The New Testament of our Lord and Saviour Jesus Christ
1 Yehsuh Gihduz dwg gij lwglan Daqveiq, dwg Yaqbwzlahhanj dih doengh daih gajlaeng; laj neix dwg de dih gyabouh: 2 Yaqbwzlahhanj miz Hijsaj, Hijsaj miz Yajgoz, Yajgoz miz Youzdaq caeuq gij goengjlungz nuengxau Youzdaq. 3 Youzdaq caeuq mehyah de Dahmaj seng miz Fazlwzswh caeuq Seqlah, Fazlwzswh miz Hihswhlwnz, Hihswhlwnz miz Yaqlanz, 4 Yaqlanz miz Yaqmijnazdaz, Yaqmijnazdaz miz Nazswnq, Nazswnq miz Sajmaenz, 5 Sajmaenz caeuq mehyah de Lahhoz miz Boh'ahswh, Boh'ahswh caeuq mehyah de Luqdwz miz Ngozbiqdwz, Ngozbiqdwz miz Yehsih, 6 Yehsih miz Daqveiq goengjvuengz neix. Daqveiq goengjvuengz neix caeuq mehyah Uhliqyaq miz Sojlozmaenz, 7 Sojlozmaenz miz Lozboh'anh, Lozboh'anh miz Yaqbijyaj, Yaqbijyaj miz Yaqsaj, 8 Yaqsaj miz Yozcahfaz, Yozcahfaz miz Yozlanz, Yozlanz miz Uhsihyaq, 9 Uhsihyaq miz Yozdanj, Yozdanj miz Yaqhahswh, Yaqhahswh miz Hihsihgyah, 10 Hihsihgyah miz Majnazsih, Majnazsih miz Yaqmaenz, Yaqmaenz miz Yozsihyaq. 11 Mwh gij vunz Hijswzlez ngaiz gaemh dawz boenq bae Bahbijlwnz hih mwhde, Yozsihyaq miz Yehgohnizyaj caeuq doengh daegnuengx de. 12 Ngaiz gaemh dawz boenq bae daengz Bahbijlwnz le, Yehgohnizyaj miz Sajlahdez, Sajlahdez miz Sojlozbahbwz, 13 Sojlozbahbwz miz Yaqbijhiq, Yaqbijhiq miz Hijliqyaqgingq, Hijliqyaqgingq miz Yaqsoj, 14 Yaqsoj miz Sajduz, Sajduz miz Yaqgimh, Yaqgimh miz Hijliz, 15 Hijliz miz Hijliqyaqsaj, Hijliqyaqsaj miz Majdanq, Majdanq miz Yajgoz, 16 Yajgoz miz Yozswz. Yozswz couh dwg goeng gojyez Majliqyaq, Majliqyaq couh dwg daxmeh Yehsuh, couh dwg boux heuh Gihduz dih Yehsuh. 17 Ciuq yienghneix suenq hwnjdaeuj, dajlwh Yaqbwzlahhanj daengz Daqveiq itgungh miz cibseiq daih. Yiengq caiq dajlwh Daqveiq daengz mwh gij vunz Hijswzlez ngaiz boenq buen bae daengz Bahbijlwnz hih mwhde, caemh miz cibseiq daih. Caiq dajlwh gij vunz Hijswzlez ngaiz boenq buen bae daengz Bahbijlwnz youq hih mwhde suenq hwnj daengz seng Gihduz caemh dwg miz cibseiq daih. 18 Laj neix couh dwg geiq mwh seng Yehsuh Gihduz he. Mwh daxmeh de Majliqyaq caeuq Yozswz dingh guh gvanjbaz, mijyaengz cingqcaen haq hawj Yozswz haem hih mwhde, Hoenzsaenz Cangqdiq cix hawj de mizndang lo. 19 Goeng de Yozswz dwg boux lauxsaed simndei simsoh he dih vunz hih; de mbouj siengj hawj Majliqyaq saetnaj, couh siengj caegcaeg caeuq de gaij naeuz mbouj caeuq de guh gvanjbaz lo. 20 Hoeng, couh youq mwh de yienghneix naemj hih mwhde, bouxcai Cangqdiq youq ndaw loq de doiq de naeuz: “Yozswz, gij lwglan Daqveiq, mwngz gaejyungh lau aeu Majliqyaq ma guh yah, aenvih de raek hih laeq lwg neix dwg Hoenzsaenz Cangqdiq soengq hawj de he. 21 De gaengjdingq seng miz daeglwg he; mwngz ij an coh hawj de heuh Yehsuh, aenvih de ij gouq gij vunz de daj ndaw coih ok ma.” (‘Yehsuh’ couh dwg ‘gouq vunz’ dih iqswh.) 22 Gij saeh neix cingqgawq lingz ok Cangqdiq hawj boux cenz gij vah de naeuz goq naeuz: 23 Gaengjdingq ij miz lwgsau mijyaengz caeuq vunzsai ninz goq haem couh miz lwg lo. Gij vunz ij heuh laeq lwg neix heuh Hijmajneiqliq hih gawq vah neix lo. (‘Hijmajneiqliq’ couh dwg ‘Cangqdiq caeuq raeuz youq’ dih iqswh.) 24 Gajlaeng, Yozswz singj le, couh ciuq gij vah bouxcai Cangqdiq raengq hih yienghmwnq bae aeu Majliqyaq ma guh yah lo. 25 Hoeng, de youq mwh Majliqyaq mijyaengz seng lwg mwhde, de itcig cungj mij caeuq de ninz goq. Couh yienghneix, laeq lwg neix seng okdaeuj le, Yozswz couh an coh hawj de heuh Yehsuh.
1 Yehsuh seng youq Youzdaiq Saengj dih Bwzliqhaengz Singz. De seng hih mwhde, cingq dwg goeng Hihliz guh vuengz hih mwhde. De seng le, miz geij boux coengjmingz rox yawj gijmaz rox suenq gijmaz he daj baixdoeng daeuj daengz Yehluqsajlaengj Singz, dauqcawq damqdingq cam naeuz: 2 “Ngamq seng hih Youzdaiq vunz dih vuengz youq mwnqlaw lah? Gyoengqraeuz youq baixdoeng yawjraen aen ndaundeiq dwzbez de yienh okdaeuj hwj, sojhij gyoengqraeuz saengzcingz daeuj baiq de sax de lah.” 3 Yiengq Hihliz goengjvuengz neix caeuq Yehluqsajlaengj cenz singz sojmiz hih vunz dingq daengz gij siuhsiz neix le, cungj roxnginh simyou fubfub. 4 Gajlaeng, goeng Hihliz couh heuh sojmiz hih goengjsae dajbwiz caeuq fazliz cenhgyah daeuj doxcomz, cam gyoengqde naeuz: “Gihduz youq nwjh seng lah?” 5 Yiengq, gyoengqde han naeuz: “Youq Youzdaiq Saengj dih Bwzliqhaengz Singz, aenvih boux cenz gij vah Cangqdiq dwg yienghneix sij naeuz goq hih: 6 Dieg Youzdaiq dih Bwzliqhaengz Singz hax, mwngz gaenhbaenj mbouj dwg youq dieg Youzdaiq dih gak aen singz dih aen ceiq iq ceiq yaez he, aenvih ij miz goengjvuengz he dajlaeng mwngz ok daeuj daiq gij vunz Cangqdiq, Hijswzlez vunz.” 7 Goeng Hihliz dingq gyoengqde yienghneix gangj le, couh caegcaeg cimh doengh boux daj baixdoeng daeuj hih doengh boux coengjmingz rox yawj gijmaz rox suenq gijmaz mwnq daeuj saemjcam gyoengqde dauqdaej aen ndaundeiq dwzbez mwnq seizlaw yienh okdaeuj. 8 Gajlaeng goeng de caiq baij gyoengqde bae Bwzliqhaengz Singz; de raengq gyoengqde naeuz: “Faenhsou bae cimh laeq lwgngez mwnq, cimh daengz raen bae. Cimhraen le, ma naeuz gou ni; gou caemh ij bae baiq de.” 9 Gyoengqde dingq goengjvuengz yienghneix raengq le, couh bae lo. Bae hih mwhde, sawqmwh aen ndaundeiq dwzbez mwnq, youq baixdoeng raen hih aen ndaundeiq dwzbez mwnq, caiq yienh youq gwnzmbwn dangqnaj gyoengqde itcig daiq gyoengqde bae daengz mwnq laeq lwgngez youq mwnq, dingz youq gwnz de. 10 Gyoengqde raen aen de le, cungj angq hwj ij rai bae. 11 Gajlaeng gyoengqde couh majcangq haeuj ndaw ranz mwnq bae. Haeuj bae le, couh yawjraen laeq lwgngez he caeuq daxmeh de Majliqyaq. Gyoengqde raen le, couh bomz roengz doem bae sax laeq lwgngez neix. Gyoengqde sax le, vanzlij caiq hoi aen hab dijbauj he, aeu gim, aeu yeijyangh caeuq mozyoz soengq hawj laeq de. 12 Gajlaeng gyoengqde fangxngwnzloq raen Cangqdiq naeuz mbouj hawj gyoengqde dauq maj laeng Hihliz goengjvuengz mwnq, yiengq gyoengqde couh goq daixlingh diuz roen bae, maj dieg bonjfaenh gyoengqde lo. 13 Gyoengqde maj le, Yozswz fangxngwnzloq; youq ndaw loq de bouxcai Cangqdiq doiq de naeuz: “Vaiq hwnq! Daiq laeq lwgngez neix caeuq daxmeh de deuz bae Ngaihgiz youq bax; ij youq daengz gou naeuz mwngz ni bae, aenvih goeng Hihliz ij cimh laeq lwgngez neix, ijsiengj gaj de.” 14 Yozswz loqraen yienghneix le, couh vaiqdi hwnq, lienzyeh daiq lwg daiq yah deuz bae Ngaihgiz. 15 De deuz bae daengz Ngaihgiz youq, itcig youq daengz goeng Hihliz rai. Gij saeh neix ngamq lingz ok Cangqdiq hawj boux cenz gij vah de gangj goq naeuz: Gou daj Ngaihgiz heuh daeglwg gou ok ma. 16 Yiengq caiq gangj daengz goeng Hihliz, gajlaeng, goeng Hihliz rox bonjfaenh de ngaiz doengh boux coengjmingz rox yawj gijmaz suenq gijmaz mwnq coemx de le, cungj aeuqheiq hwj ij rai bae. De couh ciuq gaxgonq de dajlaeng doengh boux coengjmingz rox yawj gijmaz rox suenq gijmaz mwnq damqdingq ndaej rox aen ndaundeiq dwzbez mwnq yienh okdaeuj hih cizgyenh ma suenq, couh baij vunz bae dawz Bwzliqhaengz Singz caeuq seiqhenz singz de sojmiz hih lwgngez vunzsai song bi doxroengz cungj gaj liux. 17 Yienghneix gij saeh neix cingq lingz ok Yehliqmij boux cenz gij vah Cangqdiq neix gaxgonq gangj goq naeuz: 18 Youq Lahmaj dingqri sing daej ngwdngwd, couh dwg Lahgyez daej gij lwg de. De mbouj dingq vunz vued de, aenvih gij lwg de cungj rai lo. 19 Gajlaeng goeng Hihliz goengjvuengz neix rai le, bouxcai Cangqdiq caiq yienh youq ndaw loq Yozswz. (Mwhneix Yozswz cingq youq Ngaihgiz.) De youq ndaw loq doiq Yozswz naeuz: 20 “Hwnq! Daiq lwg daiq yah dauq maj dieg Hijswzlez, aenvih boux ij gaj laeq lwgngez neix hih gaenq rai lo.” 21 Yozswz loqraen yienghneix le, couh majcangq daiq lwg daiq yah dauq ma daengz dieg Hijswzlez. 22 Hoeng, de dingq daengz dwg Yaqgihlauj daeglwg Hihliz swnj goeng Hihliz guh Youzdaiq dih vuengz le, couh mbouj gamj bae Youzdaiq Saengj. Gajlaeng de fangxngwnzloq raen Cangqdiq naeuz de, de couh bae dieg Gyahliqliq, 23 youq mwnq dieg heuh Nazsajlwz he youq. Yienghneix caemh ngamq lingz ok boux cenz gij vah Cangqdiq gangj goq naeuz: Gij vunz ij naeuz de dwg Nazsajlwz vunz.
1 Miz baez he, guh sijlij dih Yozhanq youq rogndoi Youzdaiq Saengj cenzgangj gij vah Cangqdiq. 2 De naeuz: “Cangqdiq dih gienzveih couh ij fazveih lo; faenhsou ij daj ndaw sim nginh loek gaij goqma.” 3 Boux Yozhanq neix couh dwg boux Hijcaiqyaq boux cenz gij vah Cangqdiq neix naeuz goq naeuz: Youq rogndoi miz vunz hemq goggog naeuz: “Cwnjbiq diuz roen he hawj bouxcawj; coih diuz roen soh hawj de byaij!” hih boux mwnq lo. 4 Mwhde Yozhanq dwg daenj buh fwn lozdoz, rwet gyaeb sai naeng, dwg gw duz daek caeuq dangzrwi ndoi he. 5 Yiengq miz haujlai vunz daj Yehluqsajlaengj caeuq Youzdaiq Saengj caeuq fueng diuz dah Yozdanq daeuj daengz de mwnq dingq de gangj vah, 6 caemh nginh coih, caemh youq diuz dah Yozdanq hawj de sijlij. 7 Yozhanq raen miz haujlai gaep haeuj Fazliqcaiq baij hih vunz caeuq haujlai gaep haeuj Sajduhgaih baij hih vunz caemh daeuj ij hawj de sijlij le, de couh doiq gyoengqde naeuz: “Doenghgij vunz doegdoeg siebsieb faenhsou hax! Faenhsou naemqnaeuz yienghneix guh couh ndaej deuz ok Cangqdiq fatheiq fad faenhsou lo mah? 8 Faenhsou ij guh gij saeh ndaej cingqmingz naeuz faenhsou gaenq gaijgoq he. 9 Gaejyungh naemqnaeuz faenhsou dwg gij lwglan Yaqbwzlahhanj le, Cangqdiq couh mbouj fad faenhsou. Faenhsou couh daekeiq vaujvauq lo! Gwh lauxsaed naeuz sou ni, Cangqdiq aeu doenghgij rin neix ma cungj ndaej seizbienh bienqbaenz gij lwglan Yaqbwzlahhanj hwx. 10 Faenhsou couh luj go mak; famz go mak mbouj giet mak ndei hih couh ij ngaiz raemj gveng haeuj feiz bae. Faenhsou ij siujsim, Cangqdiq gaenq dawz fouj hwnjdaeuj ij raemj lo. 11 “Gou seizneix cijmboujgoq dwg aeu raemx ma sijlij hawj faenhsou lah, dwg hawj faenhsou ij daj ndaw sim nginh loek gaijgoq lah. Hoeng, baezneix ij miz boux beij gou ak he daeuj. Boux de, daiq gou bang de riuj haizcauj cungj mbouj lwnz daengz gou hwx. De ij yungh Hoenzsaenz Cangqdiq caeuq feiz ma sijlij hawj faenhsou. 12 Ndaw fawz boux de dawz lad, lad dawz gij nyapnyangj he okdaeuj, sauq cengh caiqcangz, dawz ceh mienh coengq haeuj canghguq bae, dawz doenghheij nyapnyap nyangjnyangj he dwk haeuj ndaw feiz mbouj rox maet he bae vueng.” 13 Mwhde Yehsuh caemh daj Gyahliqliq daeuj diuz dah Yozdanq hawj Yozhanq sijlij. 14 Yiengq Yozhanq couh naeuz bonjfaenh de mbouj boiqndaej bang de sijlij. De vanzlij naeuz: “Mwngz mboujyungh sijlij nej! Gou caemh mbouj bang mwngz hih; gou wnggai hawj mwngz bang gou sijlij cij deng, hoeng, mwngz dauq daeuj hawj gou bang mwngz sijlij lah!” 15 Yehsuh dingq le, han naeuz: “Seizneix camqciz yienghneix guh bax, aenvih yienghneix guh dwg ciuq gij cawjeiq Cangqdiq guh hih.” Yozhanq dingq de yienghneix naeuz le, caemh dapwngq de lo. 16 Couh yienghneix, Yozhanq couh bang Yehsuh sijlij lo. Couh youq mwh Yehsuh sijlij ndaej le, daj ndaw raemx hwnj ma hih mwhde, sawqmwh aen mbwn luj aen dou yienghmwnq hoi; de yawjraen Hoenzsaenz Cangqdiq luj duz roegguqgap yienghmwnq mbin roengz gwnz ndang de daeuj. 17 Caemh miz sing daj gwnzmbwn doiq de naeuz: “Mwngz dwg daeglwg gou; gou gig aiq mwngz. Mwngz hawj gou roxnginh hab'eiq habhoz raixcaix.”
1 Miz baez he, Hoenzsaenz Cangqdiq daiq Yehsuh bae daengz rogndoi, hawj de ngaiz Sajdanq duz fangzvuengz neix sawq de, 2 hawj de youq rogndoi lekdungx gijmaz cungj mbouj gw, dungxiek seiqcib ngwnzngoenz. Yiengq de lek seiqcib ngwnzngoenz le, roxnginh dungxiek ij rai bae. 3 Couh youq mwhneix, fangzvuengz daeuj yaeuh de doiq de naeuz: “Hauhnaeuz mwngz dwg daeglwg Cangqdiq nex, mwngz couh mingqlingq ngauq rin neix, hawj de bienq menqbauh bax!” 4 Yiengq Yehsuh han naeuz: “Singqgingh ndaw de sij naeuz: Vunz mbouj dwg caenhgag gauq miz gw cij ndaej lix nej, dauq dwg ij gauq Cangqdiq soj gangj hih vah cij ndaej lix lah.” 5 Gajlaeng, fangzvuengz caiq daiq de bae daengz aen singz Cangqdiq, Yehluqsajlaengj, hawj de ndwn youq gwnz dingj aen laeuz gunghdenq Cangqdiq mwnq ceiq sang he, 6 caiq doiq de naeuz: “Hauhnaeuz mwngz dwg lwg Cangqdiq nex, mwngz couh daj dineix diuq roengzbae bax, aenvih ndaw Singqgingh ndaw de caemh sij naeuz: Cangqdiq raengq bouxcai de, hawj bouxcai de aeu fawz ma raeuz mwngz baujhuq mwngz, hawj mwngz mbouj ngaiz bungq dawz rin hah.” 7 Yehsuh dingq le, youhcaiq han naeuz: “Singqgingh ndaw de caemh sij naeuz: Mbouj ndaej sawq Cangqdiq, mwngz dih cwnz hah.” 8 Fangzvuengz dingq de yienghneix gangj le, cungj mbouj fug, youhcaiq daiq de hwnj aen bya sangsang he bae yinx hawj de yawj, hawj de yawjraen lajmbwn sojmiz hih guek cungj dwg ndei hux ndei he, 9 couh doiq de naeuz: “Neq! Mwngz yawj veiq; hauhnaeuz mwngz baiq gou sax gou nex, gou couh dawz mwngz soj yawjraen hih cungj soengq hawj mwngz.” 10 Yehsuh dingq le, youhcaiq han de naeuz: “Sajdanq, deuz! Ndaw Singqgingh ndaw de caemh sij naeuz: Cangqdiq dwg mwngz dih cwnz; ij baiq ij sax, caenhgag ndaej baiq ndaej sax de, caemh dwg caenhgag ndaej swqhaeuh de.” 11 Sajdanq fangzvuengz dingq de yienghneix naeuz le, mij banqfaz, couh swhswh deuz lo. Sajdanq deuz le, couh miz bouxcai Cangqdiq daeuj swqhaeuh de. 12 Miz baez he, Yehsuh dingq naeuz guh sijlij dih Yozhanq ngaiz gyaeng haeuj ndaw lauz bae le, couh dauq maj dieg Gyahliqliq lo. 13 Hoeng, de mij maj Nazsajlwz dieg bonjfaenh de youq, dauq bae Gyahbwznungz Singz youq lah. Gyahbwznungz Singz dwg youq gij dieg Sihbuqlwnz caeuq gij dieg Nazfuzdahliq song aen cuz neix hih dieg he, dwg gaenh aen huz Gyahliqliq he. 14 De yienghneix cingq lingz ok Hijcaiqyaq boux cenz gij vah Cangqdiq neix gangj goq hih vah naeuz: 15 Dieg Sihbuqlwnz caeuq dieg Nazfuzdahliq, youq henz haij baih hamq dah Yozdanq, linghvaih minzcuz soj youq hih dieg Gyahliqliq hax! 16 Doenghgij vunz luj youq ndaw laep hih vunz hax, couh ij yawjraen rongh sagsag lo. Doenghheij vunz lau rai he hax, couh ij miz rongh ciuq dawz lo. 17 Couh dwg daj mwhmwnq hwnj, Yehsuh couh gaihcij cenzgangj naeuz: “Cangqdiq dih gienzveih couh ij fazveih lo; faenhsou wnggai ij daj ndaw sim nginh loek gaij goqma.” 18 Miz baez he, Yehsuh youq henz huz Gyahliqliq byaij. Yiengq de yawjraen miz song boux beixnuengx youq ndaw huz dwk bya. Song boux de couh dwg Sihmaenz (Sihmaenz caemh heuh Bijdwz) caeuq daegnuengx de Anhdwzlez; song boux de yienzlaiz dwg canghdwkbya he. 19 Yehsuh yawjraen le, couh doiq song boux de naeuz: “Daeuj, daeuj gaen gou bax; gou ij hawj faenhsou ndaej vunz luj ndaej bya yienghmwnq.” 20 Gyoengqde dingq le, couh mbouj aeu doenghheij muengx de, couh gaen Yehsuh bae lo. 21 Gajlaeng, Yehsuh caiq ndij goq henz huz bae, caiq raen miz doiq beixnuengx he, couh dwg song daeglwg Sihbiqdaiq, Yajgoz caeuq Yozhanq. Song boux de cingq naengh youq ndaw ruz caeuq daxboh de fong muengx. De raen le, couh heuh song boux de hawj song boux de gaen de. 22 Song boux de dingq le, couh majcangq daj gwnz ruz roengz ma, biek daxboh de bae gaen Yehsuh lo. 23 Gajlaeng, Yehsuh byaij baenx cenz Gyahliqliq sojmiz hih dieg, bae gak aen veiqdangz cenzgangj guek Cangqdiq dih ndei siuhsiz, caemh bang vunz yw ndei gak cungj bingh. 24 Couh yienghneix, daj mwhmwnq hwnj, Yehsuh dih siuhsiz cenz bae baenx cenz Siqliqyaq Saengj, guh hwj mwnq hih vunz cungj daiq doenghheij vunz miz bingh he daeuj, mboujguenj baenz maz bingh, bingh in bingh dot hah, fangz doz hah, fatbanghmou hah, gyad hah cungj daiq daeuj hawj de yw; de caemh yw gyoengqde ndei. 25 Sojhij miz baenx haujlai vunz dajlwh Gyahliqliq hah, Dihgyahbohlij hah, Yehluqsajlaengj hah, Youzdaiq hah, doiqmienh diuz dah Yozdanq hah cungj daeuj gaen Yehsuh.
1 Yiengq Yehsuh raen miz baenx haujlai vunz daeuj gaen de le, couh hwnj bya bae. De hwnj bae le, ngamq baex naengh roengzma he, gyoengq lwgsae de couh gvaengz goqbae dep de. 2 Gajlaeng, Yehsuh couh doiq gyoengqde naeuz: 3 “Mbouj rasang yawjhwnj Cangqdiq hih vunz hax, miz fuk lo, aenvih de dwg haeuj guek Cangqdiq hih. 4 “Siengsim hih vunz hax, miz fuk lo, aenvih Cangqdiq couh ij vued de lo. 5 “Soh semxsemh hih vunz hax, miz fuk lo, aenvih lajmbwn hih dieg couh ij gvi hawj de lo. 6 “Muengh ndaej ciuq gij cawjeiq Cangqdiq bae guh hih vunz hax, miz fuk lo, aenvih Cangqdiq couh ij hawj de rox gaeuq lo. 7 “Rox hojsik hih vunz hax, miz fuk lo, aenvih Cangqdiq caemh hojsik de. 8 “Simndei lauxsaed hih vunz hax, miz fuk lo, aenvih de couh ij ndaej raen Cangqdiq lo. 9 “Hawj vunz doxhuz hih vunz hax, miz fuk lo, aenvih Cangqdiq nginh de guh lwg. 10 “Vih ciuq gij cawjeiq Cangqdiq bae guh hwj ngaiz souh daengz vunz haih hih vunz hax, miz fuk lo, aenvih de dwg haeuj guek Cangqdiq hih. 11 Hauhnaeuz vih gou hwj ngaiz vunz yug, ngaiz vunz haih, ngaiz vunz luenhbangh bangjlaih hih, faenhsou couh miz fuk lo. 12 Faenhsou wnggai riuriu angqangq, aenvih youq gwnzmbwn Cangqdiq ij miz haujlai cangj hawj faenhsou, caemh aenvih youq dangq gaxgonq faenhsou caemh miz boux cenz gij vah Cangqdiq caemh yienghneix ngaiz vunz haih goq.” 13 Yehsuh gangj daengz dineix le, vanzlij caiq naeuz: “Faenhsou dwg lajmbwn hih gyu. Yiengq, hauhnaeuz gij gyu neix gaenq cwt lo, couh ij baenzlaw caiq hawj de ndaej bienq ndaengq haem nej? Mij'z yungh hih gyu, mbouj vwt ok rog bae hawj vunz caij, ij diuh de ma guh maz haem nej? 14 “Faenhsou dwg lajmbwn hih rongh; ij wnggai hawj vunz raen, hawj vunz rox, mbouj wnggai yo hwnjdaeuj. Ij luj aen singz hwnq youq gwnz dingjbya yienghmwnq yienh sagsag. 15 Caemhdangq naeuz mij'z vunz naeuz diemj daeng rongh le, caiq dawz aen de coengq haeuj ndaw gang bae, dauq dwg ij dawz aen de coengq hwnj gwnz daiz bae, hawj aen de ndaej ciuq rongh baenx cenz ranz vunz raen lah. 16 Caemh doxdoengz, faenhsou caemh wnggai ciuq rongh hawj vunz lajmbwn, hawj gyoengqde yawj ndaej raen faenhsou guh hih ndeisaeh hwj haenh daxboh gwnzmbwn faenhsou.” 17 Yehsuh vanzlij caiq naeuz: “Gou daeuj lajmbwn mbouj dwg ij daeuj cawz gij vah Mohsih caeuq cawz gij vah boux cenz gij vah Cangqdiq he nej, dauq dwg ij yienh ok gij vah gyoengqde hwj daeuj lah. 18 Gou lauxsaed naeuz sou ni, cijaeu mbwnmbwn deihdeih lij miz, fazliz dih it bit it veh caemh lij miz, miz daengz sojmiz hih cungj lingz okdaeuj bae. 19 Sojhij, mboujguenj dwg byawz, hauhnaeuz de yawj mbouj hwnj gij fazliz neix hih diuz he, cungjsuenq naeuz diuz mbouj youqgaenj he, cixnaeuz son vunz yienghneix guh hih, de youq guek Cangqdiq mwnq couh dwg boux ceiq yaez ceiq yaqyuij he lo. Hoeng, fanjgoqma, mboujguenj dwg byawz, hauhnaeuz de soenhsouj gij fazliz neix caemh son vunz ciuq yienghmwnq bae guh hih, de youq guek Cangqdiq couh dwg boux ceiq rem ceiq veijdaq he lo. 20 Gou saedsaeh naeuz sou ni, cizfeih faenhsou youq ndaw lwgra Cangqdiq ndaej beij gij fazliz cenhgyah caeuq ndaej beij gij vunz Fazliqcaiq baij he ndwn ndaej cingq, mbouj nex, faenhsou gaengjdingq mbouj ndaej gaep haeuj guek Cangqdiq.” 21 Yehsuh vanzlij caiq naeuz: “Faenhsou gaengjdingq ndaej dingqri naeuz goq gimqcij dangq doenghbaez hih vah bax, couh dwg naeuz: ‘Mbouj ndaej gaj vunz; gaj vunz hih gaengjdingq ngaiz buenqhingz.’ 22 Hoeng, gou naeuz sou ni, mboujguenj byawz fatheiq vunz hih, caemh ngaiz souh daengz saemjbuenq; naeuz vunz mij'z yungh hih couh ij ngaiz souh daengz gauhgiz fazdingz saemjbuenq, caemh mboujguenj byawz ndaq naeuz vunz ngawz hih caemh gaengjdingq mbouj ndaej duet ok mwnq Cangqdiq fad fangz dawz feiz he. 23 Sojhij, mwngz dawz gij dajbwiz bae dajbwiz hih mwhde, hauhnaeuz mwngz ngeix daengz miz vunz caeuq mwngz doiq mwngz mbouj muenx nex, 24 mwngz couh camqciz mbouj bwiz; sien bae caeuq de gangjhuz gaenq, menhcij caiq bwiz. 25 Hauhnaeuz miz vunz bae gauq mwngz hawj mwngz boiz ngaenz hih, mwngz couh ij domh de mijyaengz bae daengz fazyenq, lij youq dangjroen hih mwhde, mwngz couh ij vaiq bae caeuq de gangjhuz, mijn'x nex couh ngaiz de dawz mwngz gyau hawj fazyenq, gyau hawj gingjcaz, ngaiz lauzgaij. 26 Gou saedsaeh naeuz sou ni, daengz mwhmwnq, mwngz ca faen he mbouj ndaej boiz liux, mwngz couh gaej muengh naeuz ndaej coengq okma lo. 27 “Faenhsou dingqri naeuz goq mbouj ndaej guhyoux gij vah neix lo bax? 28 Gou naeuz sou ni, mboujguenj byawz raen vunzbaz couh ijsiengj caeuq de hih, yiengq de caemhdangq gaenq caeuq de guhyoux lo. 29 Hauhnaeuz cehra mwngz hawj mwngz famh coih hih, yiengq couh ij dawz ceh de vet okdaeuj gveng bae; cingxnyienh aen ndangdaej noix bae yiengh he lah, yienghneix dauq giengz goq baenx cenz ndang cungj ngaiz Cangqdiq dawz bae vwt roengz mwnq de fad fangz he bae. 30 Hauhnaeuz gij fawz gvaz mwngz hawj mwngz famh coih hih, yiengq couh ij dawz gij de raemj bae, gveng bae; cingxnyienh aen ndang noix bae yiengh he, yienghneix dauq giengz goq baenx cenz ndang cungj ngaiz Cangqdiq dawz bae vwt roengz mwnq de fad fangz he bae. 31 “Caemh miz gij gveihdingq he naeuz: ‘Mboujguenj byawz caeuq mehyah de lizvwnh, couh gaengjdingq ij miz mbaw lizvwnh cingq he hawj de.’ 32 Hoeng, gou naeuz sou ni hax, cizfeih dwg meh de caeuq vunz guhyoux cij ndaej liz, mbouj nex, hauhnaeuz goeng de liz de, couh suenq naeuz dwg goeng de nyoengx meh de bae guhyoux lo; yiengq boux aeu meh de mwnq caemh suenq guhyoux lo. 33 “Faenhsou caemh gaengjdingq dingqri gij vah doiq dangq doenghbaez naeuz goq naeuz: ‘Yiengq Cangqdiq fazsiq goq hih couh ijaeu gangj daengz guh daengz; mbouj ndaej bak lai myaiz led.’ 34 Hoeng, gou naeuz sou ni hax, mboujguenj guxmaz cungj mbouj ndaej fazsiq; mbouj ndaej yinx hwnj mbwn bae fazsiq, aenvih aen mbwn dwg aen lungzeij Cangqdiq. 35 Caemh mbouj ndaej yinx lajdeih bae fazsiq, aenvih lajdeih dwg gij ha eij Cangqdiq; caemh mbouj ndaej yinx haeuj Yehluqsajlaengj bae fazsiq, aenvih Yehluqsajlaengj dwg aen singz Cangqdiq, veijdaq dih vuengz. 36 Engq mbouj ndaej yinx haeuj ndaek raeuj bonjfaenh bae fazsiq, aenvih mwngz mbouj ndaej hawj dug byoem mwngz bienq ndaem bienq bieg. 37 Couh dwg naeuz, faenhsou gangj vah, ‘dwg’ couh naeuz ‘dwg,’ ‘mbouj dwg’ couh naeuz ‘mbouj dwg;’ mbouj ndaej fazsiq. Hauhnaeuz fazsiq, couh dwg Sajdanq iuyinx hih. 38 “Faenhsou caemh dingqri naeuz goq naeuz: ‘Doh ra boiz ra, doh faenz boiz faenz,’ gawq neix lo bax. 39 Hoeng, gou naeuz sou ni, gaejyungh caeuq vunz vaih doxngig. Hauhnaeuz miz vunz mbap mbiengj naj gvaz mwngz, mwngz couh veq mbiengj naj swix mwngz hawj de ajcaih de mbap. 40 Caiq hauhnaeuz miz vunz ij gauq mwngz, ijsiengj aeu diuz buh baixndaw mwngz hih, yiengq mwngz couh daiqlienz diuz buh baixrog mwngz cungj ajcaih de aeu. 41 Caiq hauhnaeuz miz vunz ep mwngz buenx de byaij leix roen he, yiengq mwngz couh ij buenx de byaij song leix roen. 42 Youhcaiq hauhnaeuz miz vunz gouz mwngz nex, mwngz couh dapwngq de; miz vunz ij laeng mwngz ciq gijmaz hih, yiengq mwngz couh ij ciq hawj de, mbouj ndaej doi. 43 “Faenhsou caemh dingqri naeuz goq: ‘Ij aiq doenghheij gekleiz mwngz, haenq doenghheij caeuq mwngz miz haemzcaeuz he,’ gawq neix lwi? 44 Hoeng, gou naeuz sou ni, faenhsou ij aiq doengh boux caeuq faenhsou doxmiz haemzcaeuz he, caemh ij bang doengh boux haih mwngz goq he gouz Cangqdiq. 45 Yienghmwnq cij ndaej guh lwg Bohmbwn, aenvih Bohmbwn hawj gyangjngoenz ciuq vunz ndei, caemh ciuq vunz rwix vunz vaih; hawj fwn doek hawj vunz simndei simsoh he, caemh doek hawj vunz simdoeg simfwn he. 46 Yiengq, hauhnaeuz faenhsou cij rox aiq doenghheij aiq faenhsou he, Cangqdiq hozbiet ij cangj hawj faenhsou nej! Yienghneix guh, daiqlienz doengh boux sou ceiq he cungj caemh rox yienghneix guh hah! 47 Caiq hauhnaeuz faenhsou cij rox dongx gij baengzyoux faenhsou lah, yiengq caemh ij miz maz daekeiq nex! Yienghneix guh, daiqlienz doenghheij linghvaih minzcuz mbouj rox Cangqdiq he cungj caemh rox yienghneix guh hah. 48 Sojhij faenhsou wnggai guh boux simndei liuxliux he, caemh luj Bohmbwn faenhsou yienghmwnq ndei liuxliux he.”
1 Yehsuh vanzlij caiq naeuz: “Faenhsou ij siujsim, mbouj ndaej guqiq youq dangqnaj vunzlai loh hawj vunz rox hawj vunz raen mwngz guh gijmaz gijmaz ndeisaeh; hauhnaeuz yienghmwnq, couh mbouj ndaej dajlaeng Bohmbwn faenhsou mwnq ndaej gijmaz cangj lo. 2 Sojhij, mwngz hawj vunz mwhde, gaejyungh dauqcawq cej naeuz vunz ni; gaejyungh luj doengh boux gyajcang guh simndei mwnq youq veiqdangz cixnaeuz youq gwnz gai soj guh hih yienghmwnq siengj hawj vunz haenh gyoengqde. Gou saedsaeh naeuz sou ni, gyoengqde yienghneix guh cijmboujgoq caenhgag ndaej hawj vunz haenh yiengh dog lah, gaenhbaenj mbouj ndaej daengz Cangqdiq dih gijmaz. 3 Mwngz hawj vunz mwhde, gaejyungh hawj fawz swix rox fawz gvaz guh gijmaz. Couh dwg naeuz hawj vunz, gaejyungh ngeix daengz: ‘Gou yienghneix guh vunz rox mbouj rox nej’ yienghneix. Gou naeuz sou ni, siengj guh couh guh bax; 4 mboujyungh guqiq hawj vunz rox. Yienghneix, yawj vunz cingx goq gingq bohliz bae hih Bohmbwn faenhsou, de gaengjdingq cangj hawj faenhsou hih. 5 “Faenhsou gouz Cangqdiq haenh Cangqdiq hih mwhde, mbouj ndaej luj doengh boux cang guh vunz simndei simsoh mwnq, haenj ndwn youq veiqdangz cixnaeuz youq gwnz gai mwnq vunz lai he gouzhaenh Cangqdiq hawj vunz yawj. Gou saedsaeh naeuz sou ni, gyoengqde yienghneix guh, cijmboujgoq caenhgag ndaej yienghneix hwj lah; Cangqdiq gaenhbaenj mbouj dawz haeuj rwz gij saeh gyoengqde. 6 Gou saedsaeh naeuz sou ni, faenhsou gouz Cangqdiq haenh Cangqdiq mwhde, wnggai haeuj ndaw fungh maj haep dou hwj gouzhaenh boux faenhsou aeu ra ma yawj mbouj raen dih Bohmbwn, yienghneix boux yawj vunz cingx goq gingq bohliz bae dih Bohmbwn faenhsou gaengjdingq hoh fuk hawj faenhsou. 7 “Faenhsou gouzhaenh Cangqdiq, caemh mbouj ndaej luj lingh minzcuz yienghmwnq raemhraemh raexraex. Gyoengqde naemqnaeuz raemhraemh raexraex gouzhaenh gyoengqde dih cwnz, gyoengqde dih cwnz couh gaengjdingq dingq gyoengqde. 8 Faenhsou ciengeiz mbouj ndaej hag gyoengqde, aenvih faenhsou mijyaengz hoi bak gouzhaenh haem, Bohmbwn faenhsou cix rox faenhsou ij aeu gijmaz lo. 9 Sojhij, faenhsou gouzhaenh Cangqdiq nex, ij yienghneix naeuz: Bohmbwn raeuz hax, caenhgag mwngz cij dwg caencwnz; Vunz ij soenhcungq mwngz. 10 Muengh gij gienzveih mwngz youq lajmbwn fazveih. Muengh gij cawjeiq mwngz ndaej youq lajmbwn doiqyienh, Caemh luj youq gwnzmbwn doiqyienh yienghmwnq. 11 Muengh mwngz nyok hawj raeuz ngoenznaengz ij gw he. 12 Gouz mwngz mienx gij coih raeuz, Aenvih raeuz caemh mienx doengh boux daekcoih raeuz he lo. 13 Caemh muengh raeuz mbouj ngaiz yungx bae guh vaihsaeh; Gouq gyoengqraeuz duet ok boux simdoeg simsieb mwnq. Aenvih caenhgag mwngz cij dwg vuengz, cij miz gienz, cij boiqndaej vunz haenh, yungjyenj haenh roengzbae. Ahmaenz. 14 Hauhnaeuz faenhsou rox nyiuz vunz, Bohmbwn faenhsou caemh nyiuz faenhsou; 15 yiengq fanjgoqma, hauhnaeuz faenhsou mbouj rox nyiuz vunz nex, Bohmbwn faenhsou caemh mbouj nyiuz faenhsou hih.” 16 Yehsuh gangj daengz dineix le, vanzlij caiq naeuz: “Gou saedsaeh naeuz sou ni, faenhsou lekdungx gouzhaenh Cangqdiq mwhde, mbouj ndaej luj doenghheij gyajcang guh simndei simsoh mwnq, cang guh hojyouq, najheu hwj guqiq hawj vunz rox de lekdungx hwj gouzhaenh Cangqdiq. Gou saedsaeh naeuz sou ni, gyoengqde cijmboujgoq caenhgag ndaej hawj vunz rox yienghneix hwj lah. 17 Gou caiq naeuz sou ni, faenhsou lekdungx gouzhaenh Cangqdiq hih mwhde, ij swiq naj roi raeuj ndei; 18 mbouj ndaej hawj vunz yawj ndaej ok faenhsou lekdungx, caenhgag hawj boux aeu ra ma yawj mbouj raen dih Bohmbwn faenhsou rox ndaej lo. Yienghmwnq, yawj vunz cingx goq gingq bohliz bae dih Bohmbwn faenhsou, de gaengjdingq hoh fuk hawj faenhsou.” 19 Yehsuh youhcaiq naeuz: “Faenhsou mbouj ndaej vih bonjfaenh hwj youq lajmbwn rom doxgaiq, rom cienzcaiz, aenvih lajmbwn miz non sae, caemh ngaiz hwnj singq hwnj naej, caemh miz caeg daeuj caeg aeu. 20 Sojhij faenhsou ij rom cienzcaiz hih, wnggai rom youq gwnzmbwn, aenvih gwnzmbwn mbouj miz non sae, mbouj rox hwnj singq hwnj naej, caemh mbouj miz caeg daeuj caeg. 21 Faenhsou wnggai rox, cienzcaiz youq mwnqlaw, aen sim caemh youq mwnqlaw.” 22 De caiq naeuz: “Cehra faenhsou caemhdangq gwnz ndang faenhsou hih aen daeng he. Ceh de rongh, baenx ndang cungj caemh rongh; 23 hauhnaeuz ceh de fangz, baenx ndang cungj caemh laep, ndaw sim de caemh laep, yiengq couh youqgaenj lo!” 24 De caiq naeuz: “Bouxhoiq he mbouj ndaej swqhaeuh song bouxcawj; mbouj nex, de gaengjdingq haenj boux he, yiem boux he, cixnaeuz naek boux he, mbaeu boux he. Sojhij faenhsou mbouj ndaej gingqbaiq Cangqdiq caiq baiqfug ngaenz. 25 “Sojhij gou caiq saedsaeh naeuz sou ni, gaejyungh vih gw vih daenj hwj you, aenvih mingh dij goq gij gw, aen ndang dij goq buh. 26 Hawjm'z ngeixngeix yawj hux, doenghheij roeg mbin gwnz mbwn, gyoengqde cungj mij ndaem mij sou, caemh mij canghguq, hoeng, Bohmbwn faenhsou ciuqyiengh ciengx gyoengqde, ciuqyiengh mij hawj gyoengqde ngaiz rai iek. Gangjnaeuz faenhsou, faenhsou mbouj beij duz roeg dij ndaej lai haz? 27 Caiq gangjnaeuz faenhsou dineix, miz byawz gauq baengh you le ndaej hawj bonjfaenh lai souhyienz diemjcung he nej? 28 “Gou vanzlij caiq naeuz faenhsou hax, faenhsou vihmaz ij vih daenj hwj you nej? Faenhsou ngeixngeix yawj hux, doengh go va bwzhoz rogndoi, doengh go de dwg baenzlaw hwnj hwnjdaeuj hih. Go de cix mbouj hoj guh hong, cix mbouj hoj daemj faiq, 29 hoeng, gou naeuz sou ni, cungjsuenq Sojlozmaenz goengjvuengz neix, youq mwh de ceiq ing'yungz ceiq yungzdaeuz hih mwh he daenj hih buh cungj mbouj ndaej beij duj va bwzhoz gyaeu haem hwx. 30 “Heix, faenhsou hax, sinq Cangqdiq sinq daiq noix lai lo. Hawjm'z yawjyawj hux, doenghheij nyaengq rogndoi hax, doengh go de hwnj le, goq mbouj geijlwh ngoenz couh ngaiz aeu ma dwk feiz lo. Hoeng, Cangqdiq ciuqyiengh doiq go de ndei, hawj go de heu swdswd. Gangjnaeuz dwg faenhsou hwx, de mbouj engqgya ij hawj buh hawj faenhsou daenj haz? 31 “Sojhij, faenhsou gaejyungh yousim febfeb, you naeuz ij gw gijmaz, ij daenj gijmaz. 32 Doenghheij vunz vih gw vih daenj hwj you hih cungj dwg doenghheij minzcuz mbouj rox Cangqdiq he lah. Faenhsou ij aeu gijmaz, ij gw gijmaz, Bohmbwn faenhsou cungj rox. 33 Aen sim faenhsou wnggai sien yiengq aen guek Cangqdiq, caemh guh gij hab'eiq habhoz de he; yienghmwnq faenhsou hih gwgw daenjdaenj sojmiz hih, de cungj swhmboujyienz hawj faenhsou. 34 “Sojhij hax, faenhsou gaejyungh vih ngoenzcog hwj you, aenvih ngoenzcog miz ngoenzcog hih you; ngoenz he nanz, ngoenz he dang couh ndaej lo.”
1 Yehsuh vanzlij caiq naeuz: “Faenhsou gaejyungh lwnh naeuz vunz, dwg vunz ndei vunz rwix. Yienghmwnq faenhsou couh mbouj ngaiz Cangqdiq naeuz faenhsou lo, 2 aenvih faenhsou baenzlaw naeuz vunz, Cangqdiq caemh baenzlawz naeuz faenhsou; faenhsou aeu gijmaz ma rau hawj vunz, Cangqdiq caemh doxdoengz aeu gijmaz ma rau hawj faenhsou. 3 “Faenhsou vihmaz caenhgag yawj ndaej raen ndaw ra boux beixnuengx mwngz miz nwnh faex, dauq yawj mbouj raen ndaw ra bonjfaenh miz gyaengh faex nej? 4 Ndaw ra mwngz lij miz faex, mwngz ij baenzlaw ndaej naeuz boux beixnuengx mwngz naeuz: ‘Daeuj, daengj gou dawz nwnh faex ndaw ra mwngz ok,’ yienghneix naeuz nej? 5 Gyajcang guh vunz simndei simsoh hih mwngz hax! Gou naeuz mwngz hax, mwngz vanzlij dwg sien dawz gyaengh faex ndaw ra mwngz ok bax! Yienghmwnq mwngz cij yawj ndaej raen cingsuj, cij ndaej dawz nwnh faex ndaw ra boux beixnuengx mwngz ok hah. 6 “Mbouj ndaej dawz doenghgij hab hawj Cangqdiq he hawj duz ma, caemh mbouj ndaej dawz cinhcuh gveng youq dangqnaj duz mou, hoengjlau duz de caij le, caiq veq goqma haeb yungz faenhsou.” 7 Yehsuh caiq naeuz: “Gou naeuz sou ni, faenhsou gouz, couh hawj faenhsou; faenhsou cimh, couh hawj faenhsou cimh ndaej raen. Faenhsou ndaek dou, couh hoi dou hawj faenhsou. 8 Aenvih famz gouz gijmaz hih, couh ndaej gijmaz; cimh gijmaz hih, couh ndaej raen gijmaz; ndaek dou hih, couh hoi dou hawj. 9 “Faenhsou ndaw neix miz byawz guh boh hih, lwg heuh aeu bingj, dauq aeu rin hawj de nej? 10 Heuh aeu bya, dauq aeu ngwzdoeg dangq bya ma hawj de nej? 11 Gannaeuz faenhsou mbouj suenq dwg vunz ndei lah, hoeng, vanzlij rox ij aeu gij ndei he hawj lwg, gangjnaeuz dwg Bohmbwn faenhsou, de mbouj engqgya ij dawz gij ndei he hawj doengh boux gouz de he haz? 12 Sojhij, mboujguenj gijmaz saeh, faenhsou muengh vunz baenzlawz doiq faenhsou, faenhsou caemh ij baenzlaw doiq vunz. Gij neix cungj dwg Mohsih dih fazliz caeuq boux cenz gij vah Cangqdiq soj gangj hih.” 13 Yehsuh caiq naeuz: “Gou naeuz sou ni, faenhsou wnggai haeuj aen dou gaeb mwnq bae, aenvih doeng haeuj rai haeuj satsoq hih dou dwg gvangq hih, diuz roen de caemh gvangq, miz haujlai vunz haeuj bae. 14 Hoeng, doeng haeuj seiqseiz lix hih aen dou mwnq dwg gaeb hih, diuz roen de caemh dwg gaeb hih, cimh ndaej raen hih vunz caemh noix.” 15 De caiq naeuz: “Faenhsou ijaeu daezfuengz doenghheij gyaj hih boux cenz gij vah Cangqdiq. Gyoengqde daeuj laeng faenhsou dineix luj duz menzyiengz yienghmwnq soh semxsemh, hoeng, gizsaed gyoengqde caenh luj duz langz yienghmwnq ijsiengj haih faenhsou lah. 16 Aeu gyoengqde soj guh hih ma yawj, couh yawj ndaej ok gyoengqde dwg guxmaz vunz. Caz oen ij baenz ndaej dawz mak buzdauz nej? Caz cah caemh ij baenz ndaej dawz mak uzvahgoj nej? 17 Caemh doxdoengz, faex ndei dawz mak ndei; faex yaez dawz mak yaez. 18 Faex ndei mbouj dawz mak yaez; faex yaez mbouj dawz mak ndei. 19 Famz mbouj dawz mak ndei hih couh ij ngaiz raemj dwk haeuj feiz bae. 20 Sojhij faex ndei faex yaez yawj gij mak de couh ndaej faen okdaeuj, caemh doxdoengz, dwg mbouj dwg boux gyaj hih boux cenz gij vah Cangqdiq, couh aeu gyoengqde soj guh hih ma yawj couh yawj ndaej ok.” 21 Yehsuh vanzlij caiq naeuz: “Gou naeuz sou ni, mbouj dwg naeuz byawz heuh gou ‘Bouxcawj hax bouxcawj,’ heuh hwj dwk sadsad couh ndaej gaep haeuj aen guek Cangqdiq law; caenhgag doengh boux ciuq gij cawjeiq Bohmbwn gou bae guh hih cij ndaej gaep haeuj guek Cangqdiq lah. 22 Yiengq daengz ngoenz saemjbuenq hih ngoenz mwnq, gaengjdingq miz haujlai vunz doiq gou naeuz: ‘Bouxcawj hax bouxcawj, raeuz mbouj dwg hij gij mingzhiq mwngz bae cenz gij vah Cangqdiq caeuq hij gij coh mwngz bae boenq fangz caeuq bae guh doenghgij geizmiuj hih saeh maz?’ 23 Hoeng, daengz mwhmwnq, gou couh gaengjdingq ij doiq gyoengqde naeuz: ‘Gou coengzlaiz mbouj rox faenhsou goq; doenghheij vunz doegdoeg siebsieb faenhsou hax, deuz! Mbouj ndaej daeuj dep gou!’” 24 Yehsuh vanzlij caiq naeuz: “Faenhsou dingq daengz gij vah gou caemh ciuq gij vah gou bae guh hih vunz, couh luj boux coengjmingz he hwnq ranz hwnq youq gwnz rin. 25 Yienghmwnq cungjsuenq naeuz miz rumz hung fwn hung daeuj bongx, miz raemxdumh daeuj cung, aen ranz neix ciuqyiengh gaenj dwtdwt mij doengh saek di, aenvih aen de dwg hwnq youq gwnz rin he. 26 Yiengq famz dingq daengz gij vah gou, hoeng, dauq mij ciuq gij vah gou bae guh hih vunz, couh luj boux vunz ngawzngad he, hwnq ranz hwnq haeuj anjsa bae. 27 Baex daengz miz rumz miz fwn daeuj ci daeuj bongx, miz raemxdumh raemxrongz daeuj cung he, aen ranz neix couh doq doemqdak liux.” 28 Yehsuh gangj doenghgij vah neix sat le, gyoengq vunz cungj raen geizheih de soj gangj hih vah, 29 aenvih de soj gangj hih cungj mbouj luj doenghheij fazliz cenhgyah soj gangj hih, caenh luj boux miz gienzveih he soj gangj hih lah.
1 Yehsuh gangj doenghgij neix sat le, gajlaeng de couh daj gwnz bya roengz ma. Yiengq miz baenx haujlai vunz daeuj gaen de. 2 Youq mwnq miz boux hwnj mazfung he daeuj daengz dangqnaj de couh gvih youq dangqnaj de doiq de naeuz: “Bouxcawj gou hax, cijaeu mwngz haenjheiq, mwngz gaengjdingq ndaej yw gou ndei, hawj gou ndaej gancengh.” 3 Yehsuh raen yienghneix le, couh iet fawz oemj laeng de bae, couh doiq de naeuz: “Gou haenj yw mwngz hah; mwngz ndei lo bax!” Yehsuh baex gangj gawq neix he, boux de couh doq ndei lo. 4 Gajlaeng, Yehsuh doiq boux de naeuz: “Mwngz ciengeiz mbouj ndaej gangj gij saeh neix naeuz vunz ni! Mwngz ij bae laeng boux guh dajbwiz he hawj de gyenjcaz yawj, caemh ij ciuq Mohsih dih gveihdingq, dawz gij dajbwiz bae bwiz Cangqdiq, hawj gij vunzlai cingqmingz naeuz mwngz bingh ndei lo.” 5 Yehsuh daj gwnz bya roengz ma bae daengz Gyahbwznungz Singz. Yiengq youq mwnq miz boux Lozmaj lienzcangj he daeuj gouz de, naeuz: 6 “Bouxcawj gou hax, bouxhoiq gou gyad hwj. De cienfanh indot he, seizneix ninz youq ndaw ranz.” 7 Yehsuh dingq de yienghneix naeuz le, couh naeuz: “Daengj gou bae yw de.” 8 Boux lienzcangj dingq de yienghneix naeuz le, couh han de naeuz: “Bouxcawj gou hax, mwngz ij bae ndaw ranz gou, hoeng gou mbouj boiqndaej hawj mwngz bae hah. Gou naeuz, cijaeu mwngz naeuz gawq vah he, bouxhoiq gou couh gaengjdingq ndaej ndei lo. 9 Caemh luj youq baixgwnz gou miz bouxguen cijveih gou, youq baixlaj gou caemh miz binggyep dingq gou cijveih. Cijaeu gou mingqlingq bouxlawz naeuz: ‘Bae!’ Bouxlawz couh bae; naeuz: ‘Daeuj!’ bouxlawz couh daeuj; doiq bouxhoiq gou naeuz: ‘Mwngz guh gij neix gij neix’ de couh bae guh lo.” 10 Yehsuh dingq daengz gij vah neix le, cungj raen geizheih ij rai bae. De couh doiq gij vunz gaen de mwnq naeuz: “Gou saedsaeh naeuz sou ni, luj de yienghneix baenxlai miz sinqsim hih vunz, cungjsuenq naeuz youq ndaw Hijswzlez vunz ndaw de, gou cungj mijyaengz raen miz goq. 11 Gou caiq naeuz sou ni, baezneix ij miz haujlai linghvaih minzcuz hih vunz daj fueng baixdoeng caeuq fueng baixsae daeuj, daeuj caeuq Yaqbwzlahhanj, Hijsaj, Yajgoz itheij youq ndaw guek Cangqdiq gw laeuj. 12 Hoeng, baenjlaiz wnggai ndaej gaep haeuj guek Cangqdiq hih Hijswzlez vunz, dauq mij ndaej gaep haeuj, dauq ngaiz boenq ok rog mwnq laep saengxsaengx he bae, youq rog haeb faenz haeb heuj hwj daej ngwdngwd.” 13 Yehsuh doiq gij vunz yienghneix gangj sat le, couh doiq boux Lozmaj lienzcangj mwnq naeuz: “Mwngz maj ranz bax! Gaengjdingq ciuq mwngz soj sinq hih yienghmwnq guh hawj mwngz.” Couh youq mwhneix, bouxhoiq de couh doq ndaej ndei lo. 14 Gajlaeng Yehsuh bae laeng Bijdwz. De raen mehdai Bijdwz fatbingh fatndat ninz youq gwnz congz. 15 De raen yienghneix le, couh baex lax gij fawz mehdai de, meh de couh doq ndei lo. De ndei le, couh hwnq daeuj daih Yehsuh. 16 Yiengq daengz yiengqhaemh, miz vunz daiq baenx haujlai vunz ngaiz fangz doz he daeuj daengz Yehsuh mwnq, siengj hawj Yehsuh bang gyoengqde boenq fangz. Yehsuh raen yienghneix le, baex naeuz gawq he lah, doenghheij fangz mwnq couh doq boenq okma lo. Youq mwnq, de caemh yw ndei sojmiz hih vunz bingh. 17 De yienghneix guh ngamq lingz ok Hijcaiqyaq boux cenz gij vah Cangqdiq neix soj gangj hih vah: De dingj gij bingh gyoengqraeuz, bang rap gij in gyoengqraeuz. 18 Yehsuh raen miz baenx haujlai vunz daeuj gvaengz de le, couh doiq gyoengq lwgsae de naeuz: “Gyoengqraeuz naengh ruz goq doiqmienh huz mwnq bae bax.” 19 Couh youq mwhneix, miz boux fazliz cenhgyah he goq daeuj doiq de naeuz: “Lauxsae, mboujguenj mwngz bae daengz mwnqlaw, gou cungj gaen mwngz bae daengz mwnqlaw.” 20 Yehsuh dingq le, han naeuz: “Huzliz vanzlij miz congh, roeg lij miz rongz, hoeng, gou, Vunz dih Daiqbiuj, daiqlienz mwnq ndwn he cungj mbouj miz.” 21 Mwhde caemh miz boux lwgsae he caemh doiq Yehsuh naeuz: “Bouxcawj hax, cingj mwngz hawj gou sien maj moek daxboh gou gaenq.” 22 Yehsuh dingq le, couh yungh gij beijgangj he ma doiq de naeuz: “Hawj vunzrai bae moek gij vunzrai gyoengqde bax! Mwngz caenhrox daeuj gaen gou ndaej lo.” 23 Couh yienghneix, Yehsuh couh hwnj ruz bae; gyoengq lwgsae de caemh gaen de hwnj ruz bae. 24 Sawqmwh gwnz huz fan miz ndaek raq rumz hung he. Rumz hung ci hwj gij raemx biu hwnjdaeuj yungyiemj raixcaix, ij mauh goq aen ruz senxsenx bae, hoeng, mwhde Yehsuh dauq ninz hwj ndaek fwjfwq. 25 Gyoengq lwgsae de raen yienghneix le, cungj simvueng hwj vaiqdi heuh Yehsuh singj; gyoengqde naeuz: “Bouxcawj, bouxcawj! Vaiqdi gouq gyoengqraeuz bax! Gyoengqraeuz couh ij ngaiz rai raemx lo!” 26 Yehsuh dingq gyoengq lwgsae yienghneix hemq le, couh doiq gyoengq lwgsae de naeuz: “Doenghheij mbouj gaeuq sinq gou hih faenhsou hax, vihmaz baenxlai lau nej?” De yienghneix naeuz le, couh ndwn hwnjdaeuj ndaq gij rumz caeuq gij bohlangq, yiengq rumzrumz raemxraemx couh doq dinghcub lo. 27 Gyoengq lwgsae raen yienghneix le, cungj raen geizheih ij rai bae, couh gag naeuz: “Geizheih, geizheih! Boux vunz bouxn'x, dauqdaej dwg byawz hax? De mingqlingq rumz caeuq raemx, gingqyienz rumzrumz raemxraemx cungj dingq de!” 28 Couh yienghneix, Yehsuh naengh ruz bae daengz doiqmienh huz dieg Gyahdaqlah. Youq mwnq miz song boux ngaiz fangz doz he daj ndaw gumz moh ok daeuj daengz dangqnaj de. Song boux de cienfanh yak he; bienqnaengz mij'z vunz gamj byaij goq diuz roen mwnq bae. 29 Song boux de ok daeuj baex raen Yehsuh he le, couh hemq naeuz: “Cangqdiq dih lwg hax, raeuz caeuq mwngz miz maz gvanhaeh nex? Mijyaengz daengz ngoenz saemjbuenq haem; mwngz couh daeuj dineix hawj gyoengqraeuz souh haemz souh hoj lo mah?” 30 Yiengq ngamqluj mwhneix youq mwnq mbouj geijlwh gyae, miz ndaek gyoengq mou he youq mwnq gw doxgaiq. 31 Gajlaeng, duz fangz doz youq gwnz ndang mwnq couh gouz Yehsuh naeuz: “Hauhnaeuz mwngz ij boenq gyoengqraeuz okbae nex, couh boenq gyoengqraeuz haeuj ndaw gyoengq mou mwnq bae bax!” 32 Yehsuh raen yienghneix le, couh naeuz: “Bae bax!” De baex naeuz gawq neix he, duz fangz couh majcangq ok ma ndaenj haeuj gwnz ndang gyoengq mou mwnq bae lo. Yiengq, gyoengq mou mwnq couh cung roengz ndaw huz bae rai liux lo. 33 Boux ciengx mou mwnq raen yienghneix le, couh majcangq riq haeuj singz bae gangj naeuz vunz ni song boux ngaiz fangz doz mwnq soj roeb daengz hih saeh. 34 Gajlaeng, baenx cenz singz hih vunz cungj ok daeuj yawj. Gyoengqde raen Yehsuh le, couh gouz Yehsuh, hawj Yehsuh bae daixlingh mwnq, mbouj youq mwnq dieg gyoengqde youq.
1 Couh vih yienghneix hwj Yehsuh couh dauq hwnj ruz bae, dauq ma daengz baih huz baihneix, couh dwg de youq hih aen singz mwnq. 2 Yiengq youq mwnq miz vunz aeu damqgyaq ma ram boux vunz gyad he daeuj daengz de mwnq, siengj hawj de yw. De raen gyoengqde miz baenxlai sinqsim le, couh doiq boux vunz gyad mwnq naeuz: “Baengzyoux hax, coengqsim bax, gij coih mwngz gaenq ndaej mienx lo.” 3 Yiengq youq mwnq miz geij boux Youzdaiq fazliz cenhgyah he raen Yehsuh yienghneix naeuz le, ndaw sim couh gag naemj: “Ndaek ngauqm'z dwg byawz nex? Mwngz gaenhbaenj mbouj miz gij gienz Cangqdiq, hoeng, gingqyienz gamj gangj gij vah daekcoih Cangqdiq he.” 4 Gajlaeng, Yehsuh rox daengz ndaw sim gyoengqde ngeix gijmaz le, couh doiq gyoengqde naeuz: “Ndaw sim faenhsou vihmaz ij naemj gij doegdoeg siebsieb he nej? 5 Gou rox faenhsou mbouj sinq gou miz gij gienz Cangqdiq ndaej hawj vunz mienx coih he, aenvih mienx coih, vunz yungh ra ma yawj mbouj raen hih. Hoeng, hauhnaeuz gou heuh hawj vunz ndaej ndwn hwnjdaeuj nex, faenhsou couh rox gou miz gij gienz Cangqdiq lo. 6 Gou seizneix couh cingqmingz hawj faenhsou yawj, gou, Vunz dih Daiqbiuj, dwg lajmbwn boux miz gienz ndaej mienx coih he dih vunz he.” Yehsuh gangj doengh gawq neix sat le, couh doiq boux vunz gyad mwnq naeuz: “Gou naeuz hawj mwngz ndwn hwnjdaeuj! Dawz aen damqgyaq mwngz maj ranz lo bax!” 7 Yehsuh ngamq gangj gawq neix sat bak, boux vunz gyad mwnq couh doq youq dangqnaj vunzlai ndwn hwnjdaeuj, couh maj ranz lo. 8 Guh hwj youq mwnq hih vunz yawj hwj ra byaengqbyat bae, couh haenh Cangqdiq, aenvih de dawz gij gienz neix soengq hawj vunz. 9 Yehsuh yw boux vunz gyad mwnq ndei le, couh daj aen singz mwnq ok ma bae daixlingh mwnq. De bae hih mwhde, de yawjraen miz boux vunz guh sou ceiq he naengh youq mwnq sou ceiq mwnq; gij coh boux de heuh Majdaiq. De raen le, couh doiq boux de naeuz: “Daeuj gaen gou bax!” Majdaiq dingq Yehsuh yienghneix naeuz le, couh majcangq ndwn hwnjdaeuj, couh gaen Yehsuh bae lo. 10 Gajlaeng, Yehsuh caeuq doenghheij lwgsae de youq ndaw ranz Majdaiq gw haeux hih mwhde, miz haujlai guh sou ceiq he caeuq doenghheij vunz vaih he caemh daeuj caeuq Yehsuh caeuq doenghheij lwgsae de itheij gw haeux. 11 Yiengq, doenghheij gaep haeuj Fazliqcaiq baij he raen le, couh naeuz gij lwgsae Yehsuh naeuz: “Boux lauxsae faenhsou vihmaz caeuq doenghheij vunz guh sou ceiq, doenghheij vunz vaih mwnq gw haeux gw laeuj nej?” 12 Yehsuh dingqri gij vah neix le, couh yungh gij beijgangj he ma naeuz: “Ndang cangq hih vunz mboujyungh canghyw nej; yungh canghyw hih cungj dwg doenghheij vunz miz bingh he lah. 13 Cingq luj ndaw Singqgingh ndaw de sij naeuz: Gou haenj hih dwg hojsik vunz, mbouj haenj gij dajbwiz he nej. Faenhsou gag bae naemjnaemj gawq neix yawj dwg gijmaz iqswh bax! Aenvih gou daeuj dineix, mbouj dwg hawj gij vunz gag naemqnaeuz bonjfaenh mij'z coih he daeuj gaen gou nej, dauq dwg hawj gij vunz nginh naeuz bonjfaenh miz coih he daeuj gaen gou lah.” 14 Mwhde miz gij lwgsae guh sijlij dih Yozhanq daeuj cam Yehsuh naeuz: “Gyoengqraeuz caeuq doenghheij gaep haeuj Fazliqcaiq baij hih vunz siengzseiz cungj lekdungx hwj gouzhaenh Cangqdiq, hoeng, gij lwgsae mwngz vihmaz mbouj lekdungx hwj gouzhaenh Cangqdiq nej?” 15 Yehsuh dingq le, couh yungh gij beijgangj he ma doiq gyoengqde naeuz: “Faenhsou raen mbouj raen goq miz gojyez moq aeu yah cingj laeuj, gij hek de siengsim nej? Raen lwi? Hoeng gou naeuz sou ni hax, baex daengz ngoenz vunz daeuj gaemh dawz gojyez moq bae he, daengz mwhmwnq, gyoengqde couh ij lekdungx lo.” 16 Yehsuh vanzlij yungh gij beijgangj he ma naeuz: “Mij'z vunz naeuz aeu gij boiq mijyaengz swt raemx he ma fong haeuj buh vaih buh rwix bae; yienghmwnq hawj diuz buh vaih mwnq vaih engqgya lai, engqgya gvangq. 17 Caemh mij'z vunz naeuz dawz laeuj moq coux haeuj daehnaeng gaeuq bae; hauhnaeuz yienghneix, daehnaeng ngaiz ceg, laeuj caemh ngaiz roh okdaeuj. Dauqfanj ij dawz laeuj moq coux haeuj daehnaeng moq bae lah. Yienghneix song yiengh cungj ndaej baux.” 18 Yehsuh gangj gij beijgangj neix hih mwhde, miz boux dang veiqdangz daeuzdaeuz he daeuj daengz dangqnaj Yehsuh couh gvih bomz roengzbae gouz Yehsuh naeuz: “Lauxsae, gouz mwngz bae ndaw ranz gou bax, aenvih dahlwg gou daxbaenh ngaiz rai lo. Gouz mwngz bae oemj fawz haeuj gwnz ndang de bae. Mwngz oemj de, de couh gaengjdingq ndaej dauqlix.” 19 Yehsuh raen yienghneix le, couh hwnq gaen boux de bae lo. Gyoengq lwgsae de caemh gaen de bae. 20 Couh youq mwh Yehsuh gaen boux veiqdangz daeuzdaeuz bae hih mwhde, miz boux vunzbaz he, de ndwennaengz miz gij doxgaiq daeuj cungj daeuj mbouj dingz goq he, gaenq miz cibngeih bi yienghneix lo. De daeuj daengz baixlaeng Yehsuh le, couh mo gij dinbuh baixlaeng de, 21 aenvih boux vunzbaz mwnq gag naemj: “Cijaeu gou ndaej mo dawz gij dinbuh de, gij bingh gou couh gaengjdingq ndaej ndei lo.” 22 Yiengq, Yehsuh rox le, couh veq goqma, couh yawjraen de, couh doq doiq de naeuz: “Dahnuengx hax, mwngz coengqsim bax; gij sinqsim mwngz ndaej gouq mwngz lo.” Couh daj mwhmwnq hwnj, boux vunzbaz mwnq couh ndei liux lo. 23 Caiq gangj daengz Yehsuh gaen boux veiqdangz daeuzdaeuz mwnq, bae daengz ndaw ranz de le, yawjraen gij vunz ij oksang he boq dig, vunz cixcaemh cauz yuxyux. 24 De raen yienghneix le, couh doiq gyoengqde naeuz: “Ok bae! Faenhsou ok bae bax! Dahlwg neix mij dwg rai law; dwg ninz ralaep lah!” Gyoengq vunz mwnq raen de yienghneix naeuz le, cungj lengxriu de. 25 Yehsuh boenq gyoengq vunzlai okbae le, couh haeuj ndaw fungh dahlwg mwnq bae, couh rag dawz gij fawz dah de; dah de couh doq hwnq hwnjdaeuj. 26 Couh yienghneix, gajlaeng gij siuhsiz neix cungj cenz bae baenx cenz diqgih mwnq liux. 27 Gajlaeng, Yehsuh dajlaeng boux veiqdangz daeuzdaeuz mwnq ok ma, bae daixlingh mwnq. De bae hih mwhde, miz song boux rafangz gaen youq gajlaeng de, hemq naeuz: “Daqveiq dih lwglan hax, hojsik hojsik raeuz bax!” 28 Yehsuh dingq daengz yienghneix le, couh haeuj aen ranz he bae; song boux rafangz mwnq caemh gaen haeuj bae, bae daengz dangqnaj Yehsuh. Gajlaeng, Yehsuh couh cam song boux mwnq naeuz: “Faenhsou sinq gou ndaej guh daengz gij saeh neix haj?” Song boux de dingq le, couh doq han naeuz: “Bouxcawj gou hax, raeuz sinq!” 29 Yehsuh dingq song boux de yienghneix han le, couh mo song boux de, mo song cehra, couh naeuz: “Ciuq faenhsou sinq hih yienghmwnq guh hawj faenhsou lo.” 30 Yehsuh baex yienghneix naeuz he le, song boux de couh doq ndaej yawjraen lo. Gajlaeng, Yehsuh couh raengq song boux de naeuz: “Faenhsou ij siujsim, ciengeiz mbouj ndaej naeuz vunz ni gij saeh neix.” 31 Hoeng, song boux de ok ma le, dauq dawz Yehsuh guh hih gij saeh neix cenz naeuz vunz ni, cenz baenx cenz diqgih mwnq liux. 32 Youq mwh song boux de daj Yehsuh mwnq ok ma hih mwhde, caemh miz vunz daiq boux vunz ngaiz fangz doz hwj ngoemx he daeuj cimh Yehsuh. 33 Yehsuh raen le, couh bang boux de boenq duz fangz okma. Duz fangz ok ma le, boux vunz ngoemx mwnq couh doq ndaej gangj vah okdaeuj lo. Gyoengq vunzlai raen yienghneix le, cungj raen geizheih ij rai bae, cungj naeuz: “Youq Hijswzlez, coengzlaiz mij raen miz gij saeh neix goq.” 34 Hoeng, gij vunz gaep haeuj Fazliqcaiq baij he dauq naeuz: “Ndaek gijn'x, miz maz nex! De cijmboujgoq dwg baengh Sajdanq duz fangzvuengz neix boenq fangz hwj mah.” 35 Gij saeh neix goq le, gajlaeng, Yehsuh bae gak mbanj gak singz bae, bae gak aen veiqdangz bae son vunz, cenzgangj guek Cangqdiq dih ndei siuhsiz, caemh bang vunz yw bingh, yw ndei gak cungj gak bingh. 36 Gajlaeng de raen miz haujlai vunz miz nanh, mij saek yiengh ndaej baengh, caenh luj gyoengq yiengz mij boux ciengx yiengz he le, couh hojsik hwj ij rai bae, 37 couh yungh gij beijgangj he ma doiq gyoengq lwgsae de naeuz: “Ij ndaej sou hih haeuxhaeux mienhmienh lai hoh, hoeng, gij vunz sou he daiq noix lai lo. 38 Sojhij faenhsou ij wnggai gouz bouxcawj haeuxmienh mwnq lai baij vunz bae sou cij ndaej.”
1 Miz baez he, Yehsuh heuh cibngeih boux lwgsae de daeuj doxcomz, daeuj soengq gienz hawj gyoengqde, hawj gyoengqde ndaej boenq fangz caeuq ndaej yw gak cungj bingh. 2 Laj neix couh dwg cibngeih boux lwgsae de dih coh; cibngeih boux lwgsae neix, gyoengqde caemh heuh cibngeih boux dwzbaijyienz: Daixit boux couh dwg Sihmaenz (Sihmaenz caemh heuh Bijdwz), gajlaeng daengz daegnuengx de, Anhdwzlez. Gajlaeng daengz song daeglwg Sihbiqdaiq, Yajgoz caeuq Yozhanq. 3 Gajlaeng caiq daengz Feihliz caeuq Bahdohlozmaij, caeuq Dohmaj caeuq guh sou ceiq dih Majdaiq, caiq daengz daeglwg Yaqlwzfeih Yajgoz, gajlaeng caiq daengz Dazdaiq, 4 caiq daengz Gizcwnq Dangj dih Sihmaenz, vanzlij miz cuzmaiq Yehsuh dih Youzdaq, Gyahloz vunz. 5 Yehsuh heuh cibngeih boux lwgsae neix daeuj le, couh raengq gyoengqde naeuz: “Faenhsou mbouj ndaej bae dieg linghvaih minzcuz he, caemh gaejyungh haeuj aen singz Sajmajliqyaq vunz youq he bae, 6 dauq ij bae laeng gij vunz Hijswzlez, bae laeng doenghheij vunz luj duz yiengz yienghmwnq loengj roen he bae. 7 “Faenhsou ij itmienh bae itmienh cenz naeuz vunz ni: ‘Cangqdiq dih gienzveih couh ij fazveih lo.’ 8 Caemh ij yw bingh hawj vunz, hawj vunz ndaej dauqlix, hawj vunz mazfung ndaej ndei, bang vunz boenq fangz. Faenhsou begbeg ndaej hih gou nyok hawj faenhsou hih gienz hih; faenhsou couh ij wnggai sijndaej bang vunz. 9 “Faenhsou bae hih mwhde, gimgim ngaenzngaenz, cienzdoengz hih cienzdoengz cungj mbouj ndaej raek. 10 Caemh mbouj ndaej raek daeh raek buh raek haiz raek faexdwngx bae, aenvih faenhsou dwg guh gij hong Cangqdiq he; gunghyinz guh hong dwg wngdang ndaej gw ndaej yungh hih. 11 “Mboujguenj faenhsou haeuj aen singzlaw, aen mbanjlaw bae, cungj ij sien damqdingq yawj byawz simndei, nyienh'eiq daih faenhsou, faenhsou couh haeuj ranz byawz bae. Mbouj ndaej youq ranz dawz ranz; ij youq daengz faenhsou bae daixlingh mwnq bae. 12 Faenhsou haeuj ranzlawz bae, couh ij hoh fuk ranzlawz. 13 Hauhnaeuz ranz mwnq hih vunz vuenhringz faenhsou hih, faenhsou hoh hih fuk couh gaengjdingq ranz mwnq ndaej; hauhnaeuz ranzlawz mbouj vuenhringz faenhsou hih, faenhsou hoh hih fuk couh gvi hawj faenhsou boiz. 14 Yiengq, hauhnaeuz ranzlawz cixnaeuz dieglawz mbouj vuenhringz faenhsou hih, mbouj dingq gij vah faenhsou, faenhsou couh mbouj youq ranz mwnq dieg mwnq youq. Yiengq, ok ma hih mwhde, couh ij saemq din hawj gij boenqcingh gwnz din doek youq mwnq, yienghneix caemhdangq naeuz gingjgauq gyoengqde. 15 Gou saedsaeh naeuz sou ni, daengz mwh saemjbuenq hih mwhmwnq, mwnq hih vunz ij souh daengz fad hih ij camj goq gij vunz aen singz Sojdohmaj caeuq Ngozmohlah bae.” 16 Yehsuh vanzlij caiq doiq cibngeih boux lwgsae de naeuz: “Gou seizneix baij faenhsou ok bae caemhdangq luj duz yiengz ndaenj haeuj ndaw gyoengq langz bae ityiengh. Sojhij faenhsou ij siujsim, ij luj duz ngwz yienghmwnq gvai, caemh ij luj duz roegguqgap yienghmwnq soh. 17 Faenhsou ij daezfuengz vunz, aenvih gyoengqde ij gaemh dawz faenhsou bae gyau hawj fazdingz, ij youq veiqdangz doh faenhsou. 18-19 Faenhsou caemh ij ngaiz vih gou hwj ngaiz vunz gaemh dawz bae daengz goeng'ak mwnq bae saemj.Yiengq daengz mwhmwnq, faenhsou gaejyungh you ij baenzlaw gangj cixnaeuz ij gangj gijmaz; Cangqdiq swhmboujyienz son faenhsou, hawj faenhsou baenzlaw gangj. Daengz mwhmwnq, faenhsou couh ndaej youq dangqnaj gij vunz mwnq caeuq gij vunz linghvaih minzcuz he cingqmingz gou dwg byawz he lo. 20 Aenvih faenhsou soj gangj hih cungj mbouj dwg gij vah faenhsou, dauq dwg gij vah Hoenzsaenz Cangqdiq dunghgoq conghbak faenhsou ma gangj hih lah. 21 “Gou caiq naeuz sou ni, faenhsou caemh ij ngaiz gij vunz ndaw ranz bonjfaenh cuzmaiq, beixnuengx haih beixnuengx, bohmeh caeuq lwg doxmiz haemzcaeuz, doxhaih rai. 22 Faenhsou caemh vih gou hwj ngaiz vunz haenq. Hoeng, cijaeu faenhsou gyenhciz roengzbae, daengz gajlaeng faenhsou couh gaengjdingq ndaej gouq. 23 Yiengq, hauhnaeuz faenhsou ngaiz dieglawz hih vunz bwkhaih nex, faenhsou couh ij senj deuz bae daixlingh dieg. Hoeng, gou saedsaeh naeuz sou ni, faenhsou cungj mijyaengz ndaej byaij Hijswzlez sojmiz hih dieg liux haem hwx, Vunz dih Daiqbiuj cungj daeuj lux. 24 “Faenhsou wnggai rox, lwgsae mbouj beij lauxsae cungqyauq, bouxhoiq caemh mbouj beij bouxcawj cungqyauq. 25 Hoeng hauhnaeuz lwgsae ndaej caeuq lauxsae doxdoengz, bouxhoiq ndaej caeuq bouxcawj doxdoengz nex, baenz hoh. Yiengq, hauhnaeuz guh cawjranz hih ngaiz vunz ndaq naeuz: ‘Dihduz fangzvuengz Bezsihbuz mwngz!’ lo, ndaw ranz hih vunz mbouj engqgya caemh ngaiz vunz ndaq haz?” 26 Yehsuh vanzlij caiq naeuz: “Gou seizneix sien naeuz sou ni doenghgij saeh neix; faenhsou gaejyungh lau doenghgij vunz ij haih faenhsou he, aenvih Cangqdiq yo gijmaz hwnjdaeuj hih, swhmboujyienz miz ngoenz he de gaengjdingq hawj vunz rox hih, couh dwg naeuz de miz gijmaz miqmiz, de cungj hawj vunz rox. 27 Sojhij gou caegcaeg naeuz sou ni hih, faenhsou ij maixmingz gangj naeuz vunz ni; gou daep haeuj duj rwz faenhsou bae gangjngvap naeuz sou ni hih, faenhsou caemh ij hwnj dingjranz bae hemq naeuz vunz ni. 28 “Gaejyungh lau doengh boux caenhgag ndaej gaj aen ndangdaej faenhsou, dauq mij bonjsaeh ndaej haih daengz gij hoenzsaenz faenhsou he. Faenhsou ij lau, dauq lau boux miz gienz lienz vunz lienz hoenzsaenz cungj ndaej hawj youq ndaw mwnq fad fangz, mwnq satsoq he hih boux mwnq.” 29 Yehsuh youhcaiq naeuz: “Song duz roeglaej cijmboujgoq ngamq hai ndaej faen ngaenz he hwj lah, hoeng, hauhnaeuz Bohmbwn mbouj hawj nex, it duz cungj mbouj ngaiz doek roengz doem ma. 30 Gangjnaeuz faenhsou, de daiqlienz gij byoem faenhsou cungj geq goq hwx. 31 Sojhij, gou naeuz faenhsou gaejyungh lau; faenhsou youq ndaw lwgra Cangqdiq beij roeglaej dij ndaej lai lo.” 32 Yehsuh caiq naeuz: “Famz youq dangqnaj vunzlai nginh gou hih, gou caemh youq dangqnaj Bohmbwn gou nginh de; 33 famz youq dangqnaj vunzlai mbouj nginh gou hih, gou caemh youq dangqnaj Bohmbwn gou mbouj nginh de.” 34 Yehsuh vanzlij caiq naeuz: “Faenhsou gaejyungh naemqnaeuz gou daeuj lajmbwn dwg hawj vunz doxndei. Gou naeuz sou ni, gou daeuj lajmbwn dwg hawj vunz doengh cax doengh giemq lah. 35 Dwg hawj lwg caeuq boh mbouj doxndei, lwgsau caeuq meh mbouj doxndei, bawx caeuq meh mbouj doxndei. 36 Gij dizyinz bonjfaenh gag dwg ndaw ranz vunz. 37 Doengh boux aiq bohmeh aiq goq gou hih mbouj boiqndaej guh lwgsae gou, aiq lwg aiq goq gou hih caemh mbouj boiqndaej guh lwgsae gou. 38 Mbouj aemq aen gyaq cixcib bonjfaenh daeuj gaen gou hih caemh mbouj boiqndaej guh lwgsae gou. 39 Sij mbouj ndaej diuz mingh bonjfaenh hih, dauq ngaiz vwt mingh; vih gou hwj ngaiz vwt mingh hih, dauq ndaej miz mingh.” 40 Yehsuh caiq doiq doengh boux lwgsae de naeuz: “Famz daih faenhsou hih caemhdangq daih gou lo; daih gou hih caemhdangq daih boux baij gou daeuj hih lo. 41 Famz vih boux dwg boux cenz gij vah Cangqdiq hwj daih de hih, caemh gaengjdingq ndaej cangj caeuq boux cenz gij vah Cangqdiq cangj doxdoengz. Famz vih boux dwg simndei simsoh hwj daih de hih, caemh gaengjdingq ndaej cangj caeuq boux simndei simsoh hih cangj doxdoengz. 42 Gannaeuz gij lwgsae gou mbouj suenq dwg guxmaz vunz lah, hoeng, mboujguenj byawz vih boux de dwg lwgsae gou hwj aeu raemx hawj de gw hih, cungjsuenq naeuz cijngamq hawj cenj raemx he lah, gou saedsaeh naeuz sou ni, boux hawj cenj raemx mwnq gaengjdingq ndaej cangjliq.”
1 Yehsuh raengq cibngeih boux lwgsae de doenghgij vah neix sat le, couh daj mwnq bae gak aen singz bae son vunz caeuq cenzgangj guek Cangqdiq dih ndei siuhsiz. 2 Yiengq, guh sijlij dih Yozhanq youq ndaw lauz dingqri naeuz Yehsuh Gihduz soj guh hih saeh le, de couh baij doengh boux lwgsae de bae cimh Yehsuh, 3 hawj gyoengqde bae cimh Yehsuh naeuz: “Mwngz couh dwg boux ndaw Singqgingh sij naeuz goq ij daeuj gouq vunz hih boux mwnq laj, cixnaeuz raeuz caiq ij daengj daixlingh boux lah?” 4 Yehsuh dingq le, doiq gyoengqde naeuz: “Faenhsou maj bax, dawz faenhsou soj raen soj dingq daengz hih maj naeuz Yozhanq ni, 5 couh dwg naeuz, rafangz bienq raraeh, ha'gyad ndaej byaij roen, mazfung yw ndaej ndei, rwznuk ndaej dingqri, rai ndaej dauqlix, vunz gungz ndaej dingq daengz Cangqdiq dih ndei siuhsiz. 6 Famz mbouj yiem gou hih vunz miz fuk lo!” 7 Doengh boux lwgsae Yozhanq dingq Yehsuh gangj sat doenghgij vah neix le, couh maj lo. Gyoengqde maj le, Yehsuh couh doiq gyoengq vunzlai gangj gvanhhih Yozhanq dih saeh; de naeuz: “Gaxgonq faenhsou bae rogndoi ijsiengj yawj gijmaz nej? Siengj yawj go em rumz ci le doengh haj? 8 Mbouj rox hih faenhsou ok bae dauqdaej ij yawj gijmaz nex? Ij yawj boux daenj buh gyaeu buh ndei hih maz? Hoeng boux daenj buh gyaeu buh ndei hih dwg fouqfouq mizmiz hih, dwg youq aen ranz luj vangzgungh youq hih lax. 9 Yiengq dauqdaej faenhsou ijsiengj yawj gijmaz nej? Faenhsou dwg mbouj dwg bae yawj boux cenz gij vah Cangqdiq hih nej? Ox! Gou naeuz sou ni hax, deng lo! De beij doengh boux cenz gij vah Cangqdiq he vanzlij rem, vanzlij ak. 10 De couh dwg boux ndaw Singqgingh daez daengz dih boux mwnq lo; ndaw de dwg yienghneix naeuz: Gou ij baij vunz bae byaij youq dangqnaj mwngz hwj guh ndei cwnjbiq.” 11 Yehsuh vanzlij caiq naeuz: “Gou saedsaeh naeuz sou ni, youq lajmbwn, mij'z vunz ndaej beij Yozhanq engq veijdaq laem lo, hoeng, youq aen guek Cangqdiq ndaw de, cungjsuenq naeuz boux ceiq yaez ceiq mbouj miz gienz he, cungj ndaej beij Yozhanq veijdaq ndaej lai hwx. 12 Dajlwh guh sijlij dih Yozhanq daengz seizneix, guek Cangqdiq cungj dwg yungh doenghgij geizmiuj gingjgyauj akak rengzrengz he ma laeb baenz he, hoeng, doenghheij doegdoeg siebsieb nga'ngangq hih vunz siengj ciemq aeu aen de lah. 13 Gizsaed, sojmiz hih boux cenz gij vah Cangqdiq hih saw caeuq Mohsih dih fazliz saw, itcig daengz guh sijlij dih Yozhanq, cungj sij naeuz goq gij saeh neix. 14 Gou lauxsaed naeuz sou ni, gou muengh faenhsou sinq gij vah gou: Yozhanq, de couh dwg ndaw Singqgingh soj sij goq naeuz hih ij daeuj hih Hijliqyaq lo. 15 Gou gangj hih doenghgij vah neix, faenhsou ij wnggai dawz haeuj rwz!” 16 Yehsuh vanzlij caiq naeuz: “Gou ij dawz aen nienzdaiq neix hih vunz beij luj gijmaz nej? Gou naeuz sou ni, gyoengqde couh luj doenghheij lwgngez naengh youq roggai mwnq guxangq, gyoengq caeuq gyoengq doxhemq naeuz: 17 ‘Gyoengqraeuz guxangq cang guh aeu yah, haq sau, boq dig; faenhsou mbouj diuquj! Gyoengqraeuz guxangq cang guh oksang; faenhsou mbouj daej!’ 18 Bang vunz sijlij dih Yozhanq daeuj lo, de siengzseiz lekdungx caemh mbouj gw laeuj, vunz couh naeuz: ‘De ngaiz fangz doz.’ 19 Gou, Vunz dih Daiqbiuj, daeuj lo, cix gw haeux cix gw laeuj. Yiengq, vunz couh naeuz: ‘De ngah gw haeux, ngah gw laeuj, dwg baengzyoux boux sou ceiq caeuq boux baengzyoux vunz vaih he.’ Sojhij naeuz, vunz dwg mbouj dwg coengjmingz, yawj de soj guh hih saeh couh yawj ndaej ok.” 20 Yehsuh gangj sat doenghgij vah neix le, de vanzlij ndaq doenghheij singz de gaxgonq youq mwnq guh baenx haujlai geizmiuj gingjgyauj hih saeh he, aenvih doenghheij singz mwnq hih vunz nga'ngangq mbouj nginh loek gaijgoq. De ndaq naeuz: 21 “Gohlahswnq Singz caeuq Bwzcaiqdaq Singz hax, faenhsou satsoq lo! Gou youq faenhsou mwnq guh baenx haujlai geizmiuj hih saeh; hauhnaeuz doenghheij geizmiuj gingjgyauj hih saeh neix youq Daiqwj caeuq Sihdoenq song aen singz neix guh okdaeuj nex, gij vunz mwnq cungj senqsi cix daenj buh daehmaz, vanq daeuh hwnj gwnz dingjraeuj bae biujsiq gaijgoq lux. 22 Sojhij gou saedsaeh naeuz sou ni, daengz ngoenz saemjbuenq hih ngoenz mwnq, faenhsou souh daengz hih fad ij beij Daiqwj caeuq Sihdoenq song aen singz neix hih vunz camj ndaej lai. 23 “Vanzlij miz Gyahbwznungz aen singz neix. Mwngz naemqnaeuz mwngz ndaej baux hwnj mbwn bae hajx! Mij ndaej law nwjx! Mwngz ij ngaiz doek roengz vaengz bae lah. Gou youq faenhsou mwnq soj guh hih geizmiuj hih saeh, hauhnaeuz dwg youq Sojdohmaj Singz guh nex, gij vunz mwnqde gaengjdingq nginh loek gaijgoq, aen singz mwnq caemh gaengjdingq mbouj ngaiz byaeu, gaengjdingq vanzlij miz daengz seizneix. 24 Gou naeuz sou hax, cungjsuenq naeuz ij fad aen singz neix hwjx, hoeng, daengz ngoenz saemjbuenq hih ngoenz mwnq, caemh fad mbouj ndaej naek luj sou law!” 25 Yehsuh gangj daengz dineix le, couh naeuz: “Bohmbwn hax, gaemguenj gwnzmbwn caeuq lajdeih hih mwngz hax! Gou haenh mwngz, aenvih mwngz mbouj hawj doengh boux coengjmingz miz vaenzvaq he rox gij saeh neix, dauq loh hawj doengh boux luj lwgngez yienghmwnq lauxsaed he rox lah. 26 Boh hax, dwg hih; gou rox mwngz haenj yienghneix guh.” 27 De haenh daengz dineix le, vanzlij naeuz: “Sojmiz hih cungj dwg boh gou hawj gou he. Cawzok daxboh, mij'z vunz rox daeglwg dwg byawz, caemh cawzok lwg caeuq lwg nyienh'eiq naeuz vunz ni hih, mijn'x caemh mij'z vunz rox daxboh dwg byawz. 28 “Daeuj bax, doenghheij cienfanh dwgrengz sinhoj hih vunz hax, faenhsou daeuj gaen gou bax. Gou ndaej hawj faenhsou duet ok dwgrengz sinhoj hwj ndaej yietbaeg hih. 29 Mboujgoq faenhsou ij dawz aen ek gou hawj faenhsou dawz he daeuj gaen gou hag gou, hag gou sim'unq simsoh; yienghneix, faenhsou cij ndaej sim'onj. 30 Aenvih aen ek gou dwg yungzheih dawz hih, caemh dwg mbouj naek hih.”
1 Miz ngoenz ngoenzyietbaeg he, Yehsuh caeuq gij lwgsae de byaij goq reih mienh he bae. Boux lwgsae de iek le, couh yot aeu riengz mienh ma nu hwj gw. 2 Yiengq gij vunz gaep haeuj Fazliqcaiq baij he raen le, couh doiq Yehsuh naeuz: “Yawj veiq, gij lwgsae mwngz vihmaz youq ngoenz ngoenzyietbaeg yot mienh ma nu hwj gw nej? Nanzdauh faenhsou mbouj rox, youq ngoenz ngoenzyietbaeg guh hong dwg famqfaz hih mah?” 3 Yehsuh dingq le, couh han gyoengqde naeuz: “Nanzdauh faenhsou mij doeg goq youq ndaw Singqgingh ndaw de sij miz Daqveiq goengjvuengz neix caeuq gyoengq gaen henz ndang de, youq mwh iek he guh gijmaz saeh mah? 4 Ndaw de couh dwg sij naeuz de haeuj ndaw cangqbungz Cangqdiq bae, aeu gij bingj dajcoengq bwiz Cangqdiq he ma gw, caemh aeu hawj gyoengq gaen henz ndang de gw. Gij bingj dajbwiz neix, bouxlawz cungj mbouj ndaej gw, caenhgag boux guh dajbwiz he cij ndaej gw he. Bouxlawz gw nex, couh suenq veizfanj Mohsih dih fazliz lo. 5 Nanzdauh faenhsou mbouj doeg goq Mohsih fazliz mah? Ndaw de sij naeuz youq ngoenz ngoenzyietbaeg, goengjsae dajbwiz youq ndaw gunghdenq Cangqdiq guh dajbwiz; gannaeuz youq ngoenz neix guh dajbwiz caemh dwg guh hong, caemh dwg famqfaz hih lah, hoeng, de cungj mbouj suenq dwg miz coih. Faenhsou mbouj rox haj? 6 Gou saedsaeh naeuz sou ni, dineix miz boux beij gunghdenq Cangqdiq vanzlij veijdaq he. 7 Hauhnaeuz faenhsou rox ndaw Singqgingh ndaw de sij naeuz hih: Gou dwg haenj faenhsou doiq vunz miz aen sim rox hojsik he lah, mbouj dwg haenj faenhsou hawj gij dajbwiz hawj gou law hih gawq neix nex, faenhsou couh mbouj luenh dingh hawj boux mij'z coih he miz coih lo. 8 Gvanhhih ngoenzyietbaeg, caenhgag gou, Vunz dih Daiqbiuj, cij miz gienz naeuz guxmaz he.” 9 Yehsuh gangj sat doenghgij vah neix le, couh daj mwnq bae daengz aen veiqdangz gyoengqde. 10 Ngamqluj youq ndaw veiqdangz mwnq miz boux he, cik fawz de vej. Yiengq couh miz vunz cam Yehsuh naeuz: “Youq ngoenz ngoenzyietbaeg ndaej mbouj ndaej yw bingh hax?” Gyoengqde yienghneix naeuz dih muzdiz dwg siengj gauq de. 11 Yehsuh dingq le, couh han naeuz: “Beijgangj naeuz, faenhsou ndaw neix miz byawz miz duz yiengz he, duz yiengz neix ngamqluj youq ngoenz ngoenzyietbaeg ngaiz doek roengz cingj bae, yiengq faenhsou ij mbouj ij rag duz de hwnjma nej? 12 Gangjnaeuz dwg vunz hwx, vunz mbouj beij yiengz dij ndaej lai maz! Sojhij youq ngoenz ngoenzyietbaeg yw bingh dwg habfaz hih.” 13 Yehsuh gangj sat doenghgij vah neix le, couh doiq boux fawz vej mwnq naeuz: “Iet gij fawz mwngz okdaeuj!” Boux de caemh iet gij fawz de okdaeuj. De baex iet okdaeuj he, gij fawz de couh doq ndeindwt luj daixlingh cik lo. 14 Yiengq, gij vunz gaep haeuj Fazliqcaiq baij mwnq raen yienghneix le, cungj ndatheiq hwj ij rai bae, couh ok rog bae doxcimciek hwj ij baenzlaw ndaej met Yehsuh. 15 Gajlaeng Yehsuh rox naeuz miz vunz siengj haih de le, couh daj mwnq ok ma bae daixlingh mwnq. Mwhde miz haujlai vunz gaen de bae. Gyoengq vunz gaen de bae mwnq miz hih vunz miz bingh hwj, hoeng, Yehsuh caemh yw gyoengqde ndei lo. 16 De yw gyoengqde ndei le, vanzlij raengq gyoengqde mbouj hawj gyoengqde cenz naeuz vunz ni dwg byawz yw gyoengqde ndei. 17 Gij neix cingq lingz ok Hijcaiqyaq boux cenz gij vah Cangqdiq neix gangj goq hih: 18 Yawj veiq, boux neix couh dwg gou senj hih hoiq; gou aiq de, haenj de. Gou ij dawz Hoenzsaenz gou nyok hawj de; de gaengjdingq dawz gou gouq vunz caeuq saemjbuenq vunz cenz naeuz linghvaih minzcuz hih vunz ni. 19 De mbouj ceng mbouj hemq, gwnz gai caemh mij'z vunz dingqri gij sing de. 20 De dwg boux mbouj sienghaih vunz he. Hawj mwngz yawj hux, daiqlienz go em couh ij raek senxsenx lo, hoeng de cungj mbouj veiq bungq go de raek; aen daeng, diuz muenxdaeng de couh ij dawz liux senxsenx lo, hoeng de cungj caemh mbouj boq maet aen de. De cungj dwg swnh semxsemh, itcig daengj daengz de hawj gij ndei he ndaej giengz goq gij mbouj ndei he. 21 Baenx cenz lajmbwn hih vunz cungj ij muengh de. 22 Gajlaeng, miz vunz daiq boux ngaiz fangz doz hwj rafangz caeuq ngoemx he daeuj cimh Yehsuh, ij hawj Yehsuh yw boux de. Yehsuh raen yienghneix le, couh yw boux de ndei, hawj boux de ndaej gangj vah okdaeuj, caemh hawj de yawj ndaej raen. 23 Yiengq gyoengq vunzlai raen yienghneix le, cungj raen geizheih ij rai bae hwj couh naeuz: “Nanzdauh de couh dwg Daqveiq dih lwglan?” 24 Hoeng, gij vunz gaep haeuj Fazliqcaiq baij he dingq le, dauq naeuz: “Gijn'x, miz maz geizheih nex? De cijmboujgoq dwg baengh Bezsihbuz duz fangzvuengz neix boenq fangz hwj mah.” 25 Gajlaeng Yehsuh rox gij iqswh gyoengqde le, couh doiq gyoengqde naeuz: “Mboujguenj aen gueklawz, ndaw guek gag luenh hih, aen guek mwnq caemh mbouj baenz maz guek lo; baih liux bae. Caemh mboujguenj ranzlawz doxdwk doxdanh hih, ranzlawz caemh gaengjdingq ngaiz siksanq liux bae. 26 Caiq hauhnaeuz fangzvuengz gag boenq bonjfaenh, yiengq aen guek de mijyaengz siksanq liux haz? 27 Caiq hauhnaeuz gou dwg luj faenhsou naeuz hih yienghmwnq dwg baengh Bezsihbuz ma boenq fangz hih, yiengq gou cam faenhsou, gij lwgsae faenhsou dwg baengh byawz ma boenq fangz nej? Ciuq luj yienghneix, gyoengqde caemh dwg baengh Bezsihbuz ma boenq fangz lo, hoeng, gyoengqde gaengjdingq naeuz mbouj dwg. Yiengq faenhsou mijyaengz dwg loek hih maz. 28 Hoeng, hauhnaeuz gou dwg baengh gij Hoenzsaenz Cangqdiq ma boenq hih, yiengq couh dwg cingqmingz gij gienzveih Cangqdiq gaenq youq faenhsou dineix fazveih lo. 29 Caiq beijgangj naeuz miz byawz ndaej ciengj ndonj haeuj ndaw ranz boux akak rengzrengz he bae ciengj aeu gij doxgaiq de nej? Cizfeih naeuz ndaej goenj boux de hwnjdaeuj cij ndaej ciengj aeu huhluh.” 30 Yehsuh yienghneix gangj le, couh naeuz: “Mbouj gaep haeuj gou hih vunz, couh dwg fanjdeiq gou, dwg gou dih dizyinz; mbouj caeuq gou boenq yiengz doxcomz hih, couh dwg boenq doengh duz de sanq bae lo. 31 Sojhij gou naeuz sou ni, vunz soj famh hih coih, soj gangj doenghgij vah bangjlaih vunz hih cungj ndaej nyiuz, caenhgag gangj vah bangjlaih Hoenzsaenz Cangqdiq hih gaengjdingq mbouj ndaej nyiuz. 32 Gangj vah famh gou, Vunz dih Daiqbiuj hih, vanzlij suenq naeuz ndaej nyiuz; hoeng, gangj vah famh Hoenzsaenz Cangqdiq hih, mboujguenj seiq neix haj cixnaeuz seiq laeng, yungjyenj roengzbae cungj mbouj ndaej nyiuz.” 33 Yehsuh vanzlij caiq naeuz: “Faex ndei dawz mak ndei, faex yaez dawz mak yaez; faex ndei faex yaez, yawj gij mak de couh ndaej faen okdaeuj. 34 Doenghgij vunz doegdoeg siebsieb faenhsou hax! Faenhsou cungj dwg doegdoeg siebsieb he, yiengq ij baenz ndaej miz gij vah ndei he gangj okdaeuj hwj nej? Ndaw sim vunz caeng miz gijmaz, caemh gangj gijmaz okdaeuj lo. 35 Simndei simsoh hih vunz, ndaw sim de caeng hih, yienh okdaeuj hih caemh dwg ndei he. Gij vunz simdoeg simsieb he, ndaw sim de caeng hih caemh dwg doenghgij doegsieb he, yienh okdaeuj hih, caemh dwg doegsieb he. 36 Hoeng, gou naeuz sou ni, daengz ngoenz saemjbuenq hih ngoenz mwnq, famz luenh gangj vah hwj daekcoih dawz vunz hih couh ij yiengq Cangqdiq gyauhdaiq, 37 aenvih Cangqdiq ij bingz vunz soj gangj hih vah ma dingh hawj vunz miz mbouj miz coih.” 38 Youq Yehsuh gangj doenghgij vah neix hih mwhde, miz geij boux fazliz cenhgyah caeuq doenghheij gaep haeuj Fazliqcaiq baij he doiq Yehsuh naeuz: “Lauxsae, gyoengqraeuz siengj cingj mwngz loengh gij geizmiuj he hawj raeuz yawj.” 39 Yehsuh dingq le, couh han naeuz: “Aen nienzdaiq neix hax, gij vunz doegdoeg siebsieb hih cienfanh lai he! Faenhsou mbouj sinq gou, cij ijsiengj cimh yawj gijmaz gingjdoengh. Hoeng, caenhgag cawzok Yoznaz boux cenz gij vah Cangqdiq neix hih gij geizmiuj mwnq, caiq mij gijmaz gingjdoengh ndaej hawj faenhsou yawj haem lo. 40 Couh dwg gij saeh Yoznaz, baenzlawz youq ndaw dungx duz bya sam ngwnz sam ngoenz, caeuq Vunz dih Daiqbiuj caemh doxdoengz, youq laj doem ndaw de sam ngwnz sam ngoenz hih yienghmwnq. 41 Daengj daengz ngoenz saemjbuenq hih ngoenz mwnq, gij vunz Niznizveih ij daeuj gauq faenhsou daih neix hih vunz, gauq naeuz faenhsou miz coih, aenvih gij vunz Niznizveih dingq goq Yoznaz cenzgangj gij vah Cangqdiq le, couh nginh loek gaijgoq lo. Hoeng, hawjm'z yawj hux, seizneix dineix couh miz boux beij Yoznaz vanzlij veijdaq he lo, hoeng, faenhsou dauq mbouj dingq de. 42 "Daengz ngoenz saemjbuenq hih ngoenz mwnq, boux nijvangz aen guek baixnamz he ij daeuj gauq gij vunz daih neix hih faenhsou, naeuz faenhsou miz coih, aenvih doenghbaez de daj baenxlai gyae daeuj dingq Sojlozmaenz goengjvuengz neix gangj vah. De daj baenxlai gyae daeuj dingq, hoeng, gij vunz daih neix nej? Youq dineix seizneix couh miz boux beij Sojlozmaenz vanzlij veijdaq he gangj vah lo, hoeng, dauq mij'z vunz dawz haeuj rwz dingq de.” 43 Yehsuh gangj daengz dineix le, vanzlij caiq naeuz: “Miz duz fangz yak he daj gwnz ndang boux ngaiz fangz doz he ok ma le, couh youq rogndoi gvaenxgvaenx gvaxgvax ijsiengj cimh mwnq he ma yietbaeg. Hoeng, gvax bae gvax dauq cungj mij cimh ndaej raen miz mwnq youq he. 44 Yiengq duz de couh gag naeuz: ‘Gou vanzlij dwg dauq maj mwnq gaxgonq gou youq goq he youq suenq lox.’ Gizsaed duz de dauq maj daengz le, cij rox naeuz mwnq gaxgonq de youq goq he mwnq gaenq soujsib ndei, sauq cengh seuqset lo. 45 Duz de raen yienghneix le, couh ok bae iu baenx caet duz fangz beij bonjfaenh de lij ak lij yak he daeuj caeuq de haeuj bae youq. Youq le, boux vunz mwnq beij gaxgonq de vanzlij camj. Sojhij, gou naeuz hax, aen nienzdaiq doegdoeg siebsieb faenhsou hax, baezneix faenhsou souh daengz hih caemh ciuqyiengh yienghneix camj.” 46 Couh youq mwh Yehsuh vanzlij gangj doenghgij vah neix hih mwhde, daxmeh de caeuq gyoengq nuengxau de daeuj daengz de mwnq, ndwn youq rog neix siengj cimh de caeuq de gangj vah. 47 Yiengq miz vunz raen le, couh naeuz Yehsuh ni naeuz: “Yawj veiq, daxmeh mwngz caeuq gyoengq nuengxau mwngz ndwn youq rog mwnq, siengj cimh mwngz caeuq mwngz gangj vah.” 48 Hoeng, Yehsuh dauq han boux de naeuz: “Byawz dwg meh gou? Byawz dwg nuengx gou?” 49 De yienghneix han le, couh iet fawz yinx laeng gyoengq lwgsae de bae naeuz: “Yawj hux, gyoengqde couh dwg meh gou, nuengx gou. 50 Famz dingq gij vah Bohmbwn gou, ciuq gij vah de bae guh hih cungj dwg meh gou, nuengx gou.”
1 Yehsuh gangj doenghgij vah neix sat le, couh daj ndaw ranz mwnq ok ma, bae daengz henz Gyahliqliq Huz naengh. 2 Mwhde caemh miz haujlai vunz gaen de bae, gvaengz de siengj dingq de gangj vah. Yiengq, aenvih vunz daiq lai lai, de couh hwnj aen ruz he bae naengh, hawj gyoengq vunzlai ndwn youq henz hamq mwnq. 3 Gajlaeng, de couh yungh beijgangj ma gangj naeuz gij vunzlai ni baenx haujlai dauhleix. De naeuz: “Miz boux nungzminz he, de bae dajroek. 4 Roek hih mwhde, miz doengh ceh doek youq henz roen he, couh ngaiz roeg mbin roengzdaeuj dot gw. 5 Doengh ceh doek youq mwnq miz rin lai he, aenvih doem mbouj laeg, caemh mbouj lai, gannaeuz hwnj ndaej vaiq lah, 6 hoeng, gij rag de mbouj laeg. Yiengq gyangjngoenz baex cik he, couh doq reuq liux lo. 7 Doengh ceh doek youq ndaw caz oen he, caeuq go oen doxcaenx hwnj, caemh caenx hwj hwnj mbouj ndaej. 8 Hoeng, doengh ceh doek youq ndaw doem biz he, baex did hwnjdaeuj he couh noengq nwtnwt lo, caemh beij ceh doek mwnq sou ndaej baenx samcib boix cix miz, roekcib boix cix miz, simqciq baenx bak boix cix miz.” 9 Yehsuh gangj daengz dineix le, couh naeuz: “Daxbaenh gou soj gangj hih, faenhsou ijaeu dawz haeuj rwz.” 10 Gyoengq lwgsae de dingq le, couh goq bae cam de naeuz: “Lauxsae, mwngz doiq gyoengq vunzlai gangj vah, vihmaz ij yungh beijgangj nej?” 11 Yehsuh dingq le, han naeuz: “Gij miqmiz ndaw guek Cangqdiq caenhgag ndaej hawj faenhsou rox lah; mbouj ndaej hawj gyoengqde rox nej. 12 Aenvih famz gaenq miz hih, engqgya ij lai hawj de, hawj de miz hwj lw bae; famz mbouj miz hih, couh daiqlienz de soj miz hih cungj ij dued aeu ma liux. 13 Sojhij, gou yungh beijgangj ma doiq gyoengqde gangj, hawj gyoengqde yawj cix yawj mbouj ok, dingq cix dingq mbouj rox. 14 Yienghneix, youq laeng gyoengqde cingq lingz ok Hijcaiqyaq boux cenz gij vah Cangqdiq neix gangj goq hih vah; de naeuz: Faenhsou dingq gan dingq lo, hoeng, dingq mbouj rox; faenhsou yawj caemh yawj lo, hoeng, yawj mbouj ok, 15 aenvih gyoengqde hih sim mazmwnh lo, rwz cix rwz boih lo, ra cix ra mbouj hoi. Mijn'x, cehra gyoengqde couh yawj ndaej raen lo, rwz cixcaemh ndaej dingqri lo, sim cixcaemh singqsag, caemh daj ndaw sim nginh loek gaij goqma, yiengq gou couh yw gyoengqde ndei lo.” 16 De yienghneix gangj le, vanzlij doiq gyoengq lwgsae de naeuz: “Hoeng faenhsou miz fuk lo, aenvih cehra faenhsou yawj ndaej raen, rwz caemh ndaej dingqri. 17 Gou saedsaeh naeuz sou ni, doenghbaez miz haujlai boux boux cenz gij vah Cangqdiq caeuq doengh boux youq ndaw lwgra Cangqdiq suenq dwg vunz simndei simsoh he ijsiengj raen doenghgij faenhsou seizneix ndaej raen hih, hoeng, cungj mbouj ndaej raen, ijsiengj dingq faenhsou seizneix soj dingq hih, hoeng, cungj caemh mbouj ndaej dingq.” 18 De caiq naeuz: “Sojhij faenhsou wnggai rox gij iqswh beijgangj dajroek neix. 19 Couh dwg naeuz: Doengh ceh, dwg daiqbiuj gij vah Cangqdiq. Doengh ceh doek youq henz roen mwnq, couh dwg naeuz vunz dingq gij ndei siuhsiz aen guek Cangqdiq lo, hoeng dingq mbouj rox. Gajlaeng miz fangzvuengz daeuj, daj ndaw sim gyoengqde dued aeu bae. 20 Doengh ceh doek youq mwnq miz rin lai mwnq, couh dwg naeuz vunz dingq ndei siuhsiz dingq hwj cienfanh angq he lah, 21 hoeng, caeng youq ndaw sim mbouj laeg, ndat ndaej yaep he. Gajlaeng vih ndei siuhsiz hwj ngaiz souh daengz nanh cixnaeuz ngaiz bwkhaih he le, couh caepcat liux lo. 22 Doengh ceh doek youq ndaw caz oen mwnq, couh dwg naeuz vunz dingq gij ndei siuhsiz lo, gajlaeng vihliux saenghhoz dih saepsaep soiqsoiq, caeuq dam cienzcaiz hwj mbouj ndaej guh gij saeh youq ndaw lwgra Cangqdiq suenq dwg miz yungh he. 23 Hoeng, doengh ceh doek youq ndaw doem biz mwnq nex, couh dwg gij vunz dingq daengz ndei siuhsiz le, couh rox he. Gij vunz neix ndaej guh gij saeh youq ndaw lwgra Cangqdiq suenq dwg miz yungh he, miz yungh samcib boix cix miz, roekcib boix cix miz, bak boix cix miz.” 24 Yehsuh caiq doiq gyoengqde gangj daixlingh gij beijgangj. De naeuz: “Aen guek Cangqdiq couh dwg luj vunz dawz gij ceh mienh ndei roek youq ndaw reihnaz yienghmwnq. 25 Yiengq daengz singjngwnz, vunz ninz ndaek le, boux caeuq de miz haemzcaeuz he couh caegcaeg dawz ceh vaeng bae vanq haeuj ndaw reih mienh de bae. 26 Yiengq, daengj daengz go mienh ok riengz le, go vaeng caemh ok lo. 27 “Gajlaeng, bouxhoiq raen yienghneix le, couh bae cam bouxcawj naeuz: ‘Bouxcawj hax! Mwngz mbouj dwg genj gij ceh mienh ndei he cij roek maz? Seizneix ndaw reih mienh vihmaz hwnj cab miz go vaeng hwj nej?’ 28 “Bouxcawj dingq le, couh naeuz: ‘Gaengjdingq dwg gij vunz caeuq gou miz haemzcaeuz he loengh lo.’ Gajlaeng bouxhoiq cam naeuz: ‘Mboujyienz raeuz bae dawz go vaeng ciemzcag bae suenq lox.’ 29 “Hoeng, bouxcawj dauq naeuz: ‘Mbouj lo, hoengjlau faenhsou ciemz go vaeng hih mwhde, daiqlienz go mienh cungj caemh ngaiz ciemz hwnjdaeuj. 30 Ajcaih doengh go de caeuq go mienh yienghmwnq lo. Daengj daengz ndaej sougvej mienh hih mwhde, gou menhcij raengq doengh boux sougvej he, hawj gyoengqde sien ciemz go vaeng okma, cug baenz lwg hwj diuh hwj vueng. Gajlaeng cij sou gij mienh, coengq haeuj canghguq bae.’” 31 Yehsuh vanzlij caiq doiq gyoengqde gangj gij beijgangj daixlingh. De naeuz: “Aen guek Cangqdiq caemh luj ceh byaekgat, miz vunz dawz bae roek youq ndaw reih. 32 Gannaeuz ceh de baenxlai iq, dwg sojmiz hih ceh ceiq iq hih lah, hoeng, daengj daengz ceh de did hwnjdaeuj le, couh menhmenh hung baenz go byaek hunghung he beij sojmiz hih byaek vanzlij hung, hung hwj daiqlienz roeg cungj ndaej youq gwnz nge de caux rongz bae.” 33 De vanzlij caiq naeuz: “Aen guek Cangqdiq caemh luj yauqmuj yienghmwnq. Miz vunzbaz dawz ma caeuq geij cib gaen mbamienh gaenx hwj fat mienh; dihdi he couh fat ndaej baenxbienh lo.” 34 Mbat neix Yehsuh cungj dwg yungh doenghgij beijgangj neix ma doiq gyoengq vunzlai gangj; hauhnaeuz mbouj yungh beijgangj ma gangj nex, de couh mbouj caeuq gyoengq vunzlai gangj vah lo. 35 Yienghneix cingq lingz ok boux cenz gij vah Cangqdiq soj gangj hih: Gou ij hoi bak gangj beijgangj; gou ij dawz daj cauh mbwn cauh deih doxdaeuj dih miqmiz gangj naeuz gyoengqde ni. 36 Yehsuh gangj doenghgij beijgangj neix sat le, couh daj gwnz ruz roengz ma. Gajlaeng de couh haeuj aen ranz he bae. Yiengq gij lwgsae de couh bae cam de naeuz: “Lauxsae, cingj mwngz gangj naeuz raeuz ni go vaeng dih beijgangj dwg gijmaz iqswh bax.” 37 Yehsuh dingq le, couh han gyoengqde naeuz: “Boux roek ceh mienh ndei mwnq, couh dwg ceij gou, Vunz dih Daiqbiuj, 38 reih mienh couh ceij lajmbwn, ceh ndei dwg ceij gaep haeuj guek Cangqdiq dih vunz, go vaeng dwg ceij gaep haeuj fangzvuengz Sajdanq hih vunz. 39 Boux vanq ceh vaeng mwnq dwg ceij fangzvuengz, mwh ndaej sougvej mwnq dwg ceij ciqgyaiq dih ngoenz gatsat. Doengh boux sougvej mwnq dwg ceij bouxcai Cangqdiq. 40 “Gou naeuz sou ni, go vaeng baenzlaw ngaiz ciemz okma aeu feiz vueng, aen ciqgyaiq neix daengz ngoenz gatsat he caemh dwg yienghneix. 41 Daengz mwhmwnq, Vunz dih Daiqbiuj couh baij bouxcai de, hawj bouxcai de dawz sojmiz hawj vunz famh coih hih vunz caeuq doenghheij vunz guh doeg guh sieb he cungj ij daj ndaw gyoengq vunz de cawzcag bae, 42 vwt haeuj ndaw feiz bae, ajcaih gyoengqde youq mwnq haeb faenz haeb heuj daej vangraeh. 43 Daengz mwhmwnq, doengh boux simndei simsoh he couh ndaej youq guek Bohmbwn mwnq ndaej najrongh luj gyangjngoenz yienghmwnq rongh sagsag.” De gangj daengz dineix le, couh naeuz: “Gou soj gangj hih, faenhsou ijaeu dawz haeuj rwz.” 44 Gajlaeng, Yehsuh vanzlij caiq beijgangj naeuz: “Aen guek Cangqdiq couh luj gaiq reih ndaw de yo miz gij dijbauj he. Miz vunz rox le, couh dawz gij de yo ndei. Gajlaeng couh angq vaujvauq hwj dawz de sojmiz hih cungj hai liux bae, dawz de soj hai ndaej hih ngaenz bae cawx gaiq reih neix. 45 “Vanzlij miz, aen guek Cangqdiq caemh luj boux guh cinhcuh seng'eiq he, dauqcawq bae cimh cinhcuh. 46 Yiengq, hauhnaeuz de bae cimh hih mwhde, cimh ndaej raen miz ceh cinhcuh he, gannaeuz ceh de cienfanh bengz he lah, hoeng ceh de dwg ndei raixcaix he, sojhij de couh dawz bonjfaenh de sojmiz hih cungj hai liux bae hwj dawz de soj hai ndaej hih ngaenz bae cawx ceh cinhcuh neix. 47 “Caemh vanzlij miz, aen guek Cangqdiq caemh luj fan re roek youq ndaw haij vangx dawz gak cungj bya. 48 Vangx dawz rim le, gij vunz couh rag hwnj hamq ma, naengh roengzma genj aeu duz ndei he; duz mbouj ndei he couh gvenggvak.” 49 Yehsuh gangj daengz dineix le, vanzlij naeuz: “Sojhij, gou naeuz sou ni, daengz ciqgyaiq dih ngoenz gatsat, caemh dwg yienghneix; bouxcai Cangqdiq caemh dawz gij vunz ndei he caeuq gij vunz vaih he genj okdaeuj, 50 dawz gij vunz vaih he gvenggvak haeuj ndaw feiz bae, ajcaih gyoengqde haeb faenz haeb heuj daej vangraeh.” 51 Yehsuh gangj daengz dineix le, couh cam gyoengq lwgsae de naeuz: “Gou soj gangj hih doenghgij vah neix, faenhsou cungj dingq rox lwi?” Gyoengqde dingq le, cungj han naeuz: “Dingq rox hah.” 52 Gajlaeng Yehsuh caiq naeuz: “Sojmiz rox guek Cangqdiq dih Singqgingh cenhgyah caemh luj boux cawjranz yienghmwnq; de ndaej daj ndaw canghguq de dawz gij moq he okdaeuj, caemh ndaej dawz gij gaeuq he okdaeuj.” 53 Yehsuh gangj doenghgij beijgangj neix sat le, couh daj ndaw ranz mwnq ok ma. 54 Gajlaeng de maj daengz dieg bonjfaenh de, Mbanj Nazsajlwz. De maj daengz le, de couh bae veiqdangz son vunz. Yiengq, gyoengq vunz dingq de soj son hih le, bouxboux cungj doeksaet hwj naeuz: “Geizheih, boux vunz bouxn'x, daj nwjh ndaej miz yiengh coengjmingz neix caeuq miz gij geizmiuj neix hwj nej? 55 De mbouj dwg daeglwg goeng moegciengh maz? Daxmeh de mbouj dwg Majliqyaq maz? Doengh daegnuengx de mbouj dwg Yajgoz hah, Yozswz hah, Sihmaenz hah, caeuq Youzdaq hah maz? 56 Doengh dahnuengx de mbouj dwg caemh caeuq gyoengqraeuz youq dineix hih maz? Hoeng, boux vunz neix dauqdaej de coengz maz ndaej miz doenghgij bonjsaeh neix nej?” 57 Gyoengqde yienghneix naeuz le, cungj yawj mbouj hwnj de, dwgcaengz de. Gajlaeng, Yehsuh rox daengz gyoengqde yienghneix yawj de le, couh doiq gyoengqde naeuz: “Gou naeuz sou ni, mij saek boux boux cenz gij vah Cangqdiq youq ndaw ranz bonjfaenh cixnaeuz youq dieg bonjfaenh ndaej miz vunz soenhcungq de.” 58 Gajlaeng couh vih gij vunz mwnq mbouj sinq de, sojhij de youq mwnq mbouj guh geijlai cungj geizmiuj hih saeh.
1 Miz baez he, goeng Hihliz, couh dwg goeng dang dieg Gyahliqliq dih daeuzdaeuz he, de dingq daengz gvanhhih Yehsuh sojmiz hih saeh le, 2 couh doiq doengh boux gaen henz ndang de naeuz: “Gij neix dwg guh sijlij dih Yozhanq dauqlix lah! Dwg de cij ndaej guh doenghgij geizmiuj neix he.” 3-4 Vihmaz goeng de yienghneix naeuz nej? Gij yienzyouz de dwg yienghneix: Gaxgonq, goeng Hihliz aeu meh nuengxsimj de Hihlozdij ma guh yah. Yiengq Yozhanq rox le, couh doiq de naeuz: “Mwngz aeu meh vunz mwnq dwg famqfaz hih vwx.” Couh vih yienghneix, goeng Hihliz couh aeuqheiq hwj goenj dawz Yozhanq gyaeng haeuj ndaw lauz bae. 5 Baenjlaiz goeng Hihliz dwg ij gaj Yozhanq hih, hoeng, de lau gij beksingq aeuqheiq, aenvih gij beksingq cungj naeuz Yozhanq dwg boux cenz gij vah Cangqdiq he. 6 Yiengq miz ngoenz he, dwg goeng Hihliz dih ngoenzseng. Ngoenz mwnq de cingj hek hwj cienfanh nauhyied he. Yiengq dahlwg Hihlozdij ok daeuj diuquj hawj gij vunz daeuj gw haeux gw laeuj he yawj, guh hwj goeng Hihliz cungj angq hwj ij rai bae, 7 couh doiq dah de baujcingq naeuz, mboujguenj dah de siengj aeu gijmaz, de cungj nyienh'eiq hawj dah de gijmaz. 8 Daxmeh dah de rox le, couh yungx dahlwg de hawj de naeuz: “Cingj mwngz dawz ndaek raeuj guh sijlij dih Yozhanq coengq youq ndaw buenz hwj dawz ma hawj gou.” 9 Goeng Hihliz dingq le, cungj roxnginh hoj guh ij rai bae, hoeng, couh aenvih de gaenq yiengq dah de baujcingq goq lo, doenghheij hek de cungj caemh dingqri, yiengq de mbouj ndaej mbouj ciuq gij cawjeiq dah de bae guh. 10 Couh yienghneix, goeng de couh baij vunz bae ndaw lauz raemj ndaek raeuj Yozhanq, 11 coengq youq ndaw buenz hwj dawz ma hawj dah de. Dah de raen le, couh dawz bae hawj daxmeh de. 12 Gajlaeng doenghheij lwgsae Yozhanq dingq naeuz Yozhanq ngaiz rai lo le, couh bae dawz gij seihaiz de bae moek. Moek ndei le, couh bae naeuz Yehsuh ni. 13 Yehsuh dingq daengz gij saeh neix le, couh gag naengh ruz bae daixlingh mwnq, siengj gag bae daengz mwnq dieg boihgox he bae. Yiengq, gij vunzlai rox le, cungj daj gak mbanj gak singz byaij roen daeuj gaen de. 14 Hoeng, de liuh mbouj daengz, de ngamq baex hwnj hamq ma he, couh yawjraen miz baenx haujlai vunz daeuj cimh de. De raen yienghneix le, couh hojsik gyoengqde, caemh yw ndei doengh boux miz bingh he. 15 Daengz yiengqhaemh gyangjngoenz ij doek mwhde, gyoengq lwgsae de raen yienghneix le, couh daeuj doiq de naeuz: “Gyangjngoenz couh ij doek lo, dineix caiq dwg boihgox he; hawj gyoengq vunz sanq lo bax. Hawj gyoengqde bae heij mbanj mwnq cimh gw cimh youq bax.” 16 Hoeng, de dauq han gyoengqde naeuz: “Mboujyungh hawj gyoengqde sanq bae nej; faenhsou aeu gij gw hawj gyoengqde gw bax!” 17 Gyoengq lwgsae de dingq le, han naeuz: “Gyoengqraeuz dineix cijngamq miz haj aen bingj caeuq song duz bya sat lo.” 18 Yehsuh dingq le, naeuz: “Dawz goqdaeuj hawj gou.” 19 De yienghneix naeuz le, caemh doq hawj gyoengq vunz naengh youq anj nyaengq ndei hwj. Gyoengq vunz naengh ndei le, de couh dawz haj aen bingj caeuq song duz bya mwnq hwnjdaeuj, ngiengx raeuj yawj hwnj mbwn bae docih Cangqdiq. Docih le, couh euj baenx mbiengj baenx gyeh hwj ndenq hawj gyoengq lwgsae de, hawj gyoengq lwgsae de faen hawj gyoengq vunz gw. 20 Gajlaeng, gyoengq vunz bouxboux cungj ndaej gw, mbouj danhcij naeuz ndaej gw, vanzlij ndaej gw daengz imq, gw daengz lw, lw hwj coux ndaej baenx cibngeih lamz rim. 21 Mwhde youq mwnq daihgaiq miz hajcien vunzsai baenx lai, vunzbaz caeuq lwgngez mbouj suenq. 22 Gyoengq vunz gw sat le, Yehsuh couh majcangq coi gyoengq lwgsae de, hawj gyoengqde sien hwnj ruz bae, bae baih hamq huz baih de gaxgonq. Gajlaeng de cij naeuz hawj gyoengq vunzlai sanq maj. 23 Daengj gyoengq vunz sanq maj le, de couh gag hwnj bya bae gouzhaenh Cangqdiq, itcig daengz doengxhaemh laep. 24 Couh youq mwh aen ruz gaenq ok bae liz henz hamq gyae'gyae hih mwhde, cingq roeb daengz miz rumz hung, cixcaemh dwg ngig rumz raixcaix he, guh hwj bohlangq cung hawj aen ruz bubbub babbab ngeng bae ngeng dauq bae. 25 Yiengq daengz ranz ij rongh hih mwhde, Yehsuh youq gwnz huz cingq yiengq gyoengq lwgsae de byaij bae. 26 De bae hih mwhde, gyoengq lwgsae de raen de le, cungj lau hwj hemq naeuz: “Ox, miz fangz, miz fangz! Miz fangz daeuj huh!” 27 Yehsuh dingq le, couh doq doiq gyoengqde naeuz: “Gaej lau, gaej lau! Dwg gou lah! Coengqsim!” 28 Gajlaeng Bijdwz sawq cam naeuz: “Bouxcawj gou hax, hauhnaeuz cingqcaen dwg mwngz nex, couh cingj mwngz hawj gou byaij gwnz raemx bae cimh mwngz bax!” 29 Yehsuh dingq le, han naeuz: “Mwngz daeuj bax!” Gajlaeng Bijdwz cingqcaen roengz ruz, byaij gwnz raemx ij bae cimh Yehsuh. 30 Hoeng, de raen rumz daiq gaenj lai, couh lau hwj gaihcij caem roengzbae lo. De raen yienghneix le, cungj lau hwj hemq naeuz: “Bouxcawj gou hax, gouq gou bax!” 31 Yehsuh raen yienghneix le, couh doq iet fawz rag dawz de, naeuz: “Mwngz sinq daiq noix lai lo! Vihmaz vanzlij mbouj coengqsim nej?” 32 Couh yienghneix, gajlaeng Yehsuh caeuq Bijdwz cungj hwnj ruz bae lo. Song boux de hwnj ruz bae le, rumz caemh dingz lo. 33 Yehsuh hwnj ruz bae le, gij lwgsae gwnz ruz cungj baiq de sax de naeuz: “Mwngz cingqcaen dwg lwg Cangqdiq.” 34 Gyoengqde naengh ruz goq bae daengz baih hamq huz baih de hih mwnq dieg heuh Gwznizsajlwz he le, couh hwnj hamq ma lo. 35 Yiengq gij vunz mwnq baex rox naeuz dwg Yehsuh he le, couh baij vunz bae doenghheij seiqhenz dieg mwnq, daiq doenghheij vunz miz bingh he daeuj daengz Yehsuh mwnq. 36 Gyoengqde caenh gouz hawj gij vunz bingh mwnq dek gij dinbuh Yehsuh cungj ndaej lo. Gajlaeng, sojmiz ndaej dek daengz hih vunz bingh cungj ndaej ndei liux lo.
1 Miz baez he, miz gij vunz gaep haeuj Fazliqcaiq baij he caeuq doenghheij fazliz cenhgyah he daj Yehluqsajlaengj daeuj cimh Yehsuh, daeuj doiq de naeuz: 2 “Vihmaz gij lwgsae mwngz mbouj ciuq cojgoeng raeuz dih laehbeih ma guh nej? Vihmaz mbouj swiq fawz le, cij gw haeux nej?” 3 Gajlaeng, Yehsuh han gyoengqde naeuz: “Yiengq faenhsou caemh ij vihmaz caenh ij ciuq gij laehbeih faenhsou hwj veizfanj Cangqdiq dih mingqlingq nej? 4 Cangqdiq naeuz goq: ‘Ij gingqcungh bohmeh,’ caemh vanzlij naeuz: ‘Famz mang bohmeh hih cungj ij ngaiz rai.’ 5 Hoeng, faenhsou dauq naeuz hauhnaeuz vunz dawz gij baenjlaiz ij ciengx bohmeh he ij gingqcungh bohmeh he hih gaenq dawz bae soengq hawj Cangqdiq lo nex, 6 faenhsou couh naeuz mboujyungh ciengx bohmeh lo. Faenhsou couh yungh gij laehbeih neix ma cawz gij mingqlingq Cangqdiq lo. 7 Doenghheij gyaj guh simndei simsoh hih faenhsou hax, Hijcaiqyaq boux cenz gij vah Cangqdiq neix soj gangj goq hih cingqcaen mbouj loek nex! De naeuz: 8 Cangqdiq yienghneix naeuz: ‘Doenghgij vunz neix bak gangj naeuz soenhgingq gou, hoeng, de gaenhbaenj mbouj dawz haeuj rwz gou, ndaw sim de dauq yiem gou liz gou. 9 Gyoengqde dawz vunz dingh okdaeuj hih gveihdingq ma dangqbaenz dauhleix hwj bae son vunz. Sojhij gyoengqde baiq gou cungj dwg mij'z yungh hih, gyaj hih.’” 10 De yienghneix doiq gyoengqde naeuz le, couh heuh gyoengq vunzlai goq daeuj, doiq gyoengqde naeuz: “Faenhsou mbouj danhcij naeuz ij dingq, vanzlij ijaeu dingq rox. 11 Gw haeuj bak hih doxgaiq mbouj ndaej hawj vunz bienqbaenz uekcueg law; caenhgag miz gij daj ndaw bak ok daeuj he cij ndaej hawj Cangqdiq dwgcaengz lah.” 12 Yehsuh gangj daengz dineix le, gij lwgsae de daeuj doiq de naeuz: “Gij vunz gaep haeuj Fazliqcaiq baij he dingq mwngz gangj gij vah neix le, gyoengqde cungj aeuqheiq mwngz hwj ij rai, mwngz rox lwi?” 13 Yehsuh dingq le, couh han naeuz: “Famz mbouj dwg Bohmbwn gou ndaem hih cungj ij lienz rag lienz goenq ciemzcag hwnjdaeuj liux bae. 14 Mbouj leixlangh gyoengqde. Gyoengqde dwg vunz rafangz daiq roen he; rafangz daiq rafangz, song boux cungj ngaiz doek roengz cingj bae.” 15 Bijdwz dingq de yienghneix beijgangj le, couh naeuz: “Cingj mwngz gaijyiz naeuz raeuz ni gij beijgangj neix dwg gijmaz iqswh veiq.” 16 Yehsuh dingq le, han naeuz: “Nanzdauh faenhsou daengz seizneix cungj lij mijyaengz rox gij iqswh de haj? 17 Nanzdauh faenhsou mbouj rox daj conghbak haeuj bae hih cungj roengz dungx, gajlaeng caiq ok okdaeuj hih mah? 18 Hoeng, daj conghbak ok daeuj hih vah cungj dwg daj ndaw sim ok daeuj. Daj conghbak ok daeuj hih cij ndaej hawj Cangqdiq dwgcaengz he. 19 Aenvih daj ndaw sim ok daeuj hih cij miz doenghgij siengjfap yalw he. Doenghgij yalw neix couh dwg hawj vunz doxgaj hah, guhyoux hah, ndaengndwet hah, guxcaeg hah, guh gyaj cingqgiq hah, bangjlaih vunz hah. 20 Doenghgij neix cij cingqcaen ndaej hawj Cangqdiq dwgcaengz he. Hoeng, gangj daengz mbouj swiq fawz couh gw haeux hih, dauq mbouj ndaej hawj Cangqdiq dwgcaengz he.” 21 Yehsuh gangj sat doenghgij vah neix le, couh daj mwnq dieg mwnq ok ma, bae daengz mwnq dieg Daiqwj caeuq Sihdoenq song aen singz neix. 22 Yiengq dieg mwnq miz boux vunzbaz Gyahnamz he daeuj cimh Yehsuh. De daeuj le, couh hemq naeuz: “Bouxcawj gou hax, Daqveiq dih lwglan hax, hojsik hojsik gou bax! Dahlwg gou ngaiz fangz doz hwj cienfanh camj he.” 23 Yehsuh dingq le, cungj mij ok sing gangj gijmaz. Gij lwgsae de raen yienghneix le, couh goq bae gouz de naeuz: “Meh vunzbaz neix caenhrox gaen gajlaeng hangx gyoengqraeuz daeuj hemq vauxvaux. Naeuz hawj de deuz bax.” 24 Hoeng, Yehsuh dauq naeuz: “Cangqdiq baij gou daeuj dwg hawj gou bae daengz gij vunz Hijswzlez doenghheij mbouj rox fuengyiengq hih doenghheij yiengz mwnq bae lah.” Yehsuh yienghneix naeuz sat le, couh doiq meh vunzbaz mwnq naeuz: “Hoeng, mehsimj hax, mwngz mbouj dwg hah.” 25 Meh vunzbaz mwnq baex dingq gawq vah neix he le, couh gvih roengz dangqnaj de bae sax de, gouz de naeuz: “Bouxcawj gou hax, gouz mwngz bangbang gou bax!” 26 Yiengq Yehsuh dauq han naeuz: “Dawz gij bingj lwgngez bae gveng hawj ma gw dwg mbouj deng hih.” 27 Meh vunzbaz mwnq dingq le, caemh han naeuz: “Dwg hah, bouxcawj hax, hoeng, duz ma caemh ndaej gw gij daj gwnz daiz bouxcawj doek roengz doem bae he hah.” 28 Yehsuh dingq meh de yienghneix naeuz le, couh naeuz: “Mehsimj hax, mwngz miz sinqsim lai raixcaix; couh ciuq gij iqswh mwngz bae bang mwngz bax!” Couh yienghneix, daj mwhde hwnj, dahlwg de couh ndei lo. 29 Gij saeh neix goq le, Yehsuh couh daj mwnq dieg mwnq ok ma, bae daengz henz huz Gyahliqliq. Daengz le, de couh hwnj aen bya mwnq bae naengh. 30 Yiengq miz baenx haujlai vunz daeuj cimh de, miz hih daiq vunz ha ndek hih, miz hih daiq vunz rafangz hih, miz hih daiq vunz ngoemx hih, miz hih daiq vunz gyad hih, caeuq baenx haujlai vunz bingh hih cungj daeuj daengz dangqnaj de, hawj de yw. Yehsuh caemh yw gyoengqde ndei liux. 31 Youq mwnq sojmiz hih vunz raen ngoemx hih ndaej gangj vah lo, gyad hih ndaej ndei lo, ha vej hih ndaej byaij roen lo, rafangz hih ndaej yawjraen lo le, cungj raen geizheih ij rai bae, couh haenh Hijswzlez dih Cangqdiq. 32 Gajlaeng, Yehsuh couh heuh gyoengq lwgsae de goq daeuj, doiq gyoengqde naeuz: “Gou hojsik gyoengq vunz neix; gyoengqde gaen gou baenx sam ngoenz lo, cungj mij gijmaz gw haem. Gou mbouj nyienh hawj gyoengqde dungxiek maj, hoengjlau daengz dangjroen iek hwj ngunh hwj laemx bae bae.” 33 Gyoengq lwgsae de dingq le, han naeuz: “Yiengq raeuz seizneix youq rogndoi hah! Nwjh miz baenx lai bingj ndaej hawj baenx lai vunz gw imq?” 34 Yehsuh han naeuz: “Faenhsou dineix miz geijlwh bingj hax?” Gyoengqde han naeuz: “Cijngamq miz caet aen bingj caeuq geij duz bya iq sat lo.” 35 Gajlaeng Yehsuh couh hawj gij vunz naengh ndei hwj. 36 De couh dawz caet aen bingj caeuq geij duz bya iq mwnq hwnjdaeuj, docih Cangqdiq. Docih le, couh euj hwj faen hawj gyoengq lwgsae de, hawj gyoengqde faen hawj gyoengq vunzlai gw. 37 Gyoengq vunzlai bouxboux cungj caemh ndaej gw, mbouj danhcij naeuz ndaej gw, vanzlij ndaej gw daengz imq, gw daengz lw, lw hwj coux ndaej baenx caet lamz rim. 38 Mwhde youq mwnq, sojmiz ndaej gw hih itgungh miz seiqcien vunz, vunzbaz caeuq lwgngez mbouj suenq. 39 Gajlaeng Yehsuh couh hawj gyoengq vunzlai sanq maj lo. Gij vunz sanq maj le, de couh hwnj ruz bae dieg Majgyahdanh lo.
1 Miz baez he, miz gij vunz gaep haeuj Fazliqcaiq baij he caeuq gij vunz gaep haeuj Sajduhgaih baij he daeuj cimh Yehsuh, siengj hawj de guh gij geizmiuj hih saeh he hwj ndaej cingqmingz naeuz de dwg Cangqdiq baij daeuj he. 2 Yiengq Yehsuh rox le, couh doiq gyoengqde naeuz: “Yiengqhaemh gyangjngoenz ij doek mwhde, faenhsou raen aen mbwn wenjhoengz, couh naeuz: ‘Ngoenzcog gaengjdingq mbwn cingx lo.’ 3 Doengxhaet, faenhsou raen aen mbwn miz amqhoengz, couh naeuz: ‘Ngoenzneix ij fan rumz fwn doek lo.’ Doenghheij vunz faenhsou hax, rox yawj dienheiq bienqvaq, hoeng, vihmaz mbouj rox yawj aen nienzdaiq neix nej? 4 Doenghheij doegdoeg siebsieb ndaengndaeng ndwetndwet hih aen nienzdaiq faenhsou hax, faenhsou mbouj sinq gou cij ijsiengj yawj gij geizmiuj he, hoeng, cawzok luj Yoznaz boux cenz gij vah Cangqdiq neix hih gij geizmiuj mwnq, caiq mij daixlingh gij geizmiuj hawj faenhsou ndaej yawj haem lo.” Yehsuh gangj sat doenghgij vah neix le, couh baet hangx deuz lo. 5 Gajlaeng, Yehsuh caeuq gyoengq lwgsae de bae daengz doiqmienh Gyahliqliq Huz, hoeng, gyoengq lwgsae de lumz daiq bingj bae. 6 Couh youq mwhneix, Yehsuh couh doiq gyoengqde naeuz: “Faenhsou ij siujsim, ij daezfuengz gij vunz gaep haeuj Fazliqcaiq baij he caeuq gij vunz gaep haeuj Sajduhgaih baij he dih yauqmuj.” 7 Gyoengq lwgsae dingq de yienghneix naeuz le, cungj caezgya lwnh naeuz: “Aiq dwg gyoengqraeuz lumz daiq bingj le, de cij yienghneix naeuz lo bax.” 8 Yehsuh rox naeuz gyoengqde lwnh naeuz gijmaz le, couh naeuz: “Doenghheij mbouj sinq gou geijlai hih faenhsou hax, vihmaz ij lwnh naeuz mbouj daiq bingj gij saeh neix nej? 9 Faenhsou gingqyienz daengz seizneix cungj lij mijyaengz rox. Nanzdauh faenhsou lumz gaxgonq gou dawz haj aen bingj faen hawj hajcien vunz gw imq goq caiq lij lw baenx geijlwh lamz lo mah? 10 Caemh mbouj ndaejgeiq, caet aen bingj ndaej hawj seiqcien vunz gw, caemhcaiq lw hwj sou ndaej baenx geijlwh lamz lo mah? 11 Gou doiq faenhsou gangj naeuz: ‘Ij daezfuengz gij vunz gaep haeuj Fazliqcaiq baij he caeuq gij vunz gaep haeuj Sajduhgaih baij he dih yauqmuj,’ gawq neix, mbouj dwg ceij guh menqbauh dih yauqmuj nej! Faenhsou vihmaz cungj lij mbouj rox nej?” 12 Yehsuh yienghneix gangj le, gyoengq lwgsae de cij singqsag goqdaeuj, cij rox naeuz Yehsuh mbouj dwg naeuz hawj gyoengqde daezfuengz gijmaz yauqmuj, dauq dwg naeuz hawj gyoengqde daezfuengz gij vunz gaep haeuj Fazliqcaiq baij caeuq gij vunz gaep haeuj Sajduhgaih baij he soj son hih lah. 13 Gajlaeng Yehsuh caeuq gyoengq lwgsae de bae daengz mwnq gaenh aen singz Gaijsajliqyaq-Feihlizbij he. Daengz mwnq le, de cam gyoengq lwgsae de naeuz: “Vunz naeuz gou, Vunz dih Daiqbiuj, dwg byawz nej?” 14 Gyoengq lwgsae de han naeuz: “Miz vunz naeuz mwngz dwg bang vunz sijlij dih Yozhanq, caemh miz vunz naeuz mwngz dwg Hijliqyaq, caemhcaiq miz vunz naeuz mwngz dwg Yehliqmij cixnaeuz dwg dangq doenghbaez hih boux cenz gij vah Cangqdiq hih boux he dauqlix he.” 15 Yehsuh dingq le, caiq cam gyoengqde naeuz: “Yiengq faenhsou nej? Faenhsou naeuz gou dwg byawz nej?” 16 Sihmaenz-Bijdwz han naeuz: “Mwngz dwg Gihduz, dwg seiqseiz lix dih Cangqdiq dih lwg.” 17 Yehsuh dingq le, couh doiq de naeuz: “Sihmaenz, daeglwg Yozhanq, mwngz miz fuk lo! Aenvih hawj mwngz rox gij saedsaeh neix hih mbouj dwg vunz, dauq dwg daxboh gwnzmbwn gou naeuz mwngz ni lah. 18 Gou vanzlij naeuz mwngz ni, mwngz dwg Bijdwz, dwg rin; gou ij youq gwnz ngauq rin neix laeb gyauqveiq. Rai dih gienzliz mbouj ndaej giengz goq aen gyauqveiq neix. 19 Gou vanzlij ij dawz guek Cangqdiq hih seiz gyau hawj mwngz. Famz dwg mwngz youq lajdeih soj gimqcij hih, caemh dwg Cangqdiq youq gwnzmbwn gaenq gimqcij hih; mwngz youq lajdeih soj hawj hih, caemh dwg Cangqdiq youq gwnzmbwn gaenq hawj hih.” 20 Yehsuh yienghneix gangj le, vanzlij raengq gyoengq lwgsae de, mbouj hawj gyoengqde naeuz vunz ni de couh dwg Gihduz. 21 Daj mwhmwnq hwnj, Yehsuh couh naeuz gyoengq lwgsae de ni, naeuz de bietdingh ij bae Yehluqsajlaengj, youq Yehluqsajlaengj ij ngaiz souh daengz gij vunz gangj vah couh baenz he caeuq doengh boux goengjsae dajbwiz he caeuq doengh boux fazliz cenhgyah he haih, simqciq ngaiz gajrai, daixsam ngoenz ndaej dauqlix. 22 Bijdwz dingq le, couh rag de goq daixlingh mbiengj bae, naeuz: “Bouxcawj gou hax, ciengeiz mbouj ndaej yienghneix! Gij saeh neix ciengeiz mbouj ndaej fatseng youq gwnz ndang mwngz.” 23 Yehsuh dingq le, couh veq goqma gvaiq Bijdwz naeuz: “Dihduz Sajdanq mwngz deuz, mwngz bang Sajdanq gangj vah he! Mwngz siengj gaz ha gou. Mwngz yienghneix siengjfap mbouj dwg Cangqdiq dih siengjfap, dauq dwg vunz dih siengjfap lah.” 24 Yehsuh yienghneix naeuz Bijdwz le, couh doiq gyoengq lwgsae naeuz: “Hauhnaeuz faenhsou ijsiengj daeuj gaen gou hih, couh ij sijndaej diuz mingh bonjfaenh, ij ngoenzngoenz aemq aen gyaq cixcib daeuj gaen gou cij ndaej. 25 Aenvih doengh boux ijsiengj gouq gij mingh bonjfaenh hih, dauqfanj ngaiz vwt mingh; doengh boux vih gou hwj ngaiz vwt mingh hih, dauqfanj ndaej gouq mingh. 26 Doengh boux miz baenx cenz lajmbwn hih, fanjgoqma dauq mbouj miz mingh, yiengq miz maz ik nex? De vanzlij miz gijmaz ndaej vuenh diuz mingh bonjfaenh de ma nej? 27 Gou naeuz sou ni hax, baezneix gou, Vunz dih Daiqbiuj, ij luj Bohmbwn gou yienghmwnq najrongh sagsag hwj caeuq bouxcai de itheij daeuj. Daengz mwhmwnq, gou couh ciuq gak vunz soj guh hih, ndei hih hawj vunz ndei, rwix hih bauqwngq hawj vunz. 28 Gou caiq naeuz sou ni, faenhsou ndaw neix hih vunz miz mbangj hih vunz youq de lij lix hih mwhde gaengjdingq ndaej raen Vunz dih Daiqbiuj daeuj dang vuengz.”
1 Gij saeh neix goq roek ngoenz le, Yehsuh daiq Bijdwz caeuq Yajgoz caeuq daegnuengx de Yozhanq sam boux neix hwnj aen bya sang he bae. 2 Hwnj bae le, de couh youq dangqnaj gyoengqde bienq, bienq hwj naj rongh sagsag, luj gyangjngoenz nwih, diuz buh de caemh bieg supsup, myig myiengzmyiengz. 3 Sawqmwh, Mohsih caeuq Hijliqyaq song boux neix yienh youq dangqnaj gyoengqde, caeuq Yehsuh gangj vah. 4 Bijdwz raen le, couh doiq Yehsuh naeuz: “Bouxcawj gou hax, gyoengqraeuz youq dineix baenz hwx! Hauhnaeuz mwngz nyienh'eiq nex, gou couh youq dineix dap sam aen cangqbungz, aen he hawj mwngz, aen he hawj Mohsih, lij aen he hawj Hijliqyaq.” 5 Bijdwz gangj doenghgij vah neix hih mwhde, miz ndaek vangq fwj rongh sagsag he daeuj guem gyoengqde. Ndaw fwj ndaw de caemh miz sing gangj naeuz: “Boux neix dwg daeglwg gou, dwg gou aiq dih lwg; de hawj gou roxnginh hab'eiq habhoz he. Faenhsou ijaeu dingq gij vah de.” 6 Sam boux lwgsae de dingq gij sing neix le, cungj lau hwj bomz roengz doem bae. 7 Yehsuh raen le, couh byaij goqbae bekbek gyoengqde, naeuz: “Gaej lau; hwnq!” 8 Gyoengqde dingq le, couh ngiengx raeuj hwnjdaeuj yawj, hoeng, caenhgag yawjraen Yehsuh boux vunz dog sat lo, caiq mij raen saek boux haem lo. 9 Gajlaeng, gyoengqde couh roengz bya ma lo. Roengz ma hih mwhde, Yehsuh raengq sam boux lwgsae de naeuz: “Youq gou, Vunz dih Daiqbiuj, mijyaengz daj rai ndaej dauqlix cihsenz, faenhsou mbouj ndaej dawz daxbaenh soj raen hih geizmiuj hih saeh gangj naeuz vunz ni.” 10 Sam boux de dingq le, couh cam de naeuz: “Yiengq, fazliz cenhgyah vihmaz ij naeuz Hijliqyaq gaengjdingq daeuj gaxgonq nej?” 11 Yehsuh han naeuz: “Hijliqyaq danghyienz ij daeuj gaxgonq lo; de ij sien daeuj cwnjbiq ndei sojmiz hih. 12 Gou naeuz sou ni, Hijliqyaq gaenq daeuj goq lo, cijmboujgoq gij vunz mij rox de, dauq haenj baenzlawz doiq de couh baenzlawz doiq de. Baezneix gou, Vunz dih Daiqbiuj, caemh dwg ngaiz gij vunz yienghneix doiq gou.” 13 Yehsuh yienghneix gangj le, gyoengqde cij rox de soj gangj hih gij vah neix dwg ceij guh sijlij dih Yozhanq gangj hih. 14 Yiengq Yehsuh caeuq doengh boux lwgsae de roengz bya ma le, couh bae daengz gyoengq vunzlai mwnq. Youq mwnq miz boux he goq daeuj gvih youq dangqnaj de, 15 naeuz: “Bouxcawj gou hax, gouz mwngz hojsik hojsik daeglwg gou bax. De bingh fatbanghmou hwj youqgaenj raixcaix, siengzseiz ngaiz laemx roengz feiz bae, doek roengz raemx bae. 16 Gou daiq de bae cimh gij lwgsae mwngz goq hwj, hoeng, gyoengqde mij ndaej yw de ndei haem.” 17 Yehsuh dingq le, couh naeuz: “Haez, doenghgij vunz faenhsou hax! Cix yayangq cix mbouj sinq! Gou lij ij youq faenhsou dineix geijlwh caez haem? Gou ij naenx faenhsou daengz seizlaw bae? Daiq de goq daeuj dineix bax!” 18 Gajlaeng, daeg de daeuj le, Yehsuh couh haep duz fangz yak gwnz ndang de, duz fangz yak gwnz ndang de couh ok daeuj lo. Daj mwhmwnq hwnj, daeg lwgngez mwnq couh ndei lo. 19 Doengh boux lwgsae de raen yienghneix le, couh goq bae caegcaeg cam de naeuz: “Raeuz vihmaz boenq duz fangz mwnq boenq mbouj okma nej?” 20 Hoeng, Yehsuh engq han naeuz: “Aenvih faenhsou mbouj gaeuq sinq Cangqdiq; sinqsim mbouj gaeuq. Gou saedsaeh naeuz sou ni, hauhnaeuz gij sinqsim faenhsou ndaej hung luj ceh byaekgat nex, faenhsou cungj ndaej seizbienh guh daengz gijmaz. Yiengq cungjsuenq naeuz faenhsou mingqlingq aen bya neix naeuz: ‘Mwngz daj mwnqneix nod goq mwnq bae!’ yienghneix naeuz, aen de cungj caemh dingq faenhsou hwj nod goq bae hwx. 21 Gangj daengz doiq cungj fangz neix, faenhsou bietdingh ij lekdungx gouz Cangqdiq cij ndaej boenq okma hih.” 22 Miz baez he, Yehsuh caeuq gyoengq lwgsae de youq Gyahliqliq doxcomz hih mwhde, Yehsuh doiq gyoengq lwgsae de naeuz: “Gou, Vunz dih Daiqbiuj, couh ijvanh ngaiz buenqduz cuzmaiq lo, 23 ngaiz vunz haihrai, hoeng, daixsam ngoenz couh ndaej dauqlix lo.” Gyoengq lwgsae de dingq le, cungj you hwj ij rai bae. 24 Caiq miz baez he, Yehsuh caeuq gyoengq lwgsae de bae daengz Gyahbwznungz Singz hih mwh he, youq mwnq miz geij boux guh sou gunghdenq Cangqdiq hih ceiq he goq daeuj cam Bijdwz naeuz: “Goeng lauxsae faenhsou mij gyau ceiq hawj gunghdenq Cangqdiq nej?” 25 Bijdwz han naeuz: “Gyau hah.” De han yienghneix le, couh haeuj ranz maj lo. De haeuj maj cungj mij ok maz sing haem, Yehsuh couh sien cam de naeuz: “Sihmaenz, gou cam mwngz, goengjvuengz lajmbwn wnggai hawj byawz nab ceiq hawj de nej? Dwg hawj gij lwg de haj cixnaeuz gij vunz vaihguek nej? Mwngz dwg baenzlaw yawj hih nej?” 26 Bijdwz dingq le, han naeuz: “Gij vunz vaihguek.” Yehsuh dingq le, couh naeuz: “Yiengq, giqyienz dwg yienghneix vwz, lwg couh mbouj hoj gyau ceiq lo. 27 Hoeng, vih mbouj siengj daekcoih buek vunz mwnq, mwngz couh bae henz huz ep bya, dawz duz ep ndaej daixdaeuz he ma hoi conghbak de, couh ndaej daj ndaw bak de aeu ndaej maenz ngaenz he lo, aeu ma gyau hawj gunghdenq Cangqdiq bax. Bienh ngaenz neix caemh ndaej gaeuq gyau mwngz caeuq gou song boux dih ceiq lo.”
1 Miz baez he, gyoengq lwgsae Yehsuh cam de naeuz: “Youq ndaw guek Cangqdiq, byawz ceiq rem?” 2 Yehsuh dingq le, couh heuh laeq lwgngez he goq daeuj, hawj de ndwn youq gyoengqde mwnq hwj couh naeuz: 3 “Gou saedsaeh naeuz sou ni, hauhnaeuz faenhsou mbouj gaij goqma ndaej luj lwgngez yienghmwnq lauxsaed simndei, faenhsou gaenhbaenj mbouj ndaej gaep haeuj guek Cangqdiq. 4 Sojhij, byawz ndaej luj laeq lwgngez neix yienghmwnq lauxsaed simndei, byawz couh dwg youq ndaw guek Cangqdiq ceiq rem he lo. 5 “Famz miz vunz aeunaj gou, yawjhwnj gou, daih luj laeq lwgngez neix hih, yiengq caemhdangq daih gou lo. 6 Famz yungx boux luj lwgngez yienghmwnq sinq gou hih famh coih hih, satsoq lo. Yiengq boux yungx vunz famh coih mwnq, hozmboujyienz dawz famuh rin venj gwnz hoz de bae, gveng roengz haij bae, yienghmwnq ndei goq de hawj vunz famh coih bae.” 7 Yehsuh vanzlij naeuz: “Aen seiqgyaiq neix satsoq lo, aenvih cungj ij miz gij saeh hawj vunz famh coih he. Doenghgij saeh neix caemh mienx mbouj liux hih, hoeng, doengh boux hawj vunz famh coih hih satsoq lo! 8 Sojhij, hauhnaeuz miz cik fawz he cixnaeuz miz cik ha he hawj mwngz famh coih hih, couh ij dawz de raemjrak gvenggvak bae. Cingxnyienh noix fawz noix ha hwj ndaej seiqseiz lix, mbouj cingxnyienh song fawz song ha miz caez hwj ngaiz gveng haeuj ndaw feiz dawz mij rox maet he bae. 9 Caiq hauhnaeuz mwngz miz cehra he hawj mwngz famh coih, yiengq mwngz couh ij dawz ceh de vetvak gvenggvak bae. Cingxnyienh miz cehra dog hwj ndaej seiqseiz lix, mbouj cingxnyienh miz song ceh hwj ngaiz gveng haeuj ndaw feiz mwnq Cangqdiq fad fangz he bae.” 10 De gangj daengz dineix le, couh naeuz: “Faenhsou ij siujsim, mbouj ndaej yawj mbouj hwnj doenghheij luj lwgngez yienghmwnq lauxsaed simndei sinq gou hih vunz he, aenvih doengh bouxcai gyoengqde youq gwnzmbwn siengzseiz caeuq Bohmbwn gou doxraennaj. 11 Gou naeuz sou ni, gou, Vunz dih Daiqbiuj, daeuj dwg ij gouq doenghgij vunz mbouj rox fuengyiengq he lah.” 12 Yehsuh gangj daengz dineix le, vanzlij yungh beijgangj ma naeuz: “Gou cam faenhsou, beijgangj naeuz miz boux he, de miz bak duz yiengz, hoeng, miz duz he ngaiz mbouj raen lo. Yiengq boux de ij mbouj ij camqciz mbouj leix goujcib gouj duz mwnq hwj bae cimh duz ngaiz mbouj raen mwnq nej? 13 Gou saedsaeh naeuz sou ni, hauhnaeuz de cimh ndaej raen nex, gaengjdingq angq raixcaix, mbouj danhcij naeuz angq, vanzlij beij angq goq goujcib gouj duz mij ngaiz mij raen, mbouj ngaiz bae cimh mwnq angq ndaej lai hwx. 14 Caemh doxdoengz, Bohmbwn faenhsou caemh mbouj nyienh doengh boux ndaej luj lwgngez yienghmwnq lauxsaed simndei he ngaiz satsoq.” 15 De vanzlij caiq naeuz: “Hauhnaeuz boux beixnuengx mwngz daekcoih mwngz, yiengq mwngz couh ij domh mwh mij'z vunz he, caenhgag mwngz caeuq de youq mwnq hih mwhde, couh ij naeuz de. Yiengq, hauhnaeuz de dingq mwngz nex, couh dangq dwg gaenq ndaej doxndei lo. 16 Yiengq, hauhnaeuz de mbouj dingq nex, mwngz couh daiq boux daengz song boux caeuq mwngz itheij bae cimh de; yienghmwnq mwngz soj naeuz de hih vah caemh ndaej miz song daengz sam boux cingqyinz lo. 17 Caiq hauhnaeuz de cungj mbouj dingq mwngz lo, mwngz couh bae naeuz gyauqveiq naeuz vunzlai ni. Hauhnaeuz de daiqlienz gyauqveiq cungj mbouj dingq hoh vwz, mwngz couh dawz de dangqbaenz boux lingh aen minzcuz mbouj rox Cangqdiq he, cixnaeuz dwg doenghgij vunz doegsieb sou ceiq mwnq he. 18 Sojhij, gou saedsaeh naeuz sou ni, youq lajmbwn, faenhsou soj gimqcij hih, youq gwnzmbwn Cangqdiq caemh gaenq gimqcij lo; youq lajmbwn, faenhsou soj hawj hih, youq gwnzmbwn Cangqdiq caemh gaenq hawj lo. 19 “Gou caiq naeuz sou ni, faenhsou ndaw neix mboujguenj byawz, cijaeu miz song boux caezsim itheij gouz, mboujguenj gouz gijmaz, Bohmbwn gou caemh gaengjdingq hawj gijmaz, 20 aenvih mboujguenj youq mwnqlaw, cijaeu miz song daengz sam boux hij gij mingzhiq gou ma doxcomz hih, gou couh caeuq gyoengqde youq mwnqlaw lo.” 21 Gajlaeng, Bijdwz bae cam Yehsuh naeuz: “Bouxcawj gou hax! Hauhnaeuz boux beixnuengx gou daekcoih gou, yiengq gou ij nyiuz de geijlwh mbat nex? Caet mbat ndaej mboujyaengz?” 22 Yehsuh dingq le, han de naeuz: “Mbouj dwg caet mbat; dwg caetcib caet mbat. 23 Beijgangj naeuz, aen guek Cangqdiq couh luj goengjvuengz; miz goengjvuengz he, de ij caeuq gij hoiq yiemq caiq de suenq cangq. 24 Gaihcij suenq cangq lo, couh miz vunz daiq boux yiemq caiq bakfanh gaen ngaenz he daeuj. 25 Aenvih boux yiemq caiq mwnq mij'z ngaenz boiz, yiengq bouxcawj de couh mingqlingq hawj vunz dawz de hai bae caeuq hai mehyah de caeuq hai gij lwg de caeuq de sojmiz hih cungj hai liux bae le, dawz ngaenz daeuj boiz caiq. 26 “Yiengq boux yiemq caiq mwnq couh gvih youq dangqnaj bouxcawj de gouz de naeuz: ‘Bouxcawj gou hax, cingj mwngz nyiuz gou bax; baezneix gou gaengjdingq boiz mwngz liux hih.’ 27 Daengz mwhmwnq, bouxcawj de dingq de yienghneix gouz le, couh sim'unq hwj coengq de, caemh mbouj hawj de boiz caiq lo. 28 “Hoeng, liuh mbouj daengz boux de ndaej coengq okmaj le, nyangz boux caeuq de itheij guh hong he, laeng de yiemq miz bak dingq ngaenz he. De raen le, couh ya dawz boux de, nap dawz gij hoz boux de hwj haep de naeuz: ‘Dawz mwngz soj yiemq hih ngaenz boiz hawj gou liux bae!’ 29 “Yiengq boux doengzdoih mwnq couh gvih roengzma gouz de, naeuz: ‘Gouz mwngz nyiuz gou bax! Gou itdingh boiz mwngz liux hih!’ 30 Boux de cungj yienghneix gouz lo, hoeng, de cungj mbouj nyiuz de, dauq dawz de bae gyaeng haeuj ndaw lauz bae, ij daengj de boiz caiq. 31 “Yiengq doenghheij caeuq de itheij guh hong hih vunz raen de yienghneix le, cungj yawj mbouj goq ra, couh bae cimh bouxcawj mwnq, bae naeuz de ni gij saeh neix. 32 Bouxcawj dingq le, cungj aeuqheiq hwj ij rai, couh dauq heuh boux yiemq caiq de mwnq daeuj, doiq de naeuz: ‘Dihduz hoiq simdoeg mwngz, mwngz gouz gou, gou couh mienx mwngz soj yiemq hih caiq lo, 33 hoeng, mwngz vihmaz mbouj hojsik boux doengzdoih mwngz, caemh luj gou hojsik mwngz yienghmwnq nej?’ 34 Couh yienghneix, bouxcawj couh ndatheiq hwj caemh dawz de gyaeng haeuj ndaw lauz bae, dub de fad de, caemhcaiq daengj de boiz gij caiq de liux.” 35 Gangj daengz dineix le, Yehsuh couh naeuz: “Gou saedsaeh naeuz sou ni, hauhnaeuz faenhsou mbouj cingqcaen dwg daj ndaw sim nyiuz boux beixnuengx mwngz nex, Bohmbwn gou caemh luj yienghneix doiq faenhsou lo.”
1 Yehsuh gangj sat doenghgij vah neix le, couh daj Gyahliqliq bae daengz doiqmienh diuz dah Yozdanq Youzdaiq Saengj lo. 2 Mwhde caemh miz baenx haujlai vunz gaen de; de caemh yw bingh hawj gyoengqde, yw ndei gyoengqde. 3 Yiengq youq mwnq caemh miz gij vunz gaep haeuj Fazliqcaiq baij he daeuj cimh Yehsuh, siengj daj gij vah de cimh cingqgiq, couh cam de naeuz: “Veix, raeuz cam mwngz, vunzsai ndaej seizbienh cimh gijmaz lijyouz ma caeuq mehyah de lizvwnh haz?” 4 Yehsuh dingq le, han naeuz: “Nanzdauh faenhsou mij doeg goq ndaw Singqgingh ndaw de miz duenh saw he maz? Gaihcij Cangqdiq cauh mbwn cauh deih mwhde, caemh cauh vunzsai caeuq vunzbaz. 5 Cangqdiq naeuz: Sojhij, vunzsai ij liz bohmeh bae caeuq mehyah doxgaep guhbaenz boux he. 6 Yiengq, giqyienz gvanjbaz mbouj caiq dwg song boux, dangq dwg boux he lo, sojhij Cangqdiq soj boiq hih vunz, mbouj ndaej faenliz hih nej.” 7 Gyoengqde dingq le, mbouj fug, caiq cam naeuz: “Yiengq Mohsih vihmaz dingh naeuz diuz he naeuz vunzsai miz mbaw lizvwnh cingq he couh ndaej liz mehyah de lo nej?” 8 Gajlaeng Yehsuh caiq han naeuz: “Mohsih hawj faenhsou liz mehyah dwg aenvih aen sim faenhsou daiq gyeng lai, hoeng, ngamq gaihcij cauh mbwn cauh deih mwhde, mbouj dwg yienghneix hah. 9 Gou naeuz sou ni, cizfeih meh de bae caeuq vunz, mijn'x nex, mboujguenj byawz liz mehyah de hwj bae aeu daixlingh meh hih cungj dwg guhyoux.” 10 Gyoengq lwgsae de dingq daengz gij vah neix le, couh doiq de naeuz: “Hauhnaeuz guh gvanjbaz baenxlai mazfanz hih, hozbiet ij gyezvwnh nej?” 11 Yehsuh dingq le, han naeuz: “Mwngz hih gij vah neix, mbouj dwg bouxboux caeuq mwngz yawjfap doxdoengz nej; Cangqdiq hawj byawz ndaej mbouj gyez, byawz couh ndaej mbouj gyez. 12 Doenghheij mbouj gyezvwnh hih gag miz gij dauhleix de: miz hih daiqseng baenz mbouj hab gyezvwnh, miz hih dwg ngaiz vunz iem hwj mbouj hab gyezvwnh hih, caiq miz hih dwg vih ij guh gij hong Cangqdiq hwj gag mbouj gyezvwnh hih. Byawz dungziq gij vah neix couh dungziq bax.” 13 Miz baez he, miz haujlai vunz daiq lwgngez daeuj cimh Yehsuh, siengj hawj Yehsuh oemj fawz haeuj laeng gij lwg gyoengqde bae, bang gij lwg gyoengqde gouz Cangqdiq. Yiengq doenghheij lwgsae de raen le, couh naeuz gyoengqde. 14 Hoeng, Yehsuh dauq naeuz: “Hawj gyoengq lwgngez goq daeuj dep gou, gaejyungh laengz gyoengqde, aenvih aen guek Cangqdiq dwg gvi haeuj luj doenghheij lwgngez neix hih.” 15 Couh yienghneix, Yehsuh couh oemj fawz hawj gyoengq lwgngez, bang gyoengq lwgngez gouz Cangqdiq. Gajlaeng de couh daj mwnq dieg mwnq ok ma lo. 16 Caiq miz baez he, miz boux he daeuj cam Yehsuh naeuz: “Lauxsae, gou cam mwngz, gou ij guh gijmaz ndeisaeh cij ndaej seiqseiz lix nej?” 17 Yehsuh dingq le, han naeuz: “Mwngz vihmaz ij cam gou gvanhhih ‘ndei’ dih saeh nej? Gou naeuz mwngz ni, caenhgag miz boux he cij dwg ndei he. Hauhnaeuz mwngz ijsiengj ndaej seiqseiz lix nex, couh wnggai soenhsouj gij gveihdingq de.” 18 Gajlaeng, boux de cam naeuz: “Gij gveihdingq law nej?” Yehsuh caiq han de naeuz: “Couh dwg: mbouj gaj vunz, mbouj ndaej guhyoux, mbouj ndaej guxcaeg, mbouj ndaej guh gyaj cingqgiq, 19 ijaeu gingqcungh bohmeh, aiq vunz caemh ij aiq luj bonjfaenh hah.” 20 Boux de dingq le, couh naeuz: “Doenghgij neix gou gaenq ciuq guh lo hah; vanzlij ij guh gijmaz haem nej?” 21 Gajlaeng, Yehsuh caiq naeuz: “Hauhnaeuz mwngz ijsiengj ndaej ndei liuxliux nex, mwngz couh maj hai mwngz sojmiz hih, dawz gij ngaenz daeuj faen hawj vunz gungz, yienghmwnq youq gwnzmbwn mwngz couh ndaej rom miz cienzcaiz lo, mwngz caemh ij daeuj gaen gou haem cij ndaej.” 22 Boux de baex dingq daengz gij vah neix he le, cungj duix liux, gajlaeng couh maj lo, aenvih boux de cienfanh fouqmiz he. 23 Yehsuh raen yienghneix le, couh doiq gyoengq lwgsae de naeuz: “Gou saedsaeh naeuz sou ni, miz cienzngaenz dih vunz hax, hoj huh, hoj haeuj aen guek Cangqdiq bae huh! 24 Gou caiq naeuz sou ni, miz cienzngaenz hih vunz ijsiengj haeuj aen guek Cangqdiq bae hoj huh, beij duz lozdoz ndonj rwzcim vanzlij hoj hwx!” 25 Gyoengq lwgsae de dingq gij vah neix le, cungj raen geizheih ij rai bae, couh cam de naeuz: “Yiengq, ciuq luj yienghneix ma gangj, miz byawz cij ndaej gouq nex?” 26 Gajlaeng, Yehsuh couh cimyawj gyoengqde, naeuz: “Vunz guh mbouj daengz hih, Cangqdiq guh ndaej daengz hah!” 27 Yiengq Bijdwz dingq daengz yienghneix le, couh cam naeuz: “Hawjm'z yawj hux, raeuz gaenq vwt raeuz sojmiz hih hwj daeuj gaen mwngz lohwng; baezneix raeuz ij ndaej gijmaz nej?” 28 Yehsuh dingq le, caiq doiq gyoengqde naeuz: “Gou saedsaeh naeuz sou ni, daengj daengz Cangqdiq dauqyungz dawz de soj cauh hih cungj luj gaxgonq yienghmwnq ndei boiz bae, gou, Vunz dih Daiqbiuj, couh naengh youq aen lungzeij rongh sagsag he, daengz mwhde, faenhsou gaen gou hih vunz caemh ij ndaej naengh youq cibngeih aen eij gwnz de hwj saemjbuenq gij vunz Hijswzlez dih cibngeih aen cuz lo. 29 Mboujguenj byawz, vih gou hwj vwt gya vwt dangq, vwt beix vwt nuengx, vwt boh vwt meh, vwt lwg vwt lan, vwt reih vwt naz hih, baezneix de gaengjdingq ndaej baenx bak boix, vanzlij ndaej seiqseiz lix haem hwx. 30 Miz haujlai vunz baenjlaiz youq gaxgonq hih dauq ngaiz youq gajlaeng; miz haujlai vunz baenjlaiz youq gajlaeng hih dauqfanj ndaej youq gaxgonq.”
1 Yehsuh vanzlij caiq naeuz: “Aen guek Cangqdiq couh luj gij goqsaeh laj neix, couh dwg: Miz bouxcawj suen mak buzdauz he; de miz ngoenz he doengxhaet daihcaeux couh ok bae goq vunz daeuj bang de guh gij hong ndaw suen de lo. 2 Yiengq de couh caeuq vunz gangj ndei ngaenzhong, gangj naeuz it ngoenz hawj it dingq ngaenz he. Gangj ndei le, couh hawj gyoengqde daeuj guh hong lo. 3 “Yiengq daengz haemq gyang gouj diemjcung yienghneix, de caiq ok bae, youq hongxgvaengh raen miz doenghgij vunz mij hong guh he youq mwnq guxcaemz. 4 De raen yienghneix le, couh doiq gyoengqde naeuz: ‘Faenhsou bae ndaw suen gou guh hong bax; gou caemh ok ngaenzhong hawj faenhsou ngamj hih.’ 5 Gajlaeng, doenghgij vunz mwnq caemh bae lo. Gajlaeng, daengz cungh'uj cibngeih diemj caeuq yaquj sam diemj yienghneix de caemhcaiq ok bae, caemh doxdoengz, de caemh cingj vunz daeuj guh hong. 6 “Yiengq daengz yiengqhaemh haj diemjcung yienghneix, de caemh ok bae daengz hongxgvaengh, youq mwnq caemh yawjraen miz gij vunz mij hong guh he ndwn youq mwnq. De couh cam gyoengqde naeuz: ‘Vihmaz youq mwnqneix baenxngoenz mij bae guh hong nej?’ 7 “Gyoengqde han naeuz: ‘Aenvih mij vunz cingj gyoengqraeuz bae guh hah.’ “De dingq le, couh doiq gyoengqde naeuz: ‘Faenhsou couh bae suen mak gou guh hong bax.’ 8 “Gajlaeng, daengz haemh souhong le, bouxcawj suen mwnq doiq boux guenj suen de naeuz: ‘Mwngz bae heuh doenghgij vunz guh hong mwnq daeuj, fat ngaenzhong hawj gyoengqde bax. Daj doengh boux daeuj guh gajlaeng mwnq fat gaxgonq, gajlaeng fat daengz doengh boux daeuj guh gaxgonq mwnq.’ 9 Couh yienghneix, doengh boux haj diemjcung cij daeuj he caemh lingx ndaej dingq ngaenz he. 10 Gajlaeng, lwnz daengz fat hawj doengh boux daeuj gaxgonq mwnq, yiengq gyoengqde naemqnaeuz daeuj gaxgonq aiq fat ndaej haemq lai vwq. Laixlawz, caemh dwg doxdoengz, it boux lingx ndaej it dingq ngaenz lah. 11 “Yiengq gyoengqde raen yienghneix le, couh ceng bouxcawj suen mwnq, naeuz: 12 ‘Gyoengqraeuz guh baenxngoenz cix gyangjngoenz cik cix dwgrengz ij rai, hoeng, doengh boux daeuj gajlaeng he, cijngamq guh ndaej diemjcung he, caemh ndaej caeuq raeuz lingx doxdoengz.’ 13 “Bouxcawj suen mwnq dingq le, han boux de naeuz: ‘Baengzyoux hax, gou mij yiemq mwngz hah. Gou mbouj dwg caeuq mwngz gangj goq naeuz hawj mwngz dingq ngaenz he hih maz? 14 Mwngz lingx faenh mwngz maj lo bax! Gou hawj boux daeuj gajlaeng he caeuq mwngz doxdoengz, dwg gou dih saeh. 15 Nanzdauh gou mij'z gienz yungh gij ngaenz gou haj? Gou doiq vunz haijliengh, mwngz couh rahoengz mah?’” 16 Yehsuh gangj daengz dineix le, couh naeuz: “Sojhij, couh dwg doenghheij youq gajlaeng hih, dauq ndaej gaxgonq; doenghheij gaxgonq hih, dauqfanj ngaiz youq gajlaeng lo.” 17 Miz mbat he, Yehsuh bae Yehluqsajlaengj. Yiengq daengz dangjroen, de doiq cibngeih boux lwgsae de naeuz: 18 “Gyoengqraeuz seizneix bae Yehluqsajlaengj. Youq Yehluqsajlaengj gou, Vunz dih Daiqbiuj, ij ngaiz vunz cuzmaiq, gyau hawj gij goengjsae dajbwiz caeuq doenghheij fazliz cenhgyah he, ngaiz gyoengqde buenq hawj gou rai. 19 Mbouj danhcij naeuz yienghneix, vanzlij caemh dawz gou gyau hawj gij vunz linghvaih minzcuz mbouj rox Cangqdiq he, ngaiz vunz dawz ma nyoujnyak gangjriu gaijmbwq, vanzlij aeu diuz bien naeng ma fad gou, simqciq dawz gou ding hwnj gwnz gyaq cixcib bae rai. Hoeng, daixsam ngoenz gou couh ndaej dauqlix lo.” 20 Caiq miz mbat he, mehyah Sihbiqdaiq heuh song daeglwg de Yajgoz caeuq Yozhanq goq bae daengz Yehsuh mwnq, couh gvih roengzma gouz de. 21 Yehsuh raen le, couh cam de naeuz: “Mwngz miz maz saeh hax?” Meh de han naeuz: “Gouz mwngz hawj song daeglwg gou youq ndaw guek mwngz, boux he naengh youq baixgvaz mwngz, boux he naengh youq baihswix mwngz bax.” 22 Yehsuh dingq le han naeuz: “Faenhsou gaenhbaenj mbouj rox bonjfaenh faenhsou gouz gijmaz. Gou couh ij ngaiz souh nanh lo; faenhsou souh ndaej lwi?” Gajlaeng, song boux de han naeuz: “Raeuz souh ndaej!” 23 Gajlaeng Yehsuh doiq song boux de naeuz: “Gou soj souh hih nanh, faenhsou caemh bietdingh ij ngaiz souh. Cijmboujgoq naengh youq baihswix baixgvaz gou hih, mbouj dwg gou naeuz couh suenq law; dwg Bohmbwn gou naeuz hawj byawz couh hawj byawz lah.” 24 Yiengq youq mwnq lij lw hih cib boux lwgsae dingq daengz yienghneix le, couh ndatheiq song boux de hwj ij rai bae. 25 Yehsuh rox le, couh heuh gyoengqde goq daeuj, doiq gyoengqde naeuz: “Faenhsou rox, youq gij minzcuz mbouj rox Cangqdiq ndaw de, doengh boux daeuzdaeuz de dwg boux rasang yawj mbouj hwnj vunz he, doengh goeng'ak gyoengqde dwg guenj gyoengqde haed gyoengqde rem raixcaix he. 26 Hoeng, faenhsou mbouj ndaej luj yienghneix. Faenhsou byawz siengj dang ak hih, byawz couh ij guh bouxhoiq faenhsou; 27 byawz siengj youq faenhsou ndaw neix guh daeuz hih, couh ij guh hoiq swqhaeuh faenhsou. 28 Caemh luj Vunz dih Daiqbiuj daeuj ityiengh; de mbouj dwg daeuj hawj vunz swqhaeuh de nej, dauq dwg daeuj swqhaeuh vunz lah. Mbouj danhcij naeuz dwg yienghneix, vanzlij dwg bang vunz cueg coih hwj ngaiz vwt mingh lah.” 29 Yehsuh gangj sat doenghgij vah neix le, couh caeuq gyoengqde daj Yehliqgoh Singz ok ma, bae daixlingh mwnq. Bae hih mwhde, miz baenx gyoengq vunz gaen de bae. 30 Yiengq bae daengz dangjroen, miz song boux rafangz naengh youq henz roen, dingqri naeuz dwg Yehsuh ij byaij goq mwnq bae, couh hemq naeuz: “Bouxcawj gou hax! Daqveiq dih lwglan hax, hojsik hojsik raeuz bax!” 31 Gyoengq vunz raen yienghneix le, couh naeuz song boux de mbouj hawj song boux de hemq, hoeng, song boux de vunz yied naeuz song boux de yied hemq engqgya gog, naeuz: “Bouxcawj gou hax, Daqveiq dih lwglan hax! Hojsik hojsik raeuz bax!” 32 Yehsuh dingq le, couh dingz roengzma, heuh song boux de goq daeuj, cam naeuz: “Faenhsou ij hawj gou bang guh gijmaz?” 33 Song boux de dingq le, couh han naeuz: “Bouxcawj gou hax, gouz mwngz hawj raeuz yawj ndaej raen bax!” 34 Yehsuh dingq le, couh hojsik hwj laxlax cehra song boux de; gajlaeng, song boux de couh doq yawj ndaej raen lo. Song boux de yawj ndaej raen le, couh gaen Yehsuh bae lo.
1 Yehsuh caeuq gyoengq lwgsae de bae ijvanh daengz Yehluqsajlaengj, couh dwg aen mbanj Bwzfazgiz dih aen bya Gamjlamj mwnq, de couh baij song boux lwgsae sien haeuj bae aen mbanj mwnq gaxgonq. 2 De doiq song boux de naeuz: “Faenhsou bae aen mbanj doiqmienh mwnq. Faenhsou haeuj bae le, couh raen miz duz lawzmeh he lamh youq mwnq, henz de caemh miz duz lawzlwg he; faenhsou couh gej ying aeu ma hawj gou. 3 Hauhnaeuz miz vunz cam faenhsou vihmaz ij ying aeu doengh duz de nex, faenhsou couh naeuz: ‘Bouxcawj raeuz ij yungh doengh duz de.’ Yiengq boux de couh majcangq hawj faenhsou ying ma lo.” 4 Gij saeh neix cingq lingz ok boux cenz gij vah Cangqdiq naeuz goq naeuz: 5 Bae naeuz gij vunz Cizanh Singz ni naeuz: “Yawj hux, goengjvuengz faenhsou daeuj lo! De dwg swnh semxsemh hih, gwih duz lawzmeh caeuq duz lawzlwg he.” 6 Yehsuh yienghneix raengq le, song boux lwgsae de caemh ciuq de raengq hih yienghmwnq bae guh lo. 7 Couh yienghneix, song boux de couh haeuj mbanj bae ying duz lawzmeh caeuq duz lawzlwg ma hawj Yehsuh, caemh dawz diuz buh bonjfaenh gyoengqde goemq hwnj gwnz gumq duz lawz bae hawj Yehsuh gwih hwnjbae. 8 Mwh de okdin bae hih mwhde, caemh miz haujlai vunz duet buh hwj bu roen hawj de, caemh vanzlij miz vunz raemj nginghfaex ma bu roen hawj de. 9 Gyoengq vunz cungj angq hwj hemq haenh Cangqdiq goggog naeuz: “Vanqseiq! Vanqseiq! Daqveiq dih lwglan wnggai haenh! Cangqdiq baij daeuj hih caen miz fuk lo; gyoengqraeuz wnggai haenh! Vanqseiq! Vanqseiq! Vanqvanqseiq!” 10 Gajlaeng, Yehsuh ngamq baex haeuj bae daengz Yehluqsajlaengj Singz he, baenx cenz singz hih vunz cungj nauhyied foenxfoenx, cungj siengj rox dauqdaej dwg byawz, cungj naeuz: “Boux neix dwg byawz nej?” 11 Gajlaeng gyoengq vunz gaen de mwnq cungj naeuz: “De couh dwg Gyahliqliq Saengj hih vunz, aen mbanj Nazsajlwz dih Yehsuh hah. Dwg boux cenz gij vah Cangqdiq he.” 12 Yehsuh bae daengz Yehluqsajlaengj le, baex haeuj gunghdenq Cangqdiq bae he, couh majcangq boenq doenghgij vunz youq mwnq baij hai doxgaiq caeuq cawx doxgaiq he okma, vanzlij dawz aen daiz boux baij vuenh ngaenz mwnq caeuq aen daengq boux hai roegguqgap mwnq nyoengx laemx. 13 Nyoengx laemx le, vanzlij doiq gyoengqde naeuz: “Singqgingh ndaw de sij naeuz: Gunghdenq Cangqdiq dwg haenh Cangqdiq gouz Cangqdiq dih deixfueng. Faenhsou engq dawz de ma bienqbaenz rongzcaeg he lah!” 14 Gajlaeng youq mwnq miz gij vunz rafangz he caeuq gij vunz ha ndek he goq daeuj cimh Yehsuh. Yehsuh raen le, couh yw ndei gyoengqde. 15 Hoeng, doengh boux goengjsae dajbwiz he caeuq doengh boux fazliz cenhgyah he raen Yehsuh guh hih doenghgij geizmiuj neix le, caiq gyacangq dingqri gij lwgngez youq ndaw gunghdenq Cangqdiq hemq naeuz: “Daqveiq dih lwglan vanqseiq!” gawq neix le, engqgya aeuqheiq hwj ij rai bae, 16 couh cam Yehsuh naeuz: “Mwngz dingqri gyoengqde hemq gijmaz lwi?” Yehsuh dingq le, han naeuz: “Dingqri hah, couh dwg ndaw Singqgingh ndaw de sij naeuz: Daj ndaw bak lwgngez caeuq ndaw bak lwgnding cungj ndaej dingqri haenh mwngz. Gawq neix faenhsou mbouj doeg goq mah?” 17 Yehsuh gangj sat gij vah neix le, couh daj Yehluqsajlaengj Singz ok ma bae daengz aen mbanj Bwzdaqniz youq haemh. 18 Yiengq daengz haet daixngeih daihcaeux, de dauq haeuj Yehluqsajlaengj Singz bae. Bae hih mwhde, de roxnginh dungxiek. 19 Gajlaeng de raen henz roen miz go uzvahgoj he le, couh byaij goqbae siengj cimh yawj miz mbouj miz mak gw. Hoeng, de byaij bae daengz henz go de le, cungj cimh mbouj raen miz saek aen mak, cenznaengz mbaw. De raen yienghneix le, couh yinx haeuj go de bae mang naeuz: “Daj seizneix hwnj, mwngz yungjyenj mbouj dawz mak.” De baex yienghneix naeuz he lah, go de couh majcangq doq reuq lo. 20 Gyoengq lwgsae de raen yienghneix le, couh geizheih hwj cam naeuz: “Go uzvahgoj neix guxmaz couh majcangq reuq hax?” 21 Yehsuh dingq le, han naeuz: “Gou saedsaeh naeuz sou ni, hauhnaeuz faenhsou sinq Cangqdiq mbouj ngeiz de nex, mbouj danhcij naeuz ndaej luj gou doiq go uzvahgoj neix soj guh hih geizmiuj hih saeh, daiqlienz faenhsou doiq aen bya neix naeuz: ‘Daj mwnqneix nod deuz, diuq roengz haij bae!’ yienghneix cungj ndaej guh daengz hwx. 22 Sojhij, cijaeu faenhsou sinq Cangqdiq, mboujguenj faenhsou gouz gijmaz, Cangqdiq cungj hawj faenhsou ndaej gijmaz.” 23 Gajlaeng, de caeuq gyoengq lwgsae de couh haeuj bae daengz Yehluqsajlaengj, daengz gunghdenq Cangqdiq gaijyiz gvanhhih gij saedsaeh Cangqdiq. Cingq gangj hih mwhde, miz doenghheij goengjsae dajbwiz he caeuq doenghheij fazliz cenhgyah he caeuq doengh boux vunz gangj vah couh baenz he daeuj, doiq de naeuz: “Mwngz miz maz gienzliz guh gij saeh neix? Byawz hawj gij gienz neix hawj mwngz?” 24 Yehsuh dingq le, han gyoengqde naeuz: “Gou caemh ij cam faenhsou gawq he; hauhnaeuz faenhsou naeuz gou ni, gou caemh naeuz sou ni gou miz maz gienzliz guh gij saeh neix lo. 25 Couh dwg, Yozhanq dih sijlij dwg byawz dih cawjeiq? Dwg Cangqdiq haj cixnaeuz dwg vunz nej?” Gyoengqde dingq le, couh gangj yebyeb hwj doxcimciek naeuz: “Gyoengqraeuz ij baenzlawz naeuz nej? Hauhnaeuz raeuz naeuz: ‘Dwg Cangqdiq lah,’ yiengq de gaengjdingq naeuz: ‘Yiengq faenhsou vihmaz mbouj sinq Yozhanq nej?’ 26 Hoeng, hauhnaeuz raeuz naeuz: ‘Dwg vunz lah,’ yiengq gyoengq vunzlai gaengjdingq aeuqheiq, aenvih gyoengqde sinq Yozhanq dwg boux cenz gij vah Cangqdiq he.” 27 Gyoengqde yienghneix cimciek le, mij banqfaz, couh naeuz: “Mbouj rox.” Yehsuh raen gyoengqde yienghneix naeuz le, couh doiq gyoengqde naeuz: “Yiengq gou caemh mbouj naeuz sou ni gou miz maz gienzliz ndaej guh gij saeh neix nej.” 28 Yehsuh yienghneix naeuz le, vanzlij caiq doiq gyoengqde naeuz: “Gou ij doiq faenhsou gangj gij beijgangj he, yawj faenhsou baenzlaw yawj gij saeh neix. Couh dwg naeuz, miz boux he, de miz song daeglwg. Miz ngoenz he, de doiq daeglwg daeuz de naeuz: ‘Lwg hax, ngoenzneix mwngz bae suen mak buzdauz guh hong bax.’ 29 “Daeg de han naeuz: ‘Gou mbouj bae hah.’ Hoeng de goq di he le, naemjnaemj couh bae lo. 30 “Gajlaeng, de caemh doxdoengz doiq daeglwg iq de yienghneix naeuz. Daeg de han naeuz: ‘Ox, gou bae guh.’ Gizsaed de gaenhbaenj mbouj bae. 31 “Yiengq gou cam faenhsou, song daeglwg neix dauqdaej daeglawz dingq daxboh de nej?” Gyoengqde han naeuz: “Daegdaeuz de.” Yehsuh dingq le, couh doiq gyoengqde naeuz: “Gou saedsaeh naeuz sou ni, doengh boux guh sou ceiq he caeuq doengh boux guh lauxgawj he vanzlij ndaej beij faenhsou sien haeuj aen guek Cangqdiq bae gaxgonq hwx. 32 Aenvih guh sijlij dih Yozhanq daeuj lo, daeuj son faenhsou ij baenzlawz guh cij ndaej youq ndaw lwgra Cangqdiq suenq dwg boux vunz simndei simsoh he, hoeng, faenhsou mbouj dingq de, dauqfanj doengh boux guh sou ceiq he caeuq doengh boux guh lauxgawj he dingq lah. Baenjlaiz faenhsou cungj rox gyoengqde, raen gyoengqde dingq lo, hoeng, vanzlij mbouj fug nginh loek gaijgoq, mbouj fug dingq de.” 33 Yehsuh vanzlij caiq naeuz: “Gou caiq gangj gaiq beijgangj haem naeuz sou ni. Couh dwg, doenghbaez miz boux he, de ndaem suen mak buzdauz he, seiqhenz de cungj miz faex led goqbae hwj, ndaw de vat miz u caq laeuj he, caemhcaiq hwnq aen dap gyenhciq vunz he, couh dawz aen suen neix co hawj vunz, bonjfaenh de couh bae gyae youz lo. 34 Yiengq daengz mwh ndaej sou mak hih lo, de couh baij bouxhoiq de ma laeng doengh boux co suen mwnq sou aeu faenh de wnggai ndaej he. 35 Hoeng, doengh boux co suen mwnq engq dawz doengh bouxhoiq de ma doh, doh sieng boux he, gajrai boux he, aeu rin ma dub rai boux he. 36 Gajlaeng, bouxcawj suen mwnq caiq baij haujlai hoiq ma, hoeng, doengh boux co suen mwnq caemh ciuq yienghmwnq doiq gyoengqde. 37 Guh hwj bouxcawj suen mwnq mij banqfaz le, gajlaeng cij ndei gag baij daeglwg bonjfaenh ma. Boux de gag naemj: ‘Saekseiz gyoengqde lij soenhcungq daeglwg gou haem hwx.’ 38 “Hoeng, liuh mbouj daengz doengh boux co suen mwnq baex raen daeglwg de he le, couh doxcimciek hwj naeuz: ‘Neq, boux ciep aeu aen suen neix hih daeuj lo. Daengj raeuz gajgak de bae; gajgak de bae le, baezneix aen suen neix mijyaengz dwg ndaej gvi hawj gyoengqraeuz haz!’ 39 Gyoengqde yienghneix cimciek le, couh nyoengx daeg de ok rog suen ma, couh gaj de.” 40 Yehsuh gangj daengz dineix le, couh cam naeuz: “Faenhsou naemjnaemj yawj, bouxcawj suen mwnq ij baenzlawz doiq doengh boux co suen mwnq nej?” 41 Gajlaeng doengh boux goengjsae dajbwiz mwnq caeuq doengh boux fazliz cenhgyah mwnq caeuq doengh boux gangj vah couh baenz he mwnq han naeuz: “De gaengjdingq dawz doenghheij doegsieb mwnq met liux bae, dauq dawz aen suen de co hawj doengh boux nganqciz gyau faenh mak de he.” 42-43 Yehsuh dingq le, couh doiq gyoengqde naeuz: “Sojhij, gou naeuz sou ni, Cangqdiq ij dajlaeng faenhsou dued aeu aen guek de ma nyok hawj doenghgij vunz linghvaih minzcuz dingq gij vah de ciuq gij vah de bae guh he, aenvih ndaw Singqgingh ndaw de sij miz naeuz: Canghranz vwt hih hengxdiuz, gajlaeng engq bienqbaenz aen ranz mbouj ndaej noix he dih diuz gangqloz he. Gij neix cungj dwg Cangqdiq nganhbaiz hih; aeu raeuz ma yawj, dwg geizmiuj raixcaix. Gawq neix faenhsou mij doeg goq mah? 44 Bouxlawz laemx deng diuz gangqloz neix nex, bouxlawz couh ngaiz siksanq liux; diuz gangqloz neix doek youq gwnz ndang bouxlawz, bouxlawz couh ngaiz dub yungz liux.” 45 Doengh boux goengjsae dajbwiz mwnq caeuq doengh boux Fazliqcaiq baij mwnq dingq Yehsuh gangj gij beijgangj neix le, cungj roxnginh naeuz dwg ceij gyoengqde gangj he le, couh aeuqheiq hwj 46 siengj gaemh dawz de, hoeng, caiq lau gij vunzlai, aenvih gij vunzlai cungj dwg nginhnaeuz de dwg boux cenz gij vah Cangqdiq he.
1 Gajlaeng, Yehsuh caiq yungh beijgangj ma doiq gyoengqde naeuz: 2 “Aen guek Cangqdiq couh luj goengjvuengz. De bang daeglwg de cwnjbiq cingj vunz daeuj gw laeuj. 3 De cwnjbiq ndei le, couh hawj doengh bouxhoiq de bae cingj doenghheij hek de, cingj gyoengqde daeuj gw laeuj. Hoeng, gyoengq hek de mbouj haenj daeuj. 4 “Gajlaeng, de caiq baij daixlingh bouxhoiq bae cingj doenghheij hek de daeuj. De raengq doengh bouxhoiq de hawj gyoengqde naeuz gij hek de ni naeuz: ‘Gyoengqraeuz gaenq gaj cwzdaeg caeuq gaj yiengz biz ndei lo, byaekbyaek laeujlaeuj cungj caemh cwnjbiq ndei lo. Cingj faenhsou daeuj gw bax’ yienghneix naeuz. 5 Hoeng, doenghheij hek de cungj mbouj leixlangh. Gag vunz gag bae guh gij hong bonjfaenh; miz hih bae reih bae naz, miz hih bae guh seng'eiq, dajhai dajcawx, gak vunz gak yiengh. 6 Miz hih engq gaemh dawz doengh bouxhoiq bae cingj gyoengqde mwnq ma nyoujnyak gangjriu gaijmbwq, simqciq vanzlij dawz gyoengqde gaj bae. 7 “Gajlaeng goengjvuengz raen yienghneix le, cungj ndatheiq hwj ij rai bae, couh baij bing bae gaemh dawz doenghgij vunz famh gaj vunz mwnq metmak gajgak liux, caemh vanzlij caiq dawz aen singz gyoengqde coemh liux. 8 Metmak cawzcag liux le, de couh doiq doenghheij hoiq de naeuz: ‘Doenghheij byaekbyaek laeujlaeuj cungj baij ndei cingsuj lo, hoeng, doenghheij yienzlaiz gou cingj daeuj hih it lwg cungj mbouj hab ndaej gw. 9 Seizneix faenhsou bae dangjroen hah, gwnz gai hah bae; famz raen miz vunz hih cungj cingj daeuj, cingj daeuj naengh rim bae.’ 10 Bouxhoiq dingq le, caemh ok bae cingj, mboujguenj vunz ndei vunz vaih cungj cingj daeuj, cingj daeuj naengh hwj rim bae. 11 “Gajlaeng, goengjvuengz ok bae yawjyawj gij hek de. Yiengq de yawjraen miz boux he mij daenj buh ndei. 12 De raen yienghneix couh cam boux de naeuz: ‘Baengzyoux, mwngz daeuj dineix vihmaz mij daenj buh ndei nej?’ Boux de dingq le, mij maz vah ndaej gangj. 13 Gajlaeng, goengjvuengz couh doiq doengh boux gaen henz ndang de naeuz: ‘Dawz de goenj hwnjdaeuj, gvenggvak ok rog mwnq laep he bae, ajcaih de youq mwnq haeb faenz haeb heuj daej haemz daej gik vangraeh lo.’” 14 Yehsuh gangj daengz dineix le, couh naeuz: “Ndaej heuh daeuj hih vunz lai, hoeng, ndaej senj daengz hih vunz noix.” 15 Doenghheij gaep haeuj Fazliqcaiq baij mwnq dingq daengz dineix le, couh ok bae doxcimciek hwj ij baenzlawz ndaej ra congxmbongq daj gij vah de cimh cingqgiq ma haih de, 16 couh baij gij lwgsae gyoengqde caeuq doenghheij vunz gaep haeuj Hihliz Dangj he bae cimh Yehsuh, cam de naeuz: “Lauxsae, gyoengqraeuz rox mwngz dwg lauxsaed hih; mboujguenj vunz baenzlawz, mwngz cungj dwg ciuq gij saedsaeh Cangqdiq ma cenz naeuz vunz ni, aenvih mwngz mbouj yawj vunz guh saeh. 17 Yiengq raeuz cam mwngz, raeuz dwg mbouj dwg wnggai nab ceiq hawj Gaijsaj goengjvuengz Lozmaj nej?” 18 Gyoengqde yienghneix cam le, Yehsuh yawj ndaej ok gij haexnyangj gyoengqde le, couh naeuz: “Gij vunz gyajcang guh simndei simsoh faenhsou hax, vihmaz ij daeuj do gij vah gou nej? 19 Dawz gij ngaenz nab ceiq mwnq daeuj hawj gou yawj.” Yehsuh yienghneix naeuz le, gyoengqde couh dawz maenz ngaenz he daeuj hawj de yawj. 20 Yehsuh couh cam gyoengqde naeuz: “Gij duzsiengq neix caeuq gij coh neix dwg byawz hih nej?” 21 Gyoengqde dingq le, han naeuz: “Dwg Gaijsaj.” Gajlaeng, Yehsuh doiq gyoengqde naeuz: “Yiengq, Gaijsaj dih doxgaiq wnggai gvi hawj Gaijsaj, Cangqdiq dih doxgaiq caemh wnggai gvi hawj Cangqdiq.” 22 Gyoengqde dingq Yehsuh yienghneix gangj le, cungj raen geizheih ij rai bae. Gajlaeng gyoengqde mij banqfaz cimh ndaej dawz cingqgiq le, couh deuzrwg lo. 23 Caemh youq ngoenz mwnq, miz gij vunz gaep haeuj Sajduhgaih baij he, siengzseiz naeuz mbouj miz dauqlix dih doenghgij vunz mwnq, daeuj cam Yehsuh 24 naeuz: “Lauxsae, Mohsih dingh fazliz hawj gyoengqraeuz naeuz: ‘Hauhnaeuz miz vunz aeu yah ma, mehyah de mijyaengz miz lwg haem, hoeng, de cix ngaiz rai lo, lij mehyah de, yiengq daeg nuengxau de couh ij aeu meh beixsauj de ma guh yah, bang daeggo de miz lwg, hawj de miz doengh daih gajlaeng.’ 25 “Doenghbaez raeuz neij miz ranz he, miz caet goengjlungz nuengxau. Daeg daixdaeuz aeu yah ma, mijyaengz miz lwg haem, hoeng, cix ngaiz rai lo, lij mehyah de. 26 Daengz daeg daixngeih, caemh aeu meh beixsauj de ma guh yah, caemh mijyaengz miz lwg haem, cixcaemh ngaiz rai lo. Yiengq daengz daeg daixsam, de caemh yienghneix. Caet daeg cungj caemh aeu goq meh neix, cungj caemh mij miz lwg couh ngaiz rai lo. 27 Daengz gajlaeng, meh de caemh rai lo. 28 Yiengq, daengz mwh dauqlix he, meh neix ij suenq dwg mehyah bouxlawz nej? Aenvih caet daeg cungj caemh aeu meh de goq.” 29 Yehsuh dingq le, han gyoengqde naeuz: “Faenhsou loek lo, aenvih faenhsou mbouj rox ndaw Singqgingh soj sij hih dwg gijmaz, caemh mbouj rox Cangqdiq dih gienzveih. 30 Daengz mwh dauqlix he, gij vunz Cangqdiq luj bouxcai Cangqdiq yienghmwnq mbouj aeu mbouj haq hih. 31 “Gangjnaeuz vunz rai le ndaej dauqlix, ndaw Singqgingh ndaw de gaenq sij miz Cangqdiq doiq faenhsou soj gangj goq hih vah lo, nanzdauh faenhsou mij doeg goq haj? 32 De naeuz: Gou dwg cojgoeng faenhsou Yaqbwzlahhanj dih Cangqdiq, Hijsaj dih Cangqdiq, Yajgoz dih Cangqdiq. Gij iqswh neix couh dwg naeuz, Cangqdiq dwg vunzlix dih Cangqdiq, mbouj dwg vunzrai dih Cangqdiq.” 33 Gyoengq vunzlai dingq de gangj doenghgij vah neix le, cungj raen geizheih ij rai bae. 34 Yehsuh gangj doenghgij vah neix buek hawj gij vunz gaep haeuj Sajduhgaih baij he ngoemxngwd mij vah gangj bae. Yiengq, doenghgij vunz gaep haeuj Fazliqcaiq baij mwnq raen yienghneix le, mbouj fug, vanzlij ijsiengj cimh cingqgiq ma haih de, couh doxcomz hwnjdaeuj. 35 Yiengq, gyoengq vunz ndaw de miz boux fazliz cenhgyah he couh sawq Yehsuh naeuz: 36 “Lauxsae, gij fazliz Mohsih ndaw de diuzlaw ceiq cungqyauq nej?” 37 Gajlaeng, Yehsuh han naeuz: “Mwngz ij caensim caen'eiq ndiep gyaez Cangqdiq, bouxcawj mwngz. 38 Diuz neix couh dwg daixit diuz ceiq cungqyauq he lo. 39 Daengz diuz daixngeih, caemh loq ij luj diuz daixdaeuz. Couh dwg naeuz, ij aiq gij gekleiz luj aiq bonjfaenh ityiengh. 40 Mohsih dih fazliz caeuq boux cenz gij vah Cangqdiq soj sij hih saw cungj dwg hij song diuz neix ma guxdingh hih.” 41 Yehsuh yienghneix han naeuz boux de le, couh domh gyoengqde vanzlij doxcomz youq mwnq, couh cam gyoengqde naeuz: 42 “Gangj daengz Gihduz, faenhsou dwg baenzlawz yawj hih nej? De dwg lwglan byawz nej?” Yiengq gyoengqde han naeuz: “Dwg lwglan Daqveiq.” 43 Yehsuh dingq le, naeuz: “Yiengq, vihmaz Hoenzsaenz Cangqdiq hawj Daqveiq angq hwj haenh naeuz de dwg bouxcawj de nej? Daqveiq vanzlij naeuz: 44 Cangqdiq doiq bouxcawj gou naeuz: ‘Naengh youq baixgvaz gou, daengj gou dawz gij dizyinz mwngz coengq youq laj din mwngz.’ 45 Yiengq, giqyienz Daqveiq heuh de guh ‘bouxcawj’ lo, ciuq yienghneix ma gangj, de couh mbouj danhcij naeuz dwg lwglan Daqveiq, caemh vanzlij dwg bouxcawj de lo.” 46 Yehsuh yienghneix naeuz le, gyoengq vunz mwnq aj bak loengjloengq, ngoemxngwd mij vah gangj lo. Daj ngoenz mwnq hwnj, caiq mij'z vunz gamj cam de gijmaz haem lo.
1 Gajlaeng, Yehsuh doiq gyoengq vunzlai caeuq gij lwgsae de naeuz: 2 “Doenghheij fazliz cenhgyah caeuq doenghheij gaep haeuj Fazliqcaiq baij he, gyoengqde dwg cenmonz gangj Mohsih dih fazliz naeuz vunz ni he. 3 Sojhij, faenhsou ij dingq gyoengqde, ij ciuq gij vah gyoengqde gangj hih yienghmwnq bae guh. Hoeng, ciengeiz mbouj ndaej ciuq gyoengqde soj guh hih yienghmwnq bae guh, aenvih gyoengqde bak lai myaiz led. 4 “Gyoengqde dawz diuz rap naek yaz hawj vunz rap, hoeng, bonjfaenh dauq bi fawz hoengq ndetndet. 5 Gyoengqde soj guh hih cungj dwg guqiq guh hawj vunz yawj he; gyoengqde dawz hab coux Singqgingh mwnq guqiq guh hung hwj, raek youq gwnz fawz cixnaeuz najbyak, caemh youq gij foh bingbuh gya raez hwj, siengj hawj vunz naemqnaeuz gyoengqde gig yawjnaek fazliz dih gveihdingq. 6 Gyoengqde mboujguenj bae gw laeuj cixnaeuz youq veiqdangz cungj haenj naengh youq mwnq daixdaeuz he. 7 Gyoengqde cungj haenj youq gwnz gai mwnq miz vunz lai he hawj vunz dongx gyoengqde ndei, heuh gyoengqde ‘Lauxsae.’” 8 Yehsuh gangj daengz dineix le, de naeuz: “Hoeng, gou naeuz sou ni, faenhsou ciengeiz gaejyungh luj gyoengqde yienghmwnq, haenj hawj vunz heuh faenhsou ‘Lauxsae’ yienghneix. Aenvih cijngamq miz boux lauxsae he; faenhsou cungj dwg beixnuengx he. 9 Faenhsou caemh gaejyungh heuh vunz ‘Daxboh,’ aenvih faenhsou cijngamq miz boux daxboh dog, couh dwg Bohmbwn. 10 Faenhsou caemh gaejyungh hawj vunz heuh faenhsou ‘Lingjsiuq,’ aenvih faenhsou cijngamq miz boux lingjsiuq dog, couh dwg Gihduz. 11 Faenhsou ndaw neix byawz dang ceiq hung, byawz couh dwg bouxhoiq faenhsou. 12 Cangqdiq ij dawz boux rasang yawj vunz mbouj hwnj rwz he roengz daiz, baux boux mbouj rasang he hwnjdaeuj.” 13 Yehsuh gangj daengz dineix le, couh naeuz: “Doenghheij gyajcang guh simndei simsoh hih fazliz cenhgyah caeuq doenghheij gaep haeuj Fazliqcaiq baij hih vunz hax, faenhsou satsoq lo! Aenvih faenhsou laengz mbouj hawj vunz haeuj guek Cangqdiq bae; faenhsou mbouj haeuj bae cixbah lo hoeng, caemh mbouj hawj vunz haeuj bae. 14 “Doenghheij gyajcang guh simndei simsoh hih fazliz cenhgyah caeuq gaep haeuj Fazliqcaiq baij hih vunz hax, faenhsou satsoq lo! Aenvih faenhsou hangzciemq gw gij gyadangq mehmaiq. Faenhsou gouz Cangqdiq caeuq Cangqdiq gangj vah lai hux lai, cungj dwg guh hawj vunz yawj he. Luj doengh cungj vunz neix, ij fad beij vunz naek ndaej lai. 15 “Doenghheij gyajcang guh simndei simsoh hih fazliz cenhgyah caeuq gij vunz gaep haeuj Fazliqcaiq baij he hax, faenhsou satsoq lo! Faenhsou vih ij hawj vunz gaep haeuj buek vunz faenhsou, mbouj lau dwgrengz sinhoj, goq bya goq lueg, hoeng, daengj daengz vunz gaep haeuj le, faenhsou dauq hawj gyoengqde bienqbaenz beij faenhsou vanzlij doeg, vanzlij sieb, hab haeuj mwnq Cangqdiq fad fangz he bae. 16 “Doenghheij rafangz daiq roen hawj vunz loek he hax, faenhsou satsoq lo! Aenvih faenhsou naeuz: ‘Hauhnaeuz miz vunz yiengq gunghdenq Cangqdiq fazsiq nex, gij fazsiq neix mbouj suenqsoq, de mboujyungh ciuq guh nej. Hoeng, hauhnaeuz miz vunz doiq gij gim ndaw gunghdenq Cangqdiq fazsiq nex, de couh ij ciuq gij fazsiq de bae guh.’ 17 Doenghheij vunz ngawz rafangz faenhsou hax, gim cungqyauq haj, cixnaeuz hawj gim bienqbaenz dwzbez he dih gunghdenq cungqyauq nej? 18 Faenhsou caemh vanzlij naeuz: ‘Hauhnaeuz miz vunz yiengq aen daiz dajbwiz fazsiq nex, gij fazsiq de mbouj suenqsoq; yiengq, hauhnaeuz miz vunz yiengq gij dajbwiz gwnz daiz fazsiq nex, couh ij soenhsouj gij fazsiq neix, couh ij ciuq gij fazsiq de bae guh.’ 19 Doenghheij rafangz faenhsou hax, gij dajbwiz haemq cungqyauq haj, cixnaeuz hawj gij dajbwiz ndaej bienqbaenz gij dwzbez he haemq cungqyauq nej? 20 Gizsaed, yiengq aen daiz dajbwiz fazsiq caemhdangq yiengq aen daiz daiqlienz gij dajbwiz gwnz daiz de fazsiq lo; 21 yiengq aen gunghdenq Cangqdiq fazsiq caemhdangq yiengq gunghdenq caeuq youq ndaw gunghdenq dih Cangqdiq fazsiq lo. 22 Yiengq mbwn fazsiq, caemhdangq yiengq aen lungzeij Cangqdiq caeuq naengh youq aen lungzeij dih Cangqdiq fazsiq lo. 23 “Doenghheij gyajcang guh simndei simsoh hih fazliz cenhgyah caeuq gij vunz gaep haeuj Fazliqcaiq baij he hax, faenhsou satsoq lo! Aenvih faenhsou caenhgag rox daj ndaw boqoh hah, veizyangh hah, swhyienz hah ndaw de soengq hawj Cangqdiq cib faenh cih it lah, hoeng dauq mij guh daengz fazliz ndaw de dih gij cungqyauq mwnq, couh dwg doiq vunz ij goengbingz, ij rox hojsik vunz, ij gangj vah gw vah. Gizsaed hax, mboujguenj cib faenh cih it cixnaeuz doenghgij neix, faenhsou cungj ij wnggai guh daengz. 24 Doenghheij rafangz daiq roen hawj vunz hih faenhsou hax, faenhsou dauq rox raenz duz nyungz okdaeuj, hoeng, dauq dawz duz lozdoz gyan roengzbae. 25 “Doenghheij gyajcang guh simndei simsoh hih fazliz cenhgyah caeuq Fazliqcaiq baij hih vunz hax, faenhsou satsoq lo! Faenhsou caenhrox swiq buenz swiq cenj, swiq baixrog de cengh yupyup hwj, hoeng, gizsaed hax, haex max rog hih ngaeuz, ndaw hih yaq. Ndaw sim faenhsou cienfanh dam he, cij rox daengz bonjfaenh mbouj rox daengz vunz. 26 Doenghheij gaep haeuj Fazliqcaiq baij rafangz faenhsou hax! Faenhsou sien swiq buenz swiq cenj, swiq baixndaw de cengh hwj, yiengq, baixrog de mbouj dwg caemh cengh lo maz? 27 “Doenghheij gyajcang guh simndei simsoh hih fazliz cenhgyah caeuq gaep haeuj Fazliqcaiq baij hih vunz hax, faenhsou satsoq lo! Faenhsou caenh luj aen moh goq hoi bieg he, rog de yawj hwj gyaeu gywtgywt, hoeng, ndaw de cungj dwg coengq ndok vunzrai caeuq sojmiz naeuh hwj haeu saengxsaengx he lah. 28 Faenhsou caemh doxdoengz. Yawj hwnjdaeuj, faenhsou caenh lujnaeuz dwg vunz simndei simsoh nwih; gizsaed, ndaw sim faenhsou ndaem dangqmaz, cungj dwg doegdoeg siebsieb he. 29 “Doenghheij gyajcang guh simndei simsoh hih fazliz cenhgyah caeuq gaep haeuj Fazliqcaiq baij hih faenhsou hax, faenhsou satsoq lo! Aenvih faenhsou laeb guh moh hawj doengh boux cenz gij vah Cangqdiq he, coengq vahgyenh hawj aen gijnenqbeih vunz ndei. 30 Faenhsou vanzlij naeuz: ‘Hauhnaeuz gyoengqraeuz dwg youq aen nienzdaiq doenghheij cojgoeng raeuz nex, gyoengqraeuz gaengjdingq mbouj gaen gyoengqde gaj doengh boux cenz gij vah Cangqdiq he.’ 31 Gizsaed, faenhsou gaenq gag nginh naeuz bonjfaenh faenhsou dwg gij lwglan doenghheij gaj doengh boux cenz gij vah Cangqdiq he lo. 32 Bae bax! Bae guh sat cojgoeng faenhsou soj guh hih doenghgij doegdoeg siebsieb mwnq bax! 33 Doenghheij ngwzdoeg caeuq doenghheij lwglan ngwzdoeg hih faenhsou hax! Faenhsou ij baenz ndaej deuz ok mwnq Cangqdiq fad fangz hih mwnq nej? 34 “Faenhsou yawj bax, gou couh ij baij doengh boux cenz gij vah Cangqdiq caeuq doengh boux coengjmingz he caeuq doengh boux fazliz cenhgyah he daeuj daengz faenhsou dineix. Gyoengqde miz hih vunz ij ngaiz faenhsou gajhaih, miz hih ngaiz faenhsou ding hwnj gwnz gyaq cixcib bae rai, miz hih vunz youq veiqdangz ngaiz faenhsou faexbien fad, miz hih ngaiz faenhsou boenq bae singz dawz singz. 35 Sojhij, sojmiz gaj vunz ndei hih, couh dwg naeuz daj Yaqbwz ngaiz gaj itcig daengz Sajgyahliqyaq daeglwg Bahlahgyah youq mwnq aen daiz dajbwiz caeuq aen laeuz Cangqdiq hih cungqgyan mwnq ngaiz gaj hih sojmiz hih coih, cungj dwg gvi hawj faenhsou rap. 36 Gou saedsaeh naeuz sou ni, sojmiz guh gij neix hih coih cungj dwg gvi hawj gij vunz daih neix rap.” 37 Yehsuh vanzlij caiq naeuz: “Yehluqsajlaengj hax, Yehluqsajlaengj! Mwngz gajgaj haihhaih boux cenz gij vah Cangqdiq; mwngz aeu rin ma dub rai boux Cangqdiq baij daeuj mwngz mwnqneix he. Gou mbouj rox miz geijlwh mbat ij hawj gij vunz mwngz daeuj gou dineix, hawj gou luj gaeqmeh rungx gaeqlwg yienghmwnq. Hoeng, faenhsou mbouj haenj. 38 Yawj bax, aen ranz faenhsou couh ij bienq dieg vangh lo. 39 Gou naeuz sou ni, daj seizneix doxbae, faenhsou mbouj caiq ndaej raen gou haem lo, ij daengj daengz faenhsou naeuz gawq ‘Cangqdiq baij daeuj hih boux mwnq wnggai haenh!’ hih mwhde vwi, cij ndaej raen.”
1 Yehsuh gangj gawq neix sat le, couh daj gunghdenq Cangqdiq ok ma. Ok ma hih mwhde, gyoengq lwgsae de goq daeuj yinx haeuj doenghheij aen laeuz gunghdenq Cangqdiq gyaeugyaeu bae hawj de yawj. 2 Gajlaeng, de naeuz: “Faenhsou yawjraen dineix sojmiz hih lo bax? Gou saedsaeh naeuz sou ni, daengz baezneix, dineix sojmiz hih cungj ij ngaiz bingzbwd liux bae.” 3 Gajlaeng, Yehsuh bae daengz bya Gamjlamj le, couh hwnj gwnz de bae naengh. Yiengq, gyoengq lwgsae de caiq goq bae caegcaeg cam de naeuz: “Lauxsae, yiengq daengz seizlawz fatseng gij saeh mwnq nej? Mwngz dauq daeuj caeuq ciqgyaiq dih ngoenz gatsat he ij miz gijmaz gingjdoengh nej?” 4 Yehsuh dingq le, han gyoengqde naeuz: “Faenhsou ij siujsim, gaejyungh ngaiz vunz yaeuh, 5 aenvih daengz mwhde, ij miz haujlai vunz gyajcang naeuz dwg gou hwj naeuz: ‘Gou dwg Gihduz, Cangqdiq baij daeuj dih vuengz.’ Gyoengqde ij yungh yienghneix ma yaeuh haujlai vunz. 6 Daengz mwhmwnq, faenhsou gaengjdingq raen luenh caeuq dingqri naeuz miz doxhoenx; daengz mwhmwnq, faenhsou gaejyungh lau, aenvih doenghgij saeh neix gaengjdingq sien fatseng, hoeng, gij neix mbouj dwg naeuz dwg ciqgyaiq dih ngoenz gatsat he law. 7 Daengz mwhde, minzcuz caeuq minzcuz, guek caeuq guek doxhoenx; dauqcawq cungj miz iekvangh caeuq diqcwnq. 8 Doenghgij neix cungj dwg yienh ok cainanh dih gingjdoengh, couh luj vunzbazmeh gaihcij ij seng lwg hih yienghmwnq. 9 “Daengz mwhde, faenhsou ij ngaiz vunz gaemh dawz gyau hawj vunz, ngaiz vunz haihrai, youhcaiq vih gou hwj ngaiz sojmiz hih minzcuz haenq. 10 Daengz mwhmwnq, miz haujlai vunz saet sinqyangj, mbouj caiq sinq gij saedsaeh Cangqdiq haem lo, boux cuzmaiq boux, boux haenq boux. 11 Daengz mwhmwnq, miz haujlai gyaj dih boux cenz gij vah Cangqdiq daeuj yaeuh vunz coemx vunz. 12 Daengz mwhmwnq, dauqcawq cungj dwg doegdoeg siebsieb; haujlai vunz cungj mbouj miz aiqsim. 13 Hoeng, doengh boux mbouj doeknaiq, gyenhciz roengzbae hih couh ndaej gouq lo. 14 Daengz mwhmwnq, guek Cangqdiq dih ndei siuhsiz cenz baenx cenz lajmbwn, hawj sojmiz hih vunz cungj rox. Gajlaeng cij daengz ciqgyaiq dih ngoenz gatsat.” 15 Yehsuh vanzlij caiq naeuz: “Daengz mwhmwnq, faenhsou couh ndaej raen Danqhijlij boux cenz gij vah Cangqdiq neix soj sij naeuz hih ‘cauh baenz boqvaiq hih Cangqdiq dwgcaengz hih’ ndwn youq gunghdenq Cangqdiq.” (Doeg duenh neix hih vunz wnggai nienx ndei gij dauhleix de.) 16 “Daengz mwhmwnq, youq Youzdaiq Saengj hih couh ij deuz hwnj bya bae; 17 hauhnaeuz youq gwnz dingjranz hih, couh gaejyungh roengz ndaw ranz ma aeu doxgaiq, 18 caiq hauhnaeuz miz vunz youq ndaw reih hih, caemh gaejyungh ma ranz aeu buh. 19 Daengz mwhmwnq, meh daiqndang caeuq meh daiqnauq hih miz nanh lo. 20 Daengz mwhmwnq, faenhsou ij gouz Cangqdiq, gouz faenhsou ngoenz deuznanh mwnq mbouj dwg youq doengh ngoenz ngoenzyietbaeg caeuq doengh ngoenz nit he. 21 Aenvih doenghgij neix, daj cauh mbwn cauh deih doxdaeuj mijyaengz miz goq, baezneix caemh mbouj veiq miz. 22 Gou naeuz sou ni, doengh ngoenz cainanh neix, hauhnaeuz mbouj dwg Cangqdiq gemj bae nex, gaenhbaenj mij'z vunz ndaej lix roengzbae. Cangqdiq vih gij vunz de senj okdaeuj he, de couh gemj doengh ngoenz cainanh mwnq.” 23 Yehsuh vanzlij caiq naeuz: “Daengz mwhmwnq, hauhnaeuz miz vunz doiq faenhsou naeuz: ‘Neq, Gihduz youq dineix,’ cixnaeuz naeuz: ‘Neq, Gihduz youq mwnqnwih,’ yiengq faenhsou cungj mbouj ndaej sinq, 24 aenvih daengz mwhmwnq, miz doengh boux gyaj dih Gihduz caeuq doengh boux gyaj dih boux cenz gij vah Cangqdiq daeuj. Gyoengqde loengh doenghgij geizmiuj he daeuj yaeuh vunz, simqciq loengh hawj gij vunz Cangqdiq senj okdaeuj he ceng di he cungj ngaiz sinq hwx; caeklaiq miz Cangqdiq baujhuq hwx. 25 Gou saedsaeh naeuz sou ni, faenhsou ij siujsim, gou senqsi cix naeuz sou ni lo. 26 Sojhij, hauhnaeuz miz vunz doiq faenhsou naeuz: ‘Neq, Gihduz youq rogndoi,’ yiengq faenhsou gaejyungh ok bae yawj. Cixnaeuz miz vunz naeuz: ‘Neq, Gihduz youq ndaw ranz neix,’ yiengq faenhsou caemh gaejyungh sinq, 27 aenvih gou, Vunz dih Daiqbiuj, dauq daeuj hih mwhde, caenh luj byajmyig yienghmwnq daj baixdoeng myig daengz baixsae. 28 Daengz mwhmwnq, faenhsou swhmboujyienz rox, couh dwg naeuz, mwnqlaw miz doenghduz rai hih, mwnqlaw couh miz roeg ciuz.” 29 Yehsuh vanzlij caiq naeuz: “Daengz goq doengh ngoenz nanh mwnq le, gyangjngoenz couh bienq raemh, aen ndwen caemh mbouj rongh, ndaundeiq daj gwnzmbwn doek roengzdaeuj, gij rengz guenjciq haeuj gwnzmbwn hih ij luenh. 30 Daengz mwhmwnq, vunz ij raen gou, Vunz dih Daiqbiuj, ij dauq daeuj dih gij gingjdoengh he yienh youq gwnzmbwn; lajmbwn gij vunz ij daej ngwdngwd. Gajlaeng, gyoengqde caemh ij raen gou, Vunz dih Daiqbiuj, rongh sagsag myig myiengzmyiengz, cienfanh miz vi miz rengz he hwj caeuq gij fwj daj gwnzmbwn roengz daeuj. 31 Daengz mwhmwnq, gou couh hawj miz sing boq gywnhhauh yiengj, couh baij bouxcai gou bae daengz ciqgyaiq gak dieg bae heuh doenghgij vunz gou senj okdaeuj he daeuj doxcomz.” 32 Yehsuh gangj daengz dineix le, couh yungh gij beijgangj he ma doiq gyoengq lwgsae de naeuz: “Faenhsou daj go uzvahgoj couh wnggai ndaej rox gij dauhleix he lo, couh dwg, faenhsou yawjraen go de baex did mbaw he, couh wnggai rox seizhah couh ij daengz lo. 33 Caemh doxdoengz, daengz mwh faenhsou yawjraen doenghgij gingjdoengh mwnq nex, faenhsou couh wnggai rox Vunz dih Daiqbiuj couh daeuj gaenh daengz bakdou lo. 34 Gou saedsaeh naeuz sou ni, sojmiz hih doenghgij saeh neix gaengjdingq youq aen nienzdaiq neix fatseng. 35 Daengz mwhmwnq, mbwnmbwn deihdeih cungj cawzraeg liux bae, hoeng, gij vah gou yungjyenj mbouj rox raeg.” 36 De vanzlij caiq naeuz: “Gangj daengz daengz mwhde, mij vunz rox. Daiqlienz bouxcai gwnzmbwn cungj mbouj rox, lwg caemh mbouj rox, caenhgag Bohmbwn rox. 37 Daengz mwh gou, Vunz dih Daiqbiuj, dauq daeuj hih mwhde, vunz caemh mbouj rox, caemh luj aen nienzdaiq Nozyaq ityiengh. 38-39 Mwh mij raemxdumh hih mwhde, gij vunz gwgw, aeuaeu, haqhaq; vunz cungj mbouj rox ij miz saeh fatseng. Gajlaeng, daengz Nozyaq haeuj ruz bae hih ngoenz mwnq, raemx dumh dawz gij vunz cawzcag liux. Daengz gou, Vunz dih Daiqbiuj, dauq daeuj hih mwhde, caemh doxdoengz, caemh mij miz vunz rox. 40 Daengz mwhmwnq, song boux vunz caemh youq gaiq reih he guh hong hih; ciep bae boux he, louz boux he. 41 Song boux vunzbaz doxram muh hih; ciep bae boux he, louz boux he.” 42 De vanzlij caiq naeuz: “Sojhij, gou naeuz sou, sou wnggai daezsingj, aenvih faenhsou mbouj rox bouxcawj faenhsou ij seizlaw daeuj. 43 Gou caiq naeuz sou ni, caemh lujnaeuz, hauhnaeuz miz boux cawjranz he, de gaenq rox naeuz bouxcaeg ij seizlaw daeuj lo nex, boux de couh gaengjdingq mbouj hawj bouxcaeg ndonj haeuj dou bae lo. 44 Sojhij faenhsou ij guh ndei cwnjbiq, aenvih gou, Vunz dih Daiqbiuj, seizlaw dauq daeuj, faenhsou gaenhbaenj mbouj rox.” 45 Yehsuh vanzlij caiq naeuz: “Bouxlawz dwg boux lauxsaed sinq ndaej goq caiq singqsag dih bouxhoiq nej? Couh dwg boux bouxcawj baij de guenj ndaw ranz de hih saeh caeuq hawj de nganqciz fat haeux hawj doenghheij vunzhoiq mwnq hih boux mwnq lo. 46 Bouxcawj de ma le, caemh raen de ciuq de raengq hih yienghmwnq bae guh hih. Luj yienghneix hih hoiq couh miz fuk lo.” 47 Yehsuh vanzlij caiq naeuz: “Gou saedsaeh naeuz faenhsou ni, luj yienghneix hih hoiq, bouxcawj couh ij baij de guenj de sojmiz hih saizcanj lo. 48 Yiengq, hauhnaeuz bouxhoiq mwnq dwg bouxhoiq rwix he nej, ndaw sim de naemj: ‘Bouxcawj gou aiq mij ma baenx vaiq law.’ 49 De yienghneix naemj le, couh gaihcij doh doenghheij hoiq de, caiq caeuq doenghheij laeujgeq he gwgw angqangq. 50 Gajlaeng, bouxcawj de sawqmwh ma, bouxhoiq de caemh mij rox. 51 Bouxcawj de raen yienghneix le, caemh gaengjdingq fad de, boenq de deuz, fad hawj de caeuq doenghheij gyajcang guh simndei simsoh hih doenghheij vunz mwnq doxdoengz, hawj de haeb faenz haeb heuj hwj daej ngwdngwd bae.”
