Taiwanese Bible - New Testament

The New Testament of our Lord and Saviour Jesus Christ

1 Che sī Iâ-so͘ Ki-tok ê ka-phó͘: Iâ-so͘ sī [Tāi-pi̍t] ê hō͘-tāi, [Tāi-pi̍t] sī [A-pek-la-hán] ê hō͘-tāi. 2 [A-pek-la-hán] siⁿ [Í-sat], [Í-sat] siⁿ [Ngá-kok], [Ngá-kok] siⁿ [Iû-tāi] kap i ê hiaⁿ-tī. 3 [Iû-tāi] tùi [Thah-má] siⁿ [Hoat-le̍k-su] kap [Siā-la̍h], [Hoat-le̍k-su] siⁿ [Hi-su-lûn], [Hi-su-lûn] siⁿ [A-lân], 4 [A-lân] siⁿ [A-bí-ná-ta̍t], [A-bí-ná-ta̍t] siⁿ [Ná-sūn], [Ná-sūn] siⁿ [Sat-bûn], 5 [Sat-bûn] tùi [Lat-ha̍p] siⁿ [Pho-a-su], [Pho-a-su] tùi [Lō͘-tek] siⁿ [O-pī-tek], [O-pī-tek] siⁿ [Iâ-se], 6 [Iâ-se] siⁿ [Tāi-pi̍t]-ông. [Tāi-pi̍t] tùi [O͘-lī-a] ê bó͘ siⁿ [Só͘-lô-bûn], 7 [Só͘-lô-bûn] siⁿ [Lô-pho-àm], [Lô-pho-àm] siⁿ [A-pí-a], [A-pí-a] siⁿ [A-sat], 8 [A-sat] siⁿ [Iok-sa-hoat], [Iok-sa-hoat] siⁿ [Iok-lân], [Iok-lân] siⁿ [O͘-se-a], 9 [O͘-se-a] siⁿ [Iok-thán], [Iok-thán] siⁿ [A-hap-su], [A-hap-su] siⁿ [Hi-se-ka], 10 [Hi-se-ka] siⁿ [Má-ná-se], [Má-ná-se] siⁿ [A-mô͘-sū], [A-mô͘-sū] siⁿ [Iok-se-a]. 11 [Í-sek-lia̍t]-lâng siū chhian-sóa khì [Pa-pí-lûn] ê sî, [Iok-se-a] siⁿ [Iâ-ko-nî-a] kap i ê hiaⁿ-tī. 12 Siū chhian-sóa khì [Pa-pí-lûn] í-āu, [Iâ-ko-nî-a] siⁿ [Sat-lia̍p-thiat], [Sat-lia̍p-thiat] siⁿ [Só͘-lô-pa-pek], 13 [Só͘-lô-pa-pek] siⁿ [A-pí-ut], [A-pí-ut] siⁿ [Í-lī-a-kim], [Í-lī-a-kim] siⁿ [A-só͘], 14 [A-só͘] siⁿ [Sat-to̍k], [Sat-to̍k] siⁿ [A-kim], [A-kim] siⁿ [Í-lu̍t], 15 [Í-lu̍t] siⁿ [Í-lī-a-sat], [Í-lī-a-sat] siⁿ [Má-tàn], [Má-tàn] siⁿ [Ngá-kok], 16 [Ngá-kok] siⁿ [Iok-sek], [Iok-sek] sī [Má-lī-a] ê tiōng-hu; hit-ê chheng-chòe Ki-tok ê Iâ-so͘ sī tùi chit-ê [Má-lī-a] siⁿ ê. 17 Án-ni, tùi [A-pek-la-hán] kàu [Tāi-pi̍t] lóng-chóng ū cha̍p-sì tāi, tùi [Tāi-pi̍t] kàu siū chhian-sóa khì [Pa-pí-lûn] ū cha̍p-sì tāi, tùi siū chhian-sóa khì [Pa-pí-lûn] kàu Ki-tok mā ū cha̍p-sì tāi. 18 Iâ-so͘ Ki-tok chhut-sì ê keng-kè sī án-ni: I ê lāu-bú [Má-lī-a] í-keng kap [Iok-sek] tèng-hun, iáu-bē kiat-hun chiū tùi Sèng Sîn hoâi-īn. 19 I ê bī-hun-hu [Iok-sek] sī chèng-ti̍t ê lâng, bô ài hō͘ i tī lâng ê bīn-chêng kiàn-siàu, siūⁿ-beh àm-tiong kái-tû hun-iok. 20 I teh siūⁿ chit-ê tāi-chì ê sî, tī bîn-bāng tiong, Chú ê thiⁿ-sài tùi i chhut-hiān, kóng, “[Tāi-pi̍t] ê hō͘-tāi [Iok-sek], m̄-bián kiaⁿ, tio̍h chhōa [Má-lī-a] ji̍p-mn̂g chòe bó͘, in-ūi i só͘ hoâi-īn ê thai sī tùi Sèng Sîn lâi ê. 21 I ōe siⁿ chi̍t ê ta-po͘-kiáⁿ, lí tio̍h kā I hō-miâ kiò-chòe Iâ-so͘, in-ūi I beh kiù I ê chú-bîn thoat-lī in ê chōe.” 22 Che it-chhè ê sū hoat-seng sī beh èng-giām Chú thok sian-ti só͘ kóng ê ōe: 23 Lí khòaⁿ, chāi-sek-lú ōe hoâi-īn siⁿ kiáⁿ, I ê miâ beh kiò-chòe Í-má-lōe-lī. “Í-má-lōe-lī” ê ì-sù sī “Siōng-tè kap lán tông-chāi”. 24 [Iok-sek] chi̍t-ē khùn-chhíⁿ, chiū chiàu Chú ê thiⁿ-sài só͘ hoan-hù chhōa [Má-lī-a] ji̍p-mn̂g chòe bó͘, 25 put-kò chit-ê ta-po͘-kiáⁿ iáu-bē chhut-sì í-chêng bô kap [Má-lī-a] tâng-pâng. Eⁿ-á chhut-sì, [Iok-sek] chiū kā I hō-miâ kiò-chòe Iâ-so͘.

Má-thài 2

1 [Hi-lu̍t] choh-ông ê sî, Iâ-so͘ tī [Iû-thài] ê [Pek-lī-hêng] chhut-sì. Ū kúi-nā ê seng-siōng-ka tùi tang-hng lâi-kàu [Iâ-lō͘-sat-léng]. 2 In mn̄g kóng, “Hit-ê chhut-sì chòe [Iû-thài]-lâng ê Ông ê tī sím-mi̍h só͘-chāi? Goán ū khòaⁿ-tio̍h I ê chhiⁿ chhut-hiān, choan-kang lâi beh pài I.” 3 [Hi-lu̍t]-ông thiaⁿ-tio̍h, sim-lāi tio̍h-kip put-an; [Iâ-lō͘-sat-léng] choân-siâⁿ ê lâng mā-sī án-ni. 4 I chiū tiàu-chi̍p só͘-ū ê chè-si-tiúⁿ kap bîn-kan ê keng-ha̍k-kàu-su, mn̄g in kóng, “Ki-tok eng-kai tī sím-mi̍h só͘-chāi chhut-sì?” 5 In ìn kóng, “[Iû-thài] ê [Pek-lī-hêng]. In-ūi sian-ti ū án-ni kì-chài: 6 [Iû-tāi] tōe-khu ê [Pek-lī-hêng] ah, lí tī [Iû-tāi] léng-tō-chiá tiong m̄-sī siōng bî-sòe ê; in-ūi ū chi̍t ê léng-siù ōe tùi lí hia chhut-lâi, I beh bo̍k-ióng góa ê chú-bîn [Í-sek-lia̍t].” 7 [Hi-lu̍t] chiū àm-tiong tiàu hit kúi ê seng-siōng-ka, siông-sè kā in mn̄g hit lia̍p chhiⁿ sím-mi̍h sî chhut-hiān. 8 Āu-lâi, I chhe in khì [Pek-lī-hêng], kóng, “Lín khì siông-sè chhâ-mn̄g koan-hē chit-ê sòe-hàn gín-á ê sū; chhē-tio̍h, tio̍h lâi pò góa chai, góa mā thang khì pài I.” 9 In thiaⁿ ông ê ōe chiū khì. In tī tang-hng khòaⁿ-tio̍h ê hit lia̍p chhiⁿ chòe-thâu chhōa in, lâi-kàu hit-ê sòe-hàn gín-á ê só͘-chāi chiū thêng tī téng-bīn. 10 In khòaⁿ-tio̍h hit lia̍p chhiⁿ, hui-siông hoaⁿ-hí. 11 In ji̍p-khì chhù-lāi, khòaⁿ-tio̍h sòe-hàn gín-á kap I ê lāu-bú [Má-lī-a], chiū phak lo̍h-khì pài I, jiân-āu khui in ê pó-a̍h, chiong n̂g-kim, jú-hiuⁿ, kap bu̍t-io̍h chòe lé-mi̍h hiàn hō͘ I. 12 Tī bîn-bāng tiong, Siōng-tè chí-sī in m̄-thang tò-khì [Hi-lu̍t] hia, in chiū tùi pa̍t tiâu lō͘ tò-khì pún-kok. 13 Seng-siōng-ka lī-khui liáu-āu, Chú ê thiⁿ-sài tī [Iok-sek] ê bîn-bāng tiong tùi i chhut-hiān, kóng, “Khí-lâi, chhōa sòe-hàn gín-á kap I ê lāu-bú tô-cháu khì [Ai-ki̍p], tòa hia kàu góa kóng thang lī-khui ê sî, in-ūi [Hi-lu̍t] teh chhē chit-ê sòe-hàn gín-á, beh kā I thâi-sí.” 14 [Iok-sek] chiū khí-lâi, chhōa sòe-hàn gín-á kap I ê lāu-bú thàu-mî lī-khui khì [Ai-ki̍p], 15 tòa tī hia kàu [Hi-lu̍t] sí. Che sī beh èng-giām Chú thong-kè sian-ti só͘ kóng ê ōe: Góa ū tiàu góa ê kiáⁿ chhut [Ai-ki̍p]. 16 [Hi-lu̍t] chi̍t-ē chai ka-kī hō͘ seng-siōng-ka phiàn-khì, hui-siông siū-khì, chiū chhe lâng chiong [Pek-lī-hêng] í-ki̍p chiu-ûi só͘-ū ê ta-po͘ gín-á, chiàu i tùi seng-siōng-ka siông-sè chhâ-mn̄g ê sî sǹg-khí, nn̄g hè í-hā ê lóng thâi-sí. 17 Chit-ê tāi-chì ū èng-giām thong-kè sian-ti [Iâ-lī-bí] só͘ kóng ê ōe: 18 Tī [La-má] ū thiaⁿ-tio̍h siaⁿ, thî-khàu chin pi-siong; [Lúi-kiat] ūi-tio̍h i ê kiáⁿ-jî teh khàu, m̄-khéng siū an-ùi, in-ūi in lóng bô-khì. 19 [Hi-lu̍t] sí í-āu, Chú ê thiⁿ-sài tī [Ai-ki̍p], tī [Iok-sek] ê bîn-bāng tiong tùi i chhut-hiān, 20 kóng, “Khí-lâi, chhōa sòe-hàn gín-á kap I ê lāu-bú tò-khì [Í-sek-lia̍t] tōe; in-ūi beh hāi sòe-hàn gín-á ê sìⁿ-miā hiah-ê lâng í-keng sí.” 21 [Iok-sek] chiū khí-lâi, chhōa sòe-hàn gín-á kap I ê lāu-bú tò-khì [Í-sek-lia̍t] tōe. 22 [Iok-sek] thiaⁿ-kìⁿ [A-ki-ló] sòa-chiap i ê lāu-pē [Hi-lu̍t] chòe [Iû-thài] ê ông, m̄-káⁿ tò-khì hia; āu-lâi tī bîn-bāng tiong tit-tio̍h chí-sī, chiū thòe-khì [Ka-lī-lī] kéng-lāi, 23 kàu chi̍t ê siâⁿ kiò-chòe [Ná-sat-le̍k], tòa tī hia. Che sī beh èng-giām Chú thong-kè sian-ti só͘ kóng ê ōe: I beh kiò-chòe [Ná-sat-le̍k]-lâng.

Má-thài 3

1 Tng-sî, Si-sóe-chiá [Iok-hān] lâi [Iû-thài] ê khòng-iá teh thoân-tō. 2 I soan-iông kóng, “Lín tio̍h hóe-kái, in-ūi Thian-kok teh-beh si̍t-hiān lah!” 3 Chit-ê lâng chiū-sī sian-ti [Í-sài-a] só͘ teh kóng ê: Ū siaⁿ tī khòng-iá teh hoah: Tio̍h ūi Chú chún-pī tō-lō͘, ūi I siu-ti̍t sió-lō͘. 4 [Iok-hān] chhēng lo̍k-tô-mn̂g ê saⁿ, io hâ phê-tòa, só͘ chia̍h-ê sī chháu-meh kap iá-bi̍t. 5 Ū chin chōe lâng tùi [Iâ-lō͘-sat-léng], [Iû-thài] ta̍k só͘-chāi, kap [Iok-tàn]-hô it-tài lâi i hia, 6 jīn-chōe, tī [Iok-tàn]-hô tùi i niá-siū sóe-lé. 7 [Iok-hān] khòaⁿ-tio̍h chin chōe [Hoat-lī-sài-phài] kap [Sat-to͘-kai-phài] ê lâng mā lâi niá-siū sóe-lé, chiū tùi in kóng, “Lín chiah-ê to̍k-chôa, sím-mi̍h lâng kéng-kò lín siám-pī Siōng-tè teh-beh hoat ê siū-khì? 8 Tio̍h ēng hêng-ûi chèng-bêng lín ū hóe-kái. 9 Lín m̄-thang ka-kī siūⁿ-kóng ‘[A-pek-la-hán] sī goán ê chó͘-sian’, góa kā lín kóng, Siōng-tè ōe-tàng ēng chiah-ê chio̍h-thâu chō kiáⁿ-sun hō͘ [A-pek-la-hán]. 10 Pó͘-thâu í-keng khòa tī chhiū-thâu; só͘-ū bô kiat hó ké-chí ê chhiū lóng beh kā chhò khí-lâi, hiat-lo̍h hé. 11 Góa ēng chúi kā lín sóe-lé, piáu-sī lín í-keng ū hóe-kái; m̄-kú tī góa āu-bīn teh lâi Hit-ūi pí góa khah ū koân-lêng, góa liân kā I kōaⁿ ôe to bōe kham-tit; I beh ēng Sèng Sîn kap hé kā lín sóe-lé. 12 I ê chhiú the̍h pòa-ki, beh chiong be̍h-tiâⁿ pòa chheng-khì, be̍h-á siu-ji̍p chhng-khò͘, be̍h-hiūⁿ chiū ēng bōe hoa ê hé sio hiat-ka̍k.” 13 Hit sî, Iâ-so͘ tùi [Ka-lī-lī] lâi [Iok-tàn]-hô [Iok-hān] hia, beh tùi i niá-siū sóe-lé. 14 [Iok-hān] beh kā I chó͘-chí, kóng, “Góa eng-kai tùi lí niá-siū sóe-lé, lí hoán-tńg lâi chhē góa?” 15 Iâ-so͘ ìn kóng, “Lán hiān-chāi án-ni chòe chiah ha̍h Siōng-tè it-chhè ê iau-kiû.” [Iok-hān] chiū tông-ì. 16 Iâ-so͘ niá-siū sóe-lé í-āu sûi-sî tùi chúi-ni̍h khí-lâi; hut-jiân thiⁿ ūi-tio̍h I khui, I khòaⁿ-kìⁿ Siōng-tè ê Sîn chhin-chhiūⁿ hún-chiáu kàng lo̍h-lâi, hioh tī I sin-chiūⁿ. 17 Koh tùi thiⁿ ū siaⁿ kóng: Chit-ê sī góa só͘ thiàⁿ ê Kiáⁿ, I, góa chin ì-ài.

Má-thài 4

1 Āu-lâi, Iâ-so͘ hō͘ Sèng Sîn chhōa-khì khòng-iá, tī hia siū Mô͘-kúi chhì-thàm. 2 Iâ-so͘ kìm-chia̍h sì-cha̍p mî-ji̍t, āu-lâi chiū iau. 3 Chhì-thàm-chiá óa-lâi tùi I kóng, “Kì-jiân lí sī Siōng-tè ê Kiáⁿ, bēng-lēng chiah-ê chio̍h-thâu pìⁿ-chòe piáⁿ!” 4 Iâ-so͘ ìn kóng, “Sèng-keng ū kì-chài: Lâng teh oa̍h m̄-nā óa-khò piáⁿ, sī óa-khò tùi Siōng-tè ê chhùi só͘ chhut ta̍k kù ōe.” 5 Jiân-āu, Mô͘-kúi chhōa Iâ-so͘ ji̍p-khì Sèng-tiān, hō͘ I khiā tī Sèng-tiān chhù-téng siōng-koân ê só͘-chāi, 6 tùi I kóng, “Kì-jiân lí sī Siōng-tè ê Kiáⁿ, thiàu lo̍h-khì! In-ūi Sèng-keng ū kì-chài: Siōng-tè ōe ūi-tio̍h lí bēng-lēng I ê thiⁿ-sài, in ōe ēng chhiú hû lí, hō͘ lí ê kha bōe kha̍p-tio̍h chio̍h-thâu.” 7 Iâ-so͘ ìn kóng, “Sèng-keng koh ū kì-chài: M̄-thang chhì-thàm Chú --- lí ê Siōng-tè.” 8 Mô͘-kúi koh chhōa Iâ-so͘ chiūⁿ chi̍t ê chin koân ê soaⁿ, chiong sè-chiūⁿ bān-kok kap in ê êng-hôa hō͘ I khòaⁿ, 9 tùi I kóng, “Lí nā phak lo̍h-lâi pài góa, chiah-ê it-chhè góa lóng hō͘ lí.” 10 Iâ-so͘ ìn kóng, “Sat-tàn, cháu! Sèng-keng ū kì-chài: Tio̍h pài Chú --- lí ê Siōng-tè, chí-ū ho̍k-sāi I.” 11 Jiân-āu Mô͘-kúi lī-khui Iâ-so͘; ū thiⁿ-sài lâi kā I sū-hāu. 12 Iâ-so͘ thiaⁿ-tio̍h [Iok-hān] hō͘ lâng lia̍h-khì chiū thòe-khì [Ka-lī-lī]. 13 I lī-khui [Ná-sat-le̍k] khì tòa tī [Se-pò͘-lûn] kap [Ná-hut-tha-lī] tōe-khu, [Ka-lī-lī] ô͘-piⁿ ê [Ka-pek-lông]. 14 Che sī beh èng-giām thong-kè sian-ti [Í-sài-a] só͘ kóng ê ōe: 15 [Se-pò͘-lûn] ê tōe, [Ná-hut-tha-lī] ê tōe, iân-hái ê lō͘, [Iok-tàn-hô] tang-hōaⁿ, Gōa-pang-lâng ê [Ka-lī-lī], 16 tiàm tī o͘-àm tiong ê lâng ū khòaⁿ-kìⁿ tōa-kng; tiàm tī sí-ìm ê tōe ê ū kng chiò in. 17 Tùi hit sî, Iâ-so͘ khai-sí soan-iông kóng, “Tio̍h hóe-kái, in-ūi Thian-kok teh-beh si̍t-hiān lah!” 18 Iâ-so͘ tī [Ka-lī-lī] ô͘-piⁿ teh kiâⁿ ê sî, khòaⁿ-tio̍h nn̄g ê hiaⁿ-tī, kiò-chòe [Pí-tek] ê [Se-bûn] kap i ê sió-tī [An-tek-lia̍t], tī ô͘-ni̍h teh pha-bāng, in-ūi in sī lia̍h-hî-ê. 19 I tùi in kóng, “Lâi tè góa, góa beh hō͘ lín tit-tio̍h lâng chhin-chhiūⁿ lia̍h-hî-ê tit-tio̍h hî.” 20 In sûi-sî kā bāng pàng-leh, khì tè Iâ-so͘. 21 Iâ-so͘ kiâⁿ chìn-chêng, khòaⁿ-tio̍h lēng-gōa nn̄g ê hiaⁿ-tī, [Se-pí-thài] ê kiáⁿ [Ngá-kok] kap i ê sió-tī [Iok-hān]. In kap lāu-pē [Se-pí-thài] tī chûn-téng teh chéng-lí bāng, I chiū ho͘-tiàu in. 22 In sûi-sî chiong chûn kap lāu-pē pàng-leh, khì tè Iâ-so͘. 23 Iâ-so͘ kàu [Ka-lī-lī] ta̍k só͘-chāi, tī in ê hōe-tn̂g kà-sī lâng, thoân Thian-kok ê hok-im, i-hó bîn-kan ta̍k khoán ê pīⁿ-chèng. 24 I ê miâ-siaⁿ thoân kàu [Sū-lī-a] ê ta̍k só͘-chāi. Lâng chiong só͘-ū ê pīⁿ-lâng, chiū-sī siâ-sîn hū-sin, iûⁿ-hîn, kap poàn-sūi, téng, hoān-tio̍h ta̍k khoán chèng-thâu kap pīⁿ-thiàⁿ ê lâng, lóng chhōa lâi I hia, I chiū kā in i-hó. 25 Ū chi̍t tōa-tīn lâng tùi [Ka-lī-lī], [Te-ka-pho-lí], [Iâ-lō͘-sat-léng], [Iû-thài], kap [Iok-tàn-hô] tang-hōaⁿ lâi tè I.

Má-thài 5

1 Iâ-so͘ khòaⁿ-tio̍h chi̍t tōa-tīn lâng, chiū peh chiūⁿ-soaⁿ. I chē lo̍h-khì, bûn-tô͘ óa-lâi, 2 chiū khai-sí kà-sī in, kóng: 3 “Sim-lêng sàn-chhiah ê lâng chin ū hok-khì, in-ūi Thian-kok sī chit khoán lâng ê. 4 Iu-siong ê lâng chin ū hok-khì, in-ūi Siōng-tè ōe kā in an-ùi. 5 Un-jiû ê lâng chin ū hok-khì, in-ūi Siōng-tè ōe hō͘ in sêng-siū èng-ún ê thó͘-tōe. 6 Iau chhùi-ta him-bō͘ Siōng-tè chí-ì si̍t-hiān ê lâng chin ū hok-khì, in-ūi Siōng-tè ōe hō͘ in pá-chiok. 7 Gâu lîn-bín ê lâng chin ū hok-khì, in-ūi Siōng-tè ōe kā in lîn-bín. 8 Sim chheng-khì ê lâng chin ū hok-khì, in-ūi in ōe kìⁿ-tio̍h Siōng-tè. 9 Chhiok-chìn hô-pêng ê lâng chin ū hok-khì, in-ūi in ōe chiâⁿ-chòe Siōng-tè ê kiáⁿ-jî. 10 Ūi-tio̍h si̍t-chián Siōng-tè ê chí-ì siū pek-hāi ê lâng chin ū hok-khì, in-ūi Thian-kok sī chit khoán lâng ê. 11 Ūi-tio̍h góa ê iân-kò͘, lâng kā lín bú-jio̍k, pek-hāi, kóng ta̍k khoán pháiⁿ-ōe húi-pòng, lín chin ū hok-khì. 12 Tio̍h hoaⁿ-hí khoài-lo̍k, in-ūi lín tī thiⁿ-téng ê pò-siúⁿ chin tōa; lín í-chêng ê sian-ti mā bat án-ni siū pek-hāi.” 13 “Lín sī tōe-chiūⁿ ê iâm; iâm nā sit-bī, beh án-chóaⁿ hō͘ i koh kiâm? Iâm sit-bī chiū bô lō͘-ēng, chí-ū hìⁿ-sak, hō͘ lâng thún-ta̍h. 14 “Lín sī sè-kan ê kng. Khí tī soaⁿ-téng ê siâⁿ khàm bōe-tiâu. 15 Lâng teng tiám-to̍h liáu-āu bōe ēng táu kā i khàm khí-lâi, it-tēng ōe kā i chhāi tī teng-tâi téng, thang kā chhù-lāi só͘-ū ê lâng chiò-kng. 16 Chhin-chhiūⁿ án-ni, lín ê kng tio̍h chiò tī lâng ê bīn-chêng, thang hō͘ in khòaⁿ-kìⁿ lín ê hó hêng-ûi lâi êng-kng lín ê Thiⁿ-pē.” 17 “M̄-thang siūⁿ-kóng góa lâi sī beh hòe-tû [Mô͘-se] ê Lu̍t-hoat á-sī sian-ti ê kà-sī. Góa lâi m̄-sī beh hòe-tû, sī beh si̍t-hiān. 18 Góa si̍t-chāi kā lín kóng, thiⁿ kap tōe ōe siau-sit, Lu̍t-hoat ê chi̍t-tiám chi̍t-u̍ih choa̍t-tùi bōe siau-sit, lóng ōe si̍t-hiān. 19 Só͘-í, bô-lūn sím-mi̍h lâng hoān-tio̍h chiah-ê kài-bēng siōng-sòe ê chi̍t tiâu, koh kà lâng án-ni khì hoān, tī Thian-kok i sǹg-chòe sī siōng-sòe ê. Bô-lūn sím-mi̍h lâng ka-kī chun-siú, mā kà lâng chun-siú, tī Thian-kok chit-ê lâng sǹg-chòe sī siōng-tōa ê. 20 Góa kā lín kóng, lín nā bô pí keng-ha̍k-kàu-su kap Hoat-lī-sài-phài ê lâng koh-khah tiong-si̍t chun-siú Siōng-tè ê chí-ì, choa̍t-tùi bōe-tàng ji̍p Thian-kok.” 21 “Lín ū thiaⁿ-tio̍h Lu̍t-hoat án-ni kà-sī kó͘-chá lâng, kóng, ‘M̄-thang thâi-sí lâng; thâi-sí lâng ê tio̍h siū sím-phòaⁿ.’ 22 M̄-kú góa kā lín kóng, tùi hiaⁿ-tī á-sī chí-bē hoat siū-khì, lóng tio̍h siū sím-phòaⁿ. Bô-lūn sím-mi̍h lâng mē hiaⁿ-tī á-sī chí-bē ‘hòe-jîn’, tio̍h chiūⁿ hoat-têng; mē hiaⁿ-tī á-sī chí-bē ‘tòng-gōng’, tio̍h siū tōe-ge̍k ê hé sio. 23 Só͘-í, lí tī chè-tôaⁿ beh hiàn lé-mi̍h ê sî, nā siūⁿ-tio̍h lí ê hiaⁿ-tī á-sī chí-bē tùi lí ū put-móa, 24 tio̍h chiong lé-mi̍h pàng-hē tī chè-tôaⁿ chêng, seng khì kap i hô-hó, jiân-āu chiah lâi hiàn lé-mi̍h. 25 “Lâng kā lí khòng-kò, beh thoa lí khì hoat-têng, iáu tī lō͘-tiong ê sî tio̍h kóaⁿ-kín kap i hô-kái, chiah-bián hō͘ khòng-kò lí ê lâng kā lí kau hō͘ phòaⁿ-koaⁿ, phòaⁿ-koaⁿ kā lí kau hō͘ hoat-kéng khì koaiⁿ-kaⁿ. Góa si̍t-chāi kā lí kóng, chòe-āu ê chi̍t-sián gō͘-lî bô hêng chheng-chhó, choa̍t-tùi bōe-tàng chhut-kaⁿ.” 27 “Lín ū thiaⁿ-tio̍h Lu̍t-hoat án-ni kà-sī kóng, ‘M̄-thang kan-îm.’ 28 M̄-kú góa kā lín kóng, lâng nā ēng siâ-liām khòaⁿ hū-lú, í-keng tī sim-lāi hoān kan-îm. 29 Lí ê chiàⁿ-ba̍k nā ín-khí lí hoān-chōe, tio̍h kā i ó͘ hiat-ka̍k, lêng-khó sit-khì seng-khu ê chi̍t pō͘-hūn, pí kui seng-khu hó-hó hiat-lo̍h tōe-ge̍k khah hó. 30 Lí ê chiàⁿ-chhiú nā ín-khí lí hoān-chōe, tio̍h kā i chām hiat-ka̍k, lêng-khó sit-khì seng-khu ê chi̍t pō͘-hūn, pí kui seng-khu hó-hó hiat-lo̍h tōe-ge̍k khah hó.” 31 “Koh ū Lu̍t-hoat án-ni kóng, ‘Lâng nā beh lî i ê bó͘, tio̍h hō͘ i lî-hun-su.’ 32 M̄-kú góa kā lín kóng, nā m̄-sī in-ūi bó͘ put-cheng, m̄-thang kā i lî, in-ūi i nā koh khì kè chiū-sī hāi i hoān kan-îm; chhōa lî-hun ê hū-lú ê lâng mā-sī hoān kan-îm.” 33 “Lín koh ū thiaⁿ-tio̍h Lu̍t-hoat án-ni kà-sī kó͘-chá lâng kóng, ‘M̄-thang ûi-pōe chiù-chōa, tī Chú ê bīn-chêng só͘ chiù ê chōa tio̍h si̍t-hêng.’ 34 M̄-kú góa kā lín kóng, lóng m̄-thang chiù-chōa. M̄-thang kí thiⁿ chiù-chōa, in-ūi thiⁿ sī Siōng-tè ê pó-chō; 35 mā m̄-thang kí tōe chiù-chōa, in-ūi tōe sī Siōng-tè ê kha-tiam; mā m̄-thang kí [Iâ-lō͘-sat-léng] chiù-chōa, in-ūi [Iâ-lō͘-sat-léng] sī tōa Kun-ông ê siâⁿ. 36 Mā m̄-thang kí lí ê thâu-khak chiù-chōa, in-ūi lí bōe-tàng hō͘ chi̍t ki thâu-mn̂g pìⁿ-o͘ á-sī pìⁿ-pe̍h. 37 Lín kóng-ōe, sī, chiū kóng sī, m̄-sī, chiū kóng m̄-sī; kî-tha ke kóng ê sī tùi Siâ-ok-chiá chhut-lâi ê.” 38 “Lín ū thiaⁿ-tio̍h Lu̍t-hoat án-ni kà-sī kóng, ‘Ba̍k-chiu pê ba̍k-chiu; chhùi-khí pê chhùi-khí.’ 39 M̄-kú góa kā lín kóng, m̄-thang tí-khòng choh-ok ê lâng. Lâng nā siàn lí chiàⁿ-pêng ê chhùi-phóe, liân tò-pêng mā oa̍t hō͘ i siàn. 40 Lâng nā kò lí, beh the̍h lí ê lāi-saⁿ, liân gōa-saⁿ mā hō͘ i. 41 Chiàm-léng-kun ê kun-jîn nā kiông-pek lí kiâⁿ chi̍t lí lō͘, tio̍h kap i kiâⁿ nn̄g lí. 42 Lâng nā tùi lí kiû, tio̍h hō͘ i; kā lí chioh, m̄-thang kū-choa̍t.” 43 “Lín ū thiaⁿ-tio̍h chit khoán kà-sī, ‘Tio̍h thiàⁿ lí ê chhù-piⁿ, oàn-hūn lí ê tùi-te̍k.’ 44 M̄-kú góa kā lín kóng, tio̍h thiàⁿ lín ê tùi-te̍k, thòe pek-hāi lín ê lâng kî-tó. 45 Án-ni, lín chiah ōe-tàng chiâⁿ-chòe lín Thiⁿ-pē ê kiáⁿ-jî, in-ūi I hō͘ ji̍t-thâu chhut-lâi chiò pháiⁿ-lâng kap hó-lâng, mā lo̍h-hō͘ hō͘ gī-lâng kap put-gī ê lâng. 46 In-ūi lín nā thiàⁿ hiah-ê thiàⁿ lín ê lâng, ū sím-mi̍h pò-siúⁿ? Kiám m̄-sī liân hiah-ê bau̍h-sè-ê mā án-ni chòe? 47 Lín nā chí-ū tùi ka-kī ê hiaⁿ-tī á-sī chí-bē chhéng-an, ū sím-mi̍h pí pa̍t-lâng khah te̍k-pia̍t? Kiám m̄-sī liân Gōa-pang-lâng mā án-ni chòe? 48 Kì-jiân lín ê Thiⁿ-pē sī oân-choân, lín mā tio̍h oân-choân.”

Má-thài 6

1 “Tio̍h kín-sīn, m̄-thang ūi-tio̍h beh hō͘ lâng khòaⁿ chiah kò͘-ì tī lâng ê bīn-chêng tián lín ê kèng-khiân; án-ni chòe bōe-tàng tùi lín ê Thiⁿ-pē tit-tio̍h pò-siúⁿ. 2 “Só͘-í, lí chín-chè ê sî, m̄-thang seng pûn lat-pah pò lâng chai, chhin-chhiūⁿ ké-hó ê lâng tī hōe-tn̂g kap koe-lō͘ án-ni chòe, ài hō͘ lâng o-ló. Góa si̍t-chāi kā lín kóng, in í-keng tit-tio̍h èng-tit ê pò-siúⁿ lah. 3 Lí chín-chè ê sî, m̄-thang hō͘ lí ê tò-chhiú chai chiàⁿ-chhiú ê só͘-chòe, 4 hō͘ lí thang tiām-tiām-á chín-chè, tiām-tiām-á teh khòaⁿ ê lí ê Pē ōe kā lí pò-siúⁿ.” 5 “Lín kî-tó ê sî, m̄-thang chhin-chhiūⁿ ké-hó ê lâng, in-ūi in ài hō͘ lâng khòaⁿ, kò͘-ì khiā tī hōe-tn̂g á-sī lō͘-kháu kî-tó. Góa si̍t-chāi kā lín kóng, in í-keng tit-tio̍h èng-tit ê pò-siúⁿ lah. 6 Lí kî-tó ê sî, tio̍h ji̍p-khì pâng-keng lāi, koaiⁿ-mn̂g, tùi lí tiām-tiām-á teh khòaⁿ ê Pē kiû, án-ni tiām-tiām-á teh khòaⁿ ê Pē ōe kā lí pò-siúⁿ. 7 “Lín kî-tó ê sî, m̄-thang chhin-chhiūⁿ Gōa-pang-lâng kóng liáu koh-kóng, in-ūi in siūⁿ, kóng khah chōe ōe Siōng-tè chiah ōe thiaⁿ-kìⁿ. 8 Lín m̄-thang kap in siâng-khoán; in-ūi iáu-bē kiû í-chêng, lín ê Pē í-keng chai lín ê su-iàu. 9 Só͘-í, lín tio̍h án-ni kî-tó: Goán ê Thiⁿ-pē: Goān lí ê sèng-miâ siū chun-chông. 10 Goān lí si-hêng chú-koân; goān lí ê chí-ì si̍t-hiān, tī tōe-chiūⁿ chhin-chhiūⁿ tī thiⁿ-téng. 11 Kiû lí kin-á-ji̍t sù goán su-iàu ê chia̍h-mi̍h. 12 Kiû lí sià-bián goán ê ko͘-hū, chhin-chhiūⁿ goán mā ū sià-bián ko͘-hū goán ê lâng. 13 Kiû lí m̄-thang hō͘ goán hām-lo̍h tam-tng bōe-khí ê chhì-thàm, kiù goán thoat-lī hit-ê Siâ-ok-chiá. 14 “Lín nā sià-bián lâng ê kè-sit, lín ê Thiⁿ-pē mā ōe sià-bián lín; 15 lín nā bô sià-bián lâng, lín ê Thiⁿ-pē mā bōe sià-bián lín ê kè-sit.” 16 “Lín kìm-chia̍h ê sî, m̄-thang chhin-chhiūⁿ ké-hó ê lâng bīn iu-thâu kat-bīn; in-ūi in kò͘-ì hō͘ bīn pháiⁿ-khòaⁿ, ài hō͘ lâng khòaⁿ-chhut in teh kìm-chia̍h. Góa si̍t-chāi kā lín kóng, in í-keng tit-tio̍h èng-tit ê pò-siúⁿ lah. 17 Lí kìm-chia̍h ê sî, thâu-mn̂g tio̍h boah-iû, bīn tio̍h sóe, 18 hō͘ lâng khòaⁿ bōe chhut lí teh kìm-chia̍h, chí-ū hō͘ tiām-tiām-á teh khòaⁿ ê Pē khòaⁿ-kìⁿ, án-ni tiām-tiām-á teh khòaⁿ ê Pē ōe kā lí pò-siúⁿ.” 19 “M̄-thang ūi-tio̍h ka-kī chek-chū châi-pó tī tōe-chiūⁿ, tī chia ū thâng kā, ōe siⁿ-sian, chha̍t ōe ó͘-khang thau-the̍h. 20 Tio̍h ūi-tio̍h ka-kī chek-chū châi-pó tī thiⁿ-téng, tī hia bô thâng kā, bōe siⁿ-sian, bô chha̍t ó͘-khang thau-the̍h. 21 In-ūi lí ê châi-pó tī tó-ūi, lí ê sim mā ōe tī hia.” 22 “Ba̍k-chiu sī seng-khu ê teng. Lí ê ba̍k-chiu nā kim, kui seng-khu chiū kng-bêng; 23 lí ê ba̍k-chiu nā hoe, kui seng-khu chiū o͘-àm. Án-ni, lí lāi-bīn ê kng nā pìⁿ-chòe àm, chit-ê o͘-àm sī jōa-á-ni̍h giâm-tiōng!” 24 “Bô-lâng ōe-tàng ho̍k-sāi nn̄g ê chú-lâng; i nā m̄-sī oàn-hūn chit-ê, thiàⁿ hit-ê, chiū-sī khòaⁿ-tāng chit-ê, khòaⁿ-khin hit-ê. Lín bōe-tàng siâng-sî ho̍k-sāi Siōng-tè kap chîⁿ-châi. 25 “Só͘-í, góa kā lín kóng, m̄-thang ūi-tio̍h lín ê sìⁿ-miā beh chia̍h sím-mi̍h, beh lim sím-mi̍h teh chhau-hoân; mā m̄-thang ūi-tio̍h lín ê seng-khu beh chhēng sím-mi̍h teh chhau-hoân. Sìⁿ-miā kiám m̄-sī pí chia̍h-mi̍h khah tiōng-iàu? Seng-khu kiám m̄-sī pí i-ho̍k khah tiōng-iàu? 26 Lín khòaⁿ khong-tiong ê pe-chiáu, in bô chèng-choh, bô siu-sêng, mā bô tún-chek niû-si̍t tī chhng-khò͘, lín ê Thiⁿ-pē mā teh kā in iúⁿ-chhī. Lín kiám bô pí in khah kùi-tiōng? 27 Lín kiám ū lâng siūⁿ-kóng chhau-hoân ōe-tàng hō͘ ka-kī ê sìⁿ-miā ke oa̍h chi̍t-sî-á kú? 28 “Lín ná-tio̍h in-ūi beh chhēng sím-mi̍h chhau-hoân? Lín siūⁿ-khòaⁿ soaⁿ-iá ê hoe án-chóaⁿ teh tōa-châng; in bô lô-khó͘, mā bô pháng-chit. 29 Put-kò góa kā lín kóng, liân [Só͘-lô-bûn] siōng êng-hôa ê sî, i chhēng ê saⁿ to bô pí chiah-ê hoe ê chi̍t lúi koh-khah súi. 30 Soaⁿ-iá ê hoe-chháu kin-á-ji̍t teh oa̍h, bîn-á-chài hō͘ lâng hiat-lo̍h hé-lô͘, Siōng-tè to án-ni kā in chng-thāⁿ, I kiám bōe koh-khah kā lín chng-thāⁿ? Lín ná-ōe chiah-ni̍h bô sìn-sim! 31 “Só͘-í, lín m̄-bián chhau-hoân kóng, ‘Goán beh chia̍h sím-mi̍h?’ á-sī ‘Goán beh lim sím-mi̍h, beh chhēng sím-mi̍h?’ 32 Chiah-ê lóng sī Gōa-pang-lâng teh tui-kiû ê. Lín ê Thiⁿ-pē chai chiah-ê lóng sī lín só͘ su-iàu ê. 33 Tio̍h seng tui-kiû I ê chú-koân kap I ê chí-ì si̍t-hiān, chiah-ê mi̍h-kiāⁿ chiū ōe sòa lóng hō͘ lín. 34 Só͘-í, m̄-thang ūi-tio̍h bîn-á-chài chhau-hoân; bîn-á-chài ê tāi-chì bîn-á-chài chiah chhau-hoân. Chi̍t ji̍t ê kan-khó͘ chi̍t ji̍t tng.”

Má-thài 7

1 “M̄-thang phoe-phòaⁿ lâng, chiah-bián siū Siōng-tè sím-phòaⁿ. 2 In-ūi lín ēng sím-mi̍h phiau-chún phoe-phòaⁿ lâng, Siōng-tè mā ōe chiàu án-ni kā lín sím-phòaⁿ; lín ēng sím-mi̍h niû niû hō͘ lâng, Siōng-tè mā ōe chiàu án-ni niû hō͘ lín. 3 Lí ná kan-ta teh khòaⁿ hiaⁿ-tī ba̍k-chiu lāi ê chhâ-iù-á, ia̍h bô chù-ì tio̍h ka-kī ba̍k-chiu lāi ū chhâ-kho͘? 4 Lí ka-kī ba̍k-chiu lāi ū chhâ-kho͘, ná ōe-tàng tùi hiaⁿ-tī kóng ‘Lí ba̍k-chiu lāi ū chhâ-iù-á, góa kā lí the̍h chhut-lâi’? 5 Ké-hó ê lâng, ka-kī ba̍k-chiu lāi ê chhâ-kho͘ tio̍h seng the̍h chhut-lâi, chiah ōe-tàng khòaⁿ chheng-chhó thang kā hiaⁿ-tī ba̍k-chiu lāi ê chhâ-iù-á the̍h chhut-lâi. 6 “M̄-thang the̍h sîn-sèng ê mi̍h hō͘ káu, in ōe oa̍t kè-lâi kā lín; mā m̄-thang chiong lín ê chin-chu hiat tī ti ê bīn-chêng, in ōe ēng kha thún-ta̍h.” 7 “Kiû, ōe tit-tio̍h; chhē, ōe chhē-tio̍h; phah-mn̂g, ōe kā lín khui. 8 In-ūi kiû ê, chiū tit-tio̍h; chhē ê, chiū chhē-tio̍h; phah-mn̂g ê, chiū kā i khui. 9 Lín tiong-kan kiám ū lâng, in kiáⁿ kā i thó mī-pau, ōe the̍h chio̍h-thâu hō͘ i? 10 Kā i thó hî, ōe lia̍h chôa hō͘ i? 11 Lín sui-jiân pháiⁿ, iáu ōe-hiáu the̍h hó-mi̍h hō͘ lín ê kiáⁿ-jî, hô-hòng lín ê Thiⁿ-pē, I it-tēng ōe the̍h hó-mi̍h hō͘ tùi I kî-kiû ê lâng! 12 “Só͘-í, lín ài lâng án-chóaⁿ tùi-thāi lín, mā tio̍h án-ni tùi-thāi in. Che chiū-sī Lu̍t-hoat kap sian-ti ê kà-sī.” 13 “Lín tio̍h tùi hit-ê oe̍h ê mn̂g ji̍p-khì; in-ūi thàu kàu bia̍t-bông hit-ê mn̂g khoah, hit tiâu lō͘ hó kiâⁿ, ji̍p-khì ê lâng chin chōe. 14 Thàu kàu oa̍h-miā hit-ê mn̂g sòe, hit tiâu lō͘ oe̍h, chhē-tio̍h ê lâng chin chió.” 15 “Tio̍h hông-pī ké sian-ti. In lâi lín chia, gōa-piáu chhin-chhiūⁿ mî-iûⁿ, lāi-bīn khiok sī hiong-ok ê chhâi-lông. 16 Lín ōe-tàng tùi in ê ké-chí lâi bat in. Kiám ōe-tàng tùi chhì-phè bán phû-tô? Á-sī tùi chi̍t-lê bán bû-hoa-kó? 17 Án-ni, hó-chhiū kiat hó ké-chí; pháiⁿ-chhiū kiat pháiⁿ ké-chí. 18 Hó-chhiū bōe kiat pháiⁿ ké-chí; pháiⁿ-chhiū mā bōe kiat hó ké-chí. 19 Bōe kiat hó ké-chí ê chhiū lóng tio̍h chhò khí-lâi, hiat-lo̍h hé. 20 Án-ni, lín ōe-tàng tùi in ê ké-chí lâi bat in.” 21 “Chheng-ho͘ góa ‘Chú ah, Chú ah’ ê lâng, bōe lóng ji̍p Thian-kok; chí-ū si̍t-hêng góa ê Thiⁿ-pē ê chí-ì ê lâng chiah ōe. 22 Tī hit Ji̍t, ū chin chōe lâng ōe tùi góa kóng, ‘Chú ah, Chú ah, goán kiám m̄-sī bat hōng lí ê miâ thoân sìn-sit, bat hōng lí ê miâ kóaⁿ-kúi, bat hōng lí ê miâ kiâⁿ chin chōe sîn-jiah?’ 23 Hit sî góa ōe bêng-bêng tùi in kóng, ‘Góa lóng m̄-bat lín. Lín chiah-ê chòe-pháiⁿ ê lâng, lóng lī-khui góa!’ ” 24 “Só͘-í, thiaⁿ góa chiah-ê ōe koh khì si̍t-hêng ê lâng lóng chhin-chhiūⁿ chhong-bêng ê lâng kā chhù khí tī chio̍h-pôaⁿ téng, 25 hō͘ phoah, tōa-chúi lâi, hong sàu, chhiong-tio̍h chhù, chhù mā bōe tó, in-ūi khí tī chio̍h-pôaⁿ téng. 26 “Thiaⁿ góa chiah-ê ōe bô khì si̍t-hêng ê lâng chhin-chhiūⁿ gōng-lâng kā chhù khí tī soa téng, 27 hō͘ phoah, tōa-chúi lâi, hong sàu, chhiong-tio̍h chhù, chhù chiū tó, koh tó-kah chin lī-hāi.” 28 Iâ-so͘ chiah-ê ōe kóng soah, kûn-chiòng tùi I ê kà-sī kám-kak hui-siông hi-kî, 29 in-ūi I ê kà-sī chin ū koân-ui, kap in ê keng-ha̍k-kàu-su bô kâng-khoán.

Má-thài 8

1 Iâ-so͘ tùi soaⁿ-téng lo̍h-lâi ê sî, ū kui tōa-tīn ê lâng tè I. 2 Tú hit sî, ū chi̍t ê bâ-hong pīⁿ-lâng kiâⁿ óa-lâi, kūi lo̍h-khì I ê bīn-chêng, kóng, “Chú ah, lí nā khéng, ōe-tàng hō͘ góa chheng-khì.” 3 Iâ-so͘ chhun-chhiú kā i bong, kóng, “Góa khéng, hō͘ lí chheng-khì!” I ê bâ-hong-pīⁿ sûi-sî chheng-khì. 4 Iâ-so͘ kā i kóng, “Tio̍h chù-ì, lóng m̄-thang kā lâng kóng. Put-kò tio̍h khì hō͘ chè-si giām, koh chiàu [Mô͘-se] ê kui-tēng hiàn lé-mi̍h, thang tùi chèng-lâng chèng-bêng.” 5 Iâ-so͘ ji̍p-khì [Ka-pek-lông] ê sî, ū chi̍t ê [Lô-má] kun-koaⁿ kiâⁿ óa-lâi kā I khún-kiû, 6 kóng, “Chú ah, góa ê lô͘-po̍k tó tī chhù-lāi bōe tín-tāng, hui-siông kan-khó͘.” 7 Iâ-so͘ kā i kóng, “Góa lâi-khì kā i i-tī.” 8 Kun-koaⁿ ìn kóng, “Chú ah, lí lâi goán tau, góa bōe kham-tit. Lí kan-ta kóng chi̍t kù ōe, góa ê lô͘-po̍k chiū ōe hó. 9 In-ūi góa sī hō͘ lâng koán ê lâng, mā ū peng hō͘ góa koán. Góa kā chit-ê kóng ‘Khì’, i chiū khì; kā pa̍t-ê kóng ‘Lâi’, i chiū lâi; kā góa ê lô͘-po̍k kóng ‘Lí chòe chit-ê’, i chiū khì chòe.” 10 Iâ-so͘ thiaⁿ liáu kám-kak chin ì-gōa, chiū tùi hiah-ê tè I ê lâng kóng, “Góa si̍t-chāi kā lín kóng, liân tī [Í-sek-lia̍t]-lâng ê tiong-kan, góa to iáu m̄-bat khòaⁿ-tio̍h chit khoán ê sìn-sim. 11 Góa kā lín kóng, ū chin chōe lâng ōe tùi tang tùi sai lâi kap [A-pek-la-hán], [Í-sat], [Ngá-kok] tī Thian-kok chē-toh. 12 Put-kò hiah-ê pún-lâi sī Thian-kok ê kiáⁿ-jî ê, hoán-tńg ōe siū kóaⁿ chhut-khì gōa-bīn o͘-àm ê só͘-chāi, tī hia thî-khàu, kā-gê chhiat-chhí.” 13 Jiân-āu Iâ-so͘ tùi hit-ê kun-koaⁿ kóng, “Lí khì, hō͘ lí só͘ sìn ê si̍t-hiān!” Tú-tú hit sî, lô͘-po̍k ê pīⁿ chiū hó-khì. 14 Iâ-so͘ ji̍p-khì [Pí-tek] in tau, khòaⁿ-tio̍h i ê tiūⁿ-ḿ hoat-jia̍t, tó tī bîn-chhn̂g. 15 Iâ-so͘ bong i ê chhiú, jia̍t thòe-khì, i chiū khí-lâi sū-hāu I. 16 Hông-hun ê sî, ū chi̍t-kóa lâng chhōa chin chōe hō͘ siâ-sîn hū-sin ê lâng lâi Iâ-so͘ hia. I ēng chi̍t kù ōe chiū kā siâ-sîn lóng kóaⁿ chhut-khì, koh i-hó só͘-ū ê pīⁿ-lâng. 17 Che sī beh èng-giām thong-kè sian-ti [Í-sài-a] só͘ kóng ê ōe: I sêng-siū lán ê loán-jio̍k, tam-tng lán ê pīⁿ-thiàⁿ. 18 Iâ-so͘ khòaⁿ-tio̍h chi̍t tōa-tīn lâng ûi tī I chiu-ûi, chiū hoan-hù bûn-tô͘ kè-khì ô͘ ê hit pêng hōaⁿ. 19 Ū chi̍t ê keng-ha̍k-kàu-su kiâⁿ óa-lâi kā I kóng, “Lāu-su, lí bô-lūn khì tó-ūi, góa lóng beh tè lí.” 20 Iâ-so͘ ìn kóng, “Hô͘-lî ū khang, khong-tiong ê chiáu ū siū, put-kò Jîn-chú liân khòa thâu-khak ê só͘-chāi to bô.” 21 Lēng-gōa chi̍t ê bûn-tô͘ kā I kóng, “Chú ah, hō͘ góa seng tńg-khì bâi-chòng góa ê lāu-pē.” 22 Iâ-so͘ ìn kóng, “Lâi tè góa, hō͘ sí-lâng khì bâi-chòng in ka-kī ê sí-lâng!” 23 Iâ-so͘ chiūⁿ-chûn, I ê bûn-tô͘ tè I khì. 24 Hut-jiân, ô͘ khí tōa hong-éng, chûn soah hō͘ éng khàm-kah beh tîm lo̍h-khì, m̄-kú Iâ-so͘ teh khùn. 25 Bûn-tô͘ khì kā I kiò chhíⁿ, kóng, “Chú ah, kiù-leh ò͘, goán teh-beh bô-miā lò͘!” 26 Iâ-so͘ tùi in kóng, “Sió-sìn ê lâng, lín ná chiah bô-táⁿ?” I chiū khí-lâi, chek-pī hong kap éng, ô͘ chiū chēng-chēng-chēng. 27 Hiah-ê lâng tio̍h-kiaⁿ kóng, “Chit-ê sī sím-mi̍h khoán lâng, liân hong kap éng to sūn-ho̍k!” 28 Iâ-so͘ kè-khì ô͘ ê hit pêng hōaⁿ, kàu [Ka-tāi-lia̍p]-lâng ê tōe-khu, ū nn̄g ê hō͘ siâ-sîn hū-sin ê lâng tùi bōng-á-po͘ chhut-lâi, tú-tio̍h I. In hiong-kài-kài, só͘-í bô-lâng káⁿ tùi hit tiâu lō͘ keng-kè. 29 In hut-jiân tōa-siaⁿ hoah, “Siōng-tè ê Kiáⁿ, lí mài chhap goán! Sî iáu-bē kàu, lí chiū lâi beh kā goán khó͘-chhó͘ sī-bô?” 30 Hit sî, lī in ū hiah-hn̄g-à ê só͘-chāi, ū chi̍t tōa-kûn ti teh thó-chia̍h. 31 Siâ-sîn kiû Iâ-so͘ kóng, “Lí nā beh kā goán kóaⁿ chhut-khì, tio̍h chhe goán chìn-ji̍p hit kûn ti.” 32 Iâ-so͘ kā in kóng, “Lín khì!” Siâ-sîn chiū chhut-khì, chìn-ji̍p ti-kûn; hut-jiân kui-kûn ti lóng tùi soaⁿ-phiâⁿ chông lo̍h-khì ô͘-ni̍h, tū-sí tī chúi-lāi. 33 Chhī-ti ê lâng chiū tô-cháu, cháu ji̍p-khì siâⁿ-lāi, chiong it-chhè só͘ hoat-seng í-ki̍p hō͘ kúi hū-sin ê lâng só͘ tú-tio̍h ê tāi-chì lóng pò lâng chai. 34 Choân siâⁿ ê lâng lóng chhut-lâi beh khòaⁿ Iâ-so͘; in chi̍t-ē khòaⁿ-tio̍h I, chiū khún-kiû I lī-khui in ê tōe-khu.

Má-thài 9

1 Iâ-so͘ chē-chûn kè ô͘, tńg-khì ka-kī ê siâⁿ. 2 Ū lâng ēng chhn̂g kng chi̍t ê poàn-sin-put-sūi ê lâng lâi Iâ-so͘ hia. I khòaⁿ-kìⁿ in ê sìn-sim, chiū tùi hit-ê poàn-sin-put-sūi ê lâng kóng, “Siàu-liân-lâng, an-sim, lí ê chōe sià-bián lah!” 3 Ū kúi-nā ê keng-ha̍k-kàu-su sim-lāi siūⁿ, “Chit-ê lâng teh siat-to̍k Siōng-tè!” 4 Iâ-so͘ chai in ê sim-su chiū mn̄g in, “Sī-án-chóaⁿ lín sim-lāi ū chit khoán pháiⁿ liām-thâu? 5 Tùi chit-ê lâng kóng ‘Lí ê chōe sià-bián lah’, á-sī kóng ‘Lí khí-lâi kiâⁿ’, tó chi̍t hāng khah kán-tan? 6 Put-kò góa beh hō͘ lín chai, Jîn-chú tī tōe-chiūⁿ ū sià-chōe ê koân-pèng.” Jiân-āu I tùi hit-ê poàn-sin-put-sūi ê lâng kóng, “Khí-lâi, giâ lí ê chhn̂g, tńg-khì lín tau!” 7 Hit-ê lâng chiū khí-lâi, tńg-khì in tau. 8 Chèng-lâng khòaⁿ-tio̍h chin tio̍h-kiaⁿ, kui êng-kng hō͘ Siōng-tè, in-ūi I ū chiong chit khoán koân-pèng sù hō͘ lâng. 9 Iâ-so͘ lī-khui hia ǹg thâu-chêng kiâⁿ ê sî khòaⁿ-tio̍h chi̍t ê lâng, miâ kiò-chòe [Má-thài], chē tī sè-koan. Iâ-so͘ kā i kóng, “Lâi tè góa!” I chiū khí-lâi tè I. 10 Iâ-so͘ tī [Má-thài] ê chhù chia̍h-pn̄g ê sî, ū chin chōe bau̍h-sè-ê kap chōe-jîn mā lâi kap Iâ-so͘ í-ki̍p I ê bûn-tô͘ chòe-hé chia̍h. 11 Hoat-lī-sài-phài ê lâng khòaⁿ-tio̍h chiū tùi I ê bûn-tô͘ kóng, “Sī-án-chóaⁿ lín lāu-su kap bau̍h-sè-ê í-ki̍p chōe-jîn chòe-hé chia̍h-pn̄g?” 12 Iâ-so͘ thiaⁿ-tio̍h chiū kóng, “Kiān-khong-ê bô su-iàu i-seng, phòa-pīⁿ-ê chiah ū su-iàu. 13 Lín khì ha̍k-si̍p chit kù Sèng-keng ê ōe: ‘Góa ài lîn-bín, bô ài chè-mi̍h.’ In-ūi góa lâi, m̄-sī beh chio gī-lâng, sī beh chio chōe-jîn.” 14 Ū chi̍t piàn, [Iok-hān] ê bûn-tô͘ lâi kìⁿ Iâ-so͘, tùi I kóng, “Goán kap Hoat-lī-sài-phài ê lâng siông-siông kìm-chia̍h, sī-án-chóaⁿ lí ê bûn-tô͘ bô kìm-chia̍h?” 15 Iâ-so͘ ìn kóng, “Sin-lông iáu kap hun-iàn ê lâng-kheh chòe-hé ê sî, lâng-kheh kiám ōe ai-siong? Ji̍t-chí teh-beh kàu, sin-lông ōe hō͘ lâng tùi in tiong-kan lia̍h-khì, hit sî in chiū ōe kìm-chia̍h. 16 “Bô-lâng ēng bô kiu-chúi ê pò͘ khì pó͘ kū-saⁿ, in-ūi pó͘-ê hit tè ōe kā saⁿ kiù-li̍h, tian-tò phòa koh-khah tōa khang. 17 Mā bô-lâng ēng sin chiú ji̍p tī kū phê-tē; nā án-ni, phê-tē ōe piak-phòa, chiú lâu chhut-lâi, phê-tē mā phòa-khì. Sin chiú eng-kai ji̍p tī sin phê-tē, án-ni nn̄g hāng chiū lóng pó-choân.” 18 Iâ-so͘ tùi in kóng chiah-ê ōe ê sî, ū chi̍t ê hōe-tn̂g ê chú-koán lâi kūi tī I ê bīn-chêng, kóng, “Góa ê cha-bó͘-kiáⁿ tú-á sí-khì, chhiáⁿ lí lâi kā i hōaⁿ-chhiú, i chiū ōe oa̍h khí-lâi.” 19 Iâ-so͘ chiū khí-lâi, tè i khì; I ê bûn-tô͘ mā khì. 20 Tú hit sî, ū chi̍t ê tì-tio̍h hiat-lāu-pīⁿ cha̍p-jī nî kú ê hū-jîn-lâng kiâⁿ óa-khì Iâ-so͘ ê āu-bīn, bong I saⁿ-á-ku ê chhiu. 21 In-ūi i sim-lāi siūⁿ, “Góa kan-ta bong-tio̍h I ê saⁿ, pīⁿ chiū ōe hó.” 22 Iâ-so͘ oa̍t kè-lâi khòaⁿ i, kā i kóng, “Cha-bó͘-kiáⁿ, an-sim; lí ê sìn-sim hō͘ lí hó-khì lah!” Hū-jîn-lâng sûi-sî tit-tio̍h i-hó. 23 Iâ-so͘ lâi-kàu hōe-tn̂g chú-koán ê chhù, khòaⁿ-tio̍h pûn-ta̍t-á-ê kap kui tōa-tīn lâng lōng-lōng-kún, 24 chiū kā in kóng, “Lín lóng chhut-khì, chit-ê cha-bó͘ gín-á bô sí, sī teh khùn.” In chiū kā I thí-chhiò. 25 Kóaⁿ kûn-chiòng chhut-khì liáu-āu, Iâ-so͘ ji̍p-khì cha-bó͘ gín-á ê pâng-keng, khan i ê chhiú, cha-bó͘ gín-á chiū khí-lâi. 26 Tùi án-ni, chit-ê siau-sit thoân kàu hit tōe-khu ê ta̍k só͘-chāi. 27 Iâ-so͘ lī-khui hia ê sî, ū nn̄g ê bông-jîn tè I khì; in tōa-siaⁿ hoah, “Tāi-pi̍t ê Kiáⁿ, lîn-bín goán!” 28 Iâ-so͘ ji̍p-khì chhù-lāi, bông-jîn chiū kiâⁿ óa-khì. Iâ-so͘ mn̄g in, “Lín sìn góa ōe-tàng kā lín chòe chit-ê tāi-chì sī-bô?” In ìn kóng, “Chú ah, lí ōe.” 29 Jiân-āu, Iâ-so͘ bong in ê ba̍k-chiu, kóng, “Chiàu lín ê sìn-sim hō͘ lín si̍t-hiān.” 30 In ê ba̍k-chiu chiū khui, ōe khòaⁿ-kìⁿ. Iâ-so͘ giâm-giâm hoan-hù in kóng, “Chhian-bān m̄-thang hō͘ lâng chai chit-ê tāi-chì.” 31 M̄-kú in chi̍t-ē chhut-khì, soah chiong Iâ-so͘ ê tāi-chì thoân-piàn hit tōe-khu ê ta̍k só͘-chāi. 32 In chhut-khì ê sî, ū lâng chhōa chi̍t ê hō͘ siâ-sîn hū-sin bōe kóng-ōe ê lâng lâi Iâ-so͘ hia. 33 Siâ-sîn chi̍t-ē hō͘ Iâ-so͘ kóaⁿ chhut-khì, hit-ê bōe kóng-ōe ê lâng chiū kóng-ōe. Kûn-chiòng lóng tio̍h-kiaⁿ, kóng, “Tī [Í-sek-lia̍t] goán m̄-bat khòaⁿ-tio̍h chit khoán tāi-chì.” 34 Put-kò Hoat-lī-sài-phài ê lâng kóng, “I sī khò kúi-ông teh kóaⁿ-kúi.” 35 Iâ-so͘ kiâⁿ-thàu chiu-ûi só͘-ū ê siâⁿ-chhī kap chng-siā, tī ta̍k ê hōe-tn̂g kà-sī lâng, thoân Thian-kok ê hok-im, i-hó ta̍k khoán ê chèng-thâu kap pīⁿ-thiàⁿ. 36 I khòaⁿ-tio̍h hiah tōa-tīn ê lâng, chiū khó-lîn in, in-ūi in chhin-chhiūⁿ iûⁿ bô bo̍k-chiá, khùn-khó͘, bô-lâng chiàu-kò͘. 37 Iâ-so͘ chiū tùi I ê bûn-tô͘ kóng, “Thang siu-sêng ê chin chōe, chòe-kang ê lâng chin chió. 38 Só͘-í, lín tio̍h kî-kiû koán siu-sêng ê Chú phài kang-lâng khì siu-sêng.”

Má-thài 10

1 Iâ-so͘ kiò I cha̍p-jī ê bûn-tô͘ lâi, hō͘ in ū koân-pèng thang kóaⁿ siâ-sîn, i-tī ta̍k khoán ê chèng-thâu kap pīⁿ-thiàⁿ. 2 Chit cha̍p-jī sù-tô͘ ê miâ chiū-sī chiah-ê: Tē-it sī [Se-bûn], mā kiò-chòe [Pí-tek], kap i ê sió-tī [An-tek-lia̍t]; [Se-pí-thài] ê kiáⁿ [Ngá-kok] kap i ê sió-tī [Iok-hān]; 3 [Hui-le̍k] kap [Pa-to-lô-mái]; [To-má] kap bau̍h-sè ê [Má-thài]; [A-le̍k-hui] ê kiáⁿ [Ngá-kok] kap [Ta̍t-thài]; 4 Kek-chìn-tóng ê [Se-bûn] kap chhut-bōe Iâ-so͘ hit-ê [Í-su-ka-lio̍k] ê [Iû-tāi]. 5 Iâ-so͘ chhe chit cha̍p-jī sù-tô͘ chhut-khì, hoan-hù in kóng, “Lín m̄-thang khì Gōa-pang-lâng ê tōe-khu; m̄-thang chìn-ji̍p [Sat-má-lī-a]-lâng ê siâⁿ, 6 chí-ū tio̍h khì chhē [Í-sek-lia̍t]-ke sit-bê ê iûⁿ. 7 Lín khì ê sî tio̍h soan-iông kóng, ‘Thian-kok teh-beh si̍t-hiān lah!’ 8 Lín tio̍h i-hó phòa-pīⁿ ê lâng, hō͘ sí-lâng koh-oa̍h, hō͘ bâ-hong pīⁿ-lâng chheng-khì, koh kóaⁿ-chhut siâ-sîn. Lín pe̍h-pe̍h tit-tio̍h, mā tio̍h pe̍h-pe̍h hō͘ lâng. 9 Io-tòa lāi-bīn m̄-bián tòa kim-pè, gûn-pè, á-sī tâng-pè; 10 chhut-mn̂g m̄-bián tòa lú-hêng-tē á-sī nn̄g niá lāi-saⁿ, mā m̄-bián tòa liâng-ôe á-sī gia̍h koáiⁿ-á; in-ūi kang-lâng tit-tio̍h chia̍h-mi̍h sī eng-kai. 11 “Lín bô-lūn ji̍p-khì tó chi̍t ê siâⁿ tó chi̍t ê chng-siā, tio̍h thàm-thiaⁿ khòaⁿ sím-mi̍h lâng goān-ì chiap-thāi lín, chiah khì tòa hia, tòa kàu lī-khui. 12 Lín ji̍p-khì chhù-lāi ê sî, tio̍h kā in chhéng-an. 13 Chit ke ê lâng nā goān-ì chiap-thāi lín, tio̍h chiong lín ê pêng-an hō͘ in; nā bô goān-ì chiap-thāi lín, tio̍h chiong pêng-an siu-hôe. 14 M̄ chiap-thāi lín, m̄-thiaⁿ lín ê ōe ê lâng, lín lī-khui hit keng chhù á-sī hit-ê siâⁿ ê sî, tio̍h chiong lín kha-ni̍h ê thô͘-hún pōaⁿ hō͘ i chheng-khì. 15 Góa si̍t-chāi kā lín kóng, tī Sím-phòaⁿ ê Ji̍t, [Só͘-to-má] kap [Gô-mô͘-la] ê tōe só͘ siū ê hêng-hoa̍t ōe pí hit-ê siâⁿ só͘ siū ê koh-khah hó jím-siū.” 16 “Tio̍h chai, góa chhe lín chhut-khì, chhin-chhiūⁿ sàng iûⁿ ji̍p-khì chhâi-lông ê tiong-kan. Só͘-í, tio̍h chhin-chhiūⁿ chôa hiah-ni̍h lêng-khiáu, chhin-chhiūⁿ hún-chiáu hiah-ni̍h sûn-liông. 17 Lín tio̍h tî-hông, in-ūi ū lâng ōe kā lín lia̍h-khì kau hō͘ gī-hōe, tī in ê hōe-tn̂g ēng piⁿ kā lín phah. 18 Koh ūi-tio̍h góa ê iân-kò͘, lín ōe hō͘ lâng thoa kàu chóng-tok kap kun-ông ê bīn-chêng, lâi tùi in kap Gōa-pang-lâng chòe kiàn-chèng. 19 M̄-kú, lín hō͘ lâng lia̍h-khì sím-mn̄g ê sî, m̄-bián hoân-ló beh án-chóaⁿ kóng, á-sī beh kóng sím-mi̍h; hit sî lín só͘ tio̍h kóng ê, ōe kā lín chí-sī, 20 in-ūi teh kóng ê m̄-sī lín ka-kī, sī lín Thiⁿ-pē ê Sîn thong-kè lín teh kóng. 21 “Hiaⁿ-tī ōe chhut-bōe hiaⁿ-tī, hō͘ i sí; lāu-pē mā ōe án-ni tùi-thāi kiáⁿ-jî. Kiáⁿ-jî ōe khí-lâi kong-kek pē-bú, kā in hāi-sí. 22 Lín ōe ūi-tio̍h góa ê miâ siū chèng-lâng oàn-hūn, put-kò jím-nāi kàu chòe-āu ê ōe tit-tio̍h kiù. 23 In tī chit-ê siâⁿ pek-hāi lín, tio̍h tô-cháu khì pa̍t ê siâⁿ. Góa si̍t-chāi kā lín kóng, [Í-sek-lia̍t] ê siâⁿ-chhī lín kiâⁿ iáu-bē thàu, Jîn-chú chiū lâi! 24 “Ha̍k-seng bōe chhiau-kè lāu-su; lô͘-po̍k mā bōe chhiau-kè chú-lâng. 25 Ha̍k-seng kap lāu-su kâng-khoán, lô͘-po̍k kap chú-lâng kâng-khoán, án-ni chiū ū-kàu. Lâng to kā chit ke ê chú-lâng kiò-chòe [Pia̍t-se-pok], hô-hòng i ke-lāi ê lâng.” 26 “Só͘-í, m̄-bián kiaⁿ in; in-ūi bô chi̍t hāng khàm-ba̍t ê bōe lō͘-hiān; mā bô chi̍t hāng pì-bi̍t ê bōe hō͘ lâng chai. 27 Góa tī àm-tiong kā lín kóng ê, lín tio̍h tī kng-bêng-tiong kóng chhut-lâi; lín tī hīⁿ-khang-piⁿ thiaⁿ-tio̍h ê, tio̍h tī chhù-bé-téng soan-pò͘. 28 Ōe hāi-sí seng-khu khiok bōe hāi-sí lêng-hûn ê, lín m̄-bián kiaⁿ; tian-tò tio̍h kiaⁿ ōe chiong lêng-hûn kap seng-khu hiat-lo̍h tōe-ge̍k húi-bia̍t hit-ūi Siōng-tè. 29 Nn̄g chiah chhek-chiáu-á kiám m̄-sī bōe chi̍t kak gûn nā-tiāⁿ? Lín ê Thiⁿ-pē nā bô ún-chún, liân chi̍t chiah to bōe poa̍h-lo̍h tōe. 30 Lín leh, liân lín ê thâu-mn̂g to lóng ū sǹg kè. 31 Só͘-í, m̄-bián kiaⁿ, lín pí kui-kûn chhek-chiáu-á koh-khah kùi-tiōng!” 32 “Só͘-í, tī lâng ê bīn-chêng soan-jīn góa ê, góa tī góa Thiⁿ-pē ê bīn-chêng mā ōe jīn i. 33 Tī lâng ê bīn-chêng m̄-jīn góa ê, góa tī góa Thiⁿ-pē ê bīn-chêng mā m̄-jīn i.” 34 “M̄-thang siūⁿ-kóng góa lâi sī beh tòa hô-pêng hō͘ tōe-chiūⁿ; góa tòa-lâi ê m̄-sī hô-pêng, sī to-kiàm. 35 In-ūi góa lâi sī beh hō͘ lâng hun-lia̍t: lâng tùi-khòng lāu-pē, cha-bó͘-kiáⁿ tùi-khòng lāu-bú, sim-pū tùi-khòng ta-ke. 36 Lâng ê tùi-te̍k sī ka-kī ke-lāi ê lâng. 37 “Thiàⁿ pē-bú iâⁿ-kè thiàⁿ góa ê, bô chu-keh tè góa; thiàⁿ kiáⁿ á-sī cha-bó͘-kiáⁿ iâⁿ-kè thiàⁿ góa ê, bô chu-keh tè góa. 38 M̄ giâ ka-kī ê si̍p-jī-kè lâi tè góa ê, mā bô chu-keh tè góa. 39 Beh tit-tio̍h ka-kī ê sìⁿ-miā ê, ōe sòng-sit sìⁿ-miā; ūi-tio̍h góa sòng-sit ka-kī ê sìⁿ-miā ê, ōe tit-tio̍h sìⁿ-miā.” 40 “Chiap-la̍p lín ê chiū-sī chiap-la̍p góa; chiap-la̍p góa ê chiū-sī chiap-la̍p chhe góa lâi Hit-ūi. 41 Chiap-la̍p sian-ti chòe sian-ti ê, ōe tit-tio̍h sian-ti èng-tit ê pò-siúⁿ; chiap-la̍p gī-lâng chòe gī-lâng ê, ōe tit-tio̍h gī-lâng èng-tit ê pò-siúⁿ. 42 Góa si̍t-chāi kā lín kóng, bô-lūn sím-mi̍h lâng, kan-ta the̍h chi̍t poe léng-chúi hō͘ chiah-ê siōng bî-sòe ê chi̍t ê lim, in-ūi siōng bî-sòe-ê sī góa ê bûn-tô͘, chit-ê lâng it-tēng ōe tit-tio̍h pò-siúⁿ.”

Má-thài 11

1 Iâ-so͘ kà-sī cha̍p-jī ê bûn-tô͘ í-āu lī-khui hit só͘-chāi, khì hù-kūn ê siâⁿ-chhī kà-sī lâng kap thoân hok-im. 2 [Iok-hān] tī kaⁿ-ni̍h thiaⁿ-tio̍h Ki-tok só͘ chòe ê sū, chiū chhe i ê bûn-tô͘ khì 3 mn̄g I, “Lí chiū-sī teh-beh lâi Hit-ūi, á-sī goán tio̍h thèng-hāu pa̍t-lâng?” 4 Iâ-so͘ ìn kóng, “Lín chiong só͘ thiaⁿ-tio̍h, só͘ khòaⁿ-tio̍h ê khì kā [Iok-hān] kóng, 5 chiū-sī sit-bêng ê lâng koh khòaⁿ-kìⁿ, kha pái ê lâng kiâⁿ-lō͘, bâ-hong pīⁿ-lâng chheng-khì, hīⁿ-khang bōe thiaⁿ-kìⁿ ê lâng thiaⁿ-kìⁿ, sí-lâng koh-oa̍h, sàn-chhiah-lâng ū hó siau-sit thoân hō͘ in. 6 Tùi góa bô sit-khì sìn-sim ê lâng chin ū hok-khì!” 7 [Iok-hān] ê bûn-tô͘ lī-khui liáu-āu, Iâ-so͘ chiah tùi kûn-chiòng kóng-khí [Iok-hān] ê sū. I kóng, “Lín chhut-khì khòng-iá sī beh khòaⁿ sím-mi̍h? Beh khòaⁿ hō͘ hong chhe iô-lâi iô-khì ê lô͘-úi sī-bô? 8 Nā m̄-sī, lín chhut-khì beh khòaⁿ sím-mi̍h? Beh khòaⁿ chhēng ko-kùi i-ho̍k ê lâng sī-bô? Lín khòaⁿ, chhēng ko-kùi i-ho̍k ê lâng sī tī ông-kiong. 9 Án-ni, lín chhut-khì beh khòaⁿ sím-mi̍h? Beh khòaⁿ sian-ti sī-bô? Sī, m̄-kú góa kā lín kóng, i pí sian-ti koh-khah úi-tāi. 10 Koan-hē [Iok-hān], Sèng-keng ū án-ni kì-chài: Khòaⁿ ah, góa chhe góa ê sù-chiá chòe lí ê sian-hong; i beh tī lí ê thâu-chêng kā lí khui-lō͘. 11 “Góa si̍t-chāi kā lín kóng, hū-jîn-lâng só͘ siⁿ ê bô-lâng pí [Iok-hān] khah úi-tāi; m̄-kú, tī Thian-kok siōng bî-sòe-ê iáu pí i koh-khah úi-tāi. 12 Tùi Si-sóe-chiá [Iok-hān] ê ji̍t kàu hiān-chāi, Thian-kok it-ti̍t siū kiông-lia̍t ê kong-kek, hiong-béng ê lâng ēng pō-le̍k kā i chhiúⁿ-khì. 13 Sian-ti kap Lu̍t-hoat só͘-ū ê ū-giân kàu [Iok-hān] ûi-chí. 14 Lín nā goān-ì chiap-siū chiah-ê ū-giân, chiū ōe bêng-pe̍k [Iok-hān] chiū-sī hit-ê teh-beh lâi ê [Í-lī-a]. 15 Ū hī-khang ê, tio̍h thiaⁿ! 16 “Góa beh ēng sím-mi̍h pí-phēng chit sè-tāi? In chhin-chhiūⁿ chi̍t tīn gín-á chē tī chhī-tiûⁿ-kháu tùi lēng-gōa chi̍t tīn hoah: 17 Goán tùi lín pûn phín-á, lín bô thiàu-bú! Goán thî-khàu, lín mā bô pi-siong! 18 [Iok-hān] lâi, bô chia̍h bô lim, lâng chiū kóng, ‘I hō͘ kúi hū-sin!’ 19 Jîn-chú lâi, mā chia̍h mā lim, lâng chiū kóng, ‘I sī tham-chia̍h hò͘ⁿ-chiú ê lâng, sī bau̍h-sè-ê kap chōe-jîn ê pêng-iú!’ Put-kò, si̍t-chāi ê tì-hūi tùi hêng-ûi tit-tio̍h chèng-si̍t.” 20 Iâ-so͘ ū tī chi̍t-kóa siâⁿ-chhī kiâⁿ chin chōe sîn-jiah, m̄-kú hiah-ê siâⁿ-chhī ê lâng lóng bô hóe-kái, I chiū kā in chek-pī. 21 I kóng, “[Ko-lia̍p-sìn], lí chhám à! [Pek-sài-tāi], lí chhám à! Góa tī lín tiong-kan kiâⁿ ê sîn-jiah nā tī [Thài-ní] kap [Se-tùn] kiâⁿ, in chá chiū chhēng môa-saⁿ sám hé-hu hóe-kái lah. 22 Góa kā lín kóng ô͘, tī Sím-phòaⁿ ê Ji̍t, [Thài-ní] kap [Se-tùn] siū ê hêng-hoa̍t pí lín tio̍h siū ê khah hó jím-siū. 23 Lí leh, [Ka-pek-lông], Lí ài lâng kā lí hû chiūⁿ-thiⁿ sī-bô? Bōe, Siōng-tè ōe kā lí hiat-lo̍h im-kan. Tī lí hia kiâⁿ ê sîn-jiah nā tī [Só͘-to-má] kiâⁿ, [Só͘-to-má] it-tēng iáu lâu kàu kin-á-ji̍t. 24 Chóng-sī góa kā lín kóng, tī Sím-phòaⁿ ê Ji̍t, [Só͘-to-má] tōe-khu siū ê hêng-hoa̍t pí lí tio̍h siū ê khah hó jím-siū.” 25 Hit sî, Iâ-so͘ kóng, “Pē ah, thiⁿ-tōe ê Chú, góa kám-siā lí, in-ūi lí chiong chiah-ê sū tùi ū tì-hūi ū ha̍k-būn ê lâng khàm khí-lâi, khiok tùi sòe-hàn gín-á khé-sī. 26 Pē ah, sī lah, in-ūi che sī lí ê hó chí-ì. 27 “Góa ê Pē í-keng ū chiong it-chhè lóng kau-thok góa. Pē í-gōa bô-lâng bat Kiáⁿ; Kiáⁿ kap Kiáⁿ ài-beh khé-sī ê lâng í-gōa mā bô-lâng bat Pē. 28 “Lô-khó͘ pē tāng-tàⁿ ê lâng lóng tio̍h lâi góa chia, góa beh hō͘ lín an-hioh. 29 Tio̍h pē góa ê taⁿ, tùi góa lâi o̍h, in-ūi góa ê sim un-jiû khiam-sùn, lín ê sim-sîn chiū ōe tit-tio̍h an-hioh. 30 In-ūi góa ê taⁿ ha̍h-ēng, góa ê tàⁿ chin khin.”

Má-thài 12

1 Kè bô jōa kú, tī An-hioh-ji̍t Iâ-so͘ tùi be̍h-hn̂g keng-kè. I ê bûn-tô͘ pak-tó͘ iau, chiū tiah be̍h-sūi lâi chia̍h. 2 Hoat-lī-sài-phài ê lâng khòaⁿ-tio̍h, tùi Iâ-so͘ kóng, “Lí khòaⁿ, lí ê bûn-tô͘ tī An-hioh-ji̍t chòe bōe ēng-tit chòe ê tāi-chì.” 3 Iâ-so͘ kā in kóng, “Lín kiám bô tha̍k-tio̍h [Tāi-pi̍t] kap tè i ê lâng pak-tó͘ iau ê sî só͘ chòe ê tāi-chì? 4 I ji̍p-khì Siōng-tè ê tiān chia̍h hiàn-chè ê piáⁿ, chit khoán piáⁿ chí-ū chè-si chiah thang chia̍h, i kap tè i ê lâng lóng bōe ēng-tit chia̍h. 5 Lēng-gōa, lín kiám bô tha̍k-tio̍h Lu̍t-hoat ê kì-chài, chiū-sī An-hioh-ji̍t chè-si tī Sèng-tiān hoān-tio̍h An-hioh-ji̍t ê kui-kú mā sǹg bô-chōe. 6 Góa kā lín kóng, tī chia ū chi̍t ê pí Sèng-tiān khah tiōng-iàu ê. 7 Sèng-keng ū kóng, ‘Góa ài lîn-bín, bô ài chè-mi̍h.’ Lín nā liáu-kái chit kù ōe ê ì-sù, chiū bōe kā bô-chōe ê lâng tēng-chōe. 8 In-ūi Jîn-chú sī An-hioh-ji̍t ê Chú.” 9 Iâ-so͘ lī-khui hit só͘-chāi, ji̍p-khì in ê hōe-tn̂g. 10 Tú-hó ū chi̍t ê chi̍t ki chhiú khê-khì ê lâng tī-hia. Ū chi̍t-kóa lâng siūⁿ-beh khòng-kò Iâ-so͘, chiū mn̄g I kóng, “Tī An-hioh-ji̍t i-pīⁿ ū ha̍h Lu̍t-hoat bô?” 11 Iâ-so͘ ìn kóng, “Lín tiong-kan ū lâng ū chi̍t chiah iûⁿ, tú-hó tī An-hioh-ji̍t poa̍h-lo̍h khut-á, i kiám bōe kā i khiú khí-lâi? 12 Lâng pí iûⁿ ke jōa-á-ni̍h kùi-tiōng! Só͘-í, tī An-hioh-ji̍t chòe hó-sū ū ha̍h Lu̍t-hoat.” 13 Iâ-so͘ chiū kā hit-ê lâng kóng, “Chhiú chhun chhut-lâi!” Chit-ê lâng chhiú chhun chhut-lâi, chiū ho̍k-goân, oân-choân hó-khì, kap lēng-gōa hit ki chhiú kâng-khoán. 14 [Hoat-lī-sài]-phài ê lâng chhut-khì, chiū kè-bô͘ beh tùi-hù Iâ-so͘, khòaⁿ beh án-chóaⁿ kā I hāi-sí. 15 Iâ-so͘ chai-iáⁿ in ê kè-bô͘ chiū lī-khui hia; ū chin chōe lâng tè I khì, I chiū i-hó in tiong-kan só͘-ū ê pīⁿ-lâng. 16 I bēng-lēng in m̄-thang tùi lâng pò-iông I ê tāi-chì. 17 Che sī beh èng-giām thong-kè sian-ti [Í-sài-a] só͘ kóng ê ōe: 18 Lín khòaⁿ, góa só͘ kéng-soán ê lô͘-po̍k, góa só͘ thiàⁿ, só͘ ì-ài ê. Góa beh sù góa ê Sîn hō͘ I; I beh tùi bān-bîn soan-kò góa ê kong-gī. 19 I bōe cheng-piān, bōe soan-jióng; tī koe-lō͘ bô-lâng ōe thiaⁿ-tio̍h I ê siaⁿ. 20 Siū-siong ê lô͘-úi, I bōe at-chi̍h; beh hoa ê teng-hé, I bōe pûn-sit, ti̍t-kàu I hō͘ kong-gī tek-sèng. 21 Bān-bîn lóng ōe chiong ǹg-bāng kau-thok I. 22 Hit sî, ū lâng chhōa chi̍t ê hō͘ kúi hū-sin, sit-bêng koh bōe-kóng-ōe ê lâng lâi Iâ-so͘ hia; Iâ-so͘ kā i i-hó, hit-ê bōe-kóng-ōe ê lâng chiū ōe kóng-ōe, koh ōe khòaⁿ-kìⁿ. 23 Kûn-chiòng lóng chin tio̍h-kiaⁿ, kóng, “Chit-ê lâng káⁿ sī [Tāi-pi̍t] ê Kiáⁿ hò͘ⁿ?” 24 Hoat-lī-sài-phài ê lâng thiaⁿ-tio̍h chiū kóng, “Chit-ê lâng sī khò kúi-ông [Pia̍t-se-pok] teh kóaⁿ-kúi.” 25 Iâ-so͘ chai-iáⁿ in ê sim-su chiū kā in kóng, “Kok-ka ka-kī hun-cheng, ōe hong-hòe; siâⁿ-chhī á-sī ka-têng ka-kī hun-cheng, khiā bōe-tiâu. 26 Sat-tàn nā kóaⁿ Sat-tàn, sī ka-kī hun-cheng, i ê kok beh-ná khiā ōe-tiâu? 27 Góa nā khò [Pia̍t-se-pok] kóaⁿ-kúi, lín ê chú-tē sī khò sím-mi̍h âng kóaⁿ-kúi? Án-ni, lín ka-kī ê chú-tē ōe kā lín phòaⁿ-chōe. 28 Put-kò góa nā-sī khò Siōng-tè ê Sîn kóaⁿ-kúi, Siōng-tè ê chú-koân chiū í-keng tī lín tiong-kan si̍t-hiān lah. 29 “Lâng án-chóaⁿ chiah ōe-tàng ji̍p-khì ióng-sū ê chhù chhiúⁿ i ê châi-bu̍t, kiám m̄-sī tio̍h seng kā i pa̍k khí-lâi? 30 “Bô ūi góa ê chiū-sī hoán-tùi góa; bô kap góa chòe-hé siu-chi̍p ê chiū-sī teh phah-sòaⁿ. 31 Só͘-í, góa kā lín kóng, lâng it-chhè ê chōe kap húi-pòng lóng ōe tit-tio̍h sià-bián, m̄-kú siat-to̍k Sèng Sîn bōe tit-tio̍h sià-bián. 32 Bô-lūn sím-mi̍h lâng kóng-ōe kong-kek Jîn-chú, ōe tit-tio̍h sià-bián, m̄-kú bô-lūn sím-mi̍h lâng kóng-ōe kong-kek Sèng Sîn, tī kim-sè kap lâi-sè lóng bōe tit-tio̍h sià-bián.” 33 “Hó-chhiū kiat hó ké-chí; pháiⁿ-chhiū kiat pháiⁿ ké-chí; tùi só͘ kiat ê ké-chí thang chai chhiū ê hó-pháiⁿ. 34 Lín chiah-ê to̍k-chôa, lín pún-lâi sī pháiⁿ ê, beh ná-ōe kóng hó-ōe? In-ūi lâng sim-lāi chhiong-móa sím-mi̍h, chhùi chiū kóng sím-mi̍h. 35 Hó-lâng tùi só͘ chek-chū ê hó hoat-chhut hó; pháiⁿ-lâng tùi só͘ chek-chū ê pháiⁿ hoat-chhut pháiⁿ. 36 “Góa kā lín kóng, lâng só͘ kóng it-chhè ê êng-á-ōe, tī Sím-phòaⁿ ê Ji̍t ta̍k kù lóng tio̍h hū-chek. 37 In-ūi Siōng-tè beh ēng lí ê ōe lâi phòaⁿ lí bô-chōe, mā beh ēng lí ê ōe lâi tēng lí ū-chōe.” 38 Hit sî, ū kúi-nā ê keng-ha̍k-kàu-su kap Hoat-lī-sài-phài ê lâng tùi Iâ-so͘ kóng, “Lāu-su, goán ài lí kiâⁿ chi̍t ê sîn-jiah hō͘ goán khòaⁿ.” 39 Iâ-so͘ ìn kóng, “Siâ-ok kan-îm ê sè-tāi iau-kiû sîn-jiah, tû-liáu sian-ti [Iok-ná] ê sîn-jiah, bōe-koh ū sîn-jiah hō͘ in. 40 Chhin-chhiūⁿ [Iok-ná] saⁿ mî saⁿ ji̍t tī tōa-hî ê pak-tó͘ lāi, Jîn-chú mā ōe saⁿ mî saⁿ ji̍t tī tōe chhim ê só͘-chāi. 41 Tī Sím-phòaⁿ ê sî, [Nî-nî-bî]-lâng ōe kap chit sè-tāi ê lâng chòe-hé khí-lâi, kā chit sè-tāi ê lâng tēng-chōe, in-ūi in thiaⁿ-tio̍h [Iok-ná] ê thoân-tō ū hóe-kái. Lín khòaⁿ, ū pí [Iok-ná] koh-khah úi-tāi-ê tī chia! 42 Tī Sím-phòaⁿ ê sî, Lâm-hng ê lú-ông ōe kap chit sè-tāi ê lâng chòe-hé khí-lâi, kā chit sè-tāi ê lâng tēng-chōe, in-ūi i ū tùi tōe ê ke̍k-thâu lâi thiaⁿ [Só͘-lô-bûn] tì-hūi ê ōe. Lín khòaⁿ, ū pí [Só͘-lô-bûn] koh-khah úi-tāi-ê tī chia!” 43 “Siâ-sîn lī-khui só͘ hū-sin ê lâng liáu-āu, kiâⁿ-thàu bô-chúi ê tōe-khu, beh chhē chi̍t ê hioh-khùn ê só͘-chāi, chhē lóng bô, 44 chiū kóng, ‘Góa beh tńg-khì góa chhut-lâi hit keng chhù.’ I tńg-khì, khòaⁿ-tio̍h chhù khang-khang, sàu-kah chin chheng-khì, koh chéng-lí hó-sè. 45 Āu-lâi, i khì chhōa chhit ê pí i khah pháiⁿ ê siâ-sîn kap i chòe-hé lâi, ji̍p-khì hia tòa. Án-ni, hit-ê lâng ê kiat-kio̍k pí khí-thâu koh-khah chhám. Chit-ê siâ-ok ê sè-tāi mā ōe chhin-chhiūⁿ án-ni.” 46 Iâ-so͘ iáu teh tùi chèng-lâng kóng-ōe ê sî, I ê lāu-bú kap hiaⁿ-tī lâi khiā tī gōa-bīn, ài-beh kap I kóng-ōe. 47 Ū lâng kā Iâ-so͘ kóng, “Lí khòaⁿ leh, lí ê lāu-bú kap hiaⁿ-tī khiā tī gōa-bīn, ài-beh kap lí kóng-ōe.” 48 Iâ-so͘ kā hit-ê lâng kóng, “Sím-mi̍h lâng sī góa ê lāu-bú? Sím-mi̍h lâng sī góa ê hiaⁿ-tī?” 49 Jiân-āu I chhun-chhiú kí I ê bûn-tô͘ kóng, “Lín khòaⁿ, góa ê lāu-bú, góa ê hiaⁿ-tī. 50 Si̍t-hêng góa Thiⁿ-pē chí-ì ê lâng chiū-sī góa ê hiaⁿ-tī, chí-bē, kap lāu-bú.”

Má-thài 13

1 Siâng hit ji̍t, Iâ-so͘ tùi chhù-ni̍h chhut-khì, tī ô͘-piⁿ chē. 2 Ū chi̍t tōa-tīn lâng chū-chi̍p óa-lâi I hia, I soah tio̍h khì chē tī chûn-téng, kui tōa-tīn lâng lóng khiā tī hōaⁿ-téng. 3 I chiū ēng phì-jū tùi in kóng chin chōe hāng sū. I kóng: “Ū chi̍t ê iā-chéng-chí-ê chhut-khì iā chéng-chí. 4 I iā ê sî, ū-ê chéng-chí lak tī lō͘-piⁿ, chiáu-á pe lâi, kā chéng-chí chia̍h liáu-liáu. 5 Ū-ê lak tī chio̍h-thâu tōe, thô͘ chió ê só͘-chāi, in-ūi thô͘ bô chhim, chin kín chiū puh-gê; 6 put-kò ji̍t-thâu chi̍t-ē chhut, kā in pha̍k-tio̍h, in-ūi bô kun chiū ta-khì. 7 Ū-ê lak tī chhì-phè lāi, chhì-á tōa-châng khí-lâi chiū kā in hip-sí. 8 Put-kò ū-ê lak tī hó thó͘-tōe, chiū kiat-si̍t; ū-ê chi̍t-pah pē, ū-ê la̍k-cha̍p pē, ū-ê saⁿ-cha̍p pē. 9 Ū hī-khang ê, tio̍h thiaⁿ!” 10 Bûn-tô͘ lâi mn̄g Iâ-so͘, “Sī-án-chóaⁿ lí tùi kûn-chiòng lóng ēng phì-jū kā in kóng?” 11 Iâ-so͘ ìn kóng, “Thian-kok ê ò-pì í-keng ū hō͘ lín chai, m̄-kú bô hō͘ in chai. 12 In-ūi ū-ê, beh hō͘ i koh-khah chōe, chōe kàu ū chhun; bô-ê, liân i só͘ ū-ê mā beh kā i chhiúⁿ khí-lâi. 13 Ūi-tio̍h chit-ê iân-kò͘, góa ēng phì-jū tùi in kóng, in-ūi: In khòaⁿ mā khòaⁿ bô, thiaⁿ mā thiaⁿ bô, koh bōe liáu-kái. 14 [Í-sài-a] ê ū-giân tú tī in sin-chiūⁿ èng-giām: Lín thiaⁿ koh thiaⁿ mā bōe liáu-kái; lín khòaⁿ koh khòaⁿ mā bōe khòaⁿ-kìⁿ. 15 In-ūi chit-ê chú-bîn ê sim í-keng tūn, hī-khang tāng, ba̍k-chiu khoeh. Nā m̄-sī án-ni, in ê ba̍k-chiu ōe khòaⁿ-kìⁿ, hī-khang ōe thiaⁿ-kìⁿ, sim ōe hiáu-ngō͘, ōe hôe-sim tńg-ì, góa chiū kā in i-hó. 16 “M̄-kú lín chin ū hok-khì, in-ūi lín ba̍k-chiu ū khòaⁿ-kìⁿ, hīⁿ-khang ū thiaⁿ-kìⁿ. 17 Góa si̍t-chāi kā lín kóng, í-chêng ū chin chōe sian-ti kap gī-lâng ài-beh khòaⁿ lín só͘ khòaⁿ-kìⁿ ê ia̍h bô khòaⁿ-tio̍h, beh thiaⁿ lín só͘ thiaⁿ-kìⁿ ê ia̍h bô thiaⁿ-tio̍h.” 18 “Só͘-í, lín tio̍h chù-ì thiaⁿ chit-ê iā chéng-chí ê phì-jū. 19 Só͘-ū thiaⁿ-tio̍h Thian-kok ê sìn-sit bô bêng-pe̍k ê, sī chhin-chhiūⁿ iā tī lō͘-piⁿ ê chéng-chí, hit-ê Siâ-ok-chiá lâi, kā iā tī i sim-lāi ê chéng-chí chhiúⁿ-khì. 20 Iā tī chio̍h-thâu tōe ê, sī chí lâng thiaⁿ-tio̍h sìn-sit, sûi-sî hoaⁿ-hí chiap-siū, 21 m̄-kú tī i ê sim-lāi tèng-kun bô chhim, tòng bōe kú, chi̍t-ē ūi-tio̍h sìn-sit tú-tio̍h hoān-lān á-sī pek-hāi, sûi-sî chiū pàng-sak. 22 Iā tī chhì-phè lāi ê, sī chí lâng thiaⁿ-tio̍h sìn-sit liáu-āu, seng-oa̍h ê khòa-lū kap chîⁿ-châi ê bê-he̍k kā só͘ thiaⁿ-tio̍h ê sìn-sit hip-sí, soah bōe kiat-si̍t. 23 Iā tī hó thó͘-tōe ê, sī chí lâng thiaⁿ-tio̍h sìn-sit, ū liáu-kái, chin-chiàⁿ ū kiat-si̍t; ū-ê chi̍t-pah pē, ū-ê la̍k-cha̍p pē, ū-ê saⁿ-cha̍p pē.” 24 Iâ-so͘ koh tùi in kóng chi̍t ê phì-jū: “Thian-kok thang phì-jū chòe ū chi̍t ê lâng iā hó chéng-chí tī ka-kī ê hn̂g-ni̍h. 25 Lâng teh khùn ê sî, tùi-te̍k lâi, chiong phōe-á iā tī be̍h-á ê tiong-kan, chiū lī-khui. 26 Be̍h-á hoat khí-lâi, chhut-sūi ê sî, phōe-á mā hoat chhut-lâi. 27 Lô͘-po̍k lâi kìⁿ i ê chú-lâng kóng, ‘Thâu-ke, lí kiám m̄-sī iā hó ê chéng-chí tī hn̂g-ni̍h? Ná-ōe ū chiah-ê phōe-á?’ 28 Chú-lâng ìn kóng, ‘Che sī tùi-te̍k chòe ê lah.’ Lô͘-po̍k kóng, ‘Án-ni, goán lâi-khì kā hiah-ê phōe-á khau khí-lâi hó-bô?’ 29 Chú-lâng ìn kóng, ‘M̄-hó, lín khau phōe-á ê sî, m̄ tú-hó liân be̍h-á soah khau-khau khí-lâi. 30 Hō͘ phōe-á kap be̍h-á tâng-chôe tōa-châng, siu-sêng ê sî góa chiah hoan-hù siu-koah ê lâng seng kā phōe-á khau khí-lâi, khún kui-pé khì sio, jiân-āu kā be̍h-á siu ji̍p-khì góa ê chhng-khò͘.’ ” 31 Iâ-so͘ koh kā in kóng chi̍t ê phì-jū: “Thian-kok chhin-chhiūⁿ chi̍t lia̍p kòa-chhài-chí, lâng kā i the̍h-khì iā tī ka-kī ê hn̂g-ni̍h. 32 Kòa-chhài-chí sī só͘-ū chéng-chí tiong siōng sòe-lia̍p ê, tōa-châng khí-lâi, pí só͘-ū ê chhài-soe koh-khah tōa-châng, chiâⁿ-chòe chi̍t châng chhiū, liân khong-tiong ê chiáu-á to lâi tī chhiū-ki chòe siū.” 33 Iâ-so͘ koh kā in kóng chi̍t ê phì-jū: “Thian-kok chhin-chhiūⁿ kàⁿ-bú, ū chi̍t ê hū-jîn-lâng the̍h-khì lām tī saⁿ táu mī-hún chòe-hé chhiau, chòe-āu kui-ē lóng hoat khí-lâi.” 34 Chiah-ê it-chhè ê kà-sī Iâ-so͘ lóng ēng phì-jū tùi chèng-lâng kóng; I bô ēng pa̍t khoán ê hong-sek, chí-ū ēng phì-jū tùi in kóng. 35 I án-ni chòe sī beh èng-giām Chú thong-kè sian-ti só͘ kóng ê ōe: Góa beh khui-chhùi kóng phì-jū, kóng chhòng-sè í-lâi ún-ba̍t ê sū. 36 Iâ-so͘ lī-khui chèng-lâng, ji̍p-khì chhù-lāi. I ê bûn-tô͘ lâi kā I kóng, “Chhiáⁿ kā goán kóe-seh hn̂g-ni̍h ê phōe-á ê phì-jū.” 37 Iâ-so͘ ìn kóng, “Hit-ê iā hó chéng-chí ê sī Jîn-chú; 38 hn̂g sī sè-kài; hó chéng-chí sī Thian-kok ê kiáⁿ-jî; phōe-á sī hit-ê Siâ-ok-chiá ê kiáⁿ-jî; 39 iā phōe-á hit-ê te̍k-jîn sī Mô͘-kúi; siu-koah sī chí kim-sè ê chiong-kio̍k; siu-koah-ê sī thiⁿ-sài. 40 Tī kim-sè ê chiong-kio̍k, pháiⁿ-lâng ōe chhin-chhiūⁿ phōe-á hō͘ lâng khioh kui-pé ēng hé kā i sio. 41 Jîn-chú ōe chhe I ê thiⁿ-sài lâi, tùi I ê kok-lāi chiong it-chhè hō͘ lâng poa̍h-tó hoān-chōe kap put-hoat ê lâng lóng lia̍h-lâi, 42 kā in hiat-lo̍h hé-lô͘, tī hia in ōe thî-khàu, kā-gê chhiat-chhí. 43 Hit sî, gī-lâng tī in ê Pē ê Kok-tō͘ ōe chhin-chhiūⁿ ji̍t-thâu hoat-kng. Ū hī-khang ê, tio̍h thiaⁿ!” 44 “Thian-kok chhin-chhiūⁿ pó-pòe chhàng tī hn̂g-ni̍h, ū lâng chhē-tio̍h, kā i khàm khí-lâi, chin hoaⁿ-hí khì bōe it-chhè só͘-ū ê lâi bóe hit khu hn̂g. 45 “Thian-kok mā chhin-chhiūⁿ chi̍t ê seng-lí-lâng teh chhē súi ê chin-chu. 46 I chi̍t-ē chhē-tio̍h chi̍t lia̍p chin ta̍t-chîⁿ ê chin-chu, chiū khì bōe it-chhè só͘-ū ê lâi bóe hit lia̍p chin-chu.” 47 “Thian-kok mā chhin-chhiūⁿ lâng tī ô͘-ni̍h pha-bāng, lia̍h ta̍k khoán hî; 48 bāng móa chiū thoa chiūⁿ-hōaⁿ, chē lo̍h-lâi, kéng hó-ê khǹg lo̍h-khì tháng-á lāi, bái-ê hiat-ka̍k. 49 Kim-sè ê chiong-kio̍k mā chhin-chhiūⁿ án-ni; thiⁿ-sài beh chhut-khì, tùi gī-lâng ê tiong-kan kā pháiⁿ-lâng hun-pia̍t chhut-lâi, 50 hiat-lo̍h hé-lô͘; tī hia in ōe thî-khàu, kā-gê chhiat-chhí.” 51 Iâ-so͘ mn̄g I ê bûn-tô͘ kóng, “Chiah-ê lín lóng ū bêng-pe̍k bô?” In ìn kóng, “Ū.” 52 I chiū kā in kóng, “Só͘-í, ta̍k ê ha̍k-si̍p Thian-kok tō-lí ê keng-ha̍k-kàu-su, chhin-chhiūⁿ chi̍t ke ê chú-lâng tùi chhng-khò͘ kā sin kap kū ê mi̍h-kiāⁿ lóng poaⁿ chhut-lâi.” 53 Iâ-so͘ kóng chiah-ê phì-jū liáu-āu lī-khui hia, 54 tò-khì ka-kī ê kò͘-hiong. I tī in ê hōe-tn̂g kà-sī lâng, in lóng chin tio̍h-kiaⁿ, kóng, “Chit-ê lâng tùi tó-ūi tit-tio̍h chit khoán ê tì-hūi kap kiâⁿ sîn-jiah ê khùi-la̍t? 55 I kiám m̄-sī hit-ê ba̍k-chhiūⁿ ê kiáⁿ? I ê lāu-bú kiám m̄-sī kiò-chòe [Má-lī-a]? I ê hiaⁿ-tī kiám m̄-sī [Ngá-kok], [Iok-sek], [Se-bûn], kap [Iû-tāi]? 56 I ê sió-bē kiám m̄-sī lóng kap lán tī chia? Án-ni, chit-ê lâng tùi tó-ūi tit-tio̍h chit khoán ê tì-hūi kap khùi-la̍t?” 57 In soah tùi Iâ-so͘ khí hoán-kám. Iâ-so͘ kā in kóng, “Sian-ti tī ka-kī ê kò͘-hiong ka-kī ê ka-cho̍k í-gōa, it-tēng ōe siū chun-tiōng.” 58 In-ūi in m̄-sìn, Iâ-so͘ tī hia bô kiâⁿ chin chōe sîn-jiah.

Má-thài 14

1 Hit sî, [Ka-lī-lī] hun-hong ê ông [Hi-lu̍t] thiaⁿ-tio̍h Iâ-so͘ ê miâ-siaⁿ, 2 chiū tùi i ê pō͘-hā kóng, “Chit-ê lâng sī Si-sóe-chiá [Iok-hān], i í-keng tùi sí-lâng tiong koh-oa̍h, só͘-í chiah ū koân-lêng kiâⁿ chiah-ê sîn-jiah.” 3 Goân-lâi, [Hi-lu̍t] ūi-tio̍h i ê sió-tī [Hui-le̍k] ê bó͘ [Hi-lô-tí] ê iân-kò͘ ū lia̍h [Iok-hān], kā i liān khí-lâi, koaiⁿ-lo̍h kaⁿ. 4 In-ūi [Iok-hān] tiāⁿ-tiāⁿ tùi i kóng, “Lí chhōa chit-ê hū-jîn-lâng chòe bó͘ bô ha̍p-hoat.” 5 [Hi-lu̍t] siūⁿ-beh kā i thâi, put-kò kiaⁿ kûn-chiòng, in-ūi in lóng siūⁿ-kóng i sī sian-ti. 6 [Hi-lu̍t] choh siⁿ-ji̍t ê sî, [Hi-lô-tí] ê cha-bó͘-kiáⁿ tī lâi-pin bīn-chêng thiàu-bú; [Hi-lu̍t] chin hoaⁿ-hí, 7 chiū kong-khai chiù-chōa tah-èng hit-ê cha-bó͘ gín-á bô-lūn kiû sím-mi̍h lóng beh hō͘ i. 8 Cha-bó͘ gín-á hō͘ lāu-bú sái-lōng, chiū kóng, “Chhiáⁿ chiong Si-sóe-chiá [Iok-hān] ê thâu-khak khǹg tī pôaⁿ-ni̍h hō͘ góa.” 9 Ông ê sim chin kan-khó͘, put-kò in-ūi í-keng tī kùi-pin ê bīn-chêng chiù-chōa, chiū bēng-lēng chiàu só͘ kiû ê hō͘ i. 10 Ông chhe lâng khì kaⁿ-ni̍h chām [Iok-hān] ê thâu, 11 chiong thâu-khak hē tī pôaⁿ-ni̍h, kau hō͘ cha-bó͘ gín-á, cha-bó͘ gín-á chiū phâng khì hō͘ i ê lāu-bú. 12 [Iok-hān] ê bûn-tô͘ lâi siu i ê sin-si khì bâi-chòng, jiân-āu khì kā Iâ-so͘ pò-kò. 13 Iâ-so͘ thiaⁿ-tio̍h chit-ê siau-sit chiū lī-khui hia, kan-ta ka-kī chē-chûn thòe-khì phian-phiah bô-lâng tòa ê só͘-chāi. Chi̍t tōa-tīn lâng thiaⁿ-tio̍h chiū tùi ta̍k siâⁿ-chhī kiâⁿ-lō͘ tè I. 14 Iâ-so͘ chiūⁿ-hōaⁿ, khòaⁿ-tio̍h chi̍t tōa-tīn lâng chiū khó-lîn in, i-hó in ê pīⁿ. 15 Hông-hun-àm, bûn-tô͘ óa-lâi kā I kóng, “Chia sī phian-phiah ê só͘-chāi, thiⁿ mā teh àm à; chhiáⁿ kā kûn-chiòng kái-sàn, hō͘ in thang ka-kī khì hù-kūn ê chng-siā bóe chia̍h-mi̍h.” 16 Iâ-so͘ ìn kóng, “In m̄-bián khì, lín hō͘ in chia̍h.” 17 Bûn-tô͘ tùi I kóng, “Lán chia chí-ū gō͘ ê piáⁿ, nn̄g bé hî.” 18 Iâ-so͘ kóng, “The̍h lâi chia hō͘ góa.” 19 I chiū kiò chèng-lâng chē tī chháu-po͘, jiân-āu the̍h hit gō͘ ê piáⁿ kap nn̄g bé hî, ǹg thiⁿ kám-siā; piáⁿ peh-khui, the̍h hō͘ bûn-tô͘, bûn-tô͘ chiū pun hō͘ chèng-lâng. 20 Tāi-ke lóng chia̍h, chia̍h kàu pá. Bûn-tô͘ khioh chia̍h chhun ê chhùi-sut-á, móa cha̍p-jī nâ. 21 Chia̍h ê lâng, hū-jîn-lâng kap gín-á bô sǹg, iok ū gō͘-chheng ê ta-po͘-lâng. 22 Iâ-so͘ sûi-sî pek bûn-tô͘ chiūⁿ-chûn seng kè-khì tùi-bīn hōaⁿ, I ka-kī lâu teh kái-sàn kûn-chiòng. 23 Kûn-chiòng sì-sòaⁿ liáu-āu, I ka-kī chiūⁿ-soaⁿ kî-tó. Thiⁿ àm ê sî, I iáu ka-kī chi̍t ê tī hia. 24 Hit sî, chûn í-keng lī hōaⁿ chin hn̄g, in-ūi chìⁿ-hong hō͘ éng poah-lâi poah-khì. 25 Thiⁿ beh kng ê sî, Iâ-so͘ tī ô͘ ê téng-bīn ǹg bûn-tô͘ hia kiâⁿ-khì. 26 Bûn-tô͘ khòaⁿ-tio̍h I tī ô͘ ê téng-bīn teh kiâⁿ, chin tio̍h-kiaⁿ, kóng, “Sī kúi!” In kiaⁿ-kah tōa-siaⁿ hoah chhut-lâi. 27 Iâ-so͘ sûi-sî kā in kóng, “An-sim, sī góa, m̄-bián kiaⁿ!” 28 [Pí-tek] ìn kóng, “Chú ah, nā chin-chiàⁿ sī lí, bēng-lēng góa kiâⁿ chúi-bīn khì lí hia.” 29 Iâ-so͘ kóng, “Lâi!” [Pí-tek] chiū tùi chûn-téng lo̍h-lâi, kiâⁿ chúi-bīn khì Iâ-so͘ hia. 30 I chi̍t-ē khòaⁿ-tio̍h hong hiah-ni̍h tōa chiū kiaⁿ, soah beh tîm lo̍h-khì, tōa-siaⁿ hoah, “Chú ah, kiù-leh-ò͘!” 31 Iâ-so͘ sûi-sî chhun-chhiú kā i khiú-teh, kóng, “Sió-sìn ê lâng, sī-án-chóaⁿ teh giâu-gî?” 32 In chiūⁿ-chûn, hong chiū tiām-khì. 33 Chûn-téng ê lâng kūi lo̍h-khì pài I, kóng, “Lí chin-chiàⁿ sī Siōng-tè ê Kiáⁿ!” 34 Iâ-so͘ kap bûn-tô͘ kè ô͘ liáu-āu, tī [Kek-nî-sat-le̍k] chiūⁿ-hōaⁿ. 35 Hit só͘-chāi ê lâng chi̍t-ē jīn-chhut Iâ-so͘, chiū phài lâng khì sì-chiu-ûi kā só͘-ū pīⁿ-lâng lóng chhōa lâi I hia. 36 In khún-kiû Iâ-so͘ hō͘ pīⁿ-lâng kan-ta bong I saⁿ-á-ku ê chhiu chiū hó; só͘-ū bong-tio̍h ê lâng lóng tit-tio̍h i-hó.

Má-thài 15

1 Ū Hoat-lī-sài-phài ê lâng kap keng-ha̍k-kàu-su tùi [Iâ-lō͘-sat-léng] lâi kìⁿ Iâ-so͘, mn̄g I kóng, 2 “Sī-án-chóaⁿ lí ê bûn-tô͘ bô seng sóe-chhiú chiū chia̍h-pn̄g, ûi-hoān kó͘-chá-lâng ê thoân-thóng?” 3 I ìn kóng, “Lín sī-án-chóaⁿ in-ūi lín ê thoân-thóng lâi ûi-hoān Siōng-tè ê kài-bēng? 4 Siōng-tè kóng, ‘Tio̍h hàu-kèng pē-bú’; koh kóng, ‘Mē lāu-pē á-sī mē lāu-bú ê lâng eng-kai chhú-sí.’ 5 M̄-kú lín kóng, ‘Lâng nā tùi ka-kī ê lāu-pē á-sī lāu-bú kóng: Góa eng-kai hō͘ lí ê í-keng hiàn hō͘ Siōng-tè, 6 i chiū bô su-iàu hàu-kèng lāu-pē. Án-ni, lín in-ūi ka-kī ê thoân-thóng hòe-tû Siōng-tè ê ōe. 7 Lín ké-hó ê lâng, [Í-sài-a] só͘ kóng koan-hē lín ê ū-giân chin tio̍h; i kóng: 8 Chit-ê chú-bîn ēng chhùi-tûn chun-kèng góa, in ê sim khiok lī-khui góa hn̄g-hn̄g. 9 In ēng lâng ê kui-lē chòe góa ê kà-sī kà-sī lâng; in kèng-pài góa lóng bô chhái-kang.” 10 Iâ-so͘ kiò chèng-lâng lâi, kā in kóng, “Tio̍h thiaⁿ, tio̍h liáu-kái: 11 M̄-sī tùi chhùi ji̍p-khì ê hō͘ lâng bô chheng-khì, sī tùi chhùi chhut-lâi ê chiah hō͘ lâng bô chheng-khì.” 12 Bûn-tô͘ lâi tùi I kóng, “Hoat-lī-sài-phài ê lâng thiaⁿ-tio̍h lí chit-ê ōe chin hoán-kám, lí chai bô?” 13 I ìn kóng, “M̄-sī góa ê Thiⁿ-pē chai-chèng ê, lóng beh kā i khau khí-lâi. 14 Chhut-chāi in kóng. In sī chhiⁿ-mî teh khan chhiⁿ-mî; nā chhiⁿ-mî khan chhiⁿ-mî, nn̄g ê lóng ōe poa̍h-lo̍h khut-á.” 15 [Pí-tek] ìn I kóng, “Chhiáⁿ lí kā goán kóe-seh chit-ê phì-jū.” 16 I chiū kóng, “Liân lín to iáu bô bêng-pe̍k ò͘? 17 Lín kiám bô liáu-kái, só͘-ū tùi chhùi ji̍p ê lóng ji̍p-khì pak-tó͘ lāi, āu-lâi pàng lo̍h-khì piān-só͘? 18 Tùi chhùi chhut-lâi ê sī tùi sim chhut, che chiah ōe hō͘ lâng bô chheng-khì. 19 In-ūi tùi sim chhut-lâi ê ū pháiⁿ liām-thâu, hiong-sat, su-thong, kan-îm, thau-the̍h, gūi-chèng, kap húi-pòng. 20 Chiah-ê chiah ōe hō͘ lâng bô chheng-khì; bô sóe-chhiú chiū chia̍h-pn̄g, bōe hō͘ lâng bô chheng-khì.” 21 Iâ-so͘ lī-khui hit só͘-chāi, thòe-khì [Thài-ní] kap [Se-tùn] ê kéng-lāi. 22 Tú-hó ū chi̍t ê [Ka-lâm] ê hū-jîn-lâng tùi hit tōe-khu lâi, tōa-siaⁿ hoah, “Chú ah, Tāi-pi̍t ê Kiáⁿ, lîn-bín góa! Góa ê cha-bó͘-kiáⁿ hō͘ siâ-sîn hū-sin, chin kan-khó͘.” 23 Iâ-so͘ bô kā i ìn pòaⁿ-kù. I ê bûn-tô͘ lâi kiû I kóng, “Kā i kóaⁿ cháu, i tè tī lán āu-bīn ti̍t-ti̍t teh hoah.” 24 Iâ-so͘ ìn kóng, “Góa siū chhe-phài chí-ū sī beh chhē [Í-sek-lia̍t]-ke sit-lo̍h ê iûⁿ.” 25 M̄-kú hū-jîn-lâng lâi kūi tī I ê bīn-chêng, kóng, “Chú ah, chhiáⁿ pang-chān góa!” 26 Iâ-so͘ ìn kóng, “The̍h gín-á ê chia̍h-mi̍h hiat hō͘ káu-á chia̍h, m̄-hó.” 27 Hū-jîn-lâng kóng, “Chú, sī lah, káu-á mā ū chia̍h chú-lâng toh-téng lak lo̍h-lâi ê piáⁿ-iù-á.” 28 Āu-lâi, Iâ-so͘ ìn kóng, “Hū-jîn-lâng, lí ê sìn-sim chin tōa. Hō͘ lí ê sim-goān si̍t-hiān!” I ê cha-bó͘-kiáⁿ tī hit-chūn tit-tio̍h i-hó. 29 Iâ-so͘ lī-khui hit só͘-chāi, iân [Ka-lī-lī] ô͘-piⁿ kiâⁿ, āu-lâi chiūⁿ-soaⁿ, tī hia chē. 30 Ū chin tōa-tīn ê lâng chhōa kha-chhiú khê-khì, kha pái, ba̍k-chiu bô khòaⁿ-kìⁿ, chhùi bōe kóng-ōe, kap chin chōe ū pa̍t khoán pīⁿ ê lâng lâi Iâ-so͘ hia, hē tī I ê kha-chêng, I chiū kā in i-hó. 31 Chèng-lâng khòaⁿ-tio̍h bōe-kóng-ōe ê lâng ōe kóng-ōe, chhiú khê-khì ê lâng ho̍k-goân, kha pái ê lâng ōe kiâⁿ, bōe khòaⁿ-kìⁿ ê lâng ōe khòaⁿ-kìⁿ, chin tio̍h-kiaⁿ, chiū kui êng-kng hō͘ [Í-sek-lia̍t] ê Siōng-tè. 32 Iâ-so͘ kiò I ê bûn-tô͘ lâi, kā in kóng, “Góa khó-lîn chit tīn lâng, in-ūi in í-keng kap góa chòe-hé saⁿ-ji̍t kú, hiān-chāi bô mi̍h thang chia̍h lah. Góa m̄-kam hō͘ in sì-sòaⁿ iau-iau tńg-khì, kiaⁿ-liáu in tī lō͘-tiong hūn-tó.” 33 Bûn-tô͘ kā I kóng, “Tī chit-ê phian-phiah bô-lâng tòa ê só͘-chāi, goán beh khì tó-ūi the̍h hiah-chōe piáⁿ lâi hō͘ chiah-chōe lâng chia̍h?” 34 Iâ-so͘ mn̄g in kóng, “Lín ū jōa chōe piáⁿ?” In kóng, “Chhit ê; mā ū kúi-bé-á sòe bé hî.” 35 I bēng-lēng kûn-chiòng chē lo̍h-khì thô͘-kha, 36 jiân-āu the̍h hit chhit ê piáⁿ kap hiah-ê hî, kám-siā, peh-khui, the̍h hō͘ bûn-tô͘, bûn-tô͘ chiū the̍h hō͘ kûn-chiòng. 37 Chèng-lâng lóng chia̍h, chia̍h kàu pá; in khioh chia̍h chhun ê chhùi-sut-á, tóe móa chhit láng. 38 Chia̍h ê lâng, hū-jîn-lâng kap gín-á bô sǹg, kan-ta ta-po͘-lâng chiū ū sì-chheng. 39 Iâ-so͘ kái-sàn kûn-chiòng liáu-āu, chiūⁿ-chûn khì [Má-ka-tan] tōe-khu.

Má-thài 16

1 Ū Hoat-lī-sài-phài kap Sat-to͘-kai-phài ê lâng lâi chhì-thàm Iâ-so͘, iau-kiû I hō͘ in khòaⁿ tùi thiⁿ lâi ê sîn-jiah. 2 Iâ-so͘ ìn kóng, “Hông-hun ê sî, lín kóng ‘Bîn-á-chài ōe hó-thiⁿ, in-ūi thiⁿ-sek âng.’ 3 Chá-khí-sî lín kóng ‘Kin-á-ji̍t ū hong-hō͘, in-ūi thiⁿ-sek àm koh âng.’ Lín to khòaⁿ ōe-chhut thiⁿ ê kéng-siōng, ná khòaⁿ bōe-chhut chit-ê sî-tāi ê tiāu-thâu. 4 Siâ-ok kan-îm ê sè-tāi kiû sîn-jiah, m̄-kú [Iok-ná] ê sîn-jiah í-gōa bōe-koh ū sîn-jiah hō͘ chit sè-tāi ê lâng.” Kóng liáu, Iâ-so͘ chiū lī-khui in khì pa̍t-ūi. 5 Bûn-tô͘ kàu ô͘ ê hit pêng hōaⁿ chiah chai in bōe kì-tit tòa piáⁿ. 6 Iâ-so͘ kā in kóng, “Tio̍h chù-ì, tio̍h tî-hông [Hoat-lī-sài]-phài kap Sat-to͘-kai-phài ê kàⁿ.” 7 In hō͘-siōng gī-lūn kóng, “Sī in-ūi lán bô tòa piáⁿ sī-bô?” 8 Iâ-so͘ chai-iáⁿ chiū kóng, “Sió-sìn ê lâng, lín sī-án-chóaⁿ teh gī-lūn bô tòa piáⁿ ê tāi-chì? 9 Lín kiám iáu-bē bêng-pe̍k, kiám bōe kì-tit góa ēng gō͘ ê piáⁿ hō͘ gō͘-chheng lâng chia̍h, chia̍h chhun-ê lín ū khioh kúi nâ? 10 Lín kiám bōe kì-tit góa ēng chhit ê piáⁿ hō͘ sì-chheng lâng chia̍h, chia̍h chhun-ê lín ū khioh kúi láng? 11 Sī-án-chóaⁿ lín bô bêng-pe̍k góa kā lín kóng ê m̄-sī koan-hē piáⁿ ê tāi-chì? Tio̍h tî-hông Hoat-lī-sài-phài kap Sat-to͘-kai-phài ê kàⁿ!” 12 Chit sî bûn-tô͘ chiah bêng-pe̍k Iâ-so͘ m̄-sī kóng tio̍h tî-hông piáⁿ ê kàⁿ, sī tio̍h tî-hông Hoat-lī-sài-phài kap [Sat-to͘-kai]-phài ê kà-sī. 13 Iâ-so͘ lâi-kàu [Khái-sat-lī-a] [Hui-li̍p-pí] kéng-lāi ê sî, mn̄g I ê bûn-tô͘ kóng, “Lâng kóng Jîn-chú sī sím-mi̍h lâng?” 14 In ìn kóng, “Ū lâng kóng sī Si-sóe-chiá [Iok-hān]; ū lâng kóng sī [Í-lī-a]; mā ū lâng kóng sī [Iâ-lī-bí] á-sī sian-ti tiong ê chi̍t ūi.” 15 Iâ-so͘ mn̄g in kóng, “Lín leh, lín kóng góa sī sím-mi̍h lâng?” 16 [Se-bûn] [Pí-tek] ìn kóng, “Lí sī Ki-tok, éng-oa̍h Siōng-tè ê Kiáⁿ.” 17 Iâ-so͘ ìn i kóng, “[Se-bûn] [Pa-iok-ná], lí chin ū hok-khì, in-ūi kā lí khé-sī ê m̄-sī lâng, sī góa ê Thiⁿ-pē. 18 Góa koh kā lí kóng, lí sī [Pí-tek], sī chio̍h-pôaⁿ, góa beh tī chit-ê chio̍h-pôaⁿ téng khí-chō góa ê kàu-hōe, im-kan sí-bông ê koân-sè to bōe iâⁿ-kè i. 19 Góa beh chiong Thian-kok ê só-sî hō͘ lí; lí tī tōe-chiūⁿ kìm-chí ê, tī thiⁿ-téng mā ōe kìm-chí; lí tī tōe-chiūⁿ ún-chún ê, tī thiⁿ-téng mā ōe ún-chún.” 20 Āu-lâi, I bēng-lēng bûn-tô͘ m̄-thang kā lâng kóng I chiū-sī Ki-tok. 21 Hit sî, Iâ-so͘ khai-sí tùi I ê bûn-tô͘ piáu-sī I it-tēng tio̍h khì [Iâ-lō͘-sat-léng], tùi tiúⁿ-ló, chè-si-tiúⁿ, kap keng-ha̍k-kàu-su siū chin chōe khó͘-lān, koh hō͘ lâng hāi-sí, tē-saⁿ ji̍t Siōng-tè ōe hō͘ I koh-oa̍h. 22 [Pí-tek] chiū khiú Iâ-so͘ khì piⁿ-a, kā I chek-pī kóng, “Chú ah, choa̍t-tùi m̄-thang! Lí bōe ēng-tit ū chit khoán tāi-chì!” 23 Iâ-so͘ oa̍t-tńg-sin tùi [Pí-tek] kóng, “Sat-tàn, siám-khui! Lí teh kā góa tîⁿ-kha-pòaⁿ-chhiú; lí siūⁿ ê m̄-sī Siōng-tè ê sū, sī lâng ê sū.” 24 Āu-lâi, Iâ-so͘ tùi I ê bûn-tô͘ kóng, “Beh tè góa ê lâng, tio̍h oân-choân hó͘-tēng ka-kī, giâ ka-kī ê si̍p-jī-kè lâi tè góa. 25 In-ūi beh kiù ka-kī ê sìⁿ-miā ê, ōe sòng-sit sìⁿ-miā; ūi-tio̍h góa ê iân-kò͘ sòng-sit ka-kī ê sìⁿ-miā ê, ōe tit-tio̍h sìⁿ-miā. 26 Lâng nā tit-tio̍h choân sè-kài soah sòng-sit ka-kī ê sìⁿ-miā ū sím-mi̍h lī-ek? Lâng ōe-tàng ēng sím-mi̍h tāi-kè lâi kau-ōaⁿ ka-kī ê sìⁿ-miā? 27 Jîn-chú teh-beh tī I ê Pē ê êng-iāu tiong kap I ê thiⁿ-sài lâi-lîm, hit sî I ōe chiàu ta̍k ê lâng ê hêng-ûi kā in pò-siúⁿ á-sī hêng-hoa̍t. 28 Góa si̍t-chāi kā lín kóng, khiā tī chia ê lâng, ū-ê iáu-bē sí í-chêng ōe khòaⁿ-kìⁿ Jîn-chú choh-ông lâi-lîm.”

Má-thài 17

1 La̍k ji̍t āu, Iâ-so͘ chhōa [Pí-tek], [Ngá-kok], kap [Ngá-kok] ê sió-tī [Iok-hān], kan-ta in ka-kī peh-chiūⁿ chi̍t chō koân-soaⁿ. 2 Tī in bīn-chêng, Iâ-so͘ ê hêng-siōng kái-piàn: I ê bīn chhin-chhiūⁿ ji̍t-thâu hoat-kng; I ê saⁿ piàn-kah chhin-chhiūⁿ kng hiah-ni̍h pe̍h. 3 Hut-jiân-kan, [Mô͘-se] kap [Í-lī-a] tùi in hián-hiān, kap I kóng-ōe. 4 [Pí-tek] tùi Iâ-so͘ kóng, “Chú ah, lán tī chia chin hó! Lí nā beh, góa tī chia tah saⁿ keng liâu-á, chi̍t keng hō͘ lí, chi̍t keng hō͘ [Mô͘-se], chi̍t keng hō͘ [Í-lī-a].” 5 I iáu teh kóng ê sî, hut-jiân ū chi̍t phìⁿ chhàn-lān ê hûn kā in tà-leh, ū siaⁿ tùi hûn chhut-lâi, kóng, “Chit-ê sī góa só͘ thiàⁿ ê Kiáⁿ, I, góa chin ì-ài, lín tio̍h thiaⁿ-thàn I.” 6 Bûn-tô͘ chi̍t-ē thiaⁿ-tio̍h chiū phak lo̍h-khì, hui-siông kiaⁿ-hiâⁿ. 7 Iâ-so͘ kiâⁿ óa-khì, kā in bong, kóng, “Khí-lâi, m̄-bián kiaⁿ!” 8 In chi̍t-ē gia̍h-ba̍k khòaⁿ, chí-ū khòaⁿ-tio̍h Iâ-so͘, í-gōa bô pa̍t-lâng. 9 In lo̍h-soaⁿ ê sî, Iâ-so͘ bēng-lēng in kóng, “Jîn-chú tùi sí-lâng tiong koh-oa̍h í-chêng, lín m̄-thang kā lâng kóng-khí só͘ khòaⁿ-kìⁿ ê īⁿ-siōng.” 10 Bûn-tô͘ mn̄g I, kóng, “Nā án-ni, sī-án-chóaⁿ keng-ha̍k-kàu-su kóng [Í-lī-a] it-tēng tio̍h seng lâi?” 11 Iâ-so͘ ìn kóng, “[Í-lī-a] it-tēng tio̍h lâi tiông-sin chéng-lí it-chhè. 12 Góa kā lín kóng, [Í-lī-a] í-keng lâi lah, m̄-kú lâng m̄-bat i, hoán-tńg chiàu ka-kī ê ì-sù tùi-thāi i. Chhin-chhiūⁿ án-ni, Jîn-chú mā teh-beh tī in ê chhiú-ē siū-khó͘.” 13 Hit sî bûn-tô͘ chiah bêng-pe̍k I tùi in kóng ê sī chí Si-sóe-chiá Iok-hān. 14 In lâi-kàu kûn-chiòng hia, ū chi̍t ê lâng lâi, kūi tī Iâ-so͘ ê kha-chêng, 15 tùi I kóng, “Chú ah, lîn-bín góa ê kiáⁿ! In-ūi i tì-tio̍h iûⁿ-hîn, hui-siông kan-khó͘, put-sî poa̍h-lo̍h hé, mā put-sî poa̍h-lo̍h chúi. 16 Góa chhōa i kàu lí ê bûn-tô͘ hia, in bô hoat-tō͘ kā i i-hó.” 17 Iâ-so͘ ìn kóng, “Ài à, m̄-sìn koh hú-pāi ê sè-tāi, góa tio̍h kap lín tòa jōa kú? Góa tio̍h koh jím-nāi lín jōa kú? Kā i chhōa lâi góa chia.” 18 Iâ-so͘ chek-pī siâ-sîn, siâ-sîn chiū tùi gín-á chhut-khì; i ê pīⁿ sûi-sî hó-khì. 19 Āu-lâi, bûn-tô͘ su-hā lâi mn̄g Iâ-so͘, “Sī-án-chóaⁿ goán bô hoat-tō͘ kā siâ-sîn kóaⁿ chhut-khì?” 20 Iâ-so͘ kā in kóng, “Sī in-ūi lín sió-sìn. Góa si̍t-chāi kā lín kóng, lín ê sìn nā ū kòa-chhài-chí hiah tōa, lín tùi chit chō soaⁿ kóng, ‘Tùi chia sóa khì hia!’ soaⁿ mā ōe sóa khì; bô chi̍t hāng sū lín chòe bōe kàu.” 21 Bûn-tô͘ chū-chi̍p tī [Ka-lī-lī] ê sî, Iâ-so͘ kā in kóng, “Jîn-chú teh-beh hō͘ lâng chhut-bōe. 23 In ōe kā I hāi-sí, tē-saⁿ ji̍t Siōng-tè ōe hō͘ I koh-oa̍h.” Bûn-tô͘ chiū hui-siông siong-sim. 24 Iâ-so͘ kap bûn-tô͘ lâi-kàu [Ka-pek-lông] ê sî, ū chi̍t-kóa siu sèng-tiān-sè ê lâng khì mn̄g [Pí-tek], “Lín lāu-su ū la̍p sèng-tiān-sè bô?” 25 I kóng, “Ū.” [Pí-tek] ji̍p-khì chhù-lāi ê sî, Iâ-so͘ seng mn̄g i kóng, “Tōe-chiūⁿ ê kun-ông sī tùi sím-mi̍h-lâng siu koan-sè á-sī lâng-thâu-sè? Sī tùi pún-kok-lâng á-sī gōa-kok-lâng? [Se-bûn], lí siūⁿ án-chóaⁿ?” 26 [Pí-tek] ìn kóng, “Tùi gōa-kok-lâng.” Iâ-so͘ kā i kóng, “Án-ni, pún-kok-lâng chiū m̄-bián la̍p-sè lò͘. 27 Put-kò, lán ūi-tio̍h bô ài tek-chōe chiah-ê lâng, lí khì ô͘-ni̍h tiò-hî, tiò khí-lâi ê thâu-chi̍t bé, kā hî ê chhùi peh-khui chiū ōe khòaⁿ-tio̍h chi̍t ê gûn-á, the̍h khì hō͘ in, thòe góa kap lí la̍p sèng-tiān-sè.”

Má-thài 18

1 Hit sî, bûn-tô͘ lâi mn̄g Iâ-so͘, “Tī Thian-kok sím-mi̍h-lâng siōng-tōa?” 2 Iâ-so͘ kiò chi̍t ê gín-á lâi, hō͘ i khiā tī in tiong-kan, 3 kóng, “Góa si̍t-chāi kā lín kóng, lín nā bô kái-piàn pìⁿ-chòe chhin-chhiūⁿ gín-á, choa̍t-tùi bōe-tàng ji̍p Thian-kok. 4 Só͘-í, lâng ka-kī khiam-pi chhin-chhiūⁿ chit-ê gín-á, chit-ê lâng tī Thian-kok chiū-sī siōng-tōa. 5 Bô-lūn sím-mi̍h lâng, ūi-tio̍h góa ê miâ chiap-la̍p chit khoán gín-á chiū-sī chiap-la̍p góa.” 6 “Bô-lūn sím-mi̍h-lâng hō͘ sìn góa ê lâng tiong-kan bî-sòe ê chi̍t-ê hoān-chōe, lêng-khó hō͘ lâng ēng tōa chio̍h-bō pa̍k tī ām-kún thiām-lo̍h chhim-hái. 7 Chit-ê sè-kan chhám à, in-ūi ū hō͘ lâng poa̍h-tó hoān-chōe. Hō͘ lâng hoān-chōe ê sū it-tēng ū, m̄-kú ín-khí lâng hoān-chōe ê lâng chhám à. 8 “Lí ê chi̍t ki chhiú á-sī chi̍t ki kha nā hō͘ lí hoān-chōe, tio̍h kā i chām khí-lâi, tàn hiat-ka̍k. Lêng-khó chi̍t-kha chi̍t-chhiú ji̍p éng-oán-oa̍h, pí siang-kha siang-chhiú hó-hó hō͘ lâng hiat-lo̍h éng-oán ê hé khah hó. 9 Lí ê ba̍k-chiu nā hō͘ lí hoān-chōe, tio̍h kā i ó͘ chhut-lâi, tàn hiat-ka̍k. Lêng-khó kiám chi̍t lúi ba̍k-chiu ji̍p éng-oán-oa̍h, pí nn̄g lúi ba̍k-chiu hó-hó, hō͘ lâng hiat-lo̍h hé teh to̍h ê tōe-ge̍k khah hó.” 10 “Lín tio̍h kín-sīn, m̄-thang khòaⁿ-khin chiah-ê bî-sòe ê lâng ê chi̍t ê. Góa kā lín kóng, in ê thiⁿ-sài tī thiⁿ-téng sî-siông teh kìⁿ góa Thiⁿ-pē ê bīn. 12 Lín siūⁿ siáⁿ-khoán? Ū chi̍t ê lâng ū chi̍t-pah chiah iûⁿ, kî-tiong chi̍t chiah sit-bê, i kiám bōe chiong káu-cha̍p-káu chiah pàng tī soaⁿ-téng, khì chhē hit chiah sit-bê-ê? 13 Góa si̍t-chāi kā lín kóng, i nā chhē-tio̍h hit chiah sit-bê ê iûⁿ, it-tēng chin hoaⁿ-hí, pí ū káu-cha̍p-káu chiah bô sit-bê-ê koh-khah hoaⁿ-hí. 14 Siâng-khoán, lín ê Thiⁿ-pē m̄-kam chiah-ê bî-sòe ê lâng ê chi̍t ê bia̍t-bông.” 15 “Lí ê hiaⁿ-tī á-sī chí-bē nā tek-chōe lí, tio̍h khì chhē i, kan-ta lín nn̄g lâng chòe-hé ê sî su-hā kā i chí-chhut chhò-gō͘. I nā beh thiaⁿ, chiū hôe-ho̍k lí kap i chòe hiaⁿ-tī á-sī chí-bē ê koan-hē. 16 I nā m̄-thiaⁿ, tio̍h chhōa chi̍t nn̄g ê lâng kap lí khì, án-ni ta̍k kù ōe ū nn̄g ê á-sī saⁿ ê lâng thang choh-chèng. 17 I nā iáu m̄-thiaⁿ, tio̍h kā kàu-hōe kóng; i nā liân kàu-hōe to m̄-thiaⁿ, chiū kā i khòaⁿ-chòe Gōa-pang-lâng á-sī bau̍h-sè-ê.” 18 “Góa si̍t-chāi kā lín kóng, lín tī tōe-chiūⁿ kìm-chí ê, tī thiⁿ-téng mā ōe kìm-chí; lín tī tōe-chiūⁿ ún-chún ê, tī thiⁿ-téng mā ōe ún-chún. 19 “Góa koh kā lín kóng, lín tiong-kan nā ū nn̄g ê lâng tī tōe-chiūⁿ tâng-sim ha̍p-ì kî-kiû, góa ê Thiⁿ-pē lóng ōe kā in sêng-choân. 20 In-ūi, ū nn̄g ê á-sī saⁿ ê lâng hōng góa ê miâ chū-hōe, góa chiū tī in tiong-kan.” 21 [Pí-tek] lâi mn̄g Iâ-so͘, “Chú ah, góa ê hiaⁿ-tī á-sī chí-bē tek-chōe góa, góa tio̍h sià-bián i kúi piàn? Kàu chhit piàn sī-bô?” 22 Iâ-so͘ kā i kóng, “M̄-sī. Góa m̄-sī kā lí kóng tio̍h kàu chhit piàn, sī tio̍h kàu chhit-cha̍p ê chhit piàn. 23 “Án-ni, Thian-kok thang ēng chit-ê phì-jū lâi soat-bêng: Ū chi̍t ê kok-ông beh kap i ê lô͘-po̍k kiat-siàu, 24 i khai-sí sǹg-siàu ê sî, ū lâng chiong khiàm kúi-nā pah bān gûn-á ê lâng chhōa lâi i ê bīn-chêng. 25 Hit-ê lâng bōe-tàng hêng, chú-lâng chiū bēng-lēng lâng chiong hit-ê lâng kap i ê bó͘-kiáⁿ í-ki̍p it-chhè só͘-ū ê lóng khì bōe lâi hêng-chè. 26 Hit-ê lô͘-po̍k chiū kūi lo̍h-khì kiû kóng, ‘Chhiáⁿ hō͘ góa ān chi̍t-ē, góa ōe lóng hêng.’ 27 Lô͘-po̍k ê chú-lâng chiū khó-lîn i, chhat-siau i ê chè, pàng i khì. 28 “Hit-ê lô͘-po̍k chhut-khì, tú-tio̍h chi̍t ê pîⁿ-pîⁿ chòe lô͘-po̍k-ê, hit-ê lâng chí-ū khiàm i kúi ê gûn-á, chiū kā i lia̍h, tīⁿ i ê ām-kún, kóng, ‘Lí só͘ khiàm ê, lóng tio̍h hêng!’ 29 Pîⁿ-pîⁿ chòe lô͘-po̍k-ê kūi lo̍h-khì kiû i kóng, ‘Pài-thok hō͘ góa ān chi̍t-ē, góa ōe lóng hêng.’ 30 I m̄-khéng, tian-tò chiong chit-ê lâng koaiⁿ-lo̍h kaⁿ, koaiⁿ kàu só͘ khiàm ê lóng hêng chheng-chhó. 31 Lēng-gōa pîⁿ-pîⁿ chòe lô͘-po̍k-ê khòaⁿ-tio̍h, hui-siông thòng-sim, chiū chiong só͘ hoat-seng it-chhè ê tāi-chì khì kā chú-lâng pò-kò. 32 Chú-lâng chiū kiò hit-ê lô͘-po̍k lâi, tùi i kóng, ‘Lí chit-ê pháiⁿ lô͘-po̍k, in-ūi lí tùi góa kiû, góa chiū chiong lí só͘ khiàm ê chè lóng chhat-siau. 33 Góa ū lîn-bín lí, lí kiám m̄ eng-kai chhin-chhiūⁿ án-ni lîn-bín hit-ê pîⁿ-pîⁿ chòe lô͘-po̍k-ê?’ 34 I ê chú-lâng chin siū-khì, chiū kā i koaiⁿ-lo̍h kaⁿ siū-hêng, koaiⁿ kàu i chiong it-chhè ê chè-bū lóng hêng chheng-chhó. 35 “Lín ta̍k ê lâng nā bô tùi sim-tóe sià-bián ka-kī ê hiaⁿ-tī á-sī chí-bē, góa ê Thiⁿ-pē mā ōe án-ni tùi-thāi lín, bōe kā lín sià-bián.”

Má-thài 19

1 Iâ-so͘ kóng chiah-ê ōe liáu-āu, lī-khui [Ka-lī-lī] khì [Iok-tàn]-hô tùi-hōaⁿ ê [Iû-thài] tōe-khu. 2 Ū kui tōa-tīn ê lâng tè I, I chiū tī hia i-hó in ê pīⁿ. 3 Ū chi̍t-kóa Hoat-lī-sài-phài ê lâng lâi chhì-thàm I, kóng, “Lâng bô-lūn sím-mi̍h lí-iû to thang lî i ê bó͘, ū ha̍h Lu̍t-hoat bô?” 4 Iâ-so͘ ìn kóng, “Lín kiám bô tha̍k-tio̍h Chhòng-chō-chú tī khí-thâu chhòng-chō lâng ū lâm ū lú? 5 Siōng-tè kóng, ‘In-ūi chit-ê lí-iû, lâng beh lī-khui i ê pē-bú, kap i ê bó͘ kiat-ha̍p, nn̄g lâng chiâⁿ-chòe chi̍t-thé.’ 6 Án-ni, in í-keng m̄-sī nn̄g ê, sī chi̍t-thé. Só͘-í, Siōng-tè só͘ phòe-ha̍p ê, lâng m̄-thang thiah-khui.” 7 Hoat-lī-sài-phài ê lâng mn̄g I kóng, “Nā án-ni, [Mô͘-se] sī-án-chóaⁿ bēng-lēng lâng hō͘ i ê bó͘ chi̍t tiuⁿ lî-hun-su chiū thang kā i lî?” 8 Iâ-so͘ ìn kóng, “In-ūi lín ê sim ngī, [Mô͘-se] chiah iông-ún lín lî lín ê bó͘. Khí-thâu chhòng-chō ê sî Siōng-tè ê ì-sù pèng m̄-sī án-ni. 9 Góa kā lín kóng, nā m̄-sī in-ūi bó͘ put-cheng, bōe ēng-tit kā i lî, nā kā i lî koh chhōa pa̍t ê hū-jîn-lâng chiū-sī hoān kan-îm.” 10 Bûn-tô͘ kā I kóng, “Kì-jiân hu-hū ê koan-hē sī án-ni, lêng-khó mài kiat-hun khah hó.” 11 Iâ-so͘ kā in kóng, “Chit-ê ōe m̄-sī ta̍k ê lâng lóng ōe-tàng chiap-siū, chí-ū ū chit khoán un-sù ê lâng chiah ōe. 12 Ū lâng tùi chhut-sì chiū bô sek-ha̍p kiat-hun; ū lâng sī jîn-ûi ê goân-in bōe-tàng kiat-hun; mā ū lâng sī ūi-tio̍h Thian-kok ê iân-kò͘ bô ài kiat-hun. Ōe-tàng chiap-siū ê lâng tio̍h chiap-siū.” 13 Ū lâng chhōa gín-á lâi Iâ-so͘ hia, ài I kā in hōaⁿ-chhiú kî-tó. Bûn-tô͘ chek-pī hiah-ê lâng. 14 M̄-kú Iâ-so͘ kóng, “Hō͘ gín-á lâi góa chia, m̄-thang kā in chó͘-tòng, in-ūi Thian-kok sī chit khoán lâng ê.” 15 I chiū kā in hōaⁿ-chhiú chiok-hok, jiân-āu lī-khui hia. 16 Ū chi̍t piàn, ū chi̍t ê lâng lâi chhē Iâ-so͘, tùi I kóng, “Lāu-su, góa tio̍h chòe sím-mi̍h hó-sū chiah ōe-tàng tit-tio̍h éng-oán ê oa̍h-miā?” 17 Iâ-so͘ ìn kóng, “Lí ná-ōe mn̄g góa hó ê sū? Chí-ū Chi̍t-ūi sī hó. Lí nā ài chìn-ji̍p éng-oán ê oa̍h-miā, tio̍h chun-siú kài-bēng.” 18 I mn̄g Iâ-so͘ kóng, “Sī tó chi̍t tiâu kài-bēng?” Iâ-so͘ ìn kóng, “M̄-thang thâi-sí lâng; m̄-thang kan-îm; m̄-thang thau-the̍h; m̄-thang choh gūi-chèng; 19 tio̍h hàu-kèng pē-bú; tio̍h thiàⁿ chhù-piⁿ chhin-chhiūⁿ thiàⁿ ka-kī.” 20 Chit-ê siàu-liân-lâng kā I kóng, “Chiah-ê góa it-ti̍t ū teh chun-siú, iáu khiàm sím-mi̍h?” 21 Iâ-so͘ ìn kóng, “Lí nā ài chòe oân-choân ê lâng, lí khì, khì bōe lí ê châi-sán, pun hō͘ sàn-chhiah-lâng, lí tī thiⁿ-téng chiū ū châi-pó, jiân-āu lâi tè góa.” 22 Siàu-liân-lâng thiaⁿ-tio̍h chit-ê ōe, chiū iu-iu chhiû-chhiû lī-khui; in-ūi i châi-sán chin chōe . 23 Iâ-so͘ chiū kā I ê bûn-tô͘ kóng, “Góa si̍t-chāi kā lín kóng, hó-gia̍h-lâng ji̍p Thian-kok si̍t-chāi chin khùn-lân! 24 Góa koh kā lín kóng, lo̍k-tô chhng-kè chiam-phīⁿ mā pí hó-gia̍h-lâng ji̍p Siōng-tè-kok koh-khah kán-tan.” 25 Bûn-tô͘ thiaⁿ-tio̍h, chin tio̍h-kiaⁿ, kóng, “Nā án-ni, sím-mi̍h-lâng ōe-tàng tit-tio̍h kiù?” 26 Iâ-so͘ chù-ba̍k kā in khòaⁿ, kóng, “Chit-ê sū, lâng chòe bōe-kàu, m̄-kú Siōng-tè ta̍k hāng lóng ōe.” 27 [Pí-tek] ìn kóng, “Goán í-keng pàng-sak it-chhè lâi tè lí lah, goán ōe tit-tio̍h sím-mi̍h?” 28 Iâ-so͘ tùi in kóng, “Góa si̍t-chāi kā lín kóng, chiong-lâi ê sin sè-kài, Jîn-chú chē tī I êng-kng ê pó-chō ê sî, lín tè góa ê lâng ōe chē tī cha̍p-jī ê pó-chō lâi sím-phòaⁿ [Í-sek-lia̍t] ê cha̍p-jī chi-cho̍k. 29 Ūi-tio̍h góa ê miâ pàng-sak ka-kī ê chhù, hiaⁿ-tī, chí-bē, pē-bú, kiáⁿ-jî, á-sī chhân-hn̂g ê lâng, lóng ōe tit-tio̍h pah pē ê pò-siúⁿ, koh sêng-siū éng-oán ê oa̍h-miā. 30 Chóng-sī chin chōe tē-it-ê ōe chòe siōng lō͘-bé; siōng lō͘-bé-ê ōe chòe tē-it.”

Má-thài 20

1 “Thian-kok chhin-chhiūⁿ chi̍t ê hn̂g-chú thàu-chá chhut-khì chhiàⁿ kang-lâng lâi i ê phû-tô-hn̂g chòe-kang. 2 I kap kang-lâng iok-tēng chi̍t ji̍t chi̍t ê gûn, chiū chhe in khì phû-tô-hn̂g chòe-kang. 3 Chá-khí-sî káu tiám chó-iū i koh chhut-khì, khòaⁿ-tio̍h ū chi̍t-kóa lâng tī chhī-tiûⁿ-kháu teh khiā, bô tāi-chì chòe, 4 chiū tùi in kóng, ‘Lín mā khì phû-tô-hn̂g chòe-kang, góa ōe hō͘ lín kong-tō ê kang-chîⁿ.’ 5 In chiū khì. Tiong-tàu cha̍p-jī tiám kap ē-po͘ saⁿ tiám chó-iū i koh chhut-khì, mā án-ni chòe. 6 Ē-po͘ gō͘ tiám, i koh chhut-khì, khòaⁿ-tio̍h ū chi̍t-kóa lâng khiā tī hia, chiū tùi in kóng, ‘Lín ná kui-ji̍t khiā tī chia, bô tāi-chì chòe.’ 7 In kā i kóng, ‘In-ūi bô-lâng chhiàⁿ goán.’ Chú-lâng kā in kóng, ‘Lín mā khì phû-tô-hn̂g chòe-kang.’ 8 “Hông-hun ê sî, hn̂g-chú kā i ê koán-ke kóng, ‘Lí khì kiò kang-lâng lâi, hoat kang-chîⁿ hō͘ in, tùi lō͘-bé lâi-ê seng hoat, jiân-āu chiah hoat hō͘ tāi-seng lâi-ê.’ 9 Hiah-ê ē-po͘ gō͘ tiám chiah lâi ê, ta̍k ê lâng niá-tio̍h chi̍t ê gûn. 10 Tāi-seng khì chòe-kang ê lâng lâi niá kang-chîⁿ ê sî, in siūⁿ ka-kī ōe niá khah chōe, m̄-kú ta̍k ê lâng mā chí-ū niá chi̍t ê gûn. 11 In niá liáu, tùi chú-lâng bâi-oàn, 12 kóng, ‘Chiah-ê chòe-āu lâi ê lâng chí-ū chòe chi̍t tiám cheng nā-tiāⁿ, goán hō͘ ji̍t-thâu pha̍k kui-ji̍t, lô-khó͘ kang-chok, lí kèng-jiân hō͘ in kap goán niá pîⁿ chōe!’ 13 Chú-lâng ìn kî-tiong chi̍t ê lâng kóng, ‘Pêng-iú, góa tùi lí m̄-sī bô kong-tō. Lí kiám m̄-sī kap góa iok-tēng chi̍t ji̍t chi̍t ê gûn? 14 The̍h lí ê kang-chîⁿ, tńg-khì! Góa beh hō͘ siōng-bé lâi-ê kap lí niá pîⁿ chōe. 15 Góa ēng ka-kī ê mi̍h chòe góa ài chòe ê kiám bōe ēng-tit? Góa khóng-khài, lí teh ba̍k-kháng-chhiah sī-bô?’ 16 “Án-ni, siōng lō͘-bé-ê ōe chòe tē-it; tē-it-ê ōe chòe siōng lō͘-bé.” 17 Iâ-so͘ tī chiūⁿ [Iâ-lō͘-sat-léng] ê lō͘-tiong kiò cha̍p-jī ê bûn-tô͘ lâi, su-hā tùi in kóng, 18 “Taⁿ lán beh chiūⁿ [Iâ-lō͘-sat-léng], Jîn-chú ōe siū chhut-bōe hō͘ chè-si-tiúⁿ kap keng-ha̍k-kàu-su. In ōe kā I tēng sí-chōe, 19 āu-lâi chiong I kau hō͘ Gōa-pang-lâng, kā I hì-lāng, piⁿ-phah, tèng si̍p-jī-kè; tē-saⁿ ji̍t Siōng-tè ōe hō͘ I koh-oa̍h.” 20 Hit sî, [Se-pí-thài] ê bó͘ chhōa i nn̄g ê kiáⁿ lâi kìⁿ Iâ-so͘, kūi lo̍h-khì I bīn-chêng, kiû chi̍t hāng tāi-chì. 21 Iâ-so͘ mn̄g i kóng, “Lí ài sím-mi̍h?” I ìn kóng, “Lí choh-ông ê sî, chhiáⁿ lí hō͘ góa chit nn̄g ê kiáⁿ chi̍t ê chē lí ê chiàⁿ-pêng, chi̍t ê chē lí ê tò-pêng.” 22 Iâ-so͘ kóng, “Lín m̄-chai ka-kī teh kiû sím-mi̍h. Góa teh-beh lim ê poe, lín ōe-tàng lim bōe?” In kóng, “Goán ōe.” 23 Iâ-so͘ kā in kóng, “Góa ê poe lín beh lim, put-kò chē góa ê chiàⁿ-pêng tò-pêng m̄-sī góa ōe-tàng hō͘ lâng ê. Góa ê Pē ūi-tio̍h sím-mi̍h-lâng chún-pī chiū hō͘ hit-ê lâng.” 24 Kî-tha cha̍p ê bûn-tô͘ thiaⁿ-tio̍h, chiū tùi hit nn̄g ê hiaⁿ-tī siū-khì. 25 Iâ-so͘ kiò in lâi, kā in kóng, “Lín chai Gōa-pang-lâng ū thóng-tī-chiá teh kā in koán-hat, ū léng-siù teh kā in chi-phòe. 26 Lín tiong-kan chiū m̄ eng-kai án-ni. Lín tiong-kan ài chòe tōa ê, tio̍h chòe lín ê chhe-ēng; 27 ài chòe tē-it ê, tio̍h chòe lín ê lô͘-po̍k; 28 tú chhin-chhiūⁿ Jîn-chú lâi, m̄-sī beh hō͘ lâng ho̍k-sāi, hoán-tńg sī beh kā lâng ho̍k-sāi, sīm-chì hi-seng ka-kī ê sìⁿ-miā lâi sio̍k-hôe chin chōe lâng.” 29 In lī-khui [Iâ-lī-ko] ê sî, ū chi̍t tōa-kûn lâng tè Iâ-so͘ khì. 30 Tú ū nn̄g ê bông-jîn chē tī lō͘-piⁿ, thiaⁿ-tio̍h Iâ-so͘ tùi hia keng-kè, chiū tōa-siaⁿ hoah, “Tāi-pi̍t ê Kiáⁿ, lîn-bín goán!” 31 Kûn-chiòng kā in chek-pī, kiò in tiām-tiām. M̄-kú in koh-khah tōa-siaⁿ hoah, “Chú, Tāi-pi̍t ê Kiáⁿ, lîn-bín goán!” 32 Iâ-so͘ thêng-kha, kiò in, kóng, “Lín ài góa kā lín chòe sím-mi̍h?” 33 In kóng, “Chú ah, goán ài ba̍k-chiu ōe khòaⁿ-kìⁿ.” 34 Iâ-so͘ khó-lîn in, bong in ê ba̍k-chiu, in sûi-sî koh ōe khòaⁿ-kìⁿ, chiū tè I khì.

Má-thài 21

1 Iâ-so͘ kap bûn-tô͘ teh-beh kàu [Iâ-lō͘-sat-léng], lâi-kàu [Ka-ná-soaⁿ] hù-kūn ê [Pek-hoat-kî]. Hit sî I chhe nn̄g ê bûn-tô͘, 2 kā in kóng, “Lín khì tùi-bīn ê chng-siā, kàu hia sûi-sî ōe khòaⁿ-tio̍h chi̍t chiah lû pa̍k-teh, koh ū chi̍t chiah lû-á-kiáⁿ kap i tī hia; lín kā in tháu-khui, khan lâi góa chia. 3 Nā ū lâng tùi lín kóng sím-mi̍h, lín chiū kóng, ‘Chú beh ēng in.’ Hit-ê lâng ōe sûi-sî chún lín khan lâi.” 4 Chit-ê tāi-chì hoat-seng sī beh èng-giām Siōng-tè thong-kè sian-ti só͘ kóng ê ōe: 5 Tio̍h kā [Sek-an] ê hū-jîn-lâng kóng: Khòaⁿ leh, lín ê Ông beh lâi lín chia; I khiam-sùn khiâ lû-á, khiâ lû-á-kiáⁿ. 6 Bûn-tô͘ chiū khì, chiàu Iâ-so͘ ê chí-sī khì chòe. 7 In khan lû-á kap lû-á-kiáⁿ lâi, chiong gōa-saⁿ phoa̍h tī in téng-bīn, Iâ-so͘ chiū peh-khì khiâ. 8 Tōa-pō͘-hūn ê kûn-chiòng chiong in ka-kī ê gōa-saⁿ pho͘ tī lō͘-ni̍h, mā ū lâng chhò chhiū-oe pho͘ tī lō͘-ni̍h kā I hoan-gêng. 9 Chêng-kiâⁿ āu-tè ê kûn-chiòng hoah kóng: Tāi-pi̍t ê Kiáⁿ, hô-sàn-ná! Hōng Chú ê miâ lâi Hit-ūi eng-kai siū chheng-chàn! Chì-koân ê Siōng-tè, hô-sàn-ná! 10 Iâ-so͘ chi̍t-ē chìn-ji̍p [Iâ-lō͘-sat-léng], choân siâⁿ lóng hán khí-lâi, kóng, “Chit-ê sī siáⁿ-lâng?” 11 Chèng-lâng kóng, “Chit-ê sī tùi [Ka-lī-lī] ê [Ná-sat-le̍k] lâi ê sian-ti Iâ-so͘.” 12 Iâ-so͘ ji̍p-khì Sèng-tiān, chiong tiān-lāi só͘-ū teh bóe-bōe ê lâng lóng kóaⁿ chhut-khì, koh chhia-tó ōaⁿ-chîⁿ ê lâng ê toh kap bōe hún-chiáu ê lâng ê í. 13 I tùi in kóng, “Sèng-keng ū kì-chài: Góa ê chhù beh kiò-chòe kî-tó ê tiān, lín soah kā i pìⁿ-chòe thó͘-húi-á-khut.” 14 Ū bông-jîn kap kha pái ê lâng lâi Sèng-tiān chhē Iâ-so͘, I chiū kā in i-hó. 15 Chè-si-tiúⁿ kap keng-ha̍k-kàu-su khòaⁿ-tio̍h Iâ-so͘ só͘ kiâⁿ ê kî-sū, koh thiaⁿ-kìⁿ sòe-hàn gín-á tī Sèng-tiān tōa-siaⁿ hoah “Tāi-pi̍t ê Kiáⁿ, hô-sàn-ná”, chiū chin siū-khì, 16 kā Iâ-so͘ kóng, “Lí ū thiaⁿ-tio̍h in teh hoah sím-mi̍h bô?” Iâ-so͘ ìn kóng, “Ū. Lín kiám bô tha̍k-tio̍h Sèng-keng ê ōe: Lí hō͘ gín-á kap eⁿ-á ê chhùi tōa-siaⁿ chhiùⁿ-chhut o-ló.” 17 Āu-lâi Iâ-so͘ lī-khui in, chhut-siâⁿ khì [Pek-tāi-nî], tī hia kè-mî. 18 Keh chá-khí, beh tò-khì [Iâ-lō͘-sat-léng] ê sî, Iâ-so͘ pak-tó͘ iau. 19 I khòaⁿ-tio̍h lō͘-piⁿ ū chi̍t châng bû-hoa-kó-chhiū, chiū kiâⁿ óa-khì, m̄-kú chhiū-téng lóng bô khòaⁿ-tio̍h pòaⁿ-hāng, chí-ū hio̍h nā-tiāⁿ. I tùi hit châng chhiū kóng, “Lí éng-oán bōe-koh kiat ké-chí.” Hit châng bû-hoa-kó-chhiū sûi-sî ta-khì. 20 Bûn-tô͘ khòaⁿ-tio̍h, chin tio̍h-kiaⁿ, kóng, “Chit châng bû-hoa-kó-chhiū ná-ōe hut-jiân-kan ta-khì?” 21 Iâ-so͘ ìn kóng, “Góa si̍t-chāi kā lín kóng, lín nā ū sìn-sim, bô giâu-gî, m̄-nā ōe-tàng chòe góa tùi chit châng bû-hoa-kó-chhiū só͘ chòe ê tāi-chì, sīm-chì bēng-lēng chit chō soaⁿ kóng, ‘Khí-lâi, khì thiām-hái!’ mā it-tēng ōe si̍t-hiān. 22 Kî-tó ê sî, lín só͘ kiû ê it-chhè, ū sìn chiū ōe tit-tio̍h.” 23 Iâ-so͘ ji̍p-khì Sèng-tiān teh kà-sī lâng ê sî, chè-si-tiúⁿ kap bîn-kan ê tiúⁿ-ló lâi I hia, tùi I kóng, “Lí khò sím-mi̍h koân-pèng chòe chiah-ê tāi-chì? Sím-mi̍h-lâng hō͘ lí chit-ê koân-pèng?” 24 Iâ-so͘ ìn kóng, “Góa mā beh mn̄g lín chi̍t kù ōe, lín nā kā góa ìn, góa chiah kā lín kóng góa khò sím-mi̍h koân-pèng chòe chiah-ê tāi-chì. 25 [Iok-hān] kā lâng sóe-lé ê koân-pèng tùi tó-ūi lâi, sī tùi Thiⁿ á-sī tùi lâng?” In hō͘-siōng gī-lūn kóng, “Lán nā kóng ‘Tùi Thiⁿ’, I ōe kā lán kóng ‘Án-ni, lín sī-án-chóaⁿ bô sìn [Iok-hān]?’ 26 Lán nā kóng ‘Tùi lâng’, khióng-kiaⁿ kûn-chiòng hoán-kám, in-ūi in lóng siūⁿ-kóng [Iok-hān] sī sian-ti.” 27 In chiū ìn Iâ-so͘, “Goán m̄-chai.” Iâ-so͘ kā in kóng, “Án-ni, góa mā m̄ kā lín kóng góa khò sím-mi̍h koân-pèng chòe chiah-ê tāi-chì.” 28 Iâ-so͘ kóng, “Lín siūⁿ án-chóaⁿ? Ū chi̍t ê lâng ū nn̄g ê kiáⁿ; i khì kā tōa-kiáⁿ kóng, ‘Kiáⁿ ah, lí kin-á-ji̍t khì phû-tô-hn̂g chòe-kang.’ 29 Tōa-kiáⁿ ìn kóng, ‘Góa m̄ khì’, āu-lâi kái-piàn sim-ì ū khì. 30 Lāu-pē mā khì kā tē-jī kiáⁿ kóng siâng-khoán ê ōe. Tē-jī kiáⁿ ìn kóng, ‘A-pa, góa lâi-khì,’ āu-lâi bô khì. 31 Chit nn̄g ê kiáⁿ tó chi̍t ê ū chiàu lāu-pē ê ì-sù khì chòe?” In kóng, “Tōa-kiáⁿ.” Iâ-so͘ kā in kóng, “Góa si̍t-chāi kā lín kóng, bau̍h-sè-ê kap chhiong-ki ōe pí lín seng chìn-ji̍p Siōng-tè-kok. 32 In-ūi Si-sóe-chiá [Iok-hān] lâi lín chia, chí-sī lín kiâⁿ chiàⁿ-lō͘, lín bô sìn i, m̄-kú bau̍h-sè-ê kap chhiong-ki ū sìn. Sīm-chì lín khòaⁿ-tio̍h liáu-āu mā bô hóe-kái lâi sìn i.” 33 Iâ-so͘ kā in kóng, “Lín koh thiaⁿ chi̍t ê phì-jū. Ū chi̍t ê hn̂g-chú khai-khún chi̍t khu phû-tô-hn̂g, sì-bīn ûi lî-pa, lāi-bīn ó͘ chi̍t ê chiú-khut, khí chi̍t ê siú-bōng-tâi, chiong chit khu hn̂g cho͘ hō͘ tiān-lông, āu-lâi chhut-gōa khì chin hn̄g ê só͘-chāi. 34 Siu-sêng ké-chí ê sî kàu, hn̂g-chú chhe lô͘-po̍k khì tiān-lông hia, beh tùi in siu ké-chí. 35 Tiān-lông kā chiah-ê lô͘-po̍k lia̍h khí-lâi, chi̍t ê kā i phah, chi̍t ê kā i thâi-sí, chi̍t ê ēng chio̍h-thâu kā i tìm-sí. 36 Hn̂g-chú koh chhe lēng-gōa chi̍t-kóa lô͘-po̍k khì, pí thâu-chi̍t piàn khah chōe lâng. Tiān-lông mā chiàu án-ni tùi-thāi in. 37 Chòe-āu, hn̂g-chú chhe ka-kī ê kiáⁿ khì in hia, siūⁿ-kóng ‘In ōe chun-tiōng góa ê kiáⁿ.’ 38 M̄-kú tiān-lông chi̍t-ē khòaⁿ-tio̍h i ê kiáⁿ chiū chham-siông kóng, ‘Chit-ê sī i ê kè-sêng-jîn. Lâi, lán lâi kā i thâi-sí, thang tit i ê châi-sán!’ 39 In chiū kā i lia̍h khí-lâi, hiat chhut-khì phû-tô-hn̂g ê gōa-bīn, kā i thâi-sí. 40 “Án-ni, phû-tô-hn̂g ê chú-lâng tò-lâi ê sî ōe án-chóaⁿ chhú-lí hiah-ê tiān-lông?” 41 In kā Iâ-so͘ kóng, “I it-tēng ōe chiong hiah-ê pháiⁿ-lâng thiat-tóe siau-bia̍t, chiong phû-tô-hn̂g cho͘ hō͘ pa̍t ê ōe chiàu kùi-chiat la̍p ké-chí-cho͘ ê tiān-lông.” 42 Iâ-so͘ kā in kóng, “Lín kiám m̄-bat tha̍k-tio̍h Sèng-keng ū kì-chài: Khí-chhù-sai-hū só͘ khì-sak ê chio̍h, í-keng chiâⁿ-chòe siōng tiōng-iàu ê ki-chio̍h. Che sī Chú ê chok-ûi, tùi lán lâi khòaⁿ si̍t-chāi chin kî-biāu! 43 “Só͘-í, góa kā lín kóng, Siōng-tè ōe chiong Siōng-tè-kok tùi lín chhiúⁿ khí-lâi, kau hō͘ ōe kiat ké-chí ê lâng. 44 Hit-ê siak lo̍h-khì chit tè chio̍h-thâu téng ê lâng, ōe siak-kah chhùi-kut hun-si; hō͘ hit tè chio̍h-thâu teh-tio̍h ê lâng, ōe teh-kah chhùi-kô͘-kô͘.” 45 Chiah-ê chè-si-tiúⁿ kap Hoat-lī-sài-phài ê lâng thiaⁿ-tio̍h Iâ-so͘ ê phì-jū, chai-iáⁿ I sī teh kóng in. 46 In chiū chhē khang-phāng beh kā I lia̍h, m̄-kú kiaⁿ kûn-chiòng, in-ūi in khòaⁿ I sī sian-ti.

Má-thài 22

1 Iâ-so͘ koh ēng phì-jū kā in kóng: 2 “Thian-kok thang phì-jū chòe chi̍t ê kok-ông kā i ê kiáⁿ pān hun-iàn. 3 I chhe lô͘-po̍k khì kiò só͘ chhiáⁿ ê lâng-kheh lâi hù hun-iàn, put-kò in m̄-lâi. 4 Kok-ông koh chhe kî-tha ê lô͘-po̍k, kā in kóng, ‘Lín khì kā hiah-ê siū iau-chhiáⁿ ê lâng kóng, góa ê iàn-se̍k í-keng chún-pī hó-sè; góa ê gû kap pûi ê gû-á-kiáⁿ mā í-keng thâi, it-chhè lóng chún-pī hó-sè lah, chhiáⁿ lín lâi hù hun-iàn.’ 5 M̄-kú hiah-ê siū iau-chhiáⁿ ê lâng bô khòaⁿ-chòe iàu-kín, chòe in khì; chi̍t ê khì hn̂g-ni̍h chòe-kang; chi̍t ê khì chòe seng-lí; 6 kî-tha ê lia̍h i ê lô͘-po̍k, kā in lêng-jio̍k, sòa kā in thâi-sí. 7 Kok-ông hui-siông siū-khì, chiū phài peng khì châu-bia̍t hiah-ê hiong-siú, pàng-hé sio in ê siâⁿ. 8 Jiân-āu i kā lô͘-po̍k kóng, ‘Hun-iàn chún-pī hó lah, m̄-kú só͘ iau-chhiáⁿ ê lóng put-phòe hō͘ lán chhiáⁿ. 9 Só͘-í, lín khì koe-lō͘-kháu, tú-tio̍h ê lâng lóng kā in chhiáⁿ lâi hù hun-iàn.’ 10 Hiah-ê lô͘-po̍k chiū chhut-khì koe-ni̍h, tú-tio̍h ê bô-lūn hó-lâng pháiⁿ-lâng lóng kā in chhiáⁿ lâi; hun-iàn ê só͘-chāi lâng-kheh chiū chē kàu móa-móa. 11 “Kok-ông ji̍p-lâi khòaⁿ hiah-ê lâng-kheh, khòaⁿ-tio̍h tī hia ū chi̍t ê lâng bô chhēng hun-iàn ê lé-ho̍k. 12 I chiū kā i mn̄g, ‘Pêng-iú ah, lí ji̍p-lâi chia ná bô chhēng hun-iàn ê lé-ho̍k?’ Hit-ê lâng lóng bô ìn. 13 Kok-ông chiū tùi chhe-ēng-ê kóng, ‘Kha-chhiú kā pa̍k khí-lâi, kā i hiat chhut-khì gōa-bīn o͘-àm ê só͘-chāi. Tī hia, i ōe thî-khàu, kā-gê chhiat-chhí.’ 14 “Siū ho͘-tiàu-ê chin chōe, m̄-kú siū kéng-soán-ê chin chió.” 15 [Hoat-lī-sài]-phài ê lâng chhut-khì, chòe-hé chham-siông beh án-chóaⁿ lia̍h Iâ-so͘ ê ōe-phāng thang kā I hām-hāi. 16 In chhe ka-kī ê bûn-tô͘ kap [Hi-lu̍t]-tóng ê lâng khì Iâ-so͘ hia, tùi I kóng, “Lāu-su, goán chai lí chin sêng-si̍t, chiàu-si̍t chiong Siōng-tè ê tō-lí kà-sī lâng, bô-lūn sím-mi̍h khoán lâng, lí tùi-thāi in lóng bô chha-pia̍t. 17 La̍p-sè hō͘ [Lô-má] hông-tè Khái-sat ū ha̍h Lu̍t-hoat bô? Chhiáⁿ kā goán kóng lí ê siūⁿ-hoat siáⁿ-khoán.” 18 Iâ-so͘ chai-iáⁿ in ê ok-ì, chiū tùi in kóng, “Ké-hó ê lâng, sī-án-chóaⁿ beh kā góa chhì-thàm? 19 The̍h chi̍t ê la̍p-sè ê gûn-pè hō͘ góa khòaⁿ.” In chiū the̍h chi̍t ê gûn-pè hō͘ I. 20 Iâ-so͘ mn̄g in kóng, “Che sī siáⁿ-lâng ê siōng, siáⁿ-lâng ê jī-hō?” 21 In kóng, “[Khái-sat] ê.” Iâ-so͘ chiū kā in kóng, “Án-ni, [Khái-sat] ê mi̍h hō͘ [Khái-sat]; Siōng-tè ê mi̍h hō͘ Siōng-tè.” 22 In thiaⁿ liáu chin tio̍h-kiaⁿ, chiū lī-khui. 23 Siâng hit ji̍t, chi̍t-kóa chú-tiuⁿ bô koh-oa̍h ê Sat-to͘-kai-phài ê lâng lâi Iâ-so͘ hia, mn̄g I kóng, 24 “Lāu-su, [Mô͘-se] kóng, ‘Ū lâng bô siⁿ-kiáⁿ chiū sí-khì, sió-tī tio̍h chhōa hiaⁿ-só thòe hiaⁿ-ko thoân-chong-chiap-tāi.’ 25 Í-chêng goán chia bat ū chhit ê hiaⁿ-tī; siōng-tōa ê kiat-hun, bô lâu hō͘-tāi chiū sí-khì, pàng bó͘ hō͘ sió-tī. 26 Tē-jī ê, tē-saⁿ ê, kàu tē-chhit ê lóng siâng-khoán. 27 In lóng sí liáu-āu, hit-ê hū-jîn-lâng mā sí-khì. 28 Án-ni, koh-oa̍h ê sî, chit-ê hū-jîn-lâng sī chit chhit ê lâng tiong-kan tó chi̍t-ê ê bó͘? In-ūi in lóng bat chhōa i.” 29 Iâ-so͘ ìn kóng, “Lín m̄-tio̍h. Lín m̄-bat Sèng-keng, mā m̄-bat Siōng-tè ê koân-lêng. 30 In-ūi koh-oa̍h ê sî, in kap thiⁿ-téng ê thiⁿ-sài siâng-khoán, bô-kè bô-chhōa. 31 Koan-hē sí-lâng koh-oa̍h ê sū, lín kiám bô tha̍k-tio̍h Siōng-tè tùi lín kóng ê ōe: 32 ‘Góa chiū-sī [A-pek-la-hán] ê Siōng-tè, [Í-sat] ê Siōng-tè, [Ngá-kok] ê Siōng-tè’? I m̄-sī sí-lâng ê Siōng-tè, sī oa̍h-lâng ê Siōng-tè.” 33 Kûn-chiòng chi̍t-ē thiaⁿ-tio̍h, tùi I ê kà-sī kám-kak chin tio̍h-kiaⁿ. 34 [Hoat-lī-sài]-phài ê lâng thiaⁿ-tio̍h Iâ-so͘ hō͘ [Sat-to͘-kai]-phài ê lâng bô ōe thang ìn, chiū chū-chi̍p chòe-hé. 35 Kî-tiong ū chi̍t ê Lu̍t-hoat-kàu-su lâi mn̄g chi̍t ê būn-tôe, beh kā I chhì-thàm, kóng, 36 “Lāu-su, [Mô͘-se] ê Lu̍t-hoat tó chi̍t tiâu sī siōng-tōa ê kài-bēng?” 37 Iâ-so͘ ìn kóng, “Lí tio̍h choân-sim, choân-chêng, choân-ì thiàⁿ Chú lí ê Siōng-tè. 38 Che sī siōng-tōa koh tē-it ê kài-bēng. 39 Tē-jī tiâu mā siâng-khoán. Tio̍h thiàⁿ chhù-piⁿ chhin-chhiūⁿ thiàⁿ ka-kī. 40 Choân-pō͘ Lu̍t-hoat kap sian-ti ê kà-sī lóng ēng chit nn̄g tiâu chòe kun-kù.” 41 [Hoat-lī-sài]-phài ê lâng chū-chi̍p ê sî, Iâ-so͘ mn̄g in, 42 “Koan-hē Ki-tok, I sī sím-mi̍h lâng ê hō͘-tāi, lín siūⁿ án-chóaⁿ?” In kóng, “I sī [Tāi-pi̍t] ê hō͘-tāi.” 43 Iâ-so͘ tùi in kóng, “Nā-sī án-ni, sī án-chóaⁿ [Tāi-pi̍t] siū Sèng Sîn kám-tōng ê sî chheng Ki-tok chòe Chú, kóng: 44 Chú kā góa ê Chú kóng: Lí chē góa ê chiàⁿ-pêng, kàu góa hō͘ lí ê tùi-te̍k khut-ho̍k tī lí kha-ē. 45 Kì-jiân [Tāi-pi̍t] chheng-ho͘ Ki-tok chòe ‘Chú’, Ki-tok ná-ōe sī [Tāi-pi̍t] ê hō͘-tāi?” 46 Bô-lâng ōe-tàng hôe-tap pòaⁿ-kù. Tùi hit ji̍t khí, bô-lâng káⁿ koh kā I mn̄g sím-mi̍h būn-tôe.

Má-thài 23

1 Āu-lâi, Iâ-so͘ tùi kûn-chiòng kap I ê bûn-tô͘ kóng, 2 “Keng-ha̍k-kàu-su kap Hoat-lī-sài-phài ê lâng chē [Mô͘-se] ê ūi kóe-seh Lu̍t-hoat. 3 Só͘-í, in só͘ kā lín kóng ê, lín lóng tio̍h chòe, tio̍h chun-siú; put-kò m̄-thang o̍h in ê hêng-ûi, in-ūi in ōe-kóng bōe-chòe. 4 In chiong lâng taⁿ bô-hoat ê tāng-tàⁿ khún hō͘ lâng taⁿ, ka-kī liân chi̍t ki chńg-thâu-á to m̄-khéng tín-tāng. 5 In só͘-ū ê hêng-ûi lóng sī beh chòe hō͘ lâng khòaⁿ, in-ūi in chiong ka-kī ê keng-bûn-tē chòe khah khoah, saⁿ-á-ku ê chhiu chòe khah tn̂g. 6 In ài tī iàn-hōe chē tōa-ūi, tī hōe-tn̂g lāi chē koân-ūi, 7 tī chhī-tiûⁿ-kháu hō͘ lâng chhéng-an, hō͘ lâng chheng-ho͘ ‘lia̍p-pí’. 8 M̄-kú lín m̄-thang hō͘ lâng chheng-chòe ‘lia̍p-pí’, in-ūi lín chí-ū chi̍t ūi ‘Lāu-su’, lín lóng sī hiaⁿ-tī chí-bē. 9 Tī tōe-chiūⁿ, lín m̄-thang chheng-ho͘ lâng chòe ‘lāu-pē’, in-ūi lín chí-ū chi̍t ūi ‘Lāu-pē’, chiū-sī tī thiⁿ-téng Hit-ūi. 10 Lín mā m̄-thang hō͘ lâng chheng-chòe ‘kàu-su’, in-ūi lín chí-ū chi̍t ūi ‘Kàu-su’, chiū-sī Ki-tok. 11 Lín tiong-kan siōng-tōa-ê tio̍h chòe lín ê chhe-ēng. 12 Chū-ko-ê ōe siū kàng-kē; chū-khiam-ê ōe siū ko-seng.” 13 “Ké-hó ê keng-ha̍k-kàu-su kap Hoat-lī-sài-lâng, lín chhám à! Lín chiong Thian-kok ê mn̂g koaiⁿ khí-lâi, m̄ hō͘ lâng ji̍p-khì; lín ka-kī m̄ ji̍p-khì, liân beh ji̍p-khì ê lâng mā m̄ hō͘ in ji̍p-khì. 15 Ké-hó ê keng-ha̍k-kàu-su kap Hoat-lī-sài-lâng, lín chhám à! Lín ūi-tio̍h beh hō͘ chi̍t ê lâng kái-chong ji̍p-kàu, thiⁿ-piⁿ hái-kak kiâⁿ thàu-thàu. Hit-ê lâng ji̍p-kàu liáu-āu, lín soah hō͘ i pìⁿ-chòe pí lín têng-pē pháiⁿ. 16 “Chhiⁿ-mî chòe chhōa-lō͘-ê, lín chhám à! Lín kóng, ‘Lâng kí Sèng-tiān chiù-chōa bô chún-sǹg, m̄-kú nā kí tiān-lāi ê kim-khì chiù-chōa chiū tio̍h siú.’ 17 Lín chiah-ê tòng-gōng koh chhiⁿ-mî ê lâng ah, tó chi̍t hāng khah tiōng-iàu? Sī kim-khì á-sī hō͘ kim-khì chiâⁿ-chòe sîn-sèng ê Sèng-tiān? 18 Lín koh kóng, ‘Lâng kí chè-tôaⁿ chiù-chōa bô chún-sǹg, nā kí chè-tôaⁿ téng ê chè-mi̍h chiù-chōa chiū tio̍h siú.’ 19 Lín chiah-ê chhiⁿ-mî ê lâng ah, sī chè-mi̍h á-sī hō͘ chè-mi̍h chiâⁿ-chòe sîn-sèng ê chè-tôaⁿ, tó chi̍t hāng khah tiōng-iàu? 20 Só͘-í, lâng kí chè-tôaⁿ chiù-chōa, chiū-sī kí chè-tôaⁿ kap hit téng-bīn só͘-ū ê chè-mi̍h chiù-chōa. 21 Lâng kí Sèng-tiān chiù-chōa, chiū-sī kí Sèng-tiān kap tiàm tī hit lāi-bīn ê Siōng-tè chiù-chōa. 22 Lâng kí thiⁿ chiù-chōa, chiū-sī kí Siōng-tè ê pó-chō kap chē tī hit téng-bīn ê Siōng-tè chiù-chōa. 23 “Ké-hó ê keng-ha̍k-kàu-su kap [Hoat-lī-sài-lâng], lín chhám à! In-ūi lín liân phang-liāu, po̍k-hô, poeh-kak, sió-hôe-hiong to hiàn cha̍p-hūn-chi̍t hō͘ Siōng-tè, Lu̍t-hoat só͘ tiōng-sī ê chèng-gī, jîn-chû, kap sìn-si̍t, lín tian-tò hut-lio̍k. Chiah-ê chiah-sī lín eng-kai si̍t-hêng ê; téng-bīn hiah-ê mā m̄-thang hut-lio̍k. 24 Lín chiah-ê chhiⁿ-mî chòe chhōa-lō͘-ê, chi̍t chiah sòe chiah báng-thâng lín to kā lū chhut-lâi, lo̍k-tô tian-tò kui-chiah kā thun lo̍h-khì. 25 “Ké-hó ê keng-ha̍k-kàu-su kap [Hoat-lī-sài-lâng], lín chhám à! In-ūi lín chiong poe kap pôaⁿ ê gōa-bīn sóe chheng-khì, lāi-bīn khiok tóe móa tham-io̍k kap hòng-chhiòng. 26 Lín chiah-ê chhiⁿ-mî ê [Hoat-lī-sài-lâng] ah, tio̍h seng kā poe ê lāi-bīn sóe chheng-khì, gōa-bīn chū-jiân chiū chheng-khì. 27 “Ké-hó ê keng-ha̍k-kàu-su kap [Hoat-lī-sài-lâng], lín chhám à! In-ūi lín chhin-chhiūⁿ chhat pe̍h-pe̍h ê bōng, gōa-bīn hó-khòaⁿ, lāi-bīn khiok tóe móa sí-lâng ê kut-thâu kap ta̍k hāng ê ù-òe. 28 Lín mā chhin-chhiūⁿ án-ni, gōa-bīn hō͘ lâng khòaⁿ-chòe gī-lâng, lāi-bīn khiok chhiong-móa ké-hó kap put-hoat. 29 “Ké-hó ê keng-ha̍k-kàu-su kap Hoat-lī-sài-lâng, lín chhám à! In-ūi lín chō sian-ti ê bōng, chéng-siu gī-lâng ê kì-liām-pi, 30 koh kóng ‘Goán nā oa̍h tī goán chó͘-sian ê sî-tāi, it-tēng bōe kap in chòe-hé sat-hāi sian-ti’. 31 Án-ni, lín sī teh chèng-si̍t lín ka-kī sī sat-hāi sian-ti ê lâng ê kiáⁿ-sun. 32 Lín chó͘-sian chòe ê pháiⁿ-tāi, chòe lín khì oân-sêng hó lah! 33 Lín chiah-ê to̍k-chôa ê kiáⁿ-sun, kan-kúi ê lâng ah, lín kiám ōe-tàng tô-siám tōe-ge̍k ê hêng-hoa̍t? 34 Só͘-í, góa beh chhe sian-ti, tì-hūi ê lâng, kap keng-ha̍k-kàu-su khì lín hia; in ū-ê ōe hō͘ lín sat-hāi á-sī tèng si̍p-jī-kè, ū-ê ōe hō͘ lín tī lín ê hōe-tn̂g piⁿ-phah, hō͘ lín tùi chit-ê siâⁿ kóaⁿ kàu hit-ê siâⁿ. 35 Án-ni, lín tī tōe-chiūⁿ thâi-sí gī-lâng ê huih-chè lóng kui tī lín sin-chiūⁿ; chiū-sī tùi gī-lâng [A-pek] lâu ê huih kàu [Pa-lia̍p-ka] ê kiáⁿ [Sat-ka-lī-a] tī sèng-só͘ kap chè-tôaⁿ ê tiong-kan lâu ê huih, lóng kui tī lín sin-chiūⁿ. 36 Góa si̍t-chāi kā lín kóng, chiah-ê huih-chè lóng ōe kui tī chit sè-tāi ê lâng.” 37 “[Iâ-lō͘-sat-léng] ah, [Iâ-lō͘-sat-léng] ah, lí thâi-sí sian-ti, koh ēng chio̍h-thâu tìm-sí Siōng-tè chhe lâi lí chia ê sù-chiá. Góa jōa chōe piàn ài-beh chū-chi̍p lí ê kiáⁿ-jî, chhin-chhiūⁿ koe-bú chū-chi̍p koe-á-kiáⁿ kā in áⁿ tī si̍t-kó͘-ē, lín lóng bô ài! 38 Lín khòaⁿ, lín ê chhù ōe hong-hòe, bô-lâng tòa. 39 Góa kā lín kóng, tùi taⁿ í-āu lín choa̍t-tùi khòaⁿ bōe-tio̍h góa, ti̍t-kàu lín kóng, ‘Hōng Chú ê miâ lâi Hit-ūi eng-kai siū chheng-chàn!’ ”

Má-thài 24

1 Iâ-so͘ tùi Sèng-tiān chhut-lâi, tú-beh lī-khui ê sî, bûn-tô͘ óa-lâi, pò I khòaⁿ Sèng-tiān ê kiàn-tio̍k-bu̍t. 2 Iâ-so͘ kā in kóng, “Chiah-ê lín kiám m̄-sī lóng ū khòaⁿ-tio̍h? Góa si̍t-chāi kā lín kóng, tī chia it-chheh lóng ōe siū thiah-húi, thiah-kah bô chi̍t tè chio̍h ōe tha̍h tī pa̍t-tè téng-bīn.” 3 Iâ-so͘ tī [Ka-ná-soaⁿ] téng teh chē ê sî, bûn-tô͘ su-hā lâi mn̄g I, “Chhiáⁿ kā goán kóng chit-ê tāi-chì sím-mi̍h sî ōe hoat-seng? Lí ê lâi-lîm kap kim-sè ê kiat-kio̍k ū sím-mi̍h tiāu-thâu?” 4 Iâ-so͘ ìn kóng, “Tio̍h kín-sīn, chiah-bián hō͘ lâng kā lín bê-he̍k. 5 In-ūi ū chin chōe lâng ōe lī-iōng góa ê miâ, kóng ‘Góa chiū-sī Ki-tok’ lâi bê-he̍k chin chōe lâng. 6 Lín ōe thiaⁿ-tio̍h chiàn-cheng í-ki̍p chiàn-cheng ê hong-siaⁿ. Tio̍h kín-sīn, m̄-bián kiaⁿ. Chiah-ê tāi-chì it-tēng ōe hoat-seng, m̄-kú chiong-kio̍k iáu-bē kàu. 7 In-ūi bîn-cho̍k ōe khí-lâi kong-kek bîn-cho̍k, kok-ka kong-kek kok-ka; chin chōe só͘-chāi ū ki-hng kap tōe-tāng. 8 Che it-chhè ê tāi-chì put-kò sī chhui-chūn thàng-thiàⁿ ê khai-sí. 9 “Hit sî, lín ōe hō͘ lâng lia̍h-khì, siū khó͘-chhó͘, sat-hāi; lín ōe in-ūi góa ê miâ hō͘ bān-bîn oàn-hūn. 10 Hit sî, chin chōe lâng ōe sit-khì sìn-sim, hō͘-siōng chhut-bōe, pí-chhú oàn-hūn. 11 Ū chin chōe ké sian-ti ōe chhut-hiān lâi bê-he̍k chin chōe lâng. 12 Put-hoat ê tāi-chì ná ke-thiⁿ, chin chōe lâng ê thiàⁿ-sim ōe chiām-chiām léng-tām. 13 M̄-kú jím-nāi kàu chòe-āu ê lâng ōe tit-tio̍h kiù. 14 Chit-ê Thian-kok ê hok-im ōe thoân kàu phó͘-thiⁿ-ē, tùi bān-bîn chòe kiàn-chèng, chòe-āu chiong-kio̍k chiah ōe kàu.” 15 “Só͘-í, tng lín khòaⁿ-tio̍h Siōng-tè thong-kè sian-ti [Tān-í-lí] só͘ kóng hit-ê ‘Khó-ò͘ⁿ ê Húi-bia̍t-chiá’ khiā tī sîn-sèng ê só͘-chāi --- tha̍k ê lâng tio̍h bêng-pe̍k chit kù ōe ê ì-sù --- 16 hit sî tī [Iû-thài] ê tio̍h tô-cháu khì soaⁿ-lāi; 17 tī chhù-téng ê m̄-thang lo̍h-lâi the̍h chhù-lāi ê mi̍h; 18 tī hn̂g-ni̍h ê m̄-thang tńg-khì hiahⁿ gōa-saⁿ. 19 Tī hiah-ê ji̍t-chí, ū sin-īn ê kap hō͘ eⁿ-á chia̍h-lin ê hū-jîn-lâng hui-siông put-hēng! 20 Tio̍h kî-tó, lín chiah-bián tī tang-thiⁿ á-sī An-hioh-ji̍t tô-lān. 21 In-ūi tī hiah-ê ji̍t-chí teh-beh ū tōa chai-lān, sī chhòng-chō ú-tiū í-lâi m̄-bat ū ê, chiong-lâi mā bōe-koh ū. 22 Siōng-tè nā bô kiám-chió hiah-ê ji̍t-chí, sè-kan-lâng bô chi̍t ê ōe tit-tio̍h kiù. Chóng-sī ūi-tio̍h I ê soán-bîn, Siōng-tè ōe kiám-chió hiah-ê ji̍t-chí. 23 “Nā ū lâng kā lín kóng ‘Lín khòaⁿ, Ki-tok tī chia’, á-sī kóng ‘I tī hia’, m̄-thang siong-sìn. 24 In-ūi ū chi̍t-kóa ké Ki-tok kap ké sian-ti ōe chhut-hiān, kiâⁿ tōa sîn-jiah kap kî-sū lâi bê-he̍k lâng, nā ōe-tàng, liân soán-bîn to beh kā in bê-he̍k. 25 Góa í-keng seng kā lín kóng lah. 26 “Só͘-í, nā ū lâng kā lín kóng ‘Lín khòaⁿ, Ki-tok tī khòng-iá’, m̄-thang chhut-khì; á-sī kóng ‘Lín khòaⁿ, I tī pâng-keng lāi’, mā m̄-thang siong-sìn. 27 Sih-nà tùi tang-pêng sih kàu sai-pêng, Jîn-chú ê lâi-lîm mā ōe chhin-chhiūⁿ án-ni. 28 “Si-thé tī tó-ūi, thuh-thâu-eng lóng ōe khîⁿ óa-khì hia.” 29 “Chit-ê chai-lān ê ji̍t-chí chi̍t-ē kè-khì, ji̍t ōe pìⁿ o͘-àm, ge̍h bōe hoat-kng, chhiⁿ ōe tùi thiⁿ-téng lak lo̍h-lâi, thiⁿ-téng ê kng-thé lóng ōe iô-choah. 30 Hit sî Jîn-chú ê tiāu-thâu ōe tī thiⁿ-téng chhut-hiān. Tōe-chiūⁿ bān-cho̍k bān-bîn lóng ōe thî-khàu; in ōe khòaⁿ-kìⁿ Jîn-chú chhiong-móa koân-lêng kap tōa êng-kng chē thiⁿ-téng ê hûn lâi-lîm. 31 I ōe chhe I ê thiⁿ-sài pûn hiáng-liāng ê lat-pah, tùi thiⁿ ê chit pêng kàu thiⁿ ê hit pêng, tùi sì-hng chū-chi̍p I ê soán-bîn.” 32 “Tio̍h tùi bû-hoa-kó-chhiū ha̍k-si̍p: Ki puh-íⁿ hoat-hio̍h ê sî, lín chiū chai hē-thiⁿ teh-beh kàu à. 33 Chhin-chhiūⁿ án-ni, lín khòaⁿ-tio̍h che it-chhè ê tāi-chì ê sî chiū chai Jîn-chú í-keng chiap-kūn, kàu mn̂g-kháu lah. 34 Góa si̍t-chāi kā lín kóng, chit sè-tāi iáu-bē kè-khì, che it-chhè lóng ōe hoat-seng. 35 Thiⁿ kap tōe ōe siau-sit, m̄-kú góa ê ōe choa̍t-tùi bōe siau-sit.” 36 “Koan-hē hit-ê ji̍t, hit-ê sî, bô-lâng chai; thiⁿ-téng ê thiⁿ-sài m̄-chai, Kiáⁿ mā m̄-chai, chí-ū Pē chai nā-tiāⁿ. 37 In-ūi Jîn-chú ê lâi-lîm mā ōe chhin-chhiūⁿ [Ná-a] ê sî ê chêng-kéng. 38 Tōa-chúi lâi í-chêng kàu [Ná-a] chìn-ji̍p tōa-chûn hit ji̍t, lâng chiàu-siông lim-chia̍h kè-chhōa. 39 In hô͘-lí-hô͘-tô͘ lóng m̄-chai, tōa-chúi hut-jiân lâi, kā in lóng chhiong-cháu. Jîn-chú ê lâi-lîm mā ōe án-ni. 40 Hit sî, ū nn̄g ê lâng tī chhân-ni̍h, chi̍t ê siū chiap-khì; chi̍t ê pàng-teh. 41 Nn̄g ê hū-jîn-lâng tī oe-bō-keng teh oe chio̍h-bō, chi̍t ê siū chiap-khì; chi̍t ê pàng-teh. 42 “Tio̍h kéng-séng, in-ūi lín m̄-chai lín ê Chú sím-mi̍h ji̍t ōe lâi-lîm. 43 Lín tio̍h chai, chhù ê chú-lâng nā chai àm-sî kúi tiám chha̍t-á ōe lâi, it-tēng ōe kéng-séng, bōe hō͘ chha̍t-á ó͘ piah-khang ji̍p-lâi chhù-lāi. 44 Só͘-í, lín mā tio̍h chún-pī piān-piān, in-ūi Jîn-chú ōe tī lín siūⁿ bōe-kàu ê sî-chūn lâi-lîm.” 45 “Nā-sī án-ni, sím-mi̍h-lâng sī tiong-si̍t koh chhong-bêng ê lô͘-po̍k? Chīu-sī chú-lâng kau-tài i koán ke-lāi kî-tha ê lô͘-po̍k, chiàu sî pun chia̍h-mi̍h hō͘ in ê lâng. 46 Chú-lâng tńg-lâi ê sî khòaⁿ-tio̍h ū chiàu án-ni teh chòe hit-ê lô͘-po̍k si̍t-chāi ū hok-khì. 47 Góa si̍t-chāi kā lín kóng, chú-lâng ōe phài chit-ê lô͘-po̍k khì koán-lí i lóng-chóng ê châi-sán. 48 Hit-ê pháiⁿ ê lô͘-po̍k nā sim-lāi siūⁿ-kóng ‘Góa ê chú-lâng bōe hiah kín tńg-lâi’, 49 chiū phah pîⁿ-pîⁿ chòe lô͘-po̍k-ê, koh kap chiú-chùi-ê chòe-hé ia̍h-lim-ia̍h-chia̍h. 50 Chú-lâng ōe tī i bô àn-sǹg ê ji̍t, m̄-chai ê sî-chūn tńg-lâi. 51 Chú-lâng ōe giâm-giâm kā i chhú-hoa̍t, kā i kap ké-hó ê lâng hē chòe-tui; tī hia in ōe thî-khàu, kā-gê chhiat-chhí.”

Má-thài 25

1 “Thian-kok thang phì-jū chòe cha̍p ê chāi-sek-lú gia̍h teng chhut-khì gêng-chiap sin-lông. 2 Kî-tiong ū gō͘ ê gōng-ê, gō͘ ê khiáu-ê. 3 Hiah-ê gōng-ê gia̍h teng, bô lēng-gōa tòa iû, 4 m̄-kú khiáu-ê gia̍h teng, ū lēng-gōa tòa kúi-nā koàn iû. 5 Sin-lông khah òaⁿ kàu, in soah lóng tuh-ku khùn-khì. 6 “Pòaⁿ-mî, ū lâng tōa-siaⁿ hoah, ‘Sin-lông lâi lah, chhut-lâi gêng-chiap!’ 7 Hit sî, hiah-ê chāi-sek-lú lóng chhíⁿ khí-lâi, siu-chéng in ê teng. 8 Gōng-ê kā khiáu-ê kóng, ‘Goán ê teng teh-beh hoa khì lah, lín ê iû pun chi̍t-kóa hō͘ goán.’ 9 Khiáu-ê ìn kóng, ‘Kiaⁿ-liáu iû bô kàu pun lín ēng, siōng-hó lín ka-kī khì kā bōe-iû-ê bóe.’ 10 In khì bóe ê sî sin-lông kàu-ūi, hiah-ê chún-pī hó-sè-ê kap i ji̍p khì hù hun-iàn, mn̂g chiū koaiⁿ khí-lâi. 11 “Āu-lâi hiah-ê gōng ê chāi-sek-lú mā lâi, kóng, ‘Sian-siⁿ, sian-siⁿ, chhiáⁿ kā goán khui-mn̂g.’ 12 Sin-lông ìn kóng, ‘Góa si̍t-chāi kā lín kóng, góa m̄-bat lín!’ 13 “Só͘-í, tio̍h kéng-séng, in-ūi hit-ê ji̍t hit-ê sî lín m̄-chai.” 14 “Thian-kok chhin-chhiūⁿ ū chi̍t ê lâng beh chhut-gōa lú-hêng, kiò ka-kī ê lô͘-po̍k lâi, chiong châi-sán kau-tài in. 15 I chiàu ta̍k lâng ê châi-tiāu kau kim-pè hō͘ in, chi̍t ê gō͘-chheng, chi̍t ê nn̄g-chheng, chi̍t ê chi̍t-chheng, chiū chhut-gōa khì. 16 Hit-ê niá gō͘-chheng ê sûi-sî the̍h khì chòe seng-lí, koh thàn gō͘-chheng. 17 Siâng-khoán, hit-ê niá nn̄g-chheng ê mā koh thàn nn̄g-chheng. 18 M̄-kú hit-ê niá chi̍t-chheng ê chhut-khì, tī thô͘-kha ó͘ chi̍t khang, kā chú-lâng ê kim-pè chhàng khí-lâi. 19 “Kè chin kú, hiah-ê lô͘-po̍k ê chú-lâng tńg-lâi, kap in sǹg-siàu. 20 Hit-ê niá gō͘-chheng ê kiâⁿ chìn-chêng, lēng-gōa the̍h gō͘-chheng lâi, kóng, ‘Thâu-ke, lí kau-tài góa gō͘-chheng ê kim-pè, chhiáⁿ khòaⁿ, góa ū koh thàn gō͘-chheng.’ 21 Chú-lâng kā i kóng, ‘Chin hó, hó koh tiong-si̍t ê lô͘-po̍k, lí kì-jiân tī chió-ê ū tiong-si̍t, góa beh phài lí koán khah chōe-ê; ji̍p-lâi kap chú-lâng chòe-hé hoaⁿ-hí.’ 22 “Niá nn̄g-chheng ê mā lâi, kóng, ‘Thâu-ke, lí kau-tài góa nn̄g-chheng ê kim-pè, chhiáⁿ lí khòaⁿ, góa ū koh thàn nn̄g-chheng.’ 23 Chú-lâng kā i kóng, ‘Chin hó, hó koh tiong-si̍t ê lô͘-po̍k, lí kì-jiân tī chió-ê ū tiong-si̍t, góa beh phài lí koán khah chōe-ê; ji̍p-lâi kap chú-lâng chòe-hé hoaⁿ-hí.’ 24 “Chit sî, hit-ê niá chi̍t-chheng ê mā kiâⁿ chìn-chêng, kóng, ‘Thâu-ke, góa chai lí sī giâm-hat ê lâng, bô iā-chéng mā beh siu-koah, bô chèng-choh mā beh siu-sêng. 25 Góa chin kiaⁿ, chiah chiong lí ê kim-pè the̍h-khì chhàng tī thô͘-kha-tóe. Taⁿ lí ê kim-pè hêng lí.’ 26 “Chú-lâng ìn kóng, ‘Pháiⁿ koh pîn-tōaⁿ ê lô͘-po̍k, lí kì-jiân chai góa bô iā-chéng mā beh siu-koah, bô chèng-choh mā beh siu-sêng, 27 lí eng-kai chiong góa ê kim-pè kià gûn-hâng, góa tńg-lâi ê sî thang liân-pún tài-lī siu-hôe. 28 Lín kā i ê kim-pè the̍h-lâi, kau hō͘ ū chi̍t-bān kim-pè hit-ê lâng. 29 In-ūi ū-ê, beh hō͘ i koh-khah chōe; bô-ê, liân i só͘-ū ê mā beh kā i chhiúⁿ khí-lâi. 30 Chit-ê bô lō͘-ēng ê lô͘-po̍k, kā i kóaⁿ chhut-khì gōa-bīn o͘-àm ê só͘-chāi; tī hia i ōe thî-khàu, kā-gê chhiat-chhí.’ ” 31 “Jîn-chú choh-ông chhōa chèng thiⁿ-sài lâi-lîm ê sî, I ōe chē tī êng-iāu ê pó-chō. 32 Tōe-chiūⁿ bān-bîn lóng ōe chū-chi̍p tī I bīn-chêng. I ōe chiong in hun-chòe nn̄g pêng, chhin-chhiūⁿ bo̍k-chiá chiong mî-iûⁿ kap soaⁿ-iûⁿ hun-khui; 33 kā mî-iûⁿ an-pâi tī chiàⁿ-pêng, soaⁿ-iûⁿ tī tò-pêng. 34 Āu-lâi, Ông ōe kā chiàⁿ-pêng ê lâng kóng, ‘Lâi, lín chiah-ê siū góa ê Pē chiok-hok ê, lâi sêng-siū tùi chhòng-chō ú-tiū í-lâi chiū ūi-tio̍h lín chún-pī ê kok-tō͘. 35 In-ūi góa iau, lín ū hō͘ góa chia̍h; góa chhùi-ta, lín ū hō͘ góa lim; góa choh chhut-gōa-lâng, lín ū kā góa siu-liû; 36 góa chhiah-sin lō͘-thé, lín ū hō͘ góa chhēng; góa phòa-pīⁿ, lín ū kā góa chiàu-kò͘; góa tī kaⁿ-ni̍h, lín ū lâi thàm góa.’ 37 “Hit sî, gī-lâng ōe ìn I kóng, ‘Chú ah, sím-mi̍h sî goán khòaⁿ-tio̍h lí iau ū hō͘ lí chia̍h, chhùi-ta ū hō͘ lí lim? 38 Sím-mi̍h sî goán khòaⁿ-tio̍h lí choh chhut-gōa-lâng ū kā lí siu-liû, chhiah-sin lō͘-thé ū hō͘ lí chhēng? 39 Sím-mi̍h sî goán khòaⁿ-tio̍h lí phòa-pīⁿ á-sī tī kaⁿ-ni̍h, goán ū khì thàm lí?’ 40 Ông ōe ìn kóng, ‘Góa si̍t-chāi kā lín kóng, lín ū án-ni tùi-thāi góa hiaⁿ-tī chí-bē siōng bî-sòe ê chi̍t ê, chiū-sī hó khoán-thāi góa.’ 41 “Āu-lâi, Ông ōe kā tò-pêng ê lâng kóng, ‘Lín chiah-ê siū chiù-chó͘ ê lâng, lī-khui góa, ji̍p-khì ūi-tio̍h Mô͘-kúi kap i ê sù-chiá só͘ chún-pī éng-oán ê hé-ni̍h. 42 In-ūi góa iau, lín bô hō͘ góa chia̍h; góa chhùi-ta, lín bô hō͘ góa lim; 43 góa choh chhut-gōa-lâng, lín bô kā góa siu-liû; góa chhiah-sin lō͘-thé, lín bô hō͘ góa chhēng; góa phòa-pīⁿ á-sī tī kaⁿ-ni̍h, lín bô lâi thàm góa.’ 44 “Hit sî, in mā ōe ìn kóng, ‘Chú ah, sím-mi̍h sî goán khòaⁿ-tio̍h lí iau, chhùi-ta, choh chhut-gōa-lâng, chhiah-sin lō͘-thé, phòa-pīⁿ, á-sī tī kaⁿ-ni̍h, bô kā lí chiàu-kò͘?’ 45 Ông ōe kā in kóng, ‘Góa si̍t-chāi kā lín kóng, lín bô án-ni tùi-thāi siōng bî-sòe ê chi̍t ê, chiū-sī bô hó khoán-thāi góa.’ 46 Chiah-ê lâng ōe siū éng-oán ê hêng-hoa̍t, chóng-sī gī-lâng ōe tit-tio̍h éng-oán ê oa̍h-miā.”

Má-thài 26

1 Iâ-so͘ kóng chiah-ê ōe liáu-āu kā I ê bûn-tô͘ kóng, 2 “Lín chai koh kè nn̄g ji̍t chiū-sī Pôaⁿ-kè-choeh, Jîn-chú ōe siū chhut-bōe hō͘ lâng tèng si̍p-jī-kè.” 3 Hit sî, chè-si-tiúⁿ kap bîn-kan ê tiúⁿ-ló chū-chi̍p tī tōa-chè-si [Kai-a-hoat] ê kong-koán. 4 In chham-siông beh ēng kè-bô͘ lia̍h Iâ-so͘, kā I hāi-sí. 5 M̄-kú in kóng, “M̄-thang tī choeh-kî tiong, kiaⁿ-liáu bîn-chiòng khí pō-tōng.” 6 Iâ-so͘ tī [Pek-tāi-nî] bâ-hong pīⁿ-lâng [Se-bûn] ê chhù teh chē-toh chia̍h-pn̄g ê sî, ū chi̍t ê hū-jîn-lâng the̍h chi̍t koàn ge̍k-pân, lāi-bīn tóe hui-siông ko-kùi ê phang-iû, kiâⁿ óa-lâi, chiong phang-iû tò tī Iâ-so͘ ê thâu-khak téng. 8 Bûn-tô͘ khòaⁿ-tio̍h chin siū-khì, kóng, “Ná-tio̍h chiah lōng-hùi? 9 Chit koàn phang-iû ōe-tàng bōe chin chōe chîⁿ lâi kiù-chè sàn-chhiah-lâng.” 10 Iâ-so͘ chai-iáⁿ, chiū tùi in kóng, “Lín ná-beh tiau-lân chit-ê hū-jîn-lâng? I ū ūi-tio̍h góa chòe chi̍t hāng hó-sū. 11 Put-sî ū sàn-chhiah-lâng kap lín chòe-hé, put-kò góa bōe put-sî kap lín chòe-hé. 12 I tò phang-iû tī góa ê seng-khu sī kā góa chún-pī bâi-chòng. 13 Góa si̍t-chāi kā lín kóng, chit-ê hok-im bô-lūn thoân kàu choân sè-kài sím-mi̍h só͘-chāi, lâng lóng ōe kóng-khí chit-ê hū-jîn-lâng ê só͘-chòe lâi kā i kì-liām.” 14 Cha̍p-jī sù-tô͘ ê chi̍t ê, kiò-chòe [Í-su-ka-lio̍k] ê [Iû-tāi], khì kìⁿ hiah-ê chè-si-tiúⁿ, 15 kóng, “Góa nā chiong Iâ-so͘ kau hō͘ lín, lín beh hō͘ góa sím-mi̍h?” In chiū the̍h saⁿ-cha̍p ê gûn-á hō͘ i. 16 Tùi hit sî khí, [Iû-tāi] it-ti̍t teh chhē ki-hōe beh chhut-bōe Iâ-so͘. 17 Tû-kàⁿ-choeh ê thâu-chi̍t ji̍t, bûn-tô͘ lâi mn̄g Iâ-so͘, “Lí ài goán tī tó-ūi kā lí chún-pī chia̍h Pôaⁿ-kè-choeh ê boán-chhan?” 18 Iâ-so͘ kóng, “Lín ji̍p-siâⁿ khì chhē hit-ê bó͘-lâng, kā i kóng, ‘Lāu-su kóng: Góa ê sî í-keng kàu, góa beh kap góa ê bûn-tô͘ tī lí ê chhù siú Pôaⁿ-kè-choeh.’ ” 19 Bûn-tô͘ chiū chiàu Iâ-so͘ ê hoan-hù khì chún-pī Pôaⁿ-kè-choeh ê boán-chhan. 20 Hông-hun ê sî, Iâ-so͘ kap cha̍p-jī sù-tô͘ chē-toh. 21 In teh chia̍h-pn̄g ê sî, Iâ-so͘ kóng, “Góa si̍t-chāi kā lín kóng, lín tiong-kan ū chi̍t ê lâng beh kā góa chhut-bōe.” 22 In chin siong-sim, chi̍t-ê chi̍t-ê kā I mn̄g, “Chú ah, m̄-sī góa hò͘ⁿ?” 23 Iâ-so͘ ìn kóng, “Chhun-chhiú kap góa siâng-sî the̍h chia̍h-mi̍h tī pôaⁿ-ni̍h teh ùn hit-ê lâng beh kā góa chhut-bōe. 24 Chiàu Sèng-keng só͘ kì-chài, Jîn-chú ōe siū hāi, put-kò chhut-bōe Jîn-chú ê lâng chhám à! Hit-ê lâng lêng-khó bô chhut-sì khah hó.” 25 Chhut-bōe Iâ-so͘ ê [Iû-tāi] mā kā I mn̄g, “Lia̍p-pí, m̄-sī góa hò͘ⁿ?” Iâ-so͘ ìn kóng, “Che sī lí kóng ê.” 26 In teh chia̍h ê sî, Iâ-so͘ the̍h piáⁿ, kám-siā liáu-āu peh-khui, pun hō͘ bûn-tô͘, kóng, “The̍h-khì chia̍h; che sī góa ê seng-khu.” 27 Jiân-āu I phâng-poe, kám-siā liáu-āu the̍h hō͘ bûn-tô͘, kóng, “Lín lóng tio̍h lim chit poe, 28 in-ūi che sī góa ê huih, sī li̍p-iok ê huih, ūi-tio̍h chin chōe lâng lâu-chhut ê, beh hō͘ in ê chōe tit-tio̍h sià-bián. 29 Góa kā lín kóng, tī góa ê Pē ê Kok kap lín lim sin ê phû-tô-chiú hit ji̍t í-chêng, góa choa̍t-tùi bōe-koh lim chit-ê chiú.” 30 In gîm-si liáu-āu chiū chhut-khì, khì [Ka-ná-soaⁿ]. 31 Iâ-so͘ kā in kóng, “Kim-mî lín lóng ōe pàng-sak góa, in-ūi Sèng-keng ū kì-chài: Góa beh phah bo̍k-chiá, kui-kûn iûⁿ chiū sì-sòaⁿ. 32 M̄-kú góa koh-oa̍h í-āu ōe pí lín seng khì [Ka-lī-lī].” 33 [Pí-tek] tùi Iâ-so͘ kóng, “Sui-jiân in tāi-ke lóng pàng-sak lí, góa choa̍t-tùi bōe pàng-sak lí!” 34 Iâ-so͘ kā i kóng, “Góa si̍t-chāi kā lí kóng, kim-mî koe thî í-chêng, lí ōe saⁿ pái m̄-jīn góa.” 35 [Pí-tek] ìn kóng, “Nā it-tēng tio̍h kap lí chòe-hé sí, góa mā choa̍t-tùi bōe m̄-jīn lí!” Kî-tha ê bûn-tô͘ mā lóng án-ni kóng. 36 Āu-lâi, Iâ-so͘ kap bûn-tô͘ lâi-kàu chi̍t ê só͘-chāi kiò-chòe [Khek-se-má-nî]. I kā bûn-tô͘ kóng, “Góa khì hia kî-tó, lín tiàm chia chē.” 37 I chiū chhōa [Pí-tek] kap [Se-pí-thài] ê nn̄g ê kiáⁿ chòe-hé khì. I pi-siong, hui-siông thòng-khó͘, 38 tùi in kóng, “Góa sim iu-siong kàu beh sí. Lín tiàm chia! Kap góa chòe-hé kéng-séng.” 39 I kiâⁿ khah chìn-chêng, bīn phak lo̍h-khì, kî-tó kóng, “Góa ê Pē ah, nā ōe-tàng, kiû lí hō͘ góa bián lim chit-ê poe, m̄-kú m̄-sī chiàu góa ê ì-sù, tio̍h chiàu lí ê chí-ì si̍t-hiān.” 40 I tńg-lâi bûn-tô͘ hia, khòaⁿ-tio̍h in teh khùn, chiū tùi [Pí-tek] kóng, “Lín chin-chiàⁿ bōe-tàng kap góa kéng-séng chi̍t tiám cheng kú sī-bô? 41 Tio̍h kéng-séng, tio̍h kî-tó, chiah bōe hām-lo̍h iú-he̍k; lín sui-jiân sim chin ì-ài, m̄-kú jio̍k-thé loán-jio̍k.” 42 Iâ-so͘ tē-jī piàn koh khì kî-tó, kóng, “Góa ê Pē ah, chit-ê poe nā bōe-tàng bián, góa it-tēng tio̍h lim, goān lí ê chí-ì si̍t-hiān.” 43 I koh tńg-lâi, khòaⁿ-tio̍h in in-ūi ba̍k-chiu siap iáu teh khùn. 44 Iâ-so͘ koh lī-khui in, tē-saⁿ piàn khì kî-tó, mā-sī kóng siâng-khoán ê ōe. 45 Jiân-āu I koh tńg-lâi bûn-tô͘ hia, tùi in kóng, “Lín iáu teh khùn, iáu teh hioh-khùn ò͘? Lín khòaⁿ, sî-kan chiap-kūn lah; Jîn-chú siū chhut-bōe kau tī chōe-jîn ê chhiú-thâu lah. 46 Khí-lâi, lán lâi-khì. Lín khòaⁿ, chhut-bōe góa ê lâng lâi lah.” 47 Iâ-so͘ iáu teh kóng-ōe ê sî, cha̍p-jī sù-tô͘ ê chi̍t ê --- [Iû-tāi] lâi, chè-si-tiúⁿ kap bîn-kan ê tiúⁿ-ló phài lâi ê chi̍t tōa-tīn lâng gia̍h to gia̍h kùn kap i tàu-tīn lâi. 48 Chhut-bōe Iâ-so͘ hit-ê lâng ū hō͘ in chi̍t ê àm-hō, kóng, “Góa kā I chim hit-ê chiū-sī; lín kā I lia̍h.” 49 [Iû-tāi] sûi-sî kiâⁿ-óa Iâ-so͘, tùi I kóng, “Lia̍p-pí, pêng-an!” chiū kā I chim. 50 Iâ-so͘ kā i kóng, “Pêng-iú, lí ná tī chia?” Hiah-ê lâng chiū óa-khì, hē-chhiú lia̍h Iâ-so͘. 51 Hut-jiân, ū chi̍t ê kap Iâ-so͘ tàu-tīn ê lâng chhun-chhiú pu̍ih-to tùi tōa-chè-si ê lô͘-po̍k phut lo̍h-khì, kā chi̍t pêng ê hīⁿ-á siah khí-lâi. 52 Iâ-so͘ kā i kóng, “To siu khí-lâi, in-ūi gia̍h-to-ê lóng ōe sí tī to-ē. 53 Lí siūⁿ-kóng góa bōe-tàng khún-kiû góa ê Pē sûi-sî chhe cha̍p-jī iâⁿ khah ke ê thiⁿ-sài lâi sī-bô? 54 Góa nā án-ni chòe, Sèng-keng só͘ kì-chài it-tēng tio̍h hoat-seng ê tāi-chì ná-ōe èng-giām?” 55 Hit sî Iâ-so͘ tùi kûn-chiòng kóng, “Lín gia̍h to gia̍h kùn chhut-lâi lia̍h góa sī beh lia̍h kiông-tō sī-bô? Góa ta̍k ji̍t tī Sèng-tiān chē teh kà-sī lâng, lín bô kā góa lia̍h. 56 Put-kò che it-chhè ê tāi-chì lóng í-keng si̍t-hiān, sī beh èng-giām sian-ti tī Sèng-keng só͘ kóng ê ōe.” Jiân-āu, só͘-ū ê bûn-tô͘ lóng pàng-sak Iâ-so͘ tô-cháu. 57 Hiah-ê lia̍h Iâ-so͘ ê lâng kā I chhōa-khì tōa-chè-si [Kai-a-hoat] hia; keng-ha̍k-kàu-su kap tiúⁿ-ló lóng í-keng chū-chi̍p tī hia. 58 [Pí-tek] lī hn̄g-hn̄g teh tè Iâ-so͘, tè kàu tōa-chè-si kong-koán ê tiâⁿ. I ji̍p-khì lāi-bīn kap kéng-ōe chòe-hé chē, beh khòaⁿ tāi-chì ê kiat-kio̍k. 59 Chè-si-tiúⁿ kap choân gī-hōe it-ti̍t teh chhē ké chèng-kù beh kò Iâ-so͘, thang kā I chhú-sí. 60 Sui-jiân ū chin chōe lâng chhut-lâi kā I bû-kò, m̄-kú in lóng chhē bô chèng-kù. Āu-lâi ū nn̄g ê lâng chhut-lâi, 61 kóng, “Chit-ê lâng bat kóng ‘Góa ū hoat-tō͘ húi-hoāi Siōng-tè ê Sèng-tiān, saⁿ ji̍t lāi koh kā i khí khí-lâi.’ ” 62 Tōa-chè-si khiā khí-lâi tùi Iâ-so͘ kóng, “Chiah-ê lâng teh kā lí kò sím-mi̍h? Lí ná lóng bô tap-piān?” 63 M̄-kú Iâ-so͘ lóng tiām-tiām. Tōa-chè-si koh chi̍t piàn tùi I kóng, “Góa bēng-lēng lí kí éng-oán-oa̍h ê Siōng-tè chiù-chōa kā goán kóng, lí sī Ki-tok, Siōng-tè ê Kiáⁿ á m̄-sī.” 64 Iâ-so͘ ìn kóng, “Lí í-keng kóng lah. M̄-kú góa kā lín kóng, tùi taⁿ í-āu lín ōe khòaⁿ-kìⁿ Jîn-chú chē tī Choân-lêng-chiá ê chiàⁿ-pêng, chē thiⁿ-téng ê hûn lâi-lîm.” 65 Tōa-chè-si chiū thiah-phòa gōa-saⁿ, kóng, “I í-keng siat-to̍k Siōng-tè. Lán iáu su-iàu sím-mi̍h chèng-jîn? Taⁿ lín í-keng ū thiaⁿ-tio̍h I siat-to̍k Siōng-tè. 66 Lín siūⁿ án-chóaⁿ?” In ìn kóng, “I kai sí!” 67 Āu-lâi in phùi-nōa tī Iâ-so͘ ê bīn, kā I cheng, koh ū lâng kā I siàn, 68 kóng, “Ki-tok à, lí sī sian-ti, kā goán kóng khòaⁿ-bāi, siáⁿ-lâng kā lí phah?” 69 [Pí-tek] tī kong-koán gōa-bīn ê tiâⁿ teh chē, ū chi̍t ê lú-pī kiâⁿ óa-khì, kóng, “Lí mā lóng ū teh kap hit-ê [Ka-lī-lī]-lâng Iâ-so͘ chòe-hé.” 70 [Pí-tek] tī chèng-lâng ê bīn-chêng m̄-jīn, kóng, “Góa m̄-chai lí teh kóng sím-mi̍h.” 71 [Pí-tek] kiâⁿ chhut-khì kàu tōa mn̂g-kháu ê sî, ū lēng-gōa chi̍t ê lú-pī khòaⁿ-tio̍h i, chiū kā tī hia ê lâng kóng, “Chit-ê lâng ū teh kap [Ná-sat-le̍k]-lâng Iâ-so͘ chòe-hé.” 72 [Pí-tek] koh chi̍t piàn chiù-chōa m̄-jīn, kóng, “Góa m̄-bat hit-ê lâng.” 73 Kè bô jōa kú, khiā tī piⁿ-a ê lâng óa-lâi, tùi [Pí-tek] kóng, “Lí khak-si̍t mā-sī in hit tīn ê lâng, thiaⁿ lí ê khiuⁿ chiū chai.” 74 I chiū chiù-chōa kóng, “Góa m̄-bat hit-ê lâng. Góa nā kóng pe̍h-chha̍t, goān Thiⁿ chek-hoa̍t góa!” Koe sûi-sî thî. 75 [Pí-tek] siūⁿ-tio̍h Iâ-so͘ só͘ kóng ê ōe, “Koe thî í-chêng, lí ōe saⁿ pái m̄-jīn góa”; i chiū chhut-khì gōa-bīn tōa-siaⁿ thî-khàu.

Má-thài 27

1 Thàu-chá, só͘-ū ê chè-si-tiúⁿ kap bîn-kan ê tiúⁿ-ló tàu-tīn chham-siông beh hām-hāi Iâ-so͘, kā I chhú sí-hêng. 2 In kā Iâ-so͘ pa̍k khí-lâi, ah-khì kau hō͘ [Lô-má] chóng-tok [Pí-lia̍p-to]. 3 Chhut-bōe Iâ-so͘ ê [Iû-tāi] khòaⁿ-tio̍h Iâ-so͘ í-keng siū tēng-chōe, chiū hō͘-hóe, the̍h hit saⁿ-cha̍p ê gûn-á khì hêng hō͘ hiah-ê chè-si-tiúⁿ kap tiúⁿ-ló, 4 kóng, “Chhut-bōe bû-ko͘ ê lâng, góa ū chōe lah!” In ìn kóng, “Bô goán ê tāi-chì, lí ka-kī hū-chek!” 5 [Iû-tāi] chiong hiah-ê gûn-á hiat tī Sèng-tiān ê lāi-bīn chiū lī-khui, khì tiàu-sí. 6 Hiah-ê chè-si-tiúⁿ chiong gûn-á khioh khí-lâi, kóng, “Che sī huih-chîⁿ, bô eng-kai khǹg ji̍p Sèng-tiān ê kim-khò͘.” 7 In chham-siông liáu koat-tēng ēng chiah-ê chîⁿ khì bóe sio-hûi-lâng ê hn̂g, thang bâi-chòng chhut-gōa-lâng. 8 Só͘-í hit-ê hn̂g kàu kin-á-ji̍t iáu kiò-chòe Huih-hn̂g. 9 Chit-ê tāi-chì èng-giām Siōng-tè thong-kè sian-ti [Iâ-lī-bí] só͘ kóng ê ōe: “In the̍h hit saⁿ-cha̍p ê gûn-á, chiū-sī [Í-sek-lia̍t]-lâng ūi-tio̍h i kó͘-kè ê kè-chîⁿ, 10 chiàu Chú só͘ bēng-lēng góa ê, khì bóe hit khu sio-hûi-lâng ê hn̂g.” 11 Iâ-so͘ khiā tī chóng-tok ê bīn-chêng, chóng-tok mn̄g I kóng, “Lí sī [Iû-thài]-lâng ê Ông sī-bô?” Iâ-so͘ ìn kóng, “Che sī lí kóng ê.” 12 Hiah-ê chè-si-tiúⁿ kap tiúⁿ-ló khòng-kò Iâ-so͘ ê sî, I lóng bô ìn. 13 Āu-lâi [Pí-lia̍p-to] tùi I kóng, “In kā lí khòng-kò chiah-chōe hāng tāi-chì, lí kiám bô thiaⁿ-kìⁿ?” 14 Iâ-so͘ iû-goân bô kā i ìn, liân chi̍t kù mā bô, chóng-tok soah kám-kak hui-siông kî-koài. 15 Ta̍k nî ê Pôaⁿ-kè-choeh, chiàu koàn-lē chóng-tok lóng ū pàng chi̍t ê kûn-chiòng ài pàng ê hoān-lâng. 16 Hit sî tú-hó ū chi̍t ê tāi-ke lóng bat ê hoān-lâng, miâ kiò-chòe [Iâ-so͘] [Pa-lia̍p-pa]. 17 Só͘-í, kûn-chiòng chū-chi̍p ê sî, [Pí-lia̍p-to] mn̄g in kóng, “Lín ài góa pàng tó chi̍t ê hō͘ lín? [Iâ-so͘] [Pa-lia̍p-pa], á-sī chheng-chòe Ki-tok ê Iâ-so͘?” 18 [Pí-lia̍p-to] chai in sī in-ūi oàn-tò͘ chiah chiong Iâ-so͘ kau hō͘ i. 19 [Pí-lia̍p-to] khui-têng sím-mn̄g ê sî, i ê hu-jîn chhe lâng lâi kā i kóng, “Hit-ê gī-lâng ê tāi-chì, lí chhian-bān m̄-thang chhap; cha-àm góa tī bîn-bāng tiong in-ūi I siū chin chōe khó͘.” 20 Hiah-ê chè-si-tiúⁿ kap tiúⁿ-ló siàn-tōng bîn-chiòng, kah in tio̍h iau-kiû pàng [Pa-lia̍p-pa], kā Iâ-so͘ chhú sí-hêng. 21 Chóng-tok koh mn̄g in, “Chit nn̄g ê lâng lín ài góa pàng tó chi̍t ê hō͘ lín?” In ìn, “[Pa-lia̍p-pa]!” 22 [Pí-lia̍p-to] mn̄g in, “Án-ni, hit-ê chheng-chòe Ki-tok ê Iâ-so͘, lín ài góa án-chóaⁿ chhú-lí?” Kûn-chiòng lóng ìn, “Kā tèng si̍p-jī-kè!” 23 [Pí-lia̍p-to] kóng, “Sī-án-chóaⁿ? I ū chòe sím-mi̍h pháiⁿ tāi-chì?” In koh-khah tōa-siaⁿ hoah, “Kā tèng si̍p-jī-kè!” 24 [Pí-lia̍p-to] khòaⁿ í-keng bô chhái-kang, kiông-beh ín-khí pō-tōng, chiū the̍h chúi tī kûn-chiòng bīn-chêng sóe-chhiú, kóng, “Lín ka-kī hū-chek.” 25 Bîn-chiòng lóng ìn kóng, “Chit-ê lâng ê huih-chè, goán kap goán ê kiáⁿ-sun lâi tam-tng.” 26 [Pí-lia̍p-to] chiū pàng [Pa-lia̍p-pa] hō͘ in, koh bēng-lēng lâng ēng piⁿ phah Iâ-so͘, jiân-āu kau I khì tèng si̍p-jī-kè. 27 Chóng-tok ê peng-sū ah Iâ-so͘ ji̍p-khì chóng-tok-hú, tiàu-chi̍p choân-tūi ê peng kā I ûi khí-lâi. 28 In chiong Iâ-so͘ ê saⁿ thǹg khí-lâi, kā I chhēng chu-âng-sek ê tn̂g-phàu, 29 koh ēng chhì-á pīⁿ chi̍t téng ông-koan kā tì tī thâu-khak-téng, chiong chi̍t ki lô͘-tek-á hō͘ I gia̍h tī chiàⁿ-chhiú. In koh kūi tī I ê bīn-chêng hì-lāng, kóng, “[Iû-thài]-lâng ê Ông bān-sòe!” 30 In koh kā I phùi chhùi-nōa, gia̍h hit ki lô͘-tek-á sut I ê thâu-khak. 31 In kā I hì-lāng liáu-āu, chiong hit niá tn̂g-phàu kā thǹg khí-lâi, koh chiong I ka-kī ê saⁿ kā chhēng tò tńg-khì, jiân-āu kau I khì tèng si̍p-jī-kè. 32 In chhut-khì ê sî tú-tio̍h chi̍t ê [Kó͘-lī-nāi]-lâng, miâ kiò-chòe [Se-bûn]. In kiông-pek i giâ Iâ-so͘ ê si̍p-jī-kè. 33 In kàu chi̍t ê só͘-chāi kiò-chòe [Kok-kok-tha], chiū-sī “[Thâu-khak-óaⁿ-niá]”, 34 chiū ēng chham khó͘-táⁿ ê chiú hō͘ Iâ-so͘ lim; I tam chi̍t-ē, m̄ lim. 35 Peng-sū tèng Iâ-so͘ tī si̍p-jī-kè liáu-āu thiu-chhiam pun I ê saⁿ, 36 jiân-āu chē tī hia kò͘-siú. 37 In tī I ê thâu-khak téng tèng chi̍t ê chōe-chn̄g, siá kóng, “Chit-ê sī [Iû-thài]-lâng ê Ông Iâ-so͘.” 38 Ū nn̄g ê kiông-tō kap Iâ-so͘ chòe-hé tèng si̍p-jī-kè, chi̍t ê tī chiàⁿ-pêng, chi̍t ê tī tò-pêng. 39 Tùi hia keng-kè ê lâng kā I bú-jio̍k, iô-thâu, 40 kóng, “Lí chit-ê lâng, kóng beh thiah-húi Sèng-tiān saⁿ ji̍t lāi koh khí khí-lâi, tio̍h kiù ka-kī. Lí nā-sī Siōng-tè ê Kiáⁿ, tio̍h tùi si̍p-jī-kè lo̍h-lâi.” 41 Chè-si-tiúⁿ, keng-ha̍k-kàu-su, kap tiúⁿ-ló mā lóng án-ni kā I thí-chhiò, kóng, 42 “I kiù pa̍t-lâng, bô hoat-tō͘ kiù ka-kī. I sī [Í-sek-lia̍t] ê Ông, hiān-chāi tio̍h tùi si̍p-jī-kè lo̍h-lâi, lán chiū sìn I. 43 I sìn-khò Siōng-tè; Siōng-tè nā beh kiù I, hiān-chāi tio̍h kiù I; in-ūi I kóng, ‘Góa sī Siōng-tè ê Kiáⁿ.’ ” 44 Kap Iâ-so͘ chòe-hé tèng si̍p-jī-kè hit nn̄g ê kiông-tō mā kâng-khoán kā I bú-jio̍k. 45 Tùi tiong-tàu khí sòa kàu ē-po͘ saⁿ tiám, choân-tōe lóng o͘-àm. 46 Ē-po͘ saⁿ tiám chó-iū, Iâ-so͘ tōa-siaⁿ hoah, “Í-lī, Í-lī, la-má sat-pak-tāi-nî?” ì-sù sī “Góa ê Siōng-tè, góa ê Siōng-tè, lí sī-án-chóaⁿ pàng-sak góa?” 47 Ū chi̍t-kóa khiā tī hia ê lâng thiaⁿ-tio̍h, kóng, “Chit-ê lâng teh kiò [Í-lī-a].” 48 Kî-tiong ū chi̍t ê lâng sûi-sî cháu-khì the̍h hái-mî, chìm sng-chiú, pa̍k tī lô͘-tek-á bé, tu-khì hō͘ Iâ-so͘ suh. 49 Kî-tha ê lâng kóng, “Tán chi̍t-ē! Khòaⁿ [Í-lī-a] ōe lâi kā I kiù bōe.” 50 Iâ-so͘ koh tōa-siaⁿ hoah chi̍t siaⁿ, khùi chiū tn̄g. 51 Hut-jiân, Sèng-tiān lāi ê tiùⁿ-lî tùi-téng-kàu-ē li̍h-chòe nn̄g pêng; tōe tōa tín-tāng, chio̍h-pôaⁿ piak-li̍h; 52 bōng mā khui; ū chin chōe í-keng sí-khì ê Siōng-tè chú-bîn ê si-thé lóng koh-oa̍h khí-lâi. 53 Iâ-so͘ koh-oa̍h í-āu hiah-ê lâng tùi bōng chhut-lâi, ji̍p-khì Sèng-siâⁿ, chhut-hiān hō͘ chin chōe lâng khòaⁿ-kìⁿ. 54 Hit-ê kun-koaⁿ kap chòe-hé kò͘-siú Iâ-so͘ ê peng-sū khòaⁿ-tio̍h tōe-tāng kap só͘ hoat-seng ê tāi-chì, hui-siông kiaⁿ-hiâⁿ, kóng “Chit-ê khak-si̍t sī Siōng-tè ê Kiáⁿ!” 55 Tī hia ū chin chōe hū-jîn-lâng tùi hn̄g-hn̄g teh khòaⁿ; in sī tùi [Ka-lī-lī] tè Iâ-so͘ lâi sū-hāu I ê, 56 kî-tiong ū [Boa̍t-tāi-lia̍p] ê [Má-lī-a], [Ngá-kok] kap [Iok-sek] ê lāu-bú [Má-lī-a], koh ū [Se-pí-thài] nn̄g ê kiáⁿ ê lāu-bú. 57 Hông-hun ê sî, ū chi̍t ê [A-lī-má-thài] ê hó-gia̍h-lâng lâi, i miâ kiò-chòe [Iok-sek], mā-sī Iâ-so͘ ê bûn-tô͘. 58 Chit-ê lâng khì kìⁿ [Pí-lia̍p-to], chhéng-kiû chiong Iâ-so͘ ê ûi-thé hō͘ i. [Pí-lia̍p-to] chiū hoan-hù lâng chiong ûi-thé hō͘ i. 59 [Iok-sek] kā Iâ-so͘ ê ûi-thé siu lo̍h-lâi í-āu, ēng chheng-khì ê iù-môa-pò͘ pau khí-lâi, 60 jiân-āu kā I an-chòng tī ka-kī ê sin bōng, chiū-sī [Iok-sek] phah tī chio̍h-piah ni̍h ê bōng. I koh kō chi̍t tè tōa tè chio̍h lâi that tī bōng-kháu chiah lī-khui. 61 Hit sî, ū [Boa̍t-tāi-lia̍p] ê [Má-lī-a] kap pa̍t ê [Má-lī-a] tī hia, chē tī bōng ê tùi-bīn. 62 Keh-ji̍t, chiū-sī Pī-pān-ji̍t āu hit ji̍t, hiah-ê chè-si-tiúⁿ kap Hoat-lī-sài-phài ê lâng chòe-hé khì kìⁿ [Pí-lia̍p-to], 63 kóng, “Tāi-jîn, goán ōe kì-tit hit-ê pián-sian-á iáu oa̍h-teh ê sî bat kóng, ‘Saⁿ ji̍t āu, góa ōe koh-oa̍h.’ 64 Só͘-í, chhiáⁿ lí hā-lēng giâm-siú hûn-bōng kàu tē-saⁿ ji̍t, chiah bōe hō͘ I ê bûn-tô͘ lâi thau-the̍h I ê sin-si, soah kā bîn-chiòng kóng ‘I í-keng tùi sí-lâng tiong koh-oa̍h’. Nā án-ni, chit-ê chòe-āu ê khi-phiàn ōe pí thâu-chi̍t-piàn ê koh-khah giâm-tiōng.” 65 [Pí-lia̍p-to] kā in kóng, “Lín chhōa ōe-peng khì, chīn-só͘-ōe giâm-bi̍t kò͘-siú hit-ê bōng.” 66 In chiū khì, ēng hong-tiâu hong hit tè chio̍h-thâu, lâu ōe-peng tī hia kò͘-siú.

