JOHNNA KASA PAOKHAMATHA

1

Tui Chi Phasa Khangasa

Haophok khareli Tui chi leihairasai. Tui chi Vareli ngasosai, kala Tui chi Varelaka. Kharewui eina Vareli ngasosai. Ot saikora awui manga eina kashokna kala sakahai saikora hi a mazangla kasa maleilak mana. Awuili kharing kaho chi leisai, kala chi mikumowui kahorna. Kahor china tangkhamangli horngasaka, kala tangkhamangna chili mayuirar mana. John kaho Varena chiho khara mi akha leisai. Mi saikorana kahor chiwui pao shalaga shitsangpai khavai ana shakhi rami. Kahor chi a maningmana, kha kahor chiwui shakhi mikhavai kharana. Mi kachivali horkhangasaka khamashunga kahor chi okathuili rakhamina. Ana okathuili leisai kala awui manga eina okathui hi sakhuilala okathuina ali matheimi mana. Ana awui ramli rai, kha awui mibingna ali makhuisangmi mana. Kha awui mingli shitsangda khuikasanga saikorali ana Varewui naongara ngasa khavai pangshap mi. Athumli kaphara chi asheewui eina maningmana, phasawui einala maningmana, kha Varewui ningkachangna. Tui china phasa kada ithumwui ngachaili rapama. Ava khamashung eina lukhamashan pemtinghai. Avavawui eina khara Naoho chiwui tekhamatei chi ithumna theihaira. (Johna awui pongli shakhi mida kahang "Ina kahang iwui thili khara mipa china ili reimei, kaja ava ili rida leihaira kasana" kachipa chi hina.) Awuili pemting kahaiwui vang ithumna lukhamashanwui tungli lukhamashan samphanga. Varena ain chi Mosesli mi; kha khamashung eina lukhamashan Jesu Christawui eina kharana. Vareli khipakha matheilak ranga; Avavawui makali khalei Naoho mangna theikhangasakna.

John Rahikmewui Shankhi

Kala Jehudibinga, pangmonbing eina Levitebingli Jerusalemwui eina chihovada Johnli "Na khipakhala" da angahan khangasak chitharan, Johnna mashunglak eina hanga. Ana khikha mangalar mana, kha "I Christa chi manigmana" da hangphata. Chieina athumna "Chithaakha na khipa khala?" da ngahana. "Elijahla?" Ana ngahankai, "Maningmana." "Na maran chila?" Chieina ana "Maninglak mana" da ngahankai. Chiwui thili athumna ngahanlui, "Na khipa khala kachi ithumli kachihobingli unghang khavai hangmilu. Nana nakhalatta khina jikhala?" Ana hanga, "Isaiah maranna hangkahai thada, 'Prohowui shongfa ngatar ngasaklu' da lamhangli vaokazat akhon chi ina." Phariseebingna kachiho athumna Johnli rahanga, "Na Christala maning, Elijahla maning, maran chila maning, jiakha khisada rahikmi khala?" Johnna ngahankai, "Ina tara eina rahikmi; kha nathumwui ngachaili akha nganingda khalei chi nathumna mathei mana. A iwui thili kharana, kha ina awui pheihop khara khalakida matik maningmara." Saikora hi Johnna rahikmi khavai Jordan kongwui lakhavak Bethanyli kashokna.

Yanglu Varewui Yaonao

Akhama katha Jesu rakhara theida Johnna hanga, "Yanglu, okathuiwui morei khuithuikhame, Varewui Yaonao Iwui thili akha rarali, ava ili reimei, khikhala jila ava ili rida leikasana da ina kahanga chi hipana. Ila all matheisa mana, kha Israelnaobingli a khipakhala da theikhavai tara eina nirahik khamina," Kala shakhi mida hanga, "Manglana kazingramwui eina nasha thada tai kala awai tungli takapa ina thei. Iali matheisamana; kha ili tara eina rahikmi khavai kashivata china hanga, "Mangla takhangasama, nana katheipa, chi Mangla Kathara eina rahikkahai chilaka." Kala ina theikazakta shakhi kasana kaja a Varewui naelaka."

Sakhangatba Kharebing

Akhama katha Johnna awui sakhangatha khanili ngasoda nganingsai. Kala Jesu zatkasa theida hanga, "Yanglu, Varewui Yaonao!" Sakhangatha khani china awui kahang chi shada Jesuwui thi shurthuwa. Jesuna ngarei khaung eina ani shurkhara chi theida hanga, "Khi phakazatkhala?" Chiema anima Jesuli hanga, "Oja, na kali pamli khala?" Jesuna hanga, "Rayanglu." Anina Jesuwui pamkhavai chi athei, kala chithang ali ngasopam haowa, kaja kazing yinghamasai. Johnna kahang eina shurkhava khani chiwui ngachaili akhana Simon Peterwui agato Andrewna. Ana hengsada ama Simonli samphangda hanga, "Ithum Messiahli samphang haira." (Chiwui kakhalatta Christa kajina). Kala ali Jesuwuili thanvai. Chieina Jesuna ali yangkada hanga, "Na Johnwui naomayara Simon chilamah. Nali Cephas hohowra." (Chiwui kakhalatta Peter kajina).

Jesuna Philip eina Nathanaelli Kaho

Akhama katha Jesuna Galileeli vakhavai ngarana. Kala Philipli samphangda hanga, "Ili shurlu." Philip hi Andrew eina Peterwui keinung Bethsaidawui mi ngasasai. Philipna Nathanaelli samphangda hanga, "Moseswui ainli kapi kahai kala maranbuignala kapi kahai mipa, Josephwui naomayara Nazarethwui Jesu chili ithum samphang haira." Nathanaelna hanga, "Nazarethwui eina khamatha ot kashokpaila?" Philipna "Sayanglu" da hanga. Nathanael khara theida Jesuna hanga, "Yanglu, Israelwui mi akha laka, awuili khayon khikha maleimana. Nathanaelna "Ili kathada theikhala?" da ngahana. Jesuna ngahankai, "Philipna nali mahokhui ranglakha khaorarongwui azingli leilakha thei. Nathanaelna Jesuli ngahankai, "Oja, na Varewui Naomaya rana. Kala Israelwui awungana." Jesuna hanga, "Ina nali khaorarongwui azingli theiya da kahangwui vang shitkasangla? Chili mataikhamei kachungkha theifara." Kala Jesuna ali hanga, "Kachangkhat eina nathumli kahangna, nathumna kazingram shokahai theira, kala Varewui kazingraobingna Miwui Naomayarawuili katung kaka theira.

2

Canali Ngala Shakkaza

Kakathum thang Galilee ngalei Canali ngala shakkaza akha leisai, kala Jesuwui avala chili leisai. Ngala shakkaza chili Jesulila awui sakhangathabinglila hoi. Kala drakhatheira vatkahai tharan avana Jesuli hanga, "Drakhatheira maleithura." Chieina Jesuna hanga, "He shanao, nawui khiyang leikhala? Iwui atam maungshung ranga." Avavana raobingli hanga, "Ana kahahang chi salu." Apam chili Jehudiwui khangacha athi shurda pheomatha khavai ngankha tharuk haisai. Jesuna athumli hanga, "Hambing hi tara chipem howlu." Chieina athumna akhamong kashungda chipemser haowa. Jesuna hanglui, "Ara sokkhuida zatkhang kashina chili khuiva milu." Chieina athumna khuivami. Zatkhang kashina china mazap khayang eina drakhatheira woohairasai, kala chi kachieina rakhala da matheithu mana, (tara sokkasanga raobing chimangna katheina). Chieina makham kahaiya chili hokhuida hanga, "Kateishe mangkapha rida khami ngachana, kala mibingna penlak eina mangkahaiwui thili mangkashi khamina. Kha nashe aruila mangkaphapa haida lei. Hi Jesuwui khudambingwui ngachaili khare, Galileewui Cana ngaleili kasana, kala awui tekhamatei phongshokta sakhangathabinga ali shitsanghaowa. Chiwui thili Jesuna avavala achina ngarala kala awui sakhangathabingla ngasoda Capernaumli tai, kala chili khani kathumthang pamsanga.

Jesuna Vareshim Sakhamatha

Jehudiwui makankhami phanit nganaihaoda, Jesuna Jesuralemli kai. Vareshim lungli sei yao, khana khayorbing kala lupa kakaibing leigh sakasa thei. Chieina kharawui lijei sakhuilaga Jesuna sei kala yao saikora Vareshimwui eina kashamshokser haowa, kala lupa kakaibingwui lupa chi heithami hailaga tablela phalatmi haowa. Kala ana khana khayorbingli hanga, "Ot saikora hi khuithuiser howlu; ishavawui shim hi lei ngapha masa ngasakpai mana. Chieina awui sakhangathabingna hithada kapi kahai phaningunga, "Nawui shinwui vang ining sangnahaida mei thada chuingasaka." Chiwui thili Jehudibingna rada hanga, "Nana hi kasawui mashun leiya da theikhavai khi khudam chitheira khala? Jesuna ngahankai, Vareshim hi sakhai howlu, laga ina kathum thangwui lungli sakaluira Chieina Jehudibingna hanga, "Vareshim hi sakakali zingkum hangmatida tharuk zanga, laga nana kathum thangwui lungli sakara kajila?" Kha Jesuna Vareshim kacni hi awui phasali kahangna. Ana kathiwui eina ringkhalui chitharan chiwui apong kahang eilida awui sakhangathabingna phaningunga. Chieina athumna kathara tui kala Jesuna hangkahai chili shitsanga.

Jesuna Mi Saikorali Kathei

Chitharan Jesuna makankhami phanitli Jerusalemwui lungli leilakha, ana sakahai khudambing chi kathei eina mi kachungkhana ali shitsanga. Kha Jesuna athumli mashitsangmana, kaja mi saikorali ana theiser kahaiwui vang miwui ningli khi leikhala kachi hangmilui khavai khikha maleimana.

3

Jesu eina Nicodemus

Chitharan Phariseewui mi akha Nicodemus kaho Jehudiwui kathana akha leisai. Ana ngayashong Jesuli rada hanga, "Oja, na kazingramwui eina khara oja akhana kachi ithumna thei; khikhala jila nana sakahai khudambing chi Varena ngasokhami maningla khipanakha masarar mana." Jesuna ngahankai, "Kachangkhat eina ina nali kahangna, 'Kachikathali mapharaluishit ngasak akha Varewui wungram chi matheirar mara.'" Nicodemusna hanga, "Mi akhana sarhai laga kathada pharaluishit pairakhala?" Jesuna ngahankai, "Kachangkhat eina ina nali kahangna, kachikathana tara eina kala mangla eina mapharalui akha Varewui wungramli mazangrar mara. Phasana kaphara chi phasana, kala manglana kaphara chi manglana. Una kahang hili matakhak kahai masa alu, 'Nali pharaluishit ngasak phalungra'. Masina awui phankhangaili phana, kala nana chiwui akhon shalaga kachiwui eina phanra khala kala kachivak phanvahao khala kachi matheimana. Manglana kapharabing chikathana." Nicodemusna hanga, "Kathada hithapairakhala?" Jesuna ngahankai. "Na Israelwui oja akhana laga hi matheikhui rangla?" Kachangkhat eina ina kahangna, "Ithuma ithumna kathei chi matui, kala mik eina theikahai chili shakhi khamina; kha nana ithumwui shakhi makhuisang mana. Ina okathuiwui ot hanglaga mashitsang akha kazingramwui ot hanglala kathada shitsangra khala? Miwui Naomayara kazingramwui eina kata chi maningla khipakha kazingram makaranga. Kala Mosesna lamhangli phara khangkaka chithada Miwui Naomayaralila khangka phalungra. Kala ali shitkasangbing katang makhavai kharing samphangra. Khikhala jila Varena okathuili leishina kahaiwui vang awui Naoho chi miya. Nao chili shitkasanga mi kachiva mathila katang makhavai kharing samphangra. Okathuili khayon mikhavai Varena anao Mayarali chihokhara maningmana, kha awui manga eina okathui hi huikhui khavaina. Ali shitkasanga chili mayon ngasakmara; kha mashitkasanga chili yonngasak haira; kaja Varewui Naoho chiwui mingli mashitsang mana. Bichar chi hithai, kaja kahor chi okathuili rahaira, kha mikumona tangkhamangli leishitha haowa kaja athumwui otsak maphamana. Makapha kasa mina kahorli ningkachai; kala athumwui otsak theihaipai shinada kahorli maramana. Kha khamashung kasaa china awui otsak chi Varewui ningkachangna da mathingrik eina theikhavai kahorli rai.

Jesu Reikasang kala John Teokasang

Chiwui thili Jesula awui sakhangathabingla Judea ngaleili vai. Apam chili athumli ngaso pamda rakahik khuimi. Johnnala Salimwui ngalemli khalei Aenonli rahikmisai. Kala apam chili tara tarakha leisai kala mi kachungkha rada ana rahikmi. Chitharan John phathopli mazang rangsai. Chitharan Johnwui sakhangathabing eina Jehudi akha dharmawui ravaikhamathawui pongli ngayat khangarok shoka. Chieina athumna Johnli ahanga, "Oja, Jordan kongwui lakhavak nali ngasopam kasa, nana awui maramli shakhi khamipa, chi hili rahikmida leili, kala mi sorkhangasai shurzatta lei." Johnna ngahankai, "Kazingramwui eina khami maningakha khipanakha khikha masamphangrar mana. I Christa maningmana kha ali rimeida ili chihokharana da ina kahang chi nathum theihaira. Makhamkahaiva chi makhamkahaiawui vangna. Makhamkahaiawui ngasotana ali ngasopamda awui khon kasha eina mathana. Chithada sada iwui ringkapha chi ara kashung haira. A reisang phalungra, kha I teosang phalungra.

Kazingram eina Kata Jesu

Atungshongwui eina kata chi saikorawui tungli lei; okathuiwui eina khara china okathuiwuina kala okathuiwui apong matuiya. Kha kazingramwui eina kharaa china saikorawui tungli lei. Jesuna awui kathei kashi chi hanga, kha khipanakha makhuisang mana. Awui shakhi khuikasanga china Vare hi khamashunga laka kachi hangshapa. Varena kashi vata a china Varewui tui matui, kaja Varena awui mangla chipemmi. Avavana Anao Mayarali leishi, kala ot saikora awui pangli horsangmi kahaina. Naomayara chili shitkasanga china katang makhavai kharing samphangra; kahang makhanganaa china kharing kaho matheimara, kha Varewui malungkhavat awui tungli lei.

