यसु ख्रीस्त रागीम जाक्शो
1 नेल्ल क्येङा ङोंइती लोव़ माइश्शो का बाक्त। मेको लोव़ माइश्शो परमप्रभु यावे नु बाक्शा, मेको नु उइक्थी बाक्त। यूहन्ना १७:५; उत्पत्ती १:१; १यूहन्ना १:१२; प्रकाश १९:१३ 2 मिनु मेको रागी सेल्चा क्येङा ङोंइती रे परमप्रभु यावे नु काथा बाक्शो बाक्त। 3 परमप्रभु यावेमी मेको कली नेल्ल सेल्पाइश्शो बाक्त। मार मार सेल्शो बाक्मे, मेको नेल्ल आ सेल्शो बाक्त। १कोरिन्थी ८:६; कलस्सी १:१६; हिब्रू १:२ 4 मेको नु ब्रोंइतीक सोक्त बाक्शो बाक्त। मिनु मेको ब्रोंइतीक सोक्ती मुर आन कली छेङछेङ बाक्त। यूहन्ना ८:१२ 5 मेको छेङछेङ छिङछिङमी ब्राइब। मिनु छिङछिङमी छेङछेङ कली काप्ने मचाप्ब। यूहन्ना ३:१९ 6 मिनु परमप्रभु यावे आ सोइश्शो मुर का बाक्त। मेको आ नें यूहन्ना बाक्त। मत्ती ३:१; मर्कूस १:४ 7 यूहन्नामी छेङछेङ माइश्शो सु बाक्म, दे शेंथ जाक्त। यूहन्नामी “मुर नेल्लेमी लोव़ माइश्शो कली थमा सुइक्ब दुम्मल” दे शेंताक्व। प्रेरित १९:४ 8 यूहन्ना छेङछेङ माइश्शो ममाइ, छेङछेङ आ पर्बम शेंब ला बाक्त। 9 मिनु छेङछेङ माइश्शोमी रागीमी बाक्शो मुर नेल्ल आन कली रुप्ब थुं गेचा कली रागीमी जाक्त। 10 मिनु रागीमी जाक्मेनु, आ सेल्शो मुरपुकीमी मेको कली “आंइ कली सेल्ब बाक्ब” दे मतुइक्तेम। 11 आंम रागी जाक्मेनु, आंम सेल्शो मुरपुकीमी मेको कली मब्राम। भजन संग्रह २४:१ 12 सु सुमी चहिं ब्रामे नु थमा सुदमे, मेको आन कली परमप्रभु यावे आ तमी तौ दुम्चा गेप्तु। गलाती ३:२६ 13 ठेयब जातमी जरमेतीके, मुर आन दाक्शोमी जरमेतीके नु मुर आन थुंमी मिम्शोमी ममाइ तन्न परमप्रभु यावे आ पतीके ला आ तमी तौ दुम्ने चाप्नीम। यूहन्ना ३:५-६ 14 मिनु लोव़ माइश्शो मुर दुम्शा, गोपुकी नु बाक्शो बाक्त। मेको शिशी पाइब नु परमप्रभु यावे आ लां कोंइब बाक्त। गोपुकीमी “परमप्रभु यावे आ कांइचीक तौ बाक्ब” दे तुइश्शा, मेको कली परमप्रभु यावे आ छेङछेङ, आ शिशी नु आ थमा पतीकेमी ब्रीशो ताइतक। १तिमोथी ३:१६; प्रस्थान ३३:१८; यसैया ६०:१; २पत्रुस १:१६-१७ 15 यूहन्नामी मेको आ पर्बम “मेको आं नोले जाक्त हना यो, आं क्येङा ठेयब बाक्ब। मिनु आं क्येङा ङोंइती यो बाक्शो बाक्त” देंत। 16 आ शिशी पतीक गो शुश शिशी तना तन बाक्तक। यूहन्ना ३:३४; कलस्सी १:१९ 17 मोसामी परमप्रभु यावे आ अरेशो लोव़ गेप्तु। तन्न शिशी पाइब नु परमप्रभु यावे आ थमा लां कोंइब येसु ख्रीस्त रे बाक्ब। रोमी १०:४ 18 मुरपुकीमी परमप्रभु यावे कली गेनायो मतामे। तन्न परमप्रभु यावे नु बाक्ब आ कांइचीक तौमी मुर आन कली परमप्रभु यावे कली तुइक्पाइक्तु। यूहन्ना ६:४६; मत्ती ११:२७
यूहन्नामी येसु ख्रीस्त आ पर्बम शेंशो
19 मिनु यरूसलेम सहर ङा यहूदीपुकीमी चढ़ेब नु लेवी आ थर ङा मुर आन कली यूहन्ना नु ग्रुम्थ सोइक्ताक्म। मिनु मेकोपुकीमी यूहन्ना कली “गे सु ननी?” दे हिल्लो पाम्तेक्म। 20 यूहन्नामी जोल मपथु, ठीक लोव़ पशा “गो परमप्रभु यावे आ सोइश्शो ख्रीस्त मनङ” देंत। 21 मेकोपुकीमी “मिनु, गे एलीया ननी?” दे हिल्लो पाम्तेक्म। मिनु यूहन्नामी “गो मेको यो मनङ” देंत। मिनु मेकोपुकीमी लेंशा “गे परमप्रभु यावे आ लोव़ पाइब ननी?” दे हिल्लो पाम्तेक्म। मिनु मेकोमी “गो मेको यो मनङ” देंत। मलाकी ३:२३; मत्ती १७:१०-१३; ब्यवस्था १८:१५ 22 मिनु नोले मेकोपुकीमी “मिनु, गे सु ननी? आंइ कली सोइक्ब आन कली मार माइक्चा, गे इन पर्बम मार देंनीनी?” दे हिल्लो पाम्तेक्म। 23 मिनु यूहन्नामी “परमप्रभु यावे आ लोव़ पाइब यसैया आ देंशो खोदेंशो पा ‘गो गोरशो रागीमी बाक्शा, प्रभु आ लां रिम्शो ग्रोक्शा थेलीने’ दे लोव़ पाइब नङ” देंत। यसैया ४०:३ 24 मिनु हिल्लो पाइब का निक्शी फरिसी आन सोइश्शो बाक्तेक्म। फरिसी रिती थिती सेल्शा, रिम्शो पचा कली कोव़ब यो बाक्शो बाक्तेक्म। 25 मिनु यूहन्ना कली “गे ख्रीस्त मननी हना, एलीया मननी हना, परमप्रभु यावे आ लोव़ पाइब यो मननी हना, मारदे मुर आन कली ब्वाक्कुमी ख्रुम्शा ग्रुंइतीक गेय पाइनीनी?” दे हिल्लो पाम्तेक्म। 26 मिनु यूहन्नामी “इन दातेमी मुर का बाक्शो बाक्ब, मेको कली गे मतुइक्नीनी। लूका १७:२१ 27 आं नोले जाक्शो बाक्त हना यो, गो मेको आ जुत्ता प्रुइक्चा यो मशिरनुङ” देंत। 28 मेना यूहन्नामी यर्दन खोला आइक्ची हांबु बेथानी गाउंमी मुर आन कली ब्वाक्कुमी ख्रुम्शा ग्रुंइतीक गेय पना पन बाक्त।
ब्वाक्कुम ख्रुम्ब यूहन्ना आ पर्बम लोव़
29 आ दीसा यूहन्नामी येसु कली आ बाक्तीक गे पिना पिन पशो तशा “परमप्रभु यावे आ पाठा मेकोन बाक्ब। मेकोमी रागी नेल्ल ङा मुर आन मरिम्शो पशो क्याम्ब। यसैया ५३:७ 30 गो मेको आ पर्बम मार लोव़ पाता देंशा हना, मेको मुर आं क्येङा नोले जाक्त हना यो, आं क्येङा ठेयब बाक्ब। मिनु आं क्येङा ङोंइती यो बाक्शो बाक्त। 31 ङोंइती गो यो मेको कली मतुइक्ब बाक्ती। तन्न गो मुल इस्राएल ङा मुर आन कली मेको आ पर्बम तुइक्पाइक्चा कली ब्वाक्कुमी ख्रुम्शा ग्रुंइतीक गेय पथ जाक्ती” दे यूहन्नामी मुर आन कली देंत। 32 यूहन्नामी “गो परमप्रभु यावे आ सोक्त कली परवा बुदी सरीङ रे बेरशा, येसु आ तारी जुक्शो ताता। 33 ङोंइती गो यो मेको कली मतुइक्ब बाक्ती। मिनु आं कली ब्वाक्कुमी ख्रुम्शा ग्रुंइतीक गेय पथ सोइक्बमी ‘तेको मुर तारी गेमी आं सोक्त जुक्शो ताइनेवे, मेको आं सोक्तीम ख्रुम्ब बाक्ब’ दे परमप्रभु यावेमी माइक्ती। 34 मिनु गो मेको नेल्ल ताता। परमप्रभु यावे आ तौ मेकोन बाक्ब, दे तुइश्शा, इन कली तुइक्पाइक्तन्नी” दे यूहन्नामी देंत।
येसु ख्रीस्त आ शेंसीबपुकी
35 मिनु आ नित्थ नाक्त यूहन्ना आ शेंसीब निक्शी नु बाक्माक्त। 36 मिनु यूहन्नामी येसु कली हिरशा गाक्शो तशा “कोव़ङीसे, मेरेन परमप्रभु यावे आ पाठा बाक्ब” देंत। 37 मिनु मेको शेंसीब निक्शीमी यूहन्ना आ लोव़ नेंशा, येसु आ नोले खोइक्ताक्स। 38 मिनु येसुमी लेश्शा कोव़ङानु, मेको आस कली खोइश्शो तशा “गे मार माल्सी?” दे हिल्लो पाप्तु। मिनु मेको निक्शीमी “शेंब, गे ते बाक्नीनी?” दे हिल्लो पाम्ताक्स। 39 मिनु येसुमी “गो नु पिशा, कोव़ङीस” देंत। मिनु मेको निक्शी आ बाक्तीक कोव़थ लाम्ताक्स। मिनु मेको नाक्त येसु नु बाक्ताक्स। मारदे हना मेना ४ बजे खोदेंशो दुम्शो बाक्त। 40 यूहन्ना आ लोव़ नेंशा, येसु आ नोले खोइक्ब का अन्द्रीयास बाक्त। अन्द्रीयास सिमोन पत्रुस आ लोक्ब बाक्त। मत्ती ४:१८-२० 41 मिनु मेकेर रे लशा, अन्द्रीयासमी सिमोन कली ग्रुम्शा “गो निक्शीमी मस्सीह कली ग्रुम्तस्कु” देंत। मस्सीह चहिं ख्रीस्त, दे रुम्सीब। मस्सीह आ देंशो “परमप्रभु यावेमी मेको कली तेल लुक्शो बाक्ब” बाक्ब। 42 मिनु अन्द्रीयासमी सिमोन पत्रुस कली येसु नु ग्रुम्पाइक्तु। येसुमी मेको कली तशा “गे योआन्नेस आ तौ सिमोन नवे। इ नें केफास देंचा माल्ब” देंत। केफास देंशो फुल्लु बाक्ब। ग्रीक लोव़मी पत्रुस बाक्ब। 43 मिनु आ सांबु नाक्ती येसुमी “गालील रागी लाइनुङ” देंत। मिनु मेकेर लशा फिलीप कली ग्रुम्तु। मिनु फिलीप कली “आं नोले खोइय्यी” देंत। 44 मेको फिलीप अन्द्रीयास नु पत्रुस खोदेंशो पा बेथसैदा सहर ङा बाक्माक्त। 45 मिनु फिलीपमी नथानेल माइश्शो मुर कली ग्रुम्शा, मेको कली “मोसामी नु परमप्रभु यावे आ लोव़ पाइबपुकीमी यो परमप्रभु यावे आ सोइश्शो का आ पर्बम ब्रेक्शो बाक्तेक्म। मिनु गोपुकीमी मेको कली ग्रुम्तक। मेको नासरथ सहर ङा योसेफ आ तौ येसु बाक्माक्त” दे नथानेल कली देंत। यसैया ५३:२; ब्यवस्था १८:१८; येरमीया २३:५; इजीकीएल ३४:२३ 46 मिनु नथानेलमी चहिं “नासरथ सहर रे सु रिम्शो मुर जाक्ने चाप्बा ङा?” दे फिलीप कली देंत। मिनु फिलीपमी “लो, कोव़ङो” देंत। यूहन्ना ७:४१ 47 मिनु येसुमी नथानेल कली आ बाक्तीक जाक्शो तशा, नथानेल आ पर्बम “काइ जोल मपाइब नु रिम्शो गेय पाइब इस्राएली का बाक्ब” देंत। 48 मिनु नथानेलमी येसु कली “गे आं कली दोपा तुइक्नीनी?” दे हिल्लो पाप्तु। येसुमी “फिलीपमी इ कली ग्रुम्चा ङोंइती गो इ कली फोव़शी रवा आ पुंमी निश्शो ताता” देंत। 49 मिनु नथानेलमी “शेंब, गे परमप्रभु यावे आ तौ ननी। गे इस्राएल ङा मुर आन पिप ननी” देंत। यूहन्ना ६:६९; भजन संग्रह २:७; येरमीया २३:५; मत्ती १४:३३; मत्ती १६:१६ 50 मिनु येसुमी लेंशा “गो फोव़शी रवा आ पुंमी इ कली ताता देंशो आ पर्बम गे थमा सुइक्तीवी। गे मेको क्येङा ठेयब गेय पशो ताइनेवे” दे माइक्तु। 51 मिनु लोव़ बोइश्शा “नोफा दाइश्शा नेनीने, गेपुकीमी सरीङ रोक्शो ताइनीनी। मिनु परमप्रभु यावे आ स्वर्ग ङा गेय पाइबपुकी रागीमी जरमेशो आ तार जुक्शो नु स्वर्ग गे लेश्शा लशो ताइनीनी” दे माइक्तीमी। उत्पत्ती २८:१२; मत्ती ४:११
ङोंइती ङा छक लाक्चा ङा गेय
1 आ सांबु नाक्ती गालील रागी ङा काना सहरमी ग्युंबे का बाक्शो बाक्त। मिनु येसु आ ममा यो मेकेर लशो बाक्त। 2 येसु नु आ शेंसीब आन कली यो ब्रेश्शो बाक्तेक्म। 3 मिनु अङगुर शांबु नुम्मेनु, येसु आ ममामी येसु कली “अङगुर शांबु नुप्त” देंत। 4 मिनु येसुमी आ ममा कली “गो मार पचा माल्नुङा, आं कली मदेनीन। मुल सम्म आं पची मजा” दे माइक्तु। 5 मिनु आ ममामी गेय पाइब आन कली “एकोमी मार देंमे, मोदेंशो पने” दे माइक्तीमी। 6 मिनु मेकेर फुल्लु के मुशो ६ ओटा गर वोइश्शो बाक्तेक्म। यहूदी आन रिती थितीमी मुर आन कली चिक्चा, दे वोइश्शो बाक्तेक्म। मेको गर कामी २, ३ ठेयब पुक्तीक खोदेंशो ब्वाक्कु रिक्ब। मेत्रेतस माइश्शो ठेयब पुक्तीक का ३९ लिटर खोदेंशो बाक्ब। मर्कूस ७:३-४ 7 मिनु येसुमी गेय पाइब आन कली “गर नेल्ल ब्वाक्कुमी प्रिंदीन” देंत। मिनु मेकोपुकीमी गर नेल्ल ब्वाक्कुमी प्रिंताक्म। 8 मिनु “जचा योक्ब आन ठेयब मुर कली एको थाम्चा गेने” दे माइक्तीमी। मिनु मेकोपुकीमी आ देंशो खोदेंशो पाम्तेक्म। 9 मेको ठेयब मुरुमी मेको अङगुर शांबु दुम्शो ब्वाक्कु थाम्शा कोव़ङानु, जिजी कका पा ब्रोव़शो बाक्माक्त। मेकोमी मेको अङगुर शांबु ते रे चाक्शो मतुइक्त। गेय पाइबपुकीमी ला तुइश्शो बाक्तेक्म। मिनु मेको ठेयब मुरुमी ग्युम्ले कली ब्रेश्शा 10 “मुर नेल्लेमी ङोंइती ब्रोव़शो अङगुर शांबु योक्नीम। तूशा रांइदमे नोले मब्रोव़शो योक्नीम। गे चहिं मुल सम्म ब्रोव़शो अङगुर शांबु खेक्शा वोइश्शो बाक्ते” दे माइक्तु। 11 मेको येसु आ ङोंइती ङा छक लाक्चा ङा गेय बाक्त। मेको ङोंइती पशो छक लाक्चा ङा गेय गालील रागी ङा काना माइश्शो सहरमी पशो बाक्त। मोपा मुर आन कली आ सक्ति कोंइशो बाक्त। मेको तशा आ शेंसीबपुकीमी येसु कली परमप्रभु यावे आ तौ बाक्त, दे थमा सुदमे बाक्त। यूहन्ना १:१४ 12 मिनु नोले येसु, आ ममा, आ लोक्बपुकी नु आ शेंसीबपुकी नु कापेरनाउम सहरमी यिशा, मेकेर इच्का नाक्त सम्म बाक्मा बाक्त। यूहन्ना ७:३; मत्ती १३:५५
येसु परमप्रभु आ खिं लशो
13 मिनु यहूदी आन पास्सा चाड जाक्चशो बाक्त। मोपतीके येसु यरूसलेम सहर लत। यूहन्ना ५:१; यूहन्ना ७:१०; मत्ती २०:१८; मर्कूस ११:१; लूका १९:२८ 14 परमप्रभु यावे आ खिं जाक्दीम्मेनु, मेकेर ब्यफ लेयबपुकी, भेडा लेयबपुकी, परवा लेयबपुकी नु क्येट फाइक्ब नेल्लेमी आन गेय पना पन बाक्शो ताप्तु। 15 मिनु येसुमी पले डोरी के युक्तीक सेल्शा, भेडा, ब्यफ लेयबपुकी नु क्येट फाइक्ब आन कली परमप्रभु यावे आ खिं रे खेरतीमी। क्येट फाइक्ब आन क्येट वोइक्तीक खोल्शा, क्येट नेल्ल फ्राम्तीमी। 16 मिनु येसुमी परवा लेयब आन कली “एको नेल्ल लतीन। आं आफ आ खिं कली ग्याप्तीक लेयतीक खिं मसेलीन” दे माइक्तीमी। 17 मिनु परमप्रभु यावे आ लोव़मी “इन खिं कली थमा पा दाक्नुङ। मेको दाक्तीक मी खोदेंशो पा आं थुंम चोइब” दे ब्रेक्शो बाक्ब, दे आ शेंसीबपुकीमी फ्रुक्तेक्म। भजन संग्रह ६९:९ 18 मिनु यहूदीपुकीमी येसु कली “इ के मो पचा ङा अधिकार बाक्ब, दे आंइ कली मार चिन्ड कोंइने चाप्नेवे?” देंमानु, मत्ती २१:२३ 19 येसुमी “परमप्रभु यावे आ खिं प्रेतीन। गो नाक्त सांमी लेंशा सेल्ने थुम्नुङ” दे माइक्तीमी। मत्ती २६:६१; मत्ती २७:४० 20 मिनु यहूदीपुकीमी “परमप्रभु यावे आ खिं सेल्चा कली ४६ बर्स माल्शो बाक्त। दोपा नाक्त सांमी सेल्ने चाप्नेवे ङा?” देंतेक्म। 21 येसुमी आ रां आ पर्बम लोव़ पाप्तु। आ रां परमप्रभु यावे आ खिं बाक्ब। १कोरिन्थी ६:१९ 22 मिनु नोले परमप्रभु यावेमी येसु कली बेक्शो रे सेंदानु, आ शेंसीबपुकीमी ङोंइती आ रां आ पर्बम पशो लोव़ फ्रुक्तेक्म। मिनु परमप्रभु यावेमी ब्रेक्पाइश्शो लोव़ नु येसु आ देंशो लोव़ थमा सुइक्तेक्म। होसे ६:२ 23 मिनु येसु पास्सा चाडम यरूसलेममी बाक्शा, छक लाक्चा ङा गेय पवानु, मेको तशा, शुश मुरपुकीमी “परमप्रभु यावे आ तौ बाक्त” दे थमा सुइक्तेक्म। 24 येसुमी चहिं मेको आन कली थमा मसुद। 25 मारदे हना मुर नेल्ल आन कली तुइश्शा, आन पर्बम लोव़ नेंचा ममाल्द। आन थुंमी मार बाक्मे, मेको नेल्ल तुइश्शो बाक्त। मर्कूस २:८
परमप्रभु आ राज्य आ पर्बम शेंशो
1 मिनु फरिसी आन हुल ङा यहूदी आन ठेयब मुर का बाक्त। मेको आ नें निकोदेमस बाक्त। यूहन्ना ७:५०; यूहन्ना १९:३९ 2 मिनु नाक्दो मेको मुर येसु आ बाक्तीक जाक्शा, येसु कली “शेंब, गे परमप्रभु यावे आ सोइश्शो शेंब ननी, दे तुइक्नीकी। मारदे हना परमप्रभु यावे आ सोइश्शोमी ला गे इन खोदेंशो पा छक लाक्चा ङा गेय पने चाप्ब” देंत। 3 मिनु येसुमी “नोफा दाइश्शा थमा लोव़ नेनीन, मुर लेंशा, इर रे नक पा मजरमेसाक्व हना, परमप्रभु यावे आ राज्य तने मचाप्ब” देंत। १पत्रुस १:२३ 4 मिनु निकोदेमसमी “कोल्शो मुर दोपा लेंशा जरमेने चाप्बा ङा? मेको लेंशा, आ ममा आ कोव़ज ओव़शा, जरमेने चाप्बा ङा?” दे हिल्लो पाप्तु। 5 मिनु येसुमी “नोफा दाइश्शा थमा लोव़ नेनीन, ब्वाक्कु रे नु परमप्रभु यावे आ सोक्त रे जरमेशो मुरपुकी ला परमप्रभु यावे आ राज्य ओव़ने चाप्नीम। इजीकीएल ३६:२५-२७; मत्ती ३:११; तीतस ३:५ 6 मुर आ रां रे जरमेशो मुरपुकी रागी कली ला गारनीम। परमप्रभु यावे आ सोक्त रे जरमेशो मुरपुकी चहिं परमप्रभु यावे आ राज्य कली गारनीम। यूहन्ना १:१३; रोमी ८:५-९ 7 मुर लेंशा जरमेचा माल्ब, दे आं लोव़ नेंशा छक मलाक्कीन। 8 फश ते रे जाक्ब, ते लाइबा मतुंइसीब। आ रेयके नेंशा यो ते रे ग्रूबा, ते ते लाइबा, मतुंइसीब। परमप्रभु यावे आ सोक्त रे जरमेशो मुर मेको खोदेंशो बाक्नीम” देंत। 9 मिनु निकोदेमसमी “इन देंशो दोपा दुम्ने चाप्बा ङा?” दे हिल्लो पाप्तु। 10 मिनु येसुमी “गे इस्राएली आन कली शेंब दुम्शा यो, एको लोव़ मतुइक्नीनी? 11 नोफा दाइश्शा थमा लोव़ नेनीन, गो आंइ तुइश्शो लोव़ पाइनीकी। आंइ तशो यो शेंनीकी। गे चहिं आंइ शेंशो थमा मसुइक्नीनी। 12 गो इन कली रागी ङा लोव़ पङानु, गे थमा मसुइक्नीनी। मिनु गो स्वर्ग ङा लोव़ पाता हना, गे दोपा थमा सुइक्ने चाप्नीनी? 13 मुर परमप्रभु यावे आ बाक्तीकेम मलम। स्वर्ग रे जाक्शो रागीमी जरमेशो ला परमप्रभु यावे आ बाक्तीकेमी बाक्शो बाक्त। 14 मोसा गोरशो रागीम बाक्मेनु, कांसा के बुस्स सेल्शा, मेको कली क्युक्शा वोदा बाक्त। मोपा रागीम जरमेशो यो क्युक्चा पुंइसीब। गन्ती २१:८-९ 15 मारदे क्युक्चा पुंइसीब देंशा हना, सुमी मेको कली थमा सुइक्बा, मेको गेना हना यो ब्रोंइशा बाक्चा ताइब” देंत। 16 परमप्रभु यावेमी रागी ङा मुर आन कली शुश दाक्ताक्व। मोपतीके आ कांइचीक तौ रागीमी सोइक्ताक्व। सु सुमी मेको कली थमा सुइक्नीमी, मेकोपुकी नरक मलाइनीम। तन्न गेना हना यो परमप्रभु यावे नु बाक्चा ताइनीम। रोमी ५:८; रोमी ८:३२; १यूहन्ना ४:९ 17 परमप्रभु यावेमी रागी ङा मुर आन कली निसाफ पा नरकमी वोइक्चा, दे आ तौ मसोइक्त। तन्न रागी ङा मुर आन कली नरक रे प्रोंइचा कली सोइक्ताक्व। लूका १९:१० 18 सुमी परमप्रभु यावे आ तौ कली थमा सुइक्बा, मेको स्वर्गमी निसाफ पचा मपुंइसीब। सुमी चहिं थमा मसुइक्बा, मेको ङोंइती रेन निसाफ पा सजाइ तचा पुंइसीब दुम्शो बाक्ब। मारदे हना मेकोमी परमप्रभु यावे आ कांइचीक तौमी पाप रे प्रोंइब, दे थमा मसुइश्शो बाक्ब। यूहन्ना ५:२४ 19 मिनु निसाफ दोदेंशो बाक्ब देंशा हना, छेङछेङ माइश्शो रागीम जाक्त। मुरपुकीमी छेङछेङ क्येङा छिङछिङ कली शुश दाक्ताक्म। मारदे हना आन पशो गेय मरिम्शो बाक्त। यूहन्ना १:५,९-११ 20 सुमी मरिम्शो गेय पाइबा, मेकोम छेङछेङ कली काइ मदाक्ब। आ गेय मतांइसेक्ल, दे छेङछेङमी मलाइब। एफिसी ५:१३ 21 सुमी चहिं थमा पा रिम्शो गेय पाइबा, मेको छेङछेङमी लाइब। मारदे हना आ रिम्शो गेय परमप्रभु यावे कली टिशो नेल्ल तांइसेक्ल, दे छेङछेङमी लाइब। १यूहन्ना १:६-७
यूहन्नामी येसु आ पर्बम शेंशो
22 मिनु नोले येसु नु आ शेंसीबपुकी यहूदीया रागी लाम्तेक्म। मेकेर आ शेंसीबपुकी नु बाक्शा, ब्वाक्कुमी ख्रुम्शा ग्रुंइतीक गेय पाम्तेक्म। यूहन्ना ४:१-२ 23 यूहन्नामी यो सालीम सहर आ नेक्था एनोन बाक्तीक ङा शुश ब्वाक्कु बाक्तीकेमी ब्वाक्कुमी ख्रुम्शा ग्रुंइतीक गेय पशो बाक्त। शुश मुर जाक्शा, ब्वाक्कुम ख्रुम्शा ग्रुंइचा पुंइसाक्म। 24 मेना यूहन्ना जेल्खानम चोक्चा मपुंइसीशो बाक्त। मर्कूस १:१४ 25 मिनु यूहन्ना आ शेंसीबपुकीमी “दोपा पाप क्याम्सीबा?” दे यहूदी का नु लोव़ पाम्तेक्म। 26 मिनु यूहन्ना कली ग्रुम्शा “शेंब, मेको यर्दन खोला आइक्ची हांबुम गे नु बाक्ब, इन तुइक्पाइश्शो परमप्रभु यावे आ तौम ब्वाक्कुमी ख्रुम्शा ग्रुंइतीक गेय पाइब। मिनु मुर नेल्ल मेकेर लाइनीम” दे यूहन्ना कली देंतेक्म। यूहन्ना १:२६-३४ 27 मिनु यूहन्नामी “परमप्रभु यावेमी गेशो गेय ङा लाक्शा, सुइमी मारेइ गेय पने मचाप्नीम। हिब्रू ५:४ 28 गे आं कली तुइक्नीनी। गो ख्रीस्त मनङ। तन्न गो ख्रीस्त आ ङोंइती शेंचा कली सोंइसीशो नङ, दे आं शेंशो लोव़ तुइक्नीनी। यूहन्ना १:२०,२३,२७ 29 ग्युम्लेमी ग्युम्ली कली चाक्शो तशा, आ लोव़ नेंशा, आ वारच ग्येरसीब। मोपतीके गो थमा पा ग्येरसीनुङ। मत्ती ९:१५ 30 मेको ठेयब दुम्चा माल्ब। गो चहिं आइक्च दुम्चा माल्नुङ। 31 मेको स्वर्ग रे जाक्ब नेल्ल क्येङा ठेयब बाक्ब। रागी रे दुम्शो चहिं रागी ङा मुर बाक्ब। रागी ङा मुर आन पर्बम ला तुइश्शा लोव़ पाइब। स्वर्ग रे जाक्शो चहिं नेल्ल आन क्येङा ठेयब बाक्ब। यूहन्ना ८:२३ 32 मिनु आ तशो नु आ नेंशो आ पर्बम लोव़ पाइब। तन्न सुइमी आ देंशो लोव़ थमा मसुइक्नीम। 33 सु सुमी आ देंशो थमा सुइक्नीम, मेकोपुकीमी ‘परमप्रभु यावेमी ङोंइती देंशो लोव़ थमा बाक्ब’ दे तुइश्शा गेय पाइनीम। 34 परमप्रभु यावे आ सोइश्शोमी परमप्रभु यावे आ लोव़ पाइब। मेकोमी परमप्रभु यावे आ सोक्तीमी ब्रीतीके आ लोव़ पाइब। यूहन्ना १:१६ 35 आफोमी आ तौ कली दाक्शा, मेको कली नेल्ल क्येङा ठेयब अधिकार गेप्तु। यूहन्ना ५:२०; मत्ती ११:२७ 36 सुमी आ तौ आ देंशो थमा सुइक्बा, मेको गेना हना यो ब्रोंइशा बाक्चा ताइब। सुम चहिं आ देंशो मटीबा, मेको गेना हना यो ब्रोंइशा बाक्चा मतथु, परमप्रभु यावे आ गाइश्शो ताइब” दे यूहन्नामी शेंताक्व।
