1 Dai po nowaal wonuo tu ri, kuwai yo iri Tinongaran nu Kinoringan. Tinongaran oono muido-ido yo nu Kinoringan om muinong-a nu Kinoringan. 2 Kiat po nu timpuun-i muido-ido yo Kinoringan om Tinongaran oono. 3 Iyo yo su pinakai nu Kinoringan momaal nu kiawi' pinuwaal Niyo, om d'ado songginis pona ourug so wonuo tu ong d'ado Iyo. 4 Iyo yo su impuunon nu kowiawan musingkolaid. Om kowiawan oono yo su soko onawau tumogu' so kotuongan nu pomikiran nu lobuw. 5 Onawau oono kotogu' so kotuongan nu wonuo tu, om kotuongan dai kaalib nu onawau oono. 6 Ido koyuwan sinuu' nu Kinoringan, ingoranan so si Yuanis 7 linumoga' paabar so lobuw suat nu onawau oono, tayon ong kiawi' lobuw korongou om poimaid. 8 Okon ko si Yuanis su onawau oono, nga potuturan-a iyo nu ono. 9 Linumoga' onawau obana so wonuo tu monogu' nu pomikiran nu lobuw. 10 Tuui-tuui yo Iyo so wonuo tu, om Iyo yo su minongowangun nu wonuo tu, nga lobuw so wonuo tu dai kotondu' so Iyo. 11 Linumoga' Iyo so bansa Niyo, nga osuang lobuw bansa Niyo dai poimaid so Iyo. 12 Nga isai monorima' om poimaid so Iyo, taakan-a Niyo nu kopogboya'an osiliw nu inonakan nu Kinoringan. 13 Osiliw nosiro nu inonakan Niyo okon-a ko puonakon nu lobuw, nga Kinoringan su mongurug so nosiro nu inonakan Niyo. 14 Tinongaran nu Kinoringan oono minusiliw nu lobuw owarong om obana om minogol tuui so toko. Nosiou toko yo kobontugan Niyo, iri nitaak nu Kinoringan so Iyo, so' ido-ido ya Iyo Anak nu Kinoringan. 15 Nopotarang si Yuanis so lobuw suang suat so Iyo nu, “Itu yo lobuw tinangar ku so kou nu, ‘Sumusuut so aku lumoga' nu oogot po ko' aku, so' dai po su nopuanak, kuwai yo Iyo,’ ” k'aku ri. 16 Pagka sobana ko owarong Iyo, d'ado pupus Niyo mongoborakat so toko. 17 Si Musa sinuu' nu Kinoringan monaak nu Ukum so ongo lobuw, nga si Yisus sinuu' Niyo mongoluluud so toko om obana ya kiawi' totongaron Niyo. 18 D'ado po ido nokosiou-o nu Kinoringan, nga si Yisus, iri ido-ido Anak nu Kinoringan su pointolang nu Kinoringan so toko, so' dadan Iyo mido-ido so Amo Niyo. 19 Minonuu' lobuw Yaudi kiat so Yirusalim nu imam om lobuw Liwi ri mongoduat so si Yuanis nu, “Isai ko ka itu?” koo. 20 Bontolo ya niyo sumambut nu, “Okon po ko aku su Raja Nijanji nu Kinoringan iiri,” koo. 21 Mongoduato yo nosiro nu, “Bang soko ono, isai ko? Si Ilia ko gaam?” koo nosiro. Sumombuto yo si Yuanis nu, “Okon-a,” koo. “Ikau-o gaam iri Poo'abar wokon nu Kinoringan,” koo nosiro. “Okon-a”, koo iyo. 22 “Obari kai yo ong isai ko su' moilaan mai paabar so lobuw minonuu' so kai ri,” koo nosiro. 23 Sumombuto yo si Yuanis nu, “Aku yo iri maau-paau so padang pantai nu, ‘Tulido yo lalan nu TUHAN!’ soko iri tinangar ni Yisaya,” koo iyo. 24 - 25 Mongoduato po sinuu' nu lobuw Parisi ri so iyo nu, “Bang okon-a ko ikau su Raja Nijanji nu Kinoringan, intawa si Ilia, intawa Poo'abar wokon nu Kinoringan, nokuro su mongodiu' ko nu lobuw?” koo. 26 Sumombuto yo iyo so nosiro nu, “Mongodiu' aku nu lobuw sungoi su pokayon, nga kuwai po ido koyuwan nai so kou nu dai muyu otondu'an. 27 Sumusuut Iyo so aku lumoga' nga obantug po Iyo ko' aku, om insan monguyad nu tali nu kasut Niyo no nga dai su otoop,” koo. 28 Pinutongaran-o po niyo nu ono kiawi' dii so Bitania so sondipawon nu Bowang Yurdan, iri pinongodiu'an niyo nu lobuw-i. 29 Susuab-i nosiou-o ni Yuanis si Yisus lumoga' dii so iyo. Mutongaro yo iyo nu, “Siowi muyu yo! Iyo yo su Anak nu Dumba sinuu' nu Kinoringan mongidu' nu koraayan nu lobuw so wonuo tu! 30 Iyo yo iri tinangar ku nu sumusuut so aku lumoga', nga oogot po Iyo ko' aku, so' dai po su nopuanak, kuwai yo Iyo. 31 Togna ri dai po su kotondu' so Iyo, nga linumoga' aku mongodiu' nu sungoi pokayon su' otondu'an Iyo nu lobuw Israil,” koo. 32 Om mutongaro po si Yuanis nu, “Nokosiou aku nu Atod nu Kinoringan kiat so langit sinumorupa nu asang, sinumangkad so ulu Niyo ri. 33 Iya iiri dai ku po notondu'an ong isai Iyo, nga kinodawan aku nu Kinoringan, iri minonuu' so aku popongodiu' so Iyo momakai nu sungoi-i nu, ‘Bang kosiou ko nu ido koyuwan untibaan nu Atod nu Kinoringan, Iyo yo ono su monuu' nu Atod Niyo mogkuasa so kou,’ koo Kinoringan. 34 Aku yo kondiri nokosiou nu tinuturan ku iitu, om mongaabar aku so kou nu Iyo yo su Anak nu Kinoringan,” koo si Yuanis. 35 Koduo runat-i, kakal po dii si Yuanis om duo mompomaid niyo ri. 36 Nosiou-o po niyo si Yisus tumalib, mutongaro yo iyo nu, “Siowi muyu yo Iyo, ono Anak nu Dumba sinuu' nu Kinoringan-o!” koo. 37 Kiduo-duo nu mompomaid niyo ri nga nokorongou nu tinangar niyo iiri, indadi, maido yo sono nosiro so si Yisus. 38 Kumowiio si Yisus su muut-suut nosiro so Iyo. Duato yo sono Niyo nu, “Onu ka diumon muyu?” koo. Sumombuto yo nosiro, “Oo Rabi, siombo ka pinolakan Mu?” koo. (Orati nu rabi so tangar Ibrani, “moomontuduk”.) 39 “Tuui kou yo, om siowi muyu yo,” koo si Yisus. Maido yo nosiro om mintorono yo dii nu runat iiri. Iya iiri kiro-kiro jaam opat nu awi-awi. 40 Ngaran-o po nu ido koyuwan nokorongou nu tinangar ni Yuanis om minaid so si Yisus, ono yo si Andrias sulod ni Simun Pitrus. 41 Diumo yo sono ni Andrias sulod niyo ri, si Simun. Nokopusambat-o po, tongaro yo niyo nu, “Nosambat mai yo Raja Nijanji nu Kinoringan nu powiau so toko, iri paawon toko nu Masias!” koo. (Masias so tangar Ibrani muinong nu Kristus so tangar nu Yunani, orati yo po nga Raja Nijanji nu Kinoringan.) 42 Owito yo ni Andrias si Simun mian dii si Yisus. Bontongi yo iyo ni Yisus om tongaro yo nu, “Ikau-o po si Simun, anak ni Yuanis, nga kosiono, ngaran mu sono si Koipas,” koo. (Koipas muinong nu Pitrus nga orati nu kiduo oono, watu.) 43 Pogsusuab, tinantu yo ni Yisus nu mian so Galilia. Nosambat sono Niyo si Pilipus, om tongaro yo nu, “Waid-o so Aku!” koo. 44 Si Pilipus oono kiat so Baitsaida, songido nu kampung so si Andrias om si Pitrus. 45 Diumo yo ni Pilipus si Natanil om tongaro yo nu, “Nosambat mai yo lobuw kinuan ni Musa so buuk niyo ri, om nokosurat so ongo buuk nu poo'abar nu Kinoringan, iri ingoranan so si Yisus, anak ni Yusup kiat so Najarit,” koo. 46 Sumombuto yo si Natanil nu, “D'ado noilaan ku nu kuwai lobuw owarong lumoga' kiat so Najarit,” koo. Sumombuto yo si Pilipus nu, “Kayo, om ikau kondiri su kosiou,” koo. 47 Nosiou-o po ni Yisus si Natanil lumoga', mutongaro yo Iyo suat so pogokalan ni Natanil nu, “Itu yo su lobuw Israil nu dai moomudut om moongaakal,” koo. 48 Duato yo ni Natanil si Yisus nu, “Onu ka kotondu'-tondu' Mu so aku?” koo. Sumombuto yo si Yisus nu, “Dai ko po nopaau ni Pilipus, nosiou Ku yo ikau mogom-ogom so obi' nu puun nu nunuk,” koo. 49 Sumombuto yo iyo nu, “Oo Guru, Ikau-o su Anak nu Kinoringan! Ikau-o su Raja nu lobuw Yaudi,” koo. 50 Mutongaro yo si Yisus nu, “Pagka notangar Ku nu nosiou Ku ikau mogom-ogom so obi' nu puun nu nunuk, ono yo ko' oimbonaan ko gaam. Nga momaal Aku ya nu koiran-iran kaalib po nu ono ong wagu,” koo. 51 Om mutongaro po Iyo so nosiro nu, “Bana ya tongaron Ku so kou iitu nu, kosiou kou so Aku, Anak nu Riniba, om suminsing langit om ongo susuu'on nu Kinoringan muntiba mindakod so tiningkuangon Ku,” koo si Yisus.
1 Koduaan kiat nu iri, kuwai rami-rami muontun so bandar Kana so wonuo nu Galilia, om nokosuung-a ino ni Yisus. 2 Nosogina ya pudi si Yisus om mompomaid Niyo ri. 3 Naawi' yo po sungoi nu anggur-i, tongaro yo Iyo nu ino Niyo ri nu, “Noowi'an nosiro nu sungoi nu anggur,” koo. 4 Sumombuto yo si Yisus nu, “Oo ino, ikod po ponuu' so Aku momaal nu onu-onu ya. Dai po nologa' runat pointolangan Ku ong isai Aku,” koo. 5 Nga tinangar-a nu ino Niyo ri ongo moomugogoma'on-i nu, “Waid-o muyu yo onu-onu nisuu' Niyo so kou no,” koo. 6 Modia'-sodia' dii onom montaya puugasan, mongowaid nu adat nu lobuw Yaudi. Ido montaya orumposan kiro-kiro walu nopulu intawa maatus litor sungoi. 7 Tongaro yo ni Yisus ongo moomugogoma'on iiri nu, “Osuwi muyu nu sungoi kiawi' montaya oono,” koo. Osuwi yo sono nosiro montaya ri nu sungoi sampai noponu'. 8 Tongaro po Niyo nosiro nu, “Ponuuk kou yo sabat nu sungoi-o om owito muyu so wowaidon so rami-rami tu,” koo. Waalo yo sono nosiro tinangar ni Yisus iiri. 9 Nokoinum-o po wowaidon-i nu sungoi minusiliw nu anggur-i, om dai ya noilaan niyo ong ombo kiat nu sungoi nu anggur iiri, nga iri yo moomugogoma'on minonuuk nu sungoi iiri su nokoilo. Pagka soko iri, soginaa yo sono niyo pongantin kusoi-i, 10 om tongaro yo nu, “Koopotan nu lobuw wokon, poguluan po popolak sungoi nu anggur owarong-o, otopodan-o tombuoi-o monginum, nipolak nai' sungoi nu anggur koinsuatan-o. Nga ikau-o po, pinotoudi mu nai' popolak sungoi nu anggur owarong tu,” koo. 11 Ono yo su koiran-iran winaal togna ni Yisus. Pinomaalan Niyo nu ono dii so Kana so wonuo nu Galilia. Nopointolang Iyo nu kobontugan Niyo om kiawi' mompomaid Niyo ri, nga nopoimaid so Iyo. 12 Nopupus iri, miano yo si Yisus, ino Niyo ri, kosusulodan Niyo, om mompomaid Niyo ri so Kapornaum, om minolak dii kotinu-tinuan. 13 Mani-rani ologa' Rami-Rami Paska nu lobuw Yaudi, minian sono si Yisus so Yirusalim. 14 Mosuwo yo Iyo so Waloi Maayo nu Kinoringan so Yirusalim, om nosunsungan Niyo lobuw mudagang nu sapi, kambing om asang. Lobuw poongogonti'an nu siin nga songogom-ogom. 15 Mongolapo yo Iyo nu tali winaal nu lulubak, ponusura nu kambing om sapi kiat so Waloi iiri. Mija nu poongogonti'an siin nga tinuad balik Niyo om nobotiasan-a su siin nosiro. 16 Tongaro yo Niyo ongo lobuw nopowoli nu asang-i nu, “Kokato muyu gonggamon itu. Kodi muyu siliwo waloi ni Amo Ku tu nu poomudogangan!” koo. 17 Noondoman sono nu mompomaid Niyo ri nu nokosurat-o so Buuk nu Kinoringan nu, “Oo su Kinoringan, sobana ko sinomodan ku waloi Mu. Ono yo ko' oinsokitan sobana inawo ku,” koo ri. 18 Soguupi yo nu lobuw Yaudi ri si Yisus nu, “Pomaalo ka nu koiran-iran pointolang nu kikopogboya'an Ko momaal nu soko ono so kai,” koo. 19 Sumombuto yo si Yisus nu, “Insan uyason muyu ya Waloi iitu no, kotoluan-o oulit Ku yo koimbagu,” koo. 20 Sumombuto yo nosiro nu, “Opat nopulu om onom toun om noopod nai' Waloi iitu momaal, nga kotolu-toluan ong Ikau momaal nu itu?” koo. 21 Nga kinuan-o po Niyo nu Waloi Maayo nu Kinoringan, iri koyuwan Niyo ri. 22 Iri yo ko', noluli'an-o po Iyo, noondoman sono nu mompomaid Niyo ri nu nokoputangar Iyo nu soko iri, om poimaid-o sono nosiro nu Buuk nu Kinoringan om pinutangar Niyo ri. 23 Osuang lobuw nopoimaid so Iyo nu laid Niyo so Yirusalim-i iya nu Rami-Rami Paska iri, so' nokosiou nosiro nu koiran-iran winaal Niyo ri. 24 Nga Iyo dai poimaid so nosiro so' oilaan-o Niyo kiro-kiroon so inawo nosiro ido soido. 25 Pudi pona ado pokoilo so Iyo suat so kiro-kiroon so inawo nu lobuw, nga oilaan-a Niyo.
1 Kuwai ido wowaidon nu lobuw Yaudi, ngaran niyo si Nikudimus. Iyo yo po ungkiat so puimpugan nu Parisi. 2 Lumogaa yo iyo umpit nu awi dii si Yisus, om mutongaro yo nu, “Oo Guru, noilaan mai yo nu Ikau-o su sinuu' nu Kinoringan, so' d'ado ido kopomaal nu koiran-iran soko winaal Mu ri ong dai ya taakan nu kuasa kiat so Kinoringan,” koo. 3 Sumombuto yo si Yisus nu, “Obana ya totongaron Ku iitu nu d'ado ido kowaid so Pogkuosaan nu Kinoringan, ong dai po iyo opuanak koimbagu,” koo. 4 Mongoduato yo si Nikudimus nu, “Onu koo po ka lobuw otuo no yo puonakon koimbagu? Kopululi' po ka so pogonakan nu ino niyo om puonakon po?” koo. 5 Sumombuto yo si Yisus nu, “Orotio muyu yo nu, bang dai opuanak po koimbagu maid nu sungoi om Atod nu Kinoringan, dai kowaid so Pogkuosaan nu Kinoringan so surga. 6 Ino om amo yo su momoganak nu lobuw, nga Atod nu Kinoringan-o su koponaak nu kowiawan so atod toko. 7 Ikod-o koiran nu tinangar Ku so ikau nu, subai opuanak kou koimbagu no. 8 Tumouruk uos-o so siombo-ombo, om orongou toko ginuru no, nga dai oilaan ong siombo ungkiat intawa kologa'an. Soko ono ya pudi lobuw opuanak nu Atod nu Kinoringan,” koo. 9 Mongoduato po si Nikudimus nu, “Onu koo ka otuman ono?” koo. 10 Sumombuto yo si Yisus nu, “Ikau-o su moomontuduk nu lobuw Israil, nga nokuro su dai ko koorati nu ono? 11 Orotio muyu yo, mutangar kai so kou nu onu yo po noilaan mai om nosiou mai, nga dai kou ya poimaid nu tinangar mai oono. 12 Bang tuturanan Ku kou suat nu onu yo po so wonuo tu om dai kou poimaid, makin po dai kou poimaid ong tuturanan Ku kou nu onu yo po so surga. 13 D'ado po ido ya nokoian so surga, inungkiaton Ku no sondiang ko Aku, Anak nu Riniba, ono sinuu' nu Kinoringan-o,” koo. 14 Mutongaro po si Yisus nu, “Gulu ri nopopangkat si Musa nu lopung tombaga winaal nililit so kayu so padang pantai. Soko ono ya pudi Aku, Anak nu Riniba, popongkaton ong wagu. 15 Waalon soko ono tayon ong kiawi' lobuw poimaid so Aku no otaakan nu kowiawan musingkolaid. 16 Pagka osamod sobana Kinoringan nu lobuw so wonuo tu, sinuu' Aku Niyo, ido yo Anak Niyo mian so wonuo tu, su' isai yo po poimaid so Aku, dai oinsaadan nu Kinoringan, sondiang ko taakan nu kowiawan musingkolaid. 17 Suat so Kinoringan, okon-a ko mongukum nu lobuw so wonuo tu kinoponuu'an Niyo so Aku, Anak Niyo, sondiang ko monapul so nosiro. 18 Isai poimaid so Aku, dai yo ukumon, nga isai dai poimaid, noukum-o nu Kinoringan, so' dai poimaid nu Aku yo su ido-ido Anak nu Kinoringan. 19 Itu yo su orati nu ukuman oono, ono yo nokologa' Aku yo, iri onawau so wonuo tu, nga ono ya kotuongan-o su koinginan nu lobuw, so' oraai kogoyaan nosiro. 20 Isai momaal nu koraayan, rumoraayan nu onawau, om dai rumani so onawau oono, tayon ong dai kointolang koraayan niyo no. 21 Nga isai mongowaid nu pontudukan obana, rumani so onawau-o su' kointolang gogoma'on niyo obana no, musuat nu koinginan nu Kinoringan,” koo si Yisus. 22 Nopupus iri, miano yo si Yisus om mompomaid Niyo ri so wonuo nu Yudia, om mintorono yo nosiro dii kotinu-tinuan mongodiu' nu lobuw. 23 - 24 Iya oono, dai po nojiil si Yuanis. Iyo nga mongodiu' ya so Ainun orani so Salim, so' osuang sungoi dii om lumoga'-lumoga' ya lobuw mokidiu'. 25 Tumimpuuno sono tinu-tinu mompomaid ni Yuanis mokimusiwal nu lobuw Yaudi suat nu adat muugas. 26 Lumogaa yo nosiro dii so iyo mutangar nu, “Oo guru, oondoman mu po ka iri lobuw nosambat toko so sondipawon nu Bowang Yurdan, iri nituduk mu so kai ri? Kosiono Iyo nga mongodiu' ya, om osuang lobuw lumoga' mokidiu' so Iyo,” koo. 27 Sumombuto yo si Yuanis nu, “D'ado lobuw kaalap nu onu-onu ya, ong okon ko taakan nu Kinoringan. 28 Kou yo kondiri nokorongou nu tinangar ku nu, aku yo po okon-a ko Raja Nijanji nu Kinoringan, nga sinuu' aku ya nu Kinoringan popogulu so Iyo lumoga'. 29 Kosongapan-o po nu pongantin woinoi, iri yo pongantin kusoi. Iri minogat-i mundii ya mongobi' nu pongantin kusoi mongkinongou, om oondayan iyo ong korongou nu bongut nu pongantin kusoi oono. Soko ono ya pudi aku, sobana ko osudu'an aku nu osuang lobuw maid so si Yisus. 30 Iyo yo su otoop rumuang kobontugan om aku mako kobontugan,” koo. 31 Iyo, ono linumoga' kiat so surga no, obantug po ko' kiawi' lobuw so wonuo tu. Nga lobuw so wonuo tu, suat-a so wonuo tu. Ooliban kiawi' lobuw so wonuo tu nu linumoga' kiat so surga no. 32 Onu-onu nosiou om nopurongou Niyo, niabar Niyo kiawi', nga owako lobuw moingin mongimaid so Iyo. 33 Nga isai mongimaid nu totongaron Niyo no, iyo yo su pointolang nu obana ya Kinoringan. 34 Suat so si Yisus, lobuw sinuu' nu Kinoringan, Iyo yo su potuturan nu tinongaran nu Kinoringan, so' taakan Iyo nu Atod nu Kinoringan monabang so Iyo. 35 Osamod Amo so surga so Aku, Anak Niyo no, om nikomouli' Niyo onu-onu ya so Aku nu nipogkuasa. 36 Isai poimaid nu Anak oono, taakan nu kowiawan musingkolaid. Nga isai dai mongowaid nu ponuu'an nu Anak oono, dai taakan nu kowiawan, ala' nai' ukumon nu Kinoringan musingkolaid.