1 Yehsuh vanzlij caiq naeuz: “Daengz mwhmwnq, guek Cangqdiq caemh luj miz cib dah lwgsau diemj daeng bae ciep gojyez moq. 2 Yiengq cib dah ndaw de miz haj dah ngawzngad, miz haj dah gvaigvet. 3 Haj dah ngawz he dawz daeng caemh caeuq youz hwj hoeng, mij daiq youz. 4 Haj dah gvai he cix dawz daeng cix caeuq youz rim cix daiq youz. 5 Gajlaeng, gojyez moq mij daeuj baenq vaiq, ngaiz nguh cizgyenh lo, yiengq gyoengq lwgsau neix naet le, couh ralaep lo. 6 “Gajlaeng, daengz singjngwnz, miz vunz hemq naeuz: ‘Gojyez moq daeuj lo! Faenhsou ok bae ciep de bax!’ 7 “Miz vunz hemq naeuz yienghneix le, doengh dah lwgsau mwnq couh hwnq lo, caemh dawz daeng diuz hwnjdaeuj lai rongh lo. 8 Diuz lai rongh le, doengh dah ngawz mwnq doiq doengh dah gvai mwnq naeuz: ‘Cingj faenhsou hawj di youz he hawj raeuz ndaej lwi? Aenvih aen daeng raeuz ij maet lo.’ 9 “Doengh dah gvai mwnq dingq le, han naeuz: ‘Mij ndaej law; gij youz gyoengqraeuz caemh mij gaeuq ndaej hawj sou law. Faenhsou gag bae mwnq hai youz he cawx bax.’ 10 Doengh dah ngawz mwnq mij banqfaz, cij ndei swhswh gag bae cawx youz. “Gyoengqde bae le, gojyez moq caemh daeuj daengz lo. Yiengq haj dah gvai mwnq couh gaen gojyez moq haeuj bae gw laeuj lo. Gyoengqde haeuj bae le, dou caemh doq gven lo. 11 “Gajlaeng, doengh dah ngawz bae cawx youz mwnq ma le, couh heuh hoi dou; gyoengqde heuh naeuz: ‘Bouxcawj hax, hoi dou hawj raeuz bax!’ 12 “Hoeng, goeng gojyez moq dauq han naeuz: ‘Gou mbouj rox faenhsou hah.’” 13 Yehsuh gangj daengz dineix le, couh naeuz: “Sojhij, faenhsou ij siengzseiz daezsingj, aenvih gou dauq daeuj hih ngoenz de, faenhsou gaenhbaenj mbouj rox ngoenzlawz, seizlawz.” 14 Yehsuh vanzlij caiq naeuz: “Guek Cangqdiq caemh luj boux vunz ij ok bae gyae youz he. De ijvanh okdin bae hih mwhde, de heuh heij hoiq de daeuj, hawj doengh boux de guenj gij ngaenz de. 15 De ciuq gak vunz dih caixhangz ma hawj gak vunz guenj; de hawj boux he guenj hajcien, boux he guenj songcien, boux he guenj cien he. De faen hawj gyoengqde guenj le, couh ok bae gyae youz lo. 16 “Yiengq boux guenj hajcien mwnq couh majcangq dawz bae guh seng'eiq, gajlaeng canh ndaej hajcien. 17 Boux guenj songcien mwnq caemh dawz bae guh seng'eiq, caemh canh ndaej songcien. 18 Hoeng, boux guenj cien he mwnq nej, de engq bae vat u he hwj, dawz gij ngaenz hoem hwj lah. 19 “Yiengq goq mauqhuz caez le, bouxcawj gyoengqde ma lo. De ma le, couh heuh doengh bouxhoiq de daeuj suenq soq. 20 Boux guenj hajcien mwnq, de dawz hajcien mwnq caeuq dawz de canh ndaej dih hajcien mwnq daeuj, couh naeuz: ‘Bouxcawj hax, mwngz hawj gou guenj hajcien; gou dawz bae guh seng'eiq canh ndaej hajcien. Nex, cungj youq neijneix lo.’ 21 “Bouxcawj dingq le, couh doiq de naeuz: ‘Mwngz guh ndaej ndei lo! Mwngz cingqcaen dwg bouxhoiq ndei he. Aenvih mwngz guh gij saeh iq he cungj ndaej hawj vunz coengqsim, gou ij hawj mwngz guenj gij saeh engqgya hung he. Daeuj, haeuj daeuj caeuq gou itheij yangjcouq bax!’ 22 “Yiengq boux guenj songcien mwnq nej; de caemh daeuj doiq bouxcawj de naeuz: ‘Bouxcawj hax, mwngz hawj gou guenj songcien ngaenz; gou dawz bae guh seng'eiq canh ndaej songcien. Nex, cungj youq neijneix lo.’ 23 “Bouxcawj dingq le, caemh doiq de naeuz: ‘Mwngz guh ndaej ndei lo! Mwngz cingqcaen dwg bouxhoiq ndei he. Aenvih mwngz guh gij saeh iq he cungj ndaej hawj vunz coengqsim, gou ij hawj mwngz guenj gij saeh engqgya hung he. Daeuj, haeuj daeuj caeuq gou itheij yangjcouq bax!’ 24 “Gajlaeng, boux guenj cien he mwnq caemh daeuj lo. Daeuj le, de engq doiq bouxcawj de naeuz: ‘Bouxcawj hax! Nex, gij ngaenz mwngz youq dineix. Gou rox mwngz youqgaenj raixcaix. Bonjfaenh mij doengh fawz guh, hoeng, couh ijsiengj ndaej aeu gij vunz; mij geng mij ndaem, hoeng, couh ij sou aeu gij vunz. 25 Sojhij gou lau mwngz, couh dawz gij ngaenz mwngz hoem youq laj doem hwj. Nex, seizneix gou hawj mwngz boiz.’ 26 “Bouxcawj dingq de yienghneix naeuz le, ndatheiq hwj ij rai, couh doiq de naeuz: ‘Mwngz dwg bouxhoiq simdoeg simfwn gyik gyangjgyangq he! Mwngz giqyienz rox gou youqgaenj, dued aeu gij gou mij doengh fawz guh he, sou aeu gij gou mij geng mij ndaem he, 27 yiengq mwngz vihmaz mbouj dawz gij ngaenz gou swnz haeuj ngaenzhangz bae, daengj gou ma le, lienz bonj daiq leih cungj ndaej nej?’ 28 “Bouxcawj yienghneix naeuz le, couh doiq doengh boux ndwn henz ndang de naeuz: ‘Dued aeu cien ngaenz de ma, hawj boux miz fanh he mwnq, 29 aenvih famz gaenq miz hih, hawj de engqgya lai; famz mbouj miz hih, yaepm'x daiqlienz de sojmiz hih cungj dued aeu ma liux.’ 30 Bouxcawj vanzlij caiq naeuz: ‘Dawz duz hoiq mij'z yungh neix boenq ok rog bae, ajcaih de youq mwnq laep he haeb faenz haeb heuj hwj daej vangraeh lo.’” 31 Yehsuh gangj sat doenghgij saeh neix le, caiq naeuz: “Mwh Vunz dih Daiqbiuj youq ndaw rongh sagsag myig myiengzmyiengz caeuq sojmiz hih bouxcai Cangqdiq daeuj hih mwhde, dwg naengh youq aen lungzeij rongh sagsag he. 32 Lajmbwn sojmiz hih vunz cungj ij doxcomz youq dangqnaj de. De ij dawz gyoengqde faen gek hwnjdaeuj, caemh luj boux ciengx yiengz dawz menzyiengz caeuq yiengzbya faengek okdaeuj. 33 De ij dawz gij vunz Cangqdiq coengq youq baixgvaz, gij vunz mbouj dwg gij vunz Cangqdiq he coengq youq baihswix. 34 “Faen ndei le, guh goengjvuengz hih couh doiq gyoengq youq baixgvaz de naeuz: ‘Doenghheij boh gou soengq fuk hawj faenhsou he hax, daeuj bax, daeuj ciep aeu daj mijyaengz cauh mbwn cauh deih cix cwnjbiq ndei hawj faenhsou hih aen guek neix bax! 35 Aenvih gou dungxiek hozhawq hih mwhde, faenhsou hawj gou gw haeux gw raemx; gou guh hek doz youq hih mwhde, faenhsou daih gou; 36 gou mij buh mij vaq daenj hih mwhde, faenhsou hawj buh hawj vaq hawj gou daenj; gou bingh lo, faenhsou cauqguq gou; gou ngaiz gyaeng youq ndaw lauz, faenhsou daeuj yawj gou.’ 37 “Yiengq doengh boux simndei simsoh he couh han naeuz: ‘Bouxcawj gou hax, gyoengqraeuz seizlawz raen mwngz dungxiek hozhawq le, hawj mwngz gw nej? 38 Seizlawz raen mwngz guh hek doz youq le, daih mwngz nej? Seizlawz raen mwngz mij daenj le, hawj mwngz daenj nej? 39 Caemh seizlawz raen mwngz bingh caeuq rox mwngz ngaiz gyaeng le, raeuz gvansim mwngz yawj mwngz nej?’ 40 “Yiengq, goengjvuengz gaengjdingq han doengh boux de naeuz: ‘Gou saedsaeh naeuz sou ni, mboujguenj seizlaw, cijaeu faenhsou bang doenghheij beixnuengx gou ndaw de hih boux he, cungjsuenq naeuz boux de dwg boux ceiq yaez he, couh suenq dwg faenhsou bang gou lo.’ 41 “Gajlaeng, goengjvuengz caiq doiq gyoengq youq baihswix de naeuz: ‘Deuz, doenghheij ngaiz Cangqdiq mang hih faenhsou hax! Ndaenj haeuj mwnq feiz dawz mbouj rox maet he Cangqdiq cwnjbiq fad fangzvuengz caeuq gyoengq cai de he mwnq bae bax! 42 Aenvih mwh gou dungxiek hozhawq hih mwhde, faenhsou mij hawj gou gw; 43 gou guh hek doz youq hih mwhde, faenhsou mij daih gou; gou mij buh daenj hih mwhde, faenhsou mij hawj buh hawj gou daenj; gou bingh caeuq ngaiz gyaeng haeuj ndaw lauz bae hih mwhde, faenhsou mij gvansim mij yawj gou.’ 44 “Yiengq gyoengqde caemh han naeuz: ‘Bouxcawj hax, gyoengqraeuz seizlawz raen mwngz iek, hozhawq, guh hek doz youq caeuq mij buh daenj caeuq bingh caeuq ngaiz gyaeng, hoeng, gyoengqraeuz mij cauqguq mwngz, mij yawj mwngz nej?’ 45 “Yiengq goengjvuengz gaengjdingq han gyoengqde naeuz: ‘Gou saedsaeh naeuz sou ni, cijaeu faenhsou doi mbouj bang gyoengq beixnuengx gou ndaw de dih boux he, cungjsuenq naeuz boux de dwg boux ceiq yaez he, yiengq, couh suenq dwg mbouj bang gou lo.’ 46 “Luj yienghneix hih vunz, ij siengzseiz ngaiz fad; luj doenghheij simndei simsoh hih vunz, couh ndaej seiqseiz lix.”
1 Yehsuh gangj sat doenghgij vah neix le, couh doiq gyoengq lwgsae de naeuz: 2 “Faenhsou caemh rox, goq song ngoenz haem couh daengz aen ciet Bienqgoqbae lo. Daengz mwhde, gou, Vunz dih Daiqbiuj, ij ngaiz vunz cuzmaiq, ngaiz vunz dawz bae ding hwnj gwnz gyaq cixcib bae rai.” 3 Couh youq mwhneix, doenghheij goengjsae dajbwiz caeuq doengh boux gangj vah couh baenz he doxcomz youq ndaw fuj Gaihyaqfaz goengjsae dajbwiz daeuzdaeuz neix; 4 gyoengqde doxcomz hwnjdaeuj doxyuk hwj ij baenzlaw ndaej caegcaeg gaemh dawz Yehsuh gaj Yehsuh. 5 Hoeng, gyoengqde caemh gag naeuz: “Gyoengqraeuz mbouj ndaej youq aen ciet Bienqgoqbae doengh fawz, hoengjlau gyoengq vunzlai ndatheiq.” 6 Miz baez he, Yehsuh youq aen mbanj Bwzdaqniz, youq laeng Sihmaenz boux hwnj mazfung goq neix, youq ndaw ranz de gw haeux. 7 Yiengq, aen mbanj mwnq miz boux vunzbaz he dawz aen bingz aeu nyugsig ma guh he, ndaw de coux miz gij youz rang fwtfwt dijbauj he, daeuj daengz henz ndang Yehsuh. De domh Yehsuh lij gw haeux, couh dawz bingz youz rang fwtfwt neix raix hwnj gwnz dingjraeuj Yehsuh bae. De yienghneix guh dwg soenhcungq de. 8 Gyoengq lwgsae de raen le, couh aeuqheiq hwj naeuz: “Hozbiet ij yienghneix langqfeiq nej? 9 Bingz youz neix hai hwj mbouj rox hih ij ndaej geijlai ngaenz ma bang vunz gungz hwx!” 10 Yehsuh dingq le, couh doiq gyoengq lwgsae de naeuz: “Hozbiet ij diuqnanz boux vunzbaz neix nej? De youq gwnz ndang gou guh hih dwg gienh ndeisaeh he hwx. 11 Vunz gungz, faenhsou seiqseiz miz, hoeng, gou, faenhsou mbouj seiqseiz miz hax. 12 De raix youz hwnj gwnz ndang gou daeuj, dwg vih ij cangq gou hwj guh ndei cwnjbiq lah. 13 Gou saedsaeh naeuz sou ni, guek Cangqdiq dih ndei siuhsiz, mboujguenj cenz bae daengz ciqgyaiq dih mwnqlaw, gij saeh boux vunzbaz neix soj guh hih caemh gaengjdingq miz vunz cenz, miz vunz geiqniemh.” 14 Gajlaeng, cibngeih boux lwgsae ndaw de hih boux he, Youzdaq, Gyahloz vunz, de bae cimh doengh boux goengjsae dajbwiz he, 15 doiq gyoengqde naeuz: “Hauhnaeuz gou dawz Yehsuh gyau hawj faenhsou nex, faenhsou ij ok geijlai ngaenz hawj gou?” Gyoengqde dingq le, couh naeuz hawj de samcib gaiq ngaenz. Gyoengqde yienghneix naeuz le, couh doq hawj de lo. 16 Couh yienghneix, daj mwhmwnq hwnj, Youzdaq couh ra congxgon cuzmaiq Yehsuh. 17 Aen ciet Cawz Yauqmuj hih ngoenz daixdaeuz, gyoengq lwgsae Yehsuh daeuj cam Yehsuh naeuz: “Lauxsae, mwngz ij hawj gyoengqraeuz youq mwnqlaw cwnjbiq ciet Bienqgoqbae hih haeuxcaeuz hax?” 18 Gajlaeng, de han naeuz: “Faenhsou haeuj singz bae cimh boux faenhsou roxnaj mwnq, couh doiq boux de naeuz: ‘Boux lauxsae raeuz naeuz: “Gou hih mwhde couh ij daengz lo; gou ij caeuq gij lwgsae gou youq ndaw ranz mwngz goq aen ciet Bienqgoqbae he.”’” 19 Yehsuh yienghneix raengq le, gyoengq lwgsae de caemh ciuq de raengq hih yienghmwnq bae cwnjbiq ndei aen ciet Bienqgoqbae dih haeuxcaeuz lo. 20 Yiengq daengz yiengqhaemh le, Yehsuh couh caeuq cibngeih boux lwgsae de gw haeuxcaeuz lo. 21 Cingq gw hih mwhde, de doiq gyoengqde naeuz: “Gou saedsaeh naeuz sou ni, faenhsou ndaw neix miz boux he buenqduz ij hai gou.” 22 Gyoengqde dingq le, cungj heiq hwj ij rai, boux gaen boux cam naeuz: “Bouxcawj gou hax, boux mwnq gaengjdingq mbouj dwg gou bax!” 23 Gajlaeng, Yehsuh han gyoengqde naeuz: “Boux buenqduz ij hai gou mwnq, gij fawz de caemh caeuq gij fawz gou doxcaemh demj roengz gij liuq ndaw deb he bae gw bingj. 24 Cingq luj ndaw Singqgingh ndaw de sij naeuz hih, Vunz dih Daiqbiuj ij ngaiz vunz haihrai. Hoeng, boux cuzmaiq haih gou mwnq satsoq lo! Boux de gaengjdingq ij gag naeuz: ‘Hozmboujyienz mbouj miz gou hwx!’” 25 Yehsuh yienghneix gangj le, boux cuzmaiq Yehsuh hih Youzdaq caemh hoi bak cam naeuz: “Lauxsae, boux mwnq mbouj dwg gou bax?” Yehsuh dingq le, han naeuz: “Mwngz naeuz nej?” 26 Yehsuh yienghneix gangj le, caemh dawz aen bingj he hwnjdaeuj docih Cangqdiq. Docih le, couh euj hawj gyoengq lwgsae de, doiq gyoengqde naeuz: “Faenhsou dawz bae gw bax. Gij neix couh dwg daiqbiuj aen ndangdaej gou.” 27 De yienghneix naeuz le, youhcaiq dawz aen cenj coux laeuj buzdauz he hwnjdaeuj docih Cangqdiq. Docih le, couh ndenq hawj gyoengqde, doiq gyoengqde naeuz: “Faenhsou dawz cenj laeuj neix bae doxfaen gw bax. 28 Gij neix dwg daiqbiuj gij lwed gou, dwg daiqbiuj Cangqdiq yiengq vunz dinghlaeb dih baujcingq lienz diuzgyenq. Gij lwed gou dwg vih mienx coih vunz lai hwj ngaiz riuz hih. 29 Gou saedsaeh naeuz sou ni, daj seizneix hwnj, gou mbouj caiq gw saek ndik laeuj haem lo, cizfeih daengz gou youq aen guek boh gou caeuq faenhsou gw laeuj moq hih ngoenz mwnq.” 30 Couh yienghneix, gyoengqde itheij gw donq haeuxcaeuz neix le, gajlaeng gyoengqde ciengq diuz go haenh Cangqdiq he le, couh ok ma bae aen bya Gamjlamj lo. 31 Youq mwnq Yehsuh doiq gyoengq lwgsae de naeuz: “Haemhneix faenhsou cungj ij vih gou hwj mbouj nginh gou, aenvih ndaw Singqgingh ndaw de sij miz gawq naeuz: Gou ij gaj boux ciengx yiengz; gyoengq yiengz ij sanq deuz gawq neix. 32 Hoeng, gou dauqlix le, bae daengz Gyahliqliq beij faenhsou lij vaiq.” 33 Gajlaeng Bijdwz doiq de naeuz: “Cungjsuenq naeuz sojmiz hih vunz cungj mbouj nginh mwngz, gou gaengjdingq daixit boux nginh mwngz.” 34 Yehsuh dingq le, han naeuz: “Gou saedsaeh naeuz mwngz ni, ngwnzneix cungj mijyaengz gaeq haen haem, mwngz cix miz sam mbat mbouj nginh gou lo.” 35 Hoeng, Bijdwz mbouj fug, vanzlij caiq naeuz: “Gaengjdingq mbouj hih! Cungjsuenq naeuz gou caeuq mwngz ngaiz rai, gou cungj mbouj naeuz mbouj nginh mwngz.” Bijdwz yienghneix naeuz, lij miz hih lwgsae caemh yienghneix naeuz. 36 Gajlaeng, Yehsuh caeuq gyoengq lwgsae de bae daengz mwnq dieg heuh Gwzsihmajniz he. De doiq gyoengqde naeuz: “Faenhsou youq dineix naengh bax; daengj gou bae mwnq gouzhaenh Cangqdiq.” 37 De yienghneix raengq le, couh daiq Bijdwz caeuq song daeglwg Sihbiqdaiq, Yajgoz caeuq Yozhanq, bae. Mwhneix ndaw sim de caemh gaihcij you, siengsim lo. 38 Yiengq, de couh doiq sam boux de naeuz: “Gou cienfanh siengsim he, siengsim hwj ij rai bae. Faenhsou buenx gou youq dineix, caeuq gou itheij daezsingj.” 39 De yienghneix naeuz le, couh byaij doxbae di he, couh gvih bomz roengzbae, gouz naeuz: “Boh gou hax! Hauhnaeuz mwngz nyienh'eiq, gou couh gouz mwngz mbouj hawj gou souh gij haemzhoj neix. Gannaeuz gou gouz mwngz yienghneix lah, hoeng, vanzlij dwg ciuq gij cawjeiq mwngz bae guh bax.” 40 De yienghneix gouz sat le, couh dauq byaij ma daengz sam boux lwgsae de mwnq. De ma daengz le, engq raen gyoengqde ralaep lah, yiengq de couh doiq Bijdwz naeuz: “Faenhsou mbouj ndaej caeuq gou cinghsingj aen cunghdaeuz he haj? 41 Faenhsou ij baujciz cinghsingj, mbouj dingz hih gouz Cangqdiq; daengz mwhde cij mbouj ngaiz guh loek. Aenvih gou rox ndaw sim faenhsou gannaeuz nyienh'eiq luj gou yienghneix naeuz lah, hoeng, aen ndang faenhsou nyieg, guh mbouj daengz hax.” 42 De yienghneix naeuz le, caiq byaij bae daixngeih mbat, caiq bae gouz Cangqdiq naeuz: “Boh gou hax, hauhnaeuz gij haemzhoj neix gou cungj mienx mbouj liux, bietdingh ij ngaiz souh nex, couh muengh gij cawjeiq mwngz ndaej saedyienh.” 43 De yienghneix gouz sat le, caiq byaij ma daengz gyoengq lwgsae de mwnq. De raen gyoengqde youhcaiq ralaep, aenvih gyoengqde daiq naet lai lo. 44 De raen yienghneix le, youhcaiq dauqyungz byaij bae daixsam mbat gouz, gouz hih caemh caeuq gaxgonq song mbat mwnq gouz doxdoengz. 45 Gajlaeng, de youhcaiq dauq ma daengz gyoengq lwgsae de mwnq. Ma le, doiq gyoengqde naeuz: “Faenhsou vanzlij ralaep haj? Yawj veiq, mwhde daengz lo. Gou, Vunz dih Daiqbiuj, couh ij ngaiz vunz cuzmaiq gyau hawj gij vunz miz coih he lo. 46 Vaiq hwnq! Gyoengqraeuz goq bae bax! Yawj veiq, boux buenqduz hai gou mwnq daeuj huh!” 47 Yehsuh gangj mijyaengz sat bak haem, cibngeih boux lwgsae ndaw de hih boux he, Youzdaq, daiq baenx haujlai vunz daeuj; gyoengqde dwg goengjsae dajbwiz caeuq doengh boux gangj vah couh baenz he baij daeuj he. Ndaw fawz gyoengqde cungj dawz miz giemq caeuq faexmbaenq hwj. 48 Boux buenqduz cuzmaiq Yehsuh hih Youzdaq, aenvih gaxgonq de gaenq caeuq gyoengqde dingh ndei ngamqhauq naeuz: “Gou cup byawz, byawz couh dwg lo; faenhsou couh ndaej gaemh dawz de lo,” 49 yiengq, Youzdaq baex daengz dangqnaj Yehsuh he, couh naeuz: “Lauxsae!” De yienghneix dongx le, couh doq cup de lo. 50 Yehsuh raen yienghneix le, couh doiq de naeuz: “Baengzyoux, mwngz daeuj ij guh hih saeh couh guh bax!” Couh youq mwhneix, buek vunz mwnq couh majcangq gaemh dawz Yehsuh. 51 Yiengq, gyoengq lwgsae gaen henz ndang de raen yienghneix le, miz boux he couh doq yot fag giemq de okdaeuj, couh doq fwet duj rwz bouxhoiq goengjsae dajbwiz daeuzdaeuz he hih duj rwz he gat. 52 Yehsuh raen yienghneix le, couh naeuz: “Dawz giemq sou hwnjdaeuj! Doengh cax doengh giemq hih vunz caemh ij ngaiz rai youq laj bak cax bak giemq lah. 53 Nanzdauh mwngz mbouj rox gou caemh ndaej gouz boh gou baij cibngeih aen yingz vanzlij lai hih bouxcai daeuj baujhuq gou haj? 54 Hoeng, hauhnaeuz gou yienghneix guh nex, ndaw Singqgingh ndaw de soj sij naeuz hih gij saeh neix ij baenzlaw ndaej lingz okdaeuj haem nej?” 55 Yehsuh yienghneix naeuz le, couh doiq buek vunz daeuj gaemh de mwnq naeuz: “Faenhsou dawz giemq dawz faex hwj daeuj gaemh gou, gaemh luj gaemh caeggeq nwih. Gou ngoenzngoenz cungj naengh youq ndaw gunghdenq Cangqdiq son vunz; faenhsou mij gaemh dawz gou. 56 Hoeng, sojmiz hih gij saeh neix, cungj dwg lingz ok boux cenz gij vah Cangqdiq youq ndaw Singqgingh soj sij hih.” Couh youq mwhneix, doenghheij lwgsae de cungj ndoj deuz liux lo, mij gaen de lo. 57 Gyoengqde gaemh dawz de le, couh gam de bae daengz ndaw fuj Gaihyaqfaz boux goengjsae dajbwiz daeuzdaeuz neix. Doenghheij fazliz cenhgyah he caeuq doenghheij vunz gangj vah couh baenz he caemh youq mwnq doxcomz. 58 Mwhneix, Bijdwz caemh gyae'gyae req gaen gajlaeng bae, itcig gaen haeuj bae daengz daxhongh ndaw fuj boux goengjsae dajbwiz daeuzdaeuz mwnq, haeuj bae gaen doengh boux bing souj mwnq, naengh youq mwnq yawj gij saeh neix baenzlaw gaijgyez. 59 Yiengq, doenghheij goengjsae dajbwiz caeuq baenx cenz veijyienzveiq hih vunz cungj cimh gyaj cingqgiq ma gauq Yehsuh, ij gauq hawj de rai. 60 Yiengq, gannaeuz miz baenx haujlai vunz luenh gauq de lah, hoeng cimh mbouj raen miz gijmaz cingqgiq daeuj gauq de. Gajlaeng miz song boux daeuj luenh gauq de naeuz: 61 “Boux vunz neix de naeuz goq naeuz: ‘Gou ndaej cek aen gunghdenq Cangqdiq, sam ngoenz ndaw de caiq ndaej doiqyungz caep hwnjdaeuj boiz.’” 62 Goengjsae dajbwiz daeuzdaeuz dingq le, couh ndwn hwnjdaeuj cam Yehsuh naeuz: “Doengh boux neix gauq mwngz, mwngz miz maz vah gangj haem nej?” 63 Goeng de yienghneix cam lo, hoeng, Yehsuh vanzlij dwg mij han mij haemq de. Yiengq, goeng de caiq doiq de naeuz: “Gou hij gij mingzhiq seiqseiz lix dih Cangqdiq ma mingqlingq mwngz naeuz raeuz ni, mwngz dwg mbouj dwg lwg Cangqdiq, dwg Cangqdiq baij daeuj dih vuengz?” 64 Yehsuh dingq le, han naeuz: “Mwngz naeuz ndaej deng lo. Hoeng, gou naeuz mwngz ni, baezneix mwngz ij yawjraen gou, Vunz dih Daiqbiuj, naengh youq gienz akak rengzrengz dih Cangqdiq dih baixgvaz de hwj caeuq gij fwj daj gwnzmbwn roengz daeuj!” 65 Goengjsae dajbwiz daeuzdaeuz baex dingq gij vah neix he le, cungj aeuqheiq hwj gag mbek gij buh bonjfaenh vaih hwj naeuz: “De gangj gij vah daekcoih Cangqdiq he! Gyoengqraeuz vihmaz vanzlij ij cimh cingqyinz haem nej? Seizneix faenhsou cungj dingqri de gangj gij vah daekcoih Cangqdiq he lo. 66 Faenhsou yawj baenzlawz guh bax!” Gyoengq vunz dingq de yienghneix gangj le, cungj han naeuz: “De hab rai!” 67 Gajlaeng, gyoengqde couh byiq myaiz haeuj baj naj de bae, caiq gaemxgyienz dub de, vanzlij miz vunz baj fawz fak baj naj de, 68 vanzlij youhcaiq lengx de naeuz: “Cangqdiq baij daeuj dih Gihduz, hauhnaeuz mwngz ndaej caeuq Cangqdiq gangj vah nex, mwngz couh cam de yawj, yawj dwg bouxlawz doh mwngz lux!” 69 Mwhneix, Bijdwz vanzlij naengh youq daxhongh rog neix. Yiengq, mwnq miz dahhoiq he byaij goqdaeuj doiq de naeuz: “Mwngz dwg caeuq Gyahliqliq vunz dih Yehsuh caemh buek vunz he!” 70 Bijdwz dingq le, engq youq dangqnaj vunzlai mbouj nginh Yehsuh; de naeuz: “Mwngz naeuz gijmaz gou mbouj rox hah.” 71 De yienghneix naeuz le, couh byaij ok rog ma. De cingq byaij okma daengz bakdou hih mwhde, caiq miz dahhoiq he yawjraen de le, couh doiq gij vunz ndwn youq mwnq naeuz: “Neq, boux vunz neix dwg caeuq Mbanj Nazsajlwz vunz dih Yehsuh gaep haeuj buek vunz he he.” 72 Bijdwz dingq le, caiq mbouj nginh Yehsuh, mbouj danhcij naeuz mbouj nginh, vanzlij fazsiq naeuz: “Gou gaenhbaenj mbouj rox boux vunz mwnq!” 73 Yiengq caiq goq yaep he, ndwn youq henz mwnq hih gyoengq vunz mwnq ndaw de miz boux he caemh goq daeuj doiq de naeuz: “Mwngz gaengjdingq caeuq gyoengqde dwg caemh buek vunz he. Dingq gij vah mwngz couh rox lo.” 74 Bijdwz dingq le, cungj simvueng liux, couh gangj gij vah doeg he ma fazsiq, vanzlij naeuz: “Gou mbouj rox boux vunz mwnq hah!” Bijdwz ngamq baex gangj gawq vah neix sat bak he, couh doq gaeq haen lo. 75 De dingqri gaeq haen le, couh ngeix daengz gaxgonq Yehsuh doiq de soj gangj hih vah naeuz: “Ngwnzneix mijyaengz gaeq haen haem, mwngz cix miz sam mbat mbouj nginh gou lo” hih gawq neix le, couh riq ok rog bae daej ngwdngwd.
1 Yiengq daengz ngoenz daixngeih daihcaeux, sojmiz hih doenghheij goengjsae dajbwiz caeuq doengh boux gangj vah couh baenz he couh doxcimciek hwj ijsiengj dawz Yehsuh gajgak bae. 2 Gyoengqde yienghneix cimciek le, couh dawz Yehsuh goenj hwnjdaeuj, gam dawz bae gyau hawj Bijlahdoh boux Lozmaj vunz dang saengjcangj neix. 3 Yiengq buenqduz hai Yehsuh dih Youzdaq raen Yehsuh ngaiz dingh miz coih le, couh ienq hwj ij rai, couh dawz samcib gaiq ngaenz mwnq dauq bae boiz hawj goengjsae dajbwiz caeuq doengh boux gangj vah couh baenz he, doiq gyoengqde naeuz: 4 “Gou hai boux vunz ndei mij'z coih he! Gou dwg miz coih hih!” Gyoengqde dingq le, han de naeuz: “Gan raeuz maz saeh hax; gijn'x dwg mwngz hih saeh!” 5 Youzdaq dingq le, couh gvenggvak gij ngaenz youq ndaw laeuz gunghdenq Cangqdiq, couh ok bae gag cug hoz rai. 6 Doengh goengjsae dajbwiz raen yienghneix le, couh nyaeb gij ngaenz de hwnjdaeuj, naeuz: “Gij ngaenz neix dwg ngaenz lwed hih vwx; mbouj ndaej coengq haeuj ndaw sieng gien ngaenz mwnq bae vwx, dwg famqfaz hih vwx.” 7 Gajlaeng, gyoengqde couh cimciek gyezdingq dawz gij ngaenz neix bae laeng goeng canghyiuz he cawx gaiq reih he ma cenmonz moek gij vunzrai vaihdieg he. 8 Sojhij, daengz seizneix, gij vunz vanzlij heuh gaiq reih mwnq heuh Reih Lwed. 9 Gij saeh neix cingq lingz ok Yehliqmij boux cenz gij vah Cangqdiq neix soj gangj naeuz goq hih: Gyoengqde dawz gij ngaenz gij vunz Hijswzlez gah boux de hwj hawj hih samcib gaiq ngaenz 10 ma cawx gaiq reih goeng canghyiuz. Gij neix dwg ciuq Cangqdiq dih cawjeiq hih. 11 Yehsuh ngaiz gyoengqde gam dawz bae daengz saengjcangj mwnq ndwn youq dangqnaj goeng de le, gajlaeng goeng de couh cam Yehsuh naeuz: “Mwngz dwg goengjvuengz gij vunz Youzdaiq haj?” Yehsuh dingq le, han naeuz: “Mwngz naeuz ndaej deng lo.” 12 De yienghneix han le, gajlaeng doengh goengjsae dajbwiz caeuq doengh boux gangj vah couh baenz he, gyoengqde baenzlawz gauq de saemj de, de cungj mbouj han mbouj haemq. 13 Gajlaeng, goeng Bijlahdoh saengjcangj caiq cam de naeuz: “Mwngz mij dingqri gyoengqde gauq mwngz baenx lai haj?” 14 Hoeng, Yehsuh ciuqyiengh it gawq cungj mbouj han, guh hwj goeng Bijlahdoh saengjcangj raen cienfanh geizheih he. 15 Ciuq bienqnaengz, moix daengz aen ciet Cawz Yauqmuj he, saengjcangj cungj ij ciuq gyoengq vunzlai dih yauhgyiuz coengq boux vunzfamh he. 16 Yiengq, mwhneix, ngamqluj ndaw lauz miz boux vunzfamh ok mingz he, gij coh de heuh Bahlahbah he. 17-18 Saengjcangj Bijlahdoh senqsi cix rox doenghheij goengjsae dajbwiz caeuq doengh boux gangj vah couh baenz he rahoengz Yehsuh le, cij gaemh dawz de daeuj hawj de he. Sojhij de couh domh gyoengq vunzlai doxcomz youq mwnq couh cam gyoengqde naeuz: “Ngoenzneix gou ij ciuq gij iqswh faenhsou ma coengq boux vunzfamh he. Yiengq, faenhsou ij hawj gou coengq Bahlahbah haj cixnaeuz coengq boux heuh Gihduz dih Yehsuh mwnq nej?” 19 Cingq youq mwh Bijlahdoh naengh youq mwnq aen daiz saemjbuenq mwnq ij saemjbuenq hih mwhde, mehyah Bijlahdoh baij vunz daeuj naeuz de ni naeuz: “Mwngz gaejyungh guenj gij saeh boux vunz ndei neix. Ngoenzlwenz singjngwnz gou vih boux vunz neix hwj fangxngwnzloq gij lau he; ndaw sim gou cungj roxnginh mbouj onj.” 20 Hoeng, goengjsae dajbwiz caeuq doengh boux gangj vah couh baenz mwnq dauq aux gyoengq vunzlai, hawj gyoengqde naeuz Bijlahdoh: “Coengq Bahlahbah! Buenq hawj Yehsuh rai!” 21 Gyoengq vunz gan yienghneix naeuz lah, hoeng, Bijlahdoh vanzlij ijsiengj coengq Yehsuh, aenvih mehyah de daezsingj de. Sojhij de youhcaiq cam gyoengq vunzlai naeuz: “Song boux neix, faenhsou ij hawj gou coengq bouxlawz?” Gyoengq vunzlai caiq han naeuz: “Coengq Bahlahbah!” 22 Gyoengqde yienghneix han naeuz le, Bijlahdoh caiq cam naeuz: “Yiengq, gou ij baenzlaw doiq boux heuh Gihduz dih Yehsuh neix nej?” Gajlaeng, gyoengq vunzlai cungj hemq han naeuz: “Dawz de ding hwnj gwnz gyaq cixcib bae!” 23 Bijlahdoh dingq le, cungj lij ijsiengj coengq Yehsuh; de youhcaiq cam naeuz: “Vihmaz nex? De guh gijmaz vaihsaeh nex?” Hoeng, gyoengq vunz gaenhbaenj mbouj leix de naeuz gijmaz, hemq engqgya gog naeuz: “Dawz de ding hwnj gwnz gyaq cixcib bae! Dawz de ding hwnj gwnz gyaq cixcib bae!” 24 Gyoengq vunz cungj hemq hwx hemq, guh hwj de mij banqfaz. De rox hauhnaeuz de caiq yienghneix doh roengzbae, hoengjlau gij vunz nauh luenh hwnjdaeuj. Yiengq de couh aeu raemx ma youq dangqnaj vunzlai swiq gij fawz de. De doq swiq doq naeuz: “Hawj boux vunz ndei neix riuz lwed hih coih mbouj dwg gou. Mbouj gan gou saeh; faenhsou gag rap bax!” 25 Gyoengq vunzlai raen yienghneix le, cungj caezcup hwj hemq naeuz: “Hawj de riuz lwed hih coih cungj gvi hawj gyoengqraeuz caeuq gij lwglan gyoengqraeuz rap bax!” 26 Gajlaeng, Bijlahdoh ak mbouj goq gyoengq vunzlai le, couh ngaiz ciuq gyoengqde naeuz hih yienghmwnq bae guh lo, coengq Bahlahbah boux vunzfamh mwnq, hawj gij binggyep fad Yehsuh doh Yehsuh, hawj gyoengqde cwnjbiq dawz de ding hwnj gwnz gyaq cixcib bae. 27 Couh yienghneix, Yehsuh couh ngaiz gij binggyep saengjcangj daiq bae daengz ndaw fuj saengjcangj. Bae daengz le, baenx cenz gyoengq binggyep mwnq cungj daeuj gvaengz de. 28 Gyoengqde vanzlij bok gij buh de, aeu diuz buhbauz hoengz raez he hawj de daenj, 29 caiq aeu oen ma san guh aen mauh luj goengjvuengz daenj he hwj daenj hawj de, youhcaiq aeu go em he ma coengq haeuj fawz gvaz de bae. Gyoengqde yienghneix guh le, couh gvih youq dangqnaj de hwj lengx de naeuz: “Goengjvuengz Youzdaiq vanqseiq hwx!” 30 Gyoengqde yienghneix hemq le, vanzlij byiq myaiz hawj de, youhcaiq aeu go em coengq youq ndaw fawz de mwnq ma fad ndaek raeuj de. 31 Gyoengqde lengxlengx riuriu sat le, youhcaiq dawz diuz buhbauz hoengz raez mwnq duet okma, youhcaiq doiqyungz daenj gij buh bonjfaenh de hawj de boiz, gajlaeng couh daiq de okbae ding hwnj gwnz gyaq cixcib bae. 32 Yiengq gyoengqde ok bae hih mwhde, nyangz boux vunz Gujliqnaiq he, gij coh de heuh Sihmaenz he, couh ep de aemq aen gyaq cixcib Yehsuh bae. 33 Gyoengqde daiq de bae daengz mwnq dieg heuh Gozgozdah he, couh dwg ‘dieg ndokraeuj’ dih iqswh he. 34 Daengz mwnq le, gij binggyep couh dawz cenj laeuj gyaux gij raemx aen mbei he hawj Yehsuh gw. De cimz gaemz he le, couh mbouj nyienh gw lo. 35-38 Gajlaeng, gyoengqde couh dawz de ding hwnj gwnz gyaq cixcib bae. Gwnz gyaq cixcib gwnz de caemh ding miz baj baiz he, gwnz de sij miz gawq naeuz: “Boux neix dwg Youzdaiq vunz dih vuengz,” gawq neix. Gyoengqde caemh dawz song boux caeggeq caeuq Yehsuh itheij ding, boux he ding youq baixgvaz, boux he ding youq baihswix. Gyoengqde ding de hwnj bae le, youhcaiq nipgaeu faen aeu doenghheij buh de. Gyoengqde yienghneix guh le, couh naengh youq mwnq hen gam de hwj. 39 Yiengq, doenghgij vunz byaij goq mwnq bae he cungj lengx de, ngauz raeuj naeuz: 40 “Haxhax! Siengj cek gunghdenq Cangqdiq, sam ngoenz couh ndaej dauqyungz hwnq hwnjdaeuj hih mwngz hax, gag gouq bonjfaenh mwngz veiq! Hauhnaeuz mwngz dwg lwg Cangqdiq nex, couh daj gwnz gyaq cixcib roengz ma bax!” 41 Doenghheij goengjsae dajbwiz caeuq doenghheij fazliz cenhgyah caeuq doengh boux gangj vah couh baenz he caemh lengx de naeuz: 42 “Hax, hax! De naeuz de ndaej gouq vunz, hoeng, dauq mij ndaej gag gouq bonjfaenh! De mbouj dwg Hijswzlez vunz dih vuengz maz? Hauhnaeuz de seizneix ndaej daj gwnz gyaq cixcib roengz ma nex, raeuz couh sinq lo! 43 De naeuz de sinq Cangqdiq, caemh gag naeuz bonjfaenh de dwg lwg Cangqdiq. Yiengq, hauhnaeuz Cangqdiq haenj de aiq de nex, yawjyawj Cangqdiq gouq mbouj gouq de lux!” 44 Daiqlienz song boux caeggeq caemh ngaiz caeuq de ding mwnq hih cungj caemh yienghneix lengx de. 45 Gyoengqde ding de hwnj bae le, dajlwh gyangjngoenz cingq daengz yaquj sam diemjcung yienghneix, baenx cenz mwnq dieg mwnq cungj laep liux. 46 Yiengq, daihgaiq daengz sam diemjcung yienghneix, Yehsuh hemq goggog naeuz: “Hijliq, hijliq! Lahmaj sajbahgozdaqniz?” Gij iqswh de dwg naeuz: “Cangqdiq gou hax, Cangqdiq gou! Mwngz vihmaz vwt gou hax?” 47 De yienghneix hemq le, ndwn youq henz de hih vunz, miz hih vunz dingqri le, naeuz: “De heuh Hijliqyaq nejx!” 48 Couh youq mwhneix, ndaw gyoengq vunz mwnq miz boux he majcangq couh riq goqbae, dawz gaiq haijmenz he ma yomx laeuj hwj cug haeuj go em bae yingx hawj de sup. 49 Hoeng, miz hih vunz dauq naeuz: “Daengj yaep he! Daengj yawj Hijliqyaq daeuj mbouj daeuj gouq de!” 50 Gajlaeng, Yehsuh caiq hemq goggog gawq he le, couh gatcaw lo. 51 Couh youq mwhneix, venj youq ndaw aen laeuz gunghdenq Cangqdiq hih fanyiemz mwnq cungj daj gwnz lig doxroengzma faen baenx song mbiengj bae, deih cixcaemh doengh, rin hung cixcaemh aq, 52 moh cixcaemh doengh hwj aq hoi bae; miz haujlai gij vunz Cangqdiq gaenq rai lo, hoeng, cungj caemh youq mwhneix dauqlix hwnjdaeuj lo. 53 Gyoengqde dauqlix le, couh daj ndaw moh ok daeuj, daengz Yehsuh dauqlix hih mwhde, gyoengqde caemh haeuj Yehluqsajlaengj Singz bae yienh hawj vunz raen. 54 Yiengq, gam youq henz Yehsuh hih boux Lozmaj lienzcangj caeuq doenghheij binggyep mwnq yawjraen deih doengh caeuq soj fatseng hih saeh le, cungj lau hwj hemq naeuz: “Ox! De cingqcaen dwg lwg Cangqdiq!” 55 Mwh doenghgij saeh neix fatseng hih mwhde, caemh miz haujlai vunzbaz ndwn youq gyae'gyae yawj. Gyoengq vunzbaz neix dwg daj Gyahliqliq gaen Yehsuh daeuj he, dwg daeuj swqhaeuh de he. 56 Gyoengq vunzbaz neix ndaw de miz daj aen mbanj Mazdaqlah daeuj hih Majliqyaq, caemh miz daxmeh Yajgoz caeuq Yozswz dih Majliqyaq caeuq mehyah Sihbiqdaiq. 57 Yiengq daengz yiengqhaemh mwhde, miz boux vunz fouq daj aen singz Yaqliqmajdaiq daeuj he, gij coh de heuh Yozswz; de caemh dwg lwgsae Yehsuh. 58 De bae cimh Bijlahdoh, bae gouz de aeu gij seihaiz Yehsuh. Bijlahdoh caemh dungziq hawj de dawz gij seihaiz Yehsuh maj. 59 Gajlaeng, de couh daj gwnz gyaq cixcib gej Yehsuh roengzma, couh aeu boiqmaz cengh ma gyuj de ndei hwj 60 dawz bae coengq haeuj ndaw moh moq bonjfaenh de bae. Aen moh neix dwg aeu rin ma siuq guhbaenz he. Dawz de coengq ndei le, caiq gyingj ngauq rin hung he ma caet bakcongh moh de hwj. Caet ndei le, de cij maj. 61 Yozswz guh doenghgij saeh neix hih mwhde, Mbanj Mazdaqlah dih Majliqyaq caeuq daixlingh boux Majliqyaq naengh youq doiqmienh aen moh mwnq hwj yawj. 62 Yiengq daengz ngoenz daixngeih, couh dwg ngoenz cwnjbiq dih ngoenzlaeng de, doengh goengjsae dajbwiz caeuq doenghgij vunz gaep haeuj Fazliqcaiq baij he daeuj cimh Bijlahdoh, cimh de naeuz: 63 “Goeng'ak, gyoengqraeuz ndaejgeiq naeuz boux coemx vunz mwnq, mwh de lij lix hih mwhde, de naeuz goq naeuz: ‘Sam ngoenz gou gaengjdingq dauqlix,’ yienghneix naeuz. 64 Sojhij cingj mwngz baij vunz hen aen moh de rem hwj, hen daengz daixsam ngoenz bae, mienxndaej gyoengq lwgsae de caeg dawz de deuz le, caiq luenhbangh bae naeuz vunz ni naeuz: ‘De rai ndaej dauqlix lo,’ yienghneix. Hauhnaeuz gyoengqde yienghneix luenh gangj nex, beij gaxgonq de mijyaengz rai soj gangj hih vanzlij yiemzcungq hwx.” 65 Bijlahdoh dingq le, couh doiq gyoengqde naeuz: “Yiengq, faenhsou couh daiq bing bae hen ndei hwj bax!” 66 Bijlahdoh yienghneix naeuz le, gyoengqde couh daiq bing bae lo. Bae le, couh youq ngauq rin hung caet bakcongh mwnq aeu ceij ma nem hwj guh fung, caemh baij bing bajsouj hwj rem raixcaix.
1 Yiengq ngamq goq ngoenz ngoenzyietbaeg, couh dwg ngoenzsinghgiz dih doengxhaet daihcaeux ranz ij rongh hih mwhde, Mbanj Mazdaqlah dih Majliqyaq caeuq daixlingh boux Majliqyaq couh daeuj daengz aen moh Yehsuh lo. 2 Song boux de ngamq baex daengz he, sawqmwh raen deih doengh fwenxfwenx youqgaenj raixcaix. Bouxcai Cangqdiq couh daj gwnzmbwn roengz daeuj, dawz ngauq rin hung caet bakcongh moh mwnq gyingj deuz lo. Gyingj deuz le, couh naengh youq gwnz ngauq rin mwnq hwj. 3 Baj naj de myig myiengzmyiengz luj byajmyig nwih, diuz buh de caemh bieg supsup luj mwi nwih. 4 Guh hwj doengh boux bing souj mwnq raen le, cungj dungxmbouq ndangsaenz dwddwd laemx youq lajdoem luj vunzrai hoh nwih. 5 Song boux vunzbaz mwnq raen le, caemh lau hwj ij rai. Bouxcai Cangqdiq raen yienghneix le, couh doiq song boux de naeuz: “Faenhsou gaej lau! Gou rox faenhsou daeuj dwg ij cimh boux ngaiz ding hwnj gwnz gyaq cixcib hih Yehsuh hih. 6 De mbouj youq dineix lo nej; de gaenq ciuq bonjfaenh de soj gangj hih yienghmwnq dauqlix lo. Faenhsou daeuj yawjyawj mwnq gaxgonq coengq de he lux. 7 Yawj le, faenhsou vaiq bae naeuz doenghheij lwgsae de ni, naeuz: ‘De gaenq daj rai ndaej dauqlix lo. De caemh beij faenhsou sien bae daengz Gyahliqliq; youq mwnq faenhsou gaengjdingq ndaej raen de,’ yienghneix naeuz. Faenhsou ijaeu ndaejgeiq gou raengq sou hih vah.” 8 Bouxcai Cangqdiq yienghneix raengq le, song boux de cungj raen geizheih ij rai, hoeng cixcaemh angq hwj ij rai, couh ciuq de raengq hih yienghmwnq vaiq bae naeuz gyoengq lwgsae Yehsuh ni. 9 Song boux de bae hih mwhde, Yehsuh yawjraen song boux de le, couh byaij goq song boux de mwnq bae, doiq song boux de naeuz: “Faenhsou ij bae mwnqlaw?” Song boux de raen le, cungj doeksaet hwj ij rai bae, couh byaij rumj goq bae, got dawz gij ha de, sax de. 10 Gajlaeng, Yehsuh doiq song boux de naeuz: “Gaej lau! Bae naeuz doenghheij beixnuengx gou ni, hawj gyoengqde bae Gyahliqliq; gyoengqde youq mwnq gaengjdingq ndaej raen gou.” 11 Couh youq mwh song boux de bae hih mwhde, doengh boux bing souj aen moh Yehsuh mwnq hih miz geij boux caemh haeuj singz bae naeuz doengh goengjsae dajbwiz ni soj fatseng hih saeh. 12 Doengh goengjsae dajbwiz dingq le, couh caeuq doengh boux gangj vah couh baenz he cimciek, cimciek hwj ij baenzlaw muenz gij saeh neix. Gajlaeng, gyoengqde gyezdingq aeu bit cienz he hawj doengh boux bing souj mwnq dangq fung conghbak gyoengqde, 13 caiq yungx gyoengqde naeuz: “Hauhnaeuz miz vunz dwen daengz gij saeh neix nex, faenhsou couh naeuz: ‘Singjngwnz gyoengqraeuz ralaep le, gij lwgsae Yehsuh caeg dawz gij seihaiz de deuz lo.’ 14 Yiengq, hauhnaeuz goeng saengjcangj rox nex, gyoengqraeuz caemh ok naj bae yienghneix naeuz, baujcingq faenhsou mbouj miz saeh.” 15 Doengh boux bing mwnq dingq le, caemh dungziq gij cawjeiq neix, caemh aeu gij ngaenz gyoengqde hawj he, caemh ciuq gyoengqde son hih yungx hih yienghmwnq bae luenh gangj lo. Couh yienghneix, doenghgij vah neix youq gij vunz Youzdaiq ndaw de itcig riengz daengz seizneix. 16 Yiengq, caiq gangj daengz cib'it boux lwgsae Yehsuh mwnq, song boux vunzbaz bae naeuz gyoengqde ni le, gyoengqde caemh bae daengz Gyahliqliq mwnq, bae daengz aen bya Yehsuh raengq hawj gyoengqde bae he. 17 Gyoengqde daengz gwnz bya le, baex raen de he couh majcangq baiq de sax de. Hoeng, gyoengqde caemh miz hih vunz mbouj sinq, vanzlij ngeiz naeuz dwg mbouj dwg nej. 18 Yehsuh raen gyoengqde le, couh byaij bae daengz dangqnaj gyoengqde, doiq gyoengqde naeuz: “Cangqdiq gaenq dawz gwnzmbwn lajdeih sojmiz hih gienz cungj nyok hawj gou lo. 19 Sojhij faenhsou couh ij bae cenz naeuz lajmbwn sojmiz hih minzcuz ni, hawj lajmbwn sojmiz hih vunz cungj daeuj guh gij lwgsae gou, caemh hawj gyoengqde sijlij hwj ndaej cingqmingz gyoengqde dwg gij vunz Bohmbwn caeuq gij vunz daeglwg Bohmbwn caeuq gij vunz Hoenzsaenz Bohmbwn. 20 Famz gou soj raengq faenhsou hih, faenhsou cungj ij son gyoengqde, hawj gyoengqde soenhsouj. Faenhsou wnggai rox, gou siengzseiz caeuq sou youq, itcig daengz ciqgyaiq dih ngoenz gatsat de.”
1 Daeglwg Cangqdiq Yehsuh Gihduz dih ndei siuhsiz dwg yienghneix heijdaeuz hih, 2 cingq luj bonj saw Hijcaiqyaq boux cenz gij vah Cangqdiq neix sij gij vah Cangqdiq naeuz: Neq, gou ij baij bouxcai gou bae gaxgonq mwngz hwj cwnjbiq diuz roen ndei he hawj mwngz. 3 De youq rogndoi hemq naeuz: “Cwnjbiq diuz roen he hawj bouxcawj; coih diuz roen soh hwj hawj de byaij.” 4 Gij vah neix cingq lingz okdaeuj lo; cingqgawq Yozhanq ok daeuj lo. De youq rogndoi guh bang vunz sijlij, couh dwg naeuz cenzgangj gvanhhih nginh loek gaij goqma ndaej mienx coih dih sijlij. 5 Yiengq sojmiz hih Youzdaiq Saengj caeuq Yehluqsajlaengj Singz hih vunz cungj bae daengz Yozhanq mwnq nginh loek caemh youq diuz dah Yozdanq hawj de bang gyoengqde sijlij. 6 Mwhde Yozhanq dwg daenj diuz buh aeu fwn lozdoz ma guh he, rwet gyaeb sai naeng hwj, gw nex, dwg gw duz daek caeuq dangzrwi ndoi he. 7 Yozhanq bang gyoengqde sijlij mwhde doiq gyoengq vunzlai gangj naeuz: “Ij miz boux he baezneix ij daeuj. Gannaeuz de daeuj gajlaeng gou lah, hoeng, de beij gou veijdaq ndaej lai lo; de daiqlienz gou bang de riuj haizcauj cungj mbouj lwnz daengz gou hwx. 8 Gou cijmboujgoq aeu raemx ma sijlij hawj faenhsou lah. De nej, de dwg yungh Hoenzsaenz Cangqdiq ma hawj faenhsou sijlij hih.” 9 Mwhde Yehsuh daj Gyahliqliq Saengj dih Mbanj Nazsajlwz daeuj daengz diuz dah Yozdanq mwnq hawj Yozhanq sijlij. 10 Couh youq mwh de sijlij ndaej daj ndaw raemx hwnj ma hih mwhde, de sawqmwh yawjraen aen mbwn luj boiq mbek yienghmwnq mbek lig gvangq lo, Hoenzsaenz Cangqdiq luj duz roegguqgap yienghmwnq mbin roengz gwnz ndang de daeuj. 11 Caemh miz sing daj gwnzmbwn doiq de naeuz: “Mwngz dwg daeglwg gou. Gou gig aiq mwngz; mwngz hawj gou roxnginh hab'eiq habhoz.” 12 Gajlaeng Hoenzsaenz Cangqdiq couh coi de hawj de bae rogndoi; 13 yiengq de caemh bae. Couh yienghneix, de youq rogndoi youq seiqcib ngoenz, caemh ngaiz Sajdanq fangzvuengz sawq. Rogndoi mwnq caemh miz nyaen youq, hoeng, de miz bouxcai Cangqdiq swqhaeuh de hwj. 14 Goq mbouj geijlwh caez, Yozhanq ngaiz gyaeng haeuj ndaw lauz bae. Yehsuh couh bae dieg Gyahliqliq cenzgangj Cangqdiq dih ndei siuhsiz. 15 De naeuz: “Mwhde couh daengz lo; Cangqdiq dih gienzveih couh ij fazveih lo. Faenhsou ij daj ndaw sim nginh loek gaijgoq, sinq Cangqdiq dih ndei siuhsiz.” 16 Yiengq miz ngoenz he, Yehsuh ndij goq henz huz Gyahliqliq bae, de yawjraen Sihmaenz caeuq daegnuengx de Anhdwzlez youq ndaw huz dwk bya. (Song boux de dwg canghdwkbya he.) 17 Yehsuh raen le, couh doiq song boux de naeuz: “Faenhsou daeuj gaen gou bax! Gou ij hawj faenhsou bienqbaenz daixlingh cungj canghbya, ij hawj faenhsou ndaej vunz, mbouj dwg ndaej bya.” 18 Song boux de dingq le, muengxbya hah, gijmaz hah cungj mbouj aeu, couh gaen Yehsuh bae lo. 19 Yehsuh doiq song boux de yienghneix naeuz le, gajlaeng de caiq byaij bae di he. Yiengq de caiq yawjraen song daeglwg Sihbiqdaiq, Yajgoz caeuq Yozhanq; song boux de youq gwnz ruz fong vangx. 20 De raen le, couh heuh song boux de. Song boux de raen de heuh le, couh majcangq hwnj ma gaen Yehsuh bae, ajcaih daxboh gyoengqde caeuq doengh boux guq daeuj dwk bya mwnq youq gwnz ruz lo. 21 Couh yienghneix, gajlaeng Yehsuh caeuq doengh boux de bae Gyahbwznungz Singz. Daengz ngoenz ngoenzyietbaeg, de couh bae veiqdangz son vunz. 22 Yiengq gij vunz dingq de gangj hih vah cungj raen geizheih ij rai, baenxlai miz vi, caeuq doenghheij fazliz cenhgyah mwnq gangj hih mbouj doengz. 23 Couh youq mwhneix, miz boux ngaiz fangz doz he. Boux de youq ndaw veiqdangz sawqmwh hemq Yehsuh naeuz: 24 “Aex! Mbanj Nazsajlwz dih Yehsuh, mwngz daeuj dineix guxmaz nex? Mwngz ijsiengj daeuj cawz gyoengqraeuz haj? Gou rox mwngz dwg byawz hah; mwngz couh dwg boux gvi hawj Cangqdiq he hih boux vunz mwnq he!” 25 Yehsuh dingq le, ndaq de naeuz: “Haep bak! Mboujcwnj gangj vah! Majcangq daj gwnz ndang de ok ma!” 26 Yehsuh ngamq ndaq gawq neix sat bak, duz fangz couh hawj boux vunz mwnq fatbanghmou, saenz dwddwd hwj hemq vauxvaux, gajlaeng couh daj gwnz ndang de ok ma lo. 27 Gyoengq vunz raen yienghneix le, cungj raen geizheih ij rai bae, couh lwnh naeuz: “Geizheih lo! Gijn'x dwg gijmaz saeh nex? Mij rox naeuz miz vunz ndaej yienghneix guh! Cingqcaen dwg miz cungj gienz he; de gingqyienz miz cungj gienz miz rengz he ndaej mingqlingq fangz, fangz caemh dingq de nex!” 28 Couh yienghneix, gvanhhih Yehsuh dih siuhsiz cungj cenz bae baenx cenz Gyahliqliq goqdoh. 29 Gajlaeng Yehsuh daj veiqdangz ok ma le, couh caeuq Yajgoz caeuq Yozhanq bae daengz ndaw ranz Sihmaenz caeuq Anhdwzlez. 30 Mwhde mehdai Sihmaenz ngaiz fatbingh fatndat, ninz youq gwnz congz. Yehsuh ngamq baex daengz he, couh miz vunz naeuz de ni. 31 Yehsuh dingq gyoengqde naeuz le, couh bae daengz henz ndang mehdai de, yawj de, couh rag dawz gij fawz de raeuz de hwnq. De ngamq baex hwnq he, gij ndat couh majcangq doiq lo, mehdai de couh doq ndei lo. Ndei le, couh ok daeuj daih gyoengqde. 32 Ngoenz mwnq gyangjngoenz doek le, miz haujlai vunz daiq doenghheij vunz miz bingh he, mboujguenj bingh maz, caeuq doenghheij vunz ngaiz fangz doz he, cungj daiq daeuj hawj Yehsuh, hawj de yw. 33 Yiengq baenx cenz singz hih vunz cungj caemh daeuj bakdou mwnq comz. 34 Yehsuh raen yienghneix le, couh yw ndei doenghheij vunz bingh mwnq, caemh bang vunz boenq fangz, vanzlij haep mbouj hawj doenghheij fangz he gangj vah, aenvih gyoengqde rox de dwg byawz. 35 Daengz ngoenz daixngeih ranz mijyaengz rongh haem, Yehsuh couh ok bae lo. De bae daengz rogndoi mwnq fwz mij vunz he gag gouz Cangqdiq haenh Cangqdiq. 36 Yiengq, Sihmaenz caeuq linghvaih sam boux gaen de mwnq cungj dauqcawq bae cimh de. 37 Gajlaeng, cimhraen de le, couh doiq de naeuz: “Lauxsae, gyoengqraeuz daixgya cungj cimh mwngz.” 38 Yehsuh dingq le, han naeuz: “Gyoengqraeuz bae doenghheij seiqhenz mbanj mwnq bae; gou haemq ndei ndaej youq mwnq cenzgangj gij ndei siuhsiz Cangqdiq, aenvih gou dwg vih gij saeh neix hwj ok daeuj he.” 39 Couh yienghneix, Yehsuh byaij baenx cenz Gyahliqliq Saengj goqdoh, bae gak aen veiqdangz cenzgangj gij vah Cangqdiq, caemh bang vunz boenq fangz. 40 Yiengq, miz baez he, miz boux hwnj mazfung he daeuj cimh Yehsuh. De daeuj le, couh youq dangqnaj de gvih hwj gouz de naeuz: “Goengjsae hax, gouz mwngz yw ndei gou bax! Hauhnaeuz mwngz haenj nex, mwngz gaengjdingq ndaej yw gou ndei hih!” 41 Yehsuh raen de yienghneix le, couh hojsik hwj iet fawz oemj laeng de bae naeuz: “Gou haenj yw mwngz hah; mwngz ndei lo bax!” 42 Yehsuh ngamq baex gangj gawq neix sat bak he, gij bingh mazfung boux de couh doq ndei lo. 43 Boux de ndei le, Yehsuh couh hawj de maj lo. De hawj de maj hih mwhde, vanzlij naeuz boux de naeuz: 44 “Mwngz ciengeiz mbouj ndaej gangj gij saeh neix naeuz vunz ni; mwngz caenh bae laeng boux guh dajbwiz he, hawj de gyenjcaz yawj, caemh ij ciuq Mohsih dih gveihdingq dawz gij dajbwiz bae bwiz Cangqdiq, hawj gij vunzlai cingqmingz naeuz mwngz bingh ndei lo, couh ndaej lo.” 45 Yehsuh gan yienghneix naeuz lah, hoeng, boux de maj le, ciuqyiengh gangj naeuz vunz ni gij saeh neix, guh hawj de mij banqfaz caiq ndaej seizbienh haeuj singz bae haem lo. Sojhij, de cij ndei youq rogndoi youq lo, hoeng, gij vunz ciuqyiengh daj gak dieg daeuj cimh de.
1 Gajlaeng goq geij ngoenz le, Yehsuh caiq haeuj Gyahbwznungz Singz bae. Yiengq, gij vunz dingq naeuz de dauq ma daengz Gyahbwznungz Singz, rox naeuz de youq ndaw ranz youq le, 2 couh miz haujlai vunz daeuj laeng de mwnq dingq de gangj gij vah Cangqdiq, daeuj hwj ndaw ranz rim bae, daiqlienz bakdou rog neix cungj miz vunz rim bae. 3 De cingq gangj hih mwhde, miz seiq boux vunz aeu damqgyaq ma ram boux vunz gyad he daeuj hawj de yw. 4 Hoeng, vunz daiq lai lai; mij banqfaz ndaej ram haeujbae daengz dangqnaj Yehsuh. Gajlaeng, gyoengqde couh hwnj gwnz dingjranz bae cek vax, couh dawz boux vunz gyad mwnq daiqlienz aen damqgyaq de cungj daj gwnz dingjranz duengq roengz cungqgyan vunzlai bae daengz dangqnaj Yehsuh. 5 Yehsuh raen gyoengqde baenxlai miz sinqsim le, couh doiq boux vunz gyad mwnq naeuz: “Baengzyoux hax, gij coih mwngz gaenq ndaej mienx lo.” 6 Yiengq doengh boux Youzdaiq fazliz cenhgyah naengh youq mwnq he raen Yehsuh yienghneix naeuz le, ndaw sim couh naemj naeuz: 7 “Geizheih, boux vunz bouxn'x dwg byawz nex? Gingqyienz gamj gangj gij vah daekcoih Cangqdiq he! Cawz Cangqdiq ok, mij'z vunz ndaej mienx coih hax.” 8 Gyoengqde yienghneix naemj naeuz le, Yehsuh dangjciengz couh rox daengz ndaw sim gyoengqde ngeix gijmaz lo, couh doiq gyoengqde naeuz: “Faenhsou vihmaz ij yienghneix ngeix nej? 9 Gou rox faenhsou mbouj sinq gou miz gij gienz Cangqdiq ndaej hawj vunz mienx coih he, aenvih mienx coih, vunz yungh ra ma yawj mbouj raen hih. Hoeng, hauhnaeuz gou heuh hawj vunz ndaej ndwn hwnjdaeuj nex, faenhsou couh rox gou miz gij gienz Cangqdiq lo. 10 Gou seizneix couh cingqmingz hawj faenhsou yawj, gou, Vunz dih Daiqbiuj, dwg lajmbwn boux miz gienz ndaej mienx coih he dih vunz lo.” De gangj doengh gawq neix sat le, couh doiq boux vunz gyad mwnq naeuz: 11 “Gou naeuz hawj mwngz ndwn hwnjdaeuj! Dawz gij demh ninz mwngz maj ranz lo bax!” 12 Yehsuh ngamq gangj gawq neix sat, boux vunz gyad mwnq couh doq youq dangqnaj vunzlai ndwn hwnjdaeuj, couh soujsib gij demh ninz de maj ranz lo. Yiengq youq mwnq sojmiz hih vunz raen de ndaej byaij le, cungj yawj hwj ra byaengqbyat bae. Gajlaeng gyoengq vunzlai couh haenh Cangqdiq, caemh naeuz: “Gyoengqraeuz coengzlaiz cungj mij raen miz cungj saeh neix goq!” 13 Yehsuh yw boux vunz gyad mwnq ndei le, youhcaiq bae daengz Gyahliqliq Huz. De bae hih mwhde, miz baenx haujlai vunz gaen de bae, yiengq de couh doq bae doq doiq gyoengq vunzlai gangj gvanhhih Cangqdiq dih ndei siuhsiz. 14 De cingq byaij bae hih mwhde, de yawjraen Liqveiq daeglwg Yaqlwzfeih naengh youq mwnq sou ceiq mwnq guh sou ceiq. De raen le, couh heuh de, doiq de naeuz: “Aex, daeuj! Mwngz daeuj gaen gou bax!” Liqveiq raen Yehsuh yienghneix doiq de naeuz le, couh doq gaen Yehsuh bae lo. 15 Gajlaeng Yehsuh vanzlij bae ndaw ranz de gw haeux, doengh boux lwgsae de caemh gaen de bae gw. Mwhde caemh miz baenx haujlai vunz guh sou ceiq he caeuq baenx haujlai vunz vaih he caeuq de itheij gw, aenvih luj doengh cungj vunz neix siengzseiz caemh gaen Yehsuh hwj. 16 Yiengq miz doenghheij gaep haeuj Fazliqcaiq baij he hih fazliz cenhgyah rox le, couh doiq doengh boux lwgsae Yehsuh naeuz: “De vihmaz caeuq doengh boux guh sou ceiq he caeuq doengh boux vunz vaih he gw haeux gw laeuj nej?” 17 Yehsuh dingq le, couh han naeuz: “Gou daeuj dineix mbouj dwg hawj gij vunz mij'z coih he gaijgoq nej; dwg hawj gij vunz miz coih he nginh loek gaijgoq lah. Couh dwg naeuz, ndang cangq hih vunz mbouj yungh canghyw nej; yungh canghyw hih cungj dwg doenghheij vunz miz bingh hih lah.” 18 Yehsuh yienghneix han gyoengqde le, gajlaeng couh miz vunz daeuj cam Yehsuh naeuz: “Yiengq, vihmaz gij lwgsae Yozhanq caeuq gij vunz gaep haeuj Fazliqcaiq baij he, gyoengqde lekdungx, hoeng, gij lwgsae mwngz vihmaz mbouj lekdungx nej?” Boux mwnq yienghneix naeuz dwg aenvih mwhneix ngamqluj gij lwgsae Yozhanq caeuq gij lwgsae gij vunz gaep haeuj Fazliqcaiq baij he lekdungx. 19 Yehsuh dingq le, couh yungh gij beijgangj he ma doiq gyoengqde naeuz: “Gojyez moq aeu yah cingj laeuj, doengh boux buenx gojyez moq he mbouj ndaej mbouj gw laeuj nej. Cijaeu gojyez moq vanzlij gw, gyoengqde couh gaengjdingq ij buenx gw. 20 Hoeng, baex daengz ngoenz vunz daeuj gaemh dawz gojyez moq bae he, daengz mwhmwnq, gyoengqde couh ij lekdungx lo.” 21 Yehsuh caiq naeuz: “Mij'z vunz aeu vangq boiq moq he ma fong haeuj diuz buh gaeuq he bae nej; hauhnaeuz yienghmwnq, vangq boiq moq mwnq cij dawz diuz buh gaeuq mwnq vaih engqgya gvangq. 22 Caemh mij'z vunz dawz laeuj moq coux haeuj daehnaeng gaeuq bae; yienghmwnq ngaiz gij laeuj moq cengq aen daehnaeng gaeuq ceg. Laeuj caemh roh okdaeuj, daeh caemh vaih. Sojhij gij vunz cungj dwg dawz laeuj moq coux haeuj daehnaeng moq bae.” 23 Miz ngoenz ngoenzyietbaeg he, Yehsuh caeuq gij lwgsae de byaij goq reih mienh he bae. Boux lwgsae de iek le, couh yot aeu riengz mienh ma nu hwj gw. 24 Yiengq, gij vunz gaep haeuj Fazliqcaiq baij he raen le, couh doiq Yehsuh naeuz: “Yawj veiq, gij lwgsae mwngz vihmaz ij youq ngoenz ngoenzyietbaeg yot mienh ma nu hwj gw nej? Nanzdauh gyoengqde mbouj rox youq ngoenz ngoenzyietbaeg guh hong dwg famqfaz hih maz?” 25-26 Gajlaeng, Yehsuh han naeuz: “Nanzdauh faenhsou mij doeg goq youq ndaw Singqgingh ndaw de sij naeuz hih, couh dwg mwh Yaqbijyaqdah guh boux goengjsae dajbwiz daeuzdaeuz hih mwhde, Daqveiq goengjvuengz neix caeuq gyoengq gaen henz ndang de youq mwh iek he guh gijmaz saeh mah? De haeuj ndaw cangqbungz Cangqdiq bae, aeu gij bingj baij coengq bwiz Cangqdiq he ma gw, caemh aeu hawj gyoengq gaen henz ndang de gw. Gij bingj dajbwiz mwnq, bouxlawz cungj mbouj ndaej gw, caenhgag goengjsae dajbwiz cij ndaej gw he; bouxlawz gw nex, couh suenq veizfanj Mohsih dih fazliz lo. Doenghgij neix faenhsou mij doeg goq mah?” 27 Yehsuh yienghneix naeuz le, vanzlij naeuz: “Ngoenz ngoenzyietbaeg dwg laeb hawj vunz hih lah, mbouj dwg vunz laeb hawj ngoenz ngoenzyietbaeg law. 28 Sojhij, gvanhhih ngoenz ngoenzyietbaeg, caenhgag gou, Vunz dih Daiqbiuj, cij miz gienz naeuz guxmaz he.”
1 Caiq miz baez he, Yehsuh youq ngoenz ngoenzyietbaeg bae veiqdangz. Yiengq youq ndaw veiqdangz mwnq miz boux he cik fawz de vej hwj. 2 Yiengq, youq mwnq miz vunz doiq Yehsuh mbouj muenx, couh demq yawj siengj yawj Yehsuh dwg mbouj dwg youq ngoenz ngoenzyietbaeg yw bingh, yw boux fawz vej mwnq, muzdiz dwg siengj ra congxmbongq cimh cingqgiq ma gauq de, aenvih youq ngoenz ngoenzyietbaeg yw bingh couh suenq veizfanj Youzdaiq fazliz lo. 3 Gajlaeng Yehsuh yawj ndaej ok gyoengqde dih yimhmaeuz le, couh doiq boux fawz vej mwnq naeuz: “Daeuj, daeuj dangqnaj vunzlai ndwn hwj.” Yehsuh yienghneix naeuz le, boux de caemh dingq Yehsuh hwj ndwn youq dangqnaj vunzlai. 4 Yehsuh yienghneix naeuz le, couh doiq gyoengq vunzlai naeuz: “Gou cam faenhsou, youq ngoenz ngoenzyietbaeg, wnggai guh saeh ndei, cixnaeuz guh saeh yak saeh rwix; gouq vunz cixnaeuz haih vunz nej? Sou naeuz.” Gyoengq vunz dingq de yienghneix cam le, cungj mij saek boux ok sing. 5 Yehsuh yawjraen yienghneix le, couh aeuqheiq hwj cimyawj gyoengq vunz, rox naeuz aen sim gyoengqde simgyeng raixcaix le, couh roxnginh siengsim ij rai bae, couh doiq boux fawz vej mwnq naeuz: “Iet gij fawz mwngz okdaeuj.” Boux de dingq le, caemh iet gij fawz de okdaeuj. Boux de baex iet okdaeuj he, cik fawz de couh doq ndeindwt hwnjdaeuj lo. 6 Yiengq, doenghheij vunz gaep haeuj Fazliqcaiq baij he raen yienghneix le, cungj ndatheiq hwj ij rai bae, couh majcangq ok veiqdangz ma, bae caeuq doenghgij vunz gaep haeuj Hihliz dangjbaij mwnq doxcimciek hwj ij baenzlaw ndaej cawz Yehsuh bae. 7 Yiengq Yehsuh rox le, couh caeuq doenghheij lwgsae de daj veiqdangz ok ma bae daengz henz huz. De bae hih mwhde, miz baenx haujlai vunz gaen de bae; gyoengqde dwg daj Gyahliqliq daeuj gaen de he. 8 Yiengq caemh miz haujlai vunz dingq daengz gvanhhih Yehsuh soj guh hih saeh le, cungj daj Youzdaiq Saengj hah, Yehluqsajlaengj hah, Hijdujmaij hah, doiqmienh diuz dah Yozdanq hah, simqciq dajlwh Daiqwj hah, Sihdoenq hah, caeuq seiqhenz song aen singz neix hah, cungj daeuj daengz de mwnq cimh de gaen de. 9 Yehsuh raen yienghneix vunz daiq lai lai le, couh naeuz gij lwgsae de, hawj gyoengqde ra aen ruz iq he hwj cwnjbiq, mienxndaej ngaiz vunzlai caenx le, couh ndaej hwnj ruz bae lo, 10 aenvih de yw ndei baenx haujlai vunz bingh, sojhij sojmiz miz bingh hih vunz cungj buekmingh caenx haeujbae dep Yehsuh, siengj dep de mo de. 11 Doenghheij vunz ngaiz fangz doz he raen de le, cungj bomz youq dangqnaj de, hemq naeuz: “Mwngz dwg lwg Cangqdiq! Mwngz dwg lwg Cangqdiq!” 12 Hoeng, Yehsuh dingq le, dauq mingqlingq gyoengqde, mbouj hawj gyoengqde naeuz de dwg bouxlawz hawj vunz rox. 13 Gajlaeng, Yehsuh hwnj bya bae. De heuh doenghheij lwgsae de hab'eiq he gaen de bae; gyoengqde caemh gaen de bae. 14 Yiengq de couh youq ndaw gyoengqde genj aeu cibngeih boux okdaeuj, an gyoengqde heuh ‘dwzbaijyienz,’ hawj gyoengqde gaen henz ndang de, caemh baij gyoengqde bae cenzgangj Cangqdiq dih ndei siuhsiz, 15 caemh nyok gij gienz ndaej boenq fangz he hawj gyoengqde. 16 Gyoengqde couh dwg: Sihmaenz (Sihmaenz Yehsuh caemh an coh hawj de heuh Bijdwz), 17 caemh miz song daeglwg Sihbiqdaiq, Yajgoz caeuq daegnuengx de Yozhanq (Yehsuh caemh an coh hawj song boux de heuh Buenqnizgiz; ‘Buenqnizgiz’ couh dwg ‘daeglwg byajraez’ dih iqswh), 18 vanzlij miz Anhdwzlez, Feihliz, Bahdohlozmaij, Majdaiq, Dohmaj, caeuq Yajgoz daeglwg Yaqlwzfeih, caeuq Dazdaiq, caeuq Gizcwnq Dangj dih Sihmaenz, 19 vanzlij miz buenqduz cuzmaiq Yehsuh dih Youzdaq, Gyahloz vunz, couh dwg cibngeih boux neix. 20 Yehsuh senj laebdingh gyoengq neix ndei le, couh roengz bya ma lo. De ngamq baex haeuj ranz he, gyoengq vunzlai couh daeuj gvaengz de, gvaengz hwj cienfanh lai he, guh hwj de caeuq gyoengq lwgsae de mij banqfaz gw haeux bae. 21 Yiengq, gij beixnuengx caencik de dingq naeuz miz gij saeh neix le, cungj naeuz de vangh lo. Gajlaeng gyoengqde couh daeuj sujcij de. 22 Yiengq dajlwh Yehluqsajlaengj daeuj hih doengh boux fazliz cenhgyah he engqgya naeuz de naeuz: “De ngaiz Bezsihbuz duz fangzvuengz neix doz youq gwnz ndang de.” Vanzlij caiq naeuz: “De dwg gauq fangzvuengz boenq fangz he.” 23 Yehsuh rox le, couh heuh gyoengqde goq daeuj, yungh gij beijgangj he ma doiq gyoengqde naeuz: “Fangzvuengz ij baenz gag boenq fangzvuengz nej? 24 Hauhnaeuz aen gueklawz ndaw guek de gag luenh hih, aen guek mwnq couh mbouj baenz maz guek lo; baih liux bae. 25 Caiq hauhnaeuz ranzlawz doxceng doxnauh hih, ranzlawz caemh gaengjdingq ngaiz siksanq liux bae. 26 Caemh doxdoengz, hauhnaeuz fangzvuengz bonjfaenh gag hoenx bonjfaenh, yiengq aen guek de mijyaengz siksanq liux haz? 27 “Mij'z vunz ndaej ndonj haeuj ranz boux akak rengzrengz he bae ciengj aeu gij doxgaiq de, cizfeih sien ndaej dawz boux de goenj hwnjdaeuj, cij ndaej ciengj aeu gij doxgaiq de, mijn'x gaengjdingq mbouj ndaej. 28 “Gou saedsaeh naeuz sou ni, vunz soj famh hih coih caeuq soj gangj gij vah daekcoih hih cungj ndaej nyiuz, 29 hoeng, gangj gij vah daekcoih Hoenzsaenz Cangqdiq hih vunz yungjyenj mbouj ndaej nyiuz, couh ij yungjyenj rap coih.” 30 Yehsuh yienghneix naeuz dwg aenvih gyoengqde bangjlaih de ngaiz fangz doz. 31-32 Couh youq mwh Yehsuh gangj doenghgij vah neix hih mwhde, daxmeh de caeuq doenghheij nuengxau de daeuj cimh de, hoeng, aenvih gij vunz gvaengz naengh youq henz ndang de daiq lai lai, mbouj ndaej haeuj bae dep de,couh ndwn youq rog neix, hawj vunz haeuj bae naeuz de ni. Yiengq couh miz vunz naeuz de ni naeuz: “Neq, yawj veiq, daxmeh mwngz caeuq gij beixnuengx mwngz youq rog mwnq, ij cimh mwngz.” 33 Yehsuh dingq le, dauq han naeuz: “Byawz dwg meh gou? Byawz dwg beixnuengx gou?” 34 Yehsuh gangj doengh gawq neix le, couh yawjyawj doenghgij vunz naengh youq seiqhenz de, couh naeuz: “Faenhsou yawj hux, doenghheij vunz neix couh dwg meh gou, beixnuengx gou!” 35 De vanzlij caiq naeuz: “Famz dingq gij vah Cangqdiq ciuq gij cawjeiq Cangqdiq bae guh hih couh dwg meh gou, beixnuengx gou.”
1-2 Gajlaeng, Yehsuh caiq bae henz Gyahliqliq Huz, bae mwnq yungh beijgangj ma son vunz hawj vunz rox haujlai saeh, hoeng, aenvih mwhde gij vunz daeuj gvaengz de dingq de gangj vah lai hux lai, yiengq de cij ndei hwnj aen ruz dingz youq henz huz he bae naengh, hawj gyoengq vunzlai ndwn youq gwnz hamq. Yehsuh hwnj ruz bae le, couh doiq gyoengq vunzlai gangj; 3 de naeuz: “Faenhsou ij dawz haeuj rwz dingq! Couh dwg miz boux nungzminz he, de bae dajroek. 4 Roek hih mwhde, miz hih ceh ngaiz doek youq henz roen. Doengh ceh ngaiz doek youq henz roen he, couh ngaiz roeg mbin roengzdaeuj dot gw liux. 5 Miz hih ceh ngaiz doek youq mwnq miz rin doem dinj he. Doengh ceh doek youq mwnq miz rin doem dinj neix hwnj ndaej vaiq. 6 Ceh de ngamq baex did he, gyangjngoenz baex cik he, couh doq reuq lo, aenvih gwnz rin doem dinj mbouj laeg, go de caemh mij'z rag. 7 Miz hih ceh ngaiz doek youq ndaw caz oen he, caeuq go oen doxcaenx hwnj, caemh caenx hwj hwnj mbouj ndaej, caemh mbouj ndaej dawz ceh dawz mak. 8 Hoeng doengh ceh doek youq ndaw doem biz he, baex did hwnjdaeuj he couh noengq nwtnwt lo, caemh beij ceh doek mwnq sou ndaej lai baenx samcib boix, roekcib boix, simqciq lai baenx bak boix cungj miz.” 9 Yehsuh gangj doengh gawq neix le, couh naeuz: “Daxbaenh gou soj gangj hih, faenhsou ijaeu dawz haeuj rwz!” 10 Gajlaeng gyoengq vunzlai sanq maj lo. Gyoengqde sanq maj le, lij Yehsuh caeuq cibngeih boux lwgsae de caeuq doenghgij vunz gaen de he, couh cam Yehsuh, cam de gvanhhih gij beijgangj neix dwg gijmaz iqswh. 11 Yehsuh dingq le, han gyoengqde naeuz: “Gij miqmiz ndaw guek Cangqdiq caenhgag ndaej hawj faenhsou rox. Mbouj dwg faenhsou hih, couh yungh beijgangj ma gangj, 12 gangj hawj gyoengqde dingq cix dingq mbouj rox, yawj cix yawj mbouj ok, mijn'x hauhnaeuz gyoengqde rox cix yawj ndaej ok nex couh nginh loek gaijgoq, couh ndaej mienx coih lo.” 13 De caiq doiq gyoengqde naeuz: “Faenhsou mbouj rox gij beijgangj neix, ij baenz ndaej rox sojmiz hih beijgangj hwj?” 14 De yienghneix gangj le, couh naeuz: “Boux dajroek mwnq soj roek hih ceh couh dwg daiqbiuj gij vah Cangqdiq. 15 Doengh ceh doek youq henz roen mwnq, couh dwg naeuz vunz dingq gij vah Cangqdiq le, couh majcangq miz Sajdanq fangzvuengz daeuj daj ndaw sim gyoengqde dued aeu bae. 16 Doengh ceh doek youq gwnz rin mwnq, couh dwg vunz dingq gij vah Cangqdiq; gannaeuz dingq hwj cienfanh angq he lah, 17 hoeng, caeng youq ndaw sim mbouj laeg, ndat ndaej yaep he. Gajlaeng baex roeb daengz miz nanh cixnaeuz vih gij vah Cangqdiq hwj ngaiz roeb daengz bwkhaih he, couh doq caepcat liux lo, mij sinq lo. 18 Doengh ceh doek youq ndaw caz oen mwnq, couh dwg naeuz vunz dingq gij vah Cangqdiq lo, 19 hoeng, gajlaeng vihliux saenghhoz dih saepsaep soiqsoiq hwj yousim hah, cienzngaenz hah, siengjmuengh hah hwj gaz dawz lo, mbouj ndaej guh gij saeh youq ndaw lwgra Cangqdiq miz yungh he. 20 Hoeng, doengh ceh doek youq ndaw doem biz mwnq nex, couh dwg naeuz vunz dingq gij vah Cangqdiq le, couh caeng youq ndaw sim laeg hux laeg, caemh ndaej guh gij saeh youq ndaw lwgra Cangqdiq suenq dwg miz yungh he. Cungj vunz neix couh luj ceh doek youq ndaw doem biz mwnq; gajlaeng, sou ndaej hih beij ceh doek mwnq lai baenx samcib boix, roekcib boix, simqciq baenx bak boix.” 21 Yehsuh vanzlij caiq naeuz: “Miz byawz diemj daeng le, caiq dawz aen de coengq haeuj ndaw gang bae, cixnaeuz dawz aen de coengq haeuj laj congz bae? Danghyienz mbouj miz! Dauqfanj, dwg ij dawz aen de coengq hwnj gwnz daiz bae lah. 22 Sojhij, mboujguenj miz geijlai miqmiz, cungj ij gangj okdaeuj hawj vunz rox; mij'z naeuz yo miqmiz hwj. 23 Sojhij, faenhsou ijaeu dawz haeuj rwz dingq!” 24 De vanzlij caiq naeuz: “Faenhsou ijaeu dawz haeuj rwz dingq faenhsou soj dingq daengz hih. Faenhsou dingq geijlai, Cangqdiq couh hawj faenhsou rox geijlai. Mbouj danhcij naeuz yienghneix, vanzlij hawj faenhsou rox ndaej engqgya lai, 25 aenvih famz gaenq miz hih, engqgya ij lai hawj; famz mbouj miz hih, yaepm'x daiqlienz de soj miz hih cungj ngaiz dued aeu bae liux.” 26 Yehsuh vanzlij caiq naeuz: “Aen guek Cangqdiq couh luj boux youq ndaw reih dajroek. 27 Boux de roek le, doengxhaemh ma ninz, doengxhaet hwnq; doengh ceh de roek mwnq baenzlawz ngez, baenzlawz hwnj, de caemh mbouj rox. 28 Doem ndaej hawj doengh go haeuxmienh gag hwnj hwnjdaeuj; go de sien hwnj daengz ganj, gajlaeng daengz ok riengz, caiq gajlaeng daengz miz ceh mbot baenz haeux baenz mienh. 29 Daengj ndaej daeng sou le, vunz couh dawz liemz bae gvej, aenvih mwhneix couh dwg dajsou dih giqcez lo.” 30 Yehsuh vanzlij caiq naeuz: “Aen guek Cangqdiq dwg luj baenzlawz yiengh nej? Gou ij aeu gijmaz ma beijgangj nej? 31 Gou naeuz sou ni, aen guek Cangqdiq luj ceh byaekgat he. Gannaeuz ceh de baenxlai iq, dwg sojmiz hih ceh ceiq iq he lah, 32 hoeng, dawz ceh de roek roengz doem bae le, daengj daengz ceh de did hwnjdaeuj, couh menhmenh hung baenz go byaek hunghung he lo, hung hwj beij sojmiz hih byaek cungj lij hung, simqciq daiqlienz roeg cungj ndaej youq gwnz nge de caux rongz bae.” 33 Couh yienghneix, Yehsuh yungh baenx haujlai beijgangj ma doiq gyoengq vunz gangj, son gyoengq vunz, hawj gyoengq vunz rox guek Cangqdiq dih dauhleix, caemh dwg gangj sojmiz beijgangj gyoengqde dingq ndaej rox he. 34 Couh dwg naeuz, de doiq gyoengq vunz gangj, cungj dwg yungh beijgangj he, hoeng, hauhnaeuz caenhgag doiq doenghheij lwgsae de gangj nex, de couh dawz doenghgij beijgangj de cek naeuz gyoengqde ni cingsuj. 35 Couh youq haemh mwnq, Yehsuh doiq gyoengq lwgsae de naeuz: “Raeuz bae hamq huz baihmwnq bax.” 36 Yehsuh yienghneix naeuz le, gyoengq lwgsae de couh daj gyoengq vunzlai mwnq ok ma hwnj aen ruz Yehsuh naengh mwnq bae, caeuq de itheij goq hamq huz doiqmienh mwnq bae lo. Yiengq mwhde caemh miz ruz gaen gyoengqde itheij goq bae. 37 Gyoengqde cingq naengh ruz goq bae hih mwhde, sawqmwh gwnz huz fan rumz hung hwnjdaeuj; rumz ci hwj gij raemx biu haeuj ndaw ruz bae yungyiemj raixcaix, guh hwj aen ruz ij caem senxsenx bae. 38 Hoeng, Yehsuh mwhneix vanzlij youq rieng ruz demh raeuj hwj ninz hwj ndaek fwjfwq. Gyoengq lwgsae de raen yienghneix le, cungj simvueng hwj vaiqdi heuh Yehsuh singj, naeuz: “Lauxsae, lauxsae, yaepm'x gyoengqraeuz cungj ngaiz rai liux bae! Mwngz vanzlij ninz haj? Mwngz guxmaz mbouj guenj hax?” 39 Yehsuh dingq gyoengq lwgsae de yienghneix hemq le, couh ndwn hwnjdaeuj ndaq gij rumz caeuq gij bohlangq naeuz: “Majcangq dingz! Majcangq dingz!” De yienghneix ndaq le, rumzrumz raemxraemx couh majcangq doq dinghcub lo. 40 Gajlaeng Yehsuh couh doiq doengh boux lwgsae de naeuz: “Faenhsou vihmaz yienghneix lau nej? Vihmaz lij mbouj sinq gou nej?” 41 Gyoengqde raen yienghneix le, bouxboux cungj raen geizheih, cixcaemh lau hwj ij rai bae, cungj doxlwnh naeuz: “Geizheih lo, geizheih lo, boux vunz bouxn'x dauqdaej dwg byawz hax? De mingqlingq rumz caeuq raemx; raemx caeuq rumz gingqyienz cungj dingq de!”
1 Couh yienghneix, Yehsuh caeuq doengh boux lwgsae de naengh ruz bae daengz hamq huz Gyahliqliq doiqmienh mwnq; mwnq dwg haeuj dieg Gwzlahsinh he. 2 Gyoengqde bae daengz le, Yehsuh ngamq baex roengz ruz hwnj hamq he, couh doq miz boux ngaiz fangz doz daj ndaw diegmoh ok ma he byaij goq laeng de mwnq daeuj. 3-4 Boux de siengzseiz cungj dwg youq ndaw diegmoh youq he. Gannaeuz miz vunz aeu lienh ma lienh fawz lienh ha de goq hwj lah, hoeng, cungj ngaiz de ndaej cengq gat ndaej duet okdaeuj, cungj mij'z vunz ndaej guenj ndaej goq de. 5 De ngwnzngoenz youq ndaw diegmoh caeuq youq rogndoi hemq vauxvaux, caemh aeu rin ma gag heh bonjfaenh. 6-8 De daj lizgyae raen Yehsuh le, couh riq goqdaeuj. Yehsuh raen le, couh haep duz fangz doz youq gwnz ndang boux de naeuz: “Dihduz fangz yak mwngz, daj gwnz ndang de ok ma!” Gajlaeng boux de couh gvih bomz youq dangqnaj de, hemq naeuz: “Yehsuh, daeglwg ceiq veijdaq dih Cangqdiq, gou caeuq mwngz miz maz gvanhaeh nex? Gou baengh Cangqdiq hwj gouz mwngz, gaejyungh fad gou hawj gou souh nanh!” 9 Yehsuh dingq le, couh cam boux de naeuz: “Mwngz heuh maz coh lah?” Boux de han naeuz: “Gou heuh Gyoengq Bing, aenvih gyoengqraeuz miz baenx gyoengq.” 10 De yienghneix han de le, vanzlij caiq gouz Yehsuh, gouz sam gouz seiq, gouz mbouj hawj Yehsuh boenq gyoengqde ok mwnq dieg mwnq bae. 11 Yiengq ngamqluj mwhneix, youq mwnq mbouj geijlwh gyae miz ndaek gyoengq mou he youq bangxbya gw doxgaiq; 12 gyoengq fangz couh gouz Yehsuh naeuz: “Gouz mwngz hawj gyoengqraeuz haeuj laeng gyoengq mou mwnq bae bax.” 13 Yiengq Yehsuh caemh dapwngq gyoengqde. Gajlaeng, gyoengq fangz couh daj gwnz ndang boux de ok ma, ndaenj haeuj gwnz ndang gyoengq mou mwnq bae lo. Yiengq gyoengq mou mwnq couh cung roengz ndaw huz bae rai liux lo. Gyoengq mou mwnq daihgaiq miz songcien duz yienghneix. 14 Gij vunz ciengx mou mwnq raen yienghneix le, couh majcangq riq deuz, riq bae daengz ndaw singz caeuq bae daengz lajmbanj, bae gangj naeuz vunz ni gij saeh neix. Gij vunz dingq le, cungj ok daeuj siengj yawjyawj dauqdaej dwg gijmaz saeh. 15 Gyoengq vunz daengz Yehsuh mwnq le, yawjraen boux ngaiz fangz doz mwnq gaenq daenj buh ndei seuqset hwj naengh youq mwnq, vunz caemh singqsag lo, couh rox de mij ngaiz gyoengq fangz doz laem lo. Gyoengq vunz raen yienghneix le, cungj lau liux. 16 Yiengq doengh boux caenra raen gij saeh neix he couh gangj naeuz gyoengq vunzlai ni boux ngaiz fangz doz mwnq caeuq gyoengq mou mwnq hih saeh. 17 Gyoengq vunz dingq le, cungj lau hwj ij rai bae, couh gouz Yehsuh, hawj Yehsuh bae daixlingh mwnq, mbouj youq mwnq dieg gyoengqde mwnq youq. 18 Couh yienghneix, Yehsuh couh dauq hwnj ruz bae. Couh ij dauq ma hih mwhde, boux ngaiz fangz doz goq mwnq dauq gouz Yehsuh, ijsiengj gaen Yehsuh bae. 19 Hoeng, Yehsuh mij dapwngq boux de, dauq doiq boux de naeuz: “Mwngz maj ranz bax; bae naeuz doenghheij beixnuengx caencik mwngz ni Cangqdiq baenzlawz hojsik mwngz caeuq baenzlawz bang mwngz guh baenxlai ndei hih saeh.” 20 Boux de dingq le, caemh ciuq Yehsuh raengq hih yienghmwnq bae guh lo; de bae daengz dieg Dihgyahbohlij le, couh gaihcij cenzgangj Yehsuh baenzlawz doiq de soj guh hih saeh, gangj hwj hawj gij vunz mwnq cungj raen geizheih ij rai bae. 21 Gajlaeng Yehsuh youhcaiq naengh ruz bae baih huz baih de. De ngamq baex hwnj hamq he, couh miz baenx haujlai vunz daeuj gvaengz de. 22 Yiengq, youq mwnq miz boux heuh Yazluj he; de dwg dieg mwnq hih boux veiqdangz daeuzdaeuz he. De daeuj daengz dangqnaj Yehsuh couh gvih bomz roengz dangqnaj Yehsuh bae, 23 couh gouz hux gouz de naeuz: “Lauxsae, lauxsae, dahniq gou bingh hwj cienfanh youqgaenj he, ij rai senxsenx lo! Gouz mwngz vaiq bae oemj fawz haeuj laeng de bae yw de, gouq de.” 24 Yehsuh dingq boux de yienghneix naeuz le, couh gaen boux de bae. Hoeng, Yehsuh bae hih mwhde, miz baenx haujlai vunz gvaengz de gaen de, gvaengz hwj nyaed yubyub bae. 25 Couh youq mwhneix, miz boux vunzbaz he, de ndwennaengz miz gij doxgaiq mwnq daeuj, cungj daeuj mbouj dingz goq, gaenq yienghneix baenx cibngeih bi lo. 26 Gannaeuz de vah bae sojmiz hih ngaenz bae hawj canghyw yw lah, hoeng, cungj mij saek boux canghyw yw ndaej ndei de; mbouj gangjnaeuz yw ndaej ndei lo, vanzlij engqgya hojyouq, vanzlij engqgya yied ngoenz yied youqgaenj. 27-28 Yiengq de dingq naeuz gvanhhih Yehsuh dih saeh le, ndaw sim de couh gag naemj: “Cijaeu gou ndaej mo dawz gij buh de, gou couh ndaej ndei lo.” De yienghneix naemj le, couh domh mwhneix caenx bae daengz baixlaeng Yehsuh, couh mo diuz buh de. 29 De ngamq baex mo he, gij doxgaiq couh majcangq doq dingz lo, de caemh roxnginh gij bingh de gaenq ndei lo. 30 Couh youq mwhneix, Yehsuh caemh majcangq rox gij bonjsaeh ndaej yw bingh de daj gwnz ndang de mwg okbae lo. De couh veq ndang goqma cam gyoengq vunzlai naeuz: “Byawz mo diuz buh gou lah?” 31 Yiengq gij lwgsae de raen de yienghneix cam le, dauj cam de naeuz: “Lauxsae, hawjm'z yawj hux, miz baenx lai vunz daeuj gvaengz mwngz caenx mwngz; mwngz ij baenz naeuz miz vunz mo mwngz nej?” 32 Hoeng, Yehsuh vanzlij dwg dauqcawq yawjyawj, siengj yawj boux vunzbaz mo de mwnq. 33 Boux vunzbaz mwnq dingq le, rox naeuz muenz mbouj goq Yehsuh lo, couh saenz dedded hwj goq dangqnaj de daeuj gvih bomz roengzbae, naeuz de ni bonjfaenh de vihmaz ij mo de, caeuq mo de le couh majcangq ndei he, gij saeh neix. 34 Yehsuh dingq le, couh doiq boux vunzbaz mwnq naeuz: “Dahniq hax, gij sinqsim mwngz ndaej gouq mwngz lo. Gij bingh mwngz gaenq ndei liux lo; mwngz couh coengqsim maj bax!” 35 Couh youq mwh Yehsuh gangj doenghgij vah neix hih mwhde, miz vunz daj ndaw ranz Yazluj veiqdangz dih daeuzdaeuz he daeuj naeuz Yazluj ni, naeuz: “Dahlwg mwngz gaenq rai lo; mboujyungh mazfanz lauxsae lo bax.” 36 Yehsuh dingq le, couh doiq Yazluj naeuz: “Gaejyungh lau; cijaeu sinq!” 37 Couh yienghneix, Yehsuh daiq Bijdwz caeuq Yajgoz caeuq Yozhanq daegnuengx Yajgoz bae ndaw ranz Yazluj lo, hoeng, de mbouj hawj gizdah vunz gaen de bae, caenhgag daiq sam boux neix sat lo. 38 De bae daengz ranz de le, yawjraen ndaw ranz de gij vunz luenh yobyob, daej hwj gog saxsax. 39 Yehsuh raen yienghneix le, couh haeuj ndaw ranz de bae doiq gyoengq vunz naeuz: “Faenhsou vihmaz daej hwj nauhyied foenxfoenx bae nej? Dahlwg neix mij dwg rai law; dwg ninz ralaep lah.” 40 Gyoengq vunz dingq de yienghneix naeuz le, engq riu de. Gajlaeng Yehsuh couh boenq gyoengqde okbae, caenhgag hawj bohmeh dah de caeuq sam boux lwgsae de gaen de haeuj ndaw fungh dah de bae sat lo. 41 De haeuj bae daengz le, couh rag dawz gij fawz dah de, couh doiq de naeuz: “Daqliqdaq, gujmij!” Gawq neix dih gij iqswh de dwg naeuz: “Dahniq hax, gou naeuz hawj mwngz hwnq!” 42 Yehsuh ngamq gangj gawq neix sat bak, dah de couh majcangq hwnq hwnjdaeuj, couh doq byaij lo. (Mwhde dah de gaenq ndaej cibngeih bi lo.) Bohmeh de caeuq sam boux lwgsae gaen haeuj bae mwnq raen yienghneix le, cungj doeksaet hwj ij rai bae, baenxlai geizheih. 43 Gajlaeng, Yehsuh couh raengq bohmeh dah de caeuq doengh boux lwgsae de, raengq gyoengqde ciengeiz mbouj ndaej gangj naeuz vunz ni gij saeh neix. De caemh raengq naeuz aeu doxgaiq hawj dah de gw.
1 Yehsuh daj mwnq ok ma le, couh dauq maj daengz dieg bonjdeih de Mbanj Nazsajlwz; gij lwgsae de caemh gaen de bae. 2 Daengz ngoenz ngoenzyietbaeg, de couh bae veiqdangz son vunz. Yiengq, gyoengq vunz dingq de gangj hih vah cungj raen geizheih ij rai bae, couh naeuz: “Boux vunz bouxn'x, daj nwjhwh ndaej rox gij saeh neix nex? Byawz hawj gij coengjmingz neix hawj de nex? De gingqyienz vanzlij ndaej guh doenghgij geizmiuj he nex! 3 De mbouj dwg boux moegciengh mwnq maz? Mbouj dwg daeglwg Majliqyaq maz? Doengh daegnuengx de mbouj dwg Yajgoz, Yozsih, Youzdaq caeuq Sihmaenz maz? Doengh dahnuengx de mbouj dwg cungj youq gyoengqraeuz dineix maz?” Gyoengqde yienghneix naeuz le, couh dwgcaengz de. 4 Yiengq Yehsuh rox gij vunz doiq de yienghneix le, couh doiq gyoengqde naeuz: “Gou naeuz sou ni, mij saek boux boux cenz gij vah Cangqdiq youq ndaw ranz bonjfaenh cixnaeuz youq dieg bonjfaenh ndaej miz vunz soenhcungq de.” 5 Couh yienghneix, gajlaeng de couh mbouj ndaej youq dieg bonjdeih bonjfaenh guh gijmaz geizmiuj hih saeh haem lo, caenhgag oemj fawz yw ndei geij boux vunz bingh sat lo. 6 De raen doenghgij vunz mwnqde mbouj sinq de, yiengq cungj roxnginh geizheih raixcaix. Gajlaeng de couh bae doenghheij mbanj seiqhenz mwnqde bae son vunz gvanhhih guek Cangqdiq dih saeh. 7 Miz baez he, Yehsuh heuh cibngeih boux dwzbaijyienz de daeuj doxcomz, daeuj soengq gienz soengq bonjsaeh hawj gyoengqde, hawj gyoengqde ndaej boenq fangz, caemh naeuz hawj gyoengqde song boux song boux caemh suj hwj bae, 8 vanzlij raengq gyoengqde naeuz: “Faenhsou bae nex, mbouj ndaej daiq gij gw, mbouj ndaej raek daeh caeuq ngaenz; caenhgag ndaej dawz faexdwngx, gijmaz cungj mbouj ndaej raek. 9 Ndaej daenj haiz bae, hoeng, mbouj ndaej raek buh bae.” 10 De vanzlij raengq naeuz: “Faenhsou mboujguenj bae daengz mwnqlawz, haeuj ranzlawz bae youq, couh ij youq daengz faenhsou ij bae daixlingh mwnq bae. 11 Hauhnaeuz miz dieglawz hih vunz mbouj vuenhringz faenhsou caemh mbouj dingq gij vah faenhsou hih, faenhsou couh mbouj youq dieg mwnq youq. Yiengq faenhsou ok ma hih mwhde, couh ij saemq din hawj gij boenqcingh gwnz din doek youq mwnq, caemhdangq naeuz gingjgauq gyoengqde.” 12 Couh yienghneix, Yehsuh raengq doenghgij vah neix sat le, gyoengqde couh ok bae lo, ok bae naeuz hawj vunz nginh loek gaij goqma, 13 caemh bang baenx haujlai ngaiz fangz doz he boenq fangz, caiq aeu youz ma cat hawj haujlai vunz bingh, bang gyoengqde gouzhaenh Cangqdiq, yw gyoengqde ndei. 14 Gajlaeng, gvanhhih Yehsuh sojmiz hih geizmiuj hih saeh cungj cenz bae cienfanh gvangq he. Yiengq goeng Hihliz, couh dwg goeng dang dieg Gyahliqliq dih daeuzdaeuz he, de caemh dingq daengz lo. Hoeng, de gaenhbaenj mbouj rox dauqdaej dwg byawz guh hih, aenvih miz hih vunz naeuz: “Dwg bang vunz guh sijlij dih Yozhanq dauqlix hwj guh hih, sojhij cij miz doenghgij bonjsaeh he guh doenghgij geizmiuj neix.” 15 Caemh miz hih vunz naeuz: “Dwg Hijliqyaq boux cenz gij vah Cangqdiq dauqlix hwj guh he.” Caemhcaiq miz hih vunz naeuz: “Dwg boux luj dangq doenghbaez hih boux cenz gij vah Cangqdiq he guh hih lah.” 16 Goeng de dingq daengz doenghgij neix le, dauq naeuz: “Ox! De couh dwg boux ngaiz gou raemj ndaek raeuj de gat hih Yozhanq; de dauqlix lo!” 17-18 Gangj daengz Yozhanq gij saeh neix, dwg yienghneix:Yienzlaiz goeng Hihliz aeu meh nuengxsimj bonjfaenh de ma guh yah; meh de couh dwg heuh Hihlozdij. Yiengq Yozhanq ndaq goq de, naeuz: “Mwngz aeu meh nuengxsimj mwngz ma guh yah dwg mbouj deng hih, dwg famqfaz hih.” Gajlaeng, goeng Hihliz vih ij bungj hawj Hihlozdij sim'angq, couh mingqlingq hawj vunz bae dawz Yozhanq, dawz de goenj hwj gyaeng haeuj ndaw lauz bae. 19 Hoeng, Hihlozdij mbouj fug, vanzlij dwg haemz de, cungj siengj cimh miz gihveiq cawz de bae, caenh ceng mij banqfaz hoh lo, 20 caemhcaiq gyacangq aenvih goeng Hihliz rox Yozhanq dwg haeuj gij vunz Cangqdiq he, dwg boux simndei simsoh hih vunz he, sojhij cix lau de cix ij baujhuq de. Goeng de moix it mbat dingq Yozhanq gangj vah, gannaeuz de dingq le ndaw sim de mbouj onj lah, hoeng, de vanzlij ciuqyiengh haenj dingq. 21 Gajlaeng, miz ngoenz he, Hihlozdij ngamqluj daengj daengz miz gihveiq lo, couh dwg goeng Hihliz dih ngoenzseng. Ngoenz mwnq goeng de cingj doenghheij vunz gaen henz ndang de caeuq doenghheij gywnhcangj he caeuq doenghheij Gyahliqliq dih lingjdauj daeuj goq ngoenzseng de. 22 Ngoenz mwnq, dahlwg Hihlozdij ok daeuj diuquj hawj vunz yawj, guh hwj goeng Hihliz caeuq doenghgij vunz daeuj goq ngoenzseng gw laeuj he cungj angq hwj ij rai. Goeng Hihliz raen yienghneix le, couh doiq dah de naeuz: “Naeuz gou ni, mwngz ijsiengj aeu gijmaz, gou couh hawj mwngz gijmaz.” 23 Goeng de mbouj danhcij yienghneix naeuz, vanzlij yiengq dah de fazsiq naeuz: “Mboujguenj mwngz gouz gou gijmaz, gou cungj hawj; cungjsuenq naeuz mwngz naeuz aeu aen guek gou dingxfaen, gou cungj hawj mwngz.” 24 Dah de dingq goeng Hihliz yienghneix naeuz le, couh bae cam daxmeh de, cam naeuz: “Gou wnggai aeu gijmaz nej?” Daxmeh de dingq le, couh doiq de naeuz: “Aeu ndaek raeuj boux guh sijlij dih Yozhanq.” 25 Dah de dingq daxmeh de yienghneix naeuz le, couh majcangq bae naeuz goeng Hihliz ni; de naeuz: “Gou muengh goengjvuengz majcangq dawz ndaek raeuj boux guh sijlij dih Yozhanq coengq youq ndaw buenz daeuj hawj gou.” 26 Goeng Hihliz dingq le, mbouj rox hih ij baenzlaw guh, cienfanh simnyap he, hoeng, aenvih de youq dangqnaj gyoengq hek baujcingq goq, sojhij mbouj ndei doi lo. 27 Gajlaeng, de couh majcangq baij boux bing he bae ndaw lauz raemj aeu ndaek raeuj Yozhanq ma. Couh yienghneix, boux bing de couh bae ndaw lauz raemj ndaek raeuj Yozhanq, 28 dawz ndaek raeuj Yozhanq coengq youq ndaw buenz hwj dawz ma hawj dah de lo; dah de couh dawz bae hawj daxmeh de. 29 Gajlaeng gyoengq lwgsae Yozhanq dingq daengz gij saeh neix le, couh bae ndaw lauz dawz gij seihaiz Yozhanq bae moek. 30 Gajlaeng baij bae hih gyoengq dwzbaijyienz mwnq dauq ma lo, ma gangj naeuz Yehsuh ni gyoengqde soj guh soj cenzgangj hih. 31 Gyoengq dwzbaijyienz gangj doenghgij saeh neix naeuz de ni sat le, Yehsuh couh doiq gyoengqde naeuz: “Daeuj, faenhsou gaen gou bae rogndoi mwnq fwz he bae yietbaeg bax.” De yienghneix naeuz dwg aenvih gij vunz daeuj cimh gyoengqde daiq lai lai, guh hwj gyoengqde cungj mij banqfaz gw haeux bae. 32 Couh yienghneix, gyoengqde couh naengh ruz bae daengz mwnq rogndoi fwz he lo. 33 Hoeng, gyoengqde bae hih mwhde, miz haujlai vunz raen gyoengqde, rox dwg gyoengqde le, couh daj gak mbanj gak singz doxciengj ganj bae. Gajlaeng gyoengq vunz engq ganj bae daengz mwnq beij Yehsuh gyoengqde vanzlij daengz ndaej vaiq. 34 Daengj daengz Yehsuh ngamq baex roengz ruz hwnj hamq he, de couh raen miz baenx haujlai vunz youq mwnq daengj de, caenh lujnaeuz gyoengq yiengz mij'z vunz hen mij'z vunz ciengx he nwih, couh hojsik gyoengqde. Gajlaeng, couh gaihcij doiq gyoengqde gangj vah, doiq gyoengqde gangj haujlai dauhleix. 35 Daengz mbwn ij laep hih mwhde, cibngeih boux lwgsae de doiq de naeuz: “Lauxsae, mbwn gaenq ij laep lo, caiq gyacangq dineix dwg rogndoi he. 36 Hawj gyoengq vunz sanq lo bax; hawj gyoengqde bae heij mbanj seiqhenz mwnq cawx gijmaz gw bax.” 37 Yehsuh dingq le, dauq han naeuz: “Faenhsou aeu gij gw hawj gyoengqde gw bax!” Gajlaeng gyoengq lwgsae han naeuz: “Mwngz cingqcaen ij hawj gyoengqraeuz cawx gij gw hawj gyoengqde gw haj? Hauhnaeuz yienghneix, ij vah bae songbak ngaenz cij ndaej gaeuq.” 38 Yehsuh dingq le, doiq gyoengqde naeuz: “Faenhsou yawjyawj faenhsou miz geijlwh aen bingj.” Gyoengqde yawj le, han naeuz: “Gyoengqraeuz miz haj aen bingj caeuq song duz bya.” 39 Yehsuh dingq le, couh doiq gyoengq lwgsae de naeuz: “Hawj gyoengqde faen baenx suj baenx suj hwj naengh youq ndaw anj nyaengq ndei hwj.” 40 Gyoengq lwgsae de dingq le, caemh ciuq de naeuz hih yienghmwnq bae nganhbaiz, faen gyoengq vunz, faen it suj bak boux cix miz, hajcib boux cix miz, faen hawj gyoengq vunz naengh ndei. 41 Gyoengq vunz naengh ndei le, Yehsuh couh dawz haj aen bingj caeuq song duz bya, muengh hwnj mbwn bae docih Cangqdiq. Docih le, couh euj baenx mbiengj baenx gyeh hwj ndenq hawj gyoengq lwgsae de, hawj gyoengq lwgsae de faen hawj gyoengq vunz gw. 42 Gajlaeng gyoengq vunz bouxboux cungj ndaej gw; mbouj danhcij naeuz ndaej gw, vanzlij ndaej gw daengz imq, 43 gw daengz lw, lw hwj gyoengq lwgsae coux ndaej baenx cibngeih lamz rim. 44 Mwhde youq mwnq daihgaiq miz hajcien vunz, vunzbaz caeuq lwgngez mbouj suenq. 45 Gyoengq vunz gw sat le, Yehsuh couh majcangq ci gyoengq lwgsae de hwnj ruz bae, hawj gyoengqde sien bae doiqmienh huz baih de mwnq aen mbanj heuh Bwzcaiqdaq he. Bonjfaenh de lij gag youq gajlaeng hwj ij hawj gyoengq vunz sanq maj. 46 Daengj gyoengq vunz sanq maj le, de couh gag hwnj bya bae gouzhaenh Cangqdiq. 47 Yiengq daengz haemh lo. Gyoengq lwgsae de gaenq naengh ruz bae daengz cungqgyan huz lo, hoeng, Yehsuh vanzlij gag youq baih huz baihneix. 48 Gajlaeng daihgaiq daengz ranz ij rongh hih mwhde, de yawjraen gyoengq lwgsae de vih ngig rumz hwj cienfanh dwgrengz vad ruz he. De raen yienghneix le, couh byaij goq gwnz raemx, siengj byaij goq gyoengqde mwnq bae. 49-50 Hoeng, gyoengq lwgsae de raen de byaij youq gwnz raemx le, cungj naemqnaeuz dwg fangz lah, couh lau hwj hemq hwnjdaeuj. De raen yienghneix le, couh vaiqdi doiq gyoengqde naeuz: “Gaej lau! Dwg gou lah; coengqsim bax!” 51 De yienghneix naeuz le, couh hwnj aen ruz gyoengqde bae caeuq gyoengqde. De baex hwnj ruz bae he, rumz couh majcangq doq dingz lo, guh hwj gyoengqde raen cienfanh geizheih he. 52 Gyoengqde raen geizheih dwg aenvih gyoengqde daengz mwhneix cungj mijyaengz rox gij saeh haj aen bingj caeuq song duz bya hih gij saeh neix; gyoengqde cungj mijyaengz singqsag goqdaeuj, cungj lij ngawzngoed. 53 Couh yienghneix, gyoengqde naengh ruz bae daengz doiqmienh huz hih dieg Gwznizsajlwz, couh youq mwnq dingz. 54 Yiengq gyoengqde ngamq baex hwnj hamq he, gij vunz dieg mwnq couh majcangq rox naeuz dwg Yehsuh lo. 55 Gajlaeng, gyoengq vunz mwnq couh vaiq bae lieb baenx cenz dieg mwnq goqdoh, bae dawz doenghgij vunz miz bingh he coengq hwnj gwnz damqgyaq bae ram bae cimh Yehsuh. 56 Gyoengq vunz mboujguenj Yehsuh bae daengz mwnqlawz, bae daengz ndaw singz haj cixnaeuz bae daengz lajmbanj, gyoengqde cungj ram vunz bingh bae daengz de mwnq, gouz de hawj gij vunz bingh dekdek gij dinbuh de. Gajlaeng, sojmiz ndaej mo ndaej dek daengz gij dinbuh de hih cungj bingh ndei lo.
1 Miz ngoenz he, gij vunz gaep haeuj Fazliqcaiq baij he caeuq geij boux Youzdaiq fazliz cenhgyah he daj Yehluqsajlaengj daeuj daengz Yehsuh mwnq doxcomz. 2 Yiengq gyoengqde yawjraen gij lwgsae Yehsuh miz hih vunz mij ciuq gij laehbeih Fazliqcaiq baij vunz yienghmwnq swiq fawz cij gw haeux hih yienghmwnq, couh nginhnaeuz yienghmwnq mbouj hab he. 3 (Yienzlaiz Youzdaiq vunz, dwzbez dwg doenghheij gaep haeuj Fazliqcaiq baij dih Youzdaiq gyauqbaij he, gyoengqde cungj dwg ciuq dangqlaux dih laehbeih, ij swiq fawz cij ndaej gw haeux, 4 caeuq hauhnaeuz bae gai cawx gij gw ma, mbouj sien saj raemx hawj gij de suenq dwg hab gij laehbeih gyoengqde nex, caemh mbouj gw gij de. Mbouj danhcij naeuz yienghneix, vanzlij miz baenx haujlai laehbeih haem, beijgangj naeuz: cenj hah, guenq hah, doengh aen aeu doengz ma guh hih doengh aen dajcoux he hah, cungj ij yomx raemx hawj aen de mbaeq hwj bienqbaenz hab gij laehbeih gyoengqde bae.) 5 Gyoengqde yawjraen yienghneix le, couh gvaiq Yehsuh naeuz: “Vihmaz gij lwgsae mwngz mbouj ciuq gij laehbeih dangqlaux yienghmwnq swiq fawz le cij gw haeux nej?” 6-7 Yehsuh dingq le, couh han gyoengqde naeuz: “Hijcaiqyaq boux cenz gij vah Cangqdiq neix youq ndaw Singqgingh ndaw de doiq doengh cungj vunz gyajcang guh simndei simsoh hih faenhsou naeuz goq naeuz: Cangqdiq naeuz: ‘Doenghgij vunz neix conghbak naeuz soenhgingq gou, hoeng, ndaw sim gyoengqde dauq mbouj leix gou. Gyoengqde engq dawz vunz dih laehbeih caeuq gveihdingq ma dangqbaenz gij mingqlingq gou. Gyoengqde baiq gou dwg mij'z yungh hih.’ De naeuz hih doengh gawq neix dwg deng hih.” 8 Yehsuh gangj daengz dineix le, vanzlij caiq naeuz: “Faenhsou caenhrox yawjnaek gij laehbeih vunz dingh okdaeuj he, dauq mij leix gij mingqlingq Cangqdiq.” 9 De vanzlij caiq naeuz: “Faenhsou vih ij ciuq gij laehbeih faenhsou hwj yungh cungj banjdaeuz he ma vwt gij mingqlingq Cangqdiq. 10 Cangqdiq dunghgoq Mohsih hwj hawj de naeuz goq, naeuz: Ij yawjdij bohmeh. Caemh naeuz: Famz ndaq bohmeh hih, boux de gaengjdingq ij ngaiz gajrai. 11 Hoeng, faenhsou nej? Faenhsou dauq naeuz: Hauhnaeuz miz vunz doiq bohmeh naeuz: ‘Gou gaenq dawz baenjlaiz ij ciengx ij hawj faenhsou hih, gaenq aeu bae soengq hawj Cangqdiq lo,’ 12 boux de yienghneix naeuz, faenhsou couh naeuz boux de mboujyungh yauqgingq bohmeh lo. 13 Faenhsou yienghneix guh caemhdangq dawz gij laehbeih faenhsou ma dingj gij vah Cangqdiq lo. Faenhsou vanzlij guh baenx haujlai luj yienghneix dih saeh.” 14 Couh vih yienghneix, Yehsuh heuh gyoengq vunzlai daeuj doxcomz, doiq gyoengqde naeuz: “Faenhsou ij dingq gij vah gou, caemh ijaeu rox, 15 couh dwg naeuz daj rog haeuj bae daengz gwnz ndang vunz hih mbouj ndaej hawj Cangqdiq dwgcaengz nej; hawj Cangqdiq dwgcaengz hih dauq dwg daj gwnz ndang vunz ok daeuj cij ndaej hawj Cangqdiq dwgcaengz lah.” 16 Yehsuh yienghneix doiq gyoengq vunz gangj sat le, couh naeuz: “Daxbaenh gou soj gangj hih faenhsou ijaeu dawz haeuj rwz.” 17 Yehsuh gangj sat doengh gawq neix le, couh haeuj ranz maj lo. Haeuj maj le, gyoengq lwgsae de couh cam de gij beijgangj de dwg gijmaz iqswh. 18 Yiengq Yehsuh couh doiq gyoengq lwgsae de naeuz: “Faenhsou caemh luj gyoengqde mbouj rox haj? Faenhsou mbouj rox daj rog gw doxhaeuj hih mbouj ndaej hawj Cangqdiq dwgcaengz haj? 19 Aenvih daj rog gw doxhaeuj hih mbouj dwg haeuj ndaw sim, dauq dwg roengz dungx lah. Gw roengz dungx hih cungj ij baiz okdaeuj.” (Yehsuh yienghneix naeuz dwg ceij sojmiz hih gij gw youq ndaw lwgra Cangqdiq suenq dwg hab ndaej gw he.) 20 De vanzlij caiq naeuz: “Hawj Cangqdiq dwgcaengz hih cungj dwg dajlaeng vunz ok daeuj hih, 21 aenvih dajlaeng vunz ok daeuj couh dwg daj ndaw sim vunz ok daeuj hih gak cungj doegdoeg siebsieb hih siengjfap. Gij siengjfap neix ndaej hawj vunz famh coih guh gij hawj vunz gangj mbouj ndaej ok bak he, 22 guxcaeg hah, gaj vunz hah, guhyoux hah, damsim hah, guh doeg guh sieb hah, yaeuh vunz coemx vunz hah, siengj doenghgij ndaengndwet yalw he hah, rahoengz hah, bangjlaih vunz hah, gyauhngauq hah, guh gij saeh ngawz he hah. 23 Sojmiz hih doenghgij doegsieb yalw neix cungj dwg daj ndaw sim vunz ok daeuj hih; cungj dwg ndaej hawj Cangqdiq dwgcaengz hih.” 24 Gajlaeng Yehsuh daj mwnq okdin bae dieg Daiqwj. De bae daengz le, couh haeuj aen ranz he bae youq. Baenjlaiz de mbouj siengj hawj vunz rox de youq mwnq hih, hoeng, cungj muenz mbouj goq. 25-26 Yiengq, mwnq miz boux vunzbaz Hihlaz vunz linghvaih minzcuz he, dwg youq Siqliqfeihnizgih seng he, dahlwg de ngaiz fangz doz. De rox naeuz Yehsuh youq mwnq le, couh bae cimh Yehsuh, bae daengz dangqnaj de bomz roengz doem bae gouz de, hawj de bang dahlwg de boenq duz fangz doz youq gwnz ndang de okdaeuj. 27 Yehsuh raen yienghneix le, couh doiq de naeuz: “Sien hawj gyoengq lwg gw imq gaenq; dawz gij gw gyoengq lwg gveng hawj ma gw dwg mbouj hab hih.” 28 Boux vunzbaz mwnq dingq le, couh han naeuz: “Dwg hah, bouxcawj hax; mwngz naeuz ndaej deng hih. Hoeng, duz ma youq laj daiz caemh ndaej gw gij loenq lwgngez doek youq laj daiz hih hah.” 29 Yehsuh dingq de yienghneix han de le, couh naeuz: “Mwngz maj bax; baengz gawq vah mwngz neix, duz fangz doz youq gwnz ndang dahlwg mwngz gaenq ok ma lo.” 30 Gajlaeng boux vunzbaz mwnq couh maj lo. Maj le, raen dahlwg de ninz youq gwnz congz, cingqgawq mij fangz doz haem lo. 31 Gij saeh neix goq le, Yehsuh caiq daj dieg Daiqwj ok ma byaij goq Sihdoenq dauq ma daengz dieg Dihgyahbohlij dih Gyahliqliq Huz. 32 Yiengq, mwnq miz vunz daiq boux youh nuk youh ngoemx he daeuj cimh Yehsuh, daeuj gouz de hawj de oemj fawz hawj boux nukngoemx mwnq, yw de. 33 Yehsuh raen le, couh daiq boux nukngoemx mwnq liz gyoengq vunzlai, goq henz he bae, mbouj siengj hawj vunz rox, couh aeu lwgfawz bonjfaenh bae yaek haeuj duj rwz boux nukngoemx mwnq bae, caiq byiq myaiz swk haeuj diuz linx boux de bae. 34 De yienghneix guh le, couh muengh hwnj mbwn bae, diem ndaek gaemz heiq naek he, couh doiq boux de naeuz: “Hijfazdaq!” Yehsuh naeuz gawq neix dih iqswh dwg naeuz: “Ndei lo.” 35 Yehsuh ngamq baex naeuz gawq neix sat bak he, boux de duj rwz de couh doq ndaej dingqri, diuz linx de caemh doq unq, ndaej gangj vah okdaeuj lo. 36 Gajlaeng Yehsuh couh raengq doengh boux rox gij saeh neix he naeuz mbouj hawj gyoengqde dawz gij saeh neix cenz okbae; hoeng, mboujguenj Yehsuh baenzlawz raengq, gyoengqde engqgya yied cenz gij saeh neix. 37 Sojmiz dingq daengz gij saeh neix hih vunz cungj raen geizheih ij rai, cungj naeuz: “De soj guh hih saeh baenz hwx! Gingqyienz ndaej hawj rwznuk ndaej dingqri, ngoemx ndaej gangj vah!”
1 Gij saeh neix goq mbouj geijlwh caez, miz baez he, miz baenx haujlai vunz daeuj Yehsuh mwnq doxcomz. Yiengq de raen gij vunz mij gijmaz gw, couh heuh gyoengq lwgsae de goq daeuj, doiq gyoengqde naeuz: 2 “Gou saedsaeh hojsik gyoengq vunz neix, aenvih gyoengqde gaenq gaen gou baenx sam ngoenz lo; seizneix caemh mbouj miz gijmaz gw haem lo. 3 Yiengq, hauhnaeuz gou hawj gyoengqde dungxiek maj ranz nex, hoengjlau gyoengqde daengz dangjroen dingx mbouj ndaej hwj ngaiz laemx lah, aenvih gyoengqde miz hih vunz dwg daj gyae daeuj he.” 4 Gyoengq lwgsae de dingq le, couh han naeuz: “Hoeng, dineix dwg rogndoi hah; nwj bae cimh miz gij gw he ndaej hawj doenghheij vunz neix gw imq nej?” 5 Gajlaeng Yehsuh cam gyoengq lwgsae de naeuz: “Faenhsou miz geijlwh aen bingj hax?” Gyoengqde han naeuz: “Miz caet aen.” 6 Yehsuh dingq gyoengq lwgsae de naeuz miz bingj le, couh hawj gyoengq vunzlai youq mwnq naengh ndei hwj. Hawj gyoengq vunz naengh ndei le, de couh dawz caet aen bingj hwnjdaeuj docih Cangqdiq. Docih le, couh euj ndenq hawj gyoengq lwgsae de, hawj gyoengq lwgsae de faen hawj gyoengq vunzlai gw. 7 Gyoengq lwgsae caemh vanzlij miz geij duz bya iq. Yehsuh caemh dawz doengh duz bya neix hwnjdaeuj docih Cangqdiq, caemh euj hwj aeu hawj gyoengq lwgsae, hawj gyoengqde faen hawj gyoengq vunzlai gw. 8 Couh yienghneix, gyoengq vunz mwnq bouxboux cungj ndaej gw; mbouj danhcij naeuz ndaej gw, vanzlij ndaej gw daengz imq, gw daengz lw, lw hwj gyoengq lwgsae coux ndaej baenx caet lamz rim. 9 Mwhde youq mwnq daihgaiq miz seiqcien vunz yienghneix. Yehsuh daengj gyoengqde gw imq le, couh hawj gyoengqde sanq maj lo. 10 Yehsuh hawj gyoengq vunz sanq maj le, couh majcangq caeuq gyoengq lwgsae de naengh ruz bae dieg Daqmajnujdah. 11 Yiengq gyoengqde bae daengz mwnq le, youq mwnq miz gij vunz gaep haeuj Fazliqcaiq baij he couh daeuj caeuq Yehsuh doxeuq, sawq de, ij hawj de guh gij geizmiuj he daj gwnzmbwn coengq roengzdaeuj ndaej cingqmingz naeuz de dwg bouxlawz hwj hawj gyoengqde yawj. 12 Yehsuh rox gij haexnyangj gyoengqde le, couh gangznaek hwj naeuz: “Aen nienzdaiq neix hih vunz hax, vihmaz ij gouz yawj geizmiuj ndaej cingqmingz nej? Gou saedsaeh naeuz sou ni lo, faenhsou gaej muengh naeuz caiq ndaej yawjraen geizmiuj ndaej cingqmingz hih saeh lo!” 13 De yienghneix naeuz le, couh baet hangx deuz lo. Gajlaeng, de youhcaiq caeuq gyoengq lwgsae de naengh ruz goq doiqmienh huz baih de bae lo. 14 Yiengq bae hih mwhde, gyoengq lwgsae de lumz raek gij gw he bae. Gwnz ruz caenhgag miz aen bingj dog; gijmaz ndaej gw hih cungj mbouj miz. 15 Youq gwnz ruz, Yehsuh doiq gyoengq lwgsae de naeuz: “Faenhsou ijaeu siujsim, ijaeu daezfuengz gij vunz gaep haeuj Fazliqcaiq baij he caeuq goeng Hihliz dih yauqmuj.” 16 Gyoengq lwgsae de dingq de yienghneix doiq gyoengqde naeuz le, couh lwnh yebyeb naeuz: “Lauxsae de yienghneix naeuz dwg mbouj dwg vih gyoengqraeuz mbouj daiq bingj hax!” 17 Gajlaeng, Yehsuh rox gyoengqde lwnh gijmaz le, couh doiq gyoengqde naeuz: “Faenhsou vihmaz ij lwnh mbouj miz bingj gij saeh neix nej? Nanzdauh faenhsou vanzlij mijyaengz singqsag, mijyaengz rox haj? Aen sim faenhsou mazmwnh lo mah? 18 Faenhsou miz ra, hoeng, yawj mbouj raen mah? Faenhsou miz rwz, hoeng, dingq mbouj ri mah? Faenhsou caemh mbouj ndaejgeiq 19 gou euj haj aen bingj faen hawj hajcien vunz gw gij saeh neix lo mah? Gajlaeng faenhsou dawz lij lw hih coux hwnjdaeuj ndaej geijlwh lamz rim nej?” Gyoengq lwgsae de dingq de yienghneix naeuz le, han naeuz: “Ndaej cibngeih lamz.” 20 Gajlaeng Yehsuh caiq naeuz: “Mwh gou euj caet aen bingj faen hawj seiqcien vunz gw nej, faenhsou caemh coux ndaej geijlwh lamz rim?” Gyoengqde caiq han naeuz: “Caet lamz rim.” 21 Gajlaeng de couh naeuz: “Yiengq faenhsou vanzlij mijyaengz rox haj?” 22 Couh yienghneix, gyoengqde couh naengh ruz bae daengz doiqmienh huz aen mbanj heuh Bwzcaiqdaq he. Yiengq, aen mbanj mwnq miz boux rafangz he; miz vunz daiq de daeuj cimh Yehsuh, gouz Yehsuh lax de hawj de ndei. 23 Yehsuh raen yienghneix le, couh ying gij fawz boux rafangz mwnq ok rog mbanj bae. Ok bae le, couh byiq myaiz haeuj cehra boux de bae, caiq oemj fawz hwnj gwnz ndang boux de bae, cam boux de naeuz: “Mwngz yawj ndaej raen gijmaz lwi?” 24 Yehsuh yienghneix cam le, boux de couh ngiengx raeuj hwnjdaeuj baex yawj he, couh naeuz: “Ox! Gou ndaej yawjraen vunz lo; gyoengqde luj baenx go baenx go faex, byaij bae byaij dauq.” 25 Gajlaeng, Yehsuh caiq oemj fawz haeuj cehra de bae. Yiengq de baex byaengq yawj he, couh majcangq yawj ndaej raen, yawj ndaej cingsuj lo. 26 Boux de yawj ndaej raen le, Yehsuh couh hawj de maj ranz lo. Yehsuh vanzlij raengq boux de naeuz: “Maj ranz couh cigcig maj daengz ranz bae; mbouj ndaej youq ndaw mbanj daengz law youq law.” 27 Gajlaeng Yehsuh caeuq gyoengq lwgsae de caiq yiengq fueng Gaijsajliqyaq-Feihlizbij Singz hih doenghheij mbanj seiqhenz de bae. Bae hih mwhde, Yehsuh cam gyoengq lwgsae de naeuz: “Heijvunz naeuz gou dwg byawz?” 28 Gyoengq lwgsae de han naeuz: “Miz hih vunz naeuz mwngz dwg bang vunz sijlij dih Yozhanq, caemh miz hih vunz naeuz mwngz dwg Hijliqyaq, caemhcaiq miz hih vunz naeuz mwngz dwg dangq doenghbaez hih boux cenz gij vah Cangqdiq hih boux he.” 29 Gajlaeng, Yehsuh caiq cam gyoengq lwgsae de naeuz: “Yiengq faenhsou nej? Faenhsou naeuz gou dwg bouxlawz nex?” Bijdwz couh han naeuz: “Mwngz dwg Gihduz, Cangqdiq baij daeuj dih vuengz.” 30 Yehsuh dingq le, couh raengq gyoengqde ciengeiz mbouj ndaej gangj naeuz vunz ni de dwg bouxlawz. 31 Daj mwhmwnq hwnj, Yehsuh couh gaihcij doiq gyoengq lwgsae de naeuz: “Gou, Vunz dih Daiqbiuj, bietdingh ij ngaiz souh daengz haujlai dih haemzhoj, ngaiz gij vunz gangj vah couh baenz he caeuq doengh boux goengjsae dajbwiz he caeuq doengh boux fazliz cenhgyah he yiem, simqciq ngaiz haihrai. Hoeng, daengz daixsam ngoenz couh ndaej dauqlix hwnjdaeuj.” 32 Yehsuh gangj gij saeh neix naeuz gyoengq lwgsae de ni cingcing sujsuj, yiengq Bijdwz dingq le, engq rag Yehsuh goq henz he bae gienq de, naeuz de mbouj wnggai gangj gij saeh neix. 33 Hoeng, Yehsuh dauq veq ndang goqma yawj, yawj haeuj laeng gyoengq lwgsae de bae, ndaq Bijdwz naeuz: “Dihduz lwg fangz Sajdanq mwngz, deuz! Mwngz siengj hih cungj fap neix mbouj dwg Cangqdiq dih siengjfap, dauq dwg vunz dih siengjfap lah.” 34 De yienghneix ndaq naeuz Bijdwz le, couh heuh gyoengq vunzlai caeuq gyoengq lwgsae de goq daeuj, couh doiq gyoengqde naeuz: “Hauhnaeuz bouxlawz ijsiengj daeuj gaen gou hih, couh ij sijndaej diuz mingh bonjfaenh, ij ngoenzngoenz gwed aen gyaq cixcib bonjfaenh daeuj gaen gou cij ndaej, 35 aenvih doengh boux ijsiengj gouq gij mingh bonjfaenh hih, dauqfanj ngaiz vwt mingh; doengh boux vih gou caeuq vih gij ndei siuhsiz hwj ngaiz vwt mingh hih, dauqfanj ndaej gouq mingh. 36 Doengh boux ndaej baenx cenz lajmbwn hih, fanjgoqma dauq ngaiz vwt diuz mingh bonjfaenh, yiengq ij miz maz ik nex? 37 De ij miz gijmaz ndaej vuenh diuz mingh bonjfaenh de nej? 38 Youq aen nienzdaiq doegsieb mbouj miz sim gaen Cangqdiq neix, famz miz vunz dawz gou caeuq dawz gij vah gou ma dangqbaenz mij naj doiq vunz, saetnaj saetnyaenq hih nex, daengz mwh gou, Vunz dih Daiqbiuj, daeuj hih mwhde, gou luj Bohmbwn yienghmwnq najrongh, caeuq bouxcai de itheij daeuj, daengz mwhmwnq, gou caemh mbouj nginh boux de; nginh de caemh roxnginh saetnaj saetnyaenq.”
1 Yehsuh vanzlij caiq doiq gyoengq vunz naeuz: “Gou saedsaeh naeuz sou ni, ndwn youq dineix hih vunz, miz mbangj hih vunz youq de lij lix hih mwhde ij ndaej raen aen guek Cangqdiq dih gij gienzveih de fazveih.” 2 Yehsuh gangj doenghgij vah neix goq roek ngoenz le, de couh daiq Bijdwz, Yajgoz caeuq Yozhanq sam boux neix hwnj aen bya sang he bae. Hwnj bae le, de couh youq dangqnaj sam boux de bienq lo, 3 bienq hwj diuz buh de bieg supsup myig myiengzmyiengz; youq lajmbwn mij'z vunz saeg boiq bieg ndaej saeg luj yienghmwnq youh bieg youh myig. 4 Couh youq mwhneix, sawqmwh Hijliqyaq caeuq Mohsih yienh youq dangqnaj sam boux de, caeuq Yehsuh gangj vah. 5 Bijdwz raen yienghneix le, mij rox dwg gijmaz saeh, couh doiq Yehsuh naeuz: “Lauxsae, lauxsae, gyoengqraeuz youq dineix baenz hwx! Raeuz dap sam aen cangqbungz, aen he hawj mwngz, aen he hawj Mohsih, lij miz aen he hawj Hijliqyaq.” 6 Gizsaed mwhde Bijdwz gaenhbaenj mbouj rox ij gangj gijmaz vah, aenvih gyoengqde raen yienghneix le, cungj lau hwj ij rai bae. 7 Gajlaeng, miz ndaek vangq fwj he daeuj guem gyoengqde, caemh miz sing daj ndaw fwj gangj vah okdaeuj naeuz: “Boux neix dwg daeglwg gou; gou gig aiq de. Faenhsou ijaeu dingq gij vah de.” 8 Bijdwz gyoengqde dingqri gij sing daj ndaw fwj yienghneix naeuz sat le, couh yawjyawj seiqhenz, hoeng, mij yawjraen saek boux, caenhgag yawjraen Yehsuh boux vunz dog youq mwnq sat lo. 9 Gajlaeng gyoengqde couh roengz bya ma. Roengz ma hih mwhde, Yehsuh raengq Bijdwz gyoengqde naeuz: “Vunz dih Daiqbiuj mijyaengz ndaej daj rai ndaej dauqlix cihsenz, faenhsou ciengeiz mbouj ndaej gangj naeuz vunz ni faenhsou soj yawjraen hih.” 10 Yehsuh yienghneix raengq Bijdwz gyoengqde, yiengq, gyoengqde caemh dingq de raengq, couh dawz gij saeh neix caeng youq ndaw sim hwj. Hoeng, gyoengqde vanzlij gag doxlwnh naeuz: “Daj rai ndaej dauqlix dauqdaej dwg gijmaz iqswh nej?” 11 Gajlaeng gyoengqde cam Yehsuh naeuz: “Mohsih dih fazliz cenhgyah vihmaz naeuz Hijliqyaq boux cenz gij vah Cangqdiq neix gaengjdingq ij sien daeuj gaxgonq nej?” 12 Yehsuh dingq gyoengqde yienghneix cam le, couh han naeuz: “Dwg hah, Hijliqyaq cingqcaen dwg ij daeuj gaxgonq guh ndei cwnjbiq hah, hoeng, ndaw Singqgingh ndaw de vihmaz ij sij naeuz Vunz dih Daiqbiuj bietdingh ij ngaiz souh daengz haujlai nanh caeuq ngaiz vunz yiem nej? 13 Gou saedsaeh naeuz sou ni, Hijliqyaq de gaenq daeuj lo, hoeng, gij vunz dauq ciuq gij cawjeiq bonjfaenh ma haenj baenzlaw doiq de couh baenzlaw doiq de, yawj de ngawz, caenh luj ndaw Singqgingh soj sij naeuz hih yienghmwnq.” 14 Gajlaeng, Yehsuh caeuq Bijdwz gyoengqde couh dauq maj daengz gyoengq lwgsae mwnq. Gyoengqde maj daengz le, raen miz baenx haujlai vunz daeuj gvaengz gyoengqde, caemh raen miz doenghheij fazliz cenhgyah he caeuq gyoengqde doxeuq. 15 Yiengq gyoengq vunz yawjraen Yehsuh le, cungj doeksaet hwj ij rai, couh riq goqbae dongx de. 16 Gajlaeng, Yehsuh couh cam gyoengq lwgsae de naeuz: “Faenhsou caeuq gyoengqde doxeuq gijmaz lah?” 17 Yiengq gyoengq vunzlai ndaw de miz boux he han naeuz: “Lauxsae, gou daiq daeglwg gou daeuj laeng mwngz dineix; de ngaiz fangz doz, hawj de mbouj ndaej gangj vah. 18 Duz fangz neix siengzseiz loengh de, hawj de laemx, hawj de bak ok fwdfauz cix haeb faenz haeb heuj, baenx ndang cungj gyeng gyaengxgyaengx bae. Gou gouz gij lwgsae mwngz bang boenq duz fangz neix okma goq hwj, hoeng, gyoengqde gaenhbaenj mbouj ndaej.” 19 Yehsuh dingq le, couh naeuz: “Haex! Doenghgij vunz aen nienzdaiq neix mbouj sinq hih faenhsou hax, gou lij ij youq faenhsou dineix geijlwh caez haem? Gou ij naenx faenhsou daengz seizlaw bae? Daiq daeglwg mwngz goq daeuj gou dineix bax!” 20 Yehsuh yienghneix naeuz le, couh miz vunz daiq daeg lwgngez mwnq goqdaeuj lo. Couh youq mwh daeg de goq daeuj hih mwhde, duz fangz doz mwnq baex yawjraen Yehsuh he, couh doq hawj daeglwg mwnq majcangq fatbanghmou, couh doq laemxdengx roengzbae, couh doq gyingj bae gyingj dauq bak cix ok fwdfauz. 21 Yehsuh raen yienghneix le, couh cam daxboh laeq de naeuz: “De ngaiz yienghneix ndaej geijlwh caez lo?” Daxboh laeq de han naeuz: “Daj lij iq cix ngaiz lo. 22 Miz haujlai mbat duz fangz neix dawz de gveng haeuj feiz gveng roengz raemx bae, ijsiengj haih de rai. Hauhnaeuz mwngz guh ndaej daengz, gou gouz mwngz hojsik hojsik raeuz, bang raeuz bax!” 23 Yehsuh dingq le, doiq de naeuz: “Mwngz daxbaenh naeuz ‘Hauhnaeuz mwngz guh ndaej daengz couh bang raeuz bax!’ Gou naeuz mwngz ni hax, mwngz naeuz ndaej deng lo; gou doiq doenghheij vunz miz sinqsim hih hax, mij'z naeuz guh mbouj daengz hih nej!” 24 Daxboh daeg de dingq Yehsuh yienghneix naeuz le, couh majcangq hemq hwnjdaeuj naeuz: “Gou miz sinqsim, hoeng, gou sinqsim mbouj gaeuq gyenhdingq; cingj mwngz bang gou bax!” 25 Couh youq mwhneix, Yehsuh yawjraen gyoengq vunzlai cungj humx goqdaeuj, yiengq de couh ndaq duz fangz mwnq naeuz: “Dihduz lwg fangz nukngoemx mwngz, gou mingqlingq mwngz daj gwnz ndang de ok ma, mboujcwnj mwngz caiq ndaenj haeuj gwnz ndang de bae.” 26 Yehsuh baex ndaq naeuz yienghneix he le, duz fangz mwnq couh majcangq hemq goggog hwnjdaeuj, hemq hwj daeg lwgngez mwnq caiq fatbanghmou donq he, youqgaenj raixcaix, ninz youq lajdoem caenh lujnaeuz rai hoh nwih le cij ok ma, guh hwj gyoengq vunz mwnq miz haujlai vunz cungj naeuz: “De gaenq rai lo!” 27 Couh youq mwhneix, Yehsuh couh rag dawz gij fawz daeg de raeuz de hwnq; daeg de caemh ndwn hwnjdaeuj lo. 28 Gajlaeng Yehsuh couh haeuj ranz maj lo. Daengj de haeuj maj le, gyoengq lwgsae de couh caegcaeg cam de naeuz: “Lauxsae, gyoengqraeuz vihmaz boenq duz fangz mwnq boenq mbouj okma hax?” 29 Yehsuh dingq le, han gyoengqde naeuz: “Ij boenq doengh cungj fangz neix nex, mbouj gouz Cangqdiq dwg mbouj ndaej hih.” 30-31 Gajlaeng, Yehsuh caeuq gyoengq lwgsae de daj mwnq ok ma, byaij goq Gyahliqliq Saengj bae. Aenvih Yehsuh ij son gyoengq lwgsae de, sojhij de mbouj siengj hawj vunz rox de bae mwnqlaw. De doiq gij lwgsae de naeuz: “Vunz dih Daiqbiuj ij ngaiz buenqduz cuzmaiq, ij ngaiz vunz haihrai, daengz daixsam ngoenz couh gaengjdingq ndaej dauqlix.” 32 Hoeng, gyoengq lwgsae de gaenhbaenj mbouj rox de gangj hih gawq vah neix dwg gijmaz iqswh, gyoengqde caemh mbouj gamj cam de. 33 Gajlaeng gyoengqde bae daengz Gyahbwznungz Singz. Yehsuh ngamq baex haeuj ranz bae he, de couh cam gyoengq lwgsae de naeuz: “Faenhsou youq dangjroen doxeuq gijmaz lah?” 34 Hoeng, gyoengqde cungj mij saek boux ok sing, aenvih gyoengqde youq dangjroen doxeuq byawz ceiq rem. 35 Gajlaeng, Yehsuh couh naengh roengzma, couh heuh cibngeih boux lwgsae de goq daeuj, doiq gyoengqde naeuz: “Hauhnaeuz byawz ijsiengj guh boux daeuzdaeuz he, couh bietdingh ij guh boux mbouj gyauhngauq mbouj yawj bonjfaenh dwg boux ak raixcaix rem raixcaix he, caemh bietdingh ij guh boux vunzhoiq he swqhaeuh baenx gyoengq vunz cij ndaej.” 36 De yienghneix naeuz le, couh daiq laeq lwgngez he goqdaeuj, hawj laeq de ndwn youq gyoengq lwgsae de mwnq hwj. Gajlaeng de caiq umj laeq de hwnjdaeuj doiq gyoengqde naeuz: 37 “Famz miz vunz aeunaj gou, yawjhwnj gou hwj daih lwgngez hih, caemhdangq daih gou lo; famz daih gou hih, mbouj danhcij naeuz dwg daih gou, dauq dwg daih baij gou daeuj hih Cangqdiq lah.” 38 Gajlaeng Yozhanq naeuz: “Lauxsae, gyoengqraeuz raen miz boux he hij gij mingzhiq mwngz ma boenq fangz, hoeng ngaiz gyoengqraeuz haed mbouj hawj boux de, aenvih boux de mij dwg luj gyoengqraeuz gaen mwngz haem.” 39 Yehsuh dingq le, couh doiq Yozhanq naeuz: “Gaejyungh haed de, aenvih mij'z vunz hij gij mingzhiq gou ma guh geizmiuj hih saeh le caiq fanjgoqma bangjlaih gou law. 40 Fanjcingq mbouj fanjdeiq raeuz hih couh dwg yungjhuq raeuz lo. 41 Gou saedsaed saehsaeh naeuz sou ni, mboujguenj byawz, famz dwg vih faenhsou dwg gvi haeuj Gihduz hwj hawj faenhsou cenj raemx he gw hih, de caemh gaengjdingq ndaej gaepfaenh cangjliq hih.” 42 Yehsuh caiq naeuz: “Hoeng, mboujguenj byawz yungx hawj boux mbouj suenq guxmaz he sinq gou he famh coih hih, boux vunz mwnq hozmboujyienz sien gag dawz famuh rin venj hwnj gwnz hoz bonjfaenh bae gveng roengz haij bae; yienghmwnq ndei goq de yungx hawj vunz famh coih bae. 43 Hauhnaeuz mwngz miz cik fawz he hawj mwngz famh coih hih, mwngz couh ij dawz cik de raemj bae; 44 yienghneix gannaeuz mwngz noix bae cik fawz he lah, hoeng, dauq ndaej seiqseiz lix, yienghmwnq giengz goq miz song cik fawz hoeng dauq ngaiz gveng roengz mwnq Cangqdiq fad fangz ndaw feiz mbouj rox maet he bae. 45 Caiq hauhnaeuz mwngz miz cik ha he hawj mwngz famh coih byaij loek hih, mwngz couh ij dawz cik de raemj bae; 46 yienghneix mwngz gannaeuz noix bae cik ha he lah, hoeng, dauq ndaej seiqseiz lix, yienghmwnq giengz goq miz song cik ha hoeng dauq ngaiz gveng roengz mwnq Cangqdiq fad fangz he bae. 47 Youhcaiq hauhnaeuz mwngz miz cehra he hawj mwngz famh coih hih, yiengq mwngz couh ij dawz ceh de vet bae; yienghneix gannaeuz mwngz noix bae cehra he lah, hoeng, dauq ndaej haeuj guek Cangqdiq bae, yienghmwnq giengz goq mwngz miz song cehra hoeng dauq ngaiz gveng roengz mwnq Cangqdiq fad fangz he, 48 mwnq miz duz non mbouj rox rai he, feiz mbouj rox maet he bae. 49 Youq mwnq gij vunz bouxboux cungj ngaiz feiz dangq gyu iep.” 50 De vanzlij caiq naeuz: “Gyu baenjlaiz miz yungh hih, hoeng, hauhnaeuz gij de bienq lo, mij veiqdauq lo, yiengq ij baenzlaw caiq ndaej hawj de ndaengq haem nej? Faenhsou ij wnggai luj gyu yienghmwnq ndaej hawj vunz miz yungh, diemz cix ndaej, fuengz naeuh cix ndaej he, yienghmwnq hawj vunz doxhuz.”
1 Gajlaeng, Yehsuh caiq daj mwnq ok ma, bae Youzdaiq Saengj, bae daengz baih dah Yozdanq. Youq mwnq youhcaiq miz baenx haujlai vunz daeuj cimh de gvaengz de, de caemh doiq gyoengqde gangj gvanhhih guek Cangqdiq dih saeh. 2 Yiengq youq mwnq miz gij vunz gaep haeuj Fazliqcaiq baij he; gyoengqde siengj haih de, couh daeuj sawq de, cam de naeuz: “Guh goengjgvan hih ndaej mbouj ndaej caeuq mehyah bonjfaenh lizvwnh, mbouj aeu mehyah bonjfaenh nej?” 3 Yehsuh dingq le, han naeuz: “Mohsih dih fazliz dwg baenzlaw naeuz hih nej?” 4 Gyoengqde han naeuz: “Mohsih dih fazliz dwg dingh naeuz vunzsai sij mbaw saw lizvwnh he couh ndaej hawj mehyah de deuz lo.” 5 Yehsuh dingq le, caiq doiq gyoengqde naeuz: “Mohsih dingh diuz fazliz neix dwg aenvih aen sim faenhsou daiq gyeng lai, de cij dingh hawj faenhsou he. 6 Hoeng, daj gaihcij cauh mbwn cauh deih mwhde, Cangqdiq cauh vunz dwg cauh vunzsai caeuq vunzbaz hah. 7 Sojhij, vunzsai ij biek boh biek meh, ij caeuq yah doxcaeuq youq, luj baenz aen ndang he, mbouj faen mwngz gou. 8 Yiengq, giqyienz dwg yienghneix vwz, gvanjbaz couh mbouj caiq dwg song boux vunz haem lo, dauq dwg luj boux dog lah. 9 Sojhij, Cangqdiq boiq hawj hih couh mbouj ndaej faensanq bae.” 10 Yehsuh yienghneix doiq gyoengqde gangj sat le, couh haeuj ranz bae lo. Yiengq, doenghheij lwgsae de couh cam de gij saeh neix. 11 Gajlaeng, Yehsuh couh doiq doenghheij lwgsae de naeuz: “Famz caeuq mehyah bonjfaenh lizvwnh le caiq caeuq daixlingh boux gyezvwnh hih, couh dwg guhyoux, dwg doiq mbouj hwnj mehyah bonjfaenh lo. 12 Yiengq caemh doxdoengz, famz caeuq goengjgvan bonjfaenh lizvwnh le caiq caeuq daixlingh boux gyezvwnh hih, yiengq caemh dwg guhyoux lo.” 13 Gajlaeng, miz baez he, miz vunz daiq lwg daeuj cimh Yehsuh, siengj hawj Yehsuh laxlax gij lwg gyoengqde. Yiengq doenghheij lwgsae de raen le, couh naeuz gyoengqde. 14 Yehsuh raen doenghheij lwgsae de yienghneix le, couh aeuqheiq hwj doiq gyoengqde naeuz: “Mbouj ndaej laengz gyoengqde; hawj lwgngez goq daeuj gou dineix bax, aenvih aen guek Cangqdiq dwg gvi haeuj luj doenghheij lwgngez neix hih. 15 Gou saedsaeh naeuz sou ni, mboujguenj guxmaz vunz, hauhnaeuz mbouj ndaej luj lwgngez yienghmwnq sinqsim, couh mbouj ndaej haeuj guek Cangqdiq bae.” 16 De yienghneix naeuz le, couh umjumj laxlax gyoengq lwgngez, couh oemj fawz hoh fuk hawj gyoengqde. 17 Gij saeh neix goq le, caiq miz baez he, Yehsuh cingq ij ganjroen, yiengq miz boux he riq goqdaeuj gvih youq dangqnaj de, cam de naeuz: “Lauxsae, mwngz dwg vunz ndei; gou cam mwngz: Gou ij baenzlawz guh cij ndaej seiqseiz lix nej?” 18 Yehsuh raen yienghneix le, couh cam boux de naeuz: “Mwngz guxmaz naeuz gou dwg vunz ndei hax? Caenhgag Cangqdiq cij ndei; cawzok Cangqdiq, caiq mbouj miz vunz ndei haem lo. 19 “Gvanhhih seiqseiz lix gij saeh neix, mwngz caemh rox Cangqdiq dih gveihdingq, couh dwg: Mbouj ndaej gaj vunz, mbouj ndaej guhyoux, mbouj ndaej guxcaeg, mbouj ndaej guh gyaj cingqgiq, mbouj ndaej coemx vunz, ij yawjdij bohmeh.” 20 Gajlaeng boux de han naeuz: “Doenghgij gveihdingq neix gou daj lij iq cix guh daengz lo.” 21 Yehsuh dingq de yienghneix naeuz le, couh cimyawj de, roxnginh ndaw sim bonjfaenh haenj de, couh doiq de naeuz: “Hoeng mwngz noix yiengh he mij guh daengz, couh dwg noix mwngz mij dawz mwngz sojmiz hih gyadangq hai bae le, dawz sojmiz hih ngaenz faen hawj vunz gungz. Hauhnaeuz mwngz yienghneix guh, mwngz couh ndaej youq gwnzmbwn rom ndaej gij dijbauj he lo. Gajlaeng mwngz caemh ij daeuj gaen gou cij ndaej.” 22 Boux de baex dingq gij vah neix he le, couh najhawq cixcaemh duix liux hwj byaij deuz lo, aenvih boux de cienfanh fouqmiz he. 23 Yehsuh raen yienghneix le, couh yawjyawj seiqhenz couh doiq doenghheij lwgsae de naeuz: “Miz cienzngaenz dih vunz hax, hoj huh, hoj haeuj aen guek Cangqdiq bae huh!” 24 Gyoengq lwgsae dingq de gangj hih doenghgij vah neix cungj raen geizheih ij rai bae. Gajlaeng Yehsuh youhcaiq naeuz: “Baengzyoux hah, siengj haeuj aen guek Cangqdiq bae hoj huh! 25 Miz cienzngaenz hih vunz ijsiengj haeuj aen guek Cangqdiq bae hoj huh, beij duz lozdoz ndonj rwzcim vanzlij hoj hwx!” 26 Gyoengq lwgsae dingq de yienghneix gangj le, engqgya raen geizheih ij rai, couh cam de naeuz: “Yiengq dauqdaej dwg byawz ndaej gouq nex?” 27 Gajlaeng Yehsuh couh cimyawj gyoengqde, han naeuz: “Vunz guh mbouj daengz hih, Cangqdiq guh ndaej daengz, aenvih mij gijmaz Cangqdiq guh mbouj daengz hih nej!” 28 Couh youq mwhneix, Bijdwz youq henz ndang de dingq daengz gij vah neix le, couh han naeuz: “Hawjm'z yawj lux, raeuz gaenq vwt raeuz sojmiz hih hwj daeuj gaen mwngz lohwng!” 29 Yehsuh dingq le, couh doiq gyoengqde naeuz: “Gou saedsaeh naeuz sou ni, famz dwg vih gou caeuq vih gij ndei siuhsiz Cangqdiq hwj vwt ranz, vwt beix, vwt nuengx, vwt boh, vwt meh, vwt lwg, vwt reih, vwt naz hih vunz, 30 youq seiq neix gaengjdingq ndaej lai baenx bak boix, couh dwg ranz hah, beixnuengx hah, bohmeh hah, lwg hah, reihnaz hah, cijmboujgoq ij ngaiz souh daengz bwkhaih, hoeng, daengz seiq laeng gaengjdingq ndaej daengz seiqseiz lix. 31 Hoeng, gou naeuz sou ni, miz haujlai baenjlaiz ndaej youq gaxgonq hih, dauqfanj ngaiz youq gajlaeng; miz haujlai baenjlaiz youq gajlaeng hih, dauqfanj ndaej youq gaxgonq.” 32 Yiengq youq mwh gyoengqde bae Yehluqsajlaengj hih mwhde, Yehsuh byaij bae gaxgonq. Gyoengq lwgsae de raen yienghneix le, cungj raen geizheih ij rai bae, gyoengq vunz gaen de he caemh roxnginh lau. De raen gyoengqde yienghneix le, couh caiq heuh cibngeih boux lwgsae de goq bae, goq henz he bae naeuz gyoengqde ni de ij ngaiz roeb daengz gijmaz saeh. De naeuz: 33 “Gyoengqraeuz seizneix ij bae Yehluqsajlaengj. Vunz dih Daiqbiuj couh ij ngaiz vunz cuzmaiq, dawz de gyau hawj goengjsae dajbwiz caeuq doenghheij fazliz cenhgyah he, ngaiz gyoengqde dingh coih, buenq hawj de rai, gajlaeng caiq ngaiz gyau hawj doenghgij vunz mbouj rox Cangqdiq he, 34 ngaiz gyoengqde dawz ma nyoujnyak gangjriu gaijmbwq, byiq myaiz hawj de, vanzlij aeu diuz bien naeng ma fad de, caiq gaj de rai. Hoeng, daengz daixsam ngoenz, de gaengjdingq ndaej dauqlix.” 35 Yehsuh yienghneix naeuz le, song daeglwg Sihbiqdaiq, Yajgoz caeuq Yozhanq, daeuj cam de naeuz: “Lauxsae, raeuz gouz mwngz yiengh he; muengh mwngz dapwngq raeuz.” 36 Yehsuh dingq le, cam naeuz: “Faenhsou ij gouz hawj gou guh gijmaz?” 37 Gyoengqde han naeuz: “Daengj baezneix mwngz naengh youq aen lungzeij rongh sagsag he hih mwhde, gouz mwngz hawj raeuz naengh youq henz ndang mwngz, boux he naengh youq baixgvaz, boux he naengh youq baihswix.” 38 Yehsuh dingq le, couh naeuz: “Faenhsou mbouj rox faenhsou gouz hih dwg gijmaz. Gou soj souh hih nanh, faenhsou ndaej souh lwi? Gou soj sijlij hih faenhsou ndaej lwi?” 39 Gyoengqde dingq le, couh doq han naeuz: “Raeuz souh ndaej.” Gajlaeng, Yehsuh naeuz: “Gou soj souh hih nanh, faenhsou gaengjdingq ij ngaiz souh; gou soj souh hih sijlij, faenhsou caemh gaengjdingq ij ngaiz souh. 40 Hoeng, cijmboujgoq naengh youq baihswix baixgvaz gou hih, mbouj dwg gou naeuz hawj couh ndaej hawj hih nej, dauq dwg Cangqdiq cwnjbiq hawj byawz couh hawj byawz lah.” 41 Yiengq lij cib boux lwgsae mwnq dingqri gij saeh neix le, couh aeuqheiq Yajgoz caeuq Yozhanq. 42 Couh vih yienghneix, Yehsuh couh heuh gyoengqde goq daeuj doxcomz, doiq gyoengqde naeuz: “Faenhsou caemh rox, doenghheij mbouj rox Cangqdiq hih vunz ndaw de, doenghheij nginhnaeuz dwg daeuzdaeuz he, gyoengqde cungj dwg guenjciq gij vunz de, cijveih gij vunz de. 43 Hoeng, faenhsou mbouj wnggai hah, dauq dwg faenhsou ndaw neix byawz ijsiengj dang ak hih, byawz couh ij guh bouxhoiq faenhsou; 44 byawz siengj dang daeuzdaeuz hih, byawz couh ij guh boux swqhaeuh vunz he, 45 aenvih Vunz dih Daiqbiuj daeuj mbouj dwg daeuj hawj vunz swqhaeuh de hih, dauq dwg de daeuj swqhaeuh vunz hih lah. Mbouj danhcij naeuz dwg yienghneix, vanzlij dwg vih ij cueg gij coih vunz hwj vwt diuz mingh bonjfaenh de hih.” 46 Gajlaeng Yehsuh caeuq gyoengq lwgsae de bae daengz Yehliqgoh Singz. Gyoengqde caeuq baenx gyoengq vunzlai ij daj Yehliqgoh Singz ok ma hih mwhde, miz boux gaujvaq rafangz he, gij coh de heuh Bahdijmaij, dwg daeglwg Dijmaij; de naengh youq henz roen guh gaujvaq. 47 Yiengq boux de baex dingqri naeuz dwg Nazsajlwz vunz dih Yehsuh byaij goqbae he le, couh hemq naeuz: “Daqveiq dih lwglan Yehsuh hax, hojsik hojsik gou bax!” 48 De yienghneix hemq le, couh miz haujlai vunz naeuz de, mbouj hawj de hemq, hoeng, vunz yied naeuz de, de yied engqgya hemq, hemq engqgya gog: “Daqveiq dih lwglan hax, hojsik hojsik gou bax!” 49 Yehsuh dingqri le, couh dingz roengzma, naeuz: “Hawj de goq daeuj.” Gajlaeng gyoengq vunz couh heuh boux rafangz mwnq doiq de naeuz: “Mwngz coengqsim bax! Hwnq, de heuh mwngz nex!” 50 Boux rafangz mwnq dingq le, couh majcangq gveng diuz buh baixrog de, couh doq diuq hwnjdaeuj, couh byaij goq Yehsuh mwnq bae. 51 Boux de goq bae le, Yehsuh couh cam boux de naeuz: “Mwngz ij hawj gou bang mwngz guh gijmaz?” Boux de han naeuz: “Lauxsae, gou siengj caiq ndaej yawjraen!” 52 Gajlaeng Yehsuh naeuz: “Mwngz maj bax; gij sinqsim mwngz ndaej yw mwngz ndei lo.” Yehsuh ngamq baex yienghneix naeuz he, boux de couh doq ndaej yawjraen lo. Boux de ndaej yawjraen le, couh gaen Yehsuh bae lo.
1 Gajlaeng Yehsuh caeuq gyoengq lwgsae de bae ijvanh daengz Yehluqsajlaengj mwnq gaenh aen mbanj Bwzfazgiz caeuq aen mbanj Bwzdaqniz song aen mbanj neix dih aen bya Gamjlamj mwnq. Yehsuh couh baij song boux lwgsae de sien bae gaxgonq; 2 de doiq song boux de naeuz: “Faenhsou bae aen mbanj dangqnaj mwnq. Faenhsou haeuj mbanj bae le, couh raen miz duz lawzlwg he lamh hwj; duz de mijyaengz miz vunz gwih goq haem. Faenhsou couh gej ying ma hawj gou. 3 Hauhnaeuz miz vunz cam faenhsou vihmaz ij gej duz de nex, faenhsou couh naeuz: ‘Bouxcawj raeuz ij yungh duz de; yungh ndaej le, couh daiq duz de dauq ma dineix boiz.’” 4 Yehsuh raengq sat le, song boux de couh bae lo. Song boux de bae le, cingqgawq gwhraix, ngamqluj Yehsuh soj raengq hih yienghmwnq, raen miz duz lawz he lamh youq bakdou he. Song boux de raen le, couh bae gej duz de. 5 Cingq gej hih mwhde, ndwn youq mwnq hih vunz miz geij boux cam naeuz: “Faenhsou vihmaz ij gej duz lawz neix hah?” 6 Gyoengqde yienghneix cam le, song boux de couh ciuq Yehsuh soj raengq hih yienghmwnq ma han gyoengqde; gajlaeng gyoengqde couh mij naeuz gijmaz lo, ajcaih song boux de ying bae lo. 7 Couh yienghneix, song boux de couh ying duz lawz ma hawj Yehsuh, caemh dawz diuz buh bonjfaenh gyoengqde goemq hwnj gwnz gumq duz lawz bae. Yehsuh couh gwih hwnjbae lo. 8 Mwh de ij okdin bae hih mwhde, caemh miz haujlai vunz aeu buh ma demh roen hawj de, caemh vanzlij miz hih vunz aeu rongfaex ma demh roen hawj de. 9 Gyoengq vunz gaen de gvaengz de bae, angq hwj nauhyied foenxfoenx hemq haenh naeuz: “Vanqseiq vanqseiq! Cangqdiq baij daeuj hih caen miz fuk; gyoengqraeuz wnggai haenh! 10 Couh ij ndaej dauq miz luj cojgoeng raeuz Daqveiq dih vuengz lux! Vanqseiq vanqseiq vanqvanqseiq hux!” 11 Couh yienghneix, Yehsuh bae daengz Yehluqsajlaengj, bae daengz gunghdenq Cangqdiq, bae dauqcawq yawjyawj. Hoeng mwhde mbwn gaenq laep lo, yiengq de couh caeuq cibngeih boux lwgsae de ok singz bae, bae daengz aen mbanj Bwzdaqniz. 12 Yiengq daengz ngoenz daixngeih, de couh caeuq gyoengqde daj aen mbanj Bwzdaqniz ok ma dauq haeuj singz bae. Couh youq mwh gyoengqde ok ma hih mwhde, de iek lo. 13 Gajlaeng de daj lizgyae yawjraen miz go uzvahgoj he, gij mbaw de mwn cupcup. De raen yienghneix le, couh byaij goqbae, siengj yawjyawj go de miz mbouj miz mak. Yiengq de bae daengz le, baenzlaw cimh cungj cimh mbouj raen miz saek aen mak, caenhgag miz mbaw lah, aenvih mwhde mbouj dwg daeng mwh dawz mak he. 14 Yehsuh raen yienghneix le, couh doiq go de naeuz: “Daj seizneix hwnj, yungjyenj mij'z vunz gw gij mak mwngz.” Mwh de naeuz gawq neix hih mwhde, gyoengq lwgsae de caemh dingqri gawq neix. 15 Couh Yienghneix, Yehsuh gyoengqde couh dauq haeuj bae daengz Yehluqsajlaengj Singz. De bae daengz le, couh haeuj gunghdenq Cangqdiq bae. De baex haeuj bae daengz he, couh majcangq boenq doenghgij vunz youq mwnq hai cawx doxgaiq he okma, caemh nyoengx aen daiz boux youq mwnq vuenh ngaenz he caeuq aen daengq boux hai roegguqgap he laemx. 16 De caiq mboujcwnj vunz dawz gij hai cawx dih doxgaiq byaij goq gunghdenq Cangqdiq, 17 caemh doiq gyoengq vunz mwnq naeuz: “Singqgingh ndaw de sij naeuz: ‘Gunghdenq Cangqdiq ij dwg sojmiz hih minzcuz gouzhaenh Cangqdiq dih deixfueng.’ Hoeng, faenhsou engq dawz de ma bienqbaenz rongzcaeg he lah.” 18 Yiengq youq mwnq hih doengh boux goengjsae dajbwiz he caeuq doengh boux fazliz cenhgyah he dingq daengz de gangj doenghgij vah neix le, couh siengj banqfaz ij gaj de, hoeng, caiq lau de, aenvih de gangj hih vah cungj hawj vunz raen roxnginh geizmiuj ij rai. 19 Gajlaeng, daengz haemh le, de caeuq gyoengq lwgsae de caemh luj bienqnaengz yienghmwnq ok singz bae lo. 20 Yiengq daengz haet daixngeih daihcaeux, de caeuq gyoengq lwgsae de haeuj singz bae hih mwhde, caiq byaij goq diuz roen gaxgonq miz go uzvahgoj mwnq bae. Gyoengqde yawjraen go uzvahgoj mwnq rai lo. 21 Bijdwz raen yienghneix le, couh ngeix daengz Yehsuh doiq go de gangj goq dih vah, couh doiq de naeuz: “Lauxsae, hawjm'z yawj hux, ngaiz mwngz naeuz hih go uzvahgoj mwnq gaenq ngaiz rai lo.” 22 Yehsuh dingq le, han naeuz: “Faenhsou wnggai doiq Cangqdiq miz sinqsim! 23 Gou saedsaeh naeuz sou ni, mboujguenj byawz, cijaeu de gamj naeuz gaengjdingq ndaej, mij maz ngeiz, cungjsuenq naeuz de doiq aen bya neix naeuz: ‘Daj dineix nod deuz, roengz haij bae!’ yienghneix naeuz, aen de cungj caemh dingq hih. 24 Sojhij, gou naeuz sou ni, famz dwg faenhsou gouz Cangqdiq hih, mboujguenj gouz gijmaz, cijaeu ndaw sim faenhsou sinq naeuz ndaej, yiengq couh gaengjdingq ndaej. 25 Cijmboujgoq mwh faenhsou gouz Cangqdiq hih mwhde, ngeix daengz miz vunz daekcoih faenhsou hih couh wnggai nyiuz boux de, yienghmwnq Bohmbwn caemh nyiuz faenhsou lo. 26 Hoeng, hauhnaeuz faenhsou mbouj nyiuz vunz, Bohmbwn faenhsou caemh mbouj nyiuz faenhsou lo.” 27 Couh yienghneix, Yehsuh caeuq gyoengq lwgsae de caiq bae daengz Yehluqsajlaengj, bae daengz gunghdenq Cangqdiq. Yiengq, de cingq youq gunghdenq Cangqdiq byaij hih mwhde, miz doengh goengjsae dajbwiz caeuq doengh boux fazliz cenhgyah he caeuq doengh boux vunz gangj vah couh baenz he daeuj cimh de, 28 saemjcam de naeuz: “Mwngz miz maz gienzliz guh gij saeh neix? Byawz hawj gij gienz neix hawj mwngz?” 29 Yehsuh dingq le, han gyoengqde naeuz: “Gou caemh ij cam faenhsou gawq he; hauhnaeuz faenhsou naeuz gou ni nex, gou caemh naeuz faenhsou ni gou miz maz gienzliz guh gij saeh neix lo. 30 Couh dwg naeuz, Yozhanq dih sijlij dwg byawz dih cawjeiq? Dwg Cangqdiq haj cixnaeuz dwg vunz nej? Naeuz gou ni.” 31 Gyoengqde dingq le, couh gangj yebyeb hwj doxcimciek naeuz: “Gyoengqraeuz ij baenzlaw naeuz nej? Hauhnaeuz raeuz naeuz: ‘Dwg Cangqdiq lah,’ yiengq de gaengjdingq naeuz: ‘Yiengq faenhsou vihmaz mbouj sinq Yozhanq nej?’ 32 Hoeng, hauhnaeuz raeuz naeuz: ‘Dwg vunz lah,’ yiengq gyoengq vunzlai gaengjdingq aeuqheiq, aenvih gyoengqde sinq Yozhanq dwg boux cenz gij vah Cangqdiq he.” 33 Gyoengqde yienghneix cimciek le, mij'z banqfaz, couh naeuz: “Gyoengqraeuz mbouj rox.” Yehsuh raen gyoengqde yienghneix naeuz le, couh doiq gyoengqde naeuz: “Yiengq, gou caemh mbouj naeuz sou ni gou miz maz gienzliz ndaej guh gij saeh neix nej.”
1 Yehsuh yienghneix han gyoengqde le, couh yungh gij beijgangj he ma doiq gyoengqde naeuz: “Miz boux he, de ndaem miz suen buzdauz he. Aen suen de caemh miz faex led goqbae hwj, caemh youq ndaw de vat guh aen ciz caq guh laeuj he, caiq hwnq aen gyenhciq dap he, couh co hawj vunz, gajlaeng couh bae vaihdieg youq lo. 2 “Yiengq daeng mwh ndaej sou mak he le, de couh baij bouxhoiq he ma laeng doengh boux co suen mwnq sou aeu faenh de wnggai ndaej he. 3 Hoeng, bouxhoiq de ngaiz doengh boux co suen mwnq doh donq he, doh hawj de bi fawz hoengq maj. 4 Maj le, bouxcawj suen mwnq caiq baij daixlingh boux ma. Daixlingh boux caemh ngaiz gyoengqde doh, doh hwj ndaek raeuj boux de sieng bae. Doh le, caiq dawz boux de ma nyoujnyak gaijmbwq, caemhcaiq hawj de bi fawz hoengq maj. 5 Gajlaeng, bouxcawj suen mwnq caiq baij boux he ma, hoeng, boux neix engqgya ngaiz gyoengqde gajgak rai. Gajlaeng, bouxcawj suen mwnq vanzlij baij haujlai vunzhoiq ma, hoeng, ciuqyiengh ngaiz doh hih doh, gaj hih gaj. 6 Gajlaeng bouxcawj suen mwnq caenh lij boux dog ndaej baij ma haem lo, couh dwg daeglwg de; daeglwg neix caemh dwg de gig aiq he. De mij banqfaz le, couh baij daeg de ma, ndaw sim de caemh gag naemj: ‘Gou baij daeglwg gou maj, saekseiz gyoengqde lij soenhcungq de haem.’ 7 “Hoeng, liuh mbouj daengz gyoengq co suen mwnq baex raen daeglwg de he, couh doxcimciek hwj naeuz: ‘Neq, boux ciep aeu aen suen neix hih daeuj lo. Daengj raeuz gajgak de bae; gajgak de bae le, baezneix aen suen neix mijyaengz dwg ndaej gvi hawj raeuz haz!’ 8 Gyoengqde yienghneix cimciek le, couh dawz daeg de gajgak rai, caiq dawz gij seihaiz daeg de gveng ok rog suen ma.” 9 Yehsuh gangj daengz dineix le, couh cam gyoengqde naeuz: “Faenhsou naemjnaemj yawj, bouxcawj suen mwnq ij baenzlawz doiq doengh boux co suen mwnq nej? De dwg mbouj dwg dawz doengh boux co suen mwnq gajgak bae nej? Gajgak bae le, caiq co hawj daixlingh boux nej? Gou saedsaeh naeuz sou ni, gaengjdingq dwg yienghneix. 10 Nanzdauh faenhsou mbouj rox, faenhsou mbouj doeg goq ndaw Singqgingh hih duenh neix mah? Canghranz vwt hih hengxdiuz, gajlaeng engq bienqbaenz aen ranz mbouj ndaej noix dih diuz gangqloz he. 11 Gij neix dwg Cangqdiq dih cawjeiq; youq ndaw lwgra raeuz dwg baenxlai geizmiuj hax.” 12 Yehsuh yienghneix doiq gyoengqde gangj le, gyoengqde dingq ndaej ok Yehsuh dih gij beijgangj neix dwg ceij gyoengqde he, couh aeuqheiq hwj siengj majcangq gaemh dawz de, hoeng gyoengqde lau gij vunzlai, mij banqfaz, gajlaeng cij ndei swhswh deuz lo. 13 Hoeng, gyoengqde mbouj fug, gajlaeng couh baij geij boux gaep haeuj Fazliqcaiq baij he caeuq geij boux gaep haeuj Hihliz dangjbaij he bae daengz Yehsuh mwnq, siengj demq yawj de gangj hih vah, siengj ra congxmbongq cimh cingqgiq ma gaemh dawz de. 14 Gyoengqde bae daengz le, couh cam Yehsuh naeuz: “Lauxsae, gyoengqraeuz rox mwngz dwg lauxsaed hih vunz; mboujguenj guxmaz vunz mwngz cungj mbouj yawj vunz guh saeh, cungj dwg yawj doxdoengz, cungj dwg saedsaed saehsaeh cenzgangj Cangqdiq hawj vunz baenzlawz goq saedceij hih. Yiengq raeuz cam mwngz, raeuz nab ceiq hawj goengjvuengz Lozmaj deng mbouj deng nej? 15 Wng mbouj wnggai nab hawj de nej?” Gyoengqde yienghneix cam le, Yehsuh yawj ndaej ok gyoengqde dih yimhmaeuz, couh doiq gyoengqde naeuz: “Faenhsou vihmaz ij sawq gou nej? Dawz maenz ngaenz he daeuj hawj gou yawj.” 16 Gajlaeng gyoengqde couh dawz maenz ngaenz he daeuj hawj de. De couh doiq gyoengqde naeuz: “Gij duzsiengq neix caeuq gij coh de dwg byawz hih nej?” Gyoengqde dingq le, han naeuz: “Dwg goengjvuengz Lozmaj, Gaijsaj.” 17 Yehsuh caiq doiq gyoengqde naeuz: “Yiengq goengjvuengz Lozmaj dih doxgaiq wnggai gvi hawj goengjvuengz Lozmaj; Cangqdiq dih doxgaiq caemh wnggai gvi hawj Cangqdiq.” Gyoengqde dingq Yehsuh yienghneix gangj le, cungj raen geizheih ij rai. 18 Yiengq caemh miz doenghgij vunz gaep haeuj Sajduhgaih baij he, siengzseiz naeuz mbouj miz dauqlix dih doenghgij vunz mwnq, daeuj cam Yehsuh naeuz: 19 “Lauxsae, Mohsih dih fazliz gveihdingq naeuz: ‘Hauhnaeuz miz vunz aeu yah ma, mijyaengz miz lwg haem cix ngaiz rai lo, lij mehyah de, yiengq daeg nuengxau de couh ij aeu meh beixsauj de ma guh yah, bang daeggo de miz lwg, hawj de miz daih gajlaeng.’ 20 Yiengq doenghbaez miz ranz he, miz caet goengjlungz nuengxau. Daeg daixdaeuz aeu yah ma, mijyaengz miz lwg haem hoeng cix ngaiz rai lo. 21 Daengz daeg daixngeih, caemh aeu meh beixsauj de ma guh yah, caemh mijyaengz miz lwg haem cixcaemh ngaiz rai lo. Yiengq daengz daeg daixsam caemh dwg yienghneix. 22 Caet daeg cungj caemh aeu goq meh neix, cungj caemh mij miz lwg couh ngaiz rai lo. Daengz gajlaeng, meh de caemh rai lo. 23 Yiengq daengz mwh dauqlix he, meh neix ij suenq dwg mehyah bouxlawz nej? Aenvih caet daeg cungj caemh aeu meh de goq.” 24 Yehsuh dingq le, han gyoengqde naeuz: “Faenhsou loek lo, aenvih faenhsou doiq Singqgingh gaenhbaenj mbouj rox cingsuj, caemh mbouj rox gij bonjsaeh Cangqdiq. 25 Aenvih vunzrai ndaej dauqlix le, dwg luj bouxcai Cangqdiq yienghmwnq mbouj aeu mbouj haq hih. 26 “Gangj daengz vunz rai le ndaej dauqlix, faenhsou mij doeg goq Mohsih sij youq ndaw bien ‘Caz Oen Feiz Dawz’ bien neix mah? Ndaw de sij miz Cangqdiq naeuz: Gou dwg cojgoeng faenhsou Yaqbwzlahhanj dih Cangqdiq, Hijsaj dih Cangqdiq, Yajgoz dih Cangqdiq. 27 Gij iqswh neix dwg naeuz, Cangqdiq dwg vunzlix dih Cangqdiq, mbouj dwg gij seihaiz vunz dih Cangqdiq. Faenhsou loek liux lo, haengzbaengzlaengz cungj loek liux lo.” 28 Yiengq youq mwnq miz boux fazliz cenhgyah he dingq daengz Yehsuh caeuq gyoengqde yienghneix lwnh le, roxnginh Yehsuh han gyoengqde han ndaej baenxlai ndei le, couh cam naeuz: “Cangqdiq dunghgoq Mohsih soj dingh hih cib diuz fazliz ndaw de diuzlawz ceiq cungqyauq nej?” 29 Yehsuh dingq le, han naeuz: “Ceiq cungqyauq hih dwg: Hijswzlez vunz hax, faenhsou dingq bax! Bouxcawj raeuz Cangqdiq caenhgag de cij dwg bouxcawj. 30 Mwngz ij caensim caen'eiq ndiep gyaez bouxcawj mwngz Cangqdiq. Diuz neix ceiq cungqyauq. 31 Gajlaeng daengz: Mwngz ij aiq gekleiz luj aiq bonjfaenh ityiengh. Song diuz neix, caiq mij saek diuz ndaej beij song diuz neix cungqyauq haem lo.” 32 Boux fazliz cenhgyah mwnq dingq Yehsuh yienghneix naeuz le, couh naeuz: “Lauxsae, mwngz naeuz ndaej deng raixcaix. Cangqdiq cijngamq miz boux dog; cawz de ok caiq mij saek boux haem lo. 33 Vunz caemh ij caensim caen'eiq ndiep gyaez de, caemh ij aiq vunz luj aiq bonjfaenh ityiengh. Gij neix beij doenghheij youq gwnz luz coemh hwj dajbwiz caeuq gak cungj dajbwiz hawj de hih lij giengz ndaej lai.” 34 Yehsuh raen de naeuz ndaej deng raixcaix le, couh doiq de naeuz: “Mwngz couh ijvanh ndaej gaep haeuj guek Cangqdiq lo.” Couh yienghneix, daj mbat mwnq hwnj, caiq mij'z vunz gamj cam Yehsuh gijmaz haem lo. 35 Gajlaeng miz baez he, Yehsuh youq ndaw gunghdenq Cangqdiq gaijyiz gvanhhih guek Cangqdiq hih saeh hih mwhde, de doiq gyoengq vunz naeuz: “Doenghheij fazliz cenhgyah he naeuz Gihduz dwg Daqveiq dih lwglan, 36 hoeng, Daqveiq bonjfaenh de vanzlij gag ciuq Hoenzsaenz Cangqdiq raengq hih yienghmwnq naeuz goq naeuz: Cangqdiq doiq bouxcawj gou naeuz: ‘Naengh youq baixgvaz gou, daengj gou dawz gij dizyinz mwngz coengq youq laj din mwngz.’ 37 Yiengq, giqyienz Daqveiq bonjfaenh de cungj gag heuh de ‘bouxcawj’ lo vwz, ciuq luj yienghneix ma gangj, de couh mbouj danhcij naeuz dwg lwglan Daqveiq, cixcaemh dwg bouxcawj Daqveiq lo.” Yehsuh yienghneix doiq gyoengq vunz gangj, gyoengq vunz dingq de gangj hwj maezgae bae. 38 Yehsuh yienghneix gangj naeuz sat le, vanzlij caiq doiq gyoengqde naeuz: “Faenhsou ij fuengz doenghheij fazliz cenhgyah he. Gyoengqde cungj haenj daenj buhbauz raez hwj byaij yoekyoek goq gai bae, haenj hawj vunzlai dongx gyoengqde, dongx gyoengqde ndei, 39 caemh haenj naengh ndaw veiqdangz dih mwnq daixdaeuz mwnq ndei he, haeuj daiz gw laeuj caemh haenj naengh mwnq ndei he. 40 Gyoengqde hangzciemq gw gij gyadangq mehmaiq; gouz Cangqdiq, caeuq Cangqdiq gangj vah lai hux lai, cungj dwg guh hawj vunz yawj he. Doengh cungj vunz neix, ij ngaiz fad beij vunz naek lai.” 41 Yehsuh gangj daengz dineix le, couh byaij goq doiqmienh aen sieng ndaw gunghdenq Cangqdiq bienqnaengz vunz gien ngaenz he bae naengh, siengj yawjyawj gij vunz gien ngaenz roengz ndaw sieng mwnq bae. Yiengq de yawjraen miz haujlai vunz fouq gien haujlai ngaenz roengzbae. 42 Gajlaeng de caemh yawjraen meh vunzmaiq vunz gungz he coengq song maenz cienzdoengz roengzbae; song maenz cienzdoengz mwnq mbouj ndaej dij daengz faen ngaenz he. 43 De yawjraen yienghneix le, couh heuh gyoengq lwgsae de goq daeuj, doiq gyoengqde naeuz: “Gou saedsaeh naeuz sou ni, mehmaiq vunz gungz mwnq coengq hih ngaenz beij sojmiz hih vunz coengq hih ngaenz cungj coengq ndaej lai, 44 aenvih gyoengq vunz coengq hih ngaenz doiq gyoengqde ma gangj mbouj suenq guxmaz ngaenz, hoeng, meh vunzmaiq mwnq nej, meh de soj coengq hih ngaenz dwg de sojmiz ij ciengx mingh hih ngaenz he.”
1 Yehsuh doiq gyoengq lwgsae de yienghneix gangj sat le, couh daj gunghdenq Cangqdiq ok ma. Ok ma hih mwhde, miz boux lwgsae he doiq de naeuz: “Vax! Lauxsae, hawjm'z yawj hux, gij rin hih baenxlai hung cix hwnq hwj baenxlai gyaeu!” 2 Yehsuh dingq le, couh doiq de naeuz: “Mwngz haenh doenghgij neix mah? Gou naeuz mwngz ni, daengz baezneix hih mwh he, dineix cungj ij ngaiz bingzbwd liux bae.” 3 Gajlaeng, Yehsuh bae daengz aen bya Gamjlamj, youq gwnz bya Gamjlamj naengh hwj yiengq gunghdenq Cangqdiq bae. Yiengq, Bijdwz, Yajgoz, Yozhanq caeuq Anhdwzlez couh caegcaeg cam de naeuz: 4 “Lauxsae, cingj mwngz naeuz raeuz ni, mwngz daxbaenh naeuz hih gij saeh mwnq daengz seizlaw ij fatseng hax? Gij saeh mwnq ij fatseng hih mwhde, ij miz gijmaz gingjdoengh hax?” 5 Yehsuh dingq le, han gyoengqde naeuz: “Mij'z vunz ndaej rox; caenhgag Cangqdiq cij rox. Hoeng gou naeuz sou ni, faenhsou ij siujsim, gaejyungh ngaiz vunz yaeuh, 6 aenvih baezneix ij miz haujlai vunz yungh gij coh gou ma gyajcang naeuz: ‘Gou dwg Gihduz,’ yienghneix naeuz hwj yaeuh baenx haujlai vunz. 7 Daengz mwh faenhsou raen luenh caeuq dingqri doxhoenx hih mwhde, faenhsou gaejyungh lau, aenvih doenghgij saeh neix gaengjdingq ij sien fatseng, hoeng, gij neix mbouj dwg naeuz dwg ciqgyaiq dih ngoenz gatsat law. 8 Daengz mwhde, minzcuz caeuq minzcuz, guek caeuq guek doxhoenx; diqcwnq hih diqcwnq, iekvangh hih iekvangh, doenghgij neix cungj dwg ij daengz souh nanh dih gingjdoengh lo, couh luj vunzbaz ij seng lwg yienghmwnq baenx raq baenx raq in'in hojyouq hojyouq yienghmwnq. 9 “Faenhsou caemh ij siujsim; daengz mwhde, faenhsou ij ngaiz vunz haih: ngaiz vunz gaemh dawz gyau hawj fazdingz, caemh ngaiz youq veiqdangz ngaiz vunz faexbien fad, caemhcaiq ngaiz vih gou hwj ngaiz bae daengz saengjcangj caeuq goengjvuengz mwnq bae benqhuq bonjfaenh caeuq guh cingqyinz. 10 Hoeng, mijyaengz daengz ciqgyaiq dih ngoenz gatsat cihsenz, guek Cangqdiq dih ndei siuhsiz gaengjdingq ij sien cenz hawj lajmbwn sojmiz hih minzcuz. 11 Yiengq, hauhnaeuz faenhsou ngaiz gaemh bae saemjbuenq nex, faenhsou gaejyungh you ij baenzlaw han gyoengqde; daengz mwhde, Hoenzsaenz Cangqdiq swhmboujyienz nyok hawj faenhsou goujcaiz, hawj faenhsou miz vah ndaej gangj, aenvih faenhsou soj gangj hih mbouj dwg gij vah faenhsou, dauq dwg Hoenzsaenz Cangqdiq hawj faenhsou gangj lah. 12 “Daengz mwhde, faenhsou caemh ij ngaiz gij vunz ndaw ranz bonjfaenh cuzmaiq: beixnuengx cuzmaiq beixnuengx, haih beixnuengx rai, boh cuzmaiq lwg, haih lwg rai, lwg ngig bohmeh, haih bohmeh rai. 13 Faenhsou caemh vih gou hwj ngaiz vunz haenq. Hoeng, cijaeu faenhsou gyenhciz naenxsim roengzbae, couh gaengjdingq ndaej gouq.” 14 Yehsuh de caiq naeuz: “Mwh faenhsou yawjraen cauh baenz boqvaiq hih Cangqdiq dwgcaengz hih ndwn youq mwnq mbouj hab ndwn hih mwhde, youq Youzdaiq Saengj hih vunz couh ij deuz hwnj bya bae.” (Doeg duenh neix hih vunz wnggai nienx ndei gij dauhleix de.) 15 “Hauhnaeuz miz vunz youq gwnz dingjranz hih, couh gaejyungh roengz ndaw ranz ma aeu doxgaiq, 16 caiq hauhnaeuz miz vunz youq ndaw reih hih caemh gaejyungh ma ranz aeu buh. 17 Daengz mwhmwnq, meh daiqndang caeuq meh daiqnauq miz nanh lo. 18 Daengz mwhmwnq, faenhsou wnggai gouz Cangqdiq, gouz de mbouj hawj gij saeh neix youq seizdoeng fatseng, 19 aenvih daengz mwhmwnq couh ij nanh dawz lo, daj Cangqdiq cauh mbwn cauh deih doxdaeuj daengz seizneix mbouj miz goq, baezneix caemh mbouj caiq miz. 20 Yiengq, hauhnaeuz Cangqdiq mbouj gemj doengh ngoenz nanh dawz he nex, couh mij'z vunz ndaej lix roengzbae. Cijmboujgoq nex, Cangqdiq vih gij vunz de senj okdaeuj he hwj gaenq dawz doengh ngoenz mwnq gemj noix lo. 21 “Daengz mwhmwnq, hauhnaeuz miz vunz doiq faenhsou naeuz: ‘Neq, yawj veiq, Gihduz youq dineix!’ cixnaeuz naeuz: ‘Neq, yawj veiq, Gihduz youq mwnq!’ yienghneix nex, faenhsou cungj mbouj ndaej sinq, 22 aenvih daengz mwhde ij miz gyaj dih Gihduz caeuq gyaj dih boux cenz gij vah Cangqdiq he ok daeuj guh doenghgij geizmiuj gingjgyauj he hwj yaeuh vunz, daiqlienz gij vunz Cangqdiq senj okdaeuj he cungj siengj yaeuh. 23 Sojhij, faenhsou ijaeu daezfuengz, aenvih gou gaenq sien dawz sojmiz hih naeuz faenhsou ni lo.” 24-25 De youhcaiq naeuz: “Daengz mwh nanh mwnq goq le, gij rengz guenjciq haeuj gwnzmbwn hih ij luenh; gyangjngoenz ij bienq laep, aen ndwen mij caiq rongh, ndaundeiq ij doek roengzma. 26 Daengz mwhmwnq, gij vunz ij yawjraen Vunz dih Daiqbiuj rongh sagsag myig myiengzmyiengz cienfanh miz vi miz rengz he caeuq gij fwj daj gwnzmbwn roengz daeuj. 27 De ij baij bouxcai Cangqdiq bae daengz ciqgyaiq gak dieg bae hawj doenghheij vunz de senj okdaeuj he daeuj doxcomz. 28 “Faenhsou wnggai coengz go uzvahgoj hag gij dauhleix neix: mwh go de gij nyod de bienq heu did mbaw hih mwhde, faenhsou couh rox seizhah ij daengz lo. 29 Caemh doxdoengz, mwh faenhsou yawjraen doenghheij saeh neix fatseng hih mwhde, faenhsou couh rox Vunz dih Daiqbiuj couh ij daeuj daengz lo, couh youq bakdou lo.” 30 De vanzlij caiq naeuz: “Gou saedsaeh naeuz sou ni, daih neix hih vunz vanz mijyaengz gvaqseiq haem, doenghgij saeh neix couh ij fatseng lo. 31 Mbwnmbwn deihdeih cungj cawzraeg liux, hoeng, gij vah gou yungjyenj mbouj rox raeg.” 32 De youhcaiq naeuz: “Hoeng, gou naeuz sou ni, mij vunz rox ngoenzlawz, seizlawz, daiqlienz bouxcai Cangqdiq caeuq daeglwg Cangqdiq cungj mbouj rox; caenhgag Cangqdiq Bohmbwn cij rox. 33 Faenhsou ij siujsim, ij singqsag, aenvih faenhsou mbouj rox ngoenz mwnq seizlaw daeuj daengz. 34 “Couh luj boux ij ok roen gyae bae he; de ij okdin bae hih mwhde, dawz ndaw ranz hih hong gyau hawj bouxhoiq guenj, caemh raengq boux souj dou de ij siujsim. 35 Sojhij, faenhsou ijaeu singqsag, aenvih faenhsou gaenhbaenj mbouj rox bouxcawj ij seizlaw ma, mbouj rox hih doengxhaemh haj cixnaeuz singjngwnz, mbouj rox hih gaeq haen haj cixnaeuz doengxhaet ma. 36 Yiengq, hauhnaeuz de sawqmwh ma nej, gaejyungh hawj de raen faenhsou ralaep lo. 37 Gou doiq faenhsou yienghneix naeuz, caemh doiq gyoengq vunzlai yienghneix naeuz, sungj hih ma naeuz, faenhsou ijaeu singqsag!”
1 Miz baez he, couh dwg ij daengz aen ciet Bienqgoqbae he, caemh dwg aen ciet Cawz Yauqmuj he hih song ngoenz daixdaeuz de, doenghheij goengjsae dajbwiz he caeuq doenghheij fazliz cenhgyah he doxyuk hwj ij siengj banqfaz baenzlawz ndaej gaemh dawz Yehsuh byaeu Yehsuh. 2 Hoeng, gajlaeng gyoengqde naeuz: “Gyoengqraeuz mbouj ndaej youq aen ciet neix doengh fawz, hoengjlau gij vunzlai aeuqheiq le fanj hwnjdaeuj.” 3 Mwhneix, Yehsuh cingq youq aen mbanj Bwzdaqniz, youq laeng Sihmaenz boux hwnj mazfung goq neix gw haeux. Yiengq cingq gw hih mwhde, miz boux vunzbaz he dawz aen bingz aeu nyugsig ma guh he, ndaw de coux rim gij youz rang fwtfwt dijbauj he heuh naqdaz he, dawz daeuj. Dawz daeuj le, couh doh gij hoz aen de vaih, couh aeu gij youz rang neix raix hwnj gwnz raeuj Yehsuh bae. De yienghneix guh dwg soenhcungq de he. 4 Yiengq youq mwnq miz geij boux raen yienghneix le, couh yawj mbouj goq ra, couh aeuqheiq hwj lwnh naeuz: “Hozbiet yienghneix langqfeiq nej? 5 Bingz youz rang dijbauj neix gijmaj hai ndaej sambak lai ngaenz hwx; hauhnaeuz aeu ma bang vunz gungz nex, lij haemq ndei hwx.” 6 Hoeng, Yehsuh dingq le, dauq han naeuz: “Ajcaih de lo bax! Hozbiet ij diuqgaz de nej? De youq gwnz ndang gou guh hih dwg gienh ndeisaeh he nex. 7 Vunz gungz, faenhsou seizlaw bang mbouj ndaej, aenvih gyoengqde siengzseiz caeuq sou youq itheij, cijaeu faenhsou haenj. Hoeng, gou nej, gou mbouj siengzseiz caeuq sou youq hah. 8 Boux vunzbaz neix de gaenq caenh de soj ndaej guh daengz hih ma guh lo; de dawz gij youz rang he raix hwnj gwnz ndang gou daeuj, dwg vih baezneix ij cangq gou hwj guh ndei cwnjbiq lah. 9 Gou saedsaeh naeuz sou ni, mboujguenj Cangqdiq dih ndei siuhsiz cenz bae daengz lajmbwn hih goklaw, boux vunzbaz neix soj guh hih saeh caemh gaengjdingq miz vunz cenz bae daengz goklaw, vunz caemh gaengjdingq ndaejgeiq de.” 10 Gajlaeng, Yehsuh dih cibngeih boux lwgsae ndaw de miz boux Gyahloz vunz he, couh dwg Youzdaq; de bae cimh doengh boux goengjsae dajbwiz he, naeuz gyoengqde ni de ij dawz Yehsuh gyau hawj gyoengqde. 11 Yiengq gyoengqde dingq le, cungj angq hwj ij rai, couh dapwngq hawj de ngaenz. Couh daj mwhneix hwnj, Youzdaq couh siengj banqfaz ra congxmbongq ij baenzlawz ndaej gaemh dawz Yehsuh gyau hawj gyoengqde. 12 Yiengq daengz aen ciet Cawz Yauqmuj dih ngoenz daixdaeuz, couh dwg ij gaj yiengzlwg hwj cwnjbiq goq aen ciet Bienqgoqbae hih ngoenz mwnq, gyoengq lwgsae Yehsuh cam Yehsuh naeuz: “Lauxsae, mwngz ij hawj gyoengqraeuz bae mwnqlaw cwnjbiq goq aen ciet Bienqgoqbae hih haeuxcaeuz hawj mwngz nej?” 13 Yehsuh dingq le, couh heuh song boux lwgsae goq daeuj, doiq song boux de naeuz: “Faenhsou haeuj singz bae, couh yawjraen miz boux he, de riuj miz huz raemx he; faenhsou couh gaen de bae. 14 De haeuj aen ranzlawz bae, faenhsou caemh gaen de haeuj aen ranzlawz bae. Haeuj bae le, couh doiq boux cawjranz mwnq naeuz: ‘Lauxsae gou cam mwngz naeuz: “Aen fungh gou youq mwnqlaw lah? Gou ij caeuq lwgsae gou youq mwnq gw ciet Bienqgoqbae.”’ 15 Faenhsou yienghneix naeuz le, de couh gaengjdingq daiq faenhsou hwnj laeuz bae yawj, faenhsou caemh gaengjdingq raen miz aen fungh hung he, ndaw de baij hwj ndei ndwtndwt, gaiqgaiq cungj miz he; faenhsou couh youq mwnq cwnjbiq bax.” 16 Yehsuh yienghneix raengq le, song boux de couh haeuj singz bae lo. Yiengq song boux de bae soj roeb daengz hih cingqgawq luj Yehsuh soj gangj hih yienghmwnq. Gajlaeng gyoengqde couh youq mwnq cwnjbiq ndei ciet Bienqgoqbae dih haeuxcaeuz lo. 17 Yiengq daengz yiengqhaemh le, Yehsuh couh daiq cibngeih boux lwgsae de bae lo. 18 Gajlaeng gw haeux hih mwhde, Yehsuh doiq gyoengqde naeuz: “Gou saedsaeh naeuz sou ni, faenhsou ndaw neix miz boux he ij cuzmaiq gou; de seizneix cingq caeuq gou gw haeux nex.” 19 Yehsuh yienghneix gangj le, gyoengq lwgsae de cungj you hwj ij rai. Bouxboux cungj cam de naeuz: “Mbouj dwg gou bax?” 20 Gajlaeng Yehsuh han naeuz: “Dwg cibngeih boux faenhsou ndaw neix hih boux he; boux de caemh caeuq gou caemh demj aen vanj he gw bingj hwj. 21 Cingq luj ndaw Singqgingh ndaw de sij naeuz hih, Vunz dih Daiqbiuj ij ngaiz vunz haihrai. Hoeng, boux buenqduz cuzmaiq de mwnq satsoq lo! Boux de hozmboujyienz mbouj seng hwx.” 22 Yehsuh yienghneix gangj sat le, couh dawz aen bingj he hwnjdaeuj docih Cangqdiq. Docih le, couh euj faen hawj gyoengq lwgsae de, doiq gyoengqde naeuz: “Faenhsou gw bax; gij neix couh dwg daiqbiuj aen ndangdaej gou.” 23 De gangj sat gawq neix le, youhcaiq dawz aen cenj coux laeuj buzdauz he hwnjdaeuj docih Cangqdiq. Docih le, couh ndenq hawj gyoengqde; gyoengqde cungj caemh gw lo. 24 Gyoengqde gw le, Yehsuh couh naeuz: “Gij neix couh dwg daiqbiuj gij lwed gou, dwg daiqbiuj Cangqdiq yiengq vunz dinghlaeb dih baujcingq lienz diuzgyenq, dwg yungh gij lwed gou ma dingh hih. Gij lwed gou dwg vih vunz lai hwj ngaiz riuz hih. 25 Gou saedsaeh naeuz sou ni, daj seizneix hwnj, gou mbouj caiq gw saek ndik laeuj, cizfeih daengz gij gienzveih Cangqdiq youq lajmbwn fazveih, daengz mwhmwnq gou cij gw.” 26 Couh yienghneix, gajlaeng gyoengqde daixgya ciengq gij go haenh Cangqdiq. Ciengq sat le, couh ok ma yiengq aen bya Gamjlamj bae lo. 27 Gyoengqde bae hih mwhde, Yehsuh vanzlij caiq doiq gyoengqde naeuz: “Faenhsou bouxboux cungj ij mbouj nginh gou liz gou, aenvih ndaw Singqgingh ndaw de Cangqdiq naeuz: Gou ij doh rai boux ciengx yiengz; gyoengq yiengz couh ij sanq deuz liux. 28 Hoeng, daengj gou dauqlix le, gou sien bae daengz Gyahliqliq daengj faenhsou.” 29 Yiengq Bijdwz dingq le, couh naeuz: “Lauxsae hax, cungjsuenq naeuz gyoengq vunz cungj mbouj nginh mwngz liz mwngz, gou gaengjdingq nginh mwngz mbouj liz mwngz!” 30 Yehsuh dingq le, dauq han de naeuz: “Bijdwz, gou saedsaeh naeuz mwngz ni, couh youq ngwnzneix, cungj mijyaengz gaeq haen song mbat haem, mwngz cix miz sam mbat mbouj nginh gou lo.” 31 Bijdwz dingq le, ngengh euq naeuz: “Cungjsuenq naeuz gou gaengjdingq ngaiz caeuq mwngz ngaiz rai, gou cungj mbouj mbouj nginh mwngz.” Bijdwz yienghneix naeuz le, lij lw hih lwgsae cungj caemh yienghneix naeuz. 32 Gajlaeng, gyoengqde bae daengz mwnq dieg heuh Gwzsihmajniz he le, Yehsuh couh doiq gyoengq lwgsae de naeuz: “Faenhsou youq dineix naengh daengj gou bax; daengj gou bae gouzhaenh Cangqdiq gaenq.” 33 De yienghneix naeuz le, couh daiq Bijdwz caeuq Yajgoz caeuq Yozhanq itheij bae lo. Couh youq mwhneix, de couh gaihcij roxnginh siengsim gikheiq lo. 34 Gajlaeng de couh doiq sam boux de naeuz: “Gou siengsim ij rai bae; faenhsou youq dineix buenx gou, caemh ij daezsingj cij ndaej.” 35 Yehsuh de yienghneix naeuz sat le, couh gag byaij doxbae di he, couh bomz roengz doem bae ij gouz Cangqdiq, gouz Cangqdiq ndaej mbouj ndaej mbouj hawj gij nanh neix dawz de. 36 Yiengq de couh gouz naeuz: “Boh hax boh, mwngz mij'z naeuz gijmaz guh mbouj daengz hih; gou gouz mwngz mbouj hawj gou souh gij haemzhoj neix! Gannaeuz gou gouz mwngz yienghneix lah, hoeng, vanzlij dwg ciuq gij cawjeiq mwngz bae guh bax!” 37 De gouz sat le, couh dauq maj daengz sam boux lwgsae de mwnq. Ma le, engq raen sam boux de ralaep lo. De raen yienghneix le, couh heuh Bijdwz doiq de naeuz: “Sihmaenz, mwngz ralaep haj? Mwngz ndaej mbouj ndaej singjsangj yaep he hax? 38 Faenhsou ij baujciz singqsag, mbouj dingz hih gouz Cangqdiq cij dingx ndaej goq mbouj ngaiz yaeuh hah. Mijn'x gannaeuz ndaw sim faenhsou nyienh'eiq lah, hoeng, aen ndang faenhsou dauq mij giengz ndaej goq hax.” 39 De yienghneix gangj sat le, caiq dauqyungz bae gouz Cangqdiq, gouz hih vah caemh dwg caeuq daxbaenh ngamqngamq gouz hih doxdoengz. 40 Gouz sat le, de caiq dauq ma daengz sam boux lwgsae de mwnq. Dauq ma le, caemh ciuqyiengh raen gyoengqde vanzlij ralaep. Aenvih gyoengqde cengq cungj cengq mbouj ndaej hoi ra, gyoengqde caemh mbouj rox hih ij baenzlaw han de. 41 Gajlaeng Yehsuh youhcaiq bae gouz, youhcaiq ma mbat daixsam. Ma le, couh doiq gyoengqde naeuz: “Faenhsou vanzlij ralaep haj? Gaeuq lox, cizgyenh daengz lo. Yawj veiq, Vunz dih Daiqbiuj couh ij ngaiz vunz hai hawj vunz vaih lo. 42 Vaiq hwnq! Yawj veiq, boux buenqduz hai gou mwnq daeuj daengz lo! Gyoengqraeuz goq bae bax!” 43 Yehsuh vanzlij gangj gij vah neix hih mwhde, cibngeih boux lwgsae ndaw de dih Youzdaq daiq baenx gyoengq vunz goqdaeuj; gyoengqde dwg goengjsae dajbwiz caeuq fazliz cenhgyah caeuq doengh boux gangj vah couh baenz he baij daeuj he. Ndaw fawz gyoengqde cungj dawz miz giemq caeuq faexmbaenq hwj. 44-46 Youzdaq goq daeuj le, couh majcangq byaij daengz dangqnaj Yehsuh, couh heuh naeuz: “Lauxsae!” De heuh le couh doq cup de. Yiengq gyoengq vunz mwnq couh doq gaemh dawz Yehsuh lo, aenvih gaxgonq Youzdaq boux buenqduz cuzmaiq Yehsuh neix gaenq caeuq gyoengq vunz mwnq gangj ndei gij ngamqhauq neix lo, naeuz: ‘Faenhsou raen gou bae cup byawz, byawz couh dwg faenhsou ij dawz hih vunz lo.’ Couh yienghneix, Yehsuh couh ngaiz gyoengq vunz mwnq gaemh dawz gam bae lo. 47 Couh youq mwhneix, ndwn youq henz de hih boux lwgsae he couh doq yot fag giemq de okdaeuj, couh doq raemj duj rwz bouxhoiq goengjsae dajbwiz daeuzdaeuz hih duj rwz he gat. 48 Yehsuh raen yienghneix le, couh doiq gyoengq vunz mwnq naeuz: “Faenhsou dawz giemq dawz faex hwj daeuj gaemh gou; nanzdauh gou dwg caeggeq mah? 49 Gou ngoenzngoenz cungj youq ndaw gunghdenq Cangqdiq son vunz, caeuq faenhsou youq itheij; faenhsou mij gaemh gou. Hoeng, faenhsou yienghneix guh cingq lingz ok youq ndaw Singqgingh ndaw de soj sij naeuz hih.” 50 Couh youq mwhneix, gij lwgsae de cungj mbouj leix de, cungj deuz liux lo. 51 Yiengq, miz boux hauxseng rangz he gwnz ndang de bangj miz vangq boiqmaz he gaen youq gajlaeng Yehsuh. Gyoengq vunz mwnq raen le, couh ij gaemh dawz de, 52 hoeng, de couh vwtvak vangq boiqmaz de loxgenz loxgangh hwj vaiqdi riq deuz lo. 53 Gajlaeng, gyoengq vunz mwnq gam dawz Yehsuh bae daengz ndaw fuj goengjsae dajbwiz daeuzdaeuz. Youq mwnq caemh miz doenghheij goengjsae dajbwiz caeuq doengh boux gangj vah couh baenz he caeuq doenghheij fazliz cenhgyah he youq mwnq doxcomz. 54 Yehsuh ngaiz vunz gam dawz bae hih mwhde, Bijdwz gyae'gyae req gaen gajlaeng bae, itcig gaen bae daengz daxhongh ndaw fuj boux de, bae daengz mwnq gaen doenghheij gingjveiq mwnq naengh youq mwnq byoq feiz. 55 Yiengq doenghheij goengjsae dajbwiz caeuq baenx gyoengq veijyienzveiq youq mwnq doxcomz mwnq cungj siengj cimh cingqgiq ma gauq Yehsuh, buenq de rai, hoeng, cimh mij raen miz cingqgiq. 56 Mbouj danhcij yienghneix, caemh miz haujlai vunz daeuj bangjlaih de gauq de, hoeng gyoengqde soj bangjlaih soj gauq hih cungj mbouj doxdoengz. 57 Gajlaeng, youq mwnq caemhcaiq miz geij boux ndwn hwnjdaeuj luenh bangjlaih de naeuz: 58 “Gyoengqraeuz dingqri de naeuz goq naeuz: ‘Gou ij dawz aen gunghdenq Cangqdiq vunz hwnq baenz neix cek bae, sam ngoenz couh caiq ndaej doiqyungz hwnq hwnjdaeuj, hoeng, mbouj dwg vunz hwnq hih.’” 59 Gyoengqde yienghneix luenh gauq de, hoeng, gyoengqde soj gangj hih cungj mbouj doxdoengz. 60 Yiengq, goengjsae dajbwiz daeuzdaeuz dingq gij vunz yienghneix gauq de le, couh ndwn hwnjdaeuj youq dangqnaj vunzlai cam Yehsuh naeuz: “Gyoengq vunz gauq mwngz, mwngz vihmaz mbouj gag buek nej?” 61 Goeng de yienghneix cam, hoeng, Yehsuh dauq mij han mij haemq de. Gajlaeng, goeng de caiq cam de naeuz: “Mwngz dwg mbouj dwg Gihduz, boux wnggai haenh dih Cangqdiq dih lwg?” 62 Yehsuh dingq le, han naeuz: “Dwg hah, gou couh dwg. Baezneix faenhsou gaengjdingq ij yawjraen Vunz dih Daiqbiuj naengh youq baixgvaz gienz akak rengzrengz dih Cangqdiq, caemh ij yawjraen de caeuq gij fwj daj gwnzmbwn roengz daeuj.” 63 Goeng de dingq de yienghneix naeuz le, couh aeuqheiq hwj gag mbek gij buh bonjfaenh, naeuz: “Gyoengqraeuz hozbiet ij cimh cingqgiq haem nej? 64 Faenhsou gaenq dingqri de gag gangj gij vah daekcoih Cangqdiq he lo. Faenhsou naeuznaeuz yawj baenzlaw guh bax!” Gyoengq vunz dingq le, couh naeuz: “Wnggai buenq de rai!” 65 Couh yienghneix, gajlaeng engq miz vunz byiq myaiz hawj de, caiq aeu boiq ma fung cehra de hwj cij gaemxgyienz dub de doiq de naeuz: “Mwngz naeuz mwngz dwg boux cenz gij vah Cangqdiq lo, yiengq mwngz naeuznaeuz yawj, byawz dub mwngz?” Gij vunz yienghneix gangj gij vah hoj dingq he ma nyoujnyak de le, doenghheij binggyep he caemh rag de goq bae baj fawz mbap de. 66 Mwhde Bijdwz caemh vanzlij youq daxhongh ndaw fuj goengjsae dajbwiz daeuzdaeuz mwnq byoq feiz. Ngamqluj mwhneix dahhoiq goengjsae dajbwiz daeuzdaeuz caemh goq bae. 67 De yawjraen Bijdwz youq mwnq byoq feiz le, couh cimyawj de doiq de naeuz: “Mwngz soqlaiz cungj dwg caeuq Nazsajlwz vunz dih Yehsuh caemh buek vunz he.” 68 Bijdwz dingq de yienghneix naeuz le, engq mij nginh Yehsuh, dauq han naeuz: “Gou mbouj rox mwngz naeuz gijmaz hah.” De yienghneix han dah de le, couh ok daxhongh ma daengz bakdoumonz. Couh youq mwhneix, gaeq couh haen lo. 69 Goq ndaej yaep he le, dahhoiq mwnq caiq yawjraen de, yiengq dah de couh doiq gij vunz ndwn henz he naeuz: “Ndaek vunz ndaekn'x dwg caeuq boux mwnq caemh buek vunz he hah.” 70 Bijdwz dingq le, caemh mbouj nginh. Yiengq caiq goq ndaej yaep he, gij vunz ndwn youq henz de caiq miz vunz doiq de naeuz: “Mwngz couh dwg buek vunz gyoengqde! Aenvih mwngz caemh dwg Gyahliqliq vunz.” 71 Mbat neix Bijdwz dingq le, engqgya fazsiq naeuz: “Gou gaenhbaenj mbouj rox faenhsou naeuz hih boux vunz mwnq; hauhnaeuz gou dwg caeuq de caemh buek vunz he nex, couh ngaiz Cangqdiq fad!” doenghgij vah neix. 72 Couh youq mwh de gangj hih gij vah neix hih mwhde, gaeq couh caiq haen lo. Gaeq haen le, Bijdwz couh doq singjgeih daengz gaxgonq Yehsuh doiq de gangj naeuz goq naeuz: “Gaeq haen song mbat cihsenz mwngz miz sam mbat mbouj nginh gou,” gawq neix. De baex ngeix daengz he le, couh mbaet mbouj ndaej daej lo.
1 Couh yienghneix, daengz ngoenz daixngeih daihcaeux le, doenghheij goengjsae dajbwiz he caeuq doenghheij boux gangj vah couh baenz he caeuq doenghheij fazliz cenhgyah he caeuq gyoengq veijyienzveiq he doxcomz hwj cimciek ij dawz Yehsuh goenj hwnjdaeuj, gam soengq bae hawj Bijlahdoh saengjcangj. Gyoengqde cimciek ndei le, couh soengq bae hawj de lo. 2 Yiengq, Bijlahdoh raen Yehsuh le, couh cam Yehsuh naeuz: “Mwngz dwg gij vunz Youzdaiq dih vuengz haj?” Yehsuh dingq le, han naeuz: “Mwngz naeuz ndaej deng lo.” 3-4 Gajlaeng Bijlahdoh youhcaiq cam Yehsuh, aenvih de roxdoenghheij goengjsae dajbwiz gauq Yehsuh haujlai saeh; sojhij de couh cam de naeuz: “Haex, gyoengqde gauq mwngz baenx lai, hoeng, mwngz vihmaz mbouj buek gyoengqde nej?” 5 Hoeng Yehsuh mboujguenj Bijlahdoh baenzlawz cam de, de vanzlij dwg mbouj han mbouj haemq de, guh hwj de raen geizheih ij rai bae. 6 Ciuq Bijlahdoh bienqnaengz gvenq he, moix daengz aen ciet Cawz Yauqmuj he, de cungj ij ciuq gij vunz dih yauhgyiuz coengq boux vunzfamh he. 7 Yiengq ngamqluj mwhneix, ndaw lauz gyaeng miz boux vunzfamh heuh Bahlahbah he. Boux Bahlahbah neix dwg boux gaep haeuj buek sauqfanj gaj vunz goq he, ngaiz gyaeng haeuj ndaw lauz bae he. 8 Cingq luj mwhneix aen ciet Cawz Yauqmuj he daengz lo; gyoengq vunzlai couh gouz Bijlahdoh hawj de ciuq bonjfaenh de bienqnaengz gvenq hih yienghmwnq coengq boux vunz he hawj gyoengqde. 9-10 Mwhneix, ndaw sim Bijlahdoh caemh gag rox, goengjsae dajbwiz dawz Yehsuh daeuj hawj de dwg haeuj gij rahoengz he. Gizsaed Yehsuh gaenhbaenj mbouj miz gijmaz coih,sojhij de couh cam gyoengq vunzlai naeuz: “Faenhsou ij hawj gou coengq boux Youzdaiq vunz dih vuengz hawj faenhsou mah?” 11 Bijlahdoh yienghneix cam le, doengh goengjsae dajbwiz lau de cingqcaen coengq Yehsuh le, couh nyongz gij vunzlai, nyongz hawj gyoengqde gouz Bijlahdoh coengq Bahlahbah, mbouj coengq Yehsuh. 12 Bijlahdoh rox yienghneix le, youhcaiq cam gyoengq vunzlai naeuz: “Yiengq boux faenhsou naeuz de dwg Youzdaiq vunz dih vuengz nej, gou ij baenzlaw buenq de?” 13 Gyoengq vunz dingq de yienghneix naeuz le, cungj daixgya hemq oxox naeuz: “Dawz de ding hwnj gwnz gyaq cixcib bae! Dawz de ding hwnj gwnz gyaq cixcib bae!” 14 Gij vunz yienghneix hemq le, Bijlahdoh vanzlij caiq cam gyoengq vunz naeuz: “Vihmaz nex? De famh gijmaz coih nex?” Hoeng, gyoengq vunzlai hemq engqgya gog, hemq naeuz: “Dawz de ding hwnj gwnz gyaq cixcib bae! Dawz de ding hwnj gwnz gyaq cixcib bae!” 15 Gajlaeng, Bijlahdoh ak mbouj goq gyoengq vunzlai, cix ijsiengj bungj gyoengq vunzlai hawj gyoengqde haenjheiq le, couh ciuq gyoengqde hemq hih yienghmwnq coengq Bahlahbah. Gajlaeng de couh mingqlingq hawj vunz aeu diuz bien naeng he ma fad Yehsuh, youhcaiq ajcaih vunz dawz de bae ding hwnj gwnz gyaq cixcib bae vangraeh. 16 Couh yienghneix, gajlaeng Yehsuh couh ngaiz gyoengq binggyep dawz bae lo. Gyoengqde dawz de bae daengz ndaw fuj saengjcangj le, couh heuh baenx cenz yingz hih binggyep daeuj. 17 Gyoengqde caiq dawz diuz buhbauz aeuj raez he daeuj daenj hawj de, caiq aeu oen ma san aen mauh luj goengjvuengz daenj he hwj daenj hawj de, 18 caiq hemq goggog lengx de naeuz: “Youzdaiq vunz dih vuengz vanqseiq hwx!” 19 Gyoengqde doq hemq vanzlij doq aeu go em ma fad ndaek raeuj de, caiq byiq myaiz hawj de, caiq gvih roengzbae gyajcang baiq de sax de hwj. 20 Gyoengqde dawz de ma yienghneix nyoujnyak gangjriu gaijmbwq le, caiq dawz diuz buhbauz aeuj raez mwnq duet okma le, caiq doiqyungz dawz diuz buh de daenj hawj de boiz. Gajlaeng, gyoengqde couh daiq de okbae, ij dawz de ding hwnj gwnz gyaq cixcib bae. 21 Couh yienghneix, Yehsuh ngaiz gyoengqde daiq bae lo. De ngaiz daiq bae hih mwhde, daengz buenqroen raen miz boux daj lajmbanj haeuj singz bae he. Boux de dwg vunz Gujliqnaiq he, gij coh de heuh Sihmaenz, dwg daxboh Yaqlizcanhdaq caeuq Lujfuz he. Gyoengqde raen le, couh gaemh dawz de ep de aemq aen gyaq cixcib Yehsuh bae. 22 Gyoengqde daiq Yehsuh bae daengz mwnq dieg heuh Gozgozdah he, couh dwg ‘dieg ndokraeuj he’ le, 23 couh dawz gij laeuj aeu mozyoz ma boiq he hawj Yehsuh gw, hoeng, Yehsuh it di cungj mbouj gw. 24 Gajlaeng, gyoengqde couh dawz de ding hwnj gwnz gyaq cixcib bae lo. Ding le, caiq nipgaeu faen aeu doenghheij buh de. 25 Mwh gyoengqde ding de hwnj bae hih mwhde dwg cangquj gouj diemjcung yienghneix. 26 Youq gwnz gyaq cixcib gwnz de caemh ding miz baj baiz sij gauq Yehsuh miz coih he, couh dwg gawq “Youzdaiq vunz dih vuengz” he. 27 Gyoengqde caemh dawz song boux caeggeq ding hwnj gwnz gyaq cixcib bae, boux he ding youq baixgvaz, boux he ding youq baihswix. 28 Yienghneix cingq ngamq lingz ok ndaw Singqgingh ndaw de sij naeuz: “De ngaiz lez haeuj gij vunzfamh he bae,” gawq neix. 29 Yiengq miz gij vunz daj mwnq byaij goqbae he cungj lengx Yehsuh, ngauz raeuj naeuz: “Haex! Ijsiengj cek gunghdenq Cangqdiq, sam ngoenz couh ndaej doiqyungz hwnq baenz hih hax, 30 ndaej gag gouq bonjfaenh hah, daj gwnz gyaq cixcib roengz ma veiq!” 31 Daiqlienz doenghheij goengjsae dajbwiz he caeuq doengh boux fazliz cenhgyah he cungj caemh yienghneix lengx de naeuz: “De ndaej gouq heijvunz, dauq mbouj ndaej gag gouq bonjfaenh. 32 Haxhax! Hijswzlez dih vuengz, Gihduz, vaiqdi daj gwnz gyaq cixcib diuq roengzma hawj raeuz yawjyawj bax! Hawj raeuz yawj le, raeuz couh sinq lo!” Yiengq, daiqlienz caeuq Yehsuh doxdoengz ngaiz ding hih song boux mwnq cungj caemh yienghneix lengx de. 33 Yehsuh ngaiz ding hwnjbae le, dajlwh gyangjngoenz cingq itcig daengz yaquj sam diemjcung yienghneix, baenx cenz lajmbwn cungj laep cupcup liux. 34 Yiengq, daengz yaquj sam diemjcung yienghneix, Yehsuh hemq goggog naeuz: “Hijlozih, hijlozih! Lahmaj sajbahgozdaqniz?” Iqswh dwg naeuz: “Gou dih Cangqdiq, gou dih Cangqdiq! Mwngz vihmaz vwt gou?” 35 De yienghneix hemq le, ndwn youq henz de hih vunz dingqri le, couh naeuz: “Yawj veiq, de heuh Hijliqyaq boux cenz gij vah Cangqdiq neix!” 36 Yiengq youq mwnq miz boux he couh vaiqdi riq bae dawz gij haijmenz he yomx laeuj hwj cug haeuj diuz em he bae dawz ma yingx hawj Yehsuh sup gw, vanzlij doq hawj de doq naeuz: “Daengj yaep he Hijliqyaq daeuj mbouj daeuj gouq de roengz ma hax?” 37 Gajlaeng, Yehsuh caiq hemq goggog gawq he couh rai gatcaw lo. 38 Couh youq mwhneix, venj youq ndaw aen laeuz gunghdenq Cangqdiq hih fanyiemz mwnq cungj daj gwnz lig doxroengzma faen baenx song mbiengj bae. 39 Yiengq ndwn youq doiqmienh Yehsuh hih boux Lozmaj lienzcangj he raen Yehsuh yienghneix hemq couh rai gatcaw lo le, couh naeuz: “Ox! Boux neix cingqcaen dwg lwg Cangqdiq!” 40-41 Mwhde caemh miz doenghheij vunzbaz daj youq Gyahliqliq Saengj cix gaen Yehsuh swqhaeuh Yehsuh he hih ndwn youq gyae'gyae yawj doenghgij saeh neix fatseng. Gyoengqde couh dwg Mbanj Mazdaqlah dih Majliqyaq, vanzlij miz daixlingh boux Majliqyaq haem couh dwg daxmeh Siuj Yajgoz caeuq Yozsih song boux neix, vanzlij miz Sajlozmij, caemhcaiq vanzlij miz doenghheij vunzbaz gaen Yehsuh daeuj Yehluqsajlaengj hih caemh ndwn youq mwnq yawj. 42 Ngoenz mwnq cingq dwg ijvanh daengz ngoenzyietbaeg, couh dwg ngoenz guh ndei cwnjbiq ij goq ngoenz ngoenzyietbaeg hih ngoenz mwnq dih yiengqhaemh. 43 Miz boux daj aen singz Yaqliqmajdaiq daeuj he, gij coh de heuh Yozswz. Boux vunz neix dwg boux veijyienzveiq hih veijyienz, vunz caemh soenhcungq de he; de itcig cungj dwg muengh Cangqdiq dih gij gienzveih de ndaej fazveih. De mbeihung hwj bae laeng Bijlahdoh mwnq, bae gouz de aeu gij seihaiz Yehsuh. 44 Bijlahdoh dingq le, couh doeksaet Yehsuh gaenq rai lo, couh heuh lienzcangj daeuj cam, cam de Yehsuh dwg mbouj dwg gaenq rai lo. 45 Gajlaeng de rox Yehsuh gaenq rai lo le, couh dapwngq hawj de aeu gij seihaiz Yehsuh maj lo. 46 Yiengq, Yozswz couh bae cawx boiqmaz ma, couh daj gwnz gyaq cixcib gej Yehsuh roengzma, couh aeu boiqmaz ma gyuj de ndei hwj dawz de bae coengq haeuj ndaw moh rin vunz siuq guhbaenz he bae, youhcaiq gyingj ngauq rin hung he ma caet bakcongh moh de hwj. 47 Yiengq Mbanj Mazdaqlah dih Majliqyaq caeuq daxmeh Yajgoz caeuq Yozsih dih Majliqyaq caemh yawjraen gij seihaiz Yehsuh coengq youq ndaw de.