येसुमी सामरी आन कली शेंशो
1 फरिसीपुकीम “प्रभु येसुमी यूहन्ना क्येङा शुश शेंसीब सेल्शा नु ब्वाक्कुमी ख्रुम्शा ग्रुंइतीक गेय पाइब” दे तुइश्शो बाक्तेक्म। मेकोन येसुमी तुइक्ताक्व। यूहन्ना ३:२२-२६ 2 मेको गेय येसुमी आंमा मपथु, आ ङोंइती ङा शेंशो १२ जना शेंसीब आन कली पपाइक्तु। 3 मिनु आ शेंसीबपुकी नु यहूदीया रागी रे पा, गालील रागी गे लाम्तेक्म। 4 मिनु लमानु, सामरीया रागी जाक्दीत्तेक्म। 5 सामरीया रागीमी गाक्शा, सीकार सहर जाक्दीत्तेक्म। सीकार सहर आ नेक्था याकूब आ रू बाक्त। मेको रू आ तौ योसेफ आ थेरशो रू बाक्त। उत्पत्ती ४८:२२; यहोसु २४:३३ 6 मेकेर याकूब आ दोशो इनार यो बाक्त। मिनु येसु मेकेर जाक्दीश्शा, दशा, इनार तारी नांइसाक्व। मेना १२ बजे खोदेंशो दुम्शो बाक्त। 7 मेना सामरीया ङा मीश मुर का ब्वाक्कु दिथ जाक्त। मिनु येसुमी मेको मीश मुर कली “ब्वाक्कु तूचा गेयी” दे पुंइतु। 8 मेना आ शेंसीबपुकी जचा थोव़क ग्याप्थ सहर लशो बाक्तेक्म। 9 मिनु मीश मुरुमी “गे यहूदी ननी। गो चहिं सामरीया ङा नङ। मिनु आं गुइ रे दोपा ब्वाक्कु तूचा पुंइनीनी?” दे येसु कली मदा बाक्त। मारदे हना सामरी ङा मुर आन थिशो ब्वाक्कु यहूदीपुकीमी मतूबाक्मा बाक्त। सामरीया ङा मुरपुकी आइक्च जात ङा मुर नम। लूका ९:५२-५३ 10 मिनु येसुमी मेको मीश मुर कली “परमप्रभु यावेमी इ कली मार गेचा दाक्ब, दे तुइक्ताक्वी हना, नु ब्वाक्कु पुंइब, आं कली, सु बाक्नुङ, दे तुइक्ताक्वी हना, आं कली ‘ब्वाक्कु गेयी’ दे पुंइदी वा। मिनु ब्रोंइचा गेब ब्वाक्कु गेन वा” दे मदा बाक्त। यूहन्ना ७:३८-३९ 11 मिनु मीश मुरुमी “प्रभु, एको इनार दुइश्शो बाक्ब। इन के ब्वाक्कु ग्रुंइतीक मबा। ते रे ब्रोंइचा गेब ब्वाक्कु गेनीनी? 12 आंइ किकी पिप याकूब क्येङा गे ठेयब ननी ङा? याकूबमी आंइ कली एको इनार गेशो बाक्माक्त। एकेर ङा ब्वाक्कु आंमा यो तूङा बाक्त। आ तौपुकी नु आ बी ब्यफपुकीमी यो एको ब्वाक्कु तूङमे बाक्त, दे मतुइक्नीनी?” देंत। 13 मिनु येसुमी “सुमी एको ब्वाक्कु तूबा, मेकोमी लेंशा तूतू दाक्ब। यूहन्ना ६:५८ 14 तन्न सुमी आं गेशो ब्वाक्कु तूबा, मेकोमी लेंशा तूतू मदाक्ब। आं गेशो ब्वाक्कु मुर आगामी बुक्शो खोदेंशो पा बारशा, गेना हना यो ब्रोंइशा बाक्चा गेब” देंत। यूहन्ना ६:३५; यूहन्ना ७:३८-३९; भजन संग्रह ३६:१० 15 मिनु मीश मुरुमी “प्रभु, मेको ब्वाक्कु गेयीनी। मिनु तूतू मदाक्ङल। ब्वाक्कु दिथ पिचा यो ममाल्ङल” देंत। 16 मिनु येसुमी “इ वोंइश ब्रेश्शा चाक्को” देंत। 17 मिनु मीश मुरुमी “आं वोंइश मबाक्ब” देंत। येसुमी “गे इ के वोंइश मबाक्ब, दे थमा लोव़ पाप्तीवी। 18 इ के ५ जना वोंइश बाक्तेक्म। मुल गे नु बाक्ब चहिं इ वोंइश ममाइ। इ लोव़ थमा बाक्ब” देंत। 19 मिनु “प्रभु, गे परमप्रभु यावे आ लोव़ पाइब का बाक्नी बाक्त। मोपतीके आं मारेइ मारेइ तुइक्ताक्नी। 20 आंइ किकी पिपीमी मेको डांडामी परमप्रभु यावे कली ठेयब सेल्शो बाक्तेक्म। गे यहूदीपुकीमी चहिं ‘यरूसलेम सहरमी परमप्रभु यावे कली ठेयब सेल्चा माल्ब’ दे देंनीनी” देंत। ब्यवस्था १२:५; भजन संग्रह १२२:- 21 मिनु येसुमी मेको मीश मुर कली “इच्का नोले गे इं आफ कली मेको डांडामी नु यरूसलेममी ठेयब मसेल्नीनी। गे आं देंशो लोव़ थमा सुतो। 22 गे परमप्रभु यावे कली मतुइक्थु ठेयब सेल्नीनी। गो चहिं परमप्रभु यावे कली तुइश्शा ठेयब सेल्नीकी। मारदे हना पाप रे प्रोंइब यहूदी आन दाते रे जाक्ब। २राजा १७:२९-४१; यसैया २:३ 23 मिनु मुल नु नोले थमा पा आं आफ कली ठेयब सेल्बपुकीमी आ सोक्त आ पतीकेमी थमा पा ठेयब सेल्नीमी। आं आफोमी मोदेंशो मुर माल्ब। 24 परमप्रभु यावे सोक्त बाक्ब। मिनु सुम मेको कली ठेयब सेल्नीमी, मेकोपुकीमी आ सोक्त पतीकेमी थमा पा ठेयब सेल्चा माल्नीम” देंत। २कोरिन्थी ३:१७; रोमी १२:१ 25 मिनु मीश मुरुमी “मस्सीह जाक्ब, दे तुइक्नुङ। मेको कली ख्रीस्त यो देंनीमी। मेको जाक्शा, आंइ कली नेल्ल शेंब” देंत। यूहन्ना १:४१ 26 मिनु येसुमी “गे नु लोव़ पाइब, गो मेको नङ” देंत। 27 मेना येसु आ शेंसीब जाक्तेक्म। मेकोपुकीमी मेको कली सामरीया ङा मीश मुर नु लोव़ पशो तशा, छक लाक्तेक्म। तन्न सुइमी “मारदे गे मेको नु लोव़ पाइनीनी? मार माल्नीनी?” दे हिल्लो मपाम। 28 मिनु मीश मुरुमी आ गर प्रोंइशा, सहर लत। मिनु सहर जाक्दीश्शा, सहर ङा मुर आन कली 29 “मुर का कली कोव़थ पिने। मेकोमी आं पशो नेल्ल तुइश्शा गो नु लोव़ पाप्तु। मेको ख्रीस्त बाक्म, कों?” दे मुर आन कली माइक्मी बाक्त। 30 मिनु सहर ङा मुर नेल्ल येसु कली कोव़थ जाक्तेक्म। 31 मिनु आ शेंसीबपुकीमी “शेंब, लो जने” देंतेक्म। 32 तन्न येसुमी “इन मतुइश्शो जचा थोव़क गो नु बाक्ब” देंत। 33 मिनु शेंसीबपुकीमी “सुइमी जचा थोव़क चाक्शा, गेमे कों” देंमुम्तेक्म। 34 येसुमी मेको आन कली “आं जचा थोव़क मार बाक्ब देंशा हना, आं कली सोइक्ब आ दाक्शो पचा नु आ देंशो गेय थुम्चा। मेको आं के जचा थोव़क बाक्ब। यूहन्ना ६:३८; यूहन्ना १७:४ 35 गेपुकीमी ‘४ महिना नोले बाली नाली रुप्ची जाक्ब’ देंनीनी। गो चहिं रू कोव़ङीन, हो हो पा मीशा, रुप्ची जाक्शो बाक्ब। मत्ती ९:३७ 36 रुप्बमी गाल्च ताइब। मेकोमी गेना हना यो ब्रोंइशा बाक्चा कली मुर आन कली चाक्ब। मिनु शोक्ब नु रिक्ब नेल्ल कालेम ग्येरसीनीम। 37 मारदे हना ‘का निक्शीमी शोक्नीम, का निक्शीमी रुप्नीम’ देंशो लोव़ थमा बाक्ब, दे तुंइसीब। 38 मिनु गो इन कली इन मशोक्शो रुप्थ सोइक्नन्नी। अर्कोमी शोक्तीक गेय पाम्तेक्म। गे चहिं मेको आन शोक्शो रुप्नीनी” देंत। 39 मेको मीश मुरुमी सामरीया ङा सीकार सहर ङा मुर आन कली “आं पशो गेय नेल्ल माइक्ती” देंशो नेंशा, सामरीया ङा मुर शुशेमी “मेकोन परमप्रभु यावे आ सोइश्शो ख्रीस्त बाक्त” दे थमा सुदमे बाक्त। 40 मिनु सामरीया ङा मुरपुकीमी येसु आ बाक्तीक जाक्शा “गो नु काथा बाक्कीन” दे पुंइतेक्म। मोपतीके येसु नाक्त निक्शी सम्म मेको नु बाक्त। 41 मिनु येसु आ शेंतीक लोव़ नेंशा, ङोंइती क्येङा शुश मुरपुकीमी थमा सुइक्तेक्म। 42 मेकोपुकीमी मीश मुर कली “इ देंतीक गो थमा मसुइक्नीकी। तन्न आ शेंशो आंमा नेंतक। रागी ङा मुर आन कली पाप रे प्रोंइब एकोन बाक्त, दे रुप्शा तुइक्ताक्क” देंतेक्म। प्रेरित ८:५-८
येसुमी आल कली सापाइश्शो
43 मिनु नाक्त निक्शी बाक्शा, येसु मेकेर रे गालील रागी गे लत। मत्ती ४:१२ 44 येसुमी “आंम रागी ङा मुरपुकीमी परमप्रभु यावे आ लोव़ पाइब कली काइ महिक्नीम” देंत। मत्ती १३:५७ 45 मिनु गालील रागी जाक्मेनु, गालील ङा मुरपुकीमी मेको कली ब्राम्तेक्म। मारदे हना मेकोपुकीमी यो पास्सा नाक्त यरूसलेममी बाक्शा, येसु आ पशो नेल्ल तशो बाक्तेक्म। यूहन्ना २:२३ 46 मिनु येसु ङोंइती ब्वाक्कु रे अङगुर शांबु सेल्तीक गालील रागी ङा काना सहरमी जाक्शो बाक्त। मिनु कापेरनाउम सहरमी पिप आ गेय पाइब कप्तान का बाक्शो बाक्त। मेको आ तौ रोइ पशो बाक्माक्त। यूहन्ना २:१,९ 47 मेको कप्तानमी “येसु यहूदीया रे गालील रागीमी जाक्त” दे नेंशा, येसु कली ग्रुम्थ जाक्त। मिनु मेकोमी येसु कली “आं तौ बेक्चा चिक्ताक्व, सापतीने” देंत। 48 मिनु येसुमी “गे चिन्ड नु छक लाक्चा ङा गेय मताइतीनी हना, आं कली थमा मसुइक्नीनी” देंत। यूहन्ना २:१८; १कोरिन्थी १:२२ 49 कप्तानमी “प्रभु, आं तौ मबेक्थु, आं खिं जाक्कीन” दे पुंइतु। 50 मिनु येसुमी “इन खिं लने, मारदे हना इन तौ साशा ब्रोंइब” देंशा सोइक्ताक्व। मिनु येसु आ देंशो थमा सुइश्शा, आ खिं लेश्शा लत। 51 मिनु लना लन बाक्मेनु, आ गेय पाइबपुकीमी लांमी ग्रुम्शा “इन तौ सात” दे शोव़ङमे बाक्त। 52 मिनु “गेना रे आं तौ साचा गोवा?” दे हिल्लो पवानु “सिनाक्त छकाल रे जरो शिक उइक्ताक्व” देंमा बाक्त। 53 मेको आल आ आफोमी “इन तौ साशा ब्रोंइब” दे येसुमी देंमेनु, सामाक्त, दे तुइक्ता बाक्त। मिनु मेको नु आ खिं ङा मुर नेल्लेमी थमा सुदमे बाक्त। 54 येसुमी यहूदीया रे गालील रागी जाक्शा, खेयप निक्शी ङा आ पशो छक लाक्चा ङा गेय एको बाक्ब। यूहन्ना २:११
येसुमी खोइल मदुक्ब सापाइश्शो
1 यरूसलेममी यहूदी आन के चाड का बाक्त। मिनु येसु यरूसलेम लत। यूहन्ना २:१३ 2 यरूसलेम सहर कली गारोमी हिरशो बाक्ब। मेको गारोमी लाप्चोपुकी बाक्नीम। मेको गारो ङा ठेयब लाप्चो का कली भेडा लाप्चो देंनीम। मेको आ नेक्थामी हिब्रू लोव़मी बेथेस्दा माइश्शो दोम्ली का बाक्ब। मेको दोम्ली बाक्तीकेमी ५ ओटा पाटी खिं बाक्नीम। नेहेम्याह ३:१ 3 मेको खिं आगामी शुश रोइ पाइब, मिक्च मताइब, गुइ खोइल मदुक्ब, रां सोव़शो रोइ पाइबपुकी बाक्शो बाक्तेक्म। मेको मुरपुकी दोम्ली ङा ब्वाक्कु गेना हिम्सीब, दे कोव़चा कली बाक्शो बाक्मा बाक्त। 4 मारदे हना परमप्रभु यावे आ स्वर्ग ङा गेय पाइबमी यिशा, दोम्ली ङा ब्वाक्कु कली हिम्बाक्माक्त। मिनु ब्वाक्कु हिम्सेनु, नेल्ल क्येङा ङोंइती दोम्लीम ग्रुम्ब आ रोइ साबाक्माक्त। 5 मिनु मेकेर ३८ बर्स सम्म रोइ पशो मुर का बाक्त। 6 मिनु येसुमी मेको कली तशा “मेको मुर शुश बर्स रोइ पशो बाक्त” दे तुइश्शा “गे साचा दाक्नेवे?” दे हिल्लो पाप्तु। 7 मेको रोइ पाइबमी “प्रभु, ब्वाक्कु हिम्सेनु, आं कली दोम्लीमी ख्रुम्ब मुर सुइ मपिदु। मिनु गो हना यो ‘लङ’ देंङानु, मुर का आं ङोंइती ब्वाक्कुमी ग्रुम्ब” देंत। 8 मिनु येसुमी “बोक्को, इ ब्राख्ये कुरशा गाक्को” दे माइक्तु। 9 मो देंशोनु, मेको मुर आ रोइ साशा, छुल बोक्त। मिनु आ ब्राख्ये कुरशा गाक्त। मिनु मेको सापाइश्शो नाक्त चहिं नाइक्तीक नाक्त बाक्त। 10 मोपतीके यहूदीपुकीमी साशो मुर कली “मुलाक्त नाइक्तीक नाक्त बाक्ब। इ ब्राख्ये कुरचा मदुम्ब, दे मतुइक्ती?” देंतेक्म। प्रस्थान २०:१०; येरमीया १७:२१-२२ 11 मिनु मेकोमी “आं कली सापाइक्ब मुरुमी ‘इ ब्राख्ये कुरशा गाक्को’ दे माइक्ती” देंत। 12 मेकोपुकीमी “इ ब्राख्ये कुरशा गाक्को देंब मुर सु बाक्मे?” दे हिल्लो पाम्तेक्म। 13 मिनु मेकोमी “मतुइक्नुङ” देंत। मारदे हना दोम्ली बाक्तीकेमी मुरपुकीमी पुम्दमेनु, येसु मेकेर रे गाक्ने थुम्शो बाक्त। 14 मिनु नोले येसुमी मेको साशो मुर कली परमप्रभु यावे आ खिंमी ग्रुम्तु। मिनु “गे साते। मेको क्येङा ठेयब रोइ मपचा कली गे लेंशा पाप मपावो” दे माइक्तु। यूहन्ना ८:११ 15 मिनु साशो मुरुमी यहूदी आन कली ग्रुम्थ लशा “आं कली सापाइक्ब दा येसु बाक्माक्त” दे माइक्मी बाक्त। 16 सापाइक्ची गेय नाइक्तीक नाक्ती पतीक यहूदीपुकीमी येसु कली श्येत गेचा गोम्तेक्म। मत्ती १२:१४ 17 मिनु येसुमी मेको आन कली “आं आफ मुल सम्म गेय पना पन बाक्ब। गो यो गेय पाइनुङ” देंत। यूहन्ना ९:४ 18 आ लोव़ नेंशा, यहूदीपुकीमी येसु कली साइक्चा माल्तेक्म। मारदे हना नाइक्तीक नाक्ती गेय मपतीके क्याम्चा ला ममाइ “परमप्रभु यावे नु उइक्थ बाक्नुङ। परमप्रभु यावे आं आफ बाक्ब” दे देंशोमी, मेकोपुकीमी येसु कली साइक्चा माल्तेक्म। यूहन्ना ७:३०; यूहन्ना १०:३३
येसुमी यहूदी आन कली शेंशो
19 मिनु येसुमी यहूदी आन कली “नोफा दाइश्शा नेनीन, आं आफोमी मार पाइबा, आ तौमी मेको मतवा सम्म मारेइ पने मचाप्ब। मिनु आफोमी दोदेंशो पाइबा, तौमी मोदेंशोन पाइब। यूहन्ना ३:११,३२ 20 मारदे हना आं आफोमी आ तौ कली दाक्ब। मिनु आ पशो गेय नेल्ल आ तौ कली कोंइब। मिनु आं आफोमी मुल सम्म पपाइश्शो गेय क्येङा नोले ठेयब गेय कोंइपाइक्ब। मेको गेय तशा गेपुकी छक लाक्नीनी। ३:३५ 21 मिनु आं आफोमी बेक्शो आन कली दोपा सेंबा, मोपा आ तौमी यो सु कली बेक्शो रे सेंचा दाक्बा, मेको कली सेंपाइक्ब। दानीएल ७:१३-१४; प्रेरित १०:४२ 22 आं आफोमी मुर आन कली निसाफ मपाइब। तन्न नेल्ल निसाफ पचा ङा गेय आ तौ कली पपाइक्ब। 23 मो दुम्मेनु, आं आफ कली मान पाइबपुकीमी आ तौ कली यो आफ कली खोदेंशो पा मान पाइनीम। सुमी तौ कली मान मपाइबा, मेकोमी तौ कली सोइक्ब आं आफ कली यो मान मपाइब। फिलिप्पी २:१०-११; १यूहन्ना २:२३ 24 नोफा दाइश्शा नेनीन, सुमी आं लोव़ नेंबा नु आं कली सोइक्ब आं आफ परमप्रभु यावे कली थमा सुइक्बा, मेको गेना हना यो ब्रोंइशा बाक्चा ताइब। सजाइ मताइब। मारदे हना बेक्शो रे गेना हना यो ब्रोंइशा बाक्चा ताइब। यूहन्ना ३:१६-१८ 25 नोफा दाइश्शा नेनीन, बेक्शो मुरपुकीमी मुल परमप्रभु यावे आ तौ आ सेंदा नेंनीम। सुमी नेंबा, मेको गेना हना यो ब्रोंइशा बाक्चा ताइब। एफिसी २:५-६ 26 परमप्रभु यावे नु ब्रोंइतीक सोक्त बाक्ब। मिनु आ तौ कली यो मोदेंशो ब्रोंइतीक सोक्ती गेशो बाक्त। यूहन्ना १:१-४ 27 मिनु आ तौ कली निसाफ पतीक अधिकार गेप्तु। मारदे हना आ तौ रागीमी जरमेसीशो बाक्ब। दानीएल ७:१३-१४ 28 आं देंशो आ पर्बम छक मलाक्कीन। मारदे हना इच्का नोले तुरसुमी बाक्शो बेक्शो मुर नेल्लेमी रागीमी जरमेशो आ सेंदा नेंनीम। 29 ङोंइती रिम्शो पाइबपुकी गेना हना यो ब्रोंइशा बाक्चा कली सेंसीनीम। मरिम्शो पाइबपुकी चहिं सजाइ तचा कली सेंसीनीम। दानीएल १२:२; मत्ती २५:४६; २कोरिन्थी ५:१० 30 मिनु गो आंम अधिकारमी मारेइ पने मचाप्नुङ। गो दोदेंशो नेंनुङ, मोदेंशो पा निसाफ पाइनुङ। आं निसाफ चहिं ठीक बाक्ब। मारदे हना आं दाक्शो मपथु, आं कली सोइक्ब आ देंशो पाइनुङ। यूहन्ना ६:३८
येसु सु बाक्म, देंशो सांकछी
31 गो आं पर्बम लोव़ पाता हना, मेको लोव़ थमा बाक्ब, दे थमा मसुइक्नीनी। 32 आं पर्बम अर्कोमी लोव़ पाइब, गो मेको तुइक्नुङ। 33 मेको लोव़ देंब चहिं यूहन्ना बाक्ब। गे मेको कली ‘गे सु ननी?’ दे हिल्लो पथ सोइक्ताक्नी। मिनु यूहन्नामी आं पर्बम थमा पा शेंताक्व। 34 आं पर्बम शेंशो चहिं मुरुमी शेंतीक ममाइ। पाप पशो आ पर्बम सजाइ रे ब्रोनीन, दे इन कली देंनुङ। 35 यूहन्ना छेङछेङ पा ब्रशो बत्ती खोदेंशो बाक्त। गे मेको आ हाम्सोमी ग्येरशा बाक्चा दाक्ताक्नी। 36 मिनु यूहन्नामी आं पर्बम शेंशो ठेयब बाक्त हना यो, आं पर्बम मेको क्येङा ठेयब सांकछी का बाक्ब। आं सांकछी मार बाक्ब देंशा हना, आं आफोमी आं कली पपाइश्शो गेय बाक्ब। मेको आं पशो गेयमी ‘परमप्रभु यावेमी आं कली सोइक्ताक्व’ दे इन कली शेंब। यूहन्ना ३:२; यूहन्ना १०:२५:३८ 37 आं कली सोइक्ब आं आफ आं सांकछी बाक्ब। गेपुकीमी आं आफ आ सेंदा गेनायो मनेनी। मेको कली गेनायो मतनी। मत्ती ३:१७ 38 आं आफ आ लोव़ इन थुंमी मबा। मोपतीके गेपुकीमी आं आफोमी सोइश्शो कली थमा मसुइक्नीनी। 39 गे परमप्रभु यावे आ लोव़ शेंसीन सीन बाक्नीनी। मारदे हना मो पशोनु, ब्रोंइशा बाक्चा तांइसीब, दे मिम्नीनी। मिनु परमप्रभु यावे आ लोव़मी आं पर्बम ब्रेक्शो बाक्त। लूका २४:२७,४४; २तिमोथी ३:१५-१७ 40 गे चहिं ब्रोंइचा तकल, दे आं गे मपीनीनी। 41 गो मुर आन ठेयब सेल्तीके मब्राइनुङ। 42 मिनु परमप्रभु यावेमी गेशो दाक्तीके गेपुकी नु मबाक्ब, दे गो तुइक्नुङ। 43 गो आं आफ आ नेंमी जाक्ती। तन्न गेपुकीमी आं कली मब्रनी। सुइ मुर आंम आ नेंमी जाक्त हना, मेको कली चहिं ब्राइनीनी। मत्ती २४:५ 44 मोपा गे ठेयब सेल्मुइनीनी। तन्न का ला परमप्रभु यावेमी इन कली ‘रिम्शो ननी’ देंचा मपुंइसीनीनी। आं कली दोपा थमा सुइक्ने चाप्नीनी ङा? यूहन्ना १२:४२-४३; १थिस्सलोनिकी २:६ 45 गो परमप्रभु यावे आ ङोंइती इन कली दोस गेनन्नी, दे ममिम्तीन। गे मोसामी ब्रेक्शो लोव़मी आस पाइनीनी। तन्न मेको मोसा आ ब्रेक्शो लोव़मी इन कली दोस गेब। ब्यवस्था ३१:२४-२७ 46 गे मोसा आ लोव़ थमा सुइक्नी हना, आं कली यो थमा सुइक्नी वा। मारदे हना आं पर्बम ब्रेक्शो बाक्त। उत्पत्ती ३:१५; उत्पत्ती ४९:१०; ब्यवस्था १८:१५ 47 तन्न गे मोसा आ ब्रेक्शो लोव़ ठीक पा थमा मसुइक्नीनी। मिनु आं लोव़ दोपा थमा सुइक्ने चाप्नीनी ङा?” दे येसुमी यहूदी आन कली देंत। लूका १६:३१
शुश मुर आन कली थुल्शो
1 मिनु नोले येसु गालील ङा समुन्द्र आइक्ची हांबु लत। गालील ङा समुन्द्र कली तिबेरीयास समुन्द्र यो देंनीम। 2 मिनु शुश मुरपुकीमी येसु आ नोले खोइक्तेक्म। मारदे हना येसुमी छक लाक्चा ङा गेय पा, रोइ पाइब आन कली सापाइश्शो तशो बाक्तेक्म। 3 मिनु येसु आ शेंसीबपुकी नु आइक्था डांडा गे ङोइश्शा, तशो बाक्तेक्म। 4 मेना यहूदी आन पास्सा चाड जाक्चशो बाक्त। मोपतीके शुश मुर लांम गाक्शो बाक्तीक येसु आ नेक्था जाक्तेक्म। यूहन्ना २:१८; यूहन्ना ११:५५ 5 येसुमी शुश मुर जाक्शो तशा, फिलीप कली “शोब्ले ग्याप्शा, नेल्ल आन कली दोपा थुल्चा?” दे हिल्लो पाप्तु। 6 येसुमी चहिं “आं कली थमा सुइक्बा कों, मसुइक्बा” दे फिलीप आ थुं कोव़चा कली मोदेंशो देंत। येसुमी “गो छक लाक्चा ङा गेय पाइनुङ” दे तुइक्ताक्व। 7 मिनु फिलीपमी “मेको मुरपुकीमी इच्कका ला जाम्तेक्म हना, सहे निक्शी देनारमी यो मेको आन कली शोब्ले ग्याप्चा कली मजाक्दीप्ब” देंत। मेना देनार का काबु ङा गेय आ गाल्च बाक्त। 8 मिनु सिमोन पत्रुस आ लोक्ब अन्द्रीयासमी येसु कली 9 “एकेर वोंइश आल का बाक्ब। मेको नु ५ ओटा क्योव़ज के शोब्ले नु ङांइ निक्शी बाक्ब। एको इश ङा मुर आन कली ओशोमी मार गाप्बा ङा?” देंत। 10 मिनु येसुमी “मुर आन कली निप्पतीन” देंत। मेकेर रिम्शो दिंम का बाक्त। मिनु मुरपुकी नेल्ल निस्साक्म। आल नु मीश मुर प्रोंइशा, ५ हजार खोइ वोंइश मुर बाक्तेक्म। 11 येसुमी मेको शोब्ले ताक्शा “गे रिम्शो पाइब बाक्नीनी” दे परमप्रभु यावे कली ठेयब सेल्शा, मुर आन कली शोब्ले योक्पाइक्तीमी। मोदेंशो पा ङांइ यो योक्पाइक्तीमी। मिनु मुरपुकीमी दोशो जचा ब्वचा दाक्मा, मोशोन गेपाइक्तीमी। 12 मिनु मुर नेल्लेमी रूथ्री जामे नोले, येसुमी आ शेंसीब आन कली “एर ओंथ दोशो शोब्ले लीशो बाक्मे, मेको नेल्ल खुप्तीन” देंत। 13 मिनु गुप्शा, १२ डालो प्रिंताक्म। मेको लीशा गुप्शो शोब्ले ङोंइती ङा ५ ओटा रे दुम्शो बाक्तेक्म। 14 मिनु मुरपुकीमी येसु आ पशो छक लाक्चा ङा गेय तशा “रागीमी जाक्ब परमप्रभु यावे आ लोव़ पाइब एकोन बाक्त” देंतेक्म। ब्यवस्था १८:१५ 15 मिनु येसुमी “आं कली ग्याइश्शा, पिप सेल्नीमी” दे तुइश्शा, आ का ला डांडा ङोंइसाक्व। यूहन्ना १८:३६