1 Norongou-o sono nu lobuw Parisi nu osuang po mompomaid om diniu' ni Yisus ko' ni Yuanis. 2 (Sobana yo, okon-a ko si Yisus su minongodiu', nga mompomaid Niyo ri.) 3 Noilaan-o po ni Yisus nu norongou-o nu lobuw Parisi noongourug oono, mulaiwo yo Iyo kiat so Yudia om mululio yo so Galilia, 4 linumalan so Samaria. 5 Nokologa' sono Iyo so bandar Sikar so wonuo Samaria, orani so tana' nitaak ni Yakub nu gulu ri so anak niyo si Yusup. 6 Nai yo porigi ni Yakub. Pagka minaalon Iyo mompanou, mogomo yo Iyo so isan nu porigi ri, kiro-kiro tonga' runat. 7 - 8 Ido-ido Iyo dii so' minian mompomaid Niyo ri so bandar momoli nu ingkookan. Lumogaa yo sono ido woinoi Samaria monagob so porigi iiri. Tongaro yo Niyo woinoi-i nu, “Poinum-o Aku po”, koo. 9 Sumombuto yo woinoi-i nu, “Ikau-o po lobuw Yaudi, om aku lobuw Samaria. Onu koo aku poinum so Ikau?” koo. (Iya oono, lobuw Yaudi dai susumulang nu sawan nu lobuw Samaria.) 10 Sumombuto yo si Yisus nu, “Bang oilaan mu onu nitaak nu Kinoringan om otondu'an mu Aku, ono mokitaak so ikau nu sungoi-o, tantu ikau nga mokitaak so Aku, om taakan Ku ya ikau nu sungoi koponaak nu kowiawan,” koo. 11 Mutongaro yo woinoi-i nu, “Oo Tuan, d'ado ponuuk Mu nu sungoi-o, om olalom porigi iitu. Siombo ka pongolapan Mu nu sungoi koponaak nu kowiawan kuanon Mu no? 12 Si Yakub, aki rumpungan toko ri su nopotaak nu porigi iitu so toko. Iyo, inonakan niyo om pongayam niyo ri, nga tuui ya pongolapan nu sungoi inumon. Obantug Ko po ka ko' si Yakub?” koo. 13 Sumombuto yo si Yisus nu, “Isai monginum nu sungoi iitu, lugangon po. 14 Nga isai monginum nu sungoi nitaak Ku no, dai yo lugangon musingkolaid. Sungoi nitaak Ku oono musiliw nu impuunon nu sungoi so koyuwan niyo, koponaak nu kowiawan musingkolaid,” koo. 15 Sumombuto yo woinoi oono nu, “Oo Tuan, taaki aku yo nu sungoi oono su' dai aku yo lugangon koimbagu, om dai yo su maagut muuli'-uli' tuui monagob,” koo. 16 Sumombuto yo Iyo nu, “Panou-o! Paawo yo sawo mu ri, om owito yo mululi' tuui,” koo. 17 Sumombuto yo woinoi-i nu, “D'ado yo sawo ku,” koo. Mutongaro yo Iyo nu, “Bana ya tangar mu no nu d'ado yo sawo mu. 18 Inglimo ko yo montun, om kusoi mido-ido so ikau nu ono sono tu, okon-a ko sawo mu. Bana ya tinangar mu no,” koo si Yisus. 19 Mutongaro yo woinoi-i, “Oo Tuan, Ikau-o pala su poo'abar. 20 Odu aki mai ri mongusaa' nu Kinoringan so bulud iitu no, nga tangar muyu lobuw Yaudi, subai so Yirusalim-a su pongusaa'an so Kinoringan,” koo. 21 Sumombuto yo si Yisus nu, “Obana ya totongaron Ku iitu nu, ologa' ong wagu lobuw mongusaa' nu Kinoringan okon ko so bulud iitu intawa so Yirusalim. 22 Kou lobuw Samaria dai koilo ong isai usaa'on muyu. Lobuw Yaudi koilo ong isai usaa'on mai, so' kosopulan oono linumoga' kiat so kai lobuw Yaudi. 23 Nga ologa' ya ong wagu osuat poongusaa' nu lobuw so Kinoringan, Amo toko, maid nu ponobangon nu Atod Niyo nu osuat gama'. Soko ono yo koinginan nu Kinoringan poongusaa' so Iyo. 24 Kinoringan oono Atod, om isai yo po dai kopongusaa' so Iyo nu osuat, ong dai ya kuosaan nu Atod nu Kinoringan,” koo. 25 Sumombuto yo woinoi-i nu, “Oilaan ku ya nu lumoga' ya Raja Nijanji nu Kinoringan, iri paawon so si Kristus. Bang kologa' yo Iyo, potarang Iyo nu onu-onu ya so toko,” koo. 26 Sumombuto yo si Yisus nu, “Aku yo kuanon mu no, ono mutangar-tangar so ikau nu ono sono tu,” koo. 27 Iya iiri, nokopululi' yo mompomaid ni Yisus. Noiranan sono nosiro nu mokimutangar-tangar Iyo nu ido woinoi. Nga d'ado ya kooku' so nosiro mongoduat nu woinoi-i nu, “Onu ka diumon mu?” Om d'ado ya kooku' so nosiro mongoduat so si Yisus nu, “Oo Guru, monguro Ko ka mokimutangar-tangar nu woinoi oono?” koo. 28 Ogoli ya sono nu woinoi-i sosagob niyo ri, om mulio yo so bandar-i pokoilo nu lobuw nu, 29 “Kayo toko yo monsiou nu lobuw nopotuturan suat nu kiawi' nowaal ku ri, kalu Iyo yo su Raja Nijanji nu Kinoringan,” koo. 30 Miano yo sono ongo lobuw so bandar iiri dii si Yisus. 31 Laid nu iri, ingoli yo si Yisus nu mompomaid Niyo ri mongokan nu, “Oo Guru, mongokan toko yo,” koo. 32 Sumombuto yo Iyo, “Kuwai ya kookanan Ku nu dai muyu oilaan,” koo. 33 Mududuato yo sono nosiro nu, “Kuwai bo gaam lobuw minongowit so Iyo nu kookanan?” koo. 34 Sumombuto yo si Yisus nu, “Ono yo soko kookanan Ku, monuman nu koinginan nu Kinoringan iri nisuu' so Aku sampai oopod, so' kiat nu ono osanang sono inawo Ku. 35 Koo kou, ‘Opat po nowulan om ologa' yo pomoroyan,’ koo, nga mutangar Aku so kou nu siowi muyu umo no, moonsak-o paroi-o om oinsuat-o poroyon. 36 Nokotorima' yo nu gaji lobuw momaroi-o om nokopongimpug-o nu pinumpung suat so kowiawan musingkolaid. Lobuw monuan om momaroi-o osanang sono. 37 Bana ya sinsiriban iitu nu, ‘Ido koyuwan monuan om lobuw wokon momaroi,’ koo ri. 38 Suu'on Ku kou popomaroi so umo nu lobuw wokon. Lobuw wokon noposuan nu paroi oono, om kosiono kou su mongimpug nu pinumpung nu gogoma'on nosiro no,” koo. 39 Osuang lobuw Samaria so bandar iiri nopoimaid so si Yisus kiat so tinangar nu woinoi-i nu, “Nopotuturan Iyo so aku suat so kiawi' nowaal ku ri,” koo ri. 40 Nosambat-o po Iyo nu lobuw Samaria ri, upokato yo Iyo nosiro nu poogolon po Iyo dii. Mintorono yo sono Iyo dii koduaan. 41 Sinumuang-o sono lobuw poimaid so Iyo, so' nokorongou nu pontudukan Niyo. 42 Mutongaro yo lobuw-i so woinoi iiri nu, “Kosiono poimaid kai sobana so Iyo so' kai yo kondiri nokorongou so Iyo, okon-o ko tuturan mu ri. Oilaan mai yo sono nu Iyo yo su Poowiau nu lobuw so wonuo tu,” koo. 43 Nokointoron-o po si Yisus koduaan so Sikar, lumombuso yo Iyo so Galilia, 44 musuat nu tinangar Niyo gulu ri nu, “Poo'abar nu Kinoringan orumaton so kiawi' tontong nga dai orumaton so tontong, Niyo kondiri,” koo ri. 45 Nokologa' yo po Iyo so Galilia, insomungo yo Iyo nu lobuw dii ri maid nu osudu'an so' dii-dii nosiro so Yirusalim nu Rami-Rami Paska ri. Om nokosiou-o nosiro nu koiran-iran winaal ni Yisus nu iya iiri. 46 Mululio po Iyo so Kana so wonuo nu Galilia, iri pinopusiliwan Niyo nu anggur kiat so sungoi-i. So bandar oono kuwai ido pogawai nu raja, morosakit lolaing niyo ri so Kapornaum. 47 Norongou-o po niyo nu nokologa' yo si Yisus so Galilia kiat so wonuo nu Yudia, miano yo iyo dii si Yisus mongupakat nu pologa'on so Kapornaum popomoli'on nu anak niyo ri nu osantap morosakit. 48 Mutongaro yo si Yisus so iyo nu, “Sobana ko dai kou poimaid ong dai kou ya kosiou nu koiran-iran waalon Ku nu dai owaal nu lobuw wokon,” koo. 49 Sumombuto yo pogawai iiri nu, “Oo Tuan, sikapo ya nu dai po matoi anak ku ri,” koo. 50 Sumombuto yo Iyo nu, “Uli' yo. Kaatu' yo anak mu ri,” koo. Nopoimaid-o sono pogawai iiri nu tinangar ni Yisus om momponowo yo. 51 Dai po iyo nokologa' so waloi, sumomungo yo kouriponan niyo ri so iyo paabar nu, “Oo tuan, kaatu' yo anak mu ri,” koo. 52 Duato yo niyo nosiro nu, “Sombiya kinootu'an niyo?” koo. Sumombuto yo nosiro nu, “Tonga' runat siniab-i,” koo. 53 Noondoman sono nu pogawai-i nu iya yo iiri pinutongaran ni Yisus so iyo nu, “Kaatu' yo anak mu ri,” koo ri. Nopoimaid-o sono nosiro sompungu so si Yisus. 54 Iri yo su koinduo ni Yisus momaal nu koiran-iran so Galilia nu kologa'an Niyo kiat so Yudia.
1 Nopupus iri, nologa' yo runat puromi-romian nu lobuw Yaudi. Miano yo sono si Yisus so Yirusalim. 2 Kuwai ido kulam dii, so obi' nu pintu ingoranan Pintu nu Dumba. So tangar Ibrani kulam oono ingoranan Baitsaida. So imbing nu kulam iiri kuwai limo pontaan tinaapan. 3 Osuang lobuw morosakit songgili-gili so pontaan-i, kuwai bolou, kakung om kimai. Mongindad nosiro nu gumimpung sungoi nu kulam oono, 4 so' kuwai iya nu susuu'on nu Kinoringan muntiba mongogimpung, om isai yo po kopogulu tumobung nu koogimpung-o po, opoli'an nu onu-onu ya nu osakit. 5 Ido koyuwan dii, tolu yo nopulu om walu toun laid morosakit. 6 Nosiou-o po ni Yisus lobuw iiri mili-gili om noilaan Niyo nu olaid-o morosakit, duato yo sono Niyo nu, “Moingin ko ka opoli'an?” koo. 7 Sumombuto yo lobuw-i nu, “Oo Tuan, d'ado lobuw monabang so aku lumoob, nu gumimpung sungoi-o. Manod minut aku lumoob nga dadan opoguluan aku,” koo. 8 Sumombuto yo si Yisus nu, “Undii yo, kokato yo poomoturuwan mu no om panou-o,” koo. 9 Sonduun-duun-a, nopoli'an iyo. Kokato yo niyo poomoturuwan niyo ri om momponowo yo. Nourug iri nu Runat Pongintoronan, ono yo intoronan nu lobuw Yaudi mugogoma'on. 10 Pagka soko iri, tongaro yo sono nu wowaidon nu lobuw Yaudi ri lobuw koopali' ya iiri nu, “Kosiono yo po Runat Pongintoronan. Mongowaid nu adat toko, dai ko kowasa monimban nu poomoturuwan mu no,” koo. 11 Sumombuto yo lobuw iiri nu, “Iri lobuw minomali' s'aku ri su minonuu' popongakat nu poomoturuwan ku tu om popanou so aku,” koo. 12 Duato yo nosiro lobuw iiri nu, “Isai ka minonuu' so ikau popongakat nu poomoturuwan om popanou?” koo. 13 Nga dai ya noilaan nu lobuw nopoli'an iiri ong isai minomali' so iyo ri so' osuang lobuw-i om si Yisus nga nokolaiw-o. 14 Dai po olaid kiat nu iri, nosambat sono ni Yisus lobuw pinoli'an Niyo ri so Waloi Maayo nu Kinoringan. Tongaro yo sono Niyo nu, “Kosiono nopoli'an ko yo. Rongowo yo! Ikod-o sono pomaal nu koraayan su' dai ko kolalag nu oraai po ko' noirosaan mu iiri,” koo. 15 Momponowo yo lobuw nopoli'an-o iiri om miano yo so wowaidon nu lobuw Yaudi ri paabar nu si Yisus-o su minomali' so iyo. 16 Indadi, tumimpuuno sono nosiro mongoraai so si Yisus so' minomali' Iyo so Runat Pongintoronan. 17 Nga tongaro yo ni Yisus nosiro nu, “Dadan-a mugogoma'on si Amo Ku, Kinoringan. Ono yo ko', Aku nga soko ono ya,” koo. 18 Norurudan-o sono lobuw Yaudi ri mokipopomatoi so si Yisus nu tinangar Niyo iiri, so' okon ko ontob-a nu dai minongowaid Iyo nu oturan nosiro suat so Runat Pongintoronan, nga minutangar po Iyo nu Amo yo po Niyo nga Kinoringan, koorotian Iyo yo po Kinoringan. 19 Sumombuto yo si Yisus nu, “Obana ya totongaron Ku iitu nu, Aku, Anak nu Kinoringan, dai kopomaal nu onu-onu ya koinginan Ku ong dai ya osiou Ku Amo Ku momaal nu ono. Onu ko po goma'on ni Amo Ku su goma'on Ku. 20 Suat so Aku, Anak oono, sinomodan Aku nu Amo Ku, om pointolang Iyo so Aku nu kiawi' winaal Niyo no. Pointolang Iyo so Aku, Anak Niyo no maid nu gogoma'on maayo po, om oiranan kou sono. 21 Soko si Amo Ku nu luli'an po Niyo lobuw minatoi, soko ono ya pudi Aku, Anak Niyo, taakan Ku nu kowiawan isai-isai ya koinginan Ku monaak. 22 Si Amo Ku dai yo mongukum so isai-isai, so' Aku yo su pinongoorapan mongukum. 23 Waalon Niyo soko ono tayon Niyo ong kiawi' lobuw mongorumat so Aku, soko poongorumat nosiro so Iyo. Isai dai mongorumat so Aku, dai ya mongorumat so Iyo, ono minonuu' so Aku no. 24 Bana ya totongaron Ku iitu nu, isai mongkinongou nu tinongaran Ku, om poimaid so Amo Ku, ono minonuu' so Aku no, taakan iyo nu kowiawan musingkolaid. Dai yo iyo ukumon so' nokolaiw-o kiat so poomatoi om nokoian-o so kowiawan. 25 Bana ya totongaron Ku iitu nu, ologa' ya ong wagu om nologa' yo, lobuw dai po poimaid korongou-a nu totongaron Ku so nosiro, om isai mongimaid, taakan nu kowiawan musingkolaid. 26 Soko si Amo Ku su impuunon nu kowiawan, soko ono ya pudi Aku koponaak nu kowiawan musingkolaid, so' inurug Aku Niyo nu impuunon nu kowiawan. 27 Om suat so Aku, pagka Anak Aku nu Riniba, tinaakan Aku nu Kinoringan nu kopogboya'an mongukum. 28 Ikod kou yo koiranan mongkinongou nu ono, so' ologa' ya ong wagu, lobuw minatoi korongou nu tinongaran Ku 29 om oluli'an sono nosiro. Isai nokopomaal nu owarong, taakan nu kowiawan musingkolaid, nga isai nokopomaal nu koraayan, ukumon sono,” koo si Yisus. 30 Mutongaro po si Yisus nu, “Dai su kopomaal nu onu-onu ya maid nu koinginan Ku. Onu ko po mongukum Aku mongowaid nu ponuu'an nu Kinoringan so Aku. Ono yo ko' ooluk poongukum Ku, so' dai su mongowaid nu koinginan Ku, nga mongowaid nu koinginan nu Kinoringan, ono minonuu' so Aku no. 31 Bang Aku ya su pointolang suat so Aku, mutangar lobuw nu dai opongoorapan niintolang Ku oono. 32 Nga lobuw wokon, ono yo si Yuanis, pointolang suat so Aku, om opongoorapan niintolang niyo no. 33 Minonuu' kou yo nu lobuw mongoduat so si Yuanis suat so Aku, om nopokoilo yo iyo nu obana suat so Aku. 34 Dai ya su oogot nu kointolangan kiat so lobuw-a, nga poondom Aku so kou nu nopokoilo si Yuanis tayon ong poimaid kou so Aku, om taakan kou sono nu kowiawan musingkolaid. 35 Soko politaan-o si Yuanis mongonawau so kou, nga sontagal kou ya monorima' nu onawau niyo, ono yo pontudukan niyo no. 36 Niintolang Ku no oogot po ko' niintolang ni Yuanis, ono yo kiawi' gogoma'on Ku nipogama' nu Kinoringan so Aku no. Ono yo su pongilaan nu, Amo Kinoringan-o su minonuu' so Aku. 37 Ido po kointolangan suat so Aku, ono yo Amo Ku iri minonuu' so Aku, om Iyo yo su nopointolang so Aku. Dai kou po nokorongou nu bongut Niyo, om dai kou po nokosiou nu buatan Niyo. 38 Oilaan Ku nu dai kou mongowaid nu tinongaran Niyo, so' dai kou poimaid so Aku, lobuw sinuu' Niyo no. 39 Om ido po kointolangan suat so Aku, ono yo Buuk nu Kinoringan. Moguru' kou nu Buuk oono so' ponontaman muyu nu kiat nu ono kikowiawan kou musingkolaid. Nga pudi pona pointolang Buuk oono suat so Aku, 40 dai kou ya poimaid so Aku, om dai kou sono taakan nu kowiawan musingkolaid. 41 Dai ya su mokiorumaton nu lobuw. 42 Nga oilaan Ku ya nu dai kou monamod nu Kinoringan. 43 Pudi pona linumoga' Aku maid nu kuasa nu Amo Ku Kinoringan dai muyu ya Aku torima'on. Nga bang lobuw wokon lumoga' nai so kou, maid nu kuasa niyo kondiri, torima'on muyu ya iyo. 44 Ono yo ko' dai kou poimaid, so' mokiroyowon kou ya nu inong lobuw, om dai kou mugogoma'on nu kopongoroyowan so kou nu Kinoringan. 45 Ikod kou yo ponokod nu insola'on Ku kou so tiningkuangon nu Amo Ku. Nga si Musa, iri pongoorapan muyu ri su monginsala' so kou ong wagu. 46 Bang bana nu poimaid kou so iyo, tantu poimaid kou ya so Aku, so' nokoponurat-o iyo pointolang suat so Aku. 47 Nga bang dai kou poimaid nu nisurat niyo, dai kou ya poimaid nu tinongaran Ku no,” koo si Yisus.
