatvei suang a sehin ka um a, thumvei kuang siatna ka tuaah a, jaan khat leh suun khat tuithuuh laiah ka um hi. 26 Khualzinna ah tampivei, tui tunga lauhuai ah, suamhaatte laha lauhuai ah, ka chipihte laha lauhuai ah, Jentelte laha lauhuai ah, khopi sung a lauhuai ah, gamdaai a lauhuai ah, tuilianpi a lauhuai ah, unau tahloute laha lauhuai ah, 27 tohgimna leh hahsatna ah, tampivei jaan ihmut louhna ah, gilkialna leh dangtaahna ah, tampivei an ngawlna ah, dap thuaahna leh saguaahna ah ka um hi. 28 Polam a hu silte chih louh zong kouhtuamte zousiah ka ngaihtuahna ni chin a hung net zing ka tungah aum hi. 29 Kua haatlouhna ka thuaahpih louh aum ei? Koi puuhna ka lungnatpih louh aum ei? 30 Kisuang diing mawng hitaleng, ka haatlouhna lam silte ka suang diing hi. 31 Pathian leh i Lalpa uh Jesu Khrist Pa, kumtuanga paahtawia um in ka juau sih chih ahe hi. 32 Damaska ah kumpipa Areta nuai a gamoptupa'n kei hung matsah tumin Damaskate khopi aveengsah hi. 33 Huleh kotta ah bawm in kulh pangah ahung khaikhesuh va, huchiin a khut apat ka suaahta hi.
Paul Kilaahna Silmuh Loupite leh a Ling
1 Keiuh diingin kisuang phatuam sih mahzongleh, silmuh leh Lalpa kilaahna ka hung soi diing hi. 2 Kum sawmleli paita in Khrist a um mi khat ka he a, sapum in ahiai aum ka he sih a, sapumlou in ahiai aum ka he sih a, Pathian in ahe hi, huchibang mi khat vaan thumna tan ah laahtouhin aum hi. 3 Huleh huchibang mi khat chu ka he a, sapum in ahiai sapum louin ahiai aum ka he sih a, Pathian in ahe hi. 4 Amah chu Paradis ah laahtouhin aum a, soi guallouh thu avaja a, huchu mihing diinga soi phallouh ahi. 5 Huchibang mi chu ka suang diing hi; kei mah ka hihleh ka haatlouhna loungaal bangmah ka suang sih diing hi. 6 Ajiahchu kisuan uut mahleng, mingol ka hi sih diing hi, ajiahchu thutah soi diing ka hi ngaala. Hizongleh mi koiaha in ahung muhdaan bang leh ka thu ajaah bang saanga ahung ngaih loupi louhna diingin kakideeh diing hi. 7 Huleh kilaahnate anasat beeh jaala ka kingaihsang taahluat louhna diingin Setan thupotu ahung sun diing ling khat ka tahsa ah ahung kipia hi, huchilou inchu ka kingaisang talua kha diing hi. 8 Kei apat achiahmangna diingin hi sil jiahin Lalpa kawmah thumvei ka ngeen hi. 9 Huleh Ama'n ka kawmah, "Ka hehpihna chu nang a diingin ahuntawh hi, ajiahchu ka haatna chu haatlouhna ah suhbukimin aum hi," achi hi. Hujiahin Khrist silbawltheihna ka tunga aum theihna diingin, kipaahtahin ka haatlouhnate ka suang jaw diing hi. 10 Hujiahin haatlouhnate ah, housiatnate ah, taahsapnate ah, suhduhdahnate ah, hahsatnate ah Khrist jiahin ka lungkim hi. Ajiahchu ka haatlouh huntah chiangin ka haat hi.
Paul in Korinthte Angaihtuahna
11 Kisuangna in mingol ka hung suaahta a, nang un huchilou theilouiii na hung bawl uhi. Ajiahchu na hung soiphat jawh diing uh ka hi, aj iahchu bangma hi sih zongleng, apostol lianpeente ka phaah lelhna bangma aum sih hi. 12 Tahzetin apostol hihna chiamchihnate chu kuhkalna chinteng in, chiamchihnate in, silmahte in, silbawl loupite in na lahvah bawl ahi. 13 Ajiahchu kei nanguh diinga puaahgih ka hihlouh chih louhngaal, bang lamah ahiai kouhtuam dangte saanga nuainungjaw a na um uh? Hi suhkhelhna hung ngaidam un! 14 Ngai un, na kawmva hung diinga ka kipeihna a thumveina ahita hi. Huleh nanguh diingin puaahgih ka hi sih diing hi, ajiahchu na sil neih uh hawl ka hi sih a, nanguh hung hawl ka hijaw hi. Ajiahchu tate'n nulepa a diinga akholkhawm diing uh ahi sih a, hizongleh nulepate'n tate diinga akholkhawm diing uh ahijaw hi. 15 Huleh ke'n nanguh ka hung lungsiat seem a, nang un na hung lungsiat louh seem vaangun, ke'n chu na hinna uh diingin kipaahtahin ka neih chu ka seeng diing a, ka kiseeng bei diing hi. 16 Hizongleh ahi hi hitaleh, nanguh puaahgih ka hung guan sih hi. Ahihvaangin lungsim siama doha a ka hung mat na hi uhi! 17 Na kawmva ka hung sawlte laha koiaha zangin, nanguh apat punna ka siam kha eimah? 18 Tita chu na kawmva hung diingin ka ngeen a, huleh amah toh unaupa khat ka hung sawl hi. Tita in amah lawhna diingin nanguh ahung zang mawleh? Hagau kibangiri ka gamta khawm sih viaimah? Kalsuan kibanga chiah hilou ka hi viaimah? 19 Na lahva keiuh leh keiuh dihna thu kisoi a hung ngaihtuah na hi uh maw? Khrist ah Pathian ma ah thu ka soi uhi. Hizongleh deihtahte, sil zousiah chu nanguh bawlhoihna diingin ka bawl uhi. 20 Ajiahchu ka hung chianga nanguh ka hung muh diing banga ka hung muhlouh khaah diing leh kei na hung muhlouh diing bangva na hung muhkhaah diing uh ka lau hi; huchilou inchu kinialnate, kithangsiatnate, thangtawmnate, kikhinnate, kisoisiatnate, kiguuhhounate, uanghaamnate leh buainate ahung um kha diing hi; 21 huchilou inchu, ka hung kiit chiangin ka Pathian in na lahva ahung sumualphou diing a, huleh tuma a anatasual a himahleh a sianglouhna uh leh a kingaih thaanghuaina uh leh a huuhna silchiinte vapat kisiihlou mi tampite ka lungngaihkhum kha diing hi.
A Hungna Diing Thu a Hilhlawhna
1 Hichu na kawmva ka hung a thumveina diing ahi. "Heetpihtu nih ahihlouhleh thum kam ah thu chinteng suhchetin aum diing hi." 2 Tumain na kawmva ka um anihveina laiin ka soita a, huleh tuin umlou hizongleng malaia sil anabawlsualte leh midang zousiah kawmah ka hung gial ahi, huchia ka hung kiitin chu koima ka hawi sih diing hi, 3 nang un keimah a thusoi Khrist heetchianna na hawl jiahun, Amah chu nanguh lamah haatlou ahi sih a, hizongleh na lahvah silbawltheitah ahijaw hi. 4 Ajiahchu haatlouhna jiahin kilhbehin um mahleh, Pathian silbawltheihna in ahing zing ahi. Ajiahchu keiuh zong Amah ah haatlou ka hi va, hizongleh Pathian silbawltheihna in nanguh lamah Amah toh ka hingkhawm diing uhi. 5 Ginna ah na umna viai mah nanguh leh nanguh kienkhia unla, nanguh mimal kienchian un. Ahihlouhleh nanguh leh nang un Jesu Khrist nanguh ah aum chih kiheet lou na hi viaimah?-etkhiahna a chingzoulou tahzet na hih louhngaal uh leh. 6 Hizongleh keiuh chu etkhiahna a chinglou ka hi sih uh chih na he diing uh chih ka kineem hi. 7 Huleh silgilou na bawllouhna diingun Pathian kawmah ka ngeen hi, huchu keiuh etkhiahna a chinga ka kilat theihna diing uh ahi sih a, etkhiahna ah keiuh chinglou bangin kilang mahleh ung, a dih na bawl theihna diing uh ahijaw hi. 8 Ajiahchu thutah a diinga bawl chihlouh chu thutah kalhin bangma ka bawl thei sih uhi. 9 Ajiahchu keiuh ka haatlouh va nanguh na haat chiangun ka kipaah uhi. Huleh na hoih bukimna diingun zong ka ngeen hi. 10 Hujiahin suse diing hilou a, bawlhoihna diing jaw a Lalpa hung piaah thuneihna dungjuiin na kawmva ka um chianga khauhtaha ka hung bawl louhna diingin, na kawmva ka umlouh laiin hi silte ka hung gial ahi.
Thutawpna
11 Atawppeenin, unaute, kipaahtahin um un. Hoihbukimin um un. Hamuangtahin um unla, lungsim mun khat pua unla, kituaahtahin um un; huleh lungsiatna leh hamuanna Pathian na kawmvah aum diing hi. 12 Kitawpna siangthou in khat leh khat chibai kibuuh un. 13 Misiangthoute zousiah in nanguh chibai ahung buuh uhi. 14 Lalpa Jesu Khrist hehpihna leh Pathian lungsiatna leh Hagau Siangthou kipawlpihna na bawnva kawmah umta hen. Amen.
Chibaibuuhna
1 Paul, apostol in (mihing apat hilou, mihing vaanga zong hilou, hizongleh Jesu Khrist leh misi lah apat a Amah kaithoutu Pa Pathian vaanga hijaw in), 2 huleh ka umpih unau zousiahte'n, Galatia gam a kouhtuamte kawmah: 3 Pa Pathian leh i Lalpa Jesu Khrist kawm apat hehpihna leh hamuanna na kawmvah um hen, 4 Pathian leh i Pa uh deihdaan dungjuiin tulai hun giloutah lah apat ahung suahtaatsah theihna diingin Amah chu i sualnate uh luangin akipeta hi. 5 Pathian kawmah loupina kumtuang kumtuangin um zingta hen. Amen.
Tanchinpha Dang Umlou
6 Khrist hehpihna a nanguh hung koupa apat tanchinpha tuam a kintaha na kituan mei uh chu thumah ka sa hi, 7 huchu tanchinpha dang ahi sih; himahleh nanguh hung subuai leh Khrist tanchinpha ahilou jawnga hei uut mi hunkhop aum uhi. 8 Hizongleh keiuh hiin, vaan apat angel hitaleh, tanchinpha na kawmva ka soi uh loungaal tanchinpha dang mawngmawng na kawmva ahung soi aum leh, haamselohin um heh. 9 Tuma a ka soi mahbangun tuin zong ka soi jeel ahi, tanchinpha na muhsa peen uh loungaal tanchinpha dang mi koipouhin na kawmva ahung soi leh, haamselohin um heh. 10 Ajiahchu ke'n tuin mihing kipaahsah ahiai ka hawl, ahihlouhleh Pathian kipaahsah ahiai ka hawl? Ahihlouhleh mihing suhlungkim tum ka hiaimah? Mihing suhlungkim tum nalai hitaleng, Khrist suaah ka hi sih diing hi.
Paul Tanchinpha Mihing Apat Ahihlouh Daan
11 Hizongleh unaute, ka tanchinpha soi chu mihing deihdaan ahi sih chih ka hung hesah hi. 12 Ajiahchu mihing apat ka muh zong ahi sih a, mi hung hilh zong ka hi sih a, hizongleh Jesu Khrist hung kilaahna jiaha ka muh ahijaw hi. 13 Ajiahchu bangtobanga Pathian kouhtuamte tehguallouha suduhdah a, ka suhbei veh tum daan tuma a Juda sahkhua a ka umlaiin ka tungtaang na jata uhi. 14 Huleh ka pulepate tawndaan a phatuam ka ngaih diaahkhol jiahin Juda sahkhua lamah zong ka chipihte laha ka khangual tampi ka na khuup hi. 15 Hizongleh ka nu gil sunga ka umlai apat hung koihtuamtu leh a hehpihna a hung koutu Pathian in, 16 Jentelte laha a tanchinpha ka soi theihna diinga a Tapa chu keimah a kilaahsah pha asah tahin; hulaiin mihing koima ka dong pah sih a, 17 Jerusalem a kei saanga apostol hi masate kawmah zong ka chiahtou sih a, hizongleh Arabia gam ah ka chiah jaw a, huin Damaska ah ka kilehkiitta hi. 18 Huin kum thum nungin Jerusalem ah Peter kimuhpih diingin ka chiahtou a, a kawmah ni sawmlengaa ka vaum hi. 19 Hizongleh Lalpa sanggampa Jakob chihlouh apostol dangte khatbeeh ka mu sih hi. 20 (Tua na kawmva ka thu gelhte, tahzetin, Pathian ma ah ka juau sih hi.) 21 Hu nungin Syria gamkaih leh Silisia gam ah ka chiahta hi. 22 Huleh Judia gam a Khrist a um kouhtuamte meelheetlouhin ka na um nalai hi. 23 Hizongleh, "Tuma a eiuh hung suduhdahpa'n khatvei laia asuhmang sawm ginna tanchinpha chu tuin ataangkoupihta," chih thu chauh aja uhi. 24 Huleh amah un keimah jiahin Pathian apaahtawita uhi.
Paul Natoh Jerusalem a Pomna
1 Huin kum sawmleli nungin Barnaba toh Jerusalem ah ka chiahtou kiit a, Tita zong ka pui hi. 2 Huleh kilaahna jiahin ka chiah tou a, Jentelte kawma ka tanchinpha soi chu a kawmvah ka hesah hi, hizongleh mi zahumte chu atuamin ka hilhchian a, huchilou inchu bangchi aha in athawna taai ka hi kha diing hi. 3 Hizongleh ka tonpih Tita chu Grikmi ahihvaangin zehtansah teeiteeiin aum sih hi. 4 Hi zehtanna thu ahung um jiah chu suaaha ahung taansah theihna diing va, Khrist Jesu a jaleenna i neih uh enkhe diinga guuhsima hung luut unau tahloute jiah ahi. 5 Tanchinpha thutah chu na kawmva aum zing theihna diingin daahkaal khat sung jiang zong a thu nuai va kipeluut lou ka hi uhi. 6 Hizongleh mizahumte chu bangtobang hitaleh uh kei diingin aphatuam sih; Pathian in koimah deihsah tuam anei sih, ajiahchu mi zahumte'n bangma ahung behlapsah tuan sih uhi. 7 Hizongleh huchih naah saangin, zehtante diing tanchinpha Peter kawma kepsaha aum bangin zehtanlouhte diing tanchinpha chu ka kawmah kepsahin aum chih ahe uhi. 8 (Ajiahchu zehtante apostol hi diinga Peter a sil nasataha bawltu ngeei in, Jentelte apostol hi diingin keimah ah sil nasatahin abawl a), 9 khuam chiha heet Jakob, Kepha leh Johan in ka kawma hehpihna hung kipia aheet phetun, Jentelte kawma chiah diingin kei leh Barnaba chu kipawlkhawmna khut jiatlam ahung pia uhi, huleh amahuh zehtante kawma chiah diingin. 10 Amah un migentheite ka heetzing diing uh chauh adeih va, huchu ke'n zong bawl ka tup zing mawng ahi.
Paul in Peter Avauna
11 Hizongleh Antiok a Peter ahung tun tahin amah chu dem abaang jiahin a maaitang ah ka na nial hi. 12 Ajiahchu Jakob kawm apat mi koite aha ahung maun, ama'n Jentelte kawmah an ane veu hi; hizongleh amahuh ahung tahun zehtante alauh jiahin anungtawl a, aumtuamta hi. 13 Huleh Judami dangteng zong huchibangin amah toh alepchiah va, huchiin Barnaba nasan zong a lepchiahna va puimangin aumta hi. 14 Hizongleh tanchinpha thutah dungjuiin aum sih uh chih ka muhin, a bawnva ma ah, Peter kawmah, "Nang Judami hinapi a, Judate um banga umlou a, Jentelte um banga na um ngaal leh, bang diinga Jentelte khu Judamite um banga umsah tum haam na hiaimah?
Siamtansahna
15 "Jentel misualte hilou a, keiuh pianken a Judami mawnga piangte in, 16 daan thute bawl jiahin mi siamtangin aum sih a, hizongleh Jesu Khrist gintaat jiah chauhin siamtangin aum chih ka he va, kei un zong daan silbawl jiah hilouin, Khrist ginna jiaha siamtanga ka um theihna diingin Khrist Jesu chu ka gingta uhi; ajiahchu daan juih jiahin koimah siamtangin aum sih diing hi. 17 "Hizongleh Khrist a siamtan ka sawm lai ngeei va zong misualte ka na hih uh leh, Khrist chu sualna natongtu ahiaimah? Hilou hiai! 18 Ajiahchu keima'n ka sil suhsiatte bawlpha kiitta leng, kei leh kei daan botsetu a kisiam ka hi diing hi. 19 Ajiahchu Pathian lama ka hin theihna diingin, kei chu daan jiahin daan lamah ka sita hi. 20 Khrist toh kilhbehin ka umta a, keimah hing hi nawn louin, hizongleh Khrist keimah ah ahing ahijaw hi; huleh tua tahsa a ka hin chu ahung lungsiat a ka luanga kipepa, Pathian Tapa a ginna a hing ka hi, 21 Pathian hehpihna chu bangmalou ka suaahsah sih; ajiahchu daan jiaha siamtanna hung kuan ahihin chu, Khrist chu athawna si ahi diing hi," ka chi hi.
Ginna Ahihlouhleh Daan Juihna
1 Galatia mingolte aw, na lahva na mitmuh ngeeiva Jesu Khrist chu kilhbeha chiantaha suhlat hita a, hu thutah chu muanglou diinga koi in hung bumngol ahita ei? 2 Na lahva kipan hi chauh ka he nuam hi: daan thute bawl jiahin ahiai Hagau chu na muh uh, ahihlouhleh ginna thu na jaahva na gintaat jiahun? 3 Hichilawmin na ngol uh ahi maw? Hagau a pan zoutain, tahsa a suhbukim hi diing na hi uh maw? 4 Athawn ahih tahtah leh, sil huzahpi athawna thuaah na hi uh maw? 5 Huchiin daan na juih jiahva Pathian in Hagau hung pia a, na lahva silmah bawl ahi maw, ahihlouhleh na thujaah uh na gintaat jiahun? 6 "Abraham in Pathian agingta a, huchu amah diinga dihtatna a sehsah" ahih bangin. 7 Hujiahin ginna a umte chauh Abraham tate ahi uh chih he un. 8 Huleh Pathian Lehkhathu in, ginna jiahin Pathian in Jentelte siam atangsah diing chih helawhin, Abraham kawmah, "Nangmah ah nam zousiah vangpiaahin aum diing uh," chiin tanchinpha anasoita hi. 9 Huchi ahih jiahin ginna a umte chu gingtu Abraham toh vangpiaah khawmin aum uhi. 10 Ajiahchu daan silbawlte a um photmahte chu haamse nuaia um ahi uh; ajiahchu hichibanga gelh ahi, "Daan bu a bawl diinga kigial zousiah juizing lou chu haamsiatin aum uhi," chiin. 11 Hizongleh Pathian mitmuh ah koimah daan jaala siamtang aum sih uh chih alang chian hi, ajiahchu, "Midihtat chu ginna in ahing diing," chih ahi. 12 Huleh daan thu chu ginna jiahin ahi sih a, hizongleh, "Huchibanga bawltu chu hute ah ahing diing hi," chih ahijaw hi. 13 Khrist chu ei luanga haamsiat-a hung umin, daan thu haamsiatna apatin eite ahung tandohta hi, ajiahchu hichibanga gelh ahi, "Singdawn a khailup photmah chu haamse thuaah ahi uh," chiin, 14 huchia Abraham vangpiaahna chu Jesu Khrist jaala Jentelte tunga ahung um theih a, huchia eihaw in Hagau chiam chu ginna tungtawna i muh theihna diingun.
Abraham Kawma Thuchiam
15 Unaute, mihing daan in ka soi ahi: Hichu mihing thuhun chauh hitamahleh, suhkip ahihin chu, koima'n aphel ngei sih a, beh zong abehlap ngei sih hi. 16 Huleh Abraham leh a chihaah kawmah thuchiamte chu anakipia hi. Ama'n tampite soina in, "Chihaahte kawmah," achi sih a, mi khat tungthu soina in, "Na chihaah kawmah," achi jaw hi, huchu Khrist ahi. 17 Huleh hichu ka soi ahi, Pathian in Khrist a asuhkipsa thuhun chu kum za li leh kum sawmthum nunga hung um daan thu in thuchiam chu bangmalou suaah diingin asumang thei sih hi. 18 Gouluah diing chu daan thu jiah hitaleh, thuchiam jiah ahita sih diing hi, hizongleh Pathian in thuchiam jiahin huchu Abraham anapeta hi.
Daan Siltup
19 Ahihleh bang diinga daan thu um ahiai leh? Hichu thuchiam kipiaahnate kawma Chihaah ahung masiah in bohsiatna jiahin behlapsahin aum hi, huleh hichu angelte zanga palai khat khut a suhkip ahi. 20 Huleh palai chu langkhat chauh luanga palai ahi sih a, hizongleh Pathian chu khat ahi. 21 Ahihleh daan thu chu Pathian thuchiamte kalh ahiaimah? Hilou hiai! Hinna pethei daan thu anakipia hitaleh, dihtatna chu daan thu jiahin aum ngeei diing hi. 22 Hizongleh Jesu Khrist gin jiaha thuchiam chu a gingtate akipiaah theihna diingin, Pathian Lehkhathu in mi zousiah chu sualna nuaiah akhaahkhumta hi. 23 Hizongleh ginna ahung tun main daan thu nuaia kolin i na um va, ahung kiphuanglang diing ginna ah khaahkhumin i naum uhi. 24 Huchiin ginna jiaha siam i tan theihna diingin daan thu chu Khrist kawma hung puitu diing eiuh hung hilhtu ahung hita hi. 25 Hizongleh ginna ahung tun nungin hilhtupa nuaiah i um nawnta sih uhi. 26 Ajiahchu na bawnun Khrist Jesu ginna jiahin Pathian tate na hi uhi. 27 Ajiahchu Khrist a baptisma tang photmah chu Khrist a kithuam na hita uhi. 28 Hu ah chu Judami, Grikmi aum nawn sih a, saltaang leh jaleen zong aum nawn sih, huleh numei leh pasal zong aum nawn sih hi; ajiahchu na bawnun Khrist Jesu ah pumkhat na hita uhi. 29 Huleh Khrist a na hih un chu, Abraham chihaah, thuchiam dungjui a gouluah diingte na hi uhi.
1 Huleh hichiin ka chi hi, gouluahtu diing chu bangkim neitu hizongleh naupang ahih laisiah, suaah toh kilimdanna anei tuan sih hi. 2 Hizongleh a pa hun guat atun masiahin a dontute leh a enkoltute nuaiah aum jaw hi. 3 Huchibangmahin ei zong naupang i hih laiun khovel lam kithuhilhna meimeite nuaiah suaahin i naum uhi. 4 Hizongleh ahun biching ahung tun tahin, Pathian in a Tapa chu ahung sawl a, daan nuaiah numei apat ahung piang hi, 5 daan nuaia umte tankhe diingin, huchia ta a pomna i tan theihna diingun. 6 Huleh tate na hih jiahun Pathian in a Tapa Hagau chu "Abba, Pa," chia kikouin na lungtang sungvah ahung sawlta hi. 7 Hujiahin suaah na hi nawn sih a, ta na hijawta hi; huleh ta na hih leh, Khrist jaala Pathian gouluahtu diing zong nahi hi.
Galatiate Awlmohna
8 Huchi hitamahleh, hu hun laiin Pathian na heet maun, a pianken mawng va pathian hiloute nna nana tong uhi. 9 Hizongleh tua Pathian na hung heet nung va, ahihlouhleh Pathian heet mi na hung hihjawh nung va, bang diinga thubul jawngkhaal leh manlouhte suaah a luut kiit uut a, kiheikiit na hi viai? 10 Nite, hate, hunte leh kumte na tang veu uhi. 11 Bangchi ahain na tungvah ka tonggim thawn kha diing chih ka hung lausah hi. 12 Unaute, ka hung ngeen hi, keimah bangin um un, ajiahchu kei zong nanguh bangin ka um hi. Dihlouin na hung bawl kha het sih uhi. 13 Na kawmva tanchinpha ka soi masatnapeen chu ka tahsa haatlouhna tungtawnin ahi chih na he uhi. 14 Huleh ka tahsa a nanguh diinga je-etna um chu na musit sih va, nuai zong na nuai sih uh, hizongleh Pathian angel bang leh Khrist Jesu bang hialin na hung pom jaw uhi. 15 Ahihleh hampha na kisahna uh khoia um ahita ei? Ajiahchu hither hileh bawn, na mit uh kheidohin na hung pe hiai diing uh chih heetpihna ka hung nei hi. 16 Huchia thutah ka hung hilh jiahin na meelma uh hung hita ka hiaimah? 17 Amah un phatuamngaitahin nanguh ahung hawl va, hizongleh hoihna diingun ahi sih hi; nang un amahuh na hawl theihna diingva hung koihtuam tum ahijaw uhi. 18 Hizongleh bangchihtanin ahoih lama phatuamngaitaha hawla um zing chu ahoih hi, na kawmva ka um sung chauh hilouin. 19 Ka taneute aw, nanguh a Khrist siampichinga aum masiah nausuaah nat thuaahin ka hung thuaah kiit hi. 20 Tuin na kawmva um a, ka aw suah suhlimdang ka uut ngeei mei; ajiahchu na tung thu uh ka hung lauthawngpih hi.
Hagar leh Sarah
21 Hung hilh un, nanguh daan nuaia um uutte, daan thu ngaikhe lou na hi viaimah? 22 Ajiahchu hichibanga gelh ahi, Abraham in tapa nih anei a: khat chu a suaahnu toh ahi a, huleh khatpeen chu a suaahlounu toh ahi. 23 Hizongleh suaahnu toh peen chu tahsa daan a piang ahi a, suaahlounu toh peen chu thuchiam jiaha piang ahi a, 24 hichu tehkhinna ahi: Ajiahchu hi numei nihte chu thuhun nihte ahi uh: khat chu Sinai Taang apat sala taang diinga ta neinu ahi a, huchu Hagar ahi. 25 Ajiahchu Hagar chu Arabia gam a Sinai Taang ahi a, tulaia um Jerusalem toh kibang ahi a, huleh a tate toh sala taang khawm ahi uhi. 26 Hizongleh tunglam Jerusalem chu ajaleen a, huchu i bawnva nu ahi. 27 Ajiahchu hichibanga gelh ahi, "Nang, ta neiloua chiingnu, nuam in, nang nausuaah nat thuaahlou nu, ngaihtahin kikou doh in, ajiahchu pasal neinu saangin lungjuang nu in ta anei tamjaw hi." 28 Huchiin unaute, eiuh chu Isak banga thuchiam tate i hi uhi. 29 Hizongleh hulaia tahsa daan a piang in Hagau daan a piang asuhduhdah bangin, tuin zong huchi ahi. 30 Ahihvaangin Pathian Lehkhathu in bang ahiai asoi? "Suaahnu chu a tapa toh delhmang un, ajiahchu suaahnu tapa in suaahlounu tapa toh gou aluahkhawm sih diing hi," achi hi. 31 Huchiin unaute, suaahnu tate i hi sih a, suaahlounu tate i hijaw uhi.
Khristian Jaleenna
1 Hujiahin jaleen diinga Khrist in ahung jaleensahta na ah dingkip unla, huleh suaah ngawngkol ah taang kiit nawn sih un. 2 Ngai un, zeh na tan uh leh, Khrist chu nanguh diinga bangma phatuam lou ahi diing, chiin kei Paul in na kawmvah ka soi ahi. 3 Ajiahchu zehtan zousiah kawmah daan thu zousiah jui diinga bat nei ahi uh, chih ka hesahkiit hi. 4 Nanguh daan a siamtan tum pouhmahte, Khrist toh khenin na umta uh; hehpihna apat na puuhta uhi. 5 Ajiahchu kei un Hagau jaalin ginna a dihtatna kinepna chu kilawptahin ka ngaah uhi. 6 Ajiahchu Jesu Khrist ah zehtan leh zehtan louhin bangmah phattuamna anei sih a, hizongleh lungsiatna jiaha ginna natoh chu aphatuam hi. 7 Hoihtahin na taai uhi. Thutah jui lou diingin koi in ahiai nanguh ahung daal? 8 Hi phuutna chu nanguh hung koupa apat ahi sih hi. 9 Tol tawmtakhat in tanghou beupi ajeelsuaahhi. 10 Nangunlungdang na geel sih diing uh chih Lalpa ah ka hung muang hi; hizongleh nanguh hung subuaitu in, koi hitazongleh, atunga vaihawmna chu athuaah diing hi. 11 Huleh unaute, ke'n zehtan thu soi nalai ka hih leh, bang diinga suhduhdahna thuaah nalai ka hiai? Huchi ahihleh kros a kipalpuuhna chu suhbei ahita diing hi. 12 Nanguh hung subuaite kisaatkhe hiai mei leh uh kauuthi! 13 Ajiahchu unaute, jaleen diinga kouh na hi uh; na jaleenna uh tahsa uutna diinga lemtaanna in zang sih unla, hizongleh lungsiatna in khat leh khat nna kitohsah jaw un. 14 Ajiahchu, "Nangmah na kilungsiat banga na innveengte na lungsiat diing ahi," chih thupiaah khat ah daan thu zousiah suhbukimin aum hi. 15 Hizongleh na kikeih va, na kineeh tuah uh leh, pilvaang un, huchilou inchu khat leh khat na kisuhmang tuah kha diing uhi!
Tahsa Natohte
16 Huleh hi ka soi ahi, Hagau ah um un, huchiin tahsa uutna na supiching sih diing uhi. 17 Ajiahchu tahsa uutna in Hagau adou a, Hagau in tahsa adou hi; sil na bawltumte uh na bawl theihlouhna diingun, hite ehu akikalh tuah uh ahi. 18 Hizongleh Hagau puia na um un chu, daan nuaia um na hi sih uhi. 19 Huleh tahsa uutna silbawlte chu akilang chiang hi: hute chu, aangkawmna, kingaihna thaanghuai, thaanghuaina, huuhna kihdah huai, 20 milem biahna, dawi aisaanna, muhdahna, kihauna, thangsiatna, thangtawmna, mahni masialna, kikhenna, ginna dihloute, 21 deihgohna, tualthahna, zukhamna, eltol gualnop bawlna leh huchibang dang dangte ahi. Huchibang silbawltute'n Pathian lalgam aluah sih diing uh, chih tuma a ka hung hilhtaah bangmahin, ka hung hilh khawl hi.
Hagau Gah
22 HizonglehHagaugah ahihleh lungsiatna, kipaahna, hamuanna, thuaahtheihna,jaineemna,hoihna, ginumna, 23 thunuaigolhna leh kisuumtheihna ahi. Hichibangte kalhin daan aum sih hi. 24 Huleh Khrist a hi mite'n tahsa chu a lunggulhna leh a uutna toh akilhbehta uhi. 25 Hagau a hing i hih leh, Hagau mah ah i um diing uhi. 26 Khat leh khat kilang leh kithangsiat a um louin, i kiloupisah sih diing uhi.
Puaahgih Kidawn Diing
1 Unaute, mi koiaha a suhkhelhna a matdoha aum leh, nanguh hagau mite'n nanguh ngeei in zong heemna na tuaah kha diing chih ngaihtuahin, huchibang mi chu jaineemna lungsim neitahin tungding kiit un. 2 Khat leh khat na puaahgih uh kidawn chiat unla, huchiin Khrist daan juikim un. 3 Ajiahchu mi bangma hiloupi-a amah leh amah akingaihsang leh, amah leh amah akiheem ahi. 4 Hizongleh mi chin in amah natoh kietchian chiat jaw hen, huchiin midang tung hilouin, amah chauh tungah suan diing anei diing hi. 5 Ajiahchu mi chin in amah puaah chiat akipuaah diing hi. 6 Thu hilha umpa'n ahilhtu kawmah sil hoih zousiah hawm heh. 7 Heemin um sih un, Pathian chu muhsit gual ahi sih hi; ajiahchu mi'n atuh phot uh, humah chu a-at kiit diing uhi. 8 Ajiahchu tahsa lama tuhpa'n tahsa lam apat siatna a-at diing a, hizongleh Hagau a tuhpa'n chu Hagau apat kumtuang hinna a-at diing hi. 9 Huleh sil hoih bawl i chimtaah sih diing uh, ajiahchu i lungkiaah louh leh, ahuntahin i aat diing uhi. 10 Hujiahin hun lemtaang i neih bangjeelin mi zousiah kawmah sil hoih i bawl diing uh, adiaahkholin ginna a i innkuanpihte kawmah i bawl diing uhi.
Taaihilhna leh Vangpiaahna
11 Keimah khut ngeei a na kawmva jeem gol pipi a lehkha ka hung gelh en un. 12 Tahsa a kilat hoih tum photmahte'n zehtan diingin nanguh ahung sawl teeiteei uhi; huchia Khrist kros jiaha suhduhdahna athuaah louhna diing jiah chauhun ahi. 13 Ajiahchu amahuh zehtante nasan in zong daan ajui tuan sih va, hizongleh na tahsa va suan diing aneih theihna diingun zeh tan leh uh chin chih adeih uh ahijaw hi. 14 Hizongleh ke'n chu i Lalpa uh Jesu Khrist kros loungaal ka suang het sih diing hi, Amah jiahin khovel kei diingin kilhbeh ahita a, huleh kei khovel diingin kilhbeh ka hita hi. 15 Ajiahchu Khrist Jesu ah chu siamthahna loungaal, zehtan leh zehtanlouh zong, bangmah aphatuam sih hi. 16 Huleh hi daan banga umte zousiah tungah hamuanna leh khotuahna um hen, huleh Pathian Israelte tungah zong. 17 Tua kipanin koima'n hung subuai nawn sih heh, ajiahchu ka tahsa ah Lalpa Jesu chiamtehnate ka pua hi. 18 Unaute, i Lalpa uh Jesu Khrist hehpihna na hagau uh kawmah um hen. Amen.
Chibaibuuhna
1 Paul, Pathian deihjawng a Jesu Khrist apostol in, Ephesi khua a um misiangthoute leh Khrist Jesu a mi ginumte kawmah: 2 Pathian i Pa uh leh Lalpa Jesu Khrist kawm akipan hehpihna leh hamuanna na kawmvah um hen.
Khrist a Hagaulam Vangpiaahna
3 Vaan munte a Khrist a hagaulam vangpiaahna chinteng a vaang hung pepa i Lalpa uh Jesu Khrist Pathian leh Pa chu phatin um hen. 4 Ama'n a ma a siangthou leh soiseelbeia i um theihna diinga leilung siam ma a lungsiatna a Khrist a ahung na teel dungjui in, 5 Amah hung deihsahna hoih deihjawng dungjuiin Amah a diingin Jesu Khrist tungtawna ta a eite hung bawl diingin ahung na guatlawhta hi, 6 a hehpihna loupidaan paahtawi diingin, hu hehpihna chu alungsiat mahmahpa ah athawnin ahung peta hi. 7 A hehpihna hauhdaan dungjuiin a sisan jaalin Amah ah tatkhiahna, i sualnate ngaihdamna i nei uhi, 8 hu hehpihna chu Ama'n pilna leh lemheetna zousiah ah eite tungah akiningchingsah a, 9 Ama'n ahung deihsahna hoih dungjuia Amah a bawl atup bangin a deihjawng thukiphual i kawmah ahung hesah hi, 10 huchia hunbi khenna kim ahung tun chianga vaan a sil umte leh leitung a sil umte Amah ah, a bawna Khrist a khat a asuhtuahkhawm theihna diingin. 11 Amah deihjawng lemguatna dungjui a sil zousiah bawlpa tup banga guatlawhsa i hihtaah jiahun, Amah ah gouluahtute zong i hita uhi, 12 huchia eiuh Khrist a anakineem masate chu a loupina paahtawina i hih theihna diingun. 13 Thutah thu, na hutdamna tanchinpha uh na ngaihkhiah nungun Amah ging zong na gingtata va; Amah na gingtaat nungun chiamna Hagau Siangthou a chiamchih na hita uhi, 14 Hagau Siangthou chu Pathian loupina paahtawina diinga gou leisa tatkhiahna hun masiah a diinga i gouluah diing uh khaamna ahi.
Pathian Heetna Diinga Haamteina
15 Hujiahin ke'n zong Lalpa Jesu a na ginna uh leh misiangthoute zousiah tunga na lungsiatna uh ka na jaahin, 16 ka haamteinate ah na min uh louin, nanguh jiaha kipaahthu soi ka tawp sih hi, 17 huchia i Lalpa uh Jesu Khrist Pathian, loupina Pa in Amah heetna lam thu a pilna leh thuphuandohna hagau nanguh ahung piaah theihna diingin. 18 A kouhna kinepna bang ahiai chih leh misiangthoute a a goutan loupina hauhjia bang ahiai chih na heet theihna diingun, na lungsim mitte uh suhvaaha ahung um theihna diingin ka haamtei hi, 19 huleh a silbawltheihna haatna natoh dungjuia ei agingtate lama a silbawltheihna nasat daan bang ahiai na hung heet theihna diingun, 20 hu silbawltheihna chu Ama'n misi lah apat a Khrist akaihthoh a huleh vaan munte a a jiatlam a atousah laiin Khrist tungah azangta hi, 21 hi khovel chauh hilouin, khovel hung tung diing ah zong- lalnate, thuneihnate, silbawltheihnate, vaihawmnate leh min kiphuaah zousiah tunglam peh a Khrist atousah laiin azangta hi. 22 Huleh sil zousiah a keeng nuaiah Pathian in akoihta a, Amah chu sil zousiah tunga lutang hi diingin kouhtuam kawmah apeta hi, 23 hu kouhtuam chu a sapum ahi, Amah bangkim zousiah sudimpa taangchinna ngeei chu.
Pathian Lama Si
1 Huleh nanguh na bohsiatna uh leh na sualna vah na sita va, 2 hutah ah chu tuma laiin hi khovel daan bangin na um va, huihkhua a thuneitu lai, tua thumanglou tate a tong zingtu hagau daan bangin na um uhi. 3 Hute lahah eiuh zong tuma laiin i tahsa uutna ah, i tahsa leh i lungsim deihjawng supichingin i um va, huleh midangte banga pianken mawnga thangtawmna tate i na hi uhi.
Pathian Lama Hing
4 Hizongleh Pathian khotuahna haupa'n, a lungsiatna nasatah a eite ahung lungsiatna jiahin, 5 sual a si i hih lai ngeeiun zong Khrist toh ahung suhing khawmta a (hehpihna a hutdam na hi uhi), 6 huleh Amah toh ahung kaithou khawmta a, vaan munte ah Khrist Jesu ah ahung toukhawmsahta hi, 7 huchia hun hung tung diingte ah Khrist Jesu jaala i tunga a chitna a a hehpihna hauh nasatdaan ahung etsah theihna diingin. 8 Ajiahchu hehpihna jiaha ginna jaala hutdam na hi uh, hu zong nanguh a suaah ahi sih; Pathian silthawnpiaah ahi, 9 natoh jiahin ahi sih, huchilou inchu mi'n asuang kha diing uhi. 10 Ajiahchu Pathian in malai peha i umna diinga anaguatkholh Khrist Jesu a nna hoih tong diinga siam, Amah khutsuaah i hi uhi.
Khrist a Khat
11 Hujiahin nanguh tuma lam a, tahsa a Jentelte, tahsa khut a tan Zehtan achihte un Zehtanlouh ahung chihte uh, 12 huchih laia Khrist neiloua Israel khua leh tui toh kimat lou a, khovel a kinepna bei leh Pathian neiloua na um va, chiamna thuhunte laha mikhual a ana-um na hi uh chih hezing un. 13 Hizongleh tuin chu Khrist Jesu ah, nanguh ni danga gamlapi a umte, Khrist sisan jaalin suhnaiin na umta uhi. 14 Ajiahchu Amah hi i kilemna uh ahi a, i kikaal a kidaaidanna baang chu suchimin, nihte chu pumkhatin asiamta hi. 15 Ei mihing pawl nihte apat mihing thah khat Amah ngeei a asiam theihna diingin, kimeelmaatna umsahtu daan, a sung a thupiaahte leh thusehte zousiah a tahsa a sumangin, kilemna abawlta hi, 16 hulehhuchiaAma'n anih vakros tungtawna sapum khat a Pathian toh akilepsah theih a, humah a kimeelmaatna chu asuhlup theihna diingin. 17 Huleh Amah chu hungin, nanguh gamlapi a umte leh naitakhat a umte kawmah zong lemna tanchinpha ahung soi hi. 18 Ajiahchu Amah jiahin eihaw in Hagau khat a Pa kawma luut theihna i nei tuaah uhi. 19 Hujiahin tuin chu mikhual leh gamdangmi na hi nawn sih va, hizongleh misiangthoute toh khualetui hihna neite leh Pathian innkuante na hijawta uhi, 20 huleh Jesu Khrist ngeei chu aning a suang poimohpeen hiin, apostolte leh zawlneite innbul phuh tunga lam na hi uhi. 21 Amah ah chu inn pumpi kituaahtaha suhtuaha umin, Lalpa ah biahinn siangthou in akhangtou a, 22 Amah ah nanguh zong Hagau a Pathian teenna diinga lepkhawm na hi uhi.
Jentelte Kawma Paul Natoh
1 Hikhu jiahinkei, Paul, nanguh Jentelte diinga Jesu Khrist suangkul taang in, 2 nanguh diinga Pathian hehpihna keem diinga mohpuaahna piaah ka hi chih na jaahtaah ngeei uh leh, 3 huchu tuma a tomtakhat a ka gelh bangin thukiphual chu ka kawma Ama'n thuphuandoh tungtawna ahung heetsahtaah daan ahi a, 4 huchu na sim chiangun Khrist thukiphual ka heetdaan na hesiam diing uh; 5 huchu tulaia apostol siangthoute leh zawlneite kawma Hagau a heetsaha aum bangin, nidanglaiin mihing tate kawmah heetsahin aum ngei sih hi: 6 huchia Jentelte chu sapum khat a hiangtanpih gouluahpihte leh tanchinpha jiaha Khrist ah a thuchiam tanpihte ahih diing uh chu; 7 hukhu ah Pathian silbawltheihna natoh jiaha Pathian hehpihna silpiaah ka kawma hung kipeta khu dungjuiin kei chu hu tanchinpha natongtu a siam ka hita hi. 8 Jentelte kawma Khrist hauhsat daan hawldoh seeng guallouh thute soi diinga misiangthoute zousiah laha neupeen saanga neujaw kei kawmah hi hehpihna chu piaah ahi, 9 huleh kumtuang apat a Jesu Khrist manga sil zousiah siamtu Pathian a phuala um thukiphual kipawlkhawmna chu mi zousiah musah diingin; 10 huchia tua vaan munte a lalnate leh thuneihnate kawmah Pathian pilna chinteng kouhtuam tungtawna heetsaha aum theihna diingin, 11 Ama'n i Lalpa uh Khrist Jesu a asuhbuchingtaah a kumtuang silguat dungjuiin, 12 Amah ginna jiahin eihaw'n Amah ah haansanna leh muangtaha luut theihna i nei uhi. 13 Hujiahin nanguh diinga ka gimthuaahte jiaha lungke lou diingin ka hung ngeen hi, huchu na loupina uh ahi.
Ephesite Diinga Haamteisahna
14 Hikhu jiahin i Lalpa uh Jesu Khrist Pa ma ah ka khuupdin a, 15 lei leh vaan a innkuan chinteng in a min uh alaahnapa uh Amah ma ah, 16 huchia Ama'n a loupina hauhdaan bang jeela a Hagau jiaha mihing sungnung lama silbawltheihna a suhhaat-a nanguh ahung umsah theihna diingin; 17 huchia Khrist chu ginna tungtawna na lungtang va ateen theihna diingin; huleh huchia nanguh lungsiatna a zungha leh kiptaha um a, 18 misiangthoute zousiah toh a letdaan, a saudaan, a saandaan leh a thuuhdaante na heetchian theihna diing uh leh 19 Khrist lungsiatna heetphaah guallouh na hung heet va, Pathian taangchinna zousiah a suhdima na um theihna diingun ahi. 20 Huchiin eimah a tongjeel silbawltheihna dungjuia i nget leh i ngaihtuah saanga loupijaw a bawl theipa kawmah, 21 Khrist Jesu jiahin kouhtuam ah kumtuangin akhang akhang in loupina Amah kawmah umta hen. Amen.
Khrist a Kipumkhatna
1 Hujiahin kei, Lalpa a suangkul taang in kouha na umna uh toh kiphuutawha gamta diingin ka hung hasot ahi, 2 kingaihngiamna leh thunuaigolhna zousiah toh, thuaahtheihna toh, lungsiatna a khat leh khat kithuaahzoutuah chiat diingin, 3 lemna gui a kaan khawma Hagau kipumkhatna chu theihtawpsuaha vom tinten diingin. 4 Kouh na hih laiva kinepna khat a kouh na hih bangmahun sapum khat leh Hagau khat aum a; 5 Lalpa khat, ginna khat, baptisma khat, 6 bangkim tunga um leh bangkim a um, huleh nanguh zousiah a um Pathian khat leh mi zousiah Pa khat aum hi. 7 Hizongleh Khrist silthawnpiaah tehna dungjuiin hehpihna chu i kawm chiat ah piaahin aum hi. 8 Hujiahin, "Ama'n tunglam a akal touhin matte chu sal in apui a, huleh mihingte kawmah silpiaahte apia hi," chiin asoi hi. 9 (Huchiin, "Amah akaltou," chih chu lei mun ngiampeente ah amasainakumsuhtachihlouhbang dang chihna adiai? 10 A kumsuhpa chu sil zousiah asuhbukim theihna diinga vaan zousiah tungpeh a kaltoupa mah ahi.) 11 Huleh Ama'n khenkhatte chu apostol, khenkhatte zawlnei, khenkhatte sawlleh, khenkhatte pastor leh thuhilhtu hihna apia a, 12 huchu thunatohna diinga misiangthoute Mthopna diing leh Khrist sapum bawlhoihna diing ahi a, 13 ginna lama kituaahna leh Pathian Tapa heetna lama pichingna, Khrist taangchinna dungtan i phaah chiat masiah va diinga hung kipia ahi; 14 huchia thuhilhna huih chinteng in amuutleeng lehleh, mihingte lepchiahna a doha jeheemna in amuutleeng lehleh naupang i hih nawn louhna diingun. 15 Himahleh lungsiatna a thutah soiin, sil zousiah ah Amah a I khantouh theihna diingun Amah chu lutang ahi, Khrist ngeei chu. 16 Amah apatin sapum pumpi, guhtuah chinteng in sahiang dangteng natohna hoihtah apiaah daan dungjuia zopkhawm leh khaikhawma umin, sapum chu lungsiatna a kibawlhoihna diingin akhangsah hi.
Mihing Lui leh Mihing Thah
17 Hujiahin hi ka soi a; Lalpa ah ka hung hesah hi, lungsim umjebei pua a Jentelte ahin bangun um nawn sih un; 18 heetsiamna uh suhmiala umin, amahuh a heetlouhna aum jiah leh a lungtang uh angon jiahin Pathian hinna apat khenin aum uhi; 19 amah un heettheihna mawngmawng aneih nawn louh jiahun sil sianglou chinteng huaihamtaha bawl diingin huuhna kihdahhuai ah akipumpiaahta uhi. 20 Hizongleh nang un chu Khrist thu huchibangin najil sih uh, 21 Jesu a thutah aum banga Amah thu ja a Amah thuhilh a um na hih photmah uh leh, 22 na nidanglai umdaan va mihing lui, heemna duhgawlna dungjuia se deuhdeuh chu hawhkhia unla, 23 huleh na lungsim hagau uh suthah un; 24 huleh hu mihing thah, dihtatna dih leh siangthouna a Pathian batpiha siama um chu silhiin.
Mihing Thah Umdaan Diing
25 Hujiahin juau soi tawpsanin, "Mi chin in a innveengte kawmah thutah soi chiat heh," ajiahchu eihaw khat leh khat kihiangtuah chiat i hi uhi. 26 "Lungthah unla, sual chu sual sih un": na lungthahna uh ni in tum khum sih heh. 27 Diabol zong mun ot sih un. 28 Quta in gu nawn sih henla, hizongleh tasam kawma piaah diing aneih theihna diingin a khut a sil hoih bawlin tonggim jaw heh. 29 Na kam vapat thusia pawt sih henla, hizongleh a ngaikhetute kawma hehpihna apiaah theihna diingin khantouhna diingin thuhoih pawt jaw heh. 30 Huleh Pathian Hagau Siangthou sulungngai sih un, tatna ni a diinga Amah a chiamchih na hi uhi. 3 l1 Khaatnate, thangtawmnate, lungthahnate, haannate leh kisoisiatnate chu giitlouhna zousiah toh na lah vapat koihmangin umta heh. 32 Huleh khat leh khat kingaaina tuah chiat unla, lungneem unla, Pathian in Khrist a nanguh ahung ngaihdam bangin nanguh zong khat leh khat kingaidam tuah chiat un.
1 Hujiahin ta deihtahte bangin Pathian entontute hi un. 2 Khrist in ahung lungsiat a eiuh diinga Pathian kawma silpiaah leh kithoihna namtuui diinga akilat bangin lungsiatna ah um un.
Pathian Ngaihsahloute
3 Hizongleh misiangthoute umdaan diinga kilawm him in, kingaihna thaanghuaite leh bolhhohna zousiah, huaihamna toh, na lahvah lohkhaahin um sih heh. 4 Zahmohthute, thu ngolhuai a houlimte, chiamnuih thaanghuaite na lahvah um sih henla, hute saangin kipaahthu soi jaw un. 5 Ajiahchu nulepa kaal a thaanghuaite, siangthouloute leh mihuaihamte'n (hu mi chu milem bia ahi) Khrist leh Pathian lalgam ah tan mawngmawng anei sih uh chih na he uhi. 6 Mi kuamah in thu meimei pouh in hung heem sih uh heh, ajiahchu hi silte jiahin Pathian thangtawmna chu thumanglou tate tungah atung hi. 7 Hujiahin amahuh kithuahpih sihun. 8 Ajiahchu nanguh tuma laiin mial na hi va, hizongleh tuin chu Lalpa ah vaah na hita uhi. Vaah tate bangin um un, 9 ajiahchu Hagau gah ahihleh hoihna chinteng leh dihtatna leh thutah ah ahi, 10 Lalpa deihjawng bang ahiai chih enchian un. 11 Huleh gah neilou mial natohte toh kithuah khawmna nei sih unla, hizongleh adihlouh daan uh taahlang jaw un. 12 Ajiahchu aguuha a silbawlte uh chu asoi zong azumhuai hi. 13 Hizongleh sil zousiah adihlouh daan uh vaah in ataahlat chiangin muhtheihin aum uh, ajiahchu sil sulang photmah chu vaah ahi. 14 Hujiahin Ama'n, "Nang ihmu khanglou inla, misi lah apatin thou in, huchiin Khrist in ahung salhvaah diing hi," achi hi. 15 Huchiin na umdaan uh pilvaang un, mingolte banga umlouin hizongleh mipilte bangin um un, 16 nite ahoih louh jiahin hun chu aphatuam theipeenin zang un. 17 Hujiahin ngol sih unla, hizongleh Lalpa deihjawng bang ahiai chih hesiam jaw un. 18 Huleh zukhamin um sih un, hu ah chu kisuumlouhna aum hi; hizongleh Hagau a dimin um jaw un; 19 phatna late, Pathian late leh hagaulam late a nanguh leh nanguh kihouin, na lungtang vah Lalpa diingin ging kilawm toh la sa un; 20 bangkim tungah i Lalpa uh Jesu Khrist min in Pathian leh Pa kawmah kipaahthu soi ngiitngeet un; 21 Pathian launa ah khat leh khat kituluut tuah chiat un.
Khristian Innkuan
22 Jite haw, Lalpa kawma bangin na pasalte chiat uh nuaiah kituluut un. 23 Ajiahchu Khrist chu kouhtuam lutang ahih a, sapum Hundampa ahih bangin, pasal chu ji lutang ahi. 24 Hujiahin kouhtuam chu Khrist nuaia akituhluut mahbangin, jite chu silbangkim ah a pasalte chiat uh nuaiah kituluut uh heh. 25 Pasalte haw, Khrist in kouhtuam alungsiat a, a luang a akipiaah bangin, nang un zong na j ite uh lungsiat un, 26 huchia Ama'n a kouhtuam chu thu tungtawna tui a sawp a asawpsiang theihna diingin, 27 huchia kouhtuam buaahbaanglou, meelhemlou leh huchibang mawngmawng umlou, hizongleh kouhtuam siangthou leh soisiat bei loupitah chu Amah akipiaah theihna diingin. 28 Hujiahin pasalte'n chu amahuh sapum ngeei bangin a jite chiat uh alungsiat diing uh ahi. A ji lungsiatpa chu amah leh amah kilungsiat ahi. 29 Ajiahchu kuama'n amah tahsa ahaw ngei sih, hizongleh Lalpa'n kouhtuam achawm a adeihthoh bangin, achawmin adeihthoh jaw hi. 30 Ajiahchu eite chu Amah sapum leh tahsa leh guh hiangte i hi uhi. 31 "Hi jiahin pasal in a pa leh a nu anuse diinga huleh a ji ah abehta diing a, huleh anihun sapum khat ahung hita diing uh." 32 Hichu thukiphual loupitah ahi, hizongleh ke'n chu Khrist leh kouhtuam thu ahi ka soi. 33 Banghitaleh na lahva koipouhin amah akilungsiat bangin a ji lungsiat heh, huleh ji chu a pasal zahtaat diingin pilvaang heh.
Tate leh Nulepa
1 Naupangte haw, Lalpa ah na nulepate uh thu mang un, ajiahchu hichu sildih ahi. 2 "Na nu leh na pa zahtaat in," huchu chiam nei thupiaah masapeen ahi, 3 "huchiin nang a diingin ahoih diinga huleh leitung ah na damsawt diing hi." 4 Huleh nanguh pate haw, na tate uh sulungthah sih un, hizongleh Lalpa thununna leh thuhilhna in keem piching jaw un.
Suaahte leh Pute
5 Suaahte haw, Khrist thu na man bangun lau leh kiliing pumin lungsiangtahin tahsa lama na pute uh thu mang un; 6 mihing kipaahsah diinga mitmei chauh veeng hilouin, Khrist suaah banga lungtang apat Pathian deihjawng bawl jawin. 7 Mihing kawma hilouin, Lalpa kawma natong bangin thanuamtahin tong un, 8 ajiahchu mi chin in, suaah hiin suaahlou hitaleh, sil hoih abawl phot uh Lalpa kawm apatin humah amu kiit diing uh chih na he uhi. 9 Huleh nanguh pute haw, nanguh ngeei Pu zong vaan ah aum chih hein, huleh Ama'n mi deihsahtuam anei sih chih hein huchibangmahin a kawmvah bawl unla, vaubawl sih un.
Gingtute Gaalthuam
10 Atawppeenin ka unaute, Lalpa ah leh a haatna silbawltheihna ah haattahin um un. 11 Diabol jeheemnate na douzoh theihna diingun Pathian gaalthuam bukim in kithuam un. 12 Bangjiahin ahiai i chih leh i dou uh chu tahsa leh sisan ahi sih a, hizongleh lalnate, thuneihnate, hi khovel mial tunga vaihawmtute leh huihkhua a hagau gilou umte ahijaw uhi. 13 Hujiahin ni hoihlou a na douzohna diing uh leh na bawlzoh veh nungva zong na din theihna diingun Pathian gaalthuam bukim la un. 14 Hujiahinna kawng uh thutah a gaahin, dihtatna awmphaw silhin, 15 lemna tanchinpha kisahkhawlna chu na keeng va butin ding un. 16 Hi teng baanah, ginna lum la un, hukhu in giloupa thaltang kuang thei zousiah na sumit thei diing uhi. 17 Huleh hutdamna siihlukhuh la unla, huleh Hagau naamsau, huchu Pathian thu ahi a, la un. 18 Haamteina leh ngetna chinteng in bangchihlaipouhin Hagau a haamtei zinga umin, misiangthoute zousiah diingin thuaahhaatna leh ngetsahna toh ngaihsah zingin um un. 19 Huleh tanchinpha thukiphual hesah diinga hangsantah a ka kam ka kaah a, thusoitheihna piaaha ka um theihna diingin hung haamteisah un, 20 hu diinga palai siihkolbut ka hi ngaala, huchia hu lampang ka soi diing banga hangsantaha ka soi theihna diingin.
Thutawpna
21 Hizongleh nang un zong bangchibanga ka um leh ka tanchin na heet theihna diingun, Lalpa a unau deihtah leh thunatongtu ginum Tikika in bangkim nanguh ahung hesah diing hi. 22 Ka tanchin uh na heetna diing uh leh na lungtang uh ahung hamuan theihna diingin amah na kawmvah ka hung sawl ahi. 23 Pa Pathian leh Lalpa Jesu Khrist apat hamuanna, huleh lungsiatna toh ginna chu unaute kawmah um hen. 24 I Lalpa uh Jesu Khrist chihtahtaha lungsiatte zousiah kawmah hehpihna um hen. Amen.
Chibaibuuhna
1 Paul leh Timothi, Jesu Khrist suaahte'n, Philippi khua a um Khrist Jesu a misiangthou zousiah kawma leh kouhtuam houtute leh dikonte kawmah: 2 I Pa uh Pathian leh Lalpa Jesu Khrist kawm akipan hehpihna leh hamuanna na kawmvah um hen.
Haamteisahna
3 Nanguh ka hung geeldoh chintengin ka Pathian kawmah kipaahthu ka soi hi. 4 Na bawnva diinga ka haamteina chinteng ah kipaahtahin ka hung haamteisah hi, 5 akipat ni apat tuni tanpha a tanchinpha a na hung kipawlkhawmpihna uh jiahin, 6 na sungva nna hoih pantu in, Jesu Khrist ni tanphain huchu abawl mualsuaah ngeei diing chih dettahin ka muang hi. 7 Na bawnva tungtaang thu a keima'n hichibang lungsim ka neih chu adih mawng ahi, ajiahchu nanguh ka lungtang ah ka hung vom zing hi, ka kolbuhna leh tanchinpha suhkipna leh kepna ah hehpihna ka tanpihte na hih vehtaah jiahun. 8 Ajiahchu Jesu Khrist lainatna in nanguh na bawnun ka hung ngai mahmah chih chu Pathian in ahung heetpih ahi. 9 Huleh heetna leh heetkhenna zousiah a na lungsiatna uh ahung tam seemseem theihna diingin ka haamtei a, 10 huchia sil hoih mahmahte na hung heet theih va, Khrist ni tana mi chihtah leh dembei na hung hih theihna diingun, 11 Pathian loupina leh paahtawina diinga Jesu Khrist jaala um dihtatna gah a na dim jiahun.
Paul Thuaahnate
12 Hizongleh unaute, ka tunga siltungte hi tanchinpha dalh seemna diinga hung tung ahi chih na heet uh ka deih hi. 13 Huchiin Praitoriam veengtute zousiah leh midang zousiah kawmah Khrist a ka kolbuhna chu alangchianta hi. 14 Huleh Lalpa a unau tamtah in ka kolbuh jiahin lauloutah leh hangsantaha Pathian thu chu soi diingin kimuanna aneita uhi. 15 Khenkhatte'n chu thang-siatna leh kinialna jiahin Khrist ataangkoupih va, khenkhatte'n lungsim dihtah puain asoi uhi. 16 Amasate'n chu ka kolbuh a thuaahna behlapsah tumin lungsim dih toh hilouin, mahni masialna in Khrist ataangkoupih uhi. 17 Hizongleh anunungte'n chu tanchinpha gum diinga guat ka hihdaan hein, lungsiatna jiahin asoi uhi. 18 Bang akhawh ei? Lam chinteng ah aheem hiin atah hitaleh, Khrist chu taangkoupihin aumta himhim ahi. Huleh hutah ah chu ka kipaah hi. Ahi, ka kipaah diing hi.
Khrist a Hinna
19 Ajiahchu hikhuh in na haamteina uh leh Jesu Khrist Hagau panpihna jaalin ka suahtaatna ahung suaah ngeei diing chih ka he hi, 20 ka lamet mahmah leh ka kinepna dungjuiin bangma ah suhzumin ka um sih diing hi, hizongleh ka bawl zing bangmahin, tuin chu ka hin in zong, ka sih in zong, Khrist chu ka sapum ah hangsanna zousiah toh suhloupiin aum diing hi. 21 Ajiahchu kei diingin hin Khrist ahi a, sih chu punna ahi. 22 Hizongleh tahsa in hing leng kei diingin tohgimna gahsuahna ahi diing hi; ahiinlah khoipeen ka teel jaw diai chih ka he sih hi. 23 Ajiahchu nih saikaahin chih diing jaw saang helouin ka um hi, chiahmanga Khrist kawma um uutna ka nei a, huchu ahoihjaw mahmah hi. 24 Ahiinlah tahsa a um chu nanguh jiahin apoimoh jaw hi. 25 Huleh hi muanna neiin, na ginna uh khanletna diing leh na ginna va na kipaahna diingun nanguh zousiah toh ka um zing phot diing chih ka he hi. 26 Huchia na kawmva ka hung kiitna jiah a, kei diinga Jesu Khrist a na kipaahna uh atamseem theihna diingin. 27 Hunga nanguh ka hung muh ahiai, ahihlouhleh ka um louh a zong hagau khat a na dinkip daan uh leh lungsim khat nei a, tanchinpha thuginna a na pan daan uh tanchin ka jaah theihna diingin, na umdaan uh leh Khrist tanchinpha kituaahsah phot un, 28 huleh bangma ah na meelmate uh suhlauin um sih un, huchu amahuh diinga manthaaina chiamchihna ahi a, hizongleh nanguh diingin chu hutdamna ahi a, huchu Pathian akipan ahi. 29 Ajiahchu Khrist jiaha nang un Amah na gintaat chauh uh hilou a, Amah vaanga thuaah zong na thuaah diing uh ahi chih piaah na hi uhi, 30 keimah a hahsatna na muhsa bang uh leh tua keimah a hahsatna na jaah bang uh, nang un zong na nei uhi.
Khrist Kingaihngiamna
1 Hujiahin Khrist a kihehnepna bang, kilungsiatna hamuanna bang, Hagau a kipawlkhawmna bang, kilainatna leh kikhotuahna bang aum leh, 2 lungsim kibanga umin, lungsiatna kibang neiin, tup kibang leh lungsim mun khat neia umin ka kipaahna subukim un. 3 Kinialna aha, ahihlouhleh kiloupisahna jiah aha in bangmah bawl hi sih heh, hizongleh lungsim ngiamtahin mi chin in amah saangin midang hoihjawin ngai chiat heh. 4 Na lahva mi koipouh in amah lawhna diing chauh en sih henla, hizongleh midang lawhna diing zong en uh heh. 5 Khrist Jesu a zong um hi lungsim chu nanguh ah um heh, 6 Amah chu Pathian banga um hiin, Pathian toh kibanga um chu sil khiahlah huaiin angaihtuah sih a, 7 hizongleh Amah chu hung kikoihngiamin, suaah bangin ahung um a, mihing banga siamin ahung um hi. 8 Huleh mihing limlemeel bang hung puain, ahung kingaingiam a, sihna tanphain thu ahung mang hi, kros sihna ngeei chu. 9 Hujiahin Pathian in zong Amah chu nasatahin atawisangta a, min lahlah a min tungnungpeen apeta hi, 10 huchia vaan a umte, lei a umte leh lei nuaia umte khuup chinteng Jesu min a akhuupdin va, 11 huleh lei chinteng in Jesu Khrist chu Pa Pathian loupina diinga Lalpa ahi chih aphuan theihna diingun. Khovel a Vaah Banga Taanna 12 Hujiahin ka deihtahte, thu na man gige bangmahun, ka um peet chiang chauh hilouin, tua ka umlouh lai diaahkholin, lau leh liing pumin na hutdamna chiat uh tongdoh un, 13 ajiahchu Amah hung deihsahna hoih bawl diinga nanguh hung uutsahtu leh hung bawlsah diinga natongtu chu Pathian ahi hi. 14 Sil zousiah phun lou leh nial louin bawl un, 15 huehia khang paisual leh lungsim kawite laha khovel a vaahte banga na taannate uh laha dembaanglou leh poikhoihlou, soiseelbei Pathian tate na hih theihna diingun, 16 huchia Khrist ni chianga keimah in athawnin ka taai sih a, huleh athawnin ka tonggim sih chia ka kipaah theihna diingin, hinna thu chu tudet un. 17 Ahi, na ginna va hung tung sillat natoh tunga dawn diing sillat banga sunbuaahin um zongleng, ka nuam a huleh nanguh zousiah toh ka kipaah hi. 18 Hukhu jiah mahin nanguh zong kipaah unla, huleh kei hung kipaahpih un.
Timothi leh Epaphrodita
19 Hizongleh na tanchin uh ka heet chianga kei zong suhhaat-a ka um theihna diingin, Timothi na kawmva hung sawl pah diingin Lalpa Jesu ah ka kineem hi. 20 Ajiahchu lungsim munkhat pua huchibanga na umdaan uh hung ngaihtuah diing awm koima ka nei sih hi. 21 Ajiahchu mi zousiah in Jesu Khrist silte hawllouin amahuh a diing chiat ahawlta uhi. 22 Hizongleh tapa in a pa nna atoh bangin, ama'n chu tanchinpha ah kei ahung tohpih chih amah heetchianna na nei uhi. 23 Hujiahin bangchibanga ka um diing ka heetchian hunhun in amah hung sawlkhiah pah ka kineem hi. 24 Hizongleh keimah ngeei zong ka hung pah diing chih Lalpa ah ka gingta hi. 25 Ahiinlah ka sanggam leh natohpih leh sepaihpih, huleh na sawlleh uh leh ka taahsapna a hung kithuahpihtu Epaphrodita na kawmva hung sawl kiphamoh ka sa hi; 26 ajiahchu na bawnun ahung ngai mahmah a, huleh a damlouh thu na jaah jiahun alungkham mahmah hi. 27 Ajiahchu si dehtahin achina ngeei mah hi; hizongleh Pathian in ahehpih hi, huleh amah chauh hilouin kei zong ahung hehpih hi, huchilou hileh, lungkhamna tungah lungkhamna ka nei sawn diing hi. 28 Hujiahin amah na muh kiit chiangva na kipaah va, kei lungkhamna zong adaih deuhna diingin amah chu khawhsatahin ka hung sawl hi. 29 Hujiahin amah chu Lalpa ah kipaahtahin anapom unla, huleh hutobang mite chu zahna sangtah pia un, 30 ajiahchu kei diinga na hung tohsah khaahlouhte uh suhkimna diingin, Khrist natohna ah ama'n chu a hinna zong khawhsa louin anasi dehtah hi.
Tahsa a Suan Diing Umlou
1 Atawppeenin, ka unaute, Lalpa ah kipaah un. Angeimah gelh chu kei diingin abuaihuai sih a, hizongleh nanguh diingin ahoihjaw hi. 2 Uite lahah kiveeng un, silgilou bawlte lahah kiveeng un, tahsa ki-atte lahah kiveeng un. 3 Ajiahchu eiuh chu hagau a Pathian bia zehtante i hi uh, huleh Khrist Jesu ah i nuam mahmah va, huleh tahsa ah chu suan diing i nei sih uhi, 4 tahsa lamah zong suan diing neithou himahzongleng. Midang koiaha in tahsa lama suan diing neia akingaihtuahin chu, ke'n ka nei seem hi: 5 ni giat ni a zehtan, Israel chi, Benjamin phung, Hebraite laha Hebrai tahzet, daan thu heetlama Pharisai, 6 phatuamngaih lama kouhtuam suduhdahtu; daan dungjuia dihtatna lama soiseelbei ka hi. 7 Hizongleh sil kei diinga lawhna zousiah chu Khrist jiahin manna in ka ngaita hi. 8 Ahi, tahzetin Khrist Jesu ka Lalpa heetna hoihtungtuang jiahin sil zousiah chu manna giapin ka ngai ahi, Amah jiahin sil zousiah ka taanta a, huleh hute chu Khrist ka tan theihna diingin eeh bang giapin ka ngai a, 9 huleh daan apat kimu keimah dihtatna mawng nei hilouin, hizongleh Khrist a ginna tungtawna hung kuan, ginna jaala Pathian apat hung kuan dihtatna chu neia Amah a muha ka um theihna diingin; 10 huchia a sihna toh kituaahtou jeel a, Amah leh a thohkiitna silbawltheihna leh a gimthuaahna kikoppihna bang ka heet theihna diingin; 11 bangchi jawng aha beeha misi lah apat thohkiitna ka tan theih khaah leh chiin.
Khrist a Phaahtawp Deih
12 Ka tang zouta ahi sih a, bukima um zouta zong ka hi sih; hizongleh Khrist Jesu'n kei ahung matna jiah khuh mah ke'n zong ka tanden theihna diingin ka deih ahi. 13 Unaute, kei chu man zoutain ka kisep sih; hizongleh hi sil khat chu ka bawl hi, nunglam a sil umte chu mangngilhin malam a sil umte chu delhin, 14 Khrist Jesu a Pathian kouhna sang kipaahman mu diingin phaahtawpna chu ka deih ahi, 15 Hujiahin eiuh a piching teng in hitobang lungsim i nei chiat diing uh; huleh sildang khat a lungsim dang na neih uh leh, hu zong Pathian in na kawmvah ahung hesah diing hi. 16 Ahiinlah i phaahna chiangchiang ah, hu daan mahin i gamta diingva, lungsim kibangin i um diing uhi. 17 Unaute, ka umdaan juite hung hi chiat un, huleh keiuh etton a na hung neihte uh banga umte chu chiamchih un. 18 Ajiahchu mi tampi aum uh, amahuh umdaan ka hung hilh veuta hi, tuin zong kap pumin ka hung hilh hi, amahuh chu Khrist kros meelmate ahi uhi. 19 A tawpna uh chu manthaaina ahi a, a pathian uh chu a gilpi uh ahi a, huleh a loupina uh zong a zumna uh ahi a, a ngaihtuahna uh chu leilam silte ah aum hi. 20 Ajiahchu eihaw khualetui hihna chu vaan ah aum a, hu apatin Lalpa Jesu Khrist, Hundampa chu ngaahleltahin i ngaah uh ahi. 21 Ama'n chu sil zousiah Amah thuthu a aumsah theihna natohdaan dungjuiin i tahsa bangmalou chu Amah tahsa loupitah batpihin ahung bawlthahsah diing hi.
1 Hujiahin ka unau deihtah leh ngaihtahte, ka kipaahna leh ka lallukhuhte, Lalpa ah huchiin dingkip un, deihtahte.
Hahsatnate
2 Lalpa a lungsim khat hi diingin Euodia ka hasot a huleh Sintiki ka hasot hi. 3 Huleh nang ka ngawngkol puaahpih muanum zong ka hung ngeen hi, tanchinpha a nna ka tohpih numei haw leh Klement zong, huleh Hinna Lehkhabu a min tuang, nna ka tohpih dangte teng panpih in. 4 Lalpa ah kipaah ngiitngeet un, ka chi jeel diing kipaah un! 5 Na chitna uh mi zousiah heet hi hen. Lalpa anai hi. 6 Bangma ah lungdonna nei sih unla, hizongleh sil bangkim ah haamteina leh ngetna in kipaahthu soina toh na sil ngette uh Pathian kawmah hesah un. 7 Huchiin Pathian hamuanna heetphaah guallouh in, Khrist Jesu jaalin na lungtangte uh leh na lungsimte uh ahung veensah diing hi. 8 Atawppeenin, unaute, thutah photmah, sil zahum photmah, sil dih photmah, sil siangthou photmah, sil pomtaah photmah, a hoihlama minthang photmah, hoihna bang aum a, paahtawi taah bang aum leh, hi silte ngaihtuah ngiitngeet un. 9 Keimah a na jilsa uh, na tansa uh, na jaahsa uh, na muhsa uh, hu silte chu bawl un; huchiin hamuanna Pathian in ahung umpih diing hi.
Philippite Tunga Paul Kipaahna
10 Hizongleh tua atawplama kei na hung ngaihtuahna uh ahung kilat jiahin Lalpa ah nasatahin ka kipaah ahi. Tuma in na hung ngaihsah mahmah va, hizongleh hun lemtaang na mu sih va ahi. 11 Taahsap jiaha hi thu ka soi ahi sih, ajiahchu bangchibangin um zongleng, hutah a lungkimtaha umdaan ka heta hi. 12 Tasamtaha umdaan ka he a, kiningchingtaha umdaan zong ka he hi. Mun chin leh sil zousiah ah gilvah leh gilkial a um theihna leh hautah leh tasam a umdaan hilhin ka umta hi. 13 Amah ahung suhaatpa Khrist jaalin sil zousiah ka bawl thei hi. 14 Ahihvaangin ka gentheihna a na hung kithuahpih jiahun na bawl hoih uhi. 15 Tuin nanguh Philippite'n tanchinpha hung um chiil a, Makedonia gam apat ka chiahdoh laiin, nanguh chihlouh kouhtuam dang koimah in piaah leh laah lam thu ah bangmah in ahung kithuahpih sih uh chih zong naheuhi. 16 Ajiahchu Thessalonika khua ngeei ah zong ka taahsap panpihna diing na hung thot kiit jeel uhi. 17 Silpiaah ka deih jiah ahi sih a, hizongleh nanguh hoihna a kisim diing gahsuahte hawl ka hijaw hi. 18 Hizongleh sil bangkim kanei akahauhi. Nanguhapathung kithot, gim namtuui, kithoihna pomtaah leh Pathian lungkimna silte chu, Epaphrodita khut apatin ka na muta a, ka kiningchingta hi. 19 Huleh ka Pathian in Khrist Jesu a loupina a a hauhsatna dungjuiin na taahsap zousiah uh ahung pe diing hi. 20 Tuin Pathian leh i Pa uh kawmah kumtuang kumtuangin loupina um hen. Amen.
Thutawpna
21 Khrist Jesu a misiangthou zousiah chibai hung na buuhsah un. Ka kawma um unaute'n chibai ahung buuh uhi. 22 Misiangthou zousiah in, adiaahkholin Kaisar innsung mite'n chibai ahung buuh uhi. 23 I Lalpa uh Jesu Khrist hehpihna na bawnva tungah um hen. Amen.
Chibaibuuhna
1 Paul, Pathian deihjawnga Jesu Khrist apostol leh i unaupa uh Timothi in, 2 Kolosi a um, Khrist a misiangthoute leh unau ginumte kawmah, i Pa uh Pathian leh Lalpa Jesu Khrist akipan hehpihna leh hamuanna na kawmvah um hen.
Kipaahthu Soina leh Haamteina
3 Nanguh diinga haamtei ngiitngeetin Pathian, i Lalpa uh Jesu Khrist Pa kawmah kipaahthu ka soi uhi, 4 Khrist Jesu a na ginna uh leh misiangthoute zousiah tunga lungsiatna na neih daan uh ka jaah nungsiah un, 5 vaan a nanguh diinga kinepna hung kikoihsah jiahin hu kinepna thu chu tanchinpha thutah thu ah tuma laiin na jata va, 6 hu tanchinpha in chu khovel pumpi a agahsuah jeel mahbangin na kawmvah ahung tungta a, na jaah va thutah a Pathian hehpihna na hung heet ni vapatin na lahvah agahsuah jeel hi. 7 Epaphra, ka suaah tanpih uh ngaihtah, nanguh diinga Khrist natongtu ginumtah apat zong na heettaah bangmahun, 8 ama'n zong Hagau a na lungsiatna uh ka kawmvah aphuangdoh hi. 9 Hikhu jiahin keiuh zong hi ka jaah ni vapatin, nanguh diinga haamteisah leh pilna leh hagaulam heetchianna zousiah a Amah deihjawng heetna a na hung dimna diing uh ngetsah ka tawp sih uhi. 10 Huchia Lalpa diinga kilawmtawh leh sil zousiah a Amah kipaahna diinga na gamtat va, natoh hoih chinteng a hung gah a huleh Pathian heetsiamna lama na hung khantouhna diing uh leh 11 a silbawltheihna loupitah dungjuia kipaahna neia thuaahhaatna zousiah leh lungduaina lama silbawltheihna zousiah a suhhaat-a umin, 12 vaah a misiangthoute gou tankhawmpih diinga hung suchingtu Pa kawma kipaahthu soi in nanguh diinga ngetsah ka tawp sih uhi. 13 Ama'n chu mial silbawltheihna apatin ahung hundoh a, a Tapa deihtah lalgam ah ahung luutsahta a, 14 Amah ah a sisan jaalin tatdohna i mu hi, sual ngaihdamna ngeei chu.
Khrist Tungnungpeen Hihna
15 Amah chu muhtheihlouh Pathian meelpua, silsiam zousiah laha tachiil ahi. 16 Ajiahchu Amah ah sil zousiah siam ahi a, vaan a umte leh lei a umte, muhtheihte leh muhtheihlouhte, laltouphahte aha lalgamte aha vaihawmnate aha thuneihnate hitazongleh; sil zousiah Amah tungtawna siam ahi a huleh Amah diinga siam ahi. 17 Huleh Amah chu sil zousiah um main aum a, Amah ah sil zousiah aum khawm hi. 18 Amah chu sapum lutang ahi, sapum chihchu kouhtuam ahi; sil bangkim a amasapeen hihna mun atan theihna diingin Amah chu kipatna bulpi, misi lah apat tachiil ahi. 19 Ajiahchu Amah a taangchinna zousiah aum chu Pa lemsah ahi, 20 huleh Amah jaala sil zousiah Amah toh kilemsah diingin, Amah tungtawna lei a sil umte hiin vaan a sil umte hitaleh a kros sisan jaala lemna bawl zouin. 21 Huleh nanguh nidanglaia na natoh giloute uh jiaha na lungsim va Amah apat khena um leh meelma anahi hizongleh uh chin, tuin Ama'n 22 chu sihna jaalin a tahsa pum ah ahung kilemsahta hi, a mitmuh a siangthou leh dembaanglou leh soiseelbei diinga ahung dinsah theihna diingin, 23 huchu ginna a na um zing va, kingahna neia na kip va, huleh tanchinpha na jaah uh kinepna apat na kitawlmang louh uh leh ahi diing hi. Hu tanchinpha chu vaan nuaia silsiam zousiah kawma taangkoupih ahi a, kei Paul, hu thunatongtu diinga siam ka hi.
Paul Natoh
24 Nanguh diinga ka gimthuaahnate ah tuin ka kipaah hi, huleh Amah tahsa a diinga, huchu a kouhtuam diinga Khrist gimthuaahna lama kisam nalai silte chu ka tahsa in ka sudim ahi. 25 Pathian thu chu bukimtaha ka heetsah theihna diingin, nanguh diinga Pathian apat ka kawma hung kipia enkoltu mohpuaahna dungjuiin hu kouhtuam thunatongtu diinga siam ka hi, 26 hu Pathian thukiphual chu akum akum leh akhang akhang a phual anahi a, hizongleh tuin chu a misiangthoute kawmah phuangdohin aumta hi. 27 Amahuh kawmah Jentelte laha loupina hauhsatna thukiphual khuh bang ahiai chih heetsah diing chu Pathian in lem asata hi: hu thukiphual chu Khrist nanguh a um, loupina kinepna chu ahi. 28 Mi chin Khrist Jesu a hoihbukima ka piaah theihna diingun, mi chin kiveeng diinga hilhin huleh pilna chinteng a mi chin thuhilhin, Amah tanchin ka phuang uhi. 29 Hukhu diingin ke'n zong, keimah a nasataha natong Amah silbawltheihna dungjuiin hahpana pangin ka tonggim ahi.
1 Ajiahchu nanguh leh Laudikia khua a umte leh tahsa a ka meel mu nailou photmahte diinga ka kihahbawl daan he leh uh chin ka uut hi, 2 lungsiatna a kaankhawma aum va, huleh heetsiamna kichetna bukim hauhsatna zousiah atan va, huvaanga Pathian, Pa leh Khrist thukiphual heetna chu aneih va, huchia a lungtangte uh hamuana aum theihna diingin, 3 hu Khrist ah pilna leh heetna gou zousiah phualin aum hi. 4 Huleh hichu koimah in kamsiam thu a ahung heem louhna diingun ka soi ahi. 5 Ajiahchu tahsa in na kawmvah um sih zongleng, na hindaan uh kituupdaan leh Khrist a na ginna kipdaan uh ka muhin ka kipaah a, hagau in na kawmvah ka um hi.
Kiveen Diing Thu
6 Hujiahin Lalpa Khrist Jesu na pomtaah bangmahun, Amah ah hing un. 7 Amah ah zungha leh lamtouha umin, hilha na um banga ginna a kiptaha umin, hutah ah chu kipaahthu soina a diminumun. 8 Pilvaang un, huchilou inchu mi koiaha in Khrist thu bang hilouin, mihing thugousiah leh khovel kihilhna thubulte bang jaw in, khovel pilna leh heemna mei in gaallaahin ahung la kha diing uhi. 9 Ajiahchu Amah ah Pathian taangchinna zousiah sapum neiin ateeng hi; 10 huleh Amah ah nanguh suhbukim na hita va, Amah chu lalna leh thuneihna zousiah lutang ahi. 11 Amah ah nanguh chu khut a tan hilouin, Khrist zehtanna a tahsa sualna sapum tankhiah a zehtan na hi uhi. 12 Baptisma ah Amah toh vui na hita va, humah ah misi lah apat a Amah kaithoutu Pathian natoh gintaat jaalin Amah toh kaihthoh na hita uhi. 13 Huleh nanguh, na sualnate uh leh na tahsa va zehtanlouhna jiaha si chu, na bohsiatna zousiah uh hung ngaidamin, Ama'n Khrist toh ahung suhingkhawmta hi. 14 Ama'n daan thu, eiuh hung lang jawng leh ei toh kikalh lama gelh chu nawtmangin, kros dawn a kilhbehin alamangta hi. 15 Huleh lalnate leh thuneihnate susiain, Ama'n amahuh chu japi etnop a bawlin, a tungvah kros ah agualzouta hi. 16 Hujiahin mi koimah in, neeh thu aha, dawn thu aha, ankuang lui thu aha, ha thah thu aha, ahihlouhleh Sabbath ni thu aha in nanguh hung dem sih uh hen. 17 Hute chu sil hung tung diingte liim ahi a, hizongleh a tah chu Khrist ahi. 18 Mi koimah in, a silmuh ngeilouhte a kigolhluutin, a tahsamiitna lungsim a kimawhletsahin, kingaihngiamna dihlou leh angelte biahna zangin na kipaahman muh diing uh hung laahsah sih heh, 19 huleh hutobang mi'n chu hu Lutang, tahsa pumpi chawma huleh guhletaang kizopna leh thaguite kaankhawm a, Pathian apata khanna a akhangtouhna chu atudet sih hi. 20 Huchihjiahin, khovel kihilhna thubulte apat Khrist toh si na hihtaah uh leh, bang diinga khovel a hing banga daan thupiaahte nuaia kituluut na hi viai? 21 "Sukha sin, chiam sin, khoih sin," chihte 22 (hite chu zat puma mangthaai veh diing ahi), hite chu mihing thupiaah leh thuhilhna ahi. 23 Hi silte chu bawltawm biahna leh kingaihngiamna dihlou leh khawhsa loua tahsa sawihnatna ah pilhuai abang na a, hizongleh tahsa uutna douna diingin bangma aphatuam sih hi.
Gingtute Umdaan Diing
1 Huchiin Khrist toh kaihthoh khawm na hihtaah uh leh, Pathian jiatlam a tou Khrist umna tunglam a sil umte chu hawl un. 2 Lei a sil umte a nga louin, tunglam a sil umte ah na lungsim uh nga un. 3 Ajiahchu na sita va, na hinna uh chu Khrist toh Pathian ah phual ahita hi. 4 Khrist, i hinna uh ahung kilat chiangin nanguh zong Amah toh loupiin na kilang diing uhi. 5 Hujiahin na pianken uh sualnate sulum un: kingaihnate thaanghuainate, bolhhohnate, kietlahna hoihloute, uutna giloute leh duhaamnate, duhaamna chu milem biahna ahi. 6 Ajiahchu hu silte jiahin Pathian lungthahna chu thumanglou tate tungah atung veu hi. 7 Nanguh zong tumalama hu silte a na hin laiun hute ah nana um uhi. 8 Hizongleh tuin chu nang un lungthahnate, thangtawmnate, huatnate, soisiatnate haw zousiah koihmang unla, huleh houlimna thaanghuaite na kam vapat koih mang un. 9 Mihing lui chu a silbawlte toh na hawhkhiahtaah jiahun, khat leh khat kiheemtuah sih un. 10 Huleh mihing thahin na kithuamta va, hu mi thah chu amah Siamtu lim bangngeei heetna ah siamthahin aum ahi. 11 Hu siamthahna ah chu Grikmi leh Judami, zehtan leh zehtanlouh, barbarimi leh Skuthiami, saltaang leh taanglou zong aum tuan sih hi, hizongleh Khrist chu bangkim ahi a huleh bangkim ah aum hi. 12 Hujiahin Pathian miteel, mi siangthou leh deihtahte bangin lainatna lungtangte, chitnate, kingaihngiamna lungsimte, jaidamnate leh thuaahtheihnate in kithuam un; 13 khat leh khat kiihuaahthei tuah unla, khat in khat tunga thubuai bang aneih leh, kingaidam tuah un; Khrist in nanguh ahung ngaihdam bangin nanguh zong kingaidam un. 14 Huleh hi silte zousiah tungah lungsiatna silhthuah un, huchu bukimna kaankhawmna ahi. 15 Huleh Pathian hamuanna in na lungtang vah vaihawm hen, huchibang hi diingin sapum khat a kouh na hi uhi; huleh kipaahna taang zong he un. 16 Khrist thu chu nanguh ah pilna chinteng ah kichingtahin umsah unla, phatna late bang leh Pathian late bang leh hagaulam late bang in khat leh khat kijilsahin kithuhilh tuah unla, na lungtang va kipaahin Lalpa kawmah la sa un. 17 Huleh na bawl photmah uh, thusoi ah hiin natoh ah hitaleh, a bawnin Lalpa Jesu min in, Amah tungtawna Pa Pathian kawma kipaahthu soi kawmin bawl veh un.
Khristian Innkuan Umdaan
18 Jite haw, Lalpa a akilawm bangin na pasalte uh kawmah kituluut un. 19 Pasalte haw, na jite uh lungsiat unla, a tungvah gilou sih un. 20 Tate haw, sil zousiah ah na nulepate uh thu mang un, huchu Lalpa kipaahpihjawng ahi ngaala. 21 Pate haw, na tate uh sulungthah sih un, huchilou inchu alungke kha diing uhi. 22 Suaahte haw, sil zousiah ah leitung a na houtute uh thu mang un, mit natonga mihing kipaahsah diing giap hilouin, hizongleh lungsim siangthoutahin leh Pathian lau kawm jawin. 23 Huleh na bawl photmah uh mihingte diinga bawl bang hilouin, Lalpa a diing bangin lungluuttahin bawl un, 24 Lalpa kawm apatin kipaahman diing gou chu na mu diing uh chih hein, ajiahchu Lalpa Khrist natohsah na hi uhi. 25 Hizongleh sil dihlou bawltu in chu a sil dihlou bawlman amu kiit diing hi, huleh kideihsahtuamna bangmah aum sih hi.
1 Houtute haw, nang un zong vaan ah Houtu na nei uh chih hein, na suaahte uh tungah adih leh tangin bawl un.
Thuhilhna Dangte
2 Haamtei zing unla, hutah ah chu kipaahthu soi kawmin kiveeng zing un. 3 Kaan a ka umna peen, Khrist thukiphual soi diinga Pathian in keiuh diinga thusoina kot ahung honsah theihna diingin keiuh diingin zong hung haamteisah un, 4 huchia ka soi diing bangtaha ka soi theihna diingin. 5 Hun chu a phatuam theipeen a zangin, polam mite lahah pilvaangtahin um un. 6 Mi chin bangchibanga dawn diing ahiai chih na heet theihna diingun na haam kamsuah uh chu hehpihna tel, chi kisoh hi zing hen.
Thutawpna
7 Ka tanchin zousiah chu unau deihtah Tikika, natongtu ginum leh Lalpa a ka suaah hihpih in nanguh ahung hesah veh diing hi. 8 Hu diing mahin amah chu na kawmvah ka hung sawl ahi, na dinmun uh aheet a, na lungtang uh asuhhamuang theihna diingin. 9 Onesima, unau ginum leh ngaihumtah, nanguh laha mi mah toh ka hung sawl ahi. Amah un hilam sil umtan zousiah ahung hesah diing uhi. 10 Aristarka, ka suangkul taanpih in chibai ahung buuh a, huleh Mark, Barnaba sanggamnu tapa in zong chibai ahung buuh hi, amah tungtaang ah thupiaah na mu uhi, na kawmva ahung leh kipaahtahin anapom un. 11 Huleh Jesu, Jasta achih uh, zehtanmi in nanguh chibai ahung buuh hi. Hite chauh ahi uh zehtante lah apat hung kuan Pathian lalgam a diinga ka natohpihte; huleh amahuh chu kei hung hamuantute ahi uhi. 12 Na lahva mi, Epaphra, Khrist suaah in nanguh chibai ahung buuh hi, Pathian deihlam zousiah a hoihkim leh bukima na dindet theihna diingun amah chu haamteinate ah theihtawp suahin nanguh diingin apang hi. 13 Ajiahchu ama'n nanguh diing leh Laudikia leh Hierapoli khua a umte diingin phatuam angai mahmah chih ka heetpih hi. 14 Daktor deihtah Luk leh Dema in nanguh chibai ahung buuh uhi. 15 Laudikia khua a unau umte leh Nimpha leh a inn a kouhtuamte chibai hung na buuhsah un. 16 Huleh hi lehkhathot na lahva na sim zoh chiangun Laudikia kouhtuam ah zong na simsah unla, huleh nang un zong huchibangmahin Laudikia khua apat hung lehkhathot chu anasim veh un. 17 Huleh Arkippo kawmah, "Lalpa a natohna na muh chu na suhbukim theihna diingin pilvaang in," anachi un. 18 Kei Paul in hi chibai buuhna chu ka khut ngeei a ka gelh ahi. Ka kolbuhte hezing un. Hehpihna na kawmvah um hen. Amen.
Chibaibuuhna
1 Paul leh Silvana leh Timothi in Pa Pathian leh Lalpa Jesu Khrist a Thessalonika khua a um kouhtuamte kawmah: I Pa uh Pathian leh Lalpa Jesu Khrist kawm apat hehpihna leh hamuanna um hen.
Paul Kipaahthu Soina
2 Ka haamteina va na min uh louin nanguh zousiah jiahin Pathian kawmah kipaahthu ka soi zing uhi. 3 I Pathian leh Pa ma a na ginna natohte uh, na lungsiatna natohte uh leh i Lalpa uh Jesu Khrist a kinepna jiaha na hahkatnate uh bang ka hezing uhi. 4 Ajiahchu unau deihtahte, Pathian teel na hi uh chih ka he uhi. 5 Ajiahchu ka tanchinpha uh thumeia na kawm uh hung tung ahi sih a, hizongleh silbawltheihna leh Hagau Siangthou leh heetchetna nasatah toh hung tung ahijaw hi, nanguh diinga na lahva mi bangtobang ka hi viai chih na heet bangun. 6 Huleh hahsatna tamtah thuaah pumin Hagau Siangthou a kipaah kawmin thu chu pomin, kei uh leh Lalpa juite na hung hita uhi. 7 Huchiin Makedonia leh Akaia gam a gingtu zousiah diingin etton na hung hita uhi. 8 Ajiahchu Makedonia leh Akaia gam chauh ah hilouin, hizongleh mun chinteng ah nanguh apatin Lalpa thu chu athangta hi. Pathian lama na ginna uh athangsuaahta a, hujiahin kei un bangma ka soi uh angai nawn sih hi. 9 Ajiahchu amahuh ngeei in bangtobanga nanguh laha hung luut ka hi viai chih leh milemte apat Pathian hing leh dihtah nna tong diinga na hung kihei daan uh ahung hilh va, 10 huleh misi lah apat Ama'n akaihthoh, vaan apat hung kuan a Tapa, lungthahna hung tung diing apat eite hung hunkhepa Jesu ngeei ana-ngaah diinga na kihei daan uh ahung hilh uhi.
Paul Natohna
1 Ajiahchu unaute, na lahva ka hung luutna uh athawn ahi sih chih nanguh ngeei in na he uhi. 2 Hizongleh na heetsa mahbangun ama a ka thuaahgim zoh un Philippi a zumhuaitaha bawlgawpa ka um nungun zong buai pumpumin Pathian tanchinpha na kawmva soi diingin ka Pathian vah ka na hangsan jaw mah uhi. 3 Ajiahchu ka hung hasotna uh chu dihloutaha kiheemna ahihlouhleh tupna sianglou apat ahi sih a, heembawlna in zong ahi sih hi. 4 Hizongleh tanchinpha kolsaha um diinga Pathian phatsah mi ka hih bang ngeeiun mihing kipaahsah diing bang hilouin, ka lungtang uh endihtu Pathian kipaahsah hi jawin thu ka soi jeel uh ahijaw hi. 5 Ajiahchu bangchihmahin zong kimaaitangphatna leh duhaamna phual kawmin na kawmvah ka hung ngei sih uh chih na he uhi, Pathian chu ahung heetpihtu ahi. 6 Khrist apostolte ka hihna un thuneihna zang thei hi zongleh ung, mihingte apat aha, nanguh apat ahihlouhleh midangte apatin paahtawina ka hawl ngei sih uhi. 7 Hizongleh nu in a tate aduatbawl bangin na lahvah jaidamtahin ka um jaw uhi. 8 Huchiin ka deihtahte uh na hung hihtaah jiahun nanguh hung ngaina mahmahin Pathian tanchinpha chauh hilouin keiuh hinna tanpha hung piaah ka uut uhi. 9 Ajiahchu unaute, ka tohgimdaan uh leh ka tawldaan uh na he zing uhi; ajiahchu na lahva koima ka suhbuai louhna diingun suun leh jaan a tongin Pathian tanchinpha nanguh kawmah ka soi uhi. 10 Nanguh agingtate laha siangthoutah leh dihtah leh soiseelbeia ka gamtat daan uh hung heetpihtute nanguh na hi va, huleh Pathian zong ahung heetpihtu ahi. 11 Pa in a tate tunga abawl banga na bawnva ka hung hasot daan uh, ka hung hamuan daan uh, huleh thu ka hung piaah daan uh na he uhi, 12 huchia a lalgam leh a loupina a nanguh hung kou luutpa Pathian a diinga kilawma na hin theihna diingun. 13 Hi jiahin Pathian kawmah tawplouin kipaahthu ka soi uhi, ajiahchu Pathian thu keiuh apat a na jaah uh na pom laiun, mihing thu banga pom louin, thutah, nanguh agingtate a zong nasataha natong thei Pathian thu ngeei hiin na pom jaw uhi. 14 Ajiahchu unaute, Judia gam a Khrist Jesu a Pathian kouhtuamte umdaan entontute na hung hita uhi. Ajiahchu amah un Judate laha athuaah bangun, nang un zong na gam mite uh lahah na thuaah ve uhi. 15 Hu Judate'n chu Lalpa Jesu leh a zawlneite uh athat va, keiuh zong ahung suduhdah uh; huleh Pathian asulungkim sih va huleh mi zousiah akalh va; 16 Jentelte hutdam ahih theihna diingva a kawmva thusoi ahung khap va, huchu a sualna uh suhdim zingna diingin ahi. Hizongleh Pathian lungthahna chu akhawh theitawpin a tungvah ahung tungta hi.
Thessalonikate Muh Uutna
17 Hizongleh keiuh chu unaute, tomchakhat sung lungtang lam hilou a, meel lam chauha kikhena i um vaangun, kilawptahin na meel uh mu diingin ka hahpan seem uhi. i8 Huchihjiahin na kawmva hung ka tum ten va, kei Paul ngeei in zong anon nonin hung ka tumta a, hizongleh Setan in ahung daal hi. 19 Ajiahchu ka kinepna uh aha, ka kipaahna uh ahihlouhleh ka kipaahna lallukhuh uh bang ahiai? Ahung chianga i Lalpa Jesu Khrist ma ah nanguh ngeei na hi sih diviaimah? 20 Ajiahchu nanguh ka suan uh leh ka kipaahna uh na hi uhi.
1 Hujiahin ka thuaah zoh nawn louh phetun Athen khua ah keiuh chauh nuutsiatin um leh ung hoih ka sa uhi. 2 Huleh i unaupa uh Timothi, Pathian natongtu, Khrist tanchinpha lama ka tohpih uh chu nanguh hung sukip diing leh na ginna lamva hung hamuan diingin ka hung sawlta uhi, 3 huchia hi gimthuaahnate jiaha koima akiliin louhna diingin; ajiahchu hi silte thuaah diing mawnga guat i hi uh chih nanguh ngeei in na he uhi. 4 Ajiahchu na kawmva ka um laiun gimthuaahna thuaah diing i hi uh chih ka hung hilhlawhta uhi; huchibang ngeeiin atungta a, huchu na he uhi. 5 Hikhu jiahin, ka thuaah zoh nawn louh phetin, heemtu'n nanguh ahung heempuuh kha diing a, huleh ka tohgimna uh athawn kha diing chiin na gindaan uh he diingin mi ka hung sawl hi.
Timothi Natohna
6 Hizongleh tua Timothi na kawm vapat ka kawm uh ahung tunin na ginna uh leh na lungsiatna thu uh, huleh kei un nanguh ka hung muh nuam mahmah bangun nang un zong keiuh hung mu nuam mahmahin na hung hezing uh chih tanchin kipaahhuaitah ahung puaah hi. 7 Hujiahin, unaute, ka thuaahgimna uh leh ka hahsatna zousiah vah na ginna jiahun na tungvah hamuangtahin ka um uhi. 8 Ajiahchu Lalpa a na dinkip phot uh leh, tuin ka hingta uhi. 9 I Pathian uh ma ah na tungva ka kipaahna zousiah uh jiahin nanguh lam thu ah Pathian kawmah bangtobang kipaahthu ka soi thei taphet diviai? 10 Na meel uh ka muh theihna diing uh leh na ginna lamva na taahsap uh ka hung suhbuchinsah theihna diingun suun leh jaan in nasataha haamteiin ka um uhi. 11 Tuin i Pathian uh leh i Pa uh ngeei, huleh i Lalpa Jesu Khrist in na kawm lamvah hung pui hen. 12 Huleh nanguh lama lungsiatna ka hauh bangun, Lalpa'n nanguh khat leh khat kilungsiat tuahna leh mi zousiah na lungsiatna uh hung supungin hung hausahta hen, 13 huchia i Lalpa Jesu Khrist a misiangthoute zousiah toh ahung chianga Pathian i Pa uh ngeei ma a na lungtangte uh sianthouna lama soiseelbeia ahung suhkip theihna diingin.
Lalpa Kipaahsah Hinkhua
1 Huchiin atawppeenin, unaute, na umdaan diing uh leh Pathian na kipaahsah daan diing uh, ka kawmva kipan a na laah bangun na hauh seemna diingun Lalpa Jesu ah ka hung ngeenun, ka hung hasot uhi. 2 Ajiahchu Lalpa Jesu jaalin bangtobang thupiaahte ka hung piaah uh na he uhi. 3 Ajiahchu na sianthou diing uh chu Pathian deihjawng ahi: kingaihna thaanghuai na tawpsan diing uh; 4 mi chin in siangthou leh zahumtaha na beel chiat uh kepdaan na heetna diing uh, 5 Pathian helou Jentelte banga huuhna kihdahhuai lama kipe louin; 6 hulam thu ah chu koima a unau tungah tasualin ahihlouhleh alam louin gamta sih heh, ajiahchu Lalpa chu hutobang sil bawlte zousiah phubalatu ahih a, kei un zong ka hung hilhlawhta va huleh ka hung hesah zouta uhi. 7 Ajiahchu Pathian in sianglou diingin ahung kou sih a, hizongleh siangthou diingin ahung kou jaw hi. 8 Hujiahin anualtu chu mihing nuai ahi sih a, a Hagau Siangthou hung petu Pathian nuai ahijaw hi. 9 Hizongleh unau kilungsiat daan lam thu ah gelhsah na ngai sih uhi, ajiahchu kilungsiattuah chiat diingin nanguh ngeei Pathian hilhin na umta uhi. 10 Huleh Makedonia gam pumpi a unau um zousiah tungah huchu na bawl ngeei uhi. Hizongleh unaute, nasataha tong seem diingin ka hung hasot uhi; 11 thu ka hung piaah bangva kamtawm deuha um a, na natoh chiat uh kitoh a, huleh na khut ngeei va nna tong diingin, 12 huchia polam mite lama kilawmtaha na um theihna diingun, huleh bangmah taahsap na neih louhna diingun.
Misiangthou Donna Diing
13 Hizongleh unaute, midang kinepna himhim neiloute banga na lungkham louhna diingun ihmute tungtaang na heetlouh uh ka deih sih hi. 14 Ajiahchu Jesu asi a huleh athoukiit chih i gintaat leh, Jesu a ihmute zong Pathian in Amah toh ahung puikhawm diing hi. 15 Ajiahchu hichu Lalpa thu in na kawmvah ka soi uh ahi, huchu eiuh Lalpa hung pai donga hinga ana-um nalaite'n ihmute i makhelh sih diing uhi. 16 Ajiahchu Lalpa ngeei chu kikou aw toh, angel tungnungpeen aw leh Pathian peengkuul ging toh, vaan apat ahung kumsuh diing a, huleh Khrist a site athou masa diing uhi. 17 Huzohchiangin eiuh hinga ana-um nalaite huihkhua ah Lalpa tuaah diingin amahuh toh meipi lahah laahtouhin i um diing va, huchiin kumtuangin Lalpa kawmah i umta diing uhi. 18 Huchihjiahin hi thute in khat leh khat kihamuan tuah chiat un.
Lalpa Ni
1 Hizongleh unaute, a hun leh a ni lam thu chu ka hung gelhsah na ngai sih uhi. 2 Ajiahchu nanguh mah in Lalpa Ni chu jaan a guta bangin ahung tung diing hi chih chiantahin na he uhi. 3 Ajiahchu, "Muanna leh bitna!" chia asoi laitahun numei nauvei bangin thakhatin manthaaina a tungvah atung diing a; huleh asuaahta hiai sih diing uhi. 4 Hizongleh unaute, nanguh chu hu Ni in guta banga ahung phawn diingin mial ah na um sih uhi. 5 Na bawnun vaah tate leh suun tate na hi uhi. Jaan a mi i hi sih va, mial a mi zong i hi sih uhi. 6 Hujiahin midangte bangin i ihmu sih diing va, hizongleh hahin i kiging jaw diing uhi. 7 Ajiahchu ihmute chu jaan ah ahi a-ihmut uh, huleh zukhamte zong jaan ah ahi akham uh. 8 Hizongleh ei suun a mite'n chu ginna phaw leh lungsiatna silhin, hutdamna kinepna chu lukhuh a khuhin i kiging diing uhi. 9 Ajiahchu Pathian in lungthahna tuaah diing hilouin, hizongleh i Lalpa Jesu Khrist vaanga hutdamna tang diingin ahung guat ahijaw hi. 10 Amah chu i luangin asi ahi, i hahin zong, i ihmutin zong, Amah toh i hin khawm theihna diingin. 11 Hujiahin nana hih veu mahbangun kisuhamuang khawm chiat unla, kisuhaattuah chiat un.