येसु ब्वाक्कु तार गाक्शो
16 मिनु नां रिक्चावानु, येसु आ शेंसीबपुकी गालील ङा समुन्द्र आ नेक्था जाक्शा, 17 डोंगामी ङोइश्शा, समुन्द्र शोक्शा, कापेरनाउम सहर गे लचा गोम्तेक्मे। मेना नां रिक्शो बाक्त। येसु चहिं लेश्शा मजाक्शो बाक्त। 18 मिनु ठेयब फश गिवार पा समुन्द्र ङा ब्वाक्कु शुश मुइश्शा, डोंगा कली हिम्पाइक्तु। 19 मिनु येसु आ शेंसीबपुकी डोंगा ङोइश्शा, २५ कि ३० स्तादीयोन खोदेंशो जाक्दीम्मानु, येसु कली समुन्द्र ङा ब्वाक्कु तार गाक्ना गाक्न आन डोंगा गे पिशो ताम्तेक्म। मिनु मेको कली तशा “सु बाक्म” दे हिंतेक्म। स्तादीयोन का १८५ मिटर खोदेंशो बाक्ब। 20 मिनु येसुमी “गो नङ, महिनीन” दे माइक्तीमी। 21 मिनु ग्येरसीशा, येसु कली डोंगामी ङोइक्पाइक्तेक्म। मिनु डोंगामी ङोइक्पाइश्शा, कापेरनाउम जाक्दीत्तेक्म।
येसु ब्रोंइचा गेब शोब्ले बाक्ब
22 मिनु आ दीसा नाक्त शोब्ले जाइब मुरपुकी मेक उइ बाक्शो बाक्तेक्म। सिनाक्ती समुन्द्र आ नेक्था डोंगा का ला बाक्त। मिनु येसु आ शेंसीबपुकीमी मेको डोंगा लाइश्शा, कापेरनाउम गे लाम्तेक्म, दे तुइक्ताक्म। येसु चहिं आ शेंसीबपुकी नु डोंगामी मला, दे यो तुइक्ताक्म। 23 तिबेरीयास सहर रे डोंगापुकी प्रभुमी परमप्रभु यावे कली “गे रिम्शो पाइब बाक्नीनी” देंशा शोब्ले योक्तीक दिंम आ नेक्था जाक्तेक्म। 24 मिनु मुरपुकीमी येसु नु आ शेंसीबपुकी मेकेर मबाक्शो तशा, डोंगा ङोइश्शा, कापेरनाउम गे लशा, येसु कली माल्तेक्म। 25 मिनु मेकेर जाक्दीश्शा, येसु कली थित्तेक्म। मिनु मेकोपुकीमी “शेंब, एकेर गेना जाक्नी?” दे हिल्लो पाम्तेक्म। 26 येसुमी “नोफा दाइश्शा नेनीन, आं छक लाक्चा ङा गेय आ पर्बम ममाइ, तन्न शोब्ले जशा रूतीके आं कली माल्तीनी। 27 राक्चा ङा जचा थोव़क कली श्येत मपने। मराक्चा ङा जचा थोव़क कली चहिं गेय पने। मराक्चा ङा जचा थोव़क मार बाक्मे देंशा हना, गेना हना यो ब्रोंइशा बाक्चा बाक्ब। रागीमी जरमेशोमी इन कली मेको जचा थोव़क गेब। मारदे हना आ आफोमी रागीम जरमेशो कली आ छाप थोक्ताक्व” दे येसुमी शेंताक्व। यूहन्ना ५:३६ 28 मिनु येसु कली “परमप्रभु यावे आ देंशो पचा कली मार गेय पचा माल्नीकी?” दे हिल्लो पाम्तेक्म। 29 मिनु येसुमी “मेको परमप्रभु यावे आ गेय बाक्ब। गेपुकी परमप्रभु यावे आ सोइश्शो कली थमा सुइक्चा, परमप्रभु यावे आ गेय बाक्ब” दे माइक्तीमी। 30 मिनु मेकोपुकीमी लेंशा येसु कली “गे परमप्रभु यावे आ तौ ननी, दे कोंइचा कली मार छक लाक्चा ङा गेय पाइनीनी? 31 आंइ किकी पिपीमी गोरशो रागीमी मन्ना शोब्ले जशो बाक्तेक्म। ‘मेको आन कली सरीङ रे शोब्ले गेम्तीमी’ दे ब्रेक्शो बाक्त” देंतेक्म। भजन संग्रह ७८:२४; प्रस्थान १६:१३-१५ 32 मिनु येसुमी “नोफा दाइश्शा नेनीन, मोसामी इन कली स्वर्ग रे शोब्ले गेशो ममाइ, तन्न आं आफोमी इन कली थमा पा स्वर्ग रे शोब्ले गेब। 33 मारदे हना परमप्रभु यावेमी गेशो शोब्ले स्वर्ग रे यीब। मेकोमी रागी ङा मुर आन कली गेना हना यो परमप्रभु यावे नु ब्रोंइचा गेब” दे माइक्तीमी। 34 मिनु मेकोपुकीमी “प्रभु, मेको शोब्ले गेना हना यो गेकी” दे पुंइतेक्म। 35 मिनु येसुमी “गेना हना यो परमप्रभु यावे नु ब्रोंइचा गेब शोब्ले गो नङ। सु सु आं गे पीनीमी, मेको शोव़लु मबेक्नीम। मिनु आं कली थमा सुइक्बपुकी गेनायो तूतू मदाक्नीम। यूहन्ना ४:१४; यूहन्ना ७:३७ 36 गेपुकीमी चहिं आं कली तशो बाक्तीनी हना यो, थमा मसुइक्नीनी। 37 मिनु आं आफोमी आं कली गेशो मुरपुकी आं गे पीनीम। आं गे पीब आन कली गेनायो मतिल्नुङमी। मत्ती ११:२८ 38 मारदे हना गो आं दाक्शो गेय पथ ममाइ, तन्न आं कली सोइक्ब आ दाक्शो गेय पचा कली स्वर्ग रे जाक्शो नङ। यूहन्ना ४:३४ 39 मिनु आं कली सोइक्ब आ दाक्शो मार बाक्ब देंशा हना, आं कली गेशो मुर का यो मसाम्चा, नु नोले ङा नाक्तीमी मेको आन कली सेंपाइक्चा बाक्ब। यूहन्ना १०:२८-२९; यूहन्ना १७:१२ 40 मिनु सु सुमी परमप्रभु यावे आ तौ, दे आं कली तुइक्नीमी नु थमा सुइक्नीम। मेको आन कली नोले ङा नाक्तीमी सेंपाइश्शा, गेना हना यो ब्रोंइशा बाक्चा गेनुङमी। आं आफ आ दाक्शो गेय मेकोन बाक्त” दे यहूदी आन कली शेंताक्व। यूहन्ना ५:२९; यूहन्ना ११:२४ 41 मिनु यहूदीपुकीमी येसु आ लोव़ नेंशा गन गन पाम्तेक्म। मारदे हना येसुमी “गो स्वर्ग रे यिशो शोब्ले नङ” देंशो बाक्त। 42 मिनु मेकोपुकीमी “मार, एको योसेफ आ तौ येसु ममाइ? मेको आ आम आफ कली गो तुइक्नीकी” देंतेक्म। मिनु मेकोमी “ ‘गो स्वर्ग रे जाक्शो नङ’ दे दोपा देंने चाप्बा ङा?” दे गन गन पाम्तेक्म। लूका ४:२२ 43 मिनु येसुमी मेको आन कली “गन गन मपने। 44 आं कली सोइक्ब आं आफोमी आं कली गेशो मुर ला आं गे पिने चाप्नीम। अरु चहिं मचाप्नीम। आं कली गेशो मुर आन कली नोले ङा नाक्ती सेंनुङमी। 45 मिनु परमप्रभु यावे आ लोव़ पाइब आन किताबमी ‘परमप्रभु यावेमी नेल्ल आन कली शेंब’ दे ब्रेक्शो बाक्त। तेकोमी आं आफ आ लोव़ नेंशा शेंसीबा, मेको आं गे पीब। यसैया ५४:१३ 46 सुइमी आं आफ कली मतामे। परमप्रभु यावे रे यीबमी ला आफ कली तशो बाक्त। यूहन्ना १:१८ 47 मिनु नोफा दाइश्शा नेनीन, सुमी थमा सुइक्बा, मेको गेना हना यो ब्रोंइशा बाक्चा ताइब। यूहन्ना ३:१६ 48 मिनु गो ब्रोंइचा गेब शोब्ले नङ। यूहन्ना ६:३५ 49 इन किकी पिपीमी गोरशो रागीमी मन्ना शोब्ले जचा ताम्तेक्म हना यो, बेक्तेक्म। १कोरिन्थी १०:३-५ 50 तन्न मुरपुकीमी स्वर्ग रे यिशो शोब्ले कली जाम्तेक्म हना, मबेक्थु ब्रोंइशा बाक्नीम। 51 गो स्वर्ग रे यिशो ब्रोंइतीक शोब्ले नङ। सुमी मेको शोब्ले जाइबा, मेको गेना हना यो परमप्रभु यावे नु बाक्शा ब्रोंइब। मिनु रागी ङा मुर आन कली ब्रोंइपाइक्चा, दे मार शोब्ले गेनुङ देंशा हना, आं गेशो शोब्ले आं रां बाक्ब” दे शेंताक्व। मर्कूस १४:२२ 52 मिनु यहूदीपुकीमी “एको मुरुमी आंइ कली दोपा आ रां ब्वचा गेने चाप्बा?” दे लोव़ पा जिम्तेक्म। 53 मिनु येसुमी “नोफा दाइश्शा नेनीन, गे रागीमी जरमेशो आं रां मब्वाइतीनी हना, नु आं हुश मतूतीनी हना, गेना हना यो परमप्रभु नु ब्रोंइशा बाक्चा गेब सोक्त गे नु मबाक्ब। 54 सु सुमी आं रां ब्वाइनीमी नु आं हुश तूनीमी, मेको गेना हना यो ब्रोंइशा बाक्चा ताइनीम। मारदे हना गो मेको कली नोले ङा नाक्ती सेंपाइक्नुङमी। मत्ती २६:२६-२८ 55 आं रां थमा जचा थोव़क बाक्ब। आं हुश यो थम तूचा थोव़क बाक्ब। 56 सुमी आं रां ब्वाइबा नु आं हुश तूबा, मेको आं आगाम बाक्ब। मिनु गो मेको आ आगाम बाक्नुङ। यूहन्ना १५:४; १यूहन्ना ३:२४ 57 दोपा ब्रोंइशा बाक्ब आं आफोमी आं कली सोइश्शा ब्रोंइपाइय्यी, मोपा आं रां ब्वाइब यो गो रे पा ब्रोंइचा ताइब। 58 मेको स्वर्ग रे यिशो शोब्ले बाक्ब। इन किकी पिपीमी शोब्ले जशा बेक्तेक्म। गो मेको खोदेंशो शोब्ले मगेनुङ। सुमी चहिं आं शोब्ले जाइबा, मेको गेना हना यो ब्रोंइशा बाक्ब” देंत। 59 मेको लोव़ येसुमी कापेरनाउम सहर ङा ग्रुम्तीक खिंमी यहूदी आन कली शेंताक्व।
गेना हना यो ब्रोंइचा गेब लोव़
60 मिनु मेको लोव़ नेंशा, येसु आ शेंसीबपुकी शुशेमी “एको आं शेंशो कका पा कशो लोव़ बाक्त। सु नेंने चाप्बा ङा?” देंमुम्तेक्म। 61 येसुमी चहिं “आं शेंसीबपुकीमी आं लोव़ आ पर्बम गन गन पाम्तेक्म” दे तुइश्शा, मेको आन कली “मार, आं पशो लोव़ नेंशा, चुरशा आं कली प्रोंइनीनी? 62 मिनु रागीमी जरमेशो आ ङोंइती ङा बाक्तीकेमी लेश्शो ताइतीनी हना, मार मिम्नीनी? लूका २४:५०-५१ 63 परमप्रभु यावे आ सोक्त ब्रोंइचा गेब बाक्ब। मुरुम चहिं मारेइ पने मचाप्नीम। आं देंशो लोव़ परमप्रभु यावे आ सोक्ती ङा ब्रोंइचा गेब लोव़ बाक्ब। 64 तन्न गे का निक्शी आं कली थमा मसुइक्ब बाक्नीनी” देंत। मारदे हना येसुमी ङोंइती रे आ कली थमा मसुइक्ब सु सु नमी, दे तुइश्शो बाक्त। मिनु येसु आ शेंसीब का येसु कली साइक्ब आन कली वारच पाइब दुम्ब, दे यो तुइश्शो बाक्त। 65 मिनु येसुमी “आं आफोमी आं कली गेशो मुर ला आं गे पिने चाप्नीम, दे ङोंइती रे माइक्तन्नी” देंत। 66 मिनु मोदेंशो शेंशो आ पर्बम शुशेमी येसु आ नोले खोइक्चा प्रोंइतेक्म। 67 मिनु येसुमी आ १२ जना शेंसीब आन कली “गेपुकी यो लाइनीनी?” दे हिल्लो पाम्तीमी। 68 मिनु सिमोन पत्रुसमी “प्रभु, गो सु का आ नोले खोइक्नीकी? गे गेना हना यो ब्रोंइशा बाक्चा ङा लोव़ पाइनीनी। 69 गे परमप्रभु यावेमी योव़शा सोइश्शो ननी, दे तुइश्शा थमा सुइक्नीकी” देंत। मत्ती १६:१६ 70 मिनु येसुमी “गो गे १२ जना इन कली योव़तन्नी। तन्न इन दातेमी सैतान का बाक्ब” देंत। 71 येसुमी मेको लोव़ इस्कारीयोत ङा सिमोन आ तौ यहूदा आ पर्बम देंशो बाक्त। मारदे हना यहूदा मेको १२ जना आन दाते ङा का दुम्शा यो येसु कली साइक्ब आन कली वारच पाइब दुम्त।
बाली ओंइतीक चाडम लशो
1 मिनु नोले येसु गालील रागीमी हिरना हिरन बाक्त। मारदे हना यहूदीपुकीमी येसु कली साइक्चा माल्तीके यहूदीया रागीमी लचा मदाक्शो बाक्माक्त। यूहन्ना ४:४३ 2 मिनु यहूदी आन बाली ओंइतीक चाड जाक्चशो बाक्त। लेवी २३:३४-३६ 3 मिनु आ लोक्बपुकीमी येसु कली “इ शेंसीब आन कली इ गेय कोंइचा कली यहूदीया रागी लावो। यूहन्ना २:१२; मत्ती १२:४६; प्रेरित १:१४ 4 मुरपुकीमी इ कली तुइक्पांइसीचा दाक्नेवे हना, ख्रुइश्शा गेय मपावो। इ पशो गेय मुर आन कली कोंइदीमी” देंतेक्म। 5 मारदे हना आ लोक्बपुकीमी यो येसु कली थमा मसुइक्बाक्तेक्म। 6 मिनु येसुमी आ लोक्ब आन कली “मुल सम्म आं लची मजा। गेपुकी लने चाप्नीनी। यूहन्ना २:४ 7 रागी ङा मुरपुकीमी इन कली श्येत मगेनीम। आं कली चहिं श्येत गेनीम। मारदे हना गो मेको आन कली ‘आन पशो गेय मरिम्शो बाक्ब’ दे कोंइनुङमी। यूहन्ना १५:१८ 8 गे लने, गो मुल मलाइनुङ। मुल आं लची मजा” दे माइक्तीमी। 9 मो देंशा येसु गालील रागीमी बाक्त। 10 मिनु येसु आ लोक्बपुकी चाड मानेथ लाम्तेक्म। मिनु नोले येसु यो मुर आन मतचा ङा पा यरूसलेम लत। यूहन्ना २:१३ 11 मिनु चाडमी यहूदीपुकीमी येसु कली माल्शा “मेको ते बाक्मे” दे हिल्लो पाम्तेक्म। 12 मिनु मुरपुकीमी येसु आ पर्बम शुश ख्रुइश्शा लोव़ पमुम्तेक्म। का निक्शीमी “रिम्शो मुर बाक्ब” देंतेक्म। का निक्शीमी चहिं “ममाइ, मुर आन कली हेंथे गाक्पाइक्ब बाक्ब” देंतेक्म। 13 नेल्लेमी यहूदी आन क्येङा हिंशा, ख्रुइश्शो लोव़ पाम्तेक्म। यूहन्ना ९:२२; यूहन्ना १२:४२; यूहन्ना १९:३८
येसु चाडम बाक्शो
14 मिनु बाली ओंइतीक चाड ङा नाक्त का येसुमी परमप्रभु यावे आ खिंमी लशा, मुर आन कली शेंताक्व। 15 मिनु यहूदीपुकीमी छक लाक्शा “मेको गेनायो मशेंसीशो मुरुम यो दोपा इश ङा जोक्गा?” देंमुम्तेक्म। मत्ती १३:५६ 16 मिनु येसुमी मेको आन कली “आं शेंतीक आं के ममाइ, तन्न आं कली सोइक्ब के बाक्ब। 17 सु मुरुमी परमप्रभु यावे आ दाक्शो पाइबा, मेकोमी आं शेंतीके लोव़ परमप्रभु यावे के बाक्बा कों, आंम के बाक्बा, दे तुइक्ब। 18 सुम चहिं आंम लोव़ शेंबा, मेकोमी आंम कली ठेयब सेल्चा दाक्ब। आं कली सोइक्ब परमप्रभु यावे कली ठेयब सेल्चा दाक्ब चहिं थमा पा काइ पाप मपाइब बाक्ब। यूहन्ना ५:४१,४५ 19 मोसामी इन कली परमप्रभु यावे आ अरेशो लोव़ गेशो बाक्त। मिनु गेपुकी मारदे मेको मपाइनीनी? मारदे आं कली साइक्चा माल्नीनी?” देंत। रोमी २:१७-२४; यूहन्ना ५:१६-१८ 20 मिनु मुरपुकीमी “सुमी इन कली साइक्चा माल्बा? वोलमी इन कली सुम्शो बाक्तीके ‘गे आं कली साइक्चा माल्तीनी’ दे देंनीनी” देंतेक्म। यूहन्ना १०:२० 21 येसुमी “गो गेय का पाता। गे मेको तशा, छक लाक्तीनी। यूहन्ना ५:१६ 22 मोसामी इन कली ‘ख्रोइक्तीक चिनु ख्रोइक्चा माल्ब’ दे अरेशो लोव़ गेशो बाक्त। मेको मोसा आ अरेशो ममाइ, इं किकी पिपी आन अरेशो बाक्त। मिनु गेपुकीमी नाइक्तीक नाक्त ख्रोइक्तीक चिनु ख्रोइक्नीनी। उत्पत्ती १७:१०-१२; लेवी १२:३ 23 मोसा आ गेशो अरेशो लोव़ टिचा कली नाइक्तीक नाक्त यो ख्रोइक्तीक चिनु ख्रोइक्तीनी। गो चहिं मुर का आ रां नेल्ल सापदुनु, गेपुकी मारदे गाइक्नीनी? 24 कुल कोव़शा, निसाफ मपने। तन्न कुल मकोव़थु निसाफ पने” दे माइक्तीमी। 25 मिनु यरूसलेम ङा मुर का निक्शीमी “मुरुमी मेको कली साइक्चा माल्शो ममाइ? 26 मिनु एकेर बाक्शा, मुर नेल्ल आन कली शेंब। मेको कली मारेइ मदेंनीमी। मिनु ठेयब मुरपुकीमी ‘एको ख्रीस्त बाक्त’ दे थमा पा तुइक्ताक्मे? 27 गोपुकीमी चहिं मेको मुर ते रे जाक्मे, दे तुइक्नीकी। तन्न ख्रीस्त जाक्त हना, ते रे जाक्बा, दे सुइमी मतुइक्नीम” दे देंमुम्तेक्म। हिब्रू ७:३ 28 मोपतीके येसुमी परमप्रभु यावे आ खिंमी मुर आन कली ठेयब सेंदा पा “गेपुकीमी आं कली तुइक्नीनी। मिनु गो ते ङा नङ, मेको यो तुइक्नीनी? आंमा मिम्शा मजाक्ङ। तन्न आं कली सोइक्ब थमा पा परमप्रभु यावे बाक्ब। मिनु गेपुकीमी मेको कली मतुइक्नीनी। 29 गो चहिं मेको कली तुइक्नुङ। मारदे हना गो मेको आ बाक्तीक रे जाक्शो नङ। मेकोम आं कली सोइक्ताक्यी” दे शेंताक्मी। मत्ती ११:२७ 30 मिनु यहूदीपुकीमी येसु कली ग्याइक्चा माल्तेक्म। तन्न सुइमी मग्याइक्तेम। मारदे हना येसु कली ग्याइक्ची ना मजाक्शो बाक्त। यूहन्ना ८:२०; लूका २३:५२ 31 मिनु शुश मुरपुकीमी मेको कली थमा सुइक्तेक्म। मेकोपुकीमी “ख्रीस्त अर्को बाक्त हना, मेकोमी एको क्येङा शुश छक लाक्चा ङा गेय पने चाप्बा ङा?” देंतेक्म। 32 मिनु फरिसीपुकीमी मुर आन पशो लोव़ नेंशा, ठेयब चढ़ेब नु फरिसीपुकीमी “येसु कली ग्याइक्चा” दे पिप आ गेय पाइब ठेयब मुर आन कली सोइक्ताक्म। 33 मिनु येसुमी “गो गेपुकी नु इच्का नाक्ती सम्म बाक्नुङ। मिनु नोले आं कली सोइक्ब आ बाक्तीकेमी लाइनुङ। यूहन्ना १३:३३ 34 मेना गेपुकीमी आं कली माल्नीनी। तन्न मथित्नीनी। गे आं बाक्तीकेमी जाक्ने मचाप्नीनी” दे माइक्तीमी। यूहन्ना ८:२१ 35 मिनु यहूदीपुकीमी “एको ते लचा चिक्शो बाक्मे? मिनु गोपुकीमी एको कली मथित्नीकी? ग्रीस ङा मुर आन बाक्तीक लशा, मेकेर ब्रशा बाक्शो यहूदी आन कली ममाइ, तन्न ग्रीस ङा मुर आन कली शेंचा दाक्बा, कों? 36 आ देंशो ‘गेपुकीमी आं कली माल्नीनी, तन्न मथित्नीनी’ मिनु ‘आं बाक्तीकेमी जाक्ने मचाप्नीनी’ दे एको दोदेंशो लोव़ पवा?” देंमुम्तेक्म।
यहूदीपुकी येसु आ पर्बम ब्राशो
37 मिनु बाली ओंइतीक चाड नुप्ची नाक्त नेल्ल क्येङा ठेयब नाक्ती बाक्त। मेना येसुमी मुर आन कली “सु सुमी तूतू दाक्नीमी, मेको आं गे पिशा तूङमेक्ल। लेवी २३:३६; यूहन्ना ४:१०; यसैया ५५:१; प्रकाश २२:१७ 38 सु सुमी आं कली थमा सुइक्नीमी, मेको आन रां रे ब्रोंइचा गेब ब्वाक्कु बुक्ब, दे परमप्रभु यावे आ लोव़मी ब्रेक्शो बाक्ब” दे शेंताक्मी। यसैया ५८:११; येरमीया ३१:१२ 39 मेको आ शेंशो दोदेंशो रुम्सीब देंशा हना, येसुमी परमप्रभु यावे आ सोक्त आ पर्बम शेंशो बाक्त। येसु कली थमा सुइक्बपुकीमी मेको सोक्त कली तचशो बाक्तेक्म। तन्न मेना सम्म परमप्रभु यावे आ सोक्त थमा सुइक्ब आन कली मगेशो बाक्त। मारदे हना येसु आ आफ आ छेङछेङम लाइक्चा मपुंइसीशो बाक्त। यूहन्ना १६:१७ 40 मिनु येसु आ शेंशो नेंशा, मुर का निक्शीमी “एकोन थमा परमप्रभु यावे आ लोव़ पाइब बाक्ब” देंतेक्म। यूहन्ना ६:१४ 41 का निक्शीमी “एकोन ख्रीस्त बाक्त” देंतेक्म। का निक्शीमी “ख्रीस्त गालील रागी रे जाक्बा ङा? यूहन्ना १:४६ 42 परमप्रभु यावे आ लोव़मी ‘ख्रीस्त दाऊद आ खिं ङा मुर रे नु दाऊद आ गाउं बेथलेहेम रे जाक्ब’ मदेंम ङा?” देंतेक्म। मत्ती २२:४२; मीका ५:१; मत्ती २:५-६ 43 मोदुम्तीके मुरपुकी येसु आ पर्बम ब्रातेक्म। यूहन्ना ९:१६ 44 मिनु का निक्शीमी येसु कली ग्याइक्चा माल्तेक्म। तन्न सुइमी मेको कली मग्याइक्तेम। 45 मिनु मेको पिप आ गेय पाइब ठेयब मुरपुकी ठेयब चढ़ेब नु फरिसी आन बाक्तीक लेम्मा बाक्त। मिनु मेको आन कली “मारदे मेको कली मचाक्नी?” दे हिल्लो पामेनु, 46 “मेको मुरुम शेंशो खोदेंशो पा सुइमी गेनायो मशेंदेम” देंमा बाक्त। मत्ती ७:२८-२९ 47 मिनु फरिसीपुकीमी “इन कली यो हेंथे खोइक्पदा? 48 ठेयब मुरपुकी नु फरिसीपुकीमी यो मेको कली थमा सुदमे? 49 तन्न परमप्रभु यावे आ अरेशो लोव़ मजोक्बपुकी सराप रशो बाक्नीम” दे हुइक्तमे बाक्त। 50 मिनु ङोंइती येसु आ बाक्तीक जाक्शो फरिसी आन हुल ङा निकोदेमस माइश्शो मुरुमी यूहन्ना ३:१-२ 51 “आंइ ऐन कानुनमी मुर आ पशो नेंशा ला निसाफ पाइनीम, ममाइ?” देंत। ब्यवस्था १:१६ 52 मेकोपुकीमी “गे यो गालील रागी ङा नवे? परमप्रभु यावे आ लोव़ ब्रेक्शो किताब पढेशा कोव़ङो। गालील रे सुइ परमप्रभु यावे आ लोव़ पाइब मग्रूब, दे मतुइक्नेवे?” देंमा बाक्त। 53 मिनु नेल्ल छुल छाल बोक्शा, खिं लमा बाक्त।
फरिसीपुकीमी येसु आ थुं थाम्शो