Má-thài 28

1 An-hioh-ji̍t kè liáu, Lé-pài-ji̍t thiⁿ beh kng ê sî, [Boa̍t-tāi-lia̍p] ê [Má-lī-a] kap pa̍t ê [Má-lī-a] khì thàm-bōng. 2 Hut-jiân, ū tōa tōe-tāng, in-ūi Chú ê chi̍t ê thiⁿ-sài tùi thiⁿ kàng-lîm, chiong hit tè chio̍h-thâu kō-khui, chē tī hit téng-bīn. 3 I ê bīn-māu chhin-chhiūⁿ sih-nà, i ê saⁿ chhin-chhiūⁿ seh hiah-ni̍h pe̍h. 4 Hiah-ê kò͘-siú ê ōe-peng kiaⁿ-kah phi̍h-phi̍h-chhoah, soah pìⁿ-chòe chhin-chhiūⁿ sí-lâng. 5 Hit-ê thiⁿ-sài kā hiah-ê hū-jîn-lâng kóng, “M̄-bián kiaⁿ; góa chai lín teh chhē hō͘ lâng tèng si̍p-jī-kè ê Iâ-so͘. 6 I bô tī chia, chiàu I só͘ kóng, I í-keng koh-oa̍h. Lâi, lâi khòaⁿ I tó ê só͘-chāi. 7 Lín kóaⁿ-kín khì kā I ê bûn-tô͘ kóng, ‘I í-keng tùi sí-lâng tiong koh-oa̍h lah. I pí lín seng khì [Ka-lī-lī]; tī hia lín ōe kìⁿ-tio̍h I.’ Tio̍h ōe kì-tit góa í-keng ū kā lín kóng lah.” 8 In chiū kóaⁿ-kín lī-khui bōng, iā kiaⁿ iā tōa hoaⁿ-hí, cháu-khì kā Iâ-so͘ ê bûn-tô͘ kóng. 9 Hut-jiân, Iâ-so͘ chhut-hiān, tùi in kóng, “Tāi-ke pêng-an!” In kiâⁿ chìn-chêng lám I ê kha, kā I pài. 10 Iâ-so͘ kā in kóng, “M̄-bián kiaⁿ! Khì kā góa ê hiaⁿ-tī kóng, kiò in khì [Ka-lī-lī], tī hia in ōe kìⁿ-tio̍h góa.” 11 Hiah-ê hū-jîn-lâng lī-khui ê sî, ū chi̍t-kóa kò͘-siú bōng ê ōe-peng ji̍p-khì siâⁿ-lāi, chiong só͘ hoat-seng ê tāi-chì lóng kā chè-si-tiúⁿ pò-kò. 12 Chè-si-tiúⁿ kap tiúⁿ-ló chū-chi̍p chham-siông liáu-āu, the̍h chin chōe gûn-á hō͘ hiah-ê peng, 13 kóng, “Lín tio̍h án-ni kóng, ‘I ê bûn-tô͘ àm-sî lâi, tī goán teh khùn ê sî chiong I ê sin-si thau the̍h-khì.’ 14 Bān-it chóng-tok thiaⁿ-tio̍h chit-ê tāi-chì, goán ōe khì kā i an-tah, pau lín bô tāi-chì.” 15 Ōe-peng chiū the̍h hiah-ê gûn-á chiàu in só͘ hoan-hù ê khì chòe. Chit-ê tāi-chì kàu kin-á-ji̍t iáu tī [Iû-thài]-lâng ê tiong-kan teh liû-thoân. 16 Cha̍p-it ê bûn-tô͘ khì [Ka-lī-lī], kàu Iâ-so͘ chí-tēng in khì hit chō soaⁿ-téng. 17 In kìⁿ-tio̍h Iâ-so͘ chiū kā I pài, put-kò ū lâng iáu teh giâu-gî. 18 Iâ-so͘ kiâⁿ óa-khì kā in kóng, “Siōng-tè í-keng chiong thiⁿ-téng tōe-ē it-chhè ê koân-pèng lóng hō͘ góa. 19 Só͘-í, lín tio̍h khì chio bān-bîn lâi chòe bûn-tô͘, kā in sóe-lé, hō͘ in kui tī Pē, Kiáⁿ, Sèng Sîn ê miâ, 20 kà-sī in chun-siú góa só͘ hō͘ lín it-chhè ê bēng-lēng. Tio̍h ōe kì-tit, góa ta̍k ji̍t kap lín tông-chāi, ti̍t-kàu kim-sè ê kiat-sok.”

Má-khó 1

1 Siōng-tè ê Kiáⁿ Iâ-so͘ Ki-tok ê hok-im án-ni khai-sí. 2 Sian-ti [Í-sài-a] ê chheh ū kì-chài: Siōng-tè kóng: Khòaⁿ ah, góa chhe góa ê sù-chiá chòe lí ê sian-hong, i beh kā lí khui-lō͘. 3 Ū siaⁿ tī khòng-iá teh hoah: Ūi Chú chún-pī tō-lō͘, ūi I siu-ti̍t sió-lō͘. 4 Kó-jiân, [Iok-hān] tī khòng-iá chhut-hiān, kā lâng sóe-lé, soan-iông kóng, “Tio̍h hóe-kái, niá-siū sóe-lé, Siōng-tè chiū sià-bián lín ê chōe.” 5 [Iû-thài] ta̍k só͘-chāi ū chin chōe lâng kap [Iâ-lō͘-sat-léng] só͘-ū ê lâng lóng chhut-lâi, khì [Iok-hān] hia, kò-pe̍k ka-kī ê chōe, tī [Iok-tàn-hô] tùi i niá-siū sóe-lé. 6 [Iok-hān] chhēng lo̍k-tô-mn̂g ê saⁿ, io hâ phê-tòa, chia̍h chháu-meh kap iá-bi̍t. 7 I soan-iông kóng, “Ū chi̍t ūi pí góa khah ū koân-lêng-ê tī góa āu-bīn teh lâi, góa liân khû lo̍h-khì kā I tháu ôe-tòa to bōe kham-tit. 8 Góa ēng chúi kā lín sóe-lé, m̄-kú I beh ēng Sèng Sîn kā lín sóe-lé.” 9 Kè bô kúi-ji̍t, Iâ-so͘ tùi [Ka-lī-lī] ê [Ná-sat-le̍k] lâi, tī [Iok-tàn-hô] tùi [Iok-hān] niá-siū sóe-lé. 10 Iâ-so͘ chi̍t-ē tùi chúi-ni̍h khí-lâi, chiū khòaⁿ-kìⁿ thiⁿ li̍h-khui, Sèng Sîn chhin-chhiūⁿ hún-chiáu kàng-lo̍h tī I sin-chiūⁿ. 11 Koh tùi thiⁿ ū siaⁿ kóng: Lí sī góa só͘ thiàⁿ ê Kiáⁿ, lí, góa chin ì-ài. 12 Sèng Sîn sûi-sî chhui-pek Iâ-so͘ khì khòng-iá. 13 I tī khòng-iá sì-cha̍p ji̍t kú siū Sat-tàn chhì-thàm; I it-ti̍t lóng kap iá-siù chòe-hé, m̄-kú ū thiⁿ-sài teh kā I sū-hāu. 14 [Iok-hān] siū lia̍h liáu-āu, Iâ-so͘ khì [Ka-lī-lī] soan-iông Siōng-tè ê hok-im, 15 kóng, “Sî-ki kàu à, Siōng-tè ê chú-koân teh-beh si̍t-hiān lah, tio̍h hóe-kái, sìn hok-im.” 16 Iâ-so͘ tùi [Ka-lī-lī] ô͘-piⁿ keng-kè ê sî, khòaⁿ-tio̍h [Se-bûn] kap i ê sió-tī [An-tek-lia̍t] tī ô͘-ni̍h teh pha-bāng, in-ūi in sī lia̍h-hî-ê. 17 Iâ-so͘ tùi in kóng, “Lâi tè góa, góa beh hō͘ lín tit-tio̍h lâng chhin-chhiūⁿ lia̍h-hî-ê tit-tio̍h hî.” 18 In sûi-sî kā bāng pàng-leh, khì tè Iâ-so͘. 19 Kiâⁿ bô jōa hn̄g, Iâ-so͘ khòaⁿ-tio̍h [Se-pí-thài] ê kiáⁿ [Ngá-kok] kap i ê sió-tī [Iok-hān] tī chûn-téng teh chéng-lí bāng. 20 I sûi-sî ho͘-tiàu in, in chiū chiong lāu-pē [Se-pí-thài] kap chhiàⁿ ê kang-lâng pàng tī chûn-téng, tè Iâ-so͘ khì. 21 Iâ-so͘ kap I ê bûn-tô͘ kàu [Ka-pek-lông]; An-hioh-ji̍t chi̍t-ē kàu, I sûi-sî ji̍p-khì hōe-tn̂g kà-sī. 22 Chèng-lâng tùi I ê kà-sī kám-kak hui-siông hi-kî, in-ūi I ê kà-sī chin ū koân-ui, kap keng-ha̍k-kàu-su bô sio-siâng. 23 Hit sî, hōe-tn̂g lāi ū chi̍t ê siâ-sîn hū-sin ê lâng hiông-hiông hoah chhut-lâi, 24 “[Ná-sat-le̍k]-lâng Iâ-so͘, lí mài chhap goán! Lí lâi beh húi-bia̍t goán sī-bô? Góa chai lí sī sím-mi̍h-lâng; lí sī Siōng-tè ê Sèng-chiá.” 25 Iâ-so͘ kā i chek-pī kóng, “Tiām-tiām! Tùi chit-ê lâng chhut-khì!” 26 Siâ-sîn hō͘ hit-ê lâng thiu-chhoah, tōa-siaⁿ hoah chi̍t siaⁿ, chiū tùi i chhut-khì. 27 Chèng-lâng tio̍h-kiaⁿ, gī-lūn hun-hun kóng, “Che sī sím-mi̍h tāi-chì? Sī ū koân-pèng ê sin kà-sī! I bēng-lēng siâ-sîn, in lóng hâng-ho̍k.” 28 Iâ-so͘ ê miâ-siaⁿ sûi-sî thoân kàu [Ka-lī-lī] kap chiu-ûi ta̍k só͘-chāi. 29 Iâ-so͘ chi̍t-ē lī-khui hōe-tn̂g, sûi-sî chhōa [Ngá-kok] kap [Iok-hān] khì [Se-bûn] kap [An-tek-lia̍t] in tau. 30 [Se-bûn] ê tiūⁿ-ḿ tú teh hoat-jia̍t, tó tī bîn-chhn̂g, in sûi-sî chiong i ê chêng-hêng kā Iâ-so͘ kóng. 31 Iâ-so͘ kiâⁿ óa-khì khan i ê chhiú, kā i hû khí-lâi; i ê jia̍t thòe-khì, chiū kā in sū-hāu. 32 Hông-hun, ji̍t-lo̍h ê sî, chèng-lâng chiong ta̍k chióng pīⁿ-lâng kap kúi hū-sin ê lâng lóng chhōa lâi Iâ-so͘ hia. 33 Thong-siâⁿ ê lâng lóng chū-chi̍p tī mn̂g-kháu. 34 Iâ-so͘ i-hó chin chōe hoān-tio̍h ta̍k khoán pīⁿ ê lâng, koh kóaⁿ-chhut chin chōe kúi. I m̄-chún kúi kóng-ōe, in-ūi in chai I sī sím-mi̍h lâng. 35 Keh-ji̍t thàu-chá, thiⁿ iáu-bē kng, Iâ-so͘ chiū khí-lâi, chhut-khì phian-phiah bô-lâng tòa ê só͘-chāi, tī hia kî-tó. 36 [Se-bûn] kap tâng-phōaⁿ khì chhē I. 37 In chhē-tio̍h chiū kā I kóng, “Ta̍k ê lóng teh chhē lí.” 38 Iâ-so͘ ìn kóng, “Lán lâi-khì hù-kūn ê chng-siā, góa mā thang tī hia thoân-tō, in-ūi che sī góa chhut-lâi ê bo̍k-te̍k.” 39 Iâ-so͘ khì [Ka-lī-lī] ta̍k só͘-chāi, tī in ê hōe-tn̂g thoân-tō koh kóaⁿ-kúi. 40 Ū chi̍t ê bâ-hong pīⁿ-lâng lâi khún-kiû Iâ-so͘, kūi lo̍h-khì tùi I kóng, “Lí nā khéng, ōe-tàng hō͘ góa chheng-khì.” 41 Iâ-so͘ móa-sim lîn-bín, chhun-chhiú kā i bong, kóng, “Góa khéng, hō͘ lí chheng-khì!” 42 I ê bâ-hong sûi-sî bô-khì, i chiū chheng-khì. 43 Iâ-so͘ sûi-sî kiò i lī-khui, giâm-giâm kā i hoan-hù, 44 kóng, “Chhian-bān m̄-thang kā lâng kóng. Put-kò lí tio̍h khì hō͘ chè-si giām, koh chiàu [Mô͘-se] ê kui-tēng ūi-tio̍h lí ū tit-tio̍h chheng-khì hiàn chè-mi̍h, thang tùi chèng-lâng chèng-bêng.” 45 M̄-kú, i chi̍t-ē chhut-khì chiū sì-kòe soan-thoân pò-iông chit-ê siau-sit, tì-kàu Iâ-so͘ bōe-tàng kong-khai ji̍p-siâⁿ, soah tio̍h tòa tī siâⁿ-gōa phian-phiah ê só͘-chāi. Chèng-lâng iû-goân tùi ta̍k só͘-chāi khì chhē I.

Má-khó 2

1 Kúi ji̍t āu, Iâ-so͘ koh khì [Ka-pek-lông], ū siau-sit thoân kóng I tī chhù-lāi, 2 chiū ū chin chōe lâng chū-chi̍p óa-lâi, soah lóng bô khang-ūi, liân mn̂g-kháu to bô. Iâ-so͘ tùi in teh káng-tō ê sî, 3 ū sì ê lâng kng chi̍t ê poàn-sin-put-sūi ê lâng lâi I hia. 4 In-ūi lâng chin chōe, bōe-tàng kng kàu Iâ-so͘ ê bīn-chêng, in chiū tī I téng-bīn ê chhù-téng thiah chi̍t khang, hō͘ hit-ê poàn-sin-put-sūi ê lâng tó tī chhn̂g-pho͘ lūi lo̍h-khì. 5 Iâ-so͘ khòaⁿ-kìⁿ in ê sìn-sim, chiū tùi hit-ê poàn-sin-put-sūi ê lâng kóng, “Siàu-liân-lâng, lí ê chōe sià-bián lah!” 6 Ū kúi-nā ê keng-ha̍k-kàu-su chē tī hia, sim-lāi teh gī-lūn, 7 “Chit-ê lâng ná-ōe án-ni kóng? I teh siat-to̍k Siōng-tè! To̍k-it ê Siōng-tè í-gōa, sím-mi̍h lâng ōe-tàng sià-chōe?” 8 Iâ-so͘ lāi-sim sûi-sî chai-iáⁿ in án-ni teh gī-lūn, chiū tùi in kóng, “Sī-án-chóaⁿ lín sim-lāi teh chit-būn chit-ê tāi-chì? 9 Tùi poàn-sin-put-sūi ê lâng kóng ‘Lí ê chōe sià-bián lah’, á-sī kóng ‘Khí-lâi, giâ lí ê chhn̂g-pho͘ khí-lâi kiâⁿ’, tó chi̍t hāng khah kán-tan? 10 Put-kò góa beh hō͘ lín chai Jîn-chú tī tōe-chiūⁿ ū sià-chōe ê koân-pèng.” Iâ-so͘ chiū tùi hit-ê poàn-sin-put-sūi ê lâng kóng, 11 “Góa kā lí kóng, khí-lâi, giâ lí ê chhn̂g-pho͘, tńg-khì lín tau!” 12 I chiū khí-lâi, sûi-sî giâ i ê chhn̂g-pho͘, tī chèng-lâng ê bīn-chêng kiâⁿ chhut-khì. Chèng-lâng lóng tōa tio̍h-kiaⁿ, kui êng-kng hō͘ Siōng-tè kóng, “Goán chêng-kàu-taⁿ m̄-bat khòaⁿ-tio̍h chit khoán tāi-chì!” 13 Iâ-so͘ koh khì [Ka-lī-lī] ô͘-piⁿ, ū chi̍t tōa-tīn lâng lâi I hia, I chiū kā in kà-sī. 14 Iâ-so͘ keng-kè ê sî khòaⁿ-tio̍h [A-le̍k-hui] ê kiáⁿ [Lī-bī] chē tī sè-koan, chiū tùi i kóng, “Lâi tè góa!” [Lī-bī] chiū khí-lâi tè Iâ-so͘. 15 Āu-lâi, Iâ-so͘ tī [Lī-bī] in tau chia̍h-pn̄g. Ū chin chōe bau̍h-sè-ê kap chōe-jîn mā kap Iâ-so͘ í-ki̍p I ê bûn-tô͘ chòe-hé chia̍h-pn̄g, in-ūi ū chin chōe lâng teh tè Iâ-so͘. 16 Chi̍t-kóa [Hoat-lī-sài]-phài ê keng-ha̍k-kàu-su khòaⁿ-tio̍h Iâ-so͘ kap chōe-jîn í-ki̍p bau̍h-sè-ê chòe-hé chia̍h-pn̄g, chiū tùi I ê bûn-tô͘ kóng, “Sī-án-chóaⁿ I kap bau̍h-sè-ê í-ki̍p chōe-jîn chòe-hé chia̍h?” 17 Iâ-so͘ thiaⁿ-tio̍h chiū kā in kóng, “Kiān-khong-ê bô su-iàu i-seng, phòa-pīⁿ-ê chiah ū su-iàu. Góa lâi, m̄-sī beh chio gī-lâng, sī beh chio chōe-jîn.” 18 [Iok-hān] ê bûn-tô͘ kap [Hoat-lī-sài]-phài ê lâng teh kìm-chia̍h. Ū lâng lâi mn̄g Iâ-so͘, “[Iok-hān] ê bûn-tô͘ kap [Hoat-lī-sài]-phài ê bûn-tô͘ kìm-chia̍h, sī-án-chóaⁿ lí ê bûn-tô͘ bô kìm-chia̍h?” 19 Iâ-so͘ ìn kóng, “Sin-lông iáu kap hun-iàn ê lâng-kheh chòe-hé ê sî, lâng-kheh kiám ōe kìm-chia̍h? In iáu kap sin-lông chòe-hé ê sî bōe kìm-chia̍h. 20 Ji̍t-chí teh-beh kàu, sin-lông ōe hō͘ lâng tùi in tiong-kan lia̍h-khì, hit ji̍t in chiū ōe kìm-chia̍h. 21 “Bô-lâng ēng bô kiu-chúi ê pò͘ khì pó͘ kū-saⁿ. Nā án-ni chòe, hit tè sin-pò͘ ōe kiù-li̍h kū-saⁿ, tian-tò phòa koh-khah tōa khang. 22 Mā bô-lâng chiong sin-chiú ji̍p tī kū phê-tē. Nā án-ni chòe, sin-chiú ōe kā phê-tē piak-phòa, chiú lâu chhut-lâi, phê-tē mā pháiⁿ-khì. Sin-chiú eng-kai ji̍p tī sin phê-tē!” 23 Ū chi̍t ê An-hioh-ji̍t, Iâ-so͘ tùi be̍h-hn̂g keng-kè. I ê bûn-tô͘ ná kiâⁿ ná tiah be̍h-sūi. 24 [Hoat-lī-sài]-phài ê lâng tùi Iâ-so͘ kóng, “Lí khòaⁿ! In sī-án-chóaⁿ tī An-hioh-ji̍t chòe bōe ēng-tit chòe ê tāi-chì?” 25 Iâ-so͘ kā in kóng, “Lín kiám m̄-bat tha̍k-tio̍h [Tāi-pi̍t] kap tè i ê lâng pak-tó͘ iau su-iàu chia̍h-mi̍h ê sî só͘ chòe ê tāi-chì? 26 [A-pí-a-tha] chòe tōa-chè-si ê sî, [Tāi-pi̍t] ji̍p-khì Siōng-tè ê tiān chia̍h hiàn-chè ê piáⁿ, mā hō͘ tè i ê lâng chia̍h; chit khoán piáⁿ chè-si í-gōa ê lâng bōe ēng-tit chia̍h.” 27 Iâ-so͘ kā in kóng, “An-hioh-ji̍t sī ūi-tio̍h lâng lâi siat-li̍p; lâng m̄-sī ūi-tio̍h An-hioh-ji̍t lâi chhòng-chō. 28 Só͘-í, Jîn-chú mā-sī An-hioh-ji̍t ê Chú.”

Má-khó 3

1 Iâ-so͘ koh ji̍p-khì hōe-tn̂g, tī hia ū chi̍t ê chi̍t ki chhiú khê-khì ê lâng. 2 Ū chi̍t-kóa lâng teh tng-tán khòaⁿ Iâ-so͘ tī An-hioh-ji̍t ōe kā chit-ê lâng i-tī á-bōe, thang kā I kò. 3 Iâ-so͘ tùi hit-ê chhiú khê-khì ê lâng kóng, “Khí-lâi, lâi tiong-ng chia.” 4 Jiân-āu I mn̄g chèng-lâng, “Tī An-hioh-ji̍t, chòe hó-sū á-sī chòe pháiⁿ-sū, kiù sìⁿ-miā á-sī hāi sìⁿ-miā, tó chi̍t hāng ha̍h Lu̍t-hoat?” In lóng tiām-tiām. 5 Iâ-so͘ siū-khì, chi̍t-ê chi̍t-ê kā in khòaⁿ, ūi-tio̍h in ê ngī-sim iu-siong, chiū tùi hit-ê lâng kóng, “Chhiú chhun chhut-lâi!” I chhiú chhun chhut-lâi, chiū ho̍k-goân. 6 Hiah-ê [Hoat-lī-sài]-phài ê lâng chiū lī-khui hōe-tn̂g, sûi-sî kap [Hi-lu̍t]-tóng ê lâng tàu-tīn kè-bô͘ tùi-hù Iâ-so͘, khòaⁿ beh án-chóaⁿ kā I hāi-sí. 7 Iâ-so͘ kap bûn-tô͘ thòe-khì [Ka-lī-lī] ô͘-piⁿ, ū chi̍t tōa-tīn [Ka-lī-lī]-lâng tè I khì; 8 koh ū chi̍t tōa-tīn lâng thiaⁿ-tio̍h Iâ-so͘ só͘ chòe ê tāi-chì, tùi [Iû-thài], [Iâ-lō͘-sat-léng], [Í-thó͘-mái], [Iok-tàn-hô] tang-hōaⁿ, í-ki̍p [Thài-ní] kap [Se-tùn] chiu-ûi lâi chhē I. 9 In-ūi lâng chin chōe, Iâ-so͘ hoan-hù bûn-tô͘ kā I chún-pī chi̍t chiah chûn, chiah-bián hō͘ lâng kā I khoeh píⁿ-khì. 10 In-ūi Iâ-so͘ bat i-hó chin chōe pīⁿ-lâng, só͘-í só͘-ū ê pīⁿ-lâng lóng khoeh óa-lâi beh kā I bong. 11 Hiah-ê siâ-sîn chi̍t-ē khòaⁿ-tio̍h Iâ-so͘ chiū phak tī I ê bīn-chêng, tōa-siaⁿ hoah, “Lí sī Siōng-tè ê Kiáⁿ!” 12 Iâ-so͘ giâm-giâm bēng-lēng in m̄-thang tùi lâng kong-khai kóng-khí I ê tāi-chì. 13 Iâ-so͘ chiūⁿ-soaⁿ, tiàu-chi̍p I só͘ ì-ài ê lâng, in chiū lâi. 14 I siat-li̍p cha̍p-jī lâng, chheng in chòe sù-tô͘, sī beh hō͘ in kap I chòe-hé, koh chhe in khì thoân-tō, 15 mā hō͘ in ū koân-pèng kóaⁿ-kúi. 16 I só͘ jīm-bēng ê cha̍p-jī lâng chiū-sī: [Se-bûn] --- Iâ-so͘ kā i kiò-chòe [Pí-tek], 17 [Se-pí-thài] ê kiáⁿ [Ngá-kok] kap i ê sió-tī [Iok-hān] --- Iâ-so͘ kā in kiò-chòe [Poàn-nî-kî], ì-sù sī “Lûi-kong-á kiáⁿ”, 18 [An-tek-lia̍t], [Hui-le̍k], [Pa-to-lô-mái], [Má-thài], [To-má], [A-le̍k-hui] ê kiáⁿ [Ngá-kok], [Ta̍t-thài], Kek-chìn-tóng-oân [Se-bûn], 19 kap chhut-bōe Iâ-so͘ hit-ê [Í-su-ka-lio̍k] ê [Iû-tāi]. 20 Iâ-so͘ tńg-khì chhù-ni̍h. Ū chi̍t tīn lâng koh chū-chi̍p óa-lâi, Iâ-so͘ kap bûn-tô͘ soah liân pn̄g to bōe kò͘-tit chia̍h. 21 I ê chhin-lâng thiaⁿ-tio̍h chit-ê tāi-chì chiū chhut-lâi beh kā I chó͘-chí, in-ūi in kóng “I cheng-sîn sit-siông!” 22 Tùi [Iâ-lō͘-sat-léng] lo̍h-lâi ê keng-ha̍k-kàu-su kóng, “I sī hō͘ [Pia̍t-se-pok] hū-sin, khò kúi-ông teh kóaⁿ-kúi.” 23 Iâ-so͘ kiò in lâi, ēng phì-jū tùi in kóng, “Sat-tàn ná-ōe kóaⁿ Sat-tàn? 24 Kok-ka nā ka-kī hun-cheng, hit-ê kok-ka chiū khiā bōe-tiâu. 25 Ka-têng nā ka-kī hun-cheng, hit-ê ka-têng mā khiā bōe-tiâu. 26 Sat-tàn nā ka-kī kong-kek, hun-cheng, i khiā bōe-tiâu, it-tēng ōe bia̍t-bông. 27 “Bô-lâng ōe-tàng ji̍p-khì ióng-sū ê chhù chhiúⁿ i ê châi-bu̍t; tio̍h seng kā i pa̍k khí-lâi, chiah ōe-tàng kiap i ê chhù. 28 “Góa si̍t-chāi kā lín kóng, lâng bô-lūn hoān sím-mi̍h chōe, kóng sím-mi̍h pòng-to̍k ê ōe, lóng ōe tit-tio̍h sià-bián. 29 M̄-kú bô-lūn sím-mi̍h lâng siat-to̍k Sèng Sîn, éng-oán bōe tit-tio̍h sià-bián, i sī hoān-tio̍h éng-oán ê chōe.” 30 Iâ-so͘ kóng chiah-ê ōe sī in-ūi in kóng “I hō͘ siâ-sîn hū-sin.” 31 Iâ-so͘ ê lāu-bú kap I ê hiaⁿ-tī lâi, khiā tī gōa-bīn, chhe lâng khì kiò I. 32 Ū chi̍t tīn lâng chē tī Iâ-so͘ chiu-ûi; ū lâng kā I kóng, “Lí khòaⁿ, lí ê lāu-bú kap lí ê sió-tī sió-bē tī gōa-bīn beh chhē lí!” 33 Iâ-so͘ ìn kóng, “Sím-mi̍h lâng sī góa ê lāu-bú, góa ê hiaⁿ-tī?” 34 Jiân-āu I tùi chē tī chiu-ûi ê lâng chi̍t-ê chi̍t-ê kā in khòaⁿ, kóng, “Góa ê lāu-bú kap góa ê hiaⁿ-tī tī chia. 35 Si̍t-hêng Siōng-tè chí-ì ê lâng chiū-sī góa ê hiaⁿ-tī, chí-bē, kap lāu-bú.”

Má-khó 4

1 Iâ-so͘ koh chi̍t piàn tī [Ka-lī-lī] ô͘-piⁿ teh kà-sī lâng. Ū chi̍t tōa-tīn lâng chū-chi̍p óa-lâi, I soah tio̍h chiūⁿ-khì chûn-téng chē; chûn tī ô͘-ni̍h, kui tōa-tīn lâng tī hōaⁿ-téng. 2 Iâ-so͘ ēng phì-jū kà-sī in chin chōe hāng sū. I kà-sī ê sî kā in kóng: 3 “Tio̍h chù-ì thiaⁿ! Ū chi̍t ê iā chéng-chí ê lâng chhut-khì iā chéng-chí. 4 I iā ê sî, ū-ê chéng-chí lak tī lō͘-piⁿ, chiáu-á pe-lâi, kā i chia̍h liáu-liáu. 5 Ū-ê lak tī chio̍h-thâu-tōe, thô͘ chió ê só͘-chāi, in-ūi thô͘ bô chhim, chin kín chiū puh-gê, 6 ji̍t-thâu chi̍t-ē chhut, kā i pha̍k-tio̍h, in-ūi bô kun chiū ta-khì. 7 Ū-ê lak tī chhì-phè lāi, chhì-á tōa-châng khí-lâi, kā i hip-sí, chiū bô kiat-si̍t. 8 Ū-ê lak tī hó thó͘-tōe, chiū hoat-íⁿ, sêng-tióng, kiat-si̍t; ū-ê kiat saⁿ-cha̍p pē, ū-ê la̍k-cha̍p pē, ū-ê chi̍t-pah pē.” 9 Iâ-so͘ kóng, “Ū hīⁿ-khang thang thiaⁿ ê lâng, tio̍h thiaⁿ!” 10 Iâ-so͘ ka-kī chi̍t-ê ê sî, tī I chiu-ûi ê lâng kap cha̍p-jī sù-tô͘ lâi mn̄g I chiah-ê phì-jū ê ì-sù. 11 Iâ-so͘ chiū kā in kóng, “Siōng-tè-kok ê ò-pì í-keng ū hō͘ lín, m̄-kú tùi gōa-lâng ta̍k hāng lóng sī ēng phì-jū, 12 beh hō͘ In khòaⁿ koh khòaⁿ, mā khòaⁿ bô, thiaⁿ koh thiaⁿ, mā bōe liáu-kái; nā m̄-sī án-ni, in ōe hôe-sim tńg-ì, Siōng-tè chiū kā in sià-bián. 13 Iâ-so͘ koh mn̄g in kóng, “Chit-ê phì-jū lín bōe bêng-pe̍k sī-bô? Án-ni lín ná-ōe bêng-pe̍k kî-tha só͘-ū ê phì-jū? 14 Iā-chéng-chí-ê sī iā Siōng-tè ê sìn-sit. 15 Iā tī lō͘-piⁿ ê sī chí lâng thiaⁿ-tio̍h sìn-sit, Sat-tàn sûi-sî lâi, kā iā tī in sim-lāi ê sìn-sit chhiúⁿ-khì. 16 Siâng-khoán, iā tī chio̍h-thâu-tōe ê sī chí lâng thiaⁿ-tio̍h sìn-sit, sûi-sî hoaⁿ-hí chiap-siū, 17 put-kò tī in ê sim-lāi tèng-kun bô chhim, tòng bōe kú, chi̍t-ē ūi-tio̍h sìn-sit tú-tio̍h hoān-lān á-sī pek-hāi, sûi-sî pàng-sak. 18 Iā tī chhì-phè lāi ê sī chí lâng thiaⁿ-tio̍h sìn-sit liáu-āu, 19 in-ūi seng-oa̍h ê khòa-lū, chîⁿ-châi ê bê-he̍k, kap kî-tha ta̍k khoán ê su-io̍k ji̍p-khì sim-lāi, kā só͘ thiaⁿ-tio̍h ê sìn-sit hip-sí, soah bōe kiat-si̍t. 20 Hiah-ê iā tī hó thó͘-tōe ê sī chí lâng thiaⁿ-tio̍h sìn-sit, hoaⁿ-hí chiap-siū chiū kiat-si̍t; ū-ê saⁿ-cha̍p pē, ū-ê la̍k-cha̍p pē, ū-ê chi̍t-pah pē.” 21 Iâ-so͘ mn̄g in kóng, “Kiám ū lâng tiám teng ēng táu khàm khí-lâi á-sī khǹg-tī bîn-chhn̂g kha, bô kā i chhāi tī teng-tâi téng? 22 In-ūi it-chhè ún-ba̍t ê bô chi̍t hāng bōe hián-lō͘; it-chhè am-khàm ê bô chi̍t hāng bōe lō͘-hiān. 23 Ū hīⁿ-khang thang thiaⁿ ê lâng, tio̍h thiaⁿ!” 24 Iâ-so͘ koh kā in kóng, “Tio̍h chù-ì lín só͘ thiaⁿ ê. Lín ēng sím-mi̍h niû niû hō͘ lâng, Siōng-tè ōe ēng siâng-khoán ê niû niû hō͘ lín, sīm-chì hō͘ lín koh-khah chōe. 25 In-ūi ū-ê, beh hō͘ i koh-khah chōe; bô-ê, liân i só͘ ū-ê mā beh kā i chhiúⁿ khí-lâi.” 26 Iâ-so͘ koh kóng, “Siōng-tè-kok chhin-chhiūⁿ lâng chiong chéng-chí iā tī tōe-ni̍h. 27 I àm-sî khì khùn, ji̍t-sî khí-lâi, chéng-chí teh puh-gê tōa-châng, i m̄-chai sī-án-chóaⁿ ōe án-ni. 28 Thó͘-tōe chū-jiân seng-sán ngó͘-kok, tāi-seng puh-gê, āu-lâi thò͘-sūi, chòe-āu pá-sūi. 29 Ngó͘-kok sek ê sî, sûi-sî ēng liâm-le̍k-á siu-koah, in-ūi siu-sêng ê sî kàu lah.” 30 Iâ-so͘ mn̄g kóng, “Lán beh ēng sím-mi̍h lâi pí-phēng Siōng-tè-kok, beh ēng sím-mi̍h phì-jū lâi soat-bêng? 31 Siōng-tè-kok chhin-chhiūⁿ chi̍t lia̍p kòa-chhài-chí, iā lo̍h-tōe ê sî sī tōe-chiūⁿ chéng-chí tiong siōng sòe-lia̍p ê; 32 iā lo̍h-khì, tōa-châng khí-lâi, pí só͘-ū ê chhài-soe koh-khah tōa-châng, hoat-chhut tōa ki oe, sīm-chì khong-tiong ê chiáu-á to ōe-tàng tī chhiū-ńg-ē chòe siū.” 33 Iâ-so͘ ēng chin chōe chhin-chhiūⁿ chit khoán ê phì-jū tùi chèng-lâng soan-káng sìn-sit, lóng chiàu in só͘ ōe bêng-pe̍k ê kā in kóng. 34 I bô ēng pa̍t khoán ê hong-sek, chí-ū ēng phì-jū tùi in kóng, put-kò kan-ta kap ka-kī ê bûn-tô͘ chòe-hé ê sî chiah ta̍k hāng kā in soat-bêng. 35 Hit ji̍t thiⁿ àm ê sî, Iâ-so͘ tùi bûn-tô͘ kóng, “Lán kè lâi-khì hit pêng hōaⁿ.” 36 Bûn-tô͘ chiū lī-khui kûn-chiòng chiūⁿ-chûn, kap í-keng tī chûn-téng ê Iâ-so͘ chòe-hé khì. Ū kúi-nā chiah chûn mā chòe-hé khì. 37 Hut-jiân khí tōa-hong, éng phoah ji̍p chûn-lāi, chûn soah hō͘ chúi im kàu beh móa. 38 Iâ-so͘ tī chûn-bé khòa chím-thâu teh khùn; bûn-tô͘ kā I kiò-chhíⁿ, kóng, “Lāu-su, goán teh-beh bô-miā lò͘, lí bô iàu-kín ò͘?” 39 Iâ-so͘ khí-lâi, chek-pī hong, koh bēng-lēng éng, kóng, “Chēng lo̍h-khì! Tiāⁿ lo̍h-lâi!” Hong tiām-khì, ô͘ chiū chēng-chēng-chēng. 40 Iâ-so͘ tùi bûn-tô͘ kóng, “Lín ná hiah-ni̍h kiaⁿ? Lín iáu bô sìn-sim sī-bô?” 41 In hui-siông kiaⁿ-hiâⁿ, kóng-lâi kóng-khì, “Chit-ê sī sím-mi̍h lâng, liân hong kap éng to sūn-ho̍k!”

Má-khó 5

1 Iâ-so͘ kè-khì [Ka-lī-lī-ô͘] ê hit pêng hōaⁿ, kàu [Kek-la̍h-sim]-lâng ê tōe-khu. 2 I chi̍t-ē lo̍h-chûn, ū chi̍t ê hō͘ siâ-sîn hū-sin ê lâng tú tùi bōng-á-po͘ chhut-lâi, tú-tio̍h I. 3 Chit-ê lâng lóng tòa tī bōng-á-po͘, lâng ēng thih-liān to kā i liān bōe-tiâu. 4 Chin chōe piàn lâng ēng thih-liān kap kha-khàu kā i khún-pa̍k, thih-liān hō͘ i chhoah-tn̄g, kha-khàu hō͘ i kòng-chhùi, bô-lâng ū khùi-la̍t kā i chè-ho̍k. 5 I mî-ji̍t tī bōng-á-po͘ á-sī soaⁿ-phiâⁿ loān jióng, koh ēng chio̍h-thâu siong-hāi ka-kī. 6 I tī hn̄g-hn̄g ê só͘-chāi khòaⁿ-tio̍h Iâ-so͘, chiū cháu-lâi kūi tī I ê bīn-chêng, 7 tōa-siaⁿ hoah, “Chì-koân Siōng-tè ê Kiáⁿ Iâ-so͘, lí mài chhap góa! Góa kí Siōng-tè ê miâ khún-kiû lí m̄-thang khó͘-chhó͘ góa.” 8 In-ūi Iâ-so͘ ū tùi i kóng, “Siâ-sîn, tùi chit-ê lâng chhut-khì!” 9 Iâ-so͘ mn̄g i, “Lí sím-mi̍h miâ?” I ìn kóng, “Góa ê miâ sī ‘Kun-thoân’, in-ūi goán chin tōa-tīn.” 10 I pek-chhiat ai-kiû Iâ-so͘ m̄-thang kóaⁿ in lī-khui hit-ê tōe-khu. 11 Hit sî, hù-kūn ê soaⁿ-phiâⁿ ū chi̍t tōa-kûn ti teh thó-chia̍h. 12 Siâ-sîn kiû Iâ-so͘ kóng, “Hō͘ goán khì ti-kûn hia, thang ji̍p-khì in lāi-bīn.” 13 Iâ-so͘ chún in. Siâ-sîn chiū chhut-khì, chìn-ji̍p hit kûn ti; kui kûn ti, iok ū nn̄g-chheng chiah, tùi soaⁿ-phiâⁿ chông lo̍h-khì ô͘-ni̍h, hō͘ chúi tū-sí. 14 Chhī-ti ê lâng chiū kiaⁿ-kah cháu khì siâⁿ-lāi kap hiuⁿ-siā pò chit-ê siau-sit. Chèng-lâng chiū chhut-lâi beh khòaⁿ ū hoat-seng sím-mi̍h tāi-chì. 15 In lâi Iâ-so͘ hia, khòaⁿ-tio̍h hit-ê hō͘ kúi hū-sin, chiū-sī bat hō͘ “Kun-thoân” tîⁿ-tio̍h ê lâng chē tī hia, ū chhēng-saⁿ, cheng-sîn chèng-siông, chiū chin tio̍h-kiaⁿ. 16 Khòaⁿ-tio̍h ê lâng chiū chiong hō͘ kúi hū-sin ê lâng kap ti-kûn só͘ tú-tio̍h ê tāi-chì kā lâng kóng. 17 In chiū iau-kiû Iâ-so͘ lī-khui in ê tōe-khu. 18 Iâ-so͘ beh chiūⁿ-chûn ê sî, bat hō͘ kúi hū-sin hit-ê lâng kiû Iâ-so͘ chún i chòe-hé khì. 19 Iâ-so͘ m̄-chún, kā i kóng, “Tńg-khì lín tau, lín chhin-lâng hia, chiong Chú lîn-bín lí, tùi lí só͘ chòe hiah-ni̍h tōa ê tāi-chì lóng pò in chai.” 20 Hit-ê lâng chiū lī-khui, tī [Te-ka-pho-lí] thoân-iông Iâ-so͘ tùi i só͘ chòe hiah-ni̍h tōa ê tāi-chì; só͘-ū ê lâng lóng tio̍h-kiaⁿ kî-koài. 21 Iâ-so͘ koh chē-chûn kè-khì ô͘ ê hit pêng hōaⁿ; I tī ô͘-piⁿ, ū chi̍t tōa-tīn lâng chū-chi̍p óa-lâi. 22 Ū chi̍t ê hōe-tn̂g ê chú-koán kiò-chòe [Ia̍p-ló͘] lâi, chi̍t-ē khòaⁿ-tio̍h Iâ-so͘ chiū phak tī I ê kha-chêng, 23 khún-kiû I kóng, “Góa ê sòe-hàn cha-bó͘-kiáⁿ teh-beh sí à, chhiáⁿ lí lâi kā i hōaⁿ-chhiú, i-hó, hō͘ i ōe oa̍h.” 24 Iâ-so͘ chiū kap i khì; ū chi̍t tōa-tīn lâng mā oe-oe khoeh-khoeh tè I khì. 25 Ū chi̍t ê hū-jîn-lâng tì-tio̍h hiat-lāu-pīⁿ cha̍p-jī nî kú; 26 i ū hō͘ chin chōe i-seng khòaⁿ-kè, siū-tio̍h chin chōe thòng-khó͘, koh chîⁿ lóng khai liáu-liáu, i ê pīⁿ m̄-nā bô khah hó, tian-tò ná siong-tiōng. 27 I ū thiaⁿ-tio̍h Iâ-so͘ ê tāi-chì, chiū khoeh ji̍p-khì kûn-chiòng lāi-bīn, kiâⁿ óa-khì Iâ-so͘ ê āu-bīn, bong I ê saⁿ. 28 I siūⁿ-kóng, “Góa kan-ta bong-tio̍h I ê saⁿ, pīⁿ chiū ōe hó.” 29 I ê hiat-lāu sûi-sî chí, kám-kak seng-khu ê pīⁿ í-keng hó. 30 Iâ-so͘ sûi-sî chai ū khùi-la̍t tùi I chhut-khì, chiū oa̍t kè-lâi, mn̄g kûn-chiòng, “Sím-mi̍h lâng bong góa ê saⁿ?” 31 Bûn-tô͘ ìn kóng, “Lí khòaⁿ kui-tīn lâng teh kā lí khoeh, lí ná-ōe kóng ‘Sím-mi̍h lâng kā góa bong’?” 32 Iâ-so͘ sì-kho͘-lìn-tńg khòaⁿ chi̍t-ē, ài chai sím-mi̍h lâng kā I bong. 33 Hit-ê hū-jîn-lâng chai tī i sin-chiūⁿ só͘ hoat-seng ê tāi-chì, kiaⁿ-kah phi̍h-phi̍h-chhoah, chiū kūi tī Iâ-so͘ kha-chêng, chiong lóng-chóng ê si̍t-chêng kóng chhut-lâi. 34 Iâ-so͘ kā i kóng, “Cha-bó͘-kiáⁿ, lí ê sìn-sim hō͘ lí hó-khì lah, pêng-an tò-khì, lí ê pīⁿ í-keng hó à.” 35 Iâ-so͘ iáu teh kóng ê sî, ū lâng tùi hōe-tn̂g chú-koán ê chhù lâi, kā [Ia̍p-ló͘] kóng, “Lí ê cha-bó͘-kiáⁿ í-keng sí-khì, ná-tio̍h koh lô-hoân lāu-su.” 36 Iâ-so͘ ū thiaⁿ-tio̍h in kóng ē ōe, chiū tùi hōe-tn̂g chú-koán kóng, “M̄-bián kiaⁿ, chí-ū tio̍h sìn!” 37 I chiū chhōa [Pí-tek], [Ngá-kok], kap [Ngá-kok] ê sió-tī [Iok-hān] chòe-hé khì, í-gōa m̄-chún pa̍t-lâng tè-khì. 38 In lâi-kàu hōe-tn̂g chú-koán ê chhù, Iâ-so͘ khòaⁿ-tio̍h tiûⁿ-bīn chin loān, ū lâng teh háu, ū lâng tōa-siaⁿ teh khàu. 39 I chi̍t-ē ji̍p-khì chiū kā in kóng, “Lín ná khàu-kah loān chhau-chhau? Chit-ê gín-á bô sí, sī teh khùn.” 40 In chiū kā I thí-chhiò, m̄-kú I kā in lóng kóaⁿ chhut-khì, jiân-āu chhōa gín-á ê pē-bú kap hit saⁿ ê bûn-tô͘ ji̍p-khì gín-á ê pâng-keng. 41 I khan gín-á ê chhiú, tùi i kóng, “Tāi-lī-tāi kó͘-bí!” ì-sù chiū-sī “Cha-bó͘ gín-á, góa kā lí kóng, khí-lâi!” 42 Cha-bó͘ gín-á sûi-sî peh khí-lâi kiâⁿ, in-ūi i í-keng cha̍p-jī hè. In hui-siông tio̍h-kiaⁿ. 43 Iâ-so͘ giâm-giâm kéng-kài in m̄-thang chiong chit-ê tāi-chì hō͘ lâng chai, koh kiò in the̍h mi̍h-kiāⁿ hō͘ cha-bó͘ gín-á chia̍h.

Má-khó 6

1 Iâ-so͘ lī-khui hia, tò-khì ka-kī ê kò͘-hiong, bûn-tô͘ tè I khì. 2 An-hioh-ji̍t, I tī hōe-tn̂g kà-sī lâng. Chin chōe lâng thiaⁿ-tio̍h I ê kà-sī, lóng chin tio̍h-kiaⁿ, kóng, “Chit-ê lâng ê pún-sū tùi tó-ūi lâi? I tit-tio̍h ê tàu-tóe sī sím-mi̍h khoán ê tì-hūi? I ê chhiú ná ōe-tàng kiâⁿ chit khoán sîn-jiah? 3 I kiám m̄-sī ba̍k-chhiūⁿ? Kiám m̄-sī [Má-lī-a] ê kiáⁿ, [Ngá-kok], [Iok-se], [Iû-tāi], kap [Se-bûn] ê hiaⁿ-tī? I ê sió-bē kiám m̄-sī kap lán tòa tī chia?” In soah tùi Iâ-so͘ khí hoán-kám. 4 Iâ-so͘ kā in kóng, “Sian-ti tī ka-kī ê kò͘-hiong, ka-kī ê chhin-lâng, ka-kī ê ka-cho̍k í-gōa, it-tēng ōe siū chun-tiōng.” 5 I tī hia bōe-tàng kiâⁿ sím-mi̍h sîn-jiah, chí-ū kā kúi-ê-á pīⁿ-lâng hōaⁿ-chhiú, kā in i-hó. 6 Iâ-so͘ tùi in ê m̄-sìn kám-kak chin kî-koài. Iâ-so͘ kiâⁿ-thàu chiu-ûi ê hiuⁿ-siā kà-sī lâng. 7 I tiàu-chi̍p cha̍p-jī sù-tô͘ lâi, chhe in nn̄g-ê nn̄g-ê chhut-khì, hō͘ in ū koân-pèng thang chè-ap siâ-sîn. 8 I hoan-hù in, chhut-mn̂g ê sî koáiⁿ-á í-gōa sím-mi̍h lóng m̄-thang tòa; m̄-thang tòa chia̍h-mi̍h; m̄-thang tòa lú-hêng-tē; io-tòa lāi-bīn m̄-thang tòa chîⁿ; 9 chí-ū chhēng liâng-ôe; m̄-thang chhēng nn̄g niá lāi-saⁿ. 10 I koh kā in kóng, “Lín bô-lūn ji̍p-khì sím-mi̍h lâng ê chhù, tio̍h tòa hia kàu lī-khui hit só͘-chāi. 11 Bô-lūn sím-mi̍h só͘-chāi, lâng nā m̄ chiap-la̍p lín, m̄ thiaⁿ lín ê kà-sī, lín lī-khui ê sî tio̍h chiong kha-ni̍h ê thô͘-hún pōaⁿ-tiāu, piáu-sī tùi in kéng-kò.” 12 Sù-tô͘ chiū chhut-khì thoân-tō, khǹg lâng hóe-kái. 13 In koh kóaⁿ-chhut chin chōe kúi, mā ēng iû boah chin chōe pīⁿ-lâng, kā in i-hó. 14 [Hi-lu̍t]-ông ū thiaⁿ-tio̍h Iâ-so͘ ê sū, in-ūi I ê miâ thoân-piàn ta̍k só͘-chāi. Ū lâng kóng, “I sī Si-sóe-chiá [Iok-hān], tùi sí-lâng tiong koh-oa̍h, só͘-í ū koân-lêng kiâⁿ chiah-ê sîn-jiah.” 15 M̄-kú mā ū lâng kóng, “I sī [Í-lī-a]”; koh ū lâng kóng, “I sī sian-ti, chhin-chhiūⁿ kó͘-chá ê chi̍t ê sian-ti.” 16 [Hi-lu̍t] thiaⁿ-tio̍h chiū kóng, “Sī góa kā i chām-thâu hit-ê [Iok-hān], i ū koh-oa̍h.” 17 [Hi-lu̍t] ū phài lâng khì lia̍h [Iok-hān], kā i liān tī kaⁿ-ni̍h, goân-in sī [Hi-lu̍t] ū chhōa sió-tī [Hui-le̍k] ê bó͘ [Hi-lô-tí] chòe bó͘; 18 in-ūi [Iok-hān] tiāⁿ-tiāⁿ tùi [Hi-lu̍t] kóng, “Lí chhōa sió-tī ê bó͘ bô ha̍p-hoat!” 19 [Hi-lô-tí] sim-lāi tùi [Iok-hān] khioh-hūn, siūⁿ-beh kā i thâi, m̄-kú bōe-tàng chiàu sim-goān, 20 in-ūi [Hi-lu̍t] kiaⁿ [Iok-hān], chai-iáⁿ i sī chèng-gī koh sèng-kiat ê lâng, ū kā i pó-hō͘. [Hi-lu̍t] ta̍k piàn thiaⁿ [Iok-hān] ê ōe, hui-siông put-an, iáu-kú chin ài thiaⁿ. 21 [Hi-lô-tí] ê ki-hōe lâi lah. [Hi-lu̍t] choh siⁿ-ji̍t ê sî, pān iàn-se̍k chhiáⁿ bûn-bú pah-koaⁿ kap [Ka-lī-lī] bîn-kan ê léng-siù. 22 [Hi-lô-tí] ê cha-bó͘-kiáⁿ ji̍p-lâi thiàu-bú, hō͘ [Hi-lu̍t] kap chāi-chō ê kùi-pin hoaⁿ-hí. Ông kā hit-ê cha-bó͘ gín-á kóng, “Khòaⁿ lí ài sím-mi̍h, chòe lí kiû, góa lóng beh hō͘ lí.” 23 [Hi-lu̍t] koh tùi i chiù-chōa kóng, “Lí bô-lūn kiû sím-mi̍h, liân góa ông-kok ê chi̍t-pòaⁿ mā ōe hō͘ lí.” 24 Cha-bó͘ gín-á chhut-khì mn̄g i ê lāu-bú, “Góa tio̍h kiû sím-mi̍h?” I ê lāu-bú kā i kóng, “Si-sóe-chiá [Iok-hān] ê thâu.” 25 I sûi-sî kóaⁿ tò tńg-lâi, tùi ông iau-kiû kóng, “Chhiáⁿ lí sûi-sî chiong Si-sóe-chiá [Iok-hān] ê thâu-khak khǹg tī pôaⁿ-ni̍h hō͘ góa.” 26 Ông ê sim hui-siông kan-khó͘, put-kò í-keng tī kùi-pin ê bīn-chêng chiù-chōa, chiū bô kā i kū-choa̍t. 27 Ông sûi-sî chhe chi̍t ê kéng-ōe khì the̍h [Iok-hān] ê thâu. Kéng-ōe chiū khì kaⁿ-ni̍h chām [Iok-hān] ê thâu, 28 chiong thâu-khak hē tī pôaⁿ-ni̍h phâng lâi hō͘ cha-bó͘ gín-á, cha-bó͘ gín-á chiū hō͘ i ê lāu-bú. 29 [Iok-hān] ê bûn-tô͘ thiaⁿ-tio̍h chiū lâi siu i ê sin-si, kā i bâi-chòng tī bōng-ni̍h. 30 Sù-tô͘ tńg-lâi Iâ-so͘ hia, chiong in só͘ chòe só͘ kà-sī ê lóng kā I pò-kò. 31 Iâ-so͘ kā in kóng, “Án-ni, lín mā tio̍h ka-kī khì phian-phiah bô-lâng tòa ê só͘-chāi sió-khóa hioh-khùn chi̍t-ē.” In-ūi chhut-chhut ji̍p-ji̍p ê lâng chin chōe, in liân chia̍h-pn̄g ê sî-kan to bô. 32 In chiū chē-chûn kan-ta in ka-kī khì phian-phiah bô-lâng tòa ê só͘-chāi. 33 Chin chōe lâng khòaⁿ-tio̍h in lī-khui, jīn-chhut sī in, chiū tùi ta̍k ê siâⁿ-chhī sūn lio̍k-lō͘ cháu chìn-chêng, pí in tāi-seng kàu hit só͘-chāi. 34 Iâ-so͘ chiūⁿ-hōaⁿ, khòaⁿ-tio̍h chi̍t tōa-tīn lâng chiū khó-lîn in, in-ūi in chhin-chhiūⁿ bô bo̍k-chiá ê iûⁿ. I chiū kà-sī in chin chōe hāng sū. 35 Sî-kan í-keng chin òaⁿ, bûn-tô͘ óa-lâi kā I kóng, “Chit-ê só͘-chāi chin phian-phiah, sî-kan mā chin òaⁿ lah. 36 Chhiáⁿ kā in kái-sàn, hō͘ in khì hù-kūn ê hiong-chhoan chng-siā ka-kī bóe mi̍h-kiāⁿ chia̍h.” 37 Iâ-so͘ ìn kóng, “Lín hō͘ in chia̍h.” Bûn-tô͘ mn̄g kóng, “Goán tio̍h khì bóe nn̄g-pah ê gûn-á ê piáⁿ hō͘ in chia̍h o͘h?” 38 Iâ-so͘ kóng, “Lín ū jōa chōe piáⁿ, khì khòaⁿ-bāi leh!” In khòaⁿ liáu chiū kóng, “Ū gō͘ ê; mā ū nn̄g bé hî.” 39 Iâ-so͘ hoan-hù bûn-tô͘ kā chèng-lâng hun-cho͘, hō͘ in chē tī chhiⁿ-chhùi ê chháu-po͘. 40 Chèng-lâng chiū chi̍t-cho͘ chi̍t-cho͘ chē lo̍h-khì, ū ê chi̍t-pah ê, ū ê gō͘-cha̍p ê. 41 Āu-lâi Iâ-so͘ the̍h hit gō͘ ê piáⁿ kap nn̄g bé hî, ǹg thiⁿ kám-siā, peh-khui, the̍h hō͘ bûn-tô͘ khì pun hō͘ chèng-lâng. I koh chiong hit nn̄g bé hî pun hō͘ chèng-lâng. 42 Tāi-ke lóng chia̍h, chia̍h kàu pá. 43 Bûn-tô͘ khioh chia̍h chhun ê piáⁿ-iù-á kap hî-sut-á, móa cha̍p-jī nâ. 44 Chia̍h piáⁿ ê, kan-ta ta-po͘-lâng chiū ū gō͘-chheng. 45 Iâ-so͘ sûi-sî pek I ê bûn-tô͘ chiūⁿ-chûn seng kè-khì tùi-bīn hōaⁿ, khì [Pek-sài-tāi], ka-kī lâu teh kái-sàn kûn-chiòng. 46 Iâ-so͘ lī-khui kûn-chiòng liáu-āu chiū chiūⁿ-soaⁿ kî-tó. 47 Thiⁿ àm ê sî, chûn kiâⁿ kàu ô͘ ê tiong-ng; Iâ-so͘ ka-kī chi̍t ê tī hōaⁿ-téng. 48 I khòaⁿ-tio̍h bûn-tô͘ chìⁿ-hong teh kò-chiúⁿ, kò-kah chin kan-khó͘. Thiⁿ beh kng ê sî, Iâ-so͘ tī ô͘ ê téng-bīn ǹg in hia kiâⁿ khì, siūⁿ-beh tùi piⁿ-a kè-khì. 49 Bûn-tô͘ khòaⁿ-tio̍h I tī ô͘ ê téng-bīn teh kiâⁿ, siūⁿ-kóng sī kúi, chiū tōa-siaⁿ hoah, 50 in-ūi tāi-ke lóng ū khòaⁿ-tio̍h I, chin kiaⁿ. Iâ-so͘ sûi-sî kā in kóng, “An-sim, sī góa, bián kiaⁿ!” 51 Iâ-so͘ chiūⁿ-chûn khì kap in chòe-hé, hong chiū tiām-khì. Bûn-tô͘ hui-siông tio̍h-kiaⁿ, 52 in-ūi in bô bêng-pe̍k hit-ê piáⁿ ê ì-gī, sim iáu chin tūn. 53 Iâ-so͘ kap bûn-tô͘ kè ô͘ liáu-āu tī [Kek-nî-sat-le̍k] chiūⁿ-hōaⁿ, kā chûn pha tī hōaⁿ-piⁿ. 54 In chi̍t-ē lo̍h-chûn, chèng-lâng sûi-sî jīn-chhut Iâ-so͘, 55 chiū sì-kòe kiâⁿ thàu-thàu, thiaⁿ-tio̍h Iâ-so͘ tī tó-ūi chiū ēng chhn̂g-pho͘ kng pīⁿ-lâng khì hia. 56 Iâ-so͘ bô-lūn kiâⁿ kàu sím-mi̍h chng-siā, siâⁿ-chhī, hiong-chhoan, lâng chiū kā pīⁿ-lâng kng lâi khǹg tī chhī-tiûⁿ-kháu, khún-kiû Iâ-so͘ siōng-bô mā hō͘ pīⁿ-lâng bong-tio̍h I saⁿ-á-ku ê chhiu; só͘-ū bong-tio̍h ê lâng lóng tit-tio̍h i-hó.

Má-khó 7

1 [Hoat-lī-sài-phài] ê lâng kap chi̍t-kóa tùi [Iâ-lō͘-sat-léng] lâi ê keng-ha̍k-kàu-su tàu-tīn lâi chhē Iâ-so͘. 2 In khòaⁿ-tio̍h Iâ-so͘ ê bûn-tô͘ ū lâng ēng bô chheng-khì ê chhiú, chiū-sī bô sóe-chhiú chiū chia̍h-pn̄g. 3 Goân-lâi [Hoat-lī-sài-phài] ê lâng kap só͘-ū ê [Iû-thài]-lâng lóng chip-siú chó͘-sian ê thoân-thóng, nā bô chiàu hoat-tō͘ sóe-chhiú chiū bô chia̍h-pn̄g; 4 tùi chhī-tiûⁿ tò-lâi, nā bô sóe mā bô chia̍h. In koh chun-siú kî-tha chin chōe thoân-thóng ê kui-lē, chhin-chhiūⁿ sóe poe-á, koàn-á, tâng-khì, kap chhn̂g-pho͘, téng. 5 Só͘-í, [Hoat-lī-sài-phài] ê lâng kap keng-ha̍k-kàu-su mn̄g Iâ-so͘, “Sī-án-chóaⁿ lí ê bûn-tô͘ ēng bô chheng-khì ê chhiú chia̍h-pn̄g, ûi-hoān chó͘-sian ê thoân-thóng?” 6 Iâ-so͘ ìn kóng, “[Í-sài-a] só͘ kóng koan-hē lín chiah-ê ké-hó ê lâng ê ū-giân chin tio̍h; i án-ni siá: Chit-ê chú-bîn ēng chhùi-tûn chun-kèng góa, in ê sim khiok lī-khui góa hn̄g-hn̄g. 7 In ēng lâng ê kui-lē chòe góa ê kà-sī kà-sī lâng; in kèng-pài góa lóng bô chhái-kang. 8 “Lín kèng-jiân pàng-sak Siōng-tè ê kài-bēng, khì chip-siú lâng ê thoân-thóng.” 9 Iâ-so͘ koh kóng, “Lín ūi-tio̍h beh chip-siú thoân-thóng, ēng kháu-biāu ê hong-hoat lâi kū-choa̍t Siōng-tè ê kài-bēng. 10 [Mô͘-se] bēng-lēng lín ‘Tio̍h hàu-kèng pē-bú’, koh kóng ‘Mē lāu-pē á-sī mē lāu-bú ê lâng eng-kai chhú-sí’. 11 M̄-kú lín kóng, lâng nā tùi ka-kī ê lāu-pē á-sī lāu-bú kóng ‘Góa eng-kai hō͘ lí ê í-keng chòe Kok-ní-pán’ --- Kok-ní-pán ê ì-sù chiū-sī hiàn hō͘ Siōng-tè ê lé-mi̍h, 12 lín chiū chún i bián hōng-ióng ka-kī ê pē-bú. 13 Lín ēng lín só͘ thoân-siū ê thoân-thóng lâi hòe-tû Siōng-tè ê ōe. Lín koh chòe chin chōe chit khoán ê tāi-chì.” 14 Iâ-so͘ koh kiò chèng-lâng lâi, kā in kóng, “Lín tāi-ke lóng tio̍h thiaⁿ góa ê ōe, tio̍h liáu-kái: 15 Tùi gōa-bīn ji̍p-khì lâng lāi-bīn ê bô chi̍t hāng ōe hō͘ lâng bô chheng-khì; tùi lāi-bīn chhut-lâi ê mi̍h chiah ōe hō͘ lâng bô chheng-khì.” 17 Iâ-so͘ lī-khui chèng-lâng, ji̍p-khì chhù-lāi, I ê bûn-tô͘ chiū mn̄g I chit-ê phì-jū ê ì-sù. 18 I kā in kóng, “Án-ni liân lín to bô bêng-pe̍k ò͘? Lín kiám bô liáu-kái, tùi gōa-bīn ji̍p-khì lâng lāi-bīn ê lóng bōe hō͘ lâng bô chheng-khì? 19 In-ūi tùi gōa-bīn ji̍p-khì ê m̄-sī ji̍p-khì sim-lāi, sī ji̍p-khì pak-tó͘-lāi, āu-lâi pàng lo̍h-khì piān-só͘.” Iâ-so͘ án-ni kóng sī chí só͘-ū ê chia̍h-mi̍h lóng chheng-khì. 20 I koh kóng, “Tùi lâng lāi-bīn chhut-lâi ê chiah ōe hō͘ lâng bô chheng-khì. 21 In-ūi tùi lāi-bīn chhut-lâi ê, chiū-sī tùi lâng ê sim chhut ê, ū pháiⁿ liām-thâu, su-thong, thau-the̍h, hiong-sat, 22 kan-îm, tham-sim, siâ-ok, kan-chà, hòng-chhiòng, chi̍t-tò͘, húi-pòng, kiau-ngō͘, bōe hiáu hun-pia̍t sī-hui. 23 Chiah-ê it-chhè siâ-ok ê sū lóng sī tùi lāi-bīn chhut-lâi ê, che chiah ōe hō͘ lâng bô chheng-khì.” 24 Iâ-so͘ tùi hia chhut-hoat khì [Thài-ní] tōe-khu. I ji̍p-khì chi̍t keng chhù, bô ài lâng chai, put-kò bô hoat-tō͘ pó-bi̍t. 25 Sûi-sî ū chi̍t ê hū-jîn-lâng thiaⁿ-tio̍h Iâ-so͘ ê tāi-chì, chiū lâi kūi tī I ê kha-chêng; i ê cha-bó͘-kiáⁿ hō͘ siâ-sîn hū-sin. 26 Chit-ê hū-jîn-lâng sī chhut-sì tī [Sū-lī-a] [Hui-nî-ki] ê [Hi-la̍h-lâng]. I kiû Iâ-so͘ kā i ê cha-bó͘-kiáⁿ kóaⁿ-kúi. 27 Iâ-so͘ kā i kóng, “Tio̍h seng hō͘ gín-á chia̍h; the̍h gín-á ê chia̍h-mi̍h hiat hō͘ káu-á chia̍h m̄-hó.” 28 [Hū-jîn-lâng] ìn kóng, “Chú ah, toh-á-kha ê káu-á to chia̍h gín-á ê piáⁿ-iù-á.” 29 Iâ-so͘ kā i kóng, “In-ūi lí chit kù ōe, lí thang tńg-khì; kúi í-keng lī-khui lí ê cha-bó͘-kiáⁿ lah!” 30 [Hū-jîn-lâng] tńg-khì in tau, khòaⁿ-tio̍h cha-bó͘-kiáⁿ tó tī chhn̂g-ni̍h, kúi í-keng lī-khui. 31 Iâ-so͘ koh lī-khui [Thài-ní] tōe-khu, keng-kè [Se-tùn] í-ki̍p [Te-ka-pho-lí] tōe-khu, lâi-kàu [Ka-lī-lī-ô͘.] 32 Ū lâng chhōa chi̍t ê bōe thiaⁿ-kìⁿ koh bōe kóng-ōe ê lâng lâi Iâ-so͘ hia, khún-kiû Iâ-so͘ kā i hōaⁿ-chhiú. 33 Iâ-so͘ chhōa hit-ê lâng lī-khui chèng-lâng khì piⁿ-a, chhng chńg-thâu-á ji̍p-khì i siang pêng ê hīⁿ-khang, koh phùi-nōa boah i ê chi̍h, 34 jiân-āu ǹg-thiⁿ, thó͘-khùi, kā i kóng, “Í-hoat-tāi”, ì-sù chiū-sī “Khui!” 35 Hit lâng ê hī-khang sûi-sî khui, chi̍h-kun lēng, kóng-ōe kóng-kah chin chheng-chhó. 36 Iâ-so͘ giâm-giâm bēng-lēng in m̄-thang kā lâng kóng, m̄-kú I jú kìm-chí, in jú chhut-la̍t pò-iông. 37 Tāi-ke lóng hui-siông tio̍h-kiaⁿ, kóng, “I ta̍k hāng lóng chòe-kah chin hó, liân bōe thiaⁿ-kìⁿ ê lâng to ōe thiaⁿ-kìⁿ, bōe kóng-ōe ê lâng to ōe kóng-ōe!”

Má-khó 8

1 Kè bô kúi ji̍t, koh ū chi̍t tōa-tīn kûn-chiòng chū-chi̍p. In bô mi̍h thang chia̍h, Iâ-so͘ chiū kiò I ê bûn-tô͘ lâi, kā in kóng, 2 “Góa chin khó-lîn chit tīn lâng, in-ūi in í-keng kap góa chòe-hé saⁿ-ji̍t kú, hiān-chāi bô mi̍h thang chia̍h lah. 3 Góa nā hō͘ in sì-sòaⁿ iau-iau tńg-khì in tau, in ōe tī lō͘-tiong hūn-tó, in-ūi ū lâng tùi chin hn̄g ê só͘-chāi lâi.” 4 Bûn-tô͘ kā I kóng, “Tī chit-ê phian-phiah bô-lâng tòa ê só͘-chāi, beh khì tó-ūi chhē chia̍h-mi̍h hō͘ chiah-ê lâng chia̍h pá?” 5 Iâ-so͘ mn̄g in, “Lín ū jōa chōe piáⁿ?” In kóng, “Chhit ê.” 6 Iâ-so͘ bēng-lēng kûn-chiòng chē lo̍h-khì thô͘-kha, jiân-āu the̍h hit chhit ê piáⁿ, kám-siā, peh-khui, the̍h hō͘ bûn-tô͘ khì pun, in chiū pun hō͘ kûn-chiòng. 7 In mā ū kúi-nā bé sòe bé hî, Iâ-so͘ kám-siā liáu, kiò bûn-tô͘ the̍h khì pun. 8 In lóng chia̍h, chia̍h kàu pá, koh khioh chia̍h chhun ê chhùi-sut-á, lóng-chóng khioh chhit láng. 9 Lâng-sò͘ iok ū sì-chheng. Iâ-so͘ kā in kái-sàn, 10 jiân-āu sûi-sî kap bûn-tô͘ chiūⁿ-chûn, khì [Tāi-má-lô͘-tha] ê kéng-lāi. 11 Chi̍t-kóa [Hoat-lī-sài-phài] ê lâng lâi chhē Iâ-so͘, kap I piān-lūn. In siūⁿ-beh kā I chhì-thàm, iau-kiû I kiâⁿ tùi thiⁿ lâi ê sîn-jiah. 12 Iâ-so͘ tùi sim-tóe thó͘ chi̍t ê tōa-khùi, kóng, “Sī-án-chóaⁿ chit sè-tāi ê lâng kiû sîn-jiah? Góa si̍t-chāi kā lín kóng, bōe-koh ū sîn-jiah hō͘ chit sè-tāi ê lâng.” 13 I chiū lī-khui in, koh chiūⁿ-chûn kè-khì ô͘ ê hit pêng hōaⁿ. 14 Bûn-tô͘ bōe kì-tit tòa piáⁿ, put-kò in tī chûn-lāi ū chi̍t ê piáⁿ. 15 Iâ-so͘ kā in kéng-kò, “Tio̍h chù-ì, tio̍h tî-hông [Hoat-lī-sài-phài] ê kàⁿ kap [Hi-lu̍t] ê kàⁿ!” 16 Bûn-tô͘ hō͘-siōng gī-lūn, “Sī in-ūi lán bô piáⁿ sī-bô?” 17 Iâ-so͘ chai-iáⁿ chiū kā in kóng, “Lín sī-án-chóaⁿ teh gī-lūn bô tòa piáⁿ ê tāi-chì? Lín kiám iáu-bô liáu-kái, iáu-bô bêng-pe̍k? Lín ê sim kiám hiah-ni̍h tūn? 18 Lín ū ba̍k-chiu, kiám bô khòaⁿ-kìⁿ? Lín ū hī-khang, kiám bô thiaⁿ-kìⁿ? Lín kiám bōe kì-tit, 19 góa peh gō͘ ê piáⁿ hō͘ gō͘-chheng lâng chia̍h ê sî, chia̍h chhun ê chhùi-sut-á, lín ū khioh móa kúi nâ?” In kóng, “Cha̍p-jī nâ.” 20 Iâ-so͘ koh mn̄g, “Góa peh chhit ê piáⁿ hō͘ sì-chheng lâng chia̍h ê sî, chia̍h chhun ê chhùi-sut-á, lín ū khioh kúi láng?” In kóng, “Chhit láng.” 21 Iâ-so͘ chiū kā in kóng, “Án-ni, lín kiám iáu-bô bêng-pe̍k?” 22 Iâ-so͘ kap bûn-tô͘ lâi-kàu [Pek-sài-tāi]. Ū lâng chhōa chi̍t ê bông-jîn lâi Iâ-so͘ hia, khún-kiû Iâ-so͘ kā i bong. 23 Iâ-so͘ khan hit-ê bông-jîn ê chhiú, chhōa i chhut-khì chng-gōa, jiân-āu chiong chhùi-nōa phùi tī i ê ba̍k-chiu, koh ēng siang-chhiú kā i bong, mn̄g kóng, “Lí ū khòaⁿ-tio̍h sím-mi̍h?” 24 I gia̍h-thâu khí-lâi khòaⁿ, kóng, “Góa khòaⁿ-tio̍h lâng, khòaⁿ khí-lâi chhin-chhiūⁿ chhiū-á teh kiâⁿ-lâi kiâⁿ-khì.” 25 Iâ-so͘ koh chi̍t piàn ēng siang-chhiú bong i ê ba̍k-chiu, i chù-sîn khòaⁿ, sī-le̍k chiū ho̍k-goân, ta̍k hāng lóng khòaⁿ-kah chin chheng-chhó. 26 Iâ-so͘ kiò i tńg-khì in tau, kā i kóng, “Lí liân chng-lāi to m̄-thang ji̍p-khì.” 27 Iâ-so͘ kap I ê bûn-tô͘ khì [Khái-sat-lī-a] [Hui-li̍p-pí] hù-kūn ê hiong-chhoan. Tī lō͘-tiong, I mn̄g in kóng, “Lâng kóng góa sī sím-mi̍h lâng?” 28 In ìn kóng, “Ū lâng kóng lí sī Si-sóe-chiá [Iok-hān]; ū lâng kóng sī [Í-lī-a]; mā ū lâng kóng sī sian-ti tiong ê chi̍t ê.” 29 Iâ-so͘ koh mn̄g in kóng, “Lín leh, lín kóng góa sī sím-mi̍h lâng?” [Pí-tek] ìn kóng, “Lí sī Ki-tok.” 30 Iâ-so͘ bēng-lēng in chhian-bān m̄-thang tùi lâng kóng-khí I ê tāi-chì. 31 Iâ-so͘ khai-sí kà-sī bûn-tô͘ kóng, “Jîn-chú it-tēng tio̍h siū chin chōe khó͘-lān, hō͘ tiúⁿ-ló, chè-si-tiúⁿ, kap keng-ha̍k-kàu-su kū-choa̍t, koh hō͘ lâng hāi-sí, saⁿ ji̍t āu koh-oa̍h.” 32 I chiong chit-ê tāi-chì chheng-chheng chhó-chhó kā in kóng. [Pí-tek] chiū khiú Iâ-so͘ khì piⁿ-a, kā I chek-pī. 33 Iâ-so͘ oa̍t kè-lâi khòaⁿ bûn-tô͘, chek-pī [Pí-tek], kóng, “Sat-tàn, siám-khui! Lí só͘ siūⁿ ê m̄-sī Siōng-tè ê sū, sī lâng ê sū.” 34 Jiân-āu, Iâ-so͘ kā kûn-chiòng kap bûn-tô͘ kiò óa-lâi, tùi in kóng, “Beh tè góa ê lâng, tio̍h oân-choân hó͘-tēng ka-kī, giâ ka-kī ê si̍p-jī-kè lâi tè góa. 35 In-ūi beh kiù ka-kī ê sìⁿ-miā ê, ōe sòng-sit sìⁿ-miā; ūi-tio̍h góa kap hok-im ê iân-kò͘ sòng-sit ka-kī ê sìⁿ-miā ê, ōe kiù-tio̍h sìⁿ-miā. 36 Lâng tit-tio̍h choân sè-kài soah sòng-sit ka-kī ê sìⁿ-miā ū sím-mi̍h lī-ek? 37 Lâng ōe-tàng ēng sím-mi̍h tāi-kè lâi kau-ōaⁿ ka-kī ê sìⁿ-miā? 38 Tī chit-ê îm-loān siâ-ok ê sè-tāi, lâng nā in-ūi góa kap góa ê ōe kám-kak kiàn-siàu, Jîn-chú tī I ê Pē ê êng-kng tiong kap sèng thiⁿ-sài lâi-lîm ê sî mā ōe in-ūi i kám-kak kiàn-siàu.”

Má-khó 9

1 Iâ-so͘ koh kā in kóng, “Góa si̍t-chāi kā lín kóng, khiā tī chia ê lâng, ū-ê iáu-bē sí í-chêng ōe khòaⁿ-kìⁿ Siōng-tè-kok í-keng chhiong-móa tōa lêng-le̍k lâi-lîm.” 2 La̍k ji̍t āu, Iâ-so͘ chhōa [Pí-tek], [Ngá-kok], kap [Iok-hān], kan-ta in ka-kī peh-chiūⁿ chi̍t chō koân soaⁿ. Tī in ê bīn-chêng, Iâ-so͘ ê hêng-siōng hut-jiân kái-piàn. 3 I ê saⁿ piàn-kàu kng-iàⁿ-iàⁿ, hui-siông pe̍h, tōe-chiūⁿ ê phiò-pò͘ sai-hū mā bōe-tàng phiò-kàu hiah-ni̍h pe̍h. 4 Hit sî [Í-lī-a] kap [Mô͘-se] chòe-hé chhut-hiān, kap Iâ-so͘ kóng-ōe. 5 [Pí-tek] tùi Iâ-so͘ kóng, “Lia̍p-pí, lán tī chia chin hó, goán lâi tah saⁿ keng liâu-á, chi̍t keng hō͘ lí, chi̍t keng hō͘ [Mô͘-se], chi̍t keng hō͘ [Í-lī-a].” 6 [Pí-tek] m̄-chai tio̍h kóng sím-mi̍h, in-ūi in hui-siông kiaⁿ-hiâⁿ. 7 Hit sî, ū chi̍t phìⁿ hûn kā in tà-teh, koh ū siaⁿ tùi hûn chhut-lâi, kóng, “Chit-ê sī góa só͘ thiàⁿ ê Kiáⁿ, lín tio̍h thiaⁿ-thàn I.” 8 In kóaⁿ-kín sì-chiu-ûi khòaⁿ chi̍t lìn, chí-ū khòaⁿ-tio̍h Iâ-so͘, bô pa̍t-lâng tī hia. 9 In lo̍h-soaⁿ ê sî, Iâ-so͘ bēng-lēng in kóng, “Jîn-chú tùi sí-lâng tiong koh-oa̍h í-chêng, m̄-thang chiong só͘ khòaⁿ-kìⁿ ê sū kā lâng kóng.” 10 In chiong Iâ-so͘ ê ōe khǹg tī sim-lāi, su-hā teh gī-lūn tùi sí-lâng tiong koh-oa̍h chit kù ōe sī sím-mi̍h ì-sù. 11 In mn̄g Iâ-so͘, “Sī-án-chóaⁿ keng-ha̍k-kàu-su kóng [Í-lī-a] it-tēng tio̍h seng lâi?” 12 Iâ-so͘ ìn kóng, “[Í-lī-a] it-tēng tio̍h seng lâi hôe-ho̍k it-chhè. Án-ni, Sèng-keng ná-ōe kì-chài kóng Jîn-chú it-tēng tio̍h siū chin chōe khó͘-lān koh hō͘ lâng biáu-sī? 13 Góa kā lín kóng, tú-tú chiàu Sèng-keng só͘ kì-chài, [Í-lī-a] í-keng lâi lah, lâng chiàu in ê ì-sù tùi-thāi i.” 14 In lâi-kàu kî-tha ê bûn-tô͘ hia, khòaⁿ-tio̍h chi̍t tōa-kûn lâng kā in ûi-teh, ū kúi-nā ê keng-ha̍k-kàu-su kap in teh piān-lūn. 15 Kûn-chiòng chi̍t-ē khòaⁿ-tio̍h Iâ-so͘, chin tio̍h-kiaⁿ, sûi-sî cháu óa-khì kā I chhéng-an. 16 Iâ-so͘ mn̄g bûn-tô͘ kóng, “Lín kap in teh piān-lūn sím-mi̍h?” 17 Kûn-chiòng ê tiong-kan ū chi̍t ê ìn I kóng, “Lāu-su, góa chhōa góa ê kiáⁿ lâi chhē lí, i hō͘ kúi hū-sin bōe kóng-ōe. 18 Bô-lūn tī tó-ūi, kúi chi̍t-ē hū-sin, kā i siak-tó, i chiū phū pe̍h-pho-nōa, kā chhùi-khí-kun, kui seng-khu ngī-khok-khok. Góa chhiáⁿ lí ê bûn-tô͘ kā kúi kóaⁿ chhut-khì, in bô hoat-tō͘.” 19 Iâ-so͘ kā in kóng, “Ài à, m̄-sìn ê sè-tāi! Góa tio̍h kap lín tòa jōa kú? Góa tio̍h koh jím-nāi lín jōa kú? Kā gín-á chhōa lâi chia!” 20 In chiū kā i chhōa lâi. Hit-ê kúi chi̍t-ē khòaⁿ-tio̍h Iâ-so͘, sûi-sî hō͘ hit-ê gín-á thiu-chhoah, tó tī thô͘-kha kō-lâi kō-khì, phū pe̍h-pho-nōa. 21 Iâ-so͘ mn̄g i ê lāu-pē, “I án-ni jōa kú à?” I ìn kóng, “Tùi sòe-hàn chiū án-ni. 22 Kúi tiāⁿ-tiāⁿ kā i hiat-lo̍h hé, chhia-lo̍h chúi, beh kā i hāi-sí. Lí nā ōe, kiû lí khó-lîn goán, pang-chān goán!” 23 Iâ-so͘ kā i kóng, “Lí kóng ‘Lí nā ōe!’ Ū sìn ê lâng ta̍k hāng lóng ōe.” 24 Gín-á ê lāu-pē sûi-sî hoah kóng, “Góa sìn! Góa ê sìn bô kàu, kiû lí pang-chān!” 25 Iâ-so͘ khòaⁿ-tio̍h kûn-chiòng cháu óa-lâi, giâm-giâm chek-pī hit-ê siâ-sîn, kóng, “Lí chit-ê é-káu koh chhàu-hī ê kúi, góa bēng-lēng lí tùi chit-ê gín-á chhut-lâi, m̄-chún lí koh ji̍p-khì!” 26 Kúi tōa-siaⁿ hoah, hō͘ hit-ê gín-á tōa thiu-chhoah chiah chhut-khì. Hit-ê gín-á pìⁿ-chòe kap sí-lâng siâng-khoán, só͘-í tōa-pō͘-hūn ê lâng kóng, “I sí-khì lah.” 27 Chóng-sī Iâ-so͘ khan gín-á ê chhiú, kā i hû khí-lâi, i chiū khí-lâi. 28 Iâ-so͘ ji̍p-khì chhù-lāi, i ê bûn-tô͘ su-hā kā I mn̄g, “Sī-án-chóaⁿ goán bô hoat-tō͘ kā kúi kóaⁿ chhut-khì?” 29 Iâ-so͘ ìn kóng, “Chit chióng kúi chí-ū khò kî-tó chiah kóaⁿ ōe chhut-khì.” 30 Iâ-so͘ kap bûn-tô͘ lī-khui hia, keng-kè [Ka-lī-lī]. Iâ-so͘ bô ài lâng chai I tī tó-ūi, 31 in-ūi I tú teh kà-sī bûn-tô͘, tùi in kóng, “Jîn-chú ōe hō͘ lâng chhut-bōe, in ōe kā I hāi-sí, sí liáu saⁿ-ji̍t āu ōe koh-oa̍h.” 32 In bōe bêng-pe̍k chit kù ōe, koh m̄-káⁿ kā I mn̄g. 33 In lâi-kàu [Ka-pek-lông]. Iâ-so͘ tī chhù-ni̍h ê sî mn̄g bûn-tô͘ kóng, “Lín tī lō͘-tiong teh gī-lūn sím-mi̍h?” 34 In lóng tiām-tiām, in-ūi tī lō͘-tiong in hō͘-siōng teh cheng-lūn sím-mi̍h lâng siōng-tōa. 35 Iâ-so͘ chē lo̍h-khì, kiò cha̍p-jī sù-tô͘ lâi, tùi in kóng, “Nā ū lâng beh chòe tē-it, tio̍h chòe chèng-lâng ê siōng lō͘-bé, chòe chèng-lâng ê chhe-ēng.” 36 I chiū khan chi̍t ê sòe-hàn gín-á lâi, hō͘ i khiā tī in tiong-kan, kā i phō khí-lâi, tùi in kóng, 37 “Bô-lūn sím-mi̍h lâng nā ūi-tio̍h góa ê miâ chiap-la̍p chi̍t ê chit khoán gín-á, chiū-sī chiap-la̍p góa. Chiap-la̍p góa ê, m̄-sī chiap-la̍p góa, sī chiap-la̍p chhe góa lâi Hit-ūi.” 38 [Iok-hān] tùi Iâ-so͘ kóng, “Lāu-su, goán ū khòaⁿ-tio̍h chi̍t ê lâng hōng lí ê miâ teh kóaⁿ-kúi, goán kā i chó͘-tòng, in-ūi i bô teh tè lán.” 39 Iâ-so͘ kóng, “M̄-thang kā i chó͘-tòng, in-ūi bô-lâng ōe hōng góa ê miâ kiâⁿ sîn-jiah, sûi-sî koh kóng góa ê pháiⁿ-ōe. 40 Bô hoán-tùi lán ê chiū-sī ūi lán. 41 Góa si̍t-chāi kā lín kóng, bô-lūn sím-mi̍h lâng, in-ūi lín sio̍k Ki-tok, ēng chi̍t poe chúi hō͘ lín lim, i it-tēng ōe tit-tio̍h pò-siúⁿ.” 42 Iâ-so͘ kóng, “Bô-lūn sím-mi̍h-lâng hō͘ sìn góa ê lâng tiong-kan bî-sòe ê chi̍t-ê hoān-chōe, i khah hó hō͘ lâng ēng tōa chio̍h-bō kā i tiàu tī ām-kún, hiat-lo̍h hái. 43 “Lí ê chhiú nā hō͘ lí hoān-chōe, tio̍h chām hiat-ka̍k, lêng-khó kiám chi̍t ki chhiú ji̍p éng-oán-oa̍h, pí siang-chhiú hó-hó lo̍h tōe-ge̍k hō͘ bōe hoa ê hé sio khah hó. 45 Lí ê kha nā hō͘ lí hoān-chōe, tio̍h chām hiat-ka̍k, lêng-khó kiám chi̍t ki kha ji̍p éng-oán-oa̍h, pí siang-kha hó-hó hō͘ lâng hiat-lo̍h tōe-ge̍k khah hó. 47 Lí ê ba̍k-chiu nā hō͘ lí hoān-chōe, tio̍h ó͘ hiat-ka̍k, lêng-khó kiám chi̍t lúi ba̍k-chiu ji̍p Siōng-tè-kok, pí nn̄g-lúi ba̍k-chiu hó-hó hō͘ lâng hiat-lo̍h tōe-ge̍k khah hó. 48 Tī tōe-ge̍k, thâng bōe sí, hé bōe hoa. 49 “In-ūi ta̍k ê lâng lóng tio̍h ēng hé liān, chhin-chhiūⁿ ēng iâm sīⁿ. 50 Iâm chin ū lō͘-ēng; m̄-kú iâm nā sit-khì kiâm-bī, beh án-chóaⁿ koh hō͘ i kiâm? Lín ka-kī tio̍h ū iâm ê chok-iōng, hō͘-siōng hô-hó.”

Má-khó 10

1 Iâ-so͘ lī-khui hit só͘-chāi ji̍p-khì [Iû-thài] tōe-khu, kè-khì [Iok-tàn]-hô ê hit pêng hōaⁿ. Kûn-chiòng koh chū-chi̍p khì I hia, I koh chiàu-siông kà-sī in. 2 Ū chi̍t-kóa [Hoat-lī-sài-phài] ê lâng beh chhì-thàm Iâ-so͘, óa-lâi mn̄g I kóng, “Tiōng-hu lî i ê bó͘ ū ha̍h Lu̍t-hoat bô?” 3 Iâ-so͘ ìn kóng, “[Mô͘-se] ū hō͘ lín sím-mi̍h bēng-lēng?” 4 In kóng, “[Mô͘-se] ún-chún lâng siá lî-hun-su chiū thang lî i ê bó͘.” 5 Iâ-so͘ kā in kóng, “[Mô͘-se] sī in-ūi lín ê sim ngī chiah siá chit tiâu kài-bēng hō͘ lín. 6 M̄-kú khí-thâu chhòng-chō ê sî, Siōng-tè chō lâng, ū lâm ū lú. 7 In-ūi chit-ê lí-iû, lâng beh lī-khui i ê pē-bú, kap i ê bó͘ kiat-ha̍p, 8 nn̄g lâng chiâⁿ-chòe chi̍t-thé. Án-ni, in í-keng m̄-sī nn̄g ê, sī chi̍t-thé. 9 Só͘-í, Siōng-tè só͘ phòe-ha̍p ê, lâng m̄-thang thiah-khui.” 10 In ji̍p-khì chhù-lāi ê sî, bûn-tô͘ koh mn̄g Iâ-so͘ chit-ê tāi-chì. 11 Iâ-so͘ kā in kóng, “Bô-lūn sím-mi̍h lâng, lî i ê bó͘ khì chhōa pa̍t ê hū-jîn-lâng chiū-sī hoān kan-îm, ko͘-hū i ê bó͘; 12 bó͘ nā lî i ê tiōng-hu khì kè pa̍t-lâng mā-sī hoān kan-îm.” 13 Ū lâng chhōa gín-á lâi Iâ-so͘ hia, ài I kā in hōaⁿ-chhiú chiok-hok; bûn-tô͘ kā in chek-pī. 14 Iâ-so͘ khòaⁿ-tio̍h, chin siū-khì, tùi bûn-tô͘ kóng, “Hō͘ gín-á lâi góa chia, m̄-thang kā in chó͘-tòng, in-ūi Siōng-tè-kok sī chit khoán lâng ê. 15 Góa si̍t-chāi kā lín kóng, lâng nā bô chhin-chhiūⁿ gín-á án-ni chiap-siū Siōng-tè-kok, choa̍t-tùi bōe-tàng ji̍p-khì.” 16 Iâ-so͘ chiū kā in phō, hōaⁿ-chhiú chiok-hok. 17 Iâ-so͘ tú-beh chhut-gōa ê sî, ū chi̍t ê lâng cháu-lâi, kūi tī I ê bīn-chêng, mn̄g I kóng, “Hó ê Lāu-su, góa tio̍h chòe sím-mi̍h chiah ōe-tàng sêng-siū éng-oán ê oa̍h-miā?” 18 Iâ-so͘ kā i kóng, “Lí ná-ōe kóng góa sī hó? Siōng-tè í-gōa, bô chi̍t ê sī hó. 19 Chiah-ê kài-bēng lí lóng bat: M̄-thang thâi-sí lâng; m̄-thang kan-îm; m̄-thang thau-the̍h; m̄-thang choh gūi-chèng; m̄-thang chà-khi; tio̍h hàu-kèng pē-bú.” 20 Hit-ê lâng ìn Iâ-so͘ kóng, “Lāu-su, chiah-ê kài-bēng góa tùi sòe-hàn chiū it-ti̍t ū teh chun-siú.” 21 Iâ-so͘ chù-ba̍k khòaⁿ i, thiàⁿ i, kā i kóng, “Lí iáu khiàm chi̍t hāng; lí khì, khì bōe só͘-ū ê lâi pun hō͘ sàn-chhiah-lâng, lí tī thiⁿ-téng chiū ū châi-pó; jiân-āu lâi tè góa.” 22 Hit-ê lâng chi̍t-ē thiaⁿ-tio̍h chit kù ōe, bīn sit-sek, iu-iu chhiû-chhiû lī-khui; in-ūi i châi-sán chin chōe. 23 Iâ-so͘ sì-chiu-ûi khòaⁿ chi̍t lìn, kā bûn-tô͘ kóng, “Ū-chîⁿ-lâng ji̍p Siōng-tè-kok jōa-á-ni̍h khùn-lân!” 24 Bûn-tô͘ thiaⁿ-tio̍h I só͘ kóng ê ōe, hui-siông tio̍h-kiaⁿ. Iâ-so͘ koh kā in kóng, “Sòe-kiáⁿ ah, ji̍p Siōng-tè-kok chin-chiàⁿ khùn-lân! 25 Lo̍k-tô chhng-kè chiam-phīⁿ mā pí hó-gia̍h-lâng ji̍p Siōng-tè-kok koh-khah kán-tan.” 26 Bûn-tô͘ koh-khah tio̍h-kiaⁿ, tāi-ke kóng-lâi kóng-khì, “Nā án-ni, sím-mi̍h lâng ōe-tàng tit-tio̍h kiù?” 27 Iâ-so͘ chù-ba̍k kā in khòaⁿ, kóng, “Chit-ê sū, lâng chòe bōe-kàu, Siōng-tè chiū m̄-sī án-ni, in-ūi Siōng-tè ta̍k hāng lóng ōe.” 28 [Pí-tek] chiū kā Iâ-so͘ kóng, “Goán í-keng pàng-sak it-chhè lâi tè lí.” 29 Iâ-so͘ ìn kóng, “Góa si̍t-chāi kā lín kóng, bô-lūn sím-mi̍h lâng, nā ūi-tio̍h góa kap hok-im ê iân-kò͘ pàng-sak chhù-the̍h, hiaⁿ-tī, chí-bē, lāu-bú, lāu-pē, kiáⁿ-jî, kap chhân-hn̂g, 30 tī kim-sè ōe tit-tio̍h pah-pē ê chhù-the̍h, hiaⁿ-tī, chí-bē, lāu-bú, kiáⁿ-jî kap chhân-hn̂g, koh ū pek-hāi; tī lâi-sè ōe tit-tio̍h éng-oán ê oa̍h-miā. 31 Chóng-sī chin chōe tē-it-ê ōe chòe siōng lō͘-bé; siōng lō͘-bé-ê ōe chòe tē-it.” 32 Iâ-so͘ kap I ê bûn-tô͘ chiūⁿ [Iâ-lō͘-sat-léng] ê lō͘-tiong, I kiâⁿ tī thâu-chêng; bûn-tô͘ kám-kak chin kî-koài, tè ê lâng chin kiaⁿ-hiâⁿ. Iâ-so͘ koh chi̍t piàn chhōa cha̍p-jī sù-tô͘ khì piⁿ-a, chiong I teh-beh tú-tio̍h ê sū kā in kóng, 33 “Taⁿ lán beh chiūⁿ [Iâ-lō͘-sat-léng]; Jîn-chú ōe siū chhut-bōe hō͘ chè-si-tiúⁿ kap keng-ha̍k-kàu-su. In ōe kā I tēng sí-chōe, āu-lâi chiong I kau hō͘ Gōa-pang-lâng. 34 In ōe kā I hì-lāng, phùi-nōa, piⁿ-phah, hāi-sí; saⁿ ji̍t āu, I ōe koh-oa̍h.” 35 [Se-pí-thài] ê kiáⁿ [Ngá-kok] kap [Iok-hān] kiâⁿ chìn-chêng, kā Iâ-so͘ kóng, “Lāu-su, goán só͘ kiû ê, chhiáⁿ lí kā goán sêng-choân.” 36 Iâ-so͘ mn̄g kóng, “Lín ài góa kā lín chòe sím-mi̍h?” 37 In kóng, “Lí tit-tio̍h êng-kng ê sî, chhiáⁿ hō͘ goán chi̍t ê chē lí ê chiàⁿ-pêng, chi̍t ê chē lí ê tò-pêng.” 38 Iâ-so͘ kā in kóng, “Lín m̄-chai ka-kī teh kiû sím-mi̍h. Góa lim ê poe, lín ōe-tàng lim bōe? Góa siū ê sóe, lín ōe-tàng siū bōe?” 39 In kóng, “Goán ōe!” Iâ-so͘ kā in kóng, “Góa só͘ lim ê poe, lín beh lim; góa só͘ siū ê sóe, lín beh siū, 40 put-kò chē góa ê chiàⁿ-pêng tò-pêng m̄-sī góa ōe-tàng hō͘ lâng ê. Siōng-tè ūi-tio̍h sím-mi̍h lâng chún-pī chiū hō͘ hit-ê lâng.” 41 Kî-tha hit cha̍p ê bûn-tô͘ thiaⁿ-tio̍h chiū tùi [Ngá-kok] kap [Iok-hān] siū-khì. 42 Iâ-so͘ kiò in lâi, kā in kóng, “Lín chai, tī Gōa-pang-lâng ê tiong-kan, hiah-ê hō͘ lâng khòaⁿ-chòe thóng-tī-chiá ê chòe chú kā in koán-hat, in ê léng-siù kā in chi-phòe. 43 Put-kò lín tiong-kan chiū m̄ eng-kai án-ni; lín tiong-kan ài chòe tōa-ê tio̍h chòe lín ê chhe-ēng; 44 ài chòe tē-it-ê tio̍h chòe chèng-lâng ê lô͘-po̍k. 45 In-ūi Jîn-chú m̄-sī lâi beh hō͘ lâng ho̍k-sāi, hoán-tńg sī beh kā lâng ho̍k-sāi, sīm-chì hi-seng ka-kī ê sìⁿ-miā lâi sio̍k-hôe chin chōe lâng.” 46 Iâ-so͘ kap I ê bûn-tô͘ lâi-kàu [Iâ-lī-ko]. In kap chi̍t tōa-tīn lâng beh tùi [Iâ-lī-ko] chhut-khì ê sî, ū chi̍t ê sit-bêng ê khit-chia̍h, [Tí-mái] ê kiáⁿ [Pa-tí-mái], chē tī lō͘-piⁿ. 47 I thiaⁿ-kóng [Ná-sat-le̍k]-lâng Iâ-so͘ tùi hia kè, chiū hoah, “[Tāi-pi̍t] ê Kiáⁿ Iâ-so͘, lîn-bín góa!” 48 Chin chōe lâng kā i chek-pī, kiò i tiām-tiām, m̄-kú i jú tōa-siaⁿ hoah, “[Tāi-pi̍t] ê Kiáⁿ, lîn-bín góa!” 49 Iâ-so͘ thêng-kha, kóng, “Kiò i lâi!” In chiū khì kiò hit-ê bông-jîn, kā i kóng, “An-sim, khí-lâi! I teh kiò lí.” 50 Bông-jîn chiū chiong gōa-saⁿ hiat-tiāu, thiàu khí-lâi, lâi-kàu Iâ-so͘ hia. 51 Iâ-so͘ kā i kóng, “Lí ài góa kā lí chòe sím-mi̍h?” Bông-jîn ìn kóng, “Góa ê lia̍p-pí, góa ài koh khòaⁿ-kìⁿ!” 52 Iâ-so͘ kā i kóng, “Lí tńg-khì. Lí ê sìn-sim hō͘ lí tit-tio̍h i-hó!” Bông-jîn sûi-sî koh ōe khòaⁿ-kìⁿ, chiū kui lō͘ tè Iâ-so͘.

Má-khó 11

1 Iâ-so͘ kap bûn-tô͘ teh-beh kàu [Iâ-lō͘-sat-léng], kàu [Ka-ná-soaⁿ] kha ê [Pek-hoat-kî] kap [Pek-tāi-nî] ê sî, I chhe nn̄g ê bûn-tô͘, 2 kā in kóng, “Lín khì tùi-bīn ê chng-siā, ji̍p-khì, sûi-sî ōe khòaⁿ-tio̍h chi̍t chiah m̄-bat hō͘ lâng khiâ-kè ê lû-á-kiáⁿ pa̍k tī hia; lín kā i tháu-khui, khan lâi chia. 3 Nā ū lâng mn̄g lín sī-án-chóaⁿ án-ni chòe, tio̍h kā i kóng, ‘Chú beh ēng i, liâm-piⁿ ōe-koh khan tńg-lâi hêng.’ ” 4 In khì, khòaⁿ-tio̍h lō͘-piⁿ ū chi̍t chiah lû-á-kiáⁿ pa̍k tī mn̂g-kháu, chiū kā i tháu-khui. 5 Ū chi̍t-kóa khiā tī hia ê lâng mn̄g in kóng, “Lín tháu lû-á-kiáⁿ beh chhòng sím-mi̍h?” 6 In chiàu Iâ-so͘ só͘ hoan-hù ê kā in hôe-tap; hiah-ê lâng chiū chún in khan-khì. 7 In khan hit chiah lû-á-kiáⁿ kàu Iâ-so͘ hia, chiong ka-kī ê gōa-saⁿ phoa̍h tī lû-á téng, Iâ-so͘ chiū peh-khì khiâ. 8 Ū chin chōe lâng ēng in ê gōa-saⁿ pho͘ tī lō͘-ni̍h, mā ū lâng tùi iá-gōa chhò chhiū-oe pho͘ tī lō͘-ni̍h kā I hoan-gêng. 9 Chêng-kiâⁿ āu-tè ê lâng tōa-siaⁿ hoah: Hô-sàn-ná! Hōng Chú ê miâ lâi Hit-ūi eng-kai siū chheng-chàn! 10 Teh-beh lâi lán chó͘-sian [Tāi-pi̍t] ê ông-kok eng-kai siū chheng-chàn! Chì-koân ê Siōng-tè, hô-sàn-ná! 11 Iâ-so͘ chìn-ji̍p [Iâ-lō͘-sat-léng], ji̍p-khì Sèng-tiān, ta̍k hāng khòaⁿ chi̍t lìn. In-ūi thiⁿ í-keng àm, I chiū kap cha̍p-jī sù-tô͘ chhut siâⁿ khì [Pek-tāi-nî]. 12 Keh-ji̍t, Iâ-so͘ kap bûn-tô͘ tùi [Pek-tāi-nî] chhut-lâi ê sî, Iâ-so͘ pak-tó͘ iau. 13 I tī hn̄g-hn̄g khòaⁿ-tio̍h chi̍t châng ū chin chōe hio̍h ê bû-hoa-kó-chhiū, chiū kiâⁿ óa-khì beh khòaⁿ ū ké-chí á bô. I kiâⁿ kàu hia, chhiū-téng chhiū-hio̍h í-gōa, lóng bô khòaⁿ-tio̍h pòaⁿ-hāng, in-ūi m̄-sī bû-hoa-kó ê kùi-chiat. 14 I chiū tùi hit châng bû-hoa-kó-chhiū kóng, “Éng-oán bô-lâng ōe-koh chia̍h lí ê ké-chí!” I ê bûn-tô͘ lóng ū thiaⁿ-tio̍h. 15 Āu-lâi in lâi-kàu [Iâ-lō͘-sat-léng], Iâ-so͘ ji̍p-khì Sèng-tiān, khí-chhiú chiong tī tiān-lāi teh bóe-bōe ê lâng kóaⁿ chhut-khì, koh chhia-tó ōaⁿ-chîⁿ ê lâng ê toh kap bōe hún-chiáu ê lâng ê í. 16 I mā m̄-chún lâng the̍h mi̍h-kiāⁿ ēng Sèng-tiān chòe thong-lō͘ kè-lâi kè-khì. 17 I kà-sī in kóng, “Sèng-keng kiám bô kì-chài: Góa ê chhù beh kiò-chòe bān-bîn kî-tó ê tiān, lín soah kā i pìⁿ-chòe thó͘-húi-á khut.” 18 Chè-si-tiúⁿ kap keng-ha̍k-kàu-su thiaⁿ-tio̍h chiū it-ti̍t siūⁿ pān-hoat beh hāi-sí Iâ-so͘, m̄-kú in kiaⁿ I, in-ūi kûn-chiòng tùi I ê kà-sī lóng chin kám-ho̍k. 19 Hông-hun ê sî, Iâ-so͘ kap bûn-tô͘ chhut-khì siâⁿ-gōa. 20 Keh chá-khí, Iâ-so͘ kap bûn-tô͘ tùi hia keng-kè ê sî, khòaⁿ-tio̍h hit châng bû-hoa-kó-chhiū kui-châng lóng ta-khì. 21 [Pí-tek] kì-tit chiū kā Iâ-so͘ kóng, “Lia̍p-pí, lí khòaⁿ, lí chiù-chó͘ hit châng bû-hoa-kó-chhiū í-keng ta-khì.” 22 Iâ-so͘ ìn kóng, “Lín tio̍h sìn Siōng-tè. 23 Góa si̍t-chāi kā lín kóng, bô-lūn sím-mi̍h lâng tùi chit chō soaⁿ kóng ‘Khí-lâi, khì thiām-hái’, i sim nā bô giâu-gî, sìn só͘ kóng ê it-tēng ōe si̍t-hiān, mā ōe án-ni hō͘ i si̍t-hiān. 24 Só͘-í, góa kā lín kóng, lín kî-tó ê sî bô-lūn kiû sím-mi̍h, sìn í-keng tit-tio̍h chiū ōe tit-tio̍h. 25 Lín khiā-teh kî-tó ê sî, nā tùi bó͘-lâng sim ū put-pêng, tio̍h kā i sià-bián; án-ni, lín ê Thiⁿ-pē mā ōe sià-bián lín ê kè-sit.. 27 In koh lâi-kàu [Iâ-lō͘-sat-léng]. Iâ-so͘ tī Sèng-tiān teh kiâⁿ ê sî, chè-si-tiúⁿ, keng-ha̍k-kàu-su, kap tiúⁿ-ló lâi I hia, 28 mn̄g I kóng, “Lí khò sím-mi̍h koân-pèng chòe chiah-ê tāi-chì? Sím-mi̍h lâng hō͘ lí chit-ê koân-pèng lâi chòe chiah-ê tāi-chì?” 29 Iâ-so͘ kā in ìn kóng, “Góa beh mn̄g lín chi̍t kù ōe. Lín kā góa ìn-tap, góa chiah kā lín kóng góa khò sím-mi̍h koân-pèng chòe chiah-ê tāi-chì. 30 [Iok-hān] sóe-lé ê koân-pèng sī tùi Thiⁿ á-sī tùi lâng lâi ê? Lín kā góa kóng.” 31 In hō͘-siōng gī-lūn kóng, “Lán nā kóng ‘Tùi Thiⁿ’, I ōe kóng ‘Án-ni lín sī-án-chóaⁿ bô sìn [Iok-hān]?’ 32 M̄-kú lán nā kóng ‘Tùi lâng...’, khióng-kiaⁿ kûn-chiòng hoán-kám, in-ūi in lóng siūⁿ-kóng [Iok-hān] chin-chiàⁿ sī sian-ti.” 33 In chiū ìn Iâ-so͘, “Goán m̄-chai.” Iâ-so͘ chiū tùi in kóng, “Án-ni, góa mā m̄ kā lín kóng góa khò sím-mi̍h koân-pèng chòe chiah-ê tāi-chì.”

Má-khó 12

1 Iâ-so͘ koh ēng phì-jū tùi in kóng: “Ū chi̍t ê lâng khai-khún chi̍t khu phû-tô-hn̂g, sì-bīn ûi lî-pa, ó͘ chi̍t ê chiú-khut, khí chi̍t ê siú-bōng-tâi, chiong chit khu hn̂g cho͘ hō͘ tiān-lông, āu-lâi chhut-gōa khì hn̄g-hn̄g ê só͘-chāi. 2 Siu-sêng ê sî kàu, i chhe chi̍t ê lô͘-po̍k khì tiān-lông hia, beh kā in siu hn̂g-ni̍h ê ké-chí. 3 In lia̍h hit-ê lô͘-po̍k, kā i phah, kóaⁿ i khang-chhiú tò-khì. 4 I koh chhe lēng-gōa chi̍t ê lô͘-po̍k khì, in siong-hāi i ê thâu-khak, kā i bú-jio̍k. 5 Āu-lâi, hn̂g-chú koh chhe pa̍t ê lô͘-po̍k khì, in kā i thâi-sí. I koh chhe chin chōe lô͘-po̍k khì, ū-ê hō͘ in phah, ū-ê hō͘ in thâi-sí. 6 I iáu ū chi̍t ê, chiū-sī só͘ thiàⁿ ê kiáⁿ, chòe-āu mā chhe i khì tiān-lông hia, siūⁿ-kóng ‘In ōe chun-tiōng góa ê kiáⁿ’. 7 M̄-kú hiah-ê tiān-lông chham-siông kóng, ‘Chit-ê sī i ê kè-sêng-jîn. Lâi, lán lâi kā i thâi-sí, i ê châi-sán chiū pìⁿ-chòe lán ê.’ 8 In chiū kā i lia̍h khí-lâi, kā i thâi-sí, kā hiat chhut-khì phû-tô-hn̂g ê gōa-bīn. 9 “Án-ni, phû-tô-hn̂g ê chú-lâng ōe án-chóaⁿ chhú-lí? I ōe lâi châu-bia̍t chiah-ê tiān-lông, chiong phû-tô-hn̂g cho͘ hō͘ pa̍t-lâng. 10 Lín kiám m̄-bat tha̍k-tio̍h chit tōaⁿ Sèng-keng ê kì-chài: Khí-chhù-sai-hū só͘ khì-sak ê chio̍h í-keng chiâⁿ-chòe siōng tiōng-iàu ê ki-chio̍h. 11 Che sī Chú ê chok-ûi, tùi lán lâi khòaⁿ si̍t-chāi chin kî-biāu?” 12 Hiah-ê [Iû-thài-lâng] ê léng-tō-chiá chai-iáⁿ Iâ-so͘ kóng chit-ê phì-jū sī teh chí in, chiū siūⁿ-beh kā I lia̍h, m̄-kú kiaⁿ kûn-chiòng, chiū lī-khui. 13 In chhe kúi-nā ê [Hoat-lī-sài-phài] ê lâng kap [Hi-lu̍t-tóng] ê lâng khì Iâ-so͘ hia, beh chhē I ê ōe-pìⁿ thang kā I hām-hāi. 14 In chiū khì, tùi Iâ-so͘ kóng, “Lāu-su, goán chai lí chin sêng-si̍t, bô-lūn sím-mi̍h khoán lâng, lí tùi-thāi in lóng bô chha-pia̍t, lí chí-ū tiong-si̍t kà-sī Siōng-tè ê tō-lí. Án-ni, la̍p-sè hō͘ [Lô-má] hông-tè [Khái-sat] ū ha̍h Lu̍t-hoat bô? Goán tio̍h la̍p-sè á m̄-bián?” 15 Iâ-so͘ khòaⁿ-chhut in ê khúi-kè, chiū tùi in kóng, “Sī-án-chóaⁿ beh kā góa chhì-thàm? The̍h chi̍t ê gûn-pè hō͘ góa khòaⁿ-bāi leh.” 16 In chiū the̍h chi̍t ê gûn-pè lâi. Iâ-so͘ mn̄g in, “Che sī sím-mi̍h lâng ê siōng, sím-mi̍h lâng ê jī-hō?” In ìn kóng, “[Khái-sat] ê.” 17 Iâ-so͘ kā in kóng, “[Khái-sat] ê mi̍h hō͘ [Khái-sat]; Siōng-tè ê mi̍h hō͘ Siōng-tè.” In tùi Iâ-so͘ kám-kak chin tio̍h-kiaⁿ. 18 Ū chi̍t-kóa chú-tiuⁿ bô koh-oa̍h ê [Sat-to͘-kai-phài] ê lâng lâi Iâ-so͘ hia, mn̄g I kóng, 19 “Lāu-su, [Mô͘-se] só͘ siá ê Lu̍t-hoat kā goán kóng, ‘Nā ū lâng i ê hiaⁿ sí-khì, pàng bó͘ bô pàng kiáⁿ, i choh sió-tī ê tio̍h chhōa hiaⁿ-só thòe hiaⁿ thoân-chong-chiap-tāi.’ 20 Bat ū chhit ê hiaⁿ-tī, siōng-tōa ê chhōa-bó͘, bô lâu hō͘-tāi chiū sí-khì. 21 Tē-jī ê chhōa i ê hiaⁿ-só, mā bô lâu hō͘-tāi chiū sí-khì. Tē-saⁿ ê mā siâng-khoán. 22 Chit chhit ê hiaⁿ-tī lóng bô lâu hō͘-tāi, chòe-āu chit-ê hū-jîn-lâng mā sí-khì. 23 Koh-oa̍h ê sî, in lóng koh-oa̍h, án-ni chit-ê hū-jîn-lâng sī tó chi̍t ê lâng ê bó͘? In-ūi chit chhit-ê lóng bat chhōa i chòe bó͘.” 24 Iâ-so͘ kā in kóng, “Lín m̄-tio̍h, in-ūi lín m̄-bat Sèng-keng, mā m̄-bat Siōng-tè ê koân-lêng. 25 In tùi sí-lâng tiong koh-oa̍h ê sî, kap thiⁿ-téng ê thiⁿ-sài siâng-khoán, bô kè bô chhōa. 26 Koan-hē sí-lâng koh-oa̍h, lín kiám m̄-bat tha̍k-tio̍h [Mô͘-se] ê chheh ‘Teh to̍h ê chhì-phè’ hit tōaⁿ? Siōng-tè tùi [Mô͘-se] kóng, ‘Góa sī [A-pek-la-hán] ê Siōng-tè, [Í-sat] ê Siōng-tè, [Ngá-kok] ê Siōng-tè.’ 27 I m̄-sī sí-lâng ê Siōng-tè, sī oa̍h-lâng ê Siōng-tè. Lín oân-choân m̄-tio̍h!” 28 Ū chi̍t ê keng-ha̍k-kàu-su lâi, thiaⁿ-tio̍h Iâ-so͘ kap [Sat-to͘-kai-phài] ê lâng teh piān-lūn, khòaⁿ Iâ-so͘ ìn liáu chin tio̍h, chiū mn̄g I, “Só͘-ū ê kài-bēng tiong, tó chi̍t tiâu tē-it tiōng-iàu?” 29 Iâ-so͘ ìn kóng, “Tē-it sī: [Í-sek-lia̍t] ah, lín tio̍h thiaⁿ! Chú lán ê Siōng-tè sī to̍k-it ê Chú. 30 Lí tio̍h choân-sim, choân-chêng, choân-ì, choân-le̍k thiàⁿ Chú lí ê Siōng-tè. 31 Tē-jī sī: Tio̍h thiàⁿ chhù-piⁿ chhin-chhiūⁿ thiàⁿ ka-kī. Bô pa̍t ê kài-bēng pí chiah-ê koh-khah tiōng-iàu.” 32 Hit-ê keng-ha̍k-kàu-su tùi Iâ-so͘ kóng, “Lāu-su, lí só͘ kóng ê chin tio̍h. Lí kóng Siōng-tè chí-ū chi̍t ūi, I í-gōa bô pa̍t-ê; 33 koh kóng tio̍h ēng choân-sim, choân-tì, choân-le̍k thiàⁿ Siōng-tè, koh thiàⁿ chhù-piⁿ chhin-chhiūⁿ thiàⁿ ka-kī sī pí hiàn lóng-chóng ê sio-chè kap chè-mi̍h koh-khah iàu-kín.” 34 Iâ-so͘ khòaⁿ-tio̍h i ìn liáu chin ū tì-hūi, chiū kā i kóng, “Lí lī Siōng-tè-kok bô hn̄g.” Hit sî í-āu, bô-lâng káⁿ koh mn̄g Iâ-so͘ sím-mi̍h būn-tôe. 35 Iâ-so͘ tī Sèng-tiān teh kà-sī ê sî, mn̄g kóng, “Keng-ha̍k-kàu-su ná-ōe kóng Ki-tok sī [Tāi-pi̍t] ê hō͘-tāi? 36 [Tāi-pi̍t] pún-sin siū Sèng Sîn kám-tōng kóng: Chú kā góa ê Chú kóng: Lí chē góa ê chiàⁿ-pêng, kàu góa hō͘ lí ê tùi-te̍k khut-ho̍k tī lí ê kha-ē. 37 [Tāi-pi̍t] pún-sin kóng Ki-tok sī Chú, Ki-tok ná-ōe sī [Tāi-pi̍t] ê hō͘-tāi?” Ū chi̍t tōa-kûn lâng ài thiaⁿ Iâ-so͘ ê kà-sī. 38 Iâ-so͘ kà-sī kóng, “Tio̍h tî-hông keng-ha̍k-kàu-su. In ài chhēng tn̂g-saⁿ kiâⁿ-lâi kiâⁿ-khì, tī chhī-tiûⁿ-kháu hō͘ lâng chhéng-an, 39 tī hōe-tn̂g lāi chē koân-ūi, tī iàn-hōe chē tōa-ūi. 40 In chhim-chiàm kóaⁿ-hū ê ke-hé, thiau-kò͘-ì kî-tó chin tn̂g. In ōe siū koh-khah tāng ê hêng-hoa̍t.” 41 Iâ-so͘ chē tī Sèng-tiān hōng-hiàn-kūi ê tùi-bīn teh khòaⁿ lâng hiàn chîⁿ lo̍h-khì. Chin chōe hó-gia̍h-lâng hiàn chin chōe chîⁿ. 42 Ū chi̍t ê sàn-chhiah ê kóaⁿ-hū lâi, hiàn nn̄g ê tâng-chîⁿ-á, chiū-sī chi̍t kak gûn. 43 Iâ-so͘ kiò bûn-tô͘ lâi, kā in kóng, “Góa si̍t-chāi kā lín kóng, chit-ê sàn-chhiah ê kóaⁿ-hū hiàn ji̍p-khì hōng-hiàn-kūi ê, pí chèng-lâng hiàn ê koh-khah chōe. 44 In-ūi in lóng sī hiàn ēng chhun ê, m̄-kú chit-ê kóaⁿ-hū sui-jiân chin sàn-chhiah, iáu-kú the̍h só͘-ū ê, chiū-sī choân-pō͘ ê seng-oa̍h-hùi lóng hiàn lo̍h-khì.”

Má-khó 13

1 Iâ-so͘ tùi Sèng-tiān chhut-lâi ê sî, ū chi̍t ê bûn-tô͘ tùi I kóng, “Lāu-su, lí khòaⁿ, chio̍h chiah-ni̍h tōa tè! Kiàn-tio̍k-bu̍t chiah-ni̍h tông-hông!” 2 Iâ-so͘ kā in kóng, “Lín teh khòaⁿ chiah-ê tōa ê kiàn-tio̍k-bu̍t ò͘. Chiah-ê lóng ōe siū thiah-húi, thiah-kah bô chi̍t tè chio̍h ōe tha̍h tī pa̍t tè téng-bīn.” 3 Iâ-so͘ tī [Ka-ná-soaⁿ] téng, bīn ǹg Sèng-tiān teh chē ê sî, [Pí-tek], [Ngá-kok], [Iok-hān], kap [An-tek-lia̍t] su-hā kā I mn̄g, 4 “Chhiáⁿ kā goán kóng, chit-ê tāi-chì sím-mi̍h sî ōe hoat-seng? Chiah-ê it-chhè ê tāi-chì teh-beh oân-sêng ê sî ū sím-mi̍h tiāu-thâu?” 5 Iâ-so͘ chiū kā in kóng, “Tio̍h kín-sīn chiah-bián siū bê-he̍k. 6 Ū chin chōe lâng ōe lī-iōng góa ê miâ lâi, kóng ‘Góa chiū-sī Ki-tok’ thang bê-he̍k chin chōe lâng. 7 Lín thiaⁿ-tio̍h chiàn-cheng í-ki̍p chiàn-cheng ê hong-siaⁿ ê sî, m̄-bián kiaⁿ. Chiah-ê tāi-chì it-tēng ōe hoat-seng, m̄-kú chiong-kio̍k iáu-bē kàu. 8 In-ūi bîn-cho̍k ōe khí-lâi kong-kek bîn-cho̍k, kok-ka kong-kek kok-ka. Chin chōe só͘-chāi ū tōe-tāng, ū ki-hng. Chiah-ê tāi-chì put-kò sī chhui-chūn thàng-thiàⁿ ê khai-sí. 9 “Lín ka-kī tio̍h kín-sīn, lín ōe hō͘ lâng kau hō͘ gī-hōe, tī hōe-tn̂g siū piⁿ-phah. Lín ōe ūi-tio̍h góa ê iân-kò͘ khiā tī chóng-tok kap kun-ông ê bīn-chêng, tùi in chòe kiàn-chèng. 10 M̄-kú hok-im it-tēng tio̍h tāi-seng thoân hō͘ bān-bîn. 11 In kā lín lia̍h-khì kau hō͘ hoat-têng ê sî, m̄-bián seng hoân-ló beh kóng sím-mi̍h, hit sî lín tit-tio̍h sím-mi̍h chí-sī chiū chiàu án-ni kóng, in-ūi teh kóng-ê m̄-sī lín ka-kī, sī Sèng Sîn. 12 Hiaⁿ-tī ōe chhut-bōe hiaⁿ-tī, hō͘ i sí; lāu-pē mā ōe án-ni tùi-thāi kiáⁿ-jî. Kiáⁿ-jî ōe khí-lâi kong-kek pē-bú, kā in hāi-sí. 13 Lín ōe ūi-tio̍h góa ê miâ hō͘ chèng-lâng oàn-hūn. M̄-kú jím-nāi kàu chòe-āu ê lâng ōe tit-tio̍h kiù.” 14 “Tng lín khòaⁿ-tio̍h hit-ê ‘Khó-ò͘ⁿ ê Húi-bia̍t-chiá’ khiā tī m̄ eng-kai khiā ê só͘-chāi --- tha̍k ê lâng tio̍h bêng-pe̍k chit kù ōe ê ì-sù --- hit sî tī [Iû-thài] ê tio̍h tô-cháu khì soaⁿ-lāi; 15 tī chhù-téng ê m̄-thang lo̍h-lâi, mā m̄-thang ji̍p-khì chhù-lāi the̍h mi̍h-kiāⁿ; 16 tī hn̂g-ni̍h ê m̄-thang tńg-khì hiahⁿ gōa-saⁿ. 17 Tī hiah-ê ji̍t-chí, ū sin-īn ê kap hō͘ eⁿ-á chia̍h-lin ê hū-jîn-lâng hui-siông put-hēng! 18 Tio̍h kî-tó, chiah-ê tāi-chì chiah-bián tī tang-thiⁿ hoat-seng. 19 In-ūi tī hiah-ê ji̍t-chí teh-beh ū chai-lān, sī tùi Siōng-tè chhòng-chō bān-mi̍h í-lâi m̄-bat ū ê, chiong-lâi mā bōe-koh ū. 20 Chú nā bô kiám-chió hiah-ê ji̍t-chí, bô-lâng ōe tit-tio̍h kiù; m̄-kú ūi-tio̍h I só͘ kéng ê soán-bîn, I í-keng ū kiám-chió hiah-ê ji̍t-chí. 21 “Hit sî, nā ū lâng kā lín kóng ‘Lín khòaⁿ, Ki-tok tī chia’, á-sī kóng ‘Lín khòaⁿ, I tī hia’, m̄-thang siong-sìn. 22 In-ūi ū chi̍t-kóa ké Ki-tok kap ké sian-ti ōe chhut-hiān, kiâⁿ sîn-jiah kî-sū, nā ōe, liân soán-bîn to beh kā in bê-he̍k. 23 Tio̍h kín-sīn; góa í-keng chiong it-chhè lóng seng kā lín kóng lah.” 24 “Tī hit-ê chai-lān kè liáu hiah-ê ji̍t-chí, ji̍t ōe pìⁿ o͘-àm, ge̍h bōe hoat-kng, 25 chhiⁿ ōe tùi thiⁿ-téng lak lo̍h-lâi, thiⁿ-téng ê kng-thé lóng ōe iô-choah. 26 Hit sî, lâng ōe khòaⁿ-kìⁿ Jîn-chú chhiong-móa tōa koân-lêng kap êng-kng chē hûn lâi-lîm. 27 I ōe chhe-khián thiⁿ-sài tùi sì-hng, tùi tōe ê chit pêng kàu thiⁿ ê hit pêng chū-chi̍p I ê soán-bîn.” 28 “Lín tio̍h tùi bû-hoa-kó-chhiū ha̍k-si̍p: Ki puh-íⁿ hoat-hio̍h ê sî, lín chiū chai hē-thiⁿ teh-beh kàu. 29 Chhin-chhiūⁿ án-ni, lín khòaⁿ-tio̍h chiah-ê tāi-chì hoat-seng ê sî chiū chai Jîn-chú í-keng chiap-kūn, kàu mn̂g-kháu lah. 30 Góa si̍t-chāi kā lín kóng, chit sè-tāi iáu-bē kè-khì, che it-chhè lóng ōe hoat-seng. 31 Thiⁿ kap tōe ōe siau-sit, m̄-kú góa ê ōe choa̍t-tùi bōe siau-sit.” 32 “Koan-hē hit-ê ji̍t, hit-ê sî, bô-lâng chai; thiⁿ-téng ê thiⁿ-sài m̄-chai, Kiáⁿ mā m̄-chai, chí-ū Pē chai. 33 Tio̍h kín-sīn, tio̍h kéng-séng, in-ūi lín m̄-chai hit-ê sî-khek sím-mi̍h sî ōe kàu. 34 Chhin-chhiūⁿ ū chi̍t ê lâng beh chhut-gōa, chiong koân kau hō͘ lô͘-po̍k, hun-phòe kang-chok hō͘ ta̍k ê lâng, koh hoan-hù siú-ōe sió-sim kò͘-siú. 35 Só͘-í, tio̍h kéng-séng, chiah-bián chit ke ê chú-lâng hut-jiân tńg-lâi khòaⁿ-tio̍h lín teh khùn, in-ūi lín m̄-chai i sím-mi̍h sî ōe tńg-lâi, sī hông-hun á-sī pòaⁿ-mî, sī thiⁿ-beh-kng á-sī ji̍t-chhut ê sî. 37 Góa kā lín kóng ê ōe mā beh tùi chèng-lâng kóng: Tio̍h kéng-séng!”

Má-khó 14

1 Koh nn̄g-ji̍t chiū-sī Pôaⁿ-kè-choeh kap Tû-kàⁿ-choeh. Chè-si-tiúⁿ kap keng-ha̍k-kàu-su teh chhē-khòaⁿ beh ēng sím-mi̍h kè-bô͘ thang lia̍h Iâ-so͘, kā I hāi-sí; 2 put-kò in kóng, “M̄-thang tī choeh-kî tiong, kiaⁿ-liáu bîn-chiòng khí pō-tōng.” 3 Iâ-so͘ tī [Pek-tāi-nî] bâ-hong pīⁿ-lâng [Se-bûn] ê chhù teh chē-toh chia̍h-pn̄g ê sî, ū chi̍t ê hū-jîn-lâng lâi, the̍h chi̍t koàn ge̍k-pân, lāi-bīn tóe móa sûn koh kùi ê Ná-ta̍t phang-iû. I kòng-phòa ge̍k-pân, chiong phang-iû tò tī Iâ-so͘ ê thâu-khak téng. 4 Ū chi̍t-kóa lâng chin siū-khì, hō͘-siōng gī-lūn kóng, “Ná-tio̍h án-ni lōng-hùi phang-iû? 5 Chit koàn phang-iû ōe-tàng bōe saⁿ-pah gōa ê gûn lâi kiù-chè sàn-chhiah-lâng!” In chiū kā i chek-pī. 6 M̄-kú Iâ-so͘ kóng, “M̄-thang kā i tòng! Ná-beh kā i tiau-lân? I ū ūi-tio̍h góa chòe chi̍t hāng hó-sū. 7 Put-sî ū sàn-chhiah-lâng kap lín chòe-hé, lín nā beh, put-koán-sî to ōe-tàng pang-chān in; put-kò góa bōe put-sî kap lín chòe-hé. 8 Chit-ê hū-jîn-lâng í-keng chīn-la̍t chòe lah; i seng ēng phang-iû boah góa ê seng-khu chún-pī góa ê bâi-chòng. 9 Góa si̍t-chāi kā lín kóng, hok-im bô-lūn thoân kàu choân sè-kài sím-mi̍h só͘-chāi, lâng lóng ōe kóng-khí chit-ê hū-jîn-lâng só͘ chòe ê tāi-chì lâi kì-liām i.” 10 Cha̍p-jī sù-tô͘ ê chi̍t ê, [Í-su-ka-lio̍k] ê [Iû-tāi], khì kìⁿ hiah-ê chè-si-tiúⁿ, beh chiong Iâ-so͘ chhut-bōe hō͘ in. 11 In thiaⁿ-tio̍h chin hoaⁿ-hí, tah-èng beh chîⁿ hō͘ i. [Iû-tāi] chiū it-ti̍t teh chhē ki-hōe khòaⁿ-beh án-chóaⁿ thang chhut-bōe Iâ-so͘. 12 Tû-kàⁿ-choeh ê thâu-chi̍t ji̍t, chiū-sī thâi Pôaⁿ-kè-choeh ê iûⁿ-ko hit ji̍t, bûn-tô͘ lâi mn̄g Iâ-so͘, “Lí ài goán khì tó-ūi kā lí chún-pī chia̍h Pôaⁿ-kè-choeh ê boán-chhan?” 13 Iâ-so͘ chhe nn̄g ê bûn-tô͘, hoan-hù in kóng, “Lín ji̍p-khì siâⁿ-lāi, ōe tú-tio̍h chi̍t ê the̍h chúi-pân ê lâng, lín tè i khì. 14 I bô-lūn ji̍p-khì tó chi̍t keng chhù, lín tio̍h kā hit ke ê chú-lâng kóng, ‘Lāu-su teh mn̄g, I kap bûn-tô͘ beh chia̍h Pôaⁿ-kè-choeh boán-chhan ê kheh-thiaⁿ tī tó-ūi?’ 15 I ōe pò lín khòaⁿ lâu-téng chi̍t keng khoán hó-sè ê tōa-thiaⁿ, lín chiū tī hia ūi-tio̍h lán chún-pī.” 16 Hit nn̄g ê bûn-tô͘ chiū chhut-khì, kàu siâⁿ-lāi, khòaⁿ-tio̍h ta̍k hāng kap Iâ-so͘ kā in kóng ê lóng siâng-khoán; in chiū tī hia chún-pī Pôaⁿ-kè-choeh ê boán-chhan. 17 Hông-hun ê sî, Iâ-so͘ kap cha̍p-jī sù-tô͘ chòe-hé lâi. 18 In teh chia̍h-pn̄g ê sî, Iâ-so͘ kóng, “Góa si̍t-chāi kā lín kóng, lín chiah-ê kap góa chòe-hé teh chia̍h ê lâng tiong-kan ū chi̍t ê beh kā góa chhut-bōe.” 19 In chin siong-sim, chi̍t-ê chi̍t-ê kā I mn̄g, “M̄-sī góa hò͘ⁿ?” 20 Iâ-so͘ kā in kóng, “Sī lín cha̍p-jī lâng tiong ê chi̍t ê, chiū-sī the̍h piáⁿ kap góa tī pôaⁿ-ni̍h teh ùn hit-ê. 21 Chiàu Sèng-keng só͘ kì-chài, Jîn-chú ōe siū hāi, put-kò chhut-bōe Jîn-chú hit-ê lâng chhám à! Hit-ê lâng lêng-khó bô chhut-sì khah hó!” 22 In teh chia̍h ê sî, Iâ-so͘ the̍h piáⁿ, kám-siā liáu-āu peh-khui, pun hō͘ bûn-tô͘, kóng, “The̍h khì; che sī góa ê seng-khu.” 23 Āu-lâi I phâng-poe, kám-siā liáu-āu the̍h hō͘ bûn-tô͘, in chiū lóng lim hit poe. 24 Iâ-so͘ kā in kóng, “Che sī góa ê huih, sī li̍p-iok ê huih, ūi-tio̍h chin chōe lâng lâu-chhut ê. 25 Góa si̍t-chāi kā lín kóng, tī Siōng-tè-kok lim sin ê phû-tô-chiú hit ji̍t í-chêng, góa choa̍t-tùi bōe-koh lim chit-ê phû-tô-chiú.” 26 In gîm-si liáu-āu chiū chhut-khì, khì [Ka-ná-soaⁿ]. 27 Iâ-so͘ kā in kóng, “Lín lóng ōe pàng-sak góa, in-ūi Sèng-keng ū kì-chài: Góa beh phah bo̍k-chiá, iûⁿ chiū sì-sòaⁿ. 28 Put-kò góa koh-oa̍h í-āu ōe pí lín seng khì [Ka-lī-lī].” 29 [Pí-tek] kā Iâ-so͘ kóng, “Chèng-lâng nā lóng pàng-sak lí, góa it-tēng bōe!” 30 Iâ-so͘ kā [Pí-tek] kóng, “Góa si̍t-chāi kā lí kóng, kin-á-ji̍t, chiū-sī kim-mî, koe thî nn̄g piàn í-chêng, lí ōe saⁿ pái m̄-jīn góa.” 31 M̄-kú [Pí-tek] kian-chhî kóng, “Nā it-tēng tio̍h kap lí chòe-hé sí, góa mā choa̍t-tùi bōe m̄-jīn lí!” Kî-tha ê lâng mā lóng án-ni kóng. 32 Iâ-so͘ kap bûn-tô͘ lâi-kàu chi̍t ê só͘-chāi, miâ kiò-chòe [Khek-se-má-nî]. I kā bûn-tô͘ kóng, “Góa khì kî-tó, lín tiàm chia chē.” 33 I chiū chhōa [Pí-tek], [Ngá-kok], [Iok-hān] chòe-hé khì. I chin kiaⁿ-hiâⁿ, hui-siông thòng-khó͘, 34 tùi in kóng, “Góa ê sim iu-siong kàu beh sí. Lín tiàm chia. Tio̍h kéng-séng!” 35 Iâ-so͘ kiâⁿ khah chìn-chêng, phak tī thô͘-kha kî-kiû, khòaⁿ ōe-tàng hō͘ I bián keng-kè chit-ê thòng-khó͘ ê sî-kan bōe. 36 I kiû kóng, “A-pa Pē ah, lí ta̍k hāng lóng ōe. Chit-ê poe kiû lí kā góa the̍h khui, m̄-kú m̄-sī chiàu góa ê ì-sù, tio̍h chiàu lí ê chí-ì si̍t-hiān.” 37 Āu-lâi Iâ-so͘ tńg-lâi, khòaⁿ-tio̍h bûn-tô͘ teh khùn, chiū kā [Pí-tek] kóng, “[Se-bûn], lí teh khùn ò͘? Lí bōe-tàng kéng-séng chi̍t tiám-cheng kú sī-bô? 38 Tio̍h kéng-séng, tio̍h kî-tó, chiah bōe hām-lo̍h iú-he̍k. Lín ê sim chin ì-ài, m̄-kú jio̍k-thé loán-jio̍k.” 39 Iâ-so͘ koh khì kî-tó, mā-sī kóng siâng-khoán ê ōe. 40 I koh tńg-lâi, khòaⁿ-tio̍h in in-ūi ba̍k-chiu chin siap iáu teh khùn; in m̄-chai beh kā Iâ-so͘ ìn sím-mi̍h. 41 Iâ-so͘ tē-saⁿ piàn tńg-lâi, tùi in kóng, “Lín iáu teh khùn, iáu teh hioh-khùn ò͘? Kàu-gia̍h lah! Sî-kan í-keng kàu; lín khòaⁿ, Jîn-chú siū chhut-bōe kau tī chōe-jîn ê chhiú-thâu lah. 42 Khí-lâi, lán lâi-khì. Lín khòaⁿ, chhut-bōe góa ê lâng beh kàu lah.” 43 Iâ-so͘ iáu teh kóng ê sî, cha̍p-jī sù-tô͘ ê chi̍t ê --- [Iû-tāi] sûi-sî lâi. Chè-si-tiúⁿ, keng-ha̍k-kàu-su, kap tiúⁿ-ló phài lâi ê chi̍t tīn lâng gia̍h to gia̍h kùn kap i tàu-tīn lâi. 44 Hit-ê chhut-bōe-chiá ū hō͘ in chi̍t ê àm-hō, kóng, “Góa kā I chim hit-ê chiū-sī, lín kā I lia̍h, giâm-bi̍t khàn-siú, kā I ah-khì.” 45 [Iû-tāi] chi̍t-ē kàu, sûi-sî kiâⁿ-óa Iâ-so͘, kiò “Lia̍p-pí”, chiū kā I chim, 46 in chiū hē-chhiú lia̍h Iâ-so͘. 47 Ū chi̍t ê khiā tī piⁿ-a ê lâng pu̍ih to tùi tōa-chè-si ê lô͘-po̍k phut lo̍h-khì, siah-tiāu i ê chi̍t pêng hī-á. 48 Iâ-so͘ kā in kóng, “Lín gia̍h to gia̍h kùn chhut-lâi lia̍h góa, sī teh lia̍h kiông-tō sī-bô? 49 Góa ta̍k ji̍t tī Sèng-tiān teh kà-sī lâng, lín mā ū tī hia, lín bô kā góa lia̍h. M̄-kú che sī beh hō͘ Sèng-keng ê ōe tit-tio̍h èng-giām.” 50 Hit sî, só͘-ū ê bûn-tô͘ lóng pàng-sak Iâ-so͘, tô-cháu. 51 Ū chi̍t ê siàu-liân-lâng teh tè Iâ-so͘, seng-khu chí-ū moa chi̍t tè iù-môa-pò͘. In beh kā i lia̍h, 52 m̄-kú i kā iù-môa-pò͘ pàng-leh, thǹg-pak-theh tô-cháu. 53 In kā Iâ-so͘ chhōa-khì tōa-chè-si hia; só͘-ū ê chè-si-tiúⁿ, tiúⁿ-ló, kap keng-ha̍k-kàu-su lóng chū-chi̍p tī hia. 54 [Pí-tek] lī hn̄g-hn̄g tè Iâ-so͘, tè ji̍p-khì tōa-chè-si kong-koán ê tiâⁿ, kap hiah-ê kéng-ōe chòe-hé chē-teh hang-hé. 55 Hiah-ê chè-si-tiúⁿ kap choân gī-hōe it-ti̍t teh chhē chèng-kù beh kò Iâ-so͘, kā I tēng sí-chōe, m̄-kú chhē lóng bô. 56 In-ūi ū chin chōe lâng kā Iâ-so͘ bû-kò, in ê chèng-sû bô it-tì. 57 Ū kúi-nā ê lâng khí-lâi kā I bû-kò, kóng 58 “Goán bat thiaⁿ-kìⁿ I kóng, ‘Góa beh thiah-húi chit keng lâng ê chhiú só͘ khí ê Sèng-tiān, saⁿ ji̍t lāi beh koh lēng-gōa khí chi̍t keng m̄-sī lâng ê chhiú khí ê.’ ” 59 Liân chit-ê, in ê chèng-sû mā bô it-tì. 60 Tōa-chè-si tī chèng-lâng ê bīn-chêng khiā khí-lâi, mn̄g Iâ-so͘, “Chiah-ê lâng teh kā lí kò sím-mi̍h? Lí ná lóng bô tap-piān?” 61 M̄-kú Iâ-so͘ tiām-tiām, lóng bô ìn pòaⁿ-kù. Tōa-chè-si koh mn̄g I kóng, “Lí sī Ki-tok, sī eng-kai tit-tio̍h chheng-chàn Hit-ūi ê Kiáⁿ á m̄-sī?” 62 Iâ-so͘ ìn kóng, “Góa sī. Lín ōe khòaⁿ-kìⁿ Jîn-chú chē tī Choân-lêng-chiá ê chiàⁿ-pêng, chē thiⁿ-téng ê hûn lâi!” 63 Tōa-chè-si thiah-li̍h ka-kī ê gōa-saⁿ, kóng, “Lán iáu su-iàu sím-mi̍h chèng-jîn? 64 Lín í-keng ū thiaⁿ-tio̍h I siat-to̍k Siōng-tè. Lín phah-sǹg án-chóaⁿ?” In lóng phòaⁿ I ū-chōe, eng-kai chhú-sí. 65 Ū chi̍t-kóa lâng kā Iâ-so͘ phùi chhùi-nōa, ng I ê bīn, ēng kûn-thâu-bú kā I cheng, koh tùi I kóng, “Sian-ti à, kóng khòaⁿ-bāi, siáⁿ-lâng kā lí cheng?” Kéng-ōe kā I lia̍h-teh ti̍t-ti̍t siàn. 66 [Pí-tek] iáu tī tōa-chè-si kong-koán ē-bīn ê tiâⁿ, ū chi̍t ê tōa-chè-si ê lú-pī lâi. 67 I khòaⁿ-tio̍h [Pí-tek] teh hang-hé, ti̍t-ti̍t kā i siòng, kóng, “Lí mā lóng ū teh kap hit-ê [Ná-sat-le̍k]-lâng Iâ-so͘ chòe-hé.” 68 [Pí-tek] m̄-jīn, kóng, “Góa m̄-chai, mā thiaⁿ bô lí teh kóng sím-mi̍h.” I chiū chhut-khì tiâⁿ ê gōa-bīn. Hit sî koe chiū thî. 69 Hit-ê lú-pī khòaⁿ-tio̍h i, koh kā khiā tī piⁿ-a ê lâng kóng, “Chit-ê lâng sī in hit tīn ê lâng.” 70 [Pí-tek] koh-chài m̄-jīn. Kè bô jōa kú, hiah-ê khiā tī piⁿ-a ê lâng koh tùi [Pí-tek] kóng, “Lí khak-si̍t sī in hit tīn ê lâng, in-ūi lí mā-sī [Ka-lī-lī]-lâng.” 71 [Pí-tek] chiū chiù-chōa kóng, “Lín teh kóng hit-ê lâng, góa m̄-bat. Góa nā kóng pe̍h-chha̍t, goān Siōng-tè chek-hoa̍t góa!” 72 Hit sî, koe tē-jī piàn thî. [Pí-tek] siūⁿ-khí Iâ-so͘ kā i kóng ê ōe “Koe thî nn̄g piàn í-chêng, lí ōe saⁿ pái m̄-jīn góa”, chiū chhut-siaⁿ khàu.

Má-khó 15

1 Thiⁿ chi̍t-ē kng, hiah-ê chè-si-tiúⁿ, tiúⁿ-ló, keng-ha̍k-kàu-su, í-ki̍p choân gī-hōe ê lâng tàu-tīn chham-siông. In kā Iâ-so͘ pa̍k khí-lâi, ah-khì kau hō͘ [Pí-lia̍p-to]. 2 [Pí-lia̍p-to] mn̄g Iâ-so͘, “Lí sī [Iû-thài]-lâng ê Ông sī-bô?” Iâ-so͘ ìn kóng, “Che sī lí kóng ê.” 3 Chè-si-tiúⁿ kò Iâ-so͘ chin chōe hāng tāi-chì. 4 [Pí-lia̍p-to] koh mn̄g Iâ-so͘, “Lí khòaⁿ, in kā lí kò chiah-chōe hāng, lí ná lóng bô tap-piān?” 5 Iâ-so͘ iû-goân bô ìn pòaⁿ-kù, [Pí-lia̍p-to] soah kám-kak chin kî-koài. 6 Ta̍k nî tī Pôaⁿ-kè-choeh ê sî, [Pí-lia̍p-to] lóng ū chiàu bîn-chiòng ê iau-kiû pàng chi̍t ê hoān-lâng hō͘ in. 7 Ū chi̍t ê lâng miâ kiò-chòe [Pa-lia̍p-pa], i kap chi̍t-kóa poān-tô͘ chòe-hé koaiⁿ-kaⁿ; in bat tī pō-loān tiong thâi-sí lâng. 8 Kûn-chiòng chū-chi̍p óa-lâi, iau-kiû [Pí-lia̍p-to] chiàu koàn-lē pān-lí. 9 [Pí-lia̍p-to] mn̄g in kóng, “Lín ài góa pàng [Iû-thài]-lâng ê Ông hō͘ lín bô?” 10 In-ūi i chai hiah-ê chè-si-tiúⁿ sī ūi-tio̍h oàn-tò͘ chiah chiong Iâ-so͘ kau hō͘ i. 11 Hiah-ê chè-si-tiúⁿ siàn-tōng kûn-chiòng, tian-tò iau-kiû [Pí-lia̍p-to] pàng [Pa-lia̍p-pa] hō͘ in. 12 [Pí-lia̍p-to] koh chi̍t piàn mn̄g in kóng, “Án-ni, lín chheng-chòe ‘[Iû-thài-lâng] ê Ông’ ê, lín ài góa án-chóaⁿ chhú-lí?” 13 In koh tōa-siaⁿ hoah, “Kā tèng si̍p-jī-kè!” 14 [Pí-lia̍p-to] mn̄g in kóng, “Sī-án-chóaⁿ? I ū chòe sím-mi̍h pháiⁿ tāi-chì?” In koh-khah tōa-siaⁿ hoah, “Kā tèng si̍p-jī-kè!” 15 [Pí-lia̍p-to] ūi-tio̍h beh hō͘ kûn-chiòng hoaⁿ-hí, chiū pàng [Pa-lia̍p-pa] hō͘ in, koh bēng-lēng lâng ēng piⁿ phah Iâ-so͘, jiân-āu kau I khì tèng si̍p-jī-kè. 16 Peng-sū tòa Iâ-so͘ khì chóng-tok-hú ê īⁿ-lāi, āu-lâi tiàu-chi̍p choân-tūi ê peng. 17 In kā Iâ-so͘ chhēng chi̍t niá chí-sek ê gōa-phàu, koh ēng chhì-á pīⁿ chi̍t téng ông-koan kā I tì. 18 In kā I kiâⁿ-lé, hoah kóng, “[Iû-thài]-lâng ê Ông bān-sòe!” 19 In koh ēng chi̍t ki lô͘-tek-á sut I ê thâu-khak, kā I phùi chhùi-nōa, kūi lo̍h-khì pài I. 20 In hì-lāng I liáu-āu, hit niá chí-sek ê gōa-phàu kā thǹg khí-lâi, koh chiong I ka-kī ê saⁿ kā chhēng lo̍h-khì, jiân-āu ah I chhut-khì tèng si̍p-jī-kè. 21 Ū chi̍t ê [Kó͘-lī-nāi]-lâng [Se-bûn], sī [A-le̍k-san-tāi] kap [Ló͘-hu] ê lāu-pē, i tùi chng-kha lâi, tú-hó tùi hia keng-kè; peng-sū kiông-pek i giâ Iâ-so͘ ê si̍p-jī-kè. 22 In kā Iâ-so͘ ah-kàu chi̍t ê só͘-chāi kiò-chòe [Kok-kok-tha], hoan-e̍k sī “[Thâu-khak-óaⁿ-niá]”. 23 In ēng chham bu̍t-io̍h ê chiú hō͘ Iâ-so͘ lim, m̄-kú I bô lim . 24 Jiân-āu in kā I tèng si̍p-jī-kè, koh pun I ê saⁿ, thiu-chhiam koat-tēng ta̍k ê lâng tit-tio̍h sím-mi̍h. 25 In tèng Iâ-so͘ tī si̍p-jī-kè ê sî sī chá-khí-sî káu tiám. 26 Ū chi̍t ê pâi-á siá I ê chōe-chn̄g: “Iû-thài-lâng ê Ông”. 27 Ū nn̄g ê kiông-tō kap I chòe-hé tèng si̍p-jī-kè, chi̍t ê tī chiàⁿ-pêng, chi̍t ê tī tò-pêng. 29 Tùi hia keng-kè ê lâng kā I bú-jio̍k, iô-thâu, kóng, “Ài à, lí chit-ê lâng, kóng beh thiah-húi Sèng-tiān saⁿ ji̍t lāi koh kā khí khí-lâi, 30 tio̍h kiù lí ka-kī, tùi si̍p-jī-kè lo̍h-lâi!” 31 Chè-si-tiúⁿ kap keng-ha̍k-kàu-su mā án-ni kā I thí-chhiò, kóng-lâi kóng-khì, “I kiù pa̍t-lâng, bô hoat-tō͘ kiù ka-kī! 32 I sī Ki-tok, [Í-sek-lia̍t] ê Ông, hiān-chāi tio̍h tùi si̍p-jī-kè lo̍h-lâi, hō͘ lán thang khòaⁿ, thang sìn.” Kap Iâ-so͘ chòe-hé tèng si̍p-jī-kè hiah-ê kiông-tō mā kā I bú-jio̍k. 33 Tiong-tàu ê sî, choân-tōe lóng o͘-àm, sòa kàu ē-po͘ saⁿ tiám. 34 Saⁿ tiám ê sî, Iâ-so͘ tōa-siaⁿ hoah, “Í-lô-i, Í-lô-i, la-má sat-pak-tāi-nî?” ì-sù sī “Góa ê Siōng-tè, góa ê Siōng-tè, lí sī-án-chóaⁿ pàng-sak góa?” 35 Ū chi̍t-kóa khiā tī piⁿ-a ê lâng thiaⁿ-tio̍h, kóng, “Lín khòaⁿ, I teh kiò [Í-lī-a]!” 36 Ū chi̍t ê lâng cháu-khì, the̍h hái-mî chìm sng-chiú, pa̍k tī lô͘-tek-á bé, tu-khì hō͘ Iâ-so͘ suh, kóng, “Tán chi̍t-ē! Lán khòaⁿ [Í-lī-a] ōe lâi kā I kiù bōe.” 37 Iâ-so͘ tōa-siaⁿ hoah chi̍t siaⁿ, chiū tn̄g-khùi. 38 Hit sî Sèng-tiān lāi ê tiùⁿ-lî tùi-téng kàu-ē li̍h-chòe nn̄g pêng. 39 Khiā tī Iâ-so͘ tùi-bīn ê kun-koaⁿ khòaⁿ-tio̍h I tn̄g-khùi ê chêng-hêng, kóng, “Chit-ê lâng khak-si̍t sī Siōng-tè ê Kiáⁿ!” 40 Mā ū chi̍t-kóa hū-jîn-lâng tùi hn̄g-hn̄g teh khòaⁿ, kî-tiong ū [Boa̍t-tāi-lia̍p] ê [Má-lī-a], sió [Ngá-kok] kap [Iok-sek] ê lāu-bú [Má-lī-a], í-ki̍p [Sat-lô-bí]. 41 In sī Iâ-so͘ tī [Ka-lī-lī] ê sî chiū tè I koh ho̍k-sāi I ê hū-jîn-lâng. Lēng-gōa koh ū chin chōe kap Iâ-so͘ chòe-hé lâi [Iâ-lō͘-sat-léng] ê hū-jîn-lâng mā tī hia. 42 Í-keng hông-hun, in-ūi hit ji̍t sī Pôaⁿ-kè-choeh ê Pī-pān-ji̍t, sī An-hioh-ji̍t ê chêng chi̍t ji̍t, 43 [A-lī-má-thài] ê [Iok-sek] lâi, hó-táⁿ khì kìⁿ [Pí-lia̍p-to], chhéng-kiû chiong Iâ-so͘ ê ûi-thé hō͘ i. [Iok-sek] sī chi̍t ê siū lâng chun-kèng ê gī-oân, pún-sin mā ū teh kî-thāi Siōng-tè-kok ê lâi-lîm. 44 [Pí-lia̍p-to] thiaⁿ-tio̍h Iâ-so͘ í-keng sí, kám-kak kî-koài, chiū kiò kun-koaⁿ lâi, mn̄g khòaⁿ Iâ-so͘ sī m̄-sī í-keng sí-khì. 45 I tùi kun-koaⁿ thiaⁿ-tio̍h Iâ-so͘ khak-si̍t sí ê siau-sit, chiū chiong ûi-thé kau hō͘ [Iok-sek]. 46 [Iok-sek] bóe chi̍t tè iù-môa-pò͘, jiân-āu chiong Iâ-so͘ ê ûi-thé tùi si̍p-jī-kè sóa lo̍h-lâi, ēng hit tè iù-môa-pò͘ kā I pau, an-chòng tī í-keng phah hó tī chio̍h-piah-lāi ê bōng, koh kō chi̍t tè chio̍h lâi that tī bōng-kháu. 47 [Boa̍t-tāi-lia̍p] ê [Má-lī-a] kap [Iok-sek] ê lāu-bú [Má-lī-a] ū khòaⁿ-tio̍h an-chòng Iâ-so͘ ê só͘-chāi.

Má-khó 16

1 An-hioh-ji̍t kè liáu, [Boa̍t-tāi-lia̍p] ê [Má-lī-a], [Ngá-kok] ê lāu-bú [Má-lī-a], kap [Sat-lô-bí] bóe phang-liāu beh khì boah Iâ-so͘ ê ûi-thé. 2 Lé-pài-ji̍t thàu-chá, ji̍t tú-á chhut ê sî, in chiū khì bōng-tōe. 3 In hō͘-siōng kóng, “Sím-mi̍h lâng beh thòe lán chiong bōng-kháu hit tè chio̍h kō-khui?” 4 Hit tè chio̍h hui-siông tōa tè. In chi̍t-ē gia̍h-thâu, khòaⁿ-tio̍h hit tè chio̍h í-keng kō-khui. 5 In ji̍p-khì bōng-lāi, khòaⁿ-tio̍h chi̍t ê chhēng pe̍h saⁿ ê siàu-liân-lâng chē tī chiàⁿ-pêng, hui-siông tio̍h-kiaⁿ. 6 Hit-ê siàu-liân-lâng tùi in kóng, “Bián kiaⁿ! Góa chai lín teh chhē hō͘ lâng tèng si̍p-jī-kè ê [Ná-sat-le̍k]-lâng Iâ-so͘ ; I í-keng koh-oa̍h, bô tī chia. Lâi khòaⁿ khǹg I ê só͘-chāi. 7 Lín khì, khì kā I ê bûn-tô͘ kap [Pí-tek] kóng, ‘I pí lín seng khì [Ka-lī-lī], tī hia lín ōe kìⁿ-tio̍h I, tú-tú chiàu I kā lín kóng ê.’ ” 8 In tùi bōng-ni̍h chhut-lâi, ti̍t-ti̍t cháu, kiaⁿ-kah phi̍h-phi̍h-chhoah koh gāng-khì. In lóng bô tùi lâng kóng sím-mi̍h, in-ūi in chin kiaⁿ. Hiah-ê hū-jîn-lâng khì [Pí-tek] kap i ê pêng-iú hia, tùi in kán-tan pò-kò só͘ thiaⁿ-kìⁿ lóng-chóng ê tāi-chì. Chiah-ê tāi-chì í-āu, Iâ-so͘ pún-sin chhe-khián I ê bûn-tô͘, tùi-tang-kàu-sai soan-iông sîn-sèng, put-bia̍t, hō͘ lâng tit-tio̍h éng-oán chín-kiù ê sìn-sit. Amen! 9 Lé-pài-ji̍t thàu-chá, Iâ-so͘ koh-oa̍h liáu-āu, tāi-seng tùi [Boa̍t-tāi-lia̍p] ê [Má-lī-a] hián-hiān; Iâ-so͘ bat kā i kóaⁿ-chhut chhit ê kúi. 10 I khì kā hiah-ê tè Iâ-so͘ ê lâng pò-kò, hit sî in teh ai-siong thî-khàu. 11 In thiaⁿ-kìⁿ Iâ-so͘ koh-oa̍h koh ū hō͘ [Má-lī-a] khòaⁿ-tio̍h, in iáu m̄-sìn. 12 Chiah-ê tāi-chì í-āu, ū nn̄g ê bûn-tô͘ kiâⁿ-lō͘ beh khì chng-kha ê sî, Iâ-so͘ ēng pa̍t khoán ê hêng-siōng tùi in hián-hiān. 13 In tńg-khì kā kî-tha ê lâng pò-kò, m̄-kú hiah-ê lâng lóng m̄-sìn. 14 Āu-lâi, cha̍p-it ê sù-tô͘ teh chia̍h-pn̄g ê sî, Iâ-so͘ tùi in hián-hiān. I chek-pī in m̄-sìn kap ngī-sim, in-ūi in bô sìn khòaⁿ-tio̍h Iâ-so͘ koh-oa̍h ê lâng kā in kóng ê ōe. 15 Iâ-so͘ kā in kóng, “Lín tio̍h khì choân sè-kài tùi só͘-ū pī-chō-ê soan-iông hok-im. 16 Sìn lâi niá-siū sóe-lé ê lâng ōe tit-tio̍h kiù; m̄-sìn ê lâng ōe siū tēng-chōe. 17 Sìn ê lâng ōe kiâⁿ ē-bīn chiah-ê sîn-jiah: In ōe hōng góa ê miâ kóaⁿ-kúi; in ōe kóng sin ê gú-giân; 18 in lia̍h chôa á-sī lim to̍k mā bōe siū siong-hāi; in kā pīⁿ-lâng hōaⁿ-chhiú, pīⁿ-lâng ōe tit-tio̍h i-hó.” 19 Chú Iâ-so͘ kā in kóng chiah-ê ōe liáu-āu siū chiap chiūⁿ-thiⁿ, chē tī Siōng-tè ê chiàⁿ-pêng. 20 Bûn-tô͘ chhut-khì ta̍k só͘-chāi thoân hok-im. Chú kap in tâng-kang, ēng in só͘ kiâⁿ ê sîn-jiah chèng-si̍t in só͘ thoân ê tō-lí.

Lō͘-ka 1

1 Só͘ chun-kèng ê [Thê-o-hui-lô] sian-siⁿ: Tī goán tiong-kan só͘ hoat-seng ê tāi-chì, í-keng ū chin chōe lâng chéng-lí koh phian-siá; 2 chiah-ê tāi-chì sī chiàu hiah-ê tùi khí-thâu chiū chhin-ba̍k khòaⁿ-kìⁿ ê lâng kap thoân-tō ê lâng só͘ thoân-siū hō͘ goán ê. 3 Chiah-ê lóng-chóng ê tāi-chì, góa ū tùi-thâu-kàu-bé siông-sè chhâ-khó, chiah siūⁿ-kóng tio̍h ūi-tio̍h lí chiàu sūn-sū siá chhut-lâi, 4 hō͘ lí thang bêng-pe̍k só͘ ha̍k-si̍p ê tō-lí sī khak-si̍t. 5 [Hi-lu̍t] chòe [Iû-thài]-ông ê sî, ū chi̍t ê [A-pí-a] pan ê chè-si, miâ kiò-chòe [Sat-ka-lī-a]; i ê bó͘ [I-lī-sa-pek] mā-sī chè-si [A-lûn] ê hō͘-tāi. 6 In nn̄g lâng oân-choân chun-siú Chú it-chhè ê kài-bēng kap kui-lē, hō͘ Siōng-tè khòaⁿ-chòe gī-lâng. 7 In bô kiáⁿ, in-ūi [I-lī-sa-pek] bōe siⁿ, in nn̄g lâng mā lóng í-keng chin lāu. 8 Ū chi̍t ji̍t, [Sat-ka-lī-a] ti̍t-pan, tī Siōng-tè ê bīn-chêng chip-hêng chè-si ê chit-bū. 9 Chiàu chè-si-chit ê kui-lē, i thiu-tio̍h khau ji̍p-khì Chú ê sèng-só͘ sio-hiuⁿ. 10 I teh sio-hiuⁿ ê sî, kui tōa-tīn bîn-chiòng tī gōa-bīn teh kî-tó. 11 Ū Chú ê chi̍t ê thiⁿ-sài hián-hiān, khiā tī hiuⁿ-tôaⁿ ê chiàⁿ-pêng. 12 [Sat-ka-lī-a] chi̍t-ē khòaⁿ-tio̍h chin tio̍h-kiaⁿ, hui-siông put-an. 13 Thiⁿ-sài kā i kóng, “[Sat-ka-lī-a], m̄-bián kiaⁿ, in-ūi Siōng-tè í-keng thiaⁿ-tio̍h lí ê kî-tó; lí ê bó͘ [I-lī-sa-pek] ōe kā lí siⁿ chi̍t ê hāu-siⁿ. Lí tio̍h kā i hō-miâ kiò-chòe [Iok-hān]. 14 Lí ōe hoaⁿ-hí khoài-lo̍k; chin chōe lâng mā ōe in-ūi i ê chhut-sì lâi hoaⁿ-hí, 15 in-ūi i tī Chú ê bīn-chêng ōe chòe tōa jîn-bu̍t. Po̍h-chiú kāu-chiú i lóng bōe ēng-tit lim. I iáu tī bú-thai chiū hō͘ Sèng Sîn chhiong-móa. 16 I ōe hō͘ chin chōe [Í-sek-lia̍t] ê kiáⁿ-sun kui-ǹg Chú --- in ê Siōng-tè. 17 I ōe ēng sian-ti [Í-lī-a] ê cheng-sîn kap lêng-le̍k lâi chòe Chú ê sian-hong. I ōe hō͘ pē-bú kap kiáⁿ-jî hô-hó; hō͘ pōe-ge̍k ê lâng choán-ǹg lâi tè gī-lâng ê ì-liām; hō͘ chú-bîn chún-pī piān thang gêng-chiap Chú.” 18 [Sat-ka-lī-a] tùi thiⁿ-sài kóng, “Góa tio̍h án-chóaⁿ chiah ōe chai chit-ê tāi-chì? Góa í-keng lāu, góa ê bó͘ mā hiah-chōe hè à.” 19 Thiⁿ-sài ìn kóng, “Góa sī teh sū-hāu Siōng-tè ê [Ka-pek-lia̍t], siū phài lâi thoân-ōe, tùi lí pò chit-ê hó siau-sit. 20 Kàu chiah-ê tāi-chì èng-giām hit ji̍t, lí ōe é-káu bōe kóng-ōe, in-ūi lí bô siong-sìn góa só͘ kóng sî kàu ōe si̍t-hiān chiah-ê ōe.” 21 Hit sî, bîn-chiòng teh thèng-hāu [Sat-ka-lī-a], in chin kî-koài i ná-ōe ji̍p-khì sèng-só͘ hiah-ni̍h kú. 22 I chhut-lâi ê sî soah bōe-tàng tùi in kóng-ōe, in chiah chai i tī sèng-só͘ ū khòaⁿ-kìⁿ īⁿ-siōng. I bōe kóng-ōe, it-ti̍t tùi in pí-chhiú. 23 [Sat-ka-lī-a] ho̍k-sāi ê ji̍t-kî kè liáu chiū tńg-khì chhù-ni̍h. 24 Kè bô jōa kú, i ê bó͘ [I-lī-sa-pek] hoâi-īn, gō͘ ge̍h-ji̍t kú bô chhut-mn̂g. 25 [I-lī-sa-pek] kóng, “Chú chiah-ni̍h khòaⁿ-kò͘ góa, kā góa tû-khì tī lâng bīn-chêng ê kiàn-siàu.” 26 [I-lī-sa-pek] hoâi-īn tē-la̍k ge̍h-ji̍t, thiⁿ-sài [Ka-pek-lia̍t] hōng Siōng-tè chhe-phài kàu [Ka-lī-lī] chi̍t ê siâⁿ, kiò-chòe [Ná-sat-le̍k], 27 khì kìⁿ chi̍t ê chāi-sek-lú, miâ kiò-chòe [Má-lī-a]. Chit-ê chāi-sek-lú í-keng kap [Tāi-pi̍t]-ke chi̍t ê lâng miâ kiò-chòe [Iok-sek] tèng-hun. 28 Thiⁿ-sài kàu [Má-lī-a] hia, tùi i kóng, “Pêng-an! Lí sī chèng hū-lú tiong-kan siōng ū hok-khì ê; Chú kap lí tông-chāi!” 29 [Má-lī-a] in-ūi chiah-ê ōe hui-siông put-an, sim-lāi it-ti̍t teh siūⁿ chit-ê chhéng-an sī sím-mi̍h ì-sù. 30 Thiⁿ-sài tùi i kóng, “[Má-lī-a], m̄-bián kiaⁿ, in-ūi lí ū tit-tio̍h Siōng-tè sù-hok. 31 Lí ōe hoâi-īn siⁿ chi̍t ê hāu-siⁿ, lí tio̍h kā I hō-miâ kiò-chòe Iâ-so͘. 32 I ōe chòe tōa jîn-bu̍t, lâng ōe chheng-ho͘ I chòe Chì-koân Siōng-tè ê Kiáⁿ. Chú Siōng-tè ōe chiong I chó͘-sian [Tāi-pi̍t] ê ông-ūi hō͘ I. 33 I ōe éng-oán thóng-tī [Ngá-kok] ê kiáⁿ-sun; I ê ông-kok bû-kiông-chīn.” 34 [Má-lī-a] tùi thiⁿ-sài kóng, “Góa iáu-bē chhut-kè, ná-ōe ū chit khoán tāi-chì?” 35 Thiⁿ-sài ìn kóng, “Sèng Sîn beh lîm-kàu lí, Chì-koân Siōng-tè ê koân-lêng beh tì-ìm lí. In-ūi án-ni, hit-ê teh-beh chhut-sì ê eⁿ-á sī sèng-ê, lâng ōe chheng-ho͘ I chòe Siōng-tè ê Kiáⁿ. 36 Lí khòaⁿ, lí ê chhin-chiâⁿ [I-lī-sa-pek], i sui-jiân nî-lāu, mā í-keng hoâi-īn beh siⁿ chi̍t ê hāu-siⁿ. Lâng kóng i bōe siⁿ, m̄-kú i í-keng ū-sin la̍k ge̍h-ji̍t. 37 In-ūi Siōng-tè bô chi̍t hāng tāi-chì chòe bōe-kàu.” 38 [Má-lī-a] kóng, “Góa sī Chú ê lú-pī, goān chiàu lí ê ōe tī góa sin-chiūⁿ si̍t-hiān.” Thiⁿ-sài chiū lī-khui i. 39 Kè bô jōa kú, [Má-lī-a] chhut-hoat, kóaⁿ-kín khì [Iû-thài] soaⁿ-tōe ê chi̍t ê siâⁿ. 40 I ji̍p-khì [Sat-ka-lī-a] ê chhù, kā [I-lī-sa-pek] chhéng-an. 41 [I-lī-sa-pek] thiaⁿ-tio̍h [Má-lī-a] ê chhéng-an, pak-tó͘ lāi ê eⁿ-á chiū tiô-thiàu. [I-lī-sa-pek] hō͘ Sèng Sîn chhiong-móa, 42 tōa-siaⁿ kóng, “Hū-jîn-lâng tiong lí siōng siū chiok-hok! Lí pak-tó͘ lāi ê gín-á mā siū chiok-hok! 43 Góa ê Chú ê lāu-bú lâi hóng-būn góa, góa ná-ōe kham-tit? 44 In-ūi góa chi̍t-ē thiaⁿ-tio̍h lí chhéng-an ê siaⁿ, pak-tó͘ lāi ê eⁿ-á chiū hoaⁿ-hí tiô-thiàu. 45 Siong-sìn Chú kóng ê ōe it-tēng ōe si̍t-hiān hit-ê hū-jîn-lâng chin ū hok-khì!” 46 [Má-lī-a] kóng: Góa ê sim chun Chú chòe tōa; 47 Góa ê sîn in-ūi Siōng-tè --- góa ê Kiù-chú lâi hoaⁿ-hí. 48 In-ūi Chú ū khòaⁿ-kò͘ I pi-bî ê lú-pī. Tùi taⁿ í-āu, bān sè-tāi ê lâng lóng ōe kóng góa ū hok-khì, 49 in-ūi Choân-lêng ê Siōng-tè ūi-tio̍h góa chòe úi-tāi ê tāi-chì; I ê miâ sī sèng. 50 Tùi kèng-ùi I ê lâng, I lîn-bín in kàu sè-sè tāi-tāi. 51 I chhun-chhut koân-lêng ê chhiú, kóaⁿ-sòaⁿ sim kiau-ngō͘ ê lâng. 52 I chiong chiáng-koân-ê tùi pó-chō thoa lo̍h-lâi, pi-bî ê lâng kā in ko-seng. 53 Iau-gō ê lâng, I ēng hó-mi̍h hō͘ in pá-chiok; hó-gia̍h ê lâng, I kóaⁿ in khang-chhiú chhut-khì. 54 I hû-chō͘ I ê po̍k-jîn [Í-sek-lia̍t], kì-tit kā in lîn-bín; 55 chiàu I tùi lán chó͘-sian ê èng-ún, lîn-bín [A-pek-la-hán] kap i ê kiáⁿ-sun kàu éng-oán. 56 [Má-lī-a] kap [I-lī-sa-pek] chòe-hé tòa chha-put-to saⁿ ge̍h-ji̍t, jiân-āu tńg-khì in tau. 57 [I-lī-sa-pek] seng-sán ê ji̍t-kî í-keng kàu, chiū siⁿ chi̍t ê hāu-siⁿ. 58 Chhù-piⁿ kap chhin-chiâⁿ thiaⁿ-kóng Chú ū tōa-tōa lîn-bín i, chiū kap i chòe-hé hoaⁿ-hí. 59 Gín-á chhut-sì tē-poeh ji̍t, in lâi beh kā i kat-lé, koh chiàu in lāu-pē ê miâ kiò i chòe [Sat-ka-lī-a]. 60 Chóng-sī i ê lāu-bú kóng, “M̄-thang! Tio̍h kā i hō-miâ chòe [Iok-hān].” 61 In tùi i kóng, “Lín chhin-chiâⁿ tiong-kan bô-lâng hō chit-ê miâ.” 62 In chiū ēng chhiú pí, mn̄g gín-á ê lāu-pē khòaⁿ beh kā i hō sím-mi̍h miâ. 63 [Sat-ka-lī-a] kā in thó chi̍t tè siá-jī-pán, siá kóng, “I ê miâ sī [Iok-hān].” Tāi-ke lóng tio̍h-kiaⁿ. 64 [Sat-ka-lī-a] sûi-sî khui-chhùi kóng-ōe, chheng-chàn Siōng-tè. 65 Chhù-piⁿ-keh-piah lóng chin tio̍h-kiaⁿ; choân [Iû-thài] ê soaⁿ-tōe lóng teh tâm-lūn chit hāng tāi-chì. 66 Thiaⁿ-tio̍h chit hāng tāi-chì ê lâng siūⁿ-kóng, “Chit-ê eⁿ-á chiong-lâi ōe chiâⁿ-chòe sím-mi̍h khoán lâng?” In-ūi ū Chú ê koân-lêng kap i tông-chāi. 67 [Iok-hān] ê lāu-pē [Sat-ka-lī-a] hō͘ Sèng Sîn chhiong-móa, ū-giân kóng: 68 Tio̍h chheng-chàn Chú [Í-sek-lia̍t] ê Siōng-tè! In-ūi I ū khòaⁿ-kò͘ koh kiù-sio̍k I ê chú-bîn. 69 I tùi I ê po̍k-jîn [Tāi-pi̍t] ê ke, kā lán siat-li̍p chi̍t ūi ū tōa khùi-la̍t ê Chín-kiù-chiá. 70 Chiàu I tī kó͘-chá thong-kè I sèng sian-ti ê chhùi èng-ún kóng: 71 I beh chín-kiù lán thoat-lī lán ê tùi-te̍k, thoat-lī it-chhè oàn-hūn lán ê lâng ê chhiú. 72 I èng-ún beh lîn-bín lán ê chó͘-sian, koh kì-tit I só͘ li̍p sîn-sèng ê iok, 73 chiū-sī I tùi lán ê chó͘ [A-pek-la-hán] só͘ li̍p ê iok. I beh kiù lán thoat-lī tùi-te̍k ê chhiú, hō͘ lán bô kiaⁿ-hiâⁿ, chi̍t-sì-lâng tī I ê bīn-chêng, ēng sèng-kiat kong-gī ho̍k-sāi I. 76 Sòe-kiáⁿ ah, lí ōe hō͘ lâng chheng-ho͘ chòe Chì-koân Siōng-tè ê sian-ti; in-ūi lí ōe chòe Chú ê sian-hong lâi chún-pī I beh kiâⁿ ê lō͘, 77 hō͘ I ê chú-bîn in-ūi chōe tit-tio̍h sià-bián thang bêng-pe̍k Siōng-tè ê chín-kiù. 78 In-ūi lán ê Siōng-tè un-jiû chû-pi, I hō͘ chheng-chá ê ji̍t-thâu tùi thiⁿ-téng chiò lán, 79 chiò lán chiah-ê tiàm tī o͘-àm kap sí-bông ìm-ńg-ē ê lâng, ín-chhōa lán ê kha kiâⁿ-ji̍p hô-pêng ê lō͘. 80 Chit-ê gín-á chiām-chiām tōa-hàn, sim-lêng ji̍t-ji̍t ióng-chòng. I tòa khòng-iá, it-ti̍t kàu i tī [Í-sek-lia̍t]-lâng ê tiong-kan kong-khai chhut-hiān hit ji̍t.

Lō͘-ka 2

1 Hit sî, [Lô-má] hông-tè [A-kó͘-sū-tok] pan-pò͘ bēng-lēng, kiò choân-kok ê jîn-bîn lóng teng-kì hō͘-kháu. 2 Chit-ê thâu-chi̍t-piàn ê hō͘-kháu phó͘-cha sī [Ku-lí-liú] chòe [Sū-lī-a] chóng-tok ê sî si̍t-si ê. 3 Chèng-lâng lóng tńg-khì ka-kī ê kò͘-hiong teng-kì hō͘-kháu. 4 [Iok-sek] mā tùi [Ka-lī-lī] ê [Ná-sat-le̍k] khì [Iû-thài] ê [Pek-lī-hêng], chiū-sī [Tāi-pi̍t] chhut-sì ê siâⁿ, in-ūi i sio̍k [Tāi-pi̍t] ê ke, sī [Tāi-pi̍t] ê sè-hē. 5 [Iok-sek] kap i ê bī-hun-chhe [Má-lī-a] chòe-hé khì teng-kì. Hit sî, [Má-lī-a] í-keng hoâi-īn. 6 In tī hia ê sî, [Má-lī-a] seng-sán ê sî kàu, 7 chiū siⁿ thâu-chiūⁿ-kiáⁿ; i ēng pò͘ kā I pau, hō͘ I khùn tī chô-ni̍h, in-ūi kheh-koán bô só͘-chāi thang hō͘ in tòa. 8 Hit tōe-khu ū chi̍t-kóa kò͘-iûⁿ ê lâng tī iá-gōa, mî-sî lûn-liû teh kò͘ in ê iûⁿ-kûn. 9 Chú ê chi̍t ê thiⁿ-sài tùi in chhut-hiān; Chú ê êng-kng sì-bīn kā in chiò, in chiū hui-siông kiaⁿ-hiâⁿ. 10 Thiⁿ-sài kā in kóng, “M̄-bián kiaⁿ! Góa kā lín pò chi̍t ê beh hō͘ bān-bîn tōa hoaⁿ-hí ê hó siau-sit. 11 Kin-á-ji̍t, tī [Tāi-pi̍t] ê siâⁿ ū chi̍t ūi Kiù-chú ūi-tio̍h lín chhut-sì, chiū-sī Chú Ki-tok. 12 Lín ōe khòaⁿ-tio̍h chi̍t ê eⁿ-á ēng pò͘ pau-teh tó tī chô-ni̍h; che hō͘ lín chòe kì-hō.” 13 Hut-jiân ū chi̍t tōa-tīn thian-kun kap hit-ê thiⁿ-sài chòe-hé siōng-chàn Siōng-tè kóng: 14 Goān êng-kng kui tī chì-koân ê Siōng-tè; goān I sù hô-pêng hō͘ tōe-chiūⁿ I só͘ ì-ài ê lâng. 15 Chiah-ê thiⁿ-sài lī-khui in chiūⁿ-thiⁿ ê sî, kò͘-iûⁿ-ê lóng kóng, “Lán lâi-khì [Pek-lī-hêng], khòaⁿ Chú pò lán chai chit-ê só͘ hoat-seng ê tāi-chì.” 16 In chiū kóaⁿ-kín khì, chhē-tio̍h [Má-lī-a] kap [Iok-sek], í-ki̍p tó tī chô-ni̍h ê eⁿ-á. 17 In khòaⁿ liáu, chiū chiong thiⁿ-sài tùi in kóng chit-ê eⁿ-á ê tāi-chì pò lâng chai. 18 Thiaⁿ-tio̍h kò͘-iûⁿ-ê só͘ kóng chiah-ê ōe ê lâng lóng kám-kak chin kî-koài. 19 Put-kò [Má-lī-a] chiong chiah-ê tāi-chì lóng khǹg tī sim-lāi, put-sî teh siūⁿ. 20 Kò͘-iûⁿ-ê tńg-khì, in-ūi só͘ thiaⁿ-kìⁿ só͘ khòaⁿ-tio̍h it-chhè ê tāi-chì lóng kap thiⁿ-sài tùi in kóng ê oân-choân kâng-khoán, chiū chiong êng-kng chheng-chàn kui hō͘ Siōng-tè. 21 Chhut-sì tē-poeh ji̍t, kā eⁿ-á kat-lé ê ji̍t kàu, in chiū kā I hō-miâ kiò-chòe Iâ-so͘; chit-ê miâ sī [Má-lī-a] iáu-bē hoâi-īn ê sî thiⁿ-sài kā I hō ê. 22 Chiàu [Mô͘-se] ê Lu̍t-hoat, kiat-chēng-lé ê ji̍t kè liáu, [Iok-sek] kap [Má-lī-a] phō eⁿ-á khì [Iâ-lō͘-sat-léng] beh chiong I hiàn hō͘ Chú. 23 Chiàu Chú ê Lu̍t-hoat kì-chài, “Thâu-chi̍t-the ê ta-po͘-kiáⁿ lóng tio̍h sèng-pia̍t kui hō͘ Chú.” 24 Koh chiàu Chú ê Lu̍t-hoat kui-tēng tio̍h hiàn “chi̍t tùi pan-kah, á-sī nn̄g chiah hún-chiáu-á kiáⁿ” chòe seng-lé. 25 Hit sî, tī [Iâ-lō͘-sat-léng] ū chi̍t ê lâng miâ kiò-chòe [Se-biān]. Chit-ê lâng gī koh kèng-khiân, it-ti̍t teh kî-thāi [Í-sek-lia̍t] ê ho̍k-heng. Sèng Sîn ū kap i tông-chāi. 26 I tit-tio̍h Sèng Sîn ê khé-sī, chai-iáⁿ i sí í-chêng it-tēng ōe khòaⁿ-tio̍h Chú só͘ èng-ún ê Ki-tok. 27 I hō͘ Sèng Sîn kám-tōng ji̍p-khì Sèng-tiān. Tú hit sî, Iâ-so͘ ê pē-bú phō eⁿ-á Iâ-so͘ ji̍p-lâi, beh chiàu Lu̍t-hoat ê koàn-lē kā i kú-hêng gî-sek. 28 [Se-biān] ēng siang chhiú phō eⁿ-á, chheng-chàn Siōng-tè kóng: 29 Chú ah, taⁿ chiàu lí ê ōe, hō͘ lí ê lô͘-po̍k pêng-pêng an-an lī-khui sè-kan; 30 in-ūi góa í-keng ū chhin-ba̍k khòaⁿ-tio̍h lí ê chín-kiù, 31 chiū-sī lí tī bān-bîn bīn-chêng só͘ chún-pī ê. 32 I chòe khé-sī Gōa-pang-lâng ê kng, chòe lí ê chú-bîn [Í-sek-lia̍t] ê êng-kng. 33 Iâ-so͘ ê pē-bú thiaⁿ-tio̍h [Se-biān] kóng-khí koan-hē eⁿ-á ê sū, chin tio̍h-kiaⁿ. 34 [Se-biān] kā in chiok-hok, koh tùi eⁿ-á ê lāu-bú [Má-lī-a] kóng, “Chit-ê eⁿ-á siū soán-li̍p sī beh hō͘ [Í-sek-lia̍t] tiong chin chōe lâng poa̍h-tó, chin chōe lâng peh khí-lâi, koh chiâⁿ-chòe siū kong-kek ê kì-hō, 35 hō͘ chin chōe lâng sim-lāi ê ì-liām lō͘-hiān; lí pún-sin ê sim mā ōe hō͘ lāi-kiàm chha̍k thàu-kè.” 36 Koh ū chi̍t ê lú sian-ti [A-ná], sī [A-siat] chi-cho̍k ê [Hoat-lōe-le̍k] ê cha-bó͘-kiáⁿ. I í-keng chin lāu. I kiat-hun liáu kap tiōng-hu seng-oa̍h chhit nî, 37 hiān-chāi í-keng poeh-cha̍p-sì hè. I lóng bô lī-khui Sèng-tiān, mî-ji̍t ho̍k-sāi Siōng-tè, kìm-chia̍h kî-tó. 38 Tú hit sî, i mā lâi kám-siā Siōng-tè, tùi só͘-ū teh kî-thāi Siōng-tè kiù-sio̍k [Iâ-lō͘-sat-léng] ê lâng kóng-khí chit-ê eⁿ-á ê sū. 39 [Iok-sek] kap [Má-lī-a] chiàu Chú ê Lu̍t-hoat oân-sêng it-chhè ê kui-tēng chiū tńg-khì [Ka-lī-lī], kàu in ê kò͘-hiong [Ná-sat-le̍k]. 40 Chit-ê gín-á chiām-chiām tōa-hàn, ji̍t-ji̍t ióng-chòng, chhiong-móa tì-hūi; Siōng-tè ê un-hūi kap I tông-chāi. 41 Iâ-so͘ ê pē-bú ta̍k nî lóng ū khì [Iâ-lō͘-sat-léng] siú Pôaⁿ-kè-choeh. 42 Iâ-so͘ cha̍p-jī hè ê sî, in mā chiàu koàn-lē chiūⁿ-khì. 43 Choeh-kî soah, in chhut-hoat beh tńg-khì, gín-á Iâ-so͘ lâu tī [Iâ-lō͘-sat-léng]. I ê pē-bú lóng m̄-chai, 44 siūⁿ-chòe I sī tī chòe-hé kiâⁿ hit tīn lâng ê tiong-kan. In kiâⁿ chi̍t ji̍t ê lō͘-thêng liáu-āu chiah khai-sí tī chhin-chiâⁿ kap se̍k-sāi-lâng ê tiong-kan teh chhē. 45 In chhē bô, chiū tò tńg-khì [Iâ-lō͘-sat-léng] chhē, 46 saⁿ ji̍t āu chiah tī Sèng-tiān khòaⁿ-tio̍h I chē tī kàu-su ê tiong-kan, iā teh thiaⁿ iā teh mn̄g. 47 Só͘-ū thiaⁿ-tio̍h I kóng-ōe ê lâng lóng in-ūi I chhong-bêng ê ìn-tap kám-kak tio̍h-kiaⁿ kî-koài. 48 I ê pē-bú khòaⁿ-tio̍h I, hui-siông tio̍h-kiaⁿ. I ê lāu-bú tùi I kóng, “Kiáⁿ ah, lí ná thang án-ni tùi-thāi goán? Lí khòaⁿ leh, lí ê lāu-pē kap góa chin hoân-ló it-ti̍t teh chhē lí!” 49 Iâ-so͘ ìn kóng, “Lín ná-tio̍h chhē góa? Kiám m̄-chai góa it-tēng tio̍h tī góa ê Pē ê chhù?” 50 Put-kò in bōe liáu-kái I tùi in kóng ê ōe. 51 Āu-lâi Iâ-so͘ kap in chòe-hé tńg-khì [Ná-sat-le̍k], sū-sū sūn-thàn in. I ê lāu-bú chiong chiah-ê tāi-chì lóng khǹg tī sim-lāi. 52 Iâ-so͘ ê tì-hūi kap nî-hè ná ke-thiⁿ; Siōng-tè kap lâng mā ná thiàⁿ I.

Lō͘-ka 3

1 [Lô-má] hông-tè [Thê-pí-liû] thóng-tī tē-cha̍p-gō͘ nî, [Pâng-siu] [Pí-lia̍p-to] choh [Iû-thài] chóng-tok, [Hi-lu̍t] choh [Ka-lī-lī] hun-hong ê ông, i ê sió-tī [Hui-le̍k] choh [Í-thó͘-lī-a] kap [Tek-lia̍p-khó-nî] tōe-hng hun-hong ê ông, [Lū-sat-liap] choh [A-pí-lī-nî] hun-hong ê ông, 2 [A-ná] kap [Kai-a-hoat] choh tōa-chè-si ê sî, Siōng-tè ê ōe lîm-kàu [Sat-ka-lī-a] ê kiáⁿ [Iok-hān], hit sî i tī khòng-iá. 3 [Iok-hān] chiū khì [Iok-tàn-hô] it-tài ta̍k só͘-chāi soan-iông kóng, “Tio̍h hóe-kái, niá-siū sóe-lé, Siōng-tè chiū sià-bián lín ê chōe!” 4 Chiàu sian-ti [Í-sài-a] ê chheh kì-chài: Ū siaⁿ tī khòng-iá teh hoah: Tio̍h kā Chú chún-pī tō-lō͘, ūi-tio̍h I siu-ti̍t sió-lō͘. 5 It-chhè ê soaⁿ-kok tio̍h thūn hō͘ tīⁿ; só͘-ū tōa-soaⁿ sió-soaⁿ tio̍h siah hō͘ kē; oan-khiau ê lō͘ tio̍h kái hō͘ ti̍t; khâm-khia̍t ê lō͘ tio̍h siu hō͘ pîⁿ! 6 Bān-bîn lóng ōe khòaⁿ-kìⁿ Siōng-tè ê chín-kiù. 7 [Iok-hān] kā lâi beh niá-siū sóe-lé hiah-ê kûn-chiòng kóng, “Lín chiah-ê to̍k-chôa, sím-mi̍h lâng kéng-kò lín siám-pī Siōng-tè teh-beh hoat ê siū-khì? 8 Tio̍h ēng hêng-ûi chèng-bêng lín ū hóe-kái! Lín m̄-thang ka-kī siūⁿ kóng ‘[A-pek-la-hán] sī goán ê chó͘-sian’, góa kā lín kóng, Siōng-tè ōe-tàng ēng chiah-ê chio̍h-thâu chō kiáⁿ-sun hō͘ [A-pek-la-hán]. 9 Pó͘-thâu í-keng khòa tī chhiū-thâu; só͘-ū bô kiat hó ké-chí ê chhiū lóng beh kā chhò khí-lâi, hiat-lo̍h hé.” 10 Chèng-lâng mn̄g [Iok-hān], “Án-ni, goán tio̍h chòe sím-mi̍h?” 11 I ìn kóng, “Ū nn̄g niá saⁿ-ê, tio̍h pun hō͘ bô-ê; ū chia̍h-mi̍h-ê, mā tio̍h án-ni chòe.” 12 Ū chi̍t-kóa bau̍h-sè-ê mā lâi beh niá-siū sóe-lé. In mn̄g [Iok-hān], “Lāu-su, goán tio̍h chòe sím-mi̍h?” 13 I kā in kóng, “Kui-tēng ê sè-kim í-gōa m̄-thang ke siu.” 14 Ū chi̍t-kóa kun-jîn mā mn̄g i, “Goán tio̍h chòe sím-mi̍h?” I kā in kóng, “M̄-thang kā lâng khióng-hat the̍h-chîⁿ; mā m̄-thang kā lâng khà-iû; só͘ niá ê sin-súi tio̍h boán-chiok.” 15 Bîn-chiòng teh kî-thāi, tāi-ke sim-lāi siūⁿ-kóng [Iok-hān] kiám-chhái sī Ki-tok ê sî, 16 [Iok-hān] tùi tāi-ke kóng, “Góa ēng chúi kā lín sóe-lé; m̄-kú ū chi̍t ūi pí góa khah ū koân-lêng ê teh-beh lâi, góa liân kā I tháu ôe-tòa to bōe kham-tit. I beh ēng Sèng Sîn kap hé kā lín sóe-lé. 17 I ê chhiú the̍h pòa-ki beh chiong be̍h-tiâⁿ pòa chheng-khì, be̍h-á siu-ji̍p chhng-khò͘, be̍h-hiūⁿ chiū ēng bōe hoa ê hé kā i sio-tiāu.” 18 [Iok-hān] tùi bîn-chiòng thoân hok-im, ēng chin chōe bô kâng-khoán ê kóng-hoat kā in khoàn-bián. 19 Put-kò [Iok-hān] chek-pī hun-hong ê ông [Hi-lu̍t], in-ūi i ū chhōa tē-hū [Hi-lô-tí] chòe bó͘, koh in-ūi i ū chòe chin chōe pháiⁿ tāi-chì. 20 Chiah-ê í-gōa, i ū chòe chi̍t hāng koh-khah pháiⁿ ê tāi-chì, chiū-sī kā [Iok-hān] koaiⁿ-lo̍h kaⁿ. 21 Bîn-chiòng lóng niá-siū sóe-lé liáu-āu, Iâ-so͘ mā lâi niá-siū sóe-lé. I teh kî-tó ê sî, thiⁿ khui, 22 Sèng Sîn kàng-lo̍h tī I téng-bīn, hêng-chōng chhin-chhiūⁿ hún-chiáu; koh tùi thiⁿ ū siaⁿ kóng: Lí sī góa só͘ thiàⁿ ê Kiáⁿ, lí, góa chin ì-ài. 23 Iâ-so͘ khai-sí thoân-tō ê sî, iok saⁿ-cha̍p hè. Chèng-lâng khòaⁿ I chòe [Iok-sek] ê kiáⁿ, [Iok-sek] sī [Hi-lí] ê kiáⁿ, 24 [Hi-lí] sī [Má-thah] ê kiáⁿ, [Má-thah] sī [Lī-bī] ê kiáⁿ, [Lī-bī] sī [Be̍k-ki] ê kiáⁿ, [Be̍k-ki] sī [Ngá-ná] ê kiáⁿ, [Ngá-ná] sī [Iok-sek] ê kiáⁿ, 25 [Iok-sek] sī [Má-tha-thê-a] ê kiáⁿ, [Má-tha-thê-a] sī [A-mô͘-su] ê kiáⁿ, [A-mô͘-su] sī [Ná-hông] ê kiáⁿ, [Ná-hông] sī [Í-su-lī] ê kiáⁿ, [Í-su-lī] sī [Ná-kai] ê kiáⁿ, 26 [Ná-kai] sī [Má-ap] ê kiáⁿ, [Má-ap] sī [Má-tha-thê-a] ê kiáⁿ, [Má-tha-thê-a] sī [Se-bí] ê kiáⁿ, [Se-bí] sī [Iok-sek-khek] ê kiáⁿ, [Iok-sek-khek] sī [Iok-tāi] ê kiáⁿ, 27 [Iok-tāi] sī [Iok-a-ná] ê kiáⁿ, [Iok-a-ná] sī [Lī-sat] ê kiáⁿ, [Lī-sat] sī [Só͘-lô-pa-pek] ê kiáⁿ, [Só͘-lô-pa-pek] sī [Sat-lia̍p-thiat] ê kiáⁿ, [Sat-lia̍p-thiat] sī [Nî-lī] ê kiáⁿ, 28 [Nî-lī] sī [Be̍k-ki] ê kiáⁿ, [Be̍k-ki] sī [A-tí] ê kiáⁿ, [A-tí] sī [Ko-song] ê kiáⁿ, [Ko-song] sī [Í-mô͘-tông] ê kiáⁿ, [Í-mô͘-tông] sī [Ní] ê kiáⁿ, 29 [Ní] sī [Iok-sè] ê kiáⁿ, [Iok-sè] sī [Í-lī-í-siā] ê kiáⁿ, [Í-lī-í-siā] sī [Iok-lēng] ê kiáⁿ, [Iok-lēng] sī [Má-thah] ê kiáⁿ, [Má-thah] sī [Lī-bī] ê kiáⁿ, 30 [Lī-bī] sī [Se-biān] ê kiáⁿ, [Se-biān] sī [Iû-tāi] ê kiáⁿ, [Iû-tāi] sī [Iok-sek] ê kiáⁿ, [Iok-sek] sī [Iok-lâm] ê kiáⁿ, [Iok-lâm] sī [Í-lī-a-kèng] ê kiáⁿ, 31 [Í-lī-a-kèng] sī [Bí-lī-a] ê kiáⁿ, [Bí-lī-a] sī [Mái-lâm] ê kiáⁿ, [Mái-lâm] sī [Má-ta̍t-tha] ê kiáⁿ, [Má-ta̍t-tha] sī [Ná-tan] ê kiáⁿ, [Ná-tan] sī [Tāi-pi̍t] ê kiáⁿ, 32 [Tāi-pi̍t] sī [Iâ-se] ê kiáⁿ, [Iâ-se] sī [O-pī-tek] ê kiáⁿ, [O-pī-tek] sī [Pho-a-su] ê kiáⁿ, [Pho-a-su] sī [Sat-la] ê kiáⁿ, [Sat-la] sī [Ná-sūn] ê kiáⁿ, 33 [Ná-sūn] sī [A-bí-ná-ta̍t] ê kiáⁿ, [A-bí-ná-ta̍t] sī [A-bîn] ê kiáⁿ, [A-bîn] sī [A-nî] ê kiáⁿ, [A-nî] sī [Hi-su-lûn] ê kiáⁿ, [Hi-su-lûn] sī [Hoat-le̍k-su] ê kiáⁿ, [Hoat-le̍k-su] sī [Iû-tāi] ê kiáⁿ, 34 [Iû-tāi] sī [Ngá-kok] ê kiáⁿ, [Ngá-kok] sī [Í-sat] ê kiáⁿ, [Í-sat] sī [A-pek-la-hán] ê kiáⁿ, [A-pek-la-hán] sī [Tha-la] ê kiáⁿ, [Tha-la] sī [Ná-ho̍k] ê kiáⁿ, 35 [Ná-ho̍k] sī [Se-lo̍k] ê kiáⁿ, [Se-lo̍k] sī [La-gô͘] ê kiáⁿ, [La-gô͘] sī [Hoat-le̍k] ê kiáⁿ, [Hoat-le̍k] sī [Hi-pek] ê kiáⁿ, [Hi-pek] sī [Sa-la] ê kiáⁿ, 36 [Sa-la] sī [Kai-lâm] ê kiáⁿ, [Kai-lâm] sī [A-hoat-sat] ê kiáⁿ, [A-hoat-sat] sī [Siám] ê kiáⁿ, [Siám] sī [Ná-a] ê kiáⁿ, [Ná-a] sī [La-be̍k] ê kiáⁿ, 37 [La-be̍k] sī [Má-thó͘-sat-la̍h] ê kiáⁿ, [Má-thó͘-sat-la̍h] sī [Í-lo̍k] ê kiáⁿ, [Í-lo̍k] sī [Ngá-lia̍t] ê kiáⁿ, [Ngá-lia̍t] sī [Má-le̍k-lia̍t] ê kiáⁿ, [Má-le̍k-lia̍t] sī [Kai-lâm] ê kiáⁿ, 38 [Kai-lâm] sī [Í-ná-sū] ê kiáⁿ, [Í-ná-sū] sī [Sài-te̍k] ê kiáⁿ, [Sài-te̍k] sī [A-tong] ê kiáⁿ, [A-tong] sī Siōng-tè ê kiáⁿ.

Lō͘-ka 4

1 Iâ-so͘ siū Sèng Sîn chhiong-móa, tùi [Iok-tàn-hô] tńg-lâi. I hō͘ Sèng Sîn chhōa-khì khòng-iá, 2 tī hia sì-cha̍p ji̍t kú siū Mô͘-kúi chhì-thàm. Hit-ê kî-kan I lóng bô chia̍h sím-mi̍h, hiah-ê ji̍t-chí kè liáu, pak-tó͘ chiū iau. 3 Mô͘-kúi tùi I kóng, “Kì-jiân lí sī Siōng-tè ê Kiáⁿ, tio̍h bēng-lēng chit tè chio̍h-thâu pìⁿ-chòe piáⁿ.” 4 Iâ-so͘ ìn kóng, “Sèng-keng ū kì-chài: ‘Lâng teh oa̍h m̄-nā óa-khò piáⁿ.’ ” 5 Jiân-āu Mô͘-kúi chhōa Iâ-so͘ kàu koân ê só͘-chāi, chi̍t-ba̍k-nih-kú chiong thiⁿ-ē bān-kok hō͘ I khòaⁿ, 6 kā I kóng, “Chiah-ê it-chhè ê koân-sè kap êng-hôa, góa lóng beh hō͘ lí; in-ūi chiah-ê it-chhè í-keng lóng kau hō͘ góa, góa beh hō͘ sím-mi̍h lâng chiū hō͘ hit-ê lâng. 7 Só͘-í, lí nā kūi lo̍h-lâi pài góa, chiah-ê it-chhè lóng-chóng sī lí ê.” 8 Iâ-so͘ ìn kóng, “Sèng-keng ū kì-chài: Tio̍h pài Chú --- lí ê Siōng-tè, chí-ū ho̍k-sāi I.” 9 Mô͘-kúi koh chhōa Iâ-so͘ khì [Iâ-lō͘-sat-léng], hō͘ I khiā tī Sèng-tiān siōng-koân ê só͘-chāi, kā I kóng, “Kì-jiân lí sī Siōng-tè ê Kiáⁿ, tùi chia thiàu lo̍h-khì, 10 in-ūi Sèng-keng ū kì-chài: ‘Siōng-tè ōe ūi-tio̍h lí bēng-lēng I ê thiⁿ-sài lâi pó-hō͘ lí’; 11 koh kóng: In ōe ēng chhiú kā lí hû-teh, hō͘ lí ê kha bōe kha̍p-tio̍h chio̍h-thâu.” 12 Iâ-so͘ ìn kóng, “Sèng-keng ū kì-chài: ‘M̄-thang chhì-thàm Chú --- lí ê Siōng-tè.’ ” 13 Só͘-ū ê chhì-thàm lóng ēng liáu, Mô͘-kúi chiū lī-khui Iâ-so͘, thèng-hāu āu-piàn ê ki-hōe. 14 Iâ-so͘ siū Sèng Sîn ê koân-lêng chhiong-móa, tńg-khì [Ka-lī-lī]. I ê miâ-siaⁿ thoân kàu sì-ûi ta̍k tōe-khu. 15 I tī ta̍k ê hōe-tn̂g kà-sī lâng, siū chèng-lâng chun-kèng. 16 Iâ-so͘ tò-khì I tióng-tōa ê só͘-chāi [Ná-sat-le̍k], chiàu si̍p-koàn tī An-hioh-ji̍t ji̍p-khì hōe-tn̂g. I khiā khí-lâi beh tha̍k Sèng-keng. 17 Ū lâng the̍h chi̍t kńg sian-ti [Í-sài-a] ê chheh hō͘ I, I chiū thí-khui, chhē-tio̍h chi̍t só͘-chāi ū kì-chài: 18 Chú ê Sîn lîm-kàu góa, in-ūi I ēng iû boah góa, hō͘ góa thoân hó siau-sit hō͘ sàn-chhiah-lâng. I chhe-phài góa soan-pò͘: Siū-lia̍h-ê tit-tio̍h tháu-pàng, bô khòaⁿ-kìⁿ-ê koh khòaⁿ-kìⁿ, siū-ap-pek-ê tit-tio̍h chū-iû, 19 soan-pò͘ Chú Un-hūi ê Nî. 20 Iâ-so͘ kā chheh kńg-khí-lâi, hêng hō͘ hōe-tn̂g ê chō͘-lí, chiū chē lo̍h-khì. Hōe-tn̂g lāi ê chèng-lâng lóng chù-ba̍k kā I khòaⁿ. 21 I chiū kā in kóng, “Chit tōaⁿ Sèng-keng, kin-á-ji̍t lín teh thiaⁿ ê sî í-keng si̍t-hiān lah.” 22 Tāi-ke lóng chheng-chàn Iâ-so͘, tùi I só͘ kóng jîn-chû ê ōe kám-kak kî-koài, kóng, “Chit-ê lâng kiám m̄-sī [Iok-sek] ê kiáⁿ?” 23 Iâ-so͘ tùi in kóng, “Lín it-tēng ōe ín-iōng ‘I-seng ah, tio̍h i-tī lí ka-kī’ chit kù sio̍k-gú lâi tùi góa kóng, ‘Goán ū thiaⁿ-tio̍h lí tī [Ka-pek-lông] chòe chin chōe tāi-chì, taⁿ mā tio̍h tī lí ê kò͘-hiong chòe.’ ” 24 Iâ-so͘ koh kóng, “Góa si̍t-chāi kā lín kóng, sian-ti bô chi̍t ê tī ka-kī ê kò͘-hiong siū hoan-gêng. 25 Góa kā lín kóng si̍t-ōe, tī [Í-lī-a] ê sî-tāi ū khòng-hān saⁿ nî pòaⁿ kú, ta̍k só͘-chāi ū tōa ki-hng, hit sî [Í-sek-lia̍t] tiong ū chin chōe kóaⁿ-hū; 26 [Í-lī-a] pèng bô siū chhe khì in hia, chí-ū khì [Se-tùn] [Sat-le̍k-hoat] chi̍t ê kóaⁿ-hū hia. 27 Sian-ti [Í-lī-sa] ê sî, [Í-sek-lia̍t] tiong ū chin chōe bâ-hong pīⁿ-lâng, tû-khí [Sū-lī-a]-lâng [Nái-bān] í-gōa, bô chi̍t ê tit-tio̍h chheng-khì.” 28 Hōe-tn̂g lāi só͘-ū ê lâng chi̍t-ē thiaⁿ-tio̍h chiah-ê ōe chin siū-khì. 29 In khiā khí-lâi, kā Iâ-so͘ kóaⁿ-chhut siâⁿ-gōa, khiú kàu soaⁿ-khàm, beh kā I chhia lo̍h-khì; in ê siâⁿ sī khí tī soaⁿ-téng. 30 Iâ-so͘ khiok tùi in tiong-kan kiâⁿ-kè, chòe I khì. 31 Iâ-so͘ lo̍h-khì [Ka-lī-lī] ê [Ka-pek-lông]-siâⁿ, ta̍k ê An-hioh-ji̍t lóng ū teh kà-sī lâng. 32 In tùi I ê kà-sī kám-kak hui-siông hi-kî, in-ūi I ê ōe ū koân-ui. 33 Hōe-tn̂g lāi ū chi̍t ê hō͘ bô chheng-khì ê kúi-sîn hū-sin ê lâng, i tōa-siaⁿ hoah, 34 “[Ná-sat-le̍k]-lâng Iâ-so͘, lí mài chhap goán! Lí lâi beh húi-bia̍t goán sī-bô? Góa chai lí sī sím-mi̍h lâng; lí sī Siōng-tè ê Sèng-chiá.” 35 Iâ-so͘ kā i chek-pī kóng, “Tiām-tiām! Tùi chit-ê lâng chhut-khì!” Kúi tī chèng-lâng ê bīn-chêng kā i siak-tó, chiū tùi i chhut-khì, lóng bô kā i siong-hāi-tio̍h. 36 Chèng-lâng chin tio̍h-kiaⁿ, kóng-lâi kóng-khì, “I ê ōe ná hiah lī-hāi? I ēng koân-ui kap lêng-le̍k bēng-lēng bô chheng-khì ê siâ-sîn, in chiū chhut-khì.” 37 Iâ-so͘ ê miâ-siaⁿ chiū thoân kàu sì-ûi ta̍k só͘-chāi. 38 Iâ-so͘ lī-khui hōe-tn̂g, ji̍p-khì [Se-bûn] in tau. [Se-bûn] ê tiūⁿ-ḿ phòa-pīⁿ, hoat-jia̍t chin sio, ū lâng kā Iâ-so͘ kóng chit-ê tāi-chì. 39 Iâ-so͘ khiā óa-khì i ê piⁿ-a, chek-pī jia̍t-pīⁿ, jia̍t chiū thòe; hū-jîn-lâng sûi-sî khí-lâi kā in sū-hāu. 40 Ji̍t-lo̍h ê sî, chèng-lâng chiong ū ta̍k chióng pīⁿ ê lâng lóng chhōa lâi chhē Iâ-so͘. Iâ-so͘ chi̍t-ê chi̍t-ê kā in hōaⁿ-chhiú, lóng kā in i-hó. 41 Mā ū kúi tùi chin chōe lâng ê seng-khu chhut-lâi, hoah kóng, “Lí sī Siōng-tè ê Kiáⁿ!” Iâ-so͘ kā in chek-pī, m̄-chún in kóng, in-ūi in chai Iâ-so͘ sī Ki-tok. 42 Thiⁿ chi̍t-ē kng, Iâ-so͘ chiū chhut siâⁿ khì phian-phiah bô-lâng tòa ê só͘-chāi. Kui-tīn lâng teh chhē I, chhē-tio̍h chiū kā I lâu-teh, bô ài I lī-khui. 43 M̄-kú Iâ-so͘ kā in kóng, “Góa mā tio̍h khì pa̍t ê siâⁿ-chhī thoân Siōng-tè-kok ê hok-im; che sī Siōng-tè chhe-phài góa lâi ê bo̍k-te̍k.” 44 I chiū kè-sio̍k tī [Iû-thài] ta̍k ê hōe-tn̂g thoân-tō.

Lō͘-ka 5

1 Ū chi̍t piàn, Iâ-so͘ khiā tī [Kek-nî-sat-le̍k] ô͘-piⁿ, ū chi̍t tīn lâng khoeh óa-khì beh thiaⁿ Siōng-tè ê ōe. 2 I khòaⁿ-tio̍h nn̄g chiah chûn thêng tī ô͘-piⁿ, lia̍h-hî-ê lī-khui chûn teh sóe-bāng. 3 Kî-tiong chi̍t chiah sī [Se-bûn] ê; Iâ-so͘ chiūⁿ hit chiah chûn, kiò i kò sió-khóa lī-khui hōaⁿ, jiân-āu chē lo̍h-khì, tùi chûn-téng kà-sī chèng-lâng. 4 Iâ-so͘ kóng soah, tùi [Se-bûn] kóng, “Kā chûn kò khì khah chhim ê só͘-chāi, pha-bāng lo̍h-khì lia̍h-hî.” 5 [Se-bûn] ìn kóng, “Lāu-su, goán piàⁿ kui-mî lia̍h lóng bô, m̄-kú lí to teh kóng à, góa chiū lâi lo̍h-bāng.” 6 In chi̍t-ē pàng lo̍h-khì, bāng-tio̍h chin chōe hî, bāng soah giōng-beh phòa-khì. 7 In ia̍t-chhiú kiò pa̍t chiah chûn ê tâng-phōaⁿ lâi tàu-kha-chhiú. In chiū lâi, chiong hî tóe tī nn̄g chiah chûn, tóe kàu móa-móa soah giōng-beh tîm lo̍h-khì. 8 [Se-bûn] [Pí-tek] chi̍t-ē khòaⁿ-tio̍h, chiū kūi lo̍h-khì Iâ-so͘ ê kha-chêng, kóng, “Chú ah, chhiáⁿ lī-khui góa! Góa sī chi̍t ê ū-chōe ê lâng.” 9 [Se-bûn] kap i ê tâng-phōaⁿ in-ūi lia̍h-tio̍h hiah-chōe hî chin tio̍h-kiaⁿ. 10 [Se-bûn] ê tâng-phōaⁿ [Se-pí-thài] ê kiáⁿ [Ngá-kok] kap [Iok-hān] mā chin tio̍h-kiaⁿ. Iâ-so͘ kā [Se-bûn] kóng, “M̄-bián kiaⁿ, tùi taⁿ í-āu, lí ōe tit-tio̍h lâng.” 11 In thoa chûn óa hōaⁿ liáu-āu, chiong it-chhè pàng-leh, khì tè Iâ-so͘. 12 Ū chi̍t piàn Iâ-so͘ tī chi̍t ê siâⁿ, tī hia ū chi̍t ê lâng kui seng-khu jiám-tio̍h bâ-hong. I khòaⁿ-tio̍h Iâ-so͘ chiū phak lo̍h-khì kî-kiû kóng, “Chú ah, lí nā khéng, ōe-tàng hō͘ góa chheng-khì.” 13 Iâ-so͘ chhun-chhiú kā i bong, kóng, “Góa khéng, hō͘ lí chheng-khì!” I ê bâ-hong sûi-sî bô-khì. 14 Iâ-so͘ bēng-lēng i, kóng, “M̄-thang kā lâng kóng; tio̍h khì hō͘ chè-si giām, koh chiàu [Mô͘-se] ê kui-tēng, ūi-tio̍h lí ū tit-tio̍h chheng-khì hiàn chè-mi̍h, thang tùi chèng-lâng chèng-bêng.” 15 Iâ-so͘ ê miâ-siaⁿ ná thoân ná khoah; kui tōa-tīn lâng chū-chi̍p lâi beh thiaⁿ tō-lí, koh kiû I hō͘ in ê pīⁿ tit-tio̍h i-hó. 16 M̄-kú Iâ-so͘ thòe-khì phian-phiah ê só͘-chāi kî-tó. 17 Ū chi̍t ji̍t, Iâ-so͘ teh kà-sī lâng ê sî, ū [Hoat-lī-sài]-phài ê lâng kap Lu̍t-hoat-kàu-su tī hia teh chē. In sī tùi [Ka-lī-lī] kap [Iû-thài] ta̍k hiuⁿ-siā, í-ki̍p [Iâ-lō͘-sat-léng] lâi ê. Chú ê koân-lêng kap Iâ-so͘ tông-chāi, hō͘ I ōe-tàng i-hó pīⁿ-lâng. 18 Hit sî, ū lâng ēng chhn̂g kng chi̍t ê poàn-sin-put-sūi ê lâng lâi, siūⁿ-beh kng ji̍p-khì hē tī Iâ-so͘ ê bīn-chêng; 19 m̄-kú in-ūi lâng chin chōe, chhē bô lō͘ thang kng ji̍p-khì, chiū peh-khì chhù-téng, thiah chhù-hiā, chiong hit-ê poàn-sin-put-sūi-ê liân chhn̂g lūi lo̍h-khì chèng-lâng ê tiong-kan, hē tī Iâ-so͘ ê bīn-chêng. 20 Iâ-so͘ khòaⁿ-kìⁿ in ê sìn-sim, chiū kóng, “Pêng-iú à, lí ê chōe sià-bián lah.” 21 Hiah-ê keng-ha̍k-kàu-su kap [Hoat-lī-sài]-phài ê lâng gī-lūn kóng, “Chit-ê teh siat-to̍k Siōng-tè ê sī siáⁿ-lâng? Siōng-tè í-gōa, sím-mi̍h lâng ōe-tàng sià-chōe.” 22 Iâ-so͘ chai-iáⁿ in teh chit-būn sím-mi̍h, chiū tùi in kóng, “Sī án-chóaⁿ lín sim-lāi teh chit-būn? 23 Kóng ‘Lí ê chōe sià-bián lah’, á-sī kóng ‘Khí-lâi kiâⁿ’, tó chi̍t hāng khah kán-tan? 24 Put-kò góa beh hō͘ lín chai Jîn-chú tī tōe-chiūⁿ ū sià-chōe ê koân-pèng.” Iâ-so͘ tùi hit-ê poàn-sin-put-sūi ê lâng kóng, “Góa kā lí kóng, khí-lâi, giâ lí ê chhn̂g, tńg-khì lín tau!” 25 Hit-ê lâng sûi-sî tī chèng-lâng ê bīn-chêng peh khí-lâi, giâ i só͘ tó ê chhn̂g tńg-khì in tau, ná kiâⁿ ná kui êng-kng hō͘ Siōng-tè. 26 Chèng-lâng lóng chin tio̍h-kiaⁿ, kui êng-kng hō͘ Siōng-tè, sim-lāi chhiong-móa kèng-ùi kóng, “Goán kin-á-ji̍t ū khòaⁿ-tio̍h kî-biāu ê tāi-chì!” 27 Chiah-ê tāi-chì í-āu, Iâ-so͘ chhut-khì, khòaⁿ-tio̍h chi̍t ê bau̍h-sè-ê, miâ kiò-chòe [Lī-bī], chē tī sè-koan, chiū tùi i kóng, “Lâi tè góa!” 28 [Lī-bī] chiū pàng-sak it-chhè, khí-lâi tè I. 29 [Lī-bī] tī in tau ūi-tio̍h Iâ-so͘ pān tōa iàn-se̍k. Ū chi̍t tōa-tīn bau̍h-sè-ê í-ki̍p kî-tha ê lâng kap in chòe-hé chē-toh chia̍h-pn̄g. 30 Ū chi̍t-kóa [Hoat-lī-sài]-phài ê lâng kap sio̍k in ê keng-ha̍k-kàu-su tùi Iâ-so͘ ê bûn-tô͘ bâi-oàn, kóng, “Sī-án-chóaⁿ lín kap bau̍h-sè-ê í-ki̍p chōe-jîn chòe-hé lim-chia̍h?” 31 Iâ-so͘ ìn kóng, “Kiān-khong-ê bô su-iàu i-seng, phòa-pīⁿ-ê chiah ū su-iàu. 32 Góa lâi, m̄-sī beh chio gī-lâng, sī beh chio chōe-jîn lâi hóe-kái.” 33 Āu-lâi in tùi Iâ-so͘ kóng, “[Iok-hān] ê bûn-tô͘ siông-siông kìm-chia̍h kî-tó, [Hoat-lī-sài]-phài ê bûn-tô͘ mā-sī án-ni, m̄-kú lí ê bûn-tô͘ iā chia̍h iā lim.” 34 Iâ-so͘ tùi in kóng, “Sin-lông iáu kap hun-iàn ê lâng-kheh chòe-hé ê sî, lín kiám ōe hō͘ lâng-kheh kìm-chia̍h? 35 Ji̍t-chí teh-beh kàu, sin-lông ōe hō͘ lâng tùi in tiong-kan lia̍h-khì, tī hiah-ê ji̍t in chiū ōe kìm-chia̍h.” 36 Iâ-so͘ koh ēng chi̍t ê phì-jū kā in kóng: “Bô-lâng thiah sin-saⁿ lâi pó͘ kū-saⁿ, nā án-ni chòe, m̄-nā sin-saⁿ thiah-phòa, thiah khí-lâi hit tè sin-pò͘ kap kū-saⁿ mā bōe ha̍h. 37 Mā bô-lâng ēng sin-chiú ji̍p tī kū phê-tē. I nā án-ni chòe, sin-chiú ōe kā kū phê-tē piak-phòa, chiú lâu chhut-lâi, phê-tē mā phòa-khì. 38 Sin-chiú tio̍h ji̍p tī sin phê-tē. 39 Bô-lâng lim kū-chiú liáu-āu ài lim sin-chiú, lâng lóng ōe kóng ‘Iáu-sī kū-chiú khah hó.’ ”

Lō͘-ka 6

1 Ū chi̍t ê An-hioh-ji̍t, Iâ-so͘ tùi be̍h-hn̂g keng-kè. I ê bûn-tô͘ tiah be̍h-sūi, ēng chhiú jôe lâi chia̍h. 2 Ū chi̍t-kóa [Hoat-lī-sài]-phài ê lâng kā in kóng, “Lín sī-án-chóaⁿ chòe An-hioh-ji̍t bōe ēng-tit chòe ê tāi-chì?” 3 Iâ-so͘ ìn kóng, “Lín kiám m̄-bat tha̍k-tio̍h [Tāi-pi̍t] kap tè i ê lâng pak-tó͘ iau ê sî só͘ chòe ê tāi-chì? 4 I ji̍p-khì Siōng-tè ê tiān the̍h hiàn-chè ê piáⁿ lâi chia̍h, mā hō͘ tè i ê lâng chia̍h. Chit khoán piáⁿ chí-ū chè-si chiah thang chia̍h.” 5 Iâ-so͘ kā in kóng, “Jîn-chú sī An-hioh-ji̍t ê Chú.” 6 Lēng-gōa chi̍t ê An-hioh-ji̍t, Iâ-so͘ ji̍p-khì hōe-tn̂g kà-sī; tī hia ū chi̍t ê chiàⁿ-chhiú khê-khì ê lâng. 7 Ū chi̍t-kóa keng-ha̍k-kàu-su kap [Hoat-lī-sài]-phài ê lâng teh tng-tán khòaⁿ Iâ-so͘ tī An-hioh-ji̍t ōe kā i i-tī á bōe, thang chhē khang-phāng lâi kò I. 8 Iâ-so͘ chai in teh siūⁿ sím-mi̍h, chiū kā hit-ê chhiú khê-khì ê lâng kóng, “Khí-lâi, lâi khiā tī tiong-ng!” I chiū khí-lâi, khiā tī hia. 9 Iâ-so͘ tùi in kóng, “Góa mn̄g lín, tī An-hioh-ji̍t chòe hó-sū á-sī chòe pháiⁿ-sū, kiù sìⁿ-miā á-sī hāi sìⁿ-miā, tó chi̍t hāng ha̍p-hoat?” 10 Iâ-so͘ chiū chi̍t-ê chi̍t-ê kā in khòaⁿ, jiân-āu tùi hit-ê lâng kóng, “Chhiú chhun chhut-lâi!” I chiàu án-ni chòe, chhiú chiū ho̍k-goân. 11 Hiah-ê lâng hui-siông siū-khì, chham-siông beh án-chóaⁿ tùi-hù Iâ-so͘. 12 Ū chi̍t ji̍t, Iâ-so͘ chhut-khì soaⁿ-ni̍h kî-tó, thong-mî tùi Siōng-tè kî-kiû. 13 Thiⁿ-kng ê sî, I kiò bûn-tô͘ lâi, tùi in tiong-kan kéng-soán cha̍p-jī ê, chheng in chòe sù-tô͘, 14 chiū-sī [Se-bûn] --- Iâ-so͘ koh kā i hō-miâ kiò-chòe [Pí-tek] --- kap i ê sió-tī [An-tek-lia̍t], [Ngá-kok] kap [Iok-hān], [Hui-le̍k] kap [Pa-to-lô-mái], 15 [Má-thài] kap [To-má], [A-le̍k-hui] ê kiáⁿ [Ngá-kok] kap chheng-chòe Kek-chìn-tóng ê [Se-bûn], 16 [Ngá-kok] ê kiáⁿ [Iû-tāi] kap āu-lâi chhut-bōe Iâ-so͘ hit-ê [Í-su-ka-lio̍k] ê [Iû-tāi]. 17 Iâ-so͘ kap sù-tô͘ lo̍h-soaⁿ, lâi khiā tī pîⁿ-tōe, tī hia ū chi̍t tōa-tīn I ê bûn-tô͘, koh ū chi̍t tōa-tīn bîn-chiòng. Chiah-ê lâng sī tùi [Iû-thài] choân-tōe kap [Iâ-lō͘-sat-léng], í-ki̍p [Thài-ní] kap [Se-tùn] iân-hái lâi ê. 18 In beh thiaⁿ Iâ-so͘ kóng tō-lí, mā beh hō͘ I i-pīⁿ. Hiah-ê hō͘ siâ-sîn kiáu-jiáu ê lâng mā lâi, lóng tit-tio̍h i-tī. 19 Kui tōa-tīn ê lâng lóng siūⁿ-beh kā I bong, in-ūi ū koân-lêng tùi I hoat-chhut, hō͘ in lóng tit-tio̍h i-hó. 20 Iâ-so͘ chù-ba̍k khòaⁿ I ê bûn-tô͘, kóng: Lín chiah-ê sàn-chhiah-lâng chin ū hok-khì, in-ūi lín sī Siōng-tè-kok ê chú-bîn. 21 Lín hiān-chāi teh iau ê lâng chin ū hok-khì, in-ūi Siōng-tè ōe hō͘ lín pá-chiok. Lín hiān-chāi teh thî-khàu ê lâng chin ū hok-khì, in-ūi Siōng-tè ōe hō͘ lín chhiò. 22 Lâng oàn-hūn lín, ūi-tio̍h Jîn-chú ê iân-kò͘ kā lín khì-sak, kā lín bú-jio̍k, kā lín khòaⁿ-chòe pháiⁿ-lâng, lín chin ū hok-khì. 23 Hit ji̍t lín tio̍h hoaⁿ-hí tiô-thiàu, in-ūi lín tī thiⁿ-ni̍h ê pò-siúⁿ chin tōa. Chá-chêng chiah-ê lâng ê chó͘-sian mā án-ni tùi-thāi sian-ti. 24 M̄-kú lín chiah-ê hó-gia̍h-lâng chhám à, in-ūi lín í-keng hióng-siū an-lo̍k. 25 Lín hiān-chāi pá-chiok ê lâng chhám à, in-ūi lín ōe iau-gō. Lín hiān-chāi teh chhiò ê lâng chhám à, in-ūi lín ōe ai-siong thî-khàu. 26 Chèng-lâng lóng teh o-ló lín ê sî, lín chhám à, in-ūi in ê chó͘-sian mā bat án-ni tùi-thāi ké sian-ti.” 27 “Lín chiah-ê teh thiaⁿ ê lâng, góa kā lín kóng: Tio̍h thiàⁿ lín ê tùi-te̍k, hó khoán-thāi oàn-hūn lín ê lâng. 28 Tio̍h chiok-hok lóe-mē lín ê lâng, ūi-tio̍h bú-jio̍k lín ê lâng kî-tó. 29 Ū lâng siàn lí ê chhùi-phóe, lēng-gōa chi̍t-pêng mā hō͘ i siàn. Ū lâng pak lí ê gōa-saⁿ, lāi-saⁿ mā sòa hō͘ i. 30 Ū lâng kā lí kiû sím-mi̍h, tio̍h hō͘ i. Ū lâng chhiúⁿ lí ê mi̍h-kiāⁿ, m̄-thang kā i thó. 31 Lín ài lâng án-chóaⁿ tùi-thāi lín, mā tio̍h án-ni tùi-thāi in. 32 “Lín nā chí-ū thiàⁿ hiah-ê thiàⁿ lín ê lâng, ū sím-mi̍h kong-lô? In-ūi liân pháiⁿ-lâng mā thiàⁿ hiah-ê thiàⁿ in ê lâng. 33 Lín nā chí-ū hó khoán-thāi hiah-ê hó khoán-thāi lín ê lâng, ū sím-mi̍h kong-lô? Liân pháiⁿ-lâng mā án-ni chòe. 34 Lín nā chîⁿ chioh hō͘ hiah-ê lín ǹg-bāng ōe hêng ê lâng, ū sím-mi̍h kong-lô? Liân pháiⁿ-lâng mā chioh hō͘ hiah-ê ōe lóng-chóng hêng ê pháiⁿ-lâng. 35 Chóng-sī lín tio̍h thiàⁿ lín ê tùi-te̍k, hó khoán-thāi in; chioh-lâng mā m̄-thang ǹg-bāng beh siu-hôe. Án-ni, lín chiū ōe tit-tio̍h chin tōa ê pò-siúⁿ, koh ōe chiâⁿ-chòe Chì-koân Siōng-tè ê kiáⁿ-jî, in-ūi I tùi bōng-un pōe-gī kap siâ-ok ê lâng chin chû-pi. 36 Lín ê Thiⁿ-pē sī jîn-chû, lín mā tio̍h jîn-chû.” 37 “M̄-thang phoe-phòaⁿ lâng, chiah bōe siū Siōng-tè sím-phòaⁿ; m̄-thang kā lâng tēng-chōe, chiah bōe siū Siōng-tè tēng-chōe. Tio̍h sià-bián lâng, chiah ōe siū Siōng-tè sià-bián. 38 Tio̍h hō͘ lâng, Siōng-tè chiū ōe hō͘ lín; I ōe ji̍h koh iô, hō͘ i cha̍t, koh niû kàu móa-móa, tò lo̍h-khì lín ê saⁿ-á-phè. Lín ēng sím-mi̍h niû niû hō͘ lâng, Siōng-tè mā ōe chiàu án-ni niû tò-tńg hō͘ lín.” 39 Iâ-so͘ koh ēng phì-jū tùi in kóng, “Bông-jîn kiám ōe khan bông-jîn? Kiám bōe nn̄g ê lóng poa̍h-lo̍h khiⁿ-kau? 40 Ha̍k-seng bōe chhiau-kè lāu-su, put-kò ha̍k-seng nā o̍h ū khí, i chiū ōe chhin-chhiūⁿ lāu-su. 41 “Lí ná kan-ta teh khòaⁿ hiaⁿ-tī ba̍k-chiu lāi ê chhâ-iù-á, ia̍h bô chù-ì-tio̍h ka-kī ba̍k-chiu lāi ū chhâ-kho͘? 42 Lí bô khòaⁿ-kìⁿ ka-kī ba̍k-chiu lāi ū chhâ-kho͘, ná ōe-tàng kā lí ê hiaⁿ-tī kóng, ‘Hiaⁿ-tī ah, lí ba̍k-chiu lāi ê chhâ-iù-á góa lâi kā lí the̍h chhut-lâi.’ Ké-hó ê lâng ah, ka-kī ba̍k-chiu lāi ê chhâ-kho͘ tio̍h seng the̍h chhut-lâi, chiah ōe-tàng khòaⁿ chheng-chhó, thang kā hiaⁿ-tī ba̍k-chiu lāi ê chhâ-iù-á the̍h chhut-lâi.” 43 “Hó-chhiū bōe kiat pháiⁿ ké-chí; pháiⁿ-chhiū mā bōe kiat hó ké-chí. 44 Ta̍k châng chhiū tùi só͘ kiat ê ké-chí lâi chai i ê hó-pháiⁿ. Bōe-tàng tùi chhì-phè bán bû-hoa-kó, mā bōe-tàng tùi chháu-chhì siu phû-tô. 45 Hó-lâng tùi sim-lāi só͘ chek-chū ê hó hoat-chhut hó; pháiⁿ-lâng tùi só͘ chek-chū ê pháiⁿ hoat-chhut pháiⁿ. In-ūi lâng sim-lāi chhiong-móa sím-mi̍h, chhùi chiū kóng sím-mi̍h.” 46 “Sī-án-chóaⁿ lín chheng-ho͘ góa ‘Chú ah, Chú ah’ khiok bô si̍t-hêng góa ê kà-sī? 47 Lâi góa chia thiaⁿ góa ê ōe, koh si̍t-hêng ê lâng, góa kā lín kóng i chhin-chhiūⁿ sím-mi̍h. 48 I chhin-chhiūⁿ lâng khí-chhù, thô͘ ku̍t chin chhim, tōe-ki hē tī chio̍h-pôaⁿ téng; tōa-chúi lâi, chúi chhiong-tio̍h chhù, chhù mā bōe iô-tāng, in-ūi chhù khí chin kian-kò͘. 49 M̄-kú thiaⁿ góa chiah-ê ōe bô si̍t-hêng ê lâng chhin-chhiūⁿ lâng khí-chhù bô hē tōe-ki, chúi chi̍t-ē chhiong, chhù sûi-sî tó lo̍h-khì, sīm-chì tó-kah chin lī-hāi.”

Lō͘-ka 7

1 Iâ-so͘ kóng hō͘ bîn-chiòng thiaⁿ ê ōe lóng kóng soah, chiū ji̍p-khì [Ka-pek-lông]. 2 Ū chi̍t ê [Lô-má] kun-koaⁿ, i só͘ tiōng-iōng ê lô͘-po̍k phòa-pīⁿ, pīⁿ-kah teh-beh sí. 3 Kun-koaⁿ thiaⁿ-tio̍h Iâ-so͘ ê tāi-chì, chiū chhe kúi-nā ê [Iû-thài]-lâng ê tiúⁿ-ló khì Iâ-so͘ hia, chhiáⁿ Iâ-so͘ lâi i-tī i ê lô͘-po̍k. 4 Chiah-ê tiúⁿ-ló kàu Iâ-so͘ hia, khún-chhiat kiû I kóng, “Chit-ê lâng ōe kham-tit lí kā i pang-chān, 5 in-ūi i ài-hō͘ lán [Iû-thài]-lâng, koh kā lán khí hōe-tn̂g.” 6 Iâ-so͘ chiū kap in khì. Iâ-so͘ teh-beh kàu i ê chhù ê sî, hit-ê kun-koaⁿ chhe kúi-nā ê pêng-iú lâi kā I kóng, “Chú ah, m̄-thang lô-hoân lí, lí lâi goán tau, góa bōe kham-tit. 7 Só͘-í góa chiah m̄-káⁿ ka-kī lâi kìⁿ lí. Lí chí-ū kóng chi̍t kù ōe, góa ê lô͘-po̍k chiū ōe hó. 8 In-ūi góa sī hō͘ lâng koán ê lâng, mā ū peng hō͘ góa koán. Góa kā chit-ê kóng ‘Khì’, i chiū khì; kā pa̍t-ê kóng ‘Lâi’, i chiū lâi; kā góa ê lô͘-po̍k kóng ‘Lí chòe chit-ê’, i chiū khì chòe.” 9 Iâ-so͘ thiaⁿ-tio̍h chiah-ê ōe tùi i kám-kak chin ì-gōa, oa̍t tńg-sin kā tè I ê kûn-chiòng kóng, “Góa kā lín kóng, liân tī [Í-sek-lia̍t]-lâng ê tiong-kan, góa to iáu m̄-bat khòaⁿ-tio̍h chit khoán ê sìn-sim.” 10 Siū chhe ê lâng tńg-khì kun-koaⁿ ê chhù, khòaⁿ-tio̍h lô͘-po̍k í-keng hó-khì. 11 Kè bô jōa kú, Iâ-so͘ khì chi̍t ê siâⁿ, kiò-chòe [Ná-in]. I ê bûn-tô͘ kap kui tōa-tīn lâng tè I khì. 12 Iâ-so͘ beh kàu siâⁿ-mn̂g ê sî, tú-hó ū lâng kng chi̍t ê sí-lâng chhut-lâi, i ê lāu-bú ko͘-ko͘ siⁿ chit-ê kiáⁿ, koh sī kóaⁿ-hū. Ū chi̍t tīn siâⁿ-lāi ê lâng chhut-lâi sàng-chòng. 13 Chú chi̍t-ē khòaⁿ-tio̍h chit-ê kóaⁿ-hū chiū khó-lîn i, kā i kóng, “M̄-thang khàu!” 14 Jiân-āu Iâ-so͘ kiâⁿ óa-khì hōaⁿ kng sin-si ê kè, kng ê lâng chiū thêng-kha. Iâ-so͘ kóng, “Siàu-liân-lâng, góa kā lí kóng, ‘Khí-lâi!’ ” 15 Hit-ê sí-lâng chiū peh khí-lâi chē, khui-chhùi kóng-ōe. Iâ-so͘ chiū chiong i kau hō͘ i ê lāu-bú. 16 Chèng-lâng lóng hui-siông kiaⁿ-hiâⁿ, chiong êng-kng kui hō͘ Siōng-tè kóng, “Lán tiong-kan ū chhut-hiān chi̍t ūi tōa sian-ti lah!”; koh kóng, “Siōng-tè ū khòaⁿ-kò͘ I ê chú-bîn!” 17 Koan-hē Iâ-so͘ chit-ê hong-siaⁿ thoân kàu choân [Iû-thài] kap chiu-ûi ta̍k tōe-khu. 18 [Iok-hān] ê bûn-tô͘ chiong chiah-ê tāi-chì lóng kā [Iok-hān] pò-kò. [Iok-hān] chiū kiò nn̄g ê bûn-tô͘ lâi, 19 chhe in khì kìⁿ Chú, kóng, “Lí chiū-sī teh-beh lâi Hit-ūi, á-sī goán tio̍h thèng-hāu pa̍t-lâng?” 20 Chiah-ê lâng lâi-kàu Iâ-so͘ hia, chiū kóng, “Si-sóe-chiá [Iok-hān] chhe goán lâi mn̄g lí kóng ‘Lí chiū-sī teh-beh lâi Hit-ūi, á-sī goán tio̍h thèng-hāu pa̍t-lâng?’ ” 21 Tú hit sî, Iâ-so͘ ū i-hó chin chōe sin-khó͘ pīⁿ-thiàⁿ kap hō͘ kúi hū-sin ê lâng, koh hō͘ chin chōe sit-bêng ê lâng ōe khòaⁿ-kìⁿ. 22 Iâ-so͘ chiū ìn kóng, “Lín tńg-khì kā [Iok-hān] pò-kò lín só͘ khòaⁿ-tio̍h kap thiaⁿ-tio̍h ê, chiū-sī sit-bêng ê lâng koh khòaⁿ-kìⁿ, kha pái ê lâng kiâⁿ-lō͘, bâ-hong pīⁿ-lâng chheng-khì, hīⁿ-khang bōe thiaⁿ-kìⁿ ê lâng thiaⁿ-kìⁿ, sí-lâng koh-oa̍h, sàn-chhiah-lâng ū hó siau-sit thoân hō͘ in. 23 Tùi góa bô sit-khì sìn-sim ê lâng chin ū hok-khì!” 24 [Iok-hān] chhe lâi ê lâng lī-khui liáu-āu, Iâ-so͘ chiah tùi chèng-lâng kóng-khí [Iok-hān] ê sū. I kóng, “Lín chhut-khì khòng-iá sī beh khòaⁿ sím-mi̍h? Beh khòaⁿ hō͘ hong chhe iô-lâi iô-khì ê lô͘-úi sī-bô? 25 Án-ni, lín chhut-khì beh khòaⁿ sím-mi̍h? Beh khòaⁿ chhēng ko-kùi i-ho̍k ê lâng sī-bô? Lín khòaⁿ, chhēng chhia-hoa ê i-ho̍k seng-oa̍h chhia-chhí ê lâng sī tī ông-kiong. 26 Án-ni, lín chhut-khì beh khòaⁿ sím-mi̍h? Beh khòaⁿ sian-ti sī-bô? Sī, m̄-kú góa kā lín kóng, i pí sian-ti koh-khah úi-tāi. 27 Koan-hē [Iok-hān], Sèng-keng ū án-ni kì-chài: Khòaⁿ ah, góa chhe góa ê sù-chiá chòe lí ê sian-hong; i beh tī lí ê thâu-chêng kā lí khui-lō͘. 28 Góa kā lín kóng, hū-jîn-lâng só͘ siⁿ ê bô chi̍t ê pí [Iok-hān] khah úi-tāi. M̄-kú, tī Siōng-tè-kok siōng-sòe-ê iáu pí i koh-khah úi-tāi!” 29 Thiaⁿ-tio̍h chiah-ê ōe ê bîn-chiòng kap bau̍h-sè-ê mā lóng sêng-jīn Siōng-tè sī kong-gī, in-ūi in ū niá-siū [Iok-hān] ê sóe-lé. 30 M̄-kú [Hoat-lī-sài]-phài ê lâng kap Lu̍t-hoat-kàu-su lóng kū-choa̍t Siōng-tè tùi in só͘ tēng ê chí-ì, bô niá-siū [Iok-hān] ê sóe-lé. 31 Iâ-so͘ koh kóng, “Án-ni, chit sè-tāi ê lâng góa beh ēng sím-mi̍h lâi pí-phēng? In chhin-chhiūⁿ sím-mi̍h? 32 In chhin-chhiūⁿ chi̍t tīn gín-á chē tī chhī-tiûⁿ-kháu tùi tâng-phōaⁿ hō͘-siōng hoah: Goán tùi lín pûn phín-á, lín bô thiàu-bú! Goán chhiùⁿ ai-ko, lín mā bô khàu! 33 Si-sóe-chiá [Iok-hān] lâi, bô chia̍h-pn̄g, bô lim-chiú, lín chiū kóng, ‘I hō͘ kúi hū-sin!’ 34 Jîn-chú lâi, mā chia̍h mā lim, lín chiū kóng, ‘I sī tham-chia̍h hò͘ⁿ-chiú ê lâng, sī bau̍h-sè-ê kap chōe-jîn ê pêng-iú.’ 35 Tì-hūi sī tùi ū tì-hūi ê lâng tit-tio̍h chèng-si̍t.” 36 Ū chi̍t ê [Hoat-lī-sài]-phài ê lâng chhiáⁿ Iâ-so͘ chia̍h-pn̄g, Iâ-so͘ chiū ji̍p-khì hit-ê [Hoat-lī-sài]-lâng ê chhù chē-toh chia̍h-pn̄g. 37 Hit-ê siâⁿ-lāi ū chi̍t ê ū chōe ê hū-jîn-lâng, i chai Iâ-so͘ tī hit-ê [Hoat-lī-sài]-lâng ê chhù teh chia̍h-pn̄g, chiū tòa chi̍t koàn tóe phang-iû ê ge̍k-pân lâi. 38 I khiā tī Iâ-so͘ ê āu-bīn, óa I ê kha teh khàu, ba̍k-sái tih-tâm I ê kha, chiū ēng ka-kī ê thâu-mn̂g kā chhit, koh ti̍t-ti̍t chim I ê kha, ēng phang-iû kā boah. 39 Chhiáⁿ Iâ-so͘ hit-ê [Hoat-lī-sài]-lâng chi̍t-ē khòaⁿ-tio̍h, sim-lāi siūⁿ, “Chit-ê lâng nā-sī sian-ti, it-tēng ōe chai teh kā I bong ê sī siáⁿ-lâng, sī sím-mi̍h khoán hū-jîn-lâng, in-ūi i sī chōe-jîn.” 40 Iâ-so͘ chiū tùi i kóng, “[Se-bûn], góa ū ōe beh kā lí kóng.” [Se-bûn] kóng, “Lāu-su, chhiáⁿ kóng.” 41 Iâ-so͘ chiū kóng, “Ū nn̄g ê lâng tùi chi̍t ê chè-chú chioh chîⁿ, chi̍t ê khiàm i gō͘-pah ê gûn-á, iáu chi̍t ê khiàm i gō͘-cha̍p. 42 In bô hoat-tō͘ thang hêng, chè-chú chiū chhat-siau in ê chè. Án-ni, tó chi̍t ê ōe khah thiàⁿ chè-chú?” 43 [Se-bûn] ìn kóng, “Góa siūⁿ sī chè siū chhat-siau khah chōe hit-ê.” Iâ-so͘ kā i kóng, “Lí ê phòaⁿ-toàn chin tio̍h.” 44 Jiân-āu Iâ-so͘ oa̍t-thâu ǹg hū-jîn-lâng, tùi [Se-bûn] kóng, “Lí ū khòaⁿ-tio̍h chit-ê hū-jîn-lâng bô? Góa ji̍p lí ê chhù, lí bô ēng chúi hō͘ góa sóe-kha, m̄-kú i ēng ba̍k-sái tih-tâm góa ê kha, koh ēng i ê thâu-mn̂g chhit. 45 Lí bô kā góa chim, m̄-kú góa ji̍p-lâi liáu-āu, i ti̍t-ti̍t chim góa ê kha. 46 Lí bô ēng iû boah góa ê thâu-khak, m̄-kú i ēng phang-iû boah góa ê kha. 47 Só͘-í, góa kā lí kóng, i thiàⁿ khah chōe, piáu-sī i chin chōe ê chōe-kò í-keng ū tit-tio̍h sià-bián. Tit-tio̍h sià-bián chió, thiàⁿ chiū chió.” 48 Iâ-so͘ chiū kā hū-jîn-lâng kóng, “Lí ê chōe tit-tio̍h sià-bián lah.” 49 Kâng toh hiah-ê lâng sim-lāi siūⁿ, “Chit-ê tàu-tóe sī sím-mi̍h lâng, I kèng-jiân sià-bián lâng ê chōe!” 50 Iâ-so͘ kā hit-ê hū-jîn-lâng kóng, “Lí ê sìn-sim ū kiù lí; pêng-an tò-khì.”