1 Yiengq ngoenzyietbaeg ngamq baex goq he le, Mbanj Mazdaqlah dih Majliqyaq caeuq daxmeh Yajgoz caeuq Yozsih dih Majliqyaq caeuq Sajlozmij sam boux neix couh cawx yanghliuq cwnjbiq dawz bae hoz haeuj gij seihaiz Yehsuh bae. 2 Gajlaeng daengz ngoenzsinghgiz dih doengxhaet daihcaeux, gyangjngoenz ngamq baex hwnj he, gyoengqde couh bae aen moh coengq Yehsuh mwnq lo. 3 Gyoengqde bae hih mwhde, cungj doxcam naeuz: “Byawz ndaej bang raeuz nod ngauq rin caet bak moh mwnq deuz nex baenz hoh,” 4 aenvih ngauq rin mwnq daiq hung lai huh. Sojhij gyoengqde doq bae vanzlij doq yienghneix naeuz, danxdaeuz gyoengqde bae daengz le, baex ngiengx raeuj yawj he, engq raen ngauq rin hung mwnq gaenq gyingj deuz lo. 5 Gyoengqde raen yienghneix le, couh haeuj ndaw moh de bae. Baex haeuj bae yawj he, couh yawjraen miz boux hauxseng daenj buhbauz bieg he naengh youq baixgvaz gyoengqde. Gyoengqde raen le, cungj lau hwj ij rai bae. 6 Boux hauxseng mwnq raen gyoengqde lau le, couh doiq gyoengqde naeuz: “Gaej lau; faenhsou ij cimh boux ngaiz ding youq gwnz gyaq cixcib hih Mbanj Nazsajlwz vunz dih Yehsuh, de gaenq dauqlix lo; mbouj youq dineix haem lo. Hawjm'z yawj mwnq coengq de mwnq lux. 7 Faenhsou vaiq bae naeuz gyoengq lwgsae de ni caeuq naeuz Bijdwz ni, naeuz: ‘Yehsuh gaenq beij faenhsou sien bae daengz Gyahliqliq lo; faenhsou gaengjdingq youq mwnq ndaej raen de, cingq luj de gaxgonq naeuz sou ni goq hih.’” 8 Sam boux vunzbaz mwnq dingq le, cix doeksaet cix lau hwj dungxmbouq ndangsaenz bae, couh daj ndaw moh riq okma. Gajlaeng, gyoengqde gaenhbaenj mbouj gamj naeuz vunz ni gij saeh neix, aenvih gyoengqde lau. 9 Yehsuh youq ngoenzsinghgiz dih doengxhaet daihcaeux dauqlix lo. De dauqlix le, couh sien yienh hawj Mbanj Mazdaqlah dih Majliqyaq raen. Boux Majliqyaq neix couh dwg Yehsuh daj gwnz ndang de boenq caet duz fangz doz okma goq hih boux vunzbaz mwnq lo. 10 De raen Yehsuh le, couh bae naeuz doenghheij vunz siengzseiz gaen Yehsuh he ni. Doenghheij vunz neix cingq vih Yehsuh hwj siengsim daej nex. 11 Gyoengqde dingq naeuz Yehsuh dauqlix le vanzlij yienh hawj Majliqyaq raen hwj, hoeng, gyoengqde ciuqyiengh mbouj sinq. 12 Gij saeh neix goq le, gyoengq lwgsae ndaw de miz song boux bae lajmbanj. Youq dangjroen, Yehsuh bienq daixlingh cungj saeksiengq hwj yienh hawj song boux de raen. 13 Gajlaeng, song boux de caemh maj naeuz gizdah lwgsae ni, hoeng, gyoengq lwgsae cungj caemh vanzlij mbouj sinq. 14 Gajlaeng, miz mbat he, cib'it boux lwgsae de gw haeux, de couh yienh hawj gyoengqde raen, vanzlij gvaiq gyoengqde, gvaiq gyoengqde mbouj sinq, akeuq, aenvih gyoengqde mbouj sinq doenghheij vunz, de dauqlix le yienh hawj gyoengqde raen goq he. 15 De gvaiq gyoengqde le, vanzlij doiq gyoengqde naeuz: “Faenhsou ij bae daengz ciqgyaiq gak dieg bae cenzgangj naeuz sojmiz hih vunz ni Cangqdiq dih ndei siuhsiz. 16 Gou naeuz sou ni, doenghheij vunz sinq he caemh sijlij he couh ndaej gouq lo, hoeng, doenghheij vunz mbouj sinq he couh ij ngaiz dingh miz coih lo. 17 Sinq hih vunz couh ij miz gij geizmiuj hih saeh he hwj ndaej cingqmingz naeuz de dwg sinq he, couh dwg ndaej hij gij mingzhiq gou ma boenq fangz, ndaej gangj cungj vah Hoenzsaenz Cangqdiq hawj gangj he, 18 ndaej aeu fawz ma gaemh ngwz, gw gij miz doeg he caemh mbouj ngaiz sienghaih, oemj fawz hawj vunz bingh, vunz bingh couh ndaej ndei.” 19 Bouxcawj raeuz Yehsuh doiq gyoengqde gangj sat doenghgij vah neix le, couh ndaej ciep hwnj mbwn bae naengh youq baixgvaz Cangqdiq lo. 20 Gajlaeng, gyoengq lwgsae de caemh ciuq de raengq hih yienghmwnq bae guh lo. Gyoengqde dauqcawq bae cenzgangj Cangqdiq dih ndei siuhsiz. Bouxcawj raeuz Yehsuh bang gyoengqde, hawj gyoengqde ndaej guh doenghgij geizmiuj hih saeh hwj cingqmingz gyoengqde soj cenz hih ndei siuhsiz cungj dwg saedsaeh he, dwg deng he.
1 Dizahfeihloz senhsaengh, gaenq miz vunz dawz gij saeh youq laeng gyoengqraeuz soj lingz okdaeuj hih sij ndei lo. 2 Gyoengqde dwg gaenhgiq doengh boux daj gaihcij cix caenra raen hih cenz okdaeuj hih bien baenz saw lo. 3 Hoeng, gou caemh dawz doenghgij saeh neix daj daeuz daengz rieng doiqyungz sijsaeq ngeix goq, couh gyezdingq ciuq swnqsiq sij okdaeuj. 4 Gou yienghneix guh dwg ij hawj mwngz rox, vunz soj son mwngz hih cungj dwg saedsaeh he. 5 Mwh Hihliz guh vuengz Youzdaiq hih mwhde, miz boux guh dajbwiz he, gij coh de heuh Sajgyahliqyaq. (Gyoengq guh dajbwiz faen miz geij aen ban; Sajgyahliqyaq couh gvi haeuj aen ban heuh Yaqbijyaj ban.) Mehyah de heuh Ihliqcahbwz, dwg Yaqlwnz dih doengh daih gajlaeng he. 6 Song boux neix youq ndaw lwgra Cangqdiq dwg vunz simndei simsoh, dwg boux dingq gij vah Cangqdiq soenhsouj Cangqdiq soj dingh dih gveihdingq dih vunz he. 7 Hoeng gyoengqde mij'z lwg, aenvih Ihliqcahbwz dwg mehmaen he, song boux de nienz caemhcix laux lo. 8 Miz ngoenz he, lwnz daengz aen ban Sajgyahliqyaq bae bwiz Cangqdiq. 9 Ciuq doengh boux guh dajbwiz bienqnaengz guh gvenq hih, ij nyaebgaeu aeu, nyaebgaeu yawj deng byawz haeuj bae aen laeuz ndaw gunghdenq Cangqdiq siu yieng. Yiengq, ngamqluj nyaebgaeu dawz de. 10 Couh yienghneix, de couh haeuj bae siu yieng lo. De haeuj bae siu yieng hih mwhde, gij beksingq youq rog neix gouz Cangqdiq haenh Cangqdiq. 11 Couh youq mwhneix, sawqmwh bouxcai Cangqdiq ndwn youq henz aen cenmonz siu yieng dih mbiengj baixgvaz he, yienh hawj de raen. 12 De raen le, cungj lau hwj dungxmbouq ndangsaenz liux. 13 Yiengq bouxcai Cangqdiq raen de yienghneix le, couh doiq de naeuz: “Sajgyahliqyaq hax, mwngz gaejyungh lau! Cangqdiq gaenq dingqri mwngz gouz de lo; mehyah mwngz Ihliqcahbwz, de ij miz daeglwg he hawj mwngz. Yiengq mwngz caemh ij an coh hawj daeglwg mwngz heuh Yozhanq. 14 Daeglwg mwngz ndaej hawj mwngz roxnginh sim'angq; ij miz haujlai vunz caemh vih miz de hwj sim'angq, 15 aenvih de youq ndaw lwgra Cangqdiq dwg boux veijdaq dih vunz. Daj de lij youq ndaw dungx daxmeh de, Hoenzsaenz Cangqdiq cix doz youq gwnz ndang de lo. De bietdingh laeuj mbouj demj bak. 16 De ij naeuz baenx haujlai Hijswzlez vunz doiqyungz nginh doiqyungz dingq gij vah Cangqdiq, bouxcawj gyoengqde. 17 De caemh miz luj Hijliqyaq boux cenz gij vah Cangqdiq neix dih ndaek cungj singjsaenz caeuq ndaek cungj bonjsaeh mwnq; de daeuj gaxgonq bouxcawj, hawj boh gaijbienq goqma naek lwg, hawj gij vunz mbouj dingq gij vah Cangqdiq he bienqbaenz simndei simsoh hih vunz, dwg cwnjbiq gij vunz ndei hwj daengj bouxcawj daeuj.” 18 Sajgyahliqyaq dingq bouxcai yienghneix naeuz le, couh doiq de naeuz: “Gou caeuq mehyah gou cungj laux liux lo; mwngz miz maz baengzgawq ndaej cingqmingz hawj gou rox miz gij saeh neix nej?” 19 Yiengq bouxcai han de naeuz: “Gou dwg Gyahbwzlez, dwg bouxcai gaen youq henz ndang Cangqdiq he; dwg Cangqdiq baij gou daeuj naeuz mwngz ni gij saeh ndei neix he. 20 Gou gangj hih doenghgij vah neix, swhmboujyienz daengz mwh he cungj gag lingz okdaeuj. Hoeng, aenvih mwngz mbouj sinq gij vah gou, mwngz ij ngaiz bienqbaenz boux vunz ngoemx he; daengj daengz gij saeh neix fatseng hih ngoenz mwnq, mwngz cij ndaej doiqyungz gangj vah okdaeuj.” 21 Mwh bouxcai doiq Sajgyahliqyaq gangj vah hih mwhde, gij vunzlai youq rog neix daengj Sajgyahliqyaq ok ma, hoeng bouxboux cungj raen geizheih, de youq ndaw de baenxlai caez. 22 Daengj daengz raen de ok ma le, engq raen de aeu fawz ma doeng yinx sae yinx, doeng vad sae vad, mij ndaej caeuq vunz gangj vah laem lo. Yiengq gij vunz couh rox de youq ndaw de Cangqdiq hawj de raen daengz geizmiuj dih saeh lo. 23 Lwnz daengz de youq gunghdenq Cangqdiq dajbwiz sat le, de couh maj ranz lo. 24 Couh yienghneix, goq duenh he, mehyah de Ihliqcahbwz cingqgawq mizndang lo. Meh de dajlwh gaihcij mizndang dih haj ndwen daixdaeuz he, de couh mbouj ok dou lo. 25 Ihliqcahbwz raen bonjfaenh de mizndang le couh naeuz: “Ox, Cangqdiq baenxlai cauqguq gou, hawj gou ndaej duet ok youq dangqnaj vunzlai gij saetnaj saetnyaenq he lo.” 26 Youq mwh Ihliqcahbwz mizndang ndaej roek ndwen hih mwhde, Cangqdiq baij Gyahbwzlez bouxcai neix bae daengz Gyahliqliq hih aen mbanj heuh Nazsajlwz he, 27 bae laeng dah lwgsau heuh Majliqyaq he. (Dah neix gaenq caeuq Yozswz dingh guh gvanjbaz lo, hoeng de mijyaengz ngaiz vunzsai yaek haeuj laeng de bae goq. Yozswz dwg Daqveiq goengjvuengz neix hih doengh daih gajlaeng he.) 28 Gyahbwzlez bae doiq dah de naeuz: “Gungheij mwngz lo! Cangqdiq yawjhwnj mwngz, couh senj mwngz; de caeuq mwngz youq.” 29 Hoeng, Majliqyaq dingq bouxcai yienghneix naeuz le, engq lau hwj simvueng liux, couh ngeix bae ngeix dauq cungj siengj rox bouxcai gangj hih dwg gijmaz iqswh. 30 Bouxcai raen yienghneix le, couh vued de naeuz: “Gaej lau, gaej lau, Majliqyaq, aenvih Cangqdiq yawjhwnj mwngz! 31 Gou naeuz mwngz ni hax, mwngz ij daiqndang seng laeq lwgngez he. Mwngz ij an coh hawj de heuh Yehsuh. 32 De ndaej dang hung dang ak; vunz ij heuh de ‘gienz akak rengzrengz Cangqdiq dih lwg.’ Cangqdiq ij hawj de ciep gij gienz Daqveiq boux cojgoeng de dang vuengz mwnq. 33 De ij yungjyenj guh aen cuz Yajgoz dih vuengz, gij gienz de caemh mij rox duet.” 34 Majliqyaq dingq le, couh doiq bouxcai naeuz: “Gou cungj mijyaengz haq haem; ij baenz miz gij saeh neix?” 35 Yiengq bouxcai naeuz: “Hoenzsaenz Cangqdiq ij hwnj gwnz ndang mwngz; gij rengz gienz akak rengzrengz dih Cangqdiq ij mwg daengz mwngz. Sojhij mwngz ij seng hih daeglwg daj Cangqdiq daeuj hih daeglwg neix, gij vunz caemh ij heuh de ‘lwg Cangqdiq.’” 36 Bouxcai vanzlij naeuz: “Mwngz ndaejgeiq lwi, boux caencik mwngz Ihliqcahbwz, couh dwg naeuz de dwg maen hih boux mwnq hax? Seizneix de gaenq nienz laux lo, hoeng de ndaej mizseng lo, raek miz daeg lwgmbauq he hwj, gaenq raek ndaej roek ndwen lo. 37 Aenvih Cangqdiq mij miz gijmaz naeuz guh mbouj daengz hih.” 38 Gajlaeng Majliqyaq naeuz: “Gou dwg dahhoiq Cangqdiq; muengh gij vah mwngz youq gwnz ndang gou lingz okdaeuj.” Majliqyaq yienghneix naeuz le, bouxcai couh biek de bae lo. 39 Yiengq goq mbouj geijlwh caez, Majliqyaq couh nyungjnyungj nyatnyat yiengq fueng canhgih bae, bae daengz Youzdaiq Saengj hih aen mbanj he, 40 haeuj ndaw ranz Sajgyahliqyaq bae, bae dongx Ihliqcahbwz. 41 Ihliqcahbwz dingqri gij sing Majliqyaq le, raek youq gwnz ndang de hih laeq lwg mwnq couh dik bywngxbywngx. Ngamqluj mwhneix Hoenzsaenz Cangqdiq caemh doz youq gwnz ndang de, hawj de 42 hemq hwnjdaeuj naeuz: “Mwngz dwg sojmiz hih vunzbaz ndaw de dwg boux ceiq miz fuk he; raek youq gwnz ndang mwngz hih laeq lwg neix caemh dwg miz fuk hih!” 43 De caiq naeuz: “Daxmeh bouxcawj gou hax, mwngz daeuj yawj gou, gou mbouj boiqndaej hax, 44 aenvih daxbaenh gou baex dingqri sing mwngz dongx gou hih lah, laeq lwg youq gwnz ndang gou cungj angq hwj dik bywngxbywngx bae. 45 Mwngz dwg miz fuk hih, aenvih mwngz sinq Cangqdiq, sinq de doiq mwngz soj gangj hih saeh cungj lingz okdaeuj.” 46 Gajlaeng Majliqyaq naeuz: Ndaw sim gou haenh Cangqdiq, haenh de baenxlai veijdaq; 47 Ndaw sim gou dwg vih de gouq gou hwj angq! 48 Gannaeuz gou dwg dahhoiq yaqyuij de lah, Hoeng, de cungj yawj daengz gou. Daj mwhneix doxbae, gij vunz seiqseiq daihdaih cungj ij haenh gou miz fuk, 49 Aenvih akak rengzrengz dih Cangqdiq youq gwnz ndang gou guh gij saeh geizmiuj he. Gwnzmbwn lajdeih caenhgag de cij dwg Cangqdiq he! 50 De hojsik gij vunz gingqcungh de, mboujguenj daihlawz hih vunz. 51 De iet gij fawz de okdaeuj guh gij saeh hunghung he, Bangx deuz doenghgij vunz rasang yawj vunz mbouj hwnj rwz he. 52 De loengh hawj boux dang ak miz gienz he luetgyeuq, Baux boux mbouj rasang he hih vunz hwnjdaeuj. 53 De hawj boux iek gw ndei gw imq, Hawj boux fouq boux miz baet fawz hoengq maj. 54-55 De bangcoh bouxhoiq de Hijswzlez vunz, Ngamqluj de dapwngq cojgoeng raeuz, Mbouj lumz de gaxgonq naeuz goq, Ij cauqguq Yaqbwzlahhanj caeuq doengh daih gajlaeng de itcig roengzbae mbouj bienq! 56 Couh yienghneix, Majliqyaq youq laeng Ihliqcahbwz youq miz sam ndwen nodned yienghneix cij maj ranz. 57 Ihliqcahbwz daengz seng lo; de seng miz daeg lwgmbauq he. 58 Gajlaeng gij caencik beixnuengx de caeuq doenghheij gekleiz de dingqri naeuz Cangqdiq doiq de baenxlai ndei, cungj caemh angq gaen gajlaeng hangx de. 59 Yiengq daengz daixbet ngoenz le, couh guh gozlij hawj laeq lwg neix. Gyoengq beixnuengx caencik caeuq gekleiz de caemh daeuj, caemh ij an coh hawj laeq lwg neix luj daxboh de heuh Sajgyahliqyaq. 60 Hoeng, daxmeh de dauq han naeuz: “Mbouj hah, ij hawj de an heuh Yozhanq lah.” 61 Gyoengqde dingq le, cungj naeuz: “Ox! Ndaw cuz mwngz mij'z vunz an gij coh neix goq haem.” 62 Gyoengqde yienghneix naeuz le, couh yiengq daxboh de vad fawz, ijsiengj cam de an gijmaz coh hawj laeq lwg neix. 63 Gajlaeng Sajgyahliqyaq couh hawj vunz aeu baj sij saw he daeuj hawj de sij; de couh sij: “Gij coh de heuh Yozhanq.” Yiengq gyoengq vunz raen le, cungj doeksaet liux, raen gig geizheih. 64 Couh youq mwhneix, Sajgyahliqyaq caemh doq ndaej doiqyungz gangj vah boiz lo. De baex aj bak, couh haenh Cangqdiq. 65 Gyoengq vunz raen le, cungj doeksaet liux; doenghheij youq seiqhenz gaenh ranz de rox le caemh doeksaet ij rai. Gajlaeng gij saeh neix cenz baenx cenz Youzdaiq canhgih. Sojmiz dingqri gij saeh neix hih vunz cungj doxgangj yebyeb 66 ngeix naeuz: “Yaxq, laeq lwg neix baezneix ij dwg guxmaz vunz nej?” Gizsaed laeq lwgngez neix miz Cangqdiq caeuq de youq hwj. 67 Caemh youq mwhneix Hoenzsaenz Cangqdiq doz youq gwnz ndang Sajgyahliqyaq; yiengq, de couh dawz gij vah Cangqdiq cenz naeuz vunz ni, naeuz: 68 Bouxcawj, Hijswzlez dih Cangqdiq, dwg wnggai haenh dih, Aenvih de daeuj laeng gij vunz de, daeuj cueg gyoengqde. 69-70 Ngamqluj doenghbaez miz doengh boux boux cenz gij vah Cangqdiq he gangj goq, De ij daj ndaw doengh daih gajlaeng Daqveiq, bouxhoiq Cangqdiq neix, Baij boux akak miz bonjsaeh he ndaej gouq raeuz he, 71 Ndaej daj ndaw dizyinz gouq raeuz okma, Caeuq daj ndaw fawz doengh boux haenq gyoengqraeuz he gouq gyoengqraeuz okma. 72 De yienghneix guh couh dwg cojgvaq cojgoeng raeuz, Mbouj lumz gaxgonq de yiemzyiemz suzsuz dingh goq hih gij baujcingq lienz diuzgyenq mwnq, 73 Couh dwg de doiq cojgoeng raeuz Yaqbwzlahhanj baujcingq goq hih. 74 De hawj gyoengqraeuz ndaej daj ndaw fawz dizyinz duet okma, Hawj raeuz mbouj you mbouj heiq hih swqhaeuh de, 75 Baenx seiqvunz cungj ciuq gij cawjeiq de guh gij hab'eiq habhoz de, swqhaeuh de. 76 De caiq naeuz: “Lwg gou hax, vunz ij heuh mwngz dwg boux cenz gij vah gienz akak rengzrengz dih Cangqdiq he, aenvih mwngz ij bae gaxgonq bouxcawj guh cwnjbiq ndei hawj de, 77-78 bae naeuz gij vunz de ni, hawj gyoengqde rox: Aenvih Cangqdiq sim'unq couh hawj vunz mienx coih hwj ndaej gouq. Vih yienghneix, de caemh baij boux he daj gwnzmbwn roengz daeuj; boux de luj doengxhaet hih gyangjngoenz, ndaej ciuq rongh hawj raeuz, 79 ciuq rongh hawj gij vunz lau rai, mbouj rox Cangqdiq he, yinx hawj raeuz byaij hozbingz dih roen.” 80 Couh yienghneix, laeq lwgngez neix menhmenh hung lo, ndangdaej giencangq, caemh dwg simndei simsoh hih vunz. De mijyaengz ok naj youq gij vunz Hijswzlez ndaw de cenz gij vah Cangqdiq hih mwhde, cungj dwg youq rogndoi youq he.
1 Youq Yozhanq seng ndaej mbouj geij caez hih mwh he, goengjvuengz Lozmaj, Yezgujswqduz, mingqlingq naeuz ij yinzgouj bujcaz, sojhij Lozmaj sojmiz dih vunz cungj ij daenghgiq. 2 (Mbat neix dwg daixit mbat yinzgouj bujcaz, caemh dwg Gihlijniuj guenj Siqliqyaq diqgih hih mwhde.) 3 Sojhij gak vunz cungj ij gag maj dieg bonjdeih bonjfaenh daenghgiq. 4 Yiengq Yozswz caemh maj. (Yozswz couh dwg boux caeuq Majliqyaq dingqvwnh dih boux mwnq.) Aenvih de dwg aen cuz Daqveiq dih vunz, yiengq de caemh dajlwh Gyahliqliq dih aen mbanj Nazsajlwz he maj daengz cojgoeng de Daqveiq dih aen singz mwnq, couh dwg Youzdaiq Saengj dih Bwzliqhaengz Singz. 5 De maj mwhde, de daiq Majliqyaq maj, aenvih de gaenq dingh caeuq de guh gvanjbaz lo, hoeng mwhde, Majliqyaq gaenq mizndang lo. 6 Gyoengqde maj daengz Bwzliqhaengz hih mwhde, Majliqyaq caemh daeng seng lo, 7 hoeng doenghheij bouq aeu hek mwnq, vunz cungj youq rim liux, mij mwnq youq he hawj gyoengqde youq lo, cungj daemjlaemz daemduq liux lo. Gajlaeng song boux de daiqlienz diengz max cungj youq. Couh yienghneix, Majliqyaq youq mwnq seng daeglwg de. De aeu boiq ma duk laeq lwg de hwj coengq haeuj ndaw ruhmax bae. 8-9 Haemh mwnq, bouxcai Cangqdiq sawqmwh ndwn youq dangqnaj gyoengq youq rog singz ciengx yiengz hen yiengz mwnq. Gij ronghndongq Cangqdiq rongh youq seiqhenz gyoengqde, guh hawj gyoengqde cungj mbeilek ij rai bae. 10 Gajlaeng bouxcai mwnq doiq gyoengqde naeuz: “Gaejyungh lau, gaejyungh lau! Daengj gwh naeuz sou ni gienh saeh ndei he; gienh saeh ndei neix ndaej hawj lajmbwn sojmiz dih vunz cungj gig vuenheij he. 11 Couh dwg, Cangqdiq baij daeuj dih vuengz, Gihduz, bouxcawj faenhsou, boux ij gouq vunz he, de dwg vih ij gouq faenhsou hwj ngoenzneix seng lo, seng youq ndaw singz Daqveiq, couh dwg Bwzliqhaengz Singz. 12 Faenhsou gaengjdingq raen miz laeq lwgnding he. De miz geiqhauh hwj, couh dwg aeu boiq ma duk hwj ninz youq ndaw ruhmax couh dwg lo.” 13 Boux de gangj sat le, sawqmwh miz buek bing Cangqdiq he caeuq de doengxcaez haenh Cangqdiq naeuz: 14 Youq gwnzmbwn najrongh hih cungj dwg gvi hawj Cangqdiq! Lajmbwn bingzan hih cungj ij gvi hawj gij vunz habhoz Cangqdiq he! 15 Gajlaeng gyoengq bing maj gwnzmbwn le, gij vunz ciengx yiengz mwnq naeuz: “Gyoengqraeuz haeuj Bwzliqhaengz Singz bae bax! Cangqdiq naeuz raeuz ni hih gienh saeh mwnq gaenq fatseng lo; daengj gyoengqraeuz bae yawjyawj!” 16 Gajlaeng gyoengqde couh nyungjnyungj nyatnyat haeuj singz bae, cimhraen Majliqyaq caeuq Yozswz, caeuq raen laeq lwgnding ninz youq ndaw ruhmax mwnq. 17 Gyoengqde cimhraen le, cungj boux cenz boux naeuz gij saeh laeq lwgnding neix, bouxcai Cangqdiq naeuz gyoengqde ni goq he. 18 Mboujguenj bouxlawz dingqri gij vunz ciengx yiengz gangj hih gij saeh neix, cungj roxnginh raen geizheih, 19 hoeng, Majliqyaq dauq dawz gij saeh neix geiq youq ndaw sim hwj, siengj bae siengj dauq. 20 Gajlaeng doengh boux ciengx yiengz mwnq dauq maj lo, doq maj doq haenh, mbouj dingz hih haenh Cangqdiq, aenvih Cangqdiq hawj gyoengqde dingqri caeuq caenra raen hih gij saeh neix; gij saeh neix caemh caeuq bouxcai Cangqdiq gangj naeuz gyoengqde ni hih doxdoengz liux. 21 Laeq lwgngez ngamq seng ndaej bet ngoenz, couh youq gwnz ndang de gozlij lo, caemhcaiq an coh hawj de heuh Yehsuh. Gij coh neix dajlwh Majliqyaq mijyaengz mizndang mwhde, bouxcai gaenq an ndei hawj de lo. 22 Ciuq Mohsih dih fazliz, seng lwgngez, daengj daengz ndaej daengz muenx ngoenz gancengh le, ij daiq lwgngez bae hawj Cangqdiq. Yiengq, song boux de couh daiq laeq lwgngez de bae Yehluqsajlaengj Singz, daiq de bae hawj Cangqdiq, 23 aenvih youq ndaw fazliz Cangqdiq ndaw de sij naeuz: Moix it ranz dih daeglwg daeuz bietdingh ij gvi hawj Cangqdiq. 24 Ndaw de caemh vanzlij sij naeuz: Ij aeu doiq roegraeu he cixnaeuz song duz roegguqgaplwg bae dajbwiz. Gajlaeng gyoengqde couh ciuq fazliz dingh hih yienghmwnq bae guh lo. 25 Yiengq, youq Yehluqsajlaengj ndaw singz ndaw de miz goeng he heuh Sihmenq. De dwg boux gingqcungh Cangqdiq he, caemh soenhsouj Cangqdiq fazliz dih vunz. De itcig muengh boux ij nai gij vunz Hijswzlez hih boux mwnq daeuj. Hoenzsaenz Cangqdiq caemh doz youq gwnz ndang de. 26 Hoenzsaenz Cangqdiq gaenq hawj de rox daengz, youq de mijyaengz rai cihsenz, ndaej raen daengz Gihduz, Cangqdiq baij daeuj dih vuengz. 27 Aenvih Hoenzsaenz Cangqdiq hawj de haeuj ndaw veizciengz gunghdenq Cangqdiq bae, ngamqluj mwhneix, Yozswz caeuq Majliqyaq umj Yehsuh laeq lwgngez neix caemh haeuj bae ij ciuq gij fazliz gveihdingq he bae guh hih mwhde. 28 Sihmenq raen le, couh umj laeq lwgngez neix, couh haenh Cangqdiq naeuz: 29 “Bouxcawj gou hax, gaxgonq mwngz gangj goq dih saeh seizneix gaenq ndaej raen lo! Hawj gou, bouxhoiq mwngz, rai ra caemh laep lo, 30-31 Aenvih gou caenra raen mwngz youq dangqnaj sojmiz hih vunz cwnjbiq hih boux gouq vunz neix. 32 De luj aen daeng rongh sagsag he; Gij rongh de ndaej hawj gij vunz vaihguek rox Cangqdiq, De caemh hawj gij vunz Hijswzlez najrongh.” 33 Bohmeh laeq lwgngez neix dingqri Sihmenq gangj hih doenghgij vah neix le, cungj raen geizheih ij rai bae. 34 Sihmenq vanzlij hoh fuk hawj gyoengqde, caiq doiq Majliqyaq naeuz: “Laeq lwgngez neix ij miz haujlai Hijswzlez vunz mbouj sinq de; hoeng, mbouj sinq de hih couh ngaiz satsoq. Caemh miz haujlai vunz sinq de; sinq de hih couh ndaej raen ndei. De caemh miz haujlai vunz fanjdeiq de soj daiqbiuj hih, 35 yiengq, caemh dwg vih yienghneix hwj ndaej yawj ok ndaw sim vunz dwg ndei haj yak. Caemh vih yienghneix mwngz ngaiz siengsim ij rai, luj miz cax ndaemq youq ndaw sim mwngz nwih.” 36 Youq mwnq caemh miz meh cenz gij vah Cangqdiq he, gij coh de heuh Yaqnaz. De dwg aen cuz Yaqsez hih vunz, dwg dah lwgsau Fazneiqliz. De lij hauxseng mwhde, ngamq haq ndaej caet bi, goeng de couh rai lo, de couh ngaiz soujmaiq lo. Seizneix de gaenq laux liux lo, 37 gaenq ndaej betcib seiq bi lo. De cungj dwg youq gunghdenq Cangqdiq youq, ngwnzngoenz cungj gingqbaiq Cangqdiq, siengzseiz lekdungx gouzcam Cangqdiq. 38 Mwh Sihmenq vanzlij caeuq Yozswz caeuq Majliqyaq gangj vah hih mwhde, de couh byaij goqbae haenh Cangqdiq. Gajlaeng de vanzlij doiq sojmiz muengh Cangqdiq daeuj cueg gij vunz Hijswzlez hih vunz gangj gvanhhih Yehsuh dih saeh. 39 Couh yienghneix, Yozswz caeuq Majliqyaq ciuq Cangqdiq dingh dih gveihdingq bae guh le, gajlaeng couh maj Gyahliqliq dieg bonjdeih de aen mbanj Nazsajlwz lo. 40 Yiengq laeq lwgngez neix menhmenh maj hung lo, ndangdaej cix giencangq cixcaemh rox faenbied ndei caeuq yak, gijmaz wnggai guh, gijmaz mbouj wnggai guh, gwnz ndang de caemh miz gij fuk Cangqdiq. 41 Binaengz daengz aen ciet Bienqgoqbae he, bohmeh de cungj bae Yehluqsajlaengj goq aen ciet neix. 42 Yiengq mwh Yehsuh ndaej cibngeih bi hih mwhde, gyoengqde caemh luj binaengz ityiengh bae goq ciet, hoeng mbat neix gyoengqde daiq Yehsuh itheij bae. 43 Goq aen ciet neix le, gyoengqde couh ma ranz lo, hoeng, Yehsuh mbouj gaen gyoengqde maj; de lij youq Yehluqsajlaengj youq. Bohmeh de caemh it di cungj mbouj rox. 44 Aenvih vunz daiq lai lai, song boux de naemqnaeuz de gaen gij vunzlai byaij lah. Daengj daengz gyoengqde byaij baenxngoenz roen le, cij rox naeuz mbouj dwg, cij gaihcij youq doenghheij baengzyoux caencik ndaw de cimh. 45 Hoeng, song boux de cimh bae cimh dauq, cungj cimh mbouj raen de. Gajlaeng song boux de couh doiqyungz bae Yehluqsajlaengj cimh. 46 Cimh daengz daixsam ngoenz le, song boux de cij youq ndaw veizciengz gunghdenq Cangqdiq cimh ndaej raen de, raen de naengh youq ndaw gyoengq lauxsae son Singqgingh mwnq, dingq gyoengqde gangj vah. De doq dingq doq cam gyoengqde, 47 guh hwj youq mwnq sojmiz hih vunz raen de yienghlawz yienghlawz cam, yienghlawz yienghlawz dap le, cungj raen geizheih raixcaix. 48 Bohmeh de raen de le, caemh raen geizheih. Gajlaeng daxmeh de couh doiq de naeuz: “Lwg hax! Mwngz vihmaz ij yienghneix doiq raeuz hax? Mwngz rox lwi, boh mwngz caeuq gou cimh mbouj raen mwngz, cungj heiq hwj ij rai lo, mwngz rox lwi? Hawj raeuz dauqcawq bae cimh mwngz!” 49 Hoeng, Yehsuh engq dauq han naeuz: “Faenhsou vihmaz ij cimh gou nex? Nanzdauh faenhsou mbouj rox gou wnggai youq ndaw ranz daxboh gou maz?” 50 Hoeng, bohmeh de cungj dingq mbouj rox gij vah de dauqdaej dwg gijmaz iqswh. 51 Gajlaeng Yehsuh caemh gaen bohmeh de maj Nazsajlwz lo. De gig naeuzdingq, yienghyiengh cungj swnh bohmeh de, daxmeh de caemh dawz de sojmiz hih saeh geiq youq ndaw sim. 52 Couh yienghneix, Yehsuh hung lo, ngoenz beij ngoenz rox faenbied ndei caeuq yak, caemh ngoenz beij ngoenz rox gijmaz wnggai guh, gijmaz mbouj wnggai guh. Cangqdiq caemh gig aiq de, gij vunz caemh gig haenj de.
1 Mwh Dizbiqliuz youq Lozmaj dang vuengz dih daixcibhaj bi, Baenjdiuh Bijlahdoh dang Youzdaiq Saengj dih saengjcangj, Hihliz dang dieg Gyahliqliq dih daeuzdaeuz, daegnuengx de Feihliz dang dieg Hijdujliqyaq caeuq dieg Dwzlahgojniz dih daeuzdaeuz, Lijsajnez dang dieg Yaqbijliqniz dih daeuzdaeuz, 2 Yaqnaq caeuq Gaihyaqfaz dang goengjsae dajbwiz daeuzdaeuz hih mwhmwnq, gij vah Cangqdiq haeuj bae daengz youq rogndoi youq hih Yozhanq, daeglwg Sajgyahliqyaq. 3 Yozhanq rox le, couh bae fueng diuz dah Yozdanq, bae mwnq cenzgangj, couh dwg naeuz cenzgangj gvanhhih nginh loek, gaij goqma ndaej mienx coih dih sijlij. 4 Caemh luj bonj saw Hijcaiqyaq boux cenz gij vah Cangqdiq he sij naeuz: Youq rogndoi miz vunz hemq naeuz: “Cwnjbiq diuz roen he hawj bouxcawj; Coih diuz roen soh hwj hawj de byaij. 5 Sojmiz dih bya'bya lueglueg cungj ij dienz bingz bae; Bya hung bya iq cungj ij canj bingz bae. Vwtvwt vanvan hih roen cungj ij coih soh bae; Gumzgumz gemxgemx hih roen cungj ij dienz bingz bae. 6 Lajmbwn sojmiz hih vunz cungj ndaej yawjraen Cangqdiq gouq vunz.” 7 Yozhanq yienghneix cenzgangj le, couh miz haujlai vunz daeuj ij hawj Yozhanq sijlij, hoeng Yozhanq rox gij vunz gaenhbaenj mbouj dwg daj ndaw sim nginh loek gaijgoq, couh naeuz gyoengq vunzlai naeuz: “Doenghgij vunz doegdoeg siebsieb faenhsou hax! Faenhsou naemqnaeuz yienghneix guh couh ndaej deuz ok Cangqdiq fatheiq fad faenhsou lo hajx? 8 Faenhsou ij guh gij saeh ndaej cingqmingz naeuz faenhsou gaenq gaijgoq he. Gaejyungh naemqnaeuz faenhsou dwg gij lwglan Yaqbwzlahhanj le, Cangqdiq couh nyiuz gij coih faenhsou, faenhsou couh daekeiq vaujvauq lo! Gwh naeuz sou ni, Cangqdiq aeu doenghgij rin neix ma cungj ndaej seizbienh bienqbaenz gij lwglan Yaqbwzlahhanj. 9 Faenhsou couh luj go mak; famz go mak mbouj giet mak ndei hih couh ij ngaiz raemj gveng haeuj feiz bae. Faenhsou ij siujsim, Cangqdiq gaenq dawz fouj hwnjdaeuj ij raemj lo!” 10 Gyoengq vunz dingq le, couh cam de naeuz: “Yiengq gyoengqraeuz ij wnggai baenzlawz guh nej?” 11 Yozhanq han naeuz: “Bouxlawz miz song diuz buh hih, faen diuz he hawj boux mbouj miz he; miz gij doxgw hih caemh ij yienghneix guh.” 12 Caemh miz doenghgij vunz sou ceiq he daeuj ij hawj Yozhanq sijlij. Gyoengqde cam Yozhanq naeuz: “Lauxsae, raeuz wnggai baenzlawz guh nej?” 13 Yozhanq couh naeuz gyoengqde ni, naeuz: “Fazliz gveihdingq hawj sou sou geijlai, sou couh sou geijlai, mbouj ndaej lai sou.” 14 Caemhcaiq miz doengh boux dang bing he daeuj cam de naeuz: “Yiengq gyoengqraeuz nej? Gyoengqraeuz caemh wnggai baenzlawz guh?” Yozhanq caemh doiq gyoengqde naeuz: “Faenhsou mbouj ndaej bangjlaih vunz, mbouj ndaej hangz vunz haep vunz aeu ngaenz. Fat hawj faenhsou geijlai, faenhsou couh aeu geijlai; faenhsou wnggai rox gaeuq.” 15 Mwhde gij vunz cungj muengh Gihduz, Cangqdiq baij daeuj dih vuengz, daeuj, sojhij gyoengqde cungj gag nanq, Yozhanq aiq dwg boux Gihduz mwnq dinghluh. 16 Hoeng Yozhanq dauq doiq gyoengqde naeuz: “Gou cijmboujgoq aeu raemx ma sijlij hawj faenhsou lah; ij miz boux beij gou ak he daeuj. Boux de daiq gou ij bang de riuj haizcauj cungj mbouj lwnz daengz gou hwx. De ij yungh Hoenzsaenz Cangqdiq caeuq feiz ma hawj faenhsou sijlij. 17 Ndaw fawz de dawz lad, dawz ceh mienh coengq haeuj canghguq bae, sauq cengh caiqcangz, dawz doenghheij nyapnyangj he dwk haeuj ndaw feiz mbouj rox maet he bae vueng.” 18 Couh yienghneix, Yozhanq cenz gij ndei siuhsiz Cangqdiq, gangj baenx haujlai vah ma gienqmienx gij vunz. 19 De caemh ndaq goeng Hihliz dieg Gyahliqliq dih daeuzdaeuz, aenvih goeng de caeuq Hihlozdij, meh nuengxsimj de, caemh aenvih de guh baenx haujlai vaihsaeh. 20 Gajlaeng goq mbouj geijlai caez, goeng Hihliz guh gij saeh engqgya ya he, de engq dawz Yozhanq gyaeng haeuj ndaw lauz bae. 21 Mwh Yozhanq vanzlij mijyaengz ngaiz goeng Hihliz gyaeng hwnjdaeuj hih mwh de, miz baez he, Yozhanq cingq sijlij hawj vunz, yiengq Yehsuh caemh daeuj hawj de sijlij. Couh youq mwh Yehsuh caeuq Cangqdiq gangj vah hih mwhde, sawqmwh aen mbwn luj aen dou nwih hoi lo. 22 Hoenzsaenz Cangqdiq luj duz roegguqgap he mbin roengz gwnz ndang de daeuj, caemh miz sing daj gwnzmbwn doiq de naeuz: “Mwngz dwg daeglwg gou. Gou gig aiq mwngz; mwngz hawj gou roxnginh hab'eiq habhoz.” 23 Yehsuh ndaej samcib bi couh gaihcij guh gij saeh Cangqdiq baij hawj de guh he lo. Gij vunz yawj de dangq dwg daeglwg Yozswz. Yozswz dwg daeglwg Hihlij, 24 Hihlij dwg daeglwg Majdaz, Majdaz dwg daeglwg Liqveiq, Liqveiq dwg daeglwg Mwzgih, Mwzgih dwg daeglwg Yajnaz, Yajnaz dwg daeglwg Yozswz, 25 Yozswz dwg daeglwg Majdahdizyaq, Majdahdizyaq dwg daeglwg Yaqmohswh, Yaqmohswh dwg daeglwg Nazhungz, Nazhungz dwg daeglwg Hijswhliq, Hijswhliq dwg daeglwg Nazgaih, 26 Nazgaih dwg daeglwg Majyaz, Majyaz dwg daeglwg Majdahdizyaq, Majdahdizyaq dwg daeglwg Sihmeij, Sihmeij dwg daeglwg Yozswzgwz, Yozswzgwz dwg daeglwg Yozdaq, Yozdaq dwg daeglwg Yozyaqnaz, 27 Yozyaqnaz dwg daeglwg Liqsaj, Liqsaj dwg daeglwg Sojlozbahbwz, Sojlozbahbwz dwg daeglwg Sajlahdez, Sajlahdez dwg daeglwg Nizliq, Nizliq dwg daeglwg Mwzgih, 28 Mwzgih dwg daeglwg Yaqdij, Yaqdij dwg daeglwg Gohsangh, Gohsangh dwg daeglwg Hijmohdangh, Hijmohdangh dwg daeglwg Wj, Wj dwg daeglwg Yozsiq, 29 Yozsiq dwg daeglwg Hijliqhijseq, Hijliqhijseq dwg daeglwg Yozlingq, Yozlingq dwg daeglwg Majdaz, Majdaz dwg daeglwg Liqveiq, 30 Liqveiq dwg daeglwg Sihmenj, Sihmenj dwg daeglwg Youzdaq, Youzdaq dwg daeglwg Yozswz, Yozswz dwg daeglwg Yoznamz, Yoznamz dwg daeglwg Hijliqyaqgingq, 31 Hijliqyaqgingq dwg daeglwg Mijliqyaq, Mijliqyaq dwg daeglwg Maijnamz, Maijnamz dwg daeglwg Majdazdah, Majdazdah dwg daeglwg Nazdanh, Nazdanh dwg daeglwg Daqveiq, 32 Daqveiq dwg daeglwg Yehsih, Yehsih dwg daeglwg Ngozbiqdwz, Ngozbiqdwz dwg daeglwg Boh'ahswh, Boh'ahswh dwg daeglwg Sajmaenz, Sajmaenz dwg daeglwg Nazswnq, 33 Nazswnq dwg daeglwg Yaqmijnazdaz, Yaqmijnazdaz dwg daeglwg Yaqlanz, Yaqlanz dwg daeglwg Hihswhlwnz, Hihswhlwnz dwg daeglwg Fazlwzswh, Fazlwzswh dwg daeglwg Youzdaq, 34 Youzdaq dwg daeglwg Yajgoz, Yajgoz dwg daeglwg Hijsaj, Hijsaj dwg daeglwg Yaqbwzlahhanj, Yaqbwzlahhanj dwg daeglwg Dahlah, Dahlah dwg daeglwg Nazhoq, 35 Nazhoq dwg daeglwg Sihluz, Sihluz dwg daeglwg Lahnguz, Lahnguz dwg daeglwg Fazlwz, Fazlwz dwg daeglwg Hihbwz, Hihbwz dwg daeglwg Cahlah, 36 Cahlah dwg daeglwg Gaihnamz, Gaihnamz dwg daeglwg Yaqfazsaj, Yaqfazsaj dwg daeglwg Cenj, Cenj dwg daeglwg Nozyaq, Nozyaq dwg daeglwg Lahmwz, 37 Lahmwz dwg daeglwg Majdujsajlah, Majdujsajlah dwg daeglwg Hijnoz, Hijnoz dwg daeglwg Yajlez, Yajlez dwg daeglwg Majlwzlez, Majlwzlez dwg daeglwg Gaihnamz, Gaihnamz dwg daeglwg Hijnozswq, 38 Hijnozswq dwg daeglwg Caihdwz, Caihdwz dwg daeglwg Yaqdangh, Yaqdangh dwg Cangqdiq cauh okdaeuj he.
1 Yehsuh daj diuz dah Yozdanq dauq ma, gwnz ndang de cungj dwg miz Hoenzsaenz Cangqdiq. Hoenzsaenz daiq de bae daengz rogndoi. 2 Youq rogndoi, de gijmaz cungj mbouj gw, dungxiek seiqcib ngwnzngoenz, caemh ngaiz fangzvuengz, couh dwg fangz yak dih vuengz, yaeuh de. Yiengq de lek seiqcib ngwnzngoenz le, roxnginh dungxiek ij rai bae. 3 Gajlaeng, fangzvuengz caiq daeuj yungx de, sawq de, naeuz de, naeuz: “Hauhnaeuz mwngz dwg lwg Cangqdiq nex, mwngz couh mingqlingq ngauq rin neix, hawj de bienq menqbauh yawj!” 4 Yiengq Yehsuh han naeuz: “Singqgingh ndaw de sij naeuz: Vunz mbouj dwg caenhgag gauq miz gw cij ndaej lix nej.” 5 Fangzvuengz dingq de yienghneix gangj le, mbouj fug, couh daiq de bae daengz mwnq dieg sangsang he, caiq loengh ndaek cungj he hwj hawj de baex yaep ra he couh doq yawj ndaej raen lajmbwn sojmiz hih guek, 6-7 couh doq doiq de naeuz: “Mwngz yawj, lajmbwn sojmiz hih guek hih gienz caeuq yungzdaeuz cungj dwg gij gou liux. Hauhnaeuz mwngz baiq gou sax gou nex, gou couh dawz doenghgij neix soengq hawj mwngz, aenvih doenghgij neix Cangqdiq gaenq soengq hawj gou lo; gou haenj hawj byawz couh hawj byawz lo.” 8 Hoeng, Yehsuh engq han naeuz: “Ndaw Singqgingh ndaw de sij naeuz: Cangqdiq dwg mwngz dih cwnz. Ij baiq ij sax, caenhgag ndaej baiq ndaej sax de, caemh dwg caenhgag ndaej swqhaeuh de.” 9 Fangzvuengz vanzlij mbouj fug, caiq daiq de bae Yehluqsajlaengj, hawj de ndwn youq gwnz gunghdenq Cangqdiq mwnq ceiq sang he hwj doiq de naeuz: “Hauhnaeuz mwngz dwg lwg Cangqdiq nex, mwngz couh daj dineix diuq roengzbae, 10 aenvih ndaw Singqgingh ndaw de caemh sij naeuz: Cangqdiq raengq doengh bouxcai de, hawj bouxcai de baujhuq mwngz. 11 Singqgingh ndaw de vanzlij caemhcaiq sij naeuz: Bouxcai ij aeu gij fawz de ma raeuz mwngz, mbouj hawj mwngz bungq dawz rin.” 12 Gajlaeng, Yehsuh caemhcaiq han de naeuz: “Singqgingh ndaw de caemh naeuz: Mbouj ndaej sawq Cangqdiq, mwngz dih cwnz hah.” 13 Couh yienghneix, fangzvuengz yungh baenx geij cungj banqfaz ma yungx Yehsuh, hoeng Yehsuh cungj mbouj dingq de. Yiengq de raen mij banqfaz le, couh deuz lo, siengj daengj daengz daixlingh mbat menhcij caiq daeuj yungx de. 14 Yehsuh dauq ma daengz Gyahliqliq; gij bonjsaeh Hoenzsaenz Cangqdiq cungj dwg caeuq de youq. Yiengq de couh gig miz mingz, riengz bae baenx geij fueng. 15 De youq gak aen Youzdaiq veiqdangz son vunz; gij vunz bouxboux cungj haenh de. 16 Gajlaeng, de caiq bae aen mbanj Nazsajlwz, couh dwg de gaxgonq youq aen mbanj neix maj hung he. Daengz ngoenz ngoenzyietbaeg, de caemh luj bienqnaengz bae veiqdangz guh lijbaiq. Ngoenz mwnq de caemh ndwn hwnjdaeuj doeg Singqgingh hawj vunz dingq. 17 Yiengq miz vunz dawz gienj saw Hijcaiqyaq boux cenz gij vah Cangqdiq neix sij hih ndenq hawj de. De couh hoi gienj saw, hoi daengz mwnq he sij miz: 18 Gij Hoenzsaenz Cangqdiq daiq gou, aenvih de senj gou, hawj gou cenz gij ndei siuhsiz de hawj gij vunz gungz. De baij gou daeuj bauqgauq naeuz: “Ngaiz gaemh dawz hih ndaej coengq, rafangz hih yawj ndaej raen, souh yazbwz hih ndaej swqyouz,” 19 gij neix. Cangqdiq de seizneix ij guh gij neix lo, aenvih de baenxlai aiq vunz. 20 Yehsuh doeg daengz dineix sat le, couh gienj saw ndenq hawj boux de boiz, couh naengh roengzma. Mwhneix baenx cenz veiqdangz hih vunz cungj cuqhiq yawj de. 21 De naengh roengzma le, doiq gij vunzlai naeuz: “Haxbaenh faenhsou dingq hih duenh saw ndaw Singqgingh mwnq, ngoenzneix couh lingz okdaeuj lo!” 22 Gij vunz dingq de yienghneix gangj le, bouxboux cungj haenh de, caemh doeksaet de baenxlai rox yienghneix gangj vah. Gyoengqde couh naeuz: “Aeq, de mbouj dwg daeglwg Yozswz maz?” 23 Gajlaeng, Yehsuh doiq gyoengqde naeuz: “Gou rox, faenhsou gaengjdingq ij doiq gou gangj gawq sugvah neix naeuz: ‘Canghyw hax, yw bonjfaenh mwngz ndei hwj bax! Couh dwg naeuz gyoengqraeuz dingqri goq naeuz mwngz youq Gyahbwznungz Singz soj guh hih saeh, yiengq seizneix mwngz caemh youq dieg bonjfaenh mwngz guh mbat he lux.’” 24 Yehsuh caiq doiq gyoengqde naeuz: “Gou lauxsaed naeuz faenhsou ni lo, mij saek boux boux cenz gij vah Cangqdiq he youq dieg bonjfaenh ndaej miz vunz haenj de.” 25 De caiq naeuz: “Gou gangj gienh saeh he naeuz sou ni, couh dwg youq aen nienzdaiq Hijliqyaq dang boux cenz gij vah Cangqdiq he hih mwhde, aen mbwn lienzdaemh rengx baenx sam bi buenq baenx lai, dauqcawq cungj dwg iekvangh. Mwhmwnq gij vunz Hijswzlez miz haujlai meh vunzmaiq, 26 hoeng, Cangqdiq mij baij Hijliqyaq bae bang saek meh vunzmaiq, caenhgag baij de bae gaenh aen singz Sihdoenq hih aen mbanj heuh Sajlwzfaz he, bae bang mehmaiq linghvaih aen minzcuz he sat lo.” 27 Yehsuh gangj daengz dineix le, de vanzlij caiq naeuz: “Youq aen nienzdaiq Hijliqcah dang boux cenz gij vah Cangqdiq hih mwhde, youq Hijswzlez caemh miz haujlai vunz hwnj mazfung, hoeng dauq dwg boux Siqliqyaq vunz heuh Naijmanq he ndaej yw ndei sat lo; lij lw hih vunz cungj mij saek boux ndaej yw ndei.” 28 Gij vunz dingq Yehsuh gangj doenghgij vah neix le, couh baenx cenz veiqdangz hih vunz cungj hujheiq dengxdengx hwj 29 boenq Yehsuh ok rog singz bae. Aen singz neix dwg hwnq youq gwnz dingjbya he; gyoengq vunz boenq Yehsuh bae daengz henz bangxdat le, couh ij dawz de gveng roengzbae lo, 30 hoeng, Yehsuh dauq mbouj you mbouj heiq hih daj ndaw gyoengq vunzlai mwnq byaij deuz. 31 Gajlaeng Yehsuh caiq bae Gyahbwznungz Singz, couh dwg youq dieg Gyahliqliq he. Ngoenzyietbaeg de bae veiqdangz son vunz. 32 Gij vunz dingq de gangj hih vah cungj raen geizheih raixcaix, baenxlai miz vi. 33 Yiengq youq mwnq miz boux ngaiz fangz doz he. Boux de youq ndaw veiqdangz sawqmwh hemq Yehsuh naeuz: 34 “Aex! Mbanj Nazsajlwz dih Yehsuh, mwngz daeuj dineix guxmaz nex? Mwngz ijsiengj daeuj cawz gyoengqraeuz hajx? Gou rox mwngz dwg byawz hah; mwngz couh dwg boux gvi hawj Cangqdiq he hih boux vunz mwnq he!” 35 Yehsuh dingq le, ndaq de naeuz: “Haep bak, mboujcwnj gangj vah! Majcangq daj gwnz ndang de ok ma!” Yehsuh ngamq ndaq sat bak, duz fangz couh hawj boux vunz mwnq laemx youq dangqnaj gyoengq vunzlai, couh ok ma lo. Ok ma le, boux de caemh mij naih saek yiengh. 36 Gyoengq vunz raen yienghneix le, cungj raen geizheih ij rai bae, couh lwnh naeuz: “Geizheih lo! Gijn'x dwg gijmaz saeh nex? De gingqyienz miz gienz miz rengz boenq fangz, fangz caemh dingq de hwj ok daeuj lo!” 37 Couh yienghneix, gvanhhih Yehsuh dih siuhsiz cungj cenz bae daengz seiqhenz dieg de. 38 Gajlaeng Yehsuh daj veiqdangz ok ma le, couh bae laeng Sihmaenz. Mwhde mehdai Sihmaenz ngaiz fatbingh fatndat, yiengq gij vunz ndaw ranz de couh gouz Yehsuh, hawj Yehsuh yw de. 39 Yiengq Yehsuh couh bae daengz henz ndang mehdai de ndwn hwj ndaq gij fatndat. Ndaq le, gij ndat couh majcangq doiq lo; mehdai de caemh doq ndaej hwnq lo. Meh de hwnq le, couh daih gyoengqde. 40 Ngoenz mwnq gyangjngoenz doek le, miz vunz daiq doenghheij vunz miz bingh he; mboujguenj bingh maz, cungj daiq daeuj hawj Yehsuh yw. Yiengq Yehsuh baex coengq fawz hwnj gwnz ndang boux bingh de bae, boux de couh doq ndei lo. 41 Caemh miz haujlai vunz ngaiz fangz doz, doengh duz fangz mwnq caemh ok ma lo. Doengh duz de doq ok ma doq hemq Yehsuh naeuz: “Mwngz dwg lwg Cangqdiq!” Gajlaeng Yehsuh naeuz gyoengqde, mboujcwnj gyoengqde gangj vah. Yehsuh yienghneix naeuz gyoengqde dwg aenvih de mbouj siengj hawj gyoengqde naeuz de dwg Gihduz. 42 Couh yienghneix, daengz ranzrongh le, Yehsuh couh bae daengz mwnq haemq dingh mij'z vunz he bae, guh hwj gyoengq vunz cungj dauqcawq bae cimh de. Gajlaeng cimhraen de le, couh mbouj siengj hawj de bae daixlingh dieg. 43 Hoeng, Yehsuh doiq gyoengqde naeuz: “Gou daeuj dineix, dwg Cangqdiq baij gou daeuj, ij hawj gou dawz guek de dih ndei siuhsiz cenz naeuz vunz ni lah. Sojhij gou caemh ij bae lingh aen singz cenzgangj naeuz gij vunz ni cij ndaej.” 44 Couh yienghneix, Yehsuh youq dieg Youzdaiq dih doenghheij veiqdangz he cenzgangj gij vah Cangqdiq.
1 Miz mbat he, Yehsuh ndwn youq henz aen huz Gwznizsajlwz (couh dwg Gyahliqliq Haij he). Gij vunz daeuj gvaengz de, gvaengz hwj rim bae, ijsiengj dingq de gangj gvanhhih Cangqdiq dih vah. 2 Ngamqluj de youq mwnq yawjraen miz song aen ruz dingz youq henz de. Gij vunz dwk bya caemh mij youq gwnz de, gaenq roengz ruz ma swiq fan muengxbya lo. 3 Yiengq miz aen he dwg aen Sihmaenz; Yehsuh couh hwnj aen ruz de bae, couh naeuz hawj de cengj aen ruz ok bae liz henz hamq hwj. Aen ruz liz henz hamq di he le, Yehsuh couh naengh roengzma, doiq gyoengq vunz mwnq gangj gvanhhih Cangqdiq dih ndei siuhsiz. 4 De gangj sat le, couh doiq Sihmaenz naeuz: “Vaij aen ruz ok mwnq laeg he bae, dwk bya.” 5 Sihmaenz han de naeuz: “Goengjsae hax, gyoengqraeuz gaenq dwk baenxngwnz, caemh dwgrengz baenxngwnz lo hoeng, cungj mij dwk ndaej saek duz haem. Yiengq, giqyienz mwngz seizneix naeuz vwz, raeuz couh sawqsawq dwk yawj sat leq.” 6 Sihmaenz yienghneix gangj le, caemh vad ruz ok mwnq laeg he bae, caemh vanq muengx. Gajlaeng gyoengqde muengx ndaej baenxbienh bya, guh hwj fan muengx ij vaih bae. 7 Gyoengqde raen yienghneix le, couh vad fawz heuh gij doih daixlingh aen ruz mwnq goq daeuj bang. Gyoengqde goq daeuj le, couh dawz gij bya coux haeuj ndaw ruz bae, coux ndaej baenx song ruz rim, guh hwj aen ruz ij caem senxsenx bae. 8-9 Sihmaenz caeuq gyoengq vunz dwk bya he raen yienghneix le, cungj raen geizheih, doeksaet dwk ndaej baenx lai bya. Yiengq de couh vaiqdi youq dangqnaj Yehsuh gvih roengzma naeuz: “Bouxcawj hax, mwngz lizgaih gou bax; gou dwg boux miz coih he dih vunz!” 10 Caeuq de doxgaep dwk bya hih song daeglwg Sihbiqdaiq, Yajgoz caeuq Yozhanq, raen le, caemh doeksaet dwk ndaej baenx lai bya. Yiengq Yehsuh couh doiq Sihmaenz naeuz: “Gaejyungh lau! Daj ngoenzneix hwnj, mwngz ij sou ndaej vunz caemh luj seizneix mwngz sou ndaej hih bya.” 11 Gajlaeng, gyoengqde rag song aen ruz hwnj hamq le, gijmaz cungj mbouj aeu, couh gaen Yehsuh lo. 12 Miz mbat he, Yehsuh youq aen singz he, aen singz mwnq miz boux hwnj mazfung he. Boux de raen Yehsuh le, couh bomz roengz doem bae gouz Yehsuh naeuz: “Bouxcawj gou hax, gouz mwngz yw gou bax! Hauhnaeuz mwngz haenj nex, mwngz gaengjdingq ndaej yw gou ndei hih!” 13 Yehsuh raen de yienghneix le, couh iet fawz oemj laeng de bae naeuz: “Gou haenj yw mwngz hah; mwngz ndei lo bax!” Yehsuh ngamq gangj gawq neix sat bak, gij bingh mazfung de couh doq ndei lo. 14 Gajlaeng, Yehsuh raengq boux de naeuz: “Mwngz mbouj ndaej gangj gij saeh neix naeuz vunz ni. Mwngz ij bae laeng boux guh dajbwiz he, hawj de gyenjcaz yawj, caemh ij ciuq Mohsih dih gveihdingq dawz gij dajbwiz bae bwiz Cangqdiq, hawj gij vunzlai cingqmingz naeuz mwngz bingh ndei lo.” 15 Yehsuh yienghneix raengq, boux de caemh yienghneix guh lo. Hoeng, gvanhhih Yehsuh dih siuhsiz cenz bae engqgya vaiq, engqgya gyae, engqgya miz vunz lai daeuj dingq de gangj vah, caemh miz haujlai vunz muengh de ndaej yw gij bingh gyoengqde. 16 Gannaeuz yienghneix lah, hoeng, Yehsuh caemh siengzseiz lij gag bae rogndoi caeuq Cangqdiq gangj vah. 17 Miz ngoenz he, Yehsuh son vunz. Mwhde caemh miz gij vunz gaep haeuj Fazliqcaiq baij he caeuq gij vunz Youzdaiq dih fazliz cenhgyah he naengh youq mwnq; gyoengqde dwg daj Gyahliqliq hah, Youzdaiq hah, caeuq Yehluqsajlaengj hah, geij mwnq dieg neix hih gak dieg daeuj he. Couh youq mwhneix Yehsuh caemh miz gij bonjsaeh Cangqdiq hawj de ndaej yw bingh he. 18 Gij vunz rox le, couh miz geij boux aeu damqgyaq ma ram boux vunz gyad he daeuj hawj de yw. 19 Hoeng, vunz daiq lai lai; mij banqfaz ndaej ram haeujbae. Gajlaeng, gyoengqde couh hwnj gwnz dingjranz bae cek vax, couh dawz boux vunz gyad mwnq daiqlienz aen damqgyaq de cungj daj gwnz dingjranz duengq roengz cungqgyan vunzlai bae daengz dangqnaj Yehsuh. 20 Yehsuh raen gyoengqde baenxlai miz sinqsim le, couh doiq boux vunz gyad mwnq naeuz: “Baengzyoux hax, gij coih mwngz gaenq ndaej mienx lo.” 21 Yiengq doengh boux Youzdaiq fazliz cenhgyah caeuq gij vunz gaep haeuj Fazliqcaiq baij he raen Yehsuh yienghneix naeuz le, couh lwnh naeuz: “Geizheih, ndaek ngauqm'z dwg byawz nex, gingqyienz gamj gangj gij vah daekcoih Cangqdiq he! Cawz Cangqdiq ok, mij'z vunz ndaej mienx coih hax.” 22 Yiengq Yehsuh rox ndaw sim gyoengqde ngeix gijmaz le, couh doiq gyoengqde naeuz: “Faenhsou vihmaz ij yienghneix ngeix nej? 23 Gou rox faenhsou mbouj sinq gou miz gij gienz Cangqdiq ndaej hawj vunz mienx coih he, aenvih mienx coih, vunz yungh ra ma yawj mbouj raen hih. Hoeng, hauhnaeuz gou heuh hawj vunz ndaej ndwn hwnjdaeuj nex, faenhsou couh rox gou miz gij gienz Cangqdiq lo. 24 Gou seizneix couh cingqmingz hawj faenhsou yawj, gou, Vunz dih Daiqbiuj, dwg lajmbwn boux miz gienz ndaej mienx coih he dih vunz lo.” De gangj doengh gawq neix sat le, couh doiq boux vunz gyad mwnq naeuz: “Gou naeuz hawj mwngz ndwn hwnjdaeuj! Dawz aen damqgyaq mwngz maj ranz lo bax!” 25 Yehsuh ngamq gangj sat, boux vunz gyad mwnq couh doq youq dangqnaj vunzlai ndwn hwnjdaeuj, couh soujsib aen damqgyaq de maj ranz lo. De vanzlij doq byaij doq haenh Cangqdiq, 26 guh hwj youq mwnq sojmiz hih vunz yawj hwj ra byaengqbyat bae. Gyoengqde caemh haenh Cangqdiq, naeuz: “Ox! Gyoengqraeuz ngoenzneix ndaej raen gij geizmiuj hih saeh he!” 27 Yehsuh yw boux gyad mwnq ndei le, couh ok ma lo. Ok ma le, de yawjraen boux guh sou ceiq he, gij coh de heuh Liqveiq (Liqveiq caemh heuh Majdaiq), naengh youq mwnq sou ceiq mwnq, couh doiq boux de naeuz: “Daeuj, gaen gou bax!” 28 Liqveiq dingq Yehsuh yienghneix naeuz le, couh doq vwtvak gij hong sou ceiq de, mbouj caiq guh sou ceiq haem lo, couh gaen Yehsuh bae lo. 29 Gajlaeng, Liqveiq youq ndaw ranz bonjfaenh de loengh byaek cingj hek, loengh hwj cienfanh hoengh he daih Yehsuh. De caemh cingj baenx haujlai boux guh sou ceiq he caeuq baengzyoux daeuj gw. 30 Yiengq doengh boux gaep haeuj Fazliqcaiq baij he caeuq doengh boux cuzhih gyoengqde hih Youzdaiq fazliz cenhgyah mwnq rox le, couh naeuz gij lwgsae Yehsuh naeuz: “Faenhsou vihmaz caeuq doenghheij vunz guh sou ceiq, doenghheij vunz miz coih mwnq gw haeux gw laeuj nej?” 31-32 Yehsuh dingq le, han naeuz: “Gou daeuj dineix, mbouj dwg hawj gij vunz gag naemqnaeuz bonjfaenh mij'z coih he gaijgoq nej; dwg hawj gij vunz miz coih he nginh loek gaijgoq lah. Couh dwg naeuz, ndang cangq hih vunz mboujyungh canghyw nej; yungh canghyw hih cungj dwg doenghheij vunz miz bingh he lah.” 33 Doengh boux mwnq dingq le, caiq naeuz: “Gij lwgsae Yozhanq caeuq gij lwgsae boux gaep haeuj Fazliqcaiq baij he siengzseiz lekdungx gouz Cangqdiq, hoeng gij lwgsae mwngz caenhrox gw, mbouj rox lekdungx.” 34 Gajlaeng Yehsuh couh yungh gij beijgangj hih ma doiq gyoengqde naeuz: “Faenhsou raen mbouj raen goq miz gojyez moq aeu yah cingj laeuj, mbouj hawj hek buenx gojyez moq gw goq haz? Raen haz? 35 Hoeng gou naeuz sou ni, baex daengz ngoenz vunz daeuj gaemh dawz gojyez moq bae he, daengz mwhmwnq, gyoengqde couh ij lekdungx lo.” 36 Yehsuh caiq naeuz: “Mij'z vunz mbek buh moq hwj aeu vangq boiq moq he ma fong haeuj diuz buh gaeuq he bae; yienghmwnq mbouj danhcij naeuz buh ndei bienq buh rwix, diuz buh gaeuq mwnq caemh yawjraen mbouj sam mbouj seiq. 37 Caemh mij'z vunz dawz laeuj moq coux haeuj daehnaeng gaeuq bae; yienghmwnq ngaiz gij laeuj moq cengq aen daehnaeng gaeuq ceg. Laeuj caemh roh okdaeuj, daeh caemh vaih. 38 Sojhij gij vunz cungj dwg dawz laeuj moq coux haeuj daehnaeng moq bae. 39 Hoeng, mij'z vunz naeuz gw gij laeuj diuh caez he le, caiq ijsiengj gw gij laeuj moq he; cungj dwg naeuz laeuj gaeuq ndei goq laeuj moq.”
1 Miz ngoenz ngoenzyietbaeg he, Yehsuh caeuq gij lwgsae de byaij goq reih mienh he bae. Boux lwgsae de iek le couh yot aeu riengz mienh ma nu hwj gw. 2 Yiengq gij vunz gaep haeuj Fazliqcaiq baij he raen le, couh naeuz: “Faenhsou vihmaz ij youq ngoenz ngoenzyietbaeg yot mienh ma nu hwj gw nej? Nanzdauh faenhsou mbouj rox youq ngoenz ngoenzyietbaeg guh hong dwg famqfaz hih mah?” 3 Gajlaeng, Yehsuh han naeuz: “Nanzdauh faenhsou mij doeg goq youq ndaw Singqgingh ndaw de sij miz Daqveiq goengjvuengz neix caeuq gyoengq gaen henz ndang de, youq mwh iek he guh gijmaz saeh mah? 4 Couh dwg de haeuj ndaw cangqbungz Cangqdiq bae, aeu gij bingj baij coengq bwiz Cangqdiq he ma gw, caemh aeu hawj gyoengq gaen henz ndang de gw. Gij bingj dajbwiz mwnq, bouxlawz cungj mbouj ndaej gw; caenhgag boux guh dajbwiz he cij ndaej gw he. Bouxlawz gw nex, couh suenq veizfanj Mohsih dih fazliz lo.” 5 Yehsuh caiq naeuz: “Gvanhhih ngoenzyietbaeg, caenhgag gou, Vunz dih Daiqbiuj, cij miz gienz naeuz guxmaz he.” 6 Caiq miz ngoenz ngoenzyietbaeg he, Yehsuh youq veiqdangz son Singqgingh. Youq ndaw veiqdangz mwnq miz boux he cik fawz gvaz de vej. 7 Yiengq doengh boux gaep haeuj Fazliqcaiq baij he caeuq doengh boux Youzdaiq fazliz cenhgyah he couh caegcaeg demq yawj, siengj yawj Yehsuh dwg mbouj dwg youq ngoenz ngoenzyietbaeg yw bingh, siengj ra congxmbongq cimh cingqgiq ma gauq Yehsuh, aenvih youq ngoenz ngoenzyietbaeg yw bingh couh suenq veizfanj Youzdaiq fazliz. 8 Yehsuh yawj ndaej ok gyoengqde dih yimhmaeuz le, couh doiq boux fawz vej mwnq naeuz: “Daeuj, daeuj dangqnaj vunzlai ndwn hwj.” Yehsuh yienghneix naeuz le, boux de caemh dingq Yehsuh hwj ndwn youq dangqnaj vunzlai. 9 Yiengq Yehsuh couh doiq doengh boux ijsiengj cingj de mwnq naeuz: “Gou cam faenhsou, youq ngoenz ngoenzyietbaeg, wnggai guh saeh ndei, cixnaeuz guh saeh yak saeh rwix; gouq vunz cixnaeuz haih vunz nej, sou naeuz?” 10 Yehsuh gangj doengh gawq neix sat le, yawjyawj gyoengq vunzlai, couh doiq boux fawz vej mwnq naeuz: “Iet cik fawz gvaz mwngz okdaeuj!” Boux de couh iet cik fawz gvaz de okdaeuj. Ngamq baex iet okdaeuj he, cik fawz gvaz de couh doq ndei ndwtndwt luj daixlingh cik lo, mij vej haem lo. 11 Yiengq doengh boux gaep haeuj Fazliqcaiq baij he caeuq doengh boux Youzdaiq fazliz cenhgyah mwnq raen yienghneix le, cungj ndatheiq ij rai bae, couh doxyuk hwj ij baenzlawz cingj Yehsuh. 12 Miz baez he, Yehsuh hwnj bya bae caeuq Cangqdiq gangj vah. De caeuq Cangqdiq gangj vah gangj baenxngwnz. 13 Daengz ranzrongh le, de couh heuh doenghheij lwgsae de daeuj, daj ndaw gyoengq lwgsae de senj aeu cibngeih boux okdaeuj. Yehsuh an doengh boux neix heuh guh ‘dwzbaijyienz.’ 14 Cibngeih boux neix dwg Sihmaenz (Yehsuh caemh an coh hawj de heuh Bijdwz; ‘Bijdwz’ couh dwg ‘rin’ dih iqswh), caemh miz daegnuengx de Anhdwzlez, caeuq Yajgoz, Yozhanq, Feihliz, Bahdohlozmaij, 15 Majdaiq, Dohmaj caeuq daeglwg Yaqlwzfeih Yajgoz, caeuq Gizcwnq Dangj dih Sihmaenz, 16 lij miz song boux gij coh de cungj dwg heuh Youzdaq; boux he couh dwg daeglwg Yajgoz, boux he couh dwg Gyahloz vunz, boux buenqduz hai Yehsuh mwnq. 17 Yehsuh senj doengh boux neix okdaeuj le, couh caeuq gyoengqde roengz bya ma lo, ma daengz mwnq dieg bingz he. Youq mwnq caemh miz haujlai lwgsae, caemh miz haujlai beksingq dajlwh dieg Youzdaiq hah, Yehluqsajlaengj hah, caeuq daj henz haij Daiqwj Singz caeuq Sihdoenq Singz daeuj hah, daeuj dingq de gangj vah, caemh muengh de yw bingh hawj gyoengqde. 18 Doenghgij vunz ngaiz fangz doz he caemh daeuj, yiengq caemh ndaej yw ndei lo. 19 Gyoengq vunz bouxboux cungj siengj lax de dek de, aenvih youq gwnz ndang de miz gij bonjsaeh he mwg okdaeuj ndaej yw gij bingh vunz. 20 Gajlaeng Yehsuh raen yienghneix le, couh yawjyawj gyoengq lwgsae de naeuz: “Gungz hih vunz hax, faenhsou miz fuk lo, aenvih faenhsou dwg haeuj guek Cangqdiq he hih vunz. 21 “Seizneix ngaiz iek hih vunz hax, faenhsou miz fuk lo, aenvih faenhsou couh ij miz gw imq lo. “Seizneix daej hih vunz hax, couh miz fuk lo, aenvih faenhsou couh ij riu lo. 22 “Vih gou, Vunz dih Daiqbiuj hwj ngaiz vunz haenq faenhsou, mbouj caeuq faenhsou doxndei, yiem faenhsou, riu faenhsou, naeuz faenhsou dwg vunz vaih hih, faenhsou miz fuk lo, 23 aenvih gij cojgoeng gyoengqde caemh yienghneix haenq doengh boux cenz gij vah Cangqdiq he. Faenhsou ij riuriu angqangq, aenvih youq Cangqdiq Bohmbwn mwnq miz baenxbienh cangj hawj faenhsou. 24 “Hoeng, fouq hih vunz hax, faenhsou satsoq lo, aenvih faenhsou gaenq ndaej faenh faenhsou lo. 25 “Seizneix miz gw hwj imqaq hih vunz hax, faenhsou satsoq lo, aenvih faenhsou couh ij ngaiz iek lo. “Seizneix riuriu angqangq hih vunz hax, faenhsou satsoq lo, aenvih faenhsou couh ij daej ngwdngwd lo. 26 “Gij vunz bouxboux cungj haenh faenhsou hih mwh he nex, faenhsou couh ij satsoq lo, aenvih doenghheij cojgoeng gyoengqde caemh yienghneix haenh boux gyaj boux cenz gij vah Cangqdiq he.” 27 De caiq naeuz: “Doengh boux dingq gou gangj he, gou naeuz sou ni, ij aiq gij dizyinz faenhsou, caemh ij doiq boux haenq faenhsou he ndei. 28 Mang faenhsou hih, faenhsou caemh ij hoh fuk hawj gyoengqde; yawj faenhsou ngawz hih, faenhsou caemh ij bang gyoengqde gouz Cangqdiq. 29 Hauhnaeuz miz vunz mbap mwngz mbiengj naj he nex, couh veq daixlingh mbiengj hawj de mbap; hauhnaeuz miz vunz dued aeu diuz buh baixrog mwngz nex, mwngz couh daiqlienz diuz buh baixndaw he cungj ajcaih de aeu. 30 Famz miz vunz gouz mwngz hih, mwngz couh ij wnggai dapwngq vunz, mbouj ndaej doi; miz vunz dued aeu gij doxgaiq mwngz hih, mwngz caemh gaejyungh naeuz hawj de boiz mwngz. 31 Faenhsou siengj hawj vunz baenzlaw doiq faenhsou hih, faenhsou caemh ij wnggai baenzlaw doiq vunz. 32 “Hauhnaeuz faenhsou caenhgag aiq boux aiq faenhsou he nex, yiengq faenhsou caemh ij miz maz ndaej hawj vunz haenh he nex? Hauhnaeuz dwg yienghmwnq, daiqlienz vunz vaih cungj caemh rox yienghneix guh hah. 33 Hauhnaeuz faenhsou caenhgag doiq doengh boux doiq faenhsou ndei he ndei nex, faenhsou caemh ij miz maz ndaej hawj vunz haenh hih nej? Daiqlienz vunz vaih cungj caemh rox yienghneix guh hah. 34 Hauhnaeuz faenhsou caenhgag ciq doxgaiq hawj doengh boux baezneix ndaej miz boiz mwngz he nex, yiengq faenhsou caemh ij miz maz ndaej hawj vunz haenh he nej? Luj yienghneix, daiqlienz doengh boux vunz vaih he cungj caemh ndaej ciq doxgaiq hawj doengh boux vunz vaih he hah, cijaeu gyoengqde ndaej boiz liux. 35 “Faenhsou ij aiq doengh boux caeuq faenhsou doxmiz haemzcaeuz he, caemh ij doiq de ndei, caemh ij ciq doxgaiq hawj de, hoeng mbouj ndaej muengh boux de boiz faenhsou. Yienghmwnq faenhsou couh ndaej cangjliq engqgya lai, caemh dwg caeuq ceiq miz gienz dih Cangqdiq guhfap doxdoengz, aenvih Cangqdiq caemh doiq doenghheij mbouj rox docih de hih caeuq guh doeg guh sieb hih vunz ndei hah. 36 Faenhsou ij rox nyiuz vunz, caemh luj Bohmbwn faenhsou, Cangqdiq, yienghmwnq rox nyiuz vunz. 37 “Faenhsou caemh gaejyungh lwnh naeuz vunz dwg vunz ndei vunz yak, yienghmwnq faenhsou caemh mbouj ngaiz Cangqdiq naeuz faenhsou lo; caemh mbouj ndaej dingh coih hawj vunz, yienghmwnq faenhsou caemh mbouj ngaiz Cangqdiq dingh coih hawj faenhsou lo. Faenhsou ij rox nyiuz vunz, yienghmwnq Cangqdiq caemh nyiuz faenhsou lo. 38 Faenhsou ij rox hawj vunz, yienghmwnq Cangqdiq caemh cij hawj faenhsou; faenhsou yungh gijmaz ma rau hawj vunz, Cangqdiq caemh yungh gijmaz ma rau hawj faenhsou—mbouj danhcij naeuz hawj faenhsou, vanzlij hawj engqgya lai, simqciq ngauzngauz gyokgyok, naenxnaenx, rimrim radrad hwj hawj faenhsou.” 39 Yehsuh caiq yungh beijgangj ma doiq gyoengqde naeuz: “Rafangz baenzlaw daiq rafangz nej? Yienghmwnq mbouj dwg song boux cungj ngaiz doek roengz ndaw cingj he bae haz? 40 Lwgsae mbouj beij lauxsae cungqyauq, hoeng, daengj de hag ndaej rox le, caemh rox ndaej luj lauxsae.” 41 De vanzlij caiq naeuz: “Mwngz vihmaz caenhgag yawj ndaej raen ndaw ra beixnuengx mwngz miz nwnh faex, dauq yawj mbouj raen ndaw ra bonjfaenh miz gyaengh faex he nej? 42 Mwngz yawj mbouj raen ndaw ra bonjfaenh miz faex, ij baenzlwh ndaej naeuz boux beixnuengx mwngz, naeuz: ‘Daeuj, daengj gou dawz nwnh faex ndaw ra mwngz ok!’ yienghmwnq naeuz nej? Mwngz gyajcang guh vunz simndei simsoh hwj! Gou naeuz mwngz hax, mwngz vanzlij dwg sien dawz gyaengh faex ndaw ra mwngz ok bax; yienghmwnq mwngz cij yawj ndaej raen cingsuj, cij ndaej dawz nwnh faex ndaw ra boux beixnuengx mwngz okdaeuj hah.” 43 De vanzlij caiq naeuz: “Faex ndei mbouj dawz mak yaez; faex yaez caemh mbouj dawz mak ndei. 44 Faex ndei faex yaez, yawj gij mak de couh ndaej faen okdaeuj. Gij vunz gaengjdingq mbouj daj ndaw caz oen mbaet mak uzvahgoj, caemh mbouj daj ndaw caz cah mbaet mak buzdauz. 45 Aen sim vunz caemh luj canghguq coengq doxgaiq. Simndei hih vunz, dawz okdaeuj dih doxgaiq caemh dwg ndei; doegsieb hih vunz, dawz okdaeuj dih doxgaiq caemh dwg gij yaez he. Ndaw sim vunz caeng miz gijmaz, caemh gangj gijmaz okdaeuj.” 46 De vanzlij caiq naeuz: “Faenhsou vihmaz ij heuh gou ‘Bouxcawj hax, bouxcawj’ heuh hwj dwk sadsad, hoeng gan mbouj ciuq gij vah gou gangj hih yienghmwnq bae guh nej? 47 Gou naeuz sou ni hax, doengh boux daeuj laeng gou dineix, dingq gou gangj, caemh ciuq gij vah gou gangj hih yienghmwnq bae guh hih, luj guxmaz nej? 48 Gou naeuz sou ni, couh luj boux guh ranz, sien vat hauxranz laeglaeg daengz doem saed doem cing bae cij roengz giek guh ranz. Yiengq cungjsuenq naeuz daengz raemxdumh raemx hung daeuj cung, aen ranz neix ciuqyiengh gaenj dwtdwt, mbouj doengh saek di, aenvih aen ranz neix roengz giek cienfanh gaenj he. 49 Hoeng doengh boux gan dingq gou gangj, mbouj ciuq gij vah gou bae guh hih, couh luj boux hwnq ranz youq gwnz bingz doem mij miz hauxranz he. Raemx baex cung he, couh doq doemqdak liux lo.”
1 Yehsuh doiq gyoengq vunz gangj sat doenghgij vah neix le, couh bae Gyahbwznungz Singz lo. 2 Youq mwnq miz boux Lozmaj lienzcangj he dih bouxhoiq de bingh lo, bingh hwj ijvanh rai bae. Boux lienzcangj neix gig yawjdij bouxhoiq de. 3 Yiengq de dingq naeuz Yehsuh dih saeh le, couh baij geij boux Youzdaiq vunz gangj vah couh baenz he bae gouz Yehsuh, gouz de daeuj gouq bouxhoiq de. 4 Gyoengqde bae daengz Yehsuh mwnq le, couh gouz Yehsuh naeuz: “Gouz mwngz gouq bouxhoiq lienzcangj bax! Boux lienzcangj neix boiqndaej mwngz bang de hwj, 5 aenvih de aiq gij vunz raeuz; gannaeuz de mbouj dwg gij vunz raeuz lah, hoeng de vanzlij hwnq veiqdangz hawj gyoengqraeuz.” 6 Yehsuh dingq gyoengqde yienghneix naeuz le, couh gaen gyoengqde bae. Mwh ijvanh bae daengz aen ranz de hih mwhde, boux lienzcangj mwnq caiq hawj geij boux baengzyoux bae cimh Yehsuh, hawj gyoengqde doiq Yehsuh naeuz: “Goengjsae hax, gou mbouj gamj mazfanz mwngz daeuj daengz ranz gou; gou mbouj boiqndaej cingj mwngz daeuj laeng gou. 7 Gou caemh gag rox, gou mbouj boiqndaej bae ciep mwngz cingj mwngz. Cijaeu mwngz naeuz gawq he, bouxhoiq gou couh ndaej ndei lo, 8 caemh luj youq baixgwnz gou miz bouxguen cijveih gou, youq baixlaj gou caemh miz swqbingh dingq gou cijveih. Cijaeu gou mingqlingq bouxlawz naeuz: ‘Bae!’ bouxlawz couh bae; naeuz: ‘Daeuj!’ bouxlawz couh daeuj; doiq bouxhoiq gou naeuz: ‘Mwngz guh gij neix,’ de couh bae guh lo.” 9 Yehsuh dingq doenghgij vah neix le, raen geizheih raixcaix, couh yiengq goq gyoengq vunz gaen de bae he naeuz: “Gou naeuz sou ni, luj de yienghneix baenxlai miz sinqsim hih, cungjsuenq naeuz youq ndaw Hijswzlez vunz ndaw de, gou cungj mijyaengz raen miz goq.” 10 Gajlaeng doengh boux baij bae cimh Yehsuh he ma daengz ranz boux lienzcangj mwnq le, gaenq raen bouxhoiq de bingh ndei lo. 11 Gij saeh neix goq le, Yehsuh caeuq doengh boux lwgsae de bae aen mbanj heuh Nazinh he, caemh miz baenx gyoengq vunz gaen youq gajlaeng hangx de. 12 Yiengq ngamq bae daengz gaenh bakmbanj mwnq, couh roeb daengz miz vunz ram vunzrai okdaeuj. Boux vunzrai neix dwg daeglwg mehmaiq he; mehmaiq neix caenhgag miz daeglwg dog neix sat lo. Aenvih mehmaiq neix ciuq mwnqde dih laehbeih, de caemh bae oksang; ndaw mbanj mwnq caemh miz haujlai vunz caeuq de bae oksang. 13 De raen yienghneix le, couh hojsik mehmaiq mwnq hwj vued de naeuz: “Mehsimj hax, gaej daej, gaej daej!” 14 De gangj gawq neix sat le, couh byaij goqbae aeu fawz yaz dawz diuz faex ram he hwj, yiengq doengh boux ram mwnq couh dingz roengzma lo. Yehsuh couh doiq boux vunzrai mwnq naeuz: “Hauxseng hax, gou naeuz hawj mwngz hwnq hwnjdaeuj!” 15 Yehsuh baex gangj gawq neix sat he, boux vunzrai mwnq couh doq naengh hwnjdaeuj, caemh gangj vah okdaeuj. Couh yienghneix, Yehsuh gouq boux vunzrai neix singj hwnjdaeuj lo. Gajlaeng de couh daiq boux de bae hawj daxmeh de lo. 16 Yiengq gyoengq vunz raen yienghneix le, cungj doeksaet ij rai bae, caemh haenh Cangqdiq naeuz: “Miz boux veijdaq dih boux cenz gij vah Cangqdiq he youq laeng gyoengqraeuz dineix lo!” Vanzlij caiq naeuz: “Ox! Cangqdiq cingqcaen cauqguq gij vunz de lo!” 17 Couh yienghneix, Yehsuh dih gienh saeh neix cenz baenx cenz Youzdaiq caeuq seiqhenz gaenh de. 18 Gajlaeng, doengh boux lwgsae Yozhanq dawz sojmiz hih doenghgij saeh neix cungj gangj naeuz Yozhanq ni. 19 Yozhanq dingq le, couh baij song boux lwgsae bae cimh Yehsuh, hawj song boux de bae cam Yehsuh, naeuz: “Mwngz couh dwg boux ndaw Singqgingh naeuz goq ij daeuj hih boux mwnq laj, cixnaeuz raeuz caiq ij daengj daixlingh boux lah?” 20 Yiengq song boux mwnq bae daengz Yehsuh mwnq le, couh doiq de naeuz: “Boux bang vunz sijlij dih Yozhanq hawj raeuz daeuj cam mwngz, couh dwg naeuz boux ijvanh daeuj he dwg mwngz lwi, cixnaeuz gyoengqraeuz vanzlij ij daengj daixlingh boux daeuj lah?” 21 Couh youq mwhde caemh ngamqluj Yehsuh bang baenx haujlai vunz yw bingh, boenq fangz, caemh hawj haujlai vunz rafangz bienq raraeh. 22 Sojhij de han song boux mwnq naeuz: “Faenhsou dawz faenhsou soj raen soj dingq hih maj naeuz Yozhanq ni, couh dwg naeuz, rafangz bienq raraeh, ha'gyad ndaej byaij roen, mazfung yw ndaej ndei, rwznuk ndaej dingqri, rai ndaej bienq lix, vunz gungz ndaej dingq daengz Cangqdiq dih ndei siuhsiz. 23 Doengh boux mbouj yiem gou hih vunz miz fuk lo!” 24 Yiengq song boux lwgsae Yozhanq dingq Yehsuh gangj sat doenghgij vah neix le, couh maj lo. Song boux de maj le, Yehsuh couh doiq gyoengq vunzlai gangj gvanhhih Yozhanq dih saeh. De naeuz: “Gaxgonq faenhsou bae rogndoi ijsiengj yawj gijmaz nej? Siengj yawj go em rumz ci le doengh haj? 25 Mbouj rox hih faenhsou ok bae dauqdaej ij yawj gijmaz nex? Ij yawj boux daenj buh gyaeu buh ndei hih maz? Hoeng boux daenj buh gyaeu buh ndei dwg fouqfouq mizmiz hih, dwg youq aen ranz luj vangzgungh youq hih lax. 26 Yiengq dauqdaej faenhsou ijsiengj yawj gijmaz nej? Faenhsou dwg mbouj dwg bae yawj boux cenz gij vah Cangqdiq hih nej? Ox! Gou naeuz sou ni hax, deng lo! De beij doengh boux cenz gij vah Cangqdiq he vanzlij rem vanzlij ak. 27 De couh dwg boux ndaw Singqgingh daez daengz dih boux mwnq; ndaw de dwg yienghneix naeuz: Gou ij baij vunz bae byaij youq dangqnaj mwngz hwj guh ndei cwnjbiq.” 28 Yehsuh caiq naeuz: “Gou naeuz faenhsou ni, youq lajmbwn, mij'z vunz ndaej beij Yozhanq engq veijdaq laem lo; hoeng youq aen guek Cangqdiq ndaw de, cungjsuenq naeuz boux ceiq yaez ceiq mbouj miz gienz he, cungj ndaej beij Yozhanq veijdaq ndaej lai.” 29 Yiengq youq mwnq doenghheij vunzlai daiqlienz doengh boux sou ceiq he dingq Yehsuh gangj doenghgij vah neix le, cungj haenh naeuz Cangqdiq dih guhfap guh ndaej deng; gyoengq vunz neix caemh dwg gaenq hawj Yozhanq sijlij goq lo. 30 Hoeng youq mwnq doengh boux gaep haeuj Fazliqcaiq baij he caeuq doengh boux Youzdaiq fazliz cenhgyah he, gyoengq vunz neix dauq yiem Cangqdiq doiq gyoengqde dih nganhbaiz; gyoengqde caemh mij hawj Yozhanq sijlij haem. 31 Yehsuh caiq naeuz: “Gou ij dawz aen nienzdaiq neix hih vunz beij luj gijmaz nej? Gyoengqde dwg guxmaz hih vunz nej? 32 Gou naeuz sou ni, gyoengqde couh luj doenghheij lwgngez naengh youq roggai mwnq guxangq, gyoengq caeuq gyoengq doxhemq naeuz: ‘Gyoengqraeuz guxangq cang guh aeu yah, haq sau, boq dig; faenhsou mbouj diuquj! Gyoengqraeuz guxangq cang guh oksang; faenhsou mbouj daej!’ 33 Bang vunz sijlij dih Yozhanq daeuj lo, de siengzseiz lekdungx caemh mbouj gw laeuj; faenhsou couh naeuz de ngaiz fangz doz. 34 Gou, Vunz dih Daiqbiuj, daeuj lo, cix gw haeux cix gw laeuj; yiengq faenhsou couh naeuz: ‘De ngah gw haeux, ngah gw laeuj, dwg baengzyoux boux sou ceiq caeuq boux baengzyoux vunz vaih he.’ 35 Faenhsou hax, mboujguenj raeuz guh gijmaz, cungj ij naeuz raeuz. Nanzdauh faenhsou mbouj rox haj: ‘Vunz dwg mbouj dwg coengjmingz, yawj de soj guh hih saeh couh yawj ndaej ok.’” 36 Miz mbat he, miz boux gaep haeuj Fazliqcaiq baij he cingj Yehsuh gw haeux, yiengq Yehsuh caemh bae laeng de gw. 37 Youq dieg mwnq, miz boux vunzbaz mbouj cingqcuek he. De rox naeuz Yehsuh daeuj le, couh dawz aen bingz aeu nyugsig ma guh he coux rim gij youz ndeindei rang fwtfwt he bae daengz ndaw ranz boux gaep haeuj Fazliqcaiq baij vunz mwnq. 38 De bae daengz henz daiz gw haeux, daengz baixlaeng Yehsuh, youq henz ha de daej, daej hwj raemxra ndik deng baj din de. Yiengq boux vunzbaz mwnq couh aeu gij byoem bonjfaenh de ma swk, swk hawq, caiq cup baj din de, caemh doq cup doq raix youz haeuj baj din de bae. 39 Yiengq boux cingj Yehsuh gw haeux mwnq raen yienghneix le, ndaw sim de couh gag naemj: “Mjx, hauhnaeuz boux vunz bouxn'x dwg boux cenz gij vah Cangqdiq he nex, de wnggai rox boux dek de mo de dwg boux vunzbaz mbouj cingqcuek he lo.” 40 Yiengq Yehsuh caemh yawj ndaej ok ndaw sim boux de ngeix gijmaz, couh doiq de naeuz: “Sihmaenz, gou miz vah ij doiq mwngz gangj.” Sihmaenz han naeuz: “Ox, lauxsae, cingj mwngz naeuz bax.” 41 Yehsuh couh naeuz: “Doenghbaez miz song boux vunz yiemq boux he dih caiq. Miz boux he yiemq hajbak ngaenz, miz boux he yiemq hajcib ngaenz. 42 Aenvih song boux de cungj mij ngaenz boiz caiq, yiengq boux ciq ngaenz hawj mwnq rox le, couh mienx song boux de hih caiq, mbouj hawj song boux de boiz lo. Mwngz naeuz song boux neix byawz haemq aiq de nej?” 43 Sihmaenz han naeuz: “Gou naemj dwg boux yiemq lai he mwnq.” Yehsuh doq han naeuz: “Mwngz naeuz ndaej deng lo.” 44 Yehsuh naeuz gawq neix sat le, couh yiengq laeng boux vunzbaz mwnq bae, doiq Sihmaenz naeuz: “Mwngz yawjraen boux vunzbaz neix lo bax. Daj gou haeuj ndaw ranz mwngz daeuj daengz seizneix, mwngz cungj mij aeu raemx hawj gou swiq ha haem, hoeng de daj gou baex yamq din haeuj ranz daeuj mwhde, de couh gaihcij aeu raemxra ma swiq baj din gou, caiq aeu byoem ma swk baj din gou. 45 Mwngz mij cup gou dangq vuenhringz gou daeuj, hoeng de daj gou yamq din haeujdaeuj, de couh gaihcij cup gij ha gou lo. 46 Mwngz mij aeu di youz he daeuj raix hwnj ndaek raeuj gou daeuj dangq vuenhringz gou, hoeng de dauq aeu youz rang fwtfwt he daeuj cat baj din gou. 47 Sojhij gou naeuz mwngz ni hax, aenvih de ndaej mienx coih lai, de caemh aiq lai. Hoeng boux mienx coih ndaej noix he, de dih aiq caemh noix.” 48 Gajlaeng, Yehsuh caemh nai boux vunzbaz mwnq naeuz: “Gij coih mwngz gaenq ndaej mienx liux lo.” 49 Yiengq doengh boux caeuq de caemh daiz gw haeux he cungj gag naemj naeuz: “Geizheih, boux vunz bouxn'x dwg guxmaz vunz nex, gingqyienz ndaej mienx coih vunz nex?” 50 Yehsuh caiq doiq boux vunzbaz mwnq naeuz: “Gij sinqsim mwngz gaenq ndaej gouq mwngz lo; mwngz couh coengqsim maj ranz bax!”
1 Gij saeh neix goq le, Yehsuh couh ndij goq gak mbanj gak dieg bae cenzgangj gvanhhih aen guek Cangqdiq dih ndei siuhsiz. Mwhde caemh miz cibngeih boux lwgsae de gaen de bae. 2 Caemh miz geij boux vunzbaz gaxgonq ngaiz fangz doz goq he, ngaiz bingh yeye goq he, gajlaeng yw ndaej ndei he caemh gaen gyoengqde bae. Geij boux vunzbaz neix ndaw de miz aen mbanj Mazdaqlah dih Majliqyaq; de ngaiz miz caet duz fangz doz goq, gajlaeng gaenq ndaej boenq okdaeuj liux lo he. 3 Linghvaih vanzlij miz Yozyaqnaz mehyah Gujsaj (Gujsaj couh dwg boux guenjgya goeng Hihliz), caemh vanzlij miz Suhsajnaz caeuq baenx haujlai vunzbaz. Doenghheij vunzbaz neix cungj dwg aeu gij cienzngaenz doxgaiq bonjfaenh ma bang Yehsuh caeuq doengh boux dwzbaijyienz de. 4 Miz baez he, miz haujlai vunz daj gak mbanj gak singz daeuj daengz Yehsuh mwnq doxcomz dingq de gangj vah. Yehsuh couh yungh gij beijgangj he ma doiq gyoengq vunz gangj. De naeuz: 5 “Miz boux nungzminz he bae dajroek. Roek hih mwh he, miz doengh ceh ngaiz doek youq henz roen he, couh ngaiz vunz caij caemh ngaiz roeg mbin roengzdaeuj dot gw. 6 Doengh ceh doek youq gwnz rin he, ngamq baex did he couh doq reuq liux lo, aenvih gwnz rin gyo gyangjgyangq, mij cumx. 7 Doengh ceh doek youq ndaw caz oen he, caeuq go oen doxcaenx hwnj, caemh caenx hwj hwnj mbouj ndaej. 8 Hoeng doengh ceh doek youq ndaw doem biz he, baex did hwnjdaeuj he couh noengq nwtnwt lo, caemh beij ceh doek mwnq sou ndaej lai baenx bak boix.” Yehsuh gangj doengh gawq neix le, couh sing sang hwnjdaeuj naeuz: “Daxbaenh gou soj gangj hih, faenhsou ijaeu dawz haeuj rwz!” 9 Gyoengq lwgsae de dingq le, couh cam de gij beijgangj neix dwg gijmaz iqswh. 10 De han naeuz: “Gij miqmiz ndaw guek Cangqdiq caenhgag ndaej hawj faenhsou rox. Mbouj dwg faenhsou hih, couh yungh beijgangj ma gangj hawj gyoengqde dingq mbouj rox, aenvih ndaw Singqgingh ndaw de daez goq naeuz: Yawj cix yawj mbouj ok, dingq cix dingq mbouj rox.” 11 De caiq naeuz: “Gij beijgangj neix dwg yienghneix: Gij ceh, couh dwg daiqbiuj gij vah Cangqdiq. 12 Doengh ceh doek youq henz roen mwnq, couh dwg naeuz vunz dingq gij vah Cangqdiq le, gajlaeng miz fangzvuengz daeuj daj ndaw sim gyoengqde dued aeu bae, mbouj hawj gyoengqde sinq le ndaej gouq. 13 Doengh ceh doek youq gwnz rin mwnq, couh dwg vunz dingq gij vah Cangqdiq. Gannaeuz dingq hwj cienfanh angq he lah, hoeng caeng youq ndaw sim mbouj laeg. Ndat ndaej yaep he, baex roeb daengz gaujniemq he, couh caepcat liux lo. 14 Doengh ceh doek youq ndaw caz oen mwnq, couh dwg naeuz vunz dingq gij vah Cangqdiq lo, gajlaeng, vihliux saenghhoz dih saepsaep soiqsoiq, cienzngaenz hah, yangjcouq hah hwj gaz dawz lo, mbouj ndaej guh gij saeh youq ndaw lwgra Cangqdiq miz yungh he. 15 Hoeng doengh ceh doek youq ndaw doem biz mwnq nex, couh dwg gij vunz simndei simsoh mwnq. Gyoengqde dingq gij vah Cangqdiq le, couh caeng youq ndaw sim laeglaeg hwj. Cungj vunz neix mbouj lau dwgrengz sinhoj, ndaej guh gij saeh youq ndaw lwgra Cangqdiq miz yungh he.” 16 Yehsuh caiq naeuz: “Mij'z vunz naeuz diemj daeng le, caiq dawz aen de coengq haeuj ndaw gang bae, cixnaeuz dawz aen de coengq haeuj laj congz bae; dauqfanj, dwg ij dawz aen de coengq hwnj gwnz daiz bae, rongh hawj vunz haeuj daeuj ndaej raen rongh. 17 Sojhij, mboujguenj miz geijlai miqmiz, cungj ij gangj okdaeuj hawj vunz rox; mij'z naeuz yo miqmiz hwj. 18 “Sojhij faenhsou ij yaek rwz hwj dingq, aenvih youq ndaw lwgra Cangqdiq suenq gaenq miz hih, engqgya ij lai hawj; youq ndaw lwgra Cangqdiq suenq mbouj miz hih, yaepm'x daiqlienz de gag naemqnaeuz bonjfaenh de miz hih cungj ngaiz dued aeu ma liux.” 19 Miz baez he, youq henz ndang Yehsuh miz baenx haujlai vunz. Couh youq mwhneix, daxmeh de caeuq gyoengq nuengxau de daeuj lo, hoeng aenvih gij vunz daiq lai lai, gyoengqde mij banqfaz ndaej haeuj bae dep de. 20 Gajlaeng miz vunz naeuz de ni, naeuz: “Daxmeh mwngz caeuq gij beixnuengx mwngz daeuj hwj; gyoengqde youq rog mwnq, siengj cimh mwngz.” 21 Hoeng Yehsuh dauq han naeuz: “Dingq gij vah Cangqdiq, ciuq gij vah Cangqdiq bae guh hih couh dwg meh gou, beixnuengx gou.” 22 Caiq miz ngoenz he, Yehsuh caeuq doengh boux lwgsae de hwnj aen ruz he bae. Hwnj bae le, Yehsuh couh doiq gyoengq lwgsae de naeuz: “Gyoengqraeuz bae mbiengjbaih huz mwnq bax!” Couh yienghneix, gyoengqde couh hwnj ruz bae lo. 23 Yiengq goq bae hih mwhde, Yehsuh ninz ralaep lo. Sawqmwh fan rumz hung hwnjdaeuj; rumz ci hwj gij raemx biu haeuj ndaw ruz bae, yungyiemj raixcaix. 24 Hoeng Yehsuh vanzlij ninz hwj ndaek fwjfwq. Gyoengq lwgsae de raen yienghneix le, cungj simvueng hwj vaiqdi heuh Yehsuh singj, naeuz: “Lauxsae, lauxsae, yaepm'x gyoengqraeuz cungj ngaiz rai liux bae!” Yehsuh dingq gyoengq lwgsae de yienghneix hemq le, couh ndwn hwnjdaeuj ndaq gij rumz caeuq gij bohlangq, yiengq rumzrumz raemxraemx couh majcangq doq dinghcub. 25 Gajlaeng Yehsuh couh doiq doengh boux lwgsae de naeuz: “Gij sinqsim faenhsou nwj bae hoh lah?” Gyoengqde raen yienghneix le, bouxboux cungj raen geizheih, cixcaemh lau hwj ij rai bae, cungj gag naeuz: “Geizheih, geizheih, boux vunz bouxn'x dauqdaej dwg byawz hax? De mingqlingq rumz caeuq raemx, gingqyienz raemx caeuq rumz cungj dingq de!” 26 Couh yienghneix, Yehsuh caeuq doengh boux lwgsae de naengh ruz bae daengz dieg Gwzlahsinh. Mwnq dieg neix dwg youq aen huz Gyahliqliq dih doiqmienh de. 27 Bae daengz le, Yehsuh couh hwnj hamq ma. Ngamq baex hwnj hamq he, ndaw singz mwnq miz boux ngaiz fangz doz he byaij goqdaeuj. Boux de gaenq loxgenz loxgangh baenx haujlai caez, caemh mij youq ndaw ranz youq lo, cungj dwg youq ndaw gumz moh gaeuq youq he, aenvih boux de ngaiz fangz yak doz youq gwnz ndang de haujlai caez lo. 28-29 Gannaeuz miz vunz hen de, simqciq aeu lienh ma lienh fawz lienh ha hwj lo hoeng, cungj ngaiz ndaej duet okdaeuj, ngaiz fangz yak boenq bae daengz rogndoi. Yehsuh raen le, couh haep duz fangz daj gwnz ndang boux de ok daeuj. Hoeng boux de dauq bomz youq dangqnaj Yehsuh hemq naeuz: “Ceiq veijdaq dih Cangqdiq dih lwg Yehsuh hax, gou caeuq mwngz miz maz gvanhaeh nex? Gouz mwngz gaejyungh fad gou hawj gou souh nanh!” 30 Gajlaeng Yehsuh couh cam boux de naeuz: “Mwngz heuh maz coh lah?” Boux de han naeuz: “Gou heuh Gyoengq Bing.” De yienghneix naeuz dwg aenvih miz baenx gyoengq fangz doz youq gwnz ndang de. 31 Gajlaeng gyoengq fangz youq gwnz ndang boux de mwnq rox naeuz Yehsuh ij boenq gyoengqde okbae lo, gyoengqde couh simvueng hwj gouz Yehsuh, mbouj hawj Yehsuh boenq gyoengqde okbae gveng roengz aen vaengz Cangqdiq fad fangz he mwnq bae. 32 Yiengq ngamqluj mwhneix, youq mwnq mbouj geijlwh gyae miz gyoengq mou he youq bangxbya gw doxgaiq. Gyoengq fangz couh gouz Yehsuh hawj gyoengqde haeuj laeng gyoengq mou mwnq bae. Yehsuh caemh dapwngq lo. 33 Gajlaeng, gyoengq fangz couh daj gwnz ndang boux de ok ma, ndaenj haeuj gwnz ndang gyoengq mou mwnq bae lo. Yiengq gyoengq mou mwnq couh cung roengz ndaw huz bae rai liux lo. 34 Doengh boux ciengx mou mwnq raen yienghneix le, couh majcangq riq deuz, riq bae daengz ndaw singz caeuq daengz lajmbanj bae gangj naeuz vunz ni gij saeh neix. 35 Gij vunz dingq le, cungj riq okdaeuj siengj yawjyawj dauqdaej dwg gijmaz saeh. Gyoengq vunz daengz Yehsuh mwnq le, yawjraen boux ngaiz fangz doz mwnq mij ngaiz fangz doz laem lo, gaenq daenj buh ndei seuqset hwj naengh youq dangqnaj Yehsuh, vunz caemh singqsag lo. Gyoengq vunz raen yienghneix le, cungj lau liux. 36 Yiengq doengh boux caenra raen gij saeh neix he couh gangj naeuz gyoengq vunzlai ni boux ngaiz fangz doz mwnq, de dwg baenzlawz baenzlawz ndaej yw ndei he, 37 guh hwj Gwzlahsinh mwnq dieg neix hih vunz cungj lau hwj ij rai bae, couh gouz Yehsuh, hawj Yehsuh bae daixlingh mwnq, mbouj youq mwnq dieg gyoengqde youq. Couh yienghneix, Yehsuh couh hwnj ruz bae, couh ij dauq ma lo. 38 Hoeng, boux ngaiz fangz doz mwnq nej, de dauq gouz Yehsuh, ijsiengj gaen Yehsuh bae. Hoeng, Yehsuh dauq naeuz hawj boux de maj. Yehsuh naeuz: 39 “Mwngz maj ranz bax, maj gangj naeuz gyoengq vunz ni Cangqdiq bang mwngz guh baenxlai hung dih saeh.” Boux de dingq le, caemh ciuq Yehsuh raengq hih yienghmwnq bae guh lo. De byaij baenx cenz singz, dauqcawq bae cenzgangj Yehsuh bang de soj guh hih saeh. 40 Couh yienghneix, Yehsuh couh dauq ma daengz hamq baihneix. Youq mwnq miz baenx haujlai vunz daeuj daengj de, ciep de. 41 Yiengq miz boux he heuh Yazluj; de dwg dieg mwnq hih boux veiqdangz daeuzdaeuz he. De daeuj daengz dangqnaj Yehsuh le, couh gvih bomz roengz dangqnaj Yehsuh bae, gouz Yehsuh bae ndaw ranz de yw bingh, 42 aenvih de miz dahlwg he ndaej cibngeih bi bingh hwj ij rai lo, caemh dwg de cijngamq miz dahlwg dog neix. Yehsuh raen yienghneix le, couh bae ndaw ranz de. Hoeng, mwh de ij bae hih mwhde, miz baenx gyoengq vunz gvaengz de, gvaengz hwj nyaed yubyub bae. 43 Couh youq mwhneix, miz boux vunzbaz he, de ndwennaengz miz gij doxgaiq he daeuj, cungj daeuj mbouj dingz goq. Gaenq yienghneix baenx cibngeih bi lo, hoeng cungj mij saek boux canghyw yw ndaej ndei. 44 Yiengq de couh domh mwhneix caenx bae daengz baixlaeng Yehsuh, couh mo gij bingbuh baixlaeng de. Yiengq gij doxgaiq de couh majcangq doq dingz lo. 45 Yehsuh rox le, couh cam naeuz: “Byawz mo gou lah?” Hoeng, cungj mij'z vunz nginh. Gajlaeng Bijdwz naeuz: “Lauxsae, baenx lai vunz gvaengz mwngz; gaengjdingq miz vunz bungq dawz mwngz lo!” 46 Yiengq Yehsuh han naeuz: “Mbouj dwg, gaengjdingq miz vunz maixmingz mo gou, aenvih gou rox gij bonjsaeh ndaej yw bingh gou daj gwnz ndang gou mwg okbae lo.” 47 Boux vunzbaz mwnq dingq le, rox naeuz muenz mbouj goq Yehsuh lo. Couh saenz doeddoed hwj goq dangqnaj de daeuj gvih bomz roengzbae, youq dangqnaj gyoengq vunzlai naeuz de ni bonjfaenh de vihmaz ij mo de, caeuq mo de le couh majcangq ndei he, gij saeh neix. 48 Yehsuh dingq le, couh doiq de naeuz: “Dahniq hax, gij sinqsim mwngz ndaej gouq mwngz lo; mwngz couh coengqsim maj bax!” 49 Youq mwh Yehsuh gangj doenghgij vah neix hih mwhde, miz vunz daj ndaw ranz Yazluj veiqdangz dih daeuzdaeuz he ok daeuj naeuz Yazluj ni, naeuz: “Dahlwg mwngz gaenq rai lo; mboujyungh caiq mazfanz lauxsae lo.” 50 Yehsuh dingq le, couh doiq Yazluj naeuz: “Gaejyungh lau; cijaeu sinq, dahlwg mwngz couh ndaej gouq lo!” 51 Couh yienghneix, Yehsuh couh bae daengz ranz de lo, daengz le, de caenhgag hawj Bijdwz, Yozhanq, Yajgoz caeuq bohmeh dah de haeuj ranz bae; lij lw hih vunz cungj mbouj hawj gaen haeuj ranz bae. 52 Gij vunz mwnq cungj daej dahlwg neix. Yehsuh couh doiq gyoengq vunz naeuz: “Gaej daej, dah de mij dwg rai law; dwg ninz ralaep lah.” 53 Gajlaeng gyoengq vunz cungj riu Yehsuh, aenvih gyoengqde rox dahlwg neix mingzmingz gaenq rai lo. 54 Hoeng Yehsuh cungj mbouj leix gyoengq vunz baenzlaw riu de, couh rag dawz gij fawz dahlwg neix, heuh naeuz: “Dahniq hax, hwnq bax!” 55 Yehsuh ngamq gangj sat bak, gij hoenzsaenz dah de couh majcangq ma daengz gwnz ndang de, couh doq hwnq hwnjdaeuj. Yehsuh couh hawj gij vunz aeu gij gw he daeuj hawj dah de gw. 56 Bohmeh dah de raen le, cungj doeksaet hwj aj bak loengjloengq gig geizheih. Yehsuh caemh raengq song boux de mbouj hawj gyoengqde gangj gij saeh neix naeuz vunz ni.
1 Miz ngoenz he, Yehsuh heuh cibngeih boux lwgsae de daeuj doxcomz, daeuj soengq gienz soengq bonjsaeh hawj gyoengqde, hawj gyoengqde ndaej boenq fangz caeuq yw bingh. 2 Gajlaeng couh baij gyoengqde bae cenzgangj aen guek Cangqdiq dih ndei siuhsiz, caemhcaiq hawj gyoengqde yw bingh gouq vunz. 3 Ij bae hih mwhde, Yehsuh raengq gyoengqde naeuz: “Faenhsou bae nex, gijmaz cungj mbouj ndaej raek; mbouj ndaej raek faexdwngx, mbouj ndaej raek daeh, mbouj ndaej raek gij gw caeuq ngaenz, caemh mbouj ndaej raek buh bae lawh. 4 Faenhsou bae daengz ranzlawz, couh haeuj ranzlawz bae youq, youq daengz faenhsou ij bae daixlingh dieg bae. 5 Hauhnaeuz miz dieglawz hih vunz mbouj vuenhringz faenhsou hih, faenhsou couh mbouj youq dieg mwnq youq. Yiengq ok ma hih mwhde, couh ij saemq din hawj gij boenqcingh gwnz din doek youq mwnq, caemhdangq naeuz gingjgauq gyoengqde.” 6 Yehsuh raengq sat le, gyoengqde couh bae lo. Gyoengqde bae daengz gak aen mbanj bae cenzgangj aen guek Cangqdiq dih ndei siuhsiz caeuq bang vunz yw bingh. 7 Gajlaeng goeng Hihliz, couh dwg goeng dang dieg Gyahliqliq dih daeuzdaeuz he, de dingq daengz doenghgij geizmiuj hih saeh neix le, gaenhbaenj mbouj rox dauqdaej dwg byawz guh hih, aenvih miz vunz naeuz dwg bang vunz sijlij dih Yozhanq caiq dauqlix hwj guh, 8 caemhcaiq miz hih vunz naeuz dwg Hijliqyaq caiq yienh hawj vunz raen hwj guh he, caemhcaiq vanzlij miz vunz naeuz dwg dangq doenghbaez hih boux cenz gij vah Cangqdiq dauqlix hwj guh he. 9 Goeng Hihliz naeuz: “Gou gaenq raemj ndaek raeuj Yozhanq doek lo, hoeng gou dingqri vunz naeuz hih boux mwnq dauqdaej dwg byawz nej?” Yiengq de couh ijsiengj bae yawjyawj. 10 Gajlaeng baij bae hih gyoengq dwzbaijyienz mwnq dauq ma lo, ma gangj naeuz Yehsuh ni gyoengqde soj guh dih saeh. Gyoengq dwzbaijyienz gangj doenghgij saeh neix sat le, Yehsuh couh daiq gyoengqde daj mwnq okma, mbouj siengj hawj gij vunzlai gaen de. Couh yienghneix, de couh daiq gyoengqde bae daengz aen singz heuh Bwzcaiqdaq he. 11 Hoeng, gyoengq vunzlai rox gyoengqde bae mwnq le, caemh gaen bae. De nej, de caemh vuenhringz gyoengqde, vanzlij doiq gyoengqde gangj gvanhhih aen guek Cangqdiq dih ndei siuhsiz, caemh bang vunz yw bingh. 12 Daengz yiengqhaemh, gyangjngoenz ij doek mwhde, cibngeih boux lwgsae de doiq de naeuz: “Hawj gyoengq vunz sanq lo bax, aenvih dineix dwg rogndoi he; hawj gyoengqde bae seiqhenz gaenh mwnq, heij mbanj mwnq cimh gw cimh youq bax.” 13 Hoeng, Yehsuh han gyoengqde naeuz: “Faenhsou aeu doxgaiq hawj gyoengqde gw bax!” Gyoengq lwgsae de han naeuz: “Gyoengqraeuz cijngamq miz haj aen menqbauh caeuq song duz bya; cizfeih gyoengqraeuz bae cawx hoh luh, mijn'x gaenhbaenj mbouj gaeuq!” 14 (Mwhde youq mwnq daihgaiq miz hajcien vunz, vunzbaz caeuq lwgngez mbouj suenq.) Yehsuh dingq le, couh doiq gyoengq lwgsae de naeuz: “Hawj gyoengqde faen baenx yuj baenx yuj hwj, it yuj hajcib vunz, naengh ndei hwj.” 15 Gajlaeng gyoengq lwgsae de caemh ciuq de naeuz hih yienghmwnq bae nganhbaiz, faen gyoengq vunz, hawj gyoengq vunz naengh ndei. 16 Gyoengq vunz naengh ndei le, Yehsuh couh dawz haj aen menqbauh caeuq song duz bya, muengh hwnj mbwn bae docih Cangqdiq. Docih le, couh euj baenx mbiengj baenx gyeh hwj ndenq hawj gyoengq lwgsae de, hawj gyoengq lwgsae de faen hawj gyoengq vunz gw. 17 Gajlaeng gyoengq vunz bouxboux cungj ndaej gw; mbouj danhcij naeuz ndaej gw, vanzlij ndaej gw daengz imq, gw daengz lw, lw hwj coux ndaej baenx cibngeih lamz rim. 18 Miz mbat he, Yehsuh gag caeuq gyoengq lwgsae de youq mwnq he; de haenh Cangqdiq gouz Cangqdiq. Gajlaeng de cam gyoengq lwgsae de naeuz: “Gij vunz naeuz gou dwg bouxlawz?” 19 Gyoengq lwgsae han naeuz: “Miz vunz naeuz mwngz dwg bang vunz sijlij dih Yozhanq, caemh miz vunz naeuz mwngz dwg Hijliqyaq, caemhcaiq miz vunz naeuz mwngz dwg dangq doenghbaez hih boux cenz gij vah Cangqdiq hih boux he dauqlix lo.” 20 Yehsuh caiq cam gyoengq lwgsae de naeuz: “Yiengq faenhsou nej? Faenhsou naeuz gou dwg bouxlawz nex?” Bijdwz han naeuz: “Mwngz dwg Gihduz, Cangqdiq baij daeuj dih vuengz.” 21 Yehsuh dingq le, couh raengq gyoengqde, naeuz gyoengqde ciengeiz mbouj ndaej naeuz vunz ni de dwg bouxlawz. 22 Gajlaeng de caiq naeuz: “Gou, Vunz dih Daiqbiuj, bietdingh ij ngaiz souh daengz haujlai dih haemzhoj, ngaiz gij vunz gangj vah couh baenz he caeuq doengh boux goengjsae dajbwiz he caeuq doengh boux fazliz cenhgyah he yiem, simqciq ngaiz haihrai. Hoeng, daengz daixsam ngoenz couh ndaej dauqlix hwnjdaeuj.” 23 De gangj daengz dineix le, couh doiq gyoengq vunzlai naeuz: “Hauhnaeuz bouxlawz ijsiengj daeuj gaen gou hih, couh ij sijndaej diuz mingh bonjfaenh, ij ngoenzngoenz aemq aen gyaq cixcib daeuj gaen gou cij ndaej, 24 aenvih doengh boux ijsiengj gouq gij mingh bonjfaenh hih, dauqfanj ngaiz vwt mingh; doengh boux vih gou hwj ngaiz vwt mingh hih, dauqfanj ndaej gouq mingh. 25 Doengh boux miz baenx cenz lajmbwn hih, fanjgoqma dauq mij ndaej gaep haeuj guek Cangqdiq, yiengq miz maz ik nex? 26 Famz miz vunz dawz gou caeuq dawz gij vah gou ma dangqbaenz mij naj doiq vunz, saetnaj saetnyaenq hih nex, yiengq daengz mwh gou, Vunz dih Daiqbiuj, daeuj hih mwhde, gou luj Bohmbwn yienghmwnq veijdaq, luj bouxcai de yienghmwnq naj rongh sagsag, daengz mwhmwnq, gou caemh mbouj nginh boux de; nginh de caemh roxnginh saetnaj saetnyaenq. 27 Gou saedsaeh naeuz sou ni, ndwn youq dineix hih vunz, miz mbangj hih vunz youq de lij lix hih mwhde, ij ndaej raen aen guek Cangqdiq.” 28 Yehsuh gangj doenghgij vah neix daihgaiq goq ndaej bet ngoenz le, de daiq Bijdwz, Yozhanq caeuq Yajgoz hwnj bya bae gouz Cangqdiq haenh Cangqdiq. 29 De gouz Cangqdiq haenh Cangqdiq hih mwhde, baj naj de bienq hwj rongh sagsag, diuz buh de caemh bieg supsup myig myiengzmyiengz. 30-31 Sawqmwh miz song boux caemh rongh sagsag youq mwnq caeuq de gangj vah. Song boux neix dwg Mohsih caeuq Hijliqyaq. Gyoengqde gangj gvanhhih Yehsuh youq Yehluqsajlaengj ij guh hih saeh, couh dwg de ij souh daengz rai gij saeh neix. 32 Couh youq mwh Yehsuh gouzhaenh Cangqdiq hih mwhde, de daiq daeuj hih sam boux lwgsae mwnq gaenq ralaep baiq sugsug liux lo. Gajlaeng sam boux de singj hwnjdaeuj le, cij yawjraen gij rongh Yehsuh caeuq caeuq de ndwn youq itheij hih song boux mwnq. 33 Bijdwz raen yienghneix le, mij rox dwg gijmaz saeh. Couh youq mwh song boux mwnq ijvanh caeuq Yehsuh doxbiek hih mwhde, couh nyungjnyat hwj doiq Yehsuh naeuz: “Lauxsae, lauxsae, gyoengqraeuz youq dineix baenz hwx! Raeuz wnggai dap sam aen cangqbungz, aen he hawj mwngz, aen he hawj Mohsih, lij miz aen haem hawj Hijliqyaq.” (Bijdwz gangj doenghgij vah neix, bonjfaenh de gaenhbaenj mbouj gag rox bonjfaenh de dwg gangj gijmaz.) 34 Bijdwz gangj doengh gawq vah neix hih mwhde, miz ndaek vangq fwj he daeuj guem gyoengqde. Mwh gij fwj guem gyoengqde hih mwhde, sam boux lwgsae mwnq cungj lau liux. 35 Couh youq mwhneix, sawqmwh daj ndaw fwj miz sing gangj okdaeuj naeuz: “Boux neix dwg daeglwg gou; dwg gou senj aeu de he. Faenhsou ij dingq gij vah de.” 36 Gij sing daj ndaw fwj gangj gawq neix sat le, gyoengqde caenhgag raen Yehsuh boux vunz dog youq mwnq. Gvanhhih gij saeh neix, sam boux de youq duenh mwnq cungj mij gangj naeuz vunz ni saek di. 37 Daengz ngoenz daixngeih le, gyoengqde couh roengz bya ma lo. Mwhde, youq laj bya miz baenxbienh vunz daeuj daengj Yehsuh. 38 Yiengq ndaw gyoengq vunz mwnq miz boux he hemq naeuz: “Lauxsae, lauxsae, gouz mwngz bae yawj daeglwg gou! Gou caenhgag miz daeglwg dog neix lo! 39 De ngaiz fangz yak gaemh dawz, mbouj coengq de, hawj de youq mbouj youq hemq vauxvaux, youq mbouj youq caiq fatbanghmou, guh hawj de seiq lengq seiq sieng. 40 Gou gouz gij lwgsae mwngz bang boenq duz fangz yak okma goq hwj, hoeng, gyoengqde cungj mij bonjsaeh ndaej boenq haem.” 41 Yehsuh dingq le, naeuz: “Haez, doenghgij vunz faenhsou hax! Cix yayangq cix mbouj sinq! Gou lij ij youq faenhsou dineix geijlwh caez haem? Gou ij naenx faenhsou daengz seizlawz bae? Daiq daeglwg mwngz daeuj dineix bax!” 42 Couh youq mwh daeg de ngamq daeuj daengz hih mwhde, duz fangz yak caiq hawj de fatbanghmou, hawj de laemxdengx roengzbae. Yehsuh raen le, couh ndaq duz fangz mwnq, yw ndei daeg lwgngez neix. 43 Yiengq youq mwnq sojmiz hih vunz raen yienghneix le, cungj doeksaet, geizheih Cangqdiq dih bonjsaeh. Youq mwh gyoengq vunz vanzlij doeksaet geizheih Yehsuh soj guh hih saeh dih mwhde, Yehsuh doiq gyoengq lwgsae de naeuz: 44 “Faenhsou ij dawz haeuj rwz gij vah gou seizneix gangj naeuz faenhsou ni hih, couh dwg gou, Vunz dih Daiqbiuj, couh ijvanh ngaiz buenqduz cuzmaiq lo.” 45 Hoeng, gyoengq lwgsae de gaenhbaenj mbouj rox de gangj hih gawq vah neix dwg gijmaz iqswh, aenvih Cangqdiq mbouj hawj gyoengqde rox, gyoengqde caemh mbouj gamj cam de. 46 Miz mbat he, gyoengq lwgsae Yehsuh doxeuq, euq gyoengqde ndaw de byawz ceiq rem. 47 Gajlaeng Yehsuh yawj ndaej ok gyoengqde euq gijmaz le, couh daiq laeq lwgngez he daeuj, hawj laeq de ndwn youq henz ndang de hwj le, 48 couh doiq gyoengq lwgsae de naeuz: “Famz miz vunz aeunaj gou, yawjhwnj gou daih laeq lwgngez neix hih, caemhdangq daih gou lo; famz daih gou hih, caemhdangq daih baij gou daeuj dih Cangqdiq lo. Youq faenhsou ndaw neix, boux ceiq mbouj rasang hih, de couh dwg boux youq ndaw lwgra Cangqdiq ceiq rem hih lo.” 49 Gajlaeng Yozhanq naeuz: “Lauxsae, gyoengqraeuz raen miz boux he hij gij mingzhiq mwngz ma boenq fangz, hoeng ngaiz gyoengqraeuz lanz mbouj hawj boux de lo, aenvih boux de mij dwg luj gyoengqraeuz gaen mwngz haem.” 50 Yehsuh dingq le couh doiq Yozhanq naeuz: “Gaejyungh lanz de, aenvih mbouj fanjdeiq faenhsou hih, couh dwg yungjhuq faenhsou lo.” 51 Yehsuh rox naeuz bonjfaenh de ijvanh daengz mwh hwnj mbwn bae he hih lo, yiengq de couh gietdingh bae Yehluqsajlaengj. 52 Ijvanh bae hih mwhde, de couh baij geij boux lwgsae sien bae Sajmajliqyaq hih aen mbanj he guh cwnjbiq ndei hawj de. 53 Hoeng gij vunz aen mbanj mwnq rox de dwg ij bae Yehluqsajlaengj le, couh mbouj haenj daih de. 54 Yiengq Yajgoz caeuq Yozhanq rox le, couh ndatheiq hwj naeuz: “Bouxcawj gou hax, mwngz hawj gyoengqraeuz mingqlingq gij feiz daj gwnzmbwn roengz daeuj gyemz gyoengqde, cawz gyoengqde bae moj!” 55 Hoeng, Yehsuh veq goqma dauq gvaiq song boux de naeuz: “Aen sim faenhsou dwg guxmaz sim hax, faenhsou cungj mbouj gag rox haj? Gou, Vunz dih Daiqbiuj, daeuj mbouj dwg ij cawz vunz, dauq dwg ij gouq vunz lah.” 56 Gajlaeng gyoengqde caiq bae daixlingh aen mbanj. 57 Bae hih mwhde, miz vunz doiq Yehsuh naeuz: “Mboujguenj mwngz bae daengz mwnqlaw, gou cungj gaen mwngz bae daengz mwnqlaw.” 58 Yehsuh dauq han boux de naeuz: “Huzliz vanzlij miz congh, roeg lij miz rongz, hoeng gou, Vunz dih Daiqbiuj, daiqlienz mwnq ndwn he cungj mbouj miz.” 59 De yienghneix gangj le, couh doiq daixlingh boux naeuz: “Daeuj, gaen gou bax!” Hoeng, boux mwnq dauq han naeuz: “Ndaej hah, hoeng cingj mwngz hawj gou sien maj moek daxboh gou gaenq.” 60 Yiengq Yehsuh dingq le, couh yungh gij beijgangj he ma doiq de naeuz: “Hawj vunzrai bae moek gij vunzrai gyoengqde bax! Mwngz caenhrox bae cenzgangj aen guek Cangqdiq dih ndei siuhsiz ndaej lo.” 61 Gajlaeng caiq miz boux he caemh doiq Yehsuh naeuz: “Goengjsae hax, gou ijsiengj gaen mwngz hwj, hoeng, cingj mwngz hawj gou maj naeuz ndaw ranz gou ni gaenq.” 62 Yehsuh dingq le, doiq de naeuz: “Fawz dawz noegcae dawxcae, dauq veq naj yawj dauqlaeng hih vunz, youq ndaw guek Cangqdiq dwg mij'z yungh hih.”
1 Gij saeh neix goq duenh he le, Yehsuh caiq senj aeu caetcib vunz daeuj, hawj gyoengqde faen song boux song boux caemh suj hwj, baij gyoengqde sien bae doenghheij mbanj heij singz de ijsiengj bae he. 2 Gyoengqde ij bae hih mwhde, Yehsuh yungh gij beijgangj he ma doiq gyoengqde naeuz: “Ij ndaej sou hih haeuxhaeux mienhmienh daiq lai lai lo, hoeng, doenghheij vunz sousou gvejgvej he daiq noix lai lo; sojhij faenhsou ij gouz boux guenj dajsou he lai baij vunz bae sou cij ndaej.” 3 De caiq naeuz: “Faenhsou bae bax! Hoeng faenhsou ijaeu rox, gou baij faenhsou ok bae caemhdangq luj duz yiengzlwg ndaenj haeuj ndaw gyoengq langz bae ityiengh. 4 Faenhsou bae nex, ngaenz hah, haiz hah, fanjcingq gijmaz cungj mboujyungh raek; bi fawz hoengq bae ndaej lo. Faenhsou bae couh bae, caemh mbouj ndaej youq dangjroen caeuq vunz gangj goj nguh cizgyenh. 5 “Mboujguenj faenhsou haeuj ranzlawz bae, cungj ij sien naeuz: ‘Muengh ranz neix hih vunz cungj bingzan!’ 6 Yiengq, hauhnaeuz ranz mwnq hih vunz caeuq vunz doxhuz, haenj bingzan nex, faenhsou muengh hih couh gvi hawj ranz mwnq ndaej lo; mbouj nex, couh gvi hawj faenhsou boiz lo. 7 “Faenhsou mbouj ndaej youq ranz dawz ranz; ij dingh youq ranz he, caemh dwg gw ranz he, aenvih guh hong caemh ndaej ngaenzhong. 8 Mboujguenj faenhsou daengz dieglawz, cijaeu miz vunz vuenhringz faenhsou, gyoengqde aeu gijmaz daeuj daih faenhsou, faenhsou cungj mbouj yiem; ijaeu gw. 9 “Faenhsou caemh ij yw gij vunz bingh mwnq, caemh ij naeuz gij vunz ni: ‘Cangqdiq dih gienzveih couh ij youq faenhsou dineix fazveih lo.’ 10 Hoeng, hauhnaeuz faenhsou bae daengz mwnqlaw, mwnqlaw hih vunz mbouj vuenhringz faenhsou hih, faenhsou couh ij youq mwnq doiq gij vunz naeuz: 11 ‘Yawj veiq, daiqlienz gij boenq faenhsou gyuj youq gwnz ha raeuz, raeuz cungj ij saemq okbae. Raeuz yienghneix guh couh dwg gingjgauq faenhsou. Faenhsou caemh ijaeu rox, gij gienzveih Cangqdiq couh ij youq faenhsou dineix fazveih lo!’ 12 Gou sien naeuz sou ni, daengz mwh saemjbuenq hih mwhmwnq, mwnqneix hih vunz ij souh daengz fad hih ij camj goq gij vunz aen singz Sojdohmaj vwi.” 13 Yehsuh doiq gyoengq lwgsae de gangj doenghgij vah neix le, sawqmwh couh gag naeuz: “Gohlahswnq Singz caeuq Bwzcaiqdaq Singz hax, faenhsou satsoq lo! Gou youq faenhsou mwnq guh baenx haujlai cungj geizmiuj hih saeh; hauhnaeuz doengh cungj geizmiuj neix youq Daiqwj caeuq Sihdoenq song aen singz neix guh okdaeuj hih nex, gij vunz mwnq cungj senqsi cix daenj buh daehmaz, vanq daeuh hwnj gwnz ndang bae gyadgyax youq lajdoem hwj biujsiq gaijgoq lo. 14 Daengz ngoenz saemjbuenq hih ngoenz mwnq nex, faenhsou souh daengz hih fad ij beij Daiqwj caeuq Sihdoenq song aen singz neix hih vunz camj ndaej lai lo. 15 Vanzlij miz Gyahbwznungz aen singz neix; mwngz naemqnaeuz mwngz ndaej bungj hwnj mbwn bae hajx. Mij ndaej law nwjx! Mwngz ij ngaiz doek roengz vaengz bae lah.” 16 Yehsuh vanzlij caiq doiq gyoengq lwgsae de naeuz: “Byawz dingq faenhsou hih, caemhdangq dingq gou lo; mbouj dingq faenhsou hih caemhdangq mbouj dingq gou; mbouj dingq gou hih caemhdangq mbouj dingq boux baij gou daeuj he lo.” Couh yienghneix, gyoengq lwgsae de dingq de gangj sat doenghgij vah neix le, couh ok bae lo. 17 Gajlaeng gyoengqde riuriu angqangq hwj ma naeuz de ni, naeuz: “Bouxcawj hax, gyoengqraeuz baex dwen daengz gij coh mwngz he hih lah, hoeng, daiq fangz cungj mbouj gamj mbouj dingq raeuz lo.” 18 Yehsuh dingq le, couh doiq gyoengqde naeuz: “Dwg hwj, gou caemh raen fangzvuengz, couh dwg Sajdanq, luj byajmyig yienghmwnq daj gwnzmbwn doek roengzdaeuj hwj. 19 Gou caemh gaenq hawj gienz hawj faenhsou ndaej caij duz ngwzdoeg caeuq duz ceh hih lo, caemh hawj gienz hawj faenhsou ndaej ak goq dizyinz, Sajdanq, mbouj ngaiz gijmaz sienghaih lo. 20 Hoeng, faenhsou gaejyungh vih fangz fug faenhsou hwj angq; faenhsou wnggai ij dwg vih gij coh faenhsou ndaej daengh haeuj ndaw guek Cangqdiq bae hwj angq cij deng.” 21 Couh youq mwhneix, Hoenzsaenz Cangqdiq hawj de angq hwj haenh naeuz: “Bohmbwn hax, gaemguenj gwnzmbwn caeuq lajdeih hih mwngz hax! Gou haenh mwngz, aenvih mwngz mbouj hawj doengh boux coengjmingz miz vaenzvaq he rox gij guhfap mwngz, dauq loh hawj doengh boux luj lwgngez yienghmwnq lauxsaed he rox. Boh hax, dwg hah, gou rox mwngz haenj yienghneix guh.” 22 De haenh daengz dineix le, caiq doiq gyoengqde naeuz: “Sojmiz hih cungj dwg boh gou hawj gou he. Cawzok daxboh, mij'z vunz rox daeglwg dwg byawz; caemh cawzok lwg caeuq lwg nyienh naeuz vunz ni hih, mijn'x caemh mij'z vunz rox daxboh dwg byawz.” 23 De gangj daengz dineix le, veq ndang goqma menhmenh doiq gyoengq lwgsae de naeuz: “Faenhsou ndaej yawjraen doenghgij neix, dwg faenhsou miz fuk raixcaix lo! 24 Gou naeuz sou ni, doenghbaez miz haujlai boux boux cenz gij vah Cangqdiq caeuq haujlai goengjvuengz ijsiengj raen doenghgij faenhsou seizneix ndaej raen hih, cungj mbouj ndaej raen, siengj dingq faenhsou soj dingqri hih, cungj mbouj ndaej dingq.” 25 Miz mbat he, gij vunz daeuj dingq Yehsuh gangj vah. Miz boux Youzdaiq fazliz cenhgyah he ndwn hwnjdaeuj ok nanzdaez hawj Yehsuh, siengj sawqsawq Yehsuh. De naeuz: “Lauxsae, gou ij baenzlawz guh cij ndaej seiqseiz lix hax?” 26 Yiengq Yehsuh han de naeuz: “Ndaw saw Singqgingh ndaw de dih gij fazliz de dwg baenzlawz naeuz? Mwngz cix baenzlawz lijgaij nej?” 27 Boux fazliz cenhgyah mwnq han naeuz: “Ndaw de naeuz: Mwngz ij caensim caen'eiq ndiep gyaez Cangqdiq, bouxcawj mwngz. Ndaw de vanzlij naeuz: Ij aiq gyoengq gekleiz caemh luj aiq bonjfaenh ityiengh.” 28 Yehsuh naeuz: “Mwngz dap ndaej deng lo; mwngz ciuq yienghmwnq guh couh ndaej seiqseiz lix lo.” 29 Hoeng boux de mbouj fug; de cungj naeuz bonjfaenh de soj guh dih saeh cungj dwg deng he, miz dauhleix he. De youhcaiq cam Yehsuh naeuz: “Yiengx bouxlawz suenq dwg gekleiz gou nej?” 30 Yehsuh youhcaiq han de naeuz: “Gaxgonq miz boux he dajlwh Yehluqsajlaengj bae Yehliqgoh, ngaiz caeggeq duet roen, bok aeu gij buhvaq de liux, caiq ngaiz dubdub dohdoh donq he. Dub hwj ij rai ij lix bae le, couh dawz de vwt youq henz roen couh deuzrwg lo. 31 “Ngamqluj mwhneix miz boux Youzdaiq vunz guh dajbwiz he byaij goqdaeuj. De yawjraen boux vunz neix le, couh van byaij goq daixlingh mbiengj bae. 32 Caemh miz boux vunz Youzdaiq dwg Liqveiq dih doengh daih gajlaeng he daeuj daengz mwnq, caemh luj boux daixdaeuz gvax goq daixlingh gok byaij goqbae. 33 “Gajlaeng, miz boux Sajmajliqyaq vunz he bae youz. De youz bae daengz mwnq, yawjraen boux ngaiz vunz dub sieng mwnq, couh cojgvaq hwj 34 byaij goq bae, bang de cat di youz, di laeujyw he haeuj mwnq sieng de bae, caiq bang de duk mwnq sieng he hawj de. Gajlaeng vanzlij raeuz de hwnj gwnz gumq duz max bonjfaenh de bae, daiq de bae daengz aen bouq iq aeu hek he youq, caemh saeqsim cauqguq de. 35 Daengz ngoenzlaeng, de coengq ngaenz hawj goengcawj bouq mwnq, raengq goeng de naeuz: ‘Lauxbanj, cingj mwngz bang gou cauqguq boux vunz sieng neix. Hauhnaeuz bienh ngaenz neix mbouj gaeuq, daengj gou ma le menhcij caiq bouj hawj mwngz.’” 36 Yehsuh gangj daengz dineix le, couh cam boux fazliz cenhgyah mwnq naeuz: “Hawjm'z naeuz yawj hux, sam boux vunz neix, bouxlawz dwg boux ngaiz caeggeq duet roen mwnq dih gekleiz nej?” 37 Boux fazliz cenhgyah mwnq naeuz: “Boux hojsik bang vunz mwnq.” Yiengq Yehsuh couh doiq de naeuz: “Yiengq mwngz couh ciuq de yienghmwnq bae guh bax.” 38 Yehsuh caeuq doengh boux lwgsae de vanzlij yiengq fueng Yehluqsajlaengj bae. Gyoengqde bae daengz aen mbanj he; aen mbanj mwnq miz boux vunzbaz he heuh Majdaq. De raen Yehsuh le, couh heuh Yehsuh bae ndaw ranz de. 39 De miz dahnuengx he heuh Majliqyaq. Yehsuh bae daengz ndaw ranz de le, Majliqyaq cungj dwg naengh youq henz ndang Yehsuh, dingq Yehsuh gangj vah. 40 Mwhde, aenvih Majdaq siengj daih ndei bouxhek, de nyungjnyungj nyatnyat hwj guh gaiq dawz gaiq. Guh hwj de simnyap le, couh doiq Yehsuh naeuz: “Bouxcawj gou hax, gou miz baenxbienh hong ij guh, hoeng, dahnuengx gou cungj mbouj bang gou guh saek di, dinghdingh naengh youq mwnq; mwngz mij raen hax? Cingj mwngz bang gou naeuz de, hawj de goq daeuj bang gou bax.” 41 Gajlaeng, Yehsuh han naeuz: “Majdaq hax, Majdaq, Mwngz vih hong lai hwj simnyap, 42 hoeng, youqgaenj hih saeh cijngamq miz gienh he. Majliqyaq de gaenq guh ndaej daengz lo; mij'z vunz ndaej dajlaeng de dued aeu bae law.”
1 Miz baez he, Yehsuh youq mwnq he gouz Cangqdiq haenh Cangqdiq. De gouz Cangqdiq haenh Cangqdiq sat le, miz boux lwgsae he doiq de naeuz: “Bouxcawj gou hax, cingj mwngz son raeuz gouz Cangqdiq haenh Cangqdiq bax, caemh luj Yozhanq son gij lwgsae de yienghmwnq hax.” 2 Yiengq Yehsuh han naeuz: “Faenhsou gouz Cangqdiq haenh Cangqdiq hax, ij yienghneix naeuz: Bohmbwn hax, caenhgag mwngz cij dwg caencwnz; Vunz couh ij soenhcungq mwngz. Muengh gij gienzveih mwngz youq lajmbwn fazveih. 3 Nyok hawj raeuz ngoenznaengz ij gw he. 4 Mienx gij coih raeuz, Aenvih raeuz caemh mienx doengh boux daekcoih raeuz he. Caemh muengh raeuz mbouj ngaiz yungx bae guh vaihsaeh.” 5 Yehsuh caiq naeuz: “Faenhsou ndaw neix miz byawz singjngwnz bae laeng baengzyoux, doiq boux baengzyoux mwngz naeuz: ‘Ciq sam aen menqbauh hawj gou bax, 6 aenvih gou miz baengzyoux daj gyae daeuj laeng gou, hoeng gou mij gijmaz daih de.’ 7 Yiengq, hauhnaeuz boux de daj ndaw ranz han naeuz: ‘Gaej daeuj cauz gou! Doumonz gaenq gven lo; gou caeuq lwgngez gou gaenq ninz lo. Gou mbouj caiq hwnq daeuj aeu gijmaz hawj mwngz law.’ 8 “Gou naeuz sou ni hax, luj yienghneix, cungjsuenq naeuz boux mwnq mbouj dwg boux baengzyoux de hwjx, hoeng hauhnaeuz boux de cungj caenhrox gouz caenhrox gouz, yiengq de couh ij ngaiz hwnq daeuj aeu hawj boux de bax. 9 Sojhij gou naeuz sou ni, gouz Cangqdiq caemh dwg ityiengh; ij mbouj dingz hih gouz. Faenhsou gouz, couh hawj faenhsou; faenhsou naemqsim bae cimh, couh ndaej hawj faenhsou cimhraen; mbouj dingz hih ndaek dou, couh hoi dou hawj faenhsou. 10 Aenvih gouz, couh ndaej; cimh, couh ndaej cimhraen; ndaek dou, couh hoi dou hawj.” 11 De vanzlij caiq naeuz: “Miz bouxlawz guh boh hih, lwg heuh aeu bingj, dauq aeu rin hawj de? Heuh aeu bya, dauq aeu ngwzdoeg dangq bya ma hawj de nej? 12 Heuh aeu raeqgaeq, dauq aeu duz sipndangj hawj de nej? 13 Gannaeuz faenhsou mbouj suenq dwg vunz ndei lah, hoeng, vanzlij rox ij aeu gij ndei he hawj lwg. Gangjnaeuz dwg Bohmbwn, de mbouj engqgya ij soengq Hoenzsaenz de hawj doengh boux gouz de hih haz?” 14 Miz mbat he, Yehsuh daj gwnz ndang boux vunz ngoemx he boenq duz fangz he okdaeuj. Duz fangz ok ma le, boux ngoemx de couh doq ndaej gangj vah okdaeuj lo. Gij vunz youq mwnq raen yienghneix le, cungj raen geizheih ij rai bae. 15 Hoeng, youq ndaw gyoengq vunz mwnq engq miz vunz naeuz: “Gijn'x miz maz geizheih nex? De cijmboujgoq dwg baengh Bezsihbuz duz fangzvuengz neix boenq fangz hwj mah.” 16 Yiengq caemh miz hih vunz siengj sawq Yehsuh, siengj hawj de guh gij geizmiuj he ndaej cingqmingz naeuz de dwg baengh Cangqdiq he. 17 Hoeng, Yehsuh yawj ndaej ok gyoengqde ngeix gijmaz, couh doiq gyoengqde naeuz: “Mboujguenj aen gueklawz, ndaw guek gag luenh hih, aen guek mwnq caemh mbouj baenz maz guek lo; baih liux bae. Caemh mboujguenj ranzlawz doxceng doxnauh hih, ranzlawz caemh gaengjdingq ngaiz siksanq liux bae. 18 Caiq hauhnaeuz fangzvuengz bonjfaenh gag hoenx bonjfaenh, yiengq aen guek de mijyaengz siksanq liux haz? Sojhij gou baeq dwg baengh de ma boenq fangz hwj! 19 Yiengq, hauhnaeuz gou dwg luj faenhsou naeuz hih yienghmwnq, dwg baengh de ma boenq fangz he, yiengq gij lwgsae faenhsou dwg baengh byawz ma boenq fangz nej? Ciuq luj yienghneix, gyoengqde caemh dwg baengh fangz ma boenq fangz lo, hoeng gyoengqde gaengjdingq naeuz mbouj dwg. Yiengq faenhsou mijyaengz dwg loek hih maz? 20 Gizsaed gou dwg gauq gij bonjsaeh Cangqdiq ma boenq fangz hih, sojhij couh ndaej cingqmingz gij gienzveih Cangqdiq gaenq youq faenhsou dineix fazveih lo. 21 “Yiengq, caiq hauhnaeuz it boux yienghyiengh ujgiq cungj miz, cixcaemh ndang cangq hoenz hwdhwd, de gag hen aen ranz bonjfaenh, yiengq ndaw ranz de sojmiz hih doxgaiq couh mij naih saek yiengh. 22 Hoeng, hauhnaeuz miz boux beij de engq ak engq rengz he, caemh dub ndaej hingz de nex, yiengq doenghheij ujgiq de cungj mij'z yungh, cungj ngaiz vunz ciengj aeu liux. Doenghheij doxgaiq de caemh ngaiz ciengj aeu liux bae faen hawj vunz. 23 “Caiq hauhnaeuz mbouj gaep gou hih vunz, couh dwg fanjdeiq gou; mbouj caeuq gou boenq yiengz doxcomz hih, couh dwg boenq doengh duz de sanq bae lo.” 24 Yehsuh caiq naeuz: “Duz fangz yak daj gwnz ndang boux ngaiz doz he ok ma le, couh youq rogndoi gvaenxgvaenx gvaxgvax ij cimh mwnq he ma yietbaeg. Hoeng gvax bae gvax dauq cungj mij cimh ndaej raen miz mwnq youq he. Yiengq duz de couh naeuz: ‘Gou vanzlij dwg dauq maj mwnq gaxgonq gou youq goq he youq suenq lox.’ 25 Gizsaed duz de dauq maj daengz le, cij rox naeuz mwnq gaxgonq de youq goq he mwnq gaenq soujsib ndei, sauq cengh seuqset lo. 26 Duz de raen yienghneix le, couh ok bae iu baenx caet duz fangz beij bonjfaenh de lij ak lij yak he daeuj caeuq de haeuj bae youq. Youq le, boux vunz mwnq beij gaxgonq de vanzlij camj.” 27 Youq mwh Yehsuh gangj doenghgij vah neix hih mwhde, gyoengq vunz mwnq ndaw de miz boux vunzbaz he hemq de naeuz: “Seng mwngz ciengx mwngz hih miz fuk lo!” 28 Hoeng Yehsuh dauq han naeuz: “Gannaeuz dwg yienghmwnq lo hoeng, cungj mbouj ndaej beij doengh boux cingqcaen dingq gij vah Cangqdiq, caemh ciuq de gangj hih yienghmwnq bae guh hih miz fuk hah.” 29 Gyoengq vunz daeuj gvaengz dingq Yehsuh, yied gvaengz yied lai. De couh gaihcij doiq gyoengq vunzlai naeuz: “Aen nienzdaiq neix hax! Gij vunz doegdoeg siebsieb hih cienfanh lai he! Gyoengqde mbouj sinq gou, dauqfanj ijsiengj cimh yawj miz gijmaz gingjdoengh, hoeng caenhgag cawzok Yoznaz hih gij geizmiuj mwnq, caiq mij gijmaz gingjdoengh ndaej hawj gyoengqde yawj haem lo. 30 Yoznaz baenzlaw youq ndaw ra gij vunz Niznizveih bienqbaenz gij gingjdoengh he, gou, Vunz dih Daiqbiuj, caemh ij youq aen nienzdaiq neix guh gij gingjdoengh he. 31 “Daengz mwh saemjbuenq hih mwhde, boux nijvangz aen guek baixnamz he ij daeuj gauq gij vunz daih neix, aenvih doenghbaez de daj baenxlai gyae daeuj dingq Sojlozmaenz goengjvuengz neix gangj vah. De daj baenxlai gyae daeuj dingq, hoeng gij vunz dineix nej? Youq dineix couh miz boux beij Sojlozmaenz vanzlij veijdaq he, hoeng dauq mij'z vunz dawz haeuj rwz dingq de. 32 “Daengz ngoenz saemjbuenq hih ngoenz mwnq, gij vunz Niznizveih caemh ij daeuj gauq gij vunz dineix, aenvih youq dineix couh miz boux beij Yoznaz vanzlij veijdaq he lo, hoeng gyoengqde dauq mbouj dingq de. Gij vunz Niznizveih nej, gyoengqde dingq Yoznaz cenzgangj gij vah Cangqdiq le, couh nginh loek, couh gaijgoq lo.” 33 Yehsuh vanzlij caiq naeuz: “Mij'z vunz diemj daeng le caiq dawz aen de yo haeuj ndaw canghaeux bae cixnaeuz aeu gang ma goemj hwj. Dauqfanj ij dawz aen de coengq hwnj gwnz daiz bae, hawj vunz haeuj daeuj ndaej raen rongh. 34 Cehra mwngz caemhdangq gwnz ndang mwngz dih aen daeng he. Ceh de rongh, baenx ndang cungj caemh rongh; ceh de myox, baenx ndang cungj caemh myox. 35 Sojhij ndaw sim mwngz ij wnggai dwg rongh, mbouj wnggai dwg laep. 36 Hauhnaeuz gwnz ndang mwngz cungj dwg rongh, mbouj miz saek di laep, yienghmwnq caemhdangq luj aen daeng rongh sagsag he rongh youq gwnz ndang mwngz, hawj mwngz baenx cenz ndang cungj rongh sagsag.” 37 Yehsuh ngamq gangj doengh gawq vah neix sat, miz boux gaep haeuj Fazliqcaiq baij he cingj de bae laeng de gw haeux. De caemh bae gw. 38 Yiengq boux gaep haeuj Fazliqcaiq baij mwnq raen Yehsuh mij ciuq gyoengqde dih laehbeih swiq fawz cij gw haeux, couh raen geizheih ij rai bae. 39 Gajlaeng Yehsuh rox le, couh doiq boux de naeuz: “Gij vunz Fazliqcaiq baij faenhsou hax! Faenhsou caenhrox swiq buenz, swiq cenj, swiq baixrog de cengh yupyup hwj. Hoeng, gizsaed hax, haex max rog hih ngaeuz, ndaw hih yaq. Ndaw sim faenhsou cienfanh dam cienfanh doegsieb he. 40 Doenghheij vunz ngawz faenhsou hax! Faenhsou mbouj rox haz, Cangqdiq mbouj caenhgag cauh baixrog nej; de caemh cauh baixndaw hah. 41 Cijaeu faenhsou dawz gij doxgaiq ndaw buenz ndaw cenj soengq hawj vunz gungz, yiengq doiq faenhsou ma gangj cungj dwg cengh hih lo.” 42 De vanzlij caiq naeuz: “Gij vunz Fazliqcaiq baij hax, faenhsou ij satsoq lo! Aenvih faenhsou caenhgag rox daj ndaw boqoh hah, veizyangh hah, gak cungj saujyoz sou ndaej haeujma hih ndaw de soengq hawj Cangqdiq cib faenh cih it lah, hoeng dauq mij rox ij baenzlaw doiq vunz ndei caeuq aiq Cangqdiq. Gizsaed hax, doenghgij neix faenhsou cungj ij wnggai guh daengz. 43 “Gij vunz Fazliqcaiq baij hax, faenhsou ij satsoq lo! Aenvih faenhsou youq ndaw veiqdangz cungj haenj ciengj naengh youq dangqnaj, caemh haenj youq gwnz gai hawj vunzlai dongx faenhsou ndei. 44 Faenhsou satsoq lo! Aenvih faenhsou caemh luj oenciq meh ndaw boengz.” 45 Yehsuh yienghneix gangj le, miz boux fazliz cenhgyah he doiq Yehsuh naeuz: “Lauxsae, mwngz yienghneix naeuz, caemhdangq sai raeuz lo.” 46 Yehsuh dingq le, han naeuz: “Doenghheij fazliz cenhgyah faenhsou hax, caemh ij satsoq lo! Aenvih faenhsou dawz gij naek hawj vunz rap, bonjfaenh dauq bi fawz hoengq ndetndet. 47 Faenhsou satsoq lo! Aenvih faenhsou laeb guh moh hawj doengh boux cenz gij vah Cangqdiq mwnq. Faenhsou yienghneix guh dwg gyaj hih; gizsaed doengh boux cenz gij vah Cangqdiq neix cungj dwg ngaiz doenghheij cojgoeng faenhsou gajrai he. 48 Faenhsou yienghneix guh caemhdangq caeuq gyoengqde caemh con doengzvaq he; faenhsou ciep guh gij hong gyoengqde gaj doengh boux cenz gij vah Cangqdiq he, moek gyoengqde. 49 Cangqdiq senqsi cix rox faenhsou, sojhij de naeuz goq: Gou ij baij boux cenz gij vah gou caeuq baij dwzbaijyienz bae gyoengqde mwnq, hoeng, doengh boux gou baij bae he miz mbangj hih vunz ngaiz gyoengqde haih, miz mbangj hih vunz ngaiz gyoengqde gaj. 50 Sojhij daj cauh mbwn cauh deih daengz seizneix, gaj boux cenz gij vah Cangqdiq hih coih cungj dwg hawj gij vunz daih sou rap. 51 Couh dwg naeuz daj Yaqbwz ngaiz gaj itcig daengz Sajgyahliqyaq youq mwnq aen daiz dajbwiz caeuq aen laeuz Cangqdiq hih cungqgyan mwnq ngaiz gaj, sojmiz dih coih cungj dwg hawj gij vunz daih sou rap.” 52 De caiq naeuz: “Doenghgij fazliz cenhgyah faenhsou hax! Faenhsou satsoq lo! Aenvih faenhsou couh dangq luj vunz dawz gij seiz canghguq ndaw de miz gij dijbauj he, couh dwg naeuz miz Cangqdiq dih vah; bonjfaenh mbouj hoi haeuj bae cixbah lo, hoeng, caemh mbouj hoi hawj vunz haeuj bae.” 53 Yehsuh gangj daengz neij sat le, couh ok ma bae daixlingh mwnq lo. Gajlaeng doenghheij fazliz cenhgyah he caeuq doenghheij gaep haeuj Fazliqcaiq baij he mbouj fug, couh haenq de ij rai. Couh daj mwhmwnq hwnj, gyoengqde cungj siengj banqfaz ok nanzdaez hawj de, 54 siengj ra congxmbongq haih de.
1 Yied ngoenz yied miz vunz lai daeuj dingq Yehsuh gangj vah. Yiengq miz mbat he, miz baenx cien baenx fanh vunz daeuj dingq de gangj vah, lai hwj doxcaenx doxnap bae. Gajlaeng Yehsuh doiq gyoengq lwgsae de naeuz: “Faenhsou ij siujsim, mbouj ndaej luj gij vunz gaep haeuj Fazliqcaiq baij hih yienghmwnq cang guh vunz ndei. Yienghmwnq sawjhawj vunz bienq simya, yied bienq yied ya, couh luj gij yauqmuj fat guh menqbauh he, dihdi he couh fat baenxbienh lo. 2 Hoeng mboujguenj baenzlaw cang, mij'z naeuz miz gijmaz saeh ndaej muenz vunz; swhmboujyienz miz ngoenz he cungj ngaiz vunz rox, caemh mij'z naeuz miz gijmaz miqmiz mbouj ngaiz vunz rox. 3 Sojhij, faenhsou ndoj haeuj gox laep he bae caegcaeg gangj vah, cungj caemh ciuqyiengh ngaiz boux youq mwnq rongh he ndaej dingqri; youq ndaw rug daep haeuj rwz bae gangjngvap hwj mbouj siengj hawj vunz dingqri lah, hoeng, cungj dwg yo raeuj caeghangx ok he, gizsaed couh luj vunz youq gwnz dingjranz hemq yienghmwnq hemq gog saxsax. 4 “Hoeng, baengzyoux gou hax, gou naeuz sou ni, sou gaejyungh lau doengh boux caenhgag ndaej gaj aen ndangdaej faenhsou le, gajlaeng caiq mij bonjsaeh caiq ndaej haih daengz faenhsou he. 5 Gou naeuz sou ni, sou ij lau hih dauq dwg lau boux gaj vunz le, caiq miz gienz dawz vunz vwt roengz mwnq fad fangz mwnq bae hih boux mwnq. Couh dwg boux neix sou wnggai lau he!” 6 Yehsuh caiq naeuz: “Haj duz roeglaej mbouj dwg cijngamq dij saek song faen ngaenz maz? Hoeng, Cangqdiq dauq it duz cungj mbouj lumz. 7 Gangjnaeuz dwg faenhsou; faenhsou miz geijlwh dug byoem, de cungj rox. Sou gaej you; faenhsou beij haujlai roeglaej dij ndaej lai lo.” 8 De vanzlij caiq naeuz: “Famz youq dangqnaj vunz nginh gou hih, gou, Vunz dih Daiqbiuj, caemh youq dangqnaj bouxcai Cangqdiq nginh de; 9 fanjgoqma, famz youq dangqnaj vunz mbouj nginh gou hih, gou, Vunz dih Daiqbiuj, caemh youq dangqnaj bouxcai Cangqdiq mbouj nginh de. 10 Gangj vah famh gou, Vunz dih Daiqbiuj, vanzlij suenq naeuz ndaej nyiuz de; hoeng, bangjlaih Hoenzsaenz Cangqdiq hih, mbouj ndaej nyiuz. 11 “Miz vunz daiq faenhsou bae daengz veiqdangz, cixnaeuz daiq bae daengz boux lingjdauj mwnq bae saemj faenhsou nex, faenhsou gaejyungh you ij baenzlawz gangj, baenzlaw han, 12 aenvih mwhde Hoenzsaenz Cangqdiq gaengjdingq son faenhsou baenzlaw gangj.” 13 Yehsuh gangj daengz dineix le, youq ndaw gyoengq vunz mwnq miz vunz doiq Yehsuh naeuz: “Lauxsae, cingj mwngz naeuz hawj boux beixnuengx gou caeuq gou faen gij gyahcanj daxboh gou bax.” 14 Yiengq Yehsuh han boux de naeuz: “Mwngz hax, mwngz, dwg byawz baij gou daeuj dang boux buenqguenh faenhsou, hawj faenhsou faen gyahcanj nej?” 15 De yienghneix han boux de le, couh doiq gyoengq vunz naeuz: “Faenhsou ij siujsim, mbouj wnggai damsim, aenvih mboujguenj guxmaz vunz, cungjsuenq naeuz boux de cienfanh fouq cienfanh miz he, hoeng caemh mbouj ndaej aeu gij saizcanj de ma rau diuz mingh bonjfaenh.” 16 Yehsuh vanzlij yungh gij beijgangj he ma doiq gyoengqde naeuz: “Miz boux vunz fouq he, gij reihnaz de cienfanh ndei cienfanh biz he, sou ndaej ciencien fanhfanh haeuxhaeux mienhmienh he, 17 sojhij de couh gag naemj: ‘Yax! Sou ndaej ciencien fanhfanh haeuxhaeux mienhmienh he lo hoeng, mij mwnq gaeuq coengq hih hah. Ij baenz guh nej? 18 Ox! Mijn'x cek aen canghguq gaeuq he hwj, doiqyungz hwnq aen canghguq hung he ndaej gaeuq coengq sojmiz hih haeux caeuq sojmiz hih doxgaiq he. 19 Yienghmwnq gou couh gag doiq bonjfaenh gou naeuz: “Ox! Gou gaenq louz ndaej baenxbienh gij gw caeuq baenxbienh doxgaiq he lo! Ndaej gaeuq gou gwgw yunghyungh baenx geij bi lo. Gou caenhrox mbouj you mbouj heiq hih goq saedceij sat lo.”’ 20 “Hoeng, Cangqdiq dauq doiq de naeuz: ‘Gij vunz ngawz mwngz hax! Yaepm'x mwngz cungj byoeng lo! Mwngz diuh baenx lai; ij diuh hawj byawz nex?’” 21 Yehsuh caiq naeuz: “Famz bouxlawz gag naeuz bonjfaenh fouqmiz hih, Cangqdiq caemh naeuz de gungz hih, luj cungj vunz neix daengz gatsat, sojmiz hih cungj mij'z yungh.” 22 Yehsuh vanzlij doiq gyoengq lwgsae de naeuz: “Sojhij gou naeuz sou ni hax, gaejyungh vih gw vih daenj hwj you, 23 aenvih mingh dij goq gij gw, aen ndang dij goq buh. 24 Hawjm'z ngeixngeix yawj hux, duz roegga cungj mij ndaem mij sou, cix mij'z canghguq, hoeng Cangqdiq ciuqyiengh ciengx duz de, cungj mij hawj de ngaiz rai iek haem; gangjnaeuz faenhsou beij duz roeg dij ndaej lai lo. 25 Faenhsou dineix miz byawz you le couh ndaej lai souhyienz diemjcung he nej? 26 Yiengq, hauhnaeuz faenhsou daiq lai dih diemjcung neix cungj guh mbouj daengz nex, hozbiet ij vih saeh hwj you nej? 27 “Ngeixngeix yawj, doenghheij go bwzhozva dwg baenzlawz hwnj hwnjdaeuj hih. Go de cix mbouj hoj guh hong, cix mbouj hoj daemj faiq, hoeng, gou naeuz faenhsou ni, cungjsuenq Sojlozmaenz goengjvuengz neix youq mwh de ceiq ing'yungz hih mwhde daenj hih buh cungj mbouj ndaej beij duj bwzhozva gyaeu. 28 Faenhsou sinq Cangqdiq sinq daiq noix lai lo! Hawjm'z yawjyawj hux. Doenghheij nyaengq rogndoi hax, doengh go de hwnj le, goq mbouj geij ngoenz couh ngaiz gveng haeuj cauq bae lo. Hoeng, Cangqdiq ciuqyiengh doiq go de ndei, hawj go de heu swdswd. Gangjnaeuz dwg faenhsou, de mbouj engqgya ij hawj buh hawj faenhsou daenj haz? 29 Faenhsou gaejyungh caenhrox vih gw vih daenj hwj you. 30 Vih gw vih daenj hih cungj dwg doengh boux mbouj rox Cangqdiq he. Faenhsou siengj aeu gijmaz, siengj gw gijmaz, Bohmbwn sou gaenq rox lo. 31 Cijaeu aen sim faenhsou yiengq aen guek Cangqdiq, gwgw daenjdaenj de swhmboujyienz hawj faenhsou.” 32 De vanzlij doiq gij lwgsae de naeuz: “Lwg gou hax, faenhsou gaejyungh lau, aenvih Bohmbwn faenhsou de haenjheiq hawj faenhsou guenj aen guek de. 33 Sojhij, faenhsou ij sijndaej dawz gij doxgaiq faenhsou hai bae, dawz gij ngaenz faen hawj vunz gungz, vih bonjfaenh cwnjbiq aen ngaenzbau mbouj rox vaih, mbouj rox naeuh he, youq gwnzmbwn ngaenz yungh mbouj rox liux he, aenvih gwnzmbwn mbouj miz caeg, caemh mbouj miz non sae. 34 Couh dwg naeuz, gij cienzcaiz faenhsou youq mwnqlaw, aen sim faenhsou caemh youq mwnqlaw.” 35 De caiq naeuz: “Faenhsou ij siengzseiz guh ndei cwnjbiq, cug sairwet ndei, diemj daeng ndei. 36-38 Couh luj bouxhoiq daengj bouxcawj de bae gw laeuj ma, mboujguenj bouxcawj de singjngwnz singjhaemh seizlaw ma, de ndaek dou, couh doq ndaej hoi dou hawj de. Cijaeu de raen bouxhoiq de yienghneix, couh rox bouxhoiq de singqsag. Luj doengh bouxhoiq yienghneix couh miz fuk lo. Gou saedsaeh naeuz sou ni, luj yienghneix dih hoiq, bouxcawj caemh hawj de haeuj daiz bae gw haeux, de dauq cug sairwet ndei hwj swqhaeuh bouxhoiq. 39 “Gou caiq naeuz sou ni, hauhnaeuz miz bouxlawz gaenq rox naeuz bouxcaeg ij seizlaw daeuj lo nex, yiengq boux de couh gaengjdingq mbouj hawj bouxcaeg ndonj haeuj dou bae lo. 40 Gou gangj hih doenghgij saeh neix couh dwg naeuz, gou, Vunz dih Daiqbiuj, ij seizlaw ma faenhsou mbouj rox; sojhij faenhsou caemh ij guh ndei cwnjbiq.” 41 Yehsuh gangj daengz dineix le, Bijdwz cam de naeuz: “Bouxcawj gou hax, mwngz hih gij beijgangj neix dwg doiq gyoengqraeuz gangj hajx, cixnaeuz dwg doiq gyoengq vunzlai gangj hax?” 42 Gajlaeng Yehsuh couh doq han naeuz: “Bouxlawz dwg boux lauxsaed caiq singqsag dih bouxhoiq nej? Bouxlawz dwg boux bouxcawj baij de guenj ndaw ranz de hih saeh caeuq hawj de nganqciz fat haeux hawj doenghheij vunzhoiq mwnq hih boux mwnq nej? Bouxlawz dwg boux neix nex, gij beijgangj gou couh dwg doiq boux de gangj lo. 43 Boux neix caemh dwg boux bouxcawj ma le, raen de caemh ciuq de raengq hih yienghmwnq bae guh hih boux mwnq lo. Yiengq luj yienghneix hih hoiq couh miz fuk lo.” 44 Yehsuh vanzlij caiq naeuz: “Gou saedsaeh naeuz faenhsou ni, luj yienghneix hih hoiq, bouxcawj couh ij baij de guenj de sojmiz hih saizcanj. 45 “Yiengq, hauhnaeuz bouxhoiq mwnq ndaw sim de naemj: ‘Bouxcawj gou mij ma baenx vaiq law,’ de yienghneix naemj le, couh gaihcij doh doenghheij hoiq de, caiq gwgw angqangq, cix gw laeuj hwj laeuj fiz bae. 46 Yiengq, hauhnaeuz bouxcawj de sawqmwh ma, bouxhoiq de caemh mij rox, yiengq bouxcawj de caemh gaengjdingq fad de, fad hawj de caeuq doenghheij hoiq mbouj dingq vah he doxdoengz ngaiz satsoq. 47 Aenvih de mingzmingz rox gij iqswh bouxcawj de lo, hoeng de mbouj bae cwnjbiq, cix mbouj ciuq guh, yiengq gaengjdingq engq ngaiz fad lai naek. 48 Hoeng, hauhnaeuz boux mbouj rox bouxcawj de ij hawj de guh gijmaz, gajlaeng de caemh ngaiz guh loek, yiengq de couh mbouj ngaiz fad baenx lai, aenvih lai sinq bouxlawz, lai hawj bouxlawz guenj hih, couh yauhgyiuz bouxlawz lai.” 49 Yehsuh vanzlij caiq naeuz: “Gou daeuj lajmbwn couh dangq dawz feiz daeuj; gou caemh muengh gij feiz neix gaenq diemj dawz lo. 50 Gou caemh ij ngaiz souh nanh dih sijlij; gij sijlij neix gou cungj simnyap mijyaengz ndaej guh daengz. 51 Faenhsou naemqnaeuz gou daeuj lajmbwn dwg hawj vunz doxndei hajx? Mij dwg law nwjx! Gou naeuz sou ni, gou daeuj dwg hawj vunz doxdwk doxdanh lah. 52 Sojhij daj seizneix hwnj, ndaw ranz miz haj boux hih, cungj dwg doxdwk doxdanh, sam boux ceng song boux, song boux ceng sam boux. 53 Bohlwg doxceng; mbouj dwg boh ceng lwg, couh dwg lwg ceng boh. Meh caeuq lwg doxceng; mbouj dwg mwngz ceng gou, couh dwg gou ceng mwngz. Meh caeuq bawx doxceng; cungj dwg mwngz ceng gou, gou ceng mwngz.” 54 Yehsuh gangj daengz dineix le, couh doiq gyoengq vunzlai naeuz: “Faenhsou baex yawjraen baixsae miz fwj, couh naeuz: ‘Ij fwn doek lo.’ Faenhsou naeuz caemh deng gwhraix. 55 Fan rumz namz, couh naeuz: ‘Dienheiq ij bienq hwngq lo.’ Caemh cingqgawq gwhraix, faenhsou cungj naeuz ndaej deng. 56 Hoeng, doenghheij vunz rox gyajcang faenhsou hax, faenhsou cungj rox yawj dienheiq bienqvaq, hoeng vihmaz mbouj rox yawj aen nienzdaiq neix nej? 57 “Faenhsou vihmaz mbouj gag rox buenqduenq yawj gijmaz dwg deng, gijmaz dwg mbouj deng he nex? 58 Hauhnaeuz miz vunz gauq mwngz, gauq bae daengz fazdingz bae, yiengq mwngz vihmaz mbouj domh youq mwh mijyaengz bae fazdingz cihsenz couh caeuq de gangjhuz boiz ngaenz nej? Yienghmwnq couh mienxndaej de dawz mwngz gyau hawj fazguenh buenq mwngz lauzgaij. 59 Daengz mwhmwnq mwngz cij ij gangjhuz boiz ngaenz caemh mij gib laem lo. Daengz mwhmwnq mwngz noix faen he cungj mbouj ndaej, caemh gaejyungh muengh naeuz ndaej ok ma lo.”
1 Couh youq mwhneix, youq ndaw gyoengq vunz mwnq miz vunz naeuz Yehsuh ni, gij vunz Gyahliqliq youq bwiz Cangqdiq mwhde ngaiz saengjcangj Bijlahdoh gajrai. 2 Yehsuh dingq le, couh naeuz: “Faenhsou naemqnaeuz gyoengq vunz mwnq ngaiz gaj, dwg gyoengqde beij doenghheij gizdah Gyahliqliq vunz miz coih lai hajx? 3 Gou naeuz sou ni, mij dwg yienghneix law nwjx; gyoengqde caeuq faenhsou doxdoengz! Hauhnaeuz faenhsou mbouj gaijgoq nex, faenhsou caemh ciuqyiengh ngaiz rai. 4-5 Caemhdangq luj gaxgonq, youq Yehluqsajlaengj dih aen dap Sihlozyaq doemq roengzma daenz dawz vunz, rai bae baenx cibbet vunz. Faenhsou naemqnaeuz doengh gyoengq vunz neix miz coih lai hax? Mij dwg law; gyoengqde caeuq gizdah youq Yehluqsajlaengj hih vunz ityiengh. Gou naeuz sou ni, hauhnaeuz faenhsou mbouj gaijgoq nex, faenhsou ciuqyiengh ngaiz rai.” 6 Yehsuh gangj daengz dineix le, couh yungh gij beijgangj he ma naeuz: “Miz boux he, youq ndaw suen buzdauz bonjfaenh de ndaem go uzvahgoj he. De ijsiengj youq gwnz go de cimh gij mak de, hoeng, hanz cimh cungj cimh mbouj raen miz. 7 Yiengq de couh doiq boux guenj suen de naeuz: ‘Hawjm'z yawj hux! Go uzvahgoj neix, gou muengh baenx sam bi lo, hoeng cungj mij dawz saek aen mak hawj gou. Raemjrak bae sat lox, mijn'x ciemq dieg lai!’ 8 “Gajlaeng goeng guenj suen de naeuz: ‘Bouxcawj hax, caiq daengj bi haem yawjyawj bax. Daengj gwh ndai'ndai viqviq hwj, 9 yawj go de daengz bimoq dawz mbouj dawz, menhcij raemj.’” 10 Miz ngoenz ngoenzyietbaeg he, Yehsuh youq veiqdangz son vunz. 11 Yiengq youq mwnq miz meh vunzbaz he ngaiz fangz doz hwj bingh baenx cibbet bi lo; gij rwet de cungj goz liux lo. 12 Yehsuh yawjraen de le, couh heuh de goq daeuj, doiq de naeuz: “Mehsimj hax, mwngz mbouj miz bingh lo.” 13 Yehsuh gangj gawq neix le, couh doq oemj fawz haeuj laeng de bae. Diuz rwet de couh majcangq doq ndei lo, guh hawj de cungj angq hwj haenh Cangqdiq soebsoeb bae. 14 Vih yienghneix, boux guenj veiqdangz he raen Yehsuh youq ngoenz ngoenzyietbaeg bang vunz yw bingh le, couh hujheiq dengxdengx hwj doiq gyoengq vunz naeuz: “Faenhsou mbouj rox haj? Roek ngoenz ndaej guh hong; youq ndaw roek ngoenz neix, ngoenzngoenz cungj ndaej daeuj yawj bingh. Hoeng caenhgag youq ngoenz ngoenzyietbaeg mbouj ndaej yawj bingh, faenhsou mbouj rox haj!” 15 Gajlaeng Yehsuh han boux de naeuz: “Doenghgij vunz gyajcang guh simndei simsoh dih vunz hax! Nanzdauh faenhsou youq ngoenz ngoenzyietbaeg mbouj coengq doenghheij cwzcwz maxmax faenhsou okbae gw raemx? 16 Meh vunzbaz neix dwg Yaqbwzlahhanj dih doengh daih gajlaeng he. De ngaiz Sajdanq hoedheux baenx cibbet bi lo; nanzdauh youq ngoenz ngoenzyietbaeg couh mbouj ndaej bang de, gouq de lo mah?” 17 Yehsuh gangj daengz dineix le, doenghheij fanjdeiq de hih vunz cungj najmomjmwt, hoeng, gyoengq vunzlai dauq vih Yehsuh soj guh hih doenghgij geizmiuj hih saeh hwj angq raixcaix. 18 Miz baez he, Yehsuh naeuz: “Guek Cangqdiq dwg luj baenzlawz yiengh nex? Gou ij aeu gijmaz ma beijgangj nej? 19 Gou naeuz sou ni, guek Cangqdiq luj ceh byaekgat he. Gannaeuz ceh de baenxlai iq lah, hoeng, daengj daengz ceh de did hwnjdaeuj le, couh menhmenh hung baenz go byaek hunghung he lo, hung hwj daiqlienz roeg cungj ndaej youq gwnz nge de caux rongz bae.” 20 De vanzlij caiq naeuz: “Gou vanzlij ij dawz aen guek Cangqdiq ma beij luj gijmaz haem nej? 21 Gou naeuz hax, aen guek Cangqdiq couh luj yauqmuj. Miz vunzbaz dawz ma caeuq geij cib gaen mbamienh gaenx hwj fat mienh. Dihdi he couh fat ndaej baenxbienh.” 22 Mwh Yehsuh yiengq fueng Yehluqsajlaengj bae hih mwhde, de byaij goq haujlai mbanj haujlai singz bae gangj gvanhhih guek Cangqdiq dih ndei siuhsiz. 23 Yiengq miz boux he cam de naeuz: “Bouxcawj gou hax, ndaej gouq hih vunz mbouj lai bax?” 24 Yehsuh dingq le, couh doiq gyoengq vunz naeuz: “Gou naeuz sou ni hax, siengj ndaej gouq couh luj caenx haeuj aen dou gaeb gedged he bae; faenhsou ij roengzrengz caenx haeujbae cij ndaej. Hoeng, gou naeuz sou ni, baezneix miz haujlai vunz cungj siengj haeuj bae, hoeng haeuj mbouj ndaej. 25 Daengj daengz boux cawjgya hwnq daeuj gven dou le, faenhsou cij rox ndwn youq rog neix ndaek dou, naeuz: ‘Goengjau, hoi dou hax!’ Yiengq boux de couh ij naeuz: ‘Gou mbouj rox faenhsou dwg byawz nej!’ 26 Daengz mwhmwnq, faenhsou couh naeuz: ‘Raeuz caeuq mwngz gw haeux gw laeuj goq hwj; mwngz vanzlij youq gwnz gai raeuz son goq gyoengqraeuz nex!’ 27 Hoeng, de gaengjdingq ij doiq faenhsou naeuz: ‘Gou mbouj rox faenhsou hah. Doenghheij guh doeg guh sieb faenhsou hax, deuz! Mbouj ndaej daeuj dineix!’ 28-29 “Daengz mwhmwnq, faenhsou couh yawjraen Yaqbwzlahhanj, Hijsaj, Yajgoz caeuq doengh boux cenz gij vah Cangqdiq youq ndaw guek Cangqdiq. Ndaw de caemh miz daj doeng sae namz baek gak dieg daeuj hih vunz cungj ndaej miz faenh youq ndaw guek Cangqdiq gw laeuj. Hoeng, faenhsou dauq mij'z faenh, dauq ngaiz boenq ok rog bae, youq rog haeb faenz haeb heuj hwj daej ngwdngwd. 30 Gou lauxsaed naeuz sou ni, doengh boux baenjlaiz youq gajlaeng hih lah, hoeng dauqfanj ndaej youq gaxgonq; doengh boux baenjlaiz youq gaxgonq hih lah, hoeng dauqfanj ngaiz youq gajlaeng.” 31 Ngamqluj youq mwhneix, miz geij boux gaep haeuj Fazliqcaiq baij he daeuj doiq Yehsuh naeuz: “Mwngz vaiqdi deuz bax, aenvih goeng Hihliz siengj gaj mwngz lo.” 32 Yehsuh dingq le, doiq gyoengqde naeuz: “Bae naeuz duz huzliz mwnq ni: ‘Ngoenzneix, ngoenzcog gou ij boenq fangz yw bingh; daengz daixsam ngoenz gou couh guh liux gij hong gou lo.’ 33 Sojhij, ngoenzneix, ngoenzcog, ngoenzlaeng, gou vanzlij dwg ij giqcuz ganjroen, aenvih boux cenz gij vah Cangqdiq gaengjdingq mbouj rai youq baixrog Yehluqsajlaengj hih nej.” 34 De vanzlij caiq naeuz: “Yehluqsajlaengj hax, Yehluqsajlaengj! Mwngz gajgaj haihhaih boux cenz gij vah Cangqdiq; mwngz aeu rin ma dub rai boux Cangqdiq baij daeuj mwngz mwnqneix he. Gou mbouj rox miz geijlwh mbat ij baujhuq gij vunz mwngz, luj gaeqmeh rungx gaeqlwg yienghmwnq. Hoeng, faenhsou mbouj haenj. 35 Yawj bax, aen ranz faenhsou couh ij bienq dieg vangh lo. Gou naeuz sou ni, daj seizneix doxbae, faenhsou mbouj caiq ndaej raen gou haem lo, ij daengj daengz faenhsou naeuz gawq: ‘Cangqdiq baij daeuj hih boux mwnq wnggai haenh’ hih mwhde vwi.”
1 Miz ngoenz ngoenzyietbaeg he, Yehsuh bae laeng boux gaep haeuj Fazliqcaiq baij haemq miz mingz he gw haeux. Yiengq gyoengq vunz mwnq raen le, couh caegcaeg demq yawj de. 2 Ngamqluj youq dangqnaj de miz boux vunz bingh mbuemq he. 3 Yehsuh raen le, couh cam doengh boux fazliz cenhgyah he caeuq gij vunz gaep haeuj Fazliqcaiq baij he naeuz: “Youq ngoenz ngoenzyietbaeg yw bingh hab mbouj habfaz hax?” 4 Hoeng, gyoengqde mij'z vunz ok sing. Yiengq Yehsuh couh raeuz boux vunz bingh mwnq, yw ndei boux de. Yw ndei le, couh hawj boux de maj lo. 5 Gajlaeng de caiq doiq gyoengqde naeuz: “Faenhsou dineix miz byawz miz duz lawz cixnaeuz miz duz cwz youq ngoenz ngoenzyietbaeg doek roengz cingj bae, hoeng faenhsou mbouj majcangq dawz duz de rag hwnjma?” 6 Gyoengqde dingq Yehsuh yienghneix cam le, guh hwj ngoemxngwd mij'z vah gangj bae. 7 Yehsuh gangj sat gij vah neix le, de youq mwnq yawjraen gij vunz hek he genj mwnq dangqnaj mwnq ndei he naengh. De couh yungh gij beijgangj he ma naeuz gyoengqde. 8 De naeuz: “Miz vunz aeu bawx haq sau cingj mwngz bae guh hek, gw laeuj, mwngz gaejyungh bae mwnq dangqnaj he naengh, aenvih saekseiz aiq miz bouxhek beij mwngz engqgya cungqyauq he daeuj. 9 Yiengq, hauhnaeuz dwg yienghneix nex, boux cingj mwngz daeuj he couh ij daeuj doiq mwngz naeuz: ‘Cingj mwngz nyiengh mwnq neix hawj boux neix naengh bax.’ Daengz mwhmwnq, mwngz cij rox najmomj hwj doiq okma naengh youq gajlaeng. 10 “Hoeng, hauhnaeuz miz vunz cingj mwngz bae guh hek, mwngz couh bae mwnq rieng he naengh, yiengq bouxcawj raen yienghneix le, de gaengjdingq goq daeuj doiq mwngz naeuz: ‘Baengzyoux, cingj mwngz daeuj naengh mwnq neix bax!’ Daengz mwhmwnq, mwngz youq dangqnaj vunzlai couh roxnginh najrongh lo. 11 Aenvih gag naemqnaeuz bonjfaenh dij hih vunz, gajlaeng cungj ngaiz gag najmomj; gag naemqnaeuz bonjfaenh mbouj dij hih vunz, daengz gajlaeng couh ndaej najrongh.” 12 Gajlaeng Yehsuh doiq boux cingj de bae mwnq naeuz: “Mwngz cingj vunz daeuj gw laeuj, mbouj ndaej caenhgag cingj doenghheij beixnuengx caencik baengzyoux mwngz caeuq doenghheij vunz fouq gekleiz mwngz, aenvih doenghheij vunz neix gyoengqde caenhgag ndaej doiqyungz cingj mwngz boiz sat lo. 13 Dauqfanj, mwngz cingj laeuj nex, ij cingj doengh boux vunz gungz he, fawz vej he, ha vej he, rafangz he; yienghmwnq mwngz couh miz fuk lo! 14 Gannaeuz gyoengqde mij bonjsaeh ndaej dauq cingj mwngz boiz lah, hoeng daengz boux youq ndaw lwgra Cangqdiq dwg boux simndei simsoh he dih vunz dauqlix mwhde, Cangqdiq gaengjdingq vih gyoengqde hwj boiz mwngz.” 15 Yiengq miz boux caeuq de caemh daiz gw haeux he dingq de yienghneix gangj le, couh doiq de naeuz: “Ndaej youq ndaw guek Cangqdiq gw haeux gaeuq miz fuk lo.” 16 Yehsuh dingq de yienghneix naeuz le, couh yungh gij beijgangj he ma doiq de naeuz: “Miz boux he, loengh laeuj cingj hek, cingj hwj cienfanh hoengh he. 17 De cwnjbiq ndei le, couh hawj bouxhoiq de bae naeuz doenghheij hek de naeuz: ‘Sojmiz hih cungj cwnjbiq ndei lo; daeuj gw laeuj lo.’ 18 “Hoeng, gyoengq hek de cungj doi sam doi seiq mbouj siengj daeuj. Boux daixdaeuz naeuz: ‘Gou ngamq cawx gaiq reih he; ij bae yawj cij ndaej. Mboujeiqseiq lo; mbouj ndaej bae lo.’ 19 Daengz boux daixngeih caemh naeuz: ‘Gou ngamq cawx haj doiq cwz; ij bae sawqsawq doengh duz de cij ndaej. Mboujeiqseiq lo; mbouj ndaej bae lo.’ 20 Yiengq, caiq miz boux he caemh naeuz: ‘Gou ngamq aeu yah; mbouj ndaej bae lo.’ 21 “Gajlaeng, bouxhoiq de dauq ma naeuz bouxcawj ni doenghgij saeh neix. Bouxcawj dingq le, couh aeuqheiq hwj doiq bouxhoiq de naeuz: ‘Mwngz vaiq ok bae, bae roggai daiq doenghheij vunz gungz, vunz fawz vej, ha vej, rafangz he daeuj; raeuz cingj gyoengqde.’ 22 “Goq can he le, bouxhoiq ma doiq bouxcawj de naeuz: ‘Bouxcawj hax, mwngz hawj gou bae guh hih saeh gou gaenq ciuq guh lo, hoeng, vanzlij miz haujlai daiz hoengq, mij'z hek hah!’ 23 Yiengq bouxcawj han naeuz: ‘Mwngz bae dangjroen hah, luenqgvaengh hah; longx vunz daeuj, longx daeuj naengh rim bae.’” 24 Yehsuh gangj daengz dineix le couh naeuz: “Gou naeuz sou ni, doengh boux gou yienzlaiz cingj daeuj gw hoeng mij daeuj gw hih, it boux cungj mbouj ndaej gw gij laeuj gou.” 25 Caiq miz baez he, miz baenxbienh vunz gaen gajlaeng hangx Yehsuh bae, yiengq Yehsuh couh veq dauqlaeng ma doiq gyoengq vunzlai naeuz: 26 “Hauhnaeuz faenhsou ij daeuj gaen gou nex, couh ij aiq gou beij aiq heij boh heij meh, heij yah heij lwg, heij beixnuengx daiqlienz bonjfaenh faenhsou vanzlij lai cij ndaej; mbouj nex, couh mbouj ndaej daeuj gaen gou, guh lwgsae gou. 27 Famz mbouj aemq aen gyaq cixcib bonjfaenh daeuj gaen gou hih, sij mbouj ndaej diuz mingh bonjfaenh hih, couh mbouj ndaej guh gij lwgsae gou. 28 “Caemh lujnaeuz miz byawz ij hwnq aen dap he, de mbouj sien suenq ndei, suenqsuenq yawj ij vah bae geijlai ngaenz cij ndaej hwnq baenz aen dap he nex? 29 Mbouj nex, hoengjlau caenhgag ndaej roengz giek lah, couh mij ngaenz ndaej hwnq hwnjdaeuj lo. Daengz mwhmwnq, hawj vunz raen le, dawz ma guh vahriu, naeuz: 30 ‘Yawj veiq, boux vunz bouxn'x! Caenh rox heijdaeuz, mij rox satrieng!’” 31 De caiq naeuz: “Miz goengjvuengz he, de ij daiq bing bae hoenx lingh aen guek. De mbouj sien naengh roengzma ngeix ndei dauqdaej bonjfaenh miz fanh bing, ndaej mbouj ndaej hoenx goq vunz songfanh bing nej? 32 Yiengq, hauhnaeuz rox bonjfaenh hoenx mbouj ndaej goq vunz nex, couh ij domh dizyinz lij gyae, couh baij vunz bae caeuq gyoengqde gangjhuz, gangj diuzgyenq. 33 Faenhsou caemh doxdoengz; hauhnaeuz faenhsou miz byawz sij mbouj ndaej bonjfaenh de sojmiz hih nex, caemh mbouj ndaej guh lwgsae gou.” 34 De vanzlij caiq naeuz: “Gyu baenjlaiz miz yungh hih, hoeng, hauhnaeuz gij de bienq lo, mij veiqdauq lo, yiengq ij baenzlaw caiq ndaej hawj de ndaengq haem nej? 35 Mij'z yungh hih gyu, daiqlienz coengq haeuj doem coengq haeuj bwnh bae cungj mij'z yungh haem. Yiengq mbouj dawz de vwtvak bae, diuh de ma guxmaz? “Daxbaenh gou soj gangj hih, faenhsou ijaeu dawz haeuj rwz!”
1 Miz baez he, miz gij vunz sou ceiq he caeuq gij vunz vaih he daeuj dingq Yehsuh gangj vah. 2 Yiengq doenghgij vunz gaep haeuj Fazliqcaiq baij he caeuq doenghgij fazliz cenhgyah he raen le, cungj gangj yebyeb naeuz: “Boux vunz bouxn'x, engq vuenhringz vunz vaih lah! Mbouj danhcij naeuz vuenhringz gyoengqde, vanzlij caeuq gyoengqde gw haeux hwj!” 3 Yiengq Yehsuh rox le, couh yungh gij beijgangj he ma naeuz gyoengqde. De naeuz: 4 “Faenhsou ndaw neix miz byawz miz bak duz yiengz, hoeng, miz ngoenz he, ngaiz mij raen bae duz he, yiengq de ij mbouj ij camqciz mbouj leix goujcib gouj duz mwnq hwj bae cimh duz ngaiz mij raen mwnq nej? Caemh dwg mbouj dwg ij cimh daengz raen bae nej? 5 Cimhraen le, cungj angq hwj dawz duz de coengq hwnj gwnz hongzmbaq bae ma ranz nej, 6 vanzlij cingj doenghheij baengzyoux hah, gekleiz hah daeuj laeng de angq nej? 7 Gou naeuz sou ni hax: caemh doxdoengz, hauhnaeuz miz boux vunz miz coih he, de gaijgoq gaij ndei lo, yiengq youq gwnzmbwn caemh ij vih de gaijgoq hwj angq; mbouj danhcij naeuz angq, vanzlij beij angq goq goujcib gouj boux simndei simsoh mboujyungh gaijgoq gijmaz mwnq angq ndaej lai.” 8 Yehsuh vanzlij caiq beijgangj naeuz: “Hauhnaeuz miz boux vunzbaz he, de miz cib dingq ngaenz, hoeng ngaiz doek bae dingq he lo, yiengq de ij mbouj ij diemj daeng hwj sauq sojmiz hih ranz dauqcawq bae cimh, cimh daengz raen bae nej? 9 Yiengq cimhraen le, gaengjdingq angq hwj heuh doenghheij baengzyoux de hah, gekleiz de hah daeuj, doiq gyoengqde naeuz: ‘Gou cimh ndaej raen dingq ngaenz gou lo; caezgya daeuj caeuq gou angq bax!’ 10 Sojhij, gou naeuz sou ni hax, caemh doxdoengz, boux vunz miz coih he de gaijgoq gaij ndei le, bouxcai Cangqdiq caemh yienghmwnq angq.” 11 Yehsuh caiq naeuz: “Miz boux he, de miz song daeglwg. 12 Miz ngoenz he, daeglwg iq de doiq de naeuz: ‘Boh hax, cingj mwngz dawz gou wnggai ndaej hih saizcanj faen hawj gou bax.’ Gajlaeng boh de couh dawz saizcanj faen hawj song daeglwg de. 13 “Goq mbouj geijlwh caez, daeglwg iq de gag dawz de soj faen ndaej hih cienzcaiz bae lingh dieg youz, mbouj guh hong, youqlag gyekgyek, laengzlaengz saengjsaengj, luenhbangh sangq cienzcaiz. Gajlaeng de dawz de sojmiz hih cienzcaiz cungj sangq liux lo. 14 De sangq sojmiz hih cienzcaiz liux le, caiq ngamqluj roeb daengz dieg mwnq iekvangh. Gajlaeng de couh cienfanh dwgrengz he. 15 Mij banqfaz; de couh bae laeng gij vunz dieg mwnq hih boux he dajgoeng. Yiengq, boux mwnq couh baij de bae gueng mou. 16 Youq mwh de iek hwj ij rai vangh hih mwhde, de daiqlienz samjmou cungj ijsiengj gw, hoeng, daiqlienz gij neix cungj mij vunz hawj de. 17 “Gajlaeng de couh singqsag goqdaeuj, cij ngeix daengz: ‘Ndaw ranz boh gou miz baenxbienh vunz bang de dajgoeng, cix miz gw daixbaj, hoeng gou dauq youq dineix ij rai iek bae. 18 Ganhseiq dauq maj cimh daxboh suenq lox, maj doiq de naeuz: “Boh hax, gou daekcoih Cangqdiq, caemh daekcoih daengz mwngz; 19 daj seizneix hwnj, gou mij'z naj caiq ndaej guh daeglwg mwngz laem lo. Cijaeu gouz mwngz sou gou caemhdangq mwngz sou gunghyinz yienghmwnq sou gou couh ndaej lo!”’ 20 De yienghneix ngeix naeuz le, couh dauq maj ranz daxboh de lo. “De maj ranz mwhde, vanzlij liz ranz loqmauqhuz gyae, hoeng daxboh de couh yawjraen de ma lo. Yiengq, daxboh de couh hojsik sim'unq hwj riq okbae got dawz gij hoz de, cup de, gotgot cupcup. 21 Gajlaeng, de naeuz: ‘Boh hax, gou daekcoih Cangqdiq, caemh daekcoih daengz mwngz; daj seizneix hwnj, gou mij'z naj caiq ndaej guh lwg mwngz laem lo.’ 22 Hoeng, daxboh de dauq doiq bouxhoiq naeuz: ‘Vaiqdi maj dawz diuz buh ceiq ndei he daeuj hawj daeglwg iq gou daenj, caemh daenj haedfawz hawj de, caiq aeu haiz hawj de daenj haem, 23 caiq maj dawz duz cwzlwg biz mwnq gaj bae. Daengj raeuz gw laeuj hoh de bax, 24 aenvih lwg gou rai dauq lix, mij miz dauq miz lo!’ Gajlaeng, gij vunz couh gwgw angqangq lo. 25 “Ngamqluj mwhneix, daeglwg daeuz de daj ndaw reih ma. Ma daengz henz ranz le, dingqri ndaw ranz miz vunz ciengq go diuquj hwj hemq bae. 26 De couh yuq bouxhoiq he goq daeuj, cam de naeuz ndaw ranz miz gijmaz saeh lah. 27 Yiengq bouxhoiq naeuz de ni naeuz: ‘Daegnuengx mwngz ma lo. Daxboh mwngz raen de mij ngaiz saek yiengh saeh, couh angq hwj dawz duz cwzlwg biz mwnq gaj lo.’ 28 “Daeglwg daeuz de dingq le, cungj ndatheiq hwj ij rai bae, mbouj siengj haeuj ranz maj lo. Yiengq daxboh de rox le, couh ok daeuj heuh de haeuj maj. 29 Hoeng, de dauq doiq daxboh de naeuz: ‘Gou swqhaeuh mwngz baenx geijlwh bi, caemh dingq mwngz, swnh mwngz bae, hoeng mwngz daiq duz yiengzbyalwg he cungj mij hawj gou, hawj gou caeuq gij baengzyoux gou gwgw angqangq goq. 30 Hoeng, daeglwg mwngz neix nej, de dawz gij saizcanj mwngz cungj vah haeuj laeng gij lauxgawj mwnq bae liux. Seizneix de baex ma hih lah, hoeng, mwngz couh majcangq doq gaj duz cwzlwg biz mwnq lo!’ 31 “Gajlaeng, daxboh de doiq de naeuz: ‘Lwg hax lwg! Mwngz siengzseiz youq dineix; gou sojmiz hih cungj dwg gij mwngz liux. 32 Raeuz seizneix wnggai vih daegnuengx mwngz rai dauq lix, mij miz dauq miz hwj angq bax.’”
1 Yehsuh vanzlij caiq doiq gyoengq lwgsae de naeuz: “Doenghbaez miz boux vunz fouq he. Miz vunz gauq naeuz de ni naeuz boux guenjgya de mbouj lauxsaed, luenhbangh sangq gij cienzcaiz de. 2 Gajlaeng, boux vunz fouq mwnq couh heuh boux guenjgya de daeuj, cam de naeuz: ‘Gou dingqri vunz naeuz mwngz luenhbangh sangq cienzcaiz; dauqdaej dwg gijmaz saeh? Mwngz vaiqdi dawz gij soq suenq ndei hawj gou, aenvih mwngz mbouj caiq ndaej guh boux guenjgya laem lo.’ 3 “Boux guenjgya dingq le, ndaw sim de gag naemj: ‘Bouxcawj mbouj hawj gou guh boux guenjgya he haem lo, yiengq gou ij baenzlaw guh nej? Bae geng reih geng naz bax, cix mij'z rengz; bae guh gaujvaq bax, cix mij'z naj guh, lau nyaenq. 4 Yiengq ij baenzlaw guh nej? Giqyienz gou mbouj ndaej guh guenjgya, couh ij miz vunz nyienh'eiq bang gou, hawj gou mwnq youq he cij ndaej. Yiengq ij baenzlaw bae longx cungj baengzyoux neix nej? Ox! Gou rox gou ij baenzlaw guh lo!’ 5 “De yienghneix naemj le, couh heuh doenghheij vunz yiemq caiq bouxcawj de daeuj, cam gyoengqde, cam boux daixdaeuz naeuz: ‘Mwngz yiemq bouxcawj gou geijlai caiq hah?’ 6 Boux de han naeuz: ‘Gou yiemq bak doengj youz.’ Boux guenjgya dingq le, couh naeuz: ‘Nex, mbaw yiemqdan mwngz youq dineix; vaiqdi naengh roengzma gaij sij hajcib doengj bax.’ 7 Gajlaeng, de caiq cam boux daixngeih naeuz: ‘Mwngz nej, mwngz yiemq geijlai?’ Boux de han naeuz: ‘Hajbak rap mienh.’ Boux guenjgya naeuz: ‘Dawz mbaw yiemqdan mwngz vaiqdi naengh roengzma gaij sij seiqbak bax.’ 8 “Gajlaeng bouxcawj rox gij saeh neix le, engq haenh boux mbouj lauxsaed guenjgya neix, naeuz de rox guh saeh, coengjmingz. Gizsaed doenghheij caenhgag yawjnaek seiqgan seizneix hih vunz cungj beij doenghheij yawjnaek aen guek Cangqdiq hih vunz haemq rox guh doenghgij saeh cuzhih seiqgan seizneix he.” 9 Yehsuh caiq naeuz: “Gou naeuz sou ni hax, ij rox yungh cienz ma bang vunz, gyau lauxgeng, yiengq daengz mwh mij ngaenz he, gij vunz couh ciep faenhsou bae mwnq ndaej seiqseiz lix he youq lo.” 10 Yehsuh vanzlij caiq naeuz: “It boux vunz guh gij saeh iq he lauxsaed, guh gij saeh hung he caemh lauxsaed lo; hoeng hauhnaeuz it boux vunz guh gij saeh iq he mbouj lauxsaed, yiengq guh gij saeh hung he caemh mbouj lauxsaed lo. 11 Hauhnaeuz faenhsou guenj gij seiqgan seizneix dih cienzngaenz mbouj lauxsaed, yiengq Cangqdiq ij baenzlaw hawj faenhsou guenj gij seiqseiz miz hih dijbauj he nej? 12 Caiq hauhnaeuz faenhsou guh bouxhoiq guenj gij doxgaiq bouxcawj mbouj ndei mbouj lauxsaed lo, yiengq Cangqdiq ij baenzlawz coengqsim hawj faenhsou guh bouxcawj nej? 13 “Bouxhoiq he mbouj ndaej swqhaeuh song bouxcawj; mbouj nex, de gaengjdingq haenj boux he yiem boux he, cixnaeuz naek boux he mbaeu boux he. Sojhij faenhsou mbouj ndaej gingqbaiq Cangqdiq caiq baiqfug ngaenz.” 14 Yiengq, doengh boux raen ngaenz mbouj ndaej ok ra hih doengh boux gaep haeuj Fazliqcaiq baij he dingqri le, couh aeu ndaeng ma riu Yehsuh. 15 Gajlaeng, Yehsuh couh doiq gyoengqde naeuz: “Doenghheij vunz faenhsou hax! Youq dangqnaj vunzlai caenhrox canggyaj, cang guh vunz ndei lah! Hoeng, Cangqdiq rox aen sim faenhsou, rox daemj uk daem ndok bae. Vunz soj ngah hih, Cangqdiq dauq dwgcaengz dangqmaz. 16 “Guh sijlij dih Yozhanq mijyaengz daeuj cihsenz, vunz cungj dwg cenzgangj gij fazliz Mohsih caeuq gij saw doengh boux boux cenz gij vah Cangqdiq he; gajlaeng daj Yozhanq daeuj le, aen guek Cangqdiq dih ndei siuhsiz ndaej cenz okdaeuj lo, yiengq bouxboux cungj angq hwj ij ciengj haeuj bae. 17 Hoeng, fazliz mbouj yungzheih cawz bae; cawz mbwn cawz deih lij yungzheih goq cawz fazliz dih it bit it veg. 18 Mboujguenj byawz caeuq mehyah bonjfaenh lizvwnh le, caiq caeuq daixlingh boux gyezvwnh, yiengq couh dwg guhyoux; caeuq lizvwnh dih vunzbaz gyezvwnh, caemh dwg guhyoux.” 19 Yehsuh caiq naeuz: “Doenghbaez miz boux vunz fouq he; de ngoenzngoenz cungj daenj buh gyaeu buh ndei, ngoenzngoenz mbouj you mbouj heiq, gwgw angqangq, youqlag gyekgyek. 20 Yiengq caemh miz boux vunz gungz guh gaujvaq heuh Lahsajluq he; de baenx ndang cungj baenz baez, siengzseiz ninz youq bakdou boux vunz fouq mwnq, 21 muengh boux vunz fouq mwnq dawz doenghheij doek youq gwnz daiz hih gij gw he gveng okdaeuj ndaej aeu ma gw yw iek. Caemh siengzseiz miz ma daeuj riz gij baeznok de. 22 “Gajlaeng, boux vunz gungz mwnq rai lo. Yiengq bouxcai Cangqdiq dawz de bae daengz Yaqbwzlahhanj mwnq, couh dwg mwnq Cangqdiq hoh fuk hawj gij vunzrai hih mwnq. Mbouj geijlwh caez, boux vunz fouq mwnq caemh rai lo, caemh moek lo. 23 Moek le, de youq ndawlaep ngaiz souh haemz souh hoj. Yiengq de ngiengx raeuj hwnjdaeuj muenghyawj gyae'gyae, yawjraen Yaqbwzlahhanj, caemh yawjraen Lahsajluq boux vunz gungz mwnq youq henz ndang de. 24 De raen yienghneix le, couh hemq vauxvaux naeuz: ‘Cojgoeng gou Yaqbwzlahhanj hax, hojsik hojsik gou bax! Cingj mwngz baij Lahsajluq daeuj gou dineix bax, hawj de daeuj aeu byaifawz demj di raemx he hwj yubyub byailinx gou bax, aenvih gou youq ndaw feiz neix hojyouq ij rai bae.’ 25 “Hoeng, Yaqbwzlahhanj engq han naeuz: ‘Lwg gou hax, mwngz wnggai ngeixngeix yawj; mwngz baenx seiqvunz cungj miz gw miz daenj, mbouj you mbouj heiq. Hoeng Lahsajluq nej? De baenx seiqvunz gungzgungz ndangjndangj, souh haemz souh hoj. Seizneix de youq dineix ndaej yangjfuk lo; mwngz dauq ngaiz souh haemz souh hoj. 26 Mbouj danhcij naeuz yienghneix, cungqgyan mwngz caeuq gou vanzlij gek miz lueng laeg lumxlumx he, hawj mbiengj mwngz hih vunz mbouj ndaej goq daeuj, mbiengj gou hih vunz caemh mbouj ndaej goq bae.’ 27 “Boux vunz fouq mwnq dingq le, couh gouz de naeuz: ‘Cojgoeng gou hax, giqyienz dwg yienghneix, gou gouz mwngz baij Lahsajluq bae ndaw ranz daxboh gou, 28 aenvih gou vanzlij miz haj boux beixnuengx haem. Hawj de bae gingjgauq gyoengqde, hawj gyoengqde rox wnggai baenzlaw guh, mienxndaej gyoengqde baezneix caemh ngaiz daeuj daengz mwnqneix souh haemz souh hoj.’ 29 “Yaqbwzlahhanj caiq han naeuz: ‘Mboujyungh hawj de bae nej, aenvih gyoengq beixnuengx mwngz miz Mohsih dih fazliz saw caeuq miz gij saw boux cenz gij vah Cangqdiq hah; gyoengqde ndaej yawj doenghgij neix hah.’ 30 “Boux vunz fouq mwnq caiq naeuz: ‘Cojgoeng gou Yaqbwzlahhanj hax, mij ndaej law, aenvih gyoengqde gaenhbaenj mbouj yawj. Yiengq, hauhnaeuz miz boux vunzrai he daj ndawlaep bae daengz gyoengqde mwnq bae nex, gyoengqde cij rox ij baenzlaw guh hah.’ 31 “Yaqbwzlahhanj dingq le, caiq doiq de naeuz: ‘Hauhnaeuz gyoengqde mbouj dingq gij vah Mohsih caeuq gij vah boux cenz gij vah Cangqdiq nex, cungjsuenq naeuz miz boux rai le caiq dauqlix he, gyoengqde caemh mbouj dingq law.’”
1 Yehsuh caiq doiq gyoengq lwgsae de naeuz: “Cungj miz gij saeh hawj vunz famh coih he, hoeng yungx hawj vunz famh coih hih vunz satsoq lo! 2 Boux yungx vunz famh coih mwnq, hozmboujyienz sien gag dawz famuh rin venj hwnj gwnz hoz bonjfaenh bae, gveng roengz haij bae. Yienghmwnq ndei goq de hawj vunz famh coih bae. 3 Faenhsou ij siujsim! “Hauhnaeuz boux beixnuengx mwngz daekcoih mwngz nex, mwngz couh ij naeuz de. Hauhnaeuz de gaijgoq nex, mwngz couh ij nyiuz de. 4 Hauhnaeuz de ngoenz he daekcoih mwngz caet mbat, hoeng de moix mbat cungj doiq mwngz naeuz: ‘Gou gaij, gou gaij,’ yiengq mwngz cungj ij nyiuz de.” 5 Gyoengq dwzbaijyienz de dingq le, couh doiq Yehsuh naeuz: “Gouz bouxcawj lai gya hawj raeuz miz sinqsim hwj ndaej lai sinq Cangqdiq bax! Yienghmwnq gyoengqraeuz couh ndaej ciuq mwngz gangj hih yienghmwnq bae guh lo.” 6 Gajlaeng Yehsuh naeuz: “Hauhnaeuz gij sinqsim faenhsou ndaej hung luj ceh byaekgat nex, faenhsou cungj ndaej seizbienh guh daengz gijmaz. Yiengq cungjsuenq naeuz faenhsou mingqlingq go faex neix naeuz: ‘Lienz rag lienz goenq ciemz hwnjdaeuj; daengj roengz haij bae!’ yienghneix naeuz, go de cungj caemh dingq faenhsou hih.” 7 Yehsuh vanzlij caiq naeuz: “Hauhnaeuz miz bouxcawjlawz ndaw ranz miz bouxhoiq bae dajndaem ma cixnaeuz ciengx yiengz ma, yiengq miz mbouj miz bouxcawj doiq bouxhoiq de naeuz: ‘Mwngz goq daeuj gw haeux bax,’ miz lwi? 8 Gou naeuz hax, gaengjdingq mbouj miz! Gaengjdingq naeuz: ‘Vaiqdi dawz bangjndang, bae loengh haeuxcaeuz, swqhaeuh gou gw haeux! Daengj gou gw sat le, mwngz cij ndaej gw.’ 9 Yiengq bouxhoiq caemh ciuq bouxcawj mingqlingq hih yienghmwnq bae guh le, bouxcawj ij docih de lwi? 10 Faenhsou guh bouxhoiq Cangqdiq caemh ityiengh; raengq faenhsou guh hih saeh guh liux le, couh wnggai naeuz: ‘Raeuz cijmboujgoq dwg boux mij yungh hih vunzhoiq lah; gij neix dwg raeuz wnggai guh hih.’” 11 Yehsuh vanzlij dwg giqcuz yiengq fueng Yehluqsajlaengj bae. De byaij goq Sajmajliqyaq caeuq Gyahliqliq song mwnq neix hih cungqgyan de, 12 bae daengz aen mbanj he. Ndaw mbanj mwnq miz cib boux hwnj mazfung. Gyoengqde cingq yiengq laeng Yehsuh mwnqneix byaij daeuj, gajlaeng lij gyae'gyae couh dingz roengzma mbouj byaij lo, 13 couh hemq naeuz: “Yehsuh lauxsae, hojsik hojsik raeuz bax!” 14 Yehsuh yawjraen le, couh doiq gyoengqde naeuz: “Faenhsou bae hawj boux guh dajbwiz yawj bax.” Gajlaeng gyoengqde bae hih mwhde couh ndei lo. 15 Yiengq gyoengq vunz ndaw de miz boux he yawjraen bonjfaenh gaenq ndei lo le, couh vaiqdi dauq ma hemq haenh Cangqdiq goggog, 16 caiq bomz youq dangqnaj Yehsuh docih de. Boux neix dwg Sajmajliqyaq vunz. 17 Yehsuh raen le couh naeuz: “Yw ndaej ndei hih mbouj dwg miz cib boux maz? Lij gouj boux laem nej? 18 Nanzdauh caenhgag boux vaihdieg vunz neix dauq ma haenh Cangqdiq?” 19 Gajlaeng, de couh doiq boux de naeuz: “Hwnq bax, maj lo! Gij sinqsim mwngz ndaej yw mwngz lo.” 20 Miz baez he, gij vunz gaep haeuj Fazliqcaiq baij he cam Yehsuh naeuz: “Gij gienzveih Cangqdiq seizlawz ndaej fazveih hax?” Yehsuh han naeuz: “Gij gienzveih Cangqdiq fazveih mbouj dwg naeuz miz gingjdoengh hih nej, mbouj dwg naeuz aeu ra ma yawj ndaej raen hih nej, 21 caemh mij'z vunz ndaej naeuz: ‘Ox, yawj veiq, de youq dineix,’ cixnaeuz naeuz: ‘Ox, de youq mwnq,’ aenvih gij gienzveih Cangqdiq couh fazveih youq ndaw sim faenhsou.” 22 Gajlaeng, Yehsuh caiq doiq gij lwgsae de naeuz: “Ij miz ngoenz he, faenhsou ba'mboujmuengh ndaej raen daengz Vunz dih Daiqbiuj dih gij gienzveih de fazveih dih mwhmwnq—cungjsuenq naeuz ndaej raen ngoenz he cungj angq—hoeng faenhsou yawj mbouj raen. 23 Yiengq, hauhnaeuz miz vunz doiq faenhsou naeuz: ‘Neq, de youq mwnq!’ cixnaeuz naeuz: ‘Neq, de youq dineix!’ yiengq faenhsou gaejyungh riq okbae yawj, caemh gaejyungh gaen de, 24 aenvih gou, Vunz dih Daiqbiuj, dauq daeuj hih mwhde couh luj byajmyig yienghmwnq, daj mbiengj mbwn neix myig daengz mbiengj mbwn mwnq. 25 Hoeng, gou gaengjdingq sien ngaiz souh haujlai haemzhoj, caemh ngaiz gij vunz daih neix yiem. 26 “Mwh gou, Vunz dih Daiqbiuj, daeuj hih mwhde, caemh luj aen nienzdaiq Nozyaq ityiengh; 27 gij vunz gwgw, aeuaeu, haqhaq, gajlaeng daengz Nozyaq haeuj ruz bae hih ngoenz mwnq, raemx dumh dawz gij vunz cawzcag liux. 28 “Yiengq caemh doxdoengz, gou, Vunz dih Daiqbiuj, daeuj hih mwhde caemh luj Lozdwz nienzdaiq; gij vunz gwgw, haihai, cawxcawx, dajndaem dih dajndaem, hwnq ranz dih hwnq ranz. 29 Hoeng, baex daengz Lozdwz deuz ok Sojdohmaj Singz hih ngoenz mwnq, couh majcangq miz feiz caeuq liuzvangz daj gwnzmbwn doek roengzdaeuj byaeu dawz gyoengqde liux. 30 “Daengz gou, Vunz dih Daiqbiuj, yienh okdaeuj hih mwhde caemh doxdoengz. 31 Daengz ngoenz mwnq, faenhsou ij vaiqdi deuz. Hauhnaeuz miz vunz youq gwnz dingjranz hih, couh gaejyungh roengz ndaw ranz ma aeu doxgaiq; caiq hauhnaeuz miz vunz youq ndaw reih hih, caemh gaejyungh ma ranz aeu doxgaiq. 32 Faenhsou ijaeu ndaejgeiq mehyah Lozdwz vih sij mbouj ndaej gij doxgaiq de hwj veq dauqlaeng ngaiz souh daengz hih. 33 Doenghheij vunz ij baux bonjfaenh hih, dauq ngaiz vwt bonjfaenh; doenghheij vunz sijndaej vwt bonjfaenh hih, dauq ndaej baux bonjfaenh. 34 “Gou naeuz sou ni hax, daengz haemh mwnq, song boux vunz caemh congz ninz hih, boux he ndaej ciep bae, boux he ngaiz louz youq. 35 Song boux vunzbaz doxram muh hih; ciep bae boux he, louz boux he. 36 Song boux vunz caemh youq gaiq reih he guh hong hih, ciep bae boux he, louz boux he.” 37 Yehsuh gangj daengz dineix le, gyoengq lwgsae de cam naeuz: “Bouxcawj gou hax! Mwnqlaw miz gij saeh neix hax?” Yehsuh han naeuz: “Daengz mwh he faenhsou swhmboujyienz rox, couh dwg naeuz, mwnqlaw miz doenghduz rai hih, mwnqlaw couh miz roegga ciuz.”
1 Miz baez he, Yehsuh caiq yungh gij beijgangj he ma naeuz gyoengq lwgsae de, hawj gyoengq lwgsae de ij siengzseiz gouz Cangqdiq, mbouj ndaej doeknaiq. 2 De naeuz: “Miz aen singz he, ndaw singz mwnq miz boux dang fazguenh he; boux de mbouj lau Cangqdiq, cixcaemh yawj vunz mbouj hwnj rwz. 3 Yiengq ndaw singz mwnq miz mehmaiq he. Meh de siengzseiz bae cimh de, gouz de, doiq de naeuz: ‘Gou miz gij saeh vuengj he; gouz mwngz bang gou buenq gij saeh gou.’ 4 “Hoeng, goeng fazguenh mwnq itcig cungj mbouj dawz haeuj rwz gij saeh de. Gajlaeng caez le, goeng de couh gag naemj: ‘Yax, gannaeuz gou mbouj lau Cangqdiq caemh yawj vunz mbouj hwnj rwz lah, 5 hoeng, mehmaiq neix ngoenzngoenz caenhrox daeuj renxrenx; yiengq hozmboujyienz gou bang de buenq gij saeh vuengj de suenq lox, mienxndaej meh de ngoenzngoenz daeuj fanz gou.’” 6 Yehsuh gangj daengz dineix le couh naeuz: “Faenhsou dingqdingq yawj goeng neix de baenzlawz naemj bax! 7 Daiqlienz goeng yawj mbouj hwnj vunz neix cungj vanzlij yienghneix naemj lo, nanzdauh Cangqdiq doiq doenghheij vunz de senj okdaeuj he, ngwnzngoenz cungj gouz de hih, mbouj leix mbouj langh mbouj bang gyoengqde hajx? 8 Gou naeuz sou ni, Cangqdiq de gaengjdingq vaiqdi bang gyoengqde hih. Hoeng, daengz gou, Vunz dih Daiqbiuj, daeuj hih mwhde, youq lajmbwn cimh ndaej raen miz luj mehmaiq neix miz sinqsim haem mbouj miz?” 9 Miz baez he, Yehsuh yungh gij beijgangj he ma doiq doengh boux gag naemqnaeuz bonjfaenh youq ndaw lwgra Cangqdiq dwg boux simndei simsoh hih vunz, cix yawj vunz mbouj hwnj he naeuz: 10 “Miz song boux vunz bae gunghdenq Cangqdiq gouz Cangqdiq, caeuq Cangqdiq gangj vah. Song boux neix ndaw de miz boux he dwg gaep haeuj Fazliqcaiq baij hih vunz, miz boux he dwg guh sou ceiq hih vunz. 11 Yiengq boux gaep haeuj Fazliqcaiq baij vunz mwnq, de gag ndwn youq mwnq doiq Cangqdiq naeuz: ‘Ox, Cangqdiq hax, gou docih mwngz, aenvih gou mbouj luj heijvunz yienghmwnq, damsim, yaeuh vunz, guhyoux, caemh mbouj luj boux sou ceiq mwnq. 12 Gou aen singhgiz he lekdungx song mbat, gou caemh dawz gou soj sou ndaej hih gien hawj mwngz cib faenh cih it.’ 13 “Boux gaep haeuj Fazliqcaiq baij mwnq yienghneix gangj, hoeng, boux guh sou ceiq mwnq nej, de dauq ndwn youq gyae'gyae, mbouj gamj ngiengx raeuj hwnjdaeuj yawj, caemh caenhrox gag dub aen aek bonjfaenh hwj gangznaek naeuz: ‘Ox, Cangqdiq hax, gou dwg boux miz coih he dih vunz! Gouz mwngz nyiuz gou bax!’” 14 Yehsuh gangj daengz dineix le, de naeuz: “Gou naeuz sou ni, gajlaeng cingqcaen ndaej youq ndaw lwgra Cangqdiq dwg boux mij coih hih dauq dwg boux sou ceiq mwnq lah; boux gaep haeuj Fazliqcaiq baij vunz mwnq dauq mij dwg, aenvih gag naemqnaeuz bonjfaenh dij hih vunz, gajlaeng cungj ngaiz gag najmomj; gag naemqnaeuz bonjfaenh mbouj dij hih vunz, daengz gajlaeng couh ndaej najrongh.” 15 Miz baez he, miz haujlai vunz daiq lwg daeuj cimh Yehsuh, siengj hawj Yehsuh laxlax gij lwg gyoengqde. Yiengq doenghheij lwgsae de raen le, couh naeuz gyoengqde. 16 Hoeng, Yehsuh dauq heuh gyoengq lwgngez mwnq goq daeuj, couh doiq gyoengq lwgsae de naeuz: “Gaejyungh laengz gyoengqde; hawj doenghheij lwgngez goq daeuj dep gou, aenvih aen guek Cangqdiq dwg gvi haeuj luj doenghheij lwgngez neix. 17 Gou saedsaeh naeuz sou ni, mboujguenj guxmaz vunz, hauhnaeuz mbouj ndaej luj lwgngez yienghmwnq sinq gou, couh mbouj ndaej haeuj guek Cangqdiq bae.” 18 Caiq miz baez he, miz boux dang ak he, de cam Yehsuh naeuz: “Lauxsae, mwngz dwg vunz ndei; gou cam mwngz, gou ij baenzlaw guh cij ndaej seiqseiz lix nej?” 19 Yiengq Yehsuh cam boux de naeuz: “Mwngz guxmaz naeuz gou dwg vunz ndei hax? Caenhgag Cangqdiq cij ndei. 20 Gvanhhih seiqseiz lix gij saeh neix, mwngz caemh rox Cangqdiq dih gveihdingq, couh dwg: ‘Mbouj ndaej guhyoux, mbouj ndaej gaj vunz, mbouj ndaej guxcaeg, mbouj ndaej guh gyaj cingqgiq, ij gingqcungh bohmeh.’” 21 Gajlaeng boux de han naeuz: “Doenghgij gveihdingq neix gou daj lij iq cix soenhsouj lo.” 22 Yehsuh dingq de yienghneix naeuz le, couh doiq de naeuz: “Hoeng mwngz noix yiengh he mij guh hah, couh dwg noix mwngz mij dawz mwngz sojmiz hih gyadangq hai bae le, dawz sojmiz hih ngaenz faen hawj vunz gungz. Hauhnaeuz mwngz yienghneix guh, mwngz couh ndaej youq gwnzmbwn rom ndaej baenxbienh lo. Gajlaeng mwngz caemh ij daeuj gaen gou cij ndaej.” 23 Boux de baex dingq gij vah neix he le, cungj duix liux, aenvih de cienfanh fouq he. 24 Yehsuh raen yienghneix le, couh cimyawj de doiq de naeuz: “Miz cienzngaenz dih vunz hax, hoj huh, hoj haeuj aen guek Cangqdiq bae huh! 25 Miz ngaenz hih vunz ijsiengj haeuj aen guek Cangqdiq bae hoj huh, beij duz lozdoz ndonj rwzcim vanzlij hoj hwx!” 26 Yiengq dingqri doenghheij vah neix hih vunz couh cam naeuz: “Yiengq dauqdaej dwg byawz ndaej gouq nex?” 27 Yehsuh han naeuz: “Vunz guh mbouj daengz hih, Cangqdiq guh ndaej daengz!” 28 Couh youq mwhneix, Bijdwz youq henz ndang de dingq daengz yienghneix le, couh han naeuz: “Hawjm'z yawj lux, raeuz gaenq vwt raeuz sojmiz hih hwj daeuj gaen mwngz lohwng!” 29 Yehsuh dingq le, couh doiq gyoengqde naeuz: “Gou saedsaeh naeuz sou ni, famz dwg vih guek Cangqdiq hwj vwt ranz, vwt lwg, vwt yah, vwt beix, vwt nuengx, vwt boh, vwt meh hih vunz, 30 youq seiq neix gaengjdingq ndaej geij boix, daengz seiq laeng ndaej seiqseiz lix.” 31 Miz mbat he, Yehsuh heuh cibngeih boux lwgsae de goq daeuj, doiq gyoengqde naeuz: “Gyoengqraeuz seizneix ij bae Yehluqsajlaengj. Youq Yehluqsajlaengj mwnq, boux cenz gij vah Cangqdiq soj sij hih gvanhhih Vunz dih Daiqbiuj dih saeh couh ij lingz okdaeuj lo. 32 De ngaiz vunz gyau hawj gij vunz mbouj rox Cangqdiq he, ngaiz vunz dawz ma nyoujnyak gangjriu gaijmbwq, yawj de ngawz, byiq myaiz hawj de. 33 Mbouj danhcij naeuz yienghneix, vanzlij aeu diuz bien naeng ma fad de, simqciq gaj de. Hoeng, daengz daixsam ngoenz, de couh ndaej dauqlix.” 34 Hoeng, gyoengq lwgsae de it di cungj mbouj rox de soj gangj hih doenghgij saeh neix dwg gijmaz iqswh; gyoengqde faen mbouj ok de vihmaz ij yienghneix gangj. 35 Mwh Yehsuh ijvanh bae daengz Yehliqgoh Singz hih mwhde, miz boux rafangz he naengh youq henz roen guh gaujvaq. 36 De dingqri miz haujlai sing vunz byaij, couh cam naeuz miz gijmaz saeh lah. 37 Yiengq miz vunz naeuz de ni: “Dwg Nazsajlwz vunz dih Yehsuh byaij goq dineix daeuj lah.” 38 De dingq naeuz yienghneix le, couh hemq naeuz: “Daqveiq dih lwglan Yehsuh hax, hojsik hojsik gou bax!” 39 De yienghneix hemq le, doengh boux byaij youq daixdaeuz he couh naeuz de, mbouj hawj de hemq, hoeng, yied naeuz de yied engqgya hemq, hemq engqgya gog: “Daqveiq dih lwglan hax, hojsik hojsik gou bax!” 40 Yehsuh dingqri le, couh dingz roengzma, hawj vunz daiq boux rafangz mwnq goq daeuj dangqnaj de, couh cam boux de naeuz: 41 “Mwngz ij hawj gou bang mwngz guh gijmaz?” Boux de han naeuz: “Bouxcawj gou hax, gou siengj ndaej yawjraen!” 42 Gajlaeng Yehsuh naeuz: “Mwngz ndaej yawjraen hah; gij sinqsim mwngz ndaej yw mwngz lo.” 43 Yehsuh baex naeuz yienghneix he lah, boux de couh doq ndaej yawjraen lo. Boux de ndaej yawjraen le, couh gaen Yehsuh bae, vanzlij doq bae doq haenh Cangqdiq. Gyoengq vunzlai raen yienghneix le, caemh haenh Cangqdiq.