1 मिनु मेको नेल्ल खिं लमानु, येसु चहिं जैतून डांडा ङोंइसाक्व। 2 आ दीसा सुनी कना यिशा, परमप्रभु यावे आ खिं लत। मिनु मुर नेल्ल येसु आ नेक्था जाक्तेक्म। मिनु येसुमी निश्शा, मुर आन कली शेंताक्मी। 3 मिनु सास्त्री नु फरिसीपुकीमी येसु आ बाक्तीकेमी मीश मुर का चाक्तेक्म। मेको मीश मुर ग्युंबे पशा यो अरु वोंइश नु इप्शो बाक्माक्त। मेको कली मुर आन दातेमी राप्पाइक्तेक्म। सास्त्री यहूदी आन कली परमप्रभु यावे आ अरेशो लोव़ शेंब बाक्शो बाक्तेक्म। 4 मिनु येसु कली “शेंब, एको मीश मुर ग्युंबे पशो बाक्त हना यो, अरु आ वोंइश नु इप्शा बाक्शो थित्चा पुंइसाक्व 5 मिनु परमप्रभु यावे आ अरेशो लोव़मी मोसामी ‘मोदेंशो पाइब कली फुल्लु आप्शा साइक्चा’ दे आंइ कली अरेशो बाक्त। गे मार देंनीनी?” दे हिल्लो पाम्तेक्म। लेवी २०:१० 6 मेकोपुकीमी येसु आ थुं थाम्शा, दोस गेचा कली मो देंतेक्म। मिनु येसुमी बाप्शा, फुरक शाक्शा ब्रेक्ताक्व। 7 मेकोपुकीमी “एको मीश मुर कली मार पचा?” दे हिल्लो पना पन बाक्तेक्म। येसुमी चहिं राप्शा, मेको आन कली “गेनायो पाप मपाइबमी ङोंइती फुल्लु आबल” देंत। रोमी २:१ 8 मिनु लेंशा बाप्शा, फुरक शाक्शा ब्रेक्ताक्व। 9 मिनु येसु आ लोव़ नेंशा, दोस गेब मुर जोक्ब तुइक्ब खाल्पा रे का का पा नेल्ल लाम्तेक्म। मिनु येसु नु मेको मीश मुर ला लीताक्स। 10 येसुमी नेल्ल लशो तशा, मीश मुर कली “इ कली चाक्बपुकी ते लमा? इ कली साइक्ब सुइ मलीमा?” दे हिल्लो पवानु 11 “प्रभु, सुइ मलीम” देंत। मिनु येसुमी “गो यो इ कली मसाइक्नुङ। लावो, मिनु लेंशा पाप मपावो” देंशा सोइक्ताक्व। यूहन्ना ५:१४
येसु रागी ङा छेङछेङ
12 मिनु येसुमी लेंशा फरिसी आन कली “गो रागी कली छेङछेङ नङ। आं नोले खोइक्बपुकी गेनायो छिङछिङमी मगाक्नीम। ब्रोंइतीक छेङछेङ ताइनीम” देंत। यूहन्ना १:५,९; यसैया ४९:६; यसैया ६०:२०; मत्ती ५:१४-१६ 13 मिनु फरिसीपुकीमी येसु कली “गे इ पर्बम आंमा लोव़ पाइनेवे। मोपतीके इ लोव़ थमा ममाइ” देंतेक्म। 14 मिनु येसुमी मेको आन कली “गो आं पर्बम आंमा लोव़ पाता हना यो, आं लोव़ थमा बाक्ब। मारदे हना ते रे जाक्ङा, ते लाइनुङा, मेको तुइक्नुङ। गेपुकी चहिं गो ते रे जाक्ङा, ते लाइनुङा मतुइक्नीनी। यूहन्ना ५:३१; यूहन्ना ७:२८ 15 मिनु गेपुकी मुर आन कुल कोव़शा निसाफ पाइनीनी। गो चहिं सुइ आन कली निसाफ मपाइनुङ। यूहन्ना ३:१७ 16 गो निसाफ पाता हना यो, आं निसाफ ठीक बाक्ब। मारदे हना गो का ला दुम्शा निसाफ मपाइनुङ। गो नु आं कली सोइक्ब आं आफोमी निसाफ पाइब। 17 इन ऐन कानुनमी यो ‘मुर निक्शी आस देंशो नेंशो लोव़ थमा दुम्ब’ दे ब्रेक्सीशो बाक्ब। ब्यवस्था १९:१५ 18 गो आं पर्बम लोव़ पाइनुङ। मिनु आं कली सोइक्ब आं आफोमी आं पर्बम लोव़ पाइब” दे माइक्तीमी। 19 मिनु मेकोपुकीमी येसु कली “इ आफ ते बाक्बा?” दे हिल्लो पाम्तेक्म। येसुमी “गेपुकीमी आं कली मतुइक्नीनी। आं आफ कली यो मतुइक्नीनी। आं कली तुइक्तीनी हना, आं आफ कली यो तुइक्तीनी वा” दे माइक्तीमी। यूहन्ना १४:७ 20 येसुमी परमप्रभु यावे आ खिं ङा शोंप वोइक्तीक कोठा आ ङोंइती बाक्शा, मोदेंशो शेंशो बाक्त। परमप्रभु यावे आ खिंमी बाक्शा शेंशा यो, सुइमी मग्याइक्तेम। मारदे हना मेको कली ग्याइक्ची ना मजाक्शो बाक्त। यूहन्ना ७:३०
आ आफोमी येसु कली सोइश्शो
21 मिनु येसुमी लेंशा यहूदी आन कली “गो लाइनुङ, गे चहिं आं कली माल्नीनी। मिनु मरिम्शो पतीकेमी ग्रुम्शा बेक्नीनी। गे आं लतीकेमी जाक्ने मचाप्नीनी” देंत। यूहन्ना ७:३४-३५; यूहन्ना १३:३३ 22 मिनु यहूदीपुकीमी “एकोमी आंम कली सांइसीबा, कों? मारदे ‘आं लतीकेमी जाक्ने मचाप्नीनी’ देंबा” देंमुम्तेक्म। 23 मिनु येसुमी मेको आन कली “गेपुकी उइ ङा ननी। गो चहिं इर ङा नङ। गेपुकी रागी ङा ननी। गो चहिं रागी ङा मनङ। यूहन्ना ३:३१ 24 मोपतीके गो इन कली ‘गे इन मरिम्शो पतीकेमी ग्रुम्शा बेक्नीनी’ देंती। गेपुकीमी ‘गो मरिम्शो गेय रे प्रोंइब ननी’ दे आं कली थमा मसुइक्तीनी हना, इन मरिम्शो पतीकेमी ग्रुम्शा बेक्नीनी” देंत। यसैया ४३:१० 25 मिनु यहूदीपुकीमी “गे सु नवे” दे हिल्लो पाम्तेक्म। येसुमी मेको आन कली “गो इन कली ङोंइती रे मार देंङा? मारदे गो गेपुकी नु लोव़ पङा? 26 गो इन पर्बम शुश लोव़ पचा नु शुश निसाफ पचा माल्नुङ। आं कली सोइक्ब आं आफ आ लोव़ थमा लोव़ बाक्ब। मेको आ लोव़ नेंशा, रागी ङा मुर आन कली शेंनुङ” देंत। 27 मिनु येसुमी आ आफ आ पर्बम लोव़ पाप्तु, दे मेकोपुकीमी मरुबेम। 28 येसुमी “गेपुकी रागीमी जरमेशो कली क्युक्नीनु, गो सु नङा, दे तुइक्नीनी। मिनु गो आंमा मिम्शो मारेइ मपाइनुङ। तन्न आं आफोमी आं कली दोदेंशो शेंदा, मोदेंशो लोव़ इन कली शेंनुङ। यूहन्ना ३:१४; यूहन्ना १२:३२ 29 मिनु आं कली सोइक्ब गो नु बाक्ब। आं कली गेनायो मप्रोंइब। मारदे हना गो आ दाक्शो गेय ला पाइनुङ” दे मुर आन कली देंत।
थमा पा प्रोंइशो मुर
30 एको लोव़ नेंशा, शुश मुरुमी येसु कली थमा सुइक्तेक्म। 31 मिनु येसुमी आ कली थमा सुइक्ब यहूदी आन कली “गेपुकी आं देंशो पना पन बाक्तीनी हना, थमा पा आं शेंसीब ननी। यूहन्ना १५:७ 32 थमा माइश्शो सु बाक्मे, दे तुइक्नीनी। मिनु थमा माइश्शोमी इन कली प्रोंइब” दे येसुमी देंत। 33 मेकोपुकीमी “गो अब्राहाम आ चच युइ नकी। मुल सम्म गो सुइ आन वाइलीम वाइल मदुम्शो बाक्तक। मारदे ‘थमा माइश्शोमी इन कली प्रोंइब’ देंनीनी?” दे हिल्लो पाम्तेक्म। मत्ती ३:९ 34 येसुमी “नोफा दाइश्शा नेनीन, सु सुमी पाप पाइनीमी, मेको पाप आ वाइलीम वाइल बाक्नीम। 35 वाइलीम वाइल खिं ङा मुर मबाक्नीम, तौ चहिं खिं ङा मुर बाक्ब। 36 मिनु तौमी इन कली प्रोंइतु हना, गेपुकी थमा पा प्रोंइसीशो मुर दुम्नीनी” देंत। रोमी ६:१६,१८,२२
अब्राहाम आ आल नु सैतान आ आल
37 मिनु येसुमी “गेपुकी अब्राहाम आ चच युइ ननी, दे गो तुइक्नुङ। मोपा यो गे आं कली साइक्चा माल्नीनी। मारदे हना आं लोव़ नेंशा यो, थमा मसुइक्नीनी। 38 गो आं आफ आ पशो तशा, शेंनुङ। गेपुकीमी चहिं इन आफ आ देंशो नेंशा, मार मार पाइनीनी” दे माइक्तीमी। 39 मेकोपुकीमी “गो आंइ आफ अब्राहाम बाक्ब” देंमानु, येसुमी “गेपुकी अब्राहाम आ चच युइ ननी हना, अब्राहाम आ पशो गेय खोदेंशो पनी वा। 40 गो परमप्रभु यावेमी देंशो नेंशा, इन कली शेंथ जाक्शो बाक्ती हना यो, गेपुकीम आं कली साइक्चा माल्नीनी। अब्राहाममी इन खोदेंशो गेय गेनायो मपव। 41 गेपुकीमी चहिं इन आफ आ पशो गेय खोदेंशो पाइनीनी” दे माइक्तीमी। मेकोपुकीमी “गोपुकी मुर आन तौ मनकी। गोपुकी आंइ के आफ का बाक्ब। मेको चहिं परमप्रभु यावे बाक्ब” देंतेक्म। 42 मिनु येसुमी “परमप्रभु यावे इन आफ बाक्त हना, गेपुकी आं कली दाक्तीनी वा। मारदे हना गो परमप्रभु यावे रे रागीमी जाक्ती। गो आंमा जाक्शो मनङ। तन्न आं आफोमी सोइक्ताक्यी। 43 आं देंशो लोव़ मारदे मरुप्नीनी? गे आं लोव़ नेंशा, फाल्ने मचाप्नीनी। १कोरिन्थी २:१४ 44 इन आफ सैतान बाक्ब। मिनु गे इन आफ आ दाक्शो पचा दाक्नीनी। मेको चहिं ङोंइती रे मुर आन कली साइक्ब नु जोल पाइब बाक्त। मारदे हना मेको नु थमा देंशो बाक्सीन मबा। मोपतीके जोल ला पाइब। मेको जोल पना पन बाक्ब। जोल आ आफ बाक्त। १यूहन्ना ३८-१०; उत्पत्ती ३:४,१९ 45 गे आं कली थमा मसुइक्नीनी। मारदे हना गो थमा लोव़ पाइनुङ। 46 गेपुकीमी आं कली ‘गे मरिम्शो पाइब नवे’ दे दोसी सेल्ने चाप्नीनी ङा? गो थमा लोव़ पाता हना, मारदे आं कली थमा मसुइक्नीनी? २कोरिन्थी ५:२१; १पत्रुस २:२२; १यूहन्ना ३:५; हिब्रू ४:१५ 47 सु चहिं परमप्रभु यावे रे जाक्बा, मेको परमप्रभु यावे आ लोव़ नेंब। गेपुकी परमप्रभु यावे रे मजाक्नी। मोपतीके परमप्रभु यावे आ लोव़ नेंने मचाप्नीनी” दे माइक्तीमी। यूहन्ना १८:३७ 48 मिनु यहूदीपुकीमी “गे सामरीया ङा बाक्ते। गे वोलमी सुम्शो बाक्ते, दे थमा लोव़ मपका ङा?” देंतेक्म। यूहन्ना ७:२० 49 येसुमी “आं कली वोलमी मसुम्यी। गो आं आफ कली मान पाइनुङ। गे चहिं आं कली मान मपथु आइक्च सेल्नीनी। 50 गो आंम कली ठेयब मसेल्सीनुङ। आं कली ठेयब सेल्ब का बाक्ब। मेको ठीक निसाफ पाइब यो बाक्ब” देंत। 51 मिनु येसुमी “नोफा दाइश्शा नेनीन, सुमी आं देंशो लोव़ टीबा, मेको गेनायो मबेक्ब” देंत। यूहन्ना ६:४०,४७ 52 मिनु यहूदीपुकीमी “गे वोलमी सुम्शो बाक्ते, दे गो मुल तुइक्ताक्क। अब्राहाम नु परमप्रभु यावे आ लोव़ पाइबपुकी बेक्तेक्म। गे चहिं ‘सुमी आं देंशो टीबा, मेको गेनायो मबेक्ब’ देंते। 53 आंइ किकी पिपी अब्राहाम बेक्माक्त। गे मेको क्येङा ठेयब नवे? मिनु परमप्रभु यावे आ लोव़ पाइब यो बेक्मा बाक्त। गे सु नवे ङा?” देंतेक्म। 54 येसुमी “गो ठेयब सेल्साक्यी हना, गो ठेयब मदुम्नुङ। आं आफोमी चहिं आं कली ठेयब सेल्ब। गे आं आफ कली ‘आंइ परमप्रभु यावे’ देंनीनी। यसैया ६३:१६ 55 गेपुकीमी मेको कली मतुइक्नीनी। तन्न गो तुइक्नुङ। गो ‘मेको कली मतुइक्नुङ’ देंती हना, इन खोदेंशो जोल पाइब दुम्नुङ। तन्न गो मेको कली तुइक्नुङ। मिनु आ शेंशो पाइनुङ। यूहन्ना ७:२८-२९ 56 इन किकी पिपी अब्राहाममी आं नाक्त जाक्शो तचा दाक्शो बाक्माक्त। मिनु आं जाक्शो तशा ग्येरसाक्व” दे येसुमी देंत। 57 मिनु यहूदीपुकीमी “गे मुल सम्म ५० बर्स मजाक्दीश्शो बाक्ते। मिनु अब्राहाम कली तशो बाक्नेवे ङा?” देंतेक्म। 58 मिनु येसुमी “नोफा दाइश्शा नेनीन, गो अब्राहाम क्येङा ङोंइती रे बाक्शो नङ” देंत। यूहन्ना १:१२ 59 मिनु यहूदीपुकीमी “फुल्लु आप्शा साइक्चा” दे फुल्लु गुप्तेक्म। तन्न येसु ख्रुंइसाक्व। मिनु परमप्रभु यावे आ खिं रे ग्रूशा गाक्त। यूहन्ना १०:३१
मिक्च मताइब कली सापाइश्शो
1 मिनु येसु लना लन बाक्मेनु, जरमेशो रेन मिक्च मताइब मुर का ग्रुम्तु। 2 मिनु आ शेंसीबपुकीमी येसु कली “शेंब, मारदे मेको मिक्च मताइब जरमेशो बाक्मे? मेकोमी पाप पवा देय आ आम आफोमी पाप पाम्से?” दे हिल्लो पाम्तेक्म। लूका १३:२ 3 मिनु येसुमी “एको मुरुमी पाप पशो ममाइ, आ आम आफोमी यो मपाम्से। तन्न परमप्रभु यावे आ गेय कोंइचा कली एको मिक्च मताइब दुम्शो जरमेशो बाक्त। यूहन्ना ११:४ 4 मिनु गोपुकीमी आं कली सोइक्ब आ गेय नाक्ती पचा माल्नय। नां रिक्मेनु, सुइमी गेय पने मचाप्नीम। यूहन्ना ५:१७; येरमीया १३:१६ 5 गो रागीमी बाक्ङानु, रागी कली छेङछेङ नङ” देंत। यूहन्ना ८:१२; यूहन्ना १२:१५ 6 मो देंशा येसुमी खपीमी तोक्शा, नाक्चुक नु खप निशा, मेको मुर आ मिक्चीमी ख्रेक्ताक्व। मर्कूस ८:२३ 7 मिनु मिक्च मताइब कली “सिलोआ ङा दोम्लीम लशा चिक्सो” दे माइक्तु। सिलोआ देंशो चहिं सोइश्शो, दे रुम्सीब। मिनु मेको लशा चिक्से बाक्त। मिनु मिक्च ताइब दुम्शा, लेश्शा जाक्त।
सापाइश्शो मुर नु यहूदीपुकी
8 मिनु आ गाउं ङा मुर नु मिक्च मताइब पुंइब मुर दे तुइक्बपुकीमी “मिक्च मताइब पुंइब एको ममाइ ङा?” देंतेक्म। 9 का निक्शीमी “मेकोन बाक्त” देंतेक्म। का निक्शीमी चहिं “ममाइ, मेको खोदेंशो बाक्त” देंतेक्म। आ चहिं “गो मेकोन नङ, शां” देंत। 10 मुरपुकीमी “दोपा मिक्च ताइब दुमे, मिनु?” दे हिल्लो पाम्तेक्म। 11 मेकोमी “येसु माइश्शोमी खप निशा, आं मिक्चीम ख्रेक्ताक्यी। मिनु ‘सिलोआ ङा दोम्लीम लशा चिक्सो’ दे माइक्ती। मिनु गो दोम्ली लशा चिक्सीङानु, मिक्च ताइब दुम्ती” दे माइक्तीमी। 12 मिनु “येसु माइश्शो ते बाक्मे” दे हिल्लो पामेनु “ङाद, ते लमे, गो मतुइक्नुङ” दे माइक्तीमी। 13 मिनु आ मिक्च साशो मुर कली फरिसी आन बाक्तीक चाक्दीत्तेक्म। 14 येसुमी खप निशा, आ मिक्चीमी ख्रेक्शा सापाइश्शो नाक्त चहिं नाइक्तीक नाक्त बाक्त। 15 मोपतीके फरिसीपुकीमी यो लेंशा मेको कली “दोपा मिक्च ताइब दुमे?” दे हिल्लो पाम्तेक्म। मिनु “खप निशा, आं मिक्चीमी ख्रेक्ताक्यी। मिनु गो चिक्शा, मुल मिक्च ताइब दुम्ती” दे माइक्तीमी। 16 फरिसी का निक्शीमी “परमप्रभु यावे आ सोइश्शो ममाइ। मारदे हना नाइक्तीक नाक्त ममानेब” देंतेक्म। का निक्शीमी चहिं “पापी मुरुमी दोपा ओदेंशो छक लाक्चा ङा गेय पने चाप्बा ङा?” देंतेक्म। मिनु मेकोपुकी ब्रातेक्म। 17 मिनु फरिसीपुकीमी लेंशा आ मिक्च साशो कली “मिनु इ कली मिक्च ताइब सेल्ब आ पर्बम मार देंनेवे?” दे हिल्लो पाम्तेक्म। मिनु मेकोमी “परमप्रभु यावे आ लोव़ पाइब बाक्त” देंत। 18 यहूदीपुकीमी “मेको मुर ङोंइती मिक्च मताइब बाक्त” दे थमा मसुदेम। मोपतीके मेको आ आम आफ आस कली ब्रेत्ताक्म। 19 मिनु मेको आस कली “एको इस तौ ममाइ? ङोंइती मिक्च मताइब जरमेसाक्व देंतीसी? मुल दोपा तने चबा?” दे हिल्लो पाम्तेक्म। 20 मिनु आम आफोमी “आंस तौ बाक्ब। मिनु मिक्च मताइब जरमेसाक्व। 21 मुल दोपा मिक्च ताइब दुम्मे, गो मतुइक्नस्कु। सुम ताइब सेला, मेको यो मतुइक्नस्कु। आ कली हिल्लो पने। आल ममाइ, आंमान देंने चाप्ब” देंताक्स। 22 आ आम आफोमी यहूदी आन क्येङा हिंशा मो देंताक्स। मारदे हिंसा देंशा हना, यहूदीपुकीमी “सुम सापाइक्ब कली ख्रीस्त दे थमा सुइक्बा, मेको कली यहूदी आन ग्रुम्तीक खिं रे तिल्चा” दे सल्ला पशो बाक्तेक्म। यूहन्ना ७:१३; यूहन्ना १२:४२ 23 मोपतीके “आल ममाइ। आ कली हिल्लो पने” देंशो बाक्ताक्स। 24 मिनु मिक्च ताइब दुम्शो कली लेंशा ब्रेश्शा “परमप्रभु यावे कली मान पावो। इ कली मिक्च तपाइक्ब पापी बाक्माक्त, दे तुइक्नीकी” देंतेक्म। 25 आ मिक्च साशो मुरुमी “मेको पापी बाक्म कों, मबाक्म, गो मतुइक्नुङ। ङोंइती मिक्च मताइब बाक्ती, मुल ताइब दुम्ती, मेको ला तुइक्नुङ” दे माइक्तीमी। 26 मिनु मेकोपुकीमी “मेकोमी इ कली मार पवा? दोपा इ मिक्च ताइब सेला?” दे हिल्लो पामेनु 27 “गो ना कना माइक्तन्नी। गेपुकी चहिं मनेंनीनी। मारदे लेंशा नेंचा दाक्नीनी? गेपुकी यो मेको आ शेंसीब दुम्चा दाक्नीनी?” दे माइक्तीमी। 28 मिनु “गे मेको आ शेंसीब नवे। गोपुकी चहिं मोसा आ शेंसीब नकी। 29 परमप्रभु यावेमी मोसा कली लोव़ पशो बाक्त, दे तुइक्नीकी। तन्न मेको मुर ते रे जाक्मे, दे गो मतुइक्नीकी” दे हुइक्ताक्म। 30 मिनु आ मिक्च साशो मुरुमी “गो इन कली तशा, छक लाक्ती। आं मिक्च सापाइक्तु हना यो, मेको ते रे जाक्मे, दे गेपुकीमी मतुइक्नीनी? 31 परमप्रभु यावेमी पापी आन लोव़ मनेंब, दे गोपुकीमी तुइक्नय। तन्न सुमी परमप्रभु यावे कली मान पशा, आ दाक्शो पाइबा, परमप्रभु यावेमी मेको कली आ पुंइशो गेब। भजन संग्रह ६६:१८; यसैया १:१५; हितोपदेस १५:२९ 32 मिनु रागी सेल्चा गोशो रे जरमेशो रे मिक्च मताइब मुर मिक्च ताइब सेल्शो, दे गेनायो मनेंय। 33 मेको परमप्रभु यावे आ सोइश्शो मबाक्त हना, छक लाक्चा ङा गेय पने मचाप्ब वा” देंत। 34 मिनु “गे पापी जरमेशो बाक्ते। आंइ कली मार शेंनेवे?” दे हुइश्शा, मेको कली ग्रुंइताक्म।
सापाइश्शो मुर नु येसु
35 मिनु येसुमी मेको कली यहूदी आन ग्रुम्तीक खिं रे तिल्तेक्म देंशो नेंशा, मेको कली ग्रुम्शा “गे रागीमी जरमेशो कली थमा सुइक्नेवे?” दे हिल्लो पाप्तु। 36 मेकोमी “प्रभु, मेको सु बाक्मे, गो मेको कली थमा सुइक्नुङ” देंत। 37 मिनु येसुमी “गे मेको कली तशो बाक्ते। गे नु लोव़ पाइब मेकोन बाक्त” देंमेनु, यूहन्ना ४:२६ 38 “प्रभु, गो थमा सुइक्नुङ” देंशा, पोक्च थेक्शा, येसु कली ठेयब सेल्तु। 39 येसुमी “गो निसाफ पचा कली रागीमी जाक्ती। मिक्च मताइबपुकीमी तामेक्ल। मिक्च ताइब चहिं मताइब दुम्मल” देंत। मत्ती १३:११-१५ 40 येसु आ नेक्था बाक्ब फरिसी का निक्शीमी आ लोव़ नेंशा, येसु कली “गोपुकी मिक्च मताइब दुम्नीकी?” देंमानु, 41 येसुमी “गेपुकी मिक्च मताइब नकी देंतीनी हना, पाप मरनी वा। तन्न गोपुकी मिक्च ताइब नकी देंनीनी। मोपतीके पाप राइनीनी” दे माइक्तीमी। यूहन्ना १५:२२
रिम्शो भेडा गोठला
1 मिनु येसुमी लेंशा मेको आन कली “नोफा दाइश्शा नेनीन, सु सु भेडा गोठ आ लाप्चो रे मओव़नीमी। बार रे ङोइश्शा ओव़नीमी, मेकोपुकी खुइ नु रोइक्ब नम। 2 सु लाप्चो रे ओव़बा, मेको भेडा गोठला बाक्ब। 3 गोठला जाक्मेनु, लाप्चो खाल पाइबमी मेको कली लाप्चो रोक्ब। भेडापुकीमी गोठला आ सेंदा नेंनीम। गोठलामी आंम भेडा आन नें थिशा ब्रेश्शा, गोठ रे ग्रुंइब। 4 मिनु नेल्ल आन कली ग्रुंइशा, भेडा आन ङोंइती गाक्ब। भेडापुकीमी गोठला आ नोले खोइक्नीम। मारदे हना आ सेंदा तुइक्नीम। 5 सेंदा मतुइश्शो मुर आ नोले मखोइक्नीम। मेको कली तशा प्रोक्नीम। मारदे हना आ सेंदा मतुइक्नीम” दे येसुमी शेंताक्मी। 6 येसुमी मुर आन कली मेको कथा शेंशो बाक्त। तन्न मार लोव़ शेंशो बाक्मे, मेकोपुकीमी मरुप्शो बाक्तेक्म। 7 येसुमी लेंशा मेको आन कली “नोफा दाइश्शा नेनीन, गो भेडा गोठ ङा लाप्चो नङ। 8 सु सु आं ङोंइती जाक्मा, मेको नेल्ल खुइ नु रोइक्ब नम। मिनु भेडापुकीमी मेको आन लोव़ मटीनीमी। 9 गो लाप्चो नङ। सु सु मेको लाप्चो रे ओव़नीमी, मेकोपुकी श्येत रे ब्रोंइनीम। मिनु रिम्शो घांस बाक्तीकेमी लशा, जोचा ताइनीम। यूहन्ना १४:६ 10 खुइमी दा खुइ पथ, साइक्थ नु प्रेत्थ ला जाक्ब। गो चहिं भेडा आन कली ब्रोंइचा गेशा, ग्येरसीशा बाक्मल, दे जाक्ती” दे शेंताक्व। 11 मिनु येसुमी “गो रिम्शो गोठला नङ। रिम्शो गोठला भेडा आन पा ङा साइक्चा पुंइसीब। भजन संग्रह २३:-; यसैया ४०:११; इजीकीएल ३४:११-२३; यूहन्ना १५:१३; हिब्रू १३:२० 12 मिनु खिं ङा गोठला मबाक्थु, वोइश्शो गोठला बाक्त हना, मेकोमी भेडापुकी रिम्शो पा मकोव़ब। मारदे हना मेको आ भेडा मनमी। फर पिशो तशा, भेडा आन कली प्रोंइशा, प्रोक्ब। फरमी चहिं भेडा आन कली ग्याइश्शा साव सुव ब्रपाइक्ब। 13 मिनु मेको वोइश्शो गोठला प्रोक्ब। मारदे हना भेडा आइक्के मनम, मोपतीके रिम्शो पा मकोव़ब। 14 गो रिम्शो गोठला नङ। दोपा गो आं भेडा आन कली तुइक्नुङमी, मोपा मेकोपुकीमी आं कली तुइक्नीम। २तिमोथी २:१९ 15 दोपा आं आफोमी आं कली तुइक्बा, मोपा गो आं आफ कली तुइक्नुङ। मिनु भेडा आन पा ङा गो साइक्चा पुंइसीनुङ। 16 मेको गोठ ङा ला ममाइ, अरु गोठ ङा भेडा यो आं के बाक्नीमी। गो मेको आन कली यो चाक्चा माल्नुङ। मेकोपुकीमी आं सेंदा नेंशा, आं कली टीनीमी। मोपा गोठला का नु बगाल का दुम्ब। यूहन्ना ११:५२; प्रेरित १०:३४-३५ 17 मेको आन साइक्चा पुंइसीचा ङा गो साइक्चा पुंइसीनुङ। मोपतीके आं आफोमी आं कली दाक्ब, मिनु आं कली बेक्शो रे सेंब। 18 गो साइक्चा मपुंइसाक्यी हना, सुइमी आं कली साइक्ने मचाप्नीम। गो आं के साइक्चा पुंइसीतीके अधिकार बाक्ब। मिनु बेक्शो रे सेंसीचा अधिकार यो बाक्ब। मेको अधिकार निम्फा आं आफोमी गेती” दे शेंताक्व। यूहन्ना ५:२६ 19 येसु आ लोव़ नेंशा, यहूदीपुकी लेंशा ब्रातेक्म। यूहन्ना ७:४३; यूहन्ना ९:१६ 20 शुश यहूदीपुकीमी “एको वोलमी सुम्शा गशो बाक्त। मारदे आ लोव़ नेंनीनी?” देंतेक्म। यूहन्ना ७:२०; मर्कूस ३:२१ 21 का निक्शीमी चहिं “एको आ लोव़ वोलमी सुम्शो मुर आ पशो खोदेंशो मनेंसीब। वोलमी मिक्च मताइब मुर आ मिक्च तपाइक्ने चाप्बा ङा?” देंतेक्म।