Lō͘-ka 8

1 Kè bô jōa kú, Iâ-so͘ ta̍k siâⁿ-chhī ta̍k hiuⁿ-siā kiâⁿ thàu-thàu thôan-tō, soan-iông Siōng-tè-kok ê hok-im. Cha̍p-jī sù-tô͘ kap I chòe-tīn, 2 ū chi̍t-kóa bat hō͘ siâ-sîn hū-sin á-sī phòa-pīⁿ hō͘ Iâ-so͘ i-hó ê hū-jîn-lâng mā kap I chòe-hé khì, kî-tiong ū [Boa̍t-tāi-lia̍p] ê [Má-lī-a] --- Iâ-so͘ bat tùi i sin-chiūⁿ kóaⁿ-chhut chhit ê kúi, 3 [Hi-lu̍t] ê koán-ke [Khó͘-sat] ê bó͘ [Iok-a-ná], kap [So͘-sat-ná], í-ki̍p kî-tha chin chōe hū-jîn-lâng, in bat ēng ka-kī ê châi-bu̍t lâi ho̍k-sāi Iâ-so͘ kap I ê bûn-tô͘. 4 Ū chi̍t tōa-tīn lâng tùi ta̍k ê siâⁿ-chhī it-ti̍t chū-chi̍p lâi Iâ-so͘ hia ê sî, I ēng phì-jū kā in kóng: 5 “Ū chi̍t ê iā-chéng-chí-ê chhut-khì iā chéng-chí. I iā ê sî, ū-ê lak tī lō͘-piⁿ, hō͘ lâng ta̍h, khong-tiong ê chiáu kā i chia̍h liáu-liáu. 6 Ū-ê lak tī chio̍h-thâu tōe, in-ūi bô chúi-hun, hoat chhut-lâi chiū ta-khì. 7 Ū-ê lak tī chhì-phè lāi, chhì-á kap chéng-chí pîⁿ-pîⁿ tōa-châng khí-lâi, soah kā i hip-sí. 8 Ū-ê lak lo̍h-khì hó thó͘-tōe, tōa-châng khí-lâi, kiat-si̍t chi̍t-pah pē.” Chiah-ê ōe kóng soah, Iâ-so͘ koh tōa-siaⁿ kóng, “Ū hīⁿ-khang thang thiaⁿ ê lâng, tio̍h thiaⁿ!” 9 Iâ-so͘ ê bûn-tô͘ mn̄g I chit-ê phì-jū sī sím-mi̍h ì-sù. 10 I kóng, “Siōng-tè-kok ê ò-pì í-keng ū hō͘ lín chai, m̄-kú tùi pa̍t-lâng chiū ēng phì-jū, beh hō͘ In khòaⁿ, mā khòaⁿ bô, thiaⁿ, mā thiaⁿ bōe liáu-kái.” 11 “Chit-ê phì-jū ê ì-sù sī án-ni: Chéng-chí sī Siōng-tè ê sìn-sit. 12 Lak tī lō͘-piⁿ ê sī lâng thiaⁿ-tio̍h sìn-sit, Mô͘-kúi sûi-sî lâi, tùi in sim-lāi chiong sìn-sit chhiúⁿ-khì, chiah bōe hō͘ in sìn lâi tit-kiù. 13 Lak tī chio̍h-thâu tōe ê sī lâng thiaⁿ-tio̍h sìn-sit, sûi-sî hoaⁿ-hí chiap-siū, put-kò bô tèng-kun, chí-ū chiām-sî sìn, chi̍t-ē tú-tio̍h chhì-liān chiū pàng-sak. 14 Lak tī chhì-phè lāi ê sī lâng thiaⁿ-tio̍h sìn-sit liáu-āu, siū-tio̍h seng-oa̍h ê khòa-lū, chîⁿ-châi kap hióng-lo̍k ê chó͘-gāi, sìn-sit siū hip-sí soah bōe sêng-se̍k. 15 Lak tī hó thó͘-tōe ê sī lâng thiaⁿ-tio̍h sìn-sit, ēng sêng-si̍t siān-liông ê sim chiap-siū, nāi-sim thèng-hāu kàu kiat-si̍t.” 16 “Bô-lâng teng tiám liáu ēng àng-á khàm khí-lâi á-sī khǹg tī bîn-chhn̂g kha, sī kā i chhāi tī teng-tâi téng, thang hō͘ ji̍p-lâi ê lâng khòaⁿ-tio̍h kng. 17 In-ūi bô chi̍t hāng ún-ba̍t-ê bōe hián-lō͘; bô chi̍t hāng am-khàm-ê bōe lō͘-hiān, bōe hō͘ lâng chai. 18 “Só͘-í, tio̍h chù-ì beh án-chóaⁿ thiaⁿ; in-ūi ū-ê, beh hō͘ i koh-khah chōe; bô-ê, liân i siūⁿ-kóng ū-ê mā beh kā i chhiúⁿ khí-lâi.” 19 Iâ-so͘ ê lāu-bú kap hiaⁿ-tī lâi chhē I, m̄-kú lâng chin chōe, bōe-tàng óa-khì. 20 Ū lâng kā I kóng, “Lí ê lāu-bú kap hiaⁿ-tī khiā tī gōa-bīn beh kìⁿ lí.” 21 Iâ-so͘ tùi in kóng, “Thiaⁿ Siōng-tè ê ōe ū khì si̍t-hêng ê lâng chiū-sī góa ê lāu-bú, góa ê hiaⁿ-tī.” 22 Ū chi̍t ji̍t, Iâ-so͘ kap I ê bûn-tô͘ chiūⁿ-chûn ê sî kā in kóng, “Lán kè lâi-khì hit pêng hōaⁿ.” In chiū khui-chûn. 23 Chûn teh kiâⁿ ê sî, Iâ-so͘ khùn-khì. Hut-jiân ū chi̍t chūn tōa-hong sàu lo̍h-lâi ô͘-ni̍h, chûn hō͘ chúi im kàu beh móa, chin gûi-hiám. 24 Bûn-tô͘ khì kā I kiò-chhíⁿ, kóng, “Lāu-su, lāu-su, lán beh bô-miā lò͘!” Iâ-so͘ chhíⁿ khí-lâi, chek-pī hong kap tōa-éng, hong-éng tiāⁿ, it-chhè chiū chēng-chēng. 25 Iâ-so͘ tùi bûn-tô͘ kóng, “Lín ná hiah-ni̍h bô sìn-sim?” In kiaⁿ-hiâⁿ koh kî-koài, tāi-ke kóng-lâi kóng-khì, “Chit-ê sī sím-mi̍h lâng? I chi̍t-ē bēng-lēng, liân hong kap éng lóng sūn-ho̍k.” 26 Iâ-so͘ kap bûn-tô͘ chē-chûn kàu [Ka-lī-lī] ê tùi-bīn hōaⁿ, [Kek-la̍h-sim]-lâng ê tōe-khu. 27 Iâ-so͘ lo̍h-chûn chiūⁿ-hōaⁿ; ū chi̍t ê kúi hū-sin ê lâng tùi siâⁿ-ni̍h chhut-lâi tú-tio̍h I. Chit-ê lâng í-keng chin kú bô chhēng-saⁿ, mā bô tòa tī chhù-lāi, lóng tòa tī bōng-á-po͘. 28 I chi̍t-ē khòaⁿ-tio̍h Iâ-so͘, chiū phak tī I ê bīn-chêng, tōa-siaⁿ hoah, “Chì-koân Siōng-tè ê Kiáⁿ Iâ-so͘, mài chhap góa! Góa khún-kiû lí, m̄-thang kā góa khó͘-chhó͘!” 29 In-ūi Iâ-so͘ ū bēng-lēng siâ-sîn tùi chit-ê lâng chhut-khì --- Siâ-sîn bat chin chōe pái kā i lia̍h-teh, lâng kā i koaiⁿ khí-lâi, ēng thih-liān kā i liān, ēng kha-khàu kā i khàu, m̄-kú i kā só-liān lóng chhoah-tn̄g, koh hō͘ kúi kóaⁿ khì khòng-iá. 30 Iâ-so͘ mn̄g i, “Lí kiò-chòe sím-mi̍h miâ?” I ìn kóng, “Kun-thoân”, in-ūi ū chin chōe kúi kā i hū-sin. 31 Kúi ai-kiû Iâ-so͘ m̄-thang bēng-lēng in ji̍p-khì chhim-ian. 32 Hit sî, hù-kūn ê soaⁿ-phiâⁿ ū chi̍t tōa-kûn ti teh thó-chia̍h, kúi chiū kiû Iâ-so͘ tio̍h hō͘ in ji̍p-khì ti-kûn. Iâ-so͘ chún in. 33 Kúi chiū tùi hit-ê lâng chhut-khì, chìn-ji̍p ti-kûn. Kui-kûn ti chiū tùi soaⁿ-phiâⁿ chông lo̍h-khì ô͘-ni̍h tū-sí. 34 Hiah-ê chhī-ti ê lâng khòaⁿ-tio̍h só͘ hoat-seng ê tāi-chì, chiū kiaⁿ-kah cháu khì siâⁿ-lāi kap hiuⁿ-siā pò lâng chai. 35 Chèng-lâng chiū chhut-lâi beh khòaⁿ hoat-seng sím-mi̍h tāi-chì. In lâi-kàu Iâ-so͘ hia, khòaⁿ-tio̍h siâ-sîn í-keng tùi i chhut-khì hit-ê lâng ū chhēng-saⁿ, cheng-sîn chèng-siông, chē tī Iâ-so͘ ê kha-chêng, in chiū chin tio̍h-kiaⁿ. 36 Chhin-ba̍k khòaⁿ-tio̍h chit-ê tāi-chì ê lâng chiū chiong hit-ê hō͘ siâ-sîn hū-sin ê lâng án-chóaⁿ tit-tio̍h i-hó ê tāi-chì kā chèng-lâng pò-kò. 37 [Kek-la̍h-sim] hù-kūn só͘-ū ê lâng kiû Iâ-so͘ lī-khui in hia, in-ūi in hui-siông kiaⁿ-hiâⁿ. Iâ-so͘ chiū chē-chûn tò-tńg-khì. 38 Kúi tùi i chhut-khì hit-ê lâng kiû Iâ-so͘, ài-beh tè I khì. M̄-kú Iâ-so͘ kiò i tńg-khì, kóng, 39 “Tńg-khì lín tau, chiong Siōng-tè ūi-tio̍h lí só͘ chòe it-chhè ê tāi-chì pò hō͘ lâng chai.” Hit-ê lâng chiū tńg-khì, chiong Iâ-so͘ ūi-tio̍h i só͘ chòe hiah-ni̍h tōa ê tāi-chì thoân-iông hō͘ choân-siâⁿ ê lâng chai. 40 Iâ-so͘ tńg-lâi ê sî, ū chi̍t tīn lâng kā I hoan-gêng, in-ūi in lóng teh thèng-hāu I. 41 Ū chi̍t ê hōe-tn̂g ê chú-koán miâ kiò-chòe [Ia̍p-ló͘] lâi, i chi̍t-ē khòaⁿ-tio̍h Iâ-so͘ chiū phak tī I ê kha-chêng, khún-kiû I khì in tau. 42 In-ūi i cha̍p-jī hè ê to̍k-siⁿ cha-bó͘-kiáⁿ teh-beh sí à. Iâ-so͘ chiū kap i khì; ū kui tōa-tīn lâng mā oe-oe khoeh-khoeh tè I khì. 43 Hit sî, ū chi̍t ê hū-jîn-lâng tì-tio̍h hiat-lāu-pīⁿ í-keng cha̍p-jī nî kú, sui-jiân kheng-ka-tōng-sán chhē i-seng, m̄-kú bô-lâng ōe-tàng kā i i-hó. 44 I kiâⁿ óa-khì Iâ-so͘ ê āu-bīn, bong I saⁿ-á-ku ê chhiu, i ê hiat-lāu sûi-sî chí. 45 Iâ-so͘ kóng, “Sím-mi̍h lâng kā góa bong?” Tāi-ke lóng kóng bô. [Pí-tek] kóng, “Lāu-su, sī kûn-chiòng khoeh-lâi khoeh-khì ê sî kā lí khoeh-tio̍h.” 46 Iâ-so͘ kóng, “Ū lâng kā góa bong-tio̍h, in-ūi góa chai ū tōa lêng-le̍k tùi góa chhut-khì.” 47 Hū-jîn-lâng chai-iáⁿ am-khàm bōe-tiâu, chiū phi̍h-phi̍h-chhoah, lâi phak tī Iâ-so͘ ê kha-chêng, tī chèng-lâng ê bīn-chêng kóng i sī-án-chóaⁿ bong Iâ-so͘, koh i ê pīⁿ án-chóaⁿ sûi-sî hó-khì. 48 Iâ-so͘ kā i kóng, “Cha-bó͘-kiáⁿ, lí ê sìn-sim hō͘ lí hó-khì lah, pêng-an tò-khì.” 49 Iâ-so͘ iáu teh kóng-ōe ê sî, ū lâng tùi hōe-tn̂g chú-koán ê chhù lâi, kā [Ia̍p-ló͘] kóng, “Lí ê cha-bó͘-kiáⁿ í-keng sí-khì, m̄-thang koh lô-hoân lāu-su.” 50 Iâ-so͘ thiaⁿ-tio̍h chiū kā [Ia̍p-ló͘] kóng, “M̄-bián kiaⁿ, chí-ū sìn, i ōe hó khí-lâi.” 51 Iâ-so͘ lâi-kàu in tau ê sî, [Pí-tek], [Iok-hān], [Ngá-kok], kap gín-á ê pē-bú í-gōa, m̄-chún pa̍t-lâng kap I chòe-hé ji̍p-khì. 52 Tāi-ke lóng ūi-tio̍h sí-khì ê cha-bó͘ gín-á teh háu teh khàu. Iâ-so͘ kóng, “M̄-thang khàu, in-ūi i m̄-sī sí, sī teh khùn.” 53 In-ūi in lóng chai hit-ê cha-bó͘ gín-á í-keng sí-khì, chiū kā I thí-chhiò. 54 Iâ-so͘ khan cha-bó͘ gín-á ê chhiú, tōa-siaⁿ kóng, “Cha-bó͘ gín-á, khí-lâi!” 55 I chiū hôe-hûn, sûi-sî peh khí-lâi. Iâ-so͘ hoan-hù in tio̍h hō͘ cha-bó͘ gín-á chia̍h. 56 I ê pē-bú hui-siông tio̍h-kiaⁿ. Iâ-so͘ bēng-lēng in m̄-thang chiong só͘ hoat-seng ê tāi-chì pò lâng chai.

Lō͘-ka 9

1 Iâ-so͘ tiàu-chi̍p cha̍p-jī sù-tô͘, hō͘ in ū lêng-le̍k kap koân-pèng thang chè-ap lóng-chóng ê kúi, koh i-hó chin chōe pīⁿ-chèng. 2 Jiân-āu I chhe in chhut-khì soan-káng Siōng-tè-kok ê hok-im, koh i-tī pīⁿ-lâng. 3 I kau-tài in kóng, “Chhut-mn̂g ê sî sím-mi̍h lóng m̄-thang tòa: M̄-thang tòa koáiⁿ-á; m̄-thang tòa lú-hêng-tē; m̄-thang tòa chia̍h-mi̍h; m̄-thang tòa chîⁿ; mā m̄-thang ū nn̄g niá lāi-saⁿ. 4 Lín bô-lūn ji̍p-khì tó chi̍t keng chhù, tio̍h tòa tī hia, iā tùi hia lī-khui. 5 In nā m̄ chiap-la̍p lín, lín lī-khui hit-ê siâⁿ ê sî, tio̍h chiong kha-ni̍h ê thô͘-hún pōaⁿ-tiāu, piáu-sī tùi in kéng-kò.” 6 In chhut-khì, chi̍t-chng kè chi̍t-chng thoân hok-im, koh tī ta̍k só͘-chāi i-hó pīⁿ-lâng. 7 [Ka-lī-lī] hun-hong ê ông [Hi-lu̍t] thiaⁿ-tio̍h só͘ hoat-seng it-chhè ê tāi-chì, sim-lāi hui-siông put-an, in-ūi ū lâng kóng Si-sóe-chiá [Iok-hān] í-keng tùi sí-lâng tiong koh-oa̍h; 8 mā ū lâng kóng [Í-lī-a] ū chhut-hiān; koh ū lâng kóng kó͘-chá ê chi̍t ê sian-ti ū koh-oa̍h. 9 [Hi-lu̍t] kóng, “[Iok-hān], góa í-keng kā i chām-thâu lah, án-ni góa thiaⁿ lín teh kóng chit-ê tàu-tóe sī sím-mi̍h lâng?” I chiū ài-beh kìⁿ Iâ-so͘. 10 Sù-tô͘ tńg-lâi Iâ-so͘ hia, chiong in só͘ chòe ê tāi-chì lóng kā I pò-kò. Iâ-so͘ chiū kan-ta chhōa in thòe-khì chi̍t ê kiò-chòe [Pek-sài-tāi] ê siâⁿ. 11 Kûn-chiòng chi̍t-ē chai chiū tè I khì. Iâ-so͘ hoan-gêng in, kóng Siōng-tè-kok ê sū hō͘ in thiaⁿ, koh i-hó hiah-ê su-iàu i-tī ê lâng. 12 Ji̍t beh àm ê sî, cha̍p-jī sù-tô͘ lâi kā Iâ-so͘ kóng, “Chhiáⁿ kā kûn-chiòng kái-sàn, thang hō͘ in khì hù-kūn ê chng-siā chhē chia̍h-mi̍h kap tòa ê só͘-chāi, in-ūi lán tī chia phian-phiah bô-lâng tòa.” 13 Iâ-so͘ kā in kóng, “Lín hō͘ in chia̍h.” In kóng, “Lán chí-ū gō͘ ê piáⁿ, nn̄g bé hî, nā bô khì bóe ná ū kàu thang hō͘ chiah-chōe lâng chia̍h?” 14 Tī hia chha-put-to ū gō͘-chheng ê ta-po͘-lâng. Iâ-so͘ chiū tùi bûn-tô͘ kóng, “Kiò in hun-cho͘ chē lo̍h-khì, ta̍k cho͘ chha-put-to gō͘-cha̍p ê lâng.” 15 In chiàu án-ni chòe, kiò chèng-lâng lóng chē lo̍h-khì. 16 Iâ-so͘ the̍h hit gō͘ ê piáⁿ kap nn̄g bé hî, ǹg thiⁿ kám-siā, peh-khui, the̍h hō͘ bûn-tô͘ khì pun hō͘ kûn-chiòng. 17 Tāi-ke lóng chia̍h, chia̍h kàu pá-pá. Bûn-tô͘ chiong só͘ chhun ê sut-á lóng khioh khí-lâi, lóng-chóng ū cha̍p-jī nâ. 18 Ū chi̍t piàn, Iâ-so͘ ka-kī chi̍t ê teh kî-tó ê sî, bûn-tô͘ lâi chhē I. I mn̄g in kóng, “Chèng-lâng kóng góa sī sím-mi̍h lâng?” 19 In ìn kóng, “Ū lâng kóng lí sī Si-sóe-chiá [Iok-hān]; m̄-kú ū lâng kóng sī [Í-lī-a]; mā ū lâng kóng sī kó͘-chá ê chi̍t ê sian-ti koh-oa̍h.” 20 Iâ-so͘ koh mn̄g in kóng, “Lín leh, lín kóng góa sī sím-mi̍h lâng?” [Pí-tek] ìn kóng, “Lí sī Siōng-tè siat-li̍p ê Ki-tok!” 21 Iâ-so͘ bēng-lēng in m̄-thang tùi lâng kóng-khí chit-ê tāi-chì. 22 I kóng, “Jîn-chú it-tēng tio̍h siū chin chōe khó͘-lān, hō͘ tiúⁿ-ló, chè-si-tiúⁿ, kap keng-ha̍k-kàu-su kū-choa̍t, koh hō͘ in hāi-sí, tē-saⁿ ji̍t Siōng-tè ōe hō͘ I koh-oa̍h.” 23 Iâ-so͘ koh tùi chèng-lâng kóng, “Beh tè góa ê lâng, tio̍h hó͘-tēng ka-kī, ta̍k ji̍t giâ ka-kī ê si̍p-jī-kè lâi tè góa. 24 In-ūi beh kiù ka-kī ê sìⁿ-miā ê, ōe sòng-sit sìⁿ-miā; ūi-tio̍h góa ê iân-kò͘ sòng-sit ka-kī ê sìⁿ-miā ê, i ōe kiù-tio̍h sìⁿ-miā. 25 Lâng tit-tio̍h choân sè-kài soah sòng-sit ka-kī, á-sī húi-bia̍t ka-kī, ū sím-mi̍h lī-ek? 26 Tùi góa kap góa ê ōe kám-kak kiàn-siàu ê lâng, Jîn-chú tī I ka-kī kap Pē í-ki̍p sèng thiⁿ-sài ê êng-kng tiong lâi-lîm ê sî, mā ōe in-ūi chit-ê lâng kám-kak kiàn-siàu. 27 Góa si̍t-chāi kā lín kóng, khiā tī chia ê lâng, ū-ê iáu-bē sí í-chêng ōe khòaⁿ-kìⁿ Siōng-tè-kok.” 28 Chiah-ê ōe kóng liáu, chha-put-to poeh ji̍t āu, Iâ-so͘ chhōa [Pí-tek], [Iok-hān], kap [Ngá-kok] chiūⁿ-soaⁿ khì kî-tó. 29 I teh kî-tó ê sî, bīn-māu kái-piàn, I ê saⁿ piàn-kah pe̍h-siak-siak. 30 Hut-jiân-kan, ū nn̄g ê lâng, chiū-sī [Mô͘-se] kap [Í-lī-a], lâi kap Iâ-so͘ kóng-ōe. 31 In tī êng-kng tiong chhut-hiān, tâm-lūn Iâ-so͘ teh-beh tī [Iâ-lō͘-sat-léng] sí lâi oân-sêng sú-bēng ê sū. 32 [Pí-tek] kap i ê tâng-phōaⁿ thiám-kah khùn-khì. In chi̍t-ē chhíⁿ, khòaⁿ-kìⁿ Iâ-so͘ ê êng-kng í-ki̍p kap I khiā chòe-hé hit nn̄g ê lâng. 33 In teh-beh lī-khui Iâ-so͘ ê sî, [Pí-tek] kā Iâ-so͘ kóng, “Lāu-su, lán tī chia chin hó, goán lâi tah saⁿ keng liâu-á, chi̍t keng hō͘ lí, chi̍t keng hō͘ [Mô͘-se], chi̍t keng hō͘ [Í-lī-a].” I m̄-chai ka-kī teh kóng sím-mi̍h. 34 I teh kóng chiah-ê ōe ê sî, ū chi̍t phìⁿ hûn lâi, kā in tà-teh; in hō͘ hûn pau-ûi ê sî, khí kiaⁿ-hiâⁿ. 35 Ū siaⁿ tùi hûn chhut-lâi kóng, “Chit-ê sī góa ê Kiáⁿ, góa só͘ kéng-soán ê, lín tio̍h thiaⁿ-thàn I.” 36 Hit-ê siaⁿ kóng liáu, kan-ta chhun Iâ-so͘ chi̍t ê tī hia. Ū chi̍t tōaⁿ sî-kan, bûn-tô͘ lóng tiām-tiām, bô kā lâng kóng-khí in só͘ khòaⁿ-kìⁿ ê tāi-chì. 37 Keh-ji̍t, in tùi soaⁿ-téng lo̍h-lâi ê sî, ū kui tōa-tīn lâng lâi gêng-chiap Iâ-so͘. 38 Hit sî, kûn-chiòng ê tiong-kan ū chi̍t ê lâng hoah kóng, “Sian-siⁿ, góa chit-ê hāu-siⁿ kiû lí kā i khòaⁿ-chi̍t-è, i sī góa ê ko͘-kiáⁿ. 39 Kúi chi̍t-ē hū-sin, i sûi-sî loān hoah. Kúi hō͘ i thiu-chhoah, phū pe̍h-pho-nōa, koh kā i siong-hāi, lóng m̄ pàng i soah. 40 Góa ū chhiáⁿ lí ê bûn-tô͘ kā kúi kóaⁿ chhut-khì, in lóng bô hoat-tō͘.” 41 Iâ-so͘ ìn i kóng, “Ài à, m̄-sìn koh hú-pāi ê sè-tāi! Góa tio̍h kap lín tòa jōa kú? Góa tio̍h jím-nāi lín jōa kú? Kā lí ê hāu-siⁿ chhōa lâi chia!” 42 I hō͘ lâng chhōa lâi ê sî, kúi kā i siak-tó, hō͘ i thiu-chhoah. Iâ-so͘ chiū chek-pī siâ-sîn, i-hó hit-ê gín-á, chiong i kau hō͘ lāu-pē. 43 Chèng-lâng tùi Siōng-tè úi-tāi ê koân-lêng kám-kak chin tio̍h-kiaⁿ. Chèng-lâng tùi Iâ-so͘ só͘ chòe it-chhè ê tāi-chì iáu teh tio̍h-kiaⁿ ê sî, Iâ-so͘ tùi I ê bûn-tô͘ kóng, 44 “Chiah-ê ōe lín tio̍h chù-ì thiaⁿ: Jîn-chú teh-beh hō͘ lâng chhut-bōe kau tī lâng ê chhiú-thâu.” 45 Put-kò bûn-tô͘ bô bêng-pe̍k chit kù ōe, in-ūi ì-sù ū tùi in khàm khí-lâi hō͘ in bōe liáu-kái, in mā m̄-káⁿ mn̄g Iâ-so͘ chit kù ōe ê ì-sù. 46 Bûn-tô͘ hō͘-siōng cheng-lūn sím-mi̍h lâng siōng-tōa. 47 Iâ-so͘ chai in sim-lāi teh cheng-lūn sím-mi̍h, chiū khan chi̍t ê gín-á lâi khiā tī I sin-piⁿ, 48 jiân-āu kā in kóng, “Bô-lūn sím-mi̍h lâng ūi-tio̍h góa ê miâ chiap-la̍p chit-ê gín-á, chiū-sī chiap-la̍p góa; chiap-la̍p góa ê chiū-sī chiap-la̍p chhe góa lâi Hit-ūi. Lín chèng-lâng tiong-kan siōng-sòe-ê chiū-sī siōng-tōa.” 49 [Iok-hān] kóng, “Lāu-su, goán ū khòaⁿ-tio̍h chi̍t ê lâng hōng lí ê miâ kóaⁿ-kúi, goán kā i chó͘-tòng, in-ūi i bô kap goán tè lí.” 50 Iâ-so͘ kā i kóng, “M̄-thang kā i chó͘-tòng, in-ūi bô hoán-tùi lín ê chiū-sī ūi lín.” 51 Iâ-so͘ siū chiap chiūⁿ-thiⁿ ê ji̍t-chí teh-beh kàu, chiū koat-ì beh khì [Iâ-lō͘-sat-léng]. 52 I chhe-phài sù-chiá tāi-seng khì. In ji̍p-khì [Sat-má-lī-a]-lâng ê chng-thâu, ūi-tio̍h Iâ-so͘ chún-pī. 53 Hit só͘-chāi ê lâng bô hoan-gêng Iâ-so͘, in-ūi I beh khì [Iâ-lō͘-sat-léng]. 54 I ê bûn-tô͘ [Ngá-kok] kap [Iok-hān] khòaⁿ-tio̍h, chiū kóng, “Chú ah, goán tùi thiⁿ-téng kiò hé lo̍h-lâi kā in húi-bia̍t hó bô?” 55 Iâ-so͘ oa̍t kè-lâi, kā in chek-pī. 56 In chiū khì pa̍t ê chng-thâu. 57 In tī lō͘-tiong ê sî, ū chi̍t ê lâng tùi Iâ-so͘ kóng, “Lí bô-lūn khì tó-ūi, góa lóng beh tè lí.” 58 Iâ-so͘ kā i kóng, “Hô͘-lî ū khang, khong-tiong ê chiáu ū siū, put-kò Jîn-chú liân khòa thâu-khak ê só͘-chāi to bô.” 59 Iâ-so͘ koh tùi lēng-gōa chi̍t ê lâng kóng, “Lâi tè góa!” Hit-ê lâng ìn kóng, “Chú ah, hō͘ góa seng tńg-khì bâi-chòng góa ê lāu-pē.” 60 Iâ-so͘ ìn kóng, “Hō͘ sí-lâng khì bâi-chòng in ka-kī ê sí-lâng. Put-kò, lí tio̍h khì soan-káng Siōng-tè-kok ê hok-im.” 61 Koh ū chi̍t ê lâng kóng, “Chú ah, góa beh tè lí; put-kò hō͘ góa tāi-seng tńg-khì chhù-ni̍h kap ke-lāi ê lâng saⁿ-sî.” 62 Iâ-so͘ tùi i kóng, “Chhiú hōaⁿ tī lôe-bé iáu ti̍t-ti̍t oa̍t-thâu khòaⁿ āu-bīn ê lâng bô sek-ha̍p Siōng-tè-kok.”

Lō͘-ka 10

1 Chiah-ê tāi-chì liáu-āu, Chú lēng-gōa kéng chhit-cha̍p-jī lâng, chhe in nn̄g-ê nn̄g-ê seng khì I pún-sin siūⁿ-beh khì ê ta̍k ê siâⁿ ta̍k ê só͘-chāi. 2 Iâ-so͘ kā in kóng, “Thang siu-sêng ê chin chōe, chòe-kang ê lâng chin chió. Só͘-í, lín tio̍h kî-kiû koán siu-sêng ê chú-lâng phài kang-lâng khì siu-sêng. 3 Khì! Góa chhe lín chhut-khì, chhin-chhiūⁿ sàng iûⁿ-á ji̍p-khì chhâi-lông ê lāi-bīn. 4 M̄-thang tòa chîⁿ-tē, m̄-thang tòa lú-hêng-tē, mā m̄-thang tòa ôe, tī lō͘-ni̍h m̄-thang kā lâng chhéng-an. 5 Lín bô-lūn ji̍p-khì tó chi̍t keng chhù, tio̍h tāi-seng kóng ‘Goān lín chit ke pêng-an!’ 6 Tī hia nā ū ài pêng-an ê lâng, lín ê pêng-an ōe lâu tī in hia; nā bô, hit-ê pêng-an ōe tò-tńg-lâi kui lín. 7 Lín tio̍h tiàm hit-ê ke. In chún-pī sím-mi̍h, lín chiū chia̍h sím-mi̍h, lim sím-mi̍h, in-ūi chòe-kang ê lâng eng-kai tit-tio̍h kang-chîⁿ. Lín m̄-thang tùi chit ke sóa kè hit ke. 8 Lín bô-lūn ji̍p-khì tó chi̍t ê siâⁿ, lâng nā chiap-thāi lín, phâng sím-mi̍h chhut-lâi, lín chiū chia̍h sím-mi̍h. 9 Siâⁿ-lāi ū pīⁿ ê lâng tio̍h kā in i, sòa kā in kóng, ‘Siōng-tè-kok teh-beh si̍t-hiān lah.’ 10 “Bô-lūn ji̍p-khì tó chi̍t ê siâⁿ, lâng nā bô hoan-gêng lín, lín tio̍h chhut-khì tōa koe-lō͘ kóng, 11 ‘Liân lín chit-ê siâⁿ tiâu tī goán kha ê thô͘-hún, goán to beh pōaⁿ-tiāu kā lín kéng-kò; put-kò lín tio̍h chai Siōng-tè-kok teh-beh si̍t-hiān lah.’ 12 Góa kā lín kóng, tī Sím-phòaⁿ ê Ji̍t, [Só͘-to-má] tio̍h siū ê hêng-hoa̍t ōe pí hit-ê siâⁿ tio̍h siū ê khah hó jím-siū.” 13 “[Ko-lia̍p-sìn], lí chhám à! [Pek-sài-tāi], lí chhám à! Góa tī lín tiong-kan kiâⁿ ê sîn-jiah nā tī [Thài-ní] kap [Se-tùn] kiâⁿ, in chá chiū chhēng môa-saⁿ, chē tī hé-hu téng hóe-kái lah. 14 Tī Sím-phòaⁿ ê sî, [Thài-ní] kap [Se-tùn] tio̍h siū ê hêng-hoa̍t ōe pí lín tio̍h siū ê khah hó jím-siū. 15 Lí leh, [Ka-pek-lông], Lí ài lâng kā lí hû chiūⁿ-thiⁿ sī-bô? Bōe, Siōng-tè ōe kā lí hiat-lo̍h im-kan! 16 “Thiaⁿ-thàn lín ê lâng chiū-sī thiaⁿ-thàn góa, kū-choa̍t lín ê lâng chiū-sī kū-choa̍t góa; kū-choa̍t góa ê lâng chiū-sī kū-choa̍t chhe góa lâi Hit-ūi.” 17 Hit chhit-cha̍p-jī lâng hoaⁿ-hoaⁿ hí-hí tò-lâi, pò-kò kóng, “Chú ah, goán hōng lí ê miâ bēng-lēng, liân kúi to ho̍k-chiông goán!” 18 Iâ-so͘ kā in kóng, “Góa ū khòaⁿ-kìⁿ Sat-tàn chhin-chhiūⁿ sih-nà tùi thiⁿ-téng siak lo̍h-lâi. 19 Tio̍h chai, góa ū sù lín koân-pèng thang ta̍h chôa kap giat-á-thâng, koh thang chè-ho̍k tùi-te̍k it-chhè ê lêng-le̍k; bô chi̍t hāng ōe kā lín siong-hāi. 20 Put-kò, m̄-thang in-ūi chiah-ê siâ-sîn hâng-ho̍k lín, lín chiū hoaⁿ-hí; tio̍h in-ūi lín ê miâ kì-chài tī thiⁿ-téng lâi hoaⁿ-hí.” 21 Hit sî, Iâ-so͘ hō͘ Sèng Sîn kám-tōng móa-sim hoaⁿ-hí, kóng, “Pē ah, thiⁿ-tōe ê Chú, góa kám-siā lí, in-ūi lí ū chiong chiah-ê sū tùi ū tì-hūi ū ha̍k-būn ê lâng khàm khí-lâi, tùi sòe-hàn gín-á khé-sī. Pē ah, sī lah, in-ūi che sī lí ê hó chí-ì. 22 “Góa ê Pē í-keng ū chiong it-chhè lóng kau-thok góa. Pē í-gōa bô-lâng bat Kiáⁿ sī sím-mi̍h lâng; Kiáⁿ kap Kiáⁿ ài-beh khé-sī ê lâng í-gōa mā bô-lâng bat Pē sī sím-mi̍h lâng.” 23 Iâ-so͘ oa̍t tńg-sin su-hā tùi bûn-tô͘ kóng, “Ū ba̍k-chiu thang khòaⁿ lín só͘ khòaⁿ-kìⁿ ê lâng chin ū hok-khì! 24 Góa kā lín kóng, í-chêng ū chin chōe sian-ti kap kun-ông ài khòaⁿ lín só͘ khòaⁿ-kìⁿ ê ia̍h bô khòaⁿ-tio̍h; ài thiaⁿ lín só͘ thiaⁿ-kìⁿ ê ia̍h bô thiaⁿ-tio̍h.” 25 Ū chi̍t ê Lu̍t-hoat-kàu-su khiā khí-lâi chhì-thàm Iâ-so͘, kóng, “Lāu-su, góa tio̍h chòe sím-mi̍h chiah ōe tit-tio̍h éng-oán ê oa̍h-miā?” 26 Iâ-so͘ ìn i kóng, “Lu̍t-hoat ū siá sím-mi̍h? Lí án-chóaⁿ liáu-kái?” 27 Hit-ê lâng ìn kóng, “Lí tio̍h choân-sim, choân-chêng, choân-le̍k, choân-ì thiàⁿ Chú --- lí ê Siōng-tè; koh tio̍h thiàⁿ chhù-piⁿ chhin-chhiūⁿ thiàⁿ ka-kī.” 28 Iâ-so͘ kā i kóng, “Lí ìn liáu chin tio̍h. Chiàu án-ni khì chòe chiū ōe tit-tio̍h oa̍h-miā.” 29 Hit-ê Lu̍t-hoat-kàu-su ūi-tio̍h beh piáu-bêng ka-kī sī tio̍h, chiū koh mn̄g Iâ-so͘, “Sím-mi̍h lâng sī góa ê chhù-piⁿ?” 30 Iâ-so͘ ìn kóng, “Ū chi̍t ê lâng tùi [Iâ-lō͘-sat-léng] lo̍h-khì [Iâ-lī-ko], tú-tio̍h kiông-tō; in pak i ê saⁿ, koh kā i phah kàu pòaⁿ-sí, jiân-āu kā i pàng hē-teh, chòe in khì. 31 Tú-hó ū chi̍t ê chè-si tùi hit tiâu lō͘ lo̍h-lâi, khòaⁿ-tio̍h hit-ê lâng chiū siám tùi lō͘ ê hit pêng kè-khì. 32 Siâng-khoán, ū chi̍t ê [Lī-bī]-lâng lâi-kàu hit-ê só͘-chāi, khòaⁿ-tio̍h hit-ê lâng mā siám tùi lō͘ ê hit pêng kè-khì. 33 Chóng-sī, ū chi̍t ê [Sat-má-lī-a]-lâng tùi hia keng-kè, chi̍t-ē khòaⁿ-tio̍h hit-ê lâng chiū khó-lîn i, kiâⁿ óa-khì, 34 ēng iû kap chiú boah i ê khang-chhùi, koh ēng pò͘ kā i pau-chat, jiân-āu kā i hû khì khiâ ka-kī ê lû-á, chhōa i khì lú-koán, kā i chiàu-kò͘. 35 Keh-ji̍t, i the̍h nn̄g ê gûn-á kau hō͘ lú-koán ê thâu-ke, kau-tài kóng, ‘Chhiáⁿ lí chiàu-kò͘ chit-ê lâng, nā só͘-hùi tio̍h khah chōe, góa tò-lâi ê sî ōe pó͘ lí.’ ” 36 Iâ-so͘ mn̄g hit-ê Lu̍t-hoat-kàu-su, “Lí siūⁿ, chit saⁿ ê lâng tó chi̍t ê sī hō͘ kiông-tō chhiúⁿ hit-ê lâng ê chhù-piⁿ?” 37 I ìn kóng, “Kā i lîn-bín hit-ê.” Iâ-so͘ kā i kóng, “Lí khì, chiàu án-ni khì chòe.” 38 Iâ-so͘ kap bûn-tô͘ kè-sio̍k kiâⁿ. Iâ-so͘ ji̍p-khì chi̍t ê chng-thâu, ū chi̍t ê hū-jîn-lâng, kiò-chòe [Má-tāi], kā I chiap-thāi. 39 [Má-tāi] ū chi̍t ê sió-bē, kiò-chòe [Má-lī-a], chē tī Chú ê kha-chêng thiaⁿ I ê kà-sī. 40 [Má-tāi] ūi-tio̍h chiap-thāi, tāi-chì chōe sim ak-chak, chiū lâi kā Iâ-so͘ kóng, “Chú ah, góa ê sió-bē pàng góa ka-kī chi̍t ê teh bong, lí ná bô iàu-kín? Kiò i lâi kā góa tàu kha-chhiú.” 41 Chú ìn i kóng, “[Má-tāi], [Má-tāi], lí ūi-tio̍h tāi-chì chōe teh khòa-lū chhau-hoân; 42 só͘ su-iàu ê chí-ū chi̍t hāng. [Má-lī-a] í-keng kéng-tio̍h siōng-hó hit hūn, bô-lâng ōe-tàng kā i chhiúⁿ-khì.”

Lō͘-ka 11

1 Ū chi̍t piàn, Iâ-so͘ tī chi̍t ê só͘-chāi teh kî-tó. I kî-tó soah ê sî, ū chi̍t ê bûn-tô͘ kā I kóng, “Chú ah, [Iok-hān] ū kà i ê bûn-tô͘ kî-tó, chhiáⁿ lī mā kà goán kî-tó.” 2 Iâ-so͘ kā in kóng, “Lín kî-tó ê sî, tio̍h án-ni kóng: Pē ah, goān lí ê sèng-miâ siū chun-chông. Goān lí si-hêng chú-koân. 3 Kiû lí ta̍k ji̍t sù goán su-iàu ê chia̍h-mi̍h. 4 Kiû lí sià-bián goán ê chōe, in-ūi goán ka-kī mā ū sià-bián só͘-ū ko͘-hū goán ê lâng. Kiû lí m̄-thang hō͘ goán hām-lo̍h tam-tng bōe-khí ê chhì-thàm.” 5 Iâ-so͘ koh tùi I ê bûn-tô͘ kóng, “Lín tiong-kan ū sím-mi̍h lâng pòaⁿ-mî khì pêng-iú hia, kā i kóng, ‘Pêng-iú, chhiáⁿ lí chioh góa saⁿ tè piáⁿ, 6 in-ūi góa ū chi̍t ê pêng-iú lú-hêng lâi-kàu goán chia, góa bô mi̍h-kiāⁿ thang chhiáⁿ i.’ 7 Lí ê pêng-iú ōe tùi chhù-lāi ìn kóng, ‘Mài kā góa chhá, mn̂g í-keng koaiⁿ, góa kap gín-á tī bîn-chhn̂g teh khùn lah, bōe-tàng khí-lâi the̍h hō͘ lí.’ 8 Góa kā lí kóng, sui-jiân hit-ê lâng bōe in-ūi i sī pêng-iú khí-lâi the̍h piáⁿ hō͘ i, mā ōe in-ūi i pek-chhiat khún-kiû, khí-lâi the̍h só͘ su-iàu ê mi̍h hō͘ i. 9 “Só͘-í, góa kā lín kóng: Kiû, ōe tit-tio̍h; chhē, ōe chhē-tio̍h; phah-mn̂g, ōe kā lín khui. 10 In-ūi kiû ê, chiū tit-tio̍h; chhē ê, chiū chhē-tio̍h; phah-mn̂g ê, chiū kā i khui. 11 Lín tiong-kan choh lāu-pē ê, ka-kī ê kiáⁿ kā lín thó hî, kiám ōe lia̍h chôa hō͘ i? 12 á-sī kā lín thó nn̄g, kiám ōe lia̍h giat-á-thâng hō͘ i? 13 Lín sui-jiân pháiⁿ, iáu-kú ōe-hiáu the̍h hó-mi̍h hō͘ ka-kī ê kiáⁿ-jî, hô-hòng lín ê Thiⁿ-pē, I it-tēng ōe chiong Sèng Sîn sù hō͘ tùi I kî-kiû ê lâng!” 14 Iâ-so͘ kóaⁿ chi̍t ê é-káu-kúi; kúi chi̍t-ē chhut-khì, hit-ê bōe-kóng-ōe ê lâng chiū kóng-ōe, kûn-chiòng lóng tio̍h-kiaⁿ. 15 M̄-kú, kî-tiong ū lâng kóng, “I khò kúi-ông Pia̍t-se-pok kóaⁿ-kúi.” 16 Koh ū chi̍t-kóa lâng beh chhì-thàm Iâ-so͘, it-ti̍t iau-kiû I kiâⁿ tùi thiⁿ lâi ê sîn-jiah. 17 Iâ-so͘ chai-iáⁿ in teh siūⁿ sím-mi̍h, chiū kā in kóng, “Kok-ka ka-kī hun-cheng, ōe hong-hòe; ka-têng ka-kī hun-cheng, ōe tó-hoāi. 18 Sat-tàn nā ka-kī hun-cheng, Sat-tàn ê kok ná khiā ōe-tiâu? Lín kóng góa sī óa-khò Pia̍t-se-pok kóaⁿ-kúi. 19 Góa nā khò Pia̍t-se-pok kóaⁿ-kúi, lín ê chú-tē sī khò sím-mi̍h lâng kóaⁿ-kúi? Án-ni, lín ka-kī ê chú-tē ōe kā lín phòaⁿ-chōe. 20 Put-kò góa nā-sī khò Siōng-tè ê khùi-la̍t teh kóaⁿ-kúi, Siōng-tè ê chú-koân chiū í-keng si̍t-hiān tī lín tiong-kan. 21 “Ióng-sū bú-chong choân-pī kò͘-siú ka-kī ê chhù, i ê châi-bu̍t chiū an-choân. 22 M̄-kú ū chi̍t ê pí i khah ióng ê lâng lâi kong-kek, phah-iâⁿ, chiū chiong i só͘ óa-khò ê bú-khì chhiúⁿ-khì, koh chiong só͘ chhiúⁿ ê châi-bu̍t pun liáu-liáu. 23 “Bô ūi góa ê chiū-sī hoán-tùi góa; bô kap góa chòe-hé siu-chi̍p ê chiū-sī teh phah-sòaⁿ.” 24 “Siâ-sîn lī-khui só͘ hū-sin ê lâng liáu-āu tī bô-chúi ê tōe-khu kiâⁿ thàu-thàu, beh chhē chi̍t ê hioh-khùn ê só͘-chāi, chhē lóng bô, chiū kóng, ‘Góa beh tńg-lâi-khì góa chhut-lâi hit keng chhù.’ 25 I tńg-khì, khòaⁿ-tio̍h chhù-lāi sàu-kah chin chheng-khì, koh chéng-lí hó-sè. 26 Āu-lâi, i khì chhōa chhit ê pí i khah pháiⁿ ê siâ-sîn lâi, ji̍p-khì hia tòa. Án-ni, hit-ê lâng ê kiat-kio̍k pí khí-thâu koh-khah chhám.” 27 Iâ-so͘ teh kóng chiah-ê ōe ê sî, kûn-chiòng lāi-bīn ū chi̍t ê hū-jîn-lâng tōa-siaⁿ tùi Iâ-so͘ kóng, “Siⁿ lí, hō͘ lí suh-lin ê hū-jîn-lâng chin ū hok-khì!” 28 Put-kò Iâ-so͘ ìn kóng, “Thiaⁿ Siōng-tè ê ōe koh chun-siú ê lâng koh-khah ū hok-khì!” 29 Kûn-chiòng jú-lâi jú-chōe, Iâ-so͘ chiū kóng, “Chit sè-tāi chin-chiàⁿ sī siâ-ok ê sè-tāi! In kiû sîn-jiah, tû-liáu [Iok-ná] ê sîn-jiah, bōe-koh ū sîn-jiah hō͘ in. 30 Tú chhin-chhiūⁿ [Iok-ná] chiâⁿ-chòe [Nî-nî-bî]-lâng ê sîn-jiah, Jîn-chú mā beh chiâⁿ-chòe chit sè-tāi ê lâng ê sîn-jiah. 31 Tī Sím-phòaⁿ ê sî, Lâm-hng ê lú-ông ōe kap chit sè-tāi ê lâng chòe-hé khí-lâi kā in tēng-chōe, in-ūi i ū tùi tōe ê ke̍k-thâu lâi thiaⁿ [Só͘-lô-bûn] tì-hūi ê ōe. Lín khòaⁿ, ū pí [Só͘-lô-bûn] koh-khah úi-tāi ê tī chia! 32 Tī Sím-phòaⁿ ê sî, [Nî-nî-bî]-lâng ōe kap chit sè-tāi ê lâng chòe-hé khí-lâi kā in tēng-chōe, in-ūi [Nî-nî-bî]-lâng thiaⁿ [Iok-ná] ê thoân-tō liáu-āu lóng hóe-kái. Lín khòaⁿ, ū pí [Iok-ná] koh-khah úi-tāi ê tī chia!” 33 “Bô-lâng tiám-teng hē tī lâng khòaⁿ bōe-tio̍h ê só͘-chāi, á-sī khàm tī táu-ē; it-tēng sī hē tī teng-tâi téng, thang hō͘ ji̍p-lâi ê lâng khòaⁿ-tio̍h kng. 34 Lí ê ba̍k-chiu sī seng-khu ê teng. Lí ê ba̍k-chiu nā kim, kui seng-khu chiū kng-bêng; lí ê ba̍k-chiu nā hoe, kui seng-khu chiū o͘-àm. 35 Só͘-í, tio̍h sió-sim, m̄-thang hō͘ lí lāi-bīn ê kng pìⁿ-chòe àm. 36 Lí kui seng-khu nā lóng kng-bêng, liân chi̍t-tiám-á o͘-àm to bô, chiū ōe chhin-chhiūⁿ teng kng-iàⁿ-iàⁿ teh kā lí chiò, oân-choân kng-bêng.” 37 Iâ-so͘ teh kóng chiah-ê ōe ê sî, ū chi̍t ê [Hoat-lī-sài-phài] ê lâng chhiáⁿ I chia̍h-pn̄g, I chiū ji̍p-khì chē-toh. 38 Hit-ê [Hoat-lī-sài-lâng] khòaⁿ-tio̍h I chia̍h-pn̄g bô seng sóe-chhiú, kám-kak chin kî-koài. 39 Chú chiū kā i kóng, “Lín [Hoat-lī-sài]-lâng chí-ū chiong poe kap pôaⁿ ê gōa-bīn sóe chheng-khì, m̄-kú lín ê lāi-bīn chhiong-móa tham-io̍k kap siâ-ok! 40 Lín chiah-ê gōng-lâng! Hit-ūi chhòng-chō gōa-bīn ê Siōng-tè kiám m̄-sī mā ū chhòng-chō lāi-bīn? 41 Tio̍h the̍h poe kap pôaⁿ lāi-bīn ê mi̍h-kiāⁿ khì chín-chè, án-ni lín ê it-chhè chiū lóng chheng-khì. 42 “Lín chiah-ê [Hoat-lī-sài-lâng] chhám à! In-ūi lín chiong po̍k-hô, ûn-hiong, kap ta̍k khoán chhài-soe hōng-hiàn cha̍p-hūn-chi̍t hō͘ Siōng-tè, m̄-kú bô tiōng-sī kong-gī kap thiàⁿ Siōng-tè. Kî-si̍t chiah-ê chiah-sī lín eng-kai si̍t-hêng ê, kî-tha ê mā m̄-thang hut-lio̍k. 43 “Lín chiah-ê [Hoat-lī-sài-lâng] chhám à! In-ūi lín ài tī hōe-tn̂g lāi chē tōa-ūi, tī chhī-tiûⁿ-kháu hō͘ lâng kā lín chhéng-an. 44 Lín chhám à! In-ūi lín chhin-chhiūⁿ khòaⁿ bōe-chhut ê bōng, lâng tùi téng-bīn kiâⁿ-kè mā m̄-chai.” 45 Ū chi̍t ê Lu̍t-hoat-kàu-su kā Iâ-so͘ kóng, “Lāu-su, lí kóng chiah-ê ōe mā-sī teh bú-jio̍k goán!” 46 Iâ-so͘ ìn i kóng, “Liân lín chiah-ê Lu̍t-hoat-kàu-su mā chhám à! In-ūi lín chiong taⁿ bô-hoat ê tāng-tàⁿ hō͘ lâng taⁿ, ka-kī liân chi̍t ki chńg-thâu-á to m̄-khéng tín-tāng lâi kiám-khin in ê tāng-tàⁿ. 47 Lín chhám à! Lín ê chó͘-sian thâi-sí hiah-ê sian-ti, lín kā in chō bōng. 48 Án-ni, lín ka-kī chèng-si̍t, mā chàn-sêng chó͘-sian só͘ chòe ê tāi-chì, in-ūi in thâi-sí sian-ti, lín kā in chō bōng. 49 Só͘-í, Siōng-tè ê Tì-hūi mā ū kóng, ‘Góa beh chhe sian-ti kap sù-tô͘ khì in hia, kî-tiong ū-ê ōe hō͘ in thâi-sí, ū-ê ōe hō͘ in pek-hāi.’ 50 Án-ni, tùi chhòng-chō thiⁿ-tōe í-lâi, chiū-sī tùi [A-pek] khí ti̍t-kàu tī chè-tôaⁿ kap sèng-só͘ ê tiong-kan hō͘ lâng sat-hāi ê [Sat-ka-lī-a] ûi-chí, in só͘ lâu ê huih, chit sè-tāi ê lâng lóng tio̍h hêng. Tio̍h, góa kā lín kóng, hiah-ê chè lóng ōe kā lín chit sè-tāi ê lâng thó. 52 “Lín chiah-ê Lu̍t-hoat-kàu-su chhám à! In-ūi lín chiong khui tì-sek ê mn̂g ê só-sî kā lâng the̍h cháu, ka-kī m̄ ji̍p-khì, beh ji̍p-khì ê lâng, lín soah kā in chó͘-tòng!” 53 Iâ-so͘ tùi hia chhut-lâi ê sî, keng-ha̍k-kàu-su kap [Hoat-lī-sài-lâng] chiū ke̍k-lia̍t kā I kong-kek, pek I kóng khah chōe ōe, 54 tng-tán I kóng m̄-tio̍h, thang lia̍h I ê ōe-phāng.

Lō͘-ka 12

1 Hit sî, ū kúi-nā chheng lâng khoeh chòe-hé, tì-kàu hō͘-siōng thún-ta̍h. Iâ-so͘ chiū seng tùi I ê bûn-tô͘ kóng, “Tio̍h tî-hông [Hoat-lī-sài-phài] ê lâng ê kàⁿ-bú, chiū-sī ké-hó. 2 Bô chi̍t hāng khàm-ba̍t ê sū bōe lō͘-hiān; mā bô chi̍t hāng pì-bi̍t ê sū bōe hō͘ lâng chai. 3 Só͘-í, lín tī àm-tiong kóng ê, ōe tī kng-bêng tiong hō͘ lâng thiaⁿ-tio̍h; lín tī pâng-keng lāi hīⁿ-khang piⁿ kóng ê, ōe hō͘ lâng tī chhù-bé téng kong-khai soan-pò͘.” 4 “Pêng-iú, góa kā lín kóng, hāi-sí lín ê seng-khu liáu-āu, bōe-tàng koh tùi lín chòe sím-mi̍h ê, m̄-bián kiaⁿ. 5 Góa beh chí-sī lín eng-kai kiaⁿ ê sī tó chi̍t ūi. Lín eng-kai kiaⁿ Siōng-tè; I hō͘ lâng sí liáu-āu, iáu ū koân thang kā lâng hiat-lo̍h tōe-ge̍k. Sī! góa kā lín kóng, tio̍h kiaⁿ Chit-ūi! 6 “Gō͘ chiah chhek-chiáu-á kiám m̄-sī bōe nn̄g kak gûn nā-tiāⁿ? Siōng-tè liân chi̍t chiah to bô bōe kì-tit. 7 Liân lín ê thâu-mn̂g to lóng ū sǹg kè. M̄-bián kiaⁿ! Lín pí kui-kûn chhek-chiáu-á koh-khah kùi-tiōng!” 8 “Góa kā lín kóng, tī lâng ê bīn-chêng soan-jīn góa ê, Jîn-chú tī Siōng-tè ê thiⁿ-sài bīn-chêng mā ōe jīn i. 9 M̄-kú tī lâng ê bīn-chêng m̄-jīn góa ê, Jîn-chú tī Siōng-tè ê thiⁿ-sài bīn-chêng mā m̄-jīn i. 10 “Bô-lūn sím-mi̍h lâng kóng-ōe te̍k-tùi Jîn-chú, ōe tit-tio̍h sià-bián. M̄-kú siat-to̍k Sèng Sîn ê, bōe tit-tio̍h sià-bián. 11 “Lín hō͘ lâng lia̍h kàu hōe-tn̂g, tī thóng-tī-chiá á-sī koaⁿ-oân bīn-chêng ê sî, m̄-bián hoân-ló tio̍h án-chóaⁿ tap-piān, á-sī tio̍h kóng sím-mi̍h. 12 In-ūi hit-ê sî Sèng Sîn ōe kà lín tio̍h kóng sím-mi̍h.” 13 Chèng-lâng ê tiong-kan ū chi̍t ê lâng kā Iâ-so͘ kóng, “Lāu-su, chhiáⁿ lí kah góa ê hiaⁿ-tī kap góa pun ke-hé.” 14 Iâ-so͘ kā i kóng, “Lí chit-ê lâng, siáⁿ-lâng jīm-bēng góa chòe lín ê phòaⁿ-koaⁿ á-sī kong-chhin?” 15 I chiū tùi chèng-lâng kóng, “Tio̍h kín-sīn, tio̍h tî-hông ta̍k khoán ê tham-sim, in-ūi lâng ê sìⁿ-miā m̄-sī chāi tī châi-sán ê chōe-chió.” 16 Āu-lâi Iâ-so͘ ēng chi̍t ê phì-jū kā in kóng: “Ū chi̍t ê hó-gia̍h-lâng, i ê chhân-hn̂g tōa hong-siu. 17 I sim-lāi siūⁿ-lâi siūⁿ-khì, kóng, ‘Góa bô kàu só͘-chāi thang tún ngó͘-kok, taⁿ beh án-chóaⁿ?’ 18 I chiū kóng, ‘Góa tio̍h án-ni chòe. Góa beh kā chhng-khò͘ thiah khí-lâi koh khí khah tōa keng, thang lâi tún ngó͘-kok kap it-chhè ê châi-bu̍t, 19 jiân-āu tùi góa ka-kī kóng: ‘Eh, lí í-keng chek-chū chin chōe châi-bu̍t, ū kàu thang ēng chin chōe nî. Taⁿ chheng-êng lah, lâi lim, lâi chia̍h, lâi hióng-siū!’ 20 M̄-kú Siōng-tè kā i kóng, ‘Gōng-lâng! Kim-mî chiū beh siu-hôe lí ê sìⁿ-miā; lí só͘ chek-chū ê it-chhè beh lâu hō͘ siáⁿ-lâng?’ 21 Kâng-khoán, ūi-tio̍h ka-kī chek-chū châi-hù, bô hō͘ Siōng-tè khòaⁿ-chòe hó-gia̍h ê mā ōe án-ni.” 22 Iâ-so͘ koh tùi I ê bûn-tô͘ kóng, “Só͘-í góa kā lín kóng, m̄-thang ūi-tio̍h lín ê sìⁿ-miā beh chia̍h sím-mi̍h teh chhau-hoân; mā m̄-thang ūi-tio̍h lín ê seng-khu beh chhēng sím-mi̍h teh chhau-hoân. 23 In-ūi sìⁿ-miā pí chia̍h-mi̍h khah tiōng-iàu; seng-khu pí i-ho̍k khah tiōng-iàu. 24 Lín khòaⁿ o͘-a, in sui-jiân bô chèng-choh, bô siu-sêng, bô chhek-chhng mā bô chhng-khò͘, Siōng-tè mā teh kā in iúⁿ-chhī, lín kiám bô pí hiah-ê chiáu-á koh-khah kùi-tiōng! 25 Lín kiám ū lâng siūⁿ-kóng chhau-hoân ōe-tàng hō͘ ka-kī ê sìⁿ-miā ke oa̍h chi̍t-sî-á kú? 26 Kì-jiân liân chiah-ni̍h sòe-hāng tāi-chì to bô châi-tiāu chòe, ná-tio̍h ūi kî-tha ê sū chhau-hoân? 27 Lín khòaⁿ soaⁿ-iá ê hoe, in án-chóaⁿ teh tōa-châng? In bô lô-khó͘, mā bô pháng-chit. Put-kò góa kā lín kóng, liân [Só͘-lô-bûn] siōng êng-hôa ê sî chhēng ê saⁿ to bô pí chiah-ê hoe ê chi̍t lúi khah súi. 28 Soaⁿ-iá ê hoe-chháu kin-á-ji̍t teh oa̍h, bîn-á-chài hō͘ lâng hiat-lo̍h hé-lô͘, Siōng-tè to án-ni kā in chng-thāⁿ, I koh-khah ōe kā lín chng-thāⁿ! Lín ná chiah-ni̍h bô sìn-sim! 29 Só͘-í, lín m̄-thang kan-ta teh siūⁿ-beh chia̍h sím-mi̍h, lim sím-mi̍h; mā m̄-thang chhau-hoân. 30 Chiah-ê lóng sī chit sè-kan bô sìn ê lâng só͘ teh tui-kiû ê. Lín ê Pē chai lín ū su-iàu chiah-ê mi̍h-kiāⁿ. 31 Tian-tò tio̍h tāi-seng tui-kiû I chú-koân ê si̍t-hiān, chiah-ê mi̍h-kiāⁿ chiū lóng ōe sòa hō͘ lín.” 32 “Lín sòe-sòe ê iûⁿ-kûn ah, m̄-bián kiaⁿ, in-ūi lín ê Pē hoaⁿ-hí chiong I ê kok hō͘ lín. 33 Tio̍h bōe lín ê châi-sán lâi chín-chè sàn-chhiah-lâng. Tio̍h ūi-tio̍h lín ka-kī chún-pī ēng bōe phòa ê chîⁿ-tē lâi chek-chū ēng bōe liáu ê châi-pó tī thiⁿ-téng; tī hia chha̍t-á the̍h bōe-tio̍h, chiù-thâng mā kā bōe-tio̍h. 34 In-ūi lín ê châi-pó tī tó-ūi, lín ê sim mā ōe tī hia.” 35 “Saⁿ tio̍h chhēng hó-sè; teng tio̍h tiám hō͘ to̍h. 36 Tio̍h chhin-chhiūⁿ lô͘-po̍k teh thèng-hāu chú-lâng tùi hun-iàn tńg-lâi; chú-lâng tńg-lâi, chi̍t-ē phah-mn̂g thang sûi-sî kā i khui. 37 Chú-lâng tńg-lâi ê sî khòaⁿ-tio̍h lô͘-po̍k chhíⁿ-chhíⁿ, hiah-ê lô͘-po̍k chin ū hok-khì! Góa si̍t-chāi kā lín kóng, chú-lâng ōe ka-kī saⁿ chhēng hó-sè, chhiáⁿ in chē-toh, lâi kā in sū-hāu. 38 Chú-lâng nā tī pòaⁿ-mî á-sī thiⁿ-beh-kng ê sî tńg-lâi, khòaⁿ-tio̍h lô͘-po̍k chhíⁿ-chhíⁿ, hiah-ê lô͘-po̍k chin ū hok-khì! 39 Chit ke ê chú-lâng nā chai chha̍t-á sím-mi̍h sî-chūn ōe lâi, it-tēng bōe hō͘ chha̍t-á chhim-ji̍p i ê chhù. 40 Só͘-í, lín mā tio̍h chún-pī piān-piān, in-ūi Jîn-chú ōe tī lín siūⁿ bōe-kàu ê sî-chūn lâi-lîm.” 41 [Pí-tek] kóng, “Chú ah, lí chit-ê phì-jū sī tùi goán kóng, á-sī tùi chèng-lâng kóng?” 42 Chú kóng, “Sím-mi̍h lâng sī tiong-si̍t koh chhong-bêng ê koán-ke? Chiū-sī chú-lâng ōe kau-tài i koán-lí kî-tha ê lô͘-po̍k, chiàu-sî hun-phòe chia̍h-mi̍h hō͘ in ê hit-ê lâng. 43 I ê chú-lâng tńg-lâi ê sî, hō͘ i khòaⁿ-tio̍h ū chiàu án-ni chòe hit-ê lô͘-po̍k chin ū hok-khì! 44 Góa si̍t-chāi kā lín kóng, chú-lâng ōe phài chit-ê lô͘-po̍k koán-lí i lóng-chóng ê châi-sán. 45 Hit-ê lô͘-po̍k nā sim-lāi siūⁿ-kóng ‘Góa ê chú-lâng ōe khah bān tńg-lâi,’ chiū khí-chhiú phah kî-tha ê lô͘-po̍k lú-pī, ia̍h-chia̍h-ia̍h-lim, koh lim kàu chiú-chùi. 46 Hit-ê lô͘-po̍k ê chú-lâng ōe tī i bô àn-sǹg ê ji̍t, m̄-chai ê sî tńg-lâi. Chú-lâng ōe giâm-giâm kā i chhú-hoa̍t, kā i kap bô tiong-si̍t ê lâng khǹg chòe-tui. 47 “Lô͘-po̍k chai chú-lâng ê ì-sù khiok bô khì chún-pī, á-sī bô chiàu chú-lâng ê ì-sù khì chòe, i ōe hō͘ chú-lâng phah chin thiám. 48 Put-kò m̄-chai chú-lâng ê ì-sù khì chòe eng-kai siū chhú-hoa̍t ê tāi-chì hit-ê lô͘-po̍k ōe hō͘ chú-lâng phah khah khin. Hō͘ i khah chōe, chiū tùi i the̍h khah chōe; kau-tài i khah chōe, chiū tùi i iau-kiû khah chōe.” 49 “Góa lâi sī beh chiong hé hiat-lo̍h tōe-chiūⁿ, góa jōa-á-ni̍h ài hé í-keng to̍h khí-lâi! 50 Góa ū eng-kai siū ê sóe-lé; chit-ê sóe-lé iáu-bē siū í-chêng, góa si̍t-chāi chin kan-khó͘! 51 Lín siūⁿ-kóng góa lâi sī beh hō͘ tōe-chiūⁿ hô-pêng sī-bô? Góa kā lín kóng, m̄-sī, tian-tò sī hun-lia̍t. 52 Tùi taⁿ í-āu, chi̍t ke ū gō͘ ê lâng, in ōe hun-lia̍t, saⁿ ê tùi nn̄g ê, nn̄g ê tùi saⁿ ê. 53 In ōe hun-lia̍t, lāu-pē tùi hāu-siⁿ, hāu-siⁿ tùi lāu-pē; lāu-bú tùi cha-bó͘-kiáⁿ, cha-bó͘-kiáⁿ tùi lāu-bú; ta-ke tùi sim-pū, sim-pū tùi ta-ke.” 54 Iâ-so͘ koh kā chèng-lâng kóng, “Lín khòaⁿ-tio̍h hûn tùi sai-pêng khí-lâi ê sî, sûi-sî kóng ‘Teh-beh lo̍h-hō͘ lah’, kó-jiân chiū lo̍h-hō͘. 55 Thàu lâm-hong ê sî, lín kóng ‘Teh-beh sio-joa̍h lah’, chiū chin-chiàⁿ sio-joa̍h. 56 Ké-hó ê lâng, lín to ōe-hiáu phòaⁿ-toàn thiⁿ kap tōe ê kéng-siōng, ná bōe-hiáu phòaⁿ-toàn chit-ê sî-tāi?” 57 “Lín sī-án-chóaⁿ m̄ ka-kī phòaⁿ-toàn sím-mi̍h sī ha̍p-lí? 58 Lí kap khòng-kò lí ê lâng khì kìⁿ koaⁿ-tiúⁿ ê sî, tio̍h tī lō͘-tiong siat-hoat kap i hô-kái; nā bô, i ōe thoa lí khì kìⁿ phòaⁿ-koaⁿ, phòaⁿ-koaⁿ chiong lí kau hō͘ hoat-kéng, hoat-kéng chiū kā lí koaiⁿ-lo̍h kaⁿ. 59 Góa kā lí kóng, chòe-āu ê chi̍t-sián-gō͘-lî bô hêng chheng-chhó, lí choa̍t-tùi bōe-tàng tùi kaⁿ-ni̍h chhut-lâi.”

Lō͘-ka 13

1 Tú hit-ê sî, ū kúi-nā ê lâng lâi, tùi Iâ-so͘ kóng-khí [Pí-lia̍p-to] thâi-sí tī chè-tôaⁿ hiàn-chè ê [Ka-lī-lī]-lâng ê tāi-chì. 2 Iâ-so͘ ìn kóng, “In-ūi chiah-ê [Ka-lī-lī]-lâng siū chit khoán ê chai-lān, lín chiū siūⁿ-kóng in pí kî-tha ê [Ka-lī-lī]-lâng ū hoān khah tāng ê chōe sī-bô? 3 Góa kā lín kóng, m̄-sī, lín nā bô hóe-kái, lóng ōe chhin-chhiūⁿ in án-ni bia̍t-bông. 4 Kiám-chhái lín mā siūⁿ-kóng, [Se-lô-a] ê thah tó lo̍h-khì ê sî, hō͘ i teh-sí hit cha̍p-poeh ê lâng pí tòa tī [Iâ-lō͘-sat-léng] lóng-chóng ê lâng ū hoān khah tāng ê chōe. 5 Góa kā lín kóng, m̄-sī, lín nā bô hóe-kái, lóng ōe chhin-chhiūⁿ in án-ni bia̍t-bông.” 6 Āu-lâi, Iâ-so͘ kā in kóng chit-ê phì-jū. I kóng: “Ū chi̍t ê lâng tī i ê phû-tô-hn̂g chèng chi̍t châng bû-hoa-kó-chhiū. I lâi hit châng chhiū chhē ké-chí, m̄-kú khòaⁿ lóng bô. 7 I chiū tùi kò͘-hn̂g ê lâng kóng, ‘Lí khòaⁿ, góa liân-sòa saⁿ nî lâi chit châng bû-hoa-kó-chhiū chia chhē ké-chí, chhē lóng bô. Kā i chhò khí-lâi! Ná-tio̍h lâu-teh tìn só͘-chāi?’ 8 Hit-ê kò͘-hn̂g-ê ìn kóng, ‘Chú-lâng ah, koh kā i lâu chi̍t nî, góa lâi ku̍t sì-piⁿ ê thô͘, koh lo̍h-pûi; 9 mê-nî nā ū kiat ké-chí chiū hó, nā bô, chiah kā i chhò khí-lâi.’ ” 10 Ū chi̍t ê An-hioh-ji̍t, Iâ-so͘ tī chi̍t ê hōe-tn̂g lāi teh kà-sī lâng. 11 Ū chi̍t ê hū-jîn-lâng hō͘ siâ-sîn hū-sin, phòa-pīⁿ cha̍p-poeh nî, seng-khu oan-khiau chhun bōe-ti̍t. 12 Iâ-so͘ chi̍t-ē khòaⁿ-tio̍h, chiū kiò i lâi, kā i kóng, “Hū-jîn-lâng, lí ê pīⁿ í-keng hó lah!” 13 Iâ-so͘ ēng siang chhiú kā i hōaⁿ; i ê seng-khu sûi-sî chhun-ti̍t, chiū kui êng-kng hō͘ Siōng-tè. 14 Put-kò hōe-tn̂g ê chú-koán, in-ūi Iâ-so͘ tī An-hioh-ji̍t kā lâng i-pīⁿ, chiū chin siū-khì, tùi chèng-lâng kóng, “Lán ū la̍k ji̍t thang chòe-kang, beh i-pīⁿ tio̍h tī chit tiong-kan lâi i, m̄ eng-kai tī An-hioh-ji̍t.” 15 Chú ìn kóng, “Ké-hó ê lâng, lín ta̍k ê lâng kiám bô tī An-hioh-ji̍t tùi tiâu-ni̍h tháu gû á-sī lû, khan khì lim-chúi? 16 Chit-ê hū-jîn-lâng sī [A-pek-la-hán] ê kiáⁿ-sun, í-keng siū Sat-tàn sok-pa̍k cha̍p-poeh nî kú, tī An-hioh-ji̍t kā i tháu-pàng kiám m̄ eng-kai?” 17 Iâ-so͘ kóng chiah-ê ōe ê sî, I ê tùi-te̍k lóng kám-kak kiàn-siàu; só͘-ū ê kûn-chiòng in-ūi I só͘ chòe it-chhè kî-biāu ê tāi-chì lóng chin hoaⁿ-hí. 18 Iâ-so͘ kóng, “Siōng-tè-kok chhin-chhiūⁿ sím-mi̍h? Góa tio̍h ēng sím-mi̍h lâi pí-phēng? 19 Siōng-tè-kok chhin-chhiūⁿ chi̍t lia̍p kòa-chhài-chí, ū lâng the̍h-khì iā tī ka-kī ê hn̂g-ni̍h. Kòa-chhài chiām-chiām tōa-châng, chiâⁿ-chòe chhiū, khong-tiong ê chiáu-á mā tī chhiū-ki chòe siū.” 20 Iâ-so͘ koh kóng, “Góa beh ēng sím-mi̍h lâi pí-phēng Siōng-tè-kok? 21 Siōng-tè-kok chhin-chhiūⁿ kàⁿ-bú, ū chi̍t ê hū-jîn-lâng the̍h-khì lām tī saⁿ táu mī-hún chòe-hé chhiau, chòe-āu kui-ē lóng hoat khí-lâi.” 22 Iâ-so͘ keng-kè siâⁿ-chhī kap chng-kha khì [Iâ-lō͘-sat-léng], iân-lō͘ kà-sī lâng. 23 Ū lâng mn̄g I kóng, “Chú ah, ōe tit-tio̍h kiù ê lâng chin chió sī-bô?” Iâ-so͘ kā in kóng, 24 “Tio̍h chīn-la̍t tùi oe̍h ê mn̂g ji̍p-khì. Góa kā lín kóng, ū chin chōe lâng siūⁿ-beh ji̍p-khì ia̍h bōe-tàng ji̍p. 25 Chú-lâng khí-lâi koaiⁿ-mn̂g liáu-āu, lín chiah khiā tī mn̂g gōa phah-mn̂g, kóng, ‘Chú ah, kā goán khui!’ I ōe ìn kóng, ‘Góa m̄-chai lín sī tó-ūi lâi ê lâng.’ 26 Hit sî, lín ōe kóng, ‘Goán bat kap lí chòe-hé lim-chia̍h; lí mā bat tī goán ê koe-lō͘ kà-sī.’ 27 M̄-kú I ōe kóng, ‘Góa kā lín kóng, góa m̄-chai lín sī tó-ūi lâi ê lâng. Lín chiah-ê choh-pháiⁿ ê lâng lóng lī-khui góa!’ 28 Lín khòaⁿ-tio̍h [A-pek-la-hán], [Í-sat], [Ngá-kok], kap it-chhè ê sian-ti tī Siōng-tè-kok ê lāi-bīn, ka-kī khiok siū kóaⁿ chhut-khì gōa-bīn, hit sî lín ōe tī hia thî-khàu, kā-gê chhiat-chhí. 29 Lâng ōe tùi tang-sai lâm-pak lâi, tī Siōng-tè-kok chē-toh chham-ka iàn-hōe. 30 Án-ni, siōng lō͘-bé-ê ōe chòe tē-it; tē-it-ê ōe chòe siōng lō͘-bé.” 31 Tú hit-ê sî, ū chi̍t-kóa [Hoat-lī-sài]-phài ê lâng óa-lâi kā Iâ-so͘ kóng, “Lí tio̍h lī-khui chia khì pa̍t ê só͘-chāi, in-ūi [Hi-lu̍t] siūⁿ-beh thâi lí.” 32 Iâ-so͘ kā in kóng, “Lín khì kā hit chiah hô͘-lî kóng, ‘Lí khòaⁿ, kin-á-ji̍t bîn-á-ji̍t góa kóaⁿ-kúi, i-pīⁿ, tē-saⁿ ji̍t oân-sêng góa ê kang-chok. 33 Sui-jiân sī án-ni, kin-á-ji̍t, bîn-á-ji̍t, kap āu-ji̍t, góa it-tēng tio̍h kè-sio̍k kiâⁿ góa ê lō͘, in-ūi sian-ti bô eng-kai tī [Iâ-lō͘-sat-léng] í-gōa ê só͘-chāi hō͘ lâng thâi-sí.’ 34 “[Iâ-lō͘-sat-léng] ah, [Iâ-lō͘-sat-léng] ah, lí thâi-sí sian-ti, koh ēng chio̍h-thâu tìm-sí Siōng-tè chhe lâi lí chia ê sù-chiá. Góa jōa chōe piàn ài-beh chū-chi̍p lí ê kiáⁿ-jî, chhin-chhiūⁿ koe-bú chū-chi̍p koe-á-kiáⁿ kā in áⁿ tī si̍t-kó͘-ē, lín lóng bô ài. 35 Lín khòaⁿ, lín ê chhù ōe hong-hòe! Góa kā lín kóng, tùi taⁿ í-āu lín choa̍t-tùi khòaⁿ bōe-tio̍h góa, ti̍t-kàu lín kóng ‘Hōng Chú ê miâ lâi Hit-ūi eng-kai tit-tio̍h chheng-chàn!’ ”

Lō͘-ka 14

1 Ū chi̍t ê An-hioh-ji̍t, Iâ-so͘ khì chi̍t ê [Hoat-lī-sài]-phài ê léng-siù in tau chia̍h-pn̄g. Tāi-ke chù-ì teh kā I khòaⁿ. 2 Hit sî, tī I ê bīn-chêng ū chi̍t ê kó͘-tiòng-pīⁿ ê lâng. 3 Iâ-so͘ mn̄g Lu̍t-hoat-kàu-su kap [Hoat-lī-sài]-lâng kóng, “Tī An-hioh-ji̍t i-pīⁿ ū ha̍p-hoat bô?” 4 In lóng bô ìn. Iâ-so͘ chiū khan hit-ê lâng lâi, kā i i-hó, hō͘ i tńg-khì. 5 Jiân-āu Iâ-so͘ kā in kóng, “Lín tiong-kan kiám ū lâng ka-kī ê kiáⁿ á-sī gû tī An-hioh-ji̍t poa̍h-lo̍h kó͘-chíⁿ, i bōe sûi-sî kā i khiú khí-lâi?” 6 In tùi Iâ-so͘ só͘ mn̄g ê ōe lóng bōe-hiáu ìn. 7 Iâ-so͘ khòaⁿ-tio̍h lâng-kheh teh kéng tōa-ūi, chiū ēng chi̍t ê phì-jū kā in kóng: 8 “Lín hō͘ lâng chhiáⁿ khì hù hun-iàn ê sî, m̄-thang chē tōa-ūi, kiaⁿ-liáu ū pí lí khah chun-kùi ê lâng-kheh mā lâi hō͘ i chhiáⁿ. 9 Hit sî, chhiáⁿ i kap lí hit-ê chú-lâng ōe lâi kā lí kóng, ‘Chhiáⁿ niū-ūi hō͘ chit-ê lâng-kheh.’ Hit-chūn, lí ōe kám-kak chin pháiⁿ-sè, soah tio̍h khì chē siōng-sòe ê ūi. 10 Lí hō͘ lâng chhiáⁿ ê sî, lêng-khó khì chē siōng-sòe ê ūi. Án-ni, chhiáⁿ lí ê chú-lâng ōe lâi kā lí kóng, ‘Pêng-iú, chhiáⁿ lâi chē tōa-ūi.’ Hit-chūn, lí tī kâng-toh ê lâng-kheh bīn-chêng chiū ū thé-biān. 11 In-ūi thê-ko ka-kī ê, ōe siū kàng-kē; m̄-kú ka-kī khut-kē ê, ōe siū thê-ko.” 12 Jiân-āu, Iâ-so͘ mā kā chhiáⁿ I ê chú-lâng kóng, “Lí chhiáⁿ lâng chia̍h tiong-tàu-tǹg á-sī àm-tǹg ê sî, m̄-thang chhiáⁿ lí ê pêng-iú, hiaⁿ-tī, chhin-chiâⁿ, hó-gia̍h ê chhù-piⁿ, chiah-bián in kā lí chhiáⁿ tò-tńg, lí soah siū pò-tap. 13 Lí chhiáⁿ lâng-kheh ê sî, lêng-khó chhiáⁿ sàn-chhiah-lâng, hêng-tōng bô hong-piān ê lâng, kha-pái ê lâng, sit-bêng ê lâng. 14 Án-ni, lí it-tēng ōe siū chiok-hok, in-ūi in bōe-tàng kā lí pò-tap. Tī gī-lâng koh-oa̍h ê sî, Siōng-tè ōe kā lí pò-tap.” 15 Kâng-toh ū chi̍t ê lâng thiaⁿ-tio̍h chiah-ê ōe chiū kā Iâ-so͘ kóng, “Ōe-tàng tī Siōng-tè-kok lim-chia̍h ê lâng chin ū hok-khì!” 16 Iâ-so͘ kā i kóng, “Ū chi̍t ê lâng pān tōa iàn-se̍k, chhiáⁿ chin chōe lâng-kheh. 17 Beh khui-toh ê sî, i chhe lô͘-po̍k khì kā siū chhiáⁿ ê lâng-kheh kóng, ‘Chhiáⁿ lín lâi; ta̍k hāng lóng chún-pī hó-sè lah.’ 18 M̄-kú in chi̍t-ê chi̍t-ê the-sî. Thâu-chi̍t ê kā i kóng, ‘Góa ū bóe chi̍t tè tōe, tio̍h khì khòaⁿ-bāi leh. Chhiáⁿ lí liōng-kái.’ 19 Lēng-gōa chi̍t ê kóng, ‘Góa ū bóe gō͘ tùi gû, tio̍h khì chhì-ēng khòaⁿ-bāi leh. Chhiáⁿ lí liōng-kái.’ 20 Koh chi̍t ê kóng, ‘Góa tú chhōa-bó͘, só͘-í bōe-tàng khì.’ 21 Hit-ê lô͘-po̍k tńg-lâi kā chú-lâng pò-kò chiah-ê tāi-chì. Hit ke ê chú-lâng chiū siū-khì, kā lô͘-po̍k kóng, ‘Kóaⁿ-kín chhut-khì siâⁿ-lāi koe-thâu-hāng-bé, chhōa hiah-ê sàn-chhiah-lâng, hêng-tōng put-piān ê lâng, sit-bêng ê lâng, kha-pái ê lâng lâi.’ 22 Hit-ê lô͘-po̍k kóng, ‘Chú-lâng, lí só͘ hoan-hù ê góa í-keng lóng ū chòe, m̄-kú iáu ū khang-ūi.’ 23 Chú-lâng chiū kā lô͘-po̍k kóng, ‘Chhut-khì tōa-koe-sió-hāng kiông-pek lâng ji̍p-lâi, thang hō͘ góa ê chhù chē móa. 24 Góa kā lín kóng, seng chhiáⁿ hiah-ê lâng bô chi̍t ê ōe-tàng chia̍h góa ê iàn-se̍k.’ ” 25 Chi̍t tōa-tīn lâng kap Iâ-so͘ chòe-tīn kiâⁿ-lō͘, Iâ-so͘ oa̍t kè-lâi kā in kóng, 26 “Tè góa ê lâng nā thiàⁿ ka-kī ê pē-bú, bó͘-kiáⁿ, hiaⁿ-tī, chí-bē, sīm-chì ka-kī ê sìⁿ-miā iâⁿ-kè thiàⁿ góa, bōe-tàng chòe góa ê bûn-tô͘. 27 Bô giâ ka-kī ê si̍p-jī-kè lâi tè góa ê bōe-tàng chòe góa ê bûn-tô͘. 28 Lín tiong-kan ū lâng siūⁿ-beh khí chi̍t ê thah, kiám bô tāi-seng chē lo̍h-lâi kó͘-kè khòaⁿ ū kàu chîⁿ thang oân-sêng kang-thêng á-bô? 29 Nā bô án-ni chòe, i phah tōe-ki liáu-āu soah bōe-tàng oân-sêng kang-thêng, só͘-ū khòaⁿ-tio̍h ê lâng ōe kā i thí-chhiò, 30 kóng, ‘Chit-ê lâng ū khai-sí khí soah bōe-tàng oân-sêng!’ 31 Á-sī, ū chi̍t ê kok-ông beh khì kap pa̍t-ê kok-ông kau-chiàn, i kiám bōe seng chē lo̍h-lâi, siūⁿ-khòaⁿ i ōe-tàng ēng chi̍t bān ê peng tí-khòng ū nn̄g bān ê peng ê kok-ông á-bōe? 32 Nā chai-iáⁿ bōe, i ōe thàn hit-ê kok-ông iáu tī hn̄g-hn̄g ê sî, chhe sù-chiá khì kap i kóng-hô. 33 Kâng-khoán, lín tiong-kan bô-lūn sím-mi̍h lâng, nā bô pàng-sak ka-kī só͘-ū ê it-chhè, bōe-tàng chòe góa ê bûn-tô͘.” 34 “Iâm chin ū lō͘-ēng, m̄-kú nā sit-bī, beh án-chóaⁿ hō͘ i koh kiâm? 35 Sit-bī ê iâm bōe-tàng lo̍h-chhân, mā bōe-tàng kauh-pûi, chí-ū hìⁿ-sak. Ū hīⁿ-khang thang thiaⁿ ê, tio̍h thiaⁿ!”

Lō͘-ka 15

1 Ū chi̍t piàn, chin chōe bau̍h-sè-ê kap chōe-jîn óa-lâi Iâ-so͘ hia beh thiaⁿ I káng-tō. 2 [Hoat-lī-sài]-phài ê lâng kap keng-ha̍k-kàu-su ngau̍h-ngau̍h-liām, kóng, “Chit-ê lâng chiap-la̍p chōe-jîn, kap in chia̍h-pn̄g!” 3 Iâ-so͘ chiū kā in kóng chit-ê phì-jū: 4 “Lín tiong-kan sím-mi̍h lâng ū chi̍t-pah chiah iûⁿ phah-m̄-kìⁿ chi̍t chiah, i kiám bōe pàng hit káu-cha̍p-káu chiah tī khòng-iá, khì chhē phah-m̄-kìⁿ hit chiah, chhē kàu tio̍h? 5 Chi̍t-ē chhē-tio̍h, i chiū chin hoaⁿ-hí chiong hit chiah iûⁿ phāiⁿ tī keng-thâu. 6 I tńg-lâi kàu chhù, kiò pêng-iú kap chhù-piⁿ lâi, kā in kóng, ‘Lâi tàu hoaⁿ-hí, in-ūi phah-m̄-kìⁿ hit chiah iûⁿ í-keng chhē-tio̍h.’ 7 Góa kā lín kóng, chhin-chhiūⁿ án-ni, ūi-tio̍h ū chi̍t ê hóe-kái ê chōe-jîn, pí ū káu-cha̍p-káu ê m̄-bián hóe-kái ê gī-lâng, tī thiⁿ-téng ê hoaⁿ-hí ōe koh-khah tōa.” 8 “Á-sī, ū chi̍t ê hū-jîn-lâng ū cha̍p ê gûn-oân, phah-m̄-kìⁿ chi̍t ê, kiám bōe tiám-teng, sàu chhù-lāi, phah-piàⁿ chhē, chhē kàu tio̍h? 9 Chi̍t-ē chhē-tio̍h, i chiū kiò pêng-iú kap chhù-piⁿ lâi, kā in kóng, ‘Lâi tàu hoaⁿ-hí, in-ūi phah-m̄-kìⁿ hit-ê gûn-oân í-keng chhē-tio̍h.’ 10 Góa kā lín kóng, chhin-chhiūⁿ án-ni, Siōng-tè ê thiⁿ-sài ōe ūi-tio̍h chi̍t ê chōe-jîn hóe-kái lâi hoaⁿ-hí.” 11 Iâ-so͘ koh kóng: “Ū chi̍t ê lâng ū nn̄g ê kiáⁿ; 12 sòe-hàn-ê kā lāu-pē kóng, ‘A-pa, góa eng-kai tit ê châi-sán, chhiáⁿ lí pun hō͘ góa.’ Lāu-pē chiū chiong châi-sán pun hō͘ in nn̄g ê. 13 Kè bô kúi ji̍t, sòe-hàn kiáⁿ chiong só͘ tit-tio̍h choân-pō͘ ê châi-sán lóng ōaⁿ chòe hiān-kim, jiân-āu chhut-gōa khì chin hn̄g ê só͘-chāi, tī hia hòng-tōng, chîⁿ o͘-pe̍h khai. 14 I só͘-ū ê lóng khai liáu-liáu ê sî, tú-hó hit só͘-chāi hoat-seng tōa ki-hng, i chiah chai khiàm-kheh ê kan-khó͘. 15 I chiū khì hō͘ hit só͘-chāi ê chi̍t ê lâng chhiàⁿ. Hit-ê lâng kiò i khì hn̂g-ni̍h chhī-ti. 16 I iau-kah siūⁿ-beh the̍h ti teh chia̍h ê tāu-phoh chí-ki, m̄-kú liân che lâng mā bô hō͘ i. 17 “Āu-lâi, i kak-chhíⁿ, kóng, ‘Goán lāu-pē ū hiah-ni̍h chōe chhiàⁿ-kang, in lóng ū mi̍h thang chia̍h, koh chia̍h kàu ū chhun, m̄-kú góa tī chia teh-beh gō-sí. 18 Góa beh khí-lâi, tńg-khì góa ê lāu-pē hia, kā i kóng, ‘A-pa, góa ū tek-chōe Thiⁿ, mā ū tek-chōe lí, 19 í-keng bô chu-keh chòe lí ê kiáⁿ. Chhiáⁿ hō͘ góa chòe lí ê chhiàⁿ-kang chiū hó.’ 20 I chiū chhut-hoat tńg-khì lāu-pē hia. “I lī in tau iáu chin hn̄g, lāu-pē chiū khòaⁿ-tio̍h i, sim chin m̄-kam, kóaⁿ-kín cháu óa-khì kā i lám-teh, ti̍t-ti̍t kā i chim. 21 Kiáⁿ chiū tùi lāu-pē kóng, ‘A-pa, góa ū tek-chōe Thiⁿ, mā ū tek-chōe lí. Góa í-keng bô chu-keh chòe lí ê kiáⁿ.’ 22 M̄-kú, lāu-pē kā lô͘-po̍k kóng, ‘Kóaⁿ-kín hiahⁿ siōng-hó ê saⁿ lâi kā i chhēng, kā i kòa chhiú-chí, koh kā i chhēng-ôe, 23 sòa khan hit chiah pûi ê gû-á-kiáⁿ lâi thâi, lâi khèng-chiok. 24 In-ūi góa chit-ê kiáⁿ sī sí-khì ū koh-oa̍h, sit-lo̍h ū koh tit-tio̍h.’ In chiū khai-sí khèng-chiok. 25 “Hit sî, tōa-kiáⁿ tī hn̂g-ni̍h. I tńg-lâi, teh-beh kàu chhù ê sî thiaⁿ-tio̍h chàu-ga̍k kap thiàu-bú ê siaⁿ. 26 I kiò chi̍t ê lô͘-po̍k lâi mn̄g-khòaⁿ sī sím-mi̍h tāi-chì. 27 Hit-ê lô͘-po̍k kā i kóng, ‘Lín sió-tī tńg-lâi; lín lāu-pē in-ūi i pêng-an bô-sū tò-lâi, chiū thâi hit chiah pûi ê gû-á-kiáⁿ.’ 28 Tōa-kiáⁿ hui-siông siū-khì, m̄ ji̍p-khì. I ê lāu-pē chhut-lâi kā i khó͘-khǹg. 29 M̄-kú i ìn lāu-pē kóng, ‘Lí siūⁿ-khòaⁿ leh, góa choh lô͘-châi ho̍k-sāi lí chiah-chōe nî, m̄-bat ûi-pōe lí ê bēng-lēng, lí liân chi̍t chiah soaⁿ-iûⁿ-á to m̄-bat hō͘ góa kap pêng-iú chòe-hé hoaⁿ-hí! 30 M̄-kú, lí chit-ê kiáⁿ ūi-tio̍h chhiong-ki kā lí ê châi-sán khai liáu-liáu, i chi̍t-ē tńg-lâi, lí chiū ūi i thâi hit chiah pûi ê gû-á-kiáⁿ.’ 31 I ê lāu-pē ìn kóng, ‘Kiáⁿ ah, lí put-sî to kap góa chòe-hé, góa ū ê lóng sī lí ê. 32 Chóng-sī lí chit-ê sió-tī, i sī sí-khì ū koh-oa̍h, sit-lo̍h ū koh tit-tio̍h, lán eng-kai hoaⁿ-hoaⁿ-hí-hí lâi khèng-chiok.’ ”

Lō͘-ka 16

1 Iâ-so͘ koh tùi bûn-tô͘ kóng: “Ū chi̍t ê lâng chin hó-gia̍h, i ū chi̍t ê koán-ke, ū lâng tùi chú-lâng kiám-kú chit-ê koán-ke lōng-hùi i ê châi-sán. 2 Chú-lâng kiò i lâi, kā i mn̄g, ‘Góa ū thiaⁿ-tio̍h lí chit-ê tāi-chì, tàu-tóe sī án-chóaⁿ? Lí só͘ koán-lí ê siàu-phō͘ kau chhut-lâi, m̄ hō͘ lí koh choh koán-ke.’ 3 Hit-ê koán-ke ka-kī siūⁿ-kóng, ‘Chú-lâng beh kā góa sî-chit, m̄ hō͘ góa koh choh koán-ke, taⁿ góa beh án-chóaⁿ? Gia̍h tî-thâu bô khùi-la̍t, choh khit-chia̍h koh kiaⁿ kiàn-siàu. 4 Taⁿ, góa chai tio̍h án-chóaⁿ chòe, bô choh koán-ke í-āu chiah ū pêng-iú thang kā góa siu-liû.’ 5 “I chiū chiong chú-lâng ê chè-bū-jîn chi̍t-ê chi̍t-ê kiò lâi. I kā thâu-chi̍t ê kóng, ‘Lí khiàm goán chú-lâng jōa chōe?’ 6 I ìn kóng, ‘Chi̍t-pah tháng ka-ná-iû.’ Koán-ke kā i kóng, ‘Lí ê chioh-tiâu tī chia, kóaⁿ-kín chē lo̍h-lâi, kā kái-chòe gō͘-cha̍p.’ 7 I koh kā lēng-gōa chi̍t-ê kóng, ‘Lí khiàm jōa chōe?’ I ìn kóng, ‘Chi̍t-pah chio̍h be̍h-á.’ Koán-ke kā i kóng, ‘Lí ê chioh-tiâu tī chia, kā kái-chòe poeh-cha̍p.’ 8 “Chú-lâng po-chióng chit-ê bô láu-si̍t ê koán-ke chòe liáu chin khiáu, in-ūi sio̍k sè-kan ê lâng chhú-lí sè-sū pí sio̍k kng-bêng ê lâng khah ū piàn-khiàu.” 9 Iâ-so͘ kè-sio̍k kóng, “Góa kā lín kóng: Tio̍h ēng put-gī ê chîⁿ-châi ūi-tio̍h ka-kī kiat-kau pêng-iú, án-ni chîⁿ-châi bô-khì ê sî, in ōe chiap-la̍p lín ji̍p-khì éng-oán khiā-khí ê só͘-chāi. 10 Tùi chin sòe-hāng tāi-chì tiong-si̍t ê lâng, tùi tōa-hāng tāi-chì mā ōe tiong-si̍t; tùi chin sòe-hāng tāi-chì bô láu-si̍t ê lâng, tùi tōa-hāng tāi-chì mā bōe láu-si̍t. 11 Só͘-í, lín tùi put-gī ê chîⁿ-châi nā bô láu-si̍t, síaⁿ-lâng beh chiong chin-chiàⁿ ê châi-pó kau-tài lín? 12 Lín tùi pa̍t-lâng ê mi̍h nā bô láu-si̍t, síaⁿ-lâng beh chiong lín ê mi̍h hō͘ lín? 13 “Bô chi̍t ê lô͘-po̍k ōe-tàng ho̍k-sāi nn̄g ê chú-lâng; i nā m̄-sī oàn-hūn chit-ê, thiàⁿ hit-ê, chiū-sī khòaⁿ-tāng chit-ê, khòaⁿ-khin hit-ê. Lín bōe-tàng siâng-sî hok-sāi Siōng-tè koh ho̍k-sāi chîⁿ-châi.” 14 Hiah-ê tham-châi ê [Hoat-lī-sài]-phài ê lâng thiaⁿ-tio̍h Iâ-so͘ kóng chiah-ê ōe chiū kā I thí-chhiò. 15 Iâ-so͘ kā in kóng, “Lín chiah-ê lâng tī lâng ê bīn-chêng chū-chheng chòe-gī, m̄-kú Siōng-tè chai lín ê lāi-sim, in-ūi lâng khòaⁿ-chòe chun-kùi ê, tùi Siōng-tè lâi khòaⁿ sī thang iàm-ò͘ⁿ ê. 16 “[Mô͘-se] ê Lu̍t-hoat kap sian-ti ê kà-sī kàu Si-sóe-chiá [Iok-hān] kiat-sok. Tùi hit sî khí, Siōng-tè-kok ê hok-im chiū thoân chhut-khì, lâng-lâng lóng ngī-beh chiⁿ ji̍p-khì. 17 M̄-kú thiⁿ-tōe siau-sit pí hòe-tû Lu̍t-hoat ê chi̍t-u̍ih koh-khah kán-tan. 18 “Bô-lūn sím-mi̍h lâng, lî ka-kī ê bó͘ khì chhōa pa̍t ê hū-jîn-lâng chiū-sī hoān kan-îm; chhōa hō͘ lâng lî-hun ê hū-jîn-lâng mā-sī hoān kan-îm.” 19 “Ū chi̍t ê lâng chin hó-gia̍h, i chhēng chí-sek chin ko-kùi ê i-ho̍k, ta̍k ji̍t chhia-hoa iàn-lo̍k. 20 Koh ū chi̍t ê khit-chia̍h, miâ kiò-chòe [Lia̍p-sat-lō͘], kui seng-khu siⁿ chhng, tó tī hit-ê hó-gia̍h-lâng ê mn̂g-kháu, 21 beh khioh hó-gia̍h-lâng toh-téng lak lo̍h-lâi ê sap-á chí-ki; káu mā lâi chīⁿ i ê chhng. 22 “Āu-lâi, chit-ê khit-chia̍h sí-khì, thiⁿ-sài kā i chhōa-khì [A-pek-la-hán] ê seng-khu piⁿ. Hit-ê hó-gia̍h-lâng mā sí-khì, koh bâi-chòng. 23 I tī im-kan siū chin tōa ê thòng-khó͘, gia̍h-thâu khòaⁿ, khòaⁿ-tio̍h [A-pek-la-hán] tī hn̄g-hn̄g ê só͘-chāi, [Lia̍p-sat-lō͘] tī i ê seng-khu piⁿ. 24 I chiū chhut-siaⁿ kiò, ‘Góa ê chó͘ [A-pek-la-hán], lîn-bín góa! Chhiáⁿ lí chhe [Lia̍p-sat-lō͘] ēng chńg-thâu-á-bé ùn chúi lâi hō͘ góa ê chhùi-chi̍h liâng chi̍t-ē, in-ūi góa tī chit-ê hé-iām tiong teh siū khó͘-chhó͘.’ 25 “M̄-kú [A-pek-la-hán] kóng, ‘Kiáⁿ ah, tio̍h ōe kì-tit lí chāi-siⁿ hióng-siū it-chhè ê khoài-lo̍k, m̄-kú [Lia̍p-sat-lō͘] chāi-siⁿ siū-chīn thòng-khó͘, I hiān-chāi tī chia tit-tio̍h an-ùi, lí tī hia teh siū khó͘-chhó͘. 26 M̄-nā án-ni, goán kap lín ê tiong-kan ū tōa chhim-ian keh-khui, án-ni tùi chia bô-lâng ōe-tàng kè-khì lín hia, mā bô-lâng ōe-tàng tùi lín hia kè-lâi goán chia.’ 27 Hit-ê hó-gia̍h-lâng chiū kóng, ‘Góa ê chó͘ ah, kì-jiân sī án-ni, góa khún-kiû lí chhe [Lia̍p-sat-lō͘] khì goán lāu-pē ê chhù; 28 góa ū gō͘ ê hiaⁿ-tī tī hia, i thang khì kā in kéng-kò, chiah-bián in mā lâi-kàu chit-ê hui-siông thòng-khó͘ ê só͘-chāi.’ 29 “M̄-kú [A-pek-la-hán] ìn kóng, ‘Lí ê hiaⁿ-tī ū [Mô͘-se] kap sian-ti, in eng-kai khì thiaⁿ in ê ōe.’ 30 Hit-ê hó-gia̍h-lâng ìn kóng, ‘Góa ê chó͘ [A-pek-la-hán], in bōe lah. Nā ū lâng tùi sí-lâng tiong koh-oa̍h khì chhē in, in chiū ōe hóe-kái.’ 31 [A-pek-la-hán] kā i kóng, ‘In nā m̄-thiaⁿ [Mô͘-se] kap sian-ti ê ōe, ū lâng tùi sí-lâng tiong koh-oa̍h, in mā bōe siong-sìn.’ ”

Lō͘-ka 17

1 Iâ-so͘ koh tùi I ê bûn-tô͘ kóng, “Ín-khí lâng hoān-chōe ê sū it-tēng ū, put-kò chō-sêng chit-ê sū ê lâng chhám à! 2 Lêng-khó ēng tōa chio̍h-bō kā i tiàu tī ām-kún hiat-lo̍h hái, mā m̄-thang hō͘ bî-sòe ê chi̍t-ê poa̍h-tó hoān-chōe. 3 Lín ka-kī mā tio̍h kín-sīn! “Lí ê hiaⁿ-tī á-sī chí-bē nā hoān-chōe, tio̍h kā i chek-pī, i nā hóe-kái, tio̍h kā i sià-bián. 4 Nā ū lâng chi̍t ji̍t tek-chōe lí chhit piàn, chhit piàn lóng oa̍t tò-tńg lâi kā lí kóng ‘Góa hóe-kái lah’, lí mā lóng tio̍h kā i sià-bián.” 5 Sù-tô͘ tùi Chú kóng, “Kiû lí ke-thiⁿ goán ê sìn-sim!” 6 Chú kóng, “Lín nā ū chhin-chhiūⁿ kòa-chhài-chí hiah tōa ê sìn-sim, kā chit châng sng-châi-chhiū kóng, ‘Liân kun pu̍ih khí-lâi, khì chai tī hái-ni̍h,’ hit châng chhiū mā ōe ho̍k-chiông lín. 7 “Lín tiong-kan ū sím-mi̍h lâng, i ê lô͘-po̍k khì choh-hn̂g á-sī chhī-iûⁿ, tùi hn̂g-ni̍h tńg-lâi ê sî, kiám ōe kā lô͘-po̍k kóng ‘Kóaⁿ-kín chē lo̍h-lâi chia̍h-pn̄g’? 8 I kiám bōe kā i kóng ‘Kā góa chún-pī àm-tǹg; hâ ûi-kûn lâi sū-hāu góa chia̍h-pn̄g, āu-lâi lí chiah chia̍h chiah lim’? 9 Lô͘-po̍k chòe chú-lâng só͘ hoan-hù ê tāi-chì, chú-lâng kiám tio̍h kā i seh-siā? 10 Lín mā-sī án-ni, lín chòe siū kau-tài ê tāi-chì liáu-āu, tio̍h kóng ‘Goán sī bô lō͘-ēng ê lô͘-po̍k, goán put-kò chīn pún-hūn chòe nā-tiāⁿ.’ ” 11 Iâ-so͘ khì [Iâ-lō͘-sat-léng] ê lō͘-tiong, keng-kè [Sat-má-lī-a] kap [Ka-lī-lī] ê kau-kài. 12 I ji̍p-khì chi̍t ê chng-siā ê sî tú-tio̍h cha̍p ê bâ-hong pīⁿ-lâng. In khiā tī hn̄g-hn̄g ê só͘-chāi, 13 tōa-siaⁿ hoah, “Iâ-so͘ lāu-su ah, lîn-bín goán!” 14 Iâ-so͘ chi̍t-ē khòaⁿ-tio̍h, chiū kā in kóng, “Lín khì hō͘ chè-si kiám-cha!” In tī lō͘-tiong, chiū tit-tio̍h chheng-khì. 15 Kî-tiong ū chi̍t ê khòaⁿ-tio̍h ka-kī ê pīⁿ í-keng hó, chiū tò tńg-lâi tōa-siaⁿ o-ló Siōng-tè, 16 phak tī Iâ-so͘ ê kha-chêng, kā I kám-siā. Chit-ê sī [Sat-má-lī-a]-lâng. 17 Iâ-so͘ mn̄g kóng, “Kiám m̄-sī ū cha̍p ê lâng tit-tio̍h i-hó? Iáu hit káu ê tī tó-ūi? 18 Chit-ê gōa-cho̍k ê lâng í-gōa kiám bô-lâng tńg-lâi kám-siā Siōng-tè?” 19 Iâ-so͘ chiū kā hit-ê lâng kóng, “Khí-lâi, tńg-khì. Lí ê sìn-sim ū kiùi lí.” 20 Ū chi̍t piàn, chi̍t-kóa [Hoat-lī-sài]-phài ê lâng mn̄g Iâ-so͘, Siōng-tè-kok sím-mi̍h sî ōe lâi-lîm. Iâ-so͘ ìn kóng, “Siōng-tè-kok ê lâi-lîm m̄-sī lâng khòaⁿ ōe chhut-lâi, 21 mā bô-lâng ōe-tàng kóng ‘Lí khòaⁿ, tī hia!’ á-sī kóng ‘Lí khòaⁿ, tī chia!’ in-ūi Siōng-tè-kok sī tī lín tiong-kan.” 22 Iâ-so͘ chiū tùi I ê bûn-tô͘ kóng, “Ji̍t-chí teh-beh kàu, lín siūⁿ-beh khòaⁿ Jîn-chú lâi-lîm ê ji̍t-chí, liân chi̍t ji̍t mā khòaⁿ bōe-tio̍h. 23 Ū lâng ōe kā lín kóng ‘Lí khòaⁿ, tī hia!’ á-sī kóng ‘Lí khòaⁿ, tī chia!’ M̄-thang chhut-khì, mā m̄-thang tè in khì. 24 Chhin-chhiūⁿ sih-nà tùi thiⁿ chit pêng sih, chiò kàu thiⁿ hit pêng, Jîn-chú tī hit ji̍t mā ōe chhin-chhiūⁿ án-ni lâi-lîm. 25 Put-kò, I it-tēng tio̍h seng siū chin chōe khó͘-lān, koh hō͘ chit sè-tāi ê lâng kū-choa̍t. 26 Jîn-chú lâi-lîm ê ji̍t-chí ōe kap [Ná-a] ê sî kâng-khoán; 27 hit sî lâng chiàu-siông lim-chia̍h kè-chhōa, it-ti̍t kàu [Ná-a] ji̍p-khì tōa-chûn hit ji̍t. Tōa-chúi kàu, kā in lóng siau-bia̍t. 28 Mā kap [Lô-tek] ê ji̍t-chí kâng-khoán, lâng chiàu-siông lim-chia̍h, bóe-bōe, chèng-choh, khí-chhù, 29 m̄-kú [Lô-tek] tùi [Só͘-to-má] chhut-khì hit ji̍t, tùi thiⁿ ū lo̍h hé kap liû-hông, kā in lóng siau-bia̍t. 30 Jîn-chú hián-hiān ê ji̍t mā ōe chhin-chhiūⁿ án-ni. 31 “Hit ji̍t, tī chhù-téng-ê, m̄-thang lo̍h-lâi the̍h chhù-lāi ê mi̍h-kiāⁿ; tī chhân-ni̍h-ê, mā m̄-thang tò tńg-khì. 32 Tio̍h ōe kì-tit [Lô-tek] ê bó͘ só͘ tú-tio̍h ê tāi-chì! 33 Só͘-ū siūⁿ-beh pó-chûn ka-kī sìⁿ-miā-ê, ōe sòng-sit sìⁿ-miā; só͘-ū sòng-sit ka-kī ê sìⁿ-miā-ê, ōe tit-tio̍h sìⁿ-miā. 34 Góa kā lín kóng, tī hit àm, ū nn̄g ê lâng khùn kâng chi̍t téng bîn-chhn̂g, chi̍t-ê ōe siū chhōa-khì, lēng-gōa chi̍t-ê ōe lâu-teh. 35 Ū nn̄g ê hū-jîn-lâng chòe-hé teh oe chio̍h-bō, chi̍t-ê siū chhōa-khì, chi̍t-ê lâu-teh. 36 Ū nn̄g ê lâng tī chhân-ni̍h, chi̍t-ê siū chiap-khì, chi̍t-ê lâu-teh.” 37 Bûn-tô͘ mn̄g Iâ-so͘ kóng, “Chú ah, ōe tī tó-ūi hoat-seng?” Iâ-so͘ kā in kóng, “Si-thé tī tó-ūi, thuh-thâu-eng chiū lóng ōe khîⁿ óa-khì hia.”

Lō͘-ka 18

1 Iâ-so͘ koh tùi bûn-tô͘ kóng chi̍t ê phì-jū, kà-sī in tio̍h siông-siông kî-tó, m̄-thang hoe-sim. 2 I kóng, “Bó͘ chi̍t ê siâⁿ ū chi̍t ê phòaⁿ-koaⁿ, i bô kèng-ùi Siōng-tè, mā bô chun-tiōng lâng. 3 Tī hit-ê siâⁿ ū chi̍t ê kóaⁿ-hū it-ti̍t lâi chhē i, kóng, ‘Góa ū chi̍t ê sò͘-siōng ê tùi-thâu, chhiáⁿ lí thòe góa chú-chhî kong-tō.’ 4 Chit-ê phòaⁿ-koaⁿ chin kú lóng m̄ tah-èng, āu-lâi i ka-kī siūⁿ-kóng, ‘Góa sui-jiân bô kèng-ùi Siōng-tè, mā bô chun-tiōng lâng, 5 m̄-kú in-ūi chit-ê kóaⁿ-hū it-ti̍t lâi kā góa chhá, góa beh thòe i chú-chhî kong-tō, chiah-bián i it-ti̍t lâi kô-kô-tîⁿ.’ ” 6 Chú koh kóng, “Lín tio̍h thiaⁿ chit-ê put-gī ê phòaⁿ-koaⁿ só͘ kóng ê ōe! 7 Siōng-tè só͘ kéng-soán ê lâng mî-ji̍t tùi I ai-kiû, I kiám bōe thòe in chú-chhî kong-tō? I kiám ōe thoa-iân chin kú? 8 Góa kā lín kóng, I chin kín chiū ōe thòe in chú-chhî kong-tō. Chóng-sī, Jîn-chú lâi-lîm ê sî, I tī tōe-chiūⁿ kiám ōe khòaⁿ-tio̍h chit khoán ê sìn-sim?” 9 Iâ-so͘ tùi hiah-ê khòaⁿ ka-kī chòe gī-lâng koh khòaⁿ-khin pa̍t-lâng ê lâng ū kóng chit-ê phì-jū: 10 “Ū nn̄g ê lâng chiūⁿ Sèng-tiān kî-tó; chi̍t ê sī [Hoat-lī-sài]-phài ê lâng, lēng-gōa chi̍t ê sī bau̍h-sè-ê. 11 [Hoat-lī-sài]-lâng khiā thêng-thêng ka-kī kî-tó kóng, ‘Siōng-tè ah, góa kám-siā lí, in-ūi góa bô chhin-chhiūⁿ kî-tha ê lâng khióng-hat-chhú-châi, put-gī, îm-loān, mā bô chhin-chhiūⁿ chit-ê bau̍h-sè-ê. 12 Góa chi̍t lé-pài kìm-chia̍h nn̄g piàn, koh hōng-hiàn choân-pō͘ siu-ji̍p ê cha̍p-hūn-chi̍t.’ 13 M̄-kú hit-ê bau̍h-sè-ê khiā tī hn̄g-hn̄g ê só͘-chāi, liân gia̍h-thâu khí-lâi khòaⁿ-thiⁿ to m̄-káⁿ, chí-ū tûi-heng kóng, ‘Siōng-tè ah, lîn-bín góa chit-ê ū chōe ê lâng!’ 14 Góa kā lín kóng, chōe tit-tio̍h sià-bián tńg-khì in tau ê sī chit-ê lâng, m̄-sī hit-ê [Hoat-lī-sài]-lâng; in-ūi thê-ko ka-kī ê, ōe siū kàng-kē; ka-kī khut-kē ê, ōe siū thê-ko.” 15 Ū lâng liân eⁿ-á mā chhōa lâi Iâ-so͘ hia, beh hō͘ I hōaⁿ-chhiú chiok-hok; bûn-tô͘ khòaⁿ-tio̍h chiū kā in chek-pī. 16 M̄-kú Iâ-so͘ kiò in lâi, kóng, “Hō͘ gín-á lâi góa chia, m̄-thang kā in chó͘-tòng, in-ūi Siōng-tè-kok sī chit khoán lâng ê. 17 Góa si̍t-chāi kā lín kóng, lâng nā bô chhin-chhiūⁿ gín-á án-ni chiap-siū Siōng-tè-kok, choa̍t-tùi bōe-tàng ji̍p-khì.” 18 Ū chi̍t ê [Iû-thài]-lâng ê léng-tō-chiá lâi mn̄g Iâ-so͘ kóng, “Hó ê lāu-su, góa tio̍h chòe sím-mi̍h chiah ōe-tàng sêng-siū éng-oán ê oa̍h-miā?” 19 Iâ-so͘ kā i kóng, “Lí ná-ōe kóng góa sī hó? Siōng-tè í-gōa, bô chi̍t-ê sī hó. 20 Chiah-ê kài-bēng lí lóng bat: ‘M̄-thang kan-îm; m̄-thang thâi-sí lâng; m̄-thang thau-the̍h; m̄-thang choh gūi-chèng; tio̍h hàu-kèng pē-bú.’ ” 21 Hit-ê lâng kóng, “Chiah-ê kài-bēng góa tùi sòe-hàn chiū it-ti̍t ū teh chun-siú.” 22 Iâ-so͘ thiaⁿ-tio̍h chiah-ê ōe, chiū kā i kóng, “Lí iáu khiàm chi̍t hāng. Khì bōe só͘-ū ê, tit-tio̍h ê chîⁿ lóng pun hō͘ sàn-chhiah-lâng, lí tī thiⁿ-téng chiū ū châi-pó, jiân-āu lâi tè góa.” 23 Hit-ê lâng chi̍t-ē thiaⁿ-tio̍h chiah-ê ōe, chin siong-sim, in-ūi i hui-siông hó-gia̍h. 24 Iâ-so͘ khòaⁿ hit-ê lâng chiū kóng, “Ū-chîⁿ-lâng ji̍p Siōng-tè-kok jōa-á-ni̍h khùn-lân! 25 Lo̍k-tô chhng-kè chiam-phīⁿ mā pí hó-gia̍h-lâng ji̍p Siōng-tè-kok koh-khah kán-tan!” 26 Thiaⁿ-tio̍h chiah-ê ōe ê lâng mn̄g I kóng, “Nā án-ni, sím-mi̍h lâng ōe-tàng tit-tio̍h kiù?” 27 Iâ-so͘ ìn kóng, “Lâng chòe bōe-kàu ê, Siōng-tè lóng ōe.” 28 [Pí-tek] kóng, “Goán í-keng pàng-sak goán só͘-ū ê lâi tè lí lah.” 29 Iâ-so͘ kā in kóng, “Góa si̍t-chāi kā lín kóng, lâng nā ūi-tio̍h Siōng-tè-kok pàng-sak chhù-the̍h, bó͘, hiaⁿ-tī, pē-bú á-sī kiáⁿ-jî, 30 tī kim-sè it-tēng ōe tit-tio̍h koh-khah chōe, tī lâi-sè tit-tio̍h éng-oán ê oa̍h-miā.” 31 Iâ-so͘ chhōa cha̍p-jī sù-tô͘ khì piⁿ-a, kā in kóng, “Taⁿ lán beh chiūⁿ [Iâ-lō͘-sat-léng], sian-ti só͘ kì-chài koan-hē Jîn-chú ê it-chhè lóng ōe èng-giām. 32 I ōe siū chhut-bōe hō͘ Gōa-pang-lâng; in ōe kā I thí-chhiò, bú-jio̍k, phùi-nōa. 33 In ōe ēng piⁿ kā I phah, kā I hāi-sí, tē-saⁿ ji̍t I ōe koh-oa̍h.” 34 M̄-kú sù-tô͘ tùi chiah-ê tāi-chì lóng bô liáu-kái; chiah-ê ōe ê ì-sù ū tùi in khàm-teh, in m̄-chai Iâ-so͘ teh kóng sím-mi̍h. 35 Iâ-so͘ teh-beh kàu [Iâ-lī-ko] ê sî, ū chi̍t ê bông-jîn chē tī lō͘-piⁿ teh kiû-khit. 36 I thiaⁿ-tio̍h kûn-chiòng tùi hia keng-kè, chiū mn̄g lâng khòaⁿ sī sím-mi̍h tāi-chì. 37 In kā i kóng, “[Ná-sat-le̍k]-lâng Iâ-so͘ teh-beh tùi chia keng-kè.” 38 I chiū tōa-siaⁿ hoah, “[Tāi-pi̍t] ê Kiáⁿ Iâ-so͘ ah, lîn-bín góa!” 39 Tī thâu-chêng teh kiâⁿ ê lâng kā i chek-pī, kiò i tiām-tiām; m̄-kú i jú tōa-siaⁿ hoah, “[Tāi-pi̍t] ê Kiáⁿ, lîn-bín góa!” 40 Iâ-so͘ chiū thêng-kha, kiò lâng chhōa i lâi. I óa-lâi ê sî, Iâ-so͘ mn̄g i kóng: 41 “Lí ài góa kā lí chòe sím-mi̍h?” I kóng, “Chú ah, góa ài koh khòaⁿ-kìⁿ!” 42 Iâ-so͘ kā i kóng, “Hó, hō͘ lí koh khòaⁿ-kìⁿ! Lí ê sìn-sim hō͘ lí tit-tio̍h i-hó!” 43 I sûi-sî ōe-koh khòaⁿ-kìⁿ, chiū tè Iâ-so͘, kui êng-kng hō͘ Siōng-tè. Chèng-lâng khòaⁿ-tio̍h chit-ê tāi-chì, lóng chheng-chàn Siōng-tè.

Lō͘-ka 19

1 Iâ-so͘ ji̍p-khì [Iâ-lī-ko], tùi hia teh keng-kè. 2 Tī hia ū chi̍t ê lâng miâ kiò-chòe [Sat-kai]; i sī bau̍h-sè ê thâu-lâng, chin hó-gia̍h. 3 I ài-beh khòaⁿ Iâ-so͘ sī sím-mi̍h khoán lâng, put-kò in-ūi lâng chin chōe, i ê sin-châi koh óe, khòaⁿ bōe-tio̍h. 4 I chiū cháu chìn-chêng, peh-chiūⁿ chi̍t châng sng-châi-chhiū beh khòaⁿ Iâ-so͘, in-ūi Iâ-so͘ teh-beh tùi hia keng-kè. 5 Iâ-so͘ kiâⁿ kàu hit-ê só͘-chāi, gia̍h-thâu khòaⁿ, tùi i kóng, “[Sat-kai], kóaⁿ-kín lo̍h-lâi, kin-á-ji̍t góa it-tēng beh tòa lín tau.” 6 [Sat-kai] chiū kóaⁿ-kín lo̍h-lâi, hoaⁿ-hoaⁿ hí-hí chiap-thāi Iâ-so͘. 7 Chèng-lâng chi̍t-ē khòaⁿ-tio̍h, ngau̍h-ngau̍h-liām kóng, “Chit-ê lâng soah ji̍p-khì chōe-jîn ê chhù tòa!” 8 [Sat-kai] khiā-teh, tùi Chú kóng, “Chú ah, góa beh the̍h châi-sán ê chi̍t pòaⁿ chín-chè sàn-chhiah-lâng. Góa nā ū kā lâng pián-chîⁿ, beh sì pē hêng i.” 9 Iâ-so͘ tùi i kóng, “Kin-á-ji̍t chín-kiù í-keng lîm-kàu chit-ê ke, in-ūi i mā-sī [A-pek-la-hán] ê kiáⁿ-sun. 10 Jîn-chú lâi sī beh tui-chhē koh chín-kiù sit-lo̍h ê lâng.” 11 Chèng-lâng teh thiaⁿ chiah-ê ōe ê sî, Iâ-so͘ koh kā in kóng chi̍t ê phì-jū, in-ūi I teh-beh kàu [Iâ-lō͘-sat-léng], koh hiah-ê lâng siūⁿ-kóng Siōng-tè-kok liâm-piⁿ ōe si̍t-hiān. 12 Só͘-í Iâ-so͘ kā in kóng, “Ū chi̍t ê kùi-cho̍k khì chin hn̄g ê só͘-chāi beh siū hong choh-ông chiah tńg-lâi. 13 I tiàu-chi̍p cha̍p ê lô͘-po̍k lâi, hō͘ in cha̍p ê kim-pè, kā in kóng, ‘Góa tńg-lâi í-chêng, ēng chiah-ê kim-pè khì chòe seng-lí.’ 14 Pún-kok ê jîn-bîn oàn-hūn i, chhe chi̍t ê sù-chiá tè i ê āu-bīn khì, chàu kóng, ‘Goán bô ài chit-ê lâng chòe goán ê ông.’ 15 “Chit-ê kùi-cho̍k siū hong choh-ông tńg-lâi ê sî, kiò hiah-ê niá-tio̍h chîⁿ ê lô͘-po̍k lâi, ài chai in ta̍k ê lâng thàn jōa chōe. 16 Thâu-chi̍t ê lâi i ê bīn-chêng, kóng, ‘Chú ah, góa ū ēng lí hit-ê kim-pè thàn cha̍p ê.’ 17 Chú-lâng kā i kóng, ‘Chin hó, hó ê lô͘-po̍k! Lí kì-jiân tī sió-sū tiong-si̍t, góa beh hō͘ lí koán-lí cha̍p ê siâⁿ.’ 18 Tē-jī ê lâi kóng, ‘Chú ah, góa ū ēng lí hit-ê kim-pè thàn gō͘ ê.’ 19 Chú-lâng mā án-ni kā chit-ê lâng kóng, ‘Góa beh hō͘ lí koán-lí gō͘ ê siâⁿ.’ 20 Koh lēng-gōa chi̍t-ê lâi, kóng, ‘Chú ah, lí khòaⁿ, lí ê kim-pè tī chia. Góa ēng chhiú-kun kā i pau khí-lâi khǹg. 21 Góa chin kiaⁿ lí, in-ūi lí sī chi̍t ūi giâm-hat ê lâng, bô kià, lí mā beh niá, bô chèng, lí mā beh siu.’ 22 Chú-lâng kā i kóng, ‘Lí chit-ê khó-ò͘ⁿ ê lô͘-po̍k, góa beh chiàu lí ka-kī só͘ kóng ê kā lí tēng-chōe. Lí kì-jiân chai góa sī giâm-hat ê lâng, bô kià mā beh niá, bô chèng mā beh siu, 23 lí ná bô chiong góa ê chîⁿ kià tī gûn-hâng, tán góa tńg-lâi ê sî thang niá bú-chîⁿ kap lī-sek?’ 24 “Chú-lâng chiū kā khiā tī piⁿ-a ê lâng kóng, ‘Kā i ê kim-pè the̍h-lâi, kau hō͘ hit-ê ū cha̍p ê kim-pè ê!’ 25 In chiū tùi i kóng, ‘Chú ah, i í-keng ū cha̍p ê kim-pè lah.’ 26 Chú-lâng kóng, ‘Góa kā lín kóng, í-keng ū-ê, beh koh-khah chōe hō͘ i; bô-ê, liân i só͘-ū ê mā beh kā i the̍h-lâi. 27 M̄-kú hiah-ê tùi-te̍k góa, bô ài góa chòe in ê ông ê, kā in thoa lâi chia, tī góa ê bīn-chêng kā in thâi-sí!’ ” 28 Kóng chiah-ê ōe liáu-āu, Iâ-so͘ kiâⁿ chòe-chêng chiūⁿ [Iâ-lō͘-sat-léng]. 29 I teh-beh kàu [Ka-ná] soaⁿ soaⁿ-kha ê [Pek-hoat-kî] kap [Pek-tāi-nî] ê sî, chhe nn̄g ê bûn-tô͘, 30 hoan-hù in kóng, “Lín khì tùi-bīn ê chng-siā, ji̍p-khì ê sî ōe khòaⁿ-tio̍h chi̍t chiah iáu bô-lâng khiâ kè ê lû-á-kiáⁿ pa̍k tī hia. Lín kā i tháu-khui, khan lâi chia. 31 Nā ū lâng mn̄g ‘Lín sī án-chóaⁿ teh tháu lû-á-kiáⁿ?’ Lín tio̍h kóng, ‘Chú beh ēng i.’ ” 32 In chiū khì, só͘ tú-tio̍h ê tāi-chì ta̍k hāng kap Iâ-so͘ só͘ kóng ê siâng-khoán. 33 In teh tháu hit chiah lû-á-kiáⁿ ê sî, chú-lâng mn̄g in kóng, “Lín sī án-chóaⁿ teh tháu chit chiah lû-á-kiáⁿ?” 34 In ìn kóng, “Chú beh ēng i.” 35 In chiū khan hit chiah lû-á-kiáⁿ lâi hō͘ Iâ-so͘, chiong in ka-kī ê gōa-saⁿ phoa̍h tī lû-á téng, kā Iâ-so͘ hû-khí khiâ. 36 Iâ-so͘ khiâ lû-á-kiáⁿ chìn-chêng kiâⁿ ê sî, chèng-lâng chiong ka-kī ê gōa-saⁿ pho͘ tī lō͘-ni̍h kā I hoan-gêng. 37 Iâ-so͘ teh-beh kàu [Iâ-lō͘-sat-léng] beh lo̍h [Ka-ná-soaⁿ] ê só͘-chāi, kui tōa-tīn ê bûn-tô͘ in-ūi khòaⁿ-tio̍h it-chhè kî-biāu ê sū chiū lóng hoaⁿ-hí, tōa-siaⁿ o-ló Siōng-tè kóng: 38 Hōng Chú ê miâ lâi ê Ông eng-kai siū chheng-chàn! Goān thiⁿ-téng hô-pêng, êng-kng kui hō͘ chì-koân ê Siōng-tè! 39 Chèng-lâng tiong-kan, ū kúi-nā ê [Hoat-lī-sài]-phài ê lâng kā Iâ-so͘ kóng, “Lāu-su, tio̍h chek-pī lí ê bûn-tô͘!” 40 Iâ-so͘ ìn kóng, “Góa kā lín kóng, in nā tiām-tiām, chiah-ê chio̍h-thâu mā ōe tōa-siaⁿ hoah chhut-lâi.” 41 Iâ-so͘ teh-beh kàu [Iâ-lō͘-sat-léng], khòaⁿ-tio̍h siâⁿ, chiū ūi-tio̍h siâⁿ ai-khàu, 42 kóng “Góa si̍t-chāi chin ài lí kin-á-ji̍t chai án-chóaⁿ chiah ōe kiâⁿ-ǹg hô-pêng! M̄-kú hiān-chāi tùi lí khàm-teh, hō͘ lí khòaⁿ bōe-tio̍h. 43 In-ūi ji̍t-chí teh-beh kàu, hit sî lí ê tùi-te̍k ōe tī lí ê chiu-ûi chō thô͘-tui pau-ûi, tùi sì-bīn kā lí kong-kek. 44 In ōe chiong lí kap lí siâⁿ-lāi ê jîn-bîn choân-pō͘ húi-bia̍t, bô lâu nn̄g tè chio̍h sio-tha̍h, in-ūi lí khòaⁿ bōe chhut Siōng-tè chín-kiù lí ê sî-ki.” 45 Iâ-so͘ ji̍p-khì Sèng-tiān, khí-chhiú kóaⁿ hiah-ê bōe mi̍h-kiāⁿ ê lâng chhut-khì. 46 I kā in kóng, “Sèng-keng ū kì-chài: Góa ê chhù eng-kai sī kî-tó ê tiān, lín soah kā i pìⁿ-chòe thó͘-húi-á khut.” 47 Iâ-so͘ ta̍k ji̍t tī Sèng-tiān kà-sī lâng. Chè-si-tiúⁿ, keng-ha̍k-kàu-su, kap jîn-bîn ê thâu-lâng it-ti̍t kè-bô͘ beh hāi-sí Iâ-so͘, 48 m̄-kú chhē bô hoat-tō͘, in-ūi chèng-lâng lóng chin chù-ì teh thiaⁿ I ê ōe.

Lō͘-ka 20

1 Ū chi̍t ji̍t, Iâ-so͘ tī Sèng-tiān teh kà-sī lâng koh thoân hok-im. Ū chè-si-tiúⁿ, keng-ha̍k-kàu-su, kap tiúⁿ-ló chòe-hé lâi, 2 mn̄g I, “Kā goán kóng, lí khò sím-mi̍h koân-pèng chòe chiah-ê tāi-chì? Sím-mi̍h lâng hō͘ lí chit-ê koân-pèng?” 3 Iâ-so͘ ìn kóng, “Góa mā beh mn̄g lín chi̍t kù ōe. Lín kā góa ìn. 4 [Iok-hān] kā lâng sóe-lé ê koân-pèng sī tùi Thiⁿ á-sī tùi lâng lâi ê?” 5 In hō͘-siōng gī-lūn, “Lán nā kóng ‘Tùi Thiⁿ’, I ōe kóng ‘Án-ni, lín sī-án-chóaⁿ bô sìn [Iok-hān]’? 6 Lán nā kóng ‘Tùi lâng’, chèng-lâng ōe ēng chio̍h-thâu kā lán tìm, in-ūi in lóng sìn [Iok-hān] sī sian-ti.” 7 Só͘-í in ìn kóng m̄-chai tùi tó-ūi lâi. 8 Iâ-so͘ kā in kóng, “Án-ni, góa mā m̄ kā lín kóng góa khò sím-mi̍h koân-pèng chòe chiah-ê tāi-chì.” 9 Iâ-so͘ koh ēng chi̍t ê phì-jū kā chèng-lâng kóng, “Ū chi̍t ê lâng khai-khún chi̍t khu phû-tô-hn̂g. I chiong chit khu hn̂g cho͘ hō͘ tiān-lông, āu-lâi chhut-gōa chin kú. 10 Siu-sêng ê sî kàu, i chhe chi̍t ê lô͘-po̍k khì tiān-lông hia, beh kā in siu hn̂g-ni̍h ê ké-chí. Tiān-lông kā i phah, hō͘ i khang-chhiú tò-khì. 11 Chú-lâng koh chhe pa̍t ê lô͘-po̍k khì. In mā kā i phah, kā i bú-jio̍k, kóaⁿ i khang-chhiú tò-khì. 12 Chú-lâng chiū chhe tē-saⁿ ê lô͘-po̍k khì. In mā kā i siong-hāi, kā i kóaⁿ chhut-khì. 13 Āu-lâi phû-tô-hn̂g ê chú-lâng kóng, ‘Taⁿ góa tio̍h án-chóaⁿ chòe? Góa beh chhe góa só͘ thiàⁿ ê kiáⁿ khì. In tāi-khài ōe kā i chun-tiōng.’ 14 M̄-kú tiān-lông khòaⁿ-tio̍h i, chiū chham-siông kóng, ‘Chit-ê sī i ê kè-sêng-jîn. Lán lâi kā i thâi-sí, án-ni i ê châi-sán chiū pìⁿ-chòe lán ê.’ 15 In chiū kā i hiat chhut-khì phû-tô-hn̂g ê gōa-bīn, kā i thâi-sí. “Án-ni, phû-tô-hn̂g ê chú-lâng ōe án-chóaⁿ kā in chhú-lí? 16 I ōe lâi châu-bia̍t chiah-ê tiān-lông, chiong phû-tô-hn̂g cho͘ hō͘ pa̍t-lâng.” Chèng-lâng thiaⁿ-tio̍h chiah-ê ōe, chiū kóng, “Chhian-bān m̄-thang ū chit khoán tāi-chì!” 17 Iâ-so͘ chù-ì kā in khòaⁿ, kóng, “Sèng-keng só͘ kì-chài ê sī sím-mi̍h ì-sù: Khí-chhù sai-hū só͘ khì-sak ê chio̍h í-keng chiâⁿ-chòe siōng tiōng-iàu ê ki-chio̍h. 18 Só͘-ū siak lo̍h-khì hit tè chio̍h-thâu téng ê, ōe siak-kah chhùi-kut hun-si; hō͘ hit tè chio̍h-thâu teh-tio̍h ê, ōe teh-kah chhùi-kô͘-kô͘.” 19 Hit sî, keng-ha̍k-kàu-su kap chè-si-tiúⁿ chai-iáⁿ Iâ-so͘ kóng chit-ê phì-jū sī teh chí in, chiū siūⁿ-beh tong-tiûⁿ hē-chhiú lia̍h Iâ-so͘, put-kò kiaⁿ chèng-lâng. 20 Só͘-í, in chiū chhē ki-hōe, phài bi̍t-thàm ké-chòe láu-si̍t-lâng, beh lia̍h Iâ-so͘ ê ōe-phāng, chiong I kau hō͘ chóng-tok thang ēng i ê koân-pèng i-hoat pān-lí. 21 Chiah-ê bi̍t-thàm lâi mn̄g Iâ-so͘ kóng, “Lāu-su, goán chai lí só͘ kóng só͘ kà-sī ê lóng chin tio̍h, bô phian-sim, chí-ū tiong-si̍t kà-sī Siōng-tè ê tō-lí. 22 Goán la̍p-sè hō͘ [Lô-má] hông-tè [Khái-sat] ū ha̍h Lu̍t-hoat bô?” 23 Iâ-so͘ khòaⁿ-chhut in ê khúi-kè, chiū tùi in kóng, 24 “The̍h chi̍t ê gûn-pè hō͘ góa khòaⁿ. Che ū sím-mi̍h lâng ê siōng kap jī-hō?” In ìn kóng, “[Khái-sat] ê.” 25 Iâ-so͘ chiū tùi in kóng, “Án-ni, [Khái-sat] ê mi̍h hō͘ [Khái-sat]; Siōng-tè ê mi̍h hō͘ Siōng-tè.” 26 In tī kong-chiòng bīn-chêng lia̍h bōe-tio̍h Iâ-so͘ ê ōe-phāng, koh I ê ìn-tap hō͘ in chin tio̍h-kiaⁿ, chiū tiām-khì. 27 Ū chi̍t-kóa chú-tiuⁿ bô koh-oa̍h ê [Sat-to͘-kai]-phài ê lâng lâi Iâ-so͘ hia, mn̄g I kóng, 28 “Lāu-su, [Mô͘-se] só͘ siá ê Lu̍t-hoat kā goán kóng, ‘Nā ū lâng i ê hiaⁿ sí-khì, bó͘ iáu tī-teh m̄-kú bô kiáⁿ, i choh sió-tī ê tio̍h chhōa hiaⁿ-só thòe hiaⁿ thoân-chong-chiap-tāi.’ 29 Í-chêng bat ū chhit ê hiaⁿ-tī, siōng-tōa ê chhōa-bó͘, bô kiáⁿ chiū sí-khì. 30 Tē-jī ê, 31 tē-saⁿ ê mā chhōa in hiaⁿ-só. Chhit ê lóng án-ni, bô kiáⁿ chiū sí-khì. 32 Āu-lâi, hit-ê hū-jîn-lâng mā sí-khì. 33 Án-ni, koh-oa̍h ê sî, chit-ê hū-jîn-lâng sī tó chi̍t ê lâng ê bó͘? In-ūi chit chhit-ê lóng bat chhōa i chòe bó͘.” 34 Iâ-so͘ kā in kóng, “Kim-sè ê lâng ū kè ū chhōa; 35 put-kò ōe kham-tit tùi sí-lâng tiong koh-oa̍h koh chìn-ji̍p lâi-sè ê lâng chiū bô kè bô chhōa. 36 In-ūi in sī koh-oa̍h ê lâng, bōe-koh sí, kap thiⁿ-sài siâng-khoán sī Siōng-tè ê kiáⁿ-jî. 37 Koan-hē sí-lâng koh-oa̍h ê sū, [Mô͘-se] í-keng tī ‘Teh-to̍h ê chhì-phè’ hit tōaⁿ keng-chat ū chí-bêng, mā chheng-ho͘ Chú sī [A-pek-la-hán] ê Siōng-tè, [Í-sat] ê Siōng-tè, [Ngá-kok] ê Siōng-tè. 38 I m̄-sī sí-lâng ê Siōng-tè, sī oa̍h-lâng ê Siōng-tè. In-ūi tùi Siōng-tè lâi khòaⁿ in lóng teh oa̍h.” 39 Ū kúi-nā ê keng-ha̍k-kàu-su tùi Iâ-so͘ kóng, “Lāu-su, lí kóng liáu chin hó.” 40 In chiū m̄-káⁿ koh kā I mn̄g sím-mi̍h. 41 Iâ-so͘ tùi in kóng: “Lâng ná-ōe kóng, Ki-tok sī [Tāi-pi̍t] ê hō͘-tāi? 42 In-ūi [Tāi-pi̍t] pún-sin tī Si-phian kóng: Chú kā góa ê Chú kóng: Lí chē góa ê chiàⁿ-pêng, 43 kàu góa hō͘ lí ê tùi-te̍k chòe lí ê kha-tiam. 44 [Tāi-pi̍t] to chheng-ho͘ Ki-tok chòe Chú, Ki-tok ná-ōe sī [Tāi-pi̍t] ê hō͘-tāi?” 45 Chèng-lâng teh thiaⁿ ê sî, Iâ-so͘ tùi I ê bûn-tô͘ kóng, 46 “Tio̍h tî-hông keng-ha̍k-kàu-su. In ài chhēng tn̂g-saⁿ kiâⁿ-lâi kiâⁿ-khì, tī chhī-tiûⁿ-kháu hō͘ lâng chhéng-an, tī hōe-tn̂g chē koân-ūi, tī iàn-hōe chē tōa-ūi. 47 In chhim-chiàm kóaⁿ-hū ê ke-hé, thiau-kò͘-ì kî-tó chin tn̂g. In ōe siū koh-khah tāng ê hêng-hoa̍t.”

Lō͘-ka 21

1 Iâ-so͘ gia̍h-thâu khòaⁿ-tio̍h hó-gia̍h-lâng chiong in ê hiàn-kim hiàn lo̍h-khì hōng-hiàn-kūi. 2 I koh khòaⁿ-tio̍h chi̍t ê sàn-chhiah ê kóaⁿ-hū hiàn nn̄g ê tâng-chîⁿ-á lo̍h-khì. 3 Iâ-so͘ kóng, “Góa si̍t-chāi kā lín kóng, chit-ê sàn-chhiah kóaⁿ-hū hiàn ji̍p-khì ê pí chèng-lâng hiàn ê koh-khah chōe. 4 In-ūi in lóng sī hiàn ēng chhun-ê, m̄-kú chit-ê kóaⁿ-hū sui-jiân chin sàn-chhiah, iáu-kú the̍h só͘-ū ê seng-oa̍h-hùi lóng hiàn lo̍h-khì.” 5 Ū lâng teh tâm-lūn Sèng-tiān sī ēng hó chio̍h kap hōng-hiàn ê mi̍h lâi chong-sek ê. Iâ-so͘ kóng, 6 “Ji̍t-chí teh-beh kàu, lín teh khòaⁿ ê chiah-ê it-chhè lóng ōe siū thiah-húi, thiah-kah bô chi̍t tè ōe tha̍h tī pa̍t tè téng-bīn.” 7 Bûn-tô͘ mn̄g Iâ-so͘, “Lāu-su, chit-ê tāi-chì sím-mi̍h sî ōe hoat-seng? Chit-ê tāi-chì beh hoat-seng ê sî ū sím-mi̍h tiāu-thâu?” 8 Iâ-so͘ kóng, “Tio̍h kín-sīn, m̄-thang siū bê-he̍k. In-ūi ū chin chōe lâng ōe lī-iōng góa ê miâ lâi, kóng ‘Góa chiū-sī Ki-tok’, koh kóng ‘Sî-ki teh-beh kàu lah’. Lín m̄-thang tè in khì. 9 Lín thiaⁿ-tio̍h chiàn-cheng kap pō-loān ê siau-sit, m̄-bián kiaⁿ-hiâⁿ. Chiah-ê tāi-chì it-tēng ōe tāi-seng hoat-seng, m̄-kú chiong-kio̍k bōe sûi-sî kàu.” 10 Iâ-so͘ kè-sio̍k kā in kóng, “Bîn-cho̍k ōe khí-lâi kong-kek bîn-cho̍k, kok-ka kong-kek kok-ka. 11 Ū tōa tōe-tāng, chin chōe só͘-chāi ū ki-hng kap un-e̍k, koh ū thang kiaⁿ ê kéng-siōng kap tōa kî-chek tùi thiⁿ-téng chhut-hiān. 12 Chiah-ê tāi-chì hoat-seng í-chêng, lâng ōe lia̍h lín, pek-hāi lín, kā lín kau hō͘ hōe-tn̂g kap kaⁿ-ga̍k. Lín ōe ūi-tio̍h góa ê iân-kò͘ hō͘ lâng lia̍h-khì kun-ông kap chóng-tok ê bīn-chêng. 13 Chit-ê sī lín chòe kiàn-chèng ê ki-hōe. 14 Só͘-í, lín ê sim tio̍h lia̍h hō͘ tiāⁿ, m̄-bián seng siūⁿ-beh án-chóaⁿ piān-bêng. 15 In-ūi góa beh sù lín kháu-châi kap tì-hūi, hō͘ lín ê tùi-te̍k bô chi̍t ê ōe-tàng tùi-khòng á-sī hoán-pok. 16 Liân lín ê pē-bú, hiaⁿ-tī, chhin-chiâⁿ, kap pêng-iú mā ōe kā lín chhut-bōe; lín tiong-kan ū lâng ōe hō͘ in hāi-sí. 17 Lín ōe in-ūi góa ê miâ hō͘ chèng-lâng oàn-hūn. 18 Put-kò lín liân chi̍t ki thâu-mn̂g to bōe sit-lo̍h. 19 Tio̍h jím-nāi chiah ōe tit-tio̍h sìⁿ-miā.” 20 “Lín khòaⁿ-tio̍h [Iâ-lō͘-sat-léng] hō͘ kun-tūi pau-ûi ê sî, chiū chai chit-ê siâⁿ teh-beh húi-bia̍t lah. 21 Hit sî, tī [Iû-thài] ê lâng tio̍h tô-cháu khì soaⁿ-lāi; tī siâⁿ-lāi ê lâng tio̍h lī-khui; tī chng-kha ê lâng m̄-thang ji̍p siâⁿ. 22 In-ūi che sī Pò-èng ê Ji̍t-chí, sī beh èng-giām Sèng-keng só͘ kì-chài ê it-chhè. 23 Tī hiah-ê ji̍t-chí, ū sin-īn ê kap hō͘ eⁿ-á chia̍h-lin ê hū-jîn-lâng hui-siông put-hēng! In-ūi tōa chai-hō teh-beh lîm-kàu chit-ê tōe; Siōng-tè ê tōa siū-khì teh-beh lîm-kàu chit-ê peh-sìⁿ. 24 In ōe hō͘ to-kiàm thâi-sí, mā ōe hō͘ lâng lia̍h-khì ta̍k kok. [Iâ-lō͘-sat-léng] ōe hō͘ Gōa-pang-lâng thún-ta̍h, ti̍t-kàu Gōa-pang-lâng ê kî-hān móa.” 25 “Ji̍t, ge̍h, chhiⁿ lóng ōe hián-chhut tiāu-thâu. Tōe-chiūⁿ bān-bîn ōe in-ūi hái-éng hōa-hōa-háu kiaⁿ-hiâⁿ put-an. 26 Lâng ōe in-ūi chit sè-kài teh-beh hoat-seng ê tāi-chì kiaⁿ-kah hūn-khì, in-ūi thiⁿ-téng ê kng-thé lóng ōe iô-choah. 27 Hit sî, lâng ōe khòaⁿ-kìⁿ Jîn-chú chhiong-móa koân-lêng kap tōa êng-kng chē hûn lâi-lîm. 28 Chiah-ê tāi-chì teh-beh hoat-seng ê sî, lín tio̍h gia̍h-thâu théng-sin, in-ūi lín ê chín-kiù teh-beh kàu lah.” 29 Iâ-so͘ koh ēng phì-jū kā in kóng, “Lín khòaⁿ bû-hoa-kó-chhiū kap it-chhè ê chhiū. 30 Lín khòaⁿ-tio̍h chiah-ê chhiū puh-íⁿ ê sî chiū chai hē-thiⁿ teh-beh kàu. 31 Chhin-chhiūⁿ án-ni, lín khòaⁿ-tio̍h chiah-ê tāi-chì hoat-seng ê sî chiū chai Siōng-tè ê chú-koân teh-beh si̍t-hiān. 32 Góa si̍t-chāi kā lín kóng, chit sè-tāi iáu-bē kè-khì, chiah-ê tāi-chì lóng ōe hoat-seng. 33 Thiⁿ kap tōe ōe siau-sit, m̄-kú góa ê ōe choa̍t-tùi bōe siau-sit.” 34 “Lín ka-kī tio̍h kín-sīn, chiah-bián in-ūi tham-chia̍h, chiú-chùi, kap seng-oa̍h ê khòa-lū hō͘ lín ê sim bâ-pì, tì-kàu hit Ji̍t chhin-chhiūⁿ lô-bāng hut-jiân lîm-kàu lín, in-ūi hit Ji̍t ōe lîm-kàu tòa tī choân sè-kài ta̍k só͘-chāi ê lâng. 36 Tio̍h put-sî kéng-séng, kî-tó, hō͘ lín ū khùi-la̍t thang tô-pī it-chhè teh-beh hoat-seng ê tāi-chì, thang khiā tī Jîn-chú ê bīn-chêng.” 37 Chit kúi ji̍t, Iâ-so͘ ji̍t-sî lóng tī Sèng-tiān kà-sī lâng, mî-sî chhut-siâⁿ khì [Ka-ná-soaⁿ] kè-mî. 38 Chèng-lâng lóng thàu-chá chiū khì Sèng-tiān thiaⁿ Iâ-so͘ kóng tō-lí.

Lō͘-ka 22

1 Tû-kàⁿ-choeh, iā kiò-chòe Pôaⁿ-kè-choeh, teh-beh kàu. 2 Chè-si-tiúⁿ kap keng-ha̍k-kàu-su in-ūi kiaⁿ bîn-chiòng, só͘-í teh chhē-khòaⁿ ū sím-mi̍h hoat-tō͘ thang hāi-sí Iâ-so͘. 3 Sat-tàn ji̍p-khì hit-ê kiò-chòe [Í-su-ka-lio̍k] ê [Iû-tāi] ê sim-lāi; i sī cha̍p-jī sù-tô͘ ê chi̍t ê. 4 I khì kap chè-si-tiúⁿ í-ki̍p Sèng-tiān ê siú-ōe-koaⁿ chham-siông, khòaⁿ-beh ēng sím-mi̍h hoat-tō͘ chiong Iâ-so͘ chhut-bōe hō͘ in. 5 In chin hoaⁿ-hí, iok beh hō͘ i chîⁿ. 6 [Iû-tāi] tông-ì, chiū it-ti̍t teh chhē ki-hōe, thang tī kûn-chiòng bô tī in tiong-kan ê sî chhut-bōe Iâ-so͘. 7 Tû-kàⁿ-choeh, chiū-sī tio̍h thâi Pôaⁿ-kè-choeh ê iûⁿ-ko ê ji̍t, kàu lah. 8 Iâ-so͘ chhe [Pí-tek] kap [Iok-hān], kā in kóng, “Lín khì chún-pī Pôaⁿ-kè-choeh ê boán-chhan, lán thang chia̍h.” 9 In kā I mn̄g, “Lí ài goán tī tó-ūi chún-pī?” 10 Iâ-so͘ kā in kóng, “Lín ji̍p-khì siâⁿ-lāi, ōe tú-tio̍h chi̍t ê lâng the̍h chúi-pân, lín tè i khì i beh ji̍p-khì hit keng chhù, 11 kā hit ke ê chú-lâng kóng, ‘Lāu-su teh mn̄g, I kap I ê bûn-tô͘ beh chia̍h Pôaⁿ-kè-choeh boán-chhan ê kheh-thiaⁿ tī tó-ūi?’ 12 Hit-ê lâng ōe pò lín khòaⁿ lâu-téng chi̍t keng khoán hó-sè ê tōa-thiaⁿ. Lín chiū tī hia chún-pī.” 13 In khì, khòaⁿ-tio̍h ta̍k hāng kap Iâ-so͘ kā in kóng ê lóng siâng-khoán; in chiū tī hia chún-pī Pôaⁿ-kè-choeh ê boán-chhan. 14 Boán-chhan ê sî-kan kàu, Iâ-so͘ chiū chē-toh, sù-tô͘ kap I chòe-hé chē. 15 Iâ-so͘ kā in kóng, “Góa siū-lān í-chêng chin ài kap lín chia̍h chit-ê Pôaⁿ-kè-choeh ê boán-chhan. 16 Góa kā lín kóng, chit-ê Boán-chhan tī Siōng-tè-kok oân-choân si̍t-hiān í-chêng, góa choa̍t-tùi bōe-koh chia̍h.” 17 Iâ-so͘ chiong poe chiap kè-lâi, kám-siā liáu-āu, kóng, “Lín phâng chit-ê poe, pun hō͘ tāi-ke lim. 18 Góa kā lín kóng, tùi hiān-chāi khí ti̍t-kàu Siōng-tè-kok lâi-lîm, góa choa̍t-tùi bōe-koh lim chit-ê phû-tô-chiú.” 19 Jiân-āu Iâ-so͘ the̍h piáⁿ, kám-siā liáu-āu peh-khui, the̍h hō͘ in kóng, “Chit-ê sī góa ê seng-khu, sī ūi-tio̍h lín lâi hiàn ê. Lín tio̍h chòe chit-ê lâi kì-liām góa.” 20 Chia̍h liáu-āu I koh chiàu án-ni phâng poe, kóng, “Chit-ê poe sī sin ê iok, ēng góa ūi-tio̍h lín lâu-chhut ê huih lâi siat-li̍p ê. 21 “Lín khòaⁿ! Chhut-bōe góa hit-ê lâng chit-chūn kap góa chòe-hé chhun-chhiú tī toh-téng. 22 In-ūi Jîn-chú ōe chiàu Siōng-tè ê koat-tēng lī-khui sè-kan; m̄-kú chhut-bōe Jîn-chú hit-ê lâng chhám à!” 23 In chiū mn̄g-lâi mn̄g-khì, ài chai in tiong-kan sím-mi̍h lâng ōe chòe chit-ê tāi-chì. 24 Bûn-tô͘ tiong-kan ū khí cheng-lūn, khòaⁿ sím-mi̍h lâng sǹg siōng-tōa. 25 Iâ-so͘ kā in kóng, “Gōa-pang-lâng ê kun-ông choh-chú koán-hat peh-sìⁿ; thóng-tī-chiá hō͘ lâng chheng-chòe un-chú. 26 Chóng-sī lín m̄-sī án-ni! Lín tiong-kan siōng-tōa-ê tian-tò tio̍h chiâⁿ-chòe siōng-sòe-ê; choh léng-siù-ê tio̍h chiâⁿ-chòe ho̍k-sāi-ê. 27 Án-ni, sím-mi̍h lâng khah tōa? Sī chē-toh chia̍h-pn̄g-ê á-sī ho̍k-sāi-ê? Kiám m̄-sī chē-toh-ê? M̄-kú góa tī lín tiong-kan sī hit-ê ho̍k-sāi-ê. 28 “Lín chiah-ê lâng tī góa ê chhì-liān tiong it-ti̍t kap góa chòe-hé. 29 Góa ê Pē chiong ông ê koân-pèng sù hō͘ góa, góa mā án-ni chiong ông ê koân-pèng sù hō͘ lín, 30 hō͘ lín thang tī góa ê Kok-tō͘ kap góa chē-toh, lim-chia̍h, koh chē tī pó-chō sím-phòaⁿ [Í-sek-lia̍t] ê cha̍p-jī chi-cho̍k.” 31 Iâ-so͘ koh kóng, “[Se-bûn], [Se-bûn], Sat-tàn í-keng tùi Siōng-tè iau-kiû beh chhin-chhiūⁿ pòa be̍h-á án-ni kā lín pòa. 32 Put-kò góa ū ūi-tio̍h lí kî-tó, hō͘ lí bōe sit-khì sìn-sim. Lí hôe-thâu tńg-lâi liáu-āu, tio̍h kian-kò͘ lí ê hiaⁿ-tī ê sìn-sim.” 33 [Pí-tek] ìn I kóng, “Chú ah, góa í-keng chún-pī piān-piān beh kap lí chē-kaⁿ, kap lí chòe-hé sí!” 34 Iâ-so͘ kā i kóng, “[Pí-tek], góa kā lí kóng, kin-á-ji̍t koe thî í-chêng, lí ōe saⁿ pái m̄-jīn góa.” 35 Iâ-so͘ koh kā bûn-tô͘ kóng, “Í-chêng góa chhe lín chhut-khì, kiò lín chîⁿ-tē, lú-hêng-tē, kap ôe lóng bián tòa, lín kiám ū khiàm sím-mi̍h?” In ìn kóng, “Lóng bô.” 36 I chiū kā in kóng, “M̄-kú hiān-chāi, ū chîⁿ-tē ê tio̍h tòa-leh; ū lú-hêng-tē ê mā tio̍h tòa-leh; bô to-ê tio̍h bōe ka-kī ê gōa-saⁿ khì bóe. 37 In-ūi góa kā lín kóng, Sèng-keng kì-chài, ‘I hō͘ lâng sǹg-chòe put-hoat ê lâng’ chit kù ōe it-tēng tio̍h tī góa ê sin-chiūⁿ èng-giām. Sèng-keng kì-chài koan-hē góa ê tāi-chì í-keng teh èng-giām lah.” 38 Bûn-tô͘ kóng, “Chú ah, lí khòaⁿ, chia ū nn̄g ki to.” Iâ-so͘ ìn kóng, “Kàu-gia̍h lah!” 39 Iâ-so͘ chhut-khì, chiàu-siông khì [Ka-ná-soaⁿ]; bûn-tô͘ tè I khì. 40 Kàu hit-ê só͘-chāi, I kā in kóng, “Tio̍h kî-tó chiah bōe hām-lo̍h chhì-thàm.” 41 Jiân-āu I lī-khui in kàu hiat chio̍h-thâu ōe kàu hiah hn̄g ê só͘-chāi, kūi lo̍h-khì kî-tó, 42 kóng, “Pē ah, lí nā khéng, kiû lí chiong chit-ê poe kā góa the̍h khui! Chóng-sī m̄-thang chiàu góa ê ì-sù, tio̍h chiàu lí ê chí-ì si̍t-hiān.” 43 Ū chi̍t ê thiⁿ-sài tùi thiⁿ chhut-hiān, lâi chān I ê la̍t. 44 Iâ-so͘ hui-siông thòng-khó͘, jú jia̍t-chhiat kî-tó; I ê kōaⁿ chhin-chhiūⁿ tōa tiám huih tih-lo̍h tōe. 45 Kî-tó soah, Iâ-so͘ khiā khí-lâi, tò-khì bûn-tô͘ hia, khòaⁿ-tio̍h in in-ūi iu-siong soah khùn-khì. 46 I chiū kā in kóng, “Lín ná teh khùn? Khí-lâi kî-tó chiah bōe hām-lo̍h chhì-thàm.” 47 Iâ-so͘ iáu teh kóng-ōe ê sî, hut-jiân ū chi̍t tīn lâng lâi; cha̍p-jī sù-tô͘ ê chi̍t ê, kiò-chòe [Iû-tāi] ê, chòe-chêng chhōa-lō͘. I kiâⁿ-óa Iâ-so͘, beh kā i chim. 48 Iâ-so͘ kā i kóng, “[Iû-tāi], lí ēng chim-chhùi lâi chhut-bōe Jîn-chú ò͘?” 49 Iâ-so͘ sin-piⁿ ê bûn-tô͘ khòaⁿ-tio̍h teh hoat-seng ê tāi-chì, chiū kóng, “Chú ah, goán ēng to kā in thâi hó-bô?” 50 Kî-tiong ū chi̍t ê kā tōa-chè-si ê lô͘-po̍k phut lo̍h-khì, kā i chiàⁿ-pêng ê hī-á siah khí-lâi. 51 Iâ-so͘ kóng, “M̄-thang koh tāng-chhiú!” Iâ-so͘ bong hit-ê lô͘-po̍k ê hī-á, kā i i-hó. 52 Iâ-so͘ kā hiah-ê lâi beh lia̍h I ê chè-si-tiúⁿ, Sèng-tiān ê kéng-ōe-tiúⁿ, kap tiúⁿ-ló kóng, “Lín gia̍h-to gia̍h-kùn chhut-lâi, sī teh lia̍h kiông-tō sī-bô? 53 Góa ta̍k ji̍t kap lín tī Sèng-tiān, lín bô hē-chhiú kā góa lia̍h. Che sī lín ê sî, o͘-àm teh chiáng-koân lah.” 54 In lia̍h Iâ-so͘, ah I ji̍p-khì tōa-chè-si ê kong-koán. [Pí-tek] lī hn̄g-hn̄g teh tè Iâ-so͘. 55 In tī tiâⁿ ê tiong-ng khí hé, ûi tī hé piⁿ chòe-hé teh chē; [Pí-tek] mā chē tī in tiong-kan. 56 Ū chi̍t ê lú-pī khòaⁿ-tio̍h [Pí-tek] ǹg hé teh chē, kim-kim kā i siòng, kóng, “Chit-ê mā-sī Iâ-so͘ in hit tīn ê lâng.” 57 [Pí-tek] m̄-jīn, kóng, “Góa m̄-bat I.” 58 Kè bô jōa kú, lēng-gōa chi̍t ê lâng khòaⁿ-tio̍h i, kóng, “Lí mā-sī in hit tīn ê lâng.” [Pí-tek] kóng, “Góa m̄-sī!” 59 Chha-put-to kè chi̍t tiám-cheng, koh ū chi̍t ê lâng kian-chhî kóng, “Chit-ê lâng khak-si̍t mā ū teh kap Iâ-so͘ chòe-hé, in-ūi i sī [Ka-lī-lī]-lâng.” 60 M̄-kú [Pí-tek] kóng, “M̄-sī, góa m̄-chai lí teh kóng sím-mi̍h!” I iáu teh kóng ê sî, koe sûi-sî thî. 61 Hit sî Chú oa̍t-thâu khòaⁿ [Pí-tek], [Pí-tek] chiū siūⁿ-khí Chú tùi i só͘ kóng ê ōe, “Kin-á-ji̍t koe thî í-chêng, lí ōe saⁿ pái m̄-jīn góa.” 62 I chiū chhut-khì gōa-bīn tōa-siaⁿ thî-khàu. 63 Hiah-ê khàn-siú Iâ-so͘ ê lâng kā I hì-lāng, koh kā I phah. 64 In ng I ê ba̍k-chiu, mn̄g I kóng, “Sian-ti, lí kā goán kóng, siáⁿ-lâng kā lí phah?” 65 In koh kóng chin chōe ōe kā I bú-jio̍k. 66 Thiⁿ-kng, [Iû-thài]-lâng ê tiúⁿ-ló, chè-si-tiúⁿ, kap keng-ha̍k-kàu-su chū-chi̍p. In kā Iâ-so͘ ah khì in ê gī-hōe, 67 kā I kóng, “Lí nā-sī Ki-tok, tio̍h kā goán kóng.” Iâ-so͘ kā in kóng, “Góa nā kā lín kóng, lín mā m̄-sìn. 68 Góa mn̄g lín, lín mā m̄ ìn. 69 Tùi hiān-chāi khí, Jîn-chú ōe chē tī Choân-lêng Siōng-tè ê chiàⁿ-pêng.” 70 Chèng-lâng kóng, “Án-ni lí chiū-sī Siōng-tè ê Kiáⁿ lò͘?” Iâ-so͘ ìn in kóng, “Góa sī, sī lín kóng ê.” 71 In chiū kóng, “Lán iáu su-iàu sím-mi̍h chèng-kù? Lán í-keng ū thiaⁿ-tio̍h I chhin-chhùi kóng lah!”

Lō͘-ka 23

1 Choân-thé gī-oân lóng khiā khí-lâi, ah Iâ-so͘ khì [Pí-lia̍p-to] bīn-chêng. 2 In chiū khòng-kò kóng, “Goán ū khòaⁿ-tio̍h chit-ê lâng teh bê-he̍k goán ê bîn-cho̍k, kìm-chí lâng la̍p-sè hō͘ Khái-sat, koh chū-chheng sī Ki-tok, sī Ông.” 3 [Pí-lia̍p-to] mn̄g Iâ-so͘ kóng, “Lí sī ‘[Iû-thài]-lâng ê Ông’ sī-bô?” Iâ-so͘ ìn kóng, “Che sī lí kóng ê.” 4 [Pí-lia̍p-to] chiū tùi hiah-ê chè-si-tiúⁿ kap kûn-chiòng kóng, “Góa chhâ bōe chhut chit-ê lâng ū sím-mi̍h chōe.” 5 M̄-kú in kian-chhî kóng, “I tùi [Ka-lī-lī] kàu chia, tī [Iû-thài] choân-tōe kà-sī lâng, siàn-tōng bîn-chiòng.” 6 [Pí-lia̍p-to] chi̍t-ē thiaⁿ-tio̍h, chiū mn̄g khòaⁿ chit-ê lâng sī [Ka-lī-lī]-lâng á m̄-sī. 7 I chi̍t-ē chai Iâ-so͘ sio̍k [Hi-lu̍t]-ông ê koán-hat, chiū kā I sàng khì [Hi-lu̍t] hia; hit sî [Hi-lu̍t] pún-lâng mā tī [Iâ-lō͘-sat-léng]. 8 [Hi-lu̍t] khòaⁿ-tio̍h Iâ-so͘, hui-siông hoaⁿ-hí, in-ūi i bat thiaⁿ-tio̍h Iâ-so͘ ê tāi-chì, it-ti̍t ài-beh kìⁿ I, koh ǹg-bāng ōe-tàng khòaⁿ-tio̍h I kiâⁿ sîn-jia̍h. 9 I mn̄g Iâ-so͘ chin chōe tāi-chì, Iâ-so͘ lóng bô ìn i. 10 Chè-si-tiúⁿ kap keng-ha̍k-kàu-su khiā khí-lâi, kek-lia̍t kā I khòng-kò. 11 [Hi-lu̍t] kap i ê peng mā kā I bú-jio̍k, hì-lāng, jiân-āu koh kā I chhēng chi̍t niá chin súi ê tn̂g-phàu, chiah kā I sàng tńg-khì hō͘ [Pí-lia̍p-to]. 12 [Hi-lu̍t] kap [Pí-lia̍p-to] pún-lâi ū oan-siû, tī hit chi̍t ji̍t soah pìⁿ-chòe pêng-iú. 13 [Pí-lia̍p-to] tiàu-chi̍p chè-si-tiúⁿ, koaⁿ-oân, kap bîn-chiòng lâi, 14 kā in kóng, “Lín ah chit-ê lâng lâi góa chia, khòng-kò I siàn-tōng bîn-chiòng. Taⁿ góa tī lín ê bīn-chêng ū kā I sím-mn̄g, chhâ lóng bô lín só͘ khòng-kò ê chōe. 15 [Hi-lu̍t] mā jīn-tēng I bô-chōe chiah chiong I sàng tò-lâi lán chia. Khó-kiàn I bô chòe sím-mi̍h kai-sí ê tāi-chì. 16 Só͘-í, góa beh ēng piⁿ kā I kà-sī chi̍t-ē, chiah pàng I khì.” 17 Ta̍k nî ê Pôaⁿ-kè-choeh, chóng-tok tio̍h chiàu peh-sìⁿ ê iau-kiû pàng chi̍t ê hoān-lâng hō͘ in. 18 Kûn-chiòng lóng hoah, “Chit-ê lâng tio̍h hō͘ I sí! Pàng [Pa-lia̍p-pa] hō͘ goán.” 19 Chit-ê [Pa-lia̍p-pa] in-ūi tī siâⁿ-lāi chok-loān koh thâi-lâng chiah siū koaiⁿ-kaⁿ. 20 [Pí-lia̍p-to] siūⁿ-beh pàng Iâ-so͘, chiū koh sòe-ho̍k chèng-lâng. 21 M̄-kú in tōa-siaⁿ hoah, “Kā tèng si̍p-jī-kè! Kā tèng si̍p-jī-kè!” 22 [Pí-lia̍p-to] tē-saⁿ piàn tùi in kóng, “Sī-án-chóaⁿ? I ū chòe sím-mi̍h pháiⁿ-tāi? Góa chhâ bōe chhut I ū kai-sí ê chōe. Só͘-í, góa beh ēng piⁿ kā I kà-sī chi̍t-ē, chiah pàng I khì.” 23 Put-kò kûn-chiòng kian-chhî, tōa-siaⁿ iau-kiû kā Iâ-so͘ tèng si̍p-jī-kè, chòe-āu in ê siaⁿ soah khah-iâⁿ. 24 [Pí-lia̍p-to] chiū soan-phòaⁿ, chiàu in ê iau-kiû khì chip-hêng, 25 pàng in só͘ iau-kiû hit-ê in-ūi chok-loān, thâi-lâng, hō͘ lâng koaiⁿ-kaⁿ ê [Pa-lia̍p-pa], kā Iâ-so͘ kau hō͘ in chiàu in ê ì-sù khì chhú-lí. 26 Hiah-ê peng-sū ah Iâ-so͘ ah chhut-khì ê sî, tú-hó ū chi̍t ê [Kó͘-lī-nāi]-lâng miâ kiò-chòe [Se-bûn] tùi chng-kha lâi. In kā i lia̍h lâi, chiong si̍p-jī-kè khǹg tī keng-thâu hō͘ i giâ, tè Iâ-so͘ ê āu-bīn kiâⁿ. 27 Ū chi̍t tōa-tīn bîn-chiòng tè Iâ-so͘, kî-tiong ū chi̍t-kóa hū-jîn-lâng ūi-tio̍h I tûi-heng pi-siong thî-khàu. 28 Iâ-so͘ oa̍t-thâu tùi in kóng, “[Iâ-lō͘-sat-léng] ê hū-jîn-lâng ah, m̄-bián ūi-tio̍h góa thî-khàu; tio̍h ūi lín ka-kī kap lín ê kiáⁿ-jî thî-khàu! 29 In-ūi ji̍t-chí teh-beh kàu, lâng ōe kóng, ‘Bōe hoâi-īn, m̄-bat siⁿ-kiáⁿ, m̄-bat hō͘ gín-á chia̍h-lin ê hū-jîn-lâng chin ū hok-khì!’ 30 Hit sî, lâng ōe tùi tōa-soaⁿ kóng: Kā goán teh lo̍h-lâi! tùi sió-soaⁿ kóng: Kā goán khàm lo̍h-lâi! 31 In-ūi liân oa̍h-teh ê chhiū-ba̍k to ōe án-ni, ta-khì ê chhiū-ba̍k kiám bōe koh-khah lī-hāi?” 32 Lēng-gōa nn̄g ê hoān-lâng mā hō͘ lâng ah khì kap Iâ-so͘ chòe-hé chhú sí-hêng. 33 In kàu chi̍t ê só͘-chāi kiò-chòe “[Thâu-khak-óaⁿ]”, chiū tī hia kā Iâ-so͘ tèng si̍p-jī-kè, mā tèng hit nn̄g ê hoān-lâng, chi̍t ê tī chiàⁿ-pêng, chi̍t ê tī tò-pêng. 34 Iâ-so͘ kóng, “Pē ah, sià-bián in, in-ūi in m̄-chai in teh chòe sím-mi̍h.” Āu-lâi in thiu-chhiam pun Iâ-so͘ ê saⁿ. 35 Bîn-chiòng khiā tī hia teh khòaⁿ. Hiah-ê [Iû-thài]-lâng ê léng-siù kā I thí-chhiò, kóng, “I kiù pa̍t-lâng; I nā-sī Siōng-tè só͘ kéng-soán ê Ki-tok, tio̍h kiù ka-kī!” 36 Hiah-ê peng-sū mā kā I hì-lāng, kiâⁿ óa-khì, the̍h chhò͘ hō͘ I, 37 kóng, “Lí nā-sī ‘[Iû-thài]-lâng ê Ông’, tio̍h kiù ka-kī.” 38 Tī I ê thâu-khak téng ū chōe-chn̄g ê pâi-á siá “Chit-ê sī [Iû-thài]-lâng ê Ông.” 39 Chòe-hé tèng ê hoān-lâng, ū chi̍t-ê it-ti̍t kā Iâ-so͘ bú-jio̍k kóng, “Lí kiám m̄-sī Ki-tok? Kiù lí ka-kī mā kap goán.” 40 Lēng-gōa chi̍t-ê kā i chek-pī kóng, “Lí kap I siâng-khoán siū-hêng, lí kiám m̄ kiaⁿ Siōng-tè? 41 Lán siū hêng sī kong-tō, in-ūi lán só͘ siū ê sī chōe-kai-èng-tit, m̄-kú chit-ê lâng lóng m̄-bat chòe m̄-tio̍h ê tāi-chì.” 42 I chiū tùi Iâ-so͘ kóng, “Iâ-so͘ ah, lí choh-ông lâi-lîm ê sî, chhiáⁿ ōe kì-tit góa!” 43 Iâ-so͘ kā i kóng, “Góa si̍t-chāi kā lí kóng, kin-á-ji̍t lí ōe kap góa chòe-hé tī Lo̍k-hn̂g.” 44 Chha-put-to tiong-tàu ê sî, o͘-àm jia-khàm choân-tōe kàu ē-po͘ saⁿ tiám, ji̍t-thâu sit kng, 45 Sèng-tiān lāi ê pò͘-lî li̍h-chòe nn̄g pêng. 46 Iâ-so͘ tōa-siaⁿ hoah, “Pē ah, góa chiong góa ê lêng-hûn kau-tài lí”; kóng soah, chiū tn̄g-khùi. 47 Chi̍t ê kun-koaⁿ khòaⁿ-tio̍h só͘ hoat-seng ê tāi-chì, kui êng-kng hō͘ Siōng-tè kóng, “Chit-ê lâng chin-chiàⁿ sī gī-lâng!” 48 Chū-chi̍p tī hia teh khòaⁿ chit-ê tāi-chì ê chèng-lâng, khòaⁿ-tio̍h só͘ hoat-seng ê tāi-chì, lóng ná kiâⁿ ná tûi-heng pi-siong tńg-khì. 49 Hiah-ê bat Iâ-so͘ ê lâng, í-ki̍p tùi [Ka-lī-lī] tè lâi ê hū-jîn-lâng, lóng khiā tī hn̄g-hn̄g ê só͘-chāi khòaⁿ chiah-ê tāi-chì. 50 Ū chi̍t ê lâng kiò-chòe [Iok-sek]; i sī gī-oân, sī chi̍t ê siān-liông chèng-gī ê lâng. 51 I bô chàn-sêng kî-tha gī-oân ê kè-bô͘ kap hêng-tōng. I sī [Iû-thài]-lâng ê siâⁿ [A-lī-má-thài] ê lâng, it-ti̍t teh kî-thāi Siōng-tè-kok ê lâi-lîm. 52 Chit-ê lâng khì kìⁿ [Pí-lia̍p-to], chhéng-kiû chiong Iâ-so͘ ê ûi-thé hō͘ i. 53 I chiong ûi-thé siu lo̍h-lâi, ēng iù-môa-pò͘ pau, jiân-āu kā I an-chòng tī phah hó tī chio̍h-piah ê bōng-lāi; chit-ê bōng lóng iáu m̄-bat lâng ēng. 54 Hit ji̍t sī Pī-pān-ji̍t, An-hioh-ji̍t tú-beh khai-sí. 55 Tùi [Ka-lī-lī] kap Iâ-so͘ chòe-hé lâi hiah-ê hū-jîn-lâng tè [Iok-sek] khì. In chim-chiok khòaⁿ hit-ê bōng, khòaⁿ Iâ-so͘ ê ûi-thé án-chóaⁿ hē, 56 chiū tńg-khì chún-pī phang-liāu kap phang-iû. An-hioh-ji̍t, hiah-ê hū-jîn-lâng chiàu Lu̍t-hoat ê kui-tēng hioh-khùn.

Lō͘-ka 24

1 Lé-pài-ji̍t thàu-chá, thiⁿ beh kng ê sî, hiah-ê hū-jîn-lâng tòa in só͘ chún-pī ê phang-liāu khì bōng-tōe. 2 In khòaⁿ-tio̍h chio̍h-thâu í-keng tùi bōng kō khui, 3 chiū ji̍p-khì, m̄-kú chhē bô Chú Iâ-so͘ ê ûi-thé. 4 In ūi-tio̍h chit hāng tāi-chì gāng-khì m̄-chai beh án-chóaⁿ ê sî, hut-jiân ū nn̄g ê lâng chhēng kng-iàⁿ-iàⁿ ê saⁿ khiā tī in sin-piⁿ. 5 Chiah-ê hū-jîn-lâng hui-siông tio̍h-kiaⁿ, bīn phak-lo̍h thô͘-kha. Hit nn̄g ê lâng kā in kóng, “Lín sī-án-chóaⁿ tī sí-lâng ê tiong-kan teh chhē oa̍h-lâng? I bô tī chia, í-keng koh-oa̍h. 6 Lín tio̍h kì-tit I iáu tī [Ka-lī-lī] ê sî kā lín kóng ê ōe: 7 ‘Jîn-chú it-tēng ōe siū chhut-bōe tī chōe-jîn ê chhiú, hō͘ in tèng si̍p-jī-kè, tē-saⁿ ji̍t koh-oa̍h.’ ” 8 Hiah-ê hū-jîn-lâng chiū siūⁿ-tio̍h Iâ-so͘ ê ōe. 9 In lī-khui bōng tńg-khì, chiong chiah-ê tāi-chì lóng tùi cha̍p-it ê sù-tô͘ kap kî-tha lóng-chóng ê lâng pò-kò. 10 Tùi sù-tô͘ pò-kò chiah-ê tāi-chì ê, chiū-sī [Boa̍t-tāi-lia̍p] ê [Má-lī-a], [Iok-a-ná], [Ngá-kok] ê lāu-bú [Má-lī-a], í-ki̍p kî-tha kap in chòe-tīn ê hū-jîn-lâng. 11 Sù-tô͘ siūⁿ-kóng chiah-ê hū-jîn-lâng só͘ kóng ê ōe bô-iáⁿ-bô-chiah, só͘-í bô siong-sìn. 12 M̄-kú [Pí-tek] khí-lâi, cháu khì bōng-ni̍h, àⁿ lo̍h-khì khòaⁿ, chí-ū khòaⁿ-tio̍h iù-môa-pò͘ nā-tiāⁿ. I chiū tńg-khì, tùi só͘ hoat-seng ê tāi-chì kám-kak chin kî-koài. 13 Siâng hit ji̍t, bûn-tô͘ tiong ū nn̄g ê lâng beh khì chi̍t ê chng-thâu, kiò-chòe [Í-má-ngó͘-su], chit-ê só͘-chāi lī [Iâ-lō͘-sat-léng] iok cha̍p-it kong-lí. 14 In tī lō͘-tiong hō͘-siōng teh tâm-lūn só͘ hoat-seng lóng-chóng ê tāi-chì. 15 In tâm-lūn lâi tâm-lūn khì ê sî, Iâ-so͘ chhin-sin kiâⁿ óa-lâi kap in chòe-tīn kiâⁿ. 16 In khòaⁿ-tio̍h, m̄-kú bōe jīn-tit. 17 Iâ-so͘ mn̄g in, “Lín ná kiâⁿ ná teh gī-lūn ê sī sím-mi̍h tāi-chì?” In chiū thêng lo̍h-lâi, móa-bīn iu-chhiû. 18 Kî-tiong ū chi̍t ê lâng kiò-chòe [Kek-liû-pa] ìn I kóng, “Chit kúi ji̍t tī [Iâ-lō͘-sat-léng] só͘ hoat-seng ê tāi-chì, tùi gōa-tōe lâi tòa tī [Iâ-lō͘-sat-léng] ê lâng, sī-án-chóaⁿ kan-ta lí chi̍t-ê m̄-chai?” 19 Iâ-so͘ mn̄g in, “Sím-mi̍h tāi-chì?” In kā I kóng, “[Ná-sat-le̍k]-lâng Iâ-so͘ ê tāi-chì. I sī sian-ti, tī Siōng-tè kap chèng-lâng ê bīn-chêng, bô-lūn kóng-ōe á-sī chòe tāi-chì lóng chin ū koân-lêng. 20 Goán ê chè-si-tiúⁿ kap léng-siù kā I sàng-khì hō͘ lâng phòaⁿ sí-hêng, tèng si̍p-jī-kè. 21 I chiū-sī goán só͘ teh kî-thāi beh lâi chín-kiù [Í-sek-lia̍t] Hit-ūi. M̄-nā án-ni, chit-ê tāi-chì hoat-seng kàu kin-á-ji̍t í-keng tē-saⁿ ji̍t lah. 22 Koh goán tiong-kan ū kúi-nā ê hū-jîn-lâng hō͘ goán chin tio̍h-kiaⁿ. In thiⁿ phú-kng chiū kàu bōng-ni̍h, 23 m̄-kú chhē bô Iâ-so͘ ê ûi-thé. In tńg-lâi pò-kò kóng ū khòaⁿ-tio̍h thiⁿ-sài chhut-hiān, kā in kóng I koh-oa̍h lah. 24 Goán tiong-kan mā ū kúi-nā ê lâng khì bōng-ni̍h, khòaⁿ-tio̍h ê tāi-chì ta̍k hāng kap hū-jîn-lâng só͘ kóng ê lóng siâng-khoán, in mā bô khòaⁿ-tio̍h Iâ-so͘.” 25 Iâ-so͘ chiū tùi in kóng, “Ài à, lín ná chiah-ni̍h gōng, sim ná chiah-ni̍h tūn, bōe siong-sìn sian-ti só͘ kóng it-chhè ê ōe! 26 Ki-tok siū chiah-ê khó͘-lān lâi ji̍p I ê êng-kng kiám m̄-sī eng-kai?” 27 Iâ-so͘ chiū tùi [Mô͘-se] kap chèng sian-ti khí, kā in kóe-seh Sèng-keng tiong só͘-ū koan-hē I pún-sin ê kì-chài. 28 In teh-beh kàu só͘ beh khì hit-ê chng-thâu, Iâ-so͘ ná chhin-chhiūⁿ beh kè-sio̍k kiâⁿ, 29 put-kò in nn̄g ê kiông-kiông kā I lâu, kóng, “Ji̍t-thâu í-keng lo̍h-soaⁿ, thiⁿ àm lah, chhiáⁿ kap goán tòa.” Iâ-so͘ chiū ji̍p-khì kap in tòa. 30 Iâ-so͘ kap in chē-toh ê sî, the̍h piáⁿ kám-siā, jiân-āu peh-khui, pun hō͘ in. 31 In ê ba̍k-chiu khui, jīn-tio̍h I; I hut-jiân tùi in bīn-chêng siau-sit. 32 In chiū hō͘-siōng kóng, “I tī lō͘-tiong kap lán kóng-ōe, kā lán soat-bêng Sèng-keng ê sî, lán ê sim kiám bô chhin-chhiūⁿ hé teh to̍h?” 33 In sûi-sî chhut-hoat, tò tńg-khì [Iâ-lō͘-sat-léng], khòaⁿ-tio̍h hit cha̍p-it ê sù-tô͘ kap kî-tha ê lâng chū-chi̍p tī hia, 34 teh kóng, “Chú chin-chiàⁿ koh-oa̍h lah! I í-keng ū chhut-hiān hō͘ [Se-bûn] khòaⁿ.” 35 Hit nn̄g ê lâng chiū chiong tī lō͘-tiong só͘ hoat-seng ê tāi-chì, kap Iâ-so͘ teh peh-piáⁿ ê sî in chiah jīn-tio̍h I ê keng-kè, lóng kā in kóng. 36 Hit nn̄g ê bûn-tô͘ teh kóng chiah-ê tāi-chì ê sî, Iâ-so͘ chhin-sin khiā tī in tiong-kan, tùi in kóng, “Goān lín pêng-an!” 37 In ia̍h-kiaⁿ ia̍h-chhoah, siūⁿ-kóng sī khòaⁿ-tio̍h kúi. 38 Iâ-so͘ kā in kóng, “Lín sī-án-chóaⁿ put-an, sim-lāi thái ōe teh giâu-gî? 39 Khòaⁿ góa ê chhiú, góa ê kha; khak-si̍t sī góa. Lín bong chiū chai, in-ūi kúi bô-kut bô-bah; bong khòaⁿ-bāi leh, góa lóng ū!” 40 I kóng liáu chiū chiong I ê kha kap chhiú chhun hō͘ in khòaⁿ. 41 In hoaⁿ-hí-kah m̄-káⁿ siong-sìn, iáu kám-kak kî-koài ê sî, Iâ-so͘ mn̄g in, “Lín chia ū sím-mi̍h thang chia̍h bô?” 42 In the̍h chi̍t bé hang hó ê hî hō͘ I, 43 I chiū tī in ê bīn-chêng chiap khì chia̍h. 44 Āu-lâi Iâ-so͘ kā in kóng, “[Mô͘-se] ê Lu̍t-hoat kap sian-ti ê chheh, í-ki̍p Si-phian kì-chài koan-hē góa ê tāi-chì, it-tēng tio̍h èng-giām. Chiah-ê ōe góa iáu kap lín chòe-hé ê sî í-keng ū kā lín kóng lah.” 45 Iâ-so͘ chiū khui in ê sim-khiàu, hō͘ in bêng-pe̍k Sèng-keng, 46 tùi in kóng, “Sèng-keng ū án-ni kì-chài: Ki-tok tio̍h siū khó͘-lān, tē-saⁿ ji̍t tùi sí-lâng tiong koh-oa̍h, 47 koh lín tio̍h hōng I ê miâ thoân hóe-kái lâi tit-tio̍h sià-chōe ê tō-lí, tùi [Iâ-lō͘-sat-léng] khí, thoân kàu bān-kok. 48 Lín chiū-sī chiah-ê tāi-chì ê kiàn-chèng-jîn. 49 Góa chiong góa ê Pē só͘ èng-ún ê kau hō͘ lín; tio̍h tī chit-ê siâⁿ thèng-hāu, kàu lín tit-tio̍h tùi téng-bīn lâi ê lêng-le̍k.” 50 Iâ-so͘ chhōa in chhut-khì, it-ti̍t kàu [Pek-tāi-nî], jiân-āu gia̍h siang-chhiú kā in chiok-hok. 51 I teh kā in chiok-hok ê sî lī-khui in, siū chiap chiūⁿ-thiⁿ. 52 In chiū kā I pài, jiân-āu hoaⁿ-hoaⁿ hí-hí tńg-khì [Iâ-lō͘-sat-léng], 53 kè-sio̍k tī Sèng-tiān chheng-chàn Siōng-tè.

Iok-hān 1

1 Chhòng-sè í-chêng chiū ū Tō, Tō kap Siōng-tè tông-chāi, Tō sī Siōng-tè. 2 I tī chhòng-sè í-chêng chiū kap Siōng-tè tông-chāi. 3 Siōng-tè thong-kè I lâi chhòng-chō bān-iú; it-chhè siū-chō ê ta̍k hāng lóng sī thong-kè Tō lâi chhòng-chō. 4 Tī I lāi-bīn ū oa̍h-miā; chit-ê oa̍h-miā sī jîn-lūi ê kng. 5 Chit-ê kng tī o͘-àm tiong teh chiò, o͘-àm m̄-bat iâⁿ-kè kng. 6 Ū Siōng-tè chhe-lâi ê chi̍t ê lâng, miâ kiò-chòe [Iok-hān]. 7 Chit-ê lâng lâi sī beh choh-chèng, ūi-tio̍h kng choh-chèng, beh hō͘ só͘-ū ê lâng thong-kè i lâi sìn. 8 I pún-sin m̄-sī hit-ê kng, sī beh ūi-tio̍h hit-ê kng choh-chèng. 9 Ū chin ê kng chìn-ji̍p sè-kan lâi chiò choân jîn-lūi. 10 I tī sè-kan; sè-kan thong-kè I lâi chhòng-chō, m̄-kú sè-kan m̄-bat I. 11 I lâi-kàu ka-kī ê só͘-chāi, ka-kī ê lâng bô chiap-la̍p I. 12 Hiah-ê chiap-la̍p I ê, chiū-sī sìn I ê lâng, I sù in ū koân chiâⁿ-chòe Siōng-tè ê kiáⁿ-jî. 13 In m̄-sī tùi hiat-thóng, m̄-sī tùi jio̍k-io̍k, mā m̄-sī tùi ta-po͘-lâng ê ì-liām, sī tùi Siōng-tè siⁿ ê. 14 Tō chiâⁿ-chòe lâng, tiàm tī lán tiong-kan, chhiong-móa un-tián kap chin-lí; goán ū khòaⁿ-kìⁿ I ê êng-iāu, sī Thiⁿ-pē to̍k-it ê Kiáⁿ chiah ū ê êng-iāu. 15 [Iok-hān] ūi-tio̍h I choh-chèng, hoah kóng, “Chit-ūi chiū-sī góa bat kā lín kóng ê, I tī góa āu-bīn teh lâi, khiok pí góa khah tōa; in-ūi góa iáu-bē chhut-sì, I chiū chûn-chāi.” 16 Tùi I ê hong-hù lán lóng niá-siū un-tián, un-siōng-ka-un. 17 Lu̍t-hoat thong-kè [Mô͘-se] pan-pò͘; un-tián kap chin-lí sī thong-kè Iâ-so͘ Ki-tok lâi ê. 18 Bô-lâng bat khòaⁿ-kìⁿ Siōng-tè, chí-ū Pē sim-hoâi tiong to̍k-it ê Kiáⁿ ū kā I hián-sī chhut-lâi. 19 Í-hā sī [Iok-hān] ê kiàn-chèng: [Iâ-lō͘-sat-léng] ê Iû-thài-kàu tong-kio̍k phài chè-si kap [Lī-bī]-lâng khì mn̄g Iok-hān ê sî, kóng, “Lí sī sím-mi̍h lâng?” 20 I bô kū-choa̍t hôe-tap, kong-khai seng-bêng “Góa m̄-sī Ki-tok”. 21 In koh mn̄g i, “Nā án-ni, lí sī [Í-lī-a] sī-bô?” [Iok-hān] ìn kóng, “Góa m̄-sī.” In koh mn̄g, “Lí sī hit-ūi Sian-ti sī-bô?” Iok-hān ìn kóng, “M̄-sī.” 22 In chiū kā i kóng, “Án-ni lí sī sím-mi̍h lâng? Chhiáⁿ kā goán kóng, hō͘ goán thang hôe-tap phài goán lâi ê lâng. Lí kóng, tàu-tóe lí sī sím-mi̍h lâng?” 23 [Iok-hān] ín-iōng sian-ti [Í-sài-a] ê ōe, kóng: Góa chiū-sī tī khòng-iá teh hoah ê siaⁿ, kóng: Tio̍h ūi Chú siu-ti̍t tō-lō͘. 24 Hiah-ê lâng sī Hoat-lī-sài-phài ê lâng chhe lâi ê. 25 In koh mn̄g Iok-hān, kóng, “Lí nā m̄-sī Ki-tok, m̄-sī [Í-lī-a], mā m̄-sī hit-ūi Sian-ti, lí sī-án-chóaⁿ kā lâng sóe-lé?” 26 [Iok-hān] ìn kóng, “Góa ēng chúi kā lâng sóe-lé; m̄-kú ū chi̍t ūi lín m̄-bat-ê khiā tī lín tiong-kan. 27 I tī góa āu-bīn teh lâi, góa liân kā I tháu ôe-tòa to bōe kham-tit.” 28 Chiah-ê sū tī [Iok-tàn]-hô tang-hōaⁿ ê [Pek-tāi-nî] hoat-seng, [Iok-tàn]-hô chiū-sī Iok-hān teh kā lâng sóe-lé ê só͘-chāi. 29 Keh-ji̍t, [Iok-hān] khòaⁿ-tio̍h Iâ-so͘ kiâⁿ óa-lâi, chiū kóng, “Lín khòaⁿ, Siōng-tè ê Iûⁿ-ko, I beh tû-khì sè-kan-lâng ê chōe. 30 Koan-hē I ê tāi-chì, góa bat kā lín kóng, I pí góa khah bān lâi, chóng-sī pí góa khah tōa, in-ūi góa iáu-bē chhut-sì, I chiū chûn-chāi. 31 Góa ka-kī mā m̄-bat I, m̄-kú góa lâi ēng chúi kā lâng sóe-lé, sī beh hō͘ [Í-sek-lia̍t]-lâng jīn-bat I.” 32 [Iok-hān] koh choh-chèng, kóng, “Góa ū khòaⁿ-tio̍h Sèng Sîn chhin-chhiūⁿ hún-chiáu tùi thiⁿ kàng lo̍h-lâi, hioh tī I téng-bīn. 33 Góa ka-kī mā m̄-bat I, m̄-kú chhe góa ēng chúi kā lâng sóe-lé hit-ūi Siōng-tè ū tùi góa kóng, ‘Lí khòaⁿ-tio̍h Sèng Sîn kàng lo̍h-lâi hioh tī I téng-bīn hit-ê, I chiū-sī beh ēng Sèng Sîn kā lâng sóe-lé Hit-ūi.’ 34 Góa ū khòaⁿ-tio̍h, koh choh-chèng, chit-ūi chiū-sī Siōng-tè ê Kiáⁿ.” 35 Keh-ji̍t, [Iok-hān] koh kap i nn̄g ê bûn-tô͘ khiā tī hia; 36 i khòaⁿ-tio̍h Iâ-so͘ keng-kè, chiū kóng, “Lín khòaⁿ, Siōng-tè ê Iûⁿ-ko!” 37 Chit nn̄g ê bûn-tô͘ thiaⁿ-tio̍h i án-ni kóng, chiū khì tè Iâ-so͘. 38 Iâ-so͘ oa̍t kè-lâi, khòaⁿ-tio̍h in teh tè I, chiū mn̄g in, “Lín teh chhē sím-mi̍h?” In kā I kóng, “Lia̍p-pí, lí tòa tó-ūi?” Lia̍p-pí ê ì-sù sī lāu-su. 39 Iâ-so͘ kā in kóng, “Lín lâi khòaⁿ!” In chiū khì khòaⁿ Iâ-so͘ tòa ê só͘-chāi, hit ji̍t kap I chòe-hé tòa. Hit sî tāi-iok ē-po͘ sì tiám. 40 Thiaⁿ [Iok-hān] ê ōe lâi tè Iâ-so͘ hit nn̄g lâng, chi̍t ê sī [Se-bûn] [Pí-tek] ê sió-tī [An-tek-lia̍t]. 41 I seng khì chhē i ê hiaⁿ-ko [Se-bûn], tùi i kóng, “Goán í-keng ū tú-tio̍h [Bí-sài-a].” Bí-sài-a ê ì-sù sī Ki-tok. 42 I chiū chhōa [Se-bûn] khì kìⁿ Iâ-so͘. Iâ-so͘ chù-ba̍k kā i khòaⁿ, kóng, “Lí sī [Iok-hān] ê kiáⁿ [Se-bûn], lí ê miâ beh kiò-chòe [Ki-hoat].” [Ki-hoat] kap [Pí-tek] siâng ì-sù, chiū-sī chio̍h-pôaⁿ. 43 Keh-ji̍t, Iâ-so͘ koat-tēng beh khì [Ka-lī-lī]. I tú-tio̍h [Hui-le̍k], tùi i kóng, “Lâi tè góa!” 44 [Hui-le̍k] sī [Pek-sài-tāi]-lâng, [An-tek-lia̍t] kap [Pí-tek] ê tông-hiong. 45 [Hui-le̍k] tú-tio̍h [Ná-tàn-gia̍p], tùi i kóng, “[Mô͘-se] tī Lu̍t-hoat-su só͘ siá, í-ki̍p sian-ti só͘ kì-chài Hit-ūi, goán í-keng ū tú-tio̍h, chiū-sī [Iok-sek] ê kiáⁿ [Ná-sat-le̍k]-lâng Iâ-so͘.” 46 [Ná-tàn-gia̍p] ìn kóng, “[Ná-sat-le̍k] hit khoán só͘-chāi kiám ōe chhut sím-mi̍h hó-mi̍h?” [Hui-le̍k] kā i kóng, “Lí lâi khòaⁿ!” 47 Iâ-so͘ khòaⁿ-tio̍h [Ná-tàn-gia̍p] kiâⁿ óa-lâi, chiū kóng, “Lín khòaⁿ, i sī chin-chiàⁿ ê [Í-sek-lia̍t]-lâng, lóng bô hu-ké!” 48 [Ná-tàn-gia̍p] mn̄g Iâ-so͘, “Lí ná-ōe bat góa?” Iâ-so͘ kā i kóng, “[Hui-le̍k] iáu-bē kiò lí, góa chiū khòaⁿ-tio̍h lí tī hit châng bû-hoa-kó-chhiū kha.” 49 [Ná-tàn-gia̍p] ìn kóng, “Lia̍p-pí, lí sī Siōng-tè ê Kiáⁿ! Lí sī [Í-sek-lia̍t] ê Ông!” 50 Iâ-so͘ ìn kóng, “In-ūi góa kā lí kóng góa ū khòaⁿ-tio̍h lí tī hit châng bû-hoa-kó-chhiū kha, lí chiū sìn ò͘? Lí ōe khòaⁿ-tio̍h pí che koh-khah tōa ê sū.” 51 Iâ-so͘ koh kā i kóng, “Góa si̍t-si̍t chāi-chāi kā lín kóng, lín ōe khòaⁿ-kìⁿ thiⁿ khui, Siōng-tè ê thiⁿ-sài tī Jîn-chú ê sin-chiūⁿ chiūⁿ-lo̍h óng-lâi.”

Iok-hān 2

1 Nn̄g ji̍t āu, tī [Ka-lī-lī] ê [Ka-ná] ū hun-lé; Iâ-so͘ ê lāu-bú ū tī hia. 2 Iâ-so͘ kap I ê bûn-tô͘ mā siū iau-chhiáⁿ khì chham-ka. 3 Chiú ēng liáu ê sî, Iâ-so͘ ê lāu-bú tùi I kóng, “In í-keng bô chiú lah.” 4 Iâ-so͘ kóng, “A-bú, che kap lí góa ū sím-mi̍h koan-hē; góa ê sî iáu-bē kàu.” 5 I ê lāu-bú hoan-hù chhe-ēng ê lâng kóng, “I kā lín kóng sím-mi̍h, tio̍h chiàu án-ni khì chòe.” 6 Chiàu [Iû-thài]-lâng kiat-chēng ê kui-lē, tī hia ū la̍k ê chio̍h-àng, ta̍k ê ōe-tàng tóe chha-put-to chi̍t pah li̍p. 7 Iâ-so͘ kā hiah-ê chhe-ēng kóng, “Chiah-ê chúi-àng, chúi lóng tò hō͘ i tīⁿ.” In chiū chiong chúi tò ji̍p-khì chúi-àng, tò kàu móa. 8 Jiân-āu Iâ-so͘ kā in kóng, “Taⁿ lín kā chúi iúⁿ chhut-lâi, the̍h hō͘ pān-toh ê chóng-koán.” In chiū phâng-khì hō͘ i. 9 Pān-toh ê chóng-koán chi̍t-ē tam-tio̍h í-keng pìⁿ-chòe chiú ê chúi, m̄-chai chit-ê chiú tùi tó-ūi lâi; put-kò iúⁿ-chúi ê chhe-ēng chai, chóng-koán chiū kiò sin-lông lâi, 10 tùi i kóng, “Lâng lóng seng chhut hó chiú, tán lâng-kheh lim kàu chùi chiah chhut khah bái ê chiú, lí tian-tò chiong hó chiú lâu kàu chit-chūn.” 11 Iâ-so͘ tī [Ka-lī-lī] ê [Ka-ná] kiâⁿ chit-ê tē-it ê sîn-jiah, tī hia hián-sī I ê êng-kng; I ê bûn-tô͘ lóng sìn I. 12 Chit-ê tāi-chì í-āu, Iâ-so͘ kap I ê lāu-bú, hiaⁿ-tī, í-ki̍p bûn-tô͘ lo̍h-khì [Ka-pek-lông], tī hia tòa kúi-nā ji̍t. 13 [Iû-thài]-lâng ê Pôaⁿ-kè-choeh teh-beh kàu, Iâ-so͘ chiūⁿ-khì [Iâ-lō͘-sat-léng]. 14 I khòaⁿ-tio̍h ū lâng tī Sèng-tiān ê gōa-īⁿ teh bōe gû, iûⁿ, hún-chiáu; mā ū ōaⁿ-chîⁿ ê lâng teh hō͘ lâng ōaⁿ-chîⁿ. 15 Iâ-so͘ chiū ēng soh-á chòe piⁿ, chiong gû, iûⁿ lóng tùi Sèng-tiān kóaⁿ chhut-khì, chhia-tó chîⁿ-toh-á, iā-sòaⁿ in ê chîⁿ. 16 I koh tùi bōe hún-chiáu ê lâng kóng, “Chiah-ê lóng poaⁿ-poaⁿ chhut-khì; m̄-thang kā góa ê Pē ê chhù pìⁿ-chòe bóe-bōe ê chhù!” 17 I ê bûn-tô͘ kì-tit Sèng-keng ū kì-chài, “Siōng-tè ah, góa ūi-tio̍h lí ê tiān sim-jia̍t chhin-chhiūⁿ hé teh to̍h.” 18 [Iû-thài]-kàu tong-kio̍k ê lâng hoán-mn̄g Iâ-so͘, “Lí beh ēng sím-mi̍h sîn-jiah kā goán chèng-bêng lí ū koân chòe chiah-ê tāi-chì?” 19 Iâ-so͘ ìn kóng, “Lín thiah-húi chit keng Sèng-tiān, saⁿ ji̍t lāi góa beh koh kā i khí khí-lâi.” 20 In kóng, “Chit keng Sèng-tiān sì-cha̍p-la̍k nî chiah khí hó, lí saⁿ ji̍t lāi chiū beh khí khí-lâi ò͘?” 21 Kî-si̍t, Iâ-so͘ só͘ kóng ê Sèng-tiān sī chí I ê seng-khu. 22 I tùi sí-lâng tiong koh-oa̍h í-āu, I ê bûn-tô͘ chiah kì-tit I bat án-ni kóng, in chiū sìn Sèng-keng kap Iâ-so͘ kóng ê ōe. 23 Iâ-so͘ tī [Iâ-lō͘-sat-léng] kè Pôaⁿ-kè-choeh ê sî, chin chōe lâng khòaⁿ-tio̍h I kiâⁿ ê sîn-jiah chiū sìn I. 24 Put-kò Iâ-so͘ bô sìn-jīm in, in-ūi I liáu-kái só͘-ū ê lâng. 25 Koan-hē lâng ê tāi-chì, I bô su-iàu lâng kā I chèng-bêng, in-ūi I chin-chiàⁿ liáu-kái lâng ê lāi-sim.

Iok-hān 3

1 Ū chi̍t ê [Hoat-lī-sài]-phài ê lâng miâ kiò [Nî-ko-tek-bō͘], sī [Iû-thài]-lâng ê léng-tō-chiá. 2 Ū chi̍t àm, chit-ê lâng lâi kìⁿ Iâ-so͘, kóng, “Lia̍p-pí, goán chai lí sī Siōng-tè chhe lâi ê kàu-su. Nā m̄-sī Siōng-tè tông-chāi, bô-lâng ōe-tàng kiâⁿ lí só͘ kiâⁿ chiah-ê sîn-jiah.” 3 Iâ-so͘ ìn kóng, “Góa si̍t-si̍t chāi-chāi kā lí kóng, lâng nā bô têng chhut-sì, chiū bōe-tàng khòaⁿ-kìⁿ Siōng-tè-kok.” 4 [Nî-ko-tek-bō͘] mn̄g kóng, “Lâng í-keng lāu, ná ōe-tàng têng chhut-sì? Kiám kóng i ōe-tàng koh chi̍t piàn ji̍p-khì bú-thai lâi chhut-sì?” 5 Iâ-so͘ ìn kóng, “Góa si̍t-si̍t chāi-chāi kā lí kóng, lâng nā bô tùi chúi kap Sèng Sîn lâi chhut-sì, chiū bōe-tàng chiâⁿ-chòe Siōng-tè-kok ê chú-bîn. 6 Tùi jio̍k-thé siⁿ ê, sī jio̍k-thé; tùi Sèng Sîn siⁿ ê, sī sîn-lêng. 7 M̄-thang in-ūi góa kóng ‘lín tio̍h têng chhut-sì’ lâi kî-koài. 8 Hong beh chhe-khì tó-ūi chiū chhe-khì tó-ūi, lí ū thiaⁿ-tio̍h siaⁿ, m̄-kú m̄-chai i tùi tó-ūi lâi, tùi tó-ūi khì. Ta̍k ê tùi Sèng Sîn siⁿ ê mā-sī án-ni.” 9 [Nî-ko-tek-bō͘] mn̄g Iâ-so͘ kóng, “Chit khoán tāi-chì ná ū khó-lêng?” 10 Iâ-so͘ ìn kóng, “Lí sī [Í-sek-lia̍t]-lâng ê kàu-su, liân che to m̄-chai ò͘? 11 “Góa si̍t-si̍t chāi-chāi kā lí kóng, goán kóng goán só͘ chai ê, mā ūi-tio̍h goán só͘ khòaⁿ-tio̍h ê choh-chèng, m̄-kú lín m̄ chiap-siū goán ê kiàn-chèng. 12 Góa kā lín kóng chit sè-kan ê tāi-chì, lín to m̄-sìn, góa nā kā lín kóng thiⁿ-téng ê tāi-chì, lín ná-beh sìn? 13 Tùi thiⁿ-téng kàng-lîm ê Jîn-chú í-gōa, bô-lâng bat chiūⁿ-thiⁿ. 14 “Chhin-chhiūⁿ [Mô͘-se] tī khòng-iá kú-khí tâng-chôa, Jîn-chú mā it-tēng tio̍h án-ni siū kú-khí, 15 hō͘ ta̍k ê sìn I ê lâng tit-tio̍h éng-oán ê oa̍h-miā. 16 Siōng-tè liân I to̍k-it ê Kiáⁿ to sù hō͘ sè-kan, beh hō͘ ta̍k ê sìn I ê lâng bián bia̍t-bông, hoán-tńg tit-tio̍h éng-oán ê oa̍h-miā, I chiah-ni̍h thiàⁿ sè-kan! 17 In-ūi Siōng-tè chhe I ê Kiáⁿ lâi sè-kan, m̄-sī beh sím-phòaⁿ sè-kan, sī beh thong-kè I lâi chín-kiù sè-kan. 18 “Sìn Kiáⁿ ê lâng bōe siū tēng-chōe; m̄ sìn ê lâng í-keng siū tēng-chōe, in-ūi i m̄ sìn Siōng-tè to̍k-it ê Kiáⁿ. 19 Siōng-tè ê sím-phòaⁿ sī án-ni: Kng chìn-ji̍p sè-kan, sè-kan-lâng khah ài o͘-àm, khah bô ài kng-bêng, in-ūi in ê hêng-ûi siâ-ok. 20 Chòe pháiⁿ ê lâng lóng oàn-hūn kng, m̄ chiap-kūn kng, án-ni i ê hêng-ûi chiah bōe lō͘-hiān. 21 M̄-kú si̍t-hêng chin-lí ê lâng chiap-kūn kng, sī beh hián-bêng i ê hêng-ûi sī sūn-thàn Siōng-tè lâi chòe ê.” 22 Chiah-ê tāi-chì í-āu, Iâ-so͘ kap I ê bûn-tô͘ khì [Iû-thài] tōe-khu, I kap in chiām-sî tòa hia, koh kā lâng sóe-lé. 23 [Iok-hān] mā tī [Sat-léng] hù-kūn ê [Ai-loán] teh kā lâng sóe-lé, in-ūi hia ū chin chōe chúi, chèng-lâng sòa-chiap lâi chiap-siū [Iok-hān] ê sóe-lé. 24 Hit sî [Iok-hān] iáu-bē hō͘ lâng koaiⁿ-kaⁿ. 25 Kúi-nā ê [Iok-hān] ê bûn-tô͘ kap chi̍t ê [Iû-thài]-lâng ūi-tio̍h kiat-chēng ê lé-gî piān-lūn. 26 In lâi kìⁿ [Iok-hān], tùi i kóng, “Lia̍p-pí, í-chêng tī [Iok-tàn]-hô tang-hōaⁿ kap lí chòe-hé, lí bat ūi-tio̍h I choh-chèng Hit-ūi, lí khòaⁿ, I hiān-chāi teh kā lâng sóe-lé, chèng-lâng lóng khì I hia.” 27 [Iok-hān] ìn kóng, “Nā m̄-sī thiⁿ siúⁿ-sù, lâng bōe-tàng tit-tio̍h sím-mi̍h. 28 Góa bat kóng ‘Góa m̄-sī Ki-tok, put-kò sī siū phài choh I ê sian-hong’. Chit-ê tāi-chì, lín pún-sin sī góa ê kiàn-chèng-jîn. 29 Chhōa sin-niû ê sī sin-lông; sin-lông ê pêng-iú khiā tī piⁿ-a, chi̍t-ē thiaⁿ-tio̍h sin-lông ê siaⁿ chiū hui-siông hoaⁿ-hí. Só͘-í, góa ê hoaⁿ-hí móa-móa. 30 I it-tēng ná heng-ōng, góa it-tēng ná soe-bî.” 31 Tùi téng-bīn lâi ê, tī bān-iú ê téng-bīn; tùi tōe-chiūⁿ lâi ê, sio̍k tōe-chiūⁿ, só͘ kóng ê sī tōe-chiūⁿ ê sū. Tùi thiⁿ-téng lâi ê, tī bān-iú ê téng-bīn. 32 I ūi-tio̍h só͘ khòaⁿ-kìⁿ ê kap só͘ thiaⁿ-kìⁿ ê choh-chèng, put-kò bô-lâng chiap-siū I ê kiàn-chèng. 33 Chiap-siū I kiàn-chèng ê lâng chèng-bêng Siōng-tè sī sìn-si̍t. 34 Siōng-tè só͘ chhe-khián Hit-ūi kóng Siōng-tè só͘ kóng ê ōe, in-ūi Siōng-tè bû-hān-liōng sù Sèng Sîn hō͘ I. 35 Pē thiàⁿ Kiáⁿ, í-keng chiong it-chhè lóng kau tī I ê chhiú-tiong. 36 Sìn Kiáⁿ ê lâng ōe tit-tio̍h éng-oán ê oa̍h-miā; m̄ sūn-ho̍k Kiáⁿ ê lâng m̄-nā bōe tit-tio̍h oa̍h-miā, hoán-tńg kè-sio̍k hō͘ Siōng-tè siū-khì.

Iok-hān 4

1 Hoat-lī-sài-phài ê lâng ū thiaⁿ-tio̍h Iâ-so͘ pí [Iok-hān] chio khah chōe bûn-tô͘, koh kā khah chōe lâng sóe-lé. 2 Kî-si̍t Iâ-so͘ m̄-bat kā lâng sóe-lé, sī I ê bûn-tô͘ kā lâng sóe-lé. 3 Iâ-so͘ thiaⁿ-tio̍h chit-ê tāi-chì chiū lī-khui [Iû-thài], tńg-khì [Ka-lī-lī]; 4 I tio̍h keng-kè [Sat-má-lī-a]. 5 Iâ-so͘ lâi-kàu [Sat-má-lī-a] ê chi̍t ê siâⁿ, kiò-chòe [Sū-ka], chit-ê siâⁿ óa-kūn [Ngá-kok] hō͘ i ê kiáⁿ [Iok-sek] hit tè tōe. 6 [Ngá-kok]-chíⁿ tī hia. Iâ-so͘ in-ūi kiâⁿ-lō͘ chin siān chiū chē tī chíⁿ-piⁿ. Hit sî chha-put-to sī tiong-tàu. 7 Ū chi̍t ê [Sat-má-lī-a] ê hū-jîn-lâng lâi chhiūⁿ-chúi. Iâ-so͘ tùi i kóng, “Chhiáⁿ chi̍t-sut-á chúi hō͘ góa lim.” 8 Hit sî I ê bûn-tô͘ í-keng ji̍p-khì siâⁿ-lāi bóe chia̍h-mi̍h. 9 [Sat-má-lī-a] ê hū-jîn-lâng ìn Iâ-so͘ kóng, “Lí sī [Iû-thài]-lâng, ná-ōe tùi góa chit-ê [Sat-má-lī-a] ê cha-bó͘-lâng thó chúi lim?” Goân-lâi [Iû-thài]-lâng kap [Sat-má-lī-a]-lâng bô lâi-óng. 10 Iâ-so͘ ìn kóng, “Lí nā liáu-kái Siōng-tè hō͘ lâng ê un-sù, koh bat tùi lí kóng ‘Chhiáⁿ chi̍t-sut-á chúi hō͘ góa lim’ hit-ê sī sím-mi̍h lâng, lí chá ōe chiū kā I kiû, I chá chiū chiong oa̍h-chúi hō͘ lí.” 11 Hū-jîn-lâng kóng, “Sian-siⁿ, lí bô chhiūⁿ-chúi ê khì-khū, chíⁿ koh chhim, lí beh án-chóaⁿ tit-tio̍h oa̍h-chúi? 12 Goán ê chó͘-sian [Ngá-kok] lâu chit-ê chíⁿ hō͘ goán, i ka-kī, i ê kiáⁿ-sun, kap i ê cheng-siⁿ, lóng lim chit-ê chíⁿ-chúi, lí kiám ōe pí i khah gâu?” 13 Iâ-so͘ ìn kóng, “Lim chit-ê chíⁿ-chúi ê lâng lóng ōe-koh chhùi-ta; 14 put-kò lim góa só͘ beh hō͘ i ê chúi ê bōe-koh chhùi-ta. In-ūi góa beh hō͘ i ê chúi tī i ê lāi-bīn ōe chiâⁿ-chòe chúi-chôaⁿ, it-ti̍t chhèng-chhut oa̍h-chúi, hō͘ i tit-tio̍h éng-oán ê oa̍h-miā.” 15 Hū-jîn-lâng kóng, “Sian-siⁿ, chhiáⁿ hō͘ góa chit-ê chúi, góa chiah bōe-koh chhùi-ta, mā bián koh lâi chia chhiūⁿ-chúi.” 16 Iâ-so͘ kā i kóng, “Lí khì kiò lí ê tiōng-hu, chhōa i lâi chia.” 17 Hū-jîn-lâng ìn kóng, “Góa bô tiōng-hu.” Iâ-so͘ kā i kóng, “Lí kóng ‘Góa bô tiōng-hu’ ū iáⁿ. 18 Lí bat ū gō͘ ê tiōng-hu, hiān-chāi chit-ê m̄-sī lí ê tiōng-hu, lí kóng ê sī sū-si̍t.” 19 Hū-jîn-lâng kóng, “Sian-siⁿ, góa khòaⁿ lí sī sian-ti. 20 Goán [Sat-má-lī-a]-lâng ê chó͘-sian tī chit-ê soaⁿ-téng kèng-pài Siōng-tè; lín [Iû-thài]-lâng kóng [Iâ-lō͘-sat-léng] chiah-sī kèng-pài Siōng-tè ê só͘-chāi.” 21 Iâ-so͘ tùi i kóng, “Hū-jîn-lâng, tio̍h sìn góa. Sî teh-beh kàu, hit sî lín bōe tī chit-ê soaⁿ-téng, mā bōe tī [Iâ-lō͘-sat-léng] kèng-pài Pē. 22 Lín [Sat-má-lī-a]-lâng kèng-pài lín só͘ m̄-bat ê; goán [Iû-thài]-lâng kèng-pài goán só͘ bat ê; in-ūi chín-kiù tùi [Iû-thài]-lâng chhut. 23 Put-kò, sî teh-beh kàu, hiān-chāi chiū-sī, chin-chiàⁿ kèng-pài Pē ê lâng ōe ēng sim-lêng kap chin-sêng kèng-pài. In-ūi Pē ài chit khoán ê lâng kèng-pài I. 24 Siōng-tè sī Sîn, kèng-pài I ê lâng tio̍h ēng sim-lêng kap chin-sêng kèng-pài.” 25 Hū-jîn-lâng tùi I kóng, “Góa chai hit-ūi chheng-chòe Ki-tok ê Bí-sài-a teh-beh lâi, I lâi ê sî ōe chiong it-chhè ê tāi-chì kā goán kóng.” 26 Iâ-so͘ kā i kóng, “Góa, chit-ê teh kap lí kóng-ōe ê chiū-sī.” 27 Tú chit-ê sî, Iâ-so͘ ê bûn-tô͘ tńg-lâi. In khòaⁿ-tio̍h Iâ-so͘ kap hū-jîn-lâng teh kóng-ōe, kám-kak chin kî-koài, put-kò bô-lâng mn̄g hū-jîn-lâng “Lí beh chhòng sím-mi̍h?” á-sī mn̄g Iâ-so͘ “Lí ná teh kap hū-jîn-lâng kóng-ōe?” 28 Hū-jîn-lâng chiū chiong chúi-pân pàng hē-teh, tńg-khì siâⁿ-lāi, tùi lâng kóng 29 “Lâi-khì khòaⁿ, chit-ê lâng chiong góa kè-khì ê tāi-chì lóng kóng chhut-lâi. I káⁿ sī Ki-tok ô͘?” 30 Tāi-ke chiū chhut-siâⁿ khì khòaⁿ Iâ-so͘. 31 Hit sî bûn-tô͘ kā Iâ-so͘ kóng, “Lia̍p-pí, chhiáⁿ lâi chia̍h.” 32 Iâ-so͘ kā in kóng, “Góa ū lín m̄-chai ê chia̍h-mi̍h.” 33 Bûn-tô͘ chiū mn̄g-lâi mn̄g-khì kóng, “Kiám ū lâng the̍h mi̍h-kiāⁿ hō͘ I chia̍h?” 34 Iâ-so͘ kā in kóng, “Góa ê chia̍h-mi̍h chiū-sī si̍t-hêng chhe góa Hit-ūi ê chí-ì, koh oân-sêng I ê kang-chok. 35 Lín kiám bô án-ni kóng ‘Koh sì ge̍h-ji̍t chiū ū thang siu-sêng’? Góa kā lín kóng, ba̍k-chiu peh hō͘ kim khòaⁿ sì-bīn ê chhân-hn̂g; ngó͘-kok í-keng sek, thang siu-sêng lah. 36 Hiān-chāi siu-koah ê lâng í-keng teh niá kang-chîⁿ, koh-teh siu-sêng hō͘ lâng tit-tio̍h éng-oán oa̍h-miā ê ngó͘-kok, hō͘ iā-chéng-ê kap siu-koah-ê chòe-hé hoaⁿ-hí. 37 In-ūi sio̍k-gú kóng ‘Chi̍t ê iā-chéng, chi̍t ê siu-koah’, kóng liáu chin tio̍h. 38 Lín bô sin-khó͘ keng-choh ê, góa chhe lín khì siu-sêng; pa̍t-lâng sin-khó͘, lín hióng-siū in sin-khó͘ ê sêng-kó.” 39 Hit-ê siâⁿ ū chin chōe [Sat-má-lī-a]-lâng sìn Iâ-so͘, in-ūi hit-ê hū-jîn-lâng choh-chèng kóng, “I chiong góa kè-khì só͘ chòe ê tāi-chì lóng kā góa kóng chhut-lâi.” 40 Só͘-í hiah-ê [Sat-má-lī-a]-lâng lâi kìⁿ Iâ-so͘, kiû I tòa in hia, I chiū tī hia tòa nn̄g ji̍t. 41 In-ūi Iâ-so͘ só͘ kóng ê ōe, ū koh-khah chōe lâng lâi sìn. 42 Hiah-ê lâng kā hit-ê hū-jîn-lâng kóng, “Hiān-chāi goán sìn, m̄-sī in-ūi lí só͘ kóng ê ōe, sī in-ūi goán ū chhin-hī thiaⁿ-tio̍h Iâ-so͘ ê ōe, chai-iáⁿ I chin-chiàⁿ sī sè-kan ê Kiù-chú.” 43 Nn̄g ji̍t āu, Iâ-so͘ lī-khui hia khì [Ka-lī-lī]. 44 In-ūi Iâ-so͘ ka-kī bat kóng, “Sian-ti tī ka-kī ê kò͘-hiong bōe siū chun-tiōng.” 45 Iâ-so͘ kàu [Ka-lī-lī] ê sî [Ka-lī-lī]-lâng ū kā I hoan-gêng, in-ūi in khì [Iâ-lō͘-sat-léng] kè Pôaⁿ-kè-choeh ê sî mā ū khòaⁿ-tio̍h I tī choeh-kî tiong só͘ chòe it-chhè ê tāi-chì. 46 Iâ-so͘ koh tńg-khì [Ka-lī-lī] ê [Ka-ná], chiū-sī I bat ēng chúi pìⁿ-chòe chiú ê só͘-chāi. Tī hia ū chi̍t ê [Ka-pek-lông] ê koaⁿ-oân, i ê kiáⁿ phòa-pīⁿ. 47 I thiaⁿ-tio̍h Iâ-so͘ tùi [Iû-thài] lâi-kàu [Ka-lī-lī], chiū khì kiû Iâ-so͘ lo̍h-khì [Ka-pek-lông] i-tī i ê kiáⁿ, in-ūi i ê kiáⁿ teh-beh sí lah. 48 Iâ-so͘ kā i kóng, “Lín nā bô khòaⁿ-kìⁿ sîn-jiah kî-sū, it-tēng bōe sìn.” 49 Hit-ê koaⁿ-oân ìn kóng, “Sian-siⁿ, chhiáⁿ lí tī góa ê sòe-kiáⁿ iáu-bē sí í-chêng lo̍h lâi-khì.” 50 Iâ-so͘ tùi i kóng, “Tńg-khì, lí ê kiáⁿ bōe sí.” Hit-ê lâng sìn Iâ-so͘ kā i kóng ê ōe, chiū tńg-khì. 51 Tī lō͘-tiong, i ê lô͘-po̍k tú-tio̍h, kā i kóng i ê sòe-kiáⁿ oa̍h khí-lâi lah. 52 I chiū mn̄g in i ê kiáⁿ sím-mi̍h sî hó khí-lâi. In ìn kóng, “Cha-hng ē-po͘ chi̍t tiám jia̍t chiū thòe-khì.” 53 Lāu-pē chai-iáⁿ, tú-tú hit-ê sî Iâ-so͘ kā i kóng “Lí ê kiáⁿ bōe sí”. I ka-kī sìn, choân-ke ê lâng mā lóng sìn. 54 Che sī Iâ-so͘ tùi [Iû-thài] lâi [Ka-lī-lī] í-āu só͘ kiâⁿ ê tē-jī ê sîn-jiah.

Iok-hān 5

1 Chiah-ê tāi-chì í-āu, ū chi̍t ê [Iû-thài]-lâng ê choeh-kî, Iâ-so͘ chiūⁿ-khì [Iâ-lō͘-sat-léng]. 2 Tī [Iâ-lō͘-sat-léng], kūn [Iûⁿ-mn̂g] ê só͘-chāi ū chi̍t ê chúi-tî, [Hi-pek-lâi]-ōe kiò-chòe [Pit-sū-tāi], chúi-tî piⁿ ū gō͘ ê cháu-lông. 3 Tī cháu-lông ū chin chōe pīⁿ-lâng tó tī hia; ū sit-bêng-ê, kha-pái-ê, kap poàn-sin-put-sūi-ê. 5 Tī hia ū chi̍t ê phòa-pīⁿ saⁿ-cha̍p-poeh nî kú ê lâng. 6 Iâ-so͘ khòaⁿ-tio̍h i tī hia, chai-iáⁿ i í-keng tī hia tó chin kú, chiū kā i kóng, “Lí ài hó khí-lâi bô?” 7 Hit-ê pīⁿ-lâng ìn kóng, “Sian-siⁿ, chúi tín-tāng ê sî bô-lâng thang kā góa phō lo̍h-khì chúi-tî, góa siūⁿ-beh lo̍h-khì ê sî, pa̍t-lâng pí góa seng lo̍h-khì lah.” 8 Iâ-so͘ kā i kóng, “Khí-lâi, giâ lí ê chhn̂g-pho͘, khí-lâi kiâⁿ.” 9 Hit-ê lâng sûi-sî hó khí-lâi, chiū giâ i ê chhn̂g-pho͘ khí-lâi kiâⁿ. Hit ji̍t sī An-hioh-ji̍t. 10 Só͘-í [Iû-thài]-lâng tùi hit-ê hō͘ Iâ-so͘ i-hó ê lâng kóng, “Kin-á-ji̍t sī An-hioh-ji̍t, lí giâ chhn̂g-pho͘ bô ha̍p-hoat.” 11 I ìn kóng, “I-hó góa hit-ê lâng kā góa kóng, ‘Giâ lí ê chhn̂g-pho͘, khí-lâi kiâⁿ.’ ” 12 In chiū mn̄g i, “Kiò lí giâ chhn̂g-pho͘ khí-lâi kiâⁿ hit-ê sī siáⁿ-lâng?” 13 I m̄-chai hit-ê kā i i-hó ê sī siáⁿ-lâng, in-ūi ū chin chōe lâng tī hia, koh Iâ-so͘ ia̍h í-keng tiām-tiām-á lī-khui. 14 Āu-lâi, Iâ-so͘ tī Sèng-tiān tú-tio̍h i, kā i kóng, “Lí í-keng hó lah, m̄-thang koh hoān-chōe, chiah bōe tú-tio̍h koh-khah chhám ê tāi-chì.” 15 Hit-ê lâng lī-khui liáu-āu tùi [Iû-thài]-lâng kóng, kā i i-hó ê sī Iâ-so͘. 16 In-ūi án-ni, in khai-sí pek-hāi Iâ-so͘, in-ūi I tī An-hioh-ji̍t kā lâng i-pīⁿ. 17 Iâ-so͘ tùi in kóng, “Góa ê Pē kàu hiān-chāi it-ti̍t teh kang-chok, góa mā teh kang-chok.” 18 Ūi-tio̍h án-ni, [Iû-thài]-kàu tong-kio̍k koh-khah siūⁿ-beh hāi-sí Iâ-so͘; in-ūi Iâ-so͘ m̄-nā ûi-hoān An-hioh-ji̍t ê kui-tēng, koh chheng Siōng-tè chòe I ka-kī ê Pē, khòaⁿ ka-kī kap Siōng-tè pêng-téng. 19 Iâ-so͘ tùi in kóng, “Góa si̍t-si̍t chāi-chāi kā lín kóng, Kiáⁿ bōe-tàng chiàu ka-kī ê ì-sù chòe tāi-chì, chí-ū khòaⁿ Pē chòe sím-mi̍h, I chiah chiàu án-ni chòe. Pē só͘ chòe ê, Kiáⁿ mā chiàu án-ni chòe. 20 In-ūi Pē thiàⁿ Kiáⁿ, chiong ka-kī só͘ teh chòe ê it-chhè lóng chí-sī Kiáⁿ, mā ōe chiong pí chiah-ê khah tōa ê sū chí-sī I, beh hō͘ lín kám-kak kî-koài. 21 Pē án-chóaⁿ hō͘ sí-lâng koh-oa̍h, sù in oa̍h-miā, chhin-chhiūⁿ án-ni, Kiáⁿ mā beh chiong oa̍h-miā sù hō͘ ka-kī só͘ ài ê lâng. 22 Pē lóng bô kā lâng sím-phòaⁿ. I í-keng chiong sím-phòaⁿ ê koân-pèng lóng kau hō͘ Kiáⁿ, 23 sī beh hō͘ chèng-lâng chun-kèng Kiáⁿ, chhin-chhiūⁿ chun-kèng Pē. Bô chun-kèng Kiáⁿ chiū-sī bô chun-kèng chhe I lâi ê Pē. 24 “Góa si̍t-si̍t chāi-chāi kā lín kóng, thiaⁿ góa ê ōe koh sìn chhe góa Hit-ūi ê lâng ū éng-oán ê oa̍h-miā; i í-keng chhut-sí-ji̍p-oa̍h, m̄-bián siū sím-phòaⁿ. 25 Góa si̍t-si̍t chāi-chāi kā lín kóng, sî teh-beh kàu, hiān-chāi chiū-sī, sí-lâng ōe thiaⁿ-kìⁿ Siōng-tè ê Kiáⁿ ê siaⁿ, thiaⁿ-kìⁿ ê lâng ōe oa̍h khí-lâi. 26 In-ūi Pē pún-sin sī oa̍h-miā ê kun-goân, I mā án-ni hō͘ Kiáⁿ chiâⁿ-chòe oa̍h-miā ê kun-goân. 27 I í-keng chiong sím-phòaⁿ ê koân-pèng sù hō͘ Kiáⁿ, in-ūi Kiáⁿ sī Jîn-chú. 28 Chit-ê sū lín m̄-thang kám-kak kî-koài, in-ūi sî teh-beh kàu, só͘-ū sí-khì ê lâng lóng ōe thiaⁿ-kìⁿ Kiáⁿ ê siaⁿ, 29 in ōe tùi bōng-ni̍h chhut-lâi: Choh-hó-ê koh-oa̍h, tit-tio̍h oa̍h-miā; choh-pháiⁿ-ê koh-oa̍h, siū tēng-chōe.” 30 “Góa bōe-tàng chiàu ka-kī ê ì-sù chòe sím-mi̍h; góa chí-ū chiàu só͘ thiaⁿ-tio̍h ê lâi sím-phòaⁿ. Góa ê sím-phòaⁿ kong-chèng, in-ūi góa m̄-sī thàn ka-kī ê ì-sù, sī chiàu chhe góa lâi Hit-ūi ê chí-ì. 31 “Góa nā ūi-tio̍h ka-kī choh-chèng, góa ê kiàn-chèng chiū bô chin-si̍t. 32 Ū lēng-gōa chi̍t ê lâng teh ūi-tio̍h góa choh-chèng, góa chai i ūi-tio̍h góa só͘ chòe ê kiàn-chèng sī chin-si̍t. 33 Lín bat phài lâng khì kìⁿ [Iok-hān], i ū ūi-tio̍h chin-lí choh-chèng. 34 M̄-sī kóng góa bô su-iàu lâng ūi-tio̍h góa choh-chèng; put-kò góa kóng chiah-ê sū sī beh hō͘ lín tit-tio̍h kiù. 35 [Iok-hān] sī teh to̍h teh chiò-kng ê teng, lín hoaⁿ-hí chiām-sî hióng-siū i ê kng. 36 Put-kò góa ū pí [Iok-hān] khah ū-la̍t ê kiàn-chèng. Pē kau-tài góa oân-sêng ê kang-chok, chiū-sī góa hiān-chāi teh chòe ê kang-chok, ōe-tàng ūi-tio̍h góa choh-chèng, piáu-sī Pē ū chhe góa. 37 Koh chhe góa ê Pē í-keng chhin-sin ūi-tio̍h góa choh-chèng. Lín iáu m̄-bat thiaⁿ-tio̍h I ê siaⁿ, mā m̄-bat khòaⁿ-tio̍h I ê hêng-chōng. 38 Lín bô chiong I ê ōe khǹg tī sim-lāi, in-ūi lín m̄-sìn I só͘ chhe Hit-ūi. 39 Lín gián-kiù Sèng-keng, in-ūi lín siūⁿ, tī hit lāi-bīn ōe chhē-tio̍h éng-oán ê oa̍h-miā. Kî-si̍t, chiū-sī Sèng-keng teh ūi-tio̍h góa choh-chèng. 40 Án-ni, lín iáu-kú m̄-khéng lâi góa chia tit-tio̍h oa̍h-miā. 41 “Góa bô chiap-siū lâng ê chheng-chàn. 42 M̄-kú góa chin-chiàⁿ liáu-kái lín, tī lín lāi-bīn bô thiàⁿ Siōng-tè ê sim. 43 Góa hōng góa ê Pē ê miâ lâi, lín bô chiap-la̍p góa; nā ū pa̍t-lâng hōng ka-kī ê miâ lâi, lín tian-tò kā i chiap-la̍p. 44 Lín hō͘-siōng chheng-chàn, chóng-sī bô tui-kiû tùi î-it ê Siōng-tè lâi ê chheng-chàn, án-ni lín ná ōe-tàng sìn góa? 45 M̄-thang siūⁿ-kóng góa ōe tī Pē ê bīn-chêng khòng-kò lín. Teh khòng-kò lín ê sī lín it-ti̍t teh gióng-bōng ê [Mô͘-se]. 46 Lín nā chin-chiàⁿ ū sìn [Mô͘-se], mā ōe sìn góa; in-ūi i ū siá góa ê tāi-chì. 47 I siá ê chheh lín to m̄-sìn, ná-ōe sìn góa kóng ê ōe?”

Iok-hān 6

1 Chit-ê tāi-chì liáu-āu, Iâ-so͘ kè-khì [Ka-lī-lī]-ô͘, chiū-sī [Thê-pí-lī-a]-ô͘ ê hit pêng hōaⁿ. 2 Ū chi̍t tōa-tīn lâng tè I khì, in-ūi in ū khòaⁿ-tio̍h Iâ-so͘ i-hó pīⁿ-lâng ê sîn-jiah. 3 Iâ-so͘ peh chiūⁿ-soaⁿ, kap I ê bûn-tô͘ tī hia chē. 4 Hit sî [Iû-thài]-lâng ê Pôaⁿ-kè-choeh teh-beh kàu. 5 Iâ-so͘ gia̍h-thâu khòaⁿ-tio̍h chi̍t tōa-tīn lâng it-ti̍t ǹg I hia teh lâi, chiū kā [Hui-le̍k] kóng, “Lán beh khì tó-ūi bóe chia̍h-mi̍h thang hō͘ chiah-ê lâng chia̍h?” 6 I kóng án-ni sī teh chhì-giām [Hui-le̍k]; kî-si̍t, I ka-kī í-keng chai teh-beh chòe ê tāi-chì. 7 [Hui-le̍k] ìn kóng, “Ēng nn̄g pah ê gûn-á khì bóe piáⁿ mā bô kàu hō͘ ta̍k ê lâng chia̍h chi̍t-sut-á.” 8 Lēng-gōa chi̍t ê bûn-tô͘, chiū-sī [Se-bûn] [Pí-tek] ê sió-tī [An-tek-lia̍t], kā Iâ-so͘ kóng, 9 “Chia ū chi̍t ê gín-á, i ū gō͘ ê tōa-be̍h piáⁿ kap nn̄g bé hî; m̄-kú lâng chiah-ni̍h chōe, kan-ta chiah-ê ná ū kàu?” 10 Iâ-so͘ kóng, “Lín kiò chèng-lâng chē lo̍h-khì.” Hit-ê só͘-chāi chháu chin chōe. Chèng-lâng chiū chē lo̍h-khì; kan-ta ta-po͘-lâng chiū ū gō͘-chheng. 11 Jiân-āu Iâ-so͘ the̍h hiah-ê piáⁿ, kám-siā liáu-āu pun hō͘ chē tī hia ê lâng; hî mā án-ni pun, chhut-chāi in chia̍h. 12 In chia̍h pá liáu-āu, Iâ-so͘ kā I ê bûn-tô͘ kóng, “Chiong chia̍h chhun ê sut-á khioh khí-lâi, m̄-thang phah-sńg.” 13 In chiū chiong hit gō͘ ê piáⁿ ê sut-á, chiū-sī tāi-ke chia̍h chhun ê, khioh khí-lâi, lóng-chóng móa cha̍p-jī nâ. 14 Chèng-lâng khòaⁿ-tio̍h Iâ-so͘ só͘ kiâⁿ ê sîn-jiah, chiū kóng, “Chit-ê chin-chiàⁿ sī beh lâi chit sè-kan hit-ūi Sian-ti!” 15 Iâ-so͘ chai-iáⁿ chèng-lâng teh-beh kiông-pek I choh-ông, chiū ka-kī chi̍t ê koh thòe-khì soaⁿ-ni̍h. 16 Hông-hun ê sî, I ê bûn-tô͘ lo̍h-khì ô͘-piⁿ, 17 chiūⁿ-chûn beh kè ô͘ khì [Ka-pek-lông]. Hit sî thiⁿ í-keng àm, Iâ-so͘ iáu-bē kàu in hia. 18 Hut-jiân, in-ūi thàu tōa-hong, ô͘ khí tōa-éng. 19 Bûn-tô͘ kò-chûn, tāi-iok kò gō͘ la̍k kong-lí ê sî, khòaⁿ-tio̍h Iâ-so͘ tī ô͘ ê téng-bīn teh kiâⁿ, kiâⁿ óa-kūn chûn, in chiū khí kiaⁿ. 20 Iâ-so͘ tùi in kóng, “Sī góa, bián kiaⁿ!” 21 Bûn-tô͘ chiū hoaⁿ-hí chiap I chiūⁿ-chûn; chûn liâm-piⁿ kàu in beh khì ê só͘-chāi. 22 Keh-ji̍t, iáu tī ô͘ tùi-bīn hōaⁿ hit tīn lâng hoat-kak tī hia chí-ū chi̍t chiah chûn nā-tiāⁿ, Iâ-so͘ mā bô kap bûn-tô͘ chòe-hé chē-chûn, kan-ta bûn-tô͘ ka-kī kè-khì. 23 M̄-kú ū kúi-nā chiah chûn tùi [Thê-pí-lī-a] lâi-kàu óa-kūn Chú kám-siā liáu-āu pun piáⁿ hō͘ chèng-lâng chia̍h hit-ê só͘-chāi. 24 Chèng-lâng chi̍t-ē hoat-kak Iâ-so͘ kap I ê bûn-tô͘ lóng bô tī hia, chiū chē hiah-ê chûn kè-khì [Ka-pek-lông] chhē Iâ-so͘. 25 Chèng-lâng tī ô͘ ê tùi-bīn hōaⁿ chhē-tio̍h Iâ-so͘, chiū kā I mn̄g, “Lia̍p-pí, lí sím-mi̍h sî lâi chia?” 26 Iâ-so͘ ìn kóng, “Góa si̍t-si̍t chāi-chāi kā lín kóng, lín chhē góa, sī in-ūi ū piáⁿ chia̍h kàu pá, m̄-sī in-ūi khòaⁿ-kìⁿ sîn-jiah. 27 M̄-thang ūi-tio̍h ōe pāi-hoāi ê chia̍h-mi̍h phah-piàⁿ, tio̍h ūi-tio̍h kú-tn̂g tī-teh, ōe-tàng hō͘ lâng tit-tio̍h éng-oán ê oa̍h-miā hit-ê chia̍h-mi̍h lâi phah-piàⁿ, chiū-sī Jîn-chú beh hō͘ lín ê; in-ūi Pē Siōng-tè í-keng kā I khàm-ìn jīn-tēng.” 28 In chiū mn̄g Iâ-so͘, “Beh oân-sêng Siōng-tè ê kang, goán tio̍h chòe sím-mi̍h?” 29 Iâ-so͘ ìn kóng, “Sìn Siōng-tè só͘ chhe Hit-ūi chiū-sī chòe Siōng-tè ê kang.” 30 In chiū kóng, “Lí beh kiâⁿ sím-mi̍h sîn-jiah hō͘ goán khòaⁿ lâi sìn lí? Lí beh chòe sím-mi̍h? 31 Goán ê chó͘-sian tī khòng-iá chia̍h má-ná, tú-tú chiàu Sèng-keng só͘ kì-chài: ‘I ū chiong tùi thiⁿ lâi ê piáⁿ hō͘ in chia̍h.’ ” 32 Iâ-so͘ chiū kā in kóng, “Góa si̍t-si̍t chāi-chāi kā lín kóng, m̄-sī [Mô͘-se] chiong tùi thiⁿ lâi ê piáⁿ hō͘ lín, sī góa ê Pē chiong tùi thiⁿ lâi chin ê piáⁿ hō͘ lín. 33 In-ūi Siōng-tè só͘ sù ê piáⁿ chiū-sī tùi thiⁿ kàng lo̍h-lâi, sù oa̍h-miā hō͘ sè-kan ê.” 34 In chiū kā Iâ-so͘ kóng, “Sian-siⁿ, chhiáⁿ lí put-sî chiong chit-ê piáⁿ hō͘ goán.” 35 Iâ-so͘ kā in kóng, “Góa chiū-sī oa̍h-miā ê piáⁿ; lâi góa chia ê lâng it-tēng bōe iau, sìn góa ê lâng it-tēng bōe chhùi-ta. 36 M̄-kú góa bat kā lín kóng, lín í-keng ū khòaⁿ-tio̍h góa, iáu-kú m̄-sìn. 37 Pē só͘ hō͘ góa ê lâng lóng ōe lâi góa chia; lâi góa chia ê lâng, góa choa̍t-tùi bōe kā i khì-sak; 38 in-ūi góa tùi thiⁿ kàng lo̍h-lâi, m̄-sī beh chiàu ka-kī ê ì-sù chòe tāi-chì, sī beh si̍t-hêng chhe góa lâi Hit-ūi ê chí-ì. 39 Chhe góa lâi Hit-ūi ê chí-ì sī án-ni: I só͘ hō͘ góa ê lâng, góa liân chi̍t ê to bōe sòng-sit, tī Boa̍t-ji̍t góa ōe hō͘ i koh-oa̍h. 40 In-ūi góa ê Pē ê chí-ì sī beh hō͘ só͘-ū khòaⁿ-kìⁿ Kiáⁿ lâi sìn Kiáⁿ ê lâng lóng ōe tit-tio̍h éng-oán ê oa̍h-miā; tī Boa̍t-ji̍t góa ōe hō͘ i koh-oa̍h.” 41 In-ūi Iâ-so͘ kóng “Góa sī tùi thiⁿ kàng lo̍h-lâi ê piáⁿ”, [Iû-thài]-lâng chiū su-hā gī-lūn, 42 kóng, “Chit-ê lâng kiám m̄-sī [Iok-sek] ê kiáⁿ Iâ-so͘? Lán bat I ê pē-bú, hiān-chāi I ná-ōe kóng ‘góa sī tùi thiⁿ kàng lo̍h-lâi ê’? ” 43 Iâ-so͘ chiū tùi in kóng, “Lín mài-teh su-hā gī-lūn. 44 Nā m̄-sī chhe góa ê Pē ín-chhōa, bô-lâng ōe lâi góa chia. Lâi góa chia ê, tī Boa̍t-ji̍t góa ōe hō͘ i koh-oa̍h. 45 Sian-ti ê chheh ū kì-chài, ‘Chèng-lâng lóng ōe chiap-siū Siōng-tè ê kàu-tō.’ Só͘-ū thiaⁿ-thàn Pē, tùi I ha̍k-si̍p ê lâng, ōe lâi góa chia. 46 Che m̄-sī kóng ū lâng bat khòaⁿ-kìⁿ Pē; chí-ū tùi Siōng-tè hia lâi Hit-ūi bat khòaⁿ-kìⁿ. 47 Góa si̍t-si̍t chāi-chāi kā lín kóng: Sìn ê lâng ū éng-oán ê oa̍h-miā. 48 Góa chiū-sī oa̍h-miā ê piáⁿ. 49 Lín ê chó͘-sian tī khòng-iá chia̍h má-ná mā sí-khì. 50 Che chiū-sī tùi thiⁿ kàng lo̍h-lâi ê piáⁿ, hō͘ lâng chia̍h-liáu bōe sí. 51 Góa chiū-sī tùi thiⁿ kàng lo̍h-lâi hit-ê oa̍h-miā ê piáⁿ. Lâng nā chia̍h chit-ê piáⁿ, ōe éng-oán oa̍h-teh. Góa beh hō͘ lâng ê piáⁿ chiū-sī góa ê bah, sī ūi-tio̍h beh hō͘ sè-kan-lâng ū oa̍h-miā lâi hiàn ê.” 52 Tùi án-ni, [Iû-thài]-lâng hō͘-siōng cheng-lūn kóng, “Chit-ê lâng ná ōe-tàng ēng I ê bah hō͘ lán chia̍h?” 53 Iâ-so͘ chiū tùi in kóng, “Góa si̍t-si̍t chāi-chāi kā lín kóng, lín nā bô chia̍h Jîn-chú ê bah, bô lim I ê huih, lín lāi-bīn chiū bô oa̍h-miā. 54 Chia̍h góa ê bah, lim góa ê huih ê lâng, chiū ū éng-oán ê oa̍h-miā; tī Boa̍t-ji̍t góa ōe hō͘ i koh-oa̍h. 55 Góa ê bah chin-chiàⁿ ōe chia̍h-tit, góa ê huih chin-chiàⁿ ōe lim-tit. 56 Chia̍h góa ê bah, lim góa ê huih ê lâng, tiàm tī góa lāi-bīn, góa mā tiàm tī i lāi-bīn. 57 Éng-oa̍h ê Pē chhe góa, góa mā in-ūi Pē lâi oa̍h; chhin-chhiūⁿ án-ni, chia̍h góa ê lâng mā ōe in-ūi góa lâi oa̍h. 58 Che chiū-sī tùi thiⁿ kàng lo̍h-lâi ê piáⁿ; m̄-sī chhin-chhiūⁿ lín ê chó͘-sian só͘ chia̍h ê piáⁿ, in chia̍h-liáu mā sí-khì; chia̍h chit-ê piáⁿ ê lâng ōe éng-oán oa̍h-teh.” 59 Chiah-ê sī Iâ-so͘ tī [Ka-pek-lông] ê hōe-tn̂g kà-sī lâng ê sî kóng ê ōe. 60 Iâ-so͘ ê bûn-tô͘ tiong ū chin chōe lâng thiaⁿ-tio̍h, chiū kóng, “Chit-ê ōe chin khùn-lân liáu-kái, siáⁿ-lâng thiaⁿ ōe lo̍h-khì?” 61 Iâ-so͘ sim-lāi chai-iáⁿ I ê bûn-tô͘ su-hā teh gī-lūn chit-ê sū, chiū tùi in kóng, “Chit-ê ōe kā lín jiá-tio̍h sī-bô? 62 Án-ni, lín nā khòaⁿ-tio̍h Jîn-chú seng-koân khì-kàu I goân-lâi ê só͘-chāi, lín beh án-chóaⁿ? 63 Sù oa̍h-miā ê sī Siōng-tè ê Sîn; jio̍k-thé lóng bô kong-hāu. Góa kā lín kóng chiah ê ōe sī Sîn, sī oa̍h-miā. 64 M̄-kú lín tiong-kan ū lâng m̄-sìn.” In-ūi Iâ-so͘ tùi khí-thâu chiū chai sím-mi̍h lâng m̄-sìn, sím-mi̍h lâng beh kā I chhut-bōe. 65 I koh kóng, “In-ūi án-ni, góa bat kā lín kóng, nā m̄-sī Pē ún-chún, bô-lâng ōe-tàng lâi góa chia.” 66 In-ūi án-ni, I ê bûn-tô͘ tiong ū chin chōe lâng lī-khui, bô koh tè I. 67 Iâ-so͘ chiū tùi cha̍p-jī sù-tô͘ kóng, “Lín mā beh lī-khui ò͘?” 68 [Se-bûn] [Pí-tek] ìn kóng, “Chú ah, lí ū éng-oán-oa̍h ê ōe, goán beh khì tè siáⁿ-lâng? 69 Goán í-keng sìn, koh khak-si̍t chai lí sī Siōng-tè ê Sèng-chiá.” 70 Iâ-so͘ ìn kóng, “Góa kiám m̄-sī kéng-soán lín cha̍p-jī lâng? Lín tiong-kan ū chi̍t ê sī mô͘-kúi.” 71 I án-ni kóng sī teh chí [Í-su-ka-lio̍k] 2 [Se-bûn] ê kiáⁿ [Iû-tāi], i sī cha̍p-jī sù-tô͘ ê chi̍t ê, teh-beh chhut-bōe Iâ-so͘.