1 Gajlaeng, Yehsuh bae daengz aen singz Yehliqgoh le, de ij byaij goq aen singz neix bae. 2 Yiengq aen singz neix ndaw de miz boux guenj doenghheij vunz sou ceiq he, gij coh de heuh Sajgaih. De dwg boux vunz fouq he. 3 Boux de rox le, couh siengj yawjyawj Yehsuh dauqdaej dwg baenzlaw yiengh hih vunz. Hoeng, de vunz daiq daemq lai, caenx youq ndaw vunzlai yawj mbouj ndaej raen dangqnaj, yawj mbouj raen Yehsuh. Yiengq de baenzlawz guh nej? 4 De couh riq bae gaxgonq gyoengqde byenz hwnj go faex he bae ij yawj Yehsuh, aenvih de rox Yehsuh gaengjdingq ij byaij goq mwnq bae. 5 Yiengq Yehsuh byaij daengz mwnq le, couh ngiengx raeuj hwnjdaeuj yawj, couh doiq Sajgaih naeuz: “Sajgaih, vaiq roengz ma! Ngoenzneix gou ij bae laeng mwngz youq.” 6 Sajgaih dingq daengz yienghneix le, couh nyungjnyat daj gwnz faex roengz ma, angq vaujvauq hwj daiq Yehsuh maj ranz lo. 7 Yiengq gyoengq vunzlai raen yienghneix le, cungj lwnh yebyeb naeuz: “De gingqyienz bae laeng boux vunz vaih neix youq lah!” 8 Sajgaih dingqri gij vunz yienghneix naeuz le, couh ndwn youq dangqnaj Yehsuh hwj doiq Yehsuh naeuz: “Bouxcawj gou hax, gou ij dawz gou sojmiz hih faen hawj gij vunz gungz dingz he; doenghgij doxgaiq gou haep vunz hangz vunz aeu ndaej ma hih, gou gaengjdingq ij boiz boux de seiq boix.” 9 Yehsuh dingq le, couh naeuz: “Ngoenzneix ranz neix ndaej gouq lo, aenvih de caemh luj cojgoeng de Yaqbwzlahhanj yienghmwnq miz sinqsim guh vunz simndei simsoh. 10 Gou, Vunz dih Daiqbiuj, daeuj couh dwg vihliux ij cimh caeuq ij gouq doengh boux guh loek he hih lah.” 11 Youq mwh gyoengq vunz dingq Yehsuh gangj doenghgij vah neix hih mwhde, Yehsuh caiq yungh gij beijgangj he ma doiq gyoengq vunz gangj. Aenvih bonjfaenh de gaenq ijvanh bae daengz Yehluqsajlaengj lo, de caemhcaiq rox gyoengq vunz naemqnaeuz de majcangq ij youq Yehluqsajlaengj laeb aen guek Cangqdiq lo, 12 sojhij de couh beijgangj naeuz: “Miz boux vunz dang ak he, de ijvanh bae laeng goengjvuengz dang daeuzdaeuz he. Goengjvuengz neix ndaej guenj baenx haujlai aen guek. De ij bae dingq goengjvuengz neix senhbuq hawj de maj dang aen guek bonjfaenh de dih vuengz. 13 Yiengq de ijvanh bae hih mwhde, de sien heuh doenghheij hoiq de daeuj, heuh daeuj cib boux, couh dawz cib dingq ngaenz faen hawj it boux it dingq, doiq gyoengqde naeuz: ‘Duenh neix gou mbouj youq ranz, faenhsou dawz gij ngaenz neix bae guh seng'eiq bax.’ De yienghneix raengq gyoengqde le, couh bae lo. 14 “Hoeng, gij vunz aen guek de dwgcaengz de, couh baij vunz gaen gajlaeng hangx de bae, bae daengz gwnz de, doiq gwnz de naeuz: ‘Gyoengqraeuz mbouj hawj boux neix guh goengjvuengz gyoengqraeuz hah!’ Gyoengq vunz gan yienghneix naeuz lah, hoeng, gwnz de ciuqyiengh hawj de dang vuengz. 15 “Senhbuq sat le, de couh majcangq dauq ma lo. Ma le, de couh heuh doengh bouxhoiq gaxgonq de hawj ngaenz hawj gyoengqde guh seng'eiq hih doengh boux mwnq daeuj, cam gyoengqde, yawj gyoengqde guh seng'eiq canh ndaej geijlwh ngaenz. 16 “Boux daixdaeuz daeuj naeuz: ‘Bouxcawj hax, mwngz hawj gou hih ngaenz, gou guh seng'eiq canh ndaej cib dingq ngaenz.’ 17 “Bouxcawj dingq le, couh doiq de naeuz: ‘Guh ndaej ndei lo; mwngz cingqcaen dwg bouxhoiq ndei he. Aenvih mwngz guh gij saeh iq he cungj ndaej hawj vunz coengqsim, gou ij baij mwngz dang cib aen singz dih daeuzdaeuz.’ 18 “Boux daixngeih daeuj naeuz: ‘Bouxcawj hax, mwngz hawj gou hih ngaenz, gou guh seng'eiq canh ndaej haj dingq ngaenz.’ 19 “Bouxcawj dingq le, caemh naeuz: ‘Baenz lo, hawj mwngz dang haj aen singz dih daeuzdaeuz.’ 20 “Yiengq daengz daixsam boux daeuj naeuz: ‘Bouxcawj hax, gij ngaenz mwngz youq dineix. Gou aeu coujginh ma duk hwj coengq hwnjdaeuj. 21 Gou lau mwngz, aenvih mwngz youqgaenj raixcaix. Bonjfaenh mij doengh fawz guh, hoeng couh ijsiengj ndaej aeu gij vunz; mij geng mij ndaem, couh ij sou aeu gij vunz.’ 22 “Bouxcawj dingq de yienghneix naeuz le, ndatheiq hwj doiq de naeuz: ‘Mwngz dwg bouxhoiq simdoeg he! Bingz gij vah mwngz, gou couh ndaej dingh coih hawj mwngz. Mwngz giqyienz rox gou youqgaenj, dued aeu gij gou mij doengh fawz guh he, sou aeu gij gou mij geng mij ndaem he, 23 yiengq mwngz vihmaz mbouj dawz gij ngaenz gou swnz haeuj ngaenzhangz bae, daengj gou ma le, lienz bonj daiq leih cungj ndaej nej?’ 24 “Bouxcawj yienghneix naeuz le, couh doiq doengh boux ndwn youq henz he naeuz: ‘Dued aeu dingq ngaenz de ma hawj boux miz cib dingq mwnq.’ 25 “Yiengq doengh boux de dingq bouxcawj yienghneix naeuz le, couh naeuz: ‘Bouxcawj hax, de gaenq miz cib dingq lo!’ 26 “Bouxcawj han naeuz: ‘Dwg hah, mbouj loek. Gou naeuz sou ni, boux gaenq miz hih, hawj de engqgya lai; boux mbouj miz hih, yaepm'x daiqlienz de sojmiz hih cungj dued aeu ma liux.’ 27 Boux de gangj daengz dineix le, vanzlij caiq naeuz: ‘Caiq gangj naeuz doengh boux mbouj hawj gou dang goengjvuengz gyoengqde hih doengh boux mwnq, rag gyoengqde daeuj, daeuj dangqnaj gou gajgak bae.’” 28 Yehsuh gangj sat gij beijgangj neix le, couh daiq daeuz byaij youq gaxgonq bae Yehluqsajlaengj lo. 29 Gyoengqde bae ijvanh daengz aen mbanj Bwzfazgiz caeuq aen mbanj Bwzdaqniz song aen mbanj neix hih aen bya Gamjlamj mwnq, Yehsuh couh baij song boux lwgsae sien bae gaxgonq; 30 de doiq song boux de naeuz: “Faenhsou bae aen mbanj dangqnaj mwnq. Faenhsou haeuj mbanj bae le, couh raen miz duz lawzlwg he lamh hwj; duz de mijyaengz miz vunz gwih goq haem. Faenhsou couh gej ying ma hawj gou. 31 Hauhnaeuz miz vunz cam faenhsou vihmaz ij gej duz de nex, faenhsou couh naeuz: ‘Bouxcawj raeuz ij yungh duz de.’” 32 Yehsuh raengq sat le, song boux mwnq couh bae lo. Song boux de bae le, cingqgawq gwhraix, ngamqluj Yehsuh soj raengq hih yienghmwnq. 33 Couh youq mwh gyoengqde gej duz lawz hih mwhde, bouxcawj duz lawz mwnq couh cam gyoengqde naeuz: “Faenhsou vihmaz ij gej duz lawz neix hah?” 34 Gajlaeng gyoengqde han naeuz: “Bouxcawj raeuz ij yungh duz de.” 35 Couh yienghneix, gyoengqde couh ying duz lawz ma hawj Yehsuh, caemh dawz diuz buh bonjfaenh gyoengqde goemq hwnj gwnz gumq duz lawz bae, caiq raeuz Yehsuh gwih hwnj gwnz gumq duz de bae. 36 Mwh de okdin bae hih mwhde, gij vunzlai caemh aeu buh ma demh roen hawj de. 37 Mwh de ijvanh bae daengz Yehluqsajlaengj, roengz aen lingq aen bya Gamjlamj hih mwhde, gyoengq vunzlai gaen de mwnq cungj vih soj raen goq hih doenghheij geizmiuj mwnq hwj angq haenh Cangqdiq goggog, 38 haenh naeuz: “Cangqdiq baij daeuj dih vuengz caen miz fuk; gyoengqraeuz wnggai haenh! Cangqdiq dingh bingzan hawj raeuz! Cangqdiq gig veijdaq!” 39 Gyoengq vunzlai yienghneix hemq haenh le, ndaw gyoengq vunz ndaw de miz geij boux gaep haeuj Fazliqcaiq baij he couh doiq Yehsuh naeuz: “Lauxsae, naeuz gyoengq lwgsae mwngz; mbouj hawj gyoengqde doeng hemq sae hemq doenghgij vah neix veiq!” 40 Hoeng, Yehsuh dauq han naeuz: “Gou naeuz sou ni, hauhnaeuz gyoengqde mbouj ok sing, doengh ngauq rin neix gaengjdingq cungj ij ok sing okdaeuj hih!” 41 Yehsuh bae ijvanh daengz Yehluqsajlaengj yawj ndaej raen aen singz mwnq le, couh raemxra rih hwj 42 naeuz: “Yehluqsajlaengj dih vunz hax, ba'mboujmuengh faenhsou ngoenzneix rox daengz baenzlawz ndaej bingzan dih saeh, hoeng, daiq laeng lai lo. Hojsik gij saeh neix luj youq dangqnaj faenhsou yo hwnjdaeuj, mbouj hawj faenhsou yawj ndaej ok. 43 Couh ij daengz ngoenz dizyinz youq seiqhenz ciengz faenhsou cuk ciengz hwnjdaeuj gvaeg gunghoenx faenhsou, 44 hoenx hawj aen singz faenhsou bingzbwd, hawj faenhsou sojmiz hih vunz cungj byaeu liux bae lo, aenvih Cangqdiq daengz laeng faenhsou dineix lo, hoeng faenhsou cungj mbouj roxnaj de, mbouj ciep de.” 45 Yehsuh bae daengz Yehluqsajlaengj le, baex haeuj gunghdenq Cangqdiq bae he, couh majcangq boenq doenghgij vunz youq mwnq baij hai doxgaiq he okma, 46 doiq gyoengqde naeuz: “Singqgingh ndaw de sij naeuz: Gunghdenq Cangqdiq dwg haenh Cangqdiq gouz Cangqdiq dih deixfueng; faenhsou engq dawz de ma bienqbaenz rongzcaeg he lah!” 47 Daj mbat mwnq hwnj, Yehsuh ngoenzngoenz cungj bae gunghdenq Cangqdiq gangj gvanhhih guek Cangqdiq dih ndei siuhsiz. Yiengq doengh boux goengjsae dajbwiz he caeuq doengh boux fazliz cenhgyah he caeuq doengh boux youq ndaw singz dang ak he cungj ijsiengj gaj de, 48 hoeng ceng mbouj miz banqfaz ndaej gaj de, aenvih gij vunz cungj gig haenj dingq de gangj vah.
1 Miz ngoenz he, Yehsuh youq ndaw gunghdenq Cangqdiq gaijyiz gvanhhih guek Cangqdiq dih ndei siuhsiz. Yiengq miz doengh boux goengjsae dajbwiz he caeuq doengh boux fazliz cenhgyah he caeuq doengh boux vunz gangj vah couh baenz he daeuj, 2 doiq de naeuz: “Mwngz miz maz gienzliz guh gij saeh neix? Byawz hawj gij gienz neix hawj mwngz? Naeuz raeuz ni!” 3 Yehsuh dingq le, han gyoengqde naeuz: “Gou caemh ij cam faenhsou gawq he; faenhsou caemh ij naeuz gou ni. 4 Couh dwg, Yozhanq dih sijlij dwg byawz dih cawjeiq? Dwg Cangqdiq haj cixnaeuz dwg vunz nej?” 5 Gyoengqde dingq le, couh gangj yebyeb hwj doxcimciek naeuz: “Gyoengqraeuz ij baenzlaw naeuz nej? Hauhnaeuz raeuz naeuz: ‘Dwg Cangqdiq lah,’ yiengq de gaengjdingq naeuz: ‘Yiengq faenhsou vihmaz mbouj sinq Yozhanq nej?’ 6 Hoeng, hauhnaeuz naeuz: ‘Dwg vunz lah,’ yiengq gyoengq vunzlai gaengjdingq aeu rin ma dub raeuz rai, aenvih gyoengqde sinq Yozhanq dwg boux cenz gij vah Cangqdiq he.” 7 Gyoengqde yienghneix cimciek le, mij'z banqfaz, couh naeuz: “Mbouj rox.” 8 Yehsuh raen gyoengqde yienghneix naeuz le, couh doiq gyoengqde naeuz: “Yiengq, gou caemh mbouj naeuz sou ni gou miz maz gienzliz ndaej guh gij saeh neix nej.” 9 De yienghneix han gyoengqde le, couh yungh gij beijgangj he ma doiq gyoengq vunzlai naeuz: “Miz boux he, de ndaem miz suen buzdauz he co hawj vunz, couh bae vaihdieg youz lo. 10 Yiengq daeng mwh ndaej sou mak he le, de couh baij bouxhoiq de ma laeng doengh boux co suen mwnq sou aeu faenh de wnggai ndaej he. Hoeng, bouxhoiq de ngaiz doengh boux co suen mwnq doh donq he, doh hawj de bi fawz hoengq maj. 11 Maj le, bouxcawj suen mwnq caiq baij daixlingh boux ma. Daixlingh boux caemh ngaiz gyoengqde doh. Doh le, caiq dawz boux de ma nyoujnyak gaijmbwq, caemhcaiq hawj de bi fawz hoengq maj. 12 Gajlaeng bouxcawj suen mwnq caiq baij daixsam boux ma. Boux daixsam caemh ngaiz gyoengqde doh. Doh hwj sieng bae le, caiq dawz boux de gveng ok rog suen ma. 13 “Bouxcawj suen mwnq raen gyoengqde cungj dwg yienghneix doiq doengh bouxhoiq de le, couh gag naeuz: ‘Yaxq, gou ij baenzlaw guh nej? Gou ganhseiq hawj daeglwg gou—daeglwg neix gou gig aiq de—hawj de maj suenq lo. Saekseiz gyoengqde lij soenhgingq de laem.’ Couh yienghneix, de couh hawj daeglwg de ma lo. 14 “Hoeng, liuh mbouj daengz gyoengq co suen mwnq baex raen daeglwg de he, couh doxcimciek hwj naeuz: ‘Neq, boux ciep aeu aen suen neix hih daeuj lo. Daengj raeuz gajgak de bae; gajgak de bae le, baezneix aen suen neix mijyaengz dwg ndaej gvi hawj raeuz haz!’ 15 Gyoengqde yienghneix cimciek le, couh nyoengx daeg de ok rog suen ma, couh gaj de.” Yehsuh gangj daengz dineix le, couh cam gyoengq vunzlai naeuz: “Faenhsou naemjnaemj yawj, bouxcawj suen mwnq ij baenzlawz doiq doengh boux co suen mwnq nej? 16 De dwg mbouj dwg dawz doengh boux co suen mwnq gajgak bae nej? Gajgak bae le, caiq co hawj daixlingh boux nej?” Gyoengq vunz dingq de gangj gij vah neix le, cungj naeuz: “Ciengeiz mbouj ndaej fatseng gij saehcingz neix!” 17 Hoeng, Yehsuh dauq cimyawj gyoengqde doiq gyoengqde naeuz: “Guxmaz mbouj miz nex; ndaw Singqgingh ndaw de cungj sij miz lo. Ndaw de sij naeuz: Canghranz vwt hih hengxdiuz, gajlaeng engq bienqbaenz aen ranz mbouj ndaej noix dih diuz gangqloz he. Gawq neix dwg gijmaz iqswh? 18 Bouxlawz laemx deng diuz gangqloz neix nex, bouxlawz couh ngaiz siksanq liux; diuz gangqloz neix doek youq gwnz ndang bouxlawz, bouxlawz couh ngaiz dub yungz liux.” 19 Doengh boux fazliz cenhgyah caeuq doengh boux goengjsae dajbwiz he yawj ndaej ok Yehsuh dih gij beijgangj neix dwg ceij gyoengqde he le, couh aeuqheiq hwj siengj majcangq gaemh dawz de, hoeng gyoengqde lau gij vunzlai, mij banqfaz, cij ndei caiq daengj daengz miz gihveiq. 20 Sojhij gyoengqde couh baij vunz gyajcang guh vunz lauxsaed hwj bae caegcaeg demq yawj Yehsuh, ijsiengj ra congxmbongq, haemq ndei gaemh dawz de gyau hawj cingqfuj. 21 Yiengq doengh boux baij bae he mwnq couh cam Yehsuh naeuz: “Lauxsae, gyoengqraeuz rox mwngz soj gangj hih caeuq soj son hih cungj dwg deng hih. Caemh rox mwngz doiq vunz cungj caemh dwg doxdoengz hih; mwngz cungj dwg saedsaed saehsaeh cenz gij vah Cangqdiq hih. 22 Yiengq raeuz cam mwngz, raeuz dwg mbouj dwg wnggai gyau ceiq hawj Gaijsaj goengjvuengz Lozmaj nej?” 23 Gyoengqde yienghneix cam le, Yehsuh yawj ndaej ok gyoengqde dih yimhmaeuz, couh doiq gyoengqde naeuz: 24 “Dawz maenz ngaenz he daeuj hawj gou yawj. Yawjyawj gij duzsiengq gwnz de caeuq gij coh de dwg bouxlawz?” Gajlaeng gyoengqde han naeuz: “Dwg Gaijsaj.” 25 Yehsuh caiq doiq gyoengqde naeuz: “Yiengq Gaijsaj dih doxgaiq wnggai gvi hawj Gaijsaj; Cangqdiq dih doxgaiq caemh wnggai gvi hawj Cangqdiq.” 26 Gyoengqde dingq Yehsuh yienghneix gangj le, cungj raen geizheih raixcaix, aj bak loengjloengq ngoemxngwd, guh hwj youq dangqnaj gyoengq vunzlai mij banqfaz cimh ndaej cingqgiq. 27 Yiengq caemh miz doenghgij vunz gaep haeuj Sajduhgaih baij he, siengzseiz naeuz mbouj miz dauqlix dih doenghgij vunz mwnq, daeuj cam Yehsuh, 28 cam de naeuz: “Lauxsae, Mohsih dih fazliz gveihdingq naeuz: ‘Hauhnaeuz miz vunz aeu yah ma, mijyaengz miz lwg haem cix ngaiz rai lo, lij mehyah de, yiengq daeg nuengxau de couh ij aeu meh beixsauj de ma guh yah, bang daeggo de miz lwg, hawj de miz daih gajlaeng.’ 29 Yiengq miz ranz he, miz caet goengjlungz nuengxau. Daeg daixdaeuz aeu yah ma, mijyaengz miz lwg haem hoeng cix ngaiz rai lo. 30 Daengz daeg daixngeih, caemh aeu meh beixsauj de ma guh yah, caemh mijyaengz miz lwg haem cixcaemh ngaiz rai lo. Yiengq daengz daeg daixsam caemh yienghneix. 31 Caet daeg cungj caemh aeu goq meh neix, cungj caemh mij miz lwg couh ngaiz rai lo. 32 Daengz gajlaeng, meh de caemh rai lo. 33 Yiengq daengz mwh dauqlix he, meh neix ij suenq dwg mehyah bouxlawz nej? Aenvih caet daeg cungj caemh aeu meh de goq.” 34 Gajlaeng Yehsuh han gyoengqde naeuz: “Aen seiqgyaiq neix dih vunz miz aeu miz haq, 35 hoeng, doengh boux youq ndaw lwgra Cangqdiq boiqndaej seiqseiz lix he, boiqndaej aen seiqgyaiq moq dauqlix he, daengz mwh dauqlix he, dwg mbouj aeu mbouj haq hih, 36 aenvih gyoengqde luj bouxcai Cangqdiq ityiengh, mbouj rox rai; gyoengqde ndaej dauqlix, sojhij gyoengqde dwg lwg Cangqdiq. 37 “Gangj naeuz vunz rai le ndaej dauqlix, Mohsih gaenq cingqmingz miz gij saeh neix lo, couh dwg de sij youq ndaw bien ‘Caz oen dawz feiz’ bien neix, ndaw de sij naeuz: Cangqdiq dwg cojgoeng faenhsou Yaqbwzlahhanj dih Cangqdiq, Hijsaj dih Cangqdiq, Yajgoz dih Cangqdiq. 38 Gij iqswh neix dwg naeuz, Cangqdiq dwg vunzlix dih Cangqdiq, mbouj dwg vunzrai dih Cangqdiq, aenvih ciuq Cangqdiq ma yawj, vunz cungj dwg lix he.” 39 Youq mwnq dingq hih gyoengq vunz mwnq miz geij boux fazliz cenhgyah he naeuz: “Lauxsae, mwngz gangj ndaej deng!” 40 Daj mbat neix hwnj, doengh boux baij daeuj demq Yehsuh hih mwnq caiq mij gamj cam de gijmaz saeh haem lo. 41 Hoeng Yehsuh dauq doiq gyoengq vunz naeuz: “Gij vunz cungj naeuz Gihduz dwg Daqveiq dih lwglan lo. 42 Hoengq Daqveiq bonjfaenh de youq ndaw Gij Go Haenh Cangqdiq ndaw de cungj gag sij goq naeuz: Cangqdiq doiq bouxcawj gou naeuz: ‘Naengh youq baixgvaz gou, 43 daengj gou dawz gij dizyinz mwngz bienqbaenz aen daengq mwngz.’ 44 Yiengq, giqyienz Daqveiq heuh de guh ‘bouxcawj’ lo, ciuq yienghneix de couh mbouj danhcij naeuz dwg lwglan Daqveiq, cixcaemh dwg bouxcawj de lo.” 45 Gyoengq vunzlai lij dingq de gangj vah hih mwhde, de caemh doiq gij lwgsae de naeuz: 46 “Faenhsou ij fuengz doenghheij fazliz cenhgyah he. Gyoengqde cungj haenj daenj buhbauz raez hwj byaij yoekyoek goq gai bae, haenj hawj vunzlai dongx gyoengqde, dongx gyoengqde ndei, caemh haenj naengh ndaw veiqdangz dih mwnq daixdaeuz mwnq ndei he, haeuj daiz gw laeuj caemh haenj naengh mwnq ndei he. 47 Gyoengqde hangzciemq gw gij gyadangq mehmaiq; gouz Cangqdiq, caeuq Cangqdiq gangj vah lai hux lai, cungj dwg guh hawj vunz yawj he. Doengh cungj vunz neix, ij fad beij vunz naek lai.”
1 Yehsuh gangj daengz dineix le, ngiengx raeuj baex yawj, couh yawjraen gij vunz fouq he gien ngaenz. Gyoengqde gien roengz aen sieng ndaw gunghdenq Cangqdiq bae. 2 De caemh yawjraen meh vunzmaiq vunz gungz he coengq song maenz cienzdoengz roengzbae. 3 De yawjraen yienghneix le, couh naeuz: “Gou saedsaeh naeuz sou ni, mehmaiq vunz gungz mwnq coengq hih ngaenz, beij sojmiz hih vunz coengq hih ngaenz cungj coengq ndaej lai, 4 aenvih gyoengq vunz coengq hih ngaenz doiq gyoengqde ma gangj mbouj suenq guxmaz ngaenz, hoeng, mehmaiq mwnq nej, meh de soj coengq hih ngaenz dwg de sojmiz ij ciengx mingh hih ngaenz.” 5 Miz mbangj lwgsae doiq gunghdenq Cangqdiq hih gij rin gyaeu he caeuq doenghheij doxgaiq gyaeugyaeu soengq hawj Cangqdiq he mwnq haenh soebsoeb. Gyoengqde cingq haenh hih mwhde, Yehsuh dauq naeuz: 6 “Faenhsou soj yawjraen hih doenghgij doxgaiq neix, daengz baezneix hih mwh he, dineix cungj ij ngaiz bingzbwd liux bae.” 7 Gyoengq lwgsae dingq le, couh cam naeuz: “Lauxsae, yiengq daengz seizlawz fatseng gij saeh neix nej? Gij saeh neix ij fatseng hih mwhde, ij miz gijmaz gingjdoengh nej?” 8 Yiengq Yehsuh han gyoengqde naeuz: “Faenhsou ij siujsim, gaejyungh ngaiz vunz yaeuh, aenvih baezneix ij miz vunz yungh gij coh gou ma gyajcang naeuz: ‘Gou dwg Gihduz, Cangqdiq baij daeuj dih vuengz,’ vanzlij caiq naeuz: ‘Ijvanh daengz mwh he lo!’ Faenhsou dingq daengz doenghgij vah neix, cungj mbouj ndaej dingq, caemh mbouj ndaej gaen gyoengqde. 9 Daengz mwh faenhsou raen luenh caeuq dingqri doxhoenx hih mwhde, faenhsou gaejyungh lau, aenvih doenghgij saeh neix gaengjdingq sien fatseng, hoeng, gij neix mbouj dwg naeuz dwg ciqgyaiq dih ngoenz gatsat he law.” 10 Yehsuh vanzlij caiq naeuz: “Daengz mwhde, minzcuz caeuq minzcuz, guek caeuq guek doxhoenx. 11 Diqcwnq hih diqcwnq, iekvangh hih iekvangh, binghraq hih binghraq; gwnzmbwn cix miz ndaek cungj geizheih hawj vunz raen lau he, caeuq miz ndaek gij gingjdoengh he yienh okdaeuj. 12 “Hoeng, doenghgij neix mijyaengz fatseng hih mwhde, faenhsou ij ngaiz vunz haih, ngaiz vunz gaemh dawz gyau hawj veiqdangz, caemh ngaiz vunz gyaeng haeuj ndaw lauz bae. Youhcaiq vih gou hwj ngaiz rag bae hawj goengjvuengz caeuq cingqfuj. 13 Yiengq ngamqluj daengz mwhmwnq, faenhsou couh ndaej miz gihveiq naeuz faenhsou vihmaz ij sinq gou lo. 14 Sojhij faenhsou gaejyungh cwnjbiq ij baenzlaw han gyoengqde, 15 aenvih gou swhmboujyienz nyok hawj faenhsou goujcaiz caeuq coengjmingz, sawjhawj dizyinz buek mbouj goq faenhsou, mij'z vah ndaej gangj bae. 16 Hoeng, faenhsou caemh ngaiz bohmeh hah, beixnuengx hah, caencik hah, baengzyoux hah cuzmaiq faenhsou; faenhsou ndaw neix miz mbangj hih vunz caemh ngaiz gyoengqde haihrai, 17 vanzlij caemhcaiq vih gou hwj ngaiz vunzlai haenq. 18 Gannaeuz yienghneix lah, hoeng faenhsou daiqlienz dug byoem he cungj mbouj ngaiz doek, mbouj ngaiz loenq; 19 cijaeu faenhsou gyenhciz mbouj bienq sim, couh ndaej baux gij hoenzsaenz faenhsou lo.” 20 Yehsuh gangj daengz dineix le, vanzlij caiq naeuz: “Caenh daengz mwh faenhsou raen miz bing gvaeg Yehluqsajlaengj nex, yiengq couh dwg naeuz mwnq dieg neix couh ij ngaiz byaeu lo. 21 Daengz mwhmwnq, youq Youzdaiq Saengj hih couh ij deuz hwnj bya bae, youq ndaw singz hih couh ij ok ma, youq lajmbanj hih gaejyungh haeuj singz bae, 22 aenvih daengz mwhmwnq, couh dwg bauqwngq daengz lo, dwg vih ij hawj ndaw Singqgingh soj sij hih gvanhhih doenghgij saeh neix hih cungj ij lingz okdaeuj. 23 Daengz mwhmwnq, meh daiqndang caeuq meh daiqnauq miz nanh lo, aenvih mwnq dieg neix couh ij nanh dawz lo, ndatheiq couh ij daengz gwnz dingjraeuj gij vunz dieg neix lo. 24 Gyoengqde ij ngaiz rai youq bak cax, caemh ngaiz vaihguek gaemh bae. Yehluqsajlaengj caemh ij ngaiz gij vunz vaihguek mbouj rox Cangqdiq he nyoegnyoeg nyamxnyamx, nyoegnyamx daengz Cangqdiq dingh hih geizmuenx bae. 25 “Daengz mwhmwnq, gwnzmbwn gyangjngoenz, aen ndwen, ndaundeiq cungj miz gij geizheih he gingjdoengh okdaeuj; lajmbwn ndaw haij bohlangq caemh biu hwj dwk ruxrux, hawj lajmbwn sojmiz hih vunz cungj dungxmbouq ndangsaenz you fubfub. 26 Gij vunz cungj vih gij saeh neix hwj saet hoenzsaenz bae, aenvih mbwnmbwn deihdeih cungj ij ngaiz saenqdaenh hwj aqaq cegceg bae. 27 Daengz mwhmwnq, gij vunz ij raen gou, Vunz dih Daiqbiuj, rongh sagsag myig mywngzmywngz cienfanh miz vi miz rengz he, caeuq gij fwj daj gwnzmbwn roengz daeuj. 28 Daengz mwh fatseng gij saeh neix hih mwhde, faenhsou gaejyungh lau; ngiengx raeuj hwnjdaeuj, aenvih ij daengz mwh faenhsou ndaej cueg ma hih lo.” 29 Yehsuh vanzlij yungh gij beijgangj he ma doiq gyoengq lwgsae de naeuz: “Faenhsou yawjyawj go uzvahgoj caeuq doenghheij faex; 30 doengh go de baex did mbaw he, faenhsou couh swhmboujyienz rox seizhah couh ij daengz lo. 31 Caemh doxdoengz, mwh faenhsou yawjraen doenghheij saeh neix fatseng hih mwhde, faenhsou couh rox Cangqdiq dih gienzveih couh ij fazveih lo.” 32 De vanzlij naeuz: “Gou saedsaeh naeuz sou ni, daih neix hih vunz vanz mijyaengz gvaqseiq haem, gij saeh neix couh ij fatseng lo. 33 Mbwnmbwn deihdeih cungj cawzraeg liux, hoeng, gij vah gou yungjyenj mbouj rox raeg.” 34 Yehsuh caiq naeuz: “Faenhsou ij siujsim, ciengeiz mbouj ndaej vih laeujlaeuj nohnoh gwgw angqangq caeuq saenghhoz dih saepsaep soiqsoiq hwj sim mbouj dingh, mienxndaej daengz ngoenz mwnq—sawqmwh daeuj daengz hih ngoenz mwnq—luj canggaep yienghmwnq gaep dawz faenhsou, 35 aenvih ngoenz mwnq ij daeuj daengz lajmbwn, daengz sojmiz hih vunz. 36 Sojhij faenhsou ij singqsag, ij siengzseiz caeuq Cangqdiq gangj vah, gouz Cangqdiq soengq rengz hawj faenhsou, hawj faenhsou ndaej miz rengz ndoj goq sojmiz ij fatseng he, hawj faenhsou mij naih saek yiengh hwj miz naj ndwn youq dangqnaj gou.” 37 Couh yienghneix, Yehsuh ngoenznaengz cungj youq gunghdenq Cangqdiq gangj vah, haemhnaengz ok singz bae hwnj gwnz bya Gamjlamj bae youq. 38 Gij vunzlai ngoenznaengz daihcaeux couh bae gunghdenq Cangqdiq dingq Yehsuh gangj vah.
1 Aen ciet Cawz Yauqmuj, caemh dwg aen ciet Bienqgoqbae he, ijvanh daengz lo. 2 Doengh boux goengjsae dajbwiz he caeuq doengh boux fazliz cenhgyah he cungj ij siengj banqfaz baenzlawz byaeu Yehsuh, hoeng, caemhcaiq mbouj siengj hawj vunz rox, aenvih gyoengqde lau vunzlai. 3 Mwhde, fangzvuengz Sajdanq doz youq gwnz ndang Youzdaq, Gyahloz vunz. (Youzdaq caemh dwg ndaw cibngeih boux lwgsae ndaw de hih boux he.) 4 De couh bae cimh doengh boux goengjsae dajbwiz caeuq doengh boux souj gunghdenq Cangqdiq he cimciek, cimciek ij baenzlaw ndaej gaemh dawz Yehsuh gyau hawj gyoengqde. 5 Gyoengqde dingq le, cungj cienfanh angq he, caemh naeuz ij hawj ngaenz hawj de. 6 De caemh dungziq lo, yiengq de couh ra congxgon, cenmonz demq mwh mij'z vunz lai youq henz ndang Yehsuh he, couh hawj gyoengqde gaemh dawz Yehsuh. 7 Aen ciet Cawz Yauqmuj, youq aen ciet neix hih ngoenz daixdaeuz couh dwg ij gaj yiengzlwg hwj cwnjbiq goq aen ciet Bienqgoqbae. 8 Sojhij Yehsuh couh doiq Bijdwz caeuq Yozhanq naeuz: “Faenhsou ok bae cwnjbiq haeuxcaeuz, hawj gyoengqraeuz goq ciet Bienqgoqbae bax.” 9 Yiengq song boux de cam naeuz: “Raeuz bae mwnqlaw cwnjbiq?” 10 Yehsuh naeuz: “Faenhsou haeuj singz bae couh raen miz boux he; de riuj miz huz raemx he. Faenhsou couh gaen de bae. De haeuj aen ranzlawz bae, faenhsou caemh gaen de haeuj aen ranzlawz bae. 11 Haeuj bae le, couh doiq boux cawjranz mwnq naeuz: ‘Lauxsae gou cam mwngz naeuz: “Gou caeuq lwgsae gou ij gw ciet Bienqgoqbae; ij youq funghlaw gw lah?”’ 12 Faenhsou yienghneix naeuz, de gaengjdingq daiq faenhsou hwnj laeuz bae yawj. Faenhsou gaengjdingq raen miz aen fungh hung he, ndaw de baij hwj ndei ndwtndwt, gaiqgaiq cungj miz he. Faenhsou couh youq mwnq cwnjbiq bax.” 13 Yehsuh yienghneix raengq le, song boux de couh haeuj singz bae lo. Yiengq gyoengqde bae soj roeb daengz hih cingqgawq luj Yehsuh soj gangj hih yienghmwnq. Gajlaeng gyoengqde couh youq mwnq cwnjbiq ndei ciet Bienqgoqbae dih haeuxcaeuz. 14 Yiengq daengz gw haeuxcaeuz mwhde, Yehsuh haeuj daiz bae gw haeux, gyoengq dwzbaijyienz de caemh gaen de haeuj daiz bae gw haeux. 15 Yehsuh couh doiq gyoengqde naeuz: “Youq gou mijyaengz ngaiz souh nanh cihsenz, gou ndaej caeuq faenhsou gw donq haeuxcaeuz aen ciet Bienqgoqbae neix, gou raen dij ij rai bae, 16 aenvih daj seizneix hwnj, gou mbouj caiq gw aen ciet Bienqgoqbae dih haeuxcaeuz laem lo, cizfeih daengz donq haeuxcaeuz neix soj daiqbiuj hih ndaej youq aen guek Cangqdiq lingz okdaeuj vwi gou cij gw.” 17 Yehsuh yienghneix gangj le, couh ciep aeu aen cenj coux laeuj buzdauz he, couh docih Cangqdiq. Docih le, couh doiq gyoengqde naeuz: “Faenhsou dawz cenj laeuj neix bae doxfaen gw bax. 18 Gou naeuz sou ni, aenvih daj seizneix hwnj, gou mbouj caiq gw saek ndik laeuj, cizfeih daengz gij gienzveih Cangqdiq youq lajmbwn fazveih; daengz mwhmwnq gou cij gw.” 19 De gangj daengz dineix le, youhcaiq dawz aen bingj he hwnjdaeuj couh docih Cangqdiq. Docih le, couh euj hawj gyoengq dwzbaijyienz de, doiq gyoengqde naeuz: “Gij neix couh dwg daiqbiuj aen ndangdaej gou; dwg vih faenhsou hwj ngaiz vwt mingh dih ndangdaej. Vih ij geiqniemh gou, baezneix faenhsou caemh ij yienghneix guh.” 20 Gw haeuxcaeuz sat le, Yehsuh caiq dawz cenj laeuj hwnjdaeuj naeuz: “Cenj neix couh dwg daiqbiuj Cangqdiq yiengq vunz dinghlaeb dih saen dih baujcingq lienz diuzgyenq, dwg yungh gij lwed gou ma dingh he. Gij lwed gou dwg vih faenhsou hwj riuz he.” 21 De vanzlij caiq naeuz: “Gou naeuz sou ni, boux buenqduz ij hai gou hih, gij fawz de caemh caeuq gij fawz gou doxdoengz coengq youq gwnz daiz he. 22 Gou, Vunz dih Daiqbiuj, gannaeuz ciuq Cangqdiq sien dingh hih yienghmwnq rai bae, hoeng, boux buenqduz hai gou mwnq satsoq lo!” 23 Yehsuh yienghneix gangj le, gyoengq lwgsae cungj doxcam naeuz, dauqdaej dwg byawz ij guh gienh saeh neix nej? 24 Gajlaeng gyoengq lwgsae caemh vih youq ndaw gyoengqde bouxlawz ceiq rem hwj doxeuq. 25 Yiengq Yehsuh dingqri le, couh doiq gyoengqde naeuz: “Doenghheij goengjvuengz vaihguek, de miz gienz guenj gij vunz de, caemh seizbienh guenjciq gyoengqde, hoeng, goeng de vanzlij ij hawj gij vunz naeuz de dwg ndei hih vuengz, dwg gyoengqde dih giuqsingh. 26 Hoeng, faenhsou mbouj wnggai yienghneix. Dauqfanj, faenhsou ndaw neix bouxlawz dang ceiq ak hih, dauq ij luj lwgngez; bouxlawz dang daeuzdaeuz hih, dauqfanj ij luj bouxhoiq. 27 Ciuq bingzseiz ma gangj, bouxcawj naengh haeuj daiz gw haeux; bouxhoiq ndwn youq henz de swqhaeuh. Hoeng, gou dauq luj bouxhoiq faenhsou lah. 28 “Youq gou soj ginghliz goqdaeuj souh daengz hih nanh, faenhsou cungj dwg gaen gou, youq henz ndang gou, 29 sojhij gou seizneix nyok gij gienz luj goengjvuengz gaem hih gij gienz mwnq hawj faenhsou, caemh luj daxboh gou nyok hawj gou yienghmwnq. 30 Yienghneix, faenhsou couh ndaej youq ndaw guek gou caeuq gou doxcaemh daiz gw haeux gw laeuj lo, caemh ndaej naengh youq gwnz he saemjbuenq gij vunz Hijswzlez dih cibngeih aen cuz lo.” 31 De vanzlij caiq naeuz: “Sihmaenz, Sihmaenz, gou naeuz mwngz ni, fangzvuengz Sajdanq gouz Cangqdiq, ij dawz faenhsou ma lad, luj lad haeux yienghmwnq, yawj byawz dwg luj ceh bauz he cixnaeuz luj ceh mbot he. 32 Hoeng, gou gaenq bang mwngz gouz Cangqdiq lo, gouz hawj mwngz mbouj saetsim liux; daengj mwngz dauq miz sinqsim le, ij bang heij beixnuengx mwngz, hawj gyoengqde mbouj doeknaiq.” 33 Sihmaenz-Bijdwz dingq le, naeuz: “Bouxcawj gou hax! Gou nyienh'eiq gaen mwngz, mboujguenj mwngz ngaiz vunz gyaeng, ngaiz vunz gajrai, gou cungj gaen mwngz.” 34 Hoeng Yehsuh dauq naeuz: “Bijdwz hax, gou naeuz mwngz ni, ngwnzneix cungj mijyaengz gaeq haen haem, mwngz cix miz sam mbat naeuz mwngz mij rox gou lo.” 35 Yehsuh yienghneix naeuz le, vanzlij doiq gyoengqde naeuz: “Gaxgonq gou baij faenhsou ok bae cungj mbouj hawj faenhsou daiq ngaenzbau, daiq daeh, daiq haiz bae haem, hoeng, gajlaeng faenhsou noix gijmaz mbouj miz maz?” Gyoengqde dingq le, cungj han naeuz: “Mij hah; gaiqgaiq cungj miz.” 36 Yehsuh caiq naeuz: “Hoeng, seizneix mbouj doengz lo. Seizneix byawz miz ngaenzbau hih, ij daiq ngaenzbau; miz daeh hih, ij daiq daeh; hauhnaeuz mbouj miz giemq hih, ij hai gij buh bonjfaenh hwj cawx giemq. 37 Gou naeuz sou ni, ndaw Singqgingh ndaw de sij naeuz: De ngaiz lez haeuj gij vunzfamh he. Gawq neix ngamqluj dwg ceij gou, aenvih gvanhaeh daengz gou hih saeh cungj ij raen lo.” 38 Gij lwgsae de dingq le, naeuz: “Bouxcawj gou hax, hawjm'z yawj lux; dineix miz song fag giemq.” Yehsuh dingq le, han naeuz: “Suenq lo!” 39 Yehsuh gangj daengz dineix le, couh ok singz ma, caemh luj bienqnaengz couh hwnj bya Gamjlamj bae lo. Gyoengq lwgsae de caemh gaen de bae. 40 Bae daengz gwnz bya le, de couh doiq gyoengqde naeuz: “Faenhsou ij gouz Cangqdiq mbouj hawj faenhsou ngaiz yaeuh ngaiz coemx.” 41 De gangj gawq neix sat le, couh byaij bae liz gyoengqde daihgaiq ndek rin ndaej daengz hih yienghmwnq gyae he, couh gvih roengzma gouz Cangqdiq 42 naeuz: “Boh hax! Hauhnaeuz mwngz nyienh'eiq, couh mbouj hawj gou souh gij haemzhoj neix! Gannaeuz gou gouz mwngz yienghneix lah, hoeng vanzlij dwg ciuq gij cawjeiq mwngz bae guh bax.” 43 Couh youq mwhneix, miz bouxcai he daj gwnzmbwn roengz daeuj yienh hawj de raen, hawj de lai miz singjsaenz. 44 De yied gouz yied siengsim, yied siengsim engqgya yied gouz, yied gouz yied ok hanh, guh hwj ok hanh lwed baenx ndik baenx ndik roengz lajdoem bae bae. 45 De gouz sat le, couh ndwn hwnjdaeuj dauq maj daengz gyoengq lwgsae de mwnq. Maj le, engq raen gyoengq lwgsae de vih daiq siengsim hwj naet hwj ralaep ndaek bae. 46 De couh heuh gyoengqde singj, doiq gyoengqde naeuz: “Faenhsou vihmaz ralaep nej? Vaiq hwnq gouz Cangqdiq, gouz de mbouj hawj faenhsou ngaiz yaeuh ngaiz coemx.” 47 Yehsuh vanzlij gangj vah hih mwhde, cibngeih boux lwgsae ndaw de Youzdaq daiq baenx gyoengq vunz goqdaeuj; de goq daeuj le couh cup Yehsuh. 48 Yiengq Yehsuh couh doiq de naeuz: “Youzdaq, mwngz cup gou guh ngamqhauq ma haih gou, Vunz dih Daiqbiuj haj?” 49 Gyoengq lwgsae gaen henz ndang de raen yienghneix le, couh naeuz: “Bouxcawj gou hax, gyoengqraeuz aeu giemq ma ndaemq ndaej mbouj ndaej hax?” 50 Gyoengqde ngamq yienghneix naeuz sat, couh miz boux he doq raemj duj rwz bouxhoiq goengjsae dajbwiz daeuzdaeuz hih duj rwz baixgvaz de gat. 51 Yehsuh raen yienghneix le, couh naeuz: “Mboujcwnj doengh fawz!” De gangj gawq neix sat le, couh iet fawz mo duj rwz boux de, yw ndei duj rwz de. 52 Gajlaeng Yehsuh couh doiq doengh boux goengjsae dajbwiz he caeuq doengh boux souj gunghdenq Cangqdiq he caeuq doenghheij vunz gangj vah couh baenz he naeuz: “Faenhsou dawz giemq dawz faex hwj daeuj gaemh gou, gaemh luj gaemh caeggeq nwih. 53 Gou ngoenzngoenz cungj caeuq faenhsou youq ndaw gunghdenq Cangqdiq; faenhsou mij gaemh gou. Hoeng, seizneix faenhsou gauq laep guh mbei, gauq laep dang gienz daeuj hengzvang hengzreih daeuj gaemh gou.” 54 Couh youq mwhneix, Yehsuh couh ngaiz gyoengqde gaemh dawz lo, gaemh dawz de bae ndaw fuj goengjsae dajbwiz daeuzdaeuz he. Bijdwz caemh gyae'gyae req gaen gajlaeng bae. 55 Bae daengz daxhongh ndaw fuj boux de le, youq mwnq miz vunz caux feiz. Bijdwz couh haeuj bae mwnq naengh. 56 Yiengq, mwnq miz dahhoiq he raen Bijdwz naengh youq henz feiz le, couh cimyawj de nijnij, naeuz: “Boux vunz neix caeuq boux vunz mwnq dwg caemh buek vunz he he.” 57 Bijdwz dingq le, engq mij nginh Yehsuh, dauq han naeuz: “Dahnuengx, gou mij rox de law!” 58 Ngamq goq ndaej yaepyet he, caiq miz boux vunzsai he caemh yawjraen de, caemh naeuz: “Mwngz dwg caeuq de caemh buek vunz he!” Bijdwz dingq le, caemh naeuz: “Ndaek ngauqm'z, gou mij dwg hah!” 59 Yiengq caiq ngamq goq ndaej saek diemjcung yienghneix, miz boux he naeuz: “Gou gamj gaengjdingq boux vunz neix caeuq boux vunz mwnq dwg gaep buek vunz he, aenvih de caemh dwg Gyahliqliq vunz.” 60 Hoeng Bijdwz engq dauq han naeuz: “Ndaek vunz ndaekn'x! Gwh mbouj rox mwngz naeuz gijmaz hah!” De gangj gawq neix mijyaengz sat bak haem, gaeq couh haen lo. 61 Couh youq mwhneix, Yehsuh veq goqma yawj Bijdwz; Bijdwz couh doq ngeix daengz gaxgonq de naeuz goq hih vah: “Ngwnzneix gaeq haen cihsenz, mwngz miz sam mbat mbouj nginh gou.” 62 Bijdwz ngeix daengz dineix le, couh ok rog bae daej ngwdngwd. 63 Yehsuh ngaiz vunz dawz bae le, ngaiz doengh boux gam de dawz ma nyoujnyouj nyaknyak gaijmbwq, caiq doh de, 64 youhcaiq fung cehra de hwj naeuz: “Mwngz naeuz mwngz dwg boux cenz gij vah Cangqdiq lo, yiengq mwngz naeuz yawj dwg byawz doh mwngz lux?” 65 Mbouj danhcij naeuz yienghneix, vanzlij doeng gangj sae gangj doenghgij vah hoj dingq he ma nyoujnyouj nyaknyak de. 66 Daengz ranzrongh le, doenghgij Youzdaiq vunz dih veijyienzveiq dih veijyienz, couh dwg doenghheij vunz vunz gangj vah couh baenz he caeuq doengh goengjsae dajbwiz he caeuq doengh boux fazliz cenhgyah he, doxcomz gaihveiq, caiq hawj vunz daiq Yehsuh goq bae mwnq gyoengqde gaihveiq hih mwnq, 67 couh doiq Yehsuh naeuz: “Mwngz dwg mbouj dwg Gihduz, Cangqdiq baij daeuj dih vuengz he? Naeuz! Naeuz okdaeuj!” Yiengq Yehsuh han naeuz: “Cungjsuenq naeuz gou naeuz sou ni, sou caemh mbouj sinq; 68 hauhnaeuz gou caemh cam faenhsou gij saeh neix, faenhsou caemh gaengjdingq mbouj naeuz gou ni. 69 Hoeng daj seizneix hwnj, gou, Vunz dih Daiqbiuj, ij naengh youq baixgvaz akak rengzrengz dih Cangqdiq.” 70 Gyoengqde dingq le, cungj han naeuz: “Yiengq mwngz couh dwg lwg Cangqdiq lo?” Yehsuh han naeuz: “Faenhsou naeuz ndaej deng lo.” 71 Gajlaeng gyoengqde naeuz: “Ox! De cungj gag gangj okdaeuj lo! Gyoengqraeuz cixcaemh dingqri lo; hozbiet cungj ij saemjcam baenq lai? Hab gaj lo!”
1 Gyoengqde yienghneix gangj le, couh daiq Yehsuh bae daengz Bijlahdoh goeng saengjcangj mwnq. 2 Gyoengqde baex raen Bijlahdoh he couh gaihcij gauq Yehsuh. Gyoengqde gauq naeuz: “Gyoengqraeuz raen boux neix doeng gangj sae gangj, hawj gij vunz raeuz dingq de, fanjdeiq nab ceiq hawj goengjvuengz Lozmaj, vanzlij naeuz bonjfaenh de dwg Cangqdiq baij daeuj dih Gihduz, dwg vuengz.” 3 Bijlahdoh dingq le, cam Yehsuh naeuz: “Mwngz dwg gij vunz Youzdaiq dih vuengz mah?” Yehsuh han de naeuz: “Mwngz naeuz ndaej deng lo.” 4 Gajlaeng Bijlahdoh de couh doiq doengh goengjsae dajbwiz he caeuq gyoengq vunzlai naeuz: “Gou caz mbouj raen boux vunz neix miz maz coih nej.” 5 Hoeng gyoengqde mbouj fug, vanzlij euq naeuz: “De youq baenx cenz Youzdaiq Saengj luenhbangh cenzgangj, hawj vunz luenh nauh hwnjdaeuj; de dajlwh Gyahliqliq itcig daengz Yehluqsajlaengj dineix cungj dwg aux vunz luenh nauh he.” 6 Bijlahdoh dingq le, couh cam naeuz: “De dwg Gyahliqliq vunz haj?” 7 Gajlaeng Bijlahdoh rox Yehsuh dwg Gyahliqliq vunz he, dwg cuzhih Hihliz goengjdaeuz neix guenj he le, couh dawz Yehsuh soengq bae gyau hawj Hihliz. (Mwhde ngamqluj Hihliz youq Yehluqsajlaengj.) 8 Yiengq Hihliz raen Yehsuh le, cungj angq hwj ij rai, aenvih de geijcaeux gaxgonq gaenq dingqri naeuz goq gvanhhih Yehsuh dih saeh lo, hoeng mijyaengz ndaej raennaj de goq, daj senq cix ijsiengj yawj de loengh gij geizheih he hih saeh lo. 9 Sojhij seizneix de naemj cingq luj lo. De couh cam Yehsuh baenx haujlai yiengh, hoeng Yehsuh cungj mij han de saek yiengh. 10 Yiengq doengh goengjsae dajbwiz he caeuq doenghheij fazliz cenhgyah he youq mwnq cix caenhrox gauq de cieng de, 11 guh hwj Hihliz caeuq doenghheij binggyep de cungj dawz Yehsuh ma nyoujnyak gangjriu gaijmbwq, vanzlij dawz diuz buhbauz raez gyaeu he daeuj daenj hawj de, lengx de. Gajlaeng couh dawz de dauq soengq maj hawj Bijlahdoh boiz. 12 Baenjlaiz gaxgonq Hihliz caeuq Bijlahdoh dwg mbouj doxndei hih, hoeng couh youq ngoenz neix, song boux de dauq bienqbaenz doxndei, baenz baengzyoux hwj. 13 Gyoengqde dauq soengq Yehsuh ma hawj Bijlahdoh le, Bijlahdoh couh heuh doengh goengjsae dajbwiz he caeuq doenghheij Youzdaiq vunz dih lingjdauj he caeuq beksingq daeuj doxcomz. 14 Couh doiq gyoengqde naeuz: “Faenhsou gam boux vunz neix daeuj daengz gou dineix, naeuz de aux gyoengq vunz luenh nauh, hoeng gou gaenq youq dangqnaj faenhsou saemj de goq lo, caemh caz mbouj raen de miz maz coih hah. 15 Daiqlienz Hihliz goeng daeuzdaeuz neix cungj caemh caz mbouj raen de miz maz coih; sojhij de cij dauq soengq de ma boiz. Yiengq couh cingqmingz naeuz de mij famh daengz gijmaz wnggai rai dih coih lo. 16 Sojhij gou naeuz hax, hawj vunz doh de donq he le, couh coengqcak de sat lo.” 17 Yiengq moix daengz aen ciet Cawz Yauqmuj he, de cungj ij coengq boux vunzfamh he. 18 Hoeng, mwhneix gyoengq vunz cungj daixgya hemq oxox naeuz: “Gajgak de bae! Gajgak de bae! Coengq Bahlahbah!” 19 (Boux Bahlahbah neix dwg youq ndaw singz sauqfanj caeuq gaj vunz hwj ngaiz gyaeng haeuj ndaw lauz bae he.) 20 Gij vunz gannaeuz yienghneix hemq lah, hoeng, Bijlahdoh cungj ijsiengj coengq Yehsuh, sojhij de youhcaiq naeuz gyoengq vunzlai. 21 Hoeng, gyoengq vunzlai hemq engqgya gog, hemq naeuz: “Dawz de ding hwnj aen gyaq cixcib bae! Dawz de ding hwnj aen gyaq cixcib bae!” 22 Gyoengq vunz cungj yienghneix hemq hwx hemq, Bijlahdoh vanzlij cungj ijsiengj coengq Yehsuh. De youhcaiq doiq gyoengq vunz naeuz: “Dauqdaej boux vunz neix, de famh gijmaz coih nex? Gou saedsaeh caz mbouj raen de famh miz hab rai dih gij coih neix hah. Gou vanzlij dwg hawj vunz doh de donq he le couh coengq de suenq lox.” 23 Hoeng gyoengq vunz vanzlij dwg hemq hwx hemq hwx, hemq hwj ij dawz Yehsuh ding hwnj gwnz aen gyaq cixcib bae. Gajlaeng, Bijlahdoh ak mbouj goq gyoengq vunzlai, 24 couh ngaiz ciuq gyoengqde naeuz hih yienghmwnq guh lo, 25 coengq boux sauqfanj gaj vunz gyaeng youq ndaw lauz mwnq, ajcaih vunz dawz Yehsuh bae vangraeh. 26 Couh yienghneix, Yehsuh ngaiz vunz daiq bae lo. Daiq bae daengz buenqroen le, raen miz boux daj lajmbanj haeuj singz bae he. Boux de dwg vunz Gujliqnaiq he; gij coh de heuh Sihmaenz. Gyoengqde raen le, couh gaemh dawz de ep de aemq aen gyaq cixcib gaen gajlaeng hangx Yehsuh bae. 27 Mwhde caemh miz baenx gyoengq vunz gaen youq gajlaeng Yehsuh bae. Gyoengq vunz ndaw de miz haujlai vunzbaz; gyoengq vunzbaz neix gaen gajlaeng hangx bae daej. 28 Yehsuh raen yienghneix le, couh veq goqma doiq gyoengqde naeuz: “Gij vunzbaz Yehluqsajlaengj hax, gaejyungh vih gou hwj daej; wnggai vih faenhsou caeuq gij lwg faenhsou hwj daej bax! 29-30 Gou naeuz sou ni hax, aenvih ij miz ngoenz he, gij vunz cungj mbouj cingxnyienh youq, cingxnyienh bya doemq daenz rai, deihlak moek rai bae. Yiengq daengz mwhmwnq, gij vunzbaz mij daiqndang hih mij'z lwg hih dauq ndei. 31 Hawjm'z yawj hux, go faex mwnq vanzlij heu swdswd, hoeng gij vunz vanzlij yienghneix baenxlai doegsieb; yiengq daengz go de reuq mwhde nej, mbouj engqgya haz?” 32 Gyoengq vunz daiq Yehsuh bae hih gyoengq vunz mwnq caemh daiq miz song boux vunzfamh bae, ij dawz song boux mwnq caeuq Yehsuh itheij gaj. 33 Yiengq gyoengqde daiq bae daengz mwnq dieg heuh Ndokraeuj he le, couh dawz Yehsuh ding hwnj gwnz aen gyaq cixcib bae. Caemh ding song boux vunzfamh mwnq, boux he ding youq baihswix, boux he ding youq baixgvaz. 34 Yehsuh ngaiz ding hwnjbae le, de couh vih doenghheij vunz haih de mwnq hwj gouz Cangqdiq naeuz: “Bohmbwn hax, nyiuz gyoengqde bax, aenvih gyoengqde cungj mbouj rox bonjfaenh gyoengqde guh gijmaz saeh haem.” Gyoengqde ding de hwnj bae le, caiq nipgaeu faen aeu doenghheij buh de. 35 Gyoengq vunzlai ndwn youq henz de yawj hwj hemq bae. Gij lingjdauj Youzdaiq cix lengx de naeuz: “De naeuz de ndaej gouq vunz, yiengq de ndaej gag gouq bonjfaenh hah! Yiengq, caiq hauhnaeuz de dwg Gihduz, Cangqdiq senj dih vuengz, vihmaz de mbouj gag gouq bonjfaenh hax!” 36 Daiqlienz gyoengq binggyep cungj caemh lengx de, loengh de, dawz laeuj yaez daeuj yingx haeuj dangqnaj de bae lengx 37 naeuz: “Hauhnaeuz mwngz dwg Youzdaiq vunz dih vuengz nex, mwngz couh gag gouq bonjfaenh mwngz bax!” 38 Gyoengqde yienghneix gangj dwg aenvih gwnz gyaq cixcib gwnz de ding miz gawq naeuz: “Boux neix dwg Youzdaiq vunz dih vuengz,” gawq neix. 39 Caeuq Yehsuh doxdoengz ngaiz ding hwnj gwnz gyaq cixcib bae hih song boux vunzfamh mwnq, ndaw de miz boux he caemh lengx Yehsuh naeuz: “Mwngz mbouj dwg Gihduz maz; gag gouq bonjfaenh veiq, caemh gouq raeuz hah!” 40 Hoeng, daixlingh boux dauq gvaiq boux lengx Yehsuh mwnq naeuz: “Mwngz caemh caeuq raeuz doxdoengz ngaiz dingh coih; nanzdauh mwngz mbouj lau Cangqdiq maz? 41 Hab'eiq raeuz ngaiz ding lo, aenvih ngamqluj bauqwngq raeuz soj famh hih coih, hoeng boux neix, de mij guh vaihsaeh hah.” 42 Boux de yienghneix doiq boux mwnq naeuz le, couh doiq Yehsuh naeuz: “Yehsuh hax! Daengj daengz mwngz ndaej guh vuengz mwhde, cingj mwngz gaejyungh lumz gou!” 43 Yehsuh dingq de yienghneix naeuz le, couh doiq de naeuz: “Gou saedsaeh naeuz mwngz ni, ngoenzneix mwngz ndaej caeuq gou itheij bae yangjfuk lo.” 44-45 Mwhde daihgaiq dwg gyangjngoenz cingq. Sawqmwh gyangjngoenz laepcup, baenx cenz mwnq dieg mwnq cungj laep liux, itcig laep daengz yaquj sam diemjcung yienghneix. Mwhde venj youq ndaw aen laeuz gunghdenq Cangqdiq hih fanyiemz mwnq cungj lig faen baenx song mbiengj bae. 46 Yehsuh hemq goggog naeuz: “Daxboh hax! Gou dawz gij hoenzsaenz gou gyau hawj mwngz lo.” De gangj gawq neix sat le, couh gatcaw lo. 47 Yiengq youq mwnq miz boux Lozmaj lienzcangj he raen doenghgij saeh neix le, couh haenh Cangqdiq naeuz: “Ox! Boux neix cingqcaen dwg vunz ndei!” 48 Sojmiz youq mwnq gvaengz yawj hih vunz caemh raen yienghneix le, cungj siengsim gangznaek hwj mboengjmboengj aek maj lo. 49 Caemh miz doenghheij vunz caeuq Yehsuh sug he caeuq daj Gyahliqliq gaen de bae hih doenghheij vunzbaz mwnq cungj ndwn youq gyae'gyae yawj doenghgij saeh neix fatseng. 50-51 Yiengq youq mwnq miz boux he dwg daj Youzdaiq vunz dih aen singz Yaqliqmajdaiq daeuj he, gij coh de heuh Yozswz. Boux vunz neix dwg boux lauxsaed simndei simsoh he dih vunz; de itcig cungj dwg muengh Cangqdiq dih gij gienzveih de ndaej fazveih. De gannaeuz dwg boux Youzdaiq vunz dih veijyienzveiq dih boux veiqyienz he lah, hoeng de dauq mij dungziq gij vunz dih geiqmaeuz caeuq guhfap. 52 De couh bae laeng Bijlahdoh mwnq, bae gouz de aeu gij seihaiz Yehsuh. 53 Gajlaeng de couh daj gwnz gyaq cixcib gej Yehsuh roengzma, couh aeu boiqmaz ma gyuj de ndei hwj dawz bae coengq haeuj ndaw moh bae. Aen moh neix dwg moh rin he, dwg vunz siuq guhbaenz he; ndaw de mijyaengz coengq vunzrai goq haem. 54 (Ngoenz mwnq ngamq dwg ijvanh daengz ngoenzyietbaeg he; ngoenz neix couh ij guh ndei cwnjbiq goq ngoenz ngoenzyietbaeg.) 55 Doenghheij vunzbaz dajlwh Gyahliqliq gaen Yehsuh daeuj hih caemh req gaen gajlaeng Yozswz bae. Bae le, yawjraen aen moh caeuq raen gij seihaiz Yehsuh baenzlawz coengq youq ndaw de. 56 Gyoengqde raen yienghneix le, couh maj ranz lo, maj ranz cwnjbiq ndei gij yanghliuq caeuq gij gau rang he hwj ij aeu bae hoz haeuj gij seihaiz Yehsuh bae. Hoeng, aenvih gaenq daengz ngoenz ngoenzyietbaeg lo, vih ij soenhsouj Youzdaiq dih fazliz, gyoengqde couh youq ngoenz ngoenzyietbaeg yietbaeg ngoenz he.
1 Yiengq daengz ngoenzsinghgiz dih doengxhaet daihcaeux, doenghheij vunzbaz mwnq couh daiq yanghliuq bae aen moh coengq Yehsuh mwnq. 2 Gyoengqde bae daengz mwnq le, raen ngauq rin caet bakcongh moh mwnq gaenq gyingj goq daixlingh gok bae lo. 3 Gyoengqde raen yienghneix le, couh haeuj ndaw moh de bae yawj. Baex yawj, gyoengqde engq doeksaet hwj naeuz: “Aex! Gij seihaiz bouxcawj raeuz Yehsuh mij raen lo!” 4 Couh youq mwh gyoengqde raen geizheih hih mwhde, sawqmwh miz song boux gij buh de myig myiengzmyiengz ndwn youq henz gyoengqde, 5 guh hwj gyoengqde cungj lau hwj ij rai bae, couh vaiqdi bomz roengz doem bae. Gajlaeng song boux mwnq couh doiq gyoengqde naeuz: “Faenhsou vihmaz ij youq ndaw vunzrai cimh vunzlix nej? 6 De mbouj youq dineix lo; gaenq ndaej dauqlix lo! Faenhsou lij ndaejgeiq de youq Gyahliqliq doiq faenhsou gangj hih vah laem lwi? 7 De naeuz: ‘Gou, Vunz dih Daiqbiuj, ij ngaiz gyau hawj vunz vaih, ngaiz ding hwnj gwnz aen gyaq cixcib bae rai, daixsam ngoenz ndaej dauqlix’—hih doenghgij vah neix laem lwi?” 8 Gyoengqde dingq song boux mwnq yienghneix naeuz le, cij ngeix daengz gaxgonq Yehsuh doiq gyoengqde gangj goq hih vah. 9 Gajlaeng gyoengqde couh majcangq maj lo, maj gangj naeuz cib'it boux dwzbaijyienz mwnq caeuq gizdah vunz ni gyoengqde roeb daengz hih saeh lo. 10 Gangj doenghgij saeh neix naeuz gyoengq dwzbaijyienz ni hih doenghheij vunzbaz mwnq couh dwg daj aen mbanj Mazdaqlah daeuj hih Majliqyaq, vanzlij miz Yozyaqnaz caeuq daxmeh Yajgoz, Majliqyaq caeuq gizdah hih vunzbaz haem. 11 Hoeng gyoengq dwzbaijyienz cungj naemqnaeuz gyoengqde luenhbangh gangj samjciengz lah, gaenhbaenj mbouj sinq. 12 Mboujgoq, Bijdwz dingq le, couh riq bae aen moh mwnq yawj. Baex yawj, caenhgag yawjraen vangq boiqmaz gyuj Yehsuh mwnq sat lo; gijmaz cungj mij raen. Gajlaeng de couh dauq ma. De ma hih mwhde, gag ngeixraen geizheih ij rai; gij saeh neix cingqgawq fatseng gwhraix. 13 Couh youq ngoenz mwnq, gyoengq lwgsae ndaw de miz song boux ij bae aen mbanj heuh Hijmajujswh he. Aen mbanj neix liz Yehluqsajlaengj daihgaiq miz song bouq roen gyae. 14 Song boux de doq bae doq gangj soj fatseng hih saeh. 15 Song boux de cingq gangj hih mwhde, Yehsuh bae daengz henz ndang gyoengqde, caeuq gyoengqde byaij. 16 Hoeng gyoengqde yawj mbouj ok dwg de. 17 De cam song boux de naeuz: “Faenhsou doq byaij doq gangj gijmaz lah?” Song boux de doeknaiq ij rai; dingq de yienghneix cam le, couh dingz roengzma mbouj byaij lo. 18 Yiengq song boux ndaw de miz boux he, gij coh de heuh Gwzliuzbah, han de naeuz: “Ox, youq Yehluqsajlaengj guh hek hih gij vunz ndaw de, caenhgag mwngz mij rox mwnq geij ngoenz neix fatseng gijmaz saeh lo bax?” 19 Gajlaeng Yehsuh caiq cam naeuz: “Gijmaz saeh hax?” Song boux de han naeuz: “Couh dwg aen mbanj Nazsajlwz hih Yehsuh dih saeh hah. De dwg boux cenz gij vah Cangqdiq he; de youq ndaw lwgra Cangqdiq caeuq ndaw lwgra vunzlai gangj vah guh saeh cungj dwg miz vi he. 20 Hoeng doengh goengjsae dajbwiz mwnq caeuq gij lingjdauj raeuz engq dawz de gyau hawj Lozmaj cingqfuj buenq de rai, dawz de ding hwnj gwnz gyaq cixcib bae. 21 Yienzlaiz gyoengqraeuz naemq de dwg boux ij daeuj cueg gij vunz Hijswzlez he hih boux mwnq lah, hoeng ngoenzneix cingq dwg de ngaiz roeb daengz nanh hih daixsam ngoenz lo, cungj mij raen de dauqlix haem.” 22 Song boux de vanzlij naeuz: “Gyoengq vunz raeuz ndaw de miz mbangj vunzbaz engqgya hawj gyoengqraeuz raen geizheih. Gyoengqde daihcaeux couh bae aen moh de, 23 hoeng engq mij raen gij seihaiz de haem lo. Yiengq gyoengqde couh dauq ma, naeuz gyoengqraeuz ni bouxcai Cangqdiq yienh hawj gyoengqde raen, caemh naeuz gyoengqde ni Yehsuh gaenq dauqlix lo. 24 Gajlaeng gyoengqraeuz caemh miz vunz bae yawj hwj. Yawj le, cingqgawq sojmiz hih cungj caemh luj gyoengq vunzbaz gangj hih yienghmwnq, hoeng mij raen Yehsuh dauqlix nej.” 25 Yehsuh dingq song boux de yienghneix gangj le, couh doiq song boux de naeuz: “Eixyax, gij vunz ngawz faenhsou hax! Vihmaz lij mbouj sinq boux cenz gij vah Cangqdiq soj gangj dih vah nej? 26 Gyoengqsou mbouj dwg gaenq rox, gaxgonq gaenq miz gangj goq naeuz Gihduz ij ngaiz vunz haih cij ndaej bienqbaenz boux veijdaq dih vuengz maz?” 27 Gajlaeng de vanzlij gaijyiz naeuz song boux de ni daj Mohsih itcig daengz doengh boux cenz gij vah Cangqdiq youq ndaw Singqgingh soj sij hih gvanhhih de dih saeh, cungj gaijyiz naeuz song boux de ni cingsuj. 28 Couh yienghneix, gyoengqde doq bae doq gangj doenghgij saeh neix. Yiengq bae ijvanh daengz aen mbanj song boux de ij bae hih aen mbanj mwnq hih mwhde, Yehsuh caenh lujnaeuz vanzlij ij ganjroen laem nwih. 29 Song boux de raen yienghneix le, couh hah de naeuz: “Gyangjngoenz gaenq doek lo; cingj mwngz caeuq raeuz youq haemh bax!” Couh yienghneix, Yehsuh couh caeuq song boux de haeuj mbanj bae youq lo. 30 Yiengq daengz mwh gw haeuxcaeuz he, Yehsuh couh dawz menqbauh hwnjdaeuj docih Cangqdiq, couh euj hwj faen hawj song boux de gw. 31 Song boux de daengz mwhneix le, cij singqsag hwnjdaeuj, cij rox naeuz dwg de. Hoeng couh youq mwhneix, Yehsuh caemh sawqmwh mij raen lo. 32 Mij raen le, song boux de couh boux yawj boux hwj lwnh naeuz: “Ox, youq dangjroen, de caeuq raeuz gangj vah, gaijyiz ndaw Singqgingh naeuz raeuz ni hih mwhde, gvaiq mbouj ndaej ndaw sim raeuz ndat fwgfwg no?” 33 Song boux de yienghneix ngeix le, couh majcangq dauq ma Yehluqsajlaengj. Youq Yehluqsajlaengj, song boux de raen cib'it boux dwzbaijyienz mwnq caeuq doenghheij vunz caeuq gyoengqde doxgaen he doxcomz youq mwnq gangj; 34 gyoengqde gangj naeuz: “Bouxcawj raeuz cingqcaen dauqlix hwj; de vanzlij yienh hawj Sihmaenz raen.” 35 Song boux de raen yienghneix le, caemh gangj naeuz gyoengqde ni naeuz song boux de youq dangjroen soj roeb daengz hih, caeuq song boux de baenzlawz daengz euj menqbauh mwhde le cij rox naeuz de dwg bouxlawz hih, gangj naeuz gyoengq vunz ni. 36 Gyoengqde cingq gangj doenghgij saeh neix hih mwhde, sawqmwh Yehsuh ndwn youq ndaw gyoengqde mwnq, doiq gyoengqde naeuz: “Muengh faenhsou bingzan!” 37 Gyoengq lwgsae de raen yienghneix le, cungj doeksaet hwj lau hwj dungxmbouq ndangsaenz liux, naemqnaeuz raen fangz lah. 38 Yehsuh raen gyoengqde yienghneix le, couh naeuz gyoengqde: “Faenhsou vihmaz yienghneix doeksaet nej? Vihmaz ij naemqnaeuz gou dwg fangz nej? 39 Faenhsou yawjyawj gij fawz gij ha gou, momo yawj gwnz de vanzlij miz mbouj miz doengh mwnq sieng he, faenhsou couh rox dwg mbouj dwg gou lo, aenvih fangz mij noh mij ndok. Faenhsou yawjyawj gou miz mbouj miz lux.” 40 De gangj doenghgij vah neix sat le, couh iet fawz iet ha hawj gyoengqde yawj. 41 Gyoengqde baex yawj he, youh doeksaet youh angq, buenq sinq buenq ngeiz. De vanzlij naeuz: “Faenhsou dineix miz gijmaz gw hax?” 42 Gyoengqde dingq le, couh aeu gaiq bya cik he hawj de; 43 de couh aeu ma youq dangqnaj gyoengqde gw lo. 44 Couh yienghneix, de caiq doiq gyoengqde naeuz: “Gou caeuq faenhsou youq hih mwhde, gou mbouj dwg naeuz faenhsou ni goq maz, Mohsih dih fazliz saw, boux cenz gij vah Cangqdiq dih saw caeuq Gij Go Haenh Cangqdiq ndaw de soj sij hih, sojmiz dwg gou dih saeh hih cungj ij lingz okdaeuj hih maz?” 45 Gajlaeng de caiq hawj gyoengqde singqsag hwnjdaeuj, hawj gyoengqde rox ndaw Singqgingh dih iqswh, 46 caemhcaiq doiq gyoengqde naeuz: “Ndaw Singqgingh ndaw de sij naeuz Gihduz gaengjdingq ngaiz souh nanh daengz rai, daixsam ngoenz caemh gaengjdingq ndaej dauqlix. 47 Vunz caemh ij hij gij gienz de ma cenz naeuz vunz ni, couh dwg naeuz siengj mienx coih hih, couh ij daj ndaw sim nginh loek gaij goqma cij ndaej mienx coih hih gij ndei siuhsiz neix; vunz ij daj Yehluqsajlaengj gaihcij cenz, cenz naeuz lajmbwn sojmiz hih minzcuz ni. 48 “Faenhsou couh dwg caenra raen goq gij saeh neix dih vunz; faenhsou ij bae cenz naeuz vunz ni. 49 Faenhsou ij youq ndaw singz daengj, daengj daengz gou daj gwnzmbwn coengq gij geizmiuj hih rengz he roengzdaeuj laeng faenhsou; gij neix couh dwg daxboh gou dapwngq goq hawj faenhsou he lo.” 50 Couh yienghneix, goq geij ngoenz le, de couh daiq gyoengqde ok singz bae, bae ijvanh daengz aen mbanj Bwzdaqniz hih mwnq he. De couh yingx fawz hwnjdaeuj hoh fuk hawj gyoengqde. 51 De hoh fuk hawj gyoengqde hih mwhde, de caemh hwnj mbwn bae lo, mbouj caeuq gyoengqde youq laem lo. 52 De hwnj mbwn bae hih mwhde, gyoengqde couh baiq de sax de, gajlaeng gyoengqde cungj angq vaujvauq hwj maj Yehluqsajlaengj lo. 53 Youq Yehluqsajlaengj, gyoengqde siengzseiz cungj bae gunghdenq Cangqdiq haenh Cangqdiq.
1 Daj gaihcij mijyaengz cauh mbwn cauh deih haem, cix miz gij vah Cangqdiq lo. Miz Cangqdiq caemh miz gij vah de; gij vah de couh dangq dwg Cangqdiq lo. 2 Gij vah neix daj gaihcij cix caeuq Cangqdiq youq lo. 3 Gij vah neix couh dangq dwg boux vunz he. Gwnzmbwn lajdeih sojmiz hih cungj dwg baengh boux de cauh okdaeuj he; mij saek yiengh naeuz mij dwg de cauh. 4 Boux neix couh dwg doenj mingh; gij mingh neix couh dwg rongh, ndaej ciuq vunz he. 5 Gij rongh neix ciuq haeuj laep bae; laep mbouj ndaej giengz goq gij rongh neix. 6 Cangqdiq baij boux he daeuj, gij coh de heuh Yozhanq, 7 baij de daeuj cingqmingz gij rongh neix, dwg ij hawj vunz dingq gij siuhsiz de hwj sinq gij rongh neix. 8 Hoeng Yozhanq bonjfaenh de mbouj dwg gij rongh neix nej, dauq dwg ij cingqmingz gij rongh neix lah. 9 Gij rongh neix dwg saedsaeh hih, de ij ciuq baenx cenz lajmbwn sojmiz hih vunz. 10 De cauh lajmbwn sojmiz hih, hoeng, de daeuj lajmbwn, lajmbwn hih vunz dauq mij rox de. 11 De daeuj dieg bonjfaenh de, hoeng gij vunz bonjfaenh de dauq mij ciep de. 12 Yiengq, hauhnaeuz miz vunz ciep de hih, couh dwg doengh boux sinq de he, doengh boux sinq de he de couh nyok gienz hawj doengh boux de, hawj gyoengqde miz gienz ndaej guh lwg Cangqdiq. 13 Guh lwg Cangqdiq hih vunz mbouj dwg ciuq swqyienz yienghmwnq seng daeuj hih, cixnaeuz dwg vunz caeuq vunz yienghmwnq miz lwed miz noh miz muengh hih yienghmwnq seng, dauq dwg baengh Cangqdiq ndaej seng daeuj hih lah. 14 Gij vah Cangqdiq bienqbaenz miz lwed miz noh hih vunz; de youq laeng gyoengqraeuz youq. Gyoengqraeuz yawjraen gij rongh de, gij veijdaq de; gij rongh neix couh dwg daeglwg dog Cangqdiq Bohmbwn cij ndaej he. De dwg sinq ndaej goq he, haijliengh raixcaix he, gig aiq vunz he. 15 Guh sijlij dih Yozhanq cingqmingz hawj de hih mwhde, hemq naeuz: “Boux neix couh dwg gaxgonq gou gangj goq hih: ‘De daeuj gajlaeng gou, hoeng beij gou veijdaq, aenvih de youq gaxgonq gou; baenjlaiz de gaenq miz lo.’” 16 De haijliengh raixcaix, cungj dwg aiq raeuz nyiuz raeuz, nyiuz mbat caiq mbat. 17 Cangqdiq dunghgoq Mohsih daeuj senhbuq fazliz, hoeng aiq caeuq saedsaeh dwg Yehsuh Gihduz, Cangqdiq baij daeuj dih vuengz, nyok hawj hih. 18 Coengzlaiz mij'z vunz ndaej raen goq Cangqdiq, ndaej rox Cangqdiq; caenhgag daeglwg dog de youq henz ndang de ndaej raen de goq. De hawj vunz ndaej rox Cangqdiq. 19 Laj neix dwg Yozhanq baenzlawz han vunz dih vah. Mwhde Youzdaiq vunz dih lingjdauj baij goengjsae dajbwiz caeuq Liqveiq cuz hih vunz daj Yehluqsajlaengj daeuj cimh Yozhanq, cam de naeuz: “Mwngz dwg byawz?” 20 Hoeng Yozhanq it di cungj mbouj yo, couh doq han naeuz: “Gou mbouj dwg Gihduz.” 21 Gyoengqde dingq de yienghneix naeuz le, caiq cam naeuz: “Yiengq mwngz dwg byawz nex? Dwg Hijliqyaq haj?” Yozhanq dingq le, caiq han naeuz: “Mbouj dwg hah.” Gajlaeng gyoengqde youhcaiq cam naeuz: “Yiengq mwngz dwg boux cenz gij vah Cangqdiq mwnq haj?” Yozhanq youhcaiq han naeuz: “Caemh mbouj dwg.” 22 Gyoengqde dingq le, vanzlij caiq saemjcam naeuz: “Yiengq mwngz dauqdaej dwg byawz nex? Mwngz gag naeuz bax, naeuz raeuz ni, hawj raeuz haemq ndei maj naeuz doengh boux baij raeuz daeuj he ni.” 23 Yozhanq dingq gij vah neix le, couh yungh gij vah Hijcaiqyaq boux cenz gij vah Cangqdiq neix ma doiq gyoengqde naeuz: “Gou couh dwg boux youq rogndoi hemq goggog naeuz: ‘Coih roen sohsoh hwj hawj Cangqdiq,’ hih boux mwnq lo.” 24 Gajlaeng doengh boux baij daeuj mwnq ndaw de miz geij boux gaep haeuj Fazliqcaiq baij he 25 couh cam de naeuz: “Giqyienz mwngz mbouj dwg Gihduz, cix mbouj dwg Hijliqyaq caeuq mbouj dwg boux cenz gij vah Cangqdiq mwnq vwz, mwngz miz maz swhgwz bang vunz sijlij nej?” 26 Yozhanq dingq le, youhcaiq han naeuz: “Gou cijmboujgoq dwg aeu raemx ma sijlij hawj vunz lah; youq faenhsou mwnq miz boux he faenhsou mbouj rox de. 27 Gannaeuz de daeuj gajlaeng gou lah, hoeng, daiqlienz gou bang de riuj haizcauj cungj mbouj boiqndaej hwx.” 28 Mwhde gij saeh neix dwg youq diuz dah Yozdanq hih baixdoeng Mbanj Bwzdaqniz fatseng he; mwhde Yozhanq cingq youq mwnq bang vunz sijlij. 29 Gajlaeng, daengz daixngeih ngoenz, guh sijlij dih Yozhanq yawjraen Yehsuh byaij goqdaeuj, couh naeuz: “Neq, yawj hax, duz yiengzlwg Cangqdiq, couh dwg boux bang vunz rap coih hih boux mwnq, 30 couh dwg gaxgonq gou naeuz goq: ‘Beij gou daeuj gajlaeng, hoeng de beij gou veijdaq, aenvih baenjlaiz de gaenq miz lo’ dih boux mwnq. 31 Gaxgonq gou gaenhbaenj mbouj rox de dwg guxmaz, hoeng seizneix gou daeuj aeu raemx ma hawj vunz sijlij dwg vih ij hawj de yienh okdaeuj hawj gij vunz Hijswzlez rox de lah.” 32 Yozhanq youhcaiq cingqmingz naeuz: “Gou raen Hoenzsaenz Cangqdiq luj duz roegguqgap yienghmwnq daj gwnzmbwn roengz daeuj doz youq gwnz ndang de. 33 Gou gaenhbaenj mbouj rox de dwg guxmaz, hoeng boux baij gou daeuj hawj gou aeu raemx ma sijlij hawj vunz hih boux mwnq naeuz gou ni: ‘Mwngz raen Hoenzsaenz Cangqdiq roengz gwnz ndang bouxlawz bae nex, bouxlawz couh dwg yungh Hoenzsaenz Cangqdiq ma sijlij hawj vunz lo.’ 34 Yiengq gou gaenq raen goq lo, sojhij gou yiengq faenhsou baujcingq, de couh dwg daeglwg Cangqdiq lo.” 35 Yiengq caiq goq ngoenz he, Yozhanq caeuq song boux lwgsae de youq mwnq sijlij mwnq. 36 De raen Yehsuh byaij goqdaeuj le, couh naeuz: “Neq, boux mwnq couh dwg vih ij bang vunz rap coih hwj ngaiz rai hih duz yiengzlwg Cangqdiq lo.” 37 Song boux lwgsae de dingq de yienghneix naeuz le, couh doq bae gaen Yehsuh. 38 Yiengq Yehsuh rox song boux de gaen youq gajlaeng de le, couh veq goqma doiq song boux de naeuz: “Faenhsou ijsiengj guh gijmaz?” Song boux de dingq le, han naeuz: “Lahbij, mwngz youq mwnqlaw youq lah?” (‘Lahbij’ couh dwg ‘lauxsae’ dih iqswh.) 39 Yehsuh han naeuz: “Faenhsou gaen gou bae yawj bax.” Song boux de dingq le, couh gaen de bae, siengj yawj de youq mwnqlaw youq. Mwhde daihgaiq dwg yaquj seiq diemjcung yienghneix; ngoenz mwnq song boux de cungj dwg gaen de youq baenxngoenz. 40 Gajlaeng, song boux mwnq miz boux he, gij coh de heuh Anhdwzlez, dwg daegnuengx Sihmaenz-Bijdwz, 41 de couh majcangq bae cimh daeggo de Sihmaenz naeuz de ni naeuz: “Gyoengqraeuz ndaej raen Mizcaiqyaq hwj!” (‘Mizcaiqyaq’ couh dwg ‘Gihduz’ dih iqswh.) 42 De yienghneix naeuz le, vanzlij daiq daeggo de Sihmaenz bae laeng Yehsuh. Yehsuh raen le, couh cimyawj Sihmaenz naeuz: “Mwngz couh dwg Sihmaenz daeglwg Yozhanq laj; baezneix mwngz ij gaij coh heuh Gihfaz ndaej lo.” (‘Gihfaz’ caemh dwg ‘Bijdwz;’ gij iqswh de couh dwg ‘rin.’) 43 Goq ngoenz he le, Yehsuh gyezdingq bae Gyahliqliq Saengj. Bae hih mwhde, dingjlingz nyangz Feihliz, yiengq de couh doiq Feihliz naeuz: “Daeuj, gaen gou bax.” 44 Boux Feihliz neix dwg Mbanj Bwzcaiqdaq he, dwg caeuq Anhdwzlez caeuq Bijdwz doxcaemh mbanj he. 45 Gajlaeng Feihliz caemh bae cimh Nazdanqnez, cimh de naeuz de ni naeuz: “Youq ndaw saw Mohsih caeuq ndaw saw doengh boux cenz gij vah Cangqdiq soj sij hih boux mwnq hax, gyoengqraeuz ndaej raen de hwj, couh dwg Yehsuh, daeglwg Yozswz; de dwg aen mbanj Nazsajlwz vunz he.” 46 Nazdanqnez dingq le, couh naeuz: “Aen mbanj Nazsajlwz ij ndaej ok miz gijmaz ndei hwj?” Feihliz dingq le, han de naeuz: “Mwngz mbouj sinq, daeuj yawj veiq!” 47 Song boux de yienghneix gangj le, couh byaij goq bae yawj Yehsuh. Couh youq mwh Yehsuh yawjraen Nazdanqnez byaij goq laeng de daeuj hih mwhde, de naeuz: “Neq, yawj veiq, boux mwnq cingqcaen dwg vunz Hijswzlez; de dwg boux lauxlaux saedsaed mij coemx vunz goq he.” 48 Yiengq Nazdanqnez dingq Yehsuh yienghneix naeuz le, couh cam de naeuz: “Mwngz baeq rox gou hwj?” Yehsuh han naeuz: “Feihliz mijyaengz bae cimh mwngz haem gou cix raen mwngz youq laj go uzvahgoj lux.” 49 Gajlaeng Nazdanqnez naeuz: “Ox! Lahbij! Mwngz dwg daeglwg Cangqdiq, dwg Hijswzlez dih vuengz!” 50 Yehsuh dingq de yienghneix naeuz le, couh doiq de naeuz: “Gou naeuz gou raen mwngz youq laj go uzvahgoj goq, mwngz couh sinq laj? Baezneix mwngz ij raen gij beij gij saeh neix engqgya hung haem hwx.” 51 Yehsuh vanzlij caiq naeuz: “Gou saedsaeh naeuz sou ni lo, faenhsou gaengjdingq ndaej yawjraen aen dou mbwn hoi, bouxcai Cangqdiq ij youq gwnz ndang Vunz dih Daiqbiuj hwnjhwnj roengzroengz.”
1 Goq song ngoenz le, youq Gyahliqliq dih aen mbanj heuh Gyahnaz he miz vunz aeu bawx cingj laeuj, yiengq daxmeh Yehsuh caemh bae mwnq gw laeuj. 2 Yehsuh caeuq doengh boux lwgsae de caemh ndaej cingj bae gw laeuj hwj. 3 Gajlaeng laeuj yungh liux le, daxmeh de doiq de naeuz: “Gyoengqde mij'z laeuj huh.” 4 Yehsuh dingq le, couh doiq de naeuz: “Meh hax, mwngz vihmaz ij naeuz gou ni nej? Mijyaengz daengz mwh gou guh hih saeh haem.” 5 Hoeng daxmeh de caenh lujnaeuz dingq mbouj rox gij vah de nwih, couh gag doiq doenghheij vunzhoiq mwnq naeuz: “Yaepm'x de hawj faenhsou guh gijmaz, faenhsou couh guh gijmaz hoq.” 6 Yiengq ngamqluj youq mwnq miz roek aen gang; roek aen gang neix dwg gij vunz Youzdaiq aeu ma guh ngiqsiz, couh dwg swiq fawz yungh he. It aen gang coux ndaej song sam doengj raemx. 7 Couh yienghneix, Yehsuh couh doiq doenghheij vunzhoiq mwnq naeuz: “Coux raemx doengh aen gang mwnq rim bae!” Gajlaeng doenghheij vunzhoiq mwnq caemh dingq de, couh dawz doengh aen gang mwnq coux raemx rim. 8 Gyoengqde coux raemx rim le, Yehsuh couh naeuz: “Seizneix ndaej daek di he bae hawj boux fuqswz daih hek mwnq lo.” Gyoengqde dingq le, couh daek bae lo. 9 Doengh bouxhoiq coux raemx mwnq gan rox naeuz gij laeuj neix dwg baenzlaw bienq hih, hoeng, mij saek boux naeuz boux fuqswz daih hek mwnq ni. Boux fuqswz daih hek mwnq cimz gij laeuj raemx bienq mwnq le, couh heuh goeng gojyez moq goq daeuj, 10 doiq de naeuz: “Heijvunz cungj dwg sien dawz laeuj ndei daeuj daih hek gaxgonq, daengj gw gaeuq le, cij dawz gij laeuj yaez he okdaeuj lah. Hoeng, mwngz nej, mwngz dauq dawz gij laeuj ndei he louz daengz gajlaeng!” 11 Yehsuh dawz raemx bienq laeuj dwg de daixit mbat guh gij ndaej cingqmingz naeuz de dwg byawz he, dwg youq aen saengj Gyahliqliq dih aen mbanj heuh Gyahnaz he guh he. Gij saeh neix ndaej yienh ok de miz bonjsaeh luj Cangqdiq; doenghheij lwgsae de raen le couh sinq de lo. 12 Gij saeh neix goq le, Yehsuh caeuq daxmeh de caeuq daegnuengx de caeuq doengh boux lwgsae de bae Gyahbwznungz Singz, caemh youq mwnq youq geij ngoenz. 13 Aen ciet Bienqgoqbae, couh dwg Youzdaiq vunz goq hih aen ciet mwnq, couh ij daengz lo; Yehsuh couh bae Yehluqsajlaengj Singz. 14 De bae daengz Yehluqsajlaengj baex haeuj doumonz gunghdenq Cangqdiq bae he, couh yawjraen miz vunz youq mwnq hai cwz, hai yiengz, hai roegguqgap, vanzlij yawjraen miz vunz naengh youq mwnq vuenh ngaenz. 15 De yawjraen yienghneix le, cungj aeuqheiq hwj ij rai bae, couh aeu cag ma dangq guh faexbien hwj boenq doenghheij cwzcwz, yiengzyiengz, vunzvunz okma, vanzlij dawz aen daiz boux baij vuenh ngaenz mwnq lienz daiz lienz ngaenz nyoengx fan byoekbyak liux. 16 De vanzlij doiq boux hai roegguqgap mwnq naeuz: “Dawz doenghheij doxgaiq neix deuz! Mboujcwnj dawz aen ranz daxboh gou ma dangq guh hawciengz.” 17 Couh youq mwhneix, doengh boux lwgsae de couh ngeix daengz ndaw Singqgingh ndaw de sij naeuz: Gou vih aen ranz mwngz, ndaw sim gou ndat luj feiz nwih. 18 Gajlaeng gij vunz mwnq aeuqheiq hwj saemjcam Yehsuh naeuz: “Mwngz miz maz gienzliz boenq gyoengq vunz neix deuz? Mwngz guh gij geizmiuj he okdaeuj hawj gyoengqraeuz ndaej cingqmingz mwngz miz gienz ndaej yienghneix guh lux.” 19 Yehsuh dingq le, han gyoengqde naeuz: “Faenhsou cek aen gunghdenq neix, gou sam ngoenz ndaw de couh ndaej doiqyungz dawz aen de hwnq hwnjdaeuj.” 20 Gyoengqde dingq le, couh doq buek de naeuz: “Aen gunghdenq neix yienzlaiz yungh baenx seiqcib roek bi cij ndaej hwnq baenz; mwngz sam ngoenz couh ndaej hwnq baenz?” 21 Gizsaed gyoengqde gaenhbaenj mbouj rox Yehsuh dwg aeu aen ndangdaej bonjfaenh de ma dangq guh gunghdenq Cangqdiq. 22 Daiqlienz doenghheij lwgsae de cungj daengj daengz de rai le ndaej dauqlix le, cij ngeix daengz gaxgonq de gangj goq hih gawq vah neix. Sojhij gyoengqde engqgya sinq Singqgingh caeuq Yehsuh soj gangj hih vah. 23 Yehsuh youq Yehluqsajlaengj goq aen ciet Bienqgoqbae hih duenh mwnq, miz haujlai vunz ndaej raen de soj guh hih geizmiuj hih saeh; gyoengqde caemh sinq de dwg Cangqdiq baij daeuj dih vuengz. 24 Hoeng, Yehsuh dauq mij sinq gyoengqde, aenvih de yawj ndaej ok gij vunz dih singqcingz. 25 De caemh mboujyungh hawj vunz naeuz de ni; de cungj ndaej rox daengz ndaw sim vunz.
1 Miz boux Fazliqcaiq baij vunz he, gij coh de heuh Nizgohdijmuj; de dwg boux lingjdauj gij vunz Youzdaiq he. 2 Miz haemh he, de daeuj cimh Yehsuh, doiq Yehsuh naeuz: “Lahbij, gou rox mwngz dwg Cangqdiq baij daeuj son vunz he, aenvih hauhnaeuz mbouj miz Cangqdiq bang, gaenhbaenj mij'z vunz ndaej guh doenghgij geizmiuj mwngz soj guh hih.” 3 Yehsuh dingq le, han de naeuz: “Gou saedsaeh naeuz mwngz ni, hauhnaeuz vunz mbouj ndaej doiqyungz seng, couh mbouj ndaej gaep haeuj aen guek Cangqdiq.” 4 Gajlaeng Nizgohdijmuj youhcaiq cam naeuz: “Vunz laux le, ij baenz ndaej doiqyungz seng haem nej? Nanzdauh vanzlij ndaej doiqyungz haeuj ndaw dungx daxmeh bae caiq ndaej doiqyungz seng mbat ngeih haem maz?” 5 Yehsuh caiq han de naeuz: “Gou saedsaeh naeuz mwngz ni, vunz hauhnaeuz mbouj dwg dajlaeng raemx caeuq dajlaeng Hoenzsaenz Cangqdiq seng hih, couh mbouj ndaej haeuj aen guek Cangqdiq. 6 Daj ndangnoh seng hih vanzlij dwg ndangnoh; dajlaeng hoenzsaenz seng hih cij dwg hoenzsaenz. 7 Sojhij, mwngz gaejyungh geizheih gou naeuz faenhsou ij dauqyungz seng nej. 8 Caemh luj mwngz dingqri miz sing rumz, hoeng, gaenhbaenj mij rox gij rumz dwg daj mwnqlaw ci daeuj, ci bae daengz mwnqlaw. Caemh doxdoengz, dajlaeng Hoenzsaenz Cangqdiq seng hih mij'z vunz ndaej rox Hoenzsaenz Cangqdiq baenzlaw soengq mingh hawj de.” 9 Nizgohdijmuj dingq le, vanzlij caiq cam naeuz: “Ij baenz miz gij saeh neix hwj?” 10 Yiengq Yehsuh caiq han de naeuz: “Mwngz dwg sojmiz Hijswzlez vunz dih lauxsae lo, hoeng, dauq mij rox gij saeh neix haj? 11 Gou saedsaeh naeuz mwngz ni, gyoengqraeuz rox hih, cij gangj; gyoengqraeuz raen goq hih, cij cingqmingz. Hoeng, faenhsou dauq mbouj sinq. 12 Gou gangj naeuz faenhsou ni lajmbwn dih saeh, faenhsou vanzlij mbouj sinq; gangjnaeuz caiq gangj daengz gwnzmbwn hih saeh hwx, faenhsou mbouj engqgya mbouj sinq maz? 13 Cawzok Vunz dih Daiqbiuj daj gwnzmbwn roengz daeuj, mij'z vunz ndaej hwnj mbwn bae goq.” 14 Yehsuh vanzlij caiq naeuz: “Cingq luj Mohsih youq rogndoi yingx duz ngwz aeu doengz ma guh he hwnjdaeuj, Vunz dih Daiqbiuj caemh ciuqyiengh ij ngaiz yingx hwnjdaeuj, 15 hawj gij vunz sinq de he cungj ndaej seiqseiz lix. 16 Cangqdiq gig ndiep vunz lajmbwn, simqciq daiqlienz daeglwg dog de cungj nyok hawj vunz, hawj gij vunz sinq de he mbouj ngaiz raicied, dauq ndaej seiqseiz lix, 17 aenvih Cangqdiq baij daeglwg dog de daeuj lajmbwn, mbouj dwg ij dingh hawj vunz miz coih, dauq dwg ij hawj vunz vih de hwj ndaej gouq. 18 “Famz sinq de hih vunz cungj mbouj ngaiz dingh miz coih; mbouj sinq de hih vunz gaenq dingh hawj miz coih lo, aenvih gyoengqde mbouj sinq daeglwg dog Cangqdiq. 19 Gou couh dangq rongh. Gannaeuz rongh daeuj daengz lajmbwn lah, hoeng, lajmbwn hih vunz dauq vih bonjfaenh guh doeg guh sieb hwj mbouj haenj rongh, haenj laep; gij neix couh dwg gyoengqde ngaiz dingh coih dih yienzyouz. 20 Doenghheij guh doeg guh sieb hih vunz dwgcaengz rongh, mbouj haenj dep rongh, aenvih gyoengqde lau gyoengqde soj guh hih vaihsaeh ngaiz loh okdaeuj. 21 Hoeng, doenghheij ciuq saedsaeh bae guh hih dauq haenj rongh, yienghneix couh ndaej yienh ok gyoengqde dwg ciuq Cangqdiq guh hih.” 22 Gij saeh neix goq le, Yehsuh caeuq gij lwgsae de bae Youzdaiq Saengj camqciz youq, youq mwnq bang vunz sijlij. 23-24 Mwhde guh sijlij dih Yozhanq mijyaengz ngaiz vunz gyaeng haeuj ndaw lauz bae haw; de caemh youq mwnq gaenh Sajlaengj, mwnq heuh Aihnaenq he bang vunz sijlij, aenvih mwnq miz raemx lai. Miz haujlai vunz cungj daeuj hawj de sijlij. 25 Yiengq miz ngoenz he, miz boux Youzdaiq vunz he caeuq gij lwgsae Yozhanq vih guh gancengh ngiqsiz dih guhfap hwj doxeuq, couh dwg vih ij gouzhaenh Cangqdiq hwj swiq hih gij guhfap mwnq. 26 Gajlaeng gij lwgsae de bae doiq de naeuz: “Lahbij, gaxgonq mwngz youq baixrog diuz dah Yozdanq mwnq, mwngz gangj daengz hih boux mwnq, seizneix de bang vunz sijlij hwj, gij vunz caemh haenj bae laeng de mwnq!” 27 Yozhanq dingq le, couh han naeuz: “Cizfeih daj gwnzmbwn soengq roengzdaeuj, mijn'x nex, mij'z vunz ndaej ndaej gijmaz.” 28 Yozhanq vanzlij caiq naeuz: “Gaxgonq gou gangj goq, gou mbouj dwg Gihduz; gou cijmboujgoq dwg baij daeuj gaxgonq de guh ndei cwnjbiq lah. Gij neix faenhsou ndaej cingqmingz hah. 29 Caemhdangq gojyez moq aeu yah; doenghheij baengzyoux de ndwn youq henz de dingqri gij sing de couh angq lo. Caemh doxdoengz, gou seizneix caemh angq ij rai hah. 30 De gaengjdingq ndaej hwng hwnjdaeuj; gou nej, gou gaengjdingq ij ngaiz baih roengzma.” 31 De vanzlij caiq naeuz: “Boux daj gwnzmbwn daeuj hih cauhgoq sojmiz hih. Daj lajdeih daeuj hih dwg haeuj lajdeih he, de soj gangj daengz hih caemh dwg lajdeih hih saeh. Hoeng, boux daj gwnzmbwn daeuj hih cauhgoq sojmiz hih. 32 De ij dawz de soj dingq soj raen hih gangj naeuz vunz ni, hoeng, vunz mbouj dingq de gangj. 33 Yiengq, hauhnaeuz miz vunz dingq de gangj hih, couh ndaej cingqmingz gyoengqde dwg nginh Cangqdiq dwg saedsaeh hih. 34 Boux Cangqdiq baij daeuj mwnq gangj hih cungj dwg gij vah Cangqdiq, aenvih Cangqdiq dawz gij Hoenzsaenz bonjfaenh de haijliengh hih nyok hawj de. 35 “Cangqdiq Bohmbwn aiq daeglwg de, dawz sojmiz hih cungj gyau hawj de guenj. 36 Sinq daeglwg de hih vunz ndaej seiqseiz lix; mbouj dingq daeglwg de hih vunz mbouj ndaej seiqseiz lix, dauqfanj, Cangqdiq seiqseiz cungj aeuqheiq de.”
1 Gij vunz Fazliqcaiq baij he dingqri naeuz Yehsuh sou lwgsae, sijlij hawj lwgsae beij Yozhanq sijlij vanzlij lai. 2 (Gizsaed mwhde, gaenhbaenj mbouj dwg Yehsuh bonjfaenh de bang vunz sijlij, dauq dwg doenghheij lwgsae de bang vunz sijlij lah.) 3 Yehsuh rox yienghneix le, couh daj Youzdaiq Saengj ok ma dauq bae dieg Gyahliqliq. 4 Yiengq bae Gyahliqliq nex, ij goq dieg Sajmajliqyaq bae cij ndaej. 5 Gajlaeng de bae daengz dieg Sajmajliqyaq hih aen singz heuh Siqgyah he. Aen singz neix gaenh gij reih Yozswz; gij reih neix dwg daxboh de Yajgoz soengq hawj de he. 6 Youq mwnq reih mwnq miz aen cingj heuh Yajgoz Cingj he. Yehsuh bae daengz mwnq le, roxnginh naet, yiengq de couh naengh youq henz aen cingj mwnq yietbaeg. Mwhde daihgaiq dwg gyangjngoenz cingq. 7 Yiengq, miz boux Sajmajliqyaq vunzbaz he daeuj aeu raemx. Yehsuh raen le, couh doiq de naeuz: “Cingj mwngz hawj di raemx he hawj gou gw ndaej lwi?” 8 (Mwhde doengh boux lwgsae de gaenq haeuj singz bae cawx gij gw lo.) 9 Boux vunzbaz mwnq dingq le, raen geizheih raixcaix, couh han naeuz: “Mwngz dwg Youzdaiq vunz, gou dwg Sajmajliqyaq vunz; mwngz ij baeq cam gou aeu raemx ma gw hwj nej?” (Boux vunzbaz mwnq yienghneix naeuz dwg aenvih yienzlaiz Youzdaiq vunz caeuq Sajmajliqyaq vunz cungj mbouj doxcwnz haem.) 10 Gajlaeng Yehsuh han naeuz: “Hauhnaeuz mwngz rox Cangqdiq siengj hawj mwngz gijmaz caeuq rox seizneix cam mwngz aeu raemx ma gw hih dwg byawz nex, mwngz cungj senqsi cix gouz de lo; de caemh senqsi cix hawj gij raemx hawj vunz ndaej seiqseiz lix he lo.” 11 Boux vunzbaz mwnq dingq le, cam de naeuz: “Goengjau, mwngz cungj mij aen daekraemx hih haem, cingj caemhcix laeg; mwngz nwj bae ndaej aeu gij raemx hawj vunz ndaej seiqseiz lix he nej? 12 Cojgoeng raeuz Yajgoz louz aen cingj neix hawj gyoengqraeuz; bonjfaenh de caeuq doengh daeglwg de caeuq doenghheij cukseng de cungj gw goq gij raemx cingj neix. Nanzdauh mwngz beij de vanzlij veijdaq haj?” 13 Yehsuh dingq le, caiq han de naeuz: “Famz gw goq gij raemx aen cingj neix hih vunz ciuqyiengh vanzlij hozhawq; 14 hoeng, famz gw goq gij raemx gou hawj he hih vunz couh ndaej yungjyenj mbouj rox hozhawq, aenvih gou hih gij raemx neix ij youq gwnz ndang de bienqbaenz aen cingjraemx riuz mbouj rox sat, hawj de ndaej seiqseiz lix.” 15 Gajlaeng boux vunzbaz mwnq cam Yehsuh naeuz: “Goengjau, yiengq cingj mwngz dawz cungj raemx neix soengq hawj gou bax, hawj gou couh mbouj caiq hozhawq lo, caemh mboujyungh ngoenzngoenz riq daeuj baenx gyae aeu raemx lo.” 16 Yehsuh dingq le, couh doiq de naeuz: “Mwngz maj heuh goeng gojyez mwngz daeuj dineix bax.” 17 Boux vunzbaz mwnq han naeuz: “Gou mij gojyez nej.” Yiengq Yehsuh han de naeuz: “Mwngz naeuz ndaej deng lo. Mwngz gaenhbaenj mij gojyez, 18 aenvih mwngz gaenq miz haj goeng goq lo; seizneix caeuq mwngz youq hih caemh mij dwg goeng mwngz haem. Mwngz naeuz it di cungj mbouj loek; mwngz mij gojyez!” 19 Boux vunzbaz mwnq dingq daengz neix le, couh doiq Yehsuh naeuz: “Goengjau, gou yawj ndaej ok, mwngz dwg boux cenz gij vah Cangqdiq he. 20 Yiengq gou cam mwngz ndaej lwi? Couh dwg cojgoeng gyoengqraeuz soqsingq cungj dwg youq gwnz bya neix gingqbaiq Cangqdiq, hoeng, faenhsou gij vunz Youzdaiq vihmaz dauq naeuz Yehluqsajlaengj cij dwg gingqbaiq Cangqdiq dih deixfueng nej?” 21 Yehsuh dingq le, couh han de naeuz: “Mehsimj hax, mwngz wnggai sinq gou. Gou naeuz mwngz ni, mwhde couh ij daengz lo, gingqbaiq Cangqdiq dih deixfueng mbouj dwg youq gwnz bya neix, caemh mbouj dwg youq Yehluqsajlaengj. 22 Faenhsou Sajmajliqyaq vunz soj baiq hih, faenhsou cungj mbouj rox dwg byawz, hoeng gyoengqraeuz Youzdaiq vunz gingqbaiq hih, gyoengqraeuz rox dwg byawz, aenvih Cangqdiq ij gouq vunz dwg dunghgoq gij vunz Youzdaiq hih. 23 Gangj naeuz mwhde, couh ij daengz lo, gizsaed mwhde couh dwg mwhneix lo. Cingqcaen gingqbaiq Cangqdiq Bohmbwn hih couh dwg ij caensim caen'eiq ciuq saedsaeh gingqbaiq de, aenvih de haenj vunz yienghneix gingqbaiq de. 24 Cangqdiq dwg hoenzsaenz, sojhij ij caensim caen'eiq ciuq saedsaeh gingqbaiq de cij ndaej.” 25 Gajlaeng boux vunzbaz mwnq caiq naeuz: “Gou rox boux heuh Gihduz dih Mizcaiqyaq mwnq, de ij daeuj hwj; daengj de daeuj le, gaengjdingq naeuz gyoengqraeuz ni sojmiz hih.” 26 Yehsuh dingq de yienghneix naeuz le, couh han de naeuz: “Seizneix caeuq mwngz gangj vah hih couh dwg mwngz naeuz hih boux mwnq lo.” 27 Couh youq mwhneix, doengh boux lwgsae Yehsuh ma lo. Gyoengqde ma raen Yehsuh caeuq boux vunzbaz he gangj vah, cungj raen geizheih ij rai bae, hoeng, mij saek boux cam naeuz: “Mwngz ij guxmaz lah?” cixnaeuz: “Mwngz vihmaz ij caeuq de gangj vah lah?” 28 Boux vunzbaz mwnq dingq Yehsuh yienghneix naeuz le, cungj mbouj leix aen doengj de huh, couh majcangq riq maj daengz ndaw singz doiq vunz naeuz: 29 “Veix! Vaiq bae yawj veiq! Miz boux he, de dawz gij saeh gou cungj gangj okdaeuj liux. Gaeuq lingz hoh! Gou naemj boux de aiq dwg Gihduz dinghluh!” 30 Gij vunz dingq le, cungj caezgya ok singz bae yawj Yehsuh. 31 Caemh youq mwhneix, gyoengq lwgsae Yehsuh doiq Yehsuh naeuz: “Lahbij, cingj mwngz gw di doxgaiq he bax.” 32 Yehsuh han gyoengqde naeuz: “Gou miz gij gw he hwj, hoeng faenhsou mij rox gij de law.” 33 Gyoengq lwgsae de dingq le, cungj doxcam naeuz: “Nanzdauh miz vunz aeu gijmaz hawj de gw lo?” 34 Yehsuh caiq doiq gyoengqde naeuz: “Gij gw gou couh dwg ciuq gij cawjeiq boux baij gou daeuj mwnq bae guh gij hong de. 35 Gannaeuz dwg: ‘Daj roek daengz sou ij miz seiq ndwen cij ndaej sou’ lah, hoeng, faenhsou yawjyawj doengh reihnaz mwnq veiq; haeux, mienh gaenq ndaej daeng sou lo, ndaej gvej lo. 36 Boux sougvej he mbouj danhcij ndaej ngaenzhong, vanzlij ndaej vunz, caemh vanzlij ndaej hawj doenghheij vunz neix ndaej seiqseiz lix, hawj boux roek boux ndaem he caeuq boux sou he cungj angq. 37 Sugvah naeuz ndaej deng: ‘Boux gonq roek, boux laeng ndaej sou.’ 38 Gou baij faenhsou bae sou doenghgij faenhsou mij guh roek he. Gij vunz dwgrengz sinhoj; faenhsou dauq ndaej yangjcouq gij vunz guh dwgrengz sinhoj cij ndaej sou he.” 39 Caiq gangj daengz boux vunzbaz mwnq maj ndaw singz gangj naeuz gij vunz ni le, miz haujlai Sajmajliqyaq vunz cungj sinq Yehsuh, aenvih boux vunzbaz mwnq naeuz: “De dawz gou gaxgonq soj guh hih saeh cungj gangj okdaeuj liux.” 40 Gajlaeng gij vunz Sajmajliqyaq couh daeuj gouz Yehsuh, gouz de youq laeng gyoengqde mwnq youq, yiengq Yehsuh caemh youq mwnq youq song ngoenz. 41 Mwhde miz haujlai vunz cungj ndaej caenra raen caenrwz dingq Yehsuh gangj vah, sojhij miz vunz sinq de engqgya lai. 42 Gij vunz caemh doiq boux vunzbaz mwnq naeuz: “Seizneix gyoengqraeuz sinq, mbouj dwg vih gij vah mwngz hwj sinq, dauq dwg vih gyoengqraeuz ndaej caenrwz dingq daengz de gangj hih vah, ndaej rox de dwg boux cingqcaen daeuj gouq vunz he hwj sinq lah.” 43 Youq mwnq youq song ngoenz le, Yehsuh couh daj mwnq okdin maj Gyahliqliq lo. 44 Gaxgonq de naeuz goq: “Boux cenz gij vah Cangqdiq gag youq dieg bonjdeih bonjfaenh mij'z vunz soenhcungq gyoengqde.” 45 Hoeng, mbat neix de baex maj daengz dieg bonjfaenh de Gyahliqliq he, dauq miz vunz vuenhringz de hwj, aenvih gyoengqde bae Yehluqsajlaengj goq ciet hih mwhde ndaej caenra raen de soj guh hih saeh. 46 Gajlaeng de caiq bae daengz aen mbanj Gyahnaz. (Mbanj Gyahnaz caemh dwg youq dieg Gyahliqliq he, couh dwg mwnq gaxgonq de youq mwnq hawj raemx bienq laeuj he.) Miz boux daqcwnz he, daeglwg de youq Gyahbwznungz Singz fat bingh hung. 47 Boux daqcwnz mwnq dingq naeuz Yehsuh daj dieg Youzdaiq daeuj daengz Gyahliqliq le, couh majcangq bae cimh de, gouz de naeuz: “Daeglwg gou bingh lo; cingj mwngz bae yw de bax, aenvih daeglwg gou bingh hwj ij rai lo.” 48 Yehsuh dingq le, doiq boux de naeuz: “Hauhnaeuz faenhsou mbouj raen gij geizmiuj hih saeh hwj ndaej cingqmingz gou dwg byawz nex, faenhsou cungj mbouj sinq.” 49 Boux de gannaeuz dingq Yehsuh yienghneix naeuz lah, hoeng, vanzlij caiq doiq de naeuz: “Goengjau, gouz mwngz domh daeglwg gou vanzlij miz gaemz heiq he, mwngz vaiqdi bae bax!” 50 Gajlaeng Yehsuh couh doiq boux de naeuz: “Mwngz maj bax; daeglwg mwngz gaenq ndei lo.” Gajlaeng boux de caemh sinq gij vah de, couh dauq maj ranz lo. 51 Boux de dauq maj hih mwhde, bouxhoiq de daeuj naeuz de ni naeuz: “Daeglwg mwngz ndaej ndei lo!” 52 Boux de dingq le, couh cam naeuz: “Daeglwg gou seizlaw ndei lah?” Bouxhoiq de han de naeuz: “Ngoenzlwenz yaquj it diemjcung mwhde couh mij fatndat lo, doiq lo.” 53 Gajlaeng boux de couh ngeix daengz mwhde cingq dwg Yehsuh doiq de gangj naeuz: “Daeglwg mwngz ndei lo!” hih mwhde lo. Couh yienghneix, daj mwhmwnq hwnj, boux de caeuq ndaw ranz de cungj sinq Yehsuh. 54 Mbat neix dwg Yehsuh daj dieg Youzdaiq ok ma le dauq ma daengz dieg Gyahliqliq guh hih daixngeih mbat geizmiuj hih saeh hwj ndaej cingqmingz de dwg byawz.
1 Gij saeh neix goq le, ngamqluj daengz Youzdaiq vunz dih aen ciet he. Yehsuh couh bae Yehluqsajlaengj. 2 Youq Yehluqsajlaengj gaenh mwnq heuh Yiengz Dou hih mwnq dieg he, miz aen daemz he, aeu Hihbwzlaiz vah ma gangj couh dwg heuh Bizswqdaq. Henz aen daemz mwnq miz haj diuz soujlangz. 3 Youq soujlangz mwnq miz haujlai vunz bingh ninz youq mwnq, miz rafangz hih, ha vaij hih, ha gyad hih, guxmaz vunz bingh cungj miz. 4 Gyoengqde youq dineix daengj raemx doengh, aenvih miz bouxcai Cangqdiq saemxmboujseiz roengz ndaw daemz bae ndau raemx hawj raemx doengh le, yiengq, hauhnaeuz miz byawz ndaej sien diuq roengzbae nex, mboujguenj ngaiz bingh maz cungj ndaej ndei liux. 5 Yiengq youq mwnq miz boux he bingh baenx samcib bet bi lo. 6 Yehsuh yawjraen de ninz youq mwnq, couh rox de bingh baenx haujlai caez lo, couh cam de naeuz: “Mwngz siengj ndei liux lwi?” 7 Boux vunz bingh mwnq dingq le, han naeuz: “Goengjau, raemx doengh mwhde, mij'z vunz dawz gou coengq roengz ndaw daemz bae nej. Gou ijsiengj roengz bae hah, hoeng caenhrox miz vunz beij gou vaiq lah.” 8 Yehsuh dingq le, doiq de naeuz: “Mwngz hwnq bax! Mwngz ndaej byaij lo; dawz gij demh ninz mwngz maj bax.” 9 Yehsuh baex gangj gawq neix he le, boux vunz bingh mwnq couh doq ndei lo, couh dawz gij demh de maj lo. 10 Yiengq ngamqluj ngoenz mwnq dwg ngoenz ngoenzyietbaeg, sojhij couh miz vunz cam boux vunz bingh yw ndei mwnq naeuz: “Ngoenzneix dwg ngoenzyietbaeg, mbouj ndaej guh hong hih. Mwngz vihmaz dawz gij demh ninz mwngz deuz?” 11 Hoeng, boux mwnq dauq han naeuz: “Boux yw gou ndei mwnq naeuz: ‘Dawz gij demh ninz mwngz maj bax’ vwz.” 12 Gyoengqde dingq de yienghneix naeuz le, couh cam boux de naeuz: “Dwg byawz naeuz hawj mwngz dawz gij demh ninz mwngz bae hoh nej?” 13 Hoeng, boux mwnq gaenhbaenj mbouj rox dwg byawz naeuz, aenvih mwnq vunz lai raixcaix, Yehsuh caemh gaenq senqsi cix byaij deuz lo. 14 Gajlaeng, Yehsuh youq gunghdenq Cangqdiq nyangz boux de, couh doiq boux de naeuz: “Mwngz gaenq ndei liuxliux lo; mwngz couh mbouj caiq famh coih haem lo, mienxndaej baezneix roeb daengz hih engqgya camj.” 15 Boux de dingq le, couh bae naeuz lingjdauj ni, yw ndei de hih dwg Yehsuh. 16 Couh vih yienghneix, gij vunz Youzdaiq engqgya bwkhaih Yehsuh, aenvih Yehsuh youq ngoenz ngoenzyietbaeg yw bingh hawj vunz. 17 Yehsuh rox le, couh doiq gyoengqde naeuz: “Boh gou daengz seizneix itcig cungj dwg guh hong; gou caemh caeuq de doxdoengz.” 18 Gij vunz Youzdaiq dingq de yienghneix naeuz le, couh haenq hwj ijsiengj gaj de, aenvih de mbouj danhcij naeuz veizfanj ngoenzyietbaeg dih gveihdingq, vanzlij cwng Cangqdiq dwg boh de, yawj bonjfaenh de caeuq Cangqdiq doxdoengz. 19 Yehsuh caiq naeuz: “Gou saedsaeh naeuz sou ni, lwg gag baengh bonjfaenh, gijmaz cungj mbouj ndaej guh daengz; cawzok yawjraen boh soj guh hih, cij ndaej guh daengz he. Boh soj guh hih, lwg caemh ciuqyiengh guh. 20 Aenvih boh aiq lwg, de couh dawz de soj guh hih hawj de raen. Mbouj danhcij yienghneix, vanzlij dawz gij engqgya geizmiuj he hawj lwg de raen, hawj faenhsou engqgya geizheih. 21 Boh baenzlaw hawj vunzrai ndaej dauqlix, hawj gyoengqde miz mingh, lwg caemh doxdoengz; de caemh ndaej youz bonjfaenh dih cawjeiq ndaej hawj vunz miz mingh. 22 Boh mbouj saemjbuenq guxmaz vunz; de dawz saemjbuenq hih saeh cungj gyau hawj lwg de liux, 23 hawj vunz soenhgingq daeglwg de caemh luj soenhgingq boh ityiengh. Mbouj soenhgingq lwg hih, caemh mbouj soenhgingq baij daeglwg de daeuj hih boh lo.” 24 Yehsuh vanzlij caiq naeuz: “Gou saedsaeh naeuz sou ni, mboujguenj byawz dingq gij vah gou caiq sinq boux baij gou daeuj hih, couh ndaej seiqseiz lix, mbouj ngaiz dingh miz coih, caemh ndaej daj rai ndaej dauqlix. 25 Gou caiq saedsaeh naeuz sou ni, mwhde couh ij daengz lo, seizneix couh dwg lo, vunzrai ndaej dingqri gij sing daeglwg Cangqdiq; ndaej dingqri hih couh dwg ndaej dauqlix lo. 26 Aenvih boh bonjfaenh de couh dwg doenj mingh, de caemh ciuqyiengh hawj daeglwg de ndaej guh doenj mingh. 27 Caiq aenvih daeglwg de dwg Vunz dih Daiqbiuj, sojhij de couh nyok gij gienz saemjbuenq vunz lajmbwn he hawj daeglwg de. 28 Faenhsou gaejyungh geizheih; couh ij daengz mwhde, sojmiz youq ndaw moh hih vunzrai cungj ij ndaej dingqri gij sing daeglwg Cangqdiq, cungj ij ok daeuj. 29 Guh ndeisaeh hih vunz, dauqlix nex, ndaej seiqseiz lix; guh doeg guh sieb hih vunz, dauqlix nex, ngaiz dingh miz coih.” 30 Yehsuh vanzlij caiq doiq gij vunz Youzdaiq naeuz: “Gou gag baengh bonjfaenh gijmaz cungj mbouj ndaej guh; gou dwg ciuq gij cawjeiq Cangqdiq ma saemjbuenq hih, caemh dwg goengbingz hih, aenvih gou mbouj dwg ciuq gij cawjeiq bonjfaenh gou ma guh hih, dauq dwg ciuq gij cawjeiq baij gou daeuj hih Cangqdiq guh hih lah. 31 Yiengq, hauhnaeuz gou gag cingqmingz bonjfaenh gou, gij cingqmingz gou couh mij'z yungh lo. 32 Hoeng, hauhnaeuz miz lingh boux cingqmingz hawj gou nex, gou rox gij cingqmingz de dwg saedsaeh hih. 33-34 “Gizsaed gou gaenhbaenj mboujyungh vunz cingqmingz; cijmboujgoq gou muengh faenhsou sinq hwj ndaej gouq, sojhij, gou naeuz sou ni, faenhsou wnggai sinq Yozhanq dih cingqmingz. Faenhsou mbouj dwg baij vunz bae laeng guh sijlij dih Yozhanq goq, bae dingq de cingqmingz gij saedsaeh hih maz? 35 Yozhanq luj aen daeng diemj rongh he; faenhsou caemh nyienh'eiq camqciz yangjcouq gij rongh de. 36 “Gou nej, gou miz gij cingqmingz beij gij cingqmingz Yozhanq vanzlij miz yungh he, couh dwg boh gou hawj gou guh hih, couh dwg faenhsou raen gou soj guh hih, cingq dwg cingqmingz gou dwg daxboh baij gou daeuj he. 37 Baij gou daeuj hih daxboh caemh cingqmingz gou goq. Hoeng, faenhsou mijyaengz dingqri gij sing de goq, caemh mijyaengz raen de goq, 38 ndaw sim faenhsou caemh mij miz gij saedsaeh de, aenvih faenhsou mbouj sinq de baij daeuj hih boux mwnq. 39 “Faenhsou nenhgyiuq Singqgingh, cungj naemqnaeuz ndaej daj ndaw Singqgingh ndaw de ndaej daengz seiqseiz lix. Gizsaed, ndaej cingqmingz gou hih couh dwg gij Singqgingh neix; 40 hoeng, faenhsou dauq mij daeuj laeng gou neij gouz ndaej seiqseiz lix. 41 “Gou mbouj gouz vunz haenh gou. 42 Gou caemh rox faenhsou gaenhbaenj mbouj miz aen sim aiq Cangqdiq he. 43 Boh gou baij gou daeuj; faenhsou dauq mij ciep gou, dauq ciep boux gag cej bonjfaenh he. 44 Faenhsou caenhrox yawjnaek doxhaenh, dauq mbouj dawz haeuj rwz boux caencwnz mwnq haenh mbouj haenh faenhsou; yiengq ij baenzlaw bae sinq gou nej? 45 “Faenhsou gaejyungh naemqnaeuz gou youq dangqnaj daxboh gauq faenhsou; gauq faenhsou hih dwg faenhsou soqsingq cungj baengh hih Mohsih lah. 46 Yiengq, hauhnaeuz faenhsou sinq Mohsih hih, faenhsou caemh wnggai sinq gou hah, aenvih ndaw saw de cungj dwg daez daengz gou. 47 Caiq hauhnaeuz faenhsou daiqlienz de sij hih cungj mbouj sinq, yiengq caemh ij baenzlaw sinq gou nej?”
1 Gij saeh neix goq le, Yehsuh goq aen huz Gyahliqliq bae. (Aen huz neix caemh heuh Dizbijlijyaq Haij.) 2-4 Mwhde caemh dwg ij daengz aen ciet Youzdaiq vunz dih aen ciet Bienqgoqbae he lo. Miz haujlai vunz gaen de bae, aenvih gyoengqde raen goq de gij geizmiuj ndaej yw vunz bingh mwnq. De goq bae le, couh caeuq gyoengq lwgsae de hwnj gwnz bya bae naengh. 5 De naengh roengzma le, ngiengx raeuj hwnjdaeuj yawjraen miz baenx gyoengq vunz gaen de bae. De raen yienghneix le, couh doiq Feihliz boux lwgsae neix naeuz: “Gyoengqraeuz ij nwj bae cawx gij gw hawj gyoengq vunz mwnq gw nej?” 6 Yehsuh yienghneix naeuz dwg siengj sawqsawq Feihliz; gizsaed de gaenq rox ij baenzlawz guh lo. 7 Gajlaeng Feihliz han naeuz: “Cungjsuenq naeuz aeu songbak ngaenz bae cawx gij gw hwjx, cungj mbouj gaeuq gyoengqde gw boux gaemz hwx!” 8 Yiengq miz daixlingh boux lwgsae, gij coh de heuh Anhdwzlez, couh dwg daegnuengx Sihmaenz-Bijdwz, de doiq Yehsuh naeuz: 9 “Dineix miz laeq lwgngez he; de daiq miz haj aen menqbauh caeuq song duz bya, hoeng, baenxbienh vunz, ij baenz gaeuq faen hawj gyoengqde gw hwj?” 10 Yehsuh dingq le, couh doiq gyoengq lwgsae de naeuz: “Faenhsou hawj gyoengqde naengh roengzma.” (Yienzlaiz mwnq dwg dieg nywj he.) Gajlaeng gij vunz caemh naengh roengzma lo. Mwhde caenhgag suenq vunzsai daihgaiq miz hajcien vunz yienghneix. 11 Gyoengq vunz naengh roengzma le, Yehsuh couh dawz menqbauh hwnjdaeuj docih Cangqdiq, couh faen hawj gyoengq vunz gw. Caemh doxdoengz, de caemh dawz bya faen hawj gyoengqde gw; gyoengq vunz caemh ndaej seizbienh gw. 12 Gajlaeng gyoengqde gw imq le, Yehsuh couh doiq doengh boux lwgsae de naeuz: “Dawz doenghheij menqbauh gw lij lw he coux hwnjdaeuj. Mbouj ndaej langqfeiq.” 13 Gyoengq lwgsae dingq de yienghneix naeuz le, couh dawz gij menqbauh gyoengq vunz gw lij lw he coux hwnjdaeuj, coux ndaej baenx cibngeih lamz rim. 14 Gyoengq vunz raen Yehsuh guh gij geizmiuj neix le, cungj naeuz: “Bouxn'x cingqcaen dwg boux daeuj lajmbwn cenz gij vah Cangqdiq mwnq he lo!” 15 Yehsuh dingq ndaej ok gij vah gyoengqde, couh dwg naeuz gyoengqde siengj ep de guh vuengz. Gajlaeng de couh gag caiq hwnj caek gwnz bya he bae. 16 Yiengq daengz haemh le, gyoengq lwgsae de couh roengz bya ma, bae daengz henz huz, 17 ij naengh ruz bae Gyahbwznungz Singz, hoeng, Yehsuh vanzlij mijyaengz daeuj daengz gyoengqde mwnq, mbwn caemh laep lo. 18 Cingq youq mwh gyoengqde naengh ruz bae Gyahbwznungz hih mwhde, sawqmwh youq gwnz huz fan ndaek raq rumz hung he, ci hwj raemx fan foedfoed bae. 19 Gyoengq lwgsae buekmingh vad ruz. Yiengq daihgaiq vad bae ndaej daengz cib lai leix gyae yienghneix le, sawqmwh gyoengqde yawjraen Yehsuh youq gwnz raemx cingq yiengq aen ruz gyoengqde byaij daeuj. Gyoengqde raen le, cungj lau hwj ij rai bae. 20 Yehsuh raen yienghneix le, couh majcangq doq vued gyoengqde naeuz: “Gaejyungh lau; dwg gou lah!” 21 Gyoengqde dingq le, cungj angq hwj ij rai, gajlaeng couh ciep Yehsuh hwnj ruz bae. Couh youq mwhneix, aen ruz couh majcangq bae daengz mwnq gyoengqde ij bae he lo. 22 Daengz daixngeih ngoenz, youq hamq huz baihneix hih gyoengq vunz mwnq rox naeuz dimwnq caenhgag miz aen ruz dog, caemh rox Yehsuh gaenhbaenj mbouj caeuq gyoengq lwgsae de hwnj ruz bae. 23 Gajlaeng miz geij aen ruz daj Dizbijlijyaq Singz daeuj daengz henz hamq huz mwnq dingz; mwnq couh dwg gaenh mwnq ngoenz gaxgonq Yehsuh euj bingj faen hawj vunz gw hih mwnq. 24 Gajlaeng gyoengqde rox Yehsuh caeuq doenghheij lwgsae de cungj mbouj youq mwnq, couh hwnj ruz bae, naengh ruz bae Gyahbwznungz cimh Yehsuh. 25 Gyoengqde youq baih huz baih de ndaej raen Yehsuh, couh doiq de naeuz: “Lahbij, mwngz seizlaw daeuj daengz dineix lah?” 26 Yehsuh han gyoengqde naeuz: “Gou saedsaeh naeuz sou ni, faenhsou cimh gou, gaenhbaenj mbouj dwg vih ij ndaej yawjraen gij geizmiuj ndaej cingqmingz gou dwg byawz he, dauq dwg vih ij ndaej gw menqbauh hwj imqaq lah.” 27 De vanzlij caiq naeuz: “Faenhsou gaejyungh vih gij gw gij rox naeuh rox lanh hih hwj roengzrengz, dauq ij vih Vunz dih Daiqbiuj soengq hawj faenhsou hih seiqseiz mbouj rox naeuh hih gij gw hwj roengzrengz guh hong cij deng, aenvih Vunz dih Daiqbiuj dwg Cangqdiq Bohmbwn nginh hih, cingqmingz hih.” 28 Gyoengq vunzlai dingq de yienghneix naeuz le, couh cam de naeuz: “Yiengq gyoengqraeuz ij baenzlaw guh cij deng, cij suenq dwg guh gij hong Cangqdiq nej?” 29 Yehsuh han naeuz: “Sinq Cangqdiq baij daeuj hih boux mwnq, couh dwg guh gij hong Cangqdiq lo.” 30 Gajlaeng gyoengqde caiq cam naeuz: “Yiengq mwngz ij guh gijmaz geizmiuj hwj hawj gyoengqraeuz yawj le, couh sinq mwngz nej? Mwngz dauqdaej daeuj guh gijmaz saeh nej? 31 Cojgoeng raeuz youq rogndoi vanzlij ndaej miz mahnaq gw goq, cingq luj ndaw Singqgingh ndaw de sij naeuz: De daj gwnzmbwn coengq gij gw hawj gyoengqde gw.” 32 Hoeng Yehsuh dauq han gyoengqde naeuz: “Gou saedsaeh naeuz sou ni, daj gwnzmbwn coengq gij gw roengzdaeuj hawj faenhsou gw hih gaenhbaenj mbouj dwg Mohsih; dwg boh gou daj gwnzmbwn coengq gij gw caen he hawj faenhsou gw lah, 33 aenvih Cangqdiq hawj hih gij gw dwg daj gwnzmbwn coengq roengzdaeuj he, dwg hawj lajmbwn sojmiz hih vunz miz mingh he.” 34 Gyoengqde dingq le, couh cam de naeuz: “Goengjau, cingj mwngz ngoenzngoenz hawj gij gw neix hawj gyoengqraeuz bax!” 35 Yehsuh han naeuz: “Gou couh dwg gij gw hawj vunz miz mingh he lo. Gaep haeuj gou hih vunz gaengjdingq mbouj rox iek; sinq gou hih vunz seiqseiz mbouj rox hozhawq. 36 Hoeng gou doiq faenhsou naeuz goq, gannaeuz faenhsou ndaej raen gou goq lah, hoeng, faenhsou dauq mbouj sinq gou. 37 Famz boh soengq hawj gou hih vunz, gaengjdingq daeuj gaep haeuj gou; gaep haeuj gou hih vunz, gou gaengjdingq mbouj vwt de, 38 aenvih gou dwg daj gwnzmbwn roengz daeuj he; mbouj dwg ciuq gij cawjeiq bonjfaenh gou ma guh he, dwg ciuq gij cawjeiq boux baij gou daeuj hih guh he. 39 Boux baij gou daeuj hih gij iqswh de dwg: de soj soengq hawj gou hih, hawj gou ityiengh cungj mbouj ndaej lauq; daengj daengz ngoenz gatsat he, gou ij hawj gyoengqde dauqlix, 40 aenvih gij iqswh boh gou couh dwg naeuz, hawj sojmiz raen daeglwg de couh sinq de hih vunz couh ndaej seiqseiz lix, caemh youq ngoenz gatsat he, gou ij hawj gyoengqde dauqlix.” 41 Gij vunz Youzdaiq dingq Yehsuh naeuz bonjfaenh de couh dwg daj gwnzmbwn coengq roengzdaeuj hih gij gw he le, couh lwnh yebyeb naeuz: 42 “Aeq, bouxn'x mbouj dwg Yehsuh, daeglwg Yozswz maz? Bohmeh de gyoengqraeuz cungj rox hah; de vihmaz naeuz de dwg daj gwnzmbwn roengz daeuj hih nej?” 43 Yehsuh dingqri le, couh doiq gyoengqde naeuz: “Faenhsou gaejyungh gangj yebyeb lo. 44 Hauhnaeuz mbouj dwg baij gou daeuj hih daxboh iuyinx vunz, couh mij vunz ndaej gaep haeuj buek vunz gou. Gaep haeuj buek vunz gou hih, daengz ngoenz gatsat, gou couh hawj de dauqlix. 45 Bonj saw boux cenz gij vah Cangqdiq ndaw de yienghneix sij naeuz: ‘Gyoengqde cungj ij ndaej daengz Cangqdiq son gyoengqde.’ Gawq neix dwg ceij famz dingq Cangqdiq daxboh son caemh ciuq de son hih yienghmwnq bae guh hih, cungj ij gaep haeuj gou. 46 Gij neix mbouj dwg naeuz miz vunz raen goq Cangqdiq Bohmbwn; caenhgag dwg boux dajlaeng Cangqdiq daeuj he cij ndaej raen de goq he. 47 “Gou saedsaeh naeuz sou ni, sinq gou hih vunz couh ndaej seiqseiz lix. 48 Gou couh dwg miz mingh hih gij gw. 49 Cojgoeng faenhsou youq rogndoi gw goq mahnaq, hoeng vanzlij dwg ngaiz rai lo. 50 Hoeng, daj gwnzmbwn roengz daeuj hih gij gw, vunz gw le, mbouj rox rai. 51 Gou couh dwg daj gwnzmbwn roengz daeuj hih gij gw miz mingh; vunz gw gij gw neix couh ndaej seiqseiz lix. Gou hawj hih gij gw couh dwg gij noh gou, muzdiz dwg ij hawj vunz ndaej miz mingh hih.” 52 Gij vunz Youzdaiq dingq Yehsuh gangj gij vah neix le, cungj doxcwngq oxox naeuz: “Boux vunz bouxn'x ij baenz dawz gij noh bonjfaenh ma hawj gyoengqraeuz gw hwj nej?” 53 Yehsuh caiq doiq gyoengqde naeuz: “Gou saedsaeh naeuz sou ni, hauhnaeuz faenhsou mbouj gw gij noh Vunz dih Daiqbiuj, mbouj gw gij lwed Vunz dih Daiqbiuj, couh mij'z mingh lo. 54 Gw gij noh gij lwed gou hih vunz couh ndaej seiqseiz lix; daengz ngoenz gatsat, gou couh hawj de dauqlix. 55 Gij noh gij lwed gou cingqcaen dwg ndaej gw hih. 56 Gw gij noh gij lwed gou hih vunz ndaw sim de siengzseiz miz gou, gou caemh miz de. 57 Hawj miz mingh dih daxboh baij gou daeuj; gou dwg baengh de cij ndaej lix he. Caemh doxdoengz, gw gou hih vunz couh dwg baengh gou cij ndaej lix he. 58 Gou dwg daj gwnzmbwn roengz daeuj hih gij gw caen he. Gw gij gw neix hih vunz ndaej seiqseiz lix, mbouj luj cojgoeng faenhsou gannaeuz ndaej gw goq mahnaq lah, hoeng, ciuqyiengh ngaiz rai.” 59 Yehsuh gangj doenghgij vah neix hih mwhde, dwg youq Gyahbwznungz veiqdangz son vunz mwhde gangj he. 60 Yiengq miz haujlai lwgsae dingq de gangj doenghgij vah neix le, couh lwnh naeuz: “Gij vah neix daiq hoj dingq hoh; byawz souh ndaej hax?” 61 Yehsuh rox gyoengq lwgsae de lwnh gij saeh neix le, couh doiq gyoengqde naeuz: “Gij vah neix hawj faenhsou dwgcaengz, mbouj sinq haj? 62 Hauhnaeuz faenhsou yawjraen Vunz dih Daiqbiuj dauq hwnj gwnz yienzlaiz de maj nex, ij baenzlaw yiengh nej? 63 Hawj vunz miz mingh hih dwg Hoenzsaenz Cangqdiq, mbouj dwg ndangnoh; ndangnoh mij'z yungh. Gou doiq faenhsou soj gangj hih vah cungj dwg gangj daengz Hoenzsaenz Cangqdiq hawj vunz ndaej miz mingh hih. 64 Hoeng, faenhsou ndaw de miz hih vunz mbouj sinq.” Gizsaed, Yehsuh senqsi cix rox byawz mbouj sinq de, byawz ij buenqduz cuzmaiq de lo. 65 Yehsuh vanzlij caiq naeuz: “Sojhij gou doiq faenhsou naeuz goq: ‘Hauhnaeuz mbouj dwg daxboh hawj, mij'z vunz ndaej gaep haeuj gij vunz gou.’” 66 Miz haujlai lwgsae dingq de gangj doenghgij vah neix le, couh mbouj caiq gaen de haem lo. 67 Yehsuh raen yienghneix le, couh cam cibngeih boux lwgsae de naeuz: “Faenhsou caemh ij mbouj gaen gou haz?” 68 Yiengq Sihmaenz-Bijdwz han naeuz: “Bouxcawj gou hax, raeuz mbouj gaen mwngz, ij gaen byawz? Caenhgag mwngz cij ndaej naeuz raeuz ni ndaej seiqseiz lix hih gij siuhsiz neix hah! 69 Gyoengqraeuz sinq, caemh rox mwngz dwg boux gvi hawj Cangqdiq mwnq he hih.” 70 Yehsuh dingq le, han naeuz: “Gou mbouj dwg senj aeu faenhsou cibngeih boux maz? Hoeng, miz boux he yak luj fangzvuengz.” 71 Yehsuh gangj gawq vah neix dwg ceij Youzdaq, daeglwg Sihmaenz, Gyahloz vunz gangj he. Youzdaq dwg cibngeih boux lwgsae ndaw de dih boux he, couh dwg gajlaeng buenqduz hai de hih boux mwnq lo.
1 Gij saeh neix goq le, Yehsuh couh mbouj caiq nyienh'eiq bae dieg Youzdaiq lo, couh bae Gyahliqliq Saengj dih heij mbanj heij singz he, aenvih gij lingjdauj Youzdaiq siengj gaj de. 2 Mbouj geijlwh caez, gij vunz Youzdaiq dih aen ciet Dap Bungz he couh ij daengz lo. 3 Yiengq doengh daegnuengx de couh lengx de naeuz: “Gaejyungh youq mwnqneix lo; mwngz wnggai bae dieg Youzdaiq, bae mwnq hawj gij lwgsae mwngz ndaej raen mwngz soj guh hih saeh hah. 4 Hauhnaeuz it boux vunz siengj ok mingz hih, couh mbouj wnggai ndojndoj baexbaex, ij wnggai loh youq dangqnaj vunzlai. Yiengq, giqyienz mwngz ndaej guh doenghgij saeh neix lo, mwngz couh wnggai youq dangqnaj vunzlai guh hawj vunzlai yawj.” 5 Doengh daegnuengx de doiq de gangj doenghgij vah neix, yienzlaiz dwg gyoengqde caemh mbouj sinq de. 6-8 Yehsuh dingq doengh daegnuengx de yienghneix naeuz le, couh doiq gyoengqde naeuz: “Seizneix mbouj dwg daengz mwh gou bae he; dauq dwg faenhsou seizlaw bae cungj ndaej. Faenhsou sien bae goq ciet bax, aenvih gyoengqde mbouj veiq dwgcaengz faenhsou law; gyoengqde caenhgag dwgcaengz gou lah, aenvih gou byoengq gij vaihsaeh gyoengqde goq.” 9 Couh yienghneix, Yehsuh vanzlij dwg youq Gyahliqliq youq. 10 Gajlaeng doengh daegnuengx de bae le, de caemh bae Youzdaiq goq ciet hwj, hoeng de dwg caegcaeg bae he, mbouj hawj vunz rox haw. 11 Yiengq aen ciet neix daengz lo. Gij vunz Youzdaiq dih lingjdauj cungj caenhrox caz naeuz: “Boux Yehsuh mwnq youq nwjh lah?” 12 Dauqcawq cungj caemh miz vunz lwnh yebyeb de. Miz mbangj hih vunz lwnh naeuz: “De dwg vunz ndei,” miz mbangj hih vunz lwnh naeuz: “De dwg auxcied gyoengq vunzlai he.” 13 Hoeng, mij'z vunz gamj dingxdaeuz youq dangqnaj vunzlai cizsez gangj de hih saeh, aenvih lau gij lingjdauj Youzdaiq. 14 Yiengq, goq aen ciet neix ndaej dingxfaen le, Yehsuh bae gunghdenq Cangqdiq gangj gvanhhih Cangqdiq dih ndei siuhsiz. 15 Yiengq, dieg mwnq hih vunz dingq de gangj le, cungj raen geizheih ij rai, couh naeuz: “Boux vunz bouxn'x, cungj mij hag goq haem, ij baenz rox ndaej baenx lai nej?” 16 Yehsuh dingqri gij vunz yienghneix naeuz le, couh naeuz: “Gou gangj hih doenghgij siuhsiz neix mbouj dwg gou gag rox law; dwg boux baij gou daeuj mwnq hawj gou rox hih lah. 17 Hauhnaeuz faenhsou gietsim ciuq gij cawjeiq Cangqdiq bae guh nex, couh ndaej rox doenghgij vah neix dwg Cangqdiq hawj gou gangj haj cixnaeuz dwg gou gag gangj hih lo. 18 Doengh boux gag ciuq gij cawjeiq bonjfaenh ma gangj hih dwg siengj gag hawj bonjfaenh najrongh lah; caenhgag boux siengj hawj boux baij de daeuj mwnq ndaej najrongh hih, caenhgag boux mwnq cij dwg caen he, mbouj miz saek di gyaj hih. 19 Mohsih mbouj dwg dingh fazliz hawj faenhsou maz? Hoeng, faenhsou dauq mij saek boux soenhsouj, dauq ijsiengj gaj gou nejx.” 20 Gyoengq vunz dingq le, han naeuz: “Mwngz gaengjdingq dwg ngaiz fangz doz lo! Byawz naeuz ij gaj mwngz nex?” 21 Yehsuh naeuz: “Gou guh gij saeh geizmiuj he, faenhsou couh roxnginh raen geizheih lo mah? 22 Mohsih cenz hawj faenhsou gozlij—gizsaed, gozlij gaenhbaenj mbouj dwg Mohsih dingh okdaeuj, dwg daj cojgoeng raeuz cix dingh miz lo—faenhsou dwg youq ngoenz ngoenzyietbaeg guh gozlij lah. 23 Yiengq, giqyienz faenhsou youq ngoenz ngoenzyietbaeg guh gozlij, dwg siengj soenhsouj Mohsih dih fazliz lo, yiengq gou youq ngoenz ngoenzyietbaeg hawj vunz bingh ndei, faenhsou vihmaz ij ndatheiq gou nej? 24 Wnggai nienxnienx ndei dwg gijmaz saeh, menhcij dingh deng caeuq mbouj deng; ij ciuq saedsaeh ma dingh deng caeuq mbouj deng.” 25 Youq Yehluqsajlaengj, miz mbangj hih vunz naeuz: “Boux neix mbouj dwg boux gyoengqde ijsiengj gaj hih maz? 26 Hawjm'z yawj hux, de vanzlij youq dangqnaj vunzlai hoi ra cenzgangj Cangqdiq dih ndei siuhsiz, gingqyienz mij vunz naeuz de. Nanzdauh doengh boux dang ak mwnq naemqnaeuz de cingqcaen dwg Gihduz mah? 27 Hoeng, Gihduz daeuj mwhde, mij saek boux rox de dwg daj nwj daeuj, dauq dwg boux neix, gyoengqraeuz bouxboux cungj rox de dwg daj nwj daeuj hah.” 28 Gyoengq vunz gangj doenghgij vah neix hih mwhde, Yehsuh vanzlij dwg youq ndaw gunghdenq Cangqdiq gangj vah hih. De gangj goggog naeuz: “Faenhsou rox gou, caemh rox gou dwg daj mwnqlaw daeuj. Gizsaed gou daeuj, mbouj dwg gou gag guh cawjeiq daeuj hih; dwg boux lauxsaed sinq ndaej goq dih Cangqdiq baij gou daeuj lah. Faenhsou mbouj rox de law, 29 hoeng, gou dauq rox de, aenvih gou dwg dajlaeng de daeuj hih; dwg de baij gou daeuj hih.” 30 Gyoengqde dingq Yehsuh yienghneix naeuz le, couh ijsiengj gaemh dawz de, hoeng, geizheih, mij vunz gamj doengh fawz gaemh de; dwg aenvih Cangqdiq dingh hih mwhde mijyaengz daengz. 31 Hoeng, youq ndaw gyoengq vunz ndaw de, miz haujlai vunz sinq de; sinq de hih dauq lwnh yebyeb naeuz: “Cungjsuenq naeuz Gihduz daeuj lo, de guh gij geizmiuj he caemh mbouj ndaej beij boux neix guh ndaej lai, mbouj dwg haj?” 32 Yiengq gij vunz gaep haeuj Fazliqcaiq baij he dingq gyoengq vunzlai yienghneix lwnh yebyeb naeuz Yehsuh le, couh caeuq goengjsae dajbwiz doxyuk hwj baij doengh boux souj gunghdenq Cangqdiq he bae gaemh Yehsuh. 33 Yehsuh vanzlij doiq gyoengq vunzlai naeuz: “Gou vanzlij ndaej caeuq faenhsou camqciz youq; goq mbouj geijlwh caez, gou couh ij dauq maj daengz laeng boux baij gou daeuj mwnq lo. 34 Daengz mwhmwnq, faenhsou ij cimh gou, hoeng, caemh cimh mbouj raen gou; gou youq hih mwnq dieg mwnq, faenhsou caemh mbouj ndaej bae.” 35 Doenghgij vunz Youzdaiq dang lingjdauj he dingq de yienghneix naeuz le, cungj doxcam naeuz: “De siengj bae mwnqlaw hawj gyoengqraeuz cimh mbouj raen de nex? Nanzdauh de ij bae mwnq doenghgij vunz Youzdaiq faensanq youq Hihlaz dih gak aen cingzciq bae cenzgangj naeuz gij vunz Hihlaz ni mah? 36 De naeuz: ‘Faenhsou ij cimh gou, hoeng cimh mbouj raen gou; gou youq dih deixfueng, faenhsou mbouj ndaej bae.’ Gij vah neix dwg gijmaz iqswh nex?” 37 Yiengq daengz ngoenz aen ciet neix hih ngoenz ceiq gatsat he le, caemh dwg ngoenz ceiq nauhyied he, Yehsuh youq gunghdenq Cangqdiq ndwn hwnjdaeuj doiq gij vunz gangj goggog naeuz: “Hauhnaeuz miz byawz hozhawq nex, couh daeuj laeng gou gw. 38 Sinq gou hih vunz couh luj ndaw Singqgingh ndaw de soj sij naeuz hih: Gij raemx gw ndaej miz mingh he daj ndaw sim de luj diuz dah yienghmwnq riuz okdaeuj.” 39 Yehsuh gangj doenghgij vah neix dwg ceij gij vunz sinq de he baezneix ndaej Hoenzsaenz Cangqdiq, hoeng, mwhde Hoenzsaenz Cangqdiq mijyaengz roengz daeuj haem, aenvih Yehsuh vanz mijyaengz ndaej najrongh haem. 40 Gij vunz dingq de gangj doenghgij vah neix le, couh miz mbangj hih vunz naeuz: “De cingqcaen dwg boux cenz gij vah Cangqdiq mwnq!” 41 Caemh miz mbangj hih vunz naeuz: “De dwg Gihduz!” Caemhcaiq miz mbangj hih vunz naeuz: “Gihduz ij baenz daj Gyahliqliq daeuj hwj? 42 Aenvih ndaw Singqgingh ndaw de mbouj dwg sij naeuz Gihduz dwg doengh daih gajlaeng Daqveiq he; ij dwg daj Bwzliqhaengz Singz, aen singz Daqveiq ok daeuj he maz?” 43 Gajlaeng gij vunz couh vih Yehsuh hih saeh hwj faen banghbaij. 44 Miz hih vunz ijsiengj gaemh dawz Yehsuh, hoeng, mij vunz gamj doengh fawz. 45 Gajlaeng, goengjsae dajbwiz caeuq gaep haeuj Fazliqcaiq baij hih vunz raen doengh boux souj gunghdenq Cangqdiq baij bae gaemh Yehsuh mwnq ma le, couh cam naeuz: “Faenhsou vihmaz mbouj gaemh dawz de ma hah?” 46 Doengh boux de han naeuz: “Gyoengqraeuz coengzlaiz mij'z vunz luj de yienghmwnq gangj vah!” 47 Gij vunz Fazliqcaiq baij dingq le, naeuz: “Faenhsou caemh ngaiz de coemx lo mah? 48 Nwjh miz Youzdaiq vunz dih lingjdauj caeuq Fazliqcaiq vunz sinq de hwj? 49 Caenhgag buek vunz mbouj rox Mohsih fazliz neix cij sinq de; buek vunz neix cungj hab mang!” 50 Yiengq gij vunz Fazliqcaiq baij ndaw de miz boux he heuh Nizgohdijmuj; de gaxgonq bae cimh Yehsuh goq hwj. De doiq gyoengqde naeuz: 51 “Mbouj sien dingqdingq de gangj gijmaz hwj caz yawj de guh gijmaz, nanzdauh gij fazliz raeuz couh ndaej dingh de miz coih lo mah?” 52 Gyoengqde dingq de yienghneix naeuz le, couh ndatheiq hwj doiq de naeuz: “Nanzdauh mwngz caemh dwg Gyahliqliq vunz haj? Mwngz bae cazcaz Singqgingh yawj, mwngz couh rox, Gyahliqliq mbouj veiq miz boux cenz gij vah Cangqdiq hih.”
1 Couh yienghneix, gajlaeng gak vunz cungj gag maj ranz lo, hoeng, Yehsuh dauq gag hwnj aen bya Gamjlamj bae. 2 Daengz ngoenz daixngeih daihcaeux, Yehsuh couh dauq maj gunghdenq Cangqdiq, gyoengq vunzlai caemh bae gunghdenq mwnq cimh de. Yiengq Yehsuh couh naengh roengzma, doiq gyoengq vunzlai gangj gvanhhih Cangqdiq dih ndei siuhsiz. 3 Couh youq mwhneix, doengh boux fazliz cenhgyah he caeuq doenghheij Fazliqcaiq baij he daiq boux vunzbaz guhyoux he daeuj, hawj de ndwn youq dangqnaj vunzlai hwj, 4 couh doiq Yehsuh naeuz: “Lauxsae, boux vunzbaz neix cingq caeuq vunz ninz nex, ngaiz gyoengqraeuz gaemh dawz cangqcouj. 5 Ciuq Mohsih dih fazliz, luj cungj vunzbaz neix hab aeu rin ma dub de rai. Yiengq, ciuq mwngz ma naeuz, ij baenzlawz doiq de nej?” 6 Gyoengqde yienghneix cam Yehsuh dwg siengj canggaep hawj de, siengj cimh cingqgiq ma gauq de. Hoeng, Yehsuh dauq mij leix gyoengqde, dauq goemz roengzma aeu lwgfawz ma youq lajdoem sij saw. 7 Gyoengqde raen de yienghneix mbouj ae mbouj o le, couh caenhrox saemjcam de. Gajlaeng de couh hwnq hwnjdaeuj, couh doiq gyoengqde naeuz: “Faenhsou ndaw neix miz byawz mij'z coih, byawz couh sien aeu rin ma dub de bax.” 8 De gangj gawq neix sat le, youhcaiq goemz roengzbae youq lajdoem sij saw. 9 Gij vunz dingq de gangj gawq vah neix le, cungj roxnginh najmomj, couh daj laux daengz oiq boux gaen boux deuz lo. Gajlaeng mwnq lij gag lw Yehsuh caeuq boux vunzbaz mwnq haem lo. 10 Yehsuh raen yienghneix le, couh hwnq hwnjdaeuj, doiq boux vunzbaz mwnq naeuz: “Mehsimj hax, gyoengqde nwj bae lah? Mij'z vunz dingh hawj mwngz miz coih haz?” 11 Boux vunzbaz mwnq dingq le, han naeuz: “Goengjsae, mij'z law.” Yehsuh dingq le, caiq doiq de naeuz: “Yiengq gou caemh mbouj dingh hawj mwngz miz coih nej. Mwngz maj lo bax; baezlaeng baeznaj mbouj ndaej caiq famh coih haem lo.” 12 Gajlaeng Yehsuh caiq doiq gyoengq vunz naeuz: “Gou couh dwg lajmbwn dih rongh; famz daeuj gaen gou hih couh mbouj caiq ngaiz byaij ndaw laep bae, couh ndaej miz gij rongh hawj vunz mbouj rox rai he.” 13 Gij vunz gaep haeuj Fazliqcaiq baij dingq le, couh doiq de naeuz: “Mwngz gag cingqmingz bonjfaenh mwngz; gij cingqmingz mwngz mbouj suenqsoq.” 14 Yehsuh han naeuz: “Cungjsuenq naeuz gou gag cingqmingz bonjfaenh gou, gij cingqmingz gou caemh dwg suenqsoq hih, aenvih gou rox gou dwg daj mwnqlaw daeuj, ij bae mwnqlaw; hoeng, faenhsou dauq mij rox gou dwg daj mwnqlaw daeuj, ij bae mwnqlaw. 15 Faenhsou buenqduenq vunz dwg ciuq vunz dih yawjfap ma buenqduenq; gou dauq mbouj buenqduenq vunz. 16 Cungjsuenq naeuz gou buenqduenq, gij buenqduenq gou cungj dwg deng hih, aenvih mbouj caenhgag dwg gou buenqduenq, vanzlij miz baij gou daeuj dih daxboh caeuq gou itheij buenqduenq. 17 Gij fazliz faenhsou mbouj dwg sij naeuz: ‘Song boux vunz cingqmingz cij suenqsoq’ maz? 18 Seizneix gou mbouj danhcij naeuz gag cingqmingz bonjfaenh gou, vanzlij miz baij gou daeuj hih daxboh cingqmingz gou.” 19 Gyoengqde dingq daengz neij le, couh cam naeuz: “Daxboh mwngz youq mwnqlaw?” Yehsuh han naeuz: “Faenhsou mbouj rox gou, caemh mbouj rox daxboh gou; hauhnaeuz faenhsou rox gou, yiengq faenhsou caemh ndaej rox daxboh gou lo.” 20 Yehsuh gangj doenghgij vah neix hih mwhde, dwg youq gunghdenq Cangqdiq dih mwnq bienqnaengz vunz coengq ngaenz he. Mwhde mij vunz gamj doengh fawz gaemh de, aenvih Cangqdiq dingh hih mwhde mijyaengz daengz. 21 Yehsuh vanzlij caiq doiq gyoengqde naeuz: “Gou ijvanh bae lo. Faenhsou baezneix ij cimh gou, hoeng, cimh mbouj raen gou, aenvih gou bae hih mwnq deixfueng mwnq faenhsou mbouj ndaej bae. Faenhsou caemh ij ngaiz rai gajlaeng hangx gij coih faenhsou.” 22 Gij vunz Youzdaiq dingq le, couh lwnh naeuz: “De naeuz: ‘Gou ij bae hih deixfueng, faenhsou mbouj ndaej bae.’ Nanzdauh de ij gag gaj bonjfaenh de mah?” 23 Yehsuh dingq gyoengqde yienghneix lwnh le, couh naeuz: “Faenhsou dwg daj lajmbwn daeuj hih, dwg haeuj lajmbwn hih. Hoeng, gou dwg daj gwnz he daeuj hih; gou mbouj haeuj lajmbwn. 24 Sojhij, gou doiq faenhsou naeuz, faenhsou ij ngaiz rai gajlaeng hangx gij coih faenhsou. Hauhnaeuz faenhsou mbouj sinq gou dwg boux gag miz he, gaengjdingq ngaiz rai youq gajlaeng hangx gij coih faenhsou.” 25 Gajlaeng, gyoengqde couh cam de naeuz: “Mwngz dwg bouxlawz?” Yiengq Yehsuh han naeuz: “Gou mbouj dwg senqsi cix naeuz faenhsou ni lo mah? 26 Gangj daengz faenhsou, gou miz haujlai saeh ij naeuz faenhsou, ij saemjbuenq faenhsou, hoeng, mboujguenj baenzlaw, baij gou daeuj hih boux mwnq dwg sinq ndaej goq hih; gou soj gangj hih cungj dwg dajlaeng de dingq hih.” 27 Gyoengqde vanzlij dingq mbouj ok Yehsuh soj gangj hih “baij gou daeuj hih boux mwnq” gawq neix dwg ceij Cangqdiq he. 28 Sojhij, Yehsuh youhcaiq doiq gyoengqde naeuz: “Couh dwg naeuz, mwh faenhsou dawz Vunz dih Daiqbiuj yingx hwnjdaeuj hih mwhde, faenhsou couh rox gou dwg boux gag miz he lo, rox gou mbouj dwg ciuq gij cawjeiq bonjfaenh gou ma guh hih, dauq dwg ciuq daxboh son gou hih ma gangj hih lah. 29 Baij gou daeuj hih boux mwnq, de mbouj vwt gou, caeuq gou youq, aenvih gou siengzseiz guh gij hab'eiq habhoz de he.” 30 Yehsuh gangj doenghgij vah neix hih mwhde, couh miz haujlai vunz sinq de lo. 31 Gajlaeng Yehsuh doiq doenghgij vunz sinq de he naeuz: “Hauhnaeuz faenhsou siengzseiz ciuq gou gangj hih yienghmwnq bae guh nex, couh cingqcaen dwg lwgsae gou lo. 32 Yienghmwnq faenhsou caemh rox saedsaeh lo; saedsaeh ndaej hawj faenhsou swqyouz.” 33 Gyoengqde dingq le, han naeuz: “Gyoengqraeuz dwg gij lwglan Yaqbwzlahhanj; gyoengqraeuz coengzlaiz mij guh hoiq goq. Mwngz ij baenzlwh naeuz: ‘Faenhsou ndaej swqyouz’ lo nej, gawq neix?” 34 Yehsuh dingq le, han gyoengqde naeuz: “Gou saedsaeh naeuz sou ni, moix it boux famh coih hih vunz cungj dwg guh hoiq coih. 35 Bouxhoiq mbouj ndaej yungjyenj louz youq ndaw ranz bouxcawj; caenhgag dwg lwg cij ndaej youq. 36 Sojhij, hauhnaeuz lwg Cangqdiq hawj faenhsou swqyouz nex, faenhsou couh ndaej cingqcaen swqyouz lo. 37 “Gou rox faenhsou dwg lwglan Yaqbwzlahhanj hah, hoeng, faenhsou siengj haih gou gaj gou, aenvih ndaw sim faenhsou mbouj caeng gij vah gou. 38 Gou doiq faenhsou soj gangj hih cungj dwg gou youq laeng boh gou mwnq soj yawjraen hih, hoeng, faenhsou soj guh hih cungj dwg dajlaeng boh faenhsou dingq daengz hih.” 39 Gajlaeng gyoengqde caiq naeuz: “Boh raeuz couh dwg Yaqbwzlahhanj hah!” Yehsuh caiq doiq gyoengqde naeuz: “Hauhnaeuz faenhsou cingqcaen dwg lwglan Yaqbwzlahhanj nex, faenhsou gaengjdingq guh gij Yaqbwzlahhanj soj guh hih. 40 Gou cijmboujgoq naeuz sou ni gou dwg daj Cangqdiq mwnq ndaej dingq daengz hih saedsaeh lah, hoeng, faenhsou dauq ij gaj gou. Hauhnaeuz dwg Yaqbwzlahhanj nex, de gaenhbaenj mbouj guh gij saeh neix. 41 Faenhsou dwg guh boh sou soj guh hih.” Gajlaeng gyoengqde han naeuz: “Gyoengqraeuz mbouj dwg lwgndai nej! Gyoengqraeuz ngamq miz boux daxboh dog, couh dwg Cangqdiq.” 42 Yehsuh caiq naeuz: “Yiengq, hauhnaeuz Cangqdiq dwg daxboh faenhsou, faenhsou gaengjdingq aiq gou, aenvih gou dwg dajlaeng de daeuj hih, dwg de baij gou daeuj hih, mbouj dwg gou gag daeuj hih, caemh dwg gou gaenq youq dineix lo. 43 Faenhsou vihmaz mbouj rox gij vah gou nej? Gou naeuz sou ni, dwg aenvih faenhsou mbouj miz bonjsaeh dingq rox gij vah gou. 44 Faenhsou baenjlaiz dwg gij lwg fangzvuengz, cij rox gaen boh sou soj siengj hih yienghmwnq ma guh saeh hih. Daj gaihcij de cix dwg boux gaj vunz he lo, coengzlaiz mbouj haeuj mbiengj saedsaeh he, aenvih ndaw sim de gaenhbaenj mbouj miz saedsaeh. De soqsingq cungj dwg gangj gyajvah he, dwg doenj gyajvah he. 45 Couh dwg vih yienghneix, gou gangj gij saedsaeh he naeuz sou ni, faenhsou couh mbouj sinq gou. 46 “Faenhsou ndaw neix miz byawz ndaej cingqmingz naeuz gou dwg miz coih he nej? Mbouj miz bax! Yiengq, giqyienz gou gangj gij saedsaeh he lo, faenhsou vihmaz cungj lij mbouj sinq gou nej? 47 Famz dwg haeuj buek vunz Cangqdiq hih gaengjdingq dingq gij vah de. Hoeng, faenhsou mbouj dwg haeuj buek vunz Cangqdiq, sojhij faenhsou couh mbouj dingq gij vah de.” 48 Gajlaeng doenghheij Youzdaiq vunz naeuz de naeuz: “Gyoengqraeuz naeuz mwngz dwg Sajmajliqyaq vunz, dwg ngaiz fangz doz he. Nanzdauh gyoengqraeuz naeuz loek lo mah?” 49 Yiengq Yehsuh han naeuz: “Gou mbouj dwg ngaiz fangz doz. Gou soenhgingq boh gou, hoeng, faenhsou dauq dawz gou ma yaeujyak gaijmbwq lah. 50 Gou mbouj vih bonjfaenh gou gouz najrongh, hoeng, miz boux he bang gou gouz, de caemh ndaej dingh ok deng caeuq mbouj deng. 51 Gou saedsaeh naeuz sou ni, ciuq gou gangj hih yienghmwnq bae guh hih vunz couh ndaej yungjyenj mbouj rox rai.” 52 Gajlaeng, gyoengqde vanzlij caiq doiq de naeuz: “Seizneix gyoengqraeuz engqgya rox mwngz ngaiz fangz doz lo! Yaqbwzlahhanj rai lo, doengh boux cenz gij vah Cangqdiq caemh rai lo, hoeng, mwngz dauq naeuz: ‘Hauhnaeuz vunz ciuq gij vah gou bae guh hih, couh yungjyenj mbouj rox rai lo.’ 53 Nanzdauh mwngz beij cojgoeng raeuz Yaqbwzlahhanj vanzlij rem? De gaenq rai lo, doengh boux cenz gij vah Cangqdiq caemh rai lo; mwngz suenq guxmaz vunz nex?” 54 Yiengq de han naeuz: “Hauhnaeuz gou gag haenh bonjfaenh gou nex, mij'z yungh. Hoeng, boux haenh gou hih dwg boh gou, couh dwg faenhsou naeuz hih faenhsou dih Cangqdiq lo. 55 Faenhsou mbouj rox de, hoeng, gou dauq rox de. Hauhnaeuz gou naeuz gou mbouj rox de, yiengq couh luj faenhsou yienghmwnq dwg yaeuh vunz lo. Hoeng, gou rox de hah, caemh ciuq de gangj hih yienghmwnq bae guh lo hah. 56 Cojgoeng faenhsou Yaqbwzlahhanj rox naeuz gou ij daeuj cungj angq vaujvauq hwj daengj ngoenz gou daeuj he; de baex raen gou he, engqgya angq.” 57 Gyoengqde dingq de yienghneix naeuz le, couh caiq doiq de naeuz: “Mwngz cungj mijyaengz daengz hajcib bi haem! Mwngz raen goq Yaqbwzlahhanj hajx?” 58 Gajlaeng Yehsuh han naeuz: “Gou saedsaed saehsaeh naeuz sou ni, mijyaengz miz Yaqbwzlahhanj haem, gou cix miz gou lo.” 59 Gyoengqde dingq doenghgij vah neix le, couh aeu rin ma ij dub de, hoeng, de gaenq daj gunghdenq Cangqdiq ok ma lo, ndoj deuz lo.
1 Yehsuh daj gunghdenq Cangqdiq ok ma ndoj deuz le, gajlaeng de youq dangjroen raen boux rafangz daiqseng baenz he. 2 Yiengq gyoengq lwgsae de couh cam de naeuz: “Lahbij, boux neix seng okdaeuj couh rafangz lo; yiengq dwg byawz famh coih nej? Dwg de haj cixnaeuz dwg bohmeh de nej?” 3 Yehsuh dingq le, han naeuz: “Bouxlawz cungj mbouj dwg. De mbouj dwg, bohmeh de caemh mbouj dwg; dwg Cangqdiq ij youq gwnz ndang de yienh ok gij geizmiuj he lah. 4 Domh seizneix lij doengxngoenz, gyoengqraeuz ij vaiqdi guh gij hong boux baij gou daeuj hih mwnq; mijn'x baex daengz mbwn laep he, couh mij'z vunz ndaej guh lo. 5 Gou youq lajmbwn mwhde, gou couh dwg rongh.” 6 Yehsuh gangj sat doenghgij vah neix le, couh byiq myaiz roengz lajdoem bae, couh aeu gij myaiz de ma caeuq doem nuz baenz naez hwj swk haeuj cehra boux rafangz mwnq bae. 7 Swk le, couh doiq boux de naeuz: “Mwngz bae aen daemz Sihlozyaq mwnq swiq bax.” (‘Sihlozyaq’ gij iqswh de dwg naeuz ‘baij bae’ dih iqswh.) Yiengq boux de caemh ciuq de naeuz hih yienghmwnq bae guh lo. Gajlaeng cehra de couh ndaej yawjraen lo; de couh maj lo. 8 Gajlaeng, doenghheij gekleiz de caeuq doenghheij vunz bienqnaengz raen de vaq haeux hih doenghheij vunz mwnq raen de yienghneix le, couh naeuz: “Neq, bouxn'x, mbouj dwg bienqnaengz naengh youq mwnqn'x vaq haeux hih maz?” 9 Yiengq miz hih vunz naeuz: “Dwg hwj, dwg de hwj.” Caemh miz hih vunz naeuz: “Mbouj dwg de law, cijmboujgoq luj de hwj lah.” De dingq le, couh gag naeuz: “Dwg hah, gou couh dwg boux rafangz mwnq lo.” 10 Gyoengqde dingq le, couh cam de naeuz: “Cehra mwngz ij baenz ndaej ndei hwj lah?” 11 De han naeuz: “Miz boux he, gij coh de heuh Yehsuh, de baenj naez hwj swk haeuj cehra gou daeuj, hawj gou bae aen daemz Sihlozyaq mwnq swiq. Gou caemh ciuq guh lo, gajlaeng cehra gou couh ndaej yawjraen lo.” 12 Gyoengqde dingq le, caiq cam naeuz: “Yiengq boux vunz mwnq seizneix youq dilaw hax?” De han naeuz: “Mbouj rox hah.” 13-14 Aenvih Yehsuh aeu myaiz nuz naez hwj yw ndei boux rafangz mwnq hih ngoenz mwnq dwg ngoenzyietbaeg, sojhij gyoengqde couh daiq de bae daengz doenghgij vunz Fazliqcaiq baij mwnq. 15 Yiengq gij vunz Fazliqcaiq baij mwnq couh cam boux rafangz mwnq baenzlawz ndaej yawjraen. Boux de dingq le, couh naeuz gyoengqde ni naeuz: “Boux de aeu naez swk haeuj cehra gou daeuj. Gou baex bae swiq he, couh doq ndaej yawjraen lo.” 16 Gajlaeng miz hih Fazliqcaiq baij vunz naeuz: “Boux mwnq gaengjdingq mbouj dwg daj Cangqdiq mwnq daeuj, aenvih de mbouj soenhsouj ngoenzyietbaeg.” Yiengq caemh miz mbangj hih Fazliqcaiq baij vunz dauq naeuz: “Hauhnaeuz boux vunz miz coih he, ij baenzlawz ndaej guh gij geizmiuj neix hwj?” Couh vih yienghneix hwj gyoengqde couh doxcwngq doxeuq hwnjdaeuj. 17 Gajlaeng, Fazliqcaiq baij vunz caiq cam boux rafangz ndaej ndei mwnq naeuz: “Giqyienz de ndaej hawj cehra mwngz ndaej yawjraen, yiengq mwngz naeuz de dwg guxmaz vunz nej?” Boux de han naeuz: “De dwg boux boux cenz gij vah Cangqdiq he.” 18 Hoeng, gij vunz Youzdaiq dang lingjdauj he vanzlij mbouj sinq boux vunz mwnq gaxgonq dwg rafangz gajlaeng ndaej raen he, couh heuh bohmeh de daeuj 19 cam bohmeh de naeuz: “Bouxn'x dwg daeglwg mwngz lwi? Faenhsou mbouj dwg naeuz de seng okdaeuj couh rafangz lo maz? Seizneix vihmaz engq ndaej yawjraen lo nej?” 20 Yiengq bohmeh de han naeuz: “De dwg daeglwg raeuz hah; raeuz rox de seng okdaeuj couh rafangz lo hah. 21 Gangj naeuz de seizneix baenzlaw ndaej yawjraen, dwg byawz hawj de ndaej yawjraen, raeuz couh mbouj rox lo. De seizneix gaenq hung baenz vunz lo; faenhsou gag cam de bax. De aiq naeuz sou ni bax.” 22 Bohmeh de yienghneix naeuz dwg aenvih gij vunz Youzdaiq dang lingjdauj he gaenq senqsi cix cimciek ndei naeuz hauhnaeuz miz byawz nginh naeuz Yehsuh dwg Gihduz nex, couh boenq byawz ok veiqdangz bae. 23 Sojhij bohmeh de cij doi naeuz “De gaenq hung baenz vunz lo; faenhsou gag cam de bax,” gawq neix. 24 Gajlaeng, gij vunz Youzdaiq dang lingjdauj he vanzlij caiq heuh boux rafangz ndaej ndei mwnq daeuj, doiq de naeuz: “Mwngz ij youq dangqnaj Cangqdiq gangj lauxsaed vah, gyoengqraeuz rox boux mwnq dwg boux miz coih he.” 25 Boux rafangz ndaej ndei mwnq dingq gyoengqde yienghneix naeuz le, couh han naeuz: “De dwg mbouj dwg boux miz coih he, gou mbouj rox; fanjcingq gou rox gienh saeh he, couh dwg gou yienzlaiz rafangz yawj mbouj raen, hoeng, seizneix gou ndaej yawjraen lo.” 26 Gajlaeng gyoengqde caiq cam naeuz: “De bang mwngz guh gijmaz hax? De baenzlawz yw cehra mwngz ndei hax?” 27 Boux de caiq han naeuz: “Gou gaenq naeuz faenhsou ni lo, hoeng, faenhsou mbouj dingq; vihmaz seizneix caiq ijsiengj dingq lo nej? Nanzdauh faenhsou caemh ijsiengj guh lwgsae de hajx?” 28 Gyoengqde dingq de yienghneix han le, couh aeuqheiq hwj ndaq de naeuz: “Mwngz cij dwg ndaek vunz mwnq hih lwgsae huh; gyoengqraeuz dwg Mohsih dih lwgsae lah! 29 Gyoengqraeuz rox Cangqdiq doiq Mohsih gangj vah goq, hoeng, ndaek vunz mwnq gyoengqraeuz gaenhbaenj mbouj rox de dwg dajlwh mwnqlaw daeuj.” 30 Boux mwnq caiq han naeuz: “Ndaek gijn'x engqgya geizheih lo; de yw cehra gou ndei, faenhsou dauq mij rox de dwg daj mwnqlaw daeuj! 31 Gyoengqraeuz rox Cangqdiq mbouj dingq vunz miz coih hih, caenhgag dingq doengh boux yawjnaek de, ciuq gij cawjeiq de bae guh hih vunz lah. 32 Daj cauh mbwn cauh deih doxdaeuj, mijyaengz dingqri naeuz miz vunz ndaej yw ndei vunz rafangz daiqseng baenz he goq. 33 Sojhij, hauhnaeuz boux vunz neix mbouj dwg daj Cangqdiq mwnq daeuj nex, gijmaz cungj guh mbouj daengz hih.” 34 Gyoengqde dingq de yienghneix gangj le, couh naeuz de naeuz: “Ndaek mwngz daj seng okdaeuj cungj dwg miz coih hih lo; gingqyienz gamj daeuj naeuz gyoengqraeuz nex!” Gyoengqde yienghneix naeuz le, couh boenq de ok veiqdangz ma lo. 35 Gajlaeng Yehsuh dingq daengz gij saeh neix le, couh bae cimh boux vunz mwnq, cam de naeuz: “Mwngz sinq Vunz dih Daiqbiuj lwi?” 36 Boux de dingq le, han naeuz: “Goengjsae hax, de dwg byawz nej? Hawj gou sinq de!” 37 Yiengq Yehsuh doiq de naeuz: “Mwngz gaenq raen de lo; seizneix caeuq mwngz gangj vah hih couh dwg de lo.” 38 Boux de dingq le, couh naeuz: “Bouxcawj hax, gou sinq!” De yienghneix naeuz le, couh gvih roengzma sax de. 39 Gajlaeng Yehsuh couh naeuz: “Gou daeuj lajmbwn dih muzdiz dwg ij yienh ok ndei caeuq yak lah, dwg ij hawj vunz rafangz ndaej yawjraen, vunz raraeh bienq rafangz lah.” 40 Yiengq youq mwnq hih doenghheij gaep haeuj Fazliqcaiq baij hih vunz dingq daengz gij vah neix le, couh naeuz: “Nanzdauh gyoengqraeuz caemh rafangz lo mah?” 41 Yehsuh han naeuz: “Hauhnaeuz faenhsou dwg rafangz nex, faenhsou couh mij'z coih lo; yiengq, giqyienz faenhsou naeuz faenhsou ndaej yawjraen vwz, faenhsou couh dwg vunz lij miz coih he lo.”
1 Yehsuh caiq naeuz: “Gou saedsaeh naeuz sou ni, famz mbouj daj bak lanz yiengz haeuj bae, dauq dwg daj lingh gok byenz haeuj bae hih cungj dwg vunzcaeg, dwg caeggeq. 2 Daj bak lanz yiengz haeuj bae hih couh dwg boux ciengx yiengz he. 3 Souj bakdou hih hoi dou hawj de, yiengz caemh dingq rox gij sing de. De ciuq coh heuh gyoengq yiengz de, daiq gyoengqde okbae. 4 De daiq gyoengq yiengz de okbae le, couh byaij youq gaxgonq daiq gyoengqde. Gyoengqde couh gaen de, aenvih gyoengqde dingq rox gij sing de. 5 Gyoengqde gaenhbaenj mbouj gaen gij vunzseng he; mbouj danhcij naeuz mbouj gaen, dauqfanj ij riq deuz, aenvih gyoengqde dingq mbouj rox gij sing de.” 6 Yehsuh gangj gij beijgangj neix naeuz gyoengqde ni, hoeng, gyoengqde gaenhbaenj mbouj rox de gangj hih dwg gijmaz iqswh. 7 Gajlaeng Yehsuh youhcaiq doiq gyoengqde naeuz: “Gou saedsaeh naeuz faenhsou ni, gou couh dwg bak lanz yiengz. 8 Famz daeuj gaxgonq gou hih cungj dwg vunzcaeg, cungj dwg caeggeq; yiengz caemh mbouj dingq gyoengqde. 9 Gou couh dwg bakdou; famz daj gou mwnqneix haeuj daeuj hih gaengjdingq ndaej gouq, caemh ndaej seizbienh haeuj ok, ndaej cimh miz nywj gw. 10 Caeggeq haeuj daeuj, dwg ij caeg, ij gaj, ij boqvaiq. Gou daeuj, dwg ij hawj vunz ndaej miz mingh; mbouj danhcij yienghneix, vanzlij hawj vunz saenghhoz ndaej ndei. 11 “Gou dwg boux ciengxyiengz ndei he, dwg vih yiengz hwj sijndaej diuz mingh bonjfaenh hih. 12-13 Beijgangj naeuz, boux ciengx yiengz mwnq mbouj dwg bouxcawj de, dwg vunz goq daeuj ciengx hih lah, yiengq, hauhnaeuz miz langz daeuj nex, de gaengjdingq riq deuz, mbouj leix gyoengq yiengz, aenvih gyoengq yiengz mbouj dwg gyoengq yiengz de; de cijmboujgoq dwg boux goq daeuj ciengx yiengz he lah. Yienghmwnq yiengz gaengjdingq ngaiz langz gaemh dawz, caemh ngaiz boenq sanq deuz liux. 14-15 “Gou dwg boux ciengxyiengz ndei he. Cingq luj boh rox gou, gou caemh rox boh. Caemh doxdoengz, gou rox gij yiengz gou, gij yiengz gou caemh rox gou. Gou nyienh'eiq vih gyoengqde hwj sijndaej diuz mingh gou. 16 Gou vanzlij miz yiengz mbouj youq ndaw lanz yiengz neix. Gou bietdingh ij daiq gyoengqde ma; gyoengqde caemh gaengjdingq ij dingq gij vah gou. Gou sojmiz hih yiengz cungj ij gyonj guh buek he, gvi hawj boux ciengx yiengz he. 17 “Boh aiq gou, aenvih gou sijndaej diuz mingh bonjfaenh gou, vih ij ndaej dauq aeu ma. 18 Mij'z vunz ndaej dued aeu diuz mingh gou; dwg gou gag sijndaej vwt lah. Gou miz gienz ndaej vwt, caemh miz gienz ndaej aeu dauqma. Gij neix dwg boh gou mingqlingq gou guh hih.” 19 Gij vunz Youzdaiq dingq gij vah neix le, caiq doxcwngq doxeuq hwnjdaeuj. 20 Miz mbangj hih vunz naeuz: “Vihmaz ij dingq de nej? De ngaiz fangz doz he! Vangh lo!” 21 Caemh miz mbangj hih vunz naeuz: “Ngaiz fangz doz hih vunz mbouj rox gangj gij vah neix nej! Fangz ndaej yw rafangz ndei hajx?” 22-23 Miz baez he seizdoeng, ngamqluj youq Yehluqsajlaengj miz aen ciet Hingqcuz Coih Gunghdenq Cangqdiq he. Yehsuh byaij goq gunghdenq Cangqdiq dih Sojlozmaenz soujlangz hih mwhde, 24 gij vunz Youzdaiq daeuj gvaengz de, doiq de naeuz: “Mwngz ij hawj raeuz nanq mwngz geijlwh caez hax? Hauhnaeuz mwngz dwg Gihduz nex, couh naeuz raeuz ni bax!” 25 Yehsuh dingq le, han naeuz: “Gou gaenq naeuz faenhsou ni goq lo, hoeng, faenhsou mbouj sinq. Gou hij gij coh daxboh gou ma soj guh hih saeh ndaej cingqmingz gou hah. 26 Cijmboujgoq faenhsou mbouj dwg gij yiengz gou, sojhij faenhsou mbouj sinq gou. 27 Gij yiengz gou dingq rox gij sing gou, gou caemh rox gyoengqde, gyoengqde caemh gaen gou. 28 Gou hawj gyoengqde ndaej seiqseiz lix, yungjyenj mbouj rox rai; byawz cungj mbouj ndaej daj ndaw fawz gou dued aeu gyoengqde. 29 Boux soengq gyoengqde hawj gou hih daxboh beij sojmiz hih veijdaq. Mij'z vunz ndaej daj ndaw fawz daxboh gou dued aeu gyoengqde. 30 Gou caeuq boh caemhdangq dwg boux he.” 31 Gij vunz Youzdaiq dang lingjdauj he dingqri de yienghneix han naeuz le, couh aeu rin ma ij dub de rai. 32 Gajlaeng de couh cam gyoengqde naeuz: “Gou youq dangqnaj faenhsou guh baenx haujlai yiengh ndeisaeh, dwg daxboh hawj gou guh hih; mbouj rox hih faenhsou dwg vih yienghlaw hwj ij aeu rin ma dub gou?” 33 Yiengq gyoengqde han naeuz: “Gyoengqraeuz mbouj dwg vih mwngz soj guh hih saeh hwj ij aeu rin ma dub mwngz nej, dauq dwg vih mwngz gangj gij vah daekcoih Cangqdiq he lah; mwngz cijmboujgoq dwg vunz hwj mah, dauq dawz bonjfaenh dangq guhbaenz Cangqdiq hwj lah!” 34 Gajlaeng Yehsuh naeuz: “Gij saw fazliz faenhsou ndaw de mbouj dwg sij naeuz: ‘Gou naeuz goq faenhsou dwg cwnz’ mah? 35 Yiengq, giqyienz Cangqdiq cungj naeuz doenghheij dingq daengz gij vah de hih vunz dwg cwnz vwz—gij vah ndaw Singqgingh couh mbouj ndaej duz bae lo— 36 gangjnaeuz dwg gou hwx, gou couh dwg daxboh senj okdaeuj baij daeuj lajmbwn he. Gou gag naeuz gou dwg daeglwg Cangqdiq, faenhsou vihmaz ij naeuz gou daekcoih Cangqdiq nej? 37 Yiengq, hauhnaeuz gou mbouj dwg guh gij saeh daxboh gou nex, faenhsou couh mboujyungh sinq gou hah. 38 Hoeng, hauhnaeuz gou dwg guh gij saeh daxboh gou nex, cungjsuenq naeuz faenhsou mbouj sinq gou hwjx, caemh wnggai sinq gou soj guh hih saeh haj. Yienghneix faenhsou couh rox cingsuj, gou caeuq daxboh dwg dangq boux he; daxboh caeuq gou caemh dwg dangq boux he.” 39 Gyoengqde dingq Yehsuh yienghneix naeuz le, couh ijsiengj gaemh dawz de, hoeng, de dauq ndaej ndoj deuz lo. 40 Gajlaeng, Yehsuh couh bae diuz dah Yozdanq hih baixdoeng de, couh dwg mwnq gaxgonq Yozhanq youq mwnq sijlij hawj vunz hih mwnq youq. 41 Yiengq miz haujlai vunz bae de mwnq naeuz: “Gannaeuz Yozhanq mij guh gijmaz geizmiuj hih saeh lah, hoeng, de gangj gvanhhih boux vunz neix sojmiz hih saeh cungj dwg saedsaeh hih.” 42 Gajlaeng mwnq miz haujlai vunz cungj sinq Yehsuh.
1 Youzdaiq Saengj dih aen mbanj Bwzdaqniz miz boux vunz bingh he, gij coh de heuh Lahsajluq. Daeg vunz bingh neix de miz song boux daxce, couh dwg Majdaq caeuq Majliqyaq. 2 Boux Majliqyaq neix couh dwg boux aeu gij youz rang fwtfwt he ma cat haeuj gij ha Yehsuh caiq aeu gij byoem bonjfaenh de ma swk hawq gij ha Yehsuh hih boux vunzbaz mwnq lo. 3 Daegnuengx de Lahsajluq bingh le, song daixsiujheiz de couh baij vunz bae naeuz Yehsuh ni naeuz: “Bouxcawj gou hax, mwngz aiq hih Lahsajluq bingh lo.” 4 Yehsuh dingq le, couh naeuz: “Lahsajluq bingh, mbouj bingh daengz rai bae law; de bingh dwg vih ij hawj Cangqdiq najrongh caeuq daeglwg Cangqdiq najrongh lah.” 5 Yehsuh soqlaiz cungj aiq Majdaq caeuq dahnuengx de caeuq daegnuengx de Lahsajluq. 6 Gannaeuz de rox Lahsajluq bingh lo, hoeng, vanzlij youq mwnq lai youq song ngoenz. 7 Lai youq song ngoenz le, de cij doiq gij lwgsae de naeuz: “Gyoengqraeuz dauq maj Youzdaiq Saengj bax.” 8 Yiengq doengh boux lwgsae de han de naeuz: “Lahbij, duenh gaxgonq, gij vunz Youzdaiq dang lingjdauj he ij aeu rin ma dub mwngz rai; mwngz vanzlij ijsiengj bae mwnq haem haj?” 9 Yehsuh han naeuz: “Doengxngoenz mbouj dwg miz cibngeih aen cunghdaeuz maz? Doengxngoenz vunz byaij roen ndaej raen rongh mbouj ngaiz laemx. 10 Doengxhaemh byaij roen, mbouj miz rongh, couh ngaiz laemx.” 11 De gangj doenghgij vah neix sat le, vanzlij caiq naeuz: “Baengzyoux raeuz Lahsajluq ninz ralaep lo; gou bae heuh de singj gaenq.” 12 Doengh boux lwgsae de dingq le, caiq naeuz: “Bouxcawj hax, hauhnaeuz de ninz ralaep nex, vanzlij ndaej singj hwnjdaeuj hih.” 13 Gizsaed, Yehsuh gangj gij vah neix dih iqswh dwg naeuz Lahsajluq gaenq rai lo; hoeng, doenghgij lwgsae de dauq naemqnaeuz de naeuz de dwg luj bienqnaengz ninz ralaep lah, 14 guh hwj Yehsuh cij sohsoh naeuz gyoengqde ni naeuz: “Lahsajluq de rai lo; 15 vih ij hawj faenhsou sinq gou, yienghneix dauq baenz, de mijyaengz rai mwhde, gou mbouj youq henz de. Seizneix gyoengqraeuz bae de mwnq bax.” 16 Yiengq miz boux lwgsae gij coh de heuh Dohmaj he (gij vunz caemh heuh de Dihdujmaj), de doiq gyoengq lwgsae doih naeuz: “Gyoengqraeuz caemh gaen lauxsae bae, gaen de itheij rai bax.” 17 Yehsuh bae daengz aen mbanj Bwzdaqniz le, rox naeuz Lahsajluq gaenq rai gaenq moek roengz moh bae ndaej seiq ngoenz lo. 18 Aenvih Bwzdaqniz liz Yehluqsajlaengj mbouj geijlwh gyae, daihgaiq miz roek leix roen yienghneix, 19 sojhij, miz haujlai vunz daeuj yawj Majdaq caeuq Majliqyaq, vued song boux de. 20 Yiengq Majdaq dingq naeuz Yehsuh daeuj lo, couh ok bae ciep de, hoeng, Majliqyaq dauq naengh youq ndaw ranz. 21 Majdaq bae raen Yehsuh le, couh doiq de naeuz: “Bouxcawj gou hax, hauhnaeuz mwhde mwngz youq dineix nex, daegnuengx gou couh mbouj ngaiz rai lo! 22 Hoeng, mboujguenj seizlaw gou cungj rox, rox mwngz gouz Cangqdiq gijmaz, Cangqdiq cungj hawj mwngz gijmaz.” 23 Yehsuh dingq le doiq de naeuz: “Daegnuengx mwngz gaengjdingq ndaej dauqlix.” 24 Majdaq dingq le, naeuz: “Gou rox, youq ngoenz ciqgyaiq gatsat, vunz dauqlix hih mwhde, de gaengjdingq dauqlix.” 25 Gajlaeng, Yehsuh caiq naeuz: “Gou couh dwg dauqlix, couh dwg doenj mingh; sinq gou hih vunz, gannaeuz rai hoh lah, hoeng, cungj vanzlij ndaej dauqlix. 26 Famz sinq gou hih vunzlix, de gaengjdingq yungjyenj mbouj rox rai. Mwngz sinq lwi?” 27 Majdaq dingq le, couh han de naeuz: “Bouxcawj gou hax, gou sinq hah. Gou sinq mwngz dwg Gihduz, dwg lwg Cangqdiq, dwg Cangqdiq baij daeuj lajmbwn hih.” 28 Majdaq gangj sat gij vah neix le, couh dauq ma caegcaeg naeuz dahnuengx de Majliqyaq ni, naeuz: “Lauxsae daeuj huh; de heuh mwngz bae.” 29 Majliqyaq dingq le, couh nyungjnyat vaiq riq bae cimh Yehsuh. 30 Mwhde, Yehsuh vanzlij mijyaengz haeuj mbanj, vanzlij youq mwnq Majdaq bae ciep de hih mwnq. 31 Yiengq gij vunz daeuj vued Majliqyaq hih doenghgij vunz mwnq raen de nyungjnyat riq okbae le, couh gaen bae, naemqnaeuz de bae aen moh daegnuengx de mwnq daej lah. 32 Majliqyaq bae daengz Yehsuh mwnq le, couh bomz roengz dangqnaj Yehsuh bae daej naeuz: “Bouxcawj gou hax, hauhnaeuz mwngz senqsi cix youq dineix nex, daegnuengx gou couh mbouj ngaiz rai lo.” 33 Yehsuh raen Majliqyaq daej caeuq doenghheij vunz gaen de daeuj mwnq daej le, cungj gangznaek siengsim ij rai bae, 34 couh cam naeuz: “Faenhsou dawz de moek youq mwnqlaw lah?” Gyoengqde han naeuz: “Bouxcawj hax, cingj mwngz daeuj yawj bax.” 35 Yehsuh yienghneix cam le, caemh siengsim hwj daej lo. 36 Gij vunz Youzdaiq raen de daej le, couh naeuz: “Yawj hax, de baenxlai aiq Lahsajluq!” 37 Hoeng, miz mbangj hih vunz engq naeuz: “Giqyienz de ndaej hawj rafangz bienq raraeh vwz, nanzdauh de mbouj ndaej hawj vunz mbouj rai haj?” 38 Yehsuh dingq daengz gij vunz gangj gij vah neix le, engqgya siengsim. Gajlaeng de bae daengz henz moh Lahsajluq. Aen moh de dwg youq ndaw conghgamj he; bakcongh de miz ngauq rin he caet hwj. 39 Yehsuh raen yienghneix le, couh naeuz: “Nod ngauq rin deuz!” Gajlaeng daxce Lahsajluq Majdaq doiq Yehsuh naeuz: “Bouxcawj gou hax, de gaenq rai ndaej seiq ngoenz lo, gaenq haeu lo.” 40 Yehsuh dingq de yienghneix naeuz le, couh naeuz: “Gou mbouj dwg naeuz mwngz ni goq lo maz, cijaeu mwngz sinq, couh ndaej raen gij akak rengzrengz bonjsaeh Cangqdiq lo mah?” 41 Gij vunz dingq Yehsuh yienghneix naeuz le, couh nod ngauq rin deuz. Yehsuh couh ngiengx raeuj hwnjdaeuj yawj hwnj gwnzmbwn bae, couh gouz Cangqdiq naeuz: “Boh hax, gou docih mwngz, aenvih mwngz gaenq dingq gou gouz mwngz lo. 42 Gizsaed gou rox mwngz siengzseiz cungj dingq gou gouz mwngz hih. Gou yienghneix naeuz cungj dwg vih gij vunz youq seiqhenz ndang gou lah, dwg vih ij hawj gyoengqde sinq gou dwg mwngz baij daeuj hih.” 43 De gangj sat doenghgij vah neix le, couh hemq naeuz: “Lahsajluq, ok ma!” 44 Yehsuh yienghmwnq naeuz le, Lahsajluq boux vunzrai mwnq couh ok ma lo. Gij fawz gij ha de miz boiq gyuj hwj, baj naj de caemh aeu boiq ma gyuj hwj. Yehsuh raen yienghneix le, couh doiq gyoengq vunz naeuz: “Gej gij boiq gyuj de bae; hawj de maj bax!” 45 Gajlaeng, miz haujlai vunz daeuj yawj Majliqyaq he raen Yehsuh soj guh hih saeh le, couh sinq de lo. 46 Hoeng, caemh miz mbangj hih vunz engq dawz Yehsuh soj guh hih saeh bae gangj naeuz doenghgij vunz gaep haeuj Fazliqcaiq baij he ni. 47 Gajlaeng doenghheij vunz gaep haeuj Fazliqcaiq baij he caeuq doenghheij goengjsae dajbwiz he couh doxcomz hwnjdaeuj cimciek naeuz: “Boux vunz bouxn'x, guh baenx haujlai geizmiuj hih saeh, gyoengqraeuz ij baenz guh nej? 48 Hauhnaeuz hawj de yienghneix guh roengzbae nex, hoengjlau sojmiz hih vunz cungj sinq de hwj nauh luenh lah. Daengz mwhmwnq, gij bing Lozmaj gaengjdingq daeuj ciemq aeu gunghdenq Cangqdiq, ciengj aeu gij vunz raeuz.” 49 Yiengq doenghheij vunz mwnq ndaw de miz boux he, gij coh de heuh Gaihyaqfaz, couh dwg bi mwnq hih boux goengjsae dajbwiz daeuzdaeuz he. De naeuz: “Faenhsou gijmaz cungj mbouj rox! 50 Faenhsou mbouj rox haj, de, boux vunz he ndaej dingj baenx cenz minzcuz hih vunz rai, mbouj hawj gyoengqde rai. Nanzdauh faenhsou yawj mbouj ok de rai doiq faenhsou miz ik haj?” 51 Gizsaed boux de gangj gij vah neix gaenhbaenj mbouj dwg gij cawjeiq bonjfaenh de, dauq dwg vih de bi mwnq guh goengjsae dajbwiz daeuzdaeuz, Cangqdiq hawj de ma gangj goq naeuz Yehsuh baezneix ij dingj gij vunz Youzdaiq rai; 52 mbouj danhcij naeuz dingj gyoengqde rai, vanzlij ij dawz faensanq youq gak dieg hih gij lwg Cangqdiq doxcomz hwnjdaeuj gaep guh buek vunz he. 53 Couh yienghneix, daj mwhmwnq hwnj, doenghheij vunz mwnq couh gaihcij doxyuk hwnjdaeuj giqvaq ij gaj Yehsuh lo. 54 Gajlaeng Yehsuh rox daengz yienghneix le, de couh mbouj caiq seizbienh youq dieg Youzdaiq byaij haem lo. De couh bae aen singz gaenh aen ndoi he, aen singz neix heuh Hijfazlenz he, bae mwnq caeuq gyoengq lwgsae youq. 55 Youzdaiq vunz hih aen ciet Bienqgoqbae mwnq couh ij daengz lo. Gij vunz cungj daj lajmbanj bae Yehluqsajlaengj, cwnjbiq ij youq goq aen ciet neix cihsenz guh ndei gancengh ngiqsiz. 56 Gij vunz daengz Yehluqsajlaengj le, cungj dauqcawq bae cimh Yehsuh, hoeng, cimh mbouj raen de. Gajlaeng gij vunz cungj youq gunghdenq Cangqdiq mwnq doxcam naeuz: “Mwngz raen baenzlaw yiengh hax; Yehsuh mbouj daeuj goq ciet lo mah?” 57 Gizsaed mwhde doenghheij goengjsae dajbwiz caeuq doenghheij gaep haeuj Fazliqcaiq baij hih vunz cungj senqsi cix doiq gij vunz naeuz goq hauhnaeuz miz bouxlawz rox Yehsuh youq mwnqlaw hih, couh ij bauqgauq naeuz gyoengqde ni, hawj gyoengqde haemq ndei ndaej bae gaemh dawz de.
1 Aen ciet Bienqgoqbae dih roek ngoenz gaxgonq de, Yehsuh bae daengz Bwzdaqniz, couh dwg de heuh hawj Lahsajluq daj rai ndaej dauqlix dih aen mbanj mwnq. 2 Yiengq ndaw ranz Lahsajluq rox de daeuj le, couh loengh haeux loengh byaek cingj de gw, hoeng, Majdaq guh loengh he, Lahsajluq guh buenx Yehsuh gw he. 3 Majliqyaq nej, Majliqyaq dawz bingz youz naqdaz cwnz he rang fwtfwt cienfanh bengz he, bingz de dwg miz gaen he, dawz daeuj cat gij ha Yehsuh. Cat le, caiq aeu gij byoem bonjfaenh de ma swk hawj de, guh hwj ndaw ranz gyoengqde cungj rang fwtfwt bae. 4 Yiengq Yehsuh miz boux lwgsae he, couh dwg boux ijvanh buenqduz cuzmaiq de he, Youzdaq, dwg Gyahloz vunz he, de dauq doiq Majliqyaq naeuz: 5 “Mwngz vihmaz mbouj dawz gij youz rang neix bae hai—gij youz rang neix gijmaj hai ndaej sambak gaiq ngaenz—aeu gij ngaenz de faen hawj vunz gungz nej?” 6 Youzdaq yienghneix naeuz gaenhbaenj mbouj dwg naeuz gvansim vunz gungz; gizsaed de dauq dwg boux caeggeq he lah. De dwg guh boux guenj gij ngaenz Yehsuh gyoengqde he; de siengzseiz dam aeu gij ngaenz daixgya. 7 Yehsuh dingq le, couh naeuz: “Ajcaih de lo! De louz gij youz rang neix, baenjlaiz caemh dwg vih ij youq moek gou hih cihsenz aeu ma cat gou lah. 8 Gangj daengz vunz gungz, youq seiqhenz faenhsou siengzseiz cungj miz vunz gungz, hoeng, gou mbouj ndaej seiqseiz caeuq faenhsou youq hah.” 9 Yiengq miz haujlai vunz rox naeuz Yehsuh youq Bwzdaqniz le, couh bae mwnq yawj de; mbouj danhcij naeuz bae yawj de, caemh vanzlij ijsiengj yawjyawj dauqlix dih Lahsajluq. 10 Sojhij doengh goengjsae dajbwiz he couh giqvaq daiqlienz Lahsajluq cungj ij gaj, 11 aenvih miz haujlai vunz cungj vih Lahsajluq dih yienzyouz hwj mbouj caeuq gyoengqde, dauq bae gaen Yehsuh lah. 12 Yiengq daengz daixngeih ngoenz, miz haujlai vunz bae Yehluqsajlaengj goq ciet. Gyoengq vunz rox naeuz Yehsuh ij bae Yehluqsajlaengj le, 13 couh dawz mbaw rong bae ciep de, angq hwj hemq naeuz: “Vanqseiq! Vanqseiq Cangqdiq baij daeuj dih! Vanqseiq! Vanqseiq Hijswzlez dih vuengz!” 14 Mwhde Yehsuh dwg gwih duz lawz heijvunz bae he, cingq luj ndaw Singqgingh ndaw de sij naeuz: 15 Yehluqsajlaengj dih vunz hax, faenhsou gaejyungh lau; goengjvuengz faenhsou gwih lawz daeuj lo. 16 Mwhde, gij lwgsae Yehsuh gaenhbaenj mbouj rox fatseng youq dangqnaj gyoengqde hih saeh, itcig daengz Yehsuh dauqlix le, cij ngeix daengz ndaw Singqgingh soj sij naeuz hih dwg ceij de sij he, caemh dwg youq gwnz ndang de lingz okdaeuj lo. 17 Doenghheij vunz caenra raen Yehsuh heuh hawj Lahsajluq dauqlix daj ndaw moh byaij okdaeuj hih doenghheij vunz mwnq cungj mbouj dingz hih cenzgangj cingqmingz gij saeh neix. 18 Yiengq haujlai vunz dingq daengz Yehsuh guh hih gij geizmiuj neix le, cungj bae ciep Yehsuh. 19 Gajlaeng doenghheij gaep haeuj Fazliqcaiq baij hih vunz cungj naeuz: “Gyoengqraeuz mij'z yungh huh! Yawj veiq, baenx cenz lajmbwn hih vunz cungj gaen de liux lo!” 20 Mwhde, bae Yehluqsajlaengj goq ciet hih vunz miz geij boux Hihlaz vunz. 21 Gyoengqde bae cimh Feihliz (Feihliz dwg Gyahliqliq Saengj Bwzcaiqdaq hih vunz), bae gouz de naeuz: “Goengjau hax, gyoengqraeuz siengj cimh Yehsuh.” 22 Feihliz dingq le, couh naeuz Anhdwzlez ni, gajlaeng song boux de couh bae naeuz Yehsuh ni. 23 Yehsuh dingq le couh naeuz: “Vunz dih Daiqbiuj ndaej najrongh hih mwhde couh ij daengz lo. 24 Gou saedsaeh naeuz sou ni, ceh mienh he mbouj doek roengz doem cungj dwg ceh he; hoeng, hauhnaeuz ceh de doek roengz doem bae, couh ndaej did hwnjdaeuj, couh ndaej ok baenx haujlai mienh lo. 25 Caemh doxdoengz, it boux vunz hauhnaeuz de cij rox baux diuz mingh bonjfaenh hih, dauq ngaiz vwt mingh; doengh boux mbouj yawjnaek diuz mingh bonjfaenh hih, dauq ndaej baux mingh—mbouj danhcij naeuz ndaej baux, vanzlij ndaej baux daengz seiqseiz. 26 Gou youq mwnqlaw, bouxhoiq gou caemh ij youq mwnqlaw. Couh dwg naeuz byawz siengj daeuj swqhaeuh gou hih, couh bietdingh ij daeuj gaen gou. Swqhaeuh gou hih vunz, daxboh gaengjdingq hawj de ndaej najrongh.” 27 Yehsuh vanzlij caiq naeuz: “Seizneix gou simnyap ij rai bae, mbouj rox hih ij gangj gijmaz ndei. Gou wnggai gag naeuz: ‘Boh hax! Gouz mwngz gouq gou mbouj hawj gou ngaiz souh daengz gij saeh mwnq!’ maz? Hoeng, gou cingq dwg vih gij neix hwj daeuj hih lah.” 28 De yienghneix naeuz le, couh hemq naeuz: “Boh hax! Muengh mwngz najrongh miz mingz!” De hemq sat le, couh miz sing daj gwnzmbwn cenz roengzdaeuj naeuz: “Gou gaenq najrongh lo, gaenq ok mingz lo; gou vanzlij ij najrongh haem, ij miz mingz haem.” 29 Yiengq ndwn youq mwnq hih vunz dingqri gij sing neix le, miz mbangj hih vunz naeuz: “Byajraez lo!” Miz mbangj hih vunz naeuz: “Miz bouxcai Cangqdiq caeuq de gangj vah hwj!” 30 Hoeng, Yehsuh doiq gyoengqde naeuz: “Gij sing neix mbouj dwg vih gou yiengj nej, dauq dwg vih faenhsou hwj yiengj lah. 31 Seizneix dwg aen seiqgyaiq neix hih vunz souh daengz saemjbuenq hih mwhde lo. Aen seiqgyaiq neix hih vuengz, Sajdanq, couh ij ngaiz luetgyeuq lo. 32 Gangj daengz gou, gou daj lajdoem ij ngaiz yingx hwnjdaeuj hih mwhde, gaengjdingq ndaej hawj baenx cenz lajmbwn hih vunz daeuj gvi haeuj gou.” 33 Yehsuh gangj gij vah neix dwg ceij bonjfaenh de ij baenzlaw ngaiz rai. 34 Gyoengq vunz dingq le, couh cam naeuz: “Gyoengqraeuz rox daengz ndaw Singqgingh ndaw de sij naeuz Gihduz dwg seiqseiz lix hih, hoeng, mwngz vihmaz naeuz Vunz dih Daiqbiuj ij ngaiz yingx hwnjdaeuj rai nej? Mwngz naeuz hih dwg byawz nej?” 35 Yehsuh dingq le, dauq yungh gij beijgangj he ma han naeuz: “Rongh youq faenhsou dineix mbouj geij caez lo; faenhsou ij domh gij rongh vanzlij youq, couh ij vaiqdi byaij lo, mienx daengz laep le, yawj mbouj raen roen, mbouj rox hih ij byaij goq mwnqlaw bae lo. 36 Sojhij, faenhsou wnggai domh vanzlij miz rongh couh ij sinq gij rongh neix; yienghneix faenhsou couh ndaej bienqbaenz gij lwg rongh lo.” Yehsuh gangj sat gij vah neix le, couh bae lo, mbouj hawj vunz raen de lo. 37 Yehsuh gannaeuz youq dangqnaj gyoengqde guh baenx haujlai geizmiuj hih saeh hwj ndaej cingqmingz naeuz de dwg byawz lah, hoeng, gyoengqde vanzlij mbouj sinq de. 38 Yienghneix ngamq lingz ok gij vah Hijcaiqyaq boux cenz gij vah Cangqdiq neix gangj goq he naeuz: Cangqdiq hax, miz byawz sinq raeuz soj cenz hih siuhsiz nej? Gij rengz mwngz gaenq yienh hawj vunz raen lo, hoeng vunz mbouj sinq hah. 39 Vunz vihmaz mbouj ndaej sinq dwg aenvih boux de caemh vanzlij caiq miz gawq he naeuz: 40 Cangqdiq hawj gyoengqde rafangz, hawj aen sim gyoengqde gyeng, mijn'x nex, gyoengqde yawj ndaej raen, ndaej rox nex, couh gaij goqma, yiengq gou couh ij ngaiz yw gyoengqde ndei. 41 Hijcaiqyaq gangj goq gij vah neix dwg aenvih Cangqdiq hawj de ndaej raen Yehsuh najrongh veijdaq; de dwg ceij de gangj hih, sojhij de cij yienghneix gangj. 42 Gannaeuz yienghneix lah, hoeng, caemh miz haujlai Youzdaiq vunz dang lingjdauj he sinq Yehsuh, cijmboujgoq gyoengqde mbouj gamj hawj gij vunz gaep haeuj Fazliqcaiq baij he rox, lau gyoengqde boenq ok veiqdangz bae, 43 aenvih gyoengqde yawjnaek vunz haenh, mbouj yawjnaek Cangqdiq haenh. 44 Miz baez he, Yehsuh hemq goggog naeuz: “Sinq gou hih, gizsaed mbouj dwg sinq gou, dauq dwg sinq boux baij gou daeuj hih lah. 45 Yawjraen gou hih couh dangq yawjraen boux baij gou daeuj mwnq lo. 46 Gou daeuj dwg ij guh gij rongh lajmbwn, hawj gij vunz sinq gou he mbouj youq ndaw laep. 47 “Doenghheij dingqri gij vah gou lo, hoeng, mbouj ciuq gij vah gou bae guh hih, gou mbouj saemjbuenq de nej, aenvih gou daeuj mbouj dwg ij dingh coih hawj vunz, dauq dwg ij gouq vunz lah. 48 Doengh boux yiem gou, mbouj nginh gou hih, mbouj siengj dingq gij vah gou hih, couh ij ngaiz saemjbuenq; gou soj gangj hih vah, daengz ngoenz gatsat, couh ndaej cingqmingz de miz coih, 49 aenvih gou mbouj dwg ciuq gij cawjeiq gou ma gangj hih; dwg baij gou daeuj hih daxboh hawj gou naeuz gijmaz gou couh naeuz gijmaz. De hawj gou baenzlaw gangj gou couh baenzlaw gangj. 50 Gou rox de dih mingqlingq, couh dwg hawj vunz ndaej seiqseiz lix. Sojhij gou gangj hih vah couh dwg daxboh hawj gou gangj hih.”
1 Ijvanh daengz aen ciet Bienqgoqbae, Yehsuh rox bonjfaenh de couh ij caeuq lajmbwn doxbiek, maj daengz daxboh de Cangqdiq mwnq bae lo. De soqlaiz cungj dwg aiq gij vunz de he, caemh dwg itcig aiq roengzbae. 2 Yehsuh caeuq gyoengq lwgsae de gw haeuxcaeuz hih mwhde, fangzvuengz gaenq dawz gij ij cuzmaiq Yehsuh hih naemjfap coengq haeuj ndaw sim Youzdaq, daeglwg Sihmaenz, Gyahloz vunz bae lo. 3 Yehsuh caemh rox Cangqdiq Bohmbwn gaenq dawz sojmiz hih gienz gyau hawj bonjfaenh de liux lo, caemh rox bonjfaenh de dwg daj Cangqdiq mwnq daeuj he, couh ij dauq maj Cangqdiq mwnq bae lo le, 4 couh daj henz daiz gw haeux mwnq ndwn hwnjdaeuj, couh duet diuz buh baixrog de, caiq aeu mbaw sujbaq he ma cug rwet hwj, 5 couh bae aeu buenz raemx he ma swiq ha hawj gyoengq lwgsae de, caemh aeu mbaw sujbaq cug rwet mwnq ma swk ha hawj gyoengqde. 6 Gajlaeng ij swiq daengz Sihmaenz-Bijdwz lo. Yehsuh bae daengz dangqnaj Bijdwz le, Bijdwz cam naeuz: “Bouxcawj gou hax, mwngz ij bang gou swiq ha haj?” 7 Yehsuh han naeuz: “Mwngz seizneix mbouj rox gou soj guh hih, hoeng, baezneix mwngz gaengjdingq rox.” 8 Bijdwz dingq le, naeuz: “Gou gyenhgyez mbouj hawj mwngz swiq gij ha gou!” Hoeng, Yehsuh dauq han de naeuz: “Hauhnaeuz gou mbouj swiq gij ha mwngz, yiengq mwngz couh caeuq gou mij'z maz gvanhaeh lo.” 9 Sihmaenz-Bijdwz dingq yienghneix le, couh naeuz: “Bouxcawj hax, hauhnaeuz dwg yienghneix nex, mwngz mbouj danhcij ij gag swiq gij ha gou nej, daiqlienz gij fawz ndaek raeuj gou cungj ij swiq cij ndaej!” 10 Gajlaeng Yehsuh naeuz: “Famz swiq ndang goq hih vunz baenx cenz ndang cungj dwg cengh hih. Cijaeu swiqswiq ha couh ndaej lo. Faenhsou dwg cengh hih, hoeng, mbouj dwg bouxboux cungj cengh.” 11 (Yehsuh gangj gawq “Mbouj dwg bouxboux cungj cengh” gawq vah neix dwg aenvih de gaenq rox byawz ij cuzmaiq de lo, sojhij de cij yienghneix gangj he.) 12 Yehsuh swiq ha hawj gyoengqde liux le, couh doiqyungz daenj diuz buh baixrog de, caiq dauq maj henz daiz mwnq gaxgonq de, couh cam naeuz: “Gou daxbaenh bang faenhsou soj guh hih, faenhsou rox lwi? 13 Faenhsou heuh gou ‘Lauxsae’ heuh gou ‘Bouxcawj,’ faenhsou heuh ndaej deng hih, aenvih gou baenjlaiz couh dwg. 14 Gou dwg faenhsou hih cawj, dwg faenhsou hih lauxsae, hoeng, gou vanzlij bang faenhsou swiq ha; faenhsou engqgya ij wnggai doxbang swiq ha lo. 15 Gou guh bangjyangq hawj faenhsou dwg vih ij hawj faenhsou ciuq gou soj guh hih bae guh. 16 Gou saedsaeh naeuz sou ni, bouxhoiq mbouj ndaej beij bouxcawj ak, baij daeuj hih boux mwnq caemh mbouj ndaej beij boux baij de daeuj mwnq ak. 17 Yiengq, hauhnaeuz faenhsou rox gij dauhleix neix caemh ciuq gij dauhleix neix bae guh hih, couh miz fuk lo. 18 “Gou gangj doenghgij vah neix mbouj dwg doiq faenhsou sojmiz hih vunz gangj law. Gou doiq gou soj senj hih vunz cungj rox cingsuj, cingq luj ndaw Singqgingh ndaw de sij naeuz: Caeuq gou caemh daiz gw haeux, hoeng, dauq aeu ha ma dik gou. Gawq vah neix gaengjdingq ij lingz okdaeuj hih. 19 Gou youq gij saeh neix mijyaengz fatseng cihsenz sien naeuz sou ni, hawj faenhsou daengz gij saeh neix fatseng hih mwhde, faenhsou couh sinq gou dwg boux gag miz he lo. 20 Gou caiq saedsaeh naeuz faenhsou ni, famz daih boux gou baij daeuj hih, caemhdangq daih gou lo; famz daih gou hih, caemhdangq daih boux baij gou daeuj hih lo.” 21 Yehsuh gangj gij vah neix le, cungj siengsim hwj ij rai bae, couh naeuz: “Gou saedsaeh naeuz sou ni, faenhsou ndaw neix miz boux he ij cuzmaiq gou.” 22 Yehsuh yienghneix gangj le, gyoengq lwgsae de cungj boux yawj boux hwj mbouj rox hih de naeuz hih dwg bouxlawz. 23-24 Yiengq Sihmaenz-Bijdwz couh yawj haeuj boux lwgsae Yehsuh haenjheiq he bae, boux de naengh youq henz ndang Yehsuh, yiengq de vaekvaek raeuj, yaepyaep ra hawj de cam Yehsuh, cam de dauqdaej dwg byawz ij cuzmaiq de. 25 Boux lwgsae mwnq raen yienghneix le, couh ngeng roengz aen aek Yehsuh bae, couh cam Yehsuh naeuz: “Bouxcawj hax, dwg byawz ij cuzmaiq mwngz lah?” 26 Gajlaeng Yehsuh han naeuz: “Gou aeu aen bingj he demj ciengq hawj bouxlawz, bouxlawz couh dwg lo.” De gangj gawq vah neix sat le, couh dawz aen bingj he demj ciengq hwj aeu hawj Youzdaq daeglwg Sihmaenz, Gyahloz vunz. 27 Yiengq Youzdaq couh aeu ma gw. Gw le, Sajdanq fangzvuengz couh majcangq doz hwnj gwnz ndang de bae lo. Gajlaeng Yehsuh couh doiq Youzdaq naeuz: “Mwngz vaiq bae guh gij saeh mwngz ij guh he bax!” 28 Youq mwnq caemh daiz gw haeux hih vunz cungj mij saek boux rox Yehsuh doiq Youzdaq gangj hih doenghgij vah neix dwg gijmaz iqswh, 29 aenvih Youzdaq dwg guenj ngaenz he, guh hwj miz mbangj lwgsae naemqnaeuz Yehsuh raengq de bae cawx doenghgij ij goq ciet yungh he, cixnaeuz hawj de bae aeu ngaenz faen hawj vunz gungz lah. 30 Couh yienghneix, Youzdaq gw aen bingj mwnq le, couh ok bae lo. Mwhde dwg doengxhaemh he. 31 Youzdaq ok bae le, Yehsuh couh naeuz: “Seizneix Vunz dih Daiqbiuj ndaej najrongh lo; Cangqdiq youq gwnz ndang Vunz dih Daiqbiuj caemh ndaej najrongh lo. 32 Cangqdiq giqyienz dunghgoq Vunz dih Daiqbiuj hwj ndaej najrongh, yiengq de caemh ij dunghgoq bonjfaenh de hwj hawj Vunz dih Daiqbiuj najrongh, caemh dwg couh majcangq ij hawj de najrongh lo.” 33 Yehsuh vanzlij caiq naeuz: “Lwg hax, gou caeuq faenhsou youq mbouj geij caez haem lo. Baezneix faenhsou gaengjdingq ij cimh gou, hoeng, gou soj bae hih deixfueng, faenhsou mbouj ndaej bae. Gawq vah neix gou doiq gij lingjdauj Youzdaiq gangj goq; seizneix gou caemh gangj naeuz sou ni. 34 “Gou caemh miz gij mingqlingq moq he hawj faenhsou, couh dwg naeuz faenhsou ij doxaiq; gou baenzlawz aiq faenhsou, faenhsou caemh ij baenzlawz doxaiq. 35 Hauhnaeuz faenhsou doxaiq nex, lajmbwn hih vunz couh rox faenhsou dwg gij lwgsae gou lo.” 36 Sihmaenz-Bijdwz dingq Yehsuh yienghneix naeuz le, couh cam naeuz: “Bouxcawj hax, mwngz ij bae mwnqlaw hax?” Yehsuh han naeuz: “Gou ij bae hih deixfueng, mwngz seizneix mbouj ndaej gaen bae, hoeng, baezneix mwngz gaengjdingq ndaej gaen gou bae hih.” 37 Bijdwz dingq le, caiq cam naeuz: “Bouxcawj hax, vihmaz seizneix gou mbouj ndaej gaen mwngz bae nej? Gou nyienh'eiq vih mwngz vwt mingh hah.” 38 Yehsuh dingq le han de naeuz: “Mwngz cingqcaen nyienh'eiq vih gou hwj vwt mingh mah? Gou saedsaeh naeuz mwngz ni lo, ngwnzneix gaeq mijyaengz haen haem, mwngz ij miz sam mbat mbouj nginh gou.”
1 Yehsuh gangj daengz dineix le, vanzlij caiq doiq gyoengq lwgsae de naeuz: “Faenhsou gaejyungh you; ij sinq Cangqdiq, caemh ij sinq gou. 2 Youq ndaw ranz boh gou miz haujlai mwnq youq; hauhnaeuz mbouj miz, gou couh mbouj yienghneix naeuz lo. Gou ij bae mwnq cwnjbiq mwnq youq he hawj faenhsou. 3 Gou bae mwnq cwnjbiq mwnq youq he hawj faenhsou ndei le, gou couh dauq ma ciep faenhsou bae lo. Gou youq mwnqlaw, caemh ij hawj faenhsou youq mwnqlaw. 4 Gou ij bae hih dieg mwnq, faenhsou caemh rox diuz roen de.” 5 Gajlaeng gyoengq lwgsae ndaw de miz boux heuh Dohmaj he cam de naeuz: “Bouxcawj hax, gyoengqraeuz cungj mbouj rox mwngz ij bae mwnqlaw haem; ij baenz ndaej rox diuz roen mwnq hwj?” 6 Yehsuh dingq le, han naeuz: “Gou couh dwg roen, dwg saedsaeh, dwg mingh; hauhnaeuz mbouj dunghgoq gou, mij'z vunz ndaej bae daengz daxboh mwnq. 7 Hauhnaeuz faenhsou rox gou, yiengq caemhdangq rox boh gou lo. Daj seizneix hwnj, faenhsou rox de, caemh raen de.” 8 Gajlaeng Feihliz gouz de naeuz: “Bouxcawj hax, gouz mwngz hawj raeuz raen daxboh bax, hawj gyoengqraeuz ndaej raen naj de, gyoengqraeuz caemh rox gaeuq lo.” 9 Yehsuh dingq le, couh doiq Feihliz naeuz: “Feihliz, gou caeuq faenhsou youq baenxlai caez lo, mwngz vanzlij mbouj rox gou haj? Byawz yawjraen gou hih couh dwg yawjraen daxboh lo. Mwngz vihmaz vanzlij naeuz: ‘Hawj raeuz raen daxboh veiq’ nej? 10 Nanzdauh mwngz mbouj sinq gou caeuq boh dwg dangq boux he, boh gou caeuq gou caemhdangq dwg boux he haj? Gou doiq faenhsou soj gangj hih vah mbouj dwg ciuq gij cawjeiq gou ma gangj law, dauq dwg daxboh youq ndaw sim gou hawj gou gangj lah; de dunghgoq gou daeuj guh gij hong de lah. 11 Gou naeuz, gou caeuq boh caemhdangq dwg boux he; boh caeuq gou caemhdangq dwg boux he. Cungjsuenq naeuz faenhsou mbouj sinq gou gangj hih gij vah neix hwjx, caemh wnggai sinq sou yawjraen gou soj guh hih saeh hah. 12 “Gou saedsaeh naeuz sou ni, sinq gou hih vunz, gou soj guh hih saeh, de caemh guh; mbouj danhcij naeuz yienghneix, vanzlij guh gij saeh engqgya hung he, aenvih gou ij maj laeng daxboh mwnq bae lo. 13 Hauhnaeuz faenhsou hij gij coh gou ma gouz, mboujguenj gouz gijmaz, gou cungj dapwngq hawj faenhsou gijmaz. Yienghneix gou guh lwg hih couh ndaej hawj boh najrongh lo. 14 Hauhnaeuz faenhsou hij gij coh gou ma gouz hih, gou cungj dapwngq hawj faenhsou.” 15 Yehsuh vanzlij caiq doiq gyoengq lwgsae de naeuz: “Hauhnaeuz faenhsou aiq gou nex, couh ij wnggai soenhsouj gij mingqlingq gou. 16 Yiengq gou couh gouz daxboh, gouz de baij daixlingh boux ndaej bang he daeuj hawj faenhsou, daeuj seiqseiz caeuq faenhsou youq. 17 Boux neix couh dwg heuh miz saedsaeh dih Hoenzsaenz. Aen seiqgyaiq neix hih vunz mbouj ndaej couh de, aenvih gyoengqde yawj mbouj raen de, caemh mbouj rox de. Hoeng, faenhsou rox de hah, aenvih de siengzseiz caeuq faenhsou youq, caemh ij doz youq gwnz ndang faenhsou. 18 “Gou gaengjdingq ij dauq ma faenhsou dineix, mbouj vwt faenhsou hawj faenhsou bienqbaenz lwggyax law. 19 Goq mbouj geijlwh caez, gij vunz mbouj caiq raen gou haem lo, hoeng, faenhsou dauq ndaej raen gou, aenvih gou ij dauqlix, faenhsou caemh ij ndaej dauqlix. 20 Daengz ngoenz mwnq, faenhsou couh rox, gou caeuq daxboh gou youq, faenhsou caeuq gou youq, gou caeuq faenhsou youq. 21 “Famz dingq gij mingqlingq gou, caemh ciuq gij mingqlingq gou bae guh hih, couh dwg aiq gou hih vunz lo. Aiq gou hih vunz, boh gou caemh aiq de; gou caemh aiq de. Mbouj danhcij yienghneix, gou vanzlij yienh hawj de raen.” 22 Yehsuh gangj daengz dineix le, Youzdaq (dineix dih Youzdaq mbouj dwg boux cuzmaiq Yehsuh hih Youzdaq) de cam Yehsuh naeuz: “Bouxcawj hax, vihmaz caenhgag yienh hawj gyoengqraeuz raen, mbouj yienh hawj gij vunz lajmbwn raen nej?” 23 Yehsuh han naeuz: “Aiq gou hih vunz gaengjdingq ciuq gij vah gou bae guh; boh gou caemh gaengjdingq aiq de. Mbouj danhcij yienghneix, boh gou caeuq gou caemh caeuq de youq. 24 Mbouj aiq gou hih vunz couh mbouj ciuq gij vah gou bae guh. Faenhsou dingq daengz gou soj gangj hih cungj mbouj dwg ciuq gij cawjeiq bonjfaenh gou ma gangj, dauq dwg ciuq gij cawjeiq baij gou daeuj hih daxboh gangj lah. 25 “Gou vanzlij caeuq sou youq hih mwhde, gou gaenq gangj naeuz sou ni goq doenghgij vah neix lo. 26 Hoeng, ndaej bang vunz dih Hoenzsaenz, couh dwg daxboh vih gou hwj ij baij daeuj hih Hoenzsaenz, de ij dawz sojmiz hih saeh cungj naeuz sou ni liux, vanzlij hawj faenhsou ndaejgeiq gou doiq faenhsou soj gangj hih. 27 “Gou louz gij bingzan gou nyok hawj faenhsou. Gou nyok bingzan hawj faenhsou hih caeuq gij vunz nyok hawj faenhsou hih bingzan mbouj doxdoengz. Faenhsou gaejyungh you, caemh gaejyungh lau. 28 Gou doiq faenhsou gangj goq: ‘Gou ij bae laeng daxboh, hoeng, gou vanzlij ij dauq ma.’ Hauhnaeuz faenhsou cingqcaen aiq gou nex, couh wnggai vuenvuen heijheij, aenvih gou ij bae laeng daxboh; de ak goq gou. 29 Gou youq gij saeh neix mijyaengz fatseng cihsenz, gou sien naeuz sou ni, muzdiz dwg ij hawj faenhsou daengz mwh gij saeh neix fatseng hih mwhde sinq. 30 “Gou mbouj miz geijlwh cizgyenh ndaej caeuq faenhsou gangj haem lo, aenvih aen seiqgyaiq neix hih vuengz couh ij daeuj lo, hoeng, de mij'z gienz guenj gou law. 31 Vih ij hawj aen seiqgyaiq neix hih vunz rox gou aiq boh, boh hawj gou guh gijmaz, gou couh guh gijmaz.” Yehsuh gangj daengz dineix le, vanzlij caiq naeuz: “Daeuj, daengj gyoengqraeuz bae bax.”