यहूदीपुकीम येसु कली खेदा पशो
22 मिनु यरूसलेममी परमप्रभु यावे आ खिं ङा ङोंइती ओव़तीक चाड जाक्शो बाक्त। 23 मिनु मेको हिउंदम बाक्त। मिनु येसु परमप्रभु यावे आ खिं ङा पिप सोलोमन आ सेल्शो लाङगामी हिरना हिरन बाक्त। प्रेरित ३:११ 24 यहूदीपुकी येसु आ एर ओंथ देल्शा “गेना आंइ कली ठीक लोव़ पाइनीनी? गे ख्रीस्त ननी हना, लोव़ महिरथु, थमा पा देनीन” देंतेक्म। 25 येसुमी “गो इन कली देंती। तन्न गेपुकीमी थमा मसुइक्नी। गो आं आफ आ गेय पाइनुङ। मेको गेयमी ‘गो परमप्रभु यावे आ सोइश्शो नङ’ दे इन कली तुइक्पाइक्ब। यूहन्ना ५:३६ 26 गेपुकीमी चहिं आं कली थमा मसुइक्नीनी। मारदे हना गे आं गोठ ङा भेडा मननी। यूहन्ना ८:४५-४७ 27 गो आं भेडा आन कली तुइक्नुङमी। मिनु मेकोपुकीमी आं सेंदा नेंशा आं नोले खोइक्नीमी। भजन संग्रह ९५:७ 28 गो मेको आन कली परमप्रभु यावे नु गेना हना यो ब्रोंइशा बाक्चा गेनुङमी। मेको नरकम मलाइनीम। सुइमी आं गुइ रे रोइश्शा, लाइक्ने मचाप्नीम। 29 आं आफोमी मेको आन कली गेती। आं आफ नेल्ल क्येङा ठेयब सक्ति पाइश्शो बाक्ब। मोपतीके आं आफ आ गुइ रे सुइमी रोइक्ने मचाप्नीम। 30 गो नु आं आफ उइक्थ उइक्थ नस्कु” देंत।
येसु कली दोस गेशो
31 मिनु यहूदीपुकीमी लेंशा येसु कली साइक्चा, दे फुल्लु गुप्तेक्म। यूहन्ना ८:४९ 32 मिनु येसुमी “गो इन कली आं आफोमी पशो रिम्शो गेय कोंइताक्न्नी। तेको गेय आ पर्बम आं कली फुल्लु आप्शा साइक्चा माल्नी?” देंत। 33 यहूदीपुकीमी “रिम्शो गेय पतीक आ पर्बम इ कली फुल्लु मआप्नीकी। तन्न परमप्रभु यावे आ पर्बम मरिम्शो लोव़ पतीके इ कली फुल्लु आप्चाइतक। गे मुर दुम्शा यो, परमप्रभु यावे नु उइक्थ नङ देंनेवे” देंतेक्म। मत्ती ९:३; मत्ती २६:६५; यूहन्ना ५:१८ 34 येसुमी “परमप्रभु यावे आ लोव़ ब्रेक्शो किताबमी ‘गे नेल्ल परमप्रभु यावे आ तमी तौ ननी’ मदेंबा ङा? भजन संग्रह ८२:६ 35 परमप्रभु यावेमी आ लोव़ नेंब आन कली आ तमी तौ देंब। मिनु मेको किताब ङा लोव़ मक्याम्सीब। मत्ती ५:१७ 36 परमप्रभु यावेमी आं कली रागीमी सोइक्चा कली ठीक सेल्तु। गेपुकीमी चहिं ‘परमप्रभु यावे आ पर्बम मरिम्शो लोव़ देंनेवे’ देंनीनी। मारदे हना ‘गो परमप्रभु यावे आ तौ नङ’ देंती। यूहन्ना ५:१७-२० 37 गो आं आफ आ गेय मपाता हना, आं कली थमा मसुतीन। 38 तन्न गो आं आफ आ गेय पाइनुङ हना, गेपुकी आं कली थमा मसुइक्नीनी। आं पशो गेय परमप्रभु यावे के बाक्त, दे थमा सुतीन। मिनु गो आं आफ नु बाक्नुङ। आं आफ गो नु बाक्ब, दे रुपीन” दे येसुमी यहूदी आन कली माइक्तीमी। 39 मेकोपुकीमी येसु कली ग्याइक्चा माल्तेक्म। तन्न मेको आन दाते रे ग्रूशा गाक्त। यूहन्ना ८:५९; लूका ४:३० 40 येसु लेंशा यर्दन खोला आइक्ची हांबु लशा बाक्माक्त। ङोंइती मेकेर यूहन्नामी ब्वाक्कुमी ख्रुम्शा ग्रुंइतीक गेय पशो बाक्माक्त। यूहन्ना १:२८ 41 आ नेक्था जाक्शा, शुश मुरपुकीमी “यूहन्नामी छक लाक्चा ङा गेय मपव। तन्न मेको मुर आ पर्बम मार मार देंमे, मेको नेल्ल थमा बाक्माक्त” देंमुम्तेक्म। 42 मिनु शुश मुरुमी येसु कली थमा सुइक्तेक्म।
येसुमी लाजरस कली सेंशो
1 बेथानी गाउंमी लाजरस माइश्शो रोइ पशो मुर का बाक्त। मेको के समी निक्शी बाक्शो बाक्ताक्स। मेको आस नें मरीयम नु मारथा बाक्ताक्स। लूका १०:३८-३९ 2 मरीयम सु बाक्त देंशा हना, येसु आ खोइलीमी ब्रोव़शो रिना पाइश्शो तेल ख्रेक्शा, आ चांमी फिक्ब बाक्त। मेको आस लोक्ब लाजरस रोइ पशो बाक्त। यूहन्ना १२:३ 3 मिनु मेको समी निक्शीमी मुर का कली येसु आ बाक्तीक सोइश्शा “प्रभु, इन दाक्शो वारच रोइ पाप्तु” दे येसु कली ब्रेप्पत्से बाक्त। 4 मिनु येसुमी “मेको रोइ बेक्चा ङा रोइ ममाइ, तन्न परमप्रभु यावे आ सक्ति कोंइचा कली बाक्ब। मिनु मुरपुकीमी मेको रोइ आ पर्बम परमप्रभु यावे आ तौ कली ठेयब सेल्नीमी” देंत। यूहन्ना ९:३ 5 येसुमी मारथा नु मरीयम वोबु नु आस लोक्ब लाजरस आन कली दाक्शो बाक्माक्त। 6 मोपतीके लाजरस रोइ पाप्तु देंशो नेंशा, आन बाक्तीक लचा, नाक्त निक्शी सम्म रिम्ताक्व। 7 मिनु नोले येसुमी आ शेंसीब आन कली “लो, लेंशा यहूदीया रागी लय” देंत। 8 आ शेंसीबपुकीमी “शेंब, यहूदीपुकीमी इन कली फुल्लु आप्शा हेरा साइक्तेक्मे। मिनु गे मुल लेंशा मेकेर लचा दाक्नीनी?” दे हिल्लो पाम्तेक्म। यूहन्ना १०:३१ 9 मिनु येसुमी “काबु नाक्तीम १२ घन्टा बाक्बा, ममाइ? सु सु चहिं नाक्ती गाक्नीमी, मेको दाइल मपांइसीनीम, मारदे हना छेङछेङमी लां ताइनीम। यूहन्ना ९:४-५ 10 सु सु चहिं नाक्दो गाक्नीमी, मेकोपुकी दाइल पांइसीनीम, मारदे हना मेको छेङछेङमी मबाक्नीम” देंत। यूहन्ना १२:३५ 11 मो देंशा आ शेंसीब आन कली “इं वारच लाजरस इप्त। गो चहिं मेको कली सेंनुङ” देंत। मत्ती ९:२४ 12 आ शेंसीबपुकीमी “प्रभु, इप्त हना, आ रोइ साब” देंतेक्म। 13 येसुमी चहिं लाजरस आ बेक्चा आ पर्बम लोव़ पशो बाक्त। आ शेंसीबपुकीमी “नाइक्चा कली इप्त” दे मिम्ताक्म। 14 मिनु येसुमी लोव़ महिरथु “लाजरस बेक्ने थुम्तु। 15 गो मेकेर मबाक्ङ। मोपतीके गो ग्येरसीनुङ। मारदे हना गेपुकीमी थमा सुइक्ने चाप्नीनी। मुल गोपुकी बेथानी लय” देंत। 16 आ याइनी नें जौंले, थोमास माइश्शो शेंसीब का बाक्त। मेकोमी अरु शेंसीब आन कली “गोपुकी यो मेको नु बेक्थ लय” देंत। यूहन्ना २०:२४-२८
लाजरस कली सेंपाइश्शो
17 मिनु येसु बेथानी जाक्दीम्मेनु, मेकेर ङा मुरपुकीमी “लाजरस बेक्शो ४ नाक्त दुम्त। मेको कली बेक्शो मुर वोइक्तीक कोठामी वोइक्तेक्म” दे येसु कली देंतेक्म। 18 बेथानी गाउं यरूसलेम आ नेक्था बाक्शो बाक्ब। बेथानी रे यरूसलेम सम्म १५ स्तादीयोन ङा लां बाक्ब। स्तादीयोन का १८५ मिटर बाक्ब। 19 मिनु यरूसलेम ङा शुश यहूदीपुकीमी मारथा नु मरीयम आस लोक्ब बेक्शो आ पर्बमी “सुर्ता मपाम्सेक्ल” दे लेम्चा कली जाक्मा बाक्त। 20 मिनु मारथामी “येसु पिन पिन बाक्ब” देंशो नेंशा, येसु कली ग्रुम्थ जाक्त। मरीयम चहिं खिंमीन बाक्माक्त। 21 मिनु मारथामी येसु कली “प्रभु, एक बाक्शो ननी हना, आंस लोक्ब मबे वा। 22 तन्न मुल यो परमप्रभु यावे कली पुंइतीनी हना, परमप्रभु यावेमी इन पुंइशो गेब, दे तुइक्नुङ” दे माइक्तु। 23 मिनु येसुमी “इ लोक्ब सेंसीब” देंत। यूहन्ना ५:२८-२९; यूहन्ना ६:४०; मत्ती २२:२३-३३ 24 मिनु मारथामी “नोले ङा नाक्ती आंस लोक्ब सेंसीब दे गो तुइक्नुङ” देंत। 25 मिनु येसुमी “गो सेंपाइक्ब नु ब्रोंइपाइक्ब नङ। आं कली थमा सुइक्ब बेक्तेक्म हना यो, सेंसीनीम। 26 सु ब्रोंइबा, मिनु आं कली थमा सुइक्बा, मेको गेनायो मबेक्ब। एको लोव़ थमा सुइक्नेवे?” दे हिल्लो पाप्तु। यूहन्ना ८:५१ 27 मिनु मारथामी “प्रभु, गे रागीमी जाक्शो परमप्रभु यावे आ तौ, ख्रीस्त ननी, दे गो थमा सुइक्नुङ” देंत। मत्ती १६:१६ 28 मोदेंशा मारथा खिं लेश्शा, मरीयम कली “शेंब जाक्शो बाक्त। मिनु इ कली ब्रेत्ताक्व” दे मुर आन मनेंचा ङा पा मदा बाक्त। 29 मिनु मरीयम मेको नेंशा, छुल बोक्शा, येसु कली ग्रुम्थ लमाक्त। 30 मेना येसु मारथा ग्रुम्तीक उइ बाक्शो बाक्त। आस गाउं मजाक्दीश्शो बाक्माक्त। 31 मिनु मरीयम आ खिंम लेम्थ जाक्ब यहूदीपुकीमी मरीयम कली छुल बोक्शा लशो तशा, आ नोले खोदमे बाक्त। मारदे हना मेकोपुकीमी “मरीयम तुरसुम ङाक्थ लाइबा, कों” दे मिम्शो बाक्मा बाक्त। 32 मिनु मरीयम येसु आ बाक्तीक जाक्दीश्शा, येसु आ खोइलीम बाप्शा “प्रभु, एक बाक्शो ननी हना, आंस लोक्ब मबे वा” देंत। 33 मिनु येसुमी मेको कली नु में नु जाक्शो यहूदी आन कली ङाक्शो तशा, येसु आ थुं खाइक्त। यूहन्ना १३:२१ 34 मिनु “गे मेको कली ते वोइक्नी?” दे हिल्लो पवानु “प्रभु, कोव़थ पिने” देंतेक्म। 35 मिनु येसु यो ङाक्त। 36 यहूदीपुकीमी येसु कली ङाक्शो तशा “कोव़ङीन, येसुमी मेको कली यो शुश दाक्शो बाक्माक्त” देंतेक्म। 37 का निक्शीमी “मिक्च मताइब मुर सापाइक्बमी मेको कली बेक्चा मगेथु, सापाइक्ने मारदे मचाप्बा?” देंमुम्तेक्म। यूहन्ना ९:७ 38 मिनु येसु आ थुं लेंशा खाइश्शा, बेक्शो मुर वोइक्तीक कोठा आ नेक्था जाक्दीत्त। मेको पुक्खी खोदेंशो बाक्त। मेको पुक्खी चोक्चा, दे आ ङोंइती फुल्लु का थारशो बाक्त। मत्ती २७:६० 39 मिनु येसुमी “फुल्लु तिलीन” देंत। मिनु बेक्शो मुर आ समी मारथामी “प्रभु, मुल दा एको रिना पाइब। मारदे हना आ बेक्शो ४ नाक्ती दुम्त” देंत। 40 मिनु येसुमी “गे थमा सुइक्तीवी हना, गे परमप्रभु यावे आ सक्ति ताइनेवे, दे इ कली ममाइक्ना ङा?” देंत। 41 मिनु मुरपुकीमी पुक्खी आ ङोंइती थारशो फुल्लु तिल्तेक्म। मिनु येसुमी सरीङ गे कोव़शा “आं आफ, गे आं लोव़ नेंतीनी, गो ग्येरसाक्यी। 42 गे आं देंशो गेना हना यो नेंनीनी, दे तुइक्नुङ। मिनु आं एर ओंथ बाक्शो मुरपुकीमी गेमी आं कली सोइश्शो ननी, दे थमा सुइक्पाइक्चा कली एको लोव़ पाता” देंत। यूहन्ना १२:३० 43 मिनु मो देंशा, ठेयब सेंदा पा येसुमी “ए, लाजरस, ग्रूङो” दे ब्रेत्ताक्व। 44 मिनु मेको ङोंइती बेक्शो मुर येसु आ ब्रेश्शो नेंशा, आ गुइ खोइल आ रां नेल्ल वामी गिल्सीशा ग्रूत। आ कुल यो रुमालमी फ्रेंशो तशा, येसुमी “गिल्शो वासी प्रुइश्शा, लचा गेने” दे मुर आन कली माइक्तीमी।
येसु कली साइक्चा माल्शो
45 मरीयम कली लेम्थ जाक्शो शुश यहूदीमी मो दुम्शो तशा, येसु कली थमा सुइक्तेक्म। 46 का निक्शी चहिं फरिसी आन कली ग्रुम्थ लशा, येसु आ पशो शोव़ङमे बाक्त। 47 मो दुम्शा ठेयब चढ़ेब नु फरिसीपुकी बुक्शा “मुल मार पय? मारदे हना मेको मुरुमी शुश छक लाक्चा ङा गेय पाइबाक्त। मत्ती २६:३-४ 48 मेको कली मो पचा गेतय हना, नेल्लेमी मेको कली थमा सुइक्नीम। मिनु रोमीपुकीमी परमप्रभु यावे आ खिं नु इस्राएल रागी निम्फा खतम सेल्नीम” दे लोव़ पामे बाक्त। 49 मेकोपुकी नु काइयाफास माइश्शो मुर का बाक्माक्त। मेको बर्स ङा नेल्ल क्येङा ठेयब चढ़ेब बाक्माक्त। 50 मिनु मेकोमी “गे मारेइ मतुइक्नीनी। गो नेल्ल रागी खतम दुम्चा क्येङा, मुर का कली साइक्चा रिम्शो बाक्ब” देंमाक्त। यूहन्ना १८:१४ 51 काइयाफासमी आंम मिम्शो मदे, तन्न मेको बर्स ङा नेल्ल क्येङा ठेयब चढ़ेब दुम्शा “इस्राएल रागी ङा मुर आन पा ङा येसु साइक्चा पुंइसीब” दे नोले दुम्ब लोव़ पशो बाक्त। 52 इस्राएल रागी ङा मुर आन कली ला ममाइ, तन्न ब्रशा बाक्शो परमप्रभु यावे आ तमी तौ नेल्ल आन कली काथा दुम्पाइक्चा, दे येसु साइक्चा पुंइसीब दुम्त। यूहन्ना ७:३५; यूहन्ना १०:१६; १यूहन्ना २:२ 53 मिनु मेको नाक्त रे येसु कली दोपा साइक्चा, दे सल्ला पामे बाक्त। 54 मोपतीके येसु यहूदीपुकी नु मबाक्थु, गोरशो रागी आ नेक्थान एफ्राइम सहर लत। मिनु मेकेर आ शेंसीबपुकी नु बाक्त। २सामुएल १३:२३ 55 मिनु यहूदी आन पास्सा चाड जाक्चशो बाक्त। पहाड ङा शुश मुरपुकी आंम कली ठीक सेल्चा, दे पास्सा चाड आ ङोंइती यरूसलेम लाइबाक्मा बाक्त। २इतिहास ३०:१७-१८ 56 मेकेर जाक्दीश्शा, परमप्रभु यावे आ खिंमी बाक्शा “गे मार मिम्नीनी? येसु पास्सा चाडम जाक्बा देय मजाक्बा” दे हिल्लो पमुशा, येसु कली माल्मे बाक्त। 57 मिनु ठेयब चढ़ेब नु फरिसीपुकीमी “सुमी येसु ते बाक्बा, दे तुइक्ता, मेकोमी आंइ कली यो तुइक्पदल” दे मुर आन कली देंशो बाक्मा बाक्त। मोपा येसु कली ग्याइक्चा माल्मे बाक्त।
मरीयममी येसु कली तेल ख्रेक्शो
1 यहूदी आन पास्सा चाड जाक्चा ६ नाक्त ङोंइती येसु बेथानी गाउं जाक्दीत्त। मेकेर येसुमी लाजरस कली बेक्शो रे सेंपाइश्शो बाक्त। यूहन्ना ११:१,४३ 2 लाजरस आ खिंमी येसु नु आ शेंसीब आन कली थुल्चा ठीक पशो बाक्तेक्म। मारथामी जचा थोव़क योक्तु। लाजरस येसु नु काथा बाक्शो बाक्त। 3 मिनु मरीयममी मार पाप्तु देंशा हना, लित्रा का शुश क्येट लाइक्ब ब्रोव़शो रिना पाइश्शो तेल येसु आ खोइलीमी ख्रेक्ताक्व। मिनु आ चांमी फिक्ताक्व। मो पशा खिं गा नेल्ल ब्रोव़शो रिना पपाइक्तु। लित्रा का ३२७ ग्राम खोदेंशो बाक्ब। लूका ७:३८ 4 मेकेर येसु आ शेंसीब इस्कारीयोत ङा यहूदा यो बाक्त। मेको नोले येसु कली साइक्ब आन कली वारच पाइब दुम्बाक्माक्त। 5 मेकोमी “मारदे सहे सां देनारमी मेको तेल लेयशा, प्रुङग आन कली मयोक्गा?” दे लोव़ पाप्तु। देनार का नाक्त का ङा गाल्च बाक्त। 6 यहूदामी प्रुङग आन कली शिशी पा मिम्शा ममाइ, तन्न क्येट कुरशा, क्येट खुइ पना पन बाक्बाक्माक्त। यूहन्ना १३:२९ 7 मिनु येसुमी यहूदा कली “मरीयममी आं बेक्चा ङोंइती तेल ख्रेक्ताक्यी। एको कली श्येत मगेवो। 8 प्रुङगपुकी दा गेपुकी नु गेना हना यो बाक्नीम। गो चहिं गेपुकी नु शुश नाक्त मबाक्नुङ” दे माइक्तु। 9 मिनु शुश यहूदीपुकीमी येसु मेकेर बाक्त, दे तुइश्शा, येसु आ पर्बम ला ममाइ, येसुमी बेक्शो रे सेंपाइश्शो लाजरस कली यो कोव़चा, दे जाक्तेक्म। 10 ठेयब चढ़ेबपुकीमी “लाजरस कली यो साइक्चा” दे सल्ला पामे बाक्त। 11 मारदे हना मेको आ पर्बम शुशेमी यहूदी आन शेंतीक प्रोंइशा, येसु कली थमा सुइक्तेक्म।
येसु यरूसलेम सहर ओव़शो
12 मिनु आ दीसा शुश मुरुमी “येसु पास्सा नाक्त यरूसलेममी जाक्ब” देंशो नेन्मे बाक्त। 13 मिनु खजूर रवा आ सफा शेशा, येसु कली ग्रुम्थ जाक्तेक्म। मेकोपुकीमी “होसन्ना, परमप्रभु आ नेंमी जाक्ब इस्राएली आन पिप आसीक रशो बाक्ब” दे ग्येरशा, ग्रीना ग्रीन येसु कली ग्रुम्थ जाक्तेक्म। होसन्ना आ देंशो “परमप्रभु वारच पने” बाक्ब। भजन संग्रह ११८:२५-२६ 14 मिनु येसुमी गधा आ चाइक्ब का ङोंइसाक्व। परमप्रभु यावे आ ब्रेक्पाइश्शो किताबमी 15 “सियोन ङा मुर, महिनीन। कोव़ङीन, इन पिप गधा ङोइश्शा पिना पिन बाक्ब” दे ब्रेक्शो बाक्त। जकरिया ९:९ 16 येसु आ शेंसीबपुकीमी ङोंइती मेको लोव़ मरुप्शो बाक्तेक्म। तन्न येसु स्वर्ग लशा नोले ला “मेको लोव़ येसु आ पर्बम ब्रेक्शो बाक्माक्त। दोदेंशो ब्रेक्शो बाक्मे, मोदेंशो दुम्त” दे रुप्शो बाक्तेक्म। 17 मेको “होसन्ना” दे ग्रीबपुकी सु बाक्मा बाक्त देंशा हना, येसुमी लाजरस बेक्शो रे सेंपाइश्शो ताइब बाक्मा बाक्त। मिनु मेकोपुकीमी मुर आन कली लाजरस सेंसीशो आ पर्बमी तुइक्पाइक्तेक्म। 18 मोपतीके मेकोपुकी येसु कली ग्रुम्थ जाक्तेक्म। 19 मिनु फरिसीपुकीमी “गोपुकी मारेइ पने मचाप्नय। कोव़ङीन, मुर नेल्ल मेको आ नोले खोइक्नीम” देंमुम्तेक्म। यूहन्ना ११:४८
ग्रीस ङा मुर येसु कली ग्रुम्थ जाक्शो
20 मिनु पास्सा नाक्ती परमप्रभु यावे कली मान पचा कली का निक्शी ग्रीस रागी ङा मुर यो जाक्शो बाक्तेक्म। 21 मेकोपुकी फिलीप माइश्शो शेंसीब नु लोव़ पचा कली जाक्तेक्म। फिलीप चहिं गालील रागी ङा बेथसैदा सहर ङा बाक्त। मिनु मेको ग्रीस रागी ङा मुरपुकीमी “प्रभु, गोपुकी येसु कली ग्रुम्चा दाक्नीकी” देंतेक्म। यूहन्ना १:४४ 22 फिलीपमी मेको आन लोव़ नेंशा, अन्द्रीयास कली माइक्तु। मिनु अन्द्रीयास नु फिलीपमी येसु कली “ग्रीस रागी ङा मुरपुकी इन कली ग्रुम्थ जाक्तेक्म” दे माइक्ताक्स। 23 मिनु येसुमी “मुल रागीमी जरमेशो परमप्रभु यावे आ बाक्तीक लाइब। मिनु ठेयब सेल्चा पुंइसीब। 24 नोफा दाइश्शा नेनीन, चेरब गेडा खपीमी शोक्शा मराक्त हना, मेको मोशा लीब। तन्न शोक्शा राक्त हना, शुश ग्रेल्ब। रोमी १४:९; १कोरिन्थी १५:३६ 25 सुमी आंम दला दाक्स पाइबा, मेको गेना हना यो ब्रोंइशा बाक्चा मताइब। सुमी चहिं रागीमी बाक्शा, आंम कली ममिम्थु, परमप्रभु यावे आ देंशो टीबा, मेको गेना हना यो ब्रोंइशा बाक्चा ताइब। मत्ती १०:३९; मत्ती १६:२५; लूका १७:३३ 26 सुमी आं गेय पाइबा, आं देंशो यो पचा माल्बा, मेको आं बाक्तीकेमी बाक्चा ताइब। आं आफोमी आं गेय पाइब आन कली ठेयब सेल्ब” देंत। यूहन्ना १७:२४
येसुम आ बेक्चा आ पर्बम शेंशो
27 मिनु येसुमी “मुल आं थुं खाइक्ती। गो मार देंनुङा, आफ, आं कली मोपा साइक्चा रे प्रोंइयी, दे पुंइनुङा ङा? गो साइक्चा पुंइसीचा कली रागीमी जाक्ती। मत्ती २६:३८ 28 आं आफ, इन सक्ति कोंइदीन” दे येसुमी देंत। मिनु सरीङ रे “गो आं सक्ति कोंइताक्ङ। लेंशा चिनु कोंइनुङ” देंशो सेंदा का नेंसाक्व। यूहन्ना १३:३१; मत्ती ३:१७; मत्ती १७:५ 29 मिनु मेकेर बाक्शो मुरपुकीमी मेको सेंदा नेंशा “बुंबु पाप्तु” देंतेक्म। का निक्शीमी “परमप्रभु यावे आ स्वर्ग ङा गेय पाइब कामी मेको कली लोव़ पाप्तु” देंतेक्म। 30 मिनु येसुमी “मेको लोव़ आं कली देंशो ममाइ, इन कली देंशो बाक्ब। यूहन्ना ११:४२ 31 मुल रागी नेल्ल ङा मुर आन कली निसाफ पची नाक्त जाक्त। मुल रागी कली हुकुम पाइब कली तिल्नीम। यूहन्ना १४:३०; यूहन्ना १६:११; लूका १०:१८ 32 गो क्युक्शा साइक्चा पुंइसीशा, मुर नेल्ल आन कली आं गे कीनुङमी” देंत। यूहन्ना ८:२८ 33 येसुमी दोपा साइक्चा पुंइसीचा चिक्शो बाक्नुङ, दे तुइक्पाइक्चा कली मो देंत। 34 मिनु मुरपुकीमी येसु कली “परमप्रभु यावे आ लोव़ ब्रेक्शो किताबमी ‘ख्रीस्त गेनायो मबेक्थु बाक्ब’ देंशो नेंतक। गे चहिं ‘रागीमी जरमेशो क्युक्शा साइक्चा पुंइसीब’ देंनीनी। मिनु मेको रागीमी जरमेशो चहिं सु बाक्म?” दे हिल्लो पाम्तेक्म। भजन संग्रह ११०:४; दानीएल ७:१४ 35 मिनु येसुमी मेको मुर आन कली “मेको छेङछेङ माइश्शो का गेपुकी नु इच्का नाक्त सम्म बाक्ब। छेङछेङ बाक्म सम्म गाक्कीन। छेङछेङमी मगाक्तीनी हना, छिङछिङमी गाक्चा माल्नीनी। सु छिङछिङमी गाक्बा, मेको ते लाइबा मतुइक्ब। 36 छेङछेङ माइश्शो का बाक्म सम्म मेको कली थमा सुतीन। मो पाइतीनी हना, छेङछेङ माइश्शो आ तमी तौ दुम्नीनी” देंत। मिनु येसुमी मेको लोव़ पशा, मेकेर रे गाक्शा ख्रुंइसाक्व। एफिसी ५:८