1 Nopupus iri, mululio yo si Yisus so sondipawon nu Liu' Galilia ri, koduo ngaran, Liu' Tiborias. 2 Osuang lobuw minaid so Iyo so' nokosiou-o nu koiran-iran pinuwaal Niyo momali' nu lobuw morosakit. 3 - 4 Iya ono, oduruk-o puromi-romian Paska nu lobuw Yaudi. Tumidongo yo si Yisus om mompomaid Niyo ri so ido bulud, om mogomo yo. 5 Siowi Niyo pililiwut Niyo ri su osuang lobuw lumoga'. Indadi, mutongaro yo sono Iyo so si Pilipus nu, “Siombo gaam pomolian toko nu ingkookan muuma' ipookan so ongo lobuw oono?” koo. 6 (Minutangar Iyo soko iri monginam so si Pilipus, ampa noilaan-o Niyo onu waalon Niyo.) 7 Sumombuto yo si Pilipus nu, “Insan orogo ya duo naatus siin pirok nu baang-baang, dai ya okanid lobuw oono pudi soro sombotuan-a,” koo. 8 Mutongaro yo si Andrias, sulod ni Simun Pitrus, ido po mompomaid ni Yisus, nu, 9 “Ido lolaing tuui kibaang-baang limo nowatu om duo nokayu pait, nga onu yo ka kosudaan nu ono ong soko ono kosampuw nu lobuw?” koo. 10 Tongaro yo Niyo mompomaid Niyo ri nu, “Suuo muyu yo nosiro poogom,” koo. (Dii oguwun korikutan.) Indadi mogomo yo lobuw suang iiri so rikut-i. Koosampuw nosiro kiro-kiro limo noribu kokusoyan. 11 Olapo yo Niyo baang-baang-i om mongunsopoto yo so Kinoringan, om suuo yo Niyo mompomaid Niyo ri potayad-tayad so lobuw-i. Soko iri ya gama' Niyo nu pait-i, om kiawi' lobuw-i nga minongokan-o sono sampai nowasug. 12 Nowosugan-o po lobuw suang-i, tongaro yo ni Yisus mompomaid Niyo ri nu, “Impugo muyu yo kiawi' olu'-olu' no, om kodi muyu yo odai pudi sabat-a,” koo. 13 Impugo yo nu mompomaid ni Yisus olu'-olu' ri, nokoponu' po opulu om duo podaka. 14 Nosiou-o po nu lobuw-i winaal ni Yisus koiran-iran iiri, mutongaro yo nosiro nu, “Bana-bana ya nu Iyo yo Poo'abar nu Kinoringan sinuu' lumoga' so wonuo tu,” koo. 15 Pagka noilaan ni Yisus padu-padu nosiro nu sosogan Iyo sumiliw nu raja, mulaiwo yo sono Iyo mian so bulud. 16 Awi-awi ri po, sumondoto yo mompomaid ni Yisus so liu' ri. 17 Sumokoyo yo nosiro so alud muripau so Kapornaum, nga ololong-o dai po kologa'-loga' si Yisus dii so nosiro. 18 Muoso yo nu opogon om lumubak-o su gumbang. 19 Kiro-kiro opat intawa limo nokilumitor kinogowan nosiro, milok po om nosiou-o nosiro si Yisus mompanou so kulit nu sungoi-i sundur dii so nosiro. Linumaa' sono sobana nosiro, 20 nga mutongaro yo Iyo nu, “Ikod kou kilaa'! Si Yisus Aku ya itu,” koo. 21 Pinosakoi nai' Iyo nosiro, om nokodudul-o sono so loga'an nosiro ri. 22 Susuab-i, dii-dii po lobuw pinookan ni Yisus so diipau-i. Noilaan nosiro nu ido-ido ya alud, iri sinokoyan nu mompomaid ni Yisus om dai ya nokowaid Iyo so nosiro muripau. 23 Kuwai yo sono tinu-tinu alud sinokoyan nu lobuw linumoga' kiat so Tiborias dumudul so obi' nu pinongunsopotan ni Yisus so Kinoringan nu baang-baang nipookan so lobuw suang iiri. 24 Pagka noilaan-o nosiro nu d'ado ya dii si Yisus om mompomaid Niyo ri, sumokoyo yo sono nosiro so alud iiri om muripawo yo so Kapornaum modium so Iyo. 25 Nosambat-o po nosiro si Yisus so sondipawon nu liu' ri, duato yo Iyo nosiro nu, “Oo Guru, sombiya loga' Mu tuui?” koo. 26 Sumombuto yo Iyo nu, “Bana ya tongaron Ku iitu nu, okon-a ko ono su kopodiuman muyu so Aku om moingin mongoorati nu koiran-iran winaal Ku iiri, nga suat-a so notopodan kou mongokan nu baang-baang-i. 27 Ikod kou yo pogkari'-kari' modium nu ingkookan nu osikap-a munos, nga pogkari'-kari' kou yo modium nu ingkookan dai munos om koponaak nu kowiawan obana om musingkolaid. Aku, Anak nu Riniba su monaak nu ingkookan oono so kou, so' tinaakan Aku nu Kinoringan nu kuasa monaak nu kowiawan oono,” koo. 28 Mongoduato po nosiro so Iyo nu, “Onu ka mupatut goma'on mai su' kopomaal kai nu onu yo po koinginan nu Kinoringan?” koo. 29 Sumombuto yo si Yisus nu, “Itu yo su koinginan nu Kinoringan waalon muyu, ono yo poimaid kou yo so Aku, ono sinuu' nu Niyo no,” koo. 30 Mongoduato po nosiro so Iyo nu, “Onu ka nu koiran-iran waalon Mu pounayan mai poimaid so Ikau? 31 Odu aki mai ri nokookan nu maana so padang pantai, soko iri nokosurat so Buuk nu Kinoringan nu, ‘Tinaakan Niyo nosiro nu ingkookan kiat so surga,’ koo ri.” koo nosiro. 32 Mutongaro yo si Yisus nu, “Bana ya tongaron Ku iitu nu, okon-a ko si Musa su minonaak nu ingkookan kiat so surga, nga Amo Ku no yo su minonaak nu ono. Om monaak po Iyo koimbagu nu ingkookan sobana kiat so surga. 33 So' ingkookan nitaak nu Kinoringan-o, Iyo yo ono linumoga' kiat so surga no om monaak nu kowiawan so lobuw so wonuo tu,” koo. 34 Mutongaro yo nosiro nu, “Oo Tuan, taaki kai yo dadan nu ingkookan oono,” koo. 35 Sumombuto yo Iyo nu, “Aku yo su ingkookan kowiau. Isai poimaid so Aku, dai yo witilon om lugangon koimbagu. 36 Nga soko tinangar Ku so kou ri nu, nosiou muyu yo pona Aku, dai kou ya poimaid. 37 Kiawi' lobuw nitaak ni Amo Ku so Aku no, nosiro yo su poimaid so Aku, om isai poimaid, torima'on Ku ya. 38 Tomod Ku yo po lumoga' kiat so surga, okon ko momaal nu koinginan Ku kondiri, nga momaal nu koinginan ni Amo Ku, ono minonuu' so Aku no. 39 Itu yo koinginan Niyo, ono yo subai d'ado ido oliong so kiawi' lobuw nitaak Niyo so Aku no, ala' nai' luli'an Ku nosiro ong pongoowi'an-o nu wonuo tu. 40 Koinginan-o po ni Amo Ku, kiawi' lobuw poimaid so Aku taakan nu kowiawan musingkolaid, om luli'an Ku nosiro ong pongoowi'an-o nu wonuo tu,” koo. 41 Tumimpuun-o sono lobuw Yaudi ri murung-burung mutangar nu oraai suat so si Yisus so' minutangar Iyo nu, “Aku yo su ingkookan minuntiba kiat so surga,” koo. 42 Mutongaro yo nosiro nu, “Okon-a ka ko Iyo yo su si Yisus, anak ni Yusup. Otondu'an mai ya ino amo Niyo. Nokuro su mutangar Iyo nu linumoga' Iyo kiat so surga?” koo. 43 Mutongaro yo sono si Yisus nu, “Ikod kou puburung-burung nu soko ono. 44 D'ado ido poimaid so Aku, ong okon-a ko si Amo Ku, ono minonuu' so Aku no su mongurug so iyo poimaid so Aku. Om isai poimaid so Aku, luli'an Ku ong pongoowi'an-o nu wonuo tu. 45 Nokosurat-o so buuk nu ongo poo'abar nu Kinoringan gulu ri nu, ‘Kiawi' lobuw tudukan nu Kinoringan,’ koo ri. Indadi kiawi' lobuw iri mongimaid nu pontudukan nu Amo Ku Kinoringan, poimaid po so Aku. 46 Nga okon-a ko koorotian nu kuwai lobuw nokosiou so si Amo Ku. Ido-ido Aku ya, iri sinuu' nu Kinoringan, su nokosiou-o so Iyo. 47 Bana ya tongaron ku iitu nu, isai poimaid, taakan nu kowiawan musingkolaid. 48 Aku yo su ingkookan kowiau. 49 Nokookan-o odu aki muyu ri nu maana so padang pantai, nga minatoi-a nosiro. 50 Nga suat so ingkookan kiat so surga oono, isai kookan nu ono, miau musingkolaid. 51 Aku yo su ingkookan kiat so surga kowiau musingkolaid. Isai kookan nu ingkookan oono, miau musingkolaid. Ingkookan nitaak Ku no, ono yo koyuwan Ku tu, nitaak Ku so lobuw so wonuo tu su' miau nosiro musingkolaid,” koo. 52 Mudodoowaa ya sono lobuw Yaudi ri nu norongou tinangar ni Yisus nu, “Onu koo ka Iyo potaak nu koyuwan Niyo no okanon toko?” koo nosiro. 53 Mutongaro yo si Yisus nu, “Bana ya tongaron Ku iitu nu, bang dai kou mongokan nu onsi nu koyuwan Ku tu, om monginum nu raa' Ku no, d'ado kowiawan muyu musingkolaid. 54 Isai mongokan nu onsi nu koyuwan Ku om monginum nu raa' Ku no, taakan nu kowiawan musingkolaid, om luli'an Ku iyo ong pongoowi'an-o nu wonuo tu, 55 so' onsi Ku tu yo su ingkookan obana, om raa' Ku tu yo su iinumon obana. 56 Isai mongokan nu onsi Ku om monginum nu raa' Ku, kopuido kowiawan niyo so Aku om kowiawan Ku kopuido so iyo. 57 Amo Ku, iri minonuu' so Aku, miau musingkolaid, om Aku nga soko ono ya. Om lobuw mongokan nu onsi Ku no, nga miau-a musingkolaid so' taakan Ku iyo nu kowiawan musingkolaid. 58 Itu yo su ingkookan kiat so surga. Okon ko soko ingkookan inokan nu odu aki muyu ri so' nookan pona nosiro iri, minatoi-a nosiro. Isai kookan nu ingkookan kiat so surga oono, miau musingkolaid,” koo si Yisus. 59 Kiawi' oono tinangar ni Yisus nu laid Niyo montuduk so waloi sosombooyangan so Kapornaum. 60 Norongou-o po nu mompomaid ni Yisus totongaron Niyo iiri, mutongaro yo nosiro nu, “Orogon sobana pontudukan Niyo no. Isai ka su koorati nu ono?” koo. 61 Noilaan-o ni Yisus nu minuburung-burung mompomaid Niyo ri suat so totongaron Niyo ri, indadi mutongaro yo sono Iyo nu, “Bang opula'-pula'an kou nu totongaron Ku iiri, 62 makin po ong osiou muyu Aku, Anak nu Riniba, kokaton muli' so inungkiaton Ku ri. 63 Rongowo muyu yo! Bang mutangar Aku nu mongokan nu onsi Ku om monginum nu raa' Ku, koorotian kotorima' nu Atod nu Kinoringan. Powiau-o po nu lobuw tu, Atod nu Kinoringan, om okon ko kiat so lobuw. Pinutangar Ku iiri kiat so Atod nu Kinoringan om koponaak nu kowiawan musingkolaid, 64 nga tinu-tinu so kou dai poimaid,” koo. (Noilaan-o laid ni Yisus ong isai su poimaid om isai su monindoraai so Iyo ong wagu.) 65 Mutongaro po Iyo nu, “Ono yo ko' pokoiloon Ku kou nu d'ado lobuw poimaid so Aku ong okon-a ko lila' ni Amo Ku Kinoringan,” koo. 66 Kiat nu iri osuang sono mompomaid Niyo minulaiw, om dai yo maid so Iyo. 67 Duato yo sono Niyo opulu om duo mompomaid Niyo ri nu, “Kou pona bo gaam nga mulaiw-a kiat tuui so Aku?” koo. 68 Sumombuto yo si Simun Pitrus nu, “Oo Tuhan, isai po ka otoop waidon mai? Tinongaran Mu no yo su monaak nu kowiawan musingkolaid. 69 Poimaid kai yo sobana nu Ikau-o su sinuu' nu Kinoringan,” koo. 70 Sumombuto yo Iyo nu, “Aku ya su minomili' so kou, opulu om duo, nga ido koyuwan so kou mugogoma'on suat so Wowaidon nu Moinat,” koo. 71 Kinuan-o po Niyo nu tangar Niyo iiri si Yudas, anak ni Simun Iskariut. Mompomaid pona iyo ni Yisus, nga iyo ya su mongimpolanu mongindoraai so Iyo.
1 Nopupus iri, miano yo si Yisus so Galilia musimpanou. Dai Iyo moingin musimpanou so Yudia so' pokipopotoyan Iyo nu wowaidon nu lobuw Yaudi ri. 2 Iya iiri, oduruk-o puromi-romian nu lobuw Yaudi, nu Rami-Rami Mubosalag. 3 Tongaro yo sono Iyo nu kosusulodan Niyo ri nu, “Owarong po mian Ko so Yudia, su' kosiou-a pudi lobuw dii nu koiran-iran waalon Mu no. 4 Dai musuat ong posusut lobuw nu onu-onu waalon niyo ong moingin iyo obantug. Bang momaal Ko nu koiran-iran, subai niposiou Mu ya so lobuw suang,” koo. 5 (Insan kosusulodan-a Niyo ri, dai ya nopoimaid so Iyo.) 6 Sumombuto yo si Yisus nu, “Dai po nologa' iya pululi'an Ku dii, nga bang kou sombiya-biya ya. 7 Dai ya rumoraayan so kou lobuw dai poimaid so Aku no, nga bang Aku, rumoraayan nosiro so' kiat so pontudukan Ku no, noilaan-o sono nosiro nu oraai gogoma'on nosiro no. 8 Ian kou ya so rami-rami oono. Dai ya ong Aku mian so' dai po nologa' pululi'an Ku dii,” koo si Yisus. 9 Notangar-o po Niyo soko iri, mogolo yo Iyo so Galilia. 10 Nokoungkayas-o po kosusulodan Niyo ri mian so rami-rami ri, sumusuuto yo si Yisus ido-ido su' dai oimpa'an nu lobuw suang. 11 Laid nu rami-rami iiri, diumo yo Iyo nu wowaidon nu lobuw Yaudi ri om mududuato yo nu, “Siombo gaam Iyo,” koo. 12 Osuang sono lobuw muburung-burung suat so Iyo. Kuwai mutangar nu, “Lobuw owarong-a Iyo,” koo, nga kuwai ya mutangar nu, “Dai! Iyo yo po moongaakal,” koo. 13 Nga d'ado ido kooku' poimbosang mutangar suat so Iyo, so' lumaa' nosiro nu wowaidon nu lobuw Yaudi ri. 14 Mintonga' yo rami-rami ri, mosuwo yo si Yisus so natad nu Waloi Maayo nu Kinoringan montuduk. 15 Noiranan sono wowaidon nu lobuw Yaudi ri om mutongaro yo nu, “Siombo gaam kinoguru'an nu lobuw iitu no nu ono? Dai ya boto insan notudukan Iyo nu tinongaran nu Kinoringan,” koo. 16 Sumombuto yo Iyo nu, “Nituduk Ku yo po iitu okon ko pontudukan Ku kondiri, nga kiat so Kinoringan, ono minonuu' so Aku no. 17 Isai momaal nu koinginan nu Kinoringan, iyo yo su koilo nu pontudukan Ku iitu nu kiat so Kinoringan intawa kiat so Aku kondiri. 18 Isai montuduk kiat so pomikiran niyo, mokibontugon-a, nga isai yo po mokibontugon nu minonuu' so iyo, opongoorapan om dai mongaakal. 19 Tinudukan kou yo ni Musa nu Ukum, nga d'ado ido so kou mongowaid nu ono so' pokipopotoyan muyu Aku,” koo. 20 Sumombuto yo ongo lobuw-i nu, “Mulou Ko! Isai ka su mokipopomatoi so Ikau?” koo. 21 Sumombuto yo Iyo nu, “Ido-ido ya koiran-iran winaal Ku nu Runat Pongintoronan om noiranan kou yo sono nu iri. 22 Sinuu' kou ni Musa musunat, om insan Runat Pongintoronan-a, monunat kou ya. Sobana yo, sunat oono okon-a ko kiat so si Musa, nga odu aki muyu gulu ri su minongowaal nu soko ono. 23 Bang monunat kou nu lolaing so Runat Pongintoronan tayon ong kopongowaid nu Ukum ni Musa suat so sunat, nokuro su mungot kou nu momali' Aku so Runat Pongintoronan? 24 Ikod kou yo ponginsala' nu lobuw ong dai muyu oudio po laid onu su obana om dai obana,” koo si Yisus. 25 Nopupus iri, kuwai sono lobuw wokon so Yirusalim minutangar nu, “Okon ka ko si Yisus-o padu nosiro potoyon-i? 26 Siowi muyu bo nga mundii-dii Iyo mutangar so lobuw suang om d'ado ya poingkoyod so Iyo. Kalu noilaan-o nosiro nu Iyo yo su Raja Nijanji nu Kinoringan. 27 Nga bang kologa' yo Raja Nijanji nu Kinoringan, d'ado ido koilo ong siombo inungkiaton Niyo, nga Lobuw iitu, noilaan toko ya inungkiaton Niyo,” koo. 28 Laid ni Yisus montuduk so Waloi Maayo nu Kinoringan, linumuap-a Iyo mongoduat so nosiro nu, “Bana ka nu otondu'an muyu ong isai Aku, om oilaan muyu ong siombo inungkiaton Ku? Okon-a ko konia Ku lumoga', nga konia nu minonuu' so Aku no om opongoorapan Iyo, nga dai muyu Iyo otondu'an. 29 Aku yo su kotondu' so Iyo, so' Iyo yo su minonuu' so Aku om nai yo so Iyo inungkiaton Ku,” koo. 30 Pinokiookoman sono Iyo nu wowaidon nu lobuw Yaudi ri, nga d'ado ido kooku' so nosiro mongkuyut so Iyo so' okon po ko lila' nu Kinoringan. 31 Osuang so nosiro poimaid sono so Iyo, om mutangar nu, “Bang kologa' Raja Nijanji nu Kinoringan, kaalib ka koiran-iran waalon Niyo ko' koiran-iran winaal nu lobuw iitu?” koo. 32 Norongou-a nu lobuw Parisi ri pinuburung-burungan nu lobuw suang-i suat so si Yisus. Indadi, monuuo yo nosiro om wowaidon nu imam-i tinu-tinu moongipat so Waloi Maayo nu Kinoringan mongaakom so Iyo. 33 Nga mutongaro yo si Yisus nu, “Sontagal Aku po itu mido-ido so kou. Opupus ono muli' Aku yo so Kinoringan, iri minonuu' so Aku ri. 34 Modium kou ya so Aku, nga dai muyu Aku osambat, so' dai kou kologa' so pinolakan Ku no,” koo. 35 Mutongar-tongaro yo sono wowaidon nu lobuw Yaudi ri nu, “Siombo gaam ianan Niyo su dai toko Iyo osambat? Mian ka Iyo so bandar wokon pinolakan nu lobuw okon ko Yaudi montuduk so nosiro? 36 Onu ka orati nu tangar Niyo nu, diumon toko pona Iyo nga dai toko ya osambat, om dai toko ologa' pinolakan Niyo no?” koo. 37 Runat kopupusan om oogot so rami-rami iiri, mundiio yo si Yisus om lumuapo yo nu, “Isai lugangon, lumoga' ya tuui so Aku monginum. 38 Soko itu yo tinangar so Buuk nu Kinoringan suat so Aku nu, ‘Isai poimaid so Aku, kuwai sono lumuyu' sungoi koponaak nu kowiawan kiat so inawo niyo no,’ koo ri,” koo si Yisus. 39 Orati nu tinangar Niyo iiri, suat so Atod nu Kinoringan otorima' nu lobuw poimaid so Iyo no. Iya oono, dai po nokotaak Atod nu Kinoringan, so' dai po nokopululi' si Yisus so surga. 40 Osuang lobuw nokorongou nu pinutangar ni Yisus iiri, om kuwai so nosiro mutangar nu, “Bana ya nu Iyo yo su poo'abar nu Kinoringan,” koo. 41 Wokon-i mutangar nu, “Iyo yo su Raja Nijanji nu Kinoringan,” koo. Nga kuwai ya mutangar nu, “Okon-a ko ungkiat so Galilia Raja Nijanji nu Kinoringan, 42 so' nokosurat-o so Buuk nu Kinoringan nu, Raja Nijanji nu Kinoringan oono, solusuk ni Raja Daud, om puonakon so Baitlahim so polak ni Daud gulu ri,” koo. 43 Indadi, tumugulo sono lobuw-i musosagka' suat so si Yisus. 44 Kuwai mokipopongaakom so Iyo, nga d'ado nokooku' mongkuyut so Iyo. 45 Nokopululi' yo po ongo moongipat nu Waloi Maayo nu Kinoringan, iri sinuu' popongaakom so si Yisus, duato yo nosiro nu wowaidon nu imam om lobuw Parisi ri nu, “Nokuro su dai muyu inowit Iyo tuui?” koo. 46 Sumombuto yo nosiro nu, “Atuuk! Moilo sobana Iyo. D'ado ido koinong nu koo'ilo Niyo montuduk,” koo. 47 Sumombuto yo lobuw Parisi ri nu, “Kou pona bo gaam nga nopalid-a Niyo. 48 D'ado po ido wowaidon toko intawa toko lobuw Parisi poimaid so Iyo. 49 Nga lobuw suang iitu nopoimaid so Iyo dai koilo nu Ukum ni Musa, indadi ukumon nosiro nu Kinoringan,” koo. 50 Mutongaro yo si Nikudimus, lobuw Parisi baya' sinumambat so si Yisus nu, 51 “Mongowaid nu Ukum toko, dai kowasa mongukum nu lobuw ong dai po oudio nu kisala' ko' d'ado ya,” koo 52 Sumombuto yo nosiro nu, “Tumapan ko bo gaam so Iyo inong mu lobuw Galilia. Bosaa ya so Buuk nu Kinoringan ong kuwai ka poo'abar nu Kinoringan lumoga' kiat so Galilia ko' d'ado,” koo. 53 Indadi dai ya sono inakom nosiro si Yisus, om mulio yo nosiro ido soido,