4

Jesu eina Samariawui Shanao

Johnwuili langda kashura kachungkhali Jesuna rahikmi kachi Phariseebingna shai. (Kachangkhat Jesu akhalattana rahikkhami maningla awui sakhangathabingna kasana.) Hi kasha eina Jesuna Judeawui eina Galileeli latunga. Kala Samaria eina ngaruivaki ji haoda, Sychar kaho Samariawui keinung kaja Jacobna anao mayara Josephli khami leiwuk chiwui nga lemli vai. Jacobwui rakhong chi chili leisai, kala kharam kazatna chothaoda rakhong chiwui ayarli apamkhui, chi ngashun pung thara da khani maikhalina. Apam chili Samariawui shanao akha tara ratarasai. Jesuna ali hanga, "Ili tara khamimanglu." (Chitharan awui sakhangathabing keinungli kashakaza alohairasai.) Samariawui shanao china hanga, "Na Jehudina kathada Samariawui shanao ili tara pokhala?" (Khikhala jila Jehudibingna Samariawui mi bingli ot mangalon mana.) Jesuna ali ngahankai, "Nana Varewui kha mi chi theisasi kaja kala nali tara kapopa hi khipakhala da theisi kaja nana ali poda nali kharinga tara chi mihairara." Shanaopava china hanga, "Amei, nawui tara sokkhui khavaila makhuiphung, kala ra khongna hiyakha thuklaga nana ka chiwui eina kharinga tara chi khui rakhala? Ishawo Jacobli na rei meila? Ana ithumli rakhong hi kha mina, kala ala awui naobingla kala shakeibingla hi mangkasana." Je suna hanga, "Tara hi khamanga mi kachiva rachanglui shitra, kha ina miki kachi tara chi khamanga china marachanglui mara. Ina miki kaja tara chiya awuili workashoka katang makhavai kharing ura ngasahowra." Shanaopava china hanga, "Amei, ina marachanglui khavai kala apam hili tara maratalui khavai tara chi ili khamilu." Jesuna hanga, "Na gaharali unghokhuilu. Shanao pava china ngahankai, "I gahara malei mana." Jesuna ali hanga, "Nana nagahara maleimana da kahang hi mashunga, kaja na mayar phangali ngakum haira, kala arui leida khalei hila nagahara ma ning mana. Nana kahang chi ma shunga." Shanao china hanga, "Amei, na maran akhana da ina theikhui. Ishawo ngarana ka phung hili Vareli khoruma kha Jerusalem hi mibingna khorum kha vai apamna da nathumna hanga. Jesuna hanga, "He shanao ili shit sanglu." Avava chili nathumna ka phung hilila Jerusamelila makho rumluiki kachi atam rarali. Na thumna makathei otli khoruma, kha ithuma theikazak kahai chili khokharumna, kaja huikhami hi Jehudiwui eina kharana. Khama shung eina khokharumbingna Avava chili mangla kala khamashung eina khorumki kachi atam rarali, kala chi aruina. Avavana ali khorum ngasak khangaibing chi hikathabing lina. Vare hiya Manglana, chiei na ali khokharumbingna mangla eina, kala khamashung eina khorum phalungra." Shanao china hanga, "Messaiah, Christala kaho chi rara da ina thei. Ana khara tharan ot sai kora ithumli ana hangchitheira." Jesuna ali hanga, "Nali ngazekta khalei I hi alaka." Chichangli sakhangathabing ungrasai, kala ana shanaoli chan nga zek kasa theida matakhak haowa. Kha khipakha shanao chili na khi ningchang khala kala Jcsuli khisada ali chan ngazek khala da mangahan niana. Chieina shanao china awui taraham hailaga keinungli latungda mibingli hanga. "Rayanglu, ina sakahai saikora hangmishapa mi akha lei; hi Christa kaho chirala?" Athumna keinungwui eina rada Jesuli samphanga. Athum ramahung lakha sakha ngathabingna Jesuli "Oja, phaza khuifalu" da hanga. Kha Jesuna athumli hanga, Nathumna maka theiya kashakaza ina zaki kachi lei." Chieina kachikathana zakhavai ka khuiungmi hairala da ngazek ngaro ka. Kha Jesuna hanga, "Ili ka shivatawui ningkachang ot kasa kala ungshung khangasak chi iwui kasha kazana. Kachang mati eina ma hatura da nathumna mahang mala? Ina nathumli kahangna, ngareivada ma minkahai chi yanglu. Kahatapa china langhai samphanga kala ka tang makhavai heiwun kazipkhui. Hithada khayaowa eina kahata ring pharuma. Kaja akhana yaowa, akhana hatkhui kachi hi mashung laka. Nathumna mavakasang chi hatkhui khavai nathumli kashivatna; Khangateina yaosanga, nathumna hatkida lei." Kala shanaopava china "Ina sa kahai saikora chi ana hangmi haira" da shakhi khamwui vang Samaria wui mi kachungkha Jesuli shitsang haowa. Kala athumna Jesuli nga samsang khavai poda khani thang pamsanga. Awui tui shalaga mi kachungkha shitsang haowa. Ath umna shanaopava chili hanga, "Nana kahang chiwui vang mang ithumna shitkasang maningmana, kha ithum khalattana theihaira, kala a hi ka changkhat okathuili huikhamena"

Jesuna Akhava Akhawui Naoli Raikhami

Khani thang shanglaga Jesuna Galileeli vahaowa. Jesu akhalatt ana hanga, "Maran akhana awui ramli khayakaka mangachamana." Jesuna Galileeli vada chiwui mi bingna mathanthup eina samphanga kaja athumna makankhami phanitli Jerusalem kaka tharan Jesuna kasa sa saikora theihairasai. Chieina Jesuna Galileeli khalei Cana, tara eina drakhatheira onkha ngasak apam, chili latunga. Chitha ran Capernaumli akhawui nao kaza da leisai. Mipa china Jesu Judea wui eina Galileeli rahaira kachi ka sha eina thinanai khalei awui nao mayarali Capemaumli raraimi kha vai apoi. Jesuna ali hanga, "Na hiya kahahaka kala matakhak kahai otsak matheiranglakha mashitsang mana." Akhavapa china hanga, "Amei, inao mathirang lakha khara milu." Jesuna hanga, "Ungulu, nanao, mathimara." Mipa china Jesu wui kahang shitsangda latung haowa. Ana shim maungshung ranglakha raobingna pao khuirada hanga, "Na nao kakaza phahaira." Chieina ana atam katharan phahao khala da ngahana. Athumna ngahankai, "Aya ngashun pung akha kata tharan ka kharur vanhaowa." Jesuna, "Nanao, mathimara" da kahang atam chi chang lina kachi avava china thei. Chieina ashi shimkhur katonga shitsang haowa. Jesuna Judeawui eina Galileeli khara tharan hina machutkakhui ot kasa kakhanena.

5

Rakhong Ngalemli Raikhami

Chiwui thili Jehudiwui phanit akhali Jesuna Jerusalemli kai. Jerusalemwui yaoshim ngavei ngalemli rakhong akha, Hebrew tuili Bethesda hoda, leisai. Chiwui yangkhup phanga lei. Hili kakazabing kaja mik khangapeo, phei katek kala sheikashabing sorngasaida tara chi khangatha ngaraipama. Kaja mararakti Prohowui kazingrao tada rakhongwui tara chi ngatha ngasaka. Tara chi ngatha kahaiwui thili zangkharena kazat khikha khikha ranu kharai samphanga. Apam chili zingkum thumrada chishat kaza kahaiya mi akhala leisai. Atam chirankha ngaraikapam chi Jesuna theida "Na raingaila?" da ngahana. Kakazapa china ngahankai, "Amei, tara ngatha khaleoda ili rakhongli khuizangmi khavai khipakha maleimana; ina zangkida salala kateina riri jihaowa." Jesuna all hanga, "Nagkarthuilu, nawui khompha khuiphungda satlu." Chili ngalangda mi chi raihaowa, kala awui khompha khuiphungda zatuwa. Hi Sabbath thang kashokna. Chieina Jehudibingna raikahaiya mi chili hanga, "Aja Sabbathna nana khompha khuikaphung hi sakashara otna." Ana ngahankai, "Hi raikhamipana, 'Nawui khompha khuiphungda satlu' da hanga. Athumna "Nali khompha khuiphungda satlu kachipa chi khipakhala?" da ngahana. Kha raikahaiya china mipa chi khipakhala kachi matheithu mana, kaja apam chili mi ngazina haida Jesu thuihairasai. Khaleilaga Jesuna ali Vareshimli samphangda hanga, "Yanglu, na ara phahaira. Morei masaluialu, chithakha nali zakshikhamei khikha matamara." Chieina mipa china ali raikhame chi Jesuna da Jehudibingli ahanga. Hiwui vang eina Jehudibingna Jesuli rekharek phoka kaja ana Sabbath zimiksholi raimi haowa. Kha Jesuna ngahankai, "Ishavana ot sachingda lei, ila saphalungra." Hi kasha eina Jehudibingna Jesuli shaothat khavai lungsanmei haowa; kaja ana Sabbathwui ain sakakhai mang maningla Vareli akhalattawui avavana jihaowa, kala akhalatta Vareli ngaraicha ngasak haowa.

Anao Mayarawui Pangshap

Chieina Jesuna athumli hanga, "Kachangkhat eina ina nathumli Kahangna, Anao Mayarana akhalattawui ning eina kasa khikha maleimana, kha avavana kasa chi theida kasana. Avavana Anao Mayarali leishihaoda awui kasasa saikora chithei sera. Hili hakhamei ot eina tangda ana chitheira, chieina nathum matakhak howra. avavana kathebingli ringkhangasak thada Anao Mayaranala ringngasak khangaibingli kharing kaho chi mira. Avavana khipalikha bichar masamara, kha Anao Mayarali bichar saikora mihaira. Chieina mi saikorana Avavali khayakashi takam eina Anaoli kha yashira. Kachikathana Anao Maya rali khaya mashikha ali kashirata Avavali khaya makashina. "Kachangkhat eina ina nathum li kahangna, kachikathana iwui tui nganada ili kashiratali shitsangakha katang makhavai kharing samphang haira. Ali bichar masamara, kha kathiwui eina kanlaga kharingli shok kahaina. Ina kachangkhat ka hangna, atam rarali, kathebingna Varewui Naomayarawui akhon shaki kachi atam rashung haira, kala chi khuikasangbingna ringra. Avavawui li kharingwui angayung khalei thada Anao Mayaralila kharing angayung ngasa khavai pangshap mihaira. Kala ali bichar sakhavai pangshap mihaira, kachiwui vangkhala kaja a Miwui Naomayarana. Matakhak kahai masalu, kathebingna chikhur wui eina awui akhon shaki kachi atam nganai haira. Athumna chi khurwui eina shokra; kapha kasa bingli ngakarthuida ringngasakra kala makapha kasabinglila bichar sakha vai ngakarthui ngasakra.

Jesuwui Shakhibing

I khalattawui pangshap eina khikha masarar mana, kha Varena kahang athi shurda bichar kasana; chieina iwui bichar khamashungana; kaja iwui ningkachang masala ili ka shiratawui kaphaning mang kasana. I khalattawui vang saakha ina ka hanga hi akachang maningmana da hangpai. Kha khangatei akhana iwui vang chitheimida khalcina, kala chipana iwui apongli kahang hi kha mashungana da ina thei. Nathum na Johnli mi chihovada theihaira kaja ana khamashung chili shakhi mi. Ina mikumowui shakhi sam phang khangai maningmana, kha na thumli huikhui khavaiwui vangna. John hiya sharkahai kahora thao mei kathana, kala nathumna kasha khawui vang kahor chili pamngai. Kha iwui shakhi hiya Johnna kha mi shakhili hakmei, kaja Ishavana salu da mikahai ina sada khalei ot hina ili ishavana kachihona. kachi wui shakhina. Ili kashirata Isha vana iwui shakhina. Nathumna awui khon mashalak ranga, azakla matheilak ranga. Nathumwuili awui tui marazang ranga, kaja ana. chiho kharapa chili nathumna ma shitsang mana. Katang makhavai kharing chi kathara tuili samphang lapai da nathumna phai, chiya iwui pongli hangkahaina. Kha kharing samphang khavai nathumna iwuili marangaimana. Ina mikumowui masot mapha mana. Kha na thumwui wuklungli Varewui leika shi maleimana kachi ina thei. Ina ishavawui ming eina rai, kha na thumna ili makhui mana. Kachika thana akhalattawui ming eina raakha ali nathumna khuisangra. Na thumn akha eina akha sochikat kha ngarok ningchanga, kha Varewui kaso chi samphang khavai mapha mana. Chithakha nathumna katha da shitsangpaira khala? Ina isha vawui mangali nathumli khayon mi ra da maphaning alu. Kha yonnga sakki kache chi Mosesna, laga na thumna ali chihana. Nathumna Mosesli shitsangsi kaje ilila shitsangra, kaja ana iwui pongli kakapina. Kha nathumna awui kapi kahai chili mashitsanglaga iwui tui kathada shitsangra khala?"

6

Jesuna Thing Phangali Mikaza

Chiwui thili Jesuna Galilee ngayi kanda vai. Kala kakazabingli raimida kahahaka ot sakahai chi theida mi kachungkhana ali shura. Jesuna kaphung akhali kada awui sakhangathabingli ngasoda apama. Chitharan Jehudibingwui Makankhami phanit nganai hairasai. Jesuna ngareikada mi kachungkha khalei thei. Chieina ana Philipli hanga, "Mi hiyakhali miza khavai kashakaza kali alora khala?" (Hi Philipli tamyangkida kasana, kachangkhat khi sarakhala kachi theihaira kasana.) Philipna ngahankai, "Mi hiyakhali kateoteo miza khavai lupa shakhani eina lolala kalikha matangmara." Khangatei sakhangatha akha, Simon Peterwui agato Andrewna hanga, "Naoshinao akhana khamui phanga, khai khani da khuiphungda lei, kha mi hiyakhali china kali tangra?" "Mi katongali pamzang ngasaklu" da Jesuna hanga, (kaja chili khawo kachungkha phorsai.) Chieina mi katonga pamzanga; saikora mi thingphanga shakhana. Jesuna khamui chi khuida seiha salaga kapambing chili yaowa. Khai chila khuida chi takam eina sai, kala mi saikora thohaowa. Athum thoting kahai eina Jesuna sakhangathabingli hanga, "Zaneng chi ngamuikhuilu, kateokhala mashiman ngasak alu." Chieina khamui phanga mibingna zaiaga zaneng luk tharada khani pemda ngamuikhui. Matakhak kahai ot kasa chi theilaga mibingna "Kachangkhat okathuili raki kache maran chilaka" da hanga. Mibingna Jesuli tandi eina awunga sangasak khavai rarali kachi theihaoda Jesuna kaphungvak thuiluishit haowa.

Jesuna Tara Tungli Kazat

Kazing khaying eina sakhangathabingna ngayivak tahaowa, kala marikhong tonglaga ngayi kanda Capernamvak latunga. Kha ngayahailala Jesuna maralak thuwa. Chitharan siphan zingrot ungda tara ngaphao kazam haowa. Athumna mile kathum mati huiva kahaiwui thili Jesuna tara tungli zatta marikhongvak rakhara chi athumna thei, kala ngacheelak haowa. Kha Jesuna athumli "Mangachee alu, ina" da hanga. Jesuna marikhongli kakatong eina athum ringphalak haowa. Kala ngalangda athumna vaki kaja apam ngalei kathengli Vashung haowa.