यसैयाम यहूदी आन पर्बम ब्रेक्शो
37 मिनु येसुमी मुर आन ङोंइती शुश छक लाक्चा ङा गेय पाप्तु हना यो, मेकोपुकीम येसु कली थमा मसुदेम। 38 मोपा यसैया माइश्शो परमप्रभु यावे आ लोव़ पाइब आ ब्रेक्शो लोव़ थमा दुम्त। मार ब्रेक्शो बाक्त देंशा हना “प्रभु, आंइ देंशो लोव़ सुम थमा सुदा ङा? इन पशो गेय सुम तुइक्ता ङा?” दे ब्रेक्शो बाक्त यसैया ५३:१ 39 मोपतीके सुइमी थमा सुइक्ने मचबेम। यसैया ६:९,१० 40 मिनु यसैयामी “परमप्रभु यावेमी मेको आन कली मिक्च मताइब सेल्तीमी। मोपा परमप्रभु यावे कली मतुइक्नीम। मेको आन कली मटीब सेल्तीमी। मोपा मेकोपुकीमी परमप्रभु यावे आ लोव़ रुम्ने मचबेम। मिनु परमप्रभु यावे कली ‘आं कली सापतीन’ दे मपुंइनीम” दे यो यसैयामी ब्रेक्शो बाक्त। मत्ती १३:१४-१५ 41 मारदे हना यसैयामी येसु ख्रीस्त आ छेङछेङ ङा सक्ति ततीके येसु आ पर्बम लोव़ पशा ब्रेक्शो बाक्त। यसैया ६:१ 42 ठेयब मुर शुशेमी येसु कली थमा सुइक्तेक्म। मेकोपुकीमी “फरिसीपुकीमी आंइ कली यहूदी आन ग्रुम्तीक खिं रे तिल्नीम” दे हिंशा, अरु आन कली “गो थमा सुइक्ब दुम्तक” दे मदेंम। यूहन्ना ९:२२ 43 मारदे हना मेकोपुकीमी “आंइ पर्बमी मुरपुकीमी मार देंनीमी” दे परमप्रभु यावे क्येङा मुरपुकी तशा हिंतेक्म। यूहन्ना ५:४४
येसुम परमप्रभु आ शेंशो ला पाइब
44 मिनु येसुमी ठेयब सेंदा पशा “आं कली थमा सुइक्बमी आन थमा सुइश्शो आं कली ला ममाइ, तन्न आं कली सोइक्ब कली यो थमा सुइश्शो नम। 45 मिनु सुम आं कली ताइबा, मेकोमी आं कली सोइक्ब कली यो ताइब। यूहन्ना १४:९ 46 रागी ङा मुर आन कली परमप्रभु यावे आ पर्बम तुइक्पाइक्चा कली गो रागी कली छेङछेङ दुम्शा जाक्ती। मोपतीके सुम आं कली थमा सुइक्बा, मेको छिङछिङमी मबाक्ब। 47 मिनु सु सुमी आं देंशो लोव़ नेंशा यो मपाइनीमी, गो मेको आन कली निसाफ मपाइनुङ। मारदे हना गो रागी ङा मुर आन कली निसाफ पचा कली जाक्शो मनङ। तन्न रागी ङा मुर आन कली पाप रे प्रोंइचा कली जाक्शो नङ। यूहन्ना ३:१७; लूका ९:५६ 48 सुम आं कली मब्रथु, आं देंशो लोव़ मपाइबा, मेको कली निसाफ पाइब का बाक्ब। मेको निसाफ पाइब सु बाक्ब देंशा हना, आं देंशो लोव़ बाक्ब। एको लोव़मी मेको कली नोले ङा नाक्ती निसाफ पाइब। 49 आं कली सोइक्ब आं आफोमी गो मार देंचा नु शेंचा माल्नुङा, मेको नेल्ल माइक्ती। मोपतीके मेको आं लोव़ ममाइ। आं आफ आ लोव़ बाक्ब। 50 मेको आ देंशो लोव़ मार बाक्ब देंशा हना, गेना हना यो ब्रोंइशा बाक्चा गेब लोव़ बाक्ब। मेको आं आफोमी आं कली देंशो लोव़ बाक्ब। मोपतीके आं पशो लोव़ आं आफोमी आं कली ङोंइती देंशो लोव़ बाक्ब” दे येसुमी मुर आन कली माइक्तीमी।
येसुम आ शेंसीब आन खोइल चिक्शो
1 येसुमी पास्सा चाड ङोंइती “मुल रागी रे आं आफ आ बाक्तीक लची नाक्त जाक्त” दे तुइक्ताक्व। मिनु येसुमी नेल्ल क्येङा नोले ङा नाक्त सम्म रागीमी बाक्शो आ मुर आन कली दाक्शो बाक्त। यूहन्ना ७:३०; यूहन्ना १७:१ 2 मिनु येसु नु आ शेंसीबपुकी नाक्दो ङा खमे जना जन बाक्शो बाक्तेक्म। आ शेंसीब सिमोन आ तौ इस्कारीयोती ङा यहूदा यो बाक्शो बाक्त। सैतानमी “येसु कली साइक्चा माल्ब आन कली वारच पावो” दे यहूदा कली मिम्पाइश्शो बाक्त। लूका २२:३ 3 मिनु येसुमी “आं आफोमी आं कली नेल्ल सक्ति गेती। गो परमप्रभु यावे रे जाक्शो नङ। मिनु परमप्रभु यावे आ बाक्तीके लेत्नुङ” दे तुइश्शा, यूहन्ना ३:३५; यूहन्ना १६:२८ 4 येसु बोक्शा, आ तार फेक्शो रिम्शो वा प्रुइश्शा, वा कामी गिल्साक्व। 5 मिनु चिक्तीकेमी ब्वाक्कु कुर पा, आ शेंसीब आन खोइल चिक्ताक्मी। चिक्शा ङा मिन आ गिल्सीशो वाम फिक्ताक्मी। 6 मिनु सिमोन पत्रुस आ पालो जाक्मेनु, मेकोमी येसु कली “प्रभु, गेमी आं खोइल चिक्चा दुम्बा ङा?” देंत। 7 मिनु येसुमी “मुल आं पशो मरुप्नेवे। गे नोले ला रुप्नेवे” देंत। 8 पत्रुसमी “गो आं खोइल चिक्चा काइ मगेनुङ” देंत। मिनु येसुमी “गो इ खोइल मचिक्ताक्न हना, गे आं मुर मनवे” दे माइक्तु। 9 मिनु सिमोन पत्रुसमी “प्रभु, आं खोइल ला ममाइ, आं गुइ पिया यो चिक्तीनी” देंत। 10 येसुमी “चिक्शो मुर आन कली लेंशा चिक्चा ममाल्ब। खोइल ला चिक्चा माल्ब। खोइल चिक्शोनु, नेल्ल रिम्शो दुम्ब। गेपुकी चिक्सीशो दुम्तीनी। काइ मचिक्सीशो गेपुकी नु का बाक्ब” देंत। यूहन्ना १५:३ 11 येसुमी आ कली साइक्ब आन कली वारच पाइब कली तुइश्शा मो देंत। 12 मिनु येसुमी आन खोइल चिक्ने थुम्शा, आ ङोंइती प्रुइश्शो फेक्तीक फेक्शा, आ बाक्तीक लत। मिनु शेंसीब आन कली “इन कली पशो गेय आ अर्थ मार बाक्बा, गे तुइक्नीनी? 13 गेपुकीमी आं कली शेंब नु प्रभु देंनीनी। मेको ठीक देंतीनी। मारदे हना गो मेकोन नङ। मत्ती २८:८,१० 14 गो प्रभु नु शेंब दुम्शा यो इन खोइल चिक्ताक्न्नी। गेपुकीमी यो इन खोइल चिक्मुचा माल्नीनी। लूका २२:२७ 15 गो इन खोइल चिक्ताक्न्नी। मिनु गेपुकी आं खोदेंशो पने। फिलिप्पी; १पत्रुस २:२१ 16 मिनु नोफा दाइश्शा नेनीन, खिं ङा होव़प क्येङा वाइल ठेयब ममाइ। मिनु सोइश्शो मुर सोइक्ब क्येङा ठेयब यो ममाइ। 17 गेपुकी आं देंशो लोव़ तुइश्शा पाइतीनी हना, गे आसीक रशा ग्येरसीशो मुर दुम्नीनी” दे येसुमी देंत। मत्ती ७:२४
यहूदा आ पर्बम लोव़ पशो
18 मिनु येसुमी “गो नेल्ल इन पर्बम लोव़ मपाइनुङ। आं योव़शो आन कली तुइक्नुङ। परमप्रभु यावे आ ब्रेक्पाइश्शो लोव़मी मार ब्रेक्शो बाक्ब देंशा हना ‘आं शोब्ले जाइबमी आं कली साइक्चा कली आ खोइल क्युक्तु’ दे ब्रेक्शो बाक्ब। मुल मोदेंशो दुम्चा चिक्ताक्व। भजन संग्रह ४१:९ 19 मोदेंशो दुम्चा ङोंइती तुइक्पाइक्तन्नी। मिनु मो दुम्मेनु, गो मेकोन बाक्ङा बाक्त, दे तुइक्नीनी। मिनु आं कली थमा सुइक्नीनी। 20 नोफा दाइश्शा नेनीन। सुमी आं सोइश्शो कली ब्राइबा, मेकोमी आं कली ब्राइब। मिनु सुमी आं कली ब्राइबा, मेकोमी आं कली सोइक्ब कली यो ब्राइब” देंत। मत्ती १०:४० 21 मिनु येसुमी मेको लोव़ पशा आ थुं खाइक्त। मिनु “नोफा दाइश्शा नेनीन। गेपुकी नु का बाक्ब। मेकोमी आं कली साइक्ब आन कली वारच पाइब” दे आ थुं खाइश्शा देंत। यूहन्ना १२:२७ 22 मिनु येसु आ शेंसीबपुकीमी “सु आ पर्बम देंशो बाक्मे?” दे मतुइक्थु कोव़मुम्तेक्म। 23 येसु आ नेल्ल क्येङा दाक्शो शेंसीब येसु आ नेक्था बाक्त। यूहन्ना १९:२६; यूहन्ना २०:२; यूहन्ना २१:२० 24 मिनु सिमोन पत्रुसमी मेको कली “सु आ पर्बम लोव़ पवा, हिल्लो पावो। मिनु आंइ कली देनो” देंत। 25 मिनु येसु आ नेक्था बाक्शो शेंसीबमी “प्रभु, मेको सु बाक्मे?” दे येसु कली हिल्लो पाप्तु। 26 मिनु येसुमी “गो एको शोब्ले शेक्कुमी तेप्शा सु कली जचा गेङा, मेकोन बाक्ब” देंशा, येसुमी शोब्ले शेक्कुमी तेप्शा, सिमोन आ तौ इस्कारीयोत ङा यहूदा कली गेप्तु। 27 यहूदामी शोब्ले ताक्तु। मेना सैतान आ थुंमी ओव़त। मिनु येसुमी यहूदा कली “इ मिम्शो पावो” देंत। 28 शेंसीबपुकीमी येसुमी यहूदा कली मारदे मोदेंशो देंमे, दे मतुइक्तेम। 29 का निक्शीमी “यहूदामी क्येट आ थैली कुरशो बाक्ब। मिनु येसुमी मेको कली पास्सा नाक्त कली ‘मार मार माल्नया, मेको ग्याप्थ लावो, दे मदा कों, प्रुङग आन कली क्येट योक्शा गेवो’ दे मदा कों?” दे मिम्ताक्म। 30 यहूदा शोब्ले ताक्शा, छुल बोक्शा लत। मेना छिङछिङ दुम्शो बाक्त।
येसुम नक अरेशो लोव़ शेंशो
31 मिनु यहूदा लम नोले येसुमी “मुल रागीमी जरमेशोमी सक्ति ताप्तु। मिनु मुरपुकीमी रागीमी जरमेशो आ पतीक तशा, परमप्रभु यावे कली ठेयब सेल्नीमी। यूहन्ना १२:२३,२८ 32 मिनु परमप्रभु यावेमी रागीमी जरमेशो कली आंम आ सक्ति गेशा, ठेयब सेल्ब। एको मुल दुम्चा चिक्शो बाक्त। यूहन्ना १७:१-५ 33 आं आइक्च आलपुकी, गो इन कली शुश दाक्ताक्ङ हना यो, गो गेपुकी नु शुश बाक्चा मताइनुङ। गेपुकी आं कली माल्नीनी। मिनु गो यहूदी आन कली ‘आं लतीकेमी गेपुकी जाक्ने मचाप्नीनी’ देंशो खोदेंशो, गो इन कली यो मो देंनुङ। यूहन्ना ८:२१ 34 मिनु इन कली नक अरेशो लोव़ का पाइनुङ। मार लोव़ पाइनुङ देंशा हना, गेपुकी दाक्मुने। गोम इन कली दाक्शो खोदेंशो पा गेपुकी यो दाक्मुने। यूहन्ना १५:१२,१३,१७ 35 दाक्मुशो तशा, मुर नेल्लेमी ‘गेपुकी आं शेंसीब ननी’ दे तुइक्नीम” दे येसुमी देंत।
येसुम पत्रुस कली लोव़ पशो
36 मिनु सिमोन पत्रुसमी येसु कली “प्रभु, ते लाइनीनी?” दे हिल्लो पाप्तु। येसुमी “गो ते लाइनुङा, मुल गे आं नोले खोइक्ने मचाप्नेवे। तन्न नोले खोइक्नेवे” देंत। यूहन्ना २१:१८-१९ 37 मिनु पत्रुसमी “प्रभु, मारदे इन कली मुल नोले खोइक्ने मचाप्नुङा ङा? इन साइक्चा पुंइसीचा ङा साइक्चा पुंइसाक्ङ हना यो, गो बेक्नुङ” देंत। 38 मिनु येसुमी “मार आं साइक्चा पुंइसीचा ङा साइक्चा पुंइसीनेवे? इ नोफा दाइश्शा नेनो, भाले ग्रीचा क्येङा ङोंइती गेमी खेयप सां आं कली मतुइक्नुङ, दे देंनेवे” दे माइक्तु।
येसु परमप्रभु नु ग्रुम्पाइक्ब लां बाक्ब
1 मिनु येसुमी आ शेंसीब आन कली “इन थुं ग्येत्थ लुक्च मपने। परमप्रभु यावे कली थमा सुतीन। आं कली यो थमा सुइय्यीनी। 2 आं आफ बाक्तीकेम शुश मुर आन कली बाक्तीक सेल्शो बाक्नीम। मोपतीके इन बाक्तीक ठीक पथ लाइनुङ। 3 मिनु इन बाक्तीक ठीक पशा, लेंशा जाक्शा आं बाक्तीक लाइक्नन्नी। मिनु गो नु काथा बाक्नीनी। यूहन्ना १२:२६; यूहन्ना १७:२४ 4 मिनु आं लतीक लां तुइक्नीनी” देंत। 5 मिनु थोमासमी येसु कली “प्रभु, गे ते लाइनीनी? गो मतुइक्नीकी। मिनु लां दोपा तुइक्नीकी?” देंत। 6 मिनु येसुमी “गो थमा नु ब्रोंइचा गेब लां नङ। सुइ आन पतीक गेना हना यो आं आफ नु बाक्चा मताइनीम। तन्न आं पतीके रे ला गेना हना यो परमप्रभु यावे नु बाक्चा ताइनीम। यूहन्ना १०:९; मत्ती ११:२७; रोमी ५:१-२; हिब्रू १०:२० 7 गेपुकी आं कली तुइक्ताक्नी हना, आं आफ कली यो तुइक्नीनी। मुल रे गेपुकी आं आफ कली तुइश्शा ताइनीनी” देंत। 8 मिनु फिलीपमी “प्रभु, इन आफ आंइ कली कोंइदीन। मिनु ग्येरनीकी” देंत। 9 मिनु येसुमी “गो नु शुश बाक्शा यो, गे आं कली मतुइक्नेवे, फिलीप? सुमी आं कली तयी, मेकोमी आं आफ कली यो ताप्तु। मारदे ‘इन आफ कोंइदीन’ देंनेवे? यूहन्ना १२:४५; हिब्रू १:३ 10 गो आं आफ आगामी बाक्नुङ। मिनु आं आफ आं आगामी बाक्ब, दे थमा मसुइक्नेवे? आं देंशो लोव़ आं के ममाइ, आं आफ आ लोव़ बाक्ब। आं आगामी बाक्शो आं आफोमी गेय पाइब। यूहन्ना १२:४९ 11 गो आं आफ आ आगामी बाक्नुङ। आं आफ आं आगामी बाक्ब, दे थमा सुतीन। आं लोव़ नेंशा, थमा सुइक्ने मचाप्नीनी हना, आं पशो तशा थमा सुतीन। यूहन्ना १०:२५,३८ 12 मिनु नोफा दाइश्शा नेनीन, सुमी आं कली थमा सुइक्बा, मेकोमी आं पशो गेय यो पाइब। मिनु आं क्येङा ठेयब गेय पाइब। मारदे हना गो आं आफ आ बाक्तीक लाइनुङ। मत्ती २८:१९ 13 मिनु गेपुकी आं नेंमी मार मार पुंइनीनु, गो गेनन्नी। गो इन पुंइशो गेशा, गो, आं पतीके आं आफ आ सक्ति कोंइनुङ। यूहन्ना १५:७; यूहन्ना १६:२४; मर्कूस ११:२४; १यूहन्ना ५:१४-१५ 14 आं नेंमी मार मार पुंइनीनी, गो मेको गेनन्नी।
परमप्रभु आ सोक्त आ पर्बम शेंशो
15 गेपुकी आं कली दाक्ताक्नी हना, आं अरेशो पाइनीनी। यूहन्ना १५:१०; १यूहन्ना ५:३ 16 गेपुकी नु काथा बाक्शा, वारच पाइब का सोइक्चा, दे आं आफ कली पुंइनुङ। मेको गेपुकी नु गेना हना यो मप्रोंइथु बाक्ब। यूहन्ना १५:२६; यूहन्ना १६:७ 17 मेको वारच पाइब थमा ङा सोक्त बाक्ब। आं कली थमा मसुइक्बपुकीमी मेको सोक्त ताक्ने मचाप्नीम। मारदे हना मेकोपुकीमी मेको सोक्त कली मतुइक्नीम। गेपुकी चहिं मेको कली तुइक्नीनी। मारदे हना मेको गेपुकी नु बाक्ब। मिनु इन आगामी बाक्ब। यूहन्ना १६:१३ 18 गो इन कली रोम रोइक्च खोदेंशो पा मवोइक्नन्नी। इन बाक्तीके जाक्नुङ। 19 इच्का नोले थमा मसुइक्बपुकीमी आं कली लेंशा मताइनीम। गेपुकीमी चहिं आं कली ताइनीनी। मारदे हना गो ब्रोंइनुङ। मिनु गेपुकी यो ब्रोंइनीनी। यूहन्ना २०:२० 20 मिनु आं आफ आ आगाम बाक्नुङ। गेपुकी आं आगामी बाक्नीनी। मिनु गो इन आगामी बाक्नुङ, दे मेना रुप्शा तुइक्नीनी। 21 सुमी आं अरेशो तुइश्शा पाइबा, मेकोमी आं कली दाक्ब। सुमी आं कली दाक्बा, आं आफोमी मेको कली यो दाक्ब। मिनु गो मेको कली दाक्शा, आं कली तुइक्पांइसीनुङ” दे येसुमी देंत। १यूहन्ना ५:३; यूहन्ना १६:२७ 22 मिनु यहूदामी, इस्कारीयोत ङा यहूदा चहिं ममाइ, येसु कली “प्रभु, गे आंइ कली तुइक्पांइसीनीनी। थमा मसुइक्ब आन कली चहिं मतुइक्पांइसीनीनी, दोपा रुम्सीबा ङा?” दे हिल्लो पाप्तु। 23 मिनु येसुमी “सुमी आं कली दाक्बा, मेकोम आं देंशो लोव़ पाइब। आं आफोमी मेको कली दाक्ब। मिनु गो नु आं आफ मेको नु बाक्नस्कु। हितोपदेस ८:१७; एफिसी ३:१७ 24 आं कली मदाक्बमी चहिं आं देंशो लोव़ यो मपाइब। आं देंशो लोव़ आं के ममाइ, आं कली सोइक्ब आं आफ के बाक्ब। यूहन्ना ७:१६-१७ 25 गेपुकी नु बाक्शा, एको लोव़ पाता। 26 आं नेंमी आं आफोमी इन कली वारच पाइब आ सोक्त सोइक्ब। मेको सोक्तीमी इन कली मारेइ मारेइ शेंब नु आं देंशो लोव़ नेल्ल फ्रुक्पाइक्ब।
येसु आ गेशो थुं नाइक्तीके
27 गो आं थुं नाइश्शो खोदेंशो पा इन थुं नाइक्पाइक्नन्नी। मुरुमी पशो खोदेंशो ममाइ, इन थुं ग्येत्थ लुक्च मपने। महिनीने। यूहन्ना १६:३३; फिलिप्पी ४:७ 28 ‘गो लाइनुङ। मिनु लेंशा जाक्नुङ’ दे आं देंशो नेंतीनी। गेपुकी आं कली दाक्ताक्यीनी हना, ग्येरसीनी वा। मारदे हना गो आं आफ आ बाक्तीक लाइनुङ। आं आफ चहिं आं क्येङा ठेयब बाक्ब। 29 नेल्ल दुम्चा क्येङा ङोंइती शेंताक्न्नी। मेको दुम्मेनु, गेपुकी थमा सुइक्ब दुम्नीनी। 30 मुल ङा मेरे शुश मशेंनन्नी। मारदे हना रागी ङा मुर आन कली हुकुम पाइब जाक्ब। मेकोमी आं कली ग्राने मचाप्ब। यूहन्ना १२:३१; एफिसी २:२ 31 गो आं आफ आ देंशो पाइनुङ। मो पङानु, गो आं आफ कली दाक्नुङ, दे रागी रागी ङा मुरपुकीमी तुइक्तमेक्ल। लो बोक्कीन, गाक्य” देंत। यूहन्ना १०:१८
थमा ङा अङगुर बोट
1 मिनु येसुमी “गो थमा ङा अङगुर बोट नङ। आं आफ चहिं अङगुर कली कोव़ब बाक्ब। भजन संग्रह ८०:९-१२; यसैया ५:१-७; येरमीया २:२१ 2 आं आफोमी फल मसिप्ब राशी आन कली ख्रोइश्शा ताइक्ब। फल सिप्ब राशी कली मेको क्येङा शुश फल सिप्पाइक्चा, दे मुंइशा वोइक्ब। यूहन्ना १३:१०; १पत्रुस १:२३ 3 गेपुकी आं देंशो लोव़ टितीके मुंइसीशो राशी खोदेंशो दुम्तीनी। 4 गेपुकी आं आगामी बाक्कीन। मिनु गो इन आगामी बाक्नुङ। राशी बोटमी मबाक्त हना, मेको राशी फल सिन्ने मचाप्ब। मोपतीके गेपुकी यो आं आगामी मबाक्तीनी हना, फल सिन्ने मचाप्नीनी। 5 गो अङगुर बोट नङ। गेपुकी चहिं राशी ननी। सु आं आगाम बाक्बा, गो मेको आ आगामी बाक्नुङ। मिनु मेकोमी शुश फल सिप्ब। तन्न गो रे ङोन बाक्तीनी हना, मारेइ पने मचाप्नीनी। २कोरिन्थी २:५-६ 6 सु चहिं आं आगामी मबाक्बा, मेको ख्रोइश्शा ताइश्शो राशी खोदेंशो पा सोव़ब। मिनु मुरपुकीमी मोदेंशो राशी कली खुप्शा मीम चोइनीम। 7 गेपुकी आं आगामी बाक्शा नु आं लोव़ इन आगामी बाक्त हना, इन दाक्शो पुनीन। मिनु इन पुंइशो ताइनीनी। मर्कूस ११:२४ 8 गेपुकी आं शेंसीब दुम्शा, शुश फल सिप्ब दुम्तीनी हना, आं आफ आ सक्ति कोंइनीनी। मोपा गेपुकी आं शेंसीब दुम्नीनी। मत्ती ५:१६
दाक्मुचा माल्ब, दे शेंशो
9 आं आफोमी आं कली दाक्ब। मिनु आं आफोमी आं कली दाक्शो खोदेंब पा, गो इन कली दाक्ताक्न्नी। गेपुकी यो ‘गो इन कली दाक्नुङ’ दे तुइश्शा बाक्कीन। 10 दोपा गो आं आफोमी देंशो लोव़ टिशा, आं आफ नु दाक्मुइनस्कु, मोपा गेपुकी यो आं देंशो लोव़ टीतीनी हना, गो नु दाक्मुशा बाक्नय। 11 इन कली एको लोव़ मारदे पाता देंशा हना, आं ग्येरशो थुं इन थुंमी लील। मिनु इन थुं ग्येरसीशा बाक्ल, दे एको लोव़ पाता। यूहन्ना १७:१३ 12 गो इन कली दाक्शो खोदेंशो पा गेपुकी यो दाक्मुने, दे आं अरेशो बाक्ब। यूहन्ना १३:३४ 13 सु आ वारच आ पर्बम साइक्चा पुंइसीबा, मेको नेल्ल क्येङा ठेयब दाक्ब वारच बाक्ब। यूहन्ना १०:११; १यूहन्ना ३:१६ 14 गेपुकी आं देंशो पना पन बाक्तीनी हना, आं वारच ननी। यूहन्ना ८:३१; मत्ती १२:५० 15 मुल रे गो इन कली वाइल मदेंनुङ। मारदे हना वाइल आ ठेयब मुरुमी मार गेय पचशो बाक्मे, मेको वाइलम मतुइक्ब। गो चहिं इन कली आं आफ आ देंशो नेल्ल शेंताक्न्नी। मोपतीके इन कली वारच देंनुङ। 16 गेपुकीमी आं कली मयोव़यीनी। तन्न गेपुकी लशा फल सिश्शा, इन सिश्शो फल लील, दे गो इन कली योव़तन्नी। मिनु गेपुकीमी आं आफ कली आं नेंमी इन दाक्शो पुंइनीनु, आं आफोमी इन कली गेवल, दे वोइक्तन्नी। 17 गो इन कली ‘दाक्मुने’ दे माइक्तन्नी” देंत।
थमा सुइक्ब श्येत जाइनीम
18 मिनु “रागी ङा मुरपुकीमी इन कली मदाक्नीमी। इन कली मदाक्चा क्येङा ङोंइती आं कली मदाक्नीम, दे तुइक्नीनी। यूहन्ना ७:७ 19 गेपुकी रागी ङा मुर खोदेंशो बाक्तीनी हना, रागी ङा मुरपुकीमी इन कली दाक्नीमी। तन्न गे रागी ङा मुर मननी। गो इन कली रागी ङा मुरपुकी रे योव़तन्नी। मोपतीके रागी ङा मुरपुकीमी इन कली मदाक्नीम। यूहन्ना १७:१४; १यूहन्ना ४:४-५ 20 मिनु ङोंइती गो इन कली ‘होव़प क्येङा वाइली ठेयब ममाइ’ देंती। मिनु आं देंशो मिम्तीन। मुरपुकीमी आं कली श्येत गेतीमी हना, इन कली यो श्येत गेनीमी। मुरपुकीमी दोपा आं देंशो लोव़ नेंशा टीमे, मोपा इन देंशो लोव़ यो टीनीम। यूहन्ना १३:१६; मत्ती १०:२४-२५ 21 मुरपुकीमी आं नोले खोइक्ब इन कली श्येत गेनीम। मारदे हना आं कली सोइक्ब कली मतुइक्नीम। यूहन्ना १६:३ 22 गो रागीमी जाक्शा, मेको मुर आन कली शेंताक्ङमी। आं लोव़ तुइश्शा यो मटीमे। मोपतीके मेकोपुकी पाप राइनीमी। यूहन्ना ९:४१ 23 सुमी आं कली मदाक्बा, मेकोमी आं आफ कली यो मदाक्ब। लूका १०:३६ 24 गो मुर आन कली छक लाक्चा ङा गेय कोंइताक्ङमी। आं क्येङा ङोंइती सुइमी आं खोदेंशो गेय मकोंइदे। मेको गेय कोंइशा यो मुरपुकीमी आं आफ नु गो निम्फा आंस कली मदाक्नीम। 25 परमप्रभु यावेमी ब्रेक्पाइश्शो लोव़ थमा दुम्चा कली आं कली मदाक्नीम। मार ब्रेक्पाइश्शो बाक्त देंशा हना ‘मेकोपुकीमी आं कली मोशा यो मदाक्नीम’ दे ब्रेक्शो बाक्त। भजन संग्रह ६९:४ 26 मिनु वारच पाइब का जाक्ब। गो मेको कली आफ आ बाक्तीक रे सोइक्नुङ। मेको परमप्रभु यावे रे जाक्शो थमा ङा सोक्त बाक्ब। मेकोमी आं पर्बम शेंब। यूहन्ना १४:१६,२६; लूका २४:४९ 27 मिनु गेपुकी यो आं सांकछी दुम्शा, मुर आन कली आं पर्बम शेंनीनी। मारदे हना गेपुकी ङोंइती रे गो नु बाक्शो ननी” देंत। प्रेरित १:८,२१-२२; प्रेरित ५:३२