Iok-hān 7

1 Chit-ê tāi-chì í-āu, Iâ-so͘ khì [Ka-lī-lī] kéng-lāi ta̍k só͘-chāi; I bô ài khì [Iû-thài], in-ūi [Iû-thài]-kàu ê léng-siù chhē ki-hōe beh kā I thâi. 2 [Iû-thài]-lâng ê Tah-liâu-choeh teh-beh kàu. 3 Só͘-í Iâ-so͘ ê hiaⁿ-tī kā I kóng, “Lí tio̍h lī-khui chia khì [Iû-thài], hō͘ lí ê bûn-tô͘ mā thang khòaⁿ lí teh chòe ê tāi-chì. 4 Lâng beh chhut-miâ bōe tiām-tiām-á chòe. Kì-jiân lí teh chòe chiah-ê tāi-chì, tio̍h khì chòe hō͘ sè-kan-lâng khòaⁿ.” 5 In-ūi liân I ê hiaⁿ-tī to bô sìn I. 6 Iâ-so͘ kā in kóng, “Góa ê sî iáu-bē kàu; put-kò lín ta̍k-sî lóng piān-piān. 7 Sè-kan-lâng bô lí-iû oàn-hūn lín; in oàn-hūn góa, in-ūi góa put-sî teh chí-chhut in ê hêng-ûi siâ-ok. 8 Lín chòe lín chiūⁿ-khì siú-choeh; góa bô ài chiūⁿ-khì siú chit-ê choeh, in-ūi góa ê sî-ki iáu-bē sêng-se̍k.” 9 Iâ-so͘ kóng chiah-ê ōe liáu-āu kè-sio̍k lâu tī [Ka-lī-lī]. 10 Iâ-so͘ ê hiaⁿ-tī chiūⁿ-khì siú-choeh, I mā khì, m̄-sī kong-khai, sī tiām-tiām-á khì. 11 Choeh-kî ê tiong-kan, [Iû-thài]-kàu ê léng-siù teh chhē Iâ-so͘, mn̄g kóng, “I tī sím-mi̍h só͘-chāi?” 12 Kûn-chiòng ê tiong-kan ū chin chōe lâng su-hā teh gī-lūn Iâ-so͘ ê tāi-chì. Ū lâng kóng, “I sī hó-lâng.” Mā ū lâng kóng, “M̄-sī, I sī teh siàn-tōng kûn-chiòng.” 13 M̄-kú in kiaⁿ [Iû-thài]-kàu ê léng-siù, bô-lâng káⁿ kong-jiân kóng-khí I ê tāi-chì. 14 Choeh-kî kè chi̍t-pòaⁿ, Iâ-so͘ chiah chiūⁿ-khì Sèng-tiān kà-sī lâng. 15 [Iû-thài]-kàu ê léng-siù kám-kak kî-koài, kóng, “Chit-ê lâng bô siū-kè kàu-io̍k, ná hiah-ni̍h ū ha̍k-būn?” 16 Iâ-so͘ ìn kóng, “Góa ê kà-sī m̄-sī góa ka-kī ê, sī chhe góa lâi Hit-ūi ê kà-sī. 17 Lâng nā goān-ì si̍t-hêng Siōng-tè ê chí-ì, chiū ōe chai góa ê kà-sī sī tùi Siōng-tè lâi á-sī chiàu ka-kī ê ì-sù teh kóng. 18 Óa-khò ka-kī kóng ê sī teh kiû ka-kī ê êng-kng; kiû chhe i Hit-ūi ê êng-kng ê lâng sī chin-si̍t, i ê lāi-bīn lóng bô put-gī. 19 [Mô͘-se] kiám bô hō͘ lín Lu̍t-hoat? Put-kò lín tiong-kan bô-kah chi̍t-ê chun-siú Lu̍t-hoat. Sī-án-chóaⁿ lín siūⁿ-beh thâi góa?” 20 Kûn-chiòng ìn kóng, “Lí m̄-teh khòaⁿ-tio̍h kúi. Siáⁿ-lâng siūⁿ-beh thâi lí?” 21 Iâ-so͘ tùi in kóng, “Góa kan-ta chòe chi̍t hāng tāi-chì, lín chiū lóng kám-kak kî-koài. 22 [Mô͘-se] bēng-lēng lín kiâⁿ kat-lé, lín mā tī An-hioh-ji̍t kā lâng kiâⁿ kat-lé. Sū-si̍t, chit-ê lé-gî m̄-sī tùi [Mô͘-se], sī tùi lín chó͘-sian khai-sí. 23 Kì-jiân lín tī An-hioh-ji̍t kā chi̍t ê ta-po͘ gín-á kat-lé sī ūi-tio̍h beh chun-siú [Mô͘-se] ê Lu̍t-hoat, án-ni góa tī An-hioh-ji̍t hō͘ chi̍t ê pīⁿ-lâng oân-choân hó khí-lâi, lín sī-án-chóaⁿ tùi góa siū-khì? 24 M̄-thang khòaⁿ gōa-piáu lâi phòaⁿ-toàn sī-hui, tio̍h chiàu kong-chèng phòaⁿ-toàn.” 25 Ū chi̍t-kóa [Iâ-lō͘-sat-léng] ê lâng teh kóng, “Chit-ê kiám m̄-sī in siūⁿ-beh sat-hāi hit-ê lâng? 26 Lí khòaⁿ, I kong-khai teh kóng-ōe, in mā bô kóng sím-mi̍h kā I hoán-tùi. Kiám kóng chiah-ê koaⁿ-tiúⁿ chin-chiàⁿ chai chit-ê lâng sī Ki-tok? 27 M̄-kú chit-ê lâng ê lâi-le̍k lán lóng chai; Ki-tok lâi ê sî, bô-lâng ōe chai I tùi tó-ūi lâi.” 28 Iâ-so͘ tī Sèng-tiān teh kà-sī ê sî, tōa-siaⁿ kóng, “Lín bat góa, mā chai góa ê lâi-le̍k; put-kò góa m̄-sī chiàu ka-kī ê ì-sù lâi. Chhe góa lâi Hit-ūi sī chin-si̍t, lín khiok m̄-bat I. 29 Góa bat I, in-ūi góa tùi I hia lâi, I chhe-khián góa lâi.” 30 In chiū siūⁿ-beh kā I lia̍h, put-kò bô-lâng hē-chhiú, in-ūi I ê sî iáu-bē kàu. 31 Kûn-chiòng ê tiong-kan ū chin chōe lâng sìn I, kóng, “Ki-tok lâi ê sî, kiám ōe pí chit-ê lâng kiâⁿ khah chōe sîn-jiah?” 32 Hoat-lī-sài-phài ê lâng thiaⁿ-tio̍h kûn-chiòng su-hā teh gī-lūn Iâ-so͘ ê tāi-chì, chè-si-tiúⁿ kap Hoat-lī-sài-lâng chiū phài Sèng-tiān ê kéng-ōe khì lia̍h Iâ-so͘. 33 Iâ-so͘ kóng, “Góa koh kap lín chòe-hé bô jōa kú chiū beh tńg-khì chhe góa lâi Hit-ūi hia. 34 Lín beh chhē góa, m̄-kú chhē bōe-tio̍h, in-ūi góa khì ê só͘-chāi, lín bōe-tàng khì.” 35 [Iû-thài]-kàu ê léng-siù hō͘-siōng kóng, “Chit-ê lâng beh khì tó-ūi hō͘ lán chhē bōe-tio̍h? I siūⁿ-beh khì sì-sòaⁿ tī [Hi-la̍h] siâⁿ-chhī ê [Iû-thài] kiâu-bîn hia, khì kà-sī [Hi-la̍h]-lâng sī-bô? 36 I kóng ‘Lín beh chhē góa, m̄-kú chhē bōe-tio̍h’, koh kóng ‘Góa khì ê só͘-chāi, lín bōe-tàng khì’, che sī sím-mi̍h ì-sù?” 37 Choeh-kî ê chòe-āu hit ji̍t, iā-sī siōng tiōng-iàu ê ji̍t, Iâ-so͘ khiā khí-lâi, tōa-siaⁿ kóng, “Chhùi-ta ê lâng tio̍h lâi góa chia lim. 38 Sìn góa ê lâng, chiàu Sèng-keng só͘ kóng, ‘Ū oa̍h-chúi ê khoe ōe tùi i ê pak-lāi chhèng chhut-lâi.’ ” 39 Iâ-so͘ án-ni kóng sī chí sìn I ê lâng teh-beh niá-siū ê Sèng Sîn. Hit sî, Siōng-tè iáu-bē sù Sèng Sîn, in-ūi Iâ-so͘ iáu-bē tit-tio̍h êng-kng. 40 Kûn-chiòng ê tiong-kan ū lâng thiaⁿ-tio̍h chiah-ê ōe chiū kóng, “Chit-ê lâng chin-chiàⁿ sī hit-ūi Sian-ti.” 41 Koh ū lâng kóng, “Chit-ê lâng sī Ki-tok.” Put-kò mā ū lâng kóng, “Ki-tok ná-ōe tùi [Ka-lī-lī] chhut? 42 Sèng-keng kiám m̄-sī kóng Ki-tok sī [Tāi-pi̍t] ê kiáⁿ-sun, sī tùi [Tāi-pi̍t] ê kò͘-hiong [Pek-lī-hêng] chhut?” 43 Án-ni, kûn-chiòng in-ūi Iâ-so͘ ê iân-kò͘ khí hun-cheng. 44 Kî-tiong ū chi̍t-kóa lâng siūⁿ-beh lia̍h Iâ-so͘, m̄-kú bô-lâng hē-chhiú. 45 Sèng-tiān ê kéng-ōe tńg-khì kìⁿ chè-si-tiúⁿ kap Hoat-lī-sài-phài ê lâng. In chiū mn̄g kéng-ōe kóng, “Lín ná bô kā I ah lâi?” 46 Kéng-ōe ìn kóng, “M̄-bat ū lâng kóng-ōe chhin-chhiūⁿ chit-ê lâng.” 47 [Hoat-lī-sài]-lâng chiū tùi in kóng, “Lín mā hō͘ I bê-khì ò͘? 48 Lán ê koaⁿ-tiúⁿ á-sī [Hoat-lī-sài]-lâng kiám ū lâng sìn I? 49 Chit tīn m̄-bat Lu̍t-hoat ê kûn-chiòng sī siū chiù-chó͘ ê.” 50 [Hoat-lī-sài]-lâng ê tiong-kan bat khì kìⁿ Iâ-so͘ ê [Nî-ko-tek-bō͘] kā in kóng, 51 “Chiàu lán ê Lu̍t-hoat, bô seng sím-mn̄g koh chhâ-bêng lâng ū chòe sím-mi̍h, kiám ōe-tàng kā i tēng-chōe?” 52 In ìn kóng, “Lí mā-sī [Ka-lī-lī] lâi ê sī-bô? Lí chhâ-khó Sèng-keng chiū chai [Ka-lī-lī] m̄-bat chhut sian-ti.”

Iok-hān 8

1 Chèng-lâng lóng tńg-khì ka-kī ê chhù, m̄-kú Iâ-so͘ khì [Ka-ná]-soaⁿ. 2 Keh-ji̍t thàu-chá, Iâ-so͘ koh khì Sèng-tiān. Bîn-chiòng lóng óa-lâi I hia, I chiū chē lo̍h-khì kā in kà-sī. 3 Hit sî keng-ha̍k-kàu-su kap Hoat-lī-sài-phài ê lâng chhōa chi̍t ê hū-jîn-lâng lâi, i teh hoān kan-îm ê sî hō͘ lâng lia̍h-tio̍h. In hō͘ i khiā tī tiong-ng, 4 mn̄g Iâ-so͘ kóng, “Lāu-su, chit-ê cha-bó͘-lâng hoān kan-îm ê sî hō͘ lâng lia̍h-tio̍h. 5 Kun-kù Lu̍t-hoat, [Mô͘-se] bēng-lēng lán tio̍h ēng chio̍h-thâu tìm-sí chit khoán cha-bó͘-lâng. Lí ū sím-mi̍h ì-kiàn?” 6 In án-ni kóng sī beh chhì-thàm Iâ-so͘, thang chhē khang-phāng kā I kò. Iâ-so͘ khû lo̍h-khì, ēng chńg-thâu-á tī thô͘-kha siá-jī. 7 In ti̍t-ti̍t kā I mn̄g, Iâ-so͘ chiū khiā khí-lâi, tùi in kóng, “Lín tiong-kan bô-chōe ê lâng seng the̍h chio̍h-thâu kā i tìm.” 8 Jiân-āu I koh khû lo̍h-khì tī thô͘-kha siá-jī. 9 In chi̍t-ē thiaⁿ-tio̍h chiah-ê ōe, tùi lāu ê khai-sí chi̍t-ê chi̍t-ê liu chhut-khì, chhun Iâ-so͘ chi̍t ê, hit-ê hū-jîn-lâng iáu khiā tī hia. 10 Iâ-so͘ khiā khí-lâi, kā i kóng, “Hū-jîn-lâng, in tī tó-ūi? Bô-lâng kā lí tēng-chōe sī-bô?” 11 I ìn kóng, “Sian-siⁿ, bô.” Iâ-so͘ kóng, “Góa mā bô kā lí tēng-chōe. Lí tńg-khì, í-āu m̄-thang koh hoān-chōe.” ] 12 Iâ-so͘ koh kā chèng-lâng kóng, “Góa sī sè-kan ê kng; tè góa ê lâng bōe tī o͘-àm tiong seng-oa̍h, hoán-tńg ū oa̍h-miā ê kng.” 13 [Hoat-lī-sài]-phài ê lâng chiū tùi I kóng, “Lí teh ūi ka-kī choh-chèng, lí ê kiàn-chèng bô-hāu.” 14 Iâ-so͘ ìn kóng, “Sui-jiân góa ūi ka-kī choh-chèng, góa ê kiàn-chèng ū-hāu, in-ūi góa chai góa tùi tó-ūi lâi, beh khì tó-ūi; m̄-kú lín m̄-chai góa tùi tó-ūi lâi, beh khì tó-ūi. 15 Lín ēng lâng ê phiau-chún phoe-phòaⁿ lâng, góa bô kā lâng phoe-phòaⁿ. 16 Góa nā phoe-phòaⁿ, góa ê phòaⁿ-toàn chèng-khak, in-ūi góa m̄-sī ka-kī chi̍t ê teh phòaⁿ-toàn, sī chhe góa ê Pē kap góa chòe-hé phòaⁿ-toàn. 17 Koh lín ê Lu̍t-hoat ū kì-chài, ū nn̄g lâng choh-chèng, in ê kiàn-chèng chiah ū-hāu. 18 Góa ūi ka-kī choh-chèng, chhe góa ê Pē mā ūi góa choh-chèng.” 19 In chiū mn̄g Iâ-so͘, “Lí ê Pē tī tó-ūi?” Iâ-so͘ ìn kóng, “Lín m̄-bat góa, mā m̄-bat góa ê Pē. Lín nā bat góa, mā ōe bat góa ê Pē.” 20 Chiah-ê ōe sī Iâ-so͘ tī Sèng-tiān kà-sī lâng ê sî, tī khǹg hōng-hiàn-kūi hia kóng ê. Put-kò bô-lâng kā I lia̍h, in-ūi I ê sî iáu-bē kàu. 21 Iâ-so͘ koh kā in kóng, “Góa beh lī-khui lah. Lín ōe chhē góa, m̄-kú lín ōe in-ūi ka-kī ê chōe lâi sí; góa khì ê só͘-chāi, lín bōe-tàng khì.” 22 [Iû-thài]-kàu ê léng-siù kóng, “I kóng ‘Góa khì ê só͘-chāi, lín bōe-tàng khì’, kiám kóng I beh khì chū-sat?” 23 Iâ-so͘ kā in kóng, “Lín tùi ē-bīn lâi, góa tùi téng-bīn lâi. Lín sio̍k chit sè-kan, góa bô sio̍k chit sè-kan. 24 Só͘-í góa chiah kā lín kóng lín ōe in-ūi ka-kī ê chōe lâi sí; in-ūi lín nā m̄-sìn góa chiū-sī ‘Chū-iú-éng-iú’ Hit-ūi, lín ōe in-ūi ka-kī ê chōe lâi sí.” 25 In chiū mn̄g Iâ-so͘, “Lí sī sím-mi̍h lâng?” Iâ-so͘ ìn kóng, “Góa tùi khí-thâu chiū kā lín kóng lah. 26 Koan-hē lín, góa ū chin chōe thang kóng, thang tēng-chōe. M̄-kú chhe góa Hit-ūi sī chin-si̍t, góa chiong tùi I thiaⁿ-tio̍h ê thoân hō͘ sè-kan-lâng.” 27 In bô liáu-kái Iâ-so͘ sī tùi in teh kóng Pē ê tāi-chì. 28 Só͘-í Iâ-so͘ kā in kóng, “Lín kú-khí Jîn-chú liáu-āu chiū ōe chai, góa chiū-sī ‘Chū-iú-éng-iú’ hit-ūi, koh góa chòe tāi-chì bô chi̍t hāng sī chiàu góa ka-kī ê ì-sù, chí-ū chiàu Pē kà-sī góa ê lâi kóng. 29 Chhe góa Hit-ūi kap góa tông-chāi; I m̄-bat pàng góa ka-kī chi̍t ê, in-ūi góa put-sî teh chòe I só͘ hoaⁿ-hí ê tāi-chì.” 30 Iâ-so͘ kóng chiah-ê ōe ê sî, ū chin chōe lâng sìn I. 31 Iâ-so͘ tùi sìn I hiah-ê [Iû-thài]-lâng kóng, “Lín nā kè-sio̍k chun-siú góa ê ōe, chiū si̍t-chāi sī góa ê bûn-tô͘; 32 lín ōe bat chin-lí, chin-lí ōe hō͘ lín tit-tio̍h chū-iû.” 33 In ìn kóng, “Goán sī [A-pek-la-hán] ê kiáⁿ-sun, m̄-bat chòe lâng ê lô͘-lē. Lí ná-ōe kóng ‘Lín ōe tit-tio̍h chū-iû’?” 34 Iâ-so͘ kā in kóng, “Góa si̍t-si̍t chāi-chāi kā lín kóng, ta̍k ê hoān-chōe ê lâng chiū-sī chōe ê lô͘-lē. 35 Lô͘-lē bô éng-oán sio̍k tī chú-lâng ê ka-têng, kiáⁿ chiū éng-oán ū. 36 Só͘-í, Siōng-tè ê Kiáⁿ nā hō͘ lín chū-iû, lín chiū si̍t-chāi ū chū-iû. 37 Góa chai lín sī [A-pek-la-hán] ê kiáⁿ-sun; m̄-kú lín siūⁿ-beh thâi góa, in-ūi lín m̄ chiap-siū góa ê ōe. 38 Góa sī teh kóng tùi góa ê Pē hia khòaⁿ-tio̍h ê; lín sī teh chòe tùi lín ê pē hia thiaⁿ-tio̍h ê.” 39 In ìn Iâ-so͘ kóng, “Goán ê pē sī [A-pek-la-hán].” Iâ-so͘ tùi in kóng, “Lín nā-sī [A-pek-la-hán] ê kiáⁿ-sun, lín ōe chòe [A-pek-la-hán] só͘ chòe ê tāi-chì. 40 Hiān-chāi góa chiong tùi Siōng-tè thiaⁿ-tio̍h ê chin-lí kā lín kóng, lín soah siūⁿ-beh thâi góa. [A-pek-la-hán] pèng bô chòe chit khoán tāi-chì. 41 Lín sī teh chòe lín ê pē só͘ chòe ê tāi-chì.” In ìn kóng, “Goán m̄-sī su-seng-chú; Siōng-tè sī goán î-it ê Pē.” 42 Iâ-so͘ chiū tùi in kóng, “Siōng-tè nā chin-chiàⁿ sī lín ê Pē, lín ōe thiàⁿ góa, in-ūi góa tùi Siōng-tè hia lâi, hiān-chāi tī chia. Góa m̄-sī chiàu góa ka-kī ê ì-sù lâi, sī Siōng-tè chhe-khián góa lâi. 43 Sī-án-chóaⁿ lín bô bêng-pe̍k góa ê ōe? Sī in-ūi góa ê ōe lín thiaⁿ bōe ji̍p-khì. 44 Lín ê pē sī Mô͘-kúi; lín kan-ta siūⁿ-beh si̍t-hêng lín ê pē ê io̍k-bōng. I tùi khí-thâu chiū-sī sat-jîn-hoān, bô chun-siú chin-lí, in-ūi i ê lāi-bīn bô chin-lí. Kóng pe̍h-chha̍t sī i ê pún-sèng, in-ūi i sī kóng pe̍h-chha̍t ê, mā-sī kóng pe̍h-chha̍t ê lâng ê pē. 45 In-ūi góa kóng chin-lí, lín m̄-sìn góa. 46 Lín tiong-kan sím-mi̍h lâng ōe-tàng chí-chèng góa ū chōe? Kì-jiân góa kóng chin-lí, sī-án-chóaⁿ lín m̄-sìn góa? 47 Sio̍k Siōng-tè ê lâng thiaⁿ Siōng-tè ê ōe; lín m̄-thiaⁿ, in-ūi lín m̄-sī sio̍k Siōng-tè.” 48 [Iû-thài]-kàu ê léng-siù tùi Iâ-so͘ kóng, “Goán kóng lí sī [Sat-má-lī-a]-lâng, koh hoān-tio̍h kúi, kiám m̄-tio̍h?” 49 Iâ-so͘ kóng, “Góa bô hoān-tio̍h kúi; góa chun-kèng góa ê Pē, lín tian-tò bô chun-kèng góa. 50 Góa bô tui-kiû ka-kī ê êng-kng, put-kò ū Chi̍t-ūi ūi-tio̍h góa tui-kiû, ūi-tio̍h góa chhâi-koat. 51 Góa si̍t-si̍t chāi-chāi kā lín kóng, chun-siú góa ê ōe ê lâng it-tēng éng-oán bōe sí.” 52 [Iû-thài]-kàu ê léng-siù ìn kóng, “Taⁿ goán khak-si̍t chai lí hoān-tio̍h kúi. [A-pek-la-hán] í-keng sí, chèng sian-ti mā sí-khì, lí ná kóng ‘chun-siú góa ê ōe ê lâng éng-oán bōe sí’? 53 Lí kiám pí goán ê pē [A-pek-la-hán] khah úi-tāi? I í-keng sí, chèng sian-ti mā sí-khì. Lí siūⁿ lí sī siáⁿ-lâng?” 54 Iâ-so͘ ìn kóng, “Góa nā êng-iāu ka-kī, góa ê êng-kng chiū bô kè-ta̍t. Êng-iāu góa ê sī góa ê Pē, chiū-sī lín kóng ‘I sī goán ê Siōng-tè’ Hit-ūi. 55 Lín m̄-bat I, m̄-kú góa bat I. Góa nā kóng góa m̄-bat I, góa chiū kap lín kâng-khoán sī pe̍h-chha̍t. M̄-kú góa bat I, koh chun-siú I ê ōe. 56 Lín ê pē [A-pek-la-hán] hoaⁿ-hí teh thèng-hāu góa lâi-lîm ê ji̍t-chí; i ū khòaⁿ-tio̍h, khòaⁿ-liáu chin hoaⁿ-hí.” 57 [Iû-thài]-kàu ê léng-siù tùi Iâ-so͘ kóng, “Lí iáu-bē gō͘-cha̍p hè, kiám bat khòaⁿ-tio̍h [A-pek-la-hán]?” 58 Iâ-so͘ ìn kóng, “Góa si̍t-si̍t chāi-chāi kā lín kóng, [A-pek-la-hán] iáu-bē chhut-sì, góa í-keng chûn-chāi.” 59 In chiū the̍h chio̍h-thâu beh kā I tìm; m̄-kú Iâ-so͘ siám-khui, lī-khui Sèng-tiān.

Iok-hān 9

1 Iâ-so͘ keng-kè ê sî, khòaⁿ-tio̍h chi̍t ê chhut-sì chiū sit-bêng ê lâng. 2 I ê bûn-tô͘ kā I mn̄g, “Lia̍p-pí, chit-ê lâng chhut-sì chiū sit-bêng, sī siáⁿ-lâng hoān-chōe, sī i pún-sin á-sī i ê pē-bú?” 3 Iâ-so͘ ìn kóng, “M̄-sī in-ūi chit-ê lâng hoān-chōe, mā m̄-sī i ê pē-bú hoān-chōe, sī beh thong-kè i lâi hián-bêng Siōng-tè ê chok-ûi. 4 Thàn iáu sī ji̍t-sî, lán tio̍h chòe chhe góa Hit-ūi ê kang; àm-sî chi̍t-ē kàu, bô-lâng ōe-tàng chòe-kang. 5 Góa tī sè-kan ê sî, sī sè-kan ê kng.” 6 Chiah-ê ōe kóng liáu, I phùi chhùi-nōa tī thô͘-kha, ēng chhùi-nōa chhiau thô͘, jiân-āu ēng thô͘ kô͘ hit-ê lâng ê ba̍k-chiu, 7 kā i kóng, “Lí khì [Se-lô-a]-tî sóe,” --- [Se-lô-a] ê ì-sù sī “Hōng chhe-khián” --- i chiū khì sóe, tńg-lâi ê sî í-keng ōe khòaⁿ-kìⁿ. 8 I ê chhù-piⁿ kap bat khòaⁿ-tio̍h i í-chêng teh chòe khit-chia̍h ê lâng, kóng, “Chit-ê kiám m̄-sī put-sî chē teh kā lâng pun hit-ê lâng?” 9 Ū lâng kóng, “I chiū-sī.” Koh ū lâng kóng, “M̄-sī; sī chhin-chhiūⁿ i.” M̄-kú hit-ê lâng ka-kī kóng, “Góa chiū-sī.” 10 In koh mn̄g i, “Lí ê ba̍k-chiu án-chóaⁿ ōe khòaⁿ-kìⁿ?” 11 I ìn kóng, “Kiò-chòe Iâ-so͘ hit-ê lâng chhiau thô͘ kô͘ góa ê ba̍k-chiu, kā góa kóng, ‘lí khì [Se-lô-a]-tî sóe’; góa khì, chi̍t-ē sóe, chiū ōe khòaⁿ-kìⁿ.” 12 In mn̄g i, “Hit-ê lâng tī tó-ūi?” I kóng, “Góa m̄-chai.” 13 In chiū chhōa í-chêng sit-bêng hit-ê lâng khì Hoat-lī-sài-phài ê lâng hia. 14 Iâ-so͘ chhiau thô͘ lâi khui i ê ba̍k-chiu hit ji̍t sī An-hioh-ji̍t. 15 Só͘-í, Hoat-lī-sài-lâng koh chi̍t piàn mn̄g i sī án-chóaⁿ ōe khòaⁿ-kìⁿ. I kā in kóng, “I ēng thô͘ kô͘ góa ê ba̍k-chiu, góa khì sóe, chiū ū khòaⁿ-kìⁿ.” 16 Ū chi̍t-kóa [Hoat-lī-sài]-lâng kóng, “Chit-ê lâng m̄-sī tùi Siōng-tè hia lâi ê, in-ūi I bô siú An-hioh-ji̍t.” Koh ū pa̍t ê lâng kóng, “Chi̍t ê ū-chōe ê lâng ná ōe-tàng kiâⁿ chit khoán sîn-jiah?” In tiong-kan soah khí hun-lia̍t. 17 Hoat-lī-sài-lâng chiū mn̄g hit-ê sit-bêng ê lâng, “Kì-jiân I hō͘ lí ê ba̍k-chiu ū khòaⁿ-kìⁿ, lí kóng I sī sím-mi̍h lâng?” I ìn kóng, “I sī sian-ti.” 18 [Iû-thài]-kàu ê léng-siù it-ti̍t bô siong-sìn i í-chêng sit-bêng, hiān-chāi ū khòaⁿ-kìⁿ, chiū tiàu i ê pē-bú lâi, 19 mn̄g in kóng, “Chit-ê sī lín kóng chhut-sì chiū sit-bêng hit-ê kiáⁿ sī-bô? Sī án-chóaⁿ i hiān-chāi ōe khòaⁿ-kìⁿ?” 20 I ê pē-bú ìn kóng, “Goán chai i sī goán kiáⁿ, chhut-sì chiū sit-bêng. 21 M̄-kú i hiān-chāi án-chóaⁿ ōe khòaⁿ-kìⁿ, goán m̄-chai; mā m̄-chai sím-mi̍h lâng hō͘ i ōe khòaⁿ-kìⁿ. Lín kā i mn̄g, i í-keng tōa-hàn, ka-kī ōe-hiáu ìn.” 22 I ê pē-bú án-ni kóng, sī in-ūi kiaⁿ [Iû-thài]-kàu ê léng-siù; in-ūi in í-keng chham-siông hó-sè, nā ū lâng sêng-jīn Iâ-so͘ sī Ki-tok, tio̍h tùi hōe-tn̂g kā i kóaⁿ chhut-khì. 23 In-ūi án-ni, i ê pē-bú chiah kóng, “I í-keng tōa-hàn, lín kā i mn̄g.” 24 [Hoat-lī-sài]-lâng tē-jī piàn kiò hit-ê chhut-sì chiū sit-bêng ê lâi, kā i kóng, “Tī Siōng-tè bīn-chêng tio̍h chiàu-si̍t kóng. Goán chai chit-ê lâng sī ū-chōe ê lâng.” 25 I ìn kóng, “I sī ū chōe ê lâng á m̄-sī, góa m̄-chai. Góa chí-ū chai chi̍t hāng tāi-chì, góa chêng sit-bêng, taⁿ ōe khòaⁿ-kìⁿ.” 26 In chiū mn̄g i, “I kā lí chòe sím-mi̍h? I án-chóaⁿ hō͘ lí ōe khòaⁿ-kìⁿ?” 27 I ìn kóng, “Góa í-keng kā lín kóng lah, lín m̄-thiaⁿ, lín ná beh koh thiaⁿ? Lín mā siūⁿ-beh chòe I ê bûn-tô͘ sī-bô?” 28 In chiū kā i mē, “Lí chiah-sī hit-ê lâng ê bûn-tô͘; goán sī [Mô͘-se] ê bûn-tô͘. 29 Goán chai Siōng-tè bat tùi [Mô͘-se] kóng-ōe, m̄-kú chit-ê lâng, i tùi tó-ūi lâi, goán m̄-chai.” 30 Hit-ê lâng ìn kóng, “Án-ni ū-kàu kî-koài! I i-hó góa ê ba̍k-chiu, lín iáu-kú m̄-chai I tùi tó-ūi lâi? 31 Lán chai Siōng-tè bô thiaⁿ chōe-jîn ê kî-kiû; m̄-kú lâng nā kèng-ùi Siōng-tè, si̍t-hêng I ê chí-ì, Siōng-tè chiū kā i thiaⁿ. 32 Tùi chhòng-sè í-lâi, iáu m̄-bat thiaⁿ-kìⁿ kóng ū lâng hō͘ chhut-sì chiū sit-bêng ê lâng ōe khòaⁿ-kìⁿ. 33 Chit-ê lâng nā m̄-sī tùi Siōng-tè lâi, bōe-tàng chòe chit khoán tāi-chì.” 34 In chiū tùi i kóng, “Lí chhut-sì chiū ū-chōe, tī chōe tiong tōa-hàn, koh káⁿ beh kà-sī goán!” In chiū kā i kóaⁿ chhut-khì. 35 Iâ-so͘ thiaⁿ-tio̍h in kā i kóaⁿ-chhut hōe-tn̂g, āu-lâi chhē-tio̍h i, chiū kā i mn̄g, “Lí ū sìn Jîn-chú bô?” 36 I ìn kóng, “Sian-siⁿ, sím-mi̍h lâng sī Jîn-chú, góa thang sìn I?” 37 Iâ-so͘ tùi i kóng, “Lí í-keng ū khòaⁿ-tio̍h I; chit-chūn teh kap lí kóng-ōe ê chiū-sī I.” 38 I kóng, “Chú ah, góa sìn,” chiū kūi lo̍h-khì kā I pài. 39 Iâ-so͘ kóng, “Góa ūi-tio̍h sím-phòaⁿ lâi-kàu chit sè-kan, thang hō͘ sit-bêng-ê khòaⁿ-kìⁿ, hō͘ ba̍k-kng-ê pìⁿ-chòe sit-bêng.” 40 Chi̍t-kóa [Hoat-lī-sài]-lâng thiaⁿ-tio̍h chiū mn̄g Iâ-so͘, “Lí sī kóng goán mā sit-bêng ò͘?” 41 Iâ-so͘ ìn kóng, “Lín nā sit-bêng chiū bô-chōe; m̄-kú lín kóng ‘Goán sī ba̍k-kng-ê’, án-ni lín iáu ū-chōe.”

Iok-hān 10

1 “Góa si̍t-si̍t chāi-chāi kā lín kóng, beh ji̍p-khì iûⁿ-tiâu, bô tùi mn̂g ji̍p, tùi pa̍t só͘-chāi pôaⁿ kè-khì ê, sī chha̍t, sī kiông-tō. 2 Tùi mn̂g ji̍p-khì ê chiah-sī iûⁿ ê bo̍k-chiá. 3 Kò͘-mn̂g-ê kā bo̍k-chiá khui-mn̂g; iûⁿ jīn-tit bo̍k-chiá ê siaⁿ. I Ka-kī ê iûⁿ, chi̍t-chiah chi̍t-chiah kiò-miâ chhōa in chhut-lâi. 4 I chhōa ka-kī ê iûⁿ chhut-lâi liáu-āu, kiâⁿ tī iûⁿ ê thâu-chêng, iûⁿ chiū tè i kiâⁿ, in-ūi jīn-tit i ê siaⁿ. 5 In it-tēng bōe tè siⁿ-hūn-lâng, tian-tò ōe cháu-siám, in-ūi in m̄-bat siⁿ-hūn-lâng ê siaⁿ.” 6 Iâ-so͘ kā in kóng chit-ê phì-jū, m̄-kú in m̄-chai I teh kā in kóng sím-mi̍h. 7 Só͘-í, Iâ-so͘ koh kā in kóng, “Góa si̍t-si̍t chāi-chāi kā lín kóng, góa sī iûⁿ ê mn̂g. 8 Só͘-ū pí góa khah tāi-seng lâi ê lóng sī chha̍t, sī kiông-tō, iûⁿ bōe thiaⁿ in. 9 Góa sī mn̂g; thong-kè góa chit-ê mn̂g ji̍p-lâi ê, ōe an-choân, thang chhut-chhut ji̍p-ji̍p, koh ōe chhē-tio̍h chháu-tiûⁿ. 10 Chha̍t lâi, it-tēng sī beh thau-the̍h, beh thâi, beh húi-bia̍t. Góa lâi sī beh hō͘ in tit-tio̍h oa̍h-miā, tit-kah chin chhiong-chiok. 11 “Góa sī hó ê bo̍k-chiá; hó ê bo̍k-chiá ūi-tio̍h iûⁿ pàng-sak sìⁿ-miā. 12 Hō͘ lâng chhiàⁿ ê m̄-sī bo̍k-chiá, iûⁿ m̄-sī ka-kī ê, i chi̍t-ē khòaⁿ-tio̍h chhâi-lông lâi chiū kā iûⁿ pàng-teh, tô-cháu; chhâi-lông chiong iûⁿ kā-khì, kā in kóaⁿ-sòaⁿ. 13 I tô-cháu, in-ūi i sī hō͘ lâng chhiàⁿ ê, bô chin-chiàⁿ koan-sim iûⁿ-kûn. 14 Góa sī hó ê bo̍k-chiá; góa bat góa ka-kī ê iûⁿ, góa ka-kī ê iûⁿ mā bat góa. 15 Chhin-chhiūⁿ Pē bat góa, góa mā bat Pē. Góa ūi-tio̍h iûⁿ pàng-sak sìⁿ-miā. 16 Góa iáu ū kî-tha ê iûⁿ bô sio̍k chit-ê iûⁿ-tiâu; góa mā it-tēng tio̍h chhōa in lâi. In ōe thiaⁿ góa ê siaⁿ, mā ōe chiâⁿ-chòe chi̍t kûn, kui-sio̍k chi̍t ê bo̍k-chiá. 17 “Pē thiàⁿ góa, in-ūi góa pàng-sak ka-kī ê sìⁿ-miā, thang koh tit-tio̍h sìⁿ-miā. 18 Bô-lâng chhiúⁿ góa ê sìⁿ-miā, sī góa chū-goān pàng-sak. Góa ū koân pàng-sak, mā ū koân the̍h-tńg-lâi. Che sī góa tùi Pē chiap-siū ê bēng-lēng.” 19 In-ūi Iâ-so͘ só͘ kóng chiah-ê ōe, [Iû-thài]-lâng koh khí hun-lia̍t. 20 In tiong-kan ū chin chōe lâng kóng, “I hoān-tio̍h kúi, cheng-sîn sit-siông, ná-tio̍h thiaⁿ I ê ōe?” 21 Lēng-gōa ū lâng kóng, “Hoān-tio̍h kúi ê lâng bōe kóng chiah-ê ōe. Kúi kiám ōe khui sit-bêng ê lâng ê ba̍k-chiu?” 22 [Iâ-lō͘-sat-léng] tú teh khèng-chiok Hiàn-tiān-choeh, hit sî sī tang-thiⁿ. 23 Iâ-so͘ tī Sèng-tiān ê [Só͘-lô-bûn] cháu-lông teh kiâⁿ. 24 [Iû-thài]-lâng kā Iâ-so͘ ûi-teh, tùi I kóng, “Lí beh hō͘ goán chhai-gî jōa kú ? Lí nā-sī Ki-tok, tio̍h chiàu-si̍t kā goán kóng.” 25 Iâ-so͘ ìn kóng, “Góa í-keng ū kā lín kóng, lín m̄-sìn. Góa hōng góa ê Pē ê miâ só͘ chòe ê tāi-chì teh ūi góa choh-chèng. 26 M̄-kú lín m̄-sìn, in-ūi lín m̄-sī góa ê iûⁿ. 27 Góa ê iûⁿ thiaⁿ góa ê siaⁿ, góa bat in, in tè góa. 28 Góa sù in éng-oán ê oa̍h-miā; in éng-oán bōe bia̍t-bông; bô-lâng ōe tùi góa ê chhiú kā in chhiúⁿ-khì. 29 Chiong iûⁿ sù hō͘ góa ê Pē pí it-chhè khah úi-tāi; bô-lâng ōe-tàng kā in tùi Pē ê chhiú chhiúⁿ-khì. 30 Góa kap Pē sī chi̍t-ê.” 31 [Iû-thài]-lâng koh the̍h chio̍h-thâu beh kā I tìm. 32 Iâ-so͘ tùi in kóng, “Pē kiò góa chòe ê chin chōe hó tāi-chì, góa í-keng ū chòe hō͘ lín khòaⁿ, lín sī ūi-tio̍h tó chi̍t hāng beh ēng chio̍h-thâu kā góa tìm?” 33 [Iû-thài]-lâng ìn kóng, “Goán beh ēng chio̍h-thâu kā lí tìm, m̄-sī in-ūi lí chòe ê hó tāi-chì, sī in-ūi lí siat-to̍k Siōng-tè. Lí put-kò sī lâng, iáu-kú chū-chheng chòe Siōng-tè.” 34 Iâ-so͘ kóng, “Lín ê Lu̍t-hoat kiám m̄-sī ū kì-chài ‘Góa kóng: Lín sī sîn’? 35 Sèng-keng ê ōe éng-oán bōe kái-piàn. Kì-jiân Siōng-tè chheng-ho͘ hiah-ê chiap-siū Siōng-tè ê ōe ê lâng chòe sîn, 36 án-ni, góa sī Pē hun-pia̍t chòe sèng, koh chhe-khián ji̍p sè-kan ê, sī-án-chóaⁿ góa kóng ‘Góa sī Siōng-tè ê Kiáⁿ’, lín chiū kóng góa siat-to̍k Siōng-tè? 37 Góa nā m̄-sī teh chòe góa ê Pē ê tāi-chì, lín m̄-bián sìn góa; 38 góa nā teh chòe Pē ê tāi-chì, sui-jiân lín m̄-sìn góa, mā tio̍h sìn góa só͘ chòe ê tāi-chì, thang hō͘ lín khak-si̍t chai Pē tī góa lāi-bīn, góa tī Pē lāi-bīn.” 39 In koh siūⁿ-beh kā I lia̍h, I chiū siám-cháu lī-khui. 40 Iâ-so͘ koh kè-khì [Iok-tàn]-hô tùi-hōaⁿ, kàu khah-chá [Iok-hān] kā lâng sóe-lé ê só͘-chāi, tī hia tòa. 41 Ū chin chōe lâng lâi kìⁿ Iâ-so͘, kóng, “Sui-jiân [Iok-hān] bô kiâⁿ sîn-jiah, i só͘ kóng it-chhè koan-hē chit-ê lâng ê tāi-chì lóng khak-si̍t.” 42 Tī hia ū chin chōe lâng sìn Iâ-so͘.

Iok-hān 11

1 Ū chi̍t ê lâng kiò-chòe [Lia̍p-sat-lō͘], phòa-pīⁿ, tòa tī [Pek-tāi-nî], chiū-sī [Má-lī-a] kap i ê a-chí [Má-tāi] tòa ê chng-siā. 2 Chit-ê [Má-lī-a] bat ēng phang-iû boah Chú, koh ēng thâu-mn̂g chhit I ê kha; i ê sió-tī [Lia̍p-sat-lō͘] phòa-pīⁿ. 3 Chit nn̄g ê chí-bē chhe lâng khì kìⁿ Iâ-so͘, kóng, “Chú ah, lí só͘ thiàⁿ ê lâng teh phòa-pīⁿ.” 4 Iâ-so͘ thiaⁿ-tio̍h chiū kóng, “Chit-ê pīⁿ bōe tì-kàu sí; sī beh hián-bêng Siōng-tè ê êng-kng, thang hō͘ Siōng-tè ê Kiáⁿ tùi chit hāng tāi-chì tit-tio̍h êng-kng.” 5 Iâ-so͘ chin thiàⁿ [Má-tāi] kap i ê sió-bē, í-ki̍p [Lia̍p-sat-lō͘]. 6 I thiaⁿ-tio̍h [Lia̍p-sat-lō͘] phòa-pīⁿ, kè-sio̍k tī hit só͘-chāi tòa nn̄g ji̍t. 7 Āu-lâi, I kā bûn-tô͘ kóng, “Lán koh lâi-khì [Iû-thài].” 8 Bûn-tô͘ ìn kóng, “Lia̍p-pí, [Iû-thài]-lâng tú-á chiah teh chhē ki-hōe beh ēng chio̍h-thâu kā lí tìm, lí kiám beh koh khì hia?” 9 Iâ-so͘ kóng, “Ji̍t-sî kiám m̄-sī ū cha̍p-jī tiám-cheng? Lâng nā tī ji̍t-sî kiâⁿ chiū bōe poa̍h-tó, in-ūi ū khòaⁿ-kìⁿ chit sè-kài ê kng. 10 Lâng nā tī àm-sî kiâⁿ ōe poa̍h-tó, in-ūi i bô kng.” 11 Iâ-so͘ kóng chiah-ê ōe liáu, koh kā in kóng, “Lán ê pêng-iú [Lia̍p-sat-lō͘] khùn-khì lah, góa beh lâi-khì kā i kiò chhíⁿ.” 12 Bûn-tô͘ kóng, “Chú ah, i nā-sī khùn-khì chiū ōe hó khí-lâi.” 13 Iâ-so͘ sī kóng [Lia̍p-sat-lō͘] í-keng sí-khì, m̄-kú in siūⁿ-chòe i chin-chiàⁿ teh khùn. 14 Só͘-í Iâ-so͘ bêng-bêng kā in kóng, “[Lia̍p-sat-lō͘] sí-khì lah. 15 Ūi-tio̍h lín ê iân-kò͘, kai-chài góa bô tī-hia, sī beh hō͘ lín sìn góa. Taⁿ, lán lâi-khì i hia.” 16 Hit-ê kiò-chòe [Siang-siⁿ-á] ê [To-má] kā bûn-tô͘-phōaⁿ kóng, “Lán mā lâi-khì kap I chòe-hé sí!” 17 Iâ-so͘ kàu [Pek-tāi-nî] ê sî chiah chai [Lia̍p-sat-lō͘] í-keng chòng tī bōng-lāi sì ji̍t. 18 [Pek-tāi-nî] lī [Iâ-lō͘-sat-léng] chha-put-to saⁿ kong-lí; 19 ū chin chōe [Iû-thài]-lâng in-ūi in sió-tī ê tāi-chì lâi an-ùi [Má-tāi] kap [Má-lī-a]. 20 [Má-tāi] thiaⁿ-tio̍h Iâ-so͘ kàu-ūi, chiū chhut-khì kā I gêng-chiap; [Má-lī-a] iû-goân chē tī chhù-lāi. 21 [Má-tāi] kā Iâ-so͘ kóng, “Chú ah, lí nā ū tī chia, góa ê sió-tī chiū bōe sí. 22 Sīm-chì hiān-chāi, góa chai lí bô-lūn tùi Siōng-tè kiû sím-mi̍h, I lóng ōe hō͘ lí!” 23 Iâ-so͘ kā i kóng, “Lí ê sió-tī ōe-koh oa̍h khí-lâi.” 24 Má-tāi ìn kóng, “Góa chai tī Boa̍t-ji̍t koh-oa̍h ê sî, i ōe koh-oa̍h.” 25 Iâ-so͘ kā i kóng, “Góa sī koh-oa̍h, sī oa̍h-miā; sìn góa ê lâng sui-jiân sí, iáu-kú ōe oa̍h. 26 Só͘-ū hiān-chāi teh oa̍h lâi sìn góa ê lâng éng-oán bōe sí. Lí ū sìn bô?” 27 [Má-tāi] ìn kóng, “Chú ah, góa sìn lí sī Ki-tok, sī hit-ūi teh-beh lâi sè-kan ê Siōng-tè ê Kiáⁿ.” 28 [Má-tāi] kóng chiah-ê ōe liáu-āu chiū tńg-khì, kiò i ê sió-bē [Má-lī-a] lâi, su-hā kā i kóng, “Lāu-su lâi lah, I teh kiò lí.” 29 [Má-lī-a] chi̍t-ē thiaⁿ-tio̍h, kóaⁿ-kín khí-lâi, khì Iâ-so͘ hia. 30 Hit sî Iâ-so͘ iáu-bē kàu chng-lāi, iáu tī [Má-tāi] khì gêng-chiap I ê só͘-chāi. 31 Tī chhù-lāi teh an-ùi [Má-lī-a] ê [Iû-thài]-lâng, khòaⁿ-tio̍h [Má-lī-a] kóaⁿ-kín peh khí-lâi koh cháu chhut-khì, chiū tè i khì, siūⁿ-kóng i beh khì bōng hia khàu. 32 [Má-lī-a] kàu Iâ-so͘ hia, khòaⁿ-tio̍h I, chiū phak lo̍h-khì I ê kha-chêng, tùi I kóng, “Chú ah, lí nā ū tī chia, góa ê sió-tī chiū bōe sí.” 33 Iâ-so͘ khòaⁿ-tio̍h i teh khàu, koh khòaⁿ-tio̍h kap i chòe-hé lâi hiah-ê [Iû-thài]-lâng mā teh khàu, sim chin pi-siong kek-tōng, 34 mn̄g in kóng, “Lín kā i chòng tī tó-ūi?” In ìn kóng, “Chú ah, lâi-khì khòaⁿ.” 35 Iâ-so͘ lâu ba̍k-sái. 36 Iû-thài-lâng kóng, “Lí khòaⁿ, I hiah-ni̍h thiàⁿ i!” 37 In tiong-kan ū chi̍t-kóa lâng kóng, “I bat hō͘ sit-bêng ê lâng ōe khòaⁿ-kìⁿ, kiám bōe-tàng hō͘ chit-ê lâng bô sí?” 38 Iâ-so͘ iū-koh chin pi-siong, lâi-kàu bōng hia; hit-ê bōng sī chi̍t ê tōng-hia̍t, ū chi̍t tè chio̍h that-teh. 39 Iâ-so͘ bēng-lēng, kóng, “Kā hit tè chio̍h sóa-khui!” Sí-khì hit-ê lâng ê a-chí [Má-tāi] kā Iâ-so͘ kóng, “Chú ah, i sí sì ji̍t lah, í-keng chhàu à.” 40 Iâ-so͘ kā i kóng, “Góa kiám bô kā lí kóng, lí nā sìn, ōe khòaⁿ-kìⁿ Siōng-tè ê êng-kng?” 41 In chiū chiong hit tè chio̍h sóa-khui. Iâ-so͘ gia̍h-ba̍k ǹg thiⁿ kóng, “Pē ah, góa kám-siā lí, in-ūi lí í-keng ū thiaⁿ góa ê kî-tó. 42 Góa chai lí put-sî lóng ū teh thiaⁿ góa ê kî-tó, m̄-kú góa án-ni kóng sī ūi-tio̍h khiā tī chiu-ûi ê kûn-chiòng, thang hō͘ in sìn lí ū chhe góa.” 43 Kóng soah, Iâ-so͘ tōa-siaⁿ hoah, “[Lia̍p-sat-lō͘], chhut-lâi!” 44 Hit-ê sí-khì ê lâng chiū chhut-lâi; i ê kha-chhiú chat pò͘, bīn ēng kun-á pau-teh. Iâ-so͘ kā in kóng, “Kā i tháu-khui, hō͘ i kiâⁿ!” 45 Lâi thàm [Má-lī-a] ê [Iû-thài]-lâng, ū chin chōe lâng khòaⁿ-tio̍h Iâ-so͘ ê só͘-chòe chiū sìn I. 46 Ū chi̍t-kóa lâng khì chhē [Hoat-lī-sài]-phài ê lâng, kā in pò-kò Iâ-so͘ só͘ chòe ê tāi-chì. 47 In-ūi án-ni, hiah-ê chè-si-tiúⁿ kap [Hoat-lī-sài]-lâng tiàu-khui gī-hōe, kóng, “Chit-ê lâng kiâⁿ chiah-ni̍h chōe sîn-jiah, lán beh án-chóaⁿ tùi-hù? 48 Lán nā pàng I kè-sio̍k án-ni chòe, tāi-ke lóng ōe khì sìn I, [Lô-má]-lâng ōe lâi húi-hoāi lán ê Sèng-tiān, koh húi-bia̍t lán ê bîn-cho̍k.” 49 Kî-tiong ū chi̍t ê lâng kiò-chòe [Kai-a-hoat], sī hit nî ê tōa-chè-si, i kā in kóng, “Lín m̄-bat pòaⁿ-hāng. 50 Lín bōe-hiáu siūⁿ, lêng-khó hō͘ chi̍t ê lâng thòe chèng-lâng sí, chiah-bián hō͘ choân bîn-cho̍k bia̍t-bông, án-ni tùi lín sī khah hó.” 51 I án-ni kóng m̄-sī ka-kī ê ì-sù, sī i chòe hit nî ê tōa-chè-si teh ū-giân Iâ-so͘ teh-beh ūi-tio̍h chit-ê bîn-cho̍k lâi sí; 52 m̄-nā ūi-tio̍h chit-ê bîn-cho̍k, mā beh chiong Siōng-tè sì-sòaⁿ ê kiáⁿ-jî chū-chi̍p chòe chi̍t-ê. 53 Tùi hit ji̍t khí, [Iû-thài]-kàu ê léng-siù kè-bô͘ beh thâi Iâ-so͘. 54 In-ūi án-ni, Iâ-so͘ bô koh kong-jiân tī [Iû-thài]-lâng ê tiong-kan chhut-ji̍p; I lī-khui hia, khì óa-kūn khòng-iá ê só͘-chāi, kàu chi̍t ê kiò-chòe [Í-hoat-liân] ê siâⁿ, kap I ê bûn-tô͘ tī hia tòa. 55 [Iû-thài]-lâng ê Pôaⁿ-kè-choeh teh-beh kàu. Choeh-kî chêng, ū chin chōe lâng tùi hiong-chhoan lâi-kàu [Iâ-lō͘-sat-léng] beh siú kiat-chēng-lé. 56 In teh chhē Iâ-so͘, khiā tī Sèng-tiān lāi hō͘-siōng mn̄g kóng, “Lín siūⁿ án-chóaⁿ? I it-tēng bōe lâi kè-choeh hò͘ⁿ?” 57 In-ūi hiah-ê chè-si-tiúⁿ kap [Hoat-lī-sài]-lâng ū hoat bēng-lēng, nā ū lâng chai Iâ-so͘ tī tó-ūi, tio̍h lâi pò-kò, hō͘ in thang khì kā I lia̍h.

Iok-hān 12

1 Pôaⁿ-kè-choeh ê la̍k ji̍t chêng, Iâ-so͘ khì [Pek-tāi-nî], chiū-sī Iâ-so͘ hō͘ i tùi sí koh-oa̍h hit-ê [Lia̍p-sat-lō͘] tòa ê só͘-chāi. 2 Ū lâng tī hia ūi-tio̍h Iâ-so͘ chún-pī àm-tǹg. [Má-tāi] teh chiau-thāi; [Lia̍p-sat-lō͘] sī kap Iâ-so͘ kâng toh ê chi̍t ê. 3 [Má-lī-a] the̍h chi̍t koàn sûn ê ko-kùi ná-ta̍t phang-iû lâi boah Iâ-so͘ ê kha, koh ēng ka-kī ê thâu-mn̂g kā I chhit; iû ê phang-bī hō͘ kui chhù-lāi phang-kòng-kòng. 4 Iâ-so͘ ê chi̍t ê bûn-tô͘, chiū-sī āu-lâi chhut-bōe Iâ-so͘ hit-ê [Í-su-ka-lio̍k] ê [Iû-tāi], kóng, 5 “Ná m̄ the̍h chit-ê phang-iû khì bōe saⁿ-pah ê gûn-á lâi chín-chè sàn-chhiah-lâng?” 6 I án-ni kóng m̄-sī i koan-sim sàn-chhiah-lâng, sī in-ūi i sī chha̍t, koh siông-siông thau-the̍h i teh koán-lí ê kong-khóaⁿ. 7 Iâ-so͘ kóng, “Mài kā i tòng! Chit-ê phang-iû sī i ūi-tio̍h góa bâi-chòng ê ji̍t chún-pī ê. 8 Put-sî ū sàn-chhiah-lâng kap lín chòe-hé, put-kò góa bô put-sî kap lín chòe-hé.” 9 Ū chi̍t tōa-kûn [Iû-thài]-lâng thiaⁿ-tio̍h Iâ-so͘ tī [Pek-tāi-nî] chiū khì hia; in m̄-nā ūi-tio̍h beh khòaⁿ Iâ-so͘, mā siūⁿ-beh khòaⁿ Iâ-so͘ hō͘ i tùi sí koh-oa̍h hit-ê [Lia̍p-sat-lō͘]. 10 Só͘-í, chiah-ê chè-si-tiúⁿ kè-bô͘ liân [Lia̍p-sat-lō͘] ia̍h beh kā i thâi, 11 in-ūi ū chin chōe [Iû-thài]-lâng ūi-tio̍h [Lia̍p-sat-lō͘] ê iân-kò͘ lī-khui in khì sìn Iâ-so͘. 12 Keh-ji̍t, lâi kè-choeh ê chi̍t tōa-kûn lâng thiaⁿ-tio̍h Iâ-so͘ beh lâi [Iâ-lō͘-sat-léng], 13 chiū gia̍h chang-chhiū-ki chhut-khì gêng-chiap, hoah kóng: Hô-sán-ná! Hōng Chú ê miâ lâi Hit-ūi eng-kai siū chheng-chàn! Í-sek-lia̍t ê Ông eng-kai siū chheng-chàn! 14 Iâ-so͘ khòaⁿ-tio̍h chi̍t chiah lû-á-kiáⁿ, chiū khan lâi khiâ. Chiàu Sèng-keng só͘ kì-chài: 15 Sek-an ê hū-jîn-lâng ah, m̄-bián kiaⁿ! Khòaⁿ, lín ê Ông khiâ lû-á-kiáⁿ teh lâi lah! 16 I ê bûn-tô͘ goân-lâi bōe liáu-kái chit hāng tāi-chì, m̄-kú Iâ-so͘ tit-tio̍h êng-kng ê sî, in chiah siūⁿ-tio̍h Sèng-keng só͘ kì-chài chit hāng tāi-chì sī teh chí Iâ-so͘; tāi-chì mā chiàu án-ni hoat-seng tī I sin-chiūⁿ. 17 Iâ-so͘ kiò [Lia̍p-sat-lō͘] chhut bōng hō͘ i tùi sí koh-oa̍h hit sî, kap Iâ-so͘ chòe-hé tī hia hit kûn lâng ū kè-sio̍k teh chòe kiàn-chèng. 18 Chèng-lâng mā chhut-khì gêng-chiap Iâ-so͘, in-ūi in ū thiaⁿ-tio̍h I kiâⁿ chit-ê sîn-jiah. 19 [Hoat-lī-sài]-phài ê lâng chiū hō͘-siōng kóng, “Lán khah chòe mā bô chhái-kang. Lín khòaⁿ, choân sè-kài lóng tè I khì lah!” 20 Choeh-kî tiong khì [Iâ-lō͘-sat-léng] tiâu-pài ê ū kúi-nā ê [Hi-la̍h]-lâng. 21 Chiah-ê lâng lâi kìⁿ [Ka-lī-lī] ê [Pek-sài-tāi]-lâng [Hui-le̍k], kā i kóng, “Sian-siⁿ, goán ài kìⁿ Iâ-so͘.” 22 [Hui-le̍k] khì kā [An-tek-lia̍t] kóng, [An-tek-lia̍t] kap [Hui-le̍k] chiū chòe-hé khì kā Iâ-so͘ kóng. 23 Iâ-so͘ ìn kóng, “Jîn-chú tit-tio̍h êng-kng ê sî kàu lah. 24 Góa si̍t-si̍t chāi-chāi kā lín kóng, chi̍t lia̍p be̍h-á nā bô lo̍h tōe sí, iû-goân sī chi̍t lia̍p nā-tiāⁿ; nā sí, chiū kiat chin chōe be̍h-á. 25 Thiàⁿ-sioh ka-kī ê sìⁿ-miā ê, ōe sòng-sit sìⁿ-miā; tī chit sè-kan kam-goān hi-seng ka-kī ê sìⁿ-miā ê, ōe pó-siú sìⁿ-miā ti̍t-kàu éng-oán-oa̍h. 26 Lâng nā beh ho̍k-sāi góa, tio̍h tè góa; góa tī tó-ūi, ho̍k-sāi góa ê lâng mā ōe tī hia. Lâng nā ho̍k-sāi góa, góa ê Pē ōe kā i chun-tiōng.” 27 “Chit-chūn, góa ê sim loān chhau-chhau, góa beh kóng sím-mi̍h? Kiám beh kóng ‘Pē ah, kiù góa thoat-chhut chit-ê sî-khek’? M̄-sī. Góa sī ūi-tio̍h chit-ê sî-khek chiah lâi. 28 Pē ah, goān lí êng-iāu lí ê miâ.” Jiân-āu ū siaⁿ tùi thiⁿ-téng lâi, kóng, “Góa í-keng ū êng-iāu góa ê miâ, beh koh-chài êng-iāu.” 29 Khiā tī hia ê kûn-chiòng thiaⁿ-tio̍h chit-ê siaⁿ, siūⁿ-kóng “Lûi teh tân”; mā ū lâng kóng “Thiⁿ-sài ū kā I kóng-ōe.” 30 Iâ-so͘ ìn kóng, “Chit-ê siaⁿ m̄-sī ūi-tio̍h góa, sī beh hō͘ lín thiaⁿ ê.” 31 Hiān-chāi sī chit-ê sè-kan siū sím-phòaⁿ ê sî; hiān-chāi chit sè-kan ê thóng-tī-chiá teh-beh siū thui-hoan. 32 Góa tùi tōe-chiūⁿ siū kú-khí ê sî, ōe khip-ín bān-bîn kui-óa góa.” 33 Iâ-so͘ án-ni kóng sī piáu-bêng I teh-beh án-chóaⁿ sí. 34 Kûn-chiòng ìn I kóng, “Goán thiaⁿ-tio̍h Lu̍t-hoat ū kì-chài, Ki-tok éng-oán chûn-chāi. Lí ná-ōe kóng Jîn-chú tio̍h siū kú-khí? Chit-ê Jîn-chú sī sím-mi̍h lâng?” 35 Iâ-so͘ tùi in kóng, “Kng iáu ōe tī lín tiong-kan chi̍t-sî-á kú. Lín tio̍h thàn ū kng ê sî kè-sio̍k kiâⁿ, chiah bōe hō͘ o͘-àm jia-khàm. Tī o͘-àm tiong teh kiâⁿ ê lâng m̄-chai ōe kiâⁿ khì tó-ūi. 36 Thàn ū kng ê sî, lín tio̍h sìn kng, hō͘ lín thang chiâⁿ-chòe kng-bêng ê lâng.” Chiah-ê ōe kóng soah, Iâ-so͘ lī-khui in, bih khí-lâi. 37 Sui-jiân Iâ-so͘ tī in bīn-chêng ū kiâⁿ hiah-chōe sîn-jiah, in iáu m̄-sìn I. 38 Che sī beh èng-giām sian-ti [Í-sài-a] ê ōe, kóng: Chú ah, sím-mi̍h lâng ū sìn goán só͘ thoân ê sìn-sit? Chú ê koân-lêng ū tùi sím-mi̍h lâng hián-sī? 39 In bōe-tàng siong-sìn ê goân-in, [Í-sài-a] ū koh án-ni kóng: 40 Siōng-tè hō͘ in ê ba̍k-chiu bōe khòaⁿ-kìⁿ, hō͘ in ê sim ngī, chiah-bián in ê ba̍k-chiu khòaⁿ-kìⁿ, in ê sim hiáu-ngō͘, lâi kui-ǹg góa, Góa chiū kā in i-hó. 41 [Í-sài-a] án-ni kóng, sī in-ūi i ū khòaⁿ-kìⁿ Iâ-so͘ ê êng-iāu, chiah kóng koan-hē I ê tāi-chì. 42 Sui-jiân sī án-ni, iáu-kú ū chin chōe [Iû-thài]-lâng ê léng-siù sìn Iâ-so͘; put-kò in-ūi in kiaⁿ [Hoat-lī-sài]-lâng, m̄-káⁿ kong-khai sêng-jīn, chiah-bián siū kóaⁿ-chhut hōe-tn̂g. 43 In ài lâng ê chheng-chàn iâⁿ-kè Siōng-tè ê chheng-chàn. 44 Iâ-so͘ tōa-siaⁿ hoah, “Sìn góa ê lâng m̄-sī sìn góa, sī sìn chhe góa lâi Hit-ūi. 45 Khòaⁿ-kìⁿ góa chiū-sī khòaⁿ-kìⁿ chhe góa lâi Hit-ūi. 46 Góa choh kng lâi-kàu chit sè-kan, sī beh hō͘ sìn góa ê lâng lóng bōe tiàm tī o͘-àm. 47 Thiaⁿ góa ê ōe bô chun-siú ê lâng, góa bōe kā i sím-phòaⁿ. In-ūi góa m̄-sī lâi beh sím-phòaⁿ sè-kan-lâng, sī beh chín-kiù sè-kan-lâng. 48 Kū-choa̍t góa, m̄ chiap-siū góa ê ōe ê lâng, ū chi̍t ê sím-phòaⁿ-chiá ōe kā i sím-phòaⁿ. Tī Boa̍t-ji̍t, góa só͘ kóng ê ōe ōe kā i sím-phòaⁿ. 49 In-ūi góa m̄-sī chiàu ka-kī ê ì-sù kóng, sī chiàu chhe góa lâi ê Pē hō͘ góa ê bēng-lēng kóng sím-mi̍h, thoân sím-mi̍h. 50 Góa chai I ê bēng-lēng ōe hō͘ lâng tit-tio̍h éng-oán ê oa̍h-miā. Só͘-í, góa kóng ê lóng sī chiàu Pē kā góa kóng ê.”

Iok-hān 13

1 Pôaⁿ-kè-choeh chêng, Iâ-so͘ chai I lī-khui chit sè-kan tńg-khì Pē hia ê sî-kan í-keng kàu. I it-ti̍t ū thiàⁿ chit sè-kan sio̍k I ka-kī ê lâng, chiū thiàⁿ in kàu-tóe. 2 Iâ-so͘ kap I ê bûn-tô͘ teh chia̍h àm-tǹg ê sî, Mô͘-kúi í-keng chiong chhut-bōe Iâ-so͘ ê ì-sù hē tī [Í-su-ka-lio̍k] [Se-bûn] ê kiáⁿ [Iû-tāi] ê sim. 3 Iâ-so͘ chai Pē í-keng chiong it-chhè kau tī I ê chhiú, mā chai ka-kī tùi Siōng-tè hia lâi, beh koh tńg-khì Siōng-tè hia, 4 chiū lī-khui toh, thǹg gōa-saⁿ, the̍h chi̍t tiâu kun-á hâ tī io-ni̍h, 5 jiân-āu chiong chúi tò tī chúi-phûn, kā bûn-tô͘ sóe-kha, koh ēng hâ tī io-ni̍h ê kun-á kā in chhit. 6 I sóe kàu [Se-bûn] [Pí-tek] hia, [Pí-tek] kā I kóng, “Chú ah, lí beh kā góa sóe-kha ò͘?” 7 Iâ-so͘ ìn kóng, “Góa teh chòe ê, lí hiān-chāi m̄-chai, āu-lâi chiū ōe bêng-pe̍k.” 8 [Pí-tek] kā I kóng, “Lí choa̍t-tùi bōe ēng-tit kā góa sóe-kha.” Iâ-so͘ ìn kóng, “Góa nā bô kā lí sóe-kha, lí chiū kap góa bô koan-hē.” 9 [Se-bûn] [Pí-tek] kā I kóng, “Chú ah, m̄-nā kha, liân chhiú kap thâu-khak mā kā góa sóe.” 10 Iâ-so͘ kā i kóng, “Lâng seng-khu sóe liáu, kui seng-khu lóng chheng-khì; kan-ta sóe-kha chiū hó. Lín í-keng chheng-khì, m̄-kú m̄-sī ta̍k ê lóng án-ni.” 11 In-ūi Iâ-so͘ chai sím-mi̍h lâng teh-beh kā I chhut-bōe, só͘-í chiah kóng “Lín m̄-sī ta̍k ê lóng chheng-khì.” 12 Iâ-so͘ kā in sóe-kha liáu-āu, chhēng gōa-saⁿ, tò tńg-khì I ê chē-ūi. I mn̄g in kóng, “Lín kiám ū bêng-pe̍k góa tùi lín só͘ chòe ê? 13 Lín chheng-ho͘ góa ‘Lāu-su’, mā chheng-ho͘ góa ‘Chú’; lín án-ni chheng-ho͘ chin tio̍h, in-ūi góa chiū-sī. 14 Góa choh Chú, choh Lāu-su, to kā lín sóe-kha, lín mā tio̍h hō͘-siōng sóe-kha. 15 Góa ū lâu bô͘-iūⁿ hō͘ lín, sī beh hō͘ lín thang chiàu góa tùi lín só͘ chòe ê khì chòe. 16 Góa si̍t-si̍t chāi-chāi kā lín kóng, lô͘-po̍k bōe pí i ê chú-lâng khah tōa; hōng chhe-phài ê mā bōe pí chhe-phài i ê khah tōa. 17 Kì-jiân lín bêng-pe̍k chit-ê sū, nā khì si̍t-hêng chiū chin ū hok-khì.” 18 “Góa m̄-sī chí lín choân-thé teh kóng; góa jīn-bat góa só͘ kéng-soán ê. Put-kò che sī beh hō͘ Sèng-keng só͘ kóng ‘Kap góa chòe-hé chia̍h-pn̄g ê lâng kèng-jiân pōe-ge̍k góa’ chit kù ōe ōe èng-giām. 19 Taⁿ tāi-chì iáu-bē hoat-seng, góa seng kā lín kóng, hō͘ lín tī tāi-chì hoat-seng ê sî thang sìn góa chiū-sī hit-ūi ‘Chū-iú-éng-iú’ ê. 20 Góa si̍t-si̍t chāi-chāi kā lín kóng: chiap-la̍p góa só͘ chhe ê chiū-sī chiap-la̍p góa; chiap-la̍p góa ê chiū-sī chiap-la̍p chhe góa Hit-ūi.” 21 Iâ-so͘ kóng chiah-ê ōe liáu-āu, sim-lāi hui-siông kek-tōng, chiū bêng-bêng kóng, “Góa si̍t-si̍t chāi-chāi kā lín kóng, lín tiong-kan ū chi̍t ê lâng beh kā góa chhut-bōe” 22 Bûn-tô͘ lí-khòaⁿ-góa góa-khòaⁿ-lí, m̄-chai I sī teh kóng sím-mi̍h lâng. 23 Bûn-tô͘ tiong-kan ū chi̍t ê sī Iâ-so͘ só͘-thiàⁿ-ê, i chē tī Iâ-so͘ ê sin-piⁿ. 24 [Se-bûn] [Pí-tek] chiū ǹg hit-ê bûn-tô͘ tìm-thâu piáu-sī, kiò i mn̄g-khòaⁿ Iâ-so͘ sī teh kóng sím-mi̍h lâng? 25 Hit-ê bûn-tô͘ chiū the-óa Iâ-so͘, kā I mn̄g, “Chú ah, sī sím-mi̍h lâng?” 26 Iâ-so͘ ìn kóng, “Góa beh ùn chit tè piáⁿ the̍h hō͘ chi̍t ê lâng, hit-ê lâng chiū-sī.” I chiū the̍h hit tè piáⁿ ùn chiùⁿ, jiân-āu the̍h hō͘ [Í-su-ka-lio̍k] [Se-bûn] ê kiáⁿ [Iû-tāi]. 27 I chi̍t-ē chiap-tio̍h hit tè piáⁿ, Sat-tàn chiū ji̍p i ê sim. Iâ-so͘ kā [Iû-tāi] kóng, “Lí siūⁿ-beh chòe ê, kóaⁿ-kín khì chòe!” 28 Tâng chē-toh ê lâng bô chi̍t ê chai sī án-chóaⁿ Iâ-so͘ kā i kóng chit kù ōe. 29 In-ūi [Iû-tāi] sī koán-chîⁿ-ê, ū lâng siūⁿ-chòe Iâ-so͘ sī teh kiò i khì bóe siú-choeh beh ēng ê mi̍h, á-sī kiò i khì chín-chè sàn-chhiah-lâng. 30 [Iû-tāi] chiap hit tè piáⁿ liáu-āu sûi-sî chhut-khì. Hit sî sī àm-sî. 31 [Iû-tāi] chhut-khì liáu-āu, Iâ-so͘ kóng, “Taⁿ Jîn-chú í-keng tit-tio̍h êng-kng; Siōng-tè mā thong-kè Jîn-chú tit-tio̍h êng-kng. 32 Kì-jiân Siōng-tè thong-kè Jîn-chú tit-tio̍h êng-kng, Siōng-tè ka-kī mā beh êng-iāu Jîn-chú, koh beh sûi-sî hō͘ I tit-tio̍h êng-kng. 33 Sòe-kiáⁿ, góa kap lín chòe-hé chhun bô jōa kú lah. Lín ōe chhē góa, chiàu góa bat kā [Iû-thài]-lâng kóng, taⁿ góa kā lín kóng, ‘Góa beh khì ê só͘-chāi, lín bōe-tàng khì.’ 34 Góa hō͘ lín chi̍t tiâu sin ê kài-bēng: Lín tio̍h saⁿ-thiàⁿ; chiàu góa thiàⁿ lín án-ni, lín mā tio̍h saⁿ-thiàⁿ. 35 Lín nā saⁿ-thiàⁿ, chèng-lâng ōe tùi che lâi chai lín sī góa ê bûn-tô͘.” 36 [Se-bûn] [Pí-tek] mn̄g Iâ-so͘, “Chú ah, lí beh khì tó-ūi?” Iâ-so͘ ìn kóng, “Góa beh khì ê só͘-chāi, lí hiān-chāi bōe-tàng tè góa khì, put-kò āu-lâi ōe tè góa khì.” 37 [Pí-tek] kóng, “Chú ah, sī-án-chóaⁿ góa hiān-chāi bōe-tàng tè lí khì? Góa kam-goān ūi-tio̍h lí pàng-sak sìⁿ-miā!” 38 Iâ-so͘ ìn kóng, “Lí beh ūi-tio̍h góa pàng-sak sìⁿ-miā ò͘? Góa si̍t-si̍t chāi-chāi kā lí kóng, koe thî í-chêng, lí ōe saⁿ pái m̄-jīn góa.”

Iok-hān 14

1 Iâ-so͘ koh kóng, “Lín ê sim m̄-thang tio̍h-kip put-an. Tio̍h sìn Siōng-tè, mā tio̍h sìn góa. 2 Tī góa ê Pē ê chhù ū chin chōe pâng-keng, góa khì sī beh kā lín chún-pī só͘-chāi. Nā m̄-sī án-ni, góa bōe kā lín kóng chit-ê tāi-chì. 3 Góa khì kā lín pī-pān só͘-chāi liáu-āu, ōe-koh lâi chhōa lín khì góa hia; góa tī hia, lín mā ōe tī hia. 4 Góa beh khì ê hit tiâu lō͘, lín chai.” 5 [To-má] kā Iâ-so͘ kóng, “Chú ah, goán to m̄-chai lí beh khì tó-ūi, beh ná-ōe chai hit tiâu lō͘?” 6 Iâ-so͘ kā i kóng, “Góa chiū-sī tō-lō͘, chin-lí, oa̍h-miā. Nā m̄-sī thong-kè góa, bô-lâng ōe-tàng khì Pē hia. 7 Lín nā bat góa, mā ōe bat góa ê Pē. Tùi taⁿ í-āu, lín bat I, in-ūi lín í-keng ū khòaⁿ-kìⁿ I.” 8 [Hui-le̍k] kā Iâ-so͘ kóng, “Chú ah, chiong Pē hián-sī hō͘ goán khòaⁿ, goán chiū boán-chiok.” 9 Iâ-so͘ ìn kóng, “[Hui-le̍k], góa kap lín chòe-hé chiah-ni̍h kú, lí iáu m̄-bat góa ò͘? Khòaⁿ-kìⁿ góa, chiū-sī khòaⁿ-kìⁿ Pē. Lí ná-ōe kóng ‘Chiong Pē hián-sī hō͘ goán khòaⁿ’? 10 Góa tī Pē lāi-bīn, Pē mā tī góa lāi-bīn, lí bô sìn sī-bô? Góa kā lín kóng ê ōe m̄-sī chhut tī góa ka-kī, sī tiàm tī góa lāi-bīn ê Pē teh chòe I ka-kī ê tāi-chì. 11 Tio̍h sìn góa tī Pē lāi-bīn, Pē tī góa lāi-bīn; nā bô, mā tio̍h in-ūi góa só͘ chòe ê tāi-chì lâi sìn. 12 Góa si̍t-si̍t chāi-chāi kā lín kóng, “Sìn góa ê lâng ōe chòe góa só͘ chòe ê sū, sīm-chì ōe chòe koh-khah tōa ê, in-ūi góa beh khì Pē hia. 13 Lín hōng góa ê miâ bô-lūn kiû sím-mi̍h, góa it-tēng ōe kā lín chòe, thang hō͘ Pē tùi Kiáⁿ tit-tio̍h êng-kng. 14 Lín nā hōng góa ê miâ bô-lūn kiû sím-mi̍h, góa it-tēng ōe kā lín chòe.” 15 “Lín nā thiàⁿ góa, ōe chun-siú góa ê bēng-lēng. 16 Góa beh tùi Pē kiû, I ōe sù lín lēng-gōa chi̍t ūi Ùi-chō͘-chiá, thang kap lín éng-oán tông-chāi. 17 I sī chin-lí ê Sîn, sè-kan-lâng bōe-tàng chiap-siū ê, in-ūi in bô khòaⁿ-kìⁿ I, mā m̄-bat I. M̄-kú lín bat I, in-ūi I kap lín tông-chāi, ōe kè-sio̍k tī lín lāi-bīn. 18 “Góa bōe pàng lín chòe ko͘-jî; góa ōe-koh tò tńg-lâi lín chia. 19 Koh bô jōa kú, sè-kan-lâng bōe-koh khòaⁿ-kìⁿ góa, put-kò lín ōe khòaⁿ-kìⁿ góa, in-ūi góa oa̍h, lín mā ōe oa̍h. 20 Kàu hit ji̍t, lín ōe chai góa tī góa ê Pē lāi-bīn, lín tī góa lāi-bīn, góa mā tī lín lāi-bīn. 21 “Chiap-siū góa ê bēng-lēng koh chun-siú ê chiū-sī thiàⁿ góa ê lâng. Thiàⁿ góa ê, góa ê Pē ōe thiàⁿ i; góa mā ōe thiàⁿ i, koh chiong pún-sin hián-hiān hō͘ i khòaⁿ.” 22 [Iû-tāi] --- m̄-sī hit-ê [Í-su-ka-lio̍k] --- mn̄g Iâ-so͘, “Chú ah, sī-án-chóaⁿ lí beh chiong pún-sin tùi goán hián-hiān, m̄ tùi sè-kan-lâng hián-hiān?” 23 Iâ-so͘ ìn kóng, “Thiàⁿ góa ê lâng ōe chun-siú góa ê ōe. Góa ê Pē ōe thiàⁿ i; góa ê Pē kap góa ōe lâi i hia, kap i chòe-hé tòa. 24 Bô thiàⁿ góa ê lâng bōe chun-siú góa ê ōe. Lín só͘ thiaⁿ-kìⁿ ê m̄-sī góa ka-kī ê ōe, sī chhe góa lâi ê Pē ê ōe. 25 “Góa iáu kap lín chòe-hé ê sî, í-keng ū chiong chiah-ê ōe kā lín kóng. 26 M̄-kú Ùi-chō͘-chiá, chiū-sī Pē ēng góa ê miâ beh chhe-lâi ê Sèng Sîn, ōe chiong it-chhè ê tāi-chì kà-sī lín, mā ōe hō͘ lín kì-tit góa kā lín kóng it-chhè ê ōe. 27 “Góa chiong pêng-an lâu hō͘ lín; góa chiong góa ê pêng-an sù hō͘ lín. Góa sù hō͘ lín ê kap chit sè-kan teh hō͘ lâng ê bô kâng-khoán. Lín ê sim m̄-thang tio̍h-kip put-an, mā m̄-thang kiaⁿ-hiâⁿ. 28 Lín í-keng ū thiaⁿ-kìⁿ góa kā lín kóng, ‘Góa khì, beh koh tńg-lâi lín chia.’ Lín nā ū thiàⁿ góa, ōe in-ūi góa beh khì Pē hia lâi hoaⁿ-hí, in-ūi Pē pí góa khah tōa. 29 Taⁿ tāi-chì iáu-bē hoat-seng, góa seng kā lín kóng, hō͘ lín tī tāi-chì hoat-seng ê sî thang sìn. 30 Góa bōe-koh kap lín kóng chin chōe ōe, in-ūi chit sè-kài ê thóng-tī-chiá teh lâi lah. I choa̍t-tùi bōe-tàng tùi góa chòe sím-mi̍h, 31 m̄-kú beh hō͘ sè-kan-lâng chai góa thiàⁿ Pē, ū chiàu Pē ê bēng-lēng khì chòe. “Khí-lâi, lán lâi-khì.”

Iok-hān 15

1 “Góa sī chin ê phû-tô-chhiū, góa ê Pē sī chèng phû-tô ê. 2 Liân tī góa koh bô kiat ké-chí ê ki, I chiū kā i chián khí-lâi; ū kiat ké-chí ê ki, I chiū kā i siu-chián, hō͘ i kiat khah chōe ké-chí. 3 Góa tùi lín kóng ê ōe í-keng hō͘ lín chheng-khì lah. 4 Lín tio̍h put-sî kap góa kiat-liân, góa chiū put-sî kap lín kiat-liân. Ki bô liân tī phû-tô-chhiū, ka-kī bōe kiat ké-chí; lín nā bô kap góa kiat-liân mā-sī án-ni. 5 “Góa sī phû-tô-chhiū, lín sī ki. Kap góa kiat-liân, góa mā kap i kiat-liân ê, ōe kiat chin chōe ké-chí, in-ūi bô góa, lín bōe-tàng chòe sím-mi̍h. 6 Lâng nā bô kap góa kiat-liân, ōe chhin-chhiūⁿ ta-khì ê ki hō͘ lâng hiat chhut-khì gōa-bīn, khioh kui-tui, hiat-lo̍h hé sio. 7 Lín nā kap góa kiat-liân, góa ê ōe tī lín lāi-bīn, lín bô-lūn ài sím-mi̍h, kiû chiū hō͘ lín si̍t-hiān. 8 Lín nā kiat chin chōe ké-chí, chin-chiàⁿ chòe góa ê bûn-tô͘, góa ê Pē ōe in-ūi án-ni tit-tio̍h êng-kng. 9 Chhin-chhiūⁿ Pē ū thiàⁿ góa, góa mā ū thiàⁿ lín, lín tio̍h put-sî tiàm tī góa ê thiàⁿ lāi-bīn. 10 Lín nā chun-siú góa ê bēng-lēng, lín ōe put-sî tiàm tī góa ê thiàⁿ lāi-bīn, chhin-chhiūⁿ góa ū chun-siú góa ê Pē ê bēng-lēng, put-sî tiàm tī I ê thiàⁿ lāi-bīn. 11 “Góa kā lín kóng chiah-ê tāi-chì, sī beh hō͘ góa ê hoaⁿ-hí tī lín lāi-bīn, koh hō͘ lín ê hoaⁿ-hí móa-móa. 12 Chhin-chhiūⁿ góa ū thiàⁿ lín, lín tio̍h saⁿ-thiàⁿ; che sī góa ê bēng-lēng. 13 Lâng ūi-tio̍h pêng-iú hi-seng sìⁿ-miā, bô pí che khah tōa ê thiàⁿ. 14 Lín nā chun-siú góa ê bēng-lēng chiū-sī góa ê pêng-iú. 15 Góa bô koh kiò lín chòe lô͘-po̍k, in-ūi lô͘-po̍k m̄-chai chú-lâng teh chòe sím-mi̍h; taⁿ góa í-keng kiò lín chòe pêng-iú, in-ūi góa tùi góa ê Pē só͘ thiaⁿ-tio̍h ê lóng ū kā lín kóng lah. 16 M̄-sī lín kéng-soán góa, sī góa kéng-soán lín, koh jīm-bēng lín, hō͘ lín khì kiat ké-chí, hō͘ lín ê ké-chí ōe-tàng éng-oán pó-chûn. Án-ni, lín hōng góa ê miâ bô-lūn tùi Pē kiû sím-mi̍h, I ōe hō͘ lín. 17 Che sī góa hō͘ lín ê bēng-lēng: Lín tio̍h pí-chhú saⁿ-thiàⁿ.” 18 “Sè-kan-lâng nā oàn-hūn lín, tio̍h chai in oàn-hūn lín í-chêng seng oàn-hūn góa lah. 19 Lín nā sio̍k chit sè-kan, sè-kan-lâng ōe khòaⁿ lín chòe ka-kī ê lâng thiàⁿ lín. Put-kò góa í-keng tùi sè-kan kā lín kéng-soán chhut-lâi, lín m̄-sī sio̍k chit sè-kan, in-ūi án-ni sè-kan-lâng oàn-hūn lín. 20 Tio̍h kì-tit góa kā lín kóng ê ōe, ‘Lô͘-po̍k bōe pí chú-lâng khah tōa.’ Sè-kan-lâng nā pek-hāi góa, mā ōe pek-hāi lín; in nā chun-siú góa ê ōe, mā ōe chun-siú lín ê ōe. 21 Put-kò ūi-tio̍h góa ê iân-kò͘, in ōe tùi lín chòe chiah-ê lóng-chóng ê tāi-chì, in-ūi in m̄-bat chhe góa lâi Hit-ūi. 22 Góa nā bô lâi, bô kā in kóng, in chiū bô-chōe; put-kò in hiān-chāi bô hoat-tō͘ ūi-tio̍h ka-kī ê chōe piān-kái. 23 Oàn-hūn góa ê lâng mā oàn-hūn góa ê Pē. 24 Góa tī in tiong-kan nā bô chòe pa̍t-lâng m̄-bat chòe ê tāi-chì, in chiū bô-chōe; hiān-chāi in ū khòaⁿ-tio̍h góa ê só͘-chòe, iáu-kú oàn-hūn góa kap góa ê Pē. 25 Che sī beh si̍t-hiān in ê Lu̍t-hoat só͘ kì-chài ê ōe, ‘In bô-iân bô-kò͘ oàn-hūn góa.’ 26 “Góa beh tùi Pē hia chhe chi̍t ūi Ùi-chō͘-chiá lâi lín chia, I chiū-sī tùi Pē hia lâi hit-ūi khé-sī chin-lí ê Sîn, I lâi ê sî ōe ūi-tio̍h góa choh-chèng. 27 Lín mā tio̍h ūi-tio̍h góa choh-chèng, in-ūi lín tùi khai-sí chiū kap góa chòe-hé.”

Iok-hān 16

1 “Góa í-keng ū chiong chiah-ê tāi-chì kā lín kóng, sī beh hō͘ lín ê sìn-sim bōe iô-tāng. 2 Lâng ōe kā lín kóaⁿ-chhut hōe-tn̂g; sî teh-beh kàu, beh thâi lín ê lâng lóng ōe siūⁿ-kóng in sī teh ho̍k-sāi Siōng-tè. 3 In ōe chòe chiah-ê tāi-chì, sī in-ūi in m̄-bat Pē, mā m̄-bat góa. 4 M̄-kú góa í-keng ū chiong chiah-ê tāi-chì kā lín kóng, sī beh hō͘ lín sî kàu ōe kì-tit góa ū kā lín kóng.” “Góa bô tùi khí-thâu chiū chiong chiah-ê tāi-chì kā lín kóng, sī in-ūi góa it-ti̍t lóng ū kap lín chòe-hé. 5 Hiān-chāi góa teh-beh tńg-khì chhe góa lâi Hit-ūi hia, lín tiong-kan bô-lâng mn̄g góa ‘Lí beh khì tó-ūi?’ 6 Góa chiong chiah-ê tāi-chì kā lín kóng, lín soah móa-sim iu-būn. 7 Put-kò, góa tio̍h chiong si̍t-chêng kā lín kóng: Góa khì, sī tùi lín ū lī-ek, in-ūi góa nā bô khì, Ùi-chō͘-chiá chiū bōe lâi lín chia; góa nā khì, góa ōe chhe I lâi lín chia. 8 I lâi ê sî, ōe kā sè-kan-lâng chí-chèng in tùi chōe, tùi gī, tùi sím-phòaⁿ ū chhò-gō͘. 9 Tùi chōe, in-ūi in m̄-sìn góa; 10 tùi gī, in-ūi góa teh-beh khì Pē hia, lín bōe-koh khòaⁿ-kìⁿ góa; 11 tùi sím-phòaⁿ, in-ūi chit sè-kan ê thóng-tī-chiá í-keng siū sím-phòaⁿ. 12 “Góa iáu ū chin chōe tāi-chì beh kā lín kóng, m̄-kú lín hiān-chāi iáu bōe-tàng liáu-kái. 13 Chin-lí ê Sîn lâi ê sî, I ōe chhōa lín liáu-kái it-chhè ê chin-lí. I bōe chiàu ka-kī ê ì-sù lâi kóng, ōe chiàu só͘ thiaⁿ-kìⁿ ê lâi kóng, mā ōe kā lín thoân-pò teh-beh lâi ê sū. 14 I ōe chiong êng-iāu kui hō͘ góa, in-ūi I ōe chiong góa kau-tài I ê kā lín thoân-pò. 15 Góa ê Pē só͘-ū ê lóng sī góa ê; in-ūi án-ni, góa chiah kóng Sèng Sîn ōe chiong góa kau-tài I ê kā lín thoân-pò.” 16 “Koh bô jōa kú, lín bōe-koh khòaⁿ-kìⁿ góa; iū-koh bô jōa kú, lín ōe-koh khòaⁿ-kìⁿ góa.” 17 Ū kúi-nā ê bûn-tô͘ kóng-lâi kóng-khì, “I kā lán kóng ‘Koh bô jōa kú, lín bōe-koh khòaⁿ-kìⁿ góa; iū-koh bô jōa kú, lín ōe-koh khòaⁿ-kìⁿ góa,’ koh kóng ‘In-ūi góa teh-beh khì Pē hia’, chiah-ê ōe sī sím-mi̍h ì-sù?” 18 Só͘-í in it-ti̍t mn̄g “I só͘ kóng ‘Koh bô jōa kú’ sī sím-mi̍h ì-sù? Lán m̄-chai I teh kóng sím-mi̍h.” 19 Iâ-so͘ chai in ài-beh mn̄g I, chiū kā in kóng, “Lín in-ūi góa kóng ‘Koh bô jōa kú, lín bōe-koh khòaⁿ-kìⁿ góa; iū-koh bô jōa kú, lín ōe-koh khòaⁿ-kìⁿ góa’ teh mn̄g-lâi mn̄g-khì sī-bô? 20 Góa si̍t-si̍t chāi-chāi kā lín kóng, lín ōe thî-khàu ai-siong, m̄-kú sè-kan-lâng ōe hoaⁿ-hí; lín ōe iu-chhiû, m̄-kú lín ê iu-chhiû ōe pìⁿ-chòe hoaⁿ-hí. 21 Sán-hū siⁿ-kiáⁿ ê sî ū iu-chhiû, in-ūi sán-kî í-keng kàu; eⁿ-á chi̍t-ē chhut-sì chiū bô koh kì-tit seng-sán ê thòng-khó͘, i ōe in-ūi eⁿ-á í-keng chhut-sì tī sè-kan lâi hoaⁿ-hí. 22 Chhin-chhiūⁿ án-ni, hiān-chāi lín ū iu-chhiû, put-kò góa ōe-koh kìⁿ-tio̍h lín, lín ê sim chiū ōe hoaⁿ-hí; lín ê hoaⁿ-hí bô-lâng ōe kā lín chhiúⁿ-khì. 23 “Tī hit ji̍t, lín bōe-koh kā góa mn̄g sím-mi̍h. Góa si̍t-si̍t chāi-chāi kā lín kóng: Lín hōng góa ê miâ bô-lūn tùi Pē kiû sím-mi̍h, I ōe sù hō͘ lín. 24 Kàu hiān-chāi, lín iáu m̄-bat hōng góa ê miâ kiû sím-mi̍h. Lín tio̍h kiû, chiū ōe tit-tio̍h, thang hō͘ lín ê hoaⁿ-hí móa-móa.” 25 “Chiah-ê tāi-chì góa í-keng ēng phì-jū kā lín kóng lah. Sî teh-beh kàu, góa bōe koh-chài ēng phì-jū, ōe bêng-bêng tùi lín kóng-khí Pē ê sū. 26 Tī hit ji̍t, lín ōe hōng góa ê miâ kî-kiû; góa pèng bô kā lín kóng góa ōe thòe lín tùi Pē khún-kiû. 27 Pē pún-sin thiàⁿ lín, in-ūi lín ū thiàⁿ góa, koh ū sìn góa sī tùi Siōng-tè hia lâi ê. 28 Góa tùi Pē hia chhut-lâi, lâi-kàu sè-kan; hiān-chāi góa beh lī-khui sè-kan, tńg-khì Pē hia.” 29 I ê bûn-tô͘ kóng, “Hiān-chāi lí bêng-bêng kóng lí bô ēng phì-jū lâi kóng. 30 Taⁿ goán chai lí bû-só͘-put-ti, bô su-iàu lâng kā lí mn̄g; in-ūi án-ni goán sìn lí sī tùi Siōng-tè hia lâi ê.” 31 Iâ-so͘ ìn kóng, “Chit-chūn lín ū sìn bô? 32 Lín khòaⁿ, sî teh-beh kàu, taⁿ í-keng kàu, lín ōe hun-sòaⁿ, ta̍k ê lâng lóng tńg-khì ka-kī ê só͘-chāi, pàng góa ka-kī chi̍t ê. Kî-si̍t góa m̄-sī ka-kī chi̍t ê, in-ūi ū Pē kap góa tông-chāi. 33 Góa ū chiong chiah-ê tāi-chì kā lín kóng, sī beh hō͘ lín tī góa lāi-bīn ū pêng-an. Tī sè-kan lín ū khó͘-lān, m̄-kú tio̍h ióng-kám, góa í-keng khah-iâⁿ sè-kan.”

Iok-hān 17

1 Iâ-so͘ kóng chiah-ê ōe liáu-āu, gia̍h-ba̍k ǹg thiⁿ kóng: “Pē ah, sî í-keng kàu, goān lí êng-iāu lí ê Kiáⁿ, hō͘ Kiáⁿ thang êng-iāu lí. 2 Lí ū chiong thóng-tī bān-bîn ê koân-pèng sù hō͘ Kiáⁿ, hō͘ I thang chiong éng-oán ê oa̍h-miā sù hō͘ it-chhè lí kau-tài I ê lâng. 3 Éng-oán ê oa̍h-miā chiū-sī: Jīn-bat lí sī to̍k-it chin Sîn, koh jīn-bat lí chhe-lâi ê Iâ-so͘ Ki-tok. 4 Góa í-keng tī tōe-chiūⁿ ū oân-sêng lí kau-tài góa ê kang-chok lâi êng-iāu lí. 5 Pē ah, hiān-chāi kiû lí hō͘ góa tī lí bīn-chêng tit-tio̍h êng-kng, chiū-sī chhòng-sè í-chêng góa kap lí í-keng ū ê êng-kng. 6 “Lí tùi chit sè-kan kéng chhut-lâi hō͘ góa ê lâng, góa í-keng ū chiong lí tùi in hián-bêng. In sī lí ê, lí ū chiong in hō͘ góa; in í-keng ū chun-siú lí ê ōe. 7 Hiān-chāi in chai, lí hō͘ góa ê ta̍k hāng lóng sī tùi lí lâi ê. 8 In-ūi góa ū chiong lí hō͘ góa ê sìn-sit hō͘ in; in í-keng chiap-siū koh chin-chiàⁿ chai góa tùi lí hia lâi, koh ū sìn lí chhe góa. 9 “Góa ūi-tio̍h in kî-kiû, m̄-sī ūi-tio̍h sè-kan-lâng, sī ūi-tio̍h lí hō͘ góa ê lâng kî-kiû, in-ūi in sī lí ê. 10 Góa só͘-ū ê it-chhè lóng sī lí ê, lí só͘-ū ê lóng sī góa ê; góa ū thong-kè in tit-tio̍h êng-kng. 11 Góa bô koh tiàm chit sè-kan; put-kò in iáu tiàm tī chit sè-kan. Sèng ê Pē ah, kiû lí ēng lí hō͘ góa ê miâ pó-siú in, thang hō͘ in chiâⁿ-chòe chi̍t-ê, chhin-chhiūⁿ lán sī chi̍t-ê. 12 Góa kap in chòe-hé ê sî, góa ū ēng lí hō͘ góa ê miâ pó-siú in. Góa ū pó-hō͘ in, tû-khì chù-tiāⁿ bia̍t-bông hit-ê lâng, chi̍t ê mā bōe bia̍t-bông, thang hō͘ Sèng-keng ê ōe èng-giām. 13 Hiān-chāi góa teh-beh khì lí hia; góa iáu tī chit sè-kan kóng chiah-ê ōe, sī beh hō͘ in sim-lāi chhiong-móa góa ê hoaⁿ-hí. 14 Góa ū chiong lí ê ōe hō͘ in; sè-kan-lâng oàn-hūn in, in-ūi in m̄-sī sio̍k chit sè-kan, chhin-chhiūⁿ góa m̄-sī sio̍k chit sè-kan. 15 Góa m̄-sī kiû lí chhōa in lī-khui chit sè-kan, sī kiû lí pó-siú in thoat-lī hit-ê Siâ-ok-chiá. 16 In m̄-sī sio̍k chit sè-kan, chhin-chhiūⁿ góa m̄-sī sio̍k chit sè-kan. 17 Kiû lí ēng chin-lí kā in sèng-hòa. Lí ê ōe chiū-sī chin-lí. 18 Chhin-chhiūⁿ lí ū chhe góa ji̍p sè-kan, góa mā chhe in ji̍p sè-kan. 19 Ūi-tio̍h in ê iân-kò͘, góa ka-kī hun-pia̍t chòe sèng hō͘ lí ēng, hō͘ in mā thang thong-kè chin-lí hun-pia̍t chòe sèng hō͘ lí ēng. 20 “Góa m̄-nā ūi-tio̍h lí tùi sè-kan kéng chhut-lâi hō͘ góa hiah-ê lâng kî-kiû, mā ūi-tio̍h tùi in só͘ kóng ê ōe lâi sìn góa hiah-ê lâng kî-kiû, 21 thang hō͘ in lóng-chóng chiâⁿ-chòe chi̍t-ê. Pē ah, chhin-chhiūⁿ lí tī góa lāi-bīn, góa mā tī lí lāi-bīn, kiû lí hō͘ in tī lán lāi-bīn, thang hō͘ sè-kan-lâng sìn sī lí chhe góa lâi. 22 Lí hō͘ góa ê êng-kng, góa mā ū hō͘ in, thang hō͘ in chiâⁿ-chòe chi̍t-ê, chhin-chhiūⁿ lán sī chi̍t-ê. 23 Góa tī in lāi-bīn, lí tī góa lāi-bīn, sī beh hō͘ in oân-choân chiâⁿ-chòe chi̍t-ê, thang hō͘ sè-kan-lâng chai sī lí chhe góa lâi, mā chai lí thiàⁿ in, chhin-chhiūⁿ lí ū thiàⁿ góa. 24 “Pē ah, lí hō͘ góa hiah-ê lâng, góa tī tó-ūi, góa mā ài in kap góa chòe-hé tī hia, thang hō͘ in khòaⁿ-kìⁿ lí sù hō͘ góa ê êng-kng, in-ūi lí tī chhòng-sè í-chêng í-keng thiàⁿ góa. 25 Kong-gī ê Pē ah, sè-kan-lâng m̄-bat lí, m̄-kú góa bat lí; chiah-ê lâng chai lí í-keng ū chhe-khián góa. 26 Góa í-keng ū hō͘ in bat lí ê miâ, mā beh kè-sio̍k hō͘ in bat, thang hō͘ lí tùi góa ê thiàⁿ tī in lāi-bīn, góa mā tī in lāi-bīn.”

Iok-hān 18

1 Iâ-so͘ kî-tó soah chiū kap I ê bûn-tô͘ chhut-khì, kè-khì [Khip-lûn]-khoe ê hit-pêng. Tī hia ū chi̍t khu hn̂g, Iâ-so͘ kap I ê bûn-tô͘ ji̍p-khì. 2 Chhut-bōe Iâ-so͘ ê [Iû-tāi] mā chai hit só͘-chāi, in-ūi Iâ-so͘ kap I ê bûn-tô͘ siông-siông tī hia chū-chi̍p. 3 Só͘-í [Iû-tāi] chiū chhōa chi̍t tūi [Lô-má] peng, í-ki̍p chè-si-tiúⁿ kap [Hoat-lī-sài]-phài ê lâng só͘ phài Sèng-tiān ê kéng-ōe kàu hia, chhiú-ni̍h gia̍h teng, hé-pé, kap bú-khì. 4 Iâ-so͘ chai I só͘ beh tú-tio̍h it-chhè ê tāi-chì, chiū kiâⁿ chìn-chêng, tùi in kóng, “Lín teh chhē sím-mi̍h lâng?” 5 In ìn kóng, “[Ná-sat-le̍k]-lâng Iâ-so͘.” Iâ-so͘ kóng, “Góa chiū-sī.” Chhut-bōe Iâ-so͘ ê [Iû-tāi] mā kap in khiā chòe-hé. 6 Iâ-so͘ chi̍t-ē kā in kóng “Góa chiū-sī”, in chiū tò-thòe, tó lo̍h-khì thô͘-kha. 7 Iâ-so͘ koh chi̍t piàn mn̄g in, “Lín teh chhē sím-mi̍h lâng?” In ìn kóng, “[Ná-sat-le̍k]-lâng Iâ-so͘.” 8 Iâ-so͘ kóng, “Góa í-keng kā lín kóng góa chiū-sī. Lín nā-sī teh chhē góa, chiah-ê lâng tio̍h pàng in khì.” 9 Chit-ê ōe sī beh èng-giām I chêng kóng ê, “Lí só͘ hō͘ góa ê lâng, chi̍t ê to bōe bia̍t-bông.” 10 [Se-bûn] [Pí-tek] ū tòa chi̍t ki to, chiū pu̍ih chhut-lâi, tùi tōa-chè-si ê lô͘-po̍k phut lo̍h-khì, kā i chiàⁿ-pêng ê hī-á siah khí-lâi; hit-ê lô͘-po̍k ê miâ kiò-chòe [Má-le̍k-kó͘]. 11 Iâ-so͘ kā [Pí-tek] kóng, “To siu-ji̍p siù! Pē só͘ hō͘ góa ê khó͘-poe, góa kiám ōe-tàng bô lim?” 12 Āu-lâi, hit tūi Lô-má peng kap tūi-tiúⁿ, í-ki̍p [Iû-thài]-lâng ê kéng-ōe lia̍h Iâ-so͘, kā I pa̍k khí-lâi. 13 In seng kā I ah-khì hō͘ [A-ná], in-ūi [A-ná] sī hit nî ê tōa-chè-si [Kai-a-hoat] ê tiūⁿ-lâng. 14 Chit-ê [Kai-a-hoat] í-chêng bat tùi [Iû-thài]-kàu tong-kio̍k kiàn-gī, kóng “Lêng-khó hō͘ chi̍t ê lâng thòe chèng-lâng sí sī khah hó”. 15 [Se-bûn] [Pí-tek] kap lēng-gōa chi̍t ê bûn-tô͘ tè Iâ-so͘ khì; hit-ê bûn-tô͘ kap tōa-chè-si ū se̍k-sāi, só͘-í tè Iâ-so͘ ji̍p-khì tōa-chè-si kong-koán ê lāi-bīn-tiâⁿ, 16 m̄-kú [Pí-tek] khiā tī mn̂g-kháu. Kap tōa-chè-si se̍k-sāi hit-ê bûn-tô͘ chhut-lâi, kā kò͘-mn̂g ê lú-pī kóng chi̍t-ē, chiū chhōa [Pí-tek] ji̍p-khì. 17 Kò͘-mn̂g ê lú-pī tùi [Pí-tek] kóng, “Lí mā-sī hit-ê lâng ê bûn-tô͘ hò͘ⁿ?” I kóng, “Góa m̄-sī!” 18 In-ūi thiⁿ-khì léng, hiah-ê lô͘-po̍k kap kéng-ōe sio hé-thòaⁿ, khiā-teh hang-sio; [Pí-tek] mā kap in chòe-hé khiā-teh hang. 19 Tōa-chè-si sím-mn̄g Iâ-so͘ koan-hē I ê bûn-tô͘ kap I ê kàu-hùn ê tāi-chì. 20 Iâ-so͘ ìn kóng, “Góa lóng kong-khai tùi sè-kan-lâng kóng-ōe. Góa siông-siông tī hōe-tn̂g kap tī [Iû-thài]-lâng chū-chi̍p ê Sèng-tiān lāi kà-sī lâng; góa m̄-bat pì-bi̍t kóng. 21 Lí sī-án-chóaⁿ sím-mn̄g góa? Lí khì mn̄g bat thiaⁿ góa kóng-ōe ê lâng, khòaⁿ góa tùi in kóng sím-mi̍h, in chai góa só͘ kóng ê.” 22 Iâ-so͘ kóng liáu, khiā tī piⁿ-a ê chi̍t ê kéng-ōe kā I siàn chhùi-phóe, kóng, “Lí káⁿ án-ni ìn tōa-chè-si?” 23 Iâ-so͘ ìn i kóng, “Góa nā kóng m̄-tio̍h, lí tio̍h chí-chhut chhò-gō͘; nā kóng tio̍h, sī-án-chóaⁿ kā góa phah?” 24 Jiân-āu [A-ná] chiong hō͘ lâng pa̍k-teh ê Iâ-so͘ ah-khì hō͘ tōa-chè-si [Kai-a-hoat]. 25 [Se-bûn] [Pí-tek] iáu khiā-teh hang-hé. Ū lâng mn̄g i, “Lí mā-sī hit-ê lâng ê bûn-tô͘ hò͘ⁿ?” [Pí-tek] m̄-jīn, kóng, “Góa m̄-sī!” 26 Tōa-chè-si ê chi̍t ê lô͘-po̍k, sī hī-á hō͘ [Pí-tek] siah khí-lâi hit-ê lâng ê chhin-chiâⁿ, tùi i kóng, “Góa kiám m̄-sī ū khòaⁿ-tio̍h lí kap I tī hn̂g-lāi?” 27 [Pí-tek] koh-chài m̄-jīn; hit sî, koe sûi-sî thî. 28 Thàu-chá, [Iû-thài]-lâng ê léng-siù chiong Iâ-so͘ tùi [Kai-a-hoat] hia ah-khì chóng-tok-hú; in ka-kī bô ji̍p-khì, in-ūi kiaⁿ-liáu bak-tio̍h lâ-sâm soah bōe-tàng chia̍h Pôaⁿ-kè-choeh ê boán-chhan. 29 Só͘-í, [Pí-lia̍p-to] chhut-lâi kìⁿ in, mn̄g in kóng, “Lín kò chit-ê lâng sím-mi̍h chōe?” 30 In ìn kóng, “Chit-ê lâng nā bô chòe pháiⁿ tāi-chì, goán bōe kā I kau hō͘ lí.” 31 [Pí-lia̍p-to] kā in kóng, “Lín ka-kī khì pān, chiàu lín ê Lu̍t-hoat kā I sím-phòaⁿ.” In tùi i kóng, “Goán bô koân kā lâng phòaⁿ sí-hêng.” 32 Che sī beh èng-giām Iâ-so͘ chêng só͘ kóng ê ōe, piáu-sī I teh-beh án-chóaⁿ sí. 33 [Pí-lia̍p-to] koh ji̍p-khì chóng-tok-hú, tiàu Iâ-so͘ lâi, mn̄g I kóng, “Lí sī [Iû-thài]-lâng ê Ông sī-bô?” 34 Iâ-so͘ ìn kóng, “Lí án-ni mn̄g góa sī lí ka-kī ê ì-sù, á-sī thiaⁿ-tio̍h pa̍t-lâng kā lí kóng góa ê tāi-chì?” 35 [Pí-lia̍p-to] kóng, “Góa kiám sī [Iû-thài]-lâng? Lí pún-cho̍k ê lâng kap chè-si-tiúⁿ chiong lí kau hō͘ góa. Lí ū chòe sím-mi̍h tāi-chì?” 36 Iâ-so͘ ìn kóng, “Góa ê Kok-tō͘ m̄-sī sio̍k chit sè-kan. Góa ê Kok-tō͘ nā sio̍k chit sè-kan, góa ê pō͘-hā ōe ūi góa cheng-chiàn, bián tì-kàu góa siū chhut-bōe hō͘ [Iû-thài]-lâng ê léng-siù. Kî-si̍t, góa ê Kok-tō͘ m̄-sī sio̍k chit sè-kan.” 37 [Pí-lia̍p-to] chiū mn̄g I kóng, “Án-ni lí sī ông lò͘?” Iâ-so͘ ìn kóng, “Lí kóng góa sī ông. Góa ūi-tio̍h chit-ê chhut-sì, ūi-tio̍h chit-ê lâi sè-kan, sī beh ūi chin-lí choh-chèng. Sio̍k chin-lí ê lâng lóng ōe thiaⁿ góa ê siaⁿ.” 38 [Pí-lia̍p-to] mn̄g I kóng, “Sím-mi̍h sī chin-lí?” Kóng soah, [Pí-lia̍p-to] chiū koh chhut-khì gōa-bīn tùi in kóng, “Góa chhâ bōe chhut I ū sím-mi̍h chōe. 39 Lín ū chi̍t ê koàn-lē, tī Pôaⁿ-kè-choeh góa tio̍h pàng chi̍t ê hoān-lâng hō͘ lín. Án-ni, lín ài góa pàng [Iû-thài]-lâng ê Ông hō͘ lín bô?” 40 In koh tōa-siaⁿ hoah, “M̄-sī chit-ê lâng, sī [Pa-lia̍p-pa]!” [Pa-lia̍p-pa] sī chi̍t ê pō-tōng hūn-chú.

Iok-hān 19

1 Āu-lâi, [Pí-lia̍p-to] kiò lâng chhōa Iâ-so͘ chhut-khì ēng piⁿ kā I phah. 2 Hiah-ê peng ēng chhì-á pīⁿ chi̍t téng ông-koan kā I tì tī thâu-khak téng, koh kā I moa chi̍t niá chí-sek ê tn̂g-phàu. 3 In óa-khì, tùi I kóng, “[Iû-thài]-lâng ê Ông bān-sòe!” jiân-āu kā I siàn chhùi-phóe. 4 [Pí-lia̍p-to] koh chhut-lâi gōa-bīn, tùi hiah-ê [Iû-thài]-lâng kóng, “Lín khòaⁿ, góa chhōa I chhut-lâi hō͘ lín, hō͘ lín chai góa chhâ bōe chhut I ū-chōe.” 5 Iâ-so͘ chiū chhut-lâi, tì chhì-á ê ông-koan, moa chí-sek ê tn̂g-phàu. [Pí-lia̍p-to] kā in kóng, “Khòaⁿ, chit-ê lâng!” 6 Chè-si-tiúⁿ kap Sèng-tiān ê kéng-ōe khòaⁿ-tio̍h Iâ-so͘ chiū tōa-siaⁿ hoah, “Kā tèng si̍p-jī-kè! Kā tèng si̍p-jī-kè!” [Pí-lia̍p-to] tùi in kóng, “Lín ka-kī kā I chhōa-khì tèng si̍p-jī-kè, in-ūi góa chhâ bōe chhut I ū-chōe.” 7 Hiah-ê [Iû-thài]-lâng ìn kóng, “Goán ū Lu̍t-hoat, chiàu Lu̍t-hoat I eng-kai sí, in-ūi I hong ka-kī chòe Siōng-tè ê Kiáⁿ.” 8 [Pí-lia̍p-to] thiaⁿ-tio̍h in án-ni kóng chiū jú kiaⁿ. 9 I koh ji̍p-khì chóng-tok-hú, mn̄g Iâ-so͘ kóng, “Lí tùi tó-ūi lâi?” M̄-kú Iâ-so͘ bô kā i ìn. 10 [Pí-lia̍p-to] tùi I kóng, “Lí m̄ kā góa kóng ò͘? Kiám m̄-chai góa ū koân thang pàng lí, mā ū koân kā lí tèng si̍p-jī-kè?” 11 Iâ-so͘ ìn kóng, “Nā m̄-sī Siōng-tè sù lí koân-pèng, lí bô koân thang pān góa. In-ūi án-ni, kā góa kau hō͘ lí hit-ê lâng, i ê chōe koh-khah tāng.” 12 [Pí-lia̍p-to] thiaⁿ-tio̍h chit-ê ōe jú siūⁿ-beh pàng Iâ-so͘, m̄-kú hiah-ê [Iû-thài]-lâng it-ti̍t hoah kóng, “Lí nā pàng chit-ê lâng, lí chiū m̄-sī [Lô-má]-hông-tè [Khái-sat] ê pêng-iú. Bô-lūn sím-mi̍h lâng hong ka-kī chòe ông chiū-sī pōe-poān [Khái-sat].” 13 [Pí-lia̍p-to] thiaⁿ-tio̍h chiah-ê ōe chiū chhōa Iâ-so͘ chhut-lâi, ka-kī chē tī sím-phòaⁿ-se̍k. Hit-ê só͘-chāi kiò-chòe “Pho͘-chio̍h-tōe,” [Hi-pek-lâi-ōe] kiò-chòe “[Ka-pa-tāi].” 14 Hit ji̍t sī Pôaⁿ-kè-choeh ê chêng-ji̍t, sî-kan chha-put-to tiong-tàu. [Pí-lia̍p-to] tùi hiah-ê [Iû-thài]-lâng kóng, “Khòaⁿ, lín ê ông!” 15 In chiū hoah kóng, “Hō͘ sí, hō͘ sí! Kā tèng si̍p-jī-kè!” [Pí-lia̍p-to] tùi in kóng, “Lín ài góa chiong lín ê ông tèng si̍p-jī-kè ò͘?” Chè-si-tiúⁿ kóng, “[Khái-sat] í-gōa, goán bô ông!” 16 Āu-lâi Pí-lia̍p-to chiong Iâ-so͘ kau hō͘ in khì tèng si̍p-jī-kè. In chiū kā Iâ-so͘ ah-khì. 17 Iâ-so͘ chhut-lâi, pōe ka-kī ê si̍p-jī-kè, lâi-kàu hit-ê kiò-chòe “[Thâu-khak-óaⁿ-niá]” ê só͘-chāi, [Hi-pek-lâi]-ōe kiò-chòe “Kok-kok-tha”. 18 In tī hia kā Iâ-so͘ tèng tī si̍p-jī-kè; í-gōa ū nn̄g ê lâng kap I chòe-hé tèng, chi̍t pêng chi̍t ê, Iâ-so͘ tī tiong-ng. 19 [Pí-lia̍p-to] siá chi̍t tè chōe-chn̄g, tèng tī si̍p-jī-kè téng, téng-bīn siá, “[Ná-sat-le̍k]-lâng Iâ-so͘, [Iû-thài]-lâng ê Ông.” 20 Ū chin chōe [Iû-thài]-lâng tha̍k-tio̍h chōe-chn̄g, in-ūi Iâ-so͘ hō͘ lâng tèng si̍p-jī-kè ê só͘-chāi óa-kūn [Iâ-lō͘-sat-léng], koh chōe-chn̄g sī ēng [Hi-pek-lâi]-bûn, [La-teng]-bûn, [Hi-la̍h]-bûn siá ê. 21 [Iû-thài-kàu] ê chè-si-tiúⁿ tùi [Pí-lia̍p-to] kóng, “M̄-thang siá ‘[Iû-thài]-lâng ê Ông’, tio̍h siá ‘chit-ê lâng ka-kī kóng: Góa sī [Iû-thài]-lâng ê Ông.’ ” 22 [Pí-lia̍p-to] ìn kóng, “Góa só͘ siá ê í-keng siá lah, bô beh kái!” 23 Hiah-ê peng chiong Iâ-so͘ tèng si̍p-jī-kè liáu-āu, the̍h I ê gōa-phàu pun-chòe sì hūn, chi̍t lâng chi̍t hūn. In koh the̍h I ê lāi-saⁿ; chit niá lāi-saⁿ bô kap-chōa, téng-ē chit-chòe chi̍t tè. 24 Só͘-í, in chham-siông kóng, “Chit niá mài thiah-khui, lán lâi thiu-khau khòaⁿ sī siáⁿ-lâng ê.” Che sī beh èng-giām Sèng-keng ê ōe: In pun góa ê gōa-phàu, ūi-tio̍h góa ê saⁿ thiu-khau. Chiah-ê peng tú chiàu án-ni chòe. 25 Iâ-so͘ ê lāu-bú, I ê a-î, [Kek-lô-pa] ê bó͘ [Má-lī-a], kap [Boa̍t-tāi-lia̍p] ê [Má-lī-a] lóng khiā tī Iâ-so͘ ê si̍p-jī-kè piⁿ. 26 Iâ-so͘ khòaⁿ-tio̍h I ê lāu-bú, koh khòaⁿ-tio̍h I só͘ thiàⁿ hit-ê bûn-tô͘ khiā tī piⁿ-a, chiū tùi I ê lāu-bú kóng, “A-bú, khòaⁿ, lí ê kiáⁿ!” 27 Āu-lâi I tùi hit-ê bûn-tô͘ kóng, “Khòaⁿ, lí ê lāu-bú!” Tùi hit sî khí, hit-ê bûn-tô͘ kā Iâ-so͘ ê lāu-bú chiap tńg-khì in tau. 28 Chit-ê sū í-āu, Iâ-so͘ chai it-chhè ê tāi-chì í-keng oân-sêng, ūi-tio̍h beh èng-giām Sèng-keng ê ōe chiū kóng, “Góa chhùi-ta.” 29 Tī hia ū chi̍t ê tóe móa sng-chiú ê pân, in chiū ēng hái-mî chìm chiú, pa̍k tī gû-chhek-chháu bé, tu kàu I ê chhùi. 30 Tam liáu-āu, Iâ-so͘ kóng, “Oân-sêng lah!” Kóng liáu, thâu kau lo̍h-khì, khùi chiū tn̄g. 31 Hit ji̍t sī pài-gō͘, sī Pī-pān-ji̍t. In-ūi keh-ji̍t sī te̍k-pia̍t ê An-hioh-ji̍t, [Iû-thài]-lâng ê léng-siù ūi-tio̍h bô ài tī An-hioh-ji̍t lâu sin-si tī si̍p-jī-kè téng, chiū kiû [Pí-lia̍p-to] kah lâng kòng-tn̄g siū-hêng-chiá ê kha-kut, thang chiong sin-si siu lo̍h-lâi. 32 Hiah-ê peng chiū khì, chiong kap Iâ-so͘ chòe-hé tèng si̍p-jī-kè thâu-chi̍t ê kap lēng-gōa chi̍t-ê ê kha-kut kòng-tn̄g. 33 In lâi-kàu Iâ-so͘ hia, khòaⁿ-tio̍h I í-keng sí, chiū bô kā I ê kha-kut kòng-tn̄g. 34 M̄-kú ū chi̍t ê peng ēng chhiuⁿ chha̍k Iâ-so͘ ê hia̍p-ē, sûi-sî ū huih kap chúi lâu chhut-lâi. 35 Khòaⁿ-tio̍h ê lâng í-keng ū choh-chèng, sī beh hō͘ lín mā sìn; i ê kiàn-chèng sī chin-si̍t, i chai i só͘ kóng ê sī sū-si̍t. 36 Chiah-ê tāi-chì hoat-seng sī beh èng-giām Sèng-keng ê ōe, “I ê kut liân chi̍t ki to bô kòng-tn̄g.” 37 Koh lēng-gōa ū chi̍t kù keng-bûn kóng, “In ōe gióng-bōng in ēng chhiuⁿ kā i chha̍k ê lâng.” 38 Chiah-ê tāi-chì liáu-āu, ū chi̍t ê [A-lī-má-thài]-lâng [Iok-sek] lâi kiû [Pí-lia̍p-to] chún i khì siu Iâ-so͘ ê ûi-thé. I in-ūi kiaⁿ [Iû-thài-kàu] tong-kio̍k, só͘-í pì-bi̍t choh Iâ-so͘ ê bûn-tô͘. [Pí-lia̍p-to] ún-chún, [Iok-sek] chiū khì siu Iâ-so͘ ê ûi-thé. 39 Koh chêng bat tī àm-sî khì kìⁿ Iâ-so͘ hit-ê [Nî-ko-tek-bō͘] mā tòa iok saⁿ-cha̍p kong-kun ê bu̍t-io̍h chhiau tîm-hiuⁿ ê phang-liāu lâi. 40 In nn̄g lâng chiong Iâ-so͘ ê ûi-thé siu lo̍h-lâi, chiàu [Iû-thài]-lâng an-chòng ê koàn-lē kā I boah phang-liāu, koh ēng iù-môa-pò͘ kā I pau-chat. 41 Iâ-so͘ tèng si̍p-jī-kè ê só͘-chāi ū chi̍t khu hn̂g, hn̂g-lāi ū chi̍t ê iáu m̄-bat chòng kè lâng ê sin bōng. 42 In-ūi hit ji̍t sī pài-gō͘, sī [Iû-thài]-lâng ê Pī-pān-ji̍t, bōng koh bô hn̄g, in chiū kā Iâ-so͘ an-chòng tī hia.

Iok-hān 20

1 Lé-pài ji̍t thàu-chá, thiⁿ iáu-bē kng, [Boa̍t-tāi-lia̍p] ê [Má-lī-a] khì bōng-tōe, khòaⁿ-tio̍h bōng-kháu ê chio̍h í-keng sóa-khui. 2 I chiū cháu-khì chhē [Se-bûn] [Pí-tek], koh khì chhē Iâ-so͘ só͘ thiàⁿ hit-ê bûn-tô͘, kā in kóng, “Ū lâng chiong Chú tùi bōng-ni̍h sóa-cháu; goán m̄-chai in kā I khǹg tī tó-ūi.” 3 [Pí-tek] kap hit-ê bûn-tô͘ chiū khì bōng-tōe. 4 Nn̄g ê lâng chòe-hé cháu, hit-ê bûn-tô͘ pí [Pí-tek] cháu khah kín, seng kàu bōng-ni̍h. 5 I àⁿ lo̍h-khì khòaⁿ bōng-lāi, khòaⁿ-tio̍h iù-môa-pò͘ khǹg tī hia, put-kò bô ji̍p-khì. 6 [Se-bûn] [Pí-tek] tè-āu mā kàu, ji̍p-khì bōng-lāi. I khòaⁿ-tio̍h iù-môa-pò͘ khǹg tī hia, 7 mā khòaⁿ-tio̍h pau-chat Iâ-so͘ thâu-khak ê kun bô kap iù-môa-pò͘ khǹg chòe-hé, kńg-teh, lēng-gōa khǹg. 8 Seng kàu bōng hit-ê bûn-tô͘ mā ji̍p-khì, khòaⁿ liáu chiū sìn. 9 In iáu-bē liáu-kái Sèng-keng ê ōe, kóng I it-tēng tio̍h tùi sí-lâng tiong koh-oa̍h. 10 Jiân-āu, hit nn̄g ê bûn-tô͘ tńg-khì in tau. 11 [Má-lī-a] khiā tī bōng-gōa teh khàu. I ná khàu ná àⁿ lo̍h-khì khòaⁿ bōng-lāi, 12 khòaⁿ-tio̍h nn̄g ê chhēng pe̍h-saⁿ ê thiⁿ-sài chē tī goân-lâi hē Iâ-so͘ ê ûi-thé ê só͘-chāi, chi̍t ê tī thâu chit pêng, chi̍t ê tī kha hit pêng. 13 In mn̄g i kóng, “Hū-jîn-lâng, lí ná teh khàu?” I ìn kóng, “Ū lâng kā góa ê Chú sóa-cháu, góa m̄-chai in kā I khǹg tī tó-ūi.” 14 Kóng soah, [Má-lī-a] oa̍t tńg-sin, khòaⁿ-tio̍h Iâ-so͘ khiā tī hia, m̄-kú m̄-chai I sī Iâ-so͘. 15 Iâ-so͘ mn̄g i, “Hū-jîn-lâng, lí ná teh khàu? Lí teh chhē sím-mi̍h-lâng?” [Má-lī-a] siūⁿ-chòe I sī kò͘-hn̂g ê, chiū ìn kóng, “Thâu-ke, lí nā ū kā I sóa-cháu, chhiáⁿ kā góa kóng lí kā I khǹg tī tó-ūi, góa thang khì kā I siu tńg-lâi.” 16 Iâ-so͘ kā i kiò, “[Má-lī-a]!” [Má-lī-a] oa̍t tńg-sin, ēng [Hi-pek-lâi]-ōe kiò Iâ-so͘, “Lia̍p-pho-nî!” ì-sù chiū-sī “Lāu-su”. 17 Iâ-so͘ kā i kóng, “M̄-thang kā góa khîⁿ-teh, in-ūi góa iáu-bē chiūⁿ-khì Pē hia. Lí tio̍h khì kā góa ê hiaⁿ-tī kóng, ‘Góa beh chiūⁿ-khì góa ê Pē, mā-sī lín ê Pē, góa ê Siōng-tè, mā-sī lín ê Siōng-tè hia.”’ 18 [Boa̍t-tāi-lia̍p] ê [Má-lī-a] chiū khì kā bûn-tô͘ pò-kò kóng, “Góa í-keng kìⁿ-tio̍h Chú,” koh kóng Chú ū kā i kóng chiah-ê ōe. 19 Kâng hit-ê lé-pái-ji̍t àm-sî, bûn-tô͘ chū-chi̍p ê só͘-chāi mn̂g lóng koaiⁿ-teh, in-ūi in kiaⁿ [Iû-thài]-lâng ê léng-siù. Iâ-so͘ lâi, khiā tī in tiong-ng, tùi in kóng, “Goān lín pêng-an!” 20 I kóng liáu, chiong siang chhiú kap hia̍p-ē hō͘ in khòaⁿ. Bûn-tô͘ khòaⁿ-tio̍h Chú, chin hoaⁿ-hí. 21 Iâ-so͘ koh kā in kóng, “Goān lín pêng-an! Chhin-chhiūⁿ Pē ū chhe góa, góa mā chhe lín.” 22 Kóng soah, I tùi in pûn-khùi, kóng, “Niá-siū Sèng Sîn! 23 Lín sià-bián sím-mi̍h-lâng ê chōe, in chiū tit-tio̍h sià-bián; lín bô sià-bián sím-mi̍h-lâng ê chōe, in chiū bô tit-tio̍h sià-bián.” 24 [To-má], mā kiò-chòe [Siang-siⁿ-á], i sī cha̍p-jī sù-tô͘ ê chi̍t ê, Iâ-so͘ lâi hit sî bô kap in chòe-hé tī hia. 25 Só͘-í kî-tha ê bûn-tô͘ kā i kóng, “Goán í-keng kìⁿ-tio̍h Chú lah.” [To-má] kā in kóng, “Góa nā bô khòaⁿ-tio̍h I chhiú-tiong ê teng-jiah, ēng chńg-thâu-á bong teng-jiah, koh ēng chhiú bong I ê hia̍p-ē, góa choa̍t-tùi m̄-sìn.” 26 Chi̍t lé-pài āu, bûn-tô͘ koh chū-chi̍p tī chhù-lāi, [To-má] mā kap in chòe-hé. Mn̂g koaiⁿ-teh, Iâ-so͘ lâi, khiā tī in tiong-ng, kóng, “Goān lín pêng-an!” 27 Jiân-āu, I kā [To-má] kóng, “Chhun chńg-thâu-á lâi chia, thàm góa ê chhiú; chhun-chhiú lâi bong góa ê hia̍p-ē. M̄-thang bô-sìn, tio̍h sìn!” 28 [To-má] kóng, “Góa ê Chú, góa ê Siōng-tè!” 29 Iâ-so͘ kā i kóng, “Lí khòaⁿ-tio̍h góa chiah sìn ò͘? Bô khòaⁿ-tio̍h lâi sìn ê lâng chin ū hok-khì!” 30 Iâ-so͘ tī bûn-tô͘ ê bīn-chêng iáu kiâⁿ chin chōe sîn-jiah, bô kì-chài tī chit pún chheh. 31 Kì-chài chiah-ê sī beh hō͘ lín sìn Iâ-so͘ sī Ki-tok, sī Siōng-tè ê Kiáⁿ, koh hō͘ lín thong-kè sìn, khò I ê miâ tit-tio̍h oa̍h-miā.

Iok-hān 21

1 Āu-lâi, Iâ-so͘ koh tī [Thê-pí-lī-a] ô͘-piⁿ tùi bûn-tô͘ hián-hiān. Hián-hiān ê keng-kè sī án-ni: 2 [Se-bûn] [Pí-tek], kiò-chòe Siang-siⁿ-á ê [To-má], [Ka-lī-lī] ê [Ka-ná]-lâng [Ná-tàn-gia̍p], [Se-pí-thài] ê nn̄g ê kiáⁿ, kap lēng-gōa nn̄g ê bûn-tô͘ lóng chòe-hé. 3 [Se-bûn] [Pí-tek] kā in kóng, “Góa beh lâi-khì lia̍h-hî.” In kā i kóng, “Goán mā beh kap lí khì.” In chhut-khì, chiūⁿ-chûn; hit àm, in lia̍h lóng bô. 4 Thiⁿ phú kng, Iâ-so͘ khiā tī hōaⁿ-téng; put-kò bûn-tô͘ jīn bōe-chhut I sī Iâ-so͘. 5 Iâ-so͘ tùi in kóng, “Siàu-liân-lâng, lín lia̍h ū hî bô?” In ìn kóng, “Bô.” 6 I kā in kóng, “Kā bāng pha lo̍h-khì chûn ê chiàⁿ-pêng chiū ōe lia̍h-tio̍h.” In chiū pha lo̍h-khì; in-ūi pha-tio̍h chin chōe hî, soah thoa bōe khí-lâi. 7 Iâ-so͘ só͘ thiàⁿ hit-ê bûn-tô͘ kā [Pí-tek] kóng, “Sī Chú!” [Se-bûn] [Pí-tek] chi̍t-ē thiaⁿ-tio̍h sī Chú, in-ūi thǹg-pak-theh, kín chiong gōa-saⁿ moa-teh, thiàu lo̍h-chúi. 8 Kî-tha ê bûn-tô͘, in-ūi in lī lio̍k-tōe bô hn̄g, iok chi̍t-pah kong-chhioh, chiū kò hit chiah sòe-chiah chûn kā kui-bāng ê hî thoa óa-hōaⁿ. 9 In chi̍t-ē chiūⁿ-hōaⁿ, khòaⁿ-tio̍h hia ū hé-thòaⁿ hé, téng-bīn ū hî, koh ū piáⁿ. 10 Iâ-so͘ kā in kóng, “Tú-chiah lia̍h-tio̍h ê hî, lia̍h kúi bé-á lâi.” 11 [Se-bûn] [Pí-tek] peh-khì chûn-téng, thoa bāng khí-lâi hōaⁿ-téng, kui-bāng lóng sī tōa bé hî, lóng-chóng chi̍t-pah gō͘-cha̍p-saⁿ bé, sui-jiân hiah-ni̍h chōe, bāng mā bô phòa-khì. 12 Iâ-so͘ kā in kóng, “Lâi chia̍h chá-tǹg!” Bûn-tô͘ bô-lâng káⁿ kā I mn̄g, “Lí sī sím-mi̍h-lâng?” in-ūi in chai I sī Chú. 13 Iâ-so͘ kiâⁿ óa-lâi, the̍h piáⁿ, pun hō͘ in, hî mā chiàu án-ni pun hō͘ in. 14 Iâ-so͘ tùi sí-lâng tiong koh-oa̍h í-āu tùi bûn-tô͘ hián-hiān, che sī tē-saⁿ piàn. 15 In chia̍h chá-tǹg liáu-āu, Iâ-so͘ mn̄g [Se-bûn] [Pí-tek], “[Iok-hān] ê kiáⁿ [Se-bûn], lí ū thiàⁿ góa iâⁿ-kè chiah-ê bô?” I ìn kóng, “Chú ah, ū, lí chai góa ū thiàⁿ lí.” Iâ-so͘ kā i kóng, “Iúⁿ-chhī góa ê iûⁿ-á-kiáⁿ!” 16 Iâ-so͘ tē-jī piàn mn̄g i kóng, “[Iok-hān] ê kiáⁿ [Se-bûn], lí ū thiàⁿ góa bô?” I ìn kóng, “Chú ah, ū, lí chai góa ū thiàⁿ lí.” Iâ-so͘ kā i kóng, “Bo̍k-ióng góa ê iûⁿ!” 17 Iâ-so͘ tē-saⁿ piàn kā i mn̄g, “[Iok-hān] ê kiáⁿ [Se-bûn], lí ū thiàⁿ góa bô?” [Pí-tek] in-ūi Iâ-so͘ tē-saⁿ piàn mn̄g kóng “Lí ū thiàⁿ góa bô?” chiū chin siong-sim, kā Iâ-so͘ kóng, “Chú ah, lí ta̍k hāng lóng chai, lí chai góa ū thiàⁿ lí.” Iâ-so͘ chiū kā i kóng, “Iúⁿ-chhī góa ê iûⁿ!” 18 Góa si̍t-si̍t chāi-chāi kā lí kóng, lí siàu-liân ê sî ka-kī hâ io-tòa khì ài khì ê só͘-chāi; m̄-kú nî-lāu ê sî, lí ōe chhun siang-chhiú hō͘ lâng pa̍k, kā lí thoa kàu lí bô ài khì ê só͘-chāi.” 19 Iâ-so͘ kóng chiah-ê ōe sī chí [Pí-tek] ōe án-chóaⁿ sí lâi êng-iāu Siōng-tè. Kóng soah, Iâ-so͘ kā i kóng, “Lâi tè góa!” 20 [Pí-tek] oa̍t tńg-sin, khòaⁿ-tio̍h Iâ-so͘ só͘ thiàⁿ hit-ê bûn-tô͘ tè tī āu-bīn. I bat tī boán-chhan ê sî the-óa Iâ-so͘ ê heng-chêng, mn̄g kóng “Chú ah, sī sím-mi̍h-lâng beh chhut-bōe lí?” 21 [Pí-tek] chi̍t-ē khòaⁿ-tio̍h i chiū mn̄g Iâ-so͘, “Chú ah, chit-ê lâng ōe án-chóaⁿ?” 22 Iâ-so͘ ìn i kóng, “Góa nā ài i oa̍h kàu góa koh lâi, kap lí ū sím-mi̍h koan-hē. Lí lâi tè góa!” 23 Tùi án-ni, chit-ê ōe tī bûn-tô͘ ê tiong-kan liû-thoân kóng chit-ê bûn-tô͘ bōe sí. Kî-si̍t, Iâ-so͘ m̄-sī kóng i bōe sí, sī kóng “Góa nā ài i oa̍h kàu góa lâi, kap lí ū sím-mi̍h koan-hē.” 24 Chit-ê bûn-tô͘ chiū-sī ūi-tio̍h chiah-ê tāi-chì choh-chèng, koh chiong chiah-ê tāi-chì siá khí-lâi ê lâng. Lán chai i ê kiàn-chèng chin-si̍t. 25 Iâ-so͘ koh ū chòe kî-tha chin chōe tāi-chì, nā beh chiong chiah-ê tāi-chì chi̍t-hāng chi̍t-hāng siá khí-lâi, só͘ siá ê chheh, góa siūⁿ choân sè-kài mā tóe bōe-liáu.

Sù-tô͘ hēng-toān 1

1 [Thê-o-hui-lô] sian-siⁿ: Tī góa só͘ siá ê thâu-chi̍t pún chheh, góa í-keng ū chiong Iâ-so͘ só͘ chòe só͘ kà-sī it-chhè ê tāi-chì, tùi I khai-sí kang-chok ti̍t-kàu chiūⁿ-thiⁿ hit ji̍t, lóng ū kóng-khí. I chiūⁿ-thiⁿ í-chêng, ū thong-kè Sèng Sîn chiong chin chōe tāi-chì chí-sī só͘ kéng-soán ê sù-tô͘. 3 I siū-hāi í-āu, ū ēng chin chōe chèng-kù hián-bêng I pún-sin oa̍h-teh, tī sì-cha̍p ji̍t ê tiong-kan ū hián-hiān hō͘ sù-tô͘ khòaⁿ-kìⁿ, tùi in káng-lūn Siōng-tè-kok ê sū. 4 Iâ-so͘ kap in chòe-hé ê sî ū hoan-hù in: “M̄-thang lī-khui [Iâ-lō͘-sat-léng], chiàu góa bat kā lín kóng, tio̍h thèng-hāu Pē ê èng-ún. 5 [Iok-hān] ēng chúi sóe-lé, m̄-kú koh bô kúi ji̍t, lín ōe siū Sèng Sîn sóe-lé.” 6 Sù-tô͘ kap Iâ-so͘ chū-chi̍p ê sî, mn̄g I kóng, “Chú ah, lí beh tī chit-ê sî chiong chú-koân hôe-ho̍k hō͘ [Í-sek-lia̍t] sī-bô?” 7 I kā in kóng, “Pē ēng ka-kī ê koân-pèng koat-tēng ê sî-kan kap ki-hōe, m̄-sī lín thang chai ê. 8 M̄-kú Sèng Sîn lîm-kàu lín ê sî, lín ōe tit-tio̍h lêng-le̍k, tī [Iâ-lō͘-sat-léng], choân [Iû-thài], kap [Sat-má-lī-a], ti̍t-kàu thiⁿ-piⁿ hái-kak ūi-tio̍h góa chòe kiàn-chèng.” 9 Iâ-so͘ kóng chiah-ê ōe liáu-āu, in teh khòaⁿ ê sî, siū chiap chiūⁿ-thiⁿ; ū chi̍t phìⁿ hûn chiap I khì, in chiū khòaⁿ bōe-tio̍h. 10 In iáu teh chù-ba̍k khòaⁿ thiⁿ ê sî, hut-jiân ū nn̄g ê chhēng pe̍h-saⁿ ê lâng khiā tī in sin-piⁿ, 11 kóng, “[Ka-lī-lī]-lâng ah, lín ná khiā tī chia teh khòaⁿ thiⁿ? Chit-ūi lī-khui lín siū chiap chiūⁿ-thiⁿ ê Iâ-so͘, lín khòaⁿ-kìⁿ I án-ni chiūⁿ-thiⁿ, I mā ōe chiàu án-ni koh lâi.” 12 Āu-lâi, sù-tô͘ tùi hit-ê kiò-chòe [Ka-ná-soaⁿ] ê só͘-chāi tò-khì [Iâ-lō͘-sat-léng]; [Ka-ná-soaⁿ] lī [Iâ-lō͘-sat-léng] bô jōa hn̄g, chha-put-to chi̍t kong-lí, chiū-sī An-hioh-ji̍t ōe ēng-tit kiâⁿ ê lō͘-thêng. 13 In ji̍p-siâⁿ liáu-āu, peh-khì in só͘ tòa hit keng chhù lâu-téng ê thiaⁿ; [Pí-tek], [Iok-hān], [Ngá-kok], [An-tek-lia̍t], [Hui-le̍k] kap [To-má], [Pa-to-lô-mái] kap [Má-thài], [A-le̍k-hui] ê kiáⁿ [Ngá-kok], Kek-chìn-tóng ê [Se-bûn], kap [Ngá-kok] ê kiáⁿ [Iû-tāi] tī hia. 14 In kap kúi-nā ê hū-jîn-lâng, mā ū Iâ-so͘ ê lāu-bú [Má-lī-a] í-ki̍p I ê hiaⁿ-tī, lóng kè-sio̍k tâng-sim ha̍p-ì pek-chhiat kî-tó. 15 Kúi-nā ji̍t āu, chha-put-to ū chi̍t-pah jī-cha̍p ê sìn-tô͘ chū-chi̍p. [Pí-tek] khiā khí-lâi, kóng: 16 “Kok ūi hiaⁿ-tī, Sèng Sîn thong-kè [Tāi-pi̍t] ê chhùi tī Sèng-keng só͘ ū-giân koan-hē [Iû-tāi] chhōa lâng lia̍h Iâ-so͘ ê tāi-chì it-tēng tio̍h èng-giām. 17 I pún-lâi sī lán tiong-kan ê chi̍t ê, siū soán lâi hun-tam chit-ê chit-hūn. 18 “[Iû-tāi] ēng i chòe put-gī ê tāi-chì só͘ tit-tio̍h ê chîⁿ bóe chi̍t tè tōe; I tī hia tò-thâu-chai siak-sí, pak-tó͘ piak-li̍h, tn̂g-á lóng lâu chhut-lâi. 19 Tòa tī [Iâ-lō͘-sat-léng] ê lâng lóng chai chit hāng tāi-chì, só͘-í chiàu in pún-tōe ê ōe kā hit tè tōe kiò-chòe [A-kek-tāi-má], ì-sù sī ‘Huih-hn̂g’. 20 “In-ūi Si-phian ū kì-chài: Tio̍h hō͘ i ê chhù hong-hòe, bô-lâng tī hia khiā-khí. Koh ū kì-chài: Tio̍h hō͘ pa̍t-lâng tāi-thòe i léng-tō ê chit-ūi. 21 “Só͘-í, tio̍h ū chi̍t ê lâng lâi ka-ji̍p, kap lán chòe-hé choh Chú Iâ-so͘ koh-oa̍h ê kiàn-chèng-jîn. Chit-ê lâng tio̍h tī Chú Iâ-so͘ kap lán chòe-hé chhut-ji̍p ê sî, chiū-sī tùi [Iok-hān] si-sóe khí, kàu Iâ-so͘ lī-pia̍t lán siū chiap chiūⁿ-thiⁿ hit ji̍t, put-sî kap lán chòe-tīn.” 23 In chiū thê-miâ nn̄g ê lâng, chiū-sī kiò-chòe [Pa-sat-pa], mā chheng-chòe [Iû-sū-to͘] ê [Iok-sek], kap [Má-thê-a]. 24 In kî-tó kóng, “Chú ah, lí chai ta̍k ê lâng ê sim. Kiû lí chí-sī goán, chit nn̄g lâng tiong-kan tó chi̍t ê sī lí só͘ kéng-soán, 25 beh lâi tam-tng sù-tô͘ ê chit-hūn ê, in-ūi [Iû-tāi] í-keng pàng-sak chit-ê chit-hūn, khì i eng-kai khì ê só͘-chāi.” 26 Jiân-āu, in liam-khau, liam-tio̍h [Má-thê-a], i chiū ka-ji̍p cha̍p-it ê sù-tô͘ ê thoân-thé.

Sù-tô͘ hēng-toān 2

1 Gō͘-sûn-choeh ê ji̍t kàu, bûn-tô͘ lóng chū-chi̍p tī chi̍t só͘-chāi. 2 Hut-jiân ū siaⁿ tùi thiⁿ-téng lâi, chhin-chhiūⁿ thàu tōa-hong, chhiong-móa in teh chē ê kui-keng chhù. 3 Koh ū chhin-chhiūⁿ hun-khui ê hé-chi̍h tùi in chhut-hiān, hioh tī ta̍k ê lâng ê téng-bīn. 4 In lóng siū Sèng Sîn chhiong-móa, chiàu Sèng Sîn hō͘ in ê châi-lêng khai-sí kóng pa̍t chióng gú-giân. 5 Hit sî, ū chi̍t-kóa khiân-sêng ê [Iû-thài]-lâng tùi sè-kài ta̍k kok lâi, tòa tī [Iâ-lō͘-sat-léng]. 6 Thiaⁿ-tio̍h chit-ê siaⁿ hiáng, chèng-lâng chiū lóng chū-chi̍p óa-lâi. In-ūi ta̍k ê lâng thiaⁿ-tio̍h bûn-tô͘ ēng in ê pún-tōe-ōe tùi in kóng-ōe, soah gāng-khì. 7 In tio̍h-kiaⁿ koh kî-koài, kóng, “Lí khòaⁿ, chiah-ê teh kóng-ōe ê kiám m̄-sī lóng [Ka-lī-lī]-lâng? 8 Lán ná-ōe thiaⁿ-tio̍h in lóng ēng lán ta̍k ê lâng ê pún-tōe-ōe teh kóng-ōe? 9 Lán chiah-ê [Phàⁿ-thê-a]-lâng, [Bí-thài]-lâng, [Í-lân]-lâng, í-ki̍p tùi [Bí-só͘-put-ta̍t-bí-a], [Iû-thài] kap [Ka-phàⁿ-to-ka], [Pún-to͘] kap [A-se-a], 10 [Hut-lū-ka] kap [Pông-hui-lī-a], [Ai-ki̍p] kap óa-kūn [Kó͘-lī-nāi] ê [Lī-pí-a] tōe-khu lâi ê lâng, mā ū tùi [Lô-má] lâi ê chhut-gōa-lâng, lāi-bīn ū 11 [Iû-thài]-lâng kap kái-chong ji̍p [Iû-thài]-kàu ê lâng, koh ū [Kek-lí-te̍k]-lâng kap [A-la-pek]-lâng. Lán kèng-jiân thiaⁿ-tio̍h in lóng ēng lán ê pún-tōe-ōe kóng-khí Siōng-tè só͘ chòe úi-tāi ê tāi-chì.” 12 Tāi-ke tio̍h-kiaⁿ koh gông-ngia̍h, mn̄g-lâi mn̄g-khì, “Che sī sím-mi̍h tāi-chì?” 13 Ū lâng thí-chhiò kóng, “Chiah-ê lâng sī lim sin-chiú teh chùi.” 14 Chit-ê sî, [Pí-tek] kap cha̍p-it ê sù-tô͘ khiā khí-lâi, tōa-siaⁿ tùi chèng-lâng kóng, “[Iû-thài]-lâng kap só͘-ū tòa tī [Iâ-lō͘-sat-léng] ê lâng, lín tio̍h chai, chù-ì thiaⁿ góa ê ōe. 15 Chiah-ê lâng m̄-sī chiàu lín só͘ siūⁿ teh chiú-chùi, chit-chūn chiah chá-khí-sî káu tiám. 16 Kî-si̍t che chiū-sī sian-ti [Iok-ní] só͘ kóng ê. 17 Siōng-tè kóng: Tī chiong-boa̍t ê ji̍t-chí, Góa beh chiong góa ê Sîn piàⁿ lo̍h-khì hō͘ só͘-ū ê lâng. Lín ê kiáⁿ kap cha-bó͘-kiáⁿ ōe kóng ū-giân; lín ê siàu-liân-lâng ōe khòaⁿ-kìⁿ īⁿ-siōng; lín ê lāu-lâng ōe choh-bāng. 18 Koh tī hiah-ê ji̍t, góa mā beh chiong góa ê Sîn piàⁿ lo̍h-khì hō͘ góa ê lô͘-po̍k kap lú-pī; in ōe kóng ū-giân. 19 Góa beh tī thiⁿ-téng hián-chhut kî-sū, tī tōe-chiūⁿ kiâⁿ sîn-jiah, ū huih, hé, kap ian-bū. 20 Tī Chú tōa koh êng-iāu ê Ji̍t lâi-lîm í-chêng, ji̍t-thâu ōe pìⁿ-chòe o͘-àm, ge̍h pìⁿ-chòe chhin-chhiūⁿ huih hiah-ni̍h âng. 21 Hit sî, só͘-ū kiû-kiò Chú ê miâ ê lâng lóng ōe tit-tio̍h kiù. 22 “[Í-sek-lia̍t]-lâng, lín tio̍h thiaⁿ chiah-ê ōe. Chiàu lín só͘ chai, Siōng-tè thong-kè [Ná-sat-le̍k]-lâng Iâ-so͘ tī lín tiong-kan kiâⁿ koân-lêng, kî-sū, kap sîn-jiah, lâi tùi lín chèng-bêng I sī Siōng-tè só͘ chí-phài ê. 23 Siōng-tè chiàu I ū-tēng ê chí-ì kap kè-ōe, chiong Iâ-so͘ kau hō͘ lín; lín ēng bô Lu̍t-hoat ê lâng ê chhiú chiong I tèng tī si̍p-jī-kè téng, kā I sat-hāi. 24 Siōng-tè kā I kái-tû sí ê thòng-khó͘, hō͘ I koh-oa̍h, in-ūi sí bô hoat-tō͘ kā I khòng-chè. 25 [Tāi-pi̍t] bat chí I kóng: Góa khòaⁿ-kìⁿ Chú put-sî tī góa ê bīn-chêng, in-ūi I tī góa ê chiàⁿ-pêng, hō͘ góa bōe iô-tāng. 26 In-ūi án-ni, góa ê sim hoaⁿ-hí, góa ê chi̍h khoài-lo̍k; góa chit-ê ōe hiú-nōa ê jio̍k-thé ōe khò ǹg-bāng lâi oa̍h. 27 In-ūi lí bōe chiong góa ê lêng-hûn pàng-sak tī im-kan, mā bōe hō͘ lí ê Sèng-chiá hiú-nōa. 28 Lí í-keng chí-sī góa oa̍h-miā ê tō-lō͘, hō͘ góa tī lí ê bīn-chêng chhiong-móa hoaⁿ-hí. 29 “Kok ūi hiaⁿ-tī, koan-hē sian-chó͘ [Tāi-pi̍t] ê sū, góa hó-táⁿ kā lín kóng. I í-keng sí, koh bâi-chòng lah, i ê bōng kin-á-ji̍t iáu tī lán chia. 30 I sī sian-ti, chai Siōng-tè ū tùi i chiù-chōa èng-ún, beh tùi i ê kiáⁿ-sun jīm-bēng chi̍t ê choh-ông lâi chē i ê pó-chō. 31 [Tāi-pi̍t] seng khòaⁿ-chhut chit-ê tāi-chì, koan-hē Ki-tok ê koh-oa̍h ū kóng: I bô siū pàng-sak tī im-kan; I ê jio̍k-thé mā bô hiú-nōa. 32 Chit-ūi Iâ-so͘, Siōng-tè í-keng ū hō͘ I koh-oa̍h. Goán lóng sī chit hāng sū ê kiàn-chèng-jîn. 33 I í-keng siū ko-seng kàu Siōng-tè ê chiàⁿ-pêng, koh tùi Pē niá-siū só͘ èng-ún ê Sèng Sîn, I hiān-chāi chiong chit-ūi Sèng Sîn piàⁿ lo̍h-lâi hō͘ goán, chiū-sī lín hiān-chāi só͘ khòaⁿ-kìⁿ koh thiaⁿ-kìⁿ ê. 34 [Tāi-pi̍t] m̄-bat chiūⁿ-thiⁿ, m̄-kú i kóng: Chú tùi góa ê Chú kóng: Lí chē góa ê chiàⁿ-pêng, 35 kàu góa hō͘ lí ê tùi-te̍k chòe lí ê kha-tiam. 36 “Só͘-í, [Í-sek-lia̍t] choân-ke tio̍h khak-si̍t chai, lín kā I tèng si̍p-jī-kè chit-ūi Iâ-so͘, Siōng-tè í-keng jīm-bēng I chòe Chú, chòe Ki-tok lah!” 37 Chèng-lâng thiaⁿ-tio̍h chiah-ê ōe, sim-lāi chin chhì-chha̍k, tùi [Pí-tek] kap kî-tha ê sù-tô͘ kóng, “Kok ūi hiaⁿ-tī, goán eng-kai chòe sím-mi̍h?” 38 [Pí-tek] tùi in kóng, “Tio̍h hóe-kái, ta̍k ê lâng lóng tio̍h hōng Iâ-so͘ Ki-tok ê miâ siū sóe-lé, hō͘ lín ê chōe tit-tio̍h sià-bián, chiū ōe niá-siū Siōng-tè só͘ sù ê Sèng Sîn. 39 In-ūi chit-ê èng-ún sī beh hō͘ lín kap lín ê kiáⁿ-sun, í-ki̍p it-chhè tī hn̄g ê só͘-chāi ê lâng, chiū-sī lán ê Chú Siōng-tè só͘ ho͘-tiàu lâi kui I ê lâng.” 40 [Pí-tek] koh ēng chin chōe ōe chhut-la̍t chòe kiàn-chèng, khoàn-bián in kóng, “Tio̍h kiù ka-kī thoat-lī chit-ê siâ-ok ê sè-tāi.” 41 Tùi án-ni, niá-siū i ê sìn-sit ê lâng lóng siū sóe-lé; hit ji̍t sìn-tô͘ tāi-iok ke-thiⁿ saⁿ-chheng lâng. 42 In choân-sim niá-siū sù-tô͘ ê kà-sī, chham-ú thoân-khè seng-oa̍h, peh-piáⁿ, kî-tó. 43 Sù-tô͘ kiâⁿ chin chōe kî-sū sîn-jiah, ín-khí chèng-lâng kèng-ùi ê sim. 44 Só͘-ū ê sìn-tô͘ lóng chòe-hé seng-oa̍h, só͘-ū ê mi̍h kong-ke ēng, 45 koh bōe ka-sán châi-bu̍t, chiàu ta̍k ê lâng ê su-iàu pun hō͘ tāi-ke. 46 In ta̍k ji̍t tâng-sim ha̍p-ì tī Sèng-tiān chū-hōe, koh tī chi̍t-ke chi̍t-ke peh-piáⁿ, ēng hoaⁿ-hí sêng-sim chòe-hé lim-chia̍h, 47 siōng-chàn Siōng-tè, koh tit-tio̍h chèng-lâng hoaⁿ-hí chiap-la̍p. Chú chiong tit-kiù ê lâng ji̍t-ji̍t ke-thiⁿ hō͘ in.

Sù-tô͘ hēng-toān 3

1 Ū chi̍t ji̍t, ē-po͘-sî saⁿ-tiám kî-tó ê sî-kan, [Pí-tek] kap [Iok-hān] chiūⁿ Sèng-tiān. 2 Ū chi̍t ê chhut-sì kha chiū pái ê lâng, ta̍k ji̍t hō͘ lâng kng lâi hē tī Sèng-tiān hit-ê kiò-chòe “Súi-mn̂g” ê mn̂g-kháu, thang tùi ji̍p Sèng-tiān ê lâng kiû-khit. 3 I chi̍t-ē khòaⁿ-tio̍h [Pí-tek] kap [Iok-hān] teh-beh ji̍p-khì Sèng-tiān, chiū kiû in siá-sì. 4 [Pí-tek] kap [Iok-hān] chù-ba̍k kā i khòaⁿ, [Pí-tek] tùi i kóng, “Khòaⁿ goán!” 5 I chiū chù-sîn khòaⁿ in, khòaⁿ ōe-tàng tùi in tit-tio̍h sím-mi̍h. 6 [Pí-tek] tùi i kóng, “Kim, gûn, góa lóng bô, góa chiong góa só͘-ū ê hō͘ lí. Góa hōng [Ná-sat-le̍k]-lâng Iâ-so͘ Ki-tok ê miâ bēng-lēng lí, khí-lâi kiâⁿ!” 7 Jiân-āu [Pí-tek] khan i ê chiàⁿ-chhiú, kā i hû khí-lâi. I ê kha kap kha-ba̍k sûi-sî ū-la̍t, 8 chiū thiàu khí-lâi khiā-teh, koh kiâⁿ, kap in chòe-hé chìn-ji̍p Sèng-tiān, ná kiâⁿ ná thiàu, ná o-ló Siōng-tè. 9 Chèng-lâng khòaⁿ-tio̍h i ná kiâⁿ ná siōng-chàn Siōng-tè, 10 koh jīn-tit i sī pêng-siông chē tī “Súi-mn̂g” ê mn̂g-kháu teh kiû-khit hit-ê lâng, chiū tùi tī i sin-chiūⁿ só͘ hoat-seng ê tāi-chì kám-kak chin kî-koài tio̍h-kiaⁿ. 11 Tī [Só͘-lô-bûn] ê cháu-lông, hit-ê tit-tio̍h i-hó ê lâng kā [Pí-tek] kap [Iok-hān] khiú tiâu-tiâu, chèng-lâng tōa kî-koài, lóng cháu óa-lâi. 12 [Pí-tek] khòaⁿ-tio̍h hiah-ê lâng, chiū kā in kóng, “[Í-sek-lia̍t]-lâng, lín sī-án-chóaⁿ tùi chit hāng tāi-chì kám-kak kî-koài? Sī-án-chóaⁿ chù-ba̍k khòaⁿ goán, siūⁿ-kóng goán sī khò ka-kī ê lêng-le̍k á-sī khiân-sêng hō͘ chit-ê lâng khí-lâi kiâⁿ? 13 [A-pek-la-hán], [Í-sat], [Ngá-kok] ê Siōng-tè, chiū-sī lán chó͘-sian ê Siōng-tè, í-keng hō͘ I ê lô͘-po̍k Iâ-so͘ tit-tio̍h êng-kng, chit-ūi Iâ-so͘ lín kā I kau hō͘ koaⁿ-hú; [Pí-lia̍p-to] koat-tēng beh pàng I ê sî, lín tong-tiûⁿ kū-choa̍t. 14 Lín kū-choa̍t hit-ūi Sèng koh Kong-gī ê, iau-kiû [Pí-lia̍p-to] pàng chi̍t ê sat-jîn-hoān hō͘ lín. 15 Lín thâi-sí oa̍h-miā ê Goân-thâu, chiū-sī Siōng-tè hō͘ I tùi sí-lâng tiong koh-oa̍h Hit-ūi. Goán sī chit-ê tāi-chì ê kiàn-chèng-jîn. 16 Lín só͘ khòaⁿ-kìⁿ só͘ bat chit-ê kha pái ê lâng, tùi sìn-khò chit-ê miâ, chiū-sī Iâ-so͘ ê miâ, ū tit-tio̍h khùi-la̍t. Tùi sìn-khò Iâ-so͘, chit-ê lâng oân-choân hó khí-lâi, chit hāng tāi-chì lín tāi-ke lóng ū khòaⁿ-tio̍h. 17 “Pêng-iú, taⁿ góa chai lín kap lín ê léng-tō-chiá án-ni chòe sī in-ūi m̄-chai. 18 Siōng-tè ū thong-kè chèng sian-ti ê chhùi ū-giân I ê Ki-tok tio̍h siū-khó͘, chit-ê tāi-chì kó-jiân èng-giām lah. 19 Só͘-í, tio̍h hóe-kái kui-ǹg Siōng-tè, thang hō͘ lín ê chōe tit-tio̍h chhat-siau. 20 Án-ni, Chú chiū ōe sù lín keng-sin ê ji̍t-chí, koh chhe-khián chá chiū kéng hó-sè ê Ki-tok Iâ-so͘ lâi. 21 Chiàu Siōng-tè thong-kè kó͘-chá sèng sian-ti ê chhùi só͘ soan-pò͘ ê, I it-tēng tio̍h tiàm tī thiⁿ-téng ti̍t-kàu bān-mi̍h ho̍k-heng ê sî. 22 [Mô͘-se] bat kóng, ‘Chú --- lín ê Siōng-tè beh tùi lín tông-pau ê tiong-kan kā lín jīm-bēng chi̍t ūi chhin-chhiūⁿ góa chit khoán ê sian-ti. I kā lín kóng ê ōe, lín lóng tio̍h thiaⁿ-thàn. 23 M̄-thiaⁿ chit-ūi sian-ti ê ōe ê lâng, ōe tùi chú-bîn tiong lóng kā in tû-bia̍t.’ 24 Tùi [Sat-bó-ní] kàu í-āu só͘-ū thoân sìn-sit ê sian-ti, lóng ū kóng-khí chiah-ê ji̍t-chí. 25 Lín sī sian-ti ê kiáⁿ-sun, mā-sī Siōng-tè kap lín ê chó͘-sian só͘ li̍p ê iok ê kè-sêng-jîn. I bat tùi [A-pek-la-hán] kóng, ‘Tōe-chiūⁿ bān-cho̍k lóng ōe in-ūi lí ê hō͘-tāi tit-tio̍h hok-khì.’ 26 Siōng-tè jīm-bēng I ê Lô͘-po̍k, seng chhe I lâi lín chia, kā lín sù-hok, hō͘ lín ta̍k ê lâng oa̍t tò-tńg lī-khui siâ-ok.”

Sù-tô͘ hēng-toān 4

1 [Pí-tek] kap [Iok-hān] tùi kûn-chiòng teh kóng-ōe ê sî, ū chè-si, Sèng-tiān ê siú-ōe-tiúⁿ, kap [Sat-to͘-kai]-phài ê lâng lâi. 2 In hui-siông siū-khì, in-ūi chit nn̄g ê sù-tô͘ teh kà-sī chèng-lâng, kun-kù Iâ-so͘ ê koh-oa̍h soan-káng sí-lâng koh-oa̍h ê sū. 3 In chiū lia̍h chit nn̄g ê sù-tô͘, kā in khu-liû kàu keh-ji̍t, in-ūi thiⁿ í-keng àm. 4 Thiaⁿ-tio̍h sìn-sit ê ū chin chōe lâng sìn, ta-po͘-lâng ê jîn-sò͘ chha-put-to ū gō͘-chheng. 5 Keh-ji̍t, [Iû-thài]-lâng ê léng-siù, tiúⁿ-ló, kap keng-ha̍k-kàu-su chū-chi̍p tī [Iâ-lō͘-sat-léng]. 6 Tōa-chè-si [A-ná] kap [Kai-a-hoat], [Iok-hān], [A-le̍k-san-tāi], kap tōa-chè-si ê ka-cho̍k mā lóng tī hia. 7 In kiò sù-tô͘ lâi khiā tī in tiong-kan, mn̄g kóng, “Lín khò sím-mi̍h koân-lêng, hōng sím-mi̍h miâ, chòe chit hāng tāi-chì?” 8 Hit sî [Pí-tek] siū Sèng Sîn chhiong-móa, ìn kóng, “Kok ūi bîn-kan ê léng-siù kap tiúⁿ-ló, 9 goán kin-á-ji̍t nā-sī ūi-tio̍h chit-ê kha pái ê lâng tit-tio̍h i-hó só͘ chòe ê hó-sū siū chhâ-mn̄g, 10 lín tāi-ke kap só͘-ū [Í-sek-lia̍t]-lâng lóng tio̍h chai, chit-ê lâng oân-choân ióng-kiāⁿ khiā tī lín bīn-chêng, sī khò [Ná-sat-le̍k]-lâng Iâ-so͘ Ki-tok ê miâ. Chit-ūi Iâ-so͘ lín kā I tèng si̍p-jī-kè, m̄-kú Siōng-tè hō͘ I tùi sí-lâng tiong koh-oa̍h. 11 I chiū-sī Sèng-keng só͘ kóng: Lín chiah-ê khí-chhù-sai-hū só͘ khì-sak ê chio̍h, í-keng chiâⁿ-chòe siōng tiōng-iàu ê ki-chio̍h. 12 Iâ-so͘ í-gōa lóng bô chín-kiù, in-ūi tī thiⁿ-ē jîn-kan, Siōng-tè bô sù pa̍t ê miâ hō͘ lán thang sìn-khò lâi tit-kiù.” 13 Gī-oân khòaⁿ-tio̍h [Pí-tek] kap [Iok-hān] hiah-ni̍h ióng-kám, chai in sī bô tha̍k-chheh ê phó͘-thong-lâng, chiū chin tio̍h-kiaⁿ, koh jīn-tit in bat kap Iâ-so͘ chòe-hé, 14 mā khòaⁿ-tio̍h hit-ê tit-tio̍h i-hó ê lâng khiā tī in sin-piⁿ, chiū bô ōe thang hoán-pok. 15 Gī-oân chiū kiò in lī-khui gī-hōe, jiân-āu chham-siông 16 kóng, “Lán tio̍h án-chóaⁿ lâi tùi-hù chiah-ê lâng? In só͘ kiâⁿ chit-ê kî-īⁿ ê sîn-jiah, tòa tī [Iâ-lō͘-sat-léng] ê lâng lóng chai, lán bô hoat-tō͘ hó͘-jīn. 17 M̄-kú ūi-tio̍h beh pī-bián chit-ê tāi-chì tī bîn-kan ná thoân ná khoah, lán tio̍h kā in kéng-kò, tùi sím-mi̍h lâng to m̄-thang koh hōng Iâ-so͘ ê miâ káng-lūn.” 18 Āu-lâi, in kiò hit nn̄g ê sù-tô͘ lâi, bēng-lēng in bōe ēng-tit koh hōng Iâ-so͘ ê miâ káng-lūn á-sī kà-sī. 19 M̄-kú [Pí-tek] kap [Iok-hān] ìn kóng, “Tī Siōng-tè bīn-chêng, thiaⁿ-thàn lín á-sī thiaⁿ-thàn Siōng-tè chiah tio̍h, lín ka-kī phòaⁿ-toàn. 20 In-ūi goán só͘ khòaⁿ-tio̍h só͘ thiaⁿ-tio̍h ê, bōe-tàng bô kóng.” 21 Hiah-ê gī-oân m̄-chai tio̍h án-chóaⁿ kā in chhú-hoa̍t, chiū giâm-giâm kā in kéng-kò liáu-āu, pàng in khì; in-ūi bîn-chiòng lóng teh ūi-tio̍h só͘ hoat-seng ê tāi-chì kui êng-kng hō͘ Siōng-tè. 22 Tùi chit-ê sîn-jiah tit-tio̍h i-hó hit-ê lâng í-keng sì-cha̍p gōa hè. 23 [Pí-tek] kap [Iok-hān] siū tháu-pàng, chiū tò-khì tâng-phōaⁿ hia, chiong chè-si-tiúⁿ kap tiúⁿ-ló kā in kóng ê ōe lóng tùi in pò-kò. 24 In thiaⁿ liáu chiū tâng-sim tōa-siaⁿ tùi Siōng-tè kî-tó kóng, “Chhòng-chō thiⁿ, tōe, hái, kap kî-tiong bān-mi̍h ê Chú-cháiⁿ, 25 lí bat thong-kè Sèng Sîn ēng lí ê lô͘-po̍k goán ê chó͘ [Tāi-pi̍t] ê chhùi kóng: Gōa-pang sī-án-chóaⁿ háng-hoah? Bān-bîn sī-án-chóaⁿ kè-bô͘ bô hāu-kó ê sū? 26 Tōe-chiūⁿ ê kun-ông lóng pâi-tīn beh kau-chiàn, thóng-tī-chiá liân-ha̍p khí-lâi, beh kong-kek Chú kap I soán-li̍p ê Ki-tok. 27 [Hi-lu̍t] kap [Pâng-siu] [Pí-lia̍p-to] kó-jiân tī chit-ê siâⁿ-lāi kap Gōa-pang-lâng í-ki̍p [Í-sek-lia̍t]-lâng liân-ha̍p lâi kong-kek lí soán-li̍p sèng ê lô͘-po̍k Iâ-so͘. 28 In chū-chi̍p beh chòe lí ê koân-lêng kap lí ê chí-ì ū-tēng ōe hoat-seng it-chhè ê sū. 29 Taⁿ Chú ah, in teh kā goán khióng-hat, kiû lí kàm-chhat, hō͘ lí ê lô͘-po̍k koh-khah ū ióng-khì thang soan-káng lí ê sìn-sit. 30 Kiû lí chhun-chhiú i-tī, koh thong-kè lí sèng ê lô͘-po̍k Iâ-so͘ ê miâ hō͘ goán kiâⁿ sîn-jiah kî-sū.” 31 Kî-tó soah, chū-hōe ê só͘-chāi iô-tāng; in lóng siū Sèng Sîn chhiong-móa, ióng-kám soan-káng Siōng-tè ê sìn-sit. 32 Choân-thé sìn-tô͘ lóng tâng-sim ha̍p-ì, bô chi̍t ê lâng kóng i ê châi-bu̍t sī ka-kī ê; só͘-ū ê mi̍h-kiāⁿ kong-ke ēng. 33 Sù-tô͘ ēng tōa lêng-le̍k kiàn-chèng Chú Iâ-so͘ ê koh-oa̍h, chèng-lâng lóng tit-tio̍h tōa un-tián. 34 In tiong-kan bô-lâng ū khiàm-kheh, in-ūi ū chhân-hn̂g chhù-the̍h ê lâng lóng bōe chhut-khì, 35 só͘ tit-tio̍h ê chîⁿ the̍h lâi kau hō͘ sù-tô͘, chiàu ta̍k ê lâng ê su-iàu hun-phòe. 36 Chi̍t ê chhut-sì tī [Sài-phó͘-lō͘-su] ê [Lī-bī]-lâng [Iok-sek], sù-tô͘ kā i kiò-chòe [Pa-ná-pa], ì-sù chiū-sī An-ùi-chiá. 37 I bōe ka-kī ê chhân-hn̂g, chîⁿ the̍h lâi kau hō͘ sù-tô͘.

Sù-tô͘ hēng-toān 5

1 Ū chi̍t ê lâng miâ kiò-chòe [A-ná-nî-a], i kap i ê bó͘ [Sat-hui-lah] bōe chi̍t-kóa chhân-hn̂g; 2 i tit-tio̍h bó͘ ê tông-ì, chiong só͘ tit-tio̍h ê chîⁿ lâu chi̍t-kóa khí-lâi, chhun-ê the̍h lâi kau hō͘ sù-tô͘. 3 [Pí-tek] tùi i kóng, “[A-ná-nî-a], lí ná hō͘ Sat-tàn khòng-chè lí ê sim lâi khi-phiàn Sèng Sîn, kā bōe chhân-hn̂g ê chîⁿ lâu chi̍t pō͘-hūn khí-lâi? 4 Chhân-hn̂g iáu-bē bōe sī lí ê, bōe liáu só͘ tit-tio̍h ê chîⁿ lí ū koân thang chhú-lí, lí ná chòe chit khoán tāi-chì? Lí m̄-sī khi-phiàn lâng, sī khi-phiàn Siōng-tè!” 5 [A-ná-nî-a] chi̍t-ē thiaⁿ-tio̍h chit-ê ōe, lek lo̍h-khì chiū sí. Thiaⁿ-tio̍h chit-ê tāi-chì ê lâng lóng chin kiaⁿ-hiâⁿ. 6 Ū kúi-nā ê siàu-liân-lâng lâi, kā i ê si-thé pau khí-lâi, kng chhut-khì bâi-chòng. 7 Chha-put-to saⁿ tiám cheng āu, i ê bó͘ ji̍p-lâi, m̄-chai só͘ hoat-seng ê tāi-chì. 8 [Pí-tek] mn̄g i, “Lí kā góa kóng, lín bōe chhân-hn̂g só͘ tit-tio̍h ê chîⁿ kan-ta chiah-ê sī-bô?” I ìn kóng, “Sī, chiah-ê nā-tiāⁿ.” 9 [Pí-tek] tùi i kóng, “Lín ná tâng-sim chhì-thàm Chú ê Sîn? Lí khòaⁿ, bâi-chòng lí tiōng-hu ê lâng tú tńg-lâi kàu mn̂g-kháu, in mā beh kā lí kng chhut-khì!” 10 [Sat-hui-lah] sûi-sî lek lo̍h-khì [Pí-tek] ê kha-chêng chiū sí. Hiah-ê siàu-liân-lâng ji̍p-lâi khòaⁿ-tio̍h i í-keng sí, chiū kā i kng chhut-khì, bâi-chòng tī i tiōng-hu ê sin-piⁿ. 11 Choân kàu-hōe kap thiaⁿ-tio̍h chiah-ê tāi-chì ê lâng lóng chin kiaⁿ-hiâⁿ. 12 Sù-tô͘ tī bîn-kan kiâⁿ chin chōe sîn-jiah kî-sū. Sìn-tô͘ lóng tâng-sim ha̍p-ì tī [Só͘-lô-bûn] Cháu-lông chū-hōe. 13 Bîn-chiòng lóng chin chun-tiōng in, m̄-kú m̄-káⁿ kap in chiap-kūn. 14 Sìn Chú ê lâng it-ti̍t ke-thiⁿ, lâm-ê lú-ê lóng chin chōe. 15 Ū lâng chiong pīⁿ-lâng khǹg tī bîn-chhn̂g á-sī chhn̂g-pho͘, kng chhut-lâi hē tī lō͘-piⁿ, tī [Pí-tek] keng-kè ê sî thang hō͘ i ê iáⁿ ìm-tio̍h. 16 Koh ū kui-kûn lâng chhōa phòa-pīⁿ ê í-ki̍p hō͘ siâ-sîn khó͘-chhó͘ ê lâng tùi [Iâ-lō͘-sat-léng] chiu-ûi ê hiong-tìn chū-chi̍p óa-lâi, in lóng ū tit-tio̍h i-hó. 17 Tōa-chè-si í-ki̍p kap i kâng-tóng, chiū-sī [Sat-to͘-kai]-tóng ê lâng, tùi sù-tô͘ móa-sim chi̍t-tò͘. 18 In hē-chhiú lia̍h sù-tô͘, kā in koaiⁿ-lo̍h kaⁿ. 19 Hit mî, Chú ê thiⁿ-sài phah-khui kaⁿ-mn̂g, kā in chhōa chhut-lâi, tùi in kóng, 20 “Lín khì, khiā tī Sèng-tiān chiong chit-ê sù oa̍h-miā ê sìn-sit choân-pō͘ tùi bîn-chiòng soan-káng.” 21 Sù-tô͘ thiaⁿ i ê ōe, thiⁿ beh-kng ê sî ji̍p-khì Sèng-tiān kà-sī lâng. Tōa-chè-si kap i kâng-tóng ê lâng kàu-ūi, chiū tiàu-chi̍p só͘-ū [Í-sek-lia̍t]-lâng ê tiúⁿ-ló khui-hōe, jiân-āu chhe lâng khì kaⁿ-ga̍k chhōa sù-tô͘ lâi. 22 Siú-ōe kàu ê sî, hoat-hiān sù-tô͘ bô tī kaⁿ-ni̍h, chiū tò-lâi pò-kò kóng, 23 “Goán hoat-hiān kaⁿ-ga̍k só tiâu-tiâu, khàn-siú khiā tī mn̂g-kháu, goán chi̍t-ē khui kaⁿ-mn̂g, lāi-bīn lóng bô khòaⁿ-tio̍h pòaⁿ-lâng.” 24 Sèng-tiān ê siú-ōe-tiúⁿ kap chè-si-tiúⁿ thiaⁿ-tio̍h chit-ê pò-kò, m̄-chai tāi-chì ōe án-chóaⁿ ián-piàn chiū chin tio̍h-kip. 25 Hit sî, ū chi̍t ê lâng ji̍p-lâi kā in kóng, “Lín kā in lia̍h-khì koaiⁿ tī kaⁿ-ni̍h hiah-ê lâng, hiān-chāi khiā tī Sèng-tiān teh kà-sī bîn-chiòng!” 26 Hit-ê siú-ōe-tiúⁿ kap i ê pō͘-hā chiū khì kā sù-tô͘ chhōa lâi; in bô ēng pō-le̍k, in-ūi kiaⁿ bîn-chiòng ēng chio̍h-thâu kā in tìm. 27 In chhōa sù-tô͘ ji̍p-lâi, hō͘ in khiā tī gī-hōe bīn-chêng. Tōa-chè-si chiū kā in sím-mn̄g, 28 kóng, “Goán ū giâm-giâm kìm-chí lín m̄-thang ēng chit-ê miâ kà-sī lâng, lín hoán-tńg chiong chit-ê tō-lí thoân-piàn [Iâ-lō͘-sat-léng], siūⁿ-beh chiong lâu chit-ê lâng ê huih ê chek-jīm kui hō͘ goán.” 29 [Pí-tek] kap kî-tha ê sù-tô͘ ìn kóng, “Goán tio̍h sūn-ho̍k Siōng-tè, m̄-sī sūn-ho̍k lâng. 30 Lín kā I tèng-sí tī si̍p-jī-kè téng ê Iâ-so͘, lán chó͘-sian ê Siōng-tè ū hō͘ I koh-oa̍h. 31 Chit-ūi Iâ-so͘, Siōng-tè ko-kú I chē tī ka-kī ê chiàⁿ-pêng, choh Siú-léng, choh Kiù-chú, thang hō͘ [Í-sek-lia̍t]-lâng hóe-kái, chōe tit-tio̍h sià-bián. 32 Goán sī chiah-ê tāi-chì ê kiàn-chèng-jîn. Siōng-tè sù hō͘ sūn-ho̍k I ê lâng ê Sèng Sîn mā ūi-tio̍h chiah-ê tāi-chì choh chèng-jîn.” 33 Gī-hōe ê gī-oân thiaⁿ-tio̍h chiah-ê ōe hui-siông siū-khì, ài-beh thâi in. 34 M̄-kú in tiong-kan ū chi̍t ê [Hoat-lī-sài]-phài ê lâng, kiò-chòe [Ka-má-lia̍t], sī chèng-lâng chun-kèng ê keng-ha̍k-kàu-su. I khiā khí-lâi, hoan-hù sù-tô͘ chiām-sî chhut-khì, 35 jiân-āu tùi gī-hōe kóng, “[Í-sek-lia̍t]-lâng, lín beh pān chiah-ê lâng tio̍h chin kín-sīn! 36 Í-chêng [Tiu-tāi] khí-lâi, chū-chheng tōa jîn-bu̍t, iok ū sì-pah lâng tè i, āu-lâi i hō͘ lâng thâi-sí, só͘-ū tè i ê lâng lóng sì-sòaⁿ, siau-sit khì. 37 Āu-lâi ū chi̍t ê [Ka-lī-lī]-lâng [Iû-tāi] tī hō͘-kháu-phó͘-cha ê sî chhut-hiān, chhōa chi̍t-kóa lâng tè i, i mā hō͘ lâng thâi-sí, tè i ê lâng lóng sì-sòaⁿ. 38 Taⁿ koan-hē chit hāng tāi-chì, góa kā lín kóng, chiah-ê lâng m̄-thang chhap, chhut-chāi in khì. In só͘ kè-ōe só͘ chòe ê nā chhut tī lâng, it-tēng ōe sit-pāi; 39 nā chhut tī Siōng-tè, lín chiū bōe-tàng kā in siau-bia̍t, kiaⁿ-liáu lín soah kap Siōng-tè choh tùi-thâu!” Gī-hōe chiap-la̍p i ê ì-kiàn. 40 In kiò sù-tô͘ ji̍p-lâi, ēng piⁿ kā in phah, bēng-lēng in bōe ēng-tit koh hōng Iâ-so͘ ê miâ káng-tō, jiân-āu pàng in chhut-khì. 41 Sù-tô͘ lī-khui gī-hōe, móa-sim hoaⁿ-hí, in-ūi in hō͘ lâng khòaⁿ-chòe ōe kham-tit ūi-tio̍h Chú ê miâ siū lêng-jio̍k. 42 In ta̍k ji̍t tī Sèng-tiān kap jîn-ke kè-sio̍k kà-sī lâng, thoân Ki-tok Iâ-so͘.

Sù-tô͘ hēng-toān 6

1 Bô kú í-āu, bûn-tô͘ ê lâng-sò͘ it-ti̍t ke-thiⁿ, kóng [Hi-la̍h]-gú ê [Iû-thài]-lâng bâi-oàn hiah-ê kóng [Hi-pek-lâi]-gú ê [Iû-thài]-lâng, in-ūi tī hun-phòe ji̍t-siông seng-oa̍h ê su-iàu ū hut-lio̍k in ê kóaⁿ-hū. 2 Cha̍p-jī sù-tô͘ chiū tiàu-chi̍p choân-thé bûn-tô͘, tùi in kóng, “Goán chiong soan-káng Siōng-tè sìn-sit ê kang-chok pàng hē-teh, khì koán hun-phòe ji̍t-siông seng-oa̍h ê su-iàu bô ha̍h. 3 Só͘-í, hiaⁿ-tī ah, tio̍h tùi lín tiong-kan soán chhit ê ū hó miâ-siaⁿ, siū Sèng Sîn chhiong-móa, koh ū tì-hūi ê lâng, goán thang jīm-bēng in pān-lí chit-ê tāi-chì. 4 Goán beh choan-sim tī kî-tó kap thoân-tō ê kang-chok.” 5 Sù-tô͘ ê ì-kiàn tit-tio̍h choân hōe-chiòng chàn-sêng, in chiū soán [Sū-thê-hoán], i sī chhiong-móa sìn-sim kap Sèng Sîn ê lâng; koh soán [Hui-le̍k], [Pek-lô-ko-lô], [Nî-ka-ná], [Thê-bûn], [Pa-bí-ná], kap kái-chong ji̍p [Iû-thài]-kàu ê [An-thê-o]-lâng [Nî-ko-la]. 6 In hō͘ chiah-ê lâng khiā tī sù-tô͘ bīn-chêng, sù-tô͘ chiū ūi-tio̍h in kî-tó, kā in àn-chhiú. 7 Siōng-tè ê sìn-sit kè-sio̍k thoân-khui; tī [Iâ-lō͘-sat-léng] bûn-tô͘ ê lâng-sò͘ ke-thiⁿ chin chōe, koh ū chin chōe chè-si mā thiaⁿ-thàn chit-ê sìn-gióng. 8 [Sū-thê-hoán] chhiong-móa un-sù kap lêng-le̍k, tī bîn-chiòng ê tiong-kan kiâⁿ tōa kî-sū kap sîn-jiah. 9 Put-kò ū chi̍t-kóa lâng khí-lâi kap [Sū-thê-hoán] piān-lūn, in sī tùi [Kó͘-lī-nāi] kap [A-le̍k-san-tāi] lâi, sio̍k ‘Chū-iû-jîn’ hōe-tn̂g ê hōe-oân, í-ki̍p tùi [Ki-lī-ka] kap [A-se-a] lâi ê lâng. 10 Sèng Sîn sù tì-hūi hō͘ [Sū-thê-hoán], hō͘ in bô hoat-tō͘ thang piān-pok. 11 Āu-lâi, in bóe-siu chi̍t-kóa lâng chhut-lâi kóng, “Goán bat thiaⁿ-tio̍h i húi-pòng [Mô͘-se] kap Siōng-tè ê ōe.” 12 In siàn-tōng bîn-chiòng, tiúⁿ-ló, kap keng-ha̍k-kàu-su, chhiong-khì lia̍h [Sū-thê-hoán], kā i kau hō͘ gī-hōe. 13 In kiò chi̍t-kóa ké chèng-jîn chhut-lâi, kóng, “Chit-ê lâng put-sî kóng-ōe kong-kek chit-ê Sèng-tiān kap [Mô͘-se] ê Lu̍t-hoat. 14 Goán bat thiaⁿ-tio̍h i kóng, chit-ê [Ná-sat-le̍k]-lâng Iâ-so͘ beh húi-hoāi chit-ê Sèng-tiān, koh kái-piàn [Mô͘-se] thoân hō͘ lán ê kui-lē.” 15 Hit sî chē tī gī-hōe ê lâng lóng chù-ba̍k khòaⁿ [Sū-thê-hoán], khòaⁿ-tio̍h i ê bīn chhin-chhiūⁿ thiⁿ-sài ê bīn-māu.

Sù-tô͘ hēng-toān 7

1 Tōa-chè-si mn̄g [Sū-thê-hoán], “Sū-si̍t sī án-ni sī-bô?” 2 [Sū-thê-hoán] ìn kóng, “Kok ūi hū-ló hiaⁿ-tī, chhiáⁿ thiaⁿ! Lán ê chó͘-sian [A-pek-la-hán] sóa-khì [Hap-lân] í-chêng, iáu tòa tī [Bí-só͘-put-ta̍t-bí-a] ê sî, êng-kng ê Siōng-tè tùi i hián-hiān, 3 kā i kóng, ‘Tio̍h lī-khui lí ê kò͘-hiong kap chhin-cho̍k, khì góa beh chí-sī lí ê só͘-chāi.’ 4 [A-pek-la-hán] chiū lī-khui [Ka-le̍k-tí]-lâng ê tōe-hng, khì tòa tī [Hap-lân]. I ê lāu-pē sí liáu-āu, Siōng-tè tùi hia kā i chhian-sóa lâi hiān-chāi lín teh tòa chit-ê tōe. 5 M̄-kú Siōng-tè lóng bô sán-gia̍p hō͘ i, liân kha ta̍h hiah-ni̍h sòe ê tōe to bô. Sui-jiân hit sî i iáu bô kiáⁿ, m̄-kú Siōng-tè èng-ún beh sù i chit-ê thó͘-tōe, hō͘ i kap i ê hō͘-tāi chòe sán-gia̍p. 6 Siōng-tè ū án-ni kóng, ‘Lí ê hō͘-tāi ōe khì kià-ku tī gōa-kok, chòe lô͘-châi siū ge̍k-thāi sì-pah nî kú.’ 7 I koh kóng, ‘M̄-kú góa beh sím-phòaⁿ hit-ê hō͘ in chòe lô͘-châi ê kok-ka, āu-lâi góa ōe hō͘ in chhut-lâi, tī chit-ê só͘-chāi kèng-pài góa.’ 8 Jiân-āu Siōng-tè ū kap i li̍p-iok, ēng kat-lé chòe kì-hō. In-ūi án-ni, [A-pek-la-hán] siⁿ [Í-sat] liáu-āu tē-poeh ji̍t kā i kat-lé. Āu-lâi [Í-sat] siⁿ [Ngá-kok], [Ngá-kok] siⁿ cha̍p-jī ê cho̍k-tiúⁿ. 9 “Chiah-ê cho̍k-tiúⁿ oàn-tò͘ [Iok-sek], kā i bōe khì [Ai-ki̍p], m̄-kú Siōng-tè kap i tông-chāi, 10 kiù i thoat-lī it-chhè ê chai-lān, hō͘ i tī [Ai-ki̍p]-ông Hoat-ló ê bīn-chêng tit-tio̍h koan-ài kap tì-hūi, hō͘ [Hoat-ló] chí-phài i chòe [Ai-ki̍p] ê siú-siòng kap ông-kiong ê chóng-koán. 11 Āu-lâi [Ai-ki̍p] kap [Ka-lâm] choân-tōe hoat-seng ki-hng, ín-khí tōa chai-lān, lán ê chó͘-sian bô niû-si̍t thang chia̍h. 12 [Ngá-kok] thiaⁿ-tio̍h [Ai-ki̍p] ū niû-si̍t, chiū chhe lán ê chó͘-sian khì hia; che sī thâu-chi̍t piàn. 13 Tē-jī piàn in khì ê sî, [Iok-sek] hō͘ i ê hiaⁿ-tī jīn-chhut i ê sin-hūn, tùi án-ni Hoat-ló chiah bat [Iok-sek] ê ka-cho̍k. 14 [Iok-sek] chhe lâng khì chhiáⁿ i ê lāu-pē [Ngá-kok] kap choân ka-cho̍k chhit-cha̍p-gō͘ ê lâng lóng khì [Ai-ki̍p]. 15 [Ngá-kok] chiū lo̍h-khì [Ai-ki̍p], āu-lâi i kap lán ê chó͘-sian lóng sí tī hia; 16 in ê ûi-thé hō͘ lâng ūn kàu [Sī-kiàm], bâi-chòng tī [A-pek-la-hán] ēng chîⁿ tùi [Hap-boa̍t] ê kiáⁿ-sun bóe hit-ê bōng-tōe. 17 “Siōng-tè tùi [A-pek-la-hán] ê èng-ún jú teh-beh si̍t-hiān, [Í-sek-lia̍t]-lâng tī [Ai-ki̍p] ê jîn-kháu jú ke-thiⁿ chin chōe. 18 Āu-lâi ū lēng-gōa chi̍t ê m̄-bat [Iok-sek] ê ông khí-lâi thóng-tī [Ai-ki̍p]. 19 I ēng khúi-kè tùi-hù lán ê bîn-cho̍k, ge̍k-thāi lán ê chó͘-sian, kiông-pek in kā eⁿ-á tàn tī gōa-bīn, hō͘ in sí. 20 Tú chit-ê sî [Mô͘-se] chhut-sì, siⁿ-chòe hui-siông chheng-súi tit-lâng-thiàⁿ. I tī lāu-pē ê chhù siū iúⁿ-chhī saⁿ ge̍h ji̍t kú. 21 I siū pàng-sak ê sî, Hoat-ló ê cha-bó͘-kiáⁿ kā i khioh-khì chòe ka-kī ê kiáⁿ iúⁿ-chhī. 22 I siū chai-pôe ha̍k-si̍p [Ai-ki̍p] it-chhè ê tì-hūi, kóng-ōe chòe tāi-chì lóng ū châi-lêng. 23 “[Mô͘-se] móa sì-cha̍p hè ê sî, siūⁿ-beh khì thàm ka-kī ê hiaⁿ-tī [Í-sek-lia̍t] tông-pau. 24 I khòaⁿ-tio̍h chi̍t ê hiaⁿ-tī hō͘ [Ai-ki̍p]-lâng khi-hū, chiū khì kā i pó-hō͘, phah-sí hit-ê [Ai-ki̍p]-lâng, thòe i pò-ho̍k. 25 I siūⁿ-kóng ka-kī ê hiaⁿ-tī ōe liáu-kái Siōng-tè beh ēng i ê chhiú lâi kái-kiù in, m̄-kú in bô liáu-kái. 26 Keh-ji̍t, i khòaⁿ-tio̍h nn̄g ê [Í-sek-lia̍t]-lâng teh oan-ke, siūⁿ-beh kā in tiâu-kái, kóng, “Pêng-iú, lín sī hiaⁿ-tī, ná teh hō͘-siōng khi-hū?” 27 M̄-kú hit-ê teh khi-hū lâng ê kā [Mô͘-se] sak-khui, kóng, “Siáⁿ-lâng jīm-bēng lí choh goán ê thâu-lâng, choh goán ê phòaⁿ-koaⁿ? 28 Lí mā beh thâi góa chhin-chhiūⁿ cha-hng thâi hit-ê [Ai-ki̍p]-lâng ò͘?” 29 [Mô͘-se] chi̍t-ē thiaⁿ-tio̍h chit-ê ōe chiū tô-cháu, khì [Bí-tiân]-lâng ê tōe kià-ku; i tī hia siⁿ nn̄g ê kiáⁿ. 30 “Sì-cha̍p nî āu, tī [Se-nái]-soaⁿ ê khòng-iá ū chi̍t ê thiⁿ-sài tī chhì-phè ê hé-iām tiong tùi [Mô͘-se] hián-hiān. 31 [Mô͘-se] khòaⁿ-kìⁿ chit-ê kéng-siōng kám-kak chin hi-kî, kiâⁿ óa-khì beh khòaⁿ khah siông-sè ê sî, ū thiaⁿ-kìⁿ Chú ê siaⁿ kóng, 32 ‘Góa sī lín chó͘-sian ê Siōng-tè, sī [A-pek-la-hán], [Í-sat], [Ngá-kok] ê Siōng-tè.’ [Mô͘-se] kiaⁿ-kah phi̍h-phi̍h-chhoah, m̄-káⁿ khòaⁿ. 33 Chú tùi i kóng, ‘Ôe thǹg khí-lâi, in-ūi lí só͘ khiā ê só͘-chāi sī sèng-tōe. 34 Góa ê chú-bîn tī [Ai-ki̍p] só͘ siū ê thòng-khó͘, góa khak-si̍t ū khòaⁿ-tio̍h, mā ū thiaⁿ-tio̍h in ê ai-kiò, góa lo̍h-lâi beh chín-kiù in. Taⁿ lí lâi, góa beh chhe lí khì [Ai-ki̍p].’ 35 “Chit-ê [Mô͘-se], [Í-sek-lia̍t]-lâng bat kā i kū-choa̍t, mn̄g i kóng ‘Siáⁿ-lâng jīm-bēng lí choh thâu-lâng, choh phòaⁿ-koaⁿ?’ Chit-ê lâng Siōng-tè khiok thong-kè tī hé-iām tiong hián-hiān ê thiⁿ-sài chhe-phài i choh léng-siù, choh chín-kiù-chiá. 36 I chhōa in chhut-lâi, tī [Ai-ki̍p], tī [Âng-hái], tī khòng-iá sì-cha̍p nî kú, kiâⁿ chin chōe kî-sū sîn-jiah. 37 Chit-ê [Mô͘-se] bat tùi [Í-sek-lia̍t] kiáⁿ-sun kóng ‘Siōng-tè beh tùi lín hiaⁿ-tī ê tiong-kan kā lín heng-khí chi̍t ê chhin-chhiūⁿ góa chit khoán ê sian-ti.’ 38 [Mô͘-se] mā bat kap tī [Se-nái]-soaⁿ tùi i kóng-ōe hit-ê thiⁿ-sài í-ki̍p lán ê chó͘-sian tī khòng-iá chū-hōe; i ū niá-siū oa̍h ê sìn-sit lâi thoân hō͘ lán. 39 Lán ê chó͘-sian m̄-khéng thiaⁿ-thàn, tian-tò kā i kū-choa̍t, siūⁿ-beh tò tńg-khì [Ai-ki̍p]. 40 In tùi [A-lûn] kóng, ‘Lí tio̍h chō chi̍t-kóa sîn-bêng lâi kā goán chhōa-lō͘, in-ūi chhōa goán chhut [Ai-ki̍p] hit-ê [Mô͘-se] m̄-chai tú-tio̍h sím-mi̍h tāi-chì.’ 41 Hit sî in chō chi̍t ê gû-á-kiáⁿ ê siōng, tùi hit-ê ngó͘-siōng hiàn-chè, ūi-tio̍h ka-kī ê chhiú só͘ chō ê ngó͘-siōng khèng-chiok. 42 M̄-kú Siōng-tè oa̍t-thâu m̄ khòaⁿ in, chhut-chāi in khì pài thiⁿ-téng ê chhiⁿ-sîn, chiàu sian-ti-su só͘ kóng: [Í-sek-lia̍t] ke ah, lín tī khòng-iá sì-cha̍p nî kú, kiám bat hiàn seng-lé á-sī chè-mi̍h hō͘ góa? 43 Lín kng [Mô͘-lo̍k] ê pò͘-pîⁿ, í-ki̍p [Lí-hoan] sîn ê chhiⁿ, chiū-sī lín chō lâi pài ê siōng; só͘-í góa beh kā lín chhian-sóa khì [Pa-pí-lûn] hit pêng! 44 “Lán ê chó͘-sian tī khòng-iá ū kiàn-chèng ê hōe-bō͘, chiū-sī Siōng-tè tùi [Mô͘-se] kóng-ōe ê sî chí-sī i, chiàu i só͘ khòaⁿ-kìⁿ ê bô͘-hêng kiàn-chō ê. 45 Āu-lâi lán ê chó͘-sian kè-sêng chit-ê hōe-bō͘. Siōng-tè tùi in bīn-chêng kā gōa-cho̍k kóaⁿ-cháu; in chiàm-niá hit-ê thó͘-tōe í-āu chiah kap [Iok-su-a] chiong hōe-bō͘ sóa khì hia, it-ti̍t kàu [Tāi-pi̍t] ê sî-tāi. 46 [Tāi-pi̍t] ū tit-tio̍h Siōng-tè hoaⁿ-hí, thang kiû Siōng-tè chún i ūi-tio̍h [Ngá-kok] ê ke chhē chi̍t ê khiā-khí ê só͘-chāi. 47 M̄-kú āu-lâi ūi-tio̍h Siōng-tè khí Sèng-tiān ê sī [Só͘-lô-bûn]. 48 “Kî-si̍t Chì-koân ê Siōng-tè pèng bô tòa tī lâng ê chhiú só͘ khí ê chhù, chhin-chhiūⁿ sian-ti só͘ kóng: 49 Chú kóng: Thiⁿ sī góa ê pó-chō, tōe sī góa ê kha-tiam. Lín beh kā góa khí sím-mi̍h khoán chhù? Tó-ūi sī góa an-hioh ê só͘-chāi? 50 Che it-chhè kiám m̄-sī góa chhin-chhiú chhòng-chō ê? 51 “Lín chiah-ni̍h kò͘-chip! Lín ê sim ngī, hīⁿ-khang m̄-thiaⁿ! Lín kap lín ê chó͘-sian sio-siâng, put-sî hoán-khòng Sèng Sîn! 52 Tó chi̍t ê sian-ti bô siū-tio̍h lín ê chó͘-sian pek-hāi? Ū-giân hit-ê Kong-gī ê Lô͘-po̍k lâi-lîm hiah-ê lâng lóng hō͘ lín thâi-sí. Taⁿ lín chiâⁿ-chòe chhut-bōe koh thâi-sí hit-ūi Lô͘-po̍k ê lâng. 53 Lín sī tùi thiⁿ-sài niá-siū Siōng-tè Lu̍t-hoat ê lâng, kèng-jiân bô chun-siú!” 54 In thiaⁿ-tio̍h [Sū-thê-hoán] chiah-ê ōe hui-siông siū-khì, tùi i kā-gê chhiat-chhí. 55 M̄-kú [Sū-thê-hoán] hō͘ Sèng Sîn chhiong-móa, gia̍h-thâu khòaⁿ thiⁿ, khòaⁿ-kìⁿ Siōng-tè ê êng-kng, mā khòaⁿ-tio̍h Iâ-so͘ khiā tī Siōng-tè ê chiàⁿ-pêng. 56 I kóng, “Lín khòaⁿ! Góa khòaⁿ-kìⁿ thiⁿ khui, Jîn-chú khiā tī Siōng-tè ê chiàⁿ-pêng!” 57 Chèng-lâng ng hīⁿ-khang, tōa-siaⁿ hoah, chòe-hé chhi̍h óa-khì, 58 kā i thoa chhut-khì siâⁿ-gōa, ēng chio̍h-thâu kā i tìm. Hiah-ê chèng-jîn chiong ka-kī ê gōa-saⁿ kau hō͘ chi̍t ê kiò-chòe [Sò-lô] ê siàu-liân-lâng kò͘. 59 In ēng chio̍h-thâu tìm [Sū-thê-hoán] ê sî, [Sū-thê-hoán] kiû-kiò kóng, “Chú Iâ-so͘, kiû lí chiap-la̍p góa ê lêng-hûn!” 60 I koh kūi lo̍h-khì, tōa-siaⁿ hoah, “Chú ah, m̄-thang chiong chit-ê chōe kui hō͘ in!” I kóng liáu chiū sí.

Sù-tô͘ hēng-toān 8

1 Thâi-sí [Sū-thê-hoán] ê tāi-chì [Sò-lô] mā chàn-sêng. Kâng hit ji̍t, [Iâ-lō͘-sat-léng] ê kàu-hōe siū-tio̍h chin tōa ê pek-hāi. Sù-tô͘ í-gōa só͘-ū ê sìn-tô͘ lóng hun-sòaⁿ khì [Iû-thài] kap [Sat-má-lī-a] ê ta̍k só͘-chāi. 2 M̄-kú ū chi̍t-kóa khiân-sêng ê lâng kā [Sū-thê-hoán] bâi-chòng, ūi-tio̍h i tōa pi-siong. 3 Hit sî [Sò-lô] hē-chhiú chân-hāi kàu-hōe, chi̍t-hō͘ chi̍t-hō͘ ji̍p-khì, bô-lūn lâm lú lóng thoa chhut-lâi, kā in sàng khì koaiⁿ-lo̍h kaⁿ. 4 Hiah-ê hun-sòaⁿ ê sìn-tô͘ khì ta̍k só͘-chāi thoân-tō. 5 [Hui-le̍k] khì [Sat-má-lī-a] ê chi̍t ê siâⁿ, tùi hia ê lâng soan-iông Ki-tok. 6 Kûn-chiòng thiaⁿ-tio̍h [Hui-le̍k] só͘ kóng ê ōe, koh khòaⁿ-tio̍h i só͘ kiâⁿ ê sîn-jiah, chiū choan-sim thiaⁿ i só͘ kóng ê ōe. 7 Ū chin chōe hō͘ siâ-sîn hū-sin ê lâng tōa-siaⁿ hoah, tùi in só͘ hū-sin ê lâng chhut-khì. Ū chin chōe poàn-sin-put-sūi-ê kap kha-pái-ê mā tit-tio̍h i-hó. 8 Hit-ê siâⁿ ê lâng lóng tōa hoaⁿ-hí. 9 Ū chi̍t ê lâng miâ kiò-chòe [Se-bûn], í-chêng bat tī hit-ê siâⁿ kiâⁿ siâ-su̍t, ka-kī chū-khoa choh-tōa, hō͘ [Sat-má-lī-a] ê lâng tio̍h-kiaⁿ kî-koài. 10 Siâⁿ-lāi ê lâng tōa-tōa sòe-sòe lóng thiaⁿ-thàn i, kóng, “Chit-ê lâng sī Siōng-tè ê koân-lêng, sī lâng teh kóng ê ‘Tāi-lêng-chiá’.” 11 In lóng thiaⁿ-thàn i, in-ūi i chin kú ū ēng siâ-su̍t hō͘ in tio̍h-kiaⁿ kî-koài. 12 Put-kò in sìn [Hui-le̍k] só͘ thoân Siōng-tè-kok ê hok-im kap Iâ-so͘ Ki-tok ê miâ liáu-āu, lâm-ê lú-ê lóng chiap-siū sóe-lé. 13 Liân [Se-bûn] pún-sin mā sìn; i siū sóe-lé í-āu chiū kā [Hui-le̍k] tè tiâu-tiâu. I khòaⁿ-kìⁿ [Hui-le̍k] só͘ kiâⁿ ê sîn-jiah kap só͘ chòe tōa koân-lêng ê kî-sū, kám-kak chin tio̍h-kiaⁿ. 14 [Iâ-lō͘-sat-léng] ê sù-tô͘ thiaⁿ-tio̍h [Sat-má-lī-a]-lâng í-keng chiap-siū Siōng-tè ê sìn-sit, chiū phài [Pí-tek] kap [Iok-hān] khì in hia. 15 In lo̍h-khì, chiū ūi-tio̍h hiah-ê sìn-tô͘ kî-tó, hō͘ in thang tit-tio̍h Sèng Sîn, 16 in-ūi hiah-ê sìn-tô͘ tú siū sóe-lé, kui tī Chú Iâ-so͘ ê miâ; Sèng Sîn iáu-bē kàng-lo̍h tī in tiong-kan jīm-hô-lâng. 17 [Pí-tek] kap [Iok-hān] kā in àn-chhiú, in chiū tit-tio̍h Sèng Sîn. 18 [Se-bûn] khòaⁿ-tio̍h sù-tô͘ àn-chhiú ê lâng lóng tit-tio̍h Sèng Sîn, chiū the̍h chîⁿ hō͘ in, 19 kóng, “Chhiáⁿ lín mā chiong chit-ê koân-lêng hō͘ góa, hō͘ góa àn-chhiú ê lâng lóng ōe-tàng tit-tio̍h Sèng Sîn.” 20 [Pí-tek] tùi i kóng, “Lí ê chîⁿ kap lí chòe-hé khì sí! Lí káⁿ siūⁿ-beh ēng chîⁿ bóe Siōng-tè ê un-sù! 21 Che bô lí ê hūn, kap lí bô koan-hē; in-ūi tī Siōng-tè ê bīn-chêng lí chûn-sim put-liông. 22 Só͘-í, tio̍h hóe-kái tû-khì chit-ê siâ-liām, kî-kiû Chú hō͘ lí sim-lāi ê ì-liām ōe-tàng tit-tio̍h sià-bián. 23 Góa khòaⁿ-tio̍h lí sim-lāi ū chhiong-móa tham-sim chi̍t-tò͘, siū-tio̍h chōe-ok khu-sok.” 24 [Se-bûn] ìn kóng, “Chhiáⁿ lí ūi-tio̍h góa tùi Chú kî-kiû, hō͘ lí só͘ kóng ê tāi-chì bōe lîm-kàu góa.” 25 [Pí-tek] kap [Iok-hān] chòe kiàn-chèng, soan-káng Chú ê sìn-sit, jiân-āu tò-khì [Iâ-lō͘-sat-léng], iân-lō͘ tī [Sat-má-lī-a] ê chin chōe chng-siā thoân hok-im. 26 Chú ê thiⁿ-sài kā [Hui-le̍k] kóng, “Khí-lâi, ǹg lâm-pêng khì, kiâⁿ tùi [Iâ-lō͘-sat-léng] lo̍h-khì [Ka-sat] hit tiâu lō͘.” Hit tiâu lō͘ í-keng hong-hòe. 27 [Hui-le̍k] khí-lâi, chiū khì. I tī lō͘-tiong tú-tio̍h chi̍t ê [I-soh-phit-a] ê thài-kàm; chit-ê lâng sī [I-soh-phit-a] lú-ông [Kam-tāi-ki] ê châi-bū tāi-sîn. I chiūⁿ [Iâ-lō͘-sat-léng] khì kèng-pài Siōng-tè, tú-beh tò-khì, chē tī chhia-téng teh tha̍k sian-ti [Í-sài-a] ê chheh. 29 Sèng Sîn kā [Hui-le̍k] kóng, “Chìn-chêng óa-khì tè hit tâi chhia.” 30 [Hui-le̍k] cháu óa-khì, thiaⁿ-tio̍h i teh tha̍k sian-ti [Í-sài-a] ê chheh, chiū mn̄g, “Lí teh tha̍k ê, ū liáu-kái bô?” 31 I ìn kóng, “Bô-lâng kā góa kóe-seh, góa ná-ōe liáu-kái?” Thài-kàm chiū chhiáⁿ [Hui-le̍k] chiūⁿ-chhia, kap i chòe-hé chē. 32 I teh tha̍k ê hit tōaⁿ Sèng-keng sī án-ni: I chhin-chhiūⁿ iûⁿ hō͘ lâng khan khì thâi, chhin-chhiūⁿ iûⁿ-á tī chián-mn̂g ê lâng bīn-chêng bô chhut-siaⁿ, lóng bô khui-chhùi. 33 I jím-siū lêng-jio̍k ê sî bô-lâng thòe I chú-chhî kong-tō. Sím-mi̍h-lâng ōe-tàng soat-bêng I ê sè-hē? In-ūi I ê sìⁿ-miā tùi tōe-chiūⁿ siau-bia̍t. 34 Thài-kàm mn̄g [Hui-le̍k], “Chhiáⁿ mn̄g, sian-ti chit-ê ōe sī chí sím-mi̍h-lâng kóng ê? Sī chí i ka-kī á-sī chí pa̍t-lâng?” 35 [Hui-le̍k] chiū tùi hit tōaⁿ keng-bûn khai-sí tùi i thoân Iâ-so͘ ê hok-im. 36 In tùi hit tiâu lō͘ lo̍h-khì, kàu ū chúi ê só͘-chāi, thài-kàm kóng, “Chia ū chúi, góa kiám bōe ēng-tit tī chia niá-siū sóe-lé?” 38 Thài-kàm kiò chhia thêng-teh, [Hui-le̍k] kap thài-kàm nn̄g ê chòe-hé lo̍h-khì chúi-ni̍h, [Hui-le̍k] chiū kā i sóe-lé. 39 In tùi chúi-ni̍h khí-lâi ê sî, Chú ê Sîn kā [Hui-le̍k] chiap-khì; thài-kàm bô koh khòaⁿ-tio̍h i, m̄-kú iáu hoaⁿ-hoaⁿ hí-hí kè-sio̍k lú-thêng. 40 Put-kò āu-lâi ū lâng tī [A-só-to͘] khòaⁿ-tio̍h [Hui-le̍k]; i iân-lō͘ tī ta̍k ê siâⁿ-chhī thoân hok-im it-ti̍t kàu [Khái-sat-lī-a].

Sù-tô͘ hēng-toān 9

1 [Sò-lô] kè-sio̍k khióng-hat beh sat-hāi Chú ê bûn-tô͘. I khì kìⁿ tōa-chè-si, 2 iau-kiû tōa-chè-si siá kong-hâm hō͘ [Tāi-má-sū-kek] ta̍k ê hōe-tn̂g, chún i so͘-cha, nā ū chhē-tio̍h sìn-hōng chit-ê Tō-lō͘ ê lâng, bô-lūn lâm lú, thang kā in pa̍k khí-lâi, ah khì [Iâ-lō͘-sat-léng]. 3 I chiū khì, teh-beh kàu [Tāi-má-sū-kek] ê sî hut-jiân ū kng tùi thiⁿ lâi, sì-bīn kā i chiò. 4 I chiū poa̍h-lo̍h tōe, thiaⁿ-kìⁿ ū siaⁿ tùi i kóng, “[Sò-lô], [Sò-lô], lí sī-án-chóaⁿ teh pek-hāi góa?” 5 I mn̄g kóng, “Chú ah, lí sī sím-mi̍h-lâng?” Hit-ê siaⁿ ìn kóng, “Góa chiū-sī lí teh pek-hāi ê Iâ-so͘. 6 Khí-lâi, ji̍p-khì siâⁿ-lāi, lí tio̍h chòe ê sū, ū lâng ōe kā lí kóng.” 7 Tâng-kiâⁿ ê lâng chiū khiā-teh, gāng-gāng bōe kóng-ōe; in ū thiaⁿ-tio̍h siaⁿ, lóng bô khòaⁿ-tio̍h lâng. 8 [Sò-lô] tùi thô͘-kha peh khí-lâi, ba̍k-chiu thí-khui, lóng bô khòaⁿ-tio̍h sím-mi̍h. In chiū khan i ê chhiú, chhōa i ji̍p-khì [Tāi-má-sū-kek]. 9 I saⁿ ji̍t kú bô khòaⁿ-kìⁿ, bô chia̍h, mā bô lim. 10 Tī [Tāi-má-sū-kek] ū chi̍t ê bûn-tô͘ miâ kiò-chòe [A-ná-nî-a]. Tī īⁿ-siōng tiong Chú kā i kiò, “[A-ná-nî-a]!” I ìn kóng, “Chú ah, góa tī chia.” 11 Chú kóng, “Khí-lâi, khì hit tiâu Ti̍t-koe, tī [Iû-tāi] ê chhù chhē chi̍t ê [Tāi-sò͘]-lâng kiò-chòe [Sò-lô]; i tú teh kî-tó, 12 tī īⁿ-siōng tiong ū khòaⁿ-kìⁿ chi̍t ê lâng kiò-chòe [A-ná-nî-a] ji̍p-lâi kā i àn-chhiú, hō͘ i ōe-tàng koh khòaⁿ-kìⁿ.” 13 [A-ná-nî-a] ìn kóng, “Chú ah, góa ū thiaⁿ-tio̍h chin chōe lâng kóng-khí chit-ê lâng tī [Iâ-lō͘-sat-léng] tùi lí ê sìn-tô͘ chòe chin chōe ok-to̍k ê tāi-chì. 14 I ū chè-si-tiúⁿ ê siū-koân thang lia̍h só͘-ū kiû-kiò lí ê miâ ê lâng, hiān-chāi lâi tī chia.” 15 Chú tùi i kóng, “Lí khì, i sī góa kéng-soán ê khì-khū, beh tùi Gōa-pang-lâng, kun-ông, kap [Í-sek-lia̍t]-lâng soan-iông góa ê miâ. 16 Góa mā beh hō͘ i chai, ūi-tio̍h góa ê miâ i it-tēng tio̍h siū chin chōe khó͘-lān.” 17 [A-ná-nî-a] chiū khì, ji̍p-khì hit keng chhù, kā [Sò-lô] àn-chhiú, kóng, “[Sò-lô] hiaⁿ-tī, lí lâi ê lō͘-tiong tùi lí hián-hiān ê Chú Iâ-so͘ chhe góa lâi beh hō͘ lí ōe-tàng koh khòaⁿ-kìⁿ, koh siū Sèng Sîn chhiong-móa.” 18 Sûi-sî ū chhin-chhiūⁿ hî-lân ê mi̍h-kiāⁿ tùi [Sò-lô] ê ba̍k-chiu lak lo̍h-lâi, i chiū koh ōe khòaⁿ-kìⁿ. I khí-lâi, niá-siū sóe-lé; 19 chia̍h pá liáu-āu, thé-le̍k ho̍k-goân. [Sò-lô] kap tī [Tāi-má-sū-kek] ê bûn-tô͘ chòe-hé tòa kúi-nā ji̍t. 20 I sûi-sî tī ta̍k ê hōe-tn̂g soan-káng Iâ-so͘, kóng, “I sī Siōng-tè ê Kiáⁿ.” 21 Thiaⁿ-tio̍h ê lâng lóng tio̍h-kiaⁿ, kóng, “Tī [Iâ-lō͘-sat-léng] siau-bia̍t kiû-kiò chit-ê miâ ê, kiám m̄-sī chit-ê lâng? I lâi chia kiám m̄-sī beh lia̍h sìn-tô͘, kā in ah-khì kau hō͘ chè-si-tiúⁿ?” 22 [Sò-lô] ná kóng ná ū la̍t, chèng-bêng Iâ-so͘ sī Ki-tok, hō͘ tòa tī [Tāi-má-sū-kek] ê [Iû-thài]-lâng bô thang piān-pok. 23 Chin chōe ji̍t āu, [Iû-thài]-lâng tàu-tīn kè-bô͘ beh thâi [Sò-lô], 24 in ê kè-bô͘ ū hō͘ [Sò-lô] thiaⁿ-tio̍h. In mî-ji̍t tī siâⁿ-mn̂g tng-tán beh kā i thâi. 25 M̄-kú i ê bûn-tô͘ tī àm-sî kā i chhōa chhut-lâi, ēng chi̍t ê nâ tùi siâⁿ-chhiûⁿ téng kā i lūi lo̍h-khì. 26 [Sò-lô] kàu [Iâ-lō͘-sat-léng], siūⁿ-beh kap bûn-tô͘ kau-pôe, in lóng kiaⁿ i, in-ūi bô siong-sìn i sī bûn-tô͘. 27 Put-kò [Pa-ná-pa] chiap-la̍p i, chhōa i khì kìⁿ sù-tô͘, kā in soat-bêng [Sò-lô] tī lō͘-tiong khòaⁿ-kìⁿ Chú ê keng-kè, Chú tùi i kóng-ōe, í-ki̍p i tī [Tāi-má-sū-kek] jōa-á-ni̍h ióng-kám hōng Chú ê miâ thoân-tō ê tāi-chì. 28 [Sò-lô] tī [Iâ-lō͘-sat-léng] kap sù-tô͘ ū chhut-ji̍p lâi-óng, hōng Chú ê miâ hó-táⁿ thoân-tō. 29 I mā ū kap kóng [Hi-la̍h]-gú ê [Iû-thài]-lâng kóng-ōe piān-lūn, in iáu-kú put-sî kè-bô͘ beh kā i thâi. 30 Sìn-tô͘ chai-iáⁿ chit-ê tāi-chì, chiū chhōa i lo̍h-khì [Khái-sat-lī-a], tùi hia sàng i khì [Tāi-sò͘]. 31 Hit sî, [Iû-thài], [Ka-lī-lī], kap [Sat-má-lī-a] ta̍k só͘-chāi ê kàu-hōe lóng ū pêng-an, ná kian-kò͘ hoat-tián, só͘-kiâⁿ só͘-chòe kèng-ùi Chú, tit-tio̍h Sèng Sîn ê kó͘-lē, jîn-sò͘ it-ti̍t ke-thiⁿ. 32 [Pí-tek] khì ta̍k só͘-chāi hóng-būn, mā ū hóng-būn tiàm tī [Lū-tāi] ê sìn-tô͘. 33 I tī hia tú-tio̍h chi̍t ê lâng miâ kiò-chòe [Í-nî-ngá]; chit-ê lâng poàn-sin-put-sūi, í-keng tó-chhn̂g poeh nî kú. 34 [Pí-tek] tùi i kóng, “[Í-nî-ngá], Iâ-so͘ Ki-tok kā lí i-hó lah. Khí-lâi, chéng-lí ka-kī ê bîn-chhn̂g.” [Í-nî-ngá] sûi-sî khí-lâi. 35 Só͘-ū tòa tī [Lū-tāi] kap [Sa-lûn] ê lâng lóng ū khòaⁿ-tio̍h, chiū sìn lâi kui Chú. 36 Tī [Iok-phàⁿ] ū chi̍t ê lú sìn-tô͘, miâ kiò-chòe [Tāi-pí-tāi], [Hi-la̍h]-gú sī [To-ka], I ū chòe chin chōe hó-sū, chín-chè sàn-chhiah-lâng. 37 I phòa-pīⁿ sí-khì, lâng sóe i ê si-thé liáu-āu, kā i hē tī lâu-téng ê pâng-keng. 38 In-ūi [Lū-tāi] lī [Iok-phàⁿ] bô hn̄g, bûn-tô͘ thiaⁿ-tio̍h [Pí-tek] tī hia, chiū chhe nn̄g ê lâng khì hia, kiû i kóng, “Chhiáⁿ lí kóaⁿ-kín lâi goán hia.” 39 [Pí-tek] chiū khí-lâi, kap in chòe-hé khì. I chi̍t-ē kàu-ūi, ū lâng chhōa i khì lâu-téng ê pâng-keng. Só͘-ū ê kóaⁿ-hū lóng ûi tī [Pí-tek] ê sin-piⁿ thî-khàu, the̍h [To-ka] siⁿ-chêng só͘ chòe ê lāi-saⁿ gōa-saⁿ hō͘ i khòaⁿ. 40 [Pí-tek] kiò tāi-ke lóng chhut-khì, chiū kūi lo̍h-khì kî-tó, jiân-āu oa̍t kè-khì tùi si-thé kóng, “[Tāi-pí-tāi], khí-lâi!” [To-ka] ba̍k-chiu thí-khui, khòaⁿ-tio̍h [Pí-tek] chiū khí-lâi chē. 41 [Pí-tek] chhun-chhiú kā i hû khí-lâi, āu-lâi kiò hiah-ê sìn-tô͘ kap kóaⁿ-hū lóng ji̍p-lâi, hō͘ koh-oa̍h khí-lâi ê [To-ka] kap in kìⁿ-bīn. 42 Chit-ê siau-sit thoân-piàn [Iok-phàⁿ], chiū ū chin chōe lâng lâi sìn Chú. 43 [Pí-tek] tī [Iok-phàⁿ] chi̍t ê choh-phê sai-hū [Se-bûn] ê chhù tòa chin chōe ji̍t.

Sù-tô͘ hēng-toān 10

1 Tī [Khái-sat-lī-a] ū chi̍t ê lâng, miâ kiò-chòe [Ko-nî-liû], sī [Lô-má] kun-tūi kiò-chòe “[Ì-tāi-lī]-iâⁿ” ê tūi-tiúⁿ. 2 I sī khiân-sêng ê lâng, kap choân-ke lóng kèng-ùi Siōng-tè; i khóng-khài chín-chè sàn-chhiah ê [Iû-thài]-lâng, koh put-sî tùi Siōng-tè kî-tó. 3 Ū chi̍t ji̍t, chha-put-to ē-po͘ saⁿ tiám, i tī īⁿ-siōng tiong bêng-bêng khòaⁿ-kìⁿ Siōng-tè ê thiⁿ-sài ji̍p-lâi, kā i kiò, “[Ko-nî-liû]!” 4 I kā thiⁿ-sài ti̍t-ti̍t siòng, hui-siông kiaⁿ-hiâⁿ, kóng, “Chú ah, sím-mi̍h tāi-chì?” Thiⁿ-sài kóng, “Lí ê kî-tó kap chín-chè í-keng lóng tit-tio̍h Siōng-tè hoaⁿ-hí chiap-la̍p. 5 Taⁿ tio̍h chhe lâng khì [Iok-phàⁿ], chhiáⁿ hit-ê chheng-chòe [Pí-tek] ê [Se-bûn] lâi. 6 I choh lâng-kheh tòa tī choh-phê sai-hū [Se-bûn] ê chhù; i ê chhù tī hái-piⁿ.” 7 Tùi i kóng-ōe ê thiⁿ-sài lī-khui liáu-āu, [Ko-nî-liû] chiū kiò nn̄g ê lô͘-po̍k kap chi̍t ê pêng-siông teh sū-hāu i kèng-ùi Siōng-tè ê peng lâi, 8 chiong chiah-ê tāi-chì lóng kā in kóng liáu-āu, chhe in khì [Iok-phàⁿ]. 9 Keh-ji̍t, chha-put-to tiong-tàu, chit saⁿ ê lâng kiâⁿ beh kàu [Iok-phàⁿ] ê sî, [Pí-tek] peh-khì chhù-téng kî-tó. 10 I pak-tó͘ iau, siūⁿ-beh chia̍h. Lâng teh ūi i chún-pī chia̍h-mi̍h ê sî, i ji̍p-sîn, 11 khòaⁿ-kìⁿ thiⁿ khui, ū chi̍t ê mi̍h-kiāⁿ chhin-chhiūⁿ chi̍t tè tōa tè pò͘, sì-kak-thâu tiàu-teh, lūi lo̍h-lâi tōe-chiūⁿ, 12 lāi-bīn ū tōe-chiūⁿ ta̍k chióng ê cháu-siù, thâng-thōa, kap khong-tiong ê chiáu-lūi. 13 Ū siaⁿ tùi i kóng, “[Pí-tek], khí-lâi, thâi lâi chia̍h.” 14 M̄-kú [Pí-tek] kóng, “Chú ah, choa̍t-tùi bōe ēng-tit! Góa m̄-bat chia̍h ù-òe bô chheng-khì ê mi̍h.” 15 Hit-ê siaⁿ tē-jī piàn tùi i kóng, “Siōng-tè hō͘ i chheng-khì ê, lí m̄-thang khòaⁿ-chòe ù-òe.” 16 Chit-ê tāi-chì kè-sio̍k ū saⁿ piàn, hit-ê mi̍h-kiāⁿ sûi-sî koh siu tò-khì thiⁿ-téng. 17 [Pí-tek] kám-kak kî-koài, tú teh siūⁿ chit-ê īⁿ-siōng sī sím-mi̍h ì-sù ê sî, [Ko-nî-liû] só͘ chhe lâi ê lâng í-keng chhē-tio̍h [Se-bûn] ê chhù, lâi khiā tī mn̂g-kháu, 18 tōa-siaⁿ mn̄g, “Ū chi̍t ê kiò-chòe [Pí-tek] ê [Se-bûn] tòa tī chia bô?” 19 [Pí-tek] iáu teh siūⁿ chit-ê īⁿ-siōng sī sím-mi̍h ì-sù ê sî, Sèng Sîn kā i kóng, “Ū saⁿ ê lâng lâi beh chhē lí! 20 Lí khí-lâi, lo̍h-khì, kap in chòe-hé khì; m̄-thang tiû-tû, in-ūi in sī góa chhe lâi ê.” 21 [Pí-tek] chiū lo̍h-khì kìⁿ hiah-ê lâng, kā in kóng, “Góa chiū-sī lín teh chhē ê lâng. Lín lâi ū sím-mi̍h kùi-sū?” 22 In ìn kóng, “Goán ê tiúⁿ-koaⁿ [Ko-nî-liû] chhe goán lâi, i sī chèng-ti̍t koh kèng-ùi Siōng-tè ê lâng, siū choân-thé [Iû-thài]-lâng ê chun-kèng. I tit-tio̍h sèng thiⁿ-sài ê chí-sī, lâi chhiáⁿ lí khì in tau beh niá-siū lí ê kà-sī.” 23 [Pí-tek] chiū chhiáⁿ in ji̍p-khì, lâu in tòa hia kè-mî. Keh-ji̍t, [Pí-tek] khí-lâi kap in chòe-hé khì; mā ū kúi-nā ê [Iok-phàⁿ] ê sìn-tô͘ tàu-tīn khì. 24 Koh keh-ji̍t, in kàu [Khái-sat-lī-a], [Ko-nî-liû] í-keng iau-chhiáⁿ i ê chhin-lâng kap pêng-iú teh thèng-hāu. 25 [Pí-tek] ji̍p-khì, [Ko-nî-liû] chiū chìn-chêng gêng-chiap, phak tī i ê kha-chêng kā i pài. 26 [Pí-tek] kā i khan khí-lâi, kóng, “Khí-lâi, góa ka-kī mā-sī lâng.” 27 [Pí-tek] kap i ná kiâⁿ ná kóng-ōe ji̍p-khì lāi-bīn, khòaⁿ-tio̍h chin chōe lâng í-keng chū-chi̍p tī hia, 28 chiū tùi in kóng, “Lín chai-iáⁿ, chiàu goán ê kui-tēng, [Iû-thài]-lâng bōe ēng-tit kap Gōa-pang-lâng kau-pôe lâi-óng, m̄-kú Siōng-tè í-keng chí-sī góa, bô-lūn sím-mi̍h cho̍k-kûn ê lâng to m̄-thang khòaⁿ i chòe bô chheng-khì á-sī ù-òe. 29 Só͘-í lín chhiáⁿ góa lâi, góa bô the-sî chiū lâi. Taⁿ chhiáⁿ mn̄g, lín ūi-tio̍h sím-mi̍h tāi-chì chhiáⁿ góa lâi?” 30 [Ko-nî-liû] kóng, “Sì ji̍t chêng, tú chit-ê sî-chūn, chha-put-to ē-po͘ saⁿ tiám, góa tī chhù-lāi teh kî-tó ê sî, hut-jiân ū chi̍t ê lâng chhēng kng-iàⁿ-iàⁿ ê saⁿ khiā tī góa ê bīn-chêng, 31 kóng, ‘[Ko-nî-liû]! Siōng-tè í-keng ū thiaⁿ-kìⁿ lí ê kî-tó, mā ōe kì-tit lí só͘ chòe chín-chè lâng ê sū. 32 Lí tio̍h chhe lâng khì [Iok-phàⁿ], chhiáⁿ kiò-chòe [Pí-tek] ê [Se-bûn] lâi; i tòa tī hái-piⁿ choh-phê sai-hū [Se-bûn] in tau.’ 33 Góa chiū sûi-sî chhe lâng khì chhiáⁿ lí lâi; taⁿ lí lâi lah, si̍t-chāi chin hó. Hiān-chāi goán lóng chū-chi̍p tī Siōng-tè bīn-chêng, beh thiaⁿ Chú bēng-lēng lí só͘ beh kóng lóng-chóng ê ōe.” 34 [Pí-tek] khui-chhùi kóng, “Taⁿ góa khak-si̍t chai, Siōng-tè bô phian-thāi lâng. 35 Bô-lūn tó chi̍t ê bîn-cho̍k, kèng-ùi I, hêng-ûi chèng-ti̍t ê lâng, I lóng hoaⁿ-hí chiap-la̍p. 36 Lín chai: Chêng Siōng-tè ū thong-kè bān-bîn ê Chú Iâ-so͘ Ki-tok tùi [Í-sek-lia̍t]-lâng thoân hô-pêng ê hok-im; [Iok-hān] thoân sóe-lé ê tō-lí í-āu, chit-ê hok-im ū tùi [Ka-lī-lī] khai-sí thoân-piàn [Iû-thài] choân-tōe; 38 chiū-sī, [Ná-sat-le̍k]-lâng Iâ-so͘, Siōng-tè ū án-chóaⁿ ēng Sèng Sîn kap tōa lêng-le̍k kā I boah-iû jīm-bēng, ū án-chóaⁿ hō͘ I khì ta̍k só͘-chāi chòe hó-sū, i-hó só͘-ū siū Mô͘-kúi ap-chè ê lâng, in-ūi Siōng-tè kap I tông-chāi. 39 Goán chiū-sī I tī [Iû-thài] ta̍k só͘-chāi kap [Iâ-lō͘-sat-léng] só͘ chòe ê sū ê kiàn-chèng-jîn. In kā I tèng-sí tī si̍p-jī-kè téng, 40 tē-saⁿ ji̍t Siōng-tè hō͘ I koh-oa̍h, koh hō͘ I hián-hiān, 41 m̄-sī tùi só͘-ū ê lâng, chí-ū tùi goán chiah-ê siū Siōng-tè kéng-soán lâi chòe kiàn-chèng ê lâng hián-hiān; goán bat tī I tùi sí-lâng tiong koh-oa̍h liáu-āu kap I chòe-hé lim-chia̍h. 42 I bēng-lēng goán thoân hok-im hō͘ só͘-ū ê lâng, chèng-si̍t I sī Siōng-tè só͘ jīm-bēng choh oa̍h-lâng kap sí-lâng ê sím-phòaⁿ-chiá. 43 Só͘-ū ê sian-ti lóng ūi-tio̍h I chòe kiàn-chèng kóng, sìn I ê lâng lóng ōe in-ūi I ê miâ tit-tio̍h sià-chōe.” 44 [Pí-tek] iáu teh kóng-ōe ê sî, Sèng Sîn kàng-lîm tī só͘-ū thiaⁿ tō-lí ê lâng. 45 Kap [Pí-tek] tùi [Iok-phàⁿ] chòe-hé lâi hiah-ê siū kat-lé ê sìn-tô͘ lóng tōa tio̍h-kiaⁿ, in-ūi Sèng Sîn ê un-sù mā ū piàⁿ-lo̍h tī Gōa-pang-lâng ê sin-chiūⁿ; 46 in-ūi in ū thiaⁿ-tio̍h hiah-ê lâng kóng lêng-gú koh chheng-chàn Siōng-tè ê úi-tāi. Jiân-āu [Pí-tek] kóng, 47 “Chiah-ê lâng kap lán kâng-khoán í-keng ū niá-siū Sèng Sîn, kiám ū lâng ōe-tàng kìm-chí in niá-siū chúi ê sóe-lé?” 48 I chiū bēng-lēng in hōng Iâ-so͘ Ki-tok ê miâ niá-siū sóe-lé. Āu-lâi, in chhiáⁿ [Pí-tek] kap in koh tòa kúi-nā ji̍t.