Mibingna Jesuli Kapha

Akhama katha ngayi vaklaida leikasabingna marikhong akhamang leikasa chi thei, kala Jesuna sakhangathabingli mangasola athum mang marikhong tonglaga thuikahai chila thei. Akhama katha Tiberiaswui eina marikhong khangatei akha, Prohona seiha salaga mi kachungkhali khamui mizakhavai pam chiwui ngalemli rangasama. Mibingna Jesula sakhangathabingla chili maleimana kachi theida marikhong chili katonglaga Capernaumli Jesuli phavai.

Jesu Kharingawui Kashakazana

Mibingna ngayiwui lakhavak Jesuli kasamphangda hanga, "Oja, na katharan rakhala?" Jesuna ngahankai, "Kachang khat eina ina nathumli kahangna, nathumna ili kapha hi khudam katheiwui vangna. Shimanki kaja kashakazawui vang ngalang mazar alu; kha katang makhavai kharingawui kashakazawui vang ngalang zarlu. Hi Miwui Naomayarana nathumli mira, kachiwui vangkhala kaja Varena ali khamayawui mahor nammi kahaina." Chieina athumna ngahana, "Varewui ot sakhavai khi sarakhala?" Jesuna ngahankai, "Varena sangasak khangai chi hina: Ana shirat kharapa chili shitsanglu." Athumna ngahankai, "Ithumna theilaga nali shitsang khavai khi khudam leikhala? Nana khi samameida?" Ishawo ishayi ngarana lamhangli Manna zai kachi kathara lairkli hanghaida lei; chiya 'Ana athumwui zakhavai kazingramwui eina khamui mi?" Jesuna hanga, "Kachangkhat eina ina nathumli kahangna, nathumli kazingramwui khamui khame chi Moses maningmana, kha ishavana kazingramwui eina khamina. Varena khami khamui chiya kazingram eina tai, kala okathuili kharing mangla mi. Athumna Jesuli ngahana, "Amei, ithumli khamui chi michinglu." Jesuna hanga, "I kharingawui khamuina, ili khara mi chi mathailak mara; ili shitkasanga mi chi marachanglak mara." Ina kahang hina kaja nathumna ili theilala mashitsang mana. Ishavana ili mikahai saikorana ili rara, kala khara mi chili ina mahor hai mara. Ina kazingramwui eina kata hi I khalattawui ningkachang maningla, ili kashiratawui ningkachang sakhavaina. ili kashiratana ili sangasak khangai chi hina: Chiya ana ili mikahai saikora chi akhala mashiman ngasakla khanaowa zimiksholi ringshok ngasakser phalungra. Ishavawui ningkachang chiya Anao Mayarali theilaga shitkasanga chili katang makhavai kharing samphang ngasakra kachina, kala khanaowali ina ali ringshok ngasakra." "Kazingramwui eina kata khamui chi ina," da kahangwui vang Jehudibingna kapupta matuiya. Kala athmuna hanga, "Mipa hi Josephwui naomayara maningmala? Ava eina avavali ithum thei. Chithaakha ana kathada kazingram eina katana jikhala?" Jesuna ngahankai, "Nathum kapupta mamatui alu. Ili kashirata ishavana rakhangasak maningakha, khipakha ili mararar mana, raakha ina ali khanaowa zimiksholi ringshok ngasakra. Maranbingna kapihaida lei, 'Mi saikorali Varena tamchitheira'. Avavali nganasangda theikakhuiya mi kachiva iwuili rai. yarewui eina khara chi maningla, khipakha avavali mathei mana; a mangna thei. Kachangkhat eina ina nathumli kahangna, shitkasanga mi chi katang makhavai kharing samphanga. I kharingawui khamuina. Nawo nayi ngarana lamhangli manna zai, kha thihaowa. Kazingramwui eina kata khamui chi hina, hi mina shaida kathi mavaimara. I kazingramwui eina kata kharinga khamuina. Kachikathana hi shai akha a katang mavaila ringra. Okathuiwui ringkhavai ina miki kachi kashakaza chiya iwui asana." Chieina Jehudibingna ngayat ngarokta hanga, "Mipa hina kathada awui asa ithumli mishai paira khala?" Jesuna athumli hanga, "Kachangkhat eina ina nathumli kahangna, Miwui Naomayarawui asa mashai akha kala ashee mamang akha nathumwuili kharing kaho maleimana. Iwui asa shai akha kala iwui ashee mang akha katang makhavai kharang samphangra, kala ali khanaowa zimiksholi ringshok ngasakra. Khikhala jila iwui asa kashakaza laka, kala iwui ashee mangkhavai laka. Iwui asa kashaiya kala ashee khamanga chi ili lei kala I ali lei. Ili kharinga avavana kashiratwui vang I ali kharingna. Chithada sada iwui asa kashaiya chi iwui vang eina ringra. Hi kazingramwui eina kata khamui china, nawo nayi ngarana shailaga thikahai khamui katha maningmana. Khamui hi kashaiya mi chi mashimanda ringra." Jesuna hi Capernaumwui Synagogueli tamchitheida kahangna.

Makashiman Kharingwui Tui

Jasuwui sakhangatha kachungkhana hi shada hanga, "Tui hi saknali. Khipana theikhuirar rakhala?" Sakhangathabingna kakapum chi theida hanga, "Nathumla mamayangai mala? Miwui Naomayarana awui pamli kaluishit kachi theisi kaja khi phaningra? Ringkhangasak hi Manglana, phasa hiya aremana. Ina nathumli hangkahai chi Mangla kala kharingana. Kha nathum kaikha mashitsang mana." (Kaja haokaphokwui eina athum mashitsangmana kala khipana ali hatra khala kachi Jesuna thei.) Jesuna hanga, "Hiwui vang eina nathumli hanghaira kaja avavana khamayapa chi maning akha khipakha iwuili mararar mara." Chiwui thili kashura mi kachungkha mashurlui thuwa. Chieina Jesuna tharada khani chili hanga, "Nathumla ngalanthuiukila?" Simon Peterna ngahankai, "Proho, ithum khipawuili vara khala? Makashiman kharing tui chi Nawuili khaleina. Ara ithum shitsang haira, kala Varewui eina khara Tharkhamathengapa chi na laka da theihaira." Jesuna hanga, "Ina nathum tharada khanili kapangkakhui maning mala? Kha akhava chipee zanghaira." Hi tharada khaniwui ngachaili Simonwui nao Judas Iscariotna hathaora kachiwui pongli kahangna.

7

Jesu eina Awui Achina Ngara

Hiwui thili Jesuna Galileeli zatsai; ana Judeali mavangai mana kaja Jehudibingna ali shaothat khavai rimhaowa. Chitharan Jehudiwui tabernacle phanit nganailak hairasai. Chieina Jesuwui agato ngarana ali hanga, "Judeali valu chili nawui sakhangathabingna nawui kasasa thaira. Kachichawui otsak theingasaka jiakha ngathumda kasa khangacha maningmana; okathuina theikhavai salu." (Agato ngara eina tangda ali mashitsang mana.) Jesuna athumli hanga, "Iwui atam mararanga, kha nathumwui vanga sapaichinga. Okathuina nathumli maningkachai mana kha ile ningkachi, kaja okathuiwui makapha saikora ina hangphatmi haowa. Nathum phanitli azangulu, iya mavafamana, kaja iwui atam mararanga" da hanglaga ava Galileeli pamhaowa.

Jesuna Tabernacle Phanitli Khava

Agato ngara vakahaiwui thili Jesula vai; kha phonglak eina mazatla ngayinzata. Jehudibingna "Jesu kali leikhala" da phazata. Mibingna Jesuwui pongli ngazek ngaroka; Kaikhana "A kapha mina" ji, kala kaikhana "Mibingli thanngwui haira" da hanga. Chithalala Jehudibingli ngacheehaoda khipakha awui pongli phonglak eina mamatuileng mana. Zatkhang chi alung zangshap Jesuna vareshimli zangda tamchithei. Jehudibingna matakhak haida hanga, "Mipa hina lairik matamlakla kathada hiyakha theihao khala?" Jesuna ngahankai, "Ina tamkachithei hi iwui eina kashok maningla, ili kashirata Varewui eina kharana. Kachikathana Varewui ningkachang sangaida leiakha, ina tamkachithei hi Varewui eina kharaka I khalattawui pangshap eina khamatui khala kachi theira. Mi akhana akhalattawui tui matuiakha akhalatta mai yakhavai sai. Kha ali kashiratawui mai yakhavai phaakha, ana khaya shilak eina sai, kala awuili khayon khikha maleimana. Mosesna ain khami maning mala? Kha nathum khipakha ain chi mamayon mana. Ili shaothat khavai hotkhana khiwui vang khala?" Athumna ngahankai, "Nali kameo ngasoda lei. Nali khipana shaothara jikhala?" Jesuna ngahankai, "Ina kahaka ot akha sai, kala nathum saikora matakhakhai. Kha yanglu, Mosesna ahui rimshok khavai kasoi, (kachangkhatpava Mosesna maningla Varewui eina kharana) kala nathumna Sabbath zimiksholi ahui rimshoka. Moseswui ain chi makai khavai Sabbath zimiksholi ahui rimshokmi akha ina Sabbath thang kakaza mi akhali raikhamiwui vang khisada malung vatkhala? Zakmai eina bichar masaalu, kha khamashung eina salu."

Jesu Messiahla?

Jerusalemwui mi kaikhana hanga, "Mibingna shaothatra kache chi hipa maningmala? Yanglu, ana phonglak eina matuilala khipanakha awui tungli mahangmana. Kathanabingla ali Messiah laka chihaola? Messiah khara chitharana kachiwui eina rakhala da khipakha matheimara. Kha mipa hiwui rakhavai pam ithumna thei." Jesuna vareshimli panglak eina hanga, "Nathum ili theila kala I kachiwui eina rakhala kachi theikachangkhatla? I ningkhan eina khara maningmana. Ili kashirata a chi khamashungana. Nathum ali mathei mana. Kha iya ali thei, kaja I awui eina kharana, ana kashiratana." Chieina athumna ali tukkhui khavai sai, kha khipanakha pang makarar mana, kaja awui atam mara rangsai. Kha yaruiwui ngachaili kachungkhana ali shitsang haowa kala "Messiah ralala mipa hina kasali iangmeida sashaprala" da hanga.

Jesuli Tukhui Khavai Khangaran

Mibingna Jesuwui pongli kakharop chi Phariseebingna shai, chieina pangmon akhava kala Phariseebingna tukkhui khavai kahahaka mi chihovai. Chieina Jesuna hanga, "Ina nathumli kashakhawui vang ngasopamra, chiwui thili ili kashiralawui ngalemti vahowra. Nathumna ili phalala masamphangiuimara, kaja Ina vaki kachi pamli nathum mavarar mara." Jehudibing athum eina athum ngazek ngaroka, "A kali vaukida ali maphakhuirar mara kachikhala? A Jehudiwui pam Greek keinungbingli vada Greekbingli tamchitheira kachila? Ana 'Nathumna ili phalala masamphanglui mara kala ina vaki kachi pamli nathum mara mara' da kahang hi khisawi kachi khala?"

Kharinga Tara

Phanitwui khanaowa kala khamataiya thang Jesuna nganingda panglak eina hanga, "Kachikathana rachang akha iwuili ramangkhyi ranu. Kathara lairikli hangkahai thada 'Kachikathana ili shitsang akha awui wuklung eina kharing iara kongra thada longshokra." (Hi ali shitkasangbingna samphangki kachi Manglawui tui kahangna. Kaja Jesuna tekliamatei eina maringshokrang sathuda Mangla chi mamirangsai.)

Mibing Ning Khangakai

Mi kachungkhana tui chi shalaga hanga, "Mipa hi marah laka." Kaikhana "Messiahna" da hanga, kha kaikhana "Messiah hi Galileewui dna ramaraola" da hanga. Kathara lairikli hangkahai Messiah chi Davidwui shangnaora kala Davidna pamkasa keinung Bethlehemli pharara" da hanghaida lei. Hithada sada athumwui ngachailila Jesuwui pongli ning ngakai khangarok shokhaowa. Kaikhana Jesuli tukkhuingai, kha khipanakha pang masingleng mana.

Jehudi Kathanabingwui Mashilkasang

Pangmon akhavabing eina Phariseebingna kachiho mibing chi latkhaung tharan "Khisada ali matukung thukhala" da ngahana. Mibing china ngahankai, Mipa hina khamalui thada khipanakha mamatuilak ranga". Chieina Phariseebingna "Nathumlila ana pangasak haola? Ithumwui kathana kala Pharisee akhana ali shitkasang kalheihai rala? Mibing hi Moseswui ain matheimana, chieina Varena athumli khonshira" da hanga. Jesuli rida asamphang kahaiya Nicodemusla chili zanya. Nicodemusna athumli hanga, "Ithumwui ain athi shurda mi akhali awui khayon mathei rangla kha khayon mamipai mana." Chi eina athumna ngahankai, "Nala Galileewui eina kharala? Kathara lairik payanglu, kachilikha Galilewui eina maran mashoklak mana kachi theira."

8

Makapha Shanao Akhali Tukhara

Chiwui thili mi kachiva shimli ungkahai eina Jesuna Olive kaphungli kahaowa. Akhama katha ngathor Jesuna Vareshimli latunga. Chili yarui katongana ali kuinama, kala pamzangda athumli tamchithei phoka. Chitharan ain kathembing eina Phariseebingna phokapha shanao akha tukralaga saikorawui mangali nganing ngasaka. Athumna Jesuli hanga, "Oja shimao hi phopha mahungda leilakha tukkakhuina. Hikatha shanaoli lunggui eina horthat phalungra da Mosesna ning mihaida lei. Nana khi phaning khala?" Hi Jesuli khayon tukkhui khavai kahangna. Kha Jesuna kui mashun zangda pangmareng eina ngaleili kapiya. Athumna ngahanshon kachi eina, Jesuna nganingkada hanga, "Morei masalak kaja mi china shanaopava hili lunggui eina thamrithui ranu." Chicina ana hamzanglui shitta ngaleili kapiya. Athumna chi shalaga avava thuihaowa; kharara eina thuilaga khangano eina tangda thuiser haida Jesu eina shanaopava chimang leisai. Jesuna yangkada shanao chili hanga, "He shanao athum kali vaser haokhala? Nali khayon mikhavai khipakha maleilui mala? "Khipakha maleilak mana, Amei" da ana ngahankai. "Chitha akha inala khayon mamimana. Zatpaira, kha mo rei masalui alu."