1 nga si Yisus minian so Bulud Jaitun. 2 Susuab-i, miano yo Iyo so Waloi Maayo nu Kinoringan, om osuang lobuw linumoga' dii so Iyo. Mogomo yo Iyo montuduk so nosiro. 3 Laid Niyo montuduk-i, lumogaa yo moomontuduk nu Ukum om lobuw Parisi ri dii so Iyo minongowit nu woinoi nosunsungan lumapa'. Suuo yo iyo nosiro poundii so tiningkuangon nu lobuw suang-i, 4 om mutongaro yo nosiro so si Yisus nu, “Oo Guru, woinoi yo po iitu nosunsungan lumapa'. 5 Nokosurat so Ukum ni Musa nu, woinoi soko itu subai pilayon nu watu sampai matoi, nga onu koo ka ong Ikau?” koo. 6 Minongoduat nosiro soko iri pounayan nosiro monginsala' so Iyo, nga tumukuo yo Iyo monurat so tana' nu tontuduk Niyo ri. 7 Pagka opusou nosiro mongoduat, yumongago yo Iyo om mutongaro yo so nosiro nu, “Isai so kou d'ado koraayan, iyo yo su mogulu momilai nu woinoi oono nu watu,” koo. 8 Nopupus Iyo mutangar nu iri, tumukuo yo Iyo koimbagu om monurato yo so tana' ri. 9 Norongou-o po nosiro tinangar Niyo iiri, mulaiwo yo nosiro kiat dii soro ido-ido, gulu po ongo tutuo ri. Indadi Iyo po sono om woinoi-i dii. 10 Yumongago yo si Yisus om tongaro yo woinoi-i nu, “Siombo yo ka nosiro? D'ado ya ka ido so nosiro minongukum so ikau?” koo. 11 Sumombuto yo woinoi-i nu, “D'ado ya Tuan,” koo. “Oo. Aku nga dai ya mongukum so ikau. Panou-o om ikod-o sono pomaal nu koraayan,” koo si Yisus. 12 Mutongaro yo koimbagu si Yisus so lobuw suang-i nu, “Aku yo su onawau so wonuo tu, mongonawau nu pomikiran nu lobuw. Isai poimaid so Aku, dai yo sono otuong pomikiran niyo, so' nonowawan Ku yo nu onawau koponaak nu kowiawan musingkolaid,” koo. 13 Mutongaro yo lobuw Parisi ri so Iyo nu, “Pointolang Ko suat so kowiawan Mu, nga tinangar Mu oono dai obana,” koo. 14 Sumombuto yo Iyo nu, “Pointolang Aku pona suat so kowiawan Ku, nga obana ya tinangar Ku no so' oilaan Ku ya nu siombo inungkiaton Ku, om siombo sundur Ku. 15 Mongukum kou nu lobuw, mongowaid nu poongukum nu lobuw, nga dai Aku ya mongukum nu soko poongukum muyu. 16 Bang mongukum Aku nu lobuw, pongukuman Ku oono ooluk, so' okon-a ko ido-ido Aku mongukum nga mutabang kai si Amo Ku Kinoringan, ono minonuu' so Aku no. 17 Nokosurat-o so Buuk nu Kinoringan nu, bang muinong iri niintolang nu duo koyuwan, obana ya niintolang oono. 18 Soko ono Aku ya pointolang suat so Aku kondiri, om si Amo Ku, ono minonuu' so Aku no, nga pointolang-a suat so Aku,” koo. 19 Mongoduato yo nosiro nu, “Siombo ka si Amo Mu?” koo. Sumombuto yo Iyo nu, “Dai kou kotondu' so Aku om so si Amo Ku. Bang otondu'an muyu Aku, otondu'an muyu ya si Amo Ku,” koo. 20 Tinangar kiawi' iitu ni Yisus nu pinontudukan Niyo so Waloi Maayo nu Kinoringan, so obi' nu poongimpugan nu siin-i, nga d'ado ya minongaakom so Iyo, so' okon po ko lila' nu Kinoringan. 21 Mutongaro po si Yisus so nosiro nu, “Olaiwan Ku kou om diumon muyu sono Aku. Nga, matoi kou so koraayan muyu, om dai kou kologa' so ianan Ku no,” koo. 22 Mutongaro yo lobuw Yaudi ri nu, “Musimpatoi bo gaam Iyo, so' dai kou kologa' so kologa'an Ku no, koo ati Iyo,” koo nosiro. 23 Mutongaro yo si Yisus nu, “Kou yo po ungkiat-a so wonuo tu, nga Aku ungkiat so surga. 24 Ono yo ko' mutangar Aku so kou nu matoi kou so koraayan muyu, om tantu yo nu matoi kou so koraayan muyu ong dai kou poimaid nu Aku yo iri paawon nu Kuwai Aku Dadan, koo ri,” koo si Yisus. 25 Mongoduato yo nosiro nu, “Isai Ko ka?” koo. Sumombuto yo si Yisus nu, “Aku yo iri tinuturan Ku so kou kiat nu togna ri. 26 Osuang po tuturanon Ku so kou suat so gogoma'on muyu ongo roraai. Tuturanon Ku oono okon ko kiat so pomikiran Ku kondiri, nga kiat so minonuu' so Aku nu opongoorapan-o, om nituturan Ku so lobuw onu yo po norongou Ku kiat so Iyo,” koo. 27 Dai nosiro noorotian nu kuanon-o po ni Yisus nga Kinoringan, Amo Niyo. 28 Pagka soko iri, mutongaro yo si Yisus so nosiro nu, “Bang osalib muyu yo Aku, Anak nu Riniba, oilaan muyu ya sono nu Aku yo Raja Nijanji nu Kinoringan, om oilaan muyu nu onu yo po pinuwaal Ku no, okon ko maid nu koinginan Ku kondiri, sondiang ko mutangar Aku nu onu yo po nituduk so Aku ni Amo Ku Kinoringan. 29 Iyo, ono minonuu' so Aku no mido-ido so Aku, om dai Aku niogol Niyo so' dadan Aku ya mugogoma'on nu onu yo po koinsanang so Iyo,” koo. 30 Nokoputangar si Yisus soko iri, osuang sono lobuw nopoimaid so Iyo. 31 Mutongaro yo si Yisus so lobuw Yaudi musimpoimaid-poimaid so Iyo ri nu, “Bang tumotog kou mongowaid nu pontudukan Ku no, bana-bana ya nu mompomaid Ku kou. 32 Koilo kou nu pontudukan nu obana suat so Kinoringan, om ono yo su polabus so kou,” koo. 33 Mutongaro yo nosiro nu, “Kai yo po solusuk ni Abraham. Dai po insan nouripon kai nu isai yo po. Onu ka orati nu tinangar Mu nu polabus so kou, k'ikau-o?” koo nosiro. 34 Mutongaro yo si Yisus nu, “Bana ya tongaron Ku iitu nu isai yo po momaal nu koraayan, lobuw oono uripon nu koraayan. 35 Uripon-o yo po dai ya otatap so waloi nu tuan niyo no. Nga bang anak nu tuan-o, otatap-a molak nai. 36 Bang Aku, Anak nu Kinoringan su polabus so kou, bana ya nu kolabus kou. 37 Oilaan Ku ya nu solusuk kou ni Abraham, nga muupakat kou ya momatoi so Aku, so' dai kou poimaid nu pontudukan Ku no. 38 Ombo yo po norongou Ku so si Amo Ku Kinoringan, ono yo su tuturanon Ku. Nga kou momaal nu onu yo po nituduk nu amo muyu,” koo. 39 Sumombuto yo nosiro nu, “Amo mai yo po si Abraham,” koo. Mutongaro yo si Yisus nu, “Bang bana nu anak kou ni Abraham, waalon muyu ya onu yo po winaal niyo. 40 Goma'on Ku yo po nga paabar so kou nu pontudukan obana kiat so Kinoringan, nga pokipopotoyan muyu nai' Aku. Okon-a ko soko ono ong si Abraham. 41 Onu yo po waalon nu amo muyu nu gulu ri, ono ya su waalon muyu,” koo si Yisus. Sumombuto yo nosiro nu, “Ido-ido ya Amo mai, ono yo Kinoringan, om inonakan Niyo bana kai. Okon-a ko pungou,” koo nosiro. 42 Mutongaro yo si Yisus so nosiro nu, “Bang bana nu Kinoringan-o su Amo muyu, somodan muyu ya Aku, so' linumoga' Aku kiat so Kinoringan om okon-a ko konia ku lumoga' tuui, nga Iyo yo minonuu' so Aku. 43 Ono yo ko' dai kou koorati nu totongaron Ku no, so' dai kou mongimaid nu pontudukan Ku. 44 Wowaidon nu Moinat-o yo su amo muyu om mongowaid kou nu koinginan niyo. Kiat-a nu togna Wowaidon nu Moinat oono su moomatoi. Dai iyo insan mongowaid nu onu ya obana. Koduung mutangar iyo, owudut-a kiawi' so' ono yo kogoyaan niyo kiat nu togna, om iyo yo su impuunon nu wudut. 45 Nga Aku yo po mutangar nu onu ya obana. Ono yo ko' dai kou poimaid so Aku. 46 D'ado ido so kou kopongintolang nu kikoraayan Aku. Pudi pona pointolang Aku nu onu ya obana, dai kou ya poimaid. 47 Isai yo po ungkiat so Kinoringan, mongowaid nu totongaron Niyo. Nga kou yo po okon ko ungkiat so Kinoringan. Ono yo ko' dai kou mongimaid so Iyo,” koo si Yisus. 48 Sumombuto yo wowaidon nu lobuw Yaudi ri nu, “Bana ya tongaron mai no nu Ikau-o po lobuw Samaria sinorungan nu moinat,” koo. 49 Sumombuto yo si Yisus nu, “Okon-a ko sinorungan Aku nu moinat. Mongorumat Aku so si Amo Ku Kinoringan, nga mongimpii'an kou so Aku. 50 Dai ya su mokiorumaton, nga kuwai ido moingin ong orumaton Aku nu lobuw, om Iyo yo su pointolang nu obana Aku. 51 Bana ya totongaron Ku so kou iitu nu, isai mongimaid nu totongaron Ku, dai matoi musingkolaid,” koo si Yisus. 52 Mutongaro yo nosiro so Iyo nu, “Noilaan mai yo sono nu bana ya nu sinorungan Ko nu moinat. Minatoi-a pudi si Abraham om ongo poo'abar nu Kinoringan gulu ri, nga ong Ikau mutangar Ko nu, isai yo po mongimaid nu tinongaran Mu no, dai matoi. 53 Bang minatoi-o si Abraham, aki rumpungan mai ri, om ongo poo'abar nu Kinoringan-i, isai Ko ka itu? Kaalib Ko po ka so si Abraham?” koo. 54 Sumombuto yo Iyo nu, “Bang mokiorumaton Aku, d'ado ya kogunaan nu ono. Amo Ku no yo su mongorumat so Aku, ono Kinoringan mai koo kou no, 55 ampa dai muyu otondu'an Iyo. Nga otondu'an Ku ya Iyo. Bang mutangar Aku nu dai Aku kotondu' so Iyo, kopomudut Aku soko kou. Nga otondu'an Ku ya Iyo om mongimaid-a nu totongaron Niyo. 56 Aki rumpungan muyu si Abraham minurosiou nu runat kologa'an Ku om noilaan-o niyo nu lumoga' Aku om nosudu'an sono iyo,” koo. 57 Mutongaro yo nosiro so Iyo nu, “Umur Mu dai po kolimo nopulu toun. Onu ka kosiou-siou Mu so si Abraham?” koo. 58 Sumombuto yo Iyo nu, “Bana ya tongaron Ku iitu nu, dai po nopuanak si Abraham, kuwai Aku yo,” koo. 59 Momumpungo yo nu watu wowaidon nu lobuw Yaudi ri padu pomilai so si Yisus, nga sumusuto yo Iyo om mulaiwo yo kiat so Waloi Maayo nu Kinoringan-i.
1 Laid ni Yisus manou-panou-i, nokosambat Iyo nu lobuw bolou kiat kopuanak. 2 Mongoduato yo mompomaid Niyo ri nu, “Oo Guru, isai ka su kikoraayan so nosiro, iyo kondiri ko' ino amo niyo no sampai nobolou iyo kiat kopuanak?” koo. 3 Sumombuto yo si Yisus nu, “Okon-a ko koraayan niyo kondiri intawa ino amo niyo, nga tayon ong kointolang kuasa nu Kinoringan so kowiawan niyo no. 4 Laid nu onawau-o po, ono yo laid nu miau toko po, waalo toko po gogoma'on koinginan nu Kinoringan nisuu' so Aku no, so' bang awi yo, dai yo sono kopomaal nu ono. 5 Laid nu tuui Aku po so wonuo tu, Aku yo su mongonawau nu pomikiran nu lobuw nu pontudukan Ku obana no,” koo. 6 Nopupus-o po si Yisus mutangar, mongoduraa yo Iyo so tana' ri, popugowulo yo Niyo tana' ri om dura' Niyo ri om piidi yo Niyo so mato nu lobuw bolou-i. 7 Tongaro yo Niyo lobuw bolou-i nu, “Panou-o, muragup so Kulam Siluam,” koo. (Orati yo po nu Siluam so tangar Ibrani nga sinuu'.) Momponowo yo lobuw iiri muragup. Nokopululi' po iyo, kosiou-o sono iyo. 8 Kiawi' ombaloi niyo om lobuw obulit kosiou so iyo mokisodaka ri mutangar sono nu, “Okon ka ko iyo yo iri dadan mokisodaka ri?” koo. 9 Kuwai yo mutangar nu, “Iyo yo ono,” koo, om kuwai ya mutangar nu, “Okon-a, lobuw iitu koogio ya nu buatan niyo ri,” koo. Nga kondiri ya nu lobuw iiri mutangar nu, “Aku yo iri,” koo. 10 Duato yo iyo nosiro nu, “Onu nokopali' nu mato mu no?” koo. 11 Sumombuto yo iyo nu, “Iri lobuw ingoranan so si Yisus su nopopiid nu tana' ginowulan nu dura' Niyo ri so mato ku no, om minutangar nu, ‘Panou-o muragup so Kulam Siluam,’ koo. Miano aku yo sono muragup. Nokopuragup aku po, kosiou aku yo sono,” koo. 12 Mongoduato po nosiro nu, “Siombo ka lobuw oono,” koo. Sumombuto yo iyo nu, “Tou!” koo. 13 - 14 Pinomoli'an ni Yisus nu lobuw bolou iiri nokoiya yo nu Runat Pongintoronan. Indadi owito yo sono lobuw baya' bolou iiri so ongo lobuw Parisi ri. 15 Mongoduato po lobuw Parisi ri so iyo ong onu nokopali' nu mato niyo ri. Sumombuto yo sono iyo nu, “Piniidan Niyo mato ku no nu tana' ginowulan nu dura', om minian aku yo muragup, om kosiou aku yo sono,” koo. 16 Mutongaro yo tinu-tinu lobuw Parisi ri nu, “Dai mupatut nu ungkiat so Kinoringan lobuw oono, so' dai Iyo mongowaid nu ukum suat so Runat Pongintoronan,” koo. Nga mutongaro yo lobuw iiri nu, “Bang lobuw kikoraayan, dai kopomaal nu koiran-iran soko ono,” koo. Minupipinig sono nosiro. 17 Mongoduato po lobuw Parisi ri so lobuw-i nu, “Onu ka ponokodan mu suat so lobuw minomali' so ikau-i?” koo. Sumombuto yo iyo, “Iyo yo poo'abar nu Kinoringan,” koo. 18 Nga dai ya poimaid wowaidon nu lobuw Yaudi ri nu nobolou iyo om kosiou sono. Indadi, paawo yo nosiro ino amo niyo ri, 19 om duato yo nu, “Bana ka nu anak muyu itu, iri bolou kiat kopuanak-i? Nokuro su kosiou sono iyo?” koo. 20 Sumombuto yo nosiro nu, “Ono-ono ya su oilaan mai, anak mai iyo, om bolou iyo kiat kopuanak. 21 Nga dai mai ya moilaan ong nokuro su tinumungani ya iyo kosiou, om dai mai ya moilaan ong isai minomali' so iyo. Duato muyu ya iyo. Pagka nosukod-o, moilo yo iyo sumambut,” koo. 22 Soko iri sambut nosiro so' lumaa' nosiro nu wowaidon nu lobuw Yaudi ri. Minuupakat-o wowaidon-i nu isai yo po poimaid nu si Yisus-o Raja Nijanji nu Kinoringan, dai yo sono poosuwon so waloi sosombooyangan. 23 Iri yo ko' tinangar nu ino amo niyo ri nu, “Duato muyu ya iyo, so' nosukod-o iyo,” koo. 24 Paawo po nosiro lobuw iiri om tongaro yo nu, “Obari yo so tiningkuangon nu Kinoringan onu yo po obana. Oilaan mai nu lobuw iitu no kikoraayan,” koo. 25 Sumombuto yo lobuw iiri nu, “Dai ku ya oilaan nu kikoraayan ka lobuw oono ko' d'ado. Ono yo su oilaan ku, gulu ri bolou aku, nga kosiono kosiou aku yo sono,” koo. 26 Mongoduato po nosiro nu, “Onu ka winaal Niyo so ikau su kosiou ko yo sono?” koo. 27 Sumombuto yo iyo nu, “Notangar ku yo iri so kou nga dai muyu ya rinongou. Nokuro su ingguloton muyu po? Kou gaam nga moingin-a sumiliw nu mompomaid Niyo!” koo. 28 Ungoti yo iyo nosiro om mutongaro yo nu, “Ikau-o bo ono mompomaid Niyo. Kai yo po mompomaid ni Musa. 29 Oilaan mai nu si Musa yo su pinongodawan nu Kinoringan, nga lobuw oono dai mai oilaan ong siombo inungkiaton,” koo. 30 Sumombuto yo lobuw iiri nu, “Oiranan aku sobana nu itu! Pudi pona kopomali' si Yisus nu mato ku, nga dai muyu oilaan ong siombo inungkiaton Niyo. 31 Oilaan toko nu dai rongowon nu Kinoringan lobuw kikoraayan. Ono yo su rongowon Niyo lobuw mongorumat so Iyo om momaal nu koinginan Niyo no. 32 Kiat nu kinowongunan nu wonuo tu, d'ado po norongou nu kuwai lobuw kopomali' nu lobuw bolou kiat kopuanak. 33 Bang okon ko kiat so Kinoringan lobuw oono, dai Iyo kopomaal nu onu-onu ya,” koo. 34 Sumombuto yo nosiro nu, “Kiat kopuanak so ikau, kikoraayan ko yo. Dai mutoop ong montuduk ko so kai!” koo. Indadi kiat nu iri dai yo sono pinaasuw iyo so waloi sosombooyangan. 35 Norongou sono ni Yisus nu dai poosuwon nosiro lobuw baya' bolou iiri so waloi sosombooyangan. Nosambat-o po Niyo lobuw iiri, tongaro yo Niyo nu, “Poimaid ko ya ka nu Anak nu Riniba?” koo. 36 Sumombuto yo lobuw iiri nu, “Oo Tuan, obari yo ong isai Iyo su' poimaid aku so Iyo,” koo. 37 Sumombuto yo si Yisus nu, “Nosiou mu yo Iyo. Aku yo ono una' mu mutangar-tangar-o,” koo. 38 Sumombuto yo lobuw iiri nu, “Oo Tuhan, poimaid aku,” koo, om sumurukudo yo so tiningkuangon ni Yisus. 39 Mutongaro yo si Yisus nu, “Tomod Ku yo po lumoga' so wonuo tu nga mongukum nu lobuw. Isai obolou, kosiou sono, om isai kosiou, pobolowon Ku,” koo. 40 Osuang lobuw Parisi nokorongou nu tinangar Niyo iiri. Mutongaro yo sono nosiro nu, “Ontaman Mu ka ong kai nga bolou-a?” koo nosiro. 41 Sumombuto yo si Yisus nu, “Bang oilaan muyu nu obolou kou, d'ado ya koraayan muyu, nga pagka monokod kou nu kosiou kou ya, kakal-a kikoraayan kou,” koo si Yisus.