1 Yehsuh caeuq gyoengq lwgsae de bae le, couh doiq gyoengqde naeuz: “Gou dwg go buzdauz caen he, daxboh gou dwg guh boux ndaem he. 2 Famz haeuj gij nge gou, hoeng, mbouj dawz mak hih, couh ngaiz de daet bae. Nge ndaej dawz mak hih, de couh caed ngez ndei, hawj nge de dawz mak engqgya lai. 3 Faenhsou caemhdangq doengh nge gaenq dunghgoq gou doiq faenhsou soj gangj hih vah hwj ndaej caed ngez seuqset lo. 4 Faenhsou ij siengzseiz caeuq gou youq; gou caemh siengzseiz ij caeuq faenhsou youq. Cingq luj gij nge buzdauz, hauhnaeuz mbouj nem youq gwnz go de, nge de couh mbouj ndaej dawz mak; yiengq, hauhnaeuz faenhsou mbouj caeuq gou youq, faenhsou caemh ciuqyiengh mbouj ndaej dawz mak. 5 “Gou dwg go buzdauz, faenhsou dwg gij nge de. Siengzseiz caeuq gou youq hih, gou caemh siengzseiz caeuq de youq, de caemh ndaej dawz haujlai mak, aenvih mbouj miz gou, faenhsou couh gijmaz cungj mbouj ndaej guh daengz. 6 Doengh boux mbouj siengzseiz caeuq gou youq hih couh luj doengh nge vwt youq rog he ngaiz rai lo, ngaiz vunz nyaeb ma dwk haeuj feiz bae. 7 Yiengq, hauhnaeuz faenhsou siengzseiz caeuq gou youq, caemh ndaejgeiq gij vah gou, ciuq gij vah gou bae guh hih, mboujguenj faenhsou ij aeu gijmaz, gouz couh ndaej lo. 8 Hauhnaeuz faenhsou lai dawz mak, boh gou couh vih yienghneix hwj ndaej najrongh, faenhsou caemh gaengjdingq dwg lwgsae gou. 9 “Gou aiq faenhsou, caemh luj boh aiq gou yienghmwnq; faenhsou ij siengzseiz souj ndei gou doiq faenhsou dih aiq. 10 Hauhnaeuz faenhsou soenhsouj gij mingqlingq gou, yiengq couh dwg siengzseiz souj ndei gij aiq gou lo, caemh luj gou soenhsouj gij mingqlingq daxboh gou, siengzseiz souj ndei gij aiq de yienghmwnq. 11 Gou naeuz doenghgij saeh neix naeuz faenhsou ni dwg ij hawj faenhsou caemh ndaej vuenheij luj gou, hawj faenhsou ndaej vuenheij raixcaix. 12 Faenhsou ij doxaiq, caemh luj gou aiq faenhsou yienghmwnq; gij neix couh dwg gij mingqlingq gou. 13 Mij saek yiengh aiq ndaej beij vih baengzyoux hwj sijndaej vwt diuz mingh bonjfaenh hwj engqgya aiq haem lo. 14 Hauhnaeuz faenhsou soenhsouj gij mingqlingq gou nex, faenhsou couh dwg gij baengzyoux gou lo. 15 Gou mbouj caiq dawz faenhsou dangqbaenz bouxhoiq gou lo, aenvih bouxhoiq mbouj rox bouxcawj soj guh hih saeh; gou naeuz faenhsou dwg baengzyoux gou dwg aenvih gou dawz dajlaeng boh gou mwnq soj dingq daengz hih cungj gangj naeuz sou ni liux lo. 16 “Mbouj dwg faenhsou senj gou, dwg gou senj faenhsou hawj faenhsou bae dawz gij mak mbouj rox naeuh hih lah. Yienghmwnq faenhsou couh ndaej hij gij coh gou ma gouz, mboujguenj faenhsou gouz daxboh aeu gijmaz, de cungj nyok hawj faenhsou gijmaz. 17 Faenhsou ij doxaiq; gij neix couh dwg gou dih mingqlingq.” 18 Yehsuh vanzlij caiq naeuz: “Hauhnaeuz vunz dwgcaengz faenhsou nex, faenhsou wnggai rox, gyoengqde gaenq sien dwgcaengz gou gaxgonq lo. 19 Hauhnaeuz faenhsou dwg haeuj aen seiqgyaiq neix nex, aen seiqgyaiq neix hih vunz gaengjdingq aiq faenhsou. Hoeng, faenhsou mbouj dwg haeuj aen seiqgyaiq neix law, aenvih gou gaenq dawz faenhsou senj okdaeuj lo, sojhij aen seiqgyaiq neix couh dwgcaengz faenhsou lo. 20 Faenhsou ijaeu ndaejgeiq gou doiq faenhsou soj gangj goq hih vah, couh dwg: ‘Bouxhoiq mbouj ak goq bouxcawj,’ gawq neix. Hauhnaeuz gyoengqde bwkhaih gou, caemh gaengjdingq bwkhaih faenhsou; hauhnaeuz gyoengqde dingq gij vah gou, caemh gaengjdingq dingq gij vah faenhsou. 21 Gyoengqde vih gou hwj ij haih faenhsou, aenvih gyoengqde mbouj rox boux baij gou daeuj hih mwnq. 22 Hauhnaeuz gou mbouj daeuj lajmbwn son goq gyoengqde nex, couh mbouj ndaej naeuz gyoengqde miz coih. Hoeng gou seizneix daeuj lo; gyoengqde couh mbouj ndaej doi naeuz gyoengqde mbouj miz coih lo. 23 Haenq gou hih caemhdangq haenq boh gou lo. 24 Hauhnaeuz gou mbouj youq gyoengqde mwnq guh gij coengzlaiz mij'z vunz guh goq he dih doenghgij geizmiuj mwnq nex, gyoengqde couh miz vah yiem gou, caemh mbouj miz coih lo. Hoeng, seizneix gyoengqde gaenq caenra raen goq gou soj guh hih doenghgij geizmiuj hih saeh lo; gyoengqde mbouj danhcij mbouj sinq, dauqfanj haenq gou caeuq haenq boh gou. 25 Gij neix ngamq lingz ok gij vah youq ndaw saw fazliz gyoengqde sij naeuz: Gyoengqde mij laizyouz hwj haenq gou. 26 “Gou ij daj daxboh mwnq baij boux ndaej bang faenhsou he daeuj, couh dwg daj daxboh mwnq daeuj hih miz saedsaeh dih Hoenzsaenz. De daeuj mwhde, de ndaej cingqmingz gou. 27 Caemh doxdoengz, faenhsou caemh ndaej bang gou cingqmingz, aenvih faenhsou daj gaihcij cix gaen gou lo.”
1 Yehsuh vanzlij caiq naeuz: “Gou naeuz doenghgij saeh neix naeuz sou ni dwg ij hawj faenhsou gyenhdingq mbouj bienq sim, 2 aenvih couh ij miz vunz boenq faenhsou ok veiqdangz bae lo, simqciq ij gaj faenhsou, hoeng, gyoengqde vanzlij naemqnaeuz yienghneix guh dwg swqhaeuh Cangqdiq hih lah. Mwhneix hih couh ij daengz lo. 3 Gizsaed, gyoengqde yienghneix guh dwg aenvih gyoengqde gaenhbaenj mbouj rox Cangqdiq, caemh mbouj rox gou. 4 Gou naeuz faenhsou ni doenghgij saeh neix dwg ij hawj faenhsou daengz mwhde ndaejgeiq gou naeuz sou ni goq. Gaxgonq gou mijyaengz naeuz gij saeh neix naeuz sou ni dwg aenvih gou vanzlij caeuq sou youq. 5 “Seizneix gou ij dauq maj laeng boux baij gou daeuj hih mwnq bae lo, hoeng, faenhsou mij'z vunz cam gou naeuz: ‘Mwngz ij bae mwnqlaw lah?’ 6 Gou naeuz sou ni gij saeh neix, faenhsou couh siengsim raixcaix. 7 Gizsaed gou saedsaeh naeuz sou ni lo, gou bae dwg doiq faenhsou miz ik hih; hauhnaeuz gou mbouj bae, boux ndaej bang faenhsou mwnq, couh dwg boux miz saedsaeh dih Hoenzsaenz mwnq, couh mbouj daeuj faenhsou dineix lo. Gou bae couh ij baij de daeuj. 8 De daeuj mwhde, couh dwg ij hawj vunz rox bonjfaenh gyoengqde doiq coih hah, doiq hab'eiq habhoz Cangqdiq hah, doiq Cangqdiq dih saemjbuenq vunz hah cungj yawj loek lo. 9 Yiengq gangj daengz coih hax, dwg aenvih vunz mbouj sinq gou; sojhij gyoengqde couh dwg miz coih hih. 10 Caiq gangj daengz hab'eiq habhoz Cangqdiq gij neix, dwg aenvih gou dwg hab'eiq habhoz Cangqdiq hwj ndaej bae laeng boh, Cangqdiq mwnq; sojhij, faenhsou couh mbouj ndaej raen gou lo. 11 Yiengq, caiq gangj daengz saemjbuenq nej, couh dwg aenvih goengjvuengz lajmbwn, Sajdanq, gaenq ngaiz saemjbuenq lo. Couh vih yienghneix, lajmbwn hih vunz caemh mbouj ndaej deuz ok ngaiz saemjbuenq lo. 12 “Gou vanzlij caiq miz haujlai saeh ij naeuz sou ni, hoeng, lau faenhsou seizneix mbouj rox. 13 Daengj daengz miz saedsaeh dih Hoenzsaenz daeuj, de gaengjdingq daiq faenhsou, hawj faenhsou rox sojmiz hih saedsaeh. De caemh ij gangj naeuz faenhsou ni baezneix ij fatseng hih. De soj gangj hih mbouj dwg ciuq gij cawjeiq bonjfaenh de ma gangj law, dauq dwg gangj gij saeh bonjfaenh de daj Cangqdiq mwnq soj dingqri hih lah. 14 De vih ij hawj gou najrongh, de couh dawz dajlaeng gou ndaej hih saedsaeh cenz naeuz sou ni. 15 Famz boh sojmiz hih cungj dwg gij gou liux, sojhij gou cij naeuz, de ij dawz dajlaeng gou ndaej hih saedsaeh cungj cenz naeuz sou ni.” 16 Yehsuh vanzlij caiq naeuz: “Goq mbouj geijlwh caez, faenhsou couh mbouj ndaej raen gou laem lo; hoeng, caiq goq mbouj geijlwh caez, faenhsou youhcaiq ndaej raen gou lo.” 17 Yehsuh yienghneix gangj le, miz mbangj hih lwgsae couh doxcam naeuz: “De naeuz raeuz ni: ‘Goq mbouj geijlwh caez, faenhsou couh mbouj caiq ndaej raen gou laem lo,’ caemhcaiq naeuz: ‘Gajlaeng caiq goq mbouj geijlwh caez, faenhsou youhcaiq ndaej raen gou lo,’ vanzlij caemh naeuz: ‘aenvih gou ij bae laeng daxboh lo.’ Doenghgij vah neix dwg gijmaz iqswh nej? 18 ‘Mbouj geijlwh caez,’ dauqdaej dwg gijmaz iqswh nex? Gyoengqraeuz saedsaeh mbouj rox de gangj gijmaz.” 19 Gajlaeng Yehsuh yawj ndaej ok gyoengqde ijsiengj cam de gijmaz le, couh doiq gyoengqde naeuz: “Gou naeuz: ‘Mbouj geijlwh caez, faenhsou couh mbouj caiq ndaej raen gou laem lo,’ caemhcaiq naeuz: ‘Caemh mbouj geijlwh caez, faenhsou youhcaiq ndaej raen gou lo,’ faenhsou vih gawq neix mbouj rox hwj doxcam dwg lwi? 20 Gou saedsaeh naeuz sou ni, faenhsou ij daej ngwdngwd, gij vunz dauq riuriu angqangq. Faenhsou ij you ij heiq, hoeng faenhsou dih youheiq couh ij bienqbaenz angq vaujvauq lo. 21 Cingq luj vunzbaz seng lwg mwhde, ij in'in hojyouq hojyouq, hoeng, daengj daengz lwgngez seng le, de couh vih bonjfaenh de miz laeq lwg neix hwj angq, lumz gaxgonq de in caeuq hojyouq lo. 22 Caemh doxdoengz, faenhsou seizneix gannaeuz miz youheiq lah, hoeng, daengj daengz gou dauqlix caiq ndaej raen faenhsou hih mwhde, faenhsou couh angq vaujvauq lo; mbouj danhcij yienghneix, faenhsou sim'angq hih mij vunz ndaej dued aeu bae. 23 “Gou saedsaeh naeuz sou ni, daengz ngoenz mwnq, faenhsou gijmaz cungj mboujyungh cam gou; mboujguenj faenhsou hij gij coh gou ma gouz daxboh gijmaz, de gaengjdingq nyok hawj faenhsou gijmaz. 24 Faenhsou coengzlaiz cungj mij hij gij coh gou ma gouz goq gijmaz, hoeng, cijaeu faenhsou seizneix gouz, couh gaengjdingq ndaej; yienghneix couh ndaej hawj faenhsou angq raixcaix.” 25 Yehsuh vanzlij caiq naeuz: “Gou soqlaiz cungj yungh beijgangj ma naeuz sou ni gij saeh neix, hoeng, mwhde couh ij daengz lo, gou mbouj caiq yungh beijgangj ma gangj naeuz sou ni lo; gou ganhseiq cizsez gangj naeuz sou ni daxboh hih saeh ndaej lo. 26 Daengz ngoenz mwnq, faenhsou ij hij gij coh gou ma gouz. Gou yienghneix naeuz mbouj dwg naeuz gou ij bang faenhsou gouz law. 27 Gizsaed daxboh dwg aiq faenhsou hih, aenvih faenhsou itcig cungj aiq gou; mbouj danhcij yienghneix, faenhsou vanzlij sinq gou dwg dajlaeng daxboh mwnq daeuj hih. 28 Gou dajlaeng daxboh mwnq daeuj daengz lajmbwn, caiq daj lajmbwn dauq maj laeng daxboh mwnq.” 29 Yehsuh gangj daengz dineix le, gyoengq lwgsae doiq de naeuz: “Hawjm'z yawj hux, seizneix mwngz cizsez gangj naeuz raeuz ni, mbouj caiq yungh beijgangj ma gangj naeuz raeuz ni. 30 Gyoengqraeuz couh rox mwngz dwg boux gijmaz cungj rox he. Mwngz cungj mboujyungh vunz cam mwngz haem; mwngz cungj rox gijmaz lo. Sojhij gyoengqraeuz sinq mwngz dwg dajlaeng Cangqdiq mwnq daeuj hih.” 31 Yehsuh dingq le, couh naeuz: “Ox! Seizneix faenhsou cij sinq! 32 Hoeng, mwhde couh ij daengz lo, seizneix couh dwg lo, faenhsou couh ij ngaiz faensanq, gak vunz gag maj ranz, lij gou gag youq; mwhde couh ij daengz lo, couh dwg mwhneix lo. Hoeng, gou naeuz sou ni, mbouj dwg gag gou gag youq law; vanzlij miz daxboh caeuq gou youq nej. 33 Gou naeuz sou ni doenghgij neix dwg ij hawj faenhsou dunghgoq gou hwj ndaej bingzan. Cijmboujgoq faenhsou youq lajmbwn ij ngaiz miz nanh, hoeng, faenhsou gaejyungh you, aenvih gou gaenq ak goq aen seiqgyaiq neix lo.”
1 Yehsuh gangj doenghgij vah neix sat le, couh muengh hwnj mbwn bae yawj, naeuz: “Boh hax, mwhde daengz lo; mwngz hawj lwg mwngz najrongh bax, yiengq lwg mwngz caemh ndaej hawj mwngz najrongh lo. 2 Cingq luj mwngz dawz gij gienz guenjleix sojmiz vunz he nyok hawj de yienghmwnq, hawj de ndaej hawj doenghheij vunz mwngz nyok hawj de he ndaej seiqseiz lix. 3 Gij seiqseiz lix neix couh dwg ndaej rox mwngz—caenhgag mwngz cij dwg caen hih cwnz he—caeuq rox gou, Yehsuh Gihduz, mwngz baij daeuj hih. 4 Mwngz hawj gou guh hih hong gou gaenq guh liux lo; youq lajmbwn gou gaenq hawj mwngz najrongh lo. 5 Boh hax, seizneix gou gouz mwngz hawj gou caeuq mwngz najrongh bax, caemh luj mwh mijyaengz cauh mbwn cauh deih mwhde yienghmwnq doxcaeuq miz najrongh bax! 6 “Mwngz senj hawj gou hih vunz, gou gaenq naeuz hawj gyoengqde ni, hawj gyoengqde rox mwngz lo. Baenjlaiz gyoengqde dwg gij vunz mwngz hih, hoeng, mwngz dawz gyoengqde soengq hawj gou lo; gyoengqde caemh dingq gij vah mwngz hwj. 7 Seizneix gyoengqde rox, mwngz soj nyok hawj gou hih cungj dwg dajlaeng mwngz ndaej daeuj he, 8 aenvih mwngz gangj naeuz gou ni hih, gou caemh gangj naeuz gyoengqde ni lo. Gyoengqde caemh dingq hwj, gyoengqde caemhcaiq rox cingsuj gou dwg dajlaeng mwngz mwnq daeuj he, sinq gou dwg mwngz baij gou daeuj he. 9 “Gou mbouj bang heijvunz gouz mwngz, hoeng, gou dauq bang gij vunz mwngz senj okdaeuj nyok hawj gou he gouz, aenvih gyoengqde baenjlaiz dwg gij vunz mwngz hih. 10 Gou sojmiz hih cungj dwg gij mwngz liux, mwngz sojmiz hih caemh dwg gij gou liux. Gyoengqde hawj gou ndaej najrongh. 11 Gou couh ij bae mwngz mwnq lo, hoeng, gyoengqde dauq lij ij youq lajmbwn. Cangqdiq Bohmbwn hax, gouz mwngz dunghgoq gij coh mwngz—couh dwg gij coh mwngz nyok hawj gou hih—daeuj baujhuq gyoengqde bax, hawj gyoengqde ndaej duenzgyez gaep guh buek vunz he, caemh luj raeuz yienghneix. 12 Mwh gou caeuq gyoengqde youq hih mwhde, gou cungj dwg yungh gij coh mwngz nyok hawj gou hih gij rengz mwnq ma baujhuq gyoengqde, hawj gyoengqde mij saek boux ngaiz satsoq, caenhgag cawzok duz raicaeux Youzdaq—gij neix cingq luj gij vah ndaw Singqgingh lingz okdaeuj lo. 13 “Seizneix gou couh ij bae laeng mwngz mwnq lo, hoeng, gou lij youq lajmbwn hih mwhde, gangj doenghgij vah neix dwg ij hawj gyoengqde luj gou yienghmwnq angq raixcaix. 14 Gou dawz gij vah mwngz gangj naeuz gyoengqde ni; yiengq doenghheij aen seiqgyaiq neix hih vunz couh haenq gyoengqde, aenvih gyoengqde caeuq gou doxdoengz, mbouj dwg gaep haeuj gij vunz aen seiqgyaiq neix he. 15 Gou mbouj gouz mwngz mbouj hawj gyoengqde bae dep aen seiqgyaiq neix hih vunz, caenhgag gouz mwngz baujhuq gyoengqde, hawj gyoengqde ndaej duet ok Sajdanq boux doegdoeg siebsieb neix ndaej lo. 16 Gyoengqde caemh luj gou mbouj dwg haeuj aen seiqgyaiq neix hih vunz. 17 Gou gouz mwngz yungh gij saedsaeh mwngz ma hawj gyoengqde bienqbaenz boux dwzbez he, hab'eiq habhoz mwngz he; gij vah mwngz couh dwg saedsaeh. 18 Gou baij gyoengqde bae aen seiqgyaiq neix, caemh luj mwngz baij gou daeuj aen seiqgyaiq neix hih yienghmwnq. 19 Gou vih gyoengqde hwj guh boux dwzbez he, hab'eiq habhoz mwngz he, caemh hawj gyoengqde dunghgoq saedsaeh hwj bienqbaenz boux dwzbez he, hab'eiq habhoz mwngz he. 20 “Gou mbouj danhcij bang gyoengqde gouz, caemh bang doenghgij vunz dingq gyoengqde cenzgangj he hwj sinq gou he gouz, 21 hawj gyoengqde duenzgyez gaep guh buek vunz he, caemh luj mwngz caeuq gou, gou caeuq mwngz yienghmwnq caemh buek vunz he, hawj aen seiqgyaiq neix hih vunz sinq gou dwg mwngz baij daeuj he. 22 Mwngz hawj gou najrongh; gou caemh hawj gyoengqde najrongh, hawj gyoengqde duenzgyez gaep guh buek vunz he, caemh luj raeuz yienghmwnq gaep guh buek vunz he. 23 Gou caeuq gyoengqde youq, mwngz caeuq gou youq; yienghneix gyoengqde couh ndaej duenzgyez gaep haeuj buek vunz he doxhuz raixcaix, hawj aen seiqgyaiq neix hih vunz rox dwg mwngz baij gou daeuj he, caemh rox mwngz aiq gyoengqde he, caemh luj mwngz aiq gou yienghmwnq. 24 “Boh hax, muengh gij vunz mwngz nyok hawj gou hih gyoengq vunz mwnq, gou youq mwnqlaw gyoengqde caemh youq mwnqlaw, yienghmwnq hawj gyoengqde ndaej raen mwngz hawj gou ndaej najrongh, aenvih youq mijyaengz cauh mbwn cauh deih cihsenz, mwngz gaenq aiq gou lo. 25 “Daxboh hax, mwngz ndwn ndaej cingq! Aen seiqgyaiq neix hih vunz mbouj rox mwngz, hoeng gou rox mwngz; mwngz nyok hawj gou hih doenghgij vunz mwnq, gyoengqde rox dwg mwngz baij gou daeuj hih. 26 Gou mbouj danhcij hawj gyoengqde rox mwngz, vanzlij ij hawj gyoengqde engqgya lai rox mwngz haem; yienghmwnq couh ndaej hawj gyoengqde rox luj mwngz aiq gou yienghmwnq aiq vunz, gou caemh ndaej caeuq gyoengqde youq.”
1 Yehsuh doiq Cangqdiq gouzgangj doenghgij vah neix sat le, couh caeuq gyoengq lwgsae de goq Gizlwnz Rij bae aen suen mwnq. 2 Yiengq, buenqduz cuzmaiq Yehsuh dih Youzdaq caemh rox mwnq, aenvih Yehsuh siengzseiz daiq gyoengq lwgsae bae mwnq doxcomz. 3 Couh youq mwhneix, Youzdaq daiq baenx gyoengq bing Lozmaj caeuq doengh boux souj gunghdenq Cangqdiq he; doengh boux neix dwg goengjsae dajbwiz caeuq gij vunz gaep haeuj Fazliqcaiq baij he baij daeuj he. Gyoengqde dawz daeng, dawz feiz, dawz giemq hwj daeuj daengz aen suen mwnq. 4 Yehsuh rox naeuz bonjfaenh de ij ngaiz roeb daengz gijmaz saeh lo, couh ok daeuj cam gyoengqde naeuz: “Faenhsou cimh byawz?” 5 Gyoengqde han naeuz: “Cimh vunz Mbanj Nazsajlwz dih Yehsuh.” Yehsuh dingq le, couh han naeuz: “Gou couh dwg!” (Mwhde buenqduz cuzmaiq Yehsuh Youzdaq caemh ndwn youq mwnq.) 6 Mwh Yehsuh ngamq baex naeuz: “Gou couh dwg,” gawq neix he, gyoengqde couh doenq gyaggyag laemx roengz doem bae. 7 Gajlaeng Yehsuh caiq cam gyoengqde naeuz: “Faenhsou cimh byawz?” Gyoengqde youhcaiq han naeuz: “Cimh vunz Mbanj Nazsajlwz Yehsuh!” 8 Yehsuh dingq le, couh naeuz: “Gou daxbaenh gaenq naeuz sou ni lo, gou couh dwg hah. Hauhnaeuz faenhsou dwg daeuj cimh gou nex, couh hawj doenghheij vunz neix sanq bae bax!” 9 Yehsuh yienghneix naeuz ngamqngamq lingz ok gij vah de gaxgonq gangj goq hih: “Boh hax, mwngz nyok hawj gou hih vunz, gou boux he cungj mbouj vwt.” 10 Couh youq mwhneix, Sihmaenz-Bijdwz couh yot fag giemq raek youq gwnz ndang de okdaeuj, couh doq raemj duj rwz Majlwzguj hih duj rwz baixgvaz de gat. (Majlwzguj dwg bouxhoiq goengjsae dajbwiz daeuzdaeuz he.) 11 Gajlaeng Yehsuh couh doiq Bijdwz naeuz: “Sou fag giemq hwnjdaeuj! Daxboh hawj gou rap hih nanh gou mbouj wnggai rap mah?” 12 Yiengq Youzdaq daiq daeuj hih buek bing Lozmaj caeuq goeng lienzcangj caeuq doengh boux souj gunghdenq Cangqdiq he couh cug dawz Yehsuh, 13 couh gam de bae hawj Yaqnaq. (Yaqnaq dwg goeng boxda Gaihyaqfaz; Gaihyaqfaz dwg bi mwnq hih goengjsae dajbwiz daeuzdaeuz he. 14 Boux Gaihyaqfaz neix couh dwg boux doiq gij lingjdauj Youzdaiq gangj naeuz goq naeuz: “Boux he dingj gij vunzlai rai dwg miz ndeicawq hih” dih boux mwnq lo.) 15 Yehsuh ngaiz gyoengq vunz mwnq gaemh dawz bae le, Sihmaenz-Bijdwz caeuq daixlingh boux lwgsae couh gaen youq gajlaeng Yehsuh bae. Boux lwgsae neix caeuq goengjsae dajbwiz daeuzdaeuz sug, sojhij de ndaej gaen Yehsuh haeuj ndaw daxhongh goengjsae dajbwiz daeuzdaeuz bae. 16 Hoeng, Bijdwz dauq ngaiz ndwn youq bakdou rog neix daengj. Gajlaeng boux lwgsae sug goengjsae dajbwiz daeuzdaeuz mwnq ok ma doiq bouxhoiq vunzbaz souj bakdou mwnq gangj gawq vah he, couh daiq Bijdwz haeuj bae. 17 Yiengq boux vunzbaz mwnq raen yienghneix le, couh cam Bijdwz naeuz: “Mwngz mbouj dwg boux lwgsae boux mwnq maz?” Bijdwz dingq le, engq han naeuz: “Gou mij dwg hah.” 18 Mwhde dienheiq nit; gyoengq hoiq caeuq doengh boux souj gunghdenq Cangqdiq he caux feiz youq mwnq byoq feiz. Yiengq Bijdwz haeuj bae le, caemh bae ndwn dep gyoengqde byoq feiz. 19 Yehsuh ngaiz daiq bae daengz le, Yaqnaq couh saemjcam Yehsuh, saemjcam de gyoengq lwgsae de hih saeh caeuq saemjcam de son vunz gijmaz. 20 Yiengq Yehsuh couh han naeuz: “Gou liglaiz cungj dwg youq Youzdaiq vunz dih gyauqdangz cixnaeuz youq gunghdenq Cangqdiq son vunz, gaenhbaenj mbouj youq boihgox gangj gijmaz. 21 Faenhsou caemh ndaej seizbienh bae cam doenghheij vunz dingq gou gangj vah goq hih hah; gyoengqde gaengjdingq rox gou gangj goq gijmaz vah. Hozbiet cam gou nej?” 22 Yehsuh ngamq gangj gawq vah neix sat bak, ndwn youq henz hih boux souj gunghdenq Cangqdiq he couh fak Yehsuh mbat baqfawz he, naeuz: “Mwngz gingqyienz baenxlai mbeihung, yienghneix han goengjsae dajbwiz daeuzdaeuz!” 23 Hoeng, Yehsuh dauq cam naeuz: “Hauhnaeuz gou gangj loek gijmaz, mwngz ndaej naeuz daixgya ni gou loek youq mwnqlaw hah. Yiengq, hauhnaeuz gou mbouj loek, mwngz vihmaz ij doh gou nex?” 24 Gannaeuz Yehsuh yienghneix naeuz lah, hoeng, Yaqnaq vanzlij gam de bae hawj Gaihyaqfaz goengjsae dajbwiz daeuzdaeuz neix. Mwhneix Yehsuh vanzlij dwg ngaiz goenj hwj. 25 Mwhde Sihmaenz-Bijdwz cungj lij youq mwnq byoq feiz. Yiengq miz vunz cam de naeuz: “Mwngz mbouj dwg lwgsae de hajx?” Bijdwz dingq le, couh doq han naeuz: “Gou mbouj dwg hah!” 26 Yiengq bouxhoiq goengjsae dajbwiz daeuzdaeuz he, couh dwg boux caencik boux ngaiz Bijdwz aeu giemq ma raemj gat duj rwz de hih boux caencik de, caemh naeuz: “Gou mbouj dwg raen mwngz caeuq boux mwnq youq ndaw suen hajx?” 27 Bijdwz dingq le, vanzlij mbouj nginh bonjfaenh de dwg caeuq Yehsuh miz gvanhaeh; de caemh naeuz: “Nwjlaw, mij dwg hah!” Bijdwz baex gangj gawq neix he, gaeq couh doq haen lo. 28 Yiengq daengz haetlaeng ranz ij rongh, Youzdaiq vunz dih lingjdauj couh dajlaeng Gaihyaqfaz mwnq gam Yehsuh bae ndaw fuj Lozmaj saengjcangj, hoeng, doenghheij Youzdaiq vunz dih lingjdauj gam Yehsuh bae mwnq, mij saek boux gamj haeuj ndaw fuj Lozmaj saengjcangj bae, hoengjlau bonjfaenh ngaiz suenq dwg mbouj gancengh hwj mbouj ndaej camhgyah gw aen ciet Bienqgoqbae. 29 Sojhij Bijlahdoh saengjcangj couh ok daeuj cam gyoengqde naeuz: “Faenhsou gauq boux neix gauq de gijmaz nej?” 30 Gajlaeng gyoengqde han naeuz: “Hauhnaeuz bouxn'x mbouj guh gijmaz vaihsaeh nex, gyoengqraeuz mbouj veiq daiq de daeuj laeng mwngz dineix hih nej.” 31 Bijlahdoh saengjcangj dingq le, couh doiq gyoengqde naeuz: “Faenhsou gag daiq de maj bax; ciuq gij fazliz faenhsou bae saemjbuenq de bax!” Hoeng, gij vunz Youzdaiq dih lingjdauj dauq han naeuz: “Gyoengqraeuz mij'z gienz ndaej buenq hawj vunz rai hah.” 32 Gij neix couh lingz ok gij vah Yehsuh gaxgonq de gangj goq hih bonjfaenh de ij baenzlawz rai hih gawq vah mwnq lo. 33 Bijlahdoh dingq gyoengq vunz yienghneix gangj le, couh dauq haeuj ndaw saengjfuj maj lo, couh heuh Yehsuh daeuj, saemjcam de naeuz: “Mwngz dwg Youzdaiq vunz hih vuengz hajx?” 34 Yiengq Yehsuh han de naeuz: “Gawq vah neix dwg mwngz gag naeuz hajx, cixnaeuz dwg vunz naeuz mwngz ni hih nej?” 35 Bijlahdoh dingq le, naeuz: “Haex! Ndaek gijn'x dwg gijmaz saeh nex? Gou couh mbouj dwg Youzdaiq vunz vwh. Dwg aen guek mwngz hih vunz caeuq goengjsae dajbwiz gag daiq mwngz daeuj hih lah. Dauqdaej mwngz guh gijmaz vaihsaeh hax?” 36 Yehsuh dingq le, caiq han naeuz: “Aen guek gou mbouj dwg gaep haeuj aen seiqgyaiq neix hih nej; hauhnaeuz aen guek gou dwg gaep haeuj aen seiqgyaiq neix hih nex, gij vunz gou yaengz senqsi cix hwnj daeuj fanjgangq haz, gou caemh mbouj ngaiz gij vunz Youzdaiq gaemh dawz lo. Hoeng, cijmboujgoq aen guek gou mbouj dwg gaep haeuj aen seiqgyaiq neix hih lah.” 37 Bijlahdoh dingq le, couh doq naeuz: “Yiengq mwngz couh dwg vuengz lo?” Bijlahdoh yienghneix naeuz le, Yehsuh couh doq han naeuz: “Dwg hah, gou couh dwg; mwngz naeuz ndaej deng lo. Gou cingq dwg vih yienghneix hwj seng he, caemh dwg vih ij cingqmingz saedsaeh hwj daeuj daengz lajmbwn he. Famz dwg haeuj saedsaeh hih vunz gaengjdingq dingq gij vah gou.” 38 Bijlahdoh caiq cam naeuz: “Gijmaz dwg saedsaeh nej?” De cam gawq neix le, couh ok bae doiq gij vunz Youzdaiq naeuz: “Gou caz mbouj raen de miz gijmaz coih hah. 39 Hoeng, ciuq faenhsou bienqnaengz dih laehbeih, moix it mbat daengz aen ciet Bienqgoqbae he cungj ij hawj gou coengq boux vunzfamh he. Yiengq faenhsou seizneix ij hawj gou coengq boux Youzdaiq vunz dih vuengz neix mah?” 40 Bijlahdoh ngamq baex yienghneix naeuz hih lah, hoeng, gyoengq vunzlai cungj hemq oxox naeuz: “Coengq Bahlahbah, mbouj coengq boux mwnq! Coengq Bahlahbah!” Gyoengq vunz cungj yienghneix hemq, hoeng, boux Bahlahbah neix dwg boux auxcied hawj vunz nauh luenh he lah.
1 Gyoengq vunz yienghneix hemq le, Bijlahdoh couh hawj vunz dawz diuz bien ma fad Yehsuh. 2 Gyoengq binggyep caiq aeu oen ma san guh aen mauh luj goengjvuengz daenj he hwj daenj hawj Yehsuh, youhcaiq aeu diuz buhbauz raez aeuj he daeuj daenj hawj de, 3 caiq lengx de naeuz: “Youzdaiq vunz dih vuengz vanqseiq hwx!” Yienghneix hemq le, vanzlij caiq mbap de. 4 Gajlaeng, Bijlahdoh youhcaiq ok daeuj doiq gyoengq vunzlai naeuz: “Yawj veiq, gou daiq de okdaeuj hawj faenhsou, hawj faenhsou rox, gou caz mbouj raen de miz maz coih.” 5 Couh yienghneix, Yehsuh couh ngaiz daenj aen mauh oen he caeuq daenj diuz buhbauz raez aeuj he ok daeuj. Bijlahdoh couh doiq gyoengqde naeuz: “Faenhsou yawj boux vunz neix bax!” 6 Yiengq, doenghheij goengjsae dajbwiz caeuq doenghheij souj gunghdenq Cangqdiq baex raen Yehsuh he le, couh hemq naeuz: “Dawz de ding hwnj gwnz gyaq cixcib bae! Dawz de ding hwnj gwnz gyaq cixcib bae!” Bijlahdoh raen yienghneix le, doiq gyoengqde naeuz: “Faenhsou gag ding bax! Aenvih gou caz mbouj raen de miz maz coih haem.” 7 Bijlahdoh yienghneix naeuz lo, hoeng, gyoengqde cungj mbouj fug, vanzlij naeuz: “Ciuq gij fazliz gyoengqraeuz, de hab rai, aenvih de gag naeuz bonjfaenh de dwg lwg Cangqdiq.” 8 Bijlahdoh dingq gyoengqde yienghneix gangj le, cungj lau hwj ij rai bae. 9 De couh majcangq daiq Yehsuh dauq haeuj ndaw saengjfuj maj cam de naeuz: “Mwngz dauqdaej dwg daj mwnqlaw daeuj hax?” Hoeng, Yehsuh dauq mij han de. 10 Yiengq Bijlahdoh raen Yehsuh mbouj han de le, couh naeuz: “Mwngz vihmaz mbouj han gou? Nanzdauh mwngz mbouj rox gou miz gienz ndaej coengq mwngz, caemh miz gienz ndaej ding mwngz hwnj gwnz gyaq cixcib bae maz?” 11 Yehsuh dingq de yienghneix naeuz le, couh han naeuz: “Hauhnaeuz mbouj dwg Cangqdiq hawj mwngz gij gienz neix nex, mwngz gaenhbaenj mbouj ndaej guenj gou. Sojhij boux buenqduz cuzmaiq gou dawz gou gyau hawj mwngz hih boux mwnq, gij coih boux de engqgya naek.” 12 Bijlahdoh dingq de yienghneix naeuz le, engqgya ijsiengj coengq de, hoeng, mij banqfaz; gij vunz Youzdaiq engqgya hemq naeuz: “Hauhnaeuz mwngz coengq boux vunz neix nex, couh mbouj dwg Gaijsaj goengjvuengz neix hih baengzyoux lo! Famz gag naeuz bonjfaenh dwg vuengz hih couh dwg Gaijsaj dih dizyinz!” 13 Bijlahdoh dingq gyoengq vunz yienghneix hemq naeuz le, de mij banqfaz, ak mbouj goq vunzlai, couh daiq Yehsuh bae daengz mwnq dieg heuh Bu Rin he (gangj vah Hihbwzlaiz dwg heuh Gyahbahdaq he), youq mwnq gaihdingz saemjbuenq Yehsuh. 14 Yiengq ngoenz mwnq dwg ngoenz cwnjbiq ij goq aen ciet Bienqgoqbae he, daihgaiq gyangjngoenz cingq yienghneix. Bijlahdoh doiq gyoengq vunz Youzdaiq naeuz: “Yawj hax! Goengjvuengz faenhsou hax!” 15 Gyoengqde raen le, couh hemq oxox naeuz: “Cawz de bae! Cawzcag de bae! Dawz de ding hwnj gwnz gyaq cixcib bae!” Gajlaeng Bijlahdoh cam gyoengqde naeuz: “Faenhsou hawj gou ding goengjvuengz faenhsou hwnj gwnz gyaq cixcib bae haj?” Yiengq doengh goengjsae dajbwiz he han de naeuz: “Cawzok Gaijsaj, gyoengqraeuz mij lingh goengjvuengz hah!” 16 Gyoengqde cungj yienghneix naeuz lo, guh hwj Bijlahdoh mij banqfaz, couh swhswh gyau Yehsuh hawj gyoengqde, ajcaih gyoengqde dawz de bae ding hwnj gwnz gyaq cixcib bae. 17 Couh yienghneix, gyoengqde couh daiq Yehsuh bae lo. Yehsuh caemh gag aemq aen gyaq cixcib de bae, bae daengz mwnq dieg heuh Dieg Ndokraeuj he (gangj Hihbwzlaiz vah dwg heuh Gozgozdah). 18 Gyoengqde couh youq mwnq dawz de ding hwnj gwnz gyaq cixcib bae. Caemh vanzlij miz song boux caemh ngaiz gyoengqde ding hwnj gwnz gyaq cixcib bae, it boux ding youq it mbiengj, Yehsuh ding youq cungqgyan. 19 Bijlahdoh vanzlij hawj vunz dawz baj baiz he gwnz de sij miz: “Mbanj Nazsajlwz dih Yehsuh, Youzdaiq vunz dih vuengz,” ding hwnj gwnz dingj gyaq cixcib Yehsuh bae. 20 Baj baiz neix gwnz de dwg yungh sam cungj saw ma sij; gwnz de sij miz Hihbwzlaiz saw, Lozmaj saw, Hihlaz saw, sam cungj saw neix. Aenvih ding Yehsuh hih mwnq deixfueng neix dwg gaenh Yehluqsajlaengj Singz he, sojhij miz haujlai Youzdaiq vunz cungj ndaej yawjraen baj baiz neix, caemh rox gij saw gwnz de. 21 Yiengq Youzdaiq vunz hih doengh goengjsae dajbwiz mwnq couh doiq Bijlahdoh naeuz: “Mbouj ndaej sij ‘Youzdaiq vunz dih vuengz;’ wnggai sij ‘Boux vunz neix gag naeuz bonjfaenh de dwg Youzdaiq vunz dih vuengz.’” 22 Bijlahdoh dingq le, han naeuz: “Gou haenj sij gijmaz couh sij gijmaz!” 23 Gij binggyep Lozmaj dawz Yehsuh ding hwnj gwnz gyaq cixcib bae le, couh dawz gwnz ndang de soj daenj hih buh aeu ma faen guh seiq faenh hwj, it boux it faenh, caemhcaiq aeu diuz buhbauz raez de. Diuz buhbauz raez neix dwg yungh vangq boiq dog, couh dwg gwnzlaj vangq boiq dog, mij mwnq doxgap he. 24 Sojhij gyoengqde couh cimciek naeuz: “Gyoengqraeuz mboujyungh mbek diuz de vaih nej; nyaebgaeu aeu ndaej lo, yawj byawz nyaeb ndaej deng diuz de.” Gyoengqde yienghneix guh ngamq lingz ok ndaw Singqgingh ndaw de soj sij hih: Gyoengqde faen aeu gij daenj gou, nipgaeu aeu gij buh gou. Cingqgawq gwhraix, gij binggyep cingqcaen yienghneix guh lo. 25 Mwhde ndwn youq henz gyaq cixcib Yehsuh hih miz daxmeh de caeuq daxheiz de, caeuq Majliqyaq mehyah Gwzlozbaq, caeuq Mbanj Mazdaqlah dih Majliqyaq. 26 Yehsuh yawjraen daxmeh de caeuq boux lwgsae bonjfaenh de haenjheiq he ndwn youq henz de le, couh yinx haeuj laeng boux lwgsae mwnq bae doiq daxmeh de naeuz: “Neq, meh, boux neix couh dwg lwg mwngz!” 27 De yienghneix naeuz le, youhcaiq doiq boux lwgsae mwnq naeuz: “Neq, boux neix dwg daxmeh mwngz.” Daj mwhmwnq hwnj, boux lwgsae mwnq couh daiq daxmeh de maj ranz bonjfaenh de lo. 28 Gajlaeng Yehsuh rox naeuz bonjfaenh de gaenq guh sat gij hong Cangqdiq hawj de guh he lo. Vih ij lingz ok gij vah ndaw Singqgingh, de couh naeuz: “Gou hozhawq lo.” 29 Yiengq ngamqluj youq mwnq miz guenq laeuj he; gyoengqde couh aeu haijmenz ma yomx hwj cug haeuj gaeu nywjvaiz bae, couh dawz ma dwk haeuj vengjbak Yehsuh bae. 30 Yehsuh sup gw le, couh naeuz: “Ox, guh sat lo!” De naeuz gawq neix sat le, couh goemz raeuj gatcaw lo. 31 Ngoenz mwnq cingq dwg ngoenz cwnjbiq (couh dwg singhgiz haj), ij daengz ngoenz ngoenzyietbaeg lo. Youq ngoenz ngoenzyietbaeg mwnq mbouj ndaej venj seihaiz, aenvih ngoenz ngoenzyietbaeg mwnq dwg aen ciet Bienqgoqbae hih ngoenz he, dwg ngoenz dwzdwzbez he. Sojhij gij vunz Youzdaiq couh gouz Bijlahdoh, gouz de baij vunz doh raek gij ha doengh boux ding youq gwnz gyaq cixcib mwnq, hawj doengh boux de rai haemq vaiq, ndaej dawz gij seihaiz gyoengqde deuz. 32 Yiengq Bijlahdoh caemh dungziq. Gajlaeng gij binggyep couh dawz song boux caeuq Yehsuh ngaiz ding hih baez boux baez boux doh raek. 33 Gyoengqde dawz song boux mwnq cungj doh raek le, couh goq bae ij doh Yehsuh, laixlawz raen Yehsuh gaenq rai lo, yiengq couh mij doh raek gij ha de. 34 Hoeng, miz boux binggyep he engq aeu hungzinghcangh ma ndaemq famhdungx de, ndaemq hwj famhdungx de couh doq ok lwed ok raemx okdaeuj. 35 Boux caenra raen gij saeh neix hih boux mwnq caemh cingqmingz goq gij saeh neix hwj. Gij cingqmingz de caemh dwg saedsaeh he; de caemh rox bonjfaenh de soj gangj hih dwg saedsaeh hih. De cingqmingz dwg vih ij hawj faenhsou caemh sinq. 36 Doenghgij saeh gwnz neix ngamqluj lingz ok ndaw Singqgingh ndaw de soj sij naeuz hih: Gij ndok de diuz he cungj mbouj ndaej raek. 37 Ndaw de caemh vanzlij caiq sij miz gawq he: Gyoengqde ij yawj boux ngaiz bonjfaenh gyoengqde ndaemq hih vunz. 38 Gajlaeng, Yozswz Yaqliqmajdaiq Singz vunz bae gouz Bijlahdoh, gouz de hawj de lingx gij seihaiz Yehsuh maj. Bijlahdoh caemh hawj; yiengq de couh bae dawz Yehsuh ma. Boux Yozswz neix caemh dwg gij lwgsae Yehsuh, hoeng, de mbouj hawj vunz rox de caemh dwg lwgsae Yehsuh, aenvih de lau gij lingjdauj Youzdaiq. 39 Yiengq miz boux he, gij coh de heuh Nizgohdijmuj, couh dwg boux gaxgonq doengxhaemh bae laeng Yehsuh goq hih boux mwnq, de caemh caeuq Yozswz itheij bae. De daiq gij rang aeu mozyoz caeuq cinzyangh ma doxgyaux he daiq daeuj, daihgaiq daiq miz roekcib gaen yienghneix. 40 Song boux de caemh ciuq gij vunz Youzdaiq bienqnaengz moek vunzrai dih guhfap, aeu boiqmaz ma yomx ndei gij rang doxgyaux mwnq hwj, couh gyuj ndei gij seihaiz Yehsuh. 41 Youq mwnq Yehsuh ngaiz vunz ding hwnj gwnz gyaq cixcib bae hih mwnq, miz aen suen he. Ndaw suen de miz congh moh moq mijyaengz miz vunz coengq goq he. 42 Aenvih ngoenz mwnq dwg gij vunz Youzdaiq dih ngoenz cwnjbiq, caiq gyacangq congh moh mwnq caiq gaenh, gyoengqde couh dawz Yehsuh bae mwnq cangq lo.
1 Ngoenzsinghgiz doengxhaet daihcaeux ranz mijyaengz rongh, Mbanj Mazdaqlah dih Majliqyaq couh bae daengz aen moh coengq Yehsuh mwnq lo. De bae daengz mwnq le, engq raen ngauq rin caet bakcongh moh mwnq gaenq nod deuz lo. 2 De raen yienghneix le, couh riq bae cimh Sihmaenz-Bijdwz caeuq boux lwgsae Yehsuh haenjheiq he mwnq, doiq gyoengqde naeuz: “Miz vunz daj ndaw moh senj bouxcawj raeuz deuz lo; mbouj rox hih senj de bae mwnqlaw coengq lo!” 3 Bijdwz caeuq boux lwgsae Yehsuh haenjheiq he mwnq dingq Majliqyaq yienghneix naeuz le, song boux de couh vaiqdi riq bae aen moh mwnq yawj. 4 Boux lwgsae mwnq, de riq ndaej haemq vaiq. De riq bae daengz gaxgonq, 5 hoeng de mij haeuj aen moh mwnq bae yawj; youq rog neix goemz roengzma ndomqyawj lah. De yawjraen vangq boiqmaz gyuj Yehsuh mwnq vanzlij youq mwnq. 6 Sihmaenz-Bijdwz riq bae daengz gajlaeng. De bae daengz couh doq cizsez haeuj ndaw moh bae yawj, yawjraen vangq boiqmaz gyuj Yehsuh mwnq coengq youq mwnq, 7 hoeng, mbaw gyuj raeuj de mij caeuq vangq boiqmaz doxcaeuq coengq, gag gienj hwj coengq youq gok he. 8 Gajlaeng boux lwgsae sien riq bae daengz mwnq, de caemh haeuj bae; haeuj bae yawjraen yienghneix le, couh sinq lo. 9 Vihmaz de seizneix cij sinq, dwg aenvih yienzlaiz gyoengq lwgsae Yehsuh gaenhbaenj mbouj rox ndaw Singqgingh ndaw de soj sij naeuz hih, de gaengjdingq rai ndaej dauqlix, gawq neix dih gij iqswh de. 10 Song boux de raen yienghneix le, couh gag maj ranz lo. 11 Song boux de gaenq maj ranz lo, hoeng, Majliqyaq cungj lij gag ndwn youq rog moh mwnq daej. De doq daej doq ndomqyawj ndaw moh. 12 Baex ndomqyawj he, engq yawjraen miz song boux bouxcai Cangqdiq daenj buh bieg hwj naengh youq mwnq gaxgonq coengq Yehsuh mwnq, boux he youq raeuj, boux he youq rieng. 13 Bouxcai Cangqdiq raen de le, couh cam de naeuz: “Dahnuengx, mwngz ij daej maz lah?” Yiengq Majliqyaq han naeuz: “Miz vunz dawz bouxcawj gou deuz lo; mbouj rox hih gyoengqde dawz de bae daengz mwnqlaw coengq lo.” 14 Majliqyaq gangj gawq neix sat le, baex veq ndang goqma he, couh raen Yehsuh ndwn youq mwnq, hoeng, de mbouj rox de couh dwg Yehsuh. 15 Gajlaeng, Yehsuh doiq de naeuz: “Dahnuengx, mwngz ij daej maz lah? Mwngz ij cimh byawz lah?” Hoeng, Majliqyaq naemqnaeuz de dwg boux guenj suen mwnq lah, couh doiq de naeuz: “Goengjau, hauhnaeuz dwg mwngz dawz de bae nex, gou gouz mwngz naeuz gou ni, mwngz coengq de youq mwnqlaw lah? Gou ij bae dawz de ma.” 16 Yehsuh dingq de yienghneix naeuz le, couh heuh de naeuz: “Majliqyaq!” Yehsuh heuh le, Majliqyaq couh veq ndang goq laeng de bae, couh yungh Hihbwzlaiz vah ma heuh de naeuz: “Lahbohniz! Lahbohniz!” (‘Lahbohniz’ gij iqswh de dwg naeuz ‘lauxsae.’) De yienghneix heuh caemh doq rag dawz de. 17 Gajlaeng, Yehsuh doiq de naeuz: “Gaej rag dawz gou, aenvih gou mijyaengz hwnj bae laeng daxboh mwnq haem. Mwngz bae daengz doenghheij beixnuengx gou mwnq bae, bae naeuz gyoengqde ni, gou ij hwnj bae laeng boh gou mwnq, Cangqdiq gou lo; de caemh dwg boh faenhsou, Cangqdiq faenhsou hwj.” 18 Mbanj Mazdaqlah dih Majliqyaq dingq Yehsuh yienghneix naeuz le, couh bae naeuz gyoengq lwgsae ni naeuz: “Gou gaenq ndaej raen bouxcawj raeuz lo!” Gajlaeng de vanzlij caiq gangj naeuz gyoengq lwgsae ni Yehsuh doiq de soj gangj hih vah. 19 Couh youq ngoenz mwnq, ngoenzsinghgiz doengxhaemh, gyoengq lwgsae doxcomz. Aenvih gyoengqde lau gij lingjdauj Youzdaiq, sojhij gyoengqde couh gven dou hwj cij doxcomz, hoeng, Yehsuh ciuqyiengh ndaej haeuj bae. De ndwn youq cungqgyan gyoengqde dongx gyoengqde naeuz: “Muengh faenhsou bingzan!” 20 De naeuz gawq neix le, couh iet fawz okdaeuj hawj gyoengqde yawj, caiq bwenj famhdungx de hawj gyoengqde yawj. Gyoengq lwgsae raen le, couh rox de dwg bouxcawj gyoengqde lo, couh angq hwj ij rai bae. 21 Gajlaeng Yehsuh youhcaiq doiq gyoengqde naeuz: “Muengh faenhsou bingzan! Boh baenzlaw baij gou daeuj, gou caemh baenzlaw baij faenhsou bae.” 22 De gangj gawq vah neix sat le, couh boq gaemz heiq he hawj gyoengqde naeuz: “Faenhsou lingx aeu Hoenzsaenz Cangqdiq bax! 23 Faenhsou mienx byawz hih coih, byawz couh ndaej mienx coih lo; faenhsou mbouj mienx byawz hih coih, byawz couh mbouj ndaej mienx coih lo.” 24 Hoeng, cibngeih boux lwgsae ndaw de miz boux he, gij coh de heuh Dohmaj, caemh heuh Dihdujmaj, mwh Yehsuh yienh hawj gyoengq lwgsae raen hih mwhde de mbouj caeuq gyoengq lwgsae doih youq mwnq, mbouj ndaej raen Yehsuh. 25 Gajlaeng gyoengq lwgsae doih doiq de naeuz: “Gyoengqraeuz ndaej raen bouxcawj raeuz hwj!” Hoeng, Dohmaj mbouj sinq; de naeuz: “Cizfeih gou ndaej caenra raen gij fawz de hih mwnq ding sieng mwnq, gij fawz gou ndaej mo daengz mwnq ding sieng de, ndaej mo daengz famhdungx de, mbouj nex gou gaengjdingq mbouj sinq.” 26 Yiengq goq bet ngoenz le, gyoengq lwgsae caiq doxcomz; mbat neix Dohmaj caemh caeuq gyoengqde doxcomz, dou caemh gven hwj. Sawqmwh Yehsuh daeuj daengz gyoengqde mwnq, dongx gyoengqde naeuz: “Muengh faenhsou bingzan!” 27 De naeuz gawq neix sat le, couh doiq Dohmaj naeuz: “Aeu lwgfawz mwngz momo gij fawz gou yawj, caiq momo famhdungx gou yawj bax! Gaejyungh ngeiz mbouj sinq; cijaeu sinq couh ndaej lo!” 28 Dohmaj raen yienghneix le, couh naeuz: “Ox! Bouxcawj gou Cangqdiq hax!” 29 Gajlaeng Yehsuh caiq doiq Dohmaj naeuz: “Aenvih mwngz yawjraen gou cij sinq. Hoeng, doengh boux mij raen gou he cix sinq lo, doengh boux mwnq gaeuq miz fuk lo.” 30 Gajlaeng, Yehsuh vanzlij youq dangqnaj gyoengq lwgsae de guh baenx haujlai geizmiuj dih saeh, hoeng, cungj mij sij youq ndaw bonj saw neix. 31 Sij youq ndaw bonj saw neix hih saeh dwg vih ij hawj faenhsou sinq Yehsuh dwg Gihduz, Cangqdiq baij daeuj dih vuengz, dwg lwg Cangqdiq, caemh dwg vih hawj faenhsou sinq de hwj ndaej seiqseiz lix lah.
1 Gij saeh neix goq le, Yehsuh youq henz haij Dizbijlijyaq caiq yienh hawj gyoengq lwgsae de raen. De baenzlaw yienh hawj gyoengq lwgsae de raen nej, dwg yienghneix hih: 2 Miz baez he, Sihmaenz-Bijdwz caeuq Dohmaj (vunz caemh heuh de Dihdujmaj) caeuq Nazdanqnez Gyahliqliq dih Mbanj Gyahnaz vunz caeuq song daeglwg Sihbiqdaiq, vanzlij miz song boux lwgsae haem doxcomz youq itheij. 3 Yiengq Sihmaenz-Bijdwz doiq gyoengqde naeuz: “Gou ij bae dwk bya lo.” Yiengq gyoengqde han naeuz: “Raeuz caemh gaen mwngz bae.” Couh yienghneix, gyoengqde couh hwnj ruz bae dwk bya lo, hoeng, gyoengqde dwk baenx ngwnz cungj mij dwk ndaej saek duz. 4 Couh youq mwh ranz ij rongh hih mwh he, Yehsuh ndwn youq gwnz hamq mwnq, hoeng, gyoengq lwgsae gaenhbaenj mbouj rox de couh dwg Yehsuh. 5 Yehsuh doiq gyoengqde naeuz: “Baengzyoux, faenhsou dwk ndaej bya lwi?” Gyoengqde han naeuz: “Mij ndaej hah.” 6 Gajlaeng, Yehsuh caiq doiq gyoengqde naeuz: “Dawz fan muengx vanq roengz baixgvaz aen ruz bae; gaengjdingq dwk ndaej bya.” Gyoengqde dingq le, caemh ciuq de gangj hih yienghmwnq bae guh lo. Liuh mbouj daengz cingqgawq ndaej baenxbienh bya gwhraix, lai hwj daiq rag muengx cungj rag mbouj ndaej hwnjma bae. 7 Yiengq, Yehsuh haenjheiq hih boux lwgsae mwnq raen yienghneix le, couh doiq Bijdwz naeuz: “Aex! Dwg bouxcawj raeuz!” Sihmaenz-Bijdwz baex dingq naeuz dwg bouxcawj le, couh vaiqdi dawz diuz buh baixrog de cug haeuj rwet bae (aenvih mwhde de dwg loxgenz he). De cug haeuj rwet bae le, couh doq diuq roengz haij bae, riuz haeuj henz hamq ma. 8 Mwhde aen ruz liz henz hamq mbouj geijlwh gyae, aiq miz bak mij yienghneix gyae. Bijdwz gag riuz haeujma henz hamq; lij doengh boux lwgsae mwnq, gyoengqde vad ruz gaen gajlaeng de rag fan muengxbya haeuj henz hamq ma. 9 Gajlaeng gyoengqde hwnj hamq ma le, couh yawjraen miz dong feizdanq he, gwnz de gak miz bya caeuq bingj hwj. 10 Yehsuh couh doiq gyoengqde naeuz: “Dawz geij duz bya faenhsou dwk ndaej he goq daeuj.” 11 Yehsuh yienghneix naeuz le, Sihmaenz-Bijdwz couh hwnj ruz bae rag fan muengxbya hwnj hamq ma. Ndaw muengx mwnq cenznaengz ndaej bya hung, itgungh muengx ndaej itbak hajcib sam duz. Gannaeuz muengx ndaej baenxbienh bya lah, hoeng, fan muengx cungj mbouj ngaiz vaih saek di. 12 Gajlaeng Yehsuh caiq doiq gyoengqde naeuz: “Daeuj, gw haeuxngaiz bax!” Mwhde gyoengq lwgsae raen yienghneix lo, hoeng cungj mij saek boux gamj cam de dwg byawz, aenvih gyoengqde bouxboux cungj gag rox, de couh dwg bouxcawj gyoengqde dih Yehsuh lo. 13 Yehsuh yienghneix naeuz le, couh byaij goqbae aeu bingj aeu bya faen hawj gyoengqde gw. 14 Yehsuh rai ndaej dauqlix le, mbat neix dwg de daixsam mbat yienh hawj gyoengq lwgsae de raen. 15 Couh yienghneix, gyoengqde gw haeuxngaiz sat le, Yehsuh cam Sihmaenz-Bijdwz naeuz: “Sihmaenz daeglwg Yozhanq, mwngz beij gizdah lwgsae aiq gou lwi?” Bijdwz dingq le, han naeuz: “Dwg hah, bouxcawj gou hax, mwngz rox gou aiq mwngz hah.” Yehsuh dingq le, couh doiq de naeuz: “Yiengq mwngz couh gueng doenghheij yiengzlwg iq gou bax!” 16 De yienghneix naeuz le, vanzlij caiq cam Bijdwz daixngeih mbat naeuz: “Sihmaenz daeglwg Yozhanq, mwngz aiq gou lwi?” Bijdwz dingq le, caiq han de naeuz: “Bouxcawj gou hax, dwg hah, mwngz rox gou aiq mwngz hah.” Yehsuh dingq le, caiq doiq de naeuz: “Yiengq mwngz couh ciengx gij yiengz gou bax!” 17 De yienghneix naeuz le, youhcaiq cam Bijdwz daixsam mbat naeuz: “Sihmaenz daeglwg Yozhanq, mwngz aiq gou lwi?” Bijdwz raen Yehsuh sam mbat cungj yienghneix cam de naeuz: “Mwngz aiq gou lwi?” le, couh yousim hwj doiq Yehsuh naeuz: “Bouxcawj gou hax, mwngz mij'z naeuz gijmaz mbouj rox hah; mwngz rox gou aiq mwngz hah!” Yehsuh dingq le, youhcaiq doiq de naeuz: “Mwngz gueng gij yiengz gou bax!” 18 Yehsuh gangj sat doenghgij vah neix le, caiq doiq Bijdwz naeuz: “Gou saedsaeh naeuz mwngz ni lo, mwngz lij hauxseng hih mwh he, ndaej gag cug sairwet, siengj bae mwnqlaw couh bae mwnqlaw; hoeng, daengj daengz laux le, couh mbouj dwg yienghneix lo. Mwngz ngaiz iet fawz hawj vunz cug mwngz, vunz daiq mwngz bae mwnq mwngz mbouj haenj bae he.” 19 (Yehsuh gangj gij vah neix dwg naeuz Bijdwz ni, Bijdwz de ij baenzlaw rai hwj ndaej hawj Cangqdiq najrongh.) Yehsuh gangj sat doenghgij vah neix le, vanzlij caiq doiq Bijdwz naeuz: “Mwngz daeuj gaen gou bax!” 20 Gajlaeng Bijdwz veq ndang goqma yawjraen Yehsuh haenjheiq hih boux lwgsae mwnq gaen youq gajlaeng, couh dwg boux lwgsae youq mwh donq haeuxcaeuz gatsat mwnq naengh youq henz ndang Yehsuh cam Yehsuh naeuz: “Bouxcawj gou hax, dwg byawz ij cuzmaiq mwngz hax?” hih boux lwgsae mwnq lo. 21 Bijdwz raen yienghneix le, couh cam Yehsuh naeuz: “Bouxcawj hax, yiengq de nej? De ij ngaiz yienghlawz rai hax?” 22 Yehsuh dingq le, han de naeuz: “Mwngz ij cam ma guh gijmaz nex? Hauhnaeuz gou ij hawj de daengj daengz gou dauq daeuj hih mwhde, cix ij gvan maz mwngz saeh nej? Mwngz caenhrox gaen gou sat lo.” 23 Couh vih yienghneix, gajlaeng youq ndaw gyoengq lwgsae ndaw de cungj cenz naeuz boux lwgsae mwnq mbouj rox rai. Gizsaed, Yehsuh gaenhbaenj mbouj dwg naeuz de mbouj rox rai, dwg naeuz: “Hauhnaeuz gou hawj de daengj daengz gou dauq daeuj hih mwhde, cix ij caeuq mwngz miz maz gvanhaeh nex?” gawq neix lah. 24 Boux lwgsae mwnq couh dwg ndaej cingqmingz gwnz neix sojmiz hih saeh, caemh dawz doenghgij saeh neix geiq roengzma hih boux mwnq lo. Gyoengqraeuz caemh rox de soj cingqmingz hih cungj dwg saedsaeh hih. 25 Cawzok gwnz neix doenghgij saeh neix, Yehsuh vanzlij guh baenx haujlai saeh haem, hauhnaeuz yienghyiengh cungj ij sij okdaeuj liux nex, gwh yawj hax, baenx cenz ciqgyaiq cungj coux mbouj liux hwx.
1 Dizahfeihloz senhsaengh, gou gaenq youq daixit cek saw sij gvanhhih Yehsuh daj gaihcij soj guh dih saeh caeuq soj son hih, 2 itcig daengz de ciep hwnj mbwn bae hih ngoenz mwnq, cungj sij goq lo. Youq de mijyaengz ciep hwnj mbwn bae cihsenz, de hawj Hoenzsaenz Cangqdiq raengq gij lwgsae de senj okdaeuj he. 3 Daj de souh nanh goq hwnj seiqcib ngoenz ndaw de, de yienh hawj gyoengq lwgsae de raen goq haujlai mbat, yungh haujlai cungj fanghfaz ma cingqmingz de vanzlij lix, caemh vanzlij caeuq gyoengqde gangj gvanhhih aen guek Cangqdiq dih saeh. 4 Miz mbat he, de caeuq gyoengq lwgsae de doxcomz. De raengq gyoengqde naeuz: “Faenhsou mbouj ndaej lizgaih Yehluqsajlaengj; ij youq mwnqneix daengj Bohmbwn dapwngq goq ij hawj faenhsou hih, couh dwg gou caeuq faenhsou gangj goq hih, 5 couh dwg naeuz goq mbouj geijlwh ngoenz, Hoenzsaenz Cangqdiq couh ij daeuj daengz gwnz ndang faenhsou, sijlij hawj faenhsou—mbouj luj gaxgonq Yozhanq aeu raemx ma sijlij law.” 6 Miz mbat he, gyoengq lwgsae caeuq Yehsuh doxcomz; gyoengqde cam Yehsuh naeuz: “Bouxcawj hax, mwngz dwg mbouj dwg ij youq mwhneix hawj aen guek Hijswzlez raeuz ndaej dauqyungz laeb guek hax?” 7 Yehsuh han gyoengqde naeuz: “Bohmbwn de gag ciuq gij gienzveih bonjfaenh de ma dingh mwhlawz, ngoenzlawz; gij neix mbouj dwg faenhsou siengj rox couh ndaej rox hih nej. 8 Hoeng, daengz mwh Hoenzsaenz Cangqdiq daeuj daengz gwnz ndang faenhsou nex, faenhsou couh ndaej miz ndaek cungj geizmiuj dih bonjsaeh he lo; faenhsou ij bae baenx cenz Yehluqsajlaengj, cenz Youzdaiq, cenz Sajmajliqyaq simqciq baenx cenz lajmbwn sojmiz hih dieg bae, gangj naeuz gij vunz ni, hawj gyoengqde rox gou sojmiz dih saeh.” 9 Couh youq mwh de gangj sat doenghgij vah neix hih mwhde, de mingzmingz youq dangqnaj gyoengqde hwnj mbwn bae lo. Miz vangq fwj he baex gyoengqde hwj yawj mij raen de laem lo. 10 De hwnj mbwn bae hih mwhde, gyoengqde cungj muengh hwnj gwnzmbwn bae yawj, yawj hwj ra mbouj yaep. Couh youq mwhneix, sawqmwh miz song boux daenj buh bieg hwj ndwn youq henz ndang gyoengqde, 11 doiq gyoengqde naeuz: “Gij vunz Gyahliqliq faenhsou hax, faenhsou vihmaz ij ndwn youq dineix muengh mbwn yawj mbwn nej? Boux biek faenhsou hwnj mbwn bae hih Yehsuh, faenhsou yawjraen de baenzlaw hwnj mbwn bae, baezneix de caemh dwg baenzlaw roengz ma lo.” 12 Gajlaeng gyoengqde couh daj bya Gamjlamj maj Yehluqsajlaengj. (Daj mwnq daengz Yehluqsajlaengj daihgaiq miz song leix roen.) 13 Gyoengqde maj daengz ndaw singz le, couh hwnj laeuz bae, haeuj aen fungh gyoengqde youq he mwnq bae lo. Youq mwnq miz Bijdwz, Yozhanq, Yajgoz, Anhdwzlez, Feihliz, Dohmaj, Bahdohlozmaij, Majdaiq, daeglwg Yaqlwzfeih Yajgoz, vanzlij miz Gizcwnq Dangj dih Sihmaenz caeuq daeglwg Yajgoz Youzdaq, 14 caemh miz daxmeh Yehsuh Majliqyaq caeuq daegnuengx de, vanzlij miz geij boux vunzbaz. Gyoengqde doxcomz youq mwnq itheij gouzhaenh Cangqdiq, caemh dwg gouzhaenh haujlai caez. 15 Miz ngoenz he, daihgaiq miz bakngeih vunz yienghneix doxcomz. Bijdwz ndwn hwnjdaeuj naeuz: 16 “Gak boux beixnuengx hax, gvanhhih boux Youzdaq buenqduz daiq vunz daeuj gaemh Yehsuh hih, de baenzlaw satsoq, Hoenzsaenz Cangqdiq gaenq senqsi cix hawj Daqveiq sij youq ndaw Singqgingh lo. Gij de caemh ij lingz okdaeuj. 17 Youzdaq boux vunz neix gaxgonq dwg gyoengq vunz raeuz ndaw neix hih boux he, caeuq raeuz itheij guh saeh goq.” 18 (De yungh bonjfaenh de buenqduz cuzmaiq Yehsuh ndaej hih ngaenz ma cawx gaiq reih he; de couh youq gaiq reih neix mwnq sang he doek roengzma, dungx mbongq saej canh. 19 Youq Yehluqsajlaengj hih vunz cungj rox gij saeh neix, sojhij yungh gij vah gyoengqde mwnq ma an gij reih mwnq heuh guh Yaqgwzdaqmaj—‘Yaqgwzdaqmaj’ couh dwg ‘reih lwed’ dih iqswh.) 20 Bijdwz caiq naeuz: “Ngamqluj Daqveiq youq ndaw Gij Go Haenh Cangqdiq sij naeuz: Muengh mwnq de youq he bienq dieg vangh dieg fwz, mij'z vunz youq ndaw de. Caemh vanzlij miz mwnq he sij naeuz: Muengh ngaiz vunz dingj guh faenh hong de.” 21-22 Bijdwz vanzlij caiq naeuz: “Sojhij gyoengqraeuz bietdingh ij linghvaih senj boux he daeuj dingj Youzdaq gaep gyoengqraeuz guh bouxcawj raeuz Yehsuh dauqlix dih cingqyinz. Boux vunz neix bietdingh ij dwg daj Yehsuh hawj Yozhanq sijlij gaihcij itcig daengz de ndaej ciep hwnj mbwn bae hih mwhmwnq cungj dwg caeuq raeuz itheij gaen de he.” 23 Bijdwz yienghneix gangj le, gajlaeng gyoengqde couh senj song boux okdaeuj, couh dwg boux singq Bahsajbah he (gij coh de heuh Yozswz, caemh heuh Youzswqduh) caeuq Majdizyaq, song boux neix. 24 Gyoengqde senj song boux neix okdaeuj le, couh gouz Cangqdiq naeuz: “Bouxcawj hax, mwngz rox sojmiz hih vunz dih sim; gouz mwngz naeuz raeuz ni, song boux neix bouxlawz dwg mwngz senj okdaeuj 25 dingj Youzdaq guh boux dwzbaijyienz he, aenvih Youzdaq gaenq gag vwt gij hong guh dwzbaijyienz de hwj bae mwnq deixfueng de hab bae he lo.” 26 Gyoengqde gouz doengh gawq neix le, couh nipgaeu song boux de, gajlaeng nip dawz Majdizyaq. Couh yienghneix, de couh gaep haeuj cib'it boux dwzbaijyienz mwnq bae lo.
1 Youq ngoenz aen ciet Ujcwnz ngoenz mwnq, gyoengq lwgsae youq ndaw ranz doxcomz. 2 Sawqmwh miz sing yiengj daj gwnzmbwn cenz roengzdaeuj, caenh luj raq rumz hung he dwk foxfox ci haeuj aen ranz gyoengq lwgsae youq mwnq bae. Gij sing mwnq cenz baenx cenz ranz. 3 Caemh miz gij luj duj feiz yienghmwnq, sanq roengz gwnz ndang gak vunz bae. 4 Gajlaeng gak vunz cungj miz Hoenzsaenz Cangqdiq doz youq gwnz ndang; gak vunz couh ciuq Hoenzsaenz Cangqdiq hawj gyoengqde gangj cungj vah lawz gyoengqde couh gangj cungj vah lawz. 5 Mwhmwnq, youq Yehluqsajlaengj miz haujlai Youzdaiq vunz aiq Cangqdiq yawjnaek Cangqdiq he daj ciqgyaiq gak dieg daeuj. 6 Gyoengqde dingqri sing yiengj le, cungj caezgya ok daeuj doxcomz. Yiengq gyoengqde couh dingqri gyoengq lwgsae gak vunz gag gangj cungj vah mbouj doxdoengz he, hoeng gyoengq vunz bouxboux cungj gag dingqri gij vah bonjdeih bonjfaenh, couh raen geizheih ij rai bae. 7 Gyoengqde raen yienghneix le, couh naeuz: “Yawj veiq, gangj gij vah neix hih vunz mbouj dwg Gyahliqliq vunz maz? 8 Geizheih! Gyoengqraeuz gak vunz guxmaz cungj gag dingqri gyoengqde gangj gij vah raeuz daj lij iq cix gangj hih vah hax? 9 Gyoengqraeuz dineix miz Baqdizyaq vunz, Majdaiq vunz, Hijlanz vunz, caeuq youq Meijsojbuqdazmijyaq hah, youq Youzdaiq hah, youq Gyahbaqdohgyah hah, youq Baenjduh hah, youq Yaqsiqyaq hah, 10 youq Fozlijgyah hah, youq Bangzfeihliqyaq hah, youq Ngaihgiz hah, caeuq youq gaenh Gujliqnaiq dih Liqbijyaq dieg hih vunz hah. Vanzlij miz daj Lozmaj daeuj dih Youzdaiq vunz caeuq linghvaih aen minzcuz gaep haeuj Youzdaiqgyauq hih vunz hah, 11 caemh miz Gwzlijdwz vunz caeuq Yaqlahbwz vunz. Miz baenx lai daj mbouj doengz hih deixfueng daeuj hih cungj dingqri gyoengq vunz yungh gij vah bonjdeih gyoengqraeuz ma gangj ma haenh naeuz Cangqdiq dih veijdaq!” 12 Gyoengqde bouxboux cungj doeksaet geizheih hwj boux yawj boux naeuz: “Ndaek gijn'x dwg gijmaz iqswh gaenq lo?” 13 Yiengq caemh miz mbangj hih vunz engqgya lengxriu gyoengq lwgsae naeuz: “Gyoengq vunz gyoengqn'x, dwg gw laeuj fiz hih lah!” 14 Couh youq mwhneix, Bijdwz caeuq cib'it boux dwzbaijyienz doih de couh ndwn hwnjdaeuj. De sing sang hwnjdaeuj doiq gij vunzlai naeuz: “Youzdaiq vunz caeuq youq Yehluqsajlaengj sojmiz hih vunz hax, cingj faenhsou yaek rwz hwj dingq gou naeuz sou ni gij neix dwg gijmaz iqswh bax. 15 Couh dwg naeuz gyoengq vunz neix gaenhbaenj mbouj luj faenhsou naemj hih yienghmwnq gw laeuj fiz, aenvih seizneix cijmboujgoq ngamq dwg doengxhaet gouj diemjcung hwj mah. 16 Gizsaed hax, seizneix faenhsou soj yawjraen hih ngamqluj Yozwj boux cenz gij vah Cangqdiq neix youq ndaw Singqgingh ndaw de sij goq, naeuz: 17 Cangqdiq naeuz: ‘Youq mwh lajmbwn ijvanh daengz ngoenz gatsat he, gou ij dawz Hoenzsaenz gou nyok hawj lajmbwn sojmiz hih vunz. Gij lwg faenhsou ij ndaej dingq daengz Cangqdiq gangj vah, caiq dawz Cangqdiq gangj hih vah gangj naeuz vunz ni; gij hauxseng faenhsou ij ndaej raen Cangqdiq yienh okdaeuj hih doenghgij he; gij vunz laux faenhsou ij fangxngwnzloq raen Cangqdiq hawj gyoengqde rox dih saeh. 18 Daengz mwhmwnq, gou ij dawz gij Hoenzsaenz gou nyok hawj doenghheij hoiq gou, mboujguenj hoiq vunzsai cixnaeuz hoiq vunzbaz, hawj gyoengqde cungj ndaej dingq daengz gou gangj vah, caiq dawz gou gangj hih vah gangj naeuz vunz ni. 19 Youq gwnzmbwn gou ij yienh gij geizmiuj he; youq lajdeih gou ij guh gij gingjdoengh he, couh dwg miz lwed, miz feiz, miz oenq. 20 Gyangjngoenz ij bienq amq fubfub; aen ndwen ij hoengz luj lwed. Youq ngoenz gig rongh gig veijdaq hih bouxcawj daeuj saemjbuenq hih ngoenz mwnq cihsenz, doenghgij saeh neix cungj ij fatseng. 21 Daengz mwhmwnq, sojmiz gouz bouxcawj hih vunz cungj ndaej gouq.’” 22 Bijdwz gangj daengz dineix le, de caiq naeuz: “Gak boux Hijswzlez vunz hax, cingj faenhsou dingq gou naeuz! Cangqdiq, vih ij cingqmingz Mbanj Nazsajlwz vunz dih Yehsuh, couh hawj de youq faenhsou mwnqneix guh doenghgij geizmiuj hih saeh he hwj ndaej cingqmingz Cangqdiq dih gienzveih gaenq fazveih he lo; doenghgij neix faenhsou caemh gaenq rox hih lo. 23 Cangqdiq caemh senqsi cix rox gij saeh ij fatseng he lo. De couh ciuq gij cawjeiq bonjfaenh de ma hawj vunz dawz Yehsuh gyau hawj faenhsou; gajlaeng faenhsou couh dunghgoq gij vunz yawj gij fazliz Cangqdiq mbouj hwnj rwz he ma dawz de ding hwnj gwnz gyaq cixcib bae, haih de rai. 24 Hoeng, Cangqdiq dauq hawj de daj rai ndaej duet okdaeuj, ndaej dauqlix, aenvih rai mbouj ndaej guenjciq de. 25 Gangj daengz de, Daqveiq goengjvuengz neix vanzlij youq ndaw Singqgingh dawz gij vah de sij okdaeuj naeuz: Gou siengzseiz raen Cangqdiq youq dangqnaj gou, youq baixgvaz gou raeuz gou, hawj gou ndwn ndaej gaenj. 26 Vih yienghneix hwj aen sim gou cix angq, bak cix diemz, ndangdaej cix youq ndaej onj, 27 aenvih mwngz gaengjdingq mbouj dawz gij hoenzsaenz gou louz youq ndawlaep, caemh mbouj hawj boux gvi haeuj mwngz ndang naeuh. 28 Mwngz gaenq yinx diuz roen ndaej miz mingh he hawj gou lo; miz mwngz yawjnaek gou, hawj gou sim'angq ij rai.” 29 Bijdwz vanzlij caiq naeuz: “Gak boux beixnuengx hax, gvanhhih Daqveiq boux cojgoeng neix dih saeh, gou saedsaeh naeuz sou ni, de gaenq rai lo, cixcaemh moek lo, aen ndang de cixcaemh naeuh lo; aen moh de daengz seizneix vanzlij youq. 30 Hoeng, de dwg boux cenz gij vah Cangqdiq he; de caemh rox Cangqdiq yiengq de baujcingq goq, baujcingq ij daj doengh daih gajlaeng de dingh boux he daeuj swnj de guh vuengz. 31 De caemh ndaej rox daengz Cangqdiq giqvaq ij guh hih saeh, sojhij gangj daengz Gihduz dauqlix, de naeuz: De mbouj ngaiz louz youq ndawlaep, caemh mbouj ngaiz ndang naeuh. 32 “Yehsuh boux neix, Cangqdiq gaenq hawj de dauqlix lo; gyoengqraeuz cungj dwg cingqyinz, ndaej cingqmingz gienh saeh neix. 33 Seizneix Yehsuh gaenq naengh youq Cangqdiq dih mbiengj baixgvaz de lo, naengh mwnq ceiq ndei ceiq miz naj he. De ciep aeu gij Cangqdiq daxboh de, soj baujcingq he, couh dwg ciep aeu Hoenzsaenz Cangqdiq coengq roengzdaeuj hawj vunz, couh dwg faenhsou seizneix soj yawjraen hih soj dingqri hih.” 34 Bijdwz vanzlij caiq naeuz: “Gou daxbaenh ngamqngamq daez daengz dih doenghgij vah senqsi gangj goq caeuq youq ndaw Singqgingh ndaw de sij miz hih doenghgij neix mbouj dwg naeuz Daqveiq bonjfaenh de gag ceij bonjfaenh de naeuz law, aenvih Daqveiq gaenhbaenj mbouj ndaej ciep hwnj mbwn bae. Hoeng, de gan naeuz: Cangqdiq doiq bouxcawj gou naeuz: ‘Naengh youq baixgvaz gou, 35 daengj gou dawz gij dizyinz mwngz bienqbaenz aen daengq mwngz.’ 36 Sojhij, sojmiz hih Hijswzlez vunz hax, faenhsou ijaeu rox, boux ngaiz faenhsou ding rai youq gwnz gyaq cixcib dih Yehsuh, Cangqdiq gaenq laeb de guh bouxcawj raeuz, baij de daeuj guh vuengz raeuz lo.” 37 Gyoengq vunzlai dingq Bijdwz gangj doenghgij vah neix le, ndaw sim cungj mbouj onj, lujnaeuz miz cax ndaemq youq ndaw de nwih. Yiengq gyoengqde couh doiq Bijdwz caeuq doenghheij dwzbaijyienz he naeuz: “Beixnuengx hax, gyoengqraeuz ij baenzlaw guh nej?” 38 Gajlaeng Bijdwz han gyoengqde naeuz: “Faenhsou gak vunz cungj ij daj ndaw sim nginh loek gaijgoq, caemh ij nginh Yehsuh Gihduz hwj sijlij; yienghmwnq gij coih faenhsou couh ndaej mienx lo, caemh ndaej miz Hoenzsaenz Cangqdiq soengq hawj he lo, 39 aenvih Cangqdiq soj baujcingq hih dwg ij soengq hawj faenhsou caeuq doengh daih gajlaeng faenhsou. Mbouj danhcij naeuz yienghneix, daiqlienz doenghheij vunz youq gyae'gyae he, fanjcingq sojmiz bouxcawj raeuz Cangqdiq ij heuh daeuj he hih vunz cungj ndaej.” 40 Gajlaeng Bijdwz vanzlij gangj baenx haujlai gvanhhih Yehsuh dih saeh, caemh doiq gyoengq vunz naeuz: “Seiqgan seizneix daiq yienjcik yienjgienq lai lo; faenhsou ij singqsag hwnjdaeuj, mbouj ndaej gag cimh rai!” 41 Couh youq ngoenz mwnq, doenghheij vunz sinq de soj gangj hih caemh sijlij hih daihgaiq miz samcien vunz. Couh yienghneix, ngoenz mwnq miz baenx lai vunz gaep haeuj gyoengq lwgsae bae. 42 Gajlaeng gyoengq vunz cungj dwg caensim dingq gyoengq dwzbaijyienz son gyoengqde, caemh cungj dwg doxcomz doxbang, cungj dwg doxcomz euj menqbauh gw vih ij gijnenq Yehsuh, cungj dwg doxcomz haenh Cangqdiq gouz Cangqdiq. 43 Gajlaeng, gyoengq dwzbaijyienz caiq guh baenx haujlai geizmiuj dih saeh hwj ndaej cingqmingz Cangqdiq dih gienzveih gaenq fazveih he lo, guh hwj gyoengq vunzlai cungj lau ij rai bae. 44 Hoeng gyoengq vunz sinq he cungj caemh ciuqyiengh dwg doxcomz youq itheij, miz gijmaz cungj dwg doxcaeuq gw, doxcaeuq yungh. 45 Gyoengqde vanzlij dawz reih hah, gyadangq hah hai bae, dawz gij ngaenz faen hawj gak vunz, caemh dwg ciuq gak vunz ij yungh hih faen hawj gyoengqde. 46 Gyoengqde ngoenzngoenz cungj youq gunghdenq Cangqdiq doxcomz, caemh bae ndaw ranz gak vunz doxcomz doxcaeuq gw, gak vunz cungj haijliengh raixcaix. Gyoengqde yienghneix guh, gak vunz cungj roxnginh sim'angq. 47 Gyoengqde caemh siengzseiz haenh Cangqdiq. Gij vunz mwnq raen gyoengqde yienghneix le, bouxboux cungj haenj gyoengqde, yawjhwnj gyoengqde. Yehsuh Bouxcawj caemh hawj doenghheij vunz sinq de le ndaej gouq he, hawj doenghheij vunz neix gaep haeuj gyoengqde, hawj gyoengqde yied ngoenz yied miz vunz lai.
1 Miz ngoenz he, yaquj sam diemjcung yienghneix, couh dwg mwh gij vunz Youzdaiq doxcomz haenh Cangqdiq gouz Cangqdiq hih mwhde, Bijdwz caeuq Yozhanq caemh bae gunghdenq Cangqdiq camhgyah. 2 Yiengq youq gunghdenq hih bakdou he (bakdou neix heuh Dou Gyaeu) miz boux vunz gyad he; boux de dwg daiqseng baenz he. De ngoenzngoenz cungj hawj vunz ram de daeuj daengz bakdou neix, daeuj mwnq neix dwg ijsiengj ndaej laeng gij vunz haeuj gunghdenq bae he vaq aeu ngaenz. 3 Couh youq mwhneix, de yawjraen Bijdwz caeuq Yozhanq ij haeuj gunghdenq bae; de couh gouz song boux de, siengj laeng song boux de aeu ngaenz. 4 Song boux de raen le, couh cimyawj de, gajlaeng Bijdwz couh doiq de naeuz: “Yawj haeuj laeng song boux raeuz daeuj!” 5 Yiengq boux de couh cimyawj song boux de, naemqnaeuz ij ndaej gijmaz lah. 6 Danxdaeuz, Bijdwz dauq naeuz: “Gim ngaenz gou cungj mbouj miz, hoeng gou ndaej hawj mwngz gou miz hih, couh dwg gou ij hij gij gienz Mbanj Nazsajlwz vunz Yehsuh Gihduz ma mingqlingq mwngz, mingqlingq mwngz ndwn hwnjdaeuj byaij.” 7 Bijdwz gangj doengh gawq neix sat le, couh rag dawz gij fawz gvaz de raeuz de hwnq. Couh youq mwhneix, gij ha caeuq gij ndok duqbaeu de couh doq ndei ndwtndwt hwnjdaeuj; 8 de couh doq diuq ndwn hwnjdaeuj, couh doq byaij. Gajlaeng de vanzlij caemh gaen gyoengqde byaij haeuj gunghdenq bae, caemh doq diuq doq bae, caiq doq haenh Cangqdiq. 9 Gyoengq vunz mwnq yawjraen de doq byaij caiq doq haenh Cangqdiq, 10 caemh rox boux de couh dwg bienqnaengz naengh youq gunghdenq Cangqdiq hih bakdou heuh Dou Gyaeu mwnq guh gaujvaq hih boux mwnq, couh doiq gij saeh de geizheih ij rai bae. 11 Boux vunz mwnq rag dawz gij fawz Bijdwz caeuq gij fawz Yozhanq hwj byaij daengz gunghdenq Cangqdiq hih mwnq heuh Sojlozmaenz dih soujlangz he hih mwhde, gij vunz raen de yienghneix ndaej byaij hwj ndei ndwtndwt le, cungj raen geizheih ij rai bae, couh riq goq laeng gyoengqde mwnq bae. 12 Bijdwz raen yienghneix le, couh doiq gyoengq vunzlai naeuz: “Gij vunz Hijswzlez faenhsou hax, faenhsou vihmaz raen geizheih nej? Faenhsou vihmaz ij cimyawj gyoengqraeuz nej, yawj gyoengqraeuz caenh lujnaeuz dwg baengh gij goengrengz gyoengqraeuz caeuq yawj gyoengqraeuz caenh lujnaeuz dwg baengh gyoengqraeuz dwg hab'eiq habhoz Cangqdiq hwj cij ndaej hawj boux vunz gyad neix byaij roen he nej? 13 Gizsaed gou saedsaeh naeuz sou ni hax, gij neix dwg baujcuk baujyouh Yaqbwzlahhanj, Hijsaj caeuq Yajgoz dih Cangqdiq, couh dwg cojgoeng raeuz dih Cangqdiq guh hih gij gingjgyauj neix lah. “De vih ij hawj bouxhoiq de Yehsuh najrongh, hoeng, faenhsou dauq dawz de gyau hawj Bijlahdoh. Baenjlaiz Bijlahdoh ijsiengj coengq de hih, hoeng, faenhsou dauq youq dangqnaj de haih de rai. 14 Faenhsou yiem boux ceiq ndei ceiq dingq Cangqdiq dih vunz, dauqfanj gouz Bijlahdoh coengq boux vunzfamh gaj vunz mwnq. 15 Faenhsou haihrai boux hawj vunz miz mingh he, hoeng, Cangqdiq dauq hawj boux de ndaej dauqlix lo. Gyoengqraeuz cungj dwg gij saeh neix hih cingqyinz. 16 Gangj daengz boux vunz gyad neix, faenhsou caemh rox boux vunz neix, de yienzlaiz dwg boux vunz gyad he; gajlaeng de ndaej ndei hih gij saeh neix, faenhsou caemh caenra raen lo. Yiengq gangj daengz gienh saeh ngoenzneix, caemh dwg vih sinq Yehsuh baengh Yehsuh hwj cij ndaej yw ndei he lah.” 17 Bijdwz gangj daengz neij le, caiq naeuz: “Gak boux beixnuengx hax, gou rox hah, gou rox faenhsou caeuq doengh boux dang daeuz faenhsou yienghneix doiq Yehsuh dwg mbouj rox bonjfaenh dauqdaej dwg guh gijmaz hih. 18 Hoeng, Cangqdiq gaenq senqsi cix hawj sojmiz hih doengh boux cenz gij vah de naeuz goq naeuz, de baij daeuj dih Gihduz ij ngaiz vunz haih. Gawq neix caemh cingqgawq lingz hoh nej. 19 Sojhij faenhsou ij daj ndaw sim nginh loek gaijgoq, dauqyungz nginh Cangqdiq sinq Cangqdiq. Yienghmwnq Cangqdiq couh mienx gij coih faenhsou, 20 de caemh hawj faenhsou ndaej sim'onj lo, de vanzlij baij boux de senjdingh okdaeuj guh Gihduz he, couh dwg Yehsuh, baij de daeuj hawj faenhsou. 21 Hoeng, Gihduz bietdingh ij louz youq gwnzmbwn, itcig youq daengz Cangqdiq dauqyungz dawz de soj cauh hih cungj luj gaxgonq yienghmwnq ndei cij ndaej; gij neix dwg Cangqdiq senqsi cix hawj boux cenz gij vah de naeuz vunz ni lo. 22 Mohsih caemh naeuz goq: Bouxcawj raeuz, Cangqdiq, ij daj ndaw faenhsou baij boux luj gou yienghneix cenz gij vah Cangqdiq he daeuj; de doiq faenhsou soj gangj hih, faenhsou cungj ijaeu dingq. 23 Famz mbouj dingq gij vah boux cenz gij vah Cangqdiq neix hih vunz cungj ij ngaiz daj ndaw gij vunz Cangqdiq ndaw de cawz de bae.” 24 Bijdwz vanzlij caiq naeuz: “Sojmiz hih doengh boux cenz gij vah Cangqdiq he cungj gangj goq doengh ngoenz neix ij fatseng hih saeh, caemh dwg daj Sajmujwj boux neix doxdaeuj itcig cungj dwg. 25 Faenhsou dwg doengh daih gajlaeng doengh boux cenz gij vah Cangqdiq he, caemh dwg ndaej ciep aeu Cangqdiq caeuq gij cojgoeng faenhsou soj dingh hih, couh dwg Cangqdiq doiq Yaqbwzlahhanj naeuz: Lajmbwn sojmiz hih minzcuz cungj dwg dajlaeng doengh daih gajlaeng mwngz dih boux he ndaej miz fuk hih gij neix. 26 Sojhij Cangqdiq senj bouxhoiq de, sien baij de daeuj laeng faenhsou, soengq fuk hawj faenhsou, hawj faenhsou bouxboux mbouj caiq cimyex doenghgij doegsieb he.”
1 Couh youq mwh Bijdwz caeuq Yozhanq vanzlij doiq gij vunzlai gangj vah hih mwhde, sawqmwh miz doengh boux guh dajbwiz he caeuq boux guenj gunghdenq Cangqdiq dih daeuzdaeuz he, vanzlij miz doenghheij gaep haeuj Sajduhgaih baij hih vunz he, goq song boux de mwnq daeuj. 2 Aenvih song boux de doiq gyoengq vunzlai gangj gvanhhih Yehsuh hawj vunzrai ndaej dauqlix dih saeh, sojhij gyoengqde couh aeuqheiq hwj ij rai bae. 3 Sojhij couh daeuj gaemh dawz song boux de, dawz song boux de gyaeng haeuj ndaw lauz bae. Aenvih mwhde gaenq mbwn laep lo, couh gyaeng gyoengqde daengz ngoenz daixngeih. 4 Yiengq, gannaeuz song boux de ngaiz gyaeng hwnjdaeuj lah, hoeng, doenghheij vunz ndaej dingq song boux de gangj vah goq hih, miz haujlai vunz cungj sinq lo. Gajlaeng sojmiz sinq hih vunz, gyacangq gaxgonq sinq hih haengzbaengzlaengz miz hajcien vunz. 5 Daengz ngoenz daixngeih, doengh boux Youzdaiq vunz dang daeuzdaeuz he caeuq doengh boux vunz gangj vah couh baenz he caeuq doengh boux fazliz cenhgyah he, doenghheij vunz neix, cungj youq Yehluqsajlaengj doxcomz. 6 Youq mwnq caemh vanzlij miz Yaqnaq boux goengjsae dajbwiz daeuzdaeuz he, caeuq Gaihyaqfaz, Yozhanq, Yaqlizcanhdaq doengh goengjsae dajbwiz neix, caeuq doenghheij caencik goengjsae dajbwiz daeuzdaeuz neix cungj caemh youq mwnq. 7 Gyoengqde couh daiq Bijdwz caeuq Yozhanq song boux de daeuj, saemjcam naeuz: “Faenhsou baengh byawz ndaej gij rengz neix, hij gij mingzhiq byawz daeuj guh gij saeh neix?” 8 Hoeng mwhneix Hoenzsaenz Cangqdiq doz youq gwnz ndang Bijdwz hwj rim bae; de couh han gyoengqde naeuz: 9 “Doenghheij goeng'ak faenhsou hax, hauhnaeuz ngoenzneix dwg vih gij saeh raeuz yw ndei boux vunz gyad neix caeuq de baenzlawz ndaej ndei hih gij saeh ndei neix hwj daeuj saemjcam raeuz nex, 10 gou naeuz sou caeuq naeuz gij vunz Hijswzlez, ndwn youq dangqnaj faenhsou hih boux vunz neix, de ndaej ndei hih gij neix, cungj dwg gvi hawj Nazsajlwz vunz Yehsuh Gihduz hih. Yehsuh Gihduz boux neix ngaiz faenhsou dawz de ding hwnj gwnz gyaq cixcib bae haihrai, hoeng, Cangqdiq gaenq hawj de ndaej dauqlix lo. 11 Gangj daengz Yehsuh boux vunz neix, ndaw Singqgingh ndaw de caemh sij naeuz goq naeuz: De dwg doenghheij canghranz faenhsou vwt hih hengxdiuz; seizneix gaenq bienqbaenz aen ranz hih diuz gangqloz he lo. 12 Miz de, vunz cij ndaej gouq. Cawz de ok, mij saek boux ndaej gouq vunz, aenvih Cangqdiq mij hawj saek boux youq lajmbwn hawj raeuz ndaej baengh de ma hwj ndaej gouq.” 13 Yiengq youq mwnq sojmiz hih vunz raen Bijdwz caeuq Yozhanq cungj baenxlai mbeihung, caemhcaiq rox naeuz song boux de baenjlaiz mij'z maz vaenzvaq he dih vunz le, cungj raen geizheih ij rai, couh rox daengz song boux neix dwg gaen goq Yehsuh he. 14 Caiq yawjraen boux vunz gyad yw ndei mwnq gaen song boux de le, couh mij vah gangj haem lo. 15 Gajlaeng gyoengqde couh hawj song boux de daj mwnq gyoengqde doxcomz mwnq ok ma. Hawj song boux de ok ma le, gyoengqde couh doxcimciek hwj 16 naeuz: “Gyoengqraeuz ij baenzlawz doiq song boux neix nej? Aenvih gyoengqde mingzmingz guh ok gij geizmiuj hih saeh he lo—youq Yehluqsajlaengj hih vunz bouxboux cungj rox liux lo—raeuz mbouj ndaej laih hih nej. 17 Hoeng hoengjlau gij saeh neix yied cenz yied gvangq nej, gyoengqraeuz ij haephaep gyoengqde cij ndaej, haep mbouj hawj gyoengqde caiq hij gij coh Yehsuh ma doiq vunz gangj vah lo.” 18 Gyoengqde yienghneix cimciek le, caiq hawj Bijdwz caeuq Yozhanq doiqyungz haeuj daeuj, couh haep song boux de, haep naeuz mboujguenj baenzlawz, cungj mbouj ndaej caiq hij gij coh Yehsuh ma doiq vunz gangj vah caeuq son vunz laem lo. 19 Hoeng, Bijdwz caeuq Yozhanq dauq han naeuz: “Faenhsou gag ngeix yawj, youq dangqnaj Cangqdiq, raeuz ij dingq Cangqdiq hajx cixnaeuz dingq faenhsou? 20 Gyoengqraeuz doiq bonjfaenh raeuz soj yawjraen soj dingqri hih, mbouj ndaej naeuz haep bak redrwd cang ngoemx hwj mbouj gangj hih nej.” 21-22 Bijdwz caeuq Yozhanq mboujguenj gyoengqde baenzlaw haep, song boux de vanzlij dwg ciuq saedsaeh han gyoengqde. Yiengq gyoengqde mbouj fug, vanzlij dwg haep song boux de, hoeng gyoengqde siengj mbouj ok gijmaz banqfaz ma fad song boux de. Gajlaeng couh swhswh coengq song boux de lo, aenvih youq mwnq sojmiz hih vunz cungj vih boux vunz gyad daiqseng baenz gyad baenx seiqcib lai bi mwnq hoeng vanzlij ndaej yw ndei hih gij saeh geizmiuj neix hwj haenh Cangqdiq. 23 Bijdwz caeuq Yozhanq baex coengq okma he le, couh majcangq maj daengz gyoengq vunz bonjfaenh mwnq bae, gangj naeuz gyoengq vunz ni doengh goengjsae dajbwiz caeuq doenghheij vunz gangj vah couh baenz he soj gangj hih vah cungj gangj naeuz gyoengqde ni liux. 24 Gyoengq vunz dingq le, couh caezgya sing sang hwj haenh Cangqdiq gouz Cangqdiq, naeuz: “Bouxcawj hax, mwngz cauh liux mbwnmbwn deihdeih haijhaij caeuq sojmiz hih; 25 mwngz yungh Hoenzsaenz mwngz ma hawj bouxhoiq mwngz, cojgoeng raeuz Daqveiq naeuz goq naeuz: Doenghheij daixlingh aen minzcuz hujheiq gyoengqraeuz dengxdengx mij yungh, siengj haih gyoengqraeuz caemh mij yungh. 26 Lajmbwn hih vuengz cungj doxyuk hwnjdaeuj, doenghheij gaem gienz he caemh doxcomz youq itheij, ij gung Cangqdiq caeuq de dinghlaeb hih vuengz. 27 “Gij vah neix ngoenzneix cingqgawq lingz raixcaix. Hihliz goeng'ak neix caeuq Bijlahdoh goeng saengjcangj neix youq aen singz neix caeuq doenghheij linghvaih aen minzcuz he caeuq doenghheij Hijswzlez vunz doxgaep hwnjdaeuj ij gung mwngz dinghlaeb dih bouxhoiq mwngz Yehsuh. 28 Hoeng, gyoengqde ndaej guh daengz hih cungj dwg doenghgij mwngz soj cangjguenj soj giqvaq hih saeh lah. 29 Bouxcawj hax, gyoengqde haep gyoengqraeuz. Seizneix raeuz gouz mwngz gyenhciq gyoengqde, hawj raeuz, bouxhoiq mwngz, miz mbei ndaej gamj cenz gij ndei siuhsiz mwngz. 30 Caemh gouz mwngz iet gij fawz mwngz okdaeuj yw bingh, caiq gouz mwngz hawj raeuz ndaej hij gij mingzhiq bouxhoiq mwngz Yehsuh ma guh gij geizmiuj hih saeh he hwj ndaej cingqmingz mwngz dih gienzveih gaenq fazveih he.” 31 Gyoengqde ngamq gouz sat, sawqmwh gyoengqde youq mwnq gouz Cangqdiq haenh Cangqdiq hih mwnq dieg mwnq doenghdwd hwnjdaeuj. Couh yienghneix, gyoengqde bouxboux cungj doz miz Hoenzsaenz Cangqdiq. Gajlaeng gyoengqde couh mbeihung hwnjdaeuj cenzgangj Cangqdiq dih ndei siuhsiz, 32-33 gyoengq dwzbaijyienz caemh miz rengz ndaej cingqmingz Yehsuh Bouxcawj ndaej dauqlix, Cangqdiq caemh soengq fuk hawj gak boux lwgsae lai hux lai. Mwhde sojmiz hih lwgsae cungj dwg caezsim hih. Mij vunz naeuz faen mwngz faen gou hih saeh; miz doxgaiq cungj dwg doxcaeuq yungh he. 34 Gyoengqde caemh mij saek boux naeuz noix gijmaz mbouj miz, aenvih gyoengqde bouxlawz miz ranz miz reih hih cungj hai hwj dawz gij ngaenz daeuj 35 gyau hawj gyoengq dwzbaijyienz, gyoengq dwzbaijyienz caemh ciuq gak vunz ij yungh hih faen hawj gak vunz. 36 Yiengq miz boux he heuh Yozswz; gyoengq dwzbaijyienz heuh de heuh Bahnazbah. (‘Bahnazbah’ dwg ‘gujliq vunz’ dih iqswh.) De dwg Caiqbujluqswh dih Liqveiq vunz he. 37 De caemh miz gaiq reih he, de caemh dawz gaiq reih neix hai hwj dawz gij ngaenz daeuj gyau hawj gyoengq dwzbaijyienz.
1 Caiq miz boux he, gij coh de heuh Yaqnaznizyaq, de caeuq mehyah de Sajfeihlah caemh dawz gij reih de hai lo. 2 Hoeng de dauq dawz hai reih ndaej hih ngaenz louz mbangj hwnjdaeuj, lij lw hih cij dawz bae gyau hawj gyoengq dwzbaijyienz. Gij saeh neix mehyah de caemh rox. 3 Gajlaeng Bijdwz rox le, couh doiq de naeuz: “Yaqnaznizyaq, mwngz vihmaz hawj Sajdanq fangzvuengz cijveih aen sim mwngz, hawj mwngz daeuj coemx Hoenzsaenz Cangqdiq, dawz hai reih ndaej hih ngaenz gag louz mbangj hwnjdaeuj nej? 4 Mijyaengz hai reih mwhde, gij reih mbouj dwg gij reih mwngz maz? Hai le, gij ngaenz caemh mbouj dwg gij ngaenz mwngz maz? Vihmaz ij guh gij mazmboujmwnh neix nej? Mwngz yienghneix guh mbouj dwg coemx vunz nej, dwg coemx Cangqdiq lah.” 5-6 Yiengq Yaqnaznizyaq baex dingq gij vah neix he le, couh doq laemxdengx roengzbae, doq rai gatcaw lo. Gajlaeng couh miz geij boux vunzsai hauxseng dawz de gyuj hwj ram bae moek lo. Sojmiz dingq daengz gij saeh neix hih vunz cungj lau hwj dungxmbouq ndangsaenz liux. 7 Gij saeh neix goq ndaej saek sam aen cunghdaeuz yienghneix, mehyah de caemh daeuj lo, hoeng, meh de mij rox ngaiz fatseng gijmaz saeh haem. 8 Meh de daeuj le, Bijdwz couh cam de naeuz: “Faenhsou hai reih ndaej hih ngaenz couh dwg bienhneix lo mah?” Meh de han naeuz: “Dwg hah, couh dwg bienhneix lo.” 9 Bijdwz dingq le, couh naeuz: “Faenhsou vihmaz ij doxyuk hwj daeuj sawq Hoenzsaenz Cangqdiq nej? Yawj veiq, doengh boux moek goeng gojyez mwngz hih couh ndwn youq bakdou lo; gyoengqde caemh ij ram mwngz okbae lo.” 10 Bijdwz ngamq gangj doengh gawq neix sat bak, meh de caemh doq laemxdengx youq dangqnaj Bijdwz, couh doq rai gatcaw lo. Doengh boux hauxseng mwnq baex haeuj bae yawj he, caemh gaenq raen meh de rai gatcaw lo, yiengq doengh boux de couh ram meh de bae moek youq henz moh goeng de. 11 Gajlaeng baenx cenz gyauqveiq caeuq sojmiz dingq daengz gij saeh neix hih vunz cungj lau hwj ij rai bae. 12 Gyoengq lwgsae siengzseiz youq gunghdenq Cangqdiq dih Sojlozmaenz soujlangz mwnq doxcomz, gyoengqde caemh gig caezsim. Cangqdiq caemh hawj gyoengq dwzbaijyienz youq dangqnaj vunzlai guh baenx haujlai geizmiuj dih saeh hwj ndaej cingqmingz gij gienzveih de gaenq fazveih lo. 13-14 Mwhde gaep haeuj Yehsuh Bouxcawj hih vunz yied ngoenz yied lai, vunzsai vunzbaz cungj miz. Gij vunz cungj gig soenhcungq gyoengqde, hoeng, caemh miz doenghheij vunz mbouj sinq Yehsuh he mbouj gamj dep gyoengqde. 15 Aenvih gyoengq dwzbaijyienz guh baenx haujlai geizmiuj hih saeh, guh hwj miz haujlai vunz ram vunz bingh daeuj gwnz gai, miz hih vunz coengq youq gwnz congz, miz hih vunz coengq youq gwnz mbinj. Gyoengqde cungj muengh Bijdwz byaij goqdaeuj le, gij ngumhngaeuz de ndaej baex daengz boux vunz bingh mwnq hwj ndaej ndei. 16 Caemh vanzlij miz baenx haujlai vunz daiq vunz bingh caeuq gij vunz ngaiz fangz doz he daj seiqhenz singz seiqhenz mbanj Yehluqsajlaengj daeuj. Gajlaeng doenghheij vunz bingh mwnq cungj caemh ndaej yw ndei lo. 17 Yiengq, goengjsae dajbwiz daeuzdaeuz caeuq doenghheij vunz caeuq de caemh buek vunz he (couh dwg gaep haeuj Sajduhgaih baij hih vunz) raen yienghneix le, couh rahoengz hwj ij rai bae, 18 couh daeuj gaemh gyoengq dwzbaijyienz, gaemh dawz gyoengqde bae gyaeng haeuj ndaw lauz bae. 19 Hoeng couh youq ngoenz gyoengqde ngaiz gyaeng hih haemh mwnq, bouxcai Cangqdiq daeuj hoi doengh aen dou gyaeng gyoengqde mwnq, daiq gyoengqde okma, caiq doiq gyoengqde naeuz: 20 “Faenhsou bae gunghdenq Cangqdiq mwnq bae gangj naeuz gij vunz ni seiqseiz lix hih sojmiz hih siuhsiz.” 21 Gyoengq dwzbaijyienz dingq gij vah neix le, couh ciuq de raengq hih yienghmwnq bae guh; daengz ranz ij rongh, couh bae daengz gunghdenq Cangqdiq gangj naeuz gij vunz ni. Yiengq buek vunz dawz gyoengq dwzbaijyienz mwnq bae gyaeng le, daengz haet daixngeih daihcaeux, goengjsae dajbwiz daeuzdaeuz caeuq doenghheij vunz gaen henz ndang de couh heuh veijyienzveiq sojmiz dih vunz daeuj doxcomz, couh baij vunz bae ndaw lauz daiq gyoengq dwzbaijyienz okdaeuj saemj. 22 Laixmboujlawz gyoengqde bae daengz mwnq le, gaenq mbouj raen gyoengq dwzbaijyienz youq ndaw lauz haem lo. Yiengq gyoengqde couh dauq ma naeuz gyoengq vunz de ni naeuz: 23 “Mij raen gyoengqde lo! Geizheih hwx, gyoengqraeuz bae daengz ndaw lauz mwnq, raen aen dou gyaeng gyoengqde he vanzlij gven hwj ndaet ndwtndwt. Doengh boux hen gyoengqde hih caemh vanzlij ndwn youq bakdou hah, hoeng, gyoengqraeuz baex hoi dou haeuj bae yawj he, gaenq mij raen gyoengqde saek boux haem lo.” 24 Boux guenj gunghdenq Cangqdiq dih daeuzdaeuz caeuq doengh goengjsae dajbwiz mwnq dingq daengz gij saeh neix le, cungj raen geizheih ij rai, mbouj rox hih gij saeh neix dauqdaej dwg guxmaz saeh. 25 Ngamqluj youq mwhneix, miz boux he haeuj daeuj bauq naeuz: “Faenhsou gyaeng haeuj ndaw lauz bae hih vunz, seizneix cingq youq gunghdenq Cangqdiq doiq vunzlai gangj vah nex.” 26 Gajlaeng, boux guenj gunghdenq Cangqdiq mwnq caeuq doengh boux gaen henz ndang de couh bae gaemh dawz gyoengq dwzbaijyienz ma, hoeng, doengh boux de rox gyoengq vunzlai cungj haenj dingq gyoengq dwzbaijyienz, couh mij gamj doiq gyoengq dwzbaijyienz doengh fawz doengh ha, lau gij vunzlai aeuqheiq le, aeu rin ma banj gyoengqde. 27 Gyoengqde daiq gyoengq dwzbaijyienz ma daengz le, couh hawj gyoengq dwzbaijyienz ndwn youq dangqnaj gyoengq veijyienzveiq mwnq hwj. Goengjsae dajbwiz daeuzdaeuz couh saemjcam gyoengq dwzbaijyienz naeuz: 28 “Raeuz mbouj dwg gingjgauq goq faenhsou lo maz, gingjgauq mbouj hawj faenhsou cenzgangj gij saeh boux neix lo maz? Hoeng faenhsou dauqfanj dawz faenhsou hih ndaek cungj dauhleix mwnq cenz baenx cenz Yehluqsajlaengj, vanzlij siengj dawz boux vunz neix ngaiz rai hih saeh cungj gvi hawj gyoengqraeuz rap!” 29 Gajlaeng Bijdwz caeuq gyoengq dwzbaijyienz dingq le cungj han naeuz: “Raeuz ij dingq Cangqdiq hah, mbouj ndaej dingq vunz hih nej. 30 Ngaiz faenhsou ding hwnj gyaq cixcib bae haihrai dih Yehsuh, baujcuk baujyouh cojgoeng raeuz dih Cangqdiq gaenq hawj de dauqlix lo. 31 Cangqdiq vanzlij baux de hwnjdaeuj, hawj de youq baixgvaz bonjfaenh de guh boux vunz lajmbwn dih daeuzdaeuz, guh boux gouq vunz he, vih dwg ij hawj gij vunz Hijswzlez ndaej daj ndaw sim gaijgoq, ndaej hawj gyoengqde mienx coih. 32 Gyoengqraeuz cungj dwg gij saeh neix dih cingqyinz; Cangqdiq soengq Hoenzsaenz de hawj doengh boux dingq de hih gij Hoenzsaenz neix caemh ndaej cingqmingz gij saeh neix.” 33 Gyoengq vunz youq mwnq doxcomz mwnq dingq daengz gij vah neix le, cungj aeuqheiq ij rai bae, couh siengj cawz gyoengqde bae. 34 Hoeng, gyoengq vunz mwnq ndaw de miz boux gaep haeuj Fazliqcaiq baij he, gij coh de heuh Gyahmajlez; de dwg boux fazliz cenhgyah he, gij vunz caemh soenhcungq de. De ndwn hwnjdaeuj naeuz hawj vunz sien daiq gyoengq dwzbaijyienz okbae rog he daengj; yiengq couh miz vunz daiq gyoengqde okbae lo. 35 Gajlaeng de couh doiq gyoengq vunz mwnq naeuz: “Hijswzlez vunz hax, faenhsou giqvaq ij baenzlaw doiq gyoengqde hax, faenhsou ij siujsim cij ndaej! 36 Faenhsou vanzlij ndaejgeiq gaxgonq mbouj geijlwh caez miz boux heuh Diuhdaq he lwi? De gag cej boengxboengx naeuz bonjfaenh de dwg byawzbyawz, guh hwj miz haujlai vunz gaen de, aiq miz saek seiqbak vunz yienghneix. Gajlaeng de ngaiz vunz haihrai lo, gyoengq vunz gaen de caemh sanq liux lo. 37 Yiengq daengz mwh yinzgouj bujcaz mwnq, caemh miz Gyahliqliq vunz dih Youzdaq; de caemh longx baenx haujlai vunz daeuj gaen de. Gajlaeng de caemh ngaiz rai lo, gyoengq vunz gaen de he caemh sanq liux lo. 38 Sojhij luj ngoenzneix hih cungj saeh neix, gou naeuz faenhsou hax, vanzlij dwg ajcaih gyoengqde vangraeh lo bax. Hauhnaeuz gyoengqde soj giqvaq soj guh hih cungj dwg vunz giqvaq vunz guh hih, yiengq gaengjdingq ij ngaiz baih. 39 Yiengq, hauhnaeuz dwg Cangqdiq giqvaq Cangqdiq nganhbaiz hih, faenhsou siengj caeuq gyoengqde doxdub nex, caemhdangq caeuq Cangqdiq doxdub lo; yienghmwnq gaengjdingq dub mbouj hingz gyoengqde.” 40 Gyoengq vunz mwnq dingq de yienghneix naeuz le, caemh dungziq gij vah de, gajlaeng couh hawj gyoengq dwzbaijyienz haeuj bae. Doh gyoengqde donq he le, caiq haep gyoengqde, mbouj hawj gyoengqde caiq hij gij mingzhiq Yehsuh ma son vunz. Couh yienghneix, gajlaeng couh coengq gyoengqde lo. 41 Gyoengq dwzbaijyienz ndaej coengq okma le, cungj angq hwj ij rai bae, aenvih gyoengqde youq ndaw lwgra Cangqdiq boiqndaej vih Yehsuh hwj ngaiz vunz yawjngawz. 42 Gajlaeng gyoengqde vanzlij dwg ngoenzngoenz bae gunghdenq Cangqdiq hah, ndaw ranz vunz hah, mbouj dingz hih son vunz caeuq cenzgangj Yehsuh dwg Gihduz.
1 Gajlaeng lwgsae yied ngoenz yied lai. Gyoengq vunz ndaw de miz gij vunz gangj Hihlaz vah hih Youzdaiq vunz he caeuq gij vunz gangj Hihbwzlaiz vah dih Youzdaiq vunz he doxeuq, gyoengq gangj Hihlaz vah he ceng naeuz gyoengq lwgsae ngoenzngoenz faen doxgaiq hah bang guh gijmaz hah mbouj ngeix daengz doengh boux vunzmaiq gyoengqde, mbouj faen hawj gyoengqde, mbouj bang gyoengqde. 2 Couh vih yienghneix, cibngeih boux dwzbaijyienz mwnq couh heuh baenx cenz gyoengq lwgsae daeuj doxcomz, doiq gyoengqde naeuz: “Hawj raeuz vwt gij hong cenzgangj Cangqdiq dih ndei siuhsiz hwj mbouj guh, dauq bae guenj gij gw gij saepsoiq dih hong he, saedsaeh mbouj hab lo. 3 Sojhij gak boux beixnuengx hax, faenhsou vanzlij dwg daj ndaw faenhsou senj aeu caet boux faenhsou rox de miz Hoenzsaenz Cangqdiq doz youq gwnz ndang he, caemh rox de coengjmingz rox faenbied ndei caeuq yak he okdaeuj, hawj gyoengqraeuz baij gyoengqde guenj doenghgij saeh saepsoiq neix. 4 Yienghneix raeuz couh ndaej censim haenh Cangqdiq gouz Cangqdiq, censim bae cenzgangj Cangqdiq dih ndei siuhsiz lo.” 5 Gij cawjeiq neix baenx cenz gyoengq lwgsae cungj dungziq, yiengq gyoengqde couh senj Swhdizfanj—Swhdizfanj dwg boux sinq Gihduz gyenhdingq, Hoenzsaenz Cangqdiq caemh doz youq gwnz ndang de rim hux rim he—caeuq Feihliq, Bwzlozgohloz, Nizgyahnoz, Dizmaenz, Bahmijnaz caeuq Nizgohlah (Nizgohlah dwg daj Anhdizah Singz daeuj he; de dwg gaep haeuj Youzdaiqgyauq he), senj caet boux neix okdaeuj. 6 Gyoengqde senj caet boux neix okdaeuj le, couh hawj gyoengqde daeuj dangqnaj gyoengq dwzbaijyienz. Gyoengq dwzbaijyienz couh bang gyoengqde gouz Cangqdiq. Gouz sat le, couh oemj fawz hawj gyoengqde gyau gij hong neix hawj gyoengqde, caemh hoh fuk hawj gyoengqde. 7 Couh yienghneix, Cangqdiq dih ndei siuhsiz cenz ndaej vaiq raixcaix; youq Yehluqsajlaengj, gij lwgsae yied ngoenz yied lai, lai vaiq hux vaiq, daiqlienz doengh boux guh dajbwiz ndaw de cungj caemh miz haujlai vunz sinq Yehsuh lo. 8 Cangqdiq soengq gij fuk caeuq gij akak rengzrengz de hawj Swhdizfanj, sawjhawj de ndaej youq laeng gyoengq vunzlai guh baenx haujlai geizmiuj dih saeh hwj ndaej cingqmingz Cangqdiq dih gienzveih gaenq fazveih he. 9 Hoeng miz mbangj hih vunz fanjdeiq de. (Couh dwg gij vunz gaep haeuj aen veiqdangz heuh Liqbwzdiqnaz Veiqdangz he dih gyoengq vunz neix; gyoengqde gaxgonq dwg Gujliqnaiq Singz, Yaqlizcanhdaq Singz, caeuq Gihliqgyah Saengj caeuq Yaqsiqyaq Saengj hih Youzdaiq vunz he.) Gyoengqde cungj daeuj caeuq Swhdizfanj doxbuek. 10 Hoeng gyoengqde mij banqfaz buek ndaej goq de, aenvih Hoenzsaenz Cangqdiq hawj de coengjmingz raixcaix, hawj de ndaej buek goq vunz. 11 Gajlaeng, gyoengqde cungj mbouj fug, yiengq couh goq vunz daeuj bangjlaih de, hawj gyoengqde bae luenhbangh naeuz: “Gyoengqraeuz dingqri Swhdizfanj gangj gij vah daekcoih Mohsih caeuq Cangqdiq he.” 12 Gyoengqde yungh cungj banqfaz neix ma yungx gij vunzlai caeuq doengh boux Youzdaiq vunz gangj vah couh baenz he caeuq gij fazliz cenhgyah he, hawj gyoengqde gaemh Swhdizfanj, gaemh de bae daengz veijyienzveiq mwnq bae. 13 Yiengq doengh boux goq daeuj bangjlaih Swhdizfanj mwnq ok daeuj laih naeuz: “Boux vunz neix, de siengzseiz gangj gij vah dwgcaengz gunghdenq Cangqdiq caeuq Mohsih dih fazliz. 14 Couh dwg gyoengqraeuz dingqri de naeuz Mbanj Nazsajlwz vunz dih Yehsuh ij cawz aen gunghdenq Cangqdiq, vanzlij ij gaij Mohsih soj cenz roengzma hawj raeuz dih laehbeih.” 15 Yiengq, youq mwnq sojmiz hih vunz cungj cimyawj Swhdizfanj, yawjraen baj naj de luj bouxcai Cangqdiq nwih.
1 Doengh boux de yienghneix gangj le, goengjsae dajbwiz daeuzdaeuz couh cam Swhdizfanj naeuz: “Cingqcaen miz gij saeh neix haz?” 2 Swhdizfanj han naeuz: “Gak boux beixnuengx hax, cingj faenhsou dingq gou gangj! Mwh cojgoeng raeuz Yaqbwzlahhanj cungj lij youq Meijsojbuqdazmijyaq, mijyaengz buen bae Hahlanz youq hih mwhde, ronghndongq dih Cangqdiq yienh hawj de raen, 3 doiq de naeuz: ‘Mwngz ij lizgaih bonjdeih mwngz caeuq gij caencik beixnuengx mwngz, bae mwnq he, daengz mwh he gou swhmboujyienz naeuz mwngz ni mwnqlaw.’ 4 Yiengq Yaqbwzlahhanj caemh dingq Cangqdiq; de couh daj mwnq dieg gij vunz Gyahlwzdij ok ma, bae daengz Hahlanz youq. “Gajlaeng boh de rai le, Cangqdiq caiq hawj de daj mwnq buen daeuj daengz mwnq dieg faenhsou seizneix youq he. 5 Youq mwnq dieg neix Cangqdiq mij hawj de saek yiengh, daiqlienz cik dieg ndwn he cungj mbouj miz. Hoeng, Cangqdiq dauq dapwngq dawz mwnq dieg neix nyok hawj de caeuq doengh daih gajlaeng de aeu ma guh gyadangq, gannaeuz mwhde de mijyaengz miz lwg lah. 6 “Hoeng, Cangqdiq vanzlij dwg doiq de naeuz: ‘Doengh daih gajlaeng mwngz ij ngaiz doz youq vaihdieg youq, caemh ij ngaiz guh hoiq gij vunz dieg mwnq, caemh ij ngaiz gij vunz dieg mwnq yawjngawz, caiq ngaiz souh haemz souh hoj baenx seiqbak bi.’ 7 Cangqdiq vanzlij caiq doiq de naeuz: ‘Hoeng, gij vunz dieg mwnq hawj gyoengqde guh hoiq hih, gou gaengjdingq ij fad gyoengqde. Gajlaeng doengh daih gajlaeng mwngz ij daj mwnq dieg mwnq ok ma, youq dieg neix baiq gou.’ 8 “Couh yienghneix, Cangqdiq couh caeuq de doxdingh, dingh hawj de caeuq doengh daih gajlaeng de ndaej suenq dwg gij vunz Cangqdiq, hawj gyoengqde gozlij geiqhauh dwg gij vunz Cangqdiq. Sojhij Yaqbwzlahhanj miz Hijsaj. Youq Hijsaj seng ndaej daixbet ngoenz le, couh gozlij hawj de. Gajlaeng, Hijsaj miz Yajgoz; Yajgoz couh dwg daxboh cibngeih boux cojgoeng gij vunz Hijswzlez he. 9 “Gyoengq lwg Yajgoz gag rahoengz daegnuengx bonjfaenh gyoengqde Yozswz, couh dawz de hai bae daengz Ngaihgiz. Hoeng Cangqdiq caeuq de youq, 10 gouq de, hawj de ndaej duet ok sojmiz hih nanh, caiq soengq fuk hawj de, hawj de coengjmingz, caixhangz, caemh hawj goengjvuengz Ngaihgiz haenj de. Goengjvuengz Ngaihgiz caemh baij de guenj baenx cenz guek dih saeh, caiq hawj de guenj ndaw ranz de sojmiz hih saeh. 11 “Mbouj geij caez, Ngaihgiz caeuq dieg Gyahnamz cungj roeb daengz iekvangh gig yiemzcungq, cojgoeng raeuz caemh mij haeux gw. 12 Gajlaeng Yajgoz rox naeuz Ngaihgiz miz haeux le, couh hawj doengh daeglwg de—couh dwg cojgoeng raeuz—bae Ngaihgiz cawx haeux. (Mbat neix dwg mbat daixdaeuz.) 13 Yiengq daengz gyoengqde caiq bae mbat daixngeih, Yozswz couh caeuq doengh boux beixnuengx de doxnginh, caemh dwg daj mwhneix, goengjvuengz Ngaihgiz cij rox ndaw ranz Yozswz. 14 “Yozswz nginh gyoengq beixnuengx de le, couh hawj doengh boux beixnuengx de maj cingj daxboh de caeuq ndaw ranz daxboh de daeuj Ngaihgiz. Mwhde itgungh miz caetcib haj vunz. 15 Gajlaeng, Yajgoz caemh bae Ngaihgiz, caemh dwg de caeuq doenghheij cojgoeng raeuz cungj rai youq mwnq, 16 caemh dwg dawz bae daengz dieg Gyahnamz dih Siqgiemq, moek youq mwnq Yaqbwzlahhanj aeu bit ngaenz he ma laeng gij lwglan Hahmaz cawx ma hih mwnq diegmoh mwnq. 17 “Youq mwh ij daengz Cangqdiq dapwngq Yaqbwzlahhanj dih mwhde, gij vunz Hijswzlez youq Ngaihgiz caemh fat haujlai. 18 Yiengq youq Ngaihgiz miz boux he it di cungj mbouj rox Yozswz he, de hwnj daeuj dang vuengz. 19 Goengjvuengz neix ganvad raixcaix; de yawj gij cojgoeng raeuz ngawz, hangz gij cojgoeng raeuz, simqciq haep gij cojgoeng raeuz hawj gyoengqde gveng lwgnding, mbouj hawj lwgnding lix. 20 “Ngamqluj youq mwhneix, Mohsih seng lo. De mbauq mbupmbup. Bohmeh de caegcaeg ciengx de, hoeng de ngamq ndaej sam ndwen, 21 couh ngaiz dawz bae vwt lo. Mwh de ngaiz dawz bae vwt hih mwhde, ngamqluj dahlwg goengjvuengz Ngaihgiz raen de, aeu de ma ciengx. Dah de caemh doiq Mohsih dangq luj lwg bonjfaenh ityiengh. 22 Yiengq Mohsih caemh dwg hag gij vaenzvaq Ngaihgiz, dwg boux gangj vah guh saeh cungj rem he. 23 “De ijvanh ndaej seiqcib bi dih mwh he, ndaw sim de couh naemj ijsiengj bae yawjyawj gij vunz Hijswzlez caeuq de doxcaemh minzcuz he. 24 Yiengq miz ngoenz he, de ok bae, yawjraen boux caeuq de doxcaemh minzcuz he ngaiz boux Ngaihgiz vunz he hangz de. De raen yienghneix le, couh goq bae haeuj boux de, bang boux de, gajlaeng de vanzlij doh boux Ngaihgiz vunz mwnq rai. 25 Mohsih naemqnaeuz gij vunz caeuq de doxcaemh minzcuz he rox dwg Cangqdiq hawj de daeuj gouq gyoengqde lah, hoeng, mij dwg; gyoengqde gaenhbaenj mbouj rox. 26 Daengz ngoenz daixngeih, de yawjraen song boux Hijswzlez vunz doxdub doxhangz, yiengq de siengj bae cek song boux de, mbouj hawj gyoengqde doxdub, couh naeuz: ‘Beixnuengx hax! Song boux faenhsou dwg doxcaemh minzcuz hah! Vihmaz ij doxdub doxhangz nex?’ 27 “Danxdaeuz, boux hangz vunz mwnq engq nyoengx Mohsih deuz, naeuz: ‘Hwx, mwngz dwg byawz nex? Byawz baij mwngz daeuj guh raeuz dih daeuzdaeuz caeuq raeuz dih fazguenh nex? 28 Nanzdauh mwngz ij gaj gou, caemh luj ngoenzlwenz mwngz gaj boux Ngaihgiz vunz mwnq?’ 29 Mohsih dingq de yienghneix gangj le, roxnginh mbouj ndei daengz lo, couh deuz okbae daengz Mijdenq, youq mwnq youq. Gajlaeng de vanzlij youq mwnq baenzgya, miz song daeglwg. 30 “Yiengq goq seiqcib bi le, miz baez he, Mohsih youq mwnq gaenh aen bya Sihnaiq hih rogndoi he, miz boux bouxcai Cangqdiq he daj ndaw caz oen dawz feiz he yienh hawj de raen. 31 Mohsih yawjraen yienghneix le, cungj raen geizheih ij rai bae, couh byaij goqbae siengj yawjyawj dauqdaej dwg gijmaz. Sawqmwh, miz gij sing Cangqdiq doiq de naeuz: 32 ‘Gou dwg baujcuk baujyouh cojgoeng mwngz dih Cangqdiq, dwg Yaqbwzlahhanj, Hijsaj caeuq Yajgoz dih Cangqdiq.’ Mohsih dingq le, lau hwj dungxmbouq ndangsaenz mbouj gamj yawj bae. 33 Cangqdiq caiq doiq de naeuz: ‘Mwngz majcangq duet doiq haiz mwngz bae, aenvih mwngz ndwn youq hih mwnq dieg mwnq dwg gou youq he; mbouj ndaej laizluenh byaij haeujdaeuj hih nej. 34 Gou gaenq yawjraen gij vunz gou youq Ngaihgiz soj souh daengz hih haemzhoj lo, caemh gaenq dingqri gyoengqde gangznaek daejdanq lo. Gou roengz daeuj dwg ij gouq gyoengqde; mwngz nej, dwg gou ij baij mwngz bae Ngaihgiz hih lah.’” 35 Swhdizfanj gangj daengz dineix le, vanzlij caiq naeuz: “Boux heuh Mohsih neix couh dwg ngaiz gij vunz Hijswzlez yiem de naeuz: ‘Byawz baij mwngz daeuj guh boux daeuzdaeuz raeuz caeuq boux fazguenh raeuz he nex?’ dih boux neix lo. Hoeng, gizsaed Cangqdiq hawj bouxcai de yienh youq ndaw caz oen feiz dawz he hwj hawj de baij Mohsih dang boux daeuzdaeuz he, hawj de daeuj guh boux gouq vunz he. 36 De daiq gij vunz daj Ngaihgiz okma; de youq Ngaihgiz, youq Hungz Haij, youq rogndoi dih seiqcib bi ndaw de guh baenx haujlai geizmiuj dih saeh hwj ndaej cingqmingz Cangqdiq dih gienzveih gaenq ndaej fazveih he. 37 “Caemh dwg boux Mohsih neix, de doiq gij vunz Hijswzlez naeuz goq naeuz: ‘Cangqdiq ij daj ndaw faenhsou ndaw de senjdingh boux he daeuj hawj faenhsou, hawj boux de guh boux cenz gij vah Cangqdiq he, caemh luj gou yienghneix guh boux cenz gij vah Cangqdiq he.’ 38 Caemh dwg boux Mohsih neix, couh dwg mwh de caeuq sojmiz Hijswzlez vunz—gij cojgoeng raeuz—doz youq rogndoi hih mwhde, youq gwnz bya Sihnaiq bouxcai Cangqdiq doiq de gangj vah, gyau gij vah Cangqdiq ndaej hawj vunz lix he hawj de, hawj de ndaej cenz roengzma hawj raeuz he. 39 “Hoeng, gij cojgoeng raeuz dauqfanj mbouj dingq de, yiem de; aen sim gyoengqde dauq yiengq laeng Ngaihgiz bae. 40 Gyoengqde dauq gouz Yaqlwnz naeuz: ‘Cingj mwngz bang raeuz cauh duz you daeuj daiq gyoengqraeuz bax, aenvih gyoengqraeuz mbouj rox boux daiq gyoengqraeuz ok Ngaihgiz ma hih Mohsih, mbouj rox de youq gwnz bya roeb daengz gijmaz saeh lo.’ 41 Couh yienghneix, mwhde gyoengqde couh cauh duz cwzlwg gim he, caiq dawz doxgaiq bae bwiz duz de, caiq gag haenh gyoengqde guh hih saeh. 42 “Hoeng, Cangqdiq mbouj leixlangh gyoengqde, ajcaih gyoengqde vangraeh, caih gyoengqde bae baiq ndaundeiq, gyangjngoenz gwnzmbwn, yienghneix ngamqluj ndaw saw boux cenz gij vah Cangqdiq sij naeuz: Hijswzlez vunz hax, faenhsou seiqcib bi ndaw de youq rogndoi, mij dawz gijmaz daeuj bwiz gou goq. 43 Faenhsou gwed aen cangqbungz Mohloz duz you neix caeuq gij siengq Lijfanh aen ndaundeiq neix, couh dwg faenhsou gag cauh hwj aeu ma baiq hih you. Sojhij gou couh ij boenq faenhsou buen ok baixrog Bahbijlwnz bae. 44 “Gij cojgoeng raeuz youq rogndoi miz cangqbungz coengq aen gvih coengq miz baengzgawq; aen cangqbungz neix dwg Mohsih ciuq Cangqdiq hawj de raen hih gij yiengh mwnq bae guh hih. 45 Gajlaeng gij cojgoeng raeuz ciep aeu aen cangqbungz neix. Mwh Cangqdiq youq gaxgonq gyoengqde boenq gij vunz linghvaih minzcuz he deuz, ciemq aeu gij dieg mwnq hih mwhde, Yozcuhyaq couh caeuq gyoengqde buen aen cangqbungz bae mwnq dieg mwnq, itcig daengz aen nienzdaiq Daqveiq goengjvuengz neix. 46 “Daqveiq youq ndaw lwgra Cangqdiq dwg boux hab'eiq habhoz he dih vunz. De gouz Cangqdiq, couh dwg Hijswzlez vunz dih Cangqdiq, gouz de bihcwnj hawj de hwnq aen gunghdenq he hawj Cangqdiq youq. 47 Hoeng, gajlaeng dauq dwg daeglwg de Sojlozmaenz hwnq aen gunghdenq hawj Cangqdiq lah. 48 Gizsaed gienz akak rengzrengz dih Cangqdiq gaenhbaenj mboujyungh youq mwnq vunz aeu fawz ma hwnq dih ranz, couh luj boux cenz gij vah Cangqdiq soj gangj hih: 49-50 Cangqdiq naeuz:‘Aen mbwn dwg aen eij gou, dwg mwnq naengh gou; lajdeih dwg ha daengq gou. Mbwnmbwn deihdeih sojmiz hih mbouj dwg cenznaengz dwg gij gou cauh he haz? Nanzdauh faenhsou ij hwnq cungj ranzlawz hawj gou nej? Mwnqlaw dwg mwnq gou yietbaeg he nej?’” 51 Swhdizfanj gangj duenh saw Singqgingh neix sat le, youhcaiq doiq gyoengq veijyienzveiq mwnq naeuz: “Doenghheij vunz yayangq faenhsou hax! Faenhsou simsim rwzrwz couh luj gyoengq mbouj rox Cangqdiq mwnq hih sim rwz, siengzseiz mbouj dingq gij vah Cangqdiq. Faenhsou caeuq gij cojgoeng faenhsou doxdoengz, caenhrox caeuq Hoenzsaenz Cangqdiq doxngig. 52 Doengh boux cenz gij vah Cangqdiq mwnq, miz bouxlawz mbouj dwg ngaiz gij cojgoeng faenhsou bwkhaih hih nej? Gyoengqde daiqlienz doengh boux cenz naeuz ij miz boux simndei simsoh he daeuj hih doengh boux mwnq cungj ngaiz gyoengqde gaj; seizneix faenhsou caemh dawz boux simndei simsoh mwnq cix cuzmaiq cix gaj. 53 Cangqdiq hawj bouxcai de daeuj cenz gij fazliz de hawj faenhsou; hoeng faenhsou dauq mbouj soenhsouj.” 54 Gyoengq vunz mwnq dingq Swhdizfanj gangj doenghgij vah neix le, cungj ndatheiq hwj haeb faenz haeb heuj bae. 55 Hoeng, Swhdizfanj dauq miz Hoenzsaenz Cangqdiq doz youq gwnz ndang de hwj rim hux rim bae; de ngiengx raeuj hwnjdaeuj yawj gwnzmbwn, yawjraen gij ronghndongq Cangqdiq, caemh yawjraen Yehsuh ndwn youq baixgvaz Cangqdiq. 56 De couh angq hwnjdaeuj hemq naeuz: “Yawj veiq, yawj veiq! Gou yawjraen aen mbwn hoi hwj, luj aen dou hoi nwih; Vunz dih Daiqbiuj ndwn youq baixgvaz Cangqdiq.” 57 Gyoengq vunz dingq le, engqgya ndatheiq, ndatheiq hwj caet rwz hemq vauxvaux bae. Gajlaeng baenx gyoengq cungj caenx goqbae gaemh dawz de, 58 dawz de nyoengx ok singz bae, aeu rin ma boemz de. Doengh boux goq daeuj bangjlaih de mwnq engqgya duet diuz buh baixrog hwj hawj boux hauxseng heuh Saujloz he yawj hwj cij boemz de. 59 Youq mwh Swhdizfanj ngaiz gyoengqde aeu rin ma boemz hih mwhde, de gouz naeuz: “Bouxcawj gou Yehsuh hax, gouz mwngz sou gij hoenzsaenz gou bax.” 60 Gajlaeng de caiq gvih roengzma hemq naeuz: “Bouxcawj gou hax! Gouz mwngz caemh gaejyungh dawz gij coih neix gvi hawj doengh gyoengq neix.” De hemq gawq neix sat le, couh ngaiz rai lo. Yiengq Saujloz caemh hab'eiq Swhdizfanj ngaiz vunz dub rai.
1-2 Gajlaeng, miz gij vunz aiq Cangqdiq yawjnaek Cangqdiq he couh dawz Swhdizfanj bae moek. Gyoengqde caemh gikheiq siengsim de ngaiz vunz dub rai. Daj ngoenz mwnq hwnj, Yehluqsajlaengj dih gyauqveiq cungj souh daengz bwkhaih youqgaenj raixcaix. Cawz doengh boux dwzbaijyienz he ok, miz haujlai lwgsae cungj faensanq bae daengz Youzdaiq caeuq Sajmajliqyaq gak dieg. 3 Yiengq Saujloz ijsiengj cawz youq Yehluqsajlaengj dih gyauqveiq. De couh ndij hoh ndij hoh bae lieb, lieb yawj mwnqlaw miz lwgsae doxcomz hih couh gaemh lwgsae; mboujguenj vunzsai vunzbaz, cungj ngaiz gaemh dawz rag bae gyaeng haeuj ndaw lauz bae. 4 Hoeng, doenghheij lwgsae faensanq bae daengz gak dieg hih doenghheij lwgsae mwnq, gyoengqde vanzlij ndaej dauqcawq bae cenz gij ndei siuhsiz Cangqdiq. 5 Yiengq Feihliq bae daengz dieg Sajmajliqyaq dih aen singz he le, couh gaihcij cenzgangj byawz dwg Gihduz. 6 Gyoengq vunz mwnq cungj dingq de gangj hwj diemzmih bae, caemhcaiq raen de guh gij saeh ndaej cingqmingz Cangqdiq dih gienzveih gaenq fazveih he. Gajlaeng gyoengqde couh dingq gij vah de. 7 Mwhde gij vunz mwnq miz haujlai vunz ngaiz fangz doz, cungj caemh ndaej boenq okma lo; gij fangz ngaiz boenq okma mwnq hemq vauxvaux. Yiengq caemh miz haujlai vunz gyad, vunz ha vej cungj caemh ndaej yw ndei lo. 8 Couh yienghneix, aen singz mwnq hih vunz cungj angq hwj nauhyied foenxfoenx bae. 9 Yiengq youq aen singz mwnq miz boux he, gij coh de heuh Sihmaenz. De senqsi cix youq aen singz mwnq guh suenqmingh, doeng loengh sae loengh, hawj gij vunz mwnq raen geizheih ij rai bae. De caemh gag haenh naeuz bonjfaenh de ak raixcaix, 10 guh hwj gij vunz mwnq mboujguenj bouxlaux lwgngez cungj dingq de gaen de. Gyoengqde cungj naeuz: “Boux vunz neix couh dwg Cangqdiq dih akak rengzrengz.” (Gij akak rengzrengz neix, gyoengqde caemh heuh guh ‘Veijdaq.’) 11 Aenvih de baenx geijlwh bi doxdaeuj cungj dwg youq mwnq suenqmingh, doeng loengh sae loengh, hawj vunz raen geizheih ij rai, sojhij gyoengq vunz cungj sinq de dingq de. 12 Hoeng daengj daengz gyoengq vunz dingq daengz Feihliq cenzgangj aen guek Cangqdiq dih ndei siuhsiz, rox daengz Yehsuh Gihduz dwg byawz he le, gyoengqde couh sinq de soj gangj he; mboujguenj vunzsai vunzbaz cungj sijlij. 13 Gajlaeng daiqlienz Sihmaenz bonjfaenh de cungj sinq lo, caemh sijlij lo. De sinq le, couh siengzseiz gaen youq henz ndang Feihliq, caemh raen Feihliq guh gij geizmiuj dih saeh, guh hawj de raen geizheih ij rai cix beiqfug ij rai. 14 Yiengq youq Yehluqsajlaengj hih dwzbaijyienz dingq naeuz Sajmajliqyaq hih vunz cungj dingq gij vah Cangqdiq le, couh baij Bijdwz caeuq Yozhanq bae mwnq. 15 Song boux de baex bae daengz he le, couh vih gij vunz sinq mwnq hwj gouz Cangqdiq, ij hawj Hoenzsaenz Cangqdiq doz youq gwnz ndang gyoengqde, 16 aenvih Hoenzsaenz Cangqdiq mijyaengz hwnj gwnz ndang gyoengqde bae saek boux; gyoengqde caenhgag hij gij mingzhiq Yehsuh Bouxcawj neix ma sijlij lah. 17 Sojhij Bijdwz caeuq Yozhanq couh oemj fawz hwnj gwnz ndang gyoengqde bae gouz Cangqdiq, hawj Hoenzsaenz Cangqdiq hwnj gwnz ndang gyoengqde bae. Couh yienghneix, gyoengqde couh miz Hoenzsaenz Cangqdiq doz youq gwnz ndang gyoengqde lo. 18 Yiengq Sihmaenz raen song boux de oemj fawz le, gyoengq vunz mwnq couh doq ndaej miz Hoenzsaenz Cangqdiq lo. De raen yienghneix le, couh aeu ngaenz hawj song boux de, 19 doiq song boux de naeuz: “Hawj gij bonjsaeh neix hawj gou bax! Hawj gou caemh ndaej oemj fawz hawj byawz, byawz couh ndaej miz Hoenzsaenz Cangqdiq lo.” 20 Bijdwz raen de yienghneix le, couh doiq de naeuz: “Mwngz caeuq gij ngaenz mwngz got rai bax! Mwngz gingqyienz luenh siengj, siengj aeu ngaenz ma cawx gij fuk Cangqdiq! 21 Mwngz mij'z faenh ndaej gaep gij hong gyoengqraeuz law, aenvih mwngz youq ndaw lwgra Cangqdiq dwg boux vunz simrwix he. 22 Sojhij mwngz ij daj ndaw sim nginh loek gaijgoq. Gaij gij doegsieb mwngz, gouz Cangqdiq; saekseiz de lij ndaej mienx ndaw sim mwngz dih gij siengjfap yalw mwngz. 23 Gou yawj ndaej ok mwngz gag simnyap, ndaw sim mwngz cungj dwg rahoengz vunz he, caemh yawj ndaej ok mwngz cungj dwg ngaiz gij simdoeg simfwn mwngz gaemhanh mwngz cienfanh rem he.” 24 Sihmaenz dingq le, couh gouz Bijdwz naeuz: “Cingj faenhsou bang gou gouz Cangqdiq, gouz de mbouj hawj doenghgij saeh faenhsou soj gangj hih dawz gou.” 25 Couh yienghneix, Bijdwz caeuq Yozhanq youq mwnq guh cingqyinz, cenzgangj Cangqdiq dih ndei siuhsiz. Gajlaeng, song boux de couh maj Yehluqsajlaengj lo; gyoengqde itmienh maj, itmienh youq Sajmajliqyaq dih doenghheij mbanj he cenzgangj Cangqdiq dih ndei siuhsiz. 26 Miz ngoenz he, miz boux bouxcai Cangqdiq he doiq Feihliq naeuz: “Gou ij hawj mwngz bae fueng baixnamz; mwngz ij byaij diuz roen daj Yehluqsajlaengj daengz Gyahcaq dih diuz roen ndoi fwz mwnq.” 27 Yiengq Feihliq caemh dingq gij vah de, couh okdin bae lo. Bae le, liuh mbouj daengz youq buenqroen nyangz boux Aihsaiqngozbijyaq vunz he; de dwg youq Aihsaiqngozbijyaq laeng Ganqdaqgih boux nijvangz neix guh guenj canghguq ngaenz he, de caemh dwg boux miz gienz ak dih daiqgyenh he. De bae Yehluqsajlaengj, bae gunghdenq Cangqdiq baiq Cangqdiq 28 dauq ma daengz buenqroen. De gag youq gwnz ci bonjfaenh de doeg bonj saw boux cenz gij vah Cangqdiq Hijcaiqyaq sij dih bonj saw mwnq. 29 Yiengq Hoenzsaenz Cangqdiq doiq Feihliq naeuz: “Mwngz goq bae dep aen ci mwnq.” 30 Feihliq dingq le, couh riq goqbae dep aen ci mwnq, couh dingqri boux daiqgyenh mwnq youq ndaw ci doeg bonj saw boux cenz gij vah Cangqdiq Hijcaiqyaq sij dih bonj saw mwnq. Yiengq de couh cam boux de naeuz: “Mwngz doeg hih bonj saw neix hax, doeg rox gij iqswh de lwi?” 31 Boux daiqgyenh mwnq dingq le, han naeuz: “Mij'z vunz son gou; gaenhbaenj mbouj rox.” De yienghneix gangj le, couh cingj Feihliq hwnj aen ci de bae, caeuq de naengh. 32 Gizsaed de doeg hih duenh saw neix cingq dwg: De luj duz yiengz ngaiz vunz ying bae gaj he, caemh luj duz yiengzlwg ngaiz vunz dawz ma daet fwn, mbouj ae mbouj o he. 33 De ngaiz vunz yawjngawz; mij vunz bang de gangj vah. Gangj daengz doengh daih gajlaeng, de mij'z faenh, aenvih de youq lajmbwn couh ij satsoq lo. 34 Gajlaeng boux daiqgyenh mwnq cam Feihliq naeuz: “Cingj mwngz naeuz gou ni, boux cenz gij vah Cangqdiq gangj hih duenh vah neix dwg ceij bouxlawz? Dwg ceij bonjfaenh de hajx cixnaeuz ceij heijvunz?” 35 Feihliq dingq de yienghneix cam le, couh daj duenh Singqgingh neix gaihcij gangj naeuz de ni gvanhhih Yehsuh dih siuhsiz. 36 Couh yienghneix, Feihliq doq bae doq gangj naeuz de ni. Gajlaeng ngamqluj bae daengz mwnq he miz raemx, boux de couh naeuz: “Aeq, yawj veiq! Mwnq miz raemx hwj; gou ndaej mbouj ndaej youq mwnq sijlij hax?” 37 Feihliq han de naeuz: “Hauhnaeuz mwngz cingqcaen sinq nex, ndaej hah.” Boux de couh doq naeuz: “Gou sinq, gou sinq Yehsuh Gihduz dwg lwg Cangqdiq.” 38 De yienghneix naeuz le, couh hawj dingz ci. Song boux de couh roengz raemx bae; Feihliq couh bang de sijlij. 39 Ndaej le, song boux de daj ndaw raemx hwnj ma hih mwhde, Hoenzsaenz Cangqdiq daiq Feihliq bae lo; daiqgyenh yawj mij raen de haem lo. Gajlaeng boux daiqgyenh neix vanzlij dwg giqcuz ganjroen, caemh dwg doq bae doq angq fwngjfwngq. 40 Yiengq Feihliq nej, Hoenzsaenz Cangqdiq daiq de bae le, gajlaeng de cij rox bonjfaenh de youq Yaqsojduh Singz. Yiengq de couh ndij mbanj ndij singz bae cenzgangj Cangqdiq dih ndei siuhsiz, itcig daengz de bae daengz Gaijsajliqyaq Singz.
1 Saujloz nej, Saujloz vanzlij dwg gangj doenghgij vah doegdoeg siebsieb he ma haep gyoengq lwgsae Yehsuh Bouxcawj. De bae cimh goengjsae dajbwiz hih boux daeuzdaeuz he, 2 bae gouz boux de, hawj boux de sij mbaw bihcwnj he hawj de, hawj de bae Daqmajswqgwz Singz, bae gak aen veiqdangz bae dawz doenghgij ciuq Yehsuh byaij hih vunz he, mboujguenj vunzsai vunzbaz cungj gaemh bae daengz Yehluqsajlaengj bae. 3 Yiengq de ijvanh bae daengz Daqmajswqgwz hih mwhde, sawqmwh miz ndaek rag rongh myig myiengzmyiengz he daj gwnzmbwn ceq roengzdaeuj, ceq dawz de. 4 De couh doq ngaiz laemxdengx roengzbae, caemh doq dingqri miz sing doiq de naeuz: “Saujloz, Saujloz! Mwngz vihmaz ij haih gou?” 5 Gajlaeng Saujloz naeuz: “Goengjau, mwngz dwg byawz hax?” Gij sing mwnq han de naeuz: “Gou couh dwg mwngz haih dih Yehsuh hah. 6 Vaiq hwnq, vaiq hwnq haeuj singz bae! Swhmboujyienz miz vunz naeuz mwngz ni mwngz ij guh gijmaz.” 7 Caemh youq mwhneix, doengh boux gaen Saujloz bae hih doengh boux mwnq gan dingqri miz sing gangj lah, hoeng, yawj mij raen miz vunz. Yiengq, gyoengqde cungj lau hwj ndwn youq mwnq saemjsangjrangx aj bak loengjloengq gangj mbouj ok bak. 8 Saujloz dingqri yienghneix le, couh vaiqdi hwnq. De hwnq le, baex hoi ra he, laixlawz cehra de baenzlwh yawj engq yawj mij raen saek yiengh haem lo. Yiengq doengh boux gaen de bae mwnq raen de yienghneix le, couh ying fawz de bae Daqmajswqgwz Singz lo. 9 De sam ngoenz cungj mbouj ndaej raen saek yiengh, caemh gijmaz cungj mbouj gw. 10 Yiengq youq Daqmajswqgwz miz boux lwgsae heuh Yaqnaznizyaq he. Yehsuh hawj de caenh lujnaeuz fangxngwnzloq yienghmwnq, youq ndaw loq de heuh de naeuz: “Yaqnaznizyaq!” Yaqnaznizyaq han naeuz: “Aex, bouxcawj gou hax, gou youq dineix.” 11 Yehsuh caiq naeuz: “Mwngz majcangq bae diuz gai heuh Gai Soh mwnq bae, bae laeng Youzdaq, laeng de cimh boux daj aen singz Daqsuq daeuj he. Boux de heuh Saujloz; de seizneix cingq gouz gou nex. Mwngz bae mwnq. 12 Gou gaenq hawj boux de caenh lujnaeuz ra ok rongxrib yienghmwnq yawjraen mwngz, Yaqnaznizyaq, bae oemj fawz haeuj laeng de bae, hawj de ndaej dauqyungz yawjraen.” 13 Yiengq Yaqnaznizyaq han naeuz: “Bouxcawj hax, miz haujlai vunz naeuz gou ni goq, boux vunz mwnq youq Yehluqsajlaengj baenzlawz baenzlawz haih gij vunz mwngz. 14 De seizneix daeuj dineix; doengh goengjsae dajbwiz he caemh hawj gienz hawj de, hawj de daeuj gaemh sojmiz nginh mwngz dwg bouxcawj hih vunz nex.” 15 Hoeng Yehsuh engq han naeuz: “Mwngz caenhrox coengqsim bae sat lo, aenvih gou senj de daeuj swqhaeuh gou; gou ij hawj de youq doenghheij vunz linghvaih minzcuz he, doenghheij dang vuengz he, caeuq youq gij vunz Hijswzlez ndaw de cenzgangj gou dwg bouxlawz. 16 Gou caemh ij hawj de rox vih gou hwj ngaiz souh daengz geijlwh nanh.” 17 Yaqnaznizyaq dingq Yehsuh yienghneix naeuz le, couh ciuq de gangj hih yienghmwnq bae guh lo. De couh haeuj bae daengz aen ranz Youzdaq, couh oemj fawz hawj Saujloz, doiq de naeuz: “Saujloz beixnuengx hax, mwh mwngz daeuj dineix hih mwhde, youq dangjroen yienh hawj mwngz raen dih Yehsuh Bouxcawj hax, de baij gou daeuj, hawj gou daeuj hawj mwngz dauqyungz yawj ndaej raen, vanzlij hawj Hoenzsaenz Cangqdiq hawj mwngz rim bae.” 18 Yaqnaznizyaq yienghneix doiq Saujloz naeuz le, cehra Saujloz couh doq miz ndaek gij luj gyaepbya he daj cehra de doek okdaeuj, yiengq cehra de couh doq yawj ndaej raen boiz lo. Yawj ndaej raen le, de couh sijlij lo. 19 Couh yienghneix, gajlaeng Saujloz gw haeux le, aen ndangdaej de couh dauqfuk boiz lo. Gajlaeng de youq Daqmajswqgwz gaen gij lwgsae mwnq youq duenh he. 20 De youq mwnq hih duenh cizgyenh mwnq, de bae gak aen veiqdangz cenzgangj gij saeh Yehsuh, cenz naeuz Yehsuh dwg lwg Cangqdiq. 21 Sojmiz dingq de gangj vah hih vunz cungj raen geizheih ij rai, couh naeuz: “Ox! Boux neix mbouj dwg youq Yehluqsajlaengj bwkhaih gij vunz sinq Yehsuh hih maz? De daeuj dineix, caemh mbouj dwg ij gaemh gyoengq vunz sinq mwnq bae gyau hawj doengh goengjsae dajbwiz hih maz?” 22 Couh daj mwhneix hwnj, Saujloz yied gangj yied ndaej cingqmingz Yehsuh dwg Gihduz, Cangqdiq baij daeuj dih vuengz, gangj hawj Daqmajswqgwz dih Youzdaiq vunz ngoemxngwd mij vah gangj bae. 23 Yiengq gij vunz Youzdaiq mbouj fug Saujloz buekhingz gyoengqde. Gij saeh neix goq duenh he le, gyoengqde couh doxyuk hwj ijsiengj gaj Saujloz. 24 Gyoengqde vih ij gaj Saujloz, ngwnzngoenz cungj souj youq doenghheij baksingz he hwj, hoeng, gij yimhmaeuz gyoengqde ngaiz Saujloz rox. 25 Gajlaeng miz haemh he, gyoengq lwgsae Saujloz couh aeu loz ma daj conghcang gwnz ciengz duengq Saujloz ok rog ciengz bae, hawj de deuz. 26 Saujloz ndaej deuz okma le, de bae daengz Yehluqsajlaengj, siengj caeuq gyoengq lwgsae mwnq, gaep gyoengq lwgsae mwnq, hoeng, gyoengq lwgsae mwnq cungj mbouj leixlangh de, cungj lau de ij rai, cungj mbouj sinq naeuz de caemh dwg lwgsae Yehsuh. 27 Caenhgag miz boux lwgsae heuh Bahnazbah he leix de, daiq de bae cimh gyoengq dwzbaijyienz, bae gangj naeuz gyoengqde ni de youq dangjroen baenzlaw raen Yehsuh, Yehsuh baenzlawz doiq de naeuz, youq Daqmajswqgwz baenzlawz mbeihung hwj hij gij mingzhiq Yehsuh ma cenzgangj Cangqdiq dih ndei siuhsiz cungj gangj naeuz gyoengqde ni liux. 28 Couh yienghneix, Saujloz daj mwhmwnq hwnj couh caeuq Yehluqsajlaengj hih lwgsae miz laizvangj, 29 caemh youq mwnq mbeihung hwj hij gij mingzhiq Yehsuh ma gangj vah. De caemh siengzseiz caeuq gij vunz gangj Hihlaz vah dih Youzdaiq vunz cix gangj cix doxeuq lwnh gvanhhih Cangqdiq dih ndei siuhsiz, hoeng gyoengq vunz mwnq dauq ijsiengj gaj de. 30 Gajlaeng gyoengq lwgsae rox gij saeh neix le, couh daiq de bae Gaijsajliqyaq Singz, gajlaeng caiq hawj de bae Daqsuq Singz. 31 Gajlaeng, Youzdaiq hah, Gyahliqliq hah, Sajmajliqyaq hah, gak dieg dih gyauqveiq cungj bingzdingh ndaej duenh he. Gyauqveiq caemh cungj dwg gig soenhgingq Cangqdiq, caemh cungj dwg ndaej daengz Hoenzsaenz Cangqdiq dih bangcoh ndaej laeb hwnjdaeuj, gij vunz caemh yied ngoenz yied lai hwnjdaeuj lo. 32 Caiq gangj daengz Bijdwz, Bijdwz de dauqcawq byaij dauqcawq bae. Miz baez he, de bae daengz dieg Cahlwnz aen mbanj Lijdaq, bae mwnq yawj gij vunz Cangqdiq. 33 Youq mwnq de nyangz boux vunz gyad he, gij coh de heuh Hijnizyaq. Boux de gaenq gyad ninz youq gwnz congz baenx bet bi lo. 34 Bijdwz raen le, couh doiq de naeuz: “Hijnizyaq, Yehsuh Gihduz yw mwngz ndei lo. Hwnq bax! Hwnq soujsib doxgaiq bax!” Bijdwz yienghneix naeuz le, de couh majcangq hwnq hwnjdaeuj. 35 Gajlaeng sojmiz youq Mbanj Lijdaq dih vunz cungj yawjraen de ndaej byaij, simqciq baenx cenz dieg Cahlwnz hih vunz cungj caemh yawjraen de ndaej byaij le, couh sinq Yehsuh Bouxcawj lo. 36 Youq Yozbaq Singz miz boux lwgsae vunzbaz he, gij coh de heuh Daqbijdaq, fanhyiz daengz Hihlaz vah nex, couh dwg Dohgyah. De siengzseiz haenj bang vunz gungz, haenj guh ndeisaeh. 37 Hoeng liuh mbouj daengz mwhneix de ngaiz bingh hwj rai lo. Gij vunz ndaw ranz de dawz gij seihaiz de swiq cengh le, couh coengq de youq aen fungh gwnz laeuz. 38 Aenvih Yozbaq Singz liz Mbanj Lijdaq mbouj geijlwh gyae, yiengq youq Yozbaq dih doenghheij lwgsae mwnq dingq naeuz Bijdwz youq Lijdaq le, couh baij song boux bae cimh de, gouz de naeuz: “Cingj mwngz vaiqdi bae gyoengqraeuz mwnq bax.” 39 Bijdwz dingq le, couh majcangq gaen gyoengqde bae. Bijdwz ngamq baex bae daengz he, gyoengqde couh majcangq daiq de hwnj laeuz bae. Yiengq youq mwnq sojmiz hih mehmaiq cungj gvaengz Bijdwz hwj daej, doq daej doq hawj Bijdwz yawj Dohgyah gaxgonq nyib hawj gyoengqde hih buh baixndaw caeuq buhdox. 40 Gajlaeng Bijdwz hawj gyoengqde ok rog bae. Gyoengqde ok bae le, de couh gvih roengzma gouzcam Cangqdiq. Gouz le, couh veq ndang goqma doiq boux vunzrai mwnq naeuz: “Daqbijdaq! Hwnq!” Bijdwz baex naeuz yienghneix he le, boux de couh doq hoi ra, couh doq yawjraen Bijdwz, couh majcangq doq naengh hwnjdaeuj. 41 Yiengq Bijdwz couh byaij goqbae raeuz de hwnq, caiq heuh gyoengq lwgsae caeuq doengh mehmaiq mwnq haeuj daeuj, hawj gyoengqde yawj Dohgyah, boux vunz ndaej dauqlix neix. 42 Gajlaeng gij siuhsiz neix cenz baenx cenz Yozbaq, caemh miz baenx haujlai vunz cungj sinq Yehsuh Bouxcawj lo. 43 Daj mwhmwnq, Bijdwz youq Yozbaq youq duenh cizgyenh he, youq laeng boux gyahgungh naeng doenghduz he, boux de heuh Sihmaenz, youq laeng de youq.
1 Youq aen singz Gaijsajliqyaq miz boux he, gij coh de heuh Gohnizliuz, dwg Lozmaj gywnhdeiq Iqdaqliq yingz dih lienzcangj. 2 De dwg boux vunz aiq Cangqdiq yawjnaek Cangqdiq he; de siengzseiz bang vunz gungz, siengzseiz haenh Cangqdiq gouz Cangqdiq. De baenx cenz ranz cungj dwg gingqcungh Cangqdiq he. 3 Miz ngoenz he yaquj daihgaiq sam diemjcung yienghneix, de caenh lujnaeuz fangxngwnzloq yienghmwnq yawjraen bouxcai Cangqdiq daeuj heuh de naeuz: “Gohnizliuz!” 4 Gohnizliuz raen yienghneix le, lau hwj cimyawj de cam naeuz: “Aex goengjau, miz maz saeh lah?” Yiengq bouxcai han de naeuz: “Cangqdiq gaenq dingqri mwngz haenh de gouz de lo, caemh ndaejgeiq mwngz haenj bang vunz gungz he. 5 Seizneix mwngz ij baij vunz bae Yozbaq, bae mwnq cingj boux heuh Sihmaenz-Bijdwz he daeuj. 6 De youq laeng boux gyahgungh naeng doenghduz he youq, gij coh de heuh Sihmaenz he, aen ranz de dwg youq henz haij he.” 7 Gajlaeng, doiq de gangj vah hih bouxcai mwnq bae le, de couh heuh song bouxhoiq caeuq boux siengzseiz gaen henz ndang de hih boux bing aiq Cangqdiq yawjnaek Cangqdiq he daeuj, 8 naeuz gyoengqde ni de ngamqngamq roeb raen gijmaz. Naeuz sat le, couh baij gyoengqde bae Yozbaq lo. 9 Gyoengqde bae hih ngoenz daixngeih, mwh gyoengqde bae ijvanh daengz Yozbaq hih mwhde, daihgaiq daengz gyangjngoenz cingq, Bijdwz hwnj gwnz dingj laeuz de youq hih mwnq bae haenh Cangqdiq gouz Cangqdiq. 10 Gajlaeng de roxnginh dungxiek, siengj gw haeux, hoeng de youq hih ranz mwnq gyoengqde cijngamq cawj haeux, cawj mijyaengz ndaej haem. Couh youq mwhneix, de lujnaeuz ra ok rongxrib yienghmwnq, 11 yawjraen aen mbwn hoi luj aen dou, miz ndaek gij he luj vangq boiq yienghmwnq, seiq gok de cug hwj, daj gwnzmbwn duengq roengzdaeuj daengz lajdoem. 12 Ndaw de coux miz gak cungj doenghduz: miz duz byaij hih, duz vuenz hih, duz roeg mbin hih cungj miz. 13 Caemh miz sing doiq de naeuz: “Bijdwz, dawz doenghduz neix gaj hwj gw bae.” 14 Hoeng Bijdwz dauq naeuz: “Bouxcawj gou hax, gijn'x mbouj ndaej law! Gou coengzlaiz mbouj gw goq doenghgij mbouj hab gw hih doxgaiq goq.” 15 Gij sing mwnq caiq doiq de naeuz: “Cangqdiq naeuz ndaej hab gw hih, mwngz mbouj ndaej naeuz de mbouj hab gw.” 16 De yienghneix lienzdaemh sam mbat luj ra ok rongxrib yienghmwnq raen gij doxgaiq caeuq miz sing doiq de gangj. Gajlaeng gij doxgaiq mwnq couh sou hwnj gwnzmbwn bae lo. 17 Yiengq youq mwh Bijdwz lij ngeix loekloek mbouj rox de luj ra ok rongxrib yienghmwnq yawjraen hih dwg gijmaz iqswh hih mwhde, Gohnizliuz baij daeuj hih vunz couh cimh daeuj daengz bakdou Sihmaenz lo. 18 Gyoengqde youq bakdou hemq cam naeuz: “Veix! Miz mbouj miz boux heuh Sihmaenz-Bijdwz he youq dineix youq hah?” 19 Bijdwz cungj lij ngeix mijyaengz doeng, vanzlij youq mwnq ngeix gij saeh ngamqngamq fatseng he dauqdaej dwg gijmaz iqswh hih mwhde, Hoenzsaenz Cangqdiq doiq de naeuz: “Aex, miz sam boux daeuj cimh mwngz lo. 20 Mwngz vaiqdi hwnq, roengz maj gaen gyoengqde bae; gaejyungh ngeiz gijmaz, aenvih dwg gou baij daeuj he.” 21 Bijdwz dingq yienghneix le, couh majcangq roengz ma, doiq gij vunz daeuj cimh de mwnq naeuz: “Gou couh dwg boux faenhsou ij cimh he. Faenhsou daeuj cimh gou miz maz saeh hah?” 22 Gyoengqde han naeuz: “Dwg Gohnizliuz lienzcangj raeuz baij raeuz daeuj lah; de dwg boux youq ndaw lwgra Cangqdiq dwg boux vunz simndei simsoh he, dwg gingqcungh Cangqdiq he dih vunz. Sojmiz Youzdaiq vunz cungj haenh de naeuz de dwg vunz ndei. Miz boux bouxcai Cangqdiq he naeuz de, hawj de daeuj cingj mwngz bae laeng de; yienghmwnq de couh ndaej dingq mwngz gangj vah lo.” 23 Bijdwz dingq gyoengqde yienghneix gangj le, couh cingj gyoengqde haeuj ranz bae, caemh hah gyoengqde youq haemh. Yiengq daengz ngoenz daixngeih, Bijdwz couh caeuq geij boux Yozbaq hih lwgsae gaen gyoengqde bae lo. 24 Bae daengz ngoenz daixngeih, gyoengqde couh daengz Gaijsajliqyaq lo. Gohnizliuz caemh gaenq cingj doenghheij caencik beixnuengx caeuq baengzyoux daeuj daengj gyoengqde lo. 25 Yiengq Bijdwz cijngamq baex bae daengz he, Gohnizliuz couh majcangq rumj goqdaeuj, couh bomz youq dangqnaj de baiq de sax de. 26 Bijdwz raen yienghneix le, couh doq vax dawz de, naeuz: “Vaiq hwnq; gou caemh dwg vunz hih lah!” 27 Bijdwz yienghneix naeuz le, couh doq caeuq Gohnizliuz gangj vah doq byaij haeuj ranz bae. De raen miz haujlai vunz youq ndaw ranz de doxcomz, 28 couh doiq gyoengq vunz naeuz: “Faenhsou caemh rox, ciuq gij gveihdingq raeuz, Youzdaiq vunz mboujcwnj caeuq gij vunz linghvaih minzcuz he doxcwnz; hoeng, Cangqdiq gaenq naeuz gou lo, mboujguenj guxmaz vunz cungj ndaej, cungj mbouj ndaej yawj gyoengqde dwg gij vunz mbouj hab dep he. 29 Sojhij faenhsou baij vunz bae cingj gou daeuj, gou cungj mbouj doi, couh daeuj lo. Yiengq seizneix gou daeuj lo, gou cam faenhsou, faenhsou vihmaz ij cingj gou daeuj dineix nej?” 30 Gajlaeng Gohnizliuz han naeuz: “Couh dwg seiq ngoenz gaxgonq, daihgaiq yaquj sam diemjcung yienghneix, gou youq ndaw ranz haenh Cangqdiq gouz Cangqdiq. Sawqmwh miz boux he daenj buh myig myiengzmyiengz ndwn youq dangqnaj gou, 31 doiq gou naeuz: ‘Gohnizliuz, mwngz gouz Cangqdiq, Cangqdiq gaenq dingqri lo, de caemh ndaejgeiq mwngz bang vunz gungz soj guh hih ndeisaeh lo. 32 Mwngz ij baij vunz bae Yozbaq, bae cingj boux heuh Sihmaenz-Bijdwz he daeuj. De youq laeng boux gyahgungh naeng doenghduz he youq, gij coh de heuh Sihmaenz he, aen ranz de dwg youq henz haij he.’ 33 Sojhij gou couh majcangq baij vunz bae cingj mwngz daeuj. Seizneix mwngz daeuj lo, raeuz angq ij rai. Seizneix raeuz rox Cangqdiq cuqhiq daengz raeuz lo; raeuz couh siengj dingqdingq Cangqdiq soj raengq mwngz hih ij gangj naeuz raeuz ni hih.” 34 Couh yienghneix, Bijdwz couh gaihcij doiq gyoengq vunz mwnq gangj vah. De naeuz: “Seizneix gou saedsaeh rox, Cangqdiq mbouj dwg yawj vunz guh saeh. 35 Cijaeu dwg soenhgingq de, guh saeh guh gij cingqheiq he, mboujguenj dwg aen guekgyalawz dih vunz, aen minzcuzlawz dih vunz, de cungj haenj. 36 Aenvih de hawj gij vunz Hijswzlez rox dih ndei siuhsiz couh dwg: Yehsuh Gihduz hawj sojmiz minzcuz hih vunz ndaej caeuq Cangqdiq doxhuz; boux Yehsuh neix couh dwg bouxcawj sojmiz hih. 37 Dajlwh guh sijlij dih Yozhanq senhcenz sijlij le, gij siuhsiz neix daj Gyahliqliq gaihcij cenz, cenz baenx cenz Youzdaiq Saengj; gij saeh neix faenhsou cungj rox. 38 Faenhsou caemh rox, Mbanj Nazsajlwz vunz dih Yehsuh, Cangqdiq baenzlawz hawj Hoenzsaenz Cangqdiq doz youq gwnz ndang de, caeuq soengq bonjsaeh hawj de, hawj de bae gak dieg bae guh ndeisaeh. De yw ndei doenghheij vunz ngaiz fangzvuengz gaemhanh he, aenvih Cangqdiq caeuq de youq. 39 “Gyoengqraeuz dwzbaijyienz cungj dwg de youq ndaw gij dieg Youzdaiq vunz caeuq Yehluqsajlaengj Singz soj guh hih saeh dih cingqyinz. Gyoengq vunz mwnq engq dawz de ding hwnj gwnz gyaq cixcib bae rai. 40 Hoeng daengz daixsam ngoenz Cangqdiq hawj de ndaej dauqlix, vanzlij yienh hawj vunz raen; 41 cijmboujgoq dwg yienh hawj gyoengqraeuz doengh boux Cangqdiq senqsi cix senj okdaeuj guh cingqyinz dih vunz raen lah, couh dwg doengh boux youq de dauqlix le, ndaej caeuq de doxcaeuq gw hih vunz raen lah, mbouj dwg guxmaz vunz cungj ndaej raen law. 42 De raengq raeuz hawj raeuz bae cenzgangj gij ndei siuhsiz de, cingqmingz de dwg Cangqdiq laebdingh guh boux saemjbuenq vunzlix caeuq vunzrai dih saemjbuenqguenh he. 43 Sojmiz hih boux cenz gij vah Cangqdiq cungj guh de dih cingqyinz; gyoengqde naeuz Cangqdiq vih de hwj couh mienx gij coih doengh boux famz sinq de hih vunz.” 44 Bijdwz vanzlij gangj doenghgij vah neix hih mwhde, Hoenzsaenz Cangqdiq couh hwnj gwnz ndang gyoengq vunz daeuj dingq mwnq bae lo. 45 Yiengq doengh boux lwgsae gaen Bijdwz daj Yozbaq daeuj hih Youzdaiq vunz raen Hoenzsaenz Cangqdiq hwnj gwnz ndang gij vunz linghvaih minzcuz he bae le, cungj raen geizheih ij rai bae, 46 aenvih gyoengqde dingqri doenghgij vunz mwnq gangj cungj vah Hoenzsaenz Cangqdiq hawj vunz gangj he ma haenh Cangqdiq, haenh Cangqdiq veijdaq. 47 Gajlaeng, Bijdwz naeuz: “Caeuq raeuz doxdoengz ndaej miz Hoenzsaenz Cangqdiq lo, lij miz byawz ndaej laengz gyoengqde sijlij nej?” 48 De yienghneix gangj le, couh hawj gyoengqde vih Yehsuh Gihduz hwj sijlij. Gajlaeng gyoengq vunz mwnq vanzlij gouz Bijdwz youq laeng gyoengqde mwnq lai youq geij ngoenz haem.
1 Couh yienghneix, gajlaeng gyoengq dwzbaijyienz caeuq youq dieg Youzdaiq hih lwgsae cungj dingqri naeuz gij vunz lingh minzcuz he caemh dingq gij vah Cangqdiq. 2 Yiengq couh youq mwh Bijdwz ngamq baex maj daengz Yehluqsajlaengj he, couh miz buek vunz gag nda'ndieng hanh naeuz gij vunz linghvaih minzcuz he caemh ij gozlij cij ndaej hih buek vunz mwnq gvaiq de naeuz: 3 “Mwngz gingqyienz bae laeng boux mijyaengz gozlij hih linghvaih minzcuz he gw haeux lah.” 4 Bijdwz dingq buek vunz mwnq yienghneix naeuz le, couh dawz gienh saeh mwnq baenxban baenxban geq naeuz gyoengqde ni. 5 De naeuz: “Couh dwg youq mwh gou youq Yozbaq Singz haenh Cangqdiq gouz Cangqdiq hih mwhde, gou caenh lujnaeuz ra ok rongxrib yienghmwnq, yawjraen miz ndaek gaiq doxgaiq he daj gwnzmbwn duengq roengzdaeuj. Gij doxgaiq mwnq caenh luj vangq boiq he, seiq gok de cug hwj, duengq roengz dangqnaj gou daeuj. 6 Gou baex sijsaeq yawj he, couh yawjraen ndaw de coux miz doenghduz hwj: duz byaij cix miz, duz vuenz cix miz, duz roeg mbin cix miz, daiqlienz gukguk nyaennyaen cungj miz. 7 Gou vanzlij dingqri miz sing doiq gou naeuz: ‘Bijdwz, hwnq! Gaj doenghduz hwj gw bax.’ 8 “Gou dingq le, couh naeuz: ‘Bouxcawj gou hax, gijn'x mbouj ndaej law! Gou coengzlaiz mbouj gw goq doenghgij mbouj hab gw hih doxgaiq goq.’ 9 “Gij sing mwnq daj gwnzmbwn vanzlij naeuz: ‘Cangqdiq naeuz ndaej hab gw hih, mwngz mbouj ndaej naeuz mbouj hab gw hih nej.’ 10 Yienghneix lienzdaemh naeuz sam mbat le, gajlaeng vangq boiq caeuq gij doenghduz mwnq couh sou hwnj gwnzmbwn maj boiz lo. 11 “Ngamqluj youq mwhneix, miz sam boux vunz daj Gaijsajliqyaq baij daeuj cimh gou hih, couh ndwn youq bakdou aen ranz gou youq hih mwnq lo. 12 Yiengq Hoenzsaenz Cangqdiq couh naeuz gou, hawj gou gaen gyoengqde bae, mboujyungh ngeiz guxmaz. Dajlwh Yozbaq gaen gou daeuj hih roek boux beixnuengx neix caemh gaen gou bae, caemh haeuj ndaw ranz boux mwnq bae. 13 Boux mwnq couh naeuz gyoengqraeuz ni, de baenzlawz yawjraen bouxcai Cangqdiq he ndwn youq ndaw ranz de doiq de naeuz: ‘Baij vunz bae Yozbaq, bae mwnq cingj boux heuh Sihmaenz-Bijdwz he daeuj; 14 boux de miz vah ij doiq mwngz gangj. De gangj hih vah ndaej hawj mwngz caeuq ndaw ranz mwngz sojmiz hih vunz cungj ndaej gouq.’ 15 “Yiengq gou bae daengz ndaw ranz de le, youq mwh gou gaihcij gangj vah hih mwhde, Hoenzsaenz Cangqdiq couh hwnj gwnz ndang gyoengqde bae, caemh luj mwh de hwnj gwnz ndang gyoengqraeuz bae hih yienghmwnq. 16 Gou couh majcangq ngeix daengz Yehsuh bouxcawj raeuz gangj goq naeuz: ‘Yozhanq dwg aeu raemx ma sijlij, hoeng faenhsou ij ndaej Cangqdiq aeu Hoenzsaenz Cangqdiq ma sijlij’ gawq vah neix. 17 Yiengq, giqyienz Cangqdiq soengq Hoenzsaenz Cangqdiq, gij laex neix, hawj doenghgij vunz luj gyoengqraeuz yienghmwnq sinq bouxcawj raeuz Yehsuh Gihduz hih linghvaih minzcuz hih vunz vwz, gou suenq guxmaz nex, ndaej lanz Cangqdiq hajx?” 18 Gyoengq vunz mwnq dingq Bijdwz yienghneix gangj le, couh mij vah ndaej gvaiq de haem lo. Gajlaeng gyoengqde couh haenh Cangqdiq naeuz: “Cangqdiq caemh hawj lingh aen minzcuz nginh loek gaijgoq hwj ndaej lix.” 19 Swhdizfanj ngaiz vunz aeu rin dub rai le, doenghheij lwgsae caeuq de ngaiz bwkhaih hih cungj faensanq bae daengz gak dieg liux; miz mbangj hih bae daengz Feihnizgih, Caiqbujluqswh caeuq Anhdizah, baenxlai gyae. Gyoengqde caenhgag doiq gij vunz Youzdaiq cenzgangj gvanhhih Cangqdiq dih ndei siuhsiz lah; gizdah vunz, gyoengqde cungj mbouj cenz. 20 Hoeng doenghheij lwgsae neix ndaw de miz Caiqbujluqswh vunz, miz Gujliqnaiq vunz; gyoengqde bae daengz Anhdizah le, caemh doiq gij vunz Hihlaz cenzgangj gvanhhih Yehsuh Bouxcawj dih ndei siuhsiz. 21 Yehsuh Bouxcawj caeuq gyoengq lwgsae youq, sawj haujlai Hihlaz vunz daj ndaw sim nginh loek gaijgoq, sinq de. 22 Gajlaeng, gij siuhsiz neix cenz bae daengz Yehluqsajlaengj dih gyauqveiq; yiengq gyauqveiq couh baij Bahnazbah bae Anhdizah. 23 Bahnazbah bae daengz Anhdizah le, yawjraen Cangqdiq soengq fuk hawj gyoengq vunz mwnq, de couh angq hwj ij rai, couh gujliq gyoengq vunz, naeuz gyoengq vunz, hawj gyoengq vunz sinq Yehsuh ij gyenhdingq, mbouj ndaej bienq sim, ij yungjyenj gaen Yehsuh Bouxcawj. 24 Aenvih Bahnazbah boux vunz neix dwg boux vunz simndei, sinq Gihduz gyenhdingq he dih vunz, Hoenzsaenz Cangqdiq youq gwnz ndang de hwj rim bae, sojhij miz haujlai vunz cungj gaep haeuj Yehsuh Bouxcawj. 25 Gajlaeng Bahnazbah bae Daqsuq cimh Saujloz. 26 Cimhraen de le, couh daiq de bae Anhdizah. Song boux de youq mwnq cukcuk youq bi he. Youq ndaw bi mwnq, song boux de cungj dwg caeuq gyauqveiq doxcomz, caemh son baenx haujlai vunz. (Gyoengq vunz an gyoengq lwgsae heuh guh Gihduzduz; ‘Gihduzduz’ gij coh neix couh dwg daj youq Anhdizah gaihcij heuh lo.) 27 Caemh youq mwhde miz geij boux boux cenz gij vah Cangqdiq daj Yehluqsajlaengj daeuj daengz Anhdizah dih gyauqveiq. 28 Geij boux ndaw de miz boux he, gij coh de heuh Yaqgyahbuq. Hoenzsaenz Cangqdiq hawj de ndwn hwnjdaeuj, hawj de gangj naeuz baezneix lajmbwn ij miz ciengz iekvangh he. Gajlaeng cingqgawq daengz mwh Gwzlaujdiuh guh goengjvuengz Lozmaj hih mwhde fatseng lo. 29 Sojhij gyoengq lwgsae gak vunz cungj caenhsim caenh goengrengz bae cwnjbiq ngaenz caeuq doxgaiq soengq hawj doenghheij youq Youzdaiq hih gyoengq lwgsae. 30 Gyoengqde cwnjbiq ndei le, couh baij Bahnazbah caeuq Saujloz soengq bae hawj doengh boux gyauqveiq lingjdauj, hawj gyoengqde fat hawj gyoengq lwgsae.
1 Couh youq mwhneix, goengjvuengz Hihliz dauqcawq bae haih gij vunz youq gyauqveiq haemq cungqyauq he. 2 De hawj vunz aeu giemq bae gajrai Yajgoz boux dwzbaijyienz neix, couh dwg daeggo Yozhanq. 3 Gajlaeng de rox gij vunz Youzdaiq haenj de yienghneix guh, couh ganhseiq caiq baij vunz bae gaemh Bijdwz. (Ngamqluj ngoenz mwnq dwg duenh aen ciet Cawz Yauqmuj he.) 4 De gaemh dawz Bijdwz le, couh dawz de gyaeng haeuj ndaw lauz bae, vanzlij baij baenx seiq buek vunz, it buek seiq boux hwj daeuj doxlwnz hen de, dajsuenq baex goq aen ciet Bienqgoqbae he, couh dawz de bae dangqnaj vunzlai saemj. 5 Bijdwz ngaiz gyaeng haeuj ndaw lauz bae le, gyauqveiq hih vunz cungj vih de hwj caenhrox gouz caenhrox gouz Cangqdiq. 6 Youq goengjvuengz Hihliz ij dawz Bijdwz ok bae saemj hih haemh gaxgonq de, Bijdwz ngaiz song boux bing gam hwj ninz youq cungqgyan de, caemh dwg ngaiz aeu song diuz lienh diet ma lienh hwj, bakdou caemh miz bing souj hwj. 7 Sawqmwh, miz boux bouxcai Cangqdiq he ndwn youq henz ndang Bijdwz, caemh miz ndaek gij myigmyiengz he rongh youq ndaw lauz. Bouxcai Cangqdiq bungqbungq famhdungx de heuh de singj, naeuz: “Bijdwz, Bijdwz, vaiqdi, vaiqdi hwnq!” Bouxcai yienghneix naeuz le, diuz lienh lamh fawz de couh doq duet lo. 8 Bouxcai caiq naeuz: “Cug ndei sairwet, daenj haiz ndei!” Bijdwz caemh ciuq de gangj hih yienghmwnq bae guh lo. Bouxcai youhcaiq naeuz: “Caiq daenj buh baixrog haem; gaen gou daeuj!” 9 Bijdwz dingq le, caemh gaen de bae lo. De gannaeuz gaen de bae lah, hoeng de gaenhbaenj mbouj rox bouxcai soj guh hih saeh dwg saedsaeh he; de naemqnaeuz bonjfaenh de fangxngwnzloq lah. 10 Song boux de byaij goq daixit caeuq daixngeih dauq canqgang, gajlaeng bae daengz aen dou diet gaenh diuz gai he. Aen dou de sawqmwh gag hoi, yiengq song boux de couh daj mwnq ok ma lo. Ok ma le, song boux de byaij goq diuz gai he. Sawqmwh bouxcai engq mij raen lo, biek de bae lo. 11 Mij raen bouxcai le, Bijdwz cij singqsag goqdaeuj naeuz: “Ox, seizneix gou cingqcaen rox dwg Yehsuh Bouxcawj baij bouxcai de daeuj gouq gou daj ndaw fawz goengjvuengz Hihliz caeuq ndaw fawz gij vunz Youzdaiq duet okma lo.” 12 De yienghneix ngeix daengz le, couh yiengq aen ranz Majliqyaq daxmeh Yozhanq-Majgoj byaij bae lo. Youq ndaw ranz de miz haujlai vunz doxcomz gouz Cangqdiq. 13 Bijdwz bae daengz bakdou de le, couh ndaek aen doumonz de, yiengq Lozdaq, dahhoiq ndaw ranz Majliqyaq, ok daeuj han. 14 Hoeng, daengj daengz de rox naeuz dwg gij sing Bijdwz le, engq angq hwj lumz hoi dou, dauq riq dauqlaeng maj naeuz gyoengq vunzlai ndaw ranz ni lah. De naeuz: “Ox! Bijdwz youq rog doumonz!” 15 Gyoengq vunz dingq le, cungj han naeuz: “Mwngz fatvangh hoh luh!” Hoeng de vanzlij dwg euq naeuz: “Cingqcaen dwg de!” Gajlaeng gyoengq vunz naeuz: “Yiengq aiq dwg bouxcai de luh.” 16 Bijdwz vanzlij dwg youq rog neix ndaek dou, mbouj dingz hih ndaek hwx ndaek hwx. Gajlaeng gyoengqde hoi dou lo. Baex hoi dou he, cingqgawq raen dwg Bijdwz gwhraix, guh hawj gyoengq vunz cungj raen geizheih ij rai bae. 17 Bijdwz raen yienghneix le, couh vadvad gij fawz de, hawj gyoengq vunz dingh roengzma. Gajlaeng de couh gangj naeuz gyoengqde ni, Yehsuh Bouxcawj baenzlawz baenzlawz daj ndaw lauz daiq de okma. Gangj naeuz gyoengqde ni liux le, de couh raengq gyoengqde naeuz: “Faenhsou dawz gij saeh neix gangj naeuz Yajgoz ni, caeuq doenghheij lwgsae ni.” De gangj sat doenghheij vah neix le, couh daj mwnq ok ma bae daixlingh mwnq lo. 18 Yiengq daengz ranzrongh le, gyoengq bing souj mwnq cij rox naeuz Bijdwz mbouj youq ndaw lauz, guh hwj cungj vueng liux, mbouj rox Bijdwz bae mwnqlaw lo. 19 Gajlaeng goengjvuengz Hihliz caemh rox lo. De rox le, cungj aeuqheiq hwj ij rai, couh majcangq baij vunz dauqcawq bae cimh, hoeng cungj cimh mij raen. Yiengq de ndatheiq le, couh saemj doengh boux bing gamsouj Bijdwz mwnq, gajlaeng vanzlij dawz gyoengqde gajrai liux. Gij saeh neix goq le, goengjvuengz Hihliz daj mwnq dieg gij vunz Youzdaiq bae daengz Gaijsajliqyaq Singz youq, youq mwnq camqciz youq duenh he. 20 Goeng Hihliz aeuqheiq gij vunz Daiqwj Singz caeuq gij vunz Sihdoenq Singz, sojhij doengh gyoengq vunz mwnq couh ij baij vunz bae cimh goeng Hihliz. Bae cihsenz, gyoengqde sien bae longx goeng Bwzlahswhduh, goeng sungjguenj ndaw vangzgungh he, longx hawj de haeuj gyoengqde, bang gyoengqde, bang hawj gyoengqde ndaej caeuq goeng Hihliz doxhuz, aenvih gyoengqde ijsiengj dajlaeng goengjvuengz soj guenjyaz hih ndaej cawx haeux. 21 Yiengq daengz ngoenz dingh doxraennaj hih ngoenz mwnq, goeng Hihliz daenj buh lungzbauz hwj naengh youq aen lungzeij de, doiq gyoengq vunz gangj vah. 22 Goeng de gangj sat le, gyoengq vunz cungj hemq naeuz: “Ox! Mwngz gangj hih vah caenh luj cwnz gangj vah raixcaix!” 23 Gyoengq vunz yienghneix hemq le, goeng Hihliz daekeiq vaujvauq. Baenjlaiz caenhgag Cangqdiq cij boiqndaej vunz yienghneix haenh he, hoeng de mij doi. Sojhij bouxcai Cangqdiq couh dangjciengz fad de, hawj de ngaiz gij non gwnz ndang bonjfaenh de haeb rai. 24 Couh yienghneix, ijsiengj haih vunz hih, dauqfanj ngaiz gag rai; siengj laengz mbouj hawj vunz cenz gij vah Cangqdiq, hoeng, gij vah Cangqdiq dauqfanj yied ngoenz yied cenz ndaej vaiq, yied cenz yied cenz ndaej gvangq. 25 Yiengq caiq gangj daengz Bahnazbah caeuq Saujloz, song boux de dawz doenghgij ij soengq hawj gyoengq lwgsae he soengq bae daengz Yehluqsajlaengj le, couh daiq boux heuh Yozhanq-Majgoj he dauq maj Anhdizah lo.
1 Youq Anhdizah gyauqveiq ndaw de miz geij boux boux cenz gij vah Cangqdiq caeuq lauxsae. Geij boux neix couh dwg Bahnazbah caeuq Sihmenq (Sihmenq caemh heuh Nizgyez) caeuq Luqgyiuz (Luqgyiuz dwg Gujliqnaiq Singz vunz) caeuq Majnenq (Majnenq boux neix dwg caeuq goengjvuengz Hihliz daj lij iq cix itheij maj hung he), vanzlij miz Saujloz. 2 Miz ngoenz he, gyoengqde baiq Cangqdiq caeuq lekdungx hih mwhde, Hoenzsaenz Cangqdiq doiq gyoengqde naeuz: “Faenhsou ij bang gou baij Bahnazbah caeuq Saujloz bae guh gij hong gou ij hawj gyoengqde guh he.” 3 Yiengq gyoengqde lekdungx caeuq haenh Cangqdiq gouz Cangqdiq sat le, couh oemj fawz hawj Bahnazbah caeuq Saujloz, hoh fuk hawj song boux de, baij song boux de bae lo. 4 Aenvih Bahnazbah caeuq Saujloz dwg Hoenzsaenz Cangqdiq baij bae he, sojhij song boux de couh bae sokhaij Sihliuzgih, daj sokhaij mwnq naengh ruz bae aen dauj Caiqbujluqswh. 5 Yiengq gyoengqde baex bae daengz aen dauj Caiqbujluqswh dih aen singz Sajlahmij he, couh youq doenghheij veiqdangz Youzdaiq vunz mwnq cenzgangj Cangqdiq dih ndei siuhsiz. Yozhanq-Majgoj caemh gaen song boux de bae, bang song boux de. 6 Gajlaeng gyoengqde caiq bae daengz baih dauj baih de, bae daengz Baqfuz Singz. Youq mwnq roeb daengz boux rox suenqmingh, doeng loengh sae loengh he, gij coh de heuh Bah-Yehsuh. (Bah-Yehsuh youq ndaw vah Hihlaz couh dwg heuh Hijlijmaj.) De dwg Youzdaiq vunz he, caemh dwg boux gyaj boux cenz gij vah Cangqdiq he. 7 De caeuq bonjdeih mwnq hih boux saengjcangj heuh Swqgyiuz-Baujloz he siengzseiz miz laizvangj. Boux saengjcangj mwnq dwg boux singqsag he dih vunz; de cingj Bahnazbah caeuq Saujloz bae gangj gvanhhih Cangqdiq dih ndei siuhsiz. 8 Hoeng Bahnazbah caeuq Saujloz engq ngaiz Hijlijmaj, caemh heuh Bah-Yehsuh, hih boux rox suenqmingh neix fanjdeiq. De siengj laengz saengjcangj, mbouj hawj de sinq Yehsuh. 9 Hoeng, Saujloz (Saujloz caemh heuh Baujloz) gwnz ndang de miz Hoenzsaenz Cangqdiq hwj rim bae; de couh daengxra yawj de, 10 doiq de naeuz: “Dihduz lwg fangz yak mwngz, doegdoeg siebsieb coemxcoemx cagcag swiqswiq saksak vunz, cenmonz caeuq gij ndei he doxngig, daengz seizneix vanzlij dawz gij vah Cangqdiq ma gaijgaij gakgak hawj de mbouj deng bae! 11 Yawj bax, Cangqdiq couh ij fad mwngz lo, hawj mwngz rafangz duenh he.” Baujloz yienghneix gangj le, cehra de couh doq laepcup yawj mij raen saek yiengh haem lo. Gajlaeng de couh lumhlumh laxlax aeu, siengj cimh vunz bang de daiq roen. 12 Saengjcangj yawjraen gij saeh neix le, couh sinq Yehsuh lo, aenvih de raen Cangqdiq dih ndei siuhsiz baenxlai geizmiuj, sawjhawj de mbouj ndaej mbouj sinq bae. 13 Gij saeh neix goq le, Baujloz caeuq gyoengq doih de daj Baqfuz naengh ruz bae daengz dieg Bangzfeihliqyaq dih Bezgyah Singz. Bae daengz mwnq le, Yozhanq-Majgoj couh caeuq gyoengqde doxbiek dauq maj Yehluqsajlaengj lo. 14 Hoeng Baujloz song boux de vanzlij dwg giqcuz ganjroen; gyoengqde daj Bezgyah bae daengz dieg Bijsihdij dih Anhdizah Singz. Youq ngoenzyietbaeg gyoengqde haeuj aen veiqdangz gij vunz Youzdaiq bae guh lijbaiq. 15 Yiengq boux guenj veiqdangz mwnq daengj vunz doeg Mohsih dih fazliz caeuq doeg bonj saw boux cenz gij vah Cangqdiq he sat le, couh baij vunz goq bae cam song boux de, naeuz: “Song boux beixnuengx hax, hauhnaeuz faenhsou miz maz vah ij doiq gyoengq vunzlai gangj hih, cingj faenhsou gangj bax.” 16 Baujloz dingq le, couh ndwn hwnjdaeuj, vadvad gij fawz de dongx gyoengq vunz, couh naeuz: “Gij vunz Hijswzlez caeuq sojmiz aiq Cangqdiq yawjnaek Cangqdiq dih vunz hax, cingj faenhsou dingq gou naeuz: 17 Hijswzlez dih Cangqdiq senj gij cojgoeng raeuz; mwh gyoengqde vanzlij doz youq Ngaihgiz hih mwhde, de yawjdij gyoengqde, hawj gyoengqde fatdad lailai, vanzlij yungh gij akak rengzrengz de daj Ngaihgiz daiq gyoengqde okma. 18 Youq rogndoi caemh vanzlij naiqsim hih goqhoh gyoengqde daihgaiq miz seiqcib bi yienghneix. 19 De vanzlij youq dieg Gyahnamz cawz baenx caet aen minzcuz, dawz doenghgij dieg de soengq hawj gyoengqde. 20 De guh doenghgij saeh neix daj daeuz daengz rieng miz baenx seiqbak haj bi yienghneix. “De vanzlij caiq senj vunz daeuj hawj gyoengqde dang daeuzdaeuz, itcig daengz mwh Sajmujwj boux cenz gij vah Cangqdiq neix. 21 Gajlaeng gyoengqde gouz de hawj de laeb goengjvuengz he hawj gyoengqde. Yiengq de couh daj ndaw cuz Benqyajminj ndaw de senj Saujloz, daeglwg Gihswq, hawj gyoengqde guh vuengz, hawj de dang baenx seiqcib bi. 22 Saujloz dang vuengz seiqcib bi le, Cangqdiq couh hawj de roengz daiz lo. Gajlaeng Cangqdiq caiq laeb Daqveiq hawj gyoengqde guh vuengz. Gangj daengz Daqveiq, Cangqdiq vanzlij naeuz: ‘Gou yawj ndaej ok daeglwg Yehsih, Daqveiq, de dwg hab'eiq habhoz gou dih vunz, dwg boux ciuq gij vah gou bae guh hih vunz hih.’ 23 “Gajlaeng Cangqdiq ciuq bonjfaenh de gaxgonq dapwngq goq hih ma daj ndaw doengh daih gajlaeng Daqveiq ndaw de senjdingh boux he—couh dwg Yehsuh—daeuj gouq gij vunz Hijswzlez. 24 Youq mwh Yehsuh mijyaengz ok daeuj guh gij hong Cangqdiq cihsenz, guh sijlij dih Yozhanq gaenq yiengq gij vunz Hijswzlez gangj naeuz hawj gyoengqde daj ndaw sim nginh loek gaijgoq, ij sijlij cij ndaej. 25 Yozhanq youq mwh de ijvanh guh sat gij hong bonjfaenh de hih mwh he, de naeuz: ‘Faenhsou naemqnaeuz gou dwg byawz hajx? Dwg Gihduz hajx? Mij dwg law! Gihduz couh ij daeuj lo; boux de daiqlienz gou bang de riuj haizcauj cungj mbouj lwnz daengz gou hwx.’” 26 Baujloz vanzlij caiq naeuz: “Gak boux beixnuengx, Yaqbwzlahhanj dih lwglan caeuq sojmiz aiq Cangqdiq yawjnaek Cangqdiq dih vunz hax, gij siuhsiz ndaej gouq vunz he dwg cenz hawj gyoengqraeuz dih. 27 Hoeng, youq Yehluqsajlaengj hih vunz caeuq doengh boux dang daeuzdaeuz gyoengqde hih cungj mbouj rox Gihduz, caemh mbouj rox moix it ngoenz ngoenzyietbaeg soj doeg hih gij saw boux cenz gij vah Cangqdiq dwg gijmaz, couh buenq hawj Yehsuh rai lo, yienghmwnq ngamqluj boux cenz gij vah Cangqdiq gangj goq hih vah. 28 Gannaeuz gyoengqde cimh mbouj raen de miz maz coih wnggai ngaiz rai hih lah, hoeng, gyoengqde ciuqyiengh gouz Bijlahdoh goeng saengjcangj neix buenq de rai. 29 Gyoengqde guh liux ndaw Singqgingh sij miz gvanhhih de sojmiz dih saeh le, couh daj gwnz gyaq cixcib dawz de roengz ma, coengq haeuj ndaw moh bae. 30 Hoeng Cangqdiq engq hawj de rai le ndaej dauqlix. 31 De vanzlij yienh hawj doengh boux daj Gyahliqliq cix gaen de bae Yehluqsajlaengj hih doengh boux mwnq, yienh hawj gyoengqde raen baenx haujlai ngoenz; gyoengq vunz mwnq gajlaeng youq ndaw gij vunz Hijswzlez ndaw de dwg cingqyinz. 32 “Seizneix gou caeuq Bahnazbah dawz gij ndei siuhsiz neix gangj naeuz faenhsou ni; gij ndei siuhsiz neix couh dwg gvanhhih Cangqdiq baujcingq hawj gij cojgoeng raeuz hih. 33 Gij baujcingq neix seizneix gaenq lingz okdaeuj hawj raeuz raen lo, couh dwg Cangqdiq hawj Yehsuh daj rai ndaej dauqlix gij neix. Gij neix ngamqluj ndaw Singqgingh Gij Go Haenh Cangqdiq dih daixngeih diuz ndaw de sij naeuz: Mwngz dwg daeglwg gou; gou ngoenz neix miz mwngz. 34 “Gvanhhih hawj de daj rai ndaej dauqlix, mbouj hawj de naeuh hih gij saeh neix, Cangqdiq yienghneix naeuz goq: Gou bietdingh ij dawz gou baujcingq goq hih nyok hawj Daqveiq hih cien nienz fanh daih mbouj bienq hih fuk nyok hawj faenhsou. 35 Caiq miz duenh he ndaw de sij naeuz: Mwngz gaengjdingq mbouj hawj boux gvi haeuj mwngz hih naeuh. 36 Doenghgij vah neix mbouj dwg doiq Daqveiq naeuz law, aenvih de guh sojmiz Cangqdiq hawj de guh hih liux le, de rai lo, caemh vanzlij dwg dawz de bae moek lo, gij seihaiz de vanzlij caemh dwg ngaiz naeuh lo. 37 Caenhgag Cangqdiq hawj daj rai ndaej dauqlix hih boux mwnq mbouj ngaiz naeuh lo.” 38 Baujloz vanzlij caiq naeuz: “Gak boux beixnuengx, gou naeuz faenhsou ni: dunghgoq Yehsuh cij ndaej mienx coih. 39 Faenhsou caemh ijaeu rox, Mohsih dih fazliz mbouj ndaej hawj faenhsou ndaej youq ndaw lwgra Cangqdiq suenq dwg boux mij'z coih hih nej. Hoeng, moix it boux sinq Yehsuh dih vunz cungj ndaej youq ndaw lwgra Cangqdiq suenq dwg boux mij'z coih hih vunz. 40-41 Sojhij faenhsou ij siujsim; boux cenz gij vah Cangqdiq naeuz goq, naeuz: Yawj Cangqdiq mbouj hwnj rwz hih vunz hax, yawj bax! Yaepm'x faenhsou couh ndeiyawj lo, couh ij ngaiz satsoq lo, aenvih gou youq aen nienzdaiq faenhsou soj guh hih saeh, gannaeuz miz vunz gangj naeuz faenhsou ni hoh lah, hoeng, faenhsou cungj mbouj sinq! Sojhij faenhsou ciengeiz mbouj ndaej hawj gij saeh neix fatseng youq gwnz ndang faenhsou.” 42 Baujloz youq veiqdangz gangj doenghgij vah neix sat le, couh ok veiqdangz ma lo. Song boux de ok ma hih mwhde, gyoengq vunzlai cingj song boux de, hawj song boux de daengz ngoenz ngoenzyietbaeg gajlaeng caiq daeuj lai gangj doenghgij saeh neix naeuz gyoengqde ni. 43 Mwh song boux de ok veiqdangz ma hih mwhde, miz haujlai Youzdaiq vunz caeuq haujlai linghvaih minzcuz aiq Cangqdiq yawjnaek Cangqdiq hih vunz cungj sinq Yehsuh, cungj daeuj gaen Baujloz caeuq Bahnazbah. Song boux de caemh gujliq gyoengqde, hawj gyoengqde gyenhciz sinq Cangqdiq mbouj bienq sim. 44 Couh yienghneix, daengz ngoenz ngoenzyietbaeg gajlaeng, youq mwnq ceng mbouj geijlai baenx cenz singz hih vunz cungj daeuj doxcomz, daeuj dingq Baujloz gangj gij vah Cangqdiq. 45 Yiengq doenghgij vunz Youzdaiq mbouj sinq Yehsuh hih yawjraen yienghneix le, cungj rahoengz hwj ij rai bae, couh byah gij vunzlai, siengj hawj gij vunzlai mbouj sinq gij vah Baujloz, vanzlij bangjlaih Baujloz. 46 Hoeng, Baujloz caeuq Bahnazbah cungj mbouj lau saek di. Song boux de naeuz: “Cangqdiq dih ndei siuhsiz baenjlaiz wnggai sien cenz naeuz gij vunz Youzdaiq raeuz ni hih, hoeng, faenhsou mbouj haenj dingq, mbouj ciep aeu, yiengq couh dwg naeuz faenhsou gag nginh bonjfaenh mbouj boiqndaej gij mingh seiqseiz lix neix. Sojhij raeuz couh ij bae lingh aen minzcuz bae cenzgangj Cangqdiq dih ndei siuhsiz naeuz gyoengqde ni, 47 aenvih Cangqdiq gaenq raengq raeuz goq naeuz: Gou gaenq laeb mwngz guh gij rongh ndaej ciuq linghvaih minzcuz he lo, hawj mwngz bae naeuz baenx cenz lajmbwn hih vunz ni baenzlaw ndaej gouq he lo.” 48 Gij vunz linghvaih minzcuz he dingq daengz gij vah neix le, cungj gig vuenheij hwj haenh Cangqdiq dih ndei siuhsiz. Gajlaeng doenghheij vunz Cangqdiq senjdingh hawj gyoengqde ndaej yungjyenj lix hih cungj sinq lo. 49 Couh yienghneix, Cangqdiq dih ndei siuhsiz youq dieg mwnq cungj cenz goqdoh liux lo. 50 Hoeng couh youq mwhneix, miz gij Youzdaiq vunz he yungx doenghheij vunzbaz fouqmiz he caemh yawjnaek Cangqdiq he caeuq gij vunz youq bonjdeih mwnq miz gienz he, yungx gyoengqde, hawj gyoengqde boenq Baujloz caeuq Bahnazbah ok mwnq dieg mwnq ma. 51 Yiengq song boux de couh youq dangqnaj gyoengq vunz saemqsaemq gij boenqcingh gwnz din loenq bae. Gajlaeng song boux de couh daj mwnq ok ma bae Hijgohnenq Singz lo. 52 Gannaeuz yienghneix lah, hoeng, sojmiz youq Anhdizah Singz sinq Yehsuh hih vunz cungj ciuqyiengh vuenheij, caemh miz Hoenzsaenz Cangqdiq youq gwnz ndang gyoengqde hwj rim bae.
1 Baujloz caeuq Bahnazbah bae daengz Hijgohnenq le, caemh luj bienqnaengz yienghmwnq bae aen veiqdangz gij vunz Youzdaiq cenzgangj Cangqdiq dih ndei siuhsiz. Song boux de gangj hwj hawj gij vunz dingq hwj rwz baet bae. Gajlaeng miz haujlai Youzdaiq vunz caeuq haujlai Hihlaz vunz cungj caemh sinq Yehsuh lo. 2 Hoeng miz haujlai Youzdaiq vunz nga'ngangq mbouj sinq he yungx gij vunz linghvaih minzcuz he, yungx hawj gyoengqde dwgcaengz gij vunz sinq Yehsuh he. 3 Yiengq mboujguenj baenzlaw, Baujloz caeuq Bahnazbah song boux de vanzlij youq mwnq youq haujlai caez, caemh baengh Yehsuh Bouxcawj guh mbei, mbeihung hwj cenzgangj Cangqdiq nyienh'eiq begbeg mienx gij coih vunz dih ndei siuhsiz. Yehsuh Bouxcawj caemh soengq gij bonjsaeh hawj gyoengqde ndaej guh gij geizmiuj hih saeh he hwj ndaej cingqmingz gyoengqde soj gangj hih cungj dwg saedsaeh he. 4 Couh vih yienghneix hwj ndaw singz mwnq hih vunz faen guh song buek hwj, buek he haeuj gij vunz Youzdaiq, buek he haeuj gyoengq dwzbaijyienz. 5 Yiengq gij vunz linghvaih minzcuz he caeuq gij vunz Youzdaiq caeuq doenghheij dang daeuzdaeuz he doxyuk hwj daeuj ij haih Baujloz caeuq Bahnazbah, siengj aeu rin ma dub rai song boux de. 6 Gajlaeng gyoengqde rox le, couh daj mwnq deuz bae daengz aen saengj Lijgauhniz dih Luqswhdwz caeuq Dwzbiq song aen singz neix caeuq seiqhenz dieg de. 7 Gyoengqde youq mwnq vanzlij dwg giqcuz cenzgangj Cangqdiq dih ndei siuhsiz. 8 Youq aen singz Luqswhdwz ndaw de miz boux vunz gyad daiqseng baenz he. 9 De naengh youq mwnq dingq Baujloz gangj vah. Baujloz raen le, couh cimyawj de nijnij, yawj ndaej ok de sinq Cangqdiq, sinq Cangqdiq ndaej yw de ndei, 10 couh sing sang hwnjdaeuj naeuz: “Mwngz ndwn hwnjdaeuj! Song ha ndwn soh hwj!” Baujloz yienghneix naeuz le, boux de couh doq caemxcangh ndwn hwnjdaeuj, couh doq gaihcij ndaej byaij roen lo. 11 Yiengq gyoengq vunz mwnq raen Baujloz soj guh hih saeh le, couh caezgya aeu vah Lijgauhniz ma hemq hwnjdaeuj naeuz: “Miz sien roengz daeuj lux! Miz sien roengz daeuj lux!” 12 Gyoengqde yienghneix hemq, dwg aenvih gyoengqde naemqnaeuz Bahnazbah dwg bouxsien Caeuqswh neix lah, sojhij couh cwng de heuh Caeuqswh. Caiq aenvih Baujloz daiq daeuz gangj vah, couh naemqnaeuz de dwg bouxsien Hih'wjmij bouxsien neix, yiengq couh cwng de heuh Hih'wjmij. 13 Yiengq youq rog singz hih aen miuh baiq Caeuqswh mwnq miz boux guh dajbwiz he; de ying cwz daiq vahgyenh hwj daeuj daengz baksingz ijsiengj caeuq gyoengq vunzlai bwiz song boux de. 14 Gajlaeng Bahnazbah caeuq Baujloz rox le, cungj mbouj rox hih ij baenzlaw guh, couh simnyap hwj gag mbek diuz buh baixrog bonjfaenh hwj cung haeuj gyoengq vunzlai bae hemq naeuz: 15 “Faenhsou vihmaz ij guh cungj saeh neix nej? Raeuz caemh dwg vunz, caeuq faenhsou doxdoengz dwg vunz. Raeuz daeuj dineix dwg ij cenz gij ndei siuhsiz Cangqdiq hawj faenhsou rox lah, dwg ij hawj faenhsou daj ndaw sim nginh loek gaijgoq, mbouj caiq mizsinq, hawj faenhsou sinq boux cauh mbwn cauh deih cauh haij caeuq cauh sojmiz hih seiqseiz lix dih Cangqdiq lah. 16 Boux Cangqdiq neix youq dangq doenghbaez, de cungj caih aen minzcuzlawz guh gijmaz cungj ndaej. 17 Hoeng de caemh ij guh ndeisaeh ma cingqmingz bonjfaenh de, luj hawj fwn doek hah, hawj faenhsou binaengz fungcuk hah, hawj faenhsou gwgw daenjdaenj hah, doenghgij neix, caeuq hawj faenhsou ndaej sim'angq simriu hah.” 18 Baujloz caeuq Bahnazbah youq mwnq doiq gyoengq vunzlai gangj doenghgij vah neix, gangj hwj bak ok fwdfauz bae cij ndaej lanz hwj mbouj hawj gyoengq vunz baij doxgaiq bwiz song boux de. 19 Hoeng miz gij Youzdaiq vunz dajlwh Anhdizah caeuq Hijgohnenq daeuj he. Gyoengqde yungx gyoengq vunzlai, aux gyoengqde aeu rin ma ndek ma boemz Baujloz, boemz hwj Baujloz mij doengh mij danh bae. Gajlaeng gyoengqde cungj naemqnaeuz de rai hoh lah, couh rag dawz de gveng ok rog singz bae. 20 Laixlawz, couh youq mwh gyoengq lwgsae bae gvaengz yawj de hih mwhde, de engq ndaej ndwn hwnjdaeuj. Gajlaeng gyoengqde couh dauq haeuj singz bae. Dauq maj daengz Luqswhdwz hih ngoenz daixngeih, de caeuq Bahnazbah couh daj aen singz neix ok ma, bae aen singz Dwzbiq, 21 bae mwnq cenzgangj gvanhhih Cangqdiq dih ndei siuhsiz. Cenz le, caemh miz haujlai vunz sinq Yehsuh lo. Gajlaeng, song boux de caiq dauq ma daengz Luqswhdwz, Hijgohnenq caeuq Anhdizah, 22 ma geij mwnq neix gujliq gyoengq lwgsae hawj gyoengqde ij gyenhciz sinq Yehsuh, yungjyenj mbouj bienq sim, caiq naeuz gyoengqde ni naeuz: “Gyoengqraeuz ijsiengj haeuj aen guek Cangqdiq, couh bietdingh ij ngaiz souh daengz gak cungj nanh.” 23 Song boux de vanzlij bang gak aen gyauqveiq senjlaeb gyauqveiq lingjdauj, caiq lekdungx hwj gouz Yehsuh Bouxcawj goqhoh gyoengqde. 24 Gajlaeng, song boux de goq dieg Bijsihdij bae daengz dieg Bangzfeihliqyaq, 25 youq mwnq heuh Bezgyah Singz he cenzgangj Cangqdiq dih ndei siuhsiz. Gajlaeng gyoengqde caiq bae Yaqdaqliq Singz, 26 daj mwnq naengh ruz dauq ma daengz dieg Siqliqyaq dih Anhdizah Singz, couh dwg dauq ma daengz mwnq gaxgonq gyoengqde youq hih Cangqdiq baij gyoengqde bae guh gij hong seizneix guh sat hih mwnq. 27 Gyoengqde ma daengz Anhdizah le, couh heuh gyauqveiq sojmiz hih vunz daeuj doxcomz, daeuj gangj naeuz gyoengq vunz ni Cangqdiq baenzlaw dunghgoq gyoengqde soj guh hih saeh, caeuq Cangqdiq baenzlaw hawj gij vunz linghvaih minzcuz he ndaej sinq Yehsuh dih gihveiq. 28 Couh yienghneix, gajlaeng song boux de vanzlij caeuq gyoengq lwgsae youq mwnq baenx haujlai caez.
1 Baujloz caeuq Bahnazbah vanzlij youq Anhdizah hih mwhde, miz geij boux vunz daj Youzdaiq Saengj goq daeuj. Geij boux mwnq doiq gyoengq lwgsae naeuz: “Hauhnaeuz faenhsou mbouj ciuq gij laehbeih cojgoeng raeuz Mohsih cenz roengzma hih guh gozlij nex, faenhsou couh mbouj ndaej gouq lo.” 2 Yiengq Baujloz caeuq Bahnazbah song boux de cungj vih yienghneix hwj caeuq gyoengqde doxcwngq haujlai. Sojhij gyoengq lwgsae couh gyezdingq ij baij Baujloz caeuq Bahnazbah caeuq ndaw gyauqveiq gyoengqde hih geij boux bae Yehluqsajlaengj, bae mwnq yiengq gyoengq dwzbaijyienz mwnq caeuq gyauqveiq mwnq hih lingjdauj fanjingj gij saeh neix. 3 Gyoengqde gyezdingq ndei le, couh hawj gyoengqde bae lo. Gyoengqde byaij goq Feihnizgih caeuq Sajmajliqyaq; mboujguenj gyoengqde bae daengz mwnqlaw, cungj naeuz gij vunz ni doenghheij linghvaih minzcuz he sinq Yehsuh dih gij siuhsiz neix. Yiengq doenghheij lwgsae dingq daengz gij siuhsiz neix le, cungj angq raixcaix. Couh yienghneix, gyoengqde itloh bae itloh gangj gij siuhsiz neix, itcig bae daengz Yehluqsajlaengj. 4 Daengz Yehluqsajlaengj le, mwnqde dih gyauqveiq caeuq dwzbaijyienz caeuq gyauqveiq dih lingjdauj cungj gig angq hwj daih gyoengqde. Gajlaeng gyoengqde couh gangj naeuz gyoengq vunz ni Cangqdiq baenzlawz baenzlawz hawj gyoengqde guh saeh. 5 Hoeng, miz geij boux gaep haeuj Fazliqcaiq baij sinq Yehsuh dih vunz dauq ndwn hwnjdaeuj daez iqgyenq naeuz: “Linghvaih minzcuz sinq Yehsuh hih vunz bietdingh ij gozlij cij ndaej; mbouj danhcij naeuz yienghneix, vanzlij caemh ij soenhsouj Mohsih dih fazliz haem.” 6 Yiengq gyoengq dwzbaijyienz caeuq gyauqveiq dih lingjdauj couh itheij daujlwnq gij saeh neix. 7 Gyoengqde cungj daujlwnq baenx haujlai caez; gajlaeng Bijdwz ndwn hwnjdaeuj doiq gyoengq vunz naeuz: “Gak boux beixnuengx hax, faenhsou caemh rox, youq senqsi gaxgonq Cangqdiq gaenq daj ndaw faenhsou senj gou okdaeuj, hawj gou bae cenzgangj gij ndei siuhsiz Cangqdiq naeuz gij vunz linghvaih minzcuz he ni lo, hawj gyoengqde miz gihveiq sinq Yehsuh. 8 Yawj sim vunz cingx goq gingq bohliz bae dih Cangqdiq caemh soengq Hoenzsaenz bonjfaenh de hawj linghvaih minzcuz hih vunz, caemh luj de soengq hawj gyoengqraeuz yienghmwnq. Yienghmwnq cingqmingz de hawj linghvaih minzcuz gaep haeuj de. 9 Cijaeu gyoengqde sinq, Cangqdiq couh swiq cengh aen sim gyoengqde. Cangqdiq caemh mbouj faen mwngzmwngz gougou; cungj dwg yawj doxdoengz. 10 Yiengq, giqyienz yienghneix vwz, faenhsou seizneix vihmaz ij yex Cangqdiq, ij dawz gij cojgoeng raeuz caeuq gyoengqraeuz bonjfaenh rap mbouj ndaej hwnj dih diuz rap neix hawj gij vunz linghvaih minzcuz sinq Yehsuh he rap nej? Couh dwg naeuz, gyoengqraeuz bonjfaenh caemh mij ndaej guh daengz ciuq Mohsih dih fazliz liux hah, yiengq seizneix gyoengqraeuz vihmaz ij ep gyoengqde rap nej? 11 Gij neix dwg mbouj deng hih! Gyoengqraeuz ndaej gouq dwg baengh bouxcawj raeuz Yehsuh dih aiq cij ndaej gouq hih; linghvaih minzcuz caemh caeuq gyoengqraeuz ityiengh. Gij neix mbouj ndaej mbouj sinq hih nej.” 12 Bijdwz gangj daengz dineix sat le, Bahnazbah caeuq Baujloz caemh doiq gyoengq vunzlai gangj naeuz Cangqdiq hawj song boux de youq linghvaih minzcuz soj guh hih geizmiuj hih saeh hwj ndaej cingqmingz Cangqdiq dih gienzveih gaenq youq gyoengqde mwnq fazveih he. Gyoengq vunzlai dinghdingh dingq song boux de gangj, dingq hwj diemzmih bae. 13 Daengj song boux de gangj sat le, Yajgoz caemh naeuz: “Gak boux beixnuengx hax, cingj faenhsou caemh dingq gou gangj. 14 Daxbaenh Sihmaenz gangj naeuz faenhsou ni cingsuj gaxgonq Cangqdiq baenzlawz gvansim linghvaih minzcuz, baenzlawz daj ndaw gyoengqde senj vunz okdaeuj gvi hawj bonjfaenh de. 15 Gij neix caemh ngamqluj caeuq gyoengq boux cenz gij vah Cangqdiq senqsi cix gangj goq hih vah, sij youq ndaw Singqgingh ndaw de naeuz: 16 Baezneix gou ij ma, dauqyungz hwnq aen ranz Daqveiq goengjvuengz neix ngaiz doemq mwnq. Gou ij youq mwnq dieg ranz doemq mwnq doiqyungz hwnq hwnjdaeuj, 17 hawj lij lw hih vunz caeuq gvi haeuj gou hih linghvaih minzcuz hih vunz he cungj daeuj cimh gouz Cangqdiq. 18 Gij neix dwg Cangqdiq daj gaihcij cix gangj hih lo.” 19 Yajgoz vanzlij caiq naeuz: “Sojhij ciuq gou dih yawjfap, raeuz mbouj wnggai diuqnanz doenghheij linghvaih minzcuz sinq Cangqdiq he, 20 caenhgag sij saenq raengq gyoengqde soenhsouj geij diuz Mohsih dih fazliz, couh dwg naeuz: mbouj ndaej gw gij doxgaiq bwiz goq duz you he, mbouj ndaej guhyoux, mbouj ndaej gw doengh duz nap hoz rai he, caeuq mbouj ndaej gw lwed couh ndaej lo, 21 vih mbouj siengj daekcoih gij vunz Youzdaiq, aenvih gij vunz Youzdaiq cienfanh yawjnaek geij diuz fazliz neix; gyoengqde liglaiz moix it mbat daengz ngoenz ngoenzyietbaeg, cungj youq gak aen singz dih gak aen veiqdangz dingq vunz doeg Mohsih dih fazliz.” 22 Gajlaeng gyoengq dwzbaijyienz caeuq gyauqveiq dih lingjdauj caeuq gyauqveiq sojmiz hih vunz couh gyezdingq senj vunz, baij vunz gaen Baujloz caeuq Bahnazbah bae dieg Siqliqyaq dih Anhdizah Singz. Gyoengqde yienghneix gyezdingq le, couh senj boux vunz heuh Youzdaq (caemh heuh Bahsajbah) caeuq senj Sihlah. Song boux neix youq ndaw gyoengq vunz sinq Yehsuh he dwg guh lingjdauj he. 23 Couh yienghneix, gyoengqde couh sij saenq hawj gyoengqde dawz bae. Fung saenq ndaw de dwg yienghneix sij naeuz: Youq Anhdizah, Siqliqyaq caeuq Gihliqgyah linghvaih minzcuz dih gak boux beixnuengx hax: gyoengqraeuz Yehluqsajlaengj dih dwzbaijyienz, gyauqveiq dih lingjdauj caeuq gak boux beixnuengx dongx faenhsou ndei! 24 Dingq naeuz gyoengqraeuz miz geij boux vunz bae faenhsou mwnq, gangj gij vah hawj faenhsou yousim he. Gizsaed gyoengqraeuz gaenhbaenj mbouj hawj gyoengqde bae gangj. 25 Sojhij gyoengqraeuz daixgya gyezdingq baij vunz gaen Bahnazbah caeuq Baujloz song boux neix daengz faenhsou mwnqneix. 26 Bahnazbah caeuq Baujloz song boux neix cungj dwg vih bouxcawj raeuz Yehsuh Gihduz dih mingzhiq hwj daiqlienz mingh cungj sijndaej vwt he dih vunz. 27 Gyoengqraeuz baij hih vunz couh dwg Youzdaq caeuq Sihlah; song boux de caemh ij gangj naeuz faenhsou ni gyoengqraeuz baenzlaw gyezdingq dih saeh hih, 28 aenvih Hoenzsaenz Cangqdiq caeuq gyoengqraeuz gyezdingq mbouj hawj faenhsou rap diuz rap naek he. Hoeng miz geij gienh faenhsou ijaeu guh daengz he, 29 couh dwg: Mbouj ndaej gw gij bwiz goq duz you hih doxgaiq; mbouj ndaej gw lwed caeuq mbouj ndaej gw doengh duz nap hoz rai he, caemh mbouj ndaej guhyoux. Faenhsou guh ndaej daengz geij gienh neix couh ndaej lo. Muengh faenhsou bingzan! 30 Gyoengqde sij ndei le, Bahnazbah, Baujloz, Youzdaq caeuq Sihlah couh dawz saenq bae Anhdizah lo. Gyoengqde daengz Anhdizah le, couh heuh gyauqveiq sojmiz hih vunz daeuj doxcomz, couh gyau fung saenq hawj gyoengqde. 31 Gyoengqde couh doeg fung saenq de. Aenvih ndaw saenq ndaw de sij hih cungj dwg nai gyoengqde dih vah, yiengq baenx cenz gyauqveiq hih vunz cungj angq raixcaix. 32 Youzdaq caeuq Sihlah mbouj danhcij dwg gyauqveiq dih lingjdauj, vanzlij caemh dwg boux cenz gij vah Cangqdiq he. Gajlaeng song boux de caiq gangj baenx haujlai vah, gujliq gyoengq lwgsae, hawj gyoengqde gyenhciz sinq Cangqdiq, yungjyenj mbouj bienq sim. 33 Couh yienghneix, seiq boux de youq mwnq youq duenh he le, Youzdaq caeuq Sihlah couh dauq maj Yehluqsajlaengj, mwnq gaxgonq gyoengqde daj mwnq baij daeuj he lo. Mwh gyoengqde ij okdin maj hih mwhde, gyoengq lwgsae caemh soengq gyoengqde ok ma caemh doiq gyoengqde naeuz ndei byaij. 35 Baujloz caeuq Bahnazbah vanzlij youq Anhdizah; song boux de caemh caeuq gij vunz mwnq itheij cenzgangj Cangqdiq dih ndei siuhsiz. 36 Goq duenh he le, Baujloz doiq Bahnazbah naeuz: “Daengj raeuz dauqyungz bae doenghheij singz gaxgonq gyoengqraeuz cenzgangj Cangqdiq dih ndei siuhsiz goq hih doenghheij mwnq bae bax, bae yawjyawj gyoengq lwgsae baenzlawz yiengh lah.” 37 Yiengq Bahnazbah caemh dungziq hwj, hoeng de ijsiengj daiq Yozhanq-Majgoj boux neix bae haem. 38 Hoeng Baujloz mbouj dungziq. De raen ceiq ndei mbouj daiq de bae, aenvih gaxgonq gyoengqde youq Bangzfeihliqyaq mwhde de mbouj caeuq gyoengqde guh hong, gag deuz bae lo. 39 Vih yienghneix hwj song boux de doxcwngq doxceng. Gajlaeng song boux de couh doxfaen gag vunz gag. Bahnazbah gag daiq Majgoj, daj mwnq naengh ruz bae Caiqbujluqswh. 40 Baujloz nej, Baujloz dauq senj Sihlah caeuq de itheij bae. Gyauqveiq caemh vih de hwj gouz Cangqdiq baujyouh song boux de itloh bingzan. 41 Couh yienghneix, Baujloz bae Siqliqyaq caeuq Gihliqgyah, byaij song mwnq goqdoh, gyahgyangz gyauqveiq.