Jesu Okathuiwui Kahor

Jesuna athumli hanglui shita, "I okathuiwui kahorna. Ili kashura china kharingwui kahor samphangra kala tangkhamangli mazatlak mara." Phariseebingna hanga, "Na khalattawui vang shakhi khamina, nana kahang chi khamashung malei mana." Jesuna ngahankai, "Ina khalattawui vang shakhi milala iwui shakhi hi khamashungana, kachiwui vang khala kaja I kachi eina rakhala kala kachili varakhala kachi ina thei, kha nathumna I rakhavaila thuikhavaila matheimana. Nathumna okathuiwui apong eina bichar sai, iya khipalikha bichar masamana. Ina bichar sasalala chi khamashungana, kaja imang maningla ili kashirata ishava inina kasana. Nathumwui ainli shakhi khani ngaraichahai akha, aniwui kahang chi khamashungana da kapihai. Ina iwui vang shakhi mi, kala ili kashirata Avavanala iwui vang shakhi khamina." Chieina athumna "Nashava kachi khala?" da ngahana. Jesuna ngahankai, "Nathumna ilila ishavalila malheimana; ili theisi kaja ishavalila tneihairaki kachina." Jesuna saikora hi Vareshimwui lan haikhavai pamli tamchitheida kahangna. Kha khipanakha ali matukkhui mLina. kacbiwui vangkhala kaja awui atam mararangsai.

Ina Vaki Kachi Chili Nathum Mavarar Mara

Jesuna athumli hangluishita, "I thuihowra; nathumna ili phalala nathumwui marcili thihowra. Ina vaki kachi chili nathum mararar mara." Chieina Jehudibingna, hanga, "Mipa hina kahang: Ina vaki kachi chili nathum mararar mara chili, akhalatta ngaronthi howra kachila?" Jesuna ngahankai, "Nathuma azing eina kashokna, iya atung cina katana. Nathum okathuiwuina, iya okathuiwui maningmana. Hiwui vang eina nathum nathumwui moreili thira kachina. Kala 'I alaka' kachi mashitsang akha nathumwui moreili thihowra." "Na khipakhala" da athumna ngahana. Jesuna ngahankai, "Ina kharewui eina hangkahaina. Nathumli hangkhavai kala bichar sakhavai kachungkha lei. Ili kashirata chi khamashungana, kala ina okathuili kahang hi awui eina shakakhui manga." Avavawui pongli kahang chi athumna mathei mana. Chieina Jesuna athumli hanga, "Nathumna Miwui Naomayarali khangkaka chitharan I hi alaka kachi theinowra, kala iwui pangshap eina maningla, kha Avavana tamchithei kahai chi kahangna kachi theikhuira. Ili kashirata chi ili ngasoda lei; imang mahorhaimana, kaja ina awui ningyang khaung chi sachinga." Jesuna hi kahang kasha kachungkhana shitsanga.

Ningkhan Kasa Mi eina Rao

Chieina ali shitkasanga Jehudibingli hanga, "Nathumna iwui tamkachithei khuisang akha iwui sakhangathabingna. Nathumna khamashung chi theikhuira," Athumna ngahankai, "Ithuma Abrahamwui naongarana, kala khipakhawui rao masalak mana. Nathumli ningkhan sangasakra kachi kathada hangpaira khala? Jesuna hanga, "Ina khamashung tui kahangna, morei kasa mi kachiva moreiwui raona. Rao akhana shimkhur chiwui mi mangasaching mana; kha naomayara chi shimkhur chiwui ngasachinga. Anao Mayarana nathumli ningkhan ngasak akha, chi ningkhan kachangkhata. Nathum Abrahamwui naotunna kachi ina thei, chithalala ili shaothat kida sai, kaja nathumna iwui tamkachithei mamaya mana. Ishavali ngasoda theikahai chi ina hanga, kha nathumna awo ayiwui eina kasha chi kasana." Athumna ngahankai, "Abraham ishavana." Jesuna hanga, "Abrahamwui nao kachangkhatsi kaja ana kasa thada nathumla sara. Kha Varewui eina shakhuilaga nathumli khamashung tui khamatuiya ili nathumna shaothat khavai ngaranda lei. Abrahamna hithada masalak mana. Nathumna navawui thada sada lei." Athumna ngahankai, "Ithum shamnao maning mana, ithumwui avava Vare lei." Jesuna athumli hanga, "Vare hi nathumwui avavana jisi kaja ili leishiki kachina, kaja I Varewui eina kharana. Ikhalatta maramana. Varena chiho kharana. Ina kahang kathada matheikhuithu khala? Chiya nathumwui vang iwui tui hi sakna kahaina. Nathum hi avava, kameowui naongarana, chieina awui ningkachang chi nathumna sai. Kharewui eina ava mi khayumana; khamashung ot masalak mana, kaja awuili khamashung maleimana. Kakapik hi awui khangachana, kaja kakapik saikorawui avava ana. Ina khamashung tui kahangwui vang nathumna mashitsang mana. I morei sahaira kachi khipana hangshapra khala? Ina khamashung tui hangakha khisada mashitsangma khala? Varewui mi china Varewui tui nganai; nathum Varewui mi maning thuda awui tui makhanganana.

Jesu eina Abraham

Jehudibingna ngahankai, "Na Samariawui mina kala nali kameo zangda lei da ithumna kahang hi mamashung mala?" Jesuna ngahankai, "Ili kameo mazang mana; iya ishavair khayashi, kha nathumna ili khaya mashimana. Iya khalatta maikhaya mapha mana, kha iwui vang maikhaya kapha akha lei, ana bichar kasaa sara. Kachangkhat cina ina nathumli kahangna, iwui tui khanganapa chi mathilak mara." Jehudibingna all hanga, "Ara ithumna theikachangkhat haira kaja nali kameo ngasoda lei. Abraham thihaira, maranbingla thihaira, kha kachikathana iwui tui ngana akha mathilak mara da nana hangda lei. Thikahaiya ithumwui avava Abrahamli kala thikahaiya maranbingli na hakmeila? Jesuna ngahankai, "Ina khalattawui maikhaya phaakha iwui khaya chi khikha maningmana; ili mai yakhangasaka chi ishavana. Nathumna nathumwui Varena da kahang chi a laka. Nathum ali matheilak ranga, kha iya theihaira. Ina theihailaga matheimana jisi kaja ila nathum thada kakapikana. Kha iya ali thei kala awui kahang nganai. Nathumwui avava Abrahamna iwui zimiksho theira da ringphai; kala ana chi kathei eina ringphakhai haowa." Jehudibingna hanga, "Na zingkum hangphanga makaranga, laga Abrahamli theiya kachila?" Jesuna hanga, "Kachangkhat eina ina nathumli kahangna, Abraham maphararang lakha I leisai." Athumna lunggui ngamuikhuilaga Jesuli horkida sai; kha Jesuna ngathumda vareshimwui eina shokhaowa.

9

Ngapeoda Kaphara Mi Akhali Raikhami

Jesuna yaothuilakha mik ngapeoda kaphara akhali thei. Sakhangathabingna ngahana, "Oja, mik ngapeoda kaphara chi khipawui morei khala?" Jesuna ngahankai, "Awui mik khangapeo chi awui moreiwui vang maningmana, ava avawui moreiwui vangla maning mana. Kha Varewui pangshap awui eina theingasak khavaina. Ngashun horda leilakha ili kashiratawui ot chi ithum saphalungra. Ngayashong khipakha masarar mana. I okathuili leilakha okathuiwui kahorna." Chithada hanglaga Jesuna machora eina ngalei manatkhui laga mipa chiwui mikli neomida hanga, "Siloam rakhongli namai angatap haolu." (Aming hiwui kakhalata chiho khava kachina.) Chieina ana amai angatap laga amik kharak samphangda ungrasai. Awui theisabing kala rida katheibingna ngahana, "Kayangli popamda leikasa chi hipa maning mala?" Kaikhana "Chipana" da hanga, kha kaikhana "Maningmana, azak khangaruina" da hanga. Chieina ana hanga, "I chipa laka." "Kathada namik rakhao khala" da athumna khangahan eina, ana ngahankai, "Jesu kaho china imikli leipa kateokha neomilaga "Siloam rakhongli namai angatap haolu" da hanga. Chieina ina valaga angatap khaleoda theihaowa." ""A kali leikhala" da athumna ngahana. Kha ana "Matheimana" jihaowa.

Raikhami Chi Kathakhalada Phariseebingna Khayang

Chieina mik ngapeoda kapharapa chili Phariseebingwuili khuivai. Jesuna leipa neomilaga mik rakkhangasak chi Sabbath zimikshona. Chieina Phariseebingna kathada theihao khala kachi mipa chili ngahanlui shita. Ana ngahankai, "Ana imikli leipa kateokha neomilaga mai ngatap kahai eina kathei samphanga." Pharisee kaikhana hanga, "Hi kasa mipa hi Varewui eina khara maning mara, kaja ana Sabbathwui ningkhami mamayan mana." Khangatei kaikhana hanga, "Morei kaphunga mina kathada hiyakha hakhamahaha ot sashapra khala?" Hithada athumwui ngachaili ning khangakai shokhaowa. Chwui thili Phariseebingna mipa chili ngahanluishita, "Nali ana mik rakngasaka chihaira, phai, a hi khipa khala?" Chieina ana "A maran akhana" da ngahankai. Chithalala Jehudibingna mipa chiwui ava avali mangahan ranglakha, mik ngapeosai kachi mashitsangngaithu mana. Kala hokhuida ngahana, "Hi naniwui naola? Ali mik ngapeoda pharala? Kathada ana kathei samphanghao khala?" Ava eina ava china ngahankai, "A iniwui naolaka, kala mik ngapeolaga phara laka. Kha ana kathada theihao khala kachi mathei mana, kala khipana rakngasak khala kachila mathei mana, Ali ngahanlu, a khararnaona, ana ngahanka shapra." Ava eina avana Jehudibingli khangacheewui vangchithada hangkahaina, kaja Jesuli Messiahna da hangkaphata chili vareshimwui eina katat haora da Jehudibingna maya khangarok sahairasai. Hiwui vang anina "A khararnaona, ali ngahanlu" da kahangna. Athumna mik ngapeoda kaphara mi chili holuishitta hanga, "Varewui mangali khamashung tui hangra" da khangashit salu. Mipa chi morei kaphungana kachi ithumna thei." Ana hanga, "Mipa chi morei phungka maphungkhala I mathei mana. Kha imik ngapeosai, ara theihaira kachi hi ina thei." Athumna ngahana, "Ana nali khi sami khala? Namik kathada rakngasak khala?" Ana ngahankai, "Ina nathumli hanghaira, kha nathumna mashitsang mana. Khisada ngahanlui ngahanlui jikhala? Nathumla awui sakhangatha sangaila?" Athumna ali khonshida hanga, "Na awui sakhangathana; ithumna Moseswui sakhangathabingna. Mosesli Varena ngazeka kachi ithumna thei, kha mipa hi kachieina rakhala kachi khipakha matheimana." Ana hanga, "Hi matakhak kahai otna. A kachiwui eina rakhala kachi nathum mathei mana, kha ana imik rakngasak haira. Varena morei kaphungbingli mashami mana, kha ali khayakashiya kala awui ningkachang kasa athumli shakhamina kachi ithumna thei. Okathui haokaphok eina thuida mik ngapeoda kaphara mili mi akhana rakngasaka kachi mashalak ranga. Mipa hi Varewui eina khara maning akha khi otkha masarar mara." Athumna ngashimshida hanga, "Nava morei lungli pharasang kahai mina, laga ithumli tamchitheiki kachila?" Chieina athumna ali vareshimwui eina katat haowa.

Manglawui Mik Khangapeo

Mipa chili vareshimwui eina katat haira kachi Jesuna shai, kala thangkha samphangda hanga, "Na Miwui Naomayarali shitsangla?" Ana ngahankai, "Amei, a khipa khala?" Jesuna hanga, "Na ali theihaira, kala arui nali ngazekta khaleipa hi alaka." Mipa china "Proho, I shitsanga" da hanga kala Jesuwui mangali khukti zangda khoruma. Jesuna hanga, "Ina okathuili bichar sakhavai kharana, chieina mik khangapeobingna kathei samphangra, kala katheibingna ngapeo haora." Chili leikasa Pharisee kaikhana shada ngahana, "Ithumla mik ngapeowa kachila?" Jesuna ngahankai, "Nathum mik ngapeosi kache khayon maleimara, kha nathumna theida lei chihaokida arui eina tangda yonda lei.

10

Yaoshimwui Chanjam

Kachangkhat eina ina nathumli kahangna, kaja yaoshimli khamong eina mazangla akhurli yakkaka mipa chi khalena kala ngaponkazana. Kha khamong eina kazanga mi chi yaokahomana. Ngavei khamayonnana ali shomi; ana yaobingli kachichawui aming kaho chitharan awui khon shai kala ana homzata. Ana homshokta athumli thanzata, kala athumna awui khon shada athi shurzata. Athumna khangateili mashurphapha mana, kaja athumwui khon mamachut mana." Jesuna chanjam hi athumli hanga, kha khi kahangkhala kachi athumna matheirar mana.

Jesu Kapha Yaokaboma

Chieina Jesuna hanglui shita, "Kahanghat eina Ina nathumli kahangna; I yaobingwui khamongna. Khangatei ili rida kharabing saikora khale kala khangaponabingna, yaobingnala athumli mangana mana. I khamongna; ili kazanga mi chili huimira; ana shokzangda seizatpam samphangra. Khale china likhavai, sathat khavai kala shiman ngasak khavai rai. Kha khavat makhalei kharing samphang khavai ina rakhamina. I kapha yaokahomana. Kapha yaokahoma china yaobingwui vang mangla chihomi. Yaokahoma makhaninga kaja phakasanga mi china kharang rarali da kathei eina athumli chiho haida yamhaowa. Chieina kharang china yao tukshaida kashamyang haowa. Phakasang mina yaobingli mashivammada yamkahaina. I kapha yaokahomana. Ina iwui yaobingli thei, athumnala ili thei. Ishavana ili kathei thada inala ishavali theiya, kala ina iwui yaobingwui vang mangla chihomi. Yaoshim hili makazanga iwui yao khangateila lei. Ina athumlila khuizang phalungra, kala athumna iwui khon shara. Chieina yaokahoma akhamangra, yaoshangla akhamangra. Ishavana ili leishi, kaja ina iwui mangla samphanglui khavai chikat shapa. Khipanakha iwui eina mangapaikhui mana, kha iningkhan eina kachikatana. Ina mangla chikatshapa kala chi ina khuiluishapa. Pangshap hi ishavawui eina samkaphangna." Tui hi kasha eina Jehudibingwui ngachaili ning ngakai khangarok leiluishit haowa. Athumwui ngachaili kachungkhana hanga, "Ali kameo zanghaida pahaira. Khisada ali ngana khala?" Kha kaikhana hanga, "Kameo kazanga mi akhana hithada mamatui mara. Kameo kazanga mi akhana kathada khangapeobingli rakngasakra khala?"