1 Mutongaro yo si Yisus nu, “Bana ya tongaron Ku so kou iitu nu, bang masuw lobuw so kandang nu dumba, om dai mimpolanu so pintu nga mindakod so pagar-o, lobuw oono moonakou om moonolod. 2 Nga bang masuw lobuw so kandang om mimpolanu so pintu no, lobuw oono yo su moongipat nu dumba no. 3 Sukaban iyo nu pintu nu lobuw minongipat nu kandang-o, om ongo dumba no nga kotondu' nu bongut niyo ong monogou iyo so nosiro polabus. 4 Oowit-o po niyo lumabus ongo dumba no, mompanou iyo so pinoguluon, om ongo dumba no sumusuut so iyo so' otondu'an-a nosiro bongut niyo no. 5 Dai nosiro maid so lobuw sondiang, ala' nai' mulaiw so' dai nosiro otondu'an bongut-o,” koo. 6 Tinuturan ni Yisus salig-salig iitu so nosiro, nga dai noorotian ong onu kuanon Niyo. 7 Indadi, mutongaro po si Yisus so nosiro nu, “Bana ya tongaron Ku so kou iitu nu, Aku yo su pintu nu ongo dumba Ku no. 8 Kiawi' nokopogulu so Aku lumoga' ri, moonakou om moonolod, nga ongo dumba Ku, ono yo lobuw songapan Ku, dai maid so nosiro. 9 Aku yo su pintu. Isai masuw mimpolanu tuui so Aku, osopulan iyo. Osanang iyo sono masuw lumabus om kooyang nu ingkookan. 10 Tomod-o po nu moonakou lumoga' nga monakou-a, momatoi om mongusiba'. Nga tomod Ku yo po lumoga' tayon Ku ong kikowiawan nosiro, ono yo kowiawan d'ado kurang kabus musingkolaid. 11 Aku yo su moongipat owarong, olila' matoi suat so dumba Ku no. 12 Lobuw kukumoraja nu okon-a ko moongipat intawa songapan nu dumba oono, mongolaiw nu dumba no koduung kosiou nu ingongansad lumoga' monampo nu dumba om oboiasan-a sono nosiro. 13 Mulaiw-a kukumoraja oono, so' iyo yo po kumoraja ya suat so gaji om dai poduli'on niyo dumba no. 14 - 15 Aku yo su moongipat owarong. Otondu'an Aku ni Amo Ku, om otondu'an Ku Iyo. Soko ono ya otondu'an Ku dumba Ku om nosiro nga kotondu' so Aku, om olila' Aku matoi suat so nosiro. 16 Kuwai po dumba wokon songapan Ku ya, nga dai po nokowaid so baanan iitu. Nosiro nga owiton Ku ya om mongkinongou-a nu bongut Ku no, om osiliw nosiro nu sombaanan nu ido yo moongipat, ono yo Aku. 17 Osamod si Amo so Aku so' olila' Aku matoi, om oilaan Ku nu miau Aku koimbagu. 18 D'ado ido kopomatoi so Aku ong okon-a ko lila' Ku. Nga Aku ya kondiri su olila' matoi. Kikuasa Aku mokipatoi, om kikuasa Aku ya miau koimbagu. Ono yo su nipowaal ni Amo so Aku,” koo. 19 Pagka minutangar si Yisus soko iri, musosongkiwalo yo sono lobuw Yaudi ri. 20 Osuang minutangar nu, “Sinorungan Iyo nu moinat! Mulou Iyo! Nokuro su rongowon muyu Iyo?” koo. 21 Nga kuwai ya mutangar nu, “Okon-a ko soko ono totongaron ong lobuw sinorungan nu moinat. Kopomali' ka moinat-o nu lobuw bolou?” koo. 22 Runat nu Rami-Rami Pongoondoman nu Pinongorosmian nu Waloi Maayo nu Kinoringan so Yirusalim, inabu yo nu kodarun. 23 Minanou-panou sono si Yisus so tontong ingoranan nu Pontaan ni Salumu so natad nu Waloi Maayo nu Kinoringan-i. 24 Muimpugo yo sono wowaidon nu lobuw Yaudi ri so pililiwut Niyo ri om mutongaro yo nu, “Komuro po ka kolaid dai Ko pokoilo so kai ong isai Ko? Bontolo yo paabar so kai ong Ikau-o su Raja Nijanji nu Kinoringan,” koo. 25 Sumombuto yo Iyo nu, “Nokaabar Ku yo so kou, nga dai kou ya poimaid. Gogoma'on pinuwaal Ku, ono nisuu' ni Amo Ku no, ono yo su pointolang ong isai Aku, 26 nga dai kou poimaid so' okon-a ko songido kou nu ongo lobuw songapan Ku. 27 Ongo lobuw songapan Ku no mongkinongou-a nu totongaron Ku. Otondu'an Ku nosiro om mongimaid nosiro so Aku. 28 Taakan Ku nosiro nu kowiawan musingkolaid, om dai yo sono matoi orawu' so Kinoringan musingkolaid. Om ado yo koponolod so nosiro ungkiat so pogkuosaan Ku. 29 Amo Ku, ono nopotaak so nosiro tuui so Aku no, kaalib po so onu-onu ya. D'ado ido koponolod so nosiro ungkiat so pogkuosaan ni Amo Ku. 30 Si Amo om Aku, ido-ido ya,” koo. 31 Norongou-o po ono nu wowaidon nu lobuw Yaudi ri, mongolapo yo nosiro nu watu, padu pomilai so si Yisus. 32 Nga mutongaro yo Iyo so nosiro nu, “Osuang-o gogoma'on owarong nisuu' ni Amo Ku nowaal Ku so tiningkuangon muyu. Ombo ka nu gogoma'on Ku kopomilayan muyu so Aku?” koo. 33 Sumombuto yo nosiro nu, “Okon-a ko gogoma'on owarong nowaal Mu no su kopomilayan mai so Ikau, nga ono yo totongaron Mu mongusiba' nu Kinoringan-o. Ikau-o po lobuw-a kosuangan, nga mutangar Ko nu Ikau-o po Kinoringan,” koo. 34 Sumombuto yo si Yisus nu, “Nokosurat-o totongaron nu Kinoringan so Buuk nu Ukum muyu nu, ‘Kou yo su pinokokinoringan,’ koo ri. 35 Oilaan toko nu onu yo po nokosurat so Buuk nu Kinoringan otuman-a. Indadi, bang Kinoringan kondiri su nopokokinoringan nu ongo lobuw pologa'an nu tinongaran Niyo no, 36 nokuro su tongaron muyu po nu mongusiba' Aku nu Kinoringan suat sono nu tangar Ku nu Aku yo po Anak nu Kinoringan? Ampa Aku yo su pinili' nu Kinoringan, Amo Ku, om sinuu' Aku lumoga' so wonuo tu. 37 Bang dai Ku waalon nisuu' ni Amo so Aku no, adang kou yo poimaid so Aku. 38 Nga pagka waalon Ku ya ono, imaido muyu yo gogoma'on Ku no, pudi dai kou poimaid so Aku. Kiat nu ono, oilaan om oorotian muyu nu mido-ido si Amo so Aku, om mido-ido Aku so Iyo,” koo. 39 Padu po nosiro okomon si Yisus, nga mulaiwo yo Iyo. 40 Mululio yo si Yisus muripau so Bowang Yurdan, so tontong pinongodiu'an ni Yuanis, om mintorono yo Iyo dii. 41 Osuang lobuw linumoga' dii so Iyo. Minutangar nosiro nu, “D'ado ya nowaal ni Yuanis nu koiran-iran, nga kiawi' nituturan niyo suat so lobuw iitu no bana ya,” koo. 42 Osuang sono lobuw dii nopoimaid so si Yisus.
1 Kuwai ido koyuwan, ngaran niyo si Lajarus, minolak so Bitania maid nu sulod niyo si Maria om si Marta. 2 Si Maria yo su nopotuad nu inosak lanung so akod ni Yisus, om piniid nu obuk niyo ri. Minorosakit sono si Lajarus. 3 Mongodawo yo kiduo sulod niyo ri, niloga' dii si Yisus nu, “Oo Tuhan, morosakit una'-una' kosomodan Mu ri,” koo. 4 Norongou-o po Niyo abar iiri, mutongaro yo Iyo nu, “Dai ya kopatoi so iyo osakit oono, nga tomod-o po nu ono pobantug nu Kinoringan, om Aku, Anak Niyo nga kobantug-a,” koo. 5 Pudi pona kosomodan Niyo si Marta, si Maria om si Lajarus, 6 nga norongou-o po Niyo nu morosakit si Lajarus, tinomod-a Niyo mintoron po koduaan so pinolakan Niyo ri. 7 Nokotalib koduaan, tongaro yo Niyo mompomaid Niyo ri nu, “Mululi' toko yo so Yudia,” koo. 8 Sumombuto yo nosiro nu, “Oo Guru, owagu po boto iri padu ko pilayon om potoyon nu wowaidon nu lobuw Yaudi ri. Nokuro su mokipupululi' Ko po dii?” koo nosiro. 9 Sumombuto yo si Yisus nu, “Okon ka ko opulu om duo jinaaman laid onawau nu sondunat-o? Lobuw mompanou nu onawau-o po tantu dai kosadu, so' otogu' nu onawau. 10 Nga lobuw mompanou so otuong, tantu kosadu, so' d'ado onawau nai so iyo,” koo. 11 Soko ono yo tinangar Niyo pokoilo nu dai ya nosiro oinsaadan so Yudia. Om mutongaro po Iyo so nosiro nu, “Nokoturuw-o sulod toko ri, si Lajarus, nga mian Aku ya mongorios so iyo,” koo. 12 Mutongaro yo mompomaid Niyo ri nu, “Oo Guru, bang moturuw-a si Lajarus, tantu umatu' ya iyo,” koo. 13 Orati nu tangar ni Yisus iiri, minatoi-o si Lajarus, nga ontaman nosiro ong bana nu moturuw-a iyo. 14 Pagka soko iri, bontolo yo Niyo paabar so nosiro nu, “Minatoi-o si Lajarus. 15 Nga suat so koworongan muyu, mongunsopot Aku nu d'ado Aku dii nu iya oono su' poimaid kou. Mian toko yo dii si Lajarus,” koo. 16 Mutongaro yo si Tumas, iri ingoranan so si Apid, so kouna'an niyo ri nu, “Maid toko yo, su' kowaid toko so Iyo matoi,” koo. 17 Lumogaa si Yisus om mompomaid Niyo ri su koopatan-o kinolobongan so si Lajarus. 18 Koorawu' nu Bitania kiat so bandar Yirusalim kiro-kiro opat kilumitor. 19 Indadi osuang-a sono lobuw Yaudi kiat dii minongondaa so si Marta om si Maria monginsosamod suat so kinopotoyan nu sulod nosiro ri. 20 Norongou-o po ni Marta nu nokologa' si Yisus, sumomungo yo iyo. Si Maria minogol-a so waloi. 21 Tongaro yo ni Marta si Yisus nu, “Oo Tuhan, bang tuui-tuui Ko nu laid oono ri, dai ya matoi sulod ku ri. 22 Soko ono pona, oilaan ku nu onu-onu ya indomoon Mu so Kinoringan, tumbaidon Ko ya nu ono sono tu,” koo. 23 Sumombuto yo Iyo so si Marta nu, “Oluli'an-a bo ono sulod mu no,” koo. 24 Mutongaro yo si Marta nu, “Oilaan ku ya nai' nu oluli'an-a iyo ong pongoluli'an-o nu lobuw minatoi so pongoowi'an nu wonuo tu,” koo. 25 Mutongaro yo si Yisus nu, “Aku yo su poluli' nu lobuw minatoi om monaak nu kowiawan. Isai poimaid so Aku, miau iyo pudi minatoi-o. 26 Om lobuw miau-o po ong poimaid so Aku, dai yo matoi musingkolaid. Poimaid ko ka nu tangar Ku oono?” koo. 27 Sumombuto yo si Marta nu, “Oo Tuhan, poimaid aku ya nu Ikau-o su Anak nu Kinoringan, om Ikau-o su Raja Nijanji nu Kinoringan linumoga' so wonuo tu,” koo. 28 Nokoputangar-o po si Marta soko iri, miano yo iyo pokoilo so si Maria binurung nu, “Nokologa' yo guru toko ri, nipopaau ko Niyo,” koo. 29 Norongou-o po iri ni Maria, mogtuui miano iyo sumambat so si Yisus. 30 (Iya oono kakal po si Yisus so tontong kinopusomungan nosiro si Marta, dai po nokologa' so kampung oono.) 31 Nosiou-a nu ongo lobuw Yaudi minonginsosamod so si Maria nu olangkas iyo lumabus kiat so waloi-i, suuto yo sono iyo nosiro, so' ontaman nosiro ong mian so lobong tumangi' moupus. 32 Nokologa' yo po si Maria so pinolakan ni Yisus, sumurukudo yo iyo so tiningkuangon ni Yisus om mutongaro yo nu, “Oo Guru, bang tuui-tuui Ko nu iya iiri, miau po sulod ku ri nu kosiono tu,” koo. 33 Nosiou-o po ni Yisus nu tumangi' si Maria om lobuw minonundan so iyo ri, umurado yo sono inawo Niyo ri. 34 Duato yo Niyo nosiro nu, “Siombo ka pinolobongan muyu so iyo?” koo. Sumombuto yo nosiro nu, “Kayo toko yo monsiou,” koo. 35 Tumongio yo si Yisus. 36 Mutongaro yo ongo lobuw-i nu, “Siowi toko yo bo, osamod sobana pala Iyo so si Lajarus,” koo. 37 Nga kuwai ya so nosiro minutangar nu, “Kopomali' Iyo nu lobuw bolou, nga dai ya gaam nopogos Niyo si Lajarus dai popatoi,” koo. 38 Minurad po inawo ni Yisus, om miano yo sono so lobong-i. Lobong iiri bulud nu watu, kinuringib monguang om tinutuban nu watu maayo. Mutongaro yo Iyo so nosiro nu, 39 “Lungkibo muyu watu no,” koo. Nga sumombuto yo si Marta, sulod nu lobuw minatoi iiri nu, “Oo Guru, koopatan-o kinolobongan nu ono, tantu owutong-o,” koo. 40 Sumombuto yo Iyo so si Marta nu, “Okon ka ko notangar Ku yo iri so ikau nu, bang poimaid ko, kosiou ko ya nu kobontugan nu Kinoringan?” koo. 41 Lungkibo yo nosiro watu ri. Tumingaa'o yo si Yisus so langit om mutongaro yo nu, “Oo Amo, munsopot Aku so Ikau, so' rinongou Mu ya Aku. 42 Oilaan Ku nu rongowon Mu ya Aku dadan. Nga tongaron Ku itu suat so lobuw iitu tayon Ku ong poimaid nosiro nu Ikau-o su minonuu' so Aku,” koo. 43 Nopupus po si Yisus mutangar soko iri, momaawo yo Iyo nu, “Oo Lajarus, labus-o!” koo. 44 Lumobuso yo lobuw minatoi iiri, nga kakal po nosolui akod longon niyo ri nu koukuputi om buatan-i, nga kisosayut po nu soputangan. Tongaro yo ni Yisus ongo lobuw-i nu, “Uyadi muyu yo iyo om poponowon-a,” koo. 45 Osuang lobuw Yaudi, iri minongondaa so no Maria, nopoimaid so si Yisus nu nokosiou nu winaal Niyo iiri. 46 Nga kuwai ya tinu-tinu so nosiro minian so lobuw Parisi ri pokoilo nu winaal ni Yisus. 47 Pagka soko iri, muimpugo yo lobuw Parisi om wowaidon nu imam-i muupakat maid nu lobuw so Poongobisora'an nu Ugama ri nu, “Onu gaam opatut waalon toko? Siowi muyu, osuang-o koiran-iran winaal nu lobuw iitu. 48 Bang posimaidan toko ya Iyo, olaid-o po osuang-o sono lobuw poimaid so Iyo. Koompusan, lumoga' sono momogkuasa nu Ruum mongoraag nu Waloi Maayo nu Kinoringan tu om kiawi' bansa toko!” koo. 49 Mutongaro yo ido koyuwan kiat so nosiro, ingoranan so si Kayapas, Imam Maayo nu toun iiri nu, “Ado oilo-ilaan muyu. 50 Dai muyu oilaan nu owarong po ido koyuwan matoi mongingolig nu bansa toko, ko' kiawi' bansa toko oraag,” koo. 51 Sobana yo tinangar niyo iiri okon ko ungkiat so pikiran niyo, nga pagka iyo yo su Imam Maayo nu toun iiri, tinaakan iyo nu Kinoringan nu pongoilaan nu si Yisus-o su matoi suat so lobuw Yaudi. 52 Om okon ko so lobuw Yaudi ya su kopotoyan Niyo, nga popuido po nu ongo lobuw songapan nu Kinoringan nokoias nu pinolakan. 53 Kiat-o nu runat iiri, tumimpuuno sono muupakat ongo wowaidon nu lobuw Yaudi momatoi so si Yisus. 54 Pagka soko iri, dai yo sono moingin si Yisus mintolang so ongo lobuw Yaudi. Mulaiwo yo Iyo kiat so Yudia om miano yo so bandar Ipraim orani so padang pantai. Molako yo Iyo om mompomaid Niyo ri dii. 55 Iya oono oduruk-o Rami-Rami Paska nu lobuw Yaudi. Osuang-o lobuw ungkiat so ongo kampung minian so Yirusalim mongowaid nu oturan nu odu aki nosiro, musingugas nu dai po ologa' rami-rami maayo oono. 56 Minodium sono nosiro so si Yisus, om noimpug-o po nosiro so Waloi Maayo nu Kinoringan-i, mududuato yo nosiro nu, “Onu ka pikiran muyu? Koian-a ka Iyo so rami-rami tu?” koo. 57 Minutangar nosiro soko iri so' nokoputangar-o wowaidon nu imam om lobuw Parisi ri nu, isai-isai kosiou so si Yisus intawa koilo nu pinolakan Niyo, subai niabar su' aakom Iyo.
1 Koonoman po om ologa' yo Rami-Rami Paska, miano yo si Yisus so Bitania, so kampung ni Lajarus iri linuli'an Niyo ri. 2 Pookano yo nosiro si Yisus. Si Marta minomolak om si Lajarus minongurung mongokan. 3 Lumogaa yo si Maria minongowit sompusung nu inosak lanung ado gawul sobana ko otaas. Tuadi yo niyo so akod ni Yisus om piido yo nu obuk niyo ri. Nolongkop rinuang nu waloi-i nu awau nu inosak lanung-i. 4 Nga mutongaro yo ido mompomaid ni Yisus, ingoranan so si Yudas Iskariut, iri minongoraai-a sono so si Yisus nu, 5 “Nokuro ka su dai niwoli ya inosak lanung oono orogo tolu naatus siin pirok, om nitaak siin-o so lobuw omiskin?” koo. 6 Minutangar si Yudas soko iri okon-a ko bana nu oluluudan nu lobuw omiskin, nga iyo yo po moonakou. Iyo yo su pootou' nu ombubut poongianan nosiro nu siin, om obulit-o iyo monakou nu siin so ombubut iiri. 7 Nga mutongaro yo si Yisus nu, “Posimaidan-a woinoi oono! Waalon niyo ono suat so runat polobongan so Aku. 8 Dadan-a mido-ido so kou ong lobuw omiskin, nga Aku dai ya,” koo si Yisus. 9 Osuang lobuw Yaudi nokorongou nu dii si Yisus so Bitania, indadi miano yo nosiro dii. Minian nosiro dii okon-a ko toroido nu mokisosambat so si Yisus, nga mokisisiou-a so si Lajarus, iri linuli'an Niyo ri. 10 Iri yo ko' minuupakat wowaidon nu imam-i nu potoyon-a pudi si Lajarus, 11 so' osuang lobuw Yaudi minonulak so nosiro om nopoimaid sono so si Yisus. 12 Susuab-i, norongou nu lobuw minian murami-rami nu Paska ri nu manou-panou-o si Yisus lumoga' so Yirusalim. 13 Indadi monotaso yo nosiro nu raan nu palma om owito yo sumamung so Iyo maid nu gumonsok nu, “Royowon Kinoringan! Om royowon lobuw iitu, iri sinuu' nu TUHAN Kinoringan. Borokatan-o nu Kinoringan Raja nu lobuw Yaudi no!” koo. 14 Iya oono, ginumandar si Yisus so uyog nu koladai. Indadi, notuman-o sono tinangar so Buuk nu Kinoringan nu, 15 “Oo su lobuw nu bandar Siun, ikod kou kilaa'! Siowi raja mu no lumoga', ginumandar so uyog nu koladai!” koo ri. 16 Iya iiri dai po noilaan mai ong onu orati nu iri. Nga nosalib-o po Iyo om noluli'an koimbagu, noondoman mai nai' nu, onu yo po winaal nu lobuw so Iyo iiri, nokosurat-o so Buuk nu Kinoringan. 17 Ongo lobuw nokosiou nu pinomaawan ni Yisus so si Lajarus polabus kiat so lobong-i, om minongoluli' so iyo ri, nosiro yo su nopotuturan nu pinuwaal Niyo ri. 18 Iri yo ko' sinumamung lobuw suang-i so Iyo, so' norongou-o nosiro nu Iyo yo su minomaal nu koiran-iran iiri. 19 Mutotongar-tongaro yo sono lobuw Parisi ri nu, “Siowi toko yo bo, kiawi' lobuw, nga maid so Iyo. D'ado yo sono koompusan nu kiawi' winaal toko,” koo. 20 Tinu-tinu lobuw okon ko Yaudi nokowaid so ongo lobuw minian so Yirusalim mongusaa' nu Rami-Rami Paska iiri. 21 Lumogaa yo sono nosiro dii si Pilipus om mutongaro yo nu, “Oo tuan, mokisosambat kai so si Yisus,” koo. (Si Pilipus-o po lobuw Baitsaida so Galilia.) 22 Miano yo si Pilipus pokoilo so si Andrias nu iri, om mukuupo yo nosiro mian paabar so si Yisus. 23 Mutongaro yo si Yisus so nosiro nu, “Nologa' yo pongobontugan so Aku, Anak nu Riniba. 24 Bana ya tongaron Ku so kou iitu nu, bang dai kopulo po somparang paroi-o, kakal-a sompoparong, nga bang kopulo yo, sumuang-o sono. 25 Isai osokakan momikir suat so kowiawan niyo so wonuo tu, oliongan nai' nu kowiawan, nga isai dai osokakan momikir nu kowiawan so wonuo tu, kikowiawan iyo musingkolaid. 26 Isai mugogoma'on suat so Aku, subai maid so Aku, su' siombo polakan ku no, nai ya polak niyo. Om isai mugogoma'on suat so Aku, orumaton iyo ni Amo Ku,” koo si Yisus. 27 Mutongaro yo si Yisus nu, “Kosiono umagut inawo Ku no. Onu ka otoop tongaron Ku? Otoop Aku ka mutangar nu, ‘Oo Amo, polaiwo Aku yo kiat so kosonsora'an Ku oono,’ k'Aku? Nga dai otoop mutangar Aku nu ono, so' ono yo su tomod Ku lumoga', mongirasa nu kosonsora'an oono. 28 Oo Amo, pointolango yo kuasa Mu,” koo si Yisus. Nokorongou-o sono Iyo nu bongut kiat so surga nu, “Nokointolang Ku yo, om pointolangon Ku po koimbagu,” koo. 29 Osuang lobuw dii nokorongou nu bongut iiri. Mutongaro yo nosiro nu, “Ono yo po korud,” koo. Nga kuwai ya minutangar nu, “Okon-a ono ko korud. Susuu'on ono nu Kinoringan mokimutangar-tangar so Iyo!” koo. 30 Mutongaro yo si Yisus so nosiro nu, “Okon-a ko Aku su porongowon nu tangar iiri, nga kou yo su porongowon. 31 Ono sono tu yo pongukuman nu wonuo tu. Kosiono tu yo ponusuban nu Wowaidon nu Moinat, iri mogkuasa nu wonuo tu. 32 Nga suat so Aku, bang kosalib Aku yo, ingolan Ku kiawi' lobuw su' poimaid so Aku,” koo. 33 Minutangar Iyo soko iri pokoilo nu poomatoi Niyo. 34 Mutongaro yo lobuw suang-i so Iyo nu, “Nokosurat-o so buuk nu Ukum mai nu, Raja Nijanji nu Kinoringan oono dai matoi musingkolaid. Nokuro su tongaron Mu nu subai kosalib Anak nu Riniba? Isai ka Anak nu Riniba oono?” koo nosiro. 35 Sumombuto yo si Yisus nu, “Aku yo su onawau, om sontagal po onawau oono nai-nai so kou. Sunduri muyu yo gogoma'on muyu no nu laid po nai so kou onawau-o, su' dai kou kopanou so kotuongan. Lobuw mompanou so otuong, dai oilaan sunduran niyo no. 36 Poimaid kou yo nu onawau oono nu laid po nai so kou no, su' musiliw kou nu lobuw miau so onawau,” koo. Notangar po Niyo iri, mulaiwo yo Iyo om dai yo sono minokisiou so nosiro. 37 Pudi pona osuang-o nowaal ni Yisus nu koiran-iran nosiou nosiro, dai ya poimaid nosiro so Iyo, 38 tayon ong otuman tinangar ni Yisaya, poo'abar nu Kinoringan gulu ri nu, “Oo Tuhan, d'ado lobuw poimaid nu tuturan mai no. D'ado lobuw kosiou nu kobontugan Mu,” koo ri. 39 Dai nosiro poimaid, so' kitangar Kinoringan nilombus ni Yisaya nu, 40 “Binolou Ku nosiro, su' dai nosiro kosiou, om pinokosog Ku inawo nosiro, su' dai nosiro koorati. Om dai nosiro mululi' tuui so Aku, su' poli'an Ku nosiro,” koo ri. 41 Tinangar ni Yisaya soko iri so' nosiou-o niyo kobontugan ni Yisus, om si Yisus-o su kinuan niyo. 42 Soko iri pona, osuang-a lobuw om pudi wowaidon nu Yaudi nopoimaid so si Yisus. Nga dai kooku' nosiro pointolang so' lumaa' nosiro nu dai poosuwon nu lobuw Parisi so waloi sosombooyangan. 43 Mokiroyowon po nosiro so lobuw ko' so Kinoringan. 44 Lumuapo yo si Yisus mutangar nu, “Isai poimaid so Aku, okon ko Aku ya su koimaidan niyo, nga poimaid po nu minonuu' so Aku no. 45 Om isai kosiou so Aku, kosiou-a nu minonuu' so Aku no. 46 Linumoga' Aku so wonuo tu soko onawau, su' isai poimaid so Aku no dai kopolak so kotuongan. 47 Isai korongou nu pontudukan Ku no nga dai poimaid, okon-a ko Aku su mongukum so iyo. Okon ko monginsaad nu lobuw tomod Ku lumoga' so wonuo tu, sondiang ko' monapul. 48 Isai dai monorima' so Aku om dai mongimaid nu totongaron Ku, ukumon ong wagu. Totongaron Ku no yo, pongukum Ku so iyo so pongoowi'an nu wonuo tu. 49 Dai Aku ya mutotongaron mongowaid nu koinginan Ku kondiri, nga si Amo yo, ono minonuu' so Aku lumoga' no su poputangar so Aku nu onu yo po opatut niabar Ku. 50 Om oilaan Ku yo nu kiawi' nisuu' Niyo koponaak nu kowiawan musingkolaid. Ono yo ko' ombo yo po nikodau ni Amo so Aku no, ono yo su nituturan Ku so kou,” koo si Yisus.