Thuhilhna leh Thutawpna
12 Huleh unaute, na lahva tonggimte leh Lalpa a na houtute uh leh nanguh hung hilhtute paahtawi diingin ka hung ngeen uhi, 13 huleh a natoh jiahva amahuh nasataha lungsiatna a ngaisang diingin ka hung ngeen uhi. Khat leh khat kituaahtahin um un. 14 Tuin unaute, ka hung hasot uhi, daan bangloua umte hilh unla, lungkete hamuan unla, haatloute panpih unla, mi zousiah tungah thuaahthei un. 15 Koimah in koi giitlouh zong giitlouh a thuh lou diingin pilvaang un, hizongleh nanguh a diing hiin mi zousiah a diing hitaleh, ahoih taphot jui un. 16 Kipaah zingzing un; 17 tawplouin haamtei un; 18 sil bangkim ah kipaahthu soi un; ajiahchu nanguh diingin Khrist Jesu ah hichu Pathian deihjawng ahi. 19 Hagau sumit sih un. 20 Pathian thusoilawhte ngaineep sih un. 21 sil zousiah enchian unla, ahoihlam photmah tudet un. 22 Sual a kilang zousiah apat kiheemkhia un. 23 Huleh hamuanna Pathian ngeei in na pum-un hung susiangthou heh; huleh na hagau uh leh na lungsim uh leh na tahsa uh i Lalpa Jesu Khrist hung chianga soiseelbei diingin huumbitin um hen. 24 Nanguh hung koupa aginum a, bawl zong abawl diing hi. 25 Unaute, hung haamteisah un. 26 Unaute zousiah tawp siangthou in chibai na buuh un. 27 Hi lehkhathot unau siangthoute zousiah kawma simsah diingin Lalpa min in thu ka hung pia hi. 28 I Lalpa uh Jesu Khrist hehpihna na kawmvah um hen. Amen.
Chibaibuuhna
1 Paul, Silvana leh Timothi in, i Pa uh Pathian leh Lalpa Jesu Khrist a Thessalonika khua a um kouhtuam kawmah: 2 I Pa uh Pathian leh Lalpa Jesu Khrist akipan hehpihna leh hamuanna um hen. 3 Unaute, na ginna uh nasataha akhanlet a, na bawnva na kilungsiat tuahna uh apun seem jiahin, na tungthu vah hihtuaah ahih mahbangin, Pathian kawmah kipaahthu soi zing diing mawng ka hi uhi. 4 Huchiin mi'n nanguh ahung suhduhdahnate uh leh na gimthuaahna zousiah va na kuhkal daan uh leh na ginna jiahun Pathian kouhtuamte lahah ka hung suang uhi. 5 Hichu Pathian lalgam mi hitaaha guat na hih theihna diingva Pathian vaihawmna dihtah chiamchihna chiantah ahi a, hu diing maha zong thuaah na hi uhi. 6 Nanguh hung subuaite gimthuaahna a thuh chu Pathian a diinga sil dihtathuai ahi a, 7 huleh nanguh suhgima umte chu, Lalpa Jesu vaan akipan a angel haatte toh ahung kilaah chiangin, keiuh toh khawldamna ahung pia chu sil dihtathuai ahi a, 8 Pathian heloute leh i Lalpa uh Jesu Khrist tanchinpha awiloute tunga meikuang a phuba ala chu sil dihtathuai ahi. 9 Amahuhchu Lalpa ma leh a silbawltheihna loupitah apatin kumtuang manthaaina ah gawtin aum diing uh, 10 a misiangthoute laia tawimawia aumna diing leh gingtu tengteng laia ngaihsanga um diinga Amah ahung Ni tahchiangin, ajiahchu ka heetsahna uh na laiva gingtaat-aaumtaah jiahin. 11 Hujiahin i Pathian un nanguh chu ahung kouhna toh kiphuttawh mawng ahungsah theihna diingin, huleh a hoihna hung deihsahna zousiah leh silbawltheihna toh ginna natoh zousiah ahung bukimsah theihna diingin, nanguh diingin zong ka haamtei zingzing uhi, 12 huchia i Pathian uh leh Lalpa Jesu Khrist hehpihna dungjuia, i Lalpa uh Jesu min chu nanguh ah suhloupi-a aum a, huleh nanguh Amah ah suhloupi-a na um theihna diingin.
Lalpa Hung Kiitna Diing
1 Tuin unaute, i Lalpa uh Jesu Khrist hung na diing leh a kawma i vakikhopna diing thu ah, 2 Khrist ni chu ahung tung zouta chia hagau in aha, thu in aha, keiuh min zanga lehkhathot in aha a na lungtang uh suhliinga um pah lou diingin, ahihlouhleh buailou diingin ka hung ngeen uhi. 3 Koima'n bangmah in hung heem sih heh; ajiahchu puuhsanna tah ahung tun masat a, sualna mipa, mangthaai tapa ngeei ahung kilat phot louh leh, hu Ni chu hung tung lou diing ahi. 4 Ama'n chu Pathian chiha um zousiah leh akibia zousiah adou a, a tungva um tumin akisuloupi diing a; Pathian biahinn a Pathian banga touin, Pathian in akibawl diing hi. 5 Na kawmva ka um laiin hi thute ka hung hilhta chih he nawn lou na hi viaimah? 6 Huleh tuin amah chu amah huntaha ahung kilat theihna diing, bang in daal ahiai chih na he uhi. 7 Ajiahchu daanbohsiatna thukiphual in atong panta hi, adaaltu Amah in chu lampi apat laahmang ahih masiahin adaal zing diing hi. 8 Laahmang ahih chiangin migiloupa chu ahung kilang diing a, Lalpa Jesu'n amah chu a kam a hu in akaangtum diing a, ahung kilaahna vaah in asumang diing hi. 9 Hu daanbotsepa hungna diing chu Setan natoh dungjuia silbawltheihna teng toh, chiamchihnate toh, huleh atahlou sillimdang zousiah toh, 10 huleh mangthaaite lahah dihtatlouhna heemna zousiah toh ahi diing hi, ajiahchu amah un hutdama aum theihna diingva thutah ngaihnatna apom louh jiahun. 11 Huleh hikhu jiahin juauthu agintaatna diingun Pathian in puimangna natoh haattah a kawmvah asawl diing hi, 12 huchia thutah gingta lou a, dihtatlouhna kipaahpih jawte a bawnva siamlouh tansaha aum theihna diingun.
Dingkip Diinga Hasotna
13 Hizongleh unau Lalpa deihtahte, Hagau suhsiangthouna leh thutah gintaatna jaala hutdama um diinga atuung apat Pathian in nanguh ahung teel jiahin keiuh chu na tungthu vah Pathian kawmah kipaahthu soi zing diing mawng ka hi uhi. 14 Hu diing mawngin Ama'n ka tanchinpha uh tungtawnin nanguh i Lalpa uh Jesu Khrist loupina tang diingin ahung kou hi. 15 Hujiahin unaute, ding kip unla, thusoi in hiin ka lehkhathot un hitaleh, thugousiah nanguh hung kihilhte chu tukip un. 16 Tuin i Lalpa uh Jesu Khrist ngeei leh Pathian, i Pa uh ngeei, eite hung lungsiat a, hehpihna jaala kumtuang hamuanna leh kinepna hoih hung pepa'n, 17 na lungtang uh suhamuangin thu hoih leh natoh hoih chinteng ah hung sukipta hen.
Haamtei Diinga Ngetna
1 Atawppeenin unaute, Lalpa thu chu nanguh a aum banga akhang a huleh suhloupi-a aum theihna diingin, 2 huleh huchia mingongtatte leh migiloute laha ka bit theihna diingun hung haamteisah un; ajiahchu mi zousiah in ginna anei veh sih uhi. 3 Hizongleh Lalpa chu aginum a, Ama'n nanguh ahung sukip diing a huleh migiloupa apat ahung veeng diing hi. 4 Huleh ka hung thupiaahte uh na bawl va huleh na bawl jeel diing uh chu Lalpa ah ka hung muang uhi. 5 Huleh Lalpa'n na lungtangte uh Pathian lungsiatna ah leh Khrist diinga ngaah kuhkalna ah hung pui hen.
Thasiat Thu a Vauna
6 Huchiin unaute, keiuh apat a na muh uh thugousiah banga umlou a, daan bangloua gamta unaute zousiah laha kiheemkhe diingin i Lalpa uh Jesu Khrist min in thu ka hung pia uhi. 7 Ajiahchu nanguh ngeei in na hung juih daan diing uh na he uhi, ajiahchu na lahvah umdaan kilawmlouiu ka gamta ngei sih va, 8 koima tanghou zong athawnin ka ne ngei sih va, na lahva koima puaahgih ka hihlouhna diingun suun leh jaan in tawltahin ka tonggim jaw uhi. 9 Huchu thuneihna ka neih louh jiah uh ahi sih a, hizongleh na hung juih diingva etton diingin ka kibawl uh ahijaw hi. 10 Ajiahchu na kawmva ka um laiun zong hi thu ka hung pia uhi: Koipouh in nna atoh uut louh leh, ne zong ne sih heh. 11 Ajiahchu na lahvah daan bangloua gamta, nna mawngmawng tong lou a, phatuamloua mi tungtaang buaipihhaat khenkhat aum uh chih ka ja uhi. 12 Hutobang mite chu sipkhiana nna tong diing leh amahuh tanghou kineeh diingin Lalpa Jesu Khrist min in thu piain ka hasuan uhi. 13 Hizongleh unaute, nang un jaw sil hoih bawl chimtaah sih un. 14 Huleh koipouh in hi lehkhathot a ka thu uh azop louh leh, hu mi chu chiamchih unla, azum theihna diingin kithuahpih sih un. 15 Ahihvaangin chu meelma bangin bawl sih unla, unau bangin thuhilh jaw un.
Thutawpna
16 Tuin hamuanna Lalpa ngeei in bang lam pouh ah, bangchihlaipouhin nanguh hamuanna hung pe zingta hen. Lalpa'n na bawnun hung umpihta hen. 17 Hi ka chibaibuuhna hi kei, Paul in ka khut ngeei a ka gelh ahi a, ka lehkhathot chin ah chiamchihna ahi a, hichibanga ka gelh veu ahi. 18 I Lalpa uh Jesu Khrist hehpihna na bawnva kawmah um hen. Amen.
Chibaibuuhna
1 Paul, i Hundampa Pathian leh i kinepna uh Lalpa Jesu Khrist thupiaah banga Jesu Khrist apostol in,
Thuhilhna Dihlou Thu a Hilhlawhna
2 Ginna a ka tapa tahzet Timothi kawmah: I Pa Pathian leh i Lalpa uh Jesu Khrist kawma kipan hehpihna, khotuahna leh hamuanna umta hen. 3 Makedonia gam a ka chiah diing kuanin Ephesi khua a umzing diingin ka hung ngeen hi, huchia mi khenkhat in kihilhna dihlou ahilh louhna diing uh leh 4 amah un taangthu bulbaal neilou leh khangthu suutbei theihlouh pouh abuaipih louhna diingun hilh in, hite'n ginna jiaha Pathian natohna akhansah saangin kinialna asiam jaw uhi. 5 Huleh thupiaah kipiaahna jiah chu lungtang siangthou leh sialepha heetna hoih leh ginna dihtah apat lungsiatna neih ahi. 6 Hu apat mi khenkhatte apeetmang va, thulimlou houlimna lamah achiahta va, 7 a thusoi uh leh adih ahi chia apomte uh bang ahiai chih helouin daan hilhtute hih auut uhi. 8 Hizongleh daan chu mi'n dihtaha azatin chu ahoih chih i he hi. 9 Hichu hein: daan chu midihtat diinga bawl ahi sih a, daan poisalou leh kituluut uutloute a diing, Pathian ngaihsahloute leh misualte a diing, misiangloute leh Pathian zahloute a diing, pate thatte leh nute thatte a diing, mihing thatte a diing, 10 numei leh pasal kaala thaanghuaite a diing, tohuuhte a diing, mihing gute a diing, juau haatte a diing, juau a kihaahsialte a diing leh thugin dih toh kikalh sildang aum leh, hute a diingin ahi, 11 ka kawma kolsaha um phattaah Pathian loupitah tanchinpha dungjuiin.
Paul Tunga Lalpa Khotuahna
12 Huleh ahung suhaattu Jesu Khrist i Lalpa un thunatongtu a ahung koih a, ginuma ahung sim jiahin Amah chu ka phat ahi. 13 Tuma laiin soisetu leh suduhdahtu leh sunatu ka na hi a, hizongleh ginlouhna a heloua anabawl ka hih jiahin khotuahna ka muta hi. 14 Huleh i Lalpa uh hehpihna chu Khrist Jesu a um ginna leh lungsiatna in adimleet ahi. 15 Khrist Jesu chu misualte hundamdiinginkhovelahahunghi chih thu hi gintaat um leh pomtaah mahmah ahi, hu misualte laha sualpeen ka hi. 16 Hijiangzongleh, hikhu jiahin khotuahna ka mu hi, huchia tunungsiaha kumtuang hinna diinga Amah hung gingta diingte kawmah etsahna diingin Jesu Khrist in a thuaahzohna tawplou keimah a asuhlat masat theihna diingin. 17 Tuin kumtuang Kumpipa, sitheilou, muhtheihlouh, Pathian pil chauh kawmah zahna leh loupina chu kumtuang kumtuangin umzingta hen. Amen. 18 Ka tapa Timothi, tuma a nangmah tungtaang thusoilawhte dungjuiin hi thupiaah chu ka hung pia ahi, hute zanga kidouna hoih na dou theihna diingin, 19 ginnaleh sialephaheetna hoih chu tukip in, huchu mi khenkhatte'n apaaikhia va, ginna lamah kuang sia bangin akeehgawpta va, 20 amahuh lahah Humenai leh Alexandar ahi va, Pathian soisiat louh daan ajil theihna diingun amahuh chu Setan kawmah ka pekheta hi.
Vaantaang Pathian Biahna Thu a Hilhna
1 Hujiahin amasapeenin silngetnate, haamteinate, haamteisahnate leh kipaah-thusoinate mi zousiah diinga bawlsah diing leh 2 kumpipate leh thuneihna mun a um zousiah a diinga zong bawlsah diingin ka hung hasuan hi, huchia Pathian ngaihsah leh zahumtaha hinkho thovengtah leh hamuanhuai i man theihna diingun. 3 Ajiahchu hichu i Hundampa Pathian mitmuhin ahoihin apomtaah hi. 4 Ama'n chu mi zousiah hutdama um diing leh thutah hung he diingin adeih hi. 5 Ajiahchu Pathian khat aum a, huleh Pathian leh mihing kikaal ah Palai khat aum hi, Mihing Khrist Jesu chu. 6 Amah chu mi zousiah tatdohman diingin ahung kipia hi, huchu a huntaha heetsaha um diingin. 7 Hu diinga thusoitu leh apostol a guat ka hi. Khrist ah thutah ka soi a, huleh ka juau sih hi, ginna leh thutah a Jentelte thuhilhtu ka hi hi. 8 Hujiahin mun chin apasalte'n khut siangthou jaahin, lungthah lou leh ginglel louin haamtei uh leh ka deih hi. 9 Huchibangmahin numeite chu puansilh kilawm hun leh uang lou leh pilvaangtahin kithuam uh henla, sam pheehkiil aha, sana aha, tuikepsuang ahihlouhleh sil mantam a kithuam louin um uh leh ka deih hi, 10 hizongleh Pathian ngaihsah numei kichite a diinga kilawm huntawhin, nasep hoih in kithuam uh leh ka deih hi. 11 Numei in thumangtahin sipkhianin jil uh heh. 12 Hizongleh numei in thu ahilh leh pasal tunga thu aneih zong ka phal sih hi, sipkhianin um jaw uh heh. 13 Ajiahchu Adam chu siam masat ahi a, hu nungin Evi chu siam ahi. 14 Huleh Adam chu heemin aum sih a, hizongleh numei chu heemin aum a, bohsiatna ah apuuhta hi. 15 Hizongleh ginna leh lungsiatna leh siangthouna neia kisuumtheitaha aum zing uh leh, naupaaina tungtawnin hutdohin aum diing uhi.
Kouhtuam a Pastor Diingte
1 Hichu thu muanhuai ahi: mi koipouh kouhtuam houtu a pan uutin chu, natohna hoih adeih ahi. 2 Huchiin kouhtuam houtu chu soiseelbei, ji khat nei, kisuumthei, pilvaangtah, gamtathoih, zindousiam, thuhilh thei, 3 uain kham haatlou, kihaau haatlou, punna niin a huaiham lou, mijaidam, minial haatlou, een haatlou, 4 amah innsung hoihtaha vaihawmzou, zahumna teng toh a tate thununna nuaia koih mi ahih diing ahi. 5 Ajiahchu mi'n amah innsung bawn vaihawm daan aheet louh leh, bangchiin Pathian kouhtuam aenkol thei diai? 6 Gingthahmi ahihlouh diing ahi, huchilou inchu akisathei kha diing a, diabol bangin siamlouhtanna atang ve kha diing hi. 7 Hubaan ah zong amah chu polam mite soiphat ahih ngeei diing ahi, huchilou inchu soisiat-a umin diabol thaang ah a-awh kha diing hi.
Dikon Diingte
8 Huchibangmahin, dikonte chu mi zahum, thusoi heng lehleh loumi, uain hailou, punna niin a huaiham lou, 9 sialephaheetna siangtah a ginna thukiphual keem mi ahih diing uh ahi. 10 Huleh hite chu etchian hi masa uh henla, huchia soiseelbei ahih uh leh, dikon nna tong uh heh. 11 Huchibangmahin a jite uh zong mizahum ahih ngeei diing uh ahi, miheehsiathaat lou, kisuumthei, sil zousiah a ginum ahih diing uh ahi. 12 Dikonte chu ji khat nei, huleh a tate uh leh a innsung uh kituuptaha vaihawmzou mi hi uh heh. 13 Ajiahchu kouhtuam dikon nna hoihtaha tongte'n dinmun hoihtah leh Khrist Jesu a um ginna lama hamuanna loupitah akimuh uhi. 14 Sawtlou kaala na kawma hung kineemin hi thute na kawmah ka hung gial hi. 15 Hizongleh ka hung um sawt khaah leh, Pathian inn sunga bangchibanga gamta diing na hiai chih na heetna diingin ka hung gial ahi, huchu Pathian hing kouhtuam, thutah khuam leh thutah kingahna ahi. 16 Huleh Pathian ngaihsahna thukiphual chu nial guallouhin aloupi ahi: Pathian chu tahsa in ahung kilang a, Hagau a siamtansah ahi a, angelte'n amu va, Jentelte kawma taangkoupihin aum a, khovel ah gintaatin aum a, loupina a puitouhin aumta hi.
Thuhilhna Dihlou
1 Hizongleh hun nunung lam chiangin mi khenkhatte'n puimangna hagaute leh dawite thuhilhnate ngaihsahin, ginna chu atawpsan diing uh chih Hagau in chiantahin asoi hi; 2 lepchiahna a juauthu soiin, a sialephaheetna uh siih aam a biha umin, 3 kiteen khaamin, huleh thutah gingta a hete'n kipaahthu soia asaan mei diing uh, Pathian in asiam ante chu ne lou diingin thu apia uhi. 4 Pathian silsiam zousiah chu ahoih hi, huleh kipaahthu soia saan ahih phot leh, bangmah nuai diing aum sih hi. 5 Ajiahchu Pathian thu leh haamteina a suhsiangthou ahita hi.
Jesu Khrist Thunatongtu Hoih
6 Hi silte unaute na heetsah leh, nang chu Jesu Khrist thunatongtu hoih, ginna thute leh thugin hoih tutana na juih khu a vaahkhanga um na hi diing hi. 7 Hizongleh Pathian zahlouhna thu leh piteehte taangthu bulbaal neilou haw nuai inla, Pathian ngaihsahna lamah kithunun in. 8 Ajiahchu tahsa kithununna ahihleh themkhat chauh aphatuam a, hizongleh Pathian ngaihsahna chu tua umzing leh hung um kiit diinga hinna thuchiam nei ahih jiahin sil zousiah ah aphatuam hi. 9 Hichu thu gintaathuai leh pomtaah mahmah ahi. 10 Ajiahchu huchia Pathian hing i muan jiahin i tonggim a, i pang teeiteei uh ahi. Amah chu mi zousiah Hundampa ahi a, a gingtate a ahi diaahkhol hi. 11 Hi thute chu pia inla, huleh hilh in. 12 Na naupanna koimah in musit sih heh, hizongleh haam kamsuah ah, gamtat daan ah, lungsiatna lam thu ah, hagaulam thu ah, ginna thu ah, sianthouna lam thu ah, gingtute etton diing hijaw in. 13 Ka hung masiah lehkhasim leh hasot leh thuhilh ngaihsah in. 14 Nangmah a um silpiaah, thusoilawhna a upate khut ngahna toh nang hung kipeta chu thahdah sin. 15 Mi zousiah a diinga na khantouhna alat theihna diingin hu silte ngaihtuah inla, hute ah kizangzou in. 16 Nangmah leh na thuhilh ah pilvaang in. Hu silte ah umzing in, ajiahchu huchibang hihna jaalin nangmah leh na thu jate na huumbit diing hi.
Thunatongtu Hoih Natoh Daan Diing
1 Pasal upate chu natahin taai sinla, himahleh pa bangin, akhanglai deuhte chu sanggampa bangin hasot in, 2 numei upate chu nute bangin, akhanglai deuhte chu sanggamnu bangin, siangthoutahin hasotin. 3 Meithaite, meithai tahzette chu zahbawl in. 4 Hizongleh meithai koipouh in tate aha, tute aha aneihin chu, amah un inn sungah Pathian ngaihsah daan leh a nulepate uh hoihna thuhkiit daan jil masa uh heh; ajiahchu Pathian muhin huchu ahoih a huleh apomtaah hi. 5 Huleh meithai tahzet, amah tanga um in chu Pathian amuang a, suun leh jaan a ngeenin ahaamtei zingzing hi. 6 Hizongleh tahsa nopsahna a hingnu chu a damlaiin zong asi ahi. 7 Huleh soiseelbeia aum theihna diingun hi thute pia in. 8 Hizongleh koipouh in amah innkote a diing, adiaahkhola amah innkuanpihte a diing apoimoh uh angaihtuahsah louh leh, ginna chu ajuausan a, ginglou mi saangin asejaw ahi. 9 Meithai kum sawmguup nuailam chu meithai in sim sinla, huleh pasal khat chauh ji anahi a, 10 sil hoih bawl lama mi paahtawia um a, tate khoilian a, mikhualte anazintun a, mi siangthoute keeng anasilta a, mi gimthuaahte anapanpihta a, sil hoih photmah a thanuamtaha anakipumpiaah ahihleh, meithai in sim in. 11 Hizongleh meithai khanglai deuhte jawhgial sin,ajiahchutahsa uutna in Khrist lama akipiaahna uh azoh chiangin pasal neih auut veu uhi. 12 Huchiin a ginna masa uh apaih jiahun siamlouhtangin aum veu uhi. 13 Hubaan ah, inn chin ah avaahleh va, thasiat achiing va, huleh thasiat chauh zong hilouin mi tanchin soite leh phatuamloua mi tungtaang buaipihte ahung hi va asoi louh diing uh asoi uhi. 14 Hujiahin meithai khanglai deuhte'n chu pasal nei uh henla, talenau neiin, innsung keem hoihin soiseelna diing lemtaang mawngmawng meelma musah sih uh leh ka deih hi. 15 Ajiahchu tuin zong mi khenkhat Setan lamah apeetkheta uhi. 16 Gingtu numei aha pasal aha in meithaite aneih leh, somdawl heh, huchia meithai tahzette asomdawl theihna diingin kouhtuam chu puaahgih guanin um sih heh.
Upate Tungtaanga Thuhilhna
17 Kouhtuam upa vaihawm hoihte chu alehniha zahbawltuaaha seh hi uh heh, adiaahkholin thusoi leh thuhilhna lama tonggimte chu. 18 Ajiahchu Pathian Lehkhathu in, "Bawngtal in buh achil laiin a muuh kaan sin," huleh, "Natongtu chu loh mutaah ahi," achi hi. 19 Kouhtuam upa heehna chu heetpihtu nih aha thum aha louin pom sin. 20 Misualte chu midangte'n zong alau theihna diingun mi zousiah ma ah taaihilh in. 21 Khentuam neia bangmah bawllou a, deihsahtuam neiloua hi thute jui diingin Pathian leh Lalpa Jesu Khrist leh angel teela umte mitmuh ah thu ka hung pia hi. 22 Mi koima tungah khut nga pahpah sinla, midangte sualna ah zong vatel sin, siangtahin kikoih zing in. 23 Na gilpi jiahin leh na damlouh veu jiahin, tui chauh dawn nawn sinla, uain them khatkhat zang veu in. 24 Mi khenkhatte sualna chu akilangchiang a, vaihawmna ah atung masa veu hi; hizongleh mi khenkhatte chu a sualna un anung vah ajui hi. 25 Huchibangmahin khenkhatte sil hoih bawl kilang masa aum a, huchibang loute zong phual theih ahi sih hi.
1 Pathian min leh a thugin soisiat-a aum louhna diingin suaah ngawngkol baat photmahte'n amahuh pute chiat chu bangkim ah zahbawltaahin ngai uh heh.
Thuhilhna Dihlou leh Hauhsatna Dih
2 Huleh gingtu pute a neite'n unau ahih jiahun zahtaat louin um sih uh heh. Husaangmahin phattuamna mute chu gingtu leh deihtahte ahih jiahun a nna uh tohsah jaw seem uh heh. Hi thute hilh inla, hasot in. 3 Mi koipouh in thuhilhna dang ahilh a, i Lalpa Jesu Khrist thutah leh Pathian ngaihsahna diinga thuhilhna toh akituaah louh leh, 4 amah chu akisathei ahi a, bangma helou ahi. Heet malahin kinial leh thukalh lamah alungluut jawta a, huchibang apatin thangsiatna, kinialna, soisiatna, kiginmohna hoihloute, 5 lungsim gilou neia thutah neilou mite apat kinial haatna bang ahung suaah veu a, huchibang mite'n Pathian ngaihsah chu punna in angai uhi. Huchibang mi apat kiheemkhia in. 6 Hizongleh lungkimna toh Pathian ngaihsah chu punna nasatah ahi. 7 Ajiahchu khovel ah bangma i poluut sih a, bangma i podoh het sih diing uhi. 8 Huchiin neeh diing leh silh diing neiin hute ah i lungawi diing uhi. 9 Hizongleh hauhsat tumte chu heemna leh thaang ah, uutna ngolhuai leh susethei tampi bang ah apuuhluut veu va, hute'n chu siatna leh manthaaina ah mite asutum veu uhi. 10 Ajiahchu sum ngaihnat hi gilou zousiah bulpi ahi. Huchu khenkhat in adeihgoh va, ginna apaimangsan va, huleh amahuh leh amahuh lungkhamna tampi in akisunlet uhi.
Ginna a Kidouna Hoih Dou
11 Hizongleh, aw nang Pathian mipa, hi silte taaisan inla, dihtatna bang, Pathian ngaihsahna bang, ginna bang, lungsiatna bang, dohtheihna bang, thunuaigolhna bang deih jaw in. 12 Ginna kidouna hoih dou inla, kumtuang hinna chu tu in, hu tang diinga kouh zong na hi a, heetpihtu tamtah mitmuhin kiphuanna hoih chu na phuangta hi. 13 Sil bangkim a hinna petu Pathian leh Pontia Pilat ma a kiphuanna hoih phuangpa Khrist Jesu mitmuhin thu ka hung pia hi, 14 i Lalpa Jesu Khrist hung kilat masiah thupiaah chu siangthou leh soiseelbeia kol diingin, 15 hu kilatna chu ahuntah ah Ama'n ahung lah diing hi, Amah chauh chu ahamphapa leh Thuneipa, kumpipate Kumpipa, lalpate Lalpa ahi a, 16 Amah chauh sihtheihlouhna neipa, koima naih theihlouh vaah a umpa, koima muh ngeilouh leh muh theihlouhpa ahi a, Amah kawmah loupina leh kumtuang silbawltheihna um hen. Amen. 17 Hi khovel a mihausate chu kisatheilou diing leh hauhsatna kiplou a muanna ngalou a, sil zousiah i kipaahna diinga kichingtah meia hung petu Pathian tunga nga jaw diingin hilh in. 18 Sil hoih bawl diingin, sil hoih bawl hau diingin, silphal diingin, kihop uut diingin, 19 kumtuang hinna atuuhdet theihna diingva, hun hung tung diinga innbulkip hoihtah amahuh diinga kholkhawm diingin hilh in.
Thutawpna
20 Aw Timothi, na kawma kolsaha um chu keembit in, Pathian zahlouhna thusoi meimei leh adihloua heetna anakichi nialkalhnate chu pumpelh in. 21 Huchu khenkhat in nei hiin akisoi va, ginna lamah apaikhialta uhi. Hehpihna na kawmah um hen. Amen.
Chibaibuuhna
1 Paul, Khrist Jesu a um hinna thuchiam dungjuia Pathian deihjawnga Jesu Khrist apostol in, 2 ka ta deihtah Timothi kawmah: Pa Pathian leh Khrist Jesu i Lalpa uh kawm akipan hehpihna, khotuahna leh hamuanna um hen.
Muanhuaina
3 Suun leh jaan a ka haamteinate a tawplou a ka hung heetzingin, ka pulepate bawl banga sialephaheetna siangtah toh a nna ka toh ka Pathian kawmah kipaahthu ka soi hi. 4 Kipaahna a ka dim theihna diingin na mittuite hezingin, nangmah hung muh ka uut mahmah hi. 5 Ginna dihtah nangmah a um chu ka ngaihtuah chiangin, hu ginna chu amasapeenin na pi Loisi ah aum a, na nu Euniki ah zong aum a, huleh nangmah ah zong aum chih ka hechiang hi. 6 Hujiahin ka khut ngah tungtawna Pathian silpiaah nangmah a um chu muutkuang diingin ka hung henonsah hi. 7 Ajiahchu Pathian in launa hagau ahung pe sih a, hizongleh silbawltheihna leh lungsiatna leh lungsim kithuzohna hagau ahung pe jaw hi. 8 Huj iahin i Lalpa thu heetpihna chu zumpih sinla, ahihlouhleh Amah diinga mitaang kei zong hung zumpih sin; hizongleh Pathian silbawltheihna bang jeela tanchinpha jiaha gimthuaahna hung thuaahpihtu hijaw in. 9 Ama'n chu i silbawlte dungjui uh hilouin, hizongleh leilung pianma a Khrist Jesu a ahung piaah, Amah lemguat daan leh hehpihna dungjuiin ahung hundamta a huleh kouhna siangthou in ahung kouta hi. 10 Hizongleh ahung Hundampa Jesu Khrist kilaahna jiahin tuin suhlatin aumta a, Ama'n chu sihna sumangin, hinna leh sihtheihlouhna chu tanchinpha tungtawnin ahung sulangta hi. 11 Hu tanchinpha diinga kei chu thuphuangtu diing leh apostol diing leh Jentelte thuhilhtu diinga guat ka hi hi. 12 Hikhu jiahin hi silte zong ka thuaah hi; ahihvaangin ka zum sih, ajiahchu ka gintaatpa ka he a, huleh Amah kawma ka kolsah chu hu Ni tanin akolbit thei chih chiantahin ka he hi. 13 Khrist Jesu a um ginna leh lungsiatna ah, kei apat etton diing thu dih na jaahte chu tukip in. 14 Sil hoih na kawma kolsaha um chu i sunga teeng Hagau Siangthou tungtawnin keem in. 15 Asia gam a um zousiah in ahung nungheisan uh chih na he. hi, a lahvah Phigela leh Hermogene atel uhi. 16 Lalpa'n Onesiphora inn-kuanpihte kawmah khotuahna pia heh, ajiahchu ama'n ahung suhalh jeeljeel a, ka khainiang buh zong azumpih sih a, 17 hizongleh Rom khua ahung tun tahin kuhkaltahin ahung hawl a huleh ahung mudoh hi. 18 Hu Ni chianga Lalpa kawma khotuahna amuh diing Lalpa'n phalsah hen! Huleh Ephesi khua a ka nna tampi ahung tohsah daan hoihtahin na he hi.
1 Hujiahin, nang ka tapa, Khrist Jesu a um khotuahna ah haattahin um in. 2 Huleh heetpihtu tampi laha ka kawma thu na jaahte, hute chu mi muanhuai midangte zong hilhsawn thei diingte kawmah keemsah in. 3 Huchihjiahin nang in Jesu Khrist sepaih hoihtah bangin gimthuaah hung thuaahpih in. 4 Sepaih hi diinga teelpa akipaahsah theihna diingin sepaih koimah hi damsung khosahnate in akisubuai ngei sih hi. 5 Huleh kidemna ah mi pang mah zongleh, daan banga abawl louh leh, kipaahman amu ngei sih hi. 6 Loubawlmi tonggimtah chu a gah tang masapeen ahih diing ahi. 7 Ka thusoi chu ngaihtuah in, ajiahchu Lalpa'n nang chu sil zousiah ah heetsiamna ahung pia hi. 8 Jesu Khrist, David chihaah a mi chu ka tanchinpha soi bangin misi lah apat kaihthohin aum hi chih hezing in. 9 Hu tanchinpha jiahin silgilou bawltu bangin kaanna tanpha hahsatna ka thuaahloh a; hizongleh Pathian thu chu kaanin aum sih hi. 10 Hujiahin Khrist Jesu a um hutdamna chu kumtuanga loupina toh amuh theihna diingun teelte jiahin sil zousiah ka thuaah ahi. 11 Hi thu chu agintaathuaiin adih ahi: Ajiahchu Amah toh sita i hih leh, Amah toh i hing khawm diing uhi. 12 I thuaah leh, Amah toh vai i hawm khawm diing hi. Amah i kiheetmohbawl leh, Ama'n zong ahung kiheetmohbawl diing hi. 13 Eite ginum sih zonglei, Amah chu aginum zing hi, ajiahchu Amah leh Amah akiheetmohbawl thei sih hi.
Pathian in Apom Natongtu
14 Angaikhetute diinga pha-tuamlou, beimangna hi giap thute a kinial lou diingin hi silte hesah zing inla, Lalpa ma ah thu pia in. 15 Thutah thu dihtaha khenin, zumna diing neilou natongtu bangin, Pathian kawma pomtaaha kipe diingin phatuamngaitahin um in. 16 Hizongleh Pathian zahtaatlouhna thusoi meimeite nungheisan in, ajiahchu huchibangte'n mite chu Pathian ngaihsahlouhna lamah apui gamla deuhdeuh uhi. 17 Huleh a thusoi uh chu meimasia bangin adalh deuhdeuh diing hi. A lahvah Humenai leh Phileta apang uhi. 18 Hute'n chu thohkiitna aum zouta chiin, thutah apaisan va, mi khenkhatte ginna asubuai veh uhi. 19 Ahihvaangin Pathian innbulkip chu ading zing a, hi chiamchihna anei hi: "Lalpa'n Amah-ate ahe hi," huleh, "Mi chin Khrist min lou photmah in giitlouhna paisan heh," chih chu. 20 Hizongleh inn loupi Sungah saria leh dangka beelte chauh aum sih a, hizongleh sing beel leh lei beelte zong aum a, khenkhat zahum in aum va huleh khenkhat zahumlou zong aum hi. 21 Hujiahin mi koi hizongleh hi silte laha akikepsiangthou leh, beel zahum, siangthou leh a pu diinga zat taah, sil hoih chinteng a kipeihsa ahi diing hi. 22 Teilawl uutnate zong taaisan inla, himahleh lungtang siangthou a Lalpa min koute toh dihtatnate, ginnate, lungsiatnate, kilepnate deih jaw in. 23 Hizongleh ngolhuai leh pilhuailou kinialnate in kikhinna asiam chih hein, hute ah pang sin. 24 Huleh Lalpa suaah khat chu mi toh kinialhaat ahih diing ahi sih a, hizongleh mi zousiah tunga jaidam, thuhilhthei leh thuaahthei ahihjawh diing ahi. 25 pathian in thutah a heetna diingva kisiihna apiaah khaah leh, chiin a kalhtute chu jaidamtahin athuhilh diing ahi, 26 huleh huchia diabol in amah deihjawng bawl diinga sal a amatte ahung kiphawh va, diabol thaang apat ahung suahtaat theihna diingun.
Ni Nunung Chianga Pathian Ngaihsahlouhna
1 Huleh hi zong he in, ni nunung lamah hun hahsa tahtahte ahung um diing hi. 2 Ajiahchu mi amahuh kilungsiatte, sum ngainate, kiuangsahte, kisatheite, Pathian soisete, nulepa thumangloute, kipaahnataang heloute, siang-thouloute, 3 iitna neiloute, kilep uutloute, juau a miheehte, kideehtheiloute, mi huhamte, hoih mawngmawng deihloute, 4 leptatte, ngongtatte, kingaisangte, Pathian lungsiat saanga tahsa nopsahna ngainajawte bang ahi diing uh, 5 Pathian ngaihsah batna anei diingva hizongleh a silbawltheihna atahsang sih diing uhi. Huchibang mite chu nungheisan in! 6 Ajiahchu huchibangte laha mite chu innte bang ah aluut va, sual gih in anet numei haatloute sal in aman va, uutna chinteng in apuimang uhi, 7 hute'n chu jil zing napiin thutah ahe thei het sih uhi. 8 Huleh Janne leh Jambre in Mosi akhin bangun, hite'n zong thutah adoudaal zing uhi, amahuh chu lungsim sesuaah mi, ginna lama Pathian deihlouh mi ahi uhi.
Paul in Timothi Mohpuaahna Apia
9 Hizongleh ma asawn thei sih diing uhi, ajiahchu Janne leh Jambre bangin angoldaan uh mi zousiah kawmah ahung kilang diing hi. 10 Hizongleh nang chu ka thuhilhna, ka hindaan, ka siltup, ka ginna, ka thuaahtheihdaan, ka lungsiatna, ka kuhkaldaan pilvaangtahin nana juita a, 11 suhduhdahna leh suhgimna Antiok leh Ikoniam leh Lystra khuate a ka tunga siltungte leh suhduhdahna ka thuaahte pilvaangtahin nana juita hi. Huleh hute zousiah ah Lalpa'n ahung hundohta hi. 12 Ahi, mi Khrist Jesu a Pathian ngaihsaha um tum zousiah in suhduhdahna athuaah diing mah ahi. 13 Hizongleh migilou leh miheemhaatte chu miheem leh heema umin asesuaah deuhdeuh diing uhi. 14 Hizongleh nang chu koi kawm apat na jil ahiai chih hein, na jilsa leh heetchiansaha na umna silte ah umzing in. 15 Huleh nang chu na naupan lai apat Khrist Jesu a ginna jiaha hutdamna mu khopa nang hung hilhpilthei Pathian Lehkhathu Siangthou he na hita hi. 16 Pathian Lehkhathu zousiah chu Pathian huhaihkhuma piaah ahi a, huleh hichu thuhilhna diing bang, kitaaihilhna diing bang, kisuhdihna diing bang leh dihtatna lama thuhilhna diing bangin aphatuam hi, 17 huchia Pathian mi chu nna hoih zousiah tong diinga kimtaha akithuam bukim theihna diingin.
1 Hujiahin Pathian ma leh Amah leh a lalgam hung kilat chianga mihing leh misite vaihawmsah diingpa Jesu Khrist ma ah thu ka hung pia hi: 2 Thu chu soi in! Ahun ah bang, ahunlou ah bang kimansain um in. Thuaahthei taha thuhilh pumin a siamlouh daan uh hesah inla, taaihilh inla, hasot in. 3 Ajiahchu thuhilhna dih angaihkhiah peihlouh hun uh hung tung diing ahi; hizongleh a bilte uh thu thah ja nuama athah het-het jiahin amahuh deihjawng bangin a kawmvah thuhilhtu akhawm diing uhi. 4 Huleh a bilte uh thutah lam apat aheimang diing va, taangthu bulbal neilou lam ngain adohta diing uhi. 5 Hizongleh nang chu sil zousiah ah pilvaang inla, gimthuaah inla, sawlleh tanchinphasoina nna tong inla, na thunatohna chu sutaangtung in. 6 Ajiahchu tuin kei chu dawn sillat banga sunbuaah ka hita a, ka chiahdohna hun anaita hi. 7 Kidouna hoih chu ka douta a, kitaaidemna chu ka zouta a, ginna chu ka keemta hi. 8 Tuin chu dihtatna lallukhuh kei diingin koihin aumta, huchu Lalpa, Vaihawmtu dihtah in hu Ni chiangin ahung pe diing hi; huleh kei kawmah chauh hilouin Amah kilaahna ngaina photmahte kawmah zong ape diing hi.
Mimal Thuhilhna
9 Kintaha ka kawma hung diingin theihtawp hung suah in. 10 Ajiahchu Dema in hi tulai khovel angaihnat jiahin ahung paisanta a, huleh Thessalonika ah achiahta hi; Kresen chu Galatia gam ah achiahta a, Tita chu Dalmatia gam ah achiahta hi. 11 Luk chauh ka kawmah aum hi. Mark jawn inla, hung tonpih in, ajiahchu thunatohna lamah amah kei diingin aphatuam hi. 12 Huleh Tikika chu Ephesi ah ka sawlta hi. 13 Na hung chiangin Troas khua a Karpo kawma puannaahtual ka nuutsiat khu lehkhabute toh hung pua in, adiaahkholin savun lehkhabute khu. 14 Alexandar, sumsungpa ka tungah agilou mahmah hi. Lalpa'n a natohte bangjeelin athuh diing hi. 15 Amah apat nang zong pilvaang in, ajiahchu ama'n i thute adou naah mahmah hi. 16 Ka siamna thu ka soi masatpeen laiin koima'n ahung dinpih sih a, mi zousiah in ahung taaisan veh uhi. A mohna uh chu a tungvah tun dah heh. 17 Hizongleh tanchinpha thusoi chu kei jiaha bukimtaha zoha aum a, huleh Jentelte zousiah in ajaah theihna diingun Lalpa'n ahung dinpih a huleh ahung suhaatta hi. Huleh huumpibahnei kam apatin suahtaatsahinkaumtahi. 18 Huleh Lalpa'n natoh gilou chinteng lah apatin ahung suaahtasah diing a, huleh a vaan lalgam ah bittahin ahung tut diing hi; Amah kawmah kumtuang kumtuangin loupina umta hen. Amen.
Chibaibuuhna Nunung leh Thutawpna
19 Priska leh Akuila, huleh Onesiphora innkuanpihte chibai hung buuhsah in. 20 Erasta chu Korinth ah aum zing a, Trophima ahihleh Mileta ah damlouin ka nuseta hi. 21 Phalbi ma a hung teeiteei diingin na theihtawp suah in. Eubula in chibai ahung buuh a, Puden, Lina, Klaudia leh unaute zousiah in zong chibai ahung buuh uhi. 22 Lalpa Jesu Khrist chu na hagau kawmah um hen. Hehpihna na kawmah um hen. Amen.
Chibaibuuhna
1 Paul, Pathian suaah leh, Pathian miteelte ginna dungjui leh Pathian ngaihsahna toh kituaah thutah heetna dungjuia Jesu Khrist apostol in, 2 hichu juau theilou Pathian in hun kipat ma peha achiamsa kumtuang hinna kinepna a kinga in, 3 hizongleh i Hundampa uh Pathian thupiaah dungjuia ka kawma kolsaha um a thuchutaangkoupihna tungtawnin ahuntahin asulangta hi. 4 Ginna kibatna thu a ka tapa dihtah Tita kawmah: Pa Pathian leh Lalpa Jesu Khrist i Hundampa uh kawm akipan hehpihna, khotuahna leh hamuanna um hen.
Kouhtuam Upa Guatna
5 Krit tuikulhgam a ka hung nuutsiat jiah chu sil bawlzoh louha umte na siamtuup theihna diing leh ka hung thupiaah banga khopi chin a upate na guat theihna diingin ahi; 6 kouhtuam upa diing chu dembaanglou, ji khat nei, a tate chu noptat leh thumangloua heeha um mi hilouin gingtu ahih diing uh ahi. 7 Ajiahchu kouhtuam houtu chu Pathian goukeemtu bangin dembaanglou, thusuaahtumlou, lungthahbaihlou, uain kham haatlou, mihuham lou, punna niin a huaihamlou, 8 hizongleh zindousiam, sil hoih deih, lungsim dih, midihtat, misiangthou, mikisuumthei, 9 huchia hi thuhilhna dih tungtawna midangte hasot thei a huleh amah nialkalhtute zong adihlouh daan uh aheetchiansah theihna diinga amah anakithuhilhtaah bangmaha thu muanhuai chu dettaha tukip zing mi ahih ngeei diing ahi.
Thuhilhtu Tahloute
10 Ajiahchu mi thununglou, jawt haam haat leh miheem haatte tampi aum uhi, amahuh chu zehtan haw laha mi ahi diaahkhol uhi. 11 Hute kam chu hupsah diing ahi. Punna niin deihmanin thu ahilh louh diing uh ahilh va, mi innkuan sung atohbuai veu uhi. 12 Amahuh laha khat, a zawlnei ngeei uh khat in, "Krit mite chu juau soi zingte, gamsa giloute, thase anhaite ahi uh," chiin asoi hi. 13 Hi heetpihna chu adih ahi. Hujiahin ginna a ahung lamzan theihna diingun khauhtahin taaihilh in, 14 Judate bawltawm taangthute leh thutah apat peetmangte thupiaahte ngaihsah lou diingin khauhtahin taaihilh in. 15 Misiangthou a diingin sil zousiah asiangthou hi; hizongleh misianglou leh gingloute a diingin bangma asiang aum sih hi. A lungsim uh leh a sialepha heetna tanpha uh zong abuaah ahita hi. 16 Amah un Pathian ka he chiin a kam un aphuang va, hizongleh a silbawlte un Pathian anual va, akihdahhuai va, Pathian thu manglouin, huleh nna hoih chinteng tohna diingin chitna himhim anei sih uhi.
Gindaan Dih Hilhna
1 Hizongleh nang in chu thugin dih toh kituaah thute soi in. 2 Puteehte chu pilvaang diingin, zahum diingin, kisuumthei diingin, ginna leh lungsiatna leh kuhkalna a adihtah hi diingin thuhilh in. 3 Huchibangmahin piteehte zong sianthouna toh kilawma gamta diingin, dihloutaha misoisiat haatlou diingin, uain hailou diing leh sil hoih hilhtute hi diingin thuhilh in; 4 huchia amah un nupi khanglai lamte chu a pasalte uh lungsiat diing leh, a tate uh lungsiat diing leh, 5 pilvaang diing leh, siangthou a um diing leh, innsung nna tong diing leh, hoihtaha um diing leh a pasalte uh thu mang diinga ahilh theihna diingun, huchia Pathian thu chu soisiat-a aum louhna diingin. 6 Huchibangmahin pasal khanglai lamte zong pilvaang diingin hasot in. 7 Sil zousiah ah sil hoih bawlna lama etton diingin kimusah in; thugin a na det daan, na zahum daan leh na dih daan bang ensah in, 8 nangmah tungtaang ahoihloua genbaang aum louh jiaha alang a pangtute azumsuaah theihna diingun, soiseel guallouhin thusoi ah dih in. 9 Suaahte chu a pute uh thu mang diing leh mi kam dawng loua sil zousiah a akipaahna jawng va um diingin, 10 Pathian i Hundampa uh thuhilhna thu chu sil zousiah a acheimawi theihna diingva khutthem neilou a, ginumna hoih zousiah musah jaw diingin hasot in. 11 Ajiahchu hutdamna hung tut Pathian hehpihna chu mi zousiah kawmah ahung kilangta hi. 12 Huh in chu Pathian ngaihsah louhna leh khovel uutnate tawpsan a, tulai khang a pilvaang leh dihtattah leh Pathian ngaihsah a um diingin ahung hilh a, 13 kinepna kilawphuaitah ngaahin, huleh i Pathian loupi uh leh Hundampa Jesu Khrist loupitaha hung kilatna diing chu ngaahin i um diing uh ahi chih ahung hilh hi. 14 Ama'n chu daan poisahlouhna zousiah apat ahung tatkhiah theihna diing leh Amah a diinga nna hoih bawl diinga phatuamngai ateeltuam mite asuhsiangthou theihna diingin i luangun akipeta hi. 15 Hi thute soi inla, hasot inla, huleh thuneitahin taaihilh in. Koima'n nang hung musit sih hen.
Natoh Hoih
1 Amahuh chu vaihawmtute leh thuneitute kawma kituluut diingin, huleh sil hoih taphot bawl diinga kigingsa a um diingin, 2 mi koima soise lou diingin, lemna deih diingin, nunneem diingin mi zousiah kawma kingaihngiamna zousiah ensah jaw diingin hilhpha in. 3 Ajiahchu eite ngeei zong malaiin mingolte, thumangloute, heema umte, tahsa uutna leh nopna chi tuamtuam natongtute, gilou leh thangse zinga umte, huathuai leh khat leh khat kimudahte i na hi uhi. 4 Hizongleh mihing tunga i Hundampa uh Pathian chitna leh lungsiatna ahung kilat nungin, 5 dihtatna natoh eiuh bawlte jiah hilouin, hizongleh pianthahna silna leh Hagau Siangthou siamthahkiitna in, Ama'n a hehpihna dungjuiin ahung hundamta hi. 6 Hu Hagau Siangthou chu Jesu Khrist i Hundampa tungtawnin i tungvah kiningchingtahin ahung leihbota hi. 7 A hehpihna a siamtansah a umin kumtuang hinna kinepna dungjuiin gouluahtu diinga siamin i um ngeei diing uhi. 8 Hichu thusoi ginum ahi, huleh Pathian gingtasate chu nna hoih sep sunzom diinga apilvaang diing uh ahi chia phuut zing diingin ka hung deih ahi. Hite chu mihing diingin ahoih a, huleh aphatuam hi. 9 Hizongleh thudoh ngolhuaite, khangthu suutte, kinialnate leh daan thu a kikalhnate chu kiheimangsan in, ajiahchu hute chu sil phatuamlou leh bangmalou ahi. 10 Kikhenna tuntu chu khatvei huleh nihvei na vauhilh nungin nuai in, 11 huchibang mi chu amah leh amah siamlouh kitangsah ahih jiaha lammang leh asual ahi chih hein.
Thutawpna
12 Artema ahihlouhleh Tikika na kawma ka hung sawl chiangin Nikopoli khua ah ka kawmah hung teeiteei tum in, ajiahchu hu mun ah phalbi sung um ka tum hi. 13 Daansiam Zena leh Apollo a khualzinna va bangmah ataahsap louhna diingun theihtawpsuahin hung pui in. 14 Huleh i mite zong gahloua aum louhna diingun apoimoh kinte uh awnghu diinga nna hoih seemtou zing diingin kijilsah in. 15 Ka kawma um zousiah in nang chibai ahung buuh uhi. Ginna a ei hung lungsiatte chibai anabuuh in. Na bawnva kawmah hehpihna um hen. Amen.
Chibaibuuhna
1 Paul, Jesu Khrist jiaha mitaang leh i unaupa uh Timothi in, ka lawm deihtah uh leh ka natohpih uh Philemon kawmah, 2 huleh ka deihtah uh Apphia leh ka sepaih hihpih uh Arkippo kawmah leh na inn a kouhtuam kikhawmte kawmah: 3 i Pa uh Pathian leh Lalpa Jesu Khrist akipan hehpihna leh hamuanna na kawmvah um hen.
Kipaahthu Soina leh Haamteina
4 Ka haamteinate a na min lou zingzingin ka Pathian kawmah kipaahthu ka soi hi, 5 Lalpa Jesu lam leh misiangthoute zousiah lama lungsiatna leh ginna na neih daan jain, 6 huchia na ginna kikoppihna chu Khrist Jesu a nangmah a um sil hoih chinteng heetkimna lama ahung phattuam theihna diingin. 7 Ajiahchu na lungsiatna ah nuamna leh hehnepna loupitah ka nei uhi, ajiahchu unaupa, nangmah jiahin misiangthoute lungtang ahalhta hi.
Onesima Diinga Ngetsahna
8 Hujiahin akilawm hun bawl diinga thu hung piaah chu Khrist ah kingam mahmah zong leng, 9 lungsiatna jiahin keimah Paul, teehsepu leh tua zong Jesu Khrist j iaha mitaang in ka hung ngeenjaw ahi: 10 ka koltaanna a ka hinkhiah ka tapa Onesima a diingin ka hung ngeen hi. 11 Amah chu tuma laiin nang a diingin aphatuam sih a, hizongleh tuin chu nang leh kei diingin aphatuamta hi. 12 Amah chu ka hung sawl kiit hi. Hujiahin anapom in, amah chu ka lungtang peetmah ahi a, 13 ka tanchinpha koltaanna a nangmah luanga nna hung tohsah diingin ka kawma umdensah ka uut mahmah hi. 14 Hizongleh na lemsahna louin bangmah ka bawl uut sih, ajiahchu na sil hoih bawl chu phuutluih a bawl hilou a, uutthu a bawl ahihjawh theihna diingin. 15 Ajiahchu hun tomkhat sung hikhu diinga nang ahung kikhenpih chu kumtuanga amah na neih jawhna diing zong ahi meithei hi, 16 suaah banga hilouin, suaah saanga hoihjaw, unau deihtah bangin, adiaahin kei diingin chu deihtah ahi a, nang a diing seemin tahsa ah leh Lalpa ah abangchi hih diaahkholta diaimah? 17 Hujiahin na kithuahpih banga na hung geel leh, keimah ngeei bangin anapom in. 18 Na tunga bawlkhial aneih a, bat bangma aneih leh keimah batin anakoih in. 19 Keimah, Paul in hikhu ka khut ngeei a ka gelh ahi, keima'n ka ditsah diing hi, huchia nangmah ngeei zong kei kawmah na kiba ahi chih na kawma ka soi khel ngailouin. 20 Ahi, unaupa, nangmah apat phattuamna Lalpa ah hung neisah inla; Lalpa ah ka lungtang hung suhalh in. 21 Na thumanna a kimuangin leh ka soi saanga loupijawa na bawl diing gingtain na kawmah ka hung gial hi. 22 Huchibang kaal ah, kei diingin zong tunna inn khat hung na ngaihtuahsah in, ajiahchu na haamteinate uh tungtawna na kawmva piaaha ka um diing ka gingta hi. 23 Khrist Jesu a ka koltaanpih Epaphra in chibai ahung buuh hi, 24 huleh Mark, Aristarka, Dema leh Luk, ka natohpihte'n zong chibai ahung buuh uhi. 25 I Lalpa uh Jesu Khrist hehpihna na hagau uh kawmah umta hen. Amen.
Pathian Tapa Zawlneite Saanga Loupijaw
1 Pathian, nidanglaiaipulepate kawma lam tuamtuam leh je tuamtuam a zawlneite zanga thu anasoipa in, 2 hi ni nunungte ah a Tapa in i kawmah thu asoita a, Amah chu sil zousiah gouluahtu diingin aguat a, khovel zong Amah tungtawna siam ahi. 3 Amah chu Pathian loupina vaah leh Pathian hihna dihtah langsahtu hi in, sil zousiah a silbawltheihna thu a tudingin, Amah mah in i sualnate asilsiang zoh nungin, tunglam a Loupipeen jiatlam ah atouta hi.
Pathian Tapa Angelte Saanga Loupijaw
4 Ama'n angelte saanga min phajaw gouluah a atan bang ngeeiin, amahuh saanga hoihjaw mahmah ahung hita him hi. 5 Ajiahchu angelte lahah khoipeen kawmah ahiai Ama'n hi thute soi khaahna ananeih ngei, "Nang chu ka Tapa na hi a, tuni in ka hung hingkheta hi"? chih leh, "Amah diingin Pa ka hi diing a, kei diingin Amah chu Tapa ahi diing hi"? chih chu. 6 Hizongleh tachiil khovel a ahung puiluut laiin, Ama'n, "Pathian angelte zousiah in Amah bia uh heh," achi hi. 7 Huleh angelte tungtaang thu ah chu hichiin achi hi, "Ama'n a angelte chu huih asuaahsah a, huleh a natongte zong meikuang asuaahsah hi," chiin. 8 Hizongleh Tapa tungtaang thu ah Ama'n, "Aw Pathian, na laltouphah chu kumtuang kumtuangin aum a, dihtatna lalchiang chu na lalgam lalchiang ahi. 9 Nangma'n dihtatna na deih a, daan poisahlouhna chu na hua hi. Hujiahin Pathian, na Pathian ngeei in, nang chu na lawmte tung daih ah kipaahna than ahung nuhta hi," chiin asoi hi. 10 Huleh, "LALPA, nangma'n achiil in leilung kingahna na phuumta a, huleh vaante zong na khutsuaah ahi. 11 Amahuh chu ahung mangthaai diing va, hizongleh nang chu na um zingzing diing hi; huleh amahuh chu a bawnun puansilh bangin ahung lui diing uh; 12 puan bangin na jial diing a, ahung kihengta diing uhi. Hizongleh nang chu angeingei na hi a, na kumte'n zong bei ni himhim anei sih diing hi," chiin. l3 Hizongleh angelte laha khoipeen kawmah ahiai Ama'n hi thute soikhaahna ananeih ngei, "Na meelmate na keeng ngahna a ka bawl masiah ka jiatlam ah tou in"? chiin. 14 Hu angelte zousiah chu hutdamna gouluah diingte natohsah diinga sawldoh natongtu hagaute ahi sih viaimah?
Vauhilhna
1 Hujiahin i thu jaahsate uh tahzet-a i ngaihkhawh seem diing uh ahi, huchilou inchu i tolhmang kha diing uhi. 2 Ajiahchu angelte zanga thu kisoi bawn anakip a, bohsiatna leh thumanlouhna chinteng in gawtna dihtattah amuh un chu, 3 huchilawma hutdamna loupi ngaihsah sih lei, bangchiin ahiai i suaahtaat diing uh? Hu hutdamna thu chu achiilin Lalpa'n anasoi pat ahi a, huleh a thu jatute'n i kawmah asukip uhi. 4 Pathian in zong chiamchihnate leh sillimdangte, silbawltheihna tuamtuam toh, huleh Hagau Siangthou silpiaah tuamtuamte in Amah deihdaan dungjuiin amahuh aheetpih hi. 5 Ajiahchu Ama'n i na soi uh, tununga khovel hung um diing chu angelte nuaiah akoih sih hi. 6 Hizongleh mi khat in, mun khat ah, "Mihing bang ahi a huchilawma na ngaihtuah, ahihlouhleh mihing tapa zong bang ahi a na ngaihsah veu? 7 Nangma'n amah chu angelte saanga ngiamjaw deuhin na bawl a, loupina leh paahtawina na khuhsah a, na khut natohte tungah thu na neisah a, 8 sil zousiah a keeng nuaiah na koihta hi," chiin anahesahta hi. Ajiahchu Ama'n sil zousiah a thuthu a um diinga a nuaia akoihna ah, a nuaia akoih louh bangma aum sih hi. Hizongleh tuin chu sil zousiah anuai a kikoihin i mu nai tadih sih hi. 9 Hizongleh Pathian hehpihna jaala Ama'n mi chin a diinga sihna achep theihna diingin angelte saanga nuainungjaw deuha koiha um, huleh sihna athuaah jiaha loupina leh paahtawina khuhsaha um Jesu chu i muuhi. 10 Ajiahchu Amah a diinga sil zousiah um a huleh Amah tungtawnasilzousiahumpadiingin, ta tampite loupina a apuiluutna ah, gimthuaahna tungtawna a hutdamna uh siamtu suhbukim chu Amah diingin akilawm mawng ahi. 11 Ajiahchu susiangthoutu leh suhsiangthoute chu khat apat ahi va, hujiahin Ama'n amahuh chu unaute chih azum sih hi, 12 "Ka unaute lahah na min ka phuang diing a, kipungkhawnte lahah nangmah ka hung phat diing hi," chiin. 13 Huleh, "Amah ah ka muanna ka nga diing hi," achi kiit hi. Huleh, "En un, kei leh Pathian in ahung piaah naupangte," achi kiit hi. 14 Huchiin naupangte chu tahsa leh sisan tangkhawm ahih jiahun, Amah ngeei in zong humahbang hung tangin, sihna jaala sihna thuneitu, diabol asuhmang theihna diingin leh 15 sih lau jiaha a damsung teng uh suaaha umte asuaahtaatsah theihna diingin. 16 Aj iahchu adihtahin Ama'n angelte apanpih sih a, hizongleh Abraham chihaahte apanpih jaw hi. 17 Huchihjiahin mite a diinga sual thuphatawina diinga, Pathian lam silte a mikhotuahthei leh ginumtah Siampu Lalpeen ahih theihna diingin, sil zousiah a a unaute bangbanga bawla ahung um chu Amah diingin apoimoh him ahi. 18 Ajiahchu Amah ngeei in zong heemna tuaahin anathuaahtaah jiahin, heemna tuaahte chu apanpih thei hi.
Mosi Saanga Khrist Tungnungjaw
1 Huchihjiahin, vaan kouhna tang unau siangthoute haw, i thugin lemsahna thuphuan uh Apostol leh Siampu Lalpeen, Khrist Jesu chu ngaihtuah un. 2 Pathian innsung mite zousiah laha Mosi chu aginum mahbangin, Amah chu Amah guattu kawmah aginum hi. 3 Ajiahchu inn saanga asatu paahtawia aum jawh bang ngeeiin, Amah chu Mosi saanga loupijaw diinga sim ahita hi. 4 Ajiahchu inn chinteng chu mi koiaha khat sah ahi a, hizongleh sil zousiah satu chu Pathian ahi. 5 Huleh Mosi chu khonunga thu hung kisoi diingte heetsahna diingin, Pathian innsung mite zousiah lahah suaah natongtu bangin aginum ngeei hi. 6 Hizongleh Khrist chu Tapa bangin Pathian innsung ngeei ah aginum hi; atawp donga i hahkatna va i kinepna kipaahna uh i tuuhdet phot uh leh a innsung mite i hi uhi.
Lungtang Khauhsah Lauhhuaina
7 Huchihjiahin Hagau Siangthou in, "Tunia a aw na jaahva ahihleh, 8 gamdaai a je-etna ni a na hel bangun, na lungtang uh khauhsah sih un. 9 Hu mun ah na pulepate un ahung je-et va, ahung fiah va, huleh kum sawmli sung ka silbawlte amu uhi. 10 Hujiahin hu khang a mite tungah ka lungthahta a, huleh 'A lungtang va paikhial zingte ahi va, ka lampite zong ahe sih uhi,'ka chi hi. 11 Huchiin, 'Ka khawldamna ah aluut sih diing uh,' chiin a tungvah lungthahin ka kihaahsialta hi," chia asoi bangin. 12 Pilvaangun,unaute,huchilou inchu Pathian hing apat paikhe diingin, na lahva mi khattou sungah ginlouhna lungtang gilou ahung um kha diing hi. 13 Hizongleh "Tuni," akichih laiin, nitengin khat leh khat kihasot tuah jaw un, huchilou inchu na lahva mi khattou heemna sual a suhtaahdenin na um kha diing uhi. 14 Ajiahchu achiila i neih kimuanna atawpdonga i tuuhdet phot uh leh Khrist a tanneite i hita diing uhi, 15 "Tunia a aw na jaahva ahihleh, na hellai uh bangin, na lungtang uh khauhsah sih un," chia soi ahih laiin. 16 Ja ngaala helte kuate ahi viai? Aigupta gam apata Mosi in ahung puidohte a bawnun hilou ahi viaimah? 17 Huleh kuate tungah ahiai kum sawmli sung lungthaha aum? Sil bawlsual, gamdaai a a luang uh lumte tungah hilou ahiaimah? 18 Huleh agingtaloute kawm loungaal, koi kawmah ahiai a khawldamna ah aluut sih diing uh chia Amah akihaahsial? 19 Huchiin gintaat louhna jiahin aluut theita sih uh chih i mu uhi.
Khawldamna Hoihjaw
1 Hujiahin i lau diing uh, huchilou inchu a khawldamna a luutna diing thuchiam umzing napiin, na lahva mi khattou chinglou bangin na um kha diing uhi. 2 Ajiahchu amahuh kawma soi ahihbangin, tanchinpha chu i kawmva soi ahi hi; hizongleh a thu jatute in ginna toh asaanlouh jiahun a thu jaahte uh chu amah un aphattuampih sih uhi. 3 Ajiahchu khovel siam chiil apat a nnate tohzohsa hitazongleh Ama'n, "Huchiin, 'Ka . khawldamna ah aluut sih diing uh,' chiin a , tungva lungthahin ka kihaahsialta hi," achih mahbangin, ei agingtate chu hu khawldamna ah i luutta uhi. 4 Ajiahchu Ama'n mun khat ah ni sagih ni thu hichibangin asoi, "Huleh Pathian chu a ni sagih ni in a natoh zousiah apat akhawlta," chiin. 5 Huleh hi mun ah, "Ka khawldamna ah aluut sih diing uh," achi kiit hi. 6 Hujiahin mi khenkhat khawldamna a luut diing aum naahlai jiah leh ni dang a tanchinpha kisoi masatnate gintaatiouhna jiaha aluutlouh jiahun, 7 hun sawttah nungin David zangin, "Tuni," chiin, ni khat Ama'n aguat kiit a, "Tunia a aw na jaahva ahihleh, na lungtangte uh khauhsah sih un," chia kisoi bangin. 8 AjiahchuJoshua in amahuh khawldamsahta hileh, hu nungin Pathian in ni dang thu asoi sih diing hi. 9 Hujiahin Pathian mite a diingin khawldamna khat aum nalai hi. 10 Ajiahchu Pathian a natohna apat akhawldam bangin, Pathian khawldamna a luutpa zong a natohte apat akhawlta hi. 11 Hujiahin hu khawldamna a luut diingin i hahpan diing uh, huchilou inchu mi khattou hutobang thumanlouhna ah apuuh kha diing hi. 12 Ajiahchu Pathian thu chu ahing a, sil abawl thei a, naamsau hiamtuah saangin ahiamjaw a, hinna leh hagau leh guhtuah leh chintuiguh khenthei khopin asun thei a, huleh lungtang a ngaihtuahnate leh tupte hekhentu ahi hi. 13 Silsiam khat mah Amah mitmuh a kilanglou mawngmawng aum sih a, hizongleh Amah i tanchin i tutna diingpa mitmuh ah chu bangkim saguaah leh kihongsa ahi.
Jesu I Siampu Lai Loupi uh
14 Huchiin vaante a paisuaah Siampu Lalpeen loupitah Jesu Pathian Tapa i neih jiahin i thugin lemsahna thuphuanuh i tukip diing uhi. 15 Ajiahchu i haatlouhnate uh hung thuaahpih phalou Siampu Lalpeen nei i hi sih va, hizongleh eihaw banga lam chintenga heemna tuaahsa, ahihvaanga suallou, Siampu Lalpeen nei i hijaw uhi. 16 Hujiahin khotuahna i tan theihna diing uh leh taahsap hun chianga panpihna diinga hehpihna i muh theihna diingun, muangtahin hehpihna laltouphah chu i naih diing uhi.
1 Ajiahchu siampu lalpeen, mite laha kiteeldoh photmah chu sualnate jiaha silpiaahte leh kithoihnate alatkhawm theihna diingin, Pathian lam silte a mite thaheng a guat ahi uhi. 2 Ama'n chu bangma heloute leh lamkhialte chu dawmtahin abawl thei hi, ajiahchu amah ngeei zong haatlouhna a tuamveela um ahih jiahin. 3 Huleh hikhu jiah tahin mite a diinga sual sillatte alatsah bangin, amah a diing ngeei zong alat akiphamoh hi. 4 Huleh hi tawisangna chu, Pathian in Aaron akouh banga akouh louhngaal, mi koimah in amah diingin akilaah ngei sih hi. 5 Huchibangmahin Khrist zong Siampu Lalpeen ahihna diingin Amah leh Amah akitawisang sih a, hizongleh a kawma, "Nang chu ka Tapa na hi a, tuni in ka hung hingkhia ahi," chia soitu in atawisang ahijaw hi. 6 Ama'n mun tuam khat ah, "Nang chu Melkizedek hihdaan banga kumtuanga siampu na hi" chia asoi mahbangin. 7 Ama'n chu tahsa a aum lai nite in, sihna laha Amah hundam theipa kawmah naahpiihtaha kap leh mittui luang puma haamteina leh ngetnate laanin, Pathian alauh jiahin ngaihkhiahin aum hi. 8 Tapa hijiangzongleh a silthuaahte apatin thumandaan ajilta hi. 9 Huleh suhbukima hung umin Amah thumangte zousiah diingin kumtuanga hutdamna naah ahung hita hi, 10 "Melkizedek hihna daan banga," Siampu Lalpeen hia Pathian kouhin aumta hi.
Khristian Hinkhua a Khanlet Angaih Jiah
11 Amah tungtaang soi diing tampi ka nei va, na ngaihkhiah peihlouh jiahun ahilhchian zong ahahsa hi. 12 Ajiahchu a hun lam ngaihtuahin chu houtute na hih uh ahunta a, Pathian thubulte khat in ahung hilh kiit ngai na hung hijeelta va, huleh an gum hiloua nawitui kiphamoh bang na hung hijaw uhi. 13 Ajiahchu nawitui ne photmah in chu naungeeh ahih jiahin, dihtatna thu ah heetsiamna anei sih hi. 14 Hizongleh an gum chu mipiching, kijilna jiaha a ngaihtuahna uh asia leh apha hekhen thei diinga kijilsiamsaha umte haw a diing ahi.
1 Hujiahin Khrist toh kisai thubulte chu nusiain, pichin lam i manoh diing uh, silbawl sisa apat kisiihnate, Pathian lama ginnate, 2 baptismate tungtaanga thuhilhnate, khutngah thute, misi thohkiitna thute leh kumtuang vaihawmna lam thuhilhnate chu bulphuh kiit nawnlouin. 3 Pathian in pha asah leh, hichu i bawl ngeei diing uhi. 4 Ajiahchu khat vei suhvaaha um a, vaan silpiaah chiamta a, Hagau Siangthou tansaha um a, 5 Pathian thu hoih leh hun hung um diinga silbawltheihnate chiamta haw chu, 6 apuuh va ahihleh, hute chu kisiih diinga siamthah gual ahi sih uhi, ajiahchu amah un Pathian Tapa chu amahuh diinga kilhbeh thah leh langtangtaha sumualphou ahih jiahun. 7 Ajiahchu a tunga ju veu guahtui anadawntu leh leilettute diinga phatuam anteh louhing neehtheih hung piangsahtu lei in Pathian apat vangpiaahna amu ahi. 8 Hizongleh lingkung leh hampa lingnei suahdoh lei chu deihlouhin aum a, haamsedong phialin aum a, a tawpna chu mei ahaalahi. 9 Hizongleh deihtahte, hu-chibangin soi mahleung, nang un chu huchibang silte saanga hoihjaw leh hutdamna toh kithuahkhawm silte na bawl uh ka hung muang uhi. 10 Ajiahchu Amah min a na natoh uh leh na lungsiatna suhlat uh, misiangthoute nna na tohsah uh leh na tohzing uh chu mangngilh diingin Pathian chu dihtatlou ahi sih hi. 11 Huleh nanguh koipouh in kinepna heetchianna kim tang diingin, atawp dongin thanop suah chiat ulehchin ka hung deih mahmah uhi, 12 huchia na kithahdah louh va, hizongleh ginna leh kuhkalna jiaha thuchiam gouluahtute umdaan juitute na hung hih uh ka hung deih uhi.
Pathian Thuchiam Ginumna
13 Ajiahchu Pathian in Abraham kawma thu achiam laiin, minloh diing Amah saanga lianjaw aum louh jiahin Amah leh Amah in akihaahsial a, 14 "Tahzetin ka hung vangpiaah diing a, tahzetin ka hung supung diing hi," chiin. 15 Huchiin ama'n kuhkaltaha athuaah mualsuaah nungin silchiam chu amuta hi. 16 Ajiahchu mihingte chu amahuh saanga lianjaw min louin akihaahsial va; huleh thu namdetna diinga kihaahsialna chu amahuh diingin kinialna zousiah suhtawpna ahi. 17 Huchibangin thuchiam gouluahtute kawmah a lunggeel kihenkiittheihlouh daan Pathian in kichianseema etsah tumin, huchu kihaahsialna in asukipta hi, 18 huchu Pathian diinga juausoi hitheilou ahihna ah, sil kihengtheilou nihte jaalin, eiuh kihuumbitna diinga i ma va kinepna kikoih tang diinga taaite'n hasotna nasatah i neih theihna diingun ahi. 19 Hukinepna chu hinna long siihka kip bangin i nei a, hu kinepna chiantah leh kiptah chu puanjaah sunga luut chu ahi. 20 Hutah ah Jesu ngeei chu eiuh diinga mapuitu hiin analuut masata a, Melkizedek hihdaan banga kumtuanga Siampu Lalpeen ahung hita hi.
Melkizedek Siampu Lalpeen Hihna
1 Huchiin hi Melkizedek, Salem kumpipa chu Pathian Tungnungpeen siampu ahi a; kumpipate vathat zoua Abraham ahung paikiit laiin, ama'n anadawn a, huin avangpiaah hi. 2 Akawmah Abraham in a gaallaah sil zousiah apat sawm-a-khat apia hi. A min umjia chu amasapeenin, "dihtatna kumpipa," chihna ahi a, hubaan ah Salem kumpipa, huchu "lemna kumpipa," chihna ahi a, 3 amah chu pa neilou, nu neilou, khanggui neilou, umpatni neilou, hintawpni zong neilou ahi a, hizongleh Pathian Tapa banga siam, tawploua siampu a um zing ahi. 4 Tuin nampa Abraham ngeei in gaallaah silte sawm-a-khat apiaahnapa, hi pa loupidaan chu ngaihtuah dihvua. 5 Huleh Levi haahte laha siampu natohna mu photmah in daan thu dungjuiin, Abraham khaala pawt himahleh uh, a unaute lah apat sawm-a-khat laahna diing thupiaah amu ngeei uhi. 6 Hizongleh amah uh lah apat a a khanggui suuitela um loupa'n chu Abraham apat sawm-a-khat ala a, thuchiamte neipa chu avangpiaahta hi. 7 Huleh nial guallouhin aneujaw chu alianjaw in avangpiaahta ahi. 8 Huleh hitah ah chu a sithei mihingte'n sawm-a-khat atang va, hizongleh hutah ah chu amah ahing zing hi chia a tanchin heetsaha umpa in atang hi. 9 Huleh Levi, sawm-a-khat tangtu in zong Abraham tungtawnin sawm-a-khat apia hi, achih theih hi. 10 Ajiahchu Melkizedek in Abraham avalamtuaah laiin amah chu a pa khaal ah aum nalai hi.
Jesu chu Melkizedek Bang ahi
11 Hujiahin Levite siampu hihna tungtawna bukimna muhtheih hitaleh (ajiahchu hi nuaiah mite'n daan thu anamu uhi), Aaron hihna daan banga chih hilou a, Melkizedek hihna daan banga siampu dang ahung um angaihna bang ahiai? 12 Ajiahchu siampu hihna ahung kihentaah jiahin, daan zong akihen ahung kiphamohta hi. 13 Ajiahchu a tungtaanga hi thute kisoinapa chu phung tuama mi ahi a, hu phung laha mi koimah maitaama natong aum ngei sih hi. 14 Ajiahchu i Lalpa uh chu Juda phung apat hung piang ahi chih chiantahin alang a, hu phung thu ah chu Mosi in siampu lam thu bangma asoi sih hi. 15 Huleh Melkizedek hihna daan banga siampu dang ahung um a ahihleh ka thusoi uh achiang seem hi, 16 Amah chu mihing hihna daan banga hung um hilouin, hintawp neilou silbawltheihna banga hung um ahijaw hi. 17 Ajiahchu Ama'n, "Nang chu Melkizedek hihdaan banga kumtuanga siampu na hi," chiin aheetpih hi. 18 Ajiahchu alehlam ah thupiaah um masa chu haatlouhna leh phattuamna bei jiahin paihin aumta hi, 19 ajiahchu daan thu in bangmah asubukim sih a, alehlam ah chu kinepna hoihjaw chu ahung poluut a, hukhu tungtawnin eihaw in Pathian i naih uh ahi. 20 Huleh kihaahsialna umloua Amah chu siampu a siam ahi sih, 21 ajiahchu hu siampute chu kihaahsialna umloua siampu a siam ahi va, hizongleh Amah chu a kawma, "LALPA akihaahsialta a, a lungsim aheng sih diing, 'Nang chu Melkizedek hihdaan banga kumtuanga siampu nahi,'" chia soitu in kihaahsialna in siampu in asiam hi. 22 Huchi saanga nasajaw thamin Jesu chu thuhun hoihjaw sukiptu a siam ahung hita hi. 23 Huleh amahuh chu sihna jiaha pandensah theihlouh ahih jiahun, siampu chu anatam ngeei uhi. 24 Hizongleh Amah chu kumtuanga umzing ahih jiahin siampuhihna hentheihlouh anei hi. 25 Huchihjiahin Amah tungtawna Pathian kawma hungte chu amahuh diinga ngetsah diinga ahin zing jiahin, atawpkhawh tanin ahundam thei hi. 26 Ajiahchu huchibang Siampu Lalpeen, siangthou, poikhoihlou, buaah baanglou, misualte lah apat kituamkoih, huleh vaante saanga sangjawa tawisanga um chu eihaw a diingin akilawm mawng ahi. 27 Ama'n chu hu siampu lalpeente banga, ni chin a Amah sualna jiaha kithoihna laan masa zet a, huzoh chianga mite sualna jiaha alat angai sih hi, ajiahchu Ama'n hichu Amah leh Amah a kilatin setden diingin khatveiin anazouta hi. 28 Ajiahchu daan in haatlouhna nei mihingte siampu lai in aguat a, hizongleh kihaahsial thu, daan nunga hung um khu in chu, Tapa, kumtuanga diinga suhbukimsa chu aguat jawta hi.
Thuhun Hoihjaw Palai
1 Tuin i thusoite laha apoimohpeen chu hikhu ahi: Vaante a Loupipeen laltouphah jiatlam a tou, huchibang Siampu Lalpeen i nei uhi. 2 Mihing bawl hilou a, Lalpa bawl, mun siangthou leh biahbuuh dihtah a thunatongtu chu. 3 Ajiahchu siampu lalpeen zousiah chu silpiaahte leh kithoihnate laan diinga guat ahi uhi. Huchihjiahin hi Siampu Lalpeen in zong bang ahakhat lat diing aneih akiphamoh hi. 4 Amah leitung a um hita leh chu, daan thu bang jeela silpiaahte laantu siampute aumtaah jiahun, siampu in apang hiai sih diing hi. 5 Mosi'n biahbuuh bawl diinga akisah laia, Pathian in akawhmuh bangin, hute nasepna mun chu vaan silte etsahna leh aliim ahi uhi. Ajiahchu Ama'n, "Taang tunga etton diinga ahung kimuhsah dungjuiin sil zousiah bawl diingin pilvaang in," achi hi. 6 Hizongleh tuin chu thuchiam hoihjawte tunga siam thuhun hoihjaw Palai ahih bangjeelin Ama'n natohna hoihjaw anatangta hi. 7 Aj iahchu hu thuhun masapeen demnabei anahita leh, anihnapeen diing mun hawl ngailou diing ahi. 8 Ajiahchu Ama'n a tungva dihlouhna amuh jiahin, "Ngai un, Israel innkuante leh Juda innkuante toh thuhun thah ka siam hun diing nite hung tung diing ahita, LALPA'N achi hi. 9 "Aigupta gam apat a pulepate uh puidoh diinga a khut va ka tuuh ni a a kawmva ka thuhun peen bang hilouin; ajiahchu amahuh ka thuhun ah aum zing sih va, ke'n amahuh ka ngaihsah sih hi, LALPA'N achi hi. 10 "Ajiahchu hu hun nung chianga Israel innkuante kawma ka thuhun diing chu hikhu ahi, LALPA'N achi hi: A lungsim vah ka daan thupiaahte ka koih diing a, a lungtang vah ka gial diing hi; huleh amahuh diingin a Pathian uh ka hi diing a, amahuh chu ka mite ahi diing uhi. 11 "Huleh koimah in a innveengte leh a unaute thuhilhin, 'LALPA he in,' achi nawn sih diing uh, ajiahchu aneupeen apat alianpeen tanin a bawnun ahung heta diing uhi. 12 "Ajiahchu a dihtatlouhnate vah ka zahngai diing a, a sualnate uh leh daan poisaloua a gamtatnate uh zong ka hezing nawn sih diing hi," chiin. 13 Ama'n, "Thuhun Thah," chia asoi jiahin, amasapeen chu azattaah nawnlouh asuaahsahta hi. Huchiin jattaah nawnlouh leh hung luita chu amang dikuan ahita hi.
Lei Biahbuuh a Pathian Biahna
1 Huchiangleh thuhun masapeen in zong Pathian natohna daante leh hi khovel a mun siangthou chu ananei ngeei hi. 2 Ajiahchu biahbuuh bawl ahi a, pindan masapeen sungah chu thaumei tunna, dohkaan leh tanghousiah aum a, huchu mun siangthou kichi chu ahi. 3 Huleh puanjaah nihna sungah Mun Siangthoupeen, kichi biahbuuh pindan chu aum hi, 4 hutah ah chu gimtuui haalna sana bawm leh thuhun singkuang sana tui a luankhum, hu sungah manna umna sana beel leh Aaron chiang sel leh thuhun suangpeehte chu aum hi. 5 Huleh thuhun singkuang tungah chu khotuahna touphah liahin loupina cherubte aum uhi. Hute tungthu chu tuin a kimkeeiin i soi thei sih diing uhi. 6 Huleh hi silte hitobanga guatzoh ahih chiangin, siampute'n Pathian nna tongin biahbuuh pindan masapeen ah aluut veu uhi. 7 Hizongleh pindan nihna ah chu siampu lalpeen chauh kum khat in khatvei, amah leh mite'n heetlouha a khelhnate uh diinga alat diing sisan tawiin aluut veu hi. 8 Hitaha Hagau Siangthou in ahung heetsah chu biahbuuh pindan masapeen aum laisiah Mun Siangthoupeen a luutna lampi akilang nailou ahi, chih khu ahi. 9 Huchu tulai hun tehkaahna ahi a, hutah ah chu sialephaheetna lam thu a abetu hoih bukimsah theilou silpiaahte leh kithoihnate alaan uhi. 10 Hute chu neehte leh dawnte, kisuhsiangna tuamtuamte leh tahsa lam daante giap ahi a, siamphatkiit hun toh kaala zat diinga bawl ahi.
Sisan Jaala Tatdohna
11 Hizongleh Khrist chu biahbuuh loupijaw leh bukimjaw khut a sahlouh toh sil hoih hung um diingte Siampu Lalpeen hi diingin ahungta a, huchu hi silsiam laha ahi sih hi. 12 Keeltalte leh bawngnoute sisan a hilouin, hizongleh Amah sisan ngeei a eite diinga kumtuanga tatkhiahna muin Mun Siangthoupeen ah setden diingin khatvei chauh aluutta hi. 13 Ajiahchu bawngtalte leh keeltalte sisan leh bawngla vutvaam mi buaah tunga thehin bawn tahsa siang Idiopa asuhsiangthou inchu, 14 kumtuang Hagau jaala soiseelbeia Pathian kawma kilaan Khrist sisan in Pathian hing nna tong diingin, natoh sisate apatin na sialephaheetna uh bangchituhin asusiangthouta diai? 15 Huleh hikhu jiahin Amah chu thuhun thah Palai ahi, thuhun masa nuaia tatsualnate lah apat a tatkhiahna diinga a sihna jiahin, kouhte'n kumtuanga gouluah diingthuchiamchuatangthei diing uhi. 16 Ajiahehu thusiah umna phot ah asiahtu sihna zong aum ngeeingeei diing ahi. 17 Ajiahchu mite asih nungun thusiah in thu anei chauh hi, asiahtu damsung siahin thu mawngmawng anei sih hi. 18 Hujiahin thuhun masa zong sisan umlouin zatpat ahi sih hi. 19 Ajiahchu Mosi in daan thu dungjuia thupiaah photmah mite kawma asoi zohin, bawngnou leh keeltal sisan, tui toh sawnsan toh hussop toh ala a, lehkhabu leh mipite zousiah chu atheh a, 20 "Hichu Pathian in na kawmva ahungpiaah thuhun sisan chuahi," chiin. 21 Huleh huchibangmahin ama'n biahbuuh leh natohna vanzat zousiah chu sisan atheh hi. 22 Huleh daan dungjuiin sil zousiah sisan a suhsiangthouin aum veh phial hi, huleh sisan suah louhin ngaihdamna aum sih hi. 23 Hujiahin vaan a sil umte batpihte chu hihaw a suhsianga aum akuul hi, hizongleh vaan sil tahzet chu hite ngeei saanga kithoihna hoihjawte a suhsiangthou kuul ahi hi. 24 Ajiahchu atahtah etsahna, khut a bawl Mun Siangthoupeen ah Khrist chu aluut sih a, hizongleh tuin Pathian ma ah i luangva ding diingin vaan ngeei ah aluut jawta hi. 25 Siampu lalpeen kum chin a amah sisan hilou tawi kawma Mun Siangthoupeen a aluut bangin, Amah chu Amah leh Amah kilaan diingin aluut veu sih hi. 26 Huchi hilou hileh, khovel siam chiil apat tampivei athuaahta diing hi; hizongleh tu hun tawp ah Amah chu sualna suhbeina diinga Amah leh Amah a kithoihin khatvei ahung kilangta hi. 27 Huleh mihingte diinga khatvei sih diing guatsa, hizongleh huzohchianga vaihawmna um diing ahih bangin, 28 huchibangmahin Khrist zong mi tampite sualna pomang diinga khatvei latin aum hi. Huleh anihveina diingin Amah anangaahlahtute kawmah sualna toh kisai hilouin, hundam diingin ahung kilang kiit diing hi.
Khatvei a Setden diing Khrist Kithoihna
1 Daan thu chu sil hoih hung um diingte liim giap ahi a, a kibatpihtah ahihlouh jiahin, hu kum chin a kithoihna alat veute un avanaihtute abukimsah zou ngeingei sih diing hi. 2 Huchilou hileh, alat uh tawpta lou diing ahi viaimah? Ajiahchu a betute chu khatvei suhsiangthoua umin sual kiheetna anei nawn sih diing uhi. 3 Hizongleh hu kithoihnate ah chu kum chin in sualnate heetdoh kiitna aum hi. 4 Ajiahchu bawngtalte leh keeltalte sisan a sualnate laahmangtheih gual ahi sih hi. 5 Hujiahin khovel a ahung laiin, Ama'n, "Kithoihna leh sillat na deih sih a, hizongleh sapum khat na hung bawlsah jaw hi; 6 Haalmang sillatte leh sualna kithoihnate ah nangma'n kipaahna na nei sih hi. 7 Huin keima'n, 'Ngai in, lehkhabujial ah keimah thu gelh ahi, Aw ka Pathian, na deihjawng bawl diingin ka hung hi,' kachi hi," achi hi. 8 Amalam ah, "Kithoihna leh sillat, haalmang sillatte leh sualna kithoihna na deih sih a, amahuh ah kipaahna zong na nei sih hi," achih zohin (hute chu daan thu banga lat ahi), 9 huin Ama'n, "Ngai in, na deihjawng bawl diingin ka hung hi, Aw Pathian," achi hi. Anihna atunding theihna diingin Ama'n amasapeen chu alamangta hi. 10 Hu deihna jaalin setden diinga Jesu Khrist sapum khatvei chauh akilatna tungtawnin eite chu suhsiangthouin i umta uhi. 11 Huleh siampu chinin nitenga nna tongin sualnate lamang theilou kithoihna ngeimah laanin ading zing uhi. 12 Hizongleh Amah chu kumtuanga diinga sualnate diinga kithoihna khat alat nungin Pathian jiatlam ah atouta hi. 13 Hunung siah chu a meelmate a keengngahna a bawl ahih masiah uh angaah zingta hi. 14 Ajiahchu Ama'n sillat khat in suhsiangthoua umsate chu kumtuanga diingin asubukimta hi. 15 Huleh Hagau Siangthou in zong i kawmah ahung hesah hi, ajiahchu Ama'n, 16 "Huh hun zoh chianga a kawmva ka thuhun diing chu hih ahi, LALPA'N achi hi, a lungtang vah ka thupiaahte ka koih diing a, huleh a lungsim vah ka gial diing hi," achih zoh nungin, 17 "A sualnate uh leh a tatleehnate uh chu ka hezing nawn sih diing hi," achi tou nalai hi. 18 Tuin sual ngaihdamna umna phot ah sualna a diinga sillat aum nawn sih hi. Kuhkal Diinga Kouhna 19 Hujiahin unaute Jesu sisan jiahin Mun Siangthoupeen a luut ngamna i nei va, 20 hulehpuanjaah, huchu a tahsapum, tungtawnin eiuh diingin Ama'n lampi thah leh hing ahung honsahta a, 21 huleh Pathian innkuanpihte tunga Siampu Lalpeen i neih jiahin, 22 sialephaheetna hoihlou apat i lungtang uh thehsianga umin, i sapum uh zong tui chiim a sila umin, ginna heetchianna lungtang dihtah toh i naih diing uhi. 23 Amah thuchiam hung petu chu aginum jiahin i kinepna thuphuan uh lawnglou keeiin i tudet diing uhi. 24 Huleh lungsiatna leh sil hoih bawlna lamah khat leh khat kitohthou diingin i kingaihtuah chiat diing uhi. 25 Khenkhatte hih veu banga i kikhopnate uh tawpsan louin, himahleh khat leh khat kihasot tuah jawin, huleh a Ni ahung nai hulhul chih na heetun kihasot tuah seem un. 26 Ajiahchu thutah heetna i neih nunga i sual teeiteei un chu, sualnate diinga kithoihna aum nawnta sih hi, 27 hizongleh vaihawmna tuaah diing lauhuaitah leh doutute kaangmang diing lungthahna mei aum jawta diing hi. 28 Mosi daan thu botsia mi chu heetpihtu nih ahihlouhleh thum thu in zahngaihna beiin asi veu uhi. 29 Pathian Tapa tuandeen a, thuhun sisan amah suhsiangthouna chu sil siangloua ngai a, huleh hehpihna Hagau simmohbawltu in chu hu saanga bangchituha gawtna loupijaw thuaah leh kilawmin na ngaihtuah viai? 30 Ajiahchu, "Phubalaah chu kei a ahi, keima'n ka thuh diing hi," Lalpa'n achi, chitu Amah chu i he uhi. Huleh abaan kiit ah, "LALPA'N a mite vai ahawmsah diing hi," chitu zong. 31 Pathian hing khut a puuh chu sil lauhuaitah ahi. 32 Hizongleh tuma a, suhvaaha na um nungva, thuaahria hahsatahte na thuaah lai nite uh geeldoh kiit un, 33 thu khat ah chu muhsitna leh hahsatnate thuaahin etnop bawlna a siamin na um va, huleh thu khat ah ahihleh huchibanga bawla umte thuaahpihtute na hung hi uhi; 34 ajiahchu vaan ah gou hoihjaw leh umzing diing na neih uh kiheetin, nang un ka kolbuhnate ah na hung lainat va, huleh na neihlelam uh ahung laahsahte uh zong kipaahtahin na thuaah jawta uhi. 35 Hujiahin na muanna uh chu paaikhe sih un, huh in chu kipaahman loupitah anei hi. 36 Ajiahchu Pathian deihjawng na bawlzoh chiangva, thuchiam chu na muh theihna diingun na kuhkal uh angai hi: 37 "Ajiahchu tomkhat zohchiangin ahung diingpa chu ahung diing a, sawt ahal nawn sih diing hi. 38 Huchiin midihtat chu ginna in ahing diing, hizongleh anungtolh chu ka lungsim in amah ah kipaahna anei sih diing hi. " 39 Hizongleh eiuh chu mangthaai diinga nungtolh haw laha mi i hi sih va, hizongleh hinna huumbit diinga gingta haw laha mi i hijaw uhi.
Ginna a Mi Minthangte
1 Huleh ginna chu sil kinepnate heetchetna, sil muhlouhte um ngeeia heetna ahi. 2 Ajiahchu hi ah taanglai mite'n paahtaat aloh uhi. 3 Khovelte chu Pathian thu a suhtuah khawm ahi chih ginna jaalin i he a, huchiin sil kimute zong sil kilangte apat siam ahi sih hi. 4 Ginna in Abel in Pathian kawmah Kaina saangin kithoihna hoihjaw alaan a, hukhu jiahin midihtat ahi chih heetsahna aloh a, Pathian in a silpiaah thu ah aheetpih a, huleh hukhu jiahin sita hinapiin thu asoi nalai hi. 5 Ginna in Enok chu sihna mulou diingin laahtouhin aum a, "Pathian in alaahtouh jiahin muhin aumta sih hi"; ajiahchu laahtouha aum main Pathian akipaahsah hi chih heetsahna anei hi. 6 Hizongleh ginna louin chu Amah kipaahsah gual ahi sih hi; ajiahchu Pathian kawma hungtu in chu Amah aum chih leh, Amah chu guntuhtaha Amah hawltute kawma kipaahman petu ahi chih agintaat diing ahi. 7 Ginna in Noah chu sil muh nailouhte thu a hilha aumin, Pathian launa neiin a innkuanpihte hutkhiahna diingin kuang abawl hi, hukhu in khovel siamlouh atangsahta a, ginna jiaha um dihtatna gouluahtu ahung hita hi. 8 Ginna in Abraham chu, anung chianga goua ahung tan diing mun a chiah diinga kouha aum laiin, athumang hi. Huleh achiahna diing mun zong helouin achiahdoh hi. 9 Ginna in gam chiam ah mi gam a taam bangin anateeng zing a, thuchiam kibanga agouluahpih diingte Isak leh Jakob toh puaninn a teeng khawmin, 10 ajiahchu ama'n innbul kiptah nei, Pathian sah leh bawl khopi chu angaah hi. 11 Ginna in Sarah in zong naupaai theihna anei a, achiamtu chu muanhuaia aseh jiahin ateeh nungin ta anei hi. 12 Huchiin asisa tobang mi khat apatin vaan a aahsite banga tam leh tuikhanglian geia piauneel banga tam simseenglouh suante ahung piangtahi. 13 Hute zousiah chu silchiamte tanglouin ginna in asita va, hizongleh gamlatah apat gaalmuha muangin apomkip va, leitung ah chu mikhual leh khualzin ahi uh chih anaphuangta uhi. 14 Ajiahchu hutobang thu soite'n chu gam tuam khat ahawl uh chih chiantahin asulang uhi. 15 Huleh amah un ahung pawtna gam uh lunggulh hi uh leh chu, kihkiitna hun lemtaang anamuta tham diing uhi. 16 Hizongleh gam hoihjaw deih anahi va, huchu vaangam ahi. Huchihjiahin Pathian chu a Pathian uh chiha kouh azum sih hi, ajiahchu amahuh diingin khopi khat guatsain akoihta hi. 17 Ginna in Abraham in, je-et-a aumin, Isak alaan a, thuchiamte tangpa in a tapa tangkhat neihsun alaan hi. 18 "Isak ah na haahte akichi diing," kichipa chu amah ahi. 19 Misi lah nasan apatin zong Pathian in akaithou thei hi chia geelin, hu apatin etsahna in muh zong amu kiitta ngeei hi. 20 Ginna in Isak in sil hung tung diingte thu ah Jakob leh Esau avangpiaah hi. 21 Ginna in Jakob in asih kuanin, Joseph ta tegeel avangpiaah a, a chiangphut dawn a kingain Pathian abia hi. 22 Ginna in Joseph in asih diing kuanin Israel tate pawtkhiah diing thu asoi a, huleh a guhte tungtaang ah thu apia hi. 23 Mosi chu apian laiin, naungeeh meel hoihtah ahi chih amuh jiahun, a nulepate'n ginna in kumpipa thupiaahte zong laulouin ha thum sung aphual uhi. 24 Mosi in ahung pichin nungin, ginna in Pharaoh tanu-nu tapa chiha kouh diing auut sih a, 25 tomchakhat sung sual nopna man saangin Pathian mite toh bawlgentheihna thuaah ateel jawta hi, 26 akipaahman muh diing chu aet zing jiahin, Khrist kimuhsitna chu Aigupta gam goute saanga hauhsatna loupijawin angai hi. 27 Ama'n kumpipa thangtawmna laulouin ginna in Aigupta gam anusia hi; ajiahchu muhtheihlouhpa chu muhtheih banga sepin athuaah mualsuaah hi. 28 Ginna in Chiahkaan Kuut leh sisan thehna abawl hi, huchilou inchu tachiil sulumpa in amahuh akhoih kha diing hi. 29 Ginna in amah un leigaw a pai bangin Tuipi San akaan va, Aigupta mite'n hubanga bawlve atup un, tui ah atum vehta uhi. 30 Ginna in Jeriko kulh baang chu ni sagih avelh nungun achimtahi. 31 Ginna in nohchijuaahnu Rahab zong ginglou mite toh amangthaai khawm sih, ama'n enkhetute hamuangtaha anazintun jiahin. 32 Huleh bang ahiai ka soi naahlai diing? Gideon thute, Barak thute, Samson thute, Jephtha thute, David thute, Samuel thute leh zawlneite thu soi ning chileng, hun in ahung daih sih diing hi. 33 Hute'n chu ginna in lalgamte ala va, dihtatna nna atong va, thuchiamte atang va, huumpibahneite kam achihsah va, 34 mei silbawltheihna asudaai va, naamsau mahiam apeel va, haatlouhna apatin haatsahin aum va, kidouna ah ahaat tungtuang va, gamdang sepaihte adelhjaah uhi. 35 Numeite'n a misi uh thoukiit amu uhi. Huleh midangte chu gimthuaahsahin aum uh, thohkiitna hoihjaw amuh theihna diingun hutkhiahna apom sih uhi. 36 Huleh midangte'n chu nuihjaat bawlna leh vuaahna bang athuaah va, ahi, hulou zong kolbut leh suangkul a khumin aum uhi. 37 Amahuh chu suang a sehin aum va, tum nih suaha aattanin aum va, je-etin aum va, naamsau a saatlupin aum uhi. Belaam vun leh keel vun silhin neeh diing neilouin avaahvai va, gentheih thuaahin, gimthuaahin, gawtin aum uh; 38 amahuh a diingin khovel chu umnataah ahi sih hi. Amahuh chu gamdaaite leh taangte ah bang, kawl buuh leh leikohawm ah bang avaah lehleh uhi. 39 Huleh hite zousiah in a ginna jiahva phatna lohzouin, silchiam atang sih uh, 40 ajiahchu eihaw telloua amahuh suhbukima aum louhna diingin Pathian in eihaw diingin sil hoihjaw khat guatsain akoih hi.
Ginna a Etton Diing Jesu
1 Huchihjiahin eiuh zong heetpihtu meipi nasatah uum kiimveel a i um jiahun ahung gihsah photmah leh baihlamtaha hung awhsahthei sualte i koihkhe diing va, i ma a kitaaidemna um ah kuhkaltahin i taai diing uhi. 2 I ginna siamtu leh subukimtu Jesu lam enin, Ama'n chu a ma a um kipaahna jiahin zumnate zong poisa louin, kros a gimna athuaah a, huleh Pathian laltouphah jiatlam ah atouta hi. 3 Ajiahchu a tunga misualte nialkalhna thuaahzoupa chu ngaihtuah un, huchilou inchu na lungsim un na tawlun na lungke kha diing uhi. 4 Sual douin sisan pawt khopin na pang nai sih uhi. 5 Huleh hasotna thu, tate hilh banga na kawmva kisoi chu na mangngilhta uhi, "Ka tapa, LALPA sawina ngaineep sinla, ataaihilha na umin zong lungke sin; 6 Ajiahchu LALPA'N alungsiatte asawi a, huleh tapa adeih photmah chu ajeep veu hi." 7 Sawina na thuaah uh leh, Pathian in tate bawla hung bawl ahi; bangjiahin ahiai i chih leh pa sawilouh tapa kua aum ngei ei? 8 Hizongleh tapa zousiah tan ngei sawina na thuaah louh un chu, jauta na hi va, tapa tahtahte na hi sih uhi. 9 Hubaan ah zong eihaw hung thununtu tahsa a pate i nei va, huleh amahuh chu i zahtaat uhi. Hu saanga hagaute Pa thuthu a i um jawh seem va, i hin diing uh hilou ahiaimah? 10 Ajiahchu amah un tomtakhat diinga hoih asah bang jeelva ahung sawi uh ahi a, hizongleh Ama'n chu eite phattuamna diinga a sianthouna i tan theihna diingun ahung sawi hi. 11 Sawina zousiah chu akithuaah laiin kipaahhuai abang sih a, hizongleh ana jaw hi. Ahiinlah anungchiangin chu huchia sawihzoia umte diingin dihtatna gah hamuan umtah asuaah hi. 12 Huchihjiahin khut kaikhete leh khuup zoite chu phong tang un, 13 huleh keengbaite keeng kilawilou a, hizongleh adamjawhna diingun na keengte uh diingin lampite sial tang un.
Pathian Nial Lauhhuaina
14 Mi zousiah toh kilemna deih unla, huleh sianthouna deih un, hu sianthouna louin chu kuama'n Lalpa amu sih diing hi. 15 pilvaang un, huchilou inchu mi khattou Pathian hehpihna ching zoulouin na um kha diing va, khaatna zung hung seldohin, hukhu in mi tampite suhbuaahin aum kha diing uhi; 16 huchilou inchu numei leh pasal kaala thaanghuai mi ahihlouhleh Pathian zahlou mi, Esau banga khatvei an neeh man diinga a tachiil hihna juaahpa tobang khat aum kha diing hi. 17 Ajiahchu anunglamin vangpiaahna gou chu luah tumin mit-hi luang pumin phatuamngaitahin hawl mahleh, kisiihna mun amuh louh jiahin nualin aumta chih na he uhi. 18 Ajiahchu nanguh chu taang khoihkhaah theih leh mei a kaang, vomna leh mialna leh huihpi nunna mun, 19 huleh peengkuul ging leh thusoi gingte umna a hung na hi sih uhi, hu aw ging jatute'n chu a kawmva hu thu akisoi kiit nawn louhna diingin angeen uhi. 20 Ajiahchu amah un, "Sa nasan jiang in zong hu taang chu asuhkhaah leh suang a sehlup aha, ahihlouhleh thai a kaplup diing ahi," chih thupiaah chu athuaahzouta sih uhi. 21 Huleh hu silmuh chu alauhuai mahmah jiahin Mosi in, "Ka lau naah mahmah a ka kithing top hi," achi hi. 22 Hizongleh nanguh chu Zion Taang leh Pathian hing khopi, vaan Jerusalem, sim seenglouh angel honpi toh na hung uhi, 23 kipaahna khawmpi leh vaan a min kigialta tachiil kouhtuam kawmah, huleh mi zousiah Vaihawmtu Pathian kawmah, huleh midihtat suhbukima umte hagaute kawmah, 24 huleh thuhun thah Palai Jesu kawmah, huleh Abel a saanga sil hoihjaw soi sisan thehna kawmah na hung uh ahijaw hi. 25 Thusoitu Amah chu na nuai khaah diing uh pilvaang un. Ajiahchu leitung a thusoitu adeihlouh va bawn suaahta lou ahih uh leh, vaan apat a thu hung pepa i kiheisan un chu, i suaahta moh seem diing uhi. 26 Hu laiin a aw in lei asuliing a, hizongleh tuin chu, "Khatvei chu lei chauh hilouin, vaan zong ka suliing nalai diing," chiin Ama'n thu achiamta hi. 27 Huleh hi thu, "Khatvei ka suliing kiit diing," chih in, sil kiliingtheiloute aum zing theihna diingin sil kiliingtheite, silsiamte chu suanmangin aum diing chih ahesah hi. 28 Huchihjiahin, lalgam suh-liing guallouh i tan jiahun, zahtah leh Pathian lau kawma pomtaahtaha Pathian nna i toh theihnadiingunkipaahnalungtang i nei diing uhi. 29 Ajiahchu i Pathian uh chu kaahtum haat mei ahi.