1 मिनु येसुमी “गो एको लोव़ नेल्ल मारदे शेंताक्न्नी देंशा हना, थमा सुइक्तीक रे नोले मशोंइसीन, दे शेंताक्न्नी। 2 मुरपुकीमी इन कली ग्रुम्तीक खिं रे तिल्नीम। थमा, इच्का नोले इन कली साइक्बपुकीमी ‘गो परमप्रभु यावे आ दाक्शो पना पन बाक्ती’ दे मिम्नीम। मत्ती १०:१७,२२; मत्ती २४:९ 3 मोदेंशो पाइनीम। मारदे हना आं आफ नु आं कली मतुइक्नीम। यूहन्ना १५:२३ 4 मिनु गो मेको नेल्ल इन कली शेंताक्न्नी। आं देंशो दुम्मेनु, गो इन कली ङोंइती देंशो मिम्तीन। ङोंइती गो एको लोव़ इन कली मनेंपाइक्न्नी। मारदे हना गेपुकी नु काथा बाक्ती।
परमप्रभु आ सोक्त आ गेय
5 मुल चहिं आं कली रागीमी सोइक्ब आ बाक्तीकेमी लाइनुङ। गो लती हना यो, गेपुकी सुइमी ‘ते लाइनीनी?’ दे हिल्लो मपाइनीनी। 6 तन्न आं देंशो नेंशा, इन थुं खाइक्ब। 7 नोफा दाइश्शा नेनीन, आं लशो इन कली रिम्शो दुम्ब। गो मलती हना, थमा सुइक्ब आन कली वारच पाइब मजाक्ब। गो लती हना, मेको कली सोइक्नुङ। यूहन्ना १४:१६,२६ 8 मिनु मेको जाक्शा, रागी ङा मुर आन कली पाप आ पर्बम नु परमप्रभु यावे आ ङोंइती मार ठीक बाक्ब नु परमप्रभु यावे आ निसाफ पतीक दोदेंशो बाक्बा, दे शेंब। 9 मेको आन पाप मार बाक्त देंशा हना, आं कली थमा मसुइश्शो बाक्नीम। यूहन्ना १५:२२,२४ 10 परमप्रभु यावे आ ङोंइती ठीक दुम्शा बाक्चा आ पर्बम मार शेंब देंशा हना, गो आं आफ आ बाक्तीक लाइनुङ। मो दुम्तीके गेपुकीमी आं कली मताइनीनी, दे शेंब। प्रेरित ५:३१; रोमी ४:२५ 11 मिनु निसाफ पचा आ पर्बम मार शेंब देंशा हना, परमप्रभु यावेमी रागी ङा मुर आन कली हुकुम पाइब सैतान कली निसाफ पने थुम्तु, दे शेंब। यूहन्ना १२:३१ 12 मिनु इन कली शेंतीक लोव़ शुश लीब। तन्न मुल फाल्ने मचाप्नीनी। १कोरिन्थी ३:१ 13 मिनु थमा ङा सोक्त जाक्शा, इन कली थमा लां कोंइशा शेंब। मेकोमी आंम मिम्शो मशेंब। तन्न मार मार नेंबा, मेकोन शेंब। नोले मार मार दुम्बा, मेको यो शेंब। यूहन्ना १४:२६; १यूहन्ना २:२७ 14 आं सक्ति कोंइब। गो मार देंनुङा, मेको इन कली शेंब। 15 आं आफ आ सक्ति नु आं सक्ति कान बाक्ब। आं आफ नु मार मार बाक्मे, मेको आं के नम। मिनु परमप्रभु यावे आ सोक्तीमी आं लोव़ नेंशा, इन कली शेंब। यूहन्ना ३:३५; यूहन्ना १७:१०
‘परमप्रभु आ बाक्तीक लाइनुङ’ देंशो
16 इच्का नाक्त नोले आं कली मताइनीनी। मिनु इच्का नोले ताइनीनी” दे येसुमी आ शेंसीब आन कली माइक्तीमी। यूहन्ना १४:१९ 17 आ शेंसीब का निक्शीमी “इच्का नाक्त नोले आं कली मताइनीनी। मिनु लेंशा इच्का नाक्त नोले ताइनीनी। मिनु गो आं आफ आ बाक्तीक लाइनुङ देंत। एको लोव़ मार में” देंमुम्तेक्म। 18 मिनु “इच्का नोले नाक्त देंशो लोव़, मार में, आ देंशो लोव़ मरुबय” देंमुम्तेक्म। 19 मिनु येसुमी आ कली हिल्लो पाइनीमी, दे तुइक्ताक्व। मिनु मेको आन कली “इच्का नाक्त नोले आं कली मताइनीनी। मिनु लेंशा इच्का नाक्त नोले ताइनीनी देंशो लोव़ आ पर्बम मार लोव़ पमुनी? 20 नोफा दाइश्शा नेनीन, गेपुकी ङाक्शा, हिशेक पाइनीनी। रागी ङा मुरपुकी चहिं ग्येरसीनीम। इन थुं खाइश्शो बाक्नीनी। तन्न थुं खाइश्शो साशा ग्येरनीनी। मर्कूस १६:१० 21 मीश मुरुमी आल थिचावानु ‘आं थिची जाक्त’ दे हिंशा, श्येत जाइब। तन्न आल थिशा ‘आल का जरमेसाक्व’ दे ग्येरसीब। आ ङोंइती ङा हिंशो नु श्येत ममिम्ब। यसैया २६:१७ 22 मिनु मेको खोदेंशो पा गेपुकी मुल थुं खाइश्शो बाक्नीनी। तन्न गो इन कली लेंशा तङानु, गेपुकी थमा पा ग्येरसीनीनी। मिनु इन ग्येरसीशो सुइमी क्याम्ने मचाप्नीम। 23 मेना गेपुकी आं कली मारेइ हिल्लो मपाइनीनी। नोफा दाइश्शा नेनीन, गे आं नेंमी आं आफ कली मार मार पुंइनीनु, आं आफोमी इन कली गेब। यूहन्ना १४:१३-१४ 24 मुल सम्म गेपुकीमी आं नेंमी मारेइ मपुंइनी। पुनीन, मिनु इन पुंइशो ताइनीनी। मेको तशा, गेपुकी थमा पा ग्येरसीनीनी। 25 गो इन कली कथा खोदेंशो पा शेंताक्न्नी। नोले कथा पा मशेंनन्नी। मेना आं आफ आ पर्बम मारेइ मख्रुइक्थु शेंनन्नी। यूहन्ना १५:११ 26 आं नेंमी पुंइनीनी। मिनु गो ‘आं आफ कली इन पर्बम पुंइनुङ’ दे इन कली मदेंनुङ। 27 आं आफोमी इन कली दाक्ब। मारदे हना आं कली दाक्ताक्नी। गो आं परमप्रभु यावे रे जाक्शो नङ, दे थमा सुइक्तीनी। यूहन्ना १४:२१ 28 गो आं आफ रे रागीमी जाक्ती। लेंशा रागी रे पा, आं आफ आ बाक्तीक लाइनुङ” देंत। 29 मिनु आ शेंसीबपुकीमी येसु कली “मुल गे कथा पा मशेंथु, मारेइ मख्रुइक्थु शेंनीनी। 30 गे नेल्ल तुइक्नीनी, दे गोपुकी मुल तुइक्ताक्क। मोपतीके इन कली शेंब ममाल्ब। गे परमप्रभु यावे आ बाक्तीक रे यिशो ननी, दे थमा सुइक्तक” देंतेक्म। 31 मिनु येसुमी “मार, गे मुल थमा सुइक्नीनी, मिनु? 32 नोले नेल्ल ब्राशा, इन खिं खिं लशा, आं कली प्रोंइनीनी। मिनु गो का ला बाक्नुङ। तन्न गो का ला मदुम्नुङ। मारदे हना आं आफ गो नु बाक्ब। जकरिया १३:७; मत्ती २६:३१ 33 आं कली मिम्शा इन थुं नाइश्शा बाक्कीन, दे एको लोव़ शेंताक्न्नी। गेपुकी रागीम बाक्शा, श्येत जाइनीनी। तन्न थुं बारपाइश्शा ग्येरसीने। गो रागी कली ग्राती” देंत। यूहन्ना १४:२७; रोमी ५:१; १यूहन्ना ५:४
येसुम आ आफ कली पुंइशो लोव़
1 मिनु येसुमी मेको लोव़ पने थुम्शा, सरीङ गे कोव़शा “आं आफ, आं लची जाक्त, इन सक्ति गेयीनी। मिनु गो इन सक्ति कोंइनुङ। 2 गे आं कली मुर नेल्ल आन कली अधिकार पचा गेतीनी। मिनु आं कली गेशो मुर नेल्ल आन कली गेना हना यो ब्रोंइशा बाक्चा गेनुङमी। मत्ती ११:२७ 3 गेना हना यो गे नु ब्रोंइशा बाक्चा मार बाक्ब देंशा हना, सुमी इन कली गे ला थमा परमप्रभु यावे बाक्नीनी नु गो, इन सोइश्शो येसु ख्रीस्त नङ, दे तुइक्नीमी, मेको ला गेना हना यो गे नु ब्रोंइशा बाक्चा ताइनीम। १यूहन्ना ५:२० 4 रागीम बाक्शा, इन पपाइश्शो गेय थुम्शा, इन सक्ति कोंइताक्ङमी। 5 आं आफ, रागी सेल्चा क्येङा ङोंइती गे नु इन छेङछेङमी बाक्ती। मुल लेंशा इन बाक्तीक जाक्चा चिक्ताक्ङ। ङोंइती ङा खोदेंशो पा गे नु इन छेङछेङमी बाक्चा गेयीनी। यूहन्ना १:१; फिलिप्पी २:६ 6 गेमी रागी रे प्रोंइशो मुरपुकी गेतीनी। मेको आन कली इन नें तुइक्पाइक्तामी। मेको मुरपुकी इन के बाक्तेक्म। मिनु गे आं कली गेतीनी। मेकोपुकीमी इन लोव़ टिना टिन बाक्नीम। 7 गे आं कली मार मार गेनी, मेको नेल्ल इन के बाक्ब, दे मेकोपुकीमी मुल तुइक्नीम। 8 गे आं कली शेंताक्यीनी। मिनु इन शेंशो लोव़ मेको आन कली शेंताक्ङमी। मिनु थमा सुइक्तेक्म। गो इन बाक्तीक रे जाक्शो नङ, दे थमा पा तुइक्नीम। मेकोपुकीमी आं कली सोइक्ब, गे ननी, दे थमा सुइक्तेक्म। यूहन्ना १६:३० 9 मिनु गो मेको आन पर्बमी इन कली पुंइनुङ। रागी ङा मुर आन पर्बम मपुंइनुङ। आं कली गेशो मुर आन पर्बम पुंइनुङ। मारदे हना मेकोपुकी इन के नम। यूहन्ना ६:३७,४४ 10 आं मुर नेल्ल इन के नम। इन के आं के नम। मेकोपुकीमी आं सक्ति कोंइनीम। यूहन्ना १६:१५ 11 मुल गो रागीमी शुश नाक्त मबाक्नुङ। गे का ला बाक्शो आं आफ, इन बाक्तीक जाक्चशो बाक्नुङ। तन्न मेकोपुकी रागीमी बाक्नीम। आं आफ, आं कली गेशो मुर इन नें ङा सक्तिमी रिम्शो कोव़शा वोतीन। दोपा गो गे नु थुं का ङा बाक्ङा, मोपा मेकोपुकी यो थुं का दुम्शा बाक्मल, दे सक्ति गेने। 12 गो आं कली गेशो मुरपुकी नु बाक्ङानु, इन नें ङा सक्तिमी रिम्शो कोव़शा वोइक्तामी। सुइ मजाम्म। इन ब्रेक्पाइश्शो लोव़ थमा दुम्चा, दे का चहिं जाम्शा, नरक लाइब दुम्त। यूहन्ना ६:३९; भजन संग्रह ४१:१० 13 मुल गो इन बाक्तीक जाक्चशो बाक्नुङ। इन लोव़ रागीमी शेंताक्ङमी। मारदे शेंताक्ङमी देंशा हना, आं ग्येरशो खोदेंशो पा मेको यो ग्येरसीशा बाक्मल, दे शेंताक्ङमी। यूहन्ना १५:११ 14 गो मेको आन कली इन देंशो लोव़ शेंताक्ङमी। मिनु रागी ङा मुरपुकीमी मेको आन कली श्येत गेम्तेक्म। मारदे हना रागी ङा मनम। गो यो रागी ङा मनङ। यूहन्ना १५:१९ 15 मेको आन कली रागी रे प्रोनीन, दे इन कली मपुंइनुङ। तन्न मेको आन कली सैतान रे प्रोनीन, दे पुंइनुङ। मत्ती ६:१३; २थिस्सलोनिकी ३:३ 16 गो रागी ङा मनङ। मिनु आं खोदेंशो पा मेकोपुकी यो रागी ङा मनम। 17 मेको आन कली इन थमा पतीकेमी ख्रुमीन। इन थमा पतीक चहिं इन लोव़ बाक्ब। भजन संग्रह ११०:१६० 18 गेमी आं कली रागीमी सोइश्शो खोदेंशो पा, गो यो मेको आन कली रागी रागीम सोइक्ताक्ङमी। यूहन्ना २०:२१ 19 मेको आन पर्बम गो इन कली जिम्मा गेसीनुङ। मेकोपुकी यो थमा पतीकेमी ख्रुम्शो मुर दुम्शा बाक्मल। हिब्रू १०:१० 20 गो मेको आन पर्बम ला इन कली मपुंइनुङ। तन्न मेको आन शेंशो लोव़ रे आं कली थमा सुइक्ब दुम्ब आन पर्बम यो पुंइनुङ। रोमी १०:१७ 21 मार पुंइनुङ देंशा हना, मेको नेल्ल थुं का ङा दुम्मल। आं आफ, गे आं आगामी बाक्शो नु गो इन आगामी बाक्शो खोदेंशो पा मेकोपुकी इस आगामी बाक्मल, दे पुंइनुङ। मो दुम्त हना, रागी ङा मुरपुकीमी गेमी आं कली सोइक्ताक्नी, दे थमा सुइक्नीम। गलाती ३:२८ 22 गेमी आं कली गेशो सक्ति मेको आन कली गेतामी। मारदे गेतामी देंशा हना, गो निक्शी थुं का ङा दुम्शो खोदेंशो पा, मेकोपुकी यो गे नु थुं का ङा दुम्मल, दे मेको सक्ति गेतामी। प्रेरित ४:३२ 23 गो मेको आन आगामी बाक्नुङ। गे आं आगामी बाक्नीनी। मो पा बाक्शोनु, मेकोपुकी गे नु गो खोदेंशो पा का दुम्नीम। मो दुम्शो तशा, रागी ङा मुरपुकीमी गे आं कली सोइक्ताक्नी। मिनु गेमी आं कली दाक्ताक्यीनी। मोपा गेमी आं कली दाक्शो बुदी मेको आन कली यो दाक्ताक्नी, दे तुइक्तमेक्ल। १कोरिन्थी ६:१७ 24 आं आफ, आं कली गेशो मुरपुकी गो नु काथा बाक्मल, दे पुंइनुङ। गे रागी सेल्चा ङोंइती आं कली दाक्शा, इन सक्ति आं कली गेतीनी। मिनु मेकोपुकीमी यो आं सक्ति तामेक्ल। यूहन्ना १२:२६; हितोपदेस ८:२२-३१ 25 आं आफ, गे नेल्ल रिम्शो नु ठीक पाइब बाक्नीनी। रागी ङा मुरपुकीमी इन कली मतुइक्नीम। गो चहिं इन कली तुइक्नुङ। मिनु आं शेंसीबपुकीमी गे आं कली सोइक्ताक्यीनी, दे तुइक्नीम। 26 गो मेको आन कली इन नें तुइक्पाइक्तामी। मिनु लेंशा तुइक्पाइक्नुङमी। मारदे इन नें तुइक्पाइक्नुङमी देंशा हना, गेमी आं कली दाक्शो खोदेंशो पा इन दाक्तीके मेको आन आगामी बाक्ल। मिनु गो मेको नु आन आगाम बाक्ङल” दे येसुमी परमप्रभु यावे कली पुंइतु।
यहूदीपुकीमी येसु कली ग्याइश्शो
1 मिनु येसुमी परमप्रभु यावे नु मेको लोव़ पने थुम्शा, आ शेंसीबपुकी नु किद्रोन खोल्सा आइक्ची हांबु लाम्तेक्म। मेकेर फल फुल रवा बाक्शो रिम्शो बाक्तीक बाक्त। मिनु येसु आ शेंसीबपुकी नु मेकेर ओव़तेक्म। 2 ङोंइती मेकेर येसु आ शेंसीबपुकी नु शुश ग्रुम्तीके बाक्त। मोपतीके येसु कली ग्याइक्ब आन कली वारच पाइब यहूदामी यो “मेकेर लाइनीम” दे तुइश्शो बाक्त। लूका २१:३७ 3 मिनु यहूदामी ठेयब चढ़ेब नु फरिसी आन सोइश्शो सिपाहीपुकी नु सिपाही आन ठेयब मुर आन कली येसु नु आ शेंसीब आन बाक्तीक चाक्तु। मेकोपुकी तोव़शी नु लालटिन दाशा, या कुरशा जाक्तेक्म। 4 मिनु येसुमी “आं कली ग्याइक्थ जाक्तेक्म” दे तुइश्शा, मेको आन नेक्था लशा “सु कली माल्नी?” दे हिल्लो पाप्तु। 5 मिनु मेकोपुकीमी “नासरथ ङा येसु कली माल्तक” देंतेक्म। मिनु येसुमी “गो नङ” दे माइक्तीमी। येसु कली साइक्ब आन कली वारच पाइब यहूदा येसु कली ग्याइक्थ जाक्ब नु बाक्त। 6 मिनु येसुमी “गो नङ” देंमेनु, मेको नेल्ल नोले गे दिल्शा गोल्तेक्म। 7 मिनु येसुमी लेंशा “सु कली माल्नी?” दे हिल्लो पवानु “नासरथ ङा येसु कली माल्तक” देंतेक्म। 8 मिनु येसुमी “गो नङ, देंती। आं कली माल्तीनी हना, अरु आन कली लचा गेने” दे माइक्तीमी। 9 ङोंइती येसुमी परमप्रभु यावेमी गेशो मुर आन पर्बम “गो इन गेशो मुर सुइ मसाम्नुङमी” देंशो लोव़ थमा दुम्चा कली मेको लोव़ पाप्तु। यूहन्ना १७:१२ 10 सिमोन पत्रुसमी तरवार कुरशो बाक्त। मिनु मेकोमी तरवार ग्रि शोइश्शा, ठेयब चढ़ेब आ वाइल आ नोफा दी ख्रोइक्तु। मेको वाइली आ नें माल्कस बाक्त। 11 येसुमी “इ या खोतीमी पिप्तो। गो आं आफोमी देंशो श्येत मजङल, दे मिम्नीनी? गो मेको श्येत जचा माल्नुङ” देंत।
येसु हन्नास नु काइयाफास आस ङोंइती
12 मिनु सिपाहीपुकी, आन कप्तान नु यहूदी आन ठेयब मुरपुकीमी येसु कली ग्याइश्शा फ्रेंताक्म। 13 मेको बर्स ङा नेल्ल क्येङा ठेयब चढ़ेब काइयाफास माइश्शो बाक्माक्त। मेको आ शिउ हन्नास माइश्शो बाक्माक्त। मिनु ग्याइक्बपुकीमी येसु कली ङोंइती हन्नास आ बाक्तीकेम लाइक्तेक्म। 14 ङोंइती काइयाफासमी यहूदी आन कली “मुर नेल्ल आन साइक्चा ङा मुर का कली साइक्चा रिम्शो दुम्ब” देंशो बाक्माक्त। लूका ३:१-२; यूहन्ना ११:४९-५०
येसुम पत्रुस आ पर्बम देंशो थमा दुम्शो
15 मिनु सिमोन पत्रुस येसु आ नोले खोइक्तु। अर्को शेंसीब कामी यो नोले खोइक्तु। नेल्ल क्येङा ठेयब चढ़ेबमी मेको अर्को शेंसीब कली तुइश्शो बाक्त। मोपतीके मेको शेंसीब यो येसु नु नेल्ल क्येङा ठेयब चढ़ेब आ खिं ङा लाङगामी ओव़त। 16 पत्रुस चहिं लाप्चो उइ बाक्माक्त। नेल्ल क्येङा ठेयब चढ़ेब कली तुइक्ब अर्को शेंसीबमी लाप्चो कोव़ब मीश मुर कली लोव़ पशा ग्रूत। पत्रुस कली खिं ङा लाङगामी ओंइताक्व। 17 लाप्चो कोव़ब मीश मुरुमी पत्रुस कली तशा “गे यो मेको मुर आ शेंसीब का मनवे ङा?” देंमेनु, पत्रुसमी “गो मनङ” देंत 18 ग्यू पशो बाक्त। मोपतीके वाइलपुकी नु मेकेर बाक्ब मुरपुकीमी मी मुइश्शा, एर ओंथ बाक्शा, मी थेरना थेरन बाक्तेक्म। पत्रुस यो मी थेरशो बाक्त। 19 मेना नेल्ल क्येङा ठेयब चढ़ेबमी येसु कली “इ शेंसीब आन कली मार शेंनेवे?” दे हिल्लो पाप्तु। 20 मिनु येसुमी “गो मुर नेल्ल आन कली लोव़ पाता। ग्रुम्तीक खिंमी नु परमप्रभु यावे आ खिंमी शुश यहूदी ग्रुम्तीकेमी शेंताक्ङमी। ख्रुइश्शा मारेइ लोव़ मपङ। यूहन्ना ७:१४,२६ 21 मारदे हिल्लो पयीनी? आं शेंशो लोव़ नेंब आन कली हिल्लो पने। मेकोपुकीमी आं शेंशो लोव़ तुइक्नीम” देंत। 22 मिनु मो देंमेनु, येसु आ नेक्था बाक्ब मुरुमी येसु कली चोव़चो राप्शा “गे नेल्ल क्येङा ठेयब चढ़ेब कली मोदेंशो लोव़ पाइनेवे?” दे हुइक्ताक्व। 23 येसुमी “गो मरिम्शो लोव़ पाता हना, आं कली देनो। तन्न गो ठीक लोव़ पाता हना, मारदे राप्यी?” देंत। 24 मिनु हन्नासमी येसु कली फ्रेंशो मप्रुइक्थु, नेल्ल क्येङा ठेयब चढ़ेब काइयाफास आ बाक्तीकेमी सोइक्ताक्व। 25 मेना सिमोन पत्रुसमी थेरना थेरन बाक्शो बाक्त। मिनु मेकेर बाक्बपुकीमी पत्रुस कली “गे यो मेको मुर आ शेंसीब का मनवे ङा?” देंमानु “गो मनङ” देंत। 26 मेकेर नेल्ल क्येङा ठेयब चढ़ेब आ वाइल का यो बाक्त। पत्रुसमी नोफा क्योरशो मुर आ खिं ङा मुर का बाक्त। मेकोमी पत्रुस कली “गो इ कली मेको मुर नु फल फुल रूमी ताइतन, शां” देंत। 27 मिनु पत्रुसमी लेंशा “गो मनङ” देंत। मो देंमेनु, भाले ग्रीत।
येसुम पिलातस नु लोव़ पशो
28 मिनु नोले मेको ग्याइक्बपुकीमी येसु कली काइयाफास आ बाक्तीक रे पिलातस आ खिं गे लाइक्तेक्म। मेना नां सोव़चशो बाक्माक्त। मिनु मेकोपुकी पास्सा चाड ङा भोज जचा कली ठीक दुम्शा बाक्शो बाक्तेक्म। मोपतीके मेकोपुकी पिलातस रोमी दुम्शो आ पर्बम मथिचा ङा बाक्त, दे आ खिं आगा मओव़म। 29 मो दुम्तीके पिलातस लाङगा ग्रूशा, मेको आन कली “एको मुर कली मार दोस गेनीनी?” दे हिल्लो पाप्तु। 30 मिनु मेकोपुकीमी “एको मुर मरिम्शो मबाक्शो हना, गोपुकीमी एको कली ग्याइश्शा, इन बाक्तीकेमी मारदे चाक्नीकी ङा?” देंतेक्म। 31 मिनु पिलातसमी “एको कली लतीन। मिनु इन ऐन कानुनमी ब्रेक्शो कोव़शा, निसाफ पने” दे माइक्तीमी। मिनु मेको यहूदीपुकीमी पिलातस कली “गो आंइ कली सुइ मुर साइक्चा मगारब” देंतेक्म। यूहन्ना १९:६-७ 32 येसुमी आ ङोंइती देंशो लोव़ “दोपा बेक्चा माल्नुङा” देंशो, थमा दुम्चा कली मोदेंशो दुम्त। यूहन्ना १२:३२-३३; मत्ती २०:१९ 33 मिनु पिलातस आ खिं ओव़शा, येसु कली आगामी ब्रेश्शा “गे यहूदी आन पिप ननी?” दे हिल्लो पाप्तु। 34 येसुमी “गे आंमा मिम्शा मो देंनी देय मुरुमी देंमा?” दे हिल्लो पाप्तु। 35 मिनु पिलातसमी “गो यहूदी मनङ। इन रागी ङा मुरपुकी नु ठेयब चढ़ेबपुकीमी इन कली निसाफ पचा कली आं कली जिम्मा गेतीमी। गे मार पनी?” दे हिल्लो पाप्तु। 36 येसुमी “गो एको रागी ङा पिप मनङ। गो रागी ङा पिप नङ हना, आं वारचपुकीमी राम्शी तोशा, ओपा यहूदीपुकीमी आं कली मग्याइक्यीमी वा। तन्न गो एको रागी ङा पिप मनङ” दे येसुमी देंत। 37 पिलातसमी “मिनु गे पिपन ननी?” दे हिल्लो पाप्तु। मिनु येसुमी “गो पिप नङ, दे गे आंमा देंतीनी। मिनु थमा मार बाक्बा, दे कोंइचा कली रागीम जरमेशा जाक्ती। सु थमामी बाक्बा, मेकोमी आं सेंदा नेंब” देंत। १तिमोथी ६:१३ 38 मिनु पिलातसमी “थमा मार में?” देंत। मिनु मेको देंम नोले पिलातस लेंशा लाङगा ग्रूशा, यहूदी आन कली “एको मुर मरिम्शो पाइब, दे मसुइक्नुङ। 39 मिनु पास्सा चाडमी मुर का प्रोंइतीकेमी गो एको यहूदी आन पिप प्रोंइशा सोइक्नुङ। गेपुकी मार देंनीनी?” दे हिल्लो पाम्तीमी। 40 मेकोपुकीमी चहिं “एको कली मप्रोंइचा। तन्न बारब्बा कली प्रोंइचा” दे ग्रीतेक्म। बारब्बा चहिं खुइ बाक्माक्त।
“येसु कली साइक्चा” दे ग्रीशो