1 Sondunat po om ologa' yo Rami-Rami Paska. Noilaan-o ni Yisus nu dai yo olaid mulaiw Iyo kiat so wonuo tu om mululi' dii si Amo Niyo. Osamod Iyo nu lobuw songapan Niyo so wonuo tu om sumundur-a Iyo monamod so nosiro sampai pongoowi'an. 2 Laid ni Yisus om mompomaid Niyo ri mongokan umpak nu awi, binolinsuu' yo sono si Yudas anak ni Simun Iskariut nu Wowaidon nu Moinat, mongindoraai so si Yisus. 3 Noilaan-a ni Yisus nu nikomouli' yo ni Amo Niyo Kinoringan kiawi' pogkuosaan so Iyo, om noilaan-o Niyo nu ungkiat-a Iyo so Kinoringan om muli' ya Iyo so Kinoringan. 4 Mundiio yo Iyo om luuso yo sabung Niyo ri, om mutongkoso yo nu dimpou. 5 Noopod iri, monunguwo yo Iyo nu sungoi so sosanggan, ugasi yo Niyo akod nu mompomaid Niyo ri, om piido yo nu dimpou tinangkos Niyo ri. 6 Nologa' yo po Niyo si Simun Pitrus, mutongaro yo si Pitrus nu, “Oo Tuhan, Ikau nai' su mongugas nu akod ku tu?” koo. 7 Sumombuto yo si Yisus nu, “Itu yo po waalon Ku iitu no, dai mu po oorotian nu ono sono tu, nga oorotian mu ya ong wagu,” koo. 8 Mutongaro po si Pitrus nu, “Oo Tuhan, kodi yo ugasi akod ku no,” koo. Nga sumombuto yo si Yisus nu, “Bang dai Ku ugasan akod mu no, okon-o ko mompomaid Ku ikau,” koo. 9 Mutongaro yo si Pitrus nu, “Bang soko ono, okon ko akod ku no ya su ugasan Mu, ono pona longon om ulu ku no,” koo. 10 Sumombuto yo si Yisus nu, “Isai nokopodiu' yo, olinog-o koyuwan niyo no. Dai muru' ugasan po kiawi' koyuwan-o, sondiang ko akod-o po. Kou iitu olinog-o, nga ido po dai olinog,” koo. 11 (Noilaan-o ni Yisus ong isai so nosiro su mongindoraai so Iyo. Iri yo ko' tinangar Niyo nu, “Kou iitu olinog-o, nga ido po dai olinog,” koo.) 12 Nougasan-o po ni Yisus akod nosiro ri, musobungo yo Iyo koimbagu om mogomo yo. Mutongaro yo Iyo so nosiro nu, “Oorotian muyu ya ka ginama' Ku so kou sisuna ri? 13 Paawon muyu Aku nu guru om Tuhan om bana ya ono, so' Aku yo su guru om Tuhan. 14 Pagka Aku yo su guru om Tuhan muyu minongugas-o nu akod muyu no, kou nga opatut-a musimbaba' soko Aku. 15 Ono yo ko' winaal Ku ono tayon Ku ong kou nga momaal-a nu ono. 16 Bana ya tongaron Ku so kou iitu nu, uripon-o dai kaalib nu tuan-o. Om soko ono ya lobuw suu'on-o, dai ya kaalib nu lobuw minonuu' no. 17 Bang oorotian muyu yo ono kiawi', osanang kou yo ong waalon muyu ono. 18 Okon-a ko kou kiawi' kosuatan nu tongaron Ku oono, so' oilaan Ku isai om isai su pili'on Ku. Nga onu koo pona, tumanon-a iri nokosurat so buuk nu Kinoringan-i nu, ‘Lobuw minurung so Aku mongokan-o, iyo yo su mongoraai so Aku,’ koo ri. 19 Tongaron Ku laid ono so kou nu dai po otuman-o, su' bang otuman-o ono, poimaid kou sono nu Aku yo iri paawon nu Kuwai Aku Dadan. 20 Bana ya tongaron Ku iitu nu, isai monorima' nu lobuw suu'on Ku no, monorima' ya so Aku. Om isai monorima' so Aku, monorima' ya nu Kinoringan, ono minonuu' so Aku no,” koo si Yisus. 21 Notangar-o po ni Yisus soko iri, inumurad sono inawo Niyo ri. Mutongaro yo Iyo nu, “Bana ya tongaron Ku so kou iitu nu ido koyuwan so kou mongimpolanu mongoraai so Aku,” koo. 22 Musisiowo kai yo oiranan, so' dai mai oilaan ong isai kuanon Niyo. 23 Aku, ido mompomaid landu kosomodan ni Yisus, minogom so obi' Niyo ri. 24 Indadi, kopoyo aku yo ni Simun Pitrus popongoduat so si Yisus ong isai kuanon Niyo. 25 Rumonio aku yo dii si Yisus mongoduat nu, “Oo Tuhan! Isai ka kuanon Mu no?” k'aku. 26 Sumombuto yo si Yisus nu, “Lobuw potaakan Ku nu baang-baang niloob Ku so mangkuk-o, iyo yo ono,” koo. Mongolapo yo Iyo nu baang-baang om loobi yo so mangkuk-i om taaki yo Niyo so si Yudas, anak ni Simun Iskariut. 27 Pogalap ni Yudas nu baang-baang iiri, sinorungan-o sono iyo nu Wowaidon nu Moinat. Tongaro yo iyo ni Yisus nu, “Onu-onu ya pokigogoma'an mu, gomaa yo nai' osikap,” koo. 28 D'ado ido so kai nokoorati nu tinangar ni Yisus iiri. 29 Pagka si Yudas-o su pootou' nu ombubut pongianan mai nu siin, ontaman mai ya ong suu'on iyo ni Yisus momoli nu iinokanon suat so rami-rami oono, intawa monaak nu siin so lobuw omiskin. 30 Nosamit-o po ni Yudas baang-baang-i, mongoogowo yo iyo lumabus. Iya oono tumuongo sono. 31 Nokolaiw-o po si Yudas, mutongaro yo si Yisus nu, “Ono sono yo pobontugan so Aku, Anak nu Riniba, om Kinoringan nga pobontugon Ku ya. 32 Om bang tuui yo so Aku su kosiowan nu kobontugan nu Kinoringan, dai yo olaid om Iyo pona pointolang-a nu kobontugan Ku no. 33 Oo su inonakan Ku, sontagal po mido-ido Aku so kou. Dai olaid, diumon muyu pona Aku, dai kou kologa' so ianan Ku no, soko iri tinangar Ku yo so lobuw Yaudi ri. 34 Itu yo su ponuu'an wagu nituduk Ku so kou, ono yo pusosamod kou yo. Pagka sinomodan Ku kou, kou nga subai monamod-a nu lobuw wokon. 35 Bang musosamod kou, oilaan sono nu kiawi' lobuw nu mompomaid Ku kou,” koo si Yisus. 36 Mongoduato yo si Pitrus so si Yisus nu, “Oo Tuhan! Siombo ka ianan Mu?” koo. Sumombuto yo si Yisus nu, “Dai ko po kowaid so tontong ianan Ku no nu ono sono tu, nga kowaid ko ya ong wagu,” koo. 37 Mongoduato po si Pitrus nu, “Oo Tuhan! Nokuro su dai aku kowaid so Ikau nu ono sono tu? Olila' aku ya munung so Ikau matoi,” koo. 38 Sumombuto yo si Yisus so iyo nu, “Bana-bana ka nu olila' ko munung so Aku matoi? Bana ya tongaron Ku iitu no nu dai po mongingkukuuk piu' no, intolu ko yo mongolim nu dai ko kotondu' so Aku,” koo si Yisus.
1 Mutongaro yo si Yisus so nosiro nu, “Ikod kou yo kigagau. Poimaid kou yo so Kinoringan, om poimaid kou po so Aku. 2 So waloi ni Amo Ku osuang polakan. Mian Aku dii monodia' nu polakan muyu. Dai su mutangar soko ono ong okon ko bana. 3 Bang osodia' Ku yo polakan muyu no, mululi' Aku po mongalap so kou, su' koido kou so Aku nu kopolakan, 4 om oilaan muyu lalan mian so pinolakan Ku no,” koo. 5 Mutongaro yo si Tumas so Iyo nu, “Oo Tuhan, dai mai oilaan ong siombo ianan Mu. Onu ka koilo-ilo mai nu lalan mian nai?” koo. 6 Sumombuto yo si Yisus nu, “Aku yo su monundan nu lobuw poimpolanu so Kinoringan, om pointolang nu kodau obana, om impuunon nu kowiawan musingkolaid maid so Kinoringan. D'ado ido kologa' so pinolakan nu Kinoringan ong okon ko maid so Aku. 7 Bang otondu'an muyu Aku, otondu'an muyu ya si Amo. Ono sono tu otondu'an muyu Iyo, om osiou muyu yo,” koo. 8 Mutongaro yo si Pilipus so Iyo nu, “Oo Tuhan, pointolang-o po so kai Amo Mu oono, su' dai kai kopongoduat po so Ikau,” koo. 9 Nga sumombuto yo si Yisus nu, “Oo Pilipus, olaid Aku yo mido-ido so kou om dai muyu po Aku otondu'an. Lobuw nokosiou-o so Aku no, orati nokosiou-o so si Amo. Nokuro su pokitudukon mu po ong isai si Amo? 10 Dai ko bo gaam poimaid nu Aku om si Amo Ku muido-ido ya? Kiawi' nituduk Ku so ko, okon-a ko ungkiat so Aku kondiri, nga si Amo Ku, ono muido-ido so Aku no su nopotuduk nu kiawi' oono. 11 Poimaid kou yo nu Aku om si Amo Ku muido-ido ya. Intawa bang dai kou poimaid nu totongaron Ku oono, nga poimaid kou po so Aku kiat so pinuwaal Ku no. 12 Bana ya tongaron Ku iitu nu isai poimaid so Aku, kopongowaal iyo nu onu yo po nowaal Ku no, om kaalib po nu ono owaal-a niyo, so' Aku yo po muli' dii so Amo Ku. 13 Tumbaidon Ku ya onu-onu indomoon muyu no ong poimaid kou so Aku su' kointolang Ku kobontugan nu Amo Ku. 14 Onu-onu ya indomoon muyu maid nu mongorait so Aku, waalon Ku ya ong poimaid kou so Aku,” koo. 15 Mutongaro po si Yisus nu, “Bang osamod kou so Aku, osipon muyu ya niongosuu' Ku no. 16 Mindamo Aku ya so Amo Ku, su' taakan kou Niyo nu moonabang wokon sondiang ko Aku, ono yo Atod Niyo mido-ido so kou musingkolaid. 17 Lobuw dai po kotondu' nu Kinoringan-o, dai koponorima' so Iyo, so' dai nosiro kosiou intawa kotondu' so Iyo. Nga kou kotondu' yo so Iyo, so' mogol Iyo nai so kou om mido-ido so kou. 18 Dai Ku ya kou niogol soko asi-asi. Mululi' Aku ya tuui so kou. 19 Sontagal po om dai Aku yo osiou nu ongo lobuw dai poimaid, nga osiou muyu ya Aku. Om pagka miau Aku ya koimbagu, kou pona miau-a. 20 Bang ologa' yo ono, oilaan muyu yo sono nu kopuido Aku so si Amo Ku om kopuido kou so Aku. 21 Isai mongkinongou om mongowaid nu niongosuu' Ku no, iyo yo su monamod so Aku. Monamod si Amo nu lobuw monamod so Aku no, om Aku nga monamod so iyo, om mintolang Aku so iyo poorati ong isai Aku,” koo. 22 Mutongaro yo si Yudas (okon ko si Yudas Iskariut) nu, “Oo Tuhan, onu koo gama' Mu mintolang so kai, om dai osiou nu lobuw dai poimaid so Ikau-o?” koo. 23 Sumombuto yo si Yisus nu, “Isai monamod so Aku, iyo yo su mongimaid nu pontudukan Ku, om si Amo Ku nga monamod so iyo. Si Amo om Aku mido so iyo. 24 Lobuw dai monamod so Aku no, dai mongimaid nu pontudukan Ku no. Pontudukan nopurongou muyu iitu, okon-a ko kiat so Aku, nga ungkiat so Amo Ku, ono minonuu' so Aku no. 25 Tongaron Ku itu kiawi' so kou nu mido-ido Aku po so kou no, 26 nga Atod nu Kinoringan, ono moonabang suu'on nu Amo Ku poganti' so Aku no, Iyo yo su montuduk so kou nu onu-onu ya om poondom so kou nu kiawi' tinangar Ku so kou ri. 27 Taakan Ku kou nu kosonangan nu inawo. Kosonangan nu inawo Ku kondiri nitaak Ku so kou. Lobuw dai poimaid, dai kotorima' nu kosonangan nu inawo Ku no. Ikod kou yo kigagau om kilaa'. 28 Nokoputangar Aku so kou nu mungkayas Aku, nga mululi' Aku ya koimbagu tuui so kou. Bang osamod kou so Aku, otoop nu osanang-a inawo muyu no nu mian Aku dii si Amo Ku, so' opangkat po Iyo ko' Aku. 29 Tongaron Ku itu so kou nu ono sono tu nu dai po otuman-o, su' bang otuman-o itu kiawi', poimaid kou sono nu totongaron Ku oono. 30 Dai yo su koputangar nu osuang so kou so' oduruk-o lumoga' Wowaidon nu Moinat, iri mogkuasa nu lobuw dai poimaid. Dai ya iyo kopogkuasa so Aku. 31 Nga subai otuman kiawi' oono tayon ong oilaan nu lobuw dai poimaid nu osamod Aku nu Amo Ku om mongimaid nu kiawi' ponuu'an Niyo. Mulaiw toko yo kiat tuui,” koo si Yisus.
1 Mutongaro po si Yisus nu, “Aku yo su soko puun nu anggur obana, om si Amo Ku yo su soko moongipat nu ono. 2 Tutu'on Niyo raan dai mubua' no, om intolotadan Niyo raan mubua' no su' osampuw po bua'. 3 Soko ono kou ya, ono nougasan-o nu tinongaran nu Kinoringan, nituturan Ku so kou no. 4 Mido kou yo so Aku om Aku nga mido so kou. Raan nu anggur-o, bang dai ya kotandon so puun-o, dai kopubua'. Soko ono ya pudi kou. Bang dai kou koido so Aku, dai kou ya kopomaal nu onu ya kikosudaan. 5 Aku yo soko puun nu anggur, om kou yo su soko raan. Isai tumotog mido so Aku, lobuw oono osuang kogoyaan nu otoop, soko raan osampuw bua', so' bang d'ado Aku, dai kou kopomaal nu onu-onu ya kikosudaan. 6 Om isai dai mido so Aku, insaadan iyo, soko raan tutu'on-i om lumonot. Impugon sono raan oono om susulan. 7 Nga bang mido kou so Aku, om imaidon muyu ongo pontudukan Ku, onu-onu ya indomoon muyu no tumbaidon-a nu Kinoringan. 8 Bang mugogoma'on kou nu owarong, soko raan mubua' nu osampuw, bontugon sono si Amo Ku, om bana-bana nu mompomaid Ku kou. 9 Monamod Aku so kou soko Amo Ku su monamod-a so Aku. Totog kou yo miau soko lobuw sinomodan Ku. 10 Bang mongimaid kou nu ponuu'an Ku no, otatap Aku ya monamod so kou. Soko Aku su mongimaid-a nu ponuu'an ni Amo Ku om otatap-a Iyo monamod so Aku. 11 Pokoilo Aku nu kiawi' iitu so kou, tayon Ku ong kowaid kou so Aku sumudu'an om orunsum koosudu' muyu. 12 Itu yo su ponuu'an Ku so kou, ono yo ponamod kou yo nu inong lobuw, soko Aku nga monamod so kou. 13 Lobuw-o po sobana ko osamod nu kouna'an niyo, olila' matoi suat so nosiro. D'ado kaalib nu samod soko poonamod oono. 14 Kou yo su una'-una' Ku ong waalon muyu kiawi' nisuu' Ku no. 15 Dai Ku yo kou paawon nu uripon, so' uripon-o dai koilo nu onu-onu waalon nu tuan niyo no. Paawon Ku yo sono kou nu una'-una' Ku, so' onu yo po norongou Ku so si Amo Ku, nituturan Ku yo so kou. 16 Okon-a ko kou su minomili' so Aku, nga Aku yo su minomili' so kou, om monuu' so kou mugogoma'on nu owarong, om gogoma'on muyu oono musisinundur. Om soko ono po, taakan kou ni Amo Ku nu onu-onu ya indomoon muyu, iri inindamo muyu so' poimaid kou so Aku. 17 Itu yo ponuu'an Ku so kou, ono yo pusosamod kou yo,” koo si Yisus. 18 Mutongaro po si Yisus nu, “Bang bisigon kou nu ongo lobuw dai poimaid, ondomo muyu yo nu Aku gulu yo binisig nosiro. 19 Bang mokimuuna'-una' kou so nosiro, somodan kou ya nosiro. Nga pagka dai kou mokimuuna'-una' so nosiro, bisigon kou sono nosiro so' pinili' Ku yo kou kiat nai so nosiro. 20 Ondomo muyu yo tinangar Ku so kou ri nu, d'ado ya uripon kaalib nu tuan niyo no. Bang raai-raayon Aku yo nosiro, kou nga raai-raayon-a. Bang maid nosiro nu niongotuduk Ku no, niongotuduk muyu no nga waidon-a nosiro. 21 Pagka mompomaid Ku kou, waalon nosiro kiawi' oono so kou, so' dai nosiro otondu'an Iyo, ono minonuu' so Aku no. 22 D'ado ya koraayan nosiro ong dai Aku nai' nokologa' potuturan nu Abar Owarong so nosiro. Nga pagka nokologa' Aku yo potuturan so nosiro, d'ado yo sono pounayan nosiro dumaawa nu nosiro yo po d'ado ya koraayan. 23 Isai mongobisig so Aku, mongobisig-a so si Amo Ku. 24 Bang dai nai' nokosiou nosiro nu koiran-iran pinuwaal Ku ri, nu dai po insan owaal nu lobuw, d'ado ya koraayan nosiro. Nga kosiono nokosiou-o nosiro nu koiran-iran oono, om obisig-a nosiro so Aku om si Amo Ku. 25 Nga subai ourug ono, tayon ong otuman iri nokosurat so buuk nu Ukum nosiro ri nu, ‘Bisigon Aku nosiro d'ado pounayan mongobisig,’ koo ri. 26 Suu'on Ku pologa' Moonabang kiat so Kinoringan. Iyo yo Atod pointolang nu obana ya Kinoringan. Bang kologa' yo Iyo, pointolang sono Iyo ong isai Aku. 27 Om kou nga subai pointolang-a ong isai Aku so' kou yo su mido-ido so Aku kiat nu timpuun,” koo si Yisus.