1 Yiengq Baujloz bae daengz Dwzbiq Singz le, caiq daj mwnq bae Luqswhdwz Singz. Youq mwnq miz boux lwgsae he, gij coh de heuh Dizmohdaiq, daxmeh de dwg sinq Yehsuh dih Youzdaiq vunz he, daxboh de dwg Hihlaz vunz he. 2 Youq Luqswhdwz caeuq Hijgohnenq song aen singz neix dih lwgsae cungj haenh Dizmohdaiq. 3 Baujloz siengj daiq de itheij bae, hoeng vih mwnq dieg mwnq hih Youzdaiq vunz cungj rox daxboh de dwg Hihlaz vunz, sojhij Baujloz couh hawj de gozlij, gozlij le cij daiq de bae. 4 Gyoengqde cungj byaij goq gak mbanj gak singz bae cenz naeuz gij vunz ni youq Yehluqsajlaengj dih dwzbaijyienz caeuq gyauqveiq dih lingjdauj youq ndaw saenq soj sij goq dih doenghgij gveihdingq mwnq, cenz naeuz gyoengqde ni, hawj gyoengqde soenhsouj. 5 Gyoengqde yienghneix guh le, sawjhawj gak gyauqveiq dih vunz sinq Gihduz caemh gyenhdingq, vunz caemh yied ngoenz yied lai. 6 Hoeng, miz mbat he, Hoenzsaenz Cangqdiq engqgya lanz Baujloz gyoengqde, mbouj hawj gyoengqde youq Yaqsiqyaq Saengj cenzgangj Cangqdiq dih ndei siuhsiz. Sojhij gyoengqde couh gvax goq Fozlijgyah caeuq Gyahlahdaiq song mwnq dieg neix bae, 7 bae daengz dieg Meijsihyaq dih giemgyaiq, couh ijsiengj byaij haeuj Biqdeihniz Saengj bae lo. Hoeng Hoenzsaenz Yehsuh couh lanz gyoengqde, mbouj hawj gyoengqde haeuj bae. 8 Yiengq gyoengqde couh caiq byaij goq Meijsihyaq bae, bae daengz Dwzlozyaq Singz. 9 Couh youq ngwnz mwnq, Cangqdiq hawj Baujloz luj fangxngwnzloq yienghmwnq raen miz boux Majgizdoenq vunz he ndwn youq mwnq gouz de naeuz: “Gouz mwngz daeuj Majgizdoenq bang gyoengqraeuz bax!” 10 Yiengq Baujloz rox naeuz gij neix dwg Cangqdiq daezsingj de, hawj de bae Majgizdoenq cenzgangj Cangqdiq dih ndei siuhsiz he, sojhij gyoengqraeuz couh cwnjbiq bae Majgizdoenq lo. 11 Couh yienghneix, gyoengqraeuz couh daj Dwzlozyaq naengh ruz cizsez bae daengz aen dauj Sajmohdwzlah, daengz daixngeih ngoenz caiq bae daengz Nizyaqbohlij Singz. 12 Daj mwnq hwnj hamq le, couh bae Feihlizbij Singz. (Feihlizbij Singz couh dwg Majgizdoenq Saengj dih Daixit Diqgih dih aen singz he, caemh dwg aen guek Lozmaj guenj he.) Gyoengqraeuz bae daengz mwnq le, youq mwnq youq geij ngoenz. 13 Yiengq daengz ngoenz ngoenzyietbaeg, gyoengqraeuz couh ok singz bae daengz henz dah he, aenvih gyoengqraeuz naemq mwnq aiq miz gij vunz Youzdaiq youq mwnq doxcomz haenh Cangqdiq gouz Cangqdiq. Gyoengqraeuz bae daengz le, couh raen miz gij vunzbaz he youq mwnq doxcomz; gajlaeng gyoengqraeuz couh naengh roengzma gaihcij doiq gyoengqde gangj gvanhhih Cangqdiq dih ndei siuhsiz. 14 Yiengq, mwnq miz boux vunzbaz he, gij coh de heuh Lijdijyaq, dwg Deihyajdeihlah Singz vunz he, dwg guh dajhai boiq aeuj gw he. De soqlaiz cungj dwg baiq Cangqdiq. Cangqdiq hawj de cuqhiq dingq Baujloz gangj vah, caemh hawj de sinq de gangj hih vah. 15 Gajlaeng de caeuq ndaw ranz de cungj sijlij. Sijlij le, de couh doiq gyoengqraeuz naeuz: “Hauhnaeuz faenhsou yawjhwnj gou nex, couh cingj faenhsou bae laeng gou youq bax!” De caenhrox yienghneix hah, caenhrox hah hawj gyoengqraeuz bae laeng de youq. 16 Yiengq miz baez he, gyoengqraeuz ij bae henz dah, mwnq haenh Cangqdiq gouz Cangqdiq mwnq, bae daengz dangjroen roeb dahhoiq ngaiz fangz doz he. De cenznaengz gauq fangz hawj de ndaej rox doeng suenq sae suenqmingh hwj ndaej baenx haujlai ngaenz ma hawj bouxcawj de. 17 De itmienh gaen gyoengqraeuz, itmienh hemq vauxvaux naeuz: “Gyoengq vunz neix dwg gyoengq hoiq gienz akak rengzrengz dih Cangqdiq he, dwg daeuj cenz gij ndaej gouq dih siuhsiz he!” 18 De bijlienz geij ngoenz cungj yienghneix hemq, hemq hwj Baujloz cungj roxnginh simnyap ij rai bae. Gajlaeng Baujloz couh veq dauqlaeng ma yug duz fangz mwnq naeuz: “Gou hij Yehsuh Gihduz dih mingzhiq ma mingqlingq mwngz daj gwnz ndang de ok ma!” Baujloz yienghneix naeuz le, duz fangz mwnq couh doq daj gwnz ndang de ok ma lo. 19 Yiengq bouxcawj dahhoiq mwnq rox naeuz baezneix mbouj caiq ndaej doenghgij cienz neix haem lo le, couh hujheiq dengxdengx hwj rag dawz Baujloz caeuq Sihlah, rag song boux de bae daengz gvangjcangz cimh goeng'ak. 20 Rag song boux de bae daengz Lozmaj fazguenh mwnq le, gauq naeuz: “Gyoengq vunz neix dwg Youzdaiq vunz he; gyoengqde daeuj dineix daujluenq ciqnganh, 21 senhcenz gij laehbeih Lozmaj raeuz gimqcij he, gyoengqraeuz caemh mbouj hengz hih laehbeih he!” 22 Yiengq gij vunzlai henz de dingqri de yienghneix gangj le, couh humx hwnjdaeuj cieng song boux de. Yiengq fazguenh couh majcangq mingqlingq hawj vunz bok gij buh song boux de, hawj vunz aeu faexbien ma fad song boux de. 23 Fad song boux de donq he le, caiq dawz song boux de gyaeng haeuj ndaw lauz bae, caiq hawj boux guenj gyenhyuz he guenj song boux de rem hwj. 24 Boux guenj gyenhyuz mwnq caemh dingq fazguenh raengq, couh dawz song boux de gyaeng haeuj ndaw lauz caengz ceiq baixndaw he bae, vanzlij caiq aeu benj ma ding gyaq gab ha hwj, hen hwj cienfanh rem he. 25 Yiengq daihgaiq daengz gyangjngwnz, Baujloz caeuq Sihlah song boux de gouz Cangqdiq, ciengq go haenh Cangqdiq. Gij vunzfamh ndaw de caemh yaek rwz hwj dingq song boux de gangj, dingq song boux de ciengq. 26 Sawqmwh miz deihdoengh, lienz mwnq deihgei gyenhyuz cungj doengh fwenxfwenx bae. Yaepyet he heij dou gyenhyuz cungj hoi liux, doenghheij lienh lienh gyoengq vunzfamh he cungj caemh gag luet liux. 27 Gajlaeng boux guenj gyenhyuz mwnq singj le, raen heij dou cungj hoi liux lo; yiengq de naemqnaeuz gyoengq vunzfamh cungj deuz liux hoh lah. De couh yot cax okdaeuj siengj gag ndaemq bonjfaenh rai. 28 Ngamqluj mwhneix Baujloz raen; de couh doq hemq naeuz: “Mbouj ndaej sienghaih bonjfaenh! Gyoengqraeuz cungj lij youq dineix.” 29 Boux guenj gyenhyuz mwnq dingq le, couh heuh vunz dawz daeng goq daeuj, couh haeuj ndaw gyaeng vunzfamh mwnq bae, ndang saenz dedded hwj bomz youq dangqnaj Baujloz caeuq Sihlah. 30 Gajlaeng de couh daiq song boux de okma, youhcaiq cam naeuz: “Goengjau hax, gou ij baenzlawz guh cij ndaej gouq hax?” 31 Yiengq song boux de han naeuz: “Sinq Yehsuh Bouxcawj neix; mwngz caeuq ndaw ranz mwngz couh ndaej gouq lo.” 32 Gajlaeng song boux de vanzlij gangj gij ndei siuhsiz Cangqdiq naeuz de caeuq ndaw ranz de ni. 33 Haemh mwnq boux guenj gyenhyuz mwnq caemh bang song boux de swiq gij baksieng gwnz ndang gyoengqde. Gajlaeng boux de caeuq ndaw ranz de couh majcangq sijlij lo. 34 De youhcaiq cingj song boux de bae ndaw ranz de, hawj song boux de gw haeux. De caeuq ndaw ranz de hih vunz cungj angq raixcaix, aenvih gyoengqde cenz ranz cungj sinq Cangqdiq lo. 35 Daengz haet daixngeih daihcaeux, Lozmaj fazguenh baij gingjcaz bae naeuz: “Dawz song boux vunz mwnq coengq lo bax!” 36 Gajlaeng, boux guenj gyenhyuz mwnq couh naeuz Baujloz ni naeuz: “Fazguenh baij gingjcaz daeuj naeuz hawj coengq faenhsou lo. Mbat neix faenhsou ndaej ok gyenhyuz lo, ndaej seizbienh bae lo.” 37 Hoeng, Baujloz dauq doiq boux de naeuz: “Nwjhwh ndaej baenxlai bienxngeiz hwj! Gyoengqraeuz dwg Lozmaj vunz; gyoengqde cungj mbouj cimhraen raeuz miz maz coih haem, couh youq dangqnaj vunzlai doh gyoengqraeuz lo, caiq dawz raeuz gyaeng haeuj ndaw lauz daeuj. Seizneix siengj caegcaeg coengq gyoengqraeuz—nwjhwh miz yiengh saeh neix hwj! Raeuz mbouj ok maj hah, cizfeih gyoengqde cinhswq daeuj coengq gyoengqraeuz vwi!” 38 Doengh boux gingjcaz mwnq dingq le, couh bae naeuz fazguenh ni. Fazguenh dingq naeuz Baujloz caeuq Sihlah dwg Lozmaj vunz le, cungj lau hwj ij rai, 39 couh vaiqdi bae ndaw lauz, swnh semxsemh hwj gouz song boux de, daiq song boux de okma, caemhcaiq gouz song boux de, gouz gyoengqde mbouj caiq youq aen singz mwnq youq haem lo. 40 Yiengq song boux de ok ma le, couh maj daengz ndaw ranz Lijdijyaq, gujliq gyoengq vunz sinq Yehsuh mwnq, gajlaeng couh bae daixlingh aen singz lo.
1 Baujloz caeuq Sihlah vanzlij dwg giqcuz bae guh gij hong gyoengqde. Song boux de byaij goq Amqfeihbohlij Singz caeuq Yaqbohloznizyaq Singz bae, bae daengz Dezsajloznizgyah Singz. Youq mwnq miz Youzdaiq veiqdangz. 2 Yiengq Baujloz caemh luj bienqnaengz yienghmwnq haenj bae veiqdangz, bijlienz sam ngoenz ngoenzyietbaeg cungj dwg bae caeuq vunz daujlwnq, gaijyiz Singqgingh, 3 gaijyiz naeuz Gihduz gaengjdingq ij ngaiz vunz haihrai, caemh gaengjdingq ndaej dauqlix. De vanzlij caiq doiq gyoengqde naeuz: “Gou gangj naeuz sou ni hih boux Yehsuh neix couh dwg Gihduz.” 4 Yiengq gij vunz dingq de gangj le, couh miz mbangj hih vunz sinq lo, caemh haeuj song boux de. Gyoengq vunz neix ndaw de caemh miz haujlai yawjnaek Cangqdiq dih Hihlaz vunz, caemh miz gij vunzbaz ndaw ranz de miz mingz he. 5 Hoeng, doenghgij vunz Youzdaiq mbouj sinq he cungj rahoengz hwj ij rai bae, couh yuk doenghheij lanqsaij he daeuj, yuk hawj gyoengqde yungx aen singz mwnq sojmiz hih vunz nauh hwnjdaeuj, siengj cung haeuj ndaw ranz Yehsoenh bae, ij gaemh dawz Baujloz caeuq Sihlah bae mwnq bienqnaengz miz vunzlai doxcomz he bae. 6 Hoeng gyoengqde haeuj bae cimh mij raen song boux de. Yiengq gyoengqde couh dawz Yehsoenh caeuq geij boux lwgsae ma fadmat, dawz gyoengqde bae daengz cingqfuj bae, hemq naeuz: “Buek vunz luenh nauh mwnq seizneix daeuj daengz dineix lo; 7 Yehsoenh boux vunz neix engqgya hawj gyoengqde youq ndaw ranz de hwj! Gyoengqde cungj dwg veizfanj gij fazliz goengjvuengz Lozmaj he, naeuz miz daixlingh goengjvuengz, gij coh de heuh Yehsuh.” 8 Gyoengq vunzlai caeuq gij lingjdauj mwnq dingq gyoengqde yienghneix hemq le, cungj luenh yobyob liux. 9 Gajlaeng gij lingjdauj mwnq hawj Yehsoenh caeuq doengh boux lwgsae mwnq gyau yazgimh le, cij ndaej coengq gyoengqde. 10 Gyoengqde ndaej coengq ma le, couh majcangq lienzyeh soengq Baujloz caeuq Sihlah bae Biqlijyaq Singz. Song boux de bae daengz le, couh haeuj aen veiqdangz gij vunz Youzdaiq bae lo. 11 Mwnq hih vunz beij youq Dezsajloznizgyah hih vunz ndeigangj; gyoengqde cungj nyienh'eiq yaek rwz hwj dingq song boux de gangj, caemh vanzlij ngoenzngoenz caz Singqgingh, caz yawj Baujloz song boux de gangj hih dwg mbouj dwg caen. 12 Gajlaeng, miz haujlai vunz cungj sinq, daiqlienz doenghheij Hihlaz vunzbaz ndaw ranz de miz mingz he caeuq haujlai vunzsai cungj sinq. 13 Hoeng, Dezsajloznizgyah dih Youzdaiq vunz rox naeuz Baujloz caiq youq Biqlijyaq cenzgangj Cangqdiq dih ndei siuhsiz le, couh bae mwnq yungx gyoengq vunz luenh nauh. 14 Gyoengq lwgsae raen yienghneix le, couh soengq Baujloz bae henz haij; Sihlah caeuq Dizmohdaiq vanzlij dwg youq Biqlijyaq. 15 Doengh boux soengq Baujloz bae he itcig soengq de bae daengz Yajdenj Singz, gajlaeng couh dauq ma daengz Biqlijyaq, naeuz Sihlah caeuq Dizmohdaiq ni Baujloz raengq hawj song boux de vaiqdi bae mwnq caeuq de doxcomz. 16 Baujloz daengz Yajdenj le, youq mwnq daengj Sihlah caeuq Dizmohdaiq hih mwhde, de yawjraen aen singz mwnq baenx cenz singz dauqcawq cungj dwg miz you. De raen yienghneix le, cungj yawj mbouj goq ra saek di. 17 De couh vih yienghneix hwj siengzseiz youq veiqdangz caeuq gij vunz Youzdaiq caeuq doenghheij lingh minzcuz yawjnaek Cangqdiq he doxeuq, caemh ngoenzngoenz bae gvangjcangz caeuq vunz doxeuq. 18 Yiengq caemh miz Hijbijgujloz caeuq Swhdohyaq song aen baij neix hih lauxsae caeuq de doxeuq. Miz mbangj hih vunz naeuz: “Ndaek vunz ndaekn'x luenhbangh gangj samjciengz! Gangj gijmaz nex?” Miz mbangj hih vunz naeuz: “De cenz gij fangzfangz gveijgveij vaihguek he.” Gyoengqde yienghneix naeuz dwg aenvih Baujloz youq mwnq cenzgangj Yehsuh caeuq ndaej dauqlix dih gij siuhsiz neix. 19 Gajlaeng gyoengqde couh daiq de bae daengz Yaqlozbahguj, bae mwnq bienqnaengz vunz doxcomz gaihveiq he, bae mwnq youq dangqnaj vunzlai naeuz de, naeuz: “Gyoengqraeuz siengj rox mwngz soj cenzgangj hih dwg gijmaz siuhsiz moq. 20 Aenvih mwngz gangj hih, gyoengqraeuz cungj raen geizheih ij rai bae, sojhij gyoengqraeuz siengj rox dauqdaej dwg gijmaz iqswh.” 21 (Gizsaed youq mwnq sojmiz hih Yajdenj vunz caeuq sojmiz youq mwnq hih vaihguek vunz cungj haenj damqdingq miz gijmaz saen siuhsiz.) 22 Yiengq Baujloz ndwn youq mwnq couh doiq gyoengq vunz naeuz: “Gak boux Yajdenj vunz hax! Gou raen faenhsou mboujguenj guxmaz cungj haenj baiq cwnz. 23 Gou youq ndaw singz neix byaijbyaij yawjyawj, yawjyawj faenhsou sojmiz guh dajbwiz hih deixfueng; liuh mbouj daengz engq raen miz aen daiz dajbwiz he gwnz de dik miz: ‘Bwiz hawj mbouj roxnaj dih cwnz.’ Gizsaed gou seizneix soj gangj naeuz sou ni hih, couh dwg faenhsou cungj mbouj rox, hoeng ciuqyiengh baiq hih caen hih cwnz lo. 24 “Boux cauh mbwn cauh deih cauh sojmiz hih cwnz, couh dwg bouxcawj gwnzmbwn caeuq lajdeih neix; de mbouj youq aen ranz vunz hwnq hih nej, 25 caemh mboujyungh vunz soengq hawj gijmaz he nej. Gizsaed couh dwg de hawj raeuz miz mingh, hawj raeuz miz heiq ndaej diemjcaw, hawj raeuz sojmiz hih doxgaiq hih; fanjcingq sojmiz hih cungj dwg de hawj he. 26 De daj boux vunz he cauh ok baenx fanh aen minzcuz hih vunz, sawjhawj lajmbwn dauqcawq cungj miz vunz, vanzlij dingh hawj gyoengqde seizlaw youq mwnqlaw. 27 De yienghneix guh dwg siengj hawj vunz cimh de, cimh de ndaej rox de. Gizsaed de liz raeuz mbouj gyae nej, 28 aenvih gyoengqraeuz saedceij goq ndaej ndei mbouj ndei, ndaej mbouj ndaej guh saeh, ndaej mbouj ndaej lix cungj dwg baengh de. Caemh luj faenhsou miz mbangj hih vunz sij sei sij naeuz: ‘Raeuz caemh dwg de seng he.’” 29 Baujloz vanzlij caiq naeuz: “Yiengq, giqyienz raeuz dwg lwg de lo, raeuz couh mbouj wnggai gag ngeix Cangqdiq dwg aeu gim, aeu ngaenz, aeu rin ma dik ma cauh guh he lo. 30 Doenghbaez gij vunz mbouj rox de, mbouj nginh de, guh loek; de cungj mbouj leixlangh gyoengqde. Hoeng seizneix de ij mingqlingq lajmbwn sojmiz hih vunz ij daj ndaw sim nginh loek gaijgoq, 31 aenvih de gaenq dingh ndei ngoenz he; youq ngoenz mwnq de ij baij boux de dinghlaeb hih boux mwnq, hawj de gunghbingz gunghcingq dih saemjbuenq lajmbwn. De vanzlij hawj de daj rai ndaej dauqlix, hawj lajmbwn sojmiz hih vunz guh cingqgiq.” 32 Gyoengq vunz baex dingq daengz Baujloz gangj naeuz vunzrai ndaej dauqlix gij saeh neix le, couh miz vunz riu de yaengh de, caemh miz hih vunz naeuz: “Raeuz vanzlij ijsiengj dingq mwngz gangj gij saeh neix haem.” 33 Gajlaeng Baujloz couh daj mwnq ok ma lo. 34 Caemh miz vunz sinq de haeuj de. Gij vunz neix ndaw de miz Yaqlozbahguj dih bouxguen he, gij coh de heuh Diuhnizsiuh, caeuq boux vunzbaz he, gij coh de heuh Daqmajlij, caemh vanzlij miz gizdah vunz haem.
1 Gij saeh neix goq le, Baujloz couh daj Yajdenj ok ma, bae Gohlimzdoh Singz. 2 Youq mwnq, de roeb daengz boux heuh Yaqgihlah dih Youzdaiq vunz he; de dwg youq Baenjduh Saengj seng he, hoeng aenvih goengjvuengz Lozmaj Gwzlaujdiuh mingqlingq gij vunz Youzdaiq ij buen ok Lozmaj Singz bae, sojhij de duenh gaxgonq couh daiq mehyah de Bwzgihlah daj dieg Iqdaqliq daeuj daengz Gohlimzdoh youq. 3 Doiq gvanjbaz neix cungj dwg guh cangqbungz gw he. Aenvih Baujloz caemh dwg guh gij hong neix, sojhij de couh louz roengzma caeuq gyoengqde itheij youq itheij guh hong. 4 Yiengq moix daengz ngoenz ngoenzyietbaeg, Baujloz cungj bae Youzdaiq veiqdangz caeuq gij vunz daujlwnq, gienq gij vunz Youzdaiq caeuq gij vunz Hihlaz, muengh gyoengqde sinq Yehsuh. 5 Mwh Sihlah caeuq Dizmohdaiq daj Majgizdoenq daeuj hih mwhde, Baujloz yungh sojmiz hih cizgyenh ma yiengq gij vunz Youzdaiq cenzgangj Cangqdiq dih ndei siuhsiz, cingqmingz Yehsuh dwg Gihduz he. 6 Hoeng, gij vunz Youzdaiq mbouj danhcij naeuz fanjdeiq de, vanzlij gangj gij vah gvatgvat sauqsauq he ma lengx de. Sojhij, de couh bongx gij boenqcingh gwnz buh de, doiq gyoengqde naeuz: “Gij coih faenhsou gag gvi hawj faenhsou aeu lo, caeuq gou mij maz gvanhaeh. Daj ngoenz neix hwnj, gou couh ij bae lingh aen minzcuz lo.” 7 Baujloz yienghneix naeuz le, couh daj veiqdangz mwnq ok ma bae daengz ndaw ranz boux heuh Dizdoh-Youzswqduh he. Aen ranz de dwg caeuq veiqdangz gekleiz he, de caemh dwg boux baiq Cangqdiq he. 8 Yiengq, gannaeuz Baujloz lizgaih aen veiqdangz mwnq lah, hoeng, Gihliqswhbuq, boux veiqdangz daeuzdaeuz mwnq, caeuq gij vunz ndaw ranz de cungj sinq Yehsuh Bouxcawj lo. Gajlaeng miz haujlai Gohlimzdoh vunz dingq Baujloz gangj le, caemh sinq Yehsuh, caemh sijlij lo. 9 Yiengq miz ngwnz he, Yehsuh hawj Baujloz luj fangxngwnzloq yienghmwnq. Youq ndaw loq de Yehsuh doiq de naeuz: “Baujloz, mwngz gaej lau; mwngz caenhrox bae cenzgangj sat lo. Gaejyungh lau, gaejyungh dingz; 10 miz gou caeuq mwngz youq. Mij'z vunz gamj doengh mwngz law, aenvih aen singz neix miz haujlai vunz dwg gij vunz gou.” 11 Gajlaeng Baujloz youq aen singz mwnq youq bi buenq, youq mwnq son vunz, son gvanhhih Cangqdiq dih ndei siuhsiz. 12 Yiengq daengz mwh Gyahliuz dang Yaqgaihyaq Saengj dih saengjcangj hih mwhde, gij vunz Youzdaiq doxyuk hwnjdaeuj gung Baujloz, dawz de bae fazdingz, 13 gauq de naeuz: “Boux vunz neix daeuj yungx vunz, hawj vunz mbouj ciuq fazliz bae baiq Cangqdiq.” 14 Baujloz dingq gyoengqde yienghneix naeuz le, cijngamq ijvanh hoi bak gangj, hoeng Gyahliuz couh doq doiq gij vunz Youzdaiq naeuz: “Doenghheij vunz Youzdaiq faenhsou hax, hauhnaeuz faenhsou gauq de miz loek cixnaeuz miz gij yiemzcungq dih coih nex, gou swhmboujyienz dingq faenhsou, 15 hoeng, faenhsou soj gauq hih cijmboujgoq dwg gij fazliz faenhsou dih saek gawq vah saek cih saw lah. Faenhsou gag gaijgyez bax! Gou mbouj caeuq faenhsou leix gij saeh neix law.” 16 De yienghneix doiq gyoengqde gangj le, couh boenq gyoengqde okma. 17 Gajlaeng doenghheij Hihlaz vunz ndwn henz de engq gaemh dawz Sojdizniz boux Youzdaiq veiqdangz dih daeuzdaeuz he ma youq fazdingz doh de. Hoeng, Gyahliuz caemh ciuqyiengh mbouj leix mbouj langh. 18 Baujloz vanzlij youq Gohlimzdoh youq duenh he, gajlaeng de couh caeuq Bwzgihlah, Yaqgihlah doiq gvanjbaz neix daj mwnq naengh ruz bae Siqliqyaq. Ij okdin bae hih mwhde, aenvih de gaxgonq doiq Cangqdiq baujcingq goq, sojhij couh youq Gyenhgwzlij Singz daeq raeuj; de yienghneix guh couh dwg naeuz Youzdaiq vunz guh baujcingq dih laehbeih. 19 Gyoengqde bae daengz Hijfuzsoj le, couh hwnj ruz ma. Baujloz couh biek song gvanjbaz mwnq, gag bae veiqdangz caeuq gij vunz Youzdaiq daujlwnq Cangqdiq dih ndei siuhsiz. 20 Yiengq gyoengq vunzlai mwnq cungj hah de cingj de youq mwnq geij ngoenz, hoeng, de mbouj youq law. 21 De ij daj mwnq ok ma hih mwhde, doiq gyoengqde naeuz: “Hauhnaeuz Cangqdiq hawj gou dauq daeuj laeng faenhsou dineix nex, gou gaengjdingq caiq daeuj haem.” Couh yienghneix, de youhcaiq daj Hijfuzsoj naengh ruz bae lo. 22 Yiengq de bae daengz Gaijsajliqyaq le, couh hwnj hamq ma, bae Yehluqsajlaengj gyauqveiq yawj gyoengq lwgsae mwnq. Gajlaeng de cij dauq maj daengz Siqliqyaq dih Anhdizah Singz. 23 Daengz Anhdizah Singz le, de youq mwnq youq duenh he, gajlaeng youhcaiq bae daixlingh mwnq, bae fueng Gyahlahdaiq caeuq fueng Fozlijgyah, byaij doengh fueng mwnq goqdoh, dauqcawq bae bang gyoengq lwgsae, hawj gyoengqde ij gyenhciz sinq Cangqdiq, yungjyenj mbouj bienq sim. 24 Baujloz daj Hijfuzsoj ok ma le, miz boux Youzdaiq vunz heuh Yaqbohloz he daeuj daengz Hijfuzsoj. De dwg youq Yaqlizcanhdaq Singz seng he; de miz ndaek dungx saw he, goujcaiz caemh rem raixcaix. De doiq Singqgingh cungj cienfanh sugseg he. 25 De gaenq miz vunz son de gvanhhih Yehsuh dih ndei siuhsiz lo, de caemh gig haenj, ndaw sim de caemh gig ndat, couh siengzseiz bae son vunz gvanhhih Yehsuh dih ndei siuhsiz, caemh dwg son ndaej deng. Hoeng, cijmboujgoq de caenhgag rox Yozhanq dih sijlij lah. 26 Gannaeuz yienghneix lah, hoeng, de vanzlij dwg mbeihung hwj youq Youzdaiq veiqdangz gangj vah. Yiengq Bwzgihlah caeuq Yaqgihlah doiq gvanjbaz neix dingq de gangj le, rox de caenhgag rox Yozhanq dih sijlij lah, couh son de, hawj de engqgya lai rox gij saedsaeh Cangqdiq. 27 Gajlaeng de siengj bae Yaqgaihyaq Saengj, yiengq gyoengq lwgsae Hijfuzsoj Singz caemh cihciz de, caiq sij saenq hawj Yaqgaihyaq hih lwgsae, cingj gyoengqde daih de. Couh yienghneix, de couh bae Yaqgaihyaq lo. De bae mwnq, doiq doenghheij vih miz Cangqdiq dih aiq hwj sinq Yehsuh hih vunz miz haujlai bangcoh, 28 aenvih de gig sug Singqgingh, siengzseiz youq dangqnaj vunzlai buekhingz gij vunz Youzdaiq, yungh Singqgingh ma cingqmingz Yehsuh couh dwg Gihduz.
1 Mwh Yaqbohloz cungj lij youq Gohlimzdoh Singz hih mwhde, Baujloz byaij bae daengz Hijfuzsoj, youq mwnq roeb daengz geij boux lwgsae. 2 Yiengq de couh cam gyoengqde naeuz: “Faenhsou sinq Yehsuh mwhde, ndaej miz Hoenzsaenz Cangqdiq laq?” Gyoengqde dingq le han naeuz: “Mij ndaej hah; gyoengqraeuz cungj mijyaengz dingqri naeuz miz Hoenzsaenz Cangqdiq gij saeh neix goq haem hwx.” 3 Baujloz caiq cam naeuz: “Yiengq faenhsou sijlij dwg cungjlaw sijlij lah?” Gyoengqde caiq han naeuz: “Dwg Yozhanq cenzgangj dih sijlij.” 4 Gajlaeng Baujloz naeuz: “Yozhanq dih sijlij, dwg caenhgag naeuz vunz gaenq daj ndaw sim gaijgoq le guh dih sijlij lah, aenvih de vanzlij gag naeuz: ‘Lij miz daixlingh cungj sijlij haem; cungj sijlij neix couh dwg naeuz vunz sinq boux baezneix ij daeuj he guh dih sijlij.’ Boux mwnq couh dwg Yehsuh lo.” 5 Gyoengqde dingq daengz gij vah neix le, couh hij gij mingzhiq Yehsuh Bouxcawj ma sijlij. 6 Baujloz couh oemj fawz hwnj gwnz ndang gyoengqde bae; Hoenzsaenz Cangqdiq couh hwnj gwnz ndang gyoengqde bae. Gyoengqde gak vunz couh gag gangj cungj vah Hoenzsaenz Cangqdiq nyok hawj vunz gangj he, caemh vanzlij gangj gij Cangqdiq hawj gyoengqde gangj hih saeh. 7 Mbat neix sijlij hih itgungh miz cibngeih boux. 8 Baujloz bijlienz sam ndwen cungj dwg bae Youzdaiq veiqdangz mbeihung hwj caeuq vunz daujlwnq guek Cangqdiq dwg gijmaz, gienq gyoengq vunz, muengh gyoengq vunz sinq de gangj hih saeh. 9 Hoeng, miz mbangj hih vunz simgyeng nga'ngangq, mbouj sinq, vanzlij youq dangqnaj vunzlai sai gij ndei siuhsiz Cangqdiq. Gajlaeng Baujloz ganhseiq daiq gyoengq lwgsae daj mwnq ok ma, ngoenzngoenz bae aen gyangjdangz Deihlahnuz, bae mwnq daujlwnq Cangqdiq dih ndei siuhsiz. 10 Baujloz bijlienz yienghneix guh song bi baenxlai caez, hawj sojmiz youq Yaqsiqyaq hih vunz, mboujguenj vunz Youzdaiq haj cixnaeuz vunz Hihlaz, cungj ndaej dingq daengz Cangqdiq dih ndei siuhsiz. 11 Cangqdiq dunghgoq Baujloz, hawj de guh gij saeh geizmiuj raixcaix he, 12 guh hwj miz hih vunz daiqlienz de yungh goq hih sujbaq hah, bangjndang hah cungj dawz bae coengq hwnj gwnz ndang vunz bingh bae, gajlaeng gij vunz bingh caemh cingqgawq ndaej ndei hwj, fangz doz hih caemh cingqgawq ndaej boenq okma hwj. 13 Yiengq miz gij vunz dauqcawq bae boenq fangz hih Youzdaiq vunz, caemh siengj hij Yehsuh Bouxcawj dih mingzhiq ma boenq fangz. Gyoengqde bienqnaengz cungj haenj yiengq boux ngaiz fangz yak doz he naeuz: “Gou hij Baujloz cenzgangj hih Yehsuh dih mingzhiq ma mingqlingq mwngz ok ma!” 14 Doenghgij vunz dauqcawq bae guh gij saeh neix he caemh miz caet daeglwg Swqgihvaj, boux Youzdaiq goengjsae dajbwiz neix. 15 Miz baez he, duz fangz yak engq doiq gyoengqde naeuz: “Gou rox Yehsuh, caemh rox Baujloz hah, hoeng, faenhsou dwg byawz nex?” 16 Gajlaeng boux ngaiz fangz yak doz mwnq couh diuq hwnjdaeuj uj gyoengqde ceihfug gyoengqde, uj hwj gyoengqde sieng gwnz sieng laj bae, buh cix lig hwj luklakrag liux, hawj gyoengqde loxgenz loxgangh daj ndaw ranz riq deuz hwj maetlaenq bae. 17 Gajlaeng youq Hijfuzsoj sojmiz hih Youzdaiq vunz caeuq Hihlaz vunz dingq daengz gij saeh neix le, cungj lau hwj ij rai bae. Daj mwhneix hwnj, gij coh Yehsuh, gij vunz couh mbouj caiq laizluenh yungh haeujbae lo. 18 Yiengq caemh miz haujlai sinq Yehsuh dih vunz cungj gag ok daeuj nginh bonjfaenh soj guh hih saeh. 19 Caemh miz haujlai goengdauh caeuq haujlai mehsien cungj dawz doenghgij saw gyoengqde bienqnaengz yungh he daeuj dong youq dangqnaj vunzlai hwj vueng. Gyoengqde yienghneix guh, caemhdangq naeuz baezneix mbouj caiq guh gij saeh neix haem lo. Gyoengqde vueng hih gij saw neix suenq hwnjdaeuj gijmaj dij hajfanh ngaenz. 20 Couh yienghneix, Cangqdiq dih ndei siuhsiz cungj doenghingz, caemh hwng raixcaix. 21 Gij saeh neix goq le, Baujloz ndaw sim de gag gyezdingq ij bae Majgizdoenq caeuq Yaqgaihyaq song mwnq dieg neix, gajlaeng cij maj Yehluqsajlaengj. De vanzlij naeuz: “Gou maj daengz Yehluqsajlaengj le, caemh bietdingh ij bae Lozmaj.” 22 Couh yienghneix, de couh baij Dizmohdaiq caeuq Hijlahduh, song boux bang de he, bae Majgizdoenq. Bonjfaenh de vanzlij camqciz youq Yaqsiqyaq Saengj youq. 23 Couh youq mwhneix, vih Cangqdiq dih ndei siuhsiz hwj Hijfuzsoj fatseng ciengz luenh he. 24 Ciengz luenh neix couh dwg youz boux heuh Dijmijdiuh dih cangh dajdiz ngaenz he aux vunz nauh luenh he. De soqsingq cungj dwg diz gij yiengh aen miuh Yaqdijmij mehbuz neix he, de caemh hawj doenghgij vunz miz cungj dinfawz neix hih seng'eiq ndei raixcaix. 25 Couh vih yienghneix, Dijmijdiuh couh heuh gij gunghyinz de caeuq gij vunz doengzhangz de daeuj, doiq gyoengqde naeuz: “Gak boux hax, faenhsou caemh rox, gyoengqraeuz cungj dwg gauq gij seng'eiq neix fatcaiz he. 26 Seizneix faenhsou gaenq dingqri caemh yawjraen boux Baujloz neix mbouj danhcij naeuz youq Hijfuzsoj, simqciq baenx cenz Yaqsiqyaq, de doeng gangj sae gangj coemx vunz, naeuz gijmaz: ‘Vunz cauh hih cwnz, mbouj dwg caen hih cwnz,’ gangj hwj miz haujlai vunz cungj sinq lo. 27 Ciuq yienghneix roengzbae, gou yawj hax, mbouj danhcij naeuz gyoengqraeuz guh hangz neix hih vunz ngaiz vunz yawjngawz, daiqlienz aen miuh veijdaq dih Yaqdijmij mehbuz neix cungj caemh ngaiz bienqbaenz mbouj dij saek haux cienz. Mehbuz neix youq Yaqsiqyaq caeuq lajmbwn gak dieg, vunz cungj baiq de, hoeng baezneix gij najrongh de ij bienqbaenz najmomj lo.” 28 Gyoengq vunz baex dingq de yienghneix gangj he le, couh hujheiq dengxdengx hwj hemq naeuz: “Hijfuzsoj vunz dih Yaqdijmij mehbuz vanqseiq hwx!” 29 Gajlaeng baenx cenz singz cungj luenh yobyob liux. Gyoengq vunz couh gaemh dawz song boux gaen Baujloz daeuj hih Majgizdoenq vunz Gaihyouz caeuq Yaqlijdazguj. Gaemh dawz le, couh nyoengx haeuj ndaw giqyenq bae. 30 Baujloz raen yienghneix le, couh siengj haeuj bae, hoeng, gyoengq lwgsae mbouj hawj de haeuj bae. 31 Caemh miz Yaqsiqyaq hih geij boux dang daeuz he, dwg gij baengzyoux Baujloz, caemh baij vunz daeuj byah Baujloz, mbouj hawj de haeuj bae, daiq veizyiemj lai. 32 Couh youq mwhneix, giqyenq cungj luenh yobyob, vunz hemq yuxyux, gak vunz gak hemq. Miz haujlai vunz gaenhbaenj mbouj rox bonjfaenh vihmaz ij daeuj dineix doxcomz. 33 Caemh youq mwhneix, miz gij vunz Youzdaiq he nyoengx boux heuh Yaqlizcanhdaq he, nyoengx de bae dangqnaj bae, aenvih gij vunz Youzdaiq siengj hawj de bang gyoengqde doiq gyoengq vunzlai gangj gij saeh neix caeuq gyoengqde mij maz gvanhaeh. Yiengq boux de couh vadvad fawz ijsiengj doiq gyoengq vunz gangj vah. 34 Hoeng, gyoengq vunzlai engq rox de dwg Youzdaiq vunz, couh mbouj siengj dingq de gangj vah, couh caezgya hemq naeuz: “Hijfuzsoj dih Yaqdijmij mehbuz vanqseiq hwx!” yienghneix hemq hwx hemq baenx song diemjcung caez. 35 Gajlaeng, aen singz mwnq hih cuhgiq ok daeuj naeuz hawj gij vunz dingh roengzma. De naeuz: “Gak boux Hijfuzsoj dih vunz hax! Byawz mbouj rox Hijfuzsoj Singz dwg hen caeuq baujhuq aen miuh Yaqdijmij caeuq hen dajlaeng Caeuqswh doek roengzdaeuj hih mehbuz neix nex? 36 Yiengq, giqyienz gij saeh neix bouxboux cungj rox hoh vwz, faenhsou couh wnggai dingh roengzma, gaejyungh luenh nauhsaeh. 37 Faenhsou daiq song boux neix daeuj dineix; song boux de mij caeg aeu gij doxgaiq ndaw miuh hah, caemh mij luenh gangj mehbuz gyoengqraeuz dih vaihvah hah. 38 “Hauhnaeuz Dijmijdiuh cangh diz ngaenz caeuq doenghheij doengzhangz de ij gauq guxmaz vunz, swhmboujyienz miz ngoenz gaihdingz he, caeuq miz saemjbuenqguenh hah; gyoengqde ndaej doxdoiqcingq hah. 39 Hauhnaeuz faenhsou miz maz saeh ij cam hih, ndaej bae mwnq bienqnaengz gaihveiq he gaijgyez hah. 40 Luj ngoenzneix hih nauhsaeh, gaenhbaenj mij maz laizyouz. Gyoengqraeuz cungj lau gij vunz Lozmaj naemqnaeuz gyoengqraeuz fanjdeiq gyoengqde hwx, gyoengqraeuz caemh mij banqfaz ndaej yiengq gyoengqde gaijyiz.” 41 De gangj sat doenghgij vah neix le, couh hawj gij vunz sanq maj lo.
1 Ciengz luenh neix dingh le, Baujloz couh heuh gyoengq lwgsae daeuj doxcomz, gujliq gyoengqde, gajlaeng de couh daj mwnq okdin bae Majgizdoenq. 2 De bae mwnq, byaij fueng mwnq goqdoh, cungj dwg bae gujliq gij vunz sinq he, gujliq gyoengqde sinq Cangqdiq yungjyenj mbouj bienq sim. Gajlaeng de caiq daj mwnq bae Hihlaz, 3 youq Hihlaz youq sam ndwen. Yiengq couh youq mwh de ij naengh ruz bae Siqliqyaq hih mwhde, gij vunz Youzdaiq doxyuk hwj ijsiengj haih de. De rox le, couh gyezdingq goq Majgizdoenq dauq maj daengz Siqliqyaq. 4 De bae Majgizdoenq hih mwhde, miz Sojbahdwz daeglwg Bizlozswh, dwg Biqlijyaq vunz, caemh miz Dezsajloznizgyah vunz dih Yaqlijdazguj caeuq Sihgunghduh, vanzlij miz Gaihyouz, Dwzbiq vunz, caemh miz Dizmohdaiq, caemh vanzlij miz Yaqsiqyaq vunz Deihgihguj caeuq Dwzlozfeihmoh, 5 gyoengq vunz neix, sien bae gaxgonq, youq Dwzlozyaq daengj gyoengqraeuz. 6 Gyoengqraeuz daengj goq aen ciet Cawz Yauqmuj he le, cij daj Feihlizbij naengh ruz bae. Naengh haj ngoenz ruz le, cij bae daengz Dwzlozyaq caeuq gyoengqde doxcomz, youq mwnq youq aen singhgiz he. 7 Youq ngoenzsinghgiz, gyoengqraeuz doxcomz euj bingj faen bingj gw hih mwhde, Baujloz doiq gyoengq vunz gangj vah. Aenvih de ngoenz daixngeih couh ij okdin bae lo, sojhij de gangj hwx gangj hwx, itcig gangj daengz gyangjngwnz. 8 Gyoengqraeuz doxcomz hih gwnz laeuz mwnq diemj miz haujlai daeng. 9 Gij vunz daeuj dingq de gangj vah hih ndaw de miz boux hauxseng he, gij coh de heuh Youzdeihguj. De hwnj gwnz conghcang bae naengh hwj dingq Baujloz gangj vah, dingq hwj naet le, ralaep lo, yiengq ngaiz daj sam laeuz doek roengzma. Gajlaeng gyoengq vunz couh bae yawj de, dawz de hwnq, hoeng, engq raen de rai lo. 10 Yiengq Baujloz raen yienghneix le, couh roengz laeuz bae, couh bomz roengzbae umj de, naeuz: “Faenhsou gaej vueng; de vanzlij diemjcaw.” 11 De yienghneix naeuz le, couh dauq hwnj laeuz ma euj bingj gw, caemh giqcuz gangj, gangj baenx haujlai caez, gangj daengz ranzrongh. Gajlaeng de cij bae. 12 Couh youq mwh Baujloz dauq hwnj laeuz maj hih mwhde, miz vunz daiq boux hauxseng doek laeuz mwnq maj ranz. Gyoengq vunz raen boux de mij naih saek yiengh, lij dwg vunzlix, couh cungj angq hwj ij rai. 13 Gajlaeng gyoengqraeuz ciuq Baujloz raengq hih yienghmwnq sien naengh ruz bae aen singz Yaqsoz, youq mwnq ciep de, aenvih de mbouj siengj naengh ruz, ij gag byaij roen bae. 14 Yiengq de couh youq mwnq caeuq gyoengqraeuz doxraen. Gyoengqraeuz couh ciep de hwnj ruz; daixgya naengh ruz bae aen singz Mijdeihliqniz. 15 Gyoengqraeuz caiq daj Mijdeihliqniz naengh ruz, naengh daengz ngoenz daixngeih, couh bae daengz Gih'ah Dauj dih doiqmienh de, daengz ngoenz daixsam, bae daengz Sajmoh Dauj, daengz ngoenz daixseiq couh bae daengz aen singz Mijliqduh. 16 Aenvih Baujloz siengj ganj maj daengz Yehluqsajlaengj goq aen ciet Ujcwnz, sojhij de gietdingh mbat neix mbouj bae Hijfuzsoj, mienxndaej youq Yaqsiqyaq Saengj ngaiz cizgyenh. 17 Gannaeuz yienghneix lah, hoeng Baujloz vanzlij dwg baij vunz bae Hijfuzsoj, bae cingj Hijfuzsoj gyauqveiq dih lingjdauj daeuj Mijliqduh caeuq de doxcomz. 18 Yiengq gyoengqde caemh daeuj. Daeuj le, Baujloz couh doiq gyoengqde naeuz: “Gak boux hax, faenhsou caemh rox, dajlwh gou daengz Yaqsiqyaq Saengj dih daixit ngoenz hwnj, gou baenzlaw doiq vunz, 19 mbouj rasang, caemh riuz raemxra hwj daeuj swqhaeuh bouxcawj raeuz Yehsuh, caemhcix souh daengz gij vunz Youzdaiq dih bwkhaih. 20 Faenhsou caemh vanzlij rox, mboujlwnh youq mwnq miz vunz lai he haj cixnaeuz youq ndaw ranz bouxlawz, cijaeu doiq faenhsou miz ik hih, gou cungj son faenhsou, gangj naeuz faenhsou ni liux, cungj mbouj lau dwgrengz sinhoj. 21 Caemh mboujguenj doiq Youzdaiq vunz haj cixnaeuz doiq Hihlaz vunz, gou cungj yiemzsuz hih naeuz gyoengqde, hawj gyoengqde yiengq Cangqdiq nginh loek, hawj gyoengqde gaijgoq, sinq bouxcawj raeuz Yehsuh Gihduz. 22 “Seizneix ndaw sim gou gaenj ranxranx, gaenj ij bae Yehluqsajlaengj, hoeng gou mbouj rox youq mwnq ij ngaiz roeb daengz gijmaz saeh; 23 gou caenh rox gou youq gak aen singz cungj miz Hoenzsaenz Cangqdiq daezsingj gou naeuz ij miz nanh, simqciq ngaiz vunz gyaeng hwnjdaeuj. 24 Hoeng mboujguenj baenzlawz yiengh, cungj mbouj ndaej laengz gou; diuz mingh gou doiq gou ma gangj gaenhbaenj mbouj suenq guxmaz, cijaeu byaij sat diuz roen gou, couh dwg guh ndei gij hong bouxcawj raeuz Yehsuh gyau hawj gou hih, ndaej cenzgangj Cangqdiq haijliengh aiq vunz dih ndei siuhsiz couh ndaej lo. 25 “Gou soqsingq cungj youq laeng faenhsou mwnq cenzgangj guek Cangqdiq dih ndei siuhsiz. Hoeng, daj seizneix hwnj, hoengjlau faenhsou byawz cungj mbouj ndaej caiq raen gou haem lo. 26 Sojhij, ngoenzneix gou saedsaeh naeuz faenhsou ni, hauhnaeuz faenhsou miz byawz ngaiz Cangqdiq dingh coih nex, mbouj gvan gou saeh lo, 27 aenvih gou gaenq dawz Cangqdiq sojmiz ij hawj vunz rox hih cungj gangj naeuz faenhsou ni liuxliux lo. 28 “Faenhsou ij gag guenj ndei bonjfaenh; Hoenzsaenz Cangqdiq gaenq laeb faenhsou, hawj faenhsou luj boux ciengx yiengz yienghmwnq daeuj guenj ndei aen gyauqveiq de lo, aenvih gyauqveiq dwg Cangqdiq aeu gij lwed daeglwg de ma cueg ma hih. 29 Gou gaenq rox, daengj gou bae le, gaengjdingq miz vunz vaih ndonj haeuj gyauqveiq bae haih vunz, caemh luj miz langz ndonj haeuj ndaw gyoengq yiengz bae haih gyoengq yiengz. 30 Faenhsou ndaw neix caemh miz vunz ok daeuj luenh gangj, yungx gij lwgsae bae sinq gyoengqde, gaen gyoengqde. 31 Sojhij, faenhsou ij siujsim, ijaeu ndaejgeiq, youq ndaw sam bi neix gou ngwnzngoenz mbouj dingz hih riuz raemxra, mbouj dingz hih naeuz faenhsou, son faenhsou. 32 “Seizneix gou dawz faenhsou gyau hawj Cangqdiq. Gou muengh faenhsou dawz gou soj gangj naeuz sou ni hih gij ndei siuhsiz mwnq geiq youq ndaw sim hwj ndaej bienqbaenz boux lwgsae yied ngoenz yied ndei he, hawj faenhsou caemh ndaej daengz Cangqdiq vih gij vunz bonjfaenh de hwj cwnjbiq hih gij fuk mwnq. 33 “Gou coengzlaiz mbouj muengh ndaej gij cienzcaiz caeuq gij doxgaiq vunz goq. 34 Faenhsou caemh rox, gou caeuq doenghheij vunz gaen gou itheij guh hong soj yungh hih, cungj dwg gij fawz gou guh hong ndaej ma hih. 35 Gou mboujguenj guh gijmaz saeh, cungj daiq daeuz guh ndei, hawj faenhsou rox wnggai gaenz guh hong bae bang gij vunz mij rengz he, miz nanh he; faenhsou caemh ijaeu ndaejgeiq bouxcawj raeuz Yehsuh gangj goq naeuz: ‘Boux hawj he beij boux ndaej he engqgya miz fuk.’” 36 Baujloz gangj doenghgij vah neix sat le, couh caeuq gyoengq vunz gvih roengzma haenh Cangqdiq gouz Cangqdiq. 37 Yiengq gyoengq vunz raen Baujloz gangj hih vah cungj doengh daengz sim bae, couh daej ngwdngwd hwj got dawz de cup de. 38 Ceiq hawj gyoengqde siengsim hih dwg Baujloz naeuz: “Baezneix mbouj caiq ndaej raen gou lo,” gawq neix. Gajlaeng gyoengqde couh soengq de hwnj ruz bae lo.
1 Gyoengqraeuz youq mwnq caeuq gyoengqde doxbiek le, couh naengh ruz bae Gohswq Dauj, daixngeih ngoenz bae daengz Lozdij Dauj, caiq daj mwnq bae daengz Bwzdaqlah Singz, 2 youq mwnq nyangz aen ruz ij bae Feihnizgih he. Yiengq gyoengqraeuz couh hwnj aen ruz mwnq bae. 3 Naengh aen ruz mwnq bae daengz mwnq yawj ndaej raen Caiqbujluqswh Dauj he le, couh van goq baixnamz, yiengq fueng Siqliqyaq bae. Bae daengz sokruz Daiqwj le, couh hwnj hamq ma, aenvih aen ruz mwnq youq mwnq dingz hwj roengz doxgaiq. 4 Yiengq gyoengqraeuz youq mwnq cimhraen gyoengq lwgsae, couh caeuq gyoengq lwgsae youq mwnq youq caet ngoenz. Gajlaeng, Hoenzsaenz Cangqdiq hawj gyoengqde byah Baujloz, mbouj hawj Baujloz bae Yehluqsajlaengj. 5 Gannaeuz gyoengqde byah mbouj hawj de bae Yehluqsajlaengj lah, hoeng gyoengqraeuz youq mwnq caet ngoenz le, ciuqyiengh giqcuz ganjroen. Gyoengqraeuz ij okdin bae hih mwhde, gyoengq lwgsae mwnq daiq lwg daiq yah daeuj soengq gyoengqraeuz, soengq ok rog singz bae daengz sokruz he. Youq sokruz mwnq daixgya cungj gvih roengz anjsa bae haenh Cangqdiq gouz Cangqdiq. 6 Couh yienghneix, gajlaeng gyoengqraeuz couh hwnj ruz bae, gyoengqde couh dauqlaeng maj lo. 7 Couh yienghneix, gyoengqraeuz daj Daiqwj naengh ruz bae daengz Dohliqmaij, youq mwnq hwnj hamq ma, bae yawj gij lwgsae mwnq, caemh caeuq gyoengq lwgsae mwnq youq ngoenz he. 8 Daengz daixngeih ngoenz le, gyoengqraeuz caiq daj mwnq bae daengz Gaijsajliqyaq, bae laeng Feihliq youq. (Feihliq dwg boux cenzgangj Cangqdiq dih ndei siuhsiz he, caemh dwg youq Yehluqsajlaengj senj caet boux okdaeuj ndaw de dih boux he, caemh dwg senj okdaeuj guh gij hong gyauqveiq he. 9 De miz seiq dah lwgsau cungj mijyaengz ok haq haem; dahdah cungj dwg boux cenz gij vah Cangqdiq.) 10 Gyoengqraeuz youq mwnq geij ngoenz le, Yaqgyahbuq boux cenz gij vah Cangqdiq neix dajlwh Youzdaiq Saengj daeuj, 11 daeuj daengz gyoengqraeuz mwnq yawj gyoengqraeuz. De daeuj daengz le, couh dawz diuz sairwet Baujloz ma gag goenj fawz goenj ha hwj, naeuz: “Hoenzsaenz Cangqdiq yienghneix naeuz: ‘Bouxcawj diuz sairwet neix youq Yehluqsajlaengj ij ngaiz gij vunz Youzdaiq yienghneix goenj, gajlaeng youhcaiq dawz boux de gyau hawj gij vunz linghvaih minzcuz he.’” 12 Gyoengqraeuz caeuq gij vunz bonjdeih mwnq dingq daengz gij vah neix le, cungj caezgya gouz Baujloz, gouz mbouj hawj Baujloz bae Yehluqsajlaengj. 13 Hoeng, Baujloz dauq naeuz: “Faenhsou vihmaz ij yienghneix gikheiq daej hax, daej hawj gou siengsim bae nej? Gou gaenq guh ndei cwnjbiq lo; vih bouxcawj raeuz Yehsuh hwj ngaiz vunz goenj, simqciq ngaiz rai youq Yehluqsajlaengj, gou cungj simgam hah.” 14 Gyoengqraeuz dingq de yienghneix naeuz le, rox naeuz gyoengqraeuz mboujguenj baenzlawz gouz de, byah de, cungj mij'z yungh, yiengq couh mbouj caiq ok sing gangj gijmaz haem lo, caenh naeuz: “Caih Yehsuh Bouxcawj aiq bax,” gawq neix sat lo. 15 Couh yienghneix, goq geij ngoenz le, gyoengqraeuz couh soujsib doxgaiq, couh bae Yehluqsajlaengj lo. 16 Miz geij boux Gaijsajliqyaq hih lwgsae caeuq gyoengqraeuz itheij bae. Gyoengqde daiq gyoengqraeuz bae laeng boux gaenq sinq Yehsuh ndaej haujlai caez hih Caiqbujluqswh vunz he, gij coh de heuh Nazsoenh he, laeng de youq. 17 Gyoengqraeuz bae daengz Yehluqsajlaengj le, gyoengq lwgsae mwnq daih gyoengqraeuz ndei hux ndei. 18 Yiengq daengz ngoenz daixngeih, Baujloz caeuq gyoengqraeuz itheij bae yawj Yajgoz. Mwhde sojmiz youq Yehluqsajlaengj gyauqveiq dih lingjdauj caemh youq mwnq. 19 Baujloz raen le, couh dongx gyoengqde, caemh dawz Cangqdiq hawj de, dunghgoq de, youq linghvaih minzcuz soj guh hih saeh gangj naeuz gyoengqde ni. 20 Gyoengqde dingq le, cungj caezgya haenh Cangqdiq, youhcaiq doiq Baujloz naeuz: “Beixnuengx hax, hawjm'z yawj hux, gij vunz Youzdaiq sinq Yehsuh hih lai hux lai, gangj soq fanh baenx lai; gyoengqde cungj dwg yiemzgwz soenhsouj Mohsih dih fazliz he. 21 Gyoengqde dingqri gvanhhih mwngz dih saeh, naeuz mwngz son gij vunz Youzdaiq youq linghvaih minzcuz youq he, son gyoengqde mbouj soenhsouj Mohsih dih fazliz, son gyoengqde mbouj hawj gij lwg vunzsai gyoengqde gozlij, caemh son gyoengqde gaejyungh soenhsouj Youzdaiq vunz dih laehbeih. 22 Gyoengqde gaengjdingq rox naeuz mwngz daeuj daengz dineix luh; ij baenz guh nej? 23 Dwg mbouj dwg mwngz seizneix dingq gyoengqraeuz gangj; gyoengqraeuz dineix miz seiq boux yiengq Cangqdiq baujcingq goq he. 24 Mwngz daiq gyoengqde, caeuq gyoengqde itheij bae guh gancengh ngiqsiz, bang gyoengqde gyau ngaenz daeq raeuj. Yienghmwnq gij vunz couh rox, yienzlaiz gyoengqde dingq daengz gvanhhih mwngz dih saeh dwg gyaj hih, mbouj dwg saedsaeh hih, vanzlij caemh rox mwngz caemh soenhsouj Mohsih dih fazliz hih. 25 Gangj daengz doenghheij vunz linghvaih minzcuz sinq Yehsuh mwnq, gyoengqraeuz gaenq sij saenq raengq gyoengqde mbouj hawj gyoengqde gw doenghgij bwiz goq duz you he, caemh mbouj ndaej gw lwed caeuq doengh duz nap hoz rai he, caemh mbouj ndaej guhyoux, doenghgij neix lo.” 26 Baujloz dingq gyoengqde yienghneix naeuz le, daixngeih ngoenz couh caeuq seiq boux mwnq itheij guh gancengh ngiqsiz, caemh haeuj gunghdenq Cangqdiq bae raengq naeuz gyoengqde daengj caet ngoenz guh sat gancengh ngiqsiz le, ij hawj boux guh dajbwiz he bang gyoengqde gak vunz guh dajbwiz. 27 Ndaw caet ngoenz neix couh ij sat lo, miz gij vunz daj Yaqsiqyaq daeuj hih Youzdaiq vunz raen Baujloz youq gunghdenq Cangqdiq le, couh yungx gij vunz, aux gyoengq vunz bae gaemh Baujloz. 28 Gyoengqde hemq naeuz: “Hijswzlez vunz hax, vaiq daeuj bang hax! Boux vunz neix, de dauqcawq bae son vunz fanjdeiq gij vunz gyoengqraeuz caeuq fanjdeiq Mohsih dih fazliz, caemh fanjdeiq aen gunghdenq neix. De seizneix gingqyienz daiq gij vunz Hihlaz haeuj aen gunghdenq neix daeuj hawj aen de bienqbaenz mwnq mbouj hab baiq Cangqdiq he!” 29 Gyoengqde yienghneix hemq naeuz, dwg aenvih gyoengqde raen Dwzlozfeihmoh boux Hijfuzsoj vunz neix caeuq Baujloz youq ndaw singz goq, couh naemqnaeuz dwg Baujloz daiq de haeuj gunghdenq Cangqdiq bae lah. 30 Gyoengqde yienghneix hemq le, baenx cenz singz cungj luenh liux. Gyoengq vunz cungj caezgya caenx haeuj gunghdenq Cangqdiq bae gaemh dawz Baujloz, gaemh dawz de rag ok gunghdenq ma. Gyoengqde baex ok ma he, couh doq miz vunz gven aen dou gunghdenq lo. 31 Gyoengq vunz rag de okma le, couh ijsiengj gaj de. Couh youq mwh gyoengq vunz ij dawz Baujloz gaj hih mwhde, miz vunz daeuj bauqgauq naeuz Lozmaj gywnhdeiq dih cijveihguenh ni, naeuz: “Ox! Baenx cenz Yehluqsajlaengj cungj luenh liux lo!” 32 Cijveihguenh dingq le, couh daiq bing caeuq daiq geij boux lienzcangj bae daengz gyoengq vunzlai mwnq. Gyoengq vunz baex raen cijveihguenh caeuq gyoengq bing daeuj le, couh dingz roengzma mbouj doh Baujloz. 33 Cijveihguenh raen yienghneix le, couh goq bae gaemh dawz Baujloz, caiq hawj vunz aeu song diuz lienh ma lienh de hwj, youhcaiq cam naeuz de dwg guxmaz vunz, guh gijmaz saeh. 34 Hoeng, gyoengq vunz hemq luenh yobyob, hemq hwj goeng cijveihguenh gaenhbaenj mij banqfaz caz ok gijmaz. Gajlaeng ganhseiq hawj vunz daiq Baujloz haeuj ndaw binghyingz bae. 35 Yiengq Baujloz ngamq byaij daengz bak lae binghyingz mwnq, aenvih miz haujlai vunz caenx yubyub, cungj ijsiengj doh de, guh hwj mij banqfaz byaij bae, bwk mbouj ndaej, gyoengq bing couh dawz Baujloz ram hwnjdaeuj, ram haeuj ndaw binghyingz bae. 36 Gyoengq vunz gaen gajlaeng hemq vauxvaux naeuz: “Cawz de bae! Met de bae!” 37 Mwh Baujloz ngaiz daiq bae ijvanh daengz bakdou binghyingz hih mwhde, de cam boux cijveihguenh mwnq naeuz: “Gouz mwngz hawj gou gangj gawq vah he ndaej lwi?” Boux cijveihguenh mwnq dingq le, doeksaet hwj cam naeuz: “Ox, mwngz caemh rox gij vah Hihlaz haj? 38 Yiengq mwngz couh dwg boux gaxgonq yungx vunz daujluenh le, daiq baenx seiqcien vunz yaenghdan deuz ok rogndoi bae hih boux Ngaihgiz vunz mwnq lo?” 39 Baujloz dingq le, han naeuz: “Mij dwg law; gou dwg Youzdaiq vunz lah, dwg youq Gihliqgyah Saengj dih Daqsuq seng he, dwg boux youq aen cungqyauq cingzciq neix dih gunghminz lah. Cingj mwngz hawj gou doiq gyoengq vunz gangj vah ndaej lwi?” 40 Cijveihguenh dingq de yienghneix gangj le, couh dungziq hawj de gangj vah. Yiengq Baujloz couh ndwn hwnj gwnz mbaeklae bae, doiq gyoengq vunzlai vadvad fawz, hawj gyoengq vunz dingh roengzma. Yiengq gyoengq vunz dingh roengzma le, de couh aeu gij vah Hihbwzlaiz ma doiq gyoengqde gangj vah.
1 De naeuz: “Gak boux boxlungz nuengxau hax, cingj faenhsou dingq gou gangj.” 2 Gyoengq vunz baex dingq de aeu vah Hihbwzlaiz ma gangj he le, cungj engqgya dingh cubcub hwj dingq de gangj. 3 De naeuz: “Gou dwg Youzdaiq vunz, dwg youq dieg Gihliqgyah dih Daqsuq Singz seng he, hoeng dauq dwg youq Yehluqsajlaengj maj hung lah, caemh laeng Gyahmajlez douzsae he, dwg ciuq gij cojgoeng raeuz dih fazliz yienghmwnq ma yiemzgwz gyauqyuz goq he, dwg miz sim swqhaeuh Cangqdiq he, luj faenhsou ngoenzneix ityiengh miz sim he. 4 Gou caemh haih goq, gyaeng goq doenghheij vunz sinq Yehsuh he, mboujguenj vunzsai vunzbaz, simqciq haihrai gyoengqde. 5 Gij saeh neix, goengjsae dajbwiz daeuzdaeuz caeuq baenx cenz veijyienzveiq cungj ndaej cingqmingz naeuz gou gangj hih cungj dwg saedsaeh he. Gou vanzlij dajlaeng gyoengqde ndaej gij saenq gyoengqde sij hawj Daqmajswqgwz Singz dih Youzdaiq lingjdauj he, dawz gij saenq gyoengqde ma guh cingqgiq bae gaemh gyoengq lwgsae mwnq, gaemh dawz bae Yehluqsajlaengj saemjbuenq. 6 “Couh youq mwh gou dawz saenq bae ijvanh daengz Daqmajswqgwz hih mwhde, daihgaiq dwg gyangjngoenz cingq bax, sawqmwh miz ndaek rag rongh myig myiengzmyiengz he daj gwnzmbwn ceq roengz seiqhenz ndang gou daeuj. 7 Gou couh majcangq ngaiz laemxdengx roengzbae, caemh doq miz sing doiq gou naeuz: ‘Saujloz, Saujloz, mwngz vihmaz ij haih gou?’ 8 Yiengq gou han naeuz: ‘Goengjau hax, mwngz dwg byawz lah?’ Boux de han naeuz: ‘Gou couh dwg ngaiz mwngz haih hih Mbanj Nazsajlwz vunz dih Yehsuh hah.’ 9 Mwhde caeuq gou itheij bae hih vunz caemh raen gij myigmyiengz mwnq, hoeng, dauq mij dingqri miz sing doiq gou gangj vah. 10 Gajlaeng, gou caiq cam naeuz: ‘Goengjau hax, gou ij baenzlaw guh nej?’ Yiengq Yehsuh bouxcawj gou couh doiq gou naeuz: ‘Hwnq! Hwnq bae Daqmajswqgwz. Bae mwnq swhmboujyienz miz vunz naeuz mwngz ni ij guh gijmaz.’ 11 Mwhde aenvih gij rongh mwnq daiq myig lai, guh hawj cehra gou yawj mij raen saek yiengh bae, gajlaeng cij swhswh youz doengh boux caeuq gou itheij bae he rag dawz gij fawz gou daiq gou bae Daqmajswqgwz. 12 “Yiengq youq mwnq miz boux he, gij coh de heuh Yaqnaznizyaq. De soqlaiz cungj dwg aiq Cangqdiq yawjnaek Cangqdiq, soenhsouj Mohsih fazliz dih vunz he. Youq Daqmajswqgwz sojmiz dih Youzdaiq vunz cungj gig soenhcungq de. 13 De daeuj yawj gou, ndwn youq henz ndang gou naeuz: ‘Saujloz beixnuengx hax, ndaej dauqyungz yawjraen lo bax!’ De ngamq baex gangj gawq neix sat he, gou couh doq majcangq yawj ndaej raen de lo. 14 “De caiq naeuz: ‘Cojgoeng raeuz dih Cangqdiq gaenq senj mwngz lo, senj mwngz hawj mwngz ndaej rox de ij hawj mwngz guh gijmaz, caemh hawj mwngz raen Yehsuh, boux simndei simsoh de, caeuq dingq daengz de caeuq mwngz gangj vah. 15 Aenvih baezneix mwngz ij dawz mwngz soj yawjraen soj dingqri hih gangj naeuz lajmbwn sojmiz hih vunz ni.’ 16 Yaqnaznizyaq vanzlij caiq naeuz: ‘Yienghn'x mwngz seizneix vanzlij ngaiznged guxmaz laem nej? Vaiq bae hij gij mingzhiq Yehsuh bae sijlij bax, swiq cengh gij coih mwngz bae bax!’” 17 Baujloz gangj daengz dineix le, vanzlij caiq naeuz, de naeuz: “Gajlaeng gou couh dauq ma daengz Yehluqsajlaengj. Couh youq mwh gou youq ndaw gunghdenq Cangqdiq haenh Cangqdiq gouz Cangqdiq hih mwhde, sawqmwh gou caenh lujnaeuz ra ok rongxrib yienghmwnq, 18 yawjraen Yehsuh doiq gou naeuz. De naeuz: ‘Saujloz! Mwngz vaiqdi deuz ok Yehluqsajlaengj bae bax, aenvih gij vunz neij dwgcaengz mwngz cenzgangj gij ndei siuhsiz gou.’ 19 Yiengq gou dauq han de naeuz: ‘Bouxcawj gou hax, gyoengqde cungj rox gaxgonq gou dauqcawq bae lieb gak aen veiqdangz, bae gaemh gij vunz sinq mwngz he ma gyaeng, ma doh. 20 Vanzlij miz, mwh boux cingqyinz mwngz Swhdizfanj ngaiz vunz doh rai hih mwhde, gou caemh youq henz de hwj. Gou vanzlij roxnginh sim'angq raixcaix, caemhcaiq bang hen diuz buh doengh boux haih de rai he nex.’ 21 Gou cungj yienghneix naeuz lo, hoeng, Yehsuh vanzlij naeuz: ‘Mwngz caenhrox bae sat lo. Gou vanzlij ij baij mwngz bae gyae'gyae bae, bae daixlingh aen minzcuz bae cenzgangj gij ndei siuhsiz gou.’” 22 Yiengq gyoengq vunzlai baex dingq daengz de gangj gawq naeuz ‘daixlingh minzcuz’ he gawq neix le, cungj aeuqheiq hwj daixgya hemq hwnjdaeuj naeuz: “Doengh cungj vunz cungjn'x, gajgak de bae! Louz cungj vunz neix ma guxmaz nex!” 23 Gyoengq vunz doq hemq doq duet buh hwj bau, vanzlij doq vanq boenqcingh hwnj gwnzmbwn bae. 24 Boux Lozmaj cijveihguenh mwnq raen yienghneix le, couh mingqlingq hawj vunz dawz Baujloz haeuj ndaw yingz bae, ij hawj vunz aeu diuz bien ma fad de saemj de, siengj caz gyoengq vunz vihmaz doiq de yienghneix hemq. 25 Hoeng, couh youq mwh gyoengqde goenj Baujloz hwnjdaeuj ij doh de hih mwhde, Baujloz doiq boux lienzcangj ndwn henz ndang de mwnq naeuz: “Faenhsou doh it boux mijyaengz dingh miz coih dih Lozmaj gunghminz, habfaz mah?” 26 Boux lienzcangj mwnq dingq de gangj gawq neix le, couh majcangq bae cimh boux cijveihguenh mwnq naeuz: “Mwngz ij guh gijmaz? Boux vunz neix dwg Lozmaj vunz nex!” 27 Gajlaeng, goeng cijveihguenh couh bae cam Baujloz naeuz: “Naeuz gou ni, mwngz dwg Lozmaj vunz haj?” Baujloz han naeuz: “Dwg hah.” 28 Goeng cijveihguenh dingq le, couh gag naeuz: “Gou vih ij ndaej guh Lozmaj gunghminz hwj sai bae baenx haujlai cienz cij ndaej hwx.” Baujloz dingq le, couh naeuz: “Gou daj seng okdaeuj cix dwg lux.” 29 Doengh boux cwnjbiq ij doh Baujloz hih doengh boux mwnq dingq le, cungj lau hwj vaiq deuz bae. Boux cijveihguenh mwnq dingq le, caemh lau lo, aenvih de gingqyienz hawj vunz goenj Lozmaj gunghminz. 30 Yiengq daengz ngoenz daixngeih, boux cijveihguenh mwnq siengj rox cingsuj gij vunz Youzdaiq vihmaz ij gauq Baujloz, couh bae gej Baujloz, caiq heuh doengh goengjsae dajbwiz caeuq baenx cenz veijyienzveiq hih vunz daeuj doxcomz, gajlaeng couh heuh Baujloz ok daeuj hawj de ndwn youq dangqnaj gyoengqde hwj.
1 Baujloz ok daeuj le, couh cimyawj gyoengqde, doiq gyoengqde naeuz: “Gak boux beixnuengx hax, gou soqlaiz soj guh hih saeh, cungj mij'z naeuz doiq mbouj hwnj Cangqdiq.” 2 Yiengq youq mwnq dih Yaqnaznizyaq boux goengjsae dajbwiz daeuzdaeuz neix dingq Baujloz yienghneix naeuz le, couh hawj doengh boux ndwn youq henz ndang Baujloz he fak de mbat bak he. 3 Baujloz ngaiz vunz fak le, couh naeuz de naeuz: “Ndaek ngauqm'z, haex max rog hih ngaeuz ndaw hih yaq, gyajcang guh ndei hwj! Mwngz naengh youq dineix dwg ij ciuq fazliz daeuj saemjbuenq gou hih, hoeng mwngz mbouj soenhsouj fazliz, dauq hawj vunz doh gou. Cangqdiq caemh ij doh mwngz lo!” 4 Gyoengq vunz ndwn youq henz de dingq de yienghneix naeuz le, couh doiq de naeuz: “Mwngz gingqyienz gamj mang goengjsae dajbwiz daeuzdaeuz; mwngz mbouj rox de dwg swqhaeuh Cangqdiq he haj?” 5 Baujloz dingq le, couh naeuz: “Ox, gak boux beixnuengx hax, gou mbouj rox de dwg boux guh goengjsae dajbwiz daeuzdaeuz he hah. Gou mbouj hab mang goengjsae dajbwiz daeuzdaeuz, aenvih ndaw Singqgingh ndaw de sij naeuz: Mbouj ndaej mang beksingq dih lingjdauj.” 6 Baujloz yawj ndaej ok gyoengq vunz neix ndaw de miz dingxfaen vunz dwg Sajduhgaih baij dih vunz, dingxfaen vunz dwg Fazliqcaiq baij dih vunz, yiengq de couh youq mwnq hemq naeuz: “Gyoengq beixnuengx hax, gou dwg Fazliqcaiq baij hih vunz, caemh dwg Fazliqcaiq baij dih lwglan. Gou seizneix ngaiz vunz saemj, dwg vih gou sinq vunzrai ndaej dauqlix gij neix.” 7 De baex gangj gawq vah neix he le, Fazliqcaiq baij hih vunz caeuq Sajduhgaih baij hih vunz couh majcangq doxceng hwnjdaeuj, caemh faen song buek hwj, 8 aenvih Sajduhgaih baij hih vunz mbouj sinq vunz rai le ndaej dauqlix, caemh mbouj sinq miz bouxcai caeuq miz hoenzsaenz, hoeng, Fazliqcaiq baij hih vunz nej, sam yiengh cungj sinq miz. 9 Couh vih yienghneix, gyoengqde yied ceng yied youqgaenj. Yiengq miz geij boux Fazliqcaiq baij hih fazliz cenhgyah ndwn hwnjdaeuj hemq naeuz: “Gyoengqraeuz cimh mbouj raen boux neix miz maz coih hah; saekseiz caemh miz hoenzsaenz cixnaeuz miz bouxcai doiq de gangj vah goq nej!” 10 Gyoengq vunz yied ceng yied gog, yied ceng yied youqgaenj, guh hwj cijveihguenh cungj lau Baujloz ngaiz vunz sik faen song mbiengj bae, couh mingqlingq gij binggyep he roengz bae, daj ndaw gyoengq vunzlai daiq Baujloz okma, daiq haeuj ndaw binghyingz bae. 11 Couh youq ngwnz mwnq, Yehsuh ndwn youq henz ndang Baujloz, doiq de naeuz: “Mwngz gaej you; coengqsim bax! Mwngz gaenq ndaej youq Yehluqsajlaengj guh gou dih cingqyinz lo, youq Lozmaj caemh bietdingh ndaej vih gou hwj guh cingqyinz.” 12-13 Yiengq daengz ranzrongh le, miz seiqcib lai boux Youzdaiq vunz doxcomz hwj geiqmaeuz ij gaj Baujloz. Gyoengqde engqgya yiengq Cangqdiq baujcingq naeuz: “Mbouj gaj Baujloz, gyenhgyez mbouj gw gijmaz.” 14 Gyoengqde geiqmaeuz ndei le, couh bae cimh doengh goengjsae dajbwiz he caeuq doenghheij boux gangj vah couh baenz he, doiq gyoengqde naeuz: “Gyoengqraeuz gaenq caezgya baujcingq goq lo, hauhnaeuz mbouj gaj Baujloz, gyoengqraeuz couh gijmaz cungj mbouj gw. 15 Seizneix faenhsou caeuq gyoengq veijyienzveiq dih vunz bae naeuz Lozmaj cijveihguenh, hawj de daiq Baujloz daeuj dineix, gyajcang naeuz caiq ij caz gij saeh de hwj; gyoengqraeuz gaenq guh ndei cwnjbiq lo, daengj de daeuj daengz dangjroen le, couh gajgak de bae.” 16 Ngamqluj gyoengqde gangj doenghgij vah neix hih mwhde, ngaiz boux vaihseng Baujloz ndaej dingqri. De dingqri le, couh haeuj ndaw binghyingz bae naeuz Baujloz ni. 17 Baujloz dingq le, couh cingj boux lienzcangj he daeuj, doiq de naeuz: “Cingj mwngz daiq daeg hauxseng neix bae cimh cijveihguenh. De miz vah ij naeuz de ni.” 18 Boux lienzcangj mwnq couh daiq daeg vaihseng de bae cimh boux cijveihguenh. De naeuz: “Ngaiz gyaeng hih Baujloz, de heuh gou bae, gouz gou daiq boux hauxseng neix daeuj cimh mwngz, naeuz de miz saeh ij naeuz mwngz ni.” 19 Boux cijveihguenh mwnq dingq boux lienzcangj yienghneix naeuz le, couh rag dawz gij fawz daeg vaihseng Baujloz goq henz he bae, cam de naeuz: “Mwngz miz maz saeh ij naeuz gou ni hax?” 20 Yiengq daeg vaihseng Baujloz han de naeuz: “Gij vunz Youzdaiq gaenq cimciek ndei; gyoengqde ij gouz mwngz ngoenzcog daiq Baujloz bae daengz veijyienzveiq mwnq bae, gyajcang naeuz ij caz cingsuj gij saeh de hwj. 21 Gou gouz mwngz gaejyungh dingq gyoengqde, aenvih gyoengqde miz seiqcib lai vunz demq youq buenqroen hwj ij gaj de. Gyoengqde caemh yiengq Cangqdiq baujcingq goq naeuz: ‘Mbouj gaj Baujloz, gyenhgyez mbouj gw gijmaz.’ Gyoengqde cungj guh ndei cwnjbiq lo, caenh daengj mwngz dapwngq hoh lo.” 22 Boux cijveihguenh dingq le, couh raengq daeg vaihseng Baujloz naeuz: “Gaejyungh hawj vunz rox mwngz gaenq naeuz gij saeh neix naeuz gou ni lo.” De yienghneix raengq le, couh hawj de ok ma lo. 23-24 Daeg vaihseng Baujloz ok ma le, cijveihguenh couh heuh song boux lienzcangj daeuj, raengq song boux de naeuz: “Vaiq bae cwnjbiq songbak vunz buqbingh, caetcib vunz bingmax, songbak vunz dawz hungzinghcangh, caemh ij cwnjbiq duz max he hawj Baujloz naengh. Haemhneix gouj diemjcung ij soengq de bae Gaijsajliqyaq Singz dih Feihlizswh saengjcangj mwnq bae.” 25 Cijveihguenh caemh sij fung saenq he hawj Feihlizswh saengjcangj. Ndaw saenq ndaw de sij naeuz: 26 Feihlizswh saengjcangj, mwngz ndei: 27 Seizneix miz boux he ngaiz Youzdaiq vunz gaemh dawz, ceng di he ngaiz gyoengqde gaj lo. Gou rox de dwg Lozmaj vunz he, yiengq couh daiq bing bae gouq de okma. 28 Gou vih siengj caz cingsuj gyoengqde vihmaz ij gauq de, couh daiq de bae daengz gij vunz Youzdaiq dih veijyienzveiq mwnq bae. 29 Hoeng gajlaeng gou cij rox, gyoengqde gauq de hih dwg gvanhhih Youzdaiq vunz dih funghsuz vaenqdiz lah, gaenhbaenj mbouj famh gijmaz coih hwj hab gaj cixnaeuz hab gyaeng. 30 Gajlaeng miz vunz naeuz gou ni, miz vunz ok geiqmaeuz ij gaj de. Sojhij gou majcangq gietdingh daiq de bae daengz mwngz mwnq, caemh naeuz hawj doengh boux gauq de mwnq bae daengz mwngz mwnq bae youq dangqnaj mwngz gauq de. Muengh mwngz banh gij saeh neix. Couh yienghneix bax. Gwzlauzdiq-Lijsihyaq cijveihguenh muengh mwngz bingzan! 31 Couh yienghneix, gyoengq bing couh ciuq de raengq hih yienghmwnq bae guh, couh daiq Baujloz lienzyeh ganj bae. Gyoengqde bae daengz buenqroen mwnq heuh Anhdizbaqdij he le, 32 daengz daixngeih ngoenz gyoengq buqbingh couh dauq maj binghyingz lo, hawj gyoengq bingmax giqcuz soengq Baujloz bae. 33 Gyoengqde bae daengz Gaijsajliqyaq le, couh dawz fung saenq gyau hawj saengjcangj, caemh gyau Baujloz hawj de. 34 Saengjcangj yawj le, couh cam Baujloz, cam de dwg vunz aen saengjlaw. Gajlaeng de rox Baujloz dwg Gihliqgyah vunz le, 35 couh doiq Baujloz naeuz: “Daengj gij vunz gauq mwngz mwnq daeuj le, gou ij saemj gij saeh mwngz.” Saengjcangj yienghneix naeuz le, couh mingqlingq vunz dawz Baujloz gyaeng haeuj ndaw yazmonz gaxgonq goeng Hihliz lij lix youq goq he bae.
1 Couh yienghneix, goq haj ngoenz le, Yaqnaznizyaq boux goengjsae dajbwiz daeuzdaeuz neix caeuq geij boux Youzdaiq vunz gangj vah couh baenz he caeuq boux lizswh gij coh de heuh Dezdujloz he bae daengz Gaijsajliqyaq, bae daengz saengjcangj mwnq gauq Baujloz. 2 Yiengq Baujloz couh ngaiz daiq okbae. Baujloz ok daeuj le, Dezdujloz goeng lizswh neix couh gauq Baujloz naeuz: 3 “Saengjcangj, mwngz soqlaiz cungj dwg inghmingz naengzganq; youq mwngz dih lingjdauj laj, gyoengqraeuz Youzdaiq sojmiz hih vunz cungj dwg bingzbingz an'an. Aen guek neix caemh vih miz mwngz yawj ndaej gyae hwj miz hih caemh ndaej gaijbienq. Gyoengqraeuz cungj gig docih mwngz. 4 Youq dineix, gou mbouj gamj caiq lai gangj lo, hoengjlau mwngz roxnginh mbwq. Gou caenh gouz mwngz dingq raeuz gyenjdanh gangj geij conz vah couh ndaej lo. 5 “Gyoengqraeuz rox ndaek vunz neix, dwg ndaek vunz yaenghdan he. De dauqcawq bae aux gij vunz Youzdaiq ok daeuj daujluenh. De caemh dwg Nazsajlwz gyauqbaij ndaw de hih boux lingjdauj daeuzdaeuz he. 6 De caemh siengj hawj gunghdenq Cangqdiq bienqbaenz mwnq mbouj hab baiq Cangqdiq he. Yiengq gyoengqraeuz couh gaemh dawz de, siengj ciuq gij fazliz gyoengqraeuz ma saemj de. 7 Hoeng, liuh mbouj daengz Lijsihyaq boux cijveihguenh neix daeuj, dajlaeng gyoengqraeuz ciengj de bae, caiq raengq gij vunz gauq de he daeuj daengz mwngz dineix. 8 Seizneix mwngz gag saemj de yawj, saemj yawj couh rox gyoengqraeuz mbouj dwg luenh gauq de hih lo.” 9 Dezdujloz yienghneix gangj le, youq mwnq sojmiz hih Youzdaiq vunz caemh caezgya dwk ruxrux naeuz: “Dwg hah, saedsaeh dwg yienghneix.” 10 Couh youq mwhneix, saengjcangj couh yinxyinx Baujloz daezsingj Baujloz, hawj de gangj vah. Baujloz raen le, couh naeuz: “Gou rox saengjcangj mwngz youq aen guek neix dang fazguenh baenx haujlai bi lo, sojhij gou caemh haenj youq dangqnaj mwngz vih bonjfaenh gou hwj gangj geij conz vah. 11 Mwngz baex cazcaz yawj he, couh rox gou cijmboujgoq ngamq daeuj daengz Yehluqsajlaengj camhgyah guh lijbaiq ngamq ndaej saek cibngeih ngoenz hwj mah. 12 Gyoengqde gaenhbaenj mbouj raen gou youq gunghdenq Cangqdiq caeuq bouxlawz doxeuq goq, caemh mij raen gou youq veiqdangz cixnaeuz youq ndaw singz hih mwnqlaw yungx gij vunz, aux gij vunz nauh luenh goq. 13 Gyoengqde gauq gou hih, gaenhbaenj mbouj miz cingqgiq hawj mwngz. 14 “Hoeng, miz gienh saeh he gou dauq ij nginh naeuz mwngz ni, couh dwg gyoengqde nginhnaeuz sinq Yehsuh gaen Yehsuh dwg mbouj deng hih, hoeng, gou cingq ngamqngamq dwg sinq de gaen de hwj bae swqhaeuh boux Cangqdiq cojgoeng raeuz. Gou caemh sinq Mohsih dih fazliz caeuq gij saw boux cenz gij vah Cangqdiq soj sij he. 15 Vanzlij miz gou muengh Cangqdiq, caemh caeuq doenghheij Youzdaiq vunz neix doxdoengz, cungj dwg muengh sojmiz hih vunz, mboujguenj vunz ndei vunz yak, cungj ndaej daj rai ndaej dauqlix. 16 Sojhij, gou siengzseiz cungj gag daezsingj bonjfaenh, mboujguenj doiq Cangqdiq haj cixnaeuz doiq vunz, cungj ij guh gij doiq ndaej hwnj liengzsim he. 17 “Gou gaenq daj Yehluqsajlaengj ok ma ndaej geij bi lo. Gou mbat neix bae Yehluqsajlaengj dwg daiq ngaenz bae bang gij vunz gungz caeuq raeuz doxcaemh minzcuz he, caeuq dwg ij bae bwiz Cangqdiq lah. 18 Gyoengqde youq gunghdenq Cangqdiq raen gou hih mwhde, gou ngamqngamq guh gancengh sat, cingq dajbwiz nex, seiqhenz gou gaenhbaenj mij maz vunz; ij baenz hawj vunz nauh luenh hwj! Caenhgag miz geij boux Youzdaiq vunz daj Yaqsiqyaq daeuj sat lo. 19 Hauhnaeuz ij gauq gou nex, wnggai dwg gyoengq vunz neix daeuj daengz mwngz dineix gauq gou cij deng. 20 Mboujmiz couh hawj doenghheij youq dineix hih vunz naeuznaeuz yawj, mwh gou youq dangqnaj lingjdauj ngaiz saemj hih mwhde, gyoengqde raen gou famh maz coih, 21 cizfeih dwg mwh gou youq dangqnaj gyoengqde mwnq hemq naeuz: ‘Ngoenzneix gou ngaiz faenhsou saemj, dwg vih sinq vunzrai ndaej dauqlix,’ gawq neix hoh luh.” 22 Feihlizswh soqlaiz cungj rox gij ndei siuhsiz Yehsuh, sojhij de couh mbouj caiq cam roengzbae lo, caenhgag naeuz: “Daengj Lijsihyaq cijveihguenh daeuj le, gou cij buenqgyez gij saeh faenhsou.” 23 De yienghneix naeuz le, gajlaeng de caiq baij boux lienzcangj he daeuj fuqswz henguenj Baujloz, hoeng mij guenj de baenx rem, caemh ndaej hawj gij caencik beixnuengx baengzyoux de daeuj yawj de, caemh ndaej seizbienh soengq doxgaiq hawj de. 24 Yiengq goq geij ngoenz le, Feihlizswh caeuq mehyah de Dujsihlah (mehyah de dwg Youzdaiq vunz he) song boux de itheij daeuj heuh Baujloz bae, heuh de bae hawj de gangj gvanhhih sinq Yehsuh Gihduz dih saeh. 25 Hoeng couh youq Baujloz gangj daengz gvanhhih guh vunz ij guh vunz ndei, guh vunz mbouj ndaej siengj guh gijmaz couh guh gijmaz, caeuq baezneix Cangqdiq ij saemjbuenq vunz dih gij saeh neix le, Feihlizswh roxnginh raen lau ij rai bae, yiengq couh doiq Baujloz naeuz: “Mwngz seizneix ndaej maj lo; daengj gou ndaej hoengq menhcij caiq heuh mwngz daeuj.” 26 Daj mbat neix le, Feihlizswh siengzseiz heuh Baujloz daeuj caeuq de daujlwnq. De yienghneix guh dwg siengj hawj Baujloz oet cienz hawj de. 27 Gij saeh neix couh yienghneix rwenzrwh baenx song bi baenx lai. De vih ijsiengj bungj gij vunz Youzdaiq, couh vanzlij dwg mbouj coengq Baujloz, dwk daengz Bohgyiuz-Feihswhduh daeuj ciep de dang saengjcangj.
1 Bohgyiuz-Feihswhduh dang saengjcangj ndaej sam ngoenz le, couh daj Gaijsajliqyaq bae Yehluqsajlaengj. 2 Yiengq Yehluqsajlaengj hih doengh goengjsae dajbwiz he caeuq Youzdaiq vunz dih lingjdauj couh bae de mwnq gauq Baujloz, caemhcaiq gouz de, 3 hawj de daiq Baujloz daeuj Yehluqsajlaengj. Gyoengqde yienghneix gouz de dwg vih siengj youq dangjroen demq hwj gaj Baujloz. 4 Hoeng, Feihswhduh dauq han gyoengqde naeuz: “Baujloz seizneix vanzlij gyaeng youq Gaijsajliqyaq. Gou mbouj geijlwh caez couh ij dauq maj mwnq lo.” 5 De vanzlij naeuz: “Gij lingjdauj faenhsou ndaej gaen gou bae hah. Hauhnaeuz boux vunz mwnq miz maz mbouj deng hih, caemh ndaej youq mwnq gauq de hah.” 6 Feihswhduh youq Yehluqsajlaengj aiq youq miz bet ngoenz daengz cib ngoenz yienghneix, couh dauq maj Gaijsajliqyaq lo. Maj daengz daixngeih ngoenz, de couh gaihdingz, couh baij vunz bae daiq Baujloz daeuj. 7 Baujloz ngamq baex daeuj daengz he, doenghheij Youzdaiq vunz daj Yehluqsajlaengj daeuj hih couh humx goqbae, mwngz gawq gwh gawq, doeng an sae an gij coih youqgaenj he daeuj gauq de, hoeng cungj mij saek yiengh ndaej cingqmingz naeuz de famh coih. 8 Gajlaeng, Baujloz buek gyoengqde naeuz: “Mboujguenj dwg doiq Youzdaiq vunz dih fazliz cixnaeuz dwg doiq gunghdenq Cangqdiq cixnaeuz dwg doiq goengjvuengz Lozmaj, gou cungj mbouj famh gijmaz coih.” 9 Hoeng, Feihswhduh siengj bungj gij vunz Youzdaiq, couh cam Baujloz naeuz: “Mwngz nyienh'eiq bae Yehluqsajlaengj, youq mwnq dingq gou buenqgyez gij saeh neix lwi?” 10 Baujloz dingq le, han naeuz: “Seizneix cingq ndwn youq Lozmaj dih fazdingz gwnz de; dineix dwg gou wnggai souh daengz saemjbuenq dih deixfueng. Mwngz caemh gag rox, gou gaenhbaenj mbouj guh gijmaz doiq mbouj hwnj Youzdaiq vunz dih saeh. 11 Hauhnaeuz gou guh gijmaz loek, famh gijmaz hab rai hih coih nex, gou cungj mbouj lau rai. Caiq hauhnaeuz gyoengqde gauq gou hih cungj mbouj miz saedsaeh hih, byawz caemh mbouj ndaej dawz gou gyau hawj gyoengqde. Gou ij yiengq goengjvuengz Lozmaj cangqgauq.” 12 Feihswhduh dingq le, couh caeuq boux gaen henz ndang de cimciek, gajlaeng couh doiq Baujloz naeuz: “Ndaej hah! Giqyienz mwngz ij gyenhciz cangqsuq daengz goengjvuengz mwnq vwz, yiengq mwngz couh bae de mwnq bax.” 13 Goq geij ngoenz le, Yaqgihbaq boux dang dieg neix hih daeuzdaeuz he caeuq dahnuengx de Bwznizgih bae Gaijsajliqyaq Singz, bae yawj Feihswhduh. 14 Song boux de bae mwnq geij ngoenz le, Feihswhduh couh dawz Baujloz dih saeh gangj naeuz Yaqgihbaq boux dang daeuzdaeuz neix ni. De naeuz: “Feihlizswh youq mwnqn'x gyaeng boux vunz he. 15 Mbat gaxgonq gou bae Yehluqsajlaengj, doenghheij Youzdaiq goengjsae dajbwiz he caeuq doengh boux Youzdaiq vunz gangj vah couh baenz he gauq boux de, caemh gouz gou hawj gou buenq de miz coih. 16 Hoeng, gou doiq gyoengqde naeuz: ‘Ciuq Lozmaj vunz dih fazliz, mijyaengz ndaej caeuq boux gauq de mwnq doiqcingq, caeuq mijyaengz miz gihveiq ndaej bonjfaenh gag buek haem, couh mbouj ndaej buenq hawj boux de miz coih.’ 17-18 “Gajlaeng miz geij boux Youzdaiq vunz gaen gou ma doiqyungz daez gij saeh de. Gou naemqnaeuz miz gijmaz daixsaeh lah, hawj gou daengz daixngeih ngoenz couh vaiqdi gaihdingz, mingqlingq hawj vunz daiq boux de okdaeuj. Gizsaed, gyoengqde gauq hih, gaenhbaenj mbouj dwg gijmaz daixsaeh, 19 cijmboujgoq dwg gvanhhih gyoengqde dih funghsuz vaenqdiz caeuq gvanhhih boux gij coh heuh Yehsuh hih boux neix. Boux de gaenq rai lo, hoeng, de dauq naeuz boux de vanzlij lix. 20 Doiq gij saeh neix, gou gaenhbaenj mbouj rox ij baenzlaw guh. Yiengq gou couh cam boux de, yawj de nyienh mbouj nyienh'eiq bae Yehluqsajlaengj, bae mwnq dingq saemjbuenq gij saeh neix. 21 Hoeng, boux de gouz gou, hawj gou louz de roengzma. De siengj hawj goengjvuengz Lozmaj saemjbuenq. Sojhij gou couh mbouj coengq de, daengj seizlaw cij gam de bae daengz goengjvuengz Lozmaj mwnq.” 22 Yaqgihbaq dingq le, doiq Feihswhduh naeuz: “Gou siengj dingqdingq boux de gangj vah.” Yiengq Feihswhduh han naeuz: “Ndaej hah, ngoenzcog mwngz couh daeuj dingq bax.” 23 Couh yienghneix, daengz ngoenz daixngeih, Yaqgihbaq caeuq dahnuengx de Bwznizgih, caeuq geij boux gywnhguenh caeuq ndaw singz mwnq dih doengh boux miz gienz he bae daengz lijdangz. Gyoengqde haeuj bae hih mwhde, cungj cienfanh nauhyied he. Yiengq Feihswhduh couh mingqlingq hawj Baujloz haeuj bae. 24 Baujloz haeuj bae le, Feihswhduh couh naeuz: “Yaqgihbaq goeng'ak caeuq dineix hih gak boux hax, cingj faenhsou yawj boux vunz neix bax. De couh dwg boux sojmiz Youzdaiq vunz youq Yehluqsajlaengj caeuq youq dineix yiengq gou gauq de hih caeuq gouz gou hawj gou buenq de rai hih boux neix lo. 25 Hoeng gou caz mbouj raen de famh gijmaz hab rai dih coih hah, caiq gyacangq de yiengq goengjvuengz Lozmaj cangqgauq hah, sojhij gou gyezdingq gam de bae. 26 Cijmboujgoq gou mbouj miz boux vunz neix dih gijmaz saizliuq ndaej gyau hawj goengjvuengz Lozmaj hah, sojhij gou daiq de daeuj daengz dangqnaj faenhsou, dwzbez dwg daengz dangqnaj Yaqgihbaq goeng'ak neix, muengh dunghgoq gak boux mbat neix simjcaz ndei le, ndaej miz giqdij saizliuq cangqbauq goengjvuengz. 27 Fanjcingq ciuq gou ma yawj, gam soengq vunzfamh, mbouj miz giqdij saizliuq dwg mbouj hab hih.”
1 Yaqgihbaq dingq Feihswhduh yienghneix gangj le, couh doiq Baujloz naeuz: “Seizneix bihcwnj hawj mwngz gag gangjgangj yawj.” Yiengq Baujloz vadvad fawz couh gaihcij gag buek naeuz: 2 “Yaqgihbaq goeng'ak hax, ngoenzneix gou ndaej youq dangqnaj mwngz buek doenghgij vunz Youzdaiq gauq gou he, caemh ndaej baij gij dauhleix gou, hawj gou ndaej miz naj raixcaix! 3 Dwzbez hawj vunz engq sim'angq hih dwg mwngz doiq Youzdaiq vunz dih laehbeih yawjfap caeuq gyoengqde dih gak cungj doxbuek cungj rox sugseg liux lo. Sojhij gou gouz mwngz naiqsim dingq gou baij gij dauhleix gou. 4 “Gou dwg Youzdaiq vunz; daj lij iq daengz seizneix, cungj dwg caeuq gij minzcuz bonjfaenh youq, caemh youq Yehluqsajlaengj youq goq. Gou baenzlawz doiq vunz, Youzdaiq vunz caemh rox. 5 Hauhnaeuz gyoengqde nyienh'eiq guh cingqyinz nex, couh ndaej cingqmingz gou dwg gaep haeuj Youzdaiq vunz ceiq yiemzgwz dih gyauqbaij, couh dwg Fazliqcaiq baij he lo. 6 Gou seizneix ndwn youq dineix ngaiz saemj, dwg vih muengh Cangqdiq doiqyienh de gaxgonq doiq gij cojgoeng raeuz baujcingq goq hih. 7 Gij baujcingq neix, cibngeih aen cuz raeuz ngwnzngoenz cungj swqhaeuh Cangqdiq hwj muengh ndaej he. Ox, goeng'ak hax, gou couh dwg vih muengh gij neix hwj ngaiz Youzdaiq vunz gauq hih lo. 8 Faenhsou vihmaz naemqnaeuz mbouj miz gij saeh Cangqdiq hawj vunzrai ndaej dauqlix gij saeh neix nej? 9 “Doenghbaez gou caemh naemqnaeuz gyenhgyez fanjdeiq gij vunz sinq Mbanj Nazsajlwz vunz dih Yehsuh he cij deng. 10 Sojhij couh youq Yehluqsajlaengj yienghneix guh goq, dawz baenx haujlai sinq Yehsuh dih vunz gyaeng haeuj ndaw lauz bae, aenvih gou ndaej dajlaeng doengh goengjsae dajbwiz gaem ndaej gij gienz he. Gyoengqde ngaiz gaj, gou caemh miz faenh ndaej gyezdingq hwj. 11 Gou vanzlij siengzseiz bae gak aen veiqdangz dub gyoengqde, haep hawj gyoengqde naeuz Yehsuh dwg gyaj hih. Gou haenq gyoengqde ij rai bae, simqciq vanzlij bae daengz vaihguek hih doenghheij cingzciq he bae haih gyoengqde. 12 “Hoeng couh youq mwh gou ndaej gaem gij gienz doengh goengjsae dajbwiz mwnq hawj gou he caeuq gij mingqlingq mwnq bae Daqmajswqgwz hih mwhde, 13 youq dangjroen, daihgaiq dwg mwh gyangjngoenz cingq he, gou sawqmwh yawjraen miz ndaek rag rongh myig myiengzmyiengz he, beij gyangjngoenz lij rongh he, daj gwnzmbwn ceq roengz seiqhenz gou caeuq doengh boux caeuq gou itheij bae he daeuj. 14 Gyoengqraeuz bouxboux cungj ngaiz laemx roengz doem bae. Gou vanzlij dingqri miz sing, dwg gangj Hihbwzlaiz vah he, doiq gou naeuz: ‘Saujloz, Saujloz! Mwngz vihmaz ij haih gou? Mwngz caemh luj aeu ha bae dik oen, yied dik yied coeg.’ 15 “Gou dingqri yienghneix le, couh cam naeuz: ‘Goengjau hax, mwngz dwg byawz lah?’ “Yiengq gij sing mwnq han naeuz: ‘Gou couh dwg boux ngaiz mwngz haih hih Yehsuh hah. 16 Mwngz vaiq ndwn hwnjdaeuj! Gou cingqcingz daegnaengh yienh hawj mwngz raen he dwg ij hawj mwngz guh bouxhoiq gou lah; mwngz ij dawz mwngz ngoenzneix soj yawjraen hih caeuq baezneix gou ij gangj naeuz mwngz ni hih cungj bae gangj naeuz vunz ni liux bae. 17 Gou ij daj gij vunz Youzdaiq caeuq gij vunz linghvaih minzcuz he gouq mwngz okma. 18 Gou baij mwngz bae laeng gyoengqde mwnq, hawj gyoengqde singqsag hwnjdaeuj, hawj gyoengqde ndaej daj ndaw laep cienq daengz mwnq rongh he, ndaej daj Sajdanq mwnq duet ok gij gaemhanh de, ndaej bae daengz ndaw rumq Cangqdiq mwnq bae, youhcaiq vih sinq gou hwj ndaej mienx coih, ndaej caeuq gij vunz sinq gou he doxdoengz ndaej gaep haeuj guek Cangqdiq.’” 19 Baujloz vanzlij caiq naeuz: “Sojhij, Yaqgihbaq goeng'ak hax, gou mbouj gamj famh gij vah daj gwnzmbwn daeuj raengq gou hih nej. 20 Gou couh sien bae Daqmajswqgwz, gajlaeng daengz Yehluqsajlaengj, caiq gajlaeng caiq bae daengz Youzdaiq sojmiz hih dieg, simqciq daengz lingh minzcuz bae, gienq gyoengqde daj ndaw sim nginh loek gaij goqma sinq Cangqdiq, vanzlij guh gij ndaej cingqmingz cingqcaen dwg caensim gaijgoq he. 21 Couh dwg vih gij neix hwj gou youq ndaw gunghdenq Cangqdiq ngaiz gij vunz Youzdaiq gaemh dawz ij gaj gou lo. 22 Hoeng, caeklaiq gou ndaej do gij fuk Cangqdiq, vanzlij ndaej lix daengz seizneix, hawj gou ndaej youq dineix doiq goeng'ak cixnaeuz doiq beksingq gangj vah. Gou soj gangj hih caemh ngamq dwg doengh boux cenz gij vah Cangqdiq caeuq Mohsih soj gangj goq hih ij fatseng hih gij saeh mwnq lo, 23 couh dwg naeuz Gihduz gaengjdingq ngaiz vunz haih, caemh gaengjdingq ndaej dwg daixit boux daj rai ndaej dauqlix hwj ndaej hawj gij vunz Youzdaiq caeuq gij vunz linghvaih minzcuz he rox, rox gyoengqde caemh ndaej ndaej gouq.” 24 Baujloz yienghneix baij dauhleix le, Feihswhduh couh hemq hwnjdaeuj naeuz: “Baujloz! Mwngz vangh lo maz! Dwg mbouj dwg ndaek dungx saw mwngz daiq lai lai lo, hawj mwngz fatmwnh lo.” 25 Baujloz dingq le, han naeuz: “Feihswhduh saengjcangj hax, gou mbouj dwg vangh law. Gou soj gangj hih cungj dwg saedsaeh, mbouj miz saek di gyaj. 26 Gou caemh rox goeng'ak Yaqgihbaq caemh rox gij saeh neix. Sojhij gou cij gamj youq dangqnaj de miz maz gangj maz lah, aenvih mij saek yiengh ndaej deuz ok lwgra de, caiq gyacangq gij saeh neix bouxboux cungj caemh rox.” 27 Baujloz yienghneix gangj le, fanjgoqma cam Yaqgihbaq naeuz: “Goeng'ak hax, mwngz sinq boux cenz gij vah Cangqdiq lwi? Hoeng gou rox mwngz sinq hwj.” 28 Yaqgihbaq dingq le, han Baujloz naeuz: “Nanzdauh mwngz gangj geij gawq vah couh ndaej gangj hawj gou guh Yehsuh dih lwgsae lo mah.” 29 Yiengq Baujloz han naeuz: “Mboujguenj vah lai vah noix, gou siengzseiz yiengq Cangqdiq soj gouz hih cungj dwg muengh mwngz caeuq ngoenzneix youq dineix sojmiz hih vunz ndaej luj gou yienghneix dwg Yehsuh dih lwgsae, cijmboujgoq ciengeiz gaej luj gou ngoenzneix mbouj ndaej swqyouz.” 30 Baujloz yienghneix naeuz le, Yaqgihbaq couh ndwn hwnjdaeuj doiq okma. Goeng saengjcangj caeuq Bwznizgih caeuq youq mwnq hih vunz cungj caemh gaen doiq okma lo. 31 Gyoengqde doiq okma le, couh caezgya lwnh naeuz: “Boux vunz neix gaenhbaenj mbouj famh gijmaz hab rai hab goenj dih coih hah.” 32 Gajlaeng Yaqgihbaq doiq Feihswhduh naeuz: “Hauhnaeuz de mbouj yiengq goengjvuengz Lozmaj cangqsuq nex, couh ndaej coengq de lo.”
1 Feihswhduh gyezdingq hawj gyoengqraeuz naengh ruz bae Iqdaqliq le, couh dawz Baujloz caeuq doenghheij vunzfamh gyau hawj boux Lozmaj lienzcangj heuh Youzliuz he. 2 Yiengq gyoengqraeuz couh hwnj aen ruz daj Yaqdaqmijdenz daeuj he. Aen ruz neix dwg yiengq henz haij Yaqsiqyaq dih geij mwnq sokruz he bae. Caeuq gyoengqraeuz caemh naengh aen ruz neix bae hih miz aen saengj Majgizdoenq dih aen singz Dezsajloznizgyah dih Yaqlijdazguj boux neix. 3 Daengz daixngeih ngoenz, gyoengqraeuz bae daengz sokruz Sihdoenq. Youzliuz dwzbez cauqguq Baujloz, hawj de hwnj ruz ma bae yawj gij baengzyoux de, caemh bihcwnj hawj gij baengzyoux de daih de, soengq doxgaiq hawj de. 4 Gajlaeng gyoengqraeuz caiq daj mwnq naengh ruz bae. Aenvih mwhde ngig rumz, aen ruz couh ndij goq henz hamq Caiqbujluqswh mwnq boihrumz he bae. 5 Aen ruz hoi goq Gihliqgyah Saengj, Bangzfeihliqyaq Saengj, bae daengz Lijgyah Saengj dih Meijlah Singz. 6 Youq mwnq, Youzliuz lienzcangj raen aen ruz daj Yaqlizcanhdaq daeuj he; ngamqluj aen de ij bae Iqdaqliq. Yiengq de couh hawj gyoengqraeuz hwnj aen ruz mwnq bae. 7 Hoeng, aen ruz bae cienfanh menh he, bae baenx geij ngoenz hohloeng, cij ngamqngamq ndaej bae daengz doiqmienh aen singz Gwznizswq. Aenvih ngig rumz daiq youqgaenj lai, gyoengqraeuz vih ij baex rumz mbouj ndaej ciuq fueng yienzlaiz he bae lo, bik mbouj ndaej ngaiz van goq aen dauj Gwzlijdwz mwnq boihrumz he, daj doiqmienh dieg Sajmohniz goq bae. 8 Gyoengqraeuz ndij goq hamq haij Gwzlijdwz bae, bae hwj cienfanh dwgrengz he, gajlaeng cijngamq ndaej bae daengz mwnq dieg heuh Sokruz Ndei he gaenh aen singz heuh Lahsihyaq he. 9 Aenvih mbouj swnh rumz, aen ruz bae hwj cienfanh nguh he. Gyoengqraeuz youq gwnz ruz hih cizgyenh caemh caez, guh hwj cauhgoq aen ciet Cueg Coih lo. Goq mwhneix le, aen ruz youq gwnz haij couh gig veizyiemj. Sojhij, Baujloz couh gienq gyoengq vunz naeuz: 10 “Gak boux hax, hauhnaeuz gyoengqraeuz cungj lij giqcuz naengh ruz bae haem nex, ciuq gou yawj hax, cungj gig veizyiemj. Mbouj danhcij naeuz doxgaiq caeuq ruz satsoq, daiqlienz gyoengqraeuz cungj caemh ngaiz satsoq.” 11 Hoeng, goeng lienzcangj mbouj sinq Baujloz, cingxnyienh sinq goeng ruzcangj caeuq sinq goeng cawjruz. 12 Caemhcaiq gyacangq sokruz neix dingz ruz goq doeng mbouj daiq baenz geijlai, sojhij dingxfaen lai vunz cungj yauhgyiuz giqcuz naengh ruz bae. Gyoengqde naemj saekseiz lij ndaej bae daengz Feihnizgih goq doeng laem. (Feihnizgih dwg sokruz aen dauj Gwzlijdwz he. Sokruz neix dwg sokruz ndei he, aenvih sokruz neix hih mbiengj he dwg yiengq doeng gap baek he, mbiengj he dwg yiengq doeng gap namz he.) 13 Couh youq mwhneix, ngamqluj miz rumz namz ci goqdaeuj fexfex, yiengq gyoengqde couh naemq ngamqluj lo, sojhij couh gaihcij caiq hoi ruz bae lo. Gyoengqde couh ndij goq henz haij Gwzlijdwz bae. 14 Hoeng, ngamq bae mbouj geij caez, couh miz ndaek raq rumz hung he daj gwnz dauj bongx goqdaeuj. (Cungj rumz neix dwg heuh Rumz Doengbaek.) 15 Aen ruz ngaiz raq rumz neix bongx; gyoengqraeuz lienz vunz daiq ruz cungj ngaiz bongx deuz. 16 Aenvih ruz ngaiz bongx bae daengz gaenh aen dauj iq heuh Gauhdaq dih mwnq boihrumz he, gajlaeng gyoengqraeuz uj hwj mouyou liux cij ndaej dawz aen ruz iq riengh youq rieng ruz duengq hwnj gwnz ruz bae. 17 Gajlaeng couh aeu cag ma goenj aen ruz hung ndei hwj, fuengz aen de ngaiz raemx hung rumz hung bongx dawz siksanq bae. Gannaeuz gyoengqde goenj ndei aen ruz lah, hoeng, vanzlij lau aen ruz ngaiz gak youq anjsa ndaw raemx heuh Caiqwjdij mwnq, yiengq couh coengq fan fanh roengzma, ajcaih aen ruz biu vangraeh. 18 Rumz hung vanzlij dwg bongx mbouj dingz. Yiengq daengz ngoenz daixngeih le, gyoengqde fug gveng gij doxgaiq gwnz ruz roengz haij bae lo. 19 Daengz daixsam ngoenz, gyoengqde daiqlienz gwnz ruz soj yungh hih cungj gveng lo. 20 Gyoengqraeuz bijlienz baenx geij ngoenz cungj mij raen gyangjngoenz caeuq ndaundeiq. Rumz hung vanzlij dwg bongx hwj youqgaenj raixcaix, guh hwj gyoengqraeuz cungj roxnginh mij'z muengh lo. 21 Gwnz ruz sojmiz hih vunz bijlienz baenx geij ngoenz cungj mij gw doxgaiq lo. Baujloz couh ndwn hwnjdaeuj doiq gyoengq vunz naeuz: “Gak boux hax, hauhnaeuz faenhsou senqsi cix dingq gij vah gou, mbouj lizgaih Gwzlijdwz nex, couh mbouj ngaiz roeb daengz yienghneix lo. 22 Hoeng, seizneix gou naeuz faenhsou, coengqsim bax. Faenhsou dineix mij'z vunz ngaiz rai law; ceiq lai aen ruz neix ngaiz satsoq, 23 aenvih ngoenzlwenz singjngwnz, gou soqlaiz cungj swqhaeuh dih Cangqdiq, bouxcawj gou, de baij bouxcai de daeuj, doiq gou naeuz: 24 ‘Baujloz, mwngz gaej lau! Mwngz bietdingh ndaej ndwn youq dangqnaj goengjvuengz Lozmaj. Cangqdiq caemh ij vih mwngz hwj gouq baenx cenz ruz dih vunz.’ 25 Sojhij, gak boux coengqsim bax! Gou sinq Cangqdiq baenzlaw doiq gou gangj caemh gaengjdingq baenzlaw guh. 26 Cijmboujgoq gyoengqraeuz gaengjdingq ij ngaiz biu bae daengz aen dauj he.” 27 Yiengq daengz daixcibseiq ngoenz hih ngwnz mwnq, aen ruz vanzlij dwg youq gwnz haij Yaqdijlijyaq biu bae biu dauq. Daihgaiq daengz gyangjngwnz, doengh boux fouruz naemqnaeuz aen ruz gaenq gaenh dieg hawq lo. 28 Gyoengqde couh bau diuz cag damq laeg mwnq roengz haij bae, yiengq damq miz cibngeih ciengh laeg. Gajlaeng caiq doxbae di he le, caiq damq, vanzlij miz gouj ciengh laeg. 29 Gyoengqde raen yienghneix le, cungj lau aen ruz ngaiz bungq dawz rin, couh daj rieng ruz bau seiq gaiq ngaeu roengzbae, hawj aen ruz camqciz dingz youq mwnq, muengh dingx ndaej daengz ranzrongh. 30 Gajlaeng, gyoengq fouruz siengj deuz ok aen ruz neix, couh dawz aen ruz iq coengq roengz haij bae, gyajcang daj raeuj ruz bau ngaeu roengzbae hwj. 31 Baujloz raen yienghneix le, couh doiq boux lienzcangj caeuq gyoengq binggyep naeuz: “Doenghheij vunz neix mbouj daengj youq gwnz ruz youq, yaepm'x gwnz ruz neix sojmiz hih vunz cungj ngaiz byaeu liux.” 32 Gyoengq binggyep dingq le, couh raemj gat diuz cag aen ruz iq, ajcaih aen de fouz bae vangraeh. 33 Couh yienghneix, daengz ranz ij rongh lo, Baujloz couh gienq gyoengq vunzlai gw doxgaiq. De naeuz: “Faenhsou yousim youheiq baenx cibseiq ngoenz mbouj gw gijmaz lo. 34 Gou seizneix gienq faenhsou gw di doxgaiq he, yiengq cij ndaej dingx roengzbae hah, aenvih faenhsou dineix sojmiz hih vunz lienz dug byoem he cungj mbouj ngaiz sienghaih.” 35 Baujloz gangj gij vah neix le, couh dawz bingj hwnjdaeuj, youq dangqnaj vunzlai docih Cangqdiq le, couh euj hwj gw. 36 Gyoengq vunz raen yienghneix le, couh coengqsim, caemh gaen de gw lo. 37 (Caeuq raeuz caemh naengh aen ruz neix hih miz songbak caetcib roek vunz.) 38 Gyoengq vunz gw imq le, vih ij hawj aen ruz haemq mbaeu, couh dawz gij mienh gwnz ruz gveng roengz haij bae. 39 Yiengq daengz ranzrongh lo, gyoengqde nginh mbouj ok mwnq dieg mwnq dwg mwnqlaw, hoeng, dauq raen miz mwnq haijvanh he, caemhcaiq miz anjsa he. Gyoengqde couh siengj banqfaz hawj aen ruz youq mwnq dingz. 40 Gajlaeng, gyoengqde couh raemj doengh diuz cag gij ngaeu gat, ajcaih doenghgij ngaeu youq ndaw haij, caemh gej diuz cag cug baj dox, caiq rag fan fanh raeuj ruz hwnjdaeuj, swnh rumz ci haeuj hamq ma. 41 Hoeng, ngaiz roeb daengz lueng raemx git he. Aen ruz aen raeuj de ngaiz gak youq mwnq raemx dinj de; aen rieng ruz de ngaiz raemx git cung hwj vaih liux. 42 Gyoengq binggyep raen yienghneix le, cungj lau gyoengq vunzfamh ndaem raemx deuz, couh siengj gaj gyoengqde bae. 43 Hoeng, boux lienzcangj mwnq siengj gouq Baujloz, couh mbouj hawj gyoengqde yienghmwnq guh. Gajlaeng, de mingqlingq doenghgij vunz rox riuz raemx he diuq roengz raemx bae sien youz hwnj hamq. 44 Lij lw hih vunz, yungh benj cixnaeuz yungh gijmaz gwnz ruz ndaej fouz hih youz hwnj hamq. Couh yienghneix, gwnz ruz sojmiz hih vunz cungj ndaej gouq liux.
1 Gyoengqraeuz ndaej hwnj hamq ma le, cij rox naeuz aen dauj mwnq heuh Majwjdah. 2 Gwnz dauj mwnq hih vunz doiq gyoengqraeuz gig ndei, caux feiz hawj gyoengqraeuz byoq, aenvih mwhde cingq fwn doek, cixcaemh nit. 3 Baujloz dawz lwg liu he coengq haeuj ndaw feiz bae. Yiengq ndaw lwg liu mwnq miz duz ngwzdoeg he, ngaiz feiz ndat le, couh ok daeuj, haeb dawz gij fawz de mbouj coengq. 4 Yiengq gij vunz raen duz ngwzdoeg youq gwnz fawz Baujloz le, couh lwnh naeuz: “Boux vunz neix gaengjdingq dwg vunzfamh gaj vunz he; gannaeuz daj ndaw haij ndaej deuz rai lah, hoeng, mbwn cungj mbouj nyiuz de.” 5 Couh youq mwhneix, Baujloz engq faenq duz de hwnj gwnz feiz bae; bonjfaenh de mij naih saek yiengh. 6 Gyoengq vunz mwnq cungj naemqnaeuz gij fawz de gaengjdingq ij ngaiz gawh, cixnaeuz de gaengjdingq ij ngaiz laemx roengzbae rai lah. Laixlawz, goq baenx haujlai caez lo, cungj mij raen de ngaiz saek yiengh, gajlaeng couh vaiqdi gaij naeuz: “Ox, de dwg cwnzsien!” 7 Liz mwnq mbouj geijlwh gyae miz reih hwj; gij reih mwnq dwg gij reih Buqbwzliuz. De dwg aen dauj mwnq dih goeng daeuzdaeuz he. De hawj gyoengqraeuz bae laeng de youq, caemh daih gyoengqraeuz sam ngoenz. 8 Mwhde, daxboh de ngaiz bingh fatndat caeuq oksiq, ninz youq gwnz congz. Yiengq Baujloz rox le, couh haeuj ndaw fungh de bae yawj de, bang de gouz Cangqdiq, oemj fawz hwnj gwnz ndang de bae yw gij bingh de ndei. 9 Yiengq daj baez mwnq hwnj, aen dauj mwnq sojmiz miz bingh hih vunz cungj daeuj hawj Baujloz yw, caemh bouxboux cungj yw ndaej ndei. 10 Sojhij gyoengqde doiq gyoengqraeuz cienfanh ndei he. Gajlaeng, gyoengqraeuz ij daj mwnq naengh ruz okma hih mwhde, gyoengq vunz mwnq soengq baenx haujlai doxgaiq hawj gyoengqraeuz ij yungh hih. 11 Goq sam ndwen le, gyoengqraeuz dap aen ruz daj Yaqlizcanhdaq daeuj he. Aen ruz neix miz coh hwj; gij coh de dwg heuh Suengjseng. Aen ruz neix dingz youq aen dauj neix goq doeng he. 12 Gyoengqraeuz dap aen ruz neix bae daengz Siqlahguj le, couh youq mwnq dingz sam ngoenz. 13 Gajlaeng, caiq daj mwnq giqcuz naengh ruz gvax goq mwnq dawz mwnq bae Liqgih'ungh. Bae daengz daixngeih ngoenz le, miz rumz namz, sojhij sam ngoenz couh bae daengz Buqdiuhliq lo. 14 Youq mwnq raen miz geij boux lwgsae; gyoengqde cingj gyoengqraeuz youq mwnq caet ngoenz. Gajlaeng, gyoengqraeuz couh byaij bae Lozmaj lo. 15 Yiengq, youq Lozmaj Singz hih doenghheij lwgsae he rox naeuz gyoengqraeuz ij bae le, couh bae daengz aen haw heuh Yaqbijuh he caeuq bae daengz mwnq heuh Sam aen Lijseq he daeuj ciep gyoengqraeuz. Baujloz raen gyoengqde le, couh docih Cangqdiq, caemh roxnginh mbeihung haujlai lo. 16 Gyoengqraeuz bae daengz Lozmaj le, boux lienzcangj mwnq bihcwnj hawj Baujloz gag youq aen ranzco de youq, hoeng boux bing gam de mwnq caemh caeuq de youq mwnq hwj. 17 Yiengq goq sam ngoenz le, Baujloz couh cingj gij Youzdaiq vunz dih lingjdauj daeuj, cingj gyoengqde daeuj doiq gyoengqde naeuz: “Gak boux beixnuengx hax, gou cungj mij guh gijmaz hwj famh gij vunz aen minzcuz neix caeuq famh gij cojgoeng raeuz hih laehbeih haem. Hoeng, gou youq Yehluqsajlaengj dauq ngaiz vunz gyaeng hwnjdaeuj, caiq ngaiz vunz gam soengq bae hawj gij vunz Lozmaj. 18 Gyoengqde saemj gou, raen gou mij famh gij hab rai dih coih haem le, couh siengj coengq gou lo. 19 Hoeng, gij vunz Youzdaiq mbouj fug, guh hawj gou mij banqfaz, cij yiengq goengjvuengz Lozmaj cangqsuq lah; gaenhbaenj mij gijmaz naeuz ij gauq gij minzcuz raeuz law. 20 Couh dwg vih gij neix hwj gou cij cingj faenhsou daeuj caeuq gou raennaj lah. Gou dwg vih gij vunz Hijswzlez soj muengh hih boux mwnq hwj ngaiz lienh, ngaiz gyaeng lah.” 21 Gyoengqde dingq le, couh doiq Baujloz naeuz: “Gvanhhih mwngz dih saeh, raeuz gaenhbaenj mbouj rox, caemh mij sou ndaej maz saenq naeuz mwngz youq Youzdaiq Saengj fatseng gijmaz saeh, caemh mij saek boux daeuj naeuz gyoengqraeuz ni naeuz mwngz miz maz mbouj ndei dih saeh. 22 Hoeng, gyoengqraeuz seizneix siengj dingqdingq mwngz yawj, yawj mwngz ij miz gijmaz vah gangj, aenvih gyoengqraeuz caemh rox aen gyauqbaij neix dauqcawq cungj ngaiz vunz fanjdeiq.” 23 Gajlaeng gyoengqde couh caeuq Baujloz dingh ngoenz he hwj doxcomz. Yiengq daengz ngoenz mwnq, miz haujlai vunz bae daengz mwnq Baujloz youq hih mwnq. Baujloz daj doengxhaet daengz doengxhaemh cungj dwg doiq gyoengq vunz gangj gvanhhih guek Cangqdiq dih ndei siuhsiz. De caemh yungh Mohsih dih fazliz caeuq gij saw boux cenz gij vah Cangqdiq he ma gangj, gangj hawj gyoengq vunz sinq Yehsuh. 24 Yiengq, miz hih vunz dingq le, caemh sinq lo; miz hih vunz dingq le, dauq mbouj sinq. 25 Gyoengq vunz gak vunz yawjfap cungj mbouj doxdoengz, yiengq couh ij sanq lo. Gyoengq vunz ij sanq bae hih mwhde, Baujloz couh naeuz gawq he. De naeuz: “Hoenzsaenz Cangqdiq hawj Hijcaiqyaq, boux cenz gij vah Cangqdiq neix, hawj de doiq gij cojgoeng faenhsou soj gangj hih cungj dwg deng hih! 26 Hoenzsaenz Cangqdiq naeuz: Mwngz bae naeuz gij minzcuz neix ni, naeuz: ‘Faenhsou dingq le caiq dingq, hoeng, baenzlaw dingq cungj dingq mbouj rox; yawj le caiq yawj, hoeng, baenzlaw yawj cungj yawj mbouj ok. 27 Aenvih gyoengq vunz neix hih sim mazmwnh lo, gij rwz gyoengqde caet lo, ra cix laep lo. Mijn'x, cehra gyoengqde couh yawj ndaej raen, rwz caemh ndaej dingqri, sim caemh singqsag, caemh daj ndaw sim nginh loek gaijgoq, gou couh yw gyoengqde ndei.’” 28 Baujloz vanzlij caiq naeuz: “Sojhij, faenhsou wnggai rox, Cangqdiq gouq vunz dih siuhsiz gaenq cenz daengz lingh minzcuz lo; gyoengqde caemh dauq dingq lo.” 29 Baujloz gangj daengz gawq vah neix le, gij vunz Youzdaiq cungj doxeuq foenxfoenx hwj deuz lo. 30 Gajlaeng Baujloz youq de co hih ranz youq song bi; fanjcingq miz vunz daeuj laeng de hih, de cungj daih gyoengqde. 31 De caemh mbeihung hwj cenzgangj guek Cangqdiq dih ndei siuhsiz caeuq cenzgangj gvanhhih bouxcawj raeuz Yehsuh Gihduz hih, caemh mij raen miz vunz daeuj lanz de.
1 Gou dwg Baujloz, dwg bouxhoiq Yehsuh Gihduz, caemh dwg Cangqdiq senj daeuj guh boux dwzbaijyienz cenzgangj Cangqdiq dih ndei siuhsiz he. 2 Gij ndei siuhsiz neix, couh dwg Cangqdiq baujcingq goq hih; gij baujcingq neix, de gaenq senqsi cix hawj doengh boux cenz gij vah de hih youq ndaw Singqgingh sij naeuz goq lo. 3 Gij ndei siuhsiz neix, couh dwg gangj gvanhhih daeglwg de, bouxcawj raeuz Yehsuh Gihduz dih saeh. Aeu de seng youq lajmbwn ma gangj, de dwg Daqveiq goengjvuengz neix dih doengh daih gajlaeng, 4 hoeng, aenvih Hoenzsaenz Cangqdiq hawj de daj rai ndaej dauqlix, de yungh gij akak rengzrengz bonjfaenh de ma cingqmingz de, yienghneix couh mingzmingz ndaej hawj vunz rox de dwg daeglwg Cangqdiq, dwg bouxcawj raeuz Yehsuh Gihduz, Cangqdiq baij daeuj dih vuengz. 5 Gannaeuz gou mbouj boiqndaej de doiq gou baenxlai haijliengh lah, hoeng, gou ndaej ro de, vih de hwj guh boux dwzbaijyienz he youq lajmbwn cenzgangj gij ndei siuhsiz de, hawj gij vunz linghvaih minzcuz he dingq de, sinq de. 6 Daiqlienz doengh boux faenhsou youq Lozmaj Cangqdiq senj he, cungj dwg gvi haeuj gij vunz Yehsuh Gihduz. 7 Gou sij fung saenq neix dwg sij hawj gij vunz faenhsou youq Lozmaj Cangqdiq aiq he, caemh dwg Cangqdiq senj ma guh gij vunz de he. Muengh daxboh raeuz Cangqdiq caeuq bouxcawj raeuz Yehsuh Gihduz doiq faenhsou haijliengh, soengq bingzan hawj faenhsou! 8 Youq dineix, gou vih faenhsou hwj dunghgoq Yehsuh Gihduz daeuj docih Cangqdiq, aenvih faenhsou sinq Gihduz dih sinqsim gaenq cenz bae baenx cenz lajmbwn lo. 9 Cangqdiq rox gou bienqnaengz haenh de gouz de hih mwhde caemh dwen daengz faenhsou. De ndaej cingqmingz gou soj gangj hih vah dwg saedsaeh hih. Boux Cangqdiq neix couh dwg gou caensim caen'eiq swqhaeuh de, cenzgangj gvanhhih daeglwg de dih ndei siuhsiz he. 10 Gou caenhrox gouz de, muengh de ciuq gij cawjeiq de hawj gou ndaej miz gihveiq bae yawj faenhsou. 11 Gou muengh ndaej raen faenhsou, ndaej soengq fuk hawj faenhsou, hawj faenhsou sinq Gihduz dih sim ndaej gyenhdingq. 12 Gou yienghneix naeuz, gizsaed dwg siengj hawj faenhsou caeuq gou cungj caezgya ndaej miz gyenhdingq dih sinqsim sinq Gihduz, ndaej caezgya doxbang doxson. 13 Gak boux beixnuengx hax, gou muengh faenhsou rox, gou gaenq miz geij mbat ijsiengj bae faenhsou mwnq, youq faenhsou mwnq ndaej daiq haujlai vunz sinq Yehsuh, caemh luj gou bae daixlingh aen minzcuz yienghmwnq ityiengh. Hoeng, cungj miz gij saeh he gaz dawz hwj mbouj hawj gou bae. 14 Mboujguenj dwg mbouj dwg Hihlaz vunz, caeuq mboujguenj dwg miz mbouj miz vaenzvaq, caemh mboujguenj dwg vunz gvai cixnaeuz vunz ngawz, gou cungj miz caiq yiemq gyoengqde. 15 Sojhij gou cungj siengj dawz gij ndei siuhsiz neix cenz hawj faenhsou youq Lozmaj hih vunz. 16 Gou mbouj roxnginh raen Cangqdiq dih ndei siuhsiz dwg cungj saetnyaenq he nej, aenvih gij ndei siuhsiz neix dwg Cangqdiq gouq sojmiz sinq de hih vunz dih rengz. Gaxgonq dwg sien cenz naeuz gij vunz Youzdaiq ni, gajlaeng cij cenz daengz linghvaih minzcuz hih vunz. 17 Aenvih gij ndei siuhsiz neix ndaej hawj vunz rox baenzlaw ndaej youq ndaw lwgra Cangqdiq bienqbaenz boux mij'z coih he. Gij neix cungj dwg gauq sinq yiengh dog cij ndaej, caemh luj ndaw Singqgingh sij naeuz: Youq ndaw lwgra Cangqdiq bienqbaenz boux mij'z coih he, cungj dwg gauq sinq cij ndaej miz mingh he. 18 Gienz akak rengzrengz dih Cangqdiq hawj vunz rox, de aeuqheiq raixcaix, ij fad doenghheij yawj mbouj hwnj de he, guh gij doegdoeg siebsieb he ma muenz saedsaeh he, 19 aenvih de gaenq mingzmingz hawj vunz rox cingsuj vunz wnggai rox hih, gvanhhih de dih saeh hih. 20 Daj cauh mbwn cauh deih doxdaeuj, gij saedsaeh Cangqdiq, couh dwg naeuz gij akak rengzrengz mbouj rox cied de caeuq gij cinhfaenq de, gannaeuz ra yawj mbouj raen lah, hoeng, baengh gij de soj cauh hih, couh ndaej hawj vunz mingzmingz rox. Gij neix vunz mbouj ndaej laih naeuz mbouj rox hih. 21 Gij vunz gan rox miz Cangqdiq, hoeng dauq mbouj haenh de, mbouj docih de; couh vih yienghneix, gyoengqde couh bienq ngawz, sim mazmwnh mbouj singqsag. 22 Gyoengqde gag naeuz bonjfaenh coengjmingz raixcaix, gizsaed ngawz dangqmaz. 23 Gyoengqde mbouj baiq veijdaq hih mbouj rox rai hih Cangqdiq, dauq bae baiq duz you, couh dwg doenghheij you ciuq doenghheij rox rai hih vunz hah, duz roeg mbin hah, duz byaij he hah, duz vuenz he hah, gij yienghceij de baenj okdaeuj hih you lah. 24 Sojhij Cangqdiq ajcaih gyoengqde vangraeh, caih ndaw sim gyoengqde siengj gij ndaengndwet caeuq vunz guh gij hawj vunz gangj mbouj ndaej ok bak he daeuj doxuq aen ndang bonjfaenh. 25 Gyoengqde yiem gij saedsaeh Cangqdiq, dauq sinq gij gyaj he; gyoengqde bae baiq bae swqhaeuh doenghgij Cangqdiq cauh okdaeuj he, dauq mbouj baiq mbouj swqhaeuh Cangqdiq, boux guh cauh sojmiz okdaeuj hih boux Cangqdiq neix. Caenhgag miz de cij dwg wnggai yungjyenj haenh hih. Ahmaenz. 26 Couh vih yienghneix, Cangqdiq ajcaih gyoengqde ndwet vangraeh, gij vunzbaz mbouj ciuq liglaiz roengzdaeuj hih vunzsai caeuq vunzbaz yienghmwnq doxcaeuq ninz, dauq vunzbaz caeuq vunzbaz doxcaeuq ninz lah. 27 Gij vunzsai caemh dwg yienghmwnq, mbouj caeuq vunzbaz doxcaeuq ninz, dauqfanj vunzsai caeuq vunzsai ninz, ndwet hux ndwet, guh gij yalw saetnaj saetnyaenq mbouj ndaej gangj ok bak hih saeh he, guh hwj gag haex rih haeuj guengq. 28 Gyoengqde giqyienz naemqnaeuz mboujyungh nginh Cangqdiq, yiengq Cangqdiq couh ajcaih ndaw sim gyoengqde vaih vangraeh, ajcaih gyoengqde guh gij mbouj sam mbouj seiq mbouj wnggai guh he. 29 Ndaw sim gyoengqde cungj dwg doegdoeg siebsieb, damsim, sim yalw, cungj dwg rahoengz rahwngq, doxhangz doxgaj, yaeuhyaeuh coemxcoemx, haemzhaemz haenqhaenq, haenj gangj vunz hih saeh, 30 cungj dwg doxbangjlaih, boihlaeng gangj vunz, haenq Cangqdiq, cix rasang, yawj vunz mbouj hwnj rwz, gag haenh bonjfaenh, gag cauh guh vaihsaeh, mbouj dingq bohmeh, 31 mbouj rox faenbied ndei caeuq yak, gangj vah mbouj gw vah, mbouj rox aiq beixnuengx, mbouj rox hojsik vunz. 32 Gyoengqde gan rox Cangqdiq naeuz goq luj yienghneix guh hab ngaiz rai, hoeng gyoengqde ngengh ij yienghneix guh; mbouj danhcij naeuz yienghneix, vanzlij haenj gij vunz yienghneix guh.
1 Sojhij gou naeuz faenhsou hax, mboujguenj mwngz dwg byawz, bingzbuenq vunz hih, mwngz cungj dwg mbouj deng, dwg mbouj ndaej nyiuz hih, aenvih bonjfaenh mwngz caemh caeuq vunz guh doxdoengz hih, wnggai fad hih. Yiengq, hauhnaeuz mwngz yienghmwnq naeuz nex, caemhdangq mwngz gag dingh coih hawj bonjfaenh mwngz lo. 2 Raeuz caemh rox, Cangqdiq ciuq saedsaeh ma saemjbuenq guh vaihsaeh hih vunz. 3 Gou naeuz faenhsou hax, mwngz gamj naeuz vunz guh vaihsaeh, wnggai fad, hoeng, bonjfaenh mwngz caemh mbouj dwg ciuqyiengh caeuq boux de guh doxdoengz maz? Mwngz naemqnaeuz mwngz ndaej deuz ok Cangqdiq dih saemjbuenq hajx? 4 Mwngz dwg mbouj dwg riu Cangqdiq sim'unq, haijliengh caeuq naenxsim raixcaix? Mwngz wnggai rox, Cangqdiq sim'unq dwg ij hawj faenhsou nginh loek gaijgoq hih! 5 Hoeng, mwngz simgyeng nga'ngangq, yiengq Cangqdiq couh yied ngoenz yied aeuqheiq, guh hwj daengz ngoenz de gunghgaih gunghbingz saemjbuenq hih ngoenz mwnq, mwngz engqgya ngaiz fad naek ndaej lai, 6 aenvih de ciuq gak vunz soj guh hih, ndei hih hawj ndei, vaih hih bauqwngq hawj vunz. 7 Daengz saemjbuenq mwhde, de couh ij hawj doenghheij vih siengj ndaej daengz najrongh caeuq seiqseiz lix hwj gyenhciz guh ndeisaeh dih vunz, hawj gyoengqde mbouj rox rai, hawj gyoengqde seiqseiz caeuq de youq. 8 Hoeng doiq doenghheij caenhrox bonjfaenh, mbouj rox daengz vunz, yiem ciuq saedsaeh he, dauq bae gouzcimh doenghheij doegsieb mbouj dwg ciuq saedsaeh he dih vunz, Cangqdiq gaengjdingq aeuqheiq, fad gyoengqde. 9 Sojmiz guh doeg guh sieb hih gaengjdingq ngaiz souh haemz souh hoj, daixit, sien dwg gij vunz Youzdaiq, gajlaeng cij daengz gij vunz linghvaih minzcuz he; 10 hoeng sojmiz guh ndei he, Cangqdiq dauq haenh gyoengqde, hawj gyoengqde roxnginh najrongh, roxnginh sim'onj, daixit, sien dwg gij vunz Youzdaiq, gajlaeng cij daengz gij vunz linghvaih minzcuz he. 11 Aenvih Cangqdiq doiq bouxboux cungj doxdoengz. 12 Doenghheij linghvaih minzcuz mbouj miz Mohsih fazliz hih vunz famh coih hih ciuqyiengh ngaiz byoeng; Youzdaiq vunz miz Mohsih fazliz, hoeng famh coih hih, caemh ij ciuq Mohsih fazliz ma saemjbuenq, 13 aenvih youq ndaw lwgra Cangqdiq suenq dwg mij'z coih hih vunz hih, mbouj dwg doenghheij vunz caenhgag dingq daengz Mohsih dih fazliz he nej, dauq dwg doenghheij vunz ciuq Mohsih dih fazliz bae guh he lah. 14 Doenghheij linghvaih minzcuz mwnq, gannaeuz mbouj miz Mohsih dih fazliz lah, hoeng, hauhnaeuz gyoengqde ciuq gij cawjeiq bonjfaenh ma guh gij hab Mohsih dih fazliz he, yiengq bonjfaenh gyoengqde couh dwg fazliz lo. 15 Gyoengqde yienghneix guh couh cingqmingz naeuz ndaw sim gyoengqde caemh rox fazliz dih yauhgyiuz. Sojhij, hauhnaeuz gyoengqde guh vaihsaeh nex, couh gag roxnginh dwg miz coih hih; hauhnaeuz gyoengqde guh ndeisaeh nex, couh roxnginh bonjfaenh guh ndaej deng. 16 Yiengq couh dwg daengz Cangqdiq dunghgoq Yehsuh Gihduz daeuj saemjbuenq vunz, couh dwg saemjbuenq gij saeh yo youq ndaw sim vunz hih ngoenz mwnq, gij neix cungj dwg luj gou soj cenz hih ndei siuhsiz. 17 Faenhsou Youzdaiq vunz dwg gij vunz Cangqdiq, ndaej baengh Mohsih dih fazliz, hoeng, faenhsou daiq daekeiq lai. 18 Faenhsou gaenq ndaej hag Mohsih dih fazliz, ndaej rox daengz gij cawjeiq Cangqdiq, ndaej rox faenbied ndei caeuq yak he; 19 faenhsou couh gag naemqnaeuz bonjfaenh dwg boux daz roen hawj vunz rafangz he, dwg luj aen daeng ciuq rongh ndaw laep he, 20 dwg vunz ngawz dih goengjsae, dwg lwgngez dih lauxsae. Mwngz yienghneix naemqnaeuz, dwg aenvih mwngz miz Mohsih dih fazliz, mwngz couh gaenq rox sojmiz Cangqdiq hawj vunz rox dih saedsaeh lo. 21 Yiengq, giqyienz mwngz son vunz lo, nanzdauh mwngz mbouj gag son bonjfaenh mwngz haj? Mwngz son vunz mbouj hawj vunz guxcaeg lo, hoeng, vihmaz bonjfaenh mwngz dauq bae guxcaeg he nej? 22 Mwngz vihmaz naeuz vunz mbouj ndaej bae guhyoux lo, hoeng, bonjfaenh mwngz dauq bae guh guhyoux he? Mwngz dwgcaengz duz you, hoeng, mwngz dauq bae caeg aeu doenghgij doxgaiq ndaw miuh? 23 Mwngz gag cej bonjfaenh miz Mohsih dih fazliz, hoeng, mwngz miz mbouj miz boqvaiq gij fazliz de hwj saetnaj Cangqdiq nej? 24 Couh luj ndaw Singqgingh ndaw de sij naeuz: Vih gij Youzdaiq vunz faenhsou dih yienzyouz hwj gij mingzhiq Cangqdiq ngaiz souh daengz gij vunz linghvaih minzcuz he sai. 25 Yiengq, caiq hauhnaeuz mwngz soenhsouj fazliz nex, mwngz gozlij couh miz yungh lo; hauhnaeuz veizfanj fazliz nex, mwngz gozlij couh mij saek di yungh, caemhdangq mij gozlij lo. 26 Ciuq luj yienghneix ma yawj hax, doengh boux mij gozlij he, hauhnaeuz de soenhsouj fazliz lo, yiengq mbouj caemhdangq naeuz boux de gaenq gozlij lo mah? 27 Doenghheij gannaeuz mij gozlij he, hoeng dauq soenhsouj fazliz hih doenghheij vunz neix, cungj ij miz ngoenz he ij daeuj dingh hawj mwngz miz coih, aenvih mwngz gan miz fazliz saw, caemh gozlij hwj, hoeng, dauq veizfanj fazliz. 28-29 Cingqcaen dwg Youzdaiq vunz hih, naeuz aeu mbouj suenq; ndaw sim nginh naeuz dwg, cij suenq dwg. Cingqcaen dwg gozlij hih, mbouj dwg naeuz geiqhauh youq gwnz ndang couh suenq dwg gozlij; ij dwg geiqhauh youq ndaw sim cij suenq dwg. Cingqcaen gozlij hih, dwg Hoenzsaenz Cangqdiq guh cij suenq dwg, mbouj dwg naeuz vunz ciuq fazliz dingh hih yienghmwnq bae guh hih. Luj yienghneix hih vunz mbouj dwg vunz haenh hih, dauq dwg Cangqdiq haenh hih lah.
1 Ciuq luj yienghneix ma gangj, Youzdaiq vunz miz maz ndeicawq nej? Gozlij caemh miz maz ik nej? 2 Gou naeuz sou ni, ciuq saedsaeh ma gangj, gak cungj ndeicawq cungj miz. Daixit couh dwg Cangqdiq dawz gij vah de gyau hawj gyoengqde sij roengzma baujhuq. 3 Yiengq cungjsuenq naeuz miz mbangj hih Youzdaiq vunz doiq Cangqdiq mbouj lauxsaed mbouj sinq hwjx, cix ij miz maz nex? Nanzdauh gyoengqde mbouj sinq gij saedsaeh Cangqdiq, gij baujcingq Cangqdiq couh mij'z yungh lo mah? 4 Gaengjdingq mbouj dwg! Cungjsuenq naeuz bouxboux cungj gangj gyajvah, Cangqdiq vanzlij dwg gangj vah gw vah hih, sinq ndaej goq hih, cingq luj ndaw Singqgingh ndaw de sij naeuz: Mwngz gangj hih vah cungj dwg deng hih; mwngz ngaiz vunz gauq nex, mwngz gaengjdingq ndaej hingz goq vunz. 5 Yiengq, hauhnaeuz ciuq vunz dih yawjfap, gangj gyajvah, guh loek, famh coih, engqgya ndaej hawj vunz rox Cangqdiq dwg ndwn ndaej cingq hih, yiengq dwg mbouj dwg wnggai naeuz Cangqdiq fad vunz dwg mbouj deng hih nej? 6 Mbouj wnggai naeuz hih! Hauhnaeuz Cangqdiq mbouj deng, de ij baenzlawz ndaej saemjbuenq vunz lajmbwn nej? 7 Yiengq vunz caemh aiq ij naeuz: “Giqyienz gou gangj gyaj mbouj lauxsaed couh engqgya ndaej yienh ok Cangqdiq lauxsaed, gangj vah gw vah, hawj de engqgya ndaej najrongh vwz, gou vihmaz vanzlij ngaiz de dingh coih nej?” 8 Yiengq ganhseiq naeuz: “Guh doeg guh sieb dwg ndeisaeh hih” sat lo. Hoeng gou naeuz sou ni hax, luj gawq neix, caemh miz vunz luenhlaih naeuz gyoengqraeuz yienghneix naeuz goq hwj. Luj gij vunz neix, dingh coih hawj gyoengqde dwg hab hih. 9 Yiengq gyoengqraeuz Youzdaiq vunz beij linghvaih minzcuz hih vunz vanzlij ak mah? Gou naeuz hax, it di cungj mbouj ak, aenvih Youzdaiq vunz caeuq lingh minzcuz hih vunz cungj dwg doxdoengz, cungj dwg miz coih. 10 Ngamqluj ndaw Singqgingh ndaw de sij naeuz: Mij saek boux mij'z coih; boux he cungj mbouj miz. 11 Mij saek boux vunz rox guh gij hab'eiq habhoz Cangqdiq he, caemh mij saek boux cimh Cangqdiq gaen Cangqdiq. 12 Bouxboux cungj yiem de liz de; bouxboux cungj bienqbaenz mij'z yungh. Mij'z vunz guh ndeisaeh, boux he cungj mbouj miz. 13 Conghbak gyoengqde gangj hih vah ndaej hawj vunz satsoq; diuz linx gyoengqde rox ndau, cungj dwg coemx vunz. Vah doeg vah sieb cungj dwg daj conghbak gyoengqde ok daeuj; 14 haep bak hoi bak gawqgawq cungj dwg ndaq vunz mang vunz. 15 Gyoengqde riq luj mbin nwih, dauqcawq bae gaj vunz, 16 dauqcawq cungj miz boqvaiq caeuq siliengz. 17 Gyoengqde mbouj rox miz bingzan dih roen; 18 gyoengqde mbouj rox lau Cangqdiq. 19 Raeuz rox, fazliz dih gveihdingq diuzliq dwg doiq gij vunz youq fazliz laj de dingh he, vih mbouj siengj hawj vunz miz maz vah gangj, hawj lajmbwn sojmiz hih vunz cungj fug Cangqdiq dih saemjbuenq. 20 Aenvih mij'z vunz naeuz soenhsouj fazliz le, couh ndaej youq ndaw lwgra Cangqdiq suenq dwg boux mij'z coih he lo. Fazliz cijmboujgoq dwg hawj vunz rox bonjfaenh miz coih hwj mah. 21 Gizsaed seizneix Cangqdiq gaenq yienh ok ij baenzlawz hawj vunz cij ndaej youq ndaw lwgra de bienqbaenz vunz mij'z coih he lo. Gij neix gaenhbaenj mbouj caeuq fazliz miz maz gvanhaeh; Mohsih caeuq doengh boux cenz gij vah Cangqdiq sij hih saw cungj ndaej cingqmingz. 22 Cangqdiq hawj vunz ndaej youq ndaw lwgra de suenq dwg vunz mij'z coih he, mboujguenj dwg guxmaz vunz, cijaeu dwg sinq Yehsuh Gihduz, 23 aenvih sojmiz hih vunz cungj famh coih, cungj guh mbouj daengz veijdaq dih Cangqdiq dih yauhgyiuz. 24 Hoeng, seizneix gyoengqraeuz dauq baengh Cangqdiq dih aiq hwj ndaej dunghgoq Yehsuh Gihduz daeuj bang gyoengqraeuz cueg coih, hawj gyoengqraeuz begbeg ndaej youq ndaw lwgra Cangqdiq suenq dwg boux mij'z coih he. 25 Cangqdiq begbeg nyok Yehsuh Gihduz daeuj guh gij dajbwiz he hwj bang vunz rap coih, mbouj hawj vunz ngaiz fad; de yienghneix guh couh ndaej hawj vunz baengh gij lwed de hwj ndaej mienx coih. De yienghneix guh caemh dwg ij yienh ok de dwg ndwn ndaej cingq; gannaeuz gaxgonq Yehsuh mijyaengz daeuj cihsenz de nyiuz gij coih vunz lah, hoeng, cungj mbouj ndaej naeuz Cangqdiq dwg guh mbouj cingq ndwn mbouj cingq, dauq ij naeuz de dwg naenxsim hih. 26 Duenh neix, de vih ij guenj coih caeuq ij hawj gij vunz sinq Yehsuh he hwj ndaej youq ndaw lwgra de suenq dwg vunz mij'z coih he, de couh hawj daeglwg de dingj gij vunz miz coih he hwj fad. De yienghneix guh dwg hawj vunz rox de guh ndaej cingq ndwn ndaej cingq. 27 Yiengq, giqyienz yienghneix vwz, byawz vanzlij ij gag cej bonjfaenh haem nej? Gaenhbaenj mij'z lo! Aenvih mbouj dwg baengh bonjfaenh soenhsouj fazliz cij ndaej mienx coih he, dauq dwg baengh Yehsuh, sinq Yehsuh hwj cij ndaej lah. 28 Gij neix gyoengqraeuz gaenq rox gaengjdingq dwg yienghneix hih; ndaej mienx coih mbouj dwg gauq Mohsih dih fazliz, dauq dwg gauq sinq Yehsuh lah. 29 Nanzdauh Cangqdiq caenhgag dwg miz Mohsih fazliz dih Youzdaiq vunz dih Cangqdiq, mbouj dwg linghvaih minzcuz dih Cangqdiq? Gou naeuz sou ni, danghyienz caemh dwg linghvaih minzcuz dih Cangqdiq lo. 30 Cangqdiq, cijngamq miz boux Cangqdiq dog; cijaeu vunz sinq, mboujguenj dwg Youzdaiq vunz haj cixnaeuz dwg linghvaih minzcuz, Cangqdiq couh suenq gyoengqde ndaej youq ndaw lwgra de dwg mij'z coih dih vunz. 31 Yiengq, ciuq “cijaeu vunz sinq couh ndaej” hih gij neix ma gangj, nanzdauh Mohsih dih fazliz couh mij'z yungh hajx? Gou naeuz sou ni, danghyienz mbouj dwg lo! Dauqfanj, raeuz sinq couh dwg guh daengz Mohsih dih fazliz yauhgyiuz lo.
1 Yiengq, ciuq yienghneix ma gangj, ij baenzlawz naeuz cojgoeng gyoengqraeuz Yaqbwzlahhanj nej? 2 Hauhnaeuz aeu de soj guh hih ma gangj ndaej naeuz de dwg boux mij'z coih he nex, de couh ndaej youq dangqnaj Cangqdiq daekeiq vaujvauq lo mah? Gou naeuz sou ni, gaenhbaenj mbouj ndaej. 3 Caemh luj ndaw Singqgingh ndaw de sij naeuz: Yaqbwzlahhanj sinq Cangqdiq; couh vih de sinq hwj, Cangqdiq couh yawj de dwg boux mij'z coih he hih vunz. 4 Cangqdiq yawj de dwg boux mij'z coih he dih vunz dwg vih de sinq, mbouj dwg vih de soj guh hih. Cangqdiq mbouj luj lauxbanj caeuq gunghyinz yienghmwnq; gunghyinz guh hong couh ij hoi ngaenzhong hawj gunghyinz. Lauxbanj mbouj haijliengh nej. Hoeng, Cangqdiq haijliengh hah. 5 Yiengq, doengh boux caenhgag baengh Cangqdiq mbouj dwg baengh bonjfaenh hwj cij ndaej mienx coih hih doengh boux mwnq, aenvih gyoengqde sinq, Cangqdiq couh yawj gyoengqde suenq dwg boux mij'z coih he lo. 6 Cingq luj Daqveiq gangj goq, naeuz doengh boux mbouj dwg gauq guh gijmaz cij ndaej daengz Cangqdiq yawj de dangq dwg boux mij'z coih he hih doengh boux mwnq miz fuk lo. 7 Couh dwg naeuz: Doengh boux famh coih le ndaej nyiuz ndaej mienx coih he hih doengh boux mwnq miz fuk lo! 8 Doengh boux gannaeuz miz coih, hoeng, Cangqdiq mbouj suenq boux de miz coih, doengh boux mwnq miz fuk lo! 9 Yiengq Daqveiq soj gangj hih gij fuk neix, caenhgag doenghheij gozlij hih vunz cij ndaej hajx? Gou naeuz sou ni, mij dwg law nwjx! Doenghheij mbouj gozlij hih vunz caemh ndaej miz faenh hah. Aenvih gyoengqraeuz gaenq gangj goq Yaqbwzlahhanj vih sinq Cangqdiq hwj, Cangqdiq yawj de suenq dwg boux mij'z coih he hih dih vunz. 10 Yiengq luj yienghneix, ij baenzlaw cij suenq dwg nej? Dwg de youq mijyaengz gozlij cihsenz hajx, cixnaeuz dwg de gaenq gozlij hoh nej? Gou naeuz sou ni, dwg de youq mijyaengz gozlij cihsenz. 11 Aenvih de sinq Cangqdiq, Cangqdiq cij yawj de dangq boux mij'z coih he. Gajlaeng de gozlij cijmboujgoq dwg it cungj geiqhauh hwj mah, dwg geiqhauh vunz youq ndaw lwgra Cangqdiq dwg mij'z coih he. Sojhij Yaqbwzlahhanj dwg doenghheij vunz gannaeuz mij gozlij hoeng Cangqdiq vih gyoengqde sinq hwj couh yawj gyoengqde suenq dwg mij'z coih hih doenghheij vunz neix dih cojgoeng. 12 De caemh dwg doenghheij vunz mbouj danhcij naeuz gozlij, caemh dwg gaen de youq mijyaengz gozlij cihsenz cix sinq hih doenghheij vunz mwnq dih cojgoeng. 13 Yaqbwzlahhanj caeuq doengh daih gajlaeng de cungj ndaej daengz Cangqdiq dih gij baujcingq mwnq; gij baujcingq mwnq couh dwg ij ndaej baenx cenz lajmbwn. Yiengq, Yaqbwzlahhanj ndaej hih gij baujcingq neix, mbouj dwg naeuz de soenhsouj fazliz le couh ndaej nej, dauq dwg de sinq Cangqdiq le ndaej youq ndaw lwgra Cangqdiq suenq dwg boux mij'z coih he hwj ndaej lah. 14 Hauhnaeuz soenhsouj Mohsih dih fazliz le couh ndaej gij baujcingq Cangqdiq nex, yiengq, sinq miz maz yungh haem, gij baujcingq de caemh mij'z yungh lo. 15 Mohsih dih fazliz cijmboujgoq dwg hawj Cangqdiq ndatheiq vunz lah. Hauhnaeuz mbouj miz fazliz, couh mbouj miz famh fazliz dih saeh lo. 16 Sojhij ndaej gij baujcingq neix dwg vih vunz sinq le cij ndaej lah; Cangqdiq nyok hawj gij baujcingq neix dwg begbeg nyok hawj lah. Giqyienz dwg begbeg nyok hawj vwz, yiengq Yaqbwzlahhanj sojmiz dih doengh daih gajlaeng cungj ndaej; mbouj danhcij naeuz doenghheij miz fazliz hih vunz ndaej, daiqlienz doenghheij gaen Yaqbwzlahhanj yienghmwnq sinq hih vunz cungj ndaej, aenvih Yaqbwzlahhanj couh dwg sojmiz sinq Cangqdiq hih vunz dih cojgoeng. 17 Yaqbwzlahhanj sinq dih dwg Cangqdiq, couh dwg boux ndaej hawj vunz daj rai bienqbaenz lix, daj mbouj miz bienqbaenz miz dih boux Cangqdiq neix. Yaqbwzlahhanj youq ndaw lwgra Cangqdiq dwg daxboh gyoengqraeuz, cingq luj ndaw Singqgingh ndaw de sij naeuz: Gou gaenq laeb mwngz guh fanh minzcuz dih daxboh lo. 18 Youq de mij'z lwg saetmuengh hih mwhde, de ciuqyiengh muengh, ciuqyiengh sinq. Couh yienghneix, de ndaej guh baenx haujlai aen minzcuz dih daxboh, ngamqluj gaxgonq Cangqdiq doiq de naeuz goq: Doengh daih gajlaeng mwngz ij lai luj gij ndaundeiq gwnzmbwn yienghmwnq lai. 19 Mwh de ijvanh ndaej bak bi hih mwhde, gannaeuz de gag roxnginh aen ndangdaej bonjfaenh de gaenq mij miz yungh lo, caeuq rox mehyah de Sajlah dwg maen he, hoeng, de ciuqyiengh mbouj doeknaiq, ciuqyiengh sinq. 20 De coengzlaiz mbouj ngeiz Cangqdiq doiq de baujcingq goq dih gij baujcingq mwnq. De mbouj danhcij naeuz mbouj ngeiz de, dauqfanj engqgya sinq; mbouj danhcij naeuz sinq, vanzlij youq dangqnaj vunz haenh Cangqdiq. 21 De gyenhciz sinq Cangqdiq dih gij baujcingq mwnq gaengjdingq ndaej doiqyienh. 22 Sojhij couh dwg naeuz Yaqbwzlahhanj vih sinq hwj Cangqdiq couh yawj de dangq dwg boux mij'z coih he dih vunz lo. 23 Youq ndaw Singqgingh sij naeuz gawq “yawj de dangq dwg boux mij'z coih he dih vunz” gawq neix mbouj danhcij dwg ceij de sij, 24 caemh dwg ceij gyoengqraeuz sij he, aenvih gyoengqraeuz sinq boux hawj Yehsuh bouxcawj raeuz daj rai ndaej dauqlix dih Cangqdiq. Sojhij gyoengqraeuz caemh ndaej suenq dwg boux mij'z coih he dih vunz lo. 25 Yehsuh vih ij cueg gij coih gyoengqraeuz hwj ngaiz rai, hoeng, Cangqdiq hawj de dauqlix dwg vih ij hawj raeuz youq ndaw lwgra Cangqdiq suenq dwg boux mij'z coih he dih vunz.
1 Aenvih Cangqdiq yawj sinq Yehsuh Gihduz bouxcawj raeuz hih vunz dangq dwg boux mij'z coih he, yiengq couh hawj gyoengqraeuz ndaej dunghgoq bouxcawj raeuz Yehsuh Gihduz hwj ndaej caeuq Cangqdiq doxhuz. 2 Caemh aenvih gyoengqraeuz sinq, yiengq couh ndaej dunghgoq Yehsuh Gihduz hwj mbeihung ciep aeu Cangqdiq nyok hawj dih aiq, hawj gyoengqraeuz ndaej miz muengh do aeu gij rongh Cangqdiq, hawj gyoengqraeuz ndaej angq raixcaix. 3 Mbouj danhcij naeuz yienghneix, vanzlij ndaej hawj gyoengqraeuz youq mwh miz nanh mwhde caemh ciuqyiengh angq, aenvih gyoengqraeuz rox souh nanh ndaej hawj gyoengqraeuz baenzlaw rox naenxsim mbouj doeknaiq, 4 naenxsim ndaej hawj gij singqheiq gyoengqraeuz gaij ndei, singqheiq ndei couh ndaej hawj vunz miz muengh. 5 Miz muengh couh mbouj doeknaiq, couh mbouj saetmuengh, aenvih Cangqdiq dunghgoq nyok Hoenzsaenz de ma coq gij aiq de hawj gyoengqraeuz. 6 Gizsaed youq mwh gyoengqraeuz mij'z muengh ndaej gag gouq hih mwhde, Gihduz gaenq ciuq Cangqdiq soj dingh hih mwhde daeuj gouq vunz; vih ij gouq vunz vaih hwj de ngaiz vwt mingh. 7 Yiengq, ciuq bingzseiz ma gangj, hauhnaeuz ijsiengj gouq boux vunz ndei, couh ij ngaiz vwt mingh hih, cungj mbouj geijhoz miz hwx, hoeng, vih ij gouq boux vunzvunz cungj aiq he saekseiz aiq miz. Yiengq gangj daengz gouq vunz vaih couh ij ngaiz vwt mingh hih, gaengjdingq mbouj miz lo. 8 Hoeng Cangqdiq hawj raeuz rox de aiq vunz; gannaeuz raeuz dwg vunz vaih lah, hoeng, Gihduz vanzlij nyienh'eiq vih raeuz hwj vwt mingh. 9 Yiengq, giqyienz Gihduz vih gyoengqraeuz gij dizyinz Cangqdiq hwj riuz lwed, hawj gyoengqraeuz ndaej youq ndaw lwgra Cangqdiq suenq dwg boux mij'z coih he, ndaej caeuq de doxhuz vwz, gyoengqraeuz couh mbouj ngaiz Cangqdiq aeuqheiq hwj fad lo. 10 Yiengq caiq giqyienz daeglwg Cangqdiq rai ndaej hawj gij dizyinz Cangqdiq ndaej caeuq Cangqdiq doxhuz vwz, de dauqlix, mbouj engqgya hawj vunz ndaej gouq maz? 11 Mbouj danhcij naeuz gyoengqraeuz dunghgoq bouxcawj raeuz Yehsuh Gihduz hwj gaenq ndaej caeuq Cangqdiq doxhuz, caemh vanzlij dunghgoq de hwj hawj gyoengqraeuz ndaej vih Cangqdiq sim'angq. 12 Gangj daengz coih, couh dwg daj boux vunz he fat okdaeuj cenz baenx cenz lajmbwn. Aenvih miz coih couh hawj vunz ngaiz rai, sojhij cenz lajmbwn hih vunz cungj ngaiz rai, aenvih lajmbwn sojmiz hih vunz cungj famh coih. 13 Youq mijyaengz miz fazliz cihsenz, lajmbwn cix miz coih lo, hoeng hauhnaeuz mbouj miz fazliz, coih couh mbouj suenq coih lo. 14 Hoeng, daj Yaqdangh daengz mijyaengz miz Mohsih fazliz dih cizdaiq, rai ndaej guenjciq vunz; cungjsuenq naeuz famh gij mbouj dwg luj Yaqdangh famh hih cungj mingqlingq mwnq hwjx, cungj deuz mbouj ok ngaiz rai. Gihduz boux neix, couh dwg boux yienzlaiz Cangqdiq gangj goq naeuz de baezneix ij daeuj he, caeuq Yaqdangh boux neix cungj doxdoengz doiq vunz miz ingjyangj, 15 cijmboujgoq dwg song cungj mbouj doxdoengz, aenvih Gihduz begbeg soengq hawj hih aiq caeuq Yaqdangh famh hih coih ceng ndaej hung huh. Gannaeuz sojmiz hih vunz vih Yaqdangh boux vunz dog famh coih hwj ngaiz rai lah, hoeng, Cangqdiq dunghgoq Yehsuh Gihduz boux vunz dog begbeg soengq hawj hih aiq hwj engqgya ndaej hawj baenx haujlai vunz ndaej mienx coih hwj ndaej lix. 16 Caiq gyacangq Yaqdangh boux vunz dog famh hih coih ingjyangj hih caeuq Cangqdiq soengq hawj hih aiq hih it di cungj mbouj doxdoengz. Yaqdangh boux vunz dog famh coih cauh baenz saemjbuenq caeuq dingh coih, hoeng, Cangqdiq vih miz saemjbuenq caeuq dingh coih hwj begbeg soengq gij aiq de hawj vunz, hawj vunz bienqbaenz youq ndaw lwgra de suenq dwg boux mij'z coih he. 17 Gannaeuz rai dwg youz boux vunz dog famh coih yinxhwnj hih lah, hoeng, Yehsuh Gihduz boux vunz dog soj guh hih mbouj engqgya haz! Sojhij doenghheij nyienh'eiq sou Cangqdiq dih aiq hwj bienqbaenz boux mij'z coih hih vunz cungj ndaej dunghgoq Yehsuh Gihduz boux vunz dog hwj ndaej giengz goq coih caeuq rai. 18 Ciuq luj yienghneix ma gangj, vih boux vunz he famh coih hwj cauh baenz hawj vunz ngaiz dingh miz coih; yiengq caemh doxdoengz, boux he guh ndeisaeh couh ndaej hawj baenx haujlai vunz ndaej mienx coih, ndaej miz mingh. 19 Caemh ngamqluj boux he veizfanj mingqlingq, couh ngaiz haih baenx gyoengq vunz cungj miz coih, caemh doxdoengz, boux he ciuq guh, baenx gyoengq cungj ndaej bienqbaenz youq ndaw lwgra Cangqdiq suenq dwg boux mij'z coih he. 20 Dingh miz fazliz, engqgya yienh ok famh coih lai; hoeng, coih yied lai, yied engqgya ndaej yienh ok Cangqdiq doiq vunz haijliengh raixcaix. 21 Caemh ngamqluj coih ndaej cangjguenj hawj vunz rai, caemh doxdoengz, Cangqdiq dih haijliengh engqgya ndaej hawj vunz bienqbaenz youq ndaw lwgra Cangqdiq suenq dwg boux mij'z coih he, hawj gyoengqraeuz ndaej dunghgoq bouxcawj raeuz Yehsuh Gihduz hwj ndaej seiqseiz lix.
1 Yiengq, gyoengqraeuz ij baenzlaw naeuz nej? Dwg mbouj dwg naeuz gyoengqraeuz wnggai mbouj dingz hih famh coih hwj le couh ndaej engqgya yienh ok Cangqdiq dih aiq engqgya lai nej? 2 Gou naeuz sou ni hax, gaengjdingq mbouj dwg! Ciuq miz coih ma gangj, gyoengqraeuz caemhdangq gaenq rai lo; caiq ij baenzlwh naeuz caiq famh coih haem nej? 3 Nanzdauh faenhsou mbouj rox, gyoengqraeuz sijlij gaenq gvi haeuj Yehsuh Gihduz caeuq de caez rai lo maz? 4 Gyoengqraeuz dunghgoq sijlij caeuq de caez rai lo, caemh moek lo. Yienghneix gyoengqraeuz couh ndaej miz saen dih mingh, cingq luj Bohmbwn yungh gij veijdaq dih bonjsaeh de ma hawj Gihduz ndaej dauqlix yienghmwnq. 5 Hauhnaeuz gyoengqraeuz caeuq Gihduz caez rai lo, yiengq caemh doengzyiengh ndaej caeuq de itheij dauqlix lo. 6 Gyoengqraeuz caemh rox, gaxgonq gyoengqraeuz lij ngaiz coih guenjciq hih mwhde, gaenq caeuq Gihduz caez ding youq gwnz gyaq cixcib lo, sawj guenjciq gyoengqraeuz dih coih gaenq ngaiz byaeu lo. Yienghneix gyoengqraeuz caemh mbouj caiq guh coih dih hoiq haem lo, 7 aenvih vunz rai le, couh ndaej duet ok coih dih guenjciq lo. 8 Caiq hauhnaeuz gyoengqraeuz caeuq Gihduz caez rai lo, yiengq gyoengqraeuz caemh sinq gyoengqraeuz caemh ndaej caeuq de caez lix lo, 9 aenvih gyoengqraeuz rox, Gihduz gaenq daj rai ndaej dauqlix lo. De couh mbouj caiq ngaiz rai haem lo; rai caemh mbouj caiq ndaej guenjciq de haem lo. 10 Gig cingsuj, de rai dwg vih ij duet coih hwj rai, caemh dwg vih ij duet gatcied hwj rai, hoeng, de lix, dauq dwg vih ij gaen Cangqdiq hwj lix lah. 11 Yienghneix, aeu coih ma gangj, faenhsou caemhdangq yawj bonjfaenh gaenq rai lo, hoeng, aeu Cangqdiq ma gangj, faenhsou dunghgoq Yehsuh Gihduz hwj dangq lix lo. 12 Sojhij, gaejyungh hawj coih guenjciq aen ndang rox rai faenhsou, hawj faenhsou swnh aen ndang faenhsou dih yalw siengjmuengh. 13 Caemh gaej gien aen ndang faenhsou hawj coih, hawj coih ndaej aeu ma guh vaihsaeh. Fanjgoqma, dauq ij dawz aen ndang faenhsou gien hawj Cangqdiq, hawj de ndaej aeu ma guh ndeisaeh. Yienghneix guh cij mbouj vuengj Cangqdiq gouq lix vunzrai. 14 Coih mbouj caiq ndaej guenjciq faenhsou, aenvih faenhsou gaenq mbouj caiq dwg gvi haeuj Mohsih fazliz dih guenjciq, dauq dwg youq ndaw aiq Cangqdiq lah. 15 Ciuq luj yienghneix ma gangj, dwg mbouj dwg naeuz gyoengqraeuz mbouj dwg gvi haeuj Mohsih fazliz dih guenjciq, dauq dwg youq Cangqdiq dih ndaw aiq ndaw de hwj le couh ndaej cizliengh famh coih lo mah? Gou naeuz sou ni, it di cungj mbouj dwg! 16 Faenhsou caemh gag rox, faenhsou nyienh'eiq swqhaeuh bouxlawz, dingq bouxlawz, couh dwg bouxlawz dih hoiq; mboujguenj guh coih dih hoiq haj cixnaeuz guh Cangqdiq dih hoiq, cungj dwg hoiq. Guh coih dih hoiq, dwg hawj vunz ngaiz rai he, hoeng, guh Cangqdiq dih hoiq, dwg hawj vunz ndaej youq ndaw lwgra Cangqdiq suenq dwg boux mij'z coih he. 17 Docih Cangqdiq! Gannaeuz faenhsou gaxgonq ngaiz coih guenjciq, dingq coih, guh coih dih hoiq lah, hoeng, seizneix dauq caensim dingq gij saedsaeh cenz hawj faenhsou he. 18 Yiengq, ciuq yienghneix ma yawj, faenhsou gaenq ndaej daj ndaw coih ndaw de duet okdaeuj, bienqbaenz bouxhoiq Cangqdiq mij'z coih he hwj guh ndeisaeh lo. 19 Hoeng, gou lau faenhsou mbouj daiq rox gij iqswh gou geijlai, sojhij, gou yungh gij gyenjdanh he ma beijgangj naeuz faenhsou ni. Gaxgonq faenhsou gien aen ndang faenhsou hawj coih, guh coih dih hoiq, guh vaihsaeh, yied guh yied doegsieb. Caemh doxdoengz, seizneix faenhsou ij gien aen ndang faenhsou hawj Cangqdiq, guh Cangqdiq dih hoiq, guh ndeisaeh, bienqbaenz boux hab'eiq habhoz de he. 20 Mwh faenhsou guh coih dih hoiq hih mwhde, mbouj miz ndei dih daeuj guenjciq faenhsou. 21 Mwhde faenhsou guh hih saeh, dauqdaej ndaej gijmaz nex? Cijmboujgoq ngaiz satsoq hwj lah! Seizneix faenhsou raen najmomj lo bax. 22 Hoeng, seizneix faenhsou gaenq ndaej daj ndaw coih duet okdaeuj hwj guh Cangqdiq dih hoiq lo, ndaej guh boux hab'eiq habhoz Cangqdiq he dih vunz hwj ndaej seiqseiz lix lo. 23 Aenvih swqhaeuh coih ndaej dih ik couh dwg ngaiz rai yiengh dog, hoeng, Cangqdiq begbeg nyok hawj vunz dih dwg hawj vunz ndaej youq laeng bouxcawj raeuz Yehsuh Gihduz ndaw de hwj ndaej seiqseiz lix.
1 Gak boux beixnuengx hax, gou seizneix doiq sug Mohsih fazliz hih faenhsou naeuz; nanzdauh faenhsou mbouj rox fazliz caenhgag guenjciq vunz lix hih maz? 2 Beijgangj miz boux vunzbaz he, de haq le, cijaeu goeng gojyez de lij lix, yiengq de couh miz fazliz guenjciq de; de caenhgag ndaej caeuq goeng de. Hoeng, hauhnaeuz goeng de rai lo, de couh mij cungj fazliz neix guenjciq de haem lo. 3 Sojhij goeng gojyez de lij lix hih mwhde, hauhnaeuz de caeuq daixlingh boux vunzsai nex, de couh dwg guhyoux lo. Yiengq, hauhnaeuz goeng de rai lo, youq fazliz gwnz de, de dwg swqyouz hih; de caiq haq daixlingh boux, caemh mbouj suenq guhyoux lo. 4 Beixnuengx hax, ciuq luj yienghneix ma gangj, faenhsou caemh doxdoengz; faenhsou dunghgoq Gihduz dingj vunz rap coih hwj ngaiz rai hih, youq Mohsih fazliz gwnz de ma gangj, faenhsou caemh gaenq rai lo. Faenhsou seizneix gaenq gvi haeuj boux daj rai ndaej dauqlix hih boux mwnq, hawj gyoengqraeuz ndaej guh gij doiq Cangqdiq miz ik he. 5 Youq mwh gyoengqraeuz vanzlij ciuq gij vunz dih baenjsingq ma goq saedceij hih mwhde, Mohsih fazliz iuyinx gyoengqraeuz hawj ndangnoh gyoengqraeuz siengjmuengh guh doenghgij yalw he, gajlaeng hawj gyoengqraeuz cauh baenz rai. 6 Hoeng, seizneix Mohsih fazliz gaenq mbouj ndaej guenjciq gyoengqraeuz haem lo, aenvih aeu fazliz guenjciq raeuz ma gangj, gyoengqraeuz gaenq rai lo. Gyoengqraeuz mbouj caiq ciuq gij gaeuq hih guhfap, couh dwg naeuz mbouj caiq soenhsouj Mohsih fazliz hwj swqhaeuh Cangqdiq haem lo, dauq dwg ciuq Hoenzsaenz Cangqdiq hih gij saen hih guhfap he ma swqhaeuh Cangqdiq hih lah. 7 Yiengq, ciuq luj yienghneix, gyoengqraeuz couh naeuz Mohsih fazliz miz coih lo mah? Gaengjdingq mbouj dwg, aenvih mbouj miz Mohsih fazliz, gyoengqraeuz couh mbouj rox gijmaz dwg coih lo. Hauhnaeuz Mohsih fazliz mbouj naeuz: “Mbouj ndaej damsim,” yiengq gou couh mbouj rox gijmaz dwg damsim lo. 8 Hoeng, coih, dunghgoq Mohsih fazliz dih mingqlingq, cimh gihveiq hawj ndaw sim gou miz damsim; hauhnaeuz mbouj miz Mohsih fazliz, coih couh mbouj ndaej cimyex. 9 Doenghbaez mij Mohsih fazliz mwhde, gou dwg lix hih, hoeng, miz Mohsih fazliz le, coih caemh gaen daeuj lo, gou caemh rai lo. 10 Baenjlaiz wnggai hawj vunz lix dih mingqlingq dauqfanj hawj gou rai lo, 11 aenvih coih dunghgoq mingqlingq ma cimh gihveiq yaeuh gou, gaj gou. 12 Gizsaed, gij fazliz neix dwg Cangqdiq dingh hawj gyoengqraeuz hih, dwg deng hih. Gij mingqlingq de caemh dwg deng hih, dwg goengbingz hih, dwg ndei hih. 13 Yiengq, giqyienz dwg yienghneix, nanzdauh ndei dih mingqlingq hawj gou rai hajx? Danghyienz mbouj dwg lo! Dwg coih ciqmingz ndei dih mingqlingq hawj gou rai lah. Yienghneix, coih ciqmingz hawj gou rai engqgya ndaej yienh ok coih engqgya doegsieb. 14 Gyoengqraeuz caemh rox Mohsih fazliz dwg haeuj gij Hoenzsaenz Cangqdiq hih, hoeng, gou dwg haeuj gij ndangnoh he, gaenq hai hawj coih guh hoiq lo. 15 Gou mbouj rox gou soj guh hih, aenvih gou siengj guh hih, guh mbouj daengz; gou dwgcaengz, mbouj siengj guh hih, gou dauq bae guh lo. 16 Yiengq, giqyienz gou mbouj siengj guh hih gou dauq bae guh lo, ciuq luj yienghneix, gou mij banqfaz naeuz fazliz mbouj deng hih. 17 Gizsaed, gaenhbaenj mbouj dwg gou guh; dwg ndaw sim gou hih coih bae guh lah. 18 Gou caemh rox, gangj daengz ndangnoh gou, ndaw sim gou mij gijmaz ndei hih; gou siengj guh gij ndei he, hoeng, mij bonjsaeh guh daengz. 19 Gou siengj guh ndei, hoeng, guh mbouj daengz; mbouj siengj guh gij doegsieb he, hoeng, dauq guh daengz lo. 20 Yiengq, hauhnaeuz gou guh gij gou mbouj nyienh guh hih, yienghmwnq couh mbouj suenq dwg gou bae guh, dauq dwg gij coih youq ndaw sim gou bae guh lah. 21 Sojhij gou caenh roxnginh, gou siengj guh ndei nex, couh miz gij doegsieb he youq ndaw sim gou gauxca gou. 22 Ciuq gij iqswh ndaw sim gou, gou haenj gij fazliz Cangqdiq hih, 23 hoeng, gwnz ndang gou miz daixlingh cungj fazliz, caeuq gij fazliz Cangqdiq doxngig, hawj gou mbouj ndaej duet ok gij coih guenjciq mwnq. 24 Gou saedsaeh simnyap ij rai! Byawz ndaej gouq gou duet ok gij ndangnoh hawj gou rai hih nej? 25 Docih Cangqdiq, baengh bouxcawj raeuz Yehsuh Gihduz hwj de ndaej gouq gou! Ciuq yienghneix ma gangj, ndaw sim gou siengj guh fazliz Cangqdiq dih hoiq, hoeng, aen ndangnoh gou dauq guh gij fazliz hawj vunz famh coih he dih hoiq.
1 Sojhij, gvi haeuj Yehsuh Gihduz hih vunz couh mbouj ngaiz dingh miz coih, 2 aenvih dunghgoq Yehsuh Gihduz hwj hawj vunz ndaej miz mingh hih Hoenzsaenz Cangqdiq dih fazliz gaenq hawj gou ndaej duet ok gij fazliz hawj vunz famh coih hih caeuq rai hih lo. 3 Mohsih dih fazliz mij ndaej ak goq coih caeuq rai, aenvih vunz dih baenjsingq daiq ya lai. Hoeng, Cangqdiq dauq ndaej ak goq. De baij daeglwg dog de daeuj, hawj de bienqbaenz vunz, caeuq boux miz coih hih vunz doxdoengz miz lwed miz noh. Cangqdiq yienghneix guh dwg vih ij ak goq coih hwj hawj Yehsuh bienqbaenz gij dajbwiz cueg coih, hawj coih mbouj caiq ndaej guenjciq vunz haem lo. 4 Cangqdiq yienghneix guh dwg hawj gyoengqraeuz doenghheij mbouj dingq ndangnoh caenhgag dingq Hoenzsaenz Cangqdiq hih vunz he ndaej suenq dwg gaenq ciuq fazliz dih yauhgyiuz lo. 5 Dingq ndangnoh hih cungj dwg ngeix daengz ndangnoh dih siengjmuengh; dingq Hoenzsaenz hih cij rox siengj daengz Hoenzsaenz soj siengj hih. 6 Caenhrox ndangnoh hih cij rox rai yiengh dog, hoeng rox daengz Hoenzsaenz hih dauq lix ndaej cwxcwx caihcaih, 7 aenvih caenhrox ndangnoh hih vunz dwg caeuq Cangqdiq doxngig hih, mbouj ciuq Cangqdiq fazliz hih, gizsaed gaenhbaenj mij banqfaz ciuq. 8 Dingq ndangnoh hih vunz gaenhbaenj guh mbouj daengz hab'eiq habhoz Cangqdiq. 9 Hoeng, Hoenzsaenz Cangqdiq youq ndaw sim faenhsou; faenhsou couh mbouj dingq ndangnoh, dauq dwg dingq hoenzsaenz lah. Yiengq mbouj miz Hoenzsaenz Gihduz nex, couh mbouj dwg gvi haeuj Gihduz lo. 10 Hoeng hauhnaeuz ndaw sim faenhsou miz Gihduz nex, cungjsuenq naeuz aen ndangnoh faenhsou vih coih hwj ngaiz rai, hoenzsaenz faenhsou ciuqyiengh vih faenhsou ndaej youq ndaw lwgra Cangqdiq suenq dwg mij'z coih hwj ndaej lix. 11 Yiengq, hauhnaeuz hawj Yehsuh Gihduz ndaej dauqlix dih Cangqdiq, de dih Hoenzsaenz youq ndaw sim faenhsou nex, boux hawj Gihduz ndaej daj rai dauqlix dih Cangqdiq caemh ij dunghgoq youq ndaw sim faenhsou hih gij Hoenzsaenz mwnq hawj rox rai hih aen ndang faenhsou ndaej dauqlix hwnjdaeuj. 12 Sojhij, beixnuengx hax, ciuq yienghneix ma gangj, gyoengqraeuz mboujyungh ciuq ndangnoh yienghmwnq lix nej. 13 Hauhnaeuz faenhsou ciuq ndangnoh yienghmwnq ma lix nex, gaengjdingq ngaiz rai, mij'z vah gangj hih nej. Hoeng, hauhnaeuz baengh Hoenzsaenz Cangqdiq ma cawz coih, yiengq, couh gaengjdingq ndaej lix lo, 14 aenvih famz miz Hoenzsaenz Cangqdiq daiq hih, cungj dwg lwg Cangqdiq. 15 Cangqdiq soengq Hoenzsaenz bonjfaenh de hawj faenhsou, mbouj dwg hawj faenhsou guh hoiq caeuq hawj faenhsou vanzlij lau haem nej, dauq dwg hawj faenhsou ndaej guh lwg de, hawj faenhsou ndaej heuh de ‘ahbah, daxboh gou’ lah. 16 Hoenzsaenz Cangqdiq caeuq aen sim raeuz cungj ndaej cingqmingz raeuz dwg caen lwg Cangqdiq. 17 Yiengq, giqyienz gyoengqraeuz bienqbaenz caen lwg Cangqdiq vwz, gyoengqraeuz couh ndaej caeuq Gihduz doxdoengz ndaej yangjcouq gij fuk Cangqdiq. Sojhij, hauhnaeuz gyoengqraeuz seizneix caeuq daeglwg de Gihduz caez souh nanh nex, baezneix gyoengqraeuz couh ndaej caeuq de caez najrongh lo. 18 Gou nginhnaeuz gyoengqraeuz seizneix souh hih nanh beij baezneix ij yienh hawj raeuz hih najrongh mbouj suenq guxmaz. 19 Sojmiz cauh okdaeuj hih cungj ba'mboujmuengh gyoengq lwg Cangqdiq yienh okdaeuj, 20 aenvih sojmiz cauh okdaeuj hih cungj ngaiz bienqbaenz mij'z yungh—hoeng mbouj dwg doenghgij cauh okdaeuj dih cawjeiq nej, dauq dwg Cangqdiq dih cawjeiq lah. 21 Hoeng, cauh okdaeuj hih cungj muengh ndaej duet ok gij rox naeuh rox lanh hih gij guenjciq mwnq hwj ndaej caeuq gyoengq lwg Cangqdiq ndaej swqyouz ndaej najrongh. 22 Gyoengqraeuz rox, itcig daengz seizneix, sojmiz cauh okdaeuj hih cungj gangz wxwx, gangz ij daengj daengz mwh ndaej swqyouz mwnq, couh luj vunzbaz ij seng lwg yienghmwnq daengj. 23 Mbouj danhcij yienghneix, daiqlienz gyoengqraeuz doenghheij ndaej Cangqdiq hawj hih daixit bih fuk hih, couh dwg ndaej Hoenzsaenz Cangqdiq hih, ndaw sim caemh gangz, caemh muengh Cangqdiq nginh raeuz guh lwg de hwj ndaej cueg aen ndang gyoengqraeuz. 24 Gyoengqraeuz ndaej gouq hih vunz cungj miz yienghneix muengh. Cijmboujgoq yawj ndaej raen hih mbouj suenq muengh; miz byawz bae muengh gij yawj ndaej raen hih nex? 25 Hoeng hauhnaeuz gyoengqraeuz muengh gij yawj mbouj raen hih, couh ij hozraez, naenxsim daengj cij ndaej. 26 Fanjcingq gyoengqraeuz sinqsim mbouj giengz hih mwhde, miz Hoenzsaenz Cangqdiq bang. Mbouj rox ij baenzlaw gouzhaenh Cangqdiq hih mwhde, miz Hoenzsaenz Cangqdiq gangz gij vah vunz mij banqfaz gangz okdaeuj he ma bang raeuz gouzhaenh Cangqdiq. 27 Yawj vunz cingx goq gingq bohliz dih Cangqdiq rox Hoenzsaenz bonjfaenh de dih iqswh, aenvih Hoenzsaenz dwg ciuq gij iqswh bonjfaenh de bae bang gij vunz de gouz hih. 28 Gyoengqraeuz rox Cangqdiq cungj dwg hawj sojmiz hih saeh bienqbaenz doiq doenghheij vunz de gag ciuq gij cawjeiq bonjfaenh de ma senj okdaeuj he, aiq de he miz ik, 29 aenvih Cangqdiq gaenq sien rox byawz dwg gij vunz de, de couh senj okdaeuj lo, hawj gyoengqde caeuq daeglwg de doxluj ndaej hab'eiq habhoz de. De yienghneix guh dwg hawj daeglwg de ndaej youq haujlai beixnuengx ndaw de dang lwgdaeuz. 30 Cangqdiq heuh doenghheij vunz de senqsi cix senj okdaeuj he ok daeuj; mbouj danhcij naeuz heuh ok daeuj, vanzlij hawj gyoengqde bienqbaenz mij'z coih hih vunz, caemh mbouj danhcij naeuz hawj gyoengqde bienqbaenz mij'z coih hih vunz, caemh vanzlij hawj gyoengqde ndaej miz najrongh. 31 Yiengq, giqyienz dwg yienghneix, vanzlij miz maz naeuz laem? Cijaeu Cangqdiq bang gyoengqraeuz, byawz ndaej caeuq raeuz doxngig nej? 32 Cangqdiq daiqlienz daeglwg dog de cungj sijndaej, sijndaej hawj de vih gyoengqraeuz hwj rai; yiengq de mbouj engqgya dawz sojmiz hih cungj nyok hawj gyoengqraeuz maz? 33 Miz byawz ndaej gauq gij vunz Cangqdiq senj okdaeuj he nej? Cangqdiq gaenq senhbuq gyoengqde mij'z coih lo! 34 Caemh miz byawz ndaej dingh hawj gyoengqde miz coih nej? Yehsuh Gihduz gaenq dingj gyoengqraeuz rai lo, caemhcaiq ndaej dauqlix lo. De seizneix youq baixgvaz Cangqdiq bang gyoengqraeuz gouz Cangqdiq nex. 35 Giqyienz yienghneix, miz byawz ndaej laengz Gihduz aiq gyoengqraeuz nej? Daiqlienz nanh, haemzhoj, bwkhaih, iek, gungz, veizyiemj, caxgyiemq, doenghgij neix, cungj mbouj ndaej. 36 Gannaeuz ndaw Singqgingh ndaw de sij naeuz: Vihliux mwngz, gyoengqraeuz baenxngoenz baenxngoenz cungj dwg ngaiz vunz ij gaj, caenh luj ij gaj yiengz yienghmwnq 37 lah, hoeng, cungj mbouj ndaej laengz; gyoengqraeuz baengh Gihduz, boux aiq raeuz neix, sojmiz hih cungj ndaej giengz goq. 38 Aenvih gou sinq, mij gijmaz ndaej laengz Cangqdiq aiq gyoengqraeuz, mboujguenj rai cix ndaej, lix cix ndaej, dwg bouxcai cix ndaej, dwg fangz yak cix ndaej, dwg seizneix cix ndaej, dwg baezneix cix ndaej, dwg miz gienz cix ndaej, 39 dwg gwnzmbwn cix ndaej, dwg lajdeih cix ndaej, caeuq gak cungj cauh okdaeuj he cix ndaej; cungj mbouj ndaej laengz Cangqdiq vih bouxcawj raeuz Yehsuh Gihduz hwj aiq gyoengqraeuz.
1-3 Gou dwg haeuj gij vunz Gihduz; gou gangj lauxsaed vah naeuz sou ni: gou vih gij beixnuengx caeuq gou doxcaemh minzcuz he mbouj sinq Gihduz hwj cix simnyap cix siengsim ij rai bae. Couh vih gyoengqde hwj gou cingxnyienh ngaiz souh daengz mang caeuq ngaiz mbouj ndaej gaen Gihduz hoh luh. Gou soj gangj hih vah cungj dwg ciuq gou dih liengzsim ma gangj hih, Hoenzsaenz Cangqdiq ndaej cingqmingz hih. 4 Hojsik gyoengqde mbouj sinq, aenvih gyoengqde, Hijswzlez vunz, dwg Cangqdiq senj okdaeuj, hawj gyoengqde ndaej suenq dwg gij lwg de, hawj gyoengqde ndaej do gij rongh de. Cangqdiq caemh doiq gyoengqde baujcingq, caemh dingh fazliz hawj gyoengqde, hawj gyoengqde rox gingqbaiq de, caemh hawj gyoengqde ndaej gij baujcingq de. 5 Gij cojgoeng gyoengqde, Yaqbwzlahhanj, Hijsaj caeuq Yajgoz, dwg Cangqdiq dwzbez senj okdaeuj he. Gihduz daeuj lajmbwn guh vunz caemh dwg guh Hijswzlez vunz. Boux Gihduz neix dwg dungjguenj sojmiz he dih Cangqdiq, yungjyenj haenh he dih Cangqdiq! Ahmaenz. 6 Gou mbouj dwg naeuz Cangqdiq mij doiqyienh gij baujcingq de, hoeng, aenvih daj Hijswzlez seng hih, mbouj itdingh cungj dwg ndaej youq ndaw lwgra Cangqdiq suenq dwg caen dih Hijswzlez vunz; 7 Yaqbwzlahhanj dih doengh daih gajlaeng, mbouj itdingh cungj dwg ndaej youq ndaw lwgra Cangqdiq suenq dwg gij lwg Yaqbwzlahhanj. Cangqdiq doiq Yaqbwzlahhanj naeuz goq naeuz: Caenhgag dwg dajlaeng Hijsaj seng hih cij suenq dwg doengh daih gajlaeng mwngz. 8 Gij neix couh dwg naeuz, gauq ndangnoh seng hih lwg mbouj suenq dwg lwg Cangqdiq; gauq Cangqdiq dih baujcingq seng okdaeuj hih lwg cij suenq dwg lwg Yaqbwzlahhanj, couh dwg lwg Cangqdiq, 9 aenvih Cangqdiq doiq Yaqbwzlahhanj baujcingq goq naeuz: Daengz bimoq hih mwhneix, gou vanzlij caiq daeuj dineix; mehyah mwngz Sajlah caemh ij seng miz daeglwg he hawj mwngz. Daeglwg neix couh dwg heuh Hijsaj. 10 Mbouj danhcij naeuz yienghneix, vanzlij miz Liqbwzgyah; de caeuq cojgoeng raeuz Hijsaj daeglwg neix gyezvwnh le, vanzlij raek miz doiq suengjseng he. 11 Yiengq youq mwh song laeq lwg neix vanzlij mijyaengz seng, ndei yak vanzlij mijyaengz ndaej guh haem, Cangqdiq vih ij doiqyienh gij giqvaq bonjfaenh de, couh senj laeq lwg iq de; 12 de couh doiq Liqbwzgyah naeuz: Baezneix daeglwg daeuz mwngz ij swqhaeuh daeglwg iq mwngz. Yiengq, ciuq yienghneix ma gangj, Cangqdiq senj vunz mbouj dwg yawj vunz guh gijmaz hwj ma senj vunz, dauq dwg ciuq gij cawjeiq bonjfaenh de ma senj vunz lah. 13 Cingq luj ndaw Singqgingh ndaw de sij naeuz: Gou haenj Yajgoz, yiem Hijsauj. 14 Yiengq, ciuq luj yienghneix ma gangj, gyoengqraeuz ij baenzlaw naeuz nej? Nanzdauh naeuz Cangqdiq mbouj goengbingz mah? Danghyienz mbouj dwg lo! 15 Aenvih de doiq Mohsih naeuz goq, naeuz: Gou ij cojgvaq byawz, couh cojgvaq byawz; gou ij hojsik byawz, couh hojsik byawz. 16 Yiengq, ciuq gij neix ma gangj, Cangqdiq dih gyezdingq mbouj dwg naeuz ciuq byawz muengh guxmaz cixnaeuz ciuq byawz dih roengzrengz ma gyezdingq hih nej, dauq dwg coengz ndaw sim de dih hojsik lah. 17 Couh dangq ndaw Singqgingh ndaw de sij naeuz Cangqdiq doiq goengjvuengz Ngaihgiz naeuz: Gou laeb mwngz guh vuengz dwg vih ij youq laeng mwngz yienh ok gij bonjsaeh gou, sawjhawj gou ndaej riengzmingz baenx cenz lajmbwn lah. 18 Fanjcingq, Cangqdiq ij cojgvaq byawz, couh cojgvaq byawz; ij hawj byawz nga'ngangq, couh hawj byawz nga'ngangq. 19 Yiengq mwngz gaengjdingq ij doiq gou naeuz: “Giqyienz dwg Cangqdiq dih cawjeiq vwz, byawz cungj mbouj ndaej dingj, yiengq vihmaz Cangqdiq vanzlij ij gvaiq vunz nej?” 20 Ox! Gou naeuz mwngz hax, mwngz suenq guxmaz vunz nex, gingqyienz gamj dingj Cangqdiq? Couh dwg naeuz, cauh okdaeuj hih, ij baenz doiq boux cauh de naeuz: “Mwngz vihmaz ij cauh gou cauh baenz yienghneix nej?” 21 Nanzdauh cangh guh vanj hih, de mij'z gienz ndaej daj ndaw ngauq naez he aeu naez ma baenj guh song aen vanj maz, aen he dwg dijbauj he, aen he dwg yaez he? 22 Cangqdiq cauh vunz caemh dwg yienghneix; miz hih dwg vih ij yienh ok de dih fatheiq caeuq gij rengz de. Doenghheij vunz neix couh dangq aen vanj yaez he, Cangqdiq naenxsim yungh le, couh dawz de vwt bae; de cauh aen de dih muzdiz couh dwg ij yienghneix guh. Yiengq, giqyienz vunz caemh dwg Cangqdiq cauh okdaeuj he, miz byawz gamj naeuz de yienghneix guh mbouj ndaej nej? 23 Lij miz hih vunz, Cangqdiq cauh gyoengqde dwg vih ij yienh ok de dih veijdaq; de hojsik gyoengqde couh senqsi cix gyezdingq ij hawj gyoengqde najrongh lo. Doenghgij vunz neix couh dangq aen vanj gyaeundei he; Cangqdiq yawjdij de, insik de. Yiengq, giqyienz vunz dwg Cangqdiq cauh okdaeuj he vwz, miz byawz gamj naeuz de mbouj ndaej yienghneix guh nej? 24 Cangqdiq soj cojgvaq hih couh dwg gyoengqraeuz; gyoengqraeuz dwg Cangqdiq daj ndaw Youzdaiq vunz caeuq linghvaih minzcuz ndaw de senj okdaeuj dih vunz. 25 Cingq luj de hawj Hozsih'ah boux cenz gij vah Cangqdiq neix youq ndaw Singqgingh ndaw de sij naeuz goq naeuz: Baenjlaiz mbouj dwg gij vunz gou, gou caemh ij cwng gyoengqde: “Dwg gij vunz gou.” Baenjlaiz gou mbouj aiq hih, gou caemh ij naeuz: “Gou aiq hih.” 26 Gou gaxgonq youq mwnqlaw doiq gyoengqde naeuz: “Faenhsou mbouj dwg gij vunz gou,” gajlaeng gou caemh ij youq mwnqde doiq gyoengqde naeuz: “Faenhsou dwg seiqseiz lix dih Cangqdiq dih lwg!” 27 Hoeng, de caemh vanzlij caiq hawj Hijcaiqyaq boux cenz gij vah de neix doiq gij vunz Hijswzlez hemq goggog naeuz: Gij vunz Hijswzlez gannaeuz lai luj gij sa henz haij lah, hoeng, cijngamq miz dihdi vunz he ndaej gouq lah, 28 aenvih Cangqdiq couh ij doiqyienh gij vah de, ij sawqmwh saemjbuenq gij vunz lajmbwn lo. 29 Caemh luj Hijcaiqyaq naeuz goq naeuz: Hauhnaeuz mbouj dwg guenj cien bing fanh max dih Cangqdiq baujhuq gij cojgoeng raeuz, gyoengqraeuz senqsi cix luj Sojdohmaj caeuq Ngozmohlah song aen singz neix ngaiz byoeng lo. 30 Yiengq, ciuq luj yienghneix ma gangj, ij baenzlaw naeuz nej? Doenghgij linghvaih minzcuz hih vunz baenjlaiz mbouj haeuj uk bonjfaenh dwg mbouj dwg miz coih, hoeng Cangqdiq dauq yawj gyoengqde dwg mij'z coih hih vunz, couh dwg aenvih gyoengqde sinq de. 31 Hoeng, fanjgoqma doenghheij vunz Hijswzlez gauq soenhsouj fazliz siengj guh boux youq ndaw lwgra Cangqdiq dwg mij'z coih hih, dauq guh mbouj daengz. 32 Vihmaz nej? Aenvih gyoengqde mbouj sinq Cangqdiq, dauq gauq bonjfaenh dih guhfap ma ij guh vunz mij'z coih, hoeng cungj miz yiengh he gaz dawz, 33 cingq luj ndaw Singqgingh ndaw de sij naeuz: Yawj veiq! Gou youq Cizanh coengq ngauq rin he, hawj vunz daemjndoet laemx. Hoeng, sinq de baengh de dih vunz couh miz muengh.
1 Gak boux beixnuengx hax, ndaw sim gou soj muengh soj gouz Cangqdiq hih dwg ijsiengj hawj gij vunz Hijswzlez ndaej gouq. 2 Gou ndaej cingqmingz gyoengqde dwg yawjnaek Cangqdiq hih, hoeng, cijmboujgoq hojsik gyoengqde mbouj dwg cingqcaen rox cingsuj Cangqdiq dwg baenzlawz guhfap. 3 Gyoengqde mbouj rox, mij'z coih dwg Cangqdiq dingh hih, dauqfanj rox naeuz gag baengh bonjfaenh dih guhfap hwj ma dingh mij'z coih lah; gyoengqde gaenhbaenj mbouj fug Cangqdiq. 4 Gizsaed Gihduz dwg hawj fazliz bienqbaenz mij'z yungh, dwg hawj sojmiz sinq de hih vunz ndaej youq ndaw lwgra Cangqdiq bienqbaenz boux mij'z coih he. 5 Gvanhhih gauq soenhsouj fazliz ndaej guh mij'z coih hih vunz gij saeh neix, Mohsih yienghneix sij goq naeuz: Soenhsouj fazliz mingqlingq cij ndaej lix. 6 Hoeng gvanhhih sinq hwj ndaej bienq boux mij'z coih hih vunz, ndaw Singqgingh yienghneix sij naeuz: Mbouj ndaej ndaw sim naeb naeuz: “Byawz ndaej hwnj mbwn bae nej?” Gawq neix gij iqswh de dwg naeuz: “Byawz ndaej bae daiq Gihduz roengzma nej?” 7 Ndaw de caemh vanzlij sij naeuz: Byawz ij roengz ndawlaep bae nej? Gawq neix gij iqswh de couh dwg naeuz: “Byawz ij daiq Gihduz daj ndaw vunzrai daiq de okma nej?” 8 Gizsaed youq ndaw Singqgingh ndaw de vanzlij sij naeuz: Gij siuhsiz Cangqdiq liz mwngz mbouj geij gyae, couh youq ndaw bak, youq ndaw sim mwngz lo, couh dwg gyoengqraeuz soj cenzgangj hih, ij sinq Yehsuh. 9 Couh dwg naeuz, hauhnaeuz conghbak mwngz nginh Yehsuh dwg bouxcawj mwngz, ndaw sim mwngz sinq Cangqdiq hawj de daj rai ndaej dauqlix nex, yiengq mwngz couh ndaej gouq lo, 10 aenvih ndaw sim vunz sinq, couh ndaej youq ndaw lwgra Cangqdiq suenq dwg vunz mij'z coih; conghbak yienghneix nginh, couh ndaej gouq. 11 Cingq luj ndaw Singqgingh ndaw de sij naeuz: Famz sinq de hih vunz cungj miz muengh. 12 Gij vah neix dwg ceij sojmiz hih vunz, aenvih Youzdaiq vunz caeuq linghvaih minzcuz hih vunz cungj dwg doxdoengz, mij maz faenbied, aenvih bouxcawj raeuz dwg sojmiz vunz dih bouxcawj; de doiq sojmiz gouz de dih vunz haijliengh. 13 Cingq luj ndaw Singqgingh ndaw de sij naeuz: Famz heuhgouz Cangqdiq hih vunz cungj ndaej gouq. 14 Hoeng, hauhnaeuz vunz cungj mijyaengz sinq de haem, yiengq ij baenzlawz heuhgouz de nej? Cungj mijyaengz dingqri de goq haem, ij baenzlawz sinq de nej? Mij vunz cenzgangj de goq haem, ij baenzlawz dingqri naeuz de goq nej? 15 Mijyaengz baij vunz goq haem, ij baenzlawz cenzgangj nej? Caemh luj ndaw Singqgingh ndaw de sij naeuz: Boux cenz Cangqdiq dih ndei siuhsiz hih dij raixcaix! 16 Hoeng mbouj dwg naeuz sojmiz hih Hijswzlez vunz cungj sinq gij ndei siuhsiz neix, couh luj boux cenz gij vah Cangqdiq Hijcaiqyaq naeuz: Bouxcawj gou hax! Gyoengqraeuz soj cenz hih siuhsiz miz byawz sinq nej? 17 Sojhij naeuz ij dingq le, cij ndaej sinq, yiengq dingq dwg dingq vunz cenzgangj Gihduz dih ndei siuhsiz hah. 18 Hoeng, gou ij naeuz hax, gyoengqde cingqcaen mij dingqri goq haj? Danghyienz dingqri goq lo. Cingq luj ndaw Singqgingh ndaw de sij naeuz: Gij vah doengh boux cenzgangj Cangqdiq hih gaenq cenz baenx cenz lajmbwn lo; lajmbwn dauqcawq cungj miz gij vah gyoengqde. 19 Gou vanzlij caiq naeuz: Nanzdauh gij vunz Hijswzlez cingqcaen dingq mbouj rox? Gizsaed Mohsih gaenq senqsi cix yungh gij vah Cangqdiq ma naeuz goq naeuz: Gou ij hawj doenghheij vunz baenjlaiz mbouj suenq guxmaz minzcuz he ma yex hawj faenhsou rahoengz; gou ij yungh doenghgij vunz ngawz he ma yex hawj faenhsou aeuqheiq. 20 Hijcaiqyaq, boux cenz gij vah Cangqdiq neix, de caemh vanzlij mbeihung hwj yungh gij vah Cangqdiq ma naeuz goq naeuz: Doengh boux baenjlaiz mbouj cimh gou hih dauq cimh ndaej raen; baenjlaiz mbouj heuhgouz gou hih, gou dauq yienh hawj de raen. 21 Gangj daengz gij vunz Hijswzlez, Hijcaiqyaq caemhcaiq yungh gij vah Cangqdiq ma naeuz: Gou baenxngoenz cungj daengj ciep gij vunz nga'ngangq ak dingjbak he gaijgoq.
1 Yiengq hawj faenhsou naeuz yawj hux, nanzdauh Cangqdiq couh yiem gij vunz de lo mah? Gaengjdingq mbouj yiem, aenvih gou caemh dwg gij vunz Hijswzlez, dwg Yaqbwzlahhanj dih doengh daih gajlaeng de, dwg haeuj aen cuz Benqyajminj he. 2 Cangqdiq gaenhbaenj mbouj vwt gij vunz de senqsi cix senj okdaeuj he. Faenhsou mbouj rox ndaw Singqgingh sij miz gvanhhih Hijliqyaq boux cenz gij vah Cangqdiq neix haz? De youq dangqnaj Cangqdiq gauq gij vunz Hijswzlez naeuz: 3 Bouxcawj gou hax, gyoengqde gajrai boux cenz gij vah mwngz, caemhcaiq cek aen daiz dajbwiz mwngz. Seizneix lij gag lw gou boux vunz dog haem lo; gyoengqde vanzlij ijsiengj gaj gou. 4 Yiengq Cangqdiq baenzlawz han de nej? De naeuz: Gou gag bonjfaenh gou louz miz caetcien vunz guh gij vunz gou; gyoengqde mij baiqsax goq gyaj cwnz Bahliz. 5 Seizneix caemh doxdoengz; Cangqdiq doiq mbangj hih Hijswzlez vunz haijliengh, couh senj gyoengqde okdaeuj, louz guh gij vunz de. 6 Cangqdiq senj vunz dwg vih de haijliengh; mbouj dwg vih vunz guh gijmaz hwj senj. Hauhnaeuz dwg vih vunz guh gijmaz hwj cij senj nex, yiengq ij baenzlaw suenq naeuz dwg haijliengh haem? 7 Yiengq, ciuq luj yienghneix ma gangj, gij vunz Hijswzlez soj muengh hih dauq mij ndaej, dauq dwg doenghheij vunz de senj he cij ndaej; lij lw hih vunz cungj bienq simgyeng nga'ngangq liux. 8 Cingq luj ndaw Singqgingh ndaw de sij naeuz: Cangqdiq hawj aen sim gyoengqde mazmwnh, ra yawj mbouj raen, rwz mbouj dingqri, itcig daengz seizneix. 9 Daqveiq caemh naeuz goq naeuz: Muengh aen daiz haeux gyoengqde bienqbaenz aen gaepnou yienghmwnq gaep dawz gyoengqde, gaj dawz gyoengqde, bauqwngq dawz gyoengqde. 10 Muengh cehra gyoengqde myoxmyad, yawj mbouj raen; muengh gyoengqde gumqgoz, siengzseiz mbouj ndaej iet soh! 11 Yiengq, ciuq luj yienghneix ma gangj, gij vunz Hijswzlez guh loek le couh satsoq lo mah? Danghyienz mbouj dwg lo! Dauqfanj dwg vih gyoengqde guh loek hwj Cangqdiq couh hawj linghvaih minzcuz ndaej gouq, hawj gij vunz Hijswzlez rahoengz le couh dauq gaij goqma. 12 Gyoengqde guh loek dauq ndaej hawj lajmbwn sojmiz hih vunz ndaej miz ik, gyoengqde guh mbouj deng ndaej hawj linghvaih minzcuz miz fuk; yiengq, hauhnaeuz gyoengqde gaij goqma, mbouj engqgya ndaej hawj lajmbwn sojmiz hih vunz miz fuk lai hux lai lo maz? 13 Gou seizneix miz vah doiq gij vunz linghvaih minzcuz faenhsou gangj. Aenvih gou dwg boux dwzbaijyienz he, dwg Cangqdiq baij daeuj yiengq gij vunz linghvaih minzcuz cenzgangj Cangqdiq dih ndei siuhsiz he, sojhij gou ij caenhsim caenhrengz bae guh ndei gij hong neix. 14 Gou muengh dunghgoq yienghneix hwj ma hawj gij vunz caeuq gou doxcaemh minzcuz he rahoengz le, ndaej gouq gyoengqde ndaw de mbangj hih vunz. 15 Yiengq, hauhnaeuz Cangqdiq yiem gyoengqde, lajmbwn hih vunz couh ndaej caeuq Cangqdiq doxndei; yiengq, hauhnaeuz Cangqdiq nginh gyoengqde nex, gyoengqde mbouj dwg dangq rai ndaej dauqlix maz? 16 Hauhnaeuz miz ngauq mbamienh moq he, soengq mbangj hawj Cangqdiq, yiengq caemhdangq naeuz baenx ngauq cungj gvi hawj de liux lo. Caiq hauhnaeuz dawz ragfaex soengq hawj Cangqdiq, yiengq caemhdangq naeuz daiqlienz gij nge de cungj gvi hawj de lo. 17 Hauhnaeuz gij nge go makmbi ngaiz raemj roengzma lo, yiengq mwngz, gij nge go makmbi ndoi, couh ciep hwnjbae, couh ndaej sup aeu go makmbi daj gij rag cenz hwnjdaeuj dih gij iengraemx de, 18 yiengq mwngz couh mbouj wnggai hozroengz doengh nge ngaiz raek roengzma mwnq; hauhnaeuz mwngz hozroengz, couh ijaeu ndaejgeiq, mbouj dwg mwngz viq ragfaex, dauq dwg ragfaex viq mwngz lah. 19 Yiengq mwngz aiq naeuz: “Hoeng, doengh ngefaex ngaiz raek mwnq dwg vih ij hawj gou ciep hwnjbae hwj mah?” 20 Gij vah neix deng hih, mbouj loek law. Gyoengqde ngaiz raemj roengzma dwg aenvih gyoengqde mbouj sinq; mwngz ndaej ciep hwnjbae dwg aenvih mwngz sinq. Hoeng, mwngz mbouj ndaej daekeiq, dauq ij lau Cangqdiq; 21 giqyienz Cangqdiq mbouj louz nge gaxgonq de, yiengq de caemh mbouj louz mwngz lo. 22 Yiengq, ciuq luj yienghneix ma yawj, Cangqdiq cix soh cix yiemz. De doiq doenghheij vunz guh loek he gig yiemz, doiq mwngz gig soh, cijaeu mwngz vanzlij caeuq de doxhuz; mbouj nex, mwngz caemh ngaiz raemj roengzma. 23 Danghyienz, hauhnaeuz gyoengqde mbouj caiq gyenhciz mbouj sinq, couh dauqyungz ndaej damq hwnjbae, aenvih Cangqdiq ndaej dawz gyoengqde dauqyungz ciep hwnjbae. 24 Mwngz cijmboujgoq dwg daj gwnz go makmbi ndoi raemj roengzma hih nge he lah, dauq ndaej ciep hwnj go makmbi cingqcaen ndaem he bae. Yiengq, hauhnaeuz dwg nge gaxgonq de, mbouj engqgya yungzheih damq haz? 25 Gak boux beixnuengx hah, gou muengh faenhsou rox gij saeh nanz neix, mienxndaej faenhsou cungj gag naemqnaeuz bonjfaenh rem raixcaix. Gij saeh nanz neix couh dwg: Miz mbangj hih Hijswzlez vunz simgyeng nga'ngangq, hoeng, daengj daengz gij vunz linghvaih minzcuz Cangqdiq soj senj hih vunz cungj ndaej gaep haeuj aen guek de le, 26 cenz Hijswzlez aen minzcuz neix cungj ndaej gouq lo. Cingq luj ndaw Singqgingh ndaw de sij naeuz: Ij miz boux gouq vunz he daj Cizanh ok daeuj, ij hawj doenghgij lwglan Yajgoz mbouj caiq guh gij mbouj hab'eiq habhoz Cangqdiq he. 27 Ndaw de vanzlij sij naeuz: Gou doiq gyoengqde baujcingq: gou ij cawz gij coih gyoengqde. 28 Gyoengqde fanjdeiq gij ndei siuhsiz Cangqdiq; couh vih yienghneix hwj faenhsou couh ndaej gij ndei siuhsiz Cangqdiq. Hoeng, Cangqdiq ciuqyiengh soengq fuk hawj gyoengqde, aiq gyoengqde, aenvih gij cojgoeng gyoengqde dwg de senqsi cix senj okdaeuj he, 29 aenvih Cangqdiq soengq couh soengq, senj couh senj, mbouj rox gaijbienq. 30 Faenhsou gaxgonq dwg mbouj dingq Cangqdiq hih, hoeng, seizneix couh vih Hijswzlez vunz mbouj dingq hwj, faenhsou dauq ndaej daengz Cangqdiq dih hojsik. 31 Caemh doxdoengz, Hijswzlez vunz seizneix mbouj dingq Cangqdiq, caemh couh vih faenhsou ndaej daengz Cangqdiq dih hojsik hwj gyoengqde caemh ij ndaej daengz Cangqdiq dih hojsik. 32 Aenvih Cangqdiq hawj baenx cenz lajmbwn hih vunz cungj mbouj naeuzdingq; yienghmwnq de couh haemq ndei yienh ok de dih haijliengh caeuq hojsik lo. 33 Vax! Cangqdiq gaeuq rem lo, Gijgij cungj rem, gijgij cungj rox! De gyezdingq hih, vunz mij banqfaz rox de vihmaz ij gyezdingq, De dih guhfap vunz mij banqfaz rox! 34 Miz byawz ndaej rox ndaw sim Cangqdiq? Caemh miz byawz ndaej ok cawjeiq hawj de? 35 Miz byawz hawj doxgaiq hawj de goq, Guh hwj de gajlaeng mbouj ndaej mbouj ij ngaiz boiz de bae lwi? 36 Aenvih sojmiz hih cungj dwg daj de daeuj, baengh de, gvi haeuj de. Muengh najrongh yungjyenj gvi hawj Cangqdiq! Ahmaenz.
1 Sojhij, gak boux beixnuengx hax, giqyienz Cangqdiq yienghneix cojgvaq gyoengqraeuz, gou naeuz faenhsou, faenhsou ij dawz bonjfaenh faenhsou ma dangq guh gij dajbwiz hab'eiq habhoz Cangqdiq he, couh dwg naeuz faenhsou ij naebsim swqhaeuh Cangqdiq; faenhsou wnggai yienghneix gingqbaiq cij deng. 2 Faenhsou mbouj ndaej ciuq aen seiqgyaiq neix hwng gijmaz caemh gaen hwng gijmaz, dauq ij hawj Cangqdiq gaij gij siengjfap faenhsou hwj hawj faenhsou ndaej gaijbienq goqma, hawj faenhsou ndaej faenbied gij cawjeiq Cangqdiq, hawj faenhsou rox gijmaz dwg ndei he, dwg hab'eiq habhoz Cangqdiq he, dwg mij maz ndaej diudik he. 3 Sojhij, gou baengh Cangqdiq hawj gou hih gienz, hawj gou ndaej doiq faenhsou gak boux naeuz: Gaejyungh gag naemqnaeuz bonjfaenh ak raixcaix, dauq ij ciuq Cangqdiq soj nyok hawj bonjfaenh hih geijlai doiq Gihduz dih sinqsim ma dag bonjfaenh. 4 Couh luj aen ndang gyoengqraeuz miz bakbak ndaengndaeng haha fawzfawz, gak gaiq gak yunghfap mbouj doengz, 5 caemh doxdoengz, gyoengqraeuz gyauqveiq miz haujlai vunz, doxgaep hwnjdaeuj cij guhbaenz aen gyauqveiq he. Aen gyauqveiq neix couh luj baenz aen ndang he; gyoengqraeuz dwg aen ndang neix doxgaep hwnjdaeuj dih faenh he, dwg doxriengh doxnem hih. 6 Ciuq Cangqdiq nyok hawj hih, gak vunz gag ndaej mbouj doxdoengz. Miz hih vunz dwg ndaej cenz gij vah Cangqdiq hih; gij vunz neix de wnggai ciuq de doiq Gihduz miz geijlai dih sinqsim bae cenz. 7 Miz hih dwg ndaej guh swqhaeuh hih; couh ij caensim bae swqhaeuh. Miz hih dwg son vunz hih; couh ij caensim bae son vunz. 8 Miz hih rox gienq vunz hih; couh ij caensim bae gienq vunz. Miz hih dwg haijliengh hih; couh ij haijliengh bang vunz. Miz hih dwg guh lingjdauj hih; couh ij mbouj lau dwgrengz hwj bae guh. Miz hih dwg cojgvaq vunz hih; couh ij daj ndaw sim cojgvaq vunz. 9 Aiq vunz mbouj ndaej bak lai myaiz led. Ij yiem gij doegsieb he, haenj gij ndei he. 10 Ij doxndiep doxaiq luj beixnuengx caen nginz caen rag faenhsou, dawz vunz coengq youq daixit, ij rox doxnyiengh, 11 ij gaenz, mbouj ndaej gyik, ij naebsim bae swqhaeuh bouxcawj raeuz. 12 Mboujguenj daengj hajx cixnaeuz muengh, cungj ij miz aen sim vuenheij he; miz nanh ij naenxsim; gouz Cangqdiq ij miz sinqsim. 13 Doiq gij vunz Cangqdiq gungz, mbouj miz, ij caensim bang gyoengqde hawj gyoengqde. Miz hek daeuj, ij haijliengh, ij caensim daih hek. 14 Ij hoh fuk hawj doengh boux haih faenhsou he; ij hoh fuk, mbouj ndaej mang. 15 Vunz miz gij saeh vuenheij sim'angq he, mbouj ndaej rahoengz, ij wnggai gaen angq. Vunz miz nanh siengsim daej, faenhsou ij rox vued vunz. 16 Ij rox doxhuz; mbouj ndaej rasang, yawj vunz mbouj hwnj rwz, dauq ij rox yawjhwnj vunz. Mbouj ndaej gag naemqnaeuz bonjfaenh dwg coengjmingz vunz. 17 Gaejyungh vunz famh mwngz, mwngz caemh famh vunz. Doenghgij saeh vunz nginhnaeuz deng hih, couh ij bae guh. 18 Ij cwnqliengq guh daengz caeuq vunz doxndei. 19 Cinhngaiq dih baengzyoux hax, gaejyungh gag bae boixhaemz; wnggai nyiengh hawj Cangqdiq gag aeuqheiq le, gag bae bang mwngz boixhaemz, aenvih ndaw Singqgingh ndaw de sij naeuz: Boixhaemz youz gou boiz; gou gaengjdingq hawj de bauqwngq dawz. 20 Ndaw Singqgingh ndaw de vanzlij sij naeuz: Hauhnaeuz boux haemzcaeuz mwngz iek lo, couh ij hawj de gw; hozhawq lo, couh ij hawj raemx hawj de gw. Hauhnaeuz mwngz yienghneix guh, couh hawj de gag roxnginh saetnaj saetnyaenq, mboujeiqseiq. 21 Sojhij mwngz gaejyungh hawj gij doegsieb he giengz goq mwngz, dauq ij hawj gij ndei he giengz goq gij vaih he.
1 Moix it boux cungj ij dingq gwnz de, aenvih sojmiz hih gienz cungj dwg Cangqdiq laeb he; doenghheij vunz miz gienz he, cungj dwg Cangqdiq hawj he. 2 Sojhij mbouj dingq gwnz de hih couh dwg fanjdeiq Cangqdiq soj dingh hih; mbouj dingq hih vunz gag cauh baenz ngaiz fad. 3 Boux miz gienz he mbouj dwg hawj boux guh ndei hih vunz lau nej, dauq dwg hawj gij vunz guh doeg guh sieb he lau lah. Hauhnaeuz mwngz mbouj siengj lau boux miz gienz he nex, mwngz couh ij guh vunz ndei; yienghmwnq de couh haenh mwngz lo, 4 aenvih de dwg Cangqdiq yungh hih vunz; gij hong de dwg doiq mwngz miz ik he. Hauhnaeuz mwngz guh doeg guh sieb, mwngz couh ij wnggai lau de, aenvih de fad vunz mbouj dwg guh guxcaemz hezhej he. De dwg Cangqdiq soj yungh hih vunz; de dwg daiqbiuj Cangqdiq fad doenghheij vunz guh doeg guh sieb he. 5 Sojhij faenhsou bietdingh ij dingq gwnz de, mbouj danhcij naeuz dwg vih lau fad, caemh dwg vih liengzsim. 6 Faenhsou nab ceiq, caemh dwg vih yienghneix, aenvih cingqfuj dwg Cangqdiq laeb he, dwg bau guenj gij saeh neix he. 7 Sojhij wnggai ndaej hih, couh ijaeu hawj. Wnggai nab ceiq hih couh ij nab ceiq, wnggai nab haeux hih couh nab haeux, wnggai lau hih couh lau, wnggai soenhgingq hih couh ij soenhgingq. 8 Ciengeiz mbouj ndaej yiemq caiq vunz, caenhgag cawzok dwg doxaiq hih gij caiq neix, aenvih aiq vunz cij dwg soenhsouj fazliz dih yauhgyiuz. 9 Fazliz gveihdingq: “Mbouj ndaej guhyoux, mbouj ndaej gaj vunz, mbouj ndaej guxcaeg, mbouj ndaej damsim,” mboujguenj miz gijmaz gveihdingq, sojmiz hih, caenh miz gawq dog, couh dwg “Aiq vunz ij luj aiq bonjfaenh,” 10 aenvih vunz hauhnaeuz miz aen sim aiq vunz he, yiengq couh mbouj guh sienghaih vunz dih saeh. Sojhij aiq couh dwg hab fazliz dih yauhgyiuz lo. 11 Faenhsou caemh bietdingh ij yienghneix miz aiq, aenvih mwhde couh ij daengz lo; faenhsou caemh ijaeu rox, seizneix dwg faenhsou wnggai singqsag goqdaeuj hih mwhde lo, aenvih seizneix gyoengqraeuz couh ij ndaej daengz gouq caeuq ndaej daengz seiqseiz lix hih beij mwh gyoengqraeuz ngamq sinq hih engq gaenh lo. 12 Mbwn laep couh ij goq, ranzrongh couh ij daengz. Mbouj caiq baengh laep ma guh saeh, dauq ij yungh rongh ma ceq laep, couh dwg naeuz ij yungh saedsaeh ma fanjdeiq doegsieb. 13 Gyoengqraeuz guh vunz ij guh cingqdangq hih vunz, caemh ij guh gij saeh cingqdangq yawj ndaej raen rongh he. Mbouj ndaej caenhrox gwgw angqangq ndaengndaeng ndwetndwet, mbouj ndaej hozgenz, rahoengz, doxceng. 14 Faenhsou wnggai hawj bouxcawj raeuz Yehsuh Gihduz baux aen ndang faenhsou; gaejyungh caenhrox vih aen ndangdaej bonjfaenh hwj guh gij mbouj hab guh he.
1 Faenhsou ij vuenhringz doengh boux sinqsim mbouj gaeuq he; mbouj ndaej caeuq de doxeuq doenghgij saeh mij maz iqswh he. 2 Beijgangj naeuz miz vunz sinq Cangqdiq gaeuq gyenhdingq he, couh gijmaz cungj gamj gw, hoeng, boux sinq Cangqdiq mbouj gaeuq gyenhdingq he, couh mbouj gamj gw gij noh bwiz goq doengh duz you he, caenhgag rox gw byaek sat lo. 3 Yiengq doengh boux gijmaz cungj gamj gw he mbouj ndaej yawj doengh boux gijmaz cungj mbouj gamj gw he ngawz; boux caenhgag gw byaek he caemh mbouj ndaej naeuz boux gijmaz cungj gamj gw he miz coih, aenvih Cangqdiq gaenq sou de lo. 4 Hauhnaeuz miz byawz naeuz vunz, yiengq boux de wnggai gag ngeixngeix yawj: bonjfaenh mwngz dwg byawz, gingqyienz gamj naeuz bouxhoiq vunz? De hab mbouj hab, swhmboujyienz miz bouxcawj de naeuz de. Gizsaed de gaengjdingq ndaej gaeuqgwz, aenvih Cangqdiq sawjhawj de gaeuqgwz. 5 Miz hih vunz nginhnaeuz youq ndaw lwgra Cangqdiq miz ngoenz ndei, hoeng, caemh miz hih vunz nginhnaeuz ngoenzngoenz cungj doxdoengz; yiengq mboujguenj baenzlawz, cijaeu de sinq dwg Cangqdiq dingh he couh ndaej lo. 6 Miz hih vunz dwzbez yawjnaek ngoenz he, yienghneix couh dangq naeuz de soenhcungq bouxcawj raeuz lo. Miz hih vunz gijmaz ndaej gw hih cungj gw; cijaeu de rox docih Cangqdiq, yiengq couh dangq naeuz de soenhcungq bouxcawj raeuz. Yiengq miz hih vunz de mbouj dwg gijmaz cungj gw, hoeng, cijaeu de rox docih Cangqdiq, yiengq caemh suenq de dwg soenhcungq bouxcawj raeuz lo. 7 Fanjcingq gyoengqraeuz sinq Yehsuh hih vunz, mij saek boux naeuz dwg vih bonjfaenh hwj goq saedceij hih, caemh mij saek boux dwg vih bonjfaenh hwj rai. 8 Gyoengqraeuz lix dwg vih bouxcawj raeuz lix; rai caemh dwg vih bouxcawj raeuz rai. Gyoengqraeuz mboujguenj rai haj lix, cungj dwg gij vunz bouxcawj raeuz. 9 Sojhij vih yienghneix hwj, Gihduz rai le dauqlix lo; de yienghneix guh dwg vih ij guh vunzrai caeuq vunzlix dih cawj. 10 Yiengq mwngz vihmaz ij lwnh naeuz gij beixnuengx mwngz nej? Vihmaz yawj mbouj hwnj gij beixnuengx mwngz nej? Gyoengqraeuz baezneix cungj ij ngaiz ndwn youq dangqnaj Cangqdiq souh Cangqdiq dih saemjbuenq. 11 Cingq luj ndaw Singqgingh ndaw de sij naeuz yienghmwnq: Cangqdiq naeuz: “Gou gamj yungh gij mingh gou ma baujcingq, sojmiz hih vunz cungj ij gvih gou sax gou; sojmiz hih vunz cungj ij nginh gou dwg Cangqdiq.” 12 Ciuq yienghneix ma gangj, gyoengqraeuz bouxboux cungj ij dawz gij saeh bonjfaenh youq dangqnaj Cangqdiq gangj ndei cingsuj. 13 Sojhij, gyoengqraeuz mbouj ndaej caiq mwngz gangj gou, gou gangj mwngz laem lo; wnggai gyezdingq mbouj guh doenghgij hawj vunz famh coih hih saeh. 14 Gou baengh gou dwg Yehsuh hih vunz, gou gaengjdingq sinq sojmiz hih gij gw, mij saek yiengh naeuz dwg Cangqdiq mbouj hawj gw hih. Caenhgag doenghgij vunz naemqnaeuz mbouj ndaej gw he, doenghgij gw mwnq doiq de ma gangj couh dwg mbouj ndaej gw he lo. 15 Yiengq, hauhnaeuz mwngz gw hih gij gw mwnq hawj gij beixnuengx mwngz roxnginh raen simnyap hih, yiengq couh dwg naeuz mwngz guh hih saeh mbouj dwg miz aiqsim lo. Mwngz mbouj ndaej vih dihdi gw he hwj haih vunz, couh dwg haih boux Gihduz vih ij gouq de hwj ngaiz vwt mingh hih. 16 Sojhij gaejyungh guh gij saeh hawj vunz bangjlaih mwngz he, 17 aenvih guek Cangqdiq gaenhbaenj mbouj yawjnaek gij gw, dauq yawjnaek Hoenzsaenz bonjfaenh de hawj vunz simndei simsoh, doxhuz doxaiq, vuenvuen heijheij hih lah. 18 Couh dwg naeuz ciuq geij yiengh neix ma swqhaeuh Gihduz nex, Cangqdiq couh haenj lo, vunz caemh haenh lo. 19 Sojhij gyoengqraeuz ij cwnqliengq bae guh gij saeh hawj vunz doxhuz doxndei he, doxbang doxhoh he. 20 Gaejyungh caenh vih gij gw hwj boqvaiq gij hong Cangqdiq. Sojmiz hih gij gw cungj dwg ndaej gw, hoeng, hauhnaeuz mwngz soj gw hih ndaej hawj vunz famh coih hih, yiengq mwngz couh dwg mbouj deng lo. 21 Mboujguenj gw noh gw laeuj, cixnaeuz guh gijmaz saeh, hauhnaeuz hawj vunz famh coih hih couh mbouj ndaej guh. 22 Mwngz miz sinqsim nginhnaeuz ndaej guh hih saeh hih, cijaeu mwngz caeuq Cangqdiq rox couh ndaej lo. Famz miz vunz gag nginhnaeuz deng, mbouj ngeiz bonjfaenh hih, luj cungj vunz neix miz fuk lo. 23 Hoeng, hauhnaeuz de ngeiz de soj gw hih, yiengq de gw hih mwhde, Cangqdiq couh dingh de miz coih lo, aenvih de mbouj bingz sinqsim gw. Sojmiz mbouj bingz sinqsim bae guh hih cungj dwg famh coih.