Pathian Kipaahpih Lam Natohna
1 Unau kilungsiatna umsah zing un. 2 Mikhualte kipaahpihsiam diing mangngilh sih un, ajiahchu huchibang bawlin mi khenkhatte'n heloupiin angelte anazintun kha uhi. 3 Suangkul a umte chu amahuh toh kaankhawma um bangin hezing un. Huleh bawlsiatna thuaahte chu nanguh zong sapum a um na hih jiahun hezing un. 4 Mi zousiah lahah kiteenna chu zahbawlin um henla, huleh lupna zong suhbuaahlouhin um heh. Himahleh numei leh pasal kaala thaanghuaite leh aangkawmte chu Pathian in vai ahawmsah diing hi. 5 Na umdaan uh chu eenhaatna tellou hi heh, na sil neih tungvah lungkim un. Ajiahchu Amah ngeeiin, "Bangchihmahin ka hung nuse sih diing a, taai zong ka hung taaisan sih diing hi," achi hi. 6 Huchiin hangsantahin, "LALPA chu ahung panpihtu ahi a, ka lau sih diing hi. Mihing in bang ahung loh thei diai?" i chi ngam uhi. 7 Pathian thu na kawmva soi na lamkaite uh chu hezing un. A hinkhua vapat sil hung umdohte ngaihtuah unla, a ginna uh jui un. 8 Jesu Khrist chu jaanni, tuni huleh kumtuangin angeimah ahi. 9 Thuhilhna tuamtuamte leh limdangtahte puimangin um sih un. Lungtang chu neehletaah a hilouin, hehpihna a suhkip ahoih hi, ajiahchu neehletaah a suhkip diing ngaihtuahte'n phattuamna amu tuan sih uhi. 10 Biahbuuh natongtute'n aneeh theihlouhna uh maitaam i nei uhi. 11 Siampu lalpeen in sual thoihna diinga Mun Siangthoupeen a a sisan aluutpih ganta luang haw chu giahphual polam ah ahaalmang uhi. 12 Huchihjiahin Jesu'n zong, Amah sisan ngeei a mite asuhsiangthou theihna diingin kulh kotkhaah polam ah athuaahta hi. 13 Hujiahin Amah a muhsitna uh puain a kawmah, giahphual polam ah i chiahdoh diing uhi. 14 Ajiahchu hitah ah khopi det i nei sih va, hizongleh khopi hung um diing chu i hawl uh ahijaw hi. 15 Hujiahin Amah tungtawnin paahtawina kithoihna chu Pathian kawmah tawplouin i laan diing uhi, huchu Amah min phatna, i muuh uh gah ahi. 16 Hizongleh sil hoih bawl leh silphal chu mangngilh sih un, ajiahchu huchibang kithoihnate ah Pathian akipaah mahmah hi. 17 Na tungva lamkaite thu mang unla, huleh a thunuai vah kituluut un, ajiahchu amah un na tungtaang thu uh soi diingte bangin na hagau uh ahung veensah uh ahi. Lunggimna toh hilouin, kipaahna toh bawlsah un, ajiahchu lunggimtaha abawl uh chu nanguh diingin aphatuam sih hi.
Thutawpna leh Vangpiaahna
18 Keiuh diingin hung haamteisah un, ajiahchu sil bangkim ah dihtaha gamtat uutin sialephaheetna hoihtah ka nei uh chih ka kimuang uhi. 19 Hizongleh kintaha na kawmva puikiit-a ka um theihna diinga anahaamtei diingin ka hung hasot diaahkhol hi. 20 Tuin kumtuang thuhun sisan jaala, misi lah apat i Lalpa uh Jesu, Belaampu loupitah kaithoupa hamuanna Pathian in, 21 Jesu Khrist jaala a mitmuh a adeihjawngphotmahbawldiingin sil hoih chinteng ah nanguh hung subukim hen; Amah kawmah loupina kumtuang kumtuangin umta hen. Amen. 22 Huleh unaute, hasotna thu ngai thei teeiteei diingin ka hung ngeen hi, ajiahchu thu tawmtakhat in na kawmvah ka hung gial hi. 23 I unaupa uh Timothi hahdohin aumta chih anaheta un, ahung pai pah leh amah toh nanguh ka hung mu diing hi. 24 Na lamkaite zousiah uh leh misiangthoute zousiah chibai hung na buuhsah un. Italy gam a mite'n chibai ahung buuh uhi. 25 Na bawnva kawmah hehpihna um hen. Amen.
Chibaibuuhna leh Thuhilhna
1 Jakob, Pathian leh Lalpa Jesu Khrist suaah in kithehdalh phung sawmlenihte kawmah: Chibai. 2 Ka unaute, je-etna chi tuamtuam na tuaah chiangun kipaahna ngenin ngai un, 3 ajiahchu na ginna uh etkhiahna in thuaahtheihna asiam chih na he uhi. 4 Bangma tasamloua na bukim va, huleh na buching theihna diingun thuaahhaatna chu a bukimna tongdohsah un. 5 Na lahva koiaha in pilna ataahsap leh, mi zousiah kawma soiseellou leh phaltaha petu Pathian kawmah ngeen heh, huchiin amah chu piaahin aum diing hi. 6 Hizongleh ginglel het louin ginna in ngeen heh, ajiahchu ginglel mi chu tuikhanglian kinawh, huih muut leeng lehleh bang ahi. 7 Ajiahchu ginglel mi in chu Lalpa apat bangma muh kineem sih heh, 8 ama'n lungsim bulbaal anei sih a, a silbawl zousiah ah akip sih hi. 9 Unau kingaingiam chu tawisanga aumna ah kipaah heh. 10 Hizongleh mihausa chu suhngiama aumna ah kipaah heh, ajiahchu amah chu hampa paah banga mang diing ahi. 11 Ajiahchu ni in asatna toh ahung suaah chiangin hampa chu ahaaivul hi; hu paah chu akia a, huleh a kilawmna chu amangta hi. Huchibangmahin mihausa zong hampa bangin a sumlepaai hawlna ah avuai mang diing hi. 12 Je-etna kuhkaltaha thuaah mi chuahamphahi; ajiahchu etkhiaha aum zoh chiangin Lalpa'n Amah lungsiattute kawma piaah achiam hinna lallukhuh chu amu diing hi. 13 Mi koimah in sual bawl diinga heema aum chiangin, "Pathian in kei ahung heem hi," chi sih heh; ajiahchu Pathian chu giitlouhna a heem gual ahi sih a, huleh Pathian in koima aheem ngei sih hi. 14 Hizongleh mi chin chu amahuh uutna chiat in apuimang a, hiipa aum chiangin heemin aum ahijaw hi. 15 Huleh uutna hoihlou in nou apaai chiangin, sual ahung hingkhia hi; huleh sual in ahung pichin chiangin sihna ahung hingkhia hi. 16 Ka unau deihtahte, heemin um sih un. 17 Silpiaah hoih leh silpiaah bukim photmah chu tunglam apat ahi a, vaahte Pa kawm apat hung suh ahi a, Amah kawmah chu kihenlamdangna ahihlouhleh liim banga kiheina mawngmawng aum sih hi. 18 A silsiamte laha agah masa lawi khat i hih theihna diingun, Ama'n adeihbang ngeei a thutah a ahung hin i hi uhi.
Sahkho Dihtah Heetna
19 Hikhu jiahin ka unau deihtahte, mi chin ngaihkhiah lamah kilawp henla, thusoi lamah kilawp sih henla, lungthah baih sih heh; 20 ajiahchu mihing lungthahna in Pathian dihtatna atun sih hi. 21 Hujiahin bolhhohna zousiah leh giitlouhna a dimleet chu koihmang unla, na hagau uh hundam thei nanguh a thu kituh chu kingaingiamtahin pom un. 22 Thu ngaikhetu chauh hia nanguh leh nanguh kiheemlouin, thu juitute hijaw un. 23 Mi koipouh thu ngaikhia chauh ahih a, ajuitu ahihlouhin chu, amah chu apianpih maai liimlang akien mi bang giap ahi; 24 amah akien a, huleh aehiahmang a, bangchibang mi ahih akimangngilh pah hi. 25 Hizongleh koipouh jaleenna daan bukim en a huh a um jomzing a, huleh mangngilhhaat thungaikhia mi hilou a hizongleh thu juitu hijaw chu, a natoh ah vangpiaahin aum diing hi. 26 Na lahva mi koiaha sahkhomi a kingai a, a lei aveen zohlouh leh, amah lungtang ngeei heem ahijaw a, hu mi sahkhua chu athawn ahi. 27 Pathian leh Pa mitmuh a sahkho siangthou leh buaahbaanglou chu hih ahi: tagahte leh meithaite a gimthuaah Jaiva veh, huleh khovel a dembaangloua mahni kikoih chu ahi.
Mihausa leh Mijawng Tunga Umdaan
1 Ka unaute, loupina Lalpa, i Lalpa Jesu Khrist ginna chu mi deihsahtuamna toh neikhawm sih un. 2 Ajiahchu na kikhopna vah sana zungbuh but, puan hoihtah silh khat hung luut henla, huleh mijawng khat zong puan setah silhin hung luutta leh, 3 huchiin puan hoih silhpa chu na zahbawl va huleh a kawmah, "Nang hi mun hoih ah tou in," na chi va, huleh mijawngpa kawmah chu, "Nang hutah ah ding in," ahihlouhleh, "Hitah ah ka keeng ngahna nuaiah tou in," na chi uhi. 4 Huchiin na lahva lungsim a khentuamna sulang a, huleh ngaihtuahna gilou nei vaihawmtu hung hita hilou na hi viaimah? 5 Ngai un, ka unau deihtahte, Pathian in hi khovel a mijawngte chu ginna a hausa diing leh Amah lungsiatte kawma achiam lalgam gou luah diinga ateel hilou ahi viaimah? 6 Hizongleh nang un mijawngte na musit uhi. Nanguh hung bawlsia a huleh vaihawmna a hung kailuutte khuh mihausate hilou ahi viaimah? 7 Amah un na kikouhna uh hu min zahumtah chu asoise sih viaimah? 8 Pathian Lehkhathu a, "Nangmah na kilungsiat banga na innveengte na lungsiat diing ahi," chia kigelh dungjuia lai daan na zopkim tahtah uh leh, na bawl hoih uhi. 9 Hizongleh mi deihsahtuamna na suhlatun chu, sil na hihsual va, huleh daan in botsetu bangin siamlouh ahungtan hi. 10 Ajiahchu mi koipouh in daan jui bukim henla, mun khat ah kipalpuuhta leh, a bawna botsia a mohtangin aum hi. 11 Ajiahchu, "Aang na kawm louh diing ahi," chipa Amah in, "Tual na thah louh diing ahi," zong achi hi. Huchiin aangkawm sih zonglechin, tual na thahin chu, daan bohsetu na hita thou hi. 12 Jaleenna daan a vaihawmsaha um diingte bangin thu soi unla gamta un. 13 Ajiahchu zahngaihna neilou mi chu zahngaihna beia vaihawmsahin aum diing hi. Zahngaihna in vaihawmna tungah gual azou hi.
Ginna leh Natoh Thu
14 Ka unaute, mi'n ginna ka nei chi henla, natoh nei sih leh, bang aphatuam diai? Huchibang ginna in amah ahundam thei diaimah? 15 Unaupa ahihlouhleh unaunu khat silhleteen tasamin um henla, ni chin an neeh tasamta leh, 16 huleh na lahva khat in, "Hamuangtahin chiah inla, lumtah leh vahtahin um in," chi henla, sapum diinga sil poimoh pe tuan sih leh, bang aphatuam diai? 17 Huchibangmahin, ginna chu natoh beia amah chauh a aum leh, asi ahi. 18 Ahi, mi khat in, "Nang ginna na nei a, huleh ke'n natoh ka nei ahi," achi thei hi. Na ginna chu natoh tellouin hung ensah in, huleh ka ginna chu ka natoh in ka hung ensah diing hi. 19 Nang Pathian khat aum chih na gingta hi. Na bawl hoih hi. Dawite'n zong agingta va, huleh lauin akiliing uhi. 20 Hizongleh nang mingolpa, ginna chu natoh tellouin asi ahi chih na he uut ei? 21 I pu uh Abraham in a tapa Isak maitaam tunga alat laiin silbawl jiaha siamtang hilou ahiaimah? 22 Ginna in a silbawlte toh atong khawm a, huleh ginna chu natoh a suhbukim ahi chih na mu hi. 23 "Abraham in Pathian agingta a, huchu amah diinga dihtatna a ngaih ahi," chia Pathian Lehkhathu in asoi ataangtung hi. Huleh amah chu Pathian lawm chih ahita hi. 24 Mi chu ginna chauh hilouin, natohte in asiamtan ahi chih na mu uhi. 25 Huchibangmahin, kijuaahnu Rahab in zong, thupotute anazintun a, amahuh lamtuam a asawlkhiah laiin, natohte jiaha siamtang hilou ahi maw? 26 Ajiahchu hagau bei sapum chu asi ahih bangin, natoh bei ginna chu asi ahi.
Lei Veen Hoih Diing
1 Ka unaute, thuhilhtu in mi tampi hung pang sih un, ajiahchu ei thuhilhtute'n vaihawmna khauhjaw tang diing 1 hi uh chih i thei uhi. 2 Ajiahchu sil tampi ah i bawnun i kipalpuuh uhi. Mi koipouh thusoi lama akipalpuuh louh leh, hu mi chu mipiching ahi a, a sapum veeng thei mi zong ahi. 3 Ngai un, i thu ajuihna diingun sakolte kam ah siihbah i bah va, huleh a sapum uh apumin i kaihei thei hi. 4 En in, tuipi a longte zong alian mahmah va huleh huih haattah muut leengin aum na va, himahleh a heehtu in aheehna neutakhat in a uutna lamlam ah akiheisah hi. 5 Huchibangmahin lei zong sapum hiang neutakhat ahi a, hijiangzongleh nasatahin akiuangsahhi. Enin,meineutakhat in gammaang lianpi kang sethei hina mei e! 6 Huleh lei chu mei ahi a, giitlouhna khovel ahi. Lei chu sapum apumpi a subolhhohtu banga i sapum hiangte laha koiha um ahi a, huleh hi in pianken hinkhua zousiah akaangsah a; huleh hi chu gawtmun in mei a akaah ahi. 7 Ajiahchu sa chi chin, va chi chin, leitung a bohvaah chi chin, tuipi a ganhing chi chin, khawijual theih ahi a, huleh mihingte'n akhawijualta uhi. 8 Hizongleh lei chu koima'n akhawijual thei sih uhi. Hichu sual umkinken thei lou, sihna guuh a dim ahi. 9 Hi lei in Pathian leh Pa ngeei chu i phat va, huleh humah in Pathian batpiha siam mihingte i haamsiat jeel uhi. 10 Kamsung khat mah akipatin phatna leh haamsiatna apawtkhia hi. Ka unaute, hi silte chu huchibang diing hilou ahi. 11 Tuinaah khat in tui tuui leh tui kha apawt khesah ngei eimah? 12 Ka unaute, theipi kung ah Olive agah thei eimah, ahihlouhleh grep gui ah theipi agahtheieimah?Huchibangmahin tuinaah khat in tui al leh tui tuui apawtkhesah thei sih hi.
Pilna Dih leh Dihlou
13 Na lahva koi ahiai pil leh silhesiam? A natohte chu pilna jaidam a bawl ahihdaan a umdaan hoih in ensah heh. 14 Na lungtang va thangsiatna nasatah leh kinialna na neih uh leh, uang sih unla huleh thudih kalhin juau soi sih un. 15 Hutobang pilna chu tunglam apat hung kumsuh ahi sih a, hizongleh khovel apat tahsa uutna leh dawi apat hung kipan ahi. 16 Ajiahchu thangsiatna leh kinialna umna phot ah, heetbuaina leh silgilou chinteng aum hi. 17 Hizongleh tunglam a hung kipan pilna chu amasapeenin asiangthou phot a, huzoh chiangin kilep auut a, anunneem a, akituluut a, khotuahna leh gah hoih in adim a, khentuam anei sih a, alepchiah sih hi. 18 Huleh dihtatna gah chu kilepna bawltute'n kilepna a atuh uh ahi.
Khovel Lawmhihna Thu a Demna
1 Na lahva kidounate leh kihaunate khoi apat a hung kuan ahiai? Na sapum hiangte va kidou na tahsa uutnate vapat a hung pawt hilou ahi maw? 2 Na lunggulh va na nei tuan sih uhi. Tual na that va huleh na deihgoh va huleh na nei zou tuan sih uhi. Na kihau va huleh na kidou uhi. Ahiinlah na nei diaah sih uh, ajiahchu na nget louh jiahun. 3 Na ngeen va, na nget dih louh jiahun na mu sih uh, na tahsa nopsahna diingva zat na tup jiahun. 4 Nanguh aangkawmpate leh aangkawmnute! Khovel toh lawmhihna chu Pathian toh kimeelmaatna ahi chih he lou na hi uh maw? Hujiahin koipouh khovel lawm hih uut chu Pathian meelma in akisiam ahi. 5 "Eimah a teeng Hagau in thangsetahin ahung deih hi" chih Pathian Lehkhathu a kigial in amawh soi hi diinga gingta na hi uh maw? 6 Himahleh Ama'n hehpihna tamseem ahung pia hi. Hujiahin Ama'n, "Pathian in mi kisatheite adoudaal a, hizongleh mi kingaingiamte kawmah hehpihna apia hi," achi hi. 7 Hujiahin Pathian kawmah kituluut un. Diabol chu doudaal un, huchiin ahung taaimangsan diing hi. 8 Pathian kawm naih un, huchiin Ama'n ahung naih diing hi. Nanguh misualte, na khut uh silsiang un; lungsim bulbaal neiloute, na lungtang uh susiangthou un. 9 Hahsa sa unla huleh lungdong unla huleh kap un; na nuihna uh lungdonna suaah henla huleh na nuamna uh dahna suaah heh. 10 Lalpa mitmuh ah kingaingiam un, huchiin Ama'n ahung tawisang diing hi. 11 Unaute, khat leh khat kisoise tuah sih un. Mi a unau soisia a huleh a unau vaihawm chu daan thu soisia leh daan vaihawmkhum ahi. Hizongleh daan na vaihawmkhum inchu, a juitu na hi sih a, hizongleh a tunga vaihawmtu na hijaw hi. 12 Daanpetu khat aum a, Ama'n chu ahundam thei a, huleh asuse veh thei hi. Midang vaihawm diingin nang koi na hiai?
Mihausa Kiuangsahte Demna
13 Tuin hung un, nanguh, "Tuni ahihlouhleh jiingchiang in, hu khopi leh hi khopi ah i chiah diing va, hu mun ah kum khat i vataam diing va, leiin i juaah diing va, i pung diing uh," chitute. 14 Ahiinlah jiing chianga bang ahung um diing na he sih uhi. Ajiahchu na hinna uh bang ahiai? Meilum tomtakhat hung kilang a, huleh mangkiit pah bang giap ahi. 15 Husaangin, "Lalpa'n pha asah leh, i hing diing a, hikhu ahihlouhleh hukhu i bawl diing," na chi diing uh ahi. 16 Hizongleh tuin na kiuahsahna vah na kisuang uhi. Huchibang a kiuahsahna zousiah chu sual ahi. 17 Hujiahin sil hoih bawl diing he a, huleh bawl tuan lou mi chu amah a diingin sual ahi.
Mihausate Minuainetna Demna
1 Nanguh mihausate, tuin hung un, na tungva mangbatna hung tung diingte jiahin kap unla maau un! 2 Na hauhsatnate uh amuatgawpta a, huleh na puante uh leikha in ane zouta hi. 3 Na sana uh leh na dangka uh atuieeh vehta a; hute tuieehsiatna chu nanguh kalhna a ahung heetpihtu ahi diing a, huleh na tahsa uh chu meikaah bangin ane zou diing hi. Hun nunung lamah gou na khoi uhi. 4 Ngai un, na lou va buh aat kilohte loh, amahuh heembawla na piaah louh uh a lohte uh chu akikou va; huleh a aattute kikou aw chu sepaihte LALPA bil ah atungta hi. 5 Khovel ah nuamsatahin na um va, huleh na tahsa uh na kipaahsah uhi; sagoh ni a bangin na lungtangte uh na thausah uhi. 6 Midih chu siamlouh na tangsah va, na thatta uhi; ama'n chu ahung doudaal sih hi.
Kuhkal Diinga Hasotna
7 Hujiahin unaute, Lalpa hung masiahin kuhkaltahin um un. Ngai un, loubawlmi in lei gah luultah chu angaah a, guah masa leh guah nunung amuh masiah kuhkaltahin angaah hi. 8 Nanguh zong kuhkaltahin um un. Na lungtang uh sukip un, ajiahchu Lalpa hungna diing anaita hi. 9 Unaute, khat leh khat kiphunsan sih un, huchilou inchu siamlouh tansahin na um kha diing uhi. En un, Vaihawmtu chu kotkhaahbul ah ading hi! 10 Ka unaute, Lalpa min a thusoi zawlneite chu gimthuaahna leh kuhkalna lama etton diingin nei un. 11 Ngai un, athuaah mualsuaahtu chu hamphain i sep uhi. Job kuhkaldaan na ja va, Lalpa'n atawp a abawldaan na mu uhi. Lalpa chu lainatna leh khotuahna a dim ahi. 12 Hizongleh ka unaute, bangteng saangin, kihaahsialin kichiam sih un, vaan ahihlouhleh lei ahihlouhleh sildang bangmah min louin kihaahsial sih un. Hizongleh "Hi" na chih uh chu "Hi" hi heh, huleh "Hilou" na chih uh chu "Hilou" hi heh, huchilou inchu mileptat a seh na hi diing uhi.
Haamteina Silbawltheih Daan
13 Na lahva hahsatna thuaah aum ei? Haamtei heh. Kipaah aum ei? Phatna la sa heh. 14 Na lahva damlou aum ei? Kouhtuam upate kou henla, amah un Lalpa min a thaunuhin haamtei uh heh. 15 Ginna a haamteina in damlou chu adamsah diing a, Lalpa'n amah chu akaithou diing hi. Ama'n silsual anabawl a ahihleh, amah chu ngaihdam ahi diing hi. 16 Hujiahin suhdama na um theihna diingun na sualnate uh khat leh khat kiphuang tuah unla huleh khat leh khat kihaamteisah un Midihtat guntuhtaha haamteina in sil abawlthei mahmah hi. 17 Elijah chu eimah pianken bangthou mihing ahi a, ama'n chu guah jutlouhna diingin phatuam ngaitahin ahaamtei a; huchiin kum thum leh ha guup sung lei tungah guah julouin aumta hi. 18 Huleh ahaamtei kiit a, vaan in guah ajusah a, huleh lei in a gahte ahung suahsahta hi. 19 Unaute, na lahva mi koipouh thutah apat anapeetmangta henla, mi khat in puikiitta leh, 20 koi hizongleh misual a lamkhelhna apat hung pui kiitpa'n sihna apat mi khat hinna ahundoh diing a, huleh sualna tampi akhuhmang diing hi chih hesah un.
Chibaibuuhna
1 Peter, Jesu Khrist apostol in Ponta, Galatia, Kappadosia, Asia leh Bithunia gamte a kithehdalh mivaithaamte kawm ah, 2 Jesu Khrist a thumang diing leh sisan theh tang diinga Hagau hihsiangthou jaala Pa Pathian heetlawhna dungjuia teelte kawmah: Hehpihna na kawmvah um henla huleh hamuanna suhkhangin umta hen.
Kinepna Hing
3 Misi lah apat a Jesu Khrist thohkiitna tungtawna, a khotuahna kichingtah dungjuia kinepna hing tang diinga eiuh hung piangthahsah Pathian leh i Lalpa uh Jesu Khrist Pa chu phatin um hen, 4 goutan setheilou, buaahbaanglou leh mual theilou, vaan a nanguh diinga siit chu tang diingin, 5 hun nunung chianga kilang diing hutdamna mu diinga ginna jaala Pathian silbawltheihna a kep na hi uhi. 6 Hitah ah chu nasatahin na kipaah va, tuin tomkhat sung apoimoh leh, je-etna jaat tuamtuam in lungkham tadih mahleh uh chin, 7 na ginna uh adih kiheetchianna chu sana mei a etkhiah ahih nunga zong mangthang jeel saanga luuljaw chu, Jesu Khrist hung kilaah ni chianga paahtawina leh loupina leh zahbawlna a muha aum theihna diingin; 8 Amah chu mu sih zongleh uh chin na lungsiat uhi. Tuin Amah mu sih zongleh uh chin na gingta va, kipaahna soiguallouh leh loupina a dimin na kipaah uhi. 9 Ajiahchu na ginna uh buchinna na hagau uh hutdamna ngeei chu na mu uhi. 10 Hi hutdamna thu chu na kawmva hehpihna hung tung diing thu anasoilawh zawlneite'n nguntahin akan va asui uhi, 11 Khrist Hagau amahuh a um in Khrist thuaahgimna leh hu nunga hung jui diing loupina thu aheetsah malawh laiin, bangchibang mi leh bangtobang hun in ahiai chih heet tumin akan uhi. 12 Vaan apat a hung kisawl Hagau Siangthou zanga na kawmva tanchinpha soitute tungtawnin hu silte chu na kawmvah heetsah ahita hi. Hu mite'n chu amahuh diing hilouin, eiuh diingin nna atong jaw uhi chih a kawmvah heetsah ahi uhi. Hu silte chu angelte'n zong etveel auut uhi.
Siangthou Diinga Kouhna
13 Huchihjiahin na lungsim un kisakhawl unla, pilvaang un, huleh Jesu Khrist hung kilaah chianga nanguh kawma hung kipe diing hehpihna chu kiptahin lamen un. 14 Ta thumangte bangin na heetlouh laiva malai a na uutnate uh bangin um sih un. 15 Hizongleh nanguh hung koupa asianthou bangin nanguh zong na gamtat daan zousiah vah siangthou un. 16 "Nanguh siangthou un, ajiahchu kei ka siangthou hi," chih gelh ahihjiahin. 17 Huleh deihsahtuam neiloua mi chin a natoh dungjuia vaihawmsahtu chu Pa chia kou na hih uh leh, khovel a na vaithaam lai hun uh lau kawmin zang un. 18 Ajiahchu na pulepate vapat tawndaan a na muh uh na umdaan uh bangmah hilou apat sil sethei, dangka ahihlouhleh sana a tat na hi sih uh chih na he va, 19 hizongleh belaamnou demna bei leh niin baanglou sisan banga Khrist sisan luultah a tat na hijaw uhi. 20 Amah chu khovel kisiam mapehin guatlawhin aum ngeei hi, hizongleh hi hun nunungte ah nanguh diingin suhlatin aumta hi. 21 Amah tungtawnin misi lah apat a Amah kaithoupa leh loupina pepa Pathian na gingta uhi, huchia na ginna uh leh na kinepna uh Pathian a aumtheihna diingin. 22 Unaute tunga lungsiatna dihtah neihna diinga Hagau tungtawna thutah thumanna a na hagau uh na suhsiangthoutaah jiahun, phatuamngaitahin khat leh khat lungtang siangthou in kilungsiat tuah un. 23 Chi sethei apat hilouin, himahleh chi setheilou, Pathian thu kumtuanga hing zing leh um zing tungtawna piangthah na hijaw uhi. 24 Ajiahchu, "Mihing zousiah hi hampa bang ahi, Huleh mihing loupina zousiah zong hampa paah bang ahi. Hampa chu avul a, a paah zong apulh hi. 25 Hizongleh LALPA thu chu kumtuangin aum zing hi. " Huleh hichu na kawmva tanchinpha thu kisoi chu ahi.
Suang Hing leh Teelte
1 Huchihjiahin giitlouhna zousiah, heembawlna zousiah, lepchiahnate, eennate leh kisoisiatna zousiah tawpsan unla, 2 na khantouh theihna diingun naungeeh suaahthahte bangin Pathian thu nawitui bangma toh hallouh lunggulh un, 3 Lalpa chu mi hehpihsiam ahi chih na heettaah jiahun. 4 Mite deihlouh hizongleh Pathian teel leh luul suangpi hiiig Amah kawmah na hung uhi. 5 Nanguh zong suang hingte bangin Jesu Khrist tungtawna Pathian pomtaah hagaulam kithoihna laan diinga siampuhihna siangthou leh hagaulam inn a lamtouh na hi uhi. 6 Hujiahin Pathian Lehkhathu ah zong, "Ngai un, Zion ah aning a suang poimohpeen, teel leh luultah ngeei chu ka lem hi, huleh Amah gingta phot chu amualphou sih diing hi", chih gelh ahi. 7 Hujiahin nanguh agingtate diingin Amah chu aluul a, himahleh agingtaloute diingin, "Innlamtute suang deihlouh, hu ngeei chu aning a suang poimohpeen hung hi," 8 huleh "Kipalpuuhna suang leh kipuuhna suangpi," chu ahi. Amah un thu aman louh jiahun akipalpuuh uhi, huchibang diing him a guat zong ahi uhi. 9 Hizongleh a vaahna limdangtah a luut diinga mial apat a nanguh hung koudohpa hoihnate na phuandalh theihna diingun. , nanguh chu chi teel, lai siampu, nam siangthou, Pathian mituam biihte na hi uhi. 10 Nidanglaiin Pathian mite na hi sih va, hizongleh tuin chu Pathian mite na hita uh, khotuahna tangloute na hi va, hizongleh tuin chu khotuahna na tangta uhi. 11 Deihtahte, mikhual leh khualzin bangin, hagau doudaal zing tahsa uutnate tawpsan diingin ka hung hasot hi. 12 Silgilou bawlte banga ahung soisiat chiang va, na natoh hoihte uh amuh jiahva vehna Ni a Pathian apaahtawi theihna diingun, Jentelte lahah na gamtat daan uh kilawmtahin um un.
Vaihawmtute Nuaia Kituhluut Diing
13 Lalpa jiahin mihing daan bawl photmah nuaiah kituluut un, kumpi kawmah hitaleh athuneipeen nuaia bangin kituluut un, 14 ahihlouhleh gamoptute kawmah, kumpipa'n silgilou bawlte gawt diing leh sil hoih bawlte tawimawi diinga ahung sawl ahi va, anuai vah kituluut un. 15 Ajiahchu na sil hoih bawl va mingolte ngolna na suhdaih uh chu Pathian deihjawng ahi. 16 Mi jaleente bangin um unla, ahiinlah na jaleenna uh chu giitlouhna khuhkhumna diingin zang sih un; hizongleh Pathian suaahte bangin um un. 17 Mi zousiah zahbawl un. Unaupihte lungsiat un. Pathian lau un. Kumpipa zahbawl un.
Natohsahna Umjia
18 Suaahte haw, zahtaatna liantah toh na pute uh nuaiah kituluut un, a hoihte leh a jaineemte kawm chauh ah hilouin, hizongleh mithulimloute kawmah zong kituluut un. 19 Ajiahchu Pathian lama sialephaheetna jiaha mi'n gimna leh dihloutaha bawlna athuaah leh, hichu paahtaat taah ahi. 20 Bangjiahin ahiai i chih leh na dihlouhna jiahva vuaaha na um chiangun kuhkaltahin thuaah mahleh uh chin, bang paahtaat ahiai na loh uh? Hizongleh sil hoih na bawl va, hukhu jiaha na thuaahloh uh leh, kuhkaltahin thuaah leh uh chin, hichu Pathian ma a paahtaat taah ahi. 21 Ajiahchu hikhuh diing mawnga kouh na hi uhi, Khrist in eiuh luanga anathuaahtaah jiahin, nang un na juih theih diing uh a khaapnung etton diing ahung nuutsiat hi, 22 "Ama'n chu sual mawngmawng abawl sih a, huleh a kam ah zong heemthu akimu sih hi." 23 Housiata aum laiin Ama'n ahousiat thuh sih a, athuaah laiin zong avau sih a, hizongleh dihtattaha vaihawmpa kawmah akikeemsah jaw hi. 24 Eiuh suallama si a, hizongleh dihtatna lama i hin theihna diingun Ama'n Amah sapum ah i sualnate sing dawn ah apua a, Amah vuaahna golhte jiahin suhdamin na umta uhi. 25 Ajiahchu belaam bangin nana lammangta va, hizongleh tuin chu na hagau uh Belaampu leh Veengtu kawmah na hung kihkiitta uhi.
Jite Umdaan Diing
1 Huchibangmahin, nanguh jite haw, na pasalte uh kawm chiat ah kituluut un, huchia koiaha in Pathian thu gingta sih mahleh, Pathian thu tellou a jite gamtat daan a zoha aum theihna diingin, 2 huchiin zahtaattaha na gamtat daan uh leh siangthoutah a na umdaan uh amuh chiangun zohin aum diing uhi. 3 Na kicheina uh chu polam kicheina sam pheehte leh sana a kicheinate, ahihlouhleh puansilh hoih a kithuamte hilouin, 4 hu saangin kilawmna setheilou lungsim nunneem leh chihnuam in sunglam mihing chu kithuam jaw heh, huchu Pathian mitmuhin amanpha hi. 5 Ajiahchu hutobangmahin malai a numei siangthou, Pathian muangtute'n zong, amahuh pasalte thuthu va umin anakichei uhi. 6 Sarah ngeei in Abraham chu lalpa chia koua a thu aman bangin, suhlauna jiah hiloua sildih na bawl uh leh, Sarah tanute na hi uhi.
Pasalte Umdaan Diing
7 Huchibangmahin, nanguh pasalte haw, na haamteina uh daala aum louhna diingin, na jite uh chu hinna hehpihna na tankhawmpih uh ahihjiahun, beel keehbaihjaw banga ngaiin paahtawina pia unla, heetsiamna toh umkhawm un.
Khristian Kilainatna
8 Atawppeenin, khat leh khat lungsim munkhat pua unla, kilainattuah unla, unau banga kilungsiatin hehpihsiam unla, kingaingiam un; 9 giitlouhna chu giitlouhna a thuh louin, housiatna zong housiatna a thuh louin, hizongleh hu saanga vangpiaah jawin, ajiahchu huchi diing him a kouh na hi uhi, huchia vangpiaahna na tan theihna diingun. 10 Ajiahchu "Hinna deih leh ni hoihte muh uut in chu gilou apat a lei veeng henla, a muuh zong heemthu soina apat veeng hen. 11 Gilou apat kiheemkhia henla, sil hoih bawl heh; lemna hawl henla, deih jeel hen. 12 Ajiahchu LALPA mit chu midihtatte tungah atu a, huleh a bil zong a haamteina lamvah akidoh hi; hizongleh LALPA meel chu silgilou bawlte kalhin a tungvah atu hi. "
Thuaahna leh Khrist Ettonna
13 Huleh sil hoih juitute na hih uh leh, koi ahiai nanguh poi hung khoih diing? 14 Hizongleh dihtatna jiaha na thuaah uh leh, na hampha uhi. "Huleh ahung vauna uh lau sih unla, lung zong lungkham sih un." 15 Hizongleh na lungtang un Lalpa Pathian chu zahtaat unla, huleh nanguh a um kinepnajiah hung dong photmahte chu jaineemna leh zahtaatna toh dawng diingin bangchihlaipouhin kipeih zing un; 16 huchia Khrist a na gamtat daan hoih uh dihloutaha hung demte chu ahung soisiatna va azum theihna diingun sialephaheetna hoihtah nei un. 17 Ajiahchu Pathian lemsah ahih inchu, silgilou bawl jiaha thuaah saangin sil hoih bawl jiaha thuaah ahoihjaw hi. 18 Ajiahchu Pathian kawma ahung pui theihna diingin Khrist in zong sualnate jiahin setden diingin khatvei athuaahta a, midih chu midihlou luangin, tahsa a suhlupin aum a, hizongleh Hagau in asuhhing hi. 19 Hu Hagau tungtawnin avachiah a, suangkul a um hagaute kawmah thu avaphuang hi. 20 Hute'n nidanglaia Noah damlaia kuang bawl sung teng Pathian thuaahzohna in angaah laiin athumang sih va, hu kuang ah mi tawmtakhat, huchu mi giat tui lahah hutdamin aum uhi. 21 Hu baptisma in aetsah chu Jesu Khrist thohkiitna jiaha tua i hutdamna uh ahi, huchu tahsa nitna koihmang hilouin, sialephaheetna siangtah neihna diinga Pathian lama ngetna ahijaw hi. 22 Amah chu vaan ah achiahta a, angelte leh thuneihnate leh silbawltheihnate a thu nuaia koihin Pathian jiatlam ah aumta hi.
Sual Tawpsanna
1 Huchiin eiuh diinga Khrist in tahsa a hung thuaahta ahih jiahin nanguh zong huchibang lungsim in kithuam un, ajiahchu koipouh tahsa a thuaahsa in chu sual atawpsanta hi, 2 huchia tahsa a hun aneih laiteng a mihing uutna lam banga hingta lou a, hizongleh Pathian deihjawnga ahin jawhna diingin. 3 Ajiahchu huuhnate, uutnate, zuhainate, gualnop thaanghuai munte, zu dawnkhawmnate leh milem biahna kihdahhuaite a i umlai a Jentelte deihjawng bawlna ah i tumalai hinkhuate uh i zang huntawhta uhi. 4 Hi thu ah chu amahuh nopbawl luatna banga na bawlve louh uh thumah asa va, nanguh ahung soisia uhi. 5 Amah un mihing leh misite vaihawm diinga kipeihsa Amah kawmah a tanchin uh asoi diing uhi. 6 Hikhu jiahin tanchinpha chu misite kawmah zong soiin ana-um hi, huchia tahsa a um mite dungjuia vaihawmsah ahih theihna diingun, hizongleh Pathian deihlam dungjuia hagau a ahin theihna diingun. 7 Hizongleh sil zousiah tawpna diing chu anaita hi; hujiahin silngaikhawh unla, na haamteinate vah pilvaang un. 8 Huleh sil bangkim tungah phatuamngaitahin kilungsiat tuah chiat un, ajiahchu "lungsiatna in sualna tampi akhuhkhum hi." 9 Phunchiaah louin khat leh khat kizintun tuah un. 10 Mi chin in silpiaah na muh bang jeelun, Pathian hehpihna chi tuamtuam keemtu hoihtahte bangin, hute in khat leh khat nna kitohsah tuah chiat un. 11 Mi koipouh in thu asoi leh, Pathian kam a thu pawt bangin soi heh. Mi koipouh in thunatoh nna atoh leh, Pathian in haatna apiaah bangjeelin tong heh, Jesu Khrist jaala Pathian chu sil bangkim a paahtawia aum theihna diingin, Amah kawmah kumtuang kumtuangin paahtawina leh lalna umta hen. Amen.
Khrist Jiaha Thuaahna
12 Deihtahte, nanguh je-et diinga na tungva je-etna hung tung chu sil limdang bang aha hung tung bangin ngaihtuah sih un. 13 Hizongleh Khrist thuaahnate kikoppih na hih jiahun kipaah un, huchia a loupina ahung kilat chiangin nanguh zong naahpiihtaha nuama na kipaah theihna diingun. 14 Khrist min jiaha soisiat na hih uh leh, na hampha uhi, ajiahchu loupina Hagau leh Pathian Hagau na tungvah aum hi. Amahuh lam thu ah Amah chu soisiat ahi a, hizongleh nanguh lam thu ah Amah chu paahtawiin aum ahi. 15 Hizongleh na lahvah koimah in tualthah jiahin aha, guuhtaat jiahin aha, silgilou bawl jiahin aha, ahihlouhleh midangte tungtaang phatuamloua buaipih ahihjiahin aha thuaah sih heh. 16 Ahihvaangin koipouh in Khristian ahihjiaha a thuaah leh zum sih heh, hizongleh hi tungtaang jiahin Pathian paahtawi jaw heh. 17 Ajiahchu Pathian innkuante lahah vaihawmna kipat hun ahung tungta hi; huleh eiuh toh kipan masa ahih inchu, Pathian tanchinpha gingtaloute tawpna chu bang ahita diai? 18 Huleh "Midihtat bawn hutdam ahih haamhaam inchu, Pathian ngaihsahloute leh misualte bang asuaahta diai?" 19 Huchihjiahin koipouh Pathian lemsah dungjuia thuaahte'n sil hoihbawl ah a hagau uh chu Siamtu ginumtah kawmah kolsah uh hen.
Upate Hasotna
1 Na lahva upa umte chu kei na upa hihpih uh leh Khrist thuaahna heetpihtu leh loupina hung kilang diing zong tanpihtu in ka hasot hi. 2 Na lahva Pathian belaam pawl umte vaah unla, amahuh enkol un, hihlouh theihlouh ahihjiah hilouin, uut thu jawin, punna niin deih jiah hilouin, hizongleh lungsim kipeihsa kawm jawin; 3 etkol diinga hung kipete tunga kisulal lou a, himahleh pawlte etton diinga um jawin. 4 Huleh Belaampu Lianpeen ahung kilat chiangin loupina lallukhuh mualtheilou na mu diing uhi.
Khanglaite Hasotna
5 Huchibangmahin nanguh khanglaite haw, upate nuaiah kituluut un. Ahi, na bawnun khat leh khat kithumang tuah chiat unla, kingaihngiamna in kithuam un, ajiahchu, "Pathian in mikiliansahte adoudaal a, hizongleh mi kingaingiamte kawmah hehpihna apia hi. "
Hasotna Vaantaang
6 Hujiahin ahuntaha Ama'n nanguh ahung tawisang theihna diingin Pathian khut haattah nuaiah kingaingiam un. 7 Ama'n ahung ngaihsah zing jiahin, na lungkhamna zousiah uh a tungah nga un. 8 Sil ngaikhawh unla, kiveeng zingin um un; ajiahchu na khingpa uh diabol chu huumpibahnei hawh bangin aneeh theih diing mi hawlin avaah lehleh hi. 9 Na unau uh khovel a umte tungah huchibang thuaahnatnate atungve chih hein, ginna a kiptaha umin diabol chu dou un. 10 Hizongleh Khrist Jesu manga kumtuang loupina tang diinga eiuh hung koupa, hehpihna hau Pathian in, tomkhat sung na thuaah nungun, nanguh ahung subukimin, ahung sukipin, ahung suhaatin, ahung umdetsah diing hi. 11 Amah kawmah kumtuang kumtuangin paahtawina leh lalna umta hen. Amen. 12 Unau ginumtaha ka heet Silvana tungtawnin nanguh hasotna, huleh hichu Pathian hehpihna thutah i dinna uh ahi chih hesahin na kawmvah tomtakhatin ka hung gial ahi. 13 Nanguh toh teel khawm Babylon a umnu in chibai ahung buuh hi; huchibangmahin ka tapa Mark in zong ahung buuh hi. 14 Lungsiatna kitawp in khat leh khat chibai kibuuh un. Nanguh Khrist Jesu a um zousiah kawmah hamuanna um hen. Amen.
Chibaibuuhna
1 Simon Peter, Jesu Khrist suaah leh apostol in i Pathian leh Hundampa Jesu Khrist dihtatna jaala ginna i tan bang tangte kawmah: 2 Hehpihna leh hamuanna chu na kawmvah Pathian leh i Lalpa Jesu heetna ah suhpungin umta hen.
Khristian Umdaan
3 Amah loupina leh hoihna a eiuh hung koupa heetna jiahin, a Pathian silbawltheihna in hinna leh Pathian ngaihsahna lam thu ah sil zousiah ahung pia hi. 4 Hu tungtawnin thuchiam manpha leh loupi mahmahte chu ahung pia hi, huchia uutna tungtawna khovel a um siatna apat suaahta a Pathian pianken umdaan kikoppihte na hung hih theihna diingun. 5 Hujiahmahin thanopna zousiah suahin, na ginna vah hoihna hal unla, na hoihna vah heetna hal unla, 6 na heetna vah kideehtheihna hal unla, na kideehtheihna vah kuhkalna hal unla, huleh na kuhkalna vah Pathian ngaihsahna hal unla, 7 na Pathian ngaihsahna vah unau kilungsiatna hal unla, huleh na unau kilungsiatna vah lungsiatna hal un. 8 Ajiahchu hite nanguh a aum a akhan jeelin chu, i Lalpa Jesu Khrist heetna lamah chiing leh gahlouin na um sih diing uhi. 9 Hizongleh hi silte nei lou chu mittaw ahi a, gamla amuthei sih a, huleh a malai sualte apat silsianga aumna zong amangngilhta hi. 10 Hujiahin unaute, nanguh hung kikouhna leh kiteelna suchian diingin thanop hung suah un, ajiahchu hite na bawl uh leh chu na kipalpuuh ngei himhim sih diing uhi; 11 ajiahchu huchiin Jesu Khrist i Lalpa leh Hundampa kumtuang gam a luutna chu nanguh kawmah kiningchingtahin ahung musah diing hi. 12 Hujiahin hi silte hein, na kawmva um thutah ah tundingkip hita mahleh uh chin zong, hu silte chu hung hesahkiit zing diingin ka kithahdah ngei sih diing hi. 13 Ahi, hi puaninn a ka um sung teng nanguh hung heetsah kiit jeela hung tohhalh zing hoih ka sa hi, 14 i Lalpa Jesu Khrist hung theihsah mahbangin, hi ka puaninn koihmangna ahung tung pah diing chih ka thei ngaala. 15 Hubaan ah ka paikhiah nung chianga hi silte na heetzingna diingun ka hahkat diing hi.
Peter in Khrist Loupina Amuhna
16 Ajiahchu i Lalpa Jesu Khrist silbawltheihna leh ahung paikiitna thu ka hung theihsah laiun, taangthu bulbaal neilou pillepchiahtaha phuahtawm meimeite juitute ka hi sih va, hizongleh a loupina mutute ka hijaw uhi. 17 Ajiahchu Ama'n chu Pa Pathian kawma kipatin paahtawina leh loupina amu a, huchihlaiin loupina tungtuang apatin hichibang aw a kawmah ahung tung hi, "Hichu ka Tapa deihtah, ka kipaahna mahmah ahi," chiin. 18 Huleh taang siangthou a Amah toh ka umlai un, hi aw chu vaan apat hung pawt keiuh ngeei in ka ja uhi. 19 Soilawhna thu kipjaw seem zong i nei uhi, khua ahung vaah a, na lungtang va jiingsol aahsi ahung suaah masiah, mun mial a vaah um na ngaihsah bangva na ngaihsah uh leh na bawl hoih uh ahi diing hi. 20 pathian Lehkhathu a thusoilawh himhim chu mi khat mimal lehdohna apat hung um ahi sih chih he masa un. 21 Ajiahchu thusoilawh himhim nidanglaiin mihing deihdaan apat hung pawt ahi het sih a, hizongleh Pathian misiangthoute'n Hagau Siangthou phuut ahih bang jeelun anasoi uh ahijaw hi.
Zawlnei Tahloute
1 Hizongleh mite laha zawlnei tahloute zong ana-um mah bangin, na lahva zong thuhilhtu tahloute ahung um diing va, amah un chu amahuh leipa Lalpa hiilhial kiheetmohbawlin, mi susethei ginna dihloute aguuhin ahung luutpih diing va, amahuh leh amahuh tungah thakhatin siatna atungsah diing uhi. 2 Huchiin mi tampi in a zulhjauna uh ahung chiing diing va, amahuh jiahin thutah lampi chu soisiat ahi diing hi. 3 Huleh a huaihamna jiahun sumkawlveina a hung neiin juauthu in nanguh ahung heem diing uhi; nidanglai apat a tungva vaihawmna chu akhawl sih a, a siatgawpna uh zong a-ihmu sih hi. 4 Ajiahchu angelte'n sil asuhsual un Pathian in ahawi sih a, tartaras ah apaai a, vaihawmsaha um diinga asiit a kokhuuh mialte ah akhum jaw a, 5 huleh Pathian ngaihsahloute khovel ah tuijiin atungsah a, nidanglai khovel chu ahawi sih a, hizongleh dihtatna thusoipa Noah chu midang sagih toh akeembit a, 6 huleh Sodom leh Gomorrah khopite chu mohtangsaha susiain vutvai asuaahsah a, Pathian ngaihsahlou hung um diingte etsahna diingin abawl a, 7 huleh migiloute umdaan thaanghuaitah jiaha lungsim na mahmah midihtat Lot chu ahutkhiaha ahihleh 8 (ajiahchu hu midihtatpa'n a kawmva aum laiin, daanlou banga a silbawlte uh amuh a huleh ajaahin, hute'n a lungsim dihtat chu ani ani in asuna mahmah hi), 9 Lalpa'n amah ngaihsah mite chu heemna apat hutkhiah daan leh midihtatloute chu vaihawm ni a gawt diinga siit daan ahe hi, 10 huleh adiaahin uutna thaanghuai lama tahsadaan banga umte leh thuneitu simmoh mite chu. Amahuh chu ngolhaan leh chihhah ahi va, amah un loupina neite asoisiatun zong alau sih uhi. 11 Huchibang ahihlaiin, angel haat leh silbawltheite'n bawn, Lalpa ma ah a tungthu uh hahsoiin asoise ngam sih uhi. 12 Hizongleh hite'n ganhing ngaihtuahna neilou mat a thah diingte bangin, aheetsiam louh uh silte asoisia va, huchiin amahuh siatna ah abeimang veh diing uhi. 13 Huleh suun laia ankuang lui buai nuamsa mi ahih jiahun dihtatlouhna man amu diing uhi. Na kawmva ankuang alui laiun, amahuh kiheema ankuang lui ahih jiahun, buaah leh meelhem ahi uhi. 14 Aangkawmna mit a dim, sual tawpsan theihlouhte anei va, mi kiploute aheempuuh va, eenhaat lungsim apua va, huleh haamsethuaah tate ahi uhi. 15 Lampi dih ataaisan va, avaahmang va, dihtatlouhna loh ngainapa Beor tapa Balaam lampi ajuita uhi. 16 Hizongleh amah chu a giitlouhna jiahin taaihilhin aum a, sabiltung haamtheilou mihing haam a hung haam in zawlnei ngolna chu akhapta hi. 17 Hute chu tuikhuuh tui umlou, huih muut leeng lehleh meilum ahi va, amahuh diingin vom behbuh a mialna chu kumtuanga siit ahi. 18 Ajiahchu thumanlouh chiaahjeena soiin, giitlouhna apat suaahta haamhaamte chu tahsa uutna leh huuhna in aheempuuh uhi. 19 Amahuh chu siatna suaah hipumin mite suahtaatna thu achiam uhi; ajiahchu mi zoha aumna humah in amah chu suaahin asiam hi. 20 Ajiahchu Lalpa leh Hundampa Jesu Khrist heetna jiaha, khovel thaanghuainate anuutsiatsan nungva, humah a ataan kiit va zoha aum uh leh, a umdaan nunung uh chu achiila saangin asejaw hi. 21 Ajiahchu dihtatna lampi atheih nung va, thupiaah siangthou a kawmva kepsaha um chu anungngatsan saangun dihtatna lampi theilou anahi leh uh, amahuh diingin ahoihjaw diing hi. 22 Hizongleh "Ui amah luaah mah ah akihkiit," chih leh, "Vohpi kisilsiangsa buannawi a kibual diingin akiih," chih thupil dihtah khu bangngeeiin a tungvah atung hi.
Lalpa Ni
1 Deihtahte, tua na kawmva ka gelh hi lehkhathot anihna ahi. Hu tegeel hung hesahkiit jeelin na lungsim chiimtahte uh ka tohthou ahi, 2 huchu zawlnei siangthoute'n anasoi masat uh thute, huleh keiuh, Lalpa leh Hundampa apostolte thupiaah na heetzingna diingun ahi. 3 Hikhu he masa un, ni nunung lam ah simmohhaatte, amahuh uutna ngeei banga gamtate ahung um diing va, 4 "Ahung kiitna thuchiam khoiah ahiai? Ajiahchu silsiam chiil apat sil bangkim pulepate ihmut ni apatin aum ngeingei bangin aum zing," achi diing uhi. 5 Ajiahchu Pathian thu in nidanglaiin vaante ahung um a, lei zong tui apat leh tui lahah ana-um hi chihte tupmawngin akiheetmohsan va; 6 hu thu tungtawnin hulaia khovel um chu tui in atuum a, abeimangta hi. 7 Hizongleh vaante leh lei chu hu thu jiah mahin Pathian ngaihsahlou mite vaihawmna leh manthaaina ni a diinga siit-a umin mei a gawt diinga kholkhawm ahita hi. 8 Hizongleh deihtahte, hi sil khat theilouin um sih un, huchu Lalpa ngaihin ni khat chu kum saang khat bang ahi a, huleh kum saang khat zong ni khat bang ahi. 9 Mi khenkhat in zekaai asah bangun, Lalpa chu a thuchiam lamah azekaai sih hi, hizongleh koimah beimang deihlouin mi zousiah kisiih diing deihin eimah lamah athuaahzou ahijaw hi. 10 Hizongleh Lalpa Ni chu jaan a guta bangin ahung tung diing hi, huleh hu Ni chiangin vaante chu nasataha gingin amang diing va, huleh silbulte chu mei a haaitui ahi diing va, lei zong a sunga natoh umte toh haalmangin aum diing hi. 11 Hu silte zousiah chu huchia beimang diing ahi chih hein umdaan siangthou leh Pathian ngaihsahna lam phot ah bangchibang mi hi diing na hi viaimah? 12 Pathian Ni hung tung pah diing enkawmin, hukhu jiaha vaante chu mei a hung kaangmang diing leh silbulte zong mei a haaituia umta diing ahihjiahin. 13 Ahihvaangin ei un chu a thuchiam dungjuiin vaan thah leh lei thah, dihtatna umna chu i kineppih uhi.
Hasotna
14 Hujiahin deihtahte, hu silte kineppih na hih jiahun, niin baanglou leh dembeia hamuangtaha nana um uh Ama'n ahung muh theihna diingin thanop suah un. 15 Huleh i Lalpa thuaahtheihna chu hutdamna hiin ngai un, i unaupa deihtah Paul in Pathian in a kawma apiaah pilna dungjuianakawmvaagelh bangin, 16 a lehkhathot zousiah ah hi silte tungtaang asoi hi. Hu lehkhathotte ah thu heetsiam hahsate khenkhat aum a, hute chu mipillou leh mikiploute'n Pathian Lehkhathu dang akaihkawi bangun amahuh mah siatna diingin akaikawi uhi 17 Hujiahin deihtahte, nang un hu thute na theihlawh jiahun pilvaang un, huchilou inchu migiloute khelhna a puimanga umin na kipna vapatin na puuh kha diing uhi. 18 Hizongleh i Lalpa leh Hundampa Jesu Khrist hehpihna leh heetna ah hung khanglian un. Amah kawmah tu leh kumtuangin loupina um hen. Amen.
Kumtuang Hinna Thu
1 Achiil apata um, ka jaahsa uh, ka mit va ka muhsa uh, ka etchetsa uh, huleh ka khut un zong athamsa hu hinna Thu chu, 2 huleh hu hinna chu suhlat ahita a, hu kumtuang hinna Pa kawma um, ka kawmva suhlat-a um chu ka muta va, ka heetpih va, na kawmvah ka hung hilh uhi; 3 huchia nang un zong na hung kipawlkhawmpih theihna diingun hu ka muhsa uh leh ka jaahsa uh chu na kawmvah ka hung hilh uhi. Huleh tahzetin i kipawlkhawmna uh chu Pa toh a Tapa Jesu Khrist toh ahi. 4 Huleh na kipaahna uh abukim theihna diingin hi thute na kawmvah ka hung gial uh ahi.
Pathian toh Kipawlkhawmna
5 Amah apat na kawmva hung phuan diinga ka na jaah uh thupuaah chu hikhu ahi, Pathian chu vaah ahi a huleh Amah ah mial mawngmawng aum sih hi. 6 Amah toh ka kipawlkhawm chi ngaala, mial a i um zing un chu juau i soi a, huleh thutah i bawl sih uhi. 7 Hizongleh Amah vaah a aum banga ei zong vaah a i um zing leh, khat leh khat kipawlkhawmna i nei va, huleh a Tapa Jesu Khrist sisan in sualna zousiah apat ahung silsiang hi.
Sual Kiph uanna
8 Sualna ka nei sih i chih un chu, eimah leh eimah kiheem i hi va, huleh thutah eimah ah aum sih hi. 9 I sualnate i phuan un chu, i sualnate ngaidam diing leh dihtatlouhna zousiah apat hung silsiang diingin Amah chu amuanhuai in adihtat ahi. 10 Sualna ka nei sih i chih un chu, Amah mijuau i hisah va, huleh a thu zong eimah ah aum sih hi.
1 Ka tate haw, na sual louhna diingun hi thute na kawmvah ka gial ahi. Huleh mi koiaha asualtaah leh, Pa kawma hung soipihtu Jesu Khrist midihtat i nei uhi. 2 Amah chu i sualnate diinga thuphatawina ahi a, huleh eiuh sualna diing chauh hilouin, khovel pumpi sual thuphatawina zong ahi.
A Thupiaahte Juih
3 A thupiaahte i juihva ahihleh, Amah i he chih i he uhi. 4 Mi'n, "Amah ka he," chi ngaala a thupiaahte juilou mi chu mijuau ahi. a, huleh thutah amah ah aum sih hi. 5 Hizongleh koipouh a thu jui photmah chu, amah ah Pathian lungsiatna abukim tahzet ahi. Hikhu in Amah ah i um chih i he hi. 6 Amah ah ka um zing chitu chu Amah um bangin aum ve diing ahi.
Kilungsiat Tuahna
7 Unaute, thupiaah thah na kawmvah ka hung gial ahi sih a, hizongleh thupiaah lui, achiil apat na neih uh ka hung gial jaw ahi. Thupiaah lui chu achiil apat na jaahsa uh thu chu ahi. 8 Huchiangleh thupiaah thah na kawmvah ka hung gial ahi, huchu Amah leh nanguh ah dihtahin aum hi, ajiahchu mial abeita a huleh tuin vaah dihtah ahung vaahta hi. 9 Mi vaah ah ka um chi a, a unau mudah chu mial ah aum nalai ahi. 10 A unau lungsiattu chu vaah ah aum zing a, amah ah kipalpuuhna diing himhim aum sih hi. 11 Hizongleh a unau mudah chu mial ah aum a, mial ah akhosa hi; mial in amit asuhtawtsah jiahin achiahna lam zong ahe sih hi.
Hagaulam Hinkhua
12 Tate haw, Amah min jiaha na sualnate uh ngaihdam ahihtaah jiahin na kawmvah ka gial ahi. 13 Pate haw, achiil apat a um, Amah na heet jiahun na kawmvah ka gial ahi. Tangvaalte haw, giloupa chu na zohtaah jiahun na kawmvah ka gial ahi. Tate haw, Pa chu na heettaah jiahun na kawmvah ka gial ahi. 14 Pate haw, achiil apat a um, Amah na heettaah jiahun na kawmvah ka gial ahi. Tangvaalte haw, na haat va, Pathian thu nanguh a aum zing a, huleh giloupa chu na zohtaah jiahun na kawmvah ka gial ahi.
Khovel Lungsiat Louh Diing
15 Khovel lungsiat sih unla, khovel a sil umte zong lungsiat sih un. Mi koipouh in khovel alungsiatin chu, Pa lungsiatna amah ah aum sih hi. 16 Ajiahchu khovel a sil um zousiah, tahsa utnate, mit uutnate leh damsung kisahtheihnate chu Pathian akipan ahi sih a, hizongleh khovel apat ahijaw hi. 17 Khovel chu a uutna toh abei zing ahi; hizongleh Pathian deihjawng bawl mi chu kumtuangin aum zing hi.
Khrist Doudaalte Taaihilhna
18 Tate haw, hun nunung ahita hi; huleh Khrist doudaalpa ahung diing chih na jaah bangun, tuin zong Khrist doudaal tampi aum zouta a, hikhu jiahin hun nunung ahita chih i he uhi. 19 Amahuh chu i lah vapat apawtdoh uh, hizongleh eiuh laha mi ahi sih uhi; ajiahchu eiuh laha mi anahita leh uh, i kawmva um zing diing ahi uhi; hizongleh a bawnun eiuh laha mi ahi sih uh chih kilatna diingin apawtdoh uh ahi. 20 Hizongleh nang un chu Misiangthoupa apat thaunuh na tang va, sil zousiah na he uhi. 21 Thutah na heetlouh jiahun na kawmvah ka gial ahi sih a, hizongleh na heet jiah uh leh thutah apat juau mawngmawng apawt louh jiahin ka gial ahijaw hi. 22 Jesu chu Khrist ahi chih kiheetmohbawl loungaal koi ahiai mijuau? Pa leh Tapa kiheetmohbawl mi chu Khrist doudaalpa ahi. 23 Mi koipouh Tapa kiheetmohbawl in chu Pa anei sih a, hizongleh Tapa pom photmah in chu Pa zong anei hi. 24 Hujiahin achiil apat na jaah uh chu nanguh ah umsah zing un. Hu achiil apat na jaah uh nanguh a aum zingin chu, nanguh zong Tapa ah leh Pa ah na um zing diing uhi. 25 Huleh hikhu ahi thuchiam Ama'n piaah diinga ahung chiam, kumtuang hinna ngeei chu. 26 Nanguh hung puimang tumte tungtaang thu ah hite ka hung gelh ahi. 27 Hizongleh Amah apat thaunuhna na tan uh nanguh ah aum zing a, huleh koima hung hilh na kiphamoh sih uhi; hizongleh hu thaunuhna mah in sil zousiah nanguh ahung hilh bangin, huchu thutah ahi a, juau ahi sih a, huleh hu in nanguh ahung hilh bang ngeeiin Amah ah na um diing uhi. 28 Huleh tuin, tate haw, Amah ahung kilat chianga kimuanna i neih theihna diing leh ahung chianga a ma a i zum louhna diingun Amah ah um zing un.
Pathian Tate
29 Amah chu midihtat ahi chih na heet uh leh, mi chin dihtatna bawl photmah chu Amah a piang ahi chih na he uhi.
1 Ngai un, bangchilawma lungsiatna Pa in eiuh hung pia atai mah, Pathian tate chiha i um jiang uh! Hujiahin khovel in ahung helou uh ahi, Amah aheet louh jiahun. 2 Deihtahte, tuin Pathian tate i hi va, huleh bangtobangin ahiai i um diing chih chu akilang nai tadih sih hi. Hizongleh Amah chu aum bangbanga mu diing i hih jiahun Amah ahung kilat chiangin Amah bangin i um diing uh chih chu i he uhi, 3 Huleh mi chin Amah a hi kinepna nei photmah chu Amah asianthou bangin akisusiangthou hi. 4 Mi koipouh sual bawl in daan zong abbtsia hi, ajiahchu sual chu daanbohsiatna ahi. 5 Huleh Amah chu i sualnate uh lamang diinga hung kilang ahi chih na he va, huleh Amah ah chu sual himhim aum sih hi. 6 Mi koipouh Amah a umzing in chu sual abawl zing ngei sih hi. Koipouh sual bawl zing in Amah amu sih a, he zong ahe sih hi. 7 Tate haw, koimah in hung heem sih heh. Amah adihtat bangmahin, dihtatna bawltu chu midihtat ahi. 8 Sual bawl mi chu diabol a kuan ahi, ajiahchu diabol in achiil apatin sual abawl zing hi. Pathian Tapa ahung kilatna jiah chu diabol silbawlte asuhsiat theihna diingin ahi. 9 Mi koipouh Pathian a piang in sual abawl sih hi, ajiahchu Pathian chi amah ah aum hi; Pathian a piang ahihtaah jiahin sual abawl zing ngei sih hi. 10 Hikhu ah Pathian tate leh diabol tate akihe thei hi: Mi koipouh dihtatna bawllou chu Pathian a kuan ahi sih a, huleh a unau lungsiat lou zong Pathian a kuan ahi sih hi.
Kilungsiat Tuah Diing
11 Ajiahchu achiil apat thupuaah na jaah uh chu hih ahi: Khat leh khat i kilungsiat diing uh ahi. 12 Kaina bangin i um sih diing uh, amah chu giloupa apat ahi a, a sanggampa athat hi. Huleh bangjiaha a sanggampa athah ahiai? Amah silbawlte agilou a huleh a sanggampa natoh adihtat jiahin ahi. 13 Ka unaute, khovel in nanguh ahung muhdah leh, limdangsa sih un. 14 Unaute i lungsiat jiahin sihna apat hinna ah i luutta hi chih i he uhi. Mi koipouh a unau lungsiat lou chu sihna ah aum zing ahi. 15 Mi koipouh a unau mudah chu tualthat ahi a, huleh tualthat koimah amah a kumtuang hinna nei aum sih chih na he uhi. 16 Hikhu ah Pathian lungsiatna bang ahiai chih i he thei uhi: Ama'n eiuh diingin a hinna apekhia hi. Huleh ei un zong unaute diinga i hinna i piaah ve diing uh ahi. 17 Hizongleh mi koipouh in khovel silte nei a, a unau tasam a um mu a, amah lainat het lou mi chu, bangchiin Pathian lungsiatna amah ah aum diai? 18 Ka tate haw, thu chauh in ahihlouhleh kam chauh in i lungsiat sih diing uh, hizongleh silbawl leh thutah in hijaw hen. 19 Hikhu ah thutah apat i hi uh chih i he diing va, huleh Amah ma ah i lungtang uh i muangsah thei diing uhi. 20 Ajiahchu i lungtang un siamlouh ahung tansah leh, Pathian chu i lungtang saangin aloupijaw a, sil zousiah ahe hi. 21 Deihtahte, i lungtang in siamlouh ahung tansah louh leh, Pathian lamah kimuanna i nei uhi. 22 Huleh a thupiaahte i juih jiah leh a mitmuh a sil kipaahhuaite i bawl jiahin i nget photmah Amah apat i mu uhi. 23 Huleh a thupiaah chu hikhu ahi: eiun a Tapa Jesu Khrist min i gintaat va huleh ahung thupiaah banga khat leh khat i kilungsiat diing uh ahi. 24 Huleh mi koipouh a thupiaahte jui chu Pathian ah aum a, Pathian zong amah ah aum hi. Huleh hikhu ah Amah chu eiuh ah aum zing chih i he uh, Hagau eiuh ahung piaah khu jaalin.
Hagau Etchetna
1 Deihtahte, hagau taphot gingta sih unla, hizongleh hagaute chu Pathian apat ahihleh hihlouh na heetna diingun chian jaw un; ajiahchu zawlnei tahlou tampi khovel ah apawtdohta uhi. 2 Hikhu ah Pathian Hagau na he diing uhi: Jesu Khrist tahsa in ahung piang chih gum hagau photmah chu Pathian apat ahi. 3 Hizongleh Jesu Khrist tahsa in ahung piang chih gumlou hagau photmah chu Pathian apat ahi sih. Huleh hichu Khrist doudaalpa hagau hung diing ahi chih na jaah uh chu ahi; huleh tuin zong khovel ah aum zouta hi. 4 Tate haw, nanguh chu Pathian a kuan na hi va, hute na zouta uhi, ajiahchu Amah nanguh a um chu khovel a umpa saangin alianjaw hi. 5 Amahuh chu khovel apat ahi uhi. Hujiahin khovel a bangin thute asoi va, huleh khovel in a thu uh angaikhia uhi. 6 Eiuh chu Pathian apat i hi uhi. Koipouh Pathian he phot in i thu angaikhia a, Pathian apat hilou in chu i thu angaikhe sih hi. Hikhu ah hagau dih leh hagau dihlou i he uhi.
Pathian Lungsiatna leh Mihing Lungsiatna
7 Deihtahte, khat leh khat i kilungsiat diing uhi, ajiahchu lungsiatna Pathian apat ahi. Huleh mi lungsiatthei photmah chu Pathian a piang ahi a, Pathian ahe hi. 8 Lungsiatna neilou mi'n Pathian ahe sih, ajiahchu Pathian chu lungsiatna ahi. 9 Hikhu ah Pathian in eiuh ahung lungsiatna akilangta hi, Amah jaala i hin theihna diingun Pathian in a Tapa tang neihsun khovel ah ahung sawl hi. 10 Hi ah lungsiatna aum, ei un Pathian i lungsiat chih ahi sih a, hizongleh Ama'n eiuh ahung lungsiat a, i sualnate jiaha thuphatawina hi diingin a Tapa ahung sawl chih ahijaw hi. 11 Deihtahte, Pathian in hichibanga ahung lungsiat leh, eiun zong khat leh khat i kilungsiat diing uh ahi. 12 Mi koimah in bangchimahin Pathian amu ngei sih hi. Eihaw khat leh khat i kilungsiat un chu, Pathian eimah ah aum zing a, a lungsiatna zong eimah ah suhbukim ahita hi. 13 A Hagau ahung piaahtaah jiahin, hikhu ah eiuh Amah ah i um a, huleh Amah eiuh ah aum chih i he uhi. 14 Huleh Pa in Tapa chu khovel Hundampa diingin asawl chih i muta va huleh i hesah uhi. 15 Mi koipouh Jesu Pathian Tapa ahi chih gum taphot chu Pathian amah ah aum a, amah zong Pathian ah aum hi. 16 Huleh i tunga Pathian in lungsiatna aneih chu i he va huleh ging zong i gingta uhi. Pathian chu lungsiatna ahi; huleh koipouh lungsiatna a um chu Pathian ah aum a, Pathian zong amah ah aum hi. 17 Hikhu ah i tunga lungsiatna suhbukim ahita hi: vaihawm ni chianga hamuanna i neih theihna diingin, Amah um banga khovel a eihaw zong i um jiahin. 18 Lungsiatna ah launa aum sih hi; hizongleh lungsiatna bukim in launa adelhmang jaw hi, ajiahchu launa in thuaahgimna anei hi. Launa nei mi chu lungsiatna a suhbukim nailouh ahi. 19 Ama'n eiuh ahung lungsiat masat jiahin eiun Amah i lungsiat uh ahi. 20 Mi'n Pathian ka lungsiat chi ngaala, a unau amuhdah inchu, mijuau ahi; ajiahchu amuh gegu a unau bawn lungsiatloupi'n amuh louh Pathian bangchiin alungsiat thei diai? 21 Huleh Amah apat hi thupiaah i nei uhi: koipouh Pathian lungsiat in a unau zong alungsiat diing ahi.
Ginna a Khovel Zou
1 Mi koipouh Jesu chu Khrist ahi chih gingta chu Pathian apat piang ahi a, huleh koipouh Pathian lungsiat inchu, Ama'n ahinte zong alungsiat hi. 2 Hikhu in Pathian tate i lungsiat uh chih i he uhi, Pathian i lungsiat va huleh a thupiaahte i juih chiangun. 3 Bangjiahin ahiai i chih leh Pathian i lungsiatna uh chu a thupiaahte i juih uh khuh ahi. Huleh a thupiaahte chu puaahgih ahi sih hi. 4 pathian a piang photmah in khovel azou hi. Huleh hikhuh ahi khovel tunga gualzohna chu: i ginna ngeei uh chu. 5 Jesu Pathian Tapa ahi chih gingta mi chauh loungaal koi ahiai khovel tunga gualzou?
Pathian Tapa Heetpihna
6 Hih ahi tui leh sisan tungtawna hung chu: Jesu Khrist ngeei; tui chauh a hilouin, hizongleh tui leh sisan in ahijaw. Huleh aheetpihtu chu Hagau ahi, Hagau chu thutah ahih jiahin. 7 Ajiahchu vaan ah heetpihtu thum aum hi: Pa, Thu leh Hagau Siangthou; huleh hi thumte chu khat ahi. 8 Huleh leitung ah heetpihtu thum aum hi: hute chu Hagau, tui, huleh sisan ahi a; huleh hi thumte chu khat bangin akituaah uhi. 9 Mihing heetpihna bawn i pom inchu, Pathian heetpihna aloupijaw hi; ajiahchu a Tapa tungthu ahung heetsah chu Pathian heetpihna ahi. 10 Koipouh Pathian Tapa gingta in amah ah heetpihtu anei hi; Pathian gingtalou mi in Pathian in a Tapa ahung piaah thu heetsahna agintaat louh jiahin Pathian chu mijuau ahisah hi. 11 Heetsahna chu hikhuh ahi: Pathian in kumtuang hinna ahung peta a, hu hinna chu a Tapa ah aum hi. 12 Koipouh Tapa nei in hinna aneita; koipouh Pathian Tapa neilou in hinna anei sih hi.
Thu Nunungte
13 Kumtuang hinna na neita uh chih na heetna diing uh leh Pathian Tapa min na gintaat theihna diingun nanguh Pathian Tapa min gingtate kawmah hi thute ka gial ahi. 14 Huleh Amah a i kimuanna uh chu hikhuh ahi, Amah deihjawnga bangpuoh i ngetun chu, Ama'n ahung ngaikhia hi. 15 Huleh i nget photmah uh Ama'n ahung ngaihkhiahsah chih i heetun chu, a kawma i silnget uh i muta chih i he uhi. 16 Mi koipouh in a unau in sihna tungsahthei hilou sual bawl amuhin chu, angetsah diing a, huchiin Pathian in sihna tungsahthei hilou sual bawlte diingin hinna ape diing hi. Sihna tungsahthei sual aum a, hukhu diingin angetsah diing ka chi sih hi. 17 Dihtatlouhna zousiah chu sual ahi a, huleh sihna tungsahthei hilou sual zong aum hi. 18 Koipouh Pathian a piang chu asual zing sih chih i he hi; hizongleh Pathian a piang mi chu Pathian in akol a, migiloupa'n akhoih sih hi. 19 Eiuh chu Pathian apat i hi chih i he a, huleh khovel pumpi chu migiloupa thuneihna nuaiah aum chih i he uhi. 20 Huleh Pathian Tapa chu ahungta chih i he a, huleh Amah chu adihtah ahi chih i heet theihna diingun heetsiamna ahung peta hi. Huleh eihaw chu a dihtah Amah ngeei ah, a Tapa Jesu Khrist ah i um uhi. Amah chu Pathian dihtah leh kumtuang hinna ahi. 21 Tate haw, milemte apat kiheemkhia un. Amen.
Chibaibuuhna
1 Kei upa in, Pathian teel numei leh a tate, thutah a ka lungsiatte, huleh keimah chauh hilou a, hizongleh thutah he zousiahte'n zong alungsiatte uh kawmah ka gial hi, 2 eiuh a um leh kumtuanga zong i kawmva um diing thutah jiahin: 3 Pa Pathian akipan leh Pa Tapa, Lalpa Jesu Khrist akipan hehpihna, khotuahna leh hamuanna chu thutah leh lungsiatna in na kawmvah um hen. Khrist Thupiaah Juihna 4 Pa kawm apat a thupiaah i muh banga na tate khenkhat thutah a um ka muh jiahin ka kipaah mahmah hi. 5 Huleh tuin, unaunu, thupiaah thah gial bang chu hilouin, achiil apat i neih uh gial jawin, khat leh khat i kilungsiat tuah diing uh chiin ka hung ngeen hi. 6 Huleh hikhuh ahi lungsiatna, huchia a thupiaahte banga i gamtat uh chu. Achiil apat na jaahtaah bangun thupiaah chu hikhuh ahi, humah a na um diing uh ahi.
Khrist Doute
7 Ajiahchu Jesu Khrist tahsa in ahung chih gumlou miheemtu tampi khovel ah aumdohta hi. Hutobang mi chu heemtu leh Khrist doudaaltu ahi. 8 I tohkhiahsate mangsahlou a, kipaahman akima i muh theih jawhna diingun kiveeng un. 9 Mi koipouh daan bohsia leh Khrist thuhilhna daan a umzing lou in Pathian anei sih hi. Khrist thuhilhna daan a umzing mi'n chu Pa leh Tapa anihun anei khawm hi. 10 Mi koipouh hi kihilhna thu keng loua na kawmva hung aum leh, na inn vah tungsah sih unla, kampha in zong vaidawn sih un. 11 Ajiahchu akipaahpihtu chu amah giitlouhna kikoppih ahi.
Chibaibuuhna Nunung
12 Na kawmva thu tampi hung gelh diing ka neih vaangin lehkhapuan leh lehkhatui in ka gial nuam sih hi, hizongleh hung a, i kipaahna uh abukim theihna diingin kimaaituaha hung soi ka kineem hi. 13 Teela um na unaunu tate'n chibai ahung buuh uhi. Amen.
Chibaibuuhna
1 Keiupain, deih mahmah Gaia, thutah a ka lungsiat kawmah: 2 Deihtah, na hagau khantouh jeel banga sildang zousiah a na khantouh diing leh damtheihna diing deihin ka haamtei hi. 3 Ajiahchu unaute ahung va huleh nangmah a thutah um khu a thutah a na gamtat daan ahung heetsah tahun, ka kipaah mahmah hi. 4 Ka tate thutah ah aum uh chih ka jaah saanga kipaahna lianjaw ka nei sih hi.
Gaia Thilphalna
5 Deihtah, unaute tung leh mikhualte tunga na bawl photmah ginumtahin na bawl hi. 6 Amah un na lungsiatna chu kouhtuamte ma ah aphuangta uhi. A khualzinna va Pathian ma a na hih diinga kilawm bang jeela na haahdoh leh, na bawl hoih diing hi, 7 Amah min jiaha achiahdohna va Jentelte apat bangma la lou ahih jiahun. 8 Hujiahin thutah a natong khawmtute i hih theihna diingun hutobang mi chu i vaidawn diing mawng uh ahi.
Diotrephe Mohsahna
9 Kouhtuamte kawmah ka gial hi, hizongleh a lahva tungtuan uutpa Diotrephe in keiuh ahung vaidawn sihhi. 10 Huchihjiahin, ka hung leh chu, ka tungva thu gilou soia akamtam daan, a silbawlte ka hedohsah diing hi. Huleh hu zong hunsa louin, amah ngeei in unaute avaidawn sih a, huleh akipaahpih nuam unaute tanpha akhap a, kouhtuam apat anohdoh hi. 11 Deihtah, silgilou chu enton sinla, sil hoih enton jaw in. Sil hoih bawlmi chu Pathian apat ahi, hizongleh silgilou bawlmi in chu Pathian amu sih hi. 12 Demetria in mi zousiah apat leh thutah apat ngeei in paahtaat aloh hi. Ahi, kei un zong ka heetpih va, huleh ka heetpihna uh chu adih ahi chih na he uhi.
Chibaibuuhna Nunung
13 Gelh diing tampi ka nei a, hizongleh kolom leh lehkhatui in na kawmah ka gial sih diing hi. 14 Hizongleh sawtlou kaaiin ka hung mu diing a kimaaituahin thu i soi diing chih ka kineem hi. Hamuanna na tungah um hen. I lawmte'n chibai ahung buuh uhi. I lawmte minloh chiatin chibai hung na buuhsah in.
Chibaibuuhna
1 Jud, Jesu Khrist suaah leh Jakob sanggampa in, nanguh Pa Pathian in asuhsiangthoute leh Jesu Khrist a aveenbit leh kouha umte kawmah: 2 Khotuahna leh hamuanna leh lungsiatna na tungvah suhpungin um hen.
Thugin a Dotna
3 Deihtahte, i bawnva hutdamna thu toh kisai hung gial diinga theihtawp ka suah vaangin, misiangthoute kawma ginna setden diingin khatvei kipeta khuh a phatuamngaitaha na panna diingun hasotna thu hung gelh poimoh ka sa hi. 4 Ajiahchu mi khenkhat aguuha hung luut aum va, amahuh chu vaihawmna tuaah diingin achiil apatin chiamchihin aum zouta uhi. Amahuh chu Pathian ngaihsahlou mi leh Pathian hehpihna chu kisuumna umlou keeia huuhna suaahsah mite ahi va, huleh amah un Lalpa Pathian khat chauh leh i Lalpa Jesu Khrist chu akiheetmohbawl uhi.
Thuhilhtu Dihloute
5 Hujiahin hikhu khatvei anahe zouta mahleh uh chin, ka hung hesahkiit uut hi, huchu Lalpa'n a mite Aigupta gam apat ahutkhiah zou nungin zong agingta loute chu akhonungin asumangthaai hi. 6 Angel khenkhatte'n a thuneihna dinmun masa uh akeemden sih va, a teenna mun uh anusia uhi. Amahuh chu Pathian in kumtuang gaahna siihkhau a kaanin mial nuaiah koihin vaihawmna ni loupi a diingin asiit hi. 7 Huchibangmahin Sodom leh Gomorrah leh a kiimveel a teengte chu kingaihna ngeinadaanlou bangtaha kipawl thaanghuaina ah akipia va, Pathian in hute chu kumtuang mei a agawt diingte etsahna in azang hi. 8 Huchibangmahin hi mangmante'n a tahsa uh asubolhhoh va, thuneitute anual va, huleh loupina neite asoisiauhi; 9 Hizongleh angel tungnungpeen Mikael ngeei in zong Mosi luang tungtaang thu a diabol toh akituh va akinial laiun, soisiain amohpaih ngam sih a, husaangin, "Lalpa'n hung taai heh," achi jaw hi. 10 Hizongleh hi mite'n chu asil heet louhte uh asoisia uhi; huleh amah un chu ngaihtuahna nei lou gamsate bangin pianken heettheihna in ahe va, hi silte ah amahuh leh amahuh akisusia uhi. 11 A tunguh agih hi! Ajiahchu Kaina lampi ah apaita va, huleh lawhna deihgohna jiahin Balaam dihlouhna lampi ah lawptahin ataai va, huleh Korah helna ah amangthaaita uhi. 12 Hite chu na lungsiatna gualvaahna va nanguh toh an aneeh chiangva tuitup suang monghiam tobang ahi va, amahuh chauh akingaihtuah uhi. Amahuh chu tui paailou meilum huih muut leeng lehleh tobang ahi uhi; amahuh chu khokhaal hun a sing gah neilou, nihvei si huleh a zung a kiphungkalh doh tobang ahi uhi. 13 Amahuh chu tuipi kifawn haattah tobang ahi va, a zumna uh chu tui phuan tobangin ahung umdoh a; aahsi leeng lehleh tobang ahi va, amahuh diingin mial vombehbuh chu kumtuanga diingin siit ahi. 14 Adam apat khang sagihnapa Enok in hi mite tungthu anasoilawh hi, "Ngaiun, Lalpa chu a misiangthou saang tampite toh, 15 mi zousiah vaihawmsah diing leh Pathian ngaihsahlou tengteng in a Pathian ngaihsahlouhna natoh uh, Pathian ngaihsahlou jawnga abawlte uh leh Pathian ngaihsahlou misualte'n Amah kalha haam khauhtah azat tengteng uh mohpaih diingin Amah ahung hi," chiin. 16 Hite chu phun haatte leh soiseel haatte ahi va, a tahsa uh uutna gilou in apui bangbanga gamtate ahi uh; huleh amahuh chu uangtahin akiphat va, lawhna diing deih manin midangte kamsiam in apaahtawi uhi.
Taaihilhna leh Hasotna
17 Hizongleh deihtahte, nang un chu malai a i Lalpa uh Jesu Khrist apostolte thusoite hezing un, 18 amah un hun nunung chiangin Pathian ngaihsahlouhna lama amahuh tahsa gilou uutna bangbanga puia um mi simmoh haatte ahung um diing thu asoi uhi. 19 Hitobang mite chu khovel mi, kikhenna siamtu leh Hagau neiloute ahi uhi. 20 Hizongleh deihtahte, nanguh chu na ginna siangthoupeen uh tunga kilamtouin, Hagau Siangthou a haamteiin, 21 kumtuang hinna tuntu i Lalpa Jesu Khrist khotuahna chu ngaah zingin Pathian lungsiatna ah kikoldet un. 22 Huleh khenkhat ginglela umte chu khotuah un. 23 Huleh lau pumin midangte hunkhia un, mei kuang lah apat kaidohin sual a suhbuaah a puan uh jiangzong kihdah kawmin.
Pathian Phatna
24 Amah na puuh louhna diingva nanguh hung veengbit thei leh a loupina ma a nasataha nuamsa leh soiseelbeia nanguh hung koihtheipa, 25 i Hundampa uh Pathian pil chauh kawmah, loupinate, thupinate, vaihawmnate leh silbawltheihnate tu leh kumtuangin um zingta hen. Amen.
Thumapui
1 Sil hung tung pah ngeei diingte, a suaahte aheetsah diinga Pathian in Amah kawma apiaah, Jesu Khrist thuphuandoh. Huleh Ama'n huchu a suaah Johan kawmah a angel sawlin chiamchihna in ahesahta hi. 2 Ama'n chu Pathian thu leh Jesu Khrist heetpihna thu leh asilmuh zousiah ahesahta hi. 3 Hi soilawhna thute sim leh ngaikhete leh a sunga thu kigialte jui mi chu ahampha hi; ajiahchu ahun anaita hi.
Chibaibuuhna leh Phatna
4 Johan in Asia gam a um kouhtuam sagihte kawmah: Amah umzing leh umta leh hung um diingpa apat leh a laltouphah ma a um Hagau sagihte apat, 5 huleh heetpihtu ginum, misi lah apat tachiil leh lei a kumpipate vaihawmtu Jesu Khrist akipan hehpihna leh hamuanna na kawmvah um hen. Amah ei hung lungsiat a i sualna apat Amah ngeei sisan a hung silsiangpa leh 6 Pathian leh a Pa kawma kumpite leh siampute a hung siamtu kawmah loupina leh thuneihna kumtuang kumtuangin umzingta hen. Amen. 7 En in, meipi toh Amah ahung kum diing a, mit chinteng in Amah amu diing hi, Amah suntute ngeei in zong. Huleh lei a nam zousiah Amah jiahin akap diing uhi. Huchi hihen, Amen. 8 "Kei Alpha leh Omega, Abul leh Atawp ka hi," Lalpa, "umzing leh umta leh hung um diing, Bangkimbawltheipa," in achi hi.
Mihing Tapa Kilaahna
9 Kei Johan, na unaupa uh leh Jesu Khrist a gimthuaahna leh algam leh kuhkalna a na tan neihpih uh chu Pathian thu jiah leh Jesu Khrist thu heetpihna jiahin Patmos kichi tuikulhgam ah ka um hi. 10 Lalpa Ni in Hagau in ka um a, ka nung lamah peengkuul ging bang aw ngaihtah ka ja hi. 11 "Kei Alpha leh Omega, Amasapeen leh Anunungpeen ka hi," huleh, "Na sil muhte lehkhabu ah gial inla, Asia gam a um kouhtuam sagihte kawmah thot in: Ephesi khua ah, Smarna khua ah, Pergamos khua ah, Thiateira khua ah, Sardis khua ah, Philadelphia khua ah leh Laudikia khua ah," chiin. 12 Huleh hu ahung houpih aw chu muh tumin ka kihei hi. Huleh ka kihei a ahihleh sana thaumei tunna sagih ka mu hi. 13 Huleh hu thaumei tunna sagihte lai ah Mihing Tapa tobang mi khat, a keengphaang tandong a puan silh, sana gui a a awm kigaah ka mu hi. 14 A lutang leh a sam chu belaam mul bangin akaang a, vuuh bangin angou a, a mit chu meikuang bang ahi. 15 A keeng chu sum-eng valtah, mei a haalsiang bang ahi a, a aw chu tui tampi luang ging bang ahi. 16 Ama'n a khut jiat lam in aahsi sagih atawi a, a kam akipanin naamsau a langniha hiamtah mei apawt a, huleh a meel chu ni asatnaah laitah tobang ahi. 17 Amah ka muh tahin a keengbul ah asi bangin ka puuhta hi. Huleh Ama'n a khut jiatlam ka tungah koihin ka kawmah hichiin, "Lau sin, kei Amasapeen leh Anunungpeen ka hi. 18 Ahing zingpa chu ka hi, huleh ka sita a, hizongleh ngai in, kumtuangin ka hing ahi. Amen. Huleh Misi Khua leh Sihna chabite ka nei hi. 19 Hujiahin na sil muhte leh sil umlaite leh tununga sil hung um diingte chu gial in. 20 Ka khut jiatlam a aahsi sagih leh sana thaumei tunna sagih na muhte thukiphual chu: aahsi sagihte chu kouhtuam sagih haw angelte ahi va, huleh thaumei tunna sagih na muhte chu kouhtuam sagihte ahi uhi," achi hi.
Ephesi Kouhtuam Kawma Lehkhathot
1 "Ephesi khua a kouhtuam angel kawmah hichiin gial in, 'A khut jiatlam a aahsi sagih tawipa, sana thaumeitunna sagih laia vaah lehleh pa'n hi thute asoi hi: 2 "Na natohte, na tohgimnate, na kuhkal daante ka he a, huleh migiloute na thuaah theihlouh daan ka he hi. Huleh hiloupi a apostol ka hi uh kichite na etkhiah a, huleh mijuau ahih uh na matdoh daan zong ka he hi. 3 Na thuaahzoh a, na kuhkal a, huleh ka min jiaha na tohgim daan leh na chauh louh daan ka he hi. 4 Ahihvaangin demna khat ka hung nei hi, ajiahchu na lungsiatna masapeen na nuseta hi. 5 Hujiahin na puuhna hezing inla, kisiih inla huleh na natoh masapeente bawlkiit in. Na kisiih louh inchu, kintahin na kawmah ka hung diing a, na thaumeitunna chu a mun apatin ka suan diing hi. 6 Ahiinlah hichu na bawlhoih hi, Nikolaitan pawlte natoh na hua a, huchu ke'n zong ka hua hi. 7 Bil nei taphot in kouhtuamte kawma Hagau thusoi chu ja heh. Agualzoupa kawmah Pathian Paradis lailung a um hinna sing apat neeh diing ka pe diing hi,'" chiin.
Smarna Kouhtuam Kawma Lehkhathot
8 "Huleh Smarna khua a kouhtuam angel kawmah hichiin gial in, 'Amasapeen leh Anunungpeen, sita a hing kiitpa'n hi thute asoi hi: 9 "Na natohte leh na gimthuaahte leh na jawn daan ka he hi, hizongleh na hausa hi. Huleh Judami hiloupia ka hi uh chi, hizongleh Setan sinagog hi ngaal, hute Pathian soisiatna ka he hi. 10 Sil na hung thuaah diingte lau sin. Ngai in, etkhiaha na um theihna diingun diabol in na lahva khenkhat chu suangkul ah ahung khum diing a, ni sawm sung gimthuaahna na nei diing uhi. Sih tanphain ginum in, huchiin hinna lallukhuh ka hung pe diing hi. 11 Bil nei taphot in kouhtuamte kawma Hagau thusoi chu ja heh. Agualzoupa chu sih nihna suhnatin aum sih diing hi.'"
Pergamos Kouhtuam Kawma Lehkhathot
12 "Huleh Pergamos khua a kouhtuam angel kawmah hichiin gial in, 'Amah naamsau alangnih a hiamtah neipa'n hi thute asoi hi: 13 "Setan laltouphah mun a na teenna a na natohte ka he hi. Huleh ka min na pom kip a, Setan teenna mun a na lahva ginna jiaha thaha umpa, ka mi ginum, ka heetpihtu Antipa hun laiin zong na ginna na tawpsan sih hi. 14 Hizongleh demna sil themkhat ka hung nei hi, ajiahchu Balaam thuhilhna juite na umpih hi. Ama'n Israel tate puuhna siam diing leh milem biahna sa ne diing leh numei leh pasal kaala thaanghuaina bawl diingin Balak athuhilh hi. 15 Huchibangmahin Nikolaitan pawlte thuhilhna jui mi khenkhat zong na nei a, huchu ka hua hi. 16 Hujiahin kisiih in, huchilou inchu kintahin na kawmah ka hung diing a, ka kam a pawt naamsau in amahuh ka dou diing hi. 17 Bil nei taphot in kouhtuamte kawma Hagau thusoi chu ja heh. Agualzoupa kawmah manna phualguuh aneeh diing ka pe diing hi. Suang kaang khat, hu suang tunga min thah kigial a tangtu loungaal midang koima'n aheet louh chu ka pe diing hi.'"
Thiateira Kouhtuam Kawma Lehkhathot
18 "Huleh Thiateira khua a kouhtuam angel kawmah hichiin gial in, 'Pathian Tapa meikuang bangmai mit nei leh sum-eng valtah tobang keeng neipa'n hi thute asoi hi: 19 "Na natohte, na lungsiatnate, na ginna leh na kuhkalnate ka he a, huleh na silbawl masapeen saangin anunungpeen atamjaw hi. 20 Hizongleh hi thu ah ka hung dem hi, hu numei Jezebel amah leh amah zawlnei kichinu na thuaahtheih jiahin. A thuhilh in ka suaahte chu numei leh pasal kaala thaanghuaina bawl diing leh milem biahna sa ne diingin athuhilh a huleh aheemgawp hi. 21 Amahnu chu a numei leh pasal kaala thaanghuaina apat kisiih diingin hun ka pia a, himahleh auut sih hi. 22 Ngai in, amahnu chu gimthuaahna lupna tungah ka paai diing a huleh a silbawl uh akisiih louh uh leh a-aangkawmpih haw chu gimthuaahna nasatah ah ka paailuut diing hi. 23 A tate chu sihna in ka that diing a, huchiangin kouhtuam zousiah in kei chu lungsim leh lungtang hawlpa ka hi chih ahe diing uhi. Huleh na bawnun na natohte uh dungjuiun ka hung thuh chiat diing hi. 24 Tuin nanguh Thiateira khua a um, hi kihilhna neilou leh asoi uh banga Setan thugilte helou midang zousiah kawmah ka soi ahi, tunggihna dang na tungvah ka koih sih diing hi. 25 Hizongleh hu na neihsa uh chu ka hung masiah tukip un. 26 Agualzoupa leh a tawpdonga ka deihjawng keempa chu a kawmah namte tunga thuneihna ka pe diing hi. 27 Ke'n zong ka Pa apat a thuneihna ka muh bang ngeeiin, 'Ama'n a tungvah siih chiang in vai ahawm diing a, beel kheengtu beel a hal hal a akeeh bangin amahuh ajeepkeeh diing hi.' 28 Huleh amah chu jiingsol aahsi ka pe diing hi. 29 Bil nei taphot in kouhtuamte kawma Hagau thusoi chu ja heh.'"
Sardis Kouhtuam Kawma Lehkhathot
1 "Sardis khua a kouhtuam angel kawmah hichiin gial in, 'Pathian Hagau sagih leh aahsi sagih neipa'n hi thute asoi hi: "Na natohte ka he hi; hing min na pua a, himahleh asi na hi. 2 Kiveeng inla, sil um nalai si dikuante chu suhaat in, ajiahchu na natohte ka Pathian mitmuh ah bukimin ka mu sih hi. 3 Hujiahin na muhtaah leh na jaahtaah chu hezing in; tukip inla kisiih in. Hujiahin na kiveen louhin chu, guta bangin na kawmah ka hung diinga huleh bangchih hun a na kawma ka hung diing hun na he sih diing hi. 4 Ahiinlah Sardis khua ah a puante uh subuaah lou min tawmtakhat na nei hi; huleh amahuh chu kei toh puanvaam silhin aleeng diing uhi, ajiahchu amah un achin uhi, 5 Agualzoupa chu puanvaam silhsahin aum diing a, huleh Hinna Lehkhabu apat a min ka nawtmang sih diing a, himahleh ka Pa ma leh a angelte ma ah a min ka phuang diing hi. 6 Bil nei taphot in kouhtuamte kawma Hagau thusoi chu ja heh.'"
Philadelphia Kouhtuam Kawma Lehkhathot
7 "Philadelphia khua a kouhtuam angel kawmah hichiin gial in, 'Amah, siangthou leh dih, "David chabi neipa in, ahon chianga koima'n akhaah theihlouh leh akhaah chianga koima'n ahon theihlouhpa in", hi thute asoi hi: 8 "Na natohte ka he hi. En in, na ma ah koima'n akhaah theihlouh kot kihong ka koih hi; ajiahchu silbawltheihna neutakhat nei himahlehchin ka thu na keem a, huleh ka min na kiheetmohbawl sih hi. 9 Ngai in, Setan sinagog a Judami hia kisoi, lah hiloute chu mijuau ahi uh, amahuh chu na kawma hung paisahin na keengbul ah ka khupbohsah diinga huleh ka hung lungsiat ahi chih ka hesah diing hi. 10 Kuhkaltaha thuaah diinga ka hung thupiaah na juihzing jiahin leitung a um mite etkhiahna diinga khovel pumpi a hung tung diing jeheemna hun apat ke'n zong ka hung veengbit diing hi. 11 Ngai in, kintahin ka hung hi. Koimah in na lallukhuh ahung laahsah louhna diingin na sil neihsa chu tudet in. 12 Agualzoupa chu ka Pathian mun siangthou ah khuam in ka pangsah diing a, apawtdoh nawn sih diing hi. Huleh a tungah ka Pathian min leh ka Pathian akipan a vaan apat a hung kumsuh ka Pathian khopi Jerusalem Thah min ka gial diing hi. Huleh a tungah ka min thah ka gial diing hi. 13 Bil nei taphot in kouhtuamte kawma Hagau thusoi chu ja heh.'"
Laudikia Kouhtuam Kawma Lehkhathot
14 "Huleh Laudikia khua a kouhtuam angel kawmah hichiin gial in, 'Amen, Heetpihtu Ginum leh Dihtah, Pathian silsiamte Bulpipeen in hi thute asoi hi: 15 "Na natohte ka he hi, huchia lum lah lumlou vot lah votloua na um chu; na lum ahihlouhleh na vot ka deih ahi. 16 Huchia lumpelhpulh a, lum lah lumlou vot lah votloua na um jiahin ka kam apatin ka hung sekhe diing hi. 17 Ajiahchu nangma'n, 'Ka hausa a, ka neih apungta, bangmah ka tasam sih,' na chi a, huleh mimuhsithuai, migenthei, mijawng, mittaw leh saguaah na hihlam na he sih hi. 18 Na hung hauhsat theihna diingin sana mei a haalchiim leh na saguaah zumhuaina akilat louhna diinga na silh diing puanvaam leh na muh theihna diing na mit na nuh diing mit damdawi ka kawm apat lei diingin ka hung thuhilh ahi. 19 Ka lungsiat taphot chu ka taai a, ka thunun hi. Hujiahin phatuamngai inla kisiih in. 20 Ngai in, kotkhaahbul a dingin ka kiu ahi. Mi koipouh in ka aw ajaah a kot ahonin chu, a kawmah ka luut diinga amah toh ka ne diing a, huleh ama'n zong kei toh ane diing hi. 21 Agualzoupa chu ka kawmah ka laltouphah ah ka tousah diing, kei zong ka gualzoh a ka Pa toh a laltouphah a ka tou mahbangin. 22 Bil nei taphot in kouhtuamte kawma Hagau thusoi chu ja heh.'"
Tunung a Sil Hung Um Diingte Muhna
1 Hi silte nungin ka en a, ngai in, vaan ah kot khat akihong hi. Huleh aw ka jaah masat chu peengkuul ging abang a, kei chu hichiin ahung houpih hi, "Hilam ah hung tou in, tunung a sil hung um diingte ka hung musah diing hi," chiin. 2 Thakhatin kei chu Hagau in ka umta a, huleh en in, vaan ah laltouphah khat akitung a, laltouphah tungah Mi khat atou hi. 3 Huleh hu a toupa chu jaspar leh sardia suang bangmaiin akilang a; huleh hu laltouphah kiimveel ah chu sakhituihuup, et a emerald suang bangmeia kilang aum hi. 4 Hu laltouphah kiimveel ah laltouphah sawmnih leh li aum a, huleh hu laltouphahte tungah upa sawmnih leh li puanvaam silha tou ka mu a, huleh amah un sana lukhuh akhuh uhi. 5 Huleh hu laltouphah apatin kawlphete, awte, vaangingte ahung suaah uhi. Huleh hu laltouphah ma ah thaumei sagih akuang a, hite chu Pathian Hagau sagihte ahi uhi. 6 Huleh hu laltouphah ma ah kristal suang tobang tuikhanglian liimlang aum hi. Huleh hu laltouphah lailung leh laltouphah kiimveel ah a malam leh a nunglam mit a dim silhing li aum hi. 7 Silhing khatna chu huumpibahneitobangahia,silhing nihna chu bawngnou tobang ahi a, silhing thumna in chu mihing meel bang apua a, huleh silhing lina chu mupi leenglai bang ahi. 8 Huleh hu silhing lite'n chu ha guup chiat anei va, a polam leh a sunglam uh mit in adim chiat hi. Huleh amah un chu suun leh jaan a tawlnga louin, "Siangthou, siangthou, siangthou, Lalpa Pathian Bangkimbawltheipa, umta leh umzing leh hung um diing chu!" achi uhi. 9 Huleh hu silhing lite'n laltouphah tunga toupa, kumtuanga hing zingpa kawmah loupina leh zahbawlna apia va kipaahthu asoi tengun, 10 upa sawmnih leh lite chu laltouphah tunga toupa ma ah abohkhup va huleh kumtuang kumtuanga hing zingpa chu abia va, huleh hu laltouphah ma a a lallukhuhte uh koihin, 11 "Aw Lalpa, nang chu loupina leh zahbawlna leh silbawltheihna tangtaahna hi; ajiahchu nangma'n sil zousiah na siam a, nangmah deihna tungtawna um leh siam ahi uh," achi uhi.
Lehkhabu Kichiamchih
1 Huin Amah laltouphah tunga toupa jiat lamah a sunglam leh a polam a kigial chiamchihna sagih a kichiamchih lehkhabujial khat ka mu hi. 2 Huleh angel haat khat aw ngaihtaha kikou a, "Koi ahiai lehkhabu chu hong a huleh hu a chiamchihna umte pheltaah?" chi ka mu hi. 3 Hizongleh vaan ah hiin lei ah hiin, hulouin lei nuaiah hitaleh, hu lehkhabujial hong thei leh a sung en thei mi koima aumta sih hi. 4 Huin huh lehkhabujial hong diing leh sim diing ahihlouhleh a sung en taah mi koimah akimuh louh jiahin naahpiin ka kap hi. 5 Huin upate laha khat in ka kawmah, "Kap sin. Ngai in, Juda nam Huumpibahnei, David Zungpi in hu lehkhabujial chu hong diing leh hu a chiamchihna sagihte phel diingin agualzouta hi," achi hi. 6 Huleh ka en a, ngai in, laltouphah leh silhing lite lai ah leh upate lai ah thahsa hileh kilawm Belaamnou ka mu hi. Ama'n kii sagih leh mit sagih anei a, hute chu Pathian Hagau sagih, leitung pumpi a sawlkhiahte ahi uhi. 7 Amah chu ahung a huleh laltouphah tunga toupa khut jiatlam apatin lehkhabujial chu alata hi. 8 Huleh Ama'n lehkhabujial chu alaah tahin, silhing lite leh upa sawmnih leh lite chu Belaamnou ma ah abohkhup va, amah un kaihging leh gimnamtuui a dim sana kuang atawi chiat uhi, huchu misiangthoute haamteina ahi. 9 Huleh amah un la thah khat asa va, "Nang chu lehkhabujial la a, huleh a chiamchihnate pheltaah na hi; ajiahchu thahin na umta a, chi chin, haam chin, mi chin leh nam chin apat mite na sisan in Pathian a diingin na hung tanta a, 10 huleh i Pathian uh kawmah kumpite leh siampute in na hung siamta a; huleh leitung ah laiin i tou diing uhi," chiin. 11 Huin ka et leh laltouphah leh silhingte leh upate kiimveel ah angel tampi aw ka ja a; huleh atamdaan uh chu asiing asiing leh asaang asaang ahi va, amah un laltouphah leh silhingte leh upate auum kiimveel va, 12 "Thaha um Belaamnou chu thuneihnate, hauhsatnate, pilnate, thahaatnate, zahumnate, loupinate leh paahtawinate tangtaah ahi," chia aw ngaihtaha kikouin la asa uhi. 13 Huleh vaan a um leh lei a um leh lei nuaia um leh tuikhanglian aum chinteng in, "Laltouphah tunga toupa leh Belaamnou kawmah, paahtawinate leh zahumnate leh loupinate leh silbawltheihnate kumtuang kumtuangin um zingta heh," achih uhkaja hi. 14 Huin silhing lite'n, "Amen," achi uhi. Huleh upa sawmnih leh lite'n bohkhupin kumtuanga hing zingpa chu abeta uhi.