1 Mutongaro po si Yisus nu, “Nikoilo Ku ono kiawi' so kou su' dai kou otopodan, om mintoron sono poimaid. 2 Susubon kou ono kiat so waloi sosombooyangan ong wagu. Om ologa' ya ong wagu, lobuw momatoi so kou oono monokod nu soko ono yo gama' poinsanang nu inawo nu Kinoringan. 3 Waalon nosiro soko ono so kou so' dai po nosiro kotondu' so si Amo Ku om Aku. 4 Nga nituturan Ku ono so kou nu ono sono tu, su' bang ologa' yo ono, oondoman muyu nu nokokoilo Ku yo ono so kou,” koo. Mutongaro po si Yisus nu, “Dai Ku po ono nituturan so kou kiat nu timpuun-i, so' mido-ido Aku po so kou. 5 Nga kosiono, oduruk Aku yo mululi' dii si Amo Ku, iri minonuu' so Aku ri, nga d'ado ya so kou mongoduat ong siombo ianan Ku. 6 Kosiono pagka notuturan Ku yo ono so kou, umurad sono inawo muyu no. 7 Nga ondomo muyu yo nu owarong po ong koian Aku, so' bang dai Aku mian, dai lumoga' nai so kou moonabang oono, ono yo Atod nu Kinoringan. Nga bang koian Aku yo, pologa'on Ku sono Iyo tuui so kou. 8 Bang kologa' Iyo, Iyo yo su potarang so kiawi' lobuw dai po poimaid suat so koraayan, suat so onu ya obana, om suat so pongukuman nu Kinoringan ong wagu. 9 Potarang Iyo nu kikoraayan nosiro so' dai poimaid nosiro so Aku. 10 Potarang Iyo nu obana Aku, so' mululi' Aku dii si Amo Ku om dai muyu yo sono Aku osiou. 11 Om potarang-a Iyo suat so pongukuman nu Kinoringan so kiawi' lobuw, so' noukuman-o Niyo Wowaidon nu Moinat, iri wowaidon nu kiawi' lobuw dai poimaid. 12 Osuang po otoop tongaron Ku so kou, nga dai muyu po oorotian nu ono nu ono sono tu. 13 Nga bang kologa' yo Atod nu Kinoringan-o, pointolang Iyo so kou nu onu ya obana. Dai Iyo mutangar nu onu-onu ya kiat so pomikiran Niyo kondiri, nga monuturan Iyo nu onu yo po norongou Niyo kiat so si Amo Ku. Om potarang po Iyo onu ourug ong wagu. 14 Pobontugon Aku Niyo, so' kiawi' niabar Niyo so kou no norongou Niyo kiat so Aku. 15 Kiawi' songapan ni Amo Ku, songapan Ku ya. Ono yo ko' tongaron Ku nu, onu yo po nituturan nu Atod nu Kinoringan so kou, norongou-o Niyo kiat so Aku,” koo si Yisus. 16 Mutongaro po si Yisus nu, “Sontagal po om dai muyu yo Aku osambat, nga sontagal-a om osambat muyu ya Aku,” koo. 17 Mududuato yo tinu-tinu mompomaid Niyo ri nu, “Onu gaam orati nu tinangar Niyo nu, ‘Sontagal po om dai muyu yo Aku osambat, nga sontagal-a om osambat muyu ya Aku’? Om onu gaam orati nu tinangar Niyo nu, ‘Mian Aku dii si Amo Ku’? 18 Onu orati nu ‘sontagal po’ oono? Dai oorotian toko tongaron Niyo no,” koo nosiro. 19 Noilaan-a ni Yisus nu mokipopongoduat nosiro so Iyo. Indadi mutongaro yo Iyo nu, “Ono yo bo gaam su pinududuatan muyu ong onu orati nu tinangar Ku nu, ‘Sontagal po om dai muyu yo Aku osambat, nga sontagal-a om osambat muyu ya Aku,’ k'Aku ri. 20 Ondomo muyu yo nu sumudu'an ong alod-alod Ku, nga ong kou tumangi' monginupusan. Oopod ono, koupusan muyu no ogonti'an-a nu kosudu'an. 21 Woinoi nu oduruk-o muanak, osonsara' iyo, nga bang kolangus-o lolaing-o, olupaan-o sono niyo kosonsora'an niyo no, so' osudu'an-o nu nokolangus-o lolaing-o. 22 Soko ono ya pudi kou. Kosiono umagut inawo muyu no, nga kosambat Aku po so kou koimbagu, om iya oono sobana ko osudu'an kou, om ado sono onu-onu kopongaagut so kou. 23 Bang kologa' Aku yo koimbagu, dai kou yo sono mongoduat nu onu-onu s'Aku. Ondomo muyu yo, onu-onu ya indomoon muyu so si Amo Ku, taakan kou ya Niyo. 24 Dai kou po insan mindamo so si Amo Ku nu onu-onu ya maid nu mongorait s'Aku. Indamo kou yo su' taakan kou, om sobana ko osudu'an kou sono,” koo. 25 Mutongaro po si Yisus nu, “Montuduk Aku so kou maid nu salig-salig, nga ong wagu, dai Aku yo sono musalig-salig, sondiang ko bontolon Ku montuduk so kou suat so si Amo Ku. 26 Iya oono, pagka poimaid kou so Aku, mindamo kou so si Amo Ku, om dai Aku yo sono mindamo so Iyo suat so kou, 27 so' Iyo yo kondiri monamod so kou. Pagka monamod kou so Aku, monamod-a Iyo so kou, om nopoimaid kou nu ungkiat Aku so Kinoringan. 28 Bana ya nu ungkiat Aku dii si Amo Ku, om nokologa' Aku so wonuo tu. Nga kosiono mulaiw Aku yo sono kiat so wonuo tu, om mululi' dii so Iyo,” koo. 29 Mutongaro yo mompomaid Niyo ri nu, “Kosiono binontol Mu yo sono mutangar. Dai Ko yo musalig-salig. 30 Noilaan mai yo sono nu onu-onu nga noorotian Mu, om dai muru' mongoduat po lobuw nu onu-onu so Ikau. Pagka soko ono, poimaid kai yo nu ungkiat Ko so Kinoringan,” koo. 31 Mutongaro po si Yisus so nosiro nu, “Bana-bana ka nu poimaid kou yo sono nu ono sono tu? 32 Ondomo muyu yo, ologa' ya ong wagu poputotondiangon kou. Boromosingan kou ya muli', om Aku po su oogol, nga kiuna' Aku ya so' maid-waid-a si Amo Ku so Aku. 33 Tongaron Ku kiawi' iitu so kou tayon Ku ong koirasa kou nu kosonangan so' mido-ido kou so Aku. Sonsora'on kou nu alod-alod Ku so wonuo tu, nga ikod kou yo kilaa' so' nodoog Ku yo nosiro,” koo si Yisus.
1 Nopupus-o po si Yisus mutangar soko iri, tumingaa'o yo Iyo so langit om mutongaro yo nu, “Oo Amo so surga, kosiono nologa' yo pongorumatan s'Aku. Orumato Aku yo, Anak Mu tu su' Ikau nga orumaton-a. 2 Pinopogkuasa Mu yo Aku su' koponaak Aku nu kowiawan musingkolaid so lobuw nitaak Mu so Aku no. 3 Itu yo su koolap-olapan nu lobuw nu kowiawan musingkolaid, ono yo subai otondu'an Ko nosiro, ono Kinoringan obana. Om subai otondu'an Aku ya nosiro, ono Anak Mu si Yisus Kristus sinuu' Mu no. 4 Noorumat Ku yo Ikau so wonuo tu so' noopod Ku yo momaal kiawi' nisuu' Mu so Aku no. 5 Oo Amo Ku so surga, orumato Aku yo nu ono sono tu so tiningkuangon Mu, soko pinongorumatan Mu s'Aku nu dai po nourug wonuo tu ri,” koo. 6 Sumunduro po si Yisus mogdu'a nu, “Niintolang Ku yo so lobuw nitaak Mu so Aku no ong isai Ko. Nosiro yo po songapan Mu om nitaak Mu yo nosiro s'Aku, om inimaid-o nosiro tinongaran Mu no. 7 Ono sono tu noilaan-o nosiro nu kiawi' nitaak Mu so Aku no, ungkiat-a so Ikau. 8 Nokotuturan Ku yo so nosiro tangar nikodau Mu s'Aku ri, om nopoimaid-a nosiro. Noilaan-o nosiro nu ungkiat Aku nai so Ikau, om Ikau-o su minonuu' so Aku. 9 Mogdu'a Aku suat so nosiro. Dai Aku ya mogdu'a suat so lobuw dai poimaid so Ikau, sondiang ko suat so lobuw nitaak Mu s'Aku no, so' nosiro yo su songapan Mu. 10 Kiawi' nosongapan Ku no nga songapan Mu ya, om kiawi' nosongapan Mu no, songapan Ku ya. Kogoyaan nosiro no yo su pointolang nu kobontugan Ku no. 11 Kosiono mian Aku nai so Ikau. Okon-o sono ko tuui Aku so wonuo tu, nga nosiro kakal po so wonuo tu. Oo Amo Ku so surga, ingoligi yo nosiro nu kuasa Mu, iri kuasa nitaak Mu s'Aku, su' kopuido nosiro soko Kito su nokopuido. 12 Laid nu mido-ido Aku po so nosiro, iningoligan Ku nosiro nu kuasa Mu, ono nitaak Mu s'Aku no. Iningoligan Ku nosiro sampai d'ado ido so nosiro mulaiw kiat so koimaidan, sondiang ko ido koyuwan notantu yo nu mian so noraka, monuman nu nokosurat so Buuk Mu no. 13 Oo Amo Ku, kosiono mian Aku nai so Ikau. Tongaron Ku kiawi' iitu no nu tuui-tuui Aku po so wonuo tu, tayon Ku ong sobana ko sumudu'an nosiro soko koosudu' Ku no. 14 Inobaran Ku yo nosiro nu tinongaran Mu no, om bisigon sono nosiro nu lobuw dai poimaid so Ikau, so' dai yo nokoido pogokalan nosiro nu pogokalan nu lobuw dai poimaid oono, soko Aku ya nu dai nokoido nu pogokalan nosiro no. 15 Okon ko mindamo Aku nu tayon ong polobuson Mu nosiro ungkiat so wonuo tu, nga nipoingolig Ku nosiro su' dai oinsaadan nosiro nu Wowaidon nu Moinat. 16 Pagka dai ya kopuido pogokalan Ku no nu pogokalan nu lobuw dai poimaid oono, mompomaid Ku no, nga dai ya kopuido nu pogokalan nosiro no. 17 Siliwo yo nosiro nu songapan Mu kiat so pontudukan Mu obana no. Tinongaran Mu no yo su obana. 18 Suu'on Ku nosiro so pilolongkop nu wonuo tu, soko poonuu' Mu so Aku lumoga' so wonuo tu. 19 Nikomouli' Ku yo kowiawan Ku tu so Ikau suat so koworongan nosiro, tayon Ku ong osongapan Mu nosiro,” koo. 20 Sumunduro po si Yisus mogdu'a nu, “Oo Amo Ku so surga, okon ko suat-a so nosiro mogdu'a Aku, nga suat po so ongo lobuw poimaid nu tuturan nosiro suat so Aku no so sunduron tu. 21 Mindamo Aku so Ikau su' kopuido nosiro om songido nu pomikiran om tomodon, soko Kito su songido ya. Owarong ong songido nosiro nu pomikiran, su' poimaid ongo lobuw so wonuo tu nu Ikau-o minonuu' s'Aku. 22 Nitaak Ku yo so nosiro koorumatan nitaak Mu s'Aku ri, tayon Ku ong songido pomikiran nosiro, soko Kito su songido ya. 23 Aku om nosiro nokopuido. Ikau om Aku nga nokopuido, su' bana-bana nu songido pomikiran nosiro. Kiat nu ono, oilaan sono nu lobuw nu Ikau-o su minonuu' so Aku, om oilaan po nosiro nu osamod Ko so nosiro soko poonamod Mu s'Aku. 24 Oo Amo, moingin Aku ong kiawi' lobuw nitaak Mu so Aku no koido so Aku nu kopolakan ong wagu, su' kosiou nosiro nu koorumatan nitaak Mu so Aku no, so' d'ado po wonuo tu ri, sinomodan Mu yo Aku. 25 Oo Amo obana, ongo lobuw dai poimaid so wonuo tu dai kotondu' so Ikau, nga kotondu' Aku ya so Ikau, om oilaan nu lobuw nitaak Mu so Aku no nu Ikau-o su minonuu' s'Aku. 26 Pinokoilo Ku yo nosiro ong isai Ko, om sumundur Aku ya momaal nu ono, tayon Ku ong musosamod nosiro, soko Ikau su monamod-a s'Aku om kopuido Aku so nosiro,” koo si Yisus.
1 Nokopogdu'a yo po si Yisus soko iri, muripawo kai yo so sungoi-sungoi nu Kidrun, om mintorono kai yo so tonoman dii. 2 Tontong iiri noilaan-o laid ni Yudas, iri mompomaid mongimpolanu mongoraai so si Yisus, so' obulit kai yo muimpug dii. 3 Nadi, lumogaa yo si Yudas maid nu somposukan soujar om tinu-tinu moongipat nu Waloi Maayo nu Kinoringan, iri sinuu' nu ongo wowaidon nu imam om lobuw Parisi ri. Naanid nosiro nu sindata om togu'. 4 Oilaan-o ni Yisus onu ourug so Iyo, indadi mobio yo sono Iyo so ongo lobuw-i om mutongaro yo nu, “Isai ka diumon muyu?” koo. 5 Sumombuto yo nosiro nu, “Modium kai so si Yisus, iri lobuw Najarit-i,” koo. Sumombuto yo Iyo nu, “Aku yo diumon muyu no,” koo. Mundii-dii ya si Yudas, mongoraai iiri so obi' nosiro ri. 6 Notangar-o po ni Yisus so nosiro nu, “Aku yo diumon muyu no,” koo, nokosunsurut sono nosiro om nokolunggang. 7 Mongoduato po si Yisus so nosiro nu, “Isai ka diumon muyu?” koo. Sumombuto yo nosiro nu, “Modium kai so si Yisus, lobuw Najarit-i,” koo. 8 Mutongaro yo Iyo nu, “Inobaran Ku yo iri kou nu Aku yo diumon muyu no. Bang Aku yo su diumon muyu, posimaidi muyu ya ongo lobuw maid-waid s'Aku no,” koo. 9 (Minutangar Iyo soko iri, tayon ong otuman tinangar Niyo nu gulu ri nu, “Oo Amo, ado ido oliong nu ongo lobuw nitaak Mu so Aku no,” koo ri.) 10 Pagka kibadung si Simun Pitrus, wintoso yo niyo uripon nu Imam Maayo ri, noutas tolingo wanan-i. Ngaran nu uripon iiri, si Malkus. 11 Tongaro yo ni Yisus si Pitrus nu, “Sorungi badung mu no. Dai otoop ong dai koirasa Aku nu kosonsora'an notantu yo ni Amo s'Aku no,” koo. 12 Okomo yo si Yisus nu ongo soujar nu Ruum, wowaidon nosiro ri, om moongipat bansa Yaudi, om kogosi yo nu rantai. 13 Owito yo Iyo nosiro mian dii si Anas. Si Anas-o po iwan ni Kayapas, Imam Maayo nu toun iiri. 14 Si Kayapas-o su minongobiat nu lobuw Yaudi ri nu, owarong po ido koyuwan matoi mongingolig nu bansa nosiro, ko' kiawi' bansa Yaudi oraag. 15 Maido yo so si Yisus si Simun Pitrus om ido po mompomaid Niyo ri. Pagka otondu'an nu Imam Maayo ri ido mompomaid ni Yisus oono, maido yo iyo so si Yisus masuw so natad nu waloi nu Imam Maayo ri. 16 Si Pitrus minongindad-a so dilabus-i. Lumobuso yo sono ido mompomaid iiri mokimutangar-tangar nu woinoi moongipat nu pagar-i, om owito yo niyo si Pitrus masuw. 17 Nga sombato yo si Pitrus nu woinoi minongipat nu pagar iiri mongoduat nu, “Ikau po gaam mompomaid-a nu lobuw oono?” koo. Sumombuto yo si Pitrus nu, “Okon,” koo. 18 Iya oono osogit, indadi momurokito yo kouriponan om moongipat-i om mintorango yo nosiro. Mobio yo sono si Pitrus dii so nosiro sumimpor mintarang. 19 Mongoduato yo si Anas, iri baya' Imam Maayo ri, so si Yisus suat nu mompomaid Niyo om pontudukan Niyo ri. 20 Sumombuto yo si Yisus nu, “Laid oono ri, obontol-a poomontuduk Ku so lobuw suang. Dadan Aku montuduk so waloi sosombooyangan om so natad nu Waloi Maayo nu Kinoringan so poomuimpugan nu lobuw Yaudi. Dai ya su insan posusut nu onu-onu ya pontudukan Ku. 21 Indadi, nokuro su Aku duaton mu? Duato ya lobuw nokorongou-o nu niongotuduk Ku ri. Tantu oondoman-a nosiro pinutangar Ku ri,” koo. 22 Notangar-o po ni Yisus soko iri, sompako yo Iyo nu ido moongipat dii ri om mutongaro yo nu, “Opogi ko sobana mutangar soko ono so Imam Maayo,” koo. 23 Sumombuto yo si Yisus nu, “Bang mutangar Aku nu dai osuat, obari ya so lobuw iitu no ong onu tinangar Ku dai osuat oono. Nga bang bana ya pinutangar Ku no, nokuro su sompakon mu Aku?” koo. 24 Pagka soko iri, opiti yo si Yisus ni Anas dii si Kayapas, Imam Maayo nu toun iiri, nga kakal po kikogos longon Niyo. 25 Kakal po mundii-dii si Simun Pitrus so obi' nu apui-i, duato yo sono iyo nu ongo lobuw-i nu, “Ikau bo gaam nga mompomaid-a nu lobuw oono,” koo. Nga mongolimo yo iyo nu, “Okon,” koo. 26 Mutongaro yo ido uripon nu Imam Maayo ri, koronian-a nu lobuw winintos ni Pitrus tolingo ri nu, “Ikau-o bo gaam nosiou ku maid-waid so Iyo so tonoman iiri?” koo. 27 Mongolimo po si Pitrus nu, “Okon,” koo. Notangar-o po niyo iri, mongingkukuuko sono su piu'. 28 Osarap-sarap po, owito yo nosiro si Yisus kiat so waloi ni Kayapas mian so waloi ni Gobonor Pilatus. Nga dai ya minasuw ongo wowaidon nu Yaudi ri, so' mongowaid nu oturan nu ugama nosiro, bang masuw nosiro dii, osaiman nosiro, om dai sono kowasa maid mongokan nu iinokanon nu Rami-Rami Paska. 29 Indadi, lumobuso yo si Pilatus sumamung so nosiro om duato yo niyo nu, “Onu ka kopongobisora'an muyu nu lobuw iitu?” koo. 30 Sumombuto yo nosiro nu, “Dai mai ya owiton Iyo tuui so ikau ong d'ado kosola'an Niyo,” koo. 31 Mutongaro yo si Pilatus nu, “Olapo muyu yo Iyo om ukumo muyu ya mongowaid nu oturan nu ugama muyu,” koo. Nga sumombuto yo nosiro nu, “Mongowaid nu oturan nu Raja Maayo nu Ruum, dai kai kowasa mongukum nu lobuw nu potoyon,” koo. 32 (Iri yo ko' nourug soko iri tayon ong otuman tinangar ni Yisus suat so isai su momatoi so Iyo.) 33 Mosuwo yo si Pilatus so waloi niyo ri om paawo yo niyo si Yisus mongoduat nu, “Ikau-o ka su raja nu lobuw Yaudi?” koo. 34 Sumombuto yo si Yisus nu, “Onu ka duduat mu no, ungkiat so ikau kondiri ko' norongou mu ya so lobuw wokon?” koo. 35 Mutongaro yo si Pilatus nu, “Okon ko lobuw Yaudi ong aku! Lobuw songinong bansa Mu no om ongo wowaidon nu imam-o yo su minongowit so Ikau tuui so aku. Onu ka kosola'an Mu?” koo. 36 Sumombuto yo si Yisus nu, “Pogkuosaan Ku no okon ko suat so wonuo tu. Bang suat so wonuo tu, tantu lumawan mompomaid Ku no dai moingin nu nikomouli' Aku so wowaidon nu Yaudi. Nga pogkuosaan Ku no okon ko suat so wonuo tu,” koo. 37 Duato po Iyo ni Pilatus nu, “Bang soko ono, bana ka nu raja Ko?” koo. Sumombuto yo si Yisus nu, “Ikau-o su minutangar nu Aku yo su raja. Nopuanak Aku om nokologa' so wonuo tu nga ido-ido ya tomod Ku, ono yo pointolang nu onu ya obana. Isai moingin maid so onu ya obana, mongkinongou iyo nu tongaron Ku no,” koo. 38 Mongoduato po si Pilatus so Iyo nu, “Onu ka orati nu obana no?” koo. Lumobuso po si Pilatus om tongaro yo niyo ongo wowaidon nu Yaudi ri nu, “D'ado ya onu-onu noimpa'an ku kosola'an Niyo. 39 Nga mongowaid nu koopotan muyu, ono yo su kododanan, polabus aku nu lobuw ungkiat so jiil iya nu Paska. Moingin kou ka ong nilabus ku pinokoRaja nu lobuw Yaudi iitu no?” koo. 40 Gumonsoko yo nosiro sumambut nu, “Kodi ya lobusi Iyo! Dai kai moingin! Si Barabas-o su lobusi!” koo. (Si Barabas oono moonolod.)