1 मिनु पिलातसमी येसु कली युक्पाइक्तु। 2 आ सिपाहीपुकीमी चू के सिरपेच सेल्शा, येसु आ पियामी गुप्ताक्म। मिनु येसु कली पिप आ फेक्तीक वा फेक्ताक्म। 3 मिनु आ नेक्था जाक्शा “जय, यहूदी आन पिप” देंशा, आ चोव़चो राप्तेक्म। 4 मिनु पिलातस लेंशा, खिं रे ग्रूशा, लाङगामी रिम्शा बाक्शो आन कली “कोव़ङीन, गो एको कली ग्रुंइशा, गेपुकी नु ग्रुम्पाइक्नुङ। मारदे हना मरिम्शो पाइब मसुइक्नुङ, दे तुइक्तीन” दे माइक्तीमी। 5 मिनु येसु चू के सिरपेच गुप्शा, पिप आ फेक्तीक वा फेक्शा ग्रूत। पिलातसमी “लो, एको मुर कली कोव़ङीन” देंत। 6 मिनु ठेयब चढ़ेब नु यहूदी आन ठेयब मुरपुकीमी “शीमी कांटी थोक्शा क्याइश्शा सतीन। शीमी कांटी थोक्शा क्याइश्शा सतीन” देंना देंन ग्रीतेक्म। मिनु पिलातसमी “गो एको कली मरिम्शो पाइब मसुइक्नुङ। मोपतीके गेपुकी एको कली लाइश्शा, शीमी कांटी थोक्शा क्याइश्शा सतीन” दे माइक्तीमी। 7 यहूदीपुकीमी “आंइ ऐन कानुन बाक्ब। मिनु मेको ऐन कानुनमी ब्रेक्शो खोदेंशो पा एको मुर बेक्चा माल्ब। मारदे हना एकोमी आंमा कली परमप्रभु यावे आ तौ सेल्सीशो बाक्त” देंतेक्म। यूहन्ना १०:३३; लेवी २४:१६ 8 मिनु पिलातसमी मोदेंशो नेंशा, ङोंइती क्येङा हिंत। 9 मिनु येसु कली लेंशा खिं ओंइशा “गे ते रे जाक्शो ननी?” दे हिल्लो पाप्तु। मिनु येसुमी मारेइ लोव़ मलेत्त। 10 मोपतीके पिलातसमी “गे आं कली लोव़ मपाइनीनी? इन कली प्रोंइशा सोइक्चा नु शीमी कांटी थोक्शा क्याइश्शा साइक्चा गो नु निम्फा अधिकार बाक्ब, दे मतुइक्नीनी?” दे माइक्तु। 11 मिनु येसुमी “इन के अधिकार बाक्ब। इन कली गेशो अधिकार चहिं इर रे गेशो बाक्ब। मोपतीके इन मरिम्शो पशो क्येङा आं कली साइक्चा कली वारच पाइब आ मरिम्शो पशो ठेयब बाक्ब” देंत। 12 मिनु येसु आ लोव़ नेंशा नोले पिलातसमी येसु कली प्रोंइशा सोइक्चा माल्तु। तन्न मेको यहूदीपुकीमी पिलातस कली “गे एको कली प्रोंइशा सोइक्ताक्नी हना, गे रोमी आन पिप सिजर आ वारच मननी। मिनु सुमी ‘गो पिप नङ’ देंबा, मेको सिजर आ जोरी सत्रु दुम्ब” देंतेक्म। प्रेरित १७:७
येसु कली यहूदी आन गुइमी गेशो
13 मिनु यहूदी आन लोव़ नेंशा, पिलातसमी येसु कली खिं रे ग्रुंइताक्व। मिनु पिलातस निसाफ पाइब आ नित्तीकेमी निस्साक्व। मेको निसाफ नित्तीक आ खपीमी फुल्लु ब्रशो बाक्तेक्म। मेको कली हिब्रू लोव़मी गाब्बाथा देंनीम। 14 मेना नां सोक्चा चिक्शो बाक्त। मेको नाक्ती चहिं पास्सा चाड ङा भोज सातीक नाक्ती बाक्त। मिनु पिलातसमी यहूदी आन कली “इन पिप कली कोव़ङीन” देंत। 15 मिनु यहूदीपुकीमी “सतीन, सतीन, एको कली शीमी क्येप्शा कांटी थोक्तीन” दे ग्रीतेक्म। पिलातसमी “गो इन पिप कली शीमी क्येप्शा कांटी थोक्नुङा ङा?” दे माइक्तीमी। मिनु ठेयब चढ़ेबपुकीमी “गो आंइ के सिजर का ला पिप बाक्ब” देंतेक्म। यूहन्ना १८:३७ 16 पिलातसमी “येसु कली शीमी क्येप्शा कांटी थोक्तीन” दे मेको आन कली जिम्मा गेप्तु।
येसु कली शीम केप्शा कांटी थोक्शो
17 मिनु नोले यहूदीपुकीमी येसु कली लाइक्तेक्म। मिनु आ कली कांटी थोक्शा क्याइश्शा साइक्तीक शी आंमा कुरपाइश्शा, खप्परे माइक्तीकेमी लाइक्तेक्म। हिब्रू लोव़मी मेको कली गोल्गथा देंनीम। 18 मेकेर जाक्दीश्शा, येसु कली शीमी केप्शा कांटी थोक्ताक्म। मोदेंशो पा मुर निक्शी आस कली यो शीमी केप्शा कांटी थोक्ताक्म। मिनु येसु कली कांटी थोक्शो शी मेको आस दातेमी ख्रुक्तेक्म। 19 मिनु पिलातसमी “नासरथ ङा येसु, यहूदी आन पिप” दे ब्रेक्स ब्रेक्शा, येसु आ शीमी केप्शा वोइक्तु। 20 येसु कली साइक्तीक ठाउं यरूसलेम सहर आ नेक्था बाक्त। मिनु शुश यहूदीपुकीमी मेको ब्रेक्शो ब्रेक्स पढेम्तेक्म। मेको ब्रेक्स चहिं हिब्रू, रोमी नु ग्रीक लोव़मी ब्रेक्शो बाक्त। 21 मिनु यहूदी आन ठेयब चढ़ेबपुकीमी पिलातस कली “यहूदी आन पिप ममाइ, तन्न ‘गो यहूदी आन पिप नङ’ देंत, दे ब्रेक्तीन” दे माइक्तेक्म। 22 मिनु पिलातसमी “गो मार ब्रेक्तु, मेकोन ठीक ब्रेक्ताक्ङ” दे माइक्तीमी। 23 सिपाहीपुकीमी येसु कली कांटी थोक्शो शी ख्रुक्ने थुम्शा, येसु आ वासी ४ जना सिपाहीपुकीमी उइक्थ उइक्थ पा योक्साक्म। येसु आ तारी फेक्तीक वा उइ रे इर सम्म प्रोव़शो मफेरशो थम रिम्शो वा का बाक्त। 24 मोपतीके मेकोपुकीमी “एको चहिं मखाक्य। तन्न बाजी ग्यारय। मिनु सुम ग्राबा, मेकोमी ताइब” देंमुम्तेक्म। मो पामेनु “आं वासी योक्सीनीम। आं तारी फेक्तीक वा कली ‘सुम ताइबा?’ दे बाजी ग्यारनीम” दे ब्रेक्शो लोव़ थमा दुम्त। भजन संग्रह २२:१८ 25 मिनु सिपाहीपुकीमी मो पामेनु, येसु आ ममा येसु आ शी आ नेक्था बाक्त। क्लोपास आ मीश मरीयम नु माग्दाला ङा मरीयम यो मेकेर बाक्ताक्स। मिनु येसु आ नेल्ल क्येङा दाक्शो शेंसीब यो मेकेर बाक्त। 26 मिनु येसुमी आ ममा कली “आं ममा, मेको कली इ तौ मिम्तो” दे माइक्तु। यूहन्ना १३:२३ 27 मिनु आ शेंसीब कली “गेमी यो इम्मा खोदेंशो मिम्तो” दे माइक्तु। मेना रे मेको शेंसीबमी येसु आ ममा कली आ ममा मिम्शा, आ खिंम वोइक्तु।
येसु बेक्चा आ पर्बम ब्रेक्शो लोव़
28 मिनु नोले येसुमी “आं गेय पचा नुप्त” दे तुइक्ताक्व। मिनु परमप्रभु यावे आ ब्रेक्पाइश्शो लोव़ थमा दुम्चा कली येसुमी “गो तूतू दाक्ती” देंत। भजन संग्रह २२:१५ 29 मिनु मेकेर गर का ग्युरशो तूचा थोव़क वोइश्शो बाक्त। मेकोपुकीमी कोक्केमी वा खोदेंशो फ्रेंशा, मेको ग्युरशो तूचा थोव़कीमी ख्रुम्शा, येसु कली युप्पाइक्तेक्म। भजन संग्रह ६९:२१ 30 मिनु येसुमी युप्शा “मुल थुम्ता” देंत। मिनु आ पिया खुक्शा बेक्त। 31 मेको पास्सा चाड मानेचा कली सातीक नाक्त बाक्त। मोपतीके बेक्शो रां शीमी मबाक्मल, दे यहूदीपुकीमी पिलातस कली “मेको आन खोइल जिक्शा साइश्शा, शी रे शोल्शा लदमेक्ल” देंतेक्म। मारदे हना मेको पास्सा आ ङोंइती ङा ठेयब नाक्त बाक्त। ब्यवस्था २१:२३ 32 मोदुम्तीके सिपाहीपुकीमी कांटी थोक्शो येसु आ ग्युरा नु पेरा गे ङा निम्फा आस कली खोइल जिक्ताक्म। 33 मिनु येसु आ क्युक्तीकेमी जाक्मानु, येसु कली बेक्शो ताम्तेक्म। मिनु येसु आ खोइल मजिक्गेम। 34 सिपाही कामी येसु आ कोव़खामी भालामी तूताक्व। मिनु तूदानु, हुश नु ब्वाक्कु यित। 35 मेको नेल्ल ताइबमी मेको दुम्शो आ पर्बम सांकछी बाक्शा, थमा लोव़ पाइब। गेपुकी यो थमा सुतीन दे मेकोमी थमा लोव़ पाइब। 36 परमप्रभु यावे आ ब्रेक्पाइश्शो लोव़ थमा दुम्चा कली मोदेंशो दुम्त। लोव़ कामी “मेको आ रुश का यो मजिक्नीम” दे ब्रेक्पाइश्शो बाक्त। प्रस्थान १२:४६ 37 मिनु लोव़ कामी “मेको तूबपुकीमी आंम तूशो मुर कली कोव़नीम” दे ब्रेक्पाइश्शो बाक्त। जकरिया १२:१०; प्रकाश १:७
येसु आ बेक्शो रां वोइश्शो
38 अरीमाथीया गाउं ङा योसेफ माइश्शो मुर का बाक्त। मेको यहूदी आन कली तशा हिंशा ख्रुइश्शा, येसु आ शेंसीब दुम्शो बाक्त। मेकोमी पिलातस कली “येसु आ बेक्शो रां लाइक्चा गेयीनी” दे पुना बाक्त। मिनु पिलातसमी लाइक्चा गेवा बाक्त। मिनु योसेफ येसु आ बेक्शो रां ब्रथ जाक्त। यूहन्ना ७:१३ 39 ङोंइती येसु नु लोव़ पचा कली नाक्दो जाक्शो निकोदेमसमी येसु आ बेक्शो रां गिल्चा, दे सहे का लित्रा मूरे नु एलोव़ माइश्शो के सेल्शो ब्रोव़शो रिना पाइब थोव़क चाक्शा जाक्त। लित्रा का ३२७ ग्राम बाक्ब। यूहन्ना ३:२ 40 मिनु येसु आ बेक्शो रां लाइश्शा, ब्रोव़शो रिना पाइब थोव़क नु वामी गिल्तेक्म। मेकोन यहूदी आन के बेक्शो मुर आन कली पतीक बाक्ब। 41 येसु कली शीमी कांटी थोक्तीक आ नेक्था फल फल रू का बाक्त। मेको रूमी बेक्शो मुर कली वोइक्तीक नक पुक्खी का सेल्शो बाक्त। मेकेर सुइ मवोइश्शो बाक्त। 42 मेको नाक्त यहूदी आन पास्सा मानेचा कली सातीक नाक्त बाक्त। मोपतीके येसु कली नेल्ल क्येङा नेक्था ङा पुक्खीमी वोइक्तेक्म।
येसु सेंशो
1 मिनु साता ङा ङोंइती नाक्त नां मसोव़थु, माग्दाला ङा मरीयम बेक्शो मुर वोइक्तीक पुक्खी जाक्दीम्मेनु, पुक्खी कली सुशो ठेयब फुल्लु तिल्शो तवा बाक्त। 2 मिनु फुल्लु तिल्शो तशा, दोरशा लशा, सिमोन पत्रुस नु येसु आ दाक्शो शेंसीब आस बाक्तीक जाक्त। मिनु “प्रभु कली बेक्शो मुर वोइक्तीक पुक्खी रे लदमे बाक्त। ते वोदमे?” दे हिल्लो पाप्तु। यूहन्ना १३:२३ 3 मिनु पत्रुस नु अर्को शेंसीब बेक्शो मुर वोइक्तीक पुक्खी कोव़थ लाम्ताक्से। 4 निम्फा दोरताक्स। मिनु अर्को शेंसीबमी पत्रुस कली दाम पाप्तु। दाम पशा, ङोंइती बेक्शो मुर वोइक्तीक पुक्खी जाक्दीत। 5 मिनु खुम बाप्शा पुक्खी आगा कोव़तु। मेकेर येसु कली गिल्शो वा ला तशा, आगा मओव़। 6 सिमोन पत्रुस जाक्शा, पुक्खी ग्रु ओव़शा कोव़ङानु, येसु कली गिल्शो वा ताप्तु। 7 मिनु पियामी फ्रेंशो रूमाल मुक्शा, तिल्शा वोइश्शो ताप्तु। यूहन्ना ११:४४ 8 नोले ङोंइती जाक्ब अर्को शेंसीब यो ओव़त। मिनु मेको वा तशा थमा सुइक्तु। 9 मारदे हना मुल सम्म मेकोपुकीमी येसु बेक्शो रे सेंसीचा माल्ब, दे ब्रेक्पाइश्शो लोव़ मतुइश्शो बाक्तेक्म। भजन संग्रह १६:१०; लूका २४:२५-२७; प्रेरित २: २४-३२; १कोरिन्थी १५:४ 10 मिनु नोले मेको शेंसीब निक्शी खिं लेत्ताक्स।
येसुमी तपांइसीशो
11 मरीयम ङाक्ना ङाक्न पुक्खी आ नेक्था बाक्शो बाक्माक्त। ङाक्ना ङाक्न खुम बाप्शा, पुक्खी आगामी कोव़ङानु, 12 बुश वा फेक्शो परमप्रभु यावे आ स्वर्ग ङा गेय पाइब निक्शी आस कली तवा बाक्त। मेको निक्शी येसु आ बेक्शो रां वोइक्तीकेमी का पिया गे का खोइल गे निश्शो ताम्सी बाक्त। 13 मिनु मेको निक्शीमी मरीयम कली “गे मारदे ङाक्नेवे?” दे हिल्लो पाम्से बाक्त। मिनु मरीयममी “मेकोपुकीमी आं प्रभु कली लदमे बाक्त। मिनु ते वोदमे मतुइक्नुङ” दे माइक्सी बाक्त। 14 मो देंशा मरीयममी फिर लेश्शा कोव़ङानु, येसु कली राप्शा बाक्शो तवा बाक्त। मेको येसु बाक्ब, दे मतुइक्ता बाक्त। 15 मिनु येसुमी “गे मारदे ङाक्नेवे? सु कली मली?” दे हिल्लो पवा बाक्त। मरीयममी “मेको फल फुल रूमी गेय पाइब मुर बाक्माक्त” दाप्शा, मेको कली “हजुर, गे मेको बेक्शो रां कली एक रे लाइक्तीनी हना, ते वोइक्नी, आं कली देनीने। गो मेको कली लाइक्नुङ” दे मदा बाक्त। 16 मिनु येसुमी मरीयम कली “मरीयम” देंमेनु, मरीयममी फिर लेश्शा, हिब्रू लोव़मी “राब्बोनी” देंमाक्त। हिब्रू लोव़मी राब्बोनी देंशो “शेंब” बाक्ब। 17 मिनु येसुमी “मग्याइक्ती। मारदे हना मुल सम्म आं आफ आ बाक्तीक मलङ। आं लोक्ब आन बाक्तीक लशा, मेको आन कली ‘गो इं आफ, परमप्रभु यावे आ बाक्तीक लाइनुङ’ गे मेको आन कली शेंदो” दे माइक्तु। हिब्रू २:११-१२ 18 मिनु माग्दाला ङा मरीयम शेंसीब आन बाक्तीकेमी लशा “गो प्रभु कली ताता” देंत। येसु आ देंशो लोव़ यो तुइक्पाइक्तीमी।
येसुम शेंसीब आन कली तपांइसीशो
19 मेको साता ङा ङोंइती नाक्त नां रिक्चावानु, येसु आ शेंसीबपुकी यहूदी आन क्येङा हिंशा, लाप्चो चोक्शा, खिं गाम बाक्तेक्म। मिनु येसु मेको आन बाक्तीकेमी जाक्शा “थुं नाइश्शा बाक्कीन” देंत। 20 मो देंशा मेको आन कली आ गुइ नु आ कोव़खा कोंइदानु, आ शेंसीबपुकी प्रभु कली तशा ग्येरसाक्म। १यूहन्ना १:३ 21 मिनु लेंशा येसुमी मेको आन कली “इन थुं नाइश्शा बाक्कीन। आं आफोमी दोपा सोइक्ती, मोपा गो इन कली यो सोइक्ताक्नन्नी” दे माइक्तीमी। यूहन्ना १७:१८ 22 मो देंशा येसुमी मेको आन कली मुइश्शा “परमप्रभु यावे आ सोक्त ताक्कीन। 23 गेपुकीमी सु सु कली माफ गेनीनी, मेकोम माफ ताइनीम। सु सु कली माफ मगेनीनी, मेको आन पाप लीब” देंत। मत्ती १८:१८
थोमास कली थमा सुइक्पाइश्शो
24 मिनु येसु आ शेंसीब १२ जना आन दाते ङा का जौंले माइश्शो थोमास येसु जाक्मेनु, मेकेर मबाक्शो बाक्त। यूहन्ना ११:१६; यूहन्ना १४:५ 25 अरु शेंसीबपुकीमी “प्रभु कली ताइतक” दे थोमास कली देंमानु “येसु आ गुइमी कांटी थोक्शो गार मतङा सम्म, मेको गारमी आं ब्रेप्चो मलिक्थु नु आ कोव़खा ङा गारमी मथिङा सम्म, गो थमा मसुइक्नुङ” देंत। यूहन्ना १९:३४ 26 मिनु मेको मो दुम्शो साता का नोले येसु आ शेंसीबपुकी लेंशा खिं आगाम बाक्तेक्म। मेना थोमास यो मेकोपुकी नु काथा बाक्शो बाक्त। लाप्चो चोक्शा, आगाम बाक्मानु, येसु मेको आन बाक्तीकेमी जाक्शा “थुं नाइश्शा बाक्कीन” देंत। 27 मिनु येसुमी थोमास कली “आं गुइ ङा गारमी इ ब्रेप्चो लिक्शा, कोव़ङो। मिनु इ गुइमी आं कोव़खा ङा गार थिवो। गे थमा मसुइक्ब मदुमो। तन्न थमा सुइक्ब दुमो” दे माइक्तु। 28 थोमासमी “आं प्रभु, आं परमप्रभु यावे” देंत। यूहन्ना १:१ 29 मिनु येसुमी “गे आं कली तशा थमा सुइक्तीवी। सुमी आं कली मतथु, थमा सुइक्बा, मेको शुश ग्येरसीशो मुर बाक्ब” देंत। १पत्रुस १:८; हिब्रू ११:३
एको किताब मारदे ब्रेक्शो बाक्मे
30 मिनु येसुमी आ शेंसीब नु बाक्शा, शुश अरु छक लाक्चा ङा गेय पाप्तु। मेको गेयपुकी एको किताबमी मब्रेक्शो बाक्नीम। 31 मिनु मेको ब्रेक्शो छक लाक्चा ङा गेयपुकी मारदे ब्रेक्शो बाक्नीम देंशा हना, गेपुकीमी “येसु ख्रीस्त, परमप्रभु यावे आ तौ बाक्ब” दे थमा सुइक्ने चापीन। मिनु थमा सुइश्शा, आ नेंमी गेना हना यो ब्रोंइशा बाक्चा ताइनीनी, दे ब्रेक्शो बाक्ब। १यूहन्ना ५:१३
येसुम गालील रागीम तपांइसीशो
1 मिनु नोले येसु तिबेरीयास ङा समुन्द्र आ नेक्थामी आ शेंसीब आन कली लेंशा तपांइसाक्व। दोपा तपांइसाक्व देंशा हना, 2 सिमोन पत्रुस, जौंले माइश्शो थोमास, गालील ङा काना सहर ङा नथानेल, जब्दी आ तौ निक्शी नु येसु आ शेंसीब अर्को निक्शी काथा बाक्तेक्म। यूहन्ना १४५ 3 मिनु सिमोन पत्रुसमी मेको आन कली “गो ङांइ रेत्थ लाइनुङ” देंत। मिनु “गो यो गे नु लाइनीकी” देंतेक्म। मिनु लशा, डोंगा ङोइश्शा, ङांइ रेत्थ लाम्तेक्म। तन्न मेको नाक्दो ङांइ का यो मरेम्म। 4 मिनु सुनी नां सोव़ची ना येसु समुन्द्र आ नेक्थामी बाक्शो बाक्त। आ शेंसीबपुकीमी येसु बाक्माक्त, दे मतुइक्तेम। यूहन्ना २०:१४; लूका २४:१६ 5 मिनु येसुमी “ए आलपुकी, ङांइ बाक्म कों?” दे ब्रेश्शा, हिल्लो पाप्तु। मिनु “मबा” दे लोव़ लेत्ताक्म। लूका २४:४१ 6 मिनु येसुमी “इन ग्याइल डोंगा आ ग्युरा गे आपीन। मेकेर रेत्नीनी” दे माइक्तीमी। मिनु आ देंशो खोदेंशो पा ग्याइल आप्तेक्म। मिनु आन ग्याइली ग्रुंइने मचाप्चा ङा पा शुश ङांइ रेत्तेक्म। लूका ५:४-७ 7 मोदेंशो तशा, येसु आ नेल्ल क्येङा दाक्शो शेंसीबमी पत्रुस कली “प्रभु बाक्ब” दे माइक्तु। मिनु सिमोन पत्रुसमी “प्रभु बाक्ब” देंशो नेंशा, आ ङोंइती प्रुइश्शो वा लेंशा फेक्साक्व। मिनु ब्वाक्कुमी प्रेक्त। यूहन्ना १३:२३ 8 मिनु अरु शेंसीबपुकीमी डोंगामी बाक्शा, ग्याइल कीना कीन पिम्तेक्म। ग्याइल ब्रीशो बाक्त। मेकोपुकी समुन्द्रमी सहे निक्शी गज खोदेंशो ङोन जाक्दीश्शो बाक्तेक्म। 9 मिनु मेकोपुकीमी डोंगा रे ग्रूशा, ङांइ नु शोब्ले मीमी चोशा, वोइश्शो ताम्तेक्म। 10 मिनु येसुमी “इन रेश्शो ङांइ का निक्शी पितीन” दे माइक्तीमी। 11 येसु आ देंशो टिशा, सिमोन पत्रुस डोंगामी ङोइश्शा, ग्याइल कली कीशा, ब्वाक्कु रे ग्रुंइताक्व। मेको ग्याइलीमी सहे का ५३ ओटा ठेयब ठेयब ङांइ बाक्तेक्म। मिश ङा ङांइ बाक्शा यो मेको ग्याइली मगाक्माक्त। 12 मिनु येसुमी “निस्सीन जने ब्वने” दे माइक्तीमी। मिनु शेंसीबपुकीमी “गे सु ननी?” दे हिल्लो मपाम। “प्रभु बाक्ब” दे तुइक्ताक्म। 13 मिनु येसुमी शोब्ले लाइश्शा, आ शेंसीब आन कली शोब्ले नु ङांइ योक्शा गेम्तीमी। यूहन्ना ६:११ 14 मो दुम्मेनु, येसु सेंसीशो नोले आ शेंसीब आन कली खेयप सां तपांइसाक्व।
येसुमी पत्रुस कली लोव़ पशो
15 मिनु जने थुम्शा, येसुमी सिमोन पत्रुस कली “योआन्नेस आ तौ सिमोन, गे आं कली एको आन क्येङा दाक्नेवे?” दे हिल्लो पाप्तु। मिनु पत्रुसमी “दाक्नन्नी, प्रभु, गे तुइक्नीनी” दे माइक्तु। मिनु येसुमी “आं पाठा आन कली थुल्मी” देंत। यूहन्ना १:४२ 16 मिनु येसुमी लेंशा पत्रुस कली “योआन्नेस आ तौ सिमोन, गे आं कली दाक्नेवे” दे हिल्लो पाप्तु। मिनु पत्रुसमी “दाक्नन्नी, प्रभु, गे तुइक्नीनी” दे माइक्तु। मिनु येसुमी “आं भेडा आन कली कोव़मी” देंत। १पत्रुस ५:२,४ 17 लेंशा येसुमी “योआन्नेस आ तौ सिमोन, गे आं कली दाक्नेवे?” दे हिल्लो पाप्तु। मिनु येसुमी खेयप सां “आं कली दाक्नेवे?” दे हिल्लो पशो नेंशा, पत्रुस आ थुं खाइक्त। मिनु “प्रभु, गे नेल्ल तुइक्नीनी। गो इन कली दाक्नन्नी, दे तुइक्नीनी” दे माइक्तु। मिनु येसुमी “आं भेडा आन कली योव़मी। यूहन्ना १३:३८; यूहन्ना १६:३० 18 नोफा दाइश्शा नेनो, गे ठिटा बाक्ङेनु, किप्शुर किम्सीशा, इ दाक्शो लां खोइक्तीवी। खाल्पा दुमेनु, इ गुइ हाम्नेवे। मिनु अर्कोमी इ कली किप्शुर किप्शा, इ मदाक्शो लां लाइक्ब” दे माइक्तु। 19 येसुमी पत्रुस दोपा परमप्रभु यावे आ सक्ति कोंइशा, साइक्चा पुंइसीबा, दे मोदेंशो देंत। मिनु येसुमी “आं नोले खोइय्यी” देंत। यूहन्ना १३:३६ 20 मिनु पत्रुसमी येसु आ नोले खोइश्शा, फिर लेश्शा कोव़ङानु, येसु आ दाक्शो शेंसीब आस नोले खोइश्शो ताप्तु। मेको शेंसीब सु बाक्त देंशा हना, ङोंइती नाक्दो ङा खमे जची ना येसु नु बाक्शो बाक्त। मेको “प्रभु, इन कली साइक्ब आन कली वारच पाइब सु में?” दे हिल्लो पाइब बाक्त। यूहन्ना १३:२३-२५ 21 मिनु पत्रुसमी मेको कली तशा “प्रभु, मेको कली मार दुम्बा?” दे हिल्लो पाप्तु। 22 मिनु येसुमी “गो लेंशा मजाक्ङा सम्म मेकोमी रिम्शा बाक्चा माल्ब, दे मिम्ताक्ङ हना यो, इ कली मार दुम्बा ङा? गे आं नोले खोइय्यी” दे माइक्तु। 23 मिनु थमा सुइक्बपुकीमी मेको येसु आ दाक्शो शेंसीब आ पर्बम “मेको शेंसीब मबेक्ब” दे लोव़ पमुम्तेक्म। तन्न येसुमी “मेको मबेक्ब” देंशो ममाइ, तन्न “गो मजाक्ङा सम्म मेको रिम्शा बाक्ल कों मबाक्ल, इ कली मार दुम्बा ङा” दे माइश्शो बाक्त। 24 येसुमी “एको मबेक्ब” देंशो शेंसीब सु बाक्त देंशा हना, एको किताब ब्रेक्ब बाक्त। मिनु मेको आ ब्रेक्शो नेल्ल थमा बाक्ब, दे तुइक्नीकी। यूहन्ना १५:२७ 25 येसुमी मेको किताबमी ब्रेक्शो पशो गेय ला ममाइ, तन्न अरु शुश गेय यो पाइबाक्त। आ पशो गेय नेल्ल ब्रेक्ताक्व हना, मेको किताबपुकी वोइक्चा कली रागीमी यो मरिक्ब, दे मिम्नुङ। यूहन्ना २०:३०; भजन संग्रह १०६:२