Chiamchihnate Phelna
1 Huin Belaamnou in chiamchihna sagihte laha amasapeen aphel lai ka mu a, huleh aw khat, vaanging bangmaia silhing lite laha khat in, "Hung inla en in," achih ka ja hi. 2 Huin ka en a, ngai in, sakol kaang khat ka mu hi. A tunga tuangpa'n thalmung atawi a, a kawmah lallukhuh khat akipia a, amah chu gualzou leh gualzou jeel diingin akuankheta hi. 3 Belaamnou in chiamchihna nihna aphel zohin silhing nihna in, "Hung inla en in," achih ka ja hi. 4 Huleh sakol dang, asan khat ahung pawtdoh a, a tunga tuangpa kawmah chu leitung apat hamuanna laahsah theihna leh mite khat leh khat akithah tuahna diing uh thuneihna piaah ahi a, huleh a kawmah naamsau thupitah piaah ahi. 5 Huleh Ama'n chiamchihna thumna aphel zohin silhing thumna in, "Hung inla en in," achih ka ja hi. Huin ka et leh, ngai in, sakol vom khat ka mu a, a tunga tuangpa'n a khut in buuhna atawi hi. 6 Huleh silhing lite lah apatin aw khat in, "Dinari khat a gehu dan khat, dinari khat a barley buh dan thum; huleh sathau leh uain chu suse sin," achih kaja hi. 7 Huleh chiamchihna lina aphel zohin silhing lina in, "Hung inla en in," achih ka ja hi. 8 Huin ka et leh, ngai in, sakol daang khat ka mu a, a tunga tuangpa min chu Sihna ahi a, huleh Misi Khua in amah ajui hi. Huleh amah un leitung seh li suah seh khatte chu naamsau toh, kial toh, sihna toh, leitung a gamsate toh athah theihna diingun amahuh kawmah silbawltheihna piaah ahi. 9 Chiamchihna ngaana Ama'n aphel zohin maitaam nuaiah Pathian thu jiah leh a heetpihna apom jiahva thaha umte hagau ka mu hi. 10 Huleh amah un aw ngaihtah a kikouin, "Aw Lalpa, siangthou leh dih, bangtan ahiai leitung a teengte tunga vaihawm lou leh ka sisan uh phuba la loua na um diing?" achi uhi. 11 Huin amahuh chu puanvaam akipe chiat a, huleh a suaah hihpihte uh leh a unaute uh, amahuh bangmah a thaha um diingte ahung thah zoh veh masiah uh tomkhat anakhawl tadih diinga hilh ahi uhi. 12 Huleh Ama'n chiamchihna guupna aphel zohin ka en a, huleh ngai in, jiil nasatahin akiliing a; huleh ni chu samul sai-ippuan bangin ahung vomta a, ha chu sisan bangin ahung umta hi. 13 Huleh vaan aahsite chu theipi kung huihpi haattah in amuut chianga agah puamte apulh bangin lei ah akia uhi. 14 Huleh vaan chu lehkhabujial a jial bangin akitawlkheta a, taang leh tuikulhgam chinteng aumna vapat suanmangin aumta uhi. 15 Huin leitung a kumpipate, mi liante, mi hausate, sepaih houtuliante, mi haatte, huleh saltaang leh taanglou mi zousiah chu kohawm leh taang a suangpite ah akibuta va, 16 huleh taangte leh suangpite kawmah, "Hung netkhum unla, Amah laltouphah tunga toupa ma apat leh Belaamnou lungthahna apat hung phual un! 17 Ajiahchu a lungthahna ni huaisia hung tung ahita, koi ahiai ding zou diing?" achi uhi.
Israelmi Nuai Khat leh Siing Li leh Saang Li Chiamchihna
1 Hi silte nungin angel li, leitung ah hiin tuikhanglian tungah ahihlouhleh singkung khatmah tunga zong huih anun louhna diinga lei a huih lite tutaang a, leitung ning li a ding chu ka mu hi. 2 Huin suahlam apat hung kuan angel dang, Pathian hing chiamchihna nei khat ka mu hi. Amah chu a kawmva leitung leh tuikhanglian suhsiat theihna diing kipia angel lite kawmah aw ngaihtahin akikou a, 3 "I Pathian suaahte chu a tai va i chiamchih zoh masiah leitung hiin tuikhanglian ahihlouhleh singkungte hileh suse sih un," achi hi. 4 Huin chiamchiha umte phaahzah chu ka ja a, Israel tate phung zousiah apat nuai khat leh siing li leh saang li chiamchih ahi uhi: 5 Juda phung apat siing khat leh saang nih; Reuben phung apat siing khat leh saang nih; Gad phung apat siing khat leh saang nih; 6 Asher phung apat siing khat leh saang nih; Naphtali phung apat siing khat leh saang nih; Manasseh phung apat siing khat leh saang nih; 7 Simeon phung apat siing khat leh saang nih; Levi phung apat siing khat leh saang nih; Issakar phung apat siing khat leh saang nih; 8 Zebulon phung apat siing khat leh saang nih; Joseph phung apat siing khat leh saang nih; huleh Benjamin phung apat siing khat leh saang nih chiamchihin aum uhi.
Gimthuaahna Thupi
9 Hite zohin ka en a, ngai in, koima sim seenglouh mipi nasatah, nam chin, phung chin, mi chin leh haam chin apat puan ngou silh a, tuum baa tawia laltouphah leh Belaamnou ma a ding chu ka mu a, 10 huleh amah uh chu aw ngaihtahin akikou va, "Hutdamna chu laltouphah tunga tou i Pathian uh leh Belaamnou a ahi!" chiin. 11 Angel zousiah chu a laltouphah kiimveel leh upate leh silhing lite kiimveel ah ading va, huleh laltouphah ma ah khupboh a puuhin, 12 "Amen! Paahtawinate, loupinate, pilnate, kipaahthusoinate, zahumnate, silbawltheihnate leh thahaatnate chu i Pathian kawmah kumtuang kumtuangin um zingta heh. Amen!" chiin Pathian abia uhi. 13 Huin upate laha khat in ahung houpih a, ka kawmah, "Hi puan ngou a kithuamte koite ahi viai, huleh khoi apat hung ahi viai?" achi hi. 14 Huleh ke'n a kawmah, "Pu, nangmah in na he hi," ka chi hi. Huin ama'n ka kawmah, "Hite chu gimthuaahna nasatah apat hung pawtdohte ahi va, huleh Belaamnou sisan a sawpin a puan uh angousahta hi. 15 Hujiahin amahuh chu Pathian laltouphah ma a umin suun leh jaan in a biahinn ah a nna atong uhi. Huleh Amah laltouphah tunga toupa chu a lahvah ateeng diing hi. 16 Amahuh agilkial nawn sih diing va, adangtaah kiit nawn sih diing uh; nisa in amahuh akaang nawn sih diing a, a satna in zong asugim nawn sih diing hi. 17 Ajiahchu laltouphah laia um Belaamnou in amahuh avaah diing a, tuihing luui luanna ah amahuh apui diing a, Pathian in a mit vapat mittui zousiah asiaah siang diing hi," achi hi.
Chiamchihna Sagihna
1 Huleh Ama'n chiamchihna sagihna aphel zohin daah kimkhat veel chu vaan asip kiikeei hi. 2 Huleh angel sagih Pathian ma a ding ka mu a, huleh amahuh chu peengkuul sagih piaah ahi uhi. 3 Huleh angel dang khat ahung a, gimtuui haalna sana bawm tawiin maitaam bul ah ading hi. Amah kawmah chu laltouphah ma a sana maitaam tunga misiangthoute haamteina toh alat khawm diingin gimtuui tampi piaah ahi. 4 Huleh gimtuui khuu chu misiangthoute haamteina toh kitonin angel khut apatin Pathian ma ah ajaamtouta hi. 5 Huin angel in gimtuui haalna bawm ala a, maitaam mei in athun dim a, huleh leitung ah apaaikheta hi. Huleh awte, vaangingte, kawlphete leh jiilliingte ahung umta hi.
Peengkuul Sagih Kimuut Muhna
6 Huin hu angel sagih peengkuul sagih neite chu muut diingin akisingsata uhi. 7 Angel khatna in peengkuul amuut a, huleh gial leh mei sisan toh kihal ahung umta a, hute chu leitung ah paihkhiahin aum uhi. Huleh singkung mun thum a khen mun khat akaangtum a, huleh hampa hing zousiah akaangtumta hi. 8 Huin angel nihna in peengkuul amuut a, huleh taang lianpi mei a kaang hileh kilawm tuikhanglian ah paihluutin aum a, huleh tuikhanglian mun thum a khen mun khat sisan ahung suaahta hi. 9 Huleh tuikhanglian a um hinna nei ganhingte chu mun thum a khen mun khat asita va, huleh longpite chu mun thum a khen mun khat suhsiatin aumta hi. 10 Huin angel thumna in peengkuul amuut a, huleh aahsi liantah khat meisel banga kuang vaan apatin ahung kesuh a, huleh luuidungte mun thum a khen mun khat leh tuinaahte tung ah atu hi. 11 Hu aahsi min chu Gamsai ahi. Huin tui mun thum a khen mun khat chu gamsai ahung suaahta a, huleh suhkhaat ahihtaah jiahin hu tuite apatin mi tampi asita uhi. 12 Huin angel lina in peengkuul amuut a, huleh ni mun thum a khen mun khat, ha mun thum a khen mun khat, aahsi mun thum a khen mun khat suhsiatin aumta a, huchiin hute mun thum a khen mun khat chu suhmial ahita hi. Suun mun thum a khen mun khat chu avaah nawn sih a, huleh jaan zong mun thum a khen mun khat huchibangmahin aum hi. 13 Huin ka et leh, angel khat vaanlaijawl a leenga aw ngaihtaha hichia kikou ka ja hi, "Angel thumte'n peengkuul amuut naahlai diing jiahun lei a umte tung agih hi, atunggih hi, atunggih hi!" chiin.
1 Huin angel ngaana in peengkuul amuut a, huleh aahsi khat vaan apata lei a kesuh ka mu hi. Amah kawmah kokhuuh tobei chabi piaahin aum hi. 2 Huleh ama'n kokhuuh tobei chu ahong a, huin hu kokhuuh apatin haaltuina mei nasatah khuu bangin meikhu ahung pawtdoh hi. Hu kokhuuh a meikhu jiahin ni leh vaan ahung mialta hi. 3 Huleh hu meikhu lah apatin khauphe leitung ah ahung pawtdoh hi. Huleh lei a mom-aaite a tobang silbawltheihna a kawmvah piaah ahi. 4 Amahuh chu a tai va Pathian chiamchihna neiloute chauh chihlouh, lei a hampa aha, sil hing aha, ahihlouhleh sing mawngmawng suse lou diinga thupiaah ahi uhi. 5 Huleh amahuh chu hute thah theihna diing thuneihna piaah ahi sih va, hizongleh ha ngaa sung sugenthei diinga phal ahi uhi. Huleh a suhgentheihna uh chu mom-aai in mi adeh chianga anat daan bang ahi. 6 Huleh hu hun chiangin mite'n sihna ahawl diing va, himahleh amu sih diing uh; sih auut diing va, huleh sihna in amahuh ataaimangsan diing hi. 7 Huleh hu khauphete meel chu gaal kuan diinga guatsa sakolte bangmai ahi uhi. A lutung vah sana tobang lallukhuh hileh kilawm akhuh va, huleh a maai uh chu mihingte maai bang ahi. 8 Amah un numei sam tobang sam anei va, a ha uh chu huumpibahnei ha tobang ahi. 9 Huleh amah un siih awmphaw hileh kilawm awmphaw anei va, a hajaap ging uh chu gaal a kuan sakol tampi kaangtalai ging bang ahi. 10 Amah un mom-aai bangin mei anei va, a mei vah gu aum hi. A silbawltheihna uh chu mihingte ha ngaa sung suhnatna diing ahi. 11 Huleh amah un kokhuuh tobei angel chu a tungvah kumpi in anei uhi. A min chu Hebrai haam in Abaddon ahi a, hizongleh Grik haam in a min chu Apollion ahi. 12 Tunggihna khat abeita hi; ngai in, tunggihna nihna ahung tung nalai diing hi. 13 Huin angel guupna in peengkuul amuut a, huleh Pathian ma a um sana maitaam kii lite apat aw ka ja a, 14 peengkuul nei angel guupna kawmah, "Euphrat luuipi lian a angel li kaana umte khu suut in," chiin. 15 Huchiin a daah leh a ni leh a ha leh a kum huntaha mihingte mun thum a khen mun khat that diinga kikoih angel lite chu suutin aumta uhi. 16 Huleh hu sakol tungtuang gaalmite tam daan chu saang tampi ahi va; a phaahzah uh kisoi ka ja hi. 17 Huleh hichibangin kilaahna in sakolte leh a tunga tuang mei leh jasinth suangdum leh kaat awmphaw neite chu ka mu hi. Hu sakolte lutang chu huumpibahnei lutang tobang ahi a, huleh a kam vapatin mei leh meikhu leh kaat asuaahdoh hi. 18 Hi gawtna thum a kam vapat hung suaahdoh, mei leh meikhu leh kaat haw in mihingte mun thum a khen mun khat chu thahin aumta uhi. 19 Ajiahchu hu sakolte silbawltheihna chu a kam uh leh a mei vah aum hi; ajiahchu a mei uh chu guul tobanga lutang nei ahi a, hute in mite asuna uhi. 20 Huleh hi gawtnate a si lou midang tengteng a khut natohte vapat akisiih tuan sih va; huchiin dawite leh sana, dangka, sum-eng, suang leh sing milem, mu lah mu theilou, ja lah ja theilou, pai lah pai theilou milem abiahte uh atawpsan tuan sih uhi. 21 Huleh a tualthah uh ahihlouhleh a dawi aisaan uh ahihlouhleh a numei leh pasal kaala thaanghuaina uh ahihlouhleh a guuhtaatna vapatin zong akisiih tuan sih uhi.
Angel Haat leh Lehkhabu Neu
1 Huleh angel haat dang khat meilum a kithuama vaan apat hung kumsuh ka mu hi. A lutung ah sakhituihuup aum a, a maai chu ni abang a, huleh a keengte chu meikuang khuam bang ahi. 2 Huleh a khut ah lehkhabu neutakhat pheetsa atawi hi. Huleh a keeng jiatlam chu tuikhanglian tungah anga a, a keeng veilam chu leitung ah anga a, 3 huleh amah chu huumpibahnei humhaam bangin aw ngaihtahin akikou hi. Akikou zohin vaanging sagihte'n a aw uh asuahta uhi. 4 Huleh vaanging sagihte'n a aw uh asuah tahun gial diingin ka kisata hi. Huin vaan akipan aw khat in ka kawm ah hichia asoi ka ja hi, "Vaanging sagihte sil soi chu iim bihbeh inla, huleh gial sin," chiin. 5 Huin angel tuikhanglian leh leitung a ding ka muh khu in a khut vaan lamah atung tou a, 6 huleh kumtuang kumtuanga hing zingpa, vaan leh a sunga sil umte, lei leh a sunga sil umte, tuikhanglian leh a sunga sil umte siamtu min louin, a hun jekaisah ahi nawn sih diing hi, 7 hizongleh angel sagihna in a peengkuul amuut diing kuan chiangin chu Pathian thukiphual chu a suaah zawlneite kawma Ama'n anasoisa bangin suhkim ahita diing, chiin akihaahsial hi. 8 Huleh vaan apat aw ka jaah khu in, "Chiah inla tuikhanglian leh leitung a ding angel khut a lehkhabu neutakhat pheetsa um chu vala in," achi hi. 9 Huin angel kawmah ka vachiah a, a kawmah, "Lehkhabu neutakhat chu hung pia in," ka vachi hi. Huleh ama'n ka kawm ah, "La inla ne in, hikhu in na gil akhasah diing a, hizongleh na kam ah chu khuaizu bangin ahum diing hi," achi hi. 10 Huin angel khut apatin lehkhabu neutakhat chu ka ladoh a huleh ka ne hi, Huchu ka kam ah khuaizu bangin ahum a, himahleh ka neeh zohin ka gil chu akhata hi. 11 Huin ama'n ka kawmah, "Mi tampite leh namte leh haamte leh kumpipate tungtaang thu na soilawh ngeei diing ahi," ahung chi hi.
Heetpihtu Nihte
1 Huin tehna chiang tobang sialluang khat ahung kipia a, huleh angel chu ading a, ka kawmah, "Thou inla, Pathian biahinn leh maitaam leh a sunga abetute teh in. 2 Hizongleh Pathian biahinn polam a leitual chu nusia inla teh sin, ajiahchu hichu Jentelte kawma piaah ahita hi. Huleh amah un khopi siangthou chu ha sawmli leh ha nih atuandeen diing uhi. 3 Huleh ka heetpihtu nihte kawmah sil bawltheihna ka pe diing a, amah un sai-ippuan silhin ni saang khat leh za nih leh sawmguup sung thu asoilawh diing uhi," achi hi. 4 Hite chu olive sing nihte leh leitung Pathian ma a ding thaumei tunna nihte ahi uhi. 5 Mi koipouh in amah uh asuhnat tum leh, a kam vapat a mei hung pawtdoh in a meelmate uh akaangtum hi. Huleh mi koipouh in amahuh asuhnat leh huchibangmahin thahin aum diing uhi. 6 Hite'n chu thu asoilawh hun sungva guahjut louhna diingin vaan khaah theihna silbawltheihna anei va; huleh tui sisan suaahsah theihna leh auut daandaan va leitung gawtna chinteng a gawt theihna silbawltheihna anei uhi. 7 Huleh a heetpihna uh azoh chiangun kokhuuh tobei apata hung pawtdoh gamsa in amahuh adou diing a, azou diing a, huleh athat diing hi. 8 Huleh a luang uh chu hagaulama Sodom leh Aigupta kichi, i Lalpa uh zong kilhbeha aumna khopi loupitah kotzing ah alum diing hi. 9 Huleh mi chin leh phung chin leh haam chin leh nam chin a mite'n ni thum leh akim a luang uh aen diing va, a luang uh chu vui diing aphal sih diing uhi. 10 Huleh leitung a teengte chu amahuh tungah anuam diing va, kipaahna abawl diing va, huleh silpiaahte akithot tuah diing uhi, ajiahchu hi zawlnei nihte'n leitung a teengte abawl gim mahmah uhi. 11 Huleh ni thum leh akim zouin Pathian akipan hinna hagau a sungvah aluut a, a keeng un adingta va, huleh amahuh mute tungah launa nasatah atungta hi. 12 Huin amah un vaan apat aw ngaihtaha, "Hi lam ah hung tou un," chia a kawmva kikou aja uhi. Huleh amahuh chu meilum lahah vaan ah akaltouta va, a meelmate un amahuh amu uhi. 13 Huleh hu daahkaal mahin jiil nasatahin akiliing a, khopi mun sawm a khen mun khat achimta hi. Hu jiilliing ah mi saang sagih thahin aumta a, adang teng in chu alau mahmah va vaan Pathian kawmah loupina apeta uhi. 14 Tunggihna nihna abeita a, ngai in, tunggihna thumna chu hung tung pah diing ahi.
Peengkuul Sagihna Muutna
15 Huleh angel sagihna in peengkuul amuut a, vaan ah aw ngaihtah hichiin aging hi, "Khovel lalgamte chu i Lalpa uh leh a Khrist lalgam ahung hita a, Amah chu kumtuang kumtuangin laiin atou diing hi!" chiin. 16 Huin Pathian ma a a laltouphah va tou upa sawmnih leh lite'n khupboha puuhin Pathian abia uhi, 17 "Nang ka hung phat uhi, Aw Lalpa Pathian Bangkimbawltheipa, umzing leh umta leh hung um diingpa, ajiahchu nangma'n na silbawltheihna loupitah na lata a, vai nahawmtahi. 18 Namte chu athangtawm va, huleh na lungthahna chu ahung tungta hi. Misite vaihawmsahna diing leh na suaah zawlneite leh misiangthoute leh na min lau, aneu leh aliante kawmah kipaahman na piaahna hun leh leitung susetute na suhsiatna hun diing chu ahung tungta hi," chiin. 19 Huin vaan ah Pathian mun siangthou akihong a, a mun siangthou sungah a thuhun bawm akimu hi. Huin kawlphe, aw ging, vaan ging, jiilliing leh gialkia nasatah haw ahung umta hi.
Numei leh Dragon
1 Huleh vaan ah chiamchihna loupitah ahung kilang hi: numei khat ni a kithuam, a keeng nuaia hapi um, huleh a lutung a aahsi sawmlenih tuang lallukhuh khuh ahung um hi. 2 Amahnu chu naupaai ahi a, nausuaah diinga natna thuaahin akap hi. 3 Huin chiamchihna dang vaan ah ahung kilang kiit hi: ngai in, dragon san lianpi lutang sagih leh kii sawm nei, a lutungte a lallukhuh sagih khuh ahung um hi. 4 A mei in vaan a aahsi mun thum a khen mun khat akai a, lei ah apaaikheta hi. Huleh a Nau asuaah phaatphaat anavalhzou pah diingin dragon chu numei nausuaah diing nu ma ah ading hi. 5 Huleh amahnu'n chu Nau pasal nam zousiah tunga siihchiang a vaihawmtu diing khat ahung neikheta a, huleh a Ta chu Pathian leh a laltouphah kawmah laahtouhin aumta hi 6 Huleh numeinu chu ni saang khat leh ni za nih leh ni sawmguup achawm theihna diingun gamdaai ah Pathian in abawlsah mun ah ataaimangta hi. 7 Huin vaan ah kidouna aum a, Mikael leh a angelte'n dragon adou va, huleh dragon leh a angelte'n zong adou va, 8 himahleh azou sih va, amahuh diingin vaan ah mun muhin aum nawnta sih hi. 9 Huleh dragon lian chu paihdohin aumta hi, hu malai a guulpi, Diabol leh Setan kichi khovel pumpi heemtu chu; amah chu leitung ah paihkhiahin aumta a, huleh a angelte zong amah toh paihkhiahin aum uhi. 10 Huin vaan ah aw ngaihtah a hichia chikajahi, "Tuin chu i Pathian uh hutdamna, thahaatna, leh lalgam, huleh a Khrist silbawltheihna ahung tungta hi, ajiahchu asuun ajaan a i Pathian ma a i unaute uh heehtu chu paihkhiahin aumta hi. 11 Huleh amah un Belaamnou sisan jiah leh a heetpihna thu uh jiahin amah chu azouta va, sih tanphain a hinna uh aiit sih uhi. 12 Hujiahin nanguh vaan leh a sunga teengte kipaah un! Leitung leh tuikhanglian a teengte tung agih hi! Ajiahchu hun tomtakhat aneita chih aheet jiahin diabol chu thangtawm mahmahin na kawmvah ahung suhta hi," chiin. 13 Huleh dragon in leitung ah paihkhiah ahita chih akiheet tahin hu numei Ta pasal neinu chu agawtta hi. 14 Hu numei chu gamdaai ah hu guul muhphaah louha hun khat leh hunte leh hun kimkhat chawma aumna diing mun a aleen luut theihna diingin mupi liantah ha nih piaah ahi. 15 Huleh tuilian haattah a numei chu atohmang theihna diingin guul in hu numei nu nawhin a kam apat tuilian luang bangin tui aphihdoh hi. 16 Hizongleh lei in numeinu panpihnain a kam akaah a, hu guul in a kam apat aphihdoh tuilian chu avalh beita hi. 17 Huleh dragon chu numeinu tung ah alungthah mahmah a, huin Pathian thupiaah jui leh Jesu Khrist heetpihna pomtu, hu numei nu chihaah tengteng chu dou diingin akuanta hi.
Gamsa Masa
1 Huin tuikhanglian piauneel tungah ka ding a, huleh tuikhanglian apat gamsa hung pawt khat, lutang sagih leh kii sawm nei, huleh a kiite tunga lallukhuh sawm nei, huleh a lutangte tunga Pathian soisiatna min nei ka mu hi. 2 Huleh hu ka gamsa muh chu gialbeem tobang ahi a, a keeng chu vompi keeng abang a, a kam chu huumpibahnei kam abang hi. Huleh amah chu dragon in a silbawltheihna leh a laltouphah leh thuneihna nasatah apia hi. 3 Huleh a lutangte laha khat chu sihpih diing khop hiala liam hileh kilawmin ka mu a, huleh sihna khopa a liamna chu suhdam ahita hi. Huleh khovel pumpi in thumah asa va huleh hu gamsa chu ajuita uhi. 4 Huleh amah un gamsa kawma thuneihna petu dragon chu abia va; huleh amah un, "Gamsa toh kibang koi aum ei? Amah toh kidou ngaap koi ahiai um?" chiin gamsa chu abia uhi. 5 Huleh sil loupitahte soina diing leh Pathian soisiatna diing kam a kawmah piaah ahi a, huleh ha sawmli leh ha nih sung thuneihna piaahin aumta hi. 6 Huleh ama'n Pathian soisiatna leh a min leh a biahbuuh leh vaan a umte soisiatna in a kam akaahta hi. 7 Huleh a kawmah chu misiangthoute toh kidou diing leh amahuh zou diingin thu piaah ahita hi. Huleh a kawmah phung chin leh haam chin leh nam chin tunga thuneihna piaah ahita hi. 8 Huleh leitung a teeng zousiah khovel siamchiil apat thahsa Belaamnou Hinna Lehkhabu a a min uh kigial loute'n amah abe diing uhi. 9 Mi koipouh in bil aneih leh, ja heh. 10 Koipouh sal a puiluuttu chu sal in ataang diing a, koipouh naamsau a that chu naamsau a thahin aum diing hi. Hitah ah misiangthoute thuaahkuhkalna leh ginna suhlatna aum hi.
Gamsa Nihna
11 Huin gamsa dang leitung apat hung pawtdoh khat ka mu a, huleh ama'n chu belaam bangin kii nih anei a huleh dragon bangin thu asoi hi. 12 Ama'n gamsa masapeen thuneihna zousiah a ma ah azang a, huleh leitung leh a sunga teeng haw chu gamsa masapeen, sihna khop hiala liam hung dam kiit chu abesah hi. 13 Huleh ama'n mihingte mitmuhin vaan apat leitung ah mei bang koukhe hialin chiamchihna nasatahte abawl hi. 14 Huleh ama'n hu gamsa mitmuh a chiamchihna bawl theihna a kawma piaaha umte zangin leitung a teengte aheem a, ama'n leitung a teengte chu gamsa naamsau a suhliam a um a, hing nalai khu lim siam diingin ahilh hi. 15 Huleh gamsa lim kawma haihna apiaah theihna diing leh huchia gamsa lim chu ahung haamtheih a, huleh gamsa lim be lou photmahte athah theihna diingin amah chu silbawltheihna piaah ahi. 16 Huleh ama'n mi zousiah, aneu leh alian, hausa leh genthei, saltaang leh taanglou hitaleh, a khut jiatlam vah ahihlouhleh a tai vah chiamchihna aneisah chiat hi, 17 huleh huchia chiamchihna ahihlouhleh gamsa min ahihlouhleh a min nambar neite chihlouh, mi koimah in alei theih louh va, juaah zong ajuaah theihlouhna diingun. 18 Hitah ah pilna apoimoh; koipouh heetsiamna nei in gamsa nambar chu ngaihtuah heh, ajiahchu hichu mihing nambar ahi, a nambar chu: za guup leh sawmguup leh guup ahi.
Belaamnou leh Mi Nuai Khat leh Siing Li leh Saang Li
1 Huleh ka en a, Belaamnou chu Zion Taang a ding leh a Pa min a tai va kigial chiat mi nuai khat leh siing li leh saang li Amah toh ding ka mu hi. 2 Huleh vaan apatin aw khat tui tampi luang ging leh vaan ging nasatah bang ka ja hi. Huleh kaihging tumte kaihging tum ging ka ja hi. 3 Amah un laltouphah ma leh sil hing lite leh upate ma ah la thah hileh kilawm asa va; hu la chu leitung apat tatdoh hu mi nuai khat leh siing li leh saang li chihlouh koima'n ahe thei sih hi. 4 Hite chu numei a kisubuaah loute ahi uh, ajiahchu amahuh akikoih siangthou uhi. Hite chu Belaamnou a chiahna phot a juitute ahi uhi. Amahuh chu Pathian leh Belaamnou diinga gah masapeen hi diinga mite lah apat tatdohte ahi uhi. 5 Huleh a kam vah juauthu aum sih a, Pathian laltouphah ma ah soiseel beiin aum uhi.
Angel Th um Muhna
6 Huleh angel khat vaanlaijawl a leeng ka mu a, ama'n leitung a teeng nam chin, phung chin, haam chin leh mi chin kawma taangkoupih diing kumtuang tanchinpha anei a; 7 aw ngaihtahin akikou a, "Pathian lau unla, a kawmah loupina pia un, ajiahchu a vaihawmna hun ahung tungta hi. Huleh Amah vaan leh lei leh tuikhanglian leh tuinaahte siamtu chu bia un," chiin. 8 Angel nihna in ajui a, "Numei leh pasal kaala a thaanghuaina uutna zu chu nam zousiah adawnsah jiahin hu khopi loupi Babylon chu achimta hi, achimta hi," achi hi. 9 Huin angel thumna in amahuh ajui a aw ngaihtahin, "Mi koipouh in gamsa leh a lim abiah a, a tai ahihlouhleh a khut a chiamchihna aneih leh, 10 amah ngeei in zong Pathian lungthahna uain, a thangtawmna nou sunga ahaat theitawpa kisung chu adawn diing hi. Amah chu angel siangthoute mitmuh leh Belaamnou mitmuh ah mei leh kaat a suhnatin aum diing hi. 11 Huleh a suhnatna meikhu uh chu kumtuang kumtuangin ajaam tou a, gamsa leh a lim bete leh a min a chiamchihna nei photmahte'n chu suun leh jaan in khawldamna amu sih uhi," achi hi. 12 Hitah ah misiangthoute thuaahkuhkalna suhlatna aum hi; hitah ah Pathian thupiaah juite leh Jesu a ginna neite aum uhi. 13 Huleh vaan apatin aw khat in hi chia asoi ka ja hi, "Gial in: 'Tu apatin Lalpa a si, misite chu ahampha uhi!'" Hagau in, "Ahi, a tohgimnate uh apatin atawldamta diing uhi, ajiahchu a silbawlte un amahuh ahung juih diing jiahin," achi hi.
Lei Buh Aatna
14 Huin ka en a, huleh ngai in, meilum vaam leh hu meilum tungah Mihing Tapa hileh kilawm, a lutung a sana lallukhuh khuh a, a khut a kawite hiam tawi chu ka mu hi. 15 Huleh angel dang khat Pathian biahinn apat ahung pawtdoh a, aw ngaihtah a kikouin meilum tunga toupa kawmah, "Na kawite tawi inla aat in, nang diingin a aat hun atungta hi, ajiahchu leitung chu aat hun in aminta hi," achi hi. 16 Huchiin hu meilum tunga toupa'n leitung chu a kawite in azam a, huchiin leitung chu aatin aumta hi. 17 Huin angel dang khat vaan a Pathian mun siangthou apatin ahung pawt a, ama'n zong kawite hiamtah atawi hi. 18 Huleh mei tunga thunei angel dang khat maitaam apatin ahung pawt a, aw ngaihtaha kikouin kawite hiam tawipa kawmah, "Na kawite zam inla, lei grep gahbomte khawm in, ajiahchu grep amin vehta hi," achi hi. 19 Huehiin angel in leitung ah a kawite azam a, huleh lei grepte chu alakhawm a, huleh huchu Pathian lungthahna uain suuhna ah apaailuutta hi. 20 Huleh uain suuhna chu khogei lamah keeng a chilin aum a, uain suuhna apat sisan chu sakol kam kaih tanphain, farlong saang khat leh za guup sung ahung luangkheta hi.
Angel Sagih leh Gawtna Sagih Muhna
1 Huin vaan ah chiamchihna loupi leh limdang, gawtna nunung sagih nei angel sagih ka mu hi, hute aPathian thangtawmna abukimtaah jiahin huchu gawtna nunung ahi. 2 Huleh mei toh kihal tuikhanglian liimlang hileh kilawm, huleh gamsa tung leh a lim tung leh a chiamchihna tung leh a min nambar tunga gualzohna tangte Pathian kaihging tawi a tuikhanglian liimlang tunga ding ka mu hi. 3 Amah un Pathian suaah Mosi la leh Belaamnou la asa va: "Lalpa Pathian Bangkimbawltheipa, na silbawlte aloupiin athumah hi! Na lampite chu adihin atah ahi. Aw misiangthoute Kumpipa! 4 Kuan nang hung lau louin, Aw Lalpa, kuan na min apaahtawi lou ngam diai? Aj iahchu nang chauh na siangthou hi. Ajiahchu nam zousiah chu ahung diingva na ma ah ahung be diing uhi, ajiahchu na vaihawmna dihte suhlatin aumta hi," chiin. 5 Huleh hi silte nungin ka en a, huleh ngai in, vaan ah Pathian biahinn heetsahna biahbuuh pindan sungnung chu akihong hi. 6 Huleh angel sagihte chu gawtna sagihte tawiin puan siangthou leh vaam a kithuamin leh a awm uh sana kawnggaah a gaahin Pathian mun siangthou apat ahung pawtdoh uhi. 7 Huin silhing lite laha khat in hu angel sagihte kawmah kumtuang kumtuanga hing zing Pathian thangtawmna a dim sana kuang sagih apeta hi. 8 Huleh Pathian mun siangthou pindan sungnung chu Pathian loupina leh a silbawltheihna apat meikhu in adimta a, huleh hu angel sagihte gawtna sagih haw akizoh masiahin Pathian mun siangthou sungnung ah koima aluut theita sih uhi.
Pathian Lungthahna Kuang
1 Huin Pathian biahinn sung apatin aw ngaihtah khat in angel sagihte kawmah, "Chiah unla Pathian lungthahna kuang sagihte chu leitung ah sungkhia un," achih ka ja hi. 2 Huchiin angel khatna chu achiah a, a kuang chu leitung ah asungkhia a, huleh gamsa chiamchihna neite leh a lim betute tungah meimasia nasatah mei ahung suaahta hi. 3 Huin angel nihna in a kuang chu tuipi tung ah asungkhia a, huchu misi sisan bangin ahung umta a, huchiin tuikhanglian a um hinna nei zousiah asita uhi. 4 Huin angel thumna in a kuang chu luuidungte leh tuinaahte ah asungkhia a, hute chu sisan ahung suaahta hi. 5 Huleh tuite tunga thuneitu angel in hichia asoi ka ja hi, "Aw Lalpa, hichi banga vai na hawm jiahin, nang, umzing leh umta leh hung um diing chu na dihtat hi. 6 Ajiahchu amah un zawlneite leh misiangthoute sisan anasuah va, huleh nang adawn diingun sisan amahuh na peta hi. Ajiahchu dawn taah mawng ahi uhi," chiin. 7 Huleh maitaam apat adang khat in, "Ahi, Lalpa Pathian Bang-kimbawltheipa, na vaihawmnate chu adihin adihtat hi," achih ka ja hi. 8 Huin angel lina in a kuang chu ni tungah asungkhia a, huleh amah kawmah chu mite mei a haaigawp theihna piaah ahi. 9 Huin mite chu mei nasatah a haaigawpin aum va, huleh amah un hi gawtnate tunga thuneitu Pathian asoisia va, huleh Amah kawma loupina pe diingin akisiih sih uhi. 10 Huin angel ngaana in a kuang chu gamsa laltouphah tungah asungkhia a, huin a lalgam chu ahung mial vehta a; huleh amah un na asah jiahun a lei uh apet uhi. 11 A natna uh leh a meimate uh jiahin vaan Pathian chu asoisia va, a silbawlte uh jiahin akisiih tuan sih uhi. 12 Huin angel guupna in a kuang chu Euphrat luuipi tungah asungkhia a, huchiin suaahlam a kumpipate diinga lampi bawl ahih theihna diingin a tui chu akang vehta hi. 13 Huleh ukeeng tobang hagau bolhhoh thum, dragon kam apat leh gamsa kam apat leh zawlnei tahlou kam apat hung pawt ka mu hi; 14 ajiahchu amahuh chu Bangkimbawltheipa hu Pathian ni loupi kidouna a puikhawm diinga leitung pumpi kumpipate kawma chiahdoh, chiamchihna bawl dawite hagau ahi uhi. 15 "Ngai in, guta bangin ka hung ahi. Kiging zing leh a puan teengsa a um chu ahampha hi, huchilou inchu saguaahin avaah diing a, a zumhuaina amu kha diing uhi. " 16 Huleh amahuh chu munkhat Hebrai haam a Armageddon kichi ah apuikhawmta uhi. 17 Huin angel sagihna in a kuang chu huihkhua ah asungkhia a, huleh vaan a Pathian mun siangthou apat leh laltouphah akipanin aw ngaihtah ahung suaah a, "Bawlzoh ahita!" achi hi. 18 Huleh awte leh vaan gingte leh kawlphete ahung um a; huleh jiil nasatahin aliing a, huchibang jiilliing nasa leh loupi chu leitung a mihing um apatin aum kha nai sih hi. l9 Huleh khopi loupi chu mun thum in akikhen a, namte haw khopite chu achimta hi. Huleh Pathian in Babylon khopi loupi chu ahezing a, huleh a lungthahna huaisia uain nou chu a kawmah apeta hi. 20 Huin tuikulhgam zousiah chu ataaimangta va, taangte zong muhin aum nawnta sih hi. 21 Huleh gial nasatah mei, atang khat talent khat tuha gih vaan apatin mite tungah akia a, mite'n gial suhgimna jiahin Pathian asoisia uh, ajiahchu hu suhgimna chu ahuaise mahmah hi.
Gamsa Muhna
1 Huin kuang sagih tawi angel sagihte lah a khat ahung a huleh ahung kihoupih a, "Hi lamah hung in, tui tampi tunga tou nohchijuaah thupitahnu tunga vaihawmna ka hung musah diing hi, 2 amahnu toh lei a kumpipate'n kingaihna thaanghuai a kipawlna abawl va, huleh amahnu kingaih thaanghuaina zu chu leitung a teengte dawnkhamsahin aum uhi," achi hi. 3 Huchiin ama'n kei chu Hagau in gamdaai ah ahung pomangta hi. Huleh numei khat Pathian soisiatna min a dim, lutang sagih leh kii sawm nei gamsa sandup tunga tou ka mu hi. 4 Huleh hu numei chu puan sandup leh sandaang in akichei a, sana leh suangmantam leh tuikep suang in akijeem a, a numei leh pasal kaala thaanghuaina kihdahum leh bolhhohna a dim sana nou chu a khut in atawi hi. 5 Huleh a tai ah min khat, "THUKIPHUAL, BABYLON LOUPI, NOHCHIJUAAHTE LEH LEITUNG A KIHDAHHUAITE NU," chiin akigial hi. 6 Hu numei chu misiangthoute sisan leh Jesu diinga martarte sisan dawn khamin ka mu hi. Huleh amahnu ka muh tahin, limdang leh thumah ka sa tahzet hi. 7 Huleh angel in ka kawmah, "Bang diinga thumahsa na hiai? Hu numei leh atuanna lutang sagih leh kii sawm nei gamsa thukiphual ka hung hilh diing hi. 8 Hu na gamsa muh chu aumzouta a, huleh aum sih a, huleh kokhuuh tobei apat ahung pawtkhe diing a huleh manthaaina ah achiah luut diing hi. Huleh khovel siamchiil apata Hinna Lehkhabu a a min uh kigial lou leitung a teengte'n hu gamsa aumzouta, huleh aum lou, huleh hung um nalai diing chu amuh chiangun limdang asa diing uhi. 9 Hitah ah pilna lungsim apoimoh hi; lutang sagihte chu numei touna taang sagihte ahi uhi. 10 Huleh kumpipa sagih aum a, ngaa chu apuuhta a, khat aum a, khat chu ahung tung nai tadih sih hi. Huleh ahung tun chiangin tomtakhat sung aum diing hi. 11 Huleh hu gamsa umzouta, huleh aum lou, amah ngeei chu agiatna ahi a, huleh sagihte laha mi ahi a, huleh manthaaina ah achiah hi. 12 Huleh hu kii sawm na muhte chu lalgam mu nai tadih lou kumpipa sawmte ahi va, hizongleh amah un gamsa toh daahkaal khat sung kumpipate banga thuneihna anei uhi. 13 Hite'n chu lungsim munkhat apua va, huleh gamsa kawmah a thuneihna uh leh a haatna uh ape diing uhi. 14 Hite'n chu Belaamnou akidoupih diing va, huleh Belaamnou in amahuh azou diing hi, ajiahchu Amah chu lalpate Lalpa leh kumpipate Kumpipa ahi; huleh Amah toh umte chu kouhte, teelte leh ginumte ahi uhi," achi hi. 15 Huleh ama'n ka kawmah, "Nohchijuaahnu touna, na tui muhte chu mite leh mipite leh namte leh haamte ahi uhi. 16 Huleh gamsa tunga kii sawm na muhte'n chu nohchijuaahnu ahaw diing va, tavai leh saguaahin abawl diing va, a sa ane diing va, huleh mei in ahaalmang diing uhi. 17 Ajiahchu Pathian in a thute ataangtunkim masiaha Amah siltup asuhbukim theihna diingin, a lungsim uh mun khat a umna diing leh a lalgam uh gamsa kawma apiaahna diing uh a lungtang vah akoihta hi. 18 Huleh hu na numei muh chu hu khopi loupi leitung a kumpipate tunga vaihawmtu chu ahi," achi hi.
Babylon Khopi Puuhna
1 Hi silte nungin angel dang khat silbawltheihna loupitah neia vaan apat hungsuh ka mu a; huleh a loupina in lei ataanvaahta hi. 2 Huleh amah chu aw thupitahin naahpiihtahin akikou a, "Babylon loupi chu achimta hi, achimta a, huleh dawite umna leh hagau bolhhoh chinteng kulh leh tungleeng va sianglou leh kihdahum chinteng bawm ahung hita hi. 3 Ajiahchu nam zousiah in a kingaih thaanghuaina zu chu adawnta va, huleh leitung a kumpipate'n kingaihna thaanghuai in akipawlpihta va, amah noptatluatna jaalin leitung a sumkawlveite ahausa gawpta uhi," achi hi. 4 Huleh vaan apat aw dangkhat kaja a, "Ka mite haw, a sualnate a na tel louhna diing uh leh amahnu gawtnate na thuaahkhawm louhna diingun amah apat hung pawt un. 5 Ajiahchu a sualnate'n vaan asuta a, huleh a giitloUhnate Pathian in ahe zing ahi. 6 Ama'n ahung piaah bang ngeeiin amah pia unla, huleh a silbawl bangjeelin a kawmah alehnih in thuh un; a nou sun khawm ah amah diingin alehnih in sundimsah un. 7 Akiloupisah daan leh anoptatdaan bangjeelin bawlgim unla, sulungkham un; ajiahchu ama'n a lungtang in, 'Kumpinu in ka tou a, meithai ka hi sih, ka lungkham ngei sih diing,' achi hi. 8 Hujiahin ni khat thu in amah gawtna, sihna leh lungngaihna leh kialna ahung tung diing hi. Huleh amahnu chu mei in akaangtum diing hi, ajiahchu atunga vaihawmtu Lalpa Pathian chu ahaat ahi.
Babylon Puuh Suunna
9 "Huleh leitung a kumpipa amahnu kingaihna thaanghuai a kipawlpihte leh amahnu toh nuamtah a ana-umte'n amahnu kaatna meikhu amuh chiangun kapin asuun diing va, 10 amahnu kibawlgimna lauh jiaha gamlapi a dingin, 'Tameide, tameide, Babylon loupi, khopi kip, daahkaal khat sunga na tunga vaihawmna ahung tuntaahmei!' achi diing uhi. 11 "Huleh lei a sumkawlveite'n amahnu chu kah in asuun diing uhi, mi koima'n a thuampua uh alei nawn louh jiahin; 12 hu thuampuate chu sanate, dangkate, suangmantamte, tuikepsuangte, puanmalngaatte, puansandaangte, puanneemte, puansandupte, sing gimtuui chintengte, saiha a kibawl van chituam zousiah, sing mantampeente a kibawl vante, sum-engte, siihte, suangkaang beel chi tuamtuam zousiah, 13 huleh siingthaalte leh sil gimtuuite, sathau namtuuite leh begawte, uainte leh olive thaute, taangbuangte leh gehute, gante leh belaamte, sakolte leh kaangtalaite, suaahte leh mite hinnate bang ahi. 14 "Huleh silgah lungsim a na lunggulhte'n nang ahung nuseta va, hinkhonopna leh hoih kilawm zousiah in nang ahung paimangsanta a, huleh hite haw chu na mukiit nawn hiai sih diing hi. 15 Hi silte a sumkawlveite, amahnu jiaha hung hausate'n chu amahnu kibawlgimna lauh jiahin gamlapi a dingin kapin asuun diing va, 16 huleh, Tameide, tameide, hu khopi loupi, puan malngaat leh puan sandup leh puan sandaang silh a, huleh sana leh suang mantam leh tuikepsuang a kijeem chu! 17 Ajiahchu daahkaal khat sung chauhin hibanga hauhsatna loupi bangmalou ahung suaahta,' achi diing uhi. Huleh long houtu photmah leh long a tuang haw zousiah leh longpute leh tuikhanglian a sumkawlvei photmah chu gamlapi ah ading va, 18 huleh akaahna meikhu amuh tahun akikoukhia va, 'Hi khopi loupi tobang khopi aum ei?' achi uhi. 19 Huleh amah un a lutung va leivui kithehin akikou va, kap leh maau pumin, 'Tameide, tameide, hu khopi hauhsatna jiaha tuikhanglian a long nei haw zousiah suhhauhsat-a um hi va! Ajiahchu daahkaal khat sungin suhsiat ahung hita hi,' achi uhi. 20 Aw vaan, huleh nanguh misiangthoute, apostolte leh zawlneite, amahnu tungah nuam un, ajiahchu Pathian in na phuba uh a tungah ahung laahsahta hi!" achi hi.
Babylon Puuhsiangna
21 Huleh angel haattah khat in suang sumheeh liantah tobang suang khat ala a, tuikhanglian ah apaailuut a, "Hichibangin Babylon khopi loupi chu thagumsuah a paihkhiah ahi diing a, huleh muh kiitin aum nawn het sih diing hi. 22 Huleh kaihging tumte tumging, lasiamte lasah ging, gosem muutte muut ging leh peengkuul muutte muut ging haw na sung ah akija nawn het sih diing hi. Khutsiammi, banglam pouha khutsiam mawngmawng na sungah akimu nawn sih diing a, huleh suang sumheeh gin mawngmawng zong akija nawn sih diing hi. 23 Huleh thaumei vaah zong na sungah ataang nawn het sih diing a, mou leh moupa aw zong akija nawn het sih diing hi. Ajiahchu na sumkawlveitute hi leitung a miliante ahi va, ajiahchu na bupsiamna in nam zousiah heemin aumta uhi. 24 Huleh a sungah chu zawlneite leh misiangthoute leh leitung a thaha um zousiah sisan muhin aumta hi," achi hi.
Vaan a Gualzohna
1 Hi silte nungin vaan ah mipi tampi aw ngaihtah kajaa, "Hallelujah! Hutdamna leh loupina, zahumna leh silbawltheihna chu Lalpa i Pathian uh a ahi! 2 Ajiahchu a vaihawmnate chu athutahin adihtat ahi, ajiahchu Ama'n nohchijuaahnu loupitah, numei leh pasal kaala a thaanghuaina jiaha leitung suthaanghuainu chu vai ahawmkhumta a, huleh a suaahte sisan phuba chu a tungah alaahsahta hi," chiin. 3 Huleh amah un, "Hallelujah! Amahnu haalna meikhu chu kumtuang kumtuangin ajaamtouta hi!" achi uhi. 4 Huleh upa sawmnih leh lite leh silhing lite chu khupbohin apuuh va, "Amen! Hallelujah!" chiin laltouphah tunga tou Pathian chu abeta uhi. 5 Huchiin laltouphah apatin aw khat ahung gingdoha, "Nanguh a suaahte zousiah leh nanguh Amah lau, aneu leh aliante'n i Pathian uh chu paahtawi un!" achi hi. 6 Huleh mipi tamtah aw ging bang, tui tamtah luang ging bang leh vaanpi ging nasatah tobang ka jaa, "Hallelujah! Ajiahchu Lalpa Pathian B angkimbawltheipa' n vai ahawm hi!
Belaamnou Jineihna
7 "Kipaahin i nuam diing va huleh Amah kawmah paahtawina i pe diing uh, ajiahchu Belaamnou ji neih hun ahung tungta a, huleh a ji zong akisa zoudiamta hi," achi hi. 8 Huleh amahnu chu puan malngaat siangthou leh vaam a akijep diing phal ahi a, hu puan malngaat chu misiangthoute dihtatna ahi. 9 Huin ama'n ka kawmah, "Gial in, 'Belaamnou ji neihna ankuang uum diinga kouhte chu ahampha uhi,'" achi hi. Huleh ama'n ka kawmah, "Hite chu Pathian thusoi dihtahte ahi," achi hi. 10 Huleh amah be diingin a keengbul ah ka puuh hi. Himahleh ama'n ka kawmah, "Hung be hiai sin! Kei chu na suaah tanpih leh Jesu heetpihna thu nei, na unaute laha ka hi. Pathian bejaw in! Ajiahchu Jesu heetpihna chu thusoitheihna hagau ahi," achi hi.
Sakol Kaang Tunga Tuangpa
11 Huin vaan kihong ka mu a, huleh ngai in, sakol kaang khat; huleh a tunga tuangpa a min Ginum leh Thutah kichi ka mu a, Ama'n dihtatna in vai ahawm a huleh gaal abawl hi. 12 A mitte chu meikuang tobang ahi a, huleh a lutung ah lallukhuh tampi aum hi. Huleh Amah loungaal koima'n aheet theihlouh min kigial anei hi. 13 Huleh Amah chu sisan a kidiah puan in akithuam a, a min chu Pathian Thu akichi hi. 14 Huleh vaan a um sepaih hon in, puan malngaat vaam leh siangthou a kithuamin sakol kaangte tunga touin Amah ajui uhi. 15 Huleh namte asaatna diingin a kam apatin naamsau hiamtah apawtdoh hi. Huleh Amah ngeeiin amahuh chu siih chiang toh vai ahawmkhum diing hi. Amah ngeei in Bangkimbawltheipa Pathian lauhuaina leh thangtawmna uain suuhna chu atuanchilta hi. 16 Ama'n a puan tung leh a malpi tungah, KUMPIPATE KUMPIPA LEH LALPATE LALPA, chia kigial min anei hi.
Gamsa leh a Sepaihte Kizohna
17 Huin angel khat ni a ding ka mu a, amah chu aw ngaihtaha kikouin vaanlaijawl a leeng vate kawmah, "Hung unla Pathian ankuang luina loupitah ah hung kikhawm un, 18 kumpipate sa, sepaih houtuliante sa, mi haatte sa, sakolte sa leh a tungva tuangte sa leh mi zousiah, jaleen leh saltaang, aneu leh alian sa na neeh theihna diingun," achi hi. 19 Huleh hu gamsa leh leitung a kumpipate leh a sepaih hon uh chu hu sakol tunga tuangpa leh a sepaihte dou diinga akipunkhawm uh ka mu hi. 20 Huleh hu gamsa chu matin aumta a, huleh amah toh zawlnei tahlou, a ma a chiamchihnate bawl a, hu chiamchihna a gamsa chiamtehna neite leh a lim bete heemzoupa chu gamsa toh matkhawmin aumta hi. Hi tegeel chu anih un kaat a kaang mei diil ah ahinga paihluutin aumta uhi. 21 Huleh amawh teng chu Amah sakol tunga tuangpa kam apat hung pawtdoh naamsau in thahin aumta uhi. Huleh amahuh sa in tungleeng va zousiah agilvahta uhi.
Kum Saang Khat Setan Kaanna
1 Huin angel khat vaan apat a hung kumsuh, a khut a kokhuuh tobei chabi leh khainiang golpi tawi ka mu hi. 2 Huleh ama'n dragon, hu malai a guulpi khu, Diabol leh Setan kichi chu aman a, kum saang khat sung diingin akaanta hi; 3 huleh kum saang khat achin masiaha namte aheem kiit louhna diingin kokhuuh tobei ah apaailuut a, akhaahkhum a, huleh chiamchihin asiindetta hi, Huleh hite zoh chiangin amah chu tomkhat sung hahkhiah ahi diing hi. 4 Huleh laltouphahte leh a tunga toute ka mu a, huleh a kawmvah vaihawmna piaah ahi. Huin Jesu aheetpihna jiah uh leh Pathian thu aheetpihna jiahva a ngawng uh tana umte hagaute leh gamsa ahihlouhleh a lim be ngeilou a, a tai uh ahihlouhleh a khut va zong chiamchihna nei ngeiloute haw chu ka mu hi. Huleh amahuh chu ahung hing va huleh Khrist toh kum saang khat vai ahawmta uhi. 5 Hizongleh misi dangte chu kum saang khat achin masiah ahing kiit sih uhi. Hichu thohkiitna masapeen ahi. 6 Thohkiitna masapeen a telte chu ahampha un asiangthou uhi. Hute tungah sih nihna in thu anei sih a, hizongleh amahuh chu Pathian leh Khrist siampute ahi diing va, huleh Amah toh kum saang khat vai ahawm diing uhi.
Setan Hahdohna leh Kidouna Tawpnapeen
7 Hu kum saang khat achin chiangin Setan chu a taanna kul apat hahkhiahin aum diing a, 8 huleh leitung ning li a um namte, Gog leh Magog chu heema kidouna a puikhawm diingin achiahdoh diing hi, atam lam uh chu tuikhanglian piauneel bang ahi uhi. 9 Huleh amahuh chu lei vaailam daapin achiah tou va misiangthoute giahbuuh leh khopi deihum chu ahualkhumta uhi. Huleh Pathian a kuanin vaan apat mei ahung kesuh a, huleh amahuh akaangtumta hi. 10 Huleh amahuh heemtu diabol chu gamsa leh zawlnei tahlou umna mei leh kaat diil ah paihluutin aumta hi. Huleh amahuh chu kumtuang kumtuangin suun leh jaanin suhnatin aum diing uhi.
Gingloute Thohkiitna leh Vaihawmna Nunungpeen
11 Huin laltouphah ngou loupitah leh a tunga toupa, Amah maai apat lei leh vaan ataaimangnapa chu ka mu a, huleh amahuh diingin mun mawngmawng muhin aumta sih hi. 12 Huleh misite, aneu leh alian, laltouphah ma a ding ka mu a, lehkhabute akihong a, lehkhabu dang zong akihong hi, huchu Hinna Lehkhabu ahi. Huleh misite chu hu lehkhabute a kigial bangin a natoh dungjui un vaihawmsahin aumta uhi. 13 Tuikhanglian in a sunga misi umte ahung pedohta a, huleh Sihna leh Misi Khua in a sunga misi umte ahung pedohta uhi. Huleh mi chin chu a silbawlte uh dungjuia vaihawmsahin aumta uhi. 14 Sihna leh Misi Khua chu mei diil ah paihluutin aumta uhi. Hichu sih nihna, mei diil chu ahi. 15 Huleh koipouh Hinna Lehkhabu a min kigial kha lou photmah chu mei diil ah paihluutin aumta uhi.
Lei Thah leh Vaan Thah
1 Huin vaan thah leh lei thah ka mu hi, ajiahchu vaan masa leh lei masa chu apaimangta hi. Huleh tuikhanglian zong aum nawn sih hi. 2 Huin kei Johan in khopi siangthou, Jerusalem Thah chu mou a pasal a diinga kichei banga bawl zohsa a Pathian apat vaan a hung kumsuh chu ka mu hi. 3 Huleh vaan apat aw ngaihtah khat in, "Ngai in, Pathian teenna chu mihingte lah ahita, huleh Amah chu a lahvah ateeng diing a, huleh amahuh chu a mite ahi diing uhi. Pathian ngeei chu a kawmvah aum diing a, a Pathian uh ahi diing hi. 4 Huleh Pathian in a mit vapat mittui zousiah asiaahsiangsah diing hi. Huleh sihna, lusuunna, leh kahna aum nawn sih diing hi. Hu ah natna aum nawn sih diing hi, ajiahchu sil masate teng apaimangta hi," achihkajahi. 5 Huleh laltouphah tunga toupa'n, "Ngai in, sil zousiah ka siam thah hi," achi hi. Huleh Ama'n ka kawmah, "Gial in, ajiahchu hi thute hi adihin aginum ahi," achi hi. 6 Huleh Ama'n ka kawmah, "Bawlzoh ahita! Kei Alpha leh Omega, Abul leh Atawp ka hi. Dangtaah photmah kawmah hinna tuinaah tui athawnin ka pe diing hi. 7 Agualzoutu in chu sil zousiah aluah diing a, huleh a Pathian ka hi diing a, amah zong ka tapa ahi diing hi. 8 Hizongleh meidawite, gingtaloute, kihdahumte, tualthatte, numei leh pasal kaala thaanghuaite, bumhaatte, milembete, juau haatte zousiah tan diing chu mei leh kaat a kaang diil ahi a, huchu sih nihna ahi," achi hi.
Vaan Jerusalem Muhna
9 Huin gawtna sagih nunungpeen a dim kuang sagih tawi angel sagihte laha khat ka kawmah ahung a, ahung houpih a, "Hi lamah hung in, mounu, Belaamnou ji chu ka hung ensah diing hi," achi hi. 10 Huleh ama'n Hagau in taang sang liantah tungah ahung puita a, hu khopi loupitah Jerusalem siangthou, Pathian a kuana vaan apata hung kumsuh chu ahung ensah a,. 11 Pathian loupina anei hi. A vaah chu suang mantampeen abang a, jaspar suang bangin, kristal suang tobangin aval ahi. 12 Huleh kulhbaang nasatah leh sangtah anei a, kot sawmlenih anei a, hu kotte ah chu angel sawmlenih aum uhi. Huleh hu kotte tungah min kigial aum a, hute chu Israel tate phung sawmlenihte min ahi. 13 Suahlam ah kot thum, maallam ah kot thum, simlam ah kot thum leh tumlam ah kot thum aum hi. 14 Huleh khopi kulhbaang in innbulphuh suang sawmlenih anei a, hute tungah Belaamnou apostol sawmlenihte min atuang hi. 15 Kei hung houpihpa'n hu khopi leh a kotte leh a kulhbaang tehna diingin tehna sana chiang atawi hi. 16 Khopi chu ning li kibang neiin aum a, a dunglam saudaan chu a vaailam toh akibang hi. Huleh ama'n hu chiang in khopi chu ateh a, farlong saang sawmlenih ahi a, a dunglam leh a vaailam leh a saanlam akikim uhi. 17 Ama'n kulhbaang chu ateh a mihing tehna a tehin fit za nih veel ahi a, huchu angel tehna in zong ahi. 18 Kulhbaang chu jaspar suang a kibawl ahi a, a khopi chu sana siang a kibawl liimlang bang mei ahi. 19 Khopi kulhbaang innbulphuh suangte chu suangmantam chi chinteng a zep ahi a, huleh a innbulphuh suang masapeen chu jaspar suang ahi a, anihna chu sapphire suang ahi a, athumna chu kalsidoni suang ahi a, alina chu emerald suang ahi a, 20 angaana chu sardonix suang ahi a, aguupna chu sardia suang ahi a, asagihna chu krisolit suang ahi a, agiatna chu beril suang ahi a, akuahna chu topaz suang ahi a, asawmna chu krisopras suang ahi a, asawmlekhatna chu jasinth suang ahi a, asawmlenihna chu amethist suang ahi. 21 A kot sawmlenihte chu tuikep suang sawmlenih ahi a, a kot chin chu tuikep suang khat a bawl ahi. Huleh khopi kotzing chu sana siang a bawl, liimlang etpailet theih bang ahi.
Jerusalem Thah Loupina
22 Huleh hu ah chu Pathian biahinn mawngmawng ka mu sih a, ajiahchu Lalpa Pathian Bangkimbawltheipa leh Belaamnou chu a biahinn ahi mei uhi. 23 Huleh hu khopi in chu ataanvaah diingin ni angai sih a, ha zong angai sih hi, ajiahchu Pathian loupina in hichu ataanvaah a, huleh Belaamnou chu a thaumei ahi mei hi. 24 Hutdama um namte chu hu vaah ah aleeng diing va, leitung a kumpipate'n a loupina uh leh a zahumna uh ahung tawi diing uhi. 25 A kotte chu suun in akikhaah ngei het sih diing, ajiahchu hu mun ah jaan aum sih diing hi. 26 Huleh amah un hu sungah namte loupina leh zahumna ahung poluut diing uhi. 27 Huleh hu sung ah chu bangchihmahin silbolhhoh ahihlouhleh kihdahhuai bawl, ahihlouhleh juau soi himhim aluut sih diing a, hizongleh Belaamnou Hinna Lehkhabu a min tuangte chauh aluut diing uhi.
Hinna Tui
1 Huin ama'n hinna luui tui chiimtah kristal suang banga vai Pathian laltouphah leh Belaamnou apat a hung pawtkhia ahung ensah a, 2 hu khopi kotzing lailung leh a luuipang tuaah ah gah chi tuamtuam sawmlenih nei leh ha chin a gah hinna singkung aum hi. Huleh hu sing nahte chu namte suhdamna diing ahi. 3 Huleh hu ah haamsiatna mawngmawng aum nawn sih diing hi, hizongleh Pathian leh Belaamnou laltouphah aum jawta diing a, huleh a suaahte'n Amah nna atohsah diing uhi. 4 Amah un a meel amu diing va, a min chu a tai vah atuang diing hi. 5 Hu ah jaan aum nawn sih diing; huleh thaumei vaah leh ni vaah zong angai nawn sih diing uhi, ajiahchu Lalpa Pathian in amahuh ataanvaah diing a, huleh amah un kumtuang kumtuangin vai ahawm diing uhi.
Thutawpna
6 Huleh ama'n ka kawmah, "Hi thute hi aginumin adih ahi," achi hi. Huleh zawlneite hagaute Lalpa Pathian in sil kibawl pah diingte chu a suaahte musah diingin a angel asawlta hi. 7 "Ngai in, kintahin ka hung ngeei diing hi! Hi lehkhabu thusoilawh thute jui photmah chu ahampha hi," achi hi. 8 Huleh kei Johan in hi silte ka muh a huleh ka jaah ahi. Huleh ka jaaha ka muh tahin hi silte hung musahtu angel keengbul ah be diingin ka puuhta hi. 9 Huin ama'n ka kawmah, "Hung be hiai sin, ajiahchu kei chu nang leh na unau zawlneite leh hi lehkhabu a thu kisoite jui na suaah tanpih ka hi. Pathian be jaw in," achi hi. 10 Huleh ama'n ka kawmah, "Hi lehkhabu a thusoilawh thute khaahkhum sin, ajiahchu a hun tung diing ahita hi. 11 Mi dihlou chu dihlouin um nalai heh, mi bolhhoh chu bolhhohin um nalai heh; huleh midihtat chu dihtatin um nalai heh; mi siangthou chu siangthouin um nalai heh," achi hi.
Jesu'n Kouhtuamte Aheetsah
12 "Ngai in, kintahin ka hung hi, mi chin a silbawl bang jeela piaah diing ka kipaahman ka kawmah aum hi. 13 Kei Alpha leh Omega, Abul leh Atawp, Amasapeen leh Anunungpeen ka hi." 14 Hinna singkung a tan aneih theihna diing uh leh kotte a khopi sung aluut theihna diingva a thupiaahte juitute chu ahampha uhi. 15 Ajiahchu polam ah uite, bumhaatte, numei leh pasal kaala thaanghuaite, tualthatte milem bete, juau ngaina leh bawl photmahte aum uhi. 16 "Kei, Jesu in kouhtuamte diinga hi thute na kawma hung hesah diingin ka angel ka hung sawl hi. Kei David Zungpi leh a Chihaah, Jiingsol Aahsi Taang chu ka hi," achi hi. 17 Huleh Hagau leh mou in, Hung in!" achi uhi. Huleh aja taphot in, "Hung in!" chi heh. Huleh koipouh adangtaah chu hung heh. Huleh auut taphot in hinna tui athawnin la heh. 18 Ajiahchu koipouh hi lehkhabu thusoilawh thute ja taphot kawmah ka hesah hi: Mi koipouh in hi thute abehlapin chu, Pathian in hi lehkhabu a kigial gawtnate a tungah abehlap diing hi. 19 Huleh mi koipouh in hi thusoilawhna lehkhabu thute apat alaahmangin chu, hinna singkung leh khopi siangthou leh hi lehkhabu a kigial silte apat atan diing chu Pathian in alaahmangsah diing hi. 20 Hi thute hesahtu in, "Kintahin ka hung ngeei diing hi," achi hi. Amen. Huchi hi heh, hungta in, Lalpa Jesu! 21 I Lalpa Jesu Khrist hehpihna chu na bawnva kawmah umta hen. Amen.
The Old Testament of the Holy Bible
1 Migiloute lemguat banga paingeiloua, Misualte lampi a zong ding ngeilou a, Huleh musittute touphah a zong tou ngeilou mi chu ahampha hi. 2 Hizongleh a kipaahna chu LALPA daan ah ahi a, Huleh a daan thu chu suun leh jaanin angaihtuah ngiitngeet hi. 3 Amah chu tuiluang kawma Sing kisuan, A hun tenga gahveu bang ahi diing a, A nah zong avuai ngei sih a, Huleh abawl photmah alamzang diing hi. 4 Migiloute chu huchibang ahi sih va, Himahleh buhsi huih in amuutmang bang ahi uhi. 5 Hujiahin migiloute chu vaihawmna ah ading thei sih diing va, Misualte zong midihtatte kikhopna ah ading thei sih diing uhi. 6 Ajiahchu LALPA'N midihtatte lampi ahe a, Hizongleh migiloute lampi chu abeimang diing hi.
1 Bang diinga namte thangtawm a, Huleh bang diinga mite'n sil phatuamlou suangtuah ahi viai? 2 Leitung kumpipate akisa suausuau va, Huleh vaihawmtute'n zong LALPA leh a Thaunuh tungah thu aphial va, 3 "A gaahnate uh i sutan diing va, A khauhualte uh ei apanin i paaimang diing uh,"chiin. 4 Amah vaan a toupa anui a, Lalpa'n amahuh anuihsan diing hi. 5 Huzohchiangin Ama'n a kawmvah lungthahin thu asoi diing a, Huleh thangtawmtahin amahuh asumangbang diing hi. 6 "Keimah ngeei in ka Zion taang siangthou ah ka Kumpipa chu ka tousahta hi." 7 "LALPA thusehsa chu ka phuangdoh diing hi. LALPA'N ka kawmah, 'Nang chu ka Tapa na hi a, Tuni in ka hung hingkheta hi. 8 Hung ngeen inla, huchiin namte chu na gouluah diingin, Huleh kawlmong tawp tan chu na goutan diingin ka hung pe diing hi. 9 Nangma'n amahuh chu siih chiang in na jeepgawp diing a, Beelkhengtute'n beel atahgawp bangun amahuh chu na tatgawp diing,'" achi hi. 10 Hujiahin tuin kumpipate Aw, Pilta unla, leitung vaihawmtute Aw, hesiamta un. 11 Lau leh zahtaat kawmin LALPA nna tong unla, Liingkawmin kipaah un. 12 Tapa chu tawp un, huchilou inchu alungthah kha diing hi, Huleh lam lahah na beimang kha diing uh, Lungthah pah thei ahi ngaala. Amah beelte zousiah ahampha uhi.
A TAPA ABSALOM APAT A ATAAIMANG LAIA DAVID PHATNA LA.
1 Aw LALPA, kei hung subuaite bangchilawma pung ahita viai mah! Kei dou diingin tampi athou uhi. 2 "Amah a diingin Pathian ah hutdohna mawngmawng aum sih," Chia ka tungtaang thusoite tampi aum uhi. Selah. 3 Hizongleh Aw LALPA, nang chu ka kiimveel a diingin phaw na hi a, Ka loupina leh ka lu domkaangpa nahi hi. 4 Ka aw in LALPA chu ka kou a, Huleh Ama'n a taang siangthou akipanin ahung dawng hi. Selah. 5 Kei chu ka lum a, huleh ka ihmuta, LALPA'N ahung na veenbit jiahin ka khanglouta hi. 6 Ahung dou a, ahung uum suaah mi asiing asaang zong ka lau sih diing hi. 7 Aw LALPA, thou inla, Aw ka Pathian,hung hunkhia in, Nangma'n ka meelma zousiah khaguh na vuaahgawpsahta ngaala, Migiloute ha na suhbalsahta hi. 8 Hutdamna chu LALPA a ahi, Na vangpiaahna chu na mite tungah umta hen. Selah.
LA PUITU A DIING. NEGINOTITA SAH DIING. DAVID PHATNA LA.
1 Ka dihtatna Pathian Aw, ka T hung kouh chiangin hung dawng in. Ka mangbat chiangin nangma'n na hung sunavaaha, Hung khotuah inla, Ka haamteina hung ngaikhiain. 2 Aw nanguh mihing tate, bangtan ahiai ka loupina chu mualphouna na suaahsah diing uh? Bangtan ahiai sil bangmalou na ngaihnat va, Huleh juauthu na hawl diing uh? Selah 3 Hizongleh LALPA'N Pathian ngaihsahmi Amah a diingin akoihtuam chih he jaw un. Amah ka kouh chiangin LALPA'N ahung ngaikhe diing hi. 4 Lau unla, sual bawl sih un. Na lupna tungvah na lungtang un ngaihtuah ngiitngeet unla, daai kiikeeiun. Selah. 5 Dihtatna kithoihnate laan unla, LALPA chu muang un. 6 "Kua'n ahiai hoihna himhim keiuh hung musah diing?" chi tampi aum uhi. LALPA, na meel vaah in ka tunguh hung salhvaah in. 7 A buh uh leh a uain thah uh ahung pun chianga a kipaahna uh saanga kipaahna loupijaw Ka lungtang ah na umsah hi. 8 Hamuangtahin ka lum diing a, ka ihmu diing; Ajiahchu Aw LALPA, nangmah chauhin bittahin na hung teengsah hi.
LA PUITU A DIING. NEHILLOT A SAH DIING. DAVID PHATNA LA.
1 Ka thute ah na bil hung doh inla, Aw LALPA, ka taunate ngaihtuah in. 2 Ka Kumpipa leh ka Pathian, ka kikouna aw ngaikhia in, Ajiahchu na kawmah ahi ka haamtei diing. 3 Aw LALPA, jiingkaalin ka awnaja diing a, Jiingkaalin ka haamteina na kawm lam ka hung tut diing, Huleh ka hung entou zing diing hi. 4 Ajiahchu giitlouhna kipaahpih Pathian na hi sih a, Migiloute zong na kawmah ateeng sih diing uhi. 5 Mikiuangsahte chu na mitmuh ah ading thei sih diing va, Sualna natong zousiah nangma'n na hua hi. 6 Juauthu soite chu nangma'n na sumang a, LALPA'N sisan suahhaat leh heemhaat mi chu akihdah hi. 7 Hizongleh kei chu na lungsiatna tullou kiningchingtah jiahin na inn ah ka hung luut diing a, Huleh lau kawmin na biahinn siangthou ah ka hung be diing hi. 8 Aw LALPA, ka meelmate jiahin na dihtatna ah hung pui inla, Na lampi chu ka ma ah kihungsah in. 9 Ajiahchu a kam vah ginumna mawngmawng aum sih a, A sunglam uh chu siatna ngen ahi. A lawi uh haan kihong ahi a, A lei un heemthu asoi uhi. 10 Aw Pathian, amahuh mohin phuangdoh in, A lemguatna ngeei un amahuh puuh henla, A tatkhelhnate uh tam jiahin amahuh paaikhia in, Ajiahchu na tungah ahel uhi. 11 Hizongleh nangmah hung beelte zousiah nuam uh henla, Nuamin kikou zing uh henla, huleh nangma'n amahuh liahkhuh in, Na min ngainate zong nangmah ah nuamin um uhheh. 12 Ajiahchu Aw LALPA, nangma'n midihtat chu na vangpiaah diing a, Deihsahna in amah chu phaw bangin na uum suaah diing hi.
LA PUITU A DIING. NEGINOTH A SAH DIING. DAVID PHATNA LA.
1 Aw LALPA, lungthah in hung taai sinla, Thangtawm in zong hung sawi hiai sin. 2 Hung khotuah in, Aw LALPA, ajiahchu ka gimgawpta hi. Aw LALPA, hung sudam in, ajiahchu ka guhte ana vehta hi. 3 Ka hinna zong nasataha mangbangin aumta; Hizongleh Aw LALPA, bangtan ahiai? 4 Hung kihkiit in, Aw LALPA, ka hinna hunkhiain. Na lungsiatna tullou jiahin hung hunkhia in. 5 Ajiahchu sihna ah nangmah heetzingna aum sih; Sheol ah kuan ahiai na tunga kipaahthu soi diing? 6 Ka maauna lamah ka bahgawptaa; Jaan khovaahin ka lupna chu tui ah ka kilaamsah a; Ka lupna chu ka mittui in ka tapkawt hi. 7 Ka mit chu lunggimna jiahin ase hulhul a, Ka meelmate zousiah jiahin ahung teeh hiaihiai hi. 8 Nanguh giitlouhna natong zousiah, hung paisan veh un, Ajiahchu LALPA'N ka kah ging ajata hi. 9 LALPA'N ka ngetna angaikheta a, LALPA'N ka haamteina asaang diing hi. 10 Ka meelmate zousiah azum diing va, huleh nasatahin amangbang diing uh; Amahuh akinunghei diing va, thakhatin azum diing uhi.
DAVID SHIGGAION, BENJAMIN MI, RUSH THUSOI TUNGTAANG A LALPA PAAHTAWINA A ASAH
1 Aw LALPA ka Pathian, nangmah ka hung beelta a, Ahung delhtute zousiah lahah hung hundam inla, Huleh hung hunkhia in. 2 Huchilou inchu huumpibahnei bangin ka hinna abottel kha diing hi, Hunkhetu um louh laiin ama'n ahung maltel diing hi. 3 Aw LALPA, ka Pathian, hikhu ka na bawlta a, Ka khut a vaihawmna dihlou ana-um ahih a, 4 Keimah toh kilema um chu giitlouhna a thuh ka na hih leh, Ajiah umloua ka meelma ka suam leh, 5 Meelma in ka hinna chu deih henla, makhelh heh, Huleh ka hinna chu lei ah tuanchil henla, Huleh ka loupina zong leivui lahah sial mei heh. Selah. 6 Aw LALPA, na lungthahin thou inla, Ka meelmate thangtawmna dou diingin kisa in, Huleh kei a diingin thou in; nang in vaihawmna na guatta ngaala. 7 Huchiin mi chin kikhawmte'n nang hung uum suaah uh heh, Huleh nang chu a atungvah sangtahin kiheikiit in. 8 LALPA'N mi chin avaihawm a, Aw LALPA, keimah a ka dihtatna leh ka lungsim a hoihna um bangjeelin ka siamtanna sulang in. 9 Aw, migiloute giitlouhna chu hung bei henla, Hizongleh midihtat chu sukip in, Ajiahchu Pathian dihtat in lungsimte leh lungtangte aenchian veu ahi. 10 Lungtang a dihtatte hundamtu Pathian chu ka phaw ahi. 11 Pathian chu vaihawmtu dih ahi, Huleh Pathian in a lungthahna ni chinin asulang hi. 12 Mi'n alung ahei louh leh, Pathian in naamsau ataat hiam diing hi, A thalpi chu aluaita a, kaap diingin amanta hi. 13 Sihna hiamzatte zong Amah diingin bawlzoh ahita a, A thaltangte chu meikuang in abawl hi. 14 Ngai in, migilou in giitlouhna ahingkhia a, Silhihkhelhna apaai a, Huleh juauthu ahingkheta hi. 15 Kokhuuh abawl a, thuuh tahin atou a, Huleh a khuuh toh ah amah aketa hi. 16 Amah silhihkhelh mah chu a lutung ah ahung tukiit diing a, Hiamngaamtaha a silbawl chu amah siipjaang ah ake diing hi. 17 A dihtatna bangjeelin LALPA chu ka phat diinga, Huleh Tungnungpeen LALPA kawmah paahtawina la ka sa diing hi.
LA PUITU A DIING. GITTITH A SAH DIING. DAVID PHATNA LA.
1 Aw LALPA, ka Lalpa uh, Leitung tengteng ah na min hoih hina lawmlawm e! Na loupina chu vaante tungah na taahlang hi. 2 Meelma leh phubalatu na suhdaihna diingin, Na meelmate jiahin naungeehte leh nawiteeplaite kam a pawt in haatna na sudetta hi. 3 Na vaante, na khutzung natohna, Ha leh aahsite a mun mun a na koihkipte ka ngaihtuah chiangin, 4 Mihing bang ahi a huchilawma na ngaihtuah? Huleh mihing tapa zong bang ahi a na ngaihsah? 5 Ajiahchu nangma'n amah chu angelte saanga ngiamjaw deuhin na bawl a, Huleh loupina leh paahtawina na khuhsah hi. 6 Nangma'n amah chu na khut natohte tungah thu na neisah a, Sil zousiah a keeng nuaiah na koih hi, 7 Belaam leh bawng zousiah toh, Ahi, gamsate haw toh zong, 8 Tungleeng vate leh tuilianpi a ngate, Huleh tuipi a vaahleh taphotte toh. 9 Aw LALPA, ka Lalpa uh, Leitung zousiah ah na min hoih hina lawmlawm e!
LA PUITU A DIING. ALMUT LABBEN A SAH DUNG. DAVID PHATNA LA.
1 Aw LALPA, ka lungtang zousiah in ka hung phat diing a, Na silmah bawl zousiah ka soi diing hi. 2 Nangmah ah kipaahin ka nuam diing a, Aw Tungnungpeen, na min phatin la ka sa diing hi. 3 Ka meelmate ataaijaah chiangun, Na ma ah apuuh diing va abeimang diing uhi. 4 Ajiahchu nangma'n ka hihna dihtah ah na hung huhta a, Dihtattaha vaihawm in laltouphah ah na tou hi. 5 Namte chu na vau a, migilou na sumang a, A min uh zong kumtuang kumtuanga diingin na thaimangta hi. 6 Aw meelma, kumtuanga tawp diingin siatna chu ahung tungta, Huleh nangma'n khopite chu na suchim a, Amahuh heetzingna ngeei chu amahuh toh abeimangta hi. 7 Hizongleh LALPA chu kumtuangin aum diing a, A laltouphah chu vaihawmna diingin abawl detta hi. 8 Ama'n dihtatna in khovel vai ahawmsah diing a, Khentuam neilouin mi chih vai ahawmsah diing hi. 9 LALPA chu nuainet-a umte diingin kibuhna ahi diing a, Mangbat hun chianga kihuumbitna ahi diing hi. 10 Huleh na min hete'n nangmah ah a tahsanna uh anga diing uh; Ajiahchu Aw LALPA, nangma'n nang hung hawlte na nuse sih hi. 11 Zion a um LALPA kawmah phatna la sa unla, Mite lahah a silbawlte phuang un. 12 Sisan phuba latupa'n amahuh ahezing a, Migentheite kikou chu amangngilh sih hi. 13 Aw LALPA, hung khotuah inla, Ahung hote apat ka mangbatna chu en in, Nangma'n sihna kulh kotkhaah apat na hung domkaangta hi, 14 Huchia na paahtawina zousiah ka soi theihna diingin leh Zion tanu kulh kotkhaahte a na hutdamna a ka nuam theihna diingin. 15 Namte chu a kokhuuh toh vah atum va, Aguuha a leen jaah vah amahuh keeng mah a-awhta hi. 16 LALPA chu Amah leh Amah akihesah a, Ama'n vaihawmna atongdoh hi; Migilou chu amah khutsuaah ngeei ah a-awh hi. Higgaion. Selah 17 Migiloute chu Sheol ah akiheiluut diing va, Huleh Pathian mangngilh nam zousiah zong. 18 Ajiahchu tasamte chu mangngilhin aum zing sih diing va, Gentheite kinepna zong kumtuangin abeimang sih diing hi. 19 Aw LALPA, thou in, mihing gualzousah sin. Namte chu na mitmuh ah vaihawmkhumin um uh heh. 20 Amahuh chu lautahin umsah in, Aw LALPA, Namte'n mihing giap ahi uh chih kihe uh heh. Selah.
1 Bangachia gamlataha ding na hiai, Aw LALPA? Bang diinga mangbat hun laia kiphual na hiai? 2 Migilou in kiuahsahna in migentheite nasatahin adelh hi; A silgilou suangtuah vah amahuh mah awh uh heh. 3 Ajiahchu migilou in a lungtang uutlam asuang a, Huleh mihuaiham chu aphat a huleh LALPA asoisia hi. 4 Migilou iii kiuahsah meel puain Pathian ahawl sih, Pathian chu a ngaihtuahnate zousiah ah aum sih hi. 5 A lampite chu alohching zing a; Na vaihawmnate chu amuh phaahlouh tunglam gamlatah ah aum hi; A meelmate zousiah ahihleh ama'n anuihsan thoh hi. 6 Ama'n a lungsim in, "Ka liing sih diing, Akhang akhang in siatna ka tuaah sih diing," achi hi. 7 A kam chu haamse lohnate, heembawlnate, nuaisiahnate in adim a, A lei nuaiah kheltatna leh buaina aum hi. 8 Khosung a taanguuhna munte ah atou a, Munsip ah poikhoihloute athat jeel a; A mit in panpihbeite aguuhin ataang hi. 9 Huumpibahnei in munsip a ataan bangin ama'n munsip ah ataang a; Migentheite ahawlluut chiangin a leen in aman hi. 10 Kuunin ageem a, Huleh panpihtu neiloute chu amah haatna jiahin apuuh uhi. 11 Ama'n a lungsim in, "Pathian in amangngilhta, A maai aphualta, Amu ngei nawn het sih diing," achi hi. 12 Aw LALPA, thou in. Aw Pathian, na khut domkaangin. Suhgentheiha umte mangngilh sin. 13 Bangchidaan ahiai migilou in Pathian amuhsit a, A lungsim a, "Ajiah na phuut sih diing," achih? 14 Muh chu na mu tham hi, ajiahchu na khut a thuh diingin buaina leh lunggimna na enzing hi. Migenthei na kawmah ahung kikeemsah a, Nangmah chu tagahte panpihtu na hi. 15 Migilou leh mihoihloute baan subong inla, Na muh keei louh tanin a giitlouhna hawldoh in. 16 LALPA chu kumtuang kumtuangin Kumpipa ahi a, Namte chu Amah gam apatin abeimang uhi. 17 Aw LALPA, nangma'n kingaingiamte sildeih na ngaikhiaa, A lungtang uh na suhaat diing a, Na bil chu ja diingin na doh diing hi, 18 Pa beite leh simmoh thuaahte siamtandaan sulang diingin, Huchia leitung a mi'n asuhlau nawn louhna diingun.
LA PUITU A DIING. DAVID PHATNA LA.
1 LALPA ah ka tahsanna ka ngaa; Bangchidaanin ahiai ka hinna kawma, "Na taang ah va bangin valeeng mang in," na chih uh? 2 Ajiahchu, en un, migiloute'n a thalpi uh aluai va, Lungtang dihtat pomi aguuha akaap theihna diingun a thaltang uh thalgui ah mansain akoih uhi. 3 Innbul suangphuumte suhsiat-a aum leh, Midihtat in bang ahiai abawl theih diing? 4 LALPA chu a biahinn siangthou ah aum a, LALPA laltouphah chu vaan ah aum a; A mit in aen a, A mitvun in mihing tate aenchianjeelhi. 5 LALPA'N midihtat aenchian a, Hizongleh migilou leh ngongtatna deihmi chu a hinna in ahua hi. 6 Ama'n migiloute tungah suangmeihol ajusah diing a; Mei leh kaat leh huihpi lumtah chu a haitan uh ahi diing hi. 7 Ajiahchu LALPA chu adihtat a, Ama'n dihtatna angaina a, A meel in midih aen hi.
LA PUITU A DIING. SHEMINITH A SAH DIING, DAVID PHATNA LA.
1 Hung panpih in, LALPA, Ajiahchu Pathian ngaihsah mi aum nawn sih a, Mihing tate laha kipan mi ginumte amangta uhi. 2 Mi chin in a innveengte kawmah juauthu asoi va, Phatheemna muuh leh lungsim nih nei kawmin thu asoi uhi. 3 LALPA'N phatheemna muuh zousiah aatkhia henla, Huleh kiletsahna thusoina lei zong. 4 Amah un, "I lei un i gualzou diing uh, I muuhte chu eiuh a ahi, Koi ahiai i tunga thunei um?" achi uhi. 5 "Gentheite kisimmohna jiah leh tasamte khuaisatna jiahin," LALPA'N, "Tuin ka thou diing a, A nuihsantu apatin amah chu bittahin ka umsah diing," achi hi. 6 LALPA thute chu thu siangthou ahi a, Dangka leitung a haaltuina mei a etkhiahsa, Sagihvei hihsiangthousa bang ahi. 7 Aw LALPA, nangma'n amahuh chu na keem diing a, Hi khang a mite apat kumtuangin na huumbit diing hi. SMihing tate laha thulimlouhna paahtawia aum chiangin, Migiloute chu jaleentahin avaah lehleh uhi.
LA PUITU A DIING. DAVID PHATNA LA.
1 Bangtan ahiai, Aw LALPA? Kumtuangin na hung mangngilh diai? Bangtan ahiai kei apat na maai na phual diing? 2 Ni chin a ka lungtang a lungkhamna neiin, Bangtan ahiai ka lungsim a ka lemguat diing? Bangtan ahiai ka meelma ka tunga paahtawia aum diing? 3 Ngaihtuah inla, hung dawng in, Aw LALPA ka Pathian; Ka mit hung suhvaahsah in, Huchilou inchu sihna ihmutna in ka ihmu kha diing hi. 4 Huchilou inchu ka meelma in, "Amah ka zouta," achi kha diing a, Huleh ka liin tahchian ka meelmate anuam kha diing uhi. 5 Hizongleh ke'n chu na lungsiatna tullou ka muangta a, Na hutdamna ah ka lungtang akipaah diing hi. 6 LALPA'N ka tunga kiningchingtaha sil abawl jiahin Amah kawmah la ka sa diing hi.
LA PUITU A DIING. DAVID PHATNA LA.
1 Mingol in a lungtang in, "Pathian aum sih," achi hi. Asezouta va, Sil kihdahhuai abawl va, Sil hoih bawl mawngmawng aum sih uhi. 2 Hesiam leh Pathian hawl mi aum viai mah chih hawlin, LALPA'N vaan akipan mihing tate aensuh hi. 3 Ahilou lamah apeet veh va, Abuaahbaang zou vehta uhi; Kuamah sil hoih bawl aum sih a, Khatmah zong aum sih hi. 4 Silgilou bawl zousiah in helou ahi viaimah? Koi ahiai tanghou aneeh bangva ka mite ne? Huleh LALPA lah akou ngei saam sih uh. 5 Hutah ah chu lau mahmahin aum uhi, Ajiahchu Pathian chu midihtat suan toh aum hi. 6 Migenthei lemguatna chu na selphou va, Hizongleh LALPA chu a kihuumbitna ahi. 7 Israelte hutdamna chu Zion apatin hung pawt le aw! LALPA'N a mi saltaangte apuikiit chiangin, Hu hun chiangin Jakob anuamta diing a huleh Israel akipaahta diing hi.
DAVID PHATNA LA.
1 LALPA, koi ahiai na biahbuuh a umzing thei diing? Koi ahiai na taang siangthou a teeng thei diing? 2 Soiseelbeia gamta a, Dihtatna a bawl a, Huleh lungtang a thutah soi mi; 3 A lei a mi soise ngeilou a, A innveeng tunga zong silgilou bawl ngeilou a, A lawm min zong soise ngeilou mi; 4 A mitmuh a migilou chu musit a, Hizongleh LALPA laute chu paahtawi a; Amah siatna diing tanpha a kichiam a a thu heng ngeilou mi; 5 Apung deih diinga a sum thunglaahsah ngeilou a, Mohnabei siamlouhtangsah diinga golhna zong la ngeilou mi khu ahi. Hichibanga bawltu chu bangchihtanin suhliingin aum sih diing hi.
DAVID MIKTAM.
1 Aw Pathian, hung huumbit in, ajiahchu nangmah ah ka tahsanna ka koih hi. 2 LALPA kawmah, "Nang chu ka Lalpa na hi a, Nang apat chihlouh hoihna ka nei sih hi," ka chi hi. 3 Lei a misiangthou um zousiah thu ah, "Amahuh chu mithupite ahi va, amahuh tungah ka kipaahna zousiah aum hi. " 4 Pathian dang deih mite chu a lungkhamna uh suhpung ahi diing a, Sisan dawn sillat alat uh chu ka leihbo sih diing, Ka muuh in a minte uh ka lou saam sih diing hi. 5 LALPA chu ka goutan leh ka nou tan ahi a, Nangma'n ka tanvou chu na hung suhkipsah hi. 6 Mun nuamtahte ah kei diingin gamgi khenin aumta a, Tahzetin ka goutan chu kei diingin ahoih hi. 7 LALPA ahung lemguatsahtu chu ka phat diing a, Ka lungtang in zong jaan chiangin ahung thuhilh hi. 8 LALPA chu bangchihlaipouhin ka ma ah ka umsah gige a, Amah ka jiatlam a aum jiahin suhliingin ka um sih diing hi. 9 Hujiahin ka lungtang akipaah a huleh ka loupina anuam hi, Ka tahsa zong bittahin atawldam diing hi. 10 Ajiahchu ka hagau Sheol ah na nuse sih diing a, Na Misiangthou chu muatna mu diingin na phal saam sih diing hi. 11 Nangma'n hinna lampi na hung hesah diing a, Na ma ah nuamna dimleet aum a, Na khut jiatlam ah kumtuang kipaahna aum hi.
DAVID HAAMTEINA.
1 Aw LALPA, ka dihna thu ngaikhia inla, Ka kikou ging ngaikhawh in; Juauthu soihaat muuh a pawt hilou ka haamteina lamah na bil hung doh in. 2 Ka siamtanna chu nang apat a pawt hi henla, Na mit in khentuam neilouin en hen. 3 Nangma'n ka lungtang na enchiantaa, Jaan chiangin na hung veh a, Na hung enchianta a bangmah na mu sih hi; Ka kam in gilou asoi sih diing ka chi tinten hi. 4 Mihingte natoh thu ah jaw, Na muuh a thu pawt jiahin thagumsuah lampite apatin keimah ka kiheemkheta hi. 5 Ka kalsuante'n na lampite ajuidet a, Ka keengte atolh sih hi. 6 Aw Pathian, nangmah ka hung kou hi, ajiahchu na hung dawng diing ahi; Na bil hung doh inla huleh ka thusoi ngaikhia in. 7 Amahuh doutute apatin na khut jiatlam bitna diinga beelte Hundampa Aw, Na lungsiatna tullou chu lamdangtahin kilangsah in. 8 Na mit nauta bangin hung keem inla, Na haliim nuaiah hung phual in. 9 Ahung nuaisiah migiloute, ahung uum suaah ka sihtheihna meelmate lah apatngeeiin. 10 Amahuh chu a thau ngeei va tuamin aum va, A kam un kiuangsahtahin thu asoi uhi. 11 Tuin ka lampi chin vah ahung uum suaah va, Tual a hung puuhsah diingin a mit uh ka tungvah atusah uhi. 12 Amah chu huumpibahnei sa keihjaah uut bang, Huleh huumpibahnei luunlai munsip a taangpang bang ahi. 13 Aw LALPA, thou inla, Amah maaituaah inla kaingiam in; Ka hinna chu migilou apatin na naamsau in hunkhia in. 14 Aw LALPA, na khut in hu mite apatin, A tanvou uh hi damsung daih diing chauh, Huleh a gilpi uh na gou a na suhdim hu khovel mite apat hung hunkhia in. Amahuh chu tate ah alungkim va, Huleh a silneihte uh a ta-ngeehte uh diingin anuutsiat uhi. 15 Ke'n chu dihtatna neiin na meel ka mu diing a, Ka khanloh chiangin nangmah batna in ka lungkimta diing hi.
LA PUITU A DIING, SAUL LEH A MEELMATE ZOUSIAH APAT LALPA'N AHUTDOHNIA LALPA SUAAHPA DAVID IN HI LA THUTE LALPA KAWMA ASOI AHI.
1 Huleh ama'n: Aw O LALPA, ka haatna, ka hung lungsiat hi, achi hi. 2 LALPA chu ka suangpi, ka kulhpi leh ka hunkhetu ahi. Amah chu ka tahsanna ka koihna ka Pathian, ka haatna ahi, Ka phaw leh ka hutdamna kii leh ka kihuumbitna ahi. 3 Phattaah LALPA chu ka kou diing a, Huchiin ka meelmate lahah hutdohin ka um diing hi. 4 Sihna khauguite in ahung uum kiimveel a, Huleh Pathian ngaihsahlou mi luuitui khauh in ahung sulau hi. 5 Sheol khauguite'n ahung uum kiimveel va, Sihna thaangte in ahung maaituaah uhi. 6 Ka lungkhamin LALPA chu ka kou a, Huleh ka Pathian kawmah hung panpih diingin ka kikou hi; Ama'n a biahinn apatin ka awajataa, Huleh panpih diinga a ma a ka kikouna chu a bil in ajatahi. 7 Hutahin lei akiliing a, huleh akithing a, Amah alungthah jiahin taangte kingahna haw zong akithing a, ahung kiliing hi. 8 A naahkua apatin meikhu ajaamtou a, Huleh a kam a mei in akaangtum jungjung a; Hikhu in suangmeihol akuangsah humhum hi. 9 Ama'n vaante zong aluai kuun a, Huleh ahung suh a mialna meipi sahtah zong a keeng nuaiah aum hi. 10 Huleh Amah chu cherub tungah atuang a aleeng hi; Huleh huih haj aahte tungah haattahin aleeng hi. 11 Ama'n mial chu akibuhna mun in asiam a, Mialna tui leh huihkhua meipi sahtahin Amah auum kiimveel hi. 12 Amah ma a vaah apatin Meipi sahtah leh gialtangte leh meiaam tangte ahung suaahdoh uhi. 13 LALPA'N vaante ah vaan agingsaha, Huleh Tungnungpeen in a aw asuahsah a, Gialtangte leh meiaam tangte zong akesah hi. 14 Huleh Ama'n a thalte chu akaapdoh a, amahuh chu asudalhtahi; Huleh kawl aphesah joljol a amahuh chu asubuai vengvung hi. 15 Hutahin tuiluannate ahung kilang a, Aw LALPA, na vauna leh na naahkua a huu pawt in amuut jiahin Leilung kingahnate suhlatin ahung umta hi. 16 Ama'n chu tunglam akipanin ahung baan a ahung tu hi, Tui tampi apatin ahung kaidohta hi. 17 Ka meelma haattah apat leh kei hung mudahte lahah ahung hunkhia a, Ajiahchu amahuh kei diingin ahaat talo ngaalva. 18 Amah un chu ka vangsiat ni in ahung sual va, Hizongleh LALPA chu ka kingahna ahi. 19 Ama'n chu mun awngthawltah ah ahung puikhia a, Ka tunga akipaah jiahin ahung hunkheta hi. 20 LALPA'N ka dihtatna dungjuiin ahung thuh a; Ka khutte sianthouna dungjuiin ahung ditta hi. 21 Ajiahchu LALPA lampite ka tawna, Huleh ka Pathian apat giloutahin ka peetmang ngei sih hi. 22 Ajiahchu a thuguatte zousiah ka ma ah aum a, Huleh a thupiaah chu keimah apat ka koihmang ngei sih hi. 23 A ma ah zong soiseelbeiin ka um a, Huleh ka giitlouhna apat ka kiheemkhia hi. 24 Hujiahin LALPA'N ka dihtatna dungjuiin ahung dittaa, A mitmuh a ka khutte asianthou bang dungjuiin. 25 Mikhotuahsiamte kawmah na khotuahsiam a, Misoiseelbeite kawmah na soiseelbei hi. 26 Misiangthoute kawmah na siangthou a, Huleh mithusete kawmah mithusia bangin na um hi. 27 Ajiahchu nangma'n mi gimthuaahte na hunkhia a, Himahleh mitsanghahte chu na sungiam hi. 28 Ajiahchu nangma'n ka thaumei na hung detsah a; LALPA, ka Pathian in ka mialna ahung suhvaahsah hi. 29 Ajiahchu nangmah panpihna jaalin sepaih pawlte ka dou thei a, Ka Pathian panpihna jaalin kulhbaang ah ka kaldoh thei hi. 30 pathian ahihleh a lampi chu soiseelbei ahi, LALPA thu chu etchian ahi a, Amah beelte zousiah diingin Amah chu phaw ahi. 31 Ajiahchu LALPA chihlouh koi ahiai Pathian? Ahihlouhleh i Pathian uh chihlouh koi ahiai suangpi? 32 pathian chu haatna a hung thuampa ahi a, Huleh ka lampi soiseelbeia siampa ahi. 33 Ama'n ka keeng chu sakhi keeng bangin abawl a, Ka mun sang tungte ah ahung koih hi. 34 Ka khutte chu gaaldou daan ajilsah a, Huchiin ka baante'n zong sum-eng thalpi aluai kuum zou hi. 35 Nangma'n na hutdamna phaw na hung pia a, Na khut jiatlam in na hung tu a, Huleh na nunneemna in mihaatin ahung siamta hi. 36 Ka kalsuante na liansahta a, Huchiin ka keeng atolh sih hi. 37 Ka meelmate ka deih a ka phata hi, Suhchimit-a aum masiah uh ka kihkiit sih hi. 38 Naahtaha ka suhliam jiahin athoukiit zou nawn sih va, Ka keeng nuaiah apuuh uhi. 39 Ajiahchu nangma'n gaaldou diingin haatna in na hung thuam a, Kei hurig dou diinga kipante chu ka nuaiah na koihta hi. 40 Ka meelmate ngawng zong na hung pia hi, Huchia kei hung hote ka suhmang theihna diingin. 41 Panpihtu ngaiin akikou va, himahleh amahuh hunkhe diing koima aum sih hi; LALPA ngeei chu akou va, hizongleh adawng tuan sih hi. 42 Hutahin leivui huih muutleeng bangin amahuh ka kheen tel dimdem a, Kholai buannawi bang giapin ka paaidohta hi. 43 Nangma'n mite kihauna lah apat na hung hunkhia a, Namte luin na hung siamta a, Ka heet ngeilouh mite'n ka nna ahung tohsah uhi. 44 Ka tanchin ajaahtah chiangun ka thu amang va, Gamdangmite ka kawmah ahung kituluut uhi. 45 Gamdangmite chu avul va, Huleh a kibuhna vapat kiliing pumin ahung pawtdoh uhi. 46 LALPA chu ahing a, ka Suangpi chu phatin um hen, Huleh ka hutdamna Pathian chu tawisangin umheh. 47 Phuba hung laahsahtu leh mite ka nuaia hung koihsahpa chu Pathian ahi. 48 Ama'n ka meelmate lah apat ahung hunkhia a, Ahi, ahung doute tungah na hung tawisang a, Mingongtat lah apat na hung hunkhia hi. 49 Hujiahin Aw LALPA, namte laiah na kawmah kipaahthu ka soi diing a, Huleh na min phatna la ka sa diing hi. 50 Ama'n hutkhiahna loupitah a kumpipa kawmah apia a, Huleh a thaunuh David leh a suante tungah a lungsiatna tullou alangsah hi.
LA PUITU A DIING. DAVID PHATNA LA.
1 Vaante'n Pathian loupina aphuang va, Huleh huihidiua in a khut natoh asulang hi. 2 Suun chinin thu asoi va, Huleh jaan chinin heetna aphuangdoh uhi. 3 Thusoi aum sih a thumal lah aum sih, A aw uh jaah ahi sih hi. 4 A tehna khau uh leitung pumpi ah zansuaahin aum a, Huleh a thu uh kawlmong tanphain athangta hi. Hute ah Ama'n nisa a diingin puaninn ajaah hi. 5 Hu nisa chu moupa, a pindan apat hung pawt bang ahi a, Huleh mihaat kitaaidemna a taai diing bangin anuam hi. 6 A suaahna chu vaan kawlmong apat ahi a, A paikualna chu atawp lehlam tanin ahi a; Huleh a lumna apat kiphual bangmah aum sih hi. 7 LALPA daan chu ahoih bukim a, hinna asiamthah hi; LALPA thupiaah chu amuanhuai a, mimawl apilsah hi. 8 LALPA thuguatte chu adih a, lungtang akipaahsah hi; LALPA thupiaah chu asiangthou a, mitte asuvaah hi. 9 LALPA launa chu asiang a, kumtuang adaih hi; LALPA vaihawmnate chu adih a, adihtat kiimveel hi. 10 Hute chu sana saangin adeihhuai jaw a, Ahi, sana haalchiim tamtah saangin zong; Khuaizu leh khuaiphaang a khuaizu taahkhia saangin ahumjaw ahi. 11 Hulou zong, hute in na suaah chu taaihilhin ka umhi; Huleh hute juih ah phattuamna nasatah aum hi. 12 Kuan ahiai dihlouhna hesiam diing? Dihlouhna kiphualte apat hung silsiang in. 13 Huleh na suaah chu tupmawng sualnate apatin hung tutaang in; Ka tungah hute thu neisah sinla, Huchiin soiseelbei ka hi diing a, Huleh tatsualna huaisetah apat mohnabei ka hi diing hi. 14 Aw LALPA, ka Suangpi leh ka Tantu, Ka kam a thu pawtte leh ka lungtang a ka ngaihtuah ngiitngeette chu Na mitmuh ah pomtaah hi hen.
LA PUITU A DIING. DAVID PHATNA LA.
1 Mangbat ni in LALPA'N hung dawng hen; Jakob Pathian min in hung veeng hen. 2 Mun siangthou akipanin panpihna hung sawldoh henla, Huleh Zion akipanin hung suhaat hen. 3 Ama'n na sillat zousiah hezing henla, Huleh na haalmang kithoihna hung pomsah hen. Selah. 4 Na lungtang deihjawng hung pia henla, Huleh na lemguat zousiah hung lohchingsah hen. 5 Na hutdamna ah nuamin la ka sa diing va, Huleh ka Pathian uh min in ka puanlaapte uh ka jaah diing uhi. LALPA'N na ngetna zousiah hung lohchingsah hen. 6 LALPAN a thaunuh ahunkhia chih tuin ka heta a; A khut jiatlam hutdamna thahaatna in a vaan siangthou akipanin Ama'n chu ahung dawng diing hi. 7 Khenkhat in kaangtalaite amuangva, Khenkhat in sakolte amuang uh; Hizongleh ei un chu LALPA i Pathian uh min i hezing diing uhi. 8 Amahuh chu kaihkuunin aum va apuuhta uh; Hizongleh eiuh chu i thou va i ding tang uhi. 9 LALPA, hunkhia in. I kouh ni chiangin Kumpipa in hung dawng hen.
LA PUITU A DIING. DAVID PHATNA LA.
1 Aw LALPA, kumpipa chu na haatna ah anuam diing a, Huleh na hutdamna ah kipaah na meijeen inchia! 2 A lungtang deihlam na pia a, Huleh a muuh a asilngette na iit sih hi. Selah. 3 Ajiahchu hoihna vangpiaahnate toh amah na lamtuaah a, A lu tungah sana chiimtah lallukhuh na khuhsah hi. 4 Ama'n na kawmah hinna ahung ngeen a, huchu na pia hi, Kumtuang kumtuanga damna ngeei chu. 5 Na hutdamna ah a loupina alian a, Paahtawina leh loupina a tungah na ngata hi. 6 Ajiahchu nangma'n amah chu kumtuanga mihamphapeen in na bawl a, Na meel jiahin kipaahna nasatah na neisah hi. 7 Ajiahchu kumpipa'n LALPA amuang a, Huleh Tungnungpeen lungsiatna tullou jaalin suhliingin aum sih diing hi. 8 Na khut in na meelmate zousiah amudoh diing a, Na khut jiatlam in nangmah hung mudahte amudoh diing hi. 9 Na lungthah hun chian amahuh chu haaltuina meikuang lutlut bangin na bawl diing a, LALPA'N lungthahin amahuh chu avalhzou diing a, Huleh mei in amahuh akaang mang diing hi. 10 A tate uh lei apatin na sumang diing a, A suante uh chu mihing tate lah apat na sumang nalai diing hi. 11 Na tungah silgilou bawl tum uh henla, Sil hoihlou suangtuah zong leh uh, alohching sih diing uhi. 12 Amahuh a nunglam na ngatsah diing a, Na thaltangte chu na thalmung ah amahuh maaingat a kimanin na bawl diing hi. 13 Aw LALPA, nangmah haatna ngeei ah tawisangin um in. Huchiin na silbawltheihna phatin la ka sa diing uhi.
LA PUITU A DIING. AIJELEHT HASHSHAHAR A SAH DIING. DAVID PHATNA LA.