Jesuli Jehudibingna Makhamaya

Jerusalemli dharkat phanit kasa atam rahaowa; chi sikachangna. Jesuna vareshimli khalei Solomonwui yangkhupli zatsai. Chieina Jehudibingna rakuinamda hanga, "Nana ithumli karankha ningmawong ngasakra khala? Na Christana jiakha tharlak eina hanglu." Jesuna ngahankai, "Ina nathumli hanghaira, kha nathumna mashitsang mana. Ishavawui pangshap eina ina kasasa china shakhina. Kha nathumna mashitsang mana, kachiwui vangkhala kaja nathum iwui yaoshangli mazang mana. Iwui yaobingna iwui khon shai; ina athumli thei, chieina athumna ithi shurra. Ina athumli makashiman kharing mi, chieina athum mathilak mara; kala athumli khipanakha iwui eina mangapaithui mara. Ili khame ishavana saikorali reimei, kala athumli khipanakha ishavawui pang eina mangapaikhuirar mana. Ishava eina I akhana." Jehudibingna ali horthatkida lunggui ngamuikhui. Jesuna athumli hanga, "Ina nathumwui mangali ishavawui kapha ot kachungkha sakahaiwui vang ili lunggui eina horki kachila?" Jehudibingna ngahankai, "Kapha kasawui vang lunggui eina horki kachi maning mana, kha Vareli kachipatwui vangna. Na mikumona, kha nakhalatta Vare sakhui." Jesuna ngahankai, "Nathumwui ain changli "Nathum kameonaobingna da ina kahangna" kachi makapihai mala? Varewui tui samphang kahai athumli kameonaobing hoi (kathara tui mangacheipai mana). Ili Varena kapangkhui laga chiho kharana. Chithakha I Varewui Naomayarana da kahang hili, Vareli kachipat khi leikhala? Ina ishavawui ot masakha ilila mashitsang alu. Kha sasakha ili mashitsanglala iwui otsak chili shitsanglu; chithakha ishavana ili lei, ina ishavawuili lei kachi nathumna theishingkhui paira. Chieina athumna ali tukkhui khavai salui shita, kha ana athumwui eina thuihaowa. Jesuna Jordan kong kanlaga Johnna rahikmi khavai apam chili ngasamkhui. Chili mi kachungkha rada hanga, "Johnna matakhak kahai ot masamana, kha ana mipa hiwui maramli kahang saikora mashungsera. Apam chili mi kachungkha rada Jesuli shitsanga.

11

Lazarus Kathi

Lazarus kaho Bethanyli kapama mi akha kazahaowa. Bethany hi Mary eina achonva Martha kapama khana. (Mary hi Prohowui pheili nganamkapha thao neomilaga awui kuisam eina mitkhamiva china. Kaza kasa Lazarus hi apana.) Chinaoni hina Jesuli pao chihovada hanga, "Proho nawui khaluma ngasotnao kazahaira." Jesuna pao chi kasha eina hanga, "Hi thitchangki kachiwui kazat maning mana, kha Vareli tekmatei khavaiwui vangna, kala Varewui Naomayarana tekhamatei samphang khavaiwui shongfana." Jesuna Martha eina agatuiva kala apa Lazarusli leishilaka. Kha Lazarus kazada lei kachi shalala apam chili khanithang pamsangfaya. Chiwui thili Jesuna sakhangathabingli "Judeali thusa" da hanga. Chieina sakhangathabingna ngahankai, "Oja, achonthangchang nali Jehudibingna lunggui eina horkida sai, laga chili taluisila" Jesuna hanga, thangkhali pung tharada khani malei mala? Mina ngashunshong yaothui akha phei mangaphok mana, kaja okathuiwui kahor chi ana thei, kha ngayashong yaothui akha phei ngaphoka, kaja tangkhamangwui vangna." Jesuna hithada hangsanglui, "Ithumwui ngasotnao Lazarus piphup haira, kha ina ali amathotra." Sakhangathabingna ngahankai, "Proho, ana pida leisa akha raihaora." Kha Jesuva Lazarus thihaira kachi kahangna. Athuma khangacha kapi eilida phaning kasana. Chieina Jesuna meisa eina hanga, "Lazarus thihaira. Kha nathumna shitsang khavaiwui vang I chili maleikasa chi phalak haira. Ithum awuili vausa." Thomas, (Ngashira kaho) china awui ngasotnao sakhangathabingli hanga, "Ithumla ali ngasoda thikhavai ojali ngasovausa."

Ringkhaluiya kala Kharinga Jesu

Jesuna vakashung chitharan Lazarusli chifada matithang hairasai. Bethany hi Jerusalemwui eina mile khani shakha tai. Chieina Jehudi kachungkhana Martha eina Maryli, apa thikahaiwui vang ringpha ngasak khavai rai. Marthana Jesu rarali kachi kasha eina vangaroka; kala Mary shimli pamhaowa. Marthana Jesuli hanga, "Proho, na hili leisasi kaja ipa mathilak mara. Kha chithalala arui eina tangda Varena nawui kapopo chi samira." Jesuna ali hanga, "Napali ringshok ngasakra. Marthana "Khanaowa zimiksholi ringluira kachi shitsanga." Jesuna ali hanga, "Ina ringkhalui eina kharingana; kachikathana ili shitsang akha thihaisalala ringra; kala kachikathana ringda ili shitsang akha mathilak mara. Shitsangla?" Ana "Mha, Proho, okathuili raki kache Varewui Naomayara Messiah chi nalaka" da ngahankai."

Jesuna Kachap

Marthana hi hangkahaiwui thili agatuiva Maryli ngathumda hokhuilaga hanga, "Oja hili leili, kala ana nali phada lei." Maryna chi shakhaleoda shoksamphanga. Jesuna khalungli marashungla Marthana asamkaphang apam chili leikasana.) Maryli suiphanepta ngasopam kasa Jehudibing china Mary shokkahai theida shurshoka. Athumwui ningli Mary chikhur pamli achapki kachina da phaninga. Maryna Jesuwuili vakashung eina khukti zangda hanga, "Proho, na hili leisasi kaja ipa mathilak mara." Jesuna awui kachap kala ali shurkharabingwui kachap chi theida awui ningli sazana haowa. Kala athumli ngahana, "Kali chifahaili khala?" "Proho, rayanglu" da athumna hanga. Jesuna chapa. Chieina Jehudibingna hanga, "Yanglu, ana kayakha leishi khala?" Kha athum kaikhana hanga, "Mik khangapeoli rakkhangasak ana Lazarus mathi khavai khikha masarar marala?"

Lazarus Ringkhaung

Jesuna ning sazana haoda lungphek eina shungnam kahai chikhur chili vai. "Lungphek chi khalang shoklu" da Jesuna kasoi. Thikahaipawui achonva Marthana ngahankai, "Proho, nganamshi hairara, kaja chifada matithang haira." Jesuna ali hanga, "Nana shitsang akha Varewui tekhamatei theira da ina mahangmala?" Athumna lungphek chi khalangshok kahai eina Jesuna kazin gram yangkada hanga, "Ishava, nana ili shakhamiwui vang nali ningshi. Nana ili shami chinga da thei, kha hili khaleibingna nana ili kashiratna kachi shitsang khavai kahangna." Chiwui thili panglak eina vaoda hanga, "Lazarus, shoklu." Kathe china aphei, apang kala amai kachon eina teiphinser hailaga shokrasai. Jesuna athumli hanga, "Khalami haida ali zatngasaklu."

Jesuli Sbaothat Khavai Kasa

Marywuili khara Jehudi kachungkhana Jesuna kasa chi theida shitsang haowa. Kha athumwui ngachaili kaikhana Phariseebingli Jesuna sakahai chi unghangchithei. Chieina Phariseebing eina pangmon akhavabing kazipta hanga, "Kathausi khala? Mipa hina kahahaka otmang sada lei. Ithumna ali hithada chihohai akha mi kachiva ali shitsang howra, kala Rome shorkarna rada ithumwui vareshim kala yur hi shiman ngasak howra." Athumwui ngachaili Caiaphas kaho, chikum pangmon kharei sakasapa china hanga, "Nathum khikha mathei mana. Yur katonga shimanki kachile mibingwui vang mi akha thikhangasak phamei kachi nathum mathei rangla? (Kachangkhat hi awui ning eina kahang maning mana, kha chikum ana pangmon kharei sasahaoda Jehudi yurwui vang Jesuna thimira kachi hangkhamaranna. Kala chimang maningla, Varewui mibing chaiyang eina leikasabingli akha sada ungkazip ngasakra kachina.) Chithang eina thuida Jehudi akhavabingna Jesuli shaothat khavai khangaran saphoka. Chiwui vang eina Jesuna Judeali phonglak eina mazatla, lamhang ngalemli khalei Ephraim kaho keinung chili sakhangathabingli ngasoda apama. Chitharan Makankhami phanit nganaiuda mi kachungkha zatkhang sada tharkhamathengwui shar sakhavai, khakhawui eina Jerusalemli kai. Athumna Jesuli phai, kala vareshimli zangda akha eina akha ngahan ngaroka, "Khi phaning khala? A zatkhangli marachang marala? Jesuli tukkhui khavai a khalei pam theiakha hanglu da pangmon akhavabing eina Phariseebingna rida pao mihairasai.

12

Jesuli Thao Neokhami

Makankhami phanit sakida tharuk thang vatlakha, Jesuna kathiwui eina ringkhangasak Lazaruswui pam Bethanyli vai. Chili athumna Jesuwui ngazin phazat ngaranhaisai; kala Marthana zat ngaranmida Lazarusna Jesuli ngasoda tableli pama. Chieina Maryna aman kasaka nganamkapha thao likli akha khuirada Jesuwui pheili neomi, kala awui kuisam eina mitmihai. Thao chiwui anganamna shim chi pemhaowa. Sakhangathabingwui ngachaili ali yorzaki kache Judasna hanga, "Thao hi lupa shakathum eina yorhailaga kachambingli khisada mamithu khala?" Ana kahang hi lukhamashanwui maning mana, kha a khalena, ana lupakhao kasinga sada awuili ungkazang chi ngathumda khuichinga. Kha Jesuna hanga, "Aningkhan ranu, ili kachizan zimikshowui vang ana haisa ranu. Wathuma kachamabingli ngasochingra, kha iya nathumli mangasolui mara."

Lazarusli Shaothat Khavai Kasa

Jesu Bethanyli leiyada kasha eina Jehudi kachungkha chili vai. Athumna chili khava chi Jesuwui vang mang maningla kha kathiwui eina ringshok ngasak kahaiya Lazaruslila yangkida khavana. Chieina pangmon akhavabingna Lazaruslila shaothat khavai sai; kaja awui vang eina Jehudi kachungkha akhavabingli horhaida Jesuli shitsang haowa.

Jerusalemli Kaka

Kakhane thang Makankhami phanitli khara Jehudi kachungkhana Jesu Jerusalemli rarali kachi shai. Chieina athumna khaneina singlaga Jesuli samphang khavai vai, kala "Vareli sochikatlu, Prohowui mingli khara Israelwui Awungali ringkapha ngasaranu" da vaowa. Jesuna gadhanao akha khuida tonga, hi kathara lairikli hanghaisai: "Mangachee alu, Zionwui keinung! Nawui awunga rarali, gadhanao akhali tongda." Chitharan sakhangathabingna matheisa mana, kha matakhak eina Jesuna ringkhalui tharan kathara tuili hanghaikasa athi shurda athumna kasana kachi phaningkhuinaowa. Jesuna Lazarusli kathiwui eina ringngasakta chikhurwui eina hoka shok chitharan awui ngalemli leikasa kaikhana khi shokhaira khala kachi kateibingli sakhi sai. Chiwui vang eina yaruina ali samphangkida vai, kaja Jesuna kahaka ot sahaira kachi shahaowa. Phariseebingna ngazek ngarokta, "Yanglu, ithum ot masa pai thura, okathui katonga ali shur thui haira."

Greekwui Mi Kaikhana Jesuli Kapha

Phanitwui atamli Jerusalemli khorumkida khavabingwui ngachaili Greek kaikhala zanga. Athumna Galileeli khalei Bethsaidawui mi Phi lipli ahanga, "Oja, ithum Jesuli thei ngai." Philipna Andrewli hanga, ka la ani khanina Jesuli ahanga. Je suna anili hanga, "Miwui Naomaya rana tekmatei ngasakki kachi atam ara rahaira. Kachangkhat eina ina nathumli kahangna, mangumna nga leilungli tazangda mathi akha chitha da leichinga, kha thihai akha mangum kachungkha mathei ngasaka. Ka chikathana awui manglali leishi akha chi shimanra, kha okathui hili ama nglali mashivam akha chi katang ma vaila leisara. Kachikathana ili ot ram ngathangai akha ili shurphalungra kala I khalei chili iwui raola leira Ili otram khangathaa mi chili isha vana khaya kangasakra.

Jesuna Awui Kathiwui Pongli Khamatui

"Ara imangla khananglak haira. Khihangra khala? 'Ishava, ili kahui milu' jirala? Maningmana, kaja atam hili I kachot khangkida kharana. Is hava naming tekmatei ranu." Chieina kazingram eina akhon akha vaotai, "Ina tekmatei ngasak haira, kala tek matei ngasak luishitra." Chili nga ning kasa yaruina akhon chi shada hanga, "Kazing ngashumli." Kala kaikhana hanga, "Kazingraona ali chan khangazekna." Kha Jesuna athumU hanga, "Kahang hi iwui vang maning mana, nathumwui vangna. Ara okathuili bichar saki kachi at amna; okathuiwui akhavali khuishok howra. Ili okathuiwui eina khuika kahai chitharan, mi saikorali iwui ngalemli thankara. (Hi a khithit eina thira khala kachi kahangna.) Yaruina ngahanluishita, "Ithumwui ainli Messiah mathilak mara da hang hai. Chithakha kathada Miwui Nao mayarali khangkapaira? Miwui Nao mayara chi khipa khala?" Jesuna ngahankai, "Kahor chi nathumwuili kashakha leifara. Tangkhamang ma rashung khavai kahor lungli okthuilu. Tangkhamangli kazata a china kachi shong vara khala kachi mathei mana. Kahor chi leilakha chili shitsanglu, chieina nathum kahorwui mibing ngasapaira. Jehudibingwui Mashitkasang Jesuna hi hangkahaiwui thili athum wui eina ngathumthui haowa. Jesu na kahahaka ot athumwui miktali sahailala mashitsang mana. Hi Isaiah Maranna hangkahai ungka shungna: "Proho, ithumwui pao khipana khuisang khala? Prohona khipali awui pangshap chithei khala?" Hiwui vang eina athumna mashitsang khararna, kaja Isaiahna hithadala hanga: "Prohona athumli ngapeo ngasak haowa, athumwui ning mashok ngasak mana, chieina athumwui mikna mathei mana, athumwui ningna maphakhui mana, kala raimi khavai ili mangareiung mara." Isaiahna Jesuwui tekhamatei katheiwui vang awui pongli matuiya. Jehudiwui kathana kachungkhana Jesuli shitsanga, kha Phariseebingna vareshimwui eina khuishokhai paishina da phonglak eina mamatui mana. Athumna Varewui kasopaliya mikumowui kaso ningchangmei haowa.