Sù-tô͘ hēng-toān 11

1 Sù-tô͘ kap tòa tī [Iû-thài] ê sìn-tô͘ lóng ū thiaⁿ-tio̍h Gōa-pang-lâng mā chiap-siū Siōng-tè ê tō-lí. 2 [Pí-tek] chiūⁿ [Iâ-lō͘-sat-léng] ê sî, hiah-ê siū kat-lé ê [Iû-thài]-lâng sìn-tô͘ kā i phoe-phêng, kóng, 3 “Lí kèng-jiân ji̍p-khì bô siū kat-lé ê lâng ê chhù kap in chòe-hé chia̍h-pn̄g!” 4 [Pí-tek] chiū chiong só͘ hoat-seng ê tāi-chì chi̍t-hāng chi̍t-hāng kā in soat-bêng: 5 “Góa tī [Iok-phàⁿ]-siâⁿ teh kî-tó ê sî ū ji̍p-sîn khòaⁿ-kìⁿ īⁿ-siōng, ū chi̍t ê mi̍h-kiāⁿ chhin-chhiūⁿ chi̍t tè tōa tè pò͘, sì-kak-thâu tiàu-teh, tùi thiⁿ-téng lūi lo̍h-lâi kàu góa bīn-chêng. 6 Góa siông-sè khòaⁿ, lāi-bīn ū tōe-chiūⁿ ê cheng-siⁿ, iá-siù, thâng-thōa, kap khong-tiong ê chiáu-lūi. 7 Góa koh thiaⁿ-tio̍h ū siaⁿ kā góa kóng, ‘[Pí-tek], khí-lâi, thâi lâi chia̍h!’ 8 Góa kóng, ‘Chú ah, choa̍t-tùi bōe ēng-tit! Góa m̄-bat chia̍h ù-òe bô chheng-khì ê mi̍h.’ 9 Hit-ê siaⁿ tē-jī piàn tùi thiⁿ-téng ìn góa kóng, ‘Siōng-tè hō͘ i chheng-khì ê, lí m̄-thang khòaⁿ-chòe ù-òe.’ 10 Chit-ê tāi-chì kè-sio̍k ū saⁿ piàn, hiah-ê mi̍h-kiāⁿ chiū lóng koh siu tò tńg-khì thiⁿ-téng. 11 Tú hit sî, tùi [Khái-sat-lī-a] phài lâi chhē góa hit saⁿ ê lâng lâi-kàu goán teh tòa hit keng chhù. 12 Sèng Sîn kiò góa tio̍h kap in khì, m̄-thang tiû-tû. Hit la̍k ê sìn-tô͘ mā kap góa chòe-hé khì [Khái-sat-lī-a]. Goán chiū lóng ji̍p-khì [Ko-nî-liû] ê chhù. 13 [Ko-nî-liû] kā goán kóng i ū khòaⁿ-kìⁿ chi̍t ê thiⁿ-sài khiā tī i ê chhù-lāi, tùi i kóng, ‘Tio̍h chhe lâng khì [Iok-phàⁿ] chhiáⁿ hit-ê kiò-chòe [Pí-tek] ê [Se-bûn] lâi. 14 I ū ōe beh kā lí kóng, thang hō͘ lí kap lí ê choân-ke lóng tit-tio̍h kiù.’ 15 Góa khai-sí kóng-ōe ê sî, Sèng Sîn kàng-lîm tī in sin-chiūⁿ, kap tong-chho͘ kàng-lîm tī lán sin-chiūⁿ kâng-khoán. 16 Góa chiū siūⁿ-khí Chú só͘ kóng ê ōe: ‘[Iok-hān] ēng chúi kā lín sóe-lé, m̄-kú lín ōe niá-siū Sèng Sîn ê sóe-lé.’ 17 Kì-jiân Siōng-tè ū chiong lán sìn Chú Iâ-so͘ Ki-tok ê sî só͘ niá-siū siâng-khoán ê un-sù sù hō͘ Gōa-pang-lâng, góa sǹg siáⁿ-lâng, ná ōe-tàng chó͘-tòng Siōng-tè ê só͘-chòe?” 18 In thiaⁿ-tio̍h chiah-ê ōe chiū tiām-khì, kui êng-kng hō͘ Siōng-tè kóng, “Siōng-tè mā ū hō͘ Gōa-pang-lâng hóe-kái lâi tit-tio̍h oa̍h-miā.” 19 In-ūi [Sū-thê-hoán] ê tāi-chì siū pek-hāi sì-sòaⁿ ê sìn-tô͘, ū-ê kàu [Hui-nî-ki], [Sài-phó͘-lō͘-su], kap [An-thê-o], in bô tùi pa̍t-lâng, chí-ū tùi [Iû-thài]-lâng thoân-tō. 20 M̄-kú kî-tiong ū chi̍t-kóa [Sài-phó͘-lō͘-su] kap [Kó͘-lī-nāi] ê sìn-tô͘ kàu [An-thê-o], mā ǹg [Hi-la̍h]-lâng thoân, tùi in kóng-khí Chú Iâ-so͘ ê hok-im. 21 Chú ê khùi-la̍t kap in tông-chāi, sìn lâi kui Chú ê lâng-gia̍h chin chōe. 22 Chit-ê siau-sit thoân kàu [Iâ-lō͘-sat-léng] ê kàu-hōe, in chiū phài [Pa-ná-pa] khì [An-thê-o]. 23 I chi̍t-ē kàu-ūi, khòaⁿ-tio̍h Siōng-tè ū sù in un-hūi, chiū hoaⁿ-hí, khoàn-bián in tāi-ke tio̍h choân-sim chi̍t-ì sìn-khò Chú. 24 [Pa-ná-pa] sī hó-lâng, hō͘ Sèng Sîn chhiong-móa, koh ū sìn-sim. Ū chin chōe lâng sìn Chú. 25 Āu-lâi, [Pa-ná-pa] khì [Tāi-sò͘] chhē [Sò-lô], 26 chhē-tio̍h chiū chhōa i khì [An-thê-o]. Chiok-chiok chi̍t nî kú, in nn̄g ê kap kàu-hōe ê lâng chū-hōe, kà-sī chin chōe lâng. Bûn-tô͘ kiò-chòe “Ki-tok-tô͘” sī tùi [An-thê-o] khai-sí. 27 Hit sî, ū kúi-nā ê sian-ti tùi [Iâ-lō͘-sat-léng] lo̍h-khì [An-thê-o]. 28 Kî-tiong chi̍t ê miâ kiò-chòe [A-ka-pò͘]; i tit-tio̍h Sèng Sîn ê chí-sī, khiā khí-lâi ū-giân kóng choân sè-kài teh-beh ū tōa ki-hng. Chit-ê tāi-chì tī [Khek-lô-tē] thóng-tī ê nî-kan kó-jiân hoat-seng. 29 Bûn-tô͘ chiū koat-tēng ta̍k ê lâng chiàu ka-kī ê lêng-le̍k koan-hiàn, thang sàng khì chín-chè tòa tī [Iû-thài] ê sìn-tô͘. 30 In chiū chiàu án-ni chòe, chiong koan-hiàn thok [Pa-ná-pa] kap [Sò-lô] kau hō͘ hia ê tiúⁿ-ló.

Sù-tô͘ hēng-toān 12

1 Chha-put-to hit-ê sî, [Hi-lu̍t]-ông hē-chhiú pek-hāi kàu-hōe ê chi̍t-kóa lâng, 2 ēng to thâi-sí [Iok-hān] ê hiaⁿ-ko [Ngá-kok]. 3 I khòaⁿ-chhut chit-ê tāi-chì ū hō͘ [Iû-thài]-lâng hoaⁿ-hí, mā sòa lo̍h-khì lia̍h [Pí-tek]. Chit-ê tāi-chì tī Tû-kàⁿ-choeh ê kî-kan hoat-seng. 4 I lia̍h [Pí-tek], kā i koaiⁿ-lo̍h kaⁿ, kau hō͘ sì pan ê kéng-ōe kò͘-siú, ta̍k pan ū sì ê peng. [Hi-lu̍t] àn-sǹg beh tī Pôaⁿ-kè-choeh āu kā i tòa chhut-lâi tī chèng-lâng ê bīn-chêng sím-phòaⁿ. 5 [Pí-tek] chiū án-ni hō͘ lâng koaiⁿ tī kaⁿ-ni̍h; kàu-hōe ūi-tio̍h i tùi Siōng-tè pek-chhiat kî-tó. 6 [Hi-lu̍t] beh tòa [Pí-tek] chhut-lâi sím-phòaⁿ ê chêng chi̍t àm, [Pí-tek] khùn tī nn̄g ê kéng-ōe ê tiong-kan, hō͘ lâng ēng nn̄g tiâu thih-liān liān-teh, koh ū kéng-ōe tī mn̂g-gōa kò͘-siú. 7 Hut-jiân Chú ê thiⁿ-sài khiā tī hia, ū kng teh chiò kaⁿ-pâng. Thiⁿ-sài tah [Pí-tek] ê keng-thâu, kā i kiò-chhíⁿ, kóng, “Kín khí-lâi!” Thih-liān chiū tùi i ê chhiú lak lo̍h-khì. 8 Thiⁿ-sài tùi i kóng, “Io-tòa hâ-leh, ôe chhēng-leh,” [Pí-tek] chiū chiàu án-ni chòe. Thiⁿ-sài koh kóng, “Gōa-saⁿ moa-leh, tè góa lâi!” 9 [Pí-tek] chiū tè i chhut-khì, m̄ chai-iáⁿ thiⁿ-sài teh chòe ê sī chin ê, siūⁿ-chòe sī teh khòaⁿ īⁿ-siōng. 10 In keng-kè kéng-ōe-só͘ tē-it koan kap tē-jī koan, lâi-kàu thàng ji̍p siâⁿ hit-ê thih-mn̂g, mn̂g chū-tōng khui, in chiū chhut-khì, kiâⁿ kè chi̍t tiâu koe; thiⁿ-sài sûi-sî lī-khui [Pí-tek]. 11 [Pí-tek] chi̍t-ē chhíⁿ, kóng, “Taⁿ góa chin-chiàⁿ chai, Chú chhe I ê thiⁿ-sài lâi kiù góa thoat-lī [Hi-lu̍t] ê chhiú kap [Iû-thài]-lâng it-chhè ê kè-bô͘.” 12 I bêng-pe̍k chit-ê chêng-hêng, chiū khì [Iok-hān], mā kiò-chòe [Má-khó] ê lāu-bú [Má-lī-a] ê chhù; tī hia ū chin chōe lâng chū-chi̍p teh kî-tó. 13 [Pí-tek] phah gōa-mn̂g, ū chi̍t ê lú-pī kiò-chòe [Lô-tāi] chhut-lâi beh khui-mn̂g. 14 I jīn-tit [Pí-tek] ê siaⁿ, hoaⁿ-hí-kah bōe-kò͘-tit khui-mn̂g, chiū cháu ji̍p-khì pò-kò kóng [Pí-tek] khiā tī mn̂g-kháu. 15 In kóng, “Lí teh khí-kông!” I kian-chhî kóng ū-iáⁿ. In chiū kóng, “Án-ni it-tēng sī i ê thiⁿ-sài.” 16 [Pí-tek] it-ti̍t phah-mn̂g. In khui-mn̂g, khòaⁿ-tio̍h [Pí-tek], hui-siông tio̍h-kiaⁿ. 17 [Pí-tek] pí-chhiú kiò in an-chēng, kā in soat-bêng Chú chhōa i tùi kaⁿ-ga̍k chhut-lâi ê keng-kè. [Pí-tek] koh hoan-hù in chiong chit-ê siau-sit pò-kò [Ngá-kok] kap chèng sìn-tô͘, chiū lī-khui khì pa̍t ê só͘-chāi. 18 Thiⁿ-kng ê sî, peng-sū m̄-chai [Pí-tek] khì tó-ūi, chiū loān chhau-chhau. 19 [Hi-lu̍t] kiò lâng khì chhē, m̄-kú chhē bô, chiū sím-mn̄g khàn-siú, hā-lēng kā in chhú-sí. Chit-ê tāi-chì í-āu, [Hi-lu̍t] lī-khui [Iû-thài] khì [Khái-sat-lī-a], tòa tī hia. 20 Tng-sî, [Hi-lu̍t] tùi [Thài-ní] kap [Se-tùn] ê jîn-bîn hui-siông siū-khì, in chiū phài tāi-piáu cho͘-thoân khì kìⁿ i. In tāi-seng sòe-ho̍k kiong-têng ê chóng-koán [Pek-la-su-to͘], siat-hoat hō͘ in thang khì kìⁿ [Hi-lu̍t], tùi i kiû-hô, in-ūi in ê niû-si̍t khò ông koán-hat ê tōe-khu teh kiong-èng. 21 Tī iok-tēng ê ji̍t-chí, [Hi-lu̍t] chhēng ông-ho̍k, chē tī chō-ūi, tùi jîn-bîn ián-káng. 22 Chèng-lâng it-ti̍t hoah kóng, “Che sī sîn ê siaⁿ, m̄-sī lâng ê siaⁿ!” 23 Chú ê thiⁿ-sài sûi-sî kā [Hi-lu̍t] phah-tó, in-ūi i bô kui êng-kng hō͘ Siōng-tè; āu-lâi i hō͘ thâng kā, chiū sí-khì. 24 Siōng-tè ê tō jú thoân-khui jú heng-ōng. 25 [Pa-ná-pa] kap [Sò-lô] oân-sêng in ê jīm-bū, chiū chhōa kiò-chòe [Má-khó] ê [Iok-hān] chòe-hé lī-khui [Iâ-lō͘-sat-léng].

Sù-tô͘ hēng-toān 13

1 [An-thê-o] ê kàu-hōe ū kúi-nā ê sian-ti kap kàu-su, chiū-sī [Pa-ná-pa], hō͘ lâng kiò-chòe “O͘-lâng” ê [Se-biān], [Kó͘-lī-nāi]-lâng [Lō͘-kiû], kap hun-hong ê ông [Hi-lu̍t] chòe-hé tōa-hàn ê [Má-liām], í-ki̍p [Sò-lô]. 2 In teh kèng-pài Chú, kìm-chia̍h ê sî, Sèng Sîn kā in kóng, “Tio̍h ūi-tio̍h góa chí-phài [Pa-ná-pa] kap [Sò-lô] khì chòe góa ho͘-tiàu in chòe ê kang-chok.” 3 In kìm-chia̍h kî-tó liáu-āu, kā in àn-chhiú, chhe-phài in chhut-khì. 4 [Pa-ná-pa] kap [Sò-lô] í-keng siū Sèng Sîn chhe-phài, chiū lo̍h-khì [Se-liû-ki], tùi hia chē-chûn khì [Sài-phó͘-lō͘-su]. 5 In kàu [Sat-lia̍p-bí], chiū tī [Iû-thài]-lâng ê hōe-tn̂g soan-káng Siōng-tè ê tō. [Iok-hān] [Má-khó] mā khì hia kā in hia̍p-chō͘. 6 In kiâⁿ-thàu choân tó lâi-kàu [Phàⁿ-hut], tī hia tú-tio̍h chi̍t ê kiâⁿ hoat-su̍t ê lâng, sī [Iû-thài]-lâng ê ké sian-ti, kiò-chòe [Pa] [Iâ-so͘]. 7 I kap chóng-tok [Sū-kiû] [Pó-lô] ū kau-pôe, chit-ê chóng-tok sī hiân-bêng ê lâng, i chhiáⁿ [Pa-ná-pa] kap [Sò-lô] lâi, beh tùi in thiaⁿ Siōng-tè ê tō. 8 Put-kò hit-ê kiâⁿ hoat-su̍t ê [Í-lū-má] --- [Í-lū-má] sī i ê [Hi-la̍h]-miâ --- hoán-tùi in nn̄g lâng, siūⁿ-beh chó͘-tòng chóng-tok chiap-siū chit-ê sìn-gióng. 9 M̄-kú [Sò-lô], mā kiò-chòe [Pó-lô], hō͘ Sèng Sîn chhiong-móa, kā i gîn, 10 kóng, “Lí chit-ê mô͘-kúi-á-kiáⁿ, lí sī it-chhè kong-gī ê tùi-te̍k, chhiong-móa ta̍k khoán siâ-ok kap khúi-chà, kò͘-ì oai-khiok Chú ê chin-lí! 11 Taⁿ, lí khòaⁿ, Chú beh kā lí hêng-hoa̍t, lí ōe chhiⁿ-mî, chiām-sî bōe khòaⁿ-kìⁿ ji̍t-kng.” [Í-lū-má] ê ba̍k-chiu sûi-sî hō͘ o͘-àm tà-teh, khí ian-n̄g; i sì-kòe bong, chhē lâng kā i khan. 12 Chóng-tok khòaⁿ-tio̍h só͘ hoat-seng ê tāi-chì chiū sìn, tùi Chú ê kà-sī kám-kak chin hi-kî. 13 [Pó-lô] kap i ê tâng-phōaⁿ tùi [Phàⁿ-hut] khui-chûn, kàu [Pông-hui-lī-a] ê [Pia̍t-ka]; [Iok-hān] [Má-khó] tī hia lī-khui in, tò-khì [Iâ-lō͘-sat-léng]. 14 In tùi [Pia̍t-ka] kè-sio̍k hêng-thêng lâi-kàu [Pí-se-tí] ê [An-thê-o]. Tī An-hioh-ji̍t in ji̍p-khì hōe-tn̂g, chē lo̍h-khì. 15 [Mô͘-se] ê Lu̍t-hoat kap sian-ti-su tha̍k liáu-āu, hōe-tn̂g ê chú-koán chhe lâng lâi kā in kóng, “Hiaⁿ-tī, lín nā ū ōe beh khoàn-bián tāi-ke, chhiáⁿ lín kóng.” 16 [Pó-lô] chiū khiā khí-lâi, pí-chhiú-sè, kóng: “[Í-sek-lia̍t]-lâng kap kèng-ùi Siōng-tè ê chèng-lâng, chhiáⁿ thiaⁿ! 17 [Í-sek-lia̍t]-lâng ê Siōng-tè ū kéng-soán lán ê chó͘-sian, tī in kià-ku [Ai-ki̍p] ê sî hō͘ in chiâⁿ-chòe tōa ê bîn-cho̍k, ēng I tōa koân-lêng ê chhiú chhōa in chhut [Ai-ki̍p], 18 koh tī khòng-iá khoan-iông in sì-cha̍p nî kú. 19 I húi-bia̍t [Ka-lâm] tōe-khu chhit ê bîn-cho̍k liáu-āu, chiong hit-ê thó͘-tōe hō͘ in chòe sán-gia̍p, 20 iok sì-pah gō͘-cha̍p nî kú. “Í-āu Siōng-tè ū ūi-tio̍h in siat-li̍p sū-su, it-ti̍t kàu sian-ti [Sat-bó-ní] ê sî. 21 Āu-lâi in iau-kiû ài ū chi̍t ê ông, Siōng-tè chiū tùi [Piān-ngá-bín] chi-cho̍k soán-chhut [Ki-sū] ê kiáⁿ [Sò-lô], hō͘ i choh-ông sì-cha̍p nî kú. 22 Siōng-tè hòe [Sò-lô] liáu-āu, jīm-bēng [Tāi-pi̍t] chòe in ê ông. Koan-hē [Tāi-pi̍t], I ū án-ni kóng, ‘Góa chhē-tio̍h [Iâ-se] ê hō͘-tāi [Tāi-pi̍t], i sī ha̍h góa sim-ì ê lâng, ta̍k hāng tāi-chì chun-thàn góa ê chí-ì.’ 23 Siōng-tè chiàu I ê èng-ún, tùi [Tāi-pi̍t] ê hō͘-tāi hō͘ [Í-sek-lia̍t]-lâng chi̍t ūi Kiù-chú, chiū-sī Iâ-so͘. 24 Iâ-so͘ chhut-lâi í-chêng, [Iok-hān] tùi chèng [Í-sek-lia̍t]-lâng thoân-tō, kiò in tio̍h hóe-kái lâi niá-siū sóe-lé. 25 [Iok-hān] teh-beh kiat-sok i ê kang-chok ê sî, tùi chèng-lâng kóng, ‘Lín siūⁿ góa sī sím-mi̍h-lâng? Góa m̄-sī lín teh thèng-hāu Hit-ūi, m̄-kú ū chi̍t ūi tè tī góa āu-bīn teh lâi, góa liân kā I tháu ôe-tòa to bōe kham-tit.’ 26 “Kok ūi hiaⁿ-tī, [A-pek-la-hán] ê kiáⁿ-sun kap lín tiong-kan kèng-ùi Siōng-tè ê chèng-lâng, chit-ê chín-kiù ê sìn-sit í-keng ū thoân hō͘ lán. 27 In-ūi tòa tī [Iâ-lō͘-sat-léng] ê lâng kap in ê koaⁿ-tiúⁿ m̄-bat Iâ-so͘, mā bô bêng-pe̍k ta̍k ê An-hioh-ji̍t só͘ tha̍k sian-ti ê ōe, chiū kā I tēng-chōe, che tú èng-giām sian-ti ê ū-giân. 28 Sui-jiân in chhē bōe chhut kā I tēng sí-chōe ê lí-iû, iáu-kú iau-kiû [Pí-lia̍p-to] kā I chhú sí-hêng. 29 Sèng-keng só͘ kì-chài koan-hē Iâ-so͘ it-chhè ê sū lóng oân-sêng, in chiū chiong I tùi si̍p-jī-kè téng hû lo̍h-lâi, hē tī bōng-ni̍h. 30 Chóng-sī Siōng-tè ū hō͘ I tùi sí-lâng tiong koh-oa̍h, 31 ū chi̍t tōaⁿ sî-kan, I hián-hiān hō͘ hiah-ê tùi [Ka-lī-lī] tè I lâi [Iâ-lō͘-sat-léng] ê lâng khòaⁿ-kìⁿ. Chiah-ê lâng hiān-chāi tī chèng-lâng tiong teh choh Iâ-so͘ ê kiàn-chèng-jîn. 32 Goán chiong Siōng-tè èng-ún hō͘ chó͘-sian ê hok-im thoân hō͘ lín, 33 in-ūi I hō͘ Iâ-so͘ koh-oa̍h, chit-ê èng-ún í-keng ū tùi lán chiah-ê choh kiáⁿ-sun ê èng-giām, chhin-chhiūⁿ Si-phian tē-jī phiⁿ só͘ kì-chài: Lí sī góa ê Kiáⁿ, Góa kin-á-ji̍t siⁿ lí. 34 Koan-hē hō͘ I tùi sí-lâng tiong koh-oa̍h bô koh hiú-nōa ê sū, Siōng-tè kóng: Góa beh chiong tùi Tāi-pi̍t só͘ èng-ún hit-ê sîn-sèng khó-khò ê un-tián sù hō͘ lín. 35 Só͘-í, tī Si-phian pa̍t ê só͘-chāi mā án-ni kóng: Lí bōe hō͘ lí ê Sèng-chiá hiú-nōa. 36 [Tāi-pi̍t] chāi-siⁿ ê sî ū chun-thàn Siōng-tè ê kè-ōe. I sí liáu-āu bâi-chòng tī chó͘-sian ê piⁿ-a, hiú-nōa lah. 37 M̄-kú Siōng-tè hō͘ I tùi sí-lâng tiong koh-oa̍h Hit-ūi bô hiú-nōa. 38 Só͘-í, kok ūi hiaⁿ-tī, lín eng-kai chai, sià-chōe ê sìn-sit sī tùi chit-ūi Iâ-so͘ thoân hō͘ lín; lín khò [Mô͘-se] ê Lu̍t-hoat bōe-tàng hō͘ lín thoat-lī chōe, m̄-kú só͘-ū sìn Iâ-so͘ ê lâng lóng ōe-tàng tùi chōe tit-tio̍h tháu-pàng. 40 Só͘-í lín tio̍h kín-sīn, chiah-bián hō͘ sian-ti só͘ kóng ê lîm-kàu lín: 41 Biáu-sī Siōng-tè ê lâng ah, tio̍h khòaⁿ, tio̍h kiaⁿ, tio̍h bia̍t-bông! In-ūi tī lín ê sî-tāi góa só͘ chòe ê sū, ū lâng kā lín soat-bêng, lín mā m̄-sìn.” 42 [Pó-lô] kap [Pa-ná-pa] tùi hōe-tn̂g chhut-khì ê sî, chèng-lâng iau-chhiáⁿ in tī āu An-hioh-ji̍t koh lâi kóng chiah-ê tāi-chì hō͘ in thiaⁿ. 43 Sòaⁿ-hōe āu, chin chōe [Iû-thài]-lâng kap kái-chong ji̍p [Iû-thài]-kàu hiah-ê khiân-sêng ê Gōa-pang-lâng chiū tè [Pó-lô] kap [Pa-ná-pa] chhut-khì. Nn̄g ê sù-tô͘ kap in tâm-ōe, khoàn-bián in tio̍h khîⁿ-tiâu Siōng-tè ê un-tián. 44 Koh lo̍h-khì ê An-hioh-ji̍t, choân siâⁿ ê lâng lóng chū-chi̍p, beh thiaⁿ Chú ê tō. 45 [Iû-thài]-lâng khòaⁿ-tio̍h lâng hiah-chōe, sim-lāi chhiong-móa chi̍t-tò͘, hoán-pok [Pó-lô] só͘ kóng ê ōe, koh kā i bú-jio̍k. 46 M̄-kú [Pó-lô] kap [Pa-ná-pa] ióng-kám soan-káng kóng, “Siōng-tè ê tō tio̍h seng thoân hō͘ lín, lín kèng-jiân kū-choa̍t, ka-kī toàn-tēng bô chu-keh tit-tio̍h éng-oán ê oa̍h-miā, só͘-í goán chiah choán-ǹg Gōa-pang-lâng. 47 In-ūi Chú bat án-ni bēng-lēng goán kóng: Góa í-keng chí-tēng lí chòe Gōa-pang-lâng ê kng, thang hō͘ lí chiong góa ê chín-kiù tòa kàu thiⁿ-piⁿ hái-kak.” 48 Gōa-pang-lâng thiaⁿ-tio̍h chiah-ê ōe lóng chin hoaⁿ-hí, kui êng-kng hō͘ Chú ê tō. Hiah-ê í-keng siū Siōng-tè kéng-soán thang tit-tio̍h éng-oán ê oa̍h-miā ê lâng lóng chiâⁿ-chòe sìn-tô͘. 49 Tùi án-ni Chú ê tō thoân-piàn hit tōe-hng. 50 M̄-kú [Iû-thài]-lâng siàn-tōng khiân-sêng chun-kùi ê hū-lú kap siâⁿ-lāi ū tōe-ūi ê jîn-sū lâi pek-hāi [Pó-lô] kap [Pa-ná-pa], chiong in kóaⁿ chhut-kéng. 51 In nn̄g lâng chiū tī chèng-lâng ê bīn-chêng kā kha-ni̍h ê thô͘-hún pōaⁿ hiat-ka̍k piáu-sī khòng-gī, jiân-āu khì [Í-ko-liām]. 52 Bûn-tô͘ móa-sim hoaⁿ-hí, koh siū Sèng Sîn chhiong-móa.

Sù-tô͘ hēng-toān 14

1 Siâng-khoán ê tāi-chì mā hoat-seng tī [Í-ko-liām]. [Pó-lô] kap [Pa-ná-pa] ji̍p-khì [Iû-thài]-lâng ê hōe-tn̂g káng-tō, kiat-kó ū chin chōe [Iû-thài]-lâng kap [Hi-la̍h]-lâng lâi sìn. 2 M̄-kú hiah-ê m̄-sìn ê [Iû-thài]-lâng siàn-tōng Gōa-pang-lâng, hō͘ in iàm-ò͘ⁿ sìn-tô͘, tùi in khí hoán-kám. 3 Put-kò in nn̄g lâng tī hia tòa chin kú, khò Chú ióng-kám soan-káng; Chú sù in lêng-le̍k kiâⁿ sîn-jiah kî-sū, chèng-bêng in só͘ thoân un-tián ê tō-lí sī chin-si̍t. 4 Siâⁿ-lāi ê kûn-chiòng soah hun-lia̍t, ū-ê óa [Iû-thài]-lâng, ū-ê óa sù-tô͘. 5 Hit sî, Gōa-pang-lâng kap [Iû-thài]-lâng í-ki̍p in ê koaⁿ-tiúⁿ kè-bô͘ siong-hāi sù-tô͘, beh ēng chio̍h-thâu kā in tìm. 6 Sù-tô͘ chai chit-ê tāi-chì, chiū tô-pī khì [Lū-ko-nî] ê [Lō͘-sū-tek] kap [Te̍k-pì] nn̄g ê siâⁿ í-ki̍p chiu-ûi ê tōe-hng, 7 tī hia kè-sio̍k thoân hok-im. 8 Tī [Lō͘-sū-tek], ū chi̍t ê lâng nńg-kha, put-sî chē-teh, tùi chhut-sì chiū bōe kiâⁿ. 9 I thiaⁿ [Pó-lô] káng-tō; [Pó-lô] chù-ba̍k kā i khòaⁿ, khòaⁿ-kìⁿ i ū sìn-sim thang tit-tio̍h i-tī, 10 chiū tōa-siaⁿ kóng, “Khiā khí-lâi, khiā ti̍t-ti̍t!” Hit-ê lâng chiū thiàu khí-lâi kiâⁿ. 11 Kûn-chiòng khòaⁿ-tio̍h [Pó-lô] ê só͘-chòe, chiū ēng [Lū-ko-nî] ê ōe tōa-siaⁿ hoah, “Ū sîn-bêng hòa-sin chòe lâng kàng-lîm tī lán tiong-kan lah!” 12 In chheng [Pa-ná-pa] chòe [Tiū-su], [Pó-lô] chòe [Hi-ní-bí], in-ūi i sī chú-káng-chiá. 13 Siâⁿ-gōa ū chi̍t ê [Tiū-su]-biō ê chè-si, i khan gû koh the̍h hoe-khoân lâi-kàu siâⁿ-mn̂g-kháu, beh kap chèng-lâng chòe-hé hiàn-chè. 14 [Pa-ná-pa] kap [Pó-lô] nn̄g ê sù-tô͘ thiaⁿ-tio̍h chiū thiah-phòa saⁿ, chông ji̍p-khì kûn-chiòng lāi-bīn, hoah kóng, 15 “Lín ná teh chòe chit khoán tāi-chì? Goán mā-sī lâng, kap lín lóng kâng-khoán. Goán lâi chia thoân hok-im sī beh hō͘ lín lī-khui hu-ké ê ngó͘-siōng, lâi kui-ǹg hit-ūi oa̍h-oa̍h ê Siōng-tè, I sī thiⁿ, tōe, hái, kap kî-tiong bān-mi̍h ê Chhòng-chō-chú. 16 Chá-chêng ê sè-tāi, I iông-ún bān-bîn kiâⁿ ka-kī ê lō͘. 17 Put-kò I it-ti̍t ū thong-kè só͘ chòe ê hó-sū lâi hián-bêng I ka-kī, chiū-sī tùi thiⁿ lo̍h-hō͘, chiàu-sî siu-sêng, hō͘ lín chia̍h-mi̍h chhiong-chiok, sim-lāi hoaⁿ-hí boán-chiok.” 18 Sù-tô͘ kóng chiah-ê ōe chiah lím-lím-á chó͘-chí kûn-chiòng tùi in hiàn-chè. 19 Ū chi̍t-kóa tùi [Pí-se-tí] ê [An-thê-o] kap [Í-ko-liām] lâi ê [Iû-thài]-lâng siàn-tōng kûn-chiòng ēng chio̍h-thâu tìm [Pó-lô], siūⁿ-kóng i í-keng sí, chiū kā i thoa chhut-khì siâⁿ-gōa. 20 Bûn-tô͘ ûi óa-lâi ê sî, i khiā khí-lâi, kiâⁿ ji̍p-khì siâⁿ-lāi. Keh-ji̍t, i kap [Pa-ná-pa] chòe-hé khì [Te̍k-pì]. 21 [Pó-lô] kap [Pa-ná-pa] tī [Te̍k-pì] thoân hok-im, hō͘ chin chōe lâng chiâⁿ-chòe bûn-tô͘. Āu-lâi in tò-khì [Lō͘-sū-tek], [Í-ko-liām], kap [An-thê-o], 22 iân-lō͘ kian-kò͘ bûn-tô͘ ê sìn-sim, kó͘-lē in chhî-siú sìn-gióng, koh tùi in kóng, “Lán tio̍h keng-kè chin chōe khó͘-lān chiah ōe-tàng chìn-ji̍p Siōng-tè-kok.” 23 In nn̄g lâng tī ta̍k ê kàu-hōe siat-li̍p tiúⁿ-ló, ēng kìm-chia̍h kî-tó chiong in kau-thok hō͘ só͘ sìn ê Chú. 24 In nn̄g lâng keng-kè [Pí-se-tí] lâi-kàu [Pông-hui-lī-a], 25 tī [Pia̍t-ka] káng-tō liáu-āu lo̍h-khì [A-tāi-lī], 26 tùi hia chē-chûn tò-khì [An-thê-o]; chiū-sI tī hia kàu-hōe ū chiong in kau-thok tī Siōng-tè ê un-tián, chhe in chhut-khì chòe hiān-chāi í-keng oân-sêng ê kang-chok. 27 In kàu [An-thê-o] chiū tiàu-chi̍p kàu-hōe ê chèng sìn-tô͘, chiong Siōng-tè kap in chòe-hé chòe ê it-chhè, í-ki̍p I kā Gōa-pang-lâng khui sìn-gióng ê mn̂g ê keng-kè, lóng tùi in pò-kò. 28 Āu-lâi in kap chèng bûn-tô͘ tòa chi̍t tōaⁿ sî-kan.

Sù-tô͘ hēng-toān 15

1 Ū kúi-nā ê lâng tùi [Iû-thài] lo̍h-lâi [An-thê-o] teh kà-sī sìn-tô͘ kóng, “Lín nā bô chiàu [Mô͘-se] ê kui-kú siū kat-lé chiū bōe tit-tio̍h kiù.” 2 [Pó-lô] í-ki̍p [Pa-ná-pa] kap in ū ke̍k-lia̍t ê cheng-piān. Ūi-tio̍h chit-ê būn-tôe, tāi-ke koat-tēng phài [Pó-lô], [Pa-ná-pa], kap in tiong-kan kúi-nā ê lâng chiūⁿ [Iâ-lō͘-sat-léng] khì kìⁿ sù-tô͘ í-ki̍p tiúⁿ-ló, kap in chham-siông. 3 Kàu-hōe ê lâng sàng in chhut-hoat. In keng-kè [Hui-nî-ki] kap [Sat-má-lī-a], tùi chèng sìn-tô͘ pò-kò Gōa-pang-lâng kui Chú ê sū. Tāi-ke thiaⁿ liáu lóng chin hoaⁿ-hí. 4 In kàu [Iâ-lō͘-sat-léng] ê sî siū tio̍h kàu-hōe, sù-tô͘, kap tiúⁿ-ló hoan-gêng, in chiū chiong Siōng-tè kap in tông-chāi só͘ chòe it-chhè ê sū kā in pò-kò. 5 Put-kò ū kúi-nā ê sio̍k Hoat-lī-sài-phài ê sìn-tô͘ khiā khí-lâi kóng, “Gōa-pang-lâng it-tēng tio̍h siū kat-lé, koh tio̍h bēng-lēng in chun-siú [Mô͘-se] ê Lu̍t-hoat.” 6 Ūi-tio̍h chit-ê būn-tôe, sù-tô͘ kap tiúⁿ-ló khui-hōe thó-lūn. 7 Piān-lūn chin kú liáu-āu, [Pí-tek] khiā khí-lâi, kóng, “Kok ūi hiaⁿ-tī, lín chai Siōng-tè chá chiū tùi lín tiong-kan kéng-soán góa, thang hō͘ Gōa-pang-lâng thiaⁿ góa só͘ thoân hok-im ê sìn-sit lâi sìn. 8 Hit-ūi chai lâng lāi-sim ê Siōng-tè ū sù Sèng Sîn hō͘ Gōa-pang-lâng, kap hō͘ lán kâng-khoán, chèng-bêng I ū chiap-la̍p in. 9 Tùi sìn, I ū kā in ê sim sóe chheng-khì; I tùi-thāi lán kap in lóng bô chha-pia̍t. 10 Kì-jiân sī án-ni, lín sī án-chóaⁿ iáu teh chhì-thàm Siōng-tè, chiong lán ê chó͘-sian kap lán taⁿ bōe-khí ê tàⁿ khòa tī hiah-ê bûn-tô͘ ê keng-thâu téng? 11 M̄ eng-kai án-ni, lán siong-sìn tio̍h thong-kè Chú Iâ-so͘ ê un-tián chiah ōe tit-tio̍h kiù; in mā-sī án-ni.” 12 Tāi-ke lóng chēng-chēng thiaⁿ [Pa-ná-pa] kap [Pó-lô] kóng-khí Siōng-tè thong-kè in tī Gōa-pang-lâng ê tiong-kan só͘ kiâⁿ it-chhè ê sîn-jiah kî-sū. 13 In kóng soah, [Ngá-kok] kóng, “Kok ūi hiaⁿ-tī, chhiáⁿ thiaⁿ góa kóng. 14 Tú-chiah [Se-bûn] ū kóng-tio̍h Siōng-tè tong-chho͘ án-chóaⁿ khòaⁿ-kò͘ Gōa-pang-lâng, tùi in tiong-kan kéng lâng lâi kui-sio̍k I ka-kī. 15 Sian-ti ū kóng-khí kap chit-ê siâng-khoán ì-sù ê ōe. Chiàu Sèng-keng só͘ kì-chài: 16 Chú kóng: Chiah-ê sū í-āu góa beh tò tńg-lâi, beh tiông-kiàn í-keng tó-hoāi ê [Tāi-pi̍t] ê ke. Góa beh tùi hong-hòe tiong koh kā i khí-chō, beh têng-sin kā i kiàn-li̍p khí-lâi, 17 thang hō͘ só͘-chhun ê lâng --- só͘-ū siū ho͘-tiàu kui góa ê Gōa-pang-lâng --- lóng ōe chhē-kiû Chú. Hit-ūi chiong chit-ê sū tùi kó͘-chá chiū hō͘ lâng chai ê Chú án-ni soan-pò͘. 19 “Só͘-í, chiàu góa ê phòaⁿ-toàn, lán m̄-thang kā hiah-ê kui-ǹg Siōng-tè ê Gōa-pang-lâng tiau-lân, 20 put-kò tio̍h siá-phoe hoan-hù in m̄-thang chia̍h pài ngó͘-siōng bô chheng-khì ê mi̍h; m̄-thang îm-loān; m̄-thang chia̍h ni̍h-sí ê cheng-siⁿ kap huih. 21 In-ūi tùi kó͘-chá í-lâi, [Mô͘-se] ê Lu̍t-hoat tī ta̍k ê siâⁿ-chhī lóng ū lâng soan-káng, ta̍k ê An-hioh-ji̍t, tī ta̍k ê hōe-tn̂g lóng ū lâng soan-tho̍k.” 22 Hit sî, sù-tô͘ kap tiúⁿ-ló, í-ki̍p choân kàu-hōe koat-tēng beh tùi in tiong-kan kéng lâng, chhe in kap [Pó-lô], [Pa-ná-pa] chòe-hé khì [An-thê-o]. In só͘ soán-phài ê sī kiò-chòe [Pa-sat-pa] ê [Iû-tāi] kap [Se-la]. Chit nn̄g lâng tī hiaⁿ-tī tiong sī léng-tō jîn-bu̍t. 23 Sù-tô͘ kau-tài in tòa khì ê phoe án-ni siá: “Goán chiah-ê choh sù-tô͘ kap tiúⁿ-ló ê hiaⁿ-tī, kā tòa tī [An-thê-o], [Sū-lī-a], kap [Ki-lī-ka] ê Gōa-pang-lâng sìn-tô͘ chhéng-an! 24 Thiaⁿ-kóng ū tùi goán chia chhut-khì ê lâng khì lín hia, in ēng goán bô chí-sī in kóng ê ōe kā lín kiáu-jiáu, hō͘ lín ê sim siū-tio̍h jiáu-loān. 25 Ūi-tio̍h án-ni, goán tâng-sim ha̍p-ì koat-tēng kéng lâng, chhe in kap goán só͘ kèng-ài ê [Pó-lô] í-ki̍p [Pa-ná-pa] khì lín hia; 26 chit nn̄g lâng ūi-tio̍h lán ê Chú Iâ-so͘ Ki-tok kam-goān hiàn sìⁿ-miā. 27 Só͘-í, goán chhe-phài [Iû-tāi] kap [Se-la] khì, in ōe chhin-chhùi kā lín kóng kap phoe-lāi só͘ siá kâng-khoán ê tāi-chì. 28 In-ūi Sèng Sîn kap goán koat-tēng, ē-bīn chiah-ê tiōng-iàu sū-hāng í-gōa, bô koh ke-thiⁿ lín ê hū-tam: 29 Chiū-sī m̄-thang chia̍h pài ngó͘-siōng ê mi̍h; m̄-thang chia̍h huih kap ni̍h-sí ê cheng-siⁿ; mā m̄-thang îm-loān. Chiah-ê tāi-chì lín nā bô hoān-tio̍h chiū hó. Goān lín pêng-an!” 30 In siū-phài lo̍h-khì [An-thê-o], tī hia tiàu-chi̍p choân-thé sìn-tô͘, chiong phoe kau hō͘ in. 31 Chèng-lâng tha̍k-tio̍h hit tiuⁿ phoe, in-ūi kó͘-lē ê ōe móa-sim hoaⁿ-hí. 32 [Iû-tāi] kap [Se-la], in pún-sin mā-sī sian-ti, ū tùi sìn-tô͘ kóng chin chōe kó͘-lē ê ōe, kian-kò͘ in ê sìn-sim. 33 In tī hia tòa chi̍t tōaⁿ sî-kan liáu-āu siū sìn-tô͘ hoan-sàng, pêng-an tò-khì chhe in lâi ê lâng ê só͘-chāi. 35 [Pó-lô] kap [Pa-ná-pa] kè-sio̍k tòa tī [An-thê-o]; in kap kî-tha chin chōe lâng chòe-hé kà-sī koh soan-káng Chú ê sìn-sit. 36 Kúi-nā ji̍t āu, [Pó-lô] tùi [Pa-ná-pa] kóng, “Lán koh lâi-khì chêng thoân Chú ê sìn-sit hiah-ê siâⁿ-chhī thàm sìn-tô͘, khòaⁿ in ê chêng-hêng.” 37 [Pa-ná-pa] ài-beh chhōa kiò-chòe [Má-khó] ê [Iok-hān] chòe-hé khì, 38 m̄-kú [Pó-lô] siūⁿ-kóng bô sek-ha̍p, in-ūi [Má-khó] bat tī [Pông-hui-lī-a] lī-khui in, bô kè-sio̍k kap in chòe-kang. 39 In nn̄g lâng ì-kiàn ke̍k-lia̍t chhiong-tu̍t, tì-kàu tio̍h hun-khui. [Pa-ná-pa] chhōa [Má-khó] chē-chûn khì [Sài-phó͘-lō͘-su]; 40 [Pó-lô] kéng [Se-la], sìn-tô͘ chiong i kau-thok tī Chú ê un-tián, i chiū chhut-hoat. 41 I kiâⁿ-thàu [Sū-lī-a] kap [Ki-lī-ka], kian-kò͘ ta̍k kàu-hōe ê sìn-sim.

Sù-tô͘ hēng-toān 16

1 [Pó-lô] koh khì [Te̍k-pì] kap [Lō͘-sū-tek], tī hia ū chi̍t ê bûn-tô͘ kiò-chòe [Thê-mô͘-thài], lāu-bú sī [Iû-thài]-lâng, sī sìn-tô͘, lāu-pē sī [Hi-la̍h]-lâng. 2 [Lō͘-sū-tek] kap [Í-ko-liām] ê sìn-tô͘ lóng chheng-chàn i. 3 [Pó-lô] siūⁿ-beh chhōa i chòe-hé khì, chiū kā i kiâⁿ kat-lé, in-ūi hit só͘-chāi ê [Iû-thài]-lâng lóng chai i ê lāu-pē sī [Hi-la̍h]-lâng. 4 In chi̍t ê siâⁿ kè chi̍t ê siâⁿ chiong [Iâ-lō͘-sat-léng] ê sù-tô͘ kap tiúⁿ-ló só͘ gī-koat ê kui-lē kau hō͘ in khì chun-siú. 5 Tùi án-ni, ta̍k kàu-hōe ê sìn-sim ná kian-kò͘, jîn-sò͘ ji̍t-ji̍t ke-thiⁿ. 6 In-ūi Sèng Sîn chó͘-chí [Pó-lô] kap [Se-la] tī [A-se-a]-séng thoân-tō, in chiū tùi [Hut-lū-ka] kap [Ka-lia̍p-thài] ê tōe-hng keng-kè. 7 In lâi-kàu [Múi-se-a] pian-kài ê sî, siūⁿ-beh ji̍p-khì [Pí-chhui-nî]-séng, put-kò Iâ-so͘ ê Sîn m̄-chún, 8 in chiū se̍h kè [Múi-se-a], lo̍h-khì [Te̍k-lô-a]. 9 Hit àm, [Pó-lô] khòaⁿ-kìⁿ īⁿ-siōng, ū chi̍t ê [Má-kî-tùn]-lâng khiā-teh, kā i khún-kiû kóng, “Chhiáⁿ kè lâi [Má-kî-tùn] pang-chān goán!” 10 [Pó-lô] khòaⁿ-kìⁿ chit-ê īⁿ-siōng liáu-āu, goán sûi-sî chún-pī beh khì hia, in-ūi khak-sìn Siōng-tè ū ho͘-tiàu goán khì thoân hok-im hō͘ [Má-kî-tùn]-lâng. 11 Goán tùi [Te̍k-lô-a] khui-chûn, ti̍t-ti̍t khui-khì [Sat-mô͘-te̍k-lat], keh-ji̍t kàu [Nî-a-pho-lí]. 12 Goán tùi hia lâi-kàu [Má-kî-tùn] tē-it khu ê siâⁿ [Hui-li̍p-pí]; chit-ê siâⁿ sī [Lô-má] ê si̍t-bîn-khu. Goán tī hia tòa kúi-nā ji̍t. 13 Tī An-hioh-ji̍t, goán chhut-siâⁿ khì hô-piⁿ, siūⁿ-kóng tī hia ū kî-tó ê só͘-chāi. Goán chē lo̍h-khì, chiū tùi chū-chi̍p tī hia ê hū-lú kóng tō-lí. 14 Ū chi̍t ê bōe chí-sek-pò͘ ê [Chhui-ngá-chhui-lat] ê hū-lú, miâ kiò-chòe [Lū-tí-a], sī kèng-ùi Siōng-tè ê lâng, i mā lâi thiaⁿ. Chú khui i ê sim, hō͘ i choan-sim thiaⁿ [Pó-lô] só͘ kóng ê ōe. 15 I kap choân-ke lóng siū sóe-lé, āu-lâi i khún-kiû goán kóng, “Lín nā khòaⁿ góa chòe chin-si̍t sìn Chú ê, chhiáⁿ lâi tòa goán tau.” I án-ni kā goán kiông lâu-teh, goán chiū lâu lo̍h-lâi. 16 Ū chi̍t ji̍t, goán beh khì kî-tó ê só͘-chāi, ū tú-tio̍h chi̍t ê hō͘ pok-kòa ê sîn hū-sin ê cha-bó͘ lô͘-lē, i khò chiam-pok hō͘ chú-lâng thàn chin chōe chîⁿ. 17 I tè tī [Pó-lô] kap goán āu-bīn, tōa-siaⁿ hoah, “Chiah-ê lâng sī Chì-koân Siōng-tè ê lô͘-po̍k, beh tùi lín soan-pò͘ tit-kiù ê tō-lō͘.” 18 I chin chōe ji̍t lóng án-ni hoah; [Pó-lô] kám-kak chin thó-ià, chiū oa̍t kè-khì kā hit-ê siâ-sîn kóng, “Góa hōng Iâ-so͘ Ki-tok ê miâ bēng-lēng lí tùi i chhut-khì!” Siâ-sîn sûi-sî tùi i chhut-khì. 19 Cha-bó͘ lô͘-lē ê chú-lâng khòaⁿ-tio̍h in thàn-chîⁿ ê ǹg-bāng lóng bô-khì, chiū kā [Pó-lô] kap [Se-la] khiú-teh, thoa in khì chhī-tiong-sim kìⁿ koaⁿ-oân, 20 kau hō͘ [Lô-má] koaⁿ-tiúⁿ, khòng-kò, kóng, “Chiah-ê lâng lâi teh jiáu-loān lán ê siâⁿ; in sī [Iû-thài]-lâng, 21 teh thoân lán [Lô-má]-lâng m̄ eng-kai chiap-siū á-sī chun-siú ê hong-sio̍k si̍p-koàn.” 22 Kûn-chiòng chham-teh kong-kek, koaⁿ-tiúⁿ chiū pak [Pó-lô] kap [Se-la] ê saⁿ, bēng-lēng lâng ēng kùn-á kā in kòng. 23 Peng-teng kā in kòng chin chōe ē liáu-āu, kā in koaiⁿ-lo̍h kaⁿ, koh bēng-lēng kò͘-kaⁿ ê lâng giâm-bi̍t khàn-siú. 24 Kò͘-kaⁿ ê lâng chiap-tio̍h bēng-lēng, chiū kā in koaiⁿ-lo̍h lāi-kaⁿ, siang-kha khàu tī chhâ-kông. 25 Chha-put-to pòaⁿ-mî, [Pó-lô] kap [Se-la] teh kî-tó, gîm-si o-ló Siōng-tè, kî-tha ê hoān-lâng lóng chù-ì teh thiaⁿ. 26 Hut-jiân ū tōa tōe-tāng, tì-kàu kaⁿ-ga̍k ê tōe-ki iô-choah; só͘-ū ê kaⁿ-mn̂g sûi-sî khui, hoān-lâng ê só-liān lóng lak-khì. 27 Kò͘-kaⁿ ê lâng chhíⁿ khí-lâi, khòaⁿ-tio̍h kaⁿ-mn̂g khui-khui, siūⁿ-kóng hoān-lâng lóng tô-cháu, chiū pu̍ih-to beh chū-sat. 28 [Pó-lô] tōa-siaⁿ hoah, “M̄-thang siong-hāi ka-kī, goán lóng tī chia.” 29 Kò͘-kaⁿ ê lâng kiò lâng gia̍h-teng lâi, chông ji̍p-khì, phi̍h-phi̍h-chhoah phak tī [Pó-lô] kap [Se-la] ê kha-chêng, 30 jiân-āu chhōa in chhut-khì, mn̄g kóng, “Sian-siⁿ, góa tio̍h chòe sím-mi̍h chiah ōe tit-tio̍h kiù?” 31 In kóng, “Tio̍h sìn Chú Iâ-so͘, lí kap lí ê ke chiū ōe tit-tio̍h kiù.” 32 In chiū chiong Chú ê tō-lí kóng hō͘ i kap in choân-ke ê lâng thiaⁿ. 33 Hit mî, kò͘-kaⁿ ê lâng chhōa [Pó-lô] kap [Se-la] khì sóe khang-chhùi, jiân-āu i kap choân-ke ê lâng lóng sûi-sî siū sóe-lé. 34 I chhōa in ji̍p-khì i ê chhù, chún-pī mi̍h-kiāⁿ hō͘ in chia̍h. I kap choân-ke lóng tōa hoaⁿ-hí, in-ūi in í-keng sìn Siōng-tè. 35 Keh chá-khí, [Lô-má] ê koaⁿ-tiúⁿ phài kéng-koaⁿ lâi, kóng, “Kā hit nn̄g ê lâng pàng chhut-khì.” 36 Kò͘-kaⁿ ê lâng chiong chiah-ê ōe kā [Pó-lô] kóng, “Koaⁿ-tiúⁿ ū kau-tài beh pàng lín chhut-khì; taⁿ lín chhut-lâi, thang pêng-an lī-khui.” 37 M̄-kú [Pó-lô] tùi kéng-koaⁿ kóng, “Goán sī [Lô-má] kong-bîn, bô siū sím-mn̄g chiū tī chèng-lâng ê bīn-chêng ēng kùn-á kā goán kòng, koh kā goán koaiⁿ-lo̍h kaⁿ. Chit-chūn in beh tiām-tiām-á kā goán kóaⁿ chhut-khì sī-bô? Bōe ēng-tit! Kiò [Lô-má] koaⁿ-tiúⁿ chhin-sin lâi chhōa goán chhut-khì!” 38 Kéng-koaⁿ chiong chiah-ê ōe tùi [Lô-má] ê koaⁿ-tiúⁿ pò-kò. In chi̍t-ē thiaⁿ-tio̍h [Pó-lô] kap [Se-la] sī [Lô-má] kong-bîn chiū chin kiaⁿ-hiâⁿ, 39 lâi kaⁿ-ni̍h khǹg in, chhōa in chhut-lâi, chhiáⁿ in lī-khui hit-ê siâⁿ. 40 [Pó-lô] kap [Se-la] lī-khui kaⁿ-ga̍k, chiū khì [Lū-tí-a] in tau, kap sìn-tô͘ kìⁿ-bīn, kā in kó͘-lē liáu-āu chiah lī-khui.

Sù-tô͘ hēng-toān 17

1 [Pó-lô] kap [Se-la] keng-kè [Àm-hui-pho-lí] kap [A-pho-lô-nî-a], lâi-kàu [Thiap-sat-lô-nî-ka], tī hia ū [Iû-thài]-lâng ê hōe-tn̂g. 2 [Pó-lô] chiàu si̍p-koàn ji̍p-khì hōe-tn̂g, liân-sòa saⁿ ê An-hioh-ji̍t, ín-iōng Sèng-keng kap lâng piān-lūn. 3 I káng-kái koh chèng-bêng Ki-tok it-tēng tio̍h siū-hāi, jiân-āu tùi sí-lâng tiong koh-oa̍h. I kóng, “Góa tùi lín soan-iông ê chit-ūi Iâ-so͘ chiū-sī Ki-tok.” 4 In tiong-kan ū lâng siū sòe-ho̍k lâi sìn, chiū khì tè [Pó-lô] kap [Se-la]; kî-tiong ū chi̍t tōa-tīn kèng-ùi Siōng-tè ê [Hi-la̍h]-lâng, koh ū bōe chió chun-kùi ê hū-lú. 5 M̄-kú [Iû-thài]-lâng khí chi̍t-tò͘, chiū chio chi̍t-kóa koe-thâu ê húi-lūi, ká-kûn kiat-tóng, jiáu-loān choân-chhī, kong-kek [Iâ-sun] ê chhù, chhē [Pó-lô] kap [Se-la], beh kā in lia̍h-khì kau hō͘ bîn-chiòng. 6 In chhē bô, chiū chiong [Iâ-sun] kap chi̍t-kóa sìn-tô͘ thoa khì kìⁿ tōe-hng-koaⁿ, hoah kóng, “Chiah-ê kā thian-hā péng-lìn-tńg ê lâng mā lâi-kàu lán chia lò͘! 7 [Iâ-sun] kéng-jiân kā in siu-liû. In ûi-pōe [Lô-má] hông-tè [Khái-sat] ê hoat-lēng, kóng lēng-gōa ū chi̍t ê ông kiò-chòe Iâ-so͘.” 8 Kûn-chiòng kap tōe-hng-koaⁿ thiaⁿ-tio̍h chiah-ê ōe tio̍h-kip put-an. 9 Koaⁿ-oân tùi [Iâ-sun] kap kî-tha ê lâng siu chîⁿ kau-pó liáu-āu pàng in chhut-khì. 10 Hit àm, sìn-tô͘ thàu-mî sàng [Pó-lô] kap [Se-la] khì [Pì-lí-a]. In chi̍t-ē kàu-ūi chiū ji̍p-khì [Iû-thài]-lâng ê hōe-tn̂g. 11 Chiah-ê [Iû-thài]-lâng pí [Thiap-sat-lô-nî-ka] ê [Iû-thài]-lâng khah khai-bêng, hui-siông jia̍t-sim niá-siū tō-lí, ta̍k ji̍t chhâ-khó Sèng-keng, khòaⁿ [Pó-lô] só͘ kóng ê ū khak-si̍t bô. 12 In tiong-kan ū chin chōe chun-kùi ê [Hi-la̍h] hū-jîn-lâng kap ta-po͘-lâng sìn. 13 M̄-kú [Thiap-sat-lô-nî-ka] ê [Iû-thài]-lâng chi̍t-ē chai-iáⁿ [Pó-lô] mā tī [Pì-lí-a] teh thoân Siōng-tè ê tō, chiū khì hia siàn-tōng kûn-chiòng, ín-khí jiáu-loān. 14 Sìn-tô͘ sûi-sî sàng [Pó-lô] khì hái-piⁿ; [Se-lah] kap [Thê-mô͘-thài] lâu tī hia. 15 In chi̍t-lō͘ hō͘-sàng [Pó-lô] kàu [Ngá-tián]. [Pó-lô] hoan-hù in kiò [Se-lah] kap [Thê-mô͘-thài] chīn-liōng kóaⁿ-kín khì kap i hōe-ha̍p, jiân-āu in chiū lī-khui. 16 [Pó-lô] tī [Ngá-tián] teh thèng-hāu [Se-la] kap [Thê-mô͘-thài] ê tiong-kan, khòaⁿ-tio̍h móa-siâⁿ lóng sī ngó͘-siōng, sim chin kan-khó͘. 17 I tī hōe-tn̂g kap [Iû-thài]-lâng í-ki̍p kèng-ùi Siōng-tè ê Gōa-pang-lâng tâm-lūn, mā ta̍k ji̍t tī chhī-tiong-sim kap só͘ tú-tio̍h ê lâng tâm-lūn. 18 Ū chi̍t-kóa [I-phek-khiu-ló͘] kap [Su-to-a] ha̍k-phài ê tia̍t-ha̍k-ka lâi kap i piān-lūn. Ū lâng kóng, “Chit-ê ài-kóng-ōe-ê teh o͘-pe̍h kóng sím-mi̍h?” Ū lâng kóng, “I chhin-chhiūⁿ teh thoân gōa-kok ê kúi-sîn.” In án-ni kóng sī in-ūi [Pó-lô] thoân Iâ-so͘ kap I koh-oa̍h ê hok-im. 19 In chiū kā [Pó-lô] thoa kàu [A-lio̍k] [Pa-kó͘] gī-tiûⁿ, tùi i kóng, “Lí teh káng-lūn ê sin ha̍k-soat ōe-tàng hō͘ goán chai bōe? 20 Ū chi̍t-kóa tāi-chì goán thiaⁿ liáu koài-koài, goán ài chai sī sím-mi̍h ì-sù.” 21 Goân-lâi só͘-ū [Ngá-tián]-lâng kap tòa tī hia ê gōa-kok-lâng ēng chin chōe sî-kan tâm-lūn kap thiaⁿ sin-kî ê sū. 22 [Pó-lô] khiā tī [A-lio̍k] [Pa-kó͘] gī-tiûⁿ ê tiong-ng, kóng, “Kok ūi [Ngá-tián]-lâng, góa khòaⁿ-chhut lín tī ta̍k hong-bīn ū kiông-lia̍t ê chong-kàu jia̍t-sêng. 23 Góa tī siâⁿ-lāi teh kiâⁿ, koan-chhat lín kèng-pài ê só͘-chāi, mā ū khòaⁿ-tio̍h chi̍t chō tôaⁿ, téng-bīn siá: ‘Hiàn hō͘ m̄-bat ê sîn.’ Lín teh kèng-pài m̄-bat ê sîn, hiān-chāi góa pò lín chai. 24 Chit-ūi chhòng-chō ú-tiū kap kî-tiong bān-mi̍h ê Siōng-tè sī thiⁿ-tōe ê Chú, bô tòa tī lâng ê chhiú só͘ khí ê biō-sī, 25 mā bô khiàm-ēng lâng ê chhiú só͘ hiàn ê mi̍h, kî-si̍t I lóng bô su-iàu, I ka-kī tian-tò chiong sìⁿ-miā, kap khùi, í-ki̍p bān-mi̍h sù hō͘ jîn-lūi. 26 I tùi chi̍t ê lâng chō-chhut ta̍k chióng-cho̍k ê lâng, hō͘ in khiā-khí tī tōe-bīn-chiūⁿ ta̍k só͘-chāi, koh tāi-seng kā in tēng nî-hān kap khiā-khí ê tōe-kài. 27 Siōng-tè án-ni chòe sī beh hō͘ in chhē I, in nā chhiau-chhē chiū ōe chhē-tio̍h, kî-si̍t I kap lán ta̍k ê lâng saⁿ-lī bô hn̄g. 28 In-ūi ‘lán khò I seng-oa̍h, hêng-tōng, chûn-chāi’; chhin-chhiūⁿ lín ê si-jîn ū-ê án-ni kóng, ‘In-ūi lán mā-sī I ê kiáⁿ-sun.’ 29 Kì-jiân lán sī Siōng-tè ê kiáⁿ-sun, bô eng-kai chiong I ê sîn-sèng khòaⁿ-chòe kap ngó͘-siōng kâng-khoán, sī khò lâng ê chhiú-gē, ēng kim, gûn, á-sī chio̍h-thâu tiau-khek chhut-lâi ê. 30 Jîn-lūi iáu oa̍h tī bû-ti ê sî-tāi, Siōng-tè bô tui-kiù, m̄-kú hiān-chāi I bēng-lēng choân jîn-lūi tio̍h hóe-kái. 31 In-ūi I í-keng koat-tēng ji̍t-chí, beh ēng I só͘ chí-tēng ê lâng, chiàu kong-gī lâi sím-phòaⁿ choân sè-kài; I hō͘ chi̍t ê lâng tùi sí-lâng tiong koh-oa̍h, ēng chit-ê chòe pîn-kù, hō͘ choân jîn-lūi thang sìn.” 32 In chi̍t-ē thiaⁿ-tio̍h sí-lâng koh-oa̍h ê sū, ū lâng kā i thí-chhiò, mā ū lâng kóng, “Koan-hē chit-ê sū goán ài koh thiaⁿ lí kóng.” 33 Jiân-āu [Pó-lô] tùi in tiong-kan chhut-khì. 34 Put-kò ū chi̍t-kóa lâng tè i khì, chiâⁿ-chòe sìn-tô͘, kî-tiong ū [A-lio̍k] [Pa-kó͘] ê gī-oân [Tō͘-nî-siu], koh ū chi̍t ê lú-sū kiò-chòe [Tāi-má-lí], í-ki̍p chi̍t-kóa kap in chòe-hé ê lâng.

Sù-tô͘ hēng-toān 18

1 Chit-ê sū í-āu, [Pó-lô] lī-khui [Ngá-tián] khì [Ko-lîm-to]. 2 I tī hia tú-tio̍h chi̍t ê tī [Pún-to͘] chhut-sì ê [Iû-thài]-lâng, miâ kiò [A-ku-la], chòe-kūn chiah kap i ê bó͘ [Pek-ki-la] tùi [Ì-tāi-lī] lâi, in-ūi [Khek-lô-tē] hông-tè ū bēng-lēng só͘-ū ê [Iû-thài]-lâng lóng lī-khui [Lô-má]. [Pó-lô] khì chhē in, 3 in-ūi kâng hâng-gia̍p, lóng sī teh chòe pò͘-pîⁿ, chiū kap in tòa, chòe-hé chòe-kang. 4 Ta̍k ê An-hioh-ji̍t, [Pó-lô] lóng tī hōe-tn̂g kap lâng piān-lūn, khó͘-khǹg [Iû-thài]-lâng kap [Hi-la̍h]-lâng sìn Chú. 5 [Se-la] kap [Thê-mô͘-thài] tùi [Má-kî-tùn] lâi liáu-āu, [Pó-lô] chiū choân-sim thoân-tō, tùi [Iû-thài]-lâng kiàn-chèng Iâ-so͘ sī Ki-tok. 6 In kā i hoán-tùi koh húi-pòng ê sî, [Pó-lô] kā saⁿ-ni̍h ê thô͘-hún pōaⁿ hiat-ka̍k, tùi in kóng, “Lín ka-kī beh thó-sí, bô góa ê tāi-chì! Tùi taⁿ í-āu góa beh khì Gōa-pang-lâng hia.” 7 Jiân-āu [Pó-lô] lī-khui in, khì tòa tī chi̍t ê kèng-ùi Siōng-tè ê Gōa-pang-lâng kiò-chòe [Thê-to] [Iû-sū-to͘] ê chhù; i ê chhù tī hōe-tn̂g ê keh-piah. 8 Hōe-tn̂g ê chú-koán [Ki-lī-sū-pò͘] kap i ê choân-ke lóng sìn Chú; koh ū chin chōe [Ko-lîm-to]-lâng thiaⁿ liáu lâi sìn, mā siū sóe-lé. 9 Ū chi̍t àm, tī īⁿ-siōng tiong Chú tùi [Pó-lô] kóng, “M̄-bián kiaⁿ, tio̍h kè-sio̍k kóng, m̄-thang tiām-khì, 10 in-ūi Góa kap lí tông-chāi, bô-lâng ōe hē-chhiú kā lí siong-hāi, in-ūi góa ū chin chōe chú-bîn tī chit-ê siâⁿ-lāi.” 11 [Pó-lô] tī hia tòa chi̍t nî pòaⁿ kú, chiong Siōng-tè ê tō kà-sī in. 12 [Ka-liû] choh [A-kai-a] chóng-tok ê sî, [Iû-thài]-lâng liân-ha̍p kong-kek [Pó-lô], kā i lia̍h-khì hoat-têng, 13 kò i kóng, “Chit-ê lâng siàn-tōng lâng ēng ûi-pōe Lu̍t-hoat ê hong-sek kèng-pài Siōng-tè!” 14 [Pó-lô] tú-beh khui-chhùi, [Ka-liû] tùi [Iû-thài]-lâng kóng, “[Iû-thài]-lâng ah, che nā-sī hoān-hoat ê hêng-ûi á-sī ok-chit ê hoān-chōe, góa tong-jiân tio̍h nāi-sim thiaⁿ lín ê khòng-sò͘. 15 Só͘ cheng-lūn ê kì-jiân sī koan-hē lín Lu̍t-hoat ê jī-gán kap bêng-chheng, lín ka-kī khì kái-koat; góa m̄ pān chit khoán tāi-chì!” 16 I kā in kóaⁿ-chhut hoat-têng. 17 Chèng-lâng chiū lia̍h hōe-tn̂g ê chú-koán [Só͘-thê-nî], tī hoat-têng chêng kā i phah. Chit hāng tāi-chì [Ka-liû] lóng bô chhap. 18 [Pó-lô] tī [Ko-lîm-to] kap sìn-tô͘ koh tòa chin chōe ji̍t liáu-āu lī-khui in, kap [Pek-ki-la] í-ki̍p [A-ku-la] chòe-hé chē-chûn khì [Sū-lī-a]. Chhut-hoat chêng, [Pó-lô] in-ūi ū hē-goān, tī [Kian-kek-lí] chián thâu-mn̂g. 19 In kàu [Í-hut-só͘], [Pó-lô] kap in hun-khui, ka-kī ji̍p-khì hōe-tn̂g kap [Iû-thài]-lâng piān-lūn. 20 Tāi-ke chhiáⁿ i lâu lo̍h-lâi ke tòa kúi-ji̍t-à, i bô tah-èng. 21 Beh lī-khui ê sî, i kā in kóng, “Nā-sī Siōng-tè ê chí-ì, góa ōe-koh tńg-lâi lín chia,” jiân-āu chē-chûn lī-khui [Í-hut-só͘]. 22 I tī [Khái-sat-lī-a] lo̍h-chûn, tùi hia chiūⁿ-khì [Iâ-lō͘-sat-léng], kā kàu-hōe chhéng-an, jiân-āu lo̍h-khì [An-thê-o]. 23 [Pó-lô] tī hia tòa chi̍t tōaⁿ sî-kan liáu-āu koh chhut-hoat, keng-kè [Ka-lia̍p-thài] kap [Hut-lū-ka] tōe-khu, kian-kò͘ chèng bûn-tô͘ ê sìn-sim. 24 Ū chi̍t ê tī [A-le̍k-san-tāi] chhut-sì ê [Iû-thài]-lâng, kiò-chòe [A-pho-lô], lâi-kàu [Í-hut-só͘]; i ū chin hó ê kháu-châi, tùi Sèng-keng mā cheng-thong. 25 I tùi Chú ê Tō-lō͘ ū siū-kè hùn-liān, jia̍t-sim soan-káng, chèng-khak kà-sī Iâ-so͘ ê sū, put-kò chí-ū chai [Iok-hān] ê sóe-lé nā-tiāⁿ. 26 I tī hōe-tn̂g hó-táⁿ khai-sí káng-tō. [Pek-ki-la] kap [A-ku-la] thiaⁿ-tio̍h i ê káng-tō chiū chhōa i khì in tau, koh-khah chèng-khak kā i kóe-seh Siōng-tè ê Tō-lō͘. 27 Āu-lâi [A-pho-lô] koat-tēng beh khì [A-kai-a], [Í-hut-só͘] ê sìn-tô͘ chiū kā i kó͘-lē, siá-phoe hō͘ [A-kai-a] ê bûn-tô͘, chhiáⁿ in kā i chiap-thāi. I kàu hia í-āu, hiah-ê tùi Siōng-tè ê un-hūi lâi sìn Chú ê lâng siū-tio̍h chin tōa ê pang-chān, 28 in-ūi tī kong-khai ê piān-lūn, i ū ēng ū-la̍t ê ōe piān-tó [Iû-thài]-lâng, kun-kù Sèng-keng chèng-bêng Iâ-so͘ sī Ki-tok.

Sù-tô͘ hēng-toān 19

1 [A-pho-lô] tī [Ko-lîm-to] ê sî, [Pó-lô] keng-kè lāi-lio̍k ê tōe-khu, lâi-kàu [Í-hut-só͘], tī hia ū tú-tio̍h kúi-nā ê bûn-tô͘. 2 I mn̄g in, “Lín sìn Chú ê sî ū niá-siū Sèng Sîn bô?” In ìn kóng, “Bô, goán kàu taⁿ m̄-bat thiaⁿ-tio̍h kóng ū Sèng Sîn.” 3 [Pó-lô] koh mn̄g kóng, “Án-ni, lín niá-siū ê sī sím-mi̍h sóe-lé?” In ìn kóng, “Sī [Iok-hān] ê sóe-lé.” 4 [Pó-lô] kóng, “[Iok-hān] ê sóe-lé sī hóe-kái ê sóe-lé; i kiò [Í-sek-lia̍t]-lâng tio̍h sìn tè tī i āu-bīn lâi Hit-ūi, chiū-sī tio̍h sìn Iâ-so͘.” 5 In thiaⁿ liáu chiū hōng Chú Iâ-so͘ ê miâ niá-siū sóe-lé. 6 [Pó-lô] chi̍t-ē kā in àn-chhiú, Sèng Sîn chiū kàng-lîm tī in sin-chiūⁿ, in chiū ēng lêng-gú kóng-ōe, koh soan-káng Siōng-tè ê sìn-sit. 7 In lóng-chóng ū cha̍p-jī ê lâng. 8 [Pó-lô] liân-sòa saⁿ ge̍h-ji̍t kú ji̍p-khì hōe-tn̂g hó-táⁿ thoân-tō, kap lâng piān-lūn Siōng-tè-kok ê sū, khó͘-khǹg in sìn Chú. 9 Put-kò ū chi̍t-kóa lâng kò͘-chip m̄-sìn, tī hōe-chiòng bīn-chêng húi-pòng Chú ê Tō-lō͘. [Pó-lô] chiū chhōa bûn-tô͘ lī-khui in, ta̍k ji̍t tī [Chhui-lat-lô͘] ê káng-tn̂g kap lâng tâm-lūn. 10 Án-ni kè-sio̍k nn̄g nî kú, só͘-ū tòa tī [A-se-a]-séng ê lâng, bô-lūn [Iû-thài]-lâng á-sī [Hi-la̍h]-lâng, lóng ū thiaⁿ-kìⁿ Chú ê tō. 11 Siōng-tè ēng [Pó-lô] ê chhiú kiâⁿ kî-īⁿ ê sîn-jiah; 12 sīm-chì ū lâng the̍h [Pó-lô] ēng-kè ê chhiú-kun á-sī ûi-kûn khǹg tī pīⁿ-lâng sin-chiūⁿ, in ê pīⁿ chiū hó-khì, siâ-sîn chiū tùi in chhut-khì. 13 Hit sî ū kúi-nā ê kiâⁿ-kang-ô͘ teh kóaⁿ-kúi ê [Iû-thài]-lâng mā siūⁿ-beh chioh Chú Iâ-so͘ ê miâ lâi chè-ap siâ-sîn hū-sin ê lâng, kóng, “Góa hōng [Pó-lô] só͘ thoân Iâ-so͘ ê miâ bēng-lēng lín chhut-khì!” 14 [Iû-thài] ê chè-si-tiúⁿ [Sū-ki-óa] ê chhit ê kiáⁿ mā teh chòe chit khoán tāi-chì. 15 M̄-kú siâ-sîn ìn kóng, “Iâ-so͘ góa bat, [Pó-lô] góa mā bat, lín leh, lín sī sím-mi̍h-lâng?” 16 Hit-ê hō͘ siâ-sîn hū-sin ê lâng chhi̍h óa-khì kong-kek hiah-ê kiâⁿ-kang-ô͘-ê, kā in chè-ho̍k, hō͘ in siū-siong, chhiah-sin lō͘-thé tùi hit keng chhù tô-cháu. 17 Tòa tī [Í-hut-só͘] só͘-ū ê [Iû-thài]-lâng kap [Hi-la̍h]-lâng thiaⁿ-tio̍h chit hāng tāi-chì lóng chin tio̍h-kiaⁿ; Chú Iâ-so͘ ê miâ tōa siū chun-chông. 18 Ū chin chōe í-keng sìn ê lâng chhut-lâi, kong-khai sêng-jīn koh pò lâng chai in kè-khì só͘ chòe ê tāi-chì. 19 Ū chin chōe kiâⁿ siâ-su̍t ê lâng the̍h in ê chheh lâi, khǹg kui-tui, tī chèng-lâng ê bīn-chêng pàng-hé sio. In kè-sǹg chheh ê kè-ta̍t, tāi-iok ū gō͘-bān ê gûn-goân. 20 Tùi án-ni, Chú ê tō it-ti̍t thoân-khui, tōa-tōa heng-ōng. 21 Chiah-ê tāi-chì liáu-āu, [Pó-lô] siū Sèng Sîn kám-tōng koat-tēng beh keng-kè [Má-kî-tùn] kap [A-kai-a] khì [Iâ-lō͘-sat-léng]. I kóng, “Góa kàu hia í-āu mā it-tēng tio̍h khì hóng-būn [Lô-má].” 22 I chiū chhe nn̄g ê chō͘-chhiú [Thê-mô͘-thài] kap [Í-la-to͘] khì [Má-kî-tùn], ka-kī chiām-sî lâu tī [A-se-a]. 23 Tú hit sî, koan-hē Chú ê Tō-lō͘ tī [Í-hut-só͘] ín-khí giâm-tiōng ê jiáu-loān. 24 Ū chi̍t ê kiò-chòe [Tí-bí-tiu] ê phah-gûn sai-hū, i ēng gûn chō lú-sîn [A-tí-bí] ê biō ê bô͘-hêng, hō͘ chi̍t-kóa sai-hū thàn bōe chió chîⁿ. 25 [Tí-bí-tiu] kā hiah-ê sai-hū kap só͘-ū ê tông-gia̍p chi̍p óa-lâi, tùi in kóng, “Kok ūi, lín chai lán sī khò chit-ê kang-gē teh thàn-chîⁿ. 26 Hiān-chāi lín ū khòaⁿ-tio̍h koh ū thiaⁿ-tio̍h chit-ê [Pó-lô] teh chòe ê tāi-chì. I kóng, ‘Lâng ê chhiú só͘ chō ê lóng m̄-sī sîn.’ Chiah-ê ōe m̄-nā tī [Í-hut-só͘], mā chha-put-to tī choân [A-se-a]-séng, ū hō͘ chin chōe lâng siū kiau-so khì tè in. 27 Án-ni, m̄-nā lán chit-ê sū-gia̍p ōe phah-pháiⁿ miâ-siaⁿ, liân úi-tāi ê lú-sîn [A-tí-bí] ê biō to ōe hō͘ lâng khin-sī, choân [A-se-a]-séng kap choân sè-kài só͘ teh pài chit-ê lú-sîn ê chun-giâm mā ōe siū phò-hoāi!” 28 Kûn-chiòng chi̍t-ē thiaⁿ-tio̍h chiah-ê ōe hui-siông siū-khì, tōa-siaⁿ hoah, “ [Í-hut-só͘]-lâng ê [A-tí-bí] chin úi-tāi!” 29 Choân-siâⁿ lóng loān khí-lâi; chèng-lâng thoa [Pó-lô] ê tâng-phōaⁿ [Má-kî-tùn]-lâng [Kai-iû] kap [A-lí-ta̍t-kó͘], kui-tīn chòe chi̍t-ē chhiong ji̍p-khì ke̍k-tiûⁿ. 30 [Pó-lô] siūⁿ-beh ji̍p-khì kûn-chiòng lāi-bīn, m̄-kú bûn-tô͘ kā i chó͘-chí. 31 Ū kúi-nā ê [A-se-a]-séng ê koaⁿ-oân, sī [Pó-lô] ê pêng-iú, mā chhe lâng khì khǹg [Pó-lô] m̄-thang ji̍p-khì ke̍k-tiûⁿ. 32 Hit sî kui-ê hōe-tiûⁿ loān chhau-chhau, chi̍t lâng hoah chi̍t hāng; tōa-pō͘-hūn ê lâng m̄-chai in sī-án-chóaⁿ teh chū-chi̍p. 33 Kûn-chiòng tiong-kan ū lâng chiong jiáu-loān ê chek-jīm kui hō͘ [A-le̍k-san-tāi], in-ūi [Iû-thài]-lâng kā i sak chhut-khì thâu-chêng. [A-le̍k-san-tāi] chiū pí chhiú-sè kiò in an-chēng, siūⁿ-beh kā in piān-bêng. 34 In chi̍t-ē jīn-chhut i sī [Iû-thài]-lâng, chiū lóng chôe-siaⁿ hoah, “[Í-hut-só͘]-lâng ê [A-tí-bí] chin úi-tāi!” Án-ni ti̍t-ti̍t hoah, hoah nn̄g tiám-cheng kú. 35 Siâⁿ ê su-kì-koaⁿ hō͘ kûn-chiòng lóng an-chēng liáu-āu, kóng, “[Í-hut-só͘]-lâng, siáⁿ-lâng m̄-chai [Í-hut-só͘]-siâⁿ sī úi-tāi ê [A-tí-bí]-biō kap tùi thiⁿ lak lo̍h-lâi hit tè sèng-chio̍h ê siú-hō͘-chiá? 36 Kì-jiân bô-lâng ōe-tàng hó͘-jīn chit-ê tāi-chì, lín eng-kai an-chēng, m̄-thang chhiong-tōng. 37 Lín thoa chiah-ê lâng lâi chia, m̄-kú in pèng bô chhiúⁿ sī-biō, mā bô siat-to̍k lán ê lú-sîn. 38 [Tí-bí-tiu] kap i ê sai-hū nā beh khòng-kò, ū khui-têng ê ji̍t-chí kap chú-chhî sò͘-siōng ê koaⁿ-tiúⁿ, in thang the̍h-chhut kò-sò͘. 39 Lín nā ū kî-tha ê iau-kiû, thang tī tēng-kî ê hōe-gī kái-koat. 40 Kin-á-ji̍t só͘ hoat-seng ê tāi-chì, lán kiaⁿ-liáu ōe hō͘ lâng tui-kiù chek-jīm, koh tùi chit khoán ê hūn-loān, lán mā the̍h bōe chhut lí-iû thang piān-kái.” 41 Kóng chiah-ê ōe liáu-āu, I chiū soan-pò͘ sòaⁿ-hōe.

Sù-tô͘ hēng-toān 20

1 Jiáu-loān pêng-chēng liáu-āu, [Pó-lô] tiàu-chi̍p bûn-tô͘, kā in bián-lē, kap in saⁿ-sî, chiū lī-khui hia khì [Má-kî-tùn]. 2 I keng-kè hiah-ê tōe-khu, kóng chin chōe ōe bián-lē sìn-tô͘, jiân-āu khì [Hi-la̍h], 3 tī hia tòa saⁿ ge̍h-ji̍t. I chún-pī beh chē-chûn khì [Sū-lī-a] ê sî, [Iû-thài]-lâng kè-bô͘ beh hāi i, chiū koat-tēng keng-kè [Má-kî-tùn] tńg-khì. 4 Kap i chòe-hé khì ê, ū [Pì-lí-a]-lâng [Pit-lō͘-su] ê kiáⁿ [Só͘-pa-te̍k], koh ū [Thiap-sat-lô-nî-ka]-lâng [A-lí-ta̍t-kó͘] kap [Se-kong-to͘], [Te̍k-pì]-lâng [Kai-iû], koh ū [Thê-mô͘-thài] kap [A-se-a]-lâng [Chhui-ki-kó͘] kap [Te̍k-lô-hui-mô͘]. 5 Chiah-ê lâng seng chhut-hoat, tī [Te̍k-lô-a] teh thèng-hāu goán. 6 Tû-kàⁿ-choeh kè liáu, goán tùi [Hui-li̍p-pí] khui-chûn, gō͘ ji̍t āu kàu [Te̍k-lô-a] kap in hōe-ha̍p, tī hia tòa chhit ji̍t. 7 Pài-la̍k àm, goán tāi-ke chū-hōe peh-piáⁿ ê sî, [Pó-lô] kap tāi-ke tâm-lūn, in-ūi keh-ji̍t chiū beh lī-khui, só͘-í kóng kàu pòaⁿ-mî. 8 Goán teh chū-hōe hit keng lâu-téng ê pâng-keng ū tiám chin chōe teng-hé. 9 Ū chi̍t ê siàu-liân-lâng, kiò-chòe [Iû-chhui-kó͘], chē tī thang-á-mn̂g, [Pó-lô] kè-sio̍k kóng chin kú, i soah khùn tāng-bîn, tùi saⁿ lâu poa̍h lo̍h-khì, tāi-ke kā i hû khí-lâi ê sî í-keng sí. 10 [Pó-lô] lo̍h-khì, phak tī i ê seng-khu, kā i lám-teh, kóng, “M̄-bián tio̍h-kip, i iáu ū khùi.” 11 Jiân-āu i koh peh-khì lâu-téng, peh-piáⁿ, chia̍h, kè-sio̍k kap in tâm-lūn chin kú, kàu thiⁿ-kng chiah lī-khui. 12 In kā hit-ê oa̍h khí-lâi ê siàu-liân-lâng chhōa tńg-khì, tāi-ke siū chin tōa ê an-ùi. 13 Goán seng chiūⁿ-chûn, khui khì [A-sok], thang tī hia chiap [Pó-lô] chiūⁿ-chûn; in-ūi i beh kiâⁿ lio̍k-lō͘ khì hia, só͘-í ū án-ni an-pâi. 14 I tī [A-sok] kap goán hōe-ha̍p, goán chiū chiap i chiūⁿ-chûn khì [Bí-chhui-lī-nî]. 15 Goán tùi hia khui-chûn, keh-ji̍t kàu [Ki-ò] ê tùi-bīn-hōaⁿ, chi̍t ji̍t āu tī [Sat-mô͘] khò-hōaⁿ, koh keh-ji̍t kàu [Bí-lī-to͘]. 16 [Pó-lô] í-keng koat-tēng bô ài tī [Í-hut-só͘] thêng-liû, chiah-bián tī [A-se-a] hùi sî-kan. I beh kóaⁿ-kín khì [Iâ-lō͘-sat-léng], khòaⁿ ōe-tàng tī Gō͘-sûn-choeh í-chêng kàu-ūi bōe. 17 [Pó-lô] tùi [Bí-lī-to͘] chhe lâng khì [Í-hut-só͘], tiàu-chi̍p kàu-hōe ê tiúⁿ-ló lâi. 18 In kàu-ūi ê sî, [Pó-lô] tùi in kóng, “Tùi góa lâi-kàu [A-se-a] hit ji̍t khí it-ti̍t kàu hiān-chāi, góa kap lín án-chóaⁿ chòe-hé seng-oa̍h, lín lóng chai. 19 Sui-jiân góa ū tùi [Iû-thài]-lâng ê kè-bô͘ siū-tio̍h chhì-liān, iáu-kú hui-siông khiam-pi koh lâu ba̍k-sái teh ho̍k-sāi Chú. 20 Bô-lūn tī kong-kiōng ê tiûⁿ-ha̍p á-sī kò-pia̍t ê ka-têng, nā tùi lín ū lī-ek ê, góa m̄-bat bô tùi lín thoân, bô kā lín kà; 21 tùi [Iû-thài]-lâng kap [Hi-la̍h]-lâng góa lóng giâm-giâm khoàn-kò in tio̍h hóe-kái kui-ǹg Siōng-tè, koh sìn lán ê Chú Iâ-so͘. 22 Hiān-chāi, góa sūn-ho̍k Sèng Sîn beh khì [Iâ-lō͘-sat-léng], tī hia ōe tú-tio̍h sím-mi̍h tāi-chì, góa m̄-chai, 23 put-kò góa chai, Sèng Sîn kā góa kéng-kò, kóng tī ta̍k ê siâⁿ-chhī ū kaⁿ-ga̍k kap hoān-lān teh thèng-hāu góa. 24 M̄-kú ūi-tio̍h beh kiâⁿ-oân góa ê lō͘-thêng, oân-sêng Chú Iâ-so͘ kau-tài góa ê jīm-bū, thang kiàn-chèng Siōng-tè un-tián ê hok-im, góa oân-choân bô sioh ka-kī ê sìⁿ-miā. 25 “Góa it-ti̍t tī lín tiong-kan chhut-ji̍p teh soan-iông Siōng-tè-kok, hiān-chāi góa chai, í-āu lín bōe-tàng koh kìⁿ-tio̍h góa. 26 Só͘-í, kin-á-ji̍t góa kā lín kóng chheng-chhó, lín tiong-kan nā ū lâng tîm-lûn, m̄-sī góa ê chek-jīm, 27 in-ūi góa í-keng chiong Siōng-tè ê chí-ì lóng-chóng thoân hō͘ lín lah. 28 Lín ka-kī tio̍h kín-sīn, mā tio̍h chiàu-kò͘ Sèng Sîn kau-thok hō͘ lín lóng-chóng ê iûⁿ-kûn, choh kam-tok lâi bo̍k-ióng Siōng-tè ê kàu-hōe, chiū-sī I ēng ka-kī ê Kiáⁿ ê sí lâi kiàn-li̍p ê. 29 Góa chai góa lī-khui liáu-āu ū hiong-ok ê chhâi-lông ōe ji̍p-lâi lín tiong-kan siong-hāi iûⁿ-kûn. 30 Sīm-chì tī lín tiong-kan ū lâng ōe chhut-lâi khiok-kái chin-lí, ín-iú bûn-tô͘ khì tè in. 31 Só͘-í, lín tio̍h kéng-séng, ōe kì-tit góa saⁿ nî kú mî-ji̍t lâu ba̍k-sái khoàn-kài lín ta̍k ê lâng. 32 “Hiān-chāi góa chiong lín kau-thok hō͘ Siōng-tè, thang tùi I un-tián ê sìn-sit tit-tio̍h chō-chiū, hō͘ lín kap sèng-hòa kui Chú ê lâng lóng thang kè-sêng I só͘ sù ê hok-hūn. 33 Góa m̄-bat tham lâng ê kim, gûn, á-sī i-ho̍k. 34 Lín ka-kī chai, góa ēng chit nn̄g ki chhiú chòe-kang lâi kiong-kip ka-kī kap tâng-phōaⁿ ê su-iàu. 35 Ta̍k hāng sū góa lóng ū chòe hō͘ lín khòaⁿ, ài lín it-tēng tio̍h phah-piàⁿ chòe-kang lâi pang-chān loán-jio̍k ê lâng. Tio̍h ōe kì-tit Chú Iâ-so͘ ka-kī só͘ kóng ê ōe: ‘Hō͘-lâng ê pí niá-siū ê khah ū hok-khì.’ ” 36 Chiah-ê ōe kóng soah, [Pó-lô] kap in tāi-ke lóng kūi lo̍h-khì kî-tó. 37 Tāi-ke tōa-siaⁿ khàu, kā i lám, kā i chim; 38 in-ūi [Pó-lô] kóng “í-āu bōe-tàng koh saⁿ-kìⁿ” chit kù ōe hō͘ in hui-siông siong-sim. Jiân-āu in sàng i chiūⁿ-chûn.

Sù-tô͘ hēng-toān 21

1 Lī-pia̍t chèng-lâng liáu-āu, goán khui-chûn it-ti̍t kàu [Ko-sū], keh-ji̍t kàu [Lô-tí], tùi hia khì [Phàⁿ-tāi-lat], 2 tī hia tú-tio̍h chi̍t chiah beh kè-khì [Hui-nî-ki] ê chûn, goán chiū chiūⁿ-chûn chhut-hoat. 3 Goán lâi-kàu khòaⁿ ōe-tio̍h [Sài-phó͘-lō͘-su] ê sî, tùi lâm-pêng se̍h kè, khì [Sū-lī-a], tī [Thài-ní] lo̍h-chûn, in-ūi chûn beh tī hia lo̍h-hè. 4 Goán chhē-tio̍h chi̍t-kóa bûn-tô͘, tī hia kap in tòa chhit ji̍t. In tit-tio̍h Sèng Sîn ê chí-sī, khǹg [Pó-lô] m̄-thang chiūⁿ [Iâ-lō͘-sat-léng]. 5 Goán kap in lī-pia̍t ê sî-kan kàu chiū lī-khui, kè-sio̍k goán ê lō͘-thêng. In lóng chhōa in ê bó͘-kiáⁿ sàng goán kàu siâⁿ-gōa, tī hái-piⁿ kūi lo̍h-khì kî-tó, 6 hō͘-siōng saⁿ-sî liáu-āu goán chiūⁿ-chûn, in tò-khì in tau. 7 Goán kè-sio̍k hâng-thêng tùi [Thài-ní] khì-kàu [To-lī-mái], tī hia kā sìn-tô͘ chhéng-an, kap in tòa chi̍t ji̍t. 8 Keh-ji̍t, goán chhut-hoat khì [Khái-sat-lī-a], tī hia tòa tī thoân hok-im ê [Hui-le̍k] ê chhù, i sī [Iâ-lō͘-sat-léng] hit chhit ê chip-sū ê chi̍t ê. 9 I ū sì ê iáu-bē kiat-hun ê cha-bó͘-kiáⁿ, lóng chòe sian-ti ōe kóng ū-giân. 10 Goán tòa tī hia kúi-nā ji̍t ê tiong-kan, ū chi̍t ê sian-ti kiò-chòe [A-ka-pò͘] tùi [Iû-thài] lo̍h-lâi. 11 I lâi chhē goán, the̍h [Pó-lô] ê io-tòa pa̍k ka-kī ê kha kap chhiú, kóng, “Sèng Sîn án-ni kóng, ‘Chit tiâu io-tòa ê chú-lâng ōe tī [Iâ-lō͘-sat-léng] chhin-chhiūⁿ án-ni hō͘ [Iû-thài]-lâng pa̍k khí-lâi, jiân-āu kau hō͘ Gōa-pang-lâng.’ ” 12 Goán chi̍t-ē thiaⁿ-tio̍h, chiū kap hit só͘-chāi ê lâng khó͘-khǹg [Pó-lô] m̄-thang chiūⁿ [Iâ-lō͘-sat-léng]. 13 [Pó-lô] ìn kóng, “Lín ná khàu-kah án-ni, hō͘ góa ê sim giōng-beh chhùi-khì? Góa ūi-tio̍h Chú Iâ-so͘ ê miâ, m̄-nā tī [Iâ-lō͘-sat-léng] hō͘ lâng pa̍k, sīm-chì tī hia sí mā kam-goān.” 14 I m̄ siū khó͘-khǹg, goán chiū tiām-tiām, chí-ū kóng, “Goān Chú ê chí-ì si̍t-hiān!” 15 Kúi-nā ji̍t āu, goán chún-pī hó-sè, chiū chiūⁿ [Iâ-lō͘-sat-léng]. 16 Ū chi̍t-kóa tùi [Khái-sat-lī-a] lâi ê bûn-tô͘ mā kap goán khì, chhōa goán khì [Sài-phó͘-lō͘-su]-lâng [Ná-sun] ê chhù tòa; i sī chá-kî ê bûn-tô͘. 17 Goán kàu Iâ-lō͘-sat-léng ê sî, sìn-tô͘ jia̍t-sêng chiap-thāi goán. 18 Keh-ji̍t, [Pó-lô] kap goán khì hóng-būn [Ngá-kok]; kàu-hōe ê chèng tiúⁿ-ló lóng tī hia. 19 [Pó-lô] kā in chhéng-an, jiân-āu chiong Siōng-tè thong-kè i tī Gōa-pang-lâng ê tiong-kan só͘ chòe ê kang-chok chi̍t-hāng chi̍t-hāng tùi in pò-kò. 20 In thiaⁿ liáu lóng kui êng-kng hō͘ Siōng-tè, tùi [Pó-lô] kóng, “Hiaⁿ-tī, lí chai, tī chia ū kúi-nā bān [Iû-thài]-lâng chiâⁿ-chòe sìn-tô͘, in lóng jia̍t-sim chun-siú Lu̍t-hoat. 21 In ū thiaⁿ-tio̍h lí kà-sī tòa tī Gōa-pang ê [Iû-thài]-lâng, kiò in hòng-khì [Mô͘-se] ê Lu̍t-hoat, m̄-bián kā in ê gín-á kiâⁿ kat-lé, mā m̄-bián siú [Iû-thài]-lâng ê hong-sio̍k si̍p-koàn. 22 In it-tēng ōe thiaⁿ-tio̍h lí lâi chia ê siau-sit, án-ni beh án-chóaⁿ? 23 Taⁿ tio̍h chiàu goán kā lí kóng ê khì chòe. Chia ū sì-ê hē-goān ê ta-po͘-lâng; 24 lí chhōa in chòe-hé khì chham-ka kiat-chēng-lé, thòe in la̍p só͘-hùi, hō͘ in thang thì-thâu. Lí án-ni chòe, chèng-lâng chiū chai, in só͘ thiaⁿ-tio̍h koan-hē lí ê sū m̄-sī sū-si̍t, koh chai lí ka-kī mā ū teh chun-siú [Mô͘-se] ê Lu̍t-hoat. 25 Put-kò tùi í-keng chòe sìn-tô͘ ê Gōa-pang-lâng, goán í-keng ū siá-phoe kā in kóng, goán ū chhâi-koat kiò in m̄-thang chia̍h chè ngó͘-siōng ê mi̍h, huih, kap ni̍h-sí ê cheng-siⁿ, mā m̄-thang ū îm-loān.” 26 Keh-ji̍t, [Pó-lô] chhōa hit sì ê ta-po͘-lâng kap in chòe-hé khì chham-ka kiat-chēng-lé, jiân-āu ji̍p-khì Sèng-tiān pò-kò kiat-chēng-lé sím-mi̍h sî móa, thang ūi-tio̍h in ta̍k ê lâng hiàn chè-mi̍h. 27 Chhit-ji̍t ê kî teh-beh móa ê sî, chi̍t-kóa tùi [A-se-a] lâi ê [Iû-thài]-lâng ū khòaⁿ-tio̍h [Pó-lô] tī Sèng-tiān lāi, chiū siàn-tōng kûn-chiòng lia̍h [Pó-lô], 28 hoah kóng, “[Í-sek-lia̍t]-lâng, lâi tàu saⁿ-kāng chi̍t-ē! Chit-ê lâng ta̍k só͘-chāi kà lâng hoán-tùi [Í-sek-lia̍t]-lâng kap [Mô͘-se] ê Lu̍t-hoat, mā hoán-tùi chit-ê Sèng-tiān. Hiān-chāi i koh káⁿ chhōa [Hi-la̍h]-lâng chìn-ji̍p Sèng-tiān, ù-jiám chit-ê sîn-sèng ê só͘-chāi.” 29 In-ūi in ū khòaⁿ-tio̍h [Í-hut-só͘]-lâng [Te̍k-lō-hui-mô͘] kap [Pó-lô] chòe-hé tī siâⁿ-lāi, siūⁿ-kóng [Pó-lô] ū chhōa i ji̍p-khì Sèng-tiān. 30 Choân-siâⁿ jiáu-loān khí-lâi, bîn-chiòng lóng cháu óa-lâi; in lia̍h [Pó-lô], kā i thoa chhut-khì Sèng-tiān ê gōa-bīn, tiān ê mn̂g sûi-sî koaiⁿ khí-lâi. 31 In tú siūⁿ-beh thâi [Pó-lô] ê sî, ū siau-sit thoân kàu [Lô-má] kun-iâⁿ ê chí-hui-koaⁿ hia, kóng choân [Iâ-lō͘-sat-léng] teh khí jiáu-loān. 32 Chí-hui-koaⁿ sûi-sî tòa peng kap kun-koaⁿ cháu kàu bîn-chiòng hia. Bîn-chiòng chi̍t-ē khòaⁿ-tio̍h chí-hui-koaⁿ kap peng chiū thêng-chhiú, bô koh phah [Pó-lô]. 33 Chí-hui-koaⁿ óa-khì lia̍h [Pó-lô], kiò lâng ēng nn̄g tiâu thih-liān kā i liān-teh, koh mn̄g i sī siáⁿ-lâng, ū chòe sím-mi̍h tāi-chì. 34 Kûn-chiòng chi̍t ê hoah chi̍t khoán, in-ūi loān-chhau-chhau, chí-hui-koaⁿ bô hoat-tō͘ thang chai si̍t-chêng, chiū bēng-lēng peng ah [Pó-lô] ji̍p-khì iâⁿ-pâng. 35 [Pó-lô] teh-beh peh khiat-á ê sî, in-ūi kûn-chiòng hiong-kài-kài, peng soah tio̍h kā [Pó-lô] kng ji̍p-khì. 36 Kûn-chiòng tè tī āu-bīn hoah kóng, “Hō͘ i sí!” 37 [Pó-lô] tú-beh hō͘ lâng tòa ji̍p-khì iâⁿ-pâng ê sî tùi chí-hui-koaⁿ kóng, “Góa ōe-tàng kā lí kóng chi̍t kù ōe bōe?” Chí-hui-koaⁿ mn̄g kóng, “Lí bat [Hi-la̍h]-gú ò͘! 38 Án-ni lí chiū m̄-sī hit-ê bô kú í-chêng chō-hoán, chhōa sì chheng ê sat-chhiú cháu-khì khòng-iá ê [Ai-ki̍p]-lâng lò͘.” 39 [Pó-lô] ìn kóng, “Góa sī [Iû-thài]-lâng, chhut-sì tī [Ki-lī-ka] ê [Tāi-sò͘], sī chi̍t ê put-chí ū-miâ ê siâⁿ-chhī ê chhī-bîn. Chhiáⁿ lí chún góa tùi bîn-chiòng kóng-ōe.” 40 Chí-hui-koaⁿ ún-chún, [Pó-lô] chiū khiā tī khiat-á téng tùi bîn-chiòng pí chhiú-sè. Chèng-lâng lóng tiām lo̍h-khì ê sî, [Pó-lô] ēng [Hi-pek-lâi]-ōe tùi in kóng-ōe.

Sù-tô͘ hēng-toān 22

1 [Pó-lô] kóng, “Kok ūi hū-ló hiaⁿ-tī, chhiáⁿ thiaⁿ góa chit-chūn beh ūi-tio̍h ka-kī piān-hō͘ ê ōe.” 2 In chi̍t-ē thiaⁿ-tio̍h [Pó-lô] ēng [Hi-pek-lâi]-ōe tùi in kóng-ōe, chiū koh-khah an-chēng. [Pó-lô] kóng: 3 “Góa sī [Iû-thài]-lâng, tī [Ki-lī-ka] ê [Tāi-sò͘] chhut-sì, tī [Iâ-lō͘-sat-léng] tióng-tōa, chòe [Ka-má-lia̍t] ê ha̍k-seng, kap kin-á-ji̍t tī chia ê chu ūi kâng-khoán ū siū lán chó͘-sian Lu̍t-hoat giâm-keh ê kàu-io̍k, jia̍t-sim ho̍k-sāi Siōng-tè. 4 Góa bat pek-hāi sìn-hōng chit-ê Tō-lō͘ ê lâng, hō͘ in tì-kàu sí, bô-lūn lâm, lú, lóng kā in lia̍h-khì koaiⁿ-kaⁿ. 5 Tōa-chè-si kap gī-hōe lóng-chóng ê tiúⁿ-ló ōe-tàng ūi góa choh-chèng. Góa mā ū tùi in tit-tio̍h hō͘ [Tāi-má-sū-kek] [Iû-thài] tông-pau ê phoe. Āu-lâi góa ū khì hia beh pa̍k tòa tī hia ê sìn-tô͘, kā in lia̍h lâi [Iâ-lō͘-sat-léng] siū hêng-hoa̍t. 6 “Góa kiâⁿ beh kàu [Tāi-má-sū-kek] ê sî, chha-put-to sī tiong-tàu, hut-jiân ū chin kiông ê kng tùi thiⁿ-téng chiò tī góa ê chiu-ûi. 7 Góa poa̍h lo̍h-khì thô͘-kha, thiaⁿ-tio̍h ū siaⁿ tùi góa kóng, ‘[Sò-lô], [Sò-lô]! Lí sī-án-chóaⁿ teh pek-hāi góa?’ 8 Góa mn̄g kóng, ‘Chú ah, lí sī sím-mi̍h lâng?’ I ìn góa kóng, ‘Góa chiū-sī lí teh pek-hāi ê [Ná-sat-le̍k]-lâng Iâ-so͘.’ 9 Hiah-ê kap góa chòe-tīn kiâⁿ ê lâng ū khòaⁿ-tio̍h hit-ê kng, bô thiaⁿ-tio̍h tùi góa kóng-ōe Hit-ūi ê siaⁿ. 10 Góa koh mn̄g kóng, ‘Chú ah, góa tio̍h chòe sím-mi̍h?’ Chú tùi góa kóng, ‘Khí-lâi, ji̍p-khì [Tāi-má-sū-kek], tī hia ū lâng ōe chiong góa beh chí-phài lí khì chòe lóng-chóng ê tāi-chì kā lí kóng.’ 11 In-ūi hit-ê kng chin chha̍k-ba̍k, góa soah bōe khòaⁿ-kìⁿ, góa ê tâng-phōaⁿ chiū khan góa ji̍p-khì [Tāi-má-sū-kek]. 12 “Tī hia ū chi̍t ê lâng kiò-chòe [A-ná-nî-a], sī chi̍t ê chun-siú [Mô͘-se] Lu̍t-hoat khiân-sêng ê lâng, put-chí siū [Tāi-má-sū-kek] ê [Iû-thài]-lâng chun-kèng. 13 I lâi chhē góa, khiā tī góa ê sin-piⁿ, kóng, ‘[Sò-lô] hiaⁿ-tī, hō͘ lí ōe-koh khòaⁿ-kìⁿ!’ Hit-chūn góa sûi-sî ōe khòaⁿ-kìⁿ, ū khòaⁿ-tio̍h i. 14 I kóng, ‘Lán chó͘-sian ê Siōng-tè í-keng kéng-soán lí, hō͘ lí chai I ê chí-ì, thang khòaⁿ-kìⁿ I hit-ūi Kong-gī ê Po̍k-jîn, koh thiaⁿ-tio̍h I ê chhùi só͘ chhut ê siaⁿ, 15 in-ūi lí ōe chiong lí só͘ khòaⁿ-kìⁿ só͘ thiaⁿ-tio̍h ê tùi bān-bîn chòe kiàn-chèng. 16 Ná iáu teh iân-chhiân, khí-lâi niá-siū sóe-lé, kiû-kiò I ê miâ thang hō͘ lí ê chōe tit-tio̍h chheng-khì!’ ” 17 “Āu-lâi, góa tò-khì [Iâ-lō͘-sat-léng]; tī Sèng-tiān teh kî-tó ê sî ji̍p-sîn 18 khòaⁿ-tio̍h Chú kā góa kóng, ‘Kóaⁿ-kín, sûi-sî lī-khui [Iâ-lō͘-sat-léng], in-ūi chit só͘-chāi ê lâng bōe chiap-siū lí ūi-tio̍h góa só͘ chòe ê kiàn-chèng.’ 19 Góa ìn kóng, ‘Chú ah, in ka-kī chai góa í-chêng khì ta̍k ê hōe-tn̂g lia̍h sìn lí ê lâng koaiⁿ-lo̍h kaⁿ, koh kā in phah. 20 Lí ê kiàn-chèng-jîn [Sū-thê-hoán] hō͘ lâng sat-hāi ê sî, góa mā khiā tī piⁿ-a, chàn-tông in, koh kā hāi-sí i ê lâng kò͘ gōa-saⁿ.’ 21 Chú tùi góa kóng, ‘Lí khì, in-ūi góa beh chhe lí khì hn̄g-hn̄g ê Gōa-pang-lâng hia.’ ” 22 Chèng-lâng it-ti̍t chù-ì thiaⁿ, kàu [Pó-lô] kóng chit kù ōe ê sî, in tōa-siaⁿ hoah, “Chit khoán lâng tio̍h tùi tōe-chiūⁿ siau-bia̍t! M̄-thang hō͘ i oa̍h!” 23 In tōa-siaⁿ jióng, thiah-phòa gōa-saⁿ, ǹg khong-tiong iā thô͘-hún ê sî, 24 [Lô-má] ê chí-hui-koaⁿ bēng-lēng lâng chiong [Pó-lô] ah ji̍p-khì iâⁿ-pâng, ēng piⁿ kā i phah, ūi-tio̍h beh khak-si̍t chai [Iû-thài]-lâng sī-án-chóaⁿ teh kā i jióng. 25 In kā i pa̍k khí-lâi beh piⁿ-phah ê sî, [Pó-lô] tùi khiā tī piⁿ-a ê kun-koaⁿ kóng, “Tùi chi̍t ê bô siū phòaⁿ-chōe ê [Lô-má] kong-bîn, lín ēng piⁿ kā i phah kiám ū ha̍p-hoat?” 26 Hit-ê kun-koaⁿ chi̍t-ē thiaⁿ-tio̍h chiū khì kìⁿ chí-hui-koaⁿ, tùi i kóng, “Taⁿ beh án-chóaⁿ? Chit-ê lâng sī [Lô-má] kong-bîn!” 27 Chí-hui-koaⁿ khì kìⁿ [Pó-lô], mn̄g i kóng, “Kā góa kóng, lí sī [Lô-má] ê kong-bîn sī-bô?” [Pó-lô] ìn kóng, “Sī.” 28 Chí-hui-koaⁿ kóng, “Góa ēng chin chōe chîⁿ chiah tit-tio̍h chit-ê kong-bîn-koân.” [Pó-lô] kóng, “Góa chhut-sì chiū-sī [Lô-má] kong-bîn.” 29 Hiah-ê beh sím-mn̄g [Pó-lô] ê lâng sûi-sî lī-khui. Chí-hui-koaⁿ chi̍t-ē chai [Pó-lô] sī [Lô-má] kong-bîn, koh in-ūi kā i pa̍k-teh, chiū chin kiaⁿ. 30 Keh-ji̍t, Chí-hui-koaⁿ ài chai [Iû-thài]-lâng khòng-kò [Pó-lô] ê khak-si̍t lí-iû, chiū kā i tháu-khui, koh bēng-lēng chè-si-tiúⁿ kap choân gī-hōe chū-chi̍p, chhōa [Pó-lô] chhut-lâi, hō͘ i khiā tī in bīn-chêng.

Sù-tô͘ hēng-toān 23

1 [Pó-lô] chù-ba̍k khòaⁿ gī-oân, kóng, “Kok ūi hiaⁿ-tī, góa tī Siōng-tè ê bīn-chêng chiàu oân-choân chheng-pe̍k ê liông-sim seng-oa̍h, ti̍t-kàu kin-á-ji̍t.” 2 Tōa-chè-si [A-ná-nî-a] bēng-lēng khiā tī [Pó-lô] sin-piⁿ ê lâng kā i siàn chhùi-phóe. 3 [Pó-lô] tùi i kóng, “Lí chit-ê chhat-kah pe̍h-pe̍h ê chhiûⁿ, Siōng-tè beh phah lí! Lí khui-têng eng-kai chiàu hoat-lu̍t kā góa sím-phòaⁿ, lí kèng-jiân ûi-hoat bēng-lēng lâng phah góa!” 4 Khiā tī [Pó-lô] piⁿ-a ê lâng kóng, “Lí káⁿ mē Siōng-tè ê tōa-chè-si?” 5 [Pó-lô] ìn kóng, “Hiaⁿ-tī ah, góa m̄-chai i sī tōa-chè-si; Sèng-keng ū kì-chài kóng, ‘M̄-thang bú-jio̍k tī-lí jîn-bîn ê tiúⁿ-koaⁿ.’ ” 6 [Pó-lô] chi̍t-ē chai-iáⁿ in tiong-kan ū-ê sī [Sat-to͘-kai]-phài ê lâng, ū-ê sī [Hoat-lī-sài]-phài ê lâng, chiū tī gī-hōe hoah kóng, “Hiaⁿ-tī, góa sī [Hoat-lī-sài]-phài ê lâng, sī [Hoat-lī-sài]-lâng ê kiáⁿ, góa siū sím-mn̄g sī in-ūi ǹg-bāng sí-lâng ê koh-oa̍h!” 7 I chi̍t-ē án-ni kóng, [Hoat-lī-sài]-phài ê lâng kap [Sat-to͘-kai]-phài ê lâng chiū khí cheng-lūn, gī-hōe mā hun-lia̍t. 8 In-ūi [Sat-to͘-kai]-phài ê lâng kóng bô koh-oa̍h, bô thiⁿ-sài, mā bô sîn-lêng, m̄-kú [Hoat-lī-sài]-phài ê lâng chit saⁿ hāng lóng ū sìn. 9 Soan-jióng ê siaⁿ ná lâi ná tōa, kúi-nā ê [Hoat-lī-sài]-phài ê keng-ha̍k-kàu-su khiā khí-lâi, ke̍k-lia̍t khòng-gī kóng, “Goán chhē bōe chhut chit-ê lâng ū sím-mi̍h chhò-gō͘. Káⁿ chin-chiàⁿ ū sîn-lêng á-sī thiⁿ-sài tùi i kóng-ōe ô͘?” 10 Cheng-lūn ná lâi ná ke̍k-lia̍t, chí-hui-koaⁿ kiaⁿ-liáu [Pó-lô] hō͘ in thiah-chhùi, chiū bēng-lēng peng lo̍h-khì tùi chèng-lâng tiong-kan kā [Pó-lô] chhiúⁿ chhut-lâi, chhōa ji̍p-khì iâⁿ-pâng. 11 Hit mî, Chú khiā tī [Pó-lô] ê sin-piⁿ, kóng, “Tio̍h ióng-kám! Lí í-keng ū tī [Iâ-lō͘-sat-léng] ūi-tio̍h góa chòe kiàn-chèng, mā it-tēng tio̍h tī [Lô-má] ūi-tio̍h góa chòe kiàn-chèng.” 12 Keh chá-khí, [Iû-thài]-lâng tàu-tīn kè-bô͘, chiù-chōa nā bô thâi-sí [Pó-lô] m̄-chia̍h m̄-lim. 13 Ū sì-cha̍p gōa ê lâng chham-ka chit-ê im-bô͘. 14 In khì kìⁿ chè-si-tiúⁿ kap tiúⁿ-ló, kóng, “Goán í-keng chiù tāng-chōa, nā bô thâi-sí [Pó-lô] lóng m̄-chia̍h! 15 Hiān-chāi lín kap gī-hōe tio̍h iau-kiû chí-hui-koaⁿ chhōa [Pó-lô] lâi hō͘ lín, ké-chòe beh khah siông-sè chhâ-mn̄g i ê àn-kiāⁿ, goán ōe chún-pī hó-sè, tī i kàu chia í-chêng kā i thâi-sí.” 16 [Pó-lô] ê gōe-seng thiaⁿ-tio̍h chit-ê bâi-ho̍k ê im-bô͘, chiū ji̍p-khì peng-iâⁿ kā [Pó-lô] kóng. 17 [Pó-lô] chiū chhiáⁿ chi̍t ê kun-koaⁿ lâi, kā i kóng, “Chhiáⁿ chhōa chit-ê siàu-liân-lâng khì kìⁿ chí-hui-koaⁿ, i ū tāi-chì beh kā i pò-kò.” 18 Kun-koaⁿ chiū chhōa siàu-liân-lâng khì kìⁿ chí-hui-koaⁿ, kóng, “Hit-ê hoān-lâng [Pó-lô] kiò góa lâi, iau-kiû góa chhōa chit-ê siàu-liân-lâng lâi kìⁿ lí, in-ūi i ū tāi-chì beh kā lí kóng.” 19 Chí-hui-koaⁿ khan i ê chhiú khì piⁿ-a mn̄g i, “Lí ū sím-mi̍h tāi-chì beh kā góa pò-kò?” 20 I kóng, “[Iû-thài]-lâng í-keng kóng hó-sè, ké-chòe beh koh-khah siông-sè tiâu-cha [Pó-lô] ê àn-kiāⁿ, beh chhiáⁿ lí bîn-á-chài kā i sàng khì gī-hōe. 21 Chhiáⁿ lí m̄-thang thiaⁿ in ê ōe, in-ūi ū sì-cha̍p gōa ê lâng bâi-ho̍k teh tán i. In chiù-chōa, nā bô thâi-sí [Pó-lô] m̄-chia̍h m̄-lim. Hiān-chāi in lóng chún-pī hó-sè, teh thèng-hāu lí ún-chún.” 22 Chí-hui-koaⁿ chiū hoan-hù siàu-liân-lâng kóng, “M̄-thang tùi lâng kóng lí ū pò góa chai chit hāng tāi-chì”, jiân-āu kiò i tńg-khì. 23 Chí-hui-koaⁿ kiò nn̄g ê kun-koaⁿ lâi, kā in kóng, “Khì chún-pī pō͘-peng nn̄g-pah ê, bé-peng chhit-cha̍p ê, kap gia̍h-chhiuⁿ ê peng nn̄g-pah ê, thang tī kim-àm káu-tiám chhut-hoat khì [Khái-sat-lī-a]. 24 Koh khì chún-pī bé hō͘ [Pó-lô] khiâ, hō͘-sàng i an-choân kàu [Hui-le̍k-su] chóng-tok hia.” 25 Chí-hui-koaⁿ chiū siá chi̍t tiuⁿ phoe án-ni kóng: 26 “[Kek-ló-tē] [Lū-se-a] kā chóng-tok [Hui-le̍k-su] kok-hā chhéng-an. 27 Chit-ê lâng hō͘ [Iû-thài]-lâng lia̍h-khì, teh-beh hō͘ in thâi-sí ê sî, góa chi̍t-ē chai i sī [Lô-má] kong-bîn, chiū tòa peng khì kā i kiù. 28 Góa siūⁿ-beh bêng-pe̍k in khòng-kò i ê lí-iû chiū sàng i khì in ê gī-hōe. 29 Góa hoat-hiān i hō͘ lâng kò sī koan-hē in Lu̍t-hoat ê cheng-lūn, pèng bô hoān-tio̍h sím-mi̍h kai-sí á-sī tio̍h koaiⁿ-kaⁿ ê chōe. 30 Āu-lâi ū lâng kā góa pò-kò [Iû-thài]-lâng kè-bô͘ beh hāi i, só͘-í góa sûi-sî sàng i khì lí hia, siâng-sî bēng-lēng kò i ê lâng mā tio̍h tī lí ê bīn-chêng kā i khòng-kò.” 31 Pō͘-peng chip-hêng bēng-lēng, thàu-mî chiong [Pó-lô] tòa khì kau hō͘ [An-thê-phàⁿ-tí]. 32 Keh-ji̍t pō͘-peng tńg-khì iâⁿ-ni̍h, hō͘ bé-peng kè-sio̍k hō͘-sàng. 33 In kàu [Khái-sat-lī-a], chiong hit tiuⁿ phoe the̍h hō͘ chóng-tok, mā chiong [Pó-lô] kau hō͘ i. 34 Chóng-tok tha̍k hit tiuⁿ phoe liáu, mn̄g [Pó-lô] sī tó chi̍t séng ê lâng, chai-iáⁿ sī [Ki-lī-ka]-séng ê lâng, 35 chiū kóng, “Kò lí ê lâng kàu-ūi ê sî, góa chiah chhú-lí lí ê àn-kiāⁿ.” Āu-lâi chóng-tok bēng-lēng chiong [Pó-lô] khu-liû tī [Hi-lu̍t] ê kong-sú.

Sù-tô͘ hēng-toān 24

1 Gō͘ ji̍t āu, tōa-chè-si [A-ná-nî-a] kap kúi-nā ê tiúⁿ-ló, í-ki̍p chi̍t ê kiò-chòe [Thia̍p-thó͘-lô] ê lu̍t-su lâi-kàu [Khái-sat-lī-a]. In tī [Hui-le̍k-su] chóng-tok bīn-chêng kò [Pó-lô]. 2 [Pó-lô] chi̍t-ē siū tiàu chhut-têng, [Thia̍p-thó͘-lô] chiū kā i khòng-kò, kóng: “[Hui-le̍k-su] kok-hā, in-ūi lí hiân-bêng ê tī-lí hō͘ goán hióng-siū thài-pêng, só͘ si-hêng ê chōe-chōe kái-kek mā hō͘ kok-ka tit-tio̍h chìn-pō͘. 3 Lí ê tek-chèng hō͘ goán ta̍k-sî ta̍k-ūi kám-siā put-chīn. 4 Góa m̄-káⁿ tam-gō͘ lí siuⁿ kú, kiû lí khoan-iông lâi thiaⁿ goán kán-iàu ê sin-sò͘. 5 Goán khòaⁿ chit-ê lâng sī chi̍t ê gûi-hiám jîn-bu̍t, tī choân sè-kài ê [Iû-thài]-lâng tiong-kan chok-loān, sī [Ná-sat-le̍k]-tóng ê siú-léng. 6 I siūⁿ-beh ù-jiám Sèng-tiān, goán chiū kā i lia̍h khí-lâi. 8 Lí chhin-sin sím-mn̄g chit-ê lâng chiū ōe bêng-pe̍k goán khòng-kò i it-chhè ê tāi-chì.” 9 Chāi-tiûⁿ ê [Iû-thài]-lâng mā lóng chi-chhî chit-ê khòng-kò, kóng sū-chêng khak-si̍t sī án-ni. 10 Chóng-tok tùi [Pó-lô] sī-ì, kiò i hoat-giân, [Pó-lô] chiū kóng: “Góa chai lí tī pún-kok phòaⁿ-àn chin chōe nî, góa goān-ì tī lí bīn-chêng ūi-tio̍h ka-kī piān-hō͘. 11 Lí tiâu-cha chiū ōe bêng-pe̍k, tùi góa chiūⁿ [Iâ-lō͘-sat-léng] kèng-pài kàu kin-á-ji̍t chí-ū cha̍p-jī ji̍t. 12 [Iû-thài]-lâng pèng bô khòaⁿ-tio̍h góa tī Sèng-tiān kap lâng piān-lūn, mā bô khòaⁿ-tio̍h góa tī hōe-tn̂g á-sī chhī-lāi siàn-tōng kûn-chiòng. 13 In mā bōe-tàng tùi lí the̍h-chhut hiān-chāi teh khòng-kò góa ê chèng-kù. 14 Put-kò góa tio̍h tùi lí sêng-jīn chi̍t hāng sū, chiū-sī góa chiàu in khòaⁿ-chòe sī īⁿ-toan ê Tō-lō͘ kèng-pài goán chó͘-sian ê Siōng-tè, siong-sìn [Mô͘-se] ê Lu̍t-hoat kap sian-ti ê chheh só͘ kì-chài ê it-chhè. 15 Góa tùi Siōng-tè ū khǹg kap in kâng-khoán ê ǹg-bāng, chiū-sī bô-lūn hó-lâng á-sī pháiⁿ-lâng lóng ōe tùi sí koh-oa̍h. 16 In-ūi án-ni, góa tùi Siōng-tè kap lâng lóng chīn-la̍t pó-chhî chheng-pe̍k ê liông-sim. 17 “Góa lī-khui [Iâ-lō͘-sat-léng] kúi-nā nî āu koh tńg-khì, sī the̍h chi̍t-kóa chîⁿ beh khì kiù-chè tông-pau, koh hiàn chè-mi̍h. 18 In tī Sèng-tiān khòaⁿ-tio̍h góa ê sî, góa í-keng oân-sêng kiat-chēng-lé teh hiàn-chè, hit sî bô kûn-chiòng, mā bô jiáu-loān, 19 kan-ta ū kúi-nā ê tùi [A-se-a] lâi ê [Iû-thài]-lâng tī hia. In nā beh khòng-kò góa, eng-kai ka-kī lâi lí ê bīn-chêng kò góa chiah tio̍h. 20 Nā bô, góa tī gī-hōe sin-sò͘ ê sî, in tio̍h chí-chhut góa ū chòe sím-mi̍h m̄-tio̍h. 21 Chí-ū chi̍t hāng sū in ōe-tàng kā góa khòng-kò, chiū-sī góa bat khiā tī in tiong-kan tōa-siaⁿ kóng, ‘Góa kin-á-ji̍t siū lín sím-phòaⁿ, sī ūi-tio̍h sí-lâng ê koh-oa̍h.’ ” 22 [Hui-le̍k-su] tùi chit-ê Tō-lō͘ siong-tong chheng-chhó, chiū soan-pò͘ thòe-têng, tùi in kóng, “Thèng-hāu chí-hui-koaⁿ [Lū-se-a] lâi, góa chiah phòaⁿ-koat lín ê àn-kiāⁿ.” 23 Jiân-āu [Hui-le̍k-su] bēng-lēng hit-ê kun-koaⁿ kò͘-siú [Pó-lô], hō͘ i ū tām-po̍h chū-iû, koh chún i ê pêng-iú tòa i só͘ khiàm-ēng ê mi̍h-kiāⁿ lâi hō͘ i. 24 Kúi-nā ji̍t āu, [Hui-le̍k-su] kap i ê [Iû-thài] hu-jîn [Thó͘-se-la] lâi. I chhe lâng kiò [Pó-lô] chhut-lâi, beh thiaⁿ i káng-lūn koan-hē sìn Ki-tok Iâ-so͘ ê sū. 25 [Pó-lô] kóng kàu kong-gī, chiat-chè, kap chiong-lâi ê Sím-phòaⁿ, [Hui-le̍k-su] kám-kak kiaⁿ-hiâⁿ, chiū tùi [Pó-lô] kóng, “Chit pái kàu chia chiū hó, ū ki-hōe góa chiah koh tiàu lí lâi.” 26 Siâng-sî i mā ū teh kî-thāi [Pó-lô] ōe sàng-chîⁿ hō͘ i, só͘-í siông-siông kiò [Pó-lô] chhut-lâi, kap i tâm-lūn. 27 Keng-kè nn̄g nî, [Pho-kiû] [Hui-su-to͘] chiap [Hui-le̍k-su] choh chóng-tok. [Hui-le̍k-su] ūi-tio̍h beh hō͘ [Iû-thài]-lâng hoaⁿ-hí, kè-sio̍k kā [Pó-lô] koaiⁿ tī kaⁿ-ni̍h.

Sù-tô͘ hēng-toān 25

1 [Hui-su-to͘] chiūⁿ-jīm saⁿ ji̍t āu, tùi [Khái-sat-lī-a] chiūⁿ-khì [Iâ-lō͘-sat-léng]. 2 Chè-si-tiúⁿ kap [Iû-thài]-lâng ê léng-siù tùi i khòng-kò [Pó-lô]. In chhéng-kiû [Hui-su-to͘], 3 pài-thok i chiong [Pó-lô] sàng khì [Iâ-lō͘-sat-léng]. In kè-bô͘ tī lō͘-tiong bâi-ho̍k beh kā i thâi-sí. 4 [Hui-su-to͘] ìn kóng, “[Pó-lô] koaiⁿ tī [Khái-sat-lī-a], góa ka-kī mā liâm-piⁿ beh tńg-khì hia. 5 Só͘-í lín tiong-kan chòe thâu ê lâng thang kap góa chòe-hé khì [Khái-sat-lī-a], chit-ê lâng nā ū chòe sím-mi̍h m̄-tio̍h, in thang tī hia kā i kò.” 6 [Hui-su-to͘] tòa hia chiâⁿ-cha̍p ji̍t, chiū tò-khì [Khái-sat-lī-a]. Keh-ji̍t, i khui-têng, bēng-lēng lâng tòa [Pó-lô] lâi. 7 [Pó-lô] chi̍t-ē chhut-têng, tùi [Iâ-lō͘-sat-léng] lo̍h-lâi hiah-ê [Iû-thài]-lâng óa-lâi khiā tī i ê chiu-ûi, ēng chin chōe giâm-tiōng ê chōe-miâ kā i khòng-kò, m̄-kú the̍h bōe chhut chèng-kù. 8 [Pó-lô] ūi-tio̍h ka-kī piān-hō͘, kóng, “Góa tùi [Iû-thài]-lâng ê Lu̍t-hoat, á-sī Sèng-tiān, á-sī [Lô-má] hông-tè lóng m̄-bat chòe sím-mi̍h m̄-tio̍h ê tāi-chì.” 9 M̄-kú [Hui-su-to͘] ūi-tio̍h beh hō͘ [Iû-thài]-lâng hoaⁿ-hí, chiū mn̄g [Pó-lô], “Lí goān-ì chiūⁿ [Iâ-lō͘-sat-léng], tī hia ūi-tio̍h chiah-ê kò-sò͘ chiap-siū góa ê sím-phòaⁿ bô?” 10 [Pó-lô] kóng, “Góa hiān-chāi khiā tī hông-tè ê hoat-têng, tong-jiân tio̍h tī chia siū sím-phòaⁿ. Lí bêng-bêng chai, góa pèng bô tek-chōe [Iû-thài]-lâng. 11 Góa nā ū chòe m̄-tio̍h, hoān-tio̍h kai-sí ê chōe, chiū tio̍h sí, góa mā choa̍t-tùi bōe tô-pī. M̄-kú in ê khòng-kò nā bô sū-si̍t, bô-lâng ōe-tàng kā góa kau hō͘ in. Góa beh tùi hông-tè siōng-sò͘.” 12 [Hui-su-to͘] kap kò͘-būn chham-siông liáu-āu, ìn kóng, “Kì-jiân lí í-keng tùi hông-tè siōng-sò͘, chiū khì hông-tè hia.” 13 Kè kúi-nā ji̍t, [A-ki-phàⁿ]-ông kap [Pek-nî-ki] lâi [Khái-sat-lī-a], tùi [Hui-su-to͘] piáu-sī kèng-ì. 14 In tī hia tòa kúi-nā ji̍t liáu-āu, [Hui-su-to͘] chiong [Pó-lô] ê àn-kiāⁿ kóng hō͘ [A-ki-phàⁿ]-ông thiaⁿ, i kóng, “Tī chia ū chi̍t ê [Hui-le̍k-su] lâu lo̍h-lâi ê hoān-lâng. 15 Góa khì [Iâ-lō͘-sat-léng] ê sî, [Iû-thài]-lâng ê chè-si-tiúⁿ kap tiúⁿ-ló ū kā i kò, iau-kiû góa kā i tēng-chōe. 16 Góa kā in kóng, chiàu [Lô-má]-lâng ê koàn-lē, pī-kò iáu-bē kap goân-kò bīn-tùi-bīn tùi-chí, iáu bô ki-hōe ūi ka-kī piān-hō͘, bōe-tàng kā i tēng-chōe. 17 Só͘-í, in lóng kàu-ūi, góa sûi-sî tī keh-ji̍t khui-têng, bēng-lēng tòa hit-ê lâng lâi. 18 Goân-kò khiā khí-lâi khòng-kò, m̄-kú só͘ kò ê bô chi̍t hāng sī góa só͘ siūⁿ ê hiah-ni̍h pháiⁿ. 19 In kap i cheng-lūn ê sī in ka-kī ê chong-kàu būn-tôe, í-ki̍p chi̍t-ê kiò-chòe Iâ-so͘ ê lâng ê tāi-chì. I í-keng sí, m̄-kú [Pó-lô] chú-tiuⁿ I iáu teh oa̍h. 20 Chiah-ê būn-tôe góa m̄-chai tio̍h án-chóaⁿ tiâu-cha, só͘-í mn̄g [Pó-lô] khòaⁿ goān-ì chiūⁿ [Iâ-lō͘-sat-léng] tī hia ūi-tio̍h chiah-ê tāi-chì siū sím-phòaⁿ á-bô. 21 M̄-kú [Pó-lô] chhéng-kiû kè-sio̍k kā i khàu-liû, thèng-hāu hông-tè chhâi-koat, só͘-í góa bēng-lēng kā i khàu-liû kàu sàng-kau hō͘ hông-tè.” 22 [A-ki-phàⁿ] kā [Hui-su-to͘] kóng, “Góa ka-kī mā ài thiaⁿ chit-ê lâng kóng-ōe.” [Hui-su-to͘] kóng, “Bîn-á-chài lí ōe-tàng thiaⁿ i kóng.” 23 Keh-ji̍t, [A-ki-phàⁿ] kap [Pek-nî-ki] hui-siông chhiaⁿ-iāⁿ ji̍p-tiûⁿ, chhōa chí-hui-koaⁿ kap chhī-lāi ê iàu-jîn chìn-ji̍p tōa-thiaⁿ. [Hui-su-to͘] hā-lēng, [Pó-lô] chiū hō͘ lâng chhōa ji̍p-lâi. 24 [Hui-su-to͘] kóng, “[A-ki-phàⁿ]-ông kap chāi-chō kok ūi! Lín khòaⁿ chit-ê lâng! Tī chia kap tī [Iâ-lō͘-sat-léng] só͘-ū ê [Iû-thài]-lâng lóng tùi góa chhéng-kiû, hoah kóng tio̍h hō͘ i sí. 25 M̄-kú góa chhâ bōe chhut i ū hoān-tio̍h sím-mi̍h kai-sí ê chōe. I kì-jiân ka-kī tùi hông-tè siōng-sò͘, góa chiū koat-tēng kā i sàng-khì. 26 Koan-hē chit-ê lâng, góa bô khak-si̍t ê chu-liāu thang tùi hông-siōng thêng-chàu. In-ūi án-ni góa chiah kā i chhōa lâi kok ūi bīn-chêng, te̍k-pia̍t tī [A-ki-phàⁿ]-ông lí ê bīn-chêng, cha-bêng àn-chêng liáu-āu thang tit-tio̍h chu-liāu thêng-chàu. 27 In-ūi chiàu góa khòaⁿ, ah-sàng siû-hoān, bô chí-bêng i ê chōe-miâ sī bô ha̍p-lí.”

Sù-tô͘ hēng-toān 26

1 [A-ki-phàⁿ] tùi [Pó-lô] kóng, “Chún lí ūi-tio̍h ka-kī piān-hō͘.” [Pó-lô] chiū chhun-chhiú khai-sí piān-hō͘: 2 “[A-ki-phàⁿ]-ông, kin-á-ji̍t ōe-tàng tī lí ê bīn-chêng ūi-tio̍h [Iû-thài]-lâng khòng-kò góa it-chhè ê sū sin-piān, góa kám-kak bān-hēng. 3 In-ūi lí tùi [Iû-thài]-lâng ê koàn-lē kap cheng-lūn ê būn-tôe te̍k-pia̍t cheng-thong, só͘-í góa khún-kiû lí nāi-sim thiaⁿ. 4 “Góa tùi siàu-liân kàu taⁿ, khí-thâu tī góa pún-kok, āu-lâi tī [Iâ-lō͘-sat-léng], choh-lâng án-chóaⁿ, só͘-ū ê [Iû-thài]-lâng lóng chai. 5 In í-keng bat góa chin kú, nā khéng, ōe-tàng ūi-tio̍h góa choh-chèng. Góa choh chi̍t ê Hoat-lī-sài-lâng, ū chiàu goán ê chong-kàu siōng giâm-keh kàu-phài ê iau-kiû teh seng-oa̍h. 6 Hiān-chāi góa khiā tī chia siū sím-phòaⁿ, sī in-ūi góa ǹg-bāng Siōng-tè tùi goán chó͘-sian ê èng-ún ōe si̍t-hiān; 7 goán cha̍p-jī chi-cho̍k ê tông-pau mî-ji̍t jia̍t-sim kèng-pài mā-sī ūi-tio̍h beh hō͘ chit-ê ǹg-bāng si̍t-hiān. Ông ah, ūi-tio̍h chit-ê ǹg-bāng, góa chiah siū [Iû-thài]-lâng khòng-kò. 8 Siōng-tè hō͘ sí-lâng koh-oa̍h chit hāng tāi-chì lín sī-án-chóaⁿ toàn-tēng bōe-tàng siong-sìn? 9 “Í-chêng góa pún-sin mā siūⁿ-kóng tio̍h ēng ta̍k khoán ê hong-hoat lâi hoán-tùi [Ná-sat-le̍k]-lâng Iâ-so͘ ê miâ. 10 Góa tī [Iâ-lō͘-sat-léng] khak-si̍t ū án-ni chòe, m̄-nā ū tùi chè-si-tiúⁿ niá-siū koân-pèng lia̍h chin chōe sìn-tô͘ koaiⁿ-kaⁿ, koh tī in siū chhú-sí ê sî mā piáu-sī chàn-sêng. 11 Góa sî-siông tī kok tōe ê hōe-tn̂g kā in hêng-hoa̍t, kiông-pek in siat-to̍k chit-ê sìn-gióng, koh ēng pō-le̍k tùi-thāi in, sīm-chì kàu gōa-kok ê siâⁿ-chhī kā in pek-hāi.” 12 “Ū chi̍t piàn, góa tòa chè-si-tiúⁿ ê koân-pèng kap bēng-lēng khì [Tāi-má-sū-kek]. 13 Ông ah, tī pòaⁿ-lō͘, tiong-tàu ê sî, góa khòaⁿ-tio̍h pí ji̍t-thâu koh-khah kiông ê kng tùi thiⁿ-téng chiò lo̍h-lâi, kā góa kap tâng-kiâⁿ ê lâng tà-teh. 14 Goán lóng poa̍h lo̍h-khì thô͘-kha. Góa ū thiaⁿ-tio̍h chi̍t ê siaⁿ, ēng [Hi-pek-lâi]-ōe tùi góa kóng, ‘[Só-lô], [Só-lô], lí sī-án-chóaⁿ teh pek-hāi góa? Lí án-ni chòe, chhin-chhiūⁿ ēng kûn-thâu-bú teh cheng chio̍h-sai, ka-kī thó phê thiàⁿ.’ 15 Góa mn̄g kóng, ‘Chú ah, lí sī sím-mi̍h-lâng?’ Chú kóng, ‘Góa chiū-sī lí teh pek-hāi ê Iâ-so͘. 16 Khí-lâi, khiā-teh; góa tùi lí hián-hiān sī beh phài lí ūi-tio̍h só͘ khòaⁿ-kìⁿ koan-hē góa ê sū, í-ki̍p chiong-lâi beh tùi lí hián-hiān ê sū choh-chèng. 17 Góa beh tùi [Í-sek-lia̍t]-lâng kap Gōa-pang-lâng ê tiong-kan kā lí kiù chhut-lâi, chhe-khián lí khì in hia, 18 khui in ê ba̍k-chiu, hō͘ in lī-khui o͘-àm chìn-ji̍p kng-bêng, lī-khui Sat-tàn ê koân-sè kui-ǹg Siōng-tè, hō͘ in tùi sìn góa tit-tio̍h sià-chōe, koh sêng-siū choh Siōng-tè soán-bîn ê tōe-ūi.’ ” 19 “Só͘-í, [A-ki-phàⁿ]-ông, góa bô ûi-pōe tùi thiⁿ lâi ê īⁿ-siōng. 20 Góa tāi-seng tùi [Tāi-má-sū-kek] kap [Iâ-lō͘-sat-léng] ê lâng, āu-lâi tùi [Iû-thài] choân-tōe ê lâng, mā tùi Gōa-pang-lâng thoân-tō, khǹg in tio̍h hóe-kái lâi kui-ǹg Siōng-tè, koh tio̍h ēng hêng-ûi chèng-bêng in ū chin-chiàⁿ hóe-kái. 21 Ūi-tio̍h chit-ê iân-kò͘, [Iû-thài]-lâng tī Sèng-tiān lāi lia̍h góa, siūⁿ-beh thâi góa. 22 Kàu kin-á-ji̍t, góa tit-tio̍h Siōng-tè ê pang-chān, ōe-tàng khiā tī chia tùi chun-kùi kap pi-bî ê lâng chòe kiàn-chèng. Góa só͘ kóng ê, kap sian-ti í-ki̍p [Mô͘-se] só͘ kóng ê kâng-khoán, sī koan-hē chiong-lâi beh hoat-seng ê sū, 23 chiū-sī Ki-tok it-tēng tio̍h siū-khó͘, chiâⁿ-chòe thâu-chi̍t-ê tùi sí-lâng tiong koh-oa̍h ê, thang chiong chín-kiù ê kng thoân hō͘ [Iû-thài]-lâng kap Gōa-pang-lâng.” 24 [Pó-lô] án-ni ūi-tio̍h ka-kī teh piān-hō͘ ê sî, [Hui-su-to͘] tùi i tōa-siaⁿ hoah, “[Pó-lô], lí khí-kông lah; lí ê phok-ha̍k hō͘ lí khí-kông lah!” 25 [Pó-lô] kóng, “Hui-su-to͘ kok-hā! Góa pèng bô khí-kông; góa só͘ kóng ê ōe chin-si̍t koh ha̍p-lí. In-ūi ông lí chai chiah-ê tāi-chì, góa chiah káⁿ tōa-táⁿ tùi lí kóng. 26 Góa siong-sìn ông tùi chiah-ê tāi-chì lóng chin chheng-chhó, in-ūi só͘ hoat-seng chiah-ê tāi-chì bô-lâng m̄-chai. 27 [A-ki-phàⁿ]-ông, lí ū siong-sìn sian-ti bô? Góa chai lí ū.” 28 [A-ki-phàⁿ] tùi [Pó-lô] kóng, “Lí kóng kúi-kù-á ōe chiū beh sòe-ho̍k góa chòe Ki-tok-tô͘ ò͘!” 29 [Pó-lô] ìn kóng, “Bô-lūn kúi-kù-á ōe á-sī chin chōe ōe, góa kî-kiû Siōng-tè, m̄-nā sī lí, liân kin-á-ji̍t tī chia só͘-ū thiaⁿ góa kóng-ōe ê lâng mā lóng ōe kap góa kâng-khoán, m̄-kú bô chhin-chhiūⁿ góa hō͘ lâng ēng thih-liān liān-teh.” 30 Ông, chóng-tok, [Pek-nî-ki], kap tâng chē ê lâng lóng khiā khí-lâi. 31 In thòe-chhut liáu-āu hō͘-siōng tâm-lūn kóng, “Chit-ê lâng pèng bô hoān-tio̍h sím-mi̍h kai-sí á-sī tio̍h koaiⁿ-kaⁿ ê chōe.” 32 [A-ki-phàⁿ] tùi [Hui-su-to͘] kóng, “Chit-ê lâng nā bô tùi hông-tè siōng-sò͘, chá chiū thang kā i pàng lah.”

Sù-tô͘ hēng-toān 27

1 Goán Í-keng koat-tēng tio̍h chē-chûn khì [Ì-tāi-lī], in chiū chiong [Pó-lô] kap kî-tha ê hoān-lâng kau hō͘ hông-ka kìm-ōe-kun chi̍t ê miâ kiò [Iû-liû] ê siú-ōe-tiúⁿ. 2 Goán chē chi̍t chiah tùi [A-tāi-bí-tiân] lâi ê chûn; chit chiah chûn tú-á beh iân [A-se-a]-séng kúi-nā ê káng-kháu khui-chûn. Ū chi̍t ê tùi [Thiap-sat-lô-nî-ka] lâi ê [Má-kî-tùn]-lâng [A-lí-ta̍t-kó͘] kap goán chòe-hé khì. 3 Keh-ji̍t goán kàu [Se-tùn]. [Iû-liû] chin chhin-chhiat tùi-thāi [Pó-lô], chún i khì kìⁿ i ê pêng-iú, siū in chiau-thāi. 4 Goán tùi hia koh khui-chûn, in-ūi ge̍k-hong, chiū sūn [Sài-phó͘-lō͘-su]-tó óa siám-hong hit pêng kiâⁿ. 5 Goán keng-kè [Ki-lī-ka] kap [Pông-hui-lī-a] ê gōa-hái, lâi-kàu [Lū-ka] ê [Múi-la]. 6 Tī hia, siú-ōe-tiúⁿ [Iû-liû] chhē-tio̍h chi̍t chiah tùi [A-le̍k-san-tāi] lâi ê chûn, beh khui khì [Ì-tāi-lī], chiū kiò goán chiūⁿ hit chiah chûn. 7 Liân-sòa kúi-nā ji̍t, chûn kiâⁿ chin bān, bián-kióng chiah lâi-kàu [Kek-nî-thó͘] ê gōa-hái. In-ūi siū-tio̍h hong ê chó͘-tòng, goán chiū sūn [Khek-lí-te̍k]-tó lâm-pêng óa siám-hong hit pêng hōaⁿ kiâⁿ tùi [Sat-mô͘-nî]-kak kè-khì. 8 Goán ê chûn sūn hái-kîⁿ kiâⁿ, bián-kióng lâi-kàu lī [La-se-a] bô jōa hn̄g chi̍t ê kiò-chòe [An-choân-káng] ê só͘-chāi. 9 Goán í-keng chhiân chin chōe ji̍t, koh in-ūi kìm-chia̍h ê choeh-kî mā kè liáu, kiâⁿ-chûn gûi-hiám, só͘-í [Pó-lô] khǹg tāi-ke, 10 kóng, “Kok ūi sian-siⁿ, góa khòaⁿ lán kè-sio̍k kiâⁿ-chûn, m̄-nā hè-mi̍h kap chûn, liân lán ê sìⁿ-miā to ōe tú-tio̍h gûi-hiám koh tōa sún-sit.” 11 M̄-kú siú-ōe-tiúⁿ lêng-khó siong-sìn chûn-tiúⁿ kap chûn-chú, m̄-thiaⁿ [Pó-lô] kóng ê ōe. 12 Koh chit-ê káng-kháu mā bô sek-ha̍p kè tang-thiⁿ, tōa-pō͘-hūn ê lâng chàn-sêng khui-chûn, ǹg-bāng ōe-tàng kóaⁿ khì [Hui-nî-ki] kè tang-thiⁿ. [Hui-nî-ki] sī [Khek-lí-te̍k]-tó ê chi̍t ê káng-kháu, chi̍t bīn ǹg sai-lâm, chi̍t bīn ǹg sai-pak. 13 Hit sî, lâm-hong bî-bî-á chhe lâi, tāi-ke siūⁿ-kóng ōe sūn-lī kàu bo̍k-te̍k-tōe chiū khí-tiàⁿ, óa [Khek-lí-te̍k]-tó ê hái-kîⁿ kiâⁿ. 14 Bô kú ū chi̍t chūn kiò-chòe [Iú-la-kek-lô] ê tang-pak tōa-hong tùi [Khek-lí-te̍k]-tó sàu lo̍h-lâi. 15 Chûn hō͘ hong sàu, sái bōe kiâⁿ, chiū chhut-chāi i phiau-liû. 16 Goán lâi-kàu chi̍t ê sió-tó kiò-chòe [Ko-tāi] ê lâm-pêng, siám-hong ê hit pêng hōaⁿ, bián-kióng chiong kiù-seng-thêng pa̍k hó-sè. 17 Jiân-āu chúi-siú chiong kiù-seng-thêng thoa khí-lâi chûn-téng, ēng tōa-soh kā i khún-teh. In kiaⁿ-liáu chûn tī [Sài-ní-tí] ê soa-chiu khò-chhián, chiū lo̍h-phâng, chhut-chāi i phiau-liû. 18 Pō-hong kè-sio̍k chhe, keh-ji̍t in khai-sí chiong hè-mi̍h tàn-lo̍h hái. 19 Tē-saⁿ ji̍t, in koh chhin-chhiú chiong chûn-téng ê khì-khū tàn-tiāu. 20 Chin chōe ji̍t, ji̍t-thâu khòaⁿ bōe-tio̍h, chhiⁿ mā khòaⁿ bōe-tio̍h; hong-éng kè-sio̍k phah-kah chin lī-hāi, chòe-āu goán oân-choân hòng-khì tit-kiù ê ǹg-bāng. 21 Chèng-lâng chin kú lóng bô chia̍h, [Pó-lô] khiā tī in tiong-ng, kóng, “Kok ūi sian-siⁿ, lín chá nā thiaⁿ góa ê ōe, bô tùi [Khek-lí-te̍k] khui-chûn, chiū bōe tú-tio̍h chit khoán ê gûi-hiám kap sún-sit. 22 Hiān-chāi góa khǹg lín tio̍h ióng-kám; lín tiong-kan bô-kah chi̍t lâng ōe sòng-sit sìⁿ-miā; kan-ta ōe sit-lo̍h chit chiah chûn nā-tiāⁿ. 23 In-ūi góa só͘ sio̍k só͘ kèng-pài ê Siōng-tè, cha-àm ū chhe I ê thiⁿ-sài lâi tùi góa 24 kóng, ‘[Pó-lô], bián kiaⁿ! Lí it-tēng tio̍h khiā tī hông-tè bīn-chêng. Siōng-tè í-keng chiong chûn-lāi lóng-chóng ê lâng kau-thok lí lah.’ 25 Só͘-í, tio̍h ióng-kám, in-ūi góa siong-sìn tāi-chì it-tēng ōe chiàu Siōng-tè kā góa kóng án-ni si̍t-hiān. 26 Put-kò lán it-tēng ōe tī chi̍t ê tó-sū khò-chhián.” 27 Kàu tē-cha̍p-sì ji̍t ê àm-sî, goán iáu tī [A-tek-lī-a]-hái teh phiau-liû. Kàu pòaⁿ-mî, chúi-siú siūⁿ-kóng goán teh-beh óa-kūn lio̍k-tōe, 28 chiū tàn chhek-liōng-soh lo̍h-khì thàm, thàm-chhut ū sì-cha̍p kong-chhioh chhim; khah chìn-chêng, koh thàm chi̍t piàn, thàm-chhut ū saⁿ-cha̍p kong-chhioh chhim. 29 In kiaⁿ-liáu chûn lôe-tio̍h àm-chiau, chiū tùi chûn-bé pha sì ê tiàⁿ, pek-chhiat thèng-hāu thiⁿ kín kng. 30 Chúi-siú siūⁿ-beh pàng-sak chûn tô-cháu, chiong kiù-seng-thêng tūi lo̍h-khì hái-ni̍h, ké-chòe beh tùi chûn-thâu pha-tiàⁿ. 31 [Pó-lô] tùi siú-ōe-tiúⁿ kap peng-teng kóng, “Chiah-ê lâng nā bô lâu tī chûn-téng, lín chiū bô kiù.” 32 Peng-teng chiū chām-tn̄g kiù-seng-thêng ê soh, hō͘ i lâu-khì. 33 Thiⁿ beh kng ê sî, [Pó-lô] khǹg chèng-lâng tio̍h chia̍h. I kóng, “Lín í-keng thèng-hāu cha̍p-sì ji̍t kú lóng bô chia̍h, 34 só͘-í góa khǹg lín tio̍h chia̍h chi̍t-kóa mi̍h-kiāⁿ chiah ū khùi-la̍t. Lín liân chi̍t ki thâu-mn̂g to bōe sit-lo̍h.” 35 [Pó-lô] kóng liáu-āu, the̍h piáⁿ, tī chèng-lâng ê bīn-chêng kám-siā Siōng-tè, peh-khui chia̍h. 36 Chèng-lâng sim chiū tiāⁿ lo̍h-lâi, the̍h mi̍h-kiāⁿ chia̍h. 37 Kap goán tâng-chûn ê lâng lóng-chóng ū nn̄g-pah chhit-cha̍p-la̍k ê. 38 Tāi-ke chia̍h pá liáu-āu, chiong be̍h-á tàn lo̍h-hái, hō͘ chûn khah khin. 39 Thiⁿ-kng ê sî, chúi-siú m̄-bat hit-ê só͘-chāi, put-kò in khòaⁿ-tio̍h ū chi̍t ê hái-oan ū soa-than, chiū siūⁿ-khòaⁿ ōe-tàng chiong chûn sái chiūⁿ-than á-bōe. 40 In kā soh chām-tn̄g, chiong tiàⁿ hiat-lo̍h hái, koh tháu-khui chûn-tōa ê soh, kā chûn-thâu ê phâng tiàu khí-lâi, hō͘ i chia̍h-hong, hō͘ chûn sái chiūⁿ-than. 41 M̄-kú chûn lôe-tio̍h soa-phiâⁿ soah khò-chhián; chûn-thâu kā tiâu-teh bōe tín-tāng, chûn-bé hō͘ tōa-éng phah-phòa. 42 Peng-teng kiaⁿ-liáu hoān-lâng siû-chúi tô-cháu, siūⁿ-beh kā in lóng thâi-sí. 43 M̄-kú siú-ōe-tiúⁿ ài-beh kiù [Pó-lô], chiū kā in chó͘-chí. I bēng-lēng ōe-hiáu siû ê lâng seng thiàu-lo̍h chúi, siû chiūⁿ-hōaⁿ; 44 kî-tha ê lâng chiah lī-iōng chûn-pang á-sī chûn ê phòa-phìⁿ chiūⁿ-lio̍k. Chòe-āu, chèng-lâng lóng an-choân chiūⁿ-hōaⁿ.

Sù-tô͘ hēng-toān 28

1 Goán an-choân chiūⁿ-lio̍k liáu-āu chiah chai hit-ê tó-sū kiò-chòe [Má-ní-tha]. 2 Tong-tōe ê goân-chū-bîn tùi goán hui-siông chhin-chhiat, in-ūi lo̍h-hō͘ koh kôaⁿ, chiū khí-hé kā goán chiap-thāi. 3 [Pó-lô] khioh chi̍t khún chhâ, hiat-lo̍h hé, hit-chūn ū chi̍t bé to̍k-chôa in-ūi hé sio sô chhut-lâi, tîⁿ tī i ê chhiú. 4 Tong-tōe ê goân-chū-bîn khòaⁿ-tio̍h hit bé chôa tiàu tī [Pó-lô] ê chhiú-ni̍h, chiū kóng-lâi kóng-khì, “Chit-ê lâng it-tēng sī sat-jîn-hoān, sui-jiân tùi hái-ni̍h khioh-tio̍h miā, thian-lí bô iông-ún i oa̍h.” 5 [Pó-lô] chiong hit bé chôa hiù-lo̍h hé-ni̍h, lóng bô siū-siong. 6 Hiah-ê lâng lóng kim-kim teh khòaⁿ i ê chhiú ōe chéng khí-lâi, á-sī hut-jiân lek lo̍h-khì, sí-khì á-bōe. In thèng-hāu chin kú, khòaⁿ i lóng bô tāi-chì, chiū tian-tò siūⁿ-kóng i sī sîn-bêng. 7 Hái-sū ê thâu-ba̍k [Pō͘-pek-liû] ū chi̍t tè tōe lī hit só͘-chāi bô jōa hn̄g. I hoan-gêng goán tī hia tòa saⁿ ji̍t, chin chhin-chhiat chiap-thāi goán. 8 Tng-sî, [Pō͘-pek-liû] ê lāu-pē hoān-tio̍h jia̍t-pīⁿ kap chhiah-lī, tó tī bîn-chhn̂g. [Pó-lô] ji̍p-khì, kā i hōaⁿ-chhiú kî-tó, kā i i-hó. 9 In-ūi chit-ê tāi-chì, tong-tōe kî-tha ê pīⁿ-lâng mā lâi, mā lóng tit-tio̍h i-hó. 10 In sàng goán chin chōe lé-mi̍h; goán beh khui-chûn ê sî, chiong goán su-iàu ê mi̍h-kiāⁿ sàng kàu chûn-téng hō͘ goán. 11 Saⁿ ge̍h-ji̍t āu, goán chē [A-le̍k-san-tāi] miâ kiò “Siang-siⁿ-á-sîn” ê chûn chhut-hoat. Chit chiah chûn tú tī chit-ê tó-sū kè tang-thiⁿ. 12 Goán tī [Sū-la-kó͘] chiūⁿ-hōaⁿ, tī hia thêng-liû saⁿ ji̍t, 13 āu-lâi tùi hia khui-chûn kàu [Lī-ki-ong], keh-ji̍t ū thàu lâm-hong, tē-jī ji̍t chiū kàu [Pō͘-tiu-lī]. 14 Goán tī hia tú-tio̍h chi̍t-kóa hiaⁿ-tī chí-bē, in chhiáⁿ goán kap in tòa chi̍t lé-pài. Āu-lâi goán lâi-kàu [Lô-má]. 15 [Lô-má] ê hiaⁿ-tī chí-bē thiaⁿ-tio̍h siau-sit, chiū lâi [A-pí-o͘]-chhī kap [Sam-koán] gêng-chiap. [Pó-lô] kìⁿ-tio̍h in chiū kám-siā Siōng-tè, koh-khah ū ióng-khì. 16 Goán kàu [Lô-má] liáu-āu, [Pó-lô] tit-tio̍h ún-chún kap kò͘-siú i ê peng lēng-gōa tòa. 17 Saⁿ ji̍t āu, [Pó-lô] chhiáⁿ tong-tōe [Iû-thài]-lâng ê léng-siù lâi. In chū-chi̍p ê sî, i tùi in kóng, “Kok ūi hiaⁿ-tī, góa sui-jiân bô chòe ûi-pōe tông-pau ê tāi-chì á-sī chó͘-sian ê kui-lē, m̄-kú tī [Iâ-lō͘-sat-léng] siū lia̍h, sàng-kau hō͘ [Lô-má] tong-kio̍k. 18 In sím-mn̄g góa, khòaⁿ góa bô hoān-tio̍h kai-sí ê chōe, ū siūⁿ-beh pàng góa; 19 put-kò [Iû-thài]-lâng hoán-tùi, góa chiah ko͘-put-chiong tùi hông-tè siōng-sò͘; kî-si̍t góa bô ì-sù beh khòng-kò ka-kī ê tông-pau. 20 In-ūi án-ni, góa chiah iau-kiû kap lín kìⁿ-bīn, kap lín tâm-lūn. Góa sī ūi-tio̍h [Í-sek-lia̍t]-lâng só͘ ǹg-bāng Hit-ūi chiah siū thih-liān liān-teh.” 21 In tùi i kóng, “Koan-hē lí ê tāi-chì, goán pèng bô tùi [Iû-thài] chiap-tio̍h phoe-sìn, mā bô hiaⁿ-tī lâi tùi goán pò-kò, á-sī kóng lí ê pháiⁿ-ōe. 22 Put-kò goán ài thiaⁿ lí ê kiàn-kái, in-ūi goán chai lín chit phài ê lâng tī ta̍k só͘-chāi hō͘ lâng hoán-tùi.” 23 In kap [Pó-lô] iok-tēng chi̍t ji̍t, kàu sî ū chin chōe lâng lâi [Pó-lô] só͘ tòa ê só͘-chāi. Tùi chá kàu àm, [Pó-lô] ūi-tio̍h Siōng-tè-kok chòe kiàn-chèng, ín-iōng [Mô͘-se] ê Lu̍t-hoat kap sian-ti ê chheh khǹg in sìn Iâ-so͘. 24 I só͘ kóng ê ōe ū lâng sìn, ū lâng m̄-sìn. 25 In tiong-kan ê ì-kiàn bô it-tì; in lī-khui í-chêng, [Pó-lô] kóng chit kù ōe: “Sèng Sîn thok sian-ti [Í-sài-a] tùi lín ê chó͘-sian kóng liáu chin tio̍h! 26 I kóng: Lí khì kā chit-ê chú-bîn kóng: Lín thiaⁿ koh thiaⁿ, mā lóng bōe liáu-kái; lín khòaⁿ koh khòaⁿ, mā lóng bōe khòaⁿ-kìⁿ. 27 In-ūi chit-ê chú-bîn ê sim tūn, hī-khang tāng, ba̍k-chiu pàng khoeh-khoeh. Nā m̄-sī án-ni, in ê ba̍k-chiu ōe khòaⁿ-kìⁿ, hī-khang ōe thiaⁿ-kìⁿ, sim ōe bêng-pe̍k, ōe hôe-sim tńg-ì, góa chiū kā in i-hó. 28 “Só͘-í, lín tio̍h chai, Siōng-tè chit-ê chín-kiù ê sìn-sit í-keng thoân hō͘ Gōa-pang-lâng. In ōe thiaⁿ-thàn!” 30 [Pó-lô] tòa tī ka-kī sè ê chhù chiok-chiok nn̄g nî kú. Lâi hóng-būn ê lâng, i lóng kā in chiap-thāi. 31 I hó-táⁿ soan-iông Siōng-tè-kok ê sìn-sit, koh kà-sī koan-hē Chú Iâ-so͘ Ki-tok ê sū, lóng bô siū chó͘-tòng.

Lô-má-su 1

1 Góa sī Ki-tok Iâ-so͘ ê lô͘-po̍k [Pó-lô], hōng Siōng-tè soán-tiàu choh sù-tô͘, te̍k-phài lâi thoân I ê hok-im. 2 Chit-ê hok-im sī Siōng-tè chá-chêng thong-kè I ê chèng sian-ti kì tī Sèng-keng ê èng-ún. 3 Chit-ê hok-im sī teh kóng-khí I ê Kiáⁿ lán ê Chú Iâ-so͘ Ki-tok: Tùi jîn-sèng lâi kóng, I sī [Tāi-pi̍t] ê hō͘-tāi; 4 tùi sèng-kiat ê sîn-sèng lâi kóng, Siōng-tè hō͘ I tùi sí-lâng tiong koh-oa̍h, ēng tōa lêng-le̍k hián-bêng I sī Siōng-tè ê Kiáⁿ. 5 Goán tùi I tit-tio̍h un-sù choh sù-tô͘, ūi-tio̍h Ki-tok ê miâ beh hō͘ bān-bîn sìn lâi sūn-thàn, 6 mā pau-hâm lín chiah-ê siū soán-tiàu kui-sio̍k Iâ-so͘ Ki-tok ê lâng. 7 Góa siá chit tiuⁿ phoe hō͘ lín só͘-ū tòa tī [Lô-má], Siōng-tè só͘ thiàⁿ,só͘ soán-tiàu choh I sìn-tô͘ ê lâng. Goān lán ê Pē Siōng-tè kap Chú Iâ-so͘ Ki-tok sù lín un-tián kap pêng-an! 8 Tāi-seng, góa thong-kè Iâ-so͘ Ki-tok ūi-tio̍h lín chèng-lâng kám-siā góa ê Siōng-tè, in-ūi lín ê sìn-tek í-keng thoân-piàn choân sè-kài. 9 Góa soan-iông I ê Kiáⁿ ê hok-im, ēng sim-lêng teh ho̍k-sāi hit-ūi Siōng-tè thang kā góa choh-chèng, góa siông-siông siàu-liām lín, 10 put-sî tī kî-tó tiong khún-kiû Siōng-tè chiàu I ê hó chí-ì kā góa khui-lō͘, hō͘ góa bô kú chiū ōe-tàng sūn-lī khì lín hia. 11 Góa chin ài kìⁿ lín, thang kap lín hun-hióng sio̍k-lêng ê un-sù, hō͘ lín kian-kiông; 12 chiū-sī góa kàu lín tiong-kan ê sî, lín thong-kè góa ê sìn-gióng, góa thong-kè lín ê sìn-gióng, thang hō͘-siōng tit-tio̍h kó͘-lē. 13 Hiaⁿ-tī chí-bē, góa chin ài lín chai, góa chin chōe piàn kè-ōe beh khì lín hia, thang kap tī kî-tha Gōa-pang-lâng ê tiong-kan kâng-khoán, mā tī lín tiong-kan siu-sêng chi̍t-kóa ké-chí, m̄-kú kàu taⁿ iáu ū chó͘-tòng. 14 Bô-lūn sím-mi̍h khoán lâng, khai-hòa á-sī bī-khai-hòa ê, ū tì-hūi á-sī bô tì-hūi ê, góa lóng khiàm in ê chè. 15 Só͘-í, góa pek-chhiat ǹg-bāng mā ōe-tàng chiong hok-im thoân hō͘ lín tī [Lô-má] ê lâng. 16 Góa bô khòaⁿ hok-im chòe kiàn-siàu, in-ūi chit-ê hok-im sī Siōng-tè ê tōa lêng-le̍k, beh chín-kiù só͘-ū sìn ê lâng, tāi-seng [Iû-thài]-lâng, āu-lâi Gōa-pang-lâng. 17 In-ūi chit-ê hok-im ū khé-sī Siōng-tè ê gī, chit-ê gī tùi-thâu-kàu-bé lóng sī thong-kè sìn lâi tit-tio̍h. Chiàu Sèng-keng só͘ kì-chài, “Gī ê lâng ōe tùi sìn lâi oa̍h.” 18 Siōng-tè tùi thiⁿ-téng hoat-chhut siū-khì, khiàn-chek só͘-ū put-khiân put-gī ê lâng; in ê put-gī chó͘-tòng lâng bat chin-lí. 19 In-ūi Siōng-tè ū tùi in hián-bêng I pún-sin, só͘-í in eng-kai tùi Siōng-tè ū chheng-chhó ê jīm-sek chiah tio̍h. 20 Tùi chhòng-sè í-lâi, jio̍k-gán khòaⁿ bōe-tio̍h ê Siōng-tè éng-oán ê tōa lêng-le̍k kap sîn-sèng, thong-kè siū-chō ê mi̍h ōe-tàng chheng-chhó khòaⁿ-kìⁿ, só͘-í in lóng bōe-tàng the chek-jīm. 21 In-ūi in sui-jiân bat Siōng-tè ia̍h bô chun-tiōng I chòe Siōng-tè, mā bô kā I kám-siā; in ê su-siúⁿ hoán-tńg pìⁿ-chòe khang-khang, sim-su gû-gōng, chhiong-móa o͘-àm. 22 In chū-chheng chhong-bêng, kî-si̍t gû-gōng. 23 In bô chiong êng-kng kui hō͘ bōe-sí-bia̍t ê Siōng-tè, hoán-tńg khì pài ōe-sí-bia̍t ê lâng, pe-chiáu, khîm-siù, thâng-thōa téng ê siōng. 24 Só͘-í, Siōng-tè chhut-chāi in thàn ka-kī sim-lāi ê io̍k-bōng khì chòe bô chheng-khì ê tāi-chì, tì-kàu pí-chhú chau-that ka-kī ê sin-thé. 25 In ēng hu-ké thòe-ōaⁿ Siōng-tè ê chin-lí. In kèng-pài, ho̍k-sāi pī-chō-bu̍t, bô kèng-pài hit-ūi Chō-bu̍t-chú --- I chiah eng-kai éng-oán tit-tio̍h chheng-chàn. Amen! 26 In-ūi án-ni, Siōng-tè chhut-chāi in hòng-chhiòng thang kiàn-siàu ê jio̍k-io̍k: Cha-bó͘-lâng kap cha-bó͘-lâng ēng hoán chū-jiân ê sèng-koan-hē tāi-thòe kap ta-po͘-lâng chū-jiân ê koan-hē; 27 ta-po͘-lâng mā kâng-khoán pàng-sak kap cha-bó͘-lâng chū-jiân ê sèng-koan-hē, pí-chhú io̍k-hé kong-sim; ta-po͘-lâng kap ta-po͘-lâng chòe kiàn-siàu ê tāi-chì, kiat-kó tio̍h siū piàn-thài ê hêng-ûi kai siū ê pò-èng. 28 Kì-jiân in bô chin-chiàⁿ jīn-bat Siōng-tè, Siōng-tè chiū chhut-chāi in ê sim-su pāi-hoāi, khì chòe bô eng-kai chòe ê tāi-chì. 29 In chhiong-móa ta̍k khoán ê put-gī, pháiⁿ-sim, tham-sim, ok-to̍k, móa-sim oàn-tò͘, bô͘-sat, tò͘-cheng, kan-chà, im-bô͘, kóng ka-chiah-āu-ōe, 30 húi-pòng, oàn-hūn Siōng-tè, bú-bān Siōng-tè, kiau-ngō͘, khoa-kháu, chè-chō sī-hui, ngó͘-ge̍k pē-bú, 31 bô bêng-lí, bô siú-iok, bô chêng, bô lîn-bín. 32 In sui-jiân chai, chiàu Siōng-tè kong-gī ê phòaⁿ-toàn, chòe chiah-ê tāi-chì ê lâng eng-kai sí; in m̄-nā ka-kī chòe, sīm-chì mā chàn-sêng pa̍t-lâng án-ni chòe.

Lô-má-su 2

1 Só͘-í, lí chit-ê phoe-phòaⁿ lâng ê, bô-lūn lí sī sím-mi̍h-lâng lóng bōe-tàng piān-kái; lí phoe-phòaⁿ pa̍t-lâng sī teh phoe-phòaⁿ ka-kī, in-ūi lí phoe-phòaⁿ pa̍t-lâng chòe ê tāi-chì, ka-kī mā ta̍k hāng lóng khì chòe. 2 Lán chai, chòe chit khoán tāi-chì ê lâng, Siōng-tè ōe chiàu sū-si̍t kā in sím-phòaⁿ. 3 Lí chit-ê lâng, lí phoe-phòaⁿ pa̍t-lâng chòe chiah-ê tāi-chì, ka-kī mā khì chòe kâng-khoán ê tāi-chì, lí siūⁿ-kóng lí ōe-tàng siám-pī Siōng-tè ê sím-phòaⁿ sī-bô? 4 Á-sī kóng lí khòaⁿ-khin Siōng-tè ke̍k-tōa ê jîn-chû, khoan-iông, kap thun-lún. Lí kiám m̄-chai I ê jîn-chû sī beh chhōa lí hóe-kái? 5 Lí ngī-sim, m̄ hóe-kái, sī teh ūi-tio̍h ka-kī lúi-chek Siōng-tè ê siū-khì; chit-ê siū-khì ōe tī I kong-gī sím-phòaⁿ hit Ji̍t hián-bêng. 6 Siōng-tè ōe chiàu ta̍k lâng ê hêng-ûi kā in pò-èng. 7 Hiah-ê kian-chhî chòe hó-sū, tui-kiû êng-kng, chun-kùi, kap bōe-pāi-hoāi ê sìⁿ-miā ê lâng, Siōng-tè ōe sù in éng-oán ê oa̍h-miā. 8 Hiah-ê chū-su, bô chun-thàn chin-lí, khì thàn put-gī ê lâng, Siōng-tè ê siū-khì kap hêng-hoa̍t ōe lîm-kàu in. 9 Só͘-ū chòe pháiⁿ ê lâng ōe siū-tio̍h hoān-lān khùn-khó͘, tāi-seng sī [Iû-thài]-lâng, āu-lâi chiah Gōa-pang-lâng. 10 Put-kò só͘-ū chòe hó ê lâng ōe tit-tio̍h êng-kng, chun-kùi, kap pêng-an, tāi-seng sī [Iû-thài]-lâng, āu-lâi chiah Gōa-pang-lâng; 11 in-ūi Siōng-tè bô phian-thāi lâng. 12 Gōa-pang-lâng bô [Mô͘-se] ê Lu̍t-hoat, nā hoān-chōe mā ōe siū Lu̍t-hoat gōa ê sím-phòaⁿ lâi bia̍t-bông; [Iû-thài]-lâng ū [Mô͘-se] ê Lu̍t-hoat, nā hoān-chōe ōe chiàu Lu̍t-hoat siū sím-phòaⁿ. 13 In-ūi, m̄-sī thiaⁿ Lu̍t-hoat ê lâng tī Siōng-tè ê bīn-chêng sī gī-lâng, chí-ū si̍t-hêng Lu̍t-hoat ê lâng chiah ōe hō͘ Siōng-tè soan-phòaⁿ chòe gī-lâng. 14 Bô Lu̍t-hoat ê Gōa-pang-lâng nā chiàu pún-sèng chun-siú Lu̍t-hoat ê kui-tēng, in sui-jiân bô Lu̍t-hoat, ka-kī chiū-sī lu̍t-hoat; 15 in ê hêng-ûi piáu-sī Lu̍t-hoat ê iau-kiû ū khek tī in sim-lāi. In ê liông-sim mā chèng-si̍t, in ê sim-su ū-sî ka-kī chek-pī, ū-sî ka-kī piān-hō͘. 16 Án-ni, tī hit Ji̍t, chiàu góa só͘ thoân ê hok-im, Siōng-tè ōe thong-kè Ki-tok Iâ-so͘ lâi sím-phòaⁿ lâng ún-ba̍t ê sū. 17 Án-ni lí leh, lí chū-chheng [Iû-thài]-lâng, óa-khò Lu̍t-hoat, koh ēng Siōng-tè chòe khoa-kháu. 18 Lí bêng-pe̍k Siōng-tè ê chí-ì, ū siū-kè Lu̍t-hoat ê kàu-tō, ōe-hiáu hun-pia̍t sī-hui. 19 Lí chū-sìn ka-kī sī sit-bêng ê lâng ê chhōa-lō͘, o͘-àm tiong ê lâng ê kng, 20 gōng-lâng ê tō-su, iù-tī ê lâng ê lāu-su. Lí siūⁿ-kóng kì-jiân ū Lu̍t-hoat, tùi tì-sek kap chin-lí chiū ū pá-ak. 21 Lí kà-sī pa̍t-lâng, sī-án-chóaⁿ bô kà-sī ka-kī? Lí kà lâng m̄-thang thau-the̍h, ka-kī ū thau-the̍h bô? 22 Lí kóng m̄-thang hoān kan-îm, ka-kī ū hoān-tio̍h bô? Lí iàm-ò͘ⁿ ngó͘-siōng, ka-kī ū chhiúⁿ biō-sī? 23 Lí khoa-kháu ū Lu̍t-hoat, ka-kī ū hoān-hoat lâi bú-jio̍k Siōng-tè bô? 24 Sèng-keng ū kì-chài: “In-ūi lín ê iân-kò͘, Siōng-tè ê miâ tī Gōa-pang-lâng ê tiong-kan siū siat-to̍k.” 25 Lí nā chun-siú Lu̍t-hoat, kat-lé chiū ū kè-ta̍t; lí nā hoān-hoat, ū kat-lé pìⁿ-chòe bô kat-lé. 26 Bô siū kat-lé ê lâng nā chun-siú Lu̍t-hoat ê kui-tēng, bô siū kat-lé kiám bōe sǹg-chòe ū kat-lé? 27 Jio̍k-thé bô siū kat-lé m̄-kú ū chun-siú Lu̍t-hoat ê lâng ōe kā lí tēng-chōe, in-ūi lí ū Lu̍t-hoat ê tiâu-bûn koh siū kat-lé, m̄-kú tian-tò ûi-pōe Lu̍t-hoat. 28 Kî-si̍t, gōa-piáu choh [Iû-thài]-lâng ê m̄-sī chin-chiàⁿ ê [Iû-thài]-lâng; tī jio̍k-thé só͘ siū gōa-piáu ê kat-lé mā m̄-sī chin-chiàⁿ ê kat-lé. 29 Chin-chiàⁿ ê [Iû-thài]-lâng sī lōe-chāi ê; chin-chiàⁿ ê kat-lé sī sim ê kat-lé, sī Sèng Sîn ê chok-ûi, m̄-sī khò Lu̍t-hoat ê tiâu-bûn. Chit khoán lâng siū o-ló m̄-sī tùi lâng, sī tùi Siōng-tè.

Lô-má-su 3

1 Án-ni kóng, choh [Iû-thài]-lâng ū sím-mi̍h iu-tiám? Kat-lé ū sím-mi̍h lī-ek? 2 Tī ta̍k hong-bīn lóng ū chin chōe hó-chhù. Tē-it, Siōng-tè ū chiong I ê ōe kau-thok in. 3 In tiong-kan nā ū lâng bô sìn-si̍t, in ê bô sìn-si̍t kiám ōe hō͘ Siōng-tè ê sìn-si̍t pìⁿ-chòe bô-hāu? 4 Choa̍t-tùi bōe! Sīm-chì só͘-ū ê lâng lóng pe̍h-chha̍t, Siōng-tè ia̍h it-tēng sī chin-si̍t. Chiàu Sèng-keng só͘ kì-chài: Lí chek-pī ê sî, hián-chhut kong-gī; lí siū khòng-kò ê sî, ōe sèng-sò͘. 5 Put-kò, lán ê put-gī nā ōe-tàng hián-bêng Siōng-tè ê gī, lán ōe-tàng kóng sím-mi̍h? Góa chiàu lâng ê siūⁿ-hoat kóng, Siōng-tè tùi lán siū-khì sī put-gī sī-bô? 6 Choa̍t-tùi m̄-sī! Nā-sī, Siōng-tè ná ōe-tàng sím-phòaⁿ sè-kan? 7 Góa ê hu-ké nā ōe-tàng hō͘ Siōng-tè ê chin-si̍t koh-khah bêng-hián, hō͘ I koh-khah ū êng-kng, góa ná iáu hō͘ I soan-phòaⁿ chòe chōe-jîn? 8 Án-ni, ná m̄-kóng “Lán lâi chòe pháiⁿ hō͘ hó-sū si̍t-hiān”? Khak-si̍t ū lâng án-ni kóng lâi kā góa tiòng-siong, in eng-kai siū tēng-chōe. 9 Nā án-ni, lán [Iû-thài]-lâng kiám ū khah-iâⁿ Gōa-pang-lâng? Bô! In-ūi góa í-keng ū chí-chek [Iû-thài]-lâng kap Gōa-pang-lâng lóng siū chōe koán-hat. 10 Chiàu Sèng-keng só͘ kì-chài: Lóng bô gī-lâng, liân chi̍t ê to bô! 11 Bô hiáu-ngō͘ ê lâng; lóng bô-lâng chhē-kiû Siōng-tè. 12 Lâng lóng pōe-poān Siōng-tè, lóng kiâⁿ bê-lō͘; lóng bô-lâng chòe hó-sū, liân chi̍t ê to bô! 13 In ê nâ-âu chhin-chhiūⁿ khui-khui ê bōng; in ê chhùi-chi̍h kan-chà; in ê chhùi-tûn ū chôa ê to̍k. 14 In chhùi-lāi chhiong-móa ok-to̍k chiù-chó͘. 15 In cháu chin kín kip-beh thâi-lâng lâu-huih; 16 in cháu-kè ê lō͘ lóng ū húi-bia̍t pi-chhám. 17 Pêng-an ê lō͘ in m̄-bat, 18 tùi Siōng-tè, sim bô chûn kèng-ùi. 19 Taⁿ lán liáu-kái, Lu̍t-hoat it-chhè ê iau-kiû sī tùi tī Lu̍t-hoat-ē ê lâng kóng ê, hō͘ lâng lóng bōe-tàng piān-kái, hō͘ choân sè-kài lóng siū Siōng-tè sím-phòaⁿ. 20 Só͘-í bô-lâng khò siú Lu̍t-hoat ê tiâu-bûn ōe hō͘ Siōng-tè soan-phòaⁿ chòe gī-lâng; tùi Lu̍t-hoat, lâng chiah chai sím-mi̍h sī chōe. 21 Hiān-chāi, Siōng-tè í-keng kā lán chí-sī, lán m̄-bián khò Lu̍t-hoat ōe-tàng kap I kiàn-li̍p ha̍p-gî ê koan-hē. Lu̍t-hoat kap sian-ti lóng ūi-tio̍h che chòe kiàn-chèng. 22 Kap Siōng-tè kiàn-li̍p ha̍p-gî ê koan-hē sī thong-kè sìn Iâ-so͘ Ki-tok. Siōng-tè án-ni tùi-thāi só͘-ū sìn Ki-tok ê lâng, lóng bô chha-pia̍t. 23 In-ūi só͘-ū ê lâng lóng hoān-chōe, tì-kàu Siōng-tè ê êng-kng tit bōe-tio̍h; 24 put-kò, tùi Siōng-tè só͘ sù pe̍h-pe̍h ê un-tián, thong-kè Ki-tok Iâ-so͘ oân-sêng ê kiù-sio̍k, lâng thang kap Siōng-tè ū ha̍p-gî ê koan-hē. 25 Siōng-tè hiàn Iâ-so͘ choh sio̍k-chōe-chè, thong-kè I ê sí, hō͘ lâng tùi sìn lâi tit-tio̍h sià-chōe. Siōng-tè ēng án-ni lâi hián-bêng I ê gī. Tī kè-khì, I ēng nāi-sim tùi-thāi lâng, khoan-iông in chêng só͘ hoān ê chōe, 26 beh tī hiān-kim chit-ê sî hián-bêng I ka-kī sī gī, koh hō͘ sìn Iâ-so͘ ê lâng kap I ū ha̍p-gî ê koan-hē. 27 Nā án-ni, lán iáu ū sím-mi̍h thang khoa-kháu? Lóng bô! Khò sím-mi̍h hoat-chek? Khò hêng-ûi sī-bô? M̄-sī! Sī khò sìn ê hoat-chek. 28 Só͘-í, goán jīn-tēng, lâng kap Siōng-tè kiàn-li̍p ha̍p-gî ê koan-hē, m̄-sī khò siú Lu̍t-hoat ê hêng-ûi, chí-ū tùi sìn. 29 Siōng-tè kiám chí-ū sī [Iû-thài]-lâng ê Siōng-tè? I kiám m̄-sī Gōa-pang-lâng ê Siōng-tè? Sī, I mā-sī Gōa-pang-lâng ê Siōng-tè. 30 Kì-jiân Siōng-tè chí-ū chi̍t ūi, I hō͘ siū kat-lé ê [Iû-thài]-lâng tùi sìn lâi kap I kiàn-li̍p ha̍p-gî ê koan-hē, mā hō͘ bô siū kat-lé ê Gōa-pang-lâng tùi sìn lâi kap I kiàn-li̍p ha̍p-gî ê koan-hē. 31 Án-ni kóng, lán in-ūi chit-ê sìn soah hō͘ Lu̍t-hoat sit-khì hāu-le̍k sī-bô? Choa̍t-tùi m̄-sī! Lán tian-tò sī teh khak-li̍p Lu̍t-hoat.

Lô-má-su 4

1 Án-ni, koan-hē goán hiat-thóng ê chó͘-sian [A-pek-la-hán], lán beh kóng sím-mi̍h? 2 [A-pek-la-hán] nā-sī tùi hêng-ûi siū chheng-chòe gī-lâng, i chiū ū thang khoa-kháu, m̄-kú tùi Siōng-tè khòaⁿ, i bô thang khoa-kháu. 3 In-ūi Sèng-keng ū kì-chài: “[A-pek-la-hán] sìn Siōng-tè, in-ūi án-ni, Siōng-tè chiū sǹg i chòe gī.” 4 Lâng chòe-kang tit-tio̍h kang-chîⁿ bô sǹg un-tián, sī eng-kai ê. 5 M̄-kú bô khò hêng-ûi, chí-ū sìn soan-phòaⁿ chōe-jîn chòe bô chōe ê Siōng-tè ê lâng, i in-ūi ū chit-ê sìn, Siōng-tè chiū kā i sǹg-chòe gī. 6 [Tāi-pi̍t] mā ū kóng-khí bô khò hêng-ûi hō͘ Siōng-tè kā i sǹg-chòe gī ê lâng ū hok-khì. I kóng: 7 Kè-sit tit-tio̍h sià-bián, chōe-kò tit-tio̍h khoan-sià ê, chit khoán lâng chin ū hok-khì! 8 Chú bô kā i tēng-chōe ê, chit khoán lâng chin ū hok-khì! 9 Án-ni, chit-ê hok-khì chí-ū hō͘ siū kat-lé ê lâng sī-bô? M̄-sī, mā hō͘ bô siū kat-lé ê lâng. In-ūi góa í-keng ū kóng, “[A-pek-la-hán] sìn Siōng-tè, Siōng-tè chiū kā i sǹg-chòe gī.” 10 Sī án-chóaⁿ sǹg? Sī i siū kat-lé í-chêng, á-sī í-āu? Sī kat-lé í-chêng, m̄-sī kat-lé í-āu. 11 Āu-lâi i ū siū kat-lé; chit-ê kat-lé sī chi̍t chióng kì-hō, ìn-chèng i iáu-bē siū kat-lé í-chêng chiū tùi sìn hō͘ Siōng-tè chiap-la̍p chòe gī-lâng. Hiah-ê bô siū kat-lé ê lâng in-ūi sìn, Siōng-tè ū chiap-la̍p in chòe gī-lâng, thang hō͘ [A-pek-la-hán] choh hiah-ê bô siū kat-lé ê sìn-tô͘ ê chó͘-sian. 12 I mā-sī siū kat-lé ê lâng ê chó͘-sian; in m̄-nā siū kat-lé, mā ū chiàu goán ê chó͘-sian [A-pek-la-hán] siū kat-lé í-chêng sìn-sim ê bô͘-hoān teh seng-oa̍h. 13 Siōng-tè èng-ún [A-pek-la-hán] kap i ê kiáⁿ-sun beh hō͘ in sêng-siū sè-kài chòe sán-gia̍p; chit-ê èng-ún m̄-sī thong-kè Lu̍t-hoat, sī thong-kè sìn lâi tit-tio̍h ê gī. 14 Nā chun-siú Lu̍t-hoat ê lâng chiah ōe-tàng sêng-siū Siōng-tè ê èng-ún, sìn chiū khang-khang, èng-ún mā bô lō͘-ēng. 15 Lu̍t-hoat ōe jiá-khí Siōng-tè ê siū-khì; bô Lu̍t-hoat chiū bô ûi-hoat. 16 In-ūi án-ni, èng-ún sī ēng sìn chòe kun-kù, beh pó-chèng èng-ún sī chhut-tī Siōng-tè pe̍h-pe̍h ê un-tián, hō͘ [A-pek-la-hán] só͘-ū ê kiáⁿ-sun, m̄-nā ū siū kat-lé ê lâng, mā pau-hâm hiah-ê kap [A-pek-la-hán] siâng-khoán ū sìn Siōng-tè ê lâng. I sī lán chèng-lâng ê chó͘-sian, 17 chiàu Sèng-keng só͘ kì-chài: “Góa ū hō͘ lí choh bān-bîn ê chó͘-sian.” Chit-ê èng-ún tī Siōng-tè bīn-chêng ū-hāu. [A-pek-la-hán] sìn chit-ūi hō͘ sí-lâng koh-oa̍h, koh tùi bô chhòng-chō ū ê Siōng-tè. 18 I tī bô thang ǹg-bāng ê sî iáu khǹg ǹg-bāng, sìn kóng i ōe chiâⁿ-chòe bān-bîn ê chó͘-sian, chiàu só͘ èng-ún ê ōe kóng, “Lí it-tēng ū chin chōe kiáⁿ-sun.” 19 I í-keng chiâⁿ-pah hè, siūⁿ-tio̍h ka-kī ê seng-khu ná chhin-chhiūⁿ sí-khì, [Sa-la] ia̍h í-keng bōe siⁿ-kiáⁿ, m̄-kú [A-pek-la-hán] bô in-ūi án-ni sit-khì sìn-sim. 20 I tùi Siōng-tè ê èng-ún bô hoâi-gî, sìn-sim hoán-tńg ná kian-tēng, chiong êng-kng kui hō͘ Siōng-tè. 21 I khak-sìn Siōng-tè it-tēng ōe si̍t-hiān ka-kī ê èng-ún. 22 Só͘-í, [A-pek-la-hán] in-ūi sìn hō͘ Siōng-tè kā i sǹg-chòe gī. 23 M̄-kú, “Kā i sǹg-chòe gī” chit kù ōe m̄-sī kan-ta ūi-tio̍h i, 24 mā-sī ūi-tio̍h lán chiah-ê lâng siá ê, in-ūi lán ū sìn Siōng-tè hō͘ lán ê Chú Iâ-so͘ tùi sí-lâng tiong koh-oa̍h, lán mā ōe siū sǹg-chòe gī. 25 Ūi-tio̍h lán ê chōe-kò, Siōng-tè chiong Chú Iâ-so͘ kau hō͘ lâng hāi-sí, koh ūi-tio̍h beh hō͘ lán kap Siōng-tè ū ha̍p-gî ê koan-hē, Siōng-tè ū hō͘ I koh-oa̍h.

Lô-má-su 5

1 Kì-jiân, lán tùi sìn siū chheng-chòe gī-lâng, chiū thong-kè lán ê Chú Iâ-so͘ Ki-tok kap Siōng-tè ū hô-bo̍k ê koan-hē. 2 Lán tùi sìn, thong-kè Ki-tok thang chìn-ji̍p hiān-chāi teh hióng-siū chit-ê un-tián, hoaⁿ-hoaⁿ hí-hí ǹg-bāng thang hun-hióng Siōng-tè ê êng-kng. 3 M̄-nā án-ni, tī hoān-lān tiong, lán iû-goân hoaⁿ-hoaⁿ hí-hí, in-ūi lán chai, hoān-lān siⁿ-chhut jím-nāi, 4 jím-nāi siⁿ-chhut láu-liān, láu-liān siⁿ-chhut ǹg-bāng, 5 ǹg-bāng bōe tì-kàu sit-bāng kiàn-siàu, in-ūi Siōng-tè thong-kè sù hō͘ lán ê Sèng Sîn chiong I ê thiàⁿ koàn-ji̍p lán ê sim. 6 Lán iáu loán-jio̍k ê sî, Ki-tok tī Siōng-tè só͘ chí-tēng ê ji̍t-chí ūi-tio̍h ū chōe ê lâng sí. 7 Thòe gī-lâng sí, chha-put-to bô; thòe hó-lâng sí, kiám-chhái iáu ū lâng káⁿ. 8 Put-kò Siōng-tè tùi lán chèng-bêng I thiàⁿ lán, lán iáu sī chōe-jîn ê sî, Ki-tok ū thòe lán sí. 9 Hiān-chāi Ki-tok í-keng ūi-tio̍h lán lâu-huih hi-seng, hō͘ lán kap Siōng-tè ū ha̍p-gî ê koan-hē, I koh-khah ōe kiù lán thoat-lī Siōng-tè ê siū-khì. 10 In-ūi, lán iáu-kú choh Siōng-tè tùi-te̍k ê sî, I hō͘ ka-kī ê Kiáⁿ thòe lán sí, hō͘ lán kap I koh hô-hó. Kì-jiân koh hô-hó, lán koh-khah ōe in-ūi Ki-tok ê oa̍h lâi tit-tio̍h chín-kiù. 11 M̄-nā án-ni, lán hiān-chāi í-keng thong-kè Ki-tok kap Siōng-tè koh hô-hó, mā ōe thong-kè lán ê Chú Iâ-so͘ Ki-tok ēng Siōng-tè chòe khoa-kháu. 12 Chōe tùi chi̍t ê lâng chìn-ji̍p sè-kan, sí mā tè ji̍p-lâi; kiat-kó, só͘-ū ê lâng lóng ōe sí, in-ūi só͘-ū ê lâng lóng ū hoān-chōe. 13 Iáu-bē ū Lu̍t-hoat í-chêng, chōe í-keng tī sè-kan; put-kò bô Lu̍t-hoat, chōe chiū bô sǹg-chòe chōe. 14 M̄-kú tùi [A-tong] kàu [Mô͘-se] hit tōaⁿ kî-kan, sí teh chi-phòe choân jîn-lūi, liân bô hoān-tio̍h A-tong só͘ hoān ê kè-sit ê lâng mā tio̍h sí. [A-tong] sī teh-beh lâi Hit-ūi ê ū-piáu. 15 Put-kò [A-tong] ê kè-sit kap Siōng-tè pe̍h-pe̍h ê un-sù bōe pí-tit. In-ūi, nā tùi chi̍t ê lâng ê chōe-kò chèng-lâng lóng tio̍h sí, Siōng-tè ê un-tián, chiū-sī I thong-kè Iâ-so͘ Ki-tok chi̍t ê lâng pe̍h-pe̍h sù hō͘ chèng-lâng ê un-sù, it-tēng koh-khah hong-hù! 16 Chi̍t ê lâng só͘ hoān ê chōe kap Siōng-tè pe̍h-pe̍h ê un-sù bōe pí-tit. Chiàu sím-phòaⁿ, liân chi̍t piàn ê kè-sit mā soan-phòaⁿ “Ū chōe”; m̄-kú chiàu pe̍h-pe̍h ê un-sù, chōe-chōe piàn ê kè-sit mā soan-phòaⁿ “Bô-chōe”. 17 Nā in-ūi chi̍t ê lâng ê kè-sit, sí thong-kè chit chi̍t ê lâng chi-phòe jîn-lūi, án-ni, Iâ-so͘ Ki-tok chi̍t ê lâng só͘ sêng-chiū ê it-tēng koh-khah tōa; só͘-ū niá-siū Siōng-tè hong-hù ê un-tián, chiū-sī pe̍h-pe̍h hō͘ Siōng-tè soan-phòaⁿ bô-chōe ê lâng, ōe-tàng thong-kè Ki-tok lâi chi-phòe ka-kī ê sìⁿ-miā. 18 In-ūi chi̍t ê lâng hoān-chōe, chèng-lâng lóng siū tēng-chōe; kâng-khoán, in-ūi chi̍t ê lâng gī ê hêng-ûi, chèng-lâng lóng siū phòaⁿ bô-chōe lâi tit-tio̍h oa̍h. 19 In-ūi chi̍t ê lâng pōe-ge̍k, chèng-lâng lóng chiâⁿ-chòe chōe-jîn; kâng-khoán, chi̍t ê lâng sūn-ho̍k, chèng-lâng lóng chiâⁿ-chòe gī-lâng. 20 Lu̍t-hoat ê chè-tēng hō͘ chōe-kò ke-thiⁿ; m̄-kú chōe ke-thiⁿ, Siōng-tè ê un-tián koh-khah ke-thiⁿ. 21 Án-ni, chōe thong-kè sí lâi chi-phòe, Siōng-tè ê un-tián sī thong-kè gī lâi chi-phòe, hō͘ lán tùi lán ê Chú Iâ-so͘ Ki-tok tit-tio̍h éng-oán ê oa̍h-miā.

Lô-má-su 6

1 Án-ni, lán beh kóng sím-mi̍h? Lán tio̍h kè-sio̍k tī chōe-ok tiong seng-oa̍h thang hō͘ un-tián koh-khah ke-thiⁿ sī-bô? 2 Choa̍t-tùi m̄-sī! Lán chiah-ê ǹg chōe í-keng sí ê lâng kiám thang kè-sio̍k tī chōe-ok tiong seng-oa̍h? 3 Lín kiám m̄-chai, lán lóng siū sóe-lé lâi kap Ki-tok Iâ-so͘ kiat-ha̍p, sī siū sóe-lé lâi kap I sí? 4 Kì-jiân lán thong-kè sóe-lé kap I sí, tâng bâi-chòng, só͘-í, chhin-chhiūⁿ Ki-tok thong-kè Thiⁿ-pē êng-kng ê koân-lêng tùi sí koh-oa̍h, lán mā tio̍h kè sin ê seng-oa̍h. 5 Kì-jiân lán kap Ki-tok chiâⁿ-chòe chi̍t-thé lâi keng-giām I ê sí, lán it-tēng mā ōe kap I kiat-ha̍p lâi koh-oa̍h. 6 Lán chai, lán kū ê chū-ngó͘ í-keng kap Ki-tok chòe-hé tèng si̍p-jī-kè, sī beh hō͘ siū chōe khu-sok hit-ê kū ê lâng húi-bia̍t, hō͘ lán bô koh chòe chōe ê lô͘-lē. 7 In-ūi lâng it-tàn sí-khì chiū tùi chōe tit-tio̍h tháu-pàng. 8 Kì-jiân lán í-keng kap Ki-tok chòe-hé sí, lán siong-sìn lán mā ōe kap I chòe-hé oa̍h. 9 Lán chai Ki-tok í-keng tùi sí-lâng tiong koh-oa̍h, bōe-koh sí, sí bōe-koh chi-phòe I. 10 In-ūi I ū sí, chi̍t piàn chiū oân-choân kā chōe chè-ap; I hiān-chāi teh oa̍h, sī ūi-tio̍h Siōng-tè teh oa̍h. 11 Án-ni, lín mā tio̍h khòaⁿ ka-kī í-keng kap chōe toān-choa̍t koan-hē, kap Ki-tok Iâ-so͘ kiat-ha̍p, ūi-tio̍h Siōng-tè teh oa̍h. 12 Só͘-í, m̄-thang chiong lín ōe-sí ê seng-khu kau hō͘ chōe chi-phòe, khì sūn-thàn pún-sèng ê io̍k-bōng. 13 Mā m̄-thang chiong seng-khu ê chi-thé kau hō͘ chōe khì chòe put-gī ê kang-khū. Hoán-tńg tio̍h chòe chi̍t ê tùi sí-lâng tiong koh-oa̍h ê lâng, chiong ka-kī hiàn hō͘ Siōng-tè, chiong seng-khu ê kok chi-thé hiàn hō͘ I chòe gī ê kang-khū. 14 M̄-thang hō͘ chōe kā lín chi-phòe, in-ūi lín m̄-sī oa̍h tī Lu̍t-hoat-ē, sī oa̍h tī un-tián-ē. 15 Nā án-ni, in-ūi lán m̄-sī tī Lu̍t-hoat-ē, sī tī un-tián-ē, lán chiū thang hoān-chōe sī-bô? Choa̍t-tùi m̄-thang! 16 Kiám m̄-chai lín nā chiong ka-kī kau hō͘ bó͘-lâng choh lô͘-lē sūn-thàn i, lín chiū-sī hit-ê lâng ê lô͘-lē; án-ni kóng, lín sī choh chōe ê lô͘-lē tì-kàu sí, á-sī choh Siōng-tè ê lô͘-lē sūn-thàn I tì-kàu kap I ū ha̍p-gî ê koan-hē? 17 Kám-siā Siōng-tè, sui-jiân lín bat choh chōe ê lô͘-lē, hiān-chāi í-keng tùi sim-tóe sūn-thàn hit-ê thoân-siū hō͘ lín chòe tián-hoān ê kà-sī. 18 Lín í-keng tùi chōe tit-tio̍h tháu-pàng, chiâⁿ-chòe gī ê lô͘-lē. 19 Kiaⁿ-liáu lín bōe liáu-kái, góa ēng it-poaⁿ-lâng ê ōe kā lín kóng. Chhin-chhiūⁿ lín í-chêng bat chiong seng-khu oân-choân kau hō͘ ù-òe kap put-hoat, hō͘ put-hoat ke-thiⁿ, hiān-chāi lín tio̍h chiong lín seng-khu ê ta̍k pō͘-hūn hiàn hō͘ gī chòe sèng-kiat ê lō͘-ēng. 20 Lín choh chōe ê lô͘-lē hit sî, lín bô siū gī iok-sok. 21 Hit sî lín chòe hiān-chāi khòaⁿ-chòe kiàn-siàu ê tāi-chì, kiat-kó sī án-chóaⁿ? Kiat-kio̍k sī sí. 22 Hiān-chāi lín í-keng tùi chōe tit-tio̍h tháu-pàng, chiâⁿ-chòe Siōng-tè ê lô͘-lē, hit-ê kiat-kó sī chiâⁿ-chòe sèng-kiat; kiat-kio̍k sī éng-oán ê oa̍h-miā. 23 In-ūi chōe ê tāi-kè sī sí, m̄-kú Siōng-tè thong-kè lán ê Chú Ki-tok Iâ-so͘ pe̍h-pe̍h sù hō͘ lán ê un-tián sī éng-oán ê oa̍h-miā.

Lô-má-su 7

1 Hiaⁿ-tī chí-bē, góa sī tùi lín bat Lu̍t-hoat ê lâng teh kóng, lín kiám m̄-chai, lâng oa̍h-teh ê sî chiah siū Lu̍t-hoat iok-sok? 2 Kú chi̍t ê lē lâi kóng, kiat-hun ê hū-jîn-lâng, tiōng-hu iáu oa̍h-teh chiū siū Lu̍t-hoat iok-sok kui-sio̍k tiōng-hu; tiōng-hu nā sí chiū bô koh siū chit-ê Lu̍t-hoat iok-sok. 3 Só͘-í, tiōng-hu iáu oa̍h-teh, hū-jîn-lâng nā kap pa̍t ê ta-po͘-lâng chòe-hé tòa, ōe hō͘ lâng kiò-chòe îm-hū; tiōng-hu nā sí, i chiū bô siū chit-ê Lu̍t-hoat iok-sok, i kap pa̍t ê ta-po͘-lâng chòe-hé tòa mā m̄-sī îm-hū. 4 Góa ê hiaⁿ-tī chí-bē, chhin-chhiūⁿ án-ni, lín kap Ki-tok ê seng-khu kiat-ha̍p kap I tâng-sí, í-keng kap Lu̍t-hoat toān-choa̍t koan-hē, bô siū iok-sok, ōe-tàng kui-sio̍k pa̍t-lâng, chiū-sī hit-ūi tùi sí-lâng tiong koh-oa̍h ê Ki-tok, hō͘ lán thang ūi-tio̍h Siōng-tè kiat ké-chí. 5 Lán chiàu lâng jio̍k-thé ê pún-sèng teh oa̍h ê sî, lán hoān-chōe ê io̍k-liām siū Lu̍t-hoat kek-khí, tī lán seng-khu ê kok chi-thé ūn-chok, kiat sí-bông ê ké-chí. 6 M̄-kú, hiān-chāi lán í-keng thoat-lī Lu̍t-hoat, kap hit-ê sok-pa̍k lán ê toān-choa̍t koan-hē. Án-ni, lán ho̍k-sāi Siōng-tè, m̄-sī chiàu Lu̍t-hoat ê kū hong-sek, sī chiàu Sèng Sîn ê sin hong-sek. 7 Án-ni, lán beh kóng sím-mi̍h? Lu̍t-hoat sī chōe sī-bô? Choa̍t-tùi m̄-sī! Put-kò nā bô Lu̍t-hoat, góa chiū m̄-chai sím-mi̍h sī chōe. Lu̍t-hoat nā bô kóng “M̄-thang tham-sim”, góa chiū m̄-chai sím-mi̍h sī tham-sim. 8 Chōe lī-iōng kài-bēng chhē ki-hōe tī góa sim-lāi ín-khí ta̍k khoán ê tham-sim. Bô Lu̍t-hoat, chōe chiū bô chok-iōng. 9 Í-chêng bô Lu̍t-hoat, góa mā teh oa̍h; kài-bēng chi̍t-ē lâi, chōe oa̍h khí-lâi, góa chiū sí-khì. 10 Tùi góa lâi kóng, pún-lâi beh hō͘ lâng oa̍h ê kài-bēng, tian-tò hō͘ lâng sí. 11 In-ūi chōe lī-iōng kài-bēng chhē ki-hōe khi-phiàn góa, mā lī-iōng kài-bēng hāi-sí góa. 12 Só͘-í, Lu̍t-hoat sī sîn-sèng; kài-bēng mā-sī sîn-sèng, kong-chèng, koh liông-siān. 13 Nā án-ni kóng, hit-ê liông-siān-ê hāi-sí góa sī-bô? Choa̍t-tùi m̄-sī! Sī chōe lī-iōng hit-ê liông-siān-ê hāi-sí góa, hō͘ chōe-ok ê pún-chit hián-lō͘; án-ni, chōe lī-iōng kài-bēng hō͘ i ke̍k-kî ok-to̍k ê pún-chit koh-khah hián-lō͘ chhut-lâi. 14 Lán chai, Lu̍t-hoat sī sio̍k-lêng-ê, m̄-kú góa sī sio̍k jio̍k-thé-ê, í-keng chhut-bōe hō͘ chōe choh lô͘-lē. 15 Góa bô bêng-pe̍k ka-kī ê só͘-chòe; in-ūi góa ài chòe ê, bô khì chòe; góa bô ài chòe ê, tian-tò khì chòe. 16 Góa nā chòe góa bô ài chòe ê, chiū-sī chàn-sêng Lu̍t-hoat sī hó. 17 Án-ni, teh chòe góa bô ài chòe ê m̄-sī góa, sī tiàm tī góa lāi-bīn ê chōe. 18 Góa chai, tī góa jio̍k-thé lāi-bīn bô liông-siān; góa ū chòe hó ê ì-goān, m̄-kú bô chòe hó ê khùi-la̍t. 19 Só͘ ì-ài ê hó, góa bô khì chòe, bô ì-ài ê pháiⁿ, góa tian-tò khì chòe. 20 Góa nā chòe góa bô ì-ài ê, chiū m̄-sī góa pún-sin teh chòe, sī tiàm tī góa lāi-bīn ê chōe teh chòe. 21 Án-ni, góa ū hoat-hiān chi̍t ê hoat-chek, chiū-sī, góa siūⁿ-beh chòe hó ê sî, pháiⁿ kā góa tîⁿ-teh. 22 Góa lāi-bīn ê hit-ê lâng ì-ài Siōng-tè ê Lu̍t-hoat, 23 m̄-kú góa khòaⁿ, tī góa ê seng-khu ū lēng-gōa chi̍t ê hoat-chek kap góa sim-su ê hoat-chek teh kau-chiàn, lia̍h góa chòe siû-hoān lâi hâng-ho̍k góa seng-khu lāi-bīn ê chōe ê hoat-chek. 24 Góa chit-ê lâng ū kàu chhiⁿ-chhám! Sím-mi̍h lâng ōe-tàng kiù góa thoat-lī chit-ê tì-kàu sí ê seng-khu? 25 Kám-siā Siōng-tè, thong-kè lán ê Chú Iâ-so͘ Ki-tok I ū kiù góa! Án-ni, góa ê chhù-kéng, chi̍t hong-bīn sī ēng sim-su sūn-ho̍k Siōng-tè ê Lu̍t-hoat, lēng-gōa chi̍t hong-bīn sī ēng jio̍k-thé sūn-ho̍k chōe ê hoat-chek.

Lô-má-su 8

1 Án-ni hiah-ê kap Ki-tok Iâ-so͘ kiat-liân ê lâng chiū bô siū tēng-chōe. 2 In-ūi, thong-kè Ki-tok Iâ-so͘ hit-ê sù oa̍h-miā ê Sèng Sîn ê hoat-chek í-keng ū tháu-pàng lán thoat-lī chōe kap sí ê hoat-chek. 3 In-ūi lâng jio̍k-thé ê pún-sèng loán-jio̍k, Lu̍t-hoat chòe bōe-kàu ê, Siōng-tè ū chòe-chiâⁿ: I chhe ka-kī ê Kiáⁿ chhú kap lâng kâng-khoán ōe hoān-chōe ê pún-sèng, soan-phòaⁿ lâng pún-sèng ê chōe chòe ū chōe, lâi kái-koat chōe. 4 Siōng-tè án-ni chòe, sī beh hō͘ Lu̍t-hoat chèng-tong ê iau-kiû ōe-tàng si̍t-hiān tī lán chiah-ê bô chiàu pún-sèng, sī chiàu Sèng Sîn ê ín-chhōa teh seng-oa̍h ê lâng. 5 In-ūi sūn-thàn pún-sèng ê lâng ì-hiòng pún-sèng ê sū; m̄-kú sūn-thàn Sèng Sîn ê lâng ì-hiòng Sèng Sîn ê sū. 6 Ì-hiòng pún-sèng, kiat-kó sī sí; ì-hiòng Sèng Sîn, ōe tit-tio̍h oa̍h-miā kap hô-bo̍k. 7 Án-ni, ì-hiòng pún-sèng sī tí-te̍k Siōng-tè, in-ūi bô sūn-ho̍k Siōng-tè ê Lu̍t-hoat; kî-si̍t mā bô hoat-tō͘ sūn-ho̍k. 8 Sūn-ho̍k pún-sèng ê lâng bōe-tàng hō͘ Siōng-tè hoaⁿ-hí. 9 Kì-jiân Siōng-tè ê Sîn ū tiàm tī lín lāi-bīn, lín chiū m̄-sī sio̍k pún-sèng, sī sio̍k Sèng Sîn. Lâng nā bô Ki-tok ê Sîn chiū bô sio̍k Ki-tok. 10 Ki-tok nā tiàm tī lín lāi-bīn, sui-jiân lín ê seng-khu in-ūi chōe sí, Siōng-tè ê Sîn ōe hō͘ lín oa̍h, in-ūi lín í-keng kap Siōng-tè ū ha̍p-gî ê koan-hē. 11 Hō͘ Iâ-so͘ tùi sí-lâng tiong koh-oa̍h ê Siōng-tè ê Sîn nā tiàm tī lín lāi-bīn, chiū-sī hō͘ Ki-tok tùi sí-lâng tiong koh-oa̍h ê Siōng-tè thong-kè tiàm tī lín lāi-bīn ê Sèng Sîn, ōe hō͘ lín tì-kàu sí ê seng-khu tit-tio̍h oa̍h-miā. 12 Hiaⁿ-tī chí-bē, án-ni khòaⁿ, lán ū khiàm-chè, put-kò m̄-sī khiàm pún-sèng ê chè thàn pún-sèng teh oa̍h. 13 Lín nā thàn pún-sèng oa̍h ōe tì-kàu sí; lín nā khò Sèng Sîn tû-bia̍t jio̍k-io̍k ê hêng-ûi chiū ōe oa̍h. 14 Hō͘ Siōng-tè ê Sîn ín-chhōa ê lâng lóng sī Siōng-tè ê kiáⁿ-jî. 15 In-ūi lín tùi Siōng-tè niá-siū ê Sèng Sîn m̄-sī beh hō͘ lín koh tò tńg-khì choh lô͘-lē, iáu seng-oa̍h tī kiaⁿ-hiâⁿ tiong; lín niá-siū ê Sèng Sîn sī beh hō͘ lín chiâⁿ-chòe Siōng-tè ê kiáⁿ-jî; khò chit-ūi Sèng Sîn lán thang tōa-siaⁿ kiò, “A-pa! Pē ah!” 16 Sèng Sîn pún-sin kap lán ê sîn chòe-hé choh-chèng, kóng lán sī Siōng-tè ê kiáⁿ-jî. 17 Kì-jiân lán sī kiáⁿ-jî, chiū-sī kè-sêng-jîn, sī Siōng-tè ê kè-sêng-jîn, kap Ki-tok pîⁿ-pîⁿ choh kè-sêng-jîn. Kì-jiân lán kap Ki-tok tâng siū-khó͘, sī beh hō͘ lán mā kap I tâng siū êng-kng. 18 Góa siūⁿ, hiān-kim chit-ê sî ê khó͘-lān kap chiong-lâi teh-beh tùi lán hián-hiān ê êng-kng bōe pí-tit. 19 Pī-chō-bu̍t pek-chhiat teh thèng-hāu Siōng-tè chèng kiáⁿ-jî ê hián-hiān. 20 In-ūi pī-chō-bu̍t bōe-tàng ta̍t-kàu siū-chō ê bo̍k-te̍k, m̄-sī chhut tī in ê pún-ì, sī Siōng-tè ê chí-ì. Put-kò pī-chō-bu̍t iáu teh ǹg-bāng, 21 ū chi̍t ji̍t in pún-sin mā ōe siū tháu-pàng lâi thoat-lī ōe pāi-hoāi ê khu-sok, thang kap Siōng-tè ê kiáⁿ-jî hun-hióng êng-kng ê chū-iû. 22 Lán chai, só͘-ū pī-chō-bu̍t kàu hiān-chāi iáu chòe-hé teh thòng-khó͘ ai-kiò, chòe-hé keng-giām chhui-chūn ê khó͘-thàng. 23 M̄-nā pī-chō-bu̍t, liân lán chiah-ê tit-tio̍h Sèng Sîn choh thâu-chúi ê ké-chí-ê mā teh thó͘-khùi thèng-hāu Siōng-tè chiap-la̍p lán choh I ê kiáⁿ-jî, hō͘ lán kui-ê lâng lóng tit-tio̍h sio̍k-hôe. 24 In-ūi lán khò chit khoán ǹg-bāng tit-tio̍h kiù. Khòaⁿ-ōe-tio̍h ê ǹg-bāng m̄-sī ǹg-bāng. Khòaⁿ-ōe-tio̍h-ê ná-tio̍h ǹg-bāng? 25 Lán nā ǹg-bāng hit-ê khòaⁿ-bōe-tio̍h-ê chiū ōe jím-nāi thèng-hāu. 26 Chhin-chhiūⁿ án-ni, lán loán-jio̍k ê sî Sèng Sîn mā ū teh kā lán hû-chhî; in-ūi lán m̄-chai tio̍h án-chóaⁿ kî-tó, m̄-kú Sèng Sîn ka-kī ēng ōe bōe-tàng piáu-ta̍t ê thó͘-khùi thòe lán kî-kiû. 27 Liáu-kái lâng lāi-sim ê Siōng-tè bêng-pe̍k Sèng Sîn ê ì-sù, in-ūi Sèng Sîn chiàu Siōng-tè ê chí-ì thòe sìn-tô͘ kî-kiû. 28 Lán chai, bān-hāng sū hō͘-siōng ūn-chok, hō͘ hiah-ê thiàⁿ Siōng-tè ê lâng, chiū-sī chiàu I ka-kī ê chí-ì soán-tiàu ê, lóng ū lī-ek. 29 In-ūi Siōng-tè ū-sian bat ê lâng, mā ū-sian koat-tēng hō͘ in kap I ê Kiáⁿ ê hêng-siōng saⁿ-tâng, thang hō͘ I ê Kiáⁿ tī chōe-chōe hiaⁿ-tī tiong choh Tōa-kiáⁿ. 30 Koh I ū-sian koat-tēng ê lâng, I mā kā in kéng-tiàu; I kéng-tiàu ê lâng, I mā kā in soan-phòaⁿ chòe gī-lâng; I soan-phòaⁿ chòe gī-lâng ê, I mā hō͘ in tit-tio̍h êng-kng. 31 Koan-hē chiah-ê tāi-chì, lán beh án-chóaⁿ kóng? Siōng-tè nā ūi lán, siáⁿ-lâng ōe-tàng tí-te̍k lán? 32 I kì-jiân bô sioh ka-kī ê Kiáⁿ, hō͘ I ūi-tio̍h lán chèng-lâng hi-seng, kiám bōe chiong bān-mi̍h mā pe̍h-pe̍h sù hō͘ lán? 33 Siáⁿ-lâng ōe-tàng khòng-kò Siōng-tè ê soán-bîn? Soan-phòaⁿ in chòe gī-lâng ê sī Siōng-tè! 34 Nā án-ni, siáⁿ-lâng ōe-tàng kā in tēng-chōe? Ki-tok Iâ-so͘ í-keng sí, koh Siōng-tè ū hō͘ I tùi sí-lâng tiong koh-oa̍h, taⁿ chē tī Siōng-tè ê chiàⁿ-pêng teh thòe lán kî-kiû. 35 Siáⁿ-lâng ōe-tàng chhiat-tn̄g Ki-tok tùi lán ê thiàⁿ? Sī hoān-lān, sī khùn-khó͘, sī pek-hāi, sī iau-gō, sī sàn-chhiah, sī gûi-hiám, á-sī chhám-sí? 36 Chiàu Sèng-keng só͘ kì-chài: Ūi-tio̍h lín ê iân-kò͘, goán kui-ji̍t biān-tùi sí ê ui-hia̍p; goán hō͘ lâng khòaⁿ-chòe teh-beh thâi ê iûⁿ. 37 Lóng m̄-sī! Tī chiah-ê it-chhè ê tāi-chì, lán khò thiàⁿ lán ê Siōng-tè tek-sèng kàu ū chhun! 38 In-ūi góa khak-sìn, bô-lūn sī sí, sī oa̍h, sī thiⁿ-sài, sī lêng-kài ê thóng-léng-chiá á-sī koân-le̍k-chiá, sī hiān-kim á-sī chiong-lâi ê, 39 sī thiⁿ-téng á-sī tōe-ē ê sîn-lêng, á-sī kî-tha ê pī-chō-bu̍t, lóng bōe-tàng chhiat-tn̄g Siōng-tè thong-kè lán ê Chú Ki-tok Iâ-so͘ tùi lán ê thiàⁿ!

Lô-má-su 9

1 Góa choh chi̍t ê sio̍k Ki-tok ê lâng kóng si̍t-ōe, bô pe̍h-chha̍t; góa ê liông-sim siū Sèng Sîn kám-tōng kā góa choh-chèng: 2 Góa hui-siông iu-siong, sim-lāi thòng-khó͘ bô-thêng. 3 Góa ūi-tio̍h tông-pau, góa ê kut-jio̍k chì-chhin, pún-sin nā tio̍h siū chiù-chó͘ kap Ki-tok keh-khui mā kam-goān. 4 In sī [Í-sek-lia̍t]-lâng; Siōng-tè kéng-soán in chòe kiáⁿ-jî, sù in êng-kng, iok, Lu̍t-hoat, lé-gî, kap èng-ún. 5 In sī cho̍k-tiúⁿ ê kiáⁿ-sun; chiàu hiat-thóng, Ki-tok kap in tâng-cho̍k. Goān chhiau-oa̍t bān-mi̍h ê Siōng-tè tit-tio̍h chheng-chàn kàu bān sè-tāi. Amen! 6 Án-ni m̄-sī kóng Siōng-tè ê èng-ún bô si̍t-hiān. In-ūi m̄-sī só͘-ū ê [Í-sek-lia̍t]-lâng lóng sī Siōng-tè ê soán-bîn. 7 [A-pek-la-hán] ê kiáⁿ-sun mā bô lóng sī èng-ún ê kiáⁿ-jî. Siōng-tè bat tùi [A-pek-la-hán] kóng, “Thong-kè [Í-sat] siⁿ ê chiah thang kiò-chòe lí ê kiáⁿ-sun.” 8 Án-ni sī kóng hiat-thóng ê kiáⁿ-jî bô it-tēng sī Siōng-tè ê kiáⁿ-jî; chí-ū tùi Siōng-tè ê èng-ún siⁿ ê chiah sǹg sī Siōng-tè ê kiáⁿ-sun. 9 In-ūi èng-ún ê ōe sī án-ni kóng: “Sî-ki kàu, góa ōe koh-lâi, [Sa-la] ōe siⁿ chi̍t ê ta-po͘-kiáⁿ.” 10 M̄-nā án-ni, [Lē-pek-ka] ê siang-siⁿ-kiáⁿ mā-sī tùi kâng chi̍t ê lâng, chiū-sī lán ê chó͘-sian [Í-sat] lâi hoâi-īn. 11 M̄-kú ūi-tio̍h beh piáu-sī Siōng-tè khak-si̍t kun-kù ka-kī ê bo̍k-te̍k lâi kéng-soán lâng, I tùi [Lē-pek-ka] kóng, “Tōa-ê ōe ho̍k-sāi sòe-ê.” Chit kù ōe sī tī in iáu-bē chhut-sì, iáu-bē chòe hó á-sī chòe pháiⁿ í-chêng, Siōng-tè só͘ kóng ê. Án-ni, Siōng-tè ê kéng-soán m̄-sī kun-kù lâng ê hêng-ûi, sī kun-kù I ka-kī ê soán-tiàu. 13 Chiàu Sèng-keng kì-chài, “[Ngá-kok], góa kah-ì; [Í-sò], góa bô kah-ì.” 14 Án-ni, lán beh kóng sím-mi̍h? Siōng-tè bô kong-tō sī-bô? Choa̍t-tùi m̄-sī! 15 I bat tùi [Mô͘-se] kóng: Góa beh lîn-bín góa ài lîn-bín ê lâng; góa beh thé-thiap góa ài thé-thiap ê lâng. 16 Só͘-í, Siōng-tè ê kéng-soán m̄-sī kun-kù lâng ê ì-goān á-sī ló͘-le̍k, sī chhut tī I ê lîn-bín. 17 Sèng-keng kì-chài Siōng-tè ū tùi Hoat-ló kóng, “Góa siat-li̍p lí chòe ông, bo̍k-te̍k sī beh ēng lí lâi hián-bêng góa ê koân-lêng, hō͘ góa ê miâ thoân kàu choân sè-kài.” 18 Só͘-í, Siōng-tè beh lîn-bín sím-mi̍h-lâng chiū kā i lîn-bín, beh hō͘ sím-mi̍h-lâng sim ngī chiū hō͘ i sim ngī. 19 Án-ni, lí ōe kā góa mn̄g, “Kì-jiân sī án-ni, sī-án-chóaⁿ Siōng-tè iáu teh chek-pī lâng? Sím-mi̍h-lâng káⁿ hoán-khòng Siōng-tè ê chí-ì?” 20 Lí chit-ê lâng, lí sǹg siáⁿ, káⁿ kā Siōng-tè tú-chhùi! Siū sok-chō ê mi̍h kiám ōe tùi sok-chō-ê kóng, “Lí sī-án-chóaⁿ kā góa chō-kah án-ni?” 21 Sio-hûi-ê kiám bô koân thang ēng siâng chi̍t tè liâm-thô͘ chiàu ka-kī ê ì-sù lâi chō chi̍t ê kùi-khì ê khì-khū, chi̍t ê chho͘-sio̍k ê khì-khū? 22 Sui-jiân Siōng-tè beh piáu-sī I ê siū-khì hō͘ lâng chai I ê koân-lêng, iáu-kú ēng chin tōa ê khoan-iông thun-lún hiah-ê jiá I siū-khì eng-kai bia̍t-bông ê lâng. 23 I ūi-tio̍h só͘ ū-pī lâi chiap-siū I ê êng-kng, chiū-sī I lîn-bín ê tùi-siōng hiah-ê lâng, I koh-khah ōe hō͘ in chai I hong-hù ê êng-kng. 24 Lán lóng sī I só͘ ho͘-tiàu ê, m̄-nā tùi [Iû-thài]-lâng, mā tùi Gōa-pang-lâng tiong-kan ho͘-tiàu. 25 Chiàu I tī Hô-se-a-su só͘ kóng: Pún-lâi m̄-sī góa ê chú-bîn ê, góa beh chheng-ho͘ in chòe ‘góa ê chú-bîn’. Pún-lâi m̄-sī góa só͘ thiàⁿ ê, góa beh hō͘ in chòe ‘góa só͘ thiàⁿ ê’. 26 Tī hit-ê só͘-chāi, góa bat tùi in kóng: ‘Lín m̄-sī góa ê chú-bîn’; tī hia, in ōe kiò-chòe ‘éng-oa̍h Siōng-tè ê kiáⁿ-jî.’ 27 Koan-hē [Í-sek-lia̍t]-lâng, [Í-sài-a] bat soan-pò͘ kóng, “Sui-jiân [Í-sek-lia̍t] ê kiáⁿ-sun chhin-chhiūⁿ hái-soa hiah-ni̍h chōe, m̄-kú chí-ū só͘-chhun ê chió-sò͘ ōe tit-tio̍h kiù, 28 in-ūi Chú tī tōe-chiūⁿ ōe chin kín koh thiat-tóe chip-hêng sím-phòaⁿ.” 29 Che sī chiàu [Í-sài-a] í-chêng só͘ kóng: Nā m̄-sī Chú --- Bān-kun ê Thóng-sòe kā lán lâu chéng, lán chá chiū chhin-chhiūⁿ [Só͘-to-má], mā chhin-chhiūⁿ [Gô-mô͘-la]. 30 Án-ni, lán beh kóng sím-mi̍h? Gōa-pang-lâng bô tui-kiû kap Siōng-tè kiàn-li̍p ha̍p-gî ê koan-hē, khiok tùi sìn kap Siōng-tè ū ha̍p-gî ê koan-hē. 31 [Í-sek-lia̍t]-lâng tui-kiû tùi Lu̍t-hoat hō͘ Siōng-tè jīn-tēng in chòe gī-lâng, hoán-tńg bô tit-tio̍h. 32 Ná-ōe án-ni? In-ūi in m̄-sī tùi sìn, sī tùi khò hêng-ûi. In khì that-tio̍h hit tè hō͘ lâng poa̍h-tó ê chio̍h poa̍h-tó. 33 Sèng-keng ū án-ni kì-chài: Khòaⁿ ah, góa chiong hō͘ lâng poa̍h-tó ê chio̍h, hō͘ lâng poa̍h-tó ê tōa-chio̍h khǹg tī Sek-an, sìn I ê lâng bōe tì-kàu sit-bāng kiàn-siàu.

Lô-má-su 10

1 Hiaⁿ-tī chí-bē, góa ê sim jia̍t-chhiat ǹg-bāng, koh tùi Siōng-tè kî-kiû ê, chiū-sī [Í-sek-lia̍t]-lâng ōe tit-tio̍h kiù. 2 Góa ōe-tàng ūi-tio̍h in choh-chèng: In tùi Siōng-tè ū jia̍t-sim, m̄-kú m̄-sī kun-kù chèng-khak ê liáu-kái. 3 In-ūi in bô bêng-pe̍k Siōng-tè ê gī, beh ēng ka-kī ê hong-hoat tui-kiû kap Siōng-tè kiàn-li̍p ha̍p-gî ê koan-hē, soah bô sūn-thàn Siōng-tè hō͘ lâng chiâⁿ-chòe gī-lâng ê hong-hoat. 4 Kî-si̍t, Ki-tok í-keng oân-sêng Lu̍t-hoat ê bo̍k-te̍k, hō͘ sìn ê lâng ōe-tàng kap Siōng-tè ū ha̍p-gî ê koan-hē. 5 Koan-hē tùi khò Lu̍t-hoat tit-tio̍h ê gī, [Mô͘-se] ū án-ni siá, “Siú Lu̍t-hoat ê lâng khò Lu̍t-hoat lâi oa̍h.” 6 M̄-kú koan-hē tùi sìn chheng-gī, Sèng-keng ū án-ni kóng, “Lí m̄-thang sim-lāi kóng ‘Sím-mi̍h-lâng ōe peh chiūⁿ-thiⁿ?’ --- chiū-sī kóng, sím-mi̍h-lâng ōe chiong Ki-tok chhōa lo̍h-lâi? 7 Mā m̄-thang kóng ‘Sím-mi̍h-lâng ōe lo̍h-khì chhim-ian?’ --- chiū-sī kóng, sím-mi̍h-lâng ōe chiong Ki-tok tùi sí-lâng tiong chhōa khí-lâi?” 8 Chiah-ê ōe tàu-tóe sím-mi̍h ì-sù? Ì-sù sī: Siōng-tè ê ōe kap lí chin kūn, tī lí ê chhùi-ni̍h, tī lí ê sim-lāi. Che chiū-sī goán só͘ soan-iông ê sìn ê sìn-sit. 9 Lí nā ēng chhùi soan-jīn “Iâ-so͘ sī Chú”, sim sìn Siōng-tè ū hō͘ I tùi sí-lâng tiong koh-oa̍h, chiū ōe tit-tio̍h kiù. 10 In-ūi lâng sim sìn chiū tit-tio̍h chheng-gī; chhùi soan-jīn chiū tit-tio̍h kiù. 11 Sèng-keng ū án-ni kì-chài, “Sìn I ê lâng bōe tì-kàu sit-bāng kiàn-siàu.” 12 [Iû-thài]-lâng kap Gōa-pang-lâng lóng bô chha-pia̍t, in-ūi ū kâng chi̍t ūi Siōng-tè sī bān-bîn ê Chú, I ōe hong-hong hù-hù sù-hok hō͘ só͘-ū kiû-kiò I ê lâng. 13 In-ūi só͘-ū “Kiû-kiò Chú ê miâ ê lâng lóng ōe tit-kiù.” 14 M̄-kú in to bô sìn I, ná-ōe kiû-kiò I? To bô thiaⁿ-tio̍h, ná-ōe sìn I? To bô-lâng thoân, ná-ōe thiaⁿ-tio̍h? 15 To bô chhe-phài, ná-ōe thoân? Chiàu Sèng-keng só͘ kì-chài, “Thoân-pò hok-im ê lâng, in ê kha-jiah jōa-á-ni̍h súi!” 16 M̄-kú, m̄-sī só͘-ū ê lâng lóng sūn-thàn chit-ê hok-im. [Í-sài-a] kóng, “Chú ah, sím-mi̍h-lâng sìn goán só͘ thoân ê sìn-sit?” 17 Só͘-í, sìn sī tùi thiaⁿ, thiaⁿ sī tùi thiaⁿ Ki-tok ê ōe. 18 Put-kò góa beh mn̄g, in kiám chin-chiàⁿ lóng m̄-bat thiaⁿ-tio̍h? Tong-jiân bat! Sèng-keng án-ni kì-chài: In ê siaⁿ-im thoân-piàn choân-tōe; in ê ōe thoân kàu thiⁿ-piⁿ hái-kak. 19 Góa beh koh mn̄g, [Í-sek-lia̍t]-lâng kiám chin-chiàⁿ m̄-chai? Tāi-seng [Mô͘-se] thòe Siōng-tè án-ni kóng: Góa beh ēng m̄-sī góa chú-bîn ê lâng lâi ín-khí lín chi̍t-tò͘, ēng gû-gōng ê chú-bîn lâi kek-khí lín siū-khì. 20 Āu-lâi [Í-sài-a] mā chin hó-táⁿ thòe Siōng-tè kóng: Bô chhē góa ê lâng, góa ū hō͘ in chhē-tio̍h; bô kiû góa ê lâng, góa ū tùi in hián-hiān. 21 M̄-kú koan-hē [Í-sek-lia̍t]-lâng, I ū kóng, “Ngī-sim pōe-ge̍k ê chú-bîn, góa kui-ji̍t chhun siang-chhiú hoan-gêng.”

Lô-má-su 11

1 Án-ni, góa beh mn̄g, Siōng-tè kiám ū pàng-sak I ê chú-bîn? Choa̍t-tùi bô! Góa pún-sin mā-sī [Í-sek-lia̍t]-lâng, sī [A-pek-la-hán] ê hō͘-tāi, sio̍k [Piān-ngá-bín] chi-cho̍k. 2 Siōng-tè m̄-bat pàng-sak I chá chiū kéng-soán ê chú-bîn. Lín kiám m̄-chai Sèng-keng ū kì-chài, [Í-lī-a] tùi Siōng-tè khòng-kò [Í-sek-lia̍t]-lâng, 3 kóng, “Chú ah, in thâi-sí lí ê sian-ti, thiah-húi lí ê chè-tôaⁿ, chí-ū chhun góa chi̍t lâng, in mā teh siàu-siūⁿ góa ê sìⁿ-miā.” 4 M̄-kú Siōng-tè án-chóaⁿ ìn-tap? I kóng, “Góa ū ūi-tio̍h ka-kī lâu chhit-chheng ê m̄-bat kūi-pài [Pa-le̍k] ê lâng.” 5 Hiān-kim chit-ê sî ê chêng-hêng mā-sī án-ni, Siōng-tè ū lâu ēng un-tián kéng-soán ê chió-sò͘-lâng. 6 Kì-jiân sī Siōng-tè ê un-tián, chiū m̄-sī kun-kù lâng ê hêng-ûi; nā kun-kù lâng ê hêng-ûi, un-tián chiū m̄-sī un-tián! 7 Nā án-ni, [Í-sek-lia̍t]-lâng bô tit-tio̍h in teh tui-chhē ê, chí-ū Siōng-tè só͘ kéng-soán ê chió-sò͘-lâng ū tit-tio̍h. Kî-tha ê lâng sim ngī m̄-thiaⁿ, 8 chiàu Sèng-keng só͘ kì-chài: Siōng-tè hō͘ in ê sim-lêng bâ-pì, ba̍k-chiu khòaⁿ bōe-kìⁿ, hī-khang thiaⁿ bōe-tio̍h, ti̍t-kàu kin-á-ji̍t. 9 [Tāi-pi̍t] kóng: Tio̍h hō͘ in ê iàn-hōe chiâⁿ-chòe hām-khiⁿ, lô-bāng, hō͘ in poa̍h-tó, chòe in ê pò-èng. 10 Tio̍h hō͘ in ê ba̍k-chiu hoe, bōe khòaⁿ-kìⁿ, hō͘ in ê ka-chiah-phiaⁿ éng-oán khiau-ku. 11 Án-ni, góa beh kóng, [Í-sek-lia̍t]-lâng tó lo̍h-khì, kiám lóng peh bōe khí-lâi? It-tēng bōe án-ni! Tian-tò in-ūi in ê kè-sit, chín-kiù lîm-kàu Gōa-pang-lâng, lâi kek-khí [Í-sek-lia̍t]-lâng ê chi̍t-tò͘. 12 Kì-jiân [Í-sek-lia̍t]-lâng ê kè-sit ōe hō͘ sè-kan-lâng tit-tio̍h hong-hù ê chiok-hok, in ê sit-pāi ōe hō͘ Gōa-pang-lâng tit-tio̍h hong-hù ê chiok-hok, hô-hòng [Í-sek-lia̍t]-lâng nā choân-sò͘ tit-tio̍h kiù, hit-ê chiok-hok kiám-bōe koh-khah hong-hù? 13 Hiān-chāi góa tùi lín Gōa-pang-lâng kóng. Kì-jiân góa sī Gōa-pang-lâng ê sù-tô͘, góa khòaⁿ góa ê chit-hūn chòe êng-kng, 14 án-ni thang kek-khí góa ê tông-pau ê chi̍t-tò͘, lâi kiù in tiong-kan chi̍t-kóa lâng. 15 [Í-sek-lia̍t] tông-pau siū khì-sak nā ōe hō͘ sè-kan-lâng kap Siōng-tè koh hô-hó, in koh siū chiap-la̍p kiám m̄-sī chhin-chhiūⁿ lâng tùi sí koh-oa̍h? 16 Thâu-chi̍t tè mī-chhè nā sèng-pia̍t kui hō͘ Siōng-tè, kui-sn̂g mā lóng ōe án-ni; chhiū-kun nā sèng-pia̍t kui hō͘ Siōng-tè, ki mā lóng ōe án-ni. 17 Lâng kā ka-ná-chhiū-ki chián khí-lâi, chiong lín chiah-ê iá-seng ê ka-ná-chhiū-ki chiap lo̍h-khì, lâi chiap-siū kâng hit châng chhiū-kun ê êng-ióng-hun, 18 lín chiū m̄-thang tùi chián khí-lâi ê chhiū-ki khoa-kháu. Lín nā beh khoa-kháu, tio̍h chai, m̄-sī kun teh óa-khò lín, sī lín teh óa-khò kun. 19 Lí kiám-chhái beh kóng, “Chiah-ê chhiū-ki chián khí-lâi sī beh kā góa chiap lo̍h-khì.” 20 Tio̍h! In m̄-sìn chiah siū chián khí-lâi, lí tùi sìn chiah khiā ōe-tiâu. Lí m̄-thang kiau-ngō͘, tio̍h kiaⁿ-hiâⁿ. 21 In-ūi Siōng-tè nā bô lâu goân-lâi ê chhiū-ki, mā bô it-tēng ōe lâu lí. 22 Só͘-í, tio̍h chai Siōng-tè ê chû-ài kap giâm-hat, tùi tūi-lo̍h ê lâng, I chin giâm-hat, m̄-kú lí nā kè-sio̍k óa-khò I ê chû-ài, I chiū ēng chû-ài tùi-thāi lí; nā bô, lí mā ōe siū chián-tn̄g sit-khì I ê chû-ài. 23 [Í-sek-lia̍t]-lâng nā m̄-sī kian-chhî m̄-sìn, chiū ōe siū chiap tò tńg-khì, in-ūi Siōng-tè ōe-tàng koh kā in chiap tò tńg-khì. 24 Lín chiah-ê tùi iá-seng ê ka-ná-chhiū chián khí-lâi ê chhiū-ki, Siōng-tè to ōe-tàng ûi-hoán chū-jiân kā lín chiap tī hó ê ka-ná-chhiū, hiah-ê goân-lâi ê chhiū-ki kiám-bōe koh-khah eng-kai chiap tò tńg-khì? 25 Hiaⁿ-tī chí-bē, góa ài lín chai chit-ê ò-biāu ê chin-lí, chiah bōe siūⁿ-kóng ka-kī sī chhong-bêng. Chi̍t pō͘-hūn ê [Í-sek-lia̍t]-lâng chiām-sî ngī-sim, kàu Gōa-pang-lâng kui Chú ê sò͘-bo̍k móa ûi-chí. 26 Án-ni, só͘-ū ê [Í-sek-lia̍t]-lâng lóng ōe tit-kiù. Chiàu Sèng-keng só͘ kì-chài: Chín-kiù-chiá ōe tùi [Sek-an] chhut-lâi, I ōe tû-khì [Ngá-kok] ê put-khiân put-gī. 27 Hit sî góa beh tû-khì in ê chōe; Che sī góa kap in só͘ li̍p ê iok. 28 Chi̍t hong-bīn, tùi hok-im ê koan-tiám lâi kóng, [Í-sek-lia̍t]-lâng in-ūi lín ê iân-kò͘ chiâⁿ-chòe Siōng-tè ê tùi-te̍k. Lēng-gōa chi̍t hong-bīn, tùi kéng-soán ê koan-tiám lâi kóng, in-ūi in chó͘-sian ê iân-kò͘, in chiâⁿ-chòe Siōng-tè só͘ thiàⁿ ê lâng; 29 in-ūi Siōng-tè ê un-sù kap kéng-soán bōe kái-piàn. 30 Lín Gōa-pang-lâng í-chêng bô sūn-ho̍k Siōng-tè, hiān-chāi in-ūi [Í-sek-lia̍t]-lâng bô sūn-ho̍k, lín chiah tit-tio̍h lîn-bín. 31 Kâng-khoán, in-ūi lín ū tit-tio̍h lîn-bín, in hiān-chāi bô sūn-ho̍k Siōng-tè, sī beh hō͘ in mā ōe tit-tio̍h lîn-bín. 32 Siōng-tè chiong só͘-ū ê lâng lóng koaiⁿ tī bô sūn-ho̍k ê chōng-thāi, sī ūi-tio̍h beh lîn-bín só͘-ū ê lâng. 33 Siōng-tè ê hong-sēng, tì-hūi, chai-bat, jōa-á-ni̍h chhim-tîm ah! I ê phòaⁿ-toàn oh-tit thui-chhek; I ê tō-lō͘ oh-tit chhē-tio̍h! 34 Sím-mi̍h-lâng chai Chú ê sim-ì? Sím-mi̍h-lâng ōe-tàng thòe I chhut chú-ì? 35 Sím-mi̍h-lâng bat seng hō͘ I sím-mi̍h, I tio̍h pò-tap in? 36 In-ūi bān-mi̍h lóng chhut tī I, óa-khò I, kui tī I; goān I tit-tio̍h êng-kng ti̍t-kàu éng-oán. Amen!

Lô-má-su 12

1 Só͘-í, hiaⁿ-tī chí-bē, in-ūi Siōng-tè ê lîn-bín, góa khǹg lín tio̍h chiong ka-kī ê seng-khu hiàn hō͘ Siōng-tè chòe oa̍h-oa̍h ê chè, sī sèng-kiat, I só͘ hoaⁿ-hí ê; che sī lín ha̍p-gî ê kèng-pài. 2 M̄-thang hō͘ sè-sio̍k tông-hòa, tian-tò tio̍h hō͘ Siōng-tè kā lín kái-chō, sim-chì tit-tio̍h keng-sin, hō͘ lín thang piān-pia̍t sím-mi̍h sī Siōng-tè só͘ hoaⁿ-hí, khòaⁿ-chòe hó, koh oân-choân ê chí-ì. 3 Khò Siōng-tè hō͘ góa ê un-sù, góa tùi lín ta̍k ê lâng kóng: M̄-thang chiong ka-kī khòaⁿ siuⁿ koân, tio̍h chiàu Siōng-tè sù hō͘ lín ta̍k ê lâng sìn-sim ê hūn-liōng sīn-tiōng phêng-kè ka-kī. 4 Chhin-chhiūⁿ chi̍t ê seng-khu ū chin chōe chi-thé, ta̍k ê chi-thé kok ū bô sio-siâng ê kong-lêng. 5 Sui-jiân lán ū chin chōe lâng, m̄-kú tī Ki-tok sī chi̍t-thé, hō͘-siōng chòe chi-thé. 6 Chiàu Siōng-tè sù hō͘ lán ê un-tián, lán ta̍k ê lâng ū tit-tio̍h bô sio-siâng ê un-sù: Soan-káng sìn-sit ê lâng tio̍h hû-ha̍p sìn-sim soan-káng; 7 ho̍k-sāi ê lâng tio̍h choân-sim ho̍k-sāi; kàu-tō ê lâng tio̍h choân-sim kàu-tō; 8 khoàn-bián ê lâng tio̍h choân-sim khoàn-bián; chín-chè ê lâng tio̍h khóng-khài; léng-tō ê lâng tio̍h jia̍t-sim; chòe chû-siān ê lâng tio̍h kam-sim lo̍k-ì. 9 Thiàⁿ tio̍h sêng-sim sêng-ì; tio̍h oàn-hūn pháiⁿ, kian-chhî hó. 10 Tio̍h ēng hiaⁿ-tī-ài hō͘-siōng saⁿ-thiàⁿ; tio̍h chek-ke̍k saⁿ kèng-tiōng. 11 M̄-thang pîn-tōaⁿ; sim-chì tio̍h jia̍t-sêng, kè-sio̍k ho̍k-sāi Chú. 12 Tio̍h khǹg ǹg-bāng lâi hoaⁿ-hí; tio̍h jím-siū hoān-lān; tio̍h put-sî kî-tó. 13 Tio̍h pang-chān lín tiong-kan sàn-chhiah ê sìn-tô͘; tio̍h hó khoán-thāi chhut-gōa-lâng. 14 Tio̍h chiok-hok pek-hāi lín ê lâng; tio̍h chiok-hok, m̄-thang chiù-chó͘. 15 Tio̍h kap hoaⁿ-hí ê lâng chòe-hé hoaⁿ-hí, kap ai-khàu ê lâng chòe-hé ai-khàu. 16 Tio̍h tâng-sim ha̍p-ì; m̄-thang kiau-ngō͘; tio̍h chòe pîn-chiān ê lâng ê tâng-phōaⁿ; m̄-thang chū-chok-chhong-bêng. 17 M̄-thang ēng pháiⁿ pò pháiⁿ; tio̍h chòe chèng-lâng khòaⁿ-chòe hó ê sū. 18 Tio̍h chīn-só͘-ōe kap chèng-lâng hô-bo̍k siong-chhù. 19 Chhin-ài ê hiaⁿ-tī chí-bē, m̄-thang ūi-tio̍h ka-kī pò-oan, lêng-khó hō͘ Siōng-tè thòe lín siū-khì, in-ūi Sèng-keng ū kì-chài, “Chú kóng, sin-oan chāi-tī góa, góa ōe pò-èng.” 20 M̄-kú Sèng-keng mā ū kì-chài, “Lí ê tùi-te̍k nā iau, tio̍h hō͘ i chia̍h, chhùi-ta, tio̍h hō͘ i lim; in-ūi lí án-ni chòe, ná-chún chiong teh to̍h ê hé-thòaⁿ thia̍p tī i ê thâu-khak téng, hō͘ i kiàn-siàu-kah tòng bōe-tiâu.” 21 Só͘-í, m̄-thang hō͘ pháiⁿ iâⁿ-kè lín; tio̍h ēng hó khah-iâⁿ pháiⁿ.