1 Mosuwo yo si Pilatus om monuuo yo nu ongo soujar popongolubak so si Yisus. 2 Minomaal nosiro nu tolungas wakau kiruwi, om sumboli yo nosiro so ulu ni Yisus. Noopod iri, popusobungo yo Iyo nu sabung mongkomiang-miang, 3 om muuli'-uli' nosiro dii si Yisus musingkoorumat-orumat nu, “Mogkuasa yo musingkolaid raja nu lobuw Yaudi!” koo. Noopod iri, sompako yo Iyo nosiro. 4 Lumobuso po si Pilatus om tongaro yo lobuw suang-i nu, “Siowi muyu yo! Polobuson ku Iyo su' oilaan muyu nu d'ado ya noimpa'an ku kosola'an Niyo,” koo. 5 Lumobuso yo sono si Yisus minomakai nu tolungas kiruwi om sabung mongkomiang-miang. Mutongaro yo si Pilatus so nosiro nu, “Siowi muyu yo lobuw oono!” koo. 6 Nosiou-o po si Yisus nu ongo wowaidon nu imam om moongipat-i, gumonsoko yo nosiro nu, “Solibon Iyo! Potoyon Iyo!” koo. Mutongaro yo si Pilatus so nosiro nu, “Olapo muyu yo Iyo, om solibi muyu ya. D'ado ya ong aku noimpa'an kosola'an Niyo,” koo. 7 Sumombuto yo lobuw suang-i nu, “Mongowaid nu oturan nu ugama mai, subai potoyon Iyo so' minutangar Iyo nu Anak Iyo nu Kinoringan,” koo. 8 Norongou-o po ni Pilatus tinangar nosiro iiri, sumundur po iyo lumaa'. 9 Mosuwo yo iyo koimbagu om noowit-o po si Yisus masuw, duato yo niyo nu, “Siombo ka inungkiaton Mu?” koo. Nga dai ya sinumambut si Yisus. 10 Indadi mutongaro po si Pilatus nu, “Dai Ko ka moingin mokimutangar-tangar so aku? Ondomo yo nu kikopogboya'an aku polabus intawa posalib so Ikau,” koo. 11 Sumombuto yo si Yisus nu, “Dai ya kopogbaya' ko so Aku ong okon ko Kinoringan su popogbaya' so ikau. Ungkiat-o nai, lobuw pokomouli' so Aku tuui so ikau-o su maayo po koraayan ko' ikau,” koo. 12 Norongou-o po iri ni Pilatus, moingin po bana iyo polabus so si Yisus. Nga gumonsoko yo ongo lobuw Yaudi ri nu, “Bang nilabus mu Iyo, alod-alod ko sono ni Raja Maayo nu Ruum. Isai musingkoraja-raja, alod-alod iyo ni Raja Maayo,” koo. 13 Norongou-o po iri ni Pilatus, owito yo niyo si Yisus lumabus om mogomo yo so oogoman moongobisara' so tontong ingoranan nu Pontaan Watu (bang so tangar Yaudi ingoranan nu Gabata). 14 Iya iiri, oduruk-o mirotu om runat iiri yo putimos-timosan suat nu Rami-Rami Paska. Tongaro yo ni Pilatus lobuw Yaudi ri nu, “Tudi yo raja muyu tu,” koo. 15 Songgonsok-gonsok sono nosiro nu, “Solibon Iyo! Potoyon Iyo!” koo. Duato yo ni Pilatus nosiro nu, “Patut ka solibon ku Raja muyu tu?” koo. Sumombuto yo ongo wowaidon nu imam-i nu, “Si Raja Maayo ya su raja mai,” koo. 16 Pagka soko iri, komoulii yo ni Pilatus si Yisus so nosiro nu solibon. Olapo yo sono nosiro si Yisus, 17 om owito yo Iyo lumabus kiat so bandar pinoponimban nu salib Niyo, mian so tontong ingoranan nu, “Popolakan nu Doupuk”, bang so tangar nu Yaudi ingoranan Gulguta. 18 Dii yo pinosoliban nosiro so si Yisus. Om kuwai ya duo koyuwan sondiang ko Iyo nisalib so musompodi Niyo ri. 19 Minonuu' si Pilatus pokapit nu surat so kayu pinosoliban so si Yisus soko itu, Itu Yo Si Yisus Kiat So Najarit, Raja Nu Lobuw Yaudi. 20 Osuang-a lobuw Yaudi malib-talib nokobasa' nu surat iiri, so' orani ya so bandar pinosoliban so si Yisus iiri. Surat nikapit iiri sinurat so tangar Yaudi, tangar Ruum, om tangar Yunani. 21 Tongaro yo si Pilatus nu wowaidon nu imam-i nu, “Kodi yo surati nu, ‘Raja nu lobuw Yaudi’, nga surati yo nu, ‘PinokoRaja Iyo nu lobuw Yaudi’, koo yo ya,” koo. 22 Nga sumombuto yo si Pilatus nu, “Onu yo po nokosurat ku no yo, dai yo pindaan,” koo. 23 Nokosalib-o po nu ongo soujar-i si Yisus, olapo yo nosiro pokakas Niyo ri om boogio yo nosiro opat. Olapo po nosiro sabung Niyo olanggau, d'ado wilit-i. 24 Mutotongaro yo nosiro nu, “Kodi toko yo pisio sabung iitu, nga musuus toko ya ong isai kosongapan,” koo. Nourug soko iri tayon ong otuman iri nokosurat so Buuk nu Kinoringan-i nu, “Puboboogi'an nosiro pokakas Ku no, om musuus nosiro pongilaan ong isai kosongapan nu sabung Ku no,” koo ri. Om soko iri yo winaal nu ongo soujar iiri. 25 Nga mundii-dii so obi' nu salib ni Yisus ino om kominan Niyo ri, om si Maria sawo ni Kulupas, om si Maria Magdalina. 26 Nosiou-o po ni Yisus ino Niyo om aku, mompomaid kosomodan bana Niyo, tongaro yo Niyo ino Niyo ri nu, “Oo Ino, itu yo su anak mu,” koo. 27 Om tinangar aku ya Niyo nu, “Itu yo su ino Mu,” koo. Kiat-o nu iri poogolo ku yo ino ni Yisus so waloi ku ri. 28 Noilaan-o ni Yisus nu noopod-o Niyo kiawi' gogoma'on Niyo ri, om tayon ong otuman tinangar so Buuk nu Kinoringan, mutongaro yo sono Iyo nu, “Lugangon Aku,” koo. 29 Kuwai dii ido mangkuk kiasuw nu sungoi nu anggur mousom. Poloobo yo nosiro nu golugut so mangkuk iiri, om tonongi yo nosiro so pompod nu kayu om suloyi yo so munung Niyo ri. 30 Nososop ni Yisus sungoi nu anggur iri, mutongaro yo Iyo nu, “Noopod-o,” koo. Nopupus iri, tinumuku ya Iyo om minatoi-o sono. 31 Dai moingin ongo wowaidon nu lobuw Yaudi ri ong olaid mawid-tawid bangkai nu lobuw nisalib-i om otaiwan nu Runat Pongintoronan. Makin-o po Runat Pongintoronan nu iya iiri oogot po ko' koopotan. Pagka runat pinosoliban so si Yisus runat kolimo, mokililaa yo ongo lobuw Yaudi ri so si Pilatus nu podangon akod nu ongo lobuw nisalib-i tayon ong osikap matoi, om niuntiba yo sono. 32 Indadi miano yo soujar-i momodang gulu po nu akod nu duo koyuwan nisalib so musompodi ni Yisus. 33 Nga nokologa' yo po nosiro dii so Iyo, siowi nosiro su minatoi-o Iyo, indadi dai yo sono pinodang nosiro akod Niyo ri, 34 nga tudaa yo nu ido koyuwan soujar-i obik Niyo ri nu bangkau, om minusit sono su raa' mugawul nu sungoi. 35 (Aku yo su nokosiou nu noongourug iiri, om nituturan ku ono so kou tayon Ku ong poimaid kou. Tuturan ku oono obana, om oilaan ku nu obana ya ono). 36 Ono yo ko' nourug soko oono tayon ong otuman iri nokosurat so Buuk nu Kinoringan-i nu, “D'ado ido ya opodang nu tulang Niyo no,” koo ri. 37 Kuwai ya wokon nokosurat so Buuk nu Kinoringan nu, “Osuang lobuw kosiou so Iyo, ono tinuda' nosiro no,” koo ri. 38 Nopupus iri, mokililaa yo si Yusup, lobuw kiat so bandar Arimatia so si Pilatus nu olapon bangkai ni Yisus. Iyo nga mompomaid-a ni Yisus, nga dai ya nipokoilo so lobuw suang so' lumaa' iyo nu wowaidon nu lobuw Yaudi ri. Pagka linila'an-a iyo ni Pilatus, olapo yo sono niyo bangkai ni Yisus. 39 Si Nikudimus, iri baya' linumoga' dii si Yisus nu awi, nga minaid-a so si Yusup. Minongowit iyo kiro-kiro tolu nopulu kilu nu kolonungan ingoranan nu muur om garu. 40 Olapo yo nu duo koyuwan iiri bangkai ni Yisus om soluyo yo nu koukuputi maid nu kolonungan-i, so' ono yo su adat nu lobuw Yaudi suat so mongolobong. 41 Dii so pinosoliban so si Yisus, kitonoman. Tonoman iiri, kiuang nu watu koowaal-a om dai po insan opongolobongan. 42 Lobongi yo sono nosiro dii bangkai ni Yisus so' iri yo su orani, om susuab koimbagu no, Runat Pongintoronan nu lobuw Yaudi.
1 Otuong-tuong po nu susuab nu Runat Minggu ri, minian sono si Maria Magdalina so lobong ni Yisus. Siowi niyo su noluid watu pinonutub nu lobong-i. 2 Mundako yo iyo modium so si Simun Pitrus om aku, kosomodan ni Yisus, om tongaro yo niyo nu, “Inalap-o nu lobuw bangkai ni Tuhan Yisus, om dai ku oilaan ong siombo pinopolakan nosiro,” koo. 3 Miano kai yo sono si Pitrus so lobong ni Yisus. 4 Kiduo-duo so kai minundak, nga olangkas aku po ko' si Pitrus om aku yo su nokopogulu lumoga' so lobong-i. 5 Lumiingo aku yo monsiou so dilalom-i om nosiou ku sono molak-polak koukuputi pinonolui-i, nga dai aku ya minasuw. 6 Nokologa' yo po si Pitrus, mogtuui minasuw iyo. Nosiou-a niyo koukuputi pinonolui iiri molak-polak, 7 nga iri kumut pinonayut nu ulu ni Yisus, nokosondiang nu kinopolakan om mupi'-lupi' ya. 8 - 9 Sumusuuto aku yo masuw so lobong-i. Nosiou ku yo po iri, nopoimaid aku ya nu noluli'an Iyo pudi dai po oorotian mai iri nokosurat so Buuk nu Kinoringan nu subai oluli'an Iyo. 10 Nopupus iri, mulio kai yo. 11 Nga mundii-dii ya si Maria so ngonga'on nu lobong-i maid nu tumangi'. Lumiingo yo sono iyo monsiou so dilalom-i. 12 Nokosiou sono iyo nu duo susuu'on nu Kinoringan kipokakas nu oputi' minogom so musompodang baya' pinogilian so si Yisus, ido umpak so ulu, om ido po umpak so akod. 13 Duato yo nosiro si Maria nu, “Nokuro su tumangi' ko?” koo. Sumombuto yo si Maria nu, “Tinongawan nu lobuw bangkai nu Tuhan ku ri, om dai ku oilaan ong siombo pinopolakan so Iyo,” koo. 14 Notangar-o po iri ni Maria, kumowiio yo iyo, mogtuui nosiou niyo si Yisus mundii-dii, nga dai niyo notondu'an nu si Yisus. 15 Duato yo iyo ni Yisus nu, “Nokuro su tumangi' ko? Isai diumon mu?” koo. Ponontaman ni Maria ong moongipat iyo nu tonoman ono. Indadi, mutongaro yo iyo nu, “Bang ikau-o su nopopinda so Iyo, obari so aku ong siombo pinopolakan mu, su' oilaan ku mongalap,” koo. 16 Tongaro yo sono iyo ni Yisus nu, “Oo Maria,” koo. Kumowiio yo si Maria dii si Yisus om mutongaro yo so tangar Ibrani, Rabbuni! koo, orati niyo “Guru”. 17 Mutongaro yo si Yisus so iyo nu, “Kodi Aku po kuyuti, so' dai po su nokoindakod dii si Amo Ku. Ian-o so kosusulodan Ku ri pokoilo so nosiro nu mian Aku dii si Amo Ku, ono yo Amo muyu. Iyo yo Kinoringan usaa'on Ku om usaa'on muyu ya,” koo. 18 Indadi, pokoiloo yo sono ni Maria ongo mompomaid ni Yisus nu nosiou niyo si Yisus, om obari yo iri kodau Niyo ri. 19 Awi-awi nu Runat Minggu iiri, muimpugo yo mompomaid ni Yisus so ido bilik. Kinunsi nosiro pintu ri, so' lumaa' nosiro nu ongo wowaidon nu lobuw Yaudi ri. Milok po su mundii-dii si Yisus so tiningkuangon nosiro ri, om mutongaro yo nu, “Posonango yo inawo muyu no!” koo. 20 Nokoputangar-o po Iyo soko iri, posiowi yo Niyo palad om obik Niyo ri so nosiro. Nosudu'an sobana nosiro nu nosiou-o sono Iyo. 21 Mutongaro po si Yisus nu, “Posonango yo inawo muyu no! Soko si Amo Ku minonuu' so Aku, soko ono ya monuu' Aku so kou,” koo. 22 Nopupus iri, obusi yo Niyo inawo Niyo ri dii so nosiro om mutongaro yo nu, “Torimaa muyu yo Atod nu Kinoringan. 23 Bang mongampun kou nu koraayan nu lobuw, Kinoringan nga mongampun-a so nosiro. Bang dai kou mongampun nu koraayan nu lobuw, Kinoringan nga dai ya mongampun so nosiro,” koo. 24 Nga si Tumas, ido kiat so opulu om duo mompomaid ni Yisus, iri paawon so si Apid, dai nokowaid muimpug so kai nu linoga'an ni Yisus. 25 Obari mai yo sono iyo nu, “Nosiou mai si Tuhan Yisus!” koo kai. Nga sumombuto yo si Tumas nu, “Bang dai ku po osiou baya' nu lansang so palad Niyo om posusuk nu tontuduk ku no so pilat nu obik Niyo ri, dai po su poimaid,” koo. 26 Koturuan kiat nu iri, muimpug-o kai po so bilik iiri, om nokowaid-o sono si Tumas. Kinunsi mai kiawi' pintu ri, nga linumoga' ya si Yisus, om mundii-dii so tiningkuangon mai ri om mutongaro yo nu, “Posonango muyu yo inawo muyu no,” koo. 27 Indadi mutongaro yo sono Iyo so si Tumas nu, “Siowi yo palad Ku tu, om susuki yo tontuduk mu no so pilat nu obik Ku no, om poimaid ko yo sono. Ikod-o pongimbuali po,” koo. 28 Sumombuto yo si Tumas nu, “Ikau-o su Tuhan ku. Ikau-o su Kinoringan usaa'on ku,” koo. 29 Mutongaro yo si Yisus so iyo nu, “Poimaid ko yo sono gaam so' nosiou mu yo Aku. Osanang po ongo lobuw nu dai pona insan kosiou so Aku, nga poimaid-a,” koo. 30 Osuang po koiran-iran winaal ni Yisus so tiningkuangon mai, dai nokosurat so buuk iitu. 31 Nga tomod-o po nu sinurat iitu tayon ong poimaid kou nu si Yisus-o su Anak nu Kinoringan, Raja Nijanji nu Kinoringan. Om pagka poimaid kou so Iyo, taakan kou nu kowiawan musingkolaid maid so Kinoringan.
1 Nopupus iri, insan po minokisiou si Yisus so kai so Liu' Tiborias-i. Soko itu nourug. 2 Ido runat, minuimpug turu mompomaid ni Yisus, ono yo si Simun, si Tumas (iri paawon so si Apid), si Natanil (iri lobuw kiat so Kana so wonuo nu Galilia), inonakan ni Jibidius, om duo po mompomaid Niyo wokon. 3 Mutongaro yo si Simun Pitrus so kai nu, “Oo lakitu, mian aku po momukot,” koo. Sumombuto kai yo nu, “Maid kai,” koo kai. Sumokoyo kai yo so alud-i, om tumulako kai yo, nga nosuaban-a, insan songkayu ado ya pait mai. 4 Nokousit-o po su runat, mundii-dii sono si Yisus so imbing-i, nga dai mai notondu'an. 5 Duato kai yo ni Yisus nu, “Oo su kouna'an Ku, kipait kou ya ka?” koo. Sumombuto kai yo nu, “Insan songkayu d'ado,” koo kai. 6 Tongaro kai yo Niyo nu, “Taani muyu yo pukot-o umpak so wanan nu alud-o, su' kaalap kou nu pait,” koo. Taani mai yo sono pukot-i, om ogon-ogon dai opudik mai nu koosuang nu pait nokosulung. 7 Mutongaro aku yo so si Pitrus nu, “Ono yo Tuhan toko ri!” k'aku. Norongou-o po iri ni Pitrus, musobungo yo iyo koimbagu om tumoyogo yo rumapit. 8 Kai nga rinumapit-a maid nu alud-i sambil momudik nu pukot notagub nu pait-i. Orani kai ya so imbing-i kiro-kiro maatus-o mitor. 9 Nokotindal kai yo po, nokosiou kai nu apui om malau-salau su pait om baang-baang. 10 Mutongaro yo si Yisus so kai nu, “Pongowit kou yo tuui tinu-tinu nokayu nu pait koo'alap muyu no,” koo. 11 Miano yo si Simun Pitrus so alud-i om pudiko yo niyo pukot-i potindal, notagub-a nu pait ongo aayo. Koosuang nu pait iiri, maatus limo nopulu om tolu. Nga soko iri pona kosuang nu pait-i, dai ya nopisi' pukot-i. 12 Tongaro kai yo ni Yisus nu, “Tuui kou yo mongokan,” koo. D'ado ido so kai nokooku' mongoduat ong isai Iyo so' noilaan mai yo nu Iyo yo si Tuhan. 13 Rumonio yo si Yisus dii so kai om olapo yo Niyo baang-baang-i om taaki kai yo. Om soko iri ya gama' Niyo nu pait-i. 14 Kointolu yo iri Niyo mokisiou so kai nu noluli'an-o Iyo. 15 Nokookan kai yo po, mutongaro yo si Yisus so si Simun Pitrus nu, “Oo Simun, anak ni Yuanis, bana ka nu osamod ko so Aku nu kaalib po nu koosamod nosiro so Aku?” koo. Sumombuto yo si Pitrus nu, “Oo Tuhan, noilaan Mu yo nu osamod aku so Ikau,” koo. Mutongaro yo si Yisus nu, “Ipati yo ongo uyog nu dumba Ku no,” koo. 16 Mongoduato yo koinduo si Yisus so si Pitrus nu, “Oo Simun, anak ni Yuanis, bana ka nu osamod ko so Aku?” koo. Sumombuto yo si Pitrus nu, “Bana ya Tuhan! Noilaan Mu yo nu osamod aku so Ikau,” koo. Mutongaro po si Yisus nu, “Ipati yo ongo dumba Ku no,” koo. 17 Mongoduato po kointolu si Yisus so si Pitrus nu, “Oo Simun, anak ni Yuanis, bana ka nu osamod ko so Aku?” koo. Minurad-o sono inawo ni Pitrus so' intolu si Yisus mongoduat so iyo nu soko iri. Sumombuto yo iyo nu, “Oo Tuhan, Ikau-o su koilo nu onu-onu ya. Tantu oilaan Mu ya nu osamod aku so Ikau!” koo. Mutongaro yo si Yisus nu, “Ipati yo ongo dumba Ku no. 18 Bana ya tongaron Ku iitu nu, laid nu omuda ko no po, ikau-o kondiri su murigap-rigap sundur mompanou so siombo-ombo ya koinginan mu. Nga bang otuo ko yo, pokaang ko sono nu longon mu kogosan nu lobuw om owiton ko so tontong dai koinginan mu mian,” koo. 19 (Tinangar ni Yisus soko iri so' paabar Iyo nu poomatoi ni Pitrus ong wagu, om kiat nu ono obantug sono Kinoringan.) Mutongaro yo si Yisus so iyo nu, “Waid-o so Aku!” koo. 20 Kumowiio yo si Pitrus om nosiou aku sono niyo, kosomodan bana ni Yisus, iri minogom so obi' Niyo nu laid mai mongokan-i om minongoduat so Iyo nu, “Isai ka su mongoraai so Ikau?” k'aku ri. 21 Nosiou aku yo po ni Pitrus, duato yo niyo si Yisus nu, “Oo Tuhan, onu koo ka nu lobuw iitu no?” koo. 22 Sumombuto yo si Yisus nu, “Bang ono yo su koinginan Ku miau iyo musingkologa' Ku koimbagu, d'ado ya ilo-ilo mu. Nga ikau, waid-o s'Aku,” koo. 23 Ponontaman sono nu mompomaid wokon-i nu dai aku ya matoi. Ampa d'ado ya notangar ni Yisus nu dai aku matoi, sondiang ko, iri yo su notangar Niyo, “Bang ono yo su koinginan Ku miau iyo musingkologa' Ku koimbagu, onu ka koilo-ilo mu,” koo. 24 Aku yo su kinuan ni Yisus nu iri. Om aku yo su minonurat nu itu om oilaan toko nu onu yo po tinangar ku iitu bana ya. 25 Osuang po wokon pinuwaal ni Yisus. Bang kiawi' nu ono nga nisurat, boyo-boyoon ku nu dai orumpos so wonuo tu ongo buuk posuratan nu ono.