1 Ka Pathian, ka Pathian, bang diinga hung taaisan na hiai? Kei hung hundoh diinga ka maauna thute apat bang diinga gamla na hiai? 2 Aw ka Pathian, suun in ka kikou a, Hizongleh na hung dawng sih a, Huleh jaan in ka kikou a, ka daai tuan sih hi. 3 Hizongleh nang chu na siangthou a, Israelte phatna tungah na ton hi. 4 Ka pulepate un nang ahung muang va, ahung muang va, Huchiin amahuh na hunkhia hi. 5 Nang ahung kou va, huleh hutkhiahin aum uhi; Nang ahung muang va, huchiin suhmualphouin aum sih uhi. 6 Hizongleh kei jaw mihing ka hi sih a, lung giap ka hi, Mihingte nuaisiah leh mite muhsitkahi. 7 Ahung mu zousiah in ahung nuihsan va; A muuh uh ahung kaahkhum va, a lu uh athing va, 8 "LALPA amuang a, Amah kihunkhesah heh, Amah tunga akipaah jiahin kihunkhesah heh," achi uhi. 9 Hizongleh nang chu suul apat a hung lakhetu na hi a; Ka nu nawi tunga ka um laiin nangma'n nangmah muanna na hung neisahta hi. 10 Suul apat nangmah tunga ngahkahi a, Nang chu ka nu sunga ka umlai peh apat ka Pathian nahihi. 11 Hung gamlaat hiai sin, Ajiahchu mangbatna anai a; Ahung panpih diing mawngmawng aum sih hi. 12 Bawngtal tampi in ahung uum suaah a, Bashan bawngtal haatpipite'n ahung uum khepkhup uhi. 13 Huumpibahnei husia humhaam bangin Kam ahung kaahkhum uhi. 14 Tui banga leihbuaahin ka um a, huleh ka guh zousiah akilawi hi; Ka lungtang chu khuailu bang ahi a, ka sungah atuisuaahta hi. 15 Ka tha lah leibeel hal bangin agota a, Huleh ka lei zong ka dangtawng ah abeh bihbehhi; Nangma'n sihna leivui ah na hung puiluutta hi. 16 Ajiahchu uite'n ahung uum suaah a; Migilou hon in ahung uumbit va; Amah un ka khut leh keengte avut uhi. 17 Ka guh zousiah ka sim thei a, Ahung en va huleh ahung ensaal uhi. 18 Ka puansilhte a lahvah ahawm va, Huleh ka silhleteen tungah ai asaan uhi. 19 Hizongleh Aw LALPA, nangma'n chu hung gamlaat sin; Aw ka Haatna, hung panpih diingin kin in. 20 Ka hinna naamsau apat hunkhia inla, Ka hinna neihsun ui silbawltheihna apat hunkhia in. 21 Huumpibahnei kam apat leh gam bawngtal haw kii apat hung hunkhia in. Ajiahchu na hung ngaikhetahi. 22 Ka unaute lahah na min ka phuang diing a, Kipungkhawmte lahah nangmah ka hung phat diing hi. 23 Nanguh LALPA laute haw, Amah phat un. Jakob suan zousiah haw, Amah paahtawi un. Israel suan zousiah haw, Amah lau un. 24 Ajiahchu Ama'n gimthuaahmi gimthuaahdaan amusit sih a, Kihdah zong akihdah sih hi; Huleh a maai Amah apat aphual sih a; Hizongleh Amah akouh chiangin angaikhia hi. 25 Kikhopna loupitah ah ka phatna chu nangmah tungtaang ahi diing a; Amah laute ma ah ka thuchiam ka taangtun diing hi. 26 Thunuaigolhte'n ane diing va atai diing uh; Amah hawlte'n LALPA aphat diing uhi. Na lungtang kumtuangin hing hen! 27 Kawlmong tana um zousiah in ahezing diing va huleh LALPA lam anga diing uhi, Huleh chi chin nam chin na ma ah akuunta diing uhi. 28 Ajiahchu lalgam chu LALPA a ahi a, Huleh Amah chu nam chin tunga vaihawmpa ahi. 29 Leitung a mineizou zousiah in ane diing va huleh abe diing uh; Leivui a pai suh zousiah a ma ah ahung kuun diing va, A hinna kihuumbit theiloutu ngeei in zong. 30 Chihaah khat in Amah nna atohsah diing a, Khang hung um diingte kawmah Lalpa tanchin ahilh diing uhi. 31 Amahuh ahung pai diing va huleh mipi hung piang diingte kawmah a dihtatna aphuang diing uh, Amah bawl ahi chiin.
DAVID PHATNA LA.
1 LALPA chu ka belaampu ahi a; Ka tasam sih diing hi. 2 Ama'n hampa hing dipdep munte ah ahung kualsah jeel a; Khawlna luuipang ah ahung pui hi. 3 Ka hinna ahung bawlhoihsah a; Amah min jiahin dihtatna lampite ah ahung pui hi. 4 Ahi, sihna liim guam tawnin pai mahzongleng, Silgilou himhim ka lau sih diing; Ajiahchu nangma'n na hung umpih a, Na khetbuuh leh na chiang in ahung hamuan hi. 5 Nangma'n ka meelmate mitmuhin ka ma ah ankuang na lui a; Ka lu sathau na nuh a; Ka nou adimleet hi. 6 Peellouin hoihna leh lungsiatna tullou in ka damsung tengin ahung jui zing diing a, Huleh LALPA inn ah kumtuangin ka teengta diing hi.
DAVID PHATNA LA.
1 Leitung leh a sunga um zousiah LALPA a ahi a; Khovel leh a sunga teengte toh. 2 Ajiahchu Ama'n hichu tuipite tungah adinkhia a, Huleh luuipite tungah asiamdet hi. 3 LALPA taang ah koi ahiai kai thei diing? Ahihlouhleh a mun siangthou ah koi ahiai ding thei diing? 4 Khut siang leh lungtang siangthou nei a, Thumanlouh lama a lungsim koih ngeilou a, Heemthu a kichiam ngeilou mi chu ahi. 5 Ama'n chu LALPA apat vangpiaahna amu diing a, Huleh a hutdamna Pathian apat dihtatna zong amu diing hi. 6 Hichu Amah hawlmite suan ahi a, Na meel hawl mi, Jakob ngeei chu. Selah. 7 Kotpite Aw, na lu uh phong sang unla, Huleh nanguh kumtuang kotkhaahte Aw, kikhai sang un. Huchiin loupina Kumpipa ahung luut diing hi. 8 Hi loupina Kumpipa koi ahiai? LALPA haattah leh silbawlthei, LALPA kidouna a silbawltheitah chu ahi. 9 Kotpite Aw, na lu uh phong sang unla, Nanguh kumtuang kotkhaahte, kikhai sang un. Huchiin loupina Kumpipa ahung luut diing hi. 10 Hi loupina Kumpipa koi ahiai? Sepaihte LALPA, Amah ngeei chu loupina Kumpipa ahi. Selah.
DAVID PHATNA LA.
1 Aw LALPA, ka hinna nang a diingin ka domsang hi. 2 Aw ka Pathian, nangmah ka hung muang hi; Mualphouin hung umsah sinla, Ka meelmate ka tungah gualzousah sin. 3 Ahi, nangmah hung ngaah himhim koimah mualphouin umsah sin; Ajiah beia mi heembawlte mualphouin umsah in. 4 Aw LALPA, na lampite hung theisah inla, Na lampite hung hilh in. 5 Na thutah ah hung pui inla huleh hung hilh in; Ajiahchu nangmah ka hutdamna Pathian na hi a, Ni tumin nangmah ka hung ngaah hi. 6 Aw LALPA, na lainatnate leh na lungsiatna tullou hezing in, Ajiahchu malai apat umsa zing ahi uhi. 7 Aw LALPA, ka khangdawnlai sualnate leh bohsiatnate hezing sinla, Na hoihna jiahin na lungsiatna tullou bangjeelin hung hezing in. 8 LALPA chu hoih leh dih ahi a, Hujiahin misualte chu lampi tungtaang ahilh hi. 9 Thunuaigolhte chu vaihawmna dih ah apui a, Huleh thunuaigolhte chu Amah lampi ahilh hi. 10 A thuhun leh a thutheihsahte juite a diingin LALPA lampi zousiah chu lungsiatna tullou leh thutah ahi. 11 Aw LALPA, na min jiahin ka sualna ngaidam in, Alian mahmah ngaala. 12 LALPA lau mi koi ahiai? Amah chu Ama'n a lampi teel diing ahilh diing hi. 13 A hinna chu nuamsatahin aum diing a, Huleh a suante'n leigou aluah diing uhi. 14 LALPA thuguuh chu Amah laute diingin ahi a, Huleh a thuhun chu amahuh ahesah diing hi. 15 Ka mit in LALPA lam aen zing a, Ajiahchu Ama'n ka keengte leen apat asuutkhe diing hi. 16 Kei lam hung nga inla hung khotuah in; Ajiahchu nuutsiat leh suhgimin ka um hi. 17 Ka lungtang buainate ahung lian hi; Aw, nangma'n ka mangbatna apat hung puidoh in. 18 Ka gimthuaahna leh ka hahsatna hung en inla, Ka sualna zousiah hung ngaidam in. i9 Ka meelmate en in, ajiahchu tampi ahi va, Huleh huat chihtahin ahung hua uhi. 20 Ka hinna veeng hoih inla hung hunkhia in; Mualphouin hung umsah sin, ajiahchu nangmah ka hung beel hi. 21 Lungsim dihtah leh dihna in hung huumbit hen, Ajiahchu nangmah ka hung ngaah hi. 22 Aw Pathian, a mangbatna zousiah apat Israel tankhia in.
DAVID PHATNA LA.
1 Aw LALPA, ka siamtandaan sulang in, Ajiahchu lungsim dihtah puain ka um hi. LALPA ka muangta a, Hujiahin ka tolh sih diing hi. 2 Aw LALPA hung enkhia inla, hung chian in; Ka lungtang leh ka lungsim endih in. 3 Ajiahchu na lungsiatna tullou ka ma ah aum a, Huleh na thutah ah ka umta hi. 4 Mi thulimloute toh ka toukhawm sih a, Huleh lepchiahte toh zong ka paikhawm sih diing hi. 5 Migiloute umkhawmna ka hua a, Huleh mihoihloute toh ka toukhawm sih diing hi. 6 Ka khutte chu poikhoihlouh etsahna in ka sil diing a, Huchibangin na maitaam ka veel diing hi, Aw LALPA. 7 Kipaahthu soina aw toh ka phuan theih a, Huleh na natoh limdang zousiah ka hilh theihna diingin. 8 Aw LALPA, na umna inn ka ngaina a, Huleh na loupina umna mun zong. 9 Ka hinna misualte toh lakhawm sinla, Ka hinna sisan suahhaatte toh lakhawm saam sin. 10 Hutekhutahchu suangtuahna gilou aum a, Huleh a khut jiatlam uh chu golhguuhna in adim hi. 11 Hizongleh kei chu lungsim dihtah puain ka um diing hi, Hung tankhia inla, ka tungah zahngai in. 12 Ka keeng mun jaang ah ading a; Kikhopnate ah LALPA ka phat diing hi.
DAVID PHATNA LA.
1 LALPA chu ka vaah leh ka hutdamna ahi a, kua ka lau diai? LALPA chu ka hinna haatna ahi a, Kua ahiai ka lau diing? 2 Migiloute ka sa neeh tum a ahung kuan chiangun, Ka meelmate leh ka gaalte ahung kuan chiangun, Akisui va apuuhta uhi. 3 Sepaih hon in dou diingin hung umkiimveel mahleh uh, ka lungtang alau sih diing; Ka tungah kidouna hung suaah mahleh hikhu ah ka muang diing hi. 4 LALPA apat sil khat ka ngeen hi, Hukhu ka hawl diing hi: Huchia LALPA kilawmna en diing leh a biahinn a thu dong diinga Ka damsung tenga LALPA inn a ka um gige theihna diingin. 5 Ajiahchu mangbat ni in Ama'n a puaninn ah ahung phual diing a, A biahbuuh a mun kiphual ah ahung phual diing a; Suangpi tungah ahung koih diing hi. 6 Huleh tuin ka kiimveel a hung doute tunglam ah ka lu dopsangin aum diing hi; Hujiahin nuamna kithoihna chu a biahbuuh ah ka laan diing a, La ka sa diing, ahi, LALPA phatin la ka sa diing hi. 7 Aw LALPA, ka aw a ka hung kouh chiangin hung ngaikhia inla, Huleh hung khotuah inla, hung dawng in. 8 "Ka meel hawl un," chia na soi laiin, Ka lungtang in na kawmah, "LALPA, na meel ka hawl diing," achi hi. 9 Kei apat gamlapi ah na maai phual sinla, Na suaah chu lungthahin koihmang sin; Nang chu ahung panpihtu na hi zing hi; Ka hutdamna Pathian Aw, hung nuse sinla, hung taaisan hiai sin. 10 Ajiahchu ka nulepa'n ahung taaisan va, Hizongleh LALPA'N ahung na domsang diing hi. 11 Aw LALPA, na lampi hung hilh inla, Ka meelmate jiahin lampi naam ah hung pui in. 12 Ahung doute uut jawng ah hung pekhe sin; Ajiahchu heetpihtu dihloute leh Hiamngamna bawltuma haai hehute'n ahung kalh uhi. 13 Mihing gam ah LALPA hoihna muh kigingta lou hileng, Ka bahta diing hi. 14 LALPA ngaah inla, hangsantahin um in, Huleh na lungtang suhaat in; Ka chi ahi, LALPA chu ngaah in.
DAVID PHATNA LA.
1 Aw LALPA, ka Suangpi, nang ka hung kou diing hi, Hung daihsan sin, Huchilou inchu, nangma'n na hung daihsan leh kokhuuh a luutsuhte bang giapin Ka hung um kha diing hi. 2 Nang ka hung kouh a, na mun siangthou lam nga a ka khut ka jaah chiangin, Ka ngetna awte ngaikhia in. 3 A innveengte uh kawma lemna thu soi a, Hizongleh a lungtang va giitlouhna um, Hi migiloute leh silsual bawlte toh hung lamang khawm sin, 4 A silbawl bangun leh a silbawlte uh giitlouh bangjeelin thuh in, A khut va a natoh bang jeelun thuh inla; Atan diingva kilawm pia in. 5 LALPA natoh leh a khut silbawlte angaihsah louh jiahun, Ama'n amahuh asumang diing a, Huleh adingsah sih diing hi. 6 LALPA chu phatin um heh, Ajiahchu Ama'n ka ngetna awte angaikheta hi. 7 LALPA chu ka haatna leh ka phaw ahi; Ka lungtang in Amah amuang a, huchiin panpihin ka um hi; Hujiahin ka lungtang anuam mahmah a, Huleh ka la in Amah ka phat diing hi. 8 LALPA chu a haatna uh ahi a, Huleh Amah chu a thaunuh a diingin kihuumbitna ahi. 9 Na mite hunkhia inla, Huleh na goutante vangpiaah in; Amahuh ching inla, kumtuangin enkol in.
DAVID PHATNA LA.
1 Aw nanguh silbawltheitah tate, LALPA kawmah pia unla, LALPA kawmah loupina leh thahaatna pia un. 2 LALPA kawmah a min jiaha piaah diing kilawm loupina pia unla, Siangthouna kilawmna ah LALPA chu bia un. 3 LALPA aw chu tuite tungah aum a, Loupina Pathian in vaanpi agingsah a, LALPA chu tui tampite tungah aum hi. 4 LALPA aw chu silbawltheitah ahi a, LALPA aw chu athupi hi. 5 LALPA aw in sidar singte asutan a, Ahi, LALPA'N Lebanon taang a sidar singte asutan dimdem hi. 6 Ama'n Lebanon chu bawngnou bangin adiangsah a, Huleh Sirion taangte zong gam bawngtal tuai bangin. 7 LALPA aw in meikuangte asukhen hi. 8 LALPA aw in gamdaaite asuliinga, LALPA'N Kadesh gamdaai asuliinghi. 9 LALPA aw in sakhite nou aneisah a, Gammaang sing nahte bang anawtpulh veh a, Huleh a biahinn ah mi chin in, "Loupi!" achi chiat uhi. 10 LALPA chu tuileet tungah atou a, Ahi, LALPA chu kumtuangin Kumpipain atou hi. 11 LALPA'N a mite kawmah haatna ape diing hi; LALPA'N hamuanna toh a mite avangpiaah diing hi.
DAVID PHATNA LA. INN LATNA LA.
1 Aw LALPA, ka hung paahtawi diing hi, ajiahchu nangma'n na hung tungding hi, Huleh ka gaalte ka tungah nuamsain na koih sih hi. 2 Aw LALPA, ka Pathian, hung panpih diingin nang ka hung kou a, Huchiin na hung sudamta hi. 3 Aw LALPA, nangma'n ka hinna Sheol apat na puidoh a, Kokhuuh a ka kiahsuh louhna diingin ka hinna na huumbit hi. 4 Aw nanguh a misiangthoute, LALPA phatin lasa unla, Huleh a siangthouna heetzingna ah kipaahthu soi un. 5 Ajiahchu a lungthahna chu mitphetkaal chauh ahi a, A deihsahna chu damsunga diingin ahi; Kahna chu jaankaal khat daih ahi thei a, Hizongleh nuamna chu jiingkaal chiangin ahung tung hi. 6 Huleh ka nopsah laiin keima'n, "Suhliingin ka um sih diing," ka na chi hi. 7 Aw LALPA, na deihsahna in nangma'n ka taang kiptahin na dingsahta a, Nangma'n na maai na phual a, huchiin mangbangin ka umta hi. 8 Aw LALPA, nang ka hung kou hi, Huleh LALPA kawmah hehpihna ka ngeen hi: 9 "Kokhuuh ah chiahsuh leng ka sisan ah bang lawhna aum diai? Leivui in nang ahung phat diaimah? Na ginumna zong aphuangjaah diaimah? 10 Aw LALPA, ngaikhia inla, huleh hung khotuah in, Aw LALPA, nangmah chu ahung panpihtu hi in." 11 Nangma'n ka maauna chu kei diingin laamna na suaahsah a; Ka sai-ippuan na hung suutsah a, huleh kipaahna in na hung thuamta a, 12 Ka loupina in daaikeei loua nangmah phat-a la asah theihna diingin. Aw LALPA, ka Pathian, na kawmah kipaahthu kumtuangin ka soi diing hi.
LA PUITU A DIING. DAVID PHATNA LA.
1 Aw LALPA, nangmah ka hung beel a, Bangchihmahin mualphouin hung umsah ngei hiai sin; Na dihtatna bangjeelin hung hunkhia in. 2 Kei lamah na bil hung doh inla, Hung hunkhe meeng in; Kei diingin ka suangpi kiptah, ka bitna diinga kibuhna kulhpi hung hi in. 3 Ajiahchu nangmah ka suangpi leh ka kulhpi na hi a, Hujiahin na min jaalin hung kai inla hung pui in. 4 Kei awhna diinga aguuha aphah uh leen apat nang in na hung kaidoh diing hi, Ajiahchu nang ka haatna na hi. 5 Na khut ah ka hagau ka hung keemsah hi, Aw LALPA thutah Pathian, nangma'n na hung tanta hi. 6 Sil juau bangmalou meimei ngaihsah haw ka hua a, Hizongleh ke'n chu LALPA ka muang hi. 7 Na lungsiatna tullou ah kipaah leh nuamin ka um diing hi; Ajiahchu nangma'n ka mangbatna na mu a, Ka hinna lungkhama aum laiin zong na hung he hi. 8 Huleh ka meelmate khut ah na hung pedoh sih a, Mun awngthawl ah ka keerig na hung ngahsahta hi. 9 Aw LALPA, hung khotuah in, ajiahchu ka mangbang ahi; Lunggimna in ka mit agawp hulhul hi, Ahi, ka hinna leh ka tahsa tanphain. 10 Ajiahchu ka damsung chu lunggimna in, Huleh ka kumte chu khuaisatna in abeita hi; Ka sualna jiahin ka tha abeita a, Huleh ka guhte zong asegawpta hi. 11 Ahung doute jiahin ka min aseta a, Adiaahkholin ka innveengte lahah ahi, Huleh ka meelheette diingin zong lauhuaipi ka hita hi. Kholai a ahung mute chu kei apat akiheemkhia uhi. 12 Misi kimangngilh bangin mangngilhin ka um a; Leibeel keeh bang ka hita hi. 13 Ajiahchu mi tampite hung heehnakajaa, Ka kiimveel launa in adim hi; Hung thah diing thu akikupkhawm laiun, Ka hinna hung laahsah atum uhi. 14 Hizongleh Aw LALPA, nangmah ka hung muang hi; "Nang chu ka Pathian na hi," ka chi hi. 15 Ka hunte chu na khut ah aum hi; Ka meelmate khut apat leh ahung suduhdahte khut apat hung hunkhia in. 16 Na meel chu na suaah tungah taangsah inla, Na lungsiatna tullou vaangin hung hunkhia in. 17 Aw LALPA, mualphouin hung umsah sin, ajiahchu nangmah ka hung kou ahi; Migiloute mualphouin um henla; Sheol ah daai kiikeeiin um uh heh. 18 Muuh juautheite chu haam theiloua koihin um uh heh, Hute'n chu kiliansah leh musit kawmin thu khauh tahtah midihtat tungah asoi uhi. 19 Aw, nangmah laute a diinga na koihsah, Mihing tate mitmuh a nangmah hung tahsangte a diinga na bawlsah, Na hoihna lian hina lawmlawm e! 20 Nangma'n amahuh chu mihing tupguuhna apat, mun kiphualna umna ah na seel a, Lei nialhaatna lah apat kibuhna mun ah aguuhin na koih hi. 21 LALPA chu phatin um heh, Ajiahchu meelmate uum kiimveel khopi sunga ka um laiin Ama'n lungsiatna tullou chu lamdangtahin ahung musahta hi. 22 Keima'n, "Na mitmuh apat paihmangin ka umta," Ka na chi pah hehu a, Ahiinlah ka hung kouh chiangin hehpih ka hung ngetna awte chu nana ja hi. 23 Aw, nanguh a misiangthou zousiahte haw, LALPA chu lungsiat un, Ajiahchu LALPA'N miginumte ahuumbit a, Huleh kiliansahtaha gamta chu nasatahin athuh hi. 24 Nanguh LALPA a kineem zousiah haw, Haangtahin um unla, Huleh Ama'n na lungtang uh ahung suhhaatsah diing hi.
DAVID PHATNA LA. MASKIL.
1 A tatleehna ngaihdama uma, A sualna khuha um mi chu ahampha hi. 2 LALPA'N giitlouhna neia aseh louh, Huleh a hagau a jeheemna mawngmawng umlou mi chu ahampha hi. 3 Haamlou keeia ka um laiin, Nitum a ka maauna jaalin ka guhte angawnsuaah vehta hi. 4 Ajiahchu suun leh jaan in na khut in ka tungah ahung net a, Ka thahaatna zong nipi nisa in sil asuhgot bang ahung hita hi. Selah. 5 Ka sualna na kawmah ka theisah a, Ka giitlouhna ka iimta sih hi. "Ka tatsualnate LALPA kawmah ka phuang diing," ka chi a, Huleh nangma'n ka sual thulimlouhna na hung ngaidamta hi. Selah. 6 Hikhu jiahin muh baihlama na umlaiin koipouh Pathian ngaihsah chu na kawmah ahaamtei diing uhi; Tahzetin, tuiliante ahung leet chiangin A kawm atuumpha sih diing uhi. 7 Nang chu ka kibuhna mun na hi a, Buaina apat na hung huumbit diing a, Hutkhiahna late in na hung kualkhum diing hi. Selah. 8 Na paina diing lampi chu ka hung thuhilhin ka hung kawhmuh diing a, Ka mit ngeei in ka hung pui diing hi. 9 Heetsiamna neilou sakol ahihlouhleh sabiltunghaah aha bangin um sih un, Amahuh chu a muuh uh siihbah leh kamkaihna khau a tuuhdet angai uhi, Huchilou inchu na kawm naih ah ahung sih diing uhi. 10 Migiloute diingin lungkhamna tampi aum a, Himahleh LALPA muang mi chu lungsiatna tullou in auum suaah diing hi. 11 Nanguh midihtatte, LALPA ah kipaah unla, nuam un; Huleh nanguh lungtang dihtah po zousiah haw, nuamin kikou un.
1 Nanguh midihtatte Aw, LALPA ah nuam un, Ajiahchu midihtatte diingin Pathian phat chu akilawm him ahi. 2 Kaihging in LALPA phat unla, Tingtang leh peehging gui sawm nei in Amah phatin la sa un. 3 Amah paahtawiin la thah sa unla, Siamtahin kipaahna aw toh tumun. 4 Ajiahchu LALPA thu chu adih a, Huleh a natoh zousiah zong thutah a bawl ahi. 5 Ama'n dihtatna leh vaihawmna dih adeih a, Leitung chu LALPA lungsiatna tullou in adimsuaah hi. 6 LALPA thu in vaante siam ahi a, Hutah a umte zousiah zong a kam a huu pawt a siam ahi. 7 Ama'n sil luahkhawm bangin tuilianpi tuite chu alakhawm a, Tuithuuhte chu koihkhawmna inn ah akoih hi. 8 Leitung zousiah in LALPA lau henla, Khovel a teengte zousiah Amah lauin chija uh heh. 9 Ajiahchu Ama'n thu asoi a, huchiin ahung umta hi; Thu apia a, huchiin ahung umdetta hi. 10 LALPA'N namte lemguatna chu bangmahlouin aumsahta a, Namte silguanggalhte chu panna neilouin abawlta hi. 11 LALPA lemguat chu kumtuangin ading zing a, A lungsim ngaihtuahnate zong suan zousiah tanin aum diing hi. 12 LALPA chu a Pathian a nei nam ahampha hi, Huleh Amah goutan diinga ateel mite mah chu. 13 LALPA'N vaan apat aen a, Mihing tate zousiah amu veh hi. 14 A umna mun apatin Leitung a teengte zousiah ahung en hi. 15 Ama'n a lungsim uh abawl chiat a, A natoh zousiah uh ahe veh hi. 16 Kumpi koimah sepaih tam jiahin huumbitin aum ngei sih; Mihaat zong thahaatna jiahin hutkhiahin aum sih hi. 17 Bitna diingin sakol zong kinepna thawn ahi, A haatna thupitah jiahin koima ahunkhe sih diing hi. 18 Ngai in, LALPA mit chu Amah laute tungah atu a, A lungsiatna tullou a kineemte tung ngeei ah, 19 A hinna uh sihna apat hunkhe diingin, Huleh kial hun chianga amahuh hunkhe diingin. 20 Ka hinna un LALPA angaah hi; Amah chu ahung panpihtu leh i phaw uh ahi. 21 Ajiahehu Amah ah ka lungtang uh anuam diing hi, Ajiahchu a min siangthou ka tahsangta uhi. 22 Aw LALPA, na lungsiatna tullou chu nang a ka kinep bang ngeeiun ka tungvah hung umta heh.
ABIMELEK MA A DA VID AKINGOLSAH LAIA ABIMELEK IN ANADELHDOH A, APAISAN LAIA PHATNA LA.
1 Bangchihlaipouhin LALPA ka phat diing; A phatna chu ka kam ah aum zing diing hi. 2 Ka hinna in LALPA asuang diing, Mikingaingiamte'n hikhu anaja diing va akipaah diing uhi. 3 Aw, LALPA hung paahtawipih unla, A min i tawisang khawm diing uhi. 4 LALPA ka hawl a, huchiin ahung ngaikhia a, Ka launa zousiah apat ahung hunkheta hi. 5 Amah aen va, huchiin ahung taangta uh, Huleh a meel uh azum mawngmawng nawn sih hi. 6 Hi migenthei akikou a LALPA'N aja a, Huleh a buaina zousiah apat ahunkheta hi. 7 LALPA angel in Amah laute chu a kiimveel vah auumkhum a, Huleh ahunkhia hi. 8 Aw, LALPA chu ahoih hi chih chiam unla, eh mah dih vua, Amah beel mi chu ahampha hi. 9 Aw, nanguh a misiangthoute, LALPA chu lau un; Ajiahchu Amah laute diingin taahsap mawngmawng aum sih hi. 10 Huumpibahnei luunlaite atasam va agilkial veu uh; Hizongleh LALPA hawl mite'n chu sil hoih mawngmawng atasam sih diing uhi. HNanguh naupangte, hung unla ngaikhia un; LALPA laudaan ka hung hilh diing hi. 12 Hoihna amuh theihna diinga hinna deih a, Huleh damsawt uut mi koi ahiaimah? 13 Gilou apat na lei veeng inla, Huleh heemthu soina apat na muuh veeng in. 14 Gilou apat kiheemkhia inla sil hoih bawl in; Lemna hawl inla deih jeel in. 15 LALPA mit chu midihtatte tungah atu a, Huleh a bil zong akikou uh ngaikhe diingin adoh zing hi. 16 LALPA meel chu silgilou bawlte kalhin a tungvah atu hi, Leitung apat amahuh heetzingna paaikhe diingin. 17 Midihtatte akikou va LALPA'N aja a, Huchiin a mangbatna zousiah vapat amahuh ahunkhia hi. 18 LALPA chu lungtang hasete kawmah anai a, Huleh lungtang kisiih tuntunte ahundoh hi. 19 Midihtat hahsatna tampi ahi a, Hizongleh LALPA'N hute zousiah apatin amah ahunkhejeelhi; 20 A guh zousiah akeem a, khatmah zong suhtan ahi sih hi. 21 Silgilou in migilou athat diing a, Huleh midihtat ho mite chu siamlouh tansahin aum diing uhi. 22 LALPA'N a suaahte hinna atandoh a, Amah beelte koimah siamlouhtansahin aum sih uhi.
DAVID PHATNA LA.
1 Aw LALPA, kei hung sualte nangma'n sual inla, Kei hung doute nangma'n dou in. 2 Phaw neu leh phaw lian la inla, Kei hung panpih diingin ding in. 3 Teipi zandoh inla ahung delhte anadaal in. Ka hinna kawmah, "Na hutdamna ka hi," chiin. 4 Ka hinna hawlte mualphousah inla huleh zumtahin koih in; Ka siatna diing tumte nungkiihsahin um uh henla, Huleh nuaisiahin um uh heh. 5 Buhsi huih muut leeng bangin um uh henla, Huleh LALPA angel in delhjui jeel heh. 6 A lampi uh mial henla naal heh, LALPA angel in delhjui jeel heh. 7 Ajiahchu amah un ajiah beiin ka awhna diingin a leen uh kokhuuh ah aphual va, Hu kokhuuh chu ajiah beiin ka hinna matna diingin atou uhi. 8 Heetkholhlouhin a tungah beimangna tung henla, Huleh a leen phualguuh in amah mah man heh, Hu beimangna ngeei ah amah mah kia heh. 9 Huleh ka hinna chu LALPA ah nuamsain aum diing a, A hutdamna ah nuamin aum diing hi. 10 Ka guh zousiah in, "Migenthei diinga zohguallouha mihaat apat migenthei hunkhetu LALPA, Ahi, migenthei leh mitasam nemangtu apat amah hunkhetu, LALPA, nang tobang koi aum ei?" achi diing uhi. 11 Heetpihtu dihloute adingkhia va, Sil ka heet ngei hiai louhte ahung dong uhi. 12 Ka hinna suhgimna diingin, Gilou in hoihna ahung thuh uhi. 13 Himahleh kei chu adamlouh laiun ka puansilh sai-ip ahi a, An ngawl pumin ka hinna ka sugim a, Huleh ka haamteina chu ka aangsung ah ahung kihkiit hi. 14 Amah kawmah chu ka lawm ahihlouhleh ka unaupa aha bangin ka um a, Mi a nu suun a kap bangin lunggimtahin ka kuun hi. 15 Hizongleh ka kipalna ah amahuh chu anuam va, Huleh akikhawm khawm uh; Mivuaahhaat ka heetlouhte keimah sual diingin akikhawm va, Ahung bottel va, atawp sih uhi. 16 Ankuang luinate ah misimmohhaat lepchiahte toh A ha uh ahung gawikhum uhi. 17 Lalpa, bangtan ahiai na hung etsim diing? A hihsiat tupnate vapatin ka hinna hunkhia in, Ka hinna neihsun chu huumpibahneite lah apatin hunkhia in. 18 Kikhopna lianpitah ah na kawmah kipaahthu ka soi diing hi; Mi tampite lahah nangmah ka hung phat diing hi. 19 Dihloutaha ka meelmate ka tungah nuamsah sinla, Ajiah beia hung hote dihloutahin a mit un kihousah sin. 20 Ajiahchu amah un kilepna thu asoi sih va, Himahleh gam sunga um kinkente heema ngoh theihna diing angaihtuah jaw uhi. 21 Ahi, a kam uh lianpiin ahung kaah khum va, Huleh "Chei,chei! I mit un mu e," achi uhi. 22 Aw LALPA, nangmah in hichu na mu a, Daai het sin. Aw Lalpa, hung gamlaatsan sin. 23 Ka Pathian leh ka Lalpa, kisuhalh inla, Huleh ka dihna leh ka siamtandaan sulang diingin hah in. 24 Aw LALPA, ka Pathian, na dihtatna dungjuiin vai hung hawmsah inla, Huleh amahuh ka tungah nuamin umsah sin. 25 A lungsim un, "Nuam ei! Hichibang ahi i deih uh," chi sih uh henla, "Ka gualzouta uh," zong chi sih uh heh. 26 Ka siatna tunga kipaah khawmte mualphou leh nuaisiahin um uh heh; Ka tunga kiliansahte zumna leh zahtaatna silhsahin um uh heh. 27 Ka dihtatna jiaha hung kipaahpihte Nuam leh kipaahin um uh heh; "Ahi, a suaah neihzohna a kipaah LALPA chu Paahtawiin um heh," chi gige uh heh. 28 Huleh ka lei in na dihtatna thu asoi diing a, Huleh na phatna thu suun nitum in asoi diing hi.
LA PUITU A DIING. LALPA SUAAH DAVID PHATNA LA.
1 Migilou tatkhelhna in ka lungtang sungah thu asoi a, A mit hah ah Pathian lauhna mawngmawng aum sih hi. 2 Ajiahchu a sualna muhdoha um a huat ahihin, A mitmuh ah amah leh amah akiphat hi. 3 A kam a thu pawtte chu giitlouhna leh heem bawlna ahi a, Mipil hih leh sil hoih bawl atawpsanta hi. 4 A lupna tungah silgilou asuangtuah a, Lampi hoihlou ah apai a, Gilou akihdah sih hi. 5 Aw LALPA, na lungsiatna tullou in vaante asu a, Huleh na ginumna in vaan meipite asu hi. 6 Na dihtatna chu taang loupitahte bang ahi a, Na vaihawmnate chu tui thuuh loupitah bang ahi; Aw LALPA, nangma'n mihing leh gamsa na huumbit jeel hi. 7 Aw Pathian, na lungsiatna tullou chu manpha hina meie! Hujiahin mihing tate'n na haliim nuai muangin abeel uhi. 8 Amahuh chu na inn sunga kiningchinna in atai diing va, Huleh na kipaahna luui ah na dawnsah nalai diing hi. 9 Ajiahchu na kawmah hinna tuinaah aum a, Na vaah ah vaahna ka mu diing uhi. 10 Aw, nangmah hung hete tungah na lungsiatna tullou umsah zing inla, Huleh lungtang dihtah pote tungah na dihtatna langsah zing in. 11 Kiliansahte keeng chu kei hung sual diingin ka lamah suansah sinla, Huleh migiloute khut in hung delhmang sih heh. 12 Hutah ah giitlouhna bawltute akipuuh uh; Sehpuuhin aum va athoukiit zou nawn sih diing uhi.
DAVID PHATNA LA.
1 Silgilou bawlte jiahin kisulungthah nuam sinla, Dihloutaha gamtate zong eeng saam sin. 2 Ajiahchu hampa bangin avul pah diing va, Huleh loupa hing bangin avuai diing uhi. 3 LALPA chu muang inla huleh sil hoih bawl in; Gam sungah teeng inla, huleh ginumna ah nuamsa in. 4 LALPA tungah kipaah inla, Huchiin Ama'n na lungtang deihjawng ahung pe diing hi. 5 Na umdaan diing LALPA tungah nga inla, Huleh Amah muang in, Huchiin Ama'n ahih veh diing hi. 6 Ama'n na dihtatna chu vaah bangin, Huleh na siamtandaan chu suunlai bangmaiin ahung sulang diing hi. 7 LALPAahkhawlinla, hahkattahin Amah ngaah in; A lampi a lohching mi jiahin kisulungthah nuam sin, Ngaihtuahna gilou pichin mi jiahin. 8 Lungthah tawpsan inla huleh thangtawmna taaisan in; Kisulungthah sin, hikhu in giitlouhna chauh atun hi. 9 Ajiahchu gilou bawlte chu saatkhiahin aum diing va, Himahleh LALPA ngaahte'n chu lei aluah diing uhi. 10 Tomkaallouin migilou chu aum nawn sih diing hi; Ahi, aumna mun enchian mahlehchin, aumta sih diing hi. 11 Hizongleh thunuaigolhte'n lei aluah diing va, Hamuanna kiningching ah akipaah diing uhi. 12 Migilou in midihtat siatna diing angaihtuah a, Huleh a ha agawikhum hi. 13 Lalpa'n amah anuihsan hi, A ni ahung tung diing chih aheet jiahin. 14 Genthei leh tasamte supuuh diing leh Umdaan dihte sulum diingin migiloute'n naamsau adoh va, A thalmung uh aluai uhi. 15 A naamsau un amahuh mah lungtang asun diing a, Huleh a thalmung uh suhtanin aum diing hi. 16 Midihtat sil tawmtakhat neih chu Migilou tampite hauhsatna saangin ahoihjaw hi. 17 Ajiahchu migiloute baan chu suhtanin aum diing a, Hizongleh midihtat chu LALPA'N aveengbit hi. 18 LALPA'N misoiseelbeite ni chu ahe a, A gouluah diing uh chu kumtuangin aum diing hi. 19 Hun hoihlou ah amualphou sih diingva, Kial hun in zong avah diing uhi. 20 Migiloute chu abeimang diing va, Huleh LALPA meelmate chu Gamlah paah kilawmna bang chauh ahi diing uhi. Amang va, meikhu bangin ajaam mang uhi. 21 Migilou in athunglaah a apekiit nawn sih a, Himahleh midihtat in akhotuah a ape jaw jeel hi. 22 Ajiahchu LALPA vangpiaahte'n lei aluah diing va, Himahleh ahaamsiatte chu suhmangin aum diing uhi. 23 Mihoih kalsuante chu LALPA suhkip ahi a, Huleh a lampi ah Amah akipaah hi. 24 Puuh mahzongleh puuhsahdenin aum sih diing hi; LALPA'N amah a khut a atuuh jiahin. 25 Naupang ka na hi a, tuin teehsia ka hita a; Hizongleh midihtat taihsana aum lam ka mu sih a, A suante khutdoh zong ka mu kha sih hi. 26 Mi akhotuah zing a athunglaahsah a, Huleh a suante vangpiaahin aum uhi. 27 Gilou paisan inla sil hoih bawl in, Huchiin kumtuangin teeng in. 28 Ajiahchu LALPA'N vaihawmna dih angaina a, Huleh a misiangthoute chu ataaisan ngei sih; Kumtuangin kepin aum va, Himahleh migiloute suan chu suhmang ahi diing uhi. 29 Midihtatte'n chu gam aluah diing va, Huleh kumtuangin hutah ah ateeng diing uhi. 30 Midihtat kam in pilna thu asoi a, Huleh a lei in vaihawmna dih asoi hi. 31 A Pathian daan thu chu a lungtang ah aum a, A kalsuan atolh sih hi. 32 Migilou in midihtat aguuhin aenkhia a, Huleh suhlup atum hi. 33 LALPAN amah chu a khut ah anuse sih diing a, Vaihawma aum chiangin siamlouh atangsah sih diing hi. 34 LALPA chu ngaah inla, A lampi chu tawn in, Huchiin gam luah diingin nang ahung tawisang diing a; Migiloute suhmanga aum chiangun na mu diing hi. 35 Migilou, mihiamngam chu Apouna mun a sing nahduah banga kiliansah ka mu hi. 36 Hizongleh apaimang a, huleh ngai in, aum nawnta sih hi; Ahi, ka hawl a, hizongleh muhzohin aumta sih hi. 37 Misoiseelbei chu chiamchih inla midih chu en in; Ajiahchu huchibang mi mabaan chu hamuanna ahi diing hi. 38 Hizongleh takhialte chu suhsiat khawmin aum diing va, Migiloute suan chu suhmang ahi diing uhi. 39 Midihtatte hutdamna chu LALPA apat ahi a, Amah chu amangbat laiva a haatna uh ahi. 40 Huleh LALPA'N amahuh apanpih a ahunkhia hi; Amah abelh jiahun migiloute lah apatin Amahuh ahunkhia a, ahundoh hi.
DAVID PHATNA LA. HEETDOHSAHNA DIING.
1 Aw LALPA, lungthahin hung taai sinla, Thangtawmin zong hung thunun keei sin. 2 Ajiahchu na thaltangte'n ka sa thuuhtahin adawt a, Huleh na khut chu ka tungah nasatahin atu hi. 3 Na lungthahna jiahin ka tahsa ah damna himhim aum sih a, Ka sualna jiahin ka guhte ah damna aum sih hi. 4 Ka thulimlouhnate'n ka lu atuummang a, Puahgihtah bangin kei diingin agih talua hi. 5 Ka ngolna jiahin ka liamnate auih in asezouta hi. 6 Ka mangbang a, ka kuun khiukheu a; Suun nitumin maauin ka vaahleh hi. 7 Ajiahchu ka kawng asa hut-hut veh a, Huleh ka tahsa ah damna mun mawngmawng aum sih hi. 8 Ka bah a ka sidup keihkuih a, Ka lungtang noplouhna jiahin ka tau hi. 9 Aw Lalpa, ka deih zousiah na ma ah aum veh a, Huleh ka khuaisatna zong nang apatin akiphual sih hi. 10 Ka lungtang aphu dutdut a, tha ka nei zou nawnta sih hi; Ka mit khomuhna zong kei a um nawnlou abang hialta hi. 11 Ahung lungsiatte leh ka lawmte lah ka natna apat akiheemdohta va, Huleh ka sanggamte zong gamlapi ah ading uhi. 12 Ka hinna suhmang tuma hawlte'n thaang akam va, Ka siatna diing hawlte'n zong thu hoihlou tahtah asoi va, Huleh suun nitumin heemna thu ngen asuangtuah uhi. 13 Hizongleh kei chu bilngong bangin, jalouin ka um a; Huleh haamtheilou mi kamka ngeilou bangin ka umhi. 14 Ahi, mi haam ja theilou, Huleh a kam a zong nialna thu mawngmawng pawt ngeilou bangin ka um hi. 15 Ajiahchu Aw LALPA, nangmah ka hung kineppih hi; Aw Lalpa, ka Pathian, nangma'n na hung dawng diing hi. 16 "Hung ngaikhia in, Huchilou inchu ka keeng akitolh chiangin ahung otkhum diing va, Ka tungah akiliansah kha diing uhi," ka chi hi. 17 Ajiahchu ka puuh dehdeh a, Huleh ka lungngaihna zong ka ma ah aum gige hi. 18 Ajiahchu ka giitlouhna ka phuangkhia a, Ka sualna jiahin lungkhamna in ka dim hi. 19 Himahleh ka meelmate chu;ahalh va huleh ahaat uhi; Huleh dihloupi a hung mudahte apung deuhdeuh uhi. 20 Sil hoih silgilou a thuh veute'n ahung heeh uhi; Ajiahchu ke'n sil hoih ka jui hi. 21 Aw LALPA, hung taaisan sin; Aw ka Pathian, hung gamlaat hiai sin. 22 Aw Lalpa, ka hutdamna, Ahung panpih diingin kinmeeng in.
LA PUITU A DIING. JEDUTHUN A DIINGIN. DAVID PHATNA LA.
1 Ka lei a sil ka hihsual louhna diingin ka lampite ka veeng hoih diing a, Migiloute ka ma a aum sung teng uh ka kam muuh gaahna in ka gaah diing," ka chi hi. 2 Huchiin haamlouin daaididein ka um a, Ahoihna diing ah zong ka sip khiinkhian a; Huleh ka lungngaihna ajual deuhdeuh hi. 3 Ka sungah ka lungtang asa vutvut a, Ka geelgeel laipiin mei ahung kuang a, Huin ka lei in thu ka soita hi, 4 "LALPA, ka tawpna diing leh ka damsung diing bangtan ahih hung hesah in, Bangchituha deengdel ka hih hung hesah in. 5 Ngai in, nangma'n ka damsung chu khutpeeh tan bang giapin na siam a, Huleh ka kum zong na mitmuhin bangmahlou bangin na siam hi. Tahzetin mi chin ahoihlai peen uh zong bangmalou mei ahi uhi. Selah. 6 Tahzetin mi chin chu aliim bang giapin avaah jeel va, Abuai thawn meimei uhi; Gou akholkhawm va, Huleh aluah diing lah ahe sih uhi. 7 Huleh tuin Lalpa, bang ahiai ka ngaah peen? Ka kinepna chu nangmah ah ahi aum. 8 Ka tatkhelhna zousiah apatin hung hunkhia in; Mingolte soisiatin hung umsah sin. 9 Nangmah bawl ahihjiabin ka haam sih a, Ka kam zong ka kaah sih hi. 10 Na hung vuaahna chu kei apatin lamang inla, Na khuthaahna jiahin ka mangthaai hi. 11 Tatkhelhna jiaha mi na taaihilh chiangin, A kilawmna peen leikha bangin na susia hi; Tahzetin mi chin chu bangmahlou mei ahi uhi. Selah. 12 Aw LALPA, ka haamteina ngaikhia inla, Huleh ka kikouna ah na bil hung doh in; Ka mittui luang hi umsan mei sin; Ajiahchu ka pulepate banga : Nang toh khualzin leh zinvaithaam ka hi. 13 Aw, hi apat a ka pawt a, ka umlouh den main, Ka halh kiitna diingin hung hawi in. "
LA PUITU A DIING. DAVID PHATNA LA.
1 Kuhkaltahin LALPA ka ngaah a, Huchiin Ama'n ka lam ahung nga a, Ka kikou ajata hi. 2 Ama'n kokhuuh chijaathuaitah apat, Tumtheihna buannawi apatin ahung kaidoh tou a, Huleh ka keeng chu suangpi tungah anga a, Ka kalsuante asudet hi. 3 Huleh Ama'n ka kam ah la thah akoih a, i Pathian phatna ngeei chu; Mi tampi in amu diing va huleh alau diing va, Huchiin LALPA chu amuang diing uhi. 4 LALPA a ginsan a nei a, Huleh kiliansahte lama kihei lou a, juauthu soite lama zong kiheilou chu ahampha hi. 5 Aw LALPA, ka Pathian, na silmah bawlte leh keiuh lam Na hung ngaihtuahnate atam mahmah hi; Hute na ma a soi seenggual ahi sih hi; Phuangdoha soi diing hitaleng, sim seenggual ahi sih diing hi. 6 Kithoihna leh sillat na deih sih a, ka bilte na hung honsahta hi. Haalmang sillatte leh sual sillatte na phuut sih hi. 7 Huin ke'n, "Ngai in, ka hung hi; Lehkhabujial ah ka tungthu gelh ahi. 8 Aw ka Pathian, na deihjawng bawl ka kipaahna ahi, Huleh na daan thu chu ka lungtang ah aum hi," ka chi hi. 9 Kikhopna loupitah ah dihtatna tanchinpha ka phuanga, Ngai in, Aw LALPA, ka kam ka hup sih chih nang in na he hi. 10 Na dihtatna ka lungtang sungah ka iim sih a, Na ginumna leh na hutdamna thu ka phuangdoh jaw hi; Na lungsiatna tullou leh na thutah chu kikhopna loupitah ah ka phual sih hi. 11 Aw LALPA, na lainatna neemtah chu na hung iit sih diing a, Na lungsiatna tullou leh na thutah in hung huumbit gige hen. 12 Ajiahchu sil hoihlou simseeng louhte'n ahung tuamva, Huchiin ka khodaah theihlouhna diingin ka sualnate'n ahung delhphata uhi; Amahuh chu ka lutung a samjang saangin atamjaw va, Hujiahin ka lungtang atawlta hi. i3 Aw LALPA, hung hunkhe diingin pha sa in; Aw LALPA, hung panpih diingin kinmeeng in. 14 Ka hinna suhmang tuma hawlte mualphou leh zumtahin um veh uh heh; Ka siatna kipaahpihte nungtaaisahin um uh henla suhzumin um uh heh. 15 "Chei, chei!" chia hung koute a mualphouna jiahun Lausegawpin um zing uh heh. 16 Nangmah hung hawlte zousiah nangmah ah nuam leh kipaahin um uh heh; Na hutdamna ngaite'n, "LALPA chu aloupi hi!" chi zingzing uh heh. 17 Himahleh kei chu genthei leh tasamtah ka hi a; Ahihvaangin LALPA'N ahung ngaihtuah zing hi. Nang chu ahung panpihtu leh hunkhetu na hi a, Aw ka Pathian, sawt hal keei sin.
LA PUITU A DIING. DAVID PHATNA LA.
1 Gentheite ngaihtuah mi ahampha hi; Mangbatni'n LALPA'N amah ahunkhe diing hi. 2 LALPA'N amah ahuumbit diing a huleh ahing hawi diing hi; Leitung ah vangpiaahin aum diing a, A meelmate uut uut-a bawl diingin na pekhe sih diing hi. 3 LALPA'N damloua lupna a ihmutna mun ah asuhaat diing a, Adamlouh laiin nangma'n na damsah hi. 4 "Aw LALPA, hung khotuah inla; Ka hinna sudam in, ajiahchu na tungah ka sual hi," ka chi hi. 5 Ka meelmate'n, "Bangchihchian asi in, A min amang de aw?" chiin ahung soisia uhi. 6 Huleh aveh banga ahung leh, thumanlouh pouh asoi hi. A lungtang in thulimlouhna akholkhawm a, Apawtdoh chiangin mi ahilh jeel hi. 7 A hung hote zousiah kei soisiain akihou suausuau va, Ka siatna diing lemtaang angaihtuah uhi. 8 Amah un, "Natna hoihloutah a tunga tu ahita a, Huchiin tua alup chu athoukiit nawn sih diing," achi uhi. 9 Ahi, ka lawm kithuahpih theih, ka muantah, Ka tanghou nepa ngeei in kei kalhin a khetuul alehta hi. 10 Hizongleh Aw LALPA, amahuh ka thuh theihna diingin Nang in chu hung khotuah inla, hung kaithou in. 11 Hikhu in na hung kipaahpih chih ka he hi, Ka meelmate ka tunga agualzoh louh jiahun. 12 Kei ka hihleh chu soiseelbei ka hih jiahin na hung tu tinten a, Huleh kumtuangin na ma ah na hung dingsah zing hi. 13 lsrael LALPA Pathian chu kumtuang akipanin Kumtuang tanin phatin umta hen! Amen, Amen.
LA PUITU A DIING. KORAH TATE MASKIL.
1 Sakhital luuita tui duha ahaih hehu bangin, Aw Pathian, ka hinna nangmah ngaiin ahai hehu hi. 2 Ka hinna Pathian ngaiin adangtaah a, Pathian hing ngeei ngaiin. Bangchihchian Pathian kawma tungin a ma ah ka kilaah diai? 3 "Na Pathian khoia um ahiai?" suun nituma ahung chih laiun, Asuun ajaanin ka mittui chu ka an ahi. 4 Hi silte ka geel tahchiangin, Ka hinna ka sungah ka sungbua hi. Ajiahchu kuut mang mipi tampite toh nuamna leh phatna ging toh Pathian inn juanin ama uh kaiin Mipi lahah ka chiah veu hi. 5 Aw ka hinna, bangachia kuun? Bang diinga ka sunga buai? Pathian ah kineem in, ajiahchu ahung umpiha ahung tatdoh jiahin Amah ka phat kiit diing hi. 6 Aw ka Pathian, ka hinna ka sungah akuun hi; Hujiahin Jordan gam leh Hermon taangvuumte leh Mizar Taang apatin ka hung hezing hi. 7 Na ngalawi tui luang ging juajuate jiahin tuithuiih leh tuithuuh akikou tuah va, Na tuikihawtte leh tuikinawhte zousiah in kei ahung tuumta uhi. 8 Hizongleh LALPA'N a lungsiatna tullou chu suun hun chiangin thu ape diing a, Huleh a la in jaan chiangin ahung umpih diing hi, Huleh ka haamteina chu ka hinna Pathian kawmah aum diing hi. 9 Pathian ka Suangpi kawmah, "Bang diinga hung mangngilh na hiai? Bang diinga ahung doute jiaha lungngaia maaumaau ka hiai?" ka chi diing hi. 10 Ka guhte kitanbong bangin, Ahung doute'n ahung tawng zing va, "Na Pathian khoia um ahiai?" Suun nitum in ahung chi uhi. 11 Aw ka hinna, bangachia kuun? Bang diinga ka sunga buai? Pathian ah kineem in; Ajiahchu ka meel damna leh ka Pathian chu Ka phat nalai diing hi.
1 Aw Pathian, ka siamtandaan sulang inla, Pathian ngaihsahlou nam tungah ka dihna thu hung soipih in; Aw, miheemhaat leh midihlou lahah hung hunkhia in. 2 Ajiahchu nang ka haatna Pathian na hi a, Bangachia hung paampaih na hiai? Bangachia meelmate nuaisiahna jiaha maau lehleh ka hita ei? 3 Aw, na vaahna leh na thutah chu sawlkhia in. Hute'n kei hung pui henla Huleh na taang siangthou leh na biahbuuh hung tun uh heh. 4 Huchiin Pathian maitaam kawmah ka chiah diing, Ka kipaahna mahmah Pathian kawmah; Ahi, Pathian, ka Pathian chu tingtang in ka phat diing hi. 5 Aw ka hinna, bangachia kuun? Bangachia ka sunga buai? Pathian ah kineem in; Ajiahchu ka meel damna leh ka Pathian chu Ka phat nalai diing hi.
LA PUITU A DUNG. KORAH TATE MASKIL.
44 1 Aw Pathian nidanglaia na silbawl, Ka pulepate'n ahung hilh uh ka bil un ka ja uhi, 2 Nangma'n na khut ngeei a namte chu na nohdoh a, Ka pulepate uh na phuh daante; Namte chu na suhgim a, huleh amahuh na delhdoh daante chu. 3 Ajiahchu a gam luah uh amahuh naamsau a alaah uh ahi sih a, Amahuh baantha a kihundoh zong ahi sih uhi; Hizongleh a tungva na kipaah jiahin na khut jiatlam leh na baantha leh na meel vaah in Ahundoh ahijaw hi. 4 Aw Pathian, nang chu ka Kumpipa na hi; Jakob gualzohna diingin thu pia in. 5 Nangmah jaalin ka meelmate uh ka nohpuuh diing va; Na min jaalin ahung doute ka chil eh-eh diing uhi. 6 Ajiahchu ka thalmung ka muang sih diing a, Ka naamsau in ahung hundoh saam sih diing hi. 7 Hizongleh ka meelmate uh apatin na hung hundoh zouta a, Ahung hote mualphouin na umsah nalai hi. 8 Suun nitum in Pathian ka suang va, Kumtuangin na min ka phat diing uhi. Selah. 9 Hizongleh tuin chu na hung paaikhia a huleh na hung suzumta hi; Huleh ka sepaihte uh toh na pawtdoh sih hi. 10 Meelmate lah apat na hung nungtaaisah a, Huleh ahung hote'n gaal laah sil amahuh diingin akilaah uhi. 11 Neeh diinga guat belaam bangin na hung pekhia a, Namte lahah na hung thehdalhta hi. 12 Na mite bangmahlouin na hung juaahta a, Amahuh juaahna apat bangmah lawhna na mu sih hi. 13 Ka innveengte uh soisiatin na hung umsah a, Ka kiim va umte simmoh leh nuihsan diingin na hung umsah nalai hi. 14 Namte lahah muhsitna lama kihilhna in na hung umsah a, Mi chin lahah mite lu thinkhumin na hung umsah hi. 15 Ka zumna chu nitum in ka ma ah aum zing a, Huleh ka mualphouna in ahung tuam zouta hi, 16 Huchu leepse mi leh soise mi aw jiah leh meelma leh phubala mi jiahin ahi. 17 Hi zousiah ka tungvah ahung tung a, Hizongleh nang ka hung mangngilh ngei sih uh, Na thuhun zong tutanin ka susual sih uhi. 18 Ka lungtang uh akiheikiit sih a, Ka kalsuante un na lampi apaisan ngei saam sih hi; 19 Hizongleh nangma'n si- aalte umna mun ah na hung nuaithop a, Huleh sihna liim in na hung khuhkhum hi. 20 Ka Pathian uh min ka mangngilh va, Gam dang pathian lam a ka khut ka j aahva ahihleh, 21 Pathian in hichu ahawlkhe sih diaimah? Ama'n lungtang a thuguuhte ahe gige ngaala. 22 Ahi, nangmah jiahin suun nitum in thahin ka um va, Goh diing belaam banga ngaih ka hi uhi. 23 Aw Lalpa, khanglou in, bang diinga ihmu? Thou inla, kumtuanga diingin hung nuai sin. 24 Bangjiahin ahiai na maai na phual a, Huleh ka hahsat daan uh leh nuaisiahna ka thuaah daan uh na mangngilh? 25 Ajiahchu ka hinna uh leivui suin akuun a, Ka sapum uh lah lei ah abelh diipdeep hi. 26 Ahung panpih diingin thou inla, Huleh na lungsiatna tullou jiahin hung tandoh in.
LA PUITU A DIING. SHOSHANNIM DUNGJUIIN. KORAH TATE MASKIL. LUNGSIATNA LA.
1 Ka lungtang thu hoih in aleet noinoi a, Ka la chaangte Kumpipa kawmah ka soi hi; Ka lei chu lehkhagialtu siamtah kolom ahi. 2 Mihing tate saangin na meel ahoihjaw a, Khotuahna chu na muuh a leih ahi; Hujiahin Pathian in kumtuanga diingin ahung vangpiaah hi. 3 Aw Haattungnung, na naamsau na kawng ah vom inla, Na loupina leh na kilawmna toh. 4 Thutahna, kingaihngiamna leh dihtatna jiahin na thupina silhin gualzoutahin sakol tunga tuangin pai jeel in, Huleh na khut jiatlam in sil limdangte nang ahung hilh diing hi. 5 Na thaltangte chu kumpipa meelmate lungtang ah ahiama, Huchiin mite chu na nuaiah apuuh jeel uhi. 6 Aw Pathian, na laltouphah chu kumtuang kumtuangin aum hi; Dihtatna lalchiang chu na lalgam lalchiang ahi. 7 Nangma'n dihtatna na deih a giitlouhna chu na hua hi; Hujiahin Pathian, na Pathian ngeei in, nang chu na lawmte tung daih ah Kipaahna thau ahung nuhta hi. 8 Na puansilh zousiah chu murrah, aloe leh sing gimtuui gim in anam vengvung a, Saiha a kibawl kumpi innpite apat tumgingte'n nang ahung kipaahsah hi. 9 Na numei zahhuaite lahah kumpipate tanute atel va, Na jiatlam ah Ophir sana a kijeemin kumpinu ading hi. 10 Aw ka tanu, ngaikhia inla, Ngaihtuah inla, na bil doh in; Nangmah mite leh na pa inn mangngilh in. 11 Huchiin Kumpipa'n na meel hoih adeih mahmah diing hi; Ajiahchu Amah hi na Lalpa ahi a, a ma ah kuun in. 12 Tura tanu chu silpiaah toh ahung diing a, Mi laha hausate'n na deihsahna angeen diing uhi. 13 Kumpipa inn sungah kumpipa tanu chu aloupi kiimveel hi; A puansilh chu sana a jepmawi ahi. 14 Khut a khui puan kilawm silhin Kumpipa kawmah puiin aum diing a, Amah jui a lawm nungaah siangthoute chu na kawmah pui ahi diing uhi. 15 Kipaah leh nuamin pui ahi diing va, Kumpipa innpi ah aluut diing uhi. 16 Na pate uh luangin na tapate un aluah diing va, Amahuh chu leitung zousiah ah laltate in na bawl diing hi. 17 Na min chu akhang akhang a heetzing diingin ka bawl diing hi; Hujiahin mi chin in kumtuang kumtuangin nang ahung phatta diing uhi.
LA PUITU A DIING. KORAH TATE PHATNA LA, ELAMOTH A SAH DIING.
1 Pathian chu i kihuumbitna leh i haatna ahi a, Mangbat laia hung panpihtu nai gige ahi. 2 Hujiahin leilung hi hung limdangin, Taangte tuilianpi sung peh ah kisuan mahleh, I lau sih diing uhi. 3 A tuite chu ging humhumin, phuul bulhbulh mahleh, Tuipi kideihkhoptaha kihawtin taangte suliing mahleh i lau sih diing hi. Selah. 4 Luui khat aum a, hu luui kate'n Pathian khopi Tungnungpeen biahbuuh umna mun siangthou chu akipaahsah uhi. 5 Pathian chu hu khopi lailung ah aum a, hu khopi chu suhliingin aum sih diing hi; Pathian in phalvaah chiangin apanpih diing hi. 6 Namte chu thangtawmin akithing va, lalgamte akiliing uhi; Ama'n a aw asuah a, leilung ahung tui zouta hi. 7 Sepaihte LALPA i kawmah aum hi; Jakob Pathian chu i kihuumbitna uh ahi. Selah. 8 Hung un, leitung a sil susetu LALPA silbawlte enun. 9 Ama'n kidounate kawlmong tanin asutawp a, Thalmung asutan a, teipi chu asaattan hi; Kangtalaite mei ah ahaaltumhi. 10 Daai unla, Pathian ka hi chih he un; Namte lahah paahtawiin ka um diing a, Leitung ah paahtawiin ka um diing hi. 11 Sepaihte LALPA i kawmah aum a, Jakob Pathian chu i kihuumbitna uh ahi. Selah.
LA PUITA A DIING. KORAH TATE PHATNA LA.
1 Aw nanguh mi chinte, na khut uh beeng unla, Kipaahna aw in Pathian kawmah kikou un. 2 Ajiahchu LALPA Tungnungpeen chu amulkimhuai a, Amah chu leitung zousiah ah Kumpipa loupitah ahi. 3 Ama'n mi chih i nuaiah akoih diinga, Namte chu i keeng nuaiah akoih diing hi. 4 I gouluah diing chu ahung teelsah diing, Alungsiat Jakob loupina chu. Selah. 5 Pathian chu kikou aw toh achiah tou a, LALPA chu peengkuul ging toh achiah touta hi. 6 Pathian phatin la sa unla, phatin la sa un. I Kumpipa phatin la sa unla, phatin la sa un. 7 Ajiahchu Pathian chu leitung zousiah Kumpipa ahi; Heetsiamna toh phatna la sa un. 8 Pathian in namte tungah vai ahawm hi; Pathian chu a laltouphah siangthou ah atou hi. 9 Namte laltate haw, Abraham Pathian mipite ngeei haw Akikhawm khawm uhi. Ajiahchu leitung gaalphawte chu Pathian a ahi; Amah chu nasataha paahtawiin aum hi.
LA. KORAH TATE PHATNA LA.
1 LALPA chu aloupi a, i Pathian khopi ah, A taang siangthou ah nasataha phat diing ahi. 2 Hu khopi saanna akilawm a, Leitung pumpi kipaahna Kumpipa loupitah khopi chu Maallam Zion taang ahi. 3 Pathian chu hu khopi lalinnte ah aum a, Amah chu kihuumbitna in akimusah hi. 4 Ajiahchu, ngai in, kumpipate chu akikhawm va, Achiahdoh khawmta uhi. 5 Hu khopi chu amu va, huchiin thumah asa uh, Amangbang va apaimang pah uhi. 6 Hutah ah launa in amahuh aman a, Huleh natna in numei nauvei bangin aman hi, 7 Nangma'n suahlam huih in Tarshish longte na susia hi. 8 Bil a ka jaah bangun Sepaihte LALPA khopi ah, ka Pathian uh khopi ah ka muta uh; Pathian in hu khopi chu Kumtuanga diingin asukip diing hi. Selah. 9 Aw Pathian, na biahinn lailung ah Na lungsiatna tullou thute ka ngaihtuahta uhi. 10 Aw Pathian, na min dungjuiin, Na phatna chu kawlmong tanphain aum hi; Na khut jiatlam chu dihtatna in adim hi. 11 Na vaihawmnate jiahin Zion taang chu nuam henla, Juda tanute zong kipaahin um uh hen. 12 Zion kiim ah vaah unla, Huleh a kiimveel ah chiahleh un. Hutah a gaalveeninnte sim un. 13 A kulhte chiamteh hoih unla, A lalinnte en kiimveel un, Khang hung um diingte. kawma na hilh theihna diingun. 14 Ajiahchu hi Pathian chu Kumtuang kumtuanga i Pathian uh ahi a, Amah chu sih tanpha a ahung puitu diing ahi.
LA PUITU A DIING. KORAH TATE PHATNA LA.
1 Nanguh mi zousiah haw, hikhu ngaikhia unla, Nanguh khovel a teeng zousiah haw, na bil uh doh un. 2 Mi neu leh mi lian, ahau leh ajawng in zong. 3 Ka kam in pilna thu asoi diing a, Huleh ka lungtang ngaihtuahnate chu heetsiamna thu ahi diing hi. 4 Thupil ah ka bil ka doh diing a, Ka thu heet hahsa soi diing chu tingtang in ka phuangdoh diing hi. 5 Ni hoihloute a ka khetuul bul a thulimlouhna in ahung uum suaah chiangin Bang diingin ka lau diai? 6 A neihlelam uh muang a, A hauhsatna loupitah suangte ngeei zong, 7 Koima'n bangchihmahin a unau atan thei sih diing a, Tatna zong amah a diingin Pathian kawmah apiaahsah thei sih diing uhi, 8 Ajiahchu a hinna uh tatna diing chu aman tam a, Kumtuangin zong aman ape zou sih diing hi, 9 Huchia kumtuanga a hinna diing leh Sheol kokhuuh amuh louhna diingin. 10 Ajiahchu mipilte zong asi va, Huchimahin mingol leh mimawlte zong abeimang va, A hauhsatna uh midangte kawma anuutsiat uh ama'n amu hi. 11 A lungsim ngaihtuah daan uh chu a innte uh kumtuanga um diing leh A teennate uh suan zousiah tana um diing chih ahi; A gamte uh chu amahuh min mah avuah uhi. 12 Hizongleh mihing chu paahtawiin um mahleh aum gige sih a, Mangthang jeel gamsa bang giap ahi uhi. 13 Hichu mingolte lampi ahi a, Ahiinlah a haahte un a thusoi uh chu hoih asa uhi. Selah. 14 Belaam hon banga Sheol a diinga koih ahi va, Sihna in amahuh ane diing hi; Jiingkaal in midihte'n amahuh tungah thu anei diingva; A teenna vapat gamlatah, Sheol ah akilawmna uh suhsiat ahi diing hi. 15 Hizongleh Pathian in Sheol silbawltheihna apatin ka hinna chu atandoh diing a, Ajiahchu Ama'n ahung na pom diing hi. Selah. 16 Mi khat ahung hauhsat a, A innsung loupina ahung khan chiangin lau sin. 17 Ajiahchu asih chiangin bangmah akeng sih diing a, A loupina in zong ajui sih diing hi. 18 A damsungin amah leh amah kiphat zongleh (Huleh nangmah diinga sil hoih na kibawl chiangin mi'n hung paahtawi mahleh), 19 A pulepate khang a mite haw kawmah achiah diing a; Amah un vaah amu ngei sih diing uhi. 20 Thupina neia himahleh heetsiamna neilou mi chu Amangthang gamsate bang ahi.
ASAPH PHATNA LA.
1 Haattungnung, LALPA Pathian ngeei in thu asoita a, Huleh ni suaahna lam akipat atumna lam tanin leilung chu akouta hi. 2 Kilawmna a bukim, Zion apatin Pathian avaah khetahi. 3 I Pathian chu ahung diing a, adaai gige sih diing hi; A ma ah mei in ahaaltum diing a, Huleh a kiim ah huihpi nasatahin anung diing hi. 4 A mite a vaihawmna diingin tunglam apatin vaan, Huleh lei akou diing a, 5 "Ka misiangthoute ka kawmah hung puikhawm unla, Kithoihna a thuhun hung bawlpihte ngeei chu." 6 Huleh vaante'n a dihtatna aphuang uhi; Ajiahchu Pathian ngeei chu Vaihawmtu ahi. Selah. 7 "Aw ka mite, ngai un, thu ka soi diing hi, Aw Israel, nang kalhin ka phuang diing hi, Kei chu Pathian, na Pathian ngeei ka hi. 8 Ka ma a um gige na haalmang sillatte, Ahihlouhleh na kithoihnate jiahin Ka hung taai sih diing hi. 9 Na inn apat bawngtal ka la sih diing a, Na ganhuang apat keeltalte ka la saam sih diing hi. 10 Ajiahchu gamnuai sa chinteng kei a ahi a, Huleh mual saang khat tunga gangual umte zong. 11 Taang a va zousiah ka he veh a, Leitung a ganhing zousiah zong kei a ahi. 12 Ka gil akial a ahihleh nang ka hung hilh sih diing, Ajiahchu leilung leh a sunga sil um zousiah kei a ahi. 13 Bawngtalte sa nein, Ahihlouhleh keeltalte sisan ka dawn diing adiaimah? 14 Pathian kawmah kipaahthu soina kithoihna laan unla, Huleh Tungnungpeen kawmah na thuchiamte taangtun un. 15 Huleh na mangbat ni in hung kou inla, Ka hung hunkhe diing a, huchiin na hung paahtawi diing hi." 16 Hizongleh migilou kawmah Pathian in, "Ka thuguatte soi diing, Ahihlouhleh ka thuhun na kam a lou diinga bang thuneihna nei na hiai? 17 Ajiahchu thununna na hua a, Ka thute na nunglam ah na paai hi. 18 Guta na muhin phaje na sahpih a, Aangkawmte na kikoppih hi. 19 Giitlouhna diingin na kam chu na jaleensah a, Huleh na lei in heemna lampi na siam gige hi. 20 Tou kawmin na unau kalhinna soi a, Na nu tapa ngeei zong na soisia hi. 21 Hi silte chu na bawl a, ke'n bangmah ka soi sih hi; Nangmah bang giap diingin na hung ngaihtuah hi; Hizongleh ka hung taai diing a, Huleh na mitmuh ah sil kizom jeelin ka sulang diing hi. 22 Tuin, nanguh Pathian mangngilhte, ngaihtuah un, Huchilou inchu ka hung luaitel dimdem diing a, Huchiin koimah ahung hunkhe thei aum sih diing hi. 23 Koipouh kipaahthu soina kithoihna laan in ahung paahtawi a, Huleh a umdaan veenghoih kawmah Pathian hutdamna ka ensah diing hi," achi hi.
LA PUITU A DIING. BATHSHEBA ALUPPIHNUNGA ZAWLNEI NATHAN A KAWMA AHUNG NUNGA DAVID PHATNA LA.
51 Aw Pathian, na lungsiatna tullou dungjuiin Ka tungah zahngai inla, Na lainatna nasatah dungjuiin Ka tatkhelhnate hung thaimangsah in. 2 Ka giitlouhna hung sawpsiangsah vilvel inla, Ka sualna apat hung silsiang in. 3 Ajiahchu ka tatkhelhnate ka he a, Huleh ka sualna ka ma ah aum zingzing hi. 4 Na tungah, nangmah tung chauh ah sil ka hihsual a, Na mitmuhin hi silgilou ka na bawlta hi, Thu na soi chianga siamtanga na um a, Huleh vai na hawm chianga soiseelbeia na um theihna diingin. 5 Ngai in, sual in ka hung piang a, Huleh ka nu'n sual in ahung na paai hi. 6 Ngai in, nangma'n sunggil lamah thutahna na deih a, Huchiin akimulou lamah pilna na hung hesah diing hi. 7 Hussop in hung susiang inla, huchiin ka siang diing a; Hung silsiang inla, huchiin vuuh saangin ka ngoujaw diing hi. 8 Nuamna leh kipaahna hung jasah in, Guh na suhtansate anuam theihna diingun. 9 Ka sualnate apat na maai phual inla, Huleh ka giitlouhna zousiah hung thaimangsah in. 10 Aw Pathian, keimah ah lungtang siangthoutah siam inla, Huleh ka sungah lungsim dihtah bawlthah in. 11 Na umna apat hung paaimang sinla, Keimah apat na Hagau Siangthou lamang sin. 12 Na hutdamna kipaahna hung pekiit inla, Huleh thanopna hagau in hung tukip in. 13 Huchiin takhialte kawmah na lampite ka hilh diing a, Huleh misualte'n nangmah lam ahung nga diing uhi. 14 Aw Pathian, nang ka hutdamna Pathian, Sisan suah jiaha siamlouhtansahna apat hung hunkhia in, Huchiin ka lei in na dihtatna thu la in asa diing hi. 15 Aw Lalpa, ka muuh hung honsahinla, Huchiin ka kam in na phatna asulang diing hi. 16 Ajiahchu kithoihna ah na kipaah sih a, huchi hilou hileh ka hung peta diing hi; Haalmang sillat tungah kipaahna na nei sih hi. 17 Pathian deihjawng kithoihna chu hagau hasia ahi; Aw Pathian, hagau hasia leh lungtang kisiih tuntun chu na musit sih diing hi. 18 Na deih bangtahin Zion tungah sil hoih bawl inla, Jerusalem kulhbaangte lem in. 19 Huchiin dihtatna kithoihnate tungah na kipaahta diing a, Haaltum sillat leh haaltum pumpi tungah toh; Hutahchiangin na maitaam tungah bawngtal gualte alaanta diing uhi.
LA PUITU A DIING. EDOMMI, DOEG IN, "AHIMELEK INN AH DAVID ACHIAH," CHU SAUL KAWMA AHILH LAIA DAVID MASKIL.
1 Mi haat Aw, bang diinga silgilou bawl suang na hiai? Pathian lungsiatna tullou chu aum gige ahi. 2 Mulmeetna hiamtah bangin, Na lei in heembawltahin silgilou angaihtuah hi. 3 Hoih saangin gilou na deihjawa, Dihtatna thusoi saangin juau thusoi na deihjaw hi. Selah. 4 Aw nang mi heemhaat lei, Mi susethei thu zousiah na deihjaw hi. 5 Hizongleh Pathian in huchibangmahin kumtuanga diingin nang ahung suse diing; Ahung lamang diing a, na puanbuuh apat ahung luaikhe diing a, Huleh mihing gam apatin ahung botdoh diing hi. Selah. 6 Midihtatte'n zong amu diing va alau diing uh, Huleh anuihsan diing uh, 7 "En un, Pathian a haatna a neilou a, Hizongleh hauhsatna loupitah muang a, Huleh a giitlouhna a amah leh amah kisuhaat jawpa chu hi pa ahi," chiin. 8 Hizongleh kei chu Pathian inn a olive sing duah bang ka hi; Pathian lungsiatna tullou kumtuang kumtuangin ka muang diing hi. 9 Hikhu na bawl jiahin Kumtuangin ka hung phat diing hi; Huleh na min ka ngaah diing hi, ajiahchu na misiangthoute ma ah hichu ahoih hi.
LA PUITU A DIING. MAHALATH DUNGJUIIN. DAVID MASKIL.
1 Mingol in a lungtang in, "Pathian aum sih," achi hi. Asegawp va, sil sual kihdah huaitah abawl uh; Sil hoih bawl mawngmawng aum sih hi. 2 Hesiama Pathian hawlmi aum viai mah chih muh tumin Pathian in vaan apat mihing tate ahung ensuh hi. 3 Mi chin in alehlam anga chiat va, Abuaahbaang zou vehta uhi; Koimah sil hoih bawl mawngmawng aum sih uh, aum sih uh, Khatmah zong aum sih hi. 4 Tanghou aneeh bangva ka mite ne zou, Pathian min lah lou ngeilou, sualna natongte'n Heetna himhim neilou ahi viaimah? 5 Launa um louhna mun ah lau mahmahin aum uhi, Ajiahchu nangmah hung uumtu guhte Pathian in asudalhta hi; Pathian in amahuh amuhsit jiahin nangma'n amahuh na sumualphouta hi. 6 Zion akipat Israelte hutdamna hung tung mei leh Aw! Pathian in a mite saltaang apuikiit chiangin Jakob nuam henla, Israel kipaahta heh.
LA PUITU A DIING. KAIHGING GUI NEIA SAH DIING, ZIPH MITE'N, "DAVID I KAWMAH KIBU HILOU AHIAIMAH?" CHIA SAUL KAWMA AHUNG HILHLAIVA DAVID MASKIL.
1 Aw Pathian, na min in hung hundoh inla, Na haatna in ka siamtandaan sulang in. 2 Aw Pathian, ka haamteina ngaikhia inla, Ka kam a thute ah bil na doh in. 3 Ajiahchu meelheetlouhte'n ahung sual va, Ngongtatte'n ka hinna suhmang tumin ahawl uhi; Pathian a ma vah akoih sih uhi. Selah. 4 Ngai in, Pathian chu keimah hung panpihtu ahi a, Lalpa chu ka hinna suhingtu ahi. 5 A giitlouhna jiahun ka meelmate chu athuhkiit diing hi. Na ginumna jiahin amahuh sumang in. 6 Keimah deih thuin na kawmah sil ka laan diing; Aw LALPA, na min ka phat diing hi, huchu ahoih ngaala. 7 Ajiahchu Ama'n ka mangbatna zousiah apat ahung hunkheta a, Huleh gualzoutahin ka mit in ka meelmate ka muta hi.
LA PUITU A DIING. NEGINOTH A SAH DIING. DAVID MASKIL.
1 Aw Pathian ka haamteina ah na bil doh inla, Huleh ka ngetna apat kiphual sin. 2 Hung ngaihsah inla hung dawng in; Ka lunggeelna ah ka khawl tawldam thei sih a, ka thuumthuum hi, 3 Meelma husa jiahin leh Migiloute nuaisiahna jiahin; Ajiahchu amah un giitlouhna ahung vuhkhum va, Huleh lungthahin ahung hua uhi. 4 Ka lungtang ka sungah ana mahmah a, Huleh sihna mulkimna in ahung netkhum hi. 5 Launa leh liinna in ahung bawm a, Huleh lauhthawhgna in ahung tuamkhum hi. 6 Hulehkeima'n,"Vakhu bangin ha nei hileng Aw! Huchileh chu ka leeng mang diing a, tawldamin ka um diing hi. 7 Ngai in, huchileh chu gamlapi ah ka vaah lehleh diing a, Huleh gamdaai ah ka um diing hi. Selah. 8 Huihpi leh guahpi apatin kihuumbitna Kintahin ka deih diing," ka chi hi. 9 Aw Lalpa, a lei uh susia inla khenthaang in; Aj iahchu khopi ah hiamngapna leh kihauna ka muta ngaala. 10 Suun leh jaanin khopi kulhbaang tungah avaah lehleh va, Hihkhelhna leh mangbatna zong a lahah aum hi. 11 Giitlouhna hutah laiah aum a, Heembawlna leh lepchiahna in a kholai anuse sih hi. 12 Ajiahchu ahung soisia lah ka meelma ahi sih a, Hileh chu ka thuaahthei diing hi. Ka tunga kiliansah lah ahung hotu ahi sih a, Hileh chu ka kibuhmangsanta diing hi. 13 Himahleh nang, ka kibatpih, ka lawm, Ka kithuahpih theih mahmah na hi ngaala. 14 Kituaahtahin i kikumkhawm jeel a, Hulehb Pathian inn ah mihon toh i chiah khawm hi. 15 Sihna a tungvah tungguih henla, Sheol ah ahingin pai suh uhheh, Ajiahchu a teenna mun uh leh a lahvah giitlouhna aum hi. 16 Ke'n chu Pathian ka kou diing a, Huchiin LALPA'N ahung hundoh diing hi. 17 Nitaahlam leh jiingkaal leh suunin Ka haamtei diing a, huleh ngaihtahin ka kikou diing a, Huchiin Ama'n ka aw aja diing hi. 18 Ka tunga kidouna apatin Ama'n ka hinna hamuangtahin ahunkheta hi, Ahung sualte lah tampi ahi ngaalva. 19 Nidanglai apat um gige Pathian in aja diing a, Amahuh asugim diing hi. Selah. Kilamdanna aneih ngeilouh jiahun, Amah un Pathian alau sih uhi. 20 Amah toh kituaahte kalhin Ama'n a khut ahata a; A thuhun asuseta hi. 21 A kam a thu pawtte chu bawngnawidat saangin aneemjawa, Hizongleh a lungtang sungah kidouna aum hi; A thusoite sathau saangin aneemjawf a, Hizongleh naamsau dohkhete ahi uhi. 22 Na puaahgih LALPA tungah nga inla, Huchiin Ama'n nang ahung domkaang diing hi; Ama'n midihtat kiliin diing bangchihmahin aphal sih diing hi. 23 Hizongleh Aw Pathian, nangma'n amahuh chu beimangna kokhuuh ah na puisuh diing a, Sisansuah mi leh lepchiahte chu a damsung kimkhat uh zong adam zou sih diing uhi; Hizongleh ke'n chu nangmah ka hung muang diing hi.
LA PUITU A DIING. JONATH ELEM REHOKIM DUNGJUIIN PHILISTINTE'N GATHKHUA A DAVID AMATLAIVA DAVID MIKTAAM.
1 Aw Pathian, hung khotuah in, ajiahchu mi'n ahung tuan deen uhi; Nituma hung douin, ahung nuaisiah uhi. 2 Ka meelmate'n nitengin ahung tuan deen uhi, Ajiahchu kiliansahtaha ahung doute tampi ahi uhi. 3 Ka lau hun chiangin Nangmah ka hung muang diing hi. 4 Pathian ah (a thu ka phat diing a), Pathian ah ka tahsanna ka koihtaa, Ka lau sih diing hi. Mi'n bang ahung loh thei diai? 5 Ni chinin ka thute alakawi va; A ngaihtuahna zousiah uh chu ka siatna diing ngen ahi. 6 Ka hinna ataan chiangun, Akikhawm khawm va, akiphualmang va, Ka kalsuante achiamteh uhi. 7 Giitlouhna jaalin asuaahta diviaimah? Aw Pathian, na lungthahna in mite paaikhia in. 8 Nangma'n ka vaahvaihna na chiamteh hi; Ka mittui na tuithawl ah thun in; Na lehkhabu ah atuang sih viaimah? 9 Huchiin, nang ka hung kouh chiangin Ka meelmate anungtaai diing uhi; Hikhu ka he hi, ajiahchu Pathian ka lama pang ahi. 10 Pathian ah (a thu ka phat diing a), LALPA ah (a thu ka phat diing hi), 11 Pathian ah ka tahsanna ka koihtaa, Ka lau sih diing hi. Mihing in bang ahung loh diai? 12 Aw Pathian, na kawma kichiamnate in ahung kaanva; Na kawmah phatna ka hung pe diing hi. 13 Ajiahchu nangma'n sihna apatin ka hinna na hunkheta hi. Hinna vaah hoihtaha a Pathian ma a ka paileh theihna diingin Ka keengte puuhlou diingin na huumbit sih diaimah?
LA PUITU A DIING. AL-TASH'HETH DUNGJUIIN. SAUL APAT ATAAI A, SUANG KOHAWM A AUM LAIA DAVID MIKTAM.
1 Hung khotuah in, Aw Pathian, hung khotuah in. Ajiahchu ka hinna in nangmah ahung muang hi; Huleh hi vangsiatnate abei masiahin na ha liim ka hung beel diing hi. 2 Tungnungpeen Pathian kawmah ka kikou diing a, Pathian kei diinga bangkim hung bawlsahpa kawmah. 3 Ama'n vaan apatin asawl diing a huleh ahung hundoh diing hi; Ama'n ahung tuandeentu chu anuaisiah diing hi. Selah. Pathian in a lungsiatna tullou leh a thutahna ahung sawlkhe diing hi. 4 Ka hinna chu huumpibahneite lahah aum hi; Mei a kuang mihing tate lah ngeei ah ka lum hi, Hute ha chu tei leh thaltang ahi a, A lei uh chu naamsau hiamtah ahi. 5 Aw Pathian nang chu vaante tungpeh ah tawisangin um inla; Na loupina chu leitung zousiah tungah umta hen. 6 Amah un ka keeng awhna diingin thaang akam va: Ka hinna akuun khiukheu hi; Ka ma ah kokhuuh atou va, Hute laitah ah amahuh mah akia uhi. Selah. 7 Ka lungtang akip hi, Aw Pathian, ka lungtang akip hi; La ka sa diing a, ka hung phat diing hi. 8 Halh in, ka loupina; Halh in, peehging leh tingtang. Ke'n chu phalvaah ka phawng diing hi. 9 Aw Lalpa, mite lahah nangmah ka hung phat diing a; Namte lahah nangmah phatin la ka sa diing hi. 10 Ajiahchu na lungsiatna tullou in vaante asu a, Huleh na ginumna in vaan meilumte tan apha hi. 11 Aw Pathian, nang chu vaante tungpeh ah tawisangin um inla; Na loupina chu leitung zousiah tungah umta hen.
LA PUITU A DIING. AL-TASWHETH DUNGJUIIN. DAVID MIKTAM.
1 Thuneitute haw, dihtatna thu na soi tahzet na viai? Nanguh mihing tate haw, thudihtahin vai na hawm na viai? 2 Ahi, na lungtang vah giitlouhna na bawl va; Leitung a na khut hiamngapna bawl uh na teh uhi. 3 Migiloute chu a nu gil sung vapatin tuamkoihin aum va, Asuaah vapatin juau soiin athaithaap uhi. 4 A gu uh chu guulgu bang ahi a, Sohpuang bilngong khojalou bang ahi uhi. 5 Bangchibanga siamin jawl mahleh uh, Hute'n guul aitawite aw angaikhe sih diing uhi. 6 Aw Pathian, a kam va a ha uh tohsah inla, Aw LALPA, huumpibahnei luunlaite uiha chu suhtansahin. 7 Amahuh chu khawlloua luang tui bangin luangmang uh henla, Thai kaap tuma a thalmung aloih chiangin A thaltangte uh bangmahlou suaah heh. 8 Akitawl kawma tuisuaah teengkol bangin amahuh um uh henla, Nisa mulou diing nautolhte bangmeiin. 9 Na beelte un lingsing meikuang sa aheet maun, Ama'n piingpei bangin amahuh alamang diing hi, Ahing nalaite hileh akuang nalaite hileh alamang diing hi. 10 Phubalaahna amuh chiangin midihtat chu anuam diing a, Migilou sisan ah a keeng asil diing hi. 11 Huchiin mi'n, "Midihtat a diingin kipaahman aum tahzet a, Lei ah vaihawmpa chu Pathian ahi tahzet hi," achi diing uhi.
LA PUITU A DIING. AL-TASH'HETH DUNGJUIIN SAUL IN MI ASAWL A, DAVID THAT DIINGA A INN ATAAN LAIA DAVID MIKTAM.
1 Aw ka Pathian ka is meelmate apatin hung hunkhia inla, Ahung sualte apatin munsang ah bittahin hung koih in. 2 Silgilou bawlte lah apatin hung hunkhia inla, Huleh sisan suahhaatte apatin hung hundoh in. 3 Ajiahchu ngai in, amah un ka hinna ataang uhi; Aw LALPA, ka tatkhelhna jiah hilouin, ka sualna jiah zong hilouin, Mihiamngamte ahung sual diingin akikhawm uhi. 4 Ka dihlouhna hiloupiin zong kei dou diingin ataai va huleh akisa uhi. Hung panpih diingin kisuhalh inla, huleh en in. 5 Aw LALPA, nang sepaihte Pathian, Israelte Pathian, Hujiahin nam zousiah gawt diingin kisuhalh inla, Migilou takhialte tungah zahngai sin. Selah. 6 Nitaah lam chiangin ahung kihkiit va, Ui bangin ahaam vungvung va, Khopi kiimveel ah avaah lehleh uhi. 7 Ngai in, a kam un asa-ih khia va, Naamsaute a muuh vah aum hi; Ajiahchu amah un, "Koi in aja diai?" achi mei uhi. 8 Himahleh Aw LALPA, nang amahuh na nuihsan diing a, Nangma'n nam zousiah chu na simmohbawl diing hi. 9 A haatna jiahin nangmah ka hung ngaah diing hi; Ajiahchu Pathian chu ka gaalveen kulh ahi. 10 Ka Pathian in a lungsiatna tullou in ahung veeng diing a, Ka meelmate tunga ka deih chu Pathian in ahung musah diing hi. 11 Amahuh chu that sinla, huchilou inchu ka mite'n amangngilh kha diing uhi; Aw Lalpa, ka phaw uh, na silbawltheihna in Amahuh sudalh inla, sungiam in. 12 A kam uh sualna jiah leh a muuh va thu pawtte jiahin Akiletsahna ngeei vah matin um uh heh, Huleh a haamselohna jiah uh leh a juauthu soina jiahun zong. 13 Lungthah in amahuh sumang in, Aum nawn louhna diingun amahuh sumang in; Huleh Jakob ah kawlmong tanin Pathian in vai ahawm chih amahuh hesah in. Selah. 14 Huleh nitaah lam chiangin ahung kihkiit va, Ui bangin ahaam vengvung va, Huleh khopi kiimveel ah avaah lehleh uhi. 15 Neeh diing hawlin sahlehang ah avaah lehleh va, Atai louh uh leh ahaam vengvung uhi. 16 Hizongleh ke'n chu na silbawltheihna la in ka sa diing a, Ahijiingkaalinna lungsiatna tullou thu ngaihtahin la in ka sa diing hi; Ajiahchu nang chu ka mangbat ni a ka gaalven kulh leh kihuumbitna na hi. 17 Aw nang ka haatna, nangmah phatin la ka sa diing hi; Ajiahchu Pathian chu ka gaalveen kulh, Lungsiatna tullou ka Pathian ahi.
LA PUITU A DIING. SHUSHAN EDUTH DUNGJUIIN. ARAM-NAHARA MITE LEH ARAMZOPAH MIT TOH AKISUAL A JOAB AKIHKIIT A, EDOMTE SIING KHAT LEH SAANG NIH CHI PHAI AATHAHGAM
NUNG A KIHILHNA DIINGA DAVID MIKTAM. 1 Aw Pathian, nangma'n na hung paaikheta a, Nangma'n na hung sudalhta a, Nangmah na lungkimta sih hi; Aw, keiuh hung tungding kiit in. 2 Nang in lei na kiliingsah a, Na kikeehsahta hi; A khikeeh laite siamthah kiit in, akiliing liing ngaala. 3 Na mite sil hahsa pipi na tuaahsah a, Hoivaahna uain na hung dawnsahta hi. 4 Thutah jiaha puanlaap jaah ahih theihna diingin, Nangmah laute kawmah puanlaap na peta hi. Selah. 5 Na mideihtah hutkhiaha aum theihna diingin, Na khut jiatlam in hung hunkhia inla, hung ngaikhia in. 6 Pathian in a sianthouna in thu asoita hi: "Ka nuam diing a, Shekem ka hawmkhen diing a, Sukkoth Phai ka tehkhe diing hi. 7 Gilead kei a ahi a, huleh Manasseh zong kei a ahi; Ephraim zong ka lutang phawh ahi; Juda chu ka daanpetu ahi. 8 Moab ka kisilna beel ahi a, Edom tungah ka keengtophah ka paai diing hi; Philistia, keimah jiahin gualzouin kikou in," chiin. 9 Khopi kulh bittah ah koi in ahung puiluut diai? Edom ah koi in ahiai hung puiluut diing? 10 Aw Pathian, keiuh hung paaikhepa, nangmah na hi sih diaimah? Huleh Aw Pathian, ka sepaihte uh toh gaal kuankhawm lou, nang na hi sih diaimah? 11 Meelma apat panpihna hung pia in, Ajiahchu mihing hutkhiahna chu bangmahlou ahi. 12 Pathian jaalin hangtahin ka dou diing uhi, Ajiahchu Amah chu i meelmate tuanbeh diingpa ahi.
LA PUITU A DIINGIN. NEGINOTH SAH DIING. DAVID PHATNA LA.
1 Aw Pathian, ka kikou ngaikhia inla; Ka haamteina hung ngaihsah in. 2 Ka lungtang abahgawp chiangin Kawlmong apat ka hung kou diing a, Kei saanga sangjaw suangpi ah hung pui in. 3 Ajiahchu nang kei a diingin kihuumbitna na hi a, Ka meelmate apat gaalveen innsang kiptah na hi gige hi. 4 Na biahbuuh ah kumtuangin ka um diing a, Na hajaah liim nuai ah ka muang diing hi. Selah. 5 Ajiahchu Aw Pathian, nang in ka thuchiamte na ngaikhia a, Na min laute goutan chu na hung peta hi. 6 Nangma'n kumpipa damsung na susau diing a, A kumte zong khang tampi bang mei ahi. 7 Amah chu Pathian ma ah kumtuangin aum zing diing a, Aw, amah huumbit diingin lungsiatna tullou leh thutahna guatsah in. 8 Huchiin na min phatin kumtuangin la ka sa zing diing hi, Huchia ka thuchiamte ni tenga ka suhtaangtung theihna diingin.
LA PUITU A DIING. JEDUTHUNA DIINGIN. DAVID PHATNA LA.
1 Tahzetin ka hinna in Pathian angaah khiinkhian a; Ka hutdamna chu Amah apat ahi. 2 Ka suangpi leh ka hutdamna chu Amah chauh ahi; Amah chu ka gaalveenkulh ahi a; Nasataha suhliingin ka um sih diing hi. 3 Mi khat bangtan ahiai na sual diing uh? Na bawnun thahin na um diing va, Baang awn diaiduai leh daai puuh dehdeh bang na hi diing uh. 4 A loupina apat a sawnkhe diing chauhin akikou diing va; Juau soi chu a kipaahjawngtah uh ahi; A kam un avangpiaah va, Hizongleh a sunglam vah haamsia aloh uhi. Selah. 5 Aw ka hinna, Pathian chauh ngaahin um khiinkhian in, Ajiahchu ka kinepna Amah apat ahi ngaala. 6 Ka suangpi leh ka hutdamna chu Amah chauh ahi; Ka kihuumbitna ahi a suhliingin ka um sih diing hi. 7 Ka hutdamna leh ka loupina chu Pathian ah aum a; Ka haatna suangpi leh ka gaalveenkulh chu Pathian ah aum hi. 8 Nanguh mite haw, bangchihlaipouhin Amah muang unla; A ma ah na lungtang uh sungbua un; Pathian chu ei diinga kihuumbitna ahi. Selah. 9 Tahzetin mi dinmun ngiamte chu bangmalou ahi va, Mi dinmun sangte chu juau giap ahi uh; Buuhna a buuh hileh uh chu, A bawnun bangmalou mei saangin zong ajaangjaw uhi. 10 Mi neihsa laahsah tahsang sinla, Huleh suamna ah kineem thawn sih un; Hauhsatna ahung pun a ahihleh, Na lungtang a tungah nga sin. 11 Pathian in khat vei asoita a, Nihvei hikhu ka jata hi: Silbawltheihna chu Pathian a ahi chih chu. 12 Aw Lalpa, lungsiatna tullou zong nang a ahi; Ajiahchu nangma'n mi chin a natoh bangjeelun na thuh hi.
JUDIA GAMDAAI A AUM LAIA DAVID PHATNA LA.
1 Aw Pathian, nang chu ka Pathian na hi a; Matahin nangmah ka hung hawl diing hi; Ka hinna nangmah lunggulhin adangtaah a, Ka tahsa in ahung ngai hi, Tui um louhna gam gaw dangtaahna mun ah. 2 Huchiin na silbawltheihna leh na loupina mu diingin, Mun siangthou ah nangmah ka hung hawlta hi. 3 Ajiahchu na lungsiatna tullou chu hinna saangin ahoihjawh a; Ka muuh in ahung phat diing hi. 4 Huchiin ka damsung tengin ka hung phat diing a; Na min in ka khutte ka jaah diing hi. 5 Ka hinna chu chintuiguh leh thau a tai bangin atai a, Ka kam in kipaahna muuh toh ahung phat diing hi. 6 Ka lupna tunga nang ka hung geeldoh hun chiangin Jaanveen hunte ah na tungthu ka ngaihtuah ngiitngeet hi. 7 Ajiahchu nang chu ahung panpihpa na hi a, Na haliim nuaiah ka kipaah diing hi. 8 Ka hinna in nang ahung beel tinten a; Na khut jiatlam in na hung domkaang hi. 9 Hizongleh ka hinna suhmang tuma hawlte chu Leimun nuainung ah aluut diing uhi. 10 Naamsau silbawltheihna a piaahdoh ahi diing va; Si-aalte tanvou ahita diing uhi. 11 Hizongleh kumpipa chu Pathian ah anuam diing hi; Amah min loua kichiam photmah in asuang diing uh; Himahleh juauthu soihaatte kam chu huumin aum diing hi.
LA PUITU A DIING. DAVID PHATNA LA.
1 Aw Pathian, ka haamtei laiin ka aw j a inla; Meelma launa apatin ka hinna huumbit in. 2 Migiloute kihouguuhna apat hung phual inla, Silsual bawlte buaina siam lah apatin. 3 Amah un a lei uh naamsau bangin ataat hiam va, A thu khatahte uh thai banga kaap diingin angiim uhi, 4 Soisiat beite aguuha akaap theihna diingun; Thakhatin amah akaap va alau sih uhi. 5 Silgilou bawl diingin akihasuan va; Aguuha thaangkam thu ah akihou uh; Amah un, "Koi in hute amu diai?" achi uhi. 6 Silgilou asuangtuah va, "Ei un tohguan piltah i bawlbukimta uhi," achi uhi. Mihing sunglam ngaihtuahna leh lungtang chu thuuhtah ahi. 7 Hizongleh Pathian in amahuh chu thaltang in akaap diing a; Thakhatin suhliamin aum diing uhi. 8 Huchiin Ama'n a lei mah un amahuh apuuhsah diing a; Amahuh mu zousiah ataaimang diing uhi. 9 Huleh mi zousiah in alauta diing va; Pathian natoh asoiphuangta diing uhi; Huleh amah un asilbawl chu piltahin angaihtuahta diing uhi. 10 Midihtat chu LALPA ah akipaah diing a, huleh Amah atahsang diing hi. Huleh lungtang dihtah paai zousiah in asuang diing uhi.
LA PUITU A DIING. DAVID PHATNA LEH LA.
1Aw Pathian, na ma ah zahna daaidide aum a, Zion ah phatna in nang ahung ngaah hi; Huleh na kawmah thuchiam taangtun ahi diing hi. 2 Aw nang haamteina ngaikhetu, Na kawmah mi zousiah ahung pai diing uhi. 3 Giitlouhnate'n ahung zou a, Ka tatkhelhnate uh chu nang na ngaidam diing hi. 4 Na biahinn huang sunga aum theihna diinga na teel mi, Huleh na kawm naih diinga na siam mi ahampha hi. Na inn hoihna, na biahinn siangthou hoihna ngeei in ka tai diing uhi. 5 Aw ka hutdamna Pathian uh, Nang in natoh lamdangtahte in dihtatna in nahung dawng diing hi, Nang chu khovel kawlmong tan leh tuikhanglian gamlapi a Mi zousiah muanpa nahi hi; 6 Silbawltheihna a kithuam a, Taangte a thahaatna a sukippa; 7 Tuipi ging honhonte, Akihawt ging joijoite leh mipi thawm ging vengvung sudaaipa na hi. 8 Kawlmong a umte'n zong na chiamchihna silbawlte alau va; Jiingkaal leh nitaahlam pawtdohnate na nuamsah hi. 9 Nangma'n lei na veh a, Tui in na tapkawt a, nasatahin na suhoih a; Pathian luui chu tui in adim a; Lei huchibanga na bawlzoh chiangin Amahuh diingin buhlebaal na siamsah hi. 10 Lei kilette chu tui kiningchingtahin na pia a, A sai kichiangte chu na suhnaamsaha; Guahtui in na nipsah a, Ahung poudohte chu na vangpiaah hi. 11 Kumte chu na hoihna in na khuhsah a, Na lou lampi dungte ah kiningchinna buhlebaal ataahkhiahi. 12 Gamdaai a gan tatna munte ah ataahkhia a, Mual neute zong nuamna in akithuam uhi. 13 Gantatna munte chu gan hon in atuam a, Phaijaangte zong haichi in adim hi; Nuamin akikou va, la zong asa uhi.
LA PUITU A DIING. LA. PHATNA LA.
1 Nanguh leitung zousiah haw, Pathian paahtawiin nuamin kikou un. 2 A min loupidaan chu la in sadoh unla; A phatna chu hih thupi un. 3 Pathian kawmah, "Na natohte limdang hina mei e! Na silbawltheihna loupina jiahin Na meelmate na kawmah akipeluut diing uhi. 4 Leitung pumpi in nangmah ahung be diing va, Nangmah phatin la asa diing uhi; Na min phatin la asa diing uhi," chi un. Selah. 5 Hung unla, Pathian natohte en un, Mihing tate tunga a silbawl ah Amah chu alimdang hi. 6 Ama'n tuipi chu gamgaw asuaahsah a; Keeng in luui apaikaan uhi. Hutah ah amah ah i nuam uhi. 7 A silbawltheihna in kumtuangin vai ahawm a, a mit in namte aenkhia hi; Mihelhaatte chu amah uh leh amahuh kipaahtawi sih uh heh. Selah. 8 Mi chinte Aw, i Pathian uh phat un. Huleh Amah phatna aw ging jaahin umsah un. 9 Ama'n i hinna uh ahung veenbitsah a, I keengte uh atolh aphal sih hi. 10 Ajiahchu Aw Pathian, nang in na hung enchianta a, Dangka siih suhsiang bangin na hung susiangta hi. 11 Nang in leen ah na hung puiluut a, Ka kawng vah puaahgihtah na koih hi. 12 Nang in mite kaangtalai in ka lutang uh na gawisah a, Mei leh tui kaantanin ka chiah va; Hizongleh kiningchinna mun ah na hung puiluutta hi. 13 Na inn ah haalmang sillatte toh ka hung luut diing a, Ka thuchiamte na kawmah ka taangtun diing hi, 14 Mangbanga ka um laia ka muuh in a lamdohte leh Ka kam in asoikhiahte chu. 15 Na kawmah gan thautah haalmang sillatte ka laan diing a, Belaamtal haal gimtuuite toh; Bawngtalte toh keeltalte ka laan diing hi. Selah. 16 Nanguh Pathian lau zousiah haw, hung unla ngai un, Huleh ka hinna a diinga ahung bawlsahte ka hung phuang diing hi. 17 A kawmah ka kam in ka kikou a, Ka lei a paahtawiin aum hi. 18 Ka lungtang a giitlouhna ka ngaihtuah leh, Lalpa'n ahung ngaikhe sih diing hi. 19 Hizongleh Pathian in ahung ngaikhe tahtah a; Ka haamteina aw ahung ngaihsahta hi. 20 Ka haamteina anakoihmang loutu leh Kei apat a lungsiatna tullou koihmang loutu Pathian chu Phatin um hen.
LA PUITU A DIING. NEGINOTH TOH SAH DIING. PHATNA LA.
1 Pathian in hung khotuah henla, vaang hung pia heh, A meel chu i tungah taangsah hen, Selah 2 Na lampi chu leitung a mi heet ahih theihna diing leh Na hutdamna chu nam chin kawma heet ahih theihna diingin. 3 Aw Pathian, mite'n nang hung phat uh henla; Mi zousiah in nang hung phat uh heh. 4 Aw, namte kipaahin um uh henla, nuamin la sa uh heh. Ajiahchu dihtattahin mite tungah thu na khen diing a, Leitung a namte vai na hawmsah diing hi. Selah 5 Aw Pathian, mite'n nang hung phat uh henla; Mi zousiah in nang hung phat uh heh. 6 Lei in a gah asuah a, Pathian, i Pathian ngeei un ahung vangpiaah hi. 7 Pathian in ahung vangpiaah diing a, Huleh kawlmong tana mi zousiah in Amah alau diing uhi.
LA PUITU A DIING. DAVID PHATNA LA.