Lô-má-su 13

1 Ta̍k ê lâng tio̍h sūn-ho̍k tī téng-bīn ê koân-pèng, in-ūi koân-pèng lóng sī tùi Siōng-tè lâi. Chiáng-koân-chiá ê koân-pèng lóng sī Siōng-tè chè-tēng ê. 2 Só͘-í, hoán-khòng koân-pèng sī ûi-pōe Siōng-tè só͘ chè-tēng ê chè-tō͘; hoán-khòng ê lâng ōe siū sím-phòaⁿ. 3 Thóng-tī-chiá m̄-sī beh hō͘ choh-hó ê lâng kiaⁿ-hiâⁿ, sī beh hō͘ choh-pháiⁿ ê lâng kiaⁿ-hiâⁿ. Lí kiám bô ài chòe chi̍t ê bián kiaⁿ koân-pèng ê lâng? Nā ài, tio̍h choh-hó, lí chiū ōe tit-tio̍h chheng-chàn; 4 in-ūi i sī Siōng-tè ê chhe-ēng, i ê chit-chek sī beh pang-chān lí. M̄-kú lí nā choh-pháiⁿ, tio̍h kiaⁿ i, in-ūi i tòa kiàm m̄-sī bô bo̍k-te̍k. I sī Siōng-tè ê chhe-ēng, sī sin-oan-chiá, beh thòe Siōng-tè hêng-hoa̍t choh-pháiⁿ ê lâng. 5 Só͘-í, lín tio̍h sūn-ho̍k, m̄-sī kan-ta in-ūi kiaⁿ Siōng-tè siū-khì, mā-sī ūi-tio̍h liông-sim ê iân-kò͘. 6 Lín la̍p-sè mā-sī ūi-tio̍h chit-ê lí-iû, in-ūi i sī ho̍k-sāi Siōng-tè ê lâng, teh chip-hêng i ê chit-bū. 7 Tio̍h tùi chèng-lâng chīn lín ê gī-bū; lín khiàm ê, tio̍h hêng; eng-kai la̍p ê, tio̍h la̍p; eng-kai kiaⁿ-ùi ê, tio̍h kiaⁿ-ùi; eng-kai chun-kèng ê, tio̍h chun-kèng. 8 Hō͘-siōng saⁿ-thiàⁿ ê chè í-gōa, choa̍t-tùi m̄-thang khiàm lâng sím-mi̍h; in-ūi thiàⁿ pa̍t-lâng ê, í-keng ū oân-sêng Lu̍t-hoat ê iau-kiû. 9 Lu̍t-hoat ê iau-kiû sī: “M̄-thang kan-îm; m̄-thang thâi-lâng; m̄-thang thau-the̍h; m̄-thang tham-sim;” chiah-ê kap kî-tha ê iau-kiû lóng pau-hâm tī “Tio̍h thiàⁿ chhù-piⁿ chhin-chhiūⁿ thiàⁿ ka-kī” chit kù ōe. 10 Thiàⁿ chhù-piⁿ ê lâng bōe siong-hāi pa̍t-lâng. Só͘-í, thiàⁿ sêng-choân Lu̍t-hoat. 11 Án-ni, lín chai chit-ê sî-chūn sī lín eng-kai khùn-chhíⁿ ê sî, in-ūi hiān-chāi pí lán tú-tú sìn ê sî koh-khah chiap-kūn chín-kiù. 12 Mî-sî í-keng chhim, ji̍t-sî teh-beh kàu. Só͘-í, lán tio̍h thǹg-tiāu o͘-àm ê hêng-ûi, ēng kng-bêng chòe bú-chong. 13 Lán ê hêng-ûi tio̍h toan-chèng, chhin-chhiūⁿ tī ji̍t-sî teh seng-oa̍h. M̄-thang hòng-chhiòng, chiú-chùi; m̄-thang hò͘ⁿ-sek, hòng-tōng; m̄-thang saⁿ-chiⁿ, oàn-tò͘. 14 Tio̍h ēng Chú Iâ-so͘ Ki-tok chòe bú-chong lâi chhēng; m̄-thang chí-ū tô͘-bô͘ jio̍k-thé ê sū lâi boán-chiok su-io̍k.

Lô-má-su 14

1 Sìn-sim loán-jio̍k ê lâng tio̍h kā i chiap-la̍p, m̄-thang kap i piān-lūn ū cheng-gī ê sū. 2 Sìn ê lâng ta̍k hāng lóng ū chia̍h, m̄-kú loán-jio̍k ê lâng chí-ū chia̍h chhài-soe. 3 Ta̍k hāng chia̍h ê lâng m̄-thang khòaⁿ-khin bô ta̍k hāng chia̍h ê lâng; bô ta̍k hāng chia̍h ê lâng mā m̄-thang phoe-phòaⁿ ta̍k hāng chia̍h ê lâng, in-ūi Siōng-tè í-keng ū chiap-la̍p i. 4 Lí sǹg siáⁿ, ná káⁿ phoe-phòaⁿ pa̍t-lâng ê lô͘-po̍k? I chòe liáu hó á-sī bô hó, i ê chú-lâng ōe kā i sím-phòaⁿ. I ōe chòe hó-sè, in-ūi Chú ōe kā i pang-chān. 5 Ū lâng khòaⁿ chit ji̍t pí hit ji̍t khah tiōng-iàu; mā ū lâng khòaⁿ ta̍k ji̍t pîⁿ-pîⁿ tiōng-iàu. Ta̍k ê lâng tio̍h ū ka-kī bêng-khak ê kiàn-kái. 6 Siú te̍k-pia̍t ji̍t-chí ê lâng sī ūi-tio̍h Chú lâi siú; ū chia̍h-bah ê lâng mā-sī ūi-tio̍h Chú lâi chia̍h, in-ūi i ū kám-siā Siōng-tè. Bô chia̍h-bah ê lâng sī ūi-tio̍h Chú bô chia̍h, i mā-sī ū kám-siā Siōng-tè. 7 Lán bô-lâng ūi-tio̍h ka-kī teh oa̍h, mā bô-lâng ūi-tio̍h ka-kī lâi sí. 8 Lán nā oa̍h, sī ūi-tio̍h Chú teh oa̍h; nā sí, mā-sī ūi-tio̍h Chú lâi sí. Só͘-í, bô-lūn oa̍h á-sī sí, lán lóng sī sio̍k Chú ê lâng. 9 Ūi-tio̍h chit-ê bo̍k-te̍k Ki-tok ū sí, mā ū koh-oa̍h, thang siâng-sî chòe sí-lâng kap oa̍h-lâng ê Chú. 10 Án-ni, sī-án-chóaⁿ lí teh phoe-phòaⁿ lí ê hiaⁿ-tī á-sī chí-bē? Sī-án-chóaⁿ teh khòaⁿ-khin lí ê hiaⁿ-tī á-sī chí-bē? In-ūi lán chèng-lâng lóng tio̍h khiā tī Siōng-tè ê sím-phòaⁿ-tâi chêng. 11 Sèng-keng ū kì-chài: Chú kóng, góa sī éng-oa̍h ê Siōng-tè; ta̍k ê kha-thâu-u ōe kā góa kūi-pài, ta̍k ê chhùi-tûn ōe soan-jīn góa sī Siōng-tè. 12 Án-ni, lán ta̍k ê lâng tio̍h chiong ka-kī ê tāi-chì tī Siōng-tè ê bīn-chêng kau-tài chheng-chhó. 13 Só͘-í, lán m̄-thang koh-chài hō͘-siōng phoe-phòaⁿ, hoán-tńg tio̍h koat-sim bô chòe hō͘ hiaⁿ-tī á-sī chí-bē ê sìn-gióng siū chó͘-gāi, poa̍h-tó ê sū. 14 Góa chai, koh Chú Iâ-so͘ hō͘ góa khak-sìn, ta̍k hāng mi̍h pún-sin lóng chheng-khì; lâng nā siūⁿ-kóng bô chheng-khì, tùi hit-ê lâng lâi kóng hit hāng mi̍h chiū bô chheng-khì. 15 Lí nā in-ūi só͘ chia̍h ê mi̍h hō͘ hiaⁿ-tī á-sī chí-bē kan-khó͘ sim, lí ê hêng-ûi chiū m̄-sī chhut tī thiàⁿ-sim. Lí m̄-thang ūi-tio̍h ka-kī só͘ chia̍h ê mi̍h hō͘ hiaⁿ-tī á-sī chí-bē tì-kàu bia̍t-bông, in-ūi Ki-tok í-keng ūi-tio̍h i sí. 16 Só͘-í, m̄-thang hō͘ lí khòaⁿ-chòe hó ê chiâⁿ-chòe lâng ê húi-pòng. 17 Siōng-tè chú-koân ê si̍t-hiān m̄-sī khò lim-chia̍h, sī khò Sèng Sîn só͘ sù ê kong-gī, hô-pêng, kap hoaⁿ-hí. 18 Ēng án-ni lâi ho̍k-sāi Ki-tok ê lâng ōe hō͘ Siōng-tè hoaⁿ-hí, mā ōe tit-tio̍h lâng ê chheng-chàn. 19 Só͘-í, lán tio̍h tui-kiû hô-bo̍k kap hō͘-siōng chō-chiū ê sū. 20 M̄-thang ūi-tio̍h chia̍h-mi̍h phò-hoāi Siōng-tè ê kang-chok. Bān-mi̍h lóng chheng-khì, m̄-kú lâng nā in-ūi chia̍h-mi̍h hō͘ pa̍t-lâng ê sìn-gióng siū chó͘-gāi chiū m̄-hó. 21 Khah hó sī bô chia̍h-bah, bô lim-chiú, bô chòe hō͘ hiaⁿ-tī á-sī chí-bē sit-khì sìn-gióng ê tāi-chì. 22 Lí tùi chi̍t hāng sū ê sìn-liām sī lí kap Siōng-tè tiong-kan ê tāi-chì. Tùi ka-kī khòaⁿ-chòe tio̍h ê sū bô chū-chek ê lâng chin ū hok-khì. 23 M̄-kú sim ū giâu-gî lâi chia̍h ê lâng ōe siū tēng-chōe, in-ūi m̄-sī chhut-tī sìn-sim. M̄-sī chhut-tī sìn-sim lâi chòe ê lóng sī chōe.

Lô-má-su 15

1 Lán chiah-ê sìn-sim kian-kiông ê lâng eng-kai kā sìn-sim loán-jio̍k ê lâng tàu taⁿ tāng-tàⁿ. M̄-thang kiû hō͘ ka-kī hoaⁿ-hí; 2 lán ta̍k ê lâng tio̍h kiû hō͘ chhù-piⁿ hoaⁿ-hí, hō͘ in tit-tio̍h lī-ek thang kiàn-li̍p sìn-sim. 3 In-ūi Ki-tok bô kiû hō͘ ka-kī hoaⁿ-hí, hoán-tńg chhin-chhiūⁿ Sèng-keng só͘ kì-chài, “Bú-jio̍k lí ê lâng ê bú-jio̍k kui tī góa.” 4 Chá-chêng só͘ siá ê lóng sī ūi-tio̍h beh kà-sī lán lâi siá ê, hō͘ lán tùi jím-nāi kap Sèng-keng ê an-ùi tit-tio̍h ǹg-bāng. 5 Goān sù jím-nāi kap an-ùi ê Siōng-tè hō͘ lín tâng sim-chì ha̍k-si̍p Ki-tok Iâ-so͘ ê bô͘-iūⁿ, 6 thang tâng-sim tâng-siaⁿ êng-iāu lán ê Chú Iâ-so͘ Ki-tok ê Pē Siōng-tè! 7 Só͘-í, ūi-tio̍h êng-iāu Siōng-tè, lín tio̍h hō͘-siōng chiap-la̍p, chhin-chhiūⁿ Ki-tok ū chiap-la̍p lín. 8 Góa kā lín kóng, Ki-tok chiâⁿ-chòe siū kat-lé ê lâng ê chhe-ēng, sī beh hián-sī Siōng-tè ê sìn-si̍t, thang chèng-bêng Siōng-tè tùi chó͘-sian ê èng-ún ū si̍t-hiān, 9 mā beh hō͘ Gōa-pang-lâng in-ūi Siōng-tè ê lîn-bín thang kui êng-kng hō͘ I. Chiàu Sèng-keng só͘ kì-chài: Só͘-í, góa beh tī Gōa-pang-lâng tiong-kan soan-jīn lí, chhiùⁿ-koa o-ló lí ê miâ. 10 I koh kóng: Gōa-pang-lâng ah, tio̍h kap Siōng-tè ê chú-bîn chòe-hé hoaⁿ-hí. 11 I koh kóng: Só͘-ū ê Gōa-pang-lâng ah, tio̍h o-ló Chú; bān-bîn ah, tio̍h siōng-chàn I. 12 [Í-sài-a] koh-chài kóng: [Iâ-se] ê kun ōe puh-íⁿ, I ōe khí-lâi thóng-tī gōa-pang; Gōa-pang-lâng lóng ōe chiong ǹg-bāng kau-thok I. 13 Goān sù ǹg-bāng ê Siōng-tè, in-ūi lín tùi I ê sìn-sim, hō͘ lín chhiong-móa ta̍k khoán ê hoaⁿ-hí kap pêng-an, koh hō͘ lín tùi Sèng Sîn ê lêng-le̍k chhiong-móa ǹg-bāng! 14 Góa ê hiaⁿ-tī chí-bē, góa ka-kī khak-sìn lín hui-siông liông-siān, chhiong-móa ta̍k khoán ê tì-sek, koh ōe-hiáu hō͘-siōng khó͘-khǹg. 15 M̄-kú góa hó-táⁿ siá chit tiuⁿ phoe hō͘ lín, kā lín thê-chhíⁿ kúi tiám; in-ūi Siōng-tè ū sù góa te̍k-pia̍t ê un-tián, 16 thang tī Gōa-pang-lâng ê tiong-kan ho̍k-sāi Ki-tok Iâ-so͘, choh chè-si soan-káng Siōng-tè ê hok-im, thang hō͘ Gōa-pang-lâng chiâⁿ-chòe Sèng Sîn só͘ sèng-hòa, Siōng-tè chiap-la̍p ê chè-mi̍h. 17 Só͘-í, in-ūi Ki-tok Iâ-so͘ ê iân-kò͘, góa khòaⁿ ho̍k-sāi Siōng-tè chòe êng-kng. 18 Góa m̄-káⁿ kóng pa̍t-hāng tāi-chì, chí-ū beh kóng chit hāng, chiū-sī Ki-tok thong-kè góa ê giân-gú kap hêng-ûi, ēng sîn-jiah kî-sū ê lêng-le̍k, kap Siōng-tè ê Sîn ê lêng-le̍k, hō͘ Gōa-pang-lâng sūn-ho̍k Siōng-tè. Só͘-í tùi [Iâ-lō͘-sat-léng] it-ti̍t kàu [Í-lī-lí-kó͘] ê tōe-khu, góa ta̍k só͘-chāi khì soan-iông Ki-tok ê hok-im. 20 Góa koat-ì bô beh tī í-keng thiaⁿ-tio̍h Ki-tok ê miâ ê só͘-chāi thoân hok-im, chiah bōe tī pa̍t-lâng ê tōe-ki téng khí-chhù. 21 Chiàu Sèng-keng só͘ kì-chài: M̄-bat thiaⁿ-tio̍h I ê lâng ōe khòaⁿ-kìⁿ; m̄-bat thiaⁿ-kìⁿ I ê lâng ōe bêng-pe̍k. 22 Góa chin chōe piàn ū tú-tio̍h chó͘-tòng, bōe-tàng khì lín hia. 23 M̄-kú taⁿ tī chiah-ê tōe-khu bô pa̍t-ê só͘-chāi thang khì, koh kúi-nā nî lâi, góa it-ti̍t teh ǹg-bāng ōe-tàng khì lín hia. 24 Chit piàn beh khì [Se-pan-gâ] ê lō͘-tiong, góa ǹg-bāng ōe keng-kè lín hia khì khòaⁿ lín, seng kap lín ū chi̍t tōaⁿ sî-kan hoaⁿ-hí ê kau-pôe, jiân-āu chiah hō͘ lín sòng-hêng kè-sio̍k khì [Se-pan-gâ]. 25 M̄-kú góa hiān-chāi tio̍h seng khì [Iâ-lō͘-sat-léng] kiong-kip hiah-ê sìn-tô͘ ê su-iàu, 26 in-ūi [Má-kî-tùn] kap [A-kai-a] ê kàu-hōe hoaⁿ-hí hiàn chi̍t pit chîⁿ pang-chān [Iâ-lō͘-sat-léng] chi̍t-kóa sàn-chhiah ê sìn-tô͘. 27 Che sī in hoaⁿ-hí chòe ê, kî-si̍t mā-sī in só͘ khiàm ê chè. Kì-jiân [Iû-thài] sìn-tô͘ ū kap Gōa-pang-lâng hun-hióng sio̍k-lêng ê hok-khì, Gōa-pang ê sìn-tô͘ eng-kai tī bu̍t-chit siōng pang-chān in. 28 Thèng-hāu góa chit hāng tāi-chì chòe hó-sè, chiong koan-bō͘ ê chit pit chîⁿ kau hō͘ in liáu-āu, chiah keng-kè lín hia khì [Se-pan-gâ]. 29 Góa chai góa khì lín hia ê sî, mā ōe chiong Ki-tok hong-hù ê un-tián tòa khì hō͘ lín. 30 Hiaⁿ-tī chí-bē, thong-kè lán ê Chú Iâ-so͘ Ki-tok kap Sèng Sîn só͘ sù ê thiàⁿ-sim, góa chhiáⁿ lín chīn-la̍t kap góa chòe-hé ūi-tio̍h góa kî-kiû Siōng-tè, 31 hō͘ góa bián siū-tio̍h [Iû-thài] m̄-sìn ê lâng ê hām-hāi, koh hō͘ góa tī [Iâ-lō͘-sat-léng] pān-lí kiong-kip ê tāi-chì ōe tit-tio̍h sìn-tô͘ chiap-la̍p. 32 Án-ni, góa chiū thang hoaⁿ-hoaⁿ hí-hí chiàu Siōng-tè ê chí-ì khì lín hia, kap lín chòe-hé tiông-sin tit-tio̍h khùi-la̍t. 33 Goān sù pêng-an ê Siōng-tè kap lín tāi-ke tông-chāi. Amen!

Lô-má-su 16

1 Góa tùi lín chhui-chiàn lán ê chí-bē [Hui-pí], i sī [Kian-kek-lí] kàu-hōe ê chip-sū. 2 Chhiáⁿ lín in-ūi Chú ê iân-kò͘, chiàu sìn-tô͘ ê pún-hūn kā i chiap-thāi. I ū sím-mi̍h su-iàu, chhiáⁿ lín kā i pang-chān. I it-ti̍t jia̍t-sim pang-chān chin chōe lâng, pau-hâm góa pún-sin. 3 Chhiáⁿ thòe góa kā tī Ki-tok Iâ-so͘ ê tâng-kang [Pek-ki-lah] kap [A-ku-lah] chhéng-an. 4 In bat ūi-tio̍h góa mō͘ sìⁿ-miā ê gûi-hiám; m̄-nā góa, liân só͘-ū Gōa-pang ê kàu-hōe mā lóng beh kā in kám-siā. 5 Mā kā tī in tau teh chū-chi̍p ê kàu-hōe chhéng-an. Chhiáⁿ thòe góa chhéng-an góa só͘ thiàⁿ ê [Í-pài-nî-thó͘]; i sī [A-se-a] thâu-chi̍t ê kui-sìn Ki-tok ê lâng. 6 Mā chhéng-an ūi-tio̍h lín siū chin chōe lô-khó͘ ê [Má-lī-a]. 7 Koh kā góa ê chhin-cho̍k, kap góa chòe-hé koaiⁿ-kaⁿ ê [An-to-nî-kó͘] kap [Iû-nî-a] chhéng-an; in tī sù-tô͘ tiong sī ū bêng-bōng ê lâng, pí góa khah tāi-seng kui-sìn Ki-tok. 8 Chhiáⁿ thòe góa chhéng-an Chú-lāi góa só͘ thiàⁿ ê [Àm-pek-lī]. 9 Chhéng-an tī Ki-tok lāi-bīn ê tâng-kang [Ní-pa-lô͘] kap góa só͘ thiaⁿ ê [Sū-tāi-kó͘]. 10 Chhéng-an tī Ki-tok keng-kè khó-giām ê [A-pí-lī]. Kā [A-lī-to-pò͘] ke-lāi ê lâng chhéng-an. 11 Kā góa ê chhin-cho̍k [Hi-lô-thian] chhéng-an. Kā [Ná-kî-sò͘] ke-lāi sìn Chú ê lâng chhéng-an. 12 Chhiáⁿ thòe góa chhéng-an ūi-tio̍h Chú siū chin chōe lô-khó͘ ê [Thó͘-hui-ná] kap [Thó͘-hù-sat]. Kā só͘ thiàⁿ ê [Pí-sek] chhéng-an; i bat ūi-tio̍h Chú lô-khó͘ kang-chok. 13 Chhéng-an tī Chú siū kéng-soán ê [Ló͘-hu] kap i ê lāu-bú; i ê lāu-bú mā-sī góa ê lāu-bú. 14 Kā [A-sùn-kî-thó͘], [Hut-le̍k-kan], [Hek-bí], [Pat-lô-pa], [Hek-má] í-ki̍p kap in chòe-hé ê hiaⁿ-tī chí-bē chhéng-an. 15 Kā [Hui-lô-lô-kó͘] kap [Iû-lī-a], [Nî-lī-a] kap i ê chí-bē, kap [O-lîm-pa], í-ki̍p kap in chòe-hé ê chèng sìn-tô͘ chhéng-an. 16 Lín tio̍h ēng sèng-kiat ê saⁿ-chim hō͘-siōng chhéng-an. Ki-tok ê chèng kàu-hōe lóng kā lín chhéng-an. 17 Hiaⁿ-tī chí-bē, góa khó͘-khǹg lín, tio̍h sió-sim thê-hông hiah-ê chè-chō hun-lia̍t, hō͘ lín hoān-chōe, ûi-pōe lín só͘ niá-siū ê kà-sī hiah-ê lâng. 18 In-ūi chit khoán lâng m̄-sī choh lô͘-po̍k teh ho̍k-sāi lán ê Chú Ki-tok, sī teh kò͘ ka-kī ê pak-tó͘, ēng hoa-giân-kháu-gú iú-he̍k láu-si̍t-lâng ê sim. 19 In-ūi lín ê sūn-ho̍k, chèng-lâng í-keng lóng chai, só͘-í góa ūi-tio̍h lín hoaⁿ-hí. Góa ài lín tùi hó-sū tio̍h khiáu, tùi pháiⁿ-sū tio̍h gōng. 20 Sù pêng-an ê Siōng-tè chin kín chiū ōe chiong Sat-tàn ta̍h-chhùi, hō͘ i khut-ho̍k tī lín kha-ē. Goān lán ê Chú Iâ-so͘ ê un-hūi kap lín tông-chāi! 21 Góa ê tâng-kang [Thê-mô͘-thài] í-ki̍p góa ê chhin-cho̍k [Lō͘-kiû], [Iâ-sun], [Só͘-se-pa-tek] kā lín chhéng-an. 22 Góa --- [Tek-thê], chiū-sī chit tiuⁿ phoe ê tāi-pit-jîn, tī Chú-lāi kā lín chhéng-an. 23 Chiap-thāi góa kap choân kàu-hōe ê [Kai-iû] kā lín chhéng-an. Pún-chhī ê kòe-kè-tiúⁿ [Í-la-to͘] kap lán ê hiaⁿ-tī [Koat-thó͘] mā kā lín chhéng-an. 25 Goān êng-kng kui hō͘ Siōng-tè! I ōe chiàu góa só͘ thoân ê hok-im, chiū-sī soan-iông Iâ-so͘ Ki-tok, lâi kian-kò͘ lín ê sìn-sim. Chit-ê hok-im sī bān-kó͘ í-lâi só͘ ún-ba̍t ê ò-biāu, 26 taⁿ í-keng chiàu éng-oa̍h Siōng-tè ê bēng-lēng, thong-kè chèng sian-ti ê chheh hián-bêng chhut-lâi, beh hō͘ bān-bîn sìn lâi sūn-thàn. 27 Goān êng-kng thong-kè Iâ-so͘ Ki-tok kui tī to̍k-it choân-tì ê Siōng-tè, ti̍t-kàu éng-oán. Amen!

1 Ko-lîm-to 1

1 Góa sī [Pó-lô], hōng Siōng-tè ê chí-ì siū tiàu choh Ki-tok Iâ-so͘ ê sù-tô͘. Góa kap lán ê hiaⁿ-tī [Só͘-thê-nî] 2 siá-phoe hō͘ tī [Ko-lîm-to] Siōng-tè ê kàu-hōe, chiū-sī hiah-ê kap tī ta̍k só͘-chāi ho͘-kiò lán ê Chú Iâ-so͘ Ki-tok ê miâ, kap Ki-tok Iâ-so͘ kiat-liân siū tiàu choh sìn-tô͘ kui-sio̍k Siōng-tè ê lâng; Ki-tok sī in ê Chú, mā-sī lán ê Chú. 3 Goān lán ê Pē Siōng-tè kap Chú Iâ-so͘ Ki-tok sù lín un-tián kap pêng-an! 4 Góa sî-siông ūi-tio̍h lín teh kám-siā góa ê Siōng-tè, in-ūi I thong-kè Ki-tok Iâ-so͘ sù lín un-tián, 5 hō͘ lín thong-kè Ki-tok ta̍k hāng tit-tio̍h hù-chiok, chhiong-móa ta̍k khoán kháu-châi kap tì-sek. 6 Ki-tok ê sìn-sit í-keng tī lín tiong-kan kian-kò͘ kiàn-li̍p, 7 hō͘ lín lóng bô khiàm sím-mi̍h un-sù, thèng-hāu lán ê Chú Iâ-so͘ Ki-tok hián-hiān. 8 I mā ōe hō͘ lín kian-kò͘ ti̍t-kàu chòe-āu, tī lán ê Chú Iâ-so͘ Ki-tok ê Ji̍t bô thang hiâm. 9 Siōng-tè sī sìn-si̍t, I ho͘-tiàu lín, beh hō͘ lín kap I ê Kiáⁿ lán ê Chú Iâ-so͘ Ki-tok kiat-liân. 10 Hiaⁿ-tī chí-bē, góa hōng lán ê Chú Iâ-so͘ Ki-tok ê miâ khǹg lín tāi-ke, kóng-ōe tio̍h it-tì; lín tiong-kan mā m̄-thang hun-lia̍t. Tio̍h thoân-kiat, ū siâng-khoán ê siūⁿ-hoat kap kiōng-tông ê bo̍k-phiau. 11 Góa ê hiaⁿ-tī chí-bē, [Kek-lâi] in tau ê lâng ū tùi góa kóng-khí lín tiong-kan ū hun-cheng. 12 Góa án-ni kóng sī in-ūi lín tiong-kan ì-kiàn hun-hun; ū-ê kóng “Góa sio̍k [Pó-lô]”; ū-ê kóng “Góa sio̍k [A-pho-lô]”; ū-ê kóng “Góa sio̍k [Pí-tek]”; mā ū-ê kóng “Góa sio̍k Ki-tok”. 13 Ki-tok kèng-jiân hō͘ lâng hun-koah lah! [Pó-lô] kiám ū thòe lín tèng-sí tī si̍p-jī-kè? Lín kiám ū hōng [Pó-lô] ê miâ niá-siū sóe-lé? 14 Kám-siā Siōng-tè, [Ki-lī-su-pò͘] kap [Kai-iû] í-gōa, góa bô kā lín tiong-kan sím-mi̍h lâng sóe-lé. 15 Án-ni bô-lâng ōe-tàng kóng, lín ū hōng góa ê miâ niá-siū sóe-lé. 16 Ū-lah, góa mā ū kā [Sū-thê-hoán-ná] chi̍t ke ê lâng sóe-lé, kî-tha ū kā pa̍t-lâng sóe-lé á-bô, góa bōe kì-tit. 17 Ki-tok bô chhe góa kā lâng sóe-lé, sī beh thoân hok-im, m̄-sī ēng tì-hūi ê giân-sû thoân, chiah-bián hō͘ Ki-tok ê si̍p-jī-kè sit-khì hāu-le̍k. 18 Si̍p-jī-kè ê sìn-sit, tùi hiah-ê ǹg bia̍t-bông teh kiâⁿ ê lâng sī gû-gōng, put-kò tùi lán chiah-ê ǹg tit-kiù teh kiâⁿ ê lâng sī Siōng-tè ê tōa lêng-le̍k. 19 In-ūi Sèng-keng ū kì-chài: Góa beh siau-bia̍t tì-hūi ê lâng ê tì-hūi; góa beh khì-sak chhong-bêng ê lâng ê chhong-bêng. 20 Án-ni tì-hūi ê lâng tī tó-ūi? Keng-ha̍k-kàu-su tī tó-ūi? Chit sè-kan ê hiông-piān-ka tī tó-ūi? Siōng-tè í-keng hō͘ chit sè-kan ê tì-hūi pìⁿ-chòe gû-gōng lah! 21 Kì-jiân sè-kan-lâng bōe-tàng khò ka-kī ê tì-hūi jīn-bat Siōng-tè, Siōng-tè chiū tùi I ê tì-hūi hoaⁿ-hí ēng goán só͘ thoân gû-gōng ê sìn-sit lâi chín-kiù sìn I ê lâng. 22 [Iû-thài]-lâng kiû sîn-jiah, [Hi-la̍h]-lâng chhē tì-hūi, 23 put-kò goán soan-iông tèng si̍p-jī-kè ê Ki-tok. Chit-ê sìn-sit tùi [Iû-thài]-lâng sī chó͘-gāi, tùi Gōa-pang-lâng sī gû-gōng, 24 m̄-kú tùi Siōng-tè só͘ kéng-tiàu ê lâng, bô-lūn sī [Iû-thài]-lâng á-sī [Hi-la̍h]-lâng, chit-ê sìn-sit sī Siōng-tè ê tōa lêng-le̍k, sī Siōng-tè ê tì-hūi. 25 In-ūi Siōng-tè ê gû-gōng pí lâng khah tì-hūi, Siōng-tè ê loán-jio̍k pí lâng khah ióng-chòng. 26 Hiaⁿ-tī chí-bē, tio̍h ōe kì-tit Siōng-tè ho͘-tiàu lín ê sî, chiàu lâng ê phiau-chún, lín tiong-kan bô jōa chōe lâng ū tì-hūi, bô jōa chōe lâng ū lêng-le̍k, bô jōa chōe lâng ū chun-kùi tōe-ūi. 27 Siōng-tè kò͘-ì ēng sè-kan-lâng khòaⁿ-chòe gōng ê tāi-chì lâi hō͘ khiáu ê lâng kiàn-siàu; Siōng-tè ēng sè-kan-lâng khòaⁿ-chòe jio̍k ê tāi-chì lâi hō͘ kiông ê lâng kiàn-siàu. 28 Siōng-tè ēng sè-kan-lâng só͘ biáu-sī, khòaⁿ-bōe-khí ê tāi-chì lâi phò-hoāi lâng só͘ khòaⁿ-tāng ê tāi-chì; 29 án-ni sè-kan chiū bô-lâng ōe-tàng tī Siōng-tè ê bīn-chêng khoa-kháu. 30 M̄-kú Siōng-tè hō͘ lín kap Ki-tok Iâ-so͘ kiat-liân, hō͘ Ki-tok chiâⁿ-chòe lán tùi Siōng-tè lâi ê tì-hūi, hō͘ lán kap Siōng-tè ū ha̍p-gî ê koan-hē, chiâⁿ-chòe Siōng-tè sèng-kiat ê chú-bîn, koh tit-tio̍h chū-iû. 31 Chiàu Sèng-keng só͘ kì-chài, “Beh khoa-kháu ê lâng tio̍h khoa-kháu Chú.”

1 Ko-lîm-to 2

1 Hiaⁿ-tī chí-bē, góa í-chêng khì lín hia ê sî bô ēng súi ê giân-sû á-sī tì-hūi soan-káng Siōng-tè ê ò-pì. 2 In-ūi góa koat-tēng, tī lín tiong-kan sím-mi̍h to m̄-kóng, chí-ū beh kóng Iâ-so͘ Ki-tok í-ki̍p I tèng-sí tī si̍p-jī-kè ê sū. 3 Góa tī lín hia ê sî, loán-jio̍k koh kiaⁿ-kah phi̍h-phi̍h-chhoah. 4 Góa só kóng ê ōe, só͘ soan-káng ê sìn-sit, lóng bô ēng kháu-biāu tì-hūi ê giân-sû, sī khò Siōng-tè ê Sîn ê tōa lêng-le̍k lâi chèng-si̍t, 5 sī beh hō͘ lín ê sìn-gióng m̄-sī khò lâng ê tì-hūi, sī khò Siōng-tè ê tōa lêng-le̍k. 6 Sui-jiân sī án-ni, tùi hiah-ê lêng-sèng sêng-se̍k ê lâng góa mā ū kóng tì-hūi, put-kò m̄-sī chit sè-kan ê tì-hūi, mā m̄-sī chit sè-kan chù-tiāⁿ ōe sit-sè ê thóng-tī-chiá ê tì-hūi. 7 Góa só͘ kóng ê sī Siōng-tè ò-pì ê tì-hūi, sī tùi lâng ún-ba̍t ê, sī Siōng-tè ūi-tio̍h beh hō͘ lán tit-tio̍h êng-kng, tī chhòng-sè í-chêng chiū seng koat-tēng ê. 8 Chit sè-kan ê thóng-tī-chiá bô chi̍t ê jīn-bat chit-ê tì-hūi, in nā bat chiū bōe chiong êng-iāu ê Chú tèng-sí tī si̍p-jī-kè. 9 Chiàu Sèng-keng só͘ kì-chài: Siōng-tè ūi-tio̍h thiàⁿ I ê lâng chún-pī ê, sī ba̍k-chiu m̄-bat khòaⁿ-tio̍h, hīⁿ-khang m̄-bat thiaⁿ-tio̍h, mā m̄-bat ū lâng siūⁿ-tio̍h ê. 10 M̄-kú Siōng-tè í-keng ū thong-kè Sèng Sîn chiong chiah-ê sū tùi lán khé-sī. Sèng Sîn thiat-tóe chai bān-sū, liân Siōng-tè chhim-tîm ê chí-ì mā chai. 11 Chí-ū lâng ka-kī lāi-bīn ê sîn chiah chai ka-kī ê sū; chhin-chhiūⁿ án-ni, chí-ū Siōng-tè ê Sîn chiah chai Siōng-tè ê sū. 12 Lán niá-siū ê m̄-sī sè-kan ê sîn, sī tùi Siōng-tè lâi ê Sîn, beh hō͘ lán chai Siōng-tè sù hō͘ lán ê un-sù. 13 Só͘-í, goán tùi sio̍k-lêng ê lâng kóe-seh sio̍k Sèng Sîn ê sū, m̄-sī ēng lâng só͘ kà ê tì-hūi, sī ēng Sèng Sîn só͘ kà ê ōe. 14 Sio̍k hiat-khì ê lâng bōe-tàng niá-siū tùi Siōng-tè ê Sîn lâi ê un-sù, chiah-ê un-sù tùi i lâi kóng sī gû-gōng ê, bô hoat-tō͘ liáu-kái, in-ūi chí-ū sio̍k-lêng ê lâng chiah ōe-tàng léng-ngō͘. 15 Sio̍k Sèng Sîn ê lâng ōe-hiáu phòaⁿ-toàn bān-sū, put-kò i pún-sin ê sū bô-lâng ōe-tàng kā i phòaⁿ-toàn. 16 Sèng-keng ū kì-chài: Sím-mi̍h-lâng chai Chú ê sim-ì? Sím-mi̍h-lâng ōe-tàng kā I chhut chú-ì? M̄-kú lán ū Ki-tok ê sim-ì.

1 Ko-lîm-to 3

1 Hiaⁿ-tī chí-bē, góa kàu taⁿ tùi lín kóng-ōe, bōe-tàng khòaⁿ lín chòe sio̍k Sèng Sîn ê, sī sio̍k-sè ê, sī Ki-tok sìn-gióng ê eⁿ-á. 2 Góa ēng lin chhī lín, bô ēng pn̄g, in-ūi lín iáu bōe-tàng chia̍h-pn̄g, kàu hiān-chāi mā iáu bōe-tàng, 3 in-ūi lín iáu-kú sī sio̍k-sè ê lâng. Lín tiong-kan ū chi̍t-tò͘, ū hun-cheng; án-ni kiám m̄-sī chèng-bêng lín sī sio̍k-sè ê, sī chiàu sè-kan-lâng ê hong-sek teh seng-oa̍h? 4 Lín tiong-kan ū lâng kóng “Góa sio̍k [Pó-lô]”; mā ū lâng kóng “Góa sio̍k [A-pho-lô]”. Án-ni lín kap sè-kan-lâng ū sím-mi̍h bô kâng-khoán? 5 [A-pho-lô] sǹg siáⁿ? [Pó-lô] sǹg siáⁿ? Goán put-kò sī Siōng-tè ê chhe-ēng, ín-chhōa lín siong-sìn; ta̍k ê lâng chiàu Chú só͘ hō͘ goán ê chit-hūn teh chòe. 6 Góa iā-chéng, [A-pho-lô] ak-chúi, m̄-kú Siōng-tè hō͘ i tōa-châng. 7 Iā-chéng-ê kap ak-chúi-ê lóng bô tiōng-iàu, chí-ū hō͘ i tōa-châng ê Siōng-tè chiah tiōng-iàu. 8 Iā-chéng-ê kap ak-chúi-ê lóng kâng-khoán, Siōng-tè ōe chiàu ta̍k lâng ê kang-chok kā in pò-siúⁿ. 9 Goán sī Siōng-tè ê tâng-kang; lín sī Siōng-tè ê chhân-hn̂g. Lín mā-sī Siōng-tè ê kiàn-tio̍k-bu̍t. 10 Chiàu Siōng-tè hō͘ góa ê un-sù, choh chi̍t ê gâu ê kiàn-tio̍k-su, góa hē tōe-ki, pa̍t-lâng tī hit téng-bīn khí-chō. M̄-kú ta̍k ê lâng tio̍h khòaⁿ ka-kī án-chóaⁿ teh khí-chō. 11 In-ūi Siōng-tè í-keng ū hē Iâ-so͘ Ki-tok chòe î-it ê tōe-ki, I í-gōa bô pa̍t-ê tōe-ki. 12 Tī chit-ê tōe-ki téng, lâng nā ēng kim, gûn, pó-chio̍h, bo̍k-chhâi, chháu, á-sī tiū-kó khí-chō, 13 ta̍k ê lâng kang-thêng ê hó-bái, tī Ki-tok lâi-lîm ê Ji̍t, ōe hō͘ hé kā i lō͘-hiān chhut-lâi, in-ūi hé ōe chhì-giām ta̍k ê lâng kang-thêng ê phín-chit. 14 Lâng só͘ khí-chō ê nā hō͘ hé sio bōe-khì, i chiū ōe tit-tio̍h pò-siúⁿ. 15 Lâng só͘ khí-chō ê nā hō͘ hé sio-khì, i chiū ōe sún-sit; put-kò i pún-sin ōe tit-tio̍h kiù, chhin-chhiūⁿ tùi hé-tiong tô-miā cháu chhut-lâi. 16 Kiám m̄-chai, lín sī Siōng-tè ê tiān, Siōng-tè ê Sîn tiàm tī lín lāi-bīn? 17 Nā ū lâng húi-hoāi Siōng-tè ê tiān, Siōng-tè ōe kā hit-ê lâng húi-bia̍t; in-ūi Siōng-tè ê tiān sī sîn-sèng ê, lín chiū-sī hit-ê tiān. 18 M̄-thang phiàn ka-kī. Lín tiong-kan nā ū lâng ēng sè-kan ê phiau-chún khòaⁿ ka-kī chòe ū tì-hūi, ūi-tio̍h beh chiâⁿ-chòe chin-chiàⁿ ū tì-hūi, i tian-tò tio̍h chòe gû-gōng ê. 19 In-ūi chit sè-kan ê tì-hūi, tùi Siōng-tè lâi khòaⁿ sī gû-gōng. Sèng-keng ū kì-chài: Siōng-tè hō͘ tì-hūi ê lâng tiòng-tio̍h ka-kī ê khúi-kè. 20 Pa̍t ê só͘-chāi koh kóng: Chú chai tì-hūi ê lâng ê sim-su bô lō͘-ēng. 21 Só͘-í, bô-lūn sím-mi̍h-lâng lóng m̄-thang ēng lâng chòe khoa-kháu. Kî-si̍t it-chhè lóng sī lín ê: 22 bô-lūn [Pó-lô], [A-pho-lô], [Pí-tek], chit sè-kài, siⁿ á-sī sí, hiān-chāi á-sī chiong-lâi, che it-chhè lóng sī lín ê; 23 lín sī Ki-tok ê, Ki-tok sī Siōng-tè ê.

1 Ko-lîm-to 4

1 Án-ni, lâng tio̍h khòaⁿ goán choh Ki-tok ê lô͘-po̍k, sī Siōng-tè ò-pì ê koán-ke. 2 Tùi koán-ke ê iau-kiû sī tio̍h tùi chú-lâng tiong-si̍t. 3 Góa siū lín á-sī pa̍t-lâng phêng-toàn, lóng khòaⁿ-chòe sió-sū; liân góa mā bô phêng-toàn ka-kī. 4 Góa kám-kak ka-kī ê liông-sim chheng-pe̍k, put-kò m̄-sī án-ni chiū chèng-bêng góa bô-chōe. Sím-phòaⁿ góa ê sī Chú. 5 Só͘-í, sî-ki iáu-bē kàu, lín m̄-thang phoe-phòaⁿ lâng. Tán kàu Chú lâi-lîm, hit sî I ōe ēng kng chiò o͘-àm-tiong ê pì-bi̍t, kā ún-chông tī lâng sim-lāi ê tōng-ki po̍k-lō͘ chhut-lâi. Hit sî, ta̍k ê lâng ōe tùi Siōng-tè tit-tio̍h chheng-chàn. 6 Hiaⁿ-tī chí-bē, ūi-tio̍h lín ê iân-kò͘, góa chiong chiah-ê sū chòe lē ēng tī góa pún-sin kap [A-pho-lô] ê sin-chiūⁿ, hō͘ lín thang tùi goán ha̍k-si̍p “m̄-thang chhiau-kè Sèng-keng só͘ kì-chài” chit kù ōe ê ì-sù. Lín tiong-kan bô-lūn sím-mi̍h-lâng to m̄-thang phô͘-tháⁿ chit-ê, khòaⁿ-khin hit-ê. 7 Sím-mi̍h-lâng hō͘ lí siūⁿ-kóng ka-kī pí pa̍t-lâng khah gâu? Lí só͘-ū-ê kiám m̄-sī lóng tùi Siōng-tè niá-siū? Nā án-ni, lí sī-án-chóaⁿ teh chū-khoa, ná-chún m̄-sī tùi Siōng-tè niá-siū. 8 Lín í-keng ta̍k hāng lóng ū! Lín í-keng hù-chiok! Lín kā goán sak tī piⁿ-a, ka-kī choh-ông. Lín nā chin-chiàⁿ choh-ông m̄-chai jōa-á-ni̍h hó leh, án-ni góa mā thang kap lín chòe-hé choh-ông! 9 Góa siūⁿ, Siōng-tè chiong goán chiah-ê sù-tô͘ pâi tī bé-liu, chhin-chhiūⁿ sí-hêng-hoān hō͘ lâng thoa chhut-lâi sī-chiòng, hō͘ sè-kài, thiⁿ-sài, kap lâng khòaⁿ. 10 Goán ūi-tio̍h Ki-tok ê iân-kò͘ chòe gōng-lâng, lín khiok kap Ki-tok kiat-liân chòe khiáu-lâng; goán loán-jio̍k, lín ióng-chòng; lín siū chun-tiōng, goán siū khòaⁿ-khin. 11 Kàu hiān-chāi, goán iáu koh-teh chhùi-ta, chhēng phòa-saⁿ, siông-siông hō͘ lâng phah, ta̍k só͘-chāi liû-lōng; 12 goán khò siang-chhiú thoa-bôa tō͘-oa̍h. Goán hō͘ lâng mē, hoán-tńg kā in chiok-hok; hō͘ lâng pek-hāi, goán jím-nāi; 13 hō͘ lâng bú-jio̍k, goán ēng hó-ōe hôe-tap. Kàu hiān-chāi, goán iáu hō͘ lâng khòaⁿ-chòe sè-kan ê pùn-sò, jîn-kan ê che-tái. 14 Góa siá chiah-ê hō͘ lín, m̄-sī beh hō͘ lín kiàn-siàu, sī khòaⁿ lín chòe ka-kī chhin-ài ê kiáⁿ-jî teh kā lín kà-sī. 15 Lín sui-jiân ū kui-bān-ê kàu-tok ê lâng teh kà lín bat Ki-tok, m̄-kú lāu-pē chí-ū chi̍t-ê. Thong-kè hok-im, góa tī Ki-tok Iâ-so͘ chiâⁿ-chòe lín ê lāu-pē. 16 Só͘-í góa khǹg lín, tio̍h o̍h góa. 17 In-ūi án-ni, góa chhe [Thê-mô͘-thài] khì lín hia; tī Chú ê lāi-bīn i sī góa chhin-ài koh tiong-si̍t ê kiáⁿ; i ōe chiong góa kap Ki-tok Iâ-so͘ kiat-liân ê bô͘-hoān, chiū-sī góa tī ta̍k só͘-chāi ta̍k kàu-hōe só͘ kà-sī ê sū kā lín thê-chhíⁿ. 18 Lín tiong-kan ū lâng siūⁿ-kóng góa bōe khì lín hia, chiū chū-ko chū-tāi. 19 Nā-sī Chú ê ì-sù, góa liâm-piⁿ ōe khì lín hia. Hit sî, góa chiū ōe chai hiah-ê kiau-ngō͘ ê lâng teh kóng sím-mi̍h, mā ōe chai in ōe-tàng chòe sím-mi̍h. 20 In-ūi Siōng-tè-kok ê si̍t-hiān m̄-sī khò giân-sû, sī khò koân-lêng. 21 Lín ài tó chi̍t hāng? Góa khì lín hia ê sî, lín ài góa gia̍h chhê-á á-sī tòa un-jiû thiàⁿ-thàng ê sim?

1 Ko-lîm-to 5

1 Góa khak-si̍t ū thiaⁿ-tio̍h tī lín tiong-kan ū îm-loān ê sū; chit khoán îm-loān liân kàu-hōe-gōa mā bô, in-ūi ū lâng kap i ê āu-bú tông-ku. 2 Án-ni, lín iáu ū sím-mi̍h thang phòng-hong! Lín kiám m̄ eng-kai kám-kak siong-sim, kā chòe chit khoán tāi-chì ê lâng tùi lín tiong-kan khai-tû? 3 Sui-jiân góa lâng kap lín saⁿ-lī, sim khiok kap lín chòe-hé. Góa í-keng hōng Chú Iâ-so͘ ê miâ kā chòe chit khoán khó-ò͘ⁿ ê tāi-chì ê lâng phòaⁿ-chōe lah. Lín chū-chi̍p ê sî, góa ê sim mā kap lín chòe-hé, thang khò lán ê Chú Iâ-so͘ ê tōa lêng-le̍k, 5 chiong chit-ê lâng kau hō͘ Sat-tàn húi-bia̍t i ê seng-khu, hō͘ i ê lêng-hûn thang tī lán ê Chú ê Ji̍t tit-tio̍h kiù. 6 Lín teh khoa-kháu bô eng-kai! Lín kiám m̄-chai “Chi̍t sut-á kàⁿ-bú ōe hō͘ kui oân ê mī-chhè hoat khí-lâi”? 7 Kū ê kàⁿ tio̍h tû hō͘ chheng-khì, lín chiah ōe chiâⁿ-chòe sin ê mī-chhè, sū-si̍t lín sī bô kàⁿ ê chhè. Lán Pôaⁿ-kè-choeh ê iûⁿ-ko Ki-tok í-keng hiàn-chòe seng-lé. 8 Só͘-í, lán m̄-thang ēng ok-to̍k siâ-ok ê kū kàⁿ-bú, tio̍h ēng sûn-choân chin-si̍t ê bô-kàⁿ-piáⁿ chòe chè-mi̍h lâi siú-choeh. 9 Góa chêng kià hō͘ lín ê phoe ū kéng-kài lín m̄-thang kap îm-loān ê lâng lâi-óng. 10 Góa m̄-sī chí chit sè-kan hiah-ê îm-loān, tham-loân, chà-khi, kap pài ngó͘-siōng ê lâng; nā m̄-sī lī-khui chit-ê sè-kài chiū bōe-tàng bô kap chiah-ê lâng lâi-óng. 11 Góa taⁿ án-ni siá, sī kóng m̄-thang kap hiah-ê chū-chheng Ki-tok-tô͘, khiok sī îm-loān, tham-loân, pài ngó͘-siōng, húi-pòng pa̍t-lâng, chiú-chùi, á-sī chà-khi ê lâng lâi-óng; liân kap chiah-ê lâng tâng-toh chia̍h-pn̄g to m̄-thang. 12 Phoe-phòaⁿ kàu-hōe-gōa ê lâng m̄-sī góa ê tāi-chì; Siōng-tè ōe kā in sím-phòaⁿ. Lín kiám m̄-sī tio̍h phoe-phòaⁿ kàu-hōe-lāi ê lâng? Sèng-keng ū kì-chài, “Tio̍h tùi lín tiong-kan chiong siâ-ok ê lâng khai-tû!”

1 Ko-lîm-to 6

1 Lín tiong-kan ū lâng kap pa̍t-ê sìn-tô͘ ū kiù-hun, bô tī sìn-tô͘ bīn-chêng kā i kò, hoán-tńg tùi bô-sìn ê lâng kò i? 2 Lín kiám m̄-chai sìn-tô͘ beh sím-phòaⁿ sè-kan? Kì-jiân lín beh sím-phòaⁿ sè-kan, kiám bōe-hiáu kái-koat sió-khóa tāi-chì? 3 Lín kiám m̄-chai liân thiⁿ-sài lán to beh sím-phòaⁿ, chit sè-kan ji̍t-siông ê tāi-chì koh-khah m̄-bián kóng. 4 Chit khoán tāi-chì, lín kiám thang kau hō͘ bô siū kàu-hōe chun-tiōng ê gōa-lâng chhú-lí ? 5 Lín si̍t-chāi chin kiàn-siàu! Lín tiong-kan kiám chin-chiàⁿ bô chi̍t ê ū tì-hūi ê lâng thang phòaⁿ-toàn sìn-tô͘ tiong-kan ê sī-hui? 6 Lín kèng-jiân ū sìn-tô͘ kò sìn-tô͘, sīm-chì kò kàu bô-sìn ê lâng bīn-chêng! 7 Kî-si̍t lín sio-kò, piáu-sī lín í-keng lóng su lah. Lín ná m̄ lêng-khó siū oan-óng? Ná m̄ lêng-khó siū khek-khui? 8 Lín tian-tò oan-óng lâng, khek-khui lâng, sīm-chì tùi hōe-lāi ê hiaⁿ-tī chí-bē mā án-ni chòe! 9 Kiám m̄-chai put-gī ê lâng bōe-tàng chòe Siōng-tè-kok ê chú-bîn? M̄-thang phiàn ka-kī; bô-lūn sī îm-loān ê, pài ngó͘-siōng ê, choh lâm-chhiong ê, hò͘ⁿ lâm-sek ê, 10 chòe-chha̍t ê, tham-sim ê, chiú-chùi ê, húi-pòng ê, chà-khi ê, lóng bōe-tàng chòe Siōng-tè-kok ê chú-bîn. 11 Lín tiong-kan ū lâng í-chêng sī án-ni. M̄-kú lín í-keng sóe chheng-khì, í-keng sèng-hòa kui Siōng-tè, í-keng thong-kè Chú Iâ-so͘ Ki-tok ê miâ, koh thong-kè lán ê Siōng-tè ê Sîn, kap Siōng-tè ū ha̍p-gî ê koan-hē. 12 Ū lâng kóng, “Ta̍k hāng tāi-chì góa lóng thang chòe.” M̄-kú m̄-sī ta̍k hāng tāi-chì lóng ū lī-ek. Góa mā thang kóng, “Ta̍k hāng tāi-chì góa lóng thang chòe.” M̄-kú góa bô beh hō͘ jīm-hô tāi-chì khòng-chè. 13 Ū lâng kóng, “Chia̍h-mi̍h sī ūi-tio̍h pak-tó͘, pak-tó͘ sī ūi-tio̍h chia̍h-mi̍h.” Tio̍h, m̄-kú chit nn̄g hāng, Siōng-tè lóng ōe kā in húi-hoāi. Seng-khu m̄-sī ūi-tio̍h îm-loān, sī ūi-tio̍h ho̍k-sāi Chú; Chú ōe kiong-kip lán seng-khu ê su-iàu. 14 Siōng-tè ū hō͘ Chú tùi sí koh-oa̍h, I mā ōe ēng I ê tōa lêng-le̍k hō͘ lán koh-oa̍h. 15 Kiám m̄-chai lín ê seng-khu sī Ki-tok ê chi-thé? Án-ni, góa kiám thang chiong Ki-tok ê chi-thé hō͘ i pìⁿ-chòe ki-lú ê chi-thé? Choa̍t-tùi m̄-thang! 16 Kiám m̄-chai, kap ki-lú hoat-seng jio̍k-thé koan-hē chiū-sī kap i chiâⁿ-chòe chi̍t-thé? In-ūi Sèng-keng kóng, “Nn̄g ê lâng beh chiâⁿ-chòe chi̍t-thé.” 17 M̄-kú kap Chú kiat-ha̍p ê lâng, chiū tī sim-lêng kap I chiâⁿ-chòe chi̍t-thé. 18 Tio̍h kū-choa̍t îm-loān. Lâng bô-lūn hoān sím-mi̍h chōe, lóng bô éng-hióng ka-kī ê seng-khu, put-kò hoān îm-loān ê sī hoān-chōe hāi-tio̍h ka-kī ê seng-khu. 19 Kiám m̄-chai lín ê seng-khu sī Sèng Sîn ê tiān? Chit-ūi Sèng Sîn tiàm tī lín lāi-bīn, sī lín tùi Siōng-tè niá-siū ê. Lín m̄-sī sio̍k ka-kī, sī sio̍k Siōng-tè, 20 in-ūi lín sī I hù-chhut tāi-kè bóe lâi ê. Só͘-í, tio̍h ēng lín ê seng-khu êng-iāu Siōng-tè.

1 Ko-lîm-to 7

1 Koan-hē lín tī phoe ê lāi-bīn só͘ siá ê būn-tôe: Ta-po͘-lâng bô chhin-kūn cha-bó͘-lâng khah hó. 2 M̄-kú ūi-tio̍h îm-loān ê tāi-chì, ta-po͘-lâng eng-kai ū ka-kī ê bó͘; cha-bó͘-lâng eng-kai ū ka-kī ê ang. 3 Ta-po͘-lâng tùi bó͘ eng-kai chīn choh-ang ê gī-bū; cha-bó͘-lâng tùi ang eng-kai chīn choh-bó͘ ê gī-bū. 4 Bó͘ tùi ka-kī ê seng-khu bô koân, m̄-kú ang ū; siâng-khoán, ang tùi ka-kī ê seng-khu bô koân, m̄-kú bó͘ ū. 5 M̄-thang hut-lio̍k tùi-hong ê su-iàu; nā ūi-tio̍h beh choan-sim kî-tó, thang tông-ì chiām-sî hun-khui; chóng-sī í-āu tio̍h koh hôe-ho̍k chèng-siông ê koan-hē, chiah-bián in-ūi bōe-tàng khòng-chè ka-kī tì-kàu siū Sat-tàn iú-he̍k. 6 Góa kóng thang chiām-sî hun-khui, sī bián-kióng tông-ì, m̄-sī bēng-lēng. 7 Sū-si̍t, góa ài ta̍k ê lâng lóng chhin-chhiūⁿ góa bô kiat-hun. M̄-kú ta̍k ê lâng tùi Siōng-tè niá-siū bô kâng-khoán ê un-sù, chit-ê lâng chit khoán, hit-ê lâng hit khoán. 8 Hiān-chāi, góa tùi bô kiat-hun-ê kap kóaⁿ-hū kóng, nā ōe-tàng chhin-chhiūⁿ góa siú to̍k-sin sī khah hó; 9 m̄-kú nā bōe-tàng khòng-chè ka-kī, chiū tio̍h kiat-hun. Lêng-khó kiat-hun, pí hō͘ io̍k-hé sio khah hó. 10 Í-keng kiat-hun ê lâng, góa bēng-lēng lín --- kî-si̍t m̄-sī góa, sī Chú ê bēng-lēng: Cha-bó͘-lâng m̄-thang lī-khui tiōng-hu, 11 nā lī-khui, tio̍h siú to̍k-sin; nā bô, tio̍h koh kap tiōng-hu hô-hó. Tiōng-hu mā m̄-thang pàng-sak bó͘. 12 Tùi kî-tha ê lâng, góa kóng --- m̄-sī Chú kóng ê: Lâm ê sìn-tô͘ nā chhōa bô sìn Chú ê lâng chòe bó͘, bó͘ tông-ì kè-sio̍k kap i tòa, i chiū m̄-thang kā i pàng-sak. 13 Nā ū lú ê sìn-tô͘ kap bô sìn Chú ê lâng kiat-hun, tiōng-hu tông-ì kè-sio̍k kap i tòa, i mā m̄-thang pàng-sak tiōng-hu. 14 Bô sìn Chú ê tiōng-hu ōe in-ūi sìn Chú ê bó͘ tit-tio̍h Siōng-tè chiap-la̍p. Chhin-chhiūⁿ án-ni, bô sìn Chú ê bó͘ mā ōe in-ūi sìn Chú ê tiōng-hu tit-tio̍h Siōng-tè chiap-la̍p. Nā m̄-sī án-ni, in ê kiáⁿ-jî chiū bô sio̍k Siōng-tè; kî-si̍t, in sī sio̍k Siōng-tè. 15 M̄-kú, bô sìn Chú ê lâng nā beh lī-khui, chiū chhut-chāi i lī-khui. Tī chit khoán ê chêng-hêng, sìn Chú ê tiōng-hu á-sī bó͘ chiū bô siū hun-in ê iok-sok. Siōng-tè ho͘-tiàu lín, sī ài lín hô-bo̍k khiā-khí. 16 Tio̍h chai, sìn Chú ê cha-bó͘-lâng kiám-chhái ōe kiù ka-kī ê tiōng-hu. Tio̍h chai, sìn Chú ê tiōng-hu kiám-chhái ōe kiù ka-kī ê bó͘. 17 Bô-lūn án-chóaⁿ, ta̍k ê lâng tio̍h chiàu Chú pun hō͘ lín ê un-sù, chiàu Siōng-tè kéng-tiàu ê bo̍k-te̍k lâi seng-oa̍h. Che sī góa hō͘ ta̍k ê kàu-hōe ê kui-tēng. 18 Kat-lé liáu-āu chiah siū ho͘-tiàu ê lâng, m̄-bián am-khàm kat-lé ê kì-hō; siū ho͘-tiàu ê sî iáu-bē kat-lé ê lâng mā m̄-bián siū kat-lé. 19 In-ūi ū kat-lé bô kat-lé lóng bô iàu-kín, iàu-kín ê sī tio̍h chun-siú Siōng-tè ê kài-bēng. 20 Ta̍k ê lâng tio̍h pó-chhî siū tiàu ê sî ê sin-hūn. 21 Lí siū tiàu ê sî sī lô͘-lē sī-bô, m̄-bián khòa-ì; put-kò lí nā ū ki-hōe tit-tio̍h chū-iû, tio̍h pá-ak ki-hōe. 22 In-ūi siū Chú ho͘-tiàu ê lô͘-lē sī Chú só͘ tháu-pàng ê chū-iû-jîn; siâng-khoán, siū Chú ho͘-tiàu ê chū-iû-jîn sī Ki-tok ê lô͘-lē. 23 Lín sī Siōng-tè hù-chhut tāi-kè bóe lâi ê, m̄-thang chiâⁿ-chòe lâng ê lô͘-lē. 24 Hiaⁿ-tī chí-bē, lín ta̍k ê lâng tio̍h tī Siōng-tè ê bīn-chêng pó-chhî siū tiàu ê sî ê sin-hūn. 25 Koan-hē chāi-sek-lú ê būn-tôe, góa bô tùi Chú tit-tio̍h sím-mi̍h bēng-lēng, put-kò chòe chi̍t ê tit-tio̍h Chú ê lîn-bín chiâⁿ-chòe thang sìn-jīm ê lâng, góa thê-chhut ka-kī ê ì-kiàn. 26 Khó-lū ba̍k-chêng kan-lân ê chhù-kéng, góa siūⁿ lâng pó-chhî hiān-chōng sī khah hó. 27 Í-keng chhōa-bó͘, m̄-thang siūⁿ-beh chū-iû; iáu-bē chhōa-bó͘, m̄-thang siūⁿ-beh chhōa. 28 M̄-kú nā chhōa-bó͘, bô sǹg hoān-chōe; siàu-lú nā chhut-kè, mā bô sǹg hoān-chōe. Put-kò kiat-hun ê lâng ōe ke-thiⁿ seng-oa̍h siōng ê thoa-lūi, góa khah ài lín bián tú-tio̍h chit khoán tāi-chì. 29 Hiaⁿ-tī chí-bē, góa ài kóng ê sī, sî-kan pek-kūn lah, tùi taⁿ í-āu, ū bó͘ ê tio̍h ná-chún bô bó͘; 30 teh khàu ê ná-chún bô teh khàu; teh hoaⁿ-hí ê ná-chún bô teh hoaⁿ-hí; bóe-mi̍h ê ná-chún bô tit-tio̍h pòaⁿ-hāng; 31 chhap sè-kan sū ê, ná-chún bô teh chhap. In-ūi chit sè-kan ê hiān-chōng teh kè-khì. 32 Góa ài lín lóng bô khòa-lū. Bô chhōa-bó͘ ê lâng koan-sim Chú ê sū, khòaⁿ-beh án-chóaⁿ hō͘ Chú hoaⁿ-hí. 33 Chhōa-bó͘ ê lâng koan-sim sè-kan ê sū, khòaⁿ-beh án-chóaⁿ hō͘ bó͘ hoaⁿ-hí, 34 soah hun-sim. Bô kè ê cha-bó͘-lâng á-sī siàu-lú koan-sim Chú ê sū, sī beh hō͘ seng-khu kap sim-lêng sèng-kiat; put-kò kè-ang ê cha-bó͘-lâng koan-sim sè-kan ê sū, khòaⁿ-beh án-chóaⁿ hō͘ tiōng-hu hoaⁿ-hí. 35 Góa tùi lín án-ni kóng sī ūi-tio̍h lín ê lī-ek, m̄-sī beh kā lín sok-pa̍k, sī ài lín chòe ha̍p-gî ê sū, thang choan-sim chi̍t-ì ho̍k-sāi Chú. 36 Nā ū lâng tèng-hun liáu koat-tēng bô beh chhōa, āu-lâi in-ūi chêng-io̍k kiông, bōe-tàng khòng-chè ka-kī, ōe tùi bī-hun-chhe chòe-chhut bô ha̍p-gî ê sū, in tio̍h kiat-hun, án-ni chòe m̄-sī hoān-chōe. 37 Put-kò i nā m̄-sī in-ūi gōa-lâi ê ap-le̍k, sī chhut tī ka-kī ê koat-sim, koh ōe-tàng khòng-chè ka-kī ê ì-chì, koat-tēng bô beh kap bī-hun-chhe kiat-hun, hō͘ i pó-chhî chāi-sek-lú ê sin-hūn, i án-ni chòe sī hó. 38 Chóng kóng, kap bī-hun-chhe kiat-hun sī hó, bô kap i kiat-hun koh-khah hó. 39 Tiōng-hu iáu oa̍h-teh ê sî cha-bó͘-lâng bô chū-iû; tiōng-hu sí liáu, cha-bó͘-lâng thang chū-iû kap kah-ì ê lâng kiat-hun, put-kò, chí-ū thang kè hō͘ sìn Chú ê lâng. 40 I nā bô koh kè sī koh-khah ū hok-khì, che sī góa ê ì-kiàn, chóng-sī góa siūⁿ góa mā ū Siōng-tè ê Sîn ê chí-sī.

1 Ko-lîm-to 8

1 Koan-hē chè ngó͘-siōng ê mi̍h, lán chai “lán lóng ū tì-sek.” Kî-si̍t tì-sek ōe hō͘ lâng kiau-ngō͘; m̄-kú thiàⁿ-sim ōe chō-chiū lâng. 2 Ka-kī siūⁿ-kóng ū tì-sek ê, si̍t-chè siōng eng-kai chai ê, i iáu m̄-chai. 3 Lâng nā thiàⁿ Siōng-tè, chit-ê lâng Siōng-tè í-keng bat i. 4 Só͘-í, koan-hē chia̍h chè ngó͘-siōng ê mi̍h, lán chai, sè-kan ê ngó͘-siōng lóng m̄-sī chin ê, lán mā chai chí-ū chi̍t ūi Siōng-tè, í-gōa bô pa̍t ê. 5 Sui-jiân tī thiⁿ-téng á-sī tōe-chiūⁿ ū só͘-ūi ê sîn-bêng, koh sui-jiân ū chin chōe “sîn” á-sī “chú”, 6 m̄-kú lán chí-ū chi̍t ūi Siōng-tè, chiū-sī Thiⁿ Pē; bān-iú tùi I lâi chhòng-chō, lán ūi-tio̍h I lâi oa̍h. Lán chí-ū chi̍t ūi Chú, chiū-sī Iâ-so͘ Ki-tok; bān-iú thong-kè I chhòng-chō, lán mā thong-kè I lâi chûn-chāi. 7 M̄-kú, m̄-sī ta̍k ê lâng lóng ū chit khoán tì-sek. Ū lâng pài ngó͘-siōng koàn-sì, kàu kin-á-ji̍t chia̍h chit khoán mi̍h ê sî iáu siūⁿ-kóng sī teh chia̍h ngó͘-siōng ê mi̍h; in ê liông-sim loán-jio̍k, siūⁿ-kóng ōe hō͘ hit khoán chia̍h-mi̍h bak lâ-sâm. 8 Kî-si̍t chia̍h-mi̍h bōe hō͘ lán khah chiap-kūn Siōng-tè; bô chia̍h bô sún-sit, chia̍h mā bô khah ū lī-ek. 9 M̄-kú tio̍h sòe-jī, m̄-thang in-ūi lín chū-iû ê hêng-ûi chiâⁿ-chòe loán-jio̍k ê lâng sìn-gióng ê chó͘-gāi. 10 Nā ū lâng liông-sim loán-jio̍k, khòaⁿ-tio̍h lín só͘-ūi “ū tì-sek” ê lâng tī ngó͘-siōng ê biō-lāi lim-chia̍h, án-ni lín kiám m̄-sī teh kó͘-lē in chia̍h chè ngó͘-siōng ê mi̍h? 11 Án-ni, chit-ê loán-jio̍k ê sìn-tô͘ mā-sī Ki-tok ūi-tio̍h i sí ê lâng, ōe in-ūi lín ê “tì-sek” lâi bia̍t-bông. 12 Lín án-ni chòe sī tek-chōe lín ê hiaⁿ-tī á-sī chí-bē, siong-hāi tio̍h in ê liông-sim chiū-sī tek-chōe Ki-tok. 13 Só͘-í, nā chia̍h-mi̍h ōe hō͘ hiaⁿ-tī á-sī chí-bē ê sìn-gióng siū chó͘-gāi, góa choa̍t-tùi m̄ chia̍h chè ngó͘-siōng ê bah, chiah-bián hō͘ góa ê hiaⁿ-tī á-sī chí-bē ê sìn-gióng siū chó͘-gāi.

1 Ko-lîm-to 9

1 Góa kiám m̄-sī chū-iû ê lâng? Góa kiám m̄-sī sù-tô͘? Góa kiám m̄-bat kìⁿ-tio̍h lán ê Chú Iâ-so͘? Lín kiám m̄-sī góa ūi-tio̍h Chú kang-chok ê sêng-kó? 2 Tùi pa̍t-lâng lâi khòaⁿ góa kiám-chhái m̄-sī sù-tô͘, m̄-kú tùi lín lâi khòaⁿ, góa khak-si̍t sī. In-ūi lín kap Chú kiat-liân chiū-sī góa choh sù-tô͘ ê chèng-kù. 3 Tùi hiah-ê phoe-phêng góa ê lâng, góa án-ni piān-bêng: 4 Goán kiám bô koân thang chia̍h, thang lim? 5 Goán kiám bô koân kap kî-tha ê sù-tô͘, Chú ê hiaⁿ-tī, í-ki̍p [Pí-tek] kâng-khoán, chhōa lú sìn-tô͘ chòe bó͘ chòe-hé lú-hêng? 6 Kiám kan-ta góa kap [Pa-ná-pa] it-tēng tio̍h chòe kang chiah ōe-tàng seng-oa̍h? 7 Kiám ū lâng choh-peng koh-teh chia̍h ka-kī? Kiám ū lâng chèng-choh phû-tô-hn̂g bô chia̍h hn̂g-lāi chhut-sán ê phû-tô? Kiám ū lâng chhī-iûⁿ bô lim ka-kī ê iûⁿ-lin? 8 Góa kóng chiah-ê kiám sī kun-kù lâng ê siūⁿ-hoat? Lu̍t-hoat kiám m̄-sī mā án-ni kóng? 9 [Mô͘-se] ê Lu̍t-hoat kui-tēng, “Gû teh lún ngó͘-kok ê sî, m̄-thang kā i kòa gû-chhùi-lam.” Siōng-tè koan-sim ê kiám sī gû? 10 I kiám m̄-sī oân-choân ūi-tio̍h lán kóng ê? Tong-jiân sī! In-ūi keng-choh ê lâng khǹg ǹg-bāng keng-choh, siu-koah ê lâng khǹg ǹg-bāng siu-koah, in lóng sī kî-thāi tit-tio̍h ngó͘-kok. 11 Goán nā ū tī lín tiong-kan iā sio̍k-lêng ê chéng-chí, tùi lín tit-tio̍h bu̍t-chit siōng ê kiong-kip kiám ū kè-hūn? 12 Pa̍t-lâng nā ū koân thang tùi lín iau-kiû, goán kiám m̄-sī koh-khah ū? M̄-kú goán lóng m̄-bat ēng chit-ê koân, hoán-tńg jím-siū it-chhè, chiah-bián hō͘ Ki-tok ê hok-im siū chó͘-gāi. 13 Lín it-tēng chai, tī Sèng-tiān teh kang-chok ê lâng tùi Sèng-tiān tit-tio̍h chia̍h-mi̍h; tī chè-tôaⁿ teh hiàn-chè ê lâng pun tôaⁿ téng ê chè-mi̍h. 14 Chhin-chhiūⁿ án-ni, Chú ū hoan-hù, thoân hok-im ê lâng eng-kai khò hok-im seng-oa̍h. 15 M̄-kú góa lóng m̄-bat ēng chiah-ê koân. Góa hiān-chāi siá chiah-ê ōe mā m̄-sī beh cheng-chhú chit khoán ê koân. Góa lêng-khó sí mā bô ài hō͘ góa só͘ khoa-kháu ê lo̍k-khong! 16 Góa thoân hok-im pèng bô sím-mi̍h thang khoa-kháu; góa sī hōng-bēng teh thoân. Góa nā bô thoân ū chai-hō. 17 Góa nā kam-goān chòe chit-ê kang, chiū ū pò-siúⁿ; góa nā m̄-sī chhut-tī kam-goān, mā tio̍h chip-hêng Siōng-tè kau-tài ê jīm-bū. 18 Án-ni, góa ê pò-siúⁿ sī sím-mi̍h? Chiū-sī góa thang thoân hok-im hō͘ lâng pe̍h-pe̍h tit-tio̍h, góa tian-tò bô hióng-siū-tio̍h thoân hok-im eng-kai ū ê koân-lī. 19 Góa sī chū-iû ê lâng, bô siū lâng ê sok-pa̍k, m̄-kú ūi-tio̍h beh tit-tio̍h khah chōe lâng lâi sìn Chú, góa chiâⁿ-chòe chèng-lâng ê lô͘-lē. 20 Tùi [Iû-thài]-lâng, góa chiū choh [Iû-thài]-lâng, sī ūi-tio̍h beh tit-tio̍h [Iû-thài]-lâng. Sui-jiân góa bô siū [Mô͘-se] ê Lu̍t-hoat khu-sok, khiok choh Lu̍t-hoat-ē ê lâng, sī ūi-tio̍h beh tit-tio̍h Lu̍t-hoat-ē ê lâng. 21 Tùi Lu̍t-hoat-gōa ê lâng, góa chiū choh Lu̍t-hoat-gōa ê lâng, sī ūi-tio̍h beh tit-tio̍h Lu̍t-hoat-gōa ê lâng. Án-ni m̄-sī kóng góa bô chun-siú Siōng-tè ê Lu̍t-hoat; kî-si̍t góa sī siū Ki-tok Lu̍t-hoat iok-sok ê lâng. 22 Tùi sìn-sim loán-jio̍k ê lâng, góa chiâⁿ-chòe loán-jio̍k, sī ūi-tio̍h beh tit-tio̍h loán-jio̍k ê lâng. Tùi tó chi̍t khoán lâng, góa chiū choh hit khoán lâng, ēng ta̍k khoán hong-hoat thang ke kiù chi̍t-kóa lâng. 23 Góa chòe chiah-ê lóng sī ūi-tio̍h hok-im, bo̍k-te̍k sī beh kap lâng hun-hióng hok-im ê chiok-hok. 24 Lín it-tēng chai, tī ūn-tōng-tiûⁿ chham-ka kèng-sài ê lâng lóng lo̍h-khì cháu, m̄-kú chí-ū chi̍t ê tit-tio̍h siúⁿ. Chhin-chhiūⁿ án-ni, ūi-tio̍h beh tit-tio̍h siúⁿ, lín tio̍h phah-piàⁿ cháu. 25 Ta̍k ê soán-chhiú lóng ū chiap-siū giâm-keh ê hùn-liān; in án-ni chòe sī beh tit-tio̍h ōe pāi-hoāi ê hoa-koan; m̄-kú lán ài tit-tio̍h ê sī bōe pāi-hoāi ê hoa-koan. 26 Án-ni, góa cháu m̄-sī bô bo̍k-phiau teh cháu, phah-kûn m̄-sī teh phah khong-khì. 27 Góa giâm-keh chhau-liān ka-kī ê seng-khu kàu ōe-tàng oân-choân khòng-chè, chiah-bián chio pa̍t-lâng lâi chham-ka pí-sài, ka-kī soah sit-lo̍h chu-keh.

1 Ko-lîm-to 10

1 Hiaⁿ-tī chí-bē, góa ài lín kì-tit, lán ê chó͘-sian lóng kun-tè [Mô͘-se], tī hûn ê pó-hō͘-ē kè [Âng-hái]. 2 In tī hûn-lāi, tī hái-ni̍h, siū sóe kui tī [Mô͘-se]. 3 In lóng chia̍h kâng-khoán sio̍k-lêng ê chia̍h-mi̍h, 4 lóng lim kâng-khoán sio̍k-lêng ê chôaⁿ-chúi, chit-ê chôaⁿ-chúi sī tùi kap in tâng-kiâⁿ hit-ê sio̍k-lêng ê chio̍h-pôaⁿ lâu chhut-lâi ê; hit-ê chio̍h-pôaⁿ chiū-sī Ki-tok. 5 M̄-kú in tiong-kan tōa-pō͘-hūn ê lâng bô hō͘ Siōng-tè hoaⁿ-hí, lóng siū húi-bia̍t, tó-kah kui khòng-iá. 6 Chiah-ê tāi-chì hō͘ lán chòe kàm-kài, kiò lán m̄-thang chhin-chhiūⁿ in tham-loân pháiⁿ-tāi. 7 M̄-thang chhin-chhiūⁿ in tiong-kan ū chi̍t-kóa lâng khì pài ngó͘-siōng, chiàu Sèng-keng kì-chài: “Chiah-ê chú-bîn chē lo̍h-khì, tōa-lim tōa-chia̍h; khiā khí-lâi, tian-kông loān-sńg.” 8 Lán m̄-thang chhin-chhiūⁿ in ū chi̍t-kóa lâng îm-loān, soah tī chi̍t ji̍t lāi sí nn̄g-bān saⁿ-chheng lâng. 9 M̄-thang chhin-chhiūⁿ in tiong-kan ū chi̍t-kóa lâng chhì-thàm Chú, soah hō͘ chôa kā-sí. 10 M̄-thang chhin-chhiūⁿ in tiong-kan ū chi̍t-kóa lâng kóng oàn-giân, soah hō͘ Húi-bia̍t-chiá châu-bia̍t. 11 In só͘ tú-tio̍h chiah-ê tāi-chì thang chòe pa̍t-lâng ê kàm-kài, koh kì-lio̍k lo̍h-lâi thang kéng-kài lán chiah-ê oa̍h tī boa̍t-sè ê lâng. 12 Só͘-í, siūⁿ-kóng ka-kī khiā-chāi ê tio̍h kín-sīn, chiah bōe poa̍h-tó. 13 Lín só͘ tú-tio̍h ê chhì-thàm lóng sī lâng ōe tú-tio̍h ê. Siōng-tè sī sìn-si̍t, I bōe hō͘ lín tú-tio̍h tam-tng bōe-khí ê chhì-liān. Lín tú-tio̍h chhì-liān ê sî, I ōe kā lín khui chi̍t tiâu chhut-lō͘, hō͘ lín jím-siū ōe-tiâu. 14 Só͘-í, chhin-ài ê hiaⁿ-tī chí-bē, pài ngó͘-siōng ê sū lóng m̄-thang chhap-tio̍h. 15 Góa khòaⁿ lín chòe bêng-pe̍k sū-lí ê lâng kap lín kóng-ōe; góa só͘ kóng ê lín ka-kī thang phòaⁿ-toàn. 16 Lán teh lim hit-ê chiok-siā ê poe, kiám m̄-sī teh hun-hióng Ki-tok ê huih? Lán teh chia̍h hit-ê peh-khui ê piáⁿ, kiám m̄-sī teh hun-hióng Ki-tok ê seng-khu? 17 In-ūi piáⁿ chí-ū chi̍t tè, lán sui-jiân chin chōe lâng, iáu-kú sī chi̍t-thé, in-ūi lán chòe-hé chia̍h kâng chi̍t tè piáⁿ. 18 Ēng [Í-sek-lia̍t]-lâng chòe lē, hiah-ê chia̍h chè-mi̍h ê lâng kap chè-tôaⁿ ū koan-hē. 19 Án-ni góa teh kóng ê sī sím-mi̍h ì-sù? Sī kóng ngó͘-siōng ū sím-mi̍h tiōng-iàu, chè-mi̍h ū sím-mi̍h iàu-kín sī-bô? 20 M̄-sī, góa sī teh kóng, hiàn tī īⁿ-kàu chè-tôaⁿ téng ê chè-mi̍h sī hiàn hō͘ kúi, m̄-sī hiàn hō͘ Siōng-tè. Góa bô ài lín kap kúi kau-chhap. 21 Lín bōe-tàng lim Chú ê poe, mā lim kúi ê poe; bōe-tàng chham-ka Chú ê iân-sia̍h, mā chham-ka kúi ê iân-sia̍h. 22 Lán beh kek hō͘ Chú chi̍t-tò͘ sī-bô? Lán pí I khah kiông sī-bô? 23 Ū lâng kóng “Ta̍k hāng lóng thang chòe”, put-kò m̄-sī ta̍k hāng lóng ū lī-ek. “Ta̍k hāng lóng thang chòe”, put-kò m̄-sī ta̍k hāng sū lóng ōe-tàng pang-chān lâng. 24 Ta̍k lâng lóng m̄-thang kiû ka-kī ê lī-ek, tio̍h kiû pa̍t-lâng ê lī-ek. 25 Chhī-tiûⁿ teh bōe ê bah lóng thang bóe lâi chia̍h, m̄-bián ūi-tio̍h liông-sim ê iân-kò͘ mn̄g-tang mn̄g-sai. 26 In-ūi Sèng-keng kóng, “Tōe kap tōe-chiūⁿ ê bān-mi̍h lóng sio̍k tī Chú.” 27 Nā ū bī-sìn-chiá chhiáⁿ lín chia̍h-pn̄g, lín nā khì, pâi tī lín bīn-chêng ê mi̍h chòe lín chia̍h, m̄-bián ūi-tio̍h liông-sim ê iân-kò͘ mn̄g-tang mn̄g-sai. 28 M̄-kú nā ū lâng kā lín kóng, “Chiah-ê chia̍h-mi̍h ū chè kè ngó͘-siōng”, lín chiū ūi-tio̍h hit-ê kā lín kóng ê lâng kap liông-sim ê iân-kò͘, m̄-thang chia̍h hit-ê chia̍h-mi̍h. 29 Góa só͘ chí ê sī hit-ê lâng ê liông-sim, m̄-sī lín ê liông-sim. Kiám-chhái ū lâng ōe mn̄g, “Góa ê chū-iû ná-tio̍h siū pa̍t-lâng ê liông-sim phoe-phòaⁿ? 30 Chè kè ê mi̍h, góa nā kám-siā lâi chia̍h, ū sím-mi̍h thang hō͘ lâng húi-pòng?” 31 Só͘-í, lín bô-lūn sī chia̍h sī lim, á-sī chòe sím-mi̍h, lóng tio̍h ūi-tio̍h êng-iāu Siōng-tè lâi chòe. 32 Bô-lūn sī tùi [Iû-thài]-lâng, Gōa-pang-lâng, á-sī Siōng-tè ê kàu-hōe, lín lóng m̄-thang chiâⁿ-chòe in ê chó͘-gāi. 33 Lín tio̍h chiàu góa só͘ chòe ê khì chòe. Góa ūi-tio̍h hō͘ tāi-ke hoaⁿ-hí, m̄-bat kiû ka-kī ê lī-ek, sī kiû tāi-ke ê lī-ek, thang hō͘ in tit-tio̍h kiù.

1 Ko-lîm-to 11

1 Lín tio̍h o̍h góa, chhin-chhiūⁿ góa o̍h Ki-tok. 2 Lín put-sî ōe kì-tit góa, koh chun-thàn góa thoân-siū hō͘ lín ê kà-sī, lín si̍t-chāi thang hō͘ góa o-ló. 3 Put-kò góa ài lín bêng-pe̍k, ta̍k ê ta-po͘-lâng ê thâu sī Ki-tok, hū-jîn-lâng ê thâu sī tiōng-hu, Ki-tok ê thâu sī Siōng-tè. 4 Ta-po͘-lâng tī kong-kiōng tiûⁿ-só͘ kî-tó á-sī soan-káng Siōng-tè sìn-sit ê sî, nā tà thâu-kun sī bú-jio̍k i ê thâu Ki-tok. 5 M̄-kú cha-bó͘-lâng tī kî-tó á-sī soan-káng Siōng-tè sìn-sit ê sî, nā bô tà thâu-kun sī bú-jio̍k ka-kī ê thâu, chiū-sī i ê tiōng-hu. Chit khoán ê hū-jîn-lâng kap thâu-mn̂g hō͘ lâng thì khí-lâi ê cha-bó͘-lâng bô sím-mi̍h chha-pia̍t. 6 Cha-bó͘-lâng nā m̄ tà thâu-kun, thâu-mn̂g tio̍h chián khí-lâi; kì-jiân khòaⁿ thì kng-thâu á-sī chián thâu-mn̂g chòe kiàn-siàu ê sū, chiū tio̍h tà thâu-kun. 7 Ta-po͘-lâng bô eng-kai tà thâu-kun, in-ūi i sī Siōng-tè ê hêng-siōng kap êng-iāu; cha-bó͘-lâng sī ta-po͘-lâng ê êng-iāu. 8 In-ūi ta-po͘-lâng m̄-sī tùi cha-bó͘-lâng chō chhut-lâi ê, cha-bó͘-lâng sī tùi ta-po͘-lâng chō chhut-lâi ê. 9 Ta-po͘-lâng m̄-sī ūi-tio̍h cha-bó͘-lâng chō ê, m̄-kú cha-bó͘-lâng sī ūi-tio̍h ta-po͘-lâng chō ê. 10 Ūi-tio̍h thiⁿ-sài ê iân-kò͘, cha-bó͘-lâng ê thâu eng-kai tà koân-ui ê kì-hō. 11 Chóng-sī tī Chú ê lāi-bīn, ta-po͘-lâng su-iàu cha-bó͘-lâng, cha-bó͘-lâng mā su-iàu ta-po͘-lâng. 12 In-ūi cha-bó͘-lâng sī tùi ta-po͘-lâng chō chhut-lâi ê, ta-po͘-lâng sī thong-kè cha-bó͘-lâng siⁿ ê, m̄-kú bān-mi̍h lóng sī tùi Siōng-tè chhut-lâi ê. 13 Lín tio̍h ka-kī phòaⁿ-toàn: cha-bó͘-lâng bô tà thâu-kun tùi Siōng-tè kî-tó ū ha̍p-gî bô? 14 Chū-jiân ê pún-sèng kà lán, lâu tn̂g thâu-mn̂g sī ta-po͘-lâng ê kiàn-siàu, 15 m̄-kú cha-bó͘-lâng lâu tn̂g thâu-mn̂g sī i ê êng-iāu. In-ūi tn̂g thâu-mn̂g thang chòe cha-bó͘-lâng ê jia-phè. 16 Nā ū lâng ài piān-pok, góa chí-ū ōe-tàng kóng, tī goán kap Siōng-tè ê kàu-hōe pèng bô kî-tha ê kui-kú. 17 Góa tī chia beh kóng ê ōe m̄-sī beh kā lín o-ló, in-ūi lín ê chū-hōe sún-hāi pí lī-ek khah chōe. 18 Tē-it, góa ū thiaⁿ-kìⁿ kóng, lín tī kàu-hōe chū-hōe ê sî kiat-tóng hun-phài, góa siong-sìn ū chi̍t pō͘-hūn sī sū-si̍t. 19 Lín tiong-kan bōe bián-tit ū hun-lia̍t, án-ni hō͘ lín thang khòaⁿ-chhut sím-mi̍h lâng ōe thong-kè khó-giām. 20 Lín chū-chi̍p ê sî, m̄-sī teh chia̍h Chú ê Boán-chhan. 21 In-ūi lín ta̍k ê lâng kóaⁿ-kín chia̍h ka-kī tòa-lâi ê mi̍h-kiāⁿ, kiat-kó ū-ê iau, ū-ê chiú-chùi. 22 Lín kiám bô chhù thang chia̍h, thang lim? Lín sī teh biáu-sī Siōng-tè ê kàu-hōe, ia̍h teh hō͘ bô mi̍h thang chia̍h ê lâng kiàn-siàu sī-bô? Góa beh tùi lín kóng sím-mi̍h? Góa kiám tio̍h kā lín o-ló? Bōe, tī chit hāng sū góa bōe kā lín o-ló! 23 Góa tùi Chú só͘ niá-siū ê, góa mā thoân hō͘ lín: Chú Iâ-so͘ hō͘ lâng chhut-bōe hit mî, I the̍h piáⁿ, 24 kám-siā Siōng-tè liáu-āu, peh-khui, kóng, “Chit-ê sī góa ê seng-khu, ūi-tio̍h lín hi-seng ê; lín tio̍h chòe chit-ê lâi kì-liām góa.” 25 Chiàu án-ni, chia̍h liáu-āu, I koh phâng poe, kóng, “Chit-ê poe sī sin ê iok, ēng góa ê huih siat-li̍p ê, lín ta̍k pái lim ê sî tio̍h chòe chit-ê lâi kì-liām góa.” 26 Án-ni, lín ta̍k pái chia̍h chit-ê piáⁿ, lim chit-ê poe, sī teh soan-kò Chú ê sí, ti̍t-kàu I lâi-lîm. 27 Só͘-í, bô-lūn sím-mi̍h lâng, nā bô ēng ha̍p-gî ê thài-tō͘ chia̍h Chú ê piáⁿ, lim Chú ê poe, sī tek-chōe Chú ê sin-thé kap huih. 28 Ta̍k ê lâng tio̍h séng-chhat ka-kī chiah thang chia̍h chit-ê piáⁿ, lim chit-ê poe. 29 Lín chia̍h chit-ê piáⁿ, lim chit-ê poe, nā bô khak-si̍t bêng-pe̍k Chú ê seng-khu ê ì-sù, chia̍h chit-ê piáⁿ lim chit-ê poe sī ka-kī jiá sím-phòaⁿ. 30 In-ūi án-ni, tī lín tiong-kan ū chin chōe lâng loán-jio̍k, phòa-pīⁿ, mā ū lâng tì-kàu sí. 31 Lán nā seng séng-chhat ka-kī, chiū bōe tì-kàu siū sím-phòaⁿ. 32 Put-kò lán siū Chú sím-phòaⁿ ê sî, sī teh siū koán-kàu, hō͘ lán bián tì-kàu kap sè-kan tâng siū tēng-chōe. 33 Só͘-í, góa ê hiaⁿ-tī chí-bē, lín chū-chi̍p chia̍h Chú ê Boán-chhan ê sî, tio̍h hō͘-siōng thèng-hāu. 34 Nā ū lâng iau, tio̍h tī chhù-ni̍h seng chia̍h, chiah-bián chū-hōe tian-tò pìⁿ-chòe siū Siōng-tè sím-phòaⁿ. Kî-tha ê tāi-chì, góa khì lín hia ê sî chiah chhú-lí.

1 Ko-lîm-to 12

1 Hiaⁿ-tī chí-bē, koan-hē Sèng Sîn ê un-sù, góa ài lín liáu-kái. 2 Lín chai, lín iáu sī īⁿ-kàu-tô͘ ê sî chhut-chāi lâng chhōa-khì kiâⁿ bê-lō͘, khì pài bōe kóng-ōe ê ngó͘-siōng. 3 Só͘-í góa ài lín liáu-kái, só͘-ū siū Siōng-tè ê Sîn kám-tōng ê lâng, bô-lâng ōe kóng “Iâ-so͘ tio̍h siū chiù-chó͘”; nā bô siū Sèng Sîn kám-tōng, mā bô-lâng ōe kóng “Iâ-so͘ sī Chú.” 4 Un-sù ū chin chōe khoán, m̄-kú sù un-sù ê sī kâng chi̍t ūi Sèng Sîn. 5 Sū-hōng ū chin chōe khoán, m̄-kú sī sū-hōng kâng chi̍t ūi Chú. 6 Kang-chok ū chin chōe khoán, m̄-kú pang-chān ta̍k ê lâng khì chòe ta̍k hāng tāi-chì ê sī kâng chi̍t ūi Siōng-tè. 7 Ūi-tio̍h beh hō͘ tāi-ke tit-tio̍h lī-ek, Sèng Sîn tī ta̍k ê lâng sin-chiūⁿ só͘ hián-bêng ê kang-chok mā-sī chi̍t lâng chi̍t khoán. 8 Ū lâng thong-kè Sèng Sîn tit-tio̍h thoân sìn-sit ê tì-hūi; ū lâng kun-kù kâng chi̍t ūi Sèng Sîn tit-tio̍h thoân sìn-sit ê tì-sek; 9 ū lâng tùi kâng chi̍t ūi Sèng Sîn tit-tio̍h sìn-sim; ū lâng tùi kâng chi̍t ūi Sèng Sîn tit-tio̍h i-pīⁿ ê un-sù; 10 ū lâng tit-tio̍h kiâⁿ sîn-jiah ê un-sù; ū lâng tit-tio̍h thoân Siōng-tè sìn-sit ê un-sù; ū lâng tit-tio̍h hun-piān Siōng-tè ê Sîn kap pa̍t ê sîn ê un-sù; ū lâng tit-tio̍h kóng lêng-gú ê un-sù; ū lâng tit-tio̍h kóe-seh lêng-gú ê un-sù. 11 Chiah-ê it-chhè lóng sī kâng chi̍t ūi Sèng Sîn ê ūn-chok, I chiàu ka-kī ê ì-sù chiong bô kâng-khoán ê un-sù pun hō͘ ta̍k ê lâng. 12 Chhin-chhiūⁿ seng-khu sī chi̍t ê, m̄-kú ū chin chōe chi-thé; seng-khu sui-jiân ū chin chōe chi-thé, m̄-kú seng-khu chí-ū chi̍t ê; Ki-tok mā-sī án-ni. 13 Bô-lūn sī [Iû-thài]-lâng á-sī Gōa-pang-lâng, lô͘-lē á-sī chū-iû ê lâng, lán lóng tùi kâng chi̍t ūi Sèng Sîn niá-siū sóe-lé, chiâⁿ-chòe chi̍t-thé, koh lán mā lóng lim kâng chi̍t ūi Sèng Sîn lâi tit-tio̍h lūn-te̍k. 14 Seng-khu m̄-sī chí-ū chi̍t ê chi-thé, sī ū chin chōe chi-thé. 15 Kha nā kóng “Góa m̄-sī chhiú, só͘-í bô sio̍k seng-khu”, kha m̄-sī án-ni kóng chiū bô sio̍k seng-khu. 16 Hī-á nā kóng “Góa m̄-sī ba̍k-chiu, só͘-í bô sio̍k seng-khu”, hīⁿ-á m̄-sī án-ni kóng chiū bô sio̍k seng-khu. 17 Choân seng-khu nā lóng sī ba̍k-chiu, beh ēng sím-mi̍h lâi thiaⁿ? Choân seng-khu nā lóng sī hī-á, beh ēng sím-mi̍h lâi phīⁿ? 18 Kî-si̍t, Siōng-tè chiàu I ê chí-ì chiong ta̍k khoán chi-thé an-tì tī seng-khu. 19 Choân-pō͘ nā chí-ū sī chi̍t ê chi-thé, ná ōe-tàng sǹg-chòe seng-khu? 20 Án-ni, chi-thé ū chin chōe, m̄-kú seng-khu chí-ū chi̍t ê. 21 Ba̍k-chiu bōe-tàng kā chhùi kóng “Góa bô su-iàu lí!” Thâu mā bōe-tàng tùi kha kóng “Góa bô su-iàu lí!” 22 Kî-si̍t hiah-ê khòaⁿ khí-lâi khah loán-jio̍k ê chi-thé tian-tò khah ū pit-iàu. 23 Lán khòaⁿ khah m̄ chiūⁿ-ba̍k ê chi-thé, tian-tò khah tio̍h kā in khòaⁿ-tāng; khah pháiⁿ-khòaⁿ ê chi-thé, tian-tò khah tio̍h kā in chng-thāⁿ; 24 hiah-ê khah hó-khòaⁿ ê chi-thé chiū bô su-iàu chng-thāⁿ. Siōng-tè chiong seng-khu an-pâi hó-sè, hō͘ hiah-ê khah bô tiōng-iàu ê chi-thé tit-tio̍h khah tōa ê chun-tiōng, 25 thang hō͘ seng-khu bián tì-kàu hun-lia̍t, tian-tò hō͘ ta̍k ê chi-thé hō͘-siōng chiàu-kò͘. 26 Chi̍t ê chi-thé siū-khó͘, kî-tha ê chi-thé chiū chòe-hé siū-khó͘; chi̍t ê chi-thé tit-tio̍h êng-kng, kî-tha ê chi-thé chiū chòe-hé hoaⁿ-hí. 27 Lín sī Ki-tok ê seng-khu, ta̍k ê lâng sī seng-khu ê chi-thé. 28 Siōng-tè tī kàu-hōe só͘ an-tì ê, tē-it sī sù-tô͘, tē-jī sī sian-ti, tē-saⁿ sī kàu-su, koh ū kiâⁿ sîn-jiah ê, koh ū i-pīⁿ un-sù ê, pang-chān lâng ê, koán-lí sū-bū ê, kóng ta̍k khoán lêng-gú ê. 29 Ta̍k ê lâng kiám lóng sī sù-tô͘? Kiám lóng sī sian-ti? Kiám lóng sī kàu-su? Kiám lóng sī kiâⁿ sîn-jiah ê? 30 Kiám lóng sī ū i-pīⁿ un-sù ê? Kiám lóng sī kóng lêng-gú ê? Kiám lóng sī kóe-seh lêng-gú ê? 31 Lín tio̍h jia̍t-chhiat him-bō͘ koh-khah tiōng-iàu ê un-sù. Taⁿ góa kā lín chí-sī chi̍t tiâu siōng-hó ê lō͘.

1 Ko-lîm-to 13

1 Góa nā ōe-hiáu kóng lâng ê gú-giân, sīm-chì thiⁿ-sài ê gú-giân, nā bô jîn-ài, góa chiū chhin-chhiūⁿ lô teh tân, lâ-poa̍h teh hiáng. 2 Góa nā ū thoân-ta̍t Siōng-tè sìn-sit ê un-sù, ōe liáu-kái ta̍k khoán ê ò-pì kap ta̍k khoán ê tì-sek; góa nā ū kàu-gia̍h ê sìn-sim thang î-san tó-hái, nā bô jîn-ài, góa chiū bô lō͘-ēng. 3 Góa nā the̍h só͘-ū ê châi-sán khì kiù-chè, á-sī hiàn seng-khu hō͘ hé sio, nā bô jîn-ài, tùi góa lóng bô lī-ek. 4 Jîn-ài sī khoan-iông; jîn-ài sī chû-pi; ū jîn-ài chiū bōe chi̍t-tò͘, bōe khoa-kháu, bōe kiau-ngō͘, 5 bōe chòe kiàn-siàu ê tāi-chì, bōe kiû ka-kī ê lī-ek, bōe khoài siū-khì, bōe khioh-hūn, 6 bōe ài put-gī, chí-ū ài chin-lí. 7 Jîn-ài ōe pau-iông it-chhè, tùi it-chhè ū sìn-sim, tùi it-chhè ū ǹg-bāng, tùi it-chhè ū nāi-sim. 8 Jîn-ài éng-oán chûn-chāi. Thoân-ta̍t Siōng-tè sìn-sit ê un-sù sī chiām-sî; kóng lêng-gú ê un-sù ōe bô-khì; tì-sek mā ōe bô-khì. 9 Lán só͘ bat ê iú-hān; lán thoân-ta̍t Siōng-tè sìn-sit ê un-sù mā iú-hān. 10 M̄-kú hit-ê oân-choân-ê chi̍t-ē lâi, hit-ê iú-hān-ê chiū siau-sit. 11 Góa choh gín-á ê sî, kóng-ōe chhin-chhiūⁿ gín-á, ì-kiàn chhin-chhiūⁿ gín-á, siūⁿ-hoat mā chhin-chhiūⁿ gín-á. Taⁿ góa í-keng sêng-jîn, chiū chiong gín-á ê sū lóng pàng-sak. 12 Lán hiān-chāi chhin-chhiūⁿ chiò-kiàⁿ teh khòaⁿ, bū-bū bô-bêng, chiong-lâi ōe bīn-tùi-bīn khòaⁿ chheng-chhó. Góa hiān-chāi chí-ū chai chi̍t pō͘-hūn, chiong-lâi ōe oân-choân liáu-kái, chhin-chhiūⁿ Siōng-tè oân-choân liáu-kái góa. 13 Án-ni, sìn, ǹg-bāng, jîn-ài chit saⁿ-hāng éng-oán chûn-chāi, kî-tiong siōng tiōng-iàu ê sī jîn-ài.

1 Ko-lîm-to 14

1 Tio̍h tui-kiû jîn-ài; tio̍h jia̍t-chhiat him-bō͘ sio̍k-lêng ê un-sù, te̍k-pia̍t sī thoân-ta̍t Siōng-tè sìn-sit ê un-sù. 2 Kóng lêng-gú ê lâng m̄-sī teh tùi lâng kóng, sī teh tùi Siōng-tè kóng, in-ūi bô-lâng thiaⁿ ū; i sī khò Sèng Sîn teh kóng ò-pì ê sū. 3 Put-kò thoân-ta̍t Siōng-tè sìn-sit ê lâng sī teh tùi lâng kóng, beh hō͘ in tit-tio̍h chō-chiū, kó͘-lē, an-ùi. 4 Kóng lêng-gú ê lâng chí-ū chō-chiū ka-kī, put-kò thoân-ta̍t Siōng-tè sìn-sit ê lâng chō-chiū choân kàu-hōe. 5 Góa ài lín ta̍k ê lâng lóng ōe kóng lêng-gú, koh-khah ài lín ōe thoân-ta̍t Siōng-tè ê sìn-sit. Kóng lêng-gú nā m̄-sī ū lâng kóe-seh, thang hō͘ kàu-hōe tit-tio̍h chō-chiū, thoân-ta̍t Siōng-tè ê sìn-sit pí kóng lêng-gú khah tiōng-iàu. 6 Só͘-í, hiaⁿ-tī chí-bē, góa khì lín hia, nā kan-ta kóng lêng-gú, bô thoân-ta̍t Siōng-tè ê khé-sī, á-sī tì-sek, á-sī sìn-sit, á-sī kà-sī, tùi lín ū sím-mi̍h lī-ek? 7 Bô sìⁿ-miā ê ga̍k-khì chhin-chhiūⁿ phín-á á-sī khîm, in só͘ hoat-chhut ê im nā bô koân-kē piàn-hòa, lâng ná-ōe chai sī teh chàu sím-mi̍h? 8 Lat-pah ê siaⁿ nā bô chún-khak, lâng ná chai thang chún-pī sio-chiàn? 9 Chhin-chhiūⁿ án-ni, lín só͘ kóng ê lêng-gú, ì-sù nā bô chheng-chhó, lâng ná-ōe lí-kái lín teh kóng sím-mi̍h? Án-ni lín sī teh tùi khong-khì kóng-ōe. 10 Sè-kan ū chin chōe bô kâng-khoán ê gú-giân, ta̍k ê lóng ū ì-sù. 11 Góa nā m̄-bat bó͘ chi̍t ê gú-giân, tùi teh kóng chit-ê gú-giân ê lâng lâi khòaⁿ góa sī gōa-kok-lâng; teh kóng chit-ê gú-giân ê lâng tùi góa lâi khòaⁿ mā-sī gōa-kok-lâng. 12 Lín mā-sī án-ni, kì-jiân lín jia̍t-chhiat him-bō͘ sio̍k-lêng ê un-sù, tio̍h koh-khah chhut-la̍t tui-kiû hiah-ê ōe chō-chiū kàu-hōe ê un-sù. 13 Só͘-í, kóng lêng-gú ê lâng tio̍h kî-kiû ōe-tàng kóe-seh ê lêng-le̍k. 14 Góa nā ēng lêng-gú kî-tó, sī góa ê lêng teh kî-tó, m̄-kú góa ê lí-tì bô chok-iōng. 15 Án-ni góa beh án-chóaⁿ? Góa beh ēng lêng kî-tó, mā beh ēng lí-tì kî-tó. Góa beh ēng lêng gîm-si, mā beh ēng lí-tì gîm-si. 16 Nā bô, lín nā chí-ū ēng lêng kám-siā Siōng-tè, chham-ka chū-hōe ê hiah-ê bô liáu-kái lêng-gú ê sìn-tô͘ m̄-chai lín teh kóng sím-mi̍h, beh ná-ōe tùi lín ê kám-siā kóng “Amen”? 17 Lín ê kám-siā kiám-chhái chin hó, m̄-kú bô hō͘ pa̍t-lâng tit-tio̍h chō-chiū. 18 Kám-siā Siōng-tè, góa pí lín chèng-lâng kóng koh-khah chōe lêng-gú. 19 M̄-kú tī kàu-hōe tiong, góa lêng-khó kóng gō͘ kù ū lí-tì ê ōe thang kà-sī pa̍t lâng, mā bô ài kóng chi̍t-bān kù lêng-gú. 20 Hiaⁿ-tī chí-bē, lín siūⁿ tāi-chì m̄-thang chhin-chhiūⁿ gín-á; chòe pháiⁿ tāi-chì tio̍h chhin-chhiūⁿ eⁿ-á, siūⁿ tāi-chì tio̍h chhin-chhiūⁿ tōa-lâng. 21 Tī Lu̍t-hoat-su ū kì-chài: Chú kóng, Góa beh ēng kóng gōa-kok-ōe ê lâng, ēng īⁿ-pang-lâng ê chhùi-tûn, tùi góa ê chú-bîn kóng-ōe, m̄-kú in iáu m̄-thiaⁿ. 22 Án-ni, kóng lêng-gú m̄-sī beh hō͘ sìn-tô͘, sī beh hō͘ bô-sìn ê lâng chòe kì-hō. M̄-kú thoân-ta̍t Siōng-tè sìn-sit ê un-sù m̄-sī beh hō͘ bô-sìn ê lâng, sī beh hō͘ sìn-tô͘ chòe kì-hō. 23 Choân kàu-hōe chū-chi̍p ê sî, tāi-ke nā lóng teh kóng lêng-gú, ū bô liáu-kái lêng-gú ê sìn-tô͘ á-sī bô-sìn ê lâng ji̍p-lâi, kiám bōe kóng lín sī teh khí-siáu? 24 Tāi-ke nā lóng teh thoân-ta̍t Siōng-tè ê sìn-sit, ū bô-sìn ê lâng á-sī bô liáu-kái lêng-gú ê sìn-tô͘ ji̍p-lâi, thiaⁿ-tio̍h hiah-ê ōe chiū hiáu-ngō͘ chai-chōe, 25 sim-lāi ê pì-bi̍t hián-lō͘ chhut-lâi, ōe phak lo̍h-khì kèng-pài Siōng-tè, soan-kò kóng, “Siōng-tè chin-chiàⁿ tī lín tiong-kan!” 26 Hiaⁿ-tī chí-bē, án-ni beh án-chóaⁿ? Lín chū-hōe ê sî, ū lâng chhiùⁿ sèng-si, ū lâng kà-sī, ū lâng soan-káng Siōng-tè ê khé-sī, ū lâng kóng lêng-gú, mā ū lâng kóe-seh lêng-gú. Ta̍k hāng tāi-chì lóng tio̍h ūi-tio̍h chō-chiū kàu-hōe lâi chòe. 27 Nā ū lâng kóng lêng-gú, chí-ū nn̄g ê, siōng-chōe saⁿ ê lûn-liû kóng, koh tio̍h ū lâng kóe-seh. 28 Nā-sī bô-lâng thang kóe-seh, in tī chū-hōe tiong tio̍h chēng-chēng, chí-ū tùi ka-kī kap Siōng-tè kóng. 29 Soan-káng Siōng-tè ê sìn-sit, thang hō͘ nn̄g ê á-sī saⁿ ê kóng, kî-tha ê lâng thang phòaⁿ-toàn in só͘ kóng ê. 30 Put-kò chāi-chō ê lâng nā ū tit-tio̍h Siōng-tè ê khé-sī, tú teh kóng ê lâng tio̍h chēng-chēng. 31 Lín ta̍k ê lâng lóng thang lûn-liû soan-káng Siōng-tè ê sìn-sit, thang saⁿ-kap ha̍k-si̍p, hō͘-siōng bián-lē. 32 Soan-káng Siōng-tè sìn-sit ê lâng tio̍h ōe-hiáu iok-sok ka-kī ê un-sù, 33 in-ūi Siōng-tè m̄-sī hūn-loān ê Siōng-tè, sī hô-hâi ê Siōng-tè. Kap só͘-ū Siōng-tè chú-bîn ê kàu-hōe kâng-khoán, 34 hū-jîn-lâng tī chū-hōe tiong tio̍h chēng-chēng, bōe ēng-tit kóng-ōe. Chiàu [Iû-thài] Lu̍t-hoat só͘ kóng, hū-jîn-lâng tio̍h sūn-ho̍k. 35 In nā ài o̍h sím-mi̍h, tio̍h tī chhù-ni̍h mn̄g ka-kī ê tiōng-hu; hū-jîn-lâng tī chū-hōe tiong kóng-ōe bô thé-biān. 36 Ná án-ni kóng! Siōng-tè ê ōe kiám tùi lín lâi, á-sī kan-ta thoân hō͘ lín? 37 Nā ū lâng siūⁿ-kóng ka-kī sī thoân-ta̍t Siōng-tè sìn-sit ê lâng, á-sī sio̍k-lêng ê lâng, tio̍h chai góa teh siá hō͘ lín ê sī Chú ê bēng-lēng. 38 Nā ū lâng bô khòaⁿ chit-ê tāi-chì chòe iàu-kín, mā m̄-thang kā i khòaⁿ-chòe iàu-kín. 39 Só͘-í, góa ê hiaⁿ-tī chí-bē, tio̍h jia̍t-chhiat him-bō͘ thoân-ta̍t Siōng-tè sìn-sit ê un-sù, put-kò mā m̄-thang kìm-chí lâng kóng lêng-gú. 40 Hoān-sū tio̍h kui-kui kú-kú, chiàu tia̍t-sū chòe.

1 Ko-lîm-to 15

1 Hiaⁿ-tī chí-bē, góa beh kā lín thê-chhíⁿ: Góa thoân hō͘ lín ê hok-im lín ū chiap-siū, mā ēng che chòe sìn-gióng ê ki-chhó͘. 2 Lín nā m̄-sī khang-khang sìn, hiān-chāi iáu ū teh kian-siú góa só͘ thoân ê sìn-sit, chiū ōe khò chit-ê hok-im tit-tio̍h kiù. 3 Góa í-keng ū chiong góa pún-sin só͘ niá-siū hit-ê siōng tiōng-iàu ê sìn-sit thoân hō͘ lín, chiū-sī chiàu Sèng-keng só͘ kì-chài, Ki-tok ūi-tio̍h lán ê chōe sí, 4 bâi-chòng; koh chiàu Sèng-keng só͘ kì-chài, I tē-saⁿ ji̍t koh-oa̍h; 5 I ū tùi [Pí-tek] hián-hiān, koh tùi cha̍p-jī sù-tô͘ hián-hiān. 6 Āu-lâi I ū chi̍t pái tùi gō͘-pah gōa ê hiaⁿ-tī chí-bē hián-hiān; hiah-ê lâng ū ê í-keng sí, m̄-kú tōa-pō͘-hūn ê lâng iáu oa̍h-teh. 7 Āu-lâi I ū tùi [Ngá-kok] hián-hiān, koh tùi só͘-ū ê sù-tô͘ hián-hiān. 8 Chòe-āu, I mā tùi góa chit-ê ná-chún bô kàu-ge̍h chiū chhut-sì ê lâng hián-hiān. 9 Góa sī sù-tô͘ tiong siōng bî-sòe ê, bōe kham-tit chheng-chòe sù-tô͘, in-ūi góa bat pek-hāi Siōng-tè ê kàu-hōe. 10 M̄-kú ū Siōng-tè ê un-tián chiah ū kin-á-ji̍t ê góa, I sù hō͘ góa ê un-tián bô lo̍k-khong. Góa tian-tò pí kî-tha ê sù-tô͘ koh-khah phah-piàⁿ kang-chok, kî-si̍t m̄-sī góa ka-kī, sī Siōng-tè ê un-tián kap góa tông-chāi. 11 Só͘-í, bô-lūn sī góa á-sī in, che sī goán só͘ teh thoân, lín í-keng ū teh sìn ê. 12 Kì-jiân goán só͘ soan-iông ê sī Ki-tok í-keng ū tùi sí-lâng tiong koh-oa̍h, lín tiong-kan ná ū lâng kóng bô sí-lâng koh-oa̍h? 13 Nā bô sí-lâng koh-oa̍h, án-ni Ki-tok chiū bô koh-oa̍h. 14 Nā Ki-tok bô koh-oa̍h, án-ni góa só͘ soan-iông ê sī khang-khang, lín ê sìn mā-sī khang-khang. 15 Án-ni goán chiū-sī teh ūi Siōng-tè chòe ké kiàn-chèng, in-ūi goán kiàn-chèng Siōng-tè í-keng hō͘ Ki-tok koh-oa̍h; sí-lâng nā bô koh-oa̍h, Siōng-tè chiū bô hō͘ Ki-tok koh-oa̍h. 16 Nā sí-lâng bô koh-oa̍h, Ki-tok chiū bô koh-oa̍h. 17 Ki-tok nā bô koh-oa̍h, lín ê sìn chiū bô lō͘-ēng, lín chiū iáu tī chōe-ok tiong. 18 Án-ni, hiah-ê í-keng sí-khì ê Ki-tok-tô͘ mā lóng bia̍t-bông lah. 19 Lán sìn Ki-tok ê lâng nā kan-ta tī hiān-sè ū ǹg-bāng, lán sī só͘-ū ê lâng ê tiong-kan siōng thang khó-lîn ê. 20 M̄-kú, hiān-chāi Siōng-tè í-keng ū hō͘ Ki-tok tùi sí-lâng tiong koh-oa̍h, thang chòe í-keng sí-khì ê lâng koh-oa̍h ê pó-chèng. 21 In-ūi sí thong-kè chi̍t ê lâng lâi, sí-lâng ê koh-oa̍h mā-sī thong-kè chi̍t ê lâng lâi. 22 Tùi [A-tong] chèng-lâng lóng tio̍h sí, án-ni, mā tùi Ki-tok chèng-lâng lóng ōe koh-oa̍h. 23 Put-kò ta̍k ê lâng lóng tio̍h chiàu ka-kī ê sūn-sū koh-oa̍h: Thâu-chi̍t ê sī Ki-tok, sòa lo̍h-khì sī Ki-tok lâi-lîm ê sî sio̍k I ê lâng, 24 koh lâi chiah-sī boa̍t-kî; hit sî I ōe siau-bia̍t it-chhè ê thóng-léng-chiá, chiáng-koân-chiá, kap koân-le̍k-chiá, jiân-āu chiong thóng-tī-koân kau hō͘ Pē Siōng-tè. 25 In-ūi Ki-tok it-tēng tio̍h thóng-tī, ti̍t-kàu Siōng-tè hō͘ it-chhè ê tùi-te̍k lóng khut-ho̍k tī I ê kha-ē. 26 Chòe-āu siū húi-bia̍t ê tùi-te̍k sī sí. 27 In-ūi Sèng-keng kì-chài kóng, “Siōng-tè hō͘ bān-iú lóng khut-ho̍k tī I ê kha-ē.” Chin bêng-hián, chia só͘ kóng ê “bān-iú” pèng bô pau-hâm hō͘ bān-iú khut-ho̍k tī Ki-tok kha-ē ê Siōng-tè. 28 Kàu bān-iú lóng khut-ho̍k Ki-tok ê sî, Kiáⁿ pún-sin mā ōe khut-ho̍k tī hō͘ bān-iú lóng khut-ho̍k ê Siōng-tè, thang hō͘ Siōng-tè oân-choân thóng-hat it-chhè. 29 Nā m̄-sī án-ni, lâng thòe sí-lâng siū sóe ū sím-mi̍h ì-sù? Nā bô sí-lâng koh-oa̍h ê sū, sī án-chóaⁿ beh thòe sí-lâng siū sóe? 30 Goán sī án-chóaⁿ tio̍h sî-sî khek-khek mō͘-hiám? 31 Hiaⁿ-tī chí-bē, góa hōng lán ê Chú Ki-tok Iâ-so͘ tùi lín chiah-ê góa só͘ khoa-kháu ê lâng hó-táⁿ kóng: Góa ta̍k ji̍t biān-tùi sí. 32 Góa tī [Í-hut-só͘] kap “iá-siù” tò͘-cheng, nā sûn-chhùi sī chhut tī lâng ê tōng-ki, tùi góa ū sím-mi̍h lī-ek? Nā sí-lâng bô koh-oa̍h, chhin-chhiūⁿ lâng teh kóng: Lán bîn-á-chài to beh sí à, lâi chia̍h, lâi lim! 33 M̄-thang hō͘ lâng phiàn khì: “Kau-tio̍h pháiⁿ pêng-iú ōe phò-hoāi phín-tek!” 34 Tio̍h kak-chhíⁿ, siūⁿ hō͘ chheng-chhó, m̄-thang koh hoān-chōe, in-ūi ū chi̍t-kóa lâng iáu m̄-bat Siōng-tè, góa kóng chiah-ê sī beh hō͘ lín chai thang kiàn-siàu. 35 Kiám-chhái ū lâng beh mn̄g, “Sí-lâng án-chóaⁿ koh-oa̍h? In ōe ēng sím-mi̍h khoán ê thé lâi?” 36 Gōng-lâng! Lín iā lo̍h-tōe ê chéng-chí nā bô sí-khì, kiám ōe oa̍h khí-lâi? 37 Lín só͘ iā ê, bô-lūn sī be̍h-á á-sī pa̍t khoán ngó͘-kok, put-kò kan-ta sī chéng-chí, m̄-sī āu-lâi tióng-tōa ê hêng-thé. 38 Siōng-tè chiàu I ê chí-ì hō͘ chéng-chí ū hêng-thé; ta̍k khoán chéng-chí ū ka-kī ê hêng-thé. 39 Ta̍k khoán tōng-bu̍t ê jio̍k-thé mā lóng bô kâng-khoán: Lâng ê jio̍k-thé chi̍t khoán, siù-lūi chi̍t khoán, chiáu-lūi chi̍t khoán, hî-lūi koh chi̍t khoán. 40 Ū thiⁿ-téng ê thé, ū tōe-chiūⁿ ê thé; thian-thé ê kng kap tōe-chiūⁿ ê thé ê kng bô kâng-khoán. 41 Ji̍t-thâu ū ji̍t-thâu ê kng, ge̍h ū ge̍h ê kng, chhiⁿ ū chhiⁿ ê kng; sīm-chì ta̍k lia̍p chhiⁿ ê kng to lóng bô kâng-khoán. 42 Sí-lâng ê koh-oa̍h mā-sī án-ni. Tâi-lo̍h-khì-ê ōe hiú-nōa, koh-oa̍h-ê bōe hiú-nōa. 43 Tâi-lo̍h-khì-ê sī pi-chiān ê, koh-oa̍h-ê sī êng-iāu ê. Tâi-lo̍h-khì-ê sī loán-jio̍k ê, koh-oa̍h-ê sī ióng-chòng ê. 44 Tâi-lo̍h-khì-ê sī hiat-jio̍k ê thé, koh-oa̍h-ê sī sio̍k-lêng ê thé. Kì-jiân ū hiat-jio̍k ê thé, chiū ū sio̍k-lêng ê thé. 45 Só͘-í Sèng-keng ū kì-chài, “Thâu-chi̍t ê lâng [A-tong] siū-chō chòe ū oa̍h-miā ê lâng”, m̄-kú lō͘-bé ê [A-tong] sī sù oa̍h-miā ê Sîn. 46 Tāi-seng ū ê m̄-sī sio̍k-lêng ê, sī hiat-jio̍k ê, āu-lâi chiah ū sio̍k-lêng ê. 47 Thâu-chi̍t ê lâng sī tùi tōe chhut, sī thô͘ chō ê; tē-jī ê lâng sī tùi thiⁿ lâi ê. 48 Só͘-ū ēng thô͘ chō ê lâng lóng kap hit-ê thâu-chi̍t ê ēng thô͘ chō ê lâng kâng-khoán; só͘-ū sio̍k-thiⁿ ê lâng mā kap hit-ê lō͘-bé lâi sio̍k-thiⁿ ê lâng kâng-khoán. 49 Tú chhin-chhiūⁿ lán ū hit-ê thâu-chi̍t ê ēng thô͘ chō ê lâng ê hêng-siōng, mā ōe ū hit-ê lō͘-bé lâi sio̍k-thiⁿ ê lâng ê hêng-siōng. 50 Hiaⁿ-tī chí-bē, góa kā lín kóng: Hiat-jio̍k ê thé bōe-tàng sêng-siū Siōng-tè ê kok; ōe hiú-nōa-ê mā bōe-tàng sêng-siū bōe hiú-nōa-ê. 51 Góa beh kā lín kóng chi̍t hāng ò-pì: Lán bōe lóng sí, put-kò tī chi̍t sùn-kan, chi̍t-ba̍k-nih-kú, chòe-āu ê lat-pah chi̍t-ē tân, lán lóng ōe kái-piàn; lat-pah tân, sí-lâng ōe koh-oa̍h, pìⁿ-chòe bōe hiú-nōa-ê, lán mā lóng ōe kái-piàn. 53 In-ūi chit-ê ōe hiú-nōa-ê it-tēng tio̍h pìⁿ-chòe bōe hiú-nōa-ê, ōe-sí-ê pìⁿ-chòe bōe-sí-ê. 54 Tng ōe hiú-nōa-ê pìⁿ-chòe bōe hiú-nōa-ê, ōe-sí-ê pìⁿ-chòe bōe-sí-ê hit sî, Sèng-keng só͘ kì-chài ê ōe chiū ōe èng-giām: Sí hō͘ sèng-lī thun lo̍h-khì lah! 55 Sí ah, lí ê sèng-lī tī tó-ūi? Sí ah, lí ê to̍k-chhì tī tó-ūi? 56 Sí ê to̍k-chhì sī chōe, chōe ê ui-le̍k sī tùi Lu̍t-hoat lâi ê. 57 Kám-siā Siōng-tè, I thong-kè lán ê Chú Iâ-so͘ Ki-tok hō͘ lán tit-tio̍h sèng-lī. 58 Só͘-í, chhin-ài ê hiaⁿ-tī chí-bē, tio̍h khiā-chāi, m̄-thang iô-tāng. Tio̍h siông-siông chīn-la̍t ūi Chú chòe-kang, in-ūi lín chai ūi Chú tio̍h-bôa chòe-kang it-tēng bōe lo̍k-khong.

1 Ko-lîm-to 16

1 Koan-hē koan-hiàn pang-chān sìn-tô͘ ê tāi-chì, lín mā tio̍h chiàu góa kā [Ka-lia̍p-thài] ê chèng kàu-hōe só͘ chí-sī ê khì chòe. 2 Múi lé-pài ê thâu-chi̍t ji̍t, ta̍k ê lâng tio̍h chiàu ka-kī ê siu-ji̍p the̍h chi̍t-kóa khí-lâi khǹg, bián-tit góa khì lín hia ê sî chiah khai-sí bō͘-koan. 3 Góa kàu-ūi ê sî, ōe chiong kài-siāu ê phoe kap lín ê koan-hiàn kau hō͘ lín ōe sìn-jīm-tit ê lâng, phài in tòa khì [Iâ-lō͘-sat-léng]. 4 Nā-sī góa mā tio̍h khì khah hó, in ōe kap góa chòe-hé khì. 5 Góa chit-chūn tú teh keng-kè [Má-kî-tùn], keng-kè [Má-kî-tùn] liáu-āu àn-sǹg beh khì lín hia, 6 tāi-khài ōe tòa lín hia kap lín chòe-hé kè tang-thiⁿ. Án-ni, bô-lūn beh koh khì tó-ūi, lín thang sàng góa chhut-hoat. 7 Góa bô ài tī kè-lō͘ ê sî chiah sūn-sòa khì khòaⁿ lín; Chú nā ún-chún, góa ǹg-bāng kap lín tòa chi̍t-chām-á. 8 Góa ōe tī [Í-hut-só͘] tòa kàu Gō͘-sûn-choeh. 9 Tī chia sui-jiân ū chin chōe hoán-tùi ê lâng, m̄-kú mn̂g ūi góa tōa khui, thang chòe ū-hāu-kó ê kang-chok. 10 [Thê-mô͘-thài] kàu-ūi ê sî, lín tio̍h kā i chiap-thāi, hō͘ i ōe-tàng an-sim, in-ūi i kap góa kâng-khoán teh chòe Chú ê kang. 11 Lín lóng m̄-thang khòaⁿ i bô-khí. Tio̍h sàng i pêng-an lī-khui, hō͘ i thang tńg-lâi góa chia, in-ūi góa teh thèng-hāu i kap hiah-ê hiaⁿ-tī chòe-hé lâi. 12 Koan-hē lán ê hiaⁿ-tī [A-pho-lô], góa ū ke̍k-le̍k khǹg i kap kî-tha ê hiaⁿ-tī khì hóng-būn lín. Put-kò i bo̍k-chêng lóng bô àn-sǹg beh khì. Nā ū tú-hó ê ki-hōe i chiū ōe khì. 13 Lín tio̍h kéng-séng, sìn-sim khiā-chāi, tio̍h ióng-kám, kian-kiông. 14 Lín só͘ chòe it-chhè ê tāi-chì tio̍h ēng thiàⁿ-sim khì chòe. 15 Hiaⁿ-tī chí-bē, lín bat [Sū-thê-hoat-ná] chi̍t ke ê lâng; in sī [A-kai-a]-séng thâu-chi̍t ke kui-sìn Ki-tok ê lâng, jia̍t-sim ho̍k-bū sìn-tô͘. 16 Góa khǹg lín tio̍h sūn-thàn chit khoán lâng, í-ki̍p só͘-ū kap in chòe-hé tio̍h-bôa kang-chok ê lâng. 17 [Sū-thê-hoat-ná], [Hok-tô͘-ná-to͘], kap [A-kai-kó͘] lâi góa chia, góa chin hoaⁿ-hí. Lín bô tī-chia, in thòe lín lâi pang-chān góa. 18 In hō͘ góa kap lín pîⁿ-pîⁿ tit-tio̍h kek-lē. Só͘-í lín tio̍h kèng-tiōng chit khoán lâng. 19 [A-se-a]-séng ê chèng kàu-hōe lóng beh kā lín chhéng-an. [A-ku-lah] kap [Pek-ki-lah], í-ki̍p tī in tau teh chū-hōe ê kàu-hōe, tī Chú ê lāi-bīn beh jia̍t-chhiat kā lín chhéng-an. 20 Só͘-ū ê hiaⁿ-tī chí-bē lóng beh kā lín chhéng-an. Lín tio̍h ēng sèng-kiat ê saⁿ-chim hō͘-siōng chhéng-an. 21 Góa --- [Pó-lô] chhin-pit kā lín chhéng-an. 22 Nā ū lâng bô thiàⁿ Chú, tio̍h siū chiù-chó͘. Chú ah, chhiáⁿ lâi! 23 Goān Chú Iâ-so͘ ê un-tián kap lín tông-chāi! 24 Goān góa ê thiàⁿ kap lín só͘-ū sio̍k Ki-tok Iâ-so͘ ê lâng tông-chāi!

2 Ko-lîm-to 1

1 Góa sī [Pó-lô], hōng Siōng-tè ê chí-ì choh Ki-tok Iâ-so͘ ê sù-tô͘. Góa kap hiaⁿ-tī [Thê-mô͘-thài] siá-phoe hō͘ tī [Ko-lîm-to] Siōng-tè ê kàu-hōe kap choân [A-kai-a-séng] só͘-ū sìn-tô͘. 2 Goān lán ê Pē Siōng-tè kap Chú Iâ-so͘ Ki-tok sù lín un-tián kap pêng-an! 3 Tio̍h chheng-chàn lán ê Chú Iâ-so͘ Ki-tok ê Pē Siōng-tè! I sī chû-pi ê Pē, sù ta̍k hāng an-ùi ê Siōng-tè. 4 Tī lán it-chhè ê hoān-lān tiong, I an-ùi lán, hō͘ lán ōe-tàng ēng Siōng-tè sù lán ê an-ùi khì an-ùi hiah-ê tú-tio̍h ta̍k khoán hoān-lān ê lâng. 5 In-ūi Ki-tok ūi-tio̍h lán siū chin chōe khó͘-lān, lán mā thong-kè Ki-tok siū hiah-ni̍h chōe ê an-ùi. 6 Goán tú-tio̍h hoān-lān, mā-sī beh hō͘ lín tit-tio̍h an-ùi kap chín-kiù; goán tit-tio̍h an-ùi, mā-sī beh hō͘ lín tit-tio̍h an-ùi, ū khùi-la̍t thang jím-siū kap goán só͘ jím-siū siâng-khoán ê khó͘-lān. 7 Goán tùi lín ê ǹg-bāng bōe iô-tāng; in-ūi goán chai, lín kap goán tâng siū-khó͘, lín mā ōe kap goán tâng siū an-ùi. 8 Hiaⁿ-tī chí-bē, goán ài lín chai goán tī [A-se-a]-séng só͘ tú-tio̍h ê hoān-lān. Goán só͘ taⁿ ê tāng-tàⁿ hui-siông tāng, tāng kàu taⁿ bōe-khí, tì-kàu giōng-beh oa̍h bōe lo̍h-khì. 9 Goán ka-kī kám-kak ū siū phòaⁿ sí-hêng; án-ni sī beh hō͘ goán bô koh óa-khò ka-kī, chí-ū óa-khò hō͘ sí-lâng koh-oa̍h ê Siōng-tè. 10 I ū kiù goán thoat-lī sí ê gûi-hiám; chiong-lâi mā ōe kiù goán. Goán khak-sìn I chiong-lâi it-tēng ōe-koh kiù goán. 11 Lín mā tio̍h ēng kî-tó lâi pang-chān goán, án-ni chiah ū chin chōe lâng ōe in-ūi goán tùi lín chin chōe lâng ê kî-tó tit-tio̍h chiok-hok lâi kám-siā Siōng-tè. 12 Goán só͘ khoa-kháu ê sī án-ni: Goán ê liông-sim chèng-bêng, goán tī chit sè-kan ê seng-oa̍h lóng sī chiàu Siōng-tè só͘ sù ê sûn-kiat kap sêng-si̍t, m̄-sī khò sio̍k-sè ê tì-hūi, sī khò Siōng-tè ê un-tián; goán tùi-thāi lín koh-khah sī án-ni. 13 Goán siá hō͘ lín ê lóng sī lín ōe-hiáu tha̍k ōe-tàng liáu-kái ê. Lín kàu taⁿ só͘ lí-kái ê chí-ū chi̍t pō͘-hūn, góa ǹg-bāng lín kàu lō͘-bé ōe oân-choân liáu-kái. Án-ni, tī lán ê Chú Iâ-so͘ ê Ji̍t, lín ōe chòe goán ê khoa-kháu, goán mā chòe lín ê khoa-kháu. 15 In-ūi ū chit-ê khak-sìn, góa chiah kè-ōe seng khì hóng-būn lín, thang hō͘ lín tit-tio̍h ka-pē ê chiok-hok; 16 chiū-sī kè-ōe khì [Má-kî-tùn] ê lō͘-tiong seng khì hóng-būn lín, koh tùi [Má-kî-tùn] tò-lâi keng-kè lín hia ê sî, hō͘ lín thang sàng góa chhut-hoat khì [Iû-thài]. 17 Chit-ê kè-ōe kiám sī chhìn-chhái chòe ê? Góa chòe chit khoán kè-ōe kiám chhut tī chū-su ê tōng-ki, liâm-piⁿ kóng “sī” liâm-piⁿ kóng “m̄-sī”? 18 Siōng-tè sī sìn-si̍t, góa tùi lín tah-èng ê ōe chiū m̄-sī liâm-piⁿ “sī” liâm-piⁿ “m̄-sī”. 19 In-ūi [Se-lah], [Thê-mô͘-thài], kap góa thoân hō͘ lín hit ūi Siōng-tè ê Kiáⁿ Iâ-so͘ Ki-tok pèng m̄-sī liâm-piⁿ “sī” liâm-piⁿ “m̄-sī” ê. Chāi-tī Iâ-so͘ Ki-tok chí-ū “sī” nā-tiāⁿ. 20 Siōng-tè it-chhè ê èng-ún chāi-tī Iâ-so͘ Ki-tok chiâⁿ-chòe “sī”, só͘-í lán chiah thong-kè I kóng “Amen” lâi kui êng-kng hō͘ Siōng-tè. 21 Hō͘ goán kap lín lâi kap Ki-tok kiat-liân koh soán-phài goán ê sī Siōng-tè. 22 I kā goán khàm-ìn, koh sù Sèng Sîn tī goán sim-lāi chòe tam-pó. 23 Góa ēng ka-kī ê sìⁿ-miā chiù-chōa kiû Siōng-tè kā góa choh-chèng. Góa sī thé-thiap lín chiah bô khì [Ko-lîm-to]. 24 Goán m̄-sī teh kiông-chè lín tio̍h sìn sím-mi̍h, hoán-tńg sī teh chòe lín ê tâng-kang, hō͘ lín thang hoaⁿ-hí, in-ūi lín ê sìn-sim ū khiā-chāi.

2 Ko-lîm-to 2

1 Só͘-í, góa koat-tēng bô beh khì lín hia, chiah-bián koh-chài hō͘ lín kan-khó͘-sim. 2 Góa nā ū hō͘ lín kan-khó͘-sim, lín chiah-ê kan-khó͘-sim ê lâng í-gōa iáu ū sím-mi̍h lâng thang hō͘ góa khoài-lo̍k? 3 Ūi-tio̍h beh pī-bián góa khì lín hia ê sî, hiah-ê eng-kai hō͘ góa hoaⁿ-hí ê lâng hoán-tńg hō͘ góa kan-khó͘-sim, góa chiah siá chêng hit tiuⁿ phoe hō͘ lín. Góa khak-sìn, góa ê hoaⁿ-hí chiū-sī lín tāi-ke ê hoaⁿ-hí. 4 Góa hui-siông khùn-jiáu koh thòng-sim, lâu chin chōe ba̍k-sái siá hit tiuⁿ phoe, m̄-sī beh hō͘ lín kan-khó͘-sim, sī beh hō͘ lín chai góa jōa-á-ni̍h thiàⁿ lín. 5 Nā ū lâng hō͘ lâng kan-khó͘-sim, m̄-sī hō͘ góa kan-khó͘-sim --- góa khah bô ài kóng-kah kè-thâu giâm-tiōng --- kàu bó͘ chi̍t ê thêng-tō͘ sī hō͘ lín tāi-ke lóng kan-khó͘-sim. 6 Hit khoán lâng siū lín tāi-to-sò͘ ê lâng khiàn-chek í-keng kàu-gia̍h. 7 Lín tian-tò tio̍h kā i sià-bián, kā i kó͘-lē, chiah-bián hō͘ i kè-thâu kan-khó͘-sim soah choa̍t-bāng. 8 Só͘-í, góa khó͘-khǹg lín, tio̍h hō͘ i chai-iáⁿ lín khak-si̍t ū thiàⁿ i. 9 Góa chêng siá hit tiuⁿ phoe sī ài-beh chai lín jōa gâu jím-siū khó-giām, sī m̄-sī hoān-sū goān-ì sūn-ho̍k. 10 Lín sià-bián sím-mi̍h lâng, góa mā sià-bián i. Góa nā ū sià-bián sím-mi̍h lâng, sī tī Ki-tok ê bīn-chêng ūi-tio̍h lín ê iân-kò͘ sià-bián i. 11 Án-ni chiah-bián hō͘ Sat-tàn kā lán phiⁿ khì, in-ūi lán chin chheng-chhó Sat-tàn ê khúi-kè. 12 Góa khì [Te̍k-lô-a] thoân Ki-tok ê Hok-im ê sî, Chú í-keng kā góa khui kang-chok ê mn̂g; 13 put-kò bô tú-tio̍h góa ê hiaⁿ-tī [Thê-to], góa bōe an-sim, chiū kap hia ê lâng saⁿ-sî khì [Má-kî-tùn]. 14 Kám-siā Siōng-tè! In-ūi kap Ki-tok kiat-liân, góa sî-siông hō͘ Siōng-tè chhōa-khì chham-ka Ki-tok khái-soân ê hâng-lia̍t. Siōng-tè koh ēng goán khì ta̍k só͘-chāi soan-iông tùi jīn-bat Ki-tok chiah ū ê phang-bī. 15 Bô-lūn tī tit-kiù á-sī tîm-lûn ê lâng tiong-kan, goán chiâⁿ-chòe Ki-tok ê phang-bī hiàn hō͘ Siōng-tè; 16 tùi teh-beh tîm-lûn ê lâng sī sí ê chhàu-bī, tùi teh-beh tit-kiù ê lâng sī oa̍h ê phang-bī. Sím-mi̍h lâng ōe kham-tit chòe chit khoán tāi-chì? 17 Goán bô chhin-chhiūⁿ chin chōe lâng chiong Siōng-tè ê ōe chòe sio̍k-hè phah-bōe, tian-tò sī chòe chi̍t ê sûn-chin ê lâng, siū Siōng-tè chhe-phài, tī I ê bīn-chêng khò Ki-tok soan-káng.

2 Ko-lîm-to 3

1 Goán kiám koh-teh chhui-chiàn ka-kī? Goán kiám tio̍h chhin-chhiūⁿ chi̍t-kóa lâng siá chhui-chiàn-su hō͘ lín, á-sī su-iàu lín ê chhui-chiàn-su? 2 Lín pún-sin chiū-sī goán ê chhui-chiàn-su, siá tī goán ê sim lāi, beh hō͘ chèng-lâng chai, chèng-lâng tha̍k. 3 Chin bêng-hián, lín sī Ki-tok só͘ siá thong-kè goán lâi sàng ê phoe. Chit tiuⁿ phoe m̄-sī ēng ba̍k-chúi siá tī chio̍h-pán, sī ēng éng-oa̍h Siōng-tè ê Sîn siá tī lâng ê sim-pán. 4 Goán thong-kè Ki-tok tùi Siōng-tè ū chit khoán ê khak-sìn chiah án-ni kóng. 5 Che m̄-sī kóng goán ka-kī ū châi-tiāu thang chòe chit-ê tāi-chì, goán ê châi-tiāu sī tùi Siōng-tè lâi ê. 6 I sù goán ū châi-tiāu thang chòe sin ê iok ê chhe-ēng; m̄-sī ēng bûn-jī siá ê, sī Sèng Sîn ê iok. Bûn-jī hō͘ lâng sí, m̄-kú Sèng Sîn hō͘ lâng oa̍h. 7 Ēng bûn-jī khek tī chio̍h-pán ê Lu̍t-hoat pan-pò͘ ê sî, Siōng-tè ê êng-kng ū hián-hiān. Tùi [Mô͘-se] ê bīn hoán-chiò chhut-lâi ê kng sui-jiân chiām-chiām teh siau-sit, m̄-kú hit-ê kng iáu chin kiông, tì-kàu [Í-sek-lia̍t] kiáⁿ-sun bōe-tàng ba̍k-chiu kim-kim kā i khòaⁿ. Hō͘ lâng tì-kàu sí ê Lu̍t-hoat to ū chit khoán ê êng-kng, 8 án-ni Sèng Sîn só͘ hoat-chhut ê êng-kng kiám bōe koh-khah tōa? 9 Hit-ê kā lâng tēng-chōe ê thé-chè nā ōe hoat-chhut chit khoán ê êng-kng, hit-ê kā lâng soan-pò͘ bô-chōe ê thé-chè só͘ hián-chhut ê êng-kng kiám bōe koh-khah tōa! 10 Án-ni, in-ūi hiān-chāi ê êng-kng pí í-chêng ê koh-khah tōa, í-chêng ê êng-kng soah bô-khì. 11 Hit-ê siau-sit-ê nā ōe hoat-chhut êng-kng, hit-ê éng-chûn-ê it-tēng ōe hián-chhut koh-khah tōa ê êng-kng. 12 In-ūi goán ū chit khoán ê ǹg-bāng chiah chiah-ni̍h ióng-kám. 13 Goán bô chhin-chhiūⁿ [Mô͘-se] tio̍h ēng phè tà ka-kī ê bīn. [Mô͘-se] án-ni chòe, chiah-bián hō͘ [Í-sek-lia̍t] kiáⁿ-sun khòaⁿ-tio̍h i bīn ê êng-kng chiām-chiām siau-sit. 14 M̄-kú in ê sim tūn, it-ti̍t kàu kin-á-ji̍t in tha̍k kū ê iok ê sî, in ê sim iáu hō͘ hit tè phè tà-teh. In-ūi chí-ū kap Ki-tok kiat-liân, hit tè phè chiah the̍h khí-lâi. 15 Sīm-chì kàu kin-á-ji̍t, in ta̍k pái tha̍k [Mô͘-se] ê Lu̍t-hoat, hit tè phè iáu tà tī in ê sim. 16 M̄-kú, koan-hē [Mô͘-se], Sèng-keng ū kì-chài, “Tng i kui-ǹg Chú ê sî, i ê phè chiah the̍h khí-lâi.” 17 Tī chia teh kóng ê “Chú” sī Sèng Sîn; ū Chú ê Sîn ê só͘-chāi chiū ū chū-iû. 18 Lán tāi-ke lóng ēng bô tà-phè ê bīn teh hoán-chiò Chú ê êng-kng; chit-ê êng-kng sī tùi Chú, chiū-sī tùi Sèng Sîn hoat chhut-lâi ê êng-kng, teh kā lán kái-chō chiâⁿ-chòe I ê hêng-siōng, hō͘ lán ū koh-khah tōa ê êng-kng.

2 Ko-lîm-to 4

1 Kì-jiân Siōng-tè ū lîn-bín goán, chiong chit-ê chit-bū kau-thok goán, goán bô sit-chì. 2 Goán pàng-sak it-chhè bô ài lâng chai ê kiàn-siàu-tāi, bô chòe khi-phiàn lâng ê tāi-chì, bô oai-khiok Siōng-tè ê ōe, chí-ū tī Siōng-tè ê bīn-chêng kong-khai hián-bêng chin-lí, lâi kiò-chhíⁿ chèng-lâng ê liông-sim. 3 Goán só͘ thoân ê hok-im nā ū am-khàm bô chheng-chhó, chí-ū tùi hiah-ê teh-beh tîm-lûn ê lâng am-khàm bô chheng-chhó nā-tiāⁿ. 4 In m̄-sìn sī in-ūi chit sè-kan ê sîn-bêng hō͘ in ê sim-ba̍k chhiⁿ-mî, bōe-tàng khòaⁿ-kìⁿ hok-im ê kng, chit-ê hok-im teh kiàn-chèng êng-kng ê Ki-tok; Ki-tok sī Siōng-tè ê hêng-siōng. 5 Goán m̄-sī thoân ka-kī, sī thoân Iâ-so͘ Ki-tok sī Chú; goán ka-kī in-ūi Iâ-so͘ ê iân-kò͘ chòe lín ê lô͘-po̍k. 6 Hit-ūi bēng-lēng kng tùi o͘-àm chiò-chhut-lâi ê Siōng-tè, chiū-sī ēng kng chiò lán lāi-sim ê Siōng-tè, hō͘ lán jīn-bat I chiò tī Iâ-so͘ Ki-tok ê bīn hit-ê êng-kng. 7 Put-kò goán chiah-ê ū chit-ê sio̍k-lêng pó-pòe ê lâng, sī chhin-chhiūⁿ thô͘ chō ê khì-khū, beh piáu-sī hit-ê chì-tōa ê lêng-le̍k sī sio̍k tī Siōng-tè, m̄-sī tùi goán chhut-lâi ê. 8 Goán siông-siông tú-tio̍h ta̍k khoán khùn-lân, m̄-kú bô khut-ho̍k; tú-tio̍h choa̍t-kéng, m̄-kú bô choa̍t-bāng; 9 siū-tio̍h khún-pek, m̄-kú bô hō͘ Siōng-tè pàng-sak; siū phah-tó, m̄-kú bô tì-kàu sí. 10 Goán put-sî tòa Iâ-so͘ ê sí tī goán ōe-sí ê seng-khu, hō͘ Iâ-so͘ ê oa̍h-miā mā thang tī goán ê sin-chiūⁿ hián-bêng. 11 Goán oa̍h tī sè-kan, ūi-tio̍h Iâ-so͘ ê iân-kò͘ sî-siông tú-tio̍h sí ê gûi-hiám, thang hō͘ I ê oa̍h-miā tī goán chit-ê ōe-sí ê seng-khu hián-bêng chhut-lâi. 12 Án-ni, sí tī goán ê lāi-bīn teh hoat-seng chok-iōng, m̄-kú oa̍h-miā tī lín ê lāi-bīn teh hoat-seng chok-iōng. 13 Sèng-keng kóng, “Góa ū sìn, só͘-í góa chiah kóng”, kun-kù chit khoán sìn-gióng ê cheng-sîn, goán mā sìn, só͘-í goán chiah kóng. 14 Goán chai, hō͘ Chú Iâ-so͘ koh-oa̍h ê Siōng-tè mā ōe hō͘ goán kap Iâ-so͘ tâng koh-oa̍h, koh chhōa goán kap lín chòe-hé kàu I ê bīn-chêng. 15 Chiah-ê it-chhè lóng sī ūi-tio̍h lín, sī beh hō͘ koh-khah chōe ê lâng tit-tio̍h Siōng-tè ê un-tián, thang hiàn koh-khah chōe ê kám-siā lâi êng-iāu Siōng-tè. 16 In-ūi án-ni, goán bô sit-chì. Sui-jiân goán gōa-chāi ê lâng chiām-chiām teh soe-pāi, goán lōe-chāi ê lâng khiok ji̍t-ji̍t teh ōaⁿ-sin. 17 Goán só͘ siū chit-ê chiām-sî koh sió-khóa ê kan-khó͘ sī beh hō͘ goán tit-tio̍h bōe thang pí, koh-khah tōa, éng-oán ê êng-kng. 18 Goán só͘ tiōng-sī ê m̄-sī khòaⁿ-ōe-tio̍h ê, sī khòaⁿ-bōe-tio̍h ê; in-ūi khòaⁿ-ōe-tio̍h ê sī chiām-sî, khòaⁿ-bōe-tio̍h ê sī éng-oán.

2 Ko-lîm-to 5

1 In-ūi goán chai, lán tī tōe-chiūⁿ teh tòa chit-ê pò͘-pîⁿ ê chhù nā thiah khí-lâi, Siōng-tè ōe hō͘ lán thiⁿ-téng ê chhù, m̄-sī lâng ê chhiú khí ê, sī éng-oán ê chhù. 2 Lán hiān-chāi tī chit-ê pò͘-pîⁿ teh thó͘-khùi, jia̍t-chhiat ǹg-bāng thang khì tiàm thiⁿ-téng ê chhù, chhin-chhiūⁿ saⁿ tha̍h lo̍h-khì, 3 nā tha̍h lo̍h-khì chiū bōe chhiah-sin lō͘-thé. 4 Lán iáu tiàm tī chit-ê pò͘-pîⁿ pē tāng-tàⁿ teh thó͘-khùi; lán m̄-sī ài thǹg-khì tōe-chiūⁿ ê thé, sī beh tha̍h sio̍k-thiⁿ ê thé, thang hō͘ oa̍h-miā kā ōe-sí ê thun lo̍h-khì. 5 Hō͘ lán ū chit-ê kái-piàn ê sī Siōng-tè, I sù Sèng Sîn hō͘ lán, kā lán pó-chèng. 6 Só͘-í, goán put-sî ū ióng-khì. Goán chai, lán iáu tòa tī chit-ê seng-khu teh oa̍h ê sî, sī kap Chú saⁿ-lī. 7 In-ūi lán teh oa̍h, m̄-sī khò ba̍k-chiu khòaⁿ, sī khò sìn-sim. 8 Goán ū ióng-khì, khah ài lī-khui chit-ê seng-khu khì kap Chú tòa. 9 Só͘-í, bô-lūn tī chit-ê seng-khu á-sī lī-khui chit-ê seng-khu, goán ê bo̍k-te̍k sī ài hō͘ Chú hoaⁿ-hí. 10 In-ūi lán lóng it-tēng tio̍h khiā tī Ki-tok ê bīn-chêng siū I sím-phòaⁿ. Ta̍k ê lâng lóng tio̍h chiàu ka-kī tī tōe-chiūⁿ ê seng-khu só͘-chòe ê, bô-lūn sī hó á-sī pháiⁿ, chiap-siū pò-èng. 11 Kì-jiân goán chai-iáⁿ tio̍h kèng-ùi Chú, goán chiū khó͘-khǹg lâng. Tùi Siōng-tè lâi khòaⁿ, goán sī sím-mi̍h khoán lâng chin chheng-chhó; góa ǹg-bāng tùi lín ê liông-sim lâi khòaⁿ mā chin chheng-chhó. 12 Goán m̄-sī beh koh tùi lín chhui-chiàn ka-kī, sī hō͘ lín ū ki-hōe ēng goán chòe khoa-kháu, hō͘ lín thang hôe-èng hiah-ê chù-tiōng gōa-piáu bô chù-tiōng lāi-sim ê lâng. 13 Goán nā bô chèng-siông, sī ūi-tio̍h Siōng-tè; goán nā chèng-siông, sī ūi-tio̍h lín. 14 In-ūi Ki-tok ê thiàⁿ chhui-pek goán chòe chit-ê kiat-lūn: Chi̍t lâng ūi-tio̍h chèng-lâng sí, chèng-lâng chiū lóng sí. 15 I ūi-tio̍h chèng-lâng sí, sī beh hō͘ hiah-ê oa̍h-teh ê lâng bô koh ūi-tio̍h ka-kī oa̍h, sī ūi-tio̍h hit-ūi thòe in sí-liáu koh-oa̍h ê Ki-tok lâi oa̍h. 16 Só͘-í, tùi taⁿ í-āu goán bô koh kun-kù lâng ê phiau-chún bat lâng. Sui-jiân goán bat ēng lâng ê phiau-chún bat Ki-tok, m̄-kú hiān-chāi bô koh án-ni bat I. 17 Án-ni, bô-lūn sím-mi̍h lâng, nā kap Ki-tok kiat-liân, chiū-sī sin chhòng-chō ê lâng; kū-ê í-keng kè-khì, taⁿ lóng pìⁿ-chòe sin-ê. 18 Chiah-ê it-chhè lóng sī Siōng-tè ê chok-ûi; I thong-kè Ki-tok hō͘ lán kap I koh hô-hó, koh chiong hō͘ lâng hô-hó ê chit-bū kau-tài goán. 19 Goán só͘ thoân ê sìn-sit sī án-ni: Siōng-tè thong-kè Ki-tok hō͘ sè-kan-lâng kap I hô-hó. I bô koh tui-kiù in ê chōe-kò, khiok chiong chit-ê hō͘ lâng hô-hó ê sìn-sit kau-thok goán. 20 Só͘-í, goán choh Ki-tok ê tāi-sài, Siōng-tè thong-kè goán kā lín khó͘-khǹg. Goán thòe Ki-tok kā lín kiû, tio̍h kap Siōng-tè hô-hó. 21 Siōng-tè hō͘ bô-chōe ê Ki-tok ūi-tio̍h lán ê iân-kò͘ chiâⁿ-chòe ū-chōe-ê, hō͘ lán thang khò Ki-tok kap Siōng-tè kiàn-li̍p ha̍p-gî ê koan-hē.

2 Ko-lîm-to 6

1 Goán choh Siōng-tè ê tâng-kang koh kā lín khó͘-khǹg, lín tùi Siōng-tè niá-siū ê un-tián m̄-thang hō͘ i lo̍k-khong. 2 In-ūi Siōng-tè kóng: Tī thang siū chiap-la̍p ê sî, góa ū thiaⁿ lí; tī chín-kiù ê ji̍t, góa ū pang-chān lí. Tio̍h thiaⁿ! Chit-chūn sī siū chiap-la̍p ê sî; kin-á-ji̍t sī chín-kiù ê ji̍t! 3 Ūi-tio̍h goán sū-hōng ê kang-chok bián siū chí-chek, chó͘-gāi pa̍t-lâng ê tāi-chì goán lóng bô chòe, 4 hoán-tńg ēng siōng-tōa ê nāi-sim, hoān-sū thong-kè hoān-lān, kan-lân, kap khùn-khó͘, piáu-sī goán sī Siōng-tè ê chhe-ēng. 5 Goán bat siū-tio̍h piⁿ-phah, koaiⁿ-kaⁿ, pō-le̍k ê siong-hāi, lô-khó͘, bô-khùn, bô-chia̍h. 6 Goán ēng sûn-kiat, tì-sek, khoan-iông, jîn-chû, óa-khò Sèng Sîn, ēng sûn-chin ê thiàⁿ, 7 thoân chin-lí ê sìn-sit kap Siōng-tè ê tōa lêng-le̍k, ēng kong-gī chòe bú-khì kong-kek tùi-te̍k, pó-hō͘ ka-kī. 8 Goán siū chun-tiōng, mā siū bú-jio̍k; tit-tio̍h pháiⁿ miâ-siaⁿ, mā tit-tio̍h hó miâ-siaⁿ. Goán hō͘ lâng khòaⁿ-chòe pián-sian, kî-si̍t goán kóng si̍t-ōe; 9 ná-chún bô-lâng bat, kî-si̍t lâng-lâng lóng bat; ná-chún sí-khì, kî-si̍t iáu teh oa̍h. Goán sui-jiân siū chhú-hoa̍t, m̄-kú bô hō͘ lâng thâi-sí; 10 sui-jiân iu-siong, m̄-kú put-sî hoaⁿ-hí; sui-jiân sàn-chhiah, m̄-kú hō͘ chin chōe lâng hó-gia̍h; chhin-chhiūⁿ bô pòaⁿ-hāng, m̄-kú ta̍k hāng lóng ū. 11 [Ko-lîm-to] ê pêng-iú, goán ê sim-heng í-keng phah-khui, khui-chhùi kā lín kóng lah. 12 M̄-sī goán tùi lín bô tō͘-liōng, sī lín tùi goán bô tō͘-liōng. 13 Góa khòaⁿ lín chòe ka-kī ê kiáⁿ kā lín kóng: Kap goán siâng-khoán, lín ê sim-heng mā tio̍h phah khah khui leh. 14 M̄-thang kap bī-sìn ê lâng khan-liân kau-chhap; kong-gī kap put-hoat ū sím-mi̍h koan-liân? Kng-bêng kap o͘-àm ná ōe-tàng kau-óng? 15 Ki-tok kap Mô͘-kúi ná ōe-tàng hô-ha̍p? Sìn kap bô-sìn ê lâng ū sím-mi̍h koan-hē? 16 Siōng-tè ê tiān kap ngó͘-siōng ná ōe-tàng pâi chòe-hé? In-ūi lán sī éng-oa̍h Siōng-tè ê tiān! Chiàu Siōng-tè só͘ kóng: Góa beh kap góa ê chú-bîn chòe-hé khiā-khí, tī in tiong-kan óng-lâi. Góa beh chòe in ê Siōng-tè, in beh chòe góa ê chú-bîn. 17 Só͘-í Chú kóng: Lín tio̍h tùi in tiong-kan chhut-khì, kap in hun-lī. Bô chheng-khì ê m̄-thang chiap-chhiok, án-ni góa chiū chiap-la̍p lín. 18 Góa beh chòe lín ê Pē, lín beh chòe góa ê kiáⁿ, cha-bó͘-kiáⁿ. Choân-lêng ê Chú ū án-ni kóng.

2 Ko-lîm-to 7

1 Chhin-ài ê pêng-iú, kì-jiân lán tit-tio̍h chiah-ê èng-ún, lán tio̍h kiat-chēng ka-kī, tû-khì it-chhè hō͘ seng-khu kap sim-lêng phah lâ-sâm ê sū, ēng kèng-ùi Siōng-tè hō͘ seng-oa̍h oân-choân sèng-hòa. 2 Lín tio̍h ēng khoan-tāi ê sim tùi-thāi goán. Goán m̄-bat khek-khui lâng, m̄-bat hāi lâng tūi-lo̍h, m̄-bat phiⁿ lâng. 3 Góa án-ni kóng, m̄-sī beh kā lín khiàn-chek. Góa í-chêng bat kóng, goán chin thiàⁿ lín, goān-ì kap lín tâng-sí tâng-oa̍h. 4 Góa chin sìn-jīm lín, ēng lín chòe khoa-kháu. Góa chhiong-móa an-ùi; tī goán it-chhè ê hoān-lān tiong, góa ū móa-móa ê hoaⁿ-hí. 5 Goán kàu [Má-kî-tùn] í-āu, seng-khu bô thang hioh-khùn, hoán-tńg ta̍k hāng tāi-chì lóng tú-tio̍h khùn-lân, gōa-bīn ū hun-cheng, lāi-bīn ū kiaⁿ-hiâⁿ. 6 M̄-kú, an-ùi sit-chì ê lâng ê Siōng-tè ū chhe [Thê-to] lâi, hō͘ goán tit-tio̍h an-ùi; 7 m̄-nā in-ūi i ū lâi, koh in-ūi i ū kóng-khí lín án-chóaⁿ kā i kó͘-lē ê tāi-chì. I ū kā goán kóng-khí lín ài kìⁿ góa, lín ê sim kan-khó͘, kap lín tùi góa ê jia̍t-chêng, hō͘ góa koh-khah hoaⁿ-hí. 8 Sui-jiân góa chêng hit tiuⁿ phoe hō͘ lín sim kan-khó͘, góa bô hō͘-hóe; m̄-kú chai-iáⁿ hit tiuⁿ phoe ū hō͘ lín chi̍t-sî sim kan-khó͘, góa ū hō͘-hóe; 9 chóng-sī hiān-chāi góa chin hoaⁿ-hí, m̄-sī in-ūi lín sim kan-khó͘, sī in-ūi lín ê kan-khó͘-sim ū tì-kàu hóe-kái. Siōng-tè ū siān-iōng lín ê kan-khó͘-sim, só͘-í goán só͘ chòe ê tùi lín bô siong-hāi. 10 In-ūi Siōng-tè siān-iōng lín ê kan-khó͘-sim lâi hō͘ lín hóe-kái thang tit-tio̍h kiù, goán chiū bô sím-mi̍h thang hō͘-hóe; m̄-kú sio̍k-sè ê kan-khó͘-sim ōe hō͘ lâng tì-kàu sí. 11 Lín khòaⁿ, Siōng-tè hiah-ni̍h gâu siān-iōng lín ê kan-khó͘-sim, chiah hō͘ lín hiah-ni̍h pek-chhiat piān-bêng ka-kī ê chheng-pe̍k, hiah-ni̍h hùn-khài, hiah-ni̍h ū kéng-kài-sim, hiah-ni̍h ū kî-thāi, hiah-ni̍h jia̍t-chêng, hiah-ni̍h ke̍k-lia̍t khiàn-chek put-hoat; tī ta̍k hāng tāi-chì, lín í-keng ū chèng-bêng ka-kī ê chheng-pe̍k. 12 Só͘-í, sui-jiân góa ū siá hit tiuⁿ phoe, m̄-kú m̄-sī ūi-tio̍h kā lâng khek-khui ê lâng, á-sī siū lâng khek-khui ê lâng, sī beh tùi lín piáu-bêng lín tī Siōng-tè ê bīn-chêng tùi goán ê jia̍t-chêng ū jōa chhim. 13 In-ūi án-ni, goán ū tit-tio̍h an-ùi. Goán m̄-nā tit-tio̍h an-ùi, mā in-ūi khòaⁿ-tio̍h [Thê-to] ê hoaⁿ-hí koh-khah hoaⁿ-hí, in-ūi i ê sim ū tùi lín tāi-ke tit-tio̍h kek-lē. 14 Góa bat tùi i po-chióng lín, lín bô hō͘ góa làu-khùi. Góa ta̍k hāng tāi-chì lóng tùi lín kóng si̍t-chāi-ōe, góa tùi [Thê-to] po-chióng lín ê ōe mā-sī si̍t-chāi. 15 Só͘-í, i siūⁿ-khí lín tāi-ke án-chóaⁿ sūn-ho̍k i, kiong-kiong kèng-kèng kā i chiap-thāi, i tùi lín ê thiàⁿ-sim chiū ná chhim. 16 Góa hui-siông hoaⁿ-hí, in-ūi góa ōe-tàng oân-choân sìn-jīm lín.

2 Ko-lîm-to 8

1 Hiaⁿ-tī chí-bē, góa ài lín chai Siōng-tè sù hō͘ [Má-kî-tùn] chèng kàu-hōe ê un-hūi. 2 In ū tùi hoān-lān keng-le̍k chin chōe khó-giām, iáu-kú chhiong-móa hoaⁿ-hí; sui-jiân hui-siông sàn-chhiah, iáu-kú hui-siông khóng-khài koan-hiàn. 3 Góa ōe-tàng kā lín chèng-bêng, in í-keng chīn in só͘-ōe hōng-hiàn, sīm-chì chhiau-kè in ê khùi-la̍t. 4 In jia̍t-chhiat kiû goán hō͘ in ū chham-ka kiù-chè [Iû-thài] sìn-tô͘ sū-hōng ê kong-êng. 5 In án-ni chòe m̄-nā chhiau-kè goán ê kî-thāi, sīm-chì chun-thàn Siōng-tè ê chí-ì tāi-seng chiong ka-kī hiàn hō͘ Chú, jiân-āu hiàn hō͘ goán. 6 Só͘-í goán khǹg [Thê-to] kè-sio̍k hia̍p-chō͘ lín, lâi oân-sêng i só͘ khai-sí chit hāng chû-siān ê kang-chok. 7 Lín ê sìn-sim, kháu-châi, tì-sek, pang-chān lâng ê jia̍t-sêng, í-ki̍p tùi goán ê thiàⁿ-sim lóng hiah-ni̍h hong-hù, goán ài lín tùi chit hāng chû-siān ê kang-chok mā tio̍h hiah-ni̍h khóng-khài. 8 Góa án-ni kóng m̄-sī teh bēng-lēng, sī ài lín chai pa̍t-lâng jia̍t-sim teh pang-chān lâng, lâi khó-giām lín ê thiàⁿ-sim sī m̄-sī chin ê. 9 Lín chai lán ê Chú Iâ-so͘ Ki-tok ê un-tián: I sui-jiân hù-chiok, m̄-kú ūi-tio̍h lín chiâⁿ-chòe sàn-chhiah, sī beh hō͘ lín in-ūi I ê sàn-chhiah chiâⁿ-chòe hù-chiok. 10 Koan-hē chit hāng tāi-chì, góa kiàn-gī lín khah hó chit sî tio̍h khì oân-sêng kū-nî khai-sí ê bō͘-koan; lín m̄-nā tāi-seng hêng-tōng, koh tāi-seng thê-chhiòng. 11 Taⁿ, lín tio̍h oân-sêng chit-ê kang-chok, ēng khí-thâu kè-ōe ê sî ê jia̍t-sim, chīn lín só͘-ōe khì chòe lâi oân-sêng. 12 Lín nā hoaⁿ-hí koan-hiàn, Siōng-tè ōe hoaⁿ-hí chiap-la̍p lín hiàn lín só͘ ū-ê, bōe iau-kiû lín hiàn lín só͘ bô-ê. 13 Góa m̄-sī beh ke-thiⁿ lín ê hū-tam, hō͘ pa̍t-lâng khah khin-sang. Kì-jiân lín hiān-chāi hù-chiok, tio̍h kiong-kip sàn-chhiah ê lâng. Án-ni, lín sàn-chhiah in hó-gia̍h ê sî, in mā ōe kiong-kip lín. Án-ni chiah ū kong-pîⁿ. 15 Chiàu Sèng-keng só͘ kì-chài: Chōe ê, bô chhun; chió ê, bô khiàm. 16 Kám-siā Siōng-tè hō͘ [Thê-to] chhin-chhiūⁿ góa chiah-ni̍h jia̍t-sim pang-chān lín. 17 I m̄-nā ū hoaⁿ-hí chiap-siū goán ê khún-kiû, koh hui-siông jia̍t-sim chū-goān pang-chān lín, koat-tēng beh khì lín hia. 18 Goán lēng-gōa phài chi̍t ê hiaⁿ-tī kap [Thê-to] chòe-hé khì; chit-ê hiaⁿ-tī tī thoân hok-im ê kang-chok ū siū-tio̍h chèng kàu-hōe ê chheng-chàn. 19 M̄-nā án-ni, i siū chèng kàu-hōe soán-phài chòe goán lú-hêng ê tâng-phōaⁿ, lâi chham-ka goán chit hāng chû-siān ê kang-chok; chit-ê kang-chok sī beh kui êng-kng hō͘ Chú, koh piáu-sī goán hoaⁿ-hí kam-goān teh chòe. 20 Goán hui-siông kín-sīn teh chhú-lí lâng khóng-khài hōng-hiàn ê chîⁿ-hāng, chiah-bián ín-khí lâng ê phoe-phêng. 21 In-ūi goán ê tōng-ki kong-bêng chèng-tāi, m̄-nā tī Chú ê bīn-chêng, tī lâng ê bīn-chêng mā-sī án-ni chòe. 22 Só͘-í goán beh koh phài chi̍t ê hiaⁿ-tī kap in chòe-hé khì. I keng-kè goán chin chōe piàn ê khó-giām, chai i tī chin chōe tāi-chì jia̍t-sim pang-chān lâng. Hiān-chāi i hui-siông sìn-jīm lín, chiū koh-khah jia̍t-sim beh pang-chān lín. 23 Kóng-tio̍h [Thê-to], i sī góa ê tâng-phōaⁿ, chòe góa ê tâng-kang pang-chān lín; kap i chòe-hé khì hiah-ê hiaⁿ-tī sī ta̍k kàu-hōe chhe-phài ê, sī Ki-tok ê êng-kng. 24 Só͘-í, lín tio̍h tùi ta̍k ê kàu-hōe kong-khai chèng-si̍t lín ê thiàⁿ-sim, koh chèng-si̍t goán tùi lín ê khoa-kháu.

2 Ko-lîm-to 9

1 Koan-hē chín-chè [Iû-thài] sìn-tô͘ ê sū, góa m̄-bián koh siá-phoe hō͘ lín. 2 Góa chai lín kam-sim pang-chān, góa bat ūi-tio̍h chit hāng tāi-chì tùi [Má-kî-tùn]-lâng khoa-kháu kóng, “[A-kai-a] ê sìn-tô͘ tī kū-nî chiū chún-pī piān.” Lín ê jia̍t-sim ū kám-tōng in tōa-pō͘-hūn ê lâng. 3 Góa ū chhe kúi-nā ê hiaⁿ-tī khì lín hia, ǹg-bāng lín chiàu góa só͘ kóng ê chún-pī piān, chiah-bián góa tī chit hāng tāi-chì ūi-tio̍h lín tùi lâng ê khoa-kháu lo̍k-khong. 4 Nā bô, [Má-kî-tùn]-lâng nā kap góa khì, khòaⁿ-tio̍h lín bô chún-pī piān, goán ōe in-ūi siuⁿ siong-sìn lín soah chin làu-khùi, lín kiám bōe koh-khah làu-khùi! 5 Só͘-í, góa siūⁿ eng-kai kó͘-lē hiah-ê hiaⁿ-tī seng khì lín hia, kiò lín chêng tah-èng beh koan-hiàn ê chîⁿ seng chún-pī piān. Án-ni góa kàu-ūi ê sî lín lóng chún-pī piān lah, piáu-sī lín ê koan-hiàn m̄-sī bián-kióng, sī kam-sim lo̍k-ì. 6 Tio̍h chai: Iā chió siu chió, iā chōe siu chōe. 7 Só͘-í ta̍k ê lâng tio̍h chiàu ka-kī só͘ koat-tēng ê lâi hiàn, m̄-thang m̄-kam, mā m̄-thang bián-kióng; in-ūi Siōng-tè thiàⁿ hoaⁿ-hí hōng-hiàn ê lâng. 8 Siōng-tè ōe chiong ta̍k hāng un-tián hong-hong hù-hù sù-hok hō͘ lín, m̄-nā ka-kī ta̍k hāng kàu-gia̍h, koh ōe-tàng chòe ta̍k hāng hó-sū. 9 Chiàu Sèng-keng só͘ kì-chài: I khóng-khài chín-chè sàn-chhiah-lâng; I ê jîn-gī sòa kàu éng-oán. 10 Kiong-kip chéng-chí hō͘ iā-chéng-ê, koh siúⁿ-sù chia̍h-mi̍h hō͘ lâng chia̍h hit-ūi Siōng-tè ōe chiong lín só͘ su-iàu ê chéng-chí kiong-kip lín, koh hō͘ chéng-chí ná chōe, mā hō͘ lín jîn-gī ê ké-chí hong-siu. 11 I ōe hō͘ lín sū-sū hù-chiok, thang sûi-sî khóng-khài si-sià, hō͘ chin chōe lâng thong-kè goán chiap-tio̍h lín ê lé-mi̍h lâi kám-siā Siōng-tè. 12 In-ūi lín só͘ chòe chit-ê sū-hōng ê kang-chok m̄-nā kái-koat sìn-tô͘ ê su-iàu, mā hō͘ in tùi Siōng-tè ê kám-siā ke-thiⁿ kàu móa chhut-lâi. 13 Thong-kè lín só͘ chòe chit-ê sū-hōng chèng-si̍t lín ū sūn-thàn só͘ soan-jīn ê Ki-tok ê hok-im, í-ki̍p lín tùi in kap kî-tha só͘-ū ê lâng khóng-khài ê koan-hiàn, thang kui êng-kng hō͘ Siōng-tè. 14 Siōng-tè sù lín bû-hān ê un-tián, hō͘ in ōe koh-khah kèng-ài lín, koh ūi-tio̍h lín kî-tó. 15 Kám-siā Siōng-tè, I ū hō͘ lán bōe-tàng hêng-iông ê un-sù!

2 Ko-lîm-to 10

1 Lâng kóng góa kap lín kìⁿ-bīn ê sî kheh-khì, kap lín saⁿ-lī ê sî giâm-hat, m̄-kú góa chit-ê [Pó-lô] ēng Ki-tok ê un-jiû kap jîn-chû chhin-sin khó͘-khǹg lín. 2 Góa khì lín hia ê sî m̄-thang pek góa tùi lín giâm-hat; tùi hiah-ê phoe-phêng kóng góa ēng sio̍k-sè ê tōng-ki chòe tāi-chì ê lâng, góa it-tēng ōe tùi in bô kheh-khì. 3 Sui-jiân lán tiàm sè-kan teh seng-oa̍h, m̄-kú bô chiàu sè-kan ê hong-sek teh cheng-chiàn. 4 Góa cheng-chiàn teh ēng ê m̄-sī sio̍k-sè, sī Siōng-tè ū ui-le̍k ê bú-khì, liân kian-kò͘ ê iàu-sài to ōe-tàng phò-hoāi. Goán thui-hoan in ê giân-lūn, 5 chiong chó͘-tòng lâng jīn-bat Siōng-tè it-chhè ê kiau-ngō͘ lóng kā siau-bia̍t, koh kái-piàn it-chhè ê ì-liām, hō͘ i oân-choân kui-sūn Ki-tok. 6 Lín oân-choân sūn-ho̍k Ki-tok liáu-āu, goán chiū chhú-hoa̍t ta̍k ê m̄ sūn-ho̍k ê lâng. 7 Lín kan-ta teh khòaⁿ gōa-piáu. Nā ū lâng káⁿ kóng i sio̍k Ki-tok, i ka-kī tio̍h koh siūⁿ khòaⁿ-bāi, i sio̍k Ki-tok, góa mā kâng-khoán sio̍k Ki-tok. 8 Chú hō͘ goán ê koân-pèng sī beh kā lín kiàn-li̍p, m̄-sī beh húi-hoāi. Góa tùi chit-ê koân-pèng nā ū khah khoa-kháu, góa mā bô kám-kak kiàn-siàu. 9 Góa bô ài hō͘ lín siūⁿ-kóng góa siá-phoe teh kā lín khióng-hat. 10 In-ūi ū lâng kóng, “[Pó-lô] ê phoe giâm-hat koh kiông-ngī, m̄-kú lâng lâi ê sî khiok nńg-chiáⁿ, kóng-ōe bô hūn-liōng.” 11 Kóng chit khoán ōe ê lâng tio̍h chai, goán bô tī lín hia ê sî phoe án-chóaⁿ siá, goán kàu lín hia ê sî mā ōe án-ni chòe. 12 Goán m̄-káⁿ kap gâu tián ka-kī ê lâng pâi-teh saⁿ-pí; in án-ni pí-chhú chhìn-tāng, hō͘-siōng pí-kàu, si̍t-chāi bô tì-hūi. 13 Liân tī lín tiong-kan ê kang-chok pau-hâm chāi-lāi, goán ê khoa-kháu lóng tī Siōng-tè tēng ê hān-tō͘ lāi, lóng bô chhiau-kè. 14 Goán bô chhiau-kè hoān-ûi, bô khì lín hia mā kóng ū khì; kî-si̍t, goán sī thâu-chi̍t ê chiong Ki-tok ê hok-im thoân hō͘ lín ê. 15 Goán pèng bô chhiau-kè hān-tō͘, ēng pa̍t-lâng só͘ lô-khó͘ ê chòe ka-kī ê sêng-chek lâi khoa-kháu. Goán só͘ ǹg-bāng ê sī lín ê sìn-sim ná cheng-tióng, goán tī lín tiong-kan kang-chok ê hoān-ûi mā ná khui-khoah. 16 Án-ni, goán chiah thang chiong hok-im thoân kàu lín í-gōa ê tōe-khu, bô ēng pa̍t-lâng tī pa̍t ê hoān-ûi ê sêng-chiū chòe khoa-kháu. 17 Chiàu Sèng-keng só͘ kóng, “Beh khoa-kháu ê lâng, tio̍h khoa-kháu Chú!” 18 In-ūi m̄-sī ka-kī chhui-chiàn, sī Chú só͘ chhui-chiàn ê chiah-sī kham-tit siū chiap-la̍p ê lâng.

2 Ko-lîm-to 11

1 Chhiáⁿ lín khoan-iông góa sió-khóa ê gû-gōng; chhiáⁿ khoan-iông góa! 2 Góa thiàⁿ lín, chhin-chhiūⁿ Siōng-tè thiàⁿ lín thiàⁿ-kah beh khí chi̍t-tò͘. In-ūi lín chhin-chhiūⁿ sûn-kiat ê chāi-sek-lú, góa ū chiong lín phòe hō͘ chi̍t ê tiōng-hu, chiū-sī Ki-tok. 3 Chhin-chhiūⁿ [Hā-oa] hō͘ chôa ê khúi-chà phiàn-khì, góa mā kiaⁿ-liáu lín ê sim-su ōe siū bê-he̍k, soah khì-sak tùi Ki-tok ê sûn-kiat kap chin-sêng. 4 In-ūi tùi ū lâng khì lín hia thoân kap goán só͘ thoân bô kâng ê Iâ-so͘, á-sī lín chiap-la̍p kap lín chêng só͘ chiap-la̍p bô kâng ê Sèng Sîn, á-sī lín chiap-siū kap lín chêng só͘ chiap-siū bô kâng ê hok-im, lín mā lóng iông-jím. 5 Kap hiah-ê “chhiau-kip sù-tô͘” pí, góa siūⁿ góa chi̍t-sut-á to bô khah-su. 6 Kiám-chhái góa kóng-ōe khah ham-bān, m̄-kú tì-sek bô pí lâng khah-su, chit hāng sū góa í-keng ū ēng ta̍k khoán hong-hoat, lī-iōng ta̍k chióng ki-hōe tùi lín piáu-bêng. 7 Ūi-tio̍h beh kā lín ko-seng, góa kàng-kē ka-kī, chiong hok-im pe̍h-pe̍h thoân hō͘ lín, án-ni kiám ū sǹg hoān-chōe? 8 Góa tī lín hia sū-hōng ê sî, góa ê só͘-hùi lóng sī pa̍t ê kàu-hōe kā góa kiong-kip. Kóng khí-lâi, góa sī teh pak-siah pa̍t ê kàu-hōe lâi pang-chān lín. 9 Góa tī lín hia ê sî, ū sím-mi̍h su-iàu lóng m̄-bat kiû lín pang-chān, kā lín mâ-hoân; it-chhè ê su-iàu lóng sī [Má-kî-tùn] lâi ê sìn-tô͘ kā góa kiong-kip. Góa í-chêng bô kā lín mâ-hoân, í-āu mā bōe kā lín mâ-hoân. 10 Góa chí só͘ sìn Ki-tok ê chin-lí chiù-chōa, tī choân [A-kai-a]-séng kéng-lāi, góa lóng káⁿ án-ni tián. 11 Sī án-chóaⁿ? Kiám kóng góa bô thiàⁿ lín? Góa ū, Siōng-tè chai! 12 Góa teh chòe ê, góa beh kè-sio̍k chòe, sī beh hō͘ hiah-ê siūⁿ-beh kap goán siâng-khoán choh “sù-tô͘” ê bô ki-hōe thang khoa-kháu. 13 Chit khoán lâng sī ké sù-tô͘, chòe tāi-chì kan-chà, ké-chòe sī Ki-tok ê sù-tô͘. 14 Che bô kî-koài, liân Sat-tàn pún-sin mā ké-chòe kng-bêng ê thiⁿ-sài. 15 Án-ni Sat-tàn ê po̍k-jîn nā ké-chòe gī ê po̍k-jîn mā m̄-sī sím-mi̍h tōa tāi-chì. Chòe-āu in ê hêng-ûi ōe siū-tio̍h èng-tit ê pò-èng. 16 Góa koh kóng chi̍t piàn, m̄-thang khòaⁿ góa chòe gōng-lâng; m̄-kú nā beh, kā góa chiap-la̍p chòe gōng-lâng, góa chiah thang tián chi̍t-ē. 17 Góa chit-chūn teh kóng ê m̄-sī Chú ê ì-sù, sī chòe chi̍t ê gōng-lâng teh tián. 18 Kì-jiân ū chiah-ni̍h chōe lâng teh tián sio̍k-sè ê sū, góa mā beh tián chi̍t-ē. 19 Lín to hiah-ni̍h khiáu, eng-kai ōe hoaⁿ-hí iông-jím góa chit-ê gōng-lâng chiah tio̍h. 20 Nā ū lâng kā lín tòng-choh lô͘-lē chhe-kah, kā lín phiⁿ, kā lín hām-hāi, kā lín khòaⁿ-khin, á-sī kā lín siàn chhùi-phóe, lín to ōe iông-jím. 21 Chin kiàn-siàu, góa tio̍h sêng-jīn, chit khoán tāi-chì goán m̄-káⁿ chòe. M̄-kú nā ū lâng káⁿ tián sím-mi̍h, chún-chòe chi̍t ê gōng-lâng lâi kóng, góa mā káⁿ. 22 In sī [Hi-pek-lâi]-lâng sī-bô? Góa mā-sī. In sī [Í-sek-lia̍t]-lâng sī-bô? Góa mā-sī. In sī [A-pek-la-hán] ê kiáⁿ-sun sī-bô? Góa mā-sī. 23 In sī Ki-tok ê chhe-ēng sī-bô? Góa chún-chòe siáu-lâng lâi kóng, góa koh-khah sī. Góa siū koh-khah chōe lô-khó͘, chē koh-khah chōe kaⁿ, siū sǹg bōe-liáu ê piⁿ-phah, chin chōe piàn hiám-hiám-á sí. 24 Góa gō͘ piàn hō͘ [Iû-thài]-lâng piⁿ-phah, ta̍k piàn sì-cha̍p ē kiám chi̍t ē. 25 Góa saⁿ piàn hō͘ [Lô-má]-lâng ēng kùn-á kòng, chi̍t piàn hō͘ lâng ēng chio̍h-thâu tìm, saⁿ piàn tú-tio̍h chûn phòa, chi̍t piàn tī hái-ni̍h phiau-liû chi̍t-mî chi̍t-ji̍t. 26 Tī lú-hêng tiong góa tú-tio̍h tōa-chúi ê gûi-hiám, chhiúⁿ-kiap ê gûi-hiám, [Iû-thài] tông-pau kap Gōa-pang-lâng ê hām-hāi; mā ū siâⁿ-chhī ê gûi-hiám, khòng-iá ê gûi-hiám, hái-siōng ê gûi-hiám, kap ké hiaⁿ-tī ê gûi-hiám. 27 Góa lô-lo̍k thoa-bôa, siông-siông bô khùn, iau-gō chhùi-ta, bô thang chia̍h, bô thang tòa, bô thang chhēng. 28 Kî-tha ê tāi-chì bián kóng, kan-ta ta̍k ji̍t ūi-tio̍h só͘-ū ê kàu-hōe khòa-lū í-keng kàu-gia̍h. 29 Siáⁿ-lâng loán-jio̍k, góa bô loán-jio̍k? Siáⁿ-lâng hoān-chhò sit-pāi, góa bô siū-khì hé-to̍h? 30 Góa nā tio̍h tián, beh tián góa ê loán-jio̍k. 31 Lán ê Chú Iâ-so͘ ê Pē Siōng-tè --- goān I ê miâ éng-oán tit-tio̍h chheng-chàn --- I chai góa bô kóng pe̍h-chha̍t. 32 Góa tī [Tāi-má-sū-kek] ê sî, [A-lí-ta̍t]-ông chhiú-ē ê chóng-tok phài siú-ōe kò͘-siú siâⁿ-mn̂g, beh kā góa lia̍h, 33 m̄-kú ū lâng ēng tōa-kha nâ tùi siâⁿ-chhiûⁿ ê thang-á kā góa lūi lo̍h-khì, hō͘ góa thoat-lī i ê chhiú.

2 Ko-lîm-to 12

1 Góa it-tēng tio̍h tián. Sui-jiân bô lī-ek, m̄-kú góa beh kóng Chú hō͘ góa ê īⁿ-siōng kap khé-sī. 2 Góa chai ū chi̍t ê Ki-tok-tô͘ tī cha̍p-sì nî chêng hō͘ Chú chhōa kàu tē-saⁿ chàn thiⁿ. Góa m̄-chai i ê seng-khu ū chiūⁿ-khì, á-sī kan-ta khòaⁿ-kìⁿ īⁿ-siōng, chí-ū Siōng-tè chai. 3 Góa chai ū chi̍t ê lâng siū chhōa kàu Lo̍k-hn̂g. I ê seng-khu ū siū chiap chiūⁿ-khì, á-sī kan-ta khòaⁿ-kìⁿ īⁿ-siōng, góa m̄-chai, chí-ū Siōng-tè chai. Tī hia i ū thiaⁿ-kìⁿ ēng ōe bōe-tàng piáu-ta̍t, ēng chhùi bōe-tàng kóng chhut ê sū. 5 Góa beh tián chit-ê lâng; m̄-kú góa ê loán-jio̍k í-gōa, góa bōe ūi-tio̍h ka-kī tián. 6 Kî-si̍t, góa nā beh tián, mā bōe sǹg-sī khong-khám, in-ūi góa beh kóng ê sī sū-si̍t. M̄-kú góa bōe tián ka-kī, chiah-bián lâng tùi góa ê phêng-kè chhiau-kè in só͘ khòaⁿ-tio̍h só͘ thiaⁿ-kìⁿ ê. 7 Ūi-tio̍h beh hō͘ góa bô in-ūi ū khòaⁿ-kìⁿ chin chōe ê khé-sī tì-kàu chū-ko tek-ì, tī góa ê seng-khu ū chi̍t ki chhì, chhin-chhiūⁿ Sat-tàn ê sù-chiá teh kā góa khó͘-chhó͘, hō͘ góa bōe siuⁿ chū-ko tek-ì. 8 Ūi-tio̍h chit hāng tāi-chì, góa bat saⁿ piàn khún-kiû Chú hō͘ hit ki chhì lī-khui. 9 I ìn góa kóng, “Góa ê un-tián ū-kàu thang boán-chiok lí ê su-iàu; in-ūi lí loán-jio̍k ê sî, góa ê khùi-la̍t chiah ōe-tàng oân-choân hoat-hui.” In-ūi án-ni, góa te̍k-pia̍t ài khoa-kháu góa ê loán-jio̍k, thang hō͘ Ki-tok ê khùi-la̍t tiàm tī góa sin-chiūⁿ. 10 Ūi-tio̍h Ki-tok ê iân-kò͘, góa kā loán-jio̍k, bú-jio̍k, khùn-khó͘, kan-lân, kap pek-hāi khòaⁿ-chòe hó, in-ūi góa loán-jio̍k ê sî, góa siōng kian-kiông. 11 Góa it-ti̍t chòe gōng-lâng, sī lín kā góa pek ê; lín tio̍h kā góa po-chióng chiah tio̍h. Sui-jiân góa bô siū tiōng-sī, mā bô khah-su hiah-ê “chhiau-kip sù-tô͘”. 12 Góa tī lín tiong-kan ū ēng siōng-tōa ê nāi-sim kiâⁿ sîn-jiah, kî-sū kap koân-lêng, chèng-bêng góa sī sù-tô͘. 13 Góa bô hō͘ lín ki-hōe pang-chān góa í-gōa, góa tùi-thāi lín pí tùi-thāi kî-tha ê kàu-hōe, ū tó chi̍t hāng chòe khah bô kàu? Góa chit-ê “bô kong-tō”, chhiáⁿ lín goân-liōng 14 Taⁿ góa tē-saⁿ piàn chún-pī beh khì hóng-būn lín. Góa bōe chiâⁿ-chòe lín ê hū-tam; góa bōe iau-kiû lín sím-mi̍h, in-ūi góa só͘ ài ê sī lín, m̄-sī lín ê chîⁿ. Eng-kai sī pē-bú ūi-tio̍h kiáⁿ-jî, m̄-sī kiáⁿ-jî ūi-tio̍h pē-bú chek-chū châi-bu̍t. 15 Góa chin hoaⁿ-hí ūi-tio̍h lín hù-chhut góa só͘-ū ê, sīm-chì liân góa pún-sin to oân-choân hù-chhut. Kiám kóng góa thiàⁿ lín jú chōe, tio̍h tit-tio̍h lín ê thiàⁿ jú chió? 16 Chún kóng góa khúi-kè to-toan, ēng khi-phiàn lī-iōng lín tit-tio̍h lī-ek, góa kiám bat kā lín thoa-lūi? 17 Góa kiám ū phài sím-mi̍h lâng khì kā lín phiⁿ? 18 Góa ū khǹg [Thê-to] khì lín hia, koh phài chi̍t ê hiaⁿ-tī kap i chòe-hé khì. [Thê-to] kiám ū phiⁿ lín? Goán kiám bô kâng sim-sîn teh chòe? Kiám bô kâng pō͘-tiau teh kiâⁿ? 19 Lín it-ti̍t siūⁿ-kóng goán tùi lín teh ūi-tio̍h ka-kī piān-hō͘ sī-bô? M̄-sī! Goán tī Siōng-tè bīn-chêng kóng Ki-tok ài goán kóng ê ōe. Chhin-ài ê pêng-iú, goán só͘ chòe ê lóng sī beh hō͘ lín tit-tio̍h chō-chiū. 20 Góa kiaⁿ-liáu khì lín hia ê sî khòaⁿ-kìⁿ lín kap góa só͘ kî-thāi ê bô sio-siâng; lín khòaⁿ-kìⁿ góa kap lín tùi góa ê kî-thāi mā bô sio-siâng. Góa kiaⁿ-liáu lín ū hun-cheng, chi̍t-tò͘, pháiⁿ-sèng-tē, chū-su, húi-pòng, kóng ka-chiah-āu-ōe, kiau-ngō͘, bô tia̍t-sū. 21 Góa kiaⁿ-liáu āu-piàn koh khì lín hia ê sî, góa ê Siōng-tè ōe hō͘ góa tī lín bīn-chêng kiàn-siàu. Góa ōe ūi-tio̍h chin chōe lâng thî-khàu, in-ūi in tùi kè-khì só͘ hoān ê chōe, ù-òe, îm-loān, hòng-tōng iáu-bē hóe-kái.

2 Ko-lîm-to 13

1 Che sī góa tē-saⁿ piàn beh khì lín hia. Sèng-keng kóng, “Bô-lūn kò sím-mi̍h, tio̍h ū nn̄g ê á-sī saⁿ ê chèng-jîn.” 2 Tùi hiah-ê í-chêng hoān-chōe kap kî-tha lóng-chóng ê lâng, tī góa tē-jī piàn hóng-būn ê sî góa ū kā lín kéng-kò, hiān-chāi góa bô tī lín hia, beh koh chi̍t piàn kā lín kéng-kò, āu-piàn góa khì ê sî, góa chiū bōe pàng lín soah; 3 in-ūi lín só͘ teh chhē Ki-tok thong-kè góa kóng-ōe ê chèng-kù, lín ōe tit-tio̍h. I tùi-thāi lín pèng m̄-sī loán-jio̍k, tian-tò tī lín tiong-kan hián-chhut tōa lêng-le̍k. 4 Sui-jiân I in-ūi loán-jio̍k siū tèng-sí tī si̍p-jī-kè, m̄-kú I khò Siōng-tè ê tōa lêng-le̍k teh oa̍h. Goán kap I kiat-liân pìⁿ-chòe loán-jio̍k, m̄-kú ūi-tio̍h lín, goán khò Siōng-tè ê tōa lêng-le̍k ōe kap I chòe-hé oa̍h. 5 Lín tio̍h séng-chhat ka-kī, khòaⁿ ū chiàu sìn-gióng teh seng-oa̍h bô? Tio̍h khó-giām ka-kī. Iâ-so͘ Ki-tok tī lín lāi-bīn, lín ka-kī it-tēng chai --- lín khó-giām nā bô thong-kè chiū bián kóng. 6 Góa ǹg-bāng lín chai, goán khó-giām lóng ū thong-kè. 7 Goán kî-kiû Siōng-tè hō͘ lín bōe chòe m̄-tio̍h; che m̄-sī beh piáu-sī goán khó-giām ū thong-kè, sī beh hō͘ lín chòe tio̍h ê tāi-chì, sui-jiân goán hō͘ lâng khòaⁿ-chòe khó-giām bô thong-kè mā bô iàu-kín. 8 In-ūi goán bōe-tàng chòe ûi-pōe chin-lí ê tāi-chì, chí-ū ióng-hō͘ chin-lí. 9 Goán loán-jio̍k, lín kian-kiông, goán chiū hoaⁿ-hí. Goán só͘ kî-kiû ê sī lín ōe-tàng chiâⁿ-chòe oân-choân. 10 In-ūi án-ni, thàn góa bô tī lín hia ê sî siá chit tiuⁿ phoe, chiah-bián góa khì ê sî ēng Chú hō͘ góa ê koân-pèng giâm-hat tùi-thāi lín; chit-ê koân-pèng sī beh kiàn-li̍p, m̄-sī beh thiah-húi. 11 Hiaⁿ-tī chí-bē, chhiáⁿ pó-tiōng. Tio̍h tui-kiû oân-choân, hō͘-siōng kó͘-lē. Tio̍h tâng-sim, hô-bo̍k siong-chhù. Goān sù chû-ài kap pêng-an ê Siōng-tè kap lín tông-chāi! 12 Tio̍h ēng sèng-kiat ê saⁿ-chim hō͘-siōng chhéng-an! Só͘-ū ê sìn-tô͘ lóng beh kā lín chhéng-an! 13 Goān Chú Iâ-so͘ Ki-tok ê un-tián, Siōng-tè ê chû-ài, Sèng Sîn ê thoân-khè, kap lín tāi-ke tông-chāi!

Ka-lia̍p-thài 1

1 Góa sī [Pó-lô]. Góa choh sù-tô͘ m̄-sī tùi lâng á-sī thong-kè lâng, sī tùi Iâ-so͘ Ki-tok kap hō͘ I tùi sí-lâng tiong koh-oa̍h ê Pē Siōng-tè ê ho͘-tiàu. 2 Góa kap tī chia ê hiaⁿ-tī chí-bē siá-phoe hō͘ [Ka-lia̍p-thài] ê chèng kàu-hōe. 3 Goān lán ê Pē Siōng-tè kap Chú Iâ-so͘ Ki-tok sù lín un-tián kap pêng-an! 4 Ūi-tio̍h beh kiù lán thoat-lī hiān-kim chit-ê siâ-ok ê sè-tāi, Ki-tok ū chiàu lán ê Pē Siōng-tè ê chí-ì ūi-tio̍h lán ê chōe hiàn I pún-sin. 5 Goān êng-kng kui hō͘ Siōng-tè ti̍t-kàu éng-éng oán-oán. Amen! 6 Lín hō͘ góa chin tio̍h-kiaⁿ! Lín kèng-jiân hiah-ni̍h kín chiū pàng-sak hit-ūi thong-kè Ki-tok ê un-tián ho͘-tiàu lín ê Siōng-tè, khì tè pa̍t ê hok-im. 7 Kî-si̍t bô pa̍t khoán ê hok-im. Góa án-ni kóng sī in-ūi ū chi̍t-kóa lâng kā lín jiáu-loān, siūⁿ-beh khiok-kái Ki-tok ê hok-im. 8 M̄-kú, bô-lūn sī goán á-sī tùi thiⁿ-téng lâi ê thiⁿ-sài, só͘ thoân ê nā kap goán í-chêng thoân hō͘ lín ê hok-im bô kâng-khoán, i eng-kai siū chiù-chó͘! 9 Goán bat kóng, hiān-chāi koh kóng chi̍t piàn: Nā ū lâng só͘ thoân ê hok-im kap lín í-keng chiap-siū ê bô kâng-khoán, i eng-kai siū chiù-chó͘! 10 Góa chit-chūn án-ni kóng, kiám sī beh tit-tio̍h lâng á-sī Siōng-tè ê chheng-chàn? Góa kiám sī beh tit-tio̍h lâng ê hoaⁿ-hí? Góa nā iáu teh siūⁿ-beh tit-tio̍h lâng ê hoaⁿ-hí, góa chiū m̄-sī Ki-tok ê lô͘-po̍k. 11 Hiaⁿ-tī chí-bē, góa ài lín chai, góa só͘ thoân ê hok-im m̄-sī lâng siūⁿ chhut-lâi ê. 12 Chit-ê hok-im, góa m̄-sī tùi lâng niá-siū, mā m̄-sī tùi lâng ha̍k-si̍p, sī tùi Iâ-so͘ Ki-tok lâi ê khé-sī. 13 Lín í-keng ū thiaⁿ-kìⁿ góa í-chêng choh [Iû-thài] kàu-tô͘ ê sî ê só͘-kiâⁿ só͘-chòe. Góa jōa-ni̍h kek-lia̍t pek-hāi Siōng-tè ê kàu-hōe, beh thiat-tí kā i húi-bia̍t. 14 Góa pí kâng chi̍t pòe ê [Iû-thài-lâng] koh-khah chek-ke̍k chun-thàn [Iû-thài] kàu-kui, koh-khah jia̍t-sim chun-siú chó͘-sian ê thoân-thóng. 15 M̄-kú, tùi Siōng-tè ê un-tián, góa iáu-bē chhut-sì I chiū koat-tēng beh kéng-soán góa, 16 tùi góa khé-sī I ê Kiáⁿ, hō͘ góa thang tùi Gōa-pang-lâng soan-iông I ê Kiáⁿ ê hok-im. Hit sî, góa lóng bô kā lâng chhéng-kàu, 17 mā bô chiūⁿ [Iâ-lō͘-sat-léng] khì kìⁿ hiah-ê pí góa khah tāi-seng choh sù-tô͘ ê lâng. Góa sûi-sî khì [A-lah-pek], jiân-āu koh tò-khì [Tāi-má-sū-kek]. 18 Saⁿ nî āu, góa chiah khì [Iâ-lō͘-sat-léng] pài-hóng [Pí-tek], kap i tòa cha̍p-gō͘ ji̍t. 19 Chú ê hiaⁿ-tī [Ngá-kok] í-gōa, kî-tha ê sù-tô͘ góa lóng bô kìⁿ-tio̍h. 20 Góa só͘ siá ê lóng sī sū-si̍t; tī Siōng-tè bīn-chêng góa bô kóng pe̍h-chha̍t. 21 Āu-lâi, góa khì [Sū-lī-a] kap [Ki-lī-ka] kéng-lāi ta̍k só͘-chāi. 22 Tng-sî, [Iû-thài] tōe-khu chèng kàu-hōe ê sìn-tô͘ lóng m̄-bat góa. 23 In chí-ū thiaⁿ-tio̍h pa̍t-lâng kóng “Hit-ê í-chêng pek-hāi lán ê lâng, hiān-chāi teh thoân i kè-khì siūⁿ-beh húi-bia̍t ê sìn-gióng!” 24 In chiū in-ūi góa kui êng-kng hō͘ Siōng-tè!

Ka-lia̍p-thài 2

1 Cha̍p-sì nî āu, góa koh chiūⁿ [Iâ-lō͘-sat-léng], [Pa-ná-pa] kap góa chòe-hé khì, mā chhōa [Thê-to] chòe-hé khì. 2 Góa chiūⁿ [Iâ-lō͘-sat-léng] sī chun-thàn Chú ê khé-sī. Góa ū su-hā tùi hiah-ê léng-siù soat-bêng góa tùi Gōa-pang-lâng só͘ thoân ê hok-im, chiah-bián hō͘ góa kè-khì á-sī hiān-chāi só͘ phun-pho phah-piàⁿ ê lóng lo̍k-khong. 3 Kap góa chòe-hé khì ê [Thê-to], sui-jiân sī [Hi-la̍h]-lâng, mā bô-lâng kiông-pek i chiap-siū kat-lé. 4 Ū chi̍t-kóa ké sìn-tô͘ pì-bi̍t chǹg-ji̍p lán tiong-kan, chhin-chhiūⁿ cheng-thàm chhàng ji̍p-lâi, beh thàm lán tùi Ki-tok Iâ-so͘ só͘ tit-tio̍h ê chū-iû, siūⁿ-beh hō͘ lán chiâⁿ-chòe lô͘-lē, sòng-sit chū-iû. 5 M̄-kú, ūi-tio̍h beh hō͘ lín thang pó-choân hok-im ê chin-lí, goán chi̍t-si-á to bô tùi in niū-pō͘. 6 M̄-kú hiah-ê hō͘ lâng khòaⁿ-chòe léng-siù ê, bô-lūn in ê tōe-ūi sī sím-mi̍h, tùi góa lóng bô éng-hióng, in-ūi Siōng-tè bô ēng gōa-māu phòaⁿ-toàn lâng. In pèng bô lēng-gōa hō͘ góa sím-mi̍h chí-sī, 7 hoán-tńg liáu-kái Siōng-tè ū chiong thoân hok-im hō͘ Gōa-pang-lâng ê jīm-bū kau-thok góa, tú chhin-chhiūⁿ I ū chiong thoân hok-im hō͘ Iû-thài-lâng ê jīm-bū kau-thok [Pí-tek]. 8 In-ūi Siōng-tè ū ēng I ê koân-lêng hō͘ góa chiâⁿ-chòe Gōa-pang-lâng ê sù-tô͘, tú chhin-chhiūⁿ I mā ū hō͘ [Pí-tek] chiâⁿ-chòe [Iû-thài]-lâng ê sù-tô͘. 9 [Ngá-kok], [Pí-tek], kap [Iok-hān] chiah-ê hō͘ lâng khòaⁿ-chòe sī kàu-hōe thiāu-chio̍h ê, kì-jiân chai-iáⁿ Siōng-tè ū chiong chit-ê te̍k-pia̍t ê sú-bēng kau-tài góa, chiū kap [Pa-ná-pa] í-ki̍p góa ak-chhiú piáu-sī lóng sī tâng-kang, koh tông-ì [Pa-ná-pa] kap góa tī Gōa-pang-lâng tiong-kan kang-chok, in tī [Iû-thài]-lâng tiong-kan kang-chok. 10 In chí-ū iau-kiû goán tio̍h koan-hoâi [Iû-thài]-lâng tiong ê sàn-chhiah-lâng; chit hāng tāi-chì tú sī goán it-ti̍t ló͘-le̍k beh chòe ê. 11 [Pí-tek] lâi-kàu [An-thê-o] ê sî, góa tng-bīn kā i hoán-tùi, in-ūi i ū thang chek-pī ê só͘-chāi. 12 Goân-lâi ū chi̍t-kóa tùi [Ngá-kok] hia lâi ê lâng iáu-bē kàu í-chêng, [Pí-tek] ū kap Gōa-pang-lâng ê hiaⁿ-tī chòe-hé chia̍h-pn̄g, m̄-kú hiah-ê lâng kàu í-āu, i soah siám-pī Gōa-pang-lâng sìn-tô͘, m̄-káⁿ koh kap in chòe-hé, in-ūi kiaⁿ hiah-ê chú-tiuⁿ Gōa-pang-lâng tio̍h siū kat-lé ê lâng. 13 Kî-tha ê [Iû-thài]-lâng sìn-tô͘ mā chhin-chhiūⁿ [Pí-tek] chòe hit khoán hu-ké ê tāi-chì, liân [Pa-ná-pa] mā siū éng-hióng khì chòe kâng-khoán bô goân-chek ê tāi-chì. 14 Góa chi̍t-ē khòaⁿ-tio̍h in bô chiàu hok-im ê chin-lí teh chòe, chiū tī chèng-lâng ê bīn-chêng tùi [Pí-tek] kóng, “Sui-jiân lí sī [Iû-thài-lâng], bô chiàu [Iû-thài-lâng] khiok chhin-chhiūⁿ Gōa-pang-lâng teh seng-oa̍h, lí ná thang kiông-pek Gōa-pang-lâng tio̍h o̍h [Iû-thài-lâng] seng-oa̍h?” 15 Lán pún-sin chhut-sì chiū-sī [Iû-thài]-lâng, m̄-sī lâng só͘ kóng ê “gōa-pang chōe-jîn”. 16 Put-kò, lán chai lâng ōe-tàng kap Siōng-tè ū ha̍p-gî ê koan-hē sī khò sìn Iâ-so͘ Ki-tok, m̄-sī khò chun-siú [Mô͘-se] ê Lu̍t-hoat. Lán ka-kī mā sìn Ki-tok Iâ-so͘, sī beh hō͘ lán tùi sìn Ki-tok ōe-tàng kap Siōng-tè ū ha̍p-gî ê koan-hē, m̄-sī khò chun-siú Lu̍t-hoat, in-ūi bô-lâng ōe-tàng khò chun-siú Lu̍t-hoat kap Siōng-tè ū ha̍p-gî ê koan-hē. 17 Lán nā siūⁿ-beh tùi óa-khò Ki-tok kap Siōng-tè ū ha̍p-gî ê koan-hē, iáu-kú hō͘ lâng khòaⁿ-chòe kap Gōa-pang-lâng sio-siâng sī chōe-jîn, án-ni Ki-tok sī chōe-ok ê chhe-ēng sī-bô? Choa̍t-tùi m̄-sī! 18 Góa nā koh khí-chō góa í-chêng só͘ thiah-húi ê, chiū chèng-bêng góa sī ûi-pōe Lu̍t-hoat ê lâng. 19 In-ūi, chiàu Lu̍t-hoat góa í-keng sí tī Lu̍t-hoat-ē, sī beh hō͘ góa ǹg Siōng-tè lâi oa̍h. Góa í-keng kap Ki-tok tâng tèng si̍p-jī-kè; 20 án-ni hiān-chāi teh oa̍h ê m̄-sī góa, sī Ki-tok tī góa ê lāi-bīn teh oa̍h. Góa hiān-chāi teh oa̍h, sī khò sìn Siōng-tè ê Kiáⁿ teh oa̍h; I thiàⁿ góa, ūi-tio̍h góa pàng-sak sìⁿ-miā. 21 Góa bô hō͘ Siōng-tè ê un-tián sit-khì hāu-le̍k. Lâng nā khò Lu̍t-hoat ōe-tàng kap Siōng-tè ū ha̍p-gî ê koan-hē, Ki-tok sí chiū bô bo̍k-te̍k.

Ka-lia̍p-thài 3

1 Lín chiah-ê gōng [Ka-lia̍p-thài]-lâng ah, siáⁿ-lâng kā lín bê-he̍k? Iâ-so͘ Ki-tok tèng si̍p-jī-kè ê sū, kiám m̄-sī chin chheng-chhó hián-sī tī lín ba̍k-chiu chêng? 2 Ū chi̍t hāng tāi-chì, góa kā lín chhéng-kàu: Lín niá-siū Sèng Sîn sī tùi siú Lu̍t-hoat á-sī tùi sìn só͘ thiaⁿ-tio̍h ê hok-im? 3 Lín ná hiah-ni̍h gōng? Lín kì-jiân tùi khò Sèng Sîn khai-sí, hiān-chāi beh khò jio̍k-sin lâi oân-sêng sī-bô? 4 Lín ū hiah-chōe siū-khó͘ ê keng-giām kiám lóng bô lō͘-ēng? It-tēng ū chiah tio̍h. 5 Siōng-tè sù lín Sèng Sîn, koh tī lín tiong-kan kiâⁿ sîn-jiah, sī in-ūi lín siú Lu̍t-hoat, á-sī in-ūi lín sìn só͘ thiaⁿ-tio̍h ê hok-im? 6 Sèng-keng án-ni kóng, “[A-pek-la-hán] sìn Siōng-tè, Siōng-tè chiū khòaⁿ i chòe gī-lâng.” 7 Só͘-í, lín tio̍h chai, sìn ê lâng chiah-sī [A-pek-la-hán] chin-chiàⁿ ê kiáⁿ-sun. 8 Sèng-keng sū-sian chiū chai, Siōng-tè ōe hō͘ Gōa-pang-lâng tùi sìn kap I ū ha̍p-gî ê koan-hē, só͘-í ū chiong chit-ê hó siau-sit seng thoân hō͘ [A-pek-la-hán], kóng “Tōe-chiūⁿ bān-bîn ōe in-ūi lí tit-tio̍h chiok-hok!” 9 Án-ni it-chhè sìn ê lâng mā ōe kap ū sìn ê [A-pek-la-hán] chòe-hé siū chiok-hok! 10 Hiah-ê khò siú Lu̍t-hoat ê lâng lóng oa̍h tī chiù-chó͘ ê ē-bīn, in-ūi Sèng-keng kóng, “Bô chun-siú kì-chài tī Lu̍t-hoat ê chheh-ni̍h só͘-ū kui-tēng ê lâng lóng tio̍h siū Siōng-tè chiù-chó͘.” 11 Án-ni, bô-lâng ōe-tàng khò siú Lu̍t-hoat kap Siōng-tè ū ha̍p-gî ê koan-hē, in-ūi Sèng-keng ū kóng, “Gī ê lâng ōe tùi sìn lâi oa̍h.” 12 M̄-kú, Lu̍t-hoat m̄-sī ēng sìn chòe kun-kù. Sèng-keng kóng, “Chun-siú Lu̍t-hoat ê lâng ōe khò Lu̍t-hoat lâi oa̍h.” 13 Ki-tok í-keng ūi-tio̍h lán siū chiù-chó͘, lâi kiù-sio̍k lán thoat-lī Lu̍t-hoat ê chiù-chó͘, in-ūi Sèng-keng kì-chài kóng, “Só͘-ū tiàu tī chhâ-téng ê lâng lóng tio̍h siū chiù-chó͘.” 14 Ki-tok án-ni chòe sī beh chiong Siōng-tè hō͘ [A-pek-la-hán] ê chiok-hok thong-kè Ki-tok Iâ-so͘ sù hō͘ Gōa-pang-lâng, mā beh hō͘ lán tùi sìn lâi niá-siū Siōng-tè só͘ èng-ún ê Sèng Sîn. 15 Hiaⁿ-tī chí-bē, góa ēng chi̍t ê ji̍t-siông seng-oa̍h ê tāi-chì chòe lē lâi soat-bêng. Lâng só͘ li̍p ê khè-iok it-tàn sêng-li̍p, chiū bōe ēng-tit ke-thiⁿ á-sī hòe-iok. 16 Siōng-tè ū tùi [A-pek-la-hán] kap i ê kiáⁿ-sun èng-ún. Sèng-keng pèng m̄-sī kóng “kiáⁿ-kiáⁿ sun-sun”, chí chin chōe lâng, sī kóng “lí ê kiáⁿ-sun”, chí chi̍t ê, chiū-sī Ki-tok. 17 Góa ê ì-sù sī án-ni: Siōng-tè ū kap [A-pek-la-hán] li̍p-iok, koh tah-èng beh siú iok. Sì-pah saⁿ-cha̍p nî āu chiah chhut-hiān ê Lu̍t-hoat bōe-tàng hòe-tû chit-ê iok hō͘ Siōng-tè ê èng-ún sit-hāu. 18 In-ūi, sêng-chiap Siōng-tè sù ê sán-gia̍p nā-sī kun-kù Lu̍t-hoat, chiū bô koh khò èng-ún. M̄-kú Siōng-tè sī chiàu I ê èng-ún si-un hō͘ [A-pek-la-hán]. 19 Án-ni, Lu̍t-hoat ū siáⁿ lō͘-ēng? Lu̍t-hoat sī ūi-tio̍h beh hō͘ lâng chai sím-mi̍h sī chōe-kò, thong-kè thiⁿ-sài tùi chi̍t ê tiong-kan-jîn lâi chè-tēng ê, kong-hāu kàu só͘ èng-ún Hit-ūi “kiáⁿ-sun” lâi-lîm ê sî chiū kiat-sok. 20 M̄-kú tan-hong chi̍t ê chòe ê tāi-chì chiū bô su-iàu tiong-kan-jîn, Siōng-tè sī tan-hong chi̍t ê chòe chit hāng tāi-chì. 21 Án-ni, Lu̍t-hoat kap Siōng-tè ê èng-ún ū saⁿ tí-chhiok bô? Choa̍t-tùi bô! In-ūi Lu̍t-hoat pan-pò͘ ê bo̍k-te̍k nā-sī beh hō͘ lâng tit-tio̍h oa̍h-miā, lâng chiū ōe-tàng khò Lu̍t-hoat kap Siōng-tè ū ha̍p-gî ê koan-hē. 22 M̄-kú Sèng-keng toàn-tēng choân sè-kài lóng tī chōe-ok koán-hat ê ē-bīn, thang hō͘ Siōng-tè chiong èng-ún thong-kè sìn Iâ-so͘ Ki-tok sù hō͘ sìn ê lâng. 23 M̄-kú “sìn” ê sî-tāi lâi-lîm í-chêng, lán hō͘ Lu̍t-hoat koaiⁿ-teh, siū kàm-sī ti̍t-kàu teh-beh lâi “sìn” ê sî-tāi hián-hiān ê sî. 24 Án-ni, tī Ki-tok lâi-lîm í-chêng, Lu̍t-hoat chòe lán ê kàm-hō͘-jîn, thang hō͘ lán tùi “sìn” kap Siōng-tè ū ha̍p-gî ê koan-hē. 25 Hiān-chāi “sìn” ê sî-tāi í-keng lâi-lîm, Lu̍t-hoat chiū bô koh chòe lán ê kàm-hō͘-jîn. 26 Lín tāi-ke tùi sìn kap Ki-tok Iâ-so͘ kiat-liân chiâⁿ-chòe Siōng-tè ê kiáⁿ-jî. 27 Lín só͘-ū niá-siū sóe-lé kap Ki-tok kiat-liân ê lâng í-keng chhēng Ki-tok, ū I ê oa̍h-miā. 28 Án-ni, bô hun [Iû-thài]-lâng á-sī Gōa-pang-lâng, lô͘-lē á-sī chū-iû-ê, ta-po͘-lâng á-sī cha-bó͘-lâng, tī Ki-tok Iâ-so͘ ê lāi-bīn lóng chiâⁿ-chòe chi̍t-thé. 29 Lín kì-jiân sio̍k Ki-tok, chiū-sī [A-pek-la-hán] ê kiáⁿ-sun, sī Siōng-tè èng-ún ê kè-sêng-jîn.

Ka-lia̍p-thài 4

1 Góa koh kóng, kè-sêng-jîn sui-jiân sī choân-pō͘ châi-sán ê só͘-iú-chiá, i tī bī-sêng-liân ê sî kap lô͘-lē bô sím-mi̍h chha-pia̍t, 2 it-ti̍t kàu lāu-pē só͘ tēng ê ji̍t-chí, tio̍h siū kàm-hō͘-jîn kap hoat-tēng tāi-lí-jîn ê kàm-tok. 3 Lán mā chhin-chhiūⁿ án-ni, tī lêng-sèng bī-sêng-liân ê sî siū ú-tiū ê lêng chi-phòe chòe lô͘-lē. 4 M̄-kú sî-kî kàu, Siōng-tè chhe ka-kī ê Kiáⁿ, hō͘ I tùi hū-jîn-lâng lâi chhut-sì, oa̍h tī Lu̍t-hoat-ē, 5 ūi-tio̍h beh kiù-sio̍k oa̍h tī Lu̍t-hoat-ē ê lâng, thang hō͘ Siōng-tè kā lán siu khí-lâi chòe kiáⁿ-jî. 6 In-ūi lín sī Siōng-tè ê kiáⁿ-jî, I ū chhe I ê Kiáⁿ ê Sîn ji̍p lín ê sim, hō͘ lín kiò “A-pa, Pē!” 7 Án-ni, lí bô koh chòe lô͘-lē, sī kiáⁿ-jî; kì-jiân sī kiáⁿ-jî, Siōng-tè chiū hō͘ lí chòe kè-sêng-jîn. 8 Í-chêng, lín m̄-bat Siōng-tè ê sî hō͘ hiah-ê pún-chit m̄-sī sîn ê sîn-bêng chòe lô͘-lē chi-phòe. 9 M̄-kú hiān-chāi lín í-keng bat Siōng-tè, á-sī kóng hō͘ Siōng-tè bat, sī án-chóaⁿ lín koh tò-khì chhē chi-phòe lêng-kài hiah-ê bô-la̍t koh bô lō͘-ēng ê sîn-lêng, chòe in ê lô͘-lē? 10 Lín siú te̍k-pia̍t ê ji̍t, ge̍h, kap nî-á-choeh-á. 11 Góa kiaⁿ-liáu góa ūi-tio̍h lín só͘-chòe ê lóng sī pe̍h-pe̍h chòe. 12 Hiaⁿ-tī chí-bē, in-ūi góa í-keng ū chiâⁿ-chòe chhin-chhiūⁿ lín, góa khún-kiû lín mā tio̍h chiâⁿ-chòe chhin-chhiūⁿ góa. Lín m̄-bat khek-khui góa. 13 Lín ōe kì-tit, góa thâu-chi̍t piàn thoân hok-im hō͘ lín ê sî sī in-ūi góa seng-khu ū pīⁿ. 14 Sui-jiân góa ê kiān-khong chiâⁿ-chòe lín ê tāng-tàⁿ, lín to bô khòaⁿ-khin góa, bô kū-choa̍t góa. Lín tian-tò chiap-thāi góa chhin-chhiūⁿ teh chiap-thāi Siōng-tè ê thiⁿ-sài, chhin-chhiūⁿ teh chiap-thāi Ki-tok Iâ-so͘. 15 Lín tng-sî ê hoaⁿ-hí boán-chiok ná soah bô-khì? Góa káⁿ kóng, lín tng-sî nā tio̍h kā ba̍k-chiu ó͘ chhut-lâi hō͘ góa mā kam-goān. 16 Hiān-chāi, góa tùi lín chiàu-si̍t kóng soah pìⁿ-chòe lín ê tùi-te̍k! 17 Hiah-ê lâng tùi lín jia̍t-chêng pèng m̄-sī chhut tī hó-ì, tian-tò sī siūⁿ-beh thiah-khui lín kap góa ê koan-hē, hō͘ lín thang tùi in jia̍t-chêng. 18 Hó-sū m̄-sī kan-ta góa kap lín chòe-hé ê sî chiah chòe, tio̍h put-sî jia̍t-sim khì chòe. 19 Góa ê sòe-kiáⁿ, ūi-tio̍h beh hō͘ lín ū Ki-tok ê khoán-sit, góa koh chi̍t piàn keng-kè siⁿ-kiáⁿ ê thòng-khó͘. 20 Góa chin ài chit-chūn chiū khì lín hia, thang ēng bô kâng-khoán ê kháu-khì kap lín kóng-ōe. Góa si̍t-chāi m̄-chai beh án-chóaⁿ tùi-thāi lín! 21 Lín chiah-ê ài hō͘ Lu̍t-hoat koán-hat ê lâng, kā góa kóng, lín kiám bô beh thiaⁿ Lu̍t-hoat teh kóng sím-mi̍h? 22 In-ūi Lu̍t-hoat ū kì-chài: [A-pek-la-hán] ū nn̄g ê kiáⁿ, chi̍t ê sī lú-pī siⁿ ê, koh chi̍t ê sī chū-iû ê hū-jîn-lâng siⁿ ê. 23 Lú-pī ê kiáⁿ sī thàn jio̍k-thé siⁿ ê; tùi chū-iû ê hū-jîn-lâng siⁿ ê kiáⁿ sī thong-kè Siōng-tè ê èng-ún. 24 Che thang ēng ē-bīn ê phì-jū lâi soat-bêng: Chit nn̄g ê hū-jîn-lâng tāi-piáu nn̄g chióng khè-iok. Chi̍t ê sī [Hā-kah], tāi-piáu [Se-nái]-soaⁿ ê iok, siⁿ ê kiáⁿ choh lô͘-lē. 25 [Hā-kah] chí [A-lah-pek] ê [Se-nái]-soaⁿ, tāi-piáu hiān-chāi ê [Iâ-lō͘-sat-léng]; in-ūi i kap i ê kiáⁿ-sun lóng sī lô͘-lē. 26 Put-kò thiⁿ-téng ê [Iâ-lō͘-sat-léng] sī chū-iû ê, sī lán ê lāu-bú. 27 In-ūi Sèng-keng ū kì-chài: Bōe hoâi-īn, bōe siⁿ-kiáⁿ ê hū-jîn-lâng ah, tio̍h hoaⁿ-hí! M̄-bat keng-kè siⁿ-kiáⁿ thòng-khó͘ ê hū-jîn-lâng ah, tio̍h tōa-siaⁿ hoaⁿ-hí chhiùⁿ-koa! In-ūi siū pàng-sak ê hū-jîn-lâng pí ū tiōng-hu ê koh-khah chōe kiáⁿ-jî! 28 Hiaⁿ-tī chí-bē, lín chhin-chhiūⁿ [Í-sat], sī Siōng-tè èng-ún ê kiáⁿ-jî. 29 Tng-sî, thàn jio̍k-thé siⁿ ê pek-hāi thàn Siōng-tè ê Sîn siⁿ ê; hiān-chāi mā-sī án-ni. 30 M̄-kú Sèng-keng án-chóaⁿ kóng? “Tio̍h kā lú-pī kap i ê kiáⁿ kóaⁿ chhut-khì, in-ūi lú-pī ê kiáⁿ bōe-tàng kap chū-iû ê hū-jîn-lâng ê kiáⁿ pîⁿ-pîⁿ kè-sêng sán-gia̍p!” 31 Só͘-í, hiaⁿ-tī chí-bē, lán m̄-sī lú-pī ê kiáⁿ-jî, sī chū-iû ê hū-jîn-lâng ê kiáⁿ-jî.

Ka-lia̍p-thài 5

1 Ūi-tio̍h beh hō͘ lán ū chū-iû, Ki-tok í-keng ū kā lán tháu-pàng. Só͘-í tio̍h khiā-chāi, m̄-thang koh chiap-siū ap-chè chòe lô͘-lē! 2 Taⁿ góa --- [Pó-lô] kā lín kóng, tio̍h chù-ì thiaⁿ: Lín nā siū kat-lé, Ki-tok chiū tùi lín lóng bô lī-ek. 3 Góa koh chi̍t piàn kā ta̍k ê kam-goān chiap-siū kat-lé ê lâng kéng-kò, chit-ê lâng ū gī-bū chun-siú choân-pō͘ ê Lu̍t-hoat! 4 Lín chiah-ê siūⁿ-beh khò chun-siú Lu̍t-hoat tit-tio̍h kap Siōng-tè ū ha̍p-gî koan-hē ê lâng, sī kap Ki-tok toān-choa̍t koan-hē, sit-lo̍h Siōng-tè ê un-tián. 5 Goán pek-chhiat teh thèng-hāu, ǹg-bāng Siōng-tè hō͘ lán kap I ū ha̍p-gî ê koan-hē; chit-ê ǹg-bāng khò Siōng-tè ê Sîn, tùi sìn chiah ōe-tàng si̍t-hiān. 6 In-ūi lán nā kap Ki-tok Iâ-so͘ kiat-liân, ū siū kat-lé á-sī bô siū kat-lé lóng bô iàu-kín, iàu-kín ê sī ū thiàⁿ ê hêng-tōng piáu-hiān chhut-lâi ê sìn-sim. 7 Lín í-keng chòe liáu chin hó; sī siáⁿ-lâng kā lín chó͘-tòng, hō͘ lín bô sūn-ho̍k chin-lí? 8 Sòe-ho̍k lín ê m̄-sī hit-ūi ho͘-tiàu lín ê Siōng-tè. 9 Sio̍k-gú kóng, “Chi̍t-sut-á kàⁿ-bú ōe hō͘ kui sn̂g ê mī-chhè hoat khí-lâi.” 10 Tī Chú ê lāi-bīn góa siong-sìn lín bōe kap góa ū bô sio-siâng ê siūⁿ-hoat. Hiah-ê teh jiáu-loān lín ê, bô-lūn sī sím-mi̍h lâng, it-tēng ōe siū Siōng-tè chek-hoa̍t. 11 Hiaⁿ-tī chí-bē, góa nā kè-sio̍k thoân tio̍h siū kat-lé, sī án-chóaⁿ góa iáu teh siū pek-hāi? Góa nā án-ni chòe, góa soan-iông Ki-tok ê si̍p-jī-kè chiū bōe siū chó͘-gāi. 12 Hiah-ê teh jiáu-loān lín ê lâng lêng-khó ka-kī iam khí-lâi! 13 Hiaⁿ-tī chí-bē, Siōng-tè ho͘-tiàu lín sī beh hō͘ lín chū-iû. Put-kò m̄-thang hō͘ lín ê chū-iû pìⁿ-chòe hòng-chhiòng su-io̍k ê ki-hōe. Tio̍h ēng thiàⁿ-sim hō͘-siōng ho̍k-bū. 14 In-ūi choân-pō͘ Lu̍t-hoat pau-hâm tī “Tio̍h thiàⁿ chhù-piⁿ chhin-chhiūⁿ thiàⁿ ka-kī” chit-ê kài-bēng. 15 Tio̍h sió-sim, lín nā iáu teh sio-kā sio-thun, ōe hō͘-siōng châu-bia̍t. 16 Góa ê ì-sù sī: Lín tio̍h chiàu Sèng Sîn ê ín-chhōa seng-oa̍h, choa̍t-tùi m̄-thang kiû boán-chiok pún-sèng ê io̍k-bōng. 17 In-ūi lâng pún-sèng ê io̍k-bōng tùi-khòng Sèng Sîn; Sèng Sîn tùi-khòng lâng ê pún-sèng. Chit nn̄g ê hō͘-siōng te̍k-tùi, tì-kàu lín bōe-tàng chiàu ka-kī só͘ ài khì chòe. 18 Lín nā hō͘ Sèng Sîn ín-chhōa, chiū bōe siū Lu̍t-hoat khòng-chè. 19 Lâng pún-sèng ê hêng-ûi chin bêng-hián, chiū-sī îm-loān, ù-òe, hò͘ⁿ-sek, 20 pài ngó͘-siōng, kiâⁿ siâ-su̍t, te̍k-tùi, tò͘-cheng, chi̍t-tò͘, siū-khì, chū-su, kiat-tóng, hun-phài, 21 oàn-tò͘, chiú-chùi, hoa-thian chiú-tōe, téng. Góa í-chêng bat kā lín kéng-kò, chit-chūn koh chi̍t piàn kā lín kéng-kò: Chòe chit khoán tāi-chì ê lâng bōe-tàng chiâⁿ-chòe Siōng-tè-kok ê chú-bîn! 22 M̄-kú Sèng Sîn só͘ kiat ê ké-chí sī: Jîn-ài, hoaⁿ-hí, hô-pêng, jím-nāi, jîn-chû, liông-siān, tiong-si̍t, 23 un-jiû, chiat-chè. Chit khoán hêng-ûi it-poaⁿ ê hoat-lu̍t bô teh kìm-chí. 24 Hiah-ê sio̍k Ki-tok Iâ-so͘ ê lâng í-keng ū chiong pún-sèng kap it-chhè ê siâ-chêng su-io̍k chòe-hé tèng-sí tī si̍p-jī-kè. 25 Kì-jiân lán khò Sèng Sîn teh oa̍h, mā tio̍h chun-chiàu Sèng Sîn ê ín-chhōa lâi oa̍h. 26 Lán m̄-thang tui-kiû hu-êng, m̄-thang pí-chhú kek-khì, hō͘-siōng chi̍t-tò͘.

Ka-lia̍p-thài 6

1 Hiaⁿ-tī chí-bē, nā ū lâng hām-lo̍h kè-sit, lín chiah-ê sio̍k-lêng ê lâng tio̍h ēng un-hô ê sim kā i kiù-chèng. Lín ka-kī mā tio̍h sió-sim, chiah-bián siū ín-iú. 2 Tio̍h hun-tam tāng-tàⁿ, án-ni chòe chiah-sī teh si̍t-hiān Ki-tok ê lu̍t-hoat. 3 Ka-kī bô gâu siūⁿ-kóng chin gâu, sī teh khi-phiàn ka-kī. 4 Ta̍k ê lâng tio̍h séng-chhat ka-kī ê hêng-ûi; nā ū hó hêng-ûi, i kan-ta thang tùi ka-kī khoa-kháu, m̄-bián kap pa̍t-lâng pí-kàu. 5 In-ūi ta̍k ê lâng tio̍h taⁿ ka-kī ê tàⁿ. 6 Ha̍k-si̍p tō-lí ê lâng tio̍h kap kàu-tō i ê lâng hun-hióng ta̍k hāng hó-mi̍h. 7 M̄-thang phiàn ka-kī, Siōng-tè sī bōe ēng-tit bú-jio̍k ê. Lâng chèng sím-mi̍h chiū siu sím-mi̍h. 8 Lâng só͘ iā-ê nā-sī ūi-tio̍h boán-chiok ka-kī ê io̍k-bōng, chiū ōe siu-sêng bia̍t-bông; lâng só͘ iā-ê nā-sī ūi-tio̍h beh hō͘ Sèng Sîn hoaⁿ-hí, chiū ōe tùi Sèng Sîn siu éng-oán ê oa̍h-miā. 9 Chòe hó-sū m̄-thang siūⁿ siān; nā bô hoe-sim, sî kàu chiū thang siu-sêng. 10 Só͘-í, bô-lūn sím-mi̍h sî-chūn, tio̍h pá-ak ki-hōe tùi chèng-lâng chòe hó-sū, te̍k-pia̍t sī tùi sìn-gióng chiâⁿ-chòe chi̍t ke ê lâng. 11 Lín khòaⁿ, góa chhin-pit ēng chiah-ni̍h tōa ê jī siá hō͘ lín! 12 Hiah-ê chù-tiōng gōa-piáu thé-biān ê lâng, siūⁿ-beh kiông-pek lín chiap-siū kat-lé. In án-ni chòe kan-ta sī bô ài ūi-tio̍h Ki-tok ê si̍p-jī-kè siū pek-hāi. 13 Kî-si̍t, liân hiah-ê siū kat-lé ê lâng pún-sin mā bô chun-siú Lu̍t-hoat. In pek lín siū kat-lé, chiah ōe-tàng khoa-kháu kóng lín ū chun-siú gōa-piáu ê lé-gî. 14 Góa leh, góa chí-ū beh khoa-kháu lán ê Chú Iâ-so͘ Ki-tok ê si̍p-jī-kè, in-ūi chit-ê si̍p-jī-kè, tùi góa lâi kóng, sè-kài í-keng tèng-sí tī si̍p-jī-kè; tùi sè-kài lâi kóng, góa mā í-keng tèng-sí. 15 Ū siū kat-lé bô siū kat-lé lóng bô tiōng-iàu; tiōng-iàu ê sī lán tio̍h chiâⁿ-chòe sin chhòng-chō ê lâng. 16 Chiàu chit-ê chún-chek seng-oa̍h ê lâng chiū-sī Siōng-tè ê [Í-sek-lia̍t] chú-bîn. Goān pêng-an kap lîn-bín kap in tông-chāi! 17 Tùi taⁿ í-āu, bô-lūn sím-mi̍h lâng to lóng m̄-thang kā góa kiáu-jiáu; in-ūi Iâ-so͘ ū tī góa ê seng-khu khàm-ìn chòe kì-hō, chèng-bêng góa sio̍k I. 18 Hiaⁿ-tī chí-bē, goān lán ê Chú Iâ-so͘ Ki-tok ê un-tián kap lín tông-chāi. Amen!

Í-hut-só͘ 1

1 Góa sī [Pó-lô], hōng Siōng-tè ê chí-ì choh Ki-tok Iâ-so͘ ê sù-tô͘; góa siá-phoe hō͘ tòa tī [Í-hut-só͘], sio̍k Ki-tok Iâ-so͘ tiong-sìn ê sìn-tô͘. 2 Goān lán ê Pē Siōng-tè kap Chú Iâ-so͘ Ki-tok sù lín un-tián kap pêng-an! 3 Tio̍h chheng-chàn lán ê Chú Iâ-so͘ Ki-tok ê Pē Siōng-tè! In-ūi I ū chiong thiⁿ-téng ta̍k khoán sio̍k-lêng ê hok-khì, thong-kè lán kap Ki-tok kiat-liân, sù hō͘ lán. 4 Chhòng-sè í-chêng, Siōng-tè í-keng thong-kè Ki-tok kéng-soán lán, hō͘ lán tī I bīn-chêng chiâⁿ-chòe sèng-kiat bô khoat-tiám ê lâng. In-ūi Siōng-tè thiàⁿ lán, 5 chá chiū koat-tēng beh thong-kè Iâ-so͘ Ki-tok hō͘ lán choh I ê kiáⁿ-jî; che sī I só͘ hoaⁿ-hí ê, sī I ê chí-ì. 6 Lán tio̍h siōng-chàn Siōng-tè êng-iāu ê un-tián, in-ūi I ū chiong I só͘ thiàⁿ ê Kiáⁿ bô tiâu-kiāⁿ sù hō͘ lán! 7 Tùi Ki-tok, thong-kè I ê sí, lán tit-tio̍h chū-iû, chōe-kò tit-tio̍h sià-bián. Siōng-tè ê un-tián si̍t-chāi chin hong-hù; 8 I ū chiong chit-ê un-tián chhiong-chhiong chiok-chiok sù hō͘ lán. I ēng ta̍k khoán ê tì-hūi kap lí-kái, 9 chiàu I só͘ hoaⁿ-hí ê chí-ì, hō͘ lán chai I chá chiū koat-tēng thong-kè Ki-tok lâi oân-sêng ò-biāu ê kè-ōe. 10 Chit-ê kè-ōe, Siōng-tè beh tī sî-ki sêng-se̍k ê sî oân-sêng, thang hō͘ tī thiⁿ-téng kap tōe-chiūⁿ it-chhè ê pī-chō-bu̍t lóng chun Ki-tok choh thâu, liân-ha̍p chòe chi̍t-ê. 11 Bān-iú lóng chiàu Siōng-tè ê kè-ōe kap koat-tēng lâi oân-sêng. Siōng-tè chiàu I tāi-seng koat-tēng ê chí-ì, thong-kè Ki-tok kéng-soán goán lâi sêng-chiap I ê ke-gia̍p. 12 Án-ni sī beh hō͘ goán chiah-ê tāi-seng chiong ǹg-bāng khǹg tī Ki-tok ê lâng thang siōng-chàn Siōng-tè ê êng-iāu. 13 Thong-kè Ki-tok, lín mā ū thiaⁿ-tio̍h chin-lí ê sìn-sit, chiū-sī hit-ê hō͘ lín tit-kiù ê hok-im, hit sî lín ū sìn, Siōng-tè chiū sù lín só͘ èng-ún ê Sèng Sîn, kā lín khàm-ìn chèng-bêng lín sio̍k I. 14 Sèng Sîn pó-chèng lán thang sêng-chiap Siōng-tè só͘ èng-ún ê ke-gia̍p, ti̍t-kàu hō͘ sio̍k I ê lâng tit-tio̍h oân-choân ê chū-iû, thang siōng-chàn I ê êng-iāu. 15 In-ūi án-ni, góa chi̍t-ē thiaⁿ-tio̍h lín tùi Chú Iâ-so͘ ū sìn-sim, tùi só͘-ū ê sìn-tô͘ ū thiàⁿ-sim, 16 chiū ūi-tio̍h lín put-sî teh kám-siā Siōng-tè. Góa tī kî-tó tiong siàu-liām lín, 17 kî-kiû lán ê Chú Iâ-so͘ Ki-tok ê Siōng-tè, êng-iāu ê Thiⁿ Pē, sù Sèng Sîn hō͘ lín ū tì-hūi kap khé-sī thang jīn-bat I. 18 Góa khún-kiû Siōng-tè khui lín ê sim-gán, hō͘ lín thang chai I soán-tiàu lín lâi tit-tio̍h ê ǹg-bāng sī sím-mi̍h. I tùi I ê sìn-tô͘ só͘ èng-ún ê chiok-hok jōa-ni̍h hong-hù koh bí-biāu, 19 tī lán sìn I ê lâng tiong-kan teh ūn-hêng ê koân-lêng jōa-ni̍h tōa. I ū ūn-iōng chit-ê khùi-la̍t hō͘ Ki-tok tùi sí-lâng tiong koh-oa̍h, koh hō͘ Ki-tok tī thiⁿ-téng chē tī I ka-kī ê chiàⁿ-pêng, 21 tī hia koán-hat só͘-ū ê thóng-léng-chiá, chiáng-koân-chiá, koân-le̍k-chiá, kap chú-chèng-chiá, m̄-nā kim-sè, mā pau-koat lâi-sè it-chhè ū koân-pèng ōe-tàng chheng-ho͘ ê hâm-thâu. 22 Siōng-tè hō͘ bān-iú lóng khut-ho̍k tī Ki-tok ê kha-ē, hō͘ I choh kàu-hōe ê goân-siú, thóng-tī bān-iú. 23 Kàu-hōe sī Ki-tok ê sin-thé, sī chhiong-móa bān-iú ê Ki-tok só͘ oân-choân chhiong-móa ê.