1 Gyoengqraeuz sinqsim gyenhdingq hih vunz doiq doengh boux sinqsim mbouj gaeuq gyenhdingq hih vunz wnggai rox nyiengh; gaejyungh vih bonjfaenh haenj mbouj haenjheiq. 2 Gyoengqraeuz moix it boux guh saeh cungj ij ngeix daengz vunz, ij guh gij doiq vunz miz ik he, ndaej hawj vunz sinqsim gyenhdingq he, 3 aenvih Gihduz caemh mbouj caenhgag vih bonjfaenh, cingq luj ndaw Singqgingh ndaw de sij naeuz: Mwngz ngaiz vunz ndaq hih, gou caemhdangq ngaiz vunz ndaq lo. 4 Ndaw Singqgingh ndaw de soj sij hih cungj dwg vih ij son raeuz hwj sij hih, dwg vih ij hawj raeuz ndaej dunghgoq naenxsim caeuq ndaej baengh ndaw Singqgingh ndaw de dih gujliq hwj ndaej miz muengh. 5 Muengh boux soengq hawj naenxsim caeuq gujliq dih Cangqdiq hawj faenhsou ndaej caezsim doxhuz bae hag Yehsuh Gihduz, 6 hawj faenhsou ndaej daixgya doengxcaez haenh bouxcawj raeuz Yehsuh Gihduz dih Cangqdiq daxboh! 7 Sojhij faenhsou ij wnggai luj Gihduz yienghmwnq vuenhringz faenhsou ma vuenhringz vunz, yienghneix couh ndaej hawj Cangqdiq najrongh lo. 8 Gou naeuz faenhsou ni hax, Gihduz vih ij yienh ok Cangqdiq gangj vah gw vah hwj sijndaej diuz mingh bonjfaenh, bang gij vunz Youzdaiq. De yienghneix guh couh ndaej cingqmingz Cangqdiq doiq gij cojgoeng Youzdaiq vunz dih baujcingq lingz okdaeuj lo, 9 caemh ndaej hawj gij vunz linghvaih minzcuz he haenh Cangqdiq hojsik gyoengqde. Cingq luj ndaw Singqgingh ndaw de sij naeuz: Sojhij gou ij youq linghvaih minzcuz mwnq haenh mwngz, ciengq go haenh mwngz. 10 Ndaw de vanzlij sij naeuz: Linghvaih minzcuz hih vunz hax, faenhsou ij caeuq gij vunz Cangqdiq vuenheij. 11 Ndaw de vanzlij naeuz: Linghvaih minzcuz hih vunz hax, faenhsou ij haenh Cangqdiq; sojmiz hih vunz hax, faenhsou ij haenh de! 12 Boux cenz gij vah Cangqdiq Hijcaiqyaq caemh naeuz: Yehsih dih doengh daih gajlaeng de hih boux he baezneix ij ok daeuj, de ij guenjciq linghvaih minzcuz; linghvaih minzcuz ij muengh de. 13 Muengh boux hawj vunz miz muengh hih Cangqdiq, vih faenhsou sinq de hwj dawz vuenheij caeuq bingzan caeng youq ndaw sim faenhsou rimrim bae, hawj faenhsou dunghgoq gij rengz Hoenzsaenz de hwj ndaej miz muengh raixcaix. 14 Gak boux beixnuengx hax, gou rox faenhsou simsoh raixcaix, gvanhhih Cangqdiq dih saeh faenhsou cix rox raixcaix, caemh ndaej doxson. 15 Hoeng, youq fung saenq neix gou mbeihung hwj doiq faenhsou daezsingj geij yiengh vaenqdiz. Gou yienghneix naeuz dwg aenvih Cangqdiq hawj gij gienz neix hawj gou, 16 hawj gou ndaej youq ndaw linghvaih minzcuz ndaw de guh boux cenzgangj gvanhhih Yehsuh Gihduz dih ndei siuhsiz he, couh dwg naeuz ndaej guh luj boux bang vunz guh dajbwiz he, yienghneix haemq ndei ndaej hawj gij vunz linghvaih minzcuz he dunghgoq Hoenzsaenz Cangqdiq hwj ndaej bienqbaenz gij dajbwiz hab'eiq habhoz Cangqdiq, Cangqdiq haenjheiq he. 17 Sojhij, gou swqhaeuh Cangqdiq dwg vih miz Yehsuh Gihduz hwj roxnginh najrongh raixcaix. 18 Gizdah saeh gou mbouj gamj gangj, caenh miz yiengh he gou gamj daez, couh dwg Yehsuh Gihduz dunghgoq gij vah gou caeuq gou soj guh hih saeh, caeuq dunghgoq gij rengz Hoenzsaenz Cangqdiq hwj guh geizmiuj hih saeh, hawj gij vunz linghvaih minzcuz he dingq Cangqdiq, 19 hawj gou ndaej daj Yehluqsajlaengj itcig daengz Hijliqguj, dauqcawq bae cenzgangj gvanhhih Yehsuh Gihduz dih ndei siuhsiz. 20 Gou soqsingq cungj ij naebsim bae mwnq gij vunz coengzlaiz mijyaengz dingqri goq gij coh Yehsuh Gihduz he, bae cenzgangj gvanhhih Yehsuh Gihduz dih ndei siuhsiz; gou mbouj siengj bae mwnq gaenq miz vunz bae goq he, couh dwg naeuz gaenq miz vunz caep giek he. 21 Couh luj ndaw Singqgingh ndaw de sij naeuz: Mijyaengz dingqri naeuz goq hih couh ij rox lo; mijyaengz rox de hih couh ij rox de lo. 22 Sojhij, gou miz geij mbat ijsiengj bae faenhsou mwnq lo, hoeng, cungj caenhrox miz gij saeh he gaz dawz hawj gou mbouj ndaej bae. 23 Cijmboujgoq seizneix gou youq fueng neix gaenq guh gij hong gou sat lo, caiq gyacangq gou youq geij bi neix daeuj, itcig cungj siengj bae yawj faenhsou. 24 Sojhij, gou giqvaq bae Sihbanhyaz doqswnh bae yawj faenhsou, caeuq faenhsou doxcomz, doxgyauhliuz le, gajlaeng faenhsou menhcij soengq gou okdin bae. 25 Hoeng, vih ij bang youq Yehluqsajlaengj dih lwgsae doih, sojhij, gou seizneix couh ij bae mwnq lo, 26 aenvih Majgizdoenq caeuq Yaqgaihyaq song aen saengj neix dih gyauqveiq nyienh'eiq gien ngaenz okdaeuj hawj Yehluqsajlaengj dih doenghheij vunz gungz sinq Yehsuh he. 27 Gizsaed gij neix cungj dwg gyoengqde nyienh'eiq guh hih, caemh dwg gyoengqde soj yiemq hih. Aenvih gyoengqde caemh ndaej caeuq gij vunz Youzdaiq doxdoengz ndaej daengz gij ik Cangqdiq, sojhij gyoengqde couh aeu ngaenz daeuj dangq boixaen gyoengqde. 28 Yiengq daengj daengz gou dawz doenghgij vunz gien okdaeuj hih ngaenz gyau hawj gyoengqde, ndaej guh sat doenghgij hong neix le, couh goq laeng faenhsou mwnq bae, gajlaeng menhcij bae Sihbanhyaz. 29 Gou caemh rox, gou bae faenhsou mwnq ndaej hawj raeuz daixgya cungj vuenheij; gij neix couh dwg Yehsuh Gihduz soengq hawj raeuz dih fuk. 30 Gak boux beixnuengx hax, aenvih gyoengqraeuz miz bouxcawj raeuz Yehsuh Gihduz caeuq Hoenzsaenz Cangqdiq dih aiq, gou gouz faenhsou caeuq gou roengzrengz gouz Cangqdiq, 31 gouz de hawj gou ndaej daj ndaw fawz gij vunz Youzdaiq mbouj sinq Yehsuh he duet okma, caemh gouz de hawj gou youq Yehluqsajlaengj banh hih saeh ndaej hawj gij vunz sinq Yehsuh mwnq hab'eiq habhoz. 32 Hauhnaeuz Cangqdiq hawj nex, couh vuenvuen heijheij bae caeuq faenhsou doxcomz, daixgya yietbaeg, daixgya cungj ndaej miz singjsaenz. 33 Muengh boux soengq hawj bingzan dih Cangqdiq caeuq faenhsou youq! Ahmaenz.
1 Gou gaiqcauq Feihbij boux beixnuengx vunzbaz neix hawj faenhsou rox; de dwg youq Gyenhgwzlij gyauqveiq guh saeh he. 2 Gou cingj faenhsou ciuq gij vunz Cangqdiq wnggai guh hih yienghmwnq bae sou de; mboujguenj de ij aeu gijmaz cungj ij bang de, aenvih de bang goq haujlai vunz, caemh bang goq gou. 3 Caemh cingj faenhsou cam Bwzgihlah caeuq Yaqgihlah ndei; song boux de cungj dwg caeuq gou doxdoengz guh gij hong Yehsuh Gihduz he. 4 Gyoengqde vih ij gouq gou, vwt mingh cungj mbouj lau. Mbouj danhcij naeuz gou ij docih gyoengqde, daiqlienz lingh minzcuz dih gyauqveiq cungj docih gyoengqde. 5 Caemh cingj faenhsou cam youq ndaw ranz gyoengqde doxcomz hih gyauqveiq ndei. Caemhcaiq cingj faenhsou cam cinhngaiq dih Hijbaiqnizduj baengzyoux gou ndei; de dwg aen saengj Yaqsiqyaq sinq Gihduz dih boux daixdaeuz he. 6 Caemh cingj faenhsou cam Majliqyaq ndei; de vih faenhsou hwj guh hong dwgrengz sinhoj ij rai. 7 Cingj faenhsou cam Anhdohnizguj caeuq Youznizyaq ndei; gyoengqde dwg caeuq gou doxcaemh minzcuz he, caemh dwg caeuq gou ngaiz vunz gyaeng haeuj ndaw lauz bae goq he. Gyoengqde sinq Gihduz beij gou vanzlij caeux, caemh dwg youq ndaw gyoengq dwzbaijyienz ndaw de dwg boux miz mingz he. 8 Caemh cingj faenhsou cam doxdoengz gaep haeuj Gihduz dih baengzyoux Amqbwzliq ndei. 9 Caemh cam caeuq gyoengqraeuz doxdoengz guh gij hong Gihduz dih Wjbahnuz caeuq gou cinhngaiq dih baengzyoux Swqdaqguj ndei. 10 Caemh cam Yaqbijliq ndei; de dwg boux gaujniemq goq ndaej hab'eiq habhoz Gihduz he dih vunz he. Caemh cam Yaqliqdohbuq cenz ranz ndei. 11 Caemh cam caeuq gou doxcaemh minzcuz hih Hihlozdanh ndei caeuq cam ndaw ranz Nazgizsuq doengh boux gvi haeuj bouxcawj raeuz he ndei. 12 Gou vanzlij caiq cingj faenhsou cam Dujfeihnaz caeuq Dujfuqsaj ndei; song boux vunzbaz neix guh gij hong bouxcawj raeuz cungj dwg gaenzgaenz gaenjgaenj he. Caemh cam Bijsiz boux vih guh gij hong bouxcawj raeuz hwj gaenz guh hih boux baengzyoux neix ndei. 13 Caemh cam boux bouxcawj raeuz senj okdaeuj hih Lujfuz caeuq daxmeh de ndei. Daxmeh de caemhdangq daxmeh gou. 14 Caemhcaiq cingj faenhsou cam Yaqsoenhgizswq, Fuzlwzganq, Hwzmij, Bazlozbah, Hwzmaj caeuq caeuq gyoengqde youq itheij dih beixnuengx ndei. 15 Caemh cam Feihlozlozguj caeuq Youzliqyaq, caeuq Nizliqyaq caeuq dahnuengx de caeuq Ahlimzbah caeuq caeuq gyoengqde itheij hih doenghheij lwgsae he ndei. 16 Faenhsou ij miz Cangqdiq dih aiq hwj doxdongx ndei. Gihduz dih gak aen gyauqveiq cungj cam faenhsou ndei. 17 Gak boux beixnuengx hax, gou gienq faenhsou ij daezfuengz doenghheij vunz hawj faenhsou nauh mbouj doxndei daiq faenhsou byaij loek roen he, fanjdeiq faenhsou soj hag goq he. Doenghheij vunz neix faenhsou mbouj ndaej cimyex haeujbae, ij liz gyoengqde, 18 aenvih cungj vunz neix mbouj swqhaeuh bouxcawj raeuz Gihduz, caenh rox daengz bonjfaenh lah. Gyoengqde cungj dwg gangj doenghgij vah ndeidingq he ma coemx doenghheij vunz lauxsaed he. 19 Daixgya cungj rox faenhsou dingq gij vah Cangqdiq, sojhij gou vih faenhsou hwj sim'angq. Gou muengh faenhsou doiq ndeisaeh singqsag, doiq vaihsaeh moengxcwenx. 20 Nyok bingzan dih Cangqdiq couh ij dawz Sajdanq caij benj youq laj din faenhsou lo. Muengh bouxcawj raeuz Yehsuh Gihduz siengzseiz doiq faenhsou haijliengh! 21 Caeuq gou itheij guh gij hong Cangqdiq hih Dizmohdaiq caeuq caeuq gou doxcaemh minzcuz hih Luqgyiuz, Yehsoenh caeuq Sojsihbahdwz cam faenhsou ndei. 22 Gou, Dwzdiuh, bang Baujloz sij fung saenq neix caemh cam faenhsou ndei. 23 Boux daih gou, caemh hawj gyauqveiq youq ndaw ranz de doxcomz dih Gaihyouz caemh cam faenhsou ndei. 24 Cenmonz guenj aen singz neix cienzngaenz dih Hijlahduh cam faenhsou ndei; Gvazduj boux beixnuengx neix caemh cam faenhsou ndei. 25 Cangqdiq ndaej yungh gou soj cenzgangj hih gvanhhih Yehsuh Gihduz dih ndei siuhsiz hwj hawj faenhsou ndaej sinqsim gyenhdingq. Gij ndei siuhsiz neix coengzlaiz cungj mij'z vunz rox goq, 26 hoeng, seiqseiz lix dih Cangqdiq ciuq gij cawjeiq bonjfaenh de ma hawj boux cenz gij vah de sij okdaeuj hawj vunz rox. De yienghneix guh dwg siengj hawj lajmbwn sojmiz hih minzcuz cungj sinq de dingq de. 27 Muengh dunghgoq Yehsuh Gihduz, najrongh yungjyenj gvi hawj gaiqgaiq cungj rox hih caenhgag de cij dwg Cangqdiq hih! Ahmaenz.
1 Gou dwg Baujloz, dwg Cangqdiq ciuq gij cawjeiq bonjfaenh de ma senj gou, hawj gou guh boux dwzbaijyienz Yehsuh Gihduz he. Gou caeuq Sojdizniz boux beixnuengx neix 2 sij saenq hawj youq Gohlimzdoh Singz Cangqdiq dih gyauqveiq, couh dwg sij hawj doenghheij vunz Cangqdiq senj okdaeuj guh hab'eiq habhoz bonjfaenh de he. Faenhsou caeuq youq gak dieg nginh Yehsuh Gihduz dwg bouxcawj he doxdoengz dwg senj okdaeuj gvi haeuj gij vunz Cangqdiq he. Gihduz dwg bouxcawj gyoengqde, caemh dwg bouxcawj gyoengqraeuz. 3 Muengh daxboh raeuz Cangqdiq caeuq bouxcawj raeuz Yehsuh Gihduz doiq faenhsou haijliengh, hawj faenhsou bingzan! 4 Gou, Baujloz, siengzseiz cungj docih Cangqdiq, aenvih Yehsuh Gihduz doiq faenhsou haijliengh raixcaix, 5 sawjhawj faenhsou gaiqgaiq cungj fungcuk; goujcaiz hah ciqsiz hah cungj miz raixcaix. 6 Yienghneix faenhsou couh ndaej gaengjdingq gyoengqraeuz yiengq faenhsou soj gangj hih gvanhhih Gihduz dih saeh cungj dwg saedsaeh hih lo. 7 Sojhij faenhsou youq daengj bouxcawj raeuz Yehsuh Gihduz dauq daeuj hih mwhde, mboujguenj guxmaz cungj mbouj noix Hoenzsaenz Cangqdiq soj nyok hawj hih. 8 De caemh gaengjdingq bang faenhsou hawj faenhsou gyenhgyangz roengzbae, hawj faenhsou ndaej youq mwh bouxcawj raeuz Yehsuh Gihduz dauq daeuj hih mwhde mij maz ndaej diudik he. 9 Cangqdiq dwg saedsaeh hih sinq ndaej goq hih; de senj faenhsou hawj faenhsou ndaej caeuq daeglwg de, bouxcawj raeuz Yehsuh Gihduz, guh beixnuengx. 10 Gak boux beixnuengx hax, gou baengh bouxcawj raeuz Yehsuh Gihduz gienq faenhsou, gouz faenhsou wnggai doxhuz; mbouj ndaej doxceng, mbouj ndaej faen banghbaij, ij caezsim, 11 aenvih ndaw ranz Gwzlaiz miz vunz naeuz gou ni naeuz youq ndaw gyoengq beixnuengx faenhsou ndaw de miz vunz doxceng. 12 Dineix gou gangj hih iqswh dwg naeuz gou dingqri naeuz faenhsou ndaw de miz hih vunz naeuz: “Gou dwg gaen Baujloz he,” miz hih vunz naeuz: “Gou dwg gaen Yaqbohloz he,” caemh miz hih vunz naeuz: “Gou dwg gaen Bijdwz he,” caemhcaiq miz hih vunz naeuz: “Gou dwg gaen Gihduz he.” 13 Yiengq youq dineix, gou cam faenhsou, Gihduz dwg faen geij baij hih haj? Nanzdauh Baujloz dwg vih faenhsou hwj ngaiz ding hwnj gwnz gyaq cixcib bae rai hih mah? Faenhsou dwg vih ij bienqbaenz gij lwgsae Baujloz hwj sijlij hih mah? 14 Hoeng, gou docih Cangqdiq, gou cawzok sijlij hawj Gihliqswhbuq caeuq Gaihyouz song boux neix, youq faenhsou mwnq gou mij sijlij hawj saek boux lo hah, 15 sojhij faenhsou ciengeiz mbouj ndaej naeuz vih ij bienqbaenz gij lwgsae Baujloz hwj sijlij lah. 16 (Ox, deng lo, gou vanzlij bang ndaw ranz Swhdizfaznaq sijlij goq; cawzok mbat mwnq, gou vanzlij sijlij hawj byawz goq, gou mij ndaejgeiq lo.) 17 Gihduz senj gou baij gou mbouj dwg hawj gou bang vunz sijlij, dauq dwg hawj gou cenzgangj gij ndei siuhsiz Cangqdiq lah. Gou cenz gij ndei siuhsiz Cangqdiq mwhde caemh mbouj dwg gauq vunz dih coengjmingz hwj siengj okdaeuj hih nej, mijn'x Gihduz ngaiz ding hwnj gwnz gyaq cixcib bae couh bienqbaenz mij'z yungh lo. 18 Gihduz ngaiz ding hwnj gwnz gyaq cixcib bae rai hih gij saeh neix, doiq doenghheij vunz satsoq he ma gangj dwg ngawz hih, hoeng, doiq gyoengqraeuz doenghheij vunz ndaej gouq he ma gangj, dauq dwg ndaej yienh ok Cangqdiq dih rengz lah. 19 Couh luj ndaw Singqgingh ndaw de soj sij naeuz hih: Gou ij byaeu doenghgij vunz gag naemqnaeuz bonjfaenh rem raixcaix hih gij rem de, ij cawz doenghheij gag naemqnaeuz bonjfaenh coengjmingz hih gij coengjmingz de. 20 Sojhij coengjmingz vunz ij baenzlaw yiengh nej? Fazliz cenhgyah caemh ij baenzlaw yiengh nej? Aen seiqgyaiq neix hih benqlwnq cenhgyah caemh ij baenzlaw yiengh nej? Cangqdiq mbouj dwg gaenq hawj aen seiqgyaiq neix hih coengjmingz bienqbaenz ngawzngad lo haj? 21 Caenhgag Cangqdiq cij dwg cingqcaen coengjmingz he; de itmienh hawj aen seiqgyaiq neix hih vunz mij banqfaz dunghgoq gij coengjmingz bonjfaenh ma rox de, itmienh dunghgoq gyoengqraeuz soj cenz hih, couh dwg ciuq aen seiqgyaiq neix hih vunz ma yawj suenq dwg mazmwnh hih gij siuhsiz neix, ma gouq doenghheij sinq Yehsuh hih vunz. 22 Youzdaiq vunz ij yawj geizmiuj hih saeh, Hihlaz vunz ij gouz coengjmingz, 23 hoeng, gyoengqraeuz soj cenzgangj hih cingq dwg Gihduz ngaiz ding hwnj gwnz gyaq cixcib bae rai hih gij saeh neix lah. Gij saeh neix, aeu gij vunz Youzdaiq ma yawj, dwg daekcoih gyoengqde he; aeu gij vunz Hihlaz ma yawj, dwg haeuj gij mazmwnh he. 24 Hoeng, doiq doenghheij vunz Cangqdiq senj okdaeuj he ma yawj, mboujguenj Youzdaiq vunz cix ndaej, Hihlaz vunz cix ndaej, Gihduz cungj dwg Cangqdiq dih rengz, Cangqdiq dih coengjmingz, 25 aenvih gij coengjmingz vunz cungj ciet mbouj ndaej gij “ngawz” Cangqdiq, gij rengz vunz caemh ciet mbouj ndaej gij rengz lwgfawzgungz Cangqdiq. 26 Gak boux beixnuengx hax, ngeixngeix Cangqdiq senj faenhsou okdaeuj hih mwhde, faenhsou dwg yienghlaw hih vunz? Hauhnaeuz aeu aen seiqgyaiq neix hih vunz dih biuhcwnj ma dag nex, faenhsou ndaw de suenq naeuz coengjmingz hih gig noix, miz gienz miz ciq hih caemh gig noix, miz seqveiq diqveiq hih caemh gig noix. 27 Hoeng, Cangqdiq dauq senj doenghheij vunz ngawz he, hawj doenghheij naemqnaeuz bonjfaenh coengjmingz he saetnaj saetnyaenq. De caemh senj doenghheij vunz mij maz ndaej baengh he, hawj doenghheij miz gienz miz ciq he saetnaj saetnyaenq. 28 De senj doenghheij vunz vunz yawj mbouj hwnj rwz he, vunz dwgcaengz he, vunz naemqnaeuz de mbouj suenq guxmaz vunz he, ma hawj doenghheij gag naemqnaeuz bonjfaenh cungj cungqyauq raixcaix he bienqbaenz mij'z yungh, 29 yienghneix hawj vunz mbouj caiq ndaej youq dangqnaj Cangqdiq gag haenh bonjfaenh lo. 30 Hoeng, gyoengqraeuz ndaej baengh Cangqdiq hwj ndaej caeuq Yehsuh Gihduz doxhuz. Gyoengqraeuz caemh rox Cangqdiq baij Gihduz daeuj gouq vunz dwg coengjmingz raixcaix, gyoengqraeuz dunghgoq de hwj hawj gyoengqraeuz ndaej youq ndaw lwgra Cangqdiq suenq dwg boux mij'z coih he, ndaej guh boux hab'eiq habhoz Cangqdiq he, caemh dunghgoq de hwj gyoengqraeuz ndaej cueg ma lo. 31 Cingq luj ndaw Singqgingh ndaw de sij naeuz: Ij haenh, couh wnggai haenh Cangqdiq.
1 Gak boux beixnuengx hax, mwh gou bae daengz faenhsou mwnq cenzgangj gij siuhsiz Cangqdiq vunz mijyaengz dingq goq he hih mwhde, gaenhbaenj mbouj dwg gangj doenghgij vah gyaeu cixnaeuz iqswh laeg he, 2 aenvih gou gyezdingq goq naeuz mwh gou caeuq faenhsou youq hih mwhde, cawzok cenzgangj gvanhhih Yehsuh Gihduz caeuq de ngaiz ding hwnj gwnz gyaq cixcib bae hih gij saeh neix sat lo, gijmaz cungj mbouj gangj. 3 Hoeng, mwh gou bae daengz faenhsou mwnq hih mwhde, gou cungj simvueng ij rai bae, gou lau gou cenz mbouj deng, gangj mbouj deng. 4 Gou soj gangj soj cenz hih mbouj dwg baengh coengjmingz cixnaeuz baengh ndeidingq hih vah, dauq dwg baengh Hoenzsaenz Cangqdiq yienh ok dih rengz hwj 5 hawj faenhsou mbouj dwg vih vunz dih coengjmingz hwj sinq, dauq dwg vih Cangqdiq dih rengz hwj sinq lah. 6 Hoeng, doiq doenghheij vunz senqsi cix rox gij saedsaeh Cangqdiq, cix rox ndaej laeg he hih, gyoengqraeuz caemh gangj doenghgij dauhleix laeg neix, cijmboujgoq doenghgij dauhleix laeg neix mbouj dwg haeuj aen seiqgyaiq neix law, caemh mbouj dwg doenghheij youq aen seiqgyaiq neix dang ak gaem gienz, baezneix gaengjdingq ngaiz satsoq hih vunz rox hih gij dauhleix mwnq law. 7 Gyoengqraeuz soj gangj hih dauq dwg Cangqdiq gaxgonq yo hwnjdaeuj mbouj hawj vunz rox hih, dwg de daj mijyaengz cauh mbwn cauh deih cix dingh ndei ij hawj raeuz ndaej najrongh hih gij giqvaq mwnq lah. 8 Gij giqvaq neix youq aen seiqgyaiq neix dang ak gaem gienz hih gaenhbaenj mbouj rox. Hauhnaeuz gyoengqde rox, couh mbouj dawz veijdaq najrongh hih bouxcawj raeuz ding hwnj gwnz gyaq cixcib bae rai lo. 9 Cingq luj ndaw Singqgingh ndaw de soj sij naeuz hih: Cangqdiq vih gij vunz aiq de hwj soj cwnjbiq hih dwg vunz daiq raen cungj mijyaengz raen goq he, dingq cungj mijyaengz dingq goq he, simqciq dwg ngeix cungj mijyaengz ngeix daengz goq he. 10 Hoeng, Cangqdiq dunghgoq Hoenzsaenz bonjfaenh de hwj yienh hawj raeuz rox lo, aenvih Hoenzsaenz Cangqdiq rox sojmiz hih saeh; de yawj gijmaz cungj cingx goq gingq bohliz bae, daiqlienz ndaw sim Cangqdiq dih gij iqswh laeglaeg de, de cungj caemh rox. 11 Caemhdangq naeuz it boux vunz, de dih cawjeiq, cawzok bonjfaenh de dih hoenzsaenz, lij miz byawz ndaej rox daengz ndaw sim de dih iqswh haem nej? Caemh doxdoengz, cawzok Hoenzsaenz Cangqdiq, caemh mij'z vunz ndaej rox Cangqdiq bonjfaenh de dih iqswh lo. 12 Gyoengqraeuz soj ndaej dih Hoenzsaenz mbouj dwg haeuj aen seiqgyaiq neix dih hoenzsaenz, dauq dwg Cangqdiq dih Hoenzsaenz lah. Cangqdiq dih Hoenzsaenz hawj raeuz ndaej rox Cangqdiq begbeg soengq hawj raeuz hih. 13 Gyoengqraeuz soj cenzgangj hih caemh mbouj dwg naeuz hag gij vunz coengjmingz he hwj cenzgangj law, dauq dwg Hoenzsaenz Cangqdiq son hawj raeuz hih lah, dwg hawj raeuz dawz gij saedsaeh Cangqdiq gangj naeuz doenghheij miz Hoenzsaenz de he ni. 14 Hoeng, doenghheij mbouj miz Hoenzsaenz Cangqdiq he, gyoengqde yiem Hoenzsaenz Cangqdiq soj hawj vunz rox hih gij saedsaeh mwnq, aenvih doenghheij vunz neix nginhnaeuz gij saedsaeh neix dwg mazmwnh he; gyoengqde gaenhbaenj mbouj rox, aenvih gij saedsaeh neix dwg Hoenzsaenz Cangqdiq cij ndaej hawj vunz rox faenbied he. 15 Miz Hoenzsaenz Cangqdiq hih vunz ndaej rox faenbied sojmiz hih saeh, sojhij couh mij'z vunz ndaej naeuz boux de mbouj rox faenbied. 16 Cingq luj ndaw Singqgingh ndaw de sij naeuz: Byawz ndaej rox daengz aen sim Cangqdiq nej? Byawz ndaej bang de ok cawjeiq nej? song gawq neix. Hoeng, gyoengqraeuz miz Hoenzsaenz Cangqdiq he ndaej rox aen sim Gihduz.
1 Gak boux beixnuengx hax, gou lauxsaed naeuz sou ni, gou doenghbaez son faenhsou gij saedsaeh Cangqdiq, cungj mbouj dwg luj son doenghheij vunz miz Hoenzsaenz Cangqdiq yienghmwnq he, dauq dwg luj son doenghheij vunz haeuj aen seiqgyaiq neix he lah, aenvih faenhsou luj boux ngamqngamq sinq Gihduz mbouj geij caez he, luj lwgnding yienghmwnq mij rox saek yiengh he. 2 Sojhij, gou son faenhsou, couh dangq luj aeu gij unq gij cuk he ma hawj faenhsou gw, mij dwg aeu gij gyeng he ma hawj faenhsou gw law, aenvih gij gyeng he faenhsou gw mbouj ndaej. Gou gangj lauxsaed vah, gizsaed seizneix faenhsou vanzlij ciuqyiengh dwg gw mbouj ndaej. 3 Gou vihmaz ij yienghneix naeuz nej, dwg aenvih faenhsou vanzlij ciuqyiengh dwg ciuq aen seiqgyaiq neix hih vunz ma guh saeh, vanzlij miz rahoengz hah, doxceng hah yienghneix. Yiengq, ciuq yienghneix ma yawj, mijyaengz ndaej cingqmingz faenhsou vanzlij dwg haeuj aen seiqgyaiq neix hih vunz maz, dwg ciuq aen seiqgyaiq neix hih vunz ma guh saeh hih maz? 4 Faenhsou ndaw de miz hih vunz vanzlij gag naeuz: “Gou dwg haeuj gij vunz Baujloz he,” caemh miz hih vunz naeuz: “Gou dwg haeuj gij vunz Yaqbohloz he.” Yiengq hawjm'z yawj hux, yienghneix mijyaengz ndaej gaeuq cingqmingz naeuz faenhsou dwg caeuq aen seiqgyaiq neix hih vunz doxdoengz maz? 5 Gizsaed Yaqbohloz suenq guxmaz nex? Baujloz caemh suenq guxmaz nex? Gyoengqraeuz cijmboujgoq dwg bouxhoiq Cangqdiq hwj mah, dwg ciuq bouxcawj raeuz soj raengq hih yienghmwnq ma son vunz, daiq vunz, hawj vunz sinq bouxcawj raeuz Yehsuh Gihduz hwj mah. 6 Gyoengqraeuz gak vunz cungj miz bouxcawj raeuz baij hawj raeuz hih hong: gou dwg guh ndaem he, Yaqbohloz dwg guh dwk raemx he, caenhgag Cangqdiq cij dwg ndaej hawj go de hwnj he. 7 Yiengq, ciuq yienghneix ma gangj, boux ndaem he caeuq boux dwk raemx he cungj mbouj suenq guxmaz; caenhgag Cangqdiq cij suenq guxmaz lah, aenvih dwg de hawj sojmiz hih ndaej hwnj. 8 Boux ndaem he caeuq boux dwk raemx he cungj dwg doxdoengz, caemh dwg ciuq gak vunz soj guh hih ma ndaej hih lah, 9 aenvih gyoengqraeuz dwg gij hoiq guh gij hong Cangqdiq he; faenhsou dangq dwg Cangqdiq dih reihnaz. Faenhsou caemhdangq dwg aen ranz Cangqdiq. 10 Gou dwg baengh Cangqdiq nyok hawj gou dih bonjsaeh hwj ndaej luj boux gyenqcuzswh yienghmwnq coengjmingz he, ndaej roengz ndei hauxranz, hawj vunz ndaej youq gwnz de dab hwnq hwnjbae. Hoeng gak vunz ijaeu siujsim cij ndaej baenzlaw youq gwnz de dab hwnq hwnjbae. 11 Gij hauxranz neix gaenq roengz ndei lo; caiq mij'z vunz ndaej roengz daixlingh cungj hauxranz haem lo. Gij hauxranz gaenq roengz ndei neix couh dwg Yehsuh Gihduz lo. 12 Yiengq, beijgangj naeuz miz vunz ij aeu gim haj cixnaeuz ngaenz, baujsig haj cixnaeuz faex cixnaeuz nyangjnyangj hazhaz ma dab guh hwnq hwnj gwnz de bae hih, 13 daengz mwhde swhmboujyienz loh okdaeuj, aenvih daengz ngoenz saemjbuenq vunz lajmbwn hih ngoenz mwnq dwg daiq miz feiz he; gij feiz neix dwg ndaej yienh ok gak vunz soj dab guh hwnq hwnjbae hih dauqdaej dwg baenzlaw yiengh. 14 Yiengq, hauhnaeuz byawz dab guh hwnq hwnjbae dingx ndaej feiz coemh nex, de couh ndaej cangjliq lo. 15 Yiengq, caiq hauhnaeuz byawz dab guh hwnq hwnjbae dingx mbouj ndaej ngaiz feiz coemh hih, de couh ngaiz coem lo; gannaeuz bonjfaenh de ndaej gouq lah, hoeng, de dangq dwg luj daj ndaw feiz deuz rai he lah. 16 Nanzdauh faenhsou mbouj rox faenhsou dangq dwg gunghdenq Cangqdiq, Hoenzsaenz Cangqdiq youq ndaw faenhsou youq mah? 17 Sojhij, hauhnaeuz miz vunz byaeu gunghdenq Cangqdiq nex, Cangqdiq gaengjdingq byaeu boux de, aenvih gunghdenq Cangqdiq dwg Cangqdiq youq he. Faenhsou dangq dwg gunghdenq Cangqdiq. 18 Gou naeuz sou ni hax, sou gaejyungh caiq gag yaeuh bonjfaenh, gag naemqnaeuz bonjfaenh dwg aen seiqgyaiq neix hih coengjmingz hih vunz haem lo. Ciuq gou ma gangj hax, faenhsou vanzlij dwg gag yawj bonjfaenh dangq dwg vunz ngawz suenq lo, yienghneix faenhsou cij ndaej cingqcaen suenq dwg coengjmingz vunz, 19 aenvih aen seiqgyaiq neix nginhnaeuz coengjmingz hih, youq ndaw lwgra Cangqdiq dauq suenq dwg ngawz hih, cingq luj ndaw Singqgingh ndaw de sij miz naeuz: Cangqdiq hawj boux coengjmingz he gag caij daengqgyauz hau raeuj. 20 Ndaw de vanzlij caiq sij miz naeuz: Cangqdiq rox boux coengjmingz soj siengj hih cungj dwg luenh siengj he. 21 Sojhij mboujguenj byawz, cungj mbouj ndaej caiq gag haenh bonjfaenh dwg gaen byawz, haeuj byawz; gizsaed sojmiz hih cungj dwg faenhsou hih, 22 mboujguenj dwg Baujloz haj cixnaeuz dwg Yaqbohloz, cixnaeuz dwg Bijdwz cixnaeuz dwg seiqgyaiq cixnaeuz dwg lix, dwg rai, dwg seizneix, baezneix, sojmiz hih cungj dwg faenhsou liux. 23 Hoeng, faenhsou dauq dwg haeuj Gihduz hih, Gihduz dwg haeuj Cangqdiq hih.
1 Sojhij, mboujguenj byawz, cungj wnggai dawz gyoengqraeuz ma dangq dwg bouxhoiq Gihduz, dwg baij daeuj guh boux guenjgya guenj gij giqvaq Cangqdiq yienzlaiz de yo hwnjdaeuj mbouj hawj vunz rox he. 2 Guh guenjgya hih bietdingh ij guh boux lauxsaed hawj bouxcawj sinq ndaej goq he. 3 Yiengq gangj daengz faenhsou cixnaeuz heijvunz baenzlawz yawj gou, gou cungj mbouj dawz haeuj rwz, mbouj haeuj uk. Gizsaed gou gaenhbaenj mbouj gag bingz bonjfaenh gou, 4 aenvih gou mij gijmaz doiq mbouj hwnj liengzsim he. Hoeng, mboujguenj guxmaz, caenhgag bouxcawj raeuz cij ndaej gyezdingq gou dwg guxmaz. 5 Sojhij faenhsou cungj mbouj ndaej youq bouxcawj raeuz mijyaengz dauq daeuj cihsenz gag luenh bingz vunz. Daengj daengz de dauq daeuj mwhde, de swhmboujyienz byoq gij miqmiz vunz, loh ok vunz dih siengjfap. Daengz mwhmwnq, Cangqdiq gaengjdingq ciuq gak vunz boiqndaej haenh hih ma haenh. 6 Gak boux beixnuengx hax, vih faenhsou hwj gou dawz gou caeuq Yaqbohloz ma guh beijgangj goq, siengj hawj faenhsou ndaej dajlaeng raeuz rox gawq vah neix dih iqswh, couh dwg: “Mbouj ndaej cauhgoq ndaw Singqgingh soj sij hih,” mienxndaej faenhsou gag haenh bonjfaenh naeuz “gou gaen byawzbyawz, gou gaen byawzbyawz,” yienghneix yawjhwnj boux mbouj hwnj boux. 7 Hoeng, dwg byawz hawj faenhsou caeuq vunz mbouj doengz hih nej? Faenhsou sojmiz hih, yienghlawz mbouj dwg Cangqdiq nyok hawj hih nej? Yiengq, giqyienz dwg Cangqdiq nyok hawj vunz hih vwz, faenhsou vihmaz ij gag haenh bonjfaenh nej, caenh lujnaeuz mbouj dwg Cangqdiq hawj hih nej? 8 Faenhsou naemqnaeuz bonjfaenh gaenq miz raixcaix, fouq raixcaix, leixhaih raixcaix luj ndaej dang vuengz lo, mbouj leix gyoengqraeuz lo. Hoeng, gou dauq muengh faenhsou cingqcaen dwg ndaej dang vuengz hah; yienghmwnq gyoengqraeuz caemh ndaej caeuq faenhsou itheij dang vuengz lo. 9 Hoeng, Cangqdiq dauq dawz gyoengqraeuz dangq luj doenghheij vunz fuhluj ngaiz youzhingz he, ngaiz baizdeiq youq gajlaeng hwj ij gaj he, aenvih gyoengqraeuz couh dangq luj ciengz heiq he, hawj lajmbwn hih vunz caeuq gwnzmbwn hih bouxcai Cangqdiq yawj lah. 10 Gyoengqraeuz vih Gihduz hwj ngaiz vunz yawj dangq dwg vunz ngawz he, hoeng, faenhsou dauq ndaej hawj vunz yawj faenhsou dangq dwg Gihduz hih boux coengjmingz he. Gyoengqraeuz ngaiz vunz yawjngawz, mij bonjsaeh. Hoeng, faenhsou nej? Faenhsou dauq dwg hawj vunz yawjdij, dwg vunz rem he. 11 Itcig daengz seizneix, gyoengqraeuz cungj dwg gw mbouj imq, daenj mbouj raeuj, youq hix youq mbouj miz, hix ngaiz vunz doh hih doh. 12 Gyoengqraeuz cungj dwg gag baengh gyoengqraeuz bonjfaenh guh hong dwgrengz cij ndaej gw. Mbouj danhcij dwg yienghneix, caiq ngaiz vunz yug, hoeng, gyoengqraeuz dauq ij hoh fuk hawj gyoengqde; vunz bwkhaih raeuz, raeuz dauq ij naenxhoz naenxheiq, 13 simqciq ngaiz vunz bangjlaih mwhde, cungj ij doiq gyoengqde ndei. Itcig daengz seizneix, vunz vanzlij yawj gyoengqraeuz dangq lajmbwn hih nyapnyap nyejnyej. 14 Gou sij doenghgij vah neix, mbouj dwg naeuz ij hawj faenhsou saetnaj saetnyaenq law, dauq dwg dawz faenhsou yawj dangq dwg gij lwg gou hwj daezsingj faenhsou lah. 15 Gannaeuz miz ciencien fanhfanh lauxsae dawz Gihduz hih saeh son naeuz sou ni lah, hoeng, miz aen sim luj aen sim daxboh yienghmwnq hih mbouj lai; gou dunghgoq cenz naeuz sou ni Cangqdiq dih ndei siuhsiz hwj ndaej guh daxboh sou. 16 Sojhij gou gouz sou hag gou. 17 Gou couh vih yienghneix, gou baij Dizmohdaiq bae faenhsou mwnq. Dizmohdaiq guh gij hong bouxcawj raeuz dwg boux sinq ndaej goq he, de caemhdangq dwg gou aiq hih lwg. De ij daezsingj faenhsou hawj faenhsou rox gou vih Gihduz hwj baenzlaw guh saeh, baenzlawz doiq vunz, daezsingj faenhsou hag gou. Gou youq gak aen gyauqveiq caemh gouz vunz yienghneix hag gou. 18 Gou rox faenhsou ndaw de miz hih vunz naemqnaeuz gou mbouj bae faenhsou mwnq lo, couh rasang yawj vunz mbouj hwnj rwz. 19 Hoeng hauhnaeuz bouxcawj raeuz hawj nex, mbouj geijlwh caez gou couh ij bae faenhsou mwnq lo. Daengz mwhmwnq, gou dauq ij yawjyawj doenghheij vunz rasang yawj vunz mbouj hwnj rwz mwnq dauqdaej gag rox gangj rumz gangj rengx haj, cixnaeuz cingqcaen miz gij rengz Cangqdiq. 20 Hoeng guek Cangqdiq gaenhbaenj mbouj yawjnaek gangj rumz gangj rengx, dauq yawjnaek Cangqdiq nyok hawj hih rengz lah. 21 Yiengq gou cam faenhsou, daengz mwhmwnq, faenhsou nyienh'eiq gou baenzlaw nej? Hawj gou dawz faexbien bae fad vunz hajx, cixnaeuz hawj gou sim'unq simsoh aiq vunz hwj bae nej? Faenhsou gag naeuz bax.
1 Gou dingq naeuz faenhsou mwnq gingqyienz miz vunz caeuq daxmehlaeng de guhyoux. Cungj ya'mboujlw neix daiqlienz doenghheij aen seiqgyaiq neix hih vunz cungj mbouj miz cungj saeh neix hwx. 2 Hoeng, faenhsou vanzlij daekeiq vaujvauq, dauq mij vih miz cungj saeh neix hwj simnyap, mij dawz boux guhyoux yalw neix boenq ok gyauqveiq bae. 3 Gou gannaeuz mij youq faenhsou mwnq, hoeng, aen sim gou cungj dwg youq faenhsou mwnq, caenh lujnaeuz youq mwnq cinhswq saemjbuenq boux guh gij saeh yalw mwnq lo. 4 Yiengq, daengz faenhsou doxcomz hih mwhde, aenvih gou caemhdangq caeuq faenhsou youq bang faenhsou, caeuq miz gij rengz bouxcawj raeuz Yehsuh Gihduz caeuq faenhsou youq, faenhsou couh ij hij gij mingzhiq Yehsuh bouxcawj raeuz ma 5 dawz cungj vunz neix gyau hawj Sajdanq fangzvuengz, hawj Sajdanq fangzvuengz nyoegnyamx aen ndangnoh de, hawj gij hoenzsaenz de ndaej youq Yehsuh bouxcawj raeuz dauq daeuj hih ngoenz mwnq ndaej gouq. 6 Faenhsou mwnq miz vunz guh gij saeh yalw hih lo, hoeng, faenhsou cungj lij gag haenh bonjfaenh; yienghneix dwg mbouj deng hih. Nanzdauh faenhsou mbouj rox dihdi yauqmuj he couh ndaej fat baenx haujlai mbamienh lo mah? 7 Faenhsou vaiqdi dawz boux mwnq boenq ok gyauqveiq bae; boux de couh dangq luj gij yauqmuj gaeuq he, wnggai gveng deuz, aenvih aen ciet Bienqgoqbae dih yiengzlwg, Gihduz, vih ij guh gij dajbwiz hwj gaenq ngaiz gaj lo. Yienghneix faenhsou couh baenx gyoengq cungj ndaej bienqbaenz mij gijmaz uekcueg yalw he youq gwnz ndang faenhsou lo; gizsaed faenhsou couh dwg luj ngauq mbamienh moq mij yauqmuj fat goq he. 8 Sojhij gyoengqraeuz wnggai yungh gij bingj moq mij fat goq mij miz doeg he ma goq aen ciet neix. Couh dwg naeuz ndaw sim gyoengqraeuz mbouj wnggai miz doegdoeg siebsieb, dauq ij miz saedsaeh sinq ndaej goq he cij ndaej. 9 Gaxgonq gou gaenq sij saenq naeuz sou ni goq, naeuz mbouj hawj faenhsou caeuq doengh boux ndaengndwet guh gij yalw he laizvangj lo. 10 Gou yienghneix naeuz mbouj dwg naeuz ceij lajmbwn sojmiz guh yalw ndaengndwet he, cixnaeuz damsim, coemx vunz aeu doxgaiq, caeuq baiq you he hih vunz law; hauhnaeuz dwg yienghneix nex, faenhsou gaejyungh lix youq aen seiqgyaiq neix lo. 11 Hoeng, gou seizneix sij saenq hawj faenhsou dih iqswh dwg naeuz, hauhnaeuz miz vunz gag nginhnaeuz bonjfaenh de dwg haeuj gij vunz Gihduz he, hoeng, dauq dwg guh gij ndaengndwet yalw, damsim, baiq you, yug vunz, gw laeuj fiz, coemx vunz, luj doenghgij vunz neix, faenhsou mbouj ndaej caeuq gyoengqde miz laizvangj. 12 Aenvih saemjbuenq doenghgij vunz mbouj haeuj Gihduz he mbouj dwg gou dih saeh. Hoeng, saemjbuenq gij vunz haeuj Gihduz he mbouj dwg faenhsou hih saeh mah? 13 Doenghgij vunz mbouj haeuj Gihduz he, Cangqdiq swhmboujyienz saemjbuenq gyoengqde, hoeng faenhsou nej, faenhsou wnggai gag daj ndaw faenhsou mwnq boenq boux doegsieb mwnq okbae.
1 Gangj daengz faenhsou ndaw de miz vunz doxceng, vihmaz gauq bae daengz doenghgij vunz mbouj sinq Gihduz mwnq bae nej? Vihmaz mbouj cingj doenghgij vunz sinq Gihduz he daeuj buenq nej? 2 Nanzdauh faenhsou mbouj rox gyoengqraeuz sinq Gihduz hih vunz baezneix ij caeuq de itheij saemjbuenq dienyah hih mah? Yiengq, giqyienz faenhsou ndaej saemjbuenq dienyah hih vwz, nanzdauh faenhsou mbouj miz bonjsaeh ndaej saemjbuenq cungj saeh saepsoiq neix haj? 3 Nanzdauh faenhsou mbouj rox, daengz mwhmwnq faenhsou caemh ndaej saemjbuenq bouxcai Cangqdiq hih mah? Yiengq, ciuq luj yienghneix ma gangj, faenhsou mbouj engqgya ndaej saemjbuenq aen seiqgyaiq neix hih saeh maz? 4 Sojhij, hauhnaeuz faenhsou miz cungj saeh neix, faenhsou vanzlij ij cingj doenghgij vunz mbouj sinq Gihduz he gyauqveiq yawj mbouj hwnj he daeuj buenq saeh haem lwi? 5 Gou yienghneix naeuz dwg siengj hawj faenhsou rox saetnaj saetnyaenq lah. Nanzdauh faenhsou ndaw de cungj mij saek boux coengjmingz miz bonjsaeh ndaej buenq gij saeh beixnuengx doxceng hih haj? 6 Geizheih, faenhsou cungj dwg sinq Gihduz hih vunz hah, hoeng, gingqyienz doxgauq; mbouj danhcij yienghneix, vanzlij engqgya gauq bae daengz doenghheij vunz mbouj sinq Gihduz he mwnq bae lah. 7 Gizsaed faenhsou doxgauq gaenq dwg daix loek hih lo. Vihmaz faenhsou mbouj sawqsawq guh daengz cingxnyienh ngaiz vunz daekcoih, ngaiz coem, cix mbouj bae daekcoih vunz hih nej? 8 Faenhsou guh mbouj daengz yienghneix cixbah lo, hoeng, dauq bae daekcoih vunz, sienghaih vunz, yaeuh vunz, daiqlienz doenghgij beixbeix nuengxnuengx faenhsou cungj ngaiz faenhsou yaeuh. 9 Nanzdauh faenhsou mbouj rox miz coih hih vunz mbouj ndaej gaep haeuj guek Cangqdiq hih haj? Gou naeuz faenhsou hax, gaejyungh gag yaeuh bonjfaenh lo; mboujguenj guh yalw ndaengndwet haj cixnaeuz baiq you, guhyoux haj cixnaeuz vunzsai caeuq vunzsai, vunzbaz caeuq vunzbaz guh gij yalw he, 10 guxcaeg cixnaeuz damsim, gw laeuj fiz cixnaeuz yug vunz, coemx vunz aeu doxgaiq, cungj mbouj ndaej gaep haeuj guek Cangqdiq. 11 Faenhsou ndaw de miz hih vunz doenghbaez couh dwg yienghneix, hoeng, seizneix faenhsou gaenq dunghgoq bouxcawj raeuz Yehsuh Gihduz caeuq baengh Cangqdiq dih Hoenzsaenz hwj ndaej mienx coih, ndaej youq ndaw lwgra Cangqdiq suenq dwg boux mij'z coih he, ndaej guh gij vunz Cangqdiq he lo. 12 Yiengq aiq ij miz vunz naeuz: “Gijmaz saeh gou cungj hab ndaej guh,” yienghneix. Hoeng, gou naeuz hax, mbouj dwg naeuz yienghyiengh cungj doiq mwngz miz ik law; gannaeuz gijmaz saeh cungj ndaej guh lah, hoeng, ciuq gou ma yawj, gou mbouj hawj gij saehlaw gaemhanh gou law. 13 Yiengq caemh aiq ij miz vunz naeuz: “Gij gw dwg vih aen dungx; aen dungx caemh dwg vih gij gw,” yienghneix. (Yiengq, ciuq gou ma yawj hax, cungj dwg deng hih, hoeng cungj ij miz ngoenz he, Cangqdiq gaengjdingq ij hawj song yiengh neix bienqbaenz mij'z yungh.) Fanjgoqma, aen ndangdaej mbouj dwg vih guh ndaengndwet, dauq dwg ij vih bouxcawj raeuz hwj guh saeh hih; de dwg bouxcawj aen ndangdaej gyoengqraeuz hih. 14 Seizneix Cangqdiq mbouj danhcij hawj bouxcawj raeuz dauqlix, baezneix caemh vanzlij ij yungh gij akak rengzrengz de ma hawj gyoengqraeuz dauqlix. 15 Nanzdauh faenhsou mbouj rox aen ndang faenhsou dwg aen ndang Gihduz dih faenh he haj? Ndaej dawz aen ndang Gihduz bae caeuq doenghheij lauxgawj mwnq doxgaep haj? Baenzbaenz mbouj ndaej. 16 Faenhsou mbouj rox haj, byawz caeuq lauxgawj, byawz couh dwg caeuq lauxgawj gaep guh aen ndang he lo, aenvih ndaw Singqgingh ndaw de naeuz: Song boux ij gaep guh luj aen ndang he. 17 Hoeng, hauhnaeuz faenhsou caeuq bouxcawj raeuz doxgaep nex, couh dwg luj caeuq de caemh hoenzsaenz lo. 18 Sojhij faenhsou mbouj ndaej cimyex haeuj doenghheij ndaengndwet yalw he bae. Vunz mboujguenj famh gijmaz coih cungj mbouj caeuq aen ndangdaej miz gvanhaeh, caenhgag doenghheij guh ndaengndwet yalw he cij daekcoih daengz aen ndangdaej bonjfaenh. 19 Faenhsou wnggai rox, aen ndangdaej faenhsou dwg gunghdenq Hoenzsaenz Cangqdiq he. Aenvih Hoenzsaenz Cangqdiq dwg Cangqdiq nyok hawj faenhsou he, sojhij Hoenzsaenz Cangqdiq youq gwnz ndang faenhsou youq. Couh vih yienghneix hwj, aen ndang faenhsou mbouj caenhgag dwg aen ndang faenhsou, caemh dwg aen ndang Cangqdiq hah. 20 Aenvih faenhsou dwg Cangqdiq yungh gauhgyaq cueg ma he, sojhij faenhsou wnggai youq gwnz ndang faenhsou yienh ok gij ndei he, mbouj hawj Cangqdiq saetnaj, wnggai hawj de najrongh.
1 Seizneix gou gangjgangj gvanhhih faenhsou sij saenq cam gou hih “vunzsai mbouj dep vunzbaz mbouj bungq vunzbaz dwg ceiq ndei hih” gij saeh neix. 2 Cijmboujgoq, vih mbouj ngaiz famh gij mbouj hab famh hih hwj vanzlij dwg vunzsai wnggai gag miz mehyah bonjfaenh; vunzbaz caemh wnggai gag miz goengjgvan bonjfaenh. 3 Guh goengjgvan hih wnggai caenh goengjgvan dih swzyimq; guh mehyah hih caemh ij caenh mehyah dih swzyimq. 4 Guh mehyah hih, aen ndangdaej bonjfaenh mbouj caenhgag dwg aen ndangdaej bonjfaenh; goengjgvan caemh miz faenh. Caemh doxdoengz, guh goengjgvan hih, aen ndangdaej bonjfaenh, mehyah caemh miz faenh. 5 Sojhij guh gvanjbaz hih, cizfeih ij naebsim gouz Cangqdiq haenh Cangqdiq, song mbiengj cungj dungziq camqciz faen gag vunz gag ninz, mbouj nex, mbouj ndaej doi caeuq mehyah haj cixnaeuz caeuq goengjgvan ninz, mienxndaej Sajdanq fangzvuengz demq faenhsou dingx mbouj ndaej le, longx faenhsou. 6 Gou yienghneix naeuz, mbouj dwg naeuz mingqlingq faenhsou law; dwg dungziq faenhsou caemh ndaej camqciz yienghneix guh lah. 7 Gizsaed gou muengh faenhsou daixgya cungj luj gou seizneix mij'z yah. Hoeng, gak vunz dajlaeng Cangqdiq ndaej hih fuk mbouj doxdoengz; miz hih vunz dwg yienghneix, miz hih vunz dwg yienghmwnq. 8 Seizneix gou doiq doenghheij mij yah caeuq doenghheij mehmaiq he naeuz, hauhnaeuz gyoengqde ndaej luj gou yienghneix boux vunz dog goq saedceij nex, couh ndei lo. 9 Hoeng, hauhnaeuz gyoengqde dingx mbouj ndaej nex, yiengq couh aeu couh haq bax, mijn'x dingx mbouj ndaej siengjmuengh hwj ngaiz famh coih nex, hozmboujyienz aeu hah, haq hah suenq lox. 10 Yiengq doiq doenghheij gaenq gyezvwnh hih vunz nej, gou ij raengq gyoengqde, gizsaed mbouj dwg gou raengq gyoengqde law, dwg bouxcawj raeuz raengq gyoengqde lah, couh dwg guh yah hih mbouj ndaej caeuq goengjgvan bonjfaenh lizvwnh. 11 Yiengq, hauhnaeuz liz nex, mbouj ndaej caiq haq haem lo; ij haq cij ndaej dauq haq laeng goeng gaxgonq de boiz. Guh goengjgvan hih caemh mbouj ndaej liz mehyah bonjfaenh. 12 Yiengq gangj daengz gizdah vunz (gij neix dwg gou dih iqswh he, mbouj dwg bouxcawj raeuz dih iqswh law), hauhnaeuz miz boux beixnuengxlawz mehyah de mbouj dwg sinq Gihduz hih, meh de nyienh'eiq caeuq de saenghhoz roengzbae, yiengq boux de couh mbouj ndaej liz mehyah de. 13 Caiq hauhnaeuz miz bouxlawz goeng gojyez de mbouj dwg sinq Gihduz hih, goeng de caemh nyienh'eiq caeuq de saenghhoz roengzbae hih, de couh mbouj ndaej liz goeng de, 14 aenvih doenghheij goengjgvan mbouj sinq Gihduz hih, gyoengqde ndaej vih mehyah gyoengqde sinq Gihduz hwj Cangqdiq caemh haenj gyoengqde, hawj gyoengqde ndaej gaepfaenh haeuj gij vunz de. Caemh doxdoengz, doenghheij mehyah mbouj sinq Gihduz hih, gyoengqde caemh vih goengjgvan gyoengqde sinq Gihduz hwj Cangqdiq caemh haenj gyoengqde, hawj gyoengqde ndaej gaepfaenh haeuj gij vunz de. Hauhnaeuz mbouj dwg yienghneix, gij lwg faenhsou couh mbouj ndaej suenq dwg Cangqdiq haenj he lo. Hoeng, seizneix gyoengqde dwg Cangqdiq hih vunz lo. 15 Yiengq, caiq hauhnaeuz song boux ndaw de boux mbouj sinq mwnq cungj ij liz lo, yiengq couh ajcaih de liz bax. Mboujguenj vunzsai haj cixnaeuz vunzbaz, roeb daengz cungj saeh neix cungj mbouj ndaej cengqgengz dingx, aenvih Cangqdiq senj gyoengqraeuz dwg hawj gyoengqraeuz bingzan hih. 16 Hoeng, guh yah hih, mwngz saekseiz lij ndaej daiq goeng mwngz, hawj de sinq Gihduz hwj ndaej gouq. Guh gvan hih, mwngz saekseiz caemh lij ndaej daiq mehyah mwngz, hawj de sinq Gihduz hwj ndaej gouq. Mwngz seizneix gaenhbaenj mbouj rox baezneix ij fatseng gijmaz. 17 Mboujguenj baenzlaw, faenhsou gak vunz cungj ij wnggai ciuq Cangqdiq senj faenhsou hih, bouxcawj raeuz hawj faenhsou hih yienghmwnq bae goq saedceij. Gou yienghneix naeuz dwg doiq gak aen gyauqveiq dih yauhgyiuz lah. 18 Hauhnaeuz byawz youq Cangqdiq senj de hih mwhde gaenq gozlij lo nex, couh gaejyungh guqiq muenz; yiengq, hauhnaeuz sinq Gihduz mwhde mijyaengz gozlij nex, caemh mboujyungh ij gozlij cij ndaej nej, 19 aenvih goz mbouj gozlij mbouj suenq guxmaz; cijaeu ciuq Cangqdiq dih mingqlingq bae guh couh ndaej lo. 20 Gak vunz cungj ij wnggai baujciz Cangqdiq senj mwngz hih mwhde mwngz dwg guxmaz couh dwg guxmaz bax; mboujyungh bienq nej. 21 Beijgangj naeuz Cangqdiq senj mwngz hih mwhde, mwngz dwg guh hoiq hih, yiengq mwngz couh gaejyungh vih yienghneix hwj simnyap; hauhnaeuz miz gihveiq nex, mwngz couh ij ceng aeu swqyouz. 22 Mboujguenj Cangqdiq senj mwngz hawj mwngz daeuj guh gij vunz bouxcawj raeuz hih mwhde, mwngz dwg bouxhoiq he cungj ndaej, cungj mbouj youqgaenj, aenvih seizneix mwngz youq ndaw lwgra Gihduz gaenq suenq dwg boux swqyouz vunz he lo. Caemh doxdoengz, mboujguenj Cangqdiq senj mwngz hih mwhde, mwngz dwg boux swqyouz vunz he, hoeng, seizneix mwngz dauq dwg bouxhoiq Gihduz he lah. 23 Gou naeuz sou hax, faenhsou dwg Cangqdiq yungh gauhgyaq cueg faenhsou ma hih, sojhij faenhsou gaejyungh bienqbaenz guh gij hoiq vunz. 24 Gak boux beixnuengx hax, mwh Cangqdiq senj faenhsou hih mwhde, faenhsou dwg guxmaz, gaep haeuj gij vunz Cangqdiq le, faenhsou caemh ij baujciz luj gaxgonq yienghmwnq dwg guxmaz. 25 Gangj daengz doenghheij mij gyezvwnh hih vunz, bouxcawj raeuz mij gijmaz mingqlingq gou law, hoeng, aenvih bouxcawj raeuz doiq gou haijliengh, hawj gou ndaej suenq dwg boux sinq ndaej goq he, ndaej dawz gij iqgyenq gou gangj naeuz faenhsou ni. 26 Ngeix daengz seizneix dih gvwnqnanz, ciuq gou ma yawj, vunz ceiq ndei ndaej baujciz luj seizneix. 27 Yiengq, hauhnaeuz gaenq miz yah lo nex, couh mbouj ndaej siengj banqfaz duet de; mijyaengz miz yah hih, caemh gaej siengj banqfaz aeu. 28 Hoeng, hauhnaeuz mwngz lij siengj aeu yah hih, caemh mbouj suenq famh coih; lwgsau ok haq, caemh mij maz naeuz famh coih. Cijmboujgoq gyezvwnh hih vunz baenx seiqvunz cungj miz haujlai mazfanz; gou dauj muengh faenhsou ndaej duet ok gij mazfanz neix. 29 Gak boux beixnuengx hax, gou naeuz sou ni, bouxcawj raeuz Yehsuh Gihduz couh ij dauq daeuj lo; daj seizneix hwnj, miz yah hih, mbouj ndaej caenhrox cij siengj daengz yah, ij luj mij'z yah yienghmwnq, ij naebsim bae swqhaeuh Cangqdiq. 30 Sojhij gou naeuz sou hax, mboujguenj baenzlawz, cungjsuenq naeuz miz siengsim gikheiq daej, miz sim'angq, miz gyadangq, dungjdungj cungj ij luj mbouj miz hwj naebsim bae swqhaeuh Cangqdiq; 31 youq lajmbwn ndaej yangjcouq hih, ij miz cungj daiqduq naeuz mij yawjnaek aen seiqgyaiq neix cij deng, aenvih gyoengqraeuz caenra raen aen seiqgyaiq neix hih couh ij goq lo. 32 Gou yienghneix naeuz dwg muengh faenhsou mbouj yousim gijmaz. Mij'z yah hih vunz dwg ndaej naebsim bae guh gij hong bouxcawj raeuz hih, dwg siengj hawj bouxcawj raeuz sim'angq hih. 33 Miz yah hih vunz cungj dwg siengj lajmbwn hih saeh, cij rox guq daengz ij baenzlaw hawj yah sim'angq lah, 34 yienghneix de couh mbouj ndaej naebsim bae guh gij hong bouxcawj raeuz lo. Vunzbaz caemh doxdoengz. Mij haq mij gvan hih vunzbaz dwg ndaej naebsim bae guh gij hong bouxcawj raeuz hih; ndangdaej gyoengqde caeuq gij hoenzsaenz gyoengqde cungj dwg yiengq laeng bouxcawj raeuz hih. Hoeng, gaenq haq hih vunzbaz nej, cungj dwg gvansim lajmbwn hih saeh, cungj dwg ij baenzlaw siengj hawj goengjgvan bonjfaenh sim'angq hih. 35 Gou yienghneix naeuz dwg doiq faenhsou ndei hih, dwg siengj hawj faenhsou guh gij hab guh hih saeh, hawj faenhsou ndaej naebsim bae guh gij hong bouxcawj raeuz hih lah, mbouj dwg ij haed faenhsou law. 36 Gangj daengz hauhnaeuz miz vunz caeuq dah baengzyoux de cungj doxhab'eiq lo, dah de nienzgeij caemh miz lo, boux vunzsai de caemhcaiq lau mbouj ndaej gag haed bonjfaenh de hwj doiq dah de guh gij mbouj hab guh he, siengj vaiqdi gyezvwnh hih, yiengq couh gyezvwnh bax; yienghneix caemh mbouj suenq dwg famh coih hih. 37 Hoeng, hauhnaeuz boux vunzsai de dingx ndaej, sim caemh gyenhdingq, mbouj caeuq dah de gyezvwnh, yiengq caemh baenz. 38 Yiengq, ciuq luj yienghneix ma yawj, caeuq dah baengzyoux de gyezvwnh caemh dwg baenz hih, hoeng, hauhnaeuz mbouj gyezvwnh nex, engqgya lai baenz. 39 Caiq gangj daengz doenghheij vunzbaz gaenq haq he, goengjgvan lij lix hih mwhde, guh yah hih mbouj ndaej guh gij saeh doiq mbouj hwnj goengjgvan de, caeuq daixlingh boux vunzsai. Yiengq, hauhnaeuz goeng de rai lo nex, meh de couh ndaej swqyouz lo, ndaej caeuq de haenj hih vunzsai gyezvwnh lo, cijmboujgoq dwg ndaej haq laeng boux vunzsai caemh dwg sinq bouxcawj raeuz Yehsuh Gihduz he. 40 Hoeng, ciuq gou ma gangj, hauhnaeuz meh de mbouj caiq haq engqgya miz fuk. Gou yienghneix gangj, gou naemj dwg Hoenzsaenz Cangqdiq caemh hawj gou gangj hih.
1 Gou seizneix ij gangjgangj gij vunz Cangqdiq ndaej mbouj ndaej gw doenghgij bwiz goq duz you he. Gangj daengz gij saeh neix, gyoengqraeuz bouxboux cungj naemqnaeuz miz gij ciqsiz neix, hoeng, gou naeuz hax, miz ciqsiz dwg hawj vunz gag naemqnaeuz bonjfaenh cungj rem raixcaix he lah; gizsaed caenhgag miz aiqsim cij cingqcaen dwg rem raixcaix, cij ndaej hawj vunz miz ik. 2 Doenghheij gag naemqnaeuz bonjfaenh gijmaz cungj rox hih, gizsaed daiqlienz gyoengqde wnggai rox hih cungj mbouj rox. 3 Hoeng, doenghheij aiq Cangqdiq hih vunz, youq ndaw lwgra Cangqdiq cij suenq dwg cingqcaen rox he. 4 Yiengq doiq gij saeh ndaej mbouj ndaej gw gij dajbwiz you he ma gangj, gou naeuz hax, gyoengqraeuz rox, lajmbwn hih you mbouj suenq dwg cingqcaen hih cwnz; caenhgag Cangqdiq boux dog cij dwg cingqcaen hih cwnz. 5 Cungjsuenq naeuz miz vunz gag an naeuz gwnzmbwn lajdeih miz haujlai cwnz caeuq bouxcawj hwjx, 6 hoeng, doiq gyoengqraeuz ma gangj, caenhgag miz boux cwnz dog lah. Boux neix couh dwg Cangqdiq Bohmbwn. Sojmiz hih cungj dwg coengz de daeuj he; gyoengqraeuz cungj dwg vih de hwj lix. Gyoengqraeuz caemh dwg cijngamq miz bouxcawj dog, couh dwg Yehsuh Gihduz. Sojmiz hih cungj dwg miz de hwj cij ndaej he; gyoengqraeuz caemh dwg baengh de hwj cij ndaej lix he. 7 Hoeng, mbouj dwg naeuz bouxboux cungj rox gij ciqsiz neix, aenvih miz hih vunz gaxgonq cungj dwg baiq you, baiq gyaj cwnz gvenq lo, naemqnaeuz you couh dwg caen hih cwnz. Sojhij gyoengqde gw doenghgij bwiz goq duz you he hih mwhde, gyoengqde cungj naemqnaeuz gyoengqde caiq baiq daixlingh cungj cwnz, guh gij doiq mbouj hwnj Cangqdiq he, doiq mbouj hwnj liengzsim he, roxnginh bonjfaenh mbouj cengh he lo. 8 Gizsaed, gij gw mbouj ndaej hawj Cangqdiq yawjhwnj raeuz hih, aenvih gw caeuq mbouj gw cungj dwg doxdoengz: mbouj gw caemh mbouj miz maz haih, gw caemh mbouj miz maz ik. 9 Hoeng, faenhsou ij siujsim, mbouj ndaej vih faenhsou hih swqyouz hwj bienqbaenz ngauq rin hawj vunz daemjndoet he. 10 Hauhnaeuz miz doenghgij vunz daiq siujsim he, lau guh loek he, yawjraen mwngz, rox doenghgij dauhleix gwnz neix hih mwngz naengh youq ndaw miuh gw doenghgij bwiz goq duz you he nex, gyoengqde mbouj engqgya mbeihung hwj gw doenghgij bwiz goq duz you hih maz? 11 Yiengq faenhsou rox gij saeh doenghgij bwiz goq duz you he hih dauqfanj sienghaih daengz doenghheij daiq siujsim lau guh loek hih vunz, hawj gyoengqde satsoq. Hoeng, doenghheij vunz neix cingq dwg Gihduz aeu mingh ma gouq hih doenghheij beixnuengx neix lah. 12 Faenhsou hauhnaeuz yienghneix daekcoih gyoengq beixnuengx, hawj gyoengqde guh gij doiq mbouj hwnj liengzsim he, yiengq caemhdangq daekcoih daengz Gihduz lo. 13 Sojhij, hauhnaeuz miz hih gij gw ndaej hawj gyoengq beixnuengx famh coih hih, aeu gou ma yawj hax, gou couh yungjyenj mbouj gw, mienxndaej ngaiz hawj gij beixnuengx famh coih.
1 Nanzdauh gou mbouj dwg swqyouz hih haj? Gou mbouj dwg dwzbaijyienz haj? Gou mbouj dwg raen goq bouxcawj raeuz Yehsuh Gihduz hih haj? Faenhsou mbouj dwg gou guh gij hong bouxcawj raeuz dih baengzgawq haj? 2 Sojhij, cungjsuenq naeuz vunz yawj gou mbouj dwg boux dwzbaijyienz he hwjx, faenhsou cungj mbouj ndaej naeuz gou mbouj dwg hah, aenvih faenhsou couh dwg gou daiq hawj faenhsou sinq Gihduz he; gij neix couh ndaej cingqmingz gou dwg bouxcawj raeuz senj gou hawj gou guh boux dwzbaijyienz he lo. 3 Gou doiq doenghheij gvaiq gou saemjcam gou hih vunz cungj dwg naeuz: 4 Nanzdauh gou mij'z gienz gauq guh gij hong Cangqdiq hwj ndaej gw hih mah? 5 Nanzdauh gou mij'z gienz ndaej luj gizdah dih dwzbaijyienz, beijgangj luj daegnuengx bouxcawj raeuz caeuq Bijdwz yienghmwnq aeu gij vunzbaz sinq Gihduz he ma guh yah, daiq de okbae guh gij hong Cangqdiq? 6 Nanzdauh caenhgag gou caeuq Bahnazbah bietdingh ij gag guh hong cij ndaej miz gw? 7 Gou cam faenhsou, miz byawz dang bing hih gag daiq gij gw he bae nej? Miz byawz ndaem suen mak buzdauz he, hoeng, dauq mij gw gij mak de nej? Caemh miz byawz ciengx baenx gyoengq yiengz, hoeng, caemh mij gw gij nauq yiengz de nej? 8 Gou gangj hih doenghgij vah neix, faenhsou dwg mbouj dwg cungj naemqnaeuz dwg gou gag gangj hih nej? Gizsaed, doenghgij vah neix Cangqdiq youq ndaw Mohsih dih fazliz caemh dwg yienghneix naeuz hih, 9 ndaw de naeuz: Duz cwz dawz muh raenx haeux, mbouj ndaej daep mob hawj duz de. Nanzdauh Cangqdiq gangj hih gij vah neix caenhgag dwg gvansim duz cwz mah? 10 Mbouj dwg gvansim gyoengqraeuz mah? Gou naeuz hax, mingzmingz dwg doiq gyoengqraeuz gangj hih max. Beijgangj naeuz miz bouxlawz nungzminz dajgeng dajndaem mbouj muengh ndaej miz haeux sou haeujma nej? Yienghneix muengh dwg wngdang hih. 11 Yiengq, giqyienz dwg wngdang hih, hauhnaeuz gyoengqraeuz dawz gij ndei siuhsiz Cangqdiq cenzgangj naeuz sou ni, caiq dajlaeng faenhsou sou ndaej gij gw he, yienghneix suenq gvaqbouh lai laq? 12 Yiengq, caiq hauhnaeuz heijvunz miz gij gienzliz ndaej dajlaeng faenhsou aeu ndaej gij gw he, gyoengqraeuz mbouj engqgya miz cungj gienz neix maz? Hoeng, gyoengqraeuz coengzlaiz mbouj yungh gij gienz neix, mbouj laeng faenhsou aeu goq, dauqfanj vih ij cenz gij ndei siuhsiz Gihduz hwj souh daengz nanh lah; gyoengqraeuz yienghneix guh dwg mbouj siengj hawj gij ndei siuhsiz Gihduz ngaiz souh daengz ingjyangj. 13 Nanzdauh faenhsou mbouj rox, youq gunghdenq Cangqdiq guh hong hih couh ndaej daj gunghdenq lingx gij gw he, guh gij hong dajbwiz hih couh ndaej aeu gij dajbwiz gwnz daiz. 14 Yiengq caemh doxdoengz, bouxcawj raeuz caemh yienghneix dingh naeuz: guh gij hong cenzgangj de dih ndei siuhsiz hih caemh gauq guh gij hong neix gw. 15 Hoeng, gangj daengz miz gij gienz neix, gou mij yungh goq; gou seizneix yienghneix sij saenq hawj faenhsou mbouj dwg ij ceng hawj faenhsou yienghneix doiq gou law. Gangj lauxsaed vah, gou cingxnyienh rai iek, cix mbouj hawj vunz naemqnaeuz gou dwg vih gw hwj cij cenz gij ndei siuhsiz lah. 16 Cijmboujgoq gou guh gij hong cenzgangj Cangqdiq dih ndei siuhsiz mij gag haenh gou goq, aenvih gou guh gij hong cenzgangj neix dwg Cangqdiq baij gou hawj gou cenz hih, dwg gou wnggai guh hih. Hauhnaeuz gou mbouj cenz, gou wnggai hab satsoq. 17 Yiengq, hauhnaeuz dwg gou nyienh'eiq cenz hih, gou couh ndaej cangjliq lo. Hoeng, mboujguenj baenzlawz, cungj dwg Cangqdiq gyau hawj gou, dwg gou dih yimqmuq. 18 Yiengq, ciuq luj yienghneix ma yawj, gangj daengz gou ndaej cangjliq, dwg cangj ndaej gijmaz nej? Gou naeuz sou ni hax, couh dwg gou dawz gij ndei siuhsiz Cangqdiq cenz hawj vunz rox, hawj vunz begbeg ndaej gij ndei siuhsiz neix hih gij cangjliq neix lah. Couh vih yienghneix, gou mij yungh gij gienz gou guh cenzgangj wnggai ndaej hih gienzliz. 19 Gou gannaeuz dwg boux swqyouz mij'z vunz guenj he lah, hoeng, gou vih ij cenzgangj Cangqdiq dih ndei siuhsiz hwj hawj haujlai vunz ndaej gouq, gou nyienh'eiq guh sojmiz vunz dih hoiq. 20 Gou caeuq Youzdaiq vunz youq itheij nex, gou couh guh Youzdaiq vunz, muzdiz dwg siengj hawj gyoengqde sinq. Couh dwg naeuz caeuq doenghheij ciuq Mohsih fazliz bae guh hih vunz youq itheij hih, gou couh luj doenghheij vunz ciuq Mohsih fazliz bae guh hih vunz. Baenjlaiz gou mbouj souh fazliz dih guenjciq hih, hoeng, gou dauq luj souh fazliz guenjciq, vih dwg ij hawj gyoengqde sinq. 21 Gou caeuq doenghheij mbouj dwg souh daengz Mohsih fazliz dih guenjciq hih vunz youq itheij, gou couh luj mbouj dwg souh Mohsih fazliz guenjciq hih vunz, muzdiz dwg siengj hawj gyoengqde sinq. (Gou yienghneix guh gaenhbaenj mbouj dwg naeuz gou couh mbouj hengz Cangqdiq dih fazliz, dauq dwg soenhsouj Gihduz soj son hih lah.) 22 Gou caeuq doenghheij daiq siujsim lau guh loek hih vunz youq itheij, gou couh luj gyoengqde yienghmwnq, muzdiz dwg siengj hawj gyoengqde sinq. Gou mboujguenj caeuq guxmaz vunz youq itheij, cungj ij gaen guxmaz vunz; mboujguenj baenzlawz, gou ceiq noix cungj ij gouq di vunz he. 23 Gou soj guh hih cungj dwg vih ij cenzgangj Cangqdiq dih ndei siuhsiz hwj guh hih, vih ij ndaej caeuq vunz doxdoengz ndaej yangjcouq gij ndei siuhsiz Cangqdiq dih ndeicawq lah. 24 Nanzdauh faenhsou mbouj rox, bijcaiq riq hih vunz, gannaeuz bouxboux cungj riq lah, hoeng, ndaej cangjliq hih cijngamq ndaej boux dog. Caemh doxdoengz, faenhsou caemh wnggai ciengj riq; yienghmwnq faenhsou cij ndaej cangjliq hah. 25 Yiengq, famz camhgyah bijcaiq hih vunz cungj ij dunghgoq yiemzgwz ywnqlenq. Gyoengqde yienghneix guh cijmboujgoq dwg siengj hingz ndaej gij cangjbyimj rox naeuh rox lanh hih lah; hoeng, gyoengqraeuz siengj hingz hih gij cangjbyimj mwnq dauq dwg yungjyenj mbouj rox naeuh hih. 26 Sojhij gou riq, mbouj dwg luenh riq, dauq dwg miz muzbiuh hih. Gou caemh luj hoenxgyienz yienghmwnq, mbouj dwg luenh hoenx, dauq dwg gaengjdingq ij hoenx deng mwnq he. 27 Gou caemh luj ywnqdungqyienz yienghmwnq yiemzgwz, hawj aen ndang gou ndaej dingq gou cijveih. Hauhnaeuz mbouj dwg yienghneix, gou roengzrengz bae cenzgangj Cangqdiq dih ndei siuhsiz naeuz vunz ni, bonjfaenh gou dauq ngaiz Cangqdiq mbouj hawj gou miz gihveiq ndaej cangjliq.
1 Gak boux beixnuengx hax, faenhsou ijaeu ndaejgeiq, doenghbaez gij cojgoeng raeuz deuz ok Ngaihgiz ma hih mwhde, Cangqdiq yienh youq ndaw fwj hwj daiq gyoengqde sojmiz hih byaij goq rogndoi, caiq hawj raemx haij faen song mbiengj hwj, hawj gyoengqde sojmiz hih byaij goq mwnq hawq he, goq haij ma, 2 hawj gyoengqde ndaej youq ndaw fwj caeuq ndaw haij sijlij, hawj gyoengqde gvi haeuj Mohsih, dingq Mohsih cijveih. 3 Gyoengqde cungj dwg doxdoengz ndaej gw cungj haeux he; gij haeux neix couh dwg Cangqdiq nyok hawj hih gij gw. 4 Gyoengqde caemh doxdoengz gw gij raemx he; gij raemx neix couh dwg Cangqdiq nyok hawj hih raemx. Gij raemx neix dwg daj ngauq rin hung Cangqdiq hawj gyoengqde he gaen gyoengqde he riuz okdaeuj he. Ngauq rin hung neix, couh dwg Gihduz. 5 Hoeng, gyoengqde ndaw de miz dingxfaen lai vunz dwg Cangqdiq mbouj haenj he; sojhij gyoengqde cungj ngaiz rai youq rogndoi hwj dauqcawq cungj miz seihaiz bae. 6 Cangqdiq hawj gij saeh neix fatseng dwg gingjgauq gyoengqraeuz, mienxndaej gyoengqraeuz caemh luj gij cojgoeng raeuz yienghmwnq damsim guh gij doegsieb he. 7 Sojhij, faenhsou mbouj ndaej luj gyoengqde miz mbangj hih vunz baiq you, cingq luj ndaw Singqgingh ndaw de sij naeuz: Gij vunz naengh roengzma gwgw angqangq, ndwn hwnjdaeuj saetsaet diuqdiuq. 8 Faenhsou caemh mbouj ndaej luj gyoengqde miz hih vunz guh gij ndaengndwet he, aenvih gyoengqde guh gij ya'mboujlw he famh coih, guh hwj ngoenz he miz songfanh samcien vunz ngaiz satsoq. 9 Faenhsou caemh mbouj ndaej luj gyoengqde miz mbangj hih vunz sawq Gihduz; gyoengqde yienghmwnq guh, guh hwj gajlaeng ngaiz ngwz haeb rai. 10 Faenhsou caemh mbouj ndaej luj gyoengqde miz mbangj hih vunz hemq ienq, yienghmwnq ngaiz bouxcai Cangqdiq cawz mingh mwnq cawz bae. 11 Cangqdiq hawj gyoengqde fatseng doenghgij saeh neix, dwg vih gingjgauq gyoengqraeuz ciqgyaiq hih duenh gajlaeng de hih vunz, couh geiq sij youq ndaw Singqgingh lo. 12 Sojhij, byawz naemqnaeuz bonjfaenh ndwn ndaej gaenj hih, byawz couh ij siujsim, mienxndaej ngaiz laemx. 13 Mboujgoq, faenhsou roeb daengz ngaiz yaeuh ngaiz longx hwj famh coih hih, cungj dwg caeuq sojmiz hih vunz ngaiz yaeuh ngaiz longx hih doxdoengz lah. Hoeng, Cangqdiq dwg sinq ndaej goq hih; de gaengjdingq mbouj hawj faenhsou ngaiz souh daengz yaeuh longx hwj dingx mbouj ndaej law. Dauq dwg youq mwh faenhsou ngaiz yaeuh ngaiz longx hih mwhde, hawj rengz hawj faenhsou, hawj faenhsou ndaej dingx ndaej goq, hawj faenhsou hoi diuz roen he lah. 14 Sojhij, gou cinhngaiq dih gak boux beixnuengx hax, faenhsou mbouj ndaej baiq you. 15 Faenhsou dwg vunz coengjmingz hih; gou soj gangj hih vah dwg mbouj dwg miz dauhleix, faenhsou gag ngeixngeix yawj. 16 Moix it mbat gyoengqraeuz gijnenq bouxcawj raeuz Yehsuh Gihduz vih gyoengqraeuz rai hwj gw cenj laeuj docih de mwnq, mbouj dwg doxdoengz ndaej yangjcouq gij lwed Yehsuh Gihduz hih maz? Gyoengqraeuz soj euj hih bingj, mbouj dwg doxdoengz ndaej yangjcouq aen ndangdaej Gihduz hih maz? 17 Gannaeuz gyoengqraeuz vunz lai lah, hoeng, dauq dwg caemh aen ndang dog, aenvih gyoengqraeuz cungj caemh yangjcouq aen bingj dog. 18 Faenhsou yawjyawj gij vunz Hijswzlez lux: gyoengqde gw doenghgij bwiz goq Cangqdiq he le, gajlaeng, gyoengqde mbouj dwg caemh ndaej bienqbaenz gaep guh buek vunz baiq Cangqdiq he lo mah? 19 Gou gangj hih gij vah neix dwg gijmaz iqswh nej? Dwg naeuz duz you caeuq gij dajbwiz de miz yungh hih mah? 20 Ciuq gou ma naeuz hax, gaenhbaenj mbouj miz guxmaz yungh. Doenghheij bwiz you hih vunz, gyoengqde bwiz hih dwg bwiz fangz he, mbouj dwg bwiz Cangqdiq law. Gou mbouj haenj faenhsou caeuq fangz miz gvanhaeh hih. 21 Faenhsou mbouj ndaej cix gw cenj gijnenq bouxcawj raeuz mwnq, cix gw cenj bwiz duz fangz he; mbouj ndaej caeuq bouxcawj gw haeux caiq bae caeuq fangz gw haeux. 22 Nanzdauh gyoengqraeuz siengj yex bouxcawj raeuz fatheiq mah? Gyoengqraeuz ndaej giengz goq de mah? 23 Miz vunz naeuz: “Raeuz haenj guh gijmaz saeh cungj ndaej, cijaeu raeuz haenj.” Gawq vah neix deng hih, mbouj loek, hoeng, mbouj dwg naeuz moix it gienh saeh cungj doiq vunz miz ik law. Gannaeuz gijmaz saeh raeuz haenj guh couh guh lah, hoeng, gou naeuz hax, mbouj dwg gijgij saeh cungj ndaej bang vunz law. 24 Gou naeuz sou hax, faenhsou mboujguenj bouxlawz, cungj mbouj ndaej caenh rox daengz bonjfaenh, doiq bonjfaenh miz ik cij ndaej; caemh ijaeu ngeix daengz vunz cij ndaej. 25 Sojhij gou naeuz sou hax, ndaw hangznoh hai hih noh, faenhsou cungj ndaej seizbienh cawx ma gw; mboujyungh lau naeuz bwiz goq duz you caeuq doiq mbouj hwnj liengzsim hwj cam gijmaz, 26 aenvih ndaw Singqgingh ndaw de sij naeuz: Dienyah sojmiz hih cungj dwg gij Cangqdiq liux. 27 Sojhij, hauhnaeuz miz gij vunz mbouj sinq Cangqdiq he cingj faenhsou gw haeux, gyoengqde cingj faenhsou gw gijmaz, faenhsou couh gw gijmaz. Mboujyungh rox doenghgij gw mwnq dwg mbouj dwg bwiz goq duz you, mienxndaej faenhsou rox le, couh roxnginh sim mbouj onj. 28 Hoeng, hauhnaeuz miz vunz doiq faenhsou naeuz: “Gij noh neix bwiz goq duz you he!” Yiengq faenhsou couh ij vih boux naeuz sou ni mwnq hwj mbouj gw gij noh mwnq, caeuq vih sim'onj mbouj onj hwj mbouj gw gij noh mwnq. 29 Mboujgoq, gou dineix naeuz hih “sim'onj mbouj onj” mbouj dwg ceij mwngz naeuz law, dauq dwg ceij boux naeuz sou ni mwnq lah. Yiengq faenhsou aiq ij miz vunz cam naeuz: “Gou miz gienz haenj mbouj haenj gw noh hah; vihmaz ij guenj daengz vunz sim'onj mbouj sim'onj baenzlaw yiengh bae nej? 30 Hauhnaeuz gou miz aen sim docih Cangqdiq he, docih le, gou cij gw, yiengq vunz ij baenzlawz naeuz gou gw gij noh mwnq nej?” 31 Hoeng, daengj gou naeuz sou ni vih guxmaz bax. Mboujguenj faenhsou gw gijmaz cixnaeuz guh gijmaz, cungj ij wnggai ngeix daengz hawj Cangqdiq najrongh. 32 Sojhij faenhsou mboujguenj caeuq gij vunz Youzdaiq cixnaeuz caeuq gij vunz Hihlaz cixnaeuz caeuq doenghheij sinq Gihduz hih vunz youq itheij, cungj mbouj ndaej vih bonjfaenh soj guh hih hwj hawj vunz dwgcaengz. 33 Faenhsou dauq ij luj gou; vih ij hawj vunz ndaej gouq, mboujguenj guxmaz, cungj mbouj wnggai ngeix daengz doiq bonjfaenh miz mbouj miz ik, dauq ij ngeix daengz vunz, hawj vunz haenjheiq.
1 Faenhsou wnggai hag gou, caemh luj gou hag Gihduz yienghmwnq. 2 Gou haenh faenhsou, aenvih faenhsou mboujguenj guh gijmaz saeh, cungj ngeix daengz gou, caemh ciuq gou son faenhsou hih yienghmwnq bae guh. 3 Hoeng, gou seizneix miz gienh saeh he naeuz faenhsou. Faenhsou wnggai rox, vunzsai dwg vunzbaz dih raeuj, Gihduz dwg vunzsai dih raeuj, Cangqdiq dwg Gihduz dih raeuj. 4 Sojhij, vunzsai youq gouzhaenh Cangqdiq cixnaeuz cenz gij vah Cangqdiq hih mwhde, hauhnaeuz goemq raeuj nex, couh dangq hawj Gihduz saetnaj lo. 5 Hoeng, hauhnaeuz vunzbaz gouzhaenh Cangqdiq cixnaeuz cenz gij vah Cangqdiq hih mwhde, hauhnaeuz mbouj goemq raeuj nex, couh dangq dwg hawj goengjgvan bonjfaenh saetnaj lo. Aenvih luj yienghneix hih, couh dangq luj vunzbaz ngaiz daeq raeuj ngaeuz yienghmwnq. 6 Sojhij, hauhnaeuz vunzbaz mbouj goemq raeuj, hozmboujyienz de ganhseiq daeq raeuj ngaeuz suenq lo. Giqyienz vunzbaz daeq raeuj cixnaeuz daet byoemraeuj dwg haeuj gij saetnaj saetnyaenq he vwz, yiengq de couh wnggai goemq ndaek raeuj de hwnjdaeuj. 7 Yiengq caiq gangj daengz vunzsai gouzhaenh cixnaeuz cenz gij vah Cangqdiq hih mwhde, mbouj wnggai goemq raeuj, aenvih vunzsai dwg Cangqdiq dih yienghceij, dwg yienh ok Cangqdiq dih veijdaq he. Hoeng, vunzbaz dwg yienh ok vunzsai dih veijdaq. 8 Daj gaihcij, vunzsai mbouj dwg dajlaeng vunzbaz cauh okdaeuj hih, hoeng, vunzbaz dauq dwg dajlaeng vunzsai cauh okdaeuj he. 9 Vanzlij miz, vunzsai mbouj dwg vih vunzbaz hwj cauh okdaeuj hih, hoeng, vunzbaz dauq dwg vih vunzsai hwj cauh okdaeuj hih. 10 Sojhij, vih ij hawj bouxcai Cangqdiq sim'angq, vunzbaz wnggai goemq raeuj guh geiqhauh, couh dangq naeuz vunzbaz fug vunzsai dwg vunzbaz dih raeuj. 11 Hoeng, mboujguenj dwg guxmaz, ciuq bouxcawj raeuz dih nganhbaiz, cungj ij miz vunzsai vunzbaz cij ndaej. 12 Gannaeuz gaihcij vunzbaz dwg dajlaeng vunzsai cauh okdaeuj he, hoeng, gajlaeng sojmiz hih vunzsai cungj dwg dajlaeng vunzbaz seng okdaeuj he. Hoeng, mboujguenj baenzlaw, sojmiz hih dungjdungj cungj dwg coengz Cangqdiq ndaej daeuj he. 13 Sojhij, faenhsou gag ngeixngeix yawj, vunzbaz youq dangqnaj vunzlai gouzhaenh Cangqdiq hih mwhde, mbouj goemq raeuj hab lwi? 14 Yiengq, ciuq vunz dih yawjfap, faenhsou caemh rox, vunzsai louz byoemraeuj raez mbouj dwg saetnaj bonjfaenh lo mah? 15 Hoeng, vunzbaz louz byoemraeuj raez, dauq dwg de dih najrongh lah, aenvih vunzbaz louz byoemraeuj raez cingq dwg ndaej goemq ndaek raeuj bonjfaenh de. 16 Yiengq, hauhnaeuz miz vunz doxeuq gij saeh goemq mbouj goemq raeuj neix nex, gou caenhgag ndaej naeuz gyoengqraeuz caeuq gizdah gyauqveiq cungj dwg yienghneix yawjfap hih. 17 Laj neix, gou seizneix ij naeuz faenhsou, mbouj dwg ij haenh faenhsou, couh dwg: faenhsou doxcomz mbouj danhcij naeuz mij'z ik, vanzlij miz haih. 18 Daixit, gou dingq naeuz faenhsou doxcomz hih mwhde faen banghbaij hwj. Gou sinq gij vah neix mbouj dwg vunz gag an hih, hoeng, gij neix caemh hojgangj. 19 Saekseiz faenhsou faen banghbaij le, cij ndaej yawj ok byawz deng byawz mbouj deng nej. 20 Faenhsou seizneix doxcomz, gaenq bienqbaenz mbouj dwg vih ij gijnenq bouxcawj raeuz hwj doxcomz gw haeux lo, 21 aenvih faenhsou gw hih mwhde, cij rox guq gw bonjfaenh, mij ngeix daengz vunz, guh hwj daengz gajlaeng, miz hih vunz gw hwj imqimq aqaq fiz hih fiz, hoeng, miz hih vunz dauq iek hwj ij rai bae. 22 Faenhsou yienghmwnq gw hwj sanx bae. Nanzdauh faenhsou mij'z gya, mij ndaej gag youq ndaw ranz bonjfaenh gw haj? Vihmaz ij youq vih gijnenq bouxcawj raeuz hwj gw hih gw hwj sanx bae nej? Nanzdauh faenhsou guqiq yienghmwnq gw hwj sanx bae hwj sai Cangqdiq dih gyauqveiq mah? Hawj gij vunz mij ndaej gw he hwj saetnaj mah? Gou ij baenzlaw naeuz faenhsou nej? Faenhsou yienghneix guh wnggai hawj gou haenh faenhsou mah? Gaej muengh luh nwjx! 23 Laj neix gou dawz bouxcawj raeuz son gou hih gvanhhih vih ij gijnenq de hwj gw hih donq haeux mwnq dih gveihgij naeuz sou ni: Bouxcawj raeuz Yehsuh Gihduz ngaiz vunz cuzmaiq hih haemh mwnq hih donq haeuxcaeuz gatsat mwnq, mwhde de dawz aen bingj he hwnjdaeuj 24 docih Cangqdiq. Docih le, couh euj aen de couh naeuz: “Gij neix couh dwg daiqbiuj aen ndangdaej gou, dwg vih faenhsou hwj ngaiz vwt mingh dih ndangdaej. Vih ij geiqniemh gou, faenhsou ij yienghneix guh.” 25 Gw haeuxcaeuz sat le, de caiq dawz cenj laeuj he hwnjdaeuj naeuz: “Cenj neix couh dwg daiqbiuj Cangqdiq yiengq vunz dinghlaeb dih saen dih baujcingq lienz diuzgyenq, dwg yungh gij lwed gou ma dingh he. Faenhsou moix it mbat doxcomz gw cenj laeuj neix cungj ij yienghneix guh hwj geiqniemh gou.” 26 Sojhij gou naeuz faenhsou, faenhsou moix it mbat yienghneix gw bingj gw cenj laeuj neix hih, couh dwg ij hawj vunz rox bouxcawj raeuz vih raeuz hwj ngaiz rai hih; faenhsou ij itcig yienghneix guh daengz bouxcawj raeuz dauq daeuj hih ngoenz mwnq. 27 Sojhij mboujguenj byawz, mbouj miz aen sim naeuz soenhgingq he daeuj gw bingj gw cenj neix hih, couh dwg daekcoih aen ndang bouxcawj raeuz caeuq gij lwed de lo. 28 Couh vih yienghneix, gak vunz cungj ij sien gag ngeix ndei, cij ndaej gw aen bingj neix caeuq cenj neix. 29 Yiengq, hauhnaeuz miz byawz faen mbouj ok gw aen bingj neix gw cenj neix caeuq aen ndang bouxcawj raeuz miz maz gvanhaeh hih nex, de couh ij ngaiz souh daengz fad, couh dangq naeuz gag caij daengqgyauz hau raeuj lo. 30 Cingq vih yienghneix, faenhsou ndaw de miz haujlai vunz ndangdaej nyieg, miz bingh, caemh miz haujlai vunz ngaiz rai lo. 31 Sojhij naeuz, hauhnaeuz raeuz gak vunz sien ngeix ndei cingsuj, couh mbouj ngaiz souh daengz saemjbuenq lo. 32 Hoeng, hauhnaeuz gyoengqraeuz ngaiz souh daengz saemjbuenq nex, dwg bouxcawj raeuz guenjgyauq gyoengqraeuz lah, mienxndaej gyoengqraeuz ngaiz caeuq gij vunz lajmbwn souh daengz dingh coih. 33 Sojhij gou naeuz gak boux beixnuengx hax, mwh faenhsou doxcomz gw bingj gw laeuj hih mwhde, ij rox doxdaengj doxnyiengh. 34 Hauhnaeuz miz vunz iek lai, couh sien youq ndaw ranz bonjfaenh gw gaenq, mienxndaej daengz doxcomz hih mwhde, ngaiz souh daengz saemjbuenq. Couh yienghneix bax. Lij lw hih, daengj gou bae le, cij caiq gaijgyez.
1 Gak boux beixnuengx hax, gangj daengz Hoenzsaenz Cangqdiq nyok hawj vunz dih bonjsaeh, gou muengh faenhsou rox cingsuj. 2 Faenhsou caemh gag rox, youq faenhsou mijyaengz sinq Cangqdiq cihsenz, faenhsou baenxlai ngawz, siengzseiz ngaiz yaeuh hwj bae bwiz you. 3 Sojhij seizneix gou naeuz sou ni, famz miz Hoenzsaenz Cangqdiq doengh daengz sim hih cungj mbouj veiq naeuz: “Yehsuh wnggai ngaiz mang,” gawq neix. Fanjgoqma, caemh doxdoengz, famz mbouj miz Hoenzsaenz Cangqdiq doengh daengz sim hih caemh mbouj veiq naeuz: “Yehsuh dwg bouxcawj gou.” 4 Hoenzsaenz Cangqdiq nyok hawj vunz dih bonjsaeh miz haujlai cungj, hoeng, cungjcungj cungj dwg coengz gij Hoenzsaenz dog nyok hawj he. 5 Swqhaeuh hih caemh miz haujlai cungj, hoeng, cungjcungj cungj dwg swqhaeuh bouxcawj dog. 6 Hong caemh miz haujlai cungj, hoeng, cungjcungj cungj dwg boux Cangqdiq dog hawj rengz hawj gak vunz ndaej guh he. 7 Hoenzsaenz Cangqdiq vih ij hawj daixgya miz ndeicawq, couh nyok hawj gak vunz mbouj doengz hih bonjsaeh. 8 Miz hih ndaej rox naeuz vunz ni wnggai baenzlawz guh, miz hih ndaej rox gijmaz gijmaz. 9 Miz hih ndaej miz aen sim sinq Cangqdiq raixcaix he, miz hih ndaej rox yw bingh hawj vunz, 10 miz hih ndaej rox guh doenghgij geizmiuj hih saeh he, miz hih ndaej rox cenz gij vah Cangqdiq, miz hih ndaej rox faenbied ndei caeuq yak hih hoenzsaenz, miz hih ndaej rox gangj cungj vah Hoenzsaenz Cangqdiq nyok hawj vunz gangj he, miz hih ndaej rox fanhyiz cungj vah Hoenzsaenz Cangqdiq nyok hawj vunz gangj he. 11 Sojmiz hih cungj dwg caemh gij Hoenzsaenz dog nyok hawj he; cungj dwg de ciuq bonjfaenh de dih cawjeiq nyok hawj gak vunz he. 12 Cingq luj aen ndang he miz haujlai doxcaeuq hwnjdaeuj cij baenz aen ndang he, Gihduz couh dwg aen ndang he. 13 Mboujguenj gyoengqraeuz dwg Youzdaiq vunz haj cixnaeuz dwg Hihlaz vunz, dwg guh hoiq haj cixnaeuz dwg swqyouz vunz, cungj dwg dunghgoq gij Hoenzsaenz dog sijlij hwj ndaej gaep haeuj buek vunz he, bienqbaenz aen ndangdaej he, caemh dwg doxdoengz ndaej yangjcouq gij Hoenzsaenz dog he, couh dangq luj vunzlai doxdoengz caemh gw aen cingj raemx he. 14 Aen ndang vunz cungj dwg miz haujlai yiengh haujlai yiengh doxcaeuq hwnjdaeuj cij guhbaenz aen ndang he. 15 Beijgangj naeuz, hauhnaeuz gij ha naeuz: “Gou mbouj dwg fawz, sojhij gou mbouj suenq dwg haeuj aen ndang law,” yiengq nanzdauh couh vih yienghneix hwj mbouj suenq dwg haeuj aen ndang he lo mah? 16 Caiq beijgangj naeuz, hauhnaeuz duj rwz naeuz: “Gou mbouj dwg cehra, sojhij gou mbouj suenq dwg haeuj aen ndang,” yiengq nanzdauh yienghneix caemh mbouj suenq dwg haeuj aen ndang lo mah? 17 Yiengq, hauhnaeuz baenx ndang cungj dwg ra, ij baenz ndaej dingqri nej? Caiq hauhnaeuz baenx ndang cungj dwg rwz, yiengq ij baenz ndaej mup nej? 18 Hoeng, Cangqdiq ciuq bonjfaenh de dih cawjeiq dawz doenghgij mbouj doengz neix coengq youq mwnq hab coengq he, hawj de gaep guh aen ndang he. 19 Hauhnaeuz sojmiz hih cungj doxdoengz, yiengq ij baenz suenq dwg aen ndang he nej? 20 Gizsaed gyoengqraeuz miz aen ndang he; aen ndang neix miz haujlai yiengh mbouj doengz he. 21 Sojhij cehra mbouj ndaej doiq gij fawz naeuz: “Gou mboujyungh mwngz,” ndaek raeuj caemh mbouj ndaej doiq gij ha naeuz: “Gou mboujyungh mwngz.” 22 Dauqfanj, gwnz ndang mwnq ceiq yungzheih sieng ceiq mbouj yungzheih ndei he hih engqgya noix mbouj ndaej. 23 Youq gwnz ndang mwnq vunz mbouj dawz haeuj rwz hih, raeuz engqgya yawjdij; doenghheij mboujeiqseiq hawj vunz raen hih, raeuz engqgya ij baex ndei, goemq ndei. 24 Gwnz ndang raeuz mwnq seizbienh loh okdaeuj hih couh mboujyungh caiq baexbaex goemqgoemq lo. Cangqdiq yienghneix cang aen ndang gyoengqraeuz, hawj doenghheij mwnq gyoengqraeuz mbouj dawz haeuj rwz he bienq dawz haeuj rwz. 25 Cangqdiq yienghneix cang dwg ij hawj aen ndang gak gaiq gak yiengh ndaej doxhuz, doxhoh. 26 Hauhnaeuz aen ndangdaej hih mwnqlaw roxnginh hojyouq, yiengq baenx cenz ndang cungj caemh roxnginh hojyouq lo. Caiq hauhnaeuz miz mwnq he soeng lo, yiengq baenx cenz ndang cungj caemh soeng lo. 27 Faenhsou couh dangq dwg aen ndang Gihduz; moix it boux cungj dwg gwnz ndang de dih mwnq he. 28 Cangqdiq youq gwnz ndang Gihduz, couh dwg youq ndaw gyauqveiq, de yienghneix laeb: daixit dwg dwzbaijyienz, daixngeih dwg boux cenz gij vah de, daixsam dwg gyauqveiq dih lauxsae, gajlaeng cij daengz guh doenghgij geizmiuj he, caiq gajlaeng daengz rox yw bingh he, vanzlij miz rox bang vunz he, guenj gizdah saeh he, rox gangj cungj vah Hoenzsaenz Cangqdiq nyok hawj vunz gangj he. 29 Hoeng, mbouj dwg naeuz bouxboux cungj dwg dwzbaijyienz, boux cenz gij vah Cangqdiq, lauxsae, caemh mbouj dwg naeuz bouxboux cungj ndaej rox guh doenghgij geizmiuj hih saeh he, 30 ndaej rox yw bingh he, ndaej rox gangj cungj vah Hoenzsaenz Cangqdiq nyok hawj vunz gangj he, ndaej rox guh fanhyiz he. 31 Mboujgoq faenhsou wnggai caenhrox gouz Hoenzsaenz Cangqdiq nyok hawj faenhsou ceiq miz ik dih bonjsaeh bax. Hoeng, gou ij naeuz sou ni gij engqgya cungqyauq he, couh dwg naeuz ‘aiq.’
1 Yiengq cungjsuenq naeuz gou rox gangj lajmbwn gak cungj vah, simqciq daiqlienz gij vah bouxcai Cangqdiq cungj rox gangj hwjx, hauhnaeuz mbouj miz aen sim aiq vunz he, cix ij miz maz yungh; gou soj gangj hih vah couh dangq luj ndaek gyong ndaek laz coemq caxcemq yienghmwnq nauhyied coeg rwz lah. 2 Caiq cungjsuenq naeuz gou ndaej guh boux cenz gij vah Cangqdiq, caemh rox gak cungj miqmiz, gak cungj ciqsiz, caemhcaiq miz sinqsim raixcaix hwj ndaej gouz daengz Cangqdiq dawz aen bya nod deuz hwjx, hauhnaeuz gou mbouj miz aiq, cix ij suenq gumxlwk, ciuqyiengh mij'z yungh. 3 Caiq cungjsuenq naeuz gou dawz sojmiz hih cungj soengq hawj vunz gungz liux, simqciq ngaiz vwt mingh ngaiz feiz coemh hwjx, hauhnaeuz mbouj miz aiq, cix ij suenq gumxlwk, mij'z yungh. 4 Miz aiq, doiq vunz couh rox naenxsim, rox hojsik, mbouj rox rahoengz, mbouj gag haenh bonjfaenh, mbouj rasang. 5 Miz aiq, couh roxsoq, mbouj vih bonjfaenh, ndaej rox daengz vunz, mbouj yungzheih fatheiq; vunz daekcoih mwngz, mwngz mbouj geiq youq ndaw sim. 6 Miz aiq, couh mbouj haenj gij doegsieb he; haenj gij saedsaeh he. 7 Miz aiq, couh mboujguenj guxmaz cungj mbouj lau dwgrengz, cungj dwg sinq Cangqdiq, mbouj doeknaiq miz muengh, rox naenxsim. 8 Aiq dih baenjcinh dwg yungjyenj mbouj rox sat hih. Sojhij, gou naeuz sou ni, cungjsuenq naeuz faenhsou miz bonjsaeh ndaej rox cenz gij vah Cangqdiq hajx, cixnaeuz miz bonjsaeh ndaej rox gangj cungj vah Hoenzsaenz Cangqdiq nyok hawj vunz gangj he, cixnaeuz rox Hoenzsaenz Cangqdiq hawj vunz rox hih ciqsiz, cungj dwg camqciz hih, mbouj dwg yungjyenj hih, 9 aenvih raeuz seizneix soj rox hih cungj mbouj suenq cibfaen rox; rox cenz gij vah Cangqdiq hih caemh mbouj suenq cibfaen rox. 10 Sojhij, daengj daengz sojmiz hih bienqbaenz ndei liuxliux, daiqlienz baenjlaiz mbouj suenq cibfaen rox hih cungj bienqbaenz mij'z yungh liux. 11 Caemhdangq gou lij lwgngez mwhde, gangj vah, siengjfap, guhfap, cungj dwg luj lwgngez. Hoeng, seizneix hung baenz vunz le, cungj dawz sojmiz luj lwgngez hih saeh gveng liux. 12 Caemh doxdoengz, gyoengqraeuz seizneix doiq Cangqdiq dih saeh rox mbouj laeg, mbouj cingsuj, caemhdangq luj gyoengqraeuz seizneix yawj haeuj mojlox bae, myox myadmyad, yawj mbouj cingsuj. Hoeng, daengj daengz baezneix cungj ij miz ngoenz he, yawj ndaej raen cingcing sujsuj, caemhdangq Cangqdiq rox gyoengqraeuz yienghmwnq. 13 Hoeng, mboujguenj guxmaz, sinq, muengh, aiq, sam cungj neix dwg yungjyenj miz hih; sam cungj neix, aiq ceiq dwg veijdaq hih.
1 Faenhsou wnggai caensim caen'eiq aiq vunz, hoeng, gangj daengz faenhsou muengh Hoenzsaenz Cangqdiq nyok bonjsaeh hawj hih, gou naeuz caemh dwg deng hih, cijmboujgoq faenhsou ij engqgya muengh ndaej gij bonjsaeh cenz gij vah Cangqdiq he cij deng. 2 Doenghheij rox gangj cungj vah caenhgag Hoenzsaenz Cangqdiq cij rox he hih mbouj dwg doiq vunz gangj hih, dauq dwg doiq Cangqdiq gangj hih lah, aenvih mij'z vunz dingq rox de gangj gijmaz. De dwg dunghgoq Hoenzsaenz Cangqdiq ma gangj gij miqmiz he. 3 Hoeng, guh boux cenz gij vah Cangqdiq hih dwg doiq vunz gangj hih, dwg hawj vunz ndaej miz ik hih, dwg gujliq vunz nai vunz hih. 4 Boux rox gangj cungj vah caenhgag Hoenzsaenz Cangqdiq cij rox he hih caenhgag doiq bonjfaenh miz ik lah; boux rox cenz gij vah Cangqdiq hih dwg doiq gyauqveiq miz ik hih. 5 Gou muengh faenhsou rox gangj cungj vah Hoenzsaenz Cangqdiq nyok hawj vunz gangj he, hoeng, gou engqgya muengh faenhsou guh boux cenz gij vah Cangqdiq, aenvih gangj cungj vah neix hih, hauhnaeuz mbouj fanhyiz okdaeuj hawj gyauqveiq ndaej miz ik, yiengq couh mbouj ndaej luj boux cenz gij vah Cangqdiq yienghmwnq miz yungh lo. 6 Sojhij, gak boux beixnuengx hax, hauhnaeuz gou bae faenhsou mwnq, caenhgag yungh cungj vah caenhgag Hoenzsaenz Cangqdiq cij rox hih ma doiq faenhsou gangj, dauq mij gaijyiz naeuz sou ni Cangqdiq dih iqswh, cixnaeuz gijmaz ciqsiz, cixnaeuz gijmaz cawjeiq, caeuq mij son faenhsou nex, yiengq doiq faenhsou miz maz ik nej? 7 Couh dangq luj doenghheij miz sing, hoeng, mij'z heiq hih dig hah, gimz hah yienghmwnq, hauhnaeuz boq okdaeuj cixnaeuz danz okdaeuj mbouj miz sing sang sing daemq, yiengq byawz ndaej faenh ndaej ok boq gijmaz cixnaeuz danz gijmaz go nej? 8 Youhcaiq lujnaeuz boq gywnhhauh, hauhnaeuz mbouj boq cingsuj hawj vunz rox dwg cizcungh he nex, byawz couh ndaej cwnjbiq bae doxhoenx nej? 9 Caemh doxdoengz, hauhnaeuz faenhsou gangj gij vah vunz dingq mbouj rox he, vunz ij baenz rox faenhsou gangj gijmaz nej? Yiengq caemhdangq gangj hoengq huh. 10 Lajmbwn miz haujlai cungj vah, hoeng, mij saek cungj naeuz mij iqswh. 11 Yiengq, hauhnaeuz miz vunz doiq gou gangj vah, gou dingq mbouj roxyiuj de gangj gijmaz vah, yiengq boux de yawj gou couh dangq dwg vunz vaihguek, gou caemh yawj de dangq dwg vunz vaihguek lo. 12 Faenhsou caemh doxdoengz; giqyienz faenhsou cungj muengh ndaej Hoenzsaenz Cangqdiq nyok hawj dih bonjsaeh lo, yiengq couh ij wnggai lai gouz gij ndaej doiq gyauqveiq miz ik he. 13 Sojhij, boux rox gangj gij vah caenhgag Hoenzsaenz Cangqdiq cij rox he hih wnggai gouz Cangqdiq, gouz Cangqdiq nyok bonjsaeh hawj de, hawj de ndaej gag fanhyiz bonjfaenh de soj gangj hih vah. 14 Hoeng, hauhnaeuz gou yungh cungj vah caenhgag Hoenzsaenz Cangqdiq cij rox he ma gouzhaenh Cangqdiq nex, yiengq couh dangq dwg hoenzsaenz gou gouzhaenh lah; aen sim gou dauq mij doenghdanh nej. 15 Sojhij gou wnggai song yiengh cungj yungh ma gouzhaenh cij deng, mbangj baez dwg yungh hoenzsaenz gou ma gouzhaenh, mbangj baez dwg yungh aen sim gou ma gouzhaenh cij deng. Caemh doxdoengz, mbangj baez ciengq go caemh ij yungh hoenzsaenz gou ma ciengq go haenh Cangqdiq, mbangj baez caemh ij yungh aen sim gou ma ciengq go haenh Cangqdiq cij ndaej hah. 16 Couh dwg naeuz hauhnaeuz mwngz yungh cungj vah caenhgag Hoenzsaenz Cangqdiq cij rox he ma haenh Cangqdiq docih Cangqdiq mwhde, doenghheij vunz youq henz mwngz dingq he dingq mbouj rox mwngz gangj gijmaz; de ij baenzlawz ndaej caeuq mwngz naeuz “Ahmaenz,” gawq neix nej? 17 Mwngz yienghneix haenh Cangqdiq docih Cangqdiq dwg ndei hih, hoeng, aenvih vunz dingq mbouj rox hah, yiengq doiq vunz mij'z ik hah. 18 Docih Cangqdiq, gou rox gangj cungj vah Hoenzsaenz Cangqdiq nyok hawj vunz gangj he beij faenhsou lai. 19 Hoeng, youq gyauqveiq, gou cingxnyienh gangj haj gawq vah hawj vunz dingq rox he, ndaej son vunz rox he, mbouj cingxnyienh gangj fanh gawq hawj vunz dingq mbouj rox he. 20 Gak boux beixnuengx hax, faenhsou swhsiengj mbouj ndaej luj lwgngez yienghmwnq; ij luj vunz hung. Hoeng, youq doenghheij saeh doegsieb he, dauq ij wnggai luj lwgnding yienghmwnq. 21 Ndaw Singqgingh ndaw de sij miz naeuz: Cangqdiq naeuz: “Gou dunghgoq vunz ma yungh gij vah linghvaih minzcuz he doiq doenghheij vunz neix gangj vah; hoeng, gyoengqde vanzlij mbouj dingq gou.” 22 Yiengq, ciuq luj yienghneix ma gangj, gangj cungj vah Hoenzsaenz Cangqdiq nyok hawj vunz gangj he mbouj dwg ij hawj doenghgij vunz sinq Cangqdiq he guh baengzgawq nej, dauq dwg ij hawj doenghgij vunz mbouj sinq Cangqdiq he guh baengzgawq lah; hoeng, guh boux cenz gij vah Cangqdiq he, cenz gij vah Cangqdiq mbouj dwg hawj gij vunz mbouj sinq he guh baengzgawq nej, dauq dwg hawj gij vunz sinq he guh baengzgawq lah. 23 Sojhij, hauhnaeuz gyauqveiq doxcomz hih mwhde, daixgya cungj gangj cungj vah caenhgag Hoenzsaenz Cangqdiq cij rox he, yiengq, hauhnaeuz miz gij vunz dingq mbouj rox he, cixnaeuz gij vunz mbouj sinq Cangqdiq he haeuj daeuj raen, gyoengqde mbouj naeuz faenhsou fatvangh lo maz? 24 Hoeng, hauhnaeuz gyauqveiq sojmiz hih vunz cungj cenz gij vah Cangqdiq nex, doenghgij vunz mbouj daiq rox gij saedsaeh Cangqdiq hih, cixnaeuz doenghgij vunz mbouj sinq Cangqdiq hih haeuj daeuj raen, couh vih ndaej dingq daengz gij saedsaeh Cangqdiq hwj ngeix daengz bonjfaenh dwg miz coih he, couh roxnginh lujnaeuz ngaiz saemjbuenq, 25 gij miqmiz ndaw sim caemh loh okdaeuj, guh hwj boux de gvih bomz roengz doem bae sax Cangqdiq naeuz: “Cangqdiq saedsaeh caeuq faenhsou youq!” yienghneix naeuz. 26 Gak boux beixnuengx hax, gyoengqraeuz ij wnggai baenzlawz yungh Hoenzsaenz Cangqdiq nyok hawj dih bonjsaeh nej? Faenhsou moix it mbat doxcomz, mboujguenj miz vunz rox ciengq go cix ndaej, miz vunz gangj gij vah son vunz he cix ndaej, miz vunz rox gij miqmiz Cangqdiq hawj vunz rox he naeuz vunz ni cix ndaej, miz vunz gangj cungj vah Hoenzsaenz Cangqdiq nyok hawj vunz ndaej gangj he cix ndaej, miz vunz fanhyiz gij vah de cix ndaej, mboujguenj guh gijmaz saeh, cungj ij wnggai doiq gyauqveiq miz ik cij ndaej. 27 Faenhsou doxcomz mwhde, hauhnaeuz miz vunz aeu gij vah vunz dingq mbouj rox he ma gangj nex, ceiq lai ndaej song daengz sam boux doxlwnz gangj, caemh ij miz vunz fanhyiz cij ndaej. 28 Yiengq, hauhnaeuz mbouj miz vunz fanhyiz nex, boux gangj gij vah vunz dingq mbouj rox he ceiq ndei mbouj gangj. Hauhnaeuz ij gangj, caenhgag caeuq Cangqdiq gangj couh ndaej lo. 29 Yiengq gangj daengz boux cenz gij vah Cangqdiq he, moix it mbat youq gyauqveiq doxcomz, ndaej song daengz sam boux gangj vah; lij lw hih vunz wngdang cuqhiq dingq, ngeixngeix gyoengqde soj gangj hih. 30 Youq mwh boux de cingq gangj hih mwhde, hauhnaeuz youq mwnq hih vunz miz vunz Cangqdiq naeuz de ni gijmaz hawj de naeuz daixgya ni hih, yiengq boux cingq gangj vah mwnq couh ij dingz roengzma, nyiengh hawj boux de gangj. 31 Yienghneix daixgya couh ndaej doxlwnz gangj lo, daixgya cungj ndaej hag, cungj ndaej doxson doxbang. 32 Guh boux cenz gij vah Cangqdiq hih cungj rox gag haed bonjfaenh, lwnz daengz bonjfaenh gangj cij gangj, 33 aenvih Cangqdiq mbouj dwg hawj vunz luenh, dwg hawj vunz dingh lah. 34 Yiengq gangj daengz vunzbaz, vunzbaz camhgyah gyauqveiq doxcomz hih mwhde, ij caeuq sojmiz hih gyauqveiq doxdoengz, ij dingh cubcub, mbouj gangj vah. Couh luj Mohsih dih fazliz soj gveihdingq hih yienghmwnq, ij soenhsouj mbouj ndaej gangj vah. 35 Hauhnaeuz gyoengqde ijsiengj rox gijmaz hih, ndaej youq ndaw ranz bonjfaenh cam goeng gojyez bonjfaenh, aenvih vunzbaz youq mwh doxcomz he gangj vah dwg sainaj hih. 36 Gou gaenq naeuz faenhsou haujlai lo, hoeng, faenhsou vanzlij mbouj dingq. Nanzdauh Cangqdiq dih ndei siuhsiz dwg coengz faenhsou Gohlimzdoh mwnq daeuj hih mah? Caemh caenhgag cenz hawj faenhsou hih mah? 37 Hauhnaeuz miz vunz gag naemqnaeuz bonjfaenh dwg boux boux cenz gij vah Cangqdiq he cixnaeuz gag naemqnaeuz bonjfaenh gaen Hoenzsaenz Cangqdiq nex, couh wnggai rox gou soj sij hawj faenhsou hih dwg bouxcawj raeuz dih mingqlingq lo. 38 Yiengq, hauhnaeuz miz vunz mbouj dungziq gou soj sij hih, couh mbouj leix de. 39 Sojhij gak boux beixnuengx hax, faenhsou wnggai haenj siengj bae cenz gij vah Cangqdiq; gaejyungh haed vunz gangj cungj vah Hoenzsaenz Cangqdiq nyok hawj vunz gangj he. 40 Hoeng, mboujguenj guh gijmaz saeh, cungj mbouj ndaej luenh; ijaeu miz swnqsiq.
1 Gak boux beixnuengx hax, faenhsou ij wnggai ndaejgeiq gaxgonq gou soj cenz hawj faenhsou hih gij ndei siuhsiz Cangqdiq; gij ndei siuhsiz neix faenhsou gaenq ciep aeu lo, caemh gaenq bienqbaenz faenhsou sinq Cangqdiq dih gihsuj lo. 2 Cijaeu faenhsou gyenhciz soenhsouj gou soj cenz hawj faenhsou hih, couh gaengjdingq ndaej baengh gij de hwj ndaej gouq. Danghyienz, hauhnaeuz faenhsou coengzlaiz cungj mbouj sinq goq, yiengq couh mij'z vah gangj haem lo. 3 Gou dawz vunz cenz hawj gou ceiq cungqyauq hih siuhsiz cenz hawj faenhsou, couh dwg: Gihduz, ciuq Singqgingh ndaw de soj sij hih, vih gyoengqraeuz cueg coih hwj ngaiz rai lo, 4 caemh moek lo, caemh vanzlij ciuq ndaw Singqgingh soj sij hih youq daixsam ngoenz dauqlix lo, 5 caemh yienh hawj Bijdwz raen goq, gajlaeng, caemhcaiq vanzlij yienh hawj gyoengq cibngeih boux dwzbaijyienz de raen. 6 Gajlaeng vanzlij miz mbat he yienh hawj baenx hajbak lai vunz gaen de he raen. (Doenghheij vunz neix, ndaw de miz dingxfaen lai vunz daengz seizneix vanzlij miz, miz mbangj hih vunz gaenq rai lo.) 7 Gajlaeng de caemh yienh hawj Yajgoz raen, vanzlij youhcaiq yienh hawj gyoengq dwzbaijyienz de raen. 8 Daengz ceiq gajlaeng, de gingqyienz caemh yienh hawj gou raen. Gou suenq guxmaz nex? Gou gaep haeuj dwzbaijyienz ceiq gajlaeng he nex, 9 aenvih gou youq ndaw gyoengq dwzbaijyienz ndaw de dwg boux ceiq yawj mbouj hwnj rwz he, ceiq yaqyuij he, mbouj boiqndaej guh dwzbaijyienz he, aenvih gaxgonq gou bwkhaih Cangqdiq dih gyauqveiq goq. 10 Hoeng, aenvih Cangqdiq doiq gou haijliengh, gou cij ndaej miz ngoenz neix. Gangj lauxsaed vah, de mbouj vuengj doiq gou haijliengh; gou guh hong beij gizdah dwzbaijyienz lij roengzrengz. Mboujgoq, gou mbouj dwg baengh bonjfaenh gou hih, dauq dwg baengh Cangqdiq doiq gou dih aiq lah. 11 Sojhij, mboujguenj dwg gou cixnaeuz gizdah dwzbaijyienz doih soj cenzgangj dih siuhsiz, cungj dwg doengz gij siuhsiz dog, gij siuhsiz neix, couh dwg faenhsou soj sinq hih gij saedsaeh mwnq lo. 12 Giqyienz gyoengqraeuz itcig cungj dwg cenzgangj Gihduz gaenq daj rai ndaej dauqlix lo, vihmaz faenhsou miz hih vunz naeuz mbouj miz vunzrai ndaej dauqlix gij saeh neix nej? 13 Yiengq, hauhnaeuz mbouj miz vunzrai ndaej dauqlix gij saeh neix, yienghneix caemhdangq naeuz Gihduz mij dauqlix lo. 14 Yiengq, caiq hauhnaeuz Gihduz mij dauqlix, gyoengqraeuz soj cenzgangj hih mboujyaengz dwg gangj rumz gangj rengx lo maz? Faenhsou soj sinq hih caemh dwg mij'z yungh lo. 15 Hauhnaeuz cingqcaen dwg yienghneix, gyoengqraeuz mijyaengz dwg Cangqdiq dih gyaj cingqyinz lo maz, aenvih gyoengqraeuz naeuz de gaenq hawj Gihduz dauqlix lo. 16 Caiq hauhnaeuz vunz rai le mbouj ndaej dauqlix, yiengq Gihduz couh mij dauqlix lo. 17 Caiq hauhnaeuz Gihduz mij dauqlix nex, faenhsou soj sinq hih mijyaengz dwg sinq hoengq maz? Yiengq, ciuq luj yienghneix ma gangj, faenhsou ciuqyiengh vanzlij dwg youq ndaw coih, 18 doenghheij sinq Gihduz vunzrai hih caemh cungj suenq satsoq lo. 19 Yiengq gyoengqraeuz sinq Gihduz hih vunz, hauhnaeuz caenhgag youq seiq neix miz muengh lah nex, gyoengqraeuz couh dwg youq lajmbwn ceiq boihseiz hih vunz lo. 20 Hoeng, gizsaed Gihduz gaenq daj rai ndaej dauqlix lo. De dwg sojmiz vunzrai ndaw de dih daixit boux ndaej dauqlix; de dwg dauqlix dih baengzgawq. 21 Rai dwg coengz boux he yinxhwnj hih, couh dwg Yaqdangh; dauqlix caemh dwg coengz boux he, couh dwg Gihduz. 22 Gangj daengz vunz rai, dwg aenvih gyoengqde dwg gaep haeuj Yaqdangh he; caemh doxdoengz, gyoengq vunz ndaej dauqlix dwg aenvih gyoengqde dwg gaep haeuj Gihduz hih. 23 Cijmboujgoq ij daengj lwnz daengz le, cij ndaej dauqlix: Gihduz dwg daixit boux dauqlix, gajlaeng daengj daengz de dauq daeuj hih mwhde, gij vunz sinq de he cij ndaej dauqlix. 24 Daengz ceiq ij gajlaeng, daengz ciqgyaiq dih ngoenz gatsat, Gihduz couh ij dawz sojmiz gvanhhih gienz hah, lingjdauj hah, guenjleix hah, doenghgij neix cawz bae; daengz mwhmwnq, de couh dawz aen guek de gyau hawj Cangqdiq Bohmbwn, 25 aenvih Gihduz bietdingh ij dang vuengz, itcig dang daengz bonjfaenh de dawz sojmiz dih dizyinz cungj caij youq laj din de. 26 De ceiqhaeuq ij cawz hih dizyinz couh dwg rai, 27 aenvih ndaw Singqgingh ndaw de sij naeuz: Cangqdiq ij hawj sojmiz hih cungj fug hwj ngaiz caij youq laj din de. (Ox, ndaw Singqgingh ndaw de sij naeuz hih “Sojmiz hih cungj ij fug youq laj din de” hih gawq neix danghyienz mbouj bauhgvaz Cangqdiq bonjfaenh de lo.) 28 Daengj daengz sojmiz hih cungj fug youq laj din Gihduz le, daengz mwhmwnq, Gihduz couh dawz gij gienz boiz hawj daxboh de Cangqdiq, hawj Cangqdiq ndaej guenj sojmiz hih, guh sojmiz hih vuengz. 29 Yiengq, hauhnaeuz mbouj miz vunzrai ndaej dauqlix nex, doenghheij dingj vunzrai sijlij hih cix ij miz maz yungh haem? Hauhnaeuz rai gaenhbaenj mbouj ndaej dauqlix, yiengq vihmaz miz vunz dingj gyoengqde sijlij nej? 30 Gyoengqraeuz caemh vihmaz ij seiqseiz vih Gihduz hwj mauqyiemj nej? 31 Gak boux beixnuengx hax, gizsaed gou ngoenzngoenz cungj ijyiemj vwt mingh. Gou yienghneix naeuz dwg saedsaeh hih, caemh luj gou vih bouxcawj raeuz Yehsuh Gihduz hwj haenh faenhsou hih dwg saedsaeh hih. 32 Yiengq, caiq hauhnaeuz vunzrai mbouj ndaej dauqlix, yiengq mwh gou youq Hijfuzsoj caeuq doenghheij dizyinz doegsieb luj duz nyaen he doxdub doxdaeuq cijmboujgoq dwg vunz dih guhfap hih lah, doiq gou miz maz ik nej? Hauhnaeuz vunzrai mbouj ndaej dauqlix, ganhseiq gyoengqraeuz gwgw angqangq suenq lox, fanjcingq ngoenzcog ngoenzlaeng cungj ij rai lo. 33 Gak boux beixnuengx hax, gaejyungh ngaiz vunz yaeuh; gyau mbouj ndei hih baengzyoux, caemh ingjyangj faenhsou dih byimjdwz. 34 Faenhsou wnggai singqsag goqdaeuj, mbouj caiq famh coih. Gou naeuz gawq vah neix dwg ij hawj faenhsou rox nyaenq, aenvih faenhsou ndaw de miz hih vunz mbouj rox Cangqdiq. 35 Yiengq aiq ij miz vunz naeuz: “Vunz rai le ij baenzlaw ndaej dauqlix nej? Dauqlix le, aen ndangdaej ij dwg baenzlaw yiengh nej?” 36 Hoeng, gou naeuz hax, doenghheij vunz ngawz faenhsou hax, faenhsou ndaem roengzbae hih doengh ceh, hauhnaeuz mbouj sien moek, ceh de ij baenz ndaej hwnj hwnjdaeuj nej? 37 Caemhdangq faenhsou ndaem roengzbae hih ceh caeuq ceh de did hwnjdaeuj le dih yienghceij mbouj doxdoengz, beijgangj dwg ceh mienh cixnaeuz doengh ceh maz. 38 Hoeng, Cangqdiq ciuq gij cawjeiq bonjfaenh de hawj gak cungj ceh hwnj gak cungj mbouj doengz hih doenghgo. 39 Miz lwed miz noh hih, miz gak cungj mbouj doengz: vunz miz vunz yiengh, nyaen miz nyaen yiengh, roeg miz roeg yiengh, bya miz bya yiengh. 40 Vanzlij miz, gwnzmbwn miz gwnzmbwn hih yiengh, lajdeih miz lajdeih hih yiengh; gwnzmbwn lajdeih gag miz bonjfaenh de dih gyaeu. 41 Gyangjngoenz miz gyangjngoenz hih rongh ndei, aen ndwen miz aen ndwen hih rongh ndei, ndaundeiq miz ndaundeiq hih rongh ndei, mboujgoq, ndaundeiq caeuq ndaundeiq cungj miz aen caeuq aen rongh mbouj doxdoengz he. 42 Gangj daengz vunzrai dauqlix caemh dwg yienghneix. Seihaiz moek le rox naeuh; dauqlix le dwg mbouj rox naeuh hih. 43 Ngaiz moek hih dwg najmomj hih; dauqlix hih dwg najrongh sagsag hih. Ngaiz moek hih dwg nyieg hih; dauqlix hih dwg hoenz hwedhwed hih. 44 Ngaiz moek hih dwg ndangnoh he; ndaej dauqlix hih dwg haeuj hoenzsaenz he. Yiengq, giqyienz miz ndangnoh, caemh miz hab haeuj hoenzsaenz he, 45 aenvih ndaw Singqgingh ndaw de sij naeuz: Boux vunz daixdaeuz, Yaqdangh, dwg cauh baenz boux vunz miz lwed miz noh he gawq neix, hoeng, daengz gajlaeng, Gihduz, daixngeih boux Yaqdangh, dwg hawj vunz miz mingh dih hoenzsaenz. 46 Sien miz hih mbouj dwg haeuj hoenzsaenz hih, dauq dwg haeuj ndangnoh hih lah; gajlaeng, cij miz haeuj hoenzsaenz hih lah. 47 Boux daixdaeuz, Yaqdangh, dwg haeuj lajmbwn hih, dwg haeuj doem he; boux daixngeih, Gihduz, dwg haeuj gwnzmbwn hih. 48 Boux haeuj doem hih yienghceij dwg baenzlaw yiengh, lajmbwn sojmiz hih vunz caemh dwg baenzlaw yiengh lo; haeuj gwnzmbwn hih yienghceij dwg baenzlaw yiengh, gaep haeuj gwnzmbwn dih vunz caemh dwg baenzlaw yiengh lo. 49 Yiengq, giqyienz gyoengqraeuz miz haeuj doem hih vunz dih yienghceij, baezneix caemh ij miz haeuj gwnzmbwn hih vunz dih yienghceij lo. 50 Gak boux beixnuengx hax, gou saedsaeh naeuz sou ni, haeuj ndangnoh hih vunz mbouj ndaej gaep haeuj guek Cangqdiq hih; rox naeuh hih ndangnoh mbouj ndaej miz faenh caeuq doenghheij mbouj rox naeuh he. 51 Gou seizneix ij naeuz sou ni gij miqmiz he; faenhsou ijaeu cuqhiq. Gyoengqraeuz mbouj dwg naeuz bouxboux cungj ij ngaiz rai law; dwg sojmiz hih vunz cungj ij gaijbienq lah. 52 Couh dwg youq mwh boq gywnhhauh senhbuq ciqgyaiq dih ngoenz gatsat he, caenh luj baex yaep ra he hih mwhde, vunzrai couh doq ndaej dauqlix lo, rox naeuh hih ndangnoh bienqbaenz mbouj rox naeuh hih lo; gyoengqraeuz caemh doq gaijbienq lo. 53 Daengz mwhmwnq, doenghheij rox naeuh hih gaengjdingq bienqbaenz mbouj rox naeuh hih, doenghheij rox rai hih caemh ij bienqbaenz mbouj rox rai hih. 54 Daengz mwh doenghgij neix fatseng hih mwhde, ndaw Singqgingh ndaw de soj sij naeuz hih: Rai ngaiz cingqliq byaeu lo! 55 Rai hax rai, mwngz dih cingqliq youq mwnqlaw? Rai hax rai, gij oen doeg mwngz youq mwnqlaw? gawq neix couh lingz okdaeuj lo. 56 Rai dih oen doeg couh dwg coih; coih dih gienzliz couh dwg fazliz. 57 Hoeng, docih Cangqdiq, de dunghgoq bouxcawj raeuz Yehsuh Gihduz hwj hawj raeuz hingz goq coih caeuq rai. 58 Sojhij, cinhngaiq dih gak boux beixnuengx hax, faenhsou wnggai gyenhdingq mbouj doeknaiq, ij mbouj lau dwgrengz sinhoj hwj guh gij hong bouxcawj raeuz, aenvih faenhsou rox, guh gij hong bouxcawj raeuz mbouj dwg mij'z yungh law.
1 Gangj daengz gien ngaenz hawj Yehluqsajlaengj dih lwgsae hih saeh, faenhsou wnggai ciuq gou gaxgonq raengq youq Gyahlahdaiq dih gak aen gyauqveiq hih yienghmwnq bae guh. 2 Moix daengz ngoenzsinghgiz, faenhsou gak vunz cungj ij ciuq gak vunz dih couhyiz noiz di ngaenz he okdaeuj, daixgya swnz hwnjdaeuj, mienxndaej daengz gou bae le, faenhsou cij laemxgeiz guh gij saeh neix. 3 Daengj gou bae le, faenhsou baij vunz okdaeuj, dawz gou sij hih gaiqcauq sinq, daiqlienz faenhsou gien okdaeuj hih ngaenz, soengq bae hawj youq Yehluqsajlaengj hih lwgsae. 4 Hauhnaeuz sihyauq gou bae nex, gyoengqde caemh ndaej gaen gou itheij bae. 5 Gou seizneix cingq giqvaq ij byaij goq Majgizdoenq Saengj bae; gou bae daengz Majgizdoenq nex, couh bae faenhsou mwnq yawj faenhsou. 6 Saekseiz gou aiq youq faenhsou mwnq duenh he, saekseiz cix aiq youq mwnq goq doeng, cungj mbouj dingh; gajlaeng cij caiq giqcuz bae. Fanjcingq mboujguenj baenzlaw, gou ij bae mwnqlaw, faenhsou cungj ndaej soengq gou. 7 Hoeng, gou mbat neix mbouj siengj buenq langxgyang couh bae yawj faenhsou; hauhnaeuz yienghmwnq, daiq gaenjgib lai lo. Hauhnaeuz bouxcawj raeuz hawj nex, gou siengj caeuq faenhsou lai youq duenh he. 8 Mboujgoq nex, gou seizneix vanzlij dwg youq Hijfuzsoj, youq daengz aen ciet Ujcwnz. 9 Gannaeuz dineix miz haujlai vunz fanjdeiq gou lah, hoeng, gou vanzlij ij youq daengz mwhde, aenvih dineix seizneix miz gij gihveiq ndei raixcaix he, ndaej hawj gou guh gij hong miz ik he. 10 Yiengq Dizmohdaiq bae faenhsou dimwnq nex, faenhsou ij daih de ndei, hawj de coengqsim, aenvih de caeuq gou cungj dwg doxdoengz guh gij hong bouxcawj raeuz he. 11 Sojhij, mboujguenj byawz, cungj mbouj ndaej yawj de ngawz. Daengj de banh saeh sat le, faenhsou ij ndeindei hih soengq de okdin, hawj de ma daengz gou dineix. Gou youq dineix daengj de caeuq gizdah beixnuengx doih daeuj. 12 Yiengq, gangj daengz beixnuengx doih gyoengqraeuz Yaqbohloz, gou siengzseiz cungj naeuz de, hawj de caeuq gizdah beixnuengx doih itheij bae faenhsou mwnq yawj faenhsou, hoeng, de seizneix mbouj haenj bae; mboujgoq daengj daengz gajlaeng miz gihveiq, de vanzlij dwg bae hih. 13 Ceiqhaeuq gou ij daezsingj faenhsou: faenhsou ij wnggai singqsag, faenhsou ij wnggai baujciz gyenhdingq sinq faenhsou soj sinq hih, ij yungjgamj mbouj lau. 14 Mboujguenj guh gijmaz saeh, cungj ijaeu miz aiqsim cij ndaej. 15-16 Gak boux beixnuengx hax, faenhsou rox Swhdizfaznaq ndaw ranz de bax; gyoengqde dwg Yaqgaihyaq Saengj sinq Gihduz ceiq caeux ceiq daixdaeuz he, caemh rox gyoengqde cungj dwg caensim swqhaeuh gyoengq lwgsae he. Gak boux beixnuengx hax, gou gienq faenhsou, faenhsou wnggai dingq luj gyoengqde yienghneix hih vunz, caeuq dingq doenghheij caeuq gyoengqde itheij roengzrengz guh cungj hong he hih vunz. 17 Gou angq raixcaix, Swhdizfaznaq caeuq Fuzduznazduh caeuq Yaqgaihguj daeuj gou dineix hwj, aenvih faenhsou mbouj ndaej bang gou hih, gyoengqde ndaej bang gou. 18 Gyoengqde ndaej hawj gou caeuq faenhsou cungj ndaej daengz simsoeng satsat. Luj yienghneix hih vunz, faenhsou cungj ijaeu soenhcungq gyoengqde. 19 Youq Yaqsiqyaq Saengj sojmiz hih gyauqveiq cungj cam faenhsou ndei. Yaqgihlah caeuq Bwzgihlah, caeuq youq ndaw ranz gyoengqde doxcomz hih cungj caemh caensim cam faenhsou ndei. 20 Vanzlij miz youq dineix sojmiz hih beixbeix nuengxnuengx cungj caemh cam faenhsou ndei. Faenhsou caemh ij miz Cangqdiq dih aiq hwj doxdongx ndei. 21 Gou, Baujloz, caenfawz sij hoh faenhsou ndei! 22 Hauhnaeuz miz vunz mbouj aiq bouxcawj raeuz, boux de couh wnggai ngaiz mang. Bouxcawj hax, gou muengh mwngz daeuj! 23 Muengh bouxcawj raeuz Yehsuh Gihduz doiq faenhsou haijliengh, caeuq faenhsou daixgya youq! 24 Gou aiq faenhsou sojmiz sinq Yehsuh Gihduz hih vunz.
1 Gou dwg Baujloz, dwg ciuq gij cawjeiq Cangqdiq daeuj guh gij dwzbaijyienz Yehsuh Gihduz he. Gou caeuq Dizmohdaiq boux beixnuengx neix sij saenq hawj youq Gohlimzdoh Singz caeuq youq Yaqgaihyaq Saengj sojmiz hih lwgsae. 2 Muengh daxboh raeuz Cangqdiq caeuq bouxcawj raeuz Yehsuh Gihduz doiq faenhsou haijliengh, hawj faenhsou bingzan! 3 Bouxcawj raeuz Yehsuh Gihduz dih Cangqdiq daxboh wnggai haenh hih! De dwg hojsik vunz dih Cangqdiq, dwg vued vunz dih Bohmbwn. 4 Mboujguenj gyoengqraeuz roeb daengz gijmaz nanh, de cungj vued gyoengqraeuz, hawj gyoengqraeuz caemh ndaej rox bae vued doenghheij miz nanh he. 5 Cingq luj gyoengqraeuz yied vih Gihduz hwj souh nanh hih, Cangqdiq yied dunghgoq Gihduz hwj daeuj vued gyoengqraeuz. 6 Hauhnaeuz gyoengqraeuz souh daengz nanh, yiengq dwg vih ij hawj faenhsou ndaej daengz vued caeuq ndaej gouq lah; yiengq, hauhnaeuz gyoengqraeuz ndaej daengz vued, faenhsou caemh ndaej daengz vued lo. Gij neix dwg vih ij bang faenhsou hawj faenhsou ndaej rox naenxsim bae souh luj gyoengqraeuz soj souh hih. 7 Gyoengqraeuz sinq faenhsou mbouj veiq hawj raeuz saetmuengh hih, aenvih raeuz rox faenhsou caeuq raeuz doengz souh nanh, caemh doengz ndaej vued. 8 Gak boux beixnuengx hax, faenhsou wnggai rox, gyoengqraeuz doenghbaez youq Yaqsiqyaq Saengj roeb daengz hih nanh hawj gyoengqraeuz saedsaeh dingx mbouj ndaej hih. Gyoengqraeuz cungj roxnginh mij'z muengh hih, naemqnaeuz mij'z banqfaz ndaej lix roengzbae hih, 9 cungj naemqnaeuz gaenq rai lo. Hoeng, mwhde gyoengqraeuz caemh rox gauq gij goengrengz bonjfaenh baenzbaenz cungj mbouj ndaej, gaengjdingq ngaiz rai; gajlaeng hawj gyoengqraeuz rox, cijaeu baengh hawj vunz daj rai ndaej dauqlix dih Cangqdiq cij ndaej baux mingh. 10 Gajlaeng de cingqgawq gouq gyoengqraeuz, hawj gyoengqraeuz ndaej duet ok gij veizyiemj he. Seizneix de caemh gouq gyoengqraeuz; raeuz caemh muengh de baezneix ciuqyiengh ij gouq gyoengqraeuz, 11 aenvih faenhsou gouz Cangqdiq bang gyoengqraeuz, sawj haujlai vunz rox daengz Cangqdiq baenxlai gvansim gyoengqraeuz le couh docih Cangqdiq. 12 Gyoengqraeuz saedsaeh naeuz sou ni, bingz liengzsim ma gangj, gyoengqraeuz guh saeh doiq vunz cungj dwg lauxsaed simndei simsoh hih, dwzbez dwg caeuq faenhsou dih gvanhaeh engqgya dwg yienghneix. Sojmiz hih cungj dwg baengh Cangqdiq dih haijliengh hih, mbouj dwg baengh bonjfaenh dih coengjmingz hih. 13-14 Gyoengqraeuz sij saenq hawj faenhsou hih cungj dwg miz maz sij maz, cungj dwg faenhsou yawj ndaej rox hih. Cungjsuenq faenhsou seizneix doiq gyoengqraeuz mbouj daiq rox geijlai, hoeng, gou muengh faenhsou baezneix ndaej rox liuxliux. Yienghneix, youq bouxcawj raeuz Yehsuh Gihduz dauq daeuj hih mwhde, faenhsou veiq vih gyoengqraeuz hwj roxnginh najrongh, caemh luj gyoengqraeuz vih faenhsou hwj roxnginh najrongh hih yienghmwnq. 15-16 Gou sinq faenhsou veiq rox gyoengqraeuz hih, sojhij, gou couh geijcaeux cix giqvaq ij bae faenhsou mwnq yawj faenhsou. Gou dajsuenq daj faenhsou mwnq doqswnh bae Majgizdoenq Saengj, gajlaeng caiq daj Majgizdoenq Saengj dauq maj daengz faenhsou mwnq, gajlaeng, faenhsou soengq gou okdin bae Youzdaiq Saengj, yienghmwnq couh ndaej hoh fuk hawj faenhsou song mbat lo. 17 Gou yienghneix giqvaq, nanzdauh dwg gou yaepyaep yuekyuek mbouj dingh hih mah? Dwg gou itseiz dih singqheiq gaenj hih mah? Dwg yaep yiengh yaep yiengh hih mah? 18 Gou gamj yiengq sinq ndaej goq dih Cangqdiq baujcingq, gyoengqraeuz doiq faenhsou soj gangj hih soj cenz hih gaenhbaenj mbouj dwg naeuz yaep “dwg” yaep “mbouj dwg,” 19 aenvih gou caeuq Sihlah caeuq Dizmohdaiq youq faenhsou mwnq soj cenzgangj hih daeglwg Cangqdiq, Yehsuh Gihduz, de baenzbaenz mbouj dwg yaep “dwg” yaep “mbouj dwg” hih, dauq dwg caenhgag de cij boiqndaej “dwg” he. 20 Cangqdiq sojmiz dih baujcingq mboujguenj miz geijlai, cungj dunghgoq Yehsuh Gihduz hwj ndaej doiqyienh hih. Sojhij gyoengqraeuz gouzhaenh Cangqdiq hih mwhde, cungj dwg dunghgoq gij coh de ma naeuz “Ahmaenz!” yienghneix ma hawj Cangqdiq ndaej najrongh. 21 Dwg Cangqdiq senj gyoengqraeuz caeuq faenhsou, hawj gyoengqraeuz sinq Yehsuh Gihduz hih vunz ij gyenhgyangz mbouj doeknaiq. 22 De caemh youq gwnz ndang gyoengqraeuz guh geiqhauh hwj, couh dwg de hawj gij Hoenzsaenz de doz youq gwnz ndang gyoengqraeuz, cingqmingz gyoengqraeuz dwg gvi hawj de dih baengzgawq. 23 Cangqdiq ndaej cingqmingz gou, gou mbouj caiq bae Gohlimzdoh faenhsou mwnq dwg vih ij nyiuz faenhsou. 24 Gij neix mbouj dwg naeuz gyoengqraeuz ijsiengj guenjciq faenhsou, hawj faenhsou ij sinq gijmaz cij ndaej law, dauq dwg ijsiengj bang faenhsou, hawj faenhsou sim'angq lah, aenvih faenhsou sinq Cangqdiq gaeuq gyenhdingq lo.
1 Sojhij gou cij gyezdingq mbouj bae yawj faenhsou, mienxndaej faenhsou siengsim, 2 aenvih hauhnaeuz gou hawj faenhsou siengsim nex, lij miz bouxlawz ndaej hawj gou vuenheij haem nej? Caenhgag vih gou hwj siengsim hih faenhsou, cij ndaej hawj gou vuenheij hoh lo. 3 Vih yienghneix, gou sij saenq hawj faenhsou goq, vih mbouj ngaiz daengz gou bae yawj faenhsou hih mwhde, doenghheij baenjlaiz hawj gou vuenheij hih dauq hawj gou siengsim. Gou caemh rox, hauhnaeuz gou vuenheij nex, faenhsou caemh vuenheij lo. 4 Gou gaxgonq sij saenq hawj faenhsou hih mwhde, dwg cienfanh siengsim gikheiq riuz raemxra he. Gou yienghneix naeuz mbouj dwg ij hawj faenhsou siengsim law, dauq dwg ij hawj faenhsou rox gou baenxlai aiq faenhsou lah. 5 Yiengq, hauhnaeuz miz vunz hawj vunz siengsim nex, boux de mbouj danhcij hawj gou siengsim, vanzlij hawj faenhsou daixgya siengsim. (Gou yienghneix naeuz aiq miz di gvaqbouh he lo.) 6 Sojhij gou naeuz faenhsou hax, mbouj caiq fad de haem lo; vunzlai naeuz de, de caemh gaenq souh gaeuq lo. 7 Faenhsou hozmboujyienz nyiuz de, vued de suenq lox, mienxndaej de siengsim daiq lai hwj doeknaiq bae. 8 Sojhij, gou gienq faenhsou, wnggai hawj de rox, faenhsou vanzlij luj gaxgonq yienghmwnq aiq de. 9 Gou gaxgonq sij fung saenq mwnq hawj faenhsou dwg ij gaujniemq faenhsou dauqdaej dwg mbouj dwg caemh ciuq gou raengq hih yienghmwnq bae guh lo. 10 Gou saedsaeh naeuz sou ni, hauhnaeuz faenhsou nyiuz bouxlawz, gou caemh nyiuz bouxlawz. Gou sojmiz nyiuz hih, cungj dwg vih faenhsou, caemh dwg youq dangqnaj Gihduz nyiuz hih. 11 Gou yienghneix guh dwg vih mbouj hawj Sajdanq fangzvuengz ciemq bienxngeiz, aenvih gyoengqraeuz doiq Sajdanq dih yimhmaeuz cungj rox cingsuj. 12 Gaxgonq gou bae Dwzlozyaq Singz cenzgangj Gihduz dih ndei siuhsiz hih mwhde, gannaeuz bouxcawj raeuz youq mwnq gaenq hoi diuz roen he hawj gou hoh lah, 13 hoeng, gou vanzlij dwg sim mbouj onj, aenvih gou youq mwnq mbouj raen Dizdoh boux beixnuengx doih neix. Sojhij gou couh daj gyauqveiq mwnq ok ma daeuj daengz Majgizdoenq lo. 14 Hoeng, docih Cangqdiq! De siengzseiz daiq gyoengqraeuz hawj gyoengqraeuz baengh Gihduz hwj ndaej hingz goq sojmiz hih, caiq hawj gyoengqraeuz ndaej dawz gvanhhih Yehsuh Gihduz dih siuhsiz cenz naeuz vunz ni. Gij siuhsiz neix couh luj gij heiq rang fwtfwt he cenz bae daengz gak dieg, 15 aenvih gyoengqraeuz luj Gihduz nyok hawj Cangqdiq hih gij rang fwtfwt he; gij rang fwtfwt neix cenz bae daengz doenghheij ndaej gouq he caeuq doenghheij mbouj ndaej gouq ngaiz rai he. 16 Gij rang fwtfwt neix doiq doenghheij ngaiz rai hih vunz ma gangj, couh dwg gij heiq haeu he; doiq doenghheij ndaej gouq hih vunz ma gangj, couh dwg gij heiq rang fwtfwt he. Ox, docih Cangqdiq! Cangqdiq hawj raeuz ndaej cenz gij rang fwtfwt neix, hoeng, raeuz boiq mbouj ndaej hax! 17 Gyoengqraeuz mbouj luj haujlai vunz, dawz gij vah Cangqdiq ma dangq guh doenghgij ndaej hai ndaej cawx he nej, dauq dwg Cangqdiq senj gyoengqraeuz, baij gyoengqraeuz hawj gyoengqraeuz caensim caen'eiq caeuq baengh Yehsuh Gihduz dih gienz hwj cenz gij vah Cangqdiq lah.
1 Gyoengqraeuz yienghneix naeuz dwg mbouj dwg gag haenh bonjfaenh lo nej? Nanzdauh gyoengqraeuz caemh ij luj miz mbangj hih vunz ij miz mbaw cingqmingz hawj faenhsou, cixnaeuz ij hawj faenhsou cingqmingz cij ndaej mah? 2 Hoeng, faenhsou couh dwg gyoengqraeuz dih cingqmingz hah; gij cingqmingz neix dwg sij youq ndaw sim gyoengqraeuz, dwg doeg hawj vunz dingq hawj vunz rox hih hah. 3 Faenhsou mingzmingz dwg Gihduz dih cingqmingz, dwg dunghgoq gyoengqraeuz ma sij hih. Mbouj dwg yungh maeg ma sij, cix mbouj dwg sij youq gwnz rin, dauq dwg Hoenzsaenz seiqseiz lix dih Cangqdiq sij youq ndaw sim hih lah. 4 Gyoengqraeuz gamj yienghneix naeuz dwg aenvih gyoengqraeuz dunghgoq Gihduz hwj baenxlai sinq Cangqdiq lah. 5 Gyoengqraeuz caemh mbouj dwg naeuz baengh bonjfaenh hwj ndaej guh gijmaz law, dauq dwg Cangqdiq hawj gyoengqraeuz ndaej guh daengz hih lah. 6 De hawj gyoengqraeuz ndaej guh boux cenz gij baujcingq lienz diuzgyenq moq de naeuz vunz ni. Gij baujcingq lienz diuzgyenq moq neix mbouj dwg sij youq ndaw saw dih fazliz, dauq dwg Hoenzsaenz Cangqdiq dingh hih. Sij youq ndaw saw dih fazliz dwg hawj vunz ngaiz rai hih, hoeng, Hoenzsaenz Cangqdiq dingh hih dwg hawj vunz ndaej lix hih. 7 Gangj daengz gij fazliz hawj vunz ngaiz rai dik youq gwnz rin mwnq, mwh Cangqdiq gyau hawj Mohsih hih mwhde, Cangqdiq hawj baj naj Mohsih ronghndongq duenh he, guh hawj gij vunz Hijswzlez mbouj gamj cimyawj baj naj Mohsih bae; 8 gangjnaeuz dwg Hoenzsaenz Cangqdiq dingh okdaeuj hih gij baujcingq lienz diuzgyenq moq mwnq hwx, mbouj engqgya miz rongh maz? 9 Yiengq, hauhnaeuz gij fazliz dingh hawj vunz miz coih mwnq miz rongh, gij baujcingq moq hawj vunz youq ndaw lwgra Cangqdiq suenq dwg mij'z coih mwnq, mbouj engqgya miz rongh hih maz? 10 Gizsaed gij gaeuq yienzlaiz dih rongh caeuq gij moq gajlaeng dih rongh doxbeij, gij gaeuq hih rongh couh mbouj suenq guxmaz rongh lo. 11 Hauhnaeuz gij gaeuq ngaiz cawz bae mwnq miz rongh, yiengq gij moq yungjyenj louz mwnq mbouj engqgya miz rongh lo maz? 12 Yiengq, giqyienz gij baujcingq moq hawj gyoengqraeuz ndaej miz muengh baenx lai, gyoengqraeuz couh mbeihung hwj cenzgangj lo. 13 Hoeng gyoengqraeuz mbouj luj Mohsih yienghmwnq goemq naj hwj mbouj hawj gij vunz Hijswzlez raen gij rongh menhmenh myox daengz mbouj raen bae nej. 14-15 Yiengq gangj daengz gij vunz Hijswzlez, hojsik aen sim gyoengqde gyeng raixcaix; itcig daengz seizneix, gyoengqde doeg gij fazliz gaeuq hih mwhde, aen sim gyoengqde vanzlij dwg luj miz sujbaq goemq hwj. Hoeng mbaw sujbaq neix caenhgag Gihduz cij ndaej bwenj he; 16 mboujguenj seizlaw, gij vunz daj ndaw sim nginh loek gaij goqma gaen bouxcawj raeuz, mbaw sujbaq goemq neix couh ndaej bwenj deuz lo. 17 Dineix soj naeuz hih bouxcawj, couh dwg Hoenzsaenz Cangqdiq; Hoenzsaenz Cangqdiq youq mwnqlaw, mwnqlaw couh miz swqyouz. 18 Yiengq, giqyienz gyoengqraeuz daixgya cungj mbouj goemq naj lo, yienghneix couh ndaej hawj vunz yawjraen gyoengqraeuz luj aen gingq yienghmwnq yienh ok gij rongh bouxcawj raeuz. Hoenzsaenz Cangqdiq bouxcawj raeuz caemh hawj gyoengqraeuz ndaej bienqbaenz yied ngoenz yied ndaej luj de yienghmwnq rongh sagsag lo.
1 Yiengq, giqyienz Cangqdiq doiq gyoengqraeuz haijliengh, hawj gyoengqraeuz ndaej guh gij hong cenzgangj gij baujcingq moq de vwz, gyoengqraeuz gaengjdingq mbouj doeknaiq lo, 2 gaengjdingq mbouj guh doenghgij saetnaj saetnyaenq mij'z naj doiq vunz he, mbouj coemx vunz yaeuh vunz, mbouj doeng gaij sae gaij gij vah Cangqdiq lo, dauq dwg guh gij doiq ndaej hwnj Cangqdiq he hwj mingzmingz begbeg hih dawz gij saedsaeh Cangqdiq cenzgangj naeuz vunz ni, yienghneix hwj hawj vunz gag naemjnaemj yawj deng mbouj deng. 3 Yiengq, hauhnaeuz gyoengqraeuz soj cenzgangj hih ndei siuhsiz vunz dingq mbouj roxyiuj hih, couh dwg doenghheij vunz byaij haeuj satsoq he bae dingq mbouj rox hih lah. 4 Doenghheij vunz neix mbouj sinq Gihduz, dwg ngaiz aen ciqgyaiq neix dih cwnz, Sajdanq, loengh hwj sim mazmwnh ra fangz yawj mbouj raen gij rongh gij ndei siuhsiz Gihduz lah. Hoeng, Gihduz couh dwg Cangqdiq dih saeksiengq hah. 5 Gyoengqraeuz soj cenzgangj hih mbouj dwg cenzgangj gyoengqraeuz bonjfaenh nej; dwg cenzgangj Yehsuh Gihduz dwg bouxcawj hih lah. Vih Yehsuh Gihduz hwj, gyoengqraeuz bienqbaenz bouxhoiq faenhsou, 6 aenvih boux naeuz: “Rongh! Daj ndaw laep ciuq okdaeuj!” dih Cangqdiq, de gaenq dawz gij rongh de ciuq haeuj ndaw sim gyoengqraeuz daeuj lo, hawj gyoengqraeuz ndaej rox gij rongh Cangqdiq dih veijdaq lo. Gij rongh neix dwg yienh youq baj naj Gihduz he. 7 Hoeng, gyoengqraeuz cijmboujgoq dwg aen batvax yaez he hih lah; Cangqdiq dauq dawz gij dijbauj de couh dwg gij rongh de coux youq ndaw de hwj. Gij dijbauj neix dwg yienh ok Cangqdiq dih bonjsaeh akak rengzrengz lah; mbouj dwg yienh ok gij bonjsaeh raeuz law. 8 Gyoengqraeuz gannaeuz roeb daengz haujlai nanh lah, hoeng, ndaej baengh gij bonjsaeh Cangqdiq hwj dauq mbouj ngaiz baih; ndaw sim nyap, hoeng, mbouj saetmuengh; 9 roeb daengz haujlai bwkhaih, hoeng, Cangqdiq mbouj vwt raeuz; ngaiz vunz doh, hoeng, mbouj ngaiz rai. 10 Gyoengqraeuz siengzseiz cungj dwg luj Yehsuh yienghmwnq ij ngaiz vunz gaj, hoeng, mbouj ngaiz rai. Yienghneix gajlaeng vunz engqgya rox seiqseiz lix dih Yehsuh yienh youq gwnz ndang gyoengqraeuz. 11 Gyoengqraeuz baenxseiq vunz cungj dwg vih Yehsuh hwj siengzseiz ngaiz vunz ij gaj, couh dwg vih ij hawj Yehsuh dih saenghhoz yienh youq gwnz ndang rox rai hih gyoengqraeuz. 12 Couh dwg naeuz ciuq yienghneix ma gangj, rai dwg gyoengqraeuz dingx; lix dwg faenhsou ndaej. 13 Singqgingh ndaw de sij naeuz: Gou sinq, sojhij gou cenzgangj. Caemh doxdoengz, aenvih gyoengqraeuz sinq gij saedsaeh Cangqdiq, sojhij gyoengqraeuz couh cenzgangj naeuz vunz ni. 14 Gyoengqraeuz caemh rox, boux hawj Yehsuh bouxcawj raeuz ndaej dauqlix hih, de caemh bietdingh ij hawj gyoengqraeuz ndaej caeuq Yehsuh bouxcawj raeuz dauqlix, caemh gaengjdingq hawj gyoengqraeuz caeuq faenhsou itheij bae daengz de mwnq. 15 Gizsaed, sojmiz hih cungj dwg vih faenhsou, hawj faenhsou ndaej miz ik, sawj engqgya miz vunz lai ndaej daengz Cangqdiq dih bangcoh, engqgya miz vunz lai docih Cangqdiq, sawj sojmiz najrongh hih cungj dwg gvi hawj Cangqdiq. 16 Sojhij gyoengqraeuz mbouj doeknaiq; cungjsuenq aen ndangnoh gyoengqraeuz menhmenh laux lo, aen sim gyoengqraeuz cungj mbouj laux, engqgya ij yied ngoenz yied oiq hwnjdaeuj. 17 Gyoengqraeuz camqciz souh daengz hih di nanh neix, cingq dwg ij hawj gyoengqraeuz ndaej yungjyenj engqgya lai dih najrongh lah. 18 Gyoengqraeuz mbouj yawjnaek doenghgij yawj ndaej raen hih nej, dauq dwg yawjnaek doenghgij yawj mbouj raen he lah, aenvih doenghgij yawj ndaej raen he dwg camqciz he lah, hoeng, doenghgij yawj mbouj raen he cij dwg yungjyenj he.
1 Gyoengqraeuz cungj rox, aen ndang gyoengqraeuz seizneix caemhdangq luj aen cangqbungz; hauhnaeuz aen de ngaiz cek le, Cangqdiq couh youq gwnzmbwn bang gyoengqraeuz cwnjbiq aen ranz yungjyenj mbouj rox vaih he mbouj dwg aeu vunz ma hwnq baenz he. 2 Gyoengqraeuz seizneix youq ndaw cangqbungz neix gangznaek, muengh vaiqdi ndaej buen haeuj aen ranz gwnzmbwn mwnq bae, caemh luj lawh buh moq yienghmwnq. 3 Daenj haeuj bae le, couh mbouj ngaiz vunz raen loxgenz loxgangh lo. 4 Gyoengqraeuz youq ndaw cangqbungz neix, gannaeuz roxnginh dwgrengz hwj gangznaek lah, hoeng, vanzlij mbouj siengj duet diuz buh seizneix, dauq dwg ijsiengj ndaej vuenh aen ndang yungjyenj mbouj rox rai he, hawj seiqseiz lix hih mingh gyan aen ndang rox rai neix lah. 5 Gij neix dwg Cangqdiq nganhbaiz gyoengqraeuz he, de caiq nyok Hoenzsaenz de hawj gyoengqraeuz guh baengzgawq. 6 Sojhij, gyoengqraeuz couh mbeihung mbouj lau. Gyoengqraeuz caemh rox, cijaeu gyoengqraeuz vanzlij dwg aen ndangnoh rox naeuh neix, gyoengqraeuz couh vanzlij dwg mbouj ndaej caeuq bouxcawj raeuz youq itheij. 7 Couh vih yienghneix, gyoengqraeuz cungj dwg baengh sinq Cangqdiq, mbouj dwg baengh ra yawj ndaej raen he. 8 Gou caiq naeuz gyoengqraeuz mbeihung mbouj lau, dwg siengj duet ok aen ndang bonjfaenh hwj bae caeuq bouxcawj raeuz itheij youq. 9 Mboujguenj gyoengqraeuz caeuq mbouj caeuq bouxcawj raeuz youq itheij, gyoengqraeuz cungj ij guh gij hawj bouxcawj raeuz haenjheiq he, 10 aenvih mboujguenj baenzlawz, gyoengqraeuz daixgya cungj ij miz ngoenz he ndwn youq dangqnaj Gihduz, ngaiz de saemjbuenq, caemh dwg ciuq gak vunz soj guh hih ma saemjbuenq gak vunz, ndei hih hawj vunz ndei, rwix hih bauqwngq dawz. 11 Couh vih yienghneix, gyoengqraeuz wnggai yawjnaek bouxcawj raeuz, sojhij gyoengqraeuz gienq vunz hawj vunz nginh loek gaijgoq. Cangqdiq rox gyoengqraeuz cingcing sujsuj, gou caemh muengh faenhsou caemh rox gyoengqraeuz cingsuj. 12 Faenhsou gaejyungh naemqnaeuz gyoengqraeuz caiq gag haenh bonjfaenh lo; gyoengqraeuz cijmboujgoq siengj hawj faenhsou rox faenhsou ndaej vih gyoengqraeuz hwj najrongh, hawj faenhsou ndaej miz vah doiq doenghheij caenh yawj vunz guh saeh mbouj yawj saedsaeh ciuq saedsaeh hih vunz gangj lah. 13 Yiengq aiq ij miz vunz naeuz gyoengqraeuz fatvangh lo, hoeng, gou naeuz hax, mboujguenj guxmaz, fat mbouj fatvangh, gyoengqraeuz cungj dwg vih Cangqdiq caeuq vih faenhsou. 14 Gyoengqraeuz soj guh hih cungj dwg Gihduz aiq gyoengqraeuz hawj gyoengqraeuz yienghneix guh hih. Gyoengqraeuz rox, aenvih de boux vunz dog vih baenx cenz lajmbwn hih vunz hwj rai lo, sojhij lajmbwn sojmiz hih caemhdangq gaenq rai lo. 15 Yiengq, giqyienz Gihduz vih sojmiz hih vunz hwj rai vwz, sojmiz hih vunz couh mbouj wnggai vih bonjfaenh hwj lix lo, dauq dwg ij vih Gihduz hwj lix cij deng, aenvih Gihduz vih sojmiz hih vunz hwj rai, caemh vih sojmiz hih vunz hwj dauqlix lo. 16 Sojhij gou naeuz hax, daj seizneix hwnj, gyoengqraeuz mbouj caiq yawj vunz guh saeh lo. Gannaeuz doenghbaez raeuz ciuq vunz dih yawjfap ma yawj Gihduz goq lah, hoeng, seizneix mbouj caiq yienghmwnq yawj de haem lo. 17 Gou raen hax, mboujguenj dwg byawz, cijaeu de gaep haeuj Gihduz, de couh dwg boux vunz moq luj ngamq cauh he lo; gaeuq hih gaenq mbouj miz lo, cungj dwg moq hih lo. 18 Gij neix cungj dwg Cangqdiq guh hih geizmiuj hih saeh. De caemh dunghgoq Gihduz hwj hawj gyoengqraeuz ndaej caeuq de doxhuz. De vanzlij senj gyoengqraeuz, baij gyoengqraeuz bae cenz naeuz vunz ni ij baenzlawz ndaej caeuq Cangqdiq doxhuz. 19 Couh dwg naeuz Cangqdiq dunghgoq Gihduz hwj hawj vunz caeuq bonjfaenh de doxhuz, nyiuz gyoengq vunz hih coih. De vanzlij hawj gyoengqraeuz cenzgangj doxhuz hih gij ndei siuhsiz neix. 20 Sojhij gyoengqraeuz couh dwg Gihduz dih daiqbiuj; Cangqdiq dunghgoq gyoengqraeuz ma gienq faenhsou, caemh luj Gihduz de cinhswq gienq faenhsou, hawj faenhsou caeuq Cangqdiq doxhuz yienghmwnq. 21 Cangqdiq hawj boux mij coih mwnq, couh dwg Gihduz, dingj gyoengqraeuz rap coih hwj hawj gyoengqraeuz ndaej youq ndaw lwgra Cangqdiq bienqbaenz mij'z coih he hih vunz.
1 Gyoengqraeuz dwg caeuq Cangqdiq itheij guh hong hih; gyoengqraeuz miz gienz naeuz faenhsou. Faenhsou mbouj ndaej mbouj leixlangh Cangqdiq doiq faenhsou dih haijliengh, 2 aenvih Cangqdiq naeuz: Youq mwh hab hih mwhde, gou dingq faenhsou gouz gou; daengz ngoenz ndaej gouq mwnq gou bang faenhsou. Sojhij, gou naeuz sou ni hax, seizneix cingq dwg hab hih mwhde lo! Seizneix cingq dwg ngoenz Cangqdiq gouq faenhsou he lo. 3 Mboujguenj gyoengqraeuz guh gijmaz, cungj mbouj guh gij hawj vunz mbouj sinq he, mienxndaej vunz naeuz raeuz guh hih cungj dwg gyaj hih. 4-5 Dauqfanj gyoengqraeuz soj guh hih cungj dwg yienh ok gyoengqraeuz dwg bouxhoiq Cangqdiq. Gyoengqraeuz mboujguenj roeb daengz gijmaz nanh, haemzhoj, gungz, ngaiz vunz doh, ngaiz vunz gyaeng, ngaiz vunz nauh luenh, ngaiz guh hong dwgrengz sinhoj, ngaiz mbouj ndaej ninz, ngaiz iek, gyoengqraeuz cungj naenxsim roengzbae. 6 Gyoengqraeuz dwg boux mij maz ndaej diudik he, sug gij saedsaeh Cangqdiq he, rox naenxsim he, miz liengzsim he, baengh Hoenzsaenz Cangqdiq he, caensim caen'eiq aiq vunz he, 7 ciuq saedsaeh gangj vah he, baengh Cangqdiq hih rengz hwj guh saeh he. Gyoengqraeuz doiq dizyinz mbouj yungh gijmaz ujgiq; caenhgag ndwn ndaej cingq couh ndaej baujhuq bonjfaenh lo. 8 Gyoengqraeuz mboujguenj vunz soenhgingq cixnaeuz vunz yawjngawz, mboujguenj ngaiz vunz bangjlaih cixnaeuz vunz haenh, cungj dwg caensim swqhaeuh Cangqdiq hih. Gyoengqraeuz dwg saedsaeh hih, hoeng, vunz dauq naeuz raeuz gyaj hih. 9 Gyoengqraeuz lujnaeuz mij'z vunz rox, hoeng, dauqfanj bouxlawz cungj rox; lujnaeuz ij rai, hoeng, dauq lix hih; lujnaeuz ngaiz fad, hoeng, dauq mij ngaiz fad rai; 10 lujnaeuz siengsim, hoeng, dauq vuenheij; lujnaeuz gungz, hoeng, dauq ndaej hawj haujlai vunz fouq; lujnaeuz mij saek yiengh, hoeng, dauqfanj yienghyiengh cungj miz. 11-12 Gohlimzdoh gyauqveiq dih gak boux beixnuengx hax, mbouj dwg gyoengqraeuz doiq faenhsou mbouj caensim law, dauq dwg faenhsou doiq gyoengqraeuz mbouj caensim lah; gyoengqraeuz doiq faenhsou gangj hih vah cungj dwg miz maz gangj maz. 13 Gou doiq faenhsou luj doiq ndaw ranz vunz yienghmwnq; faenhsou doiq gou caemh wnggai luj yienghneix. 14 Faenhsou mbouj ndaej caeuq gij vunz mbouj sinq Gihduz he baenxlai caen. Ndei caeuq yak baenzlawz ndaej doxgaep nej? Laep caeuq rongh baenzlawz ndaej doxdoengz miz nej? 15 Gihduz caeuq Sajdanq fangzvuengz baenzlawz ndaej doxhuz nej? Sinq hih vunz caeuq mbouj sinq hih vunz miz maz doxdoengz nej? 16 Duz you ij baenzlawz ndaej coengq youq gunghdenq Cangqdiq nej? Gyoengqraeuz dwg gunghdenq seiqseiz lix dih Cangqdiq, cingq luj Cangqdiq naeuz: Gou ij caeuq gij vunz gou doxcaeuq youq, gou ij caeuq gyoengqde miz laizvangj. Gou ij guh gyoengqde dih Cangqdiq, gyoengqde caemh ij guh gij vunz gou. 17 Cangqdiq vanzlij caiq naeuz: Faenhsou mbouj dep gyoengqde, ij liz gyoengqde, mbouj bungq doenghgij uekcueg yaegyad he, gou couh hawj faenhsou guh gij vunz gou lo. 18 Gou ij guh daxboh faenhsou, faenhsou caemh ij guh gij lwg gou. Gij vah neix dwg gou, akak rengzrengz dih Cangqdiq gangj hih.
1 Sojhij gak boux beixnuengx hax, yiengq, giqyienz gyoengqraeuz ndaej doenghgij baujcingq neix lo, gyoengqraeuz couh wnggai gag rox mbouj caiq famh coih; doiq ndangdaej miz haih hih, doiq aen sim mbouj ndei hih, gyoengqraeuz cungj mbouj caiq cimyex haeuj bae. Wnggai miz aen sim soenhgingq Cangqdiq he, guh boux hab'eiq habhoz Cangqdiq liuxliux he. 2 Gou cingj faenhsou caensim dingq gyoengqraeuz, nginh gyoengqraeuz, mbouj yiem gyoengqraeuz, aenvih gyoengqraeuz mij guh goq gijmaz doiq mbouj hwnj vunz hih saeh, mij son mij daiq vunz guh vaihsaeh goq, mij ciemq vunz bienxngeiz goq. 3 Gou yienghneix naeuz mbouj dwg ij gvaiq faenhsou law. Gou doenghbaez gaenq doiq faenhsou naeuz goq lo, gyoengqraeuz baenxlai aiq faenhsou, simqciq guh daengz nyienh'eiq caeuq faenhsou doengz lix doengz rai. 4 Gou sinq faenhsou raixcaix; faenhsou hawj gou roxnginh najrongh. Miz faenhsou, gyoengqraeuz mboujguenj roeb daengz gijmaz nanh, cungj roxnginh vuenheij raixcaix. 5 Daiqlienz mwh gyoengqraeuz bae daengz Majgizdoenq hih mwhde, gyoengqraeuz mij banqfaz yietbaeg, cix roeb daengz gak cungj nanh, dauqcawq cungj miz vunz fanjdeiq, guh hwj gyoengqraeuz sim cix vueng. 6 Couh youq mwhde, boux nai vunz doeknaiq dih Cangqdiq, de dunghgoq Dizdoh daeuj nai gyoengqraeuz. 7 De daeuj doiq gyoengqraeuz miz haujlai bangcoh; mbouj danhcij yienghneix, vanzlij dawz faenhsou baenzlawz siengjniemh gou, baenzlaw vih gou hwj siengsim, baenzlawz caensim gvansim gou, cungj gangj naeuz gyoengqraeuz ni, hawj gou engqgya sim'angq. 8 Gannaeuz gou ienq goq gaxgonq gou sij fung saenq mwnq hawj faenhsou, hawj faenhsou siengsim lah, hoeng, seizneix gou mbouj ienq lo, aenvih gou rox, mwh faenhsou ngamq yawj fung saenq mwnq, faenhsou siengsim ij rai, hoeng, faenhsou siengsim yaep he, couh goq lo. 9 Gou seizneix sim'angq raixcaix. Gou sim'angq mbouj dwg vih faenhsou siengsim law, dauq dwg vih faenhsou dih siengsim le, ndaej daj ndaw sim nginh loek gaijgoq hwj sim'angq lah. Faenhsou siengsim dwg ciuq Cangqdiq dih cawjeiq hwj siengsim lah, dwg hawj faenhsou mbouj dwg vih gyoengqraeuz hwj souh daengz hih sienghaih law. 10 Ciuq Cangqdiq dih cawjeiq hwj siengsim hih couh mbouj miz maz ienq, couh ndaej gouq, hoeng, ciuq aen seiqgyaiq neix hih cawjeiq hwj siengsim hih couh ngaiz rai. 11 Hawjm'z yawj hux, faenhsou ciuq Cangqdiq dih cawjeiq hwj siengsim, couh hawj faenhsou gig rox hwj haenj siengj guh ndei, hawj faenhsou rox ij baenzlawz baux ndei gij mingzhiq bonjfaenh, hawj faenhsou aeuqheiq, hawj faenhsou lau, hawj faenhsou muengh ndaej raen gou, hawj faenhsou rox gvansim, hawj faenhsou rox fad vunz. Couh vih faenhsou yienghneix hwj, gou couh rox faenhsou dwg mij gijmaz loek hih. 12 Sojhij, ciuq luj yienghneix ma gangj, gou gamj youq dangqnaj Cangqdiq baujcingq, gou gaxgonq sij fung saenq mwnq hawj faenhsou, mbouj dwg naeuz vih boux famh coih mwnq hwj sij law, caemh mbouj dwg vih boux ngaiz haih goq mwnq hwj sij, dauq dwg vih ij hawj faenhsou rox faenhsou baenxlai gvansim gyoengqraeuz hwj sij lah. 13 Faenhsou dih gvansim hawj gyoengqraeuz ndaej miz muengh raixcaix, daihdaih dih gujliq gyoengqraeuz. Mbouj danhcij yienghneix, hawj vunz ceiq angq hih dwg faenhsou hawj Dizdoh ndaej coengqsim, ndaej doiqyungz angq hwnjdaeuj. 14 Gou youq dangqnaj Dizdoh haenh faenhsou goq, haenh naeuz faenhsou mij maz hawj gou roxnginh saetnaj, aenvih faenhsou caemh saedsaeh mij maz hawj gou saetnaj goq. Gou siengzseiz doiq faenhsou gangj vah cungj dwg saedsaeh hih, yiengq gou youq dangqnaj Dizdoh haenh faenhsou hih caemh dwg saedsaeh hih. 15 Seizneix de baex ngeix daengz faenhsou daixgya cungj baenxlai dingq vah caeuq baenxlai baenxlai caensim daih de, guh hawj de engqgya aiq faenhsou. 16 Seizneix gou doiq faenhsou coengqsim raixcaix, caemh angq ij rai.
1 Gak boux beixnuengx hax, gou seizneix naeuz sou ni, siengj hawj faenhsou rox Cangqdiq baenzlaw aiq Majgizdoenq dih gak aen gyauqveiq, baenzlaw doiq gyoengqde haijliengh, 2 sojhij gyoengqde gannaeuz roeb daengz haujlai nanh, roeb daengz haujlai gaujniemq lah, hoeng, gyoengqde ciuqyiengh roxnginh sim'angq. Gannaeuz gungz raixcaix lah, hoeng, gyoengqde ciuqyiengh haijliengh raixcaix. 3 Gou gamj cingqmingz gyoengqde dwg nyienh'eiq caenhsim caenh gyoengqde ndaej guh daengz hih bae gien lo, simqciq cauhgoq gyoengqde soj ndaej guh daengz hih. 4 Gyoengqde gouz gou hawj gyoengqde caemh miz faenh ndaej gien gijmaz hawj gij lwgsae youq Yehluqsajlaengj. 5 Gyoengqde soj guh hih dwg gyoengqraeuz ngeix mbouj daengz hih; gyoengqde sien dawz bonjfaenh gien hawj bouxcawj raeuz, dingq bouxcawj raeuz, gajlaeng caiq ciuq Cangqdiq dih cawjeiq dawz bonjfaenh gien hawj gyoengqraeuz. 6 Sojhij gou gienq Dizdoh, hawj de bang faenhsou guh gij saeh gien ngaenz mwnq sat bae. (Gou yienghneix naeuz dwg aenvih Dizdoh dwg guh boux yax guh gij saeh gien ngaenz neix he.) 7 Giqyienz faenhsou dih sinqsim hah, goujcaiz hah, ciqsiz hah, miz sim hah, doiq gyoengqraeuz dih aiqsim hah cungj gig ndei lo, yiengq gou caemh muengh faenhsou doiq gien ngaenz gij saeh ndei neix caemh wnggai yienh ok haijliengh raixcaix cij deng. 8 Gou naeuz sou ni, gou yienghneix naeuz faenhsou, mbouj dwg ij mingqlingq faenhsou law, dauq dwg gou siengj rox faenhsou caemh ndaej luj heijvunz yienghmwnq miz aiqsim lah. 9 Faenhsou caemh rox, bouxcawj raeuz Yehsuh Gihduz, de aiq vunz raixcaix. Baenjlaiz de youq mijyaengz roengz daeuj lajmbwn guh vunz cihsenz dwg fouqfouq mizmiz hih, hoeng, vih faenhsou hwj de nyienh'eiq roengz daeuj lajmbwn guh vunz hwj bienqbaenz boux gungzgungz ndangjndangj he. Aenvih de bienqbaenz gungzgungz ndangjndangj, couh ndaej hawj faenhsou ndaej bienqbaenz fouqfouq mizmiz lo. 10 Gangj daengz gien ngaenz gij saeh neix, gou dawz gij yawjfap gou naeuz sou ni, couh dwg bi gaxgonq faenhsou haenj guh hih, yax gien ngaenz hawj gyauqveiq hih gij hong neix, caemh dwg faenhsou heijdaeuz guh hih, 11 seizneix faenhsou wnggai guh sat bae bax. Faenhsou giqyienz miz sim yax guh gij gien ngaenz neix, yiengq faenhsou couh wnggai ciuq faenhsou ndaej guh daengz hih bae guh saeh bax, 12 aenvih hauhnaeuz faenhsou caensim gien ngaenz hih, cijaeu ciuq faenhsou soj miz hih bae gien, Cangqdiq couh haenjheiq lo; de mbouj dwg hawj faenhsou mbouj miz hoeng cungj ij gien law, dauq dwg hawj faenhsou gien faenhsou miz hih lah. 13 Gou yienghneix naeuz mbouj dwg siengj hawj faenhsou bang vunz gungz hwj hawj faenhsou bienqbaenz gungz hih law, dauq dwg siengj hawj daixgya goengbingz lah. 14 Seizneix faenhsou fouqmiz, ndaej bang vunz gungz; daengj baezneix gyoengqde caemh fouqmiz lo, caemh ndaej dauq bang faenhsou boiz nej. Yienghneix daixgya gungz fouq couh goengbingz lo. 15 Cingq luj ndaw Singqgingh ndaw de sij miz hih: Lai hih caemh mbouj suenq lai, noix hih caemh mbouj suenq noix. 16 Gou docih Cangqdiq hawj Dizdoh caeuq gou doxdoengz gvansim faenhsou. 17 De mbouj danhcij dingq gij vah gyoengqraeuz, vanzlij haenj bae faenhsou mwnq bang faenhsou. 18 Gou vanzlij baij boux he caeuq de itheij bae. Boux neix de dwg boux cenzgangj Cangqdiq dih ndei siuhsiz he; gak aen gyauqveiq hih vunz cungj caemh soenhcungq de. 19-20 Mbouj danhcij yienghneix, de caemh dwg gak aen gyauqveiq senj okdaeuj caeuq gou itheij dawz gyoengq vunz gien hih ngaenz soengq bae hawj Yehluqsajlaengj hih gak aen gyauqveiq he.Gyoengqraeuz vih mbouj hawj vunz ngeiz raeuz, aenvih gyoengqraeuz dawz baenx lai ngaenz,caemh aenvih gyoengqraeuz guh gij hong neix dwg ij hawj bouxcawj raeuz najrongh he, caemh dwg yienh ok gyoengqraeuz miz sim bang vunz he. 21 Gyoengqraeuz guh gij saeh ndei neix, ij cwnqliengq siujsim, ij hawj bouxcawj raeuz caeuq vunz rox gyoengqraeuz guh saeh, dwg guh ndaej ndei hih. 22 Cawz Dizdoh caeuq boux gou soj naeuz hih boux neix ok, gyoengqraeuz caemh vanzlij caiq baij boux he caeuq gyoengqde itheij bae. Boux de youq gak yiengh cungj guh ndaej ndei he. De doiq gij saeh neix cizgiz raixcaix; de sinq faenhsou, caemh engqgya siengj bae bang faenhsou. 23 Caiq gangj daengz Dizdoh caeuq linghvaih baij hih song boux beixnuengx, Dizdoh, de dwg bouxdoih gou, dwg caeuq gou itheij bang faenhsou he; song boux beixnuengx linghvaih baij mwnq, gyoengqde dwg dineix gyauqveiq dih daiqbiuj he, dwg hawj Gihduz najrongh he. 24 Sojhij, faenhsou ij daih gyoengqde ndei, ij naebsim bang gyoengqde sou ndei gij vunz gien okdaeuj hih ngaenz, hawj sojmiz hih gyauqveiq cungj ndaej rox faenhsou dih aiq, ndaej rox gyoengqraeuz haenh faenhsou dwg mbouj loek hih.
1 Gizsaed gou mboujyungh sij saenq daezsingj faenhsou gij saeh gien ngaenz hawj gyoengq lwgsae Yehluqsajlaengj mwnq nej. 2 Gou rox faenhsou siengj bang gyoengq lwgsae hah, sojhij gou itcig cungj youq gij vunz Majgizdoenq Saengj dineix haenh faenhsou, naeuz faenhsou Yaqgaihyaq Saengj vunz daj bi'gvaq cix gaihcij ij gien ngaenz lo. Faenhsou hih ndaek cungj singjsaenz neix ndaej hawj baenx haujlai vunz doengh daengz sim. 3 Yiengq gou seizneix baij geij boux bae faenhsou mwnq, muengh faenhsou ciuq gij vah gou bae cwnjbiq ndei gij ngaenz vunz gien daeuj mwnq, mienxndaej gou haenh faenhsou haenh hoengq, 4 aenvih gou baezneix ij bae faenhsou mwnq, saekseiz caiq miz Majgizdoenq vunz gaen gou bae. Daengz mwhmwnq, raen faenhsou lij mijyaengz cwnjbiq ndei gij ngaenz vunz gien hawj mwnq, yiengq mboujdanh vih gou sinq faenhsou hwj roxnginh saetnaj, daiqlienz faenhsou cungj caemh roxnginh engqgya saetnaj. 5 Sojhij, gou naemj wnggai baij geij boux beixnuengx doih sien bae faenhsou mwnq, dawz faenhsou gaxgonq dapwngq hawj gij ngaenz vunz gien daeuj he cwnjbiq ndei daengj gou bae, yienghmwnq couh yienh ok faenhsou dwg nyienh'eiq gien he lo. 6 Gou naeuz sou ni, noix ndaem hih couh noix sou, lai ndaem hih couh lai sou. 7 Gak vunz siengj gien geijlai couh gien geijlai; wnggai dwg nyienh'eiq gien hih cij deng, aenvih Cangqdiq haenjheiq gij vunz nyienh'eiq haenjheiq gien he. 8 Cangqdiq doiq faenhsou haijliengh raixcaix; de nyok gak yiengh hawj faenhsou, hawj faenhsou siengzseiz ndaej gaeuq yungh hwj ndaej bang vunz. 9 Cingq luj ndaw Singqgingh ndaw de sij naeuz: De haijliengh nyok hawj vunz gungz; de dih goengbingz yungjyenj mbouj rox bienq. 10 Boux nyok ceh hawj vunz roek caiq nyok gij gw hawj vunz dih Cangqdiq, de gaengjdingq lai hawj faenhsou, hawj faenhsou ndaej lai guh ndeisaeh. 11 De caemh gaengjdingq hawj faenhsou yienghyiengh cungj fouqmiz, hawj faenhsou seiqseiz cungj haijliengh cungj guh ndeisaeh. Yiengq daengz mwh gyoengqraeuz dawz gij ngaenz faenhsou gien hawj vunz hih faen hawj vunz gungz hih mwhde, gyoengqde couh docih Cangqdiq lo, 12 aenvih faenhsou soj gien hih mbouj danhcij ndaej bangbouj gyoengq lwgsae, vanzlij ndaej hawj haujlai vunz engqgya docih Cangqdiq. 13 Dunghgoq faenhsou haijliengh gien ngaenz gij ndeisaeh neix, couh ndaej cingqmingz faenhsou mbouj danhcij sinq bonjfaenh faenhsou soj cenz hih Gihduz dih ndei siuhsiz, caemh vanzlij ndaej cingqmingz faenhsou caemh dwg ciuq gij ndei siuhsiz neix bae guh. Aenvih faenhsou haijliengh nyok ngaenz hawj gyoengqde caeuq hawj vunz, yiengq couh ndaej hawj Cangqdiq najrongh lo. 14 Faenhsou haijliengh gien ngaenz, yienghneix couh ndaej yienh ok Cangqdiq doiq vunz haijliengh raixcaix. Couh vih yienghneix, gyoengqde couh aiq faenhsou, vih faenhsou hwj gouzhaenh Cangqdiq. 15 Hoeng, mboujguenj baenzlawz, gyoengqraeuz cungj wnggai docih Cangqdiq; Cangqdiq nyok hawj gyoengqraeuz hih dwg ceiq ndei hih, mij maz ndaej beij hih.
1 Gou, Baujloz, gannaeuz faenhsou naeuz gou goq, naeuz gou youq faenhsou mwnq mbeiiq, mbouj youq faenhsou mwnq nex couh mbeihung lo, hoeng, gou seizneix ij naeuz sou ni, gou seizneix siengj luj Gihduz yienghmwnq gangj vah swnh semxsemh soh semxsemh hwj doiq faenhsou naeuz. 2 Couh dwg naeuz daengj gou bae faenhsou mwnq, hauhnaeuz cungj lij miz vunz naemqnaeuz gyoengqraeuz dwg ciuq gij vunz aen seiqgyaiq neix bae guh saeh nex, gou gaengjdingq yiemzgwz mbeihung mbouj hezhej hwj naeuz gyoengqde. Hoeng, gou vanzlij dwg cingj faenhsou gaejyungh hawj gou yienghmwnq naeuz faenhsou. 3 Gou naeuz sou ni, gannaeuz gyoengqraeuz dwg aen seiqgyaiq neix hih vunz lah, hoeng, dauq mij dwg ciuq aen seiqgyaiq neix hih guhfap bae guh, 4 aenvih gyoengqraeuz guh saeh soj yungh hih mbouj dwg yungh aen seiqgyaiq neix dih ujgiq, dauq dwg yungh gij ujgiq Cangqdiq nyok hawj hih ndaej caq doemq baujleij hih, 5 ndaej hoenxhingz gak cungj lanz mbouj hawj vunz rox gij saedsaeh Cangqdiq he hih lah, couh dwg naeuz doenghgij dauhleix gij vunz gag naemqnaeuz bonjfaenh coengjmingz raixcaix he, rasang he, vanzlij miz caemh ndaej hingz goq doenghheij caeuq Cangqdiq doxngig he, caemh ndaej hawj vunz dingq Gihduz he. 6 Gou gaenq guh ndei cwnjbiq lo; daengj daengz faenhsou fug dingq Gihduz le, gou gaengjdingq ij fad doenghheij mbouj fug dingq Gihduz he. 7 Yiengq gangj daengz doenghheij yawj vunz guh saeh he, hauhnaeuz miz vunz naemqnaeuz caenhgag bonjfaenh de cij suenq dwg haeuj Gihduz hih, de couh wnggai caiq ngeixngeix yawj: gyoengqraeuz caemh caeuq de doxdoengz suenq dwg haeuj Gihduz hih hah. 8 Gyoengqraeuz saedsaeh ndaej miz gij gienz bouxcawj raeuz soj nyok hawj he; cungjsuenq naeuz gou doiq gij gienz neix haenh gvaqbouh hwjx, cungj mbouj roxnginh najnyaenq hah, aenvih bouxcawj raeuz nyok gij gienz neix hawj gyoengqraeuz dwg doiq faenhsou miz ik hih, mbouj dwg miz haih law. 9 Gou yienghneix naeuz dwg muengh faenhsou gaejyungh naemqnaeuz gou sij saenq haep faenhsou, 10 aenvih faenhsou mwnq miz vunz naeuz: “Gaejyungh lau de; gannaeuz de sij saenq gangj hih vah ak raixcaix lah, hoeng, yawj boux vunz de it di cungj mbouj ak, itbanhbanh lah, gangj vah cix ngawz.” 11 Hoeng, gou naeuz hax, gangj cungj vah neix hih vunz, de wnggai rox, gyoengqraeuz sij saenq baenzlaw naeuz, daengz gyoengqraeuz bae faenhsou mwnq hih caemh dwg baenzlaw guh hih. 12 Danghyienz, gyoengqraeuz mbouj gamj caeuq doenghheij gag cej gag haenh bonjfaenh hih vunz doxbeij lo. Gyoengqde gag aeu bonjfaenh ma dag bonjfaenh, gag beij bonjfaenh, gag maezgae bonjfaenh; gou naeuz hax, luj doengh cungj vunz neix, saedsaed saehsaeh gaeuq ngawz huh. 13 Gangj daengz gyoengqraeuz, gyoengqraeuz mboujguenj guxmaz cungj mbouj gag haenh bonjfaenh gvaqbouh; gyoengqraeuz cijmboujgoq dwg ciuq Cangqdiq dingh hawj gyoengqraeuz hih yienghmwnq bae guh hih lah. Cangqdiq dingh hih ndaw de caemh bauhgvaz daengz faenhsou. 14 Yiengq, giqyienz bauhgvaz daengz faenhsou vwz, gyoengqraeuz dawz gij ndei siuhsiz Gihduz cenz bae daengz faenhsou mwnq couh mbouj suenq gvaqbouh lo. 15 Gyoengqraeuz haenh hih, caenhgag haenh gyoengqraeuz soj guh daengz hih lah. Heijvunz guh hih, gyoengqraeuz mbouj gamj dawz ma dangq dwg bonjfaenh guh hwj haenh nej. Hoeng, gyoengqraeuz muengh faenhsou sinq Gihduz hih sim engqgya gyenhdingq, yienghmwnq couh ndaej hawj gyoengqraeuz engqgya ndaej youq Cangqdiq soj dingh hih, ndaej youq faenhsou mwnq dawz gij ndei siuhsiz Cangqdiq cenz roengzbae. 16 Mbouj danhcij ndaej cenz hawj faenhsou, caemh vanzlij ndaej cenz hawj doenghheij mij'z vunz cenz naeuz gyoengqde ni he; heijvunz soj guh hih, gyoengqraeuz mbouj aeu ma dangq guh gij bonjfaenh hwj haenh. 17 Cingq luj ndaw Singqgingh ndaw de soj sij naeuz hih: Ij haenh, couh wnggai haenh Cangqdiq. 18 Aenvih cingqcaen boiqndaej haenh hih dwg gij vunz bouxcawj raeuz soj haenh hih lah, mbouj dwg doenghheij vunz gag cej gag haenh bonjfaenh hih law.
1 Gou muengh faenhsou, cungjsuenq naeuz gou miz di ngawz he, faenhsou cungj ndaej naenxsim nyiuz gou. (Gizsaed gou rox faenhsou doiq gou gaenq gaeuq naenxsim lo.) 2 Gou luj Cangqdiq aiq faenhsou yienghmwnq aiq faenhsou, aiq daengz mbouj siengj faenhsou bae gaen vunz, aenvih gou gaenq dawz faenhsou boiq hawj Gihduz lo, caemhdangq luj dawz dah lwgsau mijyaengz haq goq, mijyaengz ngaiz vunz yaek goq he boiq hawj boux vunzsai he lo. 3 Hoeng, gou lau faenhsou ngaiz vunz yaeuh hwj mbouj caiq caensim aiq Gihduz, caemh luj Yaqvah ngaiz duz ngwz yaeuh yienghmwnq, 4 aenvih gou rox, hauhnaeuz miz vunz daengz faenhsou mwnq cenzgangj boux mbouj dwg gyoengqraeuz cenzgangj hih Yehsuh, cixnaeuz hawj faenhsou ndaej gij hoenzsaenz faenhsou mijyaengz ndaej goq he, cixnaeuz gangj gij siuhsiz mbouj dwg faenhsou soj sinq hih gij ndei siuhsiz mwnq, faenhsou cungj haenj, cungj mbouj fanjdeiq. 5 Gou naemj bonjfaenh gou mij gijmaz naeuz beij mbouj hwnj doenghheij gag naemqnaeuz bonjfaenh dwg dwzbaijyienz, dwg ceiq rem ceiq ak he he. 6 Gannaeuz gou mbouj ndaej luj doenghheij vunz miz goujcaiz hih lah, hoeng, doiq miz ciqsiz ma gangj, gou mbouj beij vunz ca; gij neix gou gaenq dunghgoq gak yiengh ma cingqmingz hawj faenhsou rox lo. 7 Gou dawz Cangqdiq dih ndei siuhsiz cenz naeuz faenhsou ni, gou coengzlaiz mij laeng faenhsou aeu gijmaz goq; gou gag yawj mbouj hwnj bonjfaenh gou, dauq yawjhwnj faenhsou. Nanzdauh gou yienghneix guh loek lo mah? 8 Gou vih ij begbeg bang faenhsou hwj laeng daixlingh aen gyauqveiq aeu saenghhozfeiq, caenh luj ciengj gyoengqde aeu ityiengh. 9 Gou youq faenhsou mwnq, mboujguenj mbouj miz gijmaz, coengzlaiz cungj mbouj gouz faenhsou bang goq, mbouj hawj faenhsou dang goq. Gou sojmiz ij yungh hih cungj dwg gij lwgsae Majgizdoenq soengq hawj he. Gou lauxsaed gangj, mboujguenj doenghbaez, seizneix caeuq baezneix, gou cungj mbouj hawj faenhsou dang. 10 Gou gamj doiq gij saedsaeh Gihduz youq ndaw sim gou baujcingq, gou yienghneix gag haenh, youq Yaqgaihyaq Saengj mij'z vunz gamj naeuz gou. 11 Gou vihmaz yienghneix naeuz gou mbouj veiq hawj faenhsou dang nej? Nanzdauh gou yienghneix naeuz couh mbouj dwg aiq faenhsou lo mah? Mbouj dwg law! Gou dwg aiq faenhsou hih; gij neix Cangqdiq dwg rox hih. 12 Gou saedsaeh naeuz sou ni, gou baezneix ciuqyiengh mbouj hawj faenhsou dang; gou ij giqcuz yienghneix guh, vih mbouj hawj doenghheij gag naeuz bonjfaenh dwg dwzbaijyienz haenh naeuz bonjfaenh gyoengqde caemh caeuq gyoengqraeuz doxdoengz. 13 Doengh cungj vunz neix dwg gyaj dih dwzbaijyienz he; gyoengqde gyajcang guh Gihduz dih dwzbaijyienz hwj daeuj coemx vunz. 14 Gizsaed, gou naeuz hax, gijn'x mbouj geizheih hih nej, aenvih daiqlienz Sajdanq fangzvuengz cungj caemh rox cang guh bouxcai rongh sagsag Cangqdiq he. 15 Sojhij, Sajdanq dih doenghheij mageq de cang guh vunz simndei simsoh, cix ij miz guxmaz hwj; gijn'x, caemh mbouj geizheih hih nej. Cijmboujgoq gyoengqde daengz gatsat caemh deuz mbouj goq bauqwngq dawz hih lah. 16 Gou caiq naeuz sou, mboujguenj byawz cungj mbouj wnggai naemqnaeuz gou dwg vunz ngawz, hoeng, hauhnaeuz faenhsou cungj ij yawj gou dangq dwg vunz ngawz caemh ndaej; yienghmwnq haemq ndaej hawj gou dangq vunz ngawz yienghmwnq hwj gag haenh bonjfaenh. 17 Gou seizneix soj gangj hih vah mbouj dwg bouxcawj raeuz hawj gou gangj hih law; dwg gou luj vunz ngawz yienghmwnq mbouj rox najnyaenq gag gangj gag haenh hih lah. 18 Gou naemj, giqyienz faenhsou miz haujlai vunz ciuq lajmbwn dih yawjfap ma gag haenh bonjfaenh hih vwz, yiengq gou caemh vihmaz mbouj ndaej gag haenh bonjfaenh gou hih nej? 19 Faenhsou cungj naemqnaeuz bonjfaenh faenhsou coengjmingz raixcaix, ndaej hozraez dingq vunz ngawz gangj vah, 20 simqciq daiqlienz miz vunz ep faenhsou hawj faenhsou guh hoiq, ciengj aeu gij doxgaiq faenhsou, coemx faenhsou, rasang, yawj faenhsou mbouj hwnj rwz, doh baj naj faenhsou, faenhsou cungj ndaej souh mbouj aeuqheiq. 21 Gou yienghneix gangj, gou roxnginh mboujeiqseiq; gou caemh rox, gou mij mbeihung, luj cungj saeh neix, gou mbouj gamj hah. Hoeng, gou gangj gawq vah ngawz he; hauhnaeuz miz vunz gamj gag haenh bonjfaenh nex, gou caemh gamj gag haenh bonjfaenh gou hah. 22 Yiengq, hauhnaeuz miz vunz gag naeuz bonjfaenh dwg Hihbwzlaiz vunz nex, gou caemh naeuz gou caemh dwg hah. Miz vunz gag haenh naeuz bonjfaenh dwg Hijswzlez vunz, gij vunz Cangqdiq senj hih nex, gou caemh naeuz gou caemh dwg hih. Miz vunz gag naeuz bonjfaenh dwg gij lwglan Yaqbwzlahhanj hih nex, gou caemh naeuz gou caemh dwg hih. 23 Miz vunz gag naeuz bonjfaenh de dwg bouxhoiq Gihduz nex, gou gamj naeuz gou engqgya dwg. (Ox, gou caenh lujnaeuz fatvangh hoh nwih, gingqyienz gag haenh bonjfaenh lah.) Gou beij gyoengqde guh hong engqgya dwgrengz, engqgya lai ngaiz gyaeng haeuj ndaw lauz bae, engqgya ngaiz vunz doh, engqgya ngaiz ij rai senxsenx. 24 Gou miz haj mbat ngaiz gij vunz Youzdaiq aeu bien naeng ma fad, moix mbat ngaiz fad baenx samcib gouj mbat, 25 ngaiz faexmbaenq doh goq sam mbat, ngaiz vunz aeu rin dub goq mbat he, ngaiz ruz vaih youq ndaw haij sam mbat, sam mbat ndaw de miz mbat he ngaiz youq ndaw haij cangh baenxngwnz baenxngoenz goq. 26 Vanzlij miz siengzseiz ok roen gyae roeb daengz goq dah veizyiemj, roeb daengz caeggeq duet roen dih veizyiemj, vanzlij miz doenghheij caeuq gou doxcaemh minzcuz he caeuq doenghheij linghvaih minzcuz he dih vunz fanjdeiq, vanzlij youq ndaw singz, youq rogndoi roeb daengz veizyiemj, ndaw haij roeb daengz veizyiemj caemh vanzlij ngaiz doenghheij gyaj sinq bouxcawj raeuz Yehsuh he haih. 27 Gou vanzlij guh hong dwgrengz sinhoj, siengzseiz mbouj ndaej ralaep, souh dungxiek hozhawq, mij mwnq youq he, daenj cix daenj mbouj raeuj. 28 Yienghneix mbouj cuksuenq, vanzlij siengzseiz vih gak gyauqveiq hwj yousim. 29 Yiengq, hauhnaeuz miz vunz doeknaiq, sinqsim mbouj gaeuq, gou bang de, gou mbouj naet mah? Hauhnaeuz vunz ngaiz vunz yaeuh guh loek, famh coih, gou mbouj vih de hwj simgaenj mah? 30 Yiengq, ciuq yienghneix ma gangj, hauhnaeuz gou ij gag haenh bonjfaenh hih, wnggai haenh gou mij rengz mij banqfaz hwj haenh suenq lo. 31 Gou yienghneix naeuz, boux yungjyenj haenh hih bouxcawj raeuz Yehsuh Gihduz dih Cangqdiq daxboh, de rox gou gangj hih vah cungj dwg saedsaeh hih, mbouj gyaj hih. 32 Caemhdangq mwh gou youq Daqmajswqgwz hih mwhde, Yaqlijdaz goengjvuengz neix hawj goeng saengjcangj de baij bing souj baksingz hwj ijsiengj gaemh dawz gou, 33 hoeng, miz vunz aeu loz daeuj hawj gou naengh youq ndaw de hwj daj conghcang gwnz ciengz duengq gou roengzma, hawj gou ndaej deuz ok ndaw fawz de.
1 Gou lauxsaed naeuz sou ni, gannaeuz gag haenh bonjfaenh mij'z ik lah, hoeng, gou seizneix vanzlij dwg ij gag haenh bonjfaenh gou: seizneix gou siengj haenh bouxcawj raeuz hawj gou luj fangxngwnzloq yienghmwnq yawjraen gij geizmiuj he caeuq rox de raengq gou hih vah. 2 Gou rox miz boux haeuj gij vunz Gihduz he, de youq cibseiq bi gaxgonq luj fangxngwnzloq yienghmwnq ndaej ciep hwnj daixsam caengz mbwn bae. Hoeng, gou mbouj rox dauqdaej dwg aen ndangdaej de caeuq hoenzsaenz de hwnj bae haj cixnaeuz caenhgag dwg hoenzsaenz de hwnj bae. Gou mbouj rox; caenhgag Cangqdiq cij rox. 3 Gou vanzlij ij naeuz: gou rox boux ndaej ciep hwnj mbwn bae he, hoeng, gou mbouj rox dauqdaej dwg aen ndang de caeuq hoenzsaenz de hwnj bae haj cixnaeuz caenhgag hoenzsaenz de hwnj bae. Gou mbouj rox; caenhgag Cangqdiq cij rox. 4 De ndaej youq mwnq ndaej yangjfuk he dingqri gij vah he, dwg vunz mij banqfaz aeu bak ma gangj he, dwg Cangqdiq mbouj hawj gangj he. 5 Gou ij haenh boux vunz neix; hoeng, bonjfaenh gou nej, hauhnaeuz gou ij gag haenh bonjfaenh gou nex, couh wnggai gag haenh naeuz bonjfaenh gou mij rengz mij banqfaz ndaej lo. 6 Gizsaed, cungjsuenq naeuz gou gag haenh bonjfaenh gou hwjx, caemh mbouj suenq naeuz ngawz hah, aenvih gou gangj hih cungj dwg saedsaeh hih, mboujgoq gou vanzlij dwg mbouj siengj gangj ok bak, mienxndaej vunz daiq yawjhwnj gou lai, cauhgoq gyoengqde daj gwnz ndang gou soj yawjraen hih, soj dingq daengz hih. 7 Cangqdiq mbouj hawj gou vih ndaej rox gij miqmiz de hwj gyauhngauq, couh hawj gou baenz cungj lujnaeuz miz diuz oen he coeg youq gwnz ndang gou nwih, luj bouxcai Sajdanq yienghmwnq siengzseiz coeg in gou, loengh gou. 8 Vih yienghneix hwj, gou gouz bouxcawj raeuz goq sam mbat, gouz de bang gou ciemz diuz oen neix ok. 9 Hoeng, bouxcawj raeuz dauq doiq gou naeuz: “Cijaeu gou aiq mwngz, couh ndaej lo, aenvih gou ndaej miz rengz hawj vunz youq mwh mij rengz mij banqfaz he, ndaej raen hamq hah.” Couh vih yienghneix hwj, gou engq haenj gag haenh bonjfaenh mij rengz mij banqfaz, yienghneix couh ndaej hawj vunz yawjraen gij rengz Gihduz yienh youq gwnz ndang gou hah. 10 Sojhij gou vih Gihduz hwj nyienh'eiq yienghneix mij rengz mij banqfaz, nyienh'eiq souh daengz vunz yawjngawz, souh nanh, souh bwkhaih, souh haemzhoj, aenvih gou seizlawz mij rengz mij banqfaz, seizlaw couh ndaej baengh Gihduz dih rengz hwj ndaej miz rengz lo. 11 Baenjlaiz gou wnggai dwg faenhsou haenh hih, hoeng, gou ngaiz faenhsou bwk hwj bienq boux vunz ngawz he gag haenh bonjfaenh lah. Gannaeuz gou mbouj suenq guxmaz vunz lah, hoeng, caemh mbouj dwg naeuz it di cungj beij mbouj hwnj doenghheij gag naemqnaeuz bonjfaenh dwg ceiq rem hih dwzbaijyienz haj. 12 Gou youq faenhsou mwnq hih mwhde, cungj dwg naenxsim raixcaix, caemh guh baenx haujlai geizmiuj gingjgyauj hih saeh hwj ndaej cingqmingz gou dwg dwzbaijyienz he. 13 Cawzok gou mbouj hawj faenhsou gyauqveiq rap gij saenghhozfeiq gou, faenhsou soj ndaej yangjcouq hih miz yienghlawz mbouj ndaej luj gizdah gyauqveiq nej? Doiq mbouj hwnj lo, gou mbouj laeng faenhsou aeu saenghhozfeiq; cingj faenhsou yienzliengh gou! 14 Hawjm'z yawj hux, gou seizneix caiq cwnjbiq bae faenhsou mwnq mbat daixsam lo. Mbat neix gou ciuqyiengh mbouj hawj faenhsou rap gij saenghhozfeiq gou, aenvih gou muengh ndaej hih dwg faenhsou, mbouj dwg faenhsou hih cienzcaiz law. Gou caeuq faenhsou caenh luj bohlwg ityiengh; guh bohmeh hih wngdang vih lwg cwk cienzcaiz, mbouj gouz lwg cwk cienzcaiz hwj ciengx bohmeh law. 15 Gou vih ij bang faenhsou, cungj nyienh'eiq sijndaej sojmiz hih, simqciq sijndaej diuz mingh bonjfaenh gou. Nanzdauh gou yied yienghneix aiq faenhsou, faenhsou couh yied mbouj aiq gou lo mah? 16 Suenq lox; mboujguenj gou baenzlawz mbouj aeu faenhsou gijmaz, ciuqyiengh ij miz vunz naeuz gou dwg gyaujvaz, miz vunz naeuz gou dwg siengj yaeuh faenhsou. 17 Hoeng, gou caemh baij vunz bae faenhsou mwnq goq hah; gyoengqde ciemq faenhsou bienxngeiz lo mah? 18 Gou gienq Dizdoh bae faenhsou mwnq, caemh baij boux beixnuengx mwnq caeuq de itheij bae. Yiengq, Dizdoh caemh ciemq faenhsou bienxngeiz lo mah? De caeuq gou soj guh hih mbouj dwg cungj dwg doxdoengz daiqduq, doxdoengz guhfap mah? 19 Gou yienghneix naeuz, faenhsou dwg mbouj dwg naemqnaeuz gyoengqraeuz ngengh ij naeuz bonjfaenh dwg deng hih nej? Gizsaed, gyoengqraeuz gangj hih gij vah neix dwg ciuq haeuj gij vunz Gihduz wnggai gangj hih vah lah, dwg doiq ndaej hwnj Cangqdiq he lah. Gak boux beixnuengx hax, gyoengqraeuz soj guh hih saeh cungj dwg doiq faenhsou miz ik hih. 20 Hoeng, gou vanzlij dwg you gou caiq bae faenhsou mwnq, raen faenhsou vanzlij dwg mij ciuq gou soj muengh hih yienghmwnq bae gaijgoq, yienghneix gou couh mij hab faenhsou soj muengh hih. Caemh vanzlij you raen faenhsou vanzlij mbouj doxhuz, rahoengz, aeuqheiq, faen banghbaij, bangjlaih, gangj vunz vaihvah, rasang, luenh nauhsaeh. 21 Gou caemh you gou bae faenhsou mwnq, gou sinq dih Cangqdiq hawj gou youq dangqnaj faenhsou saetnaj, couh vih gou yawjraen doenghheij famh coih goq hih, vanzlij guh doenghgij yalw hih, guhyoux hih, guh doeg guh sieb hih, vanzlij mboujyaengz gaijgoq hih hwj siengsim.
1 Aenvih ndaw Singqgingh ndaw de sij naeuz: Mboujguenj miz maz, cungj ij miz song daengz sam boux guh cingqyinz cij suenq, yiengq gou mbat neix dwg daixsam mbat ij bae faenhsou mwnq. 2 Gou mbat gaxgonq, couh dwg mbat daixngeih bae faenhsou mwnq, gaenq naeuz goq doenghheij famh coih mbouj gaij hih mwnq lo; seizneix gou caiq ij doiq gyoengqde caeuq gizdah vunz naeuz daixsam mbat. Hauhnaeuz gou caiq bae faenhsou mwnq nex, gaengjdingq mbouj nyiuz gyoengqde. 3 Gou yienghneix guh dwg aenvih faenhsou ij hawj gou cingqmingz gou gangj hih vah dwg Gihduz hawj gou gangj hih. Yiengq daengz gou fad gij vunz miz coih hih mwhde couh ndaej cingqmingz hawj faenhsou lo, aenvih Gihduz guenjgyauq faenhsou mbouj dwg sim'unq, mij banqfaz, hezhej, dauq dwg yiemzgwz miz rengz youqgaenj hih. 4 Yiengq, gannaeuz Gihduz ngaiz vunz ding hwnj gwnz gyaq cixcib bae haihrai hih mwhde, de dwg mij banqfaz, mij'z rengz hih, hoeng, de ndaej baengh Cangqdiq dih rengz hwj vanzlij ndaej lix. Gyoengqraeuz caemh caeuq de doxdoengz: yawj hwnjdaeuj dwg mij'z rengz, mij banqfaz hih, hoeng, gyoengqraeuz caemh ndaej baengh Cangqdiq dih rengz hwj ndaej caeuq de itheij lix, ndaej bang faenhsou. 5 Faenhsou wnggai gag rox gyenjcaz bonjfaenh, gaujniemq bonjfaenh dwg mbouj dwg gaep haeuj Yehsuh Gihduz, dwg mbouj dwg gyenhciz sinq de. Yiengq cizfeih faenhsou dwg gyaj hih lwgsae, dingx mbouj ndaej gaujniemq, mijn'x faenhsou wnggai rox Yehsuh Gihduz dwg caeuq faenhsou youq hih. 6 Gou muengh faenhsou rox gyoengqraeuz dwg dingx ndaej gaujniemq hih dwzbaijyienz. 7 Seizneix raeuz gouz Cangqdiq, gouz de mbouj hawj faenhsou guh saek yiengh vaihsaeh. Gij neix mbouj dwg naeuz ij hawj vunz haenh gyoengqraeuz law, dauq dwg ij hawj faenhsou guh saeh hengz ndaej cingq lah. Cijaeu faenhsou guh saeh hengz ndaej cingq, cungjsuenq naeuz gyoengqraeuz ngaiz vunz naeuz, gyoengqraeuz cungj mbouj youqgaenj, 8 aenvih gyoengqraeuz mboujguenj guxmaz, cungj mbouj ndaej caeuq saedsaeh doxngig, dauq ij cihciz saedsaeh. 9 Cungjsuenq naeuz gyoengqraeuz mij rengz mij banqfaz, faenhsou dauq miz rengz miz banqfaz, gyoengqraeuz cungj sim'angq, aenvih gyoengqraeuz soj gouz hih cingq dwg muengh faenhsou ndaej youq ndaw lwgra Cangqdiq bienqbaenz ndei liuxliux mij gijmaz ndaej diudik he. 10 Sojhij, domh gou mijyaengz bae faenhsou mwnq, gou couh sien sij fung saenq neix hawj faenhsou, cwnjbiq gou bae faenhsou mwnq, raen faenhsou hih mwhde, mbouj hoj yungh gij gienz bouxcawj raeuz nyok hawj gou mwnq ma yiemzgwz doiq faenhsou—gij gienz neix mbouj dwg yungh ma haih vunz law, dauq dwg yungh ma bang vunz lah. 11 Gak boux beixnuengx hax, couh yienghneix bax. Gou muengh faenhsou vuenheij, caemh muengh faenhsou gaijgoq hwj ndaej guh boux ndei liuxliux he; wnggai rox doxvued, doxcaezsim, doxhuz doxaiq he. Yienghneix aiq caeuq hawj vunz hozbingz dih Cangqdiq couh caeuq faenhsou youq. 12 Faenhsou ij miz Cangqdiq dih aiq hwj doxdongx ndei. 13 Gyoengqraeuz dineix sojmiz hih gij vunz Cangqdiq cam faenhsou ndei. 14 Muengh bouxcawj raeuz Yehsuh Gihduz doiq faenhsou haijliengh, Cangqdiq aiq faenhsou, caemh muengh Hoenzsaenz Cangqdiq doz youq gwnz ndang faenhsou, caeuq faenhsou youq!
1 Gou dwg Baujloz, dwg boux dwzbaijyienz he. Gou ndaej guh dwzbaijyienz, mbouj dwg vunz senj hawj gou guh gou couh ndaej guh, caemh mbouj dwg ciuq vunz dih cawjeiq hawj gou guh gou couh ndaej guh hih, dauq dwg dunghgoq Yehsuh Gihduz caeuq dunghgoq boux hawj de daj rai ndaej dauqlix dih Cangqdiq Bohmbwn senj gou baij gou guh lah. 2 Gou caeuq sojmiz caeuq gou youq itheij hih beixnuengx sij saenq hawj youq Gyahlahdaiq dih gak aen gyauqveiq. 3 Muengh Cangqdiq Bohmbwn caeuq bouxcawj raeuz Yehsuh Gihduz doiq faenhsou haijliengh, hawj faenhsou bingzan! 4 Bouxcawj raeuz Yehsuh Gihduz ciuq Cangqdiq Bohmbwn raeuz dih cawjeiq vih ij gouq gyoengqraeuz ndaej duet ok aen seiqgyaiq doegsieb neix hwj ngaiz vwt diuz mingh bonjfaenh de, hawj gyoengqraeuz ndaej cueg coih. 5 Muengh najrongh yungjyenj gvi hawj Cangqdiq! Ahmaenz. 6 Gou geizheih ij rai; faenhsou gingqyienz baenxlai vaiq couh yiem boux dunghgoq Gihduz dih aiq hwj senjdingh faenhsou he, dauq bae sinq daixlingh cungj ndei siuhsiz lah. 7 Gizsaed, gaenhbaenj mbouj miz daixlingh cungj ndei siuhsiz; gou yienghneix naeuz dwg aenvih miz vunz gauxca faenhsou, siengj gaij gij ndei siuhsiz Gihduz lah. 8 Hoeng, mboujguenj dwg byawz, cungjsuenq naeuz dwg gyoengqraeuz cixnaeuz dwg daj gwnzmbwn daeuj hih bouxcai hwjx, hauhnaeuz cenz hawj faenhsou hih caeuq gyoengqraeuz doenghbaez cenz hawj faenhsou hih mbouj doxdoengz nex, byawz couh wnggai ngaiz souh daengz mang. 9 Luj gij saeh neix, gyoengqraeuz gaxgonq gaenq naeuz goq lo, hoeng, gou seizneix vanzlij caiq ij naeuz mbat haem, couh dwg naeuz hauhnaeuz miz byawz cenz “ndei siuhsiz” hawj faenhsou caeuq gaxgonq faenhsou soj dingq daengz hih mbouj doxdoengz nex, boux mwnq de couh wnggai ngaiz souh daengz mang lo. 10 Gou yienghneix naeuz, dwg ijsiengj hawj vunz haenh gou mah? Gou naeuz hax, baenzbaenz mbouj dwg! Dwg ij hawj Cangqdiq sim'angq lah! Hauhnaeuz gou dwg siengj hawj vunz haenh gou nex, gou couh mbouj dwg bouxhoiq Gihduz lo. 11 Gak boux beixnuengx hax, gou saedsaeh naeuz sou ni, gou soj cenzgangj hih ndei siuhsiz gaenhbaenj mbouj dwg vunz siengj okdaeuj hih. 12 Gij ndei siuhsiz neix mbouj dwg vunz cenz hawj gou hih, caemh mbouj dwg vunz son gou hih, dauq dwg Yehsuh Gihduz hawj gou rox hih lah. 13 Faenhsou cungj caemh rox, doenghbaez gou gaen Youzdaiqgyauq hih mwhde dwg baenzlaw yiengh hih vunz, baenzlaw youqgaenj, baenzlawz bwkhaih, siengj cawz Cangqdiq dih gyauqveiq raixcaix, 14 youq Youzdaiqgyauq ndaw de, gou baenzlawz beij doenghheij vunz caeuq gou doengzdangq he hih vunz lij soenhsouj gyauqgveih, caemh vanzlij engqgya doiq Youzdaiq cojgoeng soj cenz roengzdaeuj hih laehbeih maezgae raixcaix, yawjnaek raixcaix. 15 Hoeng, Cangqdiq doiq gou haijliengh raixcaix; daj gou lij youq ndaw dungx daxmeh gou, de cix senj gou hawj gou guh gij hong de lo. 16 Miz mbat he, de gingqyienz haenjheiq hawj daeglwg de yienh hawj gou raen, hawj gou rox de, hawj gou ndaej yiengq linghvaih minzcuz hih vunz cenzgangj daeglwg de dih ndei siuhsiz. Mwhde, gou gaenhbaenj mij cam guxmaz vunz, caemh mij hawj guxmaz vunz son gou, 17 cixcaemh mij bae Yehluqsajlaengj cam doenghheij beij gou guh dwzbaijyienz lij gaxgonq he, dauq majcangq gag bae dieg Ahlahbwz, gajlaeng, caiq gag dauq ma daengz Daqmajswqgwz Singz lah. 18 Gajlaeng, goq sam bi le, gou cij bae Yehluqsajlaengj, bae cimh Bijdwz, bae laeng de youq cibhaj ngoenz. 19 Mwhde, gizdah hih dwzbaijyienz, cawzok Yajgoz, daegnuengx bouxcawj raeuz, gou cungj mij raen goq. 20 (Gou sij hawj faenhsou hih doenghgij neix, gou gamj youq dangqnaj Cangqdiq baujcingq cungj dwg saedsaeh hih, mbouj dwg gangj gyaj hih.) 21 Gajlaeng, gou caiq bae dieg Siqliqyaq caeuq Gihliqgyah. 22 Mwhmwnq Youzdaiq Saengj dih gak aen gyauqveiq hih lwgsae cungj mij saek boux rox gou. 23 Gyoengqde caenhgag dingqri vunz naeuz: “Boux doenghbaez bwkhaih gyoengqraeuz hih boux mwnq, seizneix gingqyienz cenz gij saedsaeh yienzlaiz de siengj cawz he lah.” 24 Couh vih yienghneix, gajlaeng gyoengqde couh vih gou hih saeh hwj haenh Cangqdiq.