1 Pathian thou henla, A meelmate suhdalhin um uh heh; Amah hote zong a ma ah taaijaah uh heh. 2 Meikhu muutmanga aum bangin Amahuh muutmang in; Khuailu mei kawma atuisuaah bangin Migiloute Pathian ma ah beimang uh heh. 3 Hizongleh midihtatte chu kipaahtahin um uh henla; Pathian ma ah nuam uh hen; Huleh nasatahin nuam uh hen. 4 Pathian paahtawiin la sa unla, a min phatin la sa un; Meipi tunga tuangpa chu tawisang unla, A min chu LALPA ahi, huleh a ma ah nuam un. 5 Pathian chu a umna mun siangthou ah Pa neiloute pa leh meithaite gumpa ahi. 6 Pathian in mi tangkhatte diingin innkuan asiamsah a; Saltaangte chu kiningchinna ah apuikhia a; Helhaatte chauh gamgaw ah ateeng uhi. 7 Aw Pathian, na mite ma puia na hung pawtkhiah laiin, Gamdaai a na paisuaah laiin, Selah. 8 Lei akiliing a; Vaante'n zong Pathian ma ah guah ajusah uhi; Sinai taang hilhial zong Pathian ma ah, Israelte Pathian ma ah akiliing hi. 9 Aw Pathian, nangma'n guah tampi na jusah a, Hukhu in na goutan gam agot laiin sunomin na halhsah hi. 10 Na mipite hutah ah ateeng va; Aw Pathian, nangma'n na hoihna in gentheite a diingin a mamoh uh na pia hi. 11 Lalpa'n thu apia a, Hu phuangjaahte chu pawl loupitah ahi uhi: 12 "Sepaihte kumpipate ataaidalh va, Huleh inn a umnu in gaallaah thil ahawm diing hi. 13 Belaam khumna huang sungah lum zongleh chin, Nang chu vakhu ha dangka tui a kiluankhum a, A ha mul sana taangtah tui a luankhum bang na hi diing hi." 14 Bangkimbawltheipa'n hutah a kumpipate asuhdalh laiin, Zalmon taang tunga vuuh kia bang ahi. 15 Pathian taang chu Bashan taang ahi a, Taangvuum tamtah nei taang chu Bashan taang ahi. 16 Nanguh mualvuum tamtah nei taangte haw, Bang diinga Pathian in teenna diinga adeih taangte chu thangsiattaha en na hi viai? Ahi, LALPA chu kumtuangin hutah ah ateeng diing hi. 17 Pathian kaangtalaite chu saang sawmnih, asaang asaang ahi uhi; Lalpa chu Sinai taang a aum bangin, a lahvah mun siangthou ah aum hi. 18 Nang chu tunglam ah na kaltou a, Na matte chu salin na pui hi; LALPA Pathian a lahva ateen theihna diingin mihingte lahah Silpiaahte na mu hi, mi helhaatte lah ngeei ah zong. 19 Lalpa, ni tenga puaahgih hung dawnpa, I hutdamna Pathian ngeei chu Phatin umta hen. Selah. 20 Amah i Pathian uh chu hutdamna Pathian ahi a, Huleh Lalpa PATHIAN kawmah sihna apat suahtaatna aum hi. 21 Peellouin Pathian in a meelmate lutang asuliam diing a, A paisualna a umzom jing mi sam phatna lutang chu asugawp diing hi. 22 Lalpa'n, "Bashan apatin ka puikiit diing a, Tuipi thuuhtah apatin ka mite ka puikiit diing hi, 23 Huchiin na keeng in na meelmate sisan lah na tuandeen diing a, Huleh na uite uh lei in meelmate laha tanvou anei diing," achi hi. 24 Aw Pathian, na pailai amu va, Mun siangthou a ka Pathian, ka Kumpipa apailai ngeei chu. 25 La satute a ma ah apai va, tumging tum pawlin ajui uhi; A lahvah nungaah khuangta tumpawl aum uhi. 26 Kikhopnate ah Pathian phat unla, Israel tuinaah apatin, LALPA ngeei chu phat un. 27 Hutah ah nautum Benjamin Juda phung a laltate leh a miliante, Zebulun phung a laltate, Naphtali phung a laltate tungah vai ahawm hi. 28 Na Pathian in na haatna chu thu apeta hi; Aw Pathian, keiuh diinga na hung tohdohsahte chu suhaat in. 29 Jerusalem a na biahinn jiahin, Kumpipate'n na kawmah silpiaahte ahung tawi diing uhi. 30 Mi chin dangka neente toh ahung kituhluut masiah uh, Sialluang laha gamsate leh bawngtal hon leh mipite bawngnoute taaihilh inla, Kidouna deih mite sudalh in. 31 Aigupta apatin palaite ahung pawtdoh diing va; Ethiopiate'n a khut uh Pathian lamah ajaah pah diing uhi. 32 Nanguh leitung lalgamte, Pathian phatin la sa unla, Aw, Lalpa phatin la sa un, Selah 33 Nidaiiglai peha um, vaante vaan tunga tuangpa kawmah; Ngai in, Ama'n a aw, aw loupi mahmah asuah hi. 34 Haatna chu Pathian a ahi chiin soi un; A thupina chu Israelte tungah aum a, Huleh a haatna chu vaan meipite lahah aum hi. 35 Aw Pathian, nang chu na mun siangthou ah na lauhuai hi. A mite kawma haatna leh silbawltheihna pepa Amah ngeei chu Israelte Pathian ahi. Pathian chu phatin um hen.
LA PUITU A DIING. SHOHANNIM DUNGJUIIN. DAVID PHATNA LA.
1 Aw Pathian, hung hundoh in, Ajiahchu tuite in ka hinna la diing ahita uhi. 2 Totsaisan diing umlouin, Tumtheihna buannawi lahah ka tum gulgul hi; Tui thuuhpi ah ka na umta a, huleh tuileet in ahung tuum hi. 3 Ka kikoukouna in ka tawlgawpta a; Ka dang agota a; Ka Pathian ka ngaahna in ka mit avaigawpta hi. 4 Ajiah beia hung mudahte lah Ka lu a samjang saangin atamjaw va; Dihloutaha hung dou a, suhmang hung tumte mihaatpipi ahi uhi; Ka guuh louh sil chu ka piaahkiit angaita hi. 5 Aw Pathian, nang ka ngoldaan na he a; Ka sualnate zong nang apat phual ahi sih hi. 6 Aw Lalpa, sepaihte PATHIAN, keimah jiahin nangmah hung ngaahte mualphouin um sih uh heh; Aw Israelte Pathian, keimah jiahin nangmah hung hawlte suhzumin um sih uh hen. 7 Ajiahchu nangmah jiahin soisiat ka thuaah a, Zumna in ka maai akhuhta hi. 8 Ka unaute lahah mikhual ka na hita a, Huleh ka nu tate lahah gamdang mi ka hung hita hi. 9 Ajiahchu na inn a diinga ka phatuamngaihna in ahung ne zouta a, Huleh nangmah hung housete housiatna chu ka tungah atuta hi. 10 Ka kah a, huleh an ngawl kawma ka lungtang a ka kah chiangin lah Soisiat-a ka umna giap ahita hi. 11 Puansilh a sai-ip ka zat chiangin, Amahuh diingin chiamnuih bawlna ka hung hita hi. 12 Kulh kotkhaah a toute'n ahung soisia va, Zukham haatte la giap ka na hita hi. 13 Hizongleh Aw LALPA, kei chu deihsahna hun ah Na kawmah ka hung haamtei hi; Aw Pathian, na lungsiatna tullou nasatah in, Na hutdamna thudihna in hung dawng in. 14 Tumtheihna buannawi apat hung hunkhia inla, Hung tumsah mahmah sin; Ahung mudahte apat leh tui thuuhpi apatin Hutkhiahin hung umsah in. 15 Tuilian n hung tuummang sih henla, Tui thuuh in zong hung valh sih heh; Huleh kokhuuh in zong a kam hung chihkhum sih heh. 16 Aw LALPA, hung dawng in, na lungsiatna tullou lah ahoih ngaala; Na lainatna nasatdaan dungjuiin ka lam hung nga in. 17 Na suaah apatin na maai phual sin, Ajiahchu ka mangbang ahi; Hung dawng meeng in. 18 Ka hinna kawm naih inla, tan in; Ka meelmate jiahin hung hunkhia in. 19 Nangma'n mi hung soisiatnate, ka mualphounate, mi hung simmohnate na he hi; Kei hung doute na ma ah aum veh uhi. 20 Mi hung soisiatna in ka lungtang asuna mahmah a, Nasatahin ka lungkham hi; Huchiin ahung hehpih diing ka hawl a, Hizongleh kuamah aum sih hi; Ahung hamuan diing ka hawl a, hizongleh kuamah ka mu sih hi. 21 Ka an diingin silkha ahung piava, Ka dangtaahin dawn diingin uain thuuh ahung pia uhi. 22 A dohkaan uh a ma vah thaang hung suaah henla, Huleh a hamuanna uh chu pial hung suaah heh. 23 Khua amuh louhna diingun a mitte uh hung mial henla; Huleh a kawng uh kiliingsah ngiitngeet in. 24 Na lungthahna nasatah a tungvah sungbua inla, Na thangtawmna mahmah in amahuh man heh. 25 A gaalbuuh uh hawmsuaah henla; A puaninnte vah kuamah teeng sih heh. 26 Ajiahchu amah un na vuaahpa chu agawt va; Huleh na suhliamte natthuaahna chu houlimna in anei uhi. 27 A giitlouhna tungvah giitlouhna behlap inla, Na dihtatna ah amahuh luut sih uh hen. 28 Hinna Lehkhabu apatin thaimangin um uh henla, Midihtatte lahah gelhtelin umsihuhheh. 29 Hizongleh kei chu genthei leh natthuaah mi ka hi a, Aw Pathian, na hutdamna in mun sang ah hung koih in. 30 Pathian min chu la in ka phat diing a, Kipaahthu soiin ka paahtawi diing hi. 31 Kii leh keengchin nei bawngtal ahihlouhleh bawngtalgual saangin Kipaahthu soina in LALPA akipaahsah jaw diing hi. 32 Mikingaingiamte'n hikhu amu diing va, akipaah diing uh; Huleh nanguh Pathian hawlte, na lungtang uh ahalhthah diing hi. 33 Ajiahchu LALPA'N tasamte angaikhia a, A suangkul taang mite chu amusit sih hi. 34 Lei leh vaan in Amah phat henla, Tuipite leh a sunga vaahleh photmah in phat hen. 35 Ajiahchu hutah a ateen theihna diing uh leh aneih theihna diingun, Pathian in Zion ahunkhe diing a, Huleh Juda khopite alam diing hi. 36 Amah suaahte haahte'n hichu aluah diing va, A min ngainate a sungah ateeng diing uhi.
LA PUITU A DIING. DAVID PHATNA LA. HEETDOHSAH KIITNA.
1 Aw Pathian, hung hunkhe diingin kin inla, Aw LALPA, hung panpih diingin kinmeeng in. 2 Ka hinna suhmang tuma hawlte Suhmualphou leh suhzumin um uh hen; Ka liamna a kipaahte nungkiihsahin um uh henla, nuaisiahin um uh heh. 3 "Chei, chei!" chite amualphou jiahun Taaijaahsahin um uh hen. 4 Nangmah hung hawlte zousiah nuam uh henla, Nangmah ah kipaah uh heh; Na hutdamna ngaina photmahte'n, "Pathian chu paahtawiin um hen," chi zingzing uh hen. 5 Hizongleh kei chu genthei leh tasam ka hi a, Aw Pathian, ka kawmah hung pai meeng in. Nang chu ahung panpihpa leh ahung hunkhepa na hi a, Aw LALPA, khongai sawt mahmah sin.
1 Aw LALPA, nangmah ah A ka tahsanna ka koih a; Mualphouin hung umsah ngei hiai sin. 2 Na dihtatna in hung hunkhia inla, hung suaahtasah in; Ka lamah na bil hung doh inla, hung hundoh in. 3 Nang chu ka zot theih zingzing diing, Ka teenna suangpi hung hi in; Nang in keimah hunkhe diingin thu na pia hi, Ka suangpi leh ka kulhpi na hih jiahin. 4 Aw ka Pathian, migiloute khut apatin, Midihtatlou leh mitatsete khut apatin hung hunkhia in. 5 Ajiahchu nang ka kinepna na hi a; Aw Lalpa Pathian ka khangdawn lai apat ka muan na hi. 6 Ka nu sung apatin nangmah tuuhin ka hung um a; Nang chu ka nu sung apat hung ladohpa na hi. Nang ka hung phat zing diing hi. 7 Mi tampite'n limdang ahung sah ka hi a, Hizongleh nang chu ka kihuumbitna kiptah na hi. 8 Ka kam chu nangmah phatna in dim henla, Suun nitumin nangmah paahtawina in dim hen. 9 Ka teeh hun chiangin hung paaikhe sinla, Ka tha ajawn chiangin hung taaisan sin. 10 Ajiahchu ka meelmate'n ahung soisia va; Ka hinna suhmang tumte'n lemguatna anei khawm va, 11 "Pathian in amah anuseta; Deih unla, man un, amah hundoh diing koima aum sih ngaala," achi uhi. 12 Aw Pathian, hung gamlaat sinla, Aw ka Pathian, hung panpih diingin kin meeng in. 13 Ka hinna hung doutute mualphou leh suhmangin umuh henla; Ka siatna diing hawlte chu Soisiatna leh mualphouna khuhsahin um uh hen. 14 Hizongleh kei chu ka kineem zingzing diing a, Huleh ka hung phat seemseem nalai diing hi. 15 Ka kam in na dihtatna leh Na hutdamna natohte nitumin ahesah diing hi, Atamdaan ka he seeng sih ngaala. 16 Lalpa Pathian haatna loupitah in ka chiah diing a; Na dihtatna, nangmah chauh a ngeei chu ka soi jeel diing hi. 17 Aw Pathian, ka khangdawn lai apatin nangma'n na hung hilhta a; Huleh tutanin na sil limdang bawlte ka hesahta hi. 18 Huleh ka hung upat a, ka sam ahung kaan chiangin zong, Aw Pathian, hung taaisan sin, Na haatna chu hi khang a mite kawm leh na silbawltheihna chu ahung um diing mi chin kawma Ka heetsah masiah in. 19 Aw Pathian, sil loupitahte bawltu, Na dihtatna chu asang mahmah hi, Aw Pathian, nangmah bang koi ahiai um? 20 Nangmah, buaina tamtah leh khawhtah hung musahpa'n Na hung suhalh kiit diing a, Huleh leimun thuuhtah apatin na hung puidoh kiit diing hi. 21 Ka letna na khangsah diing a, Mun chin ah na hung hamuan diing hi. 22 Kaihging in ka hung phat diinga, Aw Pathian, na thutahna ngeei ka phat diing hi. Aw nang Israelte Misiangthou, Tingtang toh nangmah phatin la ka sa diing hi. 23 Nangmah phatna la ka sah chiangin ka muuh nuamtahin akikou diing a, Huleh na tatsa ka hinna zong nuamtahin akikou diing hi. 24 Ka lei in zong nitumin na dihtatna thu asoi diing hi, Ajiahchu suhzumin aumta va, Ajiahchu ka siatna diing hawlte suhzumin aumta uhi.
SOLOMON PHATNA LA.
1 Aw Pathian, na vaihawmnate kumpipa pia inla, Huleh na dihtatna kumpipa tapa kawmah pia in. 2 Ama'n na mite dihtatna in avaihawmsah diing a, Na migentheite chu thudih in avaihawmsah diing hi. 3 Taangte'n hamuanna mite kawmah ahung tut diing va, Huleh mualte'n dihtatna in ahung tut diing uhi. 4 Ama'n i mite laha gentheite siamtandaan asulang diing a; Tasamte tate ahundoh diinga, Huleh minuaisiahtu chu gawibuang diing hi. 5 Amah un, ni leh ha um sungin, Akhang akhangin nang ahung lau diing uhi. 6 Amah chu hampa vaattan tunga guahju bangin ahung kumkhe diing a, Lei tapkawt guahmal phiin bang maiin. 7 Amah hun laiin midihtat chu aduah diing a, Hapi um sung siahin hamuanna nasatah anei diing hi. 8 Ama'n tuipi apat tuipi tanphain, Huleh Luuipi apat kawlmong tanphain vai ahawm diing hi. 9 Gamdaai a umte a ma ah akuun diing va, Huleh a meelmate'n leivui aliaah diing uhi. 10 Tarshish gam leh tuikulhgam kumpipate'n Silpiaah ahung tawi diing va, Sheba leh Seba kumpipate'n Silpiaah ahung laan diing uhi. 11 Huleh kumpipate zousiah a ma ah akuun diing va, Nam zousiah in a nna atong diing uhi. 12 Ajiahchu Ama'n tasamte chu akikou chiangun ahunkhe diing a, Gentheite zong, huleh panpihtu neiloute zong. 13 Gentheite leh tasamte ahawi diing a, Tasamte hinna ahundoh diing hi. 14 A hinna uh lepchiahna leh pawngbawlna apat atan diing a; Huleh a sisan uh chu Amah mitmuhin aluul diing hi. 15 Huleh Amah chu adam diing a; Sheba gam sana piaah ahi diing hi; Amah diingin haamteina tawplouin akineihsah zing diing a, Huleh ni chinin phatin aum diing hi. 16 Lei a taangvuumte ah Buhlebaal kiningching um henla, A gah chu Lebanon sidar sing bangin liing duamduam hen; Huleh khopi a mite chu leitung a hampa bangin duah uh hen. 17 A min chu kumtuangin um henla; A min chu ni um laisiah um zing hen. Huleh Amah ah mite chu vangpiaahin um uh hen; Nam zousiah in Amah chu ahampha chi uh heh. 18 Amah chauh sil limdang bawlpa, LALPA Pathian, Israelte Pathian, chu phatin um hen. 19 A min loupitah chu kumtuanga phatin um henla, Huleh leitung zousiah a loupina a dimsahin um hen. Amen huleh Amen. 20 Jesse tapa David haamteinate abeita hi.
ASAPH PHATNA LA.
1 Tahzetin Pathian chu Israelte tungah ahoih a, Lungtang a siangthoute tung ngeei ah. 2 Hizongleh kei chu ka keeng ataai dehdeh a; Ka kalsuante atolh dehdeh hi. 3 Ajiahchu migiloute neihzohna ka muh chiangin, Mikiliansahte ka na thangsiat hi. 4 Ajiahchu a sih hun un thuaahnatna anei sih va, A tahsa uh athau jawsop hi. 5 Midangte bangin mangbatna atuaah sih va, Huleh midangte toh zong gawtin aum sih uhi. 6 Hujiahin kiletsahna in amahuh khainiang bangin akolhkhum kiimveel a; Hiamngapna in puansilh bangin atuam hi. 7 Thauna jiahin a mit uh apawng leehlaw a; A lungtang ngaihtuahna un phaahtawp anei sih hi. 8 Asesuaah va, huleh nuaisiahna thu giloutahin asoi va; Uangtahin ahaam uhi. 9 A kam un vaante kalhin thu asoi va, A lei un leitung atawnsuaah uhi. 10 Hujiahin a mite hi lamah ahung kihkiit va, Huleh tui kiningchingtah chu amahuh dawnkangin aum hi. 11 Huleh amah un, "Pathian in bangchiin ahe diai? Huleh Tungnungpeen in heetna anei diai?" achi uhi. 12 Ngai in, hite chu migilou, khawhsahna neiloua umzing ahi va; Ahung hausa deuhdeuh diing uhi. 13 Tahzetin athawn giapin ka lungtang ka na susiang a, Huleh sualna beiin ka khutte ka na sil hi. 14 Ajiahchu nitum in gawtin ka um a, Huleh jiingkaal chinin sawihin ka um zing hi. 15 Ke'n, "Huchibangin ka soi diing," chita leng, Ngai in, na tate suante heem ka hi diing hi. 16 Hikhu heet tuma ka ngaihtuah chiangin, Kei a diingin ana talua hi, 17 Pathian mun siangthou a ka luut masiahin, Huchiin a beina diing uh ka hedohta hi. 18 Amahuh chu mun naal ah na koih ngeei a; Siatna ah na paaikhia hi. 19 Bangchidaana mitphet kaallou a suhmanga um mei ahi diviai Aw! Chijaathuaitaha suhchimit keeiin aum uhi. 20 Khanloh hun chianga mang umdaan bangin, Aw Lalpa, na khanloh hun chiangin, A lim uh na musit diing hi. 21 Ka lungsim agim a, huleh ka lungtang suhnat-a aum chiangin, 22 Kei chu mawl leh bangmah helou mahmah ka hi; Na mitmuh ah gamsa bang giap ka hi hi. 23 Ahihvaangin kei chu na kawmah ka um zing a; Ka khut jiatlam in na hung tuhi. 24 Nangma'n na lemheetna in na hung pui diing a, Hu nung chiangin loupina ah na hung na lata diing hi. 25 Vaan ah nang chihlouh kua ahiai ka neih? Huleh lei ah zong nang loungaal ka deih kuamah aum sih hi. 26 Ka tahsa leh ka lungtang abahta a; Hizongleh Pathian chu kumtuanga ka lungtang haatna leh ka tanvou ahi. 27 Ajiahchu ngai in, nang apat gamlapi a umte chu abeimang diing va; Huleh hung aangkawmsan photmahte chu na sumangta diing hi. 28 Hizongleh kei a diingin chu Pathian naih ahoih hi; Lalpa PATHIAN ah ka tahsanna ka koih hi; Na natoh zousiah ka phuandoh theihna diingin.
ASAPH MASKIL
1 Aw Pathian, bang diinga hung paaimang den na hita ei? Bang diinga na gantatna mun a belaamte tunga na lungthahna mei khuu ahiai? 2 Nidanglaia na leisa, na mi kikhawmte hezing in, Na tatsa na goutan nam, Na umna zing hih Zion Taang toh. 3 Siatna umzingna lamah na kai suaan in; Meelma in mun siangthou ah sil chinteng asuseta hi. 4 Na mikikhawmte lahah na meelmate akikou zoizoi va; A puanlaap uh chu chiamchihna diingin ajaahta uhi. 5 Heita a gammaang sing saat diinga kisa bangin aum uhi. 6 Huleh tuin a sil khuaah zepmawi zousiah uh chu heita leh sehte in khat vei thuin asugawp uhi. 7 Na mun siangthou ahaal va; Na min umna mun lei a paaiin asubuaahta uhi. 8 A lungtang un, "Amahuh i sulum veh diing uh," achi uhi. Gam sunga Pathian biahna inn zousiah ahaalta uhi. 9 Ka chiamchihnate uh ka muta sih va; Zawlnei mawngmawng lah aumta sih a; Asawt diing daan he himhim zong ka umta sih uhi. 10 Aw Pathian, bangtan ahiai doutu in ahung soisiat diing? Meelma in na min asoise kumkhua diing adiai? 11 Bang diinga na khut, na khut jiatlam ngeei na nungloih ahiai? Na awm apat zandoh kiit inla sumang in. 12 Ajiahchu Pathian chu malaipeh apat ka Kumpipa ahi a, Lei a hutdamna siampa ahi. 13 Nangma'n na haatna in tuipi na sukhen a; Tui lahah dragonte lu na suhgawpsah hi. 14 Leviathan lutangte chu na sugawp a, Amah chu gamdaai a mi umte an diingin na pia hi. 15 Tuinaah leh tuilian na khen a; Luui lianpipite na kangsah hi. 16 Suun nang a ahi a, jaan zong nang a ahi; Nang vaah leh ni na siam hi. 17 Nang leilung gamgi zousiah na hung veh a; Nipi leh phalbi zong na siam hi. 18 Aw LALPA, hikhu hezing in, meelma in ahung muhsit daan Leh mingolte'n na min asoisiat daan uh. 19 Aw, na vakhu hinna chu gamsa hang kawmah pe hiai sin; Na migentheite hinna chu kumtuangin mangngilh sin. 20 Thuhun chu khawhsa in; Ajiahchu leitung mun mialte chu hiamngapna umna in adim hi. 21 Aw, nuaisiahna thuaahte chu mualphouin kiihsah sinla; Genthei leh tasamte'n na min phat uh hen. 22 Aw Pathian, thou inla, na tungtaang thu kisoi in; Mingol in nitum a ahung soisiat daan chu hezing in. 23 Na meelmate aw suah chu mangngilh sin; Nang hung doutute husa chu angaih deuhdeuh hi.
LA PUITU A DIING. AL-TASH'HETH DUNGJUIIN. ASAPH PHATNA LA.
1 Aw Pathian, na kawmah kipaahthu ka hung soi uhi, kipaahthu ka hung soi uhi. Ajiahchu na silmah bawlte'n na min anai chih ahesah uhi. 2 "Hun guat lemtaang ka teel chiangin, Dihtahin vai ka hawm diing hi. 3 Lei leh a sunga teengte zousiah atuimang zouta va; A khuamte chu dettaha ka phuh ahi. Selahr. 4 Mikiuangsah kawmah, 'Kiuangsah sih un,' ka chi a, Huleh migiloute kawmah, 'Na kii uh sangsah sih un. 5 Na kii uh tunglam ah sangsah sih unla; Luhlultahin thu soi sih un,'" kachita hi. 6 Ajiahchu kaisangna chu suahlam a hung kipan ahi sih a, Tumlam a hung kipan zoiig ahi sih a, simlam a hung kipan zong ahi het sih hi. 7 Hizongleh Pathian chu Vaihawmtu ahi, Ama'n khat angiamsah a, Huleh khat asangsah hi. 8 Ajiahchu LALPA khut ah nou aum a, Huleh uain chu asan hi; Hoihtaha kitohhal ahi a, huleh hukhu mah chu asungkhia hi; Hichu leitung a migilou zousiah in aneng tanphain adawn siang kiukiau diing uhi. 9 Hizongleh ke'n chu kumtuangin ka phuangjaah diing a, Jakob Pathian phatin la ka sa diing hi. 10 "Migiloute kii zousiah zong ka sutan diing a, Hizongleh midihtat kii chu tawisangin aum diing hi."
LA PUITU A DIING. NEGINOTH A SAH DIING. ASAPH PHATNA LA.
1 Judate lahah Pathian chu heetin aum a; Israelte lahah a min aloupi hi. 2 Salem ah zong a biahbuuh aum a, Huleh aumna mun chu Zion ah aum hi. 3 Hutah ah Ama'n thai kuangte asutan hi, Phaw leh naamsau leh kidouna vanzatte toh. Selah. 4 Nang chu an tamna taangte saangin Na loupijaw a huleh na hoihjaw hi. 5 Lungtang phate chu gaallaahin aum va; Amahuh a-ihmu den va; Huchiin hu mihaatte khut chu koima'n aphong zouta sih uhi. 6 Aw Jakob Pathian, kaangtalai leh sakol chu Na taaina jiahin ihmutsah dildelin aum tuaah uhi. 7 Nang, nangmah ngeei chu lauh diingpa na hi; Huleh na lungthah kalsiah koi ahiai na ma a ding thei diing? 8 Na vaihawm thu vaan apatin naj asah a; Lei in alau a, adaaita hi, 9 Vaihawm diing leh lei a mi kingaingiam zousiah hundoh diinga Pathian athoh laiin. Selah. 10 Matheilouin mihing lungthahna in ahung paahtawi diing hi; Lungthahna umnalaite in na kigaah diing hi. 11 LALPA na Pathian uh kawmah thu chiam unla, huleh sutaangtung un; A kiim a mi zousiah in lauh diingpa Amah kawmah silpiaahte hung tawi uh heh. 12 Ama'n laltate lungsim kideihkhopna asaattan diing a; Lei a kumpipate diingin Amah chu alauhhuai hi.
LA PUITU A DIING. JEDUTHUNA DIINGIN. ASAPH PHATNA LA.
1 Ka aw in Pathian ka kou a, Ka aw in Pathian ngeei ka kou a, Huchiin Ama'n ka lamah bil ahung dohta hi. 2 Ka mangbatni'n Lalpa ka hawl a; Ka khut chu jaan chiangin zong lakhe louin ka jaah zing a; Ka hinna in hehnepa um adeih sih hi. 3 Pathian ka hezing a, ka buaita hi; Lungkimlouh thu ka soi a, ka hagau abahta hi. Selah. 4 Nang ka mitte na hahsah a, Haam theilou khopin ka buaita hi. 5 Nidanglaite ka ngaihtuah hi, Malai kumte chu. 6 Jaan chiangin ka la chu ka geeldoh a; Ka lungtang in ka ngaihtuah ngiitngeet a, Huleh ka hagau in phatuamngaitahin akansui hi. 7 Lalpa'n kumtuangin apaaikhe den diing adiai? Bangchihtanin adeihsah nawnta lou diing adiai? 8 A lungsiatna tullou chu abei denta adiai? A thuchiam chu kumtuanga taangtung lou denta adiai? 9 Pathian in hehpihsiam diing khu amangngilh ahita diai? A lungthahna in a chitna neemtah akhaahkhum ahita diai? Selah. 10 Huchiin ke'n, "Hichu ka haatlouhna jiah ahi; Hizongleh Tungnungpeen khut jiatlam kumte chu ka hezing diing hi," ka chi hi. 11 LALPA natohte chu ka hezing diing a, Tahzetin nidanglaia na silmahte ka hezing diing hi. 12 Na natoh thute zousiah zong ka ngaihtuah ngiitngeet diing a, Na silbawlte houlimnain ka nei diing hi. 13 Aw Pathian, sianthouna ah na lampi chu aum hi; I Pathian uh banga Pathian loupi koi aum ei? 14 Nang chu silmah bawltu Pathian na hi a; Mi chin lahah na haatdaan na phuangdohta hi. 15 Na baantha in na mite na hunkhia hi, Jakob leh Joseph tate ngeei. Selah. 16 Tuite'n nang ahung mu uh, Aw Pathian; Tuite'n nang ahung mu va, alau uh; Tuithuuhte zong akiliing uhi. 17 Meipite'n tui asungbua va; Vaante'n aw asuah uh; Na thalte zong akuang zolzol hi. 18 Na vaan ging thawm chu piingpei ah aum a; Kawlphe in khovel ataanvaah zotzot hi; Lei chu akiliing a huleh akithing hi. 19 Na lampi chu tuipi ah aum a, Na paina zong tuipi liante ah aum a, Huleh na keeng khaapte chu heettheih ahi sih hi. 20 Nangma'n Mosi leh Aaron khut in Na mite chu belaam hon bangin na pui hi.
ASAPH MASKIL.
1 Aw ka mite, ka daan thu ngaikhia unla; Ka kam a thu pawtte ah na bil uh doh un. 2 Tehkhinthu in ka kam ka kaah diing a; Nidanglaia thuheet hahsa kisoite ka soidoh diing hi, 3 I bil va i jaahsa uh leh i heetsa uh, Huleh i pulepate'n ahung na hilhsate uh chu. 4 Hute chu a tate uh lahah i iim sih diing va, Khang hung um diingte kawmah LALPA phatna thu, Huleh a haatdaan leh a silmah bawl daan chu i hilh jaw diing uhi. 5 Ajiahchu Ama'n Jakob ah thuheetsah asukip a, Israelte lahah daan aguat hi, Huchu i pulepate'n a tate kawmva aheetsah diingun thu apia hi. 6 Khang hung um diing a naupang hung piang diingte ngeei in aheet theihna diingun, Huchia amahuh chu athoh va a tate uh kawma ahilhsawn theihna diingun, 7 Huchia a kinepna uh chu Pathian a akoih va, Huleh Pathian natohte chu amangngilh louh va, Hizongleh a thupiaahte azop theihna diingun; 8 Huleh a pulepate uh tobanga khang soihah leh helhaat, Lungtang dihtah polou khang, Huleh Pathian diinga lungsim ginumlou khang ahihlouhna diingun. 9 Ephraim tate chu kigaal thuamin thalmung tawi zongleh uh, Kidou ni in anung taai uhi. 10 Pathian thuhun ajui sih va; A daan juih zong auut sih va, 11 Huleh a silbawlte leh A silmahbawl amuhsahte amangngilh uhi. 12 Ama'n a pulepate uh mitmuh ah, Aigupta gam ah bang, Zoan huang sungah bang, Silmah tahtahte abawl hi. 13 Ama'n tuipi akikhensah a huleh amahuh apaisuaahsah hi; Huleh tuite chu baang kichiang bangin akisepvuumsah hi. 14 Suun chiangin meipi in apui a, Huleh jaankhuain mei vaah in apui hi. 15 Gamdaai ah suangpi akhikeehsah a, tuithuuhpi apat bangmaiin dawn diing apia hi. 16 Suangpi apatin luuite apawtkhesah a, Huleh tui chu luuipite bangin aluangdohsah hi. 17 Huchi pumpumin zong gamdaai ah Tungnungpeen tungah sil ahihsual nalailai va, 18 Huleh a gongsan uh phatna diinga an ngeenin A lungtang un Pathian aje-et uhi. 19 Ahi, Pathian kalhin thu asoi va, "Pathian in gamdaai ah ankuang alui thei na de Aw? 20 Ngai in, Ama'n suangpi asaat a, Huchiin tuite ahung puuldoh a, Huleh luuite chu aleet hi. Ama'n tanghou zong ape thei de aw? A mite diingin sa ape thei na de aw?" achi uhi. 21 Hujiahin LALPA'N hikhu aja a alungthahta hi; Huchiin Jakob tungah mei akuangdohta a, Huleh Israel tungah thangtawmna ahung umta hi. 22 Ajiahchu amah un Pathian agingta sih va, Huleh a hutdamna zong amuang sih uhi. 23 Hijiangzongleh tunglam apatin meipite thu apia a, Huleh vaan kotte ahonsah a, 24 Aneeh diingun a tungvah manna ajukhesah a, Huleh vaan buh a kawmvah apia hi. 25 Mihingte'n angelte an ane va; Kiningchingtahin amahuh an apia hi. 26 Vaan laiah suahlam huih anungsah a; Huleh a silbawltheihna in sim huih anungsah hi. 27 Leivui jaatjetin a tungvah sa ajusah a, Ha nei vate tuipi piauneel jaat bangin. 28 A giahphual lailung vah akesah a, Aumna kiimveel vah atusah hi. 29 Huchiin ane va, avah uhi, Ajiahchu a lunggulh uh chu amahuh apia hi. 30 Huchiin zong agongsanna uh adaai nai tuan sih hi; Hizongleh a an uh a kam sungva um nalaiin, 31 Pathian lungthahna chu a tungvah atung a, A mi tahsa liante uh khenkhat athat a, Israel pasal kiteeldohte asaat puuh lemlum hi. 32 Huchi pumin zong asual nalai va, Huleh a sillimdang bawlte agingta tuan sih uhi. 33 Hujiahin a damsung nite uh bangmalouin asuhbeisah a, Huleh a kumte uh mangbatnain. 34 Amahuh athah chiangin Amah ahawl va; Huleh akihkiit va guntuhtahin Pathian akanveeluhi. 35 Huchiin Pathian chu a Suangpi uh ahi chih leh Pathian Tungnungpeen chu a Tanpa uh ahi chih ahedoh jeel uhi. 36 Ahihvaangin a kam un Amah chu heemin aphat va, Huleh a lei un a kawmah juauthu asoi uhi. 37 Ajiahchu a lungtang uh Amah tungah adih sih a, A thuhun ah aum kip saam sih uhi. 38 Hizongleh Amah chu lainatna a dim ahihjiahin a giitlouhna uh angaidam a, Huleh amahuh chu asumang sih hi. Ahi, tampivei a lungthahna akiihsah a, Huleh a thangtawmna chu asupuang sih hi. 39 Ajiahchu tahsa giap ahi uh chih leh Huih kihkiit lou diinga nung mang jeel bang ahi uh chih ahezing hi. 40 Gamdaai ah a tungah hel mun hina mei uh e, Huleh gamgaw ah Amah sulungkham mun hina mei uh e! 41 Ahi, anon nonin Pathian aje-et va, Huleh Israel Misiangthou asulungngai uhi. 42 A silbawltheihna chu ahezing sih uh, Meelma apat ahutkhiah ni ageelzing saam sih uh, 43 Aigupta gam a a chiamchihna bawlte, Huleh Zoan lougam a a silmah bawl daante; 44 A luuipite uh leh a luuitate uh sisan asuaahsah a, Huchia adawn theihlouh daante uh aheta sih uhi. 45 Ama'n a lahvah thou tampi asawl a, hute'n amahuh anezou a, Huleh ukeengte zong asawl a, hute'n amahuh asumangta hi. 46 A haichi poute uh zong lung kawmah apia a, Huleh a tohgim gah uh khauphe kawmah apia hi. 47 Ama'n a grepguite uh gial in asuhmangsah a, Huleh a theipi kungte uh vuuh in asumang hi. 48 Ama'n a gante uh zong gial kawmah apia a, Huleh a gan honte uh keeh satah kawmah apia hi. 49 Ama'n siatna angelte a lahva sawlin A lungthahna huaisetah leh a thangtawmna leh a lunghihlouhna leh Buaina a tungvah atusah hi. 50 Ama'n a lungthahna a diingin lam abawl hi; A hinna uh sihna lahah ahawi sih a, Hizongleh a hinna uh hii kawmah ape jawta a, 51 Aigupta gam a tachiil um zousiah asulum a, Ham puaninn a a haatna gah masapeente uh chu. 52 Hizongleh a mite chu belaam bangin apawtdohsah a, Huleh gan hon bangin gamdaai ah apui hi; 53 Bittahin amahuh apui a, huchiin bangmah alau sih uh; Hizongleh a meelmate uh chu tuipi in akhuh zouta hi. 54 Huchiin a gam siangthou gamgi tan apuitung hi, Hi taang a khut jiatlam a alaah ngeei ah. 55 Ama'n namte zong a ma vah adelhdoh a, Amahuh chu khau a tehin goutan diing ahawmsah a, Huleh Israel namte chu a puaninnte vah ateengsahta hi. 56 Ahiinlah Pathian Tungnungpeen chu aje-et va huleh a tungah ahel va, Huleh a thuheetsah lah ajui sih va, 57 Hizongleh akiheikiit va a pulepate uh bangin lepchiahtahin agamta jawta uh; Thalmung muanhuailou bangin apaikawita uhi. 58 Ajiahchu a munsangte un Amah asulungthahta va, Huleh a milem siamte un Amah athangsesahta uhi. 59 Pathian in hikhu ajaah tahin alungthah a, Huleh Israelte chu nasatahin akihdahta hi. 60 Huchiin mihing laha a puaninn koih, Shiloh biahbuuh chu anusetahi. 61 A haatna chu sal ah apedohta a, Huleh a loupina chu meelma khut ah apekhet'a hi. 62 A mite zong naamsau hiam kawmah apia a, Huleh a goutan tungah alungthahta hi. 63 Mei in a tangvaalte uh akaangmang a, Huleh a nungaah siangthoute un kiteenna la mawngmawng aneita sih uhi. 64 A siampute uh naamsau in apuuh va, Huleh a meithaite un akah thei himhim sih uhi. 65 Huchihlaiin Lalpa chu ihmu khanglou bangin athouta hi, Mihaat uain jiaha kikou bang maiin. 66 Huleh Ama'n meelmate chu adou kiit a, Minsiatna tawpneilou ah akoihta hi. 67 Huleh Joseph puaninn anualta a; Huleh Ephraim nam zong ateelta sih hi. 68 Hizongleh Juda nam chu ateel jawta hi, Alungsiat Zion taang mah chu. 69 A mun siangthou chu mun sang bangin abawl a, Kumtuanga diinga suhdet leilung bang maiin. 70 Ama'n a suaah David zong ateel a, Huleh belaam huang apatin alakhia hi; 71 Belaam noukaite juihna apatin A mite Jakob leh a goutan Israel vaah diingin amah apuita hi. 72 Huchiin ama'n a lungtang hoihna bangjeelin amahuh avaah a, Huleh a khutsiamna in amahuh apuita hi.
ASAPH PHATNA LA.
1 Aw Pathian, namte chu na goutan lahah aluutta va, Na biahinn siangthou asuniin va; Jerusalem asuchimta uhi. 2 Na suaahte luang chu tungleeng vate neeh diingin apia va, Na misiangthoute sa chu gamsate kawmah apia uhi. 3 A sisan uh Jerusalem kiimveel ah tui bangin asungbua va, Huleh amahuh vui diing lah kuamah aum sih hi. 4 Ka innveengte soisiatin ka umta va, Ka kiim va mite simmoh leh nuihsanin ka umta uhi. 5 LALPA, bangchihtan e? Lungthah kumkhua diing na hita eimah? Na thangsiatna mei banga kuang diing adiai? 6 Nang hung helou namte leh na min lou ngeilou gamte tungah Na lungthahna sungbua in. 7 Ajiahchu amah un Jakob anezou va, Huleh a teenna mun uh asugamta uhi. 8 Aw, malaia giitlouhna ka tungvah hezing sin; Na lainatna in kintahin hung na lamdawn pah hen, Ajiahchu nasataha suhngiamin ka umta uhi. 9 Aw ka hutdamna Pathian uh, Na min loupina diingin keiuh hung panpih in, Huleh hung hunkhia inla, na min jiahin ka sualnate uh hung silsiang in. 10 Bang diinga namte'n, "A Pathian uh khoia um ahiai?" chi diing ahi viai? Na suaahte sisan pawt phubalaahna ka mitmuh-un Nam chin lahah heet hihen. 11 Suangkul taang thuumna leh maauna na ma ah hung tung henla; Na silbawltheihna loupitah dungjuiin si diinga sehte chu huumbit in. 12 Aw Lalpa, ka innveengte'n nangmah ahung muhsitna uh a aangsung vah aleh sagihin ditkiit in. 13 Huchiin keiuh, na mite leh na gantatna mun a belaamte'n Kumtuangin kipaahthu na kawmah ka hung soi diingva, Nangmah phatna chu khang zousiah kawmah ka hesah zing diing uhi.
LA PUITU A DUNG. EL-SHOSHANNIM DUNGJUIIN ASAPH EDUTH. PHATNA LA.
1 Aw Israelte Belaampu, Nang belaam hon banga Joseph puipa, Na bil hung doh in, Nang cherubte kaala umpa, hung vaahkhia in. 2 Ephraim, Benjamin leh Manasseh mitmuhin Na haatna tohthouin hung inla, Hung hunkhia in. 3 Aw Pathian, hung tungding kiit inla; Na meel vaahsah in, Huchiin hutdamin ka um diing uhi. 4 Aw sepaihte LALPA Pathian, Bangtan ahiai na mite haamteina tunga na lungthah diing? 5 Nang amahuh chu mittui tanghou in na vaah a, Huleh dawn diingin tehna liantahin mittui na pe jeel hi. 6 Nang ka kiim va mite diinga kihauna bul in na hung siam a, Huleh ka meelmate un hung musitin akinuihsan tuah uhi. 7 Aw sepaihte Pathian, hung tungding kiit in; Na meel vaahsah inla, Huchiin hutdamin ka um diing uhi. 8 Aigupta gam apat grepgui khat na la a, Namte chu na nohdoh a, huleh na suanta hi. 9 Hu grep a diingin mun na bawlsah a, Huleh thuuhtahin zung na hasaha, Huchiin gam chu aluahdimta hi. 10 Mualte chu a liim a khuhin aum va, Huleh a kate'n chu Pathian sidar singte akhuh khum uhi. 11 A kate chu tuipi tanin ajaamsuaah sah a, Huleh a selte chu Luuipi tanphain. 12 Ahihleh bang diinga lampi a pai zousiah in Ahiaah diingva a daaite susia na hiai? 13 Gamnuai a ngai in asusia a, Huleh gamsate'n zong ane uhi. 14 Aw sepaihte Pathian, ka hung ngeen uhi, kihei kiit in; Vaan apatin hung ensuh inla huleh en in, Huleh hi grepgui hung keem in, 15 Na khut jiatlam a na suan grepgui, Huleh nang a diinga na khauhsah a kate chu. 16 Mei in akaangta a, phuuhin aumta hi; Na meel a taaina jiahin abeimang jeel uhi. 17 Na jiatlam a mi tungah na khut um hen, Nang a diinga na suhhaat mihing tapa tungah. 18 Huchiin ka hung nungheisan sih diing uh; Hung hihhalh kiit in, huchiin na min ka kou diing uhi. 19 Aw sepaihte LALPA Pathian, hung tungding kiit in; Na meel vaahsah in, Huchiin hutdamin ka um diing uhi.
LA PUITU A DIING. GITTITH DUNGJUIIN ASAPH PHATNA LA.
1 I haatna uh Pathian paahtawiin ngaihtahin la sa unla, Jakob Pathian paahtawiin nuamtahin kikou un. 2 Phatna la sa unla huleh khuangtate, Tingtang ngaihnop huai tahte, peehgingte hung tumun. 3 Ha Thah ah peengkuul muut unla, Ha liih, i ankuang luina ni loupi ah. 4 Ajiahchu hikhu Israelte diinga thuseh ahi a, Jakob Pathian daan ahi. 5 Hichu Ama'n Joseph ah thuheetsahna diinga aguat ahi a, Aigupta gam tawna Amah achiahdoh laia, Ka heetlouh haam a kisoi ka jaahna ah. 6 "Puaahgih apatin a liangkou ka ladoh a; A khutte loh apat hahkhiahin aumta hi. 7 Mangbat ni in na hung kou a, huleh ka hung hunkhia hi; Vaanginna mun guuh apat ka hung dawng a; Meribah tuite ah bang ka hungje-et hi. Selah. 8 Aw ka mite, ngaikhia unla, huchiin ka hung thuhilh diing hi. Aw Israel, ka thu na ngaihkhia a ahihleh! 9 Gam dang pathian himhim na lahvah aum diing ahi sih; Midang pathian mawngmawng na biah diing uh zong ahi sih hi. 10 Kei LALPA na Pathian uh ka hi, Aigupta gam apat a hung puidohpa chu ka hi; Na kam lianpiin kaah inla, huchiin ka sudim diing hi. 11 Hizongleh ka mite'n ka aw angaikheta sih va, Huleh Israelte'n ka thu amangta sih uhi. 12 Huchiin amahuh lemsah daan banga um diingin A lungtang uh soihah na ah amahuh ka pedohta hi. 13 Ka mite'n ka thu ngaikhiain, Israelte hi ka lampi ah pai mei leh uh aw! 14 A meelmate uh ka suhmangsah pahta diing a, Huleh a gaalte uh tungah ka khut ka laam pahta diing hi. 15 LALPA hotute'n chu a kawmah kituhluut heem asin diing va, Hizongleh a sil tan uh chu kumtuangin aum diing hi. 16 Hizongleh buh hoihpeen in amahuh ka na vaahta diing a; Huleh suangpi apat khuaizu in ka hung na taisahta diing hi."
ASAPH PHATNA LA.
1 Pathian chu mihaatte kikhopna ah ading a, Ama'n pathiante lahah vai ahawm hi. 2 Bangtan ahiai dihloutaha vainahawmva, Migiloute na deihsahtuam diing uh? Selah. 3 Migentheite leh pabeite siamtandaan sulang unla, Hahsatna thuaahte leh tagahte tungah dihtahin thu khen un. 4 Gentheite leh tasamte hunkhia unla, Migiloute khut apat hunkhia un. 5 Amah un ahe sih va, heetsiamna zong anei sih diing uh, Mial lahah apai leh uhi; Leilung kingahnate zousiah akitolawi vehta hi. 6 "Nanguh chu pathiante na hi va, Huleh na bawnun Tungnungpeen tate na hi uh. 7 Hizongleh mihingte bangin na si diing va, Huleh laltate khat bangin na puuh diing uhi," ka chita hi. 8 Aw Pathian, thou inla, leitung vai hawmsah in; Ajiahchu nam zousiah chu na goutan ahi uhi.
ASAPH PHATNA LA.
1 Aw Pathian, haamlou keeiin um sin. Aw Pathian, um kinken sinla, khongai hiai sin. 2 Ajiahchu ngai in, na meelmate akisabuai vengvung va; Huleh nangmah hung mudahte'n a lu uh aphongsang uhi. 3 Na mite tungah lepchiahtahin thu aphial va, Huleh na goute tungah aselamin akihou uhi. 4 Amah un, "Kisa dihvua, Israel min himhim heetzinga aum nawn louhna diingin, A nam hihna uh i sumang diing uh," achi uhi. 5 Ajiahchu thukhat-a kituaahin akihoukhawm va; Nangmah hung dou diingin thuhun aphial uhi. 6 Edom leh Ishmael puaninnte; Moab leh Hagar puaninnte; 7 Gebalte, Ammonte, Amalekte; Philistia leh Tura a teengte toh; 8 Assyriate zong amahuh lamah apang va; Lot suante chu apanpih uhi. Selah. 9 Atungvah, Midiante na bawl bang, Kishon luui a Sisera leh Jabin tunga na bawl bangin bawl in, 10 Amahuh chu Endor khua ah asi bei va, Tual ah eeh banggiap ahung hita uhi. 11 A miliante uh Oreb leh Zeeb bangin bawl inla, Ahi, a laltate uh zousiah Zebah bang leh Zalmunna bangin bawl in. 12 Hute'n, "Pathian gantatna gamte laahsahin I tang diing uh," achi uhi. 13 Aw ka Pathian, amahuh chu leivui kipei lunglung bangin bawl in, Buhsi huih muutleeng bang giapin. 14 Mei in gammaang akaah bangin, Huleh meikuang in taang akaah bangin, 15 Huchiin amahuh chu na huihpi haattah in gawt inla, Na khopi huih in amahuh sulau in. 16 Aw LALPA, na min ahawl theihna diingun, A meel uh zumna in sudim in. 17 Kumtuangin hihmangbat leh hihbuaiin um uh henla; Ahi, suhmualphoua umin beimang uh heh, 18 Mite'n nangmah min chauh chu LALPA min pua, Leitung zousiah tunga Tungnungpeen na hi chih aheetna diingun.
LA PUITU A DIING. GITTITH DUNGJUIIN. KORAH TATE PHATNA LA.
1 Aw sepaihte LALPA, Na biahbuuh chu ngaihnat huai hina mei e! 2 Ka hinna in LALPA innhuang sung angai mahmah hi; Ahi, abah hiai hi; Ka lungtang leh ka tahsa chu Pathian hing ngaiin akikou khia hi. 3 Ahi, kawlgiit in inn akimuh a, Huleh phialphiat in zong amah a diingin a nou koihna diingin bu akimuh hi, Aw sepaihte LALPA, ka Kumpipa leh ka Pathian, Huchu na maitaamte ngeei ahi. 4 Na inn a teengte ahampha uhi; Nangmah ahung phat nalai diing uhi. Selah. 5 Nangmah a a haatna um mi ahampha hi, A lungtang a Zion zotna lampi um mi chu. 6 Amah un Baka Phaijaang atot laiun, Huchu tuinaah in abawl uhi; Guah in zong gualjawlna in tuikulte asudim hi, 7 Haatna apat haatjawh seemna ah achiah va; Zion Pathian ma ah akimusah chiat uhi. 8 Aw sepaihte LALPA Pathian, ka haamteina ngaikhia inla; Aw Jakob Pathian, bil anadoh in. Selah. 9 Aw ka phaw uh Pathian, ngai in, Huleh na thaunuhpa meel en in. 10 Ajiahchu na innhuang sunga ni khat um chu mun danga ni saang khat saangin ahoihjaw hi. Giitlouhna puaninnte a um saangin ka Pathian inn a kotkhaah ngaahtu a pan ka uut jaw hi. 11 Ajiahchu LALPA Pathian chu ni leh phaw ahi; LALPA'N hehpihna leh loupina apia hi; Dihtaha umte diingin sil hoih himhim aiit sih hi. 12 Aw sepaihte LALPA, Nangmah hung muang mi ahampha hi.
LA PUITU A DIING. KORAH TATE PHATNA LA.
1 Aw LALPA, nangmah chu na gam tungah nana kipaah a; Nangma'n Jakob saltaangte chu na puikiitta hi. 2 Nangma'n na mite giitlouhna na ngaidamta a; A sualna zousiah uh na khuhkhumta hi. Selah. 3 Na thangtawmna zousiah na lamahgta a; Na lungthahna lauhuaina apat na kiheita hi. 4 Aw ka hutdamna Pathian uh, hung tungding kiit inla, Huleh ka tungva na lungthahna tawpsah in. 5 Ka tungvah kumtuangin na lungthah diing adiaimah? Na lungthahna chu suan zousiah tanin na umsah zing diing adiaimah? 6 Na mite nangmah a anuam theihna diingun, Na hung suhalh kiit sih diaimah? 7 Aw LALPA, na lungsiatna tullou hung musah inla, Huleh na hutdamna hung pia in. 8 LALPA Pathian thusoi diing chu ka ngaikhe diing hi, Ajiahchu Ama'n a mite kawm leh a misiangthoute kawmah hamuanna thu asoi diing hi; Hizongleh amahuh chu ngolna lamah kiheikiit sih uh heh. 9 Peellouin a hutdamna chu Amah laute naih ah aum hi, Huchia loupina chu i gam a aum theihna diingin. 10 Lungsiatna tullou leh thutah akimutuah va; Dihtatna leh hamuanna akitawp tuah uhi. 11 Thutah chu leitung apatin apoudoh a, Dihtatna in vaan apatin ahung ensuh hi. 12 LALPA'N sil hoih ahung pe diing a, huleh i gam un zong a haichigah asuahta diing hi. 13 Dihtatna chu a ma ah apai diing a, Huleh a kalsuante chu lampi in abawl diing hi.
DAVID HAAMTEINA.
1 Aw LALPA, ka lamah na bil hung doh inla, hung ngaikhia in; Ajiahchu gentheitah leh tasamtah ka hi. 2 Ka hinna vom hoihin, ka siangthou ngaala; Aw nang ka Pathian, Nangmah hung muang na suaah chu hunkhia in. 3 Aw Lalpa, hung khotuah in, Ajiahchu ni chinin nang ka hung kou hi. 4 Aw, na suaah hinna nuamsah in, Aw Lalpa, Ajiahchu ka lungtang na kawmah ka koih tinten hi. 5 Ajiahchu Lalpa, nang chu na hoih a, huleh ngaidam diingin na kipeih hi, Huleh ahung kou pouhmahte kawmah lungsiatna tullou na hau hi. 6 Aw LALPA, ka haamteina ah na bil doh inla; Hehpih ka ngetna aw ngaikhia in. 7 Ka mangbat ni in nangmah ka hung kou diing hi, Na hung dawn diing jiahin. 8 Aw Lalpa, pathiante lahah nangmah bang himhim aum sih a; Na silbawl banga silbawl himhim zong aum sih uhi. 9 Aw Lalpa, na siam nam zousiah chu ahung pai diing va nang ahung be diingva, Na min ahung paahtawi diing uhi. 10 Ajiahchu nang chu na loupi a, huleh sillimdangte na bawl hi; Nangmah chauh Pathian nahi hi. 11 Aw LALPA, na lampi hung hilh in; Na thutah ah ka um diing hi; Na min lau diingin ka lungtang hung gawmsah in. 12 Aw Lalpa ka Pathian, ka lungtang zousiah in ka hung phat diing a, Huleh kumtuangin na min ka paahtawi diing hi. 13 Ajiahchu ka tungah na lungsiatna tullou chu aloupi a, Huleh nangma'n ka hinna Sheol nuainungpeen apat na hunkheta hi. 14 Aw Pathian, mikiliansahte'n ahung sualva, Huleh mihiamngaam kikhawmte'n ka hinna suhmang tumin ahawl va, Huleh nang chu a ma vah ahung koih sih uhi. 15 Hizongleh Aw Lalpa, nang chu lainatna a dim, hehpihthei, Thuaahthei, lungsiatna tullou leh thutahna hau Pathian na hi. 16 Aw, ka lam hung nga inla, huleh hung khotuah in, Na suaah kawmah na haatna hung pia inla, Huleh na suaahnu tapa hunkhia in. 17 Hoihna diing chiamchihna hung lah in, Huchia ahung hote'n huchu amuh va azum theihna diingun, Ajiahchu LALPA, nangma'n na hung panpihta a, na hung hamuanta hi.
KORAH TATE PHATNA LA.
1 A innbul suangphuum chu taang siangthoute ah aum hi. 2 LALPA'N Zion kulh kotkhaahte chu Jakob teennate zousiah saangin angaina jaw hi. 3 Pathian khopi Aw, na tungtaang thu loupitahte asoi uhi. Selah. 4 "Kei hung hete kawmah Rahab leh Babylon tungtaang thu ka soi diing hi, Ngai in, Philistia leh Tura, Ethiopia toh: 'Hi mi hutah ah apiang hi.'" 5 Zion tungtaang ah chu, "Hi mi leh hu mi amah a piang ahi va; Huleh Tungnungpeen ngeei in amah chu atungding diing," chia soi ahi diing hi. 6 LALPA'N mi chin min akhum chiangin, "Hi mi chu hutah a piang ahi," chiin asimtel diing hi. Selah. 7 Lasate leh tumging tumte'n, "Ka tuinaah zousiah chu nangmah ah ahi aum," achi diing uhi.
LA. KORAH TATE PHATNA LA. LAPUITUA DIING. MAHALATH LEANNOTH DUNGJUIIN. EZRAMI HEMAN MASKIL.
1 Aw ka hutdamna LALPA Pathian, Suun leh jaan in na ma ah ka kikoukou hi. 2 Ka haamteina na ma ah hung tung henla; Ka kikou thawm ah na bil hung doh in. 3 Ajiahchu ka hinna buaina in adim a, Huleh ka hinna in Sheol lam anaih huaihuai hi. 4 Kokhuuh a pai suhte laha simtel ka hi a; Haatna neilou mi bang giap ka hita hi. 5 Misite laha paihkhiah, Thaha uma haan a lum bang, Na khut apat saatkhiaha um, na heetzing nawn louhte bang giap ka hita hi. 6 Kokhuuh nuainungpeen ah na hung lumsahta hi, Mun mial leh thuuhtah ah. 7 Na lungthahna gihtahin ahung netkhum a, Nang na tuikinawh zousiah in na hung sugimta hi. Selah 8 Ka meelheette kei apatin gamlapiin na umsah a; Amahuh diingin kihdah huaipiin na hung bawlta hi; Khaahkhumin ka um a, huleh ka pawtkhe theita sih hi; 9 Hahsatna jiahin ka mit ase hiaihiai hi. Aw LALPA, ni chinin nang ka hung kou hi; Nang lamah ka khutte ka jaah zing hi. 10 Misite diingin sillimdang na bawl diaimah? Misite'n thouin nang ahung phat diviaimah? Selah. 11 Na lungsiatna tullou chu haan ah heetsahin aum diaimah? Ahihlouhleh na ginumna chu Abaddon ah heetsahin aum diaimah? 12 Na sillimdang bawlte mial ah heetin aum diing adiaimah? Huleh na dihtatna chu mangngilhna gam ah akihe diaimah? 13 Hizongleh Aw LALPA, panpihna ngeenin nangmah ka hung kou hi, Huleh ka haamteina jiingkaalin na ma ah ahung tung diing hi. 14 Aw LALPA, bangachia ka hinna paaikhia na hiai? Bangachia kei apat na maai phual na hiai? 15 Ka naupan chiil apatin gimthuaah leh si dehdehin ka um a; Na sil chijaathuaite ka thuaah a; Suhlungzingin ka um hi. 16 Na thangtawmna lauhuaitah in ahung vuhmang a; Na chijaathuainate'n ahung suseta hi. 17 Hute'n ni chinin tui bangin ahung uum suaah va; Ka kiimveel in ahung tuam chintuahuhi. 18 Ahung lungsiatte leh ka lawmte chu kei apatin na koih gamlata a, Ka meelheette mial ah na umsahta hi.
EZRAMI ETHAN MASKlL.
1 LALPA lungsiatna tullou chu kumtuangin la in kasa diing hi; Ka kam in na ginum daan chu khang zousiah kawmah ka hesah diing hi. 2 Ajiahchu, "Lungsiatna tullou chu kumtuangin leptouhin aum diing a; Na ginumna chu vaante ngeei ah na sukip diing," ka chita hi. 3 "Ka mi teel toh thuhun ka siam a, Ka suaah David kawmah thu ka chiamta hi: 4 'Na chihaah kumtuangin ka sukip diing a, Huleh na laltouphah zong khang zousiah tanin ka lemtou diing hi,'" chiin. Selah. 5 Huleh Aw LALPA, vaante'n na sillimdang bawlte aphat diing va, Misiangthoute kikhopna ah na ginumna zong aphat diing uhi. 6 Ajiahchu LALPA toh tehkaah theih diing vaante ah koi aum ei? Misilbawltheitah tapate lahah LALPA toh kibang koi ahiai? 7 Pathian chu misiangthoute kikhopna ah nasataha lauh diing ahi a, Huleh a kiimveel a mi zousiah lahah zahbawl diing ahi. 8 Aw sepaihte LALPA Pathian, Nang banga silbawlthei LALPA koi ahiai? Na ginumna in nang ahung uum kiimveel hi. 9 Nang tuipi kihawt vonvon tungah thu na nei a; A tuikinawh asaan chiangin na sudaai veu hi. 10 Nang Rahab chu gaal thah bangin na suneen dimdem a; Na baan haat in na meelmate na delhjaahta hi. 11 Vaante nang a ahi a, leitung zong nang a ahi; Khovel leh a sunga um zousiah zong nangmah muhkhiah veh ahi. 12 Maallam leh simlam na siam ahi; Tabor leh Hermon taangte na min in anuam uhi. 13 Nangma'n baan silbawltheitah na nei hi; Na khut ahaat a, huleh na khut jiatlam chu paahtawiin aum hi. 14 Dihtatna leh vaihawmna dih chu na laltouphah kingahna ahi; Lungsiatna tullou leh thutahna chu na maai ma ah apai diing hi. 15 Aw ging kipaah um ja namte ahampha uhi. Aw LALPA, amahuh chu na meel vaah ah avaah uhi. 16 Na min in nitum in anuam va, Huleh na dihtatna jiahin tawisangin aum uhi. 17 Ajiahchu nang chu a haatna uh loupina na hi a, Huleh na deihsahna jiahin ka kii uh tawisangin aum hi. 18 Ajiahchu ka phaw uh chu LALPA a ahi a, Huleh ka kumpipa uh chu Israel Misiangthou a ahi. 19 Hulaiin na misiangthou kawmah kilaahin thu na soi a, "Mi haattah khat tungah panpihna ka ngata a, Mite lah apat ka teeldoh mi khat ka tawisangta hi. 20 Ka suaah David chu ka muta a, Ka sathau siangthou in amah ka nuhta a, 21 Amah ah ka khut suhkipin aum diing a; Ka baan in zong amah asuhaat diing hi. 22 Meelma in amah apat siah aphuut sih diing a, Giitlouhna ta in asugim het sih diing hi. 23 Amah ma ah a gaalte ka saatpuuh diing a, Huleh amah hote ka gawt diing hi. 24 Huleh ka ginumna leh ka lungsiatna tullou chu amah tungah aum diing a, Ka min in a kii tawisangin aum diing hi. 25 A khut zong tuipi ah ka ngasah diing a, Huleh a khut jiatlam chu luuite ah ka ngasah diing hi. 26 Ama'n, 'Nang ka Pa, Ka Pathian, huleh ka hutdamna suangpi na hi,' chiin ahung kou diing hi. 27 Ke'n zong amah chu ka tachiil in ka bawl diing a, Lei a kumpipate saanga sangjawin ka bawl diing hi. 28 Ka lungsiatna tullou chu amah diingin kumtuangin ka kephoihsah diing a, Huleh ka thuhun chu a kawmah aum kip diing hi. 29 A chihaah zong kumtuangin ka tungding diing a, Huleh a laltouphah chu vaan um laisiahin ka umsah diing hi. 30 A tate'n ka daan alehngatsan va, Ka vaihawmnate banga aum louh uh leh, 31 Ka thuguatte abohsiat va Huleh ka thupiaahte ajuih louh uh leh, 32 A bohsiatna uh chu chiang in ka veh diing a, Huleh a giitlouhna uh chu vuaahna in. 33 Ahihvaangin ka lungsiatna tullou chu a kawm apat ka laahsah veh sih diing a, Ka ginumna in zong ajuausan sih diing hi. 34 Ka thuhun ka suse sih diing a, Ka muuh a thu pawtsa zong ka sulimdang het sih diing hi. 35 Khatvei ka sianthouna in ka kichiamta a, David kawmah ka juau sih diing hi: 36 A chihaah chu kumtuangin aum diing a, Huleh a laltouphah chu ka ma ah ni bangin aum diing hi; 37 Hapi bangin kumtuanga diingin suhkipin aum diing a, Vaan a heetpihtu ginum bangin," na chi hi. Selah. 38 Hizongleh nangma'n na paaikhia a huleh na kihdah a, Na thaunuh tungah na thangtawmta hi. 39 Na suaah thuhun bangmalouin na bawl a; A lallukhuh lei a paaikhe hialin na subuaahta hi. 40 A daai zousiah na susia a; A kulhpite na suhchipsahta hi. 41 Lampi a pai phot in a silneih alaahsah jeel va; A innveengte muhsit ahita hi. 42 Nang amah doute khut jiatlam chu na tungding a, A meelma zousiah na nuamsahta hi. 43 A naamsau mahiam nang na lehhei a, Huleh amah chu gaal ma ah na dingkipsahta sih hi. 44 Nang a loupina chu na suhtawpsah a, Huleh a laltouphah chu lei ahna paaikhetahi. 45 A khangdawnlai nite chu na suhtomsah a, Amah chu mualphouna na khuhsahta hi. Selah. 46 LALPA, bang tan diing ahiai? Kumtuanga kiphual diing na hiaimah? Na thangtawmna mei banga kuang diing ahiaimah? 47 Ka hinkhua hun tom daan hezing in; Bang bangmahlou diing giapa mihing zousiah siam na hiai? 48 Kua ahiai hinga um a sihna mulou diing? Sheol thuneihna apatin a hinna ahunkhe thei diaimah? Selah. 49 Aw Lalpa, na ginumna David kawma na chiam, Nidanglaia na lungsiatna tullou khoia um ahita ei? 50 Lalpa, na suaahte asimmohna uh, Nam haatte zousiah simmohna ka aangsung a ka thuaah daan hezing in, 51 Aw LALPA, na meelmate'n ahung simmohna, Na thaunuhpa kalsuante asimmoh daan uh hezing in. 52 LALPA chu kumtuangin phatin um hen. Amen, huleh Amen.
PATHIAN MIPA MOSI HAAMTEINA,
1 Lalpa, nang chu khang zousiah a ka teenna uh na nahi hi. 2 Taangte pian ma a, Ahihlouhleh leilung leh khovel na siamkhiah main, Kumtuang apat kumtuang tanin zong nang chu Pathian nahi hi. 3 Nangma'n mihing chu leivui ah na kiihsah a, Huleh "Nanguh mihing tate, kihkiit un," na chi hi. 4 Ajiahchu nangmah mitmuhin kum saang khat chu jaanni paisa bang ahi a, Huleh jaanveen khat sung bang giap ahi. 5 Nangma'n amahuh chu tuileet bangin na tohmang a; Khan khat ihmu bang ahi uhi. Jiingkaal a hampa dawnkhia bang ahi uh; 6 Jiingkaal in ahung pou a, ahung dawnkhia a; Nitaah lamin aatpuuhin aum a, avuai hi. 7 Ajiahchu na lungthahna a suhmangin ka um va, Na thangtawmna a suhmangbatin ka um uhi. 8 Nang ka giitlouhnate uh na ma ah na koih a, Aguuha ka sualnate uh na meel vaah ah na umsah hi. 9 Ajiahchu ka damsung nite uh na lungthahna ah apaibei veh a; Ka kumte uh khuisahnain ka zangbei uhi. 10 Ka damsung kumte uh chu kum sawmsagih ahi a; Huleh haatna jiahin kum sawmgiat zong ahi thei hi, Hizongleh a sawtna chu tohgimna leh lungngaihna ahi; Ajiahchu apaimang pah a, ka leengmang uhi. 11 Koi in ahiai na lungthahna silbawltheih daan he? Na lauhuaina bangjeelin na thangtawmna aum hi. 12 Huchiin ka damsung nite uh simdaan hung hilh in, Pilna lungtang ka neih theihna diingun. 13 Aw LALPA, hung kihkiit in. Bangtan ahiai? Na suaahte tungah na lungsim kiheisah in. 14 Aw, jiingkaal in na lungsiatna tullou in hung taisah in, Ka damsung ni zousiah va ka nuam va ka kipaah theihna diingun. 15 Na hung suhgimna nite leh sil hoihlou ka tuaah kum sungte uh Bang dungjuiin hung kipaahsah in. 16 Na natoh chu na suaahte kawmah kilang henla, Huleh na loupina chu a tate uh kawmah kilang hen. 17 Huleh LALPA ka Pathian uh kilawmna chu ka tungvah um henla, Huleh ka khut natoh uh chu ka tungvah sukip in; Ahi, ka khut natoh uh sukip in.
1 Tungnungpeen mun kiphual ateeng mi chu Bangkimbawltheipa Liim nuaiah aum gige diing hi. 2 LALPA kawmah, "Amah chu ka kihuumbitna leh ka kulhpi; Ka Pathian ahi, Amah ka muang diing," ka chi diing hi. 3 Peellouin Ama'n thaangkammi thaang leh Hii hoihloutah lahah ahung hunkhe diing hi. 4 A ha in ahung liahkhuh diing a, Huleh a ha nuaiah na muang diing hi; A ginumna chu na phaw neu leh na phaw lian ahi diing hi. 5 Jaan a sil chijaathuai na lau sih diing a, Suun a thaltang leengleh zong na lau sih diing a, 6 Mial nuai a hii leengleh na lau sih diing a, Suun laia sil sukholou siatna zong na lau sih diing hi. 7 Na geiah saang khat apuuh diing va, Huleh na jiatlam ah saang sawm apuuh diing uhi; Himahleh nang chu ahung naih sih diing hi. 8 Na mit in aen mei chauh diing a, Huleh migiloute thuhkiit-a aum na mu diing hi. 9 Ajiahchu nang LALPA, ka kihuumbitna, Tungnungpeen ngeei in na teenna diing mun in na bawlta hi. 10 Sil hoihlou mawngmawng na tungah atu sih diing a, Hii in zong na teenna ahung naih sih diing hi; 11 Ajiahchu na lampi zousiah a hung veeng diingin, Na tungthu ah chu Ama'n a angelte thu ape diing hi. 12 Amah un a khut un ahung dom diing uh, Huchilou inchu na keeng suang ah na tat kha diing hi. 13 Huumpibahnei leh mualtan chu na tuandeen diing a, Huumpibahnei haatlai leh dragon chu na tuanchil diing hi. 14 "Kei ahung lungsiat jiahin amah ka hunkhe diing a; Ka min aheet jiahin mun sang ah ka koih diing hi. 15 Ama'n ahung kou diing a, huchiin ka dawng diing hi; Mangbatna ah amah ka umpih diing a; Amah ka hunkhe diing a huleh ka tawisang diing hi. 16 Damsawtna in ka sutai diing a, Huleh ka hutdamna zong ka musah diing hi."
LA. SABBATH NI LA.
1 LALPA kawma kipaahthu soi chu sil hoih ahi, Huleh Aw Tungnungpeen, na min phat-a lasah chu sil hoihtah ahi; 2 Jiingkaal a na lungsiatna tullou suhlat a, Huleh jaan a na ginumna suhlat a, 3 Tumging gui sawm neite leh peehgingte leh Kaihging gingkilawmtah toh suhlat chu ahoih hi. 4 Ajiahchu Aw LALPA, nangma'n na natoh in na hung kipaahsah a, Na khut silbawlte jiahin la ka sa diing hi. 5 Aw LALPA, na silbawlte loupi hina mei e! Na ngaihtuahnate chu athuuh mahmah mei hi. 6 Mimawl in hikhu ahe sih a, Mingol in ahesiam saam sih hi. 7 Migiloute hampa banga ahung khan va, Huleh giitlouhna bawl zousiah ahung phat lenglung chiangun, Huchu kumtuanga diinga suhmanga aum theihna diing uh ahi. 8 Hizongleh LALPA, nang chu kumtuangin tawisang nahi hi. 9 Ajiahchu Aw LALPA, ngai in, na meelmate, Ajiahchu ngai in, na meelmate abeimang diing uhi; Giitlouhna bawlte zousiah suhdalhin aum diing uhi. 10 Hizongleh ka kii chu gam bawngtal kii bangin na tawisang a, Sathau thah a thaunuhin ka umhi. 11 Ka mit in ka meelmate tunga ka deih chu amu a, Ka bil in ahung dou migiloute tunga ka deih chu aja hi. 12 Midihtat chu tuum sing bangin aduah lellul diing a, Lebanon taang a sidar sing bangin akhang diing hi. 13 LALPA inn a kiphutte chu i Pathian uh biahinn huang inntual ah aduah lenglung diing uhi. 14 Upat nungin zong gah asuang nalai diing va, Adawng thenthon diing va, ahing depdup diing uh, 15 LALPA chu adihtat ahi chih heetsahna diingin; Amah chu ka suangpi ahi a, Huleh Amah ah dihtatlouhna himhim aum sih hi.
1 LALPA'N vai ahawm a, a loupina in akithuam hi; LALPA chu haatna a kigaahin akithuam hi. Khovel zong akiliin louhna diingin dettaha suhdetin aum hi. 2 Na laltouphah chu nidanglai peha suhdet ahi a; Nang chu kumtuang apat a um zing na hi. 3 Aw LALPA, tuiliante'n asuah va, Tuiliante'n a aw uh asuah uhi; Tuipite akinawh ging joijoi uhi. 4 Tunglam a um LALPA chu tui tampi gin saangin ahaatjaw a, Ahi, tuipi kihawt haattah saangin zong ahaatjaw hi. 5 Na thuheetsahte chu amuanhuai mahmah hi; Aw LALPA, sianthouna in kumtuangin na inn akilawmsah hi.
1 Aw LALPA, phubalatu Pathian, Aw phubalatu Pathian, kimusah in. 2 Aw nang leitung Vaihawmpa, kipankhia inla, Kiliansahte kawmah a giitlouhna man uh thuh in. 3 Aw LALPA, migiloute bangtan ahiai, Migiloute bangtan ahiai agualzoh diing uh? 4 Bangtan ahiai amawh haam va, khauh tahtaha thu asoi diing uh? Huleh bangtan ahiai giitlouhna bawlte zousiah kiliansahtaha aum diing uh? 5 Aw LALPA, amah un na mite amaltel va, Na goutan asugim uhi. 6 Meithai leh mikhualte asulum va, Huleh tagahte athat uhi. 7 Ahiinlah amah un, "LALPA'N amu sih diing a, Jakob Pathian in bangin angai sih," achi uhi. 8 Mite laha mimawlte haw, hesiam un; Nanguh mingolte, bangchihchiangin ahiai na hung pil diing uh? 9 Bil siampa in, Ama'n aja sih diinga adiai? Mit siampa in, Ama'n amu sih diinga adiai? 10 Pathian helou namte hilhpa in, Ama'n ataai sih diaimah? Heetna hilhpa in, Ama'n ahe sih diaimah? 11 LALPA'N mihingte ngaihtuahna chu Bangmalou ahi, chih ahe hi. 12 Aw LALPA, nangma'n na thununmileh Na daan apat na thuhilh mi ahampha hi, 13 Migilou a diinga kokhuuh toha aum masiah a, Mangbatna nite apat khawldamna na piaah theihna diingin. 14 Ajiahchu LALPA'N a mite apaaikhe sih diing a, A goutan zong apaisan ngei sih diing hi. 15 Ajiahchu vaihawmna chu dihtatna lamah akihkiit diing a, Lungtang dihtah po zousiah in huchu ajui diing uhi. 16 Kua ahiai silgilou bawlte hung dousah diinga kipankhe diing? Ahihlouhleh kua ahiai silsual bawlte hung dousah diinga ding diing? 17 LALPA chu ahung panpihtu hi sih leh, Ka hinna chu kintahin mundaai ah aumta diing hi. 18 "Ka keeng atolh," ka chih chiangin, Aw LALPA, na lungsiatna tullou in ahung kai hi. 19 Ka lungsim a ngaihtuah tampi ka neihna ah, Na hamuannate in ka hinna akipaahsah jeel hi. 20 A daan bawl a giitlouhna guanggalh, Laltouphah in nangmah toh kithuahkhawmna anei diai? 21 Amahuh chu midihtat hinna sual tumin apungkhawm duamduam va, Mohnabei sisan chu siamlouh atangsah uhi. 22 Hizongleh LALPA chu ka kiveenbitna ahi a, Huleh ka Pathian chu ka kihuumbitna suangpi ahi. 23 Ama'n amahuh giitlouhna ngeei chu a tungvah akesah diing a, Huleh a sualna ngeei vah asuse diing hi, Ahi, LALPA i Pathian un amahuh asuse diing hi.
1 Aw hung pai un, LALPA phatin la i sa diing uh; I hutdamna Suangpi paahtawiin nuamtahin i kikou diing uhi. 2 Kipaahthu soi kawmin a ma ah i pai diing va, Phatna late sa a Amah paahtawiin nuamtahin aw i suah diing uhi. 3 Ajiahchu LALPA chu Pathian loupitah ahi a, pathiante zousiah tunga Kumpipa loupitah ahi. 4 A khut ah lei a mun thuuhtahte aum a, Huleh taang vuumte zong Amah a mah ahi. 5 Tuipi Amah a ahi a, ajiahchu Amah siam ahi; Huleh a khut in gamgaw asiam hi. 6 Aw hung pai unla, Amah biain i kuun diing uh; Ahung Siamtu LALPA ma ah i khuupdin diing uhi. 7 Ajiahchu Amah i Pathian uh ahi a, Huleh eiuh chu a gantatna mun a mite leh a khut a belaamte i hi uhi. Tunia a aw na jaahva ahihleh, 8 "Helna ni bangin, gamdaai a je-etna ni bangin Na lungtang uh khauhsah sihun, 9 Na pulepate un ahung je-et uh, Ka silbawl amuh vaangun ahung fiah uhi. 10 Kum sawmli hilhial hu khang a mite tungah ka lunghita sih a, 'Hite chu a lungtang va sil suhkhelh haat mite ahi va, Huleh ka lampite zong ahe sihuh,'kachihi. 11 Huchiin, 'Ka khawldamna ah aluut sih diing uh,' Chiin a tungva lungthahin ka kihaahsialta hi."
1 Aw LALPA paahtawiin la thah sa unla; Leilung zousiah in LALPA paahtawiin la sa un. 2 LALPA paahtawiin la sa unla, a min phat un; Ani ani in a hutdamna phuangdoh un. 3 Namte lahah a loupina phuangdoh unla, Mi zousiah lahah a sillimdang bawlte phuangjaah un. 4 Bangjiahin ahiai i chih leh LALPA chu aloupi a, nasatah a paahtawi diing ahi; Amah chu pathiante zousiah saanga lau diing ahi. 5 Aj iahchu namte pathian zousiah chu milemte ahi va, Hizongleh LALPA'N chu vaante asiam ahi. 6 Paahtawina leh loupina a ma ah aum a; Haatna leh kilawmna a mun siangthou ah aum hi. 7 Aw nanguh mi chin chichinte, LALPA kawmah pia unla, LALPA kawmah loupina leh haatna pia un. 8 LALPA kawmah atan diing a min loupina pia un; Sillat diing tawiin a biahinn huang tual ah hung pai un. 9 Aw, sianthouna kilawm toh LALPA bia un; Leilung zousiah, a ma ah liing un. 10 Namte lahah, "LALPA'N vai ahawm hi; Khovel chu dettaha suhkipin aum a, akiliing sih diing hi; Ama'n dihtattahin mite vai ahawm diing hi," chi un. 11 Vaante nuam uh henla, huleh leilung kipaah hen; Tuipi leh a sunga um zousiah zong hawhging joijoiuhhen. 12 Lougam leh a sunga um zousiah chu LALPA ma ah nuam uh hen; Huchiin gammaang a sing zousiah in nuamtahin la sa uh hen. 13 Ajiahchu Amah ahung pai diing hi, leitung vaihawm diingin kintahin ahung pai diing hi. Ama'n dihtattahin khovel vai ahawm diing a, Huleh mite tungah chu a thutah in vai ahawm diing hi.
1 LALPA'N vai ahawm hi; Leilung nuamtahin um hen; Tuikulhgam tampite chu kipaahtahin um uh hen. 2 Meilumte leh mial chu Amah kiimveel ah aum va; Dihtaha vaihawmna chu a laltouphah kingahna ahi. 3 A malam ah mei apai a, Huleh a kiimveel a a gaalte akaangmang hi. 4 Akawlphete in khovel asalh vaah zotzot va, Leilung in amu a huleh akithing hi. 5 Taangte chu LALPA ma ah khuailu bangin atuisuaah va, Khovel pumpi zong Lalpa ma ah. 6 Vaante'n a dihtatna ataahlangva, Huleh mi zousiah in a loupina amu uhi. 7 Milem siamthuh natohsah zousiah haw, milem kisahtheihpihte haw chu suhmualphouin um uh hen. Nanguh pathian zousiah haw, Amah chu bia un. 8 Zion in aja a, kipaahtahin aum hi, Huleh Aw LALPA, na vaihawmnate jiahin Juda tanute chu anuam uhi. 9 Ajiahchu LALPA, nang chu leilung zousiah tunga sangpeen na hi, pathiante zousiah tungah tawisangin na um hi. 10 Nanguh LALPA lungsiatte haw, gilou hua un. Ama'n a misiangthoute hinna avomhoih a; Amahuh chu migiloute khut apatin ahundoh hi. 11 Midihtat a diingin khua avaah a, Mi lungtang dih a diingin kipaahna aum hi. 12 Nanguh midihtatte, LALPA ah nuam unla, Huleh a min siangthou heetzingna ah kipaahthu soi un.
1 Aw, LALPA paahtawiin la thah sa un; Ajiahchu Ama'n sil limdang tahte abawl a, A khut jiatlam leh a baan siangthou in Amah diingin gualzohna akimuhtahi. 2 LALPA'N a hutdamna ahesahta a; A dihtatna chu namte mitmuhin aphuangdohta hi. 3 Israel innkuante tunga a lungsiatna tullou leh a ginumna ahezing a, Kawlmong tana mi zousiah in zong i Pathian uh hutdamna amuta uhi. 4 Leilung zousiah haw, LALPA paahtawiin nuamtahin kikou un; Ngaihtahin kikou unla, nuam unla, huleh a phatna la sa un. 5 Kaihging in LALPA phatin la sa un, Kaihging leh phatna la sahgingtoh, 6 Peengkuul leh belaamtal kii ging toh; Kumpipa, LALPA ma ah nuamtahin kikou un. 7 Tuipi leh a sunga um zousiah ging joijoi henla, Khovel leh a sunga um zousiah toh; 8 Luite'n a khut uh beeng henla; Taangte'n LALPA ma ah nuamin la sa khawm uh heh, 9 Ajiahchu lei vaihawm diingin Amah ahung diing hi. Dihtatna toh khovel vai ahawmsah diing a, Khentuam neilouin mipite vai ahawmsah diing hi.
1 LALPA'N vai ahawm hi; Mipite chu lauin kithing uh hen. Amah chu cherubte kikaal ah atou hi; Leilung chu kiliing hen. 2 LALPA chu Zion ah aloupi a, Huleh Amah chu mi zousiah tungah atungnungpeen hi. 3 Amah un na min loupitah leh lauhuaitah chu phat uh hen; Amah chu asiangthou hi. 4 Kumpipa haatna in vaihawmna dih adeih a; Nang khentuam neihlouhna na tungdoh a; Jakob ah dihna leh dihtatna in vai na hawm hi. 5 LALPA i Pathian uh tawisang unla, Huleh a keeng ngahna bul ah bia un; Amah chu asiangthou hi. 6 A siampute lahah Mosi leh Aaron aum a, Huleh a min loute lahah Samuel aum a; Amah un LALPA akou va, Ama'n amahuh adawng hi. 7 Meipi ding ah a kawmvah thu asoi a; A thuheetsahte leh a thuseh piaahte ajui uhi. 8 Aw LALPA, ka Pathian uh, nang amahuh na dawng a; Nang chu amahuh ngaidampa Pathian na hi, A silbawlkhelhte uh tungah phuba la mahlehchin. 9 LALPA i Pathian chu tawisang unla, Huleh a taang siangthou ah bia un; Ajiahchu LALPA i Pathian uh chu asiangthou hi.
PAAHTAWINA PHATNA LA
1 Nanguh gam zousiah haw, LALPA paahtawiin nuamsatahin kikou un. 2 Kipaah kawmin LALPA nna tong unla; Kipaahtaha la sa kawmin a ma ah hung pai un. 3 LALPA ngeei chu Pathian ahi chih he un; Ahung siampa Amah ahi a, eimah leh eimah i hi sih; A mite leh a gantatna mun a belaamte i hi uhi. 4 Kipaahthu soi kawmin a kotkhaah ah luut unla, Huleh paahtawi kawmin a biahinn huang tual ah luut un. A kawmah kipaahthu soi unla, huleh a min phat un. 5 Ajiahchu LALPA chu ahoih a, A lungsiatna tullou chu kumtuangin aum a, Huleh a ginumna zong khang zousiah tanin aum hi.
DAVID PHATNA LA
1 Lungsiatna tullou leh vaihawmna dih thu chu lain ka sa diing hi; Aw LALPA, nangmah phatin la ka sa diing hi. 2 Lampi hoihbukim ah piltahin ka pai diirig hi. Aw, bangchihchiangin ka kawmah na hung diai? Ka inn sungah lungtang hoihbukim puain ka um diing hi. 3 Silgilou mawngmawng ka mitmuh ah ka koih sih diing; Lampeette silbawl ka hua a; Keimah ah abeh sih diing hi. 4 Lungtang soihah in ahung paisan diing a; Giitlouhna ka he sih diing hi. 5 Koipouh a innveengte aguuha soisia chu ka sumang diing hi; Mit sanghah leh lungtang kiliansah chu ka thuaahthei sih diing hi. 6 Ka kawma aum theihna diingun, hi gam a mimuanhuaite tungah ka mit atu diing a; Lam hoihbukim a paipa in ka nna atong diing hi. 7 Heemhaatmi chu ka inn sungah aum sih diing a; Juauhaatmi zong ka ma ah a dinmun ngeiin ading zing sih diing hi. 8 LALPA khopi apat silgilou bawlte zousiah ka saatkhiah theihna diingin, Hi gam a migilou zousiah jiingkaal matahin ka sumang diing hi.
CHAUH LAIA LALPA MA A MANGBAT THU SOIA GIMTHUAAHMI HAAMTEINA.
1 Aw LALPA, ka haamteina hung ngaikhia inla, Huleh ka kikou thawm na kawmah hung tung hen. 2 Ka mangbat ni'n kei apat na maai phual sin; Na bil hung doh inla; Ka hung kouh chiangin hung dawng pah in. 3 Ajiahchu ka damsung nite meikhu bangin ajaam manga, Huleh ka guhte lah taptung bangin akaangta hi. 4 Ka lungtang chu vuaahin aum a huleh hampa bangin avuaita hi; Ka an neeh diing zong ka mangngilhta hi. 5 Ka maau maauna aw jiahin ka guhte chu Ka vun ah abeh delhdalh hi. 6 Gamdaai tuivapi bang ka hi a, Gamgaw simbu bang giap ka hita hi. 7 Ka hah gige a, Inn tunga kawlgiit amah tanga um bang ka na hita hi. 8 Ka meelmate'n nitum in ahung soisia va; Kei hung chiamnuihte'n kei hung kalhna in akichiam uhi. 9 Ajiahchu vut chu an bangin ka ne a, Huleh ka dawn diing chu mittui toh ka hal hi, 10 Na lunghihlouhna mahmah jiah leh na lungthahna jiahin; Ajiahchu nangma'n na hung domkaang a, na hung paaikheta hi. 11 Ka damsung nite chu liimliap kiam bang ahi a; Hampa bangin avuaita hi. 12 Himahleh Aw LALPA, nang chu kumtuanga um na hi a; Huleh nangmah heetzingna zong akhang akhang in aum hi. 13 Na thou diing a, Zion chu na hehpih diing hi; Amah hehpih diing hun lah atungta ngaala, Ahi, hun guat chu atungta hi. 14 Tahzetin na suaahte'n a suangte haw ah thangphatna anei va, Hutah leivui angaina uhi. 15 Huchiin namte'n LALPA min alau diing va, Huleh leitung kumpi zousiah in na loupina alau diing uhi. 16 Ajiahchu LALPA'N Zion atungding diing a, A loupina a kithuamin ahung kilang diing hi. 17 Ama'n bangma neiloute haamteina chu angaihsah a, Huleh a haamteina uh asimmoh sih hi. 18 Hichu khang hung um diingte a diingin gelh ahi, Huchia mihing hung kisiamkhe diingte'n LALPA chu aphat theihna diingun. 19 Ajiahchu a mun siangthou sangtah apatin Ama'n aensuh a; LALPA'N vaan apatin lei aen hi. 20 Suangkul taangte maauthawm ngaikhe diingin; Si diinga guatte phelkhe diingin, 21 Zion a LALPA min soilang diingin, Huleh Jerusalem a Amah phatna soithang diingin, 22 LALPA natohsah diinga mipite leh lalgamte zong Ahung kikhop khawm chiangun. 23 Ama'n lamkaal ah ka tha atawlsah a; Ka damsung nite asutomta hi. 24 Keima'n, "Aw ka Pathian, Ka lutlai ni kimlai ah hung la mang sin; Nangmah kum chu akhang akhang in aum hi. 25 Leilung kingahna chu nidanglai peha na phuumsa ahi a, Huleh vaante zong na khutsuaah ahi. 26 Amahuh chu ahung mangthaai diing va, hizongleh nang chu na um zingzing diing hi. Ahi, hute zousiah chu puansilh bangin ahung lui diing uh; Puan bangin na hengta diing a, huchiin ahung kihengta diing uhi. 27 Hizongleh nang chu angeingei na hi a, Huleh na kumte'n zong bei ni himhim anei sih diing hi. 28 Na suaahte tate chu aum zingzing diing va, Huleh a suante uh zong na ma ah suhkipin aum diing uhi," ka chi hi.
DAVID PHATNA LA.
1 Aw ka hinna, LALPA phat inla; Huleh ka sunga um zousiah haw, a min siangthou phat un. 2 Aw ka hinna, LALPA phat inla, Huleh ahung silphatuam bawlsah zousiah mangngilh sin. 3 Ama'n na sualna zousiah angaidam a; Na natna zousiah ahung suhdamsah hi. 4 Ama'n kokhuuh apatin na hinna atan a; Lungsiatna tullou leh lainatna ahung khuhsah hi. 5 Na kam chu sil hoih in asutai a; Huchiin na khangdawnna chu mupi a bangin suhthahin aum hi. 6 LALPA'N nuaisiahna thuaahte zousiah diingin Dihtatna leh thudih in vai ahawmsah hi. 7 A lampite Mosi kawmah ahesah a, A silbawlte chu Israel tate kawmah. 8 LALPA chu mikhotuahthei leh hehpihsiam, Lungneemtah leh lungsiatna tullou hautah ahi. 9 Ama'n ataai zing sih diing a, A thangtawmna zong apaai kumkho sih diing hi. 10 I sualnate bangin ahung soisa sih a, I giitlouhnate dungjuiin ahung thuh sih hi. 11 Ajiahchu vaante lei saanga asaanjawh mah bangin, A lungsiatna tullou chu Amah laute tungah aloupi hi. 12 Suahlam leh tumlam a kigamlaat bangin, Ama'n i tatsualnate ei apatin akoihmangta hi. 13 Pa in a tate ahehpih bangin, LALPA'N Amah laute ahehpih zing hi. 14 Ajiahchu Ama'n i tahsa kisiamdaan ahe a, Leivui giap i hi uh, chih ahezing hi. 15 Mihing jaw a damsung nite hampa bang giap ahi; Gam a paahta bangin ahung palhkhia a, 16 Huih in amuut a, amang jeel hi; Huleh aumna mun in ahe nawn sih diing hi. 17 Hizongleh LALPA lungsiatna tullou chu Amah laute tungah kumtuang apatin kumtuang tanin aum a, Huleh a dihtatna zong a tu khang a ta khang tanin aum hi, 18 A thuhun jui photmahte leh A thupiaahte man tuma hezingte kawmah. 19 LALPA'N a laltouphah chu vaan ah alem a; A thuneihna in zong bangkim tungah vai ahawm hi. 20 Nanguh a thupiaah subuchinga athumang, Haatna loupi nei angelte Aw, LALPA chu phat un. 21 Nanguh a sepaihte zousiah haw, Nanguh a deihjawng bawla a natongte haw, LALPA chu phat un. 22 A vaihawmna mun photmah a asilbawl zousiah haw, LALPA chu phat un; Aw ka hinna, LALPA chu phat in.
1 Aw ka hinna, LALPA chu phat in. Aw LALPA ka Pathian, nang chu na loupi mahmah a, Paahtawina leh loupina in na kithuam hi, 2 Puansilh a kithuam bangin vaah in na kituamkhum a; Vaante puaninn tung bangin na kaipalh hi. 3 Ama'n a pindan sungnung kalvaaite haw chu tui lahah ahung a; Meipite chu a kaangtalai in asiam a, Huih ha tungah apai hi. 4 Ama'n a angelte chu huih asuaahsah a, A natongte zong meikuang asuaahsah hi. 5 Kumtuanga akiliin louhna diingin Ama'n leitung kingahna aphuumhi. 6 Nangma'n leilung hi puan bangin tui thuuhtah na khuhsaha; Tuite chu taang tungah na umsah hi. 7 Na taaina jiahin tuite ataaimang va; Na vaan ging thawm jiahin kintahin akikhiin mangta uhi. 8 Amahuh diinga na bawlsah mun, Taangte tungah aluangtou va, phaijawlte ah aluangsuh uhi. 9 A kaantan louhna diingun gi na hung hi, Huchia leilung tuummang diinga akihkiit louhna diingun. 10 Ama'n guamte haw ah tuinaahte asawl a; Hute chu taangte kaal ah aluang uhi. 11 Hute'n gamsa chinteng kawmah dawn diing apia va; Gam sabiltungte'n a dangtaah uh asudaai uhi. 12 Hu luuidungte haw ah tungleeng vate'n teenna inn and va, Singbawh lahah la asa uhi. 13 Ama'n a pindan tungnung apat taangte tui in ahung tapkawt a; Lei chu na khut natoh gahte in atai hi. 14 Gante diingin hampa apousah a, Huleh haichite chu mihing zat diingin apousah hi, Lei apat neeh diing apawtsah theihna diingun, 15 Mihing lungtang kipaahsah uain, A maai suhnouna diing sathau, Huleh mihing lungtang suhaat an toh. 16 LALPA singte chu tuipomtah ahi va; Lebanon taang a asuan sidar singte mah; 17 Hutah ah vate'n bu abawl va; vaaiva diingin chu taahsing a inn ahi. 18 Taang sangtahte chu sakeelte diinga um ahi a; suangpite chu shaphante a diing ahi. 19 Ama'n hunbi heetna diingin hapi asiam a; Ni in atum hun ahe gige hi. 20 Nangma'n mial na bawl a, huchu jaan ahung hi a; Hu hun in gam nuai a sa photmah avaahdoh uhi. 21 Huumpibahnei haatlaite'n a sa mat diing uh ahawhkhum va, Huleh Pathian apat neeh diing ahawl uhi. 22 Ni ahung suaah chiangin, ahung paikhawm va, Huleh a kul sungvah alum jeel uhi. 23 Mihing chu a natohna ah Nitaahlam tana tong diingin akuandoh hi. 24 Aw LALPA, na natohte tam hina lawmlawm e! Amahuh chu pilna a na bawl veh ahi; Leilung chu na hauhsatna in adimsuaah hi. 25 Hutah ah tuilianpi nasatah leh liantah mei aum a, Hutah ah ganhing bohvaaha pai simseeng louh, Ganhing aneu leh alian aum hi. 26 Hutah ah longte akitawl uh; Hulai ah Leviathan, a sunga kimawl diinga na bawl ngeei chu aum hi. 27 Ahuntaha amahuh an na piaah theihna diingin hute zousiah in nangmah ahung ngaah chiat uhi. 28 Amah un a kawmva na piaah photmah a lakhawm uh; Na khut na jaah a, hoihna in atai uhi. 29 Nangma'n na maai na phual a, achimoh uh; A haihna uh na lamang a, a si va, huchiin leivui ah akihkiit jeel uhi. 30 Na Hagau na sawlkhia a, siamin aum uh; Leitung zong na bawlthah hi. 31 LALPA loupina chu kumtuangin um henla; LALPA chu a silbawl ah nuam hen. 32 Ama'n lei aen a, akiliing hi; Taangte akhoih a, akhu uhi. 33 Ka damsung teng LALPA phatin la ka sa diing a; Ka hin laisiahin ka Pathian phatin la ka sa diing hi. 34 Ka ngaihtuah ngiitngeetna chu Amah kipaahna hi henla, LALPA ah ka kipaah diing hi. 35 Misualte leitung apatin suhmangin um uh henla, Huleh migiloute zong um nawn sih uh hen. Aw ka hinna, LALPA chu phat in. LALPA chu phat un.
1 Aw, LALPA kawmah kipaahthu soi un. A min siangthou lou un; Mite lahah a silbawlte hesah un. 2 Amah paahtawiin la sa unla, Amah phatin la sa un; A silbawl limdang zousiah thu ah houlim un. 3 A min siangthou suang unla; LALPA hawl mite lungtang nuam hen. 4 LALPA leh a haatna hawl unla; A meel chu bangchihlaipouhin hawl un. 5 A natoh zohsa limdangte hezing unla; A silmahte leh a kam a vaihawmnate chu hezing un, 6 Aw nang a suaah Abraham chihaah, nanguh ateel Jakob tate haw. 7 Amah chu i LALPA Pathian uh ahi a; A vaihawmnate chu leitung pumpi ah aum hi. 8 Ama'n a thuhun kumtuangin ahezing a, Khang saang khat tana diinga thu anapiaah ngeei, 9 Abraham kawmah a thuhun Huleh Isak kawma akichiamna ngeei chu. 10 Humah chu daan hi diingin Jakob kawmah asukip a, Israel kawmah kumtuang thuhun diingin, 11 "Kanaan gam ka hung pe diing, na goutan tuambiih diingin," chiin. 12 Mi tawmtakhat ahih laiun; Ahi, tawmtakhat giap ahi va, huleh hu ah zinvaithaam ahi uhi. 13 Nam khat apat nam tuam kawma, Huleh lalgam khat apat adang kawma apai laiun, 14 Ama'n kuamah in amahuh 105:8 khang saang khat. Hun sawt mahmah soina ahi (khang khat chu kum sawmli ahi jeel hi), leitung tawptan chihna ahi mei diing hi. abawlsiat uh aphal sih hi; Ahi, amahuh jiahin kumpipate ataaihilh a, 15 "Ka thaunuhte khoih sih unla, Huleh ka zawlneite himhim zong suna sih un," chiin. 16 Huleh hu gam a rung diingin kial akou a, Neeh diing mawngmawng aumsahta sih hi. 17 A ma vah mi khat, Joseph ngeei asawl a, Amah chu suaah diinga juaahin aum hi. 18 A keeng chu kol in asuna va, Amah ngeei chu siih khainiang bulhin aumta hi. 19 A thusoi ahung tun masiahin, LALPA thu in amah aj e-ettahi. 20 Kumpipa in mi asawl a, asuuta, Mite vaihawmpa in amah chu asuaahtasahta hi. 21 Ama'n amah chu a inn sunga houtu leh A neih zousiah tunga thunei diingin abawlta hi, 22 A laltate chu hoih asah banga suangkul a khum diingin, Huleh a upate hilhpil diingin. 23 Israel zong Aigupta gam ah ahung a, Huleh Jakob chu Ham gam ah athaam tadih hi. 24 Ama'n a mite nasatahin apungsah a; Huleh a meelmate uh saanga haatjawin asiam hi. 25 A lungtang uh a mite mudah diingin aheisah hi, A suaahte tunga lepchiahtaha bawl diingin. 26 Ama'n a suaah Mosi asawl hi, Huleh a miteel Aaron ngeei toh. 27 Amah un a chiamchihnate a lahvah amusah va, Huleh Ham gam ah sillimdangte amusah uhi. 28 Ama'n mial asawl a, amialsahta a; Huin amah un a thu akalhta sih uhi. 29 A tuite uh sisan asuaahsah a, Huleh a ngate uh asulumta hi. 30 A gam uh ukeeng in ahung dimtaa, A kumpipa uh pindan sungnung peente tanphain. 31 Ama'n thu asoi a, huchiin thou hon tamtah ahung um va, Huleh hit zong a gam sung pumpi vah ahung umta hi. 32 Guah luangin gial a kawmvah apia a, Huleh a gam vah meikuang joljol apeta hi. 33 A grepguite uh leh a theipi kungte uh asuhlupsah a; Huleh a gam va singte zong asuhtansah hi. 34 Ama'n thu asoi a, huchiin khaukhup leh khauphete ahung um va, Huchu simzoh guallouh ahi a, 35 Huchiin a gam va haichi zousiah anegamta va, Huleh a leigahte uh anekhawngta uhi. 36 Ama'n a gam sungva tachiil zousiah zong athat a, A haatna zousiah uh masapeente chu. 37 Dangka leh sana toh amahuh apuidoh a; Huleh a namte lahah mi haatlou khat zong aum sih uhi. 38 Apawtdoh laiun Aigupta mite akipaah uhi; Amahuh launa a tungva atuh jiahin. 39 Amahuh liah diingin meipi akaaisah a; Huleh jaan a taanvaah diingin meikuang apia hi. 40 Mite'n angeen va, huchiin Ama'n meengkeeng apia a, Huleh vaan an in amahuh ataaisah hi. 41 Suangpi akhikeehsah a, huchiin tui ahung luangdoha, Mun gawte ah luui bangin aluangta hi. 42 Ajiahchu Ama'n a suaah Abraham toh A thuchiam siangthou chu ahezing hi. 43 Huchiin a mite chu kipaahna toh apuidohta a, A miteelte chu nuamna toh apuidohta hi. 44 Huleh namte gam chu amahuh apeta a; Mite tohgimna chu amah un aluahta uh; 45 Huchia Amah thuguatte azop va Huleh a daan ajuih theihna diingun. LALPA chu phat un.
1 LALPA chu phat un. Aw, LALPA kawmah kipaahthu soi un, ajiahchu Amah ahoih hi. A lungsiatna tullou kumtuangin aum ngaala. 2 LALPA silbawl loupitahte koi in ahiai soi thei diing? A phatna zousiah koi in ahiai hesah thei diing? 3 Vaihawmna dih keem hoihte ahampha uhi, Bangchihlaipouha dihtatna bawl mite toh. 4 Aw LALPA, na mite na deihsahna in hung hezing inla, Aw, na hutdamna toh hung veh in, 5 Huchia miteelte hamphatna ka muh theihna diing leh Na namte kipaahna a ka nuam theihna diing leh Na goutante toh ka kisuan theihna diingin. 6 Ka pulepate uh toh sil ka na bawlsualta va, silgilou kahihtava, Giloutahin ka na gamta zouta uhi. 7 Ka pulepate un Aigupta gam a na silmah bawlte ahesiam sih va, Na chitna loupitah ahezingta sih uh, Hizongleh tuipi geiah ahelta uhi, Tuipi San ngeei ah. 8 Hizongleh Amah min jiahin amahuh chu ahunkheta hi, Huchia a silbawltheihna loupitah aheetsah theihna diingin. 9 Ama'n Tuipi San zong ataai a, huin ahung kangta a, Huchiin amahuh chu gamdaai a pui bangin tui thuuhtah ah apuikaaita hi. 10 Huchiin amahuh hote khut apatin ahunkheta a, Huleh meelma khut apatin amahuh atanta hi. 11 Tuite'n a meelmate uh akhuhta a, Khat zong hinga nuutsiat aum sih uhi. 12 Hulaiin a thute agingta va, A phatna la asa uhi. 13 A silbawlte chu amangngilh pah va, A lemguatna chu angaah peihta sih uh, 14 Hizongleh gamdaai ah ahung gongsan mahmah va, Huleh gamgaw mun ah Pathian aje-etta uhi. 15 Huin Ama'n anget uh apia a, Hizongleh a hinna vah gawnna atutta hi. 16 A giahphual va zong Mosi athangsiat laiun, LALPA misiangthou Aaron toh, 17 Lei in a kam akaah a Dathan avalhta a, Huleh Abiram lawi chu akhuhkhumta hi. 18 Amah uh loi pawl lahah mei akuangdoh a; Mei in migiloute akaangtumta uhi. 19 Horeb ah bawngnou asiam va, Huleh milem kisunthuh chu abeta uhi. 20 Huchiin a loupina uh chu bawngtal hampa ne Lem giap atangsahta uhi. 21 Aigupta gam a silloupitah bawltu, A Hundampa uh Pathian chu amangngilhta uh, 22 Ham gam a sillimdangte leh Tuipi San a sil chijaathuaite toh. 23 Hujiahin Ama'n amahuh ka sumang diing achi hi, A miteel Mosi in a lungthahna alaahmangna diingin a ma ah dingtang sih henla hileh, Amahuh anasumangta diing hi. 24 Huin hu gam deihhuaitah chu asimmoh va, A thusoi agingta sih uh, 25 Hizongleh a puaninn sungvah aphun va, Huleh LALPA Aw chu angaikhe nuam sih uhi. 26 Hujiahin a tungvah a khut alaamta hi, Gamdaai a amahuh supuuh diingin leh, 27 A suante uh zong namte laha asuhpuuh a, Huleh gam chin a athehdalhna diingin. 28 Baal-Peor toh zong akizop khawm va, Huleh misi kawma kithoihna sate chu aneta uhi. 29 Huchibangin a silhihte un Amah asulungthahta va, Huchiin a tungvah natna hii ahung leengta hi. 30 Hulaiin Phinehas chu dingdohin akigolh a, Huchiin natna hii chu suhdaihin aumta hi. 31 Huchu amah diingin kumtuanga Khang zousiah tana diingin dihtatna a sehsah ahita hi. 32 Amah un Meribah tuite ah zong asuhmgthah va, Huchiin amahuh jiahin Mosi tungah sil hoihlou atung hialta hi; 33 Ajiahchu Pathian Hagau asulungthahta va, Huchiin a muuh in kinohtahin thu asoita hi. 34 LALPA'N a kawmva sumang diinga Thu apiaah bangin namte chu asumang sih va, 35 Hizongleh namte lahah akitohhal va, a silbawlte uh ajuita uhi. 36 A milemte uh nna atohsah va, Hute chu amahuh diingin thaang ahung hita hi. 37 Ahi, dawite kawmah a tapateuhleh A tanute un akithoih va, 38 Huleh mohnabei sisan asuah va, A tapate uh leh a tanute uh sisan ngeei, Huchu Kanaan gam a milemte kawmah kithoihna in anei va; Huchiin hu gam chu sisan a suhnitin ahung umta hi. 39 Huchibangin amahuh natoh ngeei in akisubolhhoh va, Huleh a silbawl ngeei vah nohchijuaahin akimangta uhi. 40 Hujiahin LALPA lungthahna chu a mite tungah akuangta a, Huchiin Amah goutante ngeei chu akihdahta hi. 41 Huchiin amahuh chu namte khut ah apedohta a, Huleh amahuh hote'n a tungvah vai ahawmta uhi. 42 A meelmate un anuaisiah va, Huleh a meelmate uh khut nuai a koihin aumta uhi. 43 Ama'n amahuh tampivei ahunkhia a, Hizongleh a lemguatna vah ahel va, Huleh a sualna jiahun suhngiamin aumta uhi. 44 Huchipumin zong a kikou thawm uh ajaah chiangin A hahsatna uh angaihsah a; 45 Huleh a thuhun chu amahuh jiahin ahezing a, Huleh a lungsiatna tullou soiguallouh bangjeelin a lungsim akhengiamta hi. 46 Amahuh sal a puite zousiah chu Amahuh ahehpihsah nalai hi. 47 Aw LALPA, ka Pathian uh, hung hunkhia inla, Huleh namte lah apatin hung puikhawm in, Na min siangthou paahtawi diing leh na phatna a gualzou diingin. 48 LALPA Israelte Pathian chu kumtuang apat kumtuang tanin phatin um hen. Huleh mipi zousiah in, "Amen!" chi hen. LALPA chu phat un.