Í-hut-só͘ 2

1 Í-chêng in-ūi lín hoān-chōe pōe-ge̍k Siōng-tè, lêng-sèng í-keng sí. 2 Hit sî, lín thàn sè-kan ê tiâu-liû, sūn-ho̍k khong-tiong ê chiáng-koân-chiá, chiū-sī hiān-chāi teh koán-hat pōe-ge̍k Siōng-tè ê lâng hit-ê siâ-sîn. 3 Kî-si̍t, goán í-chêng mā lóng kap chiah-ê lâng kâng-khoán thàn pún-sèng ê io̍k-bōng seng-oa̍h, chiàu ka-kī jio̍k-thé ê su-io̍k kap ì-liām teh hêng-tōng. Goán kap kî-tha ê lâng kâng-khoán, chù-tiāⁿ siū Siōng-tè hêng-hoa̍t. 4 M̄-kú Siōng-tè ū hong-sēng ê lîn-bín, ēng ke̍k-tōa ê chû-ài thiàⁿ lán, 5 tī lán iáu teh pōe-ge̍k, lêng-sèng í-keng sí ê sî, I hō͘ lán kap Ki-tok chòe-hé koh-oa̍h; lín sī tùi Siōng-tè ê un-tián tit-tio̍h kiù ê. 6 Thong-kè lán kap Ki-tok Iâ-so͘ kiat-ha̍p, Siōng-tè hō͘ lán kap I chòe-hé koh-oa̍h, tī thiⁿ-téng chòe-hé chiáng-koân. 7 I án-ni chòe sī beh thong-kè Ki-tok Iâ-so͘ tùi lán hián-sī chû-ài, thang tùi āu sè-tāi piáu-bêng I bû-hān hong-hù ê un-tián. 8 In-ūi lín sī khò Siōng-tè ê un-tián tùi sìn tit-tio̍h kiù; m̄-sī khò lín ka-kī, sī khò Siōng-tè ê un-sù. 9 Kì-jiân m̄-sī khò hêng-ûi, sím-mi̍h lâng to bōe-tàng khoa-kháu. 10 In-ūi lán sī Siōng-tè chhòng-chō ê; I thong-kè Ki-tok Iâ-so͘ chhòng-chō lán, hō͘ lán thang chòe I chá chiū chún-pī ài lán chòe ê hó-sū. 11 Só͘-í, lín chiah-ê chhut-sì chòe Gōa-pang-lâng ê, tio̍h ōe kì-tit lín kè-khì ū hō͘ chū-chheng siū-kat-lé-ê, chiū-sī ēng chhiú tī seng-khu kiâⁿ kat-lé ê [Iû-thài]-lâng, kiò-chòe bô-siū-kat-lé ê lâng. 12 Lín hit sî kap Ki-tok bô koan-hē, bô sio̍k Siōng-tè ê soán-bîn, bô hūn tī Siōng-tè èng-ún ê bêng-iok, tī chit sè-kan bô ǹg-bāng, bô Siōng-tè. 13 M̄-kú lín chiah-ê í-chêng lī-khui Siōng-tè hn̄g-hn̄g ê Gōa-pang-lâng, hiān-chāi khò Ki-tok Iâ-so͘, thong-kè I ê sí, í-keng kap Siōng-tè chhin-kūn. 14 Ki-tok chhiok-chìn lán ê hô-pêng; I ū hō͘ [Iû-thài]-lâng kap Gōa-pang-lâng chiâⁿ-chòe chi̍t-ê. I ēng ka-kī ê seng-khu thiah-húi kā in keh-khui ê chhiûⁿ, siau-tû in tiong-kan ê te̍k-tùi. 15 I hòe-tû [Iû-thài] Lu̍t-hoat ê kài-bēng kap kui-lē, hō͘ nn̄g pêng thong-kè I thang chhòng-chō chi̍t ê sin ê lâng lâi chhiok-chìn hô-pêng. 16 Ki-tok thong-kè si̍p-jī-kè siau-bia̍t pí-chhú ê te̍k-tùi, hō͘ nn̄g pêng chiâⁿ-chòe chi̍t-thé, thang kap Siōng-tè hô-hó. 17 Án-ni, Ki-tok lâi sī beh thoân hô-pêng ê hok-im hō͘ só͘-ū ê lâng, pau-koat lín chiah-ê í-chêng lī-khui Siōng-tè hn̄g-hn̄g ê Gōa-pang-lâng kap chhin-kūn Siōng-tè ê [Iû-thài]-lâng. 18 Thong-kè Ki-tok, lán nn̄g pêng ê lâng lóng ōe-tàng tùi kâng chi̍t ūi Sèng Sîn lâi chhin-kūn Pē. 19 Só͘-í, lín Gōa-pang-lâng í-keng m̄-sī gōa-kok-lâng, m̄-sī chhut-gōa-lâng, sī kap Siōng-tè ê chú-bîn pîⁿ-pîⁿ choh kok-bîn, choh Siōng-tè ê ka-cho̍k, 20 kiàn-li̍p tī sian-ti kap sù-tô͘ só͘ hē ê tōe-ki téng, ēng Ki-tok Iâ-so͘ pún-sin chòe siōng tiōng-iàu ê ki-chio̍h, 21 kui-ê kiàn-tio̍k-bu̍t khò I lâi liân-chiap kiat-ha̍p, chiām-chiām khok-tōa chiâⁿ-chòe sèng ê tiān kui-sio̍k Chú. 22 Lín kap I kiat-liân, khò Sèng Sîn ê pang-chān, mā chòe-hé siū khí-chō chòe Siōng-tè khiā-khí ê só͘-chāi.

Í-hut-só͘ 3

1 In-ūi án-ni, góa --- [Pó-lô], ūi-tio̍h lín Gōa-pang-lâng choh Ki-tok Iâ-so͘ ê siû-hoān, thòe lín tùi Siōng-tè kî-kiû. 2 Lín it-tēng ū thiaⁿ-tio̍h, ūi-tio̍h lín, Siōng-tè tùi I ê un-tián ū úi-thok góa chit-ê chit-bū. 3 Siōng-tè ū chiong I ê ò-pì khé-sī hō͘ góa chai. Góa í-keng ū kán-lio̍k siá chit-ê tāi-chì, 4 lín tha̍k liáu chiū ōe bêng-pe̍k góa tùi Ki-tok ò-pì ê liáu-kái; 5 chit-ê ò-pì, tī kè-khì ê sè-tāi bô hō͘ lâng chai, hiān-chāi Siōng-tè thong-kè Sèng Sîn í-keng ū tùi I ê sèng sù-tô͘ kap sian-ti khé-sī. 6 Chit-ê ò-pì sī án-ni: Gōa-pang-lâng thong-kè hok-im thang kap [Iû-thài]-lâng pîⁿ-pîⁿ choh kè-sêng-jîn, pîⁿ-pîⁿ sio̍k chi̍t ê sin-thé, kap Ki-tok Iâ-so͘ kiat-liân pîⁿ-pîⁿ sêng-siū Siōng-tè ê èng-ún. 7 Tùi Siōng-tè pe̍h-pe̍h ê un-sù, thong-kè I tōa lêng-le̍k ê ūn-hêng, góa chiâⁿ-chòe hok-im ê chhe-ēng. 8 Góa tī Siōng-tè só͘-ū ê chú-bîn tiong sī tē-it bî-sòe, I kèng-jiân sù góa te̍k-pia̍t ê un-tián thang chiong Ki-tok sǹg bōe-liáu hong-hù ê hok-im thoân hō͘ Gōa-pang-lâng, 9 thang hō͘ só͘-ū ê lâng bêng-pe̍k Siōng-tè án-chóaⁿ si̍t-hiān I ê ò-pì. Chhòng-chō bān-iú ê Siōng-tè tī kè-khì ê sè-tāi ū chiong chit-ê ò-pì ún-ba̍t khí-lâi, 10 sī beh tī hiān-kim ê sè-tāi, thong-kè kàu-hōe, hō͘ thian-kài ê thóng-léng-chiá, koân-le̍k-chiá, lóng thang jīn-bat Siōng-tè ta̍k khoán ê tì-hūi. 11 Siōng-tè án-ni chòe sī kun-kù I éng-oán ê chí-ì; chit-ê chí-ì í-keng thong-kè lán ê Chú Ki-tok Iâ-so͘ si̍t-hiān lah. 12 Kap Ki-tok kiat-liân, thong-kè tùi I ê sìn, lán thang chhiong-móa sìn-sim hó-táⁿ chiū-kūn Siōng-tè. 13 Só͘-í, chhiáⁿ lín m̄-bián in-ūi góa ūi-tio̍h lín siū-khó͘ lâi kan-khó͘-sim; kî-si̍t che sī lín ê kong-êng. 14 In-ūi án-ni, góa kūi-lo̍h tī Thiⁿ Pē bīn-chêng, 15 tùi I thiⁿ-téng tōe-chiūⁿ lóng-chóng ê chong-cho̍k niá-siū miâ-hō. 16 Góa tùi I kî-kiû, chiàu I hong-hù ê êng-iāu, thong-kè I ê Sèng Sîn só͘ sù ê khùi-la̍t, hō͘ lín lōe-chāi ê oa̍h-miā ióng-chòng khí-lâi. 17 Góa mā kî-kiû Ki-tok ōe in-ūi lín ê sìn lâi tiàm tī lín sim-lāi, hō͘ I ê thiàⁿ chòe tōe-ki tit-tio̍h lo̍k-si̍t, 18 hō͘ lín ōe-tàng tit-tio̍h khùi-la̍t kap Siōng-tè só͘-ū ê chú-bîn lóng bêng-pe̍k Ki-tok ê thiàⁿ jōa-ni̍h tn̂g, khoah, koân, chhim, 19 koh keng-giām hit-ê chhiau-kè lâng ê tì-sek só͘ ōe-tàng liáu-kái ê thiàⁿ, hō͘ Siōng-tè ê oân-siān kā lín oân-choân chhiong-móa. 20 Siōng-tè ōe-tàng ēng I tī lán tiong-kan teh ūn-hêng ê tōa lêng-le̍k, tōa-tōa chhiau-kè lán só͘ kiû só͘ siūⁿ ê, lâi sêng-chiū it-chhè. 21 Goān êng-iāu tī kàu-hōe tiong, thong-kè Ki-tok Iâ-so͘ kui hō͘ Siōng-tè, kàu sè-sè tāi-tāi, bû-kiông bû-chīn. Amen!

Í-hut-só͘ 4

1 Chòe chi̍t ê ūi-tio̍h Chú choh siû-hoān ê lâng, góa khó͘-khǹg lín. Kì-jiân lín siū Siōng-tè ho͘-tiàu, hêng-ûi tio̍h hû-ha̍p I ê ho͘-tiàu. 2 Hoān-sū tio̍h khiam-pi, un-jiû, jím-nāi, ēng thiàⁿ hō͘-siōng khoan-iông, 3 ēng hô-pêng hō͘-siōng liân-hê, chīn-la̍t pó-chhî Sèng Sîn só͘ sù ê ha̍p-it. 4 Sin-thé chí-ū chi̍t ê; Sèng Sîn chí-ū chi̍t ūi; in-ūi Siōng-tè tiàu lán beh tit-tio̍h ê ǹg-bāng sī chi̍t ê. 5 Chú chí-ū chi̍t ūi; sìn-gióng chí-ū chi̍t ê; sóe-lé chí-ū chi̍t ê; 6 Siōng-tè chí-ū chi̍t ūi, chiū-sī bān-iú ê Pē, I tī bān-iú ê téng-bīn, koàn-chhoàn bān-iú, koh tī bān-iú tiong. 7 Lán ta̍k ê lâng lóng chiàu Ki-tok só͘ sù ê hūn-liōng niá-siū un-sù. 8 Chiàu Sèng-keng só͘ kóng: I seng-koân kàu siōng-koân ê ūi ê sî, tòa chi̍t tōa-tūi siū-lia̍h-ê kap I khì, sù un-sù hō͘ lâng. 9 “I seng-koân” chit kù ōe sī sím-mi̍h ì-sù? Chiū-sī: I mā bat kàng-lo̍h kàu tōe siōng-chhim ê só͘-chāi. 10 Án-ni, “kàng-lo̍h” Hit-ūi chiū-sī kap “seng-koân” kàu pôaⁿ-kè chèng-thiⁿ ê téng-bīn lâi chhiong-móa bān-iú Hit-ūi sī kâng chi̍t ūi. 11 I só͘ sù ê ū sù-tô͘, ū sian-ti, ū thoân-hok-im-ê, ū bo̍k-ióng-ê kap kàu-tō-ê. 12 I án-ni chòe sī beh chong-pī Siōng-tè ê chú-bîn thang chòe sū-hōng ê kang-chok lâi kiàn-li̍p Ki-tok ê thé, 13 chòe-āu, lán lóng thang tùi Siōng-tè ê Kiáⁿ ū it-tì ê sìn-gióng kap jīm-sek lâi tióng-tāi sêng-jîn, ta̍t-kàu Ki-tok oân-choân ê thêng-tō͘. 14 Án-ni, lán chiū bô koh choh gín-á, hō͘ khi-phiàn-chiá phian-chō chhut-lâi só͘-ū chhò-gō͘ ê ha̍k-soat thoa teh-kiâⁿ, phiau-lâi phiau-khì. 15 Lán hoán-tńg tio̍h ēng thiàⁿ-sim kóng chin-si̍t, tī ta̍k hong-bīn ēng choh thâu ê Ki-tok chòe phiau-chún lâi sêng-tióng. 16 Tùi Ki-tok, sin-thé ê ta̍k kun-chat hō͘-siōng liân-chiap, ta̍k ê chi-thé hoat-hui eng-kai ū ê kong-lêng, hō͘ kui-ê sin-thé tióng-tōa, ēng thiàⁿ kiàn-li̍p khí-lâi. 17 Só͘-í, góa hōng Chú ê miâ khó͘-khǹg lín, m̄-thang kè-sio̍k chhin-chhiūⁿ Gōa-pang-lâng án-ni seng-oa̍h. In in-ūi bû-ti kap ngī-sim, sim-su o͘-àm, tì-kàu su-siúⁿ khong-tōng, kap Siōng-tè só͘ sù ê oa̍h-miā keh-tn̄g. 19 In sit-khì liâm-thí ê sim, chīn-chêng hòng-chhiòng, tham-loân ta̍k khoán ù-òe ê hêng-ûi. 20 Lín pèng m̄-sī án-ni ha̍k-si̍p Ki-tok. 21 Lín eng-kai ū thiaⁿ-tio̍h koan-hē I ê tāi-chì, ū tùi I ha̍k-si̍p, in-ūi tī Iâ-so͘ chiah ū chin-lí. 22 Án-ni, tio̍h thoat-lī í-chêng ê seng-oa̍h, thǹg-khì kū ê lâng, in-ūi kū ê lâng siū su-io̍k ê bê-he̍k teh pāi-hoāi. 23 Lín ê sim-su ì-liām tio̍h oân-choân ōaⁿ-sin, 24 chiū-sī tio̍h chhēng chiàu Siōng-tè ê hêng-siōng chhòng-chō ê sin lâng, ēng kun-kù chin-lí só͘ sán-seng ê kong-gī kap sèng-kiat piáu-hiān chhut-lâi. 25 Só͘-í, lín tio̍h thoat-lī hu-ké, tio̍h tùi chhù-piⁿ kóng chin-si̍t-ōe, in-ūi lán lóng sī Ki-tok sin-thé ê chi̍t pō͘-hūn. 26 Lín nā siū-khì m̄-thang tì-kàu hoān-chōe. M̄-thang kàu ji̍t-lo̍h iáu teh siū-khì; 27 m̄-thang hō͘ Mô͘-kúi ū khang-phāng thang lī-iōng. 28 Bat chòe-chha̍t ê m̄-thang koh thau-the̍h; tio̍h khò siang-chhiú chhut-la̍t chòe-kang tit-tio̍h chèng-tong ê siu-ji̍p, ū-la̍t thang pang-chān sàn-chhiah-lâng. 29 Pháiⁿ-ōe lóng m̄-thang kóng; tian-tò tio̍h kóng chō-chiū lâng ê hó-ōe, hō͘ thiaⁿ-tio̍h ê lâng tit-tio̍h lī-ek. 30 M̄-thang hō͘ Siōng-tè ê Sèng Sîn iu-siong; in-ūi Sèng Sîn sī lín sio̍k Siōng-tè ê ìn-kì, pó-chèng lín tī chín-kiù ê Ji̍t tit-tio̍h tháu-pàng. 31 Tio̍h khì-sak it-chhè ê ok-to̍k, pháiⁿ sèng-tē, siū-khì, soan-jióng, húi-pòng, í-ki̍p it-chhè ê pháiⁿ. 32 Tio̍h chhin-chhiat jîn-chû saⁿ khoán-thāi, hō͘-siōng sià-bián, tú kap Siōng-tè ū thong-kè Ki-tok sià-bián lín kâng-khoán.

Í-hut-só͘ 5

1 Kì-jiân lín sī Siōng-tè só͘ thiàⁿ ê kiáⁿ-jî, tio̍h o̍h I. 2 Giân-hêng kú-chí tio̍h ū thiàⁿ-sim, chhin-chhiūⁿ Ki-tok thiàⁿ lán, ūi-tio̍h lán hi-seng ka-kī ê sìⁿ-miā chòe phang-phang ê chè-mi̍h hiàn hō͘ Siōng-tè. 3 Kì-jiân lín sī Siōng-tè ê chú-bîn, it-chhè îm-loān, ù-òe, á-sī tham-io̍k ê sū, tī lín tiong-kan liân kóng to m̄-thang. 4 Mā m̄-thang kóng siâ-îm, chho͘-sio̍k, á-sī hā-liû ê ōe, hoán-tńg tio̍h kám-siā. 5 Tio̍h khak-si̍t chai, îm-loān, ù-òe, tham-loân ê lâng --- tham-loân sī chi̍t chióng ê pài ngó͘-siōng --- Ki-tok kap Siōng-tè ê Kok choa̍t-tùi bô in ê hūn. 6 M̄-thang hō͘ lâng ēng khong-tōng ê ōe kā lín bê-khì; Siōng-tè ê siū-khì ōe ūi-tio̍h chiah-ê tāi-chì lîm-kàu hiah-ê pōe-ge̍k ê lâng. 7 Só͘-í, m̄-thang kap hit khoán lâng kau-chhap. 8 Lín chêng tī o͘-àm tiong, m̄-kú hiān-chāi í-keng chiâⁿ-chòe sio̍k Chú ê lâng tī kng-bêng tiong, kiâⁿ-chòe tio̍h ū kng-bêng kiáⁿ-jî ê khoán-sit; 9 kng-bêng só͘ kiat ê ké-chí sī ta̍k khoán ê liông-siān, kong-gī, kap chin-lí. 10 Tio̍h chhâ-chhut sím-mi̍h sī Chú só͘ hoaⁿ-hí ê sū. 11 M̄-thang chham-ú tī o͘-àm tiong teh chòe bô lō͘-ēng ê tāi-chì, tian-tò tio̍h kā in po̍k-lō͘ chhut-lâi. 12 In am-am khàm-khàm teh chòe ê, liân kóng to kiàn-siàu! 13 It-chhè hō͘ kng po̍k-lō͘ chiū hián-bêng, 14 in-ūi it-chhè hián-bêng chhut-lâi ê chiū chiâⁿ-chòe kng. Só͘-í ū chi̍t kù ōe án-ni kóng: Teh khùn ê lâng, khí-lâi; tio̍h tùi sí-lâng tiong peh khí-lâi! Ki-tok beh kā lí chiò-kng! 15 Só͘-í, lín ê hêng-ûi tio̍h kín-sīn, m̄-thang chòe bô tì-hūi ê lâng, tio̍h chòe chhong-bêng ê lâng, 16 siān-iōng ki-hōe, in-ūi hiān-kim ê sî-tāi siâ-ok. 17 Só͘-í, m̄-thang chòe hô͘-tô͘ ê lâng, tio̍h bêng-pe̍k sím-mi̍h sī Chú ê chí-ì. 18 M̄-thang chiú-chùi; chiú-chùi ōe hō͘ lín pāi-hoāi; hoán-tńg tio̍h hō͘ Sèng Sîn chhiong-móa. 19 Tio̍h ēng si-phian, sèng-si, lêng-koa tùi-chhiùⁿ, tùi sim-tóe chhiùⁿ sèng-si kap si-phian chheng-chàn Chú. 20 Tio̍h khò lán ê Chú Iâ-so͘ ê miâ, ūi-tio̍h ta̍k hāng tāi-chì sî-siông kám-siā Thiⁿ Pē Siōng-tè. 21 Lín tio̍h ēng kèng-ùi Ki-tok ê sim hō͘-siōng sūn-ho̍k. 22 Choh hū-jîn-lâng-ê, tio̍h chhin-chhiūⁿ sūn-ho̍k Chú án-ni sūn-ho̍k tiōng-hu. 23 In-ūi tiōng-hu sī hū-jîn-lâng ê thâu, chhin-chhiūⁿ Ki-tok sī kàu-hōe ê thâu; I pún-sin sī kàu-hōe --- I ê seng-khu ê Kiù-chú. 24 Chhin-chhiūⁿ kàu-hōe sūn-ho̍k Ki-tok, choh hū-jîn-lâng-ê eng-kai mā tio̍h sū-sū sūn-ho̍k tiōng-hu. 25 Choh tiōng-hu-ê, tio̍h thiàⁿ hū-jîn-lâng, chhin-chhiūⁿ Ki-tok thiàⁿ kàu-hōe, ūi-tio̍h kàu-hōe hi-seng ka-kī. 26 I án-ni chòe sī beh thong-kè I ê ōe ēng chúi sóe chheng-khì lâi sèng-hòa kàu-hōe kui Siōng-tè, 27 hō͘ kàu-hōe ū êng-kng, lóng bô ù-tiám, bô jiâu-bûn, á-sī kî-tha chit khoán ê khoat-tiám, chiâⁿ-chòe sèng-kiat bô hâ-chhû thang hiàn hō͘ ka-kī. 28 Siâng-khoán, tiōng-hu tio̍h thiàⁿ ka-kī ê hū-jîn-lâng, chhin-chhiūⁿ thiàⁿ ka-kī ê seng-khu. Thiàⁿ hū-jîn-lâng chiū-sī thiàⁿ ka-kī. 29 Bô-lâng oàn-hūn ka-kī ê seng-khu, tian-tò sī kā i pó-ióng, chiàu-kò͘, kap Ki-tok tùi-thāi kàu-hōe kâng-khoán, 30 in-ūi lán sī I seng-khu ê chi-thé. 31 Sèng-keng kóng, “In-ūi án-ni, lâng ōe lī-khui pē-bú, kap i ê bó͘ kiat-ha̍p, nn̄g lâng chiâⁿ-chòe chi̍t-thé.” 32 Chit-ê keng-bûn khé-sī chi̍t ê ke̍k-tōa ê ò-pì; chiàu góa ê lí-kái, che sī teh chí Ki-tok kap kàu-hōe ê koan-hē. 33 Chóng-sī, che mā sek-iōng tī lín ta̍k ê lâng: Tiōng-hu tio̍h thiàⁿ ka-kī ê hū-jîn-lâng, chhin-chhiūⁿ thiàⁿ ka-kī; hū-jîn-lâng tio̍h kèng-tiōng i ê tiōng-hu.

Í-hut-só͘ 6

1 Choh jî-lú-ê, tio̍h sūn-ho̍k pē-bú, che sī sìn Chú ê lâng eng-kai ū ê pún-hūn. 2 “Tio̍h hàu-kèng pē-bú”, che sī thâu-chi̍t tiâu hù-tài èng-ún ê kài-bēng, “án-ni chòe lín chiū ōe ta̍k hāng hó-sè, tī chit-ê tōe kú-tn̂g khiā-khí.” 4 Choh pē-bú-ê, m̄-thang kek lín ê jî-lú siū-khì, tio̍h chiàu Chú ê koán-kàu kap kà-sī kā in pôe-ióng. 5 Choh lô͘-lē-ê, kap sūn-ho̍k Ki-tok kâng-khoán, tio̍h ēng kèng-ùi kap kiaⁿ-hiâⁿ choan-sim sūn-ho̍k lín tī sè-chiūⁿ ê chú-lâng. 6 M̄-thang tī lâng ê bīn-chêng kò͘-ì chòe hō͘ lâng khòaⁿ, hō͘ lâng hoaⁿ-hí; tio̍h choh Ki-tok ê lô͘-lē, tùi sim-lāi chun-thàn Siōng-tè ê chí-ì, 7 kam-sim lo̍k-ì chīn lô͘-lē ê pún-hūn, chhin-chhiūⁿ teh ho̍k-sāi Chú, m̄-sī teh ho̍k-sāi lâng. 8 Tio̍h chai, bô-lūn sī lô͘-lē á-sī chū-iû-ê, Chú lóng ōe chiàu ta̍k ê lâng ê hó hêng-ûi kā in pò-tap. 9 Choh chú-lâng-ê, mā tio̍h ēng kâng-khoán ê thài-tō͘ tùi-thāi lín ê lô͘-lē; m̄-thang kā in ui-hia̍p. Tio̍h chai, lín kap lín ê lô͘-lē lóng sio̍k kâng chi̍t ūi thiⁿ-téng ê Chú-lâng; I ēng kâng-khoán ê phiau-chún tùi-thāi ta̍k ê lâng. 10 Chòe-āu, góa khǹg lín tio̍h kap Chú kiat-liân, khò I ê tōa lêng-le̍k chòe kian-kiông ê lâng. 11 Tio̍h chhēng Siōng-tè só͘ sù choân-thò ê bú-chong, hō͘ lín khiā-chāi, thang tí-khòng Mô͘-kúi ê khúi-kè. 12 In-ūi lán m̄-sī kap ū huih ū bah ê lâng teh kau-chiàn, sī kap thian-kài ê siâ-lêng, chiū-sī chit-ê o͘-àm sè-tāi ê ú-tiū thóng-léng-chiá, koân-le̍k-chiá, chiáng-koân-chiá teh kau-chiàn. 13 Só͘-í, tio̍h ēng Siōng-tè só͘ sù choân-thò ê bú-chong lâi chong-pī ka-kī, thang tī siâ-ok ê ji̍t-chí ōe-tàng tí-khòng tùi-te̍k ê kong-kek, kian-chhî kàu-tóe chhî-siú tīn-tōe. 14 Só͘-í, tio̍h khiā-chāi, ēng chin-lí chòe tòa hâ, ēng chèng-gī chòe hō͘-heng-kah chhēng, 15 ēng chún-pī hó-sè ê hô-pêng ê hok-im chòe ôe chhēng. 16 Tio̍h put-sî ēng sìn-sim chòe tîn-pâi, thang phah-hoa Siâ-ok-chiá siā lâi hé ê chìⁿ. 17 Tio̍h ēng chín-kiù chòe thâu-khoe, ēng Sèng Sîn chòe kiàm, chiū-sī Siōng-tè ê ōe. 18 Tio̍h khò Sèng Sîn choân-sim kî-tó, siông-siông kî-kiû. Tio̍h put-sî kéng-séng, sî-siông ūi-tio̍h só͘-ū ê sìn-tô͘ kî-tó; 19 mā ūi-tio̍h góa kî-tó, kiû Siōng-tè sù góa sìn-sit, thang hó-táⁿ khui-chhùi soan-iông hok-im ê ò-pì. 20 Ūi-tio̍h chit-ê hok-im, góa hiān-chāi chòe chi̍t ê kòa thih-liān ê tāi-sài. Tio̍h ūi-tio̍h góa kî-tó, hō͘ góa thang hó-táⁿ soan-iông eng-kai kóng ê. 21 Lán chhin-ài ê hiaⁿ-tī, iā-sī Chú tiong-si̍t ê chhe-ēng [Chhui-ki-kó͘], ōe pò lín chai góa ê tāi-chì kap kūn-hóng. 22 Góa chhe i khì lín hia ê bo̍k-te̍k sī beh pò lín chai goán chia ê chêng-hêng, thang hō͘ lín an-sim. 23 Goān Pē Siōng-tè kap Chú Iâ-so͘ Ki-tok sù pêng-an, jîn-ài, kap sìn-sim hō͘ chèng hiaⁿ-tī chí-bē! 24 Goān Siōng-tè ê un-tián kap só͘-ū ēng bōe-piàn ê thiàⁿ lâi thiàⁿ lán ê Chú Iâ-so͘ Ki-tok ê lâng tông-chāi!

Hui-li̍p-pí 1

1 Góa --- [Pó-lô] kap [Thê-mô͘-thài] sī Ki-tok Iâ-so͘ ê lô͘-po̍k. Goán siá-phoe hō͘ tòa tī [Hui-li̍p-pí], kap Ki-tok Iâ-so͘ kiat-liân lóng-chóng ê sìn-tô͘ í-ki̍p kok ūi kam-tok kap chip-sū. 2 Goān lán ê Pē Siōng-tè kap Chú Iâ-so͘ Ki-tok sù lín un-tián kap pêng-an! 3 Góa ta̍k piàn siūⁿ-tio̍h lín ê sî lóng kám-siā góa ê Siōng-tè; 4 ta̍k piàn ūi-tio̍h lín chèng-lâng kî-tó ê sî lóng ēng hoaⁿ-hí ê sim kî-kiû, 5 in-ūi lín, tùi thâu-chi̍t ji̍t khí kàu hiān-chāi, lóng ū chham-ú soan-iông hok-im ê kang-chok. 6 Góa chhim-sìn hit-ūi tī lín tiong-kan khai-sí chòe bí-hó kang-chok ê Siōng-tè ōe tī Ki-tok Iâ-so͘ ê Ji̍t kā i oân-sêng. 7 Góa siông-siông teh siàu-liām lín, tùi lín chèng-lâng ū chit khoán ê kám-chêng sī tong-jiân ê, in-ūi bô-lūn góa hiān-chāi tī kaⁿ-ga̍k lāi á-sī í-chêng ūi-tio̍h hok-im piān-hō͘ kap choh-chèng ê sî, lín lóng ū kap góa hun-hióng Siōng-tè ê un-sù. 8 Góa ēng Ki-tok Iâ-so͘ ê thiàⁿ-sim jōa-ni̍h siàu-liām lín tāi-ke, Siōng-tè thang kā góa choh-chèng. 9 Góa só͘ kî-kiû ê sī án-ni: Lín ê thiàⁿ ōe ná ke-thiⁿ, lín ê tì-sek kap tùi ta̍k hāng ê phòaⁿ-toàn-le̍k mā ná chìn-pō͘, 10 hō͘ lín ōe-hiáu hun-pia̍t hit-ê siōng-hó ê tāi-chì, án-ni tī Ki-tok ê Ji̍t lín chiah ōe chiâⁿ-chòe sûn-kiat bô thang hiâm ê lâng, 11 chhiong-móa khò Iâ-so͘ Ki-tok chiah ū ê hó tek-hēng, thang chiong êng-kng kap o-ló kui hō͘ Siōng-tè. 12 Hiaⁿ-tī chí-bē, góa ài lín chai, góa só͘ tú-tio̍h ê tāi-chì tian-tò hō͘ hok-im koh-khah chìn-tián, 13 tì-kàu ông-kiong ê choân-thé kéng-ōe í-ki̍p kî-tha só͘-ū ê lâng lóng chai-iáⁿ góa koaiⁿ-kaⁿ sī ūi-tio̍h Ki-tok ê iân-kò͘. 14 Chin chōe hiaⁿ-tī chí-bē mā in-ūi góa koaiⁿ-kaⁿ tùi Chú koh-khah ū khak-sìn, koh-khah hó-táⁿ bô kiaⁿ-hiâⁿ lâi thoân Siōng-tè ê tō-lí. 15 Ū lâng thoân Ki-tok sī chhut tī chi̍t-tò͘ kap hò͘ⁿ cheng-lūn; mā ū lâng sī chhut tī hó ì-sù. 16 Chiah-ê lâng sī chhut tī thiàⁿ-sim, chai-iáⁿ góa siū jīm-bēng sī beh ūi hok-im piān-hō͘. 17 Lēng-gōa hiah-ê lâng soan-iông Ki-tok sī chhut tī iá-sim, tōng-ki bô sûn, siūⁿ-beh thàn góa koaiⁿ-kaⁿ ê sî ke-thiⁿ góa ê kan-khó͘. 18 Án-ni ū sím-mi̍h koan-hē? Sī ké-ì á-sī chin-sim, bô-lūn án-chóaⁿ, Ki-tok siū thoân-khui, góa chiū ūi-tio̍h án-ni hoaⁿ-hí! Tio̍h, góa beh kè-sio̍k hoaⁿ-hí, 19 in-ūi góa chai, tùi lín ê kî-tó kap Iâ-so͘ Ki-tok ê Sîn ê pang-chān, góa it-tēng ōe tit-tio̍h chū-iû. 20 Góa pek-chhiat kî-thāi kap ǹg-bāng ê, chiū-sī bô chi̍t hāng tāi-chì ōe hō͘ góa kiàn-siàu; góa sî-sî khek-khek, te̍k-pia̍t sī hiān-chāi, ū kàu-gia̍h ê ióng-khì, sī oa̍h á-sī sí, thang hō͘ Ki-tok thong-kè góa chit-ê lâng tit-tio̍h êng-iāu. 21 In-ūi, tùi góa lâi kóng, teh-oa̍h sī Ki-tok, sí sī lī-ek. 22 Nā-sī kè-sio̍k oa̍h-teh ōe-tàng chòe khah chōe ū hāu-kó ê kang-chok, góa soah m̄-chai beh kéng sím-mi̍h. 23 Góa chìn-thòe-lióng-lân. Góa si̍t-chāi chin ài lī-khui chit-ê sè-kan kap Ki-tok chòe-hé, che eng-kai sī khah hó. 24 Put-kò, ūi-tio̍h lín ê iân-kò͘, góa koh-khah tio̍h oa̍h lo̍h-khì. 25 Tùi chit hāng, góa khak-sìn; góa chai góa beh oa̍h lo̍h-khì, beh kè-sio̍k kap lín tāi-ke oa̍h lo̍h-khì, sī beh hō͘ lín ê sìn-gióng koh-khah chìn-pō͘, koh-khah ū hoaⁿ-hí, 26 án-ni góa kap lín koh saⁿ-kìⁿ ê sî, lín ōe in-ūi Ki-tok Iâ-so͘ ū chhiong-hun ê lí-iû thang ēng góa chòe khoa-kháu. 27 Bô-lūn án-chóaⁿ, lín ê giân-hêng kú-chí tio̍h hû-ha̍p Ki-tok ê hok-im. Án-ni, bô-lūn góa ōe-tàng koh khì kap lín saⁿ-kìⁿ á-bōe, lóng ōe-tàng thiaⁿ-tio̍h lín ê tāi-chì, chai lín lóng ēng siâng chi̍t ê sim-chì khiā-chāi, tâng-sim saⁿ-kap ūi-tio̍h hok-im ê sìn-gióng phah-piàⁿ. 28 Bô-lūn chòe sím-mi̍h, m̄-bián kiaⁿ hoán-tùi-chiá ê ui-hia̍p, án-ni thang chèng-bêng in ōe sit-pāi, lín ōe tek-sèng; chit-ê tek-sèng sī tùi Siōng-tè lâi ê. 29 In-ūi Siōng-tè m̄-nā ū sù lín te̍k-pia̍t ê un-hūi lâi sìn Ki-tok, mā hō͘ lín ūi-tio̍h Ki-tok siū-khó͘, 30 lâi chham-ú siâng-khoán ê cheng-chiàn; chit-ê cheng-chiàn lín ū khòaⁿ-tio̍h góa án-chóaⁿ chiàn, hiān-chāi koh thiaⁿ-kìⁿ góa iáu teh chiàn.

Hui-li̍p-pí 2

1 Kì-jiân lín kap Ki-tok kiat-liân ū tit-tio̍h kek-lē; kì-jiân lín tùi I ê thiàⁿ ū tit-tio̍h an-ùi; kì-jiân lín kap Sèng Sîn ū kau-gî; kì-jiân lín ū keng-giām Siōng-tè ê chû-pi lîn-bín; 2 lín tio̍h ū siâng-khoán ê sim-chì, siâng-khoán ê thiàⁿ-sim, hô-hâi ê kám-chêng, it-tì ê siūⁿ-hoat, thang hō͘ góa chhiong-móa hoaⁿ-hí. 3 M̄-thang chū-su chū-lī, mā m̄-thang tui-kiû hu-êng; hoán-tńg tio̍h ū khiam-sùn ê sim, khòaⁿ pa̍t-lâng pí ka-kī khah gâu. 4 Lín ta̍k ê lâng m̄-thang chí-ū kò͘ ka-kī ê tāi-chì, mā tio̍h kò͘ pa̍t-lâng ê tāi-chì. 5 Lín tio̍h ū Ki-tok Iâ-so͘ ê sim-chì: 6 I goân-pún ū Siōng-tè ê sin-hūn, khiok bô lām-iōng kap Siōng-tè pêng-téng ê tōe-ūi. 7 I hoán-tńg piàⁿ-khang ka-kī, chhú lô͘-po̍k ê sin-hūn, chhut-sì kap lâng kâng-khoán, ēng lâng ê hêng-thé chhut-hiān. 8 I chū-goān khiam-pi, sūn-ho̍k kàu sí --- sīm-chì sí tī si̍p-jī-kè téng. 9 In-ūi án-ni, Siōng-tè thê-seng I kàu siōng-koân ê tōe-ūi, sù I chhiau-oa̍t bān miâ ê miâ-hō. 10 Án-ni, ūi-tio̍h kèng-tiōng Iâ-so͘ ê miâ, thiⁿ-téng, tōe-chiūⁿ, tōe-ē, it-chhè ê kha-thâu-u lóng ōe kūi-pài, 11 it-chhè ê chhùi lóng soan-jīn, “Iâ-so͘ Ki-tok sī Chú”, lâi êng-iāu Pē Siōng-tè. 12 Só͘-í, chhin-ài ê hiaⁿ-tī chí-bē, góa tī lín hia ê sî, lín lóng ū sūn-thàn góa, hiān-chāi góa bô tī lín hia, lín koh-khah tio̍h án-ni. Tio̍h kè-sio̍k kiaⁿ-hiâⁿ ngia̍uh-ngia̍uh-chhoah lâi oân-sêng lín ê chín-kiù; 13 in-ūi Siōng-tè sî-siông tī lín tiong-kan teh chòe-kang, hō͘ lín ū ì-goān koh ōe si̍t-chián I ê hó chí-ì. 14 Bô-lūn chòe sím-mi̍h tāi-chì, lóng m̄-thang bâi-oàn á-sī cheng-lūn, 15 hō͘ lín thang chheng-pe̍k sûn-kiat, tī chit-ê siâ-ok hú-pāi ê sè-tāi choh Siōng-tè bô khoat-tiám ê kiáⁿ-jî. Tio̍h tī in tiong-kan hoat-kng, chhin-chhiūⁿ kng teh chiò sè-kan, 16 lâi kian-siú sù oa̍h-miā ê sìn-sit, hō͘ góa tī Ki-tok ê Ji̍t thang khoa-kháu kóng ka-kī bô khang-khang phun-pho, bô khang-khang lô-khó͘. 17 Góa nā tio̍h ēng ka-kī ê huih chòe tiān-chè phoah tī lín ê sìn-sim só͘ hiàn ê chè-mi̍h, góa mā hoaⁿ-hí, mā beh kap lín chòe-hé hoaⁿ-hí. 18 Siâng-khoán, lín mā tio̍h hoaⁿ-hí, kap góa hun-hióng hoaⁿ-hí. 19 Góa ǹg-bāng Chú Iâ-so͘ hō͘ góa ōe-tàng kín chhe [Thê-mô͘-thài] khì lín hia, hō͘ góa thang thiaⁿ-tio̍h lín ê siau-sit lâi tit-tio̍h kek-lē. 20 Chí-ū i ū kap góa tâng-sim chin-chiàⁿ teh koan-sim lín ê sū. 21 Chèng-lâng lóng teh tui-kiû ka-kī ê sū, m̄-sī Iâ-so͘ Ki-tok ê sū. 22 M̄-kú [Thê-mô͘-thài] ê chòe-lâng lín lóng chai, i kap góa chhin-chhiūⁿ pē kap kiáⁿ chòe-hé ūi-tio̍h thoân hok-im teh ho̍k-sāi. 23 Án-ni, góa chi̍t-ē chai góa ê tāi-chì ū sím-mi̍h kiat-kio̍k, ǹg-bāng ōe-tàng sûi-sî chhe i khì lín hia. 24 Góa khak-sìn Chú, I mā ōe hō͘ góa chin kín khì kìⁿ lín. 25 Put-kò, góa siūⁿ-kóng tio̍h chhe [Í-pa-hut-thê] khì lín hia; i sī góa ê hiaⁿ-tī, tâng-kang, kap chiàn-iú, tī góa su-iàu ê sî lín ū phài i lâi ho̍k-sāi góa. 26 I chin siàu-liām lín tāi-ke, mā in-ūi chai-iáⁿ lín ū thiaⁿ-tio̍h i phòa-pīⁿ ê tāi-chì, sim chin kan-khó͘. 27 I khak-si̍t ū phòa-pīⁿ, sīm-chì hiám sí-khì. M̄-kú Siōng-tè ū lîn-bín i, m̄-nā i nā-tiāⁿ, mā ū lîn-bín góa, hō͘ góa m̄-bián koh ke-thiⁿ iu-siong. 28 In-ūi án-ni, góa kóaⁿ-kín beh chhe i tńg-khì lín hia, hō͘ lín ōe-tàng koh kìⁿ-tio̍h i lâi hoaⁿ-hí, mā thang kiám-chió góa ê khòa-lū. 29 Só͘-í, lín tio̍h tī Chú ê lāi-bīn hoaⁿ-hoaⁿ hí-hí kā i chiap-la̍p. Tio̍h chun-tiōng chhin-chhiūⁿ i chit khoán ê lâng, 30 in-ūi i ūi-tio̍h Ki-tok ê kang-chok mō͘ sìⁿ-miā ê gûi-hiám hiám-hiám-á sí, beh pó͘ lín chòe bô-kàu ê, thòe lín lâi ho̍k-sāi góa.

Hui-li̍p-pí 3

1 Chòe āu, hiaⁿ-tī chí-bē, lín tio̍h khò Chú lâi hoaⁿ-hí! Góa koh kóng-khí í-chêng só͘ siá ê, tùi góa pèng bô mâ-hoân, tùi lín khiok ū pang-chān. 2 Tio̍h chù-ì hit tīn káu, chù-ì hiah-ê choh-pháiⁿ ê lâng, chù-ì hiah-ê ka-kī koah-siong seng-khu ê lâng. 3 Kî-si̍t, lán chiah-sī chin-chiàⁿ siū kat-lé ê lâng. Lán thong-kè Sèng Sîn kèng-pài Siōng-tè, khoa-kháu Ki-tok Iâ-so͘, bô óa-khò gōa-piáu ê lé-gî. 4 Nā kóng beh óa-khò lé-gî, góa mā ōe; nā ū lâng siūⁿ-kóng i ōe-tàng óa-khò lé-gî, góa koh-khah ōe. 5 Góa chhut-sì tē-poeh ji̍t chiū siū kat-lé, sī [Í-sek-lia̍t]-lâng, sio̍k [Piān-ngá-bín] chi-cho̍k, sī sûn-chhùi ê [Hi-pek-lâi]-lâng. Tùi siú Lu̍t-hoat lâi kóng, góa sio̍k [Hoat-lī-sài]-phài; 6 tùi jia̍t-sim lâi kóng, góa sī kàu-hōe ê pek-hāi-chiá; tùi siú Lu̍t-hoat lâi chiâⁿ-chòe gī ê phiau-chún lâi kóng, góa lóng bô sím-mi̍h thang hiâm. 7 M̄-kú, í-chêng tùi góa ū lī-ek ê, hiān-chāi in-ūi Ki-tok ê iân-kò͘, góa kā i khòaⁿ-chòe sún-sit. 8 M̄-nā án-ni, góa chin-chiàⁿ khòaⁿ it-chhè chòe sún-sit, in-ūi góa khòaⁿ jīn-bat góa ê Chú Ki-tok Iâ-so͘ chòe siōng pó-pòe. Ūi-tio̍h I góa pàng-sak it-chhè, khòaⁿ bān-sū chòe pùn-sò, sī beh tit-tio̍h Ki-tok, 9 oân-choân kap I kiat-liân, bô koh ū hit khoán khò ka-kī siú Lu̍t-hoat lâi tit-tio̍h ê gī. Góa hiān-chāi ū ê gī sī thong-kè sìn-khò Ki-tok, sī kun-kù sìn lâi tit-tio̍h Siōng-tè só͘ siúⁿ-sù ê gī. 10 Góa só͘ ài ê sī jīn-bat Ki-tok koh thé-giām I koh-oa̍h ê tōa lêng-le̍k, kap I chòe-hé siū-khó͘, keng-giām I ê sí, 11 ǹg-bāng ka-kī mā ōe-tàng tùi sí koh-oa̍h. 12 Án-ni m̄-sī kóng góa í-keng tit-tio̍h á-sī í-keng ta̍t-kàu bo̍k-phiau; góa kè-sio̍k ti̍t-ti̍t cháu, ǹg-bāng thang tit-tio̍h siúⁿ; kî-si̍t Ki-tok Iâ-so͘ í-keng tit-tio̍h góa. 13 Hiaⁿ-tī chí-bē, góa bô siūⁿ-kóng ka-kī í-keng tit-tio̍h. Góa chí-ū choan-sim chi̍t hāng, chiū-sī bōe kì-tit āu-bīn ê sū, phah-piàⁿ tui-kiû thâu-chêng ê sū, 14 ǹg bo̍k-phiau ti̍t-ti̍t cháu, ūi-tio̍h beh tit-tio̍h siúⁿ, chiū-sī Siōng-tè thong-kè Ki-tok Iâ-so͘ tiàu góa khì niá-siū hit-ê tùi téng-bīn lâi ê oa̍h-miā. 15 Só͘-í, lán tiong-kan sêng-se̍k ê lâng tio̍h ū siâng-khoán ê siūⁿ-hoat. Lín tiong-kan nā ū pa̍t khoán ê siūⁿ-hoat, Siōng-tè mā ōe chiong chit-ê siūⁿ-hoat kā lín chí-sī. 16 Bô-lūn án-chóaⁿ, lán tio̍h chiàu í-keng cháu kè-lâi ê lō͘-sòaⁿ kè-sio̍k chiân-chìn. 17 Hiaⁿ-tī chí-bē, lín lóng tio̍h o̍h góa; tio̍h chù-ì khòaⁿ hiah-ê tè goán ê bô͘-iūⁿ ê lâng án-chóaⁿ teh seng-oa̍h. 18 Góa í-keng ū kā lín kóng chin chōe piàn, hiān-chāi koh lâu ba̍k-sái kā lín kóng: Ū chin chōe lâng, in ê hêng-ûi hō͘ in chiâⁿ-chòe Ki-tok si̍p-jī-kè ê tùi-te̍k. 19 In ê kiat-kio̍k sī bia̍t-bông; in ēng pak-tó͘ chòe sîn-bêng; in chiong kiàn-siàu khòaⁿ-chòe kong-êng; in chí-ū koan-sim tōe-chiūⁿ ê sū. 20 M̄-kú, lán sī thiⁿ-téng ê kong-bîn, teh thèng-hāu tùi hia lâi ê Kiù-sè-chú, chiū-sī Chú Iâ-so͘ Ki-tok. 21 I ōe ēng hō͘ bān-iú khut-ho̍k ê lêng-le̍k lâi kái-piàn lán pi-chiān ê thé, hō͘ lán pìⁿ-chòe kap I siâng-khoán êng-iāu ê thé.

Hui-li̍p-pí 4

1 Só͘-í, góa só͘ chhin-ài só͘ siàu-liām ê hiaⁿ-tī chí-bē, lín sī góa ê hoaⁿ-hí, góa ê êng-kng, tio̍h óa-khò Chú lâi khiā-chāi. 2 Góa khó͘-khǹg [Iú-a-tia̍p], mā khó͘-khǹg [Sûn-to͘-ki], lín tī Chú ê lāi-bīn tio̍h tâng-sim. 3 Góa tiong-si̍t ê tâng-phōaⁿ, góa mā ài lí pang-chān chit nn̄g ê hū-jîn-lâng, in-ūi in kap [Kek-lī-bián] í-ki̍p góa kî-tha ê tâng-kang bat ūi-tio̍h hok-im kap góa chòe-hé hùn-tò͘; in ê miâ í-keng ū kì-chài tī oa̍h-miā-chheh. 4 Tio̍h sî-siông kap Chú kiat-liân lâi hoaⁿ-hí! Góa koh kóng chi̍t piàn, tio̍h hoaⁿ-hí! 5 Tio̍h hō͘ chèng-lâng khòaⁿ ōe chhut lín ê khoan-iông. Chú teh-beh lâi lah. 6 Lóng m̄-thang khòa-lū sím-mi̍h. Bān-sū tio̍h ēng kám-siā ê sim kî-kiû kap tāi-tó, chiong lín só͘ kiû ê hō͘ Siōng-tè chai. 7 Án-ni, Siōng-tè só͘ sù chhiau-oa̍t lâng it-chhè liáu-kái ê pêng-an, ōe thong-kè Ki-tok Iâ-so͘ pó-siú lín ê sim-su ì-liām. 8 Hiaⁿ-tī chí-bē, chóng kóng chi̍t kù, hiah-ê ōe kiàn-li̍p hó tek-hēng ê sū, hiah-ê ta̍t-tit chheng-chàn ê sū, chiū-sī it-chhè chin-si̍t ê, it-chhè thang chun-kèng ê, it-chhè kong-chèng ê, it-chhè sûn-kiat ê, it-chhè khó-ài ê, it-chhè thang o-ló ê, chiah-ê lín lóng tio̍h put-sî khǹg tī sim-lāi. 9 Lín tùi góa só͘ ha̍k-si̍p koh chiap-siū ê, thiaⁿ-tio̍h koh khòaⁿ-tio̍h ê, chiah-ê lóng tio̍h kè-sio̍k si̍t-hêng. Án-ni, sù pêng-an ê Siōng-tè chiū ōe kap lín tông-chāi. 10 Góa tī Chú ê lāi-bīn hui-siông hoaⁿ-hí! In-ūi kè chi̍t tōaⁿ sî-kan liáu-āu, lín tùi góa ê koan-sim ū koh puh-íⁿ khui-hoe; kî-si̍t, lín ū teh kā góa koan-sim, put-kò sī bô ki-hōe thang piáu-sī nā-tiāⁿ. 11 M̄-sī kóng góa bô kàu ēng, in-ūi góa í-keng o̍h ōe-hiáu bô-lūn tī sím-mi̍h kéng-gū lóng ti-chiok. 12 Góa chai án-chóaⁿ kè sàn-chhiah ê seng-oa̍h, mā chai án-chóaⁿ kè hù-jū ê seng-oa̍h. Sī pá á-sī iau, sī ū-chhun á-sī ū-khiàm, góa í-keng tit-tio̍h pì-koat, chiū-sī bô-lūn sím-mi̍h sî-chūn sím-mi̍h só͘-chāi, góa lóng ti-chiok. 13 Óa-khò sù góa lêng-le̍k ê Ki-tok, góa ū khùi-la̍t thang khek-ho̍k ta̍k khoán ê kéng-gū. 14 M̄-kú, lín ū hun-tam góa ê khùn-lân, án-ni si̍t-chāi chin hó. 15 Lín [Hui-li̍p-pí]-lâng ka-kī mā lóng chai, tī góa thoân hok-im ê chho͘-kî, góa lī-khui [Má-kî-tùn] ê sî, chí-ū lín ê kàu-hōe ū hun-tam góa seng-oa̍h hùi-iōng ê siu-chi. 16 Liân góa tī [Thiap-sat-lô-nî-ka] ê sî, lín ū kúi-nā piàn sàng mi̍h-kiāⁿ lâi kiong-kip góa ê su-iàu. 17 Góa m̄-sī ài lín sàng mi̍h-kiāⁿ, sī ài lín ū khah chōe ê lī-sûn kì ji̍p-khì lín ê hō͘-thâu. 18 Che sī lín hō͘ góa it-chhè mi̍h-kiāⁿ ê siu-kù. Lín hō͘ góa ê í-keng kàu-gia̍h koh ū-chhun. Góa ū tùi [Í-pa-hut-thê] siu-tio̍h lín sàng hō͘ góa ê lé-mi̍h, chhin-chhiūⁿ hoat-chhut phang-bī, Siōng-tè só͘ hoaⁿ-hí ê chè-mi̍h. 19 Góa ê Siōng-tè ōe chiàu I êng-iāu ê hong-hù, thong-kè Ki-tok Iâ-so͘ lâi boán-chiok lín só͘-ū ê su-iàu. 20 Goān êng-kng kui hō͘ lán ê Pē Siōng-tè, ti̍t-kàu éng-éng oán-oán. Amen! 21 Chhiáⁿ thòe góa kā sio̍k Ki-tok Iâ-so͘ ê só͘-ū sìn-tô͘ chhéng-an. Kap góa tī chia ê hiaⁿ-tī chí-bē mā beh kā lín chhéng-an. 22 Tī chia só͘-ū ê sìn-tô͘, te̍k-pia̍t sī [Khái-sat] ông-kiong lāi ê sìn-tô͘, lóng beh kā lín chhéng-an. 23 Goān Chú Iâ-so͘ Ki-tok ê un-tián kap lín tāi-ke tông-chāi!

Ko-lô-se 1

1 Góa sī [Pó-lô], hōng Siōng-tè ê chí-ì choh Ki-tok Iâ-so͘ ê sù-tô͘, góa kap lán ê hiaⁿ-tī [Thê-mô͘-thài] 2 siá-phoe hō͘ tòa tī [Ko-lô-se] ê sìn-tô͘, chiū-sī kap Ki-tok kiat-liân tiong-sìn ê hiaⁿ-tī chí-bē. Goān lán ê Pē Siōng-tè sù lín un-tián kap pêng-an! 3 Goán ūi-tio̍h lín kî-tó ê sî sî-siông teh kám-siā lán ê Chú Iâ-so͘ Ki-tok ê Pē Siōng-tè, 4 in-ūi ū thiaⁿ-tio̍h lín tùi Ki-tok Iâ-so͘ ū sìn-sim, tùi só͘-ū ê sìn-tô͘ ū thiàⁿ-sim. 5 Chiah-ê lóng sī ēng hit-ê ūi-tio̍h lín khǹg tī thiⁿ-téng ê ǹg-bāng chòe kun-kù; chit-ê ǹg-bāng tong-chho͘ hok-im chin-tō thoân hō͘ lín ê sî, lín í-keng ū thiaⁿ-tio̍h. 6 Tú kap hok-im khai-sí thoân kàu lín hia koh lín chin-chiàⁿ jīn-bat Siōng-tè ê un-tián hit ji̍t khí ê chêng-hêng siâng-khoán, chit-ê hok-im hiān-chāi í-keng thoân kàu choân sè-kài ta̍k só͘-chāi, kè-sio̍k teh sêng-tióng kiat ké-chí. 7 Lín tùi kap goán pîⁿ-pîⁿ choh lô͘-po̍k chhin-ài ê [Í-pa-hut] ū o̍h-tio̍h Siōng-tè ê un-tián; i ūi-tio̍h goán tiong-si̍t teh chòe Ki-tok ê chhe-ēng, 8 mā ū tùi goán kóng-khí Sèng Sîn hō͘ lín ū thiàⁿ-sim ê sū. 9 In-ūi án-ni, tùi thiaⁿ-tio̍h lín ê siau-sit í-āu, goán ū kè-sio̍k teh ūi-tio̍h lín kî-tó, kiû Siōng-tè hō͘ lín ōe-tàng tùi Sèng Sîn tit-tio̍h ta̍k-khoán ê tì-hūi kap lí-kái, chhiong-hun bêng-pe̍k I ê chí-ì, 10 giân-hêng kú-chí chiàu Chú só͘ ài, hoān-sū hō͘ I hoaⁿ-hí, koh hō͘ lín chòe ta̍k hāng hó-sū, kiat hó ké-chí, tùi Siōng-tè ê jīn-bat mā jú ke-thiⁿ. 11 Goān lín tùi I êng-iāu ê koân-lêng tit-tio̍h kàu-gia̍h ê khùi-la̍t, ū nāi-sim thang jím-siū it-chhè, koh ēng hoaⁿ-hí ê sim kám-siā Thiⁿ-pē, in-ūi I hō͘ lín ōe kham-tit hun-hióng I ūi-tio̍h ka-kī ê sìn-tô͘ pó-liû tī kng-bêng Kok-tō͘ ê hok-khì. 13 I kiù lán thoat-lī o͘-àm ê koân-sè, kā lán sóa ji̍p-khì I só͘ thiàⁿ ê Kiáⁿ ê Kok-tō͘; 14 lán tùi I ê Kiáⁿ tit-tio̍h kiù-sio̍k, chōe tit-tio̍h sià-bián. 15 Ki-tok sī khòaⁿ-bōe-tio̍h ê Siōng-tè ê hêng-siōng: I sī Tōa-kiáⁿ, pí it-chhè siū-chō-ê khah chá ū. 16 In-ūi Siōng-tè thong-kè I lâi chhòng-chō bān-iú, chiū-sī tī thiⁿ-téng kap tōe-chiūⁿ, khòaⁿ-ōe-tio̍h-ê kap khòaⁿ-bōe-tio̍h-ê, lêng-kài chē-ông-ūi-ê kap chú-chèng-chiá, thóng-léng-chiá kap chiáng-koân-chiá. Siōng-tè thong-kè I, iā ūi-tio̍h I, chhòng-chō bān-iú. 17 Iáu-bē ū bān-iú í-chêng I chiū chûn-chāi, bān-iú khò I liân-kiat hó-sè. 18 I sī kàu-hōe, chiū-sī I ê seng-khu ê thâu. I sī goân-sí, sī Tōa-kiáⁿ; Siōng-tè hō͘ I chiâⁿ-chòe thâu-chi̍t ê tùi sí-lâng tiong koh-oa̍h ê, thang tī bān-iú tiong chiâⁿ-chòe tē-it. 19 In-ūi Siōng-tè chiàu ka-kī ê chí-ì, chiong ka-kī oân-chéng ê te̍k-sèng chhiong-móa tī I lāi-bīn. 20 Thong-kè I ê Kiáⁿ, Siōng-tè hō͘ bān-iú, bô-lūn tī thiⁿ-téng á-sī tōe-chiūⁿ, lóng kap I hô-hó; Siōng-tè thong-kè I ê Kiáⁿ tī si̍p-jī-kè téng lâu-huih sí lâi chhiok-sêng hô-pêng. 21 Lín leh, lín ū chi̍t sî kap Siōng-tè toān-choa̍t koan-hē, sim-su kap I te̍k-tùi, chòe pháiⁿ tāi-chì. 22 M̄-kú hiān-chāi, Siōng-tè í-keng thong-kè ka-kī ê Kiáⁿ jio̍k-thé ê sí, hō͘ lín kap I hô-hó, chiâⁿ-chòe sèng-kiat, bô khoat-tiám, bô thang hiâm ê chè-mi̍h hiàn tī I bīn-chêng. 23 Lín tio̍h kian-chhî sìn-gióng, kian-kò͘ khiā-chāi, hō͘ lín thiaⁿ-tio̍h hok-im ê sî só͘ tit-tio̍h ê ǹg-bāng bô iô-tāng. Chit-ê hok-im í-keng thoân hō͘ thiⁿ-ē chiòng-seng; góa --- [Pó-lô] chiū-sī chit-ê hok-im ê chhe-ēng. 24 Taⁿ góa ūi-tio̍h lín siū-khó͘ kám-kak chin hoaⁿ-hí; in-ūi góa jio̍k-thé ê siū-khó͘ sī teh oân-sêng Ki-tok ūi-tio̍h I ê seng-khu, chiū-sī kàu-hōe, siū iáu-bē liáu ê khó͘-lān. 25 Góa choh kàu-hōe ê chhe-ēng; góa tùi Siōng-tè niá-siū ê jīm-bū sī ūi-tio̍h lín, beh chiong I ê sìn-sit oân-choân thoân-khui. 26 Chit-ê sìn-sit sī le̍k-tāi í-lâi tùi jîn-lūi só͘ ún-ba̍t ê ò-pì, hiān-chāi í-keng tùi I ê sìn-tô͘ hián-bêng. 27 Siōng-tè beh hō͘ in chai-iáⁿ, I ūi-tio̍h Gōa-pang-lâng só͘ chún-pī ê ò-pì sī jōa-ni̍h hong-hù koh êng-iāu. Chit-ê ò-pì sī Ki-tok tī lín lāi-bīn, I sī lín hun-hióng Siōng-tè êng-iāu ê ǹg-bāng. 28 Só͘-í, goán tùi só͘-ū ê lâng soan-iông Ki-tok, ēng ta̍k khoán ê tì-hūi lâi khoàn-kài koh kà-sī chèng-lâng, thang hō͘ só͘-ū tī Ki-tok lāi-bīn chiâⁿ-chòe sêng-se̍k ê lâng hiàn hō͘ Siōng-tè. 29 Ūi-tio̍h chit-ê bo̍k-te̍k, góa khò Ki-tok tī góa lāi-bīn ūn-chok ê tōa lêng-le̍k chīn-la̍t teh phah-piàⁿ.

Ko-lô-se 2

1 Ūi-tio̍h lín kap [Ló-tí-ka]-lâng, í-ki̍p só͘-ū iáu m̄-bat kìⁿ-tio̍h góa ê lâng, góa ài lín chai góa jōa-á-ni̍h teh phah-piàⁿ. 2 Góa ê bo̍k-te̍k sī ài in ê sim siū kó͘-lē, ēng thiàⁿ saⁿ kiat-liân, thang tit-tio̍h hong-hù ê lí-kái-le̍k, ū chhiong-hun ê khak-sìn lâi hiáu-ngō͘ Siōng-tè ê ò-pì, chiū-sī Ki-tok; 3 Siōng-tè ê tì-hūi kap tì-sek ê it-chhè pó-pòe lóng ún-chông tī I lāi-bīn. 4 Góa án-ni kóng sī ài lín bián hō͘ lâng ēng hoa-giân khá-gú kā lín chhōa-ji̍p bê-lō͘. 5 Sui-jiân góa lâng bô tī lín hia, sim khiok kap lín chòe-hé. Góa khòaⁿ-kìⁿ lín ê seng-oa̍h kui-kui kú-kú, tùi Ki-tok ê sìn-sim ū kian-tēng, kám-kak chin hoaⁿ-hí. 6 Kì-jiân lín ū chiap-siū Ki-tok Iâ-so͘ chòe Chú, chiū tio̍h kap I kiat-liân lâi seng-oa̍h, 7 chiàu lín só͘ siū ê kà-sī, tī I lāi-bīn tèng-kun, tī I téng-bīn kiàn-li̍p, hō͘ sìn-sim tit-tio̍h kian-kò͘, chhiong-móa kám-siā. 8 Tio̍h kín-sīn, m̄-thang hō͘ lâng ēng khong-tōng hu-ké ê tia̍t-ha̍k kā lín bê-khì, in-ūi hiah-ê ha̍k-soat sī kun-kù lâng ê thoân-soat kap chi-phòe ú-tiū ê siâ-sîn, m̄-sī Ki-tok. 9 In-ūi Siōng-tè oân-chéng ê sîn-sèng tiàm tī khòaⁿ-ōe-tio̍h ê Ki-tok ê hêng-thé lāi-bīn, 10 hō͘ lín kap I kiat-liân chiâⁿ-chòe oân-chéng. I sī goân-siú, chhiau-oa̍t it-chhè lêng-kài ê thóng-léng-chiá kap chiáng-koân-chiá. 11 Lín mā í-keng ū chiap-siū kap Ki-tok liân-kiat ê kat-lé, m̄-sī ēng lâng ê chhiú, sī thong-kè Ki-tok ê kat-lé chiong lín chōe-sèng ê jio̍k-thé thǹg khí-lâi. 12 Tùi sóe-lé, lín ū kap Ki-tok chòe-hé bâi-chòng; koh tùi sóe-lé, thong-kè sìn hō͘ Ki-tok tùi sí-lâng tiong koh-oa̍h ê Siōng-tè ê tāi-lêng, hō͘ lín mā kap I chòe-hé koh-oa̍h. 13 Lín í-chêng in-ūi hoān-chōe koh jio̍k-thé bô siū kat-lé, í-keng sí; m̄-kú hiān-chāi Siōng-tè í-keng hō͘ lín kap Ki-tok chòe-hé koh-oa̍h. Siōng-tè ū sià-bián lán it-chhè ê chōe-kò, 14 thiat-siau tùi lán put-lī koh ū hoat-lu̍t hāu-le̍k ê chioh-kù, kā i tèng tī si̍p-jī-kè téng, hō͘ i sit-hāu. 15 Siōng-tè ū kái-tû lêng-kài ê thóng-léng-chiá kap chiáng-koân-chiá ê koân-sè, hō͘ in tī Ki-tok khái-soân ê hâng-lia̍t tiong chòe chiàn-hoān sī-chiòng. 16 Só͘-í, m̄-thang tī lim-chia̍h, siú choeh-kî, chhoe-it, á-sī An-hioh-ji̍t ê būn-tôe hō͘ lâng phoe-phòaⁿ. 17 Chiah-ê put-kò sī chiong-lâi ê sū ê iáⁿ; Ki-tok chiah-sī si̍t-thé. 18 M̄-thang siū hiah-ê kò͘-ì ké khiam-pi, pài thiⁿ-sài ê lâng éng-hióng, hō͘ lín sit-khì èng-tit ê pò-siúⁿ. Hiah-ê lâng óa-khò hoàn-sióng, chiàu lâng ê siūⁿ-hoat, bô-kun bô-kù chū-khoa chū-tāi, 19 kap Thâu --- Ki-tok toān-choa̍t koan-hē. Tùi chit-ê Thâu, choân seng-khu tit-tio̍h êng-ióng, kun kap chat hō͘-siōng liân-chiap, chiàu Siōng-tè ê chí-ì sêng-tióng. 20 Kì-jiân lín kap Ki-tok chòe-hé sí, thoat-lī chi-phòe ú-tiū ê siâ-sîn, ná iáu chhin-chhiūⁿ sio̍k chit sè-kan ê lâng teh seng-oa̍h, chun-siú “M̄-thang the̍h”, “M̄-thang chia̍h”, “M̄-thang bong” chit khoán ê kìm-khī? 22 Chiah-ê put-kò sī lâng só͘ chō ê kàu-kui kap kà-sī, ēng liáu chiū bô lō͘-ēng. 23 Pài thiⁿ-sài, ké khiam-pi, kap khó͘-chhó͘ seng-khu, khòaⁿ khí-lâi ná chhin-chhiūⁿ ū tì-hūi, kî-si̍t tùi khòng-chè jio̍k-thé ê chêng-io̍k lóng bô lō͘-ēng.

Ko-lô-se 3

1 Kì-jiân lín í-keng kap Ki-tok chòe-hé koh-oa̍h, chiū tio̍h tui-kiû thiⁿ-téng ê sū, tī hia Ki-tok chē tī Siōng-tè ê chiàⁿ-pêng. 2 Lín tio̍h choan-sim téng-bīn ê sū, m̄-sī tōe-chiūⁿ ê sū. 3 In-ūi lín í-keng sí, lín ê oa̍h-miā kap Ki-tok chòe-hé ún-chông tī Siōng-tè lāi-bīn. 4 Ki-tok sī lín ê oa̍h-miā, I hián-hiān ê sî, lín mā ōe kap I chòe-hé hián-hiān lâi hun-hióng I ê êng-iāu. 5 Só͘-í, tio̍h siau-bia̍t lín lāi-bīn hiah-ê tōe-chiūⁿ ê io̍k-bōng, chiū-sī îm-loān, ù-òe, siâ-chêng, siâ-io̍k, kap tham-loân --- tham-loân sī pài ngó͘-siōng. 6 In-ūi chiah-ê sū, Siōng-tè ê siū-khì beh lîm-kàu pōe-ge̍k ê lâng. 7 Lín í-chêng thàn chiah-ê io̍k-bōng teh seng-oa̍h ê sî, giân-hêng kú-chí mā siū in chi-phòe. 8 M̄-kú hiān-chāi lín tio̍h khì-sak siū-khì, pháiⁿ sèng-tē, oàn-hūn, húi-pòng, kap kóng lah-sap-ōe, téng. 9 M̄-thang hō͘-siōng khi-phiàn, in-ūi lín í-keng ū chiong kū ê lâng kap si̍p-koàn thǹg khí-lâi, 10 chiong sin ê lâng chhēng lo̍h-khì; chit-ê sin ê lâng, Chhòng-chō-chú chiàu ka-kī ê hêng-siōng kè-sio̍k teh kā i keng-sin, hō͘ lín thang chin-chiàⁿ bat I. 11 Án-ni, bô koh hun-pia̍t [Hi-la̍h]-lâng á-sī [Iû-thài]-lâng, siū kat-lé á-sī bô siū kat-lé, bī-khai-hòa, iá-bân, lô͘-lē á-sī chū-iû-jîn. M̄-kú Ki-tok sī it-chhè, iā tī it-chhè ê lāi-bīn. 12 Lín sī Siōng-tè só͘ kéng-soán ê chú-bîn, sī I só͘ thiàⁿ ê, só͘-í tio̍h ēng lîn-bín, chû-ài, khiam-pi, un-jiû, kap nāi-sim chòe saⁿ chhēng lo̍h-khì. 13 Lín tiong-kan nā ū kiù-hun, tio̍h hō͘-siōng khoan-iông, pí-chhú sià-bián; chhin-chhiūⁿ Chú ū sià-bián lín, lín mā tio̍h án-ni saⁿ sià-bián. 14 Chiah-ê í-gōa, tio̍h koh ke tha̍h thiàⁿ-sim, in-ūi thiàⁿ ōe hō͘ it-chhè liân-kiat, oân-choân hô-ha̍p. 15 Tio̍h hō͘ Ki-tok só͘ sù ê hô-pêng chi-phòe lín ê sim; ūi-tio̍h beh hō͘ lín ū chit-ê hô-pêng, lín siū kéng-tiàu chiâⁿ-chòe chi̍t-thé. Lín koh tio̍h sî-siông kám-siā. 16 Tio̍h hō͘ Ki-tok ê ōe hong-hong hù-hù tiàm tī lín lāi-bīn. Tio̍h ēng ta̍k khoán ê tì-hūi hō͘-siōng kà-sī, pí-chhú khoàn-kài, chhiùⁿ si-phian, sèng-si, lêng-koa, tùi sim-tóe kám-siā o-ló Siōng-tè. 17 Lín bô-lūn chòe sím-mi̍h, kóng-ōe á-sī hêng-ûi, lóng tio̍h hōng Chú Iâ-so͘ ê miâ lâi chòe, thong-kè I lâi kám-siā Pē Siōng-tè. 18 Choh hū-jîn-lâng-ê, tio̍h sūn-ho̍k tiōng-hu, in-ūi che sī sìn Chú ê lâng ê pún-hūn. 19 Choh tiōng-hu-ê, tio̍h thiàⁿ hū-jîn-lâng, m̄-thang kā in pháiⁿ khoán-thāi. 20 Choh jî-lú-ê, ta̍k hāng tāi-chì tio̍h sūn-ho̍k pē-bú, in-ūi che sī Chú só͘ hoaⁿ-hí ê. 21 Choh lāu-pē-ê, m̄-thang kek jî-lú siū-khì, chiah-bōe hō͘ in hoe-sim sit-chì. 22 Choh lô͘-lē-ê, ta̍k hāng tāi-chì tio̍h sūn-ho̍k sè-chiūⁿ ê chú-lâng, m̄-sī ūi-tio̍h beh hō͘ in hoaⁿ-hí chiah tī in bīn-chêng án-ni chòe, sī in-ūi kèng-ùi Chú sêng-sim chòe. 23 Lín bô-lūn chòe sím-mi̍h, tio̍h chīn-sim chòe, m̄-sī ūi-tio̍h lâng, sī ūi-tio̍h Chú chòe. 24 Tio̍h chai, Chú ōe kā lín pò-siúⁿ, hō͘ lín tùi I tit-tio̍h sán-gia̍p; lín teh ho̍k-sāi ê sī Chú Ki-tok. 25 Choh-pháiⁿ ê lâng ōe siū pháiⁿ ê pò-èng, in-ūi Siōng-tè bōe phian-thāi lâng.

Ko-lô-se 4

1 Choh chú-lâng-ê, tio̍h kong-pêng ha̍p-lí tùi-thāi lín ê lô͘-lē, lín chai, lín tī thiⁿ-téng mā ū chi̍t ūi Chú-lâng. 2 Tio̍h kè-sio̍k pek-chhiat kî-tó; kî-tó ê sî tio̍h kéng-séng, tio̍h kám-siā. 3 Mā tio̍h ūi-tio̍h goán kî-tó, kiû Siōng-tè hō͘ goán ū thoân sìn-sit ê ki-hōe, thang soan-iông Ki-tok ê ò-pì; góa sī ūi-tio̍h chit-ê chiah teh chē-kaⁿ. 4 Tio̍h ūi-tio̍h góa kî-tó, hō͘ góa ōe-tàng chiong eng-kai kóng ê ò-pì kóng chheng-chhó. 5 Tio̍h siān-iōng ki-hōe, tùi-thāi bī-sìn-chiá tio̍h ū tì-hūi. 6 Kóng-ōe put-sî tio̍h un-hô, chhin-chhiūⁿ ēng iâm tiâu-bī, chai-iáⁿ tio̍h án-chóaⁿ ìn-tap ta̍k ê lâng. 7 Koan-hē góa it-chhè ê tāi-chì, chhin-ài ê hiaⁿ-tī [Chhui-ki-kó͘] ōe kā lín kóng; tī Chú ê kang-chok i kap góa chòe-hé choh lô͘-po̍k, tiong-si̍t teh ho̍k-sāi. 8 Góa chhe i khì lín hia, sī ài pò lín chai goán chia ê chêng-hêng, hō͘ lín ê sim thang tit-tio̍h kó͘-lē. 9 [O-nî-se-bô͘] ōe kap i chòe-hé khì; i sī lín hia ê lâng, sī tiong-si̍t koh chhin-ài ê hiaⁿ-tī. In ōe chiong goán chia it-chhè ê tāi-chì pò lín chai. 10 Kap góa chòe-hé chē-kaⁿ ê [A-lí-ta̍t-kó͘] beh kā lín chhéng-an; [Pa-ná-pa] ê piáu sió-tī [Má-khó] mā beh kā lín chhéng-an. Koan-hē [Má-khó], góa í-keng ū kā lín kau-tài, i khì ê sî tio̍h kā i chiap-thāi. 11 Hit-ê kiò-chòe [Iû-sū-to͘] ê [Iâ-so͘] mā beh kā lín chhéng-an. Tī [Iû-thài]-lâng sìn-tô͘ tiong chí-ū chit saⁿ ê lâng ūi-tio̍h Siōng-tè-kok teh kap góa tâng-kang, in ū hō͘ góa chin tōa ê an-ùi. 12 Tùi lín hia lâi Ki-tok Iâ-so͘ ê po̍k-jîn [Í-pa-hut] beh kā lín chhéng-an. I sî-siông ūi-tio̍h lín pek-chhiat kî-tó, kiû Siōng-tè hō͘ lín khiā-chāi, choh sêng-se̍k ê lâng, khak-sìn Siōng-tè lóng-chóng ê chí-ì. 13 Góa thang chèng-bêng, i khak-si̍t ūi-tio̍h lín kap tòa tī [Ló-tí-ka] í-ki̍p [Hi-la̍h-pho-lí] ê lâng sin-khó͘ chòe-kang. 14 Chhin-ài ê i-seng [Lō͘-ka] kap [Tí-má] beh kā lín chhéng-an. 15 Chhiáⁿ lín thòe góa kā [Ló-tí-ka] ê hiaⁿ-tī chí-bē kap [Lêng-hoat], í-ki̍p tī in tau teh chū-hōe ê kàu-hōe chhéng-an. 16 Chit tiuⁿ phoe lín tha̍k liáu, tio̍h siat-hoat mā hō͘ [Ló-tí-ka] ê kàu-hōe tha̍k; lín mā tio̍h tha̍k [Ló-tí-ka] ê kàu-hōe choán hō͘ lín ê phoe. 17 Tio̍h kā [A-ki-pò͘] kóng, “Lí só͘ niá-siū ho̍k-sāi Chú ê chit-bū it-tēng tio̍h oân-sêng.” 18 Góa --- [Pó-lô] chhin-pit kā lín chhéng-an. Tio̍h ōe kì-tit góa teh chē-kaⁿ. Goān Siōng-tè ê un-tián kap lín tông-chāi!

1 Thiap-sat-lô-nî-ka 1

1 Góa --- [Pó-lô], [Se-lah], kap [Thê-mô͘-thài] siá-phoe hō͘ [Thiap-sat-lô-nî-ka], sio̍k Pē Siōng-tè kap Chú Iâ-so͘ Ki-tok ê kàu-hōe. Goān lín tit-tio̍h un-tián kap pêng-an! 2 Goán sî-siông ūi-tio̍h lín tāi-ke kám-siā Siōng-tè, tī kî-tó tiong put-sî siūⁿ-tio̍h lín. 3 Goán tī lán ê Pē Siōng-tè ê bīn-chêng siàu-liām lín khò sìn-sim só͘ chòe ê kang, chhut tī thiàⁿ-sim ê lô-khó͘, kap tùi lán ê Chú Iâ-so͘ Ki-tok ê ǹg-bāng só͘ piáu-hiān ê kian-jím. 4 Hiaⁿ-tī chí-bē, goán chai, lín sī Siōng-tè só͘ thiàⁿ, só͘ kéng-soán ê, 5 in-ūi goán thoân hok-im kàu lín hia, m̄-sī chí-ū ēng giân-gú, mā khò tōa lêng-le̍k kap Sèng Sîn, í-ki̍p tùi hok-im ū oân-choân ê khak-sìn. Chiàu lín só͘ chai, goán tī lín tiong-kan ê sî choh-lâng sím-mi̍h khoán, lóng sī ūi-tio̍h beh hō͘ lín tit-tio̍h lī-ek. 6 Lín ū o̍h goán mā ū o̍h Chú, sui-jiân tī chin chōe khó͘-lān tiong, lín iáu-kú ēng Sèng Sîn só͘ sù ê hoaⁿ-hí lâi niá-siū sìn-sit. 7 Tùi án-ni, lín chiâⁿ-chòe [Má-kî-tùn] kap [A-kai-a] choân-thé sìn-tô͘ ê bô͘-hoān. 8 In-ūi Chú ê sìn-sit sī tùi lín thoân-chhut, m̄-nā tī [Má-kî-tùn] kap [A-kai-a], lín tùi Siōng-tè ê sìn mā thoân kàu ta̍k só͘-chāi, só͘-í m̄-bián goán koh kóng sím-mi̍h. 9 In ka-kī ū kóng-khí goán tī lín hia ê sî jōa-ni̍h siū lín hoan-gêng, lín án-chóaⁿ lī-khui ngó͘-siōng kui-ǹg Siōng-tè, lâi sū-hōng oa̍h koh chin ê Siōng-tè, 10 thèng-hāu I ê Kiáⁿ tùi thiⁿ lâi; I hō͘ Iâ-so͘ tùi sí-lâng tiong koh-oa̍h, lâi chín-kiù lán thoat-lī beh lâi ê sím-phòaⁿ.

1 Thiap-sat-lô-nî-ka 2

1 Hiaⁿ-tī chí-bē, lín ka-kī chai goán khì lín hia hóng-būn m̄-sī bô hāu-kó. 2 Lín chai goán khì lín hia í-chêng tī [Hui-li̍p-pí] sui-jiân siū-tio̍h pek-hāi kap bú-jio̍k, iáu-kú ū óa-khò lán ê Siōng-tè hó-táⁿ biān-tùi chin chōe chó͘-gāi thoân Siōng-tè ê hok-im hō͘ lín. 3 Goán ê khoàn-bián m̄-sī chhut tī chhò-gō͘ á-sī bô sûn-chèng ê tōng-ki, mā m̄-sī beh phiàn lâng. 4 Kì-jiân Siōng-tè khòaⁿ goán ōe kham-tit, chiong hok-im kau-thok goán, goán chiū chiàu án-ni kóng, m̄ sī beh hō͘ lâng hoaⁿ-hí, sī beh hō͘ kàm-chhat goán lāi-sim ê Siōng-tè hoaⁿ-hí. 5 Lín chai, goán m̄-bat tùi lín kóng phô͘-tháⁿ ê ōe, mā m̄-bat ū tham-sim ê liām-thâu; che Siōng-tè ōe-tàng kā goán choh-chèng. 6 Goán mā m̄-bat tùi lâng, bô-lūn sī lín á-sī pa̍t-lâng, kiû êng-kng. 7 Sui-jiân choh Ki-tok ê sù-tô͘, goán pún-lâi thang iau-kiû lín chun-tiōng goán; m̄-kú goán tī lín tiong-kan ê sî un-jiû tùi-thāi lín, chhin-chhiūⁿ ni-bú teh io gín-á. 8 Kì-jiân goán hiah-ni̍h thiàⁿ-sioh lín, m̄-nā goān-ì kap lín hun-hióng Siōng-tè ê hok-im, liân goán ka-kī ê sìⁿ-miā to kam-goān hō͘ lín, in-ūi lín sī goán só͘ thiàⁿ ê. 9 Hiaⁿ-tī chí-bē, tio̍h ōe kì-tit goán ê sin-khó͘ kap lô-lo̍k; goán thoân Siōng-tè ê hok-im hō͘ lín ê sî, ūi-tio̍h bô ài ke-thiⁿ lín jīm-hô lâng ê hū-tam, goán mî-ji̍t teh chòe-kang. 10 Lín kap Siōng-tè ōe-tàng kā goán choh-chèng, tùi lín chiah-ê sìn-tô͘, goán ê choh-lâng jōa-ni̍h sûn-kiat, chèng-ti̍t, bô thang hiâm. 11 Lín chai goán tùi-thāi lín ta̍k ê lâng, chhin-chhiūⁿ lāu-pē tùi-thāi ka-kī ê jî-lú. 12 Goán khó͘-khǹg lín, kó͘-lē lín, khoàn-bián lín, ài lín ê giân-hêng kú-chí ōe-tàng hû-ha̍p Siōng-tè ê chí-ì; I ū tiàu lín chìn-ji̍p I ka-kī ê Kok-tō͘ kap êng-iāu. 13 Goán mā ūi-tio̍h chit-ê iân-kò͘ siông-siông kám-siā Siōng-tè, in-ūi lín tùi goán thiaⁿ-tio̍h Siōng-tè ê ōe ê sî, bô kā i khòaⁿ-chòe sī lâng ê ōe, tian-tò kā i khòaⁿ-chòe khak-khak si̍t-si̍t sī Siōng-tè ê ōe; chit-ê ōe tī lín sìn-tô͘ tiong-kan teh ūn-chok. 14 Hiaⁿ-tī chí-bē, lín ū tú-tio̍h tī [Iû-thài] tōe Siōng-tè ê kàu-hōe, chiū-sī sio̍k Ki-tok Iâ-so͘ ê kàu-hōe só͘ tú-tio̍h ê tāi-chì. Lín siū-tio̍h ka-kī tông-pau ê pek-hāi, tú chhin-chhiūⁿ in ū siū-tio̍h [Iû-thài]-lâng ê pek-hāi. 15 Hiah-ê [Iû-thài]-lâng thâi-sí Chú Iâ-so͘ kap chèng sian-ti, mā pek-hāi goán. In hō͘ Siōng-tè bô hoaⁿ-hí, mā kap chèng-lâng chòe tùi-te̍k, 16 sīm-chì chó͘-tòng goán thoân hok-im hō͘ Gōa-pang-lâng, hō͘ in thang tit-tio̍h kiù. In kè-sio̍k hoān-chōe, ti̍t-kàu chōe-ok koàn-boán. Chòe-āu Siōng-tè ê siū-khì lîm-kàu in sin-chiūⁿ. 17 Hiaⁿ-tī chí-bē, goán siū pek chiām-sî kap lín hun-lī, put-kò sī seng-khu saⁿ-lī, sim khiok bô lī-khui. Goán jōa-ni̍h pek-chhiat ài koh khòaⁿ-tio̍h lín ê bīn. 18 Goán chin ài khì lín hia. Góa --- [Pó-lô] chi̍t piàn koh chi̍t piàn siūⁿ-beh khì hóng-būn lín, m̄-kú Sat-tàn kā goán chó͘-tòng. 19 Lán ê Chú Iâ-so͘ lâi-lîm ê sî, goán ê ǹg-bāng, hoaⁿ-hí, kap siōng khoa-kháu ê sī sím-mi̍h? Kiám m̄-sī lín? 20 Lín si̍t-chāi sī goán ê êng-kng kap hoaⁿ-hí.

1 Thiap-sat-lô-nî-ka 3

1 Só͘-í, goán tán bōe-tiâu, koat-tēng kan-ta goán lâu tī [Ngá-tián], 2 chiū chhe goán ê hiaⁿ-tī, iā-sī ūi-tio̍h Siōng-tè thoân Ki-tok hok-im ê tâng-kang [Thê-mô͘-thài], khì lín hia, lâi kó͘-lē lín, kian-kò͘ lín ê sìn-sim, 3 hō͘ lín tiong-kan bô-lâng in-ūi só͘ tú-tio̍h ê khó͘-lān tì-kàu iô-tāng. Lín ka-kī chai lán tú-tio̍h khó͘-lān sī Siōng-tè ê an-pâi. 4 Goán iáu kap lín chòe-hé ê sî, ū seng kā lín kóng-khí goán ōe siū khó͘-lān, āu-lâi chin-chiàⁿ ū án-ni hoat-seng, che sī lín só͘ chai ê. 5 In-ūi án-ni, góa tán bōe-tiâu chiah chhe [Thê-mô͘-thài] khì lín hia, ài chai lín ê sìn-sim án-chóaⁿ, chiah-bián lín siū Chhì-thàm-chiá bê-he̍k, tì-kàu goán tī lín tiong-kan ê lô-khó͘ lo̍k-khong. 6 Hiān-chāi [Thê-mô͘-thài] í-keng tùi lín hia tò-lâi, chiong koan-hē lín ê sìn-sim kap thiàⁿ-sim ê hó siau-sit pò goán chai, kā goán kóng lín sî-siông teh siàu-liām goán, ài kap goán kìⁿ-bīn, chhin-chhiūⁿ goán ài kap lín kìⁿ-bīn. 7 In-ūi án-ni, hiaⁿ-tī chí-bē, tī it-chhè ê hoān-lān kap khùn-khó͘ tiong goán tùi lín ê sìn-sim ū tit-tio̍h an-ùi. 8 Lín nā tùi Chú ū kian-kò͘ ê sìn-sim, goán chiah ōe-tàng kóng hiān-chāi ū chin-chiàⁿ teh oa̍h. 9 Goán tī Siōng-tè ê bīn-chêng in-ūi lín lâi hoaⁿ-hí; tùi che it-chhè ê hoaⁿ-hí, goán tio̍h án-chóaⁿ kám-siā chiah ū kàu-gia̍h? 10 Goán mî-ji̍t pek-chhiat kî-kiû thang kìⁿ lín ê bīn, lâi pó͘-chiok lín sìn-sim ê su-iàu. 11 Goān lán ê Thiⁿ-pē Siōng-tè kap lán ê Chú Iâ-so͘ kā goán khui-lō͘ thang khì lín hia. 12 Goān Chú hō͘ lín saⁿ-thiàⁿ kap thiàⁿ chèng-lâng ê sim it-ti̍t ke-thiⁿ, chhin-chhiūⁿ goán tùi lín ê thiàⁿ ū ná ke-thiⁿ. 13 Án-ni, I ōe hō͘ lín ê sim kian-kò͘, tī lán ê Chú Iâ-so͘ kap I ê chèng sìn-tô͘ lâi-lîm ê sî, tī lán ê Pē Siōng-tè ê bīn-chêng sèng-kiat, bô thang hiâm. Amen!

1 Thiap-sat-lô-nî-ka 4

1 Chòe-āu, hiaⁿ-tī chí-bē, goán iáu ū ōe beh kā lín kóng, lín ū chiap-siū goán ê kà-sī chai-iáⁿ tio̍h án-chóaⁿ seng-oa̍h chiah ōe hō͘ Siōng-tè hoaⁿ-hí, kî-si̍t lín ū chiàu án-ni teh seng-oa̍h. Put-kò goán hōng Chú Iâ-so͘ ê miâ khún-kiû koh khó͘-khǹg lín tio̍h ka-pē ló͘-le̍k. 2 In-ūi lín chai goán ū hōng Chú Iâ-so͘ ê miâ kā lín chí-sī sím-mi̍h. 3 Siōng-tè ê chí-ì sī ài lín sèng-kiat, bô îm-loān, 4 hō͘ lín ta̍k ê lâng ōe-hiáu ēng sèng-kiat kap chū-chun ê sim khòng-chè ka-kī ê seng-khu, 5 bô chhin-chhiūⁿ m̄-bat Siōng-tè ê Gōa-pang-lâng teh hòng-chhiòng chêng-io̍k. 6 M̄-thang chhim-hāi, mā m̄-thang khi-hū tâng-sìn ê hiaⁿ-tī chí-bē. Goán í-keng ū kā lín kóng, mā ū giâm-giâm seng kā lín kéng-kò, “Chòe chit khoán tāi-chì ê lâng, Chú ōe pò-èng.” 7 Siōng-tè m̄-sī ho͘-tiàu lán kè bô chheng-khì ê seng-oa̍h, sī ho͘-tiàu lán kè sèng-kiat ê seng-oa̍h. 8 Só͘-í, kū-choa̍t chit-ê kà-sī ê, m̄-sī kū-choa̍t lâng, sī kū-choa̍t sù lín Sèng Sîn ê Siōng-tè. 9 Koan-hē hiaⁿ-tī chí-bē saⁿ-thiàⁿ ê sū, bô su-iàu goán siá sím-mi̍h hō͘ lín, in-ūi lín ka-kī í-keng siū-tio̍h Siōng-tè ê kà-sī tio̍h hō͘-siōng saⁿ-thiàⁿ. 10 Kî-si̍t, lín ū chiàu chit-ê kà-sī tùi-thāi choân [Má-kî-tùn] ê hiaⁿ-tī chí-bē. M̄-kú, hiaⁿ-tī chí-bē, goán khó͘-khǹg lín tio̍h ka-pē ló͘-le̍k. 11 Chiàu goán chêng só͘ hoan-hù, lín tio̍h li̍p-chì kè an-chēng ê seng-oa̍h, chīn ka-kī ê pún-hūn chhin-chhiú chòe-kang. 12 Án-ni lín chiū ōe-tàng tit-tio̍h hōe-gōa ê lâng ê chun-kèng, bô su-iàu khò pa̍t-lâng pang-chān. 13 Hiaⁿ-tī chí-bē, koan-hē í-keng sí-khì ê lâng, goán ài lín chai, chiah-bián chhin-chhiūⁿ hiah-ê bô ǹg-bāng ê lâng án-ni teh pi-siong. 14 Kì-jiân lán sìn Iâ-so͘ ū sí, ū koh-oa̍h, só͘-í lán mā sìn Siōng-tè ōe thong-kè Iâ-so͘ chhōa hiah-ê í-keng sí-khì ê lâng kap I chòe-hé lâi. 15 Goán chiàu Chú ê ōe kā lín kóng chit-ê sū, chiū-sī lán chiah-ê tī Chú lâi-lîm ê sî iáu oa̍h-teh ê lâng, bōe pí hiah-ê í-keng sí-khì ê lâng khah tāi-seng kìⁿ-tio̍h Chú. 16 Bēng-lēng chi̍t-ē chhut, thiⁿ-sài-tiúⁿ ê siaⁿ chi̍t-ē hoah, Siōng-tè ê lat-pah chi̍t-ē hiáng, Chú pún-sin chiū ōe tùi thiⁿ-téng kàng-lîm, hiah-ê sí í-chêng í-keng sìn Ki-tok ê sí-lâng ōe tāi-seng koh-oa̍h, 17 jiân-āu lán chiah-ê iáu oa̍h-teh ê lâng lóng ōe kap in chòe-hé siū chiap-khì hûn-lāi, tī khong-tiong kap Chú saⁿ-kìⁿ. Án-ni, lán chiū ōe it-ti̍t kap Chú chòe-hé. 18 Só͘-í, lín tio̍h ēng chiah-ê ōe hō͘-siōng kó͘-lē.

1 Thiap-sat-lô-nî-ka 5

1 Hiaⁿ-tī chí-bē, koan-hē chit-ê tāi-chì hoat-seng ê sî kap kî, bô su-iàu siá-phoe kā lín kóng, 2 in-ūi lín ka-kī chai Chú ê Ji̍t ōe chhin-chhiūⁿ chha̍t-á àm-sî thau-thau-á lâi. 3 Lâng teh kóng “pêng-an bô-sū” ê sî, chai-lān chhin-chhiūⁿ sán-hū chhui-chūn ê thàng-thiàⁿ hut-jiân lîm-kàu in, bô hoat-tō͘ thang tô-pī. 4 M̄-kú, hiaⁿ-tī chí-bē, lín m̄-sī tī o͘-àm tiong, hit-ê Ji̍t bōe chhin-chhiūⁿ chha̍t-á tī bô siūⁿ-tio̍h ê sî hut-jiân lâi. 5 In-ūi lín lóng sī kng-bêng ê lâng, sī ji̍t-sî ê lâng; lán m̄-sī sio̍k mî-sî, m̄-sī sio̍k o͘-àm. 6 Só͘-í, lán m̄-thang chhin-chhiūⁿ kî-tha ê lâng teh khùn, tio̍h chhíⁿ-chhíⁿ, tio̍h kín-sīn. 7 In-ūi khùn ê lâng lóng sī àm-sî teh khùn; chiú-chùi ê lâng sī àm-sî teh chùi. 8 Kì-jiân lán sī sio̍k ji̍t-sî ê lâng, tio̍h kín-sīn, ēng sìn-sim kap thiàⁿ-sim chòe hō͘-heng-kah chhēng, ēng tit-kiù ê ǹg-bāng chòe thâu-khoe tì. 9 Siōng-tè bô an-pâi lán tio̍h siū I ê hêng-hoa̍t, sī beh hō͘ lán thong-kè Chú Iâ-so͘ Ki-tok lâi tit-tio̍h kiù. 10 Ki-tok thòe lán sí sī beh hō͘ lán, bô-lūn sī sí á-sī oa̍h, lóng ōe-tàng kap I chòe-hé oa̍h. 11 Só͘-í, chhin-chhiūⁿ lín hiān-chāi án-ni, tio̍h kè-sio̍k hō͘-siōng kó͘-lē, pí-chhú chō-chiū. 12 Hiaⁿ-tī chí-bē, chhiáⁿ lín tio̍h kèng-tiōng tī lín tiong-kan teh tio̍h-bôa, iā-sī Chú kéng-soán lâi chí-tō kap khoàn-bián lín hiah-ê lâng. 13 In-ūi in só͘ chòe ê kang, lín tio̍h ēng siōng-tōa ê kèng-ì kap thiàⁿ-sim tùi-thāi in. Lín ka-kī tio̍h hô-bo̍k siong-chhù. 14 Hiaⁿ-tī chí-bē, goán khó͘-khǹg lín tio̍h kéng-kài pîn-tōaⁿ ê lâng, bián-lē bô-táⁿ ê lâng, pang-chān loán-jio̍k ê lâng; tùi chèng-lâng tio̍h khoan-iông. 15 Lín tio̍h kín-sīn, m̄-thang ēng pháiⁿ pò pháiⁿ, tio̍h put-sî ūi-tio̍h pí-chhú í-ki̍p só͘-ū ê lâng chòe hó-sū. 16 Tio̍h put-sî hoaⁿ-hí; 17 tio̍h kè-sio̍k kî-tó; 18 bô-lūn sím-mi̍h kéng-gū lóng tio̍h kám-siā; in-ūi che sī Siōng-tè ê chí-ì, ài lín chiah-ê sio̍k Ki-tok Iâ-so͘ ê lâng án-ni chòe. 19 M̄-thang phah-hoa Sèng Sîn ê hé; 20 m̄-thang biáu-sī sian-ti ê ōe. 21 Sū-sū tio̍h chhat-giām; hó ê tio̍h chhî-siú, 22 it-chhè ê siâ-ok tio̍h khì-sak. 23 Goān sù pêng-an ê Siōng-tè chhin-sin kā lín oân-choân sèng-hòa, hō͘ lín ê lêng, hûn, kap thé tī lán ê Chú Iâ-so͘ Ki-tok lâi-lîm ê sî tit-tio̍h pó-choân, bô thang hiâm! 24 Ho͘-tiàu lín ê Siōng-tè sī sìn-si̍t, I it-tēng ōe oân-sêng chit-ê sū. 25 Hiaⁿ-tī chí-bē, chhiáⁿ ūi-tio̍h goán kî-tó. 26 Tio̍h ēng sèng ê saⁿ-chim kā lóng-chóng ê hiaⁿ-tī chí-bē chhéng-an. 27 Goán hōng Chú ê miâ hoan-hù lín tio̍h tha̍k chit tiuⁿ phoe hō͘ chèng hiaⁿ-tī chí-bē thiaⁿ. 28 Goān lán ê Chú Iâ-so͘ Ki-tok ê un-tián kap lín tông-chāi!

2 Thiap-sat-lô-nî-ka 1

1 Góa --- [Pó-lô], [Se-lah], kap [Thê-mô͘-thài] siá-phoe hō͘ [Thiap-sat-lô-nî-ka] sio̍k Pē Siōng-tè kap Chú Iâ-so͘ Ki-tok ê kàu-hōe. 2 Goān lín tùi lán ê Pē Siōng-tè kap Chú Iâ-so͘ Ki-tok tit-tio̍h un-tián kap pêng-an! 3 Hiaⁿ-tī chí-bē, goán eng-kai put-sî ūi-tio̍h lín kám-siā Siōng-tè; án-ni chòe sī tong-jiân, in-ūi lín ê sìn-sim ū tōa chìn-pō͘, lín chèng-lâng ê saⁿ-thiàⁿ mā it-ti̍t teh ke-thiⁿ. 4 Só͘-í goán tī Siōng-tè ê chèng kàu-hōe tiong ēng lín chòe khoa-kháu, in-ūi lín siū it-chhè ê pek-hāi kap jím-siū hoān-lān ê sî iáu pó-chhî kian-jím kap sìn-sim. 5 Che chèng-si̍t Siōng-tè phòaⁿ-tēng lín ōe kham-tit sêng-siū Siōng-tè-kok sī kong-tō, lín chiū-sī ūi-tio̍h chit-ê teh siū-khó͘. 6 Kì-jiân Siōng-tè sī kong-tō, I ōe ēng chai-lān pò-èng hiah-ê hō͘ lín tú-tio̍h chai-lān ê lâng, 7 mā hō͘ lín chiah-ê tú-tio̍h chai-lān ê lâng, tī Chú Iâ-so͘ kap I ū tōa lêng-le̍k ê thiⁿ-sài tī hé-iām tiong tùi thiⁿ hián-hiān ê sî, thang kap goán pîⁿ-pîⁿ tit-tio̍h tháu-pàng. 8 Hit sî, I ōe hêng-hoa̍t hiah-ê m̄-jīn Siōng-tè kap m̄ sūn-thàn lán ê Chú Iâ-so͘ ê hok-im ê lâng. 9 In ōe siū éng-oán húi-bia̍t ê hêng-hoa̍t, lī-khui Chú ê bīn-chêng, kap I êng-kng ê khùi-la̍t keh-tn̄g. 10 I lâi-lîm ê sî ōe tùi I ê sìn-tô͘ tit-tio̍h êng-kng, koh tit-tio̍h só͘-ū sìn I ê lâng ê o-ló. Tī hit Ji̍t lín mā ōe tī in tiong-kan, in-ūi lín ū sìn goán tùi lín só͘ chòe ê kiàn-chèng. 11 Ūi-tio̍h chit-ê bo̍k-te̍k, goán put-sî teh ūi-tio̍h lín kî-tó, khún-kiû lán ê Siōng-tè hō͘ lín ê seng-oa̍h ōe hû-ha̍p I ê ho͘-tiàu, mā sù lín khùi-la̍t lâi si̍t-hiān it-chhè siān-liông ê sim-ì kap sìn-sim ê chok-ûi, 12 thang hō͘ lán ê Chú Iâ-so͘ ê miâ tī lín tiong-kan tit-tio̍h êng-kng, lín mā tùi I tit-tio̍h êng-kng; che lóng sī lán ê Siōng-tè kap Chú Iâ-so͘ Ki-tok ê un-tián.

2 Thiap-sat-lô-nî-ka 2

1 Hiaⁿ-tī chí-bē, koan-hē lán ê Chú Iâ-so͘ Ki-tok ê lâi-lîm kap lán siū chū-chi̍p kàu I hia ê sū, goán iau-kiû lín, 2 nā ū thiaⁿ lâng kóng goán tī ū-giân, káng-tō, á-sī tī phoe-ni̍h ū kóng-khí “Chú ê Ji̍t kàu” ê sî, lín ê sim m̄-thang tōng-iâu á-sī kiaⁿ-hiâⁿ. 3 Lâng bô-lūn ēng sím-mi̍h hong-hoat, lín lóng m̄-thang hō͘ in phiàn-khì, in-ūi tī hit Ji̍t kàu í-chêng it-tēng seng ū pōe-kàu ê sū, mā ū put-hoat ê lâng, chiū-sī chù-tiāⁿ bia̍t-bông ê lâng, ōe chhut-hiān. 4 Chit-ê lâng ōe tí-te̍k it-chhè chheng-chòe sîn-bêng á-sī kèng-pài ê tùi-siōng, sīm-chì thê-ko ka-kī khì chē tī Siōng-tè ê tiān, chū-chheng chòe Siōng-tè. 5 Chit-ê tāi-chì, góa iáu kap lín chòe-hé ê sî bat kā lín kóng, lín kiám bōe kì-tit? 6 Lín lóng chai, hiān-chāi sī sím-mi̍h teh khian-chè hit-ê Put-hoat-chiá; i sî kàu ōe chhut-hiān. 7 In-ūi hit-ê sîn-pì ê put-hoat sè-le̍k í-keng teh ūn-chok, put-kò tio̍h thèng-hāu kàu teh khian-chè i ê sè-le̍k sóa-khui hit sî chiah ōe hoat-seng. 8 Hit sî Put-hoat-chiá ōe chhut-hiān; Chú Iâ-so͘ ōe ēng tùi I ê chhùi thò͘ chhut-lâi ê khùi kā i thâi-sí, ēng I lâi-lîm ê sî hián-hiān ê êng-kng kā i siau-bia̍t. 9 Put-hoat-chiá lâi-lîm ê sî ōe ēng Sat-tàn ta̍k khoán ê koân-lêng kiâⁿ ké sîn-jiah kap kî-sū. 10 Koh tùi bia̍t-bông ê lâng kiâⁿ ta̍k khoán siâ-ok ê phiàn-su̍t, in-ūi in kū-choa̍t khì ài hō͘ in tit-kiù ê chin-lí. 11 Ūi-tio̍h án-ni, Siōng-tè hō͘ in sán-seng kiông-lia̍t ê chhò-kak khì siong-sìn hu-ké, 12 tì-kàu it-chhè m̄-sìn chin-lí, ì-ài put-gī ê lâng lóng siū tēng-chōe. 13 Chú só͘ thiàⁿ ê hiaⁿ-tī chí-bē, goán eng-kai put-sî ūi-tio̍h lín kám-siā Siōng-tè, in-ūi I tùi khí-thâu chiū kéng-soán lín lâi tit-kiù, tùi Sèng Sîn hō͘ lín chiâⁿ-chòe sèng-kiat ê chú-bîn, koh hō͘ lín khak-sìn chin-lí. 14 Ūi-tio̍h chit-ê, Siōng-tè thong-kè goán só͘ thoân ê hok-im ho͘-tiàu lín lâi niá-siū lán ê Chú Iâ-so͘ Ki-tok ê êng-kng. 15 Só͘-í, hiaⁿ-tī chí-bē, tio̍h khiā-chāi, tio̍h kian-siú goán só͘ kà-sī ê thoân-thóng, bô-lūn sī ēng chhùi kóng ê á-sī ēng phoe siá ê, lóng tio̍h kian-siú. 16 Goān lán ê Chú Iâ-so͘ Ki-tok pún-sin kap thiàⁿ lán ê Pē Siōng-tè tùi I ê un-tián sù lán éng-oán ê an-ùi kap bí-hó ê ǹg-bāng, 17 lâi an-ùi lín ê sim, hō͘ lín ū khùi-la̍t thang chòe ta̍k hāng hó-sū, kóng ta̍k hāng hó-ōe.

2 Thiap-sat-lô-nî-ka 3

1 Hiaⁿ-tī chí-bē, goán iáu ū ōe beh kā lín kóng. Chhiáⁿ lín ūi-tio̍h goán kî-tó, hō͘ Chú ê sìn-sit ōe chhin-chhiūⁿ tī lín tiong-kan án-ni chin kín thoân-khui koh tit-tio̍h êng-kng. 2 Mā chhiáⁿ lín kî-kiû Siōng-tè hō͘ goán ōe-tàng thoat-lī choh-ok choh-to̍k ê lâng, in-ūi m̄-sī ta̍k ê lâng lóng ū sìn. 3 Chú sī khó-khò ê, I ōe hō͘ lín kian-kò͘, ōe pó-siú lín thoat-lī hit-ê Siâ-ok-chiá. 4 Chú hō͘ goán tùi lín ū sìn-sim, siong-sìn goán kau-tài lín ê tāi-chì, lín hiān-chāi ū teh chòe, āu-lâi mā ōe chòe. 5 Goān Chú ín-chhōa lín, hō͘ lín ha̍k-si̍p Siōng-tè ê thiàⁿ kap Ki-tok ê thun-lún! 6 Hiaⁿ-tī chí-bē, goán hōng Chú Iâ-so͘ Ki-tok ê miâ bēng-lēng lín, nā ū sìn-tô͘ seng-oa̍h sàn-bān pîn-tōaⁿ, bô chun-siú goán thoân-siū hō͘ in ê kà-sī, lín tio̍h siám-khui. 7 Lín ka-kī mā chai lín tio̍h án-chóaⁿ o̍h goán, in-ūi goán tī lín tiong-kan ê sî bô sàn-bān pîn-tōaⁿ. 8 Goán m̄-bat pe̍h-chia̍h pa̍t-lâng ê pn̄g; hoán-tńg mî-ji̍t thoa-bôa lô-khó͘, chiah-bián chiâⁿ-chòe lín ê hū-tam. 9 Goán án-ni chòe, m̄-sī kóng goán bô koân thang iau-kiû kiong-èng, sī ài ēng goán ka-kī chòe lín ê bô͘-iūⁿ, hō͘ lín thang o̍h goán ê khoán-sit. 10 Goán tī lín hia ê sî bat bēng-lēng lín kóng, “M̄-khéng chòe-kang ê lâng m̄-thang chia̍h.” 11 Goán án-ni kóng, sī in-ūi goán ū thiaⁿ-kìⁿ lín tiong-kan ū lâng pîn-tōaⁿ m̄ chòe-kang, chí-ū ài chhap lâng ê êng-á-sū. 12 Chit khoán lâng, goán hōng Chú Iâ-so͘ Ki-tok ê miâ kā in kéng-kò, bēng-lēng in tio̍h an-hūn chòe-kang, ka-kī thó-thàn. 13 M̄-kú, hiaⁿ-tī chí-bē, chòe hó-sū m̄-thang siūⁿ-siān. 14 Nā ū lâng m̄ khéng ho̍k-chiông goán tī chit tiuⁿ phoe só͘ hoan-hù ê ōe, tio̍h kā i kì-teh, m̄-thang kap i lâi-óng, thang hō͘ i kám-kak kiàn-siàu; 15 put-kò m̄-thang kā i khòaⁿ-chòe tùi-te̍k, tio̍h khòaⁿ i chòe hiaⁿ-tī á-sī chí-bē kā i khoàn-bián. 16 Goān sù pêng-an ê Chú put-sî ēng ta̍k khoán hong-hoat chhin-sin sù lín pêng-an! Goān Chú kap lín tāi-ke tông-chāi! 17 Góa --- [Pó-lô] chhin-pit kā lín chhéng-an. Góa tī ta̍k tiuⁿ phoe lóng ū án-ni chhiam-miâ. Góa lóng án-ni siá. 18 Goān lán ê Chú Iâ-so͘ Ki-tok ê un-tián kap lín tāi-ke tông-chāi!

1 Thê-mô͘-thài 1

1 Góa sī [Pó-lô], chiàu lán ê Kiù-chú Siōng-tè kap chòe lán ǹg-bāng ê Ki-tok Iâ-so͘ ê bēng-lēng choh Ki-tok Iâ-so͘ ê sù-tô͘, 2 siá-phoe hō͘ [Thê-mô͘-thài], sìn-gióng siōng góa chin ê kiáⁿ. Goān Pē Siōng-tè kap lán ê Chú Ki-tok Iâ-so͘ sù lí un-tián, lîn-bín, kap pêng-an! 3 Góa beh khì [Má-kî-tùn] ê sî, ū khǹg lí tio̍h lâu tī [Í-hut-só͘], thang bēng-lēng chi̍t-kóa lâng m̄-thang thoân pa̍t khoán kàu-gī, 4 mā m̄-thang lōng-hùi cheng-sîn tī bô-iáⁿ-chiah ê thoân-soat kap lò-lò-tn̂g ê cho̍k-phó͘, in-ūi chiah-ê chí-ū ōe ín-khí piān-lūn, bōe pang-chān lâng ēng sìn liáu-kái Siōng-tè ê kè-ōe. 5 Chit-ê bēng-lēng ê bo̍k-te̍k sī beh tit-tio̍h jîn-ài; chit-ê jîn-ài sī tùi chheng-khì ê sim, chheng-pe̍k ê liông-sim, kap sûn-chin ê sìn sán-seng ê. 6 Ū lâng tùi chiah-ê phian-lī, sit-bê tī khang-hu ê tâm-lūn. 7 In liân ka-kī só͘ kóng só͘ chú-tiuⁿ ê to bô lí-kái, koh siūⁿ-beh choh Lu̍t-hoat kàu-su. 8 Lán chai, lâng nā ha̍p-hoat sú-iōng Lu̍t-hoat, Lu̍t-hoat sī hó. 9 Lán mā chai, Lu̍t-hoat ê chè-tēng m̄-sī ūi-tio̍h chèng-ti̍t ê lâng, sī ūi-tio̍h put-hoat kap bô sūn-ho̍k, bô kèng-khiân kap hoān-chōe, bô sèng-kiat kap tham-loân sè-sio̍k, thâi-sí lāu-pē kap thâi-sí lāu-bú, thâi-sí lâng, 10 îm-loān, hò͘ⁿ lâm-sek, koái-iú lâng, kóng pe̍h-chha̍t, choh gūi-chèng, á-sī ûi-hoán kiān-choân ê kàu-gī chit lūi ê lâng. 11 Chit-ê kiān-choân ê kàu-gī hû-ha̍p eng-kai tit-tio̍h chheng-chàn ê Siōng-tè só͘ kau-thok góa hit-ê êng-kng ê hok-im. 12 Góa kám-siā hō͘ góa khùi-la̍t ê lán ê Chú Ki-tok Iâ-so͘, in-ūi I khòaⁿ góa chòe thang sìn-jīm, chí-phài góa chòe chhe-ēng. 13 Sui-jiân í-chêng góa pòng-to̍k, pek-hāi, koh kā I bú-jio̍k, iáu-kú tit-tio̍h lîn-bín, sī in-ūi góa bī-sìn m̄-bat ê sî chiah án-ni chòe. 14 Lán ê Chú sù góa hong-sēng kàu móa chhut-lâi ê un-tián, hō͘ góa tit-tio̍h kap Ki-tok Iâ-so͘ kiat-liân chiah ū ê sìn kap thiàⁿ. 15 “Ki-tok Iâ-so͘ lîm-kàu sè-kan sī beh chín-kiù chōe-jîn” chit kù ōe thang siong-sìn, ta̍t-tit oân-choân chiap-siū. Chōe-jîn tiong góa sī tē-it pháiⁿ ê. 16 M̄-kú góa tit-tio̍h lîn-bín sī in-ūi Iâ-so͘ Ki-tok beh ēng góa chit-ê tē-it pháiⁿ ê lâng lâi hián-bêng Siōng-tè bû-hān ê nāi-sim, thang chòe āu-lâi sìn Iâ-so͘ lâi tit-tio̍h éng-oa̍h ê lâng ê bô͘-iūⁿ. 17 Goān chun-kùi, êng-kng kui tī bān-sè ê Kun-ông, éng-oán chûn-chāi, khòaⁿ bōe-tio̍h, to̍k-it bû-jī ê Siōng-tè, ti̍t-kàu éng-éng oán-oán. Amen! 18 Góa ê kiáⁿ [Thê-mô͘-thài] ah, chiàu í-chêng koan-hē lí só͘ kóng ê ū-giân, góa chiong chit-ê bēng-lēng kau-thok lí, hō͘ lí thang ēng chiah-ê ū-giân khì cheng-chiàn eng-kai iâⁿ ê chiàn-cheng. 19 Lí tio̍h chhî-siú sìn-sim kap chheng-pe̍k ê liông-sim. Ū chi̍t-kóa lâng pàng-sak liông-sim, tì-kàu sìn-sim chhin-chhiūⁿ chûn khò-chhián, 20 kî-tiong ū [Hú-bí-nái] kap [A-le̍k-san-tāi]; góa í-keng chiong in kau hō͘ Sat-tàn, hō͘ in siū kà-sī bô koh pòng-to̍k Siōng-tè.

1 Thê-mô͘-thài 2

1 Só͘-í, tē-it, góa khoàn-bián lí tio̍h ūi-tio̍h só͘-ū ê lâng, kun-ông, kap lóng-chóng ê koaⁿ-oân khún-kiû, kî-tó, tāi-tó, kám-un, hō͘ lán thang kè pêng-chēng an-jiân ê seng-oa̍h, hoān-sū kèng-khiân, toan-chèng. 3 Án-ni chòe sī eng-kai, sī lán ê Kiù-chú Siōng-tè hoaⁿ-hí chiap-la̍p ê. 4 I ài chèng-lâng tit-kiù, ta̍t-kàu jīm-sek chin-lí. 5 In-ūi Siōng-tè sī chi̍t ūi, Siōng-tè kap lâng tiong-kan ê tiong-kan-jîn mā-sī chi̍t ūi, chiū-sī choh-lâng ê Ki-tok Iâ-so͘. 6 I hiàn pún-sin lâi sio̍k-hôe chèng-lâng, chit hāng sū tī tú-hó ê sî-ki ū tit-tio̍h chèng-si̍t. 7 Ūi-tio̍h án-ni, góa siū jīm-bēng chòe thoân-tō-chiá, sù-tô͘, kap Gōa-pang-lâng ê kàu-su, hō͘ in siong-sìn Siōng-tè jīm-sek chin-lí. Góa sī teh kóng chin ê, m̄-sī kóng ké ê. 8 Tī ta̍k só͘-chāi ê chū-hōe, góa ài ta-po͘-lâng bô siū-khì, bô cheng-lūn, gia̍h-khí sèng-kiat ê chhiú kî-tó. 9 Góa mā ài hū-jîn-lâng chhēng-chhah phok-sò͘ chéng-chôe, m̄-thang ēng kî-hêng koài-chōng ê thâu-mn̂g-hêng, kim-khì, chu-pó, á-sī chin kùi ê saⁿ chng-thāⁿ ka-kī; 10 tio̍h ēng hó hêng-ûi chòe chng-thāⁿ, piáu-sī ka-kī sī kèng-ùi Siōng-tè ê hū-jîn-lâng. 11 Hū-jîn-lâng tio̍h tiām-tiām-á o̍h, ēng sūn-chiông ê sim sū-sū sūn-ho̍k. 12 Góa m̄-chún hū-jîn-lâng kà-sī á-sī koán-hat ta-po͘-lâng; i tio̍h chēng-chēng. 13 In-ūi [A-tong] tāi-seng siū chō, āu-lâi chiah [Hā-oa]. 14 Koh [A-tong] bô siū iú-he̍k, m̄-kú hū-jîn-lâng siū iú-he̍k hām-lo̍h chōe. 15 Put-kò hū-jîn-lâng nā an-hūn siú-kí, chhî-siú sìn-gióng, jîn-ài, kap sèng-kiat, chiū ōe in-ūi siⁿ-kiáⁿ tit-tio̍h kiù.

1 Thê-mô͘-thài 3

1 Chit kù ōe thang siong-sìn: Nā ū lâng ài choh kam-tok, i sī him-bō͘ hó ê kang. 2 Só͘-í, kam-tok tio̍h bô thang hiâm, chí-ū chi̍t ê bó͘, an-hūn siú-kí, chū-chè, toan-chèng, gâu khoán-thāi chhut-gōa-lâng, gâu kà-sī; 3 bô chiú-chùi, bô hiong-pō, hoán-tńg ài un-hô, bô saⁿ-chiⁿ, bô tham-châi, 4 gâu koán-lí ka-kī ê ka-têng, kiáⁿ-jî ū sūn-ho̍k, sū-sū toan-chong. 5 In-ūi lâng nā bōe-hiáu koán-lí ka-kī ê ka-têng, ná ōe-hiáu koàn-kò͘ Siōng-tè ê kàu-hōe? 6 Chho͘-sìn-chiá m̄-thang hō͘ i tam-jīm kam-tok, chiah bōe chū-ko chū-tāi, hām-lo̍h kap Mô͘-kúi só͘ siū kâng-khoán ê sím-phòaⁿ. 7 I tī kàu-hōe gōa mā tio̍h ū hó kiàn-chèng, chiah-bián siū húi-pòng, hām-lo̍h Mô͘-kúi ê lô-bāng. 8 Chip-sū siâng-khoán mā tio̍h toan-chong, bô siang-bīn-ōe, bô hò͘ⁿ-chiú, bô tham châi-lī, 9 tio̍h ēng chheng-khì ê liông-sim kò͘-siú sìn-gióng ê ò-pì. 10 Chit khoán lâng mā tio̍h seng hō͘ in chiap-siū khó-giām, nā bô thang hiâm chiah hō͘ in tam-jīm chip-sū. 11 Lú chip-sū mā-sī tio̍h toan-chong, bô tiòng-siong pa̍t-lâng, an-hūn siú-kí, sū-sū tiong-si̍t. 12 Chip-sū eng-kai chí-ū chi̍t ê bó͘, gâu koán-lí kiáⁿ-jî kap ka-kī ê ka-têng. 13 Chip-sū ê kang-chok nā chòe ōe hó, pún-sin ōe tit-tio̍h hó miâ-siaⁿ, mā thang chin hó-táⁿ káng-lūn in tùi Ki-tok Iâ-so͘ ê sìn-gióng. 14 Góa ǹg-bāng chin kín chiū ōe khì lí hia, m̄-kú kiaⁿ-liáu khah bān kàu, góa seng siá chit tiuⁿ phoe hō͘ lí chai lán tī Siōng-tè ê ke tio̍h án-chóaⁿ seng-oa̍h; chit-ê ke chiū-sī chin-oa̍h Siōng-tè ê kàu-hōe, iā chiū-sī chin-lí ê thiāu-chio̍h kap tōe-ki. 16 Tāi-ke lóng soan-jīn lán sìn-gióng ê ò-pì sī jōa-ni̍h tōa: Ki-tok hián-hiān chòe lâng, hō͘ Sèng Sîn jīn-tēng chòe tio̍h, chhut-hiān hō͘ thiⁿ-sài khòaⁿ, siū soan-iông tī bān-pang, hō͘ sè-kan-lâng siong-sìn, siū chiap-la̍p ji̍p êng-iāu.

1 Thê-mô͘-thài 4

1 Sèng Sîn bêng-bêng kóng, tī āu-lâi ê sî-kî ū chi̍t-kóa lâng ōe pōe-sìn, khì thàn bê-he̍k lâng ê siâ-lêng kap kúi-sîn ê kà-sī. 2 Chit khoán ê kà-sī sī tùi khi-phiàn ê lâng ê pe̍h-chha̍t lâi ê, in ê liông-sim í-keng hō͘ Mô͘-kúi ēng jia̍t ê thih-ìn kā in ù kì-hō kui-sio̍k Mô͘-kúi. 3 In kìm-chí kè-chhōa, kìm-kài chi̍t-kóa chia̍h-mi̍h, chiū-sī Siōng-tè chhòng-chō beh hō͘ sìn koh bêng-pe̍k chin-lí ê lâng ēng kám-siā lâi niá-siū ê. 4 In-ūi Siōng-tè it-chhè ê chhòng-chō lóng sī hó, nā ēng kám-siā lâi niá-siū, chiū bô pòaⁿ-hāng thang kū-choa̍t; 5 thong-kè Siōng-tè ê ōe kap lâng ê kî-tó chiū chiâⁿ-chòe sèng. 6 Lí nā chiong chiah-ê sū kà-sī hiaⁿ-tī chí-bē, chiū ōe tùi só͘ sìn ê tō-lí kap só͘ sūn-thàn kiān-choân ê kà-sī tit-tio̍h pôe-iúⁿ, chiâⁿ-chòe Ki-tok Iâ-so͘ ê hó chhe-ēng. 7 Tio̍h kū-choa̍t chho͘-sio̍k kap khong-tōng bô-iáⁿ-chiah ê thoân-soat. Ūi-tio̍h kèng-khiân ê seng-oa̍h, tio̍h kè-sio̍k chhau-liān ka-kī. 8 Chhau-liān seng-khu ū tām-po̍h lī-ek, m̄-kú kèng-khiân tùi ta̍k hāng lóng ū lī-ek, in-ūi ū èng-ún thang tit-tio̍h hiān-kim kap lâi-sè ê oa̍h-miā. 9 Chit kù ōe thang siong-sìn, ta̍t-tit oân-choân chiap-siū. 10 Ūi-tio̍h chit-ê, lán chhut-la̍t tio̍h-bôa, in-ūi lán ê ǹg-bāng chāi-tī chin-oa̍h ê Siōng-tè, I sī chèng-lâng, te̍k-pia̍t sī sìn ê lâng ê Kiù-chú. 11 Lí tio̍h chiong chiah-ê tāi-chì kā in khoàn-bián kap kà-sī. 12 M̄-thang in-ūi lí ê siàu-liân hō͘ lâng khòaⁿ-khin; tio̍h tī kóng-ōe, kiâⁿ-chòe, thiàⁿ-sim, sìn-sim, sûn-kiat, chòe sìn-tô͘ ê bô͘-hoān. 13 Tio̍h tì-ì soan-tho̍k Sèng-keng, khoàn-bián, kap kà-sī, ti̍t-kàu góa lâi. 14 M̄-thang hut-lio̍k lí só͘ niá-siū sio̍k-lêng ê un-sù, chiū-sī thong-kè sian-ti ê sìn-sit kap tiúⁿ-ló-thoân ê àn-chhiú sù hō͘ lí ê. 15 Chiah-ê tāi-chì, lí tio̍h choan-sim tì-ì khì chòe, hō͘ chèng-lâng thang khòaⁿ-tio̍h lí ê chìn-pō͘. 16 Lí ka-kī tio̍h kín-sīn, lí ê kà-sī mā tio̍h kín-sīn; chiah-ê tāi-chì tio̍h kian-chhî khì chòe, án-ni chòe ōe kiù lí pún-sin kap thiaⁿ-thàn lí ê lâng.

1 Thê-mô͘-thài 5

1 M̄-thang chek-pī lāu-lâng, tio̍h chhin-chhiūⁿ khǹg lāu-pē án-ni kā i khǹg; tio̍h chhin-chhiūⁿ khǹg hiaⁿ-tī án-ni khǹg siàu-liân-lâng; 2 tio̍h chhin-chhiūⁿ khoán-thāi lāu-bú án-ni khoán-thāi lāu hū-jîn-lâng; tio̍h chhin-chhiūⁿ khoán-thāi chí-bē án-ni ēng oân-choân sûn-kiat ê sim khoán-thāi siàu-liân ê hū-jîn-lâng. 3 Tio̍h chun-tiōng chin-chiàⁿ bô i-óa ê kóaⁿ-hū. 4 Kóaⁿ-hū ū kiáⁿ-jî-sun, chiah-ê kiáⁿ-jî-sun tio̍h tāi-seng tī ka-kī ê ka-têng ha̍k-si̍p hàu-sūn ê pún-hūn, lâi pò-tap in ê sī-tōa-lâng, in-ūi che sī Siōng-tè só͘ hoaⁿ-hí ê. 5 Chin-chiàⁿ bô-i bô-óa ê kóaⁿ-hū, chí-ū gióng-bōng Siōng-tè, mî-ji̍t kè-sio̍k khún-kiû kî-tó. 6 M̄-kú chhia-hoa ê kóaⁿ-hū, sui-jiân teh oa̍h, kî-si̍t sī sí. 7 Lí tio̍h chiong chiah-ê kā in kà-sī, in chiah bōe siū chek-pī. 8 Nā ū lâng bô chiàu-kò͘ chhin-chhek, te̍k-pia̍t sī bô chiàu-kò͘ ka-kī chhù-lāi ê lâng, i í-keng pōe-poān sìn-gióng, pí bô-sìn ê lâng koh-khah hāi. 9 Kóaⁿ-hū tio̍h chhiau-kè la̍k-cha̍p hè chiah thang teng-kì; i tio̍h chí-ū kiat-hun chi̍t piàn, 10 tio̍h ū chòe hó-sū ê chèng-kù, chhin-chhiūⁿ ióng-io̍k kiáⁿ-jî, chiap-thāi chhut-gōa-lâng, kā sìn-tô͘ sóe-kha, pang-chān tú-tio̍h hoān-lān ê lâng, choan-sim chòe ta̍k hāng hó-sū. 11 M̄-kú siàu-liân ê kóaⁿ-hū m̄-thang kā in teng-kì; in-ūi in chêng-io̍k chi̍t-ē chhiong-tōng lī-khui Ki-tok, chiū siūⁿ-beh kè, 12 ûi-pōe tong-chho͘ só͘ hē ê goān, tì-kàu ka-kī chhú-chōe. 13 Koh in o̍h pîn-tōaⁿ, chi̍t-ke kè chi̍t-ke se̍h thàu-thàu; m̄-nā pîn-tōaⁿ, mā ài kóng lâng ê sī-hui, ài chhap êng-á-sū, kóng m̄ eng-kai kóng ê ōe. 14 Só͘-í góa ài siàu-liân ê kóaⁿ-hū koh-kè, siⁿ-kiáⁿ, liāu-lí ka-kī ê ka-têng, chiah bōe hō͘ tùi-te̍k ū ki-hōe thang kóng lán ê pháiⁿ-ōe; 15 in-ūi ū chi̍t-kóa kóaⁿ-hū í-keng lī-khui, khì tè Sat-tàn. 16 Sìn Chú ê hū-jîn-lâng chhù-lāi nā ū kóaⁿ-hū, tio̍h ka-kī kā in chiàu-kò͘, m̄-thang chiong chit-ê tàⁿ sak hō͘ kàu-hōe, kàu-hōe chiah ōe-tàng chiàu-kò͘ hiah-ê chin-chiàⁿ bô i-óa ê kóaⁿ-hū. 17 Gâu tī-lí kàu-hōe ê tiúⁿ-ló eng-kai tit-tio̍h ka-pē ê pò-siû, te̍k-pia̍t chīn-la̍t tī káng-tō kap kà-sī ê koh-khah tio̍h án-ni, 18 in-ūi Sèng-keng kóng, “Teh thoa chio̍h-bō ê gû m̄-thang kā i kòa gû-chhùi-lam”; koh kóng, “Kang-lâng eng-kai tit-tio̍h kang-chîⁿ.” 19 Khòng-kò tiúⁿ-ló ê àn-kiāⁿ, nā m̄-sī ū nn̄g ê á-sī saⁿ ê chèng-jîn, m̄-thang siū-lí. 20 Kè-sio̍k hoān-chōe ê lâng tio̍h tī chèng-lâng ê bīn-chêng kā in khiàn-chek, hō͘ kî-tha ê lâng tit-tio̍h kéng-kài. 21 Góa tī Siōng-tè, Ki-tok Iâ-so͘, kap siū soán ê thiⁿ-sài ê bīn-chêng bēng-lēng lí, tio̍h chun-siú chiah-ê chí-sī, m̄-thang ū sêng-kiàn, bô-lūn chòe sím-mi̍h to m̄-thang phian-sim. 22 M̄-thang sûi-piān kā lâng kiâⁿ àn-chhiú-lé. M̄-thang chham-ú pa̍t-lâng ê chōe; tio̍h pó-siú ka-kī sûn-kiat. 23 In-ūi lí ê ūi bô hó, siông-siông phòa-pīⁿ, m̄-thang kan-ta lim chúi, mā tio̍h lim tām-po̍h chiú. 24 Ū chi̍t-kóa lâng ê chōe chin bêng-hián, iáu-bē sím-phòaⁿ chiū chin chheng-chhó; ū-ê lâng ê chōe āu-lâi chiah hián-lō͘. 25 Chhin-chhiūⁿ án-ni, hó hêng-ûi mā chin bêng-hián, bô bêng-hián ê, mā khàm bōe-tiâu.

1 Thê-mô͘-thài 6

1 Tī lâng ê koán-hat-ē chòe lô͘-lē-ê, tio̍h khòaⁿ ka-kī ê chú-lâng chòe kham-tit siū chhiong-hun ê chun-kèng, Siōng-tè ê miâ kap tō-lí chiah bōe siū húi-pòng. 2 Chú-lâng nā-sī sìn Chú ê, m̄-thang in-ūi in sī Chú-lāi ê hiaⁿ-tī chiū bô kā in chun-kèng; kì-jiân tùi lô͘-lē ê ho̍k-sāi lâi tit-tio̍h lī-ek ê chú-lâng sī sìn-tô͘, mā-sī só͘ kèng-ài ê lâng, lín koh-khah tio̍h un-khûn kā in ho̍k-sāi. Lí tio̍h ēng chiah-ê sū lâi kà-sī kap khoàn-bián: 3 Nā ū lâng kà pa̍t khoán kàu-gī bô hû-ha̍p lán ê Chú Iâ-so͘ Ki-tok kiān-choân ê tō-lí, bô kun-kù khiân-sêng ê kàu-gī, 4 chiū-sī phòng-hong chū-tāi, oân-choân bû-ti, hò͘ⁿ piān-lūn, ài tī jī-bīn siōng cheng-lūn; tùi chiah-ê ín-khí chi̍t-tò͘, hun-cheng, húi-pòng, chhai-gî, 5 tì-kàu sim-su pāi-hoāi, sòng-sit chin-lí, hun-cheng bô thêng; in siūⁿ-kóng chong-kàu sī thàn-chîⁿ ê chhiú-tōaⁿ. 6 Chong-kàu khak-si̍t ōe hō͘ ti-chiok ê lâng tit-tio̍h tōa lī-ek. 7 Seng put tài-lâi, sú put tài-khì; 8 ū thang chia̍h, ū thang chhēng, ū chiah-ê lán chiū ti-chiok. 9 Siūⁿ-beh hoat-châi ê lâng ōe hām-lo̍h iú-he̍k, hām-chíⁿ, kap chin chōe khoán gû-gōng iú-hāi ê io̍k-bōng, hō͘ lâng tîm-lûn tì-kàu pāi-hoāi kap húi-bia̍t. 10 In-ūi tham-châi sī bān-ok ê kun-goân; ū lâng tham-ài chîⁿ-châi, siū bê phian-lī sìn-gióng, ka-kī siū-chīn khó͘-thàng. 11 M̄-kú lí chit-ê sio̍k Siōng-tè ê lâng, tio̍h siám-pī chiah-ê sū. Tio̍h tui-kiû chèng-gī, kèng-khiân, sìn-sim, jîn-ài, nāi-sim, kap un-jiû. 12 Sìn-gióng bí-hó ê kèng-sài tio̍h chīn-la̍t khì piàⁿ; tio̍h khak-pó éng-oán ê oa̍h-miā; ūi-tio̍h chit-ê oa̍h-miā lí ū siū kéng-tiàu, tī chin chōe kiàn-chèng-jîn ê bīn-chêng soan-jīn bí-hó ê sìn-gióng. 13 Tī sù oa̍h-miā hō͘ bān-mi̍h ê Siōng-tè, kap tùi [Pâng-siu] [Pí-lia̍p-to] soan-jīn bí-hó sìn-gióng ê Ki-tok Iâ-so͘ bīn-chêng, 14 góa hoan-hù lí tio̍h chun-siú só͘ niá-siū ê bēng-lēng, bô khoat-tiám, bô thang hiâm, ti̍t-kàu lán ê Chú Iâ-so͘ Ki-tok hián-hiān ê sî. 15 Tī sî-ki sêng-se̍k ê sî, hit-ūi eng-kai siū o-ló to̍k-it bû-jī ê Chú-cháiⁿ, bān ông ê Ông, bān chú ê Chú Siōng-tè, beh hō͘ I hián-hiān. 16 Siōng-tè sī to̍k-it bōe-sí, tiàm tī lâng bōe thang chiap-kūn ê kng-bêng tiong; bô-lâng bat khòaⁿ-kìⁿ I, mā bô-lâng ōe-tàng khòaⁿ-kìⁿ I. Goān chun-kùi kap éng-oán ê chú-koân kui tī I. Amen! 17 Tùi hiah-ê kim-sè hó-gia̍h ê lâng, lí tio̍h hoan-hù in m̄-thang kiau-ngō͘, m̄-thang chiong in ê ǹg-bāng khǹg tī bōe óa-khò-tit ê châi-bu̍t, tio̍h óa-khò chiong bān-mi̍h hong-hong hù-hù hō͘ lán ta̍k ê lâng hióng-siū ê Siōng-tè. 18 Tio̍h hoan-hù in chòe hó-sū, chòe chin chōe hó-sū, khóng-khài si-sià, kap lâng hun-hióng. 19 Án-ni chòe sī teh ūi ka-kī ê chiong-lâi khí-chō kian-kò͘ ê tōe-ki, pá-ak chin-chiàⁿ ê oa̍h-miā. 20 [Thê-mô͘-thài], tio̍h chhî-siú Siōng-tè kau-thok lí ê chit-chek. Tio̍h siám-pī bô kèng-khiân ê khong-tâm kap ké tì-sek ê cheng-lūn. 21 Ū lâng chū-chheng ū chit khoán tì-sek, tì-kàu sìn-gióng sit-lo̍h bo̍k-phiau. Goān Siōng-tè ê un-tián kap lín tông-chāi!

2 Thê-mô͘-thài 1

1 Góa sī [Pó-lô], hōng Siōng-tè ê chí-ì choh Ki-tok Iâ-so͘ ê sù-tô͘, lâi thoân Siōng-tè só͘ èng-ún in-ūi kap Ki-tok Iâ-so͘ kiat-liân chiah ū ê oa̍h-miā. 2 Góa siá-phoe hō͘ góa só͘ thiàⁿ ê kiáⁿ [Thê-mô͘-thài]. Goān Pē Siōng-tè kap lán ê Chú Ki-tok Iâ-so͘ sù lí un-tián, lîn-bín, kap pêng-an! 3 Góa kám-siā góa kap lia̍t-chó͘ kâng-khoán ēng chheng-khì ê liông-sim kèng-pài ê Siōng-tè. Góa mî-ji̍t kî-tó ê sî siàu-liām lí bô-soah. 4 Góa siūⁿ-tio̍h lī-pia̍t ê sî lí teh lâu ba̍k-sái, chiū chin ài kìⁿ lí, thang hō͘ góa chhiong-móa hoaⁿ-hí. 5 Góa kì-tit lí ū sûn-chin ê sìn-sim; chit-ê sìn-sim lí ê gōa-má [Lô-í] kap lí ê lāu-bú [Iú-nî-ki] seng ū, góa siong-sìn hiān-chāi lí mā ū. 6 In-ūi án-ni, góa thê-chhíⁿ lí, góa kā lí àn-chhiú ê sî Siōng-tè hō͘ lí ê un-sù, tio̍h hō͘ i chhin-chhiūⁿ hé koh to̍h khí-lâi. 7 In-ūi Siōng-tè hō͘ lán ê m̄-sī kiaⁿ-hiâⁿ ê sim-lêng, sī khùi-la̍t, jîn-ài, kap chū-chè ê sim-lêng. 8 Só͘-í, ūi-tio̍h lán ê Chú chòe kiàn-chèng m̄-thang kám-kak kiàn-siàu, mā m̄-thang in-ūi góa ūi-tio̍h Chú chòe siû-hoān lâi kám-kak kiàn-siàu; tio̍h chiàu Siōng-tè só͘ sù ê khùi-la̍t ūi-tio̍h hok-im kap góa chòe-hé siū-khó͘. 9 Siōng-tè kiù lán, kéng-tiàu lán chòe I ka-kī ê chú-bîn, m̄-sī kun-kù lán ê hêng-ûi, sī chiàu I ka-kī ê chí-ì kap un-tián. Chit-ê un-tián tī bān-sè í-chêng thong-kè Ki-tok Iâ-so͘ sù hō͘ lán; 10 chit-ê un-tián hiān-chāi thong-kè lán ê Kiù-chú Ki-tok Iâ-so͘ ê hián-hiān í-keng si̍t-hiān. Ki-tok í-keng húi-bia̍t sí-bông, koh thong-kè hok-im chiong bōe pāi-hoāi ê oa̍h-miā hián-bêng chhut-lâi. 11 Ūi-tio̍h chit-ê hok-im, Siōng-tè jīm-bēng góa chòe thoân-tō-chiá, sù-tô͘, kap kàu-su. 12 Só͘-í góa chiah teh siū-khó͘. Chóng-sī góa bô kám-kak kiàn-siàu, in-ūi góa bat góa só͘ sìn ê Siōng-tè, mā chhim-sìn I ōe pó-siú I só͘ kau-thok góa ê ti̍t-kàu hit-ê Ji̍t. 13 Tio̍h ēng lí tùi góa thiaⁿ-tio̍h hiah-ê kiān-choân ê tō-lí chòe bô͘-iūⁿ, kian-chhî lán kap Ki-tok kiat-liân lâi tit-tio̍h ê sìn-sim kap jîn-ài. 14 Tio̍h kò͘-siú thong-kè tiàm tī lán lāi-bīn ê Sèng Sîn kau-thok hō͘ lí ê hó-mi̍h. 15 Lí chai, tī [A-se-a] ê lâng lóng pōe-poān góa, kî-tiong ū [Hui-kiat-lō͘] kap [Hek-mô͘-kî-nî]. 16 Goān Chú lîn-bín [O-nî-sek-hut] chi̍t ke ê lâng, in-ūi i siông-siông kā góa kó͘-lē, bô in-ūi góa kòa thih-liān kám-kak kiàn-siàu, 17 tian-tò kàu [Lô-má] ê sî chiū phah-piàⁿ chhē góa chhē kàu tio̍h. 18 Goān Chú hō͘ i tī hit-ê Ji̍t tit-tio̍h lîn-bín! I tī [Í-hut-só͘] hiah-ni̍h gâu ho̍k-sāi góa, lí chin chheng-chhó.

2 Thê-mô͘-thài 2

1 Só͘-í, góa ê kiáⁿ ah, lí tio̍h khò Ki-tok Iâ-so͘ ê un-tián kian-kiông khí-lâi. 2 Lí tī chin chōe kiàn-chèng-jîn bīn-chêng tùi góa thiaⁿ-tio̍h chiah-ê kà-sī, tio̍h kau-thok hō͘ hiah-ê tiong-si̍t, mā ōe kham-tit kà-sī pa̍t-lâng ê lâng. 3 Lí tio̍h choh Ki-tok Iâ-so͘ ê cheng-peng kap góa chòe-hé siū-khó͘. 4 Ho̍k-ia̍h ê peng nā beh hō͘ koaⁿ-tiúⁿ hoaⁿ-hí, chiū m̄-thang hō͘ seng-oa̍h ê tāi-chì tîⁿ-kha pòaⁿ-chhiú. 5 Ūn-tōng-oân nā bô chiàu kui-chek pí-sài chiū bōe tit-tio̍h koan-kun ê hoa-koan. 6 Kut-la̍t chèng-choh ê lông-hu tong-jiân seng siu-sêng. 7 Góa só͘ kóng ê ōe lí tio̍h hó-hó-á siūⁿ, in-ūi Chú ōe hō͘ lí liáu-kái ta̍k hāng tāi-chì. 8 Tio̍h kì-tit Iâ-so͘ Ki-tok, I sī [Tāi-pi̍t] ê hō͘-tāi, Siōng-tè hō͘ I tùi sí-lâng tiong koh-oa̍h; che sī góa só͘ thoân ê hok-im. 9 Góa ūi-tio̍h chit-ê hok-im siū-khó͘, sīm-chì chhin-chhiūⁿ hoān-lâng hō͘ lâng ēng kha-khàu khàu-teh; m̄-kú Siōng-tè ê ōe bô siū khàu. 10 Só͘-í, góa ūi-tio̍h Siōng-tè só͘ kéng-soán ê lâng jím-siū it-chhè, hō͘ in mā ōe tit-tio̍h Ki-tok Iâ-so͘ ê chín-kiù kap éng-oán ê êng-kng. 11 Chit kù ōe thang siong-sìn: Lán nā kap I tâng-sí, mā ōe kap I tâng-oa̍h. 12 Lán nā thun-lún, mā ōe kap I chòe-hé chiáng-koân. Lán nā m̄-jīn I, I mā ōe m̄-jīn lán. 13 Lán nā sit sìn, I iû-goân sìn-si̍t, in-ūi I bōe-tàng ûi-pōe ka-kī. 14 Lí tio̍h thê-chhíⁿ tāi-ke, tī Chú ê bīn-chêng bēng-lēng in m̄-thang ūi-tio̍h giân-sû cheng-piān; án-ni chòe bô lī-ek, ōe hō͘ thiaⁿ ê lâng tì-kàu pāi-hoāi. 15 Tio̍h chīn-la̍t chòe, thang hō͘ Siōng-tè khòaⁿ-chòe khó-chhú, bô kiàn-siàu ê kang-lâng, chèng-khak kóe-seh chin-lí ê tō. 16 Tio̍h siám-pī chho͘-sio̍k bô lō͘-ēng ê ōe, in-ūi chit khoán tāi-chì ōe hō͘ lâng ná bô kèng-khiân, 17 chit khoán ê ōe ōe chhin-chhiūⁿ to̍k-chhng thòaⁿ-khui. [Hú-bí-nái] kap [Hui-lí-tô͘] mā-sī chit khoán lâng; 18 in í-keng lī-khui chin-lí, kóng koh-oa̍h ê sū í-keng kè-khì, tì-kàu chi̍t-kóa lâng ê sìn-gióng oân-choân tó-hoāi. 19 Siōng-tè ê tōe-ki kian-kò͘ bōe iô-tāng, téng-bīn ū khek jī kóng: “Chú bat sio̍k I ê lâng”, koh kóng: “Kiû-kiò Chú ê miâ ê lâng lóng tio̍h lī-khui put-gī.” 20 Tī tōa keng chhù-lāi, m̄-nā ū kim kap gûn, mā ū chhâ kap hûi ê khì-khū; ū ê chòe iù ê, ū ê chòe chho͘ ê lō͘-ēng. 21 Lâng nā kiat-chēng ka-kī, lī-khui chiah-ê chho͘-sio̍k ê sū, chiū ōe chiâⁿ-chòe kùi-khì ê khì-khū, sèng-hòa hō͘ Chú-lâng ēng, thang chún-pī hó-sè chòe ta̍k hāng hó-sū. 22 Tio̍h siám-pī siàu-liân lâng ê chêng-io̍k; tio̍h kap ēng chheng-khì ê sim kiû-kiò Chú ê lâng chòe-hé tui-kiû kong-gī, sìn-gióng, jîn-ài, kap hô-pêng. 23 M̄-thang ū gû-gōng bû-ti ê piān-lūn; lí chai chiah-ê tāi-chì ōe ín-khí oan-ke. 24 Chú ê lô͘-po̍k bô eng-kai oan-ke, tio̍h un-hô tùi-thāi chèng-lâng, gâu kà-sī, gâu jím-siū, 25 un-jiû khoàn-kài hoán-tùi-chiá, kiám-chhái Siōng-tè ōe hō͘ in hóe-kái, bat chin-lí. 26 Án-ni in sui-jiân í-keng hō͘ Mô͘-kúi lia̍h-khì sūn-thàn i ê ì-sù, mā iáu ōe chhíⁿ-ngō͘ lâi thoat-lī i ê lô-bāng.

2 Thê-mô͘-thài 3

1 Tio̍h chai, sè-kài ê boa̍t-kî kàu ê sî ōe ū chióng-chióng ê khó͘-lān. 2 Hit sî, lâng ōe chū-su, tham-châi, khoa-kháu, kiau-ngō͘, húi-pòng, ngó͘-ge̍k pē-bú, bông-un pōe-gī, bô sèng-kiat, 3 bô chhin-chêng, chân-jím, tiòng-siong, hêng-ge̍k, hiong-pō, oàn-hūn hó, 4 kan-kúi, lām-sám chòe, chū-ko chū-tāi, ài hióng-lo̍k iâⁿ-kè thiàⁿ Siōng-tè, 5 ū kèng-khiân ê gōa-māu khiok bô kèng-khiân ê si̍t-chit. Lí tio̍h siám-pī chit khoán lâng. 6 In tiong-kan ū lâng chhim-ji̍p lâng ê chhù, khòng-chè ì-chì po̍k-jio̍k ê hū-lú. Chiah-ê hū-lú siū chōe-ok kap ta̍k khoán ê chêng-io̍k chi-phòe; 7 in put-sî to teh o̍h, khiok bô hoat-tō͘ bêng-pe̍k chin-lí. 8 Chhin-chhiūⁿ chá-chêng [Ngá-nî] kap [Iông-pò͘-lûi] hoán-tùi [Mô͘-se], hiān-chāi chiah-ê lâng mā án-ni hoán-tùi chin-lí, tì-kàu sim-chì pāi-hoāi, sìn-gióng bô sûn-chin. 9 M̄-kú chiah-ê lâng, chhin-chhiūⁿ hit nn̄g ê lâng, bōe ū sím-mi̍h éng-hióng, in-ūi in ê gû-gōng ōe tī chèng-lâng ê bīn-chêng po̍k-lō͘. 10 Lí ū o̍h góa só͘ kà-sī ê, góa ê chòe-lâng, seng-oa̍h ê bo̍k-phiau, sìn-sim, khoan-iông, thiàⁿ-sim, kian-jím, 11 í-ki̍p só͘ siū ê pek-hāi kap khó͘-lān, chiah-ê lín lóng chai, chiū-sī góa tī [An-thê-o], [Í-ko-liām], kap [Lō͘-sū-tek] só͘ tú-tio̍h ê pek-hāi, góa án-chóaⁿ teh jím-siū; m̄-kú Chú ū kiù góa thoat-lī chiah-ê. 12 Só͘-ū ài-beh kap Ki-tok Iâ-so͘ kiat-liân kè kèng-khiân seng-oa̍h ê lâng, it-tēng ōe tú-tio̍h pek-hāi. 13 Put-kò pháiⁿ-lâng kap khi-phiàn-lâng-ê ōe ná lâi ná pháiⁿ, in phiàn lâng, ka-kī mā hō͘ lâng phiàn. 14 Chóng-sī lí tio̍h chhî-siú só͘ ha̍k-si̍p só͘ chhim-sìn ê tō-lí, in-ūi lí chai chiah-ê sī tùi sím-mi̍h lâng ha̍k-si̍p ê. 15 Lí mā chai lí tùi sòe-hàn chiū bêng-pe̍k Sèng-keng, chit-ê Sèng-keng ōe-tàng hō͘ lí ū tì-hūi thang thong-kè sìn Ki-tok Iâ-so͘ tit-tio̍h chín-kiù. 16 Choân-pō͘ Sèng-keng sī siū Siōng-tè ê lêng-kám siá ê, tùi kàu-tō, tùi tok-chek, tùi kiù-chèng, tùi hùn-liān lâng kiâⁿ chiàⁿ-lō͘, lóng ū lī-ek, 17 hō͘ ho̍k-sāi Siōng-tè ê lâng chong-pī hó-sè, thang chòe ta̍k hāng hó-sū.

2 Thê-mô͘-thài 4

1 Tī Siōng-tè kap teh-beh sím-phòaⁿ só͘-ū oa̍h-lâng kap sí-lâng ê Ki-tok Iâ-so͘ ê bīn-chêng, koh in-ūi Ki-tok beh hián-hiān lâi choh-ông, góa sīn-tiōng hoan-hù lí: 2 Tio̍h thoân tō-lí, bô-lūn tio̍h-sî bô tio̍h-sî lóng tio̍h kian-chhî khì thoân; tio̍h ēng chòe-tōa ê nāi-sim kàu-tō, lâi khoàn-bián, tok-chek, kap kó͘-lē. 3 In-ūi sî-ki teh-beh kàu, hit sî lâng thiaⁿ bōe-lo̍h kiān-choân ê kà-sī; hoán-tńg thàn ka-kī ê su-io̍k, chi̍t ê koh chi̍t ê phèng-chhiáⁿ sian-siⁿ lâi boán-chiok hīⁿ-khang chiūⁿ ài thiaⁿ kah-ì thiaⁿ ê kà-sī. 4 In ng hīⁿ-khang m̄-thiaⁿ chin-lí, tian-tò ài thiaⁿ bô-iáⁿ-chiah ê thoân-soat. 5 Lí hoān-sū tio̍h kín-sīn, jím-siū khó͘-lān, chòe thoân-tō-chiá ê kang-chok, chīn lí chòe Siōng-tè chhe-ēng ê pún-hūn. 6 Taⁿ góa hi-seng ka-kī hiàn hō͘ Siōng-tè ê sî kàu lah; chit-chūn chiū-sī góa lī-khui sè-kan ê sî. 7 Tio̍h cheng-piàⁿ ê góa í-keng piàⁿ liáu; tio̍h pháu-cháu ê lō͘-thêng góa í-keng cháu oân; tio̍h chhî-siú ê sìn-gióng góa í-keng kian-siú. 8 Gī ê hoa-koan hiān-chāi í-keng kā góa chún-pī hó-sè, Chú --- kong-gī ê Sím-phòaⁿ-chiá tī hit-ê Ji̍t beh hō͘ góa; m̄-nā hō͘ góa, mā beh hō͘ lóng-chóng him-bō͘ I hián-hiān ê lâng. 9 Lí tio̍h chīn-só͘-ōe kóaⁿ-kín lâi góa chia; 10 in-ūi [Tí-má] tham-ài hiān-sè, í-keng lī-khui góa khì [Thiap-sat-lô͘-nî-ka]; [Kek-le̍k-sū] mā í-keng khì [Ka-lia̍p-thài], [Thê-to] khì [That-má-thài]. 11 Chí-ū [Lō͘-ka] kap góa chòe-hé tī chia. Lí tio̍h khì chhōa [Má-khó] kap lí chòe-hé lâi, in-ūi i tùi góa ê kang-chok chin ū pang-chān. 12 Góa í-keng phài [Chhui-ki-kó͘] khì [Í-hut-só͘]. 13 Góa tī [Te̍k-lô-a] ê sî lâu tī [Ka-pò͘] in tau hit niá gōa-saⁿ, lí beh lâi ê sî tio̍h tòa lâi, mā tio̍h tòa hiah-ê chheh lâi, te̍k-pia̍t sī hiah-ê iûⁿ-phê ê chheh. 14 Phah-tâng-sai-hū [A-le̍k-san-tāi] kā góa hāi-kah chin chhám; Chú ōe chiàu i ê só͘-chòe kā i pò-èng. 15 Lí ka-kī mā tio̍h tî-hông, in-ūi i ke̍k-le̍k hoán-tùi goán só͘ thoân ê sìn-sit. 16 Góa thâu-chi̍t piàn sin-sò͘ ê sî bô-lâng tī sin-piⁿ pang-chān góa, ta̍k ê lóng kā góa pàng-sak. Goān chit-ê chōe bô kui tī in. 17 M̄-kú, Chú ū khiā tī góa sin-piⁿ, hō͘ góa ū khùi-la̍t thang chhiong-hun pò-iông sìn-sit, hō͘ só͘-ū ê Gōa-pang-lâng lóng thiaⁿ-kìⁿ. Chòe-āu góa ū tùi sai ê chhùi siū kiù chhut. 18 Chú ōe kiù góa thoat-lī lóng-chóng ê pháiⁿ-tāi, mā ōe kiù góa chìn-ji̍p I thiⁿ-ni̍h ê Kok-tō͘. Goān êng-kng kui I, ti̍t-kàu éng-éng oán-oán. Amen! 19 Chhiáⁿ thòe góa kā [Pek-ki-lah], [A-ku-lah], kap [O-nî-sek-hut] choân-ke chhéng-an. 20 [Í-lah-to͘] kè-sio̍k tiàm tī [Ko-lîm-to]; [Te̍k-lô-hui-mô͘] phòa-pīⁿ, góa kā i lâu tī [Bí-lī-to͘]. 21 Lí tio̍h chīn-só͘-ōe tī tang-thiⁿ í-chêng lâi. [Iú-pò͘-lô], [Pò͘-tiân], [Lī-lô͘], [Kek-ló-tí-a], kap chèng hiaⁿ-tī chí-bē lóng beh kā lí chhéng-an. 22 Goān Chú kap lí ê sîn tông-chāi! Goān Siōng-tè ê un-tián kap lín tông-chāi!

Thê-to 1

1 Góa sī [Pó-lô], choh Siōng-tè ê lô͘-po̍k kap Iâ-so͘ Ki-tok ê sù-tô͘, siū soán-phài khì pang-chān Siōng-tè soán-bîn ê sìn-gióng, ín-chhōa in jīn-bat ha̍h tī kèng-khiân ê chin-lí; 2 chit-ê chin-lí hō͘ lán tùi éng-oán ê oa̍h-miā ū ǹg-bāng, chiū-sī bōe kóng pe̍h-chha̍t ê Siōng-tè tī bān-sè í-chêng èng-ún beh hō͘ lán ê. 3 I tī sî-ki sêng-se̍k ê sî, thong-kè sìn-sit ê soan-káng chiong chit-ê èng-ún hián-bêng chhut-lâi. Góa ū siū thok, hōng lán ê Kiù-chú Siōng-tè ê bēng-lēng soan-káng chit-ê hok-im. 4 Góa siá-phoe hō͘ lí --- [Thê-to], tī lán kiōng-tông ê sìn-gióng lí sī góa chin ê kiáⁿ. Goān Pē Siōng-tè kap lán ê Kiù-chú Ki-tok Iâ-so͘ sù lí un-tián kap pêng-an! 5 Góa kā lí lâu tī [Kek-lí-tí], sī beh hō͘ lí chhú-lí iáu-bē pān chheng-chhó ê tāi-chì, koh chiàu góa só͘ chí-sī, tī ta̍k ê siâⁿ-chhī jīm-bēng lâng chòe tiúⁿ-ló. 6 Choh tiúⁿ-ló ê tio̍h bô thang chí-chek, chí-ū chi̍t ê bó͘, kiáⁿ-jî lóng sī sìn-tô͘, koh bô-lâng khòng-kò sī hòng-tōng á-sī m̄ sūn-ho̍k. 7 Kàu-hōe ê kam-tok, kì-jiân choh Siōng-tè ê koán-ke, tio̍h bô thang chí-chek, bô chū-ko, bô pháiⁿ sèng-tē, bô chiú-chùi, bô hiong-pō, bô tham-châi. 8 Tio̍h gâu khoán-thāi chhut-gōa-lâng, gâu chòe hó-sū, siú-kí, chèng-ti̍t, sèng-kiat, chiat-chè. 9 I it-tēng tio̍h kian-siú hit-ê khó-khò hû-ha̍p kàu-gī ê sìn-sit, án-ni chiah ōe-tàng ēng kiān-choân ê kà-sī khoàn-bián lâng, piān-tó hoán-tùi ê lâng. 10 In-ūi ū chin chōe m̄ sūn-ho̍k ê lâng, te̍k-pia̍t sī hiah-ê chú-tiuⁿ tio̍h siū kat-lé ê lâng, in ài kóng bô lō͘-ēng ê ōe, koh khi-phiàn lâng. 11 Chit khoán lâng it-tēng tio̍h kìm-chí in kóng-ōe, in-ūi in ūi-tio̍h beh tham put-gī ê chîⁿ-châi, ēng bô eng-kai kà-sī ê ōe phò-hoāi chi̍t-kóa ka-têng. 12 In [Kek-lí-tí]-lâng ê chi̍t ê sian-ti bat án-ni kóng, “[Kek-lí-tí]-lâng ài kóng pe̍h-chha̍t, sī hiong-ok ê iá-siù, tham-chia̍h koh pîn-tōaⁿ.” 13 I kóng ê sī sū-si̍t. Só͘-í lí tio̍h giâm-keh kā in chek-pī, thang hō͘ in ū kiān-choân ê sìn-gióng, 14 bô thiaⁿ-thàn [Iû-thài]-lâng bô iáⁿ-chiah ê thoân-soat kap pōe-ge̍k chin-lí ê lâng ê kui-lē. 15 Tùi chheng-khì ê lâng lâi kóng, it-chhè lóng chheng-khì; m̄-kú tùi ù-òe kap m̄-sìn ê lâng lâi kóng, bô chi̍t hāng sī chheng-khì, in-ūi in ê sim-su kap liông-ti lóng sī ù-òe. 16 In kong-khai kóng bat Siōng-tè, khiok ēng hêng-ûi hó͘-jīn I. In khó-ò͘ⁿ, pōe-ge̍k, chòe bōe chhut sím-mi̍h hó-sū.

Thê-to 2

1 Chóng-sī lí, lí ê kàu-tō tio̍h hû-ha̍p kiān-choân ê kàu-gī. 2 Tio̍h khǹg lāu-lâng ài chiat-chè, ū hó phín-keh, siú-kí, tio̍h ū kiān-choân ê sìn-sim, thiàⁿ-sim, kap nāi-sim. 3 Lí mā tio̍h án-ni khǹg lāu hū-jîn-lâng hêng-ûi kín-sīn, m̄-thang kóng lâng ê sī-hui, m̄-thang choh chiú ê lô͘-châi, tio̍h ēng hó bô͘-hoān kà-sī lâng, 4 chiah thang kà-sī siàu-liân hū-jîn-lâng thiàⁿ tiōng-hu, kap thiàⁿ kiáⁿ-jî, 5 koh tio̍h siú-kí, cheng-kiat, gâu lí-ke, chhin-chhiat, sūn-ho̍k tiōng-hu, Siōng-tè ê tō-lí chiah bōe siū húi-pòng. 6 Chhin-chhiūⁿ án-ni, lí mā tio̍h khó͘-khǹg siàu-liân ta-po͘-lâng siú-kí. 7 Lí ka-kī hoān-sū tio̍h chòe hó hêng-ûi ê bô͘-hoān, kà-sī lâng ê sî tio̍h sêng-khún ún-tiōng, 8 giân-sû tio̍h toan-chiàⁿ, bô thang chí-chek, hō͘ hoán-tùi ê lâng bô thang kóng lán ê pháiⁿ-ōe, soah ka-kī kám-kak kiàn-siàu. 9 Choh lô͘-lē-ê tio̍h sūn-ho̍k in ê chú-lâng, sū-sū hō͘ in hoaⁿ-hí; m̄-thang ìn-chhùi ìn-chi̍h; 10 m̄-thang thau-the̍h, tio̍h sū-sū tiong-si̍t liông-siān, hō͘ lán ê Kiù-chú Siōng-tè ê kà-sī tī ta̍k hong-bīn koh-khah ū kong-chhái. 11 In-ūi Siōng-tè í-keng hián-bêng I ê un-tián beh chín-kiù choân jîn-lūi. 12 Chit-ê un-tián hùn-liān lán khì-sak bô kèng-khiân ê seng-oa̍h kap sio̍k-sè ê io̍k-bōng, tī hiān-kim ê sî-tāi kè siú-kí, chèng-ti̍t, kap kèng-khiân ê seng-oa̍h, 13 thèng-hāu hit-ê chhiong-móa hok-khì ê ǹg-bāng, chiū-sī chì-chun ê Siōng-tè í-ki̍p lán ê Kiù-chú Iâ-so͘ Ki-tok êng-iāu ê hián-hiān. 14 Ki-tok ūi-tio̍h lán hiàn ka-kī, sī beh kiù-sio̍k lán thoat-lī it-chhè ê chōe-ok, hō͘ lán chiâⁿ-chòe I sûn-kiat ê chú-bîn kui-sio̍k I, jia̍t-sim chòe hó-sū. 15 Chiah-ê sū, lí tio̍h kóng, tio̍h khoàn-bián, chhiong-hun ūn-iōng chit-koân chek-pī lâng. M̄-thang hō͘ lâng khòaⁿ-khin.

Thê-to 3

1 Tio̍h thê-chhíⁿ tāi-ke ho̍k-chiông chip-chèng-chiá kap tong-koân-chiá; tio̍h sūn-ho̍k, thang piān-piān chòe ta̍k hāng hó-sū. 2 Tio̍h khǹg in m̄-thang húi-pòng pa̍t-lâng, m̄-thang oan-ke; tio̍h hô-khì iú-siān, ēng un-hô ê thài-tō͘ tùi-thāi só͘-ū ê lâng. 3 In-ūi lán ka-kī í-chêng mā-sī bô tì-sek, pōe-ge̍k, kiâⁿ bê-lō͘, choh chióng-chióng chêng-io̍k kap hióng-lo̍k ê lô͘-lē, tī ok-to̍k kap chi̍t-tò͘ tiong teh tō͘-ji̍t, hō͘-siōng oàn-hūn, pí-chhú iàm-ò͘ⁿ. 4 M̄-kú lán ê Kiù-chú Siōng-tè ê chû-pi jîn-ài hián-bêng ê sî, 5 I ū chín-kiù lán; m̄-sī in-ūi lán ka-kī ê hó hêng-ûi, sī in-ūi I ê lîn-bín, thong-kè hō͘ lâng têng-sin chhut-sì ê sóe-lé kap Sèng Sîn ê keng-sin lâi chín-kiù lán; 6 chit-ūi Sèng Sîn sī Siōng-tè thong-kè lán ê Kiù-chú Iâ-so͘ Ki-tok hong-hong hù-hù kā lán koàn-ak ê, 7 hō͘ lán khò I ê un-tián tit-tio̍h chheng-chòe gī, lâi sêng-siū lán só͘ ǹg-bāng éng-oán ê oa̍h-miā. 8 Chit kù ōe thang siong-sìn. Góa ài lí te̍k-pia̍t kiông-tiau chiah-ê sū, thang hō͘ sìn Siōng-tè ê lâng choân-sim chòe hó-sū; chiah-ê sū lóng hó, koh tùi lâng ū lī-ek. 9 Tio̍h siám-pī gû-gōng ê cheng-lūn, cho̍k-phó͘, hun-cheng, kap Lu̍t-hoat ê cheng-chip, in-ūi chiah-ê lóng bô lō͘-ēng, bô kè-ta̍t. 10 Chè-chō hun-cheng ê lâng, kā i kéng-kò chi̍t-nn̄g-piàn í-āu chiū m̄-thang koh kap i lâi-óng. 11 Lí chai, chit khoán lâng í-keng pāi-hoāi; i kè-sio̍k hoān-chōe sī teh kā ka-kī tēng-chōe. 12 Góa chhe [A-thê-má] á-sī [Chhui-ki-kó͘] khì lí hia ê sî, lí tio̍h kóaⁿ-kín lâi [Nî-ko-pho-lí] chhē góa, in-ūi góa í-keng koat-tēng beh tī hia kè tang-thiⁿ. 13 Tio̍h chīn só͘-ōe pang-chān [Se-la̍p] lu̍t-su kap [A-pho-lô] lú-thêng ê su-iàu, hō͘ in thang an-sim chhut-hoat. 14 Tio̍h hoan-hù lán ka-kī ê lâng ha̍k-si̍p chòe hó-sū lâi kiong-kip si̍t-chè ê su-iàu, chiah-bián chòe bô lō͘-ēng ê lâng. 15 Kap góa tī chia ê lâng lóng beh kā lí chhéng-an. Chhiáⁿ thòe goán kā hiah-ê tâng-sìn ê hó pêng-iú chhéng-an. Goān Siōng-tè ê un-tián kap lín tāi-ke tông-chāi!

Hui-lī-bûn 1

1 Góa sī [Pó-lô], choh Ki-tok Iâ-so͘ ê siû-hoān, góa kap lán ê hiaⁿ-tī [Thê-mô͘-thài] siá-phoe hō͘ goán só͘-thiàⁿ ê tâng-kang [Hui-lī-bûn], 2 chí-bē [A-hui-a], goán ê chiàn-iú [A-ki-pò͘], í-ki̍p tī lí ê chhù teh chū-hōe ê kàu-hōe. 3 Goān lán ê Pē Siōng-tè kap Chú Iâ-so͘ Ki-tok sù lín un-tián kap pêng-an! 4 Góa ta̍k piàn kî-tó ê sî lóng ū siūⁿ-tio̍h lí, siông-siông kám-siā góa ê Siōng-tè; 5 in-ūi góa ū thiaⁿ-tio̍h lí tùi Siōng-tè só͘-ū ê chú-bîn ū thiàⁿ-sim, tùi Chú Iâ-so͘ ū sìn-sim. 6 Góa khún-kiû Siōng-tè, thong-kè goán kap lín hun-hióng sìn-gióng, ōe-tàng chhiok-chìn tùi lán kap Ki-tok kiat-liân só͘ tit-tio̍h it-chhè ê chiok-hok ū khah chhim ê liáu-kái. 7 Hiaⁿ-tī ah, lí ê thiàⁿ-sim ū hō͘ góa chin tōa ê hoaⁿ-hí kap kó͘-lē! Siōng-tè ê chú-bîn lóng ū tùi lí tit-tio̍h kek-lē. 8 Góa khò Ki-tok sui-jiân ōe-tàng hó-táⁿ bēng-lēng lí chòe eng-kai chòe ê tāi-chì, 9 m̄-kú, in-ūi thiàⁿ ê iân-kò͘ góa lêng-khó kā lí kiû. Góa --- [Pó-lô] í-keng nî-lāu, hiān-chāi iáu-sī Ki-tok Iâ-so͘ ê siû-hoān. 10 Góa thòe [O-nî-se-bô͘] kā lí kiû, i sī góa koaiⁿ-kaⁿ ê sî só͘ siⁿ-ê. 11 I í-chêng tùi lí lóng bô lō͘-ēng, hiān-chāi tùi lí tùi góa lóng chin ū lō͘-ēng. 12 Hiān-chāi góa sàng i tńg-khì lí hia; i sī góa ê sim-koaⁿ. 13 Góa goân-lâi siūⁿ-beh kā i lâu tī sin-piⁿ, thang tī góa ūi-tio̍h hok-im chòe siû-hoān ê tiong-kan thòe lí ho̍k-sāi góa; 14 m̄-kú bô lí ê tông-ì, góa m̄-thang án-ni chòe khah hó, hō͘ lí só͘ chòe ê hó-sū m̄-sī bián-kióng, sī kam-sim lo̍k-ì. 15 Kiám-chhái in-ūi án-ni, [O-nî-se-bô͘] tio̍h chiām-sî lī-khui lí, sī beh hō͘ lí éng-kiú kā i lâu-teh; 16 bô koh sī lô͘-lē, sin-hūn chhiau-kè lô͘-lē, sī só͘-thiàⁿ ê hiaⁿ-tī. Tùi góa lâi kóng te̍k-pia̍t sī án-ni, tùi lí lâi kóng koh-khah sī án-ni; i m̄-nā sī lí ke-lāi ê lâng, mā-sī Chú-lāi ê hiaⁿ-tī. 17 Só͘-í, lí nā khòaⁿ góa chòe tâng-phōaⁿ, chiū tio̍h chhin-chhiūⁿ chiap-la̍p góa án-ni kā i chiap-la̍p. 18 I nā ū tùi lí chòe sím-mi̍h m̄-tio̍h, á-sī ū khiàm lí sím-mi̍h, sǹg góa ê siàu. 19 Góa --- [Pó-lô] chhin-chhiú siá: Góa hū-chek hêng. Góa eng-kai m̄-bián kā lí thê-chhíⁿ, lí khiàm góa ê sī lí pún-sin. 20 Sī lah, hiaⁿ-tī, in-ūi Chú ê iân-kò͘, kā góa tàu saⁿ-kāng chi̍t-ē, hō͘ góa ê sim khò Ki-tok tit-tio̍h kek-lē. 21 Góa siá-phoe hō͘ lí, in-ūi khak-sìn lí ōe thiaⁿ góa ê iau-kiû; kî-si̍t, góa chai lí ōe chòe pí góa kóng ê koh-khah chōe. 22 Mā tio̍h kā góa chún-pī chi̍t keng pâng-keng, in-ūi góa ǹg-bāng Siōng-tè ōe thiaⁿ lín ê kî-tó, hō͘ góa ōe-tàng khì lín hia. 23 Ūi-tio̍h Ki-tok Iâ-so͘ kap góa tâng choh siû-hoān ê [Í-pa-hut] beh kā lín chhéng-an. 24 Góa ê tâng-kang [Má-khó], [A-lí-ta̍t-kó͘], [Tí-má], [Lō͘-ka] mā beh kā lín chhéng-an. 25 Goān Chú Iâ-so͘ Ki-tok ê un-tián kap lín tông-chāi!

Hi-pek-lâi 1

1 Siōng-tè tī kó͘-chá ū thong-kè I ê chèng sian-ti, chin chōe piàn, ēng chin chōe hong-sek tùi lán ê chó͘-sian kóng-ōe, 2 m̄-kú tī chiong-boa̍t ê ji̍t-chí, thong-kè I ê Kiáⁿ tùi lán kóng-ōe. Siōng-tè ū chí-tēng I choh bān-iú ê kè-sêng-jîn, koh ū thong-kè I chhòng-chō ú-tiū. 3 I hoán-siā Siōng-tè ê êng-iāu, sī Siōng-tè pún-chit ê chin-siōng. I ēng I koân-lêng ê ōe hû-chhî bān-iú, sóe-tû lâng ê chōe liáu-āu, chē tī Chì-chun Chì-koân Siōng-tè ê chiàⁿ-pêng. 4 Siōng-tè ū sù Kiáⁿ pí chèng thiⁿ-sài khah chun-kùi ê miâ, hō͘ I chiâⁿ-chòe pí thiⁿ-sài khah úi-tāi. 5 Siōng-tè kiám bat tùi tó chi̍t ê thiⁿ-sài kóng: Lí sī góa ê Kiáⁿ, góa kin-á-ji̍t siⁿ lí? Koh I kiám bat tùi tó chi̍t ê thiⁿ-sài kóng: Góa beh chòe i ê Pē, I beh chòe góa ê Kiáⁿ? 6 Koh Siōng-tè chhe-khián I ê Tōa-kiáⁿ ji̍p sè-kan ê sî, I kóng: Siōng-tè só͘-ū ê thiⁿ-sài lóng tio̍h pài I. 7 Koan-hē thiⁿ-sài, I kóng: Siōng-tè ēng hong chòe I ê thiⁿ-sài, ēng hé-iām chòe I ê chhe-ēng. 8 M̄-kú koan-hē Kiáⁿ, I kóng: Siōng-tè ah, lí ê pó-chō éng-éng oán-oán chûn-chāi; lí ê Kok-tō͘ ê koân-pèng sī chèng-ti̍t ê koân-pèng. 9 Lí ài kong-gī, oàn-hūn put-hoat. Só͘-í, Siōng-tè, lí ê Siōng-tè kéng-soán lí, ēng hoaⁿ-hí ê iû boah lí, chhiau-kè boah lí ê tâng-phōaⁿ. 10 I koh kóng: Chú ah, lí tī khí-chho͘ ū kiàn-li̍p tōe ê kun-ki; thiⁿ mā-sī lí ê chhiú só͘ chō. 11 Thiⁿ-tōe lóng ōe siau-bia̍t, m̄-kú lí éng-oán chûn-chāi. Thiⁿ-tōe lóng ōe chhin-chhiūⁿ i-ho̍k chiām-chiām kū, 12 lí ōe chhin-chhiūⁿ kńg gōa-saⁿ kā in kńg khí-lâi; in ōe chhin-chhiūⁿ i-ho̍k kái-piàn. M̄-kú lí éng-oán bōe kái-piàn; lí ê hè-siū bû-kiông-chīn. 13 Siōng-tè kiám bat tùi tó chi̍t ê thiⁿ-sài kóng: Lí chē góa ê chiàⁿ-pêng, kàu góa hō͘ lí ê tùi-te̍k khut-ho̍k tī lí kha-ē? 14 Thiⁿ-sài kiám m̄-sī lóng teh ho̍k-sāi ê sîn, siū chhe-phài khì ho̍k-bū teh-beh niá-siū chín-kiù ê lâng?

Hi-pek-lâi 2

1 Só͘-í, lán it-tēng tio̍h koh-khah tì-ì só͘ thiaⁿ-tio̍h ê sìn-sit, chiah-bián phian-lī chin-tō. 2 In-ūi thong-kè thiⁿ-sài só͘ thoân ê sìn-sit nā ū kong-hāu, pōe-ge̍k bô sūn-chiông ê lâng tio̍h siū èng-siū ê hêng-hoa̍t; 3 án-ni lán hut-lio̍k chiah-ni̍h tōa ê chín-kiù, beh ná ōe-tàng siám-pī tio̍h siū ê hêng-hoa̍t? Chú pún-sin ū tāi-seng soan-pò͘ chit-ê chín-kiù, thiaⁿ-kìⁿ ê lâng mā ū tùi lán chèng-si̍t chit-ê sū. 4 Siōng-tè koh ū ēng sîn-jiah, kî-sū, ta̍k khoán tōa koân-lêng ê chok-ûi, kap chiàu I ka-kī ê ì-sù só͘ hun-phòe Sèng Sîn ê un-sù chòe-hé choh-chèng. 5 Siōng-tè bô chiong lán só͘ kóng chit-ê chiong-lâi ê sè-kài kau hō͘ thiⁿ-sài koán-lí. 6 M̄-kú Sèng-keng ū chi̍t ê só͘-chāi choh-chèng kóng: Lâng sī sím-mi̍h, lí kèng-jiân kā i koan-hoâi? Sè-kan-lâng sī sím-mi̍h, lí kèng-jiân kā i koàn-kò͘? 7 Lí hō͘ i sió-khóa khah-su thiⁿ-sài; lí ēng êng-kng chun-kùi hō͘ i chòe hoa-koan, 8 hō͘ bān-iú lóng hâng-ho̍k tī i kha-ē. Siōng-tè kì-jiân hō͘ bān-iú lóng hâng-ho̍k i, chiū bô chi̍t hāng bô hâng-ho̍k i. M̄-kú kàu hiān-chāi lán iáu-bē khòaⁿ-kìⁿ bān-iú lóng hâng-ho̍k i. 9 Lán khòaⁿ-kìⁿ hit-ê sió-khóa khah-su thiⁿ-sài ê Iâ-so͘ í-keng keng-kè sí ê thòng-khó͘, tit-tio̍h êng-kng chun-kùi ê hoa-koan; án-ni I khò Siōng-tè ê un-tián thang ūi-tio̍h chèng-lâng sí. 10 Hit-ūi chhòng-chō koh î-chhî bān-iú ê Siōng-tè ūi-tio̍h beh chhōa chin chōe kiáⁿ-jî chìn-ji̍p êng-kng, chiah tio̍h hō͘ chín-kiù ê khai-thok-chiá Iâ-so͘ keng-kè khó͘-lān chiâⁿ-chòe oân-choân. 11 Sū-si̍t, hō͘ lâng chiâⁿ-sèng ê kap tit-tio̍h chiâⁿ-sèng ê, lóng tùi kâng chi̍t ê goân-thâu chhut, in-ūi án-ni, Iâ-so͘ chheng-ho͘ in chòe kâng chi̍t ke ê lâng ia̍h bô kám-kak kiàn-siàu. 12 I tùi Siōng-tè kóng: Góa beh tùi góa ê hiaⁿ-tī kap chí-bē pò-iông lí ê miâ, tī in ê hōe tiong gîm-si o-ló lí. 13 I koh kóng: Góa beh sìn-khò I; iā kóng: Khòaⁿ ah, góa kap Siōng-tè só͘ hō͘ góa ê kiáⁿ-jî lóng tī chia. 14 Kì-jiân chiah-ê kiáⁿ-jî sī ū-huih ū-bah ê lâng, I pún-sin mā kap in siâng-khoán chiâⁿ-chòe ū-huih ū-bah ê lâng, ūi-tio̍h beh thong-kè I ê sí lâi húi-bia̍t hit-ê chiáng-koán sí-bông ê Mô͘-kúi, 15 koh tháu-pàng hiah-ê in-ūi sí-bông ê kiaⁿ-hiâⁿ it-seng chòe lô͘-châi ê lâng. 16 Tong-jiân, I teh koan-sim ê m̄-sī thiⁿ-sài, sī [A-pek-la-hán] ê kiáⁿ-sun. 17 Só͘-í, I tī ta̍k hong-bīn tio̍h kap I ê hiaⁿ-tī chí-bē kâng-khoán, thang tī Siōng-tè ê bīn-chêng choh jîn-chû tiong-sìn ê Tōa-chè-si, thang hō͘ chèng-lâng ê chōe tit-tio̍h sià-bián. 18 In-ūi I ka-kī ū siū khó͘, siū khó-giām, I ōe-tàng pang-chān hiah-ê siū chhì-thàm ê lâng.

Hi-pek-lâi 3

1 Só͘-í, lín tâng siū Siōng-tè soán-tiàu sèng ê hiaⁿ-tī chí-bē, lín tio̍h siūⁿ lán só͘ soan-jīn hit-ūi choh sù-chiá, choh Tōa-chè-si ê Iâ-so͘. 2 I tùi chí-phài I ê Siōng-tè chīn-tiong, tú kap [Mô͘-se] tī Siōng-tè ê ke chīn-tiong kâng-khoán. 3 Khí-chhù ê lâng pí i khí ê chhù khah chun-kùi; án-ni, Iâ-so͘ pí [Mô͘-se] eng-kai siū koh-khah tōa ê êng-kng. 4 Só͘-ū ê chhù lóng sī lâng khí ê, m̄-kú khí-chō bān-mi̍h ê sī Siōng-tè. 5 [Mô͘-se] choh po̍k-jîn, tùi Siōng-tè ê choân-ke chīn-tiong, ūi-tio̍h Siōng-tè āu-lâi só͘ beh kóng ê ōe choh-chèng; 6 m̄-kú, Ki-tok choh Kiáⁿ tī-lí Siōng-tè ê ke. Tùi só͘ ǹg-bāng ê, lán nā ēng khak-sìn kap ióng-khì lâi chhî-siú, lán chiū-sī Siōng-tè ke-lāi ê lâng. 7 Só͘-í, chiàu Sèng Sîn só͘ kóng: Kin-á-ji̍t lín nā thiaⁿ Siōng-tè ê siaⁿ, 8 m̄-thang ngī-sim, chhin-chhiūⁿ lín ê chó͘-sian tī pōe-ge̍k ê sî, tī khòng-iá chhì-thàm I ê ji̍t. 9 Siōng-tè kóng: Lín ê chó͘-sian sui-jiân ū khòaⁿ-tio̍h góa ê chok-ûi, in iû-goân tī hia chhì-thàm góa, khó-giām góa 10 sì-cha̍p nî kú. Só͘-í, góa tùi hit tāi ê lâng siū-khì, kóng: In ê sim sit-bê; in m̄-bat góa ê tō-lō͘. 11 Góa tī siū-khì tiong chiù-chōa kóng: In choa̍t-tùi bōe-tàng chìn-ji̍p góa só͘ sù ê an-hioh. 12 Hiaⁿ-tī chí-bē, lín tio̍h chù-ì, chiah-bián lín tiong-kan ū lâng sim siâ-ok m̄-sìn, tì-kàu lī-khui éng-oa̍h ê Siōng-tè. 13 Tio̍h thàn iáu ū hit-ê kiò-chòe “kin-á-ji̍t” ê sî, ji̍t-ji̍t saⁿ khoàn-bián, lín tiong-kan chiah-bián ū lâng siū chōe-ok bê-he̍k tì-kàu ngī-sim. 14 Lán nā kian-siú tong-chho͘ ê khak-sìn kàu lō͘-bé, chiū chiâⁿ-chòe Ki-tok ê tâng-kang. 15 Sèng-keng án-ni kóng: Kin-á-ji̍t lín nā thiaⁿ Siōng-tè ê siaⁿ, m̄-thang ngī-sim, chhin-chhiūⁿ lín ê chó͘-sian tī pōe-ge̍k ê sî. 16 Thiaⁿ-kìⁿ Siōng-tè ê siaⁿ iáu-kú pōe-ge̍k I ê sī sím-mi̍h lâng? Kiám m̄-sī hiah-ê [Mô͘-se] tùi [Ai-ki̍p] chhōa chhut-lâi só͘-ū ê lâng? 17 Siōng-tè tī hit sì-cha̍p nî kú tùi sím-mi̍h lâng hoat siū-khì? Kiám m̄-sī hiah-ê in-ūi hoān-chōe sí tī khòng-iá ê lâng? 18 Hiah-ê pōe-ge̍k ê lâng í-gōa, Siōng-tè kiám bat tùi lâng chiù-chōa kóng, in bōe-tàng chìn-ji̍p I só͘ sù ê an-hioh? 19 Án-ni, in bōe-tàng chìn-ji̍p an-hioh sī in-ūi in m̄-sìn.

Hi-pek-lâi 4

1 Kì-jiân Siōng-tè hō͘ lâng chìn-ji̍p an-hioh ê èng-ún iáu lâu-teh, lán tio̍h sió-sim, chiah-bián lín tiong-kan ū lâng siūⁿ-kóng in tit bōe-tio̍h chit-ê èng-ún. 2 Hok-im pîⁿ-pîⁿ ū thoân hō͘ in, mā ū thoân hō͘ lán; m̄-kú in só͘ thiaⁿ-kìⁿ ê sìn-sit tùi in bô lī-ek, in-ūi in hiah-ê thiaⁿ ê lâng bô ēng sìn-sim niá-siū. 3 Lán chiah-ê sìn ê lâng ōe-tàng chìn-ji̍p Siōng-tè só͘ sù ê an-hioh, chiàu I só͘ kóng: Góa tī siū-khì tiong chiù-chōa kóng: In choa̍t-tùi bōe-tàng chìn-ji̍p góa só͘ sù ê an-hioh! Kî-si̍t Siōng-tè chhòng-chō ú-tiū ê sî, I ê kang-chok í-keng oân-sêng. 4 Koan-hē tē-chhit ji̍t, Sèng-keng chi̍t ê só͘-chāi ū án-ni kóng: “Siōng-tè tī tē-chhit ji̍t soah I it-chhè ê kang-chok lâi an-hioh.” 5 Kâng chit-ê só͘-chāi ū koh kóng: “In choa̍t-tùi bōe-tàng chìn-ji̍p góa só͘ sù ê an-hioh.” 6 Kì-jiân tāi-seng thiaⁿ-tio̍h hok-im ê lâng in-ūi m̄ sūn-thàn bōe-tàng chìn-ji̍p an-hioh, Siōng-tè chiū ūi-tio̍h kî-tha ê lâng pó-liû chit-ê an-hioh. 7 Chin kú í-āu, tī [Tāi-pi̍t] ê chheh ū kì-chài, Siōng-tè siat-tēng chi̍t ji̍t kiò-chòe “kin-á-ji̍t”, chhin-chhiūⁿ téng-bīn só͘ kóng: Kin-á-ji̍t lín nā thiaⁿ Siōng-tè ê siaⁿ, m̄-thang ngī-sim. 8 [Iok-su-a] nā ū hō͘ in an-hioh, Siōng-tè chiū bōe tī āu-lâi koh kóng-khí pa̍t ê ji̍t. 9 Án-ni, Siōng-tè iáu ūi-tio̍h I ê chú-bîn pó-liû chi̍t ê An-hioh-ji̍t. 10 In-ūi chìn-ji̍p Siōng-tè só͘ sù an-hioh ê lâng, chhin-chhiūⁿ Siōng-tè soah I ê kang-chok, mā soah in it-chhè ê kang-chok. 11 Só͘-í, lán tio̍h ló͘-le̍k chìn-ji̍p chit-ê an-hioh, chiah-bián ū lâng chhin-chhiūⁿ hiah-ê m̄ sūn-ho̍k ê lâng poa̍h-tó sit-pāi. 12 Siōng-tè ê ōe sī oa̍h ê, sī ū kong-hāu ê, pí it-chhè siang-bīn-lāi ê kiàm khah lāi, ōe-tàng chhah-ji̍p, sīm-chì phòa-khui lâng ê lêng kap hûn, koan-chat kap kut-chhé, koh ōe-tàng phòaⁿ-toàn lâng sim-lāi ê io̍k-bōng kap ì-liām. 13 Só͘-ū pī-chō-bu̍t bô chi̍t hāng ōe-tàng tùi Siōng-tè ún-ba̍t; it-chhè lóng oân-choân po̍k-lō͘ tī I ê ba̍k-chiu chêng. Lán khiàm I ê siàu lóng tio̍h sǹg chheng-chhó. 14 Kì-jiân lán ū chi̍t-ūi úi-tāi ê Tōa-chè-si --- Siōng-tè ê Kiáⁿ Iâ-so͘, I í-keng chiūⁿ-thiⁿ kàu Siōng-tè ê bīn-chêng, lán tio̍h kian-siú só͘ soan-jīn ê sìn-gióng. 15 Lán chit-ūi Tōa-chè-si m̄-sī bōe thé-thiap lán ê loán-jio̍k; I tī ta̍k hong-bīn lóng chhin-chhiūⁿ lán ū siū chhì-thàm, put-kò bô hoān-chōe. 16 Só͘-í, lán tio̍h hó-táⁿ chiū-kūn Siōng-tè un-tián ê pó-chō, thang niá-siū I ê lîn-bín kap un-tián, chòe lán su-iàu ê sî ê pang-chān.

Hi-pek-lâi 5

1 Ta̍k ê tōa-chè-si lóng sī tùi lâng ê tiong-kan kéng chhut-lâi, siū chí-phài thòe lâng ho̍k-sāi Siōng-tè, ūi-tio̍h in ê chōe hiàn lé-mi̍h kap chè-phín. 2 Tōa-chè-si, in-ūi i pún-sin tī ta̍k hong-bīn lóng loán-jio̍k, só͘-í ōe-tàng thé-liōng bû-ti kap sit-bê ê lâng. 3 In-ūi án-ni, i ū gī-bū ūi-tio̍h jîn-bîn, mā tio̍h ūi ka-kī ê chōe hiàn-chè. 4 Bô-lâng ka-kī tit-tio̍h tōa-chè-si chit-ê chun-kùi ê chit-hūn; chí-ū chhin-chhiūⁿ [A-lûn], hō͘ Siōng-tè soán-tiàu ê chiah ōe tit-tio̍h. 5 Siâng-khoán, Ki-tok mā m̄-sī ka-kī cheng-chhú tōa-chè-si ê êng-iāu, hoán-tńg sī Siōng-tè tùi I kóng: Lí sī góa ê Kiáⁿ, góa kin-á-ji̍t siⁿ lí. 6 Tī pa̍t-ūi I mā ū kóng: Lí chiàu [Be̍k-ki-sé-tek] ê pan-chhù éng-oán choh chè-si. 7 Iâ-so͘ chāi-sè ê sî bat tōa-siaⁿ âu-kiò koh lâu ba̍k-sái, ǹg hit-ūi ōe kiù I thoat-lī sí-bông ê Siōng-tè kî-tó khún-kiû. In-ūi I ê khiân-sêng, Siōng-tè ū thiaⁿ I ê kî-kiû. 8 Sui-jiân I sī Siōng-tè ê Kiáⁿ, iáu-kú ū tùi só͘ siū ê khó͘-lān ha̍k-si̍p sūn-ho̍k. 9 Kì-jiân Siōng-tè hō͘ I ta̍t-kàu oân-choân ê tōe-pō͘, I chiū chiâⁿ-chòe só͘-ū sūn-ho̍k I ê lâng éng-oán tit-kiù ê kun-goân, 10 hō͘ Siōng-tè chí-tēng I chiàu [Be̍k-ki-sé-tek] ê pan-chhù choh Tōa-chè-si. 11 Koan-hē Iâ-so͘ choh Tōa-chè-si ê sū, goán ū chin chōe ōe ài kóng, m̄-kú oh-tit soat-bêng, in-ūi lín hīⁿ-khang tūn. 12 Chiàu kóng, lín chá chiū eng-kai chòe lāu-su lah, m̄-kú lín iáu su-iàu lâng kā lín kà Siōng-tè sìn-sit ê chho͘-pō͘; lín iáu su-iàu chia̍h-lin, bōe-tàng chia̍h-pn̄g. 13 Chia̍h-lin ê lóng sī eⁿ-á, iáu bōe-hiáu liáu-kái sī-hui ê tō-lí. 14 Pn̄g sī tōa-lâng teh chia̍h ê; in sio̍k-lêng ê sim-khiàu ū keng-kè si̍t-chè ê chhau-liān chiah ōe-hiáu hun-pia̍t hó-pháiⁿ.

Hi-pek-lâi 6

1 Só͘-í, lán m̄-thang thêng-liû tī Ki-tok chho͘-pō͘ ê tō-lí, bô koh-chài kan-ta tī thoat-lī sí ê hêng-ûi lâi sìn Siōng-tè, kiat-chēng-lé kap àn-chhiú-lé, sí-lâng ê koh-oa̍h kap éng-oán ê sím-phòaⁿ, téng ê kà-sī teh phah ki-chhó͘; tio̍h tui-kiû sêng-se̍k. 3 Lán tio̍h hiòng-chêng kiû chìn-pō͘, Siōng-tè nā chún, lán beh án-ni chòe. 4 Hiah-ê lâng bat hō͘ Siōng-tè ê kng chiò, bat tam-tio̍h sio̍k-thiⁿ ê un-sù, bat hun-hióng Sèng Sîn, 5 bat thé-giām Siōng-tè ê ōe ê hó-chhù, mā bat kám-siū teh-beh lâi ê sè-tāi ê koân-pèng. 6 Án-ni, in iáu-kú pōe-sìn! Chit khoán lâng bô hoat-tō͘ hō͘ in tiông-sin hóe-kái kiâⁿ tò-tńg; in-ūi in koh chiong Siōng-tè ê Kiáⁿ tèng tī si̍p-jī-kè téng, kong-jiân kā I bú-jio̍k. 7 Thó͘-tōe put-sî teh khip-siu tùi thiⁿ lo̍h-lâi ê hō͘-chúi, seng-sán chhài-soe, tùi choh-sit-lâng ū lō͘-ēng, che sī tùi Siōng-tè niá-siū ê chiok-hok. 8 M̄-kú thó͘-tōe nā hoat chháu-chhì kap cha̍p-chháu chiū bô lō͘-ēng, liâm-piⁿ ōe siū chiù-chó͘, chòe-āu hō͘ hé sio. 9 Só͘ thiàⁿ ê hiaⁿ-tī chí-bē, sui-jiân goán án-ni kóng, iáu-kú chhim-sìn lín ê chêng-hêng pí só͘ kóng ê khah hó, ōe-tàng tit-tio̍h kiù. 10 Siōng-tè m̄-sī bô kong-tō, I it-tēng ōe kì-tit lín só͘ chòe ê kang-chok, chiū-sī lín ūi-tio̍h I kè-sio̍k teh ho̍k-bū sìn-tô͘ só͘ piáu-hiān ê thiàⁿ-sim. 11 Goán chin ài lín ta̍k ê lâng tùi-thâu-kàu-bé pó-chhî jia̍t-sim, hō͘ lín só͘ ǹg-bāng ê ōe oân-choân si̍t-hiān. 12 Án-ni lín chiah bōe pîn-tōaⁿ, chiah ōe o̍h hiah-ê tùi sìn kap thun-lún lâi sêng-siū Siōng-tè èng-ún ê lâng. 13 Siōng-tè èng-ún [A-pek-la-hán] ê sî, kì-jiân bô pí I khah tōa ê thang chiù-chōa, chiū kí pún-sin chiù-chōa, 14 kóng, “Góa it-tēng beh sù-hok hō͘ lí, beh ke-thiⁿ kiáⁿ-sun hō͘ lí.” 15 [A-pek-la-hán] gâu thun-lún, só͘-í ū tit-tio̍h só͘ èng-ún ê. 16 In-ūi lâng sī kí pí i khah tōa ê lâi chiù-chōa; mā ēng chiù-chōa chòe tam-pó lâi kái-koat in tiong-kan só͘-ū ê cheng-chip. 17 Siōng-tè ài hiah-ê sêng-chiap èng-ún ê lâng khak-si̍t chai, I ê kè-ōe bōe kái-piàn, só͘-í ēng chiù-chōa lâi pó-chèng. 18 I ê èng-ún kap chiù-chōa chit nn̄g hāng lóng bōe kái-piàn, in-ūi I bōe kóng pe̍h-chha̍t, hō͘ lán chiah-ê tô-pī khì kiû I pó-hō͘ ê lâng ōe-tàng tit-tio̍h chin tōa ê kek-lē, thang chhî-siú hit-ê tī lán thâu-chêng ê ǹg-bāng. 19 Lán ū chit-ê ǹg-bāng, chhin-chhiūⁿ sìⁿ-miā ê tiàⁿ pha tī Sèng-só͘ tiùⁿ-lî ê lāi-bīn an-choân khó-khò. 20 Iâ-so͘ ūi-tio̍h lán chòe sian-hong í-keng ji̍p-khì hia, chiàu [Be̍k-ki-sé-tek] ê pan-chhù choh Tōa-chè-si ti̍t-kàu éng-oán.

Hi-pek-lâi 7

1 Chit-ūi [Be̍k-ki-sé-tek] sī [Sat-léng]-ông, mā-sī Chì-koân Siōng-tè ê chè-si. [A-pek-la-hán] thâi-sí hiah-ê ông tńg-lâi ê sî, [Be̍k-ki-sé-tek] ū kā i gêng-chiap koh kā i chiok-hok. 2 [A-pek-la-hán] ū chiong i só͘ tit-tio̍h ê cha̍p-hūn-chi̍t pun hō͘ i. Tē-it, [Be̍k-ki-sé-tek] chit-ê miâ ê ì-sù sī “Chèng-gī ê ông”, i koh sī [Sat-léng]-ông, chiū-sī “Hô-pêng-ông”. 3 I bô pē bô bú, bô sè-hē, bô chhut-sì ê ji̍t-chí, mā bô sìⁿ-miā ê kiat-sok. I kap Siōng-tè ê Kiáⁿ kâng-khoán; i kè-sio̍k choh chè-si ti̍t-kàu éng-oán. 4 Lín khòaⁿ, chit-ê lâng jōa úi-tāi! Sian-chó͘ [A-pek-la-hán] to tio̍h chiong chiàn-lī-phín ê cha̍p-hūn-chi̍t hiàn hō͘ i. 5 Ū tam-tng chè-si-chit ê [Lī-bī] ê kiáⁿ-sun, sui-jiân kap kî-tha [Í-sek-lia̍t] jîn-bîn lóng sī [A-pek-la-hán] ê kiáⁿ-sun, pîⁿ-pîⁿ sī hiaⁿ-tī, iáu-kú hōng bēng-lēng chiàu Lu̍t-hoat tùi jîn-bîn siu cha̍p-hūn-chi̍t. 6 [Be̍k-ki-sé-tek] m̄-sī sio̍k [Lī-bī] ê sè-hē, m̄-kú i ū tùi [A-pek-la-hán] chiap-siū cha̍p-hūn-chi̍t, koh kā tit-tio̍h Siōng-tè èng-ún ê [A-pek-la-hán] chiok-hok. 7 Sī-sòe siū sī-tōa chiok-hok sī lí-só͘-tong-jiân. 8 Chi̍t hong-bīn, chiah-ê siu cha̍p-hūn-chi̍t ê lóng sī ōe sí ê lâng; lēng-gōa chi̍t hong-bīn, hit-ūi siu cha̍p-hūn-chi̍t ê, Sèng-keng ū chèng-si̍t i iáu teh oa̍h. 9 Án-ni mā thang kóng, tùi lâng siu cha̍p-hūn-chi̍t ê [Lī-bī] í-keng thong-kè [A-pek-la-hán] tùi [Be̍k-ki-sé-tek] la̍p cha̍p-hūn-chi̍t. 10 In-ūi [Be̍k-ki-sé-tek] gêng-chiap [A-pek-la-hán] ê sî, [Lī-bī] iáu tī i ê sian-chó͘ [A-pek-la-hán] ê seng-khu lāi. 11 [Í-sek-lia̍t]-lâng ê Lu̍t-hoat sī kun-kù [Lī-bī] ê chè-si chè-tō͘ pan-hoat ê, chit-ê chè-tō͘ nā ōe-tàng hō͘ lâng oân-choân, ná ū su-iàu m̄-sī chiàu [A-lûn] ê pan-chhù, sī chiàu [Be̍k-ki-sé-tek] pan-chhù siat-li̍p ê lēng-gōa chi̍t ê chè-si? 12 Kì-jiân chè-si chè-tō͘ kái-piàn, Lu̍t-hoat mā tio̍h kái-piàn. 13 In-ūi chiah-ê sū só͘ chí Hit-ūi sī sio̍k pa̍t ê chi-cho̍k; chit-ê chi-cho̍k m̄-bat ū lâng tī chè-tôaⁿ chêng sū-hōng. 14 Lán ê Chú bêng-bêng sī [Iû-tāi] chi-cho̍k ê kiáⁿ-sun; koan-hē chit-ê chi-cho̍k, [Mô͘-se] m̄-bat kóng-khí chè-si ê sū. 15 Góa teh kóng ê hō͘ tāi-chì koh-khah chheng-chhó. Ū lēng-gōa chi̍t ūi chhin-chhiūⁿ [Be̍k-ki-sé-tek] ê chè-si í-keng chhut-hiān. 16 I choh Chè-si m̄-sī kun-kù lâng ê tiâu-lē kui-chek, sī kun-kù bōe húi-bia̍t ê oa̍h-miā ê koân-lêng. 17 In-ūi Sèng-keng ū án-ni choh-chèng: Chiàu [Be̍k-ki-sé-tek] ê pan-chhù, lí éng-oán choh chè-si. 18 Chi̍t hong-bīn, kū ê tiâu-lē in-ūi bô-la̍t, bô lō͘-ēng, soah siū hòe-bô, 19 in-ūi [Mô͘-se] ê Lu̍t-hoat sím-mi̍h tāi-chì to bô hoat-tō͘ sêng-choân. Lēng-gōa chi̍t hong-bīn, ū chi̍t ê khah hó ê ǹg-bāng í-keng chún-pī hó-sè, hō͘ lán thang thong-kè chit-ê ǹg-bāng chhin-kūn Siōng-tè. 20 Koh chit-ê ǹg-bāng ū keng-kè chiù-chōa. [Lī-bī] hē-thóng ê chè-si bô keng-kè chiù-chōa; 21 chí-ū chit-ūi Iâ-so͘ choh Chè-si ê sî ū keng-kè chiù-chōa; I ê Siōng-tè tùi I kóng: Chú ū chiù-chōa, bōe kái-piàn sim-ì; lí éng-oán choh chè-si. 22 Chiū-sī in-ūi án-ni, Iâ-so͘ chiâⁿ-chòe koh-khah hó ê iok ê pó-chèng. 23 [Lī-bī] hē-thóng ê chè-si ū chin chōe, in-ūi sí ê chó͘-gāi in bōe-tàng kè-sio̍k chòe; 24 chí-ū Iâ-so͘ m̄-bián chiong chè-si-chit kau hō͘ pa̍t-lâng, in-ūi I éng-oán oa̍h-teh. 25 Án-ni, thong-kè I lâi-kàu Siōng-tè bīn-chêng ê lâng, I ōe-tàng kiù in kàu-tóe, in-ūi I éng-oán oa̍h-teh teh thòe in kî-tó. 26 Chit khoán Tōa-chè-si tú-tú ha̍h lán ê su-iàu; I sèng-kiat, bô siâ-ok, bô lâ-sâm, tùi chōe-jîn tiong siū hun-pia̍t chhut-lâi, ko-seng kàu pí thiⁿ khah koân. 27 I bô su-iàu chhin-chhiūⁿ kî-tha ê tōa-chè-si ta̍k ji̍t tio̍h seng ūi-tio̍h ka-kī, āu-lâi ūi-tio̍h jîn-bîn ê chōe hiàn-chè. I hiàn pún-sin chòe chè, chi̍t piàn chiū oân-sêng. 28 [Mô͘-se] ê Lu̍t-hoat jīm-bēng bô oân-choân ê lâng choh tōa-chè-si; m̄-kú ū Lu̍t-hoat í-āu, Siōng-tè ēng chiù-chōa jīm-bēng I ê Kiáⁿ éng-oán choh oân-choân ê Tōa-chè-si.

Hi-pek-lâi 8

1 Lán só͘ teh kóng siōng iàu-kín ê sī án-ni: Lán ū chit khoán ê Tōa-chè-si, I chē tī thiⁿ-téng Chì-tōa Siōng-tè pó-chō ê chiàⁿ-pêng. 2 I tī Sèng-só͘, chiū-sī chin ê tiùⁿ-bō͘, teh sū-hōng; chit-ê tiùⁿ-bō͘ m̄-sī lâng, sī Chú só͘ tah ê. 3 Ta̍k ê tōa-chè-si lóng sī ūi-tio̍h hiàn lé-mi̍h kap chè-phín jīm-bēng ê; só͘-í chit-ūi Tōa-chè-si mā it-tēng tio̍h ū sím-mi̍h thang hiàn. 4 I nā tī tōe-chiūⁿ chiū bô choh chè-si, in-ūi í-keng ū chè-si chiàu Lu̍t-hoat teh hiàn lé-mi̍h. 5 In só͘ chòe ê ho̍k-sāi put-kò sī thiⁿ-téng tiùⁿ-bō͘ ê hù-pún kap iáⁿ-siōng, tú chiàu [Mô͘-se] beh khí-chō hōe-bō͘ ê sî, Siōng-tè ū kā i chí-sī kóng, “Lí tio̍h kín-sīn, it-chhè tio̍h chiàu tī soaⁿ-téng kā lí chí-sī ê bô͘-sek lâi khí.” 6 M̄-kú hiān-chāi Iâ-so͘ í-keng tit-tio̍h koh-khah chun-kùi ê sū-hōng, choh khah hó ê iok ê tiong-kan-jîn, chit-ê iok sī ēng khah hó ê èng-ún chè-tēng ê. 7 Thâu-chi̍t ê iok nā bô khoat-tiám, chiū bô su-iàu li̍p tē-jī ê iok. 8 M̄-kú Siōng-tè kā in chí-chek kóng: Chú kóng, khòaⁿ ah, ji̍t-chí teh-beh kàu, góa beh kap [Í-sek-lia̍t]-ke kap [Iû-tāi]-ke li̍p sin ê iok. 9 Chit-ê iok bô chhin-chhiūⁿ góa chêng kap in ê chó͘-sian só͘ li̍p ê, chiū-sī khan in ê chhiú, chhōa in chhut [Ai-ki̍p] ê sî só͘ li̍p ê; in-ūi in bô kè-sio̍k siú góa ê iok, só͘-í góa m̄-chhap in. 10 Chú koh kóng, chiah-ê ji̍t í-āu, góa kap [Í-sek-lia̍t]-ke só͘ beh li̍p ê iok sī án-ni: Góa beh chiong góa ê Lu̍t-hoat khǹg tī in ê náu-lāi, siá tī in ê sim-lāi. Góa beh chòe in ê Siōng-tè; in beh chòe góa ê chú-bîn. 11 In lóng bōe-koh kà-sī in ê tông-pau, á-sī ka-kī ê hiaⁿ-tī chí-bē kóng: Tio̍h jīn-bat Chú, in-ūi in tùi siōng-sòe kàu siōng-tōa ê, lóng ōe jīn-bat góa. 12 Góa beh sià-bián in ê put-gī, bōe-koh kì-tit in ê chōe-ok. 13 Kì-jiân kóng-kàu sin ê iok, Siōng-tè chiū hō͘ thâu-chi̍t ê iok pìⁿ-chòe kū ê. Hit-ê chiām-chiām kū teh soe-thòe ê iok liâm-piⁿ chiū siau-sit.

Hi-pek-lâi 9

1 Thâu-chi̍t ê iok mā ū lé-pài ê kui-tēng kap tōe-chiūⁿ ê sèng-só͘. 2 Ū chi̍t ê tah hó-sè ê tiùⁿ-bō͘, thâu-chêng-keng kiò-chòe Sèng-só͘, lāi-bīn ū teng-tâi, toh, kap pâi-lia̍t ê piáⁿ. 3 Tē-jī ê tiùⁿ-lî āu ê āu-bīn-keng kiò-chòe Chì-sèng-só͘, 4 lāi-bīn ū kim-hiuⁿ-tôaⁿ, choân-pō͘ ēng kim pau ê Iok-kūi, kūi-lāi ū tóe má-ná ê kim-ô͘, [A-lûn] hit ki puh-gê ê koáiⁿ-á, kap nn̄g tè iok ê chio̍h-pán. 5 Kūi téng ū êng-kng ê ki-lō͘-peng thiⁿ-sài, in ê si̍t jia-khàm Si-un-chō. Koan-hē chiah-ê sū, hiān-chāi góa bōe-tàng siông-sè soat-bêng. 6 Chiah-ê mi̍h-kiāⁿ án-ni an-pâi hó-sè, chè-si chiū ta̍k ji̍t ji̍p-khì tiùⁿ-bō͘ ê thâu-chêng-keng kú-hêng lé-pài gî-sek. 7 Āu-bīn-keng chí-ū tōa-chè-si chiah thang ji̍p-khì, m̄-kú ta̍k nî chí-ū chi̍t piàn, ta̍k piàn tio̍h tòa huih ji̍p-khì, ūi-tio̍h pún-sin í-ki̍p bîn-chiòng bô-ì-tiong hoān ê chōe lâi hiàn. 8 Tùi chiah-ê an-pâi Sèng Sîn ū bêng-bêng piáu-sī, tiùⁿ-bō͘ ê thâu-chêng-keng iáu chûn-chāi, chìn-ji̍p Chì-sèng-só͘ ê lō͘ chiū iáu-bē khui. 9 Tiùⁿ-bō͘ ê thâu-chêng-keng phì-jū hiān-sè, sī kóng, só͘ hiàn ê lé-mi̍h kap chè-phín bōe-tàng hō͘ lé-pài ê lâng ê liông-sim chheng-pe̍k. 10 Chiah-ê kan-ta sī koan-hē lim-chia̍h kap ta̍k khoán ê kiat-chēng-lé, sī sio̍k gōa-piáu ê kui-lē, chí-ū sek-iōng kàu Siōng-tè keng-sin bān-mi̍h ê sî. 11 M̄-kú Ki-tok í-keng lâi, choh Tōa-chè-si, ū si̍t-hiān hó-sū. I ū keng-kè khah tōa khah oân-choân, m̄-sī lâng ê chhiú só͘ tah, m̄-sī sio̍k chit sè-kan ê tiùⁿ-bō͘. 12 I chí-ū chi̍t piàn chìn-ji̍p Chì-sèng-só͘, m̄-sī ēng soaⁿ-iûⁿ ê huih kap gû-á ê huih, sī ēng ka-kī ê huih ūi-tio̍h lán sêng-choân éng-oán ê kiù-sio̍k. 13 Soaⁿ-iûⁿ kap gû-káng ê huih, í-ki̍p gû-bú-á ê kut-hu nā hiù tī bô chheng-khì ê lâng to ōe hō͘ in sèng-hòa chheng-khì, 14 hô-hòng Ki-tok thong-kè éng-oán ê Sîn hiàn I bô hâ-chhû ê pún-sin hō͘ Siōng-tè, I ê huih kiám bōe hō͘ lán ê liông-sim koh-khah chheng-khì, thoat-lī sí ê hêng-ûi, lâi ho̍k-sāi éng-oa̍h ê Siōng-tè? 15 In-ūi án-ni, Ki-tok chòe sin ê iok ê tiong-kan-jîn, sī beh hō͘ Siōng-tè ho͘-tiàu ê lâng ōe-tit niá-siū I só͘ èng-ún éng-oán ê sán-gia̍p, in-ūi Ki-tok í-keng ēng I ê sí sio̍k-hôe in tī chêng ê iok ê sî só͘ hoān ê chōe-kò. 16 Koan-hē ûi-chiok, it-tēng tio̍h seng chèng-si̍t li̍p ûi-chiok ê lâng í-keng sí. 17 In-ūi ûi-chiok it-tēng tio̍h li̍p ûi-chiok ê lâng sí chiah ū-hāu. Li̍p ûi-chiok ê lâng iáu oa̍h-teh, ûi-chiok chiū bô-hāu. 18 Án-ni, liân thâu-chi̍t ê iok mā-sī ū ēng huih lâi sêng-li̍p. 19 [Mô͘-se] chiàu Lu̍t-hoat chiong it-chhè ê kài-bēng thoân hō͘ jîn-bîn, jiân-āu phâng gû-káng kap soaⁿ-iûⁿ ê huih chham chúi, ēng chu-âng sek ê iûⁿ-mn̂g kap gû-chhek-chháu hiù tī hit pún chheh ê téng-bīn kap choân-thé jîn-bîn ê sin-chiūⁿ, 20 kóng, “Che sī khè-iok ê huih, sī Siōng-tè bēng-lēng lín tio̍h chun-siú ê.” 21 Siâng-khoán, [Mô͘-se] mā chiong huih hiù tī tiùⁿ-bō͘ kap lé-pài ê sî só͘ ēng it-chhè ê khì-khū. 22 Chiàu Lu̍t-hoat, chha-put-to só͘-ū ê mi̍h lóng ēng huih lâi kiat-chēng; bô lâu-huih chiū bô sià-chōe. 23 Chiàu thiⁿ-téng ê khoán-sit só͘ hóng-chō ê mi̍h su-iàu ēng cheng-siⁿ ê huih lâi kiat-chēng; m̄-kú thiⁿ-téng ê goân-mi̍h su-iàu ēng pí chiah-ê khah hó ê chè-mi̍h lâi kiat-chēng. 24 Ki-tok ji̍p-khì ê pèng m̄-sī lâng ê chhiú chō ê Sèng-só͘ --- che put-kò sī chin Sèng-só͘ ê hù-pún, sī ji̍p-khì thiⁿ-téng ê chin Sèng-só͘. I hiān-chāi ūi-tio̍h lán chhut-hiān tī Siōng-tè ê bīn-chêng. 25 Ki-tok m̄-bián chi̍t piàn koh chi̍t piàn hiàn pún-sin, chhin-chhiūⁿ tōa-chè-si tio̍h ta̍k nî kè-sio̍k tòa cheng-siⁿ ê huih ji̍p-khì Chì-sèng-só͘. 26 Nā tio̍h chi̍t piàn koh chi̍t piàn hiàn, tùi chhòng-chō sè-kài í-lâi, Ki-tok tio̍h chi̍t piàn koh chi̍t piàn siū-khó͘. M̄-kú hiān-chāi tī chit-ê sè-tāi ê lō͘-bé, I chí-ū chhut-hiān chi̍t piàn, chiong pún-sin hiàn chòe chè lâi tû-khì chōe. 27 Chiàu só͘ chù-tiāⁿ, lâng tio̍h chi̍t pái sí, sí āu tio̍h siū Siōng-tè sím-phòaⁿ. 28 Chhin-chhiūⁿ án-ni, Ki-tok í-keng ū chi̍t piàn hi-seng lâi tam-tng chèng-lâng ê chōe; I ōe tē-jī piàn hián-hiān, m̄-sī beh tùi-hù chōe, sī beh chín-kiù pek-chhiat teh thèng-hāu I lâi ê lâng.

Hi-pek-lâi 10

1 Kì-jiân Lu̍t-hoat sī teh-beh lâi ê hó-sū ê iáⁿ, m̄-sī hó-sū pún-sin ê chin-siōng, só͘-í bōe-tàng chi̍t nî kè chi̍t nî kè-sio̍k ēng siâng-khoán ê chè-mi̍h hō͘ chhin-kūn Siōng-tè ê lâng tit-tio̍h oân-choân. 2 Nā-sī ōe, in-ūi kèng-pài ê lâng chi̍t piàn chiū oân-choân tit-tio̍h kiat-chēng, bô koh ū chōe ê ì-sek, hiàn-chè ê sū eng-kai í-keng thêng-chí à. 3 Kî-si̍t, ta̍k nî só͘ hiàn ê chè-mi̍h, chí-ū ōe hō͘ lâng siūⁿ-khí in ê chōe; 4 in-ūi gû, iûⁿ ê huih bōe-tàng tû-khì lâng ê chōe. 5 Só͘-í, Ki-tok lâi-kàu sè-kan ê sî ū kóng: Chè-sū kap lé-mi̍h, lí bô ài; m̄-kú lí ū kā góa chún-pī seng-khu. 6 Sio-chè kap sio̍k-chōe-chè, lí bô kah-ì. 7 Hit sî góa kóng: Siōng-tè ah, góa lâi lah; góa lâi sī beh si̍t-hêng lí ê chí-ì. Góa ê sū ū kì-chài tī chheh-ni̍h. 8 Góa téng-bīn ū kóng, “Chè-sū kap lé-mi̍h, sio-chè kap sio̍k-chōe-chè lí bô ài, mā bô kah-ì; chiah-ê sī chiàu Lu̍t-hoat lâi hiàn ê.” 9 I sòa lo̍h-khì kóng, “Khòaⁿ ah, góa lâi sī beh si̍t-hêng lí ê chí-ì.” Án-ni, Siōng-tè hòe-tû chêng-ê, sī beh kiàn-li̍p āu-ê. 10 Iâ-so͘ Ki-tok si̍t-hêng Siōng-tè ê chí-ì, chí-ū chi̍t piàn hiàn I ka-kī ê seng-khu chiū kàu-gia̍h hō͘ lán tit-tio̍h sèng-hòa kui Siōng-tè. 11 Chè-si ta̍k ji̍t khiā-teh ho̍k-sāi Siōng-tè, chi̍t piàn koh chi̍t piàn hiàn siâng-khoán ê chè, éng-oán bōe-tàng tû-khì lâng ê chōe. 12 M̄-kú Ki-tok chí-ū chi̍t piàn hiàn sio̍k-chōe-chè, jiân-āu chē tī Siōng-tè ê chiàⁿ-pêng, 13 thèng-hāu Siōng-tè hō͘ I ê tùi-te̍k chòe I ê kha-tiam. 14 Ki-tok thong-kè chi̍t piàn ê hiàn-chè, hō͘ sèng-hòa kui Chú ê lâng éng-oán oân-choân. 15 Sèng Sîn mā ū tùi lán choh-chèng. I ū kóng: 16 Chú kóng, hiah-ê ji̍t-chí í-āu, Góa kap in só͘ beh li̍p ê io̍k chiū-sī án-ni: Góa beh chiong góa ê Lu̍t-hoat khǹg tī in ê sim-lāi, siá tī in ê náu-lāi. 17 Jiân-āu I koh kóng: Góa bô koh kì-tit in ê chōe-ok kap kè-hoān. 18 Kì-jiân chōe í-keng tit-tio̍h sià-bián, chiū m̄-bián koh hiàn sio̍k-chōe-chè. 19 Só͘-í, hiaⁿ-tī chí-bē, lán khò Iâ-so͘ lâu-huih sí ōe-tàng ū khak-sìn kap ióng-khì chìn-ji̍p Chì-sèng-só͘. 20 I thong-kè tiùⁿ-lî, chiū-sī ka-kī ê seng-khu, kā lán khui chi̍t tiâu sin koh oa̍h ê lō͘. 21 Lán í-keng ū chi̍t ūi úi-tāi ê chè-si teh tī-lí Siōng-tè ê ke, 22 lán tio̍h ēng chin-sêng ê sim, kian-koat ê sìn, chheng-khì bô khui-khiàm ê liông-sim kap chheng-chúi sóe kè ê seng-khu lâi chhin-kūn Siōng-tè. 23 Lán tio̍h kian-koat chhî-siú só͘ soan-jīn ê ǹg-bāng, in-ūi èng-ún lán ê Siōng-tè khó-khò. 24 Lán tio̍h hō͘-siōng koan-sim thang kek-lē saⁿ-thiàⁿ kap chòe hó-sū. 25 Ū chi̍t-kóa lâng thêng-chí chū-hōe, m̄-thang o̍h in ê si̍p-koàn, tian-tò tio̍h hō͘-siōng khoàn-bián; kì-jiân lín chai Chú ê Ji̍t teh-beh kàu, koh-khah tio̍h án-ni. 26 Lán jīm-sek chin-lí í-āu iáu kò͘-ì hoān-chōe, chiū bô koh ū thang sio̍k-chōe ê chè-mi̍h, 27 chí-ū ēng kiaⁿ-hiâⁿ ê sim thèng-hāu sím-phòaⁿ kap teh-beh sio-bia̍t te̍k-tùi Siōng-tè ê lâng ê lia̍t-hé. 28 Ûi-hoān [Mô͘-se] ê Lu̍t-hoat ê, kun-kù nn̄g ê á-sī saⁿ ê lâng choh-chèng chiū thang kā i chhú-sí, lóng bô khoan-sià. 29 Án-ni, thún-ta̍h Siōng-tè ê Kiáⁿ, biáu-sī hō͘ in sèng-hòa kui Chú ê iok ê huih, koh bú-bān si-un ê Sèng Sîn ê lâng, lín siūⁿ in eng-kai siū ê hêng-hoa̍t ōe ke jōa tāng? 30 Lán chai, kóng “Sin-oan chāi góa, góa beh pò-èng”, koh kóng “Chú beh sím-phòaⁿ I ê chú-bîn” hit-ūi sī sím-mi̍h lâng? 31 Hām-lo̍h éng-oa̍h Siōng-tè ê chhiú si̍t-chāi chin thang kiaⁿ! 32 Lín tio̍h ōe kì-tit kè-khì ê ji̍t-chí. Lín siū Siōng-tè ê kng chiò í-āu, ū jím-siū tōa cheng-tò͘ ê khó͘-lān; 33 ū sî lín kong-jiân siū bú-jio̍k, ge̍k-thāi; ū sî lín kap pa̍t-lâng tâng-siū ge̍k-thāi. 34 Lín kap siû-hoān tâng siū-khó͘; lín ê châi-bu̍t siū chhiúⁿ-toa̍t mā kam-goān jím-siū, in-ūi chai lín ka-kī ū koh-khah hó koh éng-oán chûn-chāi ê sán-gia̍p. 35 Só͘-í, m̄-thang sit-lo̍h ióng-khì; chit-ê ióng-khì ōe hō͘ lín tōa ê pò-siúⁿ. 36 Lín tio̍h ū nāi-sim chiah ōe-tàng si̍t-hêng Siōng-tè ê chí-ì, niá-siū I só͘ èng-ún ê hok-hūn. 37 In-ūi koh chi̍t-sî-á kú, Hit-ūi teh-beh-lâi ê ōe kàu, bōe iân-tî. 38 M̄-kú sio̍k góa ê gī-lâng ōe tùi sìn lâi oa̍h. Nā ū lâng tiû-tû thòe-āu, góa chiū bô kah-ì. 39 Lán leh, lán m̄-sī thòe-āu tì-kàu tîm-lûn, sī tùi sìn tì-kàu sìⁿ-miā tit-tio̍h pó-choân.

Hi-pek-lâi 11

1 Sìn sī tùi só͘ ǹg-bāng ê sū ū pá-ak, tùi bô khòaⁿ-kìⁿ ê sū ōe-tàng khéng-tēng. 2 Kó͘-chá-lâng in-ūi chit-ê sìn tit-tio̍h Siōng-tè jīn-tēng chiap-la̍p. 3 Tùi sìn, lán chai ú-tiū sī tùi Siōng-tè ê ōe chhòng-chō ê; án-ni khòaⁿ-ōe-tio̍h-ê sī tùi khòaⁿ-bōe-tio̍h-ê lâi chō ê. 4 Tùi sìn, [A-pek] pí [Kai-ún] hiàn khah hó ê chè-mi̍h hō͘ Siōng-tè; tùi chit-ê sìn, i tit-tio̍h Siōng-tè jīn-tēng chiap-la̍p chòe gī-lâng. Sui-jiân [A-pek] í-keng sí, thong-kè chit-ê sìn, i iáu teh kóng-ōe. 5 Tùi sìn, [Í-lo̍k] bô keng-giām sí, siū chhian-sóa khì Siōng-tè hia. Lâng bô koh khòaⁿ-tio̍h i, in-ūi Siōng-tè kā i chhian-sóa khì; [Í-lo̍k] siū chhian-sóa í-chêng, í-keng hō͘ Siōng-tè jīn-tēng chiap-la̍p. 6 Bô sìn chiū bōe-tàng hō͘ Siōng-tè hoaⁿ-hí, in-ūi chhin-kūn Siōng-tè ê lâng it-tēng tio̍h sìn Siōng-tè ū chûn-chāi, koh sìn I ōe hō͘ chhē-kiû I ê lâng tit-tio̍h pò-siúⁿ. 7 Tùi sìn, [Ná-a] tùi iáu-bē khòaⁿ-tio̍h ê sū ū thiaⁿ Siōng-tè ê kéng-kò, chûn kèng-ùi ê sim, chō chi̍t chiah tōa-chûn kiù i choân-ke. Tùi chit-ê sìn, i tēng sè-kan-lâng ê chōe, koh kun-kù chit-ê sìn, i chiâⁿ-chòe gī ê kè-sêng-jîn. 8 Tùi sìn, [A-pek-la-hán] siū tiàu khì teh-beh sêng-siū chòe sán-gia̍p ê tōe ê sî, sui-jiân m̄-chai beh khì tó-ūi, iáu-kú i ū sūn-thàn chhut-khì. 9 Tùi sìn, i kià-ku tī èng-ún ê tōe, ná chhin-chhiūⁿ tiàm tī gōa-kok, kap chòe-hé sêng-siū kâng èng-ún ê [Í-sat], [Ngá-kok] tòa tī pò͘-pîⁿ; 10 in-ūi i kî-thāi Siōng-tè só͘ siat-kè kap khí-chō hit-ê ū tōe-ki ê siâⁿ. 11 Tùi sìn, [A-pek-la-hán] sui-jiân í-keng lāu, [Sat-la̍h] mā í-keng chhiau-kè seng-sán ê nî-hè, i iáu ōe-tàng choh lāu-pē, in-ūi khak-sìn èng-ún i ê Siōng-tè sī sìn-si̍t. 12 Só͘-í thang kóng, tùi chi̍t ê teh-beh sí ê lâng ū siⁿ-thòaⁿ kiáⁿ-sun, chhin-chhiūⁿ thiⁿ-téng ê chhiⁿ hiah-ni̍h chōe, chhin-chhiūⁿ hái-piⁿ ê soa sǹg bōe-liáu. 13 Chiah-ê lóng sī kàu sí it-ti̍t ū sìn-sim ê lâng; in bô tit-tio̍h só͘ èng-ún ê, m̄-kú tùi hn̄g-hn̄g khòaⁿ-kìⁿ chiū hoaⁿ-hí, sêng-jīn ka-kī put-kò sī tōe-chiūⁿ ê chhut-gōa-lâng, liû-lōng-kheh. 14 Kóng chiah-ê ōe ê lâng piáu-sī in sī teh chhē chi̍t ê ka-hiong. 15 In nā-sī teh hoâi-liām lī-khui ê só͘-chāi, iáu ū ki-hōe thang tò-khì. 16 Put-kò, hiān-chāi in teh him-bō͘ ê sī thiⁿ-téng hit-ê koh-khah hó ê só͘-chāi. Só͘-í, Siōng-tè bô in-ūi in chheng I chòe Siōng-tè lâi kám-kak kiàn-siàu. I sīm-chì í-keng ūi-tio̍h in chún-pī chi̍t ê siâⁿ. 17 Tùi sìn, [A-pek-la-hán] siū khó-giām ê sî hiàn [Í-sat] chòe chè-mi̍h, chiū-sī sêng-siū èng-ún ê [A-pek-la-hán] hoaⁿ-hí hiàn i ê ko͘-kiáⁿ. 18 Siōng-tè ū tùi i kóng, “Tùi [Í-sat] siⁿ ê chiah thang sǹg-chòe lí ê kiáⁿ-sun.” 19 [A-pek-la-hán] siūⁿ-kóng Siōng-tè ōe-tàng hō͘ [Í-sat] tùi sí-lâng tiong koh-oa̍h, só͘-í thang phì-jū kóng [Í-sat] sī sí koh tò tńg-lâi. 20 Tùi sìn, [Í-sat] ūi-tio̍h chiong-lâi ê sū kā [Ngá-kok] kap [Í-sò] chiok-hok. 21 Tùi sìn, [Ngá-kok] lîm-chiong ê sî kā [Iok-sek] ê kiáⁿ chi̍t-ê chi̍t-ê chiok-hok; i khò tī koáiⁿ-á-thâu kèng-pài Siōng-tè. 22 Tùi sìn, [Iok-sek] lîm-chiong ê sî ū thê-khí [Í-sek-lia̍t]-lâng chhut [Ai-ki̍p] ê sū, koh hoan-hù koan-hē i ê kut-hâi bâi-chòng ê sū. 23 Tùi sìn, [Mô͘-se] chhut-sì í-āu, i ê pē-bú khòaⁿ-tio̍h eⁿ-á chheng-siù, bô kiaⁿ ông ê bēng-lēng, chiong i chhàng saⁿ ge̍h-ji̍t kú. 24 Tùi sìn, [Mô͘-se] tióng-tōa í-āu, kū-choa̍t lâng kā i chheng-chòe [Ai-ki̍p] kong-chú ê kiáⁿ, 25 khah ài kap Siōng-tè ê chú-bîn tâng siū khó͘-lān, bô ài hióng-siū chōe tiong chi̍t-ē-á kú ê khoài-lo̍k. 26 I khòaⁿ ūi-tio̍h Ki-tok siū lêng-jio̍k pí [Ai-ki̍p] ê châi-pó khah pó-kùi, in-ūi i gióng-bōng chiong-lâi ê pò-siúⁿ. 27 Tùi sìn, [Mô͘-se] bô kiaⁿ ông ê siū-khì lī-khui [Ai-ki̍p]; in-ūi i ká-ná ū khòaⁿ-kìⁿ lâng só͘ khòaⁿ bōe-tio̍h ê Siōng-tè, kian-chhî m̄-khéng tò-khì. 28 Tùi sìn, [Mô͘-se] siat-li̍p Pôaⁿ-kè-choeh, hoan-hù tio̍h hiù huih tī mn̂g-ni̍h, chiah bōe hō͘ Châu-bia̍t-chiá kha̍p-tio̍h [Í-sek-lia̍t]-lâng ê tōa-kiáⁿ. 29 Tùi sìn, [Í-sek-lia̍t]-lâng kè [Âng-hái] chhin-chhiūⁿ teh kiâⁿ ta-tōe; [Ai-ki̍p]-lâng mā siūⁿ-beh kè, soah hō͘ chúi im-sí. 30 Tùi sìn, [Í-sek-lia̍t]-lâng se̍h [Iâ-lī-ko]-siâⁿ chhit ji̍t, siâⁿ-chhiûⁿ chiū tó lo̍h-khì. 31 Tùi sìn, chhiong-ki [Lat-ha̍p] chhin-chhiat chiap-thāi cheng-thàm, só͘-í bô kap hiah-ê m̄ sūn-ho̍k Siōng-tè ê lâng chòe-hé bia̍t-bông. 32 Góa kiám tio̍h koh kóng? Góa bô kàu sî-kan thang thê-khí [Ki-tiân], [Pa-la̍k], [Chham-sun], [Iâ-hut-tha], [Tāi-pi̍t], [Sat-bó-ní], kap chèng sian-ti ê sū. 33 Chiah-ê lâng khò sìn-sim thâi-iâⁿ lia̍t-kok. In thui-hêng chèng-gī, niá-siū Siōng-tè ê èng-ún. In hong-ba̍t sai ê chhùi, 34 phah-hoa lia̍t-hé, tô-thoat to-kiàm ê sat-hāi. In loán-jio̍k pìⁿ-chòe kian-kiông, tī chiàn-tiûⁿ pìⁿ-chòe ióng-béng, phah-iâⁿ gōa-kok ê kun-tūi. 35 Ū chi̍t-kóa hū-jîn-lâng ū chiap in ê chhin-lâng tùi sí-lâng tiong tò tńg-lâi. Mā ū chi̍t-kóa lâng ūi-tio̍h beh koh-oa̍h, tit-tio̍h khah hó ê oa̍h-miā, kū-choa̍t tháu-pàng, kam-goān siū khok-hêng kàu sí. 36 Ū chi̍t-kóa lâng siū hì-lāng, piⁿ-phah; mā ū chi̍t-kóa lâng siū khún-pa̍k, koaiⁿ-kaⁿ. 37 In hō͘ lâng ēng chio̍h-thâu tìm-sí, ēng kú-á kù-sí, ēng to thâi-sí. In chhēng mî-iûⁿ á-sī soaⁿ-iûⁿ ê phê, ta̍k só͘-chāi phun-pho, jím-siū khiàm-kheh, pek-hāi, ge̍k-thāi. 38 Chit sè-kan bô ta̍t-tit in khiā-khí; in tī khòng-iá, soaⁿ-niá, chio̍h-tōng á-sī tōe-hia̍t, sì-kòe liû-lōng. 39 Chiah-ê lâng thong-kè in ê sìn lóng ū tit-tio̍h Siōng-tè jīn-tēng chiap-la̍p, m̄-kú bô tit-tio̍h só͘ èng-ún ê, 40 in-ūi Siōng-tè ūi-tio̍h lán ū khah hó ê an-pâi; I ê chí-ì sī ài chiah-ê lâng kap lán ū hūn tī chit-ê an-pâi, án-ni só͘ sìn ê chiah ōe-tàng oân-choân si̍t-hiān.

Hi-pek-lâi 12

1 Kì-jiân ū chiah-ni̍h chōe ê kiàn-chèng-jîn chhin-chhiūⁿ hûn kā lán pau-ûi teh, lán tio̍h pâi-tû it-chhè ê chó͘-gāi kap it-ti̍t teh tîⁿ-pòaⁿ lán ê chōe, kian-jím pháu-cháu thâu-chêng ê lō͘-thêng. 2 Tio̍h chù-sîn khòaⁿ sìn ê chhòng-sí-chiá kap oân-sêng-chiá Iâ-so͘. I ūi-tio̍h pâi tī thâu-chêng ê hí-lo̍k, bû-sī lêng-jio̍k, jím-siū si̍p-jī-kè ê khó͘-lān, hiān-chāi í-keng chē tī Siōng-tè pó-chō ê chiàⁿ-pêng. 3 Tio̍h siông-sè siūⁿ chit-ê lâng ê só͘-chòe, lín chiah bōe hoe-sim sit-chì. I án-chóaⁿ jím-siū chōe-jîn tùi I ê ngó͘-ge̍k. 4 Lín kap chōe-ok tò͘-cheng iáu-bē tí-khòng kàu sí ê thêng-tō͘. 5 Lín kiám bōe kì-tit Siōng-tè khó͘-khǹg lín chhin-chhiūⁿ teh khó͘-khǹg kiáⁿ-jî. I kóng: Góa ê kiáⁿ ah, m̄-thang khòaⁿ-khin Chú ê koán-kàu; siū I chek-pī mā m̄-thang hoe-sim. 6 In-ūi Chú koán-kàu I só͘ thiàⁿ ê lâng, piⁿ-phah I só͘ chiap-la̍p ê ta̍k ê kiáⁿ-jî. 7 Tio̍h jím-siū koán-kàu. Siōng-tè khoán-thāi lín chhin-chhiūⁿ kiáⁿ-jî, kiám ū kiáⁿ-jî bô siū pē-bú koán-kàu? 8 Lín nā bô siū só͘-ū ê kiáⁿ-jî só͘ siū ê koán-kàu, lín chiū-sī su-seng-chú, m̄-sī chin-chiàⁿ ê kiáⁿ-jî. 9 Siū jio̍k-thé ê pē-bú koán-kàu, lán to chun-tiōng in, hô-hòng siū lêng-sèng ê Pē koán-kàu, lán kiám m̄ eng-kai koh-khah goān-ì sūn-chiông lâi tit-tio̍h oa̍h-miā? 10 Jio̍k-thé ê pē-bú chiām-sî kú chiàu ka-kī ê ì-sù koán-kàu, m̄-kú Siōng-tè ê koán-kàu sī beh hō͘ lán tit-tio̍h lī-ek, bo̍k-te̍k sī beh hō͘ lán ū hūn tī I ê sèng-kiat. 11 Lán ta̍k piàn siū koán-kàu bōe kám-kak hoaⁿ-hí, hoán-tńg iu-siong, m̄-kú keng-kè koán-kàu thoàn-liān liáu-āu, ōe kiat hô-pêng ê ké-chí, kiâⁿ-chòe chèng-ti̍t. 12 Só͘-í, lín kha-sng chhiú-nńg ê, tio̍h kian-kiông khí-lâi. 13 Tio̍h siu-ti̍t lín beh kiâⁿ ê lō͘, chiah-bián hō͘ pái ê kha thu̍t-lûn, hoán-tńg tit-tio̍h i-hó. 14 Tio̍h ló͘-le̍k kap chèng-lâng hô-bo̍k, kè sèng-kiat ê seng-oa̍h; nā bô, bô-lâng ōe kìⁿ-tio̍h Chú. 15 Tio̍h kín-sīn, chiah-bián ū lâng sit-khì Siōng-tè ê un-tián; chiah-bián ū to̍k-chháu hoat khí-lâi, chō-sêng gûi-hāi, tì-kàu chin chōe lâng siū ù-jiám; 16 chiah-bián ū lâng îm-loān, bô kèng-ùi Siōng-tè, chhin-chhiūⁿ [Í-sò] ūi-tio̍h chi̍t-tǹg-chia̍h chhut-bōe tōa-kiáⁿ ê bêng-hūn. 17 Lín chai, āu-lâi i ài tit-tio̍h chiok-hok ê sî siū kū-choa̍t; sui-jiân i lâu ba̍k-sái khún-kiû mā bô tit-tio̍h, in-ūi i chhē bô ki-hōe thang hóe-kái. 18 Lín m̄-sī lâi-kàu hit-ê bong ōe-tio̍h ê [Se-nái]-soaⁿ, tī hia ū hé-iām, ba̍t-hûn, o͘-àm, kap pō-hong, 19 koh ū lat-pah ê hiáng-siaⁿ kap kóng-ōe ê siaⁿ. Thiaⁿ-kìⁿ ê lâng khún-kiû Siōng-tè m̄-thang koh tùi in kóng-ōe, 20 in-ūi in bōe-tàng jím-siū bēng-lēng in ê ōe, kóng: “Liân cháu-siù nā kha̍p-tio̍h soaⁿ mā tio̍h ēng chio̍h-thâu tìm-sí.” 21 Hit-ê kéng-siōng hui-siông thang kiaⁿ, tì-kàu [Mô͘-se] kóng, “Góa kiaⁿ-kah phi̍h-phi̍h-chhoah.” 22 M̄-kú, lín sī lâi-kàu [Sek-an]-soaⁿ, éng-oa̍h Siōng-tè ê siâⁿ, thiⁿ-téng ê [Iâ-lō͘-sat-léng], tī hia ū chheng-chheng bān-bān ê thiⁿ-sài chū-chi̍p khèng-chiok. 23 Lín lâi-kàu Siōng-tè ê tōa-kiáⁿ chū-chi̍p ê hōe-só͘; in ê miâ í-keng kì tī thiⁿ-téng. Lín lâi-kàu sím-phòaⁿ bān-lâng ê Siōng-tè bīn-chêng, kàu í-keng tit-tio̍h kái-chō chiâⁿ-chòe oân-choân ê gī-lâng ê lêng-hûn hia. 24 Lín lâi-kàu sin ê iok ê tiong-kan-jîn Iâ-so͘ ê bīn-chêng, kap só͘ hiù ê huih hia, chit-ê huih pí [A-pek] ê huih só͘ piáu-ta̍t ê koh-khah hó. 25 Tio̍h kín-sīn, m̄-thang kū-choa̍t teh tùi lín kóng-ōe Hit-ūi. Hiah-ê kū-choa̍t tī tōe-chiūⁿ kéng-kài in hit-ūi ê lâng to bōe-tàng thoat-lī chōe, lán nā kū-choa̍t tùi thiⁿ-téng kéng-kài lán Hit-ūi, koh-khah bōe-tàng thoat-lī. 26 Hit sî I ê siaⁿ iô-tāng tāi-tōe, m̄-kú taⁿ I ū èng-ún kóng, “Koh chi̍t piàn, góa m̄-nā hō͘ tōe, mā beh hō͘ thiⁿ iô-tāng.” 27 “Koh chi̍t piàn” chit kù ōe chí-bêng, hiah-ê siū chō ê mi̍h siū iô-tāng, siū chhian-sóa, sī beh hō͘ hiah-ê bô siū iô-tāng ê lâu lo̍h-lâi. 28 Só͘-í, lán tio̍h kám-siā, in-ūi lán ū tit-tio̍h hit-ê bōe siū iô-tāng ê Kok-tō͘. Lán tio̍h chiàu Siōng-tè só͘ hoaⁿ-hí ê, ēng khiân-sêng kap kèng-ùi lâi ho̍k-sāi I, 29 in-ūi lán ê Siōng-tè sī húi-bia̍t ê hé.