Jesuwui Tuina Bichar Kasa

Jesuna panglak eina hanga, "Kachikathana ili shitsang akha, I mangli shitkasang maningla ili kashirata chilila shitkasangna. Kachikathana ili thei akha ili kashirata chilila katheina. Ina okathuili khara hi kahor thada kharana, chieina ili shitkasanga mi kachiva tangkhamangli maleimara. Iwui tui shalaga makhuisang akha, ina ali bichar masamara; kachiwui vangkhala kaja ina okathuili bichar sakhavai maningla huikhui khavai kharana. Ili mamaya mada iwui tui makhuisang akha ali bichar sakhavai akha lei. Ina hangkahai tui china khanaowa zimiksholi ali bichar kasa ngasara. Kha ili kashirata Avava china khi hangra khala kala matuira khala kachi ili kaso kahaina. Kala awui ningkhami chi katang makhavai kharingana kachi ina thei. Chieina Ina kahang hi Avavana kakasowui athi shurda kasana."

13

Sakhangathabingwui Phei Pheokhami

Makankhami phanit sakidathangkha vatlakha, Jesuna okathui hi kanlaga Avavawuili vaki kachi atam rahaira kachi theihaowa. Ana okathuili khaleiya awui mibingli leishilaka, kala khanao eina tangda leishi. Ngazin phazatwui atamli Simon Iscariotwui naomayara Judasli chipee zanghaida Jesuli yorza khavai khangaran sahairasai. Avavana pangshap katonga mihaira kachi Jesuna thei, kala a Varewui eina kharana kala Varewuili ungura kachila thei. Chieina Jesuna awui kachon thuiraita hailaga towel akha kashanli neikhui. Kala khongsaili tara heisangda Sakhangathabingwui phei pheomilaga awui kashanli khanei towel chieina mitmihai. Jesuna Simon Peterwuili khara eina Simonna hanga, "Proho, nana iwui phei pheoranla?" Jesuna hanga, "Ina khi sakhala kachi na arui matheimana, kha naoda theira." Peterna hanga, "Nana iphei mapheopailak mara." Jesuna ngahankai, "Ina naphei mapheomi akha ini khangarum maleimana." Simon Petema ngahankai, "Chithakha Proho, iphei mang maningla ipang eina ikuila pheomilu." Jesuna ngahankai, "Ravai kahai mina aphei maningla khangatei pheokhavai maleimana. Mi akha chi maningla nathum tharserda lei." (Jesuna ali khipana hatra khala kachi theida 'Mi akha chi maningla nathum tharserda lei' da kahangna.) Jesuna athumwui phei pheomihai laga awui kachon ngavaikhuida pamluishita. Kala "Ina arui nathumli sakhami hiwui kakhalat theila?" da ngahana. "Nathumna ili oja kala Proho da hoi, chi mashunga, kaja I chilaka. Nathumwui Proho kala ojana phei pheokhami chithada nathumla akha eina akha pheomi ngarok phalungra. Nathumnala chithada sakhavai tamkachitheina. Kachangkhat ina nathumli kahangna, raona akhavali mahakmei mana, paophungmena kashivatali mahakmei mana. Ara khamashung hi nathum theihaira; nathumna hiwui athi shurda saakha kayakha ringkapha ngasara khala? Ina nathum saikorawui pongli kahang maning mana, ina kapangkhui kahaibing chill ina thei. Kha kathara tuili hangkahai, 'Ili phaza khangaruma a china ili mamaya mara' kachi hi ungshung phalungra. Atam chi ungkashung eina 'I khipakhala kachi nathumna shitsang khavai rida hangmaran kahaina. Kachangkhat ina nathumli kahangna, ina kashivata mili khamaya chi ili khamayana, kala ili khamaya chi ili kashirata chili khamayana."

Jesuli Yorzaki Kachi Hangkhamaran

Tui hi hanghailaga, Jesuna ningli sazalak eina hangphata, "Kachangkhat ina nathumli kahangna, nathumwui ngachaili akhana ili yorzara." Chieina sakhangathabing akha eina akha ning maongtong eina khipakhala da yangka ngaroka. Jesuna leikashiya sakhangatha akha awui ngalemli pamsai. Simon Peterna ali 'Khipa khala' da ngahan ngasaka. Chieina ana Jesuwui vak shaivada hanga, "Proho, chi khipa khala?" Jesuna ngahankai, "Ina khamui tengkotli rurkhuilaga miki kachi chipana." Chieina ana khamui tang akha rurkhuilaga Simon Iscariotwui naomayara Judasli mihaowa. Judasna khamui chi khuikhaleoda awuili satan zanghaowa. Jesuna ali hanga, "Thakta nawui sakapai salu." (Table kuimareida kapama mi khipanakha Jesuna ali kahang chi phab matarar mana. Judasna lupakhao singhaoda zatkhangwui vang ali ot alokhuilu kachi aili, maningakha kachambingli kateokha mikhaval kahang aili da sakhangathabingna phaninga.) Judasna khamui chi khuilaga hengsada shokhaowa. Chi ngaya hairasai.

Ningkhami Kadhara

Judas thuikahaiwui thili Jesuna hanga, "Ara Miwui Naomayarawui tekhamatei phonghaira, kala awui eina Varewui tekhamatei phonghaira. Varewui tekhamatei chi awui eina phongmi akha Miwui Naomayaralila makahatlakla tekmatei ngasakra. Inao ngara, ina nathumli kasangkha mangasolui mara. Khaleilaga nathumna ili phara, kha ina Jehudibingli kahang chi nathumlila kahangna kaja ina vaki kachi chili nathum mavarar mara. Ina nathumli ningkhami kadhar khamina kaja nathum akha eina akha.leishi ngaroklu. Ina nathumli leikashi thada nathum akha eina akha leishingarok phalungra. Nathum akhana akhali leikashi leiakha nathum iwui sakhangathabingna kachi saikorana theira."

Peterwui Makhamaya Jesuna Hangkhamaran

Simon Peterna "Proho, na kali vaura khala?" da ngahana. Jesuna ngahankai, "Ina vaki kachi chili ara na mashurararlui mara." Peterna ngahana, "Proho, khisada mashurararra khala?" I nawui vang thishapra. Jesuna ngahankai, "Na kachangkhat iwui vang thishap rala? Kachangkhat eina ina nali kahangna, harva makhong ranglakha nana ili matheimana da kathum shida hangra."

14

Avavali Vakhavai Shongfa Jesuna

Wuk makhanang alu; Vareli shitsanglu. Ishavawui shimli pamkhavai ka kachungkha lei; chi maningsi kaja ina nathumwui vang pam angaranura da hangrala? Kala nathumwui vang pam angaran hailaga nathumli rahokhuiluira chieina I khalei pamli nathumla leira. Kala iwui shongfa nathum thei." Thomasna hanga, "Proho, nana vaki kachi shongfa ithum mathei mana; shongfa chi kathada theira khala?" Jesuna ngahankai, "I shongfana, khamashungana, kala kharingana; ili khara maningla avavawuili khipakha marapai mana. Ara nathumna ili theihaoda Avavalila theikahaina; nathumna ali samphang haira, kala theihaira." Philipna hanga, "Proho, Avava chi ithumli chithei milu." Jesuna ngahankai, "Hirankha nathumli ngasopam haira, laga ili mathei rangla, Philip? Kachikathana ili theiakha Avavali theikahaina. Chitha akha khisada Avavali chitheilu da hangkhala. Avavawuili lei kala Avava iwuili lei kachi hi mashitsang mala? Kala sakhangathabingli hanga, "Ina khamatui hi iwui eina kashok maning mana, kha ili khalei Aavawui otsakna. I Aavawuili lei kala Avava iwuili lei kachi hi shitsanglu. Chi maningkha sakahai otbing chili shitsanglu. Kachangkhat ina nathumli kahangna, kachikathana ili shitsang akha ina kasa ot chi ala sashapra, hakhamei ot eina tangda sara, kaja I Avavawuili vahowra. Kala nathumna iwui ming eina kapopo chi ina mira, chieina Avavawui tekhamatei chi Anao Mayarawui manga eina theikhuipaira. Nathumna iwui ming eina kapopo chi ina mira."

Mangla Kathara Mira da Khangashit

"Nathumna ili leishi akha iwui ningkhami mayon phalungra. Nathumli khangatei Machinme akha mikhavai ina Avavali pora; khamashungwui Mangla china nathumli ngasopam chingra. Okathuina ali masamphangrar mana, kachiwui vangkhala kaja okathuina ali mathei mana, theikakhuila malei mana. Kha nathumna ali thei, kaja ana nathumli ngasopamda nathumwui lungli lei. "Ina nathumli ngachakyang eina mahorhai mara; I raluira. Hunkhawui thili okathuina ili matheilui mara, kha nathuma theira; kala ina kharing thada nathumla ringra. Chieina I Avavawuili lei, kala ina nathumli khalei thada nathum iwuili lei kachi theira." "Iwui ningkhami mayon akha, a ili leikashena. Hi leikashe chili ishavanala leishira; Inala ali leishida ikhalatta ali phongmira." (Judas Iscariot makhaninga) Judasna hanga, "Proho, nakhalatta okathuili maphongmila ithumli phongmira kachi hi kathahao khala?" Jesuna ngahankai, "Kachikathana ili leishi akha iwui tui khuisang phalungra. Ishavana ali leishira, kala ishava inina awuili rangasamra. Kachikathana ili mateishi akha iwui tui makhuisang mana. Nathumna kasha pao chi iwui eina maning mana, kha ili kashirata Avavawui eina kharana. "Ina nathumli ngasopam lakha hanghaira; iwui ming eina Avavana shiratki kache Mangla Kathara, Machinme china ot saikora nathumli tamchitheira, kala ina hangkahai saikora phaningung ngasakra. Ina nathumli chingrikahai khamina; ikhalattawui chingrikahai khamina. Hi okathuina khami katha maning mana. Wuk makhananglak alu, khangacheela mangachee alu. Ina thuihailala raluishitra da kahang chi nathumna shahaira. Nathumna ili leishi akha, ina Aavawuili vaura kachi hili ringpha ngayilaka, kachiwui vangkhala kaja ana ili reikhameina. Ot chi ungkashung tharan nathumna ili shitsang khavai saikora marashok ranglakha rida hangkahaina. Ina nathumli kasangkha mahangrar mara, kachiwui vangkhala kaja okathuiwui akhava rarada lei. Ana iwui tungli pangshap malei mana; kha ina Avavali leishi kachi okathuina theikhavai, Avavawui kakaso kachiva ina kasana. Ngakarthuilu, zatusa."

15

Jesuna Drakharongna

"Ina drakharongna kala ishavana yamgui akhavana. Athei makhamathei aphang kachiva ana yortamihai, kala athei khamathei aphang kachivali chungmeida mathei khavai samathami. Ina nathumli tamchithei kahai tui chieina nathumli tharngasak haira. Ili zanglu, chieina ina nathumli zangra. Aphangna arongli malei akha athei mamatheipai mana." Ina drakharongna, kala nathumna aphangna. Kachikathana ili zangakha, athei tarakha matheira, kaja I mazangla nathumna khikha masarar mana. Kachikathana ili mazangakha aphang katheng thada katatkhui, kala kazipkhui laga meili horsangda chuita ngasaka. Nathumna ili zangda iwui tuila nathumli leiakha, nathumna ningkachang kapopo chi samphangra. Hithada nathumwui athei tarakha khamathei china ishavawui tekhamatei phongshoka, kala iwui sakhangathabingna da chithei. Aavana ili leikashi thada ina nathumli leishilaka; iwui leikashiwui eina mayamalu. Nathumna iwui ningkhami mayonakha, ina ishavawui ningkhami mayonda awui leikashili khalei thada, nathumla iwui leikashili leira. khahi thada, nathumla iwui leikashili leira. "Ina nathumli kahang hi iwui ringkapha chi nathumli leikhavai kala nathumwui ringkapha chi kashungchao khavai kasana. Hi iwui ningkhamina; ina nathumli leikashi thada nathum akha eina akha leishi ngaroklu. Ngasotnaobingwui vang mangla chihokhami hili langda leishikhamei malei mana. Ina kakaso chi nathumna saakha, nathum iwui ngasotnaona. Ina nathumli rao maholui mana, kachiwui vangkhala kaja akhavana khi sali khala kachi raona mathei mana. Chiwui mahutli, ina nathumli ngasotnao hoi, kachiwui vangkhala kaja ishavawui eina shakakhui saikora nathumli hangser haira. Nathumna ili kapang kakhui maning mana, kha ina nathumli kapang kakhuina. Nathumna vada athei mathei ngasak khavai, kala athei chi mashiman ngasak khavai kapangkhui kahaina; chieina nathumna iming singda kapo saikora Avavana mira. Hi iwui ningkhamina; akha eina akha leishi ngaroklu."

Okathuina Ningkakachai

"Okathuina nathumli ningkachai akha, ili rida ningkachai kahaina kachi phaningunglu. Nathumna okathuiwui ngasa akha, okathuina nathumli leishira. Kha ina nathumli okathuiwui eina kapangkhui haoda nathum okathuiwui maning mana; chiwui vang eina okathuina ningkachaira kachina. 'Raona akhavali mahakmei mana' da hangkahai chi phaningunglu. Athumna ili rekharek akha nathumlila rekharek phalungra; athumna iwui tui khuisang akha nathumwuila khuisang phalungra, Kha iwui vang eina athumna nathumli saikora hi sara, kachiwui vangkhala kaja athumna ili kashirata chili mathei mana. Ina athumli maratamchitheisasi kaja morei kasa matheisa mara, kha ara athum moreiwui eina mayamshokrar mara. Ili ningkakachai chi ishavalila ningkakachaina. Khangateina masalakrang kaja ot chi athumwui mangali masachithei sasi kaja athum moreili tatung haira kachi matheisa mara; kha ara athumna iwui otsak theilaga ilila ishavalila ningkachai haira. Chithalala hi shokphalungra, kaja ainli kapi kahai 'Khi ngalangkha maleila athumna ili ningkachai haira' kachi hi ungshung khavaina. Kha Machinme, Avavawui eina kashok khamashungwui Mangla chi rara. Ina ali Avavawui eina chihorara, kala ana iwui pongli matuira. Kala nathumnala iwui pongli matuira, kachiwui vangkhala kaja haokaphokwui eina nathum ili ngasora kahaina.

16

"Nathum makonglui khavai saikora hi ina hanghaira. Athumna nathumli vareshimwui eina kasham howra. Nathumli shaokathata china awui otsak chi Vareli otram khangathana da kaphaning atam rara. Athumna Avavalila ilila makatheiwui vang chikatha ot sara. Athumna ot chi kachangkhat kasa chitharan, ina hithada hanghaisai kachi phaningung khavai ina rida hangkahaina.