1 Aw, LALPA kawmah kipaahthu soi un, ajiahchu Amah ahoih hi. A lungsiatna tullou kumtuangin aum ngaala. 2 LALPAtatsate'n hichibangin chi uh hen, Meelma khut apat atatdoh a, 3 Huleh suahlam leh tumlam, Maallam leh simlam gamte apat apuikhawmte ngeei in. 4 Gamdaai a lampi gaw ah avaah lehleh va; Teenna diing khua mawngmawng amu sih uhi. 5 Gilkial leh dangtaahin A hinna uh a sungvah achauta hi. 6 Hutahin amangbat laiun LALPA akou va, Huleh Ama'n a gentheihna vapat amahuh ahunkhia hi. 7 Mihing teenna khua a apui theihna diingun, Lampi tangtah ah apuita hi. 8 Aw, mihingte'n LALPA chu a lungsiatna tullou jiah leh Mihing tate tunga a sillimdang bawlte jiahin phat le uh Aw! 9 Ajiahchu Ama'n lunggulh mahmah neite hinna chu ataisah a, Hinna gilkial chu sil hoih in avahsah hi. 10 Mial nuai leh sihna liim nuaia tou, Gimthuaahna leh siih khainiang gaahte chu, 11 Amahuh Pathian thu kalha ahel jiahuh leh Tungnungpeen lemguat chu bangmaha asim louh jiahun, 12 Hujiahin Ama'n a lungtang uh tohgimna in akuunsah a; Apuuh va, huleh panpih diing koimah aumta sih hi. 13 Hutahin a mangbat laiun LALPA akou va, Huleh Ama'n a gentheihna vapat amahuh ahunkhia hi. 14 Mialna lah leh sihna liim apatin amahuh apuidoh a, Huleh a kaannate uh asutanta hi. 15 Aw, mihingte'n LALPA chu a lungsiatna tullou jiah leh Mihing tate tunga a sillimdang bawlte jiahin phat le uh Aw! 16 Ajiahchu Ama'n sum-eng kotkhaahte asusia a, Huleh a kamna siihjawlte asutanta hi. 17 Mingolte chu atatsual jiah uh leh A giitlouhna jiahun gimthuaahsahin aum uhi. 18 A hinna un neeh theih chinteng akihdah a; Huleh sihna kulhkot anaih jeel hi. 19 Hujn amangbat laiun LALPA akou va, Huleh Ama'n a gentheihna vapat amahuh ahunkhia hi. 20 Ama'n a thu asawl a huleh amahuh asudam a, Huleh a beimangna diing vapatin ahunkhia hi. 21 Aw, mihingte'n LALPA chu a lungsiatna tullou jiah leh Mihing tate tunga a sillimdang bawlte jiahin phatleuhAw! 22 Amah un kipaahthu soina kithoihna laan uh henla, Huleh a silbawlte nuamin phuangjaah uh hen. 23 Tuipi a longte a mi pai suhte, Tuipi tunga sumdawng haw in, 24 Amah un LALPA silbawlte leh Tui thuuh a a silmahte amu uhi. 25 Ajiahchu Ama'n thu apia a, Tuipi tuikihawtte susang thei huihpi anungsah hi. 26 Vaan lamah akaltou uat-uat va; Tui thuuhpi ah akumsuh duamduam jeel uhi; Mangbatna jiahin a hinna uh atuisuaahta hi. 27 Zukham bangin a-awn doidoi va, atuan bohboh va, Huleh umdaan diing mawngmawng ahe sih uhi. 28 Huin a mangbat laiun LALPA akou va, Huleh Ama'n a gentheihna vapat amahuh apuidoh hi. 29 Ama'n huihpi adaaisah a, Huchiin tuipi kihawtte asip duam uhi. 30 Huin adaihtaah jiahin akipaah va; Huchiin Ama'n a uutna mun uh kuangkhawlna ah apuitungta hi. 31 Aw, mihingte'n LALPA chu a lungsiatna tullou jiah leh Mihing tate tunga a sillimdang bawlte jiahin phatleuhAw! 32 Amah un mipite kikhopna ah zong Amah tawisang uh henla, Huleh upate kikhopna ah phat uh hen. 33 Ama'n luuite chu gamdaai asuaahsah a, Huleh tuinaahte zong leigaw asuaahsah hi. 34 A sunga teengte giitlouhna jiahin Buhlebaal piantamna gam chu gamgaw asuaahsah hi. 35 Gamdaai chu diil asuaahsah a, Huleh gamgaw zong tuinaah asuaahsah hi. 36 Huleh hutah ah gilkialte ateengsah hi, Teenna diinga khopi akibawl theihna diingun, 37 Huleh loute anei va huleh grephuante abawl uhi A gah hung pungte amuh theihna diingun. 38 Amahuh chu avangpiaah a, huchiin nasataha suhpungin aum va; Huleh a gante uh chu akiam aphal sih hi. 39 Nuaisiahna leh gimthuaahna leh lungkhamna jiaha ahung kiam hiaihiai va Huleh suhngiama ahung um chiangun; 40 Ama'n laltate tungah muhsitna asungbua a, Huleh lampi himhim um louhna gamdaai ah amahuh avaahsahta hi; 41 Ahihvaangin gentheite chu hahsatna apatin mun sang ah akoihtou a, Huleh gan hon bangin a innkuan uh asiamsah hi. 42 Midihtatte'n huchu amu va huleh anuam uhi; Huleh thulimlouhna zousiah in a kam ahup uhi. 43 Koipouh mipil phot in hu silte ajui diing va, Huleh amah un LALPA lungsiatna tullou chu ahesiam diing uhi.
LA. DAVID PHATNA LA.
1 Aw Pathian, ka lungtang akip hi; La ka sa diing a, ka hung phat diing hi, ka loupina ngeeiin. 2 Peehging leh kaihgingte haw,halhun. Ke'n chu phalvaah ka phawng halh diing hi. 3 Aw LALPA, mipite lahah ka hung phat diing a; Huleh namte lahah nangmah phatin la ka sa diing hi. 4 Ajiahchu na lungsiatna tullou chu vaan khuup hialin anasa a, Huleh na ginumna in meipite tan asupha hi. 5 Aw Pathian, nang chu vaante tungpeh ah tawisangin um inla, Huleh na loupina zong leitung zousiah tungah paahtawiin um hen; 6 Huchia na deihtahte hutkhiaha aum theihna diingun; Na khut jiatlam in hunkhia inla, huleh hung dawng in. 7 Pathian in a siangthouna in asoita hi: "Ka nuam diing a, Shekem ka hawmkhen diing a, Huleh Sukkoth phai ka tehkhe diing hi. 8 Gilead kei a ahi a; Manasseh kei a ahi; Ephraim zong ka lutang haatna ahi; Juda chu ka daanpetu ahi. 9 Moab chu ka kisilna beel ahi a; Edom tungah ka keengtophah ka paai diing a; Philistia tungah gualzouin ka kikou diing hi," chiin. 10 Khopi kulh bittah ah koi ahiai ahung puiluut diing? Edom ah koi in ahiai ahung pui diing? 11 Aw Pathian, keiuh hung paaikhepa, nangmah na hi sih diaimah? Aw Pathian, ka sepaihte uh toh kuandoh diingin na hung sih diaimah? 12 Ka meelma vapatin hung panpih in, Ajiahchu mihing panpihna bangmah phatuamlou ahi. 13 Pathian jaalin hangsantahin ka bawl diing uh; Ajiahchu ka meelmate uh hung totbehsah diingpa chu Amah ahi.
LA PUITU A DIING. DAVID PHATNA LA.
1 Aw ka paahtawi Pathian, haamlouin um sin. 2 Ajiahchu migiloute kam leh haamhaatte kam ka tungah akikaah a, Amah un juauhaat lei in keimah kalhin thu asoi uhi. 3 Muhdahna thu in amah un ahung hua va, Huleh ajiah umlouin ahung dou uhi. 4 Ka lungsiatna thuhkiitna in ahung soisia va; Hizongleh kei chu haamtei lamah ka kipe tinten hi. 5 Huchiin amah un sil hoih khu silgilou in ahung thuh va; Huleh ka lungsiatna chu muhdahna in ahung thuh uhi. 6 Nangma'n a tungah migilou koih inla, Huleh a jiatlam ah soisetu dingsahin. 7 Vaihawma aum chiangin siamlouhtangin um henla; Huleh a haamteina zong sualna suaah mei hen. 8 A damsung nite chu tom henla; A natohna mun midang in tang heh. 9 A tate chu pabei hi uh henla, Huleh a ji zong meithai hi heh. 10 A tate chu vaahvaiin um zing uh henla, huleh khutdoh uh hen; A neeh diing uh chu mun sete haw ah hawl uh hen. 11 Leepgu mi'n aneih zousiah laahsah veh henla; Huleh meelheetlouhte'n a tohgim gah luahsah uh hen. 12 Amah chu lungsiatna tullou a lungsiat diing himhim um sih henla, Pabeia inn a tate deihsah diing koimah um sih hen. 13 A suante chu suhmangin umuh henla; Huleh khang hung um diingte lahah a min uh thaimangin um hen. 14 A pulepate giitlouhna chu LALPA kawmah heetzingin um henla; Huleh a nu sualna zong thaimangin um sih hen. 15 Leitung apat amahuh heetzingna asuhmang theihna diingin, Amahuh chu LALPA ma ah um zing uh hen. 16 Ajiahchu ama'n lungsiatna tullou etsahna chang ahe sih a, Hizongleh lungtang a kingaisete athah theihna diingin, Gentheite leh tasamte asuduhdahjawhi. 17 Mihaamsiat auut jawng ahihbang dungjuiin, hutobangin a tungah tung henla; Mi vangpiaah chu akipaah jawng ahihlouh mahbangin, huchu amah apatin gamlain um heh. 18 Haamsia a puansilh banga akijep bangin, Huchu tuibangin a sung lamah luut henla, Huleh sathau bangin a guh sungah luut hen. 19 Huchu amah diingin asilh gige puansilh bangin um henla, Huleh akigaah zingna kawnggaah bang hung hi hen. 20 Huchu ahung doutute leh Ka hinna hung soisete tunga LALPA thuhna hi hen. 21 Hizongleh Lalpa ka PATHIAN, nangma'n, Na min jiahin hung bawlsah inla, Na lungsiatna tullou ahoih jiahin hung hunkhia in. 22 Tasam leh genthei ka hi a, Huleh ka sungah ka lungtang liamin aum hi. 23 Liim kiam bangin ka mang a; Khauphe bangin muutleeng lehlehin ka umhi. 24 An ngawl jiahin ka khuup ajoigawp a; Huleh ka tahsa in thauna himhim apo nawn sih hi. 25 Amuhsit uh ka hung hita a, Ahung et chiangun a lu ahung thinkhum uhi. 26 Aw LALPA, ka Pathian, hung panpih inla; Aw, na lungsiatna tullou dungjuiin hung hunkhia in, 27 Huchia na khut ahi, chih aheet va, LALPA, nangmah bawl ahi chih aheetna diingun. 28 Amah un haamsiat uh henla, hizongleh nang chu vangpiaah in; Athohdoh hun chiangun mualphou uh henla; Hizongleh nangmah suaahte chu nuam uh hen. 29 Ahung doute zumna in tuam henla, Puansilh a kithuam bangin mualphouna in kithuam uhhen. 30 Ka kam in LALPA nasatahin ka phat diing a; Ahi, mi tampi lahah Amah ka phat diing hi. 31 Amah chu mitasam jiatlam ah A hinna siamlouhtangsahte laha amah hunkhe diinga ding ahi ngaala.
DAVID PHATNA LA.
1 LALPA'N ka Lalpa kawmah, "Na meelmate na keeng ngahna a ka bawl masiah Ka jiatlam ah tou in," achi hi. 2 LALPA'N Zion apatin na lalchiang asawldoh diing hi; Na meelmate lahah nangma'n vaihawm in. 3 Na mite chu na silbawltheihna ni ah uutthuin akipe diing uh; Jiingkaal thaah siangthou kilawmna apat in na khanglai hihna daaitui chu na nei hi. 4 LALPA chu akichiamta a Huleh a lungsim aheng sih diing, "Nang chu Melkizedek hihdaan banga kumtuanga siampu na hi," chiin. 5 Lalpa chu na jiatlam ah aum a, Ama'n thangtawmna ni ah kumpipate asaatpuuh lemlum diing hi. 6 Ama'n namte lahah vai ahawm diing a; Gamte chu misi luang in asudim diing a; Leitung a gam lianpi a miliante chu asaatpuuh leilui diing hi. 7 Lampi a luuita tui adawn diing a; Hujiahin a lu chu atawisang diing hi.
1 LALPA chu phat un. Midihtatte kikhopna leh kikhoppina ah, Ka lungtang zousiah in LALPA chu ka phat diing hi. 2 LALPA natohte chu aloupi a, Hute a kipaahna nei photmahte hawldohin aum jeel hi. 3 A natoh chu azahtaathuai a huleh aloupi a, Huleh a dihtatna chu kumtuangin aum diing hi. 4 Ama'n a sillimdang bawlte chu heetzing diingin asiam hi; LALPA chu hehpihsiam, lainatna a dim ahi. 5 Ama'n Amah laute kawmah an neeh diing apia a; A thuhun chu kumtuangin ahezing diing hi. 6 Namte a gouluah diingva apiaahna ah, Ama'n a natohte loupidaan a mite kawmah amusah hi. 7 A khut silbawlte chu thutah leh vaihawmna dih ahi a; Umdaan diinga a thuhilhnate zousiah chu amuanhuai hi. 8 Hute chu kumtuang kumtuanga diingin adet a, Thutahna leh dihtatna a hih ahi. 9 Ama'n a mite kawmah tatna asawl a; A thuhun chu kumtuanga diingin aguat hi: Siangthou leh zahhuai chu a min ahi. 10 LALPA lau chu pilna bul ahi; A thupiaah banga gamta zousiah in heetsiamna hoih anei uhi. Amah phatna chu kumtuangin aum diing hi.
1 LALPA chu phat un. LALPA lau mi, a thupiaah a nasataha kipaah mi ahampha hi. 2 A suante chu leitung ah mi haattah ahi diing va; Midihte suan chu vangpiaahin aum diing uhi. 3 Sumlepaai leh hauhsatna chu a inn ah aum diing a; Huleh a dihtatna chu kumtuangin aum hi. 4 Midih a diingin mial lahah vaah ahung kilang hi; Amah chu mi hehpihsiam, lainatna a dim, huleh dihtattah ahi. 5 Mi hoih in deihsahna asulang a huleh athunglaahsah hi; Amah tungthu chu pilvaangtahin angaihtuah diing hi. 6 Ajiahchu bangchihtanin suhliingin aum sih diing a; Midihtatte chu kumtuanga heetzingin aum diing uhi. 7 Sil hoihlou thuthangte alau sih diing hi; LALPA muangin a lungtang adet hi. 8 A lungtang chu adet hi; A meelmate tunga adeih hung tung amuh masiah alau sih diing hi. 9 Ahawmjaah a, migentheite kawmah apia hi; A dihtatna chu kumtuangin aum zing a; A kii chu paahtawina toh tawisangin aum diing hi. 10 Migilou in hichu amu diing a, Na asa diing a huleh a ha agawi diing a, atuimang diing hi; Migiloute deihlam chu abeimang diing hi.
1 LALPA chu phat un. Aw nanguh LALPA suaahte haw, phat unla, LALPA min chu phat un. 2 Tu apat kumtuangin LALPA min chu phatin umhen. 3 Ni suaahna apatin a tumna tanin LALPA min chu phat diing ahi. 4 LALPA chu nam zousiah tungah aum a, A loupina chu vaante tunglam ah ahi. 5 Tungnung a um, LALPA i Pathian uh tobang koi ahiai? 6 Vaan a sil umte leh lei a sil umte En diinga kingaingiam Amah tobang koi ahiai? 7 Ama'n migenthei chu leivui apatin akaithou a, Huleh tasamte chu eehvuum apatin akhaidoh hi, 8 Huchia amah chu laltate toh atousah theihna diingin, A mite laha laltate toh. 9 Ama'n numei chiing chu inn apia hi, Talenau nei numei kipaahtah bangin. LALPA chu phat un.
1 Israelte Aigupta gam apat apawtdoh va, Jakob innkuante ngeei haam tuam namte apat apawt laiun, 2 Juda chu a mun siangthou ahung hi a; Huleh Israel chu a lalgam ahi hi. 3 Tuipi in huchu amu a, ataaimang a; Jordan chu akihkiitta hi. 4 Taangte chu belaamtal bangin akidiang va, Mualte chu belaamnou bangin. 5 Aw nang tuipi, bangin ahung suna a ahiai, na taaimang mei? Aw nang Jordan zong, na kihkiit mei? 6 Aw nanguh taangte haw, bangin ahung suna a ahiai, belaamtal banga na dian uh? Aw nanguh mualte haw, belaamnou banga na dian taahuh? 7 Nang leilung, Lalpa ma ah kiliing in, Jakob Pathian ma ah, 8 Ama'n suangpi chu diil asuaahsah a, Meisahsuang chu tuinaah asuaahsah hi.
1 LALPA, keiuh hung pelouin, keiuh haw hung pelouin, Hizongleh loupina chu na min pe jaw in, Na lungsiatna tullou leh na ginumna jiahin. 2 Bangchidaana namte'n, "A Pathian uh khoia um ahiai," chi diing ahi viai? 3 Hizongleh ka Pathian uh chu vaan ah aum a; Ama'n auut-uut abawlta hi. 4 A milemte uh chu dangka leh sana, Mihing khutsuaah ahi uhi. 5 Kam anei va, hizongleh ahaam thei sih uh; Mit anei va, hizongleh amu thei sih uh; 6 Bil anei va, hizongleh aja thei sih uh; Naah anei va, hizongleh gimnam ahe thei sih uh; 7 Khut anei va, hizongleh atu thei sih uh; Keeng anei va, hizongleh apai thei sih uhi; A lawi un zong ahaam thei saam sih uhi. 8 Hute haw bawlte chu hute bangmah ahi va; Hute muang photmah zong huchibang ahi uhi. 9 Aw Israel, nang chu LALPA muang in; Amah chu amahuh panpihpa leh a phaw uh ahi. 10 Aw Aaron innkuante, LALPA muang un; Amah chu amahuh panpihpa leh a phaw uh ahi. 11 Nanguh LALPA laute, LALPA chu muang un; Amah chu amahuh panpihpa leh a phaw uh ahi. 12 LALPA'N eite ahung hezing a; Ama'n ahung vangpiaah diinga; Israel innkuan chu avangpiaah diing; Aaron innkuan chu avangpiaah diing hi. 13 Ama'n LALPA laute chu aneu leh alian in Avangpiaah diing hi. 14 LALPA'N nanguh leh na tate uh Hung supung deuhdeuh hen. 15 Nanguh chu lei leh vaan siamtu LALPA'N Hung vangpiaahta hen. 16 Vaan, vaante ngeei chu LALPA a ahi a; Hizongleh leilung chu Ama'n mihing tate kawmah apia hi. 17 Misite'n LALPA chu aphat sih va, Munsip apai suhte mawngmawng in zong aphat saam sih uhi. 18 Hizongleh kei un chu tu apat kumtuang dongin LALPA chu ka phatta diing uhi. LALPA chu phat un.
1LALPA chu ka lungsiat hi, ajiahchu Ama'n ka aw leh Hehpih ka ngetnate ahung ngaihkhiahsahta hi. 2 Ka lama a bil ahung doh jiahin Ka damsung tengin Amah ka kou diing hi. 3 Sihna khauhualte'n ahung tuam a, Huleh Sheol nat thuaahgimna in ahung man hi; Mangbatna leh lungkhamna ka na tuaah hi. 4 Hutah ah LALPA min ka lou hi: "Aw LALPA, ka hung ngeen hi, ka hinna hunkhia in," chiin. 5 LALPA chu mihehpihsiam leh dihtattah ahi a; Ahi, i Pathian uh chu milainattheitah ahi. 6 LALPA'N chu miphate ahuumbit hi; Suhngiamin ka um a, Ama'n ahung panpihta hi. 7 Aw ka hinna, na khawlna ah kihkiitta in; Ajiahchu LALPA'N na tungah hoihtahin abawlta hi. 8 Ajiahchu nangma'n ka hinna chu sihna lahah, Ka mitte chu mittui lahah, Huleh ka keengte chu puuhna lahah na huumbitta hi. 9 Mihing gam ah LALPA ma ah Ka khohei diing hi. 10 Ka gingta a, hujiahin, "Nasataha suhgimin ka um hi," ka chi hi. llKin hehu pumin, "Mi zousiah chu mijuau ahi uh," ka chita hi. 12 Ka tunga ahung silphatuam bawlsah zousiah jiahin LALPA kawmah bang ahiai ka piaahthuh diing? 13 Hutdamna nou ka la diing a, LALPA min chu ka lou diing hi. 14 Tuin LALPA kawma ka thuchiam chu A mite zousiah ma ah ka taangtun diing hi. 15 A misiangthoute sihna chu LALPA mitmuhin aluul mahmah ahi. 16 Aw LALPA, na suaah ka hi tahzet hi; Na suaah ka hi a, na suaahnu tapa ka hi; Nangma'n ka koltaanna na hung suutta hi. 17 Kipaahthu soina kithoihna na kawmah ka hung laan diing a, Huleh LALPA min chu ka lou diing hi. 18 LALPA kawma ka thuchiam chu A mite zousiah ma ah ka taangtun diing hi, 19 LALPA inn huang tual ah, Aw Jerusalem, na kholai tah ah ka taangtun diing hi. LALPA chu phat un.
1 Aw nanguh nam chintengte haw, LALPA chu phat un. Mi chinte haw, Amah chu phat un. 2 Ajiahchu i tungah a lungsiatna tullou chu aloupi hi; Huleh LALPA thutah chu kumtuangin aum diing hi. LALPA chu phat un.
1 Aw LALPA kawmah kipaahthu soi un, ajiahchu Amah chu ahoih hi. A lungsiatna tullou kumtuangin aum ngaala. 2 Tuin Israelte'n, "A lungsiatna tullou kumtuangin aum ngaala," chi uh hen. 3 Tuin Aaron innkuante'n, "A lungsiatna tullou kumtuangin aum ngaala," chi uh hen. 4 Tuin LALPA laute'n, "A lungsiatna tullou kumtuangin aum ngaala," chi uh hen. 5 Ka lungdonna ah LALPA chu ka kou a; LALPA'N ahung dawng a mun awngthawl ah ahung koihta hi. 6 LALPA chu ka lam a pang ahi a: Ka lau sih diing hi. Mihing in bang ahung loh thei diai? 7 LALPA chu ka lam a pang ahung panpihte laha ahi a; Hujiahin ahung doute chu gualzoutahin ka en diing hi. 8 Mihing muan saangin LALPA a tahsanna koih ahoihjaw hi. 9 Laltate muan saangin LALPA a tahsanna koih ahoihjaw hi. 10 Nam zousiah in ahung uumsuaah va, Hizongleh LALPA min in amahuh ka sumang diing hi. 11 Amah un ahung uumsuaah va; Ahi, ahung tuam kiimveel uh; Hizongleh LALPA min in amahuh ka sumang diing hi. 12 Khuai bangin ahung tuamsuaah va; Ling meikuang bangin suhmitin aum uh; Ajiahchu LALPA min in amahuh ka sumang diing hi. 13 Ka puuhna diingin naahtahin na hung sawn a, Hizongleh LALPA'N ahung panpihta hi. 14 LALPAchu ka haatna leh ka la ahi a, Huleh ka hutdamna zong ahung hita hi. 15 Kipaahna leh hutdamna aw chu midihtatte puaninn ah aum a, LALPA khut jiatlam in hangtahin abawl hi. 16 LALPA khut jiatlam chu tawisangin aum a; LALPA khut j iatlam in hangtahin abawl hi. 17 Ka si sih diing, hizongleh ka hing diing a, Huleh LALPA natohte chu ka phuangjaah diing hi. 18 LALPA'N nasatahin ahung thunun a, Hizongleh sihna kawm hiai ah chu ahung pe sih hi. 19 Dihtatna kulh kotkhaahte hung honsah un; Hutah ah ka luut diing a, Huleh LALPA chu ka phat diing hi. 20 Hichu LALPA kulh kotkhaah ahi a, Hitah ah midihtatte aluut diing uhi. 21 Nangmah ka hung phat diing hi; Ajiahchu nangma'n na hung dawngta a, Huleh ka hutdamna na hung hita hi. 22 Innlamtute suang deihlouh ngeei chu Aning a suang poimohpeen ahung hita hi. 23 Hichu LALPA bawl ahi a; I mitmuh vah athumah ahi. 24 Hichu LALPA ni siam ahi a, Hi ni in i nuam diing va, i kipaah diing uhi. 25 Aw LALPA, ka hung ngeen uhi, tuin hunkhia in; Aw LALPA, ka hung ngeen hi, tuin vangpiaahna hung sawl in. 26 LALPA min a hung paipa chu ahampha hi; LALPA inn apatin nang chu ka hung vangpiaahta uhi. 27 LALPA chu ka Pathian ahi a, Huleh Ama'n vaah ahung peta hi; Kithoihna diing chu maitaam kiite ah khit un. 28 Nang chu ka Pathian na hi a, ka hung phat diing hi; Nang chu ka Pathian na hi a, ka hung tawisang diing hi. 29 Aw, LALPA kawmah kipaahthu soi un, Amah ahoih jiahin. A lungsiatna tullou kumtuangin aum ngaala.
Aleph
1 Lampi a kisuthaanghuai loute, LALPA daan a gamtate ahampha uhi. 2 A thuheetsah juite, Lungtang zousiah a Amah hawlte ahampha uhi. 3 Amah un sualna mawngmawng abawl sih va; A lampite ah apai uhi. 4 Umdaan diinga na thuhilhnate Phatuamngaitaha keem diingin nangma'n thu na hung pia hi. 5 Aw, na thuguatte jui diingin Ka umdaante suhkipin um le Aw! 6 Huchiin na thupiaahte zousiah ka zahtaat hun chiangin Ka mualphou sih diing hi. 7 Na vaihawmna dihtat chu kajil hun chiangin, Lungtang dihtah puain ka hung phat diing hi. 8 Na thuguatte ka jui diing hi; Aw, hung nuse den sin.
Beth
9 Vaalnou in bangchiin ahiai a umdaan asuhsiangthou diing? Na thu dungjuia umdaan veenghoihin. 10 Ka lungtang pumpi in ka hung hawl a; Aw, na thupiaahte apat hung vaahmangsah hiai sin. 11 Na tunga sil ka bawl sual louhna diingin Na thu chu ka lungtang ah ka keemta hi. 12 Aw LALPA, nang chu phatin na um hi; Na thuguatte hung hilh in. 13 Nakam apawt vaihawmnate zousiah Ka muuh in ka phuangdohta hi. 14 Na thuheetsah lamah ka nuamta hi, Hauhsatna zousiah a nuam ka sah bang hialin. 15 Umdaan diinga na thuhilhnate ka ngaihtuah ngiitngeet diing a, Huleh na lampite ka ngaihsah zing diing hi. 16 Na thuguatte ah ka kipaah diing a; Na thu ka mangngilh sih diing hi.
Gimel
17 Ka hin theihna diingin leh na thu ka juih theihna diingin Na suaah tungah hoihtahin hih in. 18 Na daan thu apat sillimdangte ka muh theihna diingin Ka mitte hung suhvaahsah in. 19 Lei ah zinthaam ka hi a; Na thupiaahte kei apat phual sin. 20 Bangchihlaipouha na vaihawmnate ka ngaihnat jiahin Ka hinna chu akeehgawpta hi. 21 Mi kiliansah haamse thuaahte chu na taaihilh a, Na thupiaah apat paimangte chu. 22 Soisiatna leh muhsitna kei apat lamang in; Na thuheetsahte lah ka jui ngaala. 23 Laltate'n zong touin kei kalhna in thu soi mahleh uh, Na suaah in chu na thuguatte ka ngaihtuah ngiitngeet hi. 24 Na thuheetsahte zong ka kipaahna leh Kei diinga lemguattute ahi uhi.
Daleth
25 Ka hinna chu leivui ah abelh hi; Na thu bangjeelin hung suhalh in. 26 Ka umdaante ka phuangdohta a, nangma'n na hung dawngta hi; Na thuguatte hung hilh in. 27 Umdaan diinga na thuhilhnate hung hesiamsah in; Huchiin na sillimdang bawlte ka ngaihtuah ngiitngeet diing hi. 28 Ka hinna lungkhamna jiahin atuisuaah a; Na thu bangjeelin hung suhaat in. 29 Heemtatna kei apat lamang inla; Huleh hehpihtahin na daan hung neisah in. 30 Thutah lampi ka teelta a; Na daante ah ka lungtang ka ngata hi. 31 Na thuheetsahte ah ka belh tinten hi; Aw LALPA, hung mualphousah sin. 32 Na thupiaah lamah ka taai diing hi, Ajiahchu ka heetsiamna na sulian diing hi.
He
33 Aw LALPA, na thuguatte umdaan hung hilh in, Huchiin atawptanin ka jui diing hi. 34 Heetsiamna hung pia in, huchiin na daan ka jui diing; Ahi, ka lungtang zousiah inkajui diing hi. 35 Na thupiaah lampi ah hung paisah in; Ajiahchu hutah ah ka kipaah hi. 36 Na thuheetsah lamah ka lungtang kiheisah in, Huleh huaihamna lamah hilouin. 37 Sil bangmahlou enlou diingin ka mit kiheisah inla, Huleh na lampi ah hung suhalh in. 38 Na thu chu na suaah kawmah sukip in, Nangmah launa a hung kipeluut kawmah. 39 Mohpaihna ka lau chu lamang in, Ajiahchu na vaihawmnate lah ahoih hi. 40 Ngai in, umdaan diinga na thuhilhnate chu ka lunggulh hi; Na dihtatna ah hung suhing in.
Vau
41 Aw LALPA, na lungsiatna tullou chu ka kawmah hung tungta hen, Na thu bangjeelin na hutdamna zong. 42 Huchiin ahung musitte dawnna diing ka nei diing hi, Na thu lah ka muang ngaala. 43 Huleh thutah ka kam apat lamang veh sin; Na vaihawmnate ka kineppih ngaala. 44 Huchiin na daan chu Kumtuang kumtuangin ka jui diing hi. 45 Huleh jaleentahin ka pai diing hi, Umdaan diinga na thuhilhnate lah ka hawl ngaala. 46 Na thuheetsahte kumpipate ma ah ka soi diing a, Huleh suhzumin ka um sih diing hi. 47 Huleh na thupiaah, Ka ngaihnatte tungah ka kipaah diing hi. 48 Huleh ka khutte zong ka ngaihnat na thupiaahte lamah ka j aah diing a, Na thuguatte chu ka ngaihtuah ngiitngeet diing hi.
Zain
49 Ka kawma kinepna hung neisahna, Na suaah kawma na thuchiam chu hezing in. 50 Hichu ka gimthuaahna a ka hamuanna ahi; Ajiahchu na thu in ahung suhalhta hi. 51 Kiliansahte'n nasatahin simmohin ahung nuihsan va; Hizongleh na daan thu chu ka paikawisan sih hi. 52 Aw LALPA, nidanglaia na vaihawmnate ka hezing a; Ka kihamuan jeel hi. 53 Na daan nusia migiloute jiahin Lunglauna nasahtahin ahung buaahkhum hi. 54 Ka khualzinna inn ah na thuguatte chu Ka la ahi zing hi. 55 Aw LALPA, jaan chiangin na min ka hezing a, Na daan zong ka jui zing hi. 56 Umdaan diinga na thuhilhnate ka vomhoih jiahin, Hichu kei a ahung hita hi.
Cheth
57 Aw LALPA, nang chu ka tanvou na hi a; Na thu ka jom diing chiin ka na kichiamta hi. 58 Ka lungtang pumpi in na hehpihna ka ngeen a; Na thu bangjeelin hung khotuah in. 59 Ka umdaante ka ngaihtuah a, Na thuheetsah lamah ka kai ka suanta hi. 60 Ka kikinsah a, na thupiaahte jui diingin Ka vaigei sih hi. 61 Migilou hon in ahung tuam va; Hizongleh na daan ka mangngilh sih hi. 62 Na vaihawmna dihtah jiahin, Jaankhang laiin kipaahthu soi diingin ka thou diing hi. 63 Nangmah hung laute zousiah leh Umdaan diinga na thuhilhnate jui zousiah lawm ka hi. 64 Aw LALPA, leilung chu na lungsiatna tullou in adim hi; Na thuguatte hung hilh in.
Teth
65 Aw LALPA, na thu bangjeelin Na suaah tungah hoihtahin na bawl hi. 66 Vaihawmna hoih leh heetna hung hilh in; Na thupiaahte ka gingta ngaala. 67 Suhgima ka um main ka na vaahmang a; Hizongleh tuin chu na thu ka na juita hi. 68 Nang chu na hoih a, huleh sil hoih na bawl hi; Na thuguatte hung hilh in. 69 Kiliansahte'n ka tungah juau aphuaah va; Hizongleh ke'n chu ka lungtang zousiah in umdaan diinga na thuhilhnate ka vomhoih diing hi. 70 A lungtang uh sungthau bangin athau a; Hizongleh kei chu na daan tungah ka kipaah hi. 71 Na thuguatte ka jil theihna diingin, Suhgima ka um chu ahoih hi. 72 Na kam a daan pawt chu kei a diingin Sana leh dangka saang tampi saangin ahoihjaw hi.
Yod
73 Na khut in na hung siam a, huleh na hung kheeng ahi a; Na thupiaahte ka jil theihna diingin heetsiamna hung pia in. 74 Nangmah hung laute'n kei ahung muh chiangun akipaah diing uh; Na thu ka kineppih jiahin. 75 Aw LALPA, na vaihawmnate chu adih a, Huleh nangma'n ginumna in na hung sugim chih ka he hi. 76 Na suaah kawma na thuchiam bangjeelin Na lungsiatna tullou in hung hamuan hen. 77 Ka hin theihna diingin na chitna chu ka kawmah hung tung hen; Na daan lah ka kipaahna ahi ngaala. 78 Kiliansahte suhmualphouin um uh hen; Ajiahchu amah un ajiah beiin dihloutahin ahung soisa uhi; Hizongleh ke'n chu umdaan diinga na thuhilhnate ka ngaihtuah ngiitngeet diing hi. 79 Nangmah hung laute leh na thuheetsah hete'n Kei lam hung nga uh hen. 80 Ka mualphou louhna diingin Na thuguatte ah ka lungtang soiseelbeiin um hen.
Kaph
81 Ka hinna na hutdamna ngaiin achau a; Hizongleh na thu ka kineppih zing hi. 82 Na thu etnain ka mit avaai zouta a, "Bangchihchianga hung hamuan diing na hiai?" ka chi hi. 83 Ajiahchu meikhu a savunthawl bang ka na hita a; Ahiinlah na thuguatte ka mangngilh sih hi. 84 Na suaah damsung ni diing bangtan hi diing ahiai? Kei hung gawtte tunga bangchihchianga vaihawm diing na hiai? 85 Mi kiliansahte'n ka kiahna diingin Na daan banglouin kokhuuh atou uhi. 86 Na thupiaahte zousiah chu amuanhuai hi; Amah un dihloupiin ahung gawt uhi; Hung panpih in. 87 Amah un leitung ah ahurig sumang dehtah hialta va, Hizongleh umdaan diinga na thuhilhnate ka nuse sih hi. 88 Na lungsiatna tullou bangjeelin hung suhalh in; Huchiin na kam a thuheetsah ka jui diing hi.
Lameh
89 Aw LALPA, kumtuanga diingin Na thu chu vaan ah suhdetin aumta hi. 90 Na ginumna chu khang zousiah tanin aum hi, Leilung na sukip a, aum gige hi. 91 Hute chu tuni tanin na thupiaah dungjuiin aum gige uhi, Ajiahchu a bawnun na suaahte ahi uhi. 92 Na daan ka kipaahna hilou hileh, Ka gimthuaahna ah ka beimangta diing hi. 93 Umdaan diinga na thuhilhnate chu ka mangngilh keei sih diing hi, Hute in na hung suhalhta ngaala. 94 Nang a ka hi, hung hunkhia in; Ajiahchu umdaan diinga na thuhilhnate ka hawl hi. 95 Migiloute'n suhmang tumin ahung ngaah va; Hizongleh ke'n chu na thuheetsahte phatuamngaitahin ka ngaihtuah diing hi. 96 Hoihbukimna zousiah tawpna chu ka muta hi, Hizongleh na thupiaah chu alian tungtuang hi.
Mem
97 Aw, na daan ngaina hina mei ing e! Hichu nitum a ka ngaihtuah ngiitngeet ahi. 98 Nangma'n na thupiaahte jiahin ahung doute saanga piijawin na hung bawl hi; Hute kumtuanga ka kawma aum zing jiahun. 99 Ahung hilhte zousiah saangin pilna ka neijaw hi, Na thuheetsahte ka ngaihtuah ngiitngeet ahih jiahin. 100 Umdaan diinga na thuhilhnate ka vomhoih jiahin Malai mite saangin ka hesiam jaw hi. 101 Na thu ka juih theihna diingin Lampi gilou a ka keengte akalsuan diing himhim ka phal sih hi. 102 Na vaihawmna apat ka peet sih hi; Nangma'n na hung hilhtaah jiahin. 103 Na thute chu ka lei a diingin hum hina lawmlawm e! Ahi, ka kam a diingin khuaizu saangin ahumjaw hi. 104 Umdaan diinga na thuhilhnate tungtawnin heetsiamna ka neihloh a, Hujiahin umdaan dihlou chinteng ka hua hi.
Nun
105 Na thu chu ka keeng a diingin thaumei ahi a, Ka lampi a diingin vaah ahi. 106 Na vaihawmna dihtatte jui diingin ka kichiam a, Ka taangtun ngeei diing hi. 107 Nasataha suhgimin ka um hi; Aw LALPA, na thu bangjeelin hung suhalh in. 108 Aw LALPA, ka kam uutthu silpiaahte hung pomsah diingin ka hung ngeen hi, Huleh na daante hung hilh in. 109 Ka hinna chu ka khut ah aum gige a, Hizongleh na daan ka mangngilh sih hi. 110 Ka awhna diingin migiloute'n thaang akam uh, Hizongleh umdaan diinga na thuhilhnate ka vaahmangsan sih hi. 111 Na thuheetsahte chu kei a diingin kumtuanga goutan ahi, Ka lungtang sunuam peen ahih jiahin. 112 Atawptanpha a na thuguatte tongkhe ngiitngeet diingin Ka lungtang kimansain ka koih hi.
Samekh
113 Lungsim kiploute ka hua a, Hizongleh na daan chu ka ngaina hi. 114 Nang chu ka kibuhna mun leh ka phaw na hi a; Na thu chu ka kineppih ahi. 115 Nanguh silgilou bawlte, hung paisan un; Ka Pathian thupiaahte jui diing ka hita ngaala. 116 Ka hin theihna diingin na thu bangjeelin hung tuzing in; Huleh ka kinepna ah mualphouin hung umsah sin. 117 Hung tu in, huchiin ka bitta diing hi; Huleh na thuguatte ka ngaikhawh gigeta "diing hi. 118 Na thuguatte apat takhialte zousiah na tuanchilta hi; A heembawlna uh lah juauthu ahi ngaala. 119 Lei a migilou zousiah niinneng bangin na sumang jeel hi; Hujiahin na thuheetsah ka ngainahi. 120 Nangmah lauin ka tahsa akithing a, Huleh na vaihawmnate ka lau hi.
Ain
121 Vai dih ka hawm a, huleh dihtahin ka bawl hi; Kei hung nuaisiahte kawmah hung nuse sin. 122 Na suaah tungtaang thu ah a hoihna diingin ding inla, Kiliansahte'n hung nuaisiah sih uh hen. 123 Na hutdamna leh na dihtatna thu etna jiahin Ka mit avaai zouta hi. 124 Na lungsiatna tullou dungjuiin na suaah tungah bawl inla, Huleh na thuguatte chu hung hilh in. 125 Na suaah ka hi a; Na thuheetsah ka heet theihna diingin Heetsiamna hung pia in. 126 Aw LALPA, nang diingin natoh ahunta hi, Na daan bangmaloua abawltaah jiahun. 127 Hujiahin na thupiaahte chu sana saangin ka ngaina jaw a, Ahi, sana siangtah saangin zong. 128 Hujiahin sil zousiah tungtaang thu a umdaan diinga Na thuhilhnate photmah chu dihin ka he a; Umdaan dihlou photmah chu ka hua hi.
Pe
129 Na thuheetsahte chu alimdang hi, Hujiahin ka hinna in avom hoih hi. 130 Na thu kihonna in vaahna apia a, Mimawlte kawmah heetsiamna apia hi. 131 Na thupiaahte ka lunggulh jiahin, Ka kam ka kaah a, ka hai hawhhawh hi. 132 Ka lam hung nga inla hung khotuah in, Na min ngainatute tunga na hih daan bangin. 133 Ka kalsuante chu na thu in sudetinla, Huleh giitlouhna mawngmawng ka tungah thu neisah sin. 134 Mihing nuaisiahna apat hung hunkhia in, Huchiin umdaan diinga na thuhilhnate ka jom diing hi. 135 Na suaah tungah na meel vaahsah inla, Huleh na thuguatte hung hilh in. 136 Amah un na daan ajuih louh jiahun Ka mittui luuitui bangin aluangkhia hi.
Tzade
137 Aw LALPA, nang chu na dihtat a, Huleh na vaihawmnate zong adih hi. 138 Nangma'n na piaah na thuheetsahte chu Adihtatin amuanhuai mahmah hi. 139 Ahung doute'n na thute amangngilhtaah jiahun, Ka phattuamngaihna in ahung sugamta hi. 140 Na thu chu asiangthou mahmah a, Hujiahin na suaah in angaina hi. 141 Kei chu mineu leh mite simmoh ka hi a, Ahiinlah umdaan diinga na thuhilhnate ka mangngilh sih hi. 142 Na dihtatna chu kumtuang dihtatna ahi a, Na daan zong thutah ahi. 143 Mangbatna leh lunglauna in ahung buaahkhum a, Ahiinlah na thupiaahte chu ka kipaahna ahi. 144 Na thuheetsah dihtatna chu kumtuanga diing ahi; Heetsiamna hung pia in, huchiin ka hing diing hi.
Koph
145 Ka lungtang pumpi in ka hung kou hi; Aw LALPA, hung ngaikhia in, Na thuguatte ka vom hoih diing hi. 146 Nangmah ka hung kou hi; Hung hunkhia in, huchiin na thuheetsahte ka jui diing hi. 147 phalvaah main ka thou a, panpihna ngeenin ka kikou a, Na thute ka kineppih hi. 148 Na thu ka ngaihtuah ngiitngeet theihna diingin Jaanveen hunte sungin ka mitte ahah uhi. 149 Na lungsiatna tullou bangjeelin ka aw ngaikhia in; Aw LALPA, na vaihawmna dih bangjeelin hung suhalh in. 150 Sildihlou delhte'n ahung naih uhi; Amahuh chu na daan apat agamla uhi. 151 Aw LALPA, nang chu na nai a, Huleh na thupiaahte zousiah chu thutah ahi. 152 Na thuheetsahte tungtaang ahihleh Kumtuanga diinga na suhkip ahi chih malaipeh apatin ka na heta hi.
Resh
153 Ka thuaahnatna ngaihtuah inla, hung hunkhia in, Na daan ka mangngilh ngei sih ngaala. 154 Ka tungthu hung soipih inla, hung hunkhia in; Na thu bangjeelin hung suhalh in. 155 Hutdamna chu migiloute apat agamla hi, Na thuguatte ahawl louh jiahun. 156 Aw LALPA, na chitnate chu aloupi hi; Na vaihawmnate bangjeelin hung suhalh in. 157 Ahung suduhdahte leh ka meelmate chu tampi ahi va, Hizongleh na thuheetsahte ka paikawisan sih hi. 158 Miginumlou chu ka en a, ka lungkim sih hi, Na thu ajuih louh jiahun. 159 umdaan diinga na thuhilhnate ka ngaihnatdaan hi ngaihtuah in; Aw LALPA, na lungsiatna suhalh in. 160 Na thu zousiah chu thutah ahi a, Huleh na vaihawmna dihtatte photmah chu kumtuangin aum diing hi.
Shin
161 Laltate'n ajiah beiin ahung suduhdahuhi, Hizongleh ka lungtang chu na thute lauin aum hi. i62 Na thu ah Gaal laah van nasatah mu bangin ka nuam hi. 163 Juauthu ka hua a, ka kihdahhi, Hizongleh na daan chu ka ngaina hi. 164 Na vaihawmna dihtatte jiahin Ni khat in sagihvei ka hung phat hi. 165 Na daan ngainate'n hamuanna loupitah anei va, Huleh bangmah in amahuh akipalpuuhsah sih diing hi. 166 Aw LALPA, na hutdamna ka kineppih a, Huleh na thupiaahte ka jui hi. 167 Ka hinna in na thuheetsah chu ajom a, Hute chu ka ngaina mahmah hi. 168 Umdaan diinga na thuhilhnate leh na thuheetsahte chu ka jom hi, Ka umdaan zousiah na ma a um veh ahih jiahin.
Tau
169 Aw LALPA, ka kikou thawm chu na kawm naih hung tung henla; Na thu bangjeelin heetsiamna hung pia in. 170 Hehpih ka ngetna na ma ah hung tung henla; Na thu bangjeelin hung hunkhia in. 171 Ka muuh in phatna thu asoi diing hi, Nangma'n na thuguatte na hung hilh jiahin. 172 Ka lei in na thu asoi diing hi, Na thupiaah zousiah dihtatna ahih jiahin. 173 Na khut in hung panpih hen, Umdaan diinga na thuhilhnate lah ka teelta ngaala. 174 Aw LALPA, na hutdamna chu ka lunggulh a, Huleh na daan chu ka kipaahna ahi. 175 Ka hinna chu hing hen, huchiin nang ahung phat diing hi; Huleh na vaihawmnate'n hung panpih hen. 176 Belaam mang bangin ka vaahmang hi; Na suaah chu hawl in, Ajiahchu na thupiaahte ka mangngilh ngei sih hi.
TAANG KALTOUHNA LA.
1 Ka mangbatna ah LALPA ka kou a, Huchiin Ama'n ahung dawng hi. 2 Aw LALPA, ka hinna muuh juauthei apat leh Lei heemhaat apat hung huumbit in. 3 Nang lei heemhaat, Na kawmah bang ahung piaun, Bang ahung loh diing viai? 4 Mihaat thaltang zumte, munphiat sing meihol aamte toh! 5 Ka tung agih hi, ajiahchu Meshekte gam a ka vaithaam a, Kedar puaninn a ka teen chu. 6 Ka hinna lemna hua mite toh Ana-umkhawm sawt talua hi. 7 Keima'n kilepna ka deih a, Hizongleh ka haam chiangin amahuh kidou auut uhi.
TAANG KALTOUHNA LA.
1 Taangte lamah ka mit ka hahtou diing hi; Khoi apatin ahiai keimah hung kipanpihna ahung tun diing? 2 Kei hung kipanpihna chu LALPA, Lei leh vaan siampa apatin ahung tung hi. 3 Ama'n na keeng akitaal aphal sih diing hi; Nangmah veengtu chu alusu sih diing hi. 4 Ngai in, Israel veengtu chu alusu sih diing a, Ihmu zong a-ihmu sih diing hi. 5 LALPA chu nang hung veengtu ahi a, LALPA chu na jiatlam a nang hung liahtu ahi. 6 Suun in ni in ahung haai sih diing a, Jaan in ha in zong ahung salh saam sih diing hi. 7 LALPA'N gilou zousiah apat ahung veeng diing a, Na hinna ahung kepsah diing hi. 8 LALPA'N na pawt leh na luut aveeng diing hi, Tu apat kumtuang tanin.
DAVID TAANG KALTOUHNA LA.
1 LALPA inn ah i chiah diing uh," chia Ka kawma asoi chiangun ka kipaah hi. 2 Aw Jerusalem, na kulh kotkhaah sungah Ka keengte uh ading ahi. 3 Jerusalem chu kiptaha gawmkhawm Khopi banga kilam ahi. 4 Hu lamah chu namte, LALPA namte, Israelte diinga thuheetsahna hi diingin, LALPA kawma kipaahthu soi diingin achiah tou jeel uhi. 5 Ajiahchu hutah ah vaihawmna diingin laltouphahte tun ahi, David innkuante laltouphahte chu. 6 Jerusalem hamuanna diingin ngetsah un: "Nangmah hung lungsiatte lohching uh hen. 7 Na kulh sungah hamuanna um henla, Na lalinn sungah lohchinna um hen." 8 Ka unaute leh ka lawite jiahin, "Na sungah hamuanna um hen," tuin ka chi diing hi. 9 LALPA i Pathian uh inn jiahin Na hoihna diing ka hawl diing hi.
TAANG KALTOUHNA LA.
1 Aw nang vaante a teengpa, Nangmah lam ka hung entou ahi. 2 Ngai in, suaahte mit in a pute uh khut aet zing bang leh Suaahnu mit in a pi khut aet zing bangin, Ama'n ahung khotuah masiah, Ka mit un LALPA ka Pathian uh lam aen zing ahi. 3 Hung khotuah in, Aw LALPA, hung khotuah in, Ajiahchu mite muhsitna in ka dim nasa mahmah uhi. 4 Ka hinna uh chu minuamsate Simmohna leh kiliansahte Muhsitna in adim nasa mahmah hi.
DAVID TAANG KALTOUHNA LA.
1 "Ei lam a pang LALPA hilou hileh chu," Tuin Israelte'n; 2 "Mite'n ahung sual laiun, Ei lam a pang LALPA hilou hileh chu, 3 Hulaiin eiuh ahung hingvalhta diing uh, I tungva athangtawm laiun; 4 Hulaiin tuite'n ahung tuummangta diing va, Luui in i hinna uh avuhmangta diing hi; 5 Hulaiin tui kihawtte'n I hinna uh atuummangta diing hi," chi uh hen. 6 Sa sialneeh diing banga a kam va hung peluutlou pa, LALPA chu phatin um hen. 7 Thaangkamte thaang apat va asuaahtaat bangin i hinna uh asuaahtata hi; Thaang chu aseta a, huleh ei chu i suaahtata uhi. 8 Ahung panpihtu chu LALPA lei leh vaan siamtu min ah aum hi.
TAANG KALTOUHNA LA.
1 LALPA muangte chu Zion taang suhliing guallouh, Kumtuanga um ngiitngeet bang ahi diing uhi. 2 Taangte Jerusalem kiimveel a aum bangin, LALPA chu a mite kiimveel ah tua kipan kumtuangin aum hi. 3 Ajiahchu migilou lalchiang chu midihtat tan tungah akinga sih diing hi, Huchilou inchu midihtatte'n a khut un giitlouhna ajam kha diing uhi. 4 Aw LALPA, hoihtaha umte tungah hoihtahin hih in, Huleh a lungtang va dihtaha umte tungah zong. 5 A lampi kawite uh lam a peette ahihleh chu LALPA'N silsual bawlte toh apuidoh diing hi. Israelte tungah chu hamuanna um hen.
TAANG KALTOUHNA LA.
1 LALPA'N Zion saltaangte apui kiit laiin, Mangmantute bang i hi uhi. 2 Hulaiin i kam uh nuihna in adim a, I lei uh lasahna in. Hulaiin nam chin lahah, "LALPA'N amahuh diingin sil loupitahte abawlsah ahi," achi uhi. 3 LALPA'N sil loupitah eiuh diingin ahung bawlsah a, Hukhu jiahin i kipaah uhi. 4 Aw LALPA, sal a ka taan uh hung pui kiit in, Simlam a luuite bangin. 5 Mittui ke kawma tuhte'n Nuamtahin a-at diing uhi. 6 Kap kawma buhchi luultah kuandohpihtu chu, A buhphalte tawiin, Nuamtahin ahung paikiit ngeei diing hi.
SOLOMON TAANG KALTOUHNA LA.
1 LALPA'N inn alam louh leh, Alamtute'n atonggim thawn giap va, LALPA'N khopi aveen louh leh, Aveengtute ahah thawn giap uhi. 2 Jiingkaal mataha thoh a, Vaigeitaha tou a, Tohgimna tanghou neeh chu Nang diingin athawn giap ahi; Ajiahchu hichibangin a mi deihtah chu a-ihmusah hi. 3 Ngai in, tate chu LALPA apat goutan ahi uhi, Huleh gil a gah chu a kipaahman ahi. 4 Haatlai tate chu mihaat khut a thaltangte bang ahi uhi. 5 A thalbawm dim a thaltang nei mi chu kipaahtahin aum hi; Kulh kotkhaah a a meelmate uh toh akihou laiun zong Amualphou sih diing uhi.
TAANG KALTOUHNA LA.
1 LALPA lau photmahte ahampha uhi, A lampi tawnte chu. 2 Ajiahchu na tohgim gah na ne diing a, Kipaahtahin na um diing a, Huleh navaahtahin zong na um diing hi. 3 Na ji chu na innjuul a grep gah nuam mahmah bang ahi diing a, Na tate zong na dohkaan kiim ah Olive singnoute bang ahi diing uhi. 4 Ngai in, LALPA lau mi chu huchibanga Vangpiaahin aum diing hi. 5 LALPA'N Zion apatin ahung vangpiaah diing a, Huleh na damsung siahin Jerusalem hoihna na mu diing hi. 6 Ahi, na tate ta tanpha na mu diing hi. Israelte tungah hamuanna um hen.
TAANG KALTOUHNA LA.
1 "Ka naupan apat mi'n tampivei ahung sugimta uh," Israelte'n tuin chi uh hen, 2 "Ka naupan apat mi'n tampivei ahung sugimta va, Hizongleh ahung zou tuan sih uhi. 3 Leilettute'n ka nungjaang ah lei alet va, A leilet kuaahte uh asausah ngeei uhi," chi uh hen. 4 LALPA chu adihtat hi, Ama'n migiloute khauhual chu asaattanta hi. 5 Zion hote zousiah chu suhmualphou leh Taaidalhsahin um uh hen. 6 Amahuh chu inn tunga hampa, Akhanlet ma a vuai bangin um uh hen, 7 Hute in buh aattu khut adim ngei sih a, Buhphal khawmtu aangsung zong adim ngei saam sih hi. 8 Mi avaahlehte'n, "LALPA vangpiaahna na tungvah um hen, LALPA min in ka hung vangpiaah uhi," chiin zong achi ngei saam sih uhi.
TAANG KALTOUHNA LA.
1 Aw LALPA, tui thuuhtah apatin ka hung kou hi. 2 Lalpa, ka aw ngaikhia in. Hehpihtahin ka ngetna aw ah Na bil hung doh in. 3 LALPA, nangma'n sualnate na chiamteha ahihleh, Aw Lalpa, kua ahiai ding zou diing? 4 Hizongleh mite'n nang ahung lau theihna diingun Na kawmah ngaihdamna aum hi. 5 LALPA chu ka ngaah zing a, Ka hinna in angaah hi, Huleh a thu zong ka kineppih hi. 6 Gaalveeng mite'n jiingkaal angaahlah saangmahun Ka hinna in Lalpa angaahlah hi; Ka chi ahi, gaalveeng mite'n jiingkaal angaahlah saangmahun. 7 Aw Israel, LALPA ah kineem in; Ajiahchu LALPA kawmah lungsiatna tullou aum a, Huleh Amah kawmah tatna kichingtah aum hi. 8 Huleh Ama'n Israel chu A sualna zousiah apat atan diing hi.
DAVID TAANG KALTOUHNA LA.
1 LALPA, ka lungtang akisathei sih a, Ka mitte zong ka sanghah sih hi. Sil loupitahte ah aha, Ahihlouhleh kei diinga sil limdang talote ah zong ka kikum saam sih hi. 2 Tahzetin ka hinna chu naungeeh A nu kawma nawi ngawlsaha um bangin ka sipsah a ka sudaaita hi; Ka hinna chu naungeeh nawi ngawlsah bangin ka sungah aum hi. 3 Aw Israel, tu akipan kumtuangin LALPA ah kineemin um in.
TAANG KALTOUHNA LA.
1 Aw LALPA'David leh A hahsatna zousiah hezing in; 2 LALPA kawma akichiam daan, Huleh Jakob Pathian Haattungnung kawma akihaahsial daante chu: 3 "Ka umna inn ah ka lum het sih diing, Ahihlouhleh ka lupna ah zong ka kaldoh keei sih diing hi; 4 Ka mitte a-ihmut ka phal sih diing, Ahihlouhleh ka mitvunte zong alusuh ka phal sih diing, 5 LALPA diinga mun khat ka hawldoh masiah, Jakob Pathian Haattungnung teenna diing chu," chiin. 6 En un, hi thu chu Ephrathah ah ka ja uh, Gammaang mun ah ka muta uhi. 7 A biahbuuh ah i luut diing va, A keeng ngahna bul ah i be diing uhi. 8 Aw LALPA, thou inla, na khawlna mun diing ah luut in, Nang leh na haatna bawm toh. 9 Na siampute chu dihtatna in kithuam uh henla, Huleh na misiangthoute chu nuamin kikou uh hen. 10 Na suaah David jiahin, Na Thaunuh meel chu kiheisah kiit sin. 11 LALPA chu David kawmah thutah in akichiamta hi; Huchu akiheisan sih diing: "Na tahsa a suan chu na laltouphah ah ka tousah diing hi. 12 Na tate'n a kawmva ka hilh diing ka thuhun leh Ka thuheetsah azop uh leh, A tate uh zong kumtuangin na laltouphah ah atou zing diing uhi," chiin. 13 Ajiahchu LALPA'N Zion ateelta a; Ama'n hichu a teenna diingin adeih hi: 14 "Hichu kumtuanga diinga ka khawl mun diing ahi; Hitah ah ka umzing diing, ka deihta ngaala. 15 A neehletaah chu kichingtahin ka vangpiaah diing a; A migentheite chu tanghou in ka taisah diing hi. 16 A siampute chu hutdamna in ka thuam diing a, Huleh a misiangthoute chu kipaahin ngaihtahin akikou diing uhi. 17 Hutah ah David kii chu ka dawndohsah diing a; Ka Thaunuh a diingin thaumei khat ka guatsahtahi. 18 A meelmate chu mualphouna in ka thuam diing a, Hizongleh Amah tungah chu a lallukhuh ataang sengsung diing hi."
DAVID TAANG KALTOUHNA LA.
1 Ngai un, unaute kituaah dialdiala umkhawm hi Hoihin nuam hina mei e! 2 Hichu lutung a thau mantamtah kinuh, Khamul a luangkhia, Aaron khamul ngeei a, A puannaah tual mong a luangkhia bang ahi. 3 Hermon daaitui, Zion taangte a kesuh daaitui bang ahi; Ajiahchu hutah ah LALPA'N vangpiaah diing thu apia hi, Kumtuanga hinna diing ngeei chu.
TAANG KALTOUHNA LA.
1 Ngai un, nanguh jaan a LALPA inn a tong, LALPA suaah zousiah haw, LALPA chu phat un. 2 Na khutte uh mun siangthou lamah jaah unla, Huleh LALPA chu phat un. 3 LALPA lei leh vaan siampa ngeei in Zion apatin hung vangpiaah hen.
1 LALPA chu phat un. LALPA min chu phat un; Aw nanguh LALPA suaahte, Amah chu phat un. 2 Nanguh LALPA inn a dingte haw, I Pathian uh inn huang sunga dingte haw, 3 LALPA chu phat un, LALPA lah ahoih ngaala. A min phatin la sa un, hu lah anuam ngaala. 4 Ajiahchu LALPA'N Jakob chu Amah a diingin ateeltahi, Israel chu a gou tuambiih diingin ateel hi. 5 LALPA chu loupitah ahi chih ka he a, Huleh i Lalpa chu pathian zousiah saanga tungnung ahi chih ka he hi. 6 LALPA'N chu pha asah photmah, Vaan ah leh lei ah bang, Tuilianpi ah leh tui thuuhpi mun zousiah ah bang Abawl veu hi. 7 Ama'n meilumte chu kawlmong apatin akaitousah a, Kawlphete bang guah diingin asiam hi; A sumbuuhte apatin bang huih aladoh hi. 8 Ama'n Aigupta tachiil asulum hi, Mihing leh ganta toh pumin. 9 Aw Aigupta, na sungah Ama'n chiamchihnate leh sillimdangte ahung sawl hi, Pharaoh tungah leh a suaahte zousiah tungah. 10 Ama'n nam loupi tahtahte asulum a, Kumpi loupi tahtahte zong athat hi. 11 Amorte kumpipa Sihon leh Bashan kumpipa Og, Huleh Kanaan a lalgam zousiah toh, 12 Huleh a gam uh chu goutan diingin apia hi, A mi Israelte kawmah goutan diingin. 13 Aw LALPA, na min chu kumtuangin aum hi, Aw LALPA, nangmah heetzingna chu khang zousiah dongin aum diing hi. 14 Ajiahchu LALPA'N a mite avaihawmsah diing a, Huleh a suaahte tungthu ah lainatna anei diing hi. 15 Namte milem haw chu dangka leh sana ahi a, Mihingte khutsuaah ahi uhi. 16 Kam bang anei va, Hizongleh ahaam thei sih uh; Mitte anei va, hizongleh a mu thei sih uhi. 17 Bilte anei va, hizongleh aja thei sih uh; A kam vah haihna himhim zong aum sih hi. 18 Hu haw bawlte chu hu haw bangin aum diing uh; Ahi, hu haw muang photmahte zong. 19 Aw Israel innkuanpihte, LALPA chu phat un. Aw Aaron innkuanpihte, LALPA chu phat un. 20 Aw Levi innkuanpihte, LALPA chu phat un. Nanguh LALPA laute, LALPA chu phat un. 21 LALPA, Jerusalem a teengpa ngeei chu Zion akipatin phatin um hen. LALPA chu paahtawi un.
1 Aw, LALPA kawmah kipaahthu soi un, Ajiahchu Amah ahoih hi. A lungsiatna tullou kumtuangin aum ngaala. 2 Aw, pathiante Pathian kawmah kipaahthu soi un, A lungsiatna tullou kumtuangin aum ngaala. 3 Aw, lalpate Lalpa kawmah kipaahthu soi un, A lungsiatna tullou kumtuangin aum ngaala. 4 Amah chauh silmah bawlpa kawmah, A lungsiatna tullou kumtuangin aum ngaala. 5 Pilna a vaan siampa Amah kawmah, A lungsiatna tullou kumtuangin aum ngaala. 6 Leitung tui tunga koih jiajuapa Amah kawmah, A lungsiatna tullou kumtuangin aum ngaala. 7 Vaah loupitahte siampa Amah kawmah, A lungsiatna tullou kumtuangin aum ngaala. 8 Ni, suun a vaihawmtu diingin, A lungsiatna tullou kumtuangin aum ngaala. 9 Ha leh aahsite jaan a vaihawmtu diingin, A lungsiatna tullou kumtuangin aum ngaala. 10 Aiguptate tachiil sulumpa Amah kawmah, A lungsiatna tullou kumtuangin aum ngaala; 11 Huleh Israelte a lah vapat a puidohpa Amah kawmah, A lungsiatna tullou kumtuangin aum ngaala; 12 Khut haattah leh baantha toh puidohpa Amah kawmah, A lungsiatna tullou kumtuangin aum ngaala. 13 Tuipi San sukhenpa Amah kawmah, A lungsiatna tullou kumtuangin aum ngaala; 14 Huleh Israelte a laia paikaaisahpa Amah kawmah, A lungsiatna tullou kumtuangin aum ngaala; 15 Hizongleh Pharaoh leh a sepaihte Tuipi San a sumangpa Amah kawmah, A lungsiatna tullou kumtuangin aum ngaala; 16 A mite gamdaai a puipa Amah kawmah, A lungsiatna tullou kumtuangin aum ngaala; 17 Kumpi loupi tahtahte sulumpa Amah kawmah, A lungsiatna tullou kumtuangin aum ngaala; 18 Huleh kumpi minthang tahtahte thatpa Amah kawmah, A lungsiatna tullou kumtuangin aum ngaala, 19 Sihon, Amorte kumpipa, A lungsiatna tullou kumtuangin aum ngaala, 20 Huleh Og, Bashan kumpipa, A lungsiatna tullou kumtuangin aum ngaala, 21 Huleh a gam uh goutan diingin apia hi, A lungsiatna tullou kumtuangin aum ngaala; 22 A suaah Israel goutan pepa kawmah, A lungsiatna tullou kumtuangin aum ngaala. 23 Ama'n i dinmun ngiamdaan ahung hezing hi, A lungsiatna tullou kumtuangin aum ngaala; 24 Ahung doute lahah ahung huumbit hi, A lungsiatna tullou kumtuangin aum ngaala; 25 Ama'n hinna nei zousiah kawmah neeh diing apia hi, A lungsiatna tullou kumtuangin aum ngaala. 26 Aw, vaan Pathian kawmah kipaahthu soi un. A lungsiatna tullou kumtuangin aum ngaala.
1 Babylon luui geite ah, Hutah ah i tou va, ahi, i kapta uh Zion i ngaihtuah chiangun. 2 Hutah a luui laia Huisuumte ah i kaihgingte uh i khai uhi. 3 Ajiahchu hutah ah sal a hung puite'n la sa diingin ahung phuut va, Ahung sugentheite'n nuam diing bangin ahung sawl uh, "Zion late khat hung sahsah un," chiin. 4 Bangchidaanin mi gam ah LALPA la ka sa thei diviaimah? 5 Aw Jerusalem, ka hung mangngilha ahihleh, Kakhutjiatlamina silbawlsiamna mangngilh jiang heh. 6 Nang ka hung heetzing louha ahihleh, Ka lei ka dangtawng ah belh bihbeh heh, Ka nopsahnapeen saanga Jerusalem ka hung deihjawh louh leh. 7 Aw LALPA, Jerusalem siat ni a Edom tate'n asilbawl uh hezing in; Amah un, "A suangphuum natanin suchim un, suchim un," achi uhi. 8 Aw suhmanga um diing Babylon tanu, Ka tungva na bawl banga hung thuh diingpa chu kipaahin aum diing hi. 9 Na ta-ngeehte hung laahsaha Suang saatna a nei diingpa chu kipaahin aum diing hi.
DAVID PHATNA LA.
1 Ka lungtang pumpi in ka hung phat diing a; pathiante ma ah nangmah phatin la ka sa diing hi. 2 Na biahinn siangthou lam ngain ka hung be diing a, Huleh na lungsiatna tullou leh na thutahna jiahin na min ka hung phat diing hi; Ajiahchu na thu chu na min zousiah dungjuiin na tawisangta hi. 3 Ka hung kouh ni in, nang na hung dawng a, Huleh haatna in ka hinna na hung suhhaatsah hi. 4 Aw LALPA, na kam a thu pawtte ajaah hun chiangun, Lei a kumpipate zousiah in ahung paahtawi diing uhi. 5 Ahi, LALPA umdaan thute phatin la asa diing uh, LALPA loupi daan lah anasa ngaala. 6 LALPA chu sangtaha um hizongleh, Mingiamte angaihsah hi; Ahihvaangin mi kiliansahte chu gamlapi apatin ahe hi. 7 Lungbuaina lahah um mahlengzong nangma'n na hung suhalh diing hi; Ka meelmate lungthahna tungah na khut na jaah diing a, Huleh na jiatlam khut in na hung hunkhe diing hi. 8 LALPA'N ka tungtaanga abawl diing chu abawl bukim diing hi; Aw LALPA, na lungsiatna tullou chu kumtuangin aum hi; Nangmah khut silbawlte chu taaisan keei sin.
LA PUITU A DIING. DAVID PHATNA LA.
1 Aw LALPA, nangma'n guntahin na hung hawl a huleh na hung heta hi. 2 Nang ka tousuh leh ka dindoh na he a; Ka ngaihtuahna chu gamlapi apatin na he hi. 3 Nang ka pai leh ka lup na hung enchain a, Huleh ka umdaan zousiah na he hi. 4 Ajiahchu ngai in, ka lei a thu khat zong aum main, Aw LALPA, nangma'n na he veh hi. 5 Nang ka nunglam leh ka malam na hung uumsuaah a, Ka tungah na khut na nga nalai hi. 6 Huchibang lawma heetna chu kei diingin alimdang talua hi; Asang beeh a, ka phazou sih hi. 7 Na Hagau kawm apat khoiah ka chiah diai? Ahihlouhleh na maai ma apat khoiah ka taaimang diai? 8 Vaan ah kaltouta leng, hutah ah nang na um a; Sheol ah lupna bawl zongleng, ngai in, hutah ah nang na um jeel hi. 9 Jiing ha jaahin tuilianpi tawppeh ah va um mahlengzong, 10 Hutah ah zong na khut in na hung pui diing a, Huleh na khut jiatlam in ahung tu diing hi. 11 "Matheilouin mial in ahung khuh diing," chita zongleng, Jaan ngeei zong ka kiim ah vaah ahi diing hi; 12 Ahi, mial in zong nang apat bangmah aliah sih a, Hizongleh jaan zong suun bangin avaah hi; Nang diingin mial leh vaah akibangsap hi. 13 Ajiahchu nangma'n ka lungsim gil lam na siam a; Ka nu suul sungah na hung na khuhkhumta hi. 14 Nang ka hung phat diing hi, ajiahchu lauhuaitah leh limdangtaha siam ka hi; Na natohte lah thumah tahtah ahi a, Huchu ka hinna in ahe chian mahmah hi. 15 Aguuha siama ka um lai leh Leimun nuainungpeen a kilawmtaha bawla ka um laiin, Ka guh ka taang nangmah apat phualin aum sih hi. 16 Ka lim bawlkim nailouh chu na mit in amu hi. Huleh na lehkhabu ah kei diinga kisehsa nite, Khat beeh atun main a bawna gelhzoh veh ahita hi. 17 Aw Pathian, na ngaihtuahnate kei diingin luui hina lawmlawm e! Akigawm khawmna chu nasahinae! 18 Sim diing hitaleng, piauneel saangin atamjaw diing hi; Ka khanloh chiangin na kawmah ka um nalai hi. 19 Tahzetin, Aw Pathian, nang migiloute that lehchin Aw; Hujiahin Aw, nanguh sisan suahhaatte, hung paisan un. 20 Ajiahchu amah un giloutahin nang ahung soisia va, Na meelmate'n na min bangmalouin asoi uhi. 21 Aw LALPA, nang hung hote ka haw sih eimah? Huleh nang hung doute tungah ka lunggim sih eimah? 22 Amahuh chu huat chihtahin ka hua a; Ka meelmate in ka ngai hi. 23 Aw Pathian, hung enchain inla, huleh ka lungtang he in; Hung enkhia inla, huleh ka ngaihtuahna tawldaan he in; 24 Huleh keimah ah umdaan gilou bang aum eimah en inla, Huleh kumtuang lampi ah hung pui in.
LAPUITU A DIING. DAVID PHATNA LA.
1 Aw LALPA, migiloute lah apat hung hunkhia in; Mi ngongtatte lah apat hung huumbit in, 2 Amah un chu a lungtang vah silgilou angaihtuah va; Kidou diingin akikhawm gige uhi. 3 A lei uh guul bangin ahiamsah va; A muuh vah guulsia gu aum hi. Selah. 4 Aw LALPA, migilou khut apatin hung veeng in: Ka chiahleh suhpuuh tum, Mingongtat apat hung huumbit in. 5 Mi kiliansahte'n ka awhna diingin thaang leh khauhual aguuh koih uh; Lampi geiah leen aphah va, Ka awhna diingin thaangte akam uhi. Selah. 6 LALPA kawmah, "Nang chu ka Pathian na hi; Aw LALPA, hehpih ka ngetna awte hung na ngaikhia in. 7 Aw Lalpa PATHIAN, ka hutdamna bulpi, Nangma'n kidou ni in ka lu na liahkhuhta hi. 8 Aw LALPA, migilou sil deihte chu pephal sin; A ngaihtuahna gilou chu pichingsah sin, Huchilou inchu akipaahtawi kha diing uhi. Selah. 9 Kei hung uum kiimveelte lu ahihleh A muuh va a thugilou soi un khuh hen. 10 A tungvah meiaam kia hen; Mei lahah paihluutin um uh henla, Athoh nawn louhna diingun kohawm thuuhtah ah khiahin um uh hen. 11 Thu gilou soitu chu leitung ah tundingin um sih hen; Mi ngongtat chu sil hoihlou in kintahin deih hen," ka chi hi. 12 LALPA'N gimthuaahte chu a thu vah apanpih diing chih leh Tasamte chu atan diingva kilawm angaihtuahsah diing chih ka he hi. 13 Matheilouin midihtatte'n na min ahung phat diing va, Midihte chu na umna ah ateeng diing uhi.
DAVID PHATNA LA
1 LALPA, nangmah ka hung kou hi; Ka kawmah hung pai meeng in; Ka hung kouh chiangin ka aw ah na bil hung doh in. 2 Ka haamteina na ma ah gimnamtuui bangin taahlatin um henla, Ka khut jaah zong nitaahlam kithoihna bangin um hen. 3 Aw LALPA, ka muuh ah veengtu tousah inla, Ka muuh kotkhaah veeng in. 4 Giitlouhna natongte toh silgilou bawl diingin, Ka lungtang sil hoihlou lam himhim ah kiheisah sinla, A neeh tuuite uh zong hung nesah sin. 5 Midihtat in hung vua hen, Huchu hehpihna ahi diing hi; Huleh hung taaihilh hen, Huchu lu a sathau nuh bang ahi diing hi; Ka lu in nuai sih hen. Ajiahchu ka haamteina chu a natoh giloute uh kalhna ahi zing hi. 6 A vaihawmtute uh chu kawl ah paihkhiahin aum va, Huleh ka thute angaikheta uhi, ahum jiahin. 7 Mi'n lei aleh a asuhjaan bangin, Ka guhte uh Sheol kam ah thehdalhin aum hi. 8 Hizongleh Aw LALPA Pathian, ka mit in nangmah lam aen a; Nangmah ah kihuumbitna ka hawl hi; Ka hinna chu chimohin nuse sin. 9 Ka awhna diinga a thaangkamte uh lah leh Silgilou bawlte thaang haw lahah hung huumbit in. 10 Kei ka suahtaat laiin Migiloute chu amahuh mah leente ah keluut uh hen.
SUANG KOHAWMA A UM LAIA DAVID MASKIL. HAAMTEINA.
1 Ka aw in LALPA ka kou a, Ka aw in LALPA kawmah hehpihna ka ngeen hi. 2 Amah ma ah ka mangbatna thu ka soi a, Ka buaina thu a ma ah ka hesah hi. 3 Ka hagau ka sunga achihmoh laiin Nangma'n ka lampi na he hi. Ka paina lampi ah amah un aguuhin thaang akam uhi. 4 Ka jiatlam en inla, huleh ka daah a, Ajiahchu koimah ahung he himhim aum sih hi; Kihuumbitna diing ka nei sih a, Koima'n ka hinna ahung donsah sih hi. 5 Aw LALPA, nangmah ka hung kou a, "Nang chu ka kihuumbitna, Mihing gam a ka tanvou na hi. 6 Ka kikou hung ngaihsah in, Ajiahchu nasataha suhngiamin ka umta hi. Ahung suduhdahte apatin hung hunkhia in, Ajiahchu amahuh kei a diingin ahaat talua uhi. 7 Na min ka phat theihna diingin Ka hinna suangkul apatin puidoh in. Midihtatte'n ahung dinkhum diing uhi, Nangma'n hoihtaha na hung bawl diing jiahin," ka chi hi.
DAVID PHATNA LA.
143 1 Aw LALPA, ka haamteina ngaikhia inla, Hehpih ka ngetna ah bil hung doh in. Na ginumna leh dihtatna jiahin hung dawng in. 2 Na suaah tung vaihawmkhum sin, Ajiahchu na mitmuh ah mihing koimah siamtang aum sih hi. 3 Meelma in ka hinna asuduhdah ngaala, Ka hinna chu lei ah asaat puuh a, Hun sawtpi misite bangin mun mial ah ahung teengsah hi. 4 Hujiahin ka hagau chu ka sungah atawi gawp a, Ka lungtang chu ka sungah abuai gawpta hi. 5 Nidanglai hunte ka geeldoh a, Na natohte zousiah ka ngaihtuah a; Na khut natohte ka suut jeel hi. 6 Na kawm lamah ka khutte kajaaha, Gamgaw a dangtaah tui ngaih bangin ka hinna in nangmah ahung ngai hi. Selah. 7 Aw LALPA, hung dawng meeng in, Ka hagau atawi gawpta hi. Kei apat na maai phual sin, Huchilou inchu kokhuuh a kesuhte bangin ka um kha diing hi. 8 Jiingkaal in na lungsiatna tullou hung jasah in, Nangmah ka hung muang ngaala. Ka paina diing lampi hung hesah in, Ka lungsim na kawmah ka nga gige ngaala. 9 Aw LALPA, ka meelmate lahah hung hunkhia in, Na hung na huumbit diingin na kawmah ka hung taai hi. 10 Na deihjawng bawldaan hung jilsah in, Ka Pathian na hi ngaala; Na Hagau hoih in dihna gam ah hung puiluut hen. 11 Aw LALPA, na min jiahin hung suhalh inla; Na dihtatna jiahin buaina apat ka hinna puidoh in. 12 Na lungsiatna tullou jiahin ka meelmate sumang inla, Huleh ka hinna sugentheite zousiah sumang in; Na suaah ka hi ngaala.
DAVID PHATNA LA.
1 LALPA, ka Suangpi chu phatin um hen, Ama'n ka khutte chu gaal kaap daan ahilh a, Huleh ka khutzungte chu kidou daan ajilsah a; 2 Ka lungsiatna tullou leh ka kulhpi, Ka innsang leh hung hunkhepa, Ka phaw leh ka kihuumbitna, Ka mite ka nuaia koihpa ahi. 3 LALPA, mihing bang ahi a ahiai na ngaihsah taah mei? Ahihlouhleh mihing tapa zong koi ahi a ahiai na ngaihtuah taah mei? 4 Mihing chu bangmalou huu bang giap ahi: A damsung nite zong liim mangjeel bang ahi. 5 Aw LALPA, na vaante luaikuun inla, hung kumsuh in; Taangte chu khoih in, huchiin akhu diing uhi. 6 Kawl phesah inla amahuh thehdalh in; Na thalte kaapdoh inla amahuh sumang in. 7 Tunglam apatin na khutte hung zam inla; Tuilianpi apat hung hunkhia in, Meelheetlouh tate khut apatin, 8 A kam un juauthute asoi va, A khut jiatlam uh zong heembawlna khut jiatlam ahi. 9 Aw Pathian, nangmah paahtawiin la thah ka sa diing hi; Tumging leh kaihging gui sawm nei in nangmah phatin la ka sa diing hi, 10 Kumpipate kawma hutdamna pia a, Naamsau chijaathuai apata a suaah David hunkhepa chu Amah ahi. 11 A kam va thumanlouh soi a, Huleh a khut jiatlam uh zong heembawlna khut jiatlam hi, Gamdangmite khut apatin hung hunkhia inla huleh hung huumbit in, 12 Ka tapate uh singkung dawng henhon bang ahung hih theihna diingun; Ka tanute uh zong kumpi innhuang a hoihtaha kijeem khuampite bang ahung hih theihna diingun; 13 Ka buhinnte uh zong sil piang chinteng a ahung dim theihna diingin; Ka belaamte un zong asaang asaang Huleh asiing asiing ka kotgawl va ahung hinkhiah theihna diingun; 14 Ka bawngtalte uh zong natong diinga ahung haat theihna diingun; Aluut leh apawt va siatna aum louhna diingin; Ka kholai va lungkimloua kikouna aum louhna diingin. 15 Huchibanga um mite chu kipaahtahin aum uhi. Ahi, LALPA a Pathian va nei mite chu kipaahtahin aum uhi.
DAVID PHATNA LA.
1 Aw Kumpipa ka Pathian, ka hung tawisang diing a; Huleh kumtuangin na min ka phat diing hi. 2 Ni chinin ka hung phat diing a, Huleh kumtuang kumtuangin na min ka phat diing hi. 3 LALPA chu aloupi a, loupitaha phat diing ahi; Huleh a loupidaan chu soizoh guallouh ahi. 4 Khang khat in khang dang khat kawmah na silbawlte aphat sawn diing a, Huleh na silbawl loupitahte chu ataahlang diing hi. 5 Nangmah paahtawina kilawmdaan loupitah leh Na silmah bawl thute ka ngaihtuah ngiitngeet diing hi. 6 Mite'n na silbawl lauhuaitah silbawltheihna asoi diing va; Huleh ke'n zong na loupidaan ka phuangjaah diing hi. 7 Amah un na hoihna nasatdaan heetzingna chu asoi diing va, Huleh na dihtatna phatin la ngaihtahin asa diing uhi. 8 LALPA chu mihehpihsiam leh lainatna a dim, Lungneemtah leh lungsiatna tullou a kichingtah ahi hi. 9 LALPA chu mi zousiah tungah ahoih a, A lungsiatna tullou zong a silsiam zousiah tungah aum hi. 10 Aw LALPA, na natohte zousiah in ahung paahtawi diing va, Huleh na misiangthoute'n nang ahung phat diing uhi. 11 Amah un na lalgam loupidaan asoi diing va, Huleh na silbawltheih daan chu houlimna in anei diing uh, 12 Mihing tate kawma a silbawl loupitahte leh A lalgam kilawmna loupidaan hesah diingin. 13 Na lalgam chu kumtuang lalgam ahi a, Huleh na thuneihna zong khang zousiah ah aum diing hi. 14 LALPA'N chu apuuh zousiah atu a, Huleh akuunte zousiah chu akaidinghi. 15 Mi zousiah mit in nang kineemtahin ahung en va, Nangma'n ahuntahin aneeh diing uh na pe jeel hi. 16 Nakhutnajaaha, Huchiin sil hing zousiah deih chu na taisah hi. 17 LALPA chu a gamtat daan zousiah ah adihtat a, Huleh a silbawl zousiah tung ah ahoih hi. 18 LALPA chu Amah koute zousiah kawmah anai hi, Thutah a Amah koutute zousiah kawmah. 19 Ama'n Amah laute deih chu ataangtungsah diing a; A kikou uh aja diing a, huleh ahunkhe diing hi. 20 LALPA'N Amah lungsiatte zousiah chu aveengbit a, Hizongleh migiloute chu asumang diing hi. 21 Ka kam in LALPA phatna thu asoi diing hi; Huleh mi zousiah in a min siangthou chu kumtuang kumtuangin phat uh hen.
1 LALPA chu phat un. Aw ka hinna, LALPA chu phat in. 2 Ka damsung tengin LALPA ka phat diing hi; Ka hin laisiahin ka Pathian phatin la ka sa diing hi. 3 Laltate ah na tahsanna uh koih sih unla, Hutkhiah theihna himhim neilou, mihing zong muang saam sin. 4 A haihna in apawtsan a, amah chu lei ah akihkiit hi; Hu ni ngeeiin a ngaihtuahnate chu abeimang ngaal hi. 5 Jakob Pathian panpihtu a nei mi ahampha hi, LALPA Pathian a kinepna nei mi chu; 6 Ama'n chu vaan leh lei bang, Tuilianpi leh a sunga um zousiah asiam ahi a, Amah chu kumtuangin aginum ahi. 7 Ama'n simmoh thuaahte a diingin adihin vai ahawmsah a, Gilkialte kawmah an apia hi. LALPA'N suangkul taangte ahahdoh hi. 8 LALPA'N mittawte mit asuhvaahsah a, LALPA'N akuun kheukheute akai tang a, LALPA'N midihtatte alungsiat hi. 9 LALPA'N mikhualte akeem hoih a; Pabeite leh meithaite apanpih a; Hizongleh migiloute lampi chu alumlehsah hi. 10 LALPA'N kumtuangin vai ahawm diing, Aw Zion, na Pathian, khang zousiah tanin. LALPA chu phat un.
1 LALPA chu phat un. Ajiahchu i Pathian uh phat a lasah chu ahoih hi; Ajiahchu huchu anuam a, huleh phat zong akilawm him ahi. 2 LALPA'N Jerusalem chu alamdoh tou a; Ama'n nohmanga um Israelte chu apuikhawm hi. 3 Ama'n lungtang keehjaahte asudam a, Huleh a liamnate uh atuam hi. 4 Ama'n aahsite tamdaan asim a; A min uh aphuaahsah chiat hi. 5 I Lalpa uh chu aloupi a, huleh silbawltheihna ah haattungnung ahi; A pilna in tawpchin anei sih. 6 LALPA'N kingaingiamte adomsang a; Migiloute chu lei ah apaaikhia hi. 7 Kipaahthu soi kawmin LALPA phatin la sa unla; Kaihging toh i Pathian uh phatin la sa un. 8 Ama'n vaan chu meipi in akhuhsah a, Lei a diingin guah apia a, Taangte tungah hampa apousah hi. 9 Ama'n gamsa kawmah neeh diing apia a, Va-aah nou haamhaam kawmah toh. 10 Amah chu sakol haatna ah akipaah sih a; Mihing keengte ah zong kipaahna himhim anei sih hi. 11 LALPA'N chu Amah laute tungah kipaahna anei a, A lungsiatna tullou kineppihte tung ngeei ah. 12 Aw Jerusalem, LALPA chu phat in; Aw Zion, na Pathian chu phat in. 13 Ajiahchu Ama'n na kulh kotkhaah jawlte asukhauh a; Na sunga na tate avangpiaah hi. 14 Na gamgite ah lemna asiam a, Huleh buh hoihpeen in ahung sudim hi. 15 Ama'n a thupiaahte chu leitung ah asawldoh a; A thu chu haattahin ataai hi. 16 Vuuh chu samul bangin apia a; Vuuh kia chu vut bangin athehjaah hi. 17 A vuuhkhal chu tanghouthem neen bangin apaaidoh a; A votna ma ah koi ahiai ding ngam diing? 18 A thu asawldoh a, hute chu asutui hi; A huih anungsah a, huleh tuite ahung luangsah hi. 19 A thu chu Jakob kawmah aphuanga, A thuguatte leh a vaihawmnate chu Israel kawmah. 20 Ama'n koimah nam tung ah huchibangin abawl ngei sih hi; Huleh a vaihawmnate ahihleh chu, amah un ahe ngei het sih uhi. LALPA chu phat un.
1 LALPA chu phat un. Vaante apatin LALPA chu phat un; Munsangte ah Amah chu phatun. 2 A angel zousiah haw, Amah chu phat un; A sepaihte zousiah haw, Amah chu phat un. 3 Ni leh ha, Amah chu phat un; Aahsi vaah zousiah haw, Amah chu phat un. 4 Vaan sangpeente haw, Amah chu phat un; Vaante tunga tui umte haw, Amah chu phat un. 5 Hute'n LALPA min chu phat uh hen, Ajiahchu Ama'n thu apia a, siamin ahung umta uhi. 6 Ama'n hute chu kumtuang kumtuanga diingin asukip a; Beithei nawn lou diingin thu abawlkhumta hi. 7 Nanguh dragonte leh tuithuuh zousiah haw, Lei apatin LALPA chu phat un; 8 Mei leh gialte, vuuh leh meilum leh huihpite haw, A thu jui zingin lei apatin LALPA chu phat un; 9 Taang leh mual zousiahte haw; sing gahnei leh sidar sing zousiah haw; 10 gamsa leh ganta zousiah haw; Ganhing bohvaah leh tungleeng vate haw; 11 Lei kumpipate leh mi zousiah haw; Laltate leh leitung vaihawmtute zousiah haw; 12 Tangvaal leh nungaahte haw; Puteehte leh naupangte haw; 13 Hute'n LALPA min chu phat uh hen, Ajiahchu Amah min chauh chu tawisangin aum a; A loupina in leitung leh vaan akhuup hi. 14 Huleh Ama'n a mite kii atawisang a, A misiangthou zousiah phatna, Israel tate phatna, Mipi a kawm naihte phatna chu atawisang hi. LALPA chu phat un.
1 LALPA chu phat un. LALPA paahtawiin la thah sa unla, Huleh misiangthoute kikhopna ah a phatna la sa un. 2 Israelte chu amahuh Siampa tungah kipaah uh henla; Zion tate chu a Kumpipa uh tungah nuam uh hen. 3 A min chu laamin phat uh henla; Khuangta leh kaihging toh Amah phatin la sa uh hen. 4 LALPA chu a mite tunga akipaah jiahin, Ama'n kingaingiamte chu hutdamna in ajeemmawi diing hi. 5 Misiangthoute chu loupina ah nuam uh henla; A lupna tungvah nuamin la sa uh hen. 6 Pathian phatna sang chu a kam vah um henla; Huleh a khut vah naamsau a langniha hiamtuah um nalai hen; 7 Nam chin tunga phuba la a, Huleh mi chin tunga gawtna tungsah diing leh; 8 A kumpipate uh chu khainiang a kaan a, Huleh a miloupite uh kolbuhsah diingin; 9 Vaihawmna kigialsa a tungva tungsah diingin: Hi chu a misiangthoute zousiah paahtawina ahi. LALPA chu phat un.
1 LALPA chu phat un. A mun siangthou ah Pathian chu phat un; A silbawltheihna huihkhua ah Amah chu phat un. 2 A silbawl haattahte jiahin Amah chu phat unla; A loupina nasatdaan dungjuiin Amah chu phat un. 3 Peengkuul ging toh Amah chu phat unla; Kaihging leh peehging in Amah chu phat un. 4 Khuangta leh laam in Amah chu phat unla; Kaihging guinei leh theile in Amah chu phat un. 5 Siihkhutbeh ging solsol in Amah chu phat unla; Siihkhutbeh ging vengveng in Amah chu phat un. 6 Haihna nei sil chinteng in LALPA chu phat uh hen. LALPA chu phat un.
Thupilte Phattuamna
1 Israel kumpipa David tapa Solomon thupilte. 2 Pilna leh thununna heetna diing, Heetsiamna thute muhdohna diing bang, 3 Pilna, thudihna, vaihawmna leh khentuam neihlouhna thununna muhna diing bang; 4 Mimawlte kawma pilna, Khanglaite kawma heetna leh geeldihtheihna muhsahna diing bangin, 5 Mipil in thu angaikhe diing a, Huchiin siamna ahung neih beh diing, Huleh heetsiamna nei mi in lemguatna piltah atang diing hi, 6 Thupil leh a hilhchetna, Mipil thute leh a thuheem soite hesiam diingin. 7 LALPA lau chu heetna bul ahi a, Hizongleh mingolte'n chu pilna leh thununna asimmoh uhi.
Lawm Gilou apat Kiveeng Diinga Vauna
8 Ka tapa, na pa thuhilhna ngaikhia inla, Huleh na nu thuhilhna kiheisan sin; 9 Ajiahchu na lu a diingin lallukhuh kilawmtah ahi diing va, Huleh na ngawng kiimveel ah khi ahi diing uhi. 10 Ka tapa, misualte'n ahung jawl uh leh, Uut het sin. 11 Amah un, "Hung inla, Sisan suah diingin i taanggu diing uh, Aj iah beiin bangma suselou i guuh ngaah diing uh; 12 Sheol bangin ahing tangun i valh diing uh, Huleh kokhuuh a kesuhte bangin a bawnun; 13 Neihlelam manpha pipite i tang diing va, Gaallaah silte in i inn i sudim diing uh; 14 Ka lahvah na ai hung saan inla, Dangka-ip khat i kikop diing uh," achih uh leh, 15 Ka tapa, a lampi uh tawnin amahuh toh kalsuan sinla, A lampi vapat na keeng veengbit in; 16 Ajiahchu a keeng uh silgilou lamah ataai va, Huleh sisan suah diingin akin uhi. 17 Tahzetin, vate muhna a leen kijaah chu Athawn giap ahi; 18 Hizongleh amah un amahuh sisan mah akitaan va, Amahuh hinna mah ataanggu uhi. 19 Hubangmahin dihloutaha punna a huaiham taphot lampi chu aum a; Hute'n a neitute hinna alaahsah uhi.
Pilna in MiAkouhna
20 Pilna chu kholai ah akikou a, Kotzing ah a aw asuah hi. 21 Mi tampi umna munte ah pilna akikou a, Khopi kotpite ah a thu asoi hi: 22 "Nanguh mimawlte haw, bangtan ahiai na mawlna uh na ngaihnat diing uh? Huleh mi simmohhaatte'n a mi simmohna va bangtan ahiai akipaah diing va, Mingolte'n bangtan ahiai heetsiamna ahuat diing uh? 23 Ka taaihilhna lamah hung kihei un, Ngai un, na tungvah ka hagau ka sungbo diing a, Na kawmvah ka thute ka hung hesah diing hi. 24 Ajiahchu ka hung kou a, na uut sih va, Ka khut ka jaah a, koima'n bangmahin na ngai sih uhi. 25 Hizongleh ka thuhilhna zousiah bangmalou na suahta va, Ka taaihilhna khatmah zong na pom nuamta sih uhi. 26 Kei zong na patauhna vah kanuidiinga; Na lauthawngna uh ahung tun chiangin ka hung nuihsan diing hi, 27 Huihpi banga na lauhna uh ahung tun a, Piingpei banga na beimangna uh ahung tun a, Lungkhamna leh gimna na tungva ahung tun chiangin. 28 Hu hun chiangin ahung kou diing va, hizongleh ka dawng sih diing; Nguntahin ahung hawl diing va, hizongleh ahung mu sih diing uhi. 29 Ajiahchu heetna anahota va, LALPA lauhna chu ateeltaah louh jiahun, 30 Ka thuhilhna adeih sih va, Huleh ka taaihilhna zousiah amusit uhi. 31 Hujiahin a umdaan gah uh ane diing va, Huleh amahuh suangtuahna mah in adim diing uhi. 32 Ajiahchu mimawlte a kiheimangna un amahuh mah athat diing a, Huleh mingolte a lohchinna un amahuh mah asumang diing hi. 33 Ahihvaangin ka thu ngaikhe photmah chu bittahin aum diing a, Huleh silgilou lauhna apatin hamuangtahin aum diing hi," chiin.
Pilna Luuldaan
1 Ka tapa, ka thute na saan a, Ka thupiaahte na kephoih leh, 2 Pilna lam a na bil na doh a, Heetsiamna lam a na lungtang na piaah a, 3 Ahi, heetna chu na kouh a, Huleh heetsiamna koua na aw ngaihtaha na suahin chu, 4 Dangkasiih banga amah na hawl a, Huleh gou kiphuumgu banga amah na hawlveelin chu, 5 Huchiin LALPA lauhdaan na hung hesiam diing a, Huleh Pathian heetna na hung mudoh diing hi. 6 Ajiahchu LALPA'N pilna apia a, A kam apatin heetna leh heetsiamna ahung pawt hi; 7 Ama'n midihtat a diingin pilna dihtah asekhawm a, Dihtattaha gamtate diingin Amah chu phaw ahi. 8 Ama'n vaihawmna lampite aveeng a, Huleh a misiangthoute lampi aveenbitsah hi. 9 Huchiin dihtatna leh vaihawmna dih, Khentuam neihlouhna leh lampi hoih chinteng na hung hesiam diing hi. 10 Pilna na lungtang a ahung luut a, Heetna chu na hinna a diinga kipaahhuaitah ahung hih chiangin, 11 Lemheetna in ahung veeng diing a, Heetsiamna in ahung keem diing hi, 12 Giitlouhna lampi apat ahung hunkhe diing hi, Sil manlouh soimi apatin, 13 Mialna lampi a pai diinga Dihtatna lampi taihsante apat ngeeiin; 14 Sil hoihlou bawl a kipaahte apatin, Huleh migiloute manlouhna a nuamte apatin; 15 A lampite uh kawi a, A lampi va dihtatloute apatin; 16 Numei thaanghuai apat hung hunkhe diingin, A kam a heemthu soihaat hu mijawlpuuhnu apat ngeeiin, 17 A khangdawnlai pasal nusia a, Huleh a Pathian thuhun mangngilhta numei apatin. 18 Ajiahchu a inn chu sihna lamah a-awnsuh a, Huleh a lampite'n misite lam ajuan hi. 19 Amahnu kawma vachiah taphot akihkiit sih a, Hinna lampite zong amukiit nawn sih uhi. 20 Huchibang ahihjiahin mihoih lampi najui diinga, Huleh midihtat lampi chu najui diing hi. 21 Ajiahchu midihtatte'n gam aluah diing va, Huleh soiseelbeite chu hutah ah aum zing diing uhi. 22 Hizongleh migiloute chu leitung apatin saatkhiah ahi diing va, Huleh miginumloute chu hutah apat bohkhiah ahi diing uhi.
Khanglaite Diinga Thuhilhna
1 Ka tapa, ka daan mangngilh sinla, Hizongleh na lungtang in ka thupiaahte chu vomzing jaw heh; 2 Ajiahchu hute'n ni tamna leh dam sawtna Huleh hamuanna ahung piaahbeh diing uhi. 3 Khotuahna leh thutahna kinusesah sin, Na ngawng ah vial inla, Na lungtang dohkaan ah gial in, 4 Huchiin Pathian leh mihing mitmuh ah Deihsahna leh heetsiamna hoih na tang diing hi. 5 Na lungtang zousiah in LALPA muang inla, Huleh nangmah heetsiamna mei ah kinga sin; 6 Na lampi zousiah ah Amah phawh inla, Huchiin Ama'n na lampite ahung kawhmuh diing hi. 7 Nangmah ngaihin kipilsah sinla, LALPA lau inla, gilou taaisan in. 8 Na tahsa a diingin damna ahi diing a, Na guhte a diingin haatthahna ahi diing hi. 9 Na neihlelamte in LALPA paahtawi inla, Huleh na sil hung pung masapeente toh paahtawi in. 10 Huchiin na buhinnte chu buh in ahung dimleet diing a, Huleh na uain suuhna khuuh uain thah in aluang leet diing hi. 11 Ka tapa, LALPA thununna ngaineep sinla, A suhdihna zong chimtaah sin; 12 Ajiahchu LALPA'N alungsiat photmah athunun hi, Pa in a ta kipaahpihtah asuhdih bangmahin. 13 pilna mu chu mi hampha ahi a, Huleh heetsiamna mutu zong. 14 Ajiahchu a lawhna chu dangkasiih kiveina lawhna saangin ahoihjaw a, Huleh a punna zong sana siang saangin ahoihjaw hi. 15 Amah chu suangmantam saangin aluuljaw a, Huleh na duhthusaam sil zousiah in zong atuhlouh ahi. 16 Damsawtna chu a khut jiatlam ah aum a, A khut veilam ah hauhsatna leh paahtawina aum hi. 17 A lampite chu nuamna lampite ahi a, Huleh a lampi zousiah chu hamuanna ahi. 18 Atutute a diingin amah chu hinna sing ahi a, Huleh amah kolzing taphot chu ahampha uhi. 19 LALPA'N pilna in leilung adinkhia a, Heetsiamna in vaante asudet hi. 20 A heetna in tuithuuhte akikhenjaah a, Huleh meipite'n daaitui ataahkhesah uhi. 21 Ka tapa, pilna leh geeldihtheihna kolzing inla, Na mitte apatin hute paimangsah sin. 22 Huchiin na hagau a diingin hinna ahi diing a, Huleh na ngawng a diingin kilawmna ahi diing hi. 23 Huchiangin na lampi ah bittahin na pai diing a, Huleh na keeng akipal sih diing hi. 24 Na lup chiangin na lau sih diing hi; Ahi, na lum diing a, na ihmut atuui diing hi. 25 Lauhguihna lau sinla, Migiloute apat siatna ahung tun chiangin zong lau sin; 26 Ajiahchu LALPA chu na muanna ahi diing a, Huleh na keeng awhlou diingin aveeng diing hi. 27 Na khut a bawltheih diinga thuneihna aum laiin, Atang diinga kilawmte tungah sil hoih heentaang sin. 28 Na neih zing ngaalin chu, na innveeng kawmah, "Chiah phot inla hung kiit jaw in, Jiing chiangin ka hung pe diing," chi sin. 29 Na innveeng tungah silgilou ngaihtuah sin, Ajiahchu na kawmah bittahin ateeng ahi. 30 Ajiah beiin mi toh kihau sin, Na tunga silgilou bangmah abawl louh leh. 31 Hiamngammi eeng sinla, Huleh agamtat daan khatmah zong teel sin. 32 Ajiahchu lamkhial mi chu LALPA diingin huathuaitah ahi a, Hizongleh a thuhilhna thuguuh chu midihtatte kawmah aum hi. 33 LALPA haamsia chu migiloute inn ah aum a, Hizongleh Ama'n midihte teenna chu avangpiaah hi. 34 Misimmoh haatte chu Ama'n asimmoh tahzet a, Hizongleh mi kingaingiamte kawmah hehpihna apia hi. 35 Mipilte'n loupina aluah diing va, Hizongleh mualphouna chu mingolte kaisangna ahi diing hi.