1 Gajlaeng goq cibseiq bi le, gou caiq bae Yehluqsajlaengj, hoeng, mbat neix gou bae dwg caeuq Bahnazbah caeuq Dizdoh itheij bae hih lah. 2 Mbat neix gou bae Yehluqsajlaengj dwg Cangqdiq naeuz hawj gou bae hih. Gou bae Yehluqsajlaengj dwg bauqgauq gou soj guh hih, couh dwg naeuz gou dawz gou soj cenz hawj linghvaih minzcuz hih ndei siuhsiz naeuz gij lingjdauj mwnq ni, dwg siengj yawjyawj gyoengqde miz maz naeuz, mienxndaej gou soj guh hih cungj bienqbaenz mij'z yungh. 3 Hoeng, liuh mbouj daengz, dingq gou gangj dingq gou gaijyiz hih, gyoengqde cungj mij maz naeuz. Daiqlienz gaen gou bae hih Dizdoh, gannaeuz de dwg Hihlaz vunz caemh mij gozlij goq lah, hoeng, caemh mij'z vunz ep de gozlij. 4 Gou vihmaz ij daez daengz gij saeh neix nej? Dwg aenvih miz hih vunz dwg gyaj Gihduzduz caeg ndonj haeuj ndaw gyoengqraeuz daeuj, caegcaeg demq yawj gyoengqraeuz vih sinq Yehsuh Gihduz hwj ndaej swqyouz hih, siengj hawj gyoengqraeuz bienqbaenz mbouj swqyouz. 5 Hoeng, gyoengqraeuz doiq doengh cungj vunz neix it di cungj mbouj fug, dwg vih ij bang faenhsou baujhuq ndei gij saedsaeh ndei siuhsiz. 6 Yiengq gangj daengz doenghheij youq gyauqveiq haemq miz mingz hih, gyoengqde doiq gou soj cenz hih ndei siuhsiz caemh mij daez gijmaz. (Dineix gou daez daengz hih doenghheij vunz neix dih yawjfap, mbouj dwg naeuz gyoengqde dwg youq gyauqveiq haemq miz gienz gangj vah hih nej, aenvih mboujguenj dwg guxmaz vunz, youq ndaw lwgra Cangqdiq bouxboux cungj dwg doxdoengz hih.) 7 Gyoengqde mbouj danhcij mbouj daez daengz gijmaz, dauqfanj yawj ndaej ok gou dwg Cangqdiq baij bae yiengq linghvaih minzcuz cenz ndei siuhsiz hih, cingq luj Cangqdiq baij Bijdwz, hawj de cenz ndei siuhsiz hawj gij vunz Youzdaiq hih yienghmwnq. 8 Aenvih boux hawj Bijdwz miz bonjsaeh ndaej guh boux dwzbaijyienz cenz ndei siuhsiz hawj gij vunz Youzdaiq hih Cangqdiq, de caemh hawj gou ndaej miz bonjsaeh, hawj gou ndaej guh boux dwzbaijyienz cenz ndei siuhsiz hawj linghvaih minzcuz he. 9 Vanzlij miz youq gyauqveiq haemq miz gienz gangj vah hih Yajgoz hah, Bijdwz hah, Yozhanq hah, sam boux neix caemh rox Cangqdiq doiq gou haijliengh hawj gou guh dwzbaijyienz le, couh caeuq gou caeuq Bahnazbah uzcouj, dungziq gyoengqraeuz caeuq gyoengqde doxdoengz dwg guh dwzbaijyienz, caemh dungziq gyoengqraeuz cenz ndei siuhsiz hawj linghvaih minzcuz, gyoengqde cenz hawj Youzdaiq vunz. 10 Cijmboujgoq gyoengqde daezsingj gyoengqraeuz, hawj gyoengqraeuz ndaejgeiq giqcuz bang vunz gungz. Gizsaed, bang vunz gungz gij saeh neix baenjlaiz couh dwg gou soqlaiz cungj haenj guh hih. 11 Hoeng, daengz gajlaeng, mwh Bijdwz daeuj daengz Anhdizah Singz hih mwhde, gou mbouj ndaej mbouj youq dangqnaj vunzlai naeuz de, aenvih de guh gij saeh he hawj vunz dingx mbouj ndaej he, 12 couh dwg, yienzlaiz de ngamq daengz Anhdizah hih mwhde, de cungj dwg caeuq gij lwgsae linghvaih minzcuz he itheij gw haeux, hoeng, daengz gajlaeng, daj Yehluqsajlaengj daj Yajgoz mwnq baij daeuj hih vunz, aenvih gyoengqde haenj gag guh cawjeiq naeuz linghvaih minzcuz hih vunz bietdingh ij luj Youzdaiq vunz yienghmwnq gozlij cij ndaej he, Bijdwz lau gyoengqde naeuz de. Couh vih yienghneix, Bijdwz couh mbouj caiq haenj caeuq doenghheij linghvaih minzcuz hih vunz gw haeux haem lo. 13 Guh hwj daengz gajlaeng gizdah Youzdaiq vunz dih lwgsae caemh gaen de, daiqlienz Bahnazbah cungj caemh gaen lo. 14 Gou raen gyoengqde yienghneix mbouj ciuq gij saedsaeh ndei siuhsiz bae guh le, couh youq dangqnaj vunzlai doiq Bijdwz naeuz: “Bijdwz, baenjlaiz mwngz dwg Youzdaiq vunz hih, hoeng, mwngz mij ciuq Youzdaiq vunz dih laehbeih bae guh, dauq ij ep hawj linghvaih minzcuz hih vunz bae ciuq gij laehbeih Youzdaiq vunz bae guh! 15 Mwngz, gou, seng okdaeuj cungj dwg Youzdaiq vunz; gyoengqraeuz mbouj dwg doenghheij mbouj rox Cangqdiq fazliz hwj famh coih hih doenghheij vunz mwnq. 16 Gyoengqraeuz rox, vunz ndaej youq ndaw lwgra Cangqdiq suenq dwg mij'z coih hih, mbouj dwg baengh soenhsouj Mohsih dih fazliz, dauq dwg baengh sinq Yehsuh Gihduz hwj ndaej hih lah. Sojhij gyoengqraeuz couh sinq Yehsuh Gihduz, yienghneix couh ndaej dunghgoq sinq Yehsuh Gihduz hwj ndaej youq ndaw lwgra Cangqdiq suenq dwg boux mij'z coih he lo. Aenvih mij'z vunz dwg dunghgoq soenhsouj Mohsih dih fazliz hwj ndaej youq ndaw lwgra Cangqdiq suenq dwg mij'z coih hih.” 17 Yiengq, hauhnaeuz miz vunz naeuz: “Gyoengqraeuz baengh sinq Yehsuh Gihduz, mbouj baengh fazliz, yienghneix gyoengqraeuz couh suenq dwg famh coih lo, yiengq mijyaengz dangq dwg naeuz Gihduz hawj vunz famh coih lo mah?” Hoeng, gou naeuz hax, it di cungj mbouj dwg! 18 Cingq luj gou vwt fazliz, caiq son vunz yungh fazliz; yienghneix gou mbouj dwg loek lo mah? 19 Aenvih gou rox dunghgoq Mohsih dih fazliz, aeu fazliz ma gangj, gou caemhdangq gaenq rai lo, yiengq gou couh ndaej vih Cangqdiq hwj lix lo. 20 Ciuq yienghneix ma gangj, gou gaenq caeuq Gihduz caez ding youq gwnz gyaq cixcib rai lo; seizneix hih gou gaenq mij dwg yienzlaiz hih gou lo, dauq dwg dauqlix dih Gihduz doz youq gwnz ndang gou lah. Sojhij gou seizneix dwg baengh sinq daeglwg Cangqdiq hwj saenghhoz he, aenvih de aiq gou, simqciq sijndaej diuz mingh bonjfaenh de. 21 Couh aenvih dwg yienghneix, gou couh gaengjdingq yawjnaek Cangqdiq doiq gou dih haijliengh, hoeng, hauhnaeuz gyoengqraeuz baengh Mohsih dih fazliz nex, Gihduz rai couh mij dij saek haux cienz lo.
1 Gij vunz ngawz Gyahlahdaiq faenhsou hax! Byawz yaeuh faenhsou hax! Yehsuh Gihduz ngaiz ding hwnj gwnz gyaq cixcib bae rai, mbouj dwg gaenq ra raen youq dangqnaj faenhsou myiengxmyiengx lo mah? 2 Youq dineix, gou caenh cam faenhsou yiengh dog lah, couh dwg faenhsou ndaej Hoenzsaenz Cangqdiq, dwg vih soenhsouj Mohsih dih fazliz haj cixnaeuz dwg vih sinq faenhsou soj dingq daengz hih ndei siuhsiz nej? 3 Gou naeuz faenhsou hax, nanzdauh faenhsou cungj ndaej baenq ngawz laj? Faenhsou mingzmingz rox, faenhsou dwg baengh Hoenzsaenz Cangqdiq ndaej gaihcij saen dih saenghhoz lo, hoeng, seizneix faenhsou dauq ijsiengj gauq baengh gij rengz bonjfaenh hwj ndaej bienqbaenz hab'eiq habhoz Cangqdiq lah! 4 Gaxgonq faenhsou ngaiz souh baenx haujlai nanh; dwg mij'z yungh hih mah? Mbouj dwg bax! 5 Vanzlij miz, Cangqdiq nyok Hoenzsaenz bonjfaenh de hawj faenhsou, caiq yienh doenghgij geizmiuj he hawj faenhsou yawj, dwg vih faenhsou soenhsouj Mohsih dih fazliz haj cixnaeuz dwg vih faenhsou sinq faenhsou soj dingq daengz dih ndei siuhsiz nej? 6 Faenhsou ngeixngeix yawj Yaqbwzlahhanj bax! Cingq luj ndaw Singqgingh ndaw de sij naeuz: Yaqbwzlahhanj vih sinq Cangqdiq hwj Cangqdiq couh yawj de suenq dwg boux mij'z coih he. 7 Sojhij, faenhsou couh wnggai rox, sinq Cangqdiq dih vunz couh dwg Yaqbwzlahhanj dih lwglan. 8 Mbouj danhcij yienghneix, geijcaeux gaxgonq youq ndaw Singqgingh sij naeuz linghvaih minzcuz hih vunz vih sinq Cangqdiq hwj couh ndaej youq ndaw lwgra Cangqdiq suenq dwg mij'z coih he. Sojhij, geijcaeux Cangqdiq cix cenz gij ndei siuhsiz neix naeuz Yaqbwzlahhanj ni, naeuz: Lajmbwn sojmiz hih minzcuz, cungj dwg dajlaeng mwngz ndaej miz fuk. 9 Yiengq, ciuq yienghneix ma gangj, sinq Cangqdiq hih vunz cungj ndaej caeuq miz sinqsim dih Yaqbwzlahhanj itheij ndaej miz fuk. 10 Sojhij, famz baengh fazliz ciuq fazliz bae guh hih, cungj dwg ngaiz mang hih, aenvih ndaw Singqgingh ndaw de sij miz naeuz: Famz mbouj ciuq ndaw saw fazliz soj dingh hih moix it diuz yienghmwnq bae guh hih, couh ngaiz souh daengz mang. 11 Yiengq, ciuq luj yienghneix, couh gig cingsuj: gizsaed mij saek boux dwg baengh fazliz hwj ndaej youq ndaw lwgra Cangqdiq suenq dwg mij'z coih hih, aenvih ndaw Singqgingh ndaw de sij miz naeuz: Mij'z coih hih vunz dwg vih sinq hwj ndaej miz mingh hih. 12 Hoeng, fazliz baenjcinh caeuq sinq cungj mij gvanhaeh, dauq dwg cingq luj ndaw Singqgingh ndaw de naeuz: Siengj baengh soenhsouj fazliz hwj ndaej miz mingh hih, bietdingh ij soenhsouj fazliz ndaw de soj dingh hih hwj cij ndaej miz mingh. 13 Hoeng, Gihduz gaenq dingj gyoengqraeuz vih mbouj soenhsouj fazliz hwj ngaiz mang hih, hawj gyoengqraeuz ndaej duet ok ngaiz mang he, aenvih ndaw Singqgingh ndaw de sij naeuz: Famz ngaiz ding youq gwnz faex hih cungj dwg ngaiz mang. 14 Gihduz yienghneix guh dih muzdiz dwg ij hawj linghvaih minzcuz hih vunz ndaej dunghgoq baengh bonjfaenh de hwj ndaej daengz Cangqdiq baujcingq hawj Yaqbwzlahhanj hih fuk, hawj gyoengqraeuz gauq baengh sinq hwj ndaej Cangqdiq soj baujcingq hawj dih Hoenzsaenz lah. 15 Gak boux beixnuengx hax, gou dawz bingzseiz vunz dih saenghhoz ma beijgangj naeuz sou ni bax, couh dwg naeuz hauhnaeuz vunz song mbiengj cungj dingh ndei baujcingq le, couh mbouj ndaej caiq seizbienh gaij haem lo. 16 Caemh doxdoengz, Cangqdiq gaenq doiq Yaqbwzlahhanj caeuq gij lwglan de baujcingq lo. Yiengq wnggai cuqhiq, Singqgingh ndaw de gaenhbaenj mij sij naeuz: “Doiq gyoengq lwglan de”—mbouj dwg ceij haujlai, ceij baenx gyoengq—dauq dwg naeuz doiq boux lwglan he lah. Couh dwg Gihduz lo. 17 Gij iqswh gou dwg naeuz, Cangqdiq doiq Yaqbwzlahhanj dih baujcingq dwg youq de hawj Mohsih senhbuq fazliz dih seiqbak samcib bi gaxgonq dih baujcingq hih. Sojhij, gij fazliz neix mbouj ndaej siu gij Cangqdiq gaxgonq cix doiq Yaqbwzlahhanj soj baujcingq hih nej. 18 Yiengq, hauhnaeuz vunz gauq soenhsouj fazliz hwj cij ndaej daengz saizcanj nex, gij saizcanj neix couh mbouj dwg Cangqdiq soj baujcingq hawj hih lo. Gangj daengz Yaqbwzlahhanj soj ndaej hih saizcanj, dwg de baengh Cangqdiq dih baujcingq hwj ndaej hih lah, dwg Cangqdiq de haijliengh, baujcingq begbeg nyok hawj de hih lah. 19 Yiengq, ciuq luj yienghneix ma gangj, vihmaz ij miz Mohsih dih fazliz nej? Miz Mohsih dih fazliz dwg Cangqdiq vih vunz famh coih hwj dingh hih lah; dwg dunghgoq bouxcai Cangqdiq hawj Mohsih boux guh cungqgyan neix senhbuq hih. Gij fazliz neix daengj daengz boux Cangqdiq baujcingq ij daeuj hih boux mwnq daeuj le, couh mij'z yungh lo. 20 Yiengq, hauhnaeuz ij miz boux cungqgyan he nex, couh bietdingh ij miz lai boux lai mbiengj, hoeng, Cangqdiq cijngamq miz boux dog mbiengj dog hah. 21 Yiengq, ciuq luj yienghneix ma yawj, fazliz caeuq Cangqdiq dih baujcingq dwg doxngig lo mah? Gou naeuz hax, it di cungj mbouj dwg. Hauhnaeuz fazliz ndaej hawj vunz miz mingh nex, vunz gauq baengh soenhsouj fazliz hwj couh ndaej youq ndaw lwgra Cangqdiq suenq dwg mij'z coih hih lo. 22 Hoeng, Singqgingh ndaw de sij naeuz, sojmiz hih vunz cungj dwg ngaiz coih gaemhanh; mij saek boux naeuz mij famh coih. Sojhij, cijaeu sinq Yehsuh Gihduz, cij ndaej gij Cangqdiq soj baujcingq he. 23 Hoeng, youq gyoengqraeuz mijyaengz rox Cangqdiq hawj gyoengqraeuz sinq Yehsuh Gihduz hwj ndaej gouq cihsenz, fazliz cungj dwg guenjciq gyoengqraeuz, caemh luj guenjciq vunzfamh yienghmwnq, itcig guenj daengz Cangqdiq yienh hawj gyoengqraeuz rox gauq sinq Yehsuh Gihduz hwj couh ndaej gouq hih gij dauhleix neix. 24 Sojhij, couh dwg naeuz, fazliz couh dwg gyoengqraeuz dih lauxsae, daiq gyoengqraeuz hawj gyoengqraeuz rox Gihduz, hawj gyoengqraeuz dunghgoq sinq Gihduz hwj ndaej youq ndaw lwgra Cangqdiq suenq dwg mij'z coih he. 25 Yiengq, giqyienz seizneix gyoengqraeuz gaenq rox gauq sinq Yehsuh Gihduz hwj ndaej gouq hih gij dauhleix neix lo, fazliz couh mbouj caiq dwg gyoengqraeuz dih lauxsae lo. 26 Sojhij faenhsou cungj dwg dunghgoq sinq Yehsuh Gihduz hwj ndaej guh lwg Cangqdiq, 27 aenvih faenhsou sojmiz sijlij gvi haeuj Gihduz hih vunz cungj yienh ok Gihduz dih singqcingz, luj Gihduz doz youq gwnz ndang nwih. 28 Yiengq, giqyienz dwg yienghneix lo, couh mboujguenj Youzdaiq vunz haj cixnaeuz linghvaih minzcuz hih vunz, mboujguenj guh hoiq haj cixnaeuz swqyouz vunz, mboujguenj dwg vunzsai haj cixnaeuz dwg vunzbaz, cungj dwg doxdoengz, aenvih faenhsou dunghgoq Yehsuh Gihduz hwj doxgaep guhbaenz aen ndang he lo. 29 Cijaeu faenhsou dwg haeuj Gihduz, faenhsou couh dwg Yaqbwzlahhanj dih lwglan, couh ndaej yangjcouq Cangqdiq baujcingq hawj dih saizcanj.
1 Gij iqswh gou dwg naeuz, hauhnaeuz miz boux lwgngez he ij ndaej ciep aeu gij saizcanj de, yiengq gannaeuz boux de ndaej gij saizcanj de lah, hoeng, youq de mijyaengz maj hung baenz vunz cihsenz, de caemhdangq luj bouxhoiq yienghmwnq, mij maz gienzliz, 2 aenvih de vanzlij dwg lwgngez, yungh vunz cauqguq de, guenj de, itcig daengz boh de soj dingh hih cizgyenh, de cij miz gienz gag guenj gij saizcanj de. 3 Caemh doxdoengz, youq Gihduz mijyaengz daeuj cihsenz, gyoengqraeuz caemh luj lwgngez yienghmwnq, luj bouxhoiq yienghmwnq mbouj ndaej gag guh cawj, aenvih gyoengqraeuz itcig ngaiz aen seiqgyaiq neix hih siengjfap gaemhanh dawz. 4 Hoeng, daengj daengz mwh hab hih mwhde, Cangqdiq couh baij daeglwg dog de daeuj, couh dwg de dunghgoq hawj vunzbaz seng de he, simqciq dwg miz Mohsih fazliz guenjciq he. 5 Cangqdiq baij daeglwg de daeuj dwg vih ij cueg gij vunz miz fazliz guenjciq he, hawj gyoengqraeuz ndaej miz faenh guh gij lwg Cangqdiq. 6 Yiengq, giqyienz gyoengqraeuz ndaej guh gij lwg Cangqdiq lo, Cangqdiq couh baij gij Hoenzsaenz daeglwg de, hawj de doz youq gwnz ndang gyoengqraeuz, hawj gyoengqraeuz ndaej heuh Cangqdiq ‘ahbah, daxboh gou!’ 7 Sojhij, couh vih yienghneix, faenhsou seizneix mbouj caiq dwg guh bouxhoiq haem lo, dauq dwg guh lwg Cangqdiq lah. Yiengq, giqyienz faenhsou dwg lwg Cangqdiq vwz, Cangqdiq couh hawj faenhsou ciep aeu gij saizcanj de lo. 8 Doenghbaez faenhsou mijyaengz rox Cangqdiq cihsenz, faenhsou cungj dwg dingq doenghheij mbouj dwg caencwnz he, guh gyoengqde dih hoiq. 9 Hoeng, seizneix faenhsou gaenq rox Cangqdiq lo—vuenh gawq vah he ma naeuz, couh dwg Cangqdiq gaenq rox faenhsou lo; faenhsou vihmaz vanzlij ijsiengj dauqlaeng gaen doenghheij mij'z yungh he, guh gyoengqde dih hoiq nej? 10 Faenhsou gingqyienz vanzlij gyenhciz gij siengjfap luj bouxhoiq yienghmwnq hih, dawz moux ngoenz, moux ndwen, moux giqduq, moux bi yawjnaek dangqmaz hwj nej. 11 Couh vih yienghneix, gou yousim faenhsou raixcaix. Gou lau gou gaxgonq vah cizgyenh bae cenz ndei siuhsiz hawj faenhsou hih bienqbaenz mij'z yungh. 12 Gak boux beixnuengx hax, gou gouz faenhsou luj gou yienghmwnq mboujyungh ciuq Mohsih dih fazliz bae guh, aenvih gou caemh caeuq linghvaih minzcuz hih vunz doxdoengz, mboujyungh hawj fazliz guenjciq. Gak boux beixnuengx hax, gou ngamq cenz ndei siuhsiz hawj faenhsou hih mwhde, faenhsou mij maz doiq mbouj hwnj gou. 13 Faenhsou gaengjdingq ndaejgeiq mwh gou ngamq cenz ndei siuhsiz hawj faenhsou hih mwhde, gou miz bingh. 14 Mwhde gannaeuz gou bingh hwj hawj faenhsou roxnginh mbwq lah, hoeng, faenhsou dauq mij dwgcaengz gou yiem gou, dauqfanj ciep gou daih gou, luj daih bouxcai Cangqdiq caeuq luj daih Yehsuh Gihduz yienghmwnq. 15 Hoeng, seizneix faenhsou sojmiz yienzlaiz dih simciengz sim'angq nwjh bae lah? Gou gamj baujcingq, mwhde, cungjsuenq naeuz faenhsou vet cehra faenhsou okdaeuj hawj gou, faenhsou cungj nyienh'eiq hwx. 16 Hoeng, seizneix couh vih gou doiq faenhsou gangj lauxsaed vah hwj couh bienqbaenz faenhsou dih dizyinz lo mah? 17 Doenghheij gyaj doiq faenhsou ndei he, gyoengqde dih muzdiz dwg ijsiengj hawj faenhsou yiem gou mbouj caeuq gou, hawj faenhsou doiq gyoengqde haenjheiq lah. 18 Yiengq, hauhnaeuz miz vunz cingqcaen doiq faenhsou ndei nex, danghyienz ndei lo, cijmboujgoq gyoengqde ij gyenhciz doiq faenhsou ndei, mbouj dwg naeuz caenhgag gou youq faenhsou mwnq le cij doiq faenhsou ndei he. 19 Lwg gou hax, vihliux faenhsou, gou roxnginh bonjfaenh gou caiq luj vunzbaz seng lwg yienghmwnq cix in cix hojyouq, itcig daengz faenhsou miz gij singqcingz luj Gihduz yienghmwnq. 20 Gou ba'mboujmuengh seizneix gou ndaej bae faenhsou mwnq caeuq faenhsou youq itheij; yienghmwnq gou couh ndaej gaij gou doiq faenhsou dih gangjfap lo, aenvih gou saedsaeh mbouj rox hih ij baenzlaw doiq faenhsou lo. 21 Doenghheij nyienh'eiq hawj fazliz guenjciq hih faenhsou hax! Faenhsou naeuz gou ni, nanzdauh faenhsou mbouj rox Mohsih dih fazliz mah? 22 Ndaw de sij naeuz Yaqbwzlahhanj miz song daeglwg; daeg he dwg dahhoiq de Yaqgyaz seng he, daeg he dwg mehyah de Sajlah seng he. 23 Daeglwg dahhoiq de seng he dwg swqyienz ciuq ndangnoh seng he, hoeng, daeglwg mehyah de seng he dauq dwg baengh Cangqdiq dih baujcingq hwj seng he. 24 Song boux vunzbaz neix dwg beijgangj Cangqdiq dih song cungj dingh hih baujcingq lienz diuzgyenq. Yaqgyaz dahhoiq neix daiqbiuj Cangqdiq youq bya Sihnaiq dingh hawj gij vunz Hijswzlez hih gij baujcingq lienz diuzgyenq he; gij baujcingq lienz diuzgyenq neix couh dwg Mohsih dih fazliz. Doengh daih gajlaeng de cungj dwg fazliz dih hoiq. 25 Yaqgyaz boux vunz neix dwg beijgangj youq Ahlahbwz dih bya Sihnaiq, caemh dwg beijgangj seizneix dih Yehluqsajlaengj Singz; de caeuq gij lwg de cungj dwg hoiq he. 26 Hoeng, Sajlah de dwg daiqbiuj youq gwnzmbwn dih Yehluqsajlaengj Singz he, dwg swqyouz vunz hih, dwg daxmeh gyoengqraeuz hih. 27 Aenvih ndaw Singqgingh ndaw de sij miz naeuz: Gij vunzbaz mbouj ndaej daiqndang he, mwngz ij sim'angq; mij seng lwg ciengx lwg hih, mwngz ij angq hwj hemq goggog bae, aenvih gij vunzbaz mbouj ndaej daiqndang he miz lwg lai goq gij vunzbaz miz gvan he. 28 Gak boux beixnuengx hax, faenhsou caeuq Hijsaj doxdoengz, cungj dwg baengh Cangqdiq dih baujcingq hwj seng hih. 29 Cijmboujgoq doenghbaez boux ciuq ndangnoh seng he bwkhaih boux dunghgoq gij rengz Hoenzsaenz Cangqdiq hwj seng he. Caemh doxdoengz, seizneix doenghheij miz Mohsih dih fazliz guenjciq he couh bwkhaih faenhsou. 30 Ndaw Singqgingh ndaw de dwg baenzlawz sij naeuz nej? Ndaw de sij naeuz: Boenq dahhoiq neix caeuq daeglwg de deuz bae, aenvih daeglwg dahhoiq mbouj ndaej caeuq daeglwg mehcawj doxdoengz ndaej yangjcouq saizcanj hih. 31 Sojhij gak boux beixnuengx hax, ciuq luj yienghneix ma yawj, gyoengqraeuz mbouj dwg dahhoiq hih lwg nej, dauq dwg mehcawj hih lwg lah.
1 Gihduz vih ij hawj gyoengqraeuz ndaej swqyouz hwj de gaenq gaijfangq gyoengqraeuz lo, sojhij gyoengqraeuz ij gyenhgyez cagaenj gij swqyouz neix; gaejyungh caiq hawj guh hoiq hih aen ek neix gaemhanh gyoengqraeuz haem lo. 2 Faenhsou dingq gou, Baujloz, naeuz sou ni: hauhnaeuz faenhsou siengj dunghgoq gozlij hwj siengj hawj Cangqdiq sim'angq nex, Gihduz doiq faenhsou ma gangj couh mij maz ik lo. 3 Seizneix gou caiq doiq doenghheij vunz gozlij he naeuz: giqyienz faenhsou gozlij lo, couh bietdingh ij soenhsouj Mohsih dih sojmiz fazliz gveihdingq. 4 Faenhsou doenghheij siengj gauq baengh soenhsouj Mohsih dih fazliz hwj ndaej hawj Cangqdiq yawj faenhsou dangq dwg mij coih hih vunz, bonjfaenh faenhsou gaenq gag caeuq Gihduz doxbiek lo, mbouj ndaej Cangqdiq dih fuk lo. 5 Hoeng, gyoengqraeuz gauq baengh Hoenzsaenz Cangqdiq, baengh sinq hwj daengj daengz gyoengqraeuz soj muengh hih ndaej youq ndaw lwgra Cangqdiq suenq dwg mij coih he, 6 aenvih doiq it boux gvi haeuj Yehsuh Gihduz hih vunz ma gangj, de goz mbouj gozlij gaenhbaenj mbouj cungqyauq; ceiq cungqyauq hih dwg, de miz mbouj miz aen sim sinq Gihduz he hwj aiq vunz cij miz yungh. 7 Faenhsou doiq sinq soqlaiz cungj dwg mbouj loek hih, hoeng, seizneix miz byawz lanz faenhsou, hawj faenhsou mbouj ciuq saedsaeh bae guh nej? 8 Gou saedsaeh naeuz sou ni bax, gaengjdingq mbouj dwg boux senj faenhsou, heuh faenhsou daeuj dih Cangqdiq. 9-10 Gannaeuz gou dunghgoq bouxcawj raeuz hwj sinq faenhsou gaengjdingq caeuq gou yawjfap doxdoengz hih lah, hoeng, faenhsou ijaeu rox, “dihdi yauqmuj he couh ndaej fat baenx ngauq mbamienh.” Mboujgoq boux nyongz faenhsou hawj faenhsou sinqsim mbouj gyenhdingq hih, mboujguenj dwg bouxlawz, gaengjdingq ij ngaiz souh daengz Cangqdiq fad. 11 Gak boux beixnuengx hax, mbouj rox hih vih guxmaz, gingqyienz miz vunz luenh naeuz gou vanzlij cenz gozlij gij saeh neix. Yiengq, hauhnaeuz gou cingqcaen lij dwg cenz gozlij gij saeh neix nex, gou couh mbouj ngaiz daekcoih dawz gij vunz Youzdaiq, caemh mbouj ngaiz gyoengqde bwkhaih lo. Yiengq, ciuq luj yienghneix ma yawj, gou cenzgangj gyaq cixcib couh mbouj ngaiz daekcoih daengz Youzdaiq vunz, mbouj ngaiz souh daengz Youzdaiq vunz dih bwkhaih lo. 12 Gangj daengz doenghheij gyongz faenhsou hih vunz, gou dauq muengh bonjfaenh gyoengqde gag iem bae sat lox. 13 Gak boux beixnuengx hax, Cangqdiq senj heuh faenhsou dwg ij hawj faenhsou ndaej swqyouz, mbouj dwg naeuz ij hawj faenhsou dawz swqyouz ma dangq ndaej seizbienh guh gij ndaengndwet hih nej, dauq dwg hawj faenhsou miz aiqsim hwj doxbang lah, 14 aenvih sungj hih ma naeuz, fazliz sojmiz hih cungj dwg: Aiq vunz ij luj aiq bonjfaenh yienghmwnq. 15 Sojhij faenhsou ijaeu siujsim; hauhnaeuz faenhsou mbouj ndaej doxaiq doxbang, dauqfanj doxhangz doxciemq nex, faenhsou gaengjdingq ngaiz caezgya satsoq. 16 Sojhij, gou saedsaeh naeuz sou ni, faenhsou ij ciuq Hoenzsaenz Cangqdiq haenj hih yienghmwnq bae guh; yienghneix cij mbouj ngaiz ciuq ndangnoh bonjfaenh yienghmwnq siengjmuengh bae guh, 17 aenvih ndangnoh bonjfaenh hih siengjmuengh caeuq Hoenzsaenz Cangqdiq dwg doxngig hih, Hoenzsaenz Cangqdiq caeuq ndangnoh dih siengjmuengh caemh dwg doxngig hih. Song cungj neix dwg doxdingj doxngig hih, dwg hawj faenhsou mbouj ndaej guh gij faenhsou siengj guh hih. 18 Hoeng, hauhnaeuz Hoenzsaenz Cangqdiq daiq faenhsou son faenhsou, faenhsou couh mbouj ngaiz souh daengz Mohsih dih fazliz guenjciq lo. 19 Ciuq vunz dih ndangnoh siengjmuengh bae guh hih mij maz ngeiz, gaengjdingq ngaiz guh doenghgij yalw doegsieb he, couh luj ndaengndwet hah, guhyoux hah, guh doenghgij gangj mbouj ndaej ok bak he hah, 20 bwiz you hah, guh sien doeng loengh sae loengh hah, haemzcaeuz hah, doxdaeuq doxceng hah, dwgcaengz hah, aeuqheiq hah, caenh rox daengz bonjfaenh mbouj rox daengz vunz hah, mbouj doxndei faen banghbaij hah, 21 rahoengz rahwngq hah, gw laeuj fiz hah, gwgw angqangq caeuq sojmiz luj doenghgij saeh neix hih hah. Gangj daengz doenghgij saeh neix, gou doenghbaez naeuz faenhsou goq, seizneix gou vanzlij caiq naeuz faenhsou, guh doenghgij saeh neix hih vunz gaengjdingq mbouj ndaej gaep haeuj guek Cangqdiq. 22 Hoeng, hauhnaeuz faenhsou hawj Hoenzsaenz Cangqdiq guenjleix faenhsou dih saenghhoz nex, faenhsou couh ndaej giet gij mak gyaeugyaeu ndeindei he lo. Gij mak neix couh dwg aiq, vuenheij, hozbingz, naenxsim, sim'unq, lauxsaed, simndei simsoh, 23 soh semxsemh, rox gag haed bonjfaenh. Luj doenghgij neix, coengzlaiz mbouj miz guxmaz fazliz gimqcij goq. 24 Famz dwg haeuj Yehsuh Gihduz hih vunz hih gaenq dawz doenghheij mbouj ndei hih siengjfap, ndangnoh caeuq ndangnoh hih siengjmuengh cungj caez ding hwnj gwnz gyaq cixcib bae lo. 25 Yiengq, hauhnaeuz gyoengqraeuz dwg baengh Hoenzsaenz Cangqdiq hwj lix hih, couh ij wnggai ciuq Hoenzsaenz Cangqdiq haenj hih yienghmwnq bae guh. 26 Mbouj ndaej rasang naemqnaeuz bonjfaenh ak raixcaix, mbouj ndaej doxra congxmbongq ma gik vunz, mbouj ndaej doxrahoengz.
1 Gak boux beixnuengx hax, hauhnaeuz miz vunz mbouj siujsim ngaiz guh loek famh coih hih, faenhsou doenghheij ndaej hawj Hoenzsaenz Cangqdiq haenjheiq hih vunz couh ij wnggai swnh semxsemh hwj mbouj yawj de ngawz, bang de gaij goqma. Hoeng, ijaeu siujsim, mienxndaej bonjfaenh faenhsou caemh ngaiz famh luj de. 2 Faenhsou miz maz nanz, ijaeu doxbang; yienghneix couh dwg soenhsouj Gihduz dih fazliz lo. 3 Yiengq, hauhnaeuz miz vunz naemqnaeuz bonjfaenh ak raixcaix rem raixcaix, mbouj haenj yienghneix hih, boux de couh dwg gag yaeuh bonjfaenh; gizsaed de it di cungj mbouj suenq guxmaz. 4 Faenhsou gak vunz cungj ij wnggai gag gyenjcaz bonjfaenh. Hauhnaeuz bonjfaenh guh ndaej ndei, wnggai haenh hih, bonjfaenh gag haenh couh ndaej lo. Mboujyungh caeuq vunz doxbeij, cixnaeuz youq dangqnaj vunz haenh nej, 5 aenvih gak vunz soj guh hih, cungj ij wngdang gag rap. 6 Faenhsou doenghheij miz lauxsae son gij saedsaeh Cangqdiq hih, faenhsou miz gijmaz ndei hih cungj ij wnggai faen hawj gij lauxsae son faenhsou he. 7 Hauhnaeuz faenhsou guh mbouj daengz gou gwnz neix daez daengz hih, couh gaejyungh gag yaeuh bonjfaenh lo; faenhsou ndaem hih dwg gijmaz, sou haeujma hih caemh dwg gijmaz—coemx mbouj ndaej Cangqdiq hih nej. 8 Doenghheij vih ij swnh bonjfaenh hih ndangnoh hwj dajndaem hih, de caemh dwg daj ndangnoh sou ndaej rai hih; doenghheij swnh Hoenzsaenz Cangqdiq hwj dajndaem hih, de gaengjdingq ndaej daj Hoenzsaenz Cangqdiq sou ndaej seiqseiz lix hih. 9 Sojhij, gyoengqraeuz gaejyungh mbwq guh ndeisaeh; hauhnaeuz gyoengqraeuz mbouj doeknaiq, daengz mwhde couh gaengjdingq sou ndaej. 10 Sojhij, cijaeu gyoengqraeuz miz gihveiq, couh wnggai guh ndeisaeh, bang vunz, dwzbez dwg bang doenghheij caeuq gyoengqraeuz doxdoengz dwg sinq Gihduz he. 11 Faenhsou yawj hux, doenghheij saw hunghung neix dwg gou caenfawz sij hawj faenhsou hih. 12 Doenghheij ep faenhsou gozlij hih, gyoengqde dwg siengj youq ndangnoh vunz yawj ndaej raen he, hawj vunz haenh hih. Gyoengqde mbouj gamj naeuz cijaeu sinq baengh Gihduz dih gyaq cixcib couh ndaej gouq lo, aenvih gyoengqde lau ngaiz souh daengz bwkhaih. 13 Gizsaed doenghheij gaenq gozlij goq hih, gyoengqde caemh mbouj soenhsouj fazliz nej. Gyoengqde siengj hawj faenhsou gozlij, cijmboujgoq dwg siengj hawj vunz haenh gyoengqde hwj lah. 14 Gou nej, gou caenhgag cawzok bouxcawj raeuz Yehsuh Gihduz dih gyaq cixcib wnggai haenh, sojmiz hih gou cungj mbouj haenh, aenvih dunghgoq gyaq cixcib hwj aen seiqgyaiq neix doiq gou ma gangj gaenq ding rai youq gwnz gyaq cixcib lo; gou, doiq aen seiqgyaiq neix ma gangj, caemh gaenq ding rai youq gwnz gyaq cixcib lo. 15 Sojhij, gou naeuz gyoengqraeuz goz mbouj gozlij cungj mbouj youqgaenj; ceiq youqgaenj hih dwg gyoengqraeuz dwg mbouj dwg boux vunz moq saen cauh he. 16 Famz ciuq gij dauhleix neix bae guh hih vunz couh dwg cingqcaen gij vunz Hijswzlez lo; muengh Cangqdiq hawj gyoengqde bingzan, hojsik gyoengqde. 17 Daj seizneix hwnj, byawz cungj mboujcwnj daeuj gauxca gou, aenvih gwnz ndang gou vih Yehsuh Gihduz hwj souh daengz bwkhaih, caemh miz baksieng. 18 Gak boux beixnuengx hax, muengh bouxcawj raeuz Yehsuh Gihduz siengzseiz doiq faenhsou daixgya haijliengh! Ahmaenz.
1 Gou dwg Baujloz, dwg ciuq gij cawjeiq Cangqdiq daeuj guh boux dwzbaijyienz Yehsuh Gihduz he. Gou sij saenq hawj youq Hijfuzsoj Singz hih gij vunz Cangqdiq, couh dwg doenghheij vunz lauxlaux saedsaed gaen Yehsuh Gihduz mbouj bienq sim he. 2 Muengh Cangqdiq Bohmbwn caeuq bouxcawj raeuz Yehsuh Gihduz doiq faenhsou haijliengh, hawj faenhsou bingzan! 3 Docih bouxcawj raeuz Yehsuh Gihduz dih Cangqdiq daxboh; de dunghgoq Yehsuh Gihduz hwj dawz gwnzmbwn gak yiengh hih fuk nyok hawj gyoengqraeuz. 4 De simqciq youq mijyaengz cauh mbwn cauh deih cihsenz cix aiq gyoengqraeuz cix dunghgoq Yehsuh Gihduz hwj senj gyoengqraeuz, hawj gyoengqraeuz ndaej youq ndaw lwgra de bienqbaenz boux mij'z coih he, mij gijmaz ndaej diudik he. 5 Caiq aenvih de aiq gyoengqraeuz, couh ciuq gij cawjeiq bonjfaenh de haenjheiq he hwj senqsi cix dingh ndei ij dunghgoq Yehsuh Gihduz hwj hawj gyoengqraeuz ndaej gvi hawj de, guh gij lwg de. 6 De yienghneix dunghgoq de ceiq aiq dih daeglwg dog de hwj begbeg nyok aiq hawj gyoengqraeuz, hawj gyoengqraeuz haenh de, haenh de haijliengh raixcaix. 7 De baenxlai aiq baenxlai haijliengh, simqciq sijndaej daeglwg dog de vih cueg gij coih gyoengqraeuz hwj riuz lwed. 8 De yienghneix doiq gyoengqraeuz, cungj dwg de ciuq bonjfaenh de dih cawjeiq, yungh gij coengjmingz de 9 ma hawj gyoengqraeuz rox de gaenq senqsi cix ij dunghgoq Yehsuh Gihduz bae guh gij vunz ngeix mbouj daengz he. 10 Gij cawjeiq de dwg ciuq de dih giqvaq hih: daengj daengz de soj dingh hih mwhde baex daengz he, gwnzmbwn lajdeih sojmiz hih cungj gvi hawj bouxcawj raeuz Yehsuh Gihduz liux, youz de guenjleix. 11 Gyoengqraeuz caemh ndaej baengh Yehsuh Gihduz hwj ndaej guh gij lwg de; gij neix cungj dwg boux ciuq gij cawjeiq bonjfaenh de soj giqvaq he ma guh sojmiz hih saeh he dih Cangqdiq he senqsi cix dingh ndei giqvaq he. 12 Gij cawjeiq de dwg ij hawj gyoengqraeuz doenghheij sien sinq Gihduz hwj ndaej miz muengh hih vunz haenh Cangqdiq najrongh. 13 Seizneix faenhsou linghvaih minzcuz hih vunz caemh ndaej dingq daengz gij saedsaeh Cangqdiq lo, couh dwg gij ndei siuhsiz Cangqdiq hawj faenhsou ndaej gouq he ndaej hawj faenhsou sinq Gihduz he. Yiengq, giqyienz faenhsou sinq Gihduz lo, Cangqdiq couh dawz bonjfaenh de soj baujcingq hih Hoenzsaenz de nyok hawj faenhsou, couh luj youq gwnz ndang faenhsou gaiqcangh guh geiqhauh, cingqmingz de gaenq cueg faenhsou ma gvi hawj de he lo. 14 Gij Hoenzsaenz neix dwg Cangqdiq baujcingq baezneix hawj gij vunz de hih baengzgawq, daengj daengz mwh gij vunz de ndaej cueg okma hih mwhde cij hawj. De yienghneix guh dwg ij hawj gij vunz de haenh de najrongh. 15 Daj gou rox daengz faenhsou doiq bouxcawj raeuz Yehsuh Gihduz dih sinqsim gyenhdingq caeuq doiq gij vunz Cangqdiq miz aiqsim le, 16 gou couh vih faenhsou hwj mbouj dingz hih haenh Cangqdiq, gouzhaenh de hih mwhde siengzseiz dwen daengz faenhsou, 17 gouz bouxcawj raeuz Yehsuh Gihduz dih Cangqdiq, najrongh dih Bohmbwn, soengq gij Hoenzsaenz hawj faenhsou ndaej coengjmingz caeuq ndaej miz ciqsiz he hwj hawj faenhsou ndaej engqgya rox de. 18 Caemh gouz Cangqdiq hawj aen sim faenhsou singqsag hwnjdaeuj, hawj faenhsou ndaej rox de senjdingh faenhsou daeuj dwg baenxlai miz muengh hih, de soj baujcingq hawj gij vunz de hih dwg miz geijlai dih fungcuk hih. 19 Gou caemh gouz de hawj faenhsou ndaej rox daengz de doiq gyoengqraeuz doenghheij sinq de hih vunz soj guh hih baenxlai veijdaq baenxlai rengz. Gij rengz gij veijdaq neix 20 ndaej hawj Gihduz daj rai ndaej dauqlix, vanzlij ndaej hawj Gihduz ndaej youq gwnzmbwn naengh youq baixgvaz de 21 hawj Gihduz ndaej ak goq sojmiz hih, ndaej guenj gienz cix ndaej, rengz cix ndaej, mboujguenj byawz cix ndaej, mboujguenj seizneix cix ndaej, baezneix cix ndaej, hawj de dungjdungj ak goq daengxheij. 22 Cangqdiq vanzlij hawj sojmiz hih cungj gvi hawj de, hawj de dungjguenj, hawj de guh gyauqveiq hih daeuzdaeuz. 23 Gyauqveiq dwg aen ndang de; baenx aen gyauqveiq cungj dwg de guenj, luj de youq gwnzmbwn lajdeih yienghmwnq guenj liuxliux.
1 Doenghbaez faenhsou dwg rai hih, aenvih faenhsou famh coih, mbouj dingq gij vah Cangqdiq. 2 Mwhde, faenhsou dwg gaen gij vunz aen seiqgyaiq neix guh saeh hih, dwg dingq aen seiqgyaiq neix gaem gienz dang daeuz dih fangzvuengz hih, couh dwg seizneix yungx doenghheij vunz mbouj dingq gij vah Cangqdiq hih Sajdanq lo. 3 Gizsaed gyoengqraeuz doenghbaez bouxboux cungj dwg caeuq gyoengqde doxdoengz, ciuq aen ndangnoh bonjfaenh siengjmuengh, siengj guh gijmaz couh guh gijmaz. Sojhij gyoengqraeuz caeuq gizdah vunz mij maz faenbied, baenjsingq cungj dwg doegsieb he, cungj dwg ij ngaiz souh daengz Cangqdiq fad. 4 Hoeng, hojsik vunz dih Cangqdiq, de baenxlai aiq gyoengqraeuz, 5 daiqlienz youq mwh gyoengqraeuz famh coih suenq dwg vunzrai hih mwhde, de cungj hawj gyoengqraeuz caeuq Yehsuh Gihduz itheij dauqlix—faenhsou ndaej gouq dwg aenvih de haijliengh. 6 De gaenq hawj gyoengqraeuz caeuq Gihduz itheij dauqlix, itheij naengh youq gwnzmbwn, itheij ndaej gaem gienz. 7 De yienghneix guh dwg siengj hawj gyoengqraeuz seiqseiq daihdaih cungj rox de dunghgoq Yehsuh Gihduz hwj doiq gyoengqraeuz baenxlai haijliengh, baenxlai aiq. 8 Faenhsou ndaej gouq dwg vih Cangqdiq dih haijliengh hwj faenhsou sinq de cij ndaej gouq; mbouj dwg faenhsou gag ndaej law, dauq dwg Cangqdiq begbeg nyok hawj hih lah; 9 caemh mbouj dwg vih faenhsou soj guh hih, yienghneix faenhsou couh mbouj ndaej gag haenh bonjfaenh lo. 10 Hoeng, gyoengqraeuz dwg Cangqdiq dwzbez saeqsim cauh okdaeuj he; de dunghgoq Yehsuh Gihduz daeuj hawj gyoengqraeuz ndaej miz mingh, muzdiz dwg ij hawj gyoengqraeuz guh gij ndeisaeh de senqsi cix giqvaq ndei he. 11 Sojhij faenhsou wnggai ndaejgeiq, faenhsou seng okdaeuj couh mbouj dwg Youzdaiq vunz. (Doenghbaez doenghheij gag naeuz bonjfaenh gaenq gozlij hih Youzdaiq vunz, gyoengqde yawj faenhsou dangq dwg mij gozlij goq hih vunz; gizsaed doenghheij Youzdaiq vunz gozlij goq he cijmboujgoq dwg vunz aeu fawz ma gozlij hih lah, gaenhbaenj mbouj ndaej hawj boux de guh daengz hab'eiq habhoz Cangqdiq.) 12 Mwhmwnq faenhsou caeuq Gihduz mij gvanhaeh, caemh mbouj ndaej gaep haeuj gij vunz Hijswzlez, doiq Cangqdiq dih gij baujcingq lienz diuzgyenq mwnq caemh mij rox saek di, mbouj miz Cangqdiq mbouj rox Cangqdiq, caenhgag rox goq mij'z muengh dih saenghhoz lah. 13 Mwhmwnq faenhsou caeuq gij vunz Cangqdiq mij maz gvanhaeh, hoeng, seizneix faenhsou dauq ndaej baengh Gihduz riuz lwed hwj ndaej gaep haeuj gij vunz de, 14 aenvih Yehsuh Gihduz couh dwg hawj gyoengqraeuz ndaej hozbingz he. De vih ij cek fuk ciengz hawj vunz doxhaemzcaeuz mwnq hwj hawj gij vunz Youzdaiq caeuq lingh aen minzcuz hih vunz ndaej doxhuz, 15 de couh aeu rai ma cawz Mohsih dih fazliz gveihdingq. De yienghneix guh dwg ij hawj Youzdaiq vunz caeuq daixlingh aen minzcuz hih vunz ndaej youq ndaw lwgra Cangqdiq bienqbaenz cungj vunz he, caemh ndaej doxhuz. 16 De dunghgoq ding rai youq gwnz gyaq cixcib hwj ndaej hawj song mbiengj doxhaemzcaeuz hih ndaej bienqbaenz buek vunz he, ndaej luj aen ndang he, ndaej caeuq Cangqdiq doxhuz. 17 De daeuj cenz gij ndei siuhsiz hawj faenhsou doenghheij linghvaih minzcuz mbouj rox Cangqdiq he ndaej hozbingz, caemh hawj gyoengqraeuz doenghheij rox Cangqdiq hih Hijswzlez vunz ndaej hozbingz. 18 Vih de hwj seizneix gyoengqraeuz baenjlaiz song cungj mbouj doengz hih vunz cungj ndaej dunghgoq doengz boux Hoenzsaenz he hwj ndaej caeuq Cangqdiq Bohmbwn miz gvanhaeh. 19 Yiengq, ciuq yienghneix ma yawj, faenhsou couh mbouj caiq dwg linghvaih minzcuz hih vunz caeuq dwg bouxhek haem lo, dauq dwg caeuq gij vunz Cangqdiq caemh aen guek he, dwg caeuq Cangqdiq caemh ranz vunz he. 20 Ranz neix cijyauq dwg hij dwzbaijyienz caeuq boux boux cenz gij vah Cangqdiq ma guh giek, hij Yehsuh Gihduz bonjfaenh de ma guh gangqloz; 21 baenx aen ranz cungj dwg baengh de cij ndaej doxlienz hwnjdaeuj, cij ndaej menhmenh hwnq hwnjdaeuj guhbaenz aen ranz Cangqdiq he. 22 Faenhsou linghvaih minzcuz hih vunz caemh dwg aen ranz neix hih faenh he, couh dwg Hoenzsaenz Cangqdiq youq he.
1 Couh vih yienghneix, gou Baujloz, vih cenz Yehsuh Gihduz dih ndei siuhsiz hawj faenhsou doenghheij linghvaih minzcuz he hwj ngaiz gyaeng hwnjdaeuj. 2 Gou naemj faenhsou gaengjdingq rox, Cangqdiq vih faenhsou hwj, de dunghgoq gou daeuj hawj faenhsou rox de doiq faenhsou haijliengh. 3 De naeuz gou ni, hawj gou rox de dih giqvaq miqmiz; gou gwnz neix gaenq sij di he dwen naeuz sou ni lo. 4 Faenhsou yawj le, couh rox gou baenzlaw lijgaij Gihduz dih giqvaq miqmiz lo. 5 Doenghbaez Cangqdiq mij hawj saek boux rox gij giqvaq miqmiz neix goq, hoeng, seizneix de dunghgoq Hoenzsaenz bonjfaenh de hwj yienh hawj gij dwzbaijyienz de caeuq boux cenz gij vah de rox. 6 Gij giqvaq miqmiz neix couh dwg sinq gij ndei siuhsiz Cangqdiq hih linghvaih minzcuz hih vunz caeuq Youzdaiq vunz cungj ndaej doxdoengz ndaej guh gij lwg Cangqdiq, mbouj faen mwngz faen gou, caemh luj aen ndang he, dunghgoq Yehsuh Gihduz hwj ndaej ciep aeu Cangqdiq soj baujcingq he. 7 Aenvih Cangqdiq doiq gou haijliengh, de dunghgoq bonjfaenh de dih akak rengzrengz hwj hawj gou ndaej guh bouxhoiq cenz gij ndei siuhsiz de. 8 Gannaeuz gou youq ndaw gij vunz Cangqdiq ndaw de dwg boux ceiq yaqyuij ceiq yawj mbouj hwnj rwz he lah, hoeng, gou gingqyienz ndaej daengz de dih aiq, ndaej gij gienz neix, hawj gou ndaej naeuz linghvaih minzcuz hih vunz ni gvanhhih Gihduz hih hawj vunz liuh mbouj daengz hih baenxlai dijbauj hih, 9 caeuq hawj sojmiz hih vunz cungj rox Cangqdiq baenzlawz hengz gij giqvaq miqmiz bonjfaenh de. Gij giqvaq neix, daj doenghbaez cauh gwnzmbwn lajdeih sojmiz hih, Cangqdiq cix dawz gij giqvaq miqmiz neix yo hwnjdaeuj mbouj yienh hawj vunz rox he, 10 muzdiz dwg ij dunghgoq seizneix hih gyauqveiq, hawj doenghheij youq gwnzmbwn gaem gienz dang ak hih rox Cangqdiq baenxlai coengjmingz. 11 Cangqdiq dwg ciuq gij cawjeiq bonjfaenh de yungjyenj mbouj rox bienq he ma yienghneix giqvaq hih; gij giqvaq neix dwg dingh ndei ij dunghgoq bouxcawj raeuz Yehsuh Gihduz ma yienh okdaeuj hih. 12 Gyoengqraeuz dwg dunghgoq sinq Yehsuh Gihduz, baengh Yehsuh Gihduz hwj mbouj you mbouj heiq hih bae daengz Cangqdiq mwnq. 13 Sojhij, gou gouz faenhsou gaejyungh vih gou vih faenhsou ngaiz souh nanh hwj doeknaiq, dauq ij vih gou souh nanh hwj roxnginh najrongh cij deng. 14-15 Sojhij gou gvih roengzbae bang faenhsou gouzcauh gwnzmbwn lajdeih gak gya gak cuz dih Cangqdiq Bohmbwn. 16 Gou gouz de, muengh de yungh gij rongh sagsag yungjyenj veijdaq de dunghgoq Hoenzsaenz bonjfaenh de hawj faenhsou miz rengz hwj hawj faenhsou gyenhdingq hwnjdaeuj. 17 Gou muengh Gihduz vih faenhsou sinq de hwj caeuq faenhsou youq, hawj faenhsou miz aiq luj miz rag yienghmwnq youq ndaw sim faenhsou gaenj dwtdwt, 18 hawj faenhsou ndaej caeuq sojmiz gij vunz Cangqdiq cungj ndaej rox Gihduz dih aiq dwg baenxlai dih haijliengh, baenxlai dih veijdaq, 19 hawj faenhsou ndaej rox Gihduz dih aiq cauhgoq vunz ndaej rox hih vanzlij veijdaq, yienghneix couh ndaej hawj gij singqheiq faenhsou ndaej luj gij singqheiq Cangqdiq liuxliux. 20 Muengh boux miz bonjsaeh cauhgoq gyoengqraeuz soj siengj soj gouz hih yienh youq laeng gyoengqraeuz dih Cangqdiq, 21 muengh de youq gyauqveiq youq Yehsuh Gihduz mwnq seiqseiq daihdaih yungjyungj yenjyenj najrongh! Ahmaenz.
1 Gou vih swqhaeuh bouxcawj raeuz hwj ngaiz gyaeng hwnjdaeuj he, sojhij gou gienq faenhsou: giqyienz Cangqdiq senj faenhsou, faenhsou couh ij guh gij hab'eiq habhoz Cangqdiq he. 2 Mbouj ndaej gag naemqnaeuz bonjfaenh ak raixcaix he, ij soh semxsemh, ij naenxsim, ij rox doxnyiengh doxaiq, 3 ij doxhuz doxlaizvangj, ij miz sim baux ndei Hoenzsaenz Cangqdiq nyok hawj hih doxhuz luj aen ndang he, 4 aenvih aen ndang, caenhgag miz aen ndang dog, Hoenzsaenz, caenhgag miz Hoenzsaenz dog, cingq luj Cangqdiq senj faenhsou daeuj hawj faenhsou ndaej doxdoengz muengh cungj he. 5 Gyoengqraeuz caenhgag miz bouxcawj dog, caemh dwg caenhgag sinq cungj he, caemh caenhgag sijlij cungj he. 6 Gyoengqraeuz caemh caenhgag miz boux Cangqdiq dog, de couh dwg daxboh lajmbwn sojmiz hih vunz he, de dungjguenj sojmiz hih, yungh sojmiz hih, dauqcawq cungj youq hih. 7 Hoeng, mbouj dwg naeuz yienghneix, faenhsou gangj vah guh saeh cungj ij dwg doxdoengz, aenvih gyoengqraeuz bouxboux cungj dwg ciuq Gihduz soj gyezdingq hih ndaej mbouj doengz hih caiz hih. 8 Sojhij, cingq luj ndaw Singqgingh ndaw de soj sij naeuz hih: De swng hwnjbae hih mwhde, gam baenx gyoengq vunz hwnj bae, dawz gak cungj caiz dij he nyok hawj vunz. 9 Yiengq, giqyienz naeuz de swng hwnjbae vwz, de gaengjdingq gaenq sien roengz lajmbwn daeuj lo. 10 Roengz lajmbwn daeuj hih couh dwg swng hwnj mbwn bae hih boux mwnq lo; de yienghneix guh dwg vih de ndaej youq gwnzmbwn lajdeih guenj liuxliux. 11 De nyok hawj vunz hih caiz mbouj doxdoengz: miz hih ndaej guh dwzbaijyienz, miz hih ndaej guh boux boux cenz gij vah Cangqdiq he, miz hih ndaej guh boux cenzgangj gij ndei siuhsiz de he, vanzlij miz hih ndaej guh boux gyauqveiq lingjdauj caeuq guh lauxsae son gij saedsaeh de he; 12 muzdiz dwg ij cwnjbiq gij vunz de, hawj gij vunz de ndaej guh gij hong de, ndaej hawj gyauqveiq yied ngoenz yied giengz. 13 Yienghneix daengj daengz gyoengqraeuz daixgya cungj ndaej rox daeglwg Cangqdiq, ndaej rox gij saedsaeh Cangqdiq, ndaej doxhuz doxgaep guh aen gyauqveiq he hwj ndaej guh hab'eiq habhoz Cangqdiq hih vunz, ndaej luj Gihduz yienghmwnq mij maz ndaej diudik he. 14 Daengz mwhmwnq, gyoengqraeuz couh mbouj caiq luj lwgngez yienghmwnq mbouj rox faenbied gijmaz hwj dingq daengz doenghgij vunz gyaujvaz he sauqyauz gijmaz couh sinq gijmaz he lo, caemh mbouj caiq sim mbouj dingh hwj luj vunz youq ndaw bohlangq yienghmwnq rumz ci hwj fan foedfoed bae lo. 15 Dauqfanj, gyoengqraeuz ij wnggai miz aen sim aiq vunz he hwj gangj lauxsaed vah he; mboujguenj guh gijmaz, cungj ij yied guh yied ndei hwj ndaej luj Gihduz, gyauqveiq dih daeuzdaeuz. 16 Gihduz dwg ndaek raeuj gyauqveiq; gyauqveiq dwg aen ndang Gihduz. Aen ndang neix dwg baengh gak mwnq gvanhcez gak diuz nginz doxciep hwnjdaeuj baenz aen ndang he, gag mwnq gag miz de dih yunghfap, sojmiz hih cungj ndaej bang aen ndang neix maj hung hwnjdaeuj, hawj baenx aen ndang cungj yienh ok miz aiq he. 17 Sojhij gou hij bouxcawj raeuz dih mingzhiq ma saedsaeh naeuz sou ni, faenhsou goq saedceij mbouj ndaej caiq luj doenghheij mij rox Cangqdiq mij nginh Cangqdiq hih yienghmwnq naemqnaeuz bonjfaenh cungj rox raixcaix he lo. 18 Doenghheij vunz naemqnaeuz bonjfaenh cungj rox raixcaix he, gizsaed gyoengqde gijmaz cungj mbouj rox, aenvih gyoengqde simgyeng, sojhij Cangqdiq nyok hawj vunz miz mingh hih, gyoengqde mij'z faenh. 19 Aen sim gyoengqde mazmwnh, siengj guh gijmaz couh guh gijmaz, cij rox guh doenghgij ndaengndwet hawj vunz gangj mbouj ndaej ok bak he. 20 Hoeng, faenhsou dajlaeng Gihduz soj hag hih dauq mbouj dwg yienghneix. 21 Hauhnaeuz faenhsou dingq goq gvanhhih Gihduz hih, caemh hag de soj son hih saedsaeh (de couh dwg saedsaeh), 22 couh ij duet ok gaxgonq faenhsou mij rox mij nginh Cangqdiq soj guh hih, aenvih mij rox Cangqdiq mij nginh Cangqdiq hih vunz dwg vih bonjfaenh dih siengjmuengh siengj guh gijmaz couh guh gijmaz hwj menhmenh bienq vaih hih. 23 Faenhsou ij gaij gij singqcingz faenhsou, 24 caemh ij guh vunz moq, luj daenj buh moq; boux vunz moq neix dwg Cangqdiq ciuq gij saeksiengq bonjfaenh de ma cauh he, hawj boux de youq ndaw lwgra de suenq dwg boux mij'z coih he, ndaej ciuq gij saedsaeh de ma guh gij vunz de he. 25 Sojhij, faenhsou mbouj ndaej gangj gyajvah; daixgya cungj ij gangj lauxsaed vah, aenvih gyoengqraeuz cungj dwg doxgaep hwnjdaeuj guhbaenz aen ndang he. 26 Hauhnaeuz faenhsou aeuqheiq nex, mbouj ndaej vih aeuqheiq hwj famh coih, caemh mbouj ndaej aeuqheiq baenxngoenz, 27 mienxndaej hawj fangzvuengz miz gihveiq iu faenhsou famh coih. 28 Gaxgonq guxcaeg hih, seizneix mbouj wnggai caiq guxcaeg haem lo; wnggai gauq baj fawz bonjfaenh guh cingqdangq miz yungh hih saeh, yienghneix couh ndaej miz lai hwj ndaej bang vunz lo. 29 Mbouj ndaej gangj gij vah ya'mboujlw he; wnggai gangj gij vah ndaej bang vunz doiq vunz miz ik he. 30 Mbouj ndaej hawj Hoenzsaenz Cangqdiq siengsim, aenvih gij Hoenzsaenz neix dwg cingqmingz faenhsou dwg gvi haeuj Cangqdiq he; Cangqdiq nyok Hoenzsaenz hawj faenhsou, couh dwg cingqmingz Cangqdiq ij youq hab hih mwhde cueg faenhsou he. 31 Mbouj ndaej simdoeg, dwgcaengz, aeuqheiq, doxnauh, bangjlaih caeuq sojmiz doegdoeg siebsieb he, 32 dauq ij doxswnh semxsemx, doxhojsik, doxnyiuz, cingq luj Cangqdiq vih Gihduz hwj nyiuz faenhsou yienghmwnq.
1 Faenhsou dwg Cangqdiq soj aiq hih lwg, sojhij faenhsou wnggai hag de. 2 Doiq vunz guh saeh caemh ij miz aen sim aiq vunz he, cingq luj Gihduz aiq raeuz yienghmwnq; de sijndaej diuz mingh bonjfaenh, aeu ma guh gij rang fwtfwt he hwj bwiz Cangqdiq. 3 Hoeng, doenghgij ndaengndwet, doenghgij hawj vunz roxnginh saetnaj saetnyaenq, damsim hih, faenhsou cungj mbouj ndaej guh; mbouj danhcij naeuz mbouj ndaej guh, daiqlienz gij saeh hawj vunz ngeiz he faenhsou cungj mbouj ndaej guh. Yienghneix cij hab ndaej guh gij vunz Cangqdiq. 4 Doenghgij vah ndwet, vah ngawz, vah lengxriu he cungj mbouj ndaej gangj, dauq ij gangj gij vah docih Cangqdiq he, 5 aenvih faenhsou cingqcaen rox, guh doenghgij ndaengndwet, doenghgij hawj vunz roxnginh saetnaj saetnyaenq, damsim he (damsim couh dangq dwg baiq you) gaengjdingq mbouj ndaej guh gij vunz Gihduz caeuq guh gij vunz Cangqdiq. 6 Gaejyungh ngaiz doenghheij gangj vah rumz vah rengx he yaeuh; Cangqdiq cingq vih doenghgij saeh neix hwj aeuqheiq doenghheij vunz mbouj dingq de he. 7 Sojhij, faenhsou mbouj ndaej caeuq doenghheij vunz neix guh doih. 8 Doenghbaez faenhsou simndaem, mbouj rox bouxcawj raeuz, hoeng, seizneix faenhsou sinq bouxcawj raeuz; bouxcawj raeuz couh ciuq rongh aen sim faenhsou. Yiengq faenhsou guh saeh doiq vunz couh ij wnggai boiqndaej youq ndaw lwgra bouxcawj raeuz dwg rongh he cij deng. 9 (Couh dwg naeuz rongh ndaej hawj vunz miz aen sim soh he, ndaej hawj vunz ndwn ndaej cingq, ndaej hawj vunz lauxsaed.) 10 Faenhsou caemh wnggai rox faenbied gijmaz dwg bouxcawj raeuz haenjheiq he. 11 Doenghheij mij'z ik, doegsieb, simndaem he, faenhsou mbouj ndaej gaepfaenh haeuj bae; mbouj danhcij naeuz mbouj ndaej gaepfaenh haeuj bae, vanzlij ij byoq gij de okdaeuj, 12 aenvih gyoengqde youq boihlaeng soj guh hih, daiqlienz dwen daengz cungj raen roxnginh saetnyaenq. 13 Mboujguenj gijmaz, ngaiz ciuq rongh le cungj dwg loh okdaeuj liux lo, aenvih sojmiz ndaej yienh okdaeuj hih couh dwg rongh. 14 Sojhij couh miz naeuz: “Ninz ralaep hih vunz, singj hwnjdaeuj bax! Vaiqvaiq daj rai dauqlix bax! Gihduz ij ciuq rongh hawj mwngz lo.” 15 Sojhij faenhsou doiq vunz guh saeh cungj ijaeu siujsim; mbouj ndaej luj vunz ngawz yienghmwnq, dauq ij luj vunz coengjmingz yienghmwnq, 16 ij cagaenj cizgyenh, mbouj ndaej langqfeiq, aenvih seiqgan seizneix daiq doegsieb lai lo. 17 Couh vih yienghneix, faenhsou caemh mbouj ndaej guh vunz mazmwnh, dauq ij guh vunz rox gij cawjeiq Cangqdiq he. 18 Faenhsou caemh mbouj ndaej gw laeuj fiz—gw laeuj fiz hawj vunz bienq ya mbouj rox nyaenq—dauq ij hawj Hoenzsaenz Cangqdiq doz youq gwnz ndang faenhsou hwj rim bae. 19 Faenhsou wnggai caensim ciengq gij go ndaw Singqgingh, gij go haenh Cangqdiq caeuq ciengq Hoenzsaenz Cangqdiq hawj raeuz angq hwj haenh hih gij go he ma doxgujliq. 20 Mboujguenj guxmaz, faenhsou cungj ij hij gij mingzhiq bouxcawj raeuz Yehsuh Gihduz ma docih Cangqdiq, Bohmbwn raeuz. 21 Vanzlij miz, faenhsou caemh ij wnggai miz aen sim yawjnaek Gihduz he hwj doxdingq, doxnyiengh. 22 Gangj daengz guh mehyah, guh mehyah hih ijaeu dingq goeng gojyez bonjfaenh, caemh luj dingq Yehsuh bouxcawj raeuz yienghmwnq, 23 aenvih goengjgvan dwg mehyah hih raeuj, caemh luj Gihduz dwg gyauqveiq hih raeuj. Gyauqveiq dwg aen ndang Gihduz; Gihduz dwg bouxcawj gouq aen ndang neix he. 24 Sojhij, cingq luj gyauqveiq baenzlaw dingq Gihduz, guh mehyah hih mboujguenj guxmaz saeh caemh ij dingq goengjgvan. 25 Gangj daengz guh goengjgvan hih, faenhsou caemh ij wnggai aiq mehyah bonjfaenh, caemh ij luj Gihduz aiq gyauqveiq yienghmwnq sijndaej diuz mingh bonjfaenh. 26 Gihduz de yienghneix guh dwg ij dunghgoq gij vah de hwj hawj gyauqveiq ndaej youq ndaw lwgra Cangqdiq bienqbaenz hab'eiq habhoz bonjfaenh de he, couh luj aeu raemx ma swiq cengh gyauqveiq yienghmwnq, 27 mij saek di uq, wenq upup ngaeuz nguebngueb, mij gijmaz ndaej diudik he hab'eiq habhoz de he dih gyauqveiq gvi hawj bonjfaenh de. 28 Guh goengjgvan hih ij wnggai aiq mehyah bonjfaenh, caemh luj aiq aen ndang bonjfaenh yienghmwnq. Aiq yah couh dangq aiq bonjfaenh, 29 aenvih coengzlaiz mij'z vunz gag dwgcaengz aen ndang bonjfaenh, cungj dwg ij baujyangj ndei, cauqguq ndei, cingq luj Gihduz doiq gyauqveiq yienghmwnq. 30 De aiq gyauqveiq luj aiq aen ndang bonjfaenh hih ndok hah noh hah, hoeng, gyoengqraeuz cingq dwg gwnz ndang de hih gak mwnq ndok caeuq noh he, 31 cingq luj ndaw Singqgingh ndaw de sij naeuz: Couh vih yienghneix, vunzsai ij biek boh biek meh, caeuq yah doxcaeuq youq; song boux ij gaep guh luj aen ndang he. 32 Gou naeuz hax, gij neix saedsaeh dwg miz iqhiq, hawj vunz hoj rox hih; gou yienghneix naeuz dwg ceij Gihduz caeuq gyauqveiq naeuz hih. 33 Gij neix gannaeuz mbouj yungzheih rox lah, hoeng, mboujguenj baenzlawz, faenhsou moix it boux guh goengjgvan hih cungj ij aiq yah, ij luj aiq bonjfaenh yienghmwnq aiq yah; guh mehyah hih caemh ij soenhcungq goengjgvan bonjfaenh.
1 Caiq gangj daengz guh lwg hih, faenhsou ij wnggai ciuq haeuj bouxcawj raeuz hih vunz yienghmwnq bae dingq bohmeh cij deng, 2 aenvih cib diuz fazliz mingqlingq ndaw de dih daixit diuz daiq miz baujcingq hih mingqlingq he couh dwg: Guh lwg hih wnggai yauqgingq bohmeh, 3 yienghmwnq mwngz couh ndaej miz fuk, ndaej souhyienz lo. 4 Yiengq gangj daengz guh boh hih, faenhsou songyauq lwg mbouj ndaej raemhraemh raexraex mbouj dingz hih ndaq, mbouj ndaej diudik, mbouj ndaej yex hawj lwg aeuqheiq, dauq ij ciuq bouxcawj raeuz hih baenzlaw son ma gyauqyuz lwg. 5 Yiengq caiq gangj daengz guh bouxhoiq hih, faenhsou guh bouxhoiq hih ij wnggai miz aen sim lau caeuq soenhcungq caeuq lauxsaed he bae dingq bouxcawj faenhsou, caemh luj dingq bouxcawj raeuz Gihduz yienghmwnq. 6 Gaejyungh vih ij hawj vunz haenh hwj gyajcang guh ndei, dauq ij luj bouxhoiq Gihduz yienghmwnq daj ndaw sim ciuq gij cawjeiq Cangqdiq bae guh, 7 caemh dwg nyienh'eiq caensim caen'eiq caenhrengz bae guh bouxhoiq wnggai guh he; ij luj swqhaeuh bouxcawj raeuz Yehsuh Gihduz, mbouj dwg luj swqhaeuh heijvunz. 8 Faenhsou wnggai rox, mboujguenj byawz guh gijmaz ndeisaeh, caemh mboujguenj de dwg bouxhoiq haj cixnaeuz dwg boux swqyouz vunz he, bouxcawj raeuz cungj ciuq de soj guh hih ma cangj hawj de. 9 Yiengq gangj daengz guh bouxcawj hih nej, faenhsou caemh ij wnggai doiq bouxhoiq ndei, mbouj ndaej haep boux de, aenvih faenhsou caemh rox, gyoengqde caeuq faenhsou doxdoengz cungj dwg doengz caemh bouxcawj he youq gwnzmbwn; bouxcawj neix de doiq bouxboux cungj doxdoengz, mbouj faen hingzcungh. 10 Ceiqhaeuq gou vanzlij miz vah ij raengq faenhsou: faenhsou wnggai baengh Cangqdiq dih akak rengzrengz hwj guh boux vunz gyenhgyangz he. 11 Daenj ndei daiq ndei dawz ndei Cangqdiq nyok hawj faenhsou dang bing soj yungh hih, guh boux bing Cangqdiq yungjgamj, ndwn ndaej gaenj he, yienghneix couh ndaej dangx goq fangzvuengz sojmiz dih yimhmaeuz, 12 aenvih caeuq gyoengqraeuz doxhoenx hih dizyinz mbouj dwg miz lwed miz noh hih vunz, dauq dwg caeuq aen seiqgyaiq neix dih miz gienz dang ak ndaej guenjciq hih fangz yak caeuq gwnzmbwn doenghheij gaem gienz hih fangz yak doxhoenx lah. 13 Sojhij ij dawz ij daiq ij daenj ndei Cangqdiq soj nyok hawj hih, guh ndei boux bing Cangqdiq yungjgamj he hwj ndaej youq mwh veizyiemj he ndaej dangx dizyinz, ndaej caeuq de hoenx daengxdaej, caemh ndwn ndaej gaenj. 14 Couh dwg naeuz faenhsou ij dawz saedsaeh ma dangq guh diuz sai gyaeb rwet he, ij guh saeh guh ndaej cingq ndwn ndaej cingq ma dangq guh baj doenqbaiz dangj aek he, 15 caemh ij dawz aen sim cenz gij ndei siuhsiz bingzan ma dangq guh doiq haiz daenj he. 16 Mbouj danhcij yienghneix, faenhsou caemh vanzlij ij dawz doiq Gihduz dih sinqsim ma dangq guh baj doenqbaiz ma dangx ma maet Sajdanq fangzvuengz ngingz goqdaeuj dih naq dawz feiz, 17 caemh vanzlij ij dawz Cangqdiq gouq vunz dih gij saedsaeh neix ma dangq guh aen mauhhang ndaej daenj raeuj ndaej baujhuq raeuj he, dawz gij vah Cangqdiq ma dangq guh fag giemq Hoenzsaenz Cangqdiq he dawz youq ndaw fawz. 18 Faenhsou caemh ij siengzseiz baengh Hoenzsaenz Cangqdiq hwj lailai gouzhaenh Cangqdiq, siengzseiz daezsingj mbouj doeknaiq hwj bang gij vunz Cangqdiq gouzhaenh Cangqdiq. 19 Linghvaih vanzlij miz: gou vanzlij ij cingj faenhsou bang gou gouz Cangqdiq, gouz de nyok hawj gou hab gangj hih vah hawj gou ndaej mbeihung mbouj lau hwj ndaej dawz gij miqmiz ndei siuhsiz Cangqdiq cenzgangj naeuz vunz ni cingsuj. 20 Ox, gou naeuz sou ni, gou couh dwg Cangqdiq baij daeuj hih daiqbiuj, vih ij cenz gij miqmiz ndei siuhsiz neix hwj ngaiz vunz suj lienh hwnjdaeuj lo. Sojhij engq wnggai mbeihung mbouj lau hwj cenzgangj gij ndei siuhsiz neix, engqgya cingj faenhsou bang gou gouz Cangqdiq, gouz de nyok hawj gou ndaej mbeihung hwj cenzgangj gij ndei siuhsiz neix. 21 Ceiqhaeuq, gangj daengz gou, vih ij hawj faenhsou rox gou youq duenh neix dih cingzgvangq, Deihgihguj boux beixnuengx neix, de gaengjdingq dawz gou sojmiz hih saeh gangj naeuz sou ni liux hih. Deihgihguj de dwg boux beixnuengx vunz haenj he, dwg boux lauxsaed sinq ndaej goq hih guh gij hong bouxcawj raeuz he. 22 Gou baij de bae faenhsou mwnq, muzdiz dwg ij hawj faenhsou rox gyoengqraeuz dineix dih cingzgvangq, caemh hawj de nai faenhsou, gujliq faenhsou. 23 Cinhngaiq dih gak boux beixnuengx hax, muengh faenhsou bingzan! Muengh Cangqdiq Bohmbwn caeuq bouxcawj raeuz Yehsuh Gihduz nyok hawj faenhsou aiqsim caeuq sinqsim. 24 Muengh Cangqdiq doiq faenhsou doenghheij yungjyenj aiq bouxcawj raeuz Yehsuh Gihduz hih vunz haijliengh!
1 Gou Baujloz caeuq Dizmohdaiq, bouxhoiq Yehsuh Gihduz, sij saenq hawj doenghheij youq Feihlizbij guenjleix gyauqveiq he caeuq doenghheij vunz guh gij hong gyauqveiq he caeuq gizdah hih vih sinq Yehsuh Gihduz hwj dwg gij vunz Cangqdiq hih. 2 Muengh Bohmbwn raeuz Cangqdiq caeuq bouxcawj raeuz Yehsuh Gihduz doiq faenhsou haijliengh, hawj faenhsou bingzan! 3 Gou moix mbat ngeix daengz faenhsou couh docih Cangqdiq. 4 Moix mbat bang faenhsou gouzhaenh Cangqdiq hih mwhde cungj dwg angq vaujvauq hih, 5 aenvih daj faenhsou sinq Gihduz dih daixit ngoenz daengz seizneix, faenhsou itcig cungj dwg caeuq gou doxdoengz cenz Cangqdiq dih ndei siuhsiz hih. 6 Yiengq, giqyienz Cangqdiq gaenq youq gwnz ndang faenhsou guh gij saeh ndei hih lo, gou sinq de gaengjdingq giqcuz guh roengzbae, itcig guh daengz Yehsuh Gihduz dauq daeuj hih ngoenz mwnq gaengjdingq ndaej guh liuxliux. 7 Gou doiq faenhsou miz yienghneix hih yawjfap dwg wngdang hih, aenvih faenhsou youq ndaw sim gou dwg ciemq miz dwzcuh veiqciq hih; mboujguenj gou dwg ngaiz gyaeng youq ndaw lauz haj cixnaeuz dwg vih Cangqdiq dih ndei siuhsiz hwj gag buek hih gag cingqmingz hih mwhde, faenhsou cungj ciuqyiengh gyenhciz guh gij hong Cangqdiq, faenhsou cungj caemh dwg caeuq gou doxdoengz ndaej daengz Cangqdiq dih cauqguq. 8 Gou dwg baenzlawz yungh Yehsuh Gihduz dih ndaek cungj aiq ndiep mwnq ma siengj faenhsou, Cangqdiq dwg rox hih, de ndaej cingqmingz gou hih. 9 Gou soj bang faenhsou gouz hih couh dwg: muengh faenhsou miz aiqsim raixcaix hwj engqgya ndaej miz ciqsiz caeuq engqgya ndaej faenbied he, 10 sawjhawj faenhsou ndaej faenbied ndei caeuq yak he. Yienghneix couh ndaej youq ngoenz Gihduz dauq daeuj hih mwhde, faenhsou couh ndaej bienqbaenz boux lauxsaed mij maz ndaej diudik he. 11 Caemh muengh faenhsou baengh Yehsuh Gihduz hwj guh gij saeh ndaej yienh ok dwg gij vunz youq ndaw lwgra Cangqdiq suenq dwg mij'z coih he; yienghneix vunz couh haenh Cangqdiq, hawj Cangqdiq najrongh lo. 12 Gak boux beixnuengx hax, gou muengh faenhsou rox, gou youq dineix soj souh daengz hih nanh cungj dwg cenz ndei siuhsiz hih, miz ik hih. 13 Dineix hih moix it boux vunz, bauhgvaz vangzgungh ndaw de hih sojmiz veiqbingh, cungj rox gou dwg vih Gihduz hwj ngaiz gyaeng hwnjdaeuj hih. 14 Dineix hih haujlai sinq bouxcawj raeuz Yehsuh Gihduz hih beixbeix nuengxnuengx cungj vih gou ngaiz gyaeng hwj engqgya sinq bouxcawj raeuz Yehsuh Gihduz, engqgya mbeihung mbouj lau hwj cenzgangj gij saedsaeh Cangqdiq. 15 Cijmboujgoq miz hih vunz cenz Gihduz dih ndei siuhsiz dwg rahoengz, sim caemh dwg mbouj fug hih, hoeng, caemh miz hih vunz dwg caensim caen'eiq hih. 16 Gij vunz caensim he dwg miz aiqsim he, aenvih gyoengqde rox gou dwg Cangqdiq senj gou baij gou daeuj baux ndei gij ndei siuhsiz he. 17 Cungj vunz rahoengz mwnq dwg haeuj gij swqswh yejsimh he. Gyoengqde naemqnaeuz domh gou lij ngaiz gyaeng youq ndaw lauz hih mwhde, couh siengj cauh ndaek cungj he hwj hawj gou siengsim. 18 Hoeng, ndaek gijn'x, cix ij miz maz gvanhaeh hwj; mboujguenj gyoengqde dwg caensim hih cixnaeuz dwg gyajsim hih, Gihduz dih ndei siuhsiz ciuqyiengh gaenq ndaej cenz bae lo. Couh vih yienghneix, gou couh angq ij rai bae; mbouj danhcij naeuz yienghneix, vanzlij gaeuq mwngz angq haem, 19 aenvih gou rox, dunghgoq faenhsou bang gou gouz Cangqdiq hwj, caeuq Hoenzsaenz Yehsuh Gihduz dih bangcoh, gou gaengjdingq ndaej coengq, ndaej doiqyungz swqyouz boiz hih. 20 Yiengq, ciuq gou soj daengj soj muengh hih, gou mbouj veiq guh gij hawj bonjfaenh gou saetnaj hih saeh hih; cijaeu miz mbei gamj guh, mboujguenj lix haj rai, cungj luj bienqnaengz yienghmwnq, ndaej hawj Gihduz youq gwnz ndang gou ndaej najrongh. 21 Aenvih gou caemh rox, doiq gou ma gangj, gou lix dwg vih Gihduz, gou rai dwg vih miz ik. 22 Hoeng, hauhnaeuz gou vanzlij ndaej lix nex, couh ndaej vih Gihduz hwj lai guh gij hong miz ik he. Yiengq, ciuq luj yienghneix ma yawj, gou ij baenzlawz guh nej? 23 Gou saedsaeh mbouj rox hih ij baenzlawz guh cij baenz, baenzbaenz cungj mbouj dwg; gou cingxnyienh caeuq aen seiqgyaiq neix doxbiek hwj bae caeuq Gihduz youq huhluh, yienghmwnq doiq gou saedsaeh ceiq ndei mbouj goq hih lo. 24 Hoeng, doiq faenhsou ma gangj, gou vanzlij dwg lix roengzbae ceiq ndei. 25 Yiengq, giqyienz gou yienghneix siengj vwz, gou rox gou wnggai ndaej lix roengzbae hih, yienghneix ndaej giqcuz caeuq faenhsou youq itheij, hawj faenhsou sinq bouxcawj raeuz Yehsuh Gihduz engqgya lai laeg lai gyenhdingq, vanzlij ndaej hawj faenhsou rox vih sinq caeuq baengh de hwj angq. 26 Yienghneix daengj daengz gou ndaej coengq okma ndaej bae yawj faenhsou hih mwhde, faenhsou couh vih gou hwj engqgya angq, engqgya haenh Yehsuh Gihduz lo. 27-28 Hoeng, gizsaed mboujguenj gou baenzlawz, cijaeu faenhsou guh saeh doiq vunz hab Gihduz dih ndei siuhsiz, luj boux sinq Gihduz hih vunz he, yienghneix, mboujguenj gou ndaej mbouj ndaej bae faenhsou mwnq yawj faenhsou cungj mbouj youqgaenj. Cijaeu gou ndaej dingq daengz faenhsou sinqsim gyenhdingq mbouj doeknaiq, it di cungj mbouj lau dizyinz fanjdeiq, cungj ndaej caezsim hwj vih sinq Gihduz dih ndei siuhsiz hwj roengzrengz, couh ndaej lo. Yienghneix couh cingqmingz faenhsou dwg Cangqdiq gouq hih, caemh yienh ok dizyinz gaengjdingq ngaiz satsoq lo. 29 Cangqdiq hawj faenhsou mbouj danhcij sinq caeuq baengh Gihduz, caemh hawj faenhsou vih de hwj souh nanh, 30 couh dwg ij souh daengz faenhsou gaxgonq yawjraen gou soj souh hih, seizneix caemhcaiq dingq daengz gou soj souh hih doxdoengz.
1 Yiengq, giqyienz faenhsou miz vih haeuj gij vunz Gihduz hwj ndaej daengz gujliq, vih miz Gihduz dih aiq hwj ndaej daengz vued, ndaej miz Hoenzsaenz Cangqdiq doz youq gwnz ndang, ndaej miz cojgvaq caeuq hojsik vwz, 2 faenhsou couh wnggai siengjfap doxdoengz, aiqsim doxdoengz, caezsim doxdoengz, muzbiuh doxdoengz, yienghneix hawj gou couh ndaej angq raixcaix lo. 3 Faenhsou mboujguenj guh gijmaz, cungj mbouj ndaej caenh ngeix daengz bonjfaenh, mbouj ndaej luj bit raeuj va yienghmwnq siengj hawj vunz haenh. Wnggai mbouj rasang, wnggai yawj vunz beij bonjfaenh giengz. 4 Mbouj ndaej caenh rox guq bonjfaenh miz mbouj miz ik, caemh ij wnggai ngeix daengz vunz miz mbouj miz ik. 5 Faenhsou wnggai miz Yehsuh Gihduz yienghmwnq hih sim. 6 De gannaeuz miz Cangqdiq sojmiz dih baenjsingq lah, hoeng, de dauq mij ciengj caeuq Cangqdiq bingz ndwn bingz naengh, 7 dauqfanj sijndaej daeuj guh vunz lajmbwn hwj bienqbaenz bouxhoiq he. 8 De nyienh'eiq dawz bonjfaenh yawj dangq dwg boux yaqyuij he hwj dingq Cangqdiq, simqciq nyienh'eiq luj vunzfamh yienghmwnq ngaiz ding rai youq gwnz gyaq cixcib. 9 Sojhij, Cangqdiq couh hawj de ndaej bienq ceiq ak ceiq najrongh he, hawj de beij sojmiz hih vanzlij veijdaq, 10 hawj gwnzmbwn, lajdeih, laj lajdeih sojmiz dingq daengz gij coh de hwj cungj gvih roengzma sax de, 11 cungj nginh naeuz Yehsuh Gihduz dwg bouxcawj, cungj haenh Cangqdiq Bohmbwn najrongh. 12 Cinhngaiq dih gak boux beixnuengx hax, mwh gou youq faenhsou mwnq hih mwhde, faenhsou cungj dwg dingq gou gaen gou, hoeng, seizneix gou mbouj youq faenhsou mwnq lo; faenhsou engqgya ij dingq gou, caemh wnggai yawjnaek Cangqdiq hwj roengzrengz guh daengz faenhsou ndaej gouq le ndaej ndei liuxliux he, 13 aenvih Cangqdiq youq faenhsou mwnq gujliq faenhsou, hawj faenhsou nyienh'eiq caemhcix ndaej ciuq gij cawjeiq ndei de bae guh. 14 Sojhij, faenhsou mboujguenj guh gijmaz saeh, cungj mbouj ndaej ienq, caemh mbouj ndaej doxcwngq. 15-16 Yienghneix couh ndaej hawj faenhsou lauxsaed, mij guh gijmaz loek he, youq aen nienzdaiq doegsieb yalw neix guh gij lwg Cangqdiq mij maz ndaej diudik he, caemh ndaej youq lajmbwn yienh ok gij saedsaeh hawj vunz miz mingh mwnq, couh luj ndaundeiq rongh youq gwnzmbwn yienghmwnq rongh. Yienghneix daengz Gihduz dauq daeuj hih mwhde, gou couh ndaej haenh naeuz gou guh hih hong dwg miz yungh hih, mbouj begbeg nyungj hoengq lo. 17 Sojhij cungjsuenq naeuz gou seizneix ngaiz vwt mingh, hawj gij lwed bonjfaenh gou ma dangq guh gij laeuj dajbwiz hwj raix youq gwnz gij dajbwiz faenhsou yungh sinqsim ma guh he, gou cungj angq, mbouj danhcij naeuz yienghneix, caemh vanzlij ndaej hawj faenhsou caeuq gou angq haem hwx. 18 Caemh doxdoengz, faenhsou caemh ij angq, caemh hawj gou miz faenh caeuq faenhsou angq. 19 Hauhnaeuz bouxcawj raeuz Yehsuh Gihduz nyienh'eiq, gou muengh gou ndaej vaiqdi baij Dizmohdaiq bae faenhsou mwnq, yienghneix hawj gou ndaej rox faenhsou dih cingzgvangq hwj ndaej sim'onj, 20 aenvih gou dineix mij'z vunz ndaej luj de caeuq gou doxdoengz caensim gvansim faenhsou haem lo. 21 Gizdah vunz cij rox guq bonjfaenh lah, gaenhbaenj mbouj gvansim Yehsuh Gihduz hih saeh. 22 Hoeng, Dizmohdaiq, faenhsou dwg rox de hih; de guh saeh doiq vunz, faenhsou cungj rox cingsuj. De caenh luj lwg caeuq boh yienghmwnq bang gou caeuq gou itheij cenz ndei siuhsiz. 23 Sojhij, daengj gou baex ndaej rox daengz gij saeh gou dwg baenzlwh yiengh le, gou couh majcangq baij de bae faenhsou mwnq. 24 Hoeng, gou sinq bouxcawj raeuz Yehsuh Gihduz, mbouj geijlwh caez de couh hawj gou bae faenhsou mwnq hih. 25 Cijmboujgoq gou naemj, gou vanzlij dwg sien baij Hijbahfuzdiz boux beixnuengx neix sien bae faenhsou mwnq. De dwg faenhsou yienzlaiz baij daeuj hawj gou, bang gou he. De cingqcaen dwg boux beixnuengx ndei gou he; de caeuq gou itheij guh hong, itheij dwgrengz he. 26 De siengj faenhsou raixcaix; de rox naeuz faenhsou rox de bingh le, de engqgya roxnginh sim mbouj onj. 27 Gizsaed, de cingqcaen dwg bingh gwhraix, bingh hwj yiemj rai hwx, hoeng, Cangqdiq hojsik de, yw de mbouj hawj de rai; mbouj danhcij hojsik de, caemh vanzlij hojsik gou, sawjhawj gou mij baenqlai siengsim. 28 Couh vih yienghneix, gou engqgya siengj vaiqdi baij de bae faenhsou mwnq, hawj faenhsou ndaej raen de le sim'angq, yienghneix gou caemh mbouj baenq yousim. 29 Sojhij gou muengh faenhsou luj swqhaeuh bouxcawj raeuz yienghmwnq hwj angq vaujvauq hwj ciep de daih de, ij soenhcungq luj de yienghneix hih vunz, 30 aenvih de vih guh gij hong Gihduz hwj cingqcaen guh daengz ijyiemj vwt mingh, hoeng, cungj vanzlij mbouj lau vwt mingh hwj daeuj gou dineix bang faenhsou guh gij faenhsou guh mbouj daengz he.
1 Ceiqhaeuq, gak boux beixnuengx hax, faenhsou wnggai vih miz bouxcawj raeuz hwj vuenheij. Gou caemh mbouj lau mazfanz hwj caiq doiqyungz daez daengz gij saeh gaxgonq gou daez goq hih, mienxndaej faenhsou miz saeh. 2 Faenhsou ij daezfuengz doenghheij guh doeg guh sieb luj mavangh yienghmwnq hih gyoengqde naeuz guxmaz ij doeng gvej sae gvej gozlij cij ndaej hih doenghheij vunz mwnq. 3 Gizsaed cingqcaen gozlij hih mbouj dwg gyoengqde nej, dauq dwg gyoengqraeuz lah, aenvih gyoengqraeuz baengh Hoenzsaenz Cangqdiq hwj baiq Cangqdiq, vih miz Gihduz hwj haenh, mbouj dwg baengh ndangnoh hwj guh hab'eiq habhoz Cangqdiq hih nej. 4 Yiengq, hauhnaeuz miz vunz naemqnaeuz baengh bonjfaenh ndangnoh hwj ndaej guh daengz hab'eiq habhoz Cangqdiq nex, gou engqgya ndaej lo, 5 aenvih gou seng okdaeuj ndaej bet ngoenz couh gozlij lo, couh dwg seng okdaeuj couh dwg Hijswzlez vunz, dwg haeuj Benqyajminj cuz he, dwg cingqcaen Hihbwzlaiz vunz seng he. Ciuq Youzdaiq vunz dih fazliz ma naeuz, gou dwg Fazliqcaiq vunz hih. 6 Yiengq ciuq gou yienzlaiz dwg Fazliqcaiq vunz he ma gangj, gou dwg cizgiz hih; doenghbaez gou bwkhaih gyauqveiq goq. Ciuq Mohsih fazliz ma gangj, gou dwg mij maz diudik hih. 7 Doenghbaez famzsoj doiq gou miz yungh hih, seizneix gou vih Gihduz hwj dungjdungj yawj dangq dwg mij'z yungh hih. 8-9 Mbouj danhcij naeuz yienghneix, gou vanzlij vih Gihduz hwj dawz sojmiz hih cungj dangq dwg coem mij yungh he, aenvih gou dawz rox bouxcawj raeuz Yehsuh Gihduz ma dangq dwg ceiq dijbauj hih. Vih ij ndaej Gihduz caeuq ndaej hawj vunz rox gou dwg gaep haeuj de hwj gou dawz sojmiz hih cungj dangq dwg lahgiz vwt deuz liux. Gou seizneix ndaej gaep haeuj de, mbouj dwg baengh soenhsouj Mohsih dih fazliz hwj gag ndaej bienqbaenz mij coih hih nej, dauq dwg baengh sinq Gihduz hwj ndaej youq ndaw lwgra Cangqdiq suenq dwg mij'z coih hih lah. 10 Seizneix gou muengh ndaej rox Gihduz caeuq ndaej caenndang rox gij akak rengzrengz dauqlix de, caemh muengh ndaej luj de yienghmwnq souh nanh, yienghmwnq ngaiz rai. 11 Yienghneix couh hawj gou ndaej luj de yienghmwnq daj rai ndaej dauqlix lo. 12 Gou yienghneix muengh, mbouj dwg naeuz gou gaenq ndaej lo, cixnaeuz gaenq ndaej bienq ndei liuxliux lo; gou vanzlij vih ij ndaej daengz cangjbyimj hwj roengzrengz roengzbae, aenvih Yehsuh Gihduz gaenq ndaej daengz gou ma dangq guh cangjbyimj lo. 13 Gak boux beixnuengx hax, gou rox gou mijyaengz ndaej gij cangjbyimj gou hih, cijmboujgoq, gou miz yiengh he gaenq ndaej lo, couh dwg gou gaenq dawz doenghbaez sojmiz hih vwt bae lumz bae, caenhrox roengzrengz roengzbae lah. 14 Gou vih ij ndaej cangjbyimj hwj roengzrengz; gij cangjbyimj neix dwg Cangqdiq dunghgoq Yehsuh Gihduz hwj daj gwnzmbwn heuh gou hwnj bae ndaej seiqseiz lix hih. 15 Sojhij gyoengqraeuz ndaw de doenghheij vunz senqsi cix rox gij saedsaeh Cangqdiq, rox ndaej laeg he hih vunz, cungj ij miz yienghneix siengjfap. Cungjsuenq naeuz mbouj miz yienghneix dih siengjfap, Cangqdiq caemh gaengjdingq hawj faenhsou rox hih. 16 Hoeng, mboujguenj baenzlawz, doiq doenghheij saedsaeh gyoengqraeuz gaenq rox hih, gyoengqraeuz couh wnggai ciuq bae guh. 17 Gak boux beixnuengx hax, faenhsou wnggai roengzrengz hag gou, ciuq gou hih yienghmwnq bae guh, caemh ij gaen ij hag doenghheij vunz hag gou ciuq gou bae guh he. 18 Gou vihmaz ij yienghneix naeuz faenhsou, dwg aenvih miz haujlai vunz gag naeuz bonjfaenh de dwg haeuj gij vunz Gihduz he, hoeng, gyoengqde mbouj sinq Gihduz vih vunz rap coih hwj ngaiz ding rai youq gwnz gyaq cixcib hih gij saedsaeh neix, fanjdeiq gij saedsaeh neix. Gij saeh neix gou doenghbaez siengzseiz naeuz sou ni; seizneix gou vanzlij riuz raemxra hwj caiq daezsingj faenhsou mbat haem. 19 Gou naeuz doengh cungj vunz neix, gyoengqde cungj dwg yawjnaek aen dungx bonjfaenh, yawj aen dungx bonjfaenh dangq caencwnz, dawz saetnaj saetnyaenq ma dangq najrongh, siengj hih cungj dwg aen seiqgyaiq neix hih saeh. Gyoengqde baezneix gaengjdingq ij ngaiz satsoq. 20 Hoeng, gyoengqraeuz dwg guek gwnzmbwn hih vunz, caemh dwg daengj bouxcawj gouq raeuz dih Yehsuh Gihduz daj mwnq dauq daeuj. 21 De ij yungh gij akak rengzrengz ndaej guenjciq sojmiz he ma hawj aen ndangnoh rox naeuh gyoengqraeuz bienqbaenz luj aen ndang bonjfaenh de yienghmwnq ndei ndwtndwt rongh sagsag.
1 Gou cinhngaiq dih gak boux beixnuengx hax, gou aiq faenhsou; gou muengh ndaej raen faenhsou raixcaix. Faenhsou couh dwg gou dih vuenheij, dwg gou dih cangjbyimj. Faenhsou wnggai baengh bouxcawj raeuz hwj sinqsim engqgya gyenhdingq mbouj doeknaiq. 2 Youjahdez caeuq Cwnzduhgih song boux vunzbaz beixnuengx neix, faenhsou dwg haeuj gij vunz bouxcawj raeuz Gihduz he; gou gienq faenhsou wnggai caezsim, doxhuz. 3 Gou caemh gouz caeuq gou guxdoih guh gij hong he lauxsaed he hih mwngz, gouz mwngz bang song boux vunzbaz neix, aenvih song boux de vih cenz ndei siuhsiz hwj caeuq gou itheij guh hong goq, caemh vanzlij caeuq Gwzliqmenj caeuq gizdah caeuq gou doxdoengz itheij guh hong hih guh hong goq, caemh dwg dwgrengz sinhoj goq. Gyoengqde youq ndaw bonjbouh miz mingh cungj daengh miz coh hwj. 4 Faenhsou wnggai baengh bouxcawj raeuz hwj siengzseiz vuenheij. Gou caiq naeuz mbat haem, faenhsou ij wnggai vuenheij! 5 Faenhsou caemh ij hawj vunz rox faenhsou dwg soh semxsemh hih; faenhsou caemh ijaeu ndaejgeiq, bouxcawj raeuz couh ij daeuj lo. 6 Sojhij, faenhsou wnggai gijmaz cungj mbouj you. Cijaeu faenhsou gouz Cangqdiq naeuz de ni faenhsou ij aeu gijmaz, docih de, 7 yienghneix Cangqdiq gaengjdingq dunghgoq Yehsuh Gihduz hwj dawz vunz ngeix mbouj daengz dih bingzan nyok hawj faenhsou; gij bingzan neix dwg ndaej baux aen sim faenhsou gyenhdingq mbouj you, ndaej an'onj hih. 8 Ceiqhaeuq, gak boux beixnuengx hax, gou vanzlij miz geij gawq vah ij gienq faenhsou, gienq faenhsou lailai ngeixngeix doenghheij saedsaeh he, caepcingq he, ndwn ndaej cingq he, lauxsaed he, doxaiq he, mingzsingh ndei he, mij maz ndaej diudik he, boiqndaej haenh he. 9 Faenhsou dajlaeng gou soj hag hih, soj ndaej hih, soj dingq daengz hih, soj yawjraen hih cungj ij ciuq bae guh; yienghneix nyok bingzan dih Cangqdiq gaengjdingq caeuq faenhsou youq lo. 10 Gou saedsaeh vuenheij raixcaix, gou ij haenh bouxcawj raeuz, aenvih faenhsou seizneix caiq bang gou—gizsaed faenhsou itcig cungj dwg gvansim gou hih, cijmboujgoq faenhsou mij gihveiq lah. 11 Gou yienghneix naeuz, mbouj dwg naeuz gou seizneix noix gijmaz mbouj miz le siengj hawj faenhsou bang gou, gou cij yienghneix naeuz law, aenvih gou gaenq guh daengz mboujguenj baenzlawz gou cungj rox gaeuq. 12 Aenvih mboujguenj gungz cix ndaej, fouq cix ndaej, iek cix ndaej, imq cix ndaej, miz cix ndaej, mbouj miz cix ndaej, gou cungj rox baenzlawz goq saedceij, rox gaeuq. 13 Gou baengh nyok rengz hawj gou hih bouxcawj, mboujguenj baenzlawz, gijmaz saeh, gou cungj ndaej guh. 14 Mboujgoq, youq gou nanz hih mwhde, faenhsou bang gou; gij neix dwg ndei hih. 15 Feihlizbij dih gak boux beixnuengx hax, faenhsou caemh rox, mwh gou ngamq gaihcij cenzgangj Cangqdiq dih ndei siuhsiz ij daj Majgizdoenq bae daixlingh mwnq hih mwhde, caenhgag faenhsou gyauqveiq bang gou hawj gou doxgaiq hawj gou saenghhozfeiq sat lo, caiq mbouj miz byawz hawj gou haem lo. 16 Daiqlienz gajlaeng gou youq Dezsajloznizgyah hih mwhde, faenhsou vanzlij bang gou mbat caiq mbat, soengq hawj gou ij yungh he. 17 Gou yienghneix naeuz, mbouj dwg naeuz gou yawjnaek faenhsou soj soengq hawj gou hih law, dauq dwg muengh faenhsou soj guh hih ndaej hawj faenhsou engqgya cangj ndaej lai, ndaej geiq youq ndaw bonjbouh Cangqdiq geiq miz faenhsou he lah. 18 Seizneix gou gaenq miz gou soj ij yungh hih lo; mbouj danhcij naeuz yienghneix, vanzlij miz daiq lai lai lo, aenvih gou daj ndaw fawz Hijbahfuzdiz ciep ndaej daengz faenhsou baij de soengq daeuj hawj gou hih, luj gij dajbwiz rang fwtfwt he, Cangqdiq haenjheiq he he. 19 Gou rox, cauqguq gou dih Cangqdiq, de gaengjdingq dunghgoq Yehsuh Gihduz hwj cienfanh haijliengh he hwj soengq hawj faenhsou soj ij yungh he lai hux lai. 20 Gou muengh Cangqdiq Bohmbwn raeuz yungjyenj najrongh! Ahmaenz. 21 Ceiqhaeuq, cingj bang gou cam faenhsou sojmiz haeuj gij vunz Yehsuh Gihduz he ndei; caeuq gou youq dineix hih beixbeix nuengxnuengx caemh cam faenhsou ndei. 22 Sojmiz hih gij vunz Cangqdiq cungj cam faenhsou ndei, dwzbez dwg youq ndaw ranz Gaijsaj goengjvuengz neix hih vunzhoiq cungj caemh cam faenhsou ndei. 23 Muengh bouxcawj raeuz Yehsuh Gihduz doiq faenhsou haijliengh, siengzseiz caeuq faenhsou youq!
1 Gou dwg Baujloz, dwg ciuq gij cawjeiq Cangqdiq daeuj guh gij dwzbaijyienz Yehsuh Gihduz he. Gou caeuq Dizmohdaiq boux beixnuengx neix sij saenq 2 hawj youq Gohlozsih Singz sojmiz hih gij vunz Cangqdiq, couh dwg gij vunz haeuj Gihduz gaen Gihduz mbouj bienq sim he dih beixbeix nuengxnuengx. Muengh Cangqdiq Bohmbwn raeuz doiq faenhsou haijliengh, hawj faenhsou bingzan! 3 Gohlozsih Singz dih gak boux beixnuengx hax, gyoengqraeuz siengzseiz bang faenhsou gouzhaenh Cangqdiq docih Cangqdiq daxboh bouxcawj raeuz Yehsuh Gihduz, 4 aenvih gyoengqraeuz dingq naeuz faenhsou sinq Yehsuh Gihduz, caemh aiq sojmiz hih haeuj gij vunz Cangqdiq he. 5 Gij neix cungj dwg coengz faenhsou doiq Cangqdiq vih faenhsou youq gwnzmbwn louz fuk hawj faenhsou hwj miz muengh he; faenhsou miz muengh dwg daj faenhsou yienzlaiz dingq daengz gij vah saedsaeh, couh dwg Cangqdiq dih ndei siuhsiz, couh miz muengh he lo. 6 Gij ndei siuhsiz neix mbouj danhcij naeuz cenz bae daengz faenhsou mwnq, vanzlij cenz bae daengz lajmbwn sojmiz hih, caemh dwg ndaej hawj vunz sinq Yehsuh Gihduz engqgya lai, engqgya ndaej hawj vunz daj ndaw sim nginh loek gaijgoq guh ndei, caemh luj faenhsou mwh ngamq dingq daengz gij ndei siuhsiz neix caeuq ngamq cingqcaen rox daengz Cangqdiq dih haijliengh yienghmwnq, doxdoengz sinq caeuq doxdoengz nginh loek gaijgoq guh ndei. 7 Gij ndei siuhsiz neix dwg faenhsou dajlaeng gyoengqraeuz cinhngaiq dih Hijbahfuz dingq daengz hih. De dwg caeuq gyoengqraeuz doxdoengz dwg bouxhoiq Cangqdiq, guxdoih guh gij hong Cangqdiq he, caemh dwg Gihduz dih bouxhoiq lauxsaed he, dwg Gihduz baij daeuj bang gyoengqraeuz he, 8 caemh dwg de naeuz gyoengqraeuz ni faenhsou vih miz Hoenzsaenz Cangqdiq hwj doengh daengz sim hwj miz aiqsim he. 9 Sojhij, couh vih yienghneix, daj gyoengqraeuz dingq daengz faenhsou hih gij siuhsiz neix hwnj, gyoengqraeuz couh siengzseiz bang faenhsou gouzhaenh Cangqdiq, gouz de hawj faenhsou dunghgoq Hoenzsaenz de hwj hawj faenhsou coengjmingz caeuq ndaej miz bonjsaeh ndaej faenbied he, hawj faenhsou mboujguenj gijmaz cungj ndaej rox gij cawjeiq de. 10 Yienghneix, sawjhawj faenhsou guh saeh doiq vunz cungj doiq ndaej hwnj bouxcawj raeuz, hawj faenhsou soj guh hih cungj ndaej hawj de haenjheiq, caemh vanzlij ndaej hawj faenhsou guh gij saeh doiq vunz miz ik he, caeuq ndaej hawj faenhsou engqgya lai rox Cangqdiq. 11 Gyoengqraeuz vanzlij gouz Cangqdiq, gouz de yungh gij veijdaq dih akak rengzrengz de ma hawj faenhsou ndaej engqgya miz rengz, ndaej engqgya gyenhdingq, hawj faenhsou vuenvuen heijheij cix rox naenxsim, 12 hawj faenhsou siengzseiz docih Bohmbwn, docih de hawj faenhsou ndaej miz faenh yangjcouq de youq ndaw guek rongh sagsag de vih gij vunz de cwnjbiq hih gij fuk mwnq, 13 aenvih de gaenq gouq gyoengqraeuz duet ok laep saengxsaengx dih guenjciq, daiq gyoengqraeuz haeuj aen guek de aiq hih daeglwg de bae guh gij vunz de, 14 hawj gyoengqraeuz ndaej baengh de aiq hih lwg hwj ndaej cueg gij coih gyoengqraeuz, ndaej mienx coih, ndaej swqyouz. 15 Gangj daengz daeglwg de aiq hih daeglwg neix, de ndaej yienh ok aeu ra ma yawj mbouj raen he dih Cangqdiq. De daj mijyaengz cauh mbwn cauh deih haem cix miz de lo; de cauhgoq sojmiz hih. 16 Gwnzmbwn lajdeih sojmiz hih, yawj ndaej raen hih, yawj mbouj ndaej raen hih, guh vuengz hih, guenjciq hih, dang ak hih, gaem gienz hih, sojmiz hih dungjdungj cungj dwg dunghgoq de, vih de hwj cauh he. 17 Sojmiz hih cungj mijyaengz miz haem, de cix gag miz lo. Sojmiz hih caemh dwg baengh de hwj cij ndaej baujciz miz he. 18 De dwg ndaek raeuj aen ndang; aen ndang neix couh dwg gyauqveiq. De dwg sojmiz hih heijdaeuz, dwg daixit boux daj rai ndaej dauqlix he, sojhij de couh dwg sojmiz hih daeuzdaeuz. 19 Cangqdiq haenjheiq hawj gij baenjsingq bonjfaenh de caeng youq gwnz ndang daeglwg de liuxliux, 20 caemh vanzlij haenjheiq dunghgoq daeglwg de ding rai youq gwnz gyaq cixcib riuz hih lwed hwj hawj sojmiz hih mboujguenj gwnzmbwn lajdeih cungj baengh de hwj ndaej caeuq bonjfaenh de doxhuz. 21 Gannaeuz faenhsou doenghbaez guh doeg guh sieb hwj daekcoih Cangqdiq, haenq Cangqdiq lah, 22 hoeng, seizneix Cangqdiq dauq dunghgoq daeglwg de, hawj aen ndangnoh daeglwg de rai hwj hawj faenhsou ndaej caeuq bonjfaenh de doxndei doxhuz, hawj faenhsou ndaej youq ndaw lwgra de suenq dwg boux mij'z coih he, mij gijmaz ndaej diudik he, mbouj miz gijmaz mboujeiqseiq hwj bae daengz dangqnaj de he. 23 Hoeng faenhsou bietdingh ij baujciz sinq faenhsou soj sinq hih, mbouj doeknaiq hwj sinq gij ndei siuhsiz mwh faenhsou ngamq dingq daengz couh sinq he hih, caemh mbouj ndaej hawj vunz ingjyangj faenhsou hwj lumz gij fuk ndei siuhsiz hawj vunz miz muengh he. Gij ndei siuhsiz neix seizneix gaenq cenz bae baenx cenz lajmbwn lo; gou Baujloz couh dwg bouxhoiq Cangqdiq cenz gij ndei siuhsiz neix he lo. 24 Gou, Baujloz, gannaeuz vih faenhsou hwj ngaiz souh nanh lah, hoeng, gou dauq roxnginh sim'angq, aenvih youq gwnz ndangnoh gou souh daengz hih sienghaih couh dangq dwg bangbouj Gihduz mijyaengz rap liux hih nanh lah; gij neix couh dwg vih gyauqveiq, aen ndang Gihduz hwj souh nanh hih. 25 Cangqdiq vih ij hawj faenhsou miz ik, de baij gou hawj gou guh gyauqveiq dih hoiq, hawj gou dawz gij siuhsiz de cenz naeuz vunz ni liuxliux. 26 Gij siuhsiz neix dwg Cangqdiq yo hwnjdaeuj baenx haujlai haujlai daih mbouj hawj vunz rox hih gij miqmiz mwnq lo. Hoeng, seizneix de gaenq yienh hawj gij vunz de raen lo, 27 muzdiz dwg ij hawj gij vunz de rox gij miqmiz neix doiq linghvaih minzcuz hih vunz dwg baenxlai dih veijdaq, baenxlai dih miz ik. Gij miqmiz neix couh dwg ndaw sim faenhsou miz Gihduz, sawjhawj faenhsou miz muengh ndaej miz faenh yangjcouq Cangqdiq dih najrongh. 28 Sojhij gyoengqraeuz cenzgangj Gihduz dih ndei siuhsiz naeuz sojmiz hih vunz ni dwg yungh Cangqdiq nyok hawj raeuz hih coengjmingz bae gienq vunz, son vunz he, muengh hawj vunz ndaej bienqbaenz gij lwgsae Gihduz mij gijmaz ndaej diudik he, mbouj miz gijmaz mboujeiqseiq he hwj bae daengz dangqnaj de. 29 Gou couh dwg vih yienghneix hwj gauq baengh Gihduz nyok hawj gou dih akak rengzrengz daeuj roengzrengz guh hong hih.
1 Faenhsou wnggai rox, gou vih faenhsou caeuq Laujdijgyah Singz hih vunz caeuq sojmiz mijyaengz raennaj gou goq hih doenghheij lwgsae mwnq hwj roengzrengz guh hong hih. 2 Gou yienghneix guh dwg vih ij gujliq faenhsou caeuq gyoengqde daixgya, hawj daixgya ndaej rox doxaiq hwj ndaej duenzgyez, hawj daixgya engqgya rox gij saedsaeh Cangqdiq hwj ndaej miz sinqsim raixcaix, engqgya rox gij giqvaq miqmiz de, couh dwg naeuz, engqgya rox Gihduz— 3 sojmiz cingqcaen hih coengjmingz, cingqcaen hih ciqsiz cungj dwg coengz de daeuj; de couh dangq luj aen loengx coux gij dijbauj he. 4 Gou yienghneix doiq faenhsou gangj vah dwg siengj hawj faenhsou mbouj ngaiz vunz gangj vah gyaeu vah ndei hwj coemx faenhsou. 5 Gannaeuz gou mbouj youq faenhsou mwnq gaen faenhsou lah, hoeng, aen sim gou cungj caemhdangq gaen faenhsou lo. Gou angq raixcaix, aenvih gou rox faenhsou daixgya cungj caezsim cungj gyenhdingq fanjdeiq gij gyaj he, sinq Gihduz hih sim caemh gyenhdingq mbouj bienq sim. 6 Giqyienz faenhsou nginh Yehsuh Gihduz guh bouxcawj lo, faenhsou couh ij wnggai ciuq de haenjheiq hih yienghmwnq bae guh, 7 couh ij ciuq gij saedsaeh de bae caep giek ndei bonjfaenh, hawj bonjfaenh ndaej engqgya yied ngoenz yied giengz, yied ngoenz yied miz aen sim sinq Gihduz engqgya gyenhdingq he. Yienghneix couh ndaej yienh ok faenhsou soj hag hih. Faenhsou caemh ij engqgya miz aen sim docih de he. 8 Hoeng, faenhsou ijaeu siujsim, gaejyungh ngaiz doenghheij gangj vah rumz vah rengx vah gyaeu vah ndei he daeuj coemx faenhsou, haed faenhsou, aenvih doenghheij vunz neix soj gangj hih vah dwg ciuq aen seiqgyaiq neix soj cenz roengzdaeuj hih laehbeih caeuq yawjfap he, dauq mbouj dwg ciuq Gihduz dih yawjfap he. 9 Aenvih Gihduz gannaeuz dwg miz vunz dih ndangnoh lah, hoeng, de dauq dwg cibcukcib dih Cangqdiq. 10 Gihduz, bouxcawj faenhsou, dwg hawj faenhsou ndaej bienqbaenz cibcukcib hab'eiq habhoz Cangqdiq hih vunz. De, Gihduz, caemh dwg sojmiz gaem gienz dang ak dih daeuzdaeuz. 11 Faenhsou caemh gaenq gvi haeuj de hwj suenq dwg gozlij lo. Cungj gozlij neix mbouj dwg yungh gij fawz vunz ma youq gwnz ndang vunz gvej mwnq he hwj guh hih gozlij law, dauq dwg Gihduz hawj faenhsou ndaej duet ok ndangnoh faenhsou dih doegsieb dih gozlij lah, 12 aenvih faenhsou sijlij hih mwhde gaenq suenq dwg caeuq Gihduz doengz moek lo, caemh aenvih faenhsou sinq gij rengz boux hawj de ndaej dauqlix dih Cangqdiq hwj caemh ndaej caeuq Gihduz itheij dauqlix lo. 13 Gannaeuz faenhsou doenghbaez mbouj gozlij, mbouj dwg gij vunz Cangqdiq, dwg famh coih hih, baenjlaiz dwg rai hih lah, hoeng, Cangqdiq dauq mienx faenhsou soj famh hih coih, hawj faenhsou ndaej caeuq Gihduz itheij dauqlix. 14 Vih ij hawj gyoengqraeuz ndaej caeuq de itheij dauqlix, de couh bang gyoengqraeuz dawz famh coih hih doiq gyoengqraeuz mbouj liq dih dangjnganq cawz bae liux, ding hwnj gwnz gyaq cixcib bae cawz liuxliux. 15 Cangqdiq yienghneix guh dwg vih ij dunghgoq gyaq cixcib hwj hawj Gihduz ndaej giengz goq sojmiz dang ak gaem gienz hih, ndaej fuhluj gyoengqde, hawj gyoengqde luj ngaiz vunz dawz ma youzhingz hwj hawj gyoengqde saetnaj. 16 Sojhij, faenhsou mbouj ndaej hawj vunz haed faenhsou, dingh hawj faenhsou gijmaz ndaej gw, gijmaz mbouj ndaej gw, cietlaw ndaej goq, cietlaw mbouj ndaej goq, moix ndwen cojit wng mbouj wnggai hingqcuz, ngoenzyietbaeg dih gveihdingq wng mbouj wnggai soenhsouj. 17 Gizsaed doenghgij gveihdingq neix cijmboujgoq dwg luj diuz giuz gaq roen hawj vunz, dizsenz daezsingj hawj vunz rox Gihduz he lah. 18 Faenhsou caemh mbouj ndaej hawj vunz ep faenhsou bae baiq bouxcai Cangqdiq, haed faenhsou hawj faenhsou cang gungz cang ndangj, cang yaqyuij yawj mbouj hwnj ra, yienghneix hwj ingjyangj faenhsou mbouj hawj faenhsou ndaej daengz Cangqdiq dih cangjbyimj. Doenghheij vunz neix cungj haenj gag cej naeuz bonjfaenh ndaej raen Cangqdiq yienh hawj gyoengqde raen geizmiuj gingjdoengh hih saeh. Gyoengqde dih yawjfap cungj dwg aen seiqgyaiq neix dih yawjfap, cungj dwg naemqnaeuz bonjfaenh ak raixcaix, rem raixcaix. 19 Gizsaed, gyoengqde caeuq ndaek raeuj, couh dwg Gihduz, mij doxlienz, mij maz gvanhaeh. Hoeng, Gihduz cingq dwg gyauqveiq hih raeuj hah; gyauqveiq dwg aen ndang de hih, baengh de hwj gak mwnq gak yiengh cij ndaej doxlienz, doxbang, cij ndaej ciuq Cangqdiq dih cawjeiq hwj hawj baenx aen ndang maj hung hwnjdaeuj. 20 Yiengq, ciuq yienghneix ma gangj, faenhsou gaenq caeuq Gihduz doengz rai lo, caemh ndaej duet ok aen seiqgyaiq neix hih yawjfap guenjciq he lo. Hoeng, faenhsou vihmaz vanzlij ij ciuq aen seiqgyaiq neix ma saenghhoz nej? Vihmaz vanzlij ij soenhsouj 21 “mbouj ndaej dek gij neix, mbouj ndaej gw gij neix, mbouj ndaej bungq gij neix” hih doenghgij gveihdingq neix nej? 22 Hoeng gangj lauxsaed vah, luj doenghgij neix, yungh daengz le, sojmiz hih couh mij'z yungh lo. Cungj gveihdingq neix cijmboujgoq dwg ciuq vunz dih cawjeiq caeuq vunz dih soj son hih yienghmwnq ma laeb hih lah. 23 Doenghgij gveihdingq neix hawj vunz yawj caenh lujnaeuz baenz raixcaix coengjmingz raixcaix nwih; de dingh hawj vunz yawj caenh lujnaeuz yawjnaek Cangqdiq, lujnaeuz mbouj gyauhngauq, caemh lujnaeuz yiemzgwz doiq aen ndang bonjfaenh nwih. Gizsaed gij gveihdingq neix doiq doenghheij ndangnoh siengjmuengh hih gaenhbaenj mbouj ndaej haed, it di cungj mij'z yungh.
1 Yiengq faenhsou giqyienz gaenq caeuq Gihduz itheij dauqlix lo, faenhsou couh wnggai yawjnaek gwnzmbwn, aenvih gwnzmbwn miz Gihduz naengh youq baixgvaz Cangqdiq hwj. 2 Faenhsou caemh ij wnggai lai ngeix gwnzmbwn, sim yiengq gwnzmbwn; gaejyungh cij rox ngeix daengz aen seiqgyaiq neix hih saeh, 3 aenvih haeuj aen seiqgyaiq neix hih faenhsou hih mingh gaenq rai lo. Faenhsou sinq Gihduz le, saen hih mingh gaenq caeuq Gihduz itheij yo youq Cangqdiq mwnq lo. 4 Daengj daengz hawj faenhsou mingh hih Gihduz yienh okdaeuj hih mwhde, faenhsou caemh ndaej caeuq de yienh ndaej najrongh lo. 5 Sojhij, faenhsou bietdingh ij cawz youq gwnz ndang faenhsou haeuj aen seiqgyaiq neix hih guh ndaeng guh ndwet, yalw, siengj gij doegsieb he, caeuq damsim he (damsim couh dangq dwg baiq you), 6 aenvih luj doenghgij saeh neix couh ngaiz yinxhwnj Cangqdiq aeuqheiq caeuq fad doenghheij vunz mbouj dingq de he lo. 7 Doenghbaez faenhsou saenghhoz youq aen seiqgyaiq neix caemh guh goq doenghheij saeh neix, 8 hoeng, seizneix dwg daengz mwh he lo; faenhsou mbouj ndaej caiq guh doenghgij saeh neix caeuq muengh doenghgij saeh neix haem lo. Dauqfanj faenhsou ij dawz doenghheij aeuqheiq, dwgcaengz, doegsieb, bangjlaih, vah doeg vah sieb vah ndaengndwet vwt bae. 9 Faenhsou caemh mbouj ndaej doxyaeuh, aenvih faenhsou gaenq duet ok yienzlaiz hih lo, 10 gaenq guh boux vunz moq he luj daenj buh moq yienghmwnq lo. Boux vunz moq neix yied ndaej gaijbienq luj boux cauh de he, couh yied rox boux cauh de he. 11 Ndaej guh boux vunz moq ndaej miz saen hih mingh hih gaenhbaenj mbouj faen Hihlaz vunz haj Youzdaiq vunz, gozlij vunz haj mbouj gozlij vunz, nga'ngangq mbouj miz vaenzvaq haj miz vaenzvaq vunz, bouxhoiq haj boux swqyouz vunz, aenvih Gihduz cauhgoq sojmiz hih; gyoengqde cungj dwg doxdoengz miz Gihduz, Gihduz cungj dwg caeuq gyoengqde youq. 12 Cangqdiq aiq faenhsou senj faenhsou daeuj guh gij vunz hab'eiq habhoz de, sojhij faenhsou wnggai miz aen sim hojsik vunz he, sim'unq mbouj gyauhngauq, soh semxsemh cix naenxsim he. 13 Caemh ij rox doxnyiengh doxnyiuz, nyiuz gij vunz daekcoih faenhsou he; bouxcawj raeuz baenzlawz nyiuz faenhsou, faenhsou caemh ij baenzlaw nyiuz vunz. 14 Cawzok doenghgij neix, ceiq cungqyauq hih vanzlij dwg faenhsou ij miz aen sim aiq vunz he, aenvih aiq ndaej hawj vunz doxhuz doxndei raixcaix. 15 Vanzlij miz, faenhsou ij hawj gij bingzan Gihduz nyok hawj faenhsou he guenjleix aen sim faenhsou, aenvih faenhsou cungj dwg Cangqdiq senj okdaeuj guhbaenz aen ndang he, doxhuz he. Vanzlij miz, faenhsou ij rox docih de. 16 Faenhsou vanzlij ij dawz gij vah Gihduz caeng youq ndaw sim faenhsou lailai laeglaeg hwj, caemh ij yungh Gihduz soj nyok hawj hih coengjmingz ma doxson doxgyienq, caemh ij miz aen sim rox boixaen he daeuj ciengq gij go ndaw Singqgingh caeuq gij go haenh Cangqdiq caeuq gij go Hoenzsaenz Cangqdiq hawj raeuz angq hwj haenh hih gij go ma haenh Cangqdiq. 17 Mboujguenj faenhsou guh gijmaz cixnaeuz gangj gijmaz, cungj ij hij gij coh bouxcawj raeuz, caeuq baengh de daeuj docih Cangqdiq Bohmbwn. 18 Dineix gou gangj daengz guh yah hih. Faenhsou ij dingq goeng gojyez bonjfaenh; gij neix dwg guh gij vunz Gihduz wnggai guh hih. 19 Guh gvan hih, faenhsou caemh ij aiq mehyah bonjfaenh, mbouj ndaej yawj de ngawz. 20 Gangj daengz guh lwg hih, faenhsou sojmiz hih cungj ij dingq bohmeh; gij neix dwg bouxcawj raeuz haenjheiq hih. 21 Guh boh hih, faenhsou mbouj ndaej guh gij saeh hawj lwg aeuqheiq he, mienxndaej gyoengqde doeknaiq. 22 Gangj daengz guh bouxhoiq hih, faenhsou sojmiz hih cungj ij dingq bouxcawj faenhsou. Faenhsou yienghneix guh mbouj dwg naeuz vih ij hawj bouxcawj haenjheiq, dauq dwg ij caensim caen'eiq lah, aenvih faenhsou dwg yawjnaek youq gwnzmbwn hih bouxcawj, soenhgingq youq gwnzmbwn hih bouxcawj hih. 23 Faenhsou mboujguenj guh gijmaz cungj ij dwg nyienh'eiq caensim caen'eiq bae guh bouxhoiq wnggai guh he, ij luj swqhaeuh bouxcawj raeuz Yehsuh Gihduz yienghmwnq, mbouj dwg luj swqhaeuh heijvunz. 24 Faenhsou wnggai rox, hauhnaeuz faenhsou yienghneix guh, bouxcawj raeuz Gihduz de gaengjdingq nyok gij saizcanj gwnzmbwn hawj faenhsou aeu ma guh cangjbyimj, aenvih faenhsou swqhaeuh hih dwg bouxcawj raeuz Gihduz. 25 Hoeng, faenhsou caemh rox, bouxcawj raeuz Gihduz de doiq bouxboux cungj doxdoengz; mboujguenj byawz guh vaihsaeh hih, de cungj ciuq boux de soj guh hih ma bauqwngq hawj boux de.
1 Gangj daengz guh bouxcawj hih, faenhsou doiq bouxhoiq ijaeu goengbingz, aenvih faenhsou rox, faenhsou caemh miz bouxcawj he youq gwnzmbwn. 2 Dineix gou gienq faenhsou gak boux beixnuengx, faenhsou wnggai singqsag caeuq miz aen sim docih Cangqdiq he hwj naebsim gouzhaenh Cangqdiq roengzbae. 3 Caemh cingj faenhsou bang gyoengqraeuz gouzhaenh Cangqdiq, gouz Cangqdiq hawj gyoengqraeuz gihveiq ndaej cenz ndei siuhsiz, cenzgangj gij giqvaq miqmiz gvanhhih Gihduz he. Gou seizneix couh dwg vih gij neix hwj ngaiz vunz gyaeng hwnjdaeuj he. 4 Caemh cingj faenhsou bang gou gouzhaenh Cangqdiq, gouz Cangqdiq hawj gou caenh gij goengrengz gou ma dawz gij giqvaq miqmiz neix gangj naeuz vunz ni cingsuj. 5 Faenhsou caeuq doenghheij mbouj sinq Gihduz hih vunz laizvangj hih, ijaeu singqsag, ij cagaenj gihveiq cenz ndei siuhsiz hawj gyoengqde. 6 Caeuq gyoengqde gangj vah ij swnh semxsemh, ij hawj gyoengqde doiq faenhsou soj gangj hih roxnginh ndeidingq hwj haenjheiq dingq bae, couh dangq luj byaek dwk gyu—dwk boiqliuh ngamj le, feihgw, hawj vunz haenj gw yienghmwnq—caemh ij rox baenzlaw han vunz cam dih vaenqdiz. 7 Gou youq dineix dih cingzgvangq, Deihgihguj boux beixnuengx neix de gaengjdingq naeuz faenhsou ni. Deihgihguj de dwg boux beixnuengx gou haenjheiq he, dwg boux lauxsaed sinq ndaej goq hih guh gij hong bouxcawj raeuz he, caemh dwg caeuq gou doxdoengz dwg bouxhoiq bouxcawj raeuz he. 8 Gou baij de bae faenhsou mwnq, muzdiz couh dwg ij hawj de naeuz faenhsou ni gyoengqraeuz dih cingzgvangq caeuq gujliq faenhsou. 9 Gou caemh baij cinhngaiq dih Ahnizsihmaeuz, boux beixnuengx lauxsaed sinq ndaej goq neix, caeuq de itheij bae; Ahnizsihmaeuz caemh dwg vunz faenhsou mwnq he. Song boux de gaengjdingq dawz dineix dih cingzgvangq gangj naeuz sou ni hih. 10 Caeuq gou youq dineix ngaiz gyaeng haeuj ndaw lauz bae hih Yaqlijdazguj cam faenhsou ndei. Majgoj, daeg biujdiq Bahnazbah, caemh cam faenhsou ndei. (Ox, dwen daengz Majgoj, gou gaxgonq gaenq raengq faenhsou goq lo, hauhnaeuz de bae faenhsou mwnq nex, faenhsou ij daih de.) 11 Vanzlij miz Yehsuq, Yehsuq vunz caemh heuh de heuh Youzswqduh; de caemh cam faenhsou ndei. Sojmiz caeuq gou itheij guh gij hong aen guek Cangqdiq hih caenhgag miz sam boux neix dwg Youzdaiq vunz; gyoengqde hawj gou ndaej roxnginh sim'onj raixcaix. 12 Vanzlij miz Hijbahfuz caemh cam faenhsou ndei. De dwg faenhsou mwnq hih vunz, caemh dwg bouxhoiq Yehsuh Gihduz. De siengzseiz caensim bang faenhsou gouzhaenh Cangqdiq, gouz Cangqdiq hawj faenhsou ndaej guh boux mij gijmaz ndaej diudik he, cibcukcib ndei he, hawj faenhsou ndaej rox cingsuj gij cawjeiq Cangqdiq. 13 De itcig cungj vih faenhsou caeuq vih youq Laujdijgyah Singz caeuq youq Hihlahbohlij Singz dih lwgsae roengzrengz guh hong hih; gij neix gou ndaej cingqmingz de hih. 14 Gyoengqraeuz cinhngaiq dih Luqgyah canghyw caeuq Dijmaj caemh cam faenhsou ndei. 15 Dineix gou caemh cingj faenhsou bang gyoengqraeuz cam youq Laujdijgyah Singz dih beixbeix nuengxnuengx caeuq Ningzfaz boux vunzbaz neix caeuq youq ndaw ranz de dih gyauqveiq ndei. 16 Ceiqhaeuq, gou ij raengq faenhsou, faenhsou doeg fung saenq neix sat le, couh cenjgyau hawj Laujdijgyah Singz dih gyauqveiq, hawj gyoengqde caemh ndaej doeg fung de. Faenhsou nej, faenhsou caemh ij doeg fung saenq Laujdijgyah Singz cenj hawj faenhsou he. 17 Vanzlij miz, faenhsou ij doiq Yaqgihbuq naeuz: “Mwngz bietdingh ij guh sat gij hong bouxcawj raeuz gyau hawj mwngz he.” 18 Faenhsou caemh ij ndaejgeiq bang gou gouz Cangqdiq, aenvih gou vanzlij ngaiz gyaeng youq ndaw lauz. Couh yienghneix bax. Gou Baujloz caenfawz doengh bit sij cam faenhsou ndei. Muengh Cangqdiq siengzseiz doiq faenhsou haijliengh!
1 Dezsajloznizgyah Singz Cangqdiq Bohmbwn caeuq bouxcawj raeuz Yehsuh Gihduz dih gyauqveiq, faenhsou ndei! Gou dwg Baujloz. Gou caeuq Sihlah caeuq Dizmohdaiq sij saenq hawj faenhsou. Muengh Cangqdiq doiq faenhsou haijliengh, hawj faenhsou bingzan! 2 Gyoengqraeuz siengzseiz vih faenhsou hwj docih Cangqdiq Bohmbwn raeuz, gouzhaenh de hih mwhde caemh dwen daengz faenhsou, 3 caemh siengzseiz ngeix daengz faenhsou vih sinq bouxcawj raeuz Yehsuh Gihduz hwj soj guh hih, vih aiq hwj roengzrengz guh hong caeuq vih doiq de miz muengh hwj rox gyenhciz naenxsim. 4 Cangqdiq soj aiq hih gak boux beixnuengx hax! Gyoengqraeuz rox Cangqdiq senj faenhsou guh gij vunz de, 5 aenvih gyoengqraeuz dawz gij ndei siuhsiz Cangqdiq cenz daengz faenhsou mwnq, doiq faenhsou ma gangj mbouj danhcij dwg aeu bak ma gangj, vanzlij dwg aeu gij rengz Hoenzsaenz Cangqdiq ma gangj. Gij ndei siuhsiz neix ndaej hawj faenhsou cibcukcib dih sinq. Faenhsou caemh rox gyoengqraeuz youq faenhsou mwnq vih faenhsou hwj baenzlaw doiq vunz, 6 faenhsou caemh hag gyoengqraeuz caeuq bouxcawj raeuz Yehsuh Gihduz; gannaeuz faenhsou roeb daengz nanh lah, hoeng, ciuqyiengh miz Hoenzsaenz Cangqdiq hawj hih angq, ciuqyiengh dingq gij vah Cangqdiq. 7 Couh vih yienghneix, faenhsou dwg Majgizdoenq Saengj caeuq Yaqgaihyaq Saengj sojmiz hih lwgsae dih bangjyangq, 8 aenvih faenhsou dawz gij ndei siuhsiz bouxcawj raeuz Yehsuh Gihduz cenz bae daengz Majgizdoenq caeuq Yaqgaihyaq. Mbouj danhcij cenz bae daengz song mwnq neix, vanzlij cenz bae daengz gak dieg bae, daiqlienz faenhsou sinq gij ndei siuhsiz neix cungj caemh cenz bae daengz gak dieg. Gij neix mboujyungh gyoengqraeuz lai gangj hih nej, 9 aenvih gij vunz cungj caemh cenz naeuz faenhsou baenzlaw daih gyoengqraeuz, baenzlawz yiem duz you boij duz you, dauq haenj Cangqdiq, swqhaeuh lix hih caen hih Cangqdiq. 10 Gij vunz caemh cenz naeuz faenhsou haenj daengj daeglwg de daj gwnzmbwn roengz daeuj, couh dwg de hawj de daj rai ndaej dauqlix hih, ij gouq gyoengqraeuz duet ok Cangqdiq fad vunz dih boux Yehsuh neix lo.
1 Gak boux beixnuengx hax, faenhsou caemh gag rox, mbat mwnq raeuz bae faenhsou mwnq yawj faenhsou mbouj dwg mbouj miz yungh hih, 2 dauqfanj ngamqluj faenhsou caemh rox hih, couh dwg gaxgonq gyoengqraeuz youq Feihlizbij ngaiz vunz haih, ngaiz vunz yawjngawz, gajlaeng daengz faenhsou mwnq caemh ngaiz vunz fanjdeiq raixcaix, hoeng, gyoengqraeuz vanzlij dwg baengh Cangqdiq guh mbei, dawz gij ndei siuhsiz Cangqdiq cenz hawj faenhsou rox. 3 Gizsaed gyoengqraeuz gienq faenhsou dingq gij ndei siuhsiz neix mbouj dwg loek, mbouj dwg ij coemx faenhsou yaeuh faenhsou hih, 4 dauq dwg Cangqdiq gaujniemq goq gyoengqraeuz, gyoengqraeuz ndaej gaeuqgwz hih lah, de baij gyoengqraeuz bae cenz gij ndei siuhsiz de. Gyoengqraeuz cenz gij ndei siuhsiz neix mbouj dwg ij bungj vunz hawj vunz sim'angq law, dauq dwg ij hawj rox aen sim gyoengqraeuz dih Cangqdiq sim'angq lah. 5 Faenhsou caemh rox, gyoengqraeuz coengzlaiz mbouj bungj vunz, caemh mbouj miz aen sim damsim he; gij neix Cangqdiq ndaej cingqmingz hih. 6 Baenjlaiz gyoengqraeuz guh Gihduz dih dwzbaijyienz hih wngdang ndaej daengz vunz dih soenhcungq caeuq haenh caeuq nyok gijmaz hih, hoeng, gyoengqraeuz dauq mbouj muengh gij neix. 7 Dauqfanj gyoengqraeuz youq faenhsou mwnq hih mwhde doiq faenhsou swnh semxsemh, swnh luj meh doiq lwgnding yienghmwnq. 8 Yiengq, giqyienz gyoengqraeuz yienghneix in faenhsou naek faenhsou vwz, couh gaengjdingq nyienh'eiq dawz gij ndei siuhsiz Cangqdiq cenz hawj faenhsou rox; mbouj danhcij yienghneix, simqciq vanzlij sijndaej diuz mingh bonjfaenh, aenvih gyoengqraeuz gig aiq faenhsou. 9 Gak boux beixnuengx hax, faenhsou gaengjdingq ndaejgeiq gyoengqraeuz, vih ij dawz gij ndei siuhsiz Cangqdiq cenz hawj faenhsou, guh hwj gyoengqraeuz ngwnzngoenz cungj dwgrengz guh hong, vih mbouj siengj hawj faenhsou ciengx gyoengqraeuz rap gyoengqraeuz. 10 Gyoengqraeuz doiq faenhsou sinq Gihduz hih vunz cungj dwg guh gij hab'eiq habhoz Cangqdiq hih, dwg ndwn ndaej cingq hih, mij'z maz ndaej diudik hih; gij neix faenhsou ndaej cingqmingz hah, Cangqdiq caemh ndaej cingqmingz hih. 11 Faenhsou caemh rox gyoengqraeuz dwg baenzlaw doiq faenhsou, gujliq faenhsou hah, vued faenhsou hah, lox faenhsou hah, cungj dwg luj boh doiq lwg yienghmwnq. 12 Gyoengqraeuz gienq faenhsou dwg hawj faenhsou guh saeh doiq vunz cungj doiq ndaej hwnj boux senj faenhsou hawj faenhsou ndaej gaep haeuj aen guek de caeuq do gij najrongh de dih Cangqdiq. 13 Gyoengqraeuz caemh siengzseiz docih Cangqdiq, aenvih faenhsou dingq gyoengqraeuz soj cenzgangj hih gij ndei siuhsiz neix, sinq dwg Cangqdiq dih ndei siuhsiz he, mbouj dwg vunz dih ndei siuhsiz. Gij ndei siuhsiz neix caemh youq gwnz ndang faenhsou doenghheij sinq Cangqdiq hih yienh okdaeuj lo. 14 Gak boux beixnuengx hax, couh dwg faenhsou caemh ngaiz souh daengz luj youq Youzdaiq Saengj hih Yehsuh Gihduz dih gak aen gyauqveiq ityiengh, souh daengz doenghheij caeuq bonjfaenh caemh minzcuz hih vunz bwkhaih, caemh luj gyoengqde gag ngaiz souh daengz caemh Youzdaiq vunz hih bwkhaih ityiengh. 15 Doenghheij Youzdaiq vunz neix gajrai bouxcawj raeuz Yehsuh caeuq doengh boux boux cenz gij vah Cangqdiq, caiq boenq gyoengqraeuz deuz. Gyoengqde daekcoih Cangqdiq, caemh caeuq sojmiz hih vunz doxngig, 16 sujcij gyoengqraeuz cenz gij ndei siuhsiz Cangqdiq naeuz linghvaih minzcuz hih vunz ni, hoengjlau linghvaih minzcuz hih vunz ndaej gouq. Gyoengqde famh coih yied rom yied lai, daiq muenxbouh lai lo, cwk hwj seizneix Cangqdiq fatheiq couh ij fad gyoengqde lo. 17 Gak boux beixnuengx hax, gyoengqraeuz seizneix camqciz mbouj caeuq faenhsou youq itheij, hoeng, aen sim gyoengqraeuz vanzlij dwg youq faenhsou mwnq hih. Gyoengqraeuz siengj faenhsou raixcaix, cungj siengj caiq ndaej raen faenhsou. 18 Sojhij gyoengqraeuz cungj siengj bae faenhsou mwnq, yawj faenhsou. Gou, Baujloz, cungj miz geij mbat ij bae faenhsou mwnq lo, hoeng, cungj ngaiz Sajdanq fangzvuengz lanz mbouj hawj gou bae. 19 Gizsaed gyoengqraeuz soj muengh hih caeuq sim'angq hih cingq dwg faenhsou lo; faenhsou couh dwg youq mwh bouxcawj raeuz Yehsuh Gihduz dauq daeuj hih mwhde, youq dangqnaj de soj haenh hih cangjbyimj lo, 20 aenvih faenhsou cingqcaen dwg ndaej hawj raeuz najrongh caeuq sim'angq hih.
1-2 Yiengq, giqyienz gyoengqraeuz ngaiz mbouj ndaej bae faenhsou mwnq caemh mbouj caiq ndaej daengj roengzbae lo, gyoengqraeuz couh gyezdingq baij Dizmohdaiq boux beixnuengx neix bae faenhsou mwnq hawj de gujliq faenhsou, hawj faenhsou ndaej sinqsim gyenhdingq. Hoeng, gou caeuq Sihlah nej, song boux raeuz vanzlij dwg gyezdingq giqcuz youq Yajdenj daengj, daengj de ma naeuz raeuz ni gij siuhsiz faenhsou.Boux beixnuengx neix caemh dwg cenz gij ndei siuhsiz Gihduz he, caemh dwg caeuq raeuz itheij guh gij hong Cangqdiq he. 3 Gyoengqraeuz baij de bae bang faenhsou, mienxndaej miz vunz ngaiz souh daengz nanh hwj doeknaiq, sinqsim mbouj gyenhdingq. Faenhsou caemh rox, gyoengqraeuz souh nanh baenjlaiz dwg Cangqdiq dih cawjeiq hih. 4 Gaxgonq gyoengqraeuz vanzlij youq faenhsou mwnq hih mwhde, gyoengqraeuz gaenq sien naeuz faenhsou ni goq lo, naeuz gyoengqraeuz baezneix gaengjdingq ij ngaiz souh nanh hih. Gajlaeng cingqgawq lingz gwhraix. Gij neix faenhsou caemh rox. 5 Sojhij, couh vih yienghneix, gou roxnginh mbouj ndaej daengj lo, cij baij Dizmohdaiq bae faenhsou mwnq vih ij rox faenhsou sinq Gihduz dih sim dauqdaej dwg baenzlaw. Gou lau faenhsou ngaiz Sajdanq yaeuh faenhsou le, faenhsou ngaiz sinq de hwj gyoengqraeuz soj guh hih hong bienqbaenz vwt hoengq. 6 Hoeng, seizneix Dizmohdaiq daj faenhsou mwnq dauq ma lo; de dawz faenhsou sinq Gihduz hih sim caeuq faenhsou dih aiqsim, gij ndei siuhsiz neix, gangj naeuz songraeuz ni. De naeuz faenhsou siengzseiz siengj daengz gyoengqraeuz, cungj muengh ndaej caiq raen gyoengqraeuz, caemh luj gyoengqraeuz muengh ndaej raen faenhsou ityiengh. 7 Sojhij, gak boux beixnuengx hax, gyoengqraeuz rox daengz faenhsou sinq Gihduz hih sim gyenhdingq le, cungjsuenq naeuz gyoengqraeuz roeb daengz nanh, cungj roxnginh sim'onj. 8 Cijaeu faenhsou ndaej baengh bouxcawj raeuz hwj sinq Gihduz hih sim gyenhdingq mbouj doeknaiq, gyoengqraeuz couh sim'onj lo. 9 Sojhij, vih faenhsou hwj gyoengqraeuz ndaej youq dangqnaj Cangqdiq angq raixcaix; vih ndaej angq hwj gyoengqraeuz mbouj rox hih ij baenzlawz vih faenhsou hwj docih Cangqdiq, boixaen Cangqdiq. 10 Sojhij seizneix cij ndei caenhrox ngwnzngoenz gouz, gouz Cangqdiq hawj gyoengqraeuz caiq ndaej bae yawj faenhsou, raen faenhsou, ndaej bang faenhsou engqgya sinq Gihduz. 11 Muengh Cangqdiq daxboh raeuz caeuq bouxcawj raeuz Yehsuh Gihduz hoi diuz roen he hawj gyoengqraeuz, daiq gyoengqraeuz bae faenhsou mwnq. 12 Muengh bouxcawj raeuz hawj faenhsou miz aen sim rox doxaiq he caeuq rox aiq vunz he, caemh dwg yied ngoenz yied aiq raixcaix he, caemhdangq luj gyoengqraeuz aiq faenhsou yienghmwnq. 13 Yiengq faenhsou miz luj cungj aiq neix le, couh ndaej hawj faenhsou sinq Gihduz gyenhdingq, ndaej hawj faenhsou youq mwh bouxcawj raeuz Yehsuh caeuq gyoengq vunz Cangqdiq dauq daeuj hih mwhde ndaej youq ndaw lwgra Cangqdiq Bohmbwn bienqbaenz hab'eiq habhoz mij maz ndaej diudik he.
1 Gak boux beixnuengx hax, seizneix gyoengqraeuz ij baengh bouxcawj raeuz Yehsuh Gihduz ma gienq faenhsou gouz faenhsou. Giqyienz faenhsou ndaej daengz gyoengqraeuz son faenhsou hih, caemh rox daengz ij baenzlawz guh cij ndaej daengz hawj Cangqdiq sim'angq hih, yiengq couh mbouj wnggai vih seizneix sojmiz hih hwj rox gaeuq, dauq ij engqgya lai roengzrengz cij deng. 2 Faenhsou caemh rox gyoengqraeuz baengh bouxcawj raeuz Yehsuh Gihduz hwj cenz hawj faenhsou hih dwg gijmaz mingqlingq. 3 Gij neix dwg Cangqdiq dih cawjeiq hih, dwg ij hawj faenhsou caensim caen'eiq gaen de hwj guh gij vunz de, mbouj cimyex haeuj doenghgij ndaengndaeng ndwetndwet he bae, 4 hawj faenhsou gak vunz rox baenzlawz guenj ndei aen ndang bonjfaenh, hawj aen ndang bonjfaenh baujciz guh hab gij vunz Cangqdiq he. 5 Gaejyungh luj doenghheij vunz mbouj rox Cangqdiq caeuq caeuq gij cawjeiq Cangqdiq doxngig hih doenghheij vunz mwnq, guh ndaeng guh ndwet he. 6 Doiq cungj saeh neix, faenhsou baenzbaenz mbouj ndaej guh gij doiq mbouj hwnj beixnuengx he. Byawz famh cungj coih neix, bouxcawj raeuz gaengjdingq ij fad de. Gij neix gou gaenq doiq faenhsou naeuz goq, gingjgauq goq lo. 7 Cangqdiq senj gyoengqraeuz mbouj dwg ij hawj raeuz goq cungj saenghhoz yalw neix law, dauq dwg ij hawj raeuz guh boux hab'eiq habhoz de hih lah. 8 Sojhij mboujguenj byawz yiem ciuq gij cawjeiq neix hih, cungj dwg yiem nyok Hoenzsaenz hawj raeuz dih Cangqdiq, dauq mbouj dwg yiem vunz dih cawjeiq. 9 Yiengq gangj daengz ij luj beixnuengx doxaiq hih gij saeh neix, gou mbouj caiq sij saenq naeuz sou luh, aenvih Cangqdiq gaenq son faenhsou goq lo. 10 Gizsaed, faenhsou cingqcaen aiq Majgizdoenq Saengj sojmiz hih beixnuengx leuz, cijmboujgoq gou vanzlij dwg muengh faenhsou ij engqgya lai aiq haem. 11 Gyoengqraeuz gaxgonq gaenq raengq faenhsou goq naeuz faenhsou ij wnggai rox gag duklik bonjfaenh, lauxlaux saedsaed goq saedceij, guh ndei gij hong bonjfaenh. 12 Yienghneix couh ndaej hawj doenghheij mbouj sinq Yehsuh bouxcawj raeuz he yawjhwnj faenhsou lo, faenhsou caemh mboujyungh baengh vunz gw haeux lo. 13 Gak boux beixnuengx hax, gangj daengz doenghheij vunz Gihduz gaenq rai he, gyoengqraeuz muengh faenhsou rox gyoengqde baezneix dih cingzgvangq, mienxndaej faenhsou luj doenghheij mbouj miz muengh hih vunz yienghmwnq siengsim. 14 Hauhnaeuz gyoengqraeuz sinq bouxcawj raeuz Yehsuh Gihduz rai le ndaej dauqlix, yiengq caemh wnggai sinq Cangqdiq gaengjdingq daiq doenghheij vunz sinq bouxcawj raeuz Yehsuh Gihduz hih doenghheij vunzrai mwnq caeuq bouxcawj raeuz Yehsuh Gihduz itheij daiq bae. 15 Seizneix gyoengqraeuz dawz gij vah bouxcawj raeuz Yehsuh Gihduz gangj naeuz sou ni, couh dwg bouxcawj raeuz dauq daeuj hih ngoenz mwnq, gyoengqraeuz doenghheij lij lix hih vunz mbouj ndaej beij doenghheij gaenq rai hih gij vunz Gihduz mwnq ndaej raen bouxcawj raeuz gaxgonq, 16 aenvih baezneix bouxcawj raeuz daj gwnzmbwn roengz daeuj hih mwhde, gaengjdingq miz gij mingqlingq goggog he, bouxcai daeuzdaeuz hemq raez rangxrangh he, sing gywnhhauh Cangqdiq yiengj gog saxsax he. Daengz mwhmwnq, doenghheij vunz Gihduz gaenq rai mwnq gaengjdingq sien ndaej dauqlix. 17 Gajlaeng, gyoengqraeuz doenghheij lij lix hih vunz gaengjdingq ij caeuq gyoengqde itheij ndaej ciep haeuj ndaw fwj bae, ndaej youq gwnzmbwn raen bouxcawj raeuz, vanzlij ndaej yungjyenj caeuq de youq itheij. 18 Sojhij gyoengqraeuz gangj naeuz sou ni hih doenghgij vah neix, faenhsou ij aeu ma doxnai doxbang doxson.
1 Gak boux beixnuengx hax, gangj daengz gij saeh neix baenzlaw fatseng, ngoenzlaw, seizlaw, gyoengqraeuz mboujyungh sij saenq naeuz sou ni nej, 2 aenvih faenhsou gaenq rox, bouxcawj raeuz dauq daeuj hih mwhde, caenh luj bouxcaeg yienghmwnq sawqmwh singjngwnz daeuj daengz. 3 Cingq youq mwh vunz naeuz “Sojmiz hih cungj bingzan” hih mwhde, sawqmwh nanh dawz gyoengqde, caenh luj vunzbaz daiqndang ij seng lwg hih yienghmwnq in; gij nanh neix gyoengqde mij banqfaz ndaej deuz. 4 Hoeng, gak boux beixnuengx hax, faenhsou mbouj dwg luj doenghheij vunz ndoj youq ndaw laep mwnq, baex daengz ngoenz Gihduz luj bouxcaeg yienghmwnq sawqmwh dauq daeuj hih mwhde, couh doeksaet, 5 aenvih faenhsou cungj dwg haeuj gij vunz doengxngoenz, dwg rongh he; gyoengqraeuz caemh mbouj dwg haeuj gij doengxngwnz laep he. 6 Sojhij gyoengqraeuz mbouj wnggai luj doenghheij vunz ninz ndaek hih yienghmwnq, ij wnggai baujciz cinghsingj, daezsingj bonjfaenh, 7 aenvih vunz ninz dwg youq doengxngwnz ninz; doenghgij vunz laeujgeq he dwg youq doengxngwnz laeuj fiz he. 8 Yiengq, giqyienz gyoengqraeuz dwg haeuj doengxngoenz, dwg rongh hih vwz, couh wnggai baujciz singqsag, ij aeu sinq Cangqdiq caeuq aiq ma guh baj baizaek dangj aek baujhuq aen sim, aeu muengh ndaej gouq ma guh aen mauhhang daenj raeuj he, 9 aenvih Cangqdiq senj gyoengqraeuz mbouj dwg ij hawj gyoengqraeuz ngaiz de fad, dauq dwg ij hawj gyoengqraeuz dunghgoq bouxcawj raeuz Yehsuh Gihduz hwj ndaej gouq lah. 10 Bouxcawj raeuz Yehsuh Gihduz vih gyoengqraeuz hwj ngaiz rai, vih dwg ij hawj gyoengqraeuz mboujguenj dwg gaenq rai hih vunz cixnaeuz dwg vanzlij lix hih vunz, cungj ndaej youq de dauq daeuj hih mwhde ndaej caeuq de itheij lix. 11 Sojhij, faenhsou wnggai doxbang doxson, caemh luj faenhsou seizneix soj guh hih ityiengh. 12 Gak boux beixnuengx hax, gyoengqraeuz seizneix gienq faenhsou, gienq faenhsou soenhcungq doenghheij youq faenhsou mwnq guh hong dwgrengz hih vunz, couh dwg doenghheij lingjdauj faenhsou caeuq gienq son faenhsou hih vunz, 13 caemh ij vih gyoengqde soj guh hih hong hwj engqgya aiq gyoengqde, yawjnaek gyoengqde, soenhgingq gyoengqde. Faenhsou caemh ij wnggai doxhuz. 14 Gak boux beixnuengx hax, gyoengqraeuz vanzlij ij gienq faenhsou, gienq faenhsou ij naeuz doenghheij vunz gyik gyangjgyangq youqlag gyekgyek he, nai doenghheij vunz mbeiiq he, gvansim cauqguq gij vunz doeknaiq he nyieg he, caemh ij naiqsim doiq vunz. 15 Faenhsou ij siujsim, mboujguenj byawz, cungj mbouj ndaej vunz famh mwngz, mwngz caemh ij famh vunz, dauq ij rox doxgvansim, caemh ij doiq vunz ndei. 16 Faenhsou ij siengzseiz vuenheij, 17 ij siengzseiz gouzhaenh Cangqdiq, 18 mboujguenj baenzlawz, cungj ij rox docih Cangqdiq, aenvih gij neix dwg Cangqdiq doiq faenhsou doenghheij vunz gaep haeuj Yehsuh Gihduz he dih yauhgyiuz. 19 Mbouj ndaej haed Hoenzsaenz Cangqdiq hawj vunz guh hih; 20 mbouj ndaej yawj mbouj hwnj boux cenz gij vah Cangqdiq soj cenz hih. 21 Mboujguenj guxmaz, cungj ij faenbied ndei: ndei hih ij hah ndei, ij baujciz, 22 rwix hih ij vwt bae. 23 Muengh hawj vunz bingzan dih Cangqdiq hawj faenhsou ndaej hab'eiq habhoz de liuxliux! Caemh muengh Cangqdiq baux aen sim faenhsou baux hoenzsaenz faenhsou baux ndangdaej faenhsou, hawj faenhsou ndaej youq bouxcawj raeuz Yehsuh Gihduz dauq daeuj hih mwhde mij gijmaz ndaej diudik. 24 Boux senjdingh faenhsou dih Cangqdiq dwg saedsaeh sinq ndaej goq hih; de gaengjdingq vih faenhsou guh daengz gij saeh neix. 25 Gak boux beixnuengx hax, cingj faenhsou bang gyoengqraeuz gouzhaenh Cangqdiq, 26 caemh bang gyoengqraeuz dongx vunz ndei. 27 Ceiqhaeuq gou ij hij bouxcawj raeuz Yehsuh Gihduz dih mingzhiq ma raengq faenhsou, cingj faenhsou dawz fung saenq neix doeg naeuz gyauqveiq dih gak boux beixnuengx ni. 28 Muengh bouxcawj raeuz Yehsuh Gihduz siengzseiz doiq faenhsou haijliengh!
1 Dezsajloznizgyah Singz dih gyauqveiq, couh dwg sinq Cangqdiq Bohmbwn raeuz caeuq sinq bouxcawj raeuz Yehsuh Gihduz hih faenhsou, faenhsou ndei! Gou dwg Baujloz. Gou caeuq Sihlah caeuq Dizmohdaiq sij saenq hawj faenhsou. 2 Muengh Cangqdiq daxboh raeuz caeuq bouxcawj raeuz Yehsuh Gihduz doiq faenhsou haijliengh, hawj faenhsou bingzan! 3 Gak boux beixnuengx hax, gyoengqraeuz wnggai siengzseiz vih faenhsou hwj docih Cangqdiq, aenvih faenhsou sinq Cangqdiq yied ngoenz yied giengz, caemh yied ngoenz yied doxaiq. 4 Couh vih yienghneix, gyoengqraeuz youq Cangqdiq hih gak aen gyauqveiq cungj haenh faenhsou, haenh faenhsou youq roeb daengz sojmiz hih bwkhaih sojmiz hih nanh, hoeng, vanzlij gyenhciz naenxsim caeuq sinq Gihduz. 5 Gij neix couh ndaej cingqmingz Cangqdiq dih gyezdingq dwg deng hih; de gaengjdingq yawj faenhsou dwg boiqndaej gaep haeuj aen guek de hih, aenvih faenhsou cingq vih aen guek de hwj souh nanh hih. 6 Cangqdiq dwg goengbingz hih; de gaengjdingq hawj doenghheij vunz bwkhaih faenhsou hih souh daengz bauqwngq, 7 caemh gaengjdingq hawj faenhsou doenghheij ngaiz souh daengz nanh hih ndaej caeuq gyoengqraeuz doxdoengz ndaej bingzan. Daengz mwh bouxcawj raeuz Yehsuh Gihduz caeuq bouxcai ak de youq ndaw feiz daj gwnzmbwn yienh okdaeuj hih mwhde, 8 de caemh ij fad doenghheij mbouj rox de caeuq mbouj dingq gij ndei siuhsiz bouxcawj raeuz Yehsuh Gihduz caeuq mbouj ciuq gij vah de bae guh hih vunz. 9 Doenghheij vunz neix gaengjdingq ij souh daengz fad, couh dwg hawj gyoengqde yungjyenj satsoq, yungjyenj mbouj ndaej dep bouxcawj raeuz caeuq mbouj ndaej miz faenh gij ak veijdaq de. 10 Daengz bouxcawj raeuz dauq daeuj hih mwhmwnq, de couh ndaej youq doenghheij vunz de mwnq ndaej najrongh, ndaej hawj sojmiz sinq de hih vunz haenh de. Faenhsou caemh caeuq gyoengqde doxdoengz, aenvih faenhsou sinq gyoengqraeuz doiq faenhsou soj cenz hih gij ndei siuhsiz de. 11 Couh vih yienghneix, gyoengqraeuz siengzseiz bang faenhsou gouzhaenh Cangqdiq, gouz de yawj faenhsou boiqndaej de senjdingh faenhsou he, caemh gouz de nyok rengz hawj faenhsou, hawj faenhsou guh faenhsou vih sinq Cangqdiq hwj guh hih ndeisaeh. 12 Yienghneix bouxcawj raeuz Yehsuh Gihduz couh ndaej youq faenhsou mwnq ndaej najrongh, ndaej miz mingz, ndaej riengzmingz lo. Faenhsou caemh baengh Cangqdiq caeuq bouxcawj raeuz Yehsuh Gihduz dih aiq caeuq haijliengh hwj ndaej najrongh.
1 Gak boux beixnuengx hax, gangj daengz gvanhhih bouxcawj raeuz Yehsuh Gihduz dauq daeuj caeuq gyoengqraeuz doxraen doxcomz hih gij saeh neix, gyoengqraeuz seizneix gienq faenhsou. 2 Gienq faenhsou: hauhnaeuz dingqri vunz naeuz bouxcawj raeuz gaenq dauq daeuj lo, yiengq faenhsou gaejyungh sinq, cix gaejyungh simvueng. Cungjsuenq gyoengqde naeuz dwg hoenzsaenz naeuz cixnaeuz dwg dajlaeng gyoengqraeuz ndaej dingq daengz hih siuhsiz cixnaeuz dwg daj ndaw saenq gyoengqraeuz ndaej rox he, cungj mbouj ndaej sinq. 3 Mboujguenj vunz baenzlawz yaeuh faenhsou, faenhsou cungj mbouj ndaej sinq, aenvih ngoenz bouxcawj raeuz dauq daeuj cihsenz gaengjdingq ij miz vunz yiem Cangqdiq, caemh ij miz boux doegdoeg siebsieb, lwg satsoq mwnq ok daeuj. 4 De ij ok daeuj fanjdeiq sojmiz heuh cwnz he caeuq vunz cungj soenhcungq gingqbaiq he, de gag yawj bonjfaenh cauhgoq daengxheij, simqciq vanzlij gag bae naengh youq gunghdenq Cangqdiq, gag naeuz bonjfaenh de dwg Cangqdiq. 5 Mbouj rox hih faenhsou ndaej mbouj ndaejgeiq? Mwh gou youq faenhsou mwnq hih mwhde, gou gangj naeuz faenhsou ni goq gij saeh neix lo. 6 Seizneix faenhsou caemh rox dwg guxmaz laengz de, hawj de daengz mwhde cij yienh okdaeuj. 7 Gizsaed ndaek doegsieb mwnq gaenq caegcaeg gaihcij doengh fawz lo, hoeng, cijmboujgoq seizneix miz boux he laengz de; daengj daengz mbouj laengz de hih mwhde 8 de couh ok daeuj lo. Hoeng, bouxcawj raeuz gaengjdingq ij yungh gij heiq bonjfaenh de ma met de; bouxcawj raeuz baex yienh myig myiengzmyiengz okdaeuj he couh cawz de. 9 Boux doegsieb neix ij daeuj guh gij hong Sajdanq fangzvuengz, guh gak cungj geizmiuj gyaj gingjdoengh he, 10 gveijmaj yungh gak cungj doegsieb he ma yaeuh doenghheij cingq byaij haeuj satsoq he bae he, aenvih gyoengqde mbouj haenj gij saedsaeh ndaej gouq vunz he. 11 Sojhij Cangqdiq couh hawj gyoengqde mbouj rox faenbied saedsaeh caeuq mbouj saedsaeh he gyaj he, hawj gyoengqde bae sinq doenghheij vah gyaj he, 12 gajlaeng Cangqdiq couh saemjbuenq doenghheij mbouj sinq saedsaeh dauq haenj famh coih hih vunz. 13 Yiengq gangj daengz gyoengqraeuz, cinhngaiq dih gak boux beixnuengx bouxcawj raeuz soj aiq dih vunz hax, gyoengqraeuz wnggai vih faenhsou hwj docih Cangqdiq, aenvih Cangqdiq daj gaihcij cix senjdingh faenhsou lo, vih ij hawj faenhsou ndaej baengh Hoenzsaenz de hwj ndaej guh gij vunz de, caemh hawj faenhsou sinq saedsaeh hwj ndaej gouq. 14 Cangqdiq vih yienghneix hwj couh dunghgoq gyoengqraeuz soj cenz hih ndei siuhsiz hwj senj faenhsou, hawj faenhsou ndaej do gij rongh bouxcawj raeuz Yehsuh Gihduz. 15 Sojhij gak boux beixnuengx hax, faenhsou wnggai gyenhgyez geiq ndei souj ndei gyoengqraeuz soj son faenhsou hih, mboujguenj dwg aeu bak gangj haj cixnaeuz dwg sij saenq son, faenhsou cungj ij geiq ndei. 16 Muengh bouxcawj raeuz Yehsuh Gihduz, caeuq aiq gyoengqraeuz doiq gyoengqraeuz haijliengh, yungjyenj nai gyoengqraeuz, hawj gyoengqraeuz miz muengh dih Cangqdiq Bohmbwn 17 gujliq faenhsou, nyok rengz hawj faenhsou, hawj faenhsou ndaej gangj gij doiq vunz miz ik caeuq guh sojmiz hih ndeisaeh.
1 Gak boux beixnuengx hax, gou vanzlij miz vah ij caeuq faenhsou gangj. Gou cingj faenhsou bang gyoengqraeuz gouz Cangqdiq, gouz hawj gij ndei siuhsiz de caemh ndaej luj youq faenhsou mwnq cenz bae vaiq hux vaiq, ndaej hawj vunz soenhcungq. 2 Caemh gouz ndaej hawj raeuz duet ok doenghheij vunz doegsieb he, aenvih mbouj dwg bouxboux cungj sinq bouxcawj raeuz Yehsuh Gihduz. 3 Hoeng, bouxcawj raeuz Yehsuh Gihduz dwg sinq ndaej goq hih; de gaengjdingq hawj faenhsou miz rengz, baujhuq faenhsou ndaej duet ok doenghheij doegsieb he. 4 De vanzlij hawj gyoengqraeuz sinq faenhsou, sinq faenhsou ciuq gyoengqraeuz soj raengq hih yienghmwnq bae guh, caemh dwg giqcuz ciuq guh roengzbae. 5 Muengh bouxcawj raeuz daiq faenhsou, hawj faenhsou ndaej luj Cangqdiq yienghmwnq miz aiqsim, luj Gihduz yienghmwnq gyenhciz naenxsim. 6 Gak boux beixnuengx hax, seizneix gyoengqraeuz hij gij mingzhiq bouxcawj raeuz Yehsuh Gihduz ma mingqlingq faenhsou: mboujguenj boux beixnuengxlawz laengzlaengz saengjsaengj mbouj guh gijmaz, mbouj soenhsouj gyoengqraeuz soj son hih, faenhsou couh ij liz gyoengqde, mbouj dep gyoengqde. 7 Faenhsou caemh gag rox ij baenzlaw hag gyoengqraeuz, aenvih gyoengqraeuz youq faenhsou mwnq hih mwhde gaenhbaenj mbouj caeggyik, 8 caemh mij begbeg gw vunz hoengq, dauq dwg ngwnzngoenz dwgrengz guh hong, gag ciengx bonjfaenh lah, vih mbouj hawj faenhsou fuqswz gyoengqraeuz dih saenghhoz. 9 Gizsaed, gyoengqraeuz yienghneix guh gaenhbaenj mbouj dwg naeuz gyoengqraeuz mij'z gienz laeng faenhsou aeu gijmaz, dauq dwg ij guh ndei bangjyangq hwj hawj faenhsou hag lah. 10 Gyoengqraeuz youq faenhsou mwnq hih mwhde, gyoengqraeuz gaenq raengq faenhsou goq, naeuz, hauhnaeuz miz vunz mbouj haenj guh hong nex, couh mbouj ndaej gw haeux, 11 aenvih gyoengqraeuz dingq naeuz faenhsou mwnq miz hih vunz ijsiengj gw ndei youqlag gyekgyek, caiq ijsiengj guenj henzsaeh. 12 Gyoengqraeuz seizneix caemh hij gij mingzhiq bouxcawj raeuz Yehsuh Gihduz ma mingqlingq doenghgij vunz neix, ij simdingh roengzma, gag guh gag gw. 13 Gangj daengz faenhsou gak boux beixnuengx hax, faenhsou ij gyenhciz guh ndeisaeh, mbouj ndaej doeknaiq. 14 Yiengq, hauhnaeuz miz vunz mbouj dingq fung saenq gyoengqraeuz soj sij hih vah hih, ij cuqhiq daezfuengz de, mbouj gaen de, mbouj caeuq de miz laizvangj, hawj de gag roxnginh nyaenq. 15 Hoeng, cijmboujgoq mbouj ndaej dawz de dangq boux dizyinz faenhsou, dauq ij doiq de luj doiq boux beixnuengx he yienghmwnq gienq de. 16 Muengh hawj vunz miz bingzan dih bouxcawj raeuz Yehsuh Gihduz siengzseiz cungj hawj faenhsou bingzan! Muengh bouxcawj raeuz caeuq faenhsou daixgya youq! 17 Gou, Baujloz, youq dineix caenfawz sij hoh faenhsou ndei! Gou moix it fung saenq dih gatsat de cungj yienghneix sij, yienghneix ndaej cingqmingz fung saenq neix dwg fung gou sij he. 18 Muengh bouxcawj raeuz Yehsuh Gihduz siengzseiz doiq faenhsou daixgya haijliengh!
1 Gou dwg Baujloz, dwg ciuq boux gouq raeuz dih Cangqdiq caeuq hawj gyoengqraeuz miz muengh dih Yehsuh Gihduz dih mingqlingq ma guh Yehsuh Gihduz dih dwzbaijyienz, 2 sij saenq hawj vih sinq Yehsuh hwj guh caen lwg gou dih Dizmohdaiq. Muengh Bohmbwn raeuz Cangqdiq caeuq bouxcawj raeuz Yehsuh Gihduz doiq mwngz haijliengh, hojsik mwngz, hawj mwngz bingzan! 3 Mwh gou bae Majgizdoenq Saengj hih mwhde, gou gaenq raengq mwngz goq naeuz hawj mwngz giqcuz youq Hijfuzsoj youq lo; yienghmwnq, mwngz couh ndaej naeuz mbouj hawj doenghheij vunz youq mwnq cenz doenghgij mbouj hab Cangqdiq dih saedsaeh he, 4 caeuq naeuz gyoengqde mbouj hawj gyoengqde doiq doenghgij gojgaeq doenghbaez he caeuq doenghheij gyabouh raez rangxrangh he maezgae, aenvih doenghgij neix cungj dwg cauh hawj vunz doxeuq, gaenhbaenj mbouj ndaej bang vunz hawj vunz ciuq Cangqdiq dih giqvaq ma guh. Hoeng, gij giqvaq neix dwg gauq sinq Yehsuh cij ndaej guh daengz he. 5 Couh dwg naeuz hawj mwngz naeuz doenghheij vunz neix dih muzdiz dwg hawj vunz doxaiq. Gij aiq neix wnggai dwg daj ndaw sim vunz mij'z coih he caeuq dwg mbouj miz gijmaz doiq mbouj hwnj liengzsim he caeuq dwg miz caensim sinqsim he. 6 Hoeng hojsik miz hih vunz bienq sim lo, mbouj miz aen sim yienghneix lo, dauq bae gangj rumz gangj rengx, gangj doenghgij mij'z yungh he. 7 Gyoengqde siengj guh Cangqdiq dih fazliz lauxsae, hoeng dauq mij rox bonjfaenh soj gangj hih, soj nda'ndieng hih. 8 Gyoengqraeuz rox, fazliz baenjlaiz dwg deng hih, cijaeu vunz yungh ndaej cingqdangq. 9 Gyoengqraeuz caemh rox, fazliz mbouj dwg laeb hawj doenghgij vunz ndei he, dauq dwg laeb hawj doenghgij vunz nga'ngangq mbouj dingq vah, famh coih mbouj gingqbaiq Cangqdiq, yawjnaek aen nienzdaiq neix, mbouj siengj guh gij hab'eiq habhoz Cangqdiq he, gaj vunz gaj bohmeh, 10 ndaengndwet, vunzsai caeuq vunzsai, hai vunz, gangj gyajvah, guh gyaj cingqgiq, caeuq doenghheij veizfanj ciuq gij saedsaeh Cangqdiq son vunz hih vunz laeb hih lah. 11 Gij saedsaeh neix dwg ciuq wnggai haenh hih najrongh hih Cangqdiq cenz hawj gou dih ndei siuhsiz ma gangj hih. 12 Gou docih nyok bonjsaeh hawj gou hih bouxcawj raeuz Yehsuh Gihduz, aenvih de yawj gou dwg boux sinq ndaej goq lauxsaed he dih vunz, de baij gou swqhaeuh de. 13 Gannaeuz gaxgonq gou gangj vah daekcoih de, bwkhaih gyauqveiq goq, caemh dwg boux doegdoeg siebsieb hih vunz he lah, hoeng, Cangqdiq ciuqyiengh aiq gou mbouj yiem gou, aenvih mwhde gou mbouj sinq de, mbouj rox bonjfaenh guh gijmaz, sojhij cij guh doenghgij saeh ya'mboujlw neix. 14 Mbouj danhcij naeuz yienghneix, bouxcawj raeuz Yehsuh Gihduz vanzlij doiq gou haijliengh raixcaix, hawj gou ndaej sinq de caeuq ndaej miz aiqsim. 15 Yehsuh Gihduz daeuj lajmbwn guh vunz dwg vih ij gouq gij vunz famh coih he; gawq vah neix dwg deng hih mbouj loek hih, hoeng, gou cingq dwg doenghgij vunz famh coih ndaw de dih boux ceiq vaih he. 16 Caemh dwg vih yienghneix hwj Yehsuh Gihduz doiq gou haijliengh raixcaix; yienghneix de couh ndaej youq gwnz ndang ceiq vaih hih gou yienh ok de miz naenxsim raixcaix he, caemh ndaej hawj doenghgij vunz baezneix ij daeuj sinq de he, ndaej seiqseiz lix he, rox daengz gyoengqde caeuq gou doxdoengz caemh ndaej miz muengh. 17 Muengh soenhgingq najrongh cungj gvi hawj Cangqdiq; Cangqdiq dwg seiqseiz lix mbouj rox rai, aeu ra ma yawj mbouj raen, caenhgag de cij dwg vuengz cij dwg Cangqdiq he! Ahmaenz. 18-19 Lwg gou Dizmohdaiq hax, gou ij hawj mwngz fuqswz gij he. Hoeng gou sien daezsingj mwngz, hawj mwngz ndaejgeiq boux cenz gij vah Cangqdiq doenghbaez doiq mwngz soj gangj goq hih, hawj mwngz ndaej sinqsim gyenhdingq mbouj doeknaiq ciuq liengzsim bae caeuq doenghheij luenh cenzgangj mbouj dwg saedsaeh hih doenghheij vunz mwnq doxdingx roengzbae. Gou yienghneix daezsingj mwngz dwg aenvih miz hih vunz mbouj gangj liengzsim, guh hwj daengz gajlaeng gij sinqsim gyoengqde caemh luj aen ruz mbongq daej caem roengz raemx bae he. 20 Gangj daengz yienghneix, Hijmijnaij caeuq Yaqlizcanhdaq couh dwg yienghneix hih vunz lo; sojhij, gou gaenq dawz gyoengqde gyau hawj Sajdanq fangzvuengz fad gyoengqde, hawj gyoengqde rox baezneix mbouj caiq ndaej gangj vah daekcoih Cangqdiq haem lo.
1 Sojhij, gou naeuz mwngz, daixit, gyoengq lwgsae cungj ij vih sojmiz hih vunz hwj gouz Cangqdiq docih Cangqdiq, bang gyoengqde gouzhaenh Cangqdiq. 2 Caemh doxdoengz, gyoengq lwgsae caemh ij vih gak aen guek dih lingjdauj gouzhaenh Cangqdiq, caeuq vih sojmiz miz gienz hih vunz hwj gouzhaenh Cangqdiq; yienghmwnq couh ndaej hawj raeuz goq an'onj caeuq bingzdingh dih saedceij, caemh ndaej hawj raeuz guh gij hab'eiq habhoz Cangqdiq he, caeuq ndaej daengz vunz dih soenhgingq. 3 Yienghneix guh youq ndaw lwgra gouq raeuz dih Cangqdiq suenq dwg ndei hih; de haenjheiq yienghneix guh hih. 4 De muengh cenz lajmbwn hih vunz cungj dwg ndaej gouq, cungj ndaej rox gij saedsaeh de. 5 Couh dwg naeuz gyoengqraeuz caenhgag miz boux Cangqdiq dog, de caeuq raeuz hih cungqgyan de caemh dwg caenhgag miz boux cungqgyan he. Boux neix couh dwg daeuj lajmbwn guh vunz hih Yehsuh Gihduz lo. 6 De youq hab hih mwhde aeu rai ma cueg coih vunz lajmbwn, hawj vunz lajmbwn mbouj ngaiz souh daengz fad; de yienghneix guh dwg ndaej cingqmingz Cangqdiq gaengjdingq nyienh'eiq gouq vunz he. 7 Gou naeuz mwngz ni gij saedsaeh he, couh dwg naeuz, vih gij ndei siuhsiz neix hwj Cangqdiq baij gou daeuj guh boux cenzgangj gij ndei siuhsiz de caeuq guh boux dwzbaijyienz de, hawj gou ndaej cenz naeuz gij vunz linghvaih minzcuz he ni gij ndei siuhsiz neix, son gyoengqde hawj gyoengqde sinq Yehsuh caeuq rox gij saedsaeh Cangqdiq. 8 Sojhij gij cawjeiq gou dwg ij hawj gak dieg gyauqveiq dih vunzsai mbouj fatheiq, mbouj doxceng; gouzhaenh Cangqdiq mwhde, ndaw sim ij wnggai mbouj miz gijmaz doiq mbouj hwnj Cangqdiq he. 9 Gou caemh ij hawj gak dieg gyauqveiq dih vunzbaz caepcingq, gaejyungh cang ndang, daenj hih buh seuqset couh ndaej lo, mbouj dwg naeuz gauq cang byoem cang raeuj ndaej gyaeu, daiq gim venj ngaenz hwj ma cang guh gyaeu guh ndei hih nej. 10 Cijaeu guh saeh ndei, bonjfaenh couh boiqndaej gag naeuz: “Gou dwg hab'eiq habhoz Cangqdiq hih vunzbaz” lo. 11 Youq gyauqveiq, vunzbaz ij wnggai dingq lauxsae, ij an'an dinghdingh hih hag; 12 gou mboujcwnj gyoengqde youq gyauqveiq son vunzsai guenj vunzsai; vunzbaz ij wnggai dingh cubcub, 13 aenvih Cangqdiq sien cauh Yaqdangh boux vunzsai neix, gajlaeng cij cauh daengz Yaqvah boux vunzbaz neix, 14 caemh dwg ngaiz yaeuh hih mbouj dwg Yaqdangh; dwg Yaqvah boux vunzbaz neix ngaiz yaeuh hwj famh coih lah. 15 Hoeng, aenvih vunzbaz dwg ndaej seng lwg he, cijaeu gyoengqde siengzseiz sinq Yehsuh, guh gij hab'eiq habhoz Cangqdiq he, miz aiqsim, caiq gag caepcingq bonjfaenh, couh ndaej gouq lo.
1 Gou saedsaeh naeuz mwngz ni, hauhnaeuz miz vunz siengj guh gyauqveiq lingjdauj hih, couh dwg gienh ndeisaeh he lo. 2 Yiengq guh lingjdauj hih bietdingh ij dwg boux mij maz diudik he, caemh dwg caenhgag gaen mehyah bonjfaenh, mij gaen goq vunz he, rox gag haed bonjfaenh he, caepcingq he, vunz caemh soenhgingq de he, caemh haenj daih hek he, rox son vunz he, 3 mbouj gw laeuj fiz he, mbouj haenj doxdub doxceng he, soh semxsemh he, mbouj dam cienzcaiz he, 4 rox guenjleix aen gya bonjfaenh, gyauq lwg bonjfaenh, sawjhawj lwg bonjfaenh naeuzdingq, lwg caemh gingqcungh de. 5 Sojhij naeuz, hauhnaeuz it boux vunz mbouj rox guenjleix aen gya bonjfaenh hih, yiengq de ij baenzlaw rox guenjleix aen gyauqveiq Cangqdiq nej? 6 Yiengq cungjsuenq naeuz miz vunz guh ndaej daengz doenghgij diuzgyenq gwnz neix hwjx, doengh boux sinq Yehsuh mbouj geijlwh caez he cungj mbouj ndaej guh gyauqveiq dih lingjdauj, mienxndaej de luj Sajdanq fangzvuengz yienghmwnq gag naemqnaeuz bonjfaenh ak raixcaix hwj le ngaiz yamq haeuj luj de ngaiz fad he bae. 7 Guh gyauqveiq lingjdauj hih, youq doenghgij vunz mbouj sinq Yehsuh he caemh bietdingh ij dwg mingzsingh ndei he, mienxndaej ngaiz vunz naeuz, ngaiz fangzvuengz gaz dawz mbouj rox. 8 Caemh doxdoengz, cenmonz guh gij hong gyauqveiq hih caemh bietdingh ij dwg boux vunz soenhgingq he, gangj vah lauxsaed, mbouj gw laeuj fiz, mbouj dam cienzcaiz he, 9 caemh bietdingh ij bingz liengzsim gyenhciz sinq gyoengqraeuz soj sinq dih gij saedsaeh Cangqdiq hawj raeuz rox he. 10 Gyoengqde caemh bietdingh ij sien souh daengz gaujniemq, cingqmingz de mij maz ndaej diudik he, cij ndaej cenmonz guh gij hong gyauqveiq. 11 Caemh doxdoengz, gij vunzbaz cenmonz guh gij hong gyauqveiq he caemh ij dwg boux vunz soenhgingq he, lauxsaed mbouj doeng gangj sae gangj vunz vaihvah he, rox gag haed bonjfaenh he, sinq ndaej goq he. 12 Caemh doxdoengz, doenghheij vunzsai cenmonz guh gij hong gyauqveiq he caemh dwg caenhgag gaen mehyah bonjfaenh, mij gaen goq vunz he, caemh ij rox guenjleix ndaw gya bonjfaenh, caeuq songyauq lwg he. 13 Gou naeuz hax, doenghheij guh gij hong gyauqveiq, guh ndaej ndei he, gij mingzhiq de caemh ndei, caemh dwg mbeihung mbouj lau hwj cenzgangj Yehsuh Gihduz dih ndei siuhsiz. 14-15 Dizmohdaiq, gou gannaeuz muengh gou ndaej vaiqdi bae yawj mwngz lah, hoeng, hoengjlau gou ngaiz nguh cizgyenh mij ndaej bae daengz mwngz mwnq vaiq. Sojhij gou sij fung saenq neix hawj mwngz, hawj mwngz ndaej rox youq gyauqveiq ij baenzlaw guh, aenvih gyauqveiq couh dwg seiqseiz lix dih Cangqdiq dih gya, dwg hen gij saedsaeh Cangqdiq mbouj hawj vunz luenh gaij he he. 16 Bak faenh cih bak, mij maz ndaej ngeiz, Cangqdiq hawj raeuz rox hih gij saedsaeh neix cingqcaen dwg geizmiuj raixcaix, couh dwg: De bienq boux vunz yienghmwnq yienh hawj vunz raen, Hoenzsaenz Cangqdiq cingqmingz de dwg Gihduz. Bouxcai Cangqdiq ndaej raen de, Gij ndei siuhsiz de caemh cenz bae daengz gak guek gak dieg. Gij vunz lajmbwn cungj sinq de, De najrongh sagsag hwj ndaej ciep hwnj mbwn bae.
1 Hoenzsaenz Cangqdiq mingzmingz naeuz cingsuj, gij vunz sinq Yehsuh Gihduz he, baezneix gaengjdingq miz hih vunz mbouj sinq de, yiem gij saedsaeh de, dauq bae gaen doenghheij hoenzsaenz yaeuh vunz he caeuq dingq doenghheij fangz yak luenh gangj luenh son he, 2 aenvih miz doenghheij gyajcang guh simndei simsoh he ok daeuj luenhbangh cenzgangj samjciengz; doenghheij vunz neix aen sim de gaenq ngaiz ma gw lo, mij sim mij daep lo. 3 Gyoengqde haed mbouj hawj vunz aeu, mbouj hawj vunz haq, haed mbouj hawj vunz gw gijlaw gijlaw. Hoeng, doenghgij gw he cungj dwg Cangqdiq cauh okdaeuj he; doenghgij vunz sinq Cangqdiq rox gij saedsaeh Cangqdiq hih, cijaeu gyoengqde miz aen sim rox docih Cangqdiq he, couh ndaej gw lo. 4 Cangqdiq soj cauh hih, cungj dwg ndei hih; cijaeu vunz rox docih de, couh ndaej lo, 5 aenvih gij vah Cangqdiq caeuq vunz gouzhaenh de hih couh ndaej hawj doenghgij gw bienqbaenz hab ndaej gw he. 6 Yiengq, hauhnaeuz mwngz dawz doenghgij saeh neix naeuz doenghheij gyoengq beixnuengx ni nex, mwngz couh suenq dwg Yehsuh Gihduz hih bouxhoiq ndei he lo, dwg daj mwngz soj sinq soj dingq hih gij saedsaeh mwnq hwj beizyangj okdaeuj he lo. 7 Mwngz gaej dingq gij gojgaeq boq ien he hwj mbouj dawz haeuj rwz Cangqdiq; wnggai vih hawj bonjfaenh bienqbaenz boux hab'eiq habhoz Cangqdiq he hwj gyenhciz duenqlenq bonjfaenh. 8-9 Gou lauxsaed naeuz mwngz ni, duenqlenq ndangdaej danghyienz miz ndeicawq, hoeng, guh hab'eiq habhoz Cangqdiq hih vunz hwj duenqlenq miz ik engqgya lai, aenvih ndaej guh daengz hab'eiq habhoz Cangqdiq hih, seiq neix seiq laeng cungj ndaej hawj mwngz miz fuk; gou gangj hih doengh gawq vah neix, mwngz wnggai sinq. 10 Sojhij, gyoengqraeuz dwg vih yienghneix hwj roengzrengz, aenvih raeuz rox caenhgag dwg de, seiqseiz lix dih Cangqdiq, cij ndaej soengq fuk hawj raeuz, caemh dwg de ndaej gouq vunz lajmbwn, engqgya dwg de gouq gij vunz sinq de he. 11 Mwngz ij dawz gij saeh neix naeuz gij vunz ni, caemh ij son gyoengqde. 12 Mbouj ndaej hawj vunz yawj mwngz dwg hauxseng hwj yawj mbouj hwnj mwngz; mboujguenj mwngz gangj vah cixnaeuz guh gijmaz, aiqsim cixnaeuz sinq Yehsuh dih sim, cixnaeuz laux mbouj lauxsaed, caep mbouj caepcingq, gak yiengh cungj ij laeb ndei bangjyangq hawj gij vunz sinq Yehsuh he. 13 Mwngz caemh ij doeg Singqgingh naeuz vunz ni, gienq vunz dingq Cangqdiq, caeuq son gij saedsaeh he naeuz vunz ni; doenghgij neix mwngz wnggai dawz haeuj sim, itcig daengz gou bae. 14 Mwngz caemh mbouj ndaej lumz Cangqdiq nyok hawj mwngz hih gij bonjsaeh mwnq; gij bonjsaeh neix couh dwg gaxgonq Cangqdiq dunghgoq doengh boux gyauqveiq lingjdauj oemj fawz hawj mwngz hih mwhde soj gangj hih. 15 Doenghgij saeh neix mwngz ij naebsim bae guh, hawj gyoengq vunzlai raen mwngz miz cwnqbuq. 16 Mwngz ij siengzseiz cuqhiq daengz bonjfaenh, gangj vah hah, guh saeh hah, caeuq mwngz soj son hih, cungj ij wnggai cuqhiq. Gou doiq mwngz soj gangj hih, mwngz ijaeu guh daengz, mbouj ndaej doeknaiq. Yienghneix mbouj danhcij naeuz ndaej gouq bonjfaenh, caemh vanzlij ndaej gouq doenghheij vunz dingq mwngz gangj he.
1 Mwngz doiq doenghheij vunzsai beij mwngz laux he ij soenhcungq; miz gijmaz, mbouj ndaej gvaiqnaeuz de ndaek. Doiq gyoengqde ij luj doiq daxboh bonjfaenh yienghmwnq menhmenh naeuz, ndeindei naeuz; doiq vunzsai hauxseng caemh dwg ij luj doiq boux beixnuengx bonjfaenh; 2 doiq doenghheij vunzbaz beij mwngz laux he caemh dwg ij luj doiq daxmeh bonjfaenh yienghmwnq; doiq lwgsau hauxseng caemh dwg ij luj doiq dahnuengx bonjfaenh, caemh ij caepcingq. 3 Ij soenhcungq doengh boux cingqcaen miz nanh hih mehmaiq. 4 Hauhnaeuz mehmaiq miz lwg miz lan nex, couh ij wnggai sien hawj gyoengqde youq ndaw ranz bonjfaenh hag baenzlawz guh cij dwg yauqgingq bouxlaux, boixaen bouxlaux, aenvih Cangqdiq haenj yienghneix he. 5 Doengh mehmaiq mij saek boux ndaej baengh he, caenhrox gag baengh Cangqdiq, ngwnzngoenz cungj caenhrox gouzhaenh Cangqdiq he hih, cij suenq dwg cingqcaen dwg mehmaiq. 6 Gangj daengz caenhrox gwgw angqangq yangjcouq yangjcouq hih mehmaiq, gannaeuz de lij lix lah, hoeng, gizsaed de caemhdangq rai lo. 7 Mwngz caemh ij naeuz gij vunz ni doenghgij saeh neix, mienxndaej gyoengqde ngaiz vunz naeuz. 8 Yiengq, hauhnaeuz miz vunz mbouj bang gij caencik bonjfaenh, dwzbez dwg gij vunz ndaw ranz bonjfaenh, yiengq de couh dwg yiem gij saedsaeh Cangqdiq lo; cungj vunz neix beij doengh boux mbouj sinq Cangqdiq he vanzlij yaez. 9 Caiq gangj daengz mehmaiq ij daengz mwhlaw cij ndaej hab daengh haeuj ndaw bonjbouh gyauqveiq bang mehmaiq he bae nej, couh dwg ij daengz roekcib bi doxbae bae cij ndaej gaepfaenh daengh haeuj ndaw bonjbouh bae, caemh dwg caenhgag gaen gojyez bonjfaenh, mij gaen goq vunz he, 10 caemh ij miz guh ndeisaeh dih mingzsingh he, beijgangj naeuz ciengx lwg songyauq lwg, mboujguenj hek gyae hek gaenh cungj haenj daih, bang gij vunz Cangqdiq swiq ha, bang gij vunz miz nanh he, caenhrengz bae guh ndeisaeh he. 11 Caiq gangj daengz doengh mehmaiq hauxseng he, mbouj ndaej hawj gyoengqde gaepfaenh daengh haeuj ndaw bonjbouh bae, aenvih hawj gyoengqde gaepfaenh daengh haeuj ndaw bonjbouh bae nex, gyoengqde couh ij fazsiq naeuz mbouj caiq haq mbat daixngeih caeuq ij yungjyenj swqhaeuh Cangqdiq yienghneix. Yiengq, hauhnaeuz gyoengqde dingx mbouj ndaej aen ndangnoh bonjfaenh siengjmuengh hwj caiq siengj haq mbat daixngeih haem nex, couh mij banqfaz ndaej naebsim swqhaeuh Gihduz lo. 12 Yienghneix gyoengqde couh ngaiz dingh miz coih, aenvih gyoengqde famh gaxgonq soj fazsiq goq hih. 13 Caiq gyacangq hauhnaeuz hawj gyoengqde daengh haeuj bae nex, cungj lau gyoengqde gajlaeng bienq gyik hwj haenj nyangz hoh ndonj hoh. Mbouj danhcij bienq gyik, vanzlij haenj guenj henzsaeh, doeng gangj sae gangj, bak lai, gangj doenghgij mbouj wnggai gangj he. 14 Sojhij gou cingxnyienh doenghheij mehmaiq hauxseng he caiq haq hoh luh. Yienghmwnq gyoengqde ndaej seng lwg gyauq lwg, guenj gya, mienxndaej ngaiz doenghheij haenq Yehsuh hih vunz miz congxgon ra congxmbongq ma naeuz gyauqveiq, 15 aenvih gaenq miz hih mehmaiq hauxseng, yienzlaiz dwg guh gij hong gyauqveiq he, hoeng gajlaeng mbouj nyienh guh, couh vwt gij hong neix hwj bae guh gij hong Sajdanq fangzvuengz haenjheiq he hih lo. 16 Gangj daengz doenghheij vunzbaz sinq Yehsuh he, hauhnaeuz ndaw ranz de miz mehmaiq nex, couh wnggai bang de, mbouj wnggai doi hawj gyauqveiq bae guenj. Yienghmwnq gyauqveiq cij ndaej bang doenghheij mehmaiq mij maz ndaej baengh he lo. 17 Doenghheij lingjdauj rox guenjleix gyauqveiq hih, dwzbez dwg doenghheij naebsim cenzgangj Cangqdiq dih ndei siuhsiz caeuq son vunz hih, wnggai lai soenhgingq gyoengqde caeuq lai hawj gyoengqde ndaej, 18 aenvih ndaw Singqgingh ndaw de sij miz naeuz: Duz cwz rag muh raenx haeux mwhde mbouj ndaej daep mob hawj duz de. Ndaw de caemh vanzlij caiq sij naeuz: Guh hong wnggai ndaej ngaenzhong. 19 Hauhnaeuz miz vunz gauq gij lingjdauj gyauqveiq nex, cizfeih miz song daengz sam boux; mbouj nex, gaenhbaenj mbouj leix gij saeh neix. 20 Yiengq, hauhnaeuz doenghheij cingqcaen famh coih he, mwngz ij wnggai youq dangqnaj vunzlai bihbingz gyoengqde, yienghneix guh couh ndaej daezsingj vunzlai mbouj gaen famh coih. 21 Gou youq dangqnaj Cangqdiq caeuq dangqnaj Yehsuh Gihduz caeuq dangqnaj doengh bouxcai Cangqdiq raengq mwngz, mwngz ij ciuq doenghgij vah neix bae guh, bae banh saeh, ijaeu ndwn ndaej cingq, mbouj ndaej yawj vunz guh saeh. 22 Mbouj ndaej seizbienh oemj fawz hawj vunz, baij vunz swqhaeuh Cangqdiq. Yienghmwnq, hoengjlau gajlaeng boux de famh coih, mwngz caemh ngaiz suenq miz coih. Mwngz wnggai baujciz bonjfaenh mbouj famh coih. 23 Aenvih aen ndangdaej mwngz siengzseiz miz bingh, sojhij mbouj wnggai caenhgag gw raemx, caemh ij wnggai gw dihdi laeuj buzdauz he, yienghmwnq ndaej bang siuhvaq. 24 Miz hih vunz famh hih coih gig okra, cungj mbouj hoj daengj daengz Cangqdiq saemjbuenq hih ngoenz mwnq haem cix rox lo. Hoeng, miz hih vunz famh hih coih mij loh hawj vunz rox, hoeng, daengj daengz Cangqdiq saemjbuenq hih ngoenz mwnq, ciuqyiengh ngaiz loh okdaeuj. 25 Caemh doxdoengz, miz hih vunz guh hih ndeisaeh, vunz caemh rox; miz hih mij loh okdaeuj hawj vunz rox, hoeng, daengz gajlaeng vunz caemh ndaej rox.
1 Caiq gangj daengz guh hoiq. Hauhnaeuz miz byawz dwg guh hoiq vunz hih, couh ij wnggai miz aen sim soenhcungq bouxcawj he. Mij'z nex, Cangqdiq dih mingzhiq caeuq de sojmiz dih saedsaeh cungj ngaiz vunz riu, ngaiz vunz yawj mbouj hwnj lo. 2 Yiengq, hauhnaeuz bouxcawj dwg sinq Yehsuh he nex, bouxhoiq couh ij wnggai dingq de, mbouj ndaej vih de caemh dwg caezgya sinq Yehsuh he hwj couh mbouj faen caepndat naekmbaeu, dauqfanj engqgya ij caensim bae swqhaeuh boux de, aenvih ndaej yangjcouq vunz swqhaeuh hih cungj dwg Cangqdiq aiq dih lwgsae. Dizmohdaiq hax, mwngz bietdingh ij son gij vunz doenghgij saeh neix, caemh gienq gyoengqde. 3 Miz hih vunz son vunz son gij mbouj doengz gij saedsaeh Cangqdiq he; doenghgij vunz neix dwg mbouj nginh gij vah bouxcawj raeuz Yehsuh Gihduz dwg saedsaeh he, gangj daengz hab'eiq Cangqdiq, gyoengqde caemh mbouj dawz haeuj rwz. 4 Cungj vunz neix couh dwg gag naemqnaeuz bonjfaenh cungj rox raixcaix; gizsaed de it di cungj mbouj rox. Doengh cungj vunz neix, miz cungj mbouj ndei he, couh dwg haenj vih gawq saw he cih saw he hwj doxceng, simqciq bienqbaenz rahoengz, mbouj doxndei, daekcoih vunz, doxngeiz, 5 hawj doenghheij vunz simya he mbouj miz Cangqdiq dih saedsaeh he doxeuq mbouj dingz. Mbouj danhcij naeuz yienghneix, vanzlij dawz swqhaeuh Cangqdiq ma dangq guh gij ndaej fatcaiz he. 6 Gizsaed, caensim caen'eiq swqhaeuh Cangqdiq caeuq doiq miz gijmaz cungj rox gaeuq he mbouj damsim he doenghheij vunz neix cij suenq dwg cingqcaen fouqmiz he, 7 aenvih seng mbouj daiq daeuj, rai mbouj daiq bae. 8 Hauhnaeuz gyoengqraeuz miz gw, miz daenj, couh wnggai rox gaeuq. 9 Siengj fatcaiz hih vunz cungj dwg ngaiz yamq haeuj famh coih hih diuz roen neix, simqciq vih bonjfaenh ngawzngad miz haih dih siengjmuengh hwj ngaiz gaemhanh dawz, guh hwj gajlaeng gag haex rih haeuj guengq, caemh satsoq lo. 10 Sojhij, miz haujlai mbouj ndei hih saeh cungj dwg coengz damsim iujdaeuz ciuyinx he. Miz hih vunz aenvih daiq dam cienzcaiz lai, guh hwj saet sinqyangj, mbouj caiq sinq gij saedsaeh Cangqdiq haem lo, caemh vih yienghneix hwj doenghgij vunz neix simnyap ij rai, luj miz cax ndaemq youq ndaw sim nwih. 11 Dizmohdaiq hax, mwngz dwg gvi haeuj Cangqdiq he; luj doenghgij saeh neix mwngz mbouj ndaej cimyex haeujbae, ij cwnqliengq guh boux lauxsaed simndei simsoh, soh semxsemh, guh boux hab'eiq habhoz Cangqdiq he, sinq Yehsuh he, miz aiqsim, rox gyenhciz mbouj doeknaiq he. 12 Mwngz souj gij saedsaeh Cangqdiq mwhde, ij wnggai luj boux bing yienghmwnq yungjgamj. Caemh ij gaem ndaet seiqseiz lix; vih hawj mwngz ndaej seiqseiz lix hwj Cangqdiq senj mwngz okdaeuj, mwngz caemh youq dangqnaj haujlai cingqyinz nginh Yehsuh dwg bouxcawj mwngz lo. 13 Gizsaed, gou youq dangqnaj boux hawj sojmiz ndaej miz mingh dih Cangqdiq caeuq boux mbeihung yiengq Bijlahdoh cingqmingz goq saedsaeh dih Yehsuh Gihduz raengq mwngz; 14 gou raengq mwngz hih gij neix mwngz ij dingq, caemh ij ciuq gou raengq hih yienghmwnq bae guh, ij guh daengz mij maz ndaej diudik he, itcig daengz bouxcawj raeuz Yehsuh Gihduz dauq daeuj hih ngoenz mwnq, 15 couh dwg naeuz Cangqdiq nginhnaeuz hab hih ngoenz mwnq. Boux Cangqdiq neix couh dwg: Boiqndaej haenh, wnggai haenh hih, Caenhgag de cij miz gienz hih, Lajmbwn sojmiz vuengz dih vuengz hih, Lajmbwn sojmiz cawj dih cawj hih, 16 Caenhgag de mbouj rox rai hih, Youq mwnq vunz dep mbouj ndaej hih ndaw rongh ndaw de hih, Mij'z vunz ndaej raen goq hih, Caemh mij'z vunz ndaej yawjraen hih Cangqdiq. Muengh najrongh caeuq seiqseiz gienz akak rengzrengz cungj gvi hawj de! Ahmaenz. 17 Mwngz caemh ij naeuz doenghheij gij vunz fouq he, daezsingj gyoengqde mbouj ndaej rasang, caemh mbouj ndaej muengh naeuz miz ngaenz le, gijmaz cungj ndaej he, dauq dwg ij baengh Cangqdiq cij ndaej hih lah, aenvih de ndaej nyok hawj raeuz sojmiz hih lai hux lai, caemh hawj raeuz ndaej angq hux angq. 18 Mwngz caemh ij naeuz hawj gyoengqde lai guh ndeisaeh, haijliengh, nyienh'eiq bang vunz. 19 Yienghmwnq gyoengqde couh ndaej youq gwnzmbwn vih bonjfaenh baezneix hwj cwk ndaej baenx haujlai cienzcaiz lo. Miz cungj cienzcaiz neix gyoengqde cij ndaej cingqcaen miz mingh. 20 Dizmohdaiq hax, mwngz ij gyenhciz baujhuq ndei Cangqdiq soj gyau hawj mwngz hih; mbouj ndaej cimyex haeuj doenghheij gangj rumz gangj rengx hwj mbouj dawz haeuj rwz Cangqdiq he, caeuq caeuq saedsaeh doxbyonj doxeuq doxceng hih gag naemqnaeuz bonjfaenh rox raixcaix hih. 21 Miz hih vunz gag naemqnaeuz bonjfaenh miz cungj ciqsiz neix, couh bienq sim lo, mbouj ciuq saedsaeh gaen saedsaeh lo. Muengh Cangqdiq soengq fuk hawj faenhsou!
1-2 Cinhngaiq dih lwg gou Dizmohdaiq: Gou dwg Baujloz; gou dwg ciuq gij cawjeiq Cangqdiq daeuj guh gij dwzbaijyienz Yehsuh Gihduz he, dwg baij daeuj cenzgangj Cangqdiq dih baujcingq. Gij baujcingq neix dwg hawj gij vunz sinq Yehsuh Gihduz he ndaej miz mingh. Muengh Cangqdiq Bohmbwn caeuq bouxcawj raeuz Yehsuh Gihduz doiq mwngz haijliengh, hojsik mwngz, hawj mwngz bingzan! 3 Gou docih Cangqdiq, couh dwg boux gou caeuq cojgoeng gou cungj doxdoengz caensim caen'eiq gingqbaiq dih Cangqdiq, aenvih gou ngwnzngoenz gouzhaenh Cangqdiq hih mwhde cungj dwg daez daengz mwngz. 4 Gou baex ngeix daengz gou caeuq mwngz doxbiek hih mwhde mwngz riuz raemxra, gou couh ngwnzngoenz cungj siengj vaiqdi ndaej raen daengz mwngz, ndaej raen mwngz ndaej hawj gou sim'angq. 5 Gou rox mwngz cungj dwg cingqcaen sinq Yehsuh hih, aenvih mwngz miz daxdai mwngz Lozhij caeuq daxmeh mwngz Youjnizgih yienghmwnq sinq Yehsuh dih sim. 6 Sojhij gou daezsingj mwngz, mwngz ij dawz Cangqdiq dunghgoq gij fawz gou oemj fawz hawj mwngz goq hih gij bonjsaeh mwnq caiq hwng hwnjdaeuj, 7 aenvih Cangqdiq nyok hawj raeuz hih mbouj dwg lau fixfih hih sim, dauq dwg mbeihung miz vi miz rengz, miz aiq, ndaej gag guh gag guenj hih sim lah. 8 Sojhij, mwngz mbouj ndaej vih guh bouxcawj raeuz dih cingqyinz hwj roxnginh saetnaj saetnyaenq, caemh mbouj ndaej yawj gou vih de hwj ngaiz gyaeng hih roxnginh saetnaj saetnyaenq, dauq ij caeuq gou baengh Cangqdiq dih rengz vih cenz Cangqdiq dih ndei siuhsiz hwj itheij souh nanh cij deng. 9 Cangqdiq gouq gyoengqraeuz, senj gyoengqraeuz mbouj dwg naeuz yawj gyoengqraeuz miz guh gijmaz ndeisaeh hih, dauq dwg ciuq gij cawjeiq de caeuq de dih haijliengh lah. Gij haijliengh neix, dwg de youq mijyaengz cauh mbwn cauh deih mwhde, de cix gyezdingq dunghgoq Yehsuh Gihduz ma hwj doiq gyoengqraeuz haijliengh lo, 10 hoeng, daengz seizneix, boux gouq raeuz hih Yehsuh Gihduz daeuj lajmbwn guh vunz le cij yienh okdaeuj lah. De gaenq hawj vunz mbouj caiq rox rai haem lo; de cenz gij ndei siuhsiz hwj dawz mbouj rox rai hih mingh yienh okdaeuj lo. 11 Gou dwg vih gij ndei siuhsiz neix hwj baij daeuj guh boux cenzgangj gij saedsaeh Cangqdiq he, guh boux dwzbaijyienz caeuq guh boux lauxsae he. 12 Sojhij gou dwg vih gij neix hwj souh daengz nanh, hoeng, gou mbouj raen saetnaj hah, aenvih gou rox gou sinq hih dwg byawz, caemh sinq de ndaej baujhuq de soj gyau hawj gou hih, itcig daengz de dauq daeuj hih ngoenz mwnq. 13 Mwngz ij geiq ndei gou soj son mwngz hih, caemh ij ciuq gou soj son mwngz hih ma son vunz, caemh ij baengh Yehsuh Gihduz caeuq de nyok hawj mwngz dih aiq hwj ma son vunz. 14 Caemh ij baengh youq ndaw sim raeuz dih Hoenzsaenz Cangqdiq, souj ndei de gyau hawj mwngz hih gij dijbauj mwnq. 15 Mwngz caemh rox, youq Yaqsiqyaq yienzlaiz gij vunz gaen gou he ceng mbouj geijlai sojmiz hih vunz cungj yiem gou; daiqlienz Feihgizluq caeuq Hwzmohgizniz cungj dwg. 16 Hoeng Anizswzfuz mbouj yiem gou; gou muengh Cangqdiq hojsik gij vunz ndaw ranz de, aenvih de siengzseiz gujliq gou, hawj gou ndaej dauqyungz gyenhdingq hwnjdaeuj. De mbouj vih gou ngaiz gyaeng haeuj ndaw lauz bae hwj roxnginh saetnaj saetnyaenq, 17 dauq dwg de baex daengz Lozmaj he couh dauqcawq bae cimh gou, caemh dwg cimh daengz raen veizcij. 18 Mwngz caemh rox, de youq Hijfuzsoj bang gou haujlai. Muengh bouxcawj raeuz dauq daeuj hih mwhde hojsik de!
1 Lwg gou Dizmohdaiq hax, mwngz ij baengh Yehsuh Gihduz dih haijliengh hwj gyenhgyangz hwnjdaeuj. 2 Gaxgonq mwngz youq dangqnaj haujlai cingqyinz dingq gou cenzgangj goq gij saedsaeh Cangqdiq. Seizneix mwngz ij dawz gij neix cenzgangj naeuz doenghheij vunz lauxsaed sinq ndaej goq he ni, hawj gyoengqde ndaej bae son vunz. 3 Mwngz caemh ij luj Yehsuh Gihduz dih boux bing ndei he yienghmwnq caeuq gou doengz souh nanh. 4 Dang bing hih vunz mbouj ndaej hawj gizdah saeh gaz dawz, yiengq cij ndaej hawj gywnhguenh haenjheiq. 5 Caemh doxdoengz, ywnqdungqyienz bijcaiq bietdingh ij soenhsouj bijcaiq dih gveihswz, yienghmwnq cij ndaej hingz, ndaej cangjliq. 6 Vunz dwgrengz sinhoj dajgeng dajndaem couh wnggai sien ndaej. 7 Mwngz ij wnggai ngeixngeix gou soj gangj hih vah, aenvih Cangqdiq gaengjdingq bang mwngz, hawj mwngz rox sojmiz hih. 8 Mwngz ijaeu ndaejgeiq boux daj rai ndaej dauqlix dih Yehsuh Gihduz; de dwg Daqveiq dih lwglan. Gij neix couh dwg gou soj cenzgangj hih ndei siuhsiz lo. 9 Gou vih cenz gij ndei siuhsiz neix hwj ngaiz souh nanh, simqciq ngaiz luj vunzfamh yienghmwnq ngaiz goenj ngaiz gyaeng. Hoeng, mboujguenj baenzlawz, Cangqdiq dih ndei siuhsiz ciuqyiengh gyaeng mbouj ndaej. 10 Vih yienghneix, gou nyienh'eiq vih gij vunz Cangqdiq senj okdaeuj he hwj souh sojmiz hih nanh, hawj gyoengqde ndaej sinq Yehsuh Gihduz hwj ndaej gouq caeuq ndaej seiqseiz najrongh. 11 Sojhij, gou saedsaeh naeuz mwngz ni, duenh vah laj neix dwg saedsaeh hih, sinq ndaej goq hih, couh dwg: Hauhnaeuz gyoengqraeuz caeuq Yehsuh Gihduz doengz rai, Gyoengqraeuz caemh caeuq de doengz lix lo. 12 Hauhnaeuz gyoengqraeuz gyenhciz sinq de mbouj doeknaiq, Gyoengqraeuz couh ndaej caeuq de dang vuengz lo. Yiengq, caiq hauhnaeuz gyoengqraeuz mbouj nginh de nex, De caemh mbouj nginh raeuz lo. 13 Hoeng, cungjsuenq naeuz gyoengqraeuz sinq mbouj goq, De ciuqyiengh sinq ndaej goq, Aenvih de dwg de, gangj vah gw vah he. 14 Mwngz ij youq dangqnaj Cangqdiq daezsingj gyoengq vunzlai, raengq gyoengqde mbouj ndaej vih gawq saw he hwj doxceng; yienghmwnq doiq gij vunz dingq he mij'z yungh, dauq miz haih hih. 15 Mwngz wnggai luj boux gunghyinz ndei he mbouj miz gijmaz saetnaj he hwj hawj goeng lauxbanj hab'eiq, ij cwnqliengq guh daengz hab'eiq habhoz Cangqdiq hih vunz, gaijyiz gij saedsaeh Cangqdiq gaijyiz ndaej deng, ndaej cwnj. 16 Mwngz mbouj ndaej gaen doenghheij gangj vah rumz vah rengx he hwj mbouj dawz haeuj rwz Cangqdiq, aenvih gangj rumz gangj rengx hih vunz, yied gangj yied hawj vunz bienqbaenz mbouj dawz haeuj rwz Cangqdiq he. 17 Gij vah gyoengqde cenz bae cienfanh vaiq he, yied cenz yied gvangq, caemh luj baeznok yienghmwnq yied naeuh yied gvangq. Doenghheij vunz neix ndaw de couh miz Hijmijnaij caeuq Feihlijduz song boux neix. 18 Gyoengqde liz saedsaeh, yiem saedsaeh, naeuz gijmaz dauqlix hih saeh gaenq goq lo, guh hwj miz hih vunz sinqsim cungj fouz fedfed mbouj dingh lo. 19 Hoeng, Cangqdiq dih saedsaeh couh luj hauxranz yienghmwnq gaenj dwtdwt, it di cungj mbouj doengh; gwnz de dik miz: “Cangqdiq rox doenghgij vunz de” caeuq: “Famz gaep haeuj Cangqdiq hih vunz cungj mbouj wnggai guh doenghgij doegsieb he.” 20 Youq doenghheij ndaw ranz vunz fouq he mbouj danhcij naeuz miz aen gim aen ngaenz coux doxgaiq he, vanzlij miz doengh aen faex he, aen vax he; miz hih dwg dijbauj hih, miz hih dwg yaqyuij hih. 21 Yiengq caemh doxdoengz, hauhnaeuz byawz siengj hawj bouxcawj yawjdij nex, couh ij gag caepcingq bonjfaenh, mbouj cimyex doenghgij saeh doegsieb he, yienghmwnq cij ndaej daengz bouxcawj de baij de guh gak cungj saeh ndei. 22 Mwngz mbouj ndaej luj doenghheij hauxseng rangz mwnq mbouj rox naenxsim, siengj guh gijmaz couh guh gijmaz. Wnggai gaen doenghheij vunz caensim gingqbaiq Cangqdiq he guh vunz simndei simsoh he, miz aen sim sinq Gihduz he, miz aiqsim he, haenj hozbingz he. 23 Doenghheij mij'z yungh hih doxeuq, mwngz gaejyungh cimyex haeujbae, aenvih mwngz rox doxeuq ndaej bienqbaenz doxceng. 24 Guh bouxhoiq Yehsuh hih, mbouj ndaej doxceng; doiq vunz wnggai ngeihheiq swnh semxsemh, rox son vunz, rox naenxsim. 25 Caemh wnggai swnh semxsemh hwj naeuz gij vunz fanjdeiq mwngz he; yienghmwnq saekseiz Cangqdiq lij hawj gyoengqde miz gihveiq gaijgoq, hawj gyoengqde rox saedsaeh, 26 hawj doenghheij vunz fanjdeiq mwngz ngaiz fangzvuengz gaemh dawz bae ciuq fangzvuengz bae guh hih, hawj gyoengqde ndaej singqsag goqdaeuj, ndaej duet ok ndaw fawz fangzvuengz.
1 Mwngz ijaeu rox, aen seiqgyaiq neix hih duenh gajlaeng he gaengjdingq ij miz nanh. 2 Daengz mwhmwnq, gij vunz cij rox guq bonjfaenh, dam cienzcaiz, gag haenh bonjfaenh, naemqnaeuz bonjfaenh cungj rem raixcaix, gangj gij vah daekcoih vunz he, ngig bohmeh, mbouj rox docih vunz, guh gij saeh mbouj hab'eiq habhoz Cangqdiq he, 3 mbouj miz aiqsim, mbouj rox nyiuz vunz, haenj doeng gangj sae gangj vunz vaihvah, mbouj rox naenxsim, doegdoeg siebsieb, mbouj haenj gij ndei he, 4 cuzmaiq baengzyoux, haenj guxmaz couh guxmaz, gag naemqnaeuz bonjfaenh ak raixcaix, caenh haenj yangjcouq mbouj haenj Cangqdiq. 5 Gyoengqde gyajcang yawjnaek Cangqdiq sinq Cangqdiq; gizsaed gyoengqde gaenhbaenj mbouj dawz haeuj rwz de, mbouj sinq de. Luj doengh gyoengq vunz neix, mwngz mbouj ndaej cimyex haeuj bae. 6 Gyoengqde miz mbangj hih vunz cungj haenj ndonj ranz dawz ranz, conghbak gyoengqde caemh rox ndau, ndau hwj ndaej gaemhanh doenghheij vunzbaz miz coih gaz dawz he, mij'z maz daezfuengz, ngaiz gak cungj siengjmuengh guenjciq he. 7 Doenghheij vunzbaz neix, gannaeuz gyoengqde siengzseiz ijsiengj hag lah, hoeng cungj hag mbouj rox gij saedsaeh Cangqdiq. 8 Gyoengq vunz neix fanjdeiq saedsaeh, caemh luj doenghbaez hih Yajniz caeuq Yangzbiq fanjdeiq Mohsih yienghmwnq. Aen sim gyoengqde daiq ya lai, mbouj boiqndaej guh gij lwgsae Yehsuh. 9 Hoeng, gyoengqde cangjyangz mbouj geijlwh caez lo, caemh luj song boux mwnq gij haexnyangj gyoengqde gaengjdingq ij ngaiz loh okdaeuj. 10 Dizmohdaiq hax, mwngz gaenq rox gou baenzlaw son vunz, baenzlaw guh, miz maz muzbiuh hah, caemh rox gou dih sinqsim, naenxsim, aiqsim, mbouj doeknaiq. 11 Mwngz caemh rox gou youq Anhdizah hah, Hijgohnenq hah, caeuq Luqswhdwz hah soj souh daengz hih bwkhaih, souh daengz hih nanh, gou baenzlawz naenxsim, caeuq Cangqdiq baenzlaw gouq gou hah; doenghgij neix, mwngz cungj rox. 12 Gizsaed mwngz caemh wnggai rox, famz siengj gaen Yehsuh Gihduz hwj guh hab'eiq habhoz Cangqdiq dih vunz cungj ij ngaiz souh daengz bwkhaih. 13 Hoeng, doenghheij guh doeg guh sieb, coemx vunz hih vunz yied ngoenz yied doeg; gyoengqde yaeuh vunz, caemh ij ngaiz vunz yaeuh gyoengqde. 14 Dizmohdaiq hax, mwngz ij ciuq mwngz soj hag soj sinq hih yienghmwnq ma guh roengzbae, aenvih mwngz rox mwngz dwg gaen byawz hag he, 15 caiq gyacangq mwngz caemh rox mwngz daj lij iq cix sug Singqgingh lo. Gij Singqgingh neix ndaej hawj vunz singqsag goqdaeuj hwj sinq Yehsuh Gihduz hwj ndaej gouq. 16 Singqgingh ndaw de dih moix it gawq cungj dwg Hoenzsaenz Cangqdiq daezsingj hawj sij he. Singqgingh dwg son hawj vunz rox gij saedsaeh Cangqdiq, hawj vunz rox ij baenzlawz bihbingz gij mbouj deng he, hawj gij vunz miz loek he singqsag goqdaeuj, hawj vunz rox gijlaw wnggai guh, gijlaw mbouj wnggai guh, 17 hawj gij vunz gvi haeuj Cangqdiq he ndaej guh ndei cwnjbiq hwj guh gak cungj saeh ndei.
1 Gou youq dangqnaj Cangqdiq caeuq dangqnaj Yehsuh Gihduz, boux ij dauq daeuj lajmbwn guh vuengz saemjbuenq vunzrai caeuq vunzlix hih boux neix, mingqlingq mwngz, 2 mingqlingq mwngz ij cenzgangj Cangqdiq dih ndei siuhsiz, mboujguenj seizlaw, fung mbouj fungbienh, caemh ij naiqsim bihbingz vunz, naeuz vunz, gienq vunz; mboujguenj guxmaz cungj ij son aeu. 3 Gou yienghneix naeuz dwg aenvih cungj ij miz ngoenz he, gij vunz mbouj caiq haenj dingq gij saedsaeh Cangqdiq, dauq ciuq bonjfaenh haenj gijmaz couh guh gijmaz, siengj baenzlaw couh baenzlaw hwj bae cimh doenghheij lauxsae cij rox gangj gij vah gyoengqde haenj dingq he. 4 Gyoengqde caet rwz mbouj dingq gij vah saedsaeh he, dauq bae dingq doenghgij vah boq ien he. 5 Hoeng, mboujguenj guxmaz, mwngz cungj ij singqsag, mbouj lau souh nanh, gyenhciz guh gij hong cenzgangj Cangqdiq dih ndei siuhsiz, caensim guh ndei gij hong Cangqdiq. 6 Hoeng, gou nej, gou couh luj gij laeuj dajbwiz he couh ij raix okbae lo; gou couh ij caeuq aen seiqgyaiq neix doxbiek lo. 7 Gou dih saenghhoz caemh luj ywnqdungqyienz bijcaiq; gou gaenq camhgyah ciengz bijcaiq mwnq lo, caiq caemh ndaej ndei caemh caiq sat lo. Couh dwg naeuz gou baenxseiq cungj caensim swqhaeuh Cangqdiq he. 8 Youq gwnzmbwn gaenq cwnjbiq cangjbyimj ij hawj gou lo, couh dwg hawj gij vunz simndei simsoh he. Gij cangjbyimj neix dwg boux ndwn ndaej cingq saemjbuenq vunz hih bouxcawj raeuz soengq hawj he, dwg de dauq daeuj hih ngoenz mwnq soengq hawj hih. Mbouj danhcij naeuz soengq hawj gou, vanzlij ij soengq hawj sojmiz muengh de dauq daeuj hih vunz. 9 Dizmohdaiq hax, cingj mwngz vaiqdi daeuj laeng gou dineix, 10 aenvih Dijmaj dam yangjcouq aen nienzdaiq neix hih gak cungj hwj mbouj gaen gou, gag bae daengz Dezsajloznizgyah lo. Lij miz Gwzlwzswq, de miz saeh le caemh bae Gyahlahdaiq lo, vanzlij miz Dizdoh haem, de caemh miz saeh caemh bae Dazmajdaiq lo. 11 Seizneix lij gag Luqgyah boux dog youq henz ndang gou gaen gou laem lo. Gou naeuz, mwngz daeuj gou dineix nex, mwngz ij daiq Majgoj daeuj, aenvih de ndaej bang gou guh gij hong Cangqdiq hwj. 12 Gou gaenq baij Deihgihguj bae Hijfuzsoj lo. 13 Vanzlij miz, mwngz daeuj nex, ij dawz diuz buh baixrog gou daeuj hawj gou, couh dwg mwh gou youq Dwzlozyaq youq ndaw ranz Gyahbuq youq hih mwhde coengq he. Mwngz caemh ij dawz doenghheij saw mwnq daeuj hawj gou, dwzbez dwg geij gienj aeu naeng yiengz ma guh he. 14 Vanzlij miz, Yaqlizcanhdaq goeng cangh dajdiz doengz neix haih gou cienfanh youqgaenj he, hoeng, Cangqdiq caemh ij ciuq de soj guh hih bauqwngq hawj de. 15 Mwngz ij siujsim de, aenvih de fanjdeiq gyoengqraeuz soj cenzgangj hih, fanjdeiq youqgaenj raixcaix. 16 Mwh gou daixit mbat, couh dwg youq Lozmaj fazdingz, gag vih bonjfaenh gou gag buek gag baij leix hih mwhde, mij'z vunz daeuj bang gou; bouxboux cungj yiem gou, hoeng, gou muengh Cangqdiq mbouj vih gij neix hwj dingh gyoengqde miz coih. 17 Gannaeuz mwhde bouxboux cungj yiem gou lah, hoeng, Cangqdiq mbouj yiem gou; de ndwn youq henz ndang gou nyok rengz hawj gou, hawj gou mbeihung hwj ndaej dawz ndei siuhsiz cingcing sujsuj hih cenzgangj naeuz haujlai linghvaih minzcuz hih vunz ni. De vanzlij gouq gou luj daj conghbak duz guk gouq gou okma. 18 Gou sinq Cangqdiq gaengjdingq gouq gou, hawj gou ndaej duet ok sojmiz doegsieb he, daiq gou hwnj gwnzmbwn aen guek de bae. Muengh najrongh yungjyenj cungj gvi hawj de! Ahmaenz. 19 Dizmohdaiq hax, cingj mwngz bang gou cam Bwzgihlah caeuq Yaqgihlah ndei, caemh cam Anizswzfuz cenz ranz ndei. 20 Vanzlij miz, gou naeuz mwngz ni, Hijlahduh youq Gohlimzdoh youq lo. Lij miz Dwzlozfeihmoh, de bingh lo; gou couh hawj de louz youq Mijliqduh youq lo. 21 Gou cingj mwngz vaiqdi ganj youq haeuj doeng cihsenz daeuj daengz gou dineix. Youq dineix hih Youjbuqloz hah, Buqdenz hah, Liqnuz hah, Gwzlaujdijyaq hah, caeuq baenx gyoengq beixnuengx cungj cam mwngz ndei. 22 Muengh bouxcawj raeuz Yehsuh Gihduz caeuq hoenzsaenz mwngz youq! Muengh Cangqdiq siengzseiz doiq faenhsou haijliengh!
1-4 Vih doxdoengz sinq cungj he hwj ndaej guh caen lwg gou hih Dizdoh: Gou dwg Baujloz, dwg bouxhoiq Cangqdiq caeuq boux dwzbaijyienz Yehsuh Gihduz he, dwg Cangqdiq baij daeuj bang gij vunz de senj okdaeuj he, hawj gyoengqde sinqsim gyenhdingq, mbouj doeknaiq, hawj gyoengqde rox gij saedsaeh Cangqdiq—gij saedsaeh neix dwg ndaej hawj vunz guh daengz hab'eiq habhoz Cangqdiq he caeuq ndaej hawj vunz rox ndaej seiqseiz lix he. Gij seiqseiz lix neix dwg coengz boux gangj vah saedsaeh he dih Cangqdiq daj senqsi cix dapwngq le caiq youq mwh hab de hih mwhde, dunghgoq cenzgangj gij ndei siuhsiz hwj ndaej hawj vunz rox he. Gou couh dwg ciuq boux gouq raeuz dih Cangqdiq dih mingqlingq bae guh gij hong cenzgangj Cangqdiq dih ndei siuhsiz he. Muengh Cangqdiq Bohmbwn caeuq boux gouq raeuz dih Yehsuh Gihduz doiq mwngz haijliengh, hawj mwngz bingzan! 5 Gou gaxgonq hawj mwngz louz youq Gwzlijdwz Dauj youq, muzdiz dwg ij hawj mwngz guh doenghgij hong mijyaengz guh liux he, caemh ij hawj mwngz ciuq gou raengq hih youq gak aen singz senj gyauqveiq lingjdauj. 6 Yiengq senj gyauqveiq lingjdauj, boux de bietdingh ij dwg mij maz diudik he, caemh dwg caenhgag gaen mehyah bonjfaenh, mij gaen goq vunz he. Gij lwg de caemh wnggai dwg sinq Yehsuh he, caemh mij'z vunz naeuz gyoengqde saetgyauq he, cij ndaej senj de guh lingjdauj. 7 Aenvih gyoengqde dwg bouxhoiq Cangqdiq, dwg gyenhduz gyauqveiq he, yiengq couh bietdingh ij dwg boux mij'z maz diudik he, mbouj gyauhngauq, mbouj yungzheih aeuqheiq, mbouj yinx gw laeuj, dwgcaengz doxdub, mbouj dam cienzcaiz, 8 haenj daih hek, haenj ndeisaeh, gag caepcingq bonjfaenh, guh saeh gangj vah ndwn ndaej cingq, yawjnaek Cangqdiq, rox naenxsim, 9 caemh ij gyenhciz sinq gij siuhsiz sinq ndaej goq he, hab gij saedsaeh Cangqdiq he. Yienghneix couh ndaej ciuq gij saedsaeh Cangqdiq ma gienq vunz, caemh ndaej buekhingz doenghheij vunz fanjdeiq he, 10 aenvih miz haujlai vunz fanjdeiq gij saedsaeh Cangqdiq, haenj gangj vah rumz vah rengx, yaeuh vunz, dwzbez dwg doenghheij vunz naeuz bietdingh ij gozlij cij ndaej gouq hih doenghheij vunz mwnq engqgya. 11 Mwngz bietdingh ij sujcij doenghheij vunz neix, mbouj hawj gyoengqde gangj rumz gangj rengx. Gyoengqde vih dam cienzcaiz hwj son doenghgij mbouj wnggai son he, guh hwj miz haujlai gya sim cungj mbouj dingh lo. 12 Cingq luj Gwzlijdwz Dauj dih bouxsien he naeuz goq naeuz: “Gwzlijdwz Dauj dih vunz cungj dwg gangj gyajvah he, cungj dwg doegsieb, cix dam gw cix gyik.” 13 De gangj hih gij vah neix dwg mbouj loek hih. Sojhij, mwngz ij yiemzgwz naeuz doengh cungj lwgsae neix, hawj gyoengqde gyenhgyez sinq gij saedsaeh Cangqdiq, 14 hawj gyoengqde cij mbouj bae dingq doenghgij Youzdaiq vunz hih doenghgij gojgaeq doenghbaez he caeuq doenghheij gveihdingq gij vunz yiem saedsaeh dingh okdaeuj he. 15 Doiq doenghheij vunz youq ndaw lwgra Cangqdiq suenq dwg mij'z coih he ma gangj, gijmaz cungj dwg deng he cungj dwg ndaej he; hoeng, doiq doenghheij vunz mbouj sinq Yehsuh, youq ndaw lwgra Cangqdiq suenq dwg miz coih he ma gangj, gijmaz cungj mbouj hab Cangqdiq, aenvih gyoengqde dih siengjfap caeuq gyoengqde dih liengzsim cungj dwg ndaem he. 16 Conghbak gyoengqde gangj naeuz rox Cangqdiq, hoeng, gyoengqde soj guh hih cungj dwg caeuq de doxngig. Gyoengqde hawj vunz dwgcaengz, cungj dwg nga'ngangq, guh mbouj ok gijmaz ndeisaeh.
1 Dizdoh hax, mwngz ij ciuq gij sinq ndaej goq hih saedsaeh ma son vunz, 2 ij naeuz doenghheij vunz laux vunzsai he, naeuz hawj gyoengqde ij gag rox haed bonjfaenh, ij rox gag caepcingq bonjfaenh, ij guh boux hawj vunz soenhgingq he, ij miz aen sim sinq Gihduz he, ij miz aiqsim, ij miz naenxsim; doenghgij neix cungj ij gyenhciz roengzbae. 3 Mwngz caemh naeuz doenghheij vunz laux vunzbaz he guh gijmaz ij hab'eiq habhoz Cangqdiq he, mbouj ndaej doeng gangj sae gangj vunz vaihvah, mbouj ndaej yinx gw laeuj, ij son vunz gij ndei he. 4 Yienghmwnq gyoengqde couh ndaej daezsingj doenghheij vunzbaz hauxseng he rox ij baenzlaw aiq goeng gojyez bonjfaenh caeuq baenzlaw aiq lwg, 5 caemh rox ij baenzlaw caepcingq bonjfaenh, rox guenj gya, doiq vunz cix ngeihheiq cix swnh semxsemh, dingq gojyez bonjfaenh he lo, yienghneix couh mienxndaej miz vunz bangjlaih Cangqdiq dih ndei siuhsiz