Mangla Katharawui Otsak

Ina khareli saikora hi nathumli mahang mana, kaja I nathumli ngasosai. Kha ara Ui kashirata chili ungura, kha nathum khipakhana 'kali vara khala' da mangahan mana. Kha ina hikathatha kahangwui vang nathum wuk kakhanangna pemhaira. Mashunglak eina ina nathumli kahangna, "Nathumwui vang I kathui phamei, kaja I mathui akha Machinme chi nathumwuili mara mara. Kha ina thuihai akha ali chihorara. Ana khara chitharan okathuiwui mibingli athum morei sahaira, khamashung apong kachikhala, kala Varewui kashong kharang khikhala kachi chitheira. Morei kasa kaja athumna ili mashitsang mana; khamashung kaja ina Avavawuili vada nathumna ili matheilui mara; kashong kharang kaja okathui hili akhava chili kashong rangra. "Ina nathumli kachungkha hangkhavai lei, kha arui chi nathumna makhuirar mara. Kha khamashungwui Mangla chi khara, eina, ana nathumli khamashung katonga chitheira. A khalattawui pangshap eina mamatuila, ana shakakhui kala naoda raki kachi tamchitheira. Ana ili tekmatei ngasakra, kaja ana hangmiki kachi chi iwui eina shokki kachina. Avavawuili khalei katonga iwuina, chiwui vang eina ana iwui eina khuilaga nathumli hangchitheira kachina.

Ringkashi eina Ringkapha

"Kashakha leilaga nathumna ili matheilui mara; kala kashakhawui thili nathumna ili theiluira." Chieina sakhangathabingna ngazek ngaroka, "Kashakha leilaga nathumna ili matheilui mara, kala kashakhawui thili nathumna ili theiluira" da kahang hi khisawi kachikhala? Kala "I Avavawuili ungura" dala hanga. Chieina athumna ngahan ngaroka, "Kashakha kachiwui kakhalat khikhala? Ana khi kahang khala?" Athumna ngahan khangai chi Jesuna theida hanga, "Kashakna leilaga nathumna ili matheilui mara; kala kashakhawui thili nathumna ili theiluira" da ina kahang hiwui pongli ngazek khangarokla? Kachangkhat eina ina nathumli kahangna, nathumna ringada chapakha okathuina manara; nathumna ning chotra, kha kachot chi ringkapha onhowra. Shanaona naokhara atam ungkashung tharan, kachot hangkhavai maleimana, kha nao phara kahai chitharan kachot saikora malaiser haowa, kachiwui vangkhala kaja okathuili nao akha phara haida ringpha haowa. Chi takam eina aruihon nathum chotta lei, kha ina nathumli samphangluira, kala nathumwui wuk ringkaphana pemhowra. Chikatha ringkapha chi nathumwui eina khipanakha mangapaithui mara. "Chitharan nathumna ili khikha mangahan mara. Kachangkliat ina kahangna, nathumna iwui ming singda ishavali kapo saikora ana mira. Aja eina tangdsi nathumna iwui ming singda mapolak ranga; polu, samphangra, chieina nathumwui ringkapha kashungra.

Okathuili Khayui

"Ina nathumli chanjam eina hanghaira; kha chanjam eina mahangluila, Avavawui pongli ngatartei eina hang khavai atam rahaira. Chitharan nathumna iming singda ali pora; ina nathumwui vang pomira kachi maning mana, kaja Avava akhalatta nathumli leishilaka, kachiwui vangkhala kaja nathumna ili leishi kala I ishavawui eina kharana kachi naihumna shitsanga. I ishavawui eina okathui hili kharana; kala ara okathui hiwui eina ishavawuili unglui howra." Chieina awui sakhangathabingna hanga, "Yanglu, chanjam tui eina maningla ara nana phonglak eina hanghaira. Nana theiscra kachi ara ithumna theihaira, ngahanlui khavai malei mana. Kala na, Varewui eina rai kachi ithum shitsanghaira." Jesuna athumli hanga, "Nathum ara shitsanghairala? Atam chi rarali, kala nathum chaiyang eina kachichawui shimli unghaida, ili ngachakyang eina nothahaoki kachi atam chi kharala rahaira. Kha kachangkhat imang maning mana, kaja ishavana ili ngasoda lei. Hi zangda chingrikahai samphang khavai hi nathumli kahangna, okathuina nathumli kachot kachang mira. Kha manganglak alu, ina, okathuili yuihaira."

17

Jesuna Sakhangathabingwui vang Seiha Kasa

Jesuna hi hangkup kahaiwui thili kazingram yangkada hanga, "Ishava, atam chi rahaira; nawui Naomayarana nali tekmatei ngasakra. Khikhala jila Nana mikahai mikumo saikorali katang makhavai kharing mikhavai, nawui Naomayarali pangshap mihaira. Kala katang. makhavai kharing kachi hiya mikumona khamashunga Vare nali kathei, kala nana kashirata Jesu Christali kathei hina. Nana ili salu da mikahai ot chi kuphaida, okathui hili nawui tekhamatei phonghaira. Ishava, okathui masarang lakha nana ili mikahai tekhamatei chieina arui nawui mangali ili tekmatei ngasakmilu. "Nana okathuiwui eina ili kapangkhui khami mibing chili naming iheingasak haira. Athum nawuina, kala athum chi nana ili mida athumna nawui tui nganai. Kala nana ili mikahai saikora hi nawui eina khara laka da ara athum theihaira. khikhala jila nana ili khami pao chi ina mida athumna samphang haira; chieina I nawui eina rai kachi mashunga da athum theihaira, kala nana ili kashiratna kachi shitsang haira." "Ina athumwui vang seiha sai. Ina okathuiwui vang seiha masa mana, kha nana ili mida iwui ngasa kahai mibing chiwui vang kasana. Iwui khalei saikora nawuina, kala nawui saikora iwuina; iwui tekhamatei athumwui cina theihaira. Ara I nawuili kharana; okathuili maleilui mara, kha athuma okathuili leida lei. O kadhara Ava, nana ili mikahai athumli nawui mingwui pangshap china mayonmilu, chicina na eina akha kasa thada, athum akha ngasapaira. Ili nana mikahai athumli ngasoda leilakha nawui mingli athumli ina mayonmi ina athumli mayonmida leilakha, kathara tui ungshung khavai shiman phalungki kachipa maningla khipakha mashiman mana. Ara I nawuili rarali; kala ina okathuili kahang hiya athuinna iwui ringkapha chi ningli pemting eina samphang khavaina. Ina nawui pao chi khamiwui vang okathuina athumli ningkachai haowa, kaja ina okathuiwui makhaning thada athumla okathuiwui maning mana. Athumli okathuiwui eina khuithui khavai kapo maning mana, kha athumli chipeewui eina mayonmi khavai kapona. Ina okathuiwui makhaning thada athumla okathuiwui maning mana. Athumli khamashung chili chikatngasak milu; nawui tui chi khamashungana. Nana ili kashirat thada, ina athumli okathuili chihokhavana. Kala athumna khamashung chili chikatshap khavai, ikhalatta nali kachikatna. "Ina athumwui vang mang seiha kasa maning mana, kha athumwui pao shada ili shitkasanga athumwui vangla sali. Athum akha sakhavai ina seiha sali. Ishava, nana iwuili, kala ina nawuili khalei thada, athum iniwuili leiranu. Athum akha sahai akha nana ili kashiratna kachi okathuina shitsanga. Na eina I akha kasa thada athum akha sakhavai, nana khami tekhamatei chi athumli mihaira. Ina athumli kala nana ili leiakha athum akha ngasachuo howra; chieina nana ili kashiratna kala nana ili leikashi thada athumlila leishi kachi okathuina theira. Ishava, athumli nana ili mihaira, kala nana khami tekhamatei thcingasak khavai, I khalalei pamli athumlila leingasakngai. He kathara Ishava, okathuina Nali matheilala, ina nali thei, kala nana ili kashiratna kachi mibing hina thei. Ina athumli naming theingasak haira, kala chithada theingasak chingra, chieina nana ili leikashi chi athumwuilila leira, kala inala athumwuili leira."

18

Jesuli Tukkakhui

Jesuna seiha sachang hailaga sakhangathabingli ngasoda Kidron tampakli khava thanm yamgu; akha leisada athumna chili azanga. Apam chi Jesuli yorkazapa Judasla theihairasai, kaja Jesuna awui, sakhangathabingli kachungkha shida chili samphanga. Chieina Judasna thanda shipaila pangmon akhavabingna kachiho kathana kaikhala, kala Phaseebingla zangda zeikhaingahala thaomeila singlaga yamgui chili rarasai. Jesuna shokki kachi theiserhaoda, athumwui mangali shokhanga, "Nathum khipali kaphakhala?" Athumna "Nazarethwui Jesuli kaphana" da ngahankai. Jesuna, "Ina" da hanga. Yorkazapa Judasla athumli ngasoda nganingsai. Jesuna "Ina" da kahang eina athum sanaungda ngaleili konglui zanga. Jesuna athumli ngahanlui shita, "Nathum khipali kaphakhala?" Athumna "Nazarethwui Jesuli kaphana" da hanga. "I ana" da nathumli hanghaira da Jesuna hanga, (Jesuna kahang hi ana hangkahai chi ungshung ngasak khavaina, kaja "Ishava, nana ili mikahai athum akhala mashiman ngasakmialu" da hanghairasai). Simon Peterna raikhai akha singsada, sutshoklaga Pangmon khareiwui raowui khana yavak yortamihaowa. Raopa chiwui ming Malchus hoi. Jesuna Peterli hanga, "Nawui raikhai chi ahonli sanghaolu. Ishavana ili mikahai tengkot chi I mamangmarada phaningla?"

Jesuli Annaswui Mangali Khuikaka

Chieina shipai akhavana thanda raimibing kala Jehudiwui kathanabing china Jesuli tukkhuilaga khalaphaowa. Kala athumna rimeikapta Annas kaja chikum pangmon kharei sakasa Caiaphaswui awovawuili khuivai. Caiaphas hi Jehudibingli, mi katongawui vang akhana thimi khangayena da hangkhamachinpa china.

Peterna Jesuli Makhamaya

Simon Peterli ngasoda sakhangatha akhana Jesuli shurvai. Sakhangatha akhapa chi pangmon khareili mathalak eina theimasui, chieina ana Jesuli ngasoda pangmon khareiwui kayangli vai. Kha Peterva ngaveili nganinghaowa. Pangmon khareili theikhamashipa china ngavei khamayonva chili shokhanglaga Peterlila alungvak khuizanga. Ngavei khamayonpava china Peterli hanga, "Nala mipa chiwui sakhangatha akha maningmala?" Peterna "Maninglakmana" da ngahankai. Siknahaoda raobing eina khamayonbingna mei salaga kuimareida marampama. Peterla athumli ngasoda amarampama.

Pangmon Khareina Jesuli Khangahan Kasa

Pangmon kharei china Jesuli awui sakhangatha eina awui tamkachitheiwui maramli ngahana. Jesuna ngahankai, "Ina mi kachivali phonglak eina hangchinga; kala Jehudi kakazip pam synagogue, vareshim hikathali tamchithei, ina ngathumda kahang khikha maleilakmana. Chithaakha khisada ili ngahankhala? Kashabingli ngahanlu. Ina athumli khi hangkhala kala athumna khi theikhuikhala kachi ngahanlu." Jesuna hi hangkahai eina shipai akhana amai kapheda hanga, "Kathada pangmon khareili hithada hangkhala?" Jesuna ngahankai, "Ina nguida hanghaira jiakha chi hangphatlu. Kha ina kahang chi mashunga jiakha khisada kakaphekhala?" Chieina Annasna ali khalaplaga pangmon kharei Caiaphaswuili chihovahaowa.

Kakhaneli Peterna Jesuli Makhamaya

Peterna chili nganingda mei marampamsai. Kala athumna hanga, "Na mipa chiwui sakhangatha akha maningmala?" Kha Peterna mamayamada "Maninglakmana" da ngahankai. Peterna khana yortami kahaipawui theisa kashoka, pangmon khareiwui rao akhana hanga, "Ina nali yamgui chili Jesuli ngaso kasa thei." Peterna "Maninglakmana" da ngahankai, kala chichangli harva khonguwa.

Pilatewui Mangali Khuikaki

Athumna Jesuli Caiaphaswui shimwui eina karotli shimenvai. Chi ngathorthakvana. Jehudibingna karotli mazangmana, kaja athum khalatta tharngasakta makankhami zatkhangli zangkhavaina. Chieina Pilatena ayarli athumli shoksamphangda hanga, "Nathumna mipa hili kaphen khi leikhala?" Athumna ngahankai, "Mipa hina yom ot masasasi kaja nawuili makhuiramara." Pilatena athumli hanga, "Nathumwui ain athi shurda bichar salu." Jehudibingna ngahankai, "Ithumna mi khipalikha mashaothatpaimana." (Jesuna kachikatha mithit eina thira khala da kachithei chitharan ana hangkahai chi ungshung khavai hi kashokna. Pilatena karotli zangluishitlaga Jesuli hokhuida hanga, "Na Jehudiwui awungala?" Jesuna ngahankai, "Naning eina kahangka, khangateina hangda kahang khala?" Pilatena ngahankai, "I Jehudina da phaningla? Nawui mibing kala pangmon akhavabingna chiho kharana. Nana khi sahaokhala?" Jesuna hanga, "Iwui wungrama okathui hiwui maningmana; iwui wungram chi okathui hiwui sasasi kajai ili Jehudibingwui pangli mahorsang khavai, iwui kashurabingna ngarar hairara. Kha iwui wungram hili malei mana." Chieina Pilatena ali ngahana, "Thakha na awunga akharali?" Jesuna ngahankai, "Awunga kachi hi nana kahangna, ili okathuili rakaphara hi khamashung chili shakhi mikhavaina. Khamashung mina iwui tui khuisanga." Pilatena "Khamashung chi khikhala" da ngahana.

Jesuli Shaothat Khavai Tuitak

Chiwui thili Pilatena kayang shokluida Jehudibingli hanga, "Ali khayon mikhavai khikha masamphang mana. Kha nathumwui zatkhanawui athi shurda makankhami phanitli phatop kazanga mi akha chihomi chinga. Jehudiwui awunga hili chihomi ngasakngaila?" Athumna panglak eina vaowa, "Ali maningmana; ithumna Barabbasli ningkachangna." (Barabbas khale mina.)