Pa Thuhilhna: Pilna a Bitna
1 Tate aw, pa thuhilhna ngai unla, Huleh heetsiamna he diingin ngaikhia un. 2 Ajiahchu thuhilhna hoihtah ka hung pia ahi, Ka thuhilhna nuse sih un. 3 Ka pa tapa ka hih a, Ka nu mitmuh a tapa tang duattah ka na hih laiin, 4 Ama'n ahung hilhta a, ka kawmah, "Na lungtang in ka thute vomzing henla, Ka thupiaahte jui henla huleh hing hen. 5 Pilna nei inla, heetsiamna nei in. Mangngilh sinla, ka kam a thute apatin kiheimang saam sin. 6 Taaisan sinla, huchiin ama'n ahung veeng diing hi; Ngaina inla, huchiin ama'n ahung veeng diing hi. 7 Pilna hi a bulpipeen ahi a, Hujiahin pilna nei in. Huleh na neih zousiah toh pumin heetsiamna nei in. 8 Amah chu tawisang in, huchiin ahung kaisangsah diing a, Na pom tintena ahihleh paahtawina ahung tut diing hi. 9 Na lu a diingin hehpihna kijepna ahung pe diing a; Loupina lallukhuh ama'n na kawmah ahung pe diing hi," achi hi. 10 Ngaikhia in, aw ka tapa, huleh ka thusoi pom in, Huchiin na damsung kumte ahung tam diing hi. 11 Pilna lampi ah ka hung hilhta a; Lampi dihte ah ka hung puita hi. 12 Lam na pai chiangin na kalsuan daalin aum sih diing a, Huleh na taai chiangin na kisui kha sih diing hi. 13 Thuhilhna chu tu tinten inla, hahkhe sin; Keem in, ajiahchu na hinna ahi. 14 Migiloute lampi ah luut sinla, Huleh misualte lampi ah zong pai sin. 15 Peel inla, a kawmah pai sin, Kiheisan inla, chiahsan in. 16 Ajiahchu poi akhoih masiah un a-ihmu sih uh; Huleh koiaha akipalpuuhsah louh uh leh a-ihmu thei sih uhi. 17 Ajiahchu giitlouhna tanghou ane va, Huleh hiamngapna zu adawn uhi. 18 Hizongleh midihte lampi chu jiing phalvaah bang ahi a, Huchu suun vaah ahih ma a vaah deuhdeuh chu ahi. 19 Migiloute lampi ahihleh mial tobang ahi a; A kipalna uh ahe sih uhi. 20 Ka tapa, ka thute ngaikhia inla, Ka thusoi ah na bil doh in. 21 Na mitmuh apatin paimangsah sinla, Na lungtang ah keem in. 22 Ajiahchu hute chu a mutute a diingin hinna ahi a, Huleh a tahsa uh zousiah diingin damtheihna ahi. 23 Na pilvaang theihtawpin na lungtang veeng hoih in, Ajiahchu hikhu apatin hinkhua a siltung zousiah ahung umdoh hi. 24 Na kam apatin heemthu soina koihmang inla, Huleh muuh lepchiah chu nangmah apat gamlapi ah koihmangin. 25 Na mit in malam dihtahin en henla, Huleh na mit ngeei in na malam tangtahin en heh. 26 Na keeng paina lampi geel vangvang inla, Huleh na lampi zousiah suhkip hi heh. 27 Jiatlam aha, veilam aha ah zong peet sin; Sual apat na keeng suandoh in.
Aangkawm Thu a Vauhilhna
1 Ka tapa, ka pilna ngaikhia inla, Ka heetsiamna ah na bil doh in, 2 Geeldihtheihna na neih zing a, Huleh na muuh in heetna akol theihna diingin. 3 Ajiahchu numei thaanghuai muuh in khuaizu ataahkhesah a, Huleh a kam chu sathau saangin anaaljaw hi. 4 Ahihvaangin atawp ah chu gamsai bangin akha a, Naamsau a langnih a hiam bangin ahiam hi. 5 A keeng in sihna lam ajuan a, A kalsuan in sheol lam ajuan hi. 6 Ama'n hinna lampi ageeldoh kha sih a, A lampite detlouh ama'n ahe sih hi. 7 Hujiahin tuin, nanguh tate haw, tuin hung ngaikhia unla, Huleh ka kam a thu pawt apat kiheimang sih un. 8 Amahnu apat na lampi gamlatahin koih inla, Huleh a inn kot kawm naih ah zong pai sin. 9 Huchilou inchu na zahumna midangte kawmah na pe kha diing a, Huleh na kumte zong migiloute kawmah na pe kha diing a; 10 Huleh gamdang mite na neihlelam in akisutai kha diing va, Huleh na tohgimna chu meelheetlouh khat inn ah atung kha diing a; 11 Huchiin a tawpna lamah Na pheh leh na tahsa ahung bei chiangin na maau diing a, 12 "Bangchidaana thuhilhna ka na huat a, Huleh ka lungtang a taaihilhna anamusit ka hita mei diai! 13 Ka houtute thu ka na mang sih a, Huleh ahung thuhilhtute lamah ka bil ka na dohta sih hi! 14 Mipungkhawmte leh kikhawmpite lahah Gilou ngenin ka na um phialta mei hi," na chi diing hi. 15 Nangmah tuikhuuh a tui kidawn inla, Nangmah tuitohdoh apat a tuiluang ngeei kidawn in. 16 Na tuinaah chu gam chin ah aluangdalhin, Luui tuite chu kotzing ah aluang diai? 17 Hute chu nang a diing chauh hisah in, Huleh na kawma um midangte a diing ahi sih. 18 Na tuinaah chu vangpiaahin um henla, Huleh na khangdawnlai ji toh nuamin um in. 19 Amahnu chu sajuhpi deihhuaitah leh sajuhtal nalhtah bang hi henla, A aang in nang chu bangchihlaipouhin hung sutai zing henla; Huleh a lungsiatna ah lungawiin um zingzing in. 20 Bang diingin ahiai, nang ka tapa, numei thaanghuai a na vakisuhlungawi a, Huleh aangkawmnu aang na vakawi diing? 21 Ajiahchu mihing lampite chu LALPA mitmuh ah aum zing a, Huleh Ama'n a chiahlehna zousiah aetchiansah hi. 22 Amah giitlouhna mah in migilou chu aman a, Huleh amah sualna khaute in amah chu kaanin aum hi. 23 Thuhilhna taahsap jiahin asi diing a, Huleh a ngolna nasatah jiahin apeetmang diing hi.
Umdaan Hoih Diinga Taaihilhna
1 Ka tapa, na innveeng a diinga mohpotu a na pan leh, Heetlouh mi diinga thuchiam nana piaahtaah leh, 2 Na kam a thute ah na awh a, Na kam a thusuaahte in mat na hita hi. 3 Na innveeng khut a na hung umtaah jiahin, Ka tapa, hikhu bawl inla, nangmah kihunkhia in: Chiah inla, kingaingiam inla, Na innveeng kawmah vangeen in. 4 Na mit ihmutna pe sinla, Na mitvun zong lusuhna pe keel sin. 5 Sabengtu khut apat sakhi ataaidoh bangin, Huleh thaangkamtu khut apat va asuaahtaat bangmahin nangmah leh nangmah kihundoh in. 6 Nang mithasia, mehsi kawmah chiah inla, A lampite ngaihtuah inla huleh pil in, 7 Ama'n chu kaihuaitu aha, Houtu aha, vaihawmtu aha nei louin, 8 Nipi laiin a an diing akisuhtuah a, Huleh buh laahhun chiangin a neeh diing alakhawm hi. 9 Bangtan ahiai na lup diing, Aw mithasia? Na ihmutna apat bangchihchianga thoudoh diing na hiai? 10 Tomkhat na ihmu a, tomkhat na lusu a, Tawlnga diingin na khut na helhkop jual hi, 11 Hujiahin na jawnna guta khualzin bangin ahung tung diing a, Huleh na taahsapna in gaal bangin ahung lap diing hi. 12 Mi manlouh, migilou chu Thumanlouh soiin avaahleh hi; 13 A mit in heetsahna abawl a, A keeng in chiamchihna apia a, A khutzung in thu ahilh hi. 14 Lamkhelhna chu a lungtang ah aum a, Giitlouhna ageel zingzing a, Kilemlouhna atuh hi. 15 Hujiahin a siatna thakhatin ahung tung diing a; Suhdam guallouhin thakhatin akisegawp diing hi. 16 LALPA'N ahuat sil guup aum hi, Ahi, sagihte chu Amah diingin kihdahhuai ahi: 17 Kiletsahna maaisuah, Lei juau, Mohnabei sisan suah khutte, 18 Ngaihtuahna gilou suangtuah lungtang, Giitlouhna bawl diinga kintaha taai keengte, 19 Juau soi heetpihtu tahlou, Huleh unau laha kilemlouhna chituh mite.
Aangkawm Thu a Vauna
20 Ka tapa, na pa thupiaah jui inla, Huleh na nu thuhilhna nuse sin. 21 Hute chu na lungtang ah vial zingzing inla; Na ngawng kiimveel ah khitin. 22 Na pai chiangin ahung pui diing va; Na ihmut chiangin ahung veeng diing va; Huleh na khanloh chiangin ahung houpih diing uhi. 23 Ajiahchu thupiaah chu thaumei ahi a, Huleh daan chu vaah ahi; Huleh thununna taaihilhna chu hinna lampi ahi, 24 Numei gilou apat leh Numei thaanghuai lei heemhaat apat nang hung veeng diingin. 25 Na lungtang in amahnu meelhoihna lunggulh sinla, A mitmeite in zong kimansah sin. 26 Ajiahchu kijuaah numei jiahin pasal khat tanghou them asuaah hi; Huleh aangkawmnu in chu hinna luultah ahawl hi. 27 Mi'n a puan kaanglouin Mei a aangsung ah atawi thei diaimah? 28 Mi khat a keeng kaang louin Meiaam tungah apai thei diaimah? 29 Huchibangin koipouh a innveengpa ji juana chiah chu ahi; Koipouh amahnu vakhoih chu siamtangin aum sih diing hi. 30 A an ngawl laia a gilkial suhvahna diinga mi khat in aguuh leh, Mite'n hu guta amusit sih diing uhi. 31 Ahiinlah akimuha ahihleh chu, aleh sagihin adit diing a; A inn a van zousiah ape diing hi. 32 Hizongleh koipouh numei toh aangkawmin heetsiamna atasam a, Hikhu bawlin amah hinna ngeei asusia hi. 33 Liamna leh zumna amu diing a, Huleh a minsiatna chu akisiaahmang sih diing hi. 34 Ajiahchu thangsiatna in mihing asuthangtawm a, Huleh phubalaah ni chiangin ama'n ahawi sih diing hi. 35 Tatna bangmah apom sih diing a, Silpiaah tampi pe zong lehchin alungkim tuan sih diing hi.
Kijuaahnu Dohate
1 Ka tapa, ka thute jui inla, Huleh ka thupiaahte na sungah kholkhawm in. 2 Ka thupiaahte jui inla, hing in, Huleh ka thuhilhte chu na mit nauta bangin keem in. 3 Na khutzungte ah vial inla, Na lungtang dohkaan tungah hute gial in. 4 Pilna kawmah, "Ka sanggamnu na hi," chi inla, Huleh heetsiamna chu na tanau kinaihpih chi in. 5 A thute a miphatheem haat hu mijawlsiam Numei thaanghuai apat nang ahung veen theihna diingun. 6 Ajiahchu ka inn kotkhaah ah, A kikhaahna awng apatin ka en a, 7 Huleh mimawlte lahah ka mua, Tangvaalte lahah heetsiamna tasam tangvaal khat ka chiamchihta hi. 8 Amahnu umna ning kawma kotzing tawnin, Huleh amahnu innlam ajuanta hi, 9 Nitaahlam, khomial juulin, jaan khomial vom bihbeh in. 10 Huleh ngai in, nohchijuaah banga kichei, Lungtang pilkheltah pua numei khat in amah anakituaahpih hi. 11 Amahnu chu ahi selsalin, asoihah a, A keengte a inn ah aum det thei sih hi. 12 Tuin kholai ah aum a, tuin kotzing ah aum a, Huleh ningkawi chin ah mi taangin aum hi. 13 Huchiin amahpa chu amanta a, huleh atawp a, Zummoh meel potahin a kawmah, 14 "Lemna sillatte ka kawmah aum a, Tuniin ka thuchiamte ka taangtunta hi. 15 Hujiahin nangmah tuaah diingin ka hung pawtdoh hi, Guntuhtaha nang hung hawl diingin, Huchiin ka hung muta hi. 16 Ka lupna ah puanphah nalhtah ka phahta hi, Aigupta puanjeem hoihtaha kikhuipawlte in. 17 Murrahte, aloete, leh siingthaalte in Ka lupna tung ka thehta hi. 18 Hung inla, jiingkaal masiah kingaihna dimseet in i umkhawm diing a, Kingaihna in i kisunuam tuah diing hi. 19 Ajiahchu ka pasal inn ah aum sih hi, Khual gamla taha zin ahi; 20 Ama'n dangka-ip akeng a, Ha liih chiangin inn ahung tung diing hi," achi hi. 21 A kamsiam mahmahna in amah aheempuuhta a, A muuh heema miphatna in amah ajawlpuuhta hi. 22 Amahnu chu ajui pah hi, a thattu diing ma a bawngtal apai bangin, Ahihlouhleh mingol a pilna diinga kol kibuh diinga achiah bangmaiin, 23 Thaltang in a sin adawt pailet masiahin, Va in thaang lam adelh kin bangin, hutobangin amah in a sihna diing ahi chih ahe sih hi. 24 Hujiahin nanguh tate haw, tuin hung ngaikhia unla, Huleh ka kam a thu pawtte ngaihsah un. 25 Na lungtang amahnu lampite lamah awn sih henla, Amahnu lampi ah vavaahmang sin. 26 Ajiahchu amahnu'n mi tampi liamsain apaaikhetaa, Mihaat tampi amahnu thahin aumta uhi. 27 A inn chu sheol zotna lampi ahi a, Sihna pindante juana chiahsuh ngeei chu.
Pilna Silthawnpiaahte
1 Pilna akikou sih a ahiai, Huleh heetsiamna in a aw asuah sih eimah? 2 Lampi gei munsang vuumte ah ading a, Lamka thuamte ah ading hi. 3 Khopi kotkhaah geite ah, khopi luutnate ah, Kotkhaah a luutnate ah akikou a: 4 "Aw mihingte, nanguh ahi ka hung kouh, Huleh ka aw chu mihing tate diingin ahi. 5 Aw nanguh mimawlte haw, pilna hesiam unla, Huleh nanguh mingolte haw, heetsiamna lungtang nei mi hung hi un. 6 Ngaikhia un, sil hoihpeente ka soi diing ahi a, Ka kam kaah lah thudih phuanna diing ahi ngaala. 7 Ajiahchu ka kam in thutah asoi diing a; Huleh giitlouhna chu ka muuh a diingin kihdahhuai ahi. 8 Ka kam a thu pawt zousiah dihtatna toh ahi a; Hute ah manlouh leh thuheikawi mawngmawng aum sih hi. 9 A hesiam a diingin akichian veh a, Huleh heetna mute a diingin adih veh hi. 10 Ka thuhilhna saang unla, dangka saang louin, Huleh sana deihhuaitah saangin heetna saang jaw un. 11 Ajiahchu suangmantam saangin pilna ahoihjaw a, Huleh deih theih diing sil zousiah toh tehkaah gual ahi sih hi. 12 Kei, pilna chu lemheetna toh ka teeng a, Huchiin heetna leh geeldihtheihna ka mudoh hi. 13 LALPA lau chu sual huat ahi a, Kiletsahna leh kiuahsahna leh lampi gilou Huleh thumanlouh soina kam bang ka hua hi. 14 Lemguatna chu kei a ahi a, huleh pilna dihtah zong; Kei chu heetsiamna ka hi a, haatna ka nei hi. 15 Keimah jiahin kumpipate'n vai ahawm va, Huleh lalte'n thudih apia uhi. 16 Keimah jiahin laltate leh mi liante'n vai ahawm va, Leitung a dihloua vaihawm zousiah in zong. 17 Ahung lungsiatte chu ka lungsiat a, Huleh guntuhtaha hung hawlte'n ahung mu diing uhi. 18 Hauhsatna leh zahumna ka kawmah aum a, Ahi, sawtpi daih hauhsatna leh dihtatna chu. 19 Ka gah chu sana saangin ahoihjaw ahi, sana siangtah saangin zong, Huleh ka sepsuah zong dangka hoihpeen saangin. 20 Dihtatna lampi ah ka pai a, Vaihawmna dih lampite lahah, 21 Kei hung lungsiatte gou ka luahsah a, A goubawmte uh ka dimsah theihna diingin. 22 LALPA'N a lampi kipat tuungin ahung neita a, Nidanglaia a silbawlte main. 23 Kumtuang apatin tunding ka na hi a, Achiil in leilung umtuung akipatin. 24 Tuithuuhte um main laahdoh ka na hi a, Tuinaah tui a dimte um ma daihin. 25 Taangte dinsaha aum main, Mualte aum main laahdohin ka na umta hi. 26 Leilung leh lougamte Ama'n adin main, Huleh khovel a leivui masapeen um main. 27 Vaante Ama'n abawl laiin ka umta a, Tuithuuhte maai a paikualna agiit laiin, 28 Tunglam a vaante Ama'n asuhdet laiin, Tuithuuh tuinaahte asuhdet laiin, 29 Tuite'n a thupiaah apaikheel theihlouhna diingva, Ama'n tuilianpi gamgi asiamsah laiin, Leilung kingahna aguat laiin, 30 Hulaiin a kawmah khutsiam natongmi bangin ka na umta hi: Huleh ni chinin Amah nuamna ka hi a, A ma ah ka kipaah zingzing hi, 31 A leitung teentheihna mun ah ka nuam a, Huleh ka lungkimna chu mihing tate tungah aum hi. 32 Hujiahin tuin, Aw nanguh tate haw, hung ngaikhia un, Ajiahchu ka lampi tawnte mi hampha ahi uhi. 33 Thuhilhna ngaikhia unla, pil un, Huleh nelhsiah sih un. 34 Ka thu ngaikhia a, Ka kotpi a ni chin a veeng a, Ka kotkhaah khuamte a ngaah zing mi chu ahampha hi. 35 Ajiahchu koipouh kei hung mu in hinna amu a, Huleh LALPA deihsahna aloh hi; 36 Hizongleh koipouh ka tunga tasual chu amah hinna suliam ahi, Keimah hung hua zousiah in sihna alungsiat uhi," chiin.
Pilna Chialna
1 Pilna in a inn abawlta a, A khuam sagihte aphutta hi. 2 A gante athatta a, A uain atohpolh a, A dohkaan zong adoh zouta hi. 3 A nungaahte asawldohta a, Khopi mun sangpeente tungah akikou a, 4 "Mimawl koipouh hi lamah hung kihei hen," chiin. Heetsiamna tasam tungtaang ahihleh, ama'n a kawmah, 5 "Hung inla, ka tanghou ne inla, Huleh ka uain halsa dawn in, 6 Ngolna taaisan inla, hing in, Huleh heetsiamna lampi ah pai in. 7 Mimusittu taaihilh in zumna akituaah a, Huleh migilou taai in liamna akiloh hi. 8 Mimusittu taaihilh sin, huchilou inchu ahung ho kha diing hi; Mipil taai in, huchiin ahung ngaina diing hi. 9 Mipil kawmah thuhilhna pia in, huchiin ahung pil deuhdeuh diing; Midih hilh in, huchiin siamna lamah ahung kisot deuhdeuh diing hi. 10 LALPA lau chu pilna bul ahi a, Huleh Siangthoupa heetna chu heetsiamna ahi. 11 Ajiahchu keimah jiahin na nite suhtam ahi diing a, Huleh na damsung kumte behlap ahi diing hi. 12 Na pil leh, nang a diinga pil na hi a, Hizongleh mi na simmoh leh nangmah chauhin na po diing hi," achi hi.
Mingol Lampi
13 Numei ngol chu ahi selsul a; Amaw a, huleh bangmah ahe sih. 14 Ajiahchu a inn kotkhaah ah atou a; Khopi mun sangpeente a touphah tungah, 15 A lampi va tangtaha mipailehte kou diingin: 16 "Amawl taphot hi lamah hung kihei heh," achi a, Huleh heetsiamna tasam tungtaang ahihleh ama'n a kawmah, 17 "Tui kigu chu ahum a, Huleh tanghou aguuha neeh chu anuam hi," achi hi. 18 Hizongleh ama'n misite hutah ah aum chih leh Amahnu mikouhte chu Sheol mun thuuhtah ah aum uh chih ahe sih hi.
Solomon Thupilte
1 Solomon thupilte: Tapa pil in pa akipaahsah a, Hizongleh tapa ngol chu a nu lungngaihna ahi. 2 Giitlouhna a muh goute in lawhna anei sih a, Hizongleh dihtatna in sihna apatin ahundoh hi. 3 LALPA'N midihtat hinna akial aphal sih diing a, Hizongleh migiloute lunggulh chu anualsah hi. 4 Khut dawngdataha bawlmi agenthei a, Hizongleh mitaima khut in asuhausa hi. 5 Nipi laia lakhawmpa chu tapa pil ahi a, Hizongleh buhlaah laia ihmu chu tapa mualphouna tuntu ahi. 6 Vangpiaahnate chu midihtat lutung ah aum a, Hizongleh migilou kam in hiamngapna aphualgu hi. 7 Midihtat heetzingna chu vangpiaahna diing ahi a, Hizongleh migilou min chu amuatmang diing hi. 8 Lungtang a pil in thupiaahte asaang diing a, Hizongleh mingol kamtam chu apuuh diing hi. 9 Dihtattaha pai mi chu bittahin apai a, Hizongleh a lampite sukholoutu chu muhdohin aum diing hi. 10 A mit a chiamchihna bawltu in mangbatna aumsah a, Hizongleh mingol kamtam chu apuuh diing hi. 11 Midihtat kam chu hinna tuikhuuh ahi a, Hizongleh migilou kam in hiamngapna aphualgu hi. 12 Huatna in kihauna atohthou a, Hizongleh lungsiatna in sual zousiah akhuhkhum hi. 13 Heetsiamna nei mi muuh ah pilna akimu a, Hizongleh chiangpum chu heetsiamna neilou mi nungjaang a diing ahi. 14 Mipilte'n heetna akhol va, Hizongleh mingol kam in siatna anaih hi. 15 Mihausa hauhsatna chu a kulhpi kiptah ahi a; Migentheite siatna chu a gentheihna uh ahi. 16 Midihtat tohgimna in hinna atun a, Migilou tohgah in sualna atun hi. 17 Thuhilhna pom mi chu hinna lampi ah aum a, Hizongleh taaihilhna deihlou mi'n paimangna atut hi. 18 Huatna phualmi in juauna muuh anei a, Huleh mi soisiatna thehdalh mi chu mingol ahi. 19 Thu tampi lahah sualna asam sih a, Hizongleh a muuh khaam thei mi chu apil ahi. 20 Midihtat lei chu dangka kiteeldoh bang ahi a, Hizongleh migilou lungtang chu mantaah ahi sih hi. 21 Midihtat muuh in tampi avaah a, Hizongleh mingolte chu pilna tasamin asi uhi. 22 LALPA vangpiaahna in asuhausa a, Huleh lungkhamna abehlap sih hi. 23 Mingol a diingin giitlouhna bawl chu kisuhhalhna bang ahi a, Hizongleh pilna chu heetsiamna nei mi a diingin kisuhhalhna ahi. 24 Migilou launa amah tungah ahung rung diing a, Hizongleh midihtat sildeih chu piaah ahi diing hi. 25 Piingpei ahung nun chiangin migilou chu aum nawnta sih a, Hizongleh midihtat in hu kumtuang suangphuum anei hi. 26 Ha a diinga uain thuuh, huleh mit a diinga meikhu apoi bangin, Mithasia chu a sawltute a diingin apoi hi. 27 LALPA launa in damsung asusau a, Hizongleh migiloute damkum chu suhtom ahi diing hi. 28 Midihtatte kinepna chu kipaahna ahi diing a, Hizongleh migiloute lametna chu amangthang diing hi. 29 Midih a diingin LALPA lampi chu haatna ahi a, Hizongleh beimangna chu giitlouhna natongte kawmah ahung diing hi. 30 Midihtat chu suhliing ahi mawngmawng sih diing a, Hizongleh migiloute'n lei aluah sih diing uhi. 31 Midihtat kam in pilna ahung tut a, Hizongleh manlouh soina lei chu saatkhiah ahi diing hi. 32 Midihtat muuh in pomtheih diing ahe a, Hizongleh migiloute kam in manlouh asoi hi.
Mutih leh Migilou Kibatlouh Daan
1 Buuhna dihlou chu LALPA a diingin kihdahhuai ahi a, Hizongleh buuhna suang kileepdaan dih chu akipaahpih jawng ahi. 2 Kiletsahna ahung um chiangin mualphouna ahung um a, Hizongleh mi kingaingiamte kawmah pilna aum hi. 3 Midihte dihna in amahuh apui diing a, Hizongleh mitasualte lepchiahna in amahuh asumang diing hi. 4 Thangtawmna ni in hauhsatna aphatuam sih, Hizongleh dihtatna in sihna apat ahundoh hi. 5 Mi soiseelbei dihtatna in a lampi asutang diing a, Hizongleh migilou chu amah giitlouhna ngeei ah apuuh diing hi. 6 Midihte dihtatna in amahuh ahundoh diing a, Hizongleh miginumloute chu amahuh deihna gilou mah ah matin aum diing uhi. 7 Migilou chu asih chiangin a kinepna amang diing a, Huleh mihaatte kinepna chu amang diing hi. 8 Midihtat chu mangbatna apatin hutdohin aum a, Huleh migilou in amah mun atang hi. 9 Mi lepchiah in a kam in a innveeng asusia a, Hizongleh heetna jaalin midih chu hutdohin aum diing hi. 10 Midihtatte a diinga sil apai hoih laiin khopi akipaah a, Huleh migiloute abeimang chiangun kipaaha kikouna aum hi. 11 Midihte vangpiaahna jaalin khopi chu tawisangin aum a, Hizongleh migiloute kam in hichu asuchim hi. 12 pilna neilou mi in a innveeng amusit a, Hizongleh heetsiamna nei mi chu aum kinken hi. 13 Thusoisawn lehleh in thuguuh asoidoh a, Hizongleh miginum in thu aiim hi. 14 Lemguatna um louhna ah mipite apuuh a, Hizongleh lemguattu tamna ah bitna aum hi. 15 Aheetlouh mi diinga mohpotu chu abuai ngeeingeei diing a, Hizongleh heetlouhmi a diinga mohpuaahna deihlou chu amuang hi. 16 Mihehpihsiam numei in zahumna atang a, Hizongleh zahngailou mi in hauhsatna atu tentun hi. 17 Mizahngaithei in amah hinna mahmah tungah sil hoih abawl a, Hizongleh mitatsia in amah tahsa mah asubuai hi. 18 Migilou in dihloutahin thaman amu a, Hizongleh dihtatna tuhpa'n kipaahman dihtah amu diing hi. 19 Dihtatna in hinna atut mahbangin, Koipouh gilou deih in amah ngeei sihna diingin adelh hi. 20 Lungtang manlouh pomite chu LALPA diingin kihdahhuai ahi va, Hizongleh a lampi va soiseelbeite chu a kipaahna ahi. 21 Matheilouin, migiloute chu gawtlouhin aum sih diing va, Hizongleh midihtatte chihaahte chu hutdohin aum diing uhi. 22 Voh naahkua a sana vuui bangin, Geeldihtheihna tasam numei meelhoih chu huchibang ahi hi. 23 Midihtatte deihjawng chu sil hoih chauh ahi a, Hizongleh migiloute lametna chu thangtawmna ahi. 24 Hawmdalh zinga pung deuhdeuh mi aum a, Hizongleh ahuntawh kai a iit puma taahsap lam manoh deuhdeuh aum hi. 25 Silphal mi hinna chu akhangtou diing a, Huleh koipouh tuibuaah chu amah zong buaahin aum diing hi. 26 Koipouh buhlebaal iit chu mi'n ahaamsiat diing va, Hizongleh vangpiaahna chu a juaahtu lu tungah aum diing hi. 27 Koipouh thanuamtaha sil hoih hawl in deihsahna amu a, Hizongleh giitlouhna hawl chu amah tungah ahung tung diing hi. 28 Koipouh a hauhsatna muang chu apuuh diing a, Hizongleh midihtat chu singbaa pha bangin aduahsuah diing hi. 29 Koipouh mahni innsung sumangbang in huih guaah aluah diing a, Huleh mingol chu lungtang a pilpa suaah ahi diing hi. 30 Midihtat gah chu hinna singkung ahi a, Huleh koipouh hagau man chu mipil ahi. 31 Midihtatte'n lei a amuh diing dawi amuh uh leh, Bangchituhin migilou leh misualte'n amu diai!
1 Koipouh thununna ngaina in heetna angaina a, Hizongleh taaihilhna hua chu mingol ahi. 2 Mi hoih in LALPA deihsahna aloh a, Hizongleh giitlouhna vanzat a nei mi chu Ama'n siamlouh atangsah diing hi. 3 Giitlouhna in mi suhdetin aum sih a, Hizongleh midihtatte zung chu akiliing sih diing hi. 4 Numei hoih chu a pasal a diingin lallukhuh ahi a, Hizongleh zumhuaina bawlnu chu a pasal guhte ah muatna bang ahi. 5 Midihtatte ngaihtuahna chu adih a, Hizongleh migiloute lemguatna chu heemna ahi. 6 Migilou thute in sisan suah diingin ataang a, Hizongleh midihte kam in amahuh ahundoh diing hi. 7 Migiloute paihkhiahin aum va, aum nawn sih uhi, Hizongleh midihtatte inn chu ading diing hi. 8 Mi khat chu a heetsiamna dungjuiin phatin aum diing a, Hizongleh lungtang a soihah chu muhsit ahi diing hi. 9 Mahni kingailoupi-a tanghou neilou saangin, Mi ngaihsanglouha um a suaah neih ahoihjaw hi. 10 Midihtat in a ganta hinna angaikhawh a, Hizongleh migiloute zahngaihna neemtah zong agilou hi. 11 Koipouh amah lou kihoh chu tanghou in atai diing a, Hizongleh sil bangmalou deih mi chu heetsiamna bei ahi. 12 Migilou in migiloute gaallaah van adeihgoh a, Hizongleh midihtatte zung in gah asuah hi. 13 Migilou chu a muuh a tatsualna in a-awh a, Hizongleh midih chu mangbatna apatin asuaahta diing hi. 14 Mi khat chu a kamsuah gah sil hoih in atai diing a, Huleh amah khut natoh ditna chu amah kawm mah a piaah ahi diing hi. 15 Mingol lampi chu amah mitmuhin adih a, Hizongleh lemguatna ngaikhemi chu mipil ahi. 16 Mingol lungthahna chu akihe pah ngaal a, Hizongleh milemthei in zumna aphual hi. 17 Koipouh thutah soi in dihtatna aensah a, Hizongleh heetpihtu dihlou in heemna aensah hi. 18 Naamsau a sut banga kintaha thu soi pahpah aum a, Hizongleh mipil lei in asudam hi. 19 Thutah muuh chu kumtuanga diingin suhkip ahi diing a, Hizongleh lei juau chu mitphetkaal sung giap a diing ahi. 20 Silgilou suangtuahna lungtang ah heemna aum a, Hizongleh lemna thu geeltute diingin kipaahna aum hi. 21 Midih a diingin lungkhamna atung sih diing a, Hizongleh migiloute chu giitlouhna in adim diing uhi. 22 Muuh juauthei chu LALPA a diingin kihdahhuai ahi a, Hizongleh dihtaha bawlte chu a kipaahna ahi. 23 Milemthei in heetna aphual a, Hizongleh mingolte lungtang in ngolna aphuangdoh hi. 24 Mithanuamte khut in vai ahawm diing a, Hizongleh mithasia chu phuutluiha nna tohsah ahi diing hi. 25 Mihing lungtang a lunghihmohna in mi akuunsah a, Hizongleh thu hoih in akipaahsah hi. 26 Midihtat in a lawm diingte pilvaangtaha ateel diing ahi, Ajiahchu migilou lampi in amahuh apuimang hi. 27 Mithasia in a sapeelna sa mat aem sih a, Hizongleh mihing silneih luui chu thanopna ahi. 28 Dihtatna lampi ah hinna aum a, Huleh hu lampi ah sihna aum sih hi.
1 Tapa pil in a pa thuhilhna angaikhia a, Hizongleh mimusittu in taaina angaikhe sih hi. 2 Mi'n a kam gah in sil hoih ane diing a, Hizongleh tasualtu hinna in hiamngapna amu diing hi. 3 Koipouh a kam veeng in a hinna aveeng a, Hizongleh a muuh lianpi kaah in siatna atang diing hi. 4 Mithasia hinna in alunggulh a, huleh bangmah anei sih hi; Hizongleh mithanuamte hinna chu thausahin aum diing hi. 5 Midihtat in juau ahua a, Hizongleh migilou chu ahuathuai a huleh zumhuaiin agamtaang hi. 6 A lampi a soiseelbei mi chu dihtatna in aveeng a, Hizongleh giitlouhna in misual asupuuh hi. 7 Mi amah leh amah hausa hia kibawl, ahiinlah bangma neilou aum a, Genthei hia kingai, ahihvaanga hausa mahmah aum hi. 8 Mihing hinna tatna chu a hauhsatna ahi a, Hizongleh migenthei in taaina angaikhe sih hi. 9 Midihtatte vaah ataang a, Hizongleh migiloute thaumei chu suhmit ahi diing hi. 10 Kiletsahna in kihauna aumsah giap a, Hizongleh lemguatna saangtute kawmah pilna aum hi. 11 Dihtatlouhna tungtawna hauhsatna muh chu akiam diing a, Hizongleh tohgimna a kholkhawmtu chu apung diing hi. 12 Kinepna suhvaigeih in lungtang anasah a, Hizongleh duhthusaam ahung pichin chiangin, hichu hinna singkung ahi. 13 Koipouh thu musit chu suhsiat ahi diing a, Hizongleh thupiaah lau chu kipaahman piaahin aum diing hi. 14 Mipil thuhilhna chu hinna tuinaah ahi a, Sihna thaangte apat pawtdohna diing ahi. 15 Heetsiamna hoih in deihsahna apia a, Hizongleh tasualte lampi chu ahahsa hi. 16 Milemhe taphot in heetna in sil abawl a, Hizongleh mingol in ngolna aphoudoh hi. 17 Thupotu gilou chu mangbatna ah apuuhluut a, Hizongleh thupotu ginum in damna atut hi. 18 Gentheihna leh mualphouna chu thununna deihloutu kawmah ahung tung diing a, Hizongleh taaihilhna ngaihsah chu paahtawiin aum diing hi. 19 Duhthusaam pichin-a um chu hinna a diingin anuam a, Hizongleh mingolte diingin giitlouhna paisan chu akihdahhuai hi. 20 Koipouh mipilte toh kithuah chu ahung pil diing a, Hizongleh mingolte toh kithuah chu suhmang ahi diing hi. 21 Giitlouhna in misualte adelh a, Hizongleh midihtatte chu sil hoih a thuhin aum diing uhi. 22 Mi hoih in a tate tate kawmah gou anusia a, Hizongleh misual hauhsatna chu midih diinga kholkhawmin aum hi. 23 Migenthei in alet lou ah an tampi aum a, Hizongleh vaihawmna dihlou in asusia hi. 24 Koipouh a chiang kheetin atapaahuaa, Hizongleh koipouh a ta lungsiat in ahuntahin athunun hi. 25 Midihtat in a hinna suhtaina diingin ane a, Hizongleh migiloute gil chu akial diing hi.
1 Numei pil in a inn abawl a, Hizongleh angol in amah khut ngeei in huchu aphelkhia hi. 2 Dihtaha gamta in LALPA alau a, Hizongleh a lampite a lamkhial in Amah amusit hi. 3 Mingol kam ah kiletsahna chiang aum a, Hizongleh mipilte muuh in amahuh akeembit diing hi. 4 Bawngtal um louhna ah gankuang asiang a, Hizongleh pun seemna chu bawngtal haatna jiahin aum hi. 5 Heetpihtu ginum chu ajuau sih a, Hizongleh heetpihtu dihlou in juau asoidoh diing hi. 6 Mimusittu in pilna ahawl a, amu sih hi, Hizongleh heetna chu heetsiamna neitu diingin baihlamtah ahi. 7 Mingol umna apatin pawt in, Huchilou inchu heetna thute na mu sih diing hi. 8 Milemthei pilna chu a lampi heetsiam ahi, Hizongleh mingolte ngolna chu heemna ahi. 9 Mingolte'n sual anuihsan va, Hizongleh midihtatte lahah deihsahna aum hi. 10 Lungtang in amah khaatna mah ahe a, Huleh mikhual in a kipaahna akikoppih sih hi. 11 Migilou inn chu suhpuuhin aum diing a, Hizongleh midih puaninn chu akhanghoih diing hi. 12 Mihing a diinga dih hileh kilawm lampi aum a, Hizongleh hu lampi tawpna chu sihna lampi ahi. 13 Nuihna nachiang ah zong lungtang chu dahin aum meithei a, Huleh gualnop tawpna chu lungngaihna ahi meithei hi. 14 Lungtang a nungtolhmi chu amah ngaihdaan in adim diing a, Hizongleh mi hoih chu amah a hoihna in suhtaiin aum diing hi. 15 Mimawl in thu tengteng agingta a, Hizongleh milemthei in a paina hoihtahin aen hi. 16 Mipil in alau a, huchiin gilou ataaisan a; Hizongleh mingol chu ahuham a, huleh akimuanghi. 17 Koipouh lungthahbaih chu ngoltahin agamta a, Huleh ngaihtuahna gilou mangmi chu huatin aum hi. 18 Mimawlte'n ngolna aluah va, Hizongleh lemtheimite chu heetna khuhsahin aum uhi. 19 Migilou chu mi hoih ma ah akuun a, Huleh migilou chu midihtat kotkhaah phungte ah. 20 Migenthei chu amah innveeng tanpha muhdahin aum a, Hizongleh mihausa in lawm tampi anei hi. 21 Koipouh amah innveeng musit in sual abawl a, Hizongleh migenthei khotuahtu chu ahampha hi. 22 Silgilou suangtuahtute'n asukhial sih va ahiaimah? Hizongleh khotuahna nasatah leh thutah chu sil hoih ngaihtuahtute a diing ahi. 23 Tohgimna zousiah ah punna aum a, Hizongleh kam a soithoh chauh in jawnna atut hi. 24 Mipilte lallukhuh chu a hauhsatna uh ahi a, Mingolte ngolna chu ngolna chauh ahi. 25 Heetpihtu dihtah in hinna ahunkhia a, Hizongleh juau soitu chu heem haat ahi. 26 LALPA launa ah muanna dettah aum a, Huleh a tate'n kihuumbitna mun anei diing uhi. 27 LALPA lau chu hinna tuinaah ahi a, Mi khat in sihna thaangte apelh theihna diingin. 28 Mi tampi umna ah kumpipa loupina aum a, Hizongleh mi um louhna ah lalta beimangna aum hi. 29 Lungthah hah mi in heetsiamna nasatah anei a, Hizongleh mi lungtom in ngolna atawisang hi. 30 Lungtang dam chu tahsa diinga hinna ahi a, Hizongleh thangsiatna chu guhte diinga muatna ahi. 31 Koipouh migenthei bawlgenthei chu a Siamtu simmoh ahi a, Hizongleh migenthei hehpihtu in Amah apaahtawi hi. 32 Migilou chu amah giitlouhna a paihdohin aum a, Hizongleh midihtat in chu a sihna ah bitna anei hi. 33 Pilna chu heetsiamna neimi lungtang ah akhawl a, Hizongleh mingolte lungtang a um chu heetin aum hi. 34 Dihtatna in nam atawisang a, Hizongleh sual chu nam chin a diingin minsiatna ahi. 35 Kumpipa deihsahna chu a suaah pilvaang tungah aum a, Hizongleh a lungthahna chu mualphouna umsahtu tungah aum hi.
1 Dawnna neem in lungthahna anohmang a, Hizongleh thusoi khauh in lungthahna asupuang hi. 2 Mipilte lei in heetna dihtahin azang a, Hizongleh mingol kam in ngolna atehdoh hi. 3 LALPA mit chu mun chinteng ah aum, A sia leh apha enin. 4 Lei hiseel chu hinna sing ahi a, Hizongleh hutah a thutah heikawina in lungsim asuhkeeh hi. 5 Mingol in a pa thununna amusita, Hizongleh koipouh taaihilhna ngaihsah chu milemthei ahi. 6 Midihtat inn sungah gou tampi aum a, Hizongleh migilou summuhna chu buaina ahi. 7 Mipilte muuh in pilna asudalha, Hizongleh mingol lungtang in huchibangin abawl sih hi. 8 Migiloute kithoihna chu LALPA diingin kihdahhuai ahi a, Hizongleh midihte haamteina chu a kipaahna ahi. 9 Migilou lampi chu LALPA a diingin kihdahhuai ahi a, Hizongleh dihtatna juimi chu Ama'n alungsiat hi. 10 Thununna hahsa chu lampi taaisantu a diing ahi a, Huleh taaihilhna hotu chu asi diing hi. 11 Sheol leh Abaddon chu LALPA ma ah aum a, Mihing tate lungtang bangchituhin aumta diai! 12 Mimusittu in amah taaihilhpa angaina sih a, Mipilte kawmah zong achiah sih diing hi. 13 Lungtang kipaah in meet kipaah asiam a, Hizongleh lungtang anat chiangin lungsim asuhkeeh hi. 14 Heetsiamna nei lungtang in heetna ahawl a, Hizongleh mingolte kam chu ngolna in akivaah hi. 15 Suhgima umpa ni zousiah chu ahoih sih a, Hizongleh lungtang a kipaahna nei mi'n ankuang aluizom zing hi. 16 Gou tampi neih a hutah a buai saangin, LALPA lau kawma gou tawmtakhat neih ahoihjaw hi. 17 Bawngtal vaahthau neeha hutah a kimuhdah saangin, Lungsiatna umna a antehlouhing neeh ahoihjaw hi. 18 Lungthah haatmi in kihauna atohthou a, Hizongleh lungthah hah in kihauna asudaai hi. 19 Mithase lampi chu lingdaai bang ahi a, Hizongleh midihtat lampi chu apheia siam ahi. 20 Tapa pil in pa akipaahsah a, Hizongleh mingol in a nu amusit hi. 21 Pilna tasam a diingin ngolna chu a nopsahna ahi a, Hizongleh heetsiamna neimi chu dihtahin apai hi. 22 Lemguatna tellouin siltupte chu beidonna ahi a, Hizongleh lemguattu tampi umna ah alohching uhi. 23 Mi khat in a kam a dawnna bangjeelin kipaahna anei a, Huleh ahuntaha thu kisoi hi bangchitaha hoih ahita eimah! 24 Hinna lampi chu mipil a diingin tunglam ah aum, Huchia nuailam a Sheol apat apawtdoh theihna diingin. 25 LALPA'N mikiliansah inn asuse diing a, Hizongleh Ama'n meithaite gamgi chu asuhdetsah diing hi. 26 Migilou ngaihtuahnate chu LALPA a diingin kihdahhuai ahi a, Hizongleh thu ngaihnophuaite chu asiangthou hi. 27 Punna a huaiham mi'n amah inn asubuai a, Hizongleh golhguuhna homi chu ahing diing hi. 28 Midihtat lungtang in dawn daan diing angaihtuah a, Hizongleh migiloute kam in sil hoihlou asungkhia hi. 29 LALPA chu migiloute apatin gamlapi ah aum a, Hizongleh midihtatte haamteina angaikhia hi. 30 Maaitai in lungtang asunuam a, Huleh thutut hoih in guhte asuthau hi. 31 Hinna taaihilhna ngaikhe bil chu Mipilte lahah ateeng zing diing hi. 32 Koipouh thununna deihlou in amah hinna amusit a, Hizongleh koipouh taaihilhna ngaikhia in heetsiamna amu hi. 33 LALPA lau chu pilna thuhilhna ahi a, Huleh zahumna ma ah kingaihngiamna aum hi.
1 Lungtang kisahkholhna chu mihing apat ahi a, Huleh lei a dawnna chu LALPA apat ahi. 2 Mihing lampi zousiah chu amah mitmuh in asiang a, Hizongleh LALPA'N ngaihtuahnate abuuh hi. 3 Na natohte LALPA kolsah inla, Huchiin na ngaihtuahte suhdetin aum diing hi. 4 LALPA'N sil zousiah Amah a diingin abawl a, Ahi, migiloute ngeei zong ni hoihlou a diingin. 5 Koipouh lungtang kiliansah taphot chu LALPA a diingin kihdahhuai ahi a, Matheilouin gawtlouhin aum sih diing uhi. 6 Khotuahna leh thutah in giitlouhna suhsiang ahi a, Huleh LALPA launa jaalin mi'n sual ataaisan hi. 7 Mi a umdaan in LALPA asuhkipaah chiangin, A meelmate tanpha amah toh kilemin abawl hi. 8 Dihloutaha summuh tampitah saangin Dihtatna a muh tawmtakhat ahoihjaw hi. 9 Mihing lungtang in a lampi aguanggalh a, Hizongleh LALPA'N a kalsuante apuisah hi. 10 Kumpipa muuh ah Pathian thutan aum a, Vaihawmna ah a kam akaahkhial sih hi. 11 Buuhna dih leh tehna dih chu LALPA a ahi a, Ip gihdaante zousiah Amah natoh ahi. 12 Kumpipate a diingin gilou bawl chu kihdahhuai ahi, Ajiahchu laltouphah chu dihtatna a suhkip ahi. 13 Muuh dihtatte chu kumpipate kipaahna ahi a, Huleh koipouh thudih soi chu angaina uhi. 14 Kumpipa lungthahna chu sihna thangkou tobang ahi a, Hizongleh mipil in asulungdam diing hi. 15 Kumpipa maaitaanna ah hinna aum a, Huleh a deihsahna chu guah nunung paai meilum tobang ahi. 16 Pilna muh chu sana saangin naah hoihjaw hina mei e! Huleh heetsiamna muh chu dangka saanga teel jawh diing ahi. 17 Midihte lamlian chu sil hoihlou taihsan ahi a; Koipouh a lampi veeng in a hinna aveengbit ahi. 18 Kiletsahna chu beimangna ma ah apai a, Huleh lungsim kiuangsah chu puuhna ma ah. 19 Mi kiliansahte toh gaallaah silte hawm saangin, Mijawngte toh lungsim kingaingiamtaha um ahoihjaw hi. 20 Koipouh khoningaitaha thu ngaihtuahin sil hoih amu diing a, Huleh koipouh LALPA muang chu mi hampha ahi. 21 Lungtang a pil chu milemhe akichi diing a, Huleh kamsiamna in jilna asupung hi. 22 Heetsiamna chu aneitu a diingin hinna tuinaah ahi a, Hizongleh mingolte kithununna chu ngolna ahi. 23 Mipil lungtang in a kam ahilh a, Huleh a muuh ah jilna abehlap hi. 24 Thu lungdamhuai chu khuaizu tobang ahi a, Hinna diinga hum leh guhte a diinga damna ahi. 25 Mihing a diinga dih hileh kilawm lampi aum a, Hizongleh hu tawpna chu sihna lampite ahi. 26 Koipouh atonggim in amah a diingin atonggim hi, Ajiahchu a gilkialna in nna atongsah hi. 27 Mimantheihlouh in silgilou atou doh a, Huleh a muuh ah meisa tobang aum hi. 28 Mithudihlou in kihauna atuh a, Huleh thusoisawn siausiautu in lawm hoihte asukhen hi. 29 Mihiamngam in a innveeng aheem a, Huchiin lampi hoihlou ah amah apui hi. 30 Ama'n dihtatlouhna silte suangtuah diingin amit asii-aat a, A muuh aloh in silgilou atungsah hi. 31 Lu samkaang chu dihtatna lampi a muha aum leh, Loupina lallukhuh ahi. 32 Koipouh lungthah hah chu mihaat saangin ahoihjaw a, Huleh koipouh amah lungsim thuzohmi chu khopi latu saangin. 33 Ai chu phei tunga saan ahi a, Hizongleh hutah a sil hung umdoh chu LALPA apat ahi.
1 Kihau kawma ankuang luina a dim inn saangin, Kituaahtaha neeh an khing kam khat ahoihjaw hi. 2 Suaah pil in mualphouna umsah tapa tungah vai ahawm diing a, Huleh unaute goutan lahah tan anei diing hi. 3 Suansiangna beel chu dangka a diing ahi a, huleh haaltuina meikhuuh chu sana a diing ahi, Hizongleh LALPA'N lungtangte aendih hi. 4 Giloubawltu in muuh tahloute angaihsah a; Mijuau in siatna soi lei lamah a bil adoh hi. 5 Koipouh migenthei musit in amah Siampa asimmoh ahi; Vangsiatna a kipaah mi chu gawtlouhin aum sih diing hi. 6 Tute chu teehsete diingin lallukhuh ahi a, Huleh tate loupina chu a pulepate uh ahi. 7 Thusoi kilawm mahmah leh mingol akimeh sih, Muuh juauthei chu lalta toh akilawm sih seem hi. 8 Golhguuhna chu a neitu mit ah suang mantam tobang ahi a, Akiheina lam phot ah ahau deuhdeuh hi. 9 Koipouh tatsualna khuh in lungsiatna ahawl a, Hizongleh koipouh thu khat veel soisoitu in a lawmte ngeeingeei asukhen hi. 10 Mingol zavei vuaahna saangin Mipil khat vei taaihilhna aluut thuuh jaw hi. 11 Migilou in helna chauh ahawl a, Hujiahin a kawmah palai tatsia sawl ahi diing hi. 12 Mingol angol laitah tuahkhaah saangin, Vompi a nou kilaahsah tuaahkhaah auuthuai jaw hi. 13 Koipouh hoihna giitlouhna a thuh chu Giitlouhna in a inn ataaisan sih diing hi. 14 Kihaau kipatna chu mi'n tui ahahkhiah bang ahi; Hujiahin kihauna aum main kinial tawp in. 15 Koipouh migilou siamtangsah a, huleh koipouh midih siamlouhtangsah chu Anihun LALPA a diinga kihdahhuai ahi. 16 Mingol in pilna deihna lungtang aneihlouh jiahin, Pilna man diing sum a khut a aum bang aphatuam diai? 17 Lawm in chu bangchihlaipouhin alungsiat a, Huleh sanggam chu vangsiatna ni a diinga piang ahi. 18 Heetsiamna tasam mi'n thuchiamna in a khut apia a, Huleh a lawmlegualte lahah mohpotu in apang hi. 19 Tatsualna ngaina in kihau angaina a, Huleh koipouh a kotkhaahpi tawisangin siatna ahawl hi. 20 Koipouh lungtang heemtat nei in sil hoih amu sih a, Huleh koipouh lei thulimlou nei chu giitlouhna ah apuuh hi. 21 Koipouh mingol hing in a lungkhamna diingin ahing a, Huleh mingol hingtu in nopsahna anei sih hi. 22 Lungtang kipaah in damna ahung tun a, Hizongleh lungsim hasia in guhte agosah hi. 23 Vaihawmna lampite sukawi diingin Migilou in a puannuai apatin golhguuhna ala hi. 24 pilna chu heetsiamna neimi ma ah aum a, Hizongleh mingol mit chu kawlmong ah aum hi. 25 Tapa ngol chu a pa a diingin lungkhamna ahi a, Huleh amah hingtunu a diingin khaatna ahi. 26 Midih gawt lah ahoih sih a, Laltate athudih jiahva jeep zong ahoih saam sih hi. 27 Koipouh a thusoi a kisuum in heetna anei a, Huleh lungsim tawldam nei mi chu heetsiamna nei mi ahi. 28 Mingol tanpha haamloua aum chiangin mipil a ngaih ahi a, Huleh koipouh a muuh chih chu heetsiamna neimi a sim ahi hi.
1 Mi amah leh amah kituamkoih in, amah deihdaan chauh ahawl a, Pilna dih adoudaal hi. 2 Mingol chu heetsiamna ah akipaah sih a, Hizongleh a lungsim aphuandoh chauh ah akipaah ahi. 3 Migilou ahung chiangin muhsitna zong ahung um ngaal a; Huleh minsiatna ahung chiangin zumna ahung umhi. 4 Mihing kam a thute chu tui thuuhtah ahi a, Huleh pilna tuinaah chu luuita luang ahi. 5 Migilou deihsah ahoih sih a, Vaihawmna a midihtat paihkhiah zong ahoih sih hi. 6 Mingol muuhte chu kinialna ah aluut a, Huleh a kam in jeepna akou hi. 7 Mingol kam chu amah manthaaina ahi a, Huleh a muuh chu a hinna thaang ahi. 8 Thusoisawn lehleh thute chu an tuuituaahtah bang mei ahi a, Huleh tahsa sungnung peen lamah aluutsuh uhi. 9 Amah natoh a dawngda chu Sumangtu loupitah a diingin sanggam ahi. 10 LALPA min chu innsang dettah ahi a, Midihtat a sungah ataailuut a, abit hi. 11 Mihausa hauhsatna chu a khopi dettah ahi a, Amah mah ngaihdaan in kulhbaang sangtah bang ahi. 12 Manthaaina ma ah mihing lungtang akiuangsah a, Hizongleh zahumna ma ah kingaihngiamna aum hi. 13 Koipouh thu ajaah ma a dawng chu, Amah a diingin ngolna leh zumna ahi. 14 Mihing lungsim in amah haatlouhna athuaahzou diing a, Hizongleh lungsim liam chu koi in ahiai thuaah zou diing? 15 Milemthei lungtang in heetna amu a, Huleh mipil bil in heetna ahawl hi. 16 Mi a silpiaah in amah diingin umna abawlsah a, Huleh miliante ma ah amah chu apui hi. 17 Koipouh a siamna thu soi masa chu dihin akilang hi, Midang khat ahung a, aetchian masiahin. 18 Aisaan in kihauna asutawp a, Huleh mihaatte kikaal akhen hi. 19 Sanggam khat suhlungkimlouh khaah zohkiit diing chu khopi kiptah laah saangin zong ahahjaw a, Huleh kinialnate chu kulhpi siih jawlte tobang ahi. 20 Mihing gil chu amah kam gah a suhtaiin aum diing a, A muuh a silpiang in suhtaiin aum diing hi. 21 Sihna leh hinna chu lei silbawltheihna ah aum a, Huleh a ngainate'n a gah ane diing uhi. 22 Koipouh ji mu in sil hoih amu a, Huleh LALPA deihsahna atang ahi. 23 Genthei in kamdam a ngetna amang a, Hizongleh mihausa in khauhtahin adawng hi. 24 Koipouh lawm tampi nei in siatna atuaah thei a, Hizongleh sanggam saanga kilamnaihpih jaw lawm khat aum hi.
Hinna leh Gamtat Tungtaang
1 Migenthei a dihna a gamta chu A muuh a manlouh soileh mingol saangin ahoihjaw hi. 2 Huleh zong heetna beia um chu hinna a diingin ahoih sih a, Huleh koipouh a keeng a kintat chu atasual hi. 3 Mihing ngolna in a lampi asukholou a, Huleh a lungtang LALPA tungah akiphin hi. 4 Hauhsatna in lawm tampi asiam a, Hizongleh migenthei chu a innveengpa apatin khentuamin aum hi. 5 Heetpihtu dihlou chu gawtlouhin aum sih diing a, Huleh koipouh juau soi chu asuaahta sih diing hi. 6 Mi tampi in miliante deihsahna ahawl diing va, Huleh koipouh silpiaah petu chu mi chin lawm ahi jeel hi. 7 Migenthei chu a unaute zousiah in ahua va, Bangchitaha nasajawin ahiai a lawmte'n agamlaatsan diing uh? Thu tampi toh adelh a, hizongleh amah un anusia uhi. 8 Koipouh pilna mu in amah hinna akilungsiat a, Koipouh heetsiamna keem in sil hoih amu diing hi. 9 Heetpihtu dihlou chu gawtlouhin aum sih diing a, Huleh juausoitu chu abeimang diing hi. 10 Nopsatah a hin chu mingol a diingin akilawm sih a, Laltate tunga suaah in thu aneih kilawmlah na diaah inchia. 11 Mi a lemheetna in amah alungthah hahsah a, Tatsualna achiahkaan chu a loupina ahi. 12 Kumpipa lungthahna chu huumpibahnei hawh bangmai ahi a, Hizongleh a deihsahna chu hampa tunga daaitui tobang ahi. 13 Tapa ngol chu a pa manthaaina ahi a, Huleh ji haanhaat chu guahju tawplou ahi. 14 Inn leh hauhsatnate chu pulepate apat goutan ahi va, Hizongleh ji lemhetah chu LALPA apat ahi. 15 Thasiatna in ihmut tuuina atun a, Huleh mithasia in gilkial athuaah diing hi. 16 Koipouh thupiaah jui in a hinna akeemhoih a, Hizongleh koipouh a lampite a ngaihsam chu asi diing hi. 17 Koipouh migenthei hehpih in LALPA leiba aguan a, Huleh Ama'n a silpiaahte aditkiit diing hi. 18 Kinepna aum laiin na tapa chu sawi inla, Huleh na hinna in asih diing phal sih heh. 19 Nasataha lungthahbaih mi in gawtna athuaah diing hi, Ajiahchu vahundoh mahlehchin na hutdoh kiit jeel angai diing hi. 20 Lemguatna ngaikhia inla, huleh thununna pom in, Na mabaan a na hung pil theihna diingin. 21 Mihing lungtang ah tohguan tampi aum a, Hizongleh LALPA lemguatna peentah chu ading diing hi. 22 Mi khat a sil kideih chu chitna ahi a, Huleh migenthei chu mijuau saangin ahoihjaw hi. 23 LALPA lau in hinna atun a, Huleh koipouh hikhu nei chu taitahin akhawl a; Sil hoihlou vehin aum sih diing hi. 24 Mithasia in a khut a kuang sungah aphuum a, A kam chiang natan adomtou peih sih hi. 25 Mimusittu vua in, huchiin mimawl ahung pilvaang diing: Heetsiamna nei mi taaihilh in, huchiin heetna ahung hesiam diing hi. 26 Koipouh a pa sugim a, huleh a nu delhmang chu Mualphouna umsahtu leh minsiatna tun tapa ahi. 27 Ka tapa, thuhilhna ngaihkhiah na tawp ngeeingeei leh, Heetna thute apat na peetmang ngaal diing hi. 28 Heetpihtu mantheihlouh in vaihawmna amusit a, Huleh migiloute kam in giitlouhna anawmvalh hi. 29 Vaihawmna chu mimusittute a diinga bawlkholh ahi a, Huleh jeepna chu mingol nungjaang a diingin ahi.
1 Zu chu simmohtu khat ahi a, Zu chiih zong kisual bungbungna ahi a, Huleh koipouh hukhu a heema um phot chu apil sih hi. 2 Kumpipa lungthahna chu huumpibahnei hawh tobang ahi a, Koipouh amah suthangtawm in amah hinna mahmah tungah asusual hi. 3 Kihauna a panlouh chu mihing a diingin zahumna ahi a, Hizongleh mingol taphot chu akinial diing uhi. 4 Mithasia in khovot jiahin lou lei alet peih sih a, Hujiahin pawltaah chiangin khut adoh diing a, bangmah anei sih hi. 5 Mihing lungtang a lemguatna chu tui thuuhtah bang ahi a, Hizongleh heetsiamna nei mi in huchu apholhdoh diing hi. 6 Mi tamjaw in amahuh hoihna chiat aphuangdalh va, Hizongleh miginum koi in ahiai mu zou diing? 7 Midih chu amah dihna ah akhoheia; Amah nungin a tate ahampha uhi. 8 Vaihawmna laltouphah a tou kumpipa'n Amit in giitlouhna zousiah athehmang hi. 9 Koi in ahiai, "Ka lungtang ka susiangthou a, Ka sualna apatin ka siangthou," chi thei diing? 10 Buuhna chi tuamtuam leh tehna chi tuamtuam, Anihun LALPA a diingin akihdahhuai hi. 11 Naupang natanpha a silbawl ah amijia heet ahi, A natoh asiangthou aha, adih aha ahihin zong. 12 Khojaahna bil leh muhna mit, Anihun LALPA'N anabawl ahi. 13 Ihmut khelel sin, huchilou inchu na jawng kha diing hi; Na mit hah in, huchiin tanghou in na tai diing hi. 14 A leitu in, "Ahoih sih, ahoih sih," achi a, Hizongleh lampi a achiah nungin akisahtheihpih hi. 15 Sana aum a, rubi suang tampi zong, Hizongleh heetna muuh chu suangmantam luultah ahi. 16 Heetlouhmi a diinga mohpotu puan chu la in, Huleh numei mijawlsiamnu a diinga mohpua a pang ahihleh, a heetpihtu diingin hu puan chu la in. 17 Heem a muh tanghou chu mi khat a diingin ahum a, Hizongleh anungin a kam suanghuum in adim diing hi. 18 Tohguantaphotchu lemguatna a suhkip ahi a; Lemguatna piltah in gaal bawl in. 19 Thusoisawn lehleh mi in thuguuhte asoidoh hi; Hujiahin a muuh a miheemphat toh kithuah sin. 20 Koipouh a nu aha, a pa aha haamsiat taphot chu A thaumei mun mialtawp ah suhmit ahi diing hi. 21 Gou akipatna a pung pah hulhul chu Atawpna ah vangpiaahin aum sih diing hi. 22 "Gilou chu ka thuh mei diing," chi sin; LALPA ngaah in, huchiin Ama'n ahung hunkhe diing hi. 23 Buuhna chi tuamtuam chu LALPA a diingin kihdahhuai ahi a, Huleh tehna dihlou ahoih sih hi. 24 Mihing vaahlehna chu LALPA apat ahi a, Huchi ahihleh mihing in a lampi bangchidaanin ahesiam thei diai? 25 Mi khat a diingin sil khat ah kinohtaha, "Asiang ahi," chih pah chu thaang ahi, Huleh anung chianga a kichiamna dohchian kiit zong. 26 Kumpi pil in migiloute ajaapmang a, Huleh a tungvah buhvuaahna kaangtalai keeng azang hi. 27 Mihing lungsim chu LALPA thaumei ahi a, Gilpi sunglam zousiah ahawl hi. 28 Lungsiatna tullou leh thutah in kumpipa ahuumbit a, Huleh a laltouphah chu lungsiatna tullou a tundingin aum hi. 29 Tangvaalte loupina chu a haatna uh ahi a, Huleh teehsete kilawmna chu a sam kaang uh ahi. 30 Liamkhopa vuaahna in giitlouhna asusiang a, Huchibangmahin jeepna in sunggil lam asusiang hi.
1 Kumpipa lungtang chu LALPA khut ah aum a, Tui luanna lampite bangin, Ama'n a uutna lamlam ah ahei hi. 2 Mi khat umdaan chinteng chu amah mitmuh ah adih a, Hizongleh LALPA'N lungtang abuuh hi. 3 Dihtatna leh vaihawmna dih bawl chu LALPA a diingin Kithoihna saangin apomtaahjawhi. 4 Mit sanghah, lungtang kiliansah, Huleh migiloute thaumei chu sual ahi. 5 Mithanuam tohguante'n hauhsatna lam anawt teeiteei a, Hizongleh mi kinoh hehu phot in taahsapna lam anawt teeiteei hi. 6 Lei juauthei manga muh gou chu tuihu kitawlmang pah bang ahi a, Sihna hawl zong huchibang ahi. 7 Migiloute tatsiatna in amahuh asumang diing hi, Vaihawmna dih apomlouh jiahun. 8 Mikhial lampi chu akawi a, Hizongleh misiang tungthu ahihleh, a natoh adih hi. 9 Inn khat a numei kihauhaat toh teenkhawm saangin, Inntung ning khat a teen ahoihjaw hi. 10 Migilou hinna in silgilou adeih a, A innveeng in a mitmuh ah deihsahna amu sih hi. 11 Mimusittu gawta aum chiangin mimawl suhpilin aum a, Hizongleh mipil thuhilha aum chiangin heetna amu hi. 12 Pathian dihtat in piltahin migilou innsung angaihtuah a, Ama'n migiloute chu asupuuh hi. 13 Koipouh migenthei kahna a bil huum chu Amah zong akap diing a, ahihvaangin jaahin aum sih diing hi. 14 Aguuha silpiaah in lungthahna asudaai a, Huleh akiphual a golhguuhna in thangtawmna sousang asudaai hi. 15 Midih a diingin vaihawmna dih bawl chu kipaahna ahi a, Hizongleh lauhthawngna chu giitlouhna bawltute a diing ahi. 16 Heetsiamna lampi apat vaahmang chu Misite kikhopna ah akhawl diing hi. 17 Koipouh nopsahna khelel chu migenthei ahi diing a; Koipouh zu leh sathau ngaina chu ahausa sih diing hi. 18 Migilou chu midihtat a diingin tatna ahi diing a, Huleh mitasual zong midihte a diingin. 19 Numei haanhaat leh lungthah toh teenkhawm saangin, Gamdaai a teen ahoihjaw hi. 20 Mipil teenna ah gou leh sathau deihhuai aum a, Hizongleh mingol in asuthelthang hi. 21 Koipouh dihtatna leh khotuahna deih in Hinna bang, dihtatna bang huleh zahumna bang amu hi. 22 Mipil chu mihaatte khopi ah akal a, Huleh amuan uh leh a kingahna uh asuhpuuhsah hi. 23 Koipouh a kam leh a lei veeng in A hinna mangbatna apatin aveeng hoih hi. 24 Mi kiliansah leh mi kideihkhop min chu "Musittu" ahi a, Ama'n kiletsahna khauhtah in sil abawl hi. 25 Mithasia chu a deihna in athat hi, Ajiahchu a khut in natoh auut sih hi. 26 Ama'n nitum in huaihamtahin aeeng a, Hizongleh midihtat in apia a, huleh akheet sih hi. 27 Migiloute kithoihna chu kihdahhuai ahi a, Lungsim gilou puma ahung tawi chiangin houh bangchitaha kihdahhuai ahita diai mah! 28 Heetpihtu dihlou chu abeimang diing a, Hizongleh angaikhetu in thu tawplouin asoi diing hi. 29 Migilou in a maai akhauhsah a, Hizongleh midih in chu a lampite abawlhoih hi. 30 LALPA kalh jawngin pilna, heetsiamna Ahihlouhleh lemguatna aum sih hi, 31 Sakol chu kidouna ni a diinga guat ahi a, Hizongleh hutdohna chu LALPA apat ahi.
1 Hauhsatna loupitah saangin min hoih chu teel jawh diing ahi a, Huleh dangka leh sana saangin deihsahna chu teel jawh diing ahi. 2 Mihausa leh mitagah in hikhu aneikhawm uhi, LALPA chu amahuh zousiah siamtu ahi. 3 Mipil in giitlouhna amulawh a, huleh akibuhsan hi, Hizongleh mimawlte'n chu avatawn va, gawtin aum uhi. 4 Kingaihngiamna leh LALPA launa jiahin Hauhsatna, zahumna leh hinna aum hi. 5 Lamkhialte lampi ah lingte leh thaangte aum a, Koipouh a hinna veenghoih in hute agamlaat diing hi. 6 Naupang chu a chiahna diing lampi ah chiil in, Huchiin ahung upat chiangin hu apatin achiahmang sih diing hi. 7 Mihausa in mitagah tungah vai ahawm a, Huleh abatu chu abasahtu a diingin suaah ahi. 8 Koipouh giitlouhna tuh in lungngaihna a-at diing a, Huleh a lungthahna chiang alohsam diing hi. 9 Koipouh silphalmi chu vangpiaah in aum diing a, A tanghou migentheite kawma apiaah jiahin. 10 Mimusittu nohmang in, huchiin kinialna abei diing; Ahi, kihauna leh minsiatna atawp diing hi. 11 Koipouh lungtang sianthouna ngaina a, Kamsuah kilawmna zang chu kumpipa lawm ahi diing hi. 12 LALPA mit in heetna akol a, Huleh Ama'n tasualte thusoi chu apaikhia hi. 13 Mithasia in, "Inn pua ah huumpibahnei aum, Kotzing ah thahin ka um kha diing," achi hi. 14 Numei thaanghuai kam chu kokhuuh thuuhtah ahi a; Koipouh LALPA haamsiat chu hu sungah ake diing hi. 15 Ngolna chu naupang lungtang ah kaanlomin aum a; Hizongleh suhdihna chiang in huchu amah apat gamlapi ah anohmang diing hi. 16 Koipouh a hauhsatna behlapna diinga migenthei bawlsia leh Koipouh mihausa kawma silpia chu ahung tasam ngeei diing hi.
Mipil Thusoite
17 Na bil doh inla, mipilte thusoi ngaikhia in, Huleh ka heetna lamah na lungtang pia in; 18 Ajiahchu na sunga na kikep hoih leh sil nuamtah ahi a; Na muuh ah suhkip khawmin um uh hen, 19 Na muanna LALPA ah ahih theihna diingin; Na kawmah, nangmah kawm ngeei ah ka hung hilhta hi. 20 Lemguatna leh heetna a sil hoihpeente Na kawmah ka gial sih a ahiai mah, 21 Thutah thute dihna ngeei nangmah ka hung heetsah theihna diingin, Na kawma hung kisawlte khu thutah thute a na dawn theihna diingin? 22 Migenthei chu agentheih jiahin suam sin, Gimthuaahte zong kotkhaah ah sugenthei sin. 23 Ajiahchu LALPA'N amahuh jiahlejaal asoipih diing a, Huleh amahuh suamtute hinna asuam diing hi. 24 Mi lungthahhaat chu lawmin nei sin, Huleh milungngam toh zong kithuah sin. 25 Huchilou inchu a umdaan najui kha diing a, Huleh na hinna a diingin thaang na kikam kha diing hi. 26 Kichiamna a khut laamte lahah khat hi sinla, Leiba diinga mohpotu a pangte lahah zong tel saam sin. 27 Piaah diing na neihlouh leh, Bang diinga na nuaia na lupna lamang diing ahiai? 28 Na pulepate'n anahunsa malaia gamgi son sin. 29 Mi a natohna a siamtungtuang na mu eimah? Kumpipate ma ah ading diing a; Mi meimeite ma ah ading sih diing hi.
1 Vaihawmtu khat toh ne diinga na tou chiangin, Na ma a um chu hoihtahin ngaihtuah in. 2 Huleh anhai mi na hihleh Na lawi ah temta koih in. 3 A an tuuina ngot lunggulh sin, Ajiahchu heemna an ahi uhi. 4 Hauhsat diing tumin tonggim vaal sin, Nangmah ngeei heetsiamna in tawpsan in. 5 Aumloupi ah na mit na koih diing ahi maw? Ajiahchu hauhsatna in tahzetin ha akibawl a, Mupi bangin vaan lamah aleengmang ahi. 6 Michiip tanghou ne sinla, A an tuuina zong lunggulh saam sin. 7 Ajiahchu amah lungtang a angaihtuah bang geihin ahi aum. "Nein dawn in," na kawmah achi a, Hizongleh a lungtang na kawmah aum sih hi. 8 Na an neehsa khu na lawkhe diing a, Huleh na thusoi humtahte na mangsah diing hi. 9 Mingol jaahin thu soi sin, Ajiahchu na pilna thusoi amusit diing hi. 10 Malaia gamgi kibawl son sin, Pabeite lou ah zong luut sin. 11 Ajiahchu amahuh Tanpa chu ahaattungnung a, Nangmah kalhin a thu uh Ama'n asoipih diing hi. 12 Na lungtang thuhilhna lamah zang inla, Huleh na bil zong heetna thute lamah. 13 Thununna chu naupang apatin kheet sin, Ajiahchu chiang in vo mahzonglechin asi sih diing hi. 14 Chiang in amah na jeep diing a, Huchiin Sheol apatin a hinna na hundoh diing hi. 15 Ka tapa, na lungtang apil leh, Ka lungtang ngeei zong akipaah diing hi. 16 Ahi, na kam in sildih asoi chiangin, Ka lungsim sungnungpeen anuam diing hi. 17 Na lungtang in misualte eeng sih henla, Hizongleh nitum in LALPA launa ah um in. 18 Ajiahchu atawpna ahung um ngeei diing a, Na lamet chu suhmangin aum sih diing hi. 19 Ka tapa, ngaikhia inla pil in, Lampi ah na lungtang pui in. 20 Zu haite lahah pang sin, Ahihlouhleh gongsana sa haite lahah zong. 21 Ajiahchu zukham haat leh anhai chu ahung jawngkhaal diing va, Huleh ihmuthaina in mihing chu puansia in atuam diing hi. 22 Nangmah hung hingtu na pa thu ngaikhia inla, Huleh ateeh chiangin na nu musit sin. 23 Thutah lei inla, juaah sin, Huleh pilna leh thununna leh heetsiamna zong. 24 Midihtat pa chu nasatah in anuam diing a, Huleh ta pil hingtu in amah apatin nopsahna anei diing hi. 25 Na nu leh na pa kipaah henla, Huleh nangmah hung paaitu nuam hen. 26 Ka tapa, na lungtang hung pia in, Huleh na mit in ka lampite enjui zing hen. 27 Ajiahchu numei kijuaah chu guam thuuhtah ahi a, Huleh numei thaanghuai chu kokhuuh jimtah ahi. 28 Suammang bangin zong ama'n ataang a, Huchiin mihingte lahah tasualte asupung hi. 29 Kua ahiai tunggihna nei? Kua ahiai lungngaihna nei? Kua ahiai kihauna nei? Kua ahiai phunna nei? Kua ahiai ajiah beia liamna nei? Kua ahiai mit san gegaw nei? 30 Zu phungpeeng uapte, Zu kitohhal hawl diinga kuante ahi uhi. 31 Zu chu asan laiin en sin, Nou sunga ajia alat laiin, Aluankhiah ngaaingaai laiin. 32 Atawp chiangin guul bangin atu a, Guulngaan bangin mi atu hi. 33 Na mit in silmah tahtah ahung mu diing a, Huleh na lungtang in sil manlouhte ahung soidoh diing hi. 34 Ahi, tuilianpi lailung a mi lum bang na hi diing, Ahihlouhleh long khuam dawn a mi lum bang na hi diing a, 35 "Ahung vua va, na ka sa sih, Ahung jeep va, ka he sih, Bangchihchianga halh diing ka diai? Dawn diing ka hawl nalai diing," na chi diing hi.
Gamtat Khohei Daan leh Taaihilhna
1 Migiloute eeng sinla, Amahuh toh kithuah zong uut het sin. 2 Ajiahchu a lungtang un hiamngapna asuangtuah va, Huleh a muuh un buaina thu asoi uhi. 3 Pilna jaalin inn chu bawl ahi a, Huleh heetsiamna a hichu suhkip ahi. 4 Heetna jaalin pindante chu Hauhsatna luui tahtah leh deihhuai zousiah a suhdim ahi diing hi. 5 Mipil chu ahaat a, Ahi, heetna neimi'n haatna apungsah hi. 6 Ajiahchu lemguatna piltah in na gaal na dou diing a, Huleh lemguattu tampi umna ah bitna aum hi. 7 Mingol a diingin pilna chu asang talua a, Huleh kulh kotkhaah ah a kam akaah sih hi. 8 Koipouh silgilou suangtuah chu Thupawtbawltu akichi diing hi. 9 Ngolna suangtuahna chu sual ahi a, Huleh mimusittu chu mihingte diingin kihdahhuai ahi. 10 Vangsiatna ni a na chauh leh, Na haatna chu aneu ahi. 11 Sihna lam a kaihluut-a umte hunkhia inla, Huleh mithattu kawma puuh diingte tutaang in. 12 "Ngai in, hichu ka he kha sih uh," na chih mei inchu, Amah lungtang buuhtupa'n hichu angaihtuah sih diaimah? Amah na hinna vomtupa'n hichu ahe sih diing adiai? Huleh Ama'n mi chin a natoh dungjuiin athuh sih diaimah? 13 Ka tapa, khuaizu ahoih jiahin ne in, Huleh na lei a diinga khuaiphaang humtah ngeei chu; 14 Huchiin pilna heetna chu na hinna a diing ahi diing hi; Na muh hun chiangin kipaahman aum diing a, Huleh na lamet chu suhmang ahi sih diing hi. 15 Aw migilou, midihtat teenna dou diingin taang sinla, A khawlna mun zong suhsiatsah sin. 16 Ajiahchu midihtat sagihvei apuuh a, huleh athoukiit hi, Hizongleh migiloute chu siatna ah apuuh uhi. 17 Na meelma apuuh chiangin nuam sin, Huleh amah akipalpuuh chiangin kipaah sin. 18 Huchilou inchu LALPA'N amu diing a, alunghi sih kha diing a, Huleh amah apatin a thangtawmna aheimang kha diing hi. 19 Silgilou bawlte jiahin kisulungthah sinla, Migiloute zong eeng tuan sin; 20 Ajiahchu mihoihlou a diingin kipaahman muh diing aum sih a; Migiloute thaumei chu suhmit ahi diing hi. 21 Katapa, LALPA leh kumpipa chu lau in; Lungsim kiheng lehleh mite toh kithuah sin; 22 Ajiahchu a vangsiatna uh thakhatin ahung umdoh diing a, Amahuh geel tunga siatna hung tung diing koi in ahiai he?
Mipil Thusoi Behlapte
23 Hite zong mipil thusoi ahi: Vaihawmna a mi deihsahtuam neih ahoih sih hi. 24 Koipouh migilou kawma, "Na dihtathi," chi photmah chu Mite'n amah ahaamsiat diing va, Namte'n amah akihdah diing uhi. 25 Hizongleh koipouh amah taaitute chu akipaah diing va, Huleh vangpiaahna hoihtah a tungvah atung diing hi. 26 Dawnna dihtah petu in muuhte chu atawp hi. 27 Polam ah na natoh bawlkhawl inla, Lou laiah nang a diing toh kituaahin bawl in, Huleh hu nung chiangin na inn bawl in. 28 Ajiah beiin na innveeng kalhna diingin heetpihtu in pang sin, Huleh na muuh in heem sin. 29 "Ka tunga abawl bangin a tungah ka bawl diing a; A natoh dungjuiin hu mi tungah ka thuh diing," chi sin. 30 Mithasepa lou kawmah ka vachiah a, Huleh heetsiamna tasampa grephuan kawmah; 31 Ngai in, ling in adeep veh a, Loulingnei in akhuhkhum veh a; A suang baangte achim vehta hi. 32 Huin ka mu a, hoihtahin ka ngaihtuahta hi; Huchu ka en a, huleh thuhilhna chu ka saangta hi. 33 Tomkhat na ihmu jual a, tomkhat na lusu a, Tawlnga diingin tomkhat na khut na helhkop jual a; 34 Huchibangin na jawngna chu mikhual bangin ahung tung diing a, Huleh na taahsapna zong gaalthuam a kithuam mi bang maiin.
Solomon Thupil dangte
1 Hite zong, Juda kumpipa Hezekiah mite'n ateikhiah uh Solomon thupilte ahi: 2 Sil iim chu Pathian loupina ahi a, Hizongleh kumpipate loupina chu sil hawldoh khuh ahi. 3 Vaan asaan bangin leh lei athuuh bangin, Kumpipate lungtang chu suuigual louh ahi. 4 Dangka apatin tuieeh lamang in, Huchiin a dangka kheengtu a diingin kheeng diing ahung umdoh diing hi. 5 Kumpipa ma apatin migilou lamang in, Huchiin a laltouphah chu dihtatna a suhkipin aum diing hi. 6 Kumpipa ma ah kikoihlian sinla, Huleh mi loupite mun ah zong ding sin. 7 Ajiahchu, "Hi lamah hung pai tou in," Na kawma ahung kichih chu Na mit in amuhsa lalta ma a koihngiama na um saangin ahoihjaw hi. 8 Kiheeh diingin kintahin thukhenna ah chiah sin, Ajiahchu na innveeng in nangmah ahung suhzum chiangin, Atawpna ah bang ahiai na bawl diing? 9 Na thubuai na innveengpa toh soikhawm inla, Huleh midang kawmah thuguuh pholhdoh sin. 10 Huchilou inchu ajatu in ahung suzum diing a, Huleh na minsiatna chu daailouin aum kha diing hi. 11 Kituaahgeiha thuteng khat soi chu Dangka bawm sunga sana apple bang ahi. 12 Taaihilhtu piltah chu thumangmi bil a sana bilbah leh Sana siangtah apat kibawl kicheina tobang ahi. 13 Palai ginum chu amah sawltute a diingin Buh-aat laia vuuh vot tobang ahi, Ajiahchu a pute hinna asuhhalhsah hi. 14 Silpiaah dihlou jiaha kisuang taphot chu Guahtui paailou meilum leh huih tobang ahi. 15 Thuaahtheihna in lalta thuzohin aum a, Huleh thusoi neemtah in guh asutan hi. 16 Khuaizu na muta eimah? Nang a diinga hungiap jaat ne in, Huchilou inchu na vah vaal diinga na law kha diing hi. 17 Na innveeng inn phamun talo sin, Huchilou inchu ahung ning diing a, ahung haw kha diing hi. 18 Mi a innveeng tunga heetpihtu dihloua pang chu Khetbuuh leh naamsau leh thaltang bang ahi. 19 Mangbat laia miginumlou gintaat chu Habal leh keengguh tuahna kilawi bang ahi. 20 Milungngai kawma lasatu chu Khovot laia mi khat puan suutkhiahsah leh Tangal tunga uain thuuh sung bang ahi. 21 Na meelma agilkial leh, neeh diing tanghou pia in, Huleh adangtaah leh, dawn diing tui pia in. 22 Ajiahchu huchibanga na bawl leh a lutung ah meiaam na sekhawm ahi diing a, Huchiin LALPA'N nang ahung dit diing hi. 23 Maal huih in guah ahung puaah luut bangin, Misoisiat haat lei in lungthah meel ahung tun hi. 24 Numei haansan toh inn khat a teen khawm saangin, Inntung ning khat a teen ahoihjaw hi. 25 Hinna dangtaahtah diinga tuivot bangin, Khualgam gamla apat tanchin hoih zong huchibang ahi. 26 Midihtat migilou ma a puuh chu Tuinaah niin leh tuikhuuh kisuthaanghuai tobang ahi. 27 Khuaizu tampi neeh ahoih sih, Huchibangmahin mi'n amah loupina diing akihawl chu loupina ahi sih hi. 28 Koipouh mahni lungsim thuzohlou chu Khopi chimsa leh kulhbaang neilou bang ahi.
Thuhilhnate
1 Nipi laia vuuh kia leh buhlaah laia guahju a kilawm louh bangin, Zahumna chu mingol a diingin akilawm sih hi. 2 Kawlgiit leeng leh phialphiat leeng lehleh bangmahin, Ajiah beia haanseloh chu mawhmeiin abei sih hi. 3 Jeepna chu sakol a diing, Kamkaihna chu sabiltung a diing, Huleh chiang chu mingol nungjaang a diing ahi. 4 Mingol chu a ngol dungjuiin dawng sin, Huchilou inchu nang zong amah bang na hi kha diing hi. 5 Mingol chu a ngol dungjuiin dawng in, Huchilou inchu amah mitmuh ah pilin akingaihtuah kha diing hi. 6 Koipouh mingol khut a thu khat thuhaah in Amah keeng ngeei asaattan a, huleh siatna adawn hi. 7 Keengbaipa keengte zatna beia akikhai niingniang bangin Mingolte kam a thupilte chu ahi. 8 Koipouh mingol kawma zahumna pia chu Vaisuangseh a suang kaanbeh bangmei ahi. 9 Zukhamhaat khut a ling um bangin, Huchi bangmahin mingolte kam a thupilte chu ahi. 10 Mingol khat guai ahihlouhleh lampai lai khat guai thop mi chu Mi tengteng suliam thalkaaptu tobang ahi. 11 Ui amah luaah mah a akihkiit bangin, Mingol chu a ngolna ah akihkiit hi. 12 Mi amah leh amah pila kingai na mu ei? Amah saangin mingol diingin kinepna aum jaw hi. 13 Mithasia in, "Lampi ah huumpibahnei aum, Kholai ah huumpibahnei aum," achi hi. 14 A khaina kopza a kot akikhai mahbangin, Mithasia chu a lupna tungah aum zing hi. 15 Mithasia in a kuang sungah a khut aphuum a, A kam tana laahtouh diing jiangzong angaap sih hi. 16 Mithasia chu amah ngaihin Midottaah sagih saangin apiljawhi. 17 Koipouh pai kawma amah a hilou kihauna a vakikum chu Ui a bil a mantu bang ahi. 18 Meisel, thaltang leh sihna thehjaah mingol khat toh kibang chu, 19 Mi a innveeng heem a, a kawma, "Ka chiamnuih agiap veh!" chitu khuh ahi. 20 Sing um louhna ah mei amit hi, Huchibangin thusoisawn lehlehtu um louhna ah kihauna atawp hi. 21 Meiaam chu meihol aamsah diing, huleh sing chu mei kuangsahtu diing ahih bangmahin, Mihaanhaat in kihauna asupuang hi. 22 Thusoisawn lehlehtu thusoite chu an tuuitah bang ahi a, Hute'n chu sungnungpeen lam azensuh hi. 23 Muuh naal leh lungtang gilou chu Leibeel dangkasiih tuieeh a luankhum bang ahi. 24 Mihuathaat in a muuh in aheembawl a, Huleh a sunglam ah heemna akholkhawm hi; 25 Thu chintaha asoi chiangin gingta sin, Ajiahchu a lungtang ah kihdahhuai sagih aum hi; 26 A mihuatna khu jeheemna in tuamkhum zongleh, A giitlouhna chu mipungkhawmte zousiah ma ah suhlatin aum diing hi. 27 Koipouh kokhuuh tou taphot chu hu ah ake diing a, Huleh koipouh suang liih chu amah tungah ahung kilehkiit diing hi. 28 Lei juauthei in ama'n asuhsiatte ahua a, Huleh maaitangphat kam in manna abawl hi.
1 Taaihilhlawhna leh Thuhilhna 1 Jiingchiang diing thu ah bangmah kisuang sin, Ajiahchu hu ni in bang ahiai ahung suaahpih diing chih na he sih hi. 2 Nangmah kam hilouin, midang in hung phat heh; Nangmah muuh hilouin midang in. 3 Suang agih a, piauneel zong agih hi, Hizongleh mingol lungthahna chu hi tegeel saangin agihjaw hi. 4 Lungthahna atatsia a, huleh thangtawmna chu avuumvaal hi, Hizongleh kua ahiai thangsiatna ma a ding thei diing? 5 A langtang a taaina chu Lungsiatna kiphual saangin ahoihjaw hi. 6 Lawm apat liamna chu aginum a, Hizongleh meelma mitawp chu heemna ahi. 7 Gilvah in khuaizu aning a, Hizongleh gilkial a diingin silkha teng zong atuui hi. 8 Mi a mun apat vaahmang chu Va abu apata leengmang tobang ahi. 9 Sathau leh gimtuui in lungtang asunuam a, Huchibangmahin mi lawm khat nopna chu a lemguatna chihtah apat ahung kuan hi. 10 Nangmah mah lawm ahihlouhleh na pa lawm taaisan sinla, Siatna na tuah ni in na unaupa inn ah vachiah sin; Innveeng kinaihpih chu gamlapi aum unau saangin ahoihjaw hi. 11 Ka tapa, pil inla ka lungtang kipaahsah in, Keimah hung soisete ka dawn theihna diingin. 12 Milemhe in giitlouhna amulawh a, akibuhsan hi, Hizongleh mimawl in chu avatawn a, gawtin aum hi. 13 Meelheetlouh a diinga mohpotu puan chu la inla, Huleh numei mijawlsiamnu a diinga mohpua a pang ahihleh, kichiamna in hu puan chu la in. 14 Koipouh jiingkaal mataha thou a, aw ngaihtaha a lawmpa vangpiaah chu A khatpa a diingin haamsia a sim ahi diing hi. 15 Guah chiin ni a tawploua guahjuleh Numei haansan akibang hi; 16 Amahnu khap chu huih khap bang ahi a, Huleh amah khap chu jiatlam khut a sathau ham tobang ahi. 17 Siih in siih mah asuhiam a, Huchibangmahin mi'n a lawm meel ahiamsah hi. 18 Koipouh theipi kung zuun in a gah ane diing a, Huchibangmahin a pu zen chu paahtawiin aum diing hi. 19 Tui a meel akimuh bangin, Huchibangmahin mihing lungtang ah ahihna akilanghi. 20 Sheol leh Abaddon in dim chih anei ngei mawngmawng sih hi; Huchibangmahin mihing mit alungkim ngei mawngmawng sih hi. 21 Suansiangna beel chu dangka a diing ahi a, huleh haaltuina meikhuuh chu sana a diing ahi, Huleh mihing chu paahtaat-a aum chiangin ahihna suhlat ahi. 22 Mingol chu buhheehna ah buh toh heeh mahlehchin, A ngolna in anuse tuan sih diing hi. 23 Na belaam honte umdaan he hoih diingin thanop suah inla, Huleh na gan honte hoihtahin en in. 24 Ajiahchu hauhsatna chu kumtuang a diing ahi sih a, Lallukhuh zong akhang akhang a um diing ahi diaah sih hi. 25 Hampa ahung muih a, hampa nou ahung kilangdoh a, Huleh muala hampate laahkhawma aum chiangin, 26 Belaamnoute'n na puansilh diing uh ahung pe diing va, Huleh keelte'n lou man diing ahung pe diing uhi; 27 Huchiin keel nawitui na an diingin, Na innkote an diingin, Huleh na nungaahte vaahna diingin kidaihin na nei diing hi.
1 Migilou chu koimah delhlouhin ataai a, Hizongleh midihtatte chu huumpibahnei bangin ahangsan uhi. 2 Gamsung tatsualna jiahin mi tampi hutah ah laiin apang uhi; Hizongleh heetsiamna leh heetna neimi jaalin hu gam adinsawtloh diing hi. 3 Migentheite bawlsia migenthei chu Neeh diing zong hawiloua tohmang guah tobang ahi. 4 Koipouh daan taaisante'n migilou apaahtawi va, Hizongleh daan juitute'n chu amahuh akalh uhi. 5 Migiloute'n vaihawmna dih ahesiam sih va, Hizongleh LALPA hawlte'n chu sil zousiah ahesiam uhi. 6 Hausa ngaala a gamtat daan a lamkhial saangin Soiseelbeia gamta migenthei ahoihjaw hi. 7 Koipouh daan juitu chu tapa silhesiam ahi a, Hizongleh mi thaangtatte toh kithuah in a pa asuzum hi. 8 Koipouh apung delha avaala sum supung in Migenthei hehpihtu a diingin akholkhawm hi. 9 Koipouh daan juilou diinga a bil lehhei chu A haamteina tanpha akihdahhuai hi. 10 Koipouh lampi dihlou a midihtatte paimangsah chu, A kokhuuh mah ah amah akeluut diing a; Hizongleh misoiseelbeite'n sil hoihte atang diing hi. 11 Mihausa chu amah ngaihdaan in apil a, Hizongleh migenthei heetsiamna nei in amah amu pailet hi. 12 Midihtatte agualzoh chiangun kipaahna nasatah aum a, Hizongleh migiloute thuneia adindoh chiangun mite akibu uhi. 13 Koipouh a sualna iim chu alohching ngei sih diing a, Hizongleh koipouh kiphuanga tawpsan in zahngaihna amu diing hi. 14 Pathian lau zing mi ahampha a, Hizongleh a lungtang khauhsah zing mi chu siatna ah ake diing hi. 15 Migentheite tunga vaihawmtu gilou chu Huumpibahnei haam leh vompi hawh bang mei ahi. 16 Heetsiamna tasam lai chu sugimtu nasatah ahi a, Hizongleh dihloutaha punna hotu in a damsung asusau diing hi. 17 Koipouh sisan suah a mohna puaahgih potu chu kokhuuh taw ah ataailuut diing a, Koima'n panpih sih heh. 18 Koipouh soiseelbeia gamta chu hutkhiahin aum diing a, Hizongleh koipouh a lampite a takhial chu thakhatin apuuh diing hi. 19 Koipouh amah lou hou in neeh diing kidaih anei diing a, Hizongleh koipouh mimanlouhte jui chu atasam nasa mahmah diing hi. 20 Miginum chu vangpiaahna tampi toh aum diing a, Hizongleh koipouh hauhsat tum pah chu gawtlouhin aum sih diing hi. 21 Deihsahtuam neih ahoih sih hi, Ajiahchu tanghou themkhat jiahin mi atasual diing hi. 22 Mit gilou neimi'n hauhsat diing akintup a, Huleh taahsapna a tunga tung diing ahe sih hi. 23 Koipouh a lei a mi maaitangphat saangin, Mi taaitu in anungchiangin deihsahna amu tamjaw diing hi. 24 Koipouh a nu aha, a pa aha suam a, "Hikhu tatsualna ahi sih," chitu chu Sumangtu kizoppih ahi. 25 Koipouh lungtang kiliansah in kihauna atohthou a, Hizongleh koipouh LALPA muang chu suhhauhsatin aum diing hi. 26 Koipouh mahni lungtang muang chu mingol ahi a, Hizongleh koipouh piltaha gamta chu hutkhiahin aum diing hi. 27 Koipouh migenthei kawma pia chu atasam sih diing a, Hizongleh koipouh akimuhmohbawl in chu haamsia tampi athuaah diing hi. 28 Migiloute athoh chiangun mite akibu va; Hizongleh abeimang chiangun midihtat apung hi.
1 Koipouh taaihilha um veu a, a ngawng khauhsah haamhaam chu Thakhat-a suhsiatin aum diing a, huleh huchu a suhdamna aum sih diing hi. 2 Midihtatte'n thuneihna ahung neih chiangun mipi akipaah va; Hizongleh migiloute'n vai ahawm chiangun mite amaau uhi. 3 Koipouh pilna ngaina in a pa akipaahsah a, Hizongleh koipouh kijuaahte kithuahpih in a hauhsatna azangbei hi. 4 Kumpipa in vaihawmna dih in gam sung asukip a, Hizongleh koipouh golhguuhna latu in asusia hi. 5 Mi a innveeng maaitangphat in A keeng a diingin leen ajaahsah hi. 6 Migilou chu a tatsualna in thaang a matin aum a, Hizongleh midihtat in la asa a, akipaah hi. 7 Midihtat in migentheite dihna ahe a, Hizongleh migilou in hukhu he diingin angaihsah sih hi. 8 Mimusittute'n khopi atohkuang va, Hizongleh mipilte'n lungthahna adaaisah uhi. 9 Mipil in mingol akinialbuaipih inchu, Mingolpa chu lungthahin ahihlouhleh nui zongleh, khawldamna aum sih hi. 10 Sisan suahhaat mite'n soiseelbei mi ahua va, Hizongleh midihte'n chu a hinna akhualsah uhi. 11 Mingol in a lungsim zousiah asoidoh a, Hizongleh mipil in chu akhonung diing khualin akolhoih hi. 12 Vaihawmtu in juau angaihkhiahin chu, A natongtute zousiah ahung gilou uhi. 13 Migenthei leh misugentheitute'n hikhu anei khawm uhi: LALPA'N anihun a mit uh asuhvaahsah hi. 14 Dihtatna toh migentheite vaihawmsah kumpipa chu, A laltouphah kumtuangin suhkip ahi diing hi. 15 Chiang leh taaihilhna in pilna apia a, Hizongleh naupang hahzan in a nu zumna atut hi. 16 Migiloute apun chiangun tatsualna apung a; Hizongleh midihtatte'n migiloute puuhna amu diing uhi. 17 Na tapa sudih in, huchiin khawldamna ahung pe diing hi; Ahi, na hinna akipaahsah diing hi. 18 Muhlawhna um louhna ah mite abeimang va; Hizongleh koipouh daan juimi chu ahampha hi. 19 Suaah chu kam a hilhna chauhin bawlhoihin aum sih diing hi; Ajiahchu hesiam mahleh ajawm sih diing hi. 20 Kintaha thu soi pahpah mi na mu ngei ei? Amah a diing saangin mingol a diingin kinepna aum jaw hi. 21 Koipouh a suaah a neu apat duatsia in atawp ah misoihah asuaahsah diing hi. 22 Milungthahhaat in kihauna atohthou a, Huleh mithangtawmhaat in tatsualna ahau hi. 23 Mi chu a kiletsahna in asungiam diing a, Hizongleh koipouh lungsim a kingaingiam in zahumna aloh diing hi. 24 Koipouh guta toh pangkhawm in amah ngeei hinna ahua a, Thutah soi diingin kichiam mahleh, asoidoh tuan sih hi. 25 Mihing launa in thaang atun a, Hizongleh koipouh LALPA muangtu chu bittaha koihsangin aum diing hi. 26 Mi tamtah in vaihawmtu deihsahna ahawl va, Hizongleh mihing diinga vaihawmna dih chu LALPA apat ahi. 27 Midihlou chu midihte a diingin kihdahhuai ahi a, Huleh koipouh a lampi a dihtat chu migilou a diingin kihdahhuai ahi.
1 Agur Thupilte 1 Jakeh tapa Agur thute, a thusoite ngeei. Hi pa in Ithiel kawmah, Ithiel leh Ukal ngeei kawmah aphuang hi: 2 Adihtahin midang saangin ka mawl diaah a, Huleh mihing khat heetsiamna ka nei sih hi. 3 Pilna lah ka jil sih a, Mi Siangthoupa heetna zong ka nei sih hi. 4 Koi ahiai vaan a kaltou, ahihlouhleh kumsuh? Koi ahiai a khut a huih huumkhawm? Koi ahiai a puansilh a tuite tuun? Koi ahiai leitung kawlmong zousiah tungdoh? A min bang ahiai, a Tapa min zong bang ahiai, na soi theih leh? 5 Pathian thu chinteng chu asiangthou a; Amah beel photmahte a diingin Amah chu phaw ahi. 6 A thute behlap sin, Huchilou inchu Ama'n ahung taaihilh diing a, mijuauthei in ahung kimu kha diing hi. 7 Nangmah apat sil nih ka hung ngeen hi, Ka sih main hute hung nuai sin: 8 Kei apatin dihlouhna leh juau lamang in; Gentheihna ahiai hauhsatna ahiai zong hung pe hiai sinla, Ka ni chin an diing hung pia in; 9 Huchilou inchu ka kham vaal diinga, ka hung kiheetmohbawl kha diing a, "Koi ahiai LALPA chu?" ka chi kha diing; Ahihlouhleh gentheiin umta leng lah, ka guta diinga, Huleh ka Pathian min ka subuaah kha diing hi. 10 Suaah a pu kawmah soise sin, Huchilou inchu ahung haamsiat diing a, huleh mohtangin na um kha diing hi. 11 A pa uh haamsiat leh a nu uh paahtawilou Khang khat aum hi. 12 Amahuh mitmuh a siangthou, Ahiinlah a thaanghuaina vapat sawpsiang nailouh khang khat aum hi. 13 Khang khat aum, Aw, a mitte uh sanghah hina mei uh e! Huleh a mitvunte uh akiphong sang hi. 14 A ha uh naamsau tobang, A ha nuailam uh temta tobang khang khat aum hi, Leilung apata migentheite leh mihing lah apat mi tasamte nezou diingin. 15 Vot in tanu nih anei hi, "Hung pia in," "Hung pia in" chih tegeel ahi. Lungkimsah theih mawngmawng louh sil thum aum a, "Ahunta!" chilou sil li aum hi: 16 Sheol, Suul chiing, Tui pomtheilou lei, Huleh "Ahunta," chilou meikuang. 17 A pa nuihsan mit, Huleh thumanna lama a nu musit mit chu Phaijaang va-aahte'n atukhe diing va, Muvaanlai noute'n ane diing uhi. 18 Kei diinga limdang talua sil thum aum, Ahi, ka heetlouh li aum hi: 19 Huihkhua a muvaanlai lampi, Suangpi tunga guul lampi, Tuilianpi lailung a long lampi, Huleh nungaah leh tangvaal kingaihna lampi. 20 Hichu aangkawm haat numei lampi ahi: Ane a, huleh a muuh asiaahsiang a, Huleh "Giitlouh ka bawl sih,"aehihi. 21 Sil thum jiahin lei akithing a, Huleh sil li ahi athuaah theihlouh: 22 Suaah kumpi a ahung pan, Mingol an khama um, 23 Numei huathuaitah in pasal aneih, Huleh suaahnumei a pi gouluahtu a apan haw ahi. 24 Sil neu tata li leitung ah aum a, Hizongleh amahuh chu apil tahzet uhi: 25 Mehsite hi ganhing haatloutah ahi va, Ahiinlah nipi laiin a an diing uh akholkhawm uhi. 26 Shaphante hi ganta deengdeltah ahi va, Ahiinlah suangpite ah a inn uh abawl uhi. 27 Khaukhupte'n kumpi anei sih va, Ahiinlah a honhonin akitawldoh uhi. 28 Innhit in a khut in atudet a, Huleh kumpipate inn sungah ateeng hi. 29 Loupitaha pai sil thum aum a, Ahi, paia kilawm mahmah li apha hi: 30 Huumpibahnei, gamsa laha haat mahmah, Huleh bangmah ma a kiheimang lou; 31 Uisiam, Keeltal, Huleh kumpi a sepaihte toh um chu ahi. 32 Nangmah leh nangmah na kitawisangna a ngoltaha nana bawlkhaah leh, Ahihlouhleh ngaihtuahna gilou na neih leh, na khut in na kam huum in. 33 Bawngnawi tohhal in bawngnawidat apawtsah a, naahko heeh in sisan apawtsah bangin, Hubangmahin kichiil lungthahna in kihauna aumsah hi.
Kumpipa Lemuel Thupilte
1 Kumpipa Lemuel thute, a nu in amah anahilh thusoite: 2 Ka tapa bang ahiai? Huleh bang ahiai, ka gil a gah tapa? Huleh bang ahiai, ka kichiamna tapa? 3 Na haatna chu numeite pe sinla, Kumpipate susetu kawmah na lampite zong pe saam sin. 4 Aw Lemuel, kumpipate a diing ahi sih, Zu dawn kumpipate a diing ahi sih, Zuchiih lunggulh zong laltate a diing ahi sih hi. 5 Huchilou inchu adawn diing va, thupiaah amangngilh diing va, Huleh gimthuaahtute dihna akaikawi kha diing uhi. 6 Zuchiih chu beimang diing mi kawmah pia inla, Huleh milungngaite kawmah zu pia in. 7 Amah chu dawnsah inla, a gentheihna mangngilhsah in, Huleh a lungkhamna zong hezing nawn sih hen. 8 Haamtheiloute a diingin na kam kaah inla, Chimoha paisuaah diing zousiah dihna tungtaang thu ah. 9 Na kam kaah inla, dihtahin vaihawm inla, Huleh migenthei leh tasamte dihna soipih in.
Ji Hoih
10 Numei umdaan hoih hi kuan ahiai mu zou diing? Aman lah suangmantam saangin atamjaw daih ngaala. 11 A pasal lungtang in amah amuang tinten a; Huleh lawhna tasamin aum sih diing hi. 12 Amahnu'n a damsung zousiah in Silsia hilouin sil hoih atohsah hi. 13 Samul leh pat ahawl a, Huleh a khut in lungawitahin atong hi. 14 Amah chu sumkawlveimi longte bang ahi a, Gamlapi apatin a an diing ahung pua hi. 15 Khovaah main athou a, Huleh a innkote an apia a, Huleh a nungaahte kawmah tanvou apia hi. 16 Lou angaihtuah a, huchu alei a, A khut natoh gah in grephuan abawl hi. 17 Haatna in a taai agaah a, Huleh a baante asuhaat hi. 18 A sumdawnnate ahoih hi chih amu a, Huleh jaan in a thaumei amit sih hi. 19 A khut chu mui khut ah anga a, Huleh a khutte'n muithal atu hi. 20 A khutte migenthei lamah ajaah a, Ahi, a khut in tasamte kawm tan apha hi. 21 A innkuan va diingin vuuh alau sih hi, Ajiahchu a innkote zousiah puan sandaang in akithuam uhi. 22 Puanphah mawitah akibawl a, A puansilh chu puan malngaat leh sandup ahi. 23 A pasal gamsunga upate laha atou chiangin Kulh kotkhaahte ah heetin aum hi. 24 Puanmalngaat puansilh in abawl a, huchiin ajuaah a, Huleh kawnggaahte chu sumkawlveite kawmah athothi. 25 Haatna leh zahumna a puansilh ahi a, Huleh hun hung tung diing ah anuam hi. 26 Pilna in a kam akaah a, Huleh a lei ah chitna daan aum hi. 27 A innkote lampi hoihtahin aen a, Huleh thasiatna tanghou ane sih hi. 28 A tate athou va, hamphanu achi va; A pasal ngeei in zong achi a, huleh ama'n amahnu aphat a: 29 "Tanu tampite'n abawl hoih mahmah va, Hizongleh nangma'n amahuh na khuup veh hi," chiin. 30 Kilawmna chu aheemhaat a, huleh meelhoihna zong bangmalou ahi; Hizongleh LALPA lau numei chu phatin aum diing hi. 31 A khut natoh gahte chu amah pia unla, Huleh kulh kotkhaahte ah amah natohte'n amah paahtawi hen.
New Testament, Simte Version, copyright © 2010 by Bibles International. Used by permission. All rights reserved worldwide.