Hi-pek-lâi 13

1 Tio̍h kè-sio̍k saⁿ-chhin saⁿ-thiàⁿ. 2 Tio̍h ōe kì-tit hó khoán-thāi chhut-gōa-lâng. In-ūi ū lâng án-ni chòe, bô-ì tiong chiap-thāi tio̍h thiⁿ-sài. 3 Tio̍h koan-hoâi siū koaiⁿ-kaⁿ ê lâng, chhin-chhiūⁿ kap in teh tâng siū koaiⁿ; tio̍h koan-hoâi siū ge̍k-thāi ê lâng, chhin-chhiūⁿ lín pún-sin teh siū ge̍k-thāi. 4 Hun-in lâng-lâng tio̍h chun-tiōng; tio̍h pó-chhî sûn-kiat ê hu-chhe koan-hē, in-ūi Siōng-tè ōe sím-phòaⁿ su-thong kiâⁿ-îm ê lâng. 5 M̄-thang tham-châi, ka-kī só͘-ū ê tio̍h ti-chiok, in-ūi Siōng-tè ū kóng, “Góa bōe lī-khui lí, mā bōe pàng-sak lí.” 6 Só͘-í lán ōe-tàng hó-táⁿ kóng: Chú sī góa ê pang-chān, góa bô kiaⁿ-hiâⁿ, lâng ōe-tàng kā góa án-chóaⁿ? 7 Tio̍h siàu-liām ín-chhōa lín, thoân Siōng-tè ê sìn-sit hō͘ lín ê lâng, chù-ì khòaⁿ in ê seng-oa̍h kap kiat-kio̍k lâi ha̍k-si̍p in ê sìn. 8 Iâ-so͘ Ki-tok cha-ji̍t, kin-á-ji̍t, kàu éng-oán lóng bōe kái-piàn. 9 Lín m̄-thang hō͘ ta̍k khoán kî-īⁿ ê kàu-gī chhōa bê-lō͘, in-ūi sim-lêng khah hó tio̍h khò Siōng-tè ê un-tián lâi kian-kò͘, m̄-sī khò chia̍h-mi̍h, che tùi chun-siú chia̍h-mi̍h kui-lē ê lâng lóng bô lī-ek. 10 Lán ū chi̍t ê chè-tôaⁿ, chè-tôaⁿ téng ê chè-mi̍h, tī hōe-bō͘ lāi ho̍k-sāi ê [Iû-thài] chè-si bô koân thang chia̍h. 11 In ê tōa-chè-si tòa cheng-siⁿ ê huih chìn-ji̍p Chì-sèng-só͘ ūi-tio̍h jîn-bîn sio̍k-chōe, cheng-siⁿ ê seng-khu khiok tī iâⁿ-gōa sio. 12 Só͘-í, ūi-tio̍h beh ēng ka-kī ê huih hō͘ jîn-bîn tit-tio̍h kiat-chēng, Iâ-so͘ mā tī iâⁿ-gōa hi-seng lâi sí. 13 Án-ni, lán tio̍h chhut-khì iâⁿ-gōa, kàu I hia, kap I tâng siū lêng-jio̍k. 14 In-ūi tī chia lán bô éng-kiú ê siâⁿ; lán sī teh chhē hit-ê teh-beh lâi ê siâⁿ. 15 Só͘-í, lán tio̍h thong-kè Iâ-so͘ kè-sio̍k chiong o-ló ê chè hiàn hō͘ Siōng-tè, che sī soan-jīn Chú ê miâ ê lâng ê chhùi-tûn só͘ kiat ê ké-chí. 16 Tio̍h ōe kì-tit chòe hó-sū, hō͘-siōng pang-chān, in-ūi che sī Siōng-tè só͘ hoaⁿ-hí ê chè-mi̍h. 17 Tio̍h ho̍k-chiông ín-chhōa lín ê lâng, thiaⁿ-thàn in ê ōe, in-ūi in put-sî teh khòaⁿ-kò͘ lín ê lêng-hûn, thang hō͘ in tùi Siōng-tè kau-tài chheng-chhó. Lín tio̍h hō͘ in hoaⁿ-hí kang-chok, bô thó͘-khùi; nā bô, tùi lín bô lī-ek. 18 Tio̍h kè-sio̍k ūi-tio̍h goán kî-tó; goán khak-sìn ka-kī ū chheng-pe̍k ê liông-sim, ì-ài hoān-sū chiàu khí-kang seng-oa̍h. 19 Góa khún-kiû lín tio̍h te̍k-pia̍t ūi-tio̍h góa kî-tó, kiû Siōng-tè hō͘ góa thang khah kín khì lín hia. 20 Siōng-tè í-keng hō͘ lán ê Chú Iâ-so͘ tùi sí-lâng tiong koh-oa̍h. I thong-kè Iâ-so͘ só͘ lâu ê huih khak-li̍p éng-oán ê iok, hō͘ Iâ-so͘ chiâⁿ-chòe iûⁿ-kûn ê Tōa-bo̍k-chiá. Goān chit-ūi sù pêng-an ê Siōng-tè hō͘ lín tī ta̍k hāng hó-sū oân-choân lâi kiâⁿ I ê chí-ì, thong-kè Iâ-so͘ Ki-tok tī lán tiong-kan sêng-chiū I só͘ hoaⁿ-hí ê sū! Goān êng-kng kui hō͘ Siōng-tè, ti̍t-kàu éng-éng oán-oán. Amen! 22 Hiaⁿ-tī chí-bē, góa hō͘ lín ê phoe bô jōa tn̂g, góa khǹg lín nāi-sim thiaⁿ góa khoàn-bián ê ōe. 23 Góa ài lín chai, lán ê hiaⁿ-tī [Thê-mô͘-thài] í-keng chhut-ga̍k; i nā khah-chá lâi, góa ōe sûi-sî kap i chòe-hé khì kìⁿ lín. 24 Chhiáⁿ thòe góa kā só͘-ū lín ê léng-tō-chiá kap lóng-chóng ê sìn-tô͘ chhéng-an. Tùi [Ì-tāi-lī] lâi ê sìn-tô͘ mā beh kā lín chhéng-an. 25 Goān Siōng-tè ê un-tián kap lín tāi-ke tông-chāi. Amen!

Ngá-kok 1

1 Góa --- [Ngá-kok] sī Siōng-tè kap Chú Iâ-so͘ Ki-tok ê lô͘-po̍k, beh kā só͘-ū hun-sòaⁿ tī ta̍k só͘-chāi Siōng-tè ê chú-bîn chhéng-an. 2 Hiaⁿ-tī chí-bē, lín tú-tio̍h ta̍k khoán chhì-liān ê sî, tio̍h siūⁿ-chòe sī thang hoaⁿ-hí ê tāi-chì, 3 in-ūi chai-iáⁿ lín ê sìn-sim keng-kè khó-giām ōe sán-seng jím-nāi. 4 Lín tio̍h jím-nāi kàu lō͘-bé chiah ōe-tàng ta̍t-kàu oân-choân koh oân-chéng, lóng bô khoat-tiám. 5 Lín tiong-kan nā ū lâng khiàm-kheh tì-hūi, tio̍h tùi Siōng-tè kî-kiû, I ōe sù hō͘ lín, in-ūi Siōng-tè ōe chin khóng-khài bô pó-liû sù hō͘ lóng-chóng ê lâng. 6 Put-kò, lín tio̍h khò sìn-sim kî-kiû, m̄-thang giâu-gî; giâu-gî ê lâng chhin-chhiūⁿ hái-éng hō͘ hong sàu, khí-khí lo̍h-lo̍h. 7 Chit khoán lâng sam-sim lióng-ì, só͘-chòe bô tēng-sèng, bián siūⁿ-beh tùi Chú tit-tio̍h sím-mi̍h. 9 Pîn-chiān ê hiaⁿ-tī chí-bē tit-tio̍h Siōng-tè thê-seng sin-hūn, tio̍h hoaⁿ-hí; 10 hù-kùi ê lâng siū Siōng-tè kàng-kē sin-hūn, mā tio̍h hoaⁿ-hí. Hù-kùi ê lâng ōe chhin-chhiūⁿ chháu hoe siā-khì. 11 Ji̍t-thâu chi̍t-ē chhut, sio-hong chi̍t-ē chhe, chháu ta-khì, hoe siā-khì, i ê súi chiū siau-sit. Hù-kùi ê lâng mā-sī án-ni, ōe tī bô-êng phun-pho ê tiong-kan siau-sit. 12 Jím-siū chhì-liān ê lâng chin ū hok-khì; in-ūi i ū keng-kè khó-giām, ōe niá-siū Siōng-tè èng-ún hō͘ thiàⁿ I ê lâng oa̍h-miā ê hoa-koan. 13 Lâng siū ín-iú ê sî, m̄-thang kóng “Góa hō͘ Siōng-tè ín-iú”, in-ūi Siōng-tè bōe siū siâ-ok iú-he̍k, I ka-kī mā bōe ín-iú lâng. 14 Lâng siū ín-iú, sī hō͘ ka-kī ê io̍k-bōng ín-iú hām-hāi. 15 Io̍k-bōng hoâi-īn chiū siⁿ-chhut chōe-ok; chōe-ok sêng-se̍k chiū sán-seng sí-bông. 16 Chhin-ài ê hiaⁿ-tī chí-bē, m̄-thang siū khi-phiàn. 17 It-chhè bí-hó ê siúⁿ-sù kap it-chhè oân-choân ê un-sù sī tùi thiⁿ-téng kng-bêng ê Goân-thâu só͘ sù. I bô kái-piàn, mā bô thian-thé tńg-se̍h ín-khí ê iáⁿ. 18 I chiàu ka-kī ê chí-ì ēng chin-lí ê tō lâi chō lán, hō͘ lán tī siū-chō ê bān-mi̍h tiong ū siōng tiōng-iàu ê tōe-ūi. 19 Chhin-ài ê hiaⁿ-tī chí-bē, tio̍h chai! Ta̍k ê lâng tio̍h kip-beh thiaⁿ; m̄-thang kip-beh kóng; m̄-thang kip-beh siū-khì; 20 in-ūi lâng ê siū-khì bōe-tàng si̍t-hiān Siōng-tè kong-gī ê iau-kiû. 21 Só͘-í, tio̍h siau-tû it-chhè lâ-sâm ê si̍p-koàn kap koàn-boán ê siâ-ok; tio̍h ēng un-jiû ê sim chiap-la̍p hit-ê chèng tī lín sim-lāi ōe-tàng kiù lín ê tō-lí. 22 Tio̍h si̍t-hêng tō-lí, m̄-thang phiàn ka-kī kóng kan-ta thiaⁿ tō-lí chiū hó. 23 Kan-ta thiaⁿ tō-lí bô khì si̍t-hêng ê lâng, tú chhin-chhiūⁿ lâng chiò-kiàⁿ khòaⁿ ka-kī siⁿ-chòe siáⁿ-khoán; 24 ka-kī siông-sè khòaⁿ, liáu-āu chi̍t-ē lī-khui, sûi-sî bōe kì-tit ka-kī siⁿ-chòe siáⁿ-khoán. 25 M̄-kú ū teh siông-sè chhâ-khó hō͘ lâng tit-tio̍h chū-iû hit-ê oân-chéng ê Lu̍t-hoat koh ū-teh kian-siú ê lâng, i ê só͘-chòe it-tēng ōe tit-tio̍h Siōng-tè sù-hok, in-ūi i ū si̍t-chāi khì si̍t-hêng, m̄-sī thiaⁿ liáu chiū bōe kì-tit. 26 Nā ū lâng siūⁿ-kóng ka-kī chin kèng-khiân, m̄-kú bô khòng-chè ka-kī ê chhùi-chi̍h, sī teh khi-phiàn ka-kī, chit-ê lâng ê kèng-khiân lóng bô lō͘-ēng. 27 Chiàu-kò͘ khó͘-lān tiong ê ko͘-jî kóaⁿ-hū, koh pó-siú ka-kī bô jiám-tio̍h sè-sio̍k ê hú-pāi, tùi Pē Siōng-tè khòaⁿ khí-lâi, che chiah-sī sûn-choân bô khoat-tiám ê kèng-khiân.

Ngá-kok 2

1 Góa ê hiaⁿ-tī chí-bē, kì-jiân lín sìn lán êng-kng ê Chú Iâ-so͘ Ki-tok, tio̍h m̄-thang khòaⁿ gōa-piáu tùi-thāi lâng. 2 Nā ū chi̍t ê kòa kim chhiú-chí, chhēng súi-saⁿ ê hó-gia̍h-lâng ji̍p-lâi lín ê hōe-tn̂g, koh ū chi̍t ê chhēng phòa-saⁿ ê sàn-chhiah-lâng ji̍p-lâi, 3 lín kan-ta chù-ì hit-ê chhēng súi-saⁿ ê, tùi i kóng, “Chhiáⁿ lâi chē tōa-ūi”, tùi hit-ê sàn-chhiah-lâng kóng, “Lí khiā tiàm hia”, á-sī kóng, “Chē góa ê kha-tiam piⁿ”, 4 án-ni lín kiám m̄-sī phian-sim, ēng pháiⁿ ê tōng-ki teh phòaⁿ-toàn lâng? 5 Chhin-ài ê hiaⁿ-tī chí-bē, tio̍h thiaⁿ! Siōng-tè ū kéng-soán sè-kan ê sàn-chhiah-lâng, hō͘ in tī sìn-gióng siōng hù-chiok, thang sêng-chiap I èng-ún hō͘ thiàⁿ I ê lâng ê Kok-tō͘. 6 M̄-kú lín bô chun-tiōng sàn-chhiah-lâng! Ap-pek lín, thoa lín chiūⁿ hoat-têng ê, kiám m̄-sī hiah-ê hó-gia̍h-lâng? 7 In chiah-sī húi-pòng Siōng-tè sù lín chun-kùi ê miâ hiah-ê lâng! 8 Lín nā chun-thàn Sèng-keng só͘ kì-chài “Tio̍h thiàⁿ chhù-piⁿ chhin-chhiūⁿ thiàⁿ ka-kī” hit-ê Siōng-tè-kok ê Lu̍t-hoat, án-ni chiū tio̍h. 9 M̄-kú lín nā khòaⁿ gōa-piáu tùi-thāi lâng chiū-sī hoān-chōe, siū Lu̍t-hoat phòaⁿ-chòe hoān-hoat. 10 Lâng nā bô siú Lu̍t-hoat tiong ê chi̍t tiâu kài-bēng, chiū-sī bô siú choân-pō͘ ê Lu̍t-hoat. 11 In-ūi Hit-ūi bēng-lēng “M̄-thang hoān kan-îm” ê, mā kóng “M̄-thang thâi-sí lâng”. Sui-jiân lí bô hoān kan-îm, lí nā thâi-sí lâng chiū-sī ûi-hoān Lu̍t-hoat. 12 Kì-jiân lín teh-beh siū hō͘ lâng chū-iû ê Lu̍t-hoat sím-phòaⁿ, tio̍h chiàu Lu̍t-hoat ê iau-kiû kóng-ōe, chòe tāi-chì. 13 In-ūi, bô ēng chû-pi tùi-thāi lâng ê, tī Sím-phòaⁿ ê sî, Siōng-tè bōe ēng chû-pi tùi-thāi i; chû-pi iâⁿ-kè sím-phòaⁿ. 14 Hiaⁿ-tī chí-bē, nā ū lâng kóng i ū sìn, m̄-kú bô ēng hêng-ûi lâi chèng-bêng, ū siáⁿ lō͘-ēng? Hit khoán ê sìn kiám ōe kiù i? 15 Lín tiong-kan nā ū hiaⁿ-tī á-sī chí-bē bô saⁿ thang chhēng, saⁿ-tǹg bô thang chia̍h, 16 lín kan-ta tùi in kóng, “Chiok lín pêng-an, tio̍h chhēng hō͘ sio, chia̍h hō͘ pá!” m̄-kú bô kiong-kip in jio̍k-thé só͘ su-iàu ê mi̍h, ū siáⁿ lō͘-ēng? 17 Án-ni, bô hêng-ûi, sìn-sim sī sí ê. 18 Kiám-chhái ū lâng beh kóng, “Lí ū sìn-sim, góa ū hêng-ûi.” Góa beh ìn kóng, “Hō͘ góa khòaⁿ bô hêng-ûi ê sìn-sim, góa chiū ēng hêng-ûi hō͘ lí khòaⁿ góa ê sìn-sim.” 19 Lín sìn Siōng-tè chí-ū chi̍t ūi, án-ni sī tio̍h; liân kúi mā sìn, koh kiaⁿ-kah phi̍h-phi̍h-chhoah. 20 Gōng-lâng ah, lín ài chai bô, bô hêng-ûi ê sìn-sim bô lō͘-ēng. 21 Lán ê chó͘-sian [A-pek-la-hán] sī án-chóaⁿ hō͘ Siōng-tè kā i chheng-chòe gī-lâng? Kiám m̄-sī tùi i hiàn ka-kī ê kiáⁿ [Í-sat] tī chè-tôaⁿ téng chit-ê hêng-ûi? 22 Khó-kiàn, i ê sìn-sim kap hêng-ûi chòe-hé ūn-chok; i ê sìn-sim sī thong-kè hêng-ûi lâi oân-sêng. 23 Che sī èng-giām Sèng-keng só͘ kóng, “[A-pek-la-hán] sìn Siōng-tè, in-ūi án-ni, Siōng-tè chiap-la̍p i chòe gī-lâng”; i mā chheng-chòe Siōng-tè ê pêng-iú. 24 Khó-kiàn, lâng siū chiap-la̍p chòe gī-lâng sī tùi hêng-ûi, m̄-sī kan-ta tùi sìn. 25 Ki-lú [Lat-ha̍p] ê chêng-hêng mā-sī án-ni. I chiap-la̍p [Í-sek-lia̍t]-lâng ê sù-chiá, pang-chān in tùi pa̍t tiâu lō͘ tô-cháu, án-ni i kiám m̄-sī tùi hêng-ûi siū chiap-la̍p chòe gī-lâng? 26 Seng-khu bô khùi sī sí ê; sìn-sim bô hêng-ûi mā-sī sí ê.

Ngá-kok 3

1 Hiaⁿ-tī chí-bē, lín tiong-kan m̄-thang ū chin chōe lâng choh kàu-su, in-ūi lín chai choh kàu-su ê lâng ōe siū khah giâm-keh ê sím-phòaⁿ. 2 In-ūi lán tāi-ke lóng siông-siông hoān chin chōe chhò-gō͘; kóng-ōe bô chhò-gō͘ ê sī oân-choân ê lâng, i ōe-hiáu khòng-chè ka-kī. 3 Lán ēng bé-kā-kiuⁿ tàu tī bé ê chhùi-ni̍h, hō͘ in sūn-ho̍k, thang khòng-chè kui-chiah bé ê hêng-tōng. 4 Koh khòaⁿ, chûn sui-jiân hiah tōa chiah, hō͘ tōa-hong chhe, phah, chí-ū ēng chi̍t ki sòe-sòe ê chûn-tōa kā i khòng-chè, sái-chûn ê lâng chiū ōe-tàng chiàu ka-kī ê ì-sù sái. 5 Chhin-chhiūⁿ án-ni, chhùi-chi̍h sī sòe ê khì-koan, iáu-kú ōe kóng tōa-ōe. Koh siūⁿ-khòaⁿ leh, chi̍t-tiám-á hé-chhiⁿ mā ōe hō͘ kui-ê chhiū-nâ lóng sio-khì. 6 Chhùi-chi̍h sī hé. Tī lán ê chi-thé tiong, chhùi-chi̍h sī siâ-ok ê sè-kài, ōe ù-jiám lán kui seng-khu. Chit-ê hé sī tùi tōe-ge̍k tiám-to̍h ê, ōe hō͘ lâng kui-ê jîn-seng sio-bia̍t. 7 Lâng ōe-tàng hō͘ ta̍k chióng iá-siù, pe-chiáu, thâng-thōa, kap hî-lūi sûn-ho̍k; kî-si̍t mā í-keng hō͘ in lóng sûn-ho̍k lah. 8 M̄-kú, bô-lâng ōe-tàng hō͘ chhùi-chi̍h sûn-ho̍k; chhùi-chi̍h sī bô-lâng khòng-chè ōe-tiâu ê siâ-ok, chhiong-móa tì-miā ê to̍k. 9 Lán ēng chhùi-chi̍h o-ló Chú lán ê Pē, mā ēng chhùi-chi̍h chiù-chó͘ chiàu Siōng-tè ka-kī ê hêng-siōng só͘ chō ê lâng. 10 Kám-siā kap chiù-chó͘ ê ōe lóng tùi kâng chi̍t ê chhùi chhut. Hiaⁿ-tī chí-bē, án-ni sī bô eng-kai! 11 Tùi kâng chi̍t ê chôaⁿ-goân kiám ōe chhèng-chhut tiⁿ ê kap khó͘ ê chúi! 12 Hiaⁿ-tī chí-bē, bû-hoa-kó-chhiū kiám ōe siⁿ ka-ná? Phû-tô-chhiū kiám ōe siⁿ bû-hoa-kó? Kiâm ê chúi-goân mā bōe chhut tiⁿ ê chúi! 13 Lín tiong-kan sím-mi̍h lâng ū tì-hūi, ū kiàn-sek? Nā ū, tio̍h ēng khiam-pi kap tì-hūi, thong-kè ka-kī ê hó phín-hēng piáu-hiān chhut-lâi. 14 Lín sim-lāi nā ū ok-to̍k, chi̍t-tò͘, kap chū-su, chiū m̄-thang khoa-kháu, kóng pe̍h-chha̍t tí-te̍k chin-lí. 15 Chit khoán tì-hūi m̄-sī tùi thiⁿ-téng lâi ê, sī sio̍k tōe-chiūⁿ, sio̍k hiat-khì, tùi Mô͘-kúi lâi ê. 16 In-ūi ū chi̍t-tò͘ kap chū-su chiū ū hūn-loān kap ta̍k hāng pháiⁿ hêng-ûi. 17 Tùi téng-bīn lâi ê tì-hūi, tē-it sī sûn-chin, koh lâi sī hô-pêng, un-hô, kap iú-siān, chhiong-móa chû-pi, kiat hó tek-hēng ê ké-chí; bô phian-su, bô hu-ké. 18 Kong-gī sī chhiok-chìn hô-pêng ê lâng ēng hô-pêng iā ê chéng-chí só͘ kiat ê ké-chí.

Ngá-kok 4

1 Lín tiong-kan ê tò͘-cheng kap cheng-chip tùi tó-ūi lâi? Kiám m̄-sī tùi lín chi-thé tiong-kan put-sî teh cheng-chip kap tò͘-cheng ê io̍k-bōng lâi? 2 Lín siūⁿ-beh tit-tio̍h, tit bōe-tio̍h, chiū beh thâi lâng. Lín io̍k-bōng móa-móa, m̄-kú bōe-tàng boán-chiok, chiū cheng-chip tò͘-cheng. Lín tit bōe-tio̍h só͘ ài ê, in-ūi bô tùi Siōng-tè kiû. 3 Lín kî-kiû, m̄-kú tit bōe-tio̍h, in-ūi lín ê tōng-ki m̄-hó, só͘ kiû ê sī kan-ta beh boán-chiok ka-kī ê khoài-lo̍k. 4 Lín chiah-ê m̄-sìn ê lâng ah, kiám m̄-chai kap sè-kan choh pêng-iú chiū-sī kap Siōng-tè choh tùi-te̍k? 5 Sèng-keng kóng, “Siōng-tè chhim-chhim ì-ài I khǹg tī lán lāi-bīn ê Sîn”, lín siūⁿ Sèng-keng só͘ siá chit kù ōe bô ì-sù sī-bô? 6 Put-kò Siōng-tè sù lán ê un-tián koh-khah tōa. In-ūi án-ni, Sèng-keng ū kóng: Siōng-tè te̍k-tùi kiau-ngō͘ ê lâng, si-un hō͘ khiam-pi ê lâng. 7 Só͘-í, lín tio̍h sūn-ho̍k Siōng-tè, hoán-khòng Mô͘-kúi, Mô͘-kúi chiū ōe tô-cháu lī-khui lín. 8 Tio̍h chhin-kūn Siōng-tè, Siōng-tè chiū ōe chhin-kūn lín. Chōe-jîn ah, tio̍h sóe lín ê chhiú; bô tēng-sèng ê lâng ah, tio̍h kiat-chēng lín ê sim. 9 Tio̍h pi-siong, ai-thòng, thî-khàu; tio̍h hō͘ lín ê khoài-lo̍k pìⁿ-chòe pi-ai, hoaⁿ-hí pìⁿ-chòe iu-chhiû. 10 Tio̍h tī Chú ê bīn-chêng khiam-pi, I chiū ōe kā lín ko-seng. 11 Hiaⁿ-tī chí-bē, m̄-thang hō͘-siōng kóng pháiⁿ-ōe. Kóng hiaⁿ-tī chí-bē ê pháiⁿ-ōe, phoe-phòaⁿ hiaⁿ-tī á-sī chí-bē, chiū-sī kóng Lu̍t-hoat ê pháiⁿ-ōe, phoe-phòaⁿ Lu̍t-hoat. Lí nā phoe-phòaⁿ Lu̍t-hoat chiū m̄-sī Lu̍t-hoat ê chun-siú-chiá, sī Lu̍t-hoat ê phoe-phòaⁿ-chiá. 12 Lu̍t-hoat ê chè-tēng-chiá kap sím-phòaⁿ-chiá chí-ū chi̍t ūi, I ōe chín-kiù, mā ōe húi-bia̍t. Lí sī siáⁿ-lâng, ná káⁿ phoe-phòaⁿ lí ê chhù-piⁿ? 13 Eh, lín thiaⁿ góa kóng. Ū lâng kóng “Kin-á-ji̍t á-sī bîn-á-chài goán beh khì bó͘ chi̍t ê siâⁿ, tī hia tòa chi̍t nî, chòe seng-lí thàn-chîⁿ”. 14 Lín liân bîn-á-chài sìⁿ-miā ōe pìⁿ án-chóaⁿ to m̄-chai! Lín ká-ná bông-bū chhut-hiān chi̍t-ē-á kú liâm-piⁿ chiū siau-sit. 15 Lín eng-kai án-ni kóng, “Chú nā goān-ì, goán chiū ōe oa̍h, thang chòe chit hāng chòe hit hāng.” 16 Lín hiān-chāi káⁿ kiau-ngō͘ chū-tāi; chit khoán ê kiau-ngō͘ lóng sī siâ-ok. 17 Só͘-í, lâng chai-iáⁿ tio̍h chòe hó-sū, bô khì chòe chiū-sī hoān-chōe.

Ngá-kok 5

1 Eh, lín chiah-ê hó-gia̍h-lâng, chù-ì thiaⁿ, tio̍h ūi-tio̍h teh-beh siū ê chai-lān ai-siong thî-khàu! 2 Lín ê châi-hù í-keng pāi-hoāi, lín ê i-ho̍k í-keng hō͘ chiù-thâng kā-phòa. 3 Lín ê kim, gûn siⁿ-sian, chiah-ê sian ōe chiâⁿ-chòe khòng-kò lín ê chèng-kù, koh ōe chhin-chhiūⁿ hé sio-bia̍t lín ê seng-khu. Lín ūi-tio̍h chiong-boa̍t ê ji̍t-chí chek-chū chîⁿ-châi. 4 Tī lín ê chhân-hn̂g ūi lín chòe-kang kā lín siu-koah ê lâng, lín bô kang-chîⁿ hō͘ in. Tio̍h thiaⁿ in kiò-khó͘ ê siaⁿ! Hiah-ê siu-koah ê kang-lâng ho͘-kiò ê siaⁿ Chú --- Bān-kun ê Thóng-sòe í-keng ū thiaⁿ-tio̍h. 5 Lín tī tōe-chiūⁿ hióng-siū chhia-hoa iàn-lo̍k. Lín ka-kī chia̍h-kah pûi chut-chut, teh tán hō͘ lâng thâi ê ji̍t. 6 Lín kā bû-ko͘ ê lâng tēng-chōe, kā i sat-hāi, i mā bô kā lín tí-khòng. 7 Só͘-í, hiaⁿ-tī chí-bē, tio̍h jím-nāi kàu Chú ê lâi-lîm. Lín khòaⁿ, lông-hu án-chóaⁿ thèng-hāu chhân-ni̍h pó-kùi ê siu-sêng; i nāi-sim thèng-hāu chhun-lîm chhiu-ú. 8 Lín mā tio̍h jím-nāi. Lín ê sim tio̍h kian-tēng, in-ūi Chú ê lâi-lîm kūn lah. 9 Hiaⁿ-tī chí-bē, m̄-thang hō͘-siōng bâi-oàn, chiah-bián siū Siōng-tè sím-phòaⁿ. Lín khòaⁿ, Sím-phòaⁿ-chiá khiā tī mn̂g-kháu lah. 10 Hiaⁿ-tī chí-bē, tio̍h ēng hiah-ê hōng Chú ê miâ kóng-ōe ê sian-ti chòe jím-siū khó͘-lān ê bô͘-iūⁿ. 11 Hiah-ê thun-lún kàu-bé ê lâng, lán khòaⁿ in chòe ū hok-khì. Lín bat thiaⁿ-kìⁿ [Iok-pek] ê jím-nāi, chai Chú chòe-āu ū án-chóaⁿ kā i chiàu-kò͘, in-ūi Chú chhiong-móa lîn-bín kap chû-ài. 12 Góa ê hiaⁿ-tī chí-bē, siōng tiōng-iàu ê chiū-sī, m̄-thang kí thiⁿ, tōe, á-sī sím-mi̍h mi̍h-kiāⁿ chiù-chōa. “Sī” chiū kóng “sī”, “m̄-sī” chiū kóng “m̄-sī”; án-ni lín chiah-bián siū Siōng-tè sím-phòaⁿ. 13 Lín tiong-kan ū thòng-khó͘ ê lâng bô? Nā ū, i tio̍h kî-tó. Lín tiong-kan ū hoaⁿ-hí ê lâng bô? Nā ū, i tio̍h chhiùⁿ o-ló ê si-koa. 14 Lín tiong-kan ū phòa-pīⁿ ê lâng bô? Nā ū, i tio̍h chhiáⁿ kàu-hōe ê tiúⁿ-ló thòe i kî-tó, hōng Chú ê miâ kā i boah-iû. 15 Ū sìn-sim ê kî-tó ōe kiù pīⁿ-lâng; Chú ōe hō͘ i koh hó khí-lâi, i só͘ hoān ê chōe mā ōe tit-tio̍h sià-bián. 16 Só͘-í, lín tio̍h hō͘-siōng jīn-chōe, saⁿ-thòe kî-tó, thang hō͘ lín tit-tio̍h i-hó. Gī-lâng ê kî-tó ū tōa kong-hāu. 17 [Í-lī-a] kap lán pîⁿ-pîⁿ sī lâng. I pek-chhiat kî-tó kóng m̄-thang lo̍h-hō͘, kó-jiân ū saⁿ nî pòaⁿ kú tōe-chiūⁿ bô lo̍h-hō͘. 18 I koh kî-tó, thiⁿ kó-jiân lo̍h tōa-hō͘, thó͘-tōe chiū seng-sán ngó͘-kok. 19 Góa ê hiaⁿ-tī chí-bē, lín tiong-kan nā ū lâng phian-lī chin-lí, ū lâng koh kā i chhōa tò tńg-lâi, 20 lín tio̍h chai, hō͘ sit-bê-ê tò tńg-lâi hit-ê lâng ōe kiù chōe-jîn ê lêng-hûn thoat-lī sí-bông, hō͘ i chin chōe ê chōe-kò tit-tio̍h jia-khàm.

1 Pí-tek 1

1 Góa --- [Pí-tek] sī Iâ-so͘ Ki-tok ê sù-tô͘, góa siá-phoe hō͘ hun-sòaⁿ tī [Pún-to͘], [Ka-lia̍p-thài], [Ka-phàⁿ-to-ka], [A-se-a], [Pí-chhui-nî] téng só͘-chāi khiā-khí ê lâng. 2 Lín siū kéng-soán sī chiàu Pē Siōng-tè ū-tēng ê chí-ì, tùi Sèng Sîn chiâⁿ-chòe sèng-kiat, thang sūn-ho̍k Iâ-so͘ Ki-tok, koh tùi I ê huih tit-tio̍h kiat-chēng. Goān Siōng-tè hong-hong hù-hù sù lín un-tián kap pêng-an! 3 Tio̍h chheng-chàn lán ê Chú Iâ-so͘ Ki-tok ê Pē Siōng-tè! Kun-kù I bô-hān ê jîn-chû, thong-kè Iâ-so͘ Ki-tok tùi sí-lâng tiong koh-oa̍h, Siōng-tè ū hō͘ lán têng-chhut-sì thang tit-tio̍h oa̍h-oa̍h ê ǹg-bāng, 4 lâi sêng-siū I ūi-tio̍h lín pó-chûn tī thiⁿ-ni̍h hit-ê bōe hiú-nōa, bōe phah lâ-sâm, bōe siau-sit ê hok-khì. 5 Che sī beh hō͘ lín chiah-ê thong-kè sìn siū I ê tōa lêng-le̍k pó-siú ê lâng thang tit-tio̍h chún-pī tī chiong-boa̍t ê sî-ki beh si̍t-hiān ê chín-kiù. 6 Ūi-tio̍h án-ni, sui-jiân lín hiān-chāi chiām-sî iáu tio̍h siū chióng-chióng ê chhì-liān sim kan-khó͘, lín tio̍h hoaⁿ-hí. 7 Che sī beh chèng-bêng lín ê sìn-sim kham-tit siū khó-giām, pí hō͘ hé liān-kè iáu ōe pāi-hoāi ê kim koh-khah pó-kùi, thang hō͘ lín tī Iâ-so͘ Ki-tok hián-hiān ê sî tit-tio̍h o-ló, êng-kng, kap chun-kùi. 8 Lín sui-jiân m̄-bat khòaⁿ-tio̍h I, mā thiàⁿ I; hiān-chāi bô khòaⁿ-kìⁿ I, iáu-kú sìn I. Lín ū ēng giân-gú bōe-tàng piáu-ta̍t ke̍k-tōa ê hoaⁿ-hí, 9 in-ūi lín ōe tit-tio̍h sìn ê kiat-kó, chiū-sī lêng-hûn ê tit-kiù. 10 Koan-hē chit-ê chín-kiù, ū-giân lín ōe tit-tio̍h un-tián hiah-ê sian-ti í-keng ū gián-kiù koh siông-sè cha-khó. 11 In tit-tio̍h tī in sim-lāi Ki-tok ê Sîn tùi in ê chí-sī, cha-khó koan-hē Ki-tok ê siū-khó͘ kap āu-lâi tit-tio̍h êng-kng chit-ê ū-giân ōe tī sím-mi̍h sî, ōe án-chóaⁿ si̍t-hiān. 12 Siōng-tè ū kā in khé-sī, hō͘ in chai in ê sū-hōng m̄-sī ūi-tio̍h ka-kī, sī ūi-tio̍h lín. Chiah-ê sū hiān-chāi í-keng ū khò tùi thiⁿ lâi ê Sèng Sîn, thong-kè hok-im ê sù-chiá thoân ho͘ lín; chiah-ê sū liân thiⁿ-sài mā pek-chhiat teh thèng-hāu ài chai. 13 Só͘-í, lín ê sim-chì tio̍h chún-pī piān, tio̍h kéng-séng, choân-sim ǹg-bāng Iâ-so͘ Ki-tok hián-hiān ê sî só͘ beh sù lín ê un-tián. 14 Tio̍h chòe sūn-ho̍k ê kiáⁿ-jî, m̄-thang chiàu lín chêng m̄-bat Siōng-tè ê sî án-ni hòng-chhiòng su-io̍k. 15 Ho͘-tiàu lín ê Siōng-tè sī sèng-kiat, lín tī it-chhè ê hêng-ûi mā tio̍h sèng-kiat. 16 In-ūi Sèng-keng ū kì-chài, “Lín tio̍h sèng-kiat, in-ūi góa sī sèng-kiat. ” 17 Lín kì-jiân kiû-kiò ēng kâng chi̍t ê phiau-chún, chiàu ta̍k lâng ê hêng-ûi sím-phòaⁿ lâng Hit-ūi chòe Pē, chiū tio̍h ēng kèng-ùi ê sim tī sè-kan ê ji̍t-chí choh kiâu-bîn seng-oa̍h. 18 In-ūi lín chai, lín siū sio̍k-hôe thoat-lī chó͘-sian lâu hō͘ lín hit khoán bô lō͘-ēng ê thoân-thóng, m̄-sī ēng ōe pāi-hoāi ê kim-gûn, 19 sī ēng hit-ūi bô khoat-tiám bô ù-tiám ê iûⁿ-ko Ki-tok só͘ lâu ê pó-huih. 20 Ki-tok tī chhòng-chō ú-tiū í-chêng seng hō͘ Siōng-tè kéng-soán, tī chit-ê boa̍t-kî chiah ūi-tio̍h lín hián-hiān. 21 Lín thong-kè Ki-tok sìn hō͘ I tùi sí-lâng tiong koh-oa̍h koh sù I êng-kng hit-ūi Siōng-tè; án-ni, lín ê sìn kap ǹg-bāng lóng chāi-tī Siōng-tè. 22 Lín í-keng tùi sūn-thàn chin-lí lâi kiat-chēng ka-kī, ū sûn-chin ê chhiú-chiok-chi-chêng, chiū tio̍h ēng chheng-khì ê sim tùi sim-tóe jia̍t-chhiat saⁿ-thiàⁿ. 23 Lín m̄-sī tùi ōe pāi-hoāi, sī tùi bōe pāi-hoāi ê chéng-chí, chiū-sī thong-kè Siōng-tè oa̍h-oa̍h, éng-oán bōe bô-khì ê ōe lâi têng-chhut-sì. 24 In-ūi Sèng-keng ū kì-chài: Lâng lóng chhin-chhiūⁿ chháu, in ê êng-hôa lóng chhin-chhiūⁿ chháu hoe; chháu ōe ta, hoe ōe siā, 25 chóng-sī Chú ê ōe éng-oán chûn-chāi. Che chiū-sī thoân hō͘ lín ê hok-im ê sìn-sit.

1 Pí-tek 2

1 Só͘-í, tio̍h khì-sak it-chhè ê pháiⁿ, it-chhè ê khúi-chà, ké-hó, chi̍t-tò͘, kap it-chhè ê húi-pòng. 2 Tio̍h chhin-chhiūⁿ tú chhut-sì ê eⁿ-á chin ài sûn ê sio̍k-lêng ê lin, hō͘ lín thang sêng-tióng kàu tit-tio̍h kiù; 3 in-ūi lín í-keng ū tam-tio̍h Chú ê jîn-chû. 4 Tio̍h chhin-kūn Chú, I sī oa̍h-chio̍h, sui-jiân hō͘ lâng khì-sak, m̄-kú siū Siōng-tè kéng-soán khòaⁿ-chòe pó-kùi. 5 Lín mā tio̍h choh oa̍h-chio̍h, hō͘ Siōng-tè ēng lâi khí-chō sio̍k-lêng ê tiān, koh choh sèng-kiat ê chè-si, thong-kè Iâ-so͘ Ki-tok hiàn Siōng-tè só͘ hoaⁿ-hí sio̍k-lêng ê chè-mi̍h. 6 In-ūi Sèng-keng ū kì-chài: Khòaⁿ ah, góa beh tī Sek-an hē chi̍t tè chio̍h, sī siū kéng pó-kùi ê chhù-kak-chio̍h; sìn I ê lâng choa̍t-tùi bōe sit-bāng. 7 Chit tè chio̍h tùi lín chiah-ê sìn ê lâng sī pó-kùi ê, m̄-kú tùi m̄-sìn ê lâng sī: Khí-chhù sai-hū só͘ khì-sak ê chio̍h í-keng chiâⁿ-chòe siōng tiōng-iàu ê ki-chio̍h! 8 Tī pa̍t-ūi ū kì-chài: Chit tè sī poàn-kha-chio̍h, sī hō͘ lâng poa̍h-tó ê chio̍h. In m̄ sūn-thàn tō-lí lâi poa̍h-tó sī Siōng-tè ê an-pâi. 9 M̄-kú lín leh, lín sī siū kéng-soán ê chióng-cho̍k, ông-ka ê chè-si, sèng-kiat ê kok-tō͘, Siōng-tè ê chú-bîn, beh hō͘ lín thang soan-iông Siōng-tè úi-tāi ê chok-ûi; chit-ūi Siōng-tè ū tiàu lín chhut o͘-àm lâi ji̍p tī I chhàn-lān ê kng-bêng. 10 Sèng-keng kóng: Lín chêng m̄-sī Siōng-tè ê chú-bîn, hiān-chāi sī I ê chú-bîn; lín chêng bô tit-tio̍h Siōng-tè ê lîn-bín, hiān-chāi tit-tio̍h I ê lîn-bín. 11 Chhin-ài ê hiaⁿ-tī chí-bē, lín tī sè-kan choh kiâu-bîn, choh lú-kheh, góa khǹg lín m̄-thang hòng-chhiòng jio̍k-thé ê chêng-io̍k; chit-ê chêng-io̍k put-sî teh kong-kek lêng-hûn. 12 Lín tī bī-sìn-chiá ê tiong-kan tio̍h ū hó hêng-ûi, hō͘ hiah-ê húi-pòng lín sī pháiⁿ-lâng ê lâng thang khòaⁿ-kìⁿ lín ê hó hêng-ûi, tī Chú lâi-lîm ê Ji̍t kui êng-kng hō͘ Siōng-tè. 13 Ūi-tio̍h Chú ê iân-kò͘, lín tio̍h sūn-thàn lâng it-chhè ê chè-tō͘, bô-lūn sī tùi chòe-ko ê thóng-tī-chiá kun-ông, 14 á-sī tùi kun-ông só͘ phài lâi chióng-lē chòe hó ê lâng, hêng-hoa̍t chòe pháiⁿ ê lâng ê koaⁿ-tiúⁿ lóng tio̍h án-ni. 15 In-ūi che sī Siōng-tè ê chí-ì; I ài lín chòe hó, hō͘ bô tì-sek ê gōng-lâng bô ōe thang kóng. 16 Lín choh chū-iû ê lâng, m̄-thang ēng chū-iû chòe siâ-ok ê chià-kháu, tio̍h choh Siōng-tè ê lô͘-po̍k. 17 Lín tio̍h chun-tiōng só͘-ū ê lâng; tio̍h thiàⁿ hiaⁿ-tī chí-bē, kèng-ùi Siōng-tè, chun-kèng kun-ông. 18 Lín choh po̍k-jîn ê, tio̍h kiong-kèng sūn-thàn lín ê chú-lâng, m̄-nā tùi siān-liông un-hô ê chú-lâng, liân khek-po̍k ê mā tio̍h án-ni. 19 Tú-tio̍h bô eng-kai siū ê thòng-khó͘, nā liáu-kái sī Siōng-tè ê ì-sù lâi jím-siū sī thang chheng-chàn ê. 20 Lín nā chòe m̄-tio̍h hō͘ lâng phah lâi jím-siū thòng-khó͘, ū sím-mi̍h thé-biān? M̄-kú lín nā choh-hó lâi jím-siū khó͘-lān, che sī Siōng-tè só͘ chheng-chàn ê. 21 Ūi-tio̍h chit-ê, Siōng-tè ho͘-tiàu lín; in-ūi Ki-tok mā ū ūi-tio̍h lín siū-khó͘, lâu bô͘-iūⁿ hō͘ lín, beh hō͘ lín thang tè I ê kha-pō͘. 22 I bô hoān-chōe; I ê chhùi mā bô khúi-chà. 23 I siū lóe-mē, bô lóe-mē tò-tńg; siū ge̍k-thāi, mā bô kā lâng ui-hia̍p; chí-ū chiong ka-kī kau-thok hō͘ hit-ūi kong-gī ê Sím-phòaⁿ-chiá. 24 Ki-tok tī si̍p-jī-kè téng chhin-sin tam-tng lán ê chōe, hō͘ lán ǹg chōe sí, ǹg gī lâi oa̍h; tùi I ê siū-siong, lín tit-tio̍h i-tī. 25 Lín chêng chhin-chhiūⁿ iûⁿ bê-lō͘, hiān-chāi í-keng tńg-lâi kui tī lín lêng-hûn ê Bo̍k-chiá kap Kàm-hō͘-chiá.

1 Pí-tek 3

1 Siâng-khoán, lín choh hū-jîn-lâng-ê tio̍h sūn-ho̍k ka-kī ê tiōng-hu. Án-ni, in tiong-kan nā ū lâng bô sūn-thàn tō-lí ê, ōe tùi lín ê hó phín-hēng siū kám-hòa; lín lóng m̄-bián kóng pòaⁿ-kù ōe, 2 in-ūi in ōe khòaⁿ-chhut lín ê seng-oa̍h sûn-kiat koh kèng-khiân. 3 Lín m̄-thang khò pīⁿ thâu-mn̂g, kòa kim-khì, chhēng súi-saⁿ téng chng-thāⁿ, 4 tio̍h khò lōe-chāi ê súi, ēng un-jiû kap an-chēng ê sèng-chêng chòe bōe pāi-hoāi ê chng-thāⁿ; che tī Siōng-tè ê bīn-chêng sī siōng pó-kùi ê. 5 In-ūi chá-sî gióng-bōng Siōng-tè hiah-ê sèng-kiat ê hū-jîn-lâng mā-sī án-ni chng-thāⁿ ka-kī, sūn-ho̍k in ê tiōng-hu; 6 chhin-chhiūⁿ [Sat-la̍h] sūn-chiông [A-pek-la-hán], chheng-ho͘ i chòe “Chú-lâng”. Lín nā chòe hó-sū, bô siū khióng-hat tì-kàu kiaⁿ-hiâⁿ, chiū-sī [Sat-la̍h] ê cha-bó͘-kiáⁿ. 7 Kâng-khoán, lín choh tiōng-hu-ê tio̍h kap ka-kī ê hū-jîn-lâng chòe-hé seng-oa̍h, thé-thiap in jio̍k-thé-siōng khah loán-jio̍k. Tio̍h kā in chun-tiōng, in-ūi in mā kap lín pîⁿ-pîⁿ sī hun-hióng Siōng-tè un-sù ê oa̍h-miā ê lâng. Án-ni, lín ê kî-tó chiah bōe siū chó͘-gāi. 8 Chóng kóng, lín tio̍h tâng-sim, tâng-chêng, saⁿ-thiàⁿ chhin-chhiūⁿ hiaⁿ-tī chí-bē, tio̍h ū jîn-chû, sim chûn khiam-pi; 9 bô ēng pháiⁿ pò pháiⁿ, á-sī ēng bú-jio̍k tùi-hù bú-jio̍k; tian-tò tio̍h ēng chiok-hok hôe-pò, in-ūi lín sī ūi-tio̍h chit-ê siū ho͘-tiàu, hō͘ lín thang sêng-siū hok-khì. 10 In-ūi Sèng-keng ū kì-chài: Lâng nā ài sìⁿ-miā, ài kè hó ji̍t-chí, tio̍h kìm-chí chhùi-chi̍h bô kóng pháiⁿ ōe, chhùi-tûn bô kóng khúi-chà. 11 Tio̍h lī-khui pháiⁿ, chòe hó-sū, it-sim tui-kiû hô-pêng. 12 In-ūi Chú ê ba̍k-chiu khòaⁿ-kò͘ gī-lâng, I ê hīⁿ-khang thiaⁿ in ê kî-kiû; m̄-kú I ōe tùi choh-pháiⁿ ê lâng pìⁿ-bīn. 13 Lín nā jia̍t-sim choh-hó, siáⁿ-lâng ōe hāi lín? 14 Chóng-sī lín nā ūi-tio̍h gī siū-khó͘, chiū ū hok-khì. M̄-bián kiaⁿ lâng ê ui-hia̍p, mā m̄-bián tio̍h-kip put-an. 15 Tio̍h chun-chông Ki-tok chòe Chú. Nā ū lâng mn̄g lín sim-tiong ê ǹg-bāng, tio̍h chún-pī piān-piān thang tùi in piān-bêng. 16 Put-kò tio̍h ēng un-hô kap chun-tiōng ê thài-tō͘ lâi hôe-tap. Tio̍h ū chheng-pe̍k ê liông-sim, thang tī lín siū bú-jio̍k ê sî hō͘ hiah-ê bú-jio̍k lín ê lâng khòaⁿ-kìⁿ lín khò Ki-tok só͘ piáu-hiān ê hó phín-hēng kám-kak kiàn-siàu. 17 Siū-khó͘ nā-sī Siōng-tè ê chí-ì, choh-hó lâi siū-khó͘ pí choh-pháiⁿ lâi siū-khó͘ khah hó. 18 In-ūi Ki-tok mā bat ūi-tio̍h chōe siū-khó͘, chi̍t piàn chiū oân-sêng; gī ê lâng thòe put-gī ê lâng siū-khó͘, sī ūi-tio̍h beh chhōa lín kàu Siōng-tè ê bīn-chêng. Tī jio̍k-thé, I siū chhú-sí; tī lêng, I ū koh-oa̍h. 19 Thong-kè I ê lêng, I mā ū khì tùi hiah-ê tī kaⁿ-lāi ê lêng thoân-tō, 20 chiū-sī [Ná-a] chún-pī tōa-chûn ê sî, Siōng-tè ū nāi-sim thèng-hāu hiah-ê m̄ sūn-ho̍k I ê lâng. Tng-sî chìn-ji̍p tōa-chûn ê lâng bô kúi ê, chí-ū poeh ê, in ū tùi chúi-ni̍h tit-tio̍h kiù. 21 Chit-ê chúi ū-piáu sóe-lé, m̄-sī beh sóe-tû lín seng-khu ê lah-sap, sī beh hō͘ lín ū chheng-pe̍k ê liông-sim thang tùi Siōng-tè kî-kiû; chit-ê sóe-lé thong-kè Iâ-so͘ Ki-tok ê koh-oa̍h hō͘ lín tit-tio̍h chín-kiù. 22 I í-keng chiūⁿ-thiⁿ, hiān-chāi tī Siōng-tè ê chiàⁿ-pêng teh chiáng-koán chèng thiⁿ-sài í-ki̍p lêng-kài ê chiáng-koân-chiá kap koân-le̍k-chiá.

1 Pí-tek 4

1 Ki-tok kì-jiân tī jio̍k-thé siū-khó͘, lín mā tio̍h ū kâng-khoán ê sim-chì lâi chong-pī ka-kī, in-ūi tī jio̍k-thé siū-khó͘ sī kap chōe-ok toān-choa̍t koan-hē. 2 Án-ni, lín tī sè-kan só͘ chhun ê ji̍t-chí chiū bô koh chiàu lâng ê chêng-io̍k, sī chiàu Siōng-tè ê chí-ì lâi oa̍h. 3 Lín ū lōng-hùi kong-im chòe bī-sìn-chiá só͘ ài chòe ê sū, îm-loān, sek-io̍k, chiú-chùi, iàn-lo̍k, tōa-chia̍h tōa-lim, kap khó-ò͘ⁿ ê ngó͘-siōng chông-pài téng, í-keng kàu-gia̍h lah. 4 In khòaⁿ-kìⁿ lín bô koh kap in kè hòng-tōng bô chiat-chè ê seng-oa̍h, chiū kî-koài soah kā lín húi-pòng. 5 In tio̍h kap teh-beh sím-phòaⁿ oa̍h-lâng kap sí-lâng ê Siōng-tè sǹg-siàu. 6 Ūi-tio̍h án-ni, hok-im sīm-chì ū thoân hō͘ sí-khì ê lâng, án-ni, in ê jio̍k-thé sui-jiân ū chiàu it-poaⁿ lâng ê khoán siū sím-phòaⁿ, m̄-kú in ê lêng ōe-tàng chiàu Siōng-tè ê khoán lâi oa̍h. 7 Bān-iú ê chiong-kio̍k kūn lah! Só͘-í, tio̍h kín-sīn siú-kí, thang kéng-séng kî-tó. 8 Siōng iàu-kín ê, sī tio̍h jia̍t-chhiat saⁿ-thiàⁿ, in-ūi thiàⁿ ōe jia-khàm chin chōe chōe-kò. 9 Tio̍h hō͘-siōng hó khoán-thāi, m̄-thang bâi-oàn. 10 Choh Siōng-tè só͘ sù ta̍k hāng un-sù ê hó koán-ke, tio̍h chiàu ta̍k ê lâng só͘ tit-tio̍h ê un-sù hō͘-siōng ho̍k-bū. 11 Kóng tō-lí ê, tio̍h kóng Siōng-tè ê sìn-sit; sū-hōng ê, tio̍h chiàu Siōng-tè só͘-sù un-sù ê le̍k-liōng lâi sū-hōng, hō͘ Siōng-tè thong-kè Iâ-so͘ Ki-tok tī bān-sū tit-tio̍h êng-iāu. Goān êng-kng koân-pèng lóng kui I, ti̍t-kàu éng-éng oán-oán. Amen! 12 Chhin-ài ê hiaⁿ-tī chí-bē, lín tú-tio̍h chhin-chhiūⁿ hé ê chhì-liān, m̄-thang ná-chún tú-tio̍h kî-koài ê sū; 13 hoán-tńg tio̍h in-ūi ū hun-tam Ki-tok ê khó͘-lān lâi hoaⁿ-hí, hō͘ lín tī I êng-iāu hián-hiān ê sî mā thang hoaⁿ-hí khoài-lo̍k. 14 Lín nā ūi-tio̍h Ki-tok ê miâ siū lêng-jio̍k, lín chin ū hok-khì, in-ūi ū Siōng-tè êng-kng ê Sîn tiàm tī lín sin-chiūⁿ. 15 Lín tiong-kan m̄-thang ū lâng in-ūi thâi-lâng, choh-chha̍t, choh-pháiⁿ, á-sī ài koán pa̍t-lâng ê tāi-chì lâi siū-khó͘. 16 Nā in-ūi choh Ki-tok-tô͘ lâi siū-khó͘, m̄-bián kiàn-siàu, hoán-tńg tio̍h in-ūi ū chit-ê miâ kui êng-kng hō͘ Siōng-tè. 17 Sím-phòaⁿ ê sî kàu lah! Siōng-tè ê ke tio̍h tāi-seng siū sím-phòaⁿ; nā tùi lán khai-sí, hiah-ê m̄ sìn-thàn Siōng-tè hok-im ê lâng ê kiat-kio̍k kiám bōe koh-khah giâm-tiōng? 18 Sèng-keng ū kóng: Gī-lâng tit-kiù to chin oh, bô kèng-khiân ê lâng kap chōe-jîn kiám bōe koh-khah khùn-lân? 19 Só͘-í, hiah-ê chiàu Siōng-tè ê chí-ì siū-khó͘ ê lâng, tio̍h chiong ka-kī kau-thok hō͘ hit-ūi thang sìn-khò ê Chō-bu̍t-chú, kè-sio̍k chòe hó-sū.

1 Pí-tek 5

1 Góa choh tiúⁿ-ló, koh choh Ki-tok siū-khó͘ ê kiàn-chèng-jîn, ū hūn tī I teh-beh hián-hiān ê êng-kng, góa kā lín tiong-kan pîⁿ-pîⁿ teh choh tiúⁿ-ló ê lâng khó͘-khǹg. 2 Tio̍h bo̍k-ióng Siōng-tè kau-tài lín ê iûⁿ-kûn, kā in koàn-kò͘, m̄-sī bián-kióng, sī chiàu Siōng-tè ê chí-ì kam-sim lo̍k-ì; m̄-sī ūi-tio̍h tham-châi, sī chū-goān jia̍t-sim lâi chòe. 3 Kau-tài hō͘ lín ê iûⁿ-kûn, m̄-thang ēng koân-ui koán-hat, tio̍h chòe in ê bô͘-iūⁿ. 4 Án-ni, lín tī Tōa-bo̍k-chiá hián-hiān ê sî ōe-tàng tit-tio̍h éng-oán bōe sit-khì kong-chhái êng-kng ê hoa-koan. 5 Siâng-khoán, lín siàu-liân-lâng tio̍h sūn-ho̍k tióng-pòe. Lín tāi-ke tio̍h khiam-pi saⁿ tùi-thāi; in-ūi Sèng-keng ū kì-chài: Siōng-tè te̍k-tùi kiau-ngō͘ ê lâng, si-un hō͘ khiam-pi ê lâng. 6 Só͘-í, lín tio̍h tī Siōng-tè tōa khùi-la̍t ê chhiú-ē khiam-pi, I kàu sî chiū ōe kā lín ko-seng. 7 Lín tio̍h chiong it-chhè ê khòa-lū kau hō͘ Siōng-tè, in-ūi I koan-sim lín. 8 Tio̍h kín-sīn, tio̍h kéng-séng, in-ūi lín ê tùi-te̍k Mô͘-kúi chhin-chhiūⁿ teh háu ê sai, sì-kòe kiâⁿ teh chhē thang thun-chia̍h ê lâng. 9 Tio̍h khò kian-tēng ê sìn-sim lâi tí-tng i, in-ūi lín chai choân sè-kài ê chèng hiaⁿ-tī chí-bē lóng teh keng-le̍k siâng-khoán ê khó͘-lān. 10 Sù it-chhè un-tián ê Siōng-tè, chiū-sī thong-kè Ki-tok lâi ho͘-tiàu lín chìn-ji̍p éng-oán ê êng-kng Hit-ūi, tī lín chiām-sî siū-khó͘ í-āu, it-tēng ōe chhin-sin kā lín tiông-sin kiàn-li̍p, sù lín khùi-la̍t, hō͘ lín kian-kò͘ khiā-chāi. 11 Goān koân-lêng kui hō͘ I, ti̍t-kàu éng-oán. Amen! 12 Thong-kè tiong-si̍t ê hiaⁿ-tī [Se-lah], góa siá chit tiuⁿ té-té ê phoe hō͘ lín, lâi bián-lē lín, koh kiàn-chèng che sī Siōng-tè chin-si̍t ê un-tián. Tio̍h tī chit-ê un-tián téng-bīn khiā-chāi. 13 Tiàm tī [Pa-pí-lûn] kap lín pîⁿ-pîⁿ siū kéng-tiàu ê kàu-hōe kā lín chhéng-an. Góa ê kiáⁿ [Má-khó] mā kā lín chhéng-an. 14 Tio̍h ēng thiàⁿ ê saⁿ-chim hō͘-siōng chhéng-an. Goān pêng-an kui tī lín só͘-ū sio̍k Ki-tok ê lâng!

2 Pí-tek 1

1 Góa --- [Se-biān] [Pí-tek] sī Iâ-so͘ Ki-tok ê lô͘-po̍k kap sù-tô͘, góa siá-phoe hō͘ hiah-ê khò lán ê Siōng-tè kap Kiù-chú Iâ-so͘ Ki-tok ê gī kap goán hun-hióng kâng-khoán pó-kùi sìn-gióng ê lâng. 2 Goān Siōng-tè, thong-kè lín jīn-bat I kap lán ê Chú Iâ-so͘, hong-hong hù-hù sù lín un-tián kap pêng-an! 3 Siōng-tè ū ēng I ê lêng-le̍k chiong kèng-khiân ê seng-oa̍h só͘ su-iàu ê it-chhè sù hō͘ lán; che sī thong-kè lán jīm-sek tiàu lán lâi hun-hióng I ê êng-kng kap liông-siān hit-ūi Siōng-tè lâi ê. 4 Án-ni, I ū chiong ke̍k-tōa koh pó-kùi ê èng-ún sù hō͘ lán, hō͘ lín thong-kè chiah-ê èng-ún thang thoat-lī sè-chiūⁿ ê io̍k-bōng só͘ chō-sêng ê hú-pāi lâi hun-hióng Siōng-tè ê pún-sèng. 5 Ūi-tio̍h chit-ê, lín tio̍h chīn-la̍t phah-piàⁿ, hō͘ lín ū sìn-sim koh ū tek-hēng, ū tek-hēng koh ū tì-sek, 6 ū tì-sek koh ū chiat-chè, ū chiat-chè koh ū jím-nāi, ū jím-nāi koh ū kèng-khiân, 7 ū kèng-khiân koh ū chhiú-chiok-chi-chêng, ū chhiú-chiok-chi-chêng koh ū jîn-ài. 8 Chiah-ê sī lín só͘ su-iàu ê phín-tek. Chiah-ê lín nā lóng ū, koh ná chhiong-si̍t, ōe hō͘ lín koh-khah chek-ke̍k, koh-khah iú-hāu jīn-bat lán ê Chú Iâ-so͘ Ki-tok. 9 Lâng nā bô chiah-ê tek-hēng, sī toán-sī, sī sit-bêng, bōe kì-tit i í-chêng ê chōe í-keng ū sóe chheng-khì. 10 Só͘-í, góa ê hiaⁿ-tī chí-bē, lín tio̍h koh-khah ló͘-le̍k lâi chèng-bêng Siōng-tè tùi lín ê ho͘-tiàu kap kéng-soán sī khak-si̍t ê; lín nā án-ni chòe chiū bōe tūi-lo̍h. 11 Án-ni, Siōng-tè ōe tōa-tōa sù-hok hō͘ lín thang chìn-ji̍p lán ê Chú --- Kiù-chú Iâ-so͘ Ki-tok éng-oán ê Kok-tō͘. 12 Án-ni, sui-jiân lín í-keng chai chiah-ê tāi-chì, koh kian-tēng chip-siú lín só͘ niá-siū ê chin-lí, góa iáu-kú beh put-sî kā lín thê-chhíⁿ chiah-ê tāi-chì. 13 Góa siūⁿ, góa iáu oa̍h-teh ê sî, tio̍h kā lín thê-chhíⁿ. 14 Lán ê Chú Iâ-so͘ Ki-tok í-keng ū chheng-chhó kā góa chí-sī, hō͘ góa chai bô kú chiū ōe thoat-lī chit-ê ōe hú-pāi ê seng-khu. 15 Góa beh chīn-la̍t siūⁿ pān-hoat, hō͘ lín tī góa lī-khui sè-kan í-āu put-sî ōe kì-tit chiah-ê tāi-chì. 16 Goán tùi lín só͘ kóng Chú Iâ-so͘ Ki-tok tōa koân-lêng lâi-lîm ê sū, m̄-sī kun-kù lâng liap-chō chhut-lâi hu-ké ê thoân-soat; goán ū chhin-ba̍k khòaⁿ-kìⁿ I ê chun-êng. 17 I tùi Pē Siōng-tè niá-siū chun-kùi kap êng-iāu ê sî, hit-ūi Chun-giâm ê Êng-kng --- Siōng-tè chhut-siaⁿ kóng, “Chit-ê sī góa só͘ thiàⁿ ê Kiáⁿ, I, góa chin ì-ài.” 18 I tī sèng-soaⁿ ê sî goán mā tī hia, ū chhin-sin thiaⁿ-kìⁿ tùi thiⁿ-téng chhut-lâi chit-ê siaⁿ. 19 Só͘-í goán tùi sian-ti só͘ soan-pò͘ ê sìn-sit koh-khah ū khak-sìn. Lín tio̍h chù-ì thiaⁿ, in-ūi chit-ê sìn-sit chhin-chhiūⁿ chi̍t pha teng tī o͘-àm ê só͘-chāi teh chiò, chiò kàu thiⁿ-kng, kàu khé-bêng-chhiⁿ chhut-hiān tī lín sim-lāi ê sî. 20 Siōng iàu-kín ê, tio̍h chai, Sèng-keng ê ū-giân m̄-thang chiàu ka-kī ê ì-sù kóe-seh. 21 In-ūi ū-giân m̄-sī chhut-tī lâng ê ì-sù, sī lâng siū Sèng Sîn kám-tōng kóng chhut tùi Siōng-tè lâi ê sìn-sit.

2 Pí-tek 2

1 Í-chêng mā ū ké sian-ti tī bîn-kan chhut-hiān; kâng-khoán, hiān-chāi mā ū ké kàu-su ōe tī lín tiong-kan chhut-hiān. In àm-tiong chiong hō͘ lâng bia̍t-bông ê īⁿ-toan tòa ji̍p-lâi, sīm-chì m̄ sêng-jīn hit-ūi sio̍k-hôe in ê Chú-cháiⁿ, tì-kàu ka-kī chin kín chiū bia̍t-bông. 2 M̄-kú iáu ū chin chōe lâng o̍h in îm-loān ê seng-oa̍h, tì-kàu chin-lí ê Tō-lō͘ in-ūi in siū húi-pòng. 3 Chiah-ê ké kàu-su in-ūi tham-sim, ōe ēng liap-chō ê kò͘-sū pián lín ê châi-bu̍t. Tùi chit khoán lâng ê tēng-chōe chá chiū koat-tēng; in chin kín chiū bia̍t-bông. 4 Siōng-tè bô khoan-iông hoān-chōe ê thiⁿ-sài, kā in tàn-lo̍h tōe-ge̍k, koaiⁿ tī o͘-àm ê chhim-khiⁿ, thèng-hāu sím-phòaⁿ. 5 Siōng-tè mā bô khoan-iông kó͘-tāi ê sè-kài, ēng tōa-chúi im-bia̍t bô kèng-ùi Siōng-tè ê sè-kan-lâng, chí-ū kiù soan-iông kong-gī ê [Ná-a] kap kî-tha chhit ê lâng. 6 Siōng-tè chhú-hoa̍t [Só͘-to-má] kap [Gô-mô͘-la̍h] ê siâⁿ-chhī, ēng hé húi-bia̍t in, hō͘ bô kèng-ùi Siōng-tè ê lâng chòe kéng-kài. 7 Siōng-tè ū kiù gī-lâng [Lô-tek], in-ūi [Lô-tek] ūi-tio̍h siâ-ok ê lâng îm-loān ê só͘-chòe chhau-sim. 8 Hit-ê gī-lâng [Lô-tek] tiàm tī in tiong-kan, ta̍k ji̍t ū thiaⁿ-kìⁿ koh khòaⁿ-tio̍h hiah-ê siâ-ok ê tāi-chì, sim-lāi hui-siông thòng-khó͘. 9 Chú chai án-chóaⁿ kiù kèng-khiân ê lâng thoat-lī chhì-liān, mā chai kā put-gī ê lâng lâu kàu Sím-phòaⁿ ê Ji̍t siū hêng-hoa̍t, te̍k-pia̍t sī hiah-ê hòng-chhiòng jio̍k-thé chêng-io̍k kap biáu-sī Siōng-tè koân-ui ê lâng. Chiah-ê ké kàu-su tōa-táⁿ koh kiau-ngō͘, sīm-chì káⁿ bú-jio̍k chun-kùi ê chèng thiⁿ-sài. 11 Hiah-ê thiⁿ-sài ê khùi-la̍t kap lêng-le̍k sui-jiân pí ké kàu-su khah tōa, mā bô tī Siōng-tè ê bīn-chêng ēng bú-jio̍k ê ōe kā in khòng-kò. 12 M̄-kú, chiah-ê lâng kap chhut-sì chiū thàn pún-lêng teh oa̍h, beh hō͘ lâng lia̍h-khì thâi ê iá-siù kâng-khoán, in húi-pòng ka-kī m̄-bat ê sū; iá-siù húi-bia̍t, in mā ōe án-ni siū húi-bia̍t, 13 siū-tio̍h ka-kī put-gī ê hêng-ûi èng-tit ê pò-èng. Tùi in lâi kóng, hióng-lo̍k sī tī ji̍t-sî chiū tîm-bê tī chêng-io̍k ê boán-chiok. In kap lín chòe-hé lim-chia̍h ê sî, tōa-chia̍h tōa-lim, hòng-chhiòng iàn-lo̍k, oân-choân sit-thài. 14 In ê ba̍k-chiu chí-ū ài khòaⁿ siâ-îm, bô hoān-chōe tòng bōe-tiâu. In ín-iú ì-chì po̍k-jio̍k ê lâng. In ê sim chí-ū siūⁿ tham-châi. In sī Siōng-tè chiù-chó͘ ê lâng! 15 In lī-khui chiàⁿ-lō͘, kiâⁿ bê-lō͘, kiâⁿ [Pí-ní] ê kiáⁿ [Pa-lân] só͘ kiâⁿ ê lō͘. [Pa-lân] tham-ài put-gī ê chîⁿ-châi, 16 ūi-tio̍h só͘ hoān ê chōe siū chek-pī. Chi̍t chiah bōe kóng-ōe ê lû-á kèng-jiân ēng lâng ê siaⁿ chó͘-chí sian-ti [Pa-lân] hong-kông ê siūⁿ-hoat. 17 Chiah-ê lâng chhin-chhiūⁿ ta-khì ê chúi-chôaⁿ, chhin-chhiūⁿ hō͘ tōa-hong chhe-sòaⁿ ê hûn-bū; Siōng-tè í-keng ū kā in tī o͘-àm ê chhim-ian lâu chi̍t ê só͘-chāi. 18 In kóng khong-tōng ê gōng-ōe, ēng bōe-tàng khòng-chè ê jio̍k-thé ê chêng-io̍k ín-iú tú-tú-á thoat-lī sit-bê seng-oa̍h ê lâng. 19 In tah-èng hō͘ lâng chū-iû, m̄-kú ka-kī chòe hú-pāi seng-oa̍h ê lô͘-lē; in-ūi lâng siū sím-mi̍h khòng-chè, chiū chiâⁿ-chòe hit-ê ê lô͘-lē. 20 Lâng jīn-bat lán ê Chú --- Kiù-chú Iâ-so͘ Ki-tok thoat-lī sè-kan ê hú-pāi í-āu, nā koh hō͘ hú-pāi ê sè-le̍k tîⁿ-teh koh ap-chè, chit khoán ê kiat-kio̍k ōe pí í-chêng koh-khah bái. 21 In jīn-bat kong-gī ê Tō-lō͘, jiân-āu lī-khui só͘ thoân-siū hō͘ in sîn-sèng ê kài-bēng, án-ni lêng-khó tùi khí-thâu chiū m̄-bat khah hó. 22 In ê chêng-hêng tú chhin-chhiūⁿ sio̍k-gú só͘ kóng, “Káu oa̍t tńg-lâi chia̍h ka-kī thò͘ chhut-lâi ê mi̍h”, á-sī, “Ti sóe chheng-khì í-āu sûi-sî koh khì kō lō͘-kô͘-bê.”

2 Pí-tek 3

1 Chhin-ài ê pêng-iú, góa hiān-chāi siá hō͘ lín ê sī tē-jī tiuⁿ phoe. Góa siá chit nn̄g tiuⁿ phoe sī beh thê-chhíⁿ lín lâi kek-khí lín sûn-kiat ê sim-chì. 2 Góa ài lín ōe kì-tit kó͘-chá ê sèng sian-ti só͘ kóng ê ōe, kap lín ê sù-tô͘ só͘ thoân lán ê Chú --- Kiù-chú hō͘ lín ê bēng-lēng. 3 Siōng iàu-kín ê, lín tio̍h chai, tī chiong-boa̍t ê ji̍t-chí ū chi̍t-kóa thàn su-io̍k seng-oa̍h ê lâng ōe chhut-hiān, kā lín thí-chhiò 4 kóng, “Chú èng-ún beh lâi-lîm, taⁿ án-chóaⁿ? I tī tó-ūi? Lán ê chó͘-sian lóng sí-khì, m̄-kú tùi chhòng-sè í-lâi it-chhè lóng kâng-khoán.” 5 In kò͘-ì bû-sī chit-ê sū-si̍t, chiū-sī tī kó͘-chá thiⁿ tùi Siōng-tè ê ōe siū chhòng-chō, tōe sī tùi chúi, mā ēng chúi lâi hêng-sêng. 6 Tng-sî ê sè-kài sī hō͘ chúi im-ba̍t lâi húi-bia̍t. 7 M̄-kú hiān-chāi ê thiⁿ kap tōe mā kâng-khoán tùi Siōng-tè ê ōe tit-tio̍h pó-liû kàu sím-phòaⁿ kap put-khiân ê lâng hō͘ hé húi-bia̍t ê ji̍t. 8 Chhin-ài ê pêng-iú, ū chi̍t hāng tāi-chì chhiáⁿ lín m̄-thang bōe kì-tit, chiū-sī tùi Chú lâi khòaⁿ, chi̍t ji̍t ná-chún chi̍t-chheng nî, chi̍t-chheng nî ná-chún chi̍t ji̍t. 9 Ū lâng siūⁿ-kóng Chú iân-tî I tah-èng beh chòe ê sū, kî-si̍t I m̄-sī teh iân-tî, sī teh iông-jím lín, bô ài ū lâng bia̍t-bông, ài ta̍k ê lâng lóng hóe-kái. 10 M̄-kú Chú ê Ji̍t ōe chhin-chhiūⁿ chha̍t-á hut-jiân lâi. Tī hit-ê Ji̍t, chiah-ê thiⁿ ōe tī tōa ê hiáng-siaⁿ tiong siau-bia̍t, thian-thé hō͘ hé siau-iûⁿ, tōe kap tōe-chiūⁿ it-chhè ê pī-chō-bu̍t lóng siau-bia̍t. 11 Kì-jiân chiah-ê it-chhè ōe án-ni húi-bia̍t, lín tio̍h án-chóaⁿ choh-lâng? Lín ê seng-oa̍h tio̍h sèng-kiat, kèng-khiân, 12 thèng-hāu Siōng-tè ê Ji̍t kóaⁿ-kín lâi-lîm. Tī hit Ji̍t, chiah-ê thiⁿ ōe hō͘ hé sio-bia̍t, thian-thé ōe hō͘ hé sio-iûⁿ. 13 M̄-kú lán teh thèng-hāu ê sī Siōng-tè só͘ èng-ún ê sin ê thiⁿ sin ê tōe, tī hia kong-gī éng-oán tit-tio̍h kiàn-li̍p. 14 Só͘-í, chhin-ài ê pêng-iú, kì-jiân lín teh thèng-hāu chiah-ê tāi-chì, tī Siōng-tè ê bīn-chêng tio̍h chīn-la̍t tui-kiû bô khoat-tiám, bô thang chí-chek, thang kap I hô-hó. 15 Tio̍h chiong lán ê Chú ê khoan-iông khòaⁿ-chòe lín tit-kiù ê ki-hōe, che mā-sī lán chhin-ài ê hiaⁿ-tī [Pó-lô] ēng Siōng-tè sù hō͘ i ê tì-hūi siá-phoe só͘ khoàn-bián ê. 16 I só͘-ū ê phoe lóng ū kóng-khí chiah-ê sū. I ê phoe ū chi̍t-kóa oh lí-kái ê ōe, hō͘ hiah-ê gû-gōng bô tēng-sèng ê lâng kā i khiok-kái, tú kap in teh khiok-kái kî-tha ê keng-bûn kâng-khoán; kiat-kó, in ka-kī thó bia̍t-bông. 17 Só͘-í, chhin-ài ê pêng-iú, lín kì-jiân tāi-seng chai chit-ê tāi-chì, tio̍h kéng-kài, chiah-bián hō͘ pháiⁿ-lâng ēng chhò-gō͘ ê giân-lūn chhōa-khì kiâⁿ chhò-gō͘ ê lō͘, lī-khui lín kian-kò͘ ê li̍p-tiûⁿ. 18 Tio̍h tī Chú --- lán ê Kiù-chú Iâ-so͘ Ki-tok ê un-tián-ē kap tùi I ê jīm-sek kè-sio̍k chìn-pō͘. Goān êng-kng kui hō͘ I, tùi hiān-chāi ti̍t-kàu éng-oán. Amen!

1 Iok-hān 1

1 Goán beh kā lín soat-bêng chhòng-sè í-chêng chiū chûn-chāi hit-ê oa̍h-miā ê Tō; chit-ê Tō goán ū thiaⁿ-tio̍h, ū chhin-ba̍k khòaⁿ-tio̍h, ū siông-sè khòaⁿ-tio̍h, mā ū chhin-chhiú bong-tio̍h. 2 Chit-ê oa̍h-miā í-keng hián-hiān; goán ū khòaⁿ-tio̍h, hiān-chāi chòe kiàn-chèng, koh tùi lín soan-pò͘ goân-lâi kap Pē tông-chāi koh í-keng ū tùi goán hián-hiān chit-ê éng-oán ê oa̍h-miā. 3 Goán khòaⁿ-tio̍h koh thiaⁿ-tio̍h ê, hiān-chāi mā tùi lín soan-pò͘, sī beh hō͘ lín mā thang kap goán ū thoân-khè; chit-ê thoân-khè sī goán kap Pē kap I ê Kiáⁿ Iâ-so͘ Ki-tok tiong-kan ê thoân-khè. 4 Goán siá chiah-ê sī beh hō͘ lán ū oân-boán ê hoaⁿ-hí. 5 Goán tùi Siōng-tè ê Kiáⁿ thiaⁿ-tio̍h, hiān-chāi thoân hō͘ lín ê sìn-sit sī án-ni: Siōng-tè sī kng, tī I oân-choân bô o͘-àm. 6 Lán nā kóng lán kap I ū thoân-khè, iáu-kú kè-sio̍k tī o͘-àm tiong seng-oa̍h, sī kóng pe̍h-chha̍t, bô si̍t-hêng chin-lí. 7 M̄-kú, Siōng-tè tī kng-bêng tiong, lán nā chiàu án-ni tī kng-bêng tiong seng-oa̍h, lán chiū hō͘-siōng ū thoân-khè, I ê Kiáⁿ Iâ-so͘ ê huih ōe kè-sio̍k sóe-chheng lán lóng-chóng ê chōe. 8 Lán nā kóng lán bô chōe, sī phiàn ka-kī, chin-lí bô tī lán lāi-bīn. 9 Lán nā sêng-jīn lán ê chōe, Siōng-tè sī sìn-si̍t kong-gī, beh sià-bián lán ê chōe, sóe-chheng lán lóng-chóng ê put-gī. 10 Lán nā kóng lán m̄-bat hoān-chōe, sī kā Siōng-tè khòaⁿ-chòe pe̍h-chha̍t, I ê tō bô tī lán lāi-bīn.

1 Iok-hān 2

1 Siàu-liân-lâng, góa siá chiah-ê sī beh hō͘ lín bōe khì hoān-chōe. Nā ū lâng hoān-chōe, lán ū gī-lâng Iâ-so͘ Ki-tok tī Pē ê bīn-chêng chòe lán ê Piān-hō͘-jîn. 2 I ūi-tio̍h lán ê chōe, m̄-nā lán ê chōe, mā ūi-tio̍h choân sè-kài ê chōe, choh sio̍k-chōe-chè. 3 Lán nā ū teh chun-siú Siōng-tè ê kài-bēng, chiū chai lán chin-chiàⁿ bat Siōng-tè. 4 Nā ū lâng kóng “góa bat Siōng-tè”, m̄-kú bô teh chun-siú I ê kài-bēng, chit-ê lâng sī pe̍h-chha̍t, i lāi-bīn bô chin-lí. 5 M̄-kú lâng nā chun-siú Siōng-tè ê tō, Siōng-tè ê thiàⁿ chiū chin-chiàⁿ tī i sin-chiūⁿ oân-choân si̍t-hiān. Lâng nā kóng i tiàm tī Siōng-tè lāi-bīn, eng-kai chiàu Iâ-so͘ Ki-tok ê giân-hêng seng-oa̍h. Án-ni chiū chai lán ū tī Siōng-tè lāi-bīn. 7 Chhin-ài ê pêng-iú, góa siá hō͘ lín ê m̄-sī sin ê kài-bēng, sī lín tùi khí-thâu chiū niá-siū hit-ê kū ê kài-bēng, sī lín bat thiaⁿ-tio̍h ê sìn-sit. 8 Chóng-sī góa siá hō͘ lín ê kài-bēng mā thang kóng sī sin ê, che tùi Ki-tok kap tùi lín lóng sī chin ê; in-ūi o͘-àm teh kè-khì, chin kng í-keng teh chiò. 9 Lâng nā kóng i tī kng-bêng tiong, m̄-kú oàn-hūn hiaⁿ-tī á-sī chí-bē, sū-si̍t i iáu-kú tī o͘-àm tiong. 10 Thiàⁿ hiaⁿ-tī á-sī chí-bē ê lâng sī tī kng-bêng tiong teh seng-oa̍h, bōe tì-kàu hō͘ lâng poa̍h-tó hoān-chōe. 11 M̄-kú oàn-hūn hiaⁿ-tī á-sī chí-bē ê lâng sī tī o͘-àm tiong, tī o͘-àm tiong teh seng-oa̍h, m̄-chai beh khì tó-ūi, in-ūi o͘-àm hō͘ i ê ba̍k-chiu bô khòaⁿ-kìⁿ. 12 Siàu-liân-lâng, góa siá-phoe hō͘ lín, in-ūi khò Ki-tok ê miâ lín ê chōe í-keng tit-tio̍h sià-bián. 13 Hū-ló sī-tōa, góa siá-phoe hō͘ lín, in-ūi lín jīn-bat tùi khí-thâu chiū chûn-chāi Hit-ūi. Chheng-liân-lâng, góa siá-phoe hō͘ lín, in-ūi lín í-keng ū iâⁿ-kè hit-ê Siâ-ok-chiá. 14 Sòe-kiáⁿ, góa siá-phoe hō͘ lín, in-ūi lín jīn-bat Pē. Hū-ló sī-tōa, góa siá-phoe hō͘ lín, in-ūi lín jīn-bat tùi khí-thâu chiū chûn-chāi Hit-ūi. Chheng-liân-lâng, góa siá-phoe hō͘ lín, in-ūi lín ióng-chòng, Siōng-tè ê tō tiàm tī lín lāi-bīn, koh lín í-keng ū iâⁿ-kè hit-ê Siâ-ok-chiá. 15 M̄-thang tham-ài sè-kan á-sī sè-kan ê mi̍h. Nā ū lâng tham-ài sè-kan, i chiū bô thiàⁿ Pē. 16 In-ūi it-chhè sio̍k sè-kan ê, chhin-chhiūⁿ jio̍k-thé ê io̍k-bōng, ba̍k-chiu ê io̍k-bōng, tián ka-kī ê châi-hù, téng, lóng m̄-sī tùi Pē lâi, sī tùi sè-kan lâi ê. 17 Chit sè-kan kap sè-kan ê io̍k-bōng lóng teh kè-khì, chóng-sī si̍t-hêng Siōng-tè chí-ì ê lâng éng-oán seng-chûn. 18 Sòe-kiáⁿ, che sī chiong-boa̍t ê sî. Lín ū thiaⁿ-tio̍h Ki-tok ê Te̍k-tùi-chiá teh-beh lâi, hiān-chāi í-keng ū chin chōe Ki-tok ê te̍k-tùi-chiá chhut-hiān; tùi án-ni, lán chai che sī chiong-boa̍t ê sî. 19 In lī-khui lán, in-ūi in m̄-sī lán ê lâng; in nā-sī lán ê lâng, ōe kè-sio̍k kap lán chòe-hé. M̄-kú in lī-khui, piáu-sī in lóng m̄-sī lán ê lâng. 20 Lín í-keng ū niá-siū Sèng Sîn, lín lóng chai. 21 Góa siá-phoe hō͘ lín, m̄-sī in-ūi lín m̄-bat chin-lí, sī in-ūi lín bat chin-lí, koh chai it-chhè ê hu-ké m̄-sī tùi chin-lí lâi. 22 Sím-mi̍h lâng sī pe̍h-chha̍t-ê? It-tēng sī kū-choa̍t Iâ-so͘ sī Ki-tok hit-ê lâng! Kū-choa̍t Pē kap Kiáⁿ ê chiū-sī Ki-tok ê Te̍k-tùi-chiá. 23 Kū-choa̍t Kiáⁿ ê bô chiap-la̍p Pē; soan-jīn Kiáⁿ chiū-sī chiap-la̍p Pē. 24 Tio̍h kian-siú lín tùi khí-thâu só͘ thiaⁿ-tio̍h ê sìn-sit. Lín nā kian-siú tùi khí-thâu só͘ thiaⁿ-tio̍h ê sìn-sit chiū ōe kè-sio̍k oa̍h tī Kiáⁿ kap Pē ê lāi-bīn. 25 Che chiū-sī Ki-tok hō͘ lán ê èng-ún, sī éng-oán ê oa̍h-miā. 26 Góa siá chiah-ê hō͘ lín, sī koan-hē siūⁿ-beh bê-he̍k lín ê lâng ê sū. 27 Tùi lín lâi kóng, lín tùi Ki-tok niá-siū ê Sèng Sîn tiàm tī lín lāi-bīn, chiū bô su-iàu pa̍t-lâng kā lín kà-sī, in-ūi chit-ê Sèng Sîn beh kà-sī lín ta̍k hāng tāi-chì; I ê kà-sī sī chin ê, m̄-sī ké ê. Án-ni, tio̍h chiàu Sèng Sîn kà-sī lín ê, tiàm tī Ki-tok lāi-bīn. 28 Taⁿ, siàu-liân-lâng, tio̍h tiàm tī Ki-tok lāi-bīn, án-ni tī I hián-hiān ê sî, lán tī I bīn-chêng chiah ōe hó-táⁿ, bōe in-ūi I ê lâi-lîm kám-kak kiàn-siàu. 29 Lín nā chai I sī kong-gī, eng-kai chai si̍t-hêng kong-gī ê lâng chiah-sī Siōng-tè ê kiáⁿ-jî.

1 Iok-hān 3

1 Lín siūⁿ-khòaⁿ leh, Pē jōa-ni̍h thiàⁿ lán, hō͘ lán thang chheng-chòe I ê kiáⁿ-jî; sū-si̍t mā-sī án-ni. Sè-kan-lâng m̄-bat lán, in-ūi in m̄-bat Siōng-tè. 2 Chhin-ài ê pêng-iú, hiān-chāi lán sī Siōng-tè ê kiáⁿ-jî, chiong-lâi ōe án-chóaⁿ iáu-bē bêng-hián. M̄-kú lán chai, Ki-tok hián-hiān ê sî, lán ōe chhin-chhiūⁿ I, in-ūi lán ōe khòaⁿ-kìⁿ I ê chin-siōng. 3 Ki-tok sī sûn-kiat, só͘-í tùi Ki-tok ū chit khoán ǹg-bāng ê lâng ōe ka-kī pó-chhî sûn-kiat. 4 Lâng hoān-chōe sī ûi-pōe Siōng-tè ê Lu̍t-hoat, in-ūi chōe sī ûi-pōe Siōng-tè ê Lu̍t-hoat. 5 Lín chai Ki-tok hián-hiān sī beh tû-khì lâng ê chōe, m̄-kú I pún-sin bô chōe. 6 Kap Ki-tok pó-chhî bi̍t-chhiat koan-hē ê lâng bōe kè-sio̍k hoān-chōe; kè-sio̍k hoān-chōe ê lâng m̄-bat khòaⁿ-kìⁿ Ki-tok, mā m̄-bat I. 7 Siàu-liân pêng-iú, m̄-thang siū bê-he̍k. Ki-tok sī gī-lâng, só͘-í si̍t-hêng kong-gī-ê chiah-sī gī-lâng. 8 Kè-sio̍k hoān-chōe ê lâng sio̍k Mô͘-kúi, in-ūi Mô͘-kúi tùi khí-thâu chiū hoān-chōe. Siōng-tè ê Kiáⁿ hián-hiān ê bo̍k-te̍k sī beh phò-hoāi Mô͘-kúi ê chok-ûi. 9 Tùi Siōng-tè siⁿ ê bōe kè-sio̍k hoān-chōe, in-ūi Siōng-tè ê oa̍h-miā tī in lāi-bīn; in bōe kè-sio̍k hoān-chōe, in-ūi in sī tùi Siōng-tè siⁿ ê. 10 Tùi án-ni, sím-mi̍h lâng sī Siōng-tè ê kiáⁿ-jî á-sī Mô͘-kúi ê kiáⁿ-jî chin chheng-chhó: Bô si̍t-hêng kong-gī, bô thiàⁿ hiaⁿ-tī chí-bē ê, m̄-sī Siōng-tè ê kiáⁿ-jî. 11 Lán tio̍h saⁿ-thiàⁿ; che sī lín tùi khí-thâu só͘ thiaⁿ-tio̍h ê sìn-sit. 12 Lán m̄-thang chhin-chhiūⁿ [Kai-ún]; i sio̍k Siâ-ok-chiá, ū thâi-sí ka-kī ê sió-tī. I ná-ōe thâi-sí sió-tī? In-ūi i ê hêng-ûi siâ-ok, m̄-kú sió-tī ê hêng-ûi chèng-ti̍t. 13 Hiaⁿ-tī chí-bē, sè-kan-lâng nā oàn-hūn lín, lín m̄-bián kî-koài. 14 Lán chai, lán í-keng chhut-sí ji̍p-oa̍h, in-ūi lán ū thiàⁿ hiaⁿ-tī chí-bē. Bô thiàⁿ-lâng-ê sī tiàm tī sí ê koán-hat-ē. 15 Oàn-hūn hiaⁿ-tī á-sī chí-bē chiū-sī thâi-lâng; lín mā chai, thâi-lâng-ê, éng-oán ê oa̍h-miā bô tiàm tī i lāi-bīn. 16 Ki-tok ūi-tio̍h lán hi-seng sìⁿ-miā, tùi án-ni lán chai sím-mi̍h sī thiàⁿ; án-ni lán mā ài ūi-tio̍h hiaⁿ-tī á-sī chí-bē hi-seng sìⁿ-miā. 17 Nā ū hó-gia̍h-lâng khòaⁿ-tio̍h hiaⁿ-tī á-sī chí-bē ū khiàm-kheh ia̍h bô tông-chêng lîn-bín, ná ōe-tàng kóng i ū thiàⁿ Siōng-tè? 18 Siàu-liân pêng-iú, saⁿ-thiàⁿ m̄-thang chí-ū ēng ōe á-sī ēng chhùi kóng, tio̍h si̍t-si̍t chāi-chāi si̍t-hêng. 19 Tùi án-ni lán chai lán sio̍k chin-lí. Lán nā siū liông-sim chek-pī, tī Siōng-tè ê bīn-chêng lán ōe-tàng an-ún chū-chāi, in-ūi I ê sim pí lán ê sim koh-khah khoan-tāi, I ta̍k hāng lóng chai. 21 Chhin-ài ê pêng-iú, lán ê liông-sim nā bô kā lán chek-pī, lán tī Siōng-tè bīn-chêng chiū thang ióng-kám m̄-bián kiaⁿ. 22 Lán bô-lūn tùi I kiû sím-mi̍h lóng ōe tit-tio̍h, in-ūi lán chun-siú I ê kài-bēng, tī I bīn-chêng chòe I só͘ hoaⁿ-hí ê sū. 23 I ê kài-bēng sī án-ni: lán tio̍h sìn I ê Kiáⁿ Iâ-so͘ Ki-tok ê miâ, mā tio̍h chiàu I hō͘ lán ê bēng-lēng saⁿ-thiàⁿ. 24 Chun-siú Siōng-tè kài-bēng ê lâng tiàm tī I lāi-bīn, I mā tī in lāi-bīn. Tùi Siōng-tè sù hō͘ lán ê Sèng Sîn lán chai Siōng-tè tiàm tī lán lāi-bīn.

1 Iok-hān 4

1 Chhin-ài ê pêng-iú, m̄-thang siong-sìn ta̍k ê sîn; tio̍h chhat-giām chiah-ê sîn sī tùi Siōng-tè lâi á m̄-sī, in-ūi ū chin chōe ké sian-ti í-keng chhut-hiān tī chit sè-kan. 2 Lín thang ēng án-ni lâi jīn-bat Siōng-tè ê Sîn: Soan-jīn Iâ-so͘ Ki-tok chiâⁿ-chòe lâng lâi sè-kan hit-ūi Sîn sī tùi Siōng-tè lâi ê; 3 m̄ soan-jīn Iâ-so͘ hiah-ê sîn m̄-sī tùi Siōng-tè lâi ê. Che sī Ki-tok ê Te̍k-tùi-chiá ê sîn, lín ū thiaⁿ-tio̍h i teh-beh lâi, hiān-chāi í-keng tī sè-kan. 4 Siàu-liân pêng-iú, lín sī sio̍k Siōng-tè, koh í-keng iâⁿ-kè ké sian-ti, in-ūi tiàm tī lín lāi-bīn ê Sèng Sîn pí tiàm tī sè-kan-lâng lāi-bīn ê sîn khah kiông khah tōa. 5 Ké sian-ti sī sio̍k sè-kan, kóng sè-kan sū, só͘-í sè-kan-lâng ōe thiaⁿ in. 6 Lán sī sio̍k Siōng-tè. Bat Siōng-tè ê lâng ōe thiaⁿ lán; bô sio̍k Siōng-tè ê lâng m̄ thiaⁿ lán. Tùi chit-ê lán jīn-bat chin-lí ê Sîn kap bê-he̍k lâng ê sîn. 7 Chhin-ài ê pêng-iú, lán tio̍h saⁿ-thiàⁿ, in-ūi thiàⁿ tùi Siōng-tè lâi. Ū thiàⁿ ê lâng sī Siōng-tè ê kiáⁿ-jî, mā bat Siōng-tè. 8 Bô thiàⁿ ê lâng m̄-bat Siōng-tè, in-ūi Siōng-tè sī thiàⁿ. 9 Siōng-tè chhe I to̍k-it ê Kiáⁿ lâi-kàu sè-kan, beh hō͘ lán tùi I tit-tio̍h oa̍h-miā; tùi chit-ê, Siōng-tè ê thiàⁿ hián-bêng tī lán tiong-kan. 10 M̄-sī lán thiàⁿ Siōng-tè, sī I ū thiàⁿ lán, chhe I ê Kiáⁿ chòe sio̍k-chōe-chè lâi sio̍k lán ê chōe. Che chiū-sī thiàⁿ. 11 Chhin-ài ê pêng-iú, Siōng-tè nā hiah-ni̍h thiàⁿ lán, lán mā tio̍h saⁿ-thiàⁿ. 12 Bô-lâng bat khòaⁿ-kìⁿ Siōng-tè, lán nā saⁿ-thiàⁿ, Siōng-tè chiū tiàm tī lán lāi-bīn, I ê thiàⁿ thong-kè lán oân-choân si̍t-hiān chhut-lâi. 13 Siōng-tè í-keng ū chiong I ê Sèng Sîn sù hō͘ lán, tùi chit-ê lán chai lán tiàm tī Siōng-tè lāi-bīn, I mā tī lán lāi-bīn. 14 Pē chhe I ê Kiáⁿ lâi chòe sè-kan ê Kiù-chú, goán ū khòaⁿ-tio̍h, hiān-chāi chòe kiàn-chèng. 15 Soan-jīn Iâ-so͘ sī Siōng-tè ê Kiáⁿ ê lâng, Siōng-tè tiàm tī i lāi-bīn, i mā tī Siōng-tè lāi-bīn. 16 Só͘-í, lán chai koh sìn Siōng-tè ū thiàⁿ lán. Siōng-tè sī thiàⁿ, ū teh si̍t-hêng thiàⁿ ê lâng tiàm tī Siōng-tè lāi-bīn, Siōng-tè mā tiàm tī i lāi-bīn. 17 Tùi án-ni, thiàⁿ tī lán tiong-kan oân-choân si̍t-hiān chhut-lâi, hō͘ lán tī Sím-phòaⁿ ê Ji̍t thang ióng-kám m̄-bián kiaⁿ, in-ūi lán tī chit sè-kan kap Ki-tok kâng-khoán. 18 Ū thiàⁿ chiū bô kiaⁿ-hiâⁿ; oân-choân ê thiàⁿ kóaⁿ-chhut kiaⁿ-hiâⁿ. In-ūi ū kiaⁿ-hiâⁿ chiū ū hêng-hoa̍t; ū kiaⁿ-hiâⁿ ê lâng, thiàⁿ iáu bô oân-choân si̍t-hiān chhut-lâi. 19 Lán tio̍h saⁿ-thiàⁿ, in-ūi Siōng-tè ū tāi-seng thiàⁿ lán. 20 Nā ū lâng kóng “Góa thiàⁿ Siōng-tè”, m̄-kú oàn-hūn hiaⁿ-tī á-sī chí-bē, i sī pe̍h-chha̍t. In-ūi, bô thiàⁿ ū-khòaⁿ-tio̍h ê hiaⁿ-tī á-sī chí-bē, ná-ōe thiàⁿ bô-khòaⁿ-tio̍h ê Siōng-tè. 21 Thiàⁿ Siōng-tè mā tio̍h thiàⁿ ka-kī ê hiaⁿ-tī á-sī chí-bē, che sī lán tùi Ki-tok niá-siū ê kài-bēng.

1 Iok-hān 5

1 Sìn Iâ-so͘ sī Ki-tok ê lâng lóng sī Siōng-tè ê kiáⁿ-jî. Thiàⁿ pē-bú, mā ōe thiàⁿ in só͘ siⁿ ê kiáⁿ-jî. 2 Lán nā thiàⁿ Siōng-tè koh chun-siú I ê kài-bēng, án-ni chiū chai lán ū teh thiàⁿ Siōng-tè ê kiáⁿ-jî. 3 Chun-siú Siōng-tè ê kài-bēng chiū-sī thiàⁿ Siōng-tè. I ê kài-bēng m̄-sī oh chun-siú. 4 In-ūi Siōng-tè ê kiáⁿ-jî lóng ōe-tàng khah-iâⁿ sè-kan; hō͘ lán khah-iâⁿ sè-kan ê chiū-sī lán ê sìn. 5 Khah-iâⁿ sè-kan ê sī sím-mi̍h lâng? Kiám m̄-sī sìn Iâ-so͘ sī Siōng-tè ê Kiáⁿ hit-ê lâng? 6 Chit-ūi Iâ-so͘ Ki-tok chiū-sī thong-kè chúi kap huih lâi ê; m̄-sī chí-ū thong-kè chúi, sī thong-kè chúi kap huih. Sèng Sîn chòe kiàn-chèng, in-ūi Sèng Sîn sī chin-lí. 7 Ū saⁿ ê chòe kiàn-chèng, 8 chiū-sī Sèng Sîn, chúi, kap huih; chit saⁿ ê kiàn-chèng lóng it-tì. 9 Lâng ê kiàn-chèng lán to chiap-siū, Siōng-tè ê kiàn-chèng koh-khah ū-hāu. Chit-ê sī Siōng-tè ūi-tio̍h I ê Kiáⁿ só͘ chòe ê kiàn-chèng. 10 Sìn Siōng-tè ê Kiáⁿ ê, tī i sim-lāi ū chit-ê kiàn-chèng; m̄-sìn Siōng-tè ê chiū-sī khòaⁿ Siōng-tè chòe pe̍h-chha̍t, in-ūi i m̄-sìn Siōng-tè ūi-tio̍h I ê Kiáⁿ só͘ chòe ê kiàn-chèng. 11 Chit-ê kiàn-chèng chiū-sī: Siōng-tè í-keng ū sù lán éng-oán ê oa̍h-miā, chit-ê oa̍h-miā sī tùi I ê Kiáⁿ lâi ê. 12 Lâng ū Siōng-tè ê Kiáⁿ chiū ū oa̍h-miā; bô Siōng-tè ê Kiáⁿ chiū bô oa̍h-miā. 13 Góa siá chiah-ê sī beh hō͘ lín sìn Siōng-tè ê Kiáⁿ ê lâng chai, lín ū éng-oán ê oa̍h-miā. 14 Lán tī Siōng-tè bīn-chêng ióng-kám bô kiaⁿ, in-ūi lán nā chiàu I ê chí-ì kî-kiû, I ōe kā lán thiaⁿ. 15 Kì-jiân chai I ōe thiaⁿ lán ê kî-kiû, chiū chai lán tùi I só͘ kiû ê í-keng ū tit-tio̍h. 16 Nā ū lâng khòaⁿ-tio̍h hiaⁿ-tī á-sī chí-bē hoān-tio̍h bōe tì-kàu sí ê chōe, tio̍h kî-kiû Siōng-tè, Siōng-tè ōe sù i oa̍h-miā; góa sī chí hiah-ê hoān-tio̍h bōe tì-kàu sí ê chōe ê lâng teh kóng. Mā ū ōe tì-kàu sí ê chōe, góa kóng “Tio̍h kî-kiû”, pèng m̄-sī chí chit-ê. 17 It-chhè put-gī ê hêng-ûi lóng sī chōe, m̄-kú mā ū bōe tì-kàu sí ê chōe. 18 Lán chai, Siōng-tè ê kiáⁿ-jî bōe kè-sio̍k hoān-chōe, in-ūi Siōng-tè ê Kiáⁿ teh kā in pó-siú, Siâ-ok-chiá bong in bōe-tio̍h. 19 Lán chai, lán sī sio̍k Siōng-tè, m̄-kú choân sè-kài siū Siâ-ok-chiá koán-hat. 20 Lán mā chai Siōng-tè ê Kiáⁿ í-keng lâi-lîm, koh hō͘ lán ū hiáu-ngō͘ ê sim thang jīn-bat hit-ūi chin Sîn Siōng-tè. Lán kap chin Sîn Siōng-tè kiat-liân, in-ūi lán kap I ê Kiáⁿ Iâ-so͘ Ki-tok kiat-liân. Chit-ūi chiū-sī chin Sîn Siōng-tè, sī éng-oán ê oa̍h-miā. 21 Sòe-kiáⁿ, lín tio̍h siám-khui ngó͘-siōng.

2 Iok-hān 1

1 Góa --- tiúⁿ-ló siá-phoe hō͘ siū kéng-soán ê hu-jîn kap lí ê kiáⁿ-jî: Góa chin-sim thiàⁿ lín, m̄-nā góa, liân só͘-ū jīn-bat chin-lí ê lâng mā thiàⁿ lín; 2 in-ūi chin-lí tiàm tī lán lāi-bīn, ōe éng-oán kap lán tông-chāi. 3 Goān Pē Siōng-tè kap Pē ê Kiáⁿ Iâ-so͘ Ki-tok sù lán un-tián, lîn-bín, kap pêng-an, hō͘ lán ê seng-oa̍h chhiong-móa chin-lí kap jîn-ài! 4 Góa hui-siông hoaⁿ-hí, in-ūi góa hoat-hiān lí ê kiáⁿ-jî tiong-kan ū lâng chun-thàn Pē ê kài-bēng, si̍t-hêng chin-lí. 5 Hu-jîn ah, góa iau-kiû lí, lán tio̍h saⁿ-thiàⁿ. Góa teh siá hō͘ lí ê m̄-sī sin ê kài-bēng, sī lán tùi khí-thâu chiū niá-siū ê. 6 Lán chiàu Siōng-tè ê kài-bēng seng-oa̍h, chiū-sī thiàⁿ. Chit-ê kài-bēng sī lín tùi khí-thâu só͘ thiaⁿ-tio̍h ê, tio̍h chiàu chit-ê kài-bēng seng-oa̍h. 7 Ū chin chōe bê-he̍k-chiá í-keng lâi-kàu chit sè-kan; in m̄ kong-khai sêng-jīn Iâ-so͘ Ki-tok chòe lâng lâi sè-kan. Chit khoán lâng sī bê-he̍k-chiá, sī Ki-tok ê Te̍k-tùi-chiá. 8 Tio̍h sió-sim, lín só͘ chòe ê kang chiah bōe lo̍k-khong, hoán-tńg ōe tit-tio̍h chhiong-chiok ê pò-siúⁿ. 9 Phian-lī bô kian-siú Ki-tok kà-sī ê lâng bô kap Siōng-tè kiat-liân. Kian-siú kà-sī ê lâng chiah ū kap Pē í-ki̍p Kiáⁿ kiat-liân. 10 Nā ū lâng khì lín hia, só͘ thoân ûi-pōe chit khoán ê kà-sī, m̄-thang chiap-la̍p i ji̍p lín ê chhù, mā m̄-thang kā i chhéng-an, 11 in-ūi kā i chhéng-an chiū-sī chham-ú i ê pháiⁿ hêng-ûi. 12 Góa iáu ū chin chōe ōe ài siá, m̄-kú bô ài ēng chóa-pit; góa khah ǹg-bāng khì lín hia, tng-bīn kap lín kóng, thang hō͘ lán ê hoaⁿ-hí chhiong-móa. 13 Kap lí pîⁿ-pîⁿ siū kéng-soán hit-ê chí-bē ê kiáⁿ-jî beh kā lí chhéng-an.

3 Iok-hān 1

1 Góa --- tiúⁿ-ló siá-phoe hō͘ chhin-ài ê [Kai-iû]; lí sī góa chin-sim só͘ thiàⁿ ê. 2 Chhin-ài ê pêng-iú, góa chiok lí bān-sū heng-thong, mā chiok lí sin-thé kiān-khong, chhin-chhiūⁿ lí ê sim-sîn hiah-ni̍h ióng-chòng. 3 Ū kúi-ê sìn-tô͘ lâi, kā góa chèng-si̍t lí tùi chin-lí tiong-sêng, sū-si̍t lí it-ti̍t ū teh si̍t-hêng chin-lí, góa hui-siông hoaⁿ-hí. 4 Thiaⁿ-tio̍h kóng góa ê kiáⁿ-jî ū teh si̍t-hêng chin-lí, bô chi̍t hāng pí che koh-khah hō͘ góa hoaⁿ-hí. 5 Chhin-ài ê pêng-iú, lí ū tiong-si̍t chiap-thāi sìn-tô͘, te̍k-pia̍t sī chhut-gōa-lâng. 6 In bat tī hōe-chiòng bīn-chêng chèng-si̍t lí ê thiàⁿ-sim. Chhiáⁿ lí chiàu Siōng-tè só͘ hoaⁿ-hí ê pang-chān in kè-sio̍k in ê lú-thêng. 7 In-ūi in ūi-tio̍h Ki-tok ê iân-kò͘ chhut-gōa thoân-tō, lóng bô tùi bī-sìn-chiá chiap-siū sím-mi̍h. 8 Só͘-í lán ū gī-bū chiap-thāi chit khoán ê lâng, hō͘ lán thang ūi-tio̍h chin-lí chiâⁿ-chòe tâng-kang. 9 Góa bat siá-phoe hō͘ kàu-hōe. Khó-sioh, ài-beh chòe kàu-hōe léng-siù ê [Tiu-te̍k-hui] m̄ chiap-la̍p góa. 10 Só͘-í, góa nā khì, beh kóng-khí i só͘ chòe ēng pháiⁿ-ōe húi-pòng kong-kek goán ê tāi-chì. M̄-nā án-ni, i pún-sin m̄ chiap-thāi sìn-tô͘, sīm-chì chó͘-tòng goān-ì chiap-thāi ê lâng, sòa kā in kek-chhut kàu-hōe. 11 Chhin-ài ê pêng-iú, m̄-thang o̍h pháiⁿ, tio̍h o̍h hó. Choh-hó-ê sio̍k Siōng-tè; choh-pháiⁿ-ê m̄-bat khòaⁿ-kìⁿ Siōng-tè. 12 Chèng-lâng lóng chheng-chàn [Tí-bí-tiu]; chin-lí pún-sin mā ūi-tio̍h i choh-chèng. Goán mā ūi-tio̍h i choh-chèng; lí chai goán ê kiàn-chèng sī chin-si̍t. 13 Góa iáu ū chin chōe ōe ài siá, m̄-kú bô ài ēng chóa-pit. 14 Góa ǹg-bāng bô kú ōe kìⁿ-tio̍h lí, lán chiah tng-bīn lâi kóng. 15 Goān lí pêng-an! Lí ê pêng-iú lóng kā lí chhéng-an. Chhiáⁿ thòe góa kā lán ê pêng-iú chi̍t-ê chi̍t-ê chhéng-an.

Iû-tāi 1

1 Góa sī Iâ-so͘ Ki-tok ê lô͘-po̍k, [Ngá-kok] ê hiaⁿ-tī [Iû-tāi], góa siá-phoe hō͘ hiah-ê siū Siōng-tè soán-tiàu, tit-tio̍h Pē Siōng-tè ê thiàⁿ, siū Iâ-so͘ Ki-tok pó-iū ê lâng. 2 Goān Siōng-tè hong-hong hù-hù sù lín lîn-bín, pêng-an, kap chû-ài! 3 Chhin-ài ê pêng-iú, góa chá chiū it-ti̍t ài-beh siá-phoe hō͘ lín, kap lín tâm-lūn lán lóng ū-hūn ê chín-kiù. Góa kám-kak chit-chūn sûi-sî su-iàu siá-phoe kā lín kó͘-lē, ài lín ūi-tio̍h Siōng-tè chí-ū chi̍t piàn chiū kàu-gia̍h thoân-siū hō͘ I chú-bîn chit-ê sìn-gióng kè-sio̍k hùn-tò͘. 4 In-ūi ū chi̍t-kóa bô kèng-ùi Siōng-tè ê lâng thau-thau-á chǹg ji̍p-lâi lán tiong-kan, lī-iōng lán ê Siōng-tè ê un-tián chòe hòng-chhiòng ê chià-kháu, koh m̄-jīn î-it ê Chú-cháiⁿ lán ê Chú Iâ-so͘ Ki-tok. Chin chá í-chêng Sèng-keng chiū ū-giân chiah-ê lâng it-tēng tio̍h siū hêng-hoa̍t. 5 Sui-jiân lín chai chiah-ê it-chhè ê sū, góa iáu-kú beh kā lín thê-chhíⁿ, Chú chi̍t piàn chiū oân-choân chiong [Í-sek-lia̍t] peh-sìⁿ tùi [Ai-ki̍p] tōe kiù chhut-lâi, āu-lâi húi-bia̍t hiah-ê m̄-sìn ê lâng. 6 Koh hiah-ê bô siú pún-hūn, lī-khui pún-ūi ê thiⁿ-sài, in hō͘ só-liān éng-oán liān tī o͘-àm ê chhim-ian; Siōng-tè kā in koaiⁿ tī hia, thèng-hāu sím-phòaⁿ ê tōa Ji̍t-chí. 7 Tòa tī [Só͘-to-má], [Gô-mô͘-la̍h], kap hù-kūn siâⁿ-chhī ê lâng, mā kap hiah-ê thiⁿ-sài siâng-khoán kiâⁿ îm-loān, hòng-chhiòng hoán chū-jiân ê sèng-io̍k, siū-tio̍h éng-oán bōe hoa ê hé ê hêng-hoa̍t, chòe chèng-lâng ê kéng-kài. 8 Siâng-khoán, chiah-ê khong-su bōng-sióng ê lâng mā ū sún-hāi ka-kī ê seng-khu, biáu-sī Siōng-tè ê koân-ui, bú-jio̍k thiⁿ-téng hiah-ê chun-êng-chiá. 9 Thiⁿ-sài-tiúⁿ [Bí-ka-le̍k] ūi-tio̍h [Mô͘-se] ê ûi-thé kap Mô͘-kúi cheng-lūn ê sî, mā m̄-káⁿ ēng húi-pòng ê ōe chek-pī, chí-ū kóng, “Chú khiàn-chek lí!” 10 M̄-kú chiah-ê lâng húi-pòng in só͘ bô liáu-kái ê sū; in chhin-chhiūⁿ iá-siù khì chòe chiàu pún-lêng só͘ chai ê tāi-chì, kiat-kó siū húi-bia̍t. 11 In chhám à! In-ūi in kiâⁿ [Kai-ún] ê lō͘, koh ūi-tio̍h chîⁿ-châi hām-lo̍h tī [Pa-lân] ê chhò-gō͘. In kap [Khó-lah] siâng-khoán, in-ūi pōe-poān lâi bia̍t-bông. 12 In m̄-chai kiàn-siàu, tōa-chia̍h tōa-lim, ka-kī kò͘-chia̍h, lâi phò-hoāi lín ê ài-chhan. In chhin-chhiūⁿ hûn hō͘ hong chhe-lâi chhe-khì, lóng bô lo̍h-hō͘; chhin-chhiūⁿ chhiū kàu chhiu-thiⁿ ia̍h bô kiat ké-chí, hō͘ lâng liân kun khau khí-lâi, sí-kah ta-khok-khok. 13 In mā chhin-chhiūⁿ pho-lōng phùn-chhut chúi-phe̍h, lō͘-chhut ka-kī ê kiàn-siàu; chhin-chhiūⁿ lī-khui khúi-tō ê chhiⁿ lak ji̍p-khì Siōng-tè ūi-tio̍h in éng-oán pó-liû hit-ê o͘-àm ê chhim-ian. 14 [A-tong] ê tē-chhit tāi sun [Í-lo̍k] ū-giân chiah-ê lâng kóng, “Lín khòaⁿ! Chú ōe chhōa chheng-chheng bān-bān ê sèng thiⁿ-sài lâi, 15 beh sím-phòaⁿ só͘-ū ê lâng, hêng-hoa̍t it-chhè bô kèng-khiân ê chōe-jîn, in-ūi in ēng bô kèng-khiân ê hong-hoat chòe it-chhè bô kèng-khiân ê sū, koh kóng siat-to̍k Siōng-tè ê ōe.” 16 Chiah-ê lâng put-sî ngau̍h-ngau̍h-liām, bâi-oàn, thàn su-io̍k chòe tāi-chì, kóng tōa-ōe, ūi-tio̍h lī-ek phô͘-tháⁿ pa̍t-lâng. 17 Chhin-ài ê pêng-iú, tio̍h ōe kì-tit lán ê Chú Iâ-so͘ Ki-tok ê sù-tô͘ ū-giân ê ōe. 18 In ū kā lín kóng, “Tī boa̍t-kî, ū chi̍t-kóa thàn ka-kī bô kèng-khiân ê io̍k-liām chòe tāi-chì ê lâng ōe chhut-hiān, in ài thí-chhiò pa̍t-lâng ê sìn-gióng.” 19 Chiah-ê sī chè-chō hun-cheng, siū pún-sèng chi-phòe, bô kap Sèng Sîn kiat-liân ê lâng. 20 Lín leh, chhin-ài ê pêng-iú, tio̍h chiong ka-kī kiàn-li̍p tī chì-sèng ê sìn-gióng téng-bīn; tio̍h khò Sèng Sîn kî-tó. 21 Tio̍h tiàm tī Siōng-tè ê thiàⁿ pó-siú ka-kī, gióng-bōng lán ê Chú Iâ-so͘ Ki-tok ê lîn-bín, ti̍t-kàu tit-tio̍h éng-oán ê oa̍h-miā. 22 Tùi chi̍t-kóa sim chûn giâu-gî ê lâng, tio̍h lîn-bín in; 23 ū chi̍t-kóa lâng, tio̍h tùi hé-tiong kā in kiù chhut-lâi; koh ū chi̍t-kóa lâng, tio̍h lîn-bín in, m̄-kú tio̍h ka-kī kéng-kài, liân in hō͘ chêng-io̍k bak-tio̍h ê saⁿ to tio̍h iàm-ò͘ⁿ. 24 Siōng-tè ōe pó-hō͘ lín bōe tūi-lo̍h, hō͘ lín bô khoat-tiám, hoaⁿ-hoaⁿ hí-hí khiā tī I êng-iāu ê bīn-chêng. 25 Goān to̍k-it ê Siōng-tè lán ê Kiù-chú, thong-kè lán ê Chú Iâ-so͘ Ki-tok, tit-tio̍h êng-kng, chun-giâm, lêng-le̍k, kap koân-pèng, tùi bān-kó͘ kàu hiān-chāi, ti̍t-kàu éng-oán. Amen!

Khé-sī-lio̍k 1

1 Che sī Iâ-so͘ Ki-tok ê khé-sī. Siōng-tè hō͘ I chit-ê khé-sī, ài I chiong liâm-piⁿ it-tēng ōe hoat-seng ê tāi-chì chí-sī Siōng-tè ê chèng lô͘-po̍k. Ki-tok ū chhe-khián I ê thiⁿ-sài khì chí-sī I ê lô͘-po̍k [Iok-hān]. 2 [Iok-hān] ūi-tio̍h Siōng-tè ê sìn-sit kap Iâ-so͘ Ki-tok ê kiàn-chèng, chiū-sī i só͘ khòaⁿ-kìⁿ ê it-chhè, lóng choh-chèng. 3 Tha̍k chit pún chheh ê lâng chin ū hok-khì; thiaⁿ-kìⁿ chit-ê ū-giân koh chun-siú chheh-ni̍h só͘ kì-chài ê lâng chin ū hok-khì; in-ūi sî-ki kūn lah. 4 Góa --- [Iok-hān] siá-phoe hō͘ [A-se-a] ê chhit ê kàu-hōe, kóng: Goān hiān-chāi chûn-chāi, kè-khì chûn-chāi, chiong-lâi mā chûn-chāi ê Siōng-tè, kap I chō-ūi chêng ê chhit ê sîn, í-ki̍p Iâ-so͘ Ki-tok, sù lín un-tián kap pêng-an! Ki-tok sī sìn-si̍t ê kiàn-chèng-jîn, thâu-chi̍t-ê tùi sí-lâng tiong koh-oa̍h, sī tōe-chiūⁿ bān ông ê Chú-cháiⁿ. I thiàⁿ lán, ūi-tio̍h lán lâu-huih hi-seng lâi tháu-pàng lán thoat-lī chōe, 6 hō͘ lán chiâⁿ-chòe chi̍t ê kok-tō͘, choh chè-si lâi ho̍k-sāi I ê Pē Siōng-tè. Goān êng-kng kap koân-lêng kui tī Iâ-so͘ Ki-tok, tāi-tāi bô-chīn. Amen! 7 Lí khòaⁿ, I chē hûn teh lâi, chèng-lâng ōe khòaⁿ-kìⁿ I, liân ēng chhiuⁿ chha̍k I ê lâng mā ōe khòaⁿ-kìⁿ. Tōe-chiūⁿ bān-cho̍k lóng ōe in-ūi I thî-khàu. Chit-ê sū it-tēng ōe hoat-seng. Amen! 8 Hiān-chāi chûn-chāi, kè-khì chûn-chāi, chiong-lâi mā chûn-chāi, Choân-lêng ê Chú Siōng-tè kóng, “Góa sī A-ní-hoat, sī A-bí-ka.” 9 Góa sī [Iok-hān], sī lín ê hiaⁿ-tī, kap lín chòe-hé hun-tam Iâ-so͘ ê hoān-lān kap thun-lún, koh ū-hūn tī I ê thóng-tī. Ūi-tio̍h thoân Siōng-tè ê sìn-sit kap kiàn-chèng Iâ-so͘, góa bat tòa tī chi̍t ê miâ kiò [Poa̍t-mô͘] ê hái-tó. 10 Ū chi̍t ê Chú-ji̍t, góa siū Sèng Sîn kám-tōng, thiaⁿ-kìⁿ tī góa ê āu-bīn ū tōa ê siaⁿ chhin-chhiūⁿ lat-pah teh hiáng, 11 kóng, “Lí tio̍h chiong só khòaⁿ-kìⁿ ê siá chòe chheh, kià hō͘ [Í-hut-só͘], [Sū-múi-ná], [Pia̍t-ka-mô͘], [Chhui-ngá-chhui-lat], [Sat-te̍k], [Hui-la̍h-thiat-hui], kap [Ló-tí-ka] chit chhit ê kàu-hōe.” 12 Góa oa̍t tńg-sin beh khòaⁿ tùi góa kóng-ōe ê sī sím-mi̍h lâng, chi̍t-ē oa̍t tńg-sin ū khòaⁿ-tio̍h chhit ki kim teng-tâi. 13 Teng-tâi ê tiong-ng ū chi̍t ūi chhin-chhiūⁿ Jîn-chú, chhēng chi̍t niá sûi-lo̍h kàu kha ê tn̂g-phàu, heng-khám hâ kim-tòa. 14 I ê thâu kap thâu-mn̂g chhin-chhiūⁿ iûⁿ-mn̂g hiah-ni̍h pe̍h, chhin-chhiūⁿ seh hiah-ni̍h pe̍h; I ê ba̍k-chiu chhin-chhiūⁿ hé-iām. 15 I ê kha chhin-chhiūⁿ kè hé-lô͘ thoàn-liān kng-liāng ê tâng; I ê siaⁿ chhin-chhiūⁿ tōa-chúi teh chhiâng ê siaⁿ. 16 I ê chiàⁿ-chhiú the̍h chhit lia̍p chhiⁿ, I ê chhùi thò͘-chhut siang-bīn-lāi ê kiàm; I ê bīn chhin-chhiūⁿ iām-jia̍t ê ji̍t-thâu hoat-kng. 17 Góa chi̍t-ē khòaⁿ-tio̍h I, chiū phak tī I kha-chêng chhin-chhiūⁿ sí-khì ê lâng. I ēng chiàⁿ-chhiú hōaⁿ góa, kóng, “M̄-bián kiaⁿ! Góa sī khí-thâu ê, mā-sī soah-bé ê. 18 Góa sī oa̍h-ê. Góa ū sí, hiān-chāi teh oa̍h, ōe éng-oán oa̍h-teh. Góa ū sí-bông kap im-hú ê só-sî. 19 Só͘-í, lí tio̍h chiong só͘ khòaⁿ-kìⁿ ê, í-ki̍p hiān-kim só͘ teh hoat-seng, kap í-āu ōe hoat-seng ê tāi-chì lóng siá khí-lâi. 20 Lí só͘ khòaⁿ-tio̍h góa chiàⁿ-chhiú the̍h hit chhit lia̍p chhiⁿ kap chhit ki kim teng-tâi ê ò-biāu sī án-ni: Chhit lia̍p chhiⁿ sī chhit ê kàu-hōe ê thiⁿ-sài; chhit ki teng-tâi sī chhit ê kàu-hōe.”

Khé-sī-lio̍k 2

1 “Lí tio̍h siá-phoe hō͘ [Í-hut-só͘] ê kàu-hōe ê thiⁿ-sài, kóng: “Chiàⁿ-chhiú tháⁿ chhit lia̍p chhiⁿ, tī chhit ki kim teng-tâi ê tiong-kan teh kiâⁿ Hit-ūi án-ni kóng: 2 Góa chai lí ê só͘-chòe, lí ê lô-khó͘ kap thun-lún. Góa chai lí bōe iông-jím pháiⁿ-lâng; lí mā bat khó-giām chū-chheng sù-tô͘ kî-si̍t m̄-sī hiah-ê lâng, khòaⁿ-chhut in sī pe̍h-chha̍t ê. 3 Lí ū thun-lún, bat ūi-tio̍h góa ê miâ jím-siū kan-khó͘, lóng bô ià-siān. 4 M̄-kú, ū chi̍t hāng tāi-chì góa beh kā lí chek-pī, chiū-sī lí í-keng pàng-sak lí tong-chho͘ ê thiàⁿ. 5 Só͘-í, tio̍h kì-tit lí tùi tó-ūi tūi-lo̍h; tio̍h hóe-kái, chòe lí tong-chho͘ só͘ chòe ê kang-chok. Nā bô, góa ōe khì lí hia, chiong lí ê teng-tâi tùi i ê só͘-chāi sóa-khui. 6 Put-kò, lí iáu ū chi̍t hāng khó-chhú ê sū, chiū-sī lí mā kap góa kâng-khoán oàn-hūn [Nî-ko-la̍h]-tóng ê só͘-chòe. 7 “Ū hīⁿ-khang ê lâng lóng tio̍h thiaⁿ Sèng Sîn kā chiah-ê kàu-hōe kóng ê ōe. “Tek-sèng ê lâng, góa beh hō͘ in chia̍h Siōng-tè ê Lo̍k-hn̂g tiong hit châng oa̍h-miā-chhiū ê ké-chí.” 8 “Lí tio̍h siá-phoe hō͘ [Sū-múi-ná] ê kàu-hōe ê thiⁿ-sài, kóng: “Khí-thâu-ê kap soah-bé-ê, sí ū koh-oa̍h Hit-ūi án-ni kóng: 9 Góa chai lí ê hoān-lān kap sàn-chhiah; kî-si̍t lí sī hó-gia̍h. Góa chai lí ū siū-tio̍h chū-chheng [Iû-thài]-lâng ê lâng ê húi-pòng; kî-si̍t in m̄-sī [Iû-thài]-lâng, sī Sat-tàn ê chi̍p-thoân. 10 M̄-bián kiaⁿ lí teh-beh siū ê khó͘-lān. Lí khòaⁿ, Mô͘-kúi teh-beh chiong lín tiong-kan kúi-nā lâng koaiⁿ-lo̍h kaⁿ, kā lín khó-giām, lín ōe siū khó͘-lān cha̍p ji̍t. Lí tio̍h chīn-tiong kàu sí, góa ōe sù lí oa̍h-miā ê hoa-koan. 11 “Ū hīⁿ-khang ê lâng lóng tio̍h thiaⁿ Sèng Sîn kā chiah-ê kàu-hōe kóng ê ōe. “Tek-sèng ê lâng choa̍t-tùi bōe siū-tio̍h tē-jī piàn sí ê chai-hāi.” 12 “Lí tio̍h siá-phoe hō͘ [Pia̍t-ka-mô͘] ê kàu-hōe ê thiⁿ-sài, kóng: “Ū siang-bīn-lāi ê kiàm Hit-ūi án-ni kóng: 13 Góa chai lí tòa tó-ūi, chiū-sī ū Sat-tàn ê chō-ūi hia. Lí ū kian-siú góa ê miâ, sīm-chì góa tiong-si̍t ê kiàn-chèng-jîn [An-thê-phàⁿ] tī lín tiong-kan, chiū-sī Sat-tàn tòa ê só͘-chāi, siū sat-hāi ê sî, lí mā bô hó͘-jīn tùi góa ê sìn-gióng. 14 M̄-kú góa ū kúi-nā hāng tāi-chì beh kā lí chek-pī: In-ūi tī lí hia ū lâng chip-siú [Pa-lân] ê kà-sī, chit-ê [Pa-lân] ū kà [Pa-la̍k] khì ín-iú [Í-sek-lia̍t] ê kiáⁿ-sun, hō͘ in chia̍h chè ngó͘-siōng ê mi̍h, koh kiâⁿ kan-îm. 15 Chhin-chhiūⁿ án-ni, lí hia mā ū lâng chip-siú [Nî-ko-la̍h]-tóng ê kà-sī. 16 Só͘-í, tio̍h hóe-kái. Nā bô, góa liâm-piⁿ ōe kàu lí hia, ēng góa chhùi-lāi ê kiàm kap in kau-chiàn. 17 “Ū hīⁿ-khang ê lâng lóng tio̍h thiaⁿ Sèng Sîn kā chiah-ê kàu-hōe kóng ê ōe. “Tek-sèng ê lâng góa beh chiong pó-chûn khí-lâi ê má-ná hō͘ i, koh beh hō͘ i chi̍t tè pe̍h-chio̍h, chio̍h ê téng-bīn ū siá sin ê miâ; chit-ê miâ, niá-siū ê lâng í-gōa, bô-lâng bat.” 18 “Lí tio̍h siá-phoe hō͘ [Chhui-ngá-chhui-lat] ê kàu-hōe ê thiⁿ-sài, kóng: “Siōng-tè ê Kiáⁿ, chiū-sī ba̍k-chiu chhin-chhiūⁿ hé-iām, kha chhin-chhiūⁿ kng-liāng ê tâng Hit-ūi án-ni kóng: 19 Góa chai lí ê só͘-chòe, lí ê thiàⁿ, sìn-sim, ho̍k-sāi, kap thun-lún; koh chai lí chòe-kūn ê só͘-chòe pí khí-thâu ê khah hó. 20 M̄-kú, ū chi̍t hāng tāi-chì góa beh kā lí chek-pī, chiū-sī lí iông-ún chū-chheng choh sian-ti ê hū-jîn-lâng [Iâ-sé-pia̍t]; i kà-sī koh bê-he̍k góa ê lô͘-po̍k khì hoān kan-îm koh chia̍h chè ngó͘-siōng ê mi̍h. 21 Góa ū hō͘ i sî-kan thang hóe-kái, m̄-kú i m̄-khéng hóe-kái lī-khui îm-hēng. 22 Khòaⁿ ah, góa beh hō͘ i kan-khó͘ tó-chhn̂g; hiah-ê kap i hoān kan-îm ê lâng nā bô hóe-kái, thêng-chí in kap i ê îm-hēng, góa mā beh hō͘ in siū tōa khó͘-lān. 23 Góa beh thâi-sí hiah-ê tè i ê lâng. Án-ni lóng-chóng ê kàu-hōe chiū ōe chai góa sī kàm-chhat lâng ê sim-su ì-liām ê, góa beh chiàu lín ta̍k ê lâng ê só͘-chòe kā lín pò-èng. 24 “Chóng-sī lín chiah-ê kî-tha ê [Chhui-ngá-chhui-lat]-lâng, lín bô siū chit khoán kàu-tō, m̄-bat só͘-ūi Sat-tàn ê ò-pì ê lâng, góa kā lín kóng, góa bōe ke-thiⁿ pa̍t khoán ê tāng-tàⁿ hō͘ lín. 25 M̄-kú, lín tio̍h kian-siú lín í-keng ū ê, ti̍t-kàu góa lâi. 26 “Tek-sèng koh kè-sio̍k ūi-tio̍h góa chòe-kang kàu lō͘-bé ê lâng, góa beh hō͘ i koân-pèng thang tī-lí bān-kok; 27 i beh ēng thih-koáiⁿ tī-lí in, chhin-chhiūⁿ kòng-chhùi hûi-khì; 28 góa mā ū án-ni tùi góa ê Pē niá-siū koân-pèng. Tek-sèng ê lâng, góa mā beh hō͘ i khé-bêng-chhiⁿ. 29 “Ū hīⁿ-khang ê lâng lóng tio̍h thiaⁿ Sèng Sîn kā chiah-ê kàu-hōe kóng ê ōe.”

Khé-sī-lio̍k 3

1 “Lí tio̍h siá-phoe hō͘ Sat-te̍k ê kàu-hōe ê thiⁿ-sài, kóng: “Ū Siōng-tè ê chhit ê sîn kap chhit lia̍p chhiⁿ Hit-ūi án-ni kóng: Góa chai lí ê só͘-chòe, lâng kóng lí teh oa̍h, kî-si̍t sī sí. 2 Tio̍h chhíⁿ khí-lâi, ka-kiông teh-beh bô-khì ê khùi-si-á, in-ūi góa khòaⁿ, tī góa ê Siōng-tè bīn-chêng, lí ê só͘-chòe iáu bô oân-choân. 3 Só͘-í, tio̍h kì-tit lí só͘ niá-siū, só͘ thiaⁿ-tio̍h ê; tio̍h chun-siú, tio̍h hóe-kái. Lí nā bô chhíⁿ khí-lâi, góa ōe chhin-chhiūⁿ chha̍t lâi; lí it-tēng m̄-chai góa sím-mi̍h sî ōe lâi-kàu lí hia. 4 M̄-kú, tī [Sat-te̍k] iáu ū chi̍t-kóa lâng in ê saⁿ bô phah lâ-sâm, in ōe chhēng pe̍h-saⁿ kap góa chòe-hé kiâⁿ, in-ūi in ōe kham-tit. 5 “Tek-sèng ê lâng siâng-khoán ōe chhēng pe̍h-saⁿ; góa it-tēng bōe tùi oa̍h-miā-chheh kā i tû-miâ. Góa ōe tī góa ê Pē kap I hiah-ê thiⁿ-sài bīn-chêng kong-khai jīn i ê miâ. 6 “Ū hīⁿ-khang ê lâng lóng tio̍h thiaⁿ Sèng Sîn kā chiah-ê kàu-hōe kóng ê ōe.” 7 “Lí tio̍h siá-phoe hō͘ [Hui-la̍h-thiat-hui] ê kàu-hōe ê thiⁿ-sài, kóng: “Sèng-kiat koh chin-si̍t, chiáng-ak [Tāi-pi̍t] ê só-sî, khui chiū bô-lâng ōe-tàng koaiⁿ, koaiⁿ chiū bô-lâng ōe-tàng khui Hit-ūi án-ni kóng: 8 Góa chai lí ê só͘-chòe, lí khòaⁿ, góa í-keng tī lí ê bīn-chêng kā lí khui chi̍t ê mn̂g, sī bô-lâng ōe-tàng koaiⁿ ê; góa chai lí kan-ta ū tām-po̍h khùi-la̍t, khiok ū siú góa ê tō-lí, m̄-bat hó͘-jīn góa ê miâ. 9 Lí khòaⁿ, Sat-tàn ê chi̍p-thoân, in chū-chheng [Iû-thài]-lâng, kî-si̍t m̄-sī, sī hiah-ê kóng pe̍h-chha̍t ê; lí khòaⁿ, góa beh hō͘ in lâi phak tī lí ê kha-chêng, in chiū chai góa ū thiàⁿ lí. 10 In-ūi lí ū chun-siú góa ê tō-lí thun-lún kàu lō͘-bé, góa mā beh pó-siú lí thoat-lī hit-ê chhì-liān ê sî, chit-ê sî teh-beh lîm-kàu choân sè-kài, lâi khó-giām tòa tī tōe-chiūⁿ ê lâng. 11 Góa liâm-piⁿ kàu; lí só͘-ū ê tio̍h kian-siú, chiah-bián ū lâng kā lí ê hoa-koan the̍h-khì. 12 “Tek-sèng ê lâng, góa beh hō͘ i chiâⁿ-chòe góa ê Siōng-tè tiān-lāi ê thiāu; i éng-oán bōe-koh lī-khui. Góa beh chiong góa ê Siōng-tè ê miâ, í-ki̍p góa ê Siōng-tè ê siâⁿ, chiū-sī tùi thiⁿ-téng góa ê Siōng-tè hia kàng-lo̍h sin ê [Iâ-lō͘-sat-léng] ê miâ, kap góa sin ê miâ, lóng siá tī i téng-bīn. 13 “Ū hīⁿ-khang ê lâng lóng tio̍h thiaⁿ Sèng Sîn kā chiah-ê kàu-hōe kóng ê ōe.” 14 “Lí tio̍h siá-phoe hō͘ [Ló-tí-ka] ê kàu-hōe ê thiⁿ-sài, kóng: “Hit-ūi Amen, tiong-sìn koh chin-si̍t ê kiàn-chèng-jîn, Siōng-tè chhòng-chō ê kun-goân, án-ni kóng: 15 Góa chai lí ê só͘-chòe, lí bô sio bô léng. Góa khah ài lí khòaⁿ sī sio á-sī léng. 16 Kì-jiân lí lâ-lûn-sio, m̄-chiâⁿ sio m̄-chiâⁿ léng, góa teh-beh tùi góa ê chhùi kā lí phùi chhut-khì. 17 In-ūi lí kóng, ‘Góa hó-gia̍h, í-keng tōa hoat-châi, lóng bô khiàm-kheh.’ Lí khiok m̄-chai lí pi-chhám, khó-lîn, sàn-chhiah, sit-bêng, koh chhiah-sin lō͘-thé. 18 Góa khǹg lí tùi góa bóe keng-kè hé thoàn-liān ê kim, thang hō͘ lí hó-gia̍h; koh bóe pe̍h ê saⁿ khì chhēng, chiah-bián hō͘ lâng khòaⁿ-tio̍h lí thǹg-theh ê kiàn-siàu; mā bóe io̍h-ko lâi boah lí ê ba̍k-chiu, hō͘ lí ōe khòaⁿ-kìⁿ. 19 Góa só͘ thiàⁿ ê lâng, góa lóng kā in chek-pī kap koán-kàu. Só͘-í, tio̍h jia̍t-sim, tio̍h hoán-hóe. 20 Lí khòaⁿ, góa í-keng khiā tī mn̂g-gōa teh phah-mn̂g; thiaⁿ-kìⁿ góa ê siaⁿ lâi khui-mn̂g ê lâng, góa beh ji̍p-khì chhē i, kap i chòe-hé chia̍h-pn̄g, i mā kap góa chòe-hé chia̍h. 21 “Tek-sèng ê lâng, góa beh hō͘ i kap góa chòe-hé chē tī góa ê pó-chō, chhin-chhiūⁿ góa í-keng tek-sèng kap góa ê Pē chòe-hé chē tī I ê pó-chō. 22 “Ū hīⁿ-khang ê lâng lóng tio̍h thiaⁿ Sèng Sîn kā chiah-ê kàu-hōe kóng ê ōe.”

Khé-sī-lio̍k 4

1 Āu-lâi góa koh khòaⁿ, khòaⁿ-kìⁿ thiⁿ-téng ū chi̍t ê khui-khui ê mn̂g. Góa ū thiaⁿ-kìⁿ hit-ê thâu-chi̍t piàn tùi góa kóng ōe ê siaⁿ, chhin-chhiūⁿ lat-pah teh hiáng, kóng, “Khí-lâi chia, góa beh chí-sī lí í-āu it-tēng tio̍h hoat-seng ê tāi-chì.” 2 Góa chiū sûi-sî siū Sèng Sîn kám-tōng, khòaⁿ-kìⁿ thiⁿ-téng ū chi̍t ê pó-chō, ū chi̍t ūi chē tī pó-chō. 3 I ê bīn-māu chhin-chhiūⁿ phek-ge̍k kap âng-pó-chio̍h; pó-chō ê chiu-ûi ū khēng, khòaⁿ khí-lâi chhin-chhiūⁿ le̍k pó-chio̍h. 4 Pó-chō ê chiu-ûi ū jī-cha̍p-sì ê chō-ūi, ū jī-cha̍p-sì ê tiúⁿ-ló chē tī chō-ūi, in chhēng pe̍h-saⁿ, thâu-khak tì kim ê hoa-koan. 5 Tùi pó-chō ū hoat-chhut sih-nà, hiáng-siaⁿ, kap lûi; tī pó-chō chêng ū chhit ki tiám-to̍h ê hé-pé, chiū-sī Siōng-tè ê chhit ê sîn. 6 Pó-chō chêng ū chhin-chhiūⁿ chúi-chiⁿ hiah-ni̍h thàu-bêng ê po-lê-hái. Pó-chō ê chiu-ûi ū sì ê oa̍h-mi̍h, in ê seng-khu chêng-āu lóng ū ba̍k-chiu. 7 Thâu-chi̍t ê oa̍h-mi̍h chhin-chhiūⁿ sai, tē-jī ê oa̍h-mi̍h chhin-chhiūⁿ gû-káng-á, tē-saⁿ ê oa̍h-mi̍h ū chhin-chhiūⁿ lâng ê bīn, tē-sì ê oa̍h-mi̍h chhin-chhiūⁿ teh pe ê eng-chiáu. 8 Chit sì ê oa̍h-mi̍h ta̍k ê lóng ū la̍k ê si̍t, chiu-ûi kap lāi-bīn kui seng-khu ū chin chōe ba̍k-chiu. In mî-ji̍t bô-thêng teh chhiùⁿ: Sèng chài! Sèng chài! Sèng chài! Choân-lêng ê Chú Siōng-tè, kè-khì chûn-chāi, hiān-chāi chûn-chāi, chiong-lâi mā chûn-chāi.” 9 Ta̍k piàn oa̍h-mi̍h chiong êng-kng, chun-kùi, kám-siā, kui hō͘ chē tī pó-chō, oa̍h kàu tāi-tāi bô-chīn Hit-ūi ê sî, 10 jī-cha̍p-sì ê tiúⁿ-ló chiū phak lo̍h-khì tī chē tī pó-chō Hit-ūi ê bīn-chêng, kèng-pài oa̍h kàu tāi-tāi bô-chīn Hit-ūi; koh chiong in ê hoa-koan hiat tī pó-chō chêng, kóng: 11 Goán ê Chú, goán ê Siōng-tè! Lí eng-kai tit-tio̍h êng-kng, chun-kùi, kap koân-lêng, in-ūi lí chhòng-chō bān-iú; tùi lí ê chí-ì, bān-iú siū-chō, seng-chûn.

Khé-sī-lio̍k 5

1 Góa khòaⁿ-kìⁿ chē tī pó-chō Hit-ūi ê chiàⁿ-chhiú ū chi̍t kńg chheh, lāi-bīn gōa-bīn lóng ū siá-jī, ēng chhit ê ìn hong-teh. 2 Góa koh khòaⁿ-kìⁿ chi̍t ê ū tōa khùi-la̍t ê thiⁿ-sài, tōa-siaⁿ soan-pò͘ kóng, “Sím-mi̍h lâng ū chu-keh thang thí-khui hit kńg chheh, thiah chheh ê hong-ìn?” 3 Tī thiⁿ-téng, tī tōe-chiūⁿ, tī tōe-ē, lóng bô-lâng ōe-tàng thí-khui á-sī tha̍k hit kńg chheh. 4 Chhē bô chi̍t ê lâng ū chu-keh thí-khui á-sī tha̍k hit kńg chheh, góa chiū tōa-siaⁿ khàu. 5 Tiúⁿ-ló ê tiong-kan ū chi̍t-ê tùi góa kóng, “M̄-thang khàu; lí khòaⁿ, tùi [Iû-tāi] chi-cho̍k chhut-lâi ê Sai, [Tāi-pi̍t] ê Kun, I í-keng tek-sèng, ōe-tàng khui hit kńg chheh kap hit chhit ê hong-ìn. 6 Āu-lâi góa khòaⁿ-kìⁿ Iûⁿ-ko khiā tī pó-chō chêng, ū sì ê oa̍h-mi̍h kap hiah-ê tiúⁿ-ló kā I ûi-teh. Iûⁿ-ko ká-ná bat siū sat-hāi, ū chhit ki kak, chhit lúi ba̍k-chiu, chiū-sī siū chhe-khián kàu phó͘-thiⁿ-ē Siōng-tè ê chhit ê sîn. 7 Iûⁿ-ko chiū chìn-chêng, tùi chē tī pó-chō Hit-ūi ê chiàⁿ-chhiú the̍h hit kńg chheh. 8 I the̍h-tio̍h ê sî, hit sì ê oa̍h-mi̍h kap jī-cha̍p-sì ê tiúⁿ-ló lóng phak tī Iûⁿ-ko ê bīn-chêng, ta̍k ê ū the̍h khîm kap tóe móa hiuⁿ ê kim-lô͘; hiuⁿ chiū-sī sìn-tô͘ ê kî-tó. 9 In gîm chi̍t siú sin ê si, kóng: Lí ū chu-keh the̍h hit kńg chheh, thiah-khui i ê hong-ìn; in-ūi lí ū siū sat-hāi, ēng lí ê huih tùi ta̍k ê cho̍k-kûn, ta̍k chióng gú-giân, ta̍k ê bîn-cho̍k, ta̍k ê pang-kok, sio̍k-hôe lâng kui Siōng-tè. 10 Lí hō͘ in chiâⁿ-chòe kok-tō͘, kap chè-si lâi ho̍k-sāi lán ê Siōng-tè; in ōe tī tōe-chiūⁿ chiáng-koân. 11 Góa koh khòaⁿ, góa ū thiaⁿ-kìⁿ chheng-chheng bān-bān thiⁿ-sài ê siaⁿ-im. In lóng ûi tī pó-chō, oa̍h-mi̍h, í-ki̍p tiúⁿ-ló ê chiu-ûi, 12 tōa-siaⁿ, kóng: Siū sat-hāi ê Iûⁿ-ko eng-kai tit-tio̍h koân-lêng, hù-jū, tì-hūi, khùi-la̍t, chun-kùi, êng-kng, kap chheng-chàn. 13 Góa koh thiaⁿ-kìⁿ, tī thiⁿ-téng, tī tōe-chiūⁿ, kap tōe-ē, hái-ni̍h, kap ú-tiū tiong it-chhè ê pī-chō-bu̍t, lóng kóng: Goān chheng-chàn, chun-kùi, êng-kng, koân-sè, lóng kui hō͘ chē tī pó-chō Hit-ūi kap Iûⁿ-ko, tāi-tāi bô-chīn! 14 Hit sì ê oa̍h-mi̍h ìn kóng, “Amen!” Hiah-ê tiúⁿ-ló chiū phak lo̍h-khì kèng-pài.

Khé-sī-lio̍k 6

1 Iûⁿ-ko khui chhit ê hong-ìn ê chi̍t-ê ê sî, góa koh khòaⁿ, góa ū thiaⁿ-kìⁿ sì ê oa̍h-mi̍h ê chi̍t-ê, i ê siaⁿ chhin-chhiūⁿ lûi ê siaⁿ, kóng, “Lâi!” 2 Góa khòaⁿ ê sî, ū khòaⁿ-tio̍h chi̍t chiah pe̍h-bé, khiâ-bé ê lâng gia̍h keng; i niá-siū hoa-koan chhut-hoat, ūi-tio̍h beh pek-chiàn pek-sèng. 3 Iûⁿ-ko khui tē-jī ê hong-ìn ê sî, góa ū thiaⁿ-kìⁿ tē-jī ê oa̍h-mi̍h kóng, “Lâi!” 4 Hit sî ū pa̍t chiah bé chhut-lâi, sī chhiah-sek ê; khiâ-bé ê lâng ū niá-siū koân-pèng thang tùi tōe-chiūⁿ chhiúⁿ-toa̍t hô-pêng, hō͘ lâng hō͘-siōng chân-sat; i ū koh niá-siū chi̍t ki tōa ki kiàm. 5 Iûⁿ-ko khui tē-saⁿ ê hong-ìn ê sî, góa ū thiaⁿ-kìⁿ tē-saⁿ ê oa̍h-mi̍h kóng, “Lâi!” Góa khòaⁿ ê sî, ū khòaⁿ-tio̍h chi̍t chiah o͘-bé, khiâ-bé ê lâng chhiú the̍h chhìn-á. 6 Góa thiaⁿ-kìⁿ ká-ná ū siaⁿ tùi sì ê oa̍h-mi̍h tiong-kan hoat-chhut kóng, “Chi̍t ji̍t ê kang-chîⁿ chí-ū thang bóe chi̍t kong-seng sió-be̍h; chi̍t ji̍t ê kang-chîⁿ chí-ū thang bóe saⁿ kong-seng tōa-be̍h; ka-ná-iû kap chiú m̄-thang phah-sńg.” 7 Iûⁿ-ko khui tē-sì ê hong-ìn ê sî, góa ū thiaⁿ-kìⁿ tē-sì ê oa̍h-mi̍h kóng, “Lâi!” 8 Góa khòaⁿ ê sî, ū khòaⁿ-tio̍h chi̍t chiah hé-hu-sek ê bé, khiâ-bé ê lâng miâ kiò-chòe Sí-bông, Im-hú tè tī āu-bīn; in ū niá-siū koân-pèng thang koán-hat tōe-chiūⁿ sì-hūn-chi̍t ê thó͘-tōe, ēng to-kiàm, ki-hng, un-e̍k, kap tōe-chiūⁿ ê iá-siù khì sat-hāi. 9 Iûⁿ-ko khui tē-gō͘ ê hong-ìn ê sî, góa khòaⁿ-kìⁿ chè-tôaⁿ-ē ū ūi-tio̍h Siōng-tè ê ōe kap ūi-tio̍h chòe kiàn-chèng siū sat-hāi ê lâng ê lêng-hûn. 10 In tōa-siaⁿ âu-kiò kóng, “Sèng koh chin ê Chú-cháiⁿ ah, tio̍h koh jōa kú lí chiah beh sím-phòaⁿ tōe-chiūⁿ ê lâng, thang ūi-tio̍h goán só͘ lâu ê huih sin-oan?” 11 Ta̍k ê lâng chiū niá-siū chi̍t niá pe̍h-saⁿ, koh ū siaⁿ kā in kóng, tio̍h koh thèng-hāu chi̍t-sî-á kú, kàu pîⁿ-pîⁿ chòe lô͘-po̍k ê lâng í-ki̍p in ê hiaⁿ-tī chí-bē, chiū-sī teh-beh kap in siâng-khoán siū sat-hāi ê lâng ê sò͘-bo̍k móa ê sî. 12 Āu-lâi góa khòaⁿ-kìⁿ Iûⁿ-ko khui tē-la̍k ê hong-ìn ê sî, hut-jiân tōe tōa tín-tāng, ji̍t-thâu pìⁿ-chòe chhin-chhiūⁿ o͘ môa-pò͘ hiah-ni̍h o͘, kui-ê ge̍h pìⁿ-chòe chhin-chhiūⁿ huih hiah-ni̍h âng; 13 thiⁿ-téng ê chhiⁿ tūi-lo̍h tōe, chhin-chhiūⁿ bû-hoa-kó-chhiū hō͘ tōa-hong sàu tín-tāng, iáu-bē sek ê ké-chí lóng lak liáu-liáu. 14 Thiⁿ siau-sit, chhin-chhiūⁿ chi̍t kńg chheh kńg khí-lâi; soaⁿ kap hái-tó lóng choah lī-khui goân-ūi. 15 Tōe-chiūⁿ ê kun-ông, thóng-tī-chiá, chiòng-léng, ū-chîⁿ-ê, ū-sè-ê, it-chhè choh lô͘-po̍k-ê, kap chū-iû-ê lóng khì bih tī tōng-lāi kap soaⁿ-giâm tiong-kan ê phāng. 16 In ǹg soaⁿ-niá kap soaⁿ-giâm hoah kóng, “Tó lo̍h-lâi kā goán khàm-teh, hō͘ goán thang siám-pī chē tī pó-chō Hit-ūi ê bīn kap Iûⁿ-ko ê siū-khì. 17 In-ūi in siū-khì ê tōa Ji̍t-chí kàu lah, sím-mi̍h lâng khiā ōe-tiâu?”

Khé-sī-lio̍k 7

1 Āu-lâi, góa ū khòaⁿ-kìⁿ sì ê thiⁿ-sài khiā tī tōe ê sì kak-thâu, chiong tōe sì-bīn ê hong cha̍h khí-lâi, hō͘ hong bōe chhe-tio̍h tōe, hái, kap it-chhè ê chhiū-ba̍k. 2 Góa koh khòaⁿ-kìⁿ lēng-gōa chi̍t ê thiⁿ-sài the̍h éng-oa̍h Siōng-tè ê ìn, tùi ji̍t-chhut ê só͘-chāi chiūⁿ-lâi; i tùi ū niá-siū koân-pèng thang siong-hāi tōe kap hái hit sì ê thiⁿ-sài tōa-siaⁿ hoah, 3 kóng, “Goán iáu-bē tī Siōng-tè lô͘-po̍k ê thâu-hia̍h khàm-ìn í-chêng, m̄-thang siong-hāi tōe, hái, kap chhiū-ba̍k.” 4 Góa thiaⁿ-kìⁿ, tī [Í-sek-lia̍t] ta̍k ê chi-cho̍k tiong siū khàm-ìn ê lâng, lóng-chóng ū cha̍p-sì-bān sì-chheng. 5 Sio̍k [Iû-tāi] chi-cho̍k siū khàm-ìn ê lâng ū chi̍t-bān nn̄g-chheng; sio̍k [Lū-piān] chi-cho̍k ê lâng ū chi̍t-bān nn̄g-chheng; sio̍k [Ka-te̍k] chi-cho̍k ê lâng ū chi̍t-bān nn̄g-chheng; 6 sio̍k [A-siat] chi-cho̍k ê lâng ū chi̍t-bān nn̄g-chheng; sio̍k [Ná-hut-tha-lī] chi-cho̍k ê lâng ū chi̍t-bān nn̄g-chheng; sio̍k [Má-ná-se] chi-cho̍k ê lâng ū chi̍t-bān nn̄g-chheng; 7 sio̍k [Se-biān] chi-cho̍k ê lâng ū chi̍t-bān nn̄g-chheng; sio̍k [Lī-bī] chi-cho̍k ê lâng ū chi̍t-bān nn̄g-chheng; sio̍k [Í-sat-ka] chi-cho̍k ê lâng ū chi̍t-bān nn̄g-chheng; 8 sio̍k [Se-pò͘-lûn] chi-cho̍k ê lâng ū chi̍t-bān nn̄g-chheng; sio̍k [Iok-sek] chi-cho̍k ê lâng ū chi̍t-bān nn̄g-chheng; sio̍k [Piān-ngá-bín] chi-cho̍k siū khàm-ìn ê lâng ū chi̍t-bān nn̄g-chheng. 9 Āu-lâi, góa koh khòaⁿ, ū khòaⁿ-kìⁿ chi̍t tōa-kûn lâng, bô-lâng ōe-tàng kè-sǹg in ê sò͘-bo̍k, sī tùi ta̍k kok, ta̍k cho̍k-kûn, ta̍k bîn-cho̍k, ta̍k khoán gú-giân lâi ê, lóng khiā tī pó-chō kap Iûⁿ-ko ê bīn-chêng, chhēng pe̍h-saⁿ, chhiú gia̍h chang-chhiū ki. 10 In tōa-siaⁿ hoah: Goān chín-kiù kui tī chē tī pó-chō ê lán ê Siōng-tè, mā kui tī Iûⁿ-ko! 11 Só͘-ū ê thiⁿ-sài lóng khiā tī pó-chō, tiúⁿ-ló, kap sì ê oa̍h-mi̍h ê chiu-ûi, in tī pó-chō chêng bīn phak lo̍h-khì kèng-pài Siōng-tè, 12 kóng: Amen! Goān siōng-chàn, êng-kng, tì-hūi, kám-siā, chun-kùi, koân-lêng, khùi-la̍t, kui tī lán ê Siōng-tè, kàu éng-éng oán-oán. Amen! 13 Tiúⁿ-ló tiong ū chi̍t-ê mn̄g góa kóng, “Chiah-ê chhēng pe̍h-saⁿ ê sī sím-mi̍h lâng? In tùi tó-ūi lâi?” 14 Góa ìn kóng, “Sian-siⁿ, lí chai.” Āu-lâi i kā góa kóng, “Chiah-ê lâng sī keng-kè tōa chai-lān chhut-lâi ê, in ū sóe in ê saⁿ, ēng Iûⁿ-ko ê huih sóe kàu pe̍h. 15 Só͘-í, in tī Siōng-tè ê pó-chō chêng, mî-ji̍t tī I ê sèng-tiān ho̍k-sāi I; chē tī pó-chō Hit-ūi beh pó-hō͘ in. 16 In bōe-koh iau, bōe-koh chhùi-ta; ji̍t-thâu kap iām-jia̍t lóng bōe siong-hāi in. 17 Tī pó-chō tiong ê Iûⁿ-ko beh chòe in ê bo̍k-chiá; I beh chhōa in kàu oa̍h-miā-chúi ê chôaⁿ-goân; Siōng-tè beh tùi in ê ba̍k-chiu chhit-khì lóng-chóng ê ba̍k-sái.

Khé-sī-lio̍k 8

1 Iûⁿ-ko khui tē-chhit ê hong-ìn ê sî, thiⁿ chēng-chēng iok pòaⁿ tiám cheng kú. 2 Āu-lâi góa ū khòaⁿ-kìⁿ chhit ê thiⁿ-sài khiā tī Siōng-tè bīn-chêng, in ū niá-siū chhit ki lat-pah. 3 Koh ū chi̍t ê thiⁿ-sài lâi, chhiú the̍h kim hiuⁿ-lô͘ khiā tī chè-tôaⁿ chêng, niá-siū chin chōe hiuⁿ thang kap chèng sìn-tô͘ ê kî-tó chòe-hé hiàn tī pó-chō chêng ê kim chè-tôaⁿ téng. 4 Hiuⁿ-ian kap sìn-tô͘ ê kî-tó tùi thiⁿ-sài ê chhiú chhèng kàu Siōng-tè bīn-chêng. 5 Jiân-āu, thiⁿ-sài the̍h hiuⁿ-lô͘, tóe móa chè-tôaⁿ téng ê hé, kā i hiat-lo̍h tōe, sûi-sî ū tân-lûi, hiáng-siaⁿ, sih-nà, kap tōe-tāng. 6 Gia̍h chhit ki lat-pah ê chhit ê thiⁿ-sài chún-pī hó-sè beh pûn. 7 Thâu-chi̍t ê thiⁿ-sài pûn, sûi-sî ū phau̍h kap hé, chham huih hiat-lo̍h tōe; tōe ê saⁿ-hūn-chi̍t sio-khì, chhiū-ba̍k ê saⁿ-hūn-chi̍t sio-khì, só͘-ū chhiⁿ-chhùi ê chháu lóng sio-khì. 8 Tē-jī ê thiⁿ-sài pûn, sûi-sî ū chhin-chhiūⁿ hé teh sio ê tōa-soaⁿ hiat-lo̍h hái; hái ê saⁿ-hūn-chi̍t pìⁿ-chòe huih; 9 hái-ni̍h ê oa̍h-mi̍h saⁿ-hūn-chi̍t sí-khì; chûn-chiah ê saⁿ-hūn-chi̍t sún-hoāi. 10 Tē-saⁿ ê thiⁿ-sài pûn, sûi-sî ū chi̍t lia̍p tōa lia̍p chhiⁿ tùi thiⁿ-téng lak lo̍h-lâi, chhin-chhiūⁿ teh to̍h ê hé-pé lak tī saⁿ-hūn-chi̍t ê kang-hô kap só͘-ū ê chúi-chôaⁿ. 11 Chit lia̍p chhiⁿ ê miâ kiò-chòe Khó͘-hiāⁿ. Saⁿ-hūn-chi̍t ê chúi pìⁿ khó͘, chin chōe lâng in-ūi chit-ê chúi sí-khì, in-ūi chúi pìⁿ khó͘. 12 Tē-sì ê thiⁿ-sài pûn, ji̍t ê saⁿ-hūn-chi̍t, ge̍h ê saⁿ-hūn-chi̍t, chhiⁿ ê saⁿ-hūn-chi̍t lóng siū kong-kek, tì-kàu ji̍t, ge̍h, chhiⁿ ê saⁿ-hūn-chi̍t pìⁿ àm, ji̍t-sî saⁿ-hūn-chi̍t bô kng, mî-sî mā saⁿ-hūn-chi̍t bô kng. 13 Āu-lâi góa khòaⁿ, ū thiaⁿ-kìⁿ chi̍t chiah tī khong-tiong teh pe ê eng-chiáu tōa-siaⁿ kiò kóng, “Chhám à! Chhám à! Tòa tī tōe-chiūⁿ ê lâng chhám à! In-ūi kî-tha ê saⁿ ê thiⁿ-sài teh-beh pûn lat-pah lah.”

Khé-sī-lio̍k 9

1 Tē-gō͘ ê thiⁿ-sài pûn, góa ū khòaⁿ-tio̍h tùi thiⁿ-téng lak lo̍h-lâi tōe-bīn hit lia̍p chhiⁿ; chit lia̍p chhiⁿ ū niá-siū hit-ê bô-tóe chhim-khiⁿ ê só-sî. 2 I khui bô-tóe chhim-khiⁿ, chiū ū tōa hé-lô͘ ê ian chhèng khí-lâi. Ji̍t-thâu kap thài-khong in-ūi chhim-khiⁿ ê ian chiū pìⁿ o͘-àm. 3 Chháu-meh tùi ian ê lāi-bīn chhut-lâi hioh tī tōe-bīn; in niá-siū koân-pèng chhin-chhiūⁿ tōe-chiūⁿ ê giat-á-thâng ū ê koân-pèng. 4 In siū kau-tài m̄-thang siong-hāi tōe-chiūⁿ ê chháu, ta̍k chióng ê chhiū-ba̍k, kap it-chhè chhiⁿ-chhùi ê mi̍h, chí-ū thang siong-hāi thâu-hia̍h bô khàm Siōng-tè ê ìn ê lâng. 5 Chháu-meh bô tit-tio̍h koân thang thâi-sí chiah-ê lâng, chí-ū thang hō͘ in siū thòng-khó͘ gō͘ ge̍h-ji̍t kú, in ê thòng-khó͘ chhin-chhiūⁿ lâng hō͘ giat-á-thâng kā-tio̍h ê thòng-khó͘. 6 Chiah-ê ji̍t ê tiong-kan, lâng kiû sí mā bōe tit sí, ài sí mā sí bōe-khì. 7 Chháu-meh ê hêng-chōng chhin-chhiūⁿ chún-pī beh chhut-chiàn ê bé; in ê thâu-khak téng tì chhin-chhiūⁿ kim ê hoa-koan; in ê bīn chhin-chhiūⁿ lâng ê bīn; 8 in ê thâu-mn̂g chhin-chhiūⁿ hū-jîn-lâng ê thâu-mn̂g; in ê gê chhin-chhiūⁿ sai ê gê; 9 in ê heng-khám chhēng chhin-chhiūⁿ thih ê hō͘-heng-kah; in ê si̍t hoat-chhut ê siaⁿ chhin-chhiūⁿ chin chōe bé thoa-chhia phun-pháu beh khì kau-chiàn ê siaⁿ. 10 In ū bé-liu chhin-chhiūⁿ giat-á-thâng ê bé-liu ū chhì; in siong-hāi lâng gō͘ ge̍h-ji̍t kú ê koân-pèng sī tī bé-liu. 11 In ê ông sī koán-hat bô-tóe chhim-khiⁿ ê thiⁿ-sài; i ê miâ [Hi-pek-lâi]-gú kiò-chòe [A-pa-tùn], [Hi-la̍h]-gú kiò-chòe [A-pho-lûn], ì-sù sī Húi-bia̍t-chiá. 12 Thâu-chi̍t ê chai-hō í-keng kè-khì; iáu ū nn̄g ê chai-hō teh-beh lâi. 13 Tē-la̍k ê thiⁿ-sài pûn, góa ū thiaⁿ-kìⁿ chi̍t ê siaⁿ tùi Siōng-tè bīn-chêng ê kim chè-tôaⁿ hit sì ê kak chhut-lâi, 14 kā gia̍h lat-pah ê tē-la̍k ê thiⁿ-sài kóng, “Lí tio̍h chiong koaiⁿ tī [Iù-hoat-la-tí] tōa-hô hit sì ê thiⁿ-sài pàng chhut-lâi.” 15 Chit sì ê thiⁿ-sài siū tháu-pàng, sī chá chiū an-pâi hó-sè, tī tiāⁿ-tio̍h ê nî, ge̍h, ji̍t, kap sî beh sat-hāi jîn-lūi ê saⁿ-hūn-chi̍t. 16 Góa ū thiaⁿ-kóng bé-peng ê sò͘-bo̍k lóng-chóng ū nn̄g-ek. 17 Tī īⁿ-siōng tiong, góa só͘ khòaⁿ-kìⁿ bé kap khiâ-bé ê lâng sī án-ni: In ū chhēng hé-iām, nâ-pó-chio̍h, kap liû-hông ê sek-tì ê hō͘-heng-kah. In ê bé ê thâu chhin-chhiūⁿ sai ê thâu, tùi in ê chhùi thò͘-chhut hé, ian, kap liû-hông. 18 Jîn-lūi ê saⁿ-hūn-chi̍t tùi bé ê chhùi thò͘ chhut-lâi ê hé, ian, kap liû-hông chit saⁿ hāng chai-hāi siū sat-hāi. 19 Chiah-ê bé ê koân-pèng sī tī in ê chhùi kap bé-liu; in ê bé-liu chhin-chhiūⁿ chôa ū thâu, ēng chiah-ê thâu siong-hāi lâng. 20 Kî-tha só͘ chhun ê chiū-sī chiah-ê bô siū chai-hō sat-hāi ê lâng. In iáu bô hoán-hóe, bô pàng-sak in ê chhiú só͘ chō ê ngó͘-siōng; in chiàu-siông pài chiah-ê kúi, kap hiah-ê bōe khòaⁿ, bōe thiaⁿ, bōe kiâⁿ, ēng kim, gûn, tâng, chio̍h, chhâ chō ê ngó͘-siōng. 21 In mā bô hoán-hóe, bô pàng-sak in hiong-sat, siâ-su̍t, îm-loān, thau-the̍h ê hêng-ûi.

Khé-sī-lio̍k 10

1 Góa khòaⁿ-kìⁿ lēng-gōa chi̍t ê tōa khùi-la̍t ê thiⁿ-sài tùi thiⁿ lo̍h-lâi; i ēng hûn choh saⁿ chhēng, thâu-khak téng ū khēng, i ê bīn chhin-chhiūⁿ ji̍t-thâu, kha chhin-chhiūⁿ hé-thiāu. 2 I ê chhiú ū the̍h chi̍t kńg í-keng thí-khui ê sòe-kńg-chheh. I chiàⁿ-kha ta̍h hái, tò-kha ta̍h tōe. 3 I tōa-siaⁿ hoah, chhin-chhiūⁿ sai teh háu, hit chhit ê lûi chiū chhut-siaⁿ ìn. 4 Chhit ê lûi chhut-siaⁿ liáu-āu, góa tú-beh siá, thiaⁿ-kìⁿ tùi thiⁿ ū siaⁿ kóng, “Chhit ê lûi só͘ kóng ê, lí tio̍h hong khí-lâi, m̄-thang kì-lio̍k.” 5 Āu-lâi, góa só͘ khòaⁿ-kìⁿ kha ta̍h hái kap tōe hit-ê thiⁿ-sài gia̍h chiàⁿ-chhiú kí thiⁿ, 6 kí hit-ūi oa̍h kàu éng-éng oán-oán ê Siōng-tè, chiū-sī chhòng-chō thiⁿ kap thiⁿ-téng ê mi̍h, tōe kap tōe-chiūⁿ ê mi̍h, hái kap hái-ni̍h ê mi̍h ê, chiù-chōa kóng, “Bōe-koh iân-tî lah! 7 Put-kò tē-chhit ê thiⁿ-sài teh-beh pûn lat-pah, lat-pah ê siaⁿ tân ê ji̍t, Siōng-tè tùi I ê lô͘-po̍k --- sian-ti só͘ soan-kò ê ò-biāu ōe si̍t-hiān.” 8 Āu-lâi, góa chêng só͘ thiaⁿ-kìⁿ tùi thiⁿ lâi hit-ê siaⁿ koh chi̍t piàn tùi góa kóng, “Lí khì, khì the̍h kha ta̍h hái kap tōe hit-ê thiⁿ-sài chhiú-tiong hit kńg thí-khui ê chheh.” 9 Góa chiū khì thiⁿ-sài hia, kiò i chiong hit kńg sòe-kńg-chheh hō͘ góa; i kā góa kóng, “Lí the̍h-khì, chia̍h lo̍h-khì, tī pak-tó͘-lāi ōe khó͘, m̄-kú tī chhùi-lāi ōe chhin-chhiūⁿ bi̍t hiah-ni̍h tiⁿ.” 10 Góa chiū tùi thiⁿ-sài ê chhiú the̍h hit kńg sòe-kńg-chheh lâi chia̍h; chhùi-lāi kó-jiân chhin-chhiūⁿ bi̍t hiah-ni̍h tiⁿ, m̄-kú thun lo̍h-khì pak-tó͘-lāi chiū pìⁿ-chòe khó͘. 11 Thiⁿ-sài koh kā góa kóng, “Lí tio̍h koh soan-pò͘ Siōng-tè koan-hē chin chōe bîn-cho̍k, pang-kok, gú-giân, kap kun-ông ê ū-giân.”

Khé-sī-lio̍k 11

1 Góa ū niá-siū chi̍t ki chhioh, hêng chhin-chhiūⁿ koáiⁿ-á, koh ū siaⁿ tùi góa kóng, “Khí-lâi, khì niû Siōng-tè ê sèng-tiān kap chè-tôaⁿ, koh sǹg tiān-lāi kèng-pài ê jîn-sò͘. 2 M̄-kú, sèng-tiān ê gōa-īⁿ m̄-thang niû, in-ūi gōa-īⁿ í-keng kau hō͘ Gōa-pang-lâng; in ōe thún-ta̍h sèng-siâⁿ sì-cha̍p-jī ge̍h-ji̍t kú. 3 Góa beh chún góa nn̄g ê kiàn-chèng-jîn chhēng môa-saⁿ, ū koân thoân-tō chi̍t-chheng nn̄g-pah la̍k-cha̍p ji̍t kú.” 4 Chit nn̄g ê kiàn-chèng-jîn chiū-sī khiā tī choân-tōe ê Chú bīn-chêng ê nn̄g châng ka-ná-chhiū kap nn̄g ki teng-tâi. 5 Nā ū lâng beh hāi in, in ōe tùi chhùi thò͘-chhut hé, chiong tùi-te̍k sio-bia̍t; nā ū lâng beh hāi in, it-tēng tio̍h án-ni siū sat-hāi. 6 Chit nn̄g ê kiàn-chèng-jîn ū koân thang koaiⁿ thiⁿ, hō͘ in thoân-tō ê kî-kan bô lo̍h-hō͘; in mā ū koân chiáng-koán chúi hō͘ i pìⁿ-chòe huih; koh chiàu in só͘ ài, thang put-koán-sî kàng ta̍k chióng chai-hāi kong-kek tāi-tōe. 7 In kiàn-chèng oân-sêng liáu-āu, tùi bô-tóe chhim-khiⁿ chiūⁿ-lâi hit chiah siù ōe kap in kau-chiàn, chiong in cheng-ho̍k, kā in thâi-sí. 8 In ê sin-si ōe tó tī tōa siâⁿ-chhī ê koe-lō͘; chit-ê siâⁿ-chhī lâng kā i pí-phēng chòe [Só͘-to-má] á-sī [Ai-ki̍p]; in ê Chú mā tī hia hō͘ lâng tèng si̍p-jī-kè. 9 Saⁿ ji̍t pòaⁿ kú, tùi ta̍k ê bîn-cho̍k, ta̍k ê cho̍k-kûn, ta̍k khoán gú-giân, ta̍k ê pang-kok, ū lâng ōe lâi khòaⁿ in ê sin-si, m̄-chún lâng kā in bâi-chòng tī bōng-ni̍h. 10 Tòa tī tōe-bīn-chiūⁿ ê lâng ōe in-ūi in ê sí lâi hoaⁿ-hí khoài-lo̍k, kau-ōaⁿ lé-mi̍h; in-ūi chit nn̄g ê sian-ti ū hō͘ tōe-chiūⁿ ê lâng siū-tio̍h khó͘-chhó͘. 11 Saⁿ ji̍t pòaⁿ kè liáu, tùi Siōng-tè hia ū oa̍h-khì ji̍p-khì in lāi-bīn, in chiū peh khí-lâi khiā; khòaⁿ-tio̍h ê lâng tōa kiaⁿ-hiâⁿ. 12 In nn̄g lâng thiaⁿ-kìⁿ tùi thiⁿ lâi tōa ê siaⁿ tùi in kóng, “Khí-lâi chia!” In chiū tī tùi-te̍k ê bīn-chêng chē hûn chiūⁿ-thiⁿ. 13 Tú hit sî, ū tōa tōe-tāng, hit chō siâⁿ tó cha̍p-hūn-chi̍t; in-ūi tōe-tāng sí-khì ê ū chhit-chheng lâng; kî-tha ê lâng tōa kiaⁿ-hiâⁿ, kui êng-kng hō͘ thiⁿ-téng ê Siōng-tè. 14 Tē-jī ê chai-hō í-keng kè; tē-saⁿ ê chai-hō liâm-piⁿ kàu. 15 Tē-chhit ê thiⁿ-sài pûn, thiⁿ-téng ū tōa ê siaⁿ, kóng: Sè-kan ê kok chiâⁿ-chòe lán ê Chú kap I ê Ki-tok ê kok; I beh éng-éng oán-oán choh-ông. 16 Tī Siōng-tè bīn-chêng chē tī in ê chō-ūi ê jī-cha̍p-sì ê tiúⁿ-ló, bīn phak lo̍h-khì kèng-pài Siōng-tè, 17 kóng: Hiān-chāi chûn-chāi, kè-khì chûn-chāi Choân-lêng ê Chú Siōng-tè, goán kám-siā lí; in-ūi lí í-keng chiáng-ak tāi-koân; lí í-keng choh-ông. 18 Gōa-pang tōa siū-khì, lí mā hoat siū-khì; sí-lâng siū sím-phòaⁿ ê sî-ki kàu lah. Lí ê lô͘-po̍k --- sian-ti, lí ê sìn-tô͘, kap kèng-ùi lí ê miâ ê, bô-lūn tōa-ê sòe-ê, lí pò-siúⁿ in ê sî-ki kàu lah. Pāi-hoāi tōe ê, lí pāi-hoāi in ê sî-ki kàu lah. 19 Tī thiⁿ-téng ê Siōng-tè ê sèng-tiān chiū khui; tī sèng-tiān-lāi I ê Iok-kūi khòaⁿ hiān-hiān; hut-jiân ū sih-nà, hiáng-siaⁿ, lûi tân, tōe-tāng, kap tōa phau̍h.

Khé-sī-lio̍k 12

1 Āu-lâi, tī thiⁿ-téng ū chi̍t ê tōa kéng-siōng chhut-hiān: Ū chi̍t ê hū-jîn-lâng chhēng ji̍t-thâu, kha ta̍h ge̍h-niû, thâu tì cha̍p-jī lia̍p chhiⁿ ê hoa-koan. 2 I ū hoâi-īn, teh-beh siⁿ-kiáⁿ, chhui-chūn, thàng-thiàⁿ, âu-kiò. 3 Tī thiⁿ-téng koh ū chi̍t ê kéng-siōng chhut-hiān: Ū chi̍t bé chhiah-sek ê tōa bé lêng, i ū chhit ê thâu, cha̍p ki kak; chhit ê thâu tì chhit téng ông-koan. 4 I ēng bé-liu kā thiⁿ-téng saⁿ-hūn-chi̍t ê chhiⁿ sàu-lo̍h tōe. Hit bé lêng khiā tī teh-beh siⁿ-kiáⁿ ê hū-jîn-lâng ê bīn-chêng, thèng-hāu i ê kiáⁿ siⁿ chhut-lâi thang kā i thun lo̍h-khì. 5 Hit-ê hū-jîn-lâng siⁿ chi̍t ê ta-po͘-kiáⁿ, i beh ēng thih-koáiⁿ tī-lí bān-kok. M̄-kú, i ê kiáⁿ hō͘ lâng chiap-khì Siōng-tè bīn-chêng, kàu I ê pó-chō hia. 6 Hit-ê hū-jîn-lâng tô-cháu khì khòng-iá, tī hia Siōng-tè ū kā i pī-pān chi̍t ê só͘-chāi, hō͘ i thang tit-tio̍h chiàu-kò͘ chi̍t-chheng nn̄g-pah la̍k-cha̍p ji̍t. 7 Āu-lâi tī thiⁿ-téng ū chiàn-cheng. [Bí-ka-le̍k] kap i ê sù-chiá khì kap hit bé lêng kau-chiàn, lêng mā kap i ê sù-chiá khí-lâi èng-chiàn. 8 Lêng thâi su, i kap i ê sù-chiá tī thiⁿ-téng chiū bô só͘-chāi thang tòa. 9 Hit bé tōa bé lêng chiū siū hiat lo̍h-khì; i chiū-sī hit bé lāu-chôa, kiò-chòe Mô͘-kúi, Sat-tàn, choân jîn-lūi ê bê-he̍k-chiá; i siū hiat-lo̍h tōe, i ê sù-chiá mā lóng kap i chòe-hé siū hiat-lo̍h tōe. 10 Āu-lâi góa thiaⁿ-kìⁿ tī thiⁿ-téng ū tōa ê siaⁿ kóng: Hiān-chāi lán ê Siōng-tè ê chín-kiù, koân-lêng, kap chú-koân í-keng si̍t-hiān! I í-keng hián-sī I ê Ki-tok ê koân-pèng! Hit-ê mî-ji̍t tī lán ê Siōng-tè bīn-chêng khòng-kò lán ê hiaⁿ-tī chí-bē ê í-keng siū hiat lo̍h-khì. 11 In khò Iûⁿ-ko ê huih, kap in só͘ kiàn-chèng ê sìn-sit í-keng khah-iâⁿ hit bé lêng; in sīm-chì kàu sí to bô sioh ka-kī ê sìⁿ-miā. 12 Só͘-í, chiah-ê thiⁿ kap tiàm tī hit tiong-kan ê, lín lóng tio̍h hoaⁿ-hí! Chóng-sī, tōe kap hái chhám à, in-ūi Mô͘-kúi í-keng khì-phut-phut lo̍h-khì lín hia, i chai-iáⁿ ka-kī ê sî bô kú lah. 13 Hit bé lêng chi̍t-ē chai ka-kī í-keng siū hiat-lo̍h tōe, chiū khì jip hit-ê siⁿ ta-po͘-kiáⁿ ê hū-jîn-lâng. 14 Hū-jîn-lâng ū tit-tio̍h tōa chiah eng-chiáu ê nn̄g ki si̍t thang pe-khì khòng-iá, kàu i ka-kī ê só͘-chāi, tī hia tit-tio̍h chiàu-kò͘ saⁿ nî pòaⁿ kú, bô siū-tio̍h lāu-chôa ê kong-kek. 15 Hit bé chôa tī hū-jîn-lâng ê āu-bīn, tùi chhùi thò͘-chhut chhin-chhiūⁿ tōa-hô ê chúi beh kā i chhiong-cháu. 16 M̄-kú, tāi-tōe pang-chān hū-jîn-lâng, khui-chhùi kā hit bé lêng thò͘ chhut-lâi ê hô-chúi thun lo̍h-khì. 17 Lêng chiū tùi hū-jîn-lâng hoat siū-khì, khì kap hū-jîn-lâng kî-tha ê kiáⁿ-sun, chiū-sī hiah-ê chun-siú Siōng-tè ê bēng-lēng í-ki̍p ūi-tio̍h Iâ-so͘ chòe kiàn-chèng ê lâng, kau-chiàn. 18 Āu-lâi, hit bé lêng khì khiā tī hái-phiâⁿ ê soa téng.

Khé-sī-lio̍k 13

1 Āu-lâi, góa ū khòaⁿ-kìⁿ chi̍t chiah siù tùi hái-ni̍h khí-lâi; i ū cha̍p ki kak, chhit ê thâu; cha̍p ki kak ū tì cha̍p téng ông-koan; ta̍k ê thâu-khak téng lóng ū pòng-to̍k Siōng-tè ê miâ-hō. 2 Góa só͘ khòaⁿ-kìⁿ hit chiah siù chhin-chhiūⁿ pà; i ê kha chhin-chhiūⁿ hîm ê kha, chhùi chhin-chhiūⁿ sai ê chhùi. Hit bé lêng chiong i ê lêng-le̍k, ông-chō, kap tōa koân-pèng kau hō͘ hit chiah siù. 3 Siù ê chi̍t ê thâu-khak chhin-chhiūⁿ ū siū-tio̍h tì-miā ê tāng-siong, m̄-kú i ê tì-miā-siong ū tit-tio̍h i-hó. Thong sè-kài ê lâng lóng kám-kak chin hi-kî, khì tè tī siù ê āu-bīn. 4 In lóng pài hit bé lêng, in-ūi lêng ū chiong i ê koân-pèng kau hō͘ siù; in mā pài siù, kóng, “Siáⁿ-lâng ōe-tàng kap chit chiah siù saⁿ-pí? Siáⁿ-lâng ōe-tàng kap i kau-chiàn?” 5 Āu-lâi, chit chiah siù ū tit-tio̍h chi̍t ê kóng tōa-ōe kap húi-pòng ê chhùi; i tit-tio̍h ún-chún thang chip-hêng koân-pèng sì-cha̍p-jī ge̍h-ji̍t kú. 6 I khui-chhùi húi-pòng Siōng-tè, húi-pòng I ê miâ kap I ê pò͘-pîⁿ, chiū-sī hiah-ê tòa tī thiⁿ-téng ê lâng. 7 I mā tit-tio̍h ún-chún thang kong-kek sìn-tô͘, kā in cheng-ho̍k; i koh tit-tio̍h koân thang tī-lí ta̍k ê cho̍k-kûn, ta̍k ê bîn-cho̍k, ta̍k khoán gú-giân, kap ta̍k ê pang-kok. 8 Só͘-ū tòa tī tōe-chiūⁿ ê lâng, in ê miâ, tī chhòng-chō sè-kài í-lâi, bô kì tī siū thâi ê Iûⁿ-ko ê oa̍h-miā-chheh ê, lóng ōe pài hit chiah siù. 9 Ū hīⁿ-khang ê lóng tio̍h thiaⁿ: 10 Hit-ê eng-kai siū lia̍h ê tio̍h siū lia̍h; hit-ê eng-kai siū sat-hāi ê tio̍h siū to sat-hāi. In-ūi án-ni, sìn-tô͘ tio̍h ū nāi-sim kap sìn-sim. 11 Āu-lâi, góa ū khòaⁿ-kìⁿ koh ū chi̍t chiah siù tùi tōe-ni̍h khí-lâi; i ū nn̄g ki kak chhin-chhiūⁿ iûⁿ ê kak, kóng-ōe chhin-chhiūⁿ lêng. 12 I tī thâu-chi̍t chiah siù ê bīn-chêng chip-hêng thâu-chi̍t chiah siù ê koân-pèng. I kiò tōe kap tòa tī tōe-chiūⁿ ê lâng khì pài thâu-chi̍t chiah siù, chiū-sī siū-tio̍h tì-miā-siong koh tit-tio̍h i-hó hit chiah siù. 13 I kiâⁿ tōa kî-chek, tī lâng ê bīn-chêng kiò hé tùi thiⁿ kàng-lo̍h tōe; 14 koh ēng siū ún-chún tī siù ê bīn-chêng kiâⁿ ê kî-chek lâi bê-he̍k tōe-chiūⁿ ê lâng, hoan-hù in tio̍h kā hit chiah siū to-siong iáu oa̍h-teh ê siù chō chi̍t chō siōng. 15 I koh siū ún-chún chiong oa̍h-khì pûn ji̍p-khì siù ê siōng, hō͘ siù ê siōng ōe kóng-ōe, koh sat-hāi só͘-ū bô pài siù ê siōng ê lâng. 16 I mā kā chèng-lâng, bô-lūn tōa-ê sòe-ê, hó-gia̍h sàn-chhiah, chū-iû-ê choh lô͘-po̍k-ê, tī in ê chiàⁿ-chhiú á-sī thâu-hia̍h khàm-ìn chòe kì-hō. 17 Bô khàm siù ê miâ, á-sī bô tāi-piáu i ê miâ ê sò͘-jī ê, chiū bōe-tàng bóe bōe. 18 Tùi chit-ê tāi-chì tio̍h ū tì-hūi. Chhong-bêng ê lâng tio̍h sǹg-chhut siù ê sò͘-jī, in-ūi sò͘-jī tāi-piáu chi̍t ê lâng ê miâ, chit-ê sò͘-jī sī la̍k-pah la̍k-cha̍p-la̍k.

Khé-sī-lio̍k 14

1 Āu-lâi góa koh khòaⁿ, ū khòaⁿ-kìⁿ Iûⁿ-ko khiā tī [Sek-an]-soaⁿ, ū cha̍p-sì-bān sì-chheng lâng kap I chòe-hé; in ê thâu-hia̍h lóng ū siá Iûⁿ-ko ê miâ kap I ê Pē ê miâ. 2 Góa thiaⁿ-kìⁿ ū siaⁿ tùi thiⁿ-téng chhut-lâi, chhin-chhiūⁿ tōa-chúi teh chhiâng ê siaⁿ, koh chhin-chhiūⁿ chhè-lûi ê siaⁿ; góa só͘ thiaⁿ-kìⁿ chit-ê siaⁿ chhin-chhiūⁿ khîm-su teh tôaⁿ khiā-khîm ê siaⁿ. 3 In tī pó-chō kap sì ê oa̍h-mi̍h í-ki̍p chèng tiúⁿ-ló ê bīn-chêng chhiùⁿ chi̍t siú sin ê koa, chit siú koa tû-liáu tùi tōe-chiūⁿ sio̍k-hôe hit cha̍p-sì-bān sì-chheng lâng bô-lâng ōe-tàng o̍h. 4 In sī m̄-bat chhin-kūn lú-sèng ê tông-lâm. Iûⁿ-ko bô-lūn khì sím-mi̍h só͘-chāi, in lóng tè kàu hia. In sī tùi jîn-lūi tiong-kan sio̍k-hôe chhut-lâi chòe khí-thâu sek ê ké-chí hiàn hō͘ Siōng-tè kap Iûⁿ-ko ê. 5 In m̄-bat kóng pe̍h-chha̍t, lóng bô khoat-tiám. 6 Góa koh khòaⁿ-kìⁿ lēng-gōa chi̍t ê thiⁿ-sài tī pòaⁿ khong-tiong teh pe; i ū éng-oán ê hok-im beh thoân hō͘ tiàm tī tōe-chiūⁿ ê lâng, hō͘ ta̍k ê pang-kok, ta̍k ê cho̍k-kûn, ta̍k khoán gú-giân, kap ta̍k ê bîn-cho̍k. 7 I tōa-siaⁿ kóng, “Tio̍h kèng-ùi Siōng-tè, kui êng-kng hō͘ I! In-ūi I sím-phòaⁿ jîn-lūi ê sî kàu lah; tio̍h kèng-pài hit-ūi chhòng-chō thiⁿ, tōe, hái, kap chúi-goân ê Chú.” 8 Lēng-gōa ū tē-jī ê thiⁿ-sài sòa lo̍h-khì kóng, “Tó lo̍h-khì lah! Hō͘ bān-kok lim i îm-loān ê lia̍t-chiú ê tōa [Pa-pí-lûn] tó lo̍h-khì lah!” 9 Lēng-gōa ū tē-saⁿ ê thiⁿ-sài sòa lo̍h-khì tōa-siaⁿ kóng, “Nā ū lâng pài hit chiah siù kap siù ê siōng, thâu-hia̍h á-sī chhiú ū khàm-ìn, 10 hit-ê lâng mā tio̍h lim Siōng-tè siū-khì ê chiú, chiū-sī thîn tī Siōng-tè siū-khì ê poe ê sûn-chiú. I ōe tī sèng thiⁿ-sài kap Iûⁿ-ko ê bīn-chêng siū-tio̍h hé kap liû-hông ê khó͘-chhó͘. 11 Khó͘-chhó͘ in ê hé-ian chhèng chiūⁿ-koân, éng-oán bô-thêng. Hiah-ê pài hit chiah siù kap siù ê siōng, í-ki̍p ū khàm-tio̍h siù ê miâ ê ìn ê lâng mî-ji̍t lóng bōe-tàng an-hioh.” 12 In-ūi án-ni, chun-siú Siōng-tè ê bēng-lēng koh kian-chhî sìn Iâ-so͘ ê sìn-tô͘ tio̍h ū nāi-sim. 13 Góa koh thiaⁿ-kìⁿ tùi thiⁿ ū siaⁿ kóng, “Lí tio̍h siá khí-lâi! Tùi taⁿ í-āu ūi-tio̍h Chú sòng-sit sìⁿ-miā ê lâng chin ū hok-khì!” Sèng Sîn kóng, “Sī, in ōe thoat-lī lô-khó͘ tit-tio̍h an-hioh, in-ūi in ê só͘-chòe ōe tit-tio̍h jīn-tēng.” 14 Āu-lâi, góa koh khòaⁿ, ū khòaⁿ-kìⁿ chi̍t phìⁿ pe̍h hûn, hûn-téng chē chi̍t ūi chhin-chhiūⁿ Jîn-chú ê, thâu-khak tì kim hoa-koan, chhiú gia̍h chi̍t ki lāi ê liâm-le̍k-á. 15 Koh ū chi̍t ê thiⁿ-sài tùi sèng-tiān hia chhut-lâi, tùi chē tī hûn-téng Hit-ūi tōa-siaⁿ hoah, “Tio̍h gia̍h liâm-le̍k-á lâi siu-koah; in-ūi siu-koah ê sî í-keng kàu, tōe-chiūⁿ ê lông-chok-bu̍t í-keng chin sek lah.” 16 Chē tī hûn-téng Hit-ūi chiū chiong liâm-le̍k-á hiat-lo̍h tōe, tōe-chiūⁿ ê lông-chok-bu̍t chiū siu-sêng. 17 Lēng-gōa chi̍t ê thiⁿ-sài tùi thiⁿ-téng ê sèng-tiān chhut-lâi, i mā gia̍h chi̍t ki lāi ê liâm-le̍k-á. 18 Koh lēng-gōa chi̍t ê koán hé ê thiⁿ-sài tùi chè-tôaⁿ hia chhut-lâi, tōa-siaⁿ tùi gia̍h lāi ê liâm-le̍k-á hit-ê thiⁿ-sài hoah, kóng, “Ēng lí lāi ê liâm-le̍k-á koah tōe-chiūⁿ kui pha ê phû-tô, in-ūi phû-tô í-keng sek lah.” 19 Thiⁿ-sài chiū chiong liâm-le̍k-á hiat-lo̍h tōe, koah tōe-chiūⁿ ê phû-tô, chiong phû-tô hiat lo̍h-khì Siōng-tè tōa siū-khì ê chiú-khut. 20 Phû-tô tī siâⁿ-gōa ê chiú-khut hō͘ lâng ta̍h, chiū ū huih tùi chiú-khut lâu chhut-lâi, tāi-iok ū nn̄g kong-chhioh chhim, saⁿ-pah kong-lí tn̂g.

Khé-sī-lio̍k 15

1 Āu-lâi, góa koh khòaⁿ-kìⁿ tī thiⁿ-téng ū lēng-gōa chi̍t ê tōa koh kî-īⁿ ê kéng-siōng chhut-hiān, ū chhit ê thiⁿ-sài chiáng-koán chòe-āu chhit ê chai-hō, in-ūi Siōng-tè beh kàng chiah-ê chai-hō, chiong I ê siū-khì piàⁿ kàu-chīn. 2 Góa koh khòaⁿ-kìⁿ chhin-chhiūⁿ ū hé chham tī lāi-bīn ê po-lê-hái, mā khòaⁿ-kìⁿ hiah-ê tek-sèng ê lâng, in chiū-sī í-keng thoat-lī hit chiah siù, siù ê siōng, kap ēng sò͘-jī lâi tāi-piáu miâ-jī hiah-ê lâng. In khiā tī po-lê hái-ni̍h, chhiú the̍h Siōng-tè hō͘ in ê khiā-khîm. 3 In chhiùⁿ Siōng-tè ê lô͘-po̍k Mô͘-se ê koa kap Iûⁿ-ko ê koa, kóng: Chú, Choân-lêng ê Siōng-tè, lí ê chok-ûi tōa koh kî-īⁿ; bān ông ê Ông, lí ê tō-lō͘ kong-gī chin-si̍t. 4 Chú ah, sím-mi̍h lâng káⁿ bô kèng-ùi lí, káⁿ bô êng-kng lí ê miâ? In-ūi chí-ū lí sī sèng; bān-kok lóng ōe lâi, tī lí ê bīn-chêng kèng-pài lí; in-ūi lí kong-gī ê chok-ûi í-keng hián-bêng. 5 Góa koh khòaⁿ-kìⁿ thiⁿ-téng ê sèng-tiān í-keng khui, lāi-bīn ū hē kiàn-chèng ê Hōe-bō͘. 6 Chiáng-koán chhit ê chai-hō ê chhit ê thiⁿ-sài tùi sèng-tiān chhut-lâi, chhēng chheng-khì koh kng-liāng ê iù-môa-pò͘ ê saⁿ, heng-khám hâ kim-tòa. 7 Sì ê oa̍h-mi̍h ê chi̍t ê chiong chhit ê kim-óaⁿ kau hō͘ hit chhit ê thiⁿ-sài, lāi-bīn tóe móa éng-oán oa̍h-teh ê Siōng-tè ê siū-khì. 8 Sèng-tiān lāi chhiong-móa tùi Siōng-tè ê êng-kng kap koân-lêng chhèng chhut-lâi ê ian, it-ti̍t kàu chhit ê thiⁿ-sài só͘ chiáng-koán hit chhit ê chai-hō kiat-sok í-chêng, bô-lâng ōe-tàng chìn-ji̍p sèng-tiān.

Khé-sī-lio̍k 16

1 Āu-lâi, góa thiaⁿ-kìⁿ ū tōa ê siaⁿ tùi tiān-ni̍h chhut-lâi kā hit chhit ê thiⁿ-sài kóng, “Lín khì, chiong hit chhit óaⁿ Siōng-tè ê siū-khì piàⁿ-lo̍h tōe.” 2 Thâu-chi̍t ê thiⁿ-sài chiū khì, chiong i hit óaⁿ piàⁿ-lo̍h tōe, hiah-ê ū siù ê kì-hō kap pài kè siù ê siōng ê lâng chiū siⁿ chhàu koh to̍k ê chhng. 3 Tē-jī ê thiⁿ-sài chiong i hit óaⁿ piàⁿ-lo̍h hái, hái-chúi chiū pìⁿ-chòe chhin-chhiūⁿ sí-lâng ê huih, hái-ni̍h ê oa̍h-mi̍h lóng sí-khì. 4 Tē-saⁿ ê thiⁿ-sài chiong i hit óaⁿ piàⁿ-lo̍h kang-hô kap chúi-chôaⁿ, chúi chiū pìⁿ-chòe huih. 5 Góa thiaⁿ-kìⁿ chiáng-koán chúi ê thiⁿ-sài kóng: Hiān-chāi chûn-chāi, chá chûn-chāi, chì-sèng ê Siōng-tè, lí sī kong-gī, lí ê sím-phòaⁿ kong-chèng. 6 In-ūi in ū lâu sìn-tô͘ kap sian-ti ê huih, hiān-chāi lí ēng huih hō͘ in lim. Che sī in èng siū ê pò-èng. 7 Āu-lâi góa thiaⁿ-kìⁿ chè-tôaⁿ ū siaⁿ kóng: Sī lah, Choân-lêng ê Chú Siōng-tè, lí ê sím-phòaⁿ chin-si̍t kong-gī. 8 Tē-sì ê thiⁿ-sài chiong i hit óaⁿ piàⁿ tī ji̍t-thâu, ji̍t-thâu chiū tit-tio̍h koân ēng iām-hé sio lâng. 9 Lâng hō͘ tōa iām-hé sio chiū húi-pòng ū koân chiáng-koán chiah-ê chai-hō ê Siōng-tè ê miâ; in iáu-kú bô hóe-kái, bô kui êng-kng hō͘ Siōng-tè. 10 Tē-gō͘ ê thiⁿ-sài chiong i hit óaⁿ piàⁿ tī hit chiah siù ê chō-ūi, siù ê ông-kok chiū pìⁿ-chòe o͘-àm, lâng in-ūi thòng-khó͘ kā-chi̍h, 11 koh in-ūi thòng-khó͘ kap to̍k-chhng siat-to̍k thiⁿ-téng ê Siōng-tè; in iáu-kú bô hóe-kái lâi kái-piàn in ê só͘-chòe. 12 Tē-la̍k ê thiⁿ-sài chiong i hit óaⁿ piàⁿ-lo̍h [Iù-hoat-la̍h-tí] tōa-hô, hô-chúi chiū ta-khì, ūi-tio̍h tùi tang-hng lâi hiah-ê kun-ông chún-pī chi̍t tiâu lō͘. 13 Góa koh khòaⁿ-kìⁿ ū saⁿ ê bô chheng-khì ê sîn, chhin-chhiūⁿ chhân-kap-á, tùi lêng ê chhùi, siù ê chhùi, kap ké sian-ti ê chhùi chhut-lâi. 14 Chiah-ê sī ōe kiâⁿ kî-chek ê ok-mô͘ ê sîn, in chhut-khì chio-chi̍p phó͘-thiⁿ-ē ê kun-ông, tī Choân-lêng ê Siōng-tè só͘ tiāⁿ-tio̍h hit-ê tōa Ji̍t-chí chhut-lâi kau-chiàn. 15 “Tio̍h chù-ì! Góa ōe chhin-chhiūⁿ chha̍t lâi. Hit-ê chhíⁿ-chhíⁿ, saⁿ chhēng piān-piān ê lâng chin ū hok-khì, in sî kàu m̄-bián thǹg-theh kiâⁿ, chiah-bián hō͘ lâng khòaⁿ-tio̍h i chhiah-sin lō͘-thé ê kiàn-siàu.” 16 Hiah-ê ok-mô͘ ê sîn chiū chū-chi̍p phó͘-thiⁿ-ē ê ông tī chi̍t ê só͘-chāi, [Hi-pek-lâi]-ōe kiò-chòe [Hap-má-kiat-tùn]. 17 Tē-chhit ê thiⁿ-sài chiong i hit óaⁿ piàⁿ tī khong-tiong, chiū ū tōa ê siaⁿ tùi sèng-tiān ê pó-chō hoat-chhut, kóng, “Oân-sêng lah!” 18 Hit sî ū sih-nà, hiáng-siaⁿ, lûi, kap tōa tōe-tāng; tōe-chiūⁿ ū jîn-lūi í-lâi m̄-bat ū chiah-ni̍h tōa ê tōe-tāng. 19 Hit-ê tōa-siâⁿ [Pa-pí-lûn] chiū li̍h-chòe saⁿ tè, lia̍t-kok ê siâⁿ-chhī mā tó-hoāi. Siōng-tè kì-tit tōa [Pa-pí-lûn]-siâⁿ, hō͘ i lim hit poe tóe Siōng-tè ke̍k tōa siū-khì ê chiú. 20 Só͘-ū ê hái-tó lóng cháu bô-khì, soaⁿ mā bô koh khòaⁿ-kìⁿ. 21 Jiân-āu tùi thiⁿ-téng ū lo̍h tōa-phau̍h lâi tìm lâng, ta̍k tè tāng iok gō͘-cha̍p kong-kun, lâng ūi-tio̍h phau̍h ê chai-hō chiū siat-to̍k Siōng-tè, in-ūi chit-ê chai-hō hui-siông giâm-tiōng.

Khé-sī-lio̍k 17

1 Hiah-ê the̍h chhit tè óaⁿ ê chhit ê thiⁿ-sài ê chi̍t ê lâi kap góa kóng-ōe, kóng, “Lâi, góa beh hō͘ lí khòaⁿ chē tī hô-liû téng hit-ê tōa îm-hū só͘ tio̍h siū ê sím-phòaⁿ. 2 Tōe-chiūⁿ ê kun-ông bat kap i kiâⁿ-îm; tōe-chiūⁿ ê chū-bîn mā bat lim i îm-loān ê chiú lim kàu chiú-chùi.” 3 Góa siū Sèng Sîn kám-tōng, hō͘ thiⁿ-sài chhōa khì khòng-iá. Góa ū khòaⁿ-kìⁿ chi̍t ê hū-jîn-lâng chē tī chi̍t chiah chu-âng sek, koh chhiong-móa siat-to̍k ê miâ-hō ê siù téng-bīn; chit chiah siù ū chhit ê thâu, cha̍p ki kak. 4 Chit-ê hū-jîn-lâng chhēng chí-sek kap chu-âng sek ê saⁿ, ēng kim, pó-chio̍h kap chin-chu chng-thāⁿ, chhiú the̍h kim poe, tóe móa khó-ò͘ⁿ ê mi̍h kap îm-loān ê ù-òe. 5 I ê thâu-hia̍h ū siá chi̍t ê miâ, ū ún-ba̍t ê ì-sù, chiū-sī “Tōa [Pa-pí-lûn], tōe-chiūⁿ îm-hū kap khó-ò͘ⁿ ê mi̍h ê lāu-bú”. 6 Góa khòaⁿ-kìⁿ hit-ê hū-jîn-lâng lim sìn-tô͘ ê huih kap ūi-tio̍h Iâ-so͘ chòe kiàn-chèng ê sûn-tō-chiá ê huih, lim kàu chùi. Góa khòaⁿ-tio̍h i ê sî tōa tio̍h-kiaⁿ. 7 Thiⁿ-sài chiū kā góa kóng, “Sī án-chóaⁿ tio̍h-kiaⁿ? Góa beh chiong chit-ê hū-jîn-lâng kap i só͘ khiâ hit chiah ū chhit ê thâu cha̍p ki kak ê siù ê pì-bi̍t kā lí kóng. 8 Lí só͘ khòaⁿ-tio̍h hit chiah siù, chá ū, hiān-chāi bô, teh-beh koh tùi chhim-ian khí-lâi, chòe-āu bia̍t-bông. Tōe-chiūⁿ ê chū-bîn, in ê miâ tùi chhòng-sè í-lâi bô kì tī oa̍h-miā-chheh ê, khòaⁿ-tio̍h hit chiah siù ōe tio̍h-kiaⁿ kî-koài, in-ūi hit chiah siù chá ū, hiān-chāi bô, āu-lâi ōe-koh chhut-hiān. 9 “Chit-ê tāi-chì tio̍h ēng tì-hūi lâi lí-kái. Hit chhit ê thâu chiū-sī hū-jîn-lâng só͘ chē ê chhit chō soaⁿ, in mā-sī chhit ê ông. 10 Kî-tiong gō͘ ê í-keng tó lo̍h-khì, chi̍t ê iáu tī-teh, lēng-gōa chi̍t ê iáu-bē lâi, nā lâi i it-tēng chiām-sî lâu-teh nā-tiāⁿ. 11 Chá ū, hiān-chāi bô hit chiah siù chiū-sī tē-poeh ê ông, sī chhit ê ông ê tiong-kan ê chi̍t ê, in mā ōe bia̍t-bông. 12 “Lí só͘ khòaⁿ-tio̍h ê cha̍p ki kak chiū-sī hit cha̍p ê iáu m̄-bat thóng-tī ê ông; m̄-kú in ōe tit-tio̍h koân choh-ông kap siù chòe-hé thóng-tī chi̍t tiám cheng kú. 13 Chit cha̍p ê ông tông-ì chiong in ê lêng-le̍k kap koân-pèng kau hō͘ hit chiah siù. 14 In beh kap Iûⁿ-ko kau-chiàn, m̄-kú Iûⁿ-ko ōe thâi-iâⁿ chiah-ê ông, in-ūi I sī bān chú ê Chú, bān ông ê Ông; kap I chòe-hé hiah-ê siū ho͘-tiàu, siū kéng-soán, tiong-si̍t ê lâng mā ōe tek-sèng.” 15 Thiⁿ-sài koh kā góa kóng, “Lí só͘ khòaⁿ-tio̍h hit-ê îm-hū chē-teh ê hô-liû, chiū-sī ta̍k ê bîn-cho̍k, ta̍k ê kûn-chiòng, ta̍k ê pang-kok, kap ta̍k khoán gú-giân ê lâng. 16 Lí só͘ khòaⁿ-tio̍h hit cha̍p ki kak kap hit chiah siù ōe oàn-hūn hit-ê îm-hū, mā ōe hō͘ i bô i-óa, chhiah-sin lō͘-thé; in ōe thun-chia̍h i ê bah, koh ēng hé kā i sio-bia̍t. 17 In-ūi Siōng-tè chiong chip-hêng I ê chí-ì ê ì-liām hē tī hit cha̍p ê ông ê sim, hō͘ in tâng-sim chiong in ê kok kau hō͘ hit chiah siù, ti̍t-kàu Siōng-tè ê ōe èng-giām. 18 Lí só͘ khòaⁿ-tio̍h hit-ê hū-jîn-lâng chiū-sī teh chiáng-koán tōe-chiūⁿ hiah-ê kun-ông hit chō tōa-siâⁿ.”

Khé-sī-lio̍k 18

1 Āu-lâi, góa ū khòaⁿ-kìⁿ lēng-gōa chi̍t ê thiⁿ-sài tùi thiⁿ-téng lo̍h-lâi. I ū tōa koân-pèng; i ê êng-kng hō͘ tōe-chiūⁿ kng khí-lâi. 2 I tōa-siaⁿ hoah: Tó lo̍h-khì lah! Tōa [Pa-pí-lûn] tó lo̍h-khì lah! Chit-ê siâⁿ chiâⁿ-chòe kúi khiā-khí ê só͘-chāi, it-chhè ù-òe ê sîn ê kaⁿ-lô, it-chhè ù-òe ê chiáu ê chiáu-lang, it-chhè ù-òe koh khó-ò͘ⁿ ê iá-siù ê lông-á. 3 In-ūi lia̍t-kok lóng ū lim-tio̍h chit-ê îm-hū îm-loān ê chiú ín-khí Siōng-tè tōa siū-khì, tōe-chiūⁿ ê kun-ông lóng ū kap i kiâⁿ-îm, tōe-chiūⁿ ê seng-lí-lâng lóng ū tùi i ê chhia-hoa hòng-tōng hoat tōa-châi. 4 Góa koh ū thiaⁿ-kìⁿ lēng-gōa chi̍t ê siaⁿ tùi thiⁿ-téng chhut-lâi, kóng: Góa ê chú-bîn ah, chhut-lâi, tio̍h tùi îm-hū hia chhut-lâi, chiah-bián bak-tio̍h i ê chōe, chiah-bián hō͘ i ê chai-hō liân-lūi-tio̍h. 5 In-ūi i ê chōe í-keng lúi-chek tú thiⁿ, Siōng-tè kì-tit i ê siâ-ok. 6 I án-chóaⁿ khoán-thāi lâng, tio̍h chiàu án-ni khoán-thāi i, chiàu i ê só͘-chòe ka-pē kā i pò-èng, ēng i tiâu-hô chiú ê poe, tiâu-hô ka-pē ê chiú hō͘ i! 7 I bat án-chóaⁿ êng-kng ka-kī, án-chóaⁿ chhia-hoa, tio̍h chiàu án-ni hō͘ i thòng-khó͘ pi-siong. In-ūi i sim-lāi ka-kī kóng: Góa chē tī pó-chō choh lú-ông; góa m̄-sī kóaⁿ-hū, choa̍t-tùi bōe tú-tio̍h choh kóaⁿ-hū ê pi-siong. 8 Só͘-í, tī chi̍t ji̍t lāi un-e̍k ōe kàu --- ū sí-bông, pi-siong, ki-hng. I ōe hō͘ hé sio-bia̍t, in-ūi sím-phòaⁿ i ê Chú Siōng-tè ū tōa khùi-la̍t. 9 Kap i kiâⁿ-îm, kè chhia-hoa seng-oa̍h chiah-ê tōe-chiūⁿ ê ông, khòaⁿ-tio̍h siâⁿ tio̍h-hé-sio ê ian, ōe ūi-tio̍h siâⁿ pi-siong thî-khàu. 10 In khòaⁿ-tio̍h siâⁿ só͘ siū ê kan-khó͘ chin kiaⁿ-hiâⁿ, lóng khiā hn̄g-hn̄g, kóng: Chhám à, chit-ê tōa-siâⁿ! [Pa-pí-lûn] chit-ê kian-kò͘ ê siâⁿ, chhám à! In-ūi bô jōa kú, lí chiū ōe siū-tio̍h sím-phòaⁿ! 11 Tōe-chiūⁿ ê seng-lí-lâng ūi-tio̍h i thî-khàu ai-siong, in-ūi bô-lâng koh bóe in ê hè, 12 chiū-sī kim, gûn, pó-chio̍h, chin-chu; iù-môa-pò͘, si-tiû, ko-kùi ê chí-sek kap âng-sek pò͘-liāu; ta̍k chióng hiuⁿ-chhâ, ta̍k khoán chhiūⁿ-gê chè-phín, ta̍k khoán kùi-khì ê bo̍k-chhâi chè-phín, tâng-khì, thih-khì, kap tāi-lí-chio̍h chè-phín; 13 jio̍k-kùi, phang-liāu, hiuⁿ, jú-hiuⁿ; chiú, ka-ná-iû, iù mī-hún, be̍h; gû, iûⁿ, bé, bé-chhia, lô͘-lē, í-ki̍p lâng. 14 Chiah-ê seng-lí-lâng tùi i kóng: Lí ê sim só͘ ì-ài hiah-ê hó-mi̍h lóng bô-khì; lí ê êng-hôa hù-kùi lóng siau-sit, éng-oán bōe-tàng koh khòaⁿ-tio̍h. 15 Khò chit-ê siâⁿ chòe seng-lí hoat tōa-châi ê seng-lí-lâng, in-ūi khòaⁿ-tio̍h chit-ê siâⁿ só͘ siū ê khó͘-chhó͘ chin kiaⁿ-hiâⁿ, lóng ōe khiā hn̄g-hn̄g pi-siong thî-khàu, 16 kóng: Chhám à, chhám à, chit-ê tōa-siâⁿ! Lí koàn-sì chhēng iù-môa-pò͘, ko-kùi ê chí-sek kap âng-sek pò͘-liāu ê saⁿ, kòa kim, pó-chio̍h, kap chin-chu chòe chng-thāⁿ. 17 Chi̍t-sî-á kú, só͘-ū ê châi-hù lóng bô-khì. Só͘-ū ê chûn-tiúⁿ, lú-kheh, chúi-siú, kap só͘-ū khò hái seng-oa̍h ê lâng, khiā hn̄g-hn̄g, 18 khòaⁿ-tio̍h siâⁿ tio̍h-hé-sio ê ian, lóng hoah: Ū tó chi̍t ê siâⁿ chhin-chhiūⁿ chit-ê tōa-siâⁿ? 19 In sám thô͘-hún tī ka-kī ê thâu-khak téng, thî-khàu pi-siong tōa-siaⁿ hoah: Chhám à, chhám à, chit-ê tōa-siâⁿ! Tī hái-ni̍h kiâⁿ-chûn ê lâng lóng khò chit-ê siâⁿ ê châi-hù hoat-châi. In-ūi chi̍t-sî-á kú, i ê it-chhè lóng bô-khì. 20 Thiⁿ ah, tio̍h ūi-tio̍h chit-ê siâⁿ hoaⁿ-hí! Lín chiah-ê sìn-tô͘, sù-tô͘, kap sian-ti tio̍h hoaⁿ-hí, in-ūi Siōng-tè í-keng ū thòe lín sin-oan kā i hêng-hoa̍t lah! 21 Āu-lâi, ū chi̍t ê tōa khùi-la̍t ê thiⁿ-sài giâ chi̍t tè chio̍h, chhin-chhiūⁿ tōa chio̍h-bō, kā i hiat-lo̍h hái, kóng: Tōa [Pa-pí-lûn]-siâⁿ mā ōe chhin-chhiūⁿ án-ni, tōa-la̍t kā i hiat lo̍h-khì, éng-oán bōe-koh khòaⁿ-kìⁿ. 22 Tôaⁿ-khîm, chhiùⁿ-koa, pûn-siau, pûn lat-pah ê siaⁿ, lí mā bōe-koh thiaⁿ-kìⁿ; ta̍k chióng kang-gē sai-hū, lí mā bōe-koh khòaⁿ-kìⁿ; oe-bō ê siaⁿ, lí mā bōe-koh thiaⁿ-kìⁿ; 23 teng-hé ê kng, bōe-koh kā lí chiò; sin kiáⁿ-sài kap sin-niû ê siaⁿ, lí bōe-koh thiaⁿ-kìⁿ; in-ūi lí ê seng-lí-lâng í-chêng tī tōe-chiūⁿ sī ū sè-le̍k ê lâng, in-ūi lí ū ēng siâ-su̍t bê-he̍k bān-kok. 24 Sian-ti, kap sìn-tô͘, í-ki̍p só͘-ū tī tōe-chiūⁿ siū thâi ê lâng ê huih, lóng ū tī chit-ê siâⁿ khòaⁿ-tio̍h.

Khé-sī-lio̍k 19

1 Āu-lâi, góa ū thiaⁿ-kìⁿ tī thiⁿ-téng chhin-chhiūⁿ ū chi̍t tōa-kûn lâng tōa-siaⁿ teh hoah: Ha-lé-lú-iah, chàn-bí Siōng Chú! Chín-kiù, êng-kng, koân-lêng lóng tùi lán ê Siōng-tè lâi! 2 I ê sím-phòaⁿ chin-si̍t kong-gī. In-ūi I ū sím-phòaⁿ hit-ê ēng îm-hēng pāi-hoāi tōe-chiūⁿ jîn-lūi ê tōa îm-hū, ū hêng-hoa̍t i lâu Siōng-tè lô͘-po̍k ê huih ê chōe. 3 In tē-jī piàn hoah: Ha-lé-lú-iah, chàn-bí Siōng Chú! Siâⁿ tio̍h-hé-sio ê ian chhèng-koân eng-oán bōe-thêng. 4 Hit jī-cha̍p-sì ê tiúⁿ-ló kap hit sì ê oa̍h-mi̍h phak lo̍h-khì kèng-pài chē tī pó-chō ê Siōng-tè, kóng: Amen. Ha-lé-lú-iah! 5 Tùi pó-chō ū siaⁿ chhut-lâi, kóng: Só͘-ū Siōng-tè ê lô͘-po̍k, só͘-ū kèng-ùi Siōng-tè ê lâng, bô-lūn pi-chiān chun-kùi, lóng tio̍h chàn-bí lán ê Siōng Chú! 6 Góa ū koh thiaⁿ-kìⁿ chhin-chhiūⁿ chi̍t tōa-kûn lâng ê siaⁿ, chhin-chhiūⁿ chin chōe tiâu hô-liû ê siaⁿ, chhin-chhiūⁿ lûi tōa-tân ê siaⁿ, kóng: Ha-lé-lú-iah, chàn-bí Siōng Chú! In-ūi lán ê Chú, Choân-lêng ê Siōng-tè choh-ông lah! 7 Lán tio̍h hoaⁿ-hí khoài-lo̍k, chiong êng-kng kui hō͘ I! In-ūi Iûⁿ-ko hun-lé ê ji̍t kàu lah; I ê sin-niû í-keng chún-pī piān lah. 8 Siōng-tè í-keng hō͘ sin-niû chhēng iù-môa-pò͘ kng-liāng chheng-pe̍h ê saⁿ. Iù-môa-pò͘ ê saⁿ sī sìn-tô͘ gī ê kiâⁿ-chòe. 9 Āu-lâi, thiⁿ-sài kā góa kóng, “Lí tio̍h siá khí-lâi; siū iau-chhiáⁿ chham-ka Iûⁿ-ko hun-iàn ê lâng chin ū hok-khì!” Thiⁿ-sài koh kā góa kóng, “Chiah-ê sī Siōng-tè chin-si̍t ê ōe.” 10 Góa chiū phak tī thiⁿ-sài ê kha-chêng beh kā i pài. M̄-kú i kā góa kóng, “Choa̍t-tùi m̄-thang! Góa kap lí, í-ki̍p hiah-ê ūi-tio̍h Iâ-so͘ choh-chèng ê lâng lóng pîⁿ-pîⁿ chòe lô͘-po̍k; lí tio̍h pài Siōng-tè!” In-ūi ūi-tio̍h Iâ-so͘ choh-chèng sī siū-tio̍h ū-giân ê Sîn ê kám-tōng. 11 Āu-lâi, góa khòaⁿ-kìⁿ thiⁿ khui, khòaⁿ-tio̍h chi̍t chiah pe̍h-bé. Khiâ tī bé téng ê kiò-chòe “Tiong-sìn” kap “Chin-si̍t”; I chiàu kong-gī sím-phòaⁿ kap chok-chiàn. 12 I ê ba̍k-chiu chhin-chhiūⁿ hé-iām; thâu-khak ū tì chin chōe ông-koan; seng-khu ū siá chi̍t ê miâ, chit-ê miâ i ka-kī í-gōa bô-lâng bat. 13 I chhēng bak-tio̍h huih ê tn̂g-phàu, I ê miâ kiò-chòe Siōng-tè ê Tō. 14 Thian-kun chhēng iù-môa-pò͘ ê tn̂g-phàu, pe̍h koh chheng-khì, khiâ pe̍h-bé teh tè I. 15 Tùi I ê chhùi thò͘-chhut chi̍t ki lāi-kiàm, beh ēng lâi phah-pāi lia̍t-kok; I beh ēng thih-koáiⁿ tī-lí in; I mā beh ta̍h Choân-lêng ê Siōng-tè ê chiú-khut, hō͘ I ê tōa siū-khì hoat-chhut. 16 Tī I ê tn̂g-phàu kap tōa-thúi ū siá chi̍t ê miâ “Bān ông ê Ông, bān chú ê Chú.” 17 Góa ū koh khòaⁿ-kìⁿ chi̍t ê thiⁿ-sài khiā tī ji̍t-thâu téng, tōa-siaⁿ tùi hiah-ê tī khong-tiong teh pe lóng-chóng ê pe-chiáu hoah, “Lâi! Chū-chi̍p lâi hù Siōng-tè ê tōa iàn-se̍k! 18 Lâi chia̍h chiah-ê kun-ông ê bah, chiong-kun ê bah, kap ióng-sū ê bah, chiah-ê bé kap khiâ-bé ê lâng ê bah, í-ki̍p lóng-chóng chū-iû ê lâng kap lô͘-lē ê bah, pi-chiān kap chun-kùi ê lâng ê bah.” 19 Góa ū koh khòaⁿ-kìⁿ hit chiah siù, tōe-chiūⁿ ê kun-ông kap in ê kun-tūi chū-chi̍p beh kap Hit-ūi khiâ pe̍h-bé ê í-ki̍p I ê kun-tūi kau-chiàn. 20 Hit chiah siù siū lia̍h, hit-ê ké sian-ti, chiū-sī chêng bat tī siù ê bīn-chêng kiâⁿ sîn-jiah ê, mā kap siù chòe-hé siū lia̍h. Chit-ê ké sian-ti bat ēng sîn-jiah bê-he̍k hiah-ê ū siù ê kì-hō kap bat pài siù ê siōng ê lâng. Hit chiah siù kap hit-ê ké sian-ti nn̄g ê lóng hō͘ lâng oa̍h-oa̍h hiat-lo̍h liû-hông teh to̍h ê hé-ô͘. 21 Só͘-chhun ê kun-tūi lóng hō͘ Hit-ūi khiâ-bé-ê ê chhùi thò͘-chhut ê kiàm sat-hāi; só͘-ū ê chiáu lóng lâi chia̍h in ê bah, chia̍h kàu pá.

Khé-sī-lio̍k 20

1 Āu-lâi, góa ū khòaⁿ-kìⁿ chi̍t ê thiⁿ-sài tùi thiⁿ-téng lo̍h-lâi, chhiú the̍h bô-tóe chhim-khiⁿ ê só-sî kap chi̍t tiâu tōa-tiâu thih-liān. 2 I lia̍h hit chiah lêng, chiū-sī hit bé lāu-chôa, sī Mô͘-kúi, sī Sat-tàn, kā i pa̍k chi̍t-chheng nî. 3 Thiⁿ-sài kā i hiat-lo̍h bô-tóe chhim-khiⁿ, jiân-āu kā bô-tóe chhim-khiⁿ koaiⁿ-ba̍t, koh ēng ìn hong khí-lâi, i chiah bōe-koh khì bê-he̍k lia̍t-pang, it-ti̍t kàu chi̍t-chheng nî móa. Chit-ê kî-hān kè liáu, i it-tēng tio̍h chiām-sî siū tháu-pàng. 4 Góa ū koh khòaⁿ-kìⁿ kúi-nā ê pó-chō, chē tī pó-chō ê ū tit-tio̍h sím-phòaⁿ ê koân-pèng. Góa mā ū khòaⁿ-kìⁿ hiah-ê ūi-tio̍h Iâ-so͘ choh-chèng kap ūi-tio̍h Siōng-tè ê Tō hō͘ lâng chām-thâu ê lâng ê lêng-hûn. Chiah-ê lâng m̄-bat pài siù, mā m̄-bat pài siù ê siōng, in ê thâu-hia̍h á-sī chhiú bô chiap-siū siù ê kì-hō. In lóng koh-oa̍h kap Ki-tok chòe-hé thóng-tī chi̍t-chheng nî. 5 Só͘-chhun ê sí-lâng kàu chi̍t-chheng nî móa ê sî chiah ōe koh-oa̍h. Che sī thâu-chi̍t piàn ê koh-oa̍h. 6 Ū-hūn tī thâu-chi̍t piàn koh-oa̍h ê lâng chin ū hok-khì, in sī sèng-kiat ê lâng. Tē-jī piàn ê sí bô koân thang kā in koán-hat, in ōe chòe Siōng-tè kap Ki-tok ê chè-si, mā ōe kap Ki-tok chòe-hé thóng-tī chi̍t-chheng nî. 7 Chi̍t-chheng nî móa ê sî, Sat-tàn ōe siū tháu-pàng chhut-kaⁿ. 8 I ōe chhut-khì bê-he̍k tōe-chiūⁿ sì-hng ê lia̍t-pang, chiū-sī [Ko-kek] kap [Má-kok], chū-chi̍p in khì kau-chiàn, in ê sò͘-ba̍k chhin-chhiūⁿ hái-soa hiah-ni̍h chōe. 9 In chìn-kun piàn-móa choân-tōe, ûi-khùn sìn-tô͘ ê iâⁿ kap Siōng-tè só͘-thiàⁿ ê siâⁿ. M̄-kú ū hé tùi thiⁿ kàng-lo̍h kā in sio-bia̍t. 10 Hit-ê bê-he̍k in ê Mô͘-kúi siū hiat-lo̍h hé kap liû-hông ê ô͘; hit chiah siù kap hit-ê ké sian-ti í-keng tī hia. In ōe ji̍t-mî siū khó͘-chhó͘, éng-oán bōe-thêng. 11 Āu-lâi, góa ū khòaⁿ-kìⁿ chi̍t ê pe̍h-sek ê tōa pó-chō, kap chē tī hit téng-bīn Hit-ūi; thiⁿ kap tōe tùi I ê bīn-chêng tô-cháu, chiū bô koh khòaⁿ-kìⁿ. 12 Góa koh ū khòaⁿ-kìⁿ sí-khì ê lâng, bô-lūn pi-chiān á-sī chun-kùi, lóng khiā tī pó-chō chêng. Kì-lio̍k ê chheh lóng thí-khui; lēng-gōa chi̍t pún oa̍h-miā-chheh mā thí-khui. Sí-khì ê lâng chiàu in ê hêng-ûi, kun-kù chiah-ê chheh só͘ kì-chài ê siū sím-phòaⁿ. 13 Hái chiong i lāi-bīn ê sí-lâng kau chhut-lâi, Sí kap Im-hú mā chiong in lāi-bīn ê sí-lâng lóng kau chhut-lâi; ta̍k ê lâng lóng chiàu in ê hêng-ûi siū sím-phòaⁿ. 14 Āu-lâi, Sí kap Im-hú siū hiat-lo̍h hé-ô͘. Chit-ê hé-ô͘ chiū-sī tē-jī piàn ê sí. 15 Miâ bô kì-chài tī oa̍h-miā-chheh ê lâng lóng siū hiat-lo̍h hé-ô͘.

Khé-sī-lio̍k 21

1 Āu-lâi, góa ū khòaⁿ-kìⁿ sin ê thiⁿ sin ê tōe, in-ūi chêng ê thiⁿ chêng ê tōe í-keng kè-khì, hái mā bô-khì. 2 Góa koh khòaⁿ-kìⁿ Sèng-siâⁿ, sin ê [Iâ-lō͘-sat-léng], tùi thiⁿ-téng Siōng-tè hia kàng lo̍h-lâi, chhin-chhiūⁿ sin-niû chng-thāⁿ hó-sè beh gêng-chiap tiōng-hu. 3 Góa koh thiaⁿ-tio̍h ū tōa ê siaⁿ tùi pó-chō hoat-chhut, kóng, “Khòaⁿ ah, Siōng-tè ê hōe-bō͘ tī lâng ê tiong-kan! Siōng-tè beh kap in chòe-hé khiā-khí; in beh chòe I ê chú-bîn; Siōng-tè beh chhin-sin kap in tông-chāi, chòe in ê Siōng-tè. 4 I beh chhit-khì in ba̍k-chiu lóng-chóng ê ba̍k-sái; bô koh ū sí-sit, mā bô koh ū ai-siong, âu-kiò, thàng-thiàⁿ, in-ūi chêng ê tāi-chì í-keng kè-khì.” 5 Āu-lâi, chē tī pó-chō Hit-ūi kóng, “Khòaⁿ ah, góa chiong bān-mi̍h lóng ōaⁿ-sin!” I koh kóng, “Tio̍h siá khí-lâi, in-ūi chiah-ê ōe chin-si̍t khó-khò”. 6 I koh kā góa kóng, “Oân-sêng lah! Góa sī A-ní-hoat kap A-bí-ka, sī khai-sí kap kiat-sok. Chhùi-ta ê lâng góa beh chiong oa̍h-miā-chúi ê chúi-chôaⁿ pe̍h-pe̍h hō͘ in lim. 7 Tek-sèng ê lâng ōe sêng-chiap chiah-ê; góa beh chòe in ê Siōng-tè, in beh chòe góa ê kiáⁿ-jî. 8 M̄-kú, hiah-ê bô-táⁿ-ê, pōe-sìn-ê, hú-pāi-ê, thâi-lâng-ê, îm-loān-ê, kiâⁿ-siâ-su̍t-ê, pài-ngó͘-siōng-ê, í-ki̍p só͘-ū kóng-pe̍h-chha̍t-ê, in tio̍h khì ê só͘-chāi sī hit-ê ēng hé kap liû-hông teh sio ê ô͘, chit-ê chiū-sī tē-jī piàn ê sí.” 9 Āu-lâi, chhit ê thiⁿ-sài, chiū-sī the̍h chhit tè óaⁿ tóe móa lō͘-bé chhit hāng chai-hō ê, kî-tiong chi̍t ê lâi tùi góa kóng, “Lâi, góa beh pò lí khòaⁿ Sin-niû, chiū-sī Iûⁿ-ko ê bó͘.” 10 Góa siū Sèng Sîn kám-tōng, hō͘ thiⁿ-sài chhōa kàu chi̍t chō tōa koh koân ê soaⁿ, hō͘ góa khòaⁿ tùi thiⁿ-téng Siōng-tè hia kàng lo̍h-lâi ê Sèng-siâⁿ [Iâ-lō͘-sat-léng]. 11 Chit-ê siâⁿ ū Siōng-tè ê êng-kng; siâⁿ ê kng chhin-chhiūⁿ siōng pó-kùi ê pó-chio̍h, chhin-chhiūⁿ phek-ge̍k, chhin-chhiūⁿ chúi-chiⁿ hiah-ni̍h kng-liāng. 12 Siâⁿ ū tōa koh koân ê chhiûⁿ, siâⁿ-chhiûⁿ ū cha̍p-jī ê mn̂g, chiah-ê mn̂g ū cha̍p-jī ê thiⁿ-sài teh kò͘-siú, ū khek [Í-sek-lia̍t] kiáⁿ-sun cha̍p-jī chi-cho̍k ê miâ; 13 tang-pêng ū saⁿ ê mn̂g, sai-pêng ū saⁿ ê mn̂g, lâm-pêng ū saⁿ ê mn̂g, pak-pêng ū saⁿ ê mn̂g. 14 Siâⁿ-chhiûⁿ ū cha̍p-jī ê tōe-ki, tōe-ki téng ū Iûⁿ-ko ê cha̍p-jī sù-tô͘ ê cha̍p-jī ê miâ. 15 Tùi góa kóng-ōe ê thiⁿ-sài ū the̍h chi̍t ki kim lô͘-tek ê chhioh, beh niû hit-ê siâⁿ, siâⁿ-mn̂g, kap siâⁿ-chhiûⁿ. 16 Siâⁿ sī sì-kak-hêng, tn̂g khoah sio-siâng. Thiⁿ-sài ēng chhioh niû siâⁿ: Ū nn̄g-chheng sì-pah kong-lí, tn̂g, khoah, koân lóng sio-siâng. 17 Thiⁿ-sài mā chiàu lâng ê chhùn-chhioh niû siâⁿ-chhiûⁿ, koân la̍k-cha̍p kong-chhioh. 18 Siâⁿ-chhiûⁿ sī ēng phek-ge̍k chō ê, siâⁿ sī ēng chhin-chhiūⁿ po-lê chheng-liāng ê sûn-kim khí ê. 19 Siâⁿ-chhiûⁿ ê tōe-ki ēng ta̍k chióng pó-chio̍h chong-sek: Thâu-chi̍t ê tōe-ki sī phek-ge̍k, tē-jī ê sī nâ-pó-chio̍h, tē-saⁿ ê sī le̍k-bé-ló, tē-sì ê sī le̍k-pó-chio̍h, 20 tē-gō͘ ê sī âng-bé-ló, tē-la̍k ê sī âng-pó-chio̍h, tē-chhit ê sī n̂g-ka-ná-chio̍h, tē-poeh ê sī chhùi-chhong-ge̍k, tē-káu ê sī n̂g-ge̍k, tē-cha̍p ê sī húi-chhùi-ge̍k, tē-cha̍p-it ê sī chí-bé-ló, tē-cha̍p-jī ê sī chí-chúi-chiⁿ. 21 Hit cha̍p-jī ê mn̂g sī cha̍p-jī lia̍p chin-chu, ta̍k ê mn̂g sī ēng chi̍t lia̍p chin-chu chòe ê. Siâⁿ ê koe-lō͘ sī sûn kim, chhin-chhiūⁿ thàu-bêng ê po-lê. 22 Tī siâⁿ-lāi góa bô khòaⁿ-tio̍h sèng-tiān, in-ūi Chú Choân-lêng ê Siōng-tè kap Iûⁿ-ko chiū-sī chit-ê siâⁿ ê sèng-tiān. 23 Chit-ê siâⁿ bô su-iàu ji̍t á-sī ge̍h lâi chiò, in-ūi Siōng-tè ê êng-kng teh chiò, koh Iûⁿ-ko chiū-sī chit-ê siâⁿ ê teng. 24 Lia̍t-pang ōe khò teng ê kng kiâⁿ-lō͘; tōe-chiūⁿ kun-ông ōe chiong in ê êng-hôa tòa lâi hō͘ chit-ê siâⁿ. 25 Ji̍t-sî, siâⁿ-mn̂g lóng bōe koaiⁿ; tī hia lóng bô mî-sî. 26 Lâng ōe chiong lia̍t-pang ê êng-kng kap chun-kùi tòa ji̍p-lâi chit-ê siâⁿ. 27 M̄-kú, bô chheng-khì ê mi̍h, í-ki̍p hêng-ûi khó-ò͘ⁿ kap kóng pe̍h-chha̍t ê lâng choa̍t-tùi bōe ēng-tit ji̍p-khì; chí-ū miâ ū kì-chài tī Iûⁿ-ko ê oa̍h-miā-chheh ê lâng chiah ōe ēng-tit ji̍p-khì.

Khé-sī-lio̍k 22

1 Thiⁿ-sài koh pò góa khòaⁿ oa̍h-miā-chúi ê hô, chhin-chhiūⁿ chúi-chiⁿ hiah-ni̍h kng-liāng, tùi Siōng-tè kap Iûⁿ-ko ê pó-chō hia lâu chhut-lâi, 2 thong-kè siâⁿ tiong-sim ê koe-lō͘. Hô ê siang-pêng ū oa̍h-miā-chhiū, ōe kiat ké-chí cha̍p-jī piàn, ta̍k ge̍h-ji̍t kiat chi̍t piàn, chhiū-hio̍h ōe chòe i-tī lia̍t-pang ê lō͘-ēng. 3 Siâⁿ-lāi lóng bōe-koh ū chiù-chó͘. Siōng-tè kap Iûⁿ-ko ê pó-chō ōe tī siâⁿ-lāi; I ê lô͘-po̍k ōe kèng-pài I, 4 mā ōe khòaⁿ-kìⁿ I ê bīn, I ê miâ ōe siá tī in ê thâu-hia̍h. 5 Bōe-koh ū mî-sî; in bô su-iàu teng ê kng á-sī ji̍t-thâu, in-ūi Chú Siōng-tè ōe kā in chiò-kng, in ōe éng-éng oán-oán choh-ông chiáng-koân. 6 Thiⁿ-sài kā góa kóng, “Chiah-ê ōe chin-si̍t khó-khò. Hit-ūi kám-tōng chèng sian-ti ê Chú Siōng-tè ū chhe I ê thiⁿ-sài chiong it-tēng sûi-sî ōe hoat-seng ê tāi-chì chí-sī I ê chèng lô͘-po̍k.” 7 Iâ-so͘ kóng, “Khòaⁿ ah, góa liâm-piⁿ lâi. Chun-siú chit pún chheh ū-giân ê ōe ê lâng chin ū hok-khì!” 8 Góa --- [Iok-hān] sī chhin-sin ū thiaⁿ-kìⁿ koh khòaⁿ-kìⁿ chiah-ê sū hit-ê lâng. Góa thiaⁿ-tio̍h koh khòaⁿ-tio̍h liáu-āu, chiū phak lo̍h-khì tī chiong chiah-ê sū chí-sī góa ê thiⁿ-sài kha-chêng beh kā i pài. 9 Put-kò i kā góa kóng, “Choa̍t-tùi m̄-thang! Góa kap lí, í-ki̍p kap lí pîⁿ-pîⁿ chòe hiaⁿ-tī ê sian-ti kap chun-siú chit pún chheh ê ōe ê lâng, lóng pîⁿ-pîⁿ chòe lô͘-po̍k. Lí tio̍h pài Siōng-tè!” 10 I koh kā góa kóng, “M̄-thang chiong chit pún chheh ū-giân ê ōe hong-ba̍t, in-ūi ū-giân si̍t-hiān ê sî-khek kūn lah. 11 Hō͘ put-gī ê lâng kè-sio̍k chòe put-gī; hō͘ ù-òe ê lâng kè-sio̍k ù-òe; hō͘ gī ê lâng kè-sio̍k si̍t-hêng kong-gī; hō͘ sèng-kiat ê lâng kè-sio̍k sèng-kiat.” 12 Iâ-so͘ kóng, “Khòaⁿ ah, góa liâm-piⁿ lâi! Góa beh tòa pò-siúⁿ lâi, chiàu ta̍k ê lâng ê só͘-chòe kā i hôe-pò. 13 Góa sī A-ní-hoat kap A-bí-ka, sī khí-thâu kap soah-bé, sī khai-sí kap kiat-sok.” 14 Chiong tn̂g-phàu sóe chheng-khì hiah-ê lâng chin ū hok-khì, in ū tit-tio̍h koân thang chia̍h oa̍h-miā-chhiū ê ké-chí, koh thang tùi chiah-ê mn̂g ji̍p-siâⁿ. 15 Hiah-ê káu-lūi, kiâⁿ-siâ-su̍t-ê, îm-loān-ê, thâi-sí-lâng-ê, pài-ngó͘-siōng-ê, kap it-chhè ài kóng pe̍h-chha̍t koh choh-sū kan-chà ê, lóng tio̍h lâu tī siâⁿ-gōa. 16 “Góa --- Iâ-so͘ í-keng chhe góa ê thiⁿ-sài, tī chiah-ê kàu-hōe chiong chiah-ê sū tùi lín choh-chèng. Góa sī [Tāi-pi̍t] ê Kun, sī i ê hō͘-tāi, sī kng-liāng ê Khé-bêng-chhiⁿ.” 17 Sèng Sîn kap Sin-niû lóng kóng, “Lâi!” Thiaⁿ-kìⁿ ê lâng tio̍h kóng, “Lâi!” Chhùi-ta ê lâng tio̍h lâi! Ì-ài ê lâng thang pe̍h-pe̍h niá-siū oa̍h-miā-chúi. 18 Góa kā ta̍k ê thiaⁿ-tio̍h chit pún chheh ū-giân ê ōe ê lâng kéng-kò: Nā ū lâng kā i ke-thiⁿ, Siōng-tè ōe chiong chit pún chheh só͘ kì ê chai-hō ke-thiⁿ hō͘ i. 19 Nā ū lâng san-tû chit pún chheh ū-giân ê ōe, Siōng-tè mā ōe tùi chit pún chheh só͘ kì oa̍h-miā-chhiū kap Sèng-siâⁿ ê hok-hūn san-tû i ê hūn-gia̍h. 20 Ūi-tio̍h chiah-ê sū choh-chèng Hit-ūi kóng, “Tio̍h, góa liâm-piⁿ lâi!” Amen! Chú Iâ-so͘ ah, chhiáⁿ lâi! 21 Goān Chú Iâ-so͘ ê un-tián kap lín tāi-ke tông-chāi!