19

Chiwui thili Pilatena Jesuli shaongasaka. Shipaibingna kashatthing eina kuihon sakhuilaga akuili ngahonmi; kala mengchin kahai kachort akha ngavaimi. Kala hithada rahanga, "Jehudiwui awungali okpeimei ranu." Kala athumna maili kapheya. Pilatena kayangli shokluishitta yaruili hanga, "yanglu, ali nathumwui mangali khuishokra, chieina awuili khayon maleimana kachi nathumla theira." Chieina Jesuna kashat kuihon ngahonda kala mengchin kahai kachon ngavaida kayangli shoka. Pilatena athumli hanga, "Yanglu, mi chi hina." Pangmon akhavabing kala kathanabingna ali kathei eina "Krushli shaothat haolu, krushli shaothat haolu," da vaokazama. Pilatena athumli hanga, "Chitha akha nathumna rakhuilaga krushli shaothatlu, kha ina awuili khayon khikha matheimana." Jehudibingna ngahankai, "A thingayi phalunga kachi ainli hanghaida lei, kaja ana Varewui Naomayarana da hanga." Chi shalaga Pilate ngacheemei haowa. Ana karotli zangluishitta Jesuli hanga, "Na kachiwui mi khala?" Kha Jesuna mangahankathu mana. Chieina Pilatena hanga, "Na mangahanka marala?" Nali huiga jilala, krushli shaoshanka jilala iwui pangshap lei kachi matheimala?" Jesuna ali ngahankai, "Nana iwui tungli pangshap khalei hi Varena khami pangshap maya. Chieina ili nawui pangli horsangkhame chiwui morei hakmei." Pilatena hi shalaga chihomi khavai khangaran sai, kha Jehudibingna "Nana ali chihomihai akha, na Caesarwui ngasotnao maning mana, awunga sakhavai khangaran mi hi Caesarli yangkashina" da vaowa. Pilatena chi shalaga Jesuli khuishoka kala Lungham kaho (Hebrew tuili Gabbatha kaho) bichar pamkhong chili pama. Chitharan pung tharada khani tahairasai, kala akhama katha Makankhami phanitna. Pilatena Jehudibingli hanga, "Hi nathumwui Awungana." Athumna vaoda hanga, "Shaothat haolu, shaothat haolu, krush tungli shaoshan haolu." Pilatena hanga, "Nathumwui Awungali krushli shaoshan ngasakngaila?" Pangmon. akhavabingna ngahankai, "Ithumwui awunga Caesar maningla khangatei malei, mana." Chieina Pilatena Jesuli krushli shaoshan khavai horsangmi haowa.

Jesuli Krushli Shaokashan

Chieina athumna Jesuli khuithui haowa, kala awui krush phungda 'Mikuira' kaho apam chili vai (chi Hebrew tuili 'Golgotha' hoi.) Athumna Jesuli chili krushli shaoshana; kala khangatei mi khanilila Jesuwui wuishong akha, yashong akha da krushli shaoshana. Pilatena aming akha kapilaga krushli "Nazarethwui Jesu, Jehudiwui Awunga" da kapimihai. Jehudi kachungkhana hi kapa samphanga, kaja Jesuli krushli shaokashan apam chi keinungwui eina matamana. Kapikahai chi Hebrew, Latin, kala Greek tui eina kapi. Jehudiwui pangmon akhavabingna Pilateli hanga, "Jehudiwui Awunga da makapialu, kha mipa hina 'I Jehudiwui Awungana' da hanga da kapimilu." Pilatena ngahankai, "Ina kapi kahai chi kapi kahaina." Shipaibingna Jesuli krushli shaoshan kahaiwui thili awui kashan kachon kak mati salaga athum akharip haowa. Kha awui phahon katuma chi rakrum kaje phahon ngasasai. Chieina shipaibing china 'Hiya masakhakla kala yanghaosa," da mayangaroka. Hi kathara tuili hangkahai "Athumna iwui kashan kachon sakhakta ngayarra, athumna iwui phahon katuma kala yangra," kachi chi ungshung khavaina. Shipaibingna chithada sai. Kha krush ngalemli Jesuwui ava, avagatui, Glopaswui preiva Mary, kala Magdalawui May athum nganingsai. Jesuna avava eina leikashiya sakhangatha akha chi nganing kasa theida avali hanga, "Shanao, chi nanao mayarana." Chiwui thili sakhangatha chili hanga, "Chi navana. Chithang eina thuida sakhangatha china ashi shimli thanung haowa.

Jesuwui Kathi

Chiwui thili Jesuna ot saikora kuphaira kachi theida, kathara tui ungshung khavai "I rachanghaira" da hanga, Chili athei kathura tengkotkha haisai; chieina athumna chonshi akha thingli khalapshanda atheira chumkhuilaga Jesuwui khamorli sangmi. Jesuna atheira chi manglaga "Kuphaira" da hanga. Kala kui mashunzangda thihaowa. Chiwui thili Jehudibingna athumwui phei sateklaga krushwui eina khuita khavai Pilateli poi. Kaja akhama katha sabbath sahaoda (sabbath hi kanaka zimikna) chithang kathi angun chi krushli kangyuida mahaingai mana. Chieina shipaibingna nganaimeikap kachewui aphei satek haowa, kala chiwui thili Jesuwui lakkhavak khaleiya chipawuila sateka. Kha Jesuli khayang eina thihaira kasa chi theihaoda masatek mana. Kha shipai akhana Jesuwui arapli kazei eina ngashuma, kala chi changli ashee eina tara longshoka. Hi katheiya mipa china shakhi mi, "Awui shakhi khami chi mashunga da ithumna thei; kala nathumla shitsang khavai, khamashung tui khamatuina da ana thei." Kathara tuili "Awui arakui akhala matek ngasak mara" da hangkahai chi ungshong ngasaka. Kathara tui khangatei akhalila hithada hanga, "Athumna ngashumthat kahaiali mibingna ngashanyangra."

Jesuli Kachifa

Chiwui thili Jehudibingli ngacheehaoda ngathumda Josephna, Pilateli Jesuwui angun rapoi. Kathingun chi khuikhavai Pilatena mayamida Josephna khuithui haowa. Jesuli thangkha ngaya rasamkaphanga Nicodemusla myrrh eina aloes khamanata nganamkapha thao pound shakha shakha khuiphungda Josephli ngasorai. Anina Jesuwui phasa chi khuitada khamanaka kachon eina romiaga nganamkapha thao neomi; kaja Jehudibingna mi kachizan atamli hithada saphalunga. Jesuli shaokathata apam chili yamgui akha leisai, kala chiwui alungli mi machizanlak rang kaja kashophut kakhui chikhur kadhar akha leisai. Akhama katha Jehudiwui sabbath zimikshona, kala chiwui ngalemli chikhur leisada chili chizan haowa.

20

Chikhur Chi Masai Kahai

Sunday ngathor mahornarang lakha, Magdalawui Maryna chikhur chili vai, kala chikhur chili shingkahai lungsham chi khalangshokhaira kasa chi athei. Chieina ana ngasamungda Peter kala Jesuna leikashiyapa chili unghanga. "Athumna Prohowui angun chikhurwui eina khuithui haira kala kali haihao khala kachi matheimana." Chieina Peter eina sakhangatha akhapa china chikhurli ayangkhavai vai. Anina ngasamvai, kha akhapana Peterli thakmei haoda vashungri haowa. Ana hamzangda khayang eina khamanaka kachon chi thei, kha chikhurwui alungli mazang mana. Simon Peter naoda ralaga mangasamlakLa zangyanga. Ana khamanaka kachon chi thei. Kuili neimi kahai kachon chi khamanaka kachon chili ngasoda maleisa mana, kha khaluilaga ngateida leisai. Chikhur pamli rashung khare sakhangatha akhapa chila zangyanga, kala chi theilaga shitsang haowa. (Kathara tuili hangkahai, "A kathiwui eina ringshok phalungra" kachi hi anila matheishingkhui rangsai. Chieina ani shimli unghaowa.

Jesuna Magdalawui Maryli Rakachitthei

Maryna chikhur ngalemli chappama kala chapsuisui eina chikhurli yangkazang chitharan; kazingrao khani Jesuli chipet khavai pamli akhana kuishakli akhana pheivak, kachara sari ngavaida pamkasa chi thei. Anina hanga, "Shanao, khisada chapkhala?" Maryna ngahankai, "Iwui Phoholi athumna khuithui haowa, kala kali haihao khala kachi matheithuwa." Ana chi hanglaga ngarei khaung eina Jesu chili nganingsai; kha chi Jesuna kachi matheimana. Jesuna ali hanga, "Shanao, khisada chapli khala? khipali kapha khala?" Yamgui akhavai aili da phaningda Maryna hanga, "Amei, phasa chi nana haiakha ill kahangmilu, ina akhuira." Jesuna hanga, "Mary." Chieina ana ngareiungda Hebrew tuili "Rabboni" (Oja) da ngahankai. Jesuna hanga, "Ili masazalu, kachiwui vangkhala kaja I ishavawuili makaranga. Kha iwui kala nathumwui avava, iwui kala nathumwui Vareli kaura kachi ichina ngarali unghangmilu." Chieina Magdalawui Maryna sakhangathabingli ana Proholi kathei kala Prohona hithada hanga kachi unghanga.

Jesuna Awui Sakhangathabingli Rakachithei

Sunday ngazin sakhangathabing Jehudibingli khangacheewui vang khamong rarhailaga kazippamsai. Chili Jesuna athumwui ngachaili ranganingda hanga, "Nathumli chingrihai ranu." Laga awui pangmaya eina ari chithei. Sakhangathabing chi Proholi theilaga ringkaphana pemhaowa. Chieina Jesuna hangluishita, "Nathumli chingrihai ranu. Ishavana ili kashirat thada ina nathumli kashivatna." Chiwui thili Jesuna athumli khak kharorda hanga, "Mangla Kathara chi khuilu. Nathumna mibingwui, morei pheomiakha athumli pheomihaira; nathumna mapheomipai akha mapheomi thura."

Thomasna Mashitkasang

Jesuna khara chitharan Thomas (ngashira kaho) sakhangatha chi maleisa mana. Chieina khangateibingna "Ithum Proholi theihaira" da hanga. Kha Thomasna hanga, "Awui pangmayawui yotpikhurli ipang masaza ranglakha kala awui arili ipang eina makhamaza ranglakha ina mashitsang mara." Hapta akha shanglaga sakhangathabing khamong shunghailaga kaziplui shita, kala Thomasla chili zanga. Khamong rarser kahaina, kha Jesuna athumwui ngachaili ranganingda hanga, "Nathumli chingrihai ranu." Kala Thomasli hanga, "Hivak napang ngaranrada ipang singyanglu; kala iwui arili khamayanglu. Ning khamaong maleila shitsanglu." Thomasna ngahankai, "Iwui Proho kala iwui Vare." Jesuna ali hanga, "Ili theihaoda ara shitsangla? Matheila shitkasanga athumli kala khamahai ngasa ranu."

Lairik Hiwui Kharin

Jesuna sakhangathabingwui mangali kahaka ot khangatei kachungkha sai, kha makapikhuiserhaimana. Kha Jesu hi Varewui Naomayara, Messiah laka da shitsang khavaiwui vang, kala shitkasang chieina kharing samphang khavai hi kapi kahaina.

21

Jesuna Sakhangatha Shinili Rakachithei

Chiwui thili Jesuna sakhangathabingli Tiberias ngayi ngalemli samphang luishita. Ana khalatta hithada chithei. Chili Simon Peter, Ngashirala kaho Thomas, Galileewui Cana eina khara Nathanael, Zebedeewui naomayara khani, kala Jesuwui sakhangatha khargatei khani da kazipsai. Simon Peterna athumli hanga, "I khai aphaura." Athumna ngahankai, "Ithumla nali ngasoda rara." Chieina athumna marikhongli atonga; kha ngaya pongda athumna akhala makhui mana. Ngathor zimik shoknanai Jesuna ngayi pheili ranganinga, kha sakhangathabingna chi Jesuna kachi mathei mana. Chieina Jesuna athumli hanga, "Yaronaobing, nathum akhala makhui mala?" Akhanida makhui mana" da ngahankai. Jesuna hanglui "Nathumwui khailan chi marikhongwui yavak horsanglu, chili kasamphangra." Athumna khailan horkasang eina mangakhunshokrar thuwa, kaja khai sorngasaida kahaowa. Jesuna leikashiya sakhangatha china Peterli hanga, "Hi Proho laka." Peterna chi kasha eina awui phahon khamato chi sangkhui (kaja phahon mangahonsa mana) laga tara lungli yongzanghaowa. Sakhangatha khangateibingna marikong tongda khailanli khai pemting eina shimenung rasai, kaja athum ngalei kathengwui eina lam hangphanga shakha mang mataksai. Athumna ngalei kathengli kashok eina mei salaga khai ruikasa kala khamui chi thei. Chieina Jesuna athumli hanga, "Arui phakakhui khai kakhuiralu." Simon Peterna khailan chi angakhun kashok eina khai kahahak shakha hangphangida kathum pemting eina zangsai. Khai chiyakha kalala khailan makakmana. Jesuna athumli raphazalu da hanga. Sakhangatha khipanakha ali "Na khipakhala" da mangahanleng mana, kaja a Prohona kachi athumna thei. Chieina Jesuna khamui chi akhuilaga athumli yaowa; khaila chithada yaopapama. Jesuna ringlui haida akhalatta sakhangathabingli samkaphang hina kakathumana.

Jesuna Peter Kahang

Athum phaza kahaiwui thili Jesuna Simon Peterli hanga, "Johnwui naomayara Simon, hibingli langmeida nana ili leishila?" Ana "Mha Proho" ina nali leishi kachi nana thei" da ngahankai. Jesuna ali hanga, "Iwui yaobingli phawuilu." Jesuna ali hangluishita, "Johnwui naomayara Simon, na ili leishila?" Ana "Mha, Proho, ina nali leishi kachi nana thei." Jesuna ali hanga, "Iwui yaobingli homlu." Kakathumali Jesuna hanglui, "Johnwui naomayara Simon, na ili leishi kachangkhatla? Kathum shida 'na ili leishila' da khangahanwui vang Peter khanang haowa; kala hithada ngahankai, "Proho, nana saikora katheina, ina nali leikashi nana katheina." Jesuna ali hanga, "Iwui yaobingli homlu." Kachangkhat ina nali kahangna, nganuilakha nakhalatta shanneira neilaga nawui zatkhangaili zata; kha ara rarkahai eina napang khangkada nawui shaneira khangateina neimilaga mavakhangai pamli thanzatra." Jesuna kahang hi Peterna kachikatha mithit eina Vareli tekmatei ngasakra khala kachi kachitheina. Kala Jesuna ali hanga, "Ili shurlu."

Leishimeikap Kaja Sakhangatha

Peterna kapeikhaung eina, Jesuna leikashiya sakhangatha, phakachizat atamli Jesuwuivak shaivada "Proho, nali khipana yorzara khala" da khangahana mipa chi, shurkhara thei. Peterna ali kathei eina Jesuli hanga, "Proho, hipa kathara khala?" Jesusa hanga, "I mararanglakha eina tangda ali ringngasakka jilala, china nali khi sara? ili shurlu." Chieina Jesuli kashurabingwui ngachaili, sakhangathapa chi mathi mara kachi kahang maningla, "I mararanglakha eina tangda ringngasakka jilala china khi sara khala?" kachina. Saikora hi shakhi khame kala lairikli kapikasanga sakhangatha chi ana,: chieina awui shakhi mashunga kachi ithumna thei. Hili langda Jesuna sakahai ot tarakha lei. Saikora chi mathang mathang eina kapitasi kaja lairikna okkathui hi puitai howra da ina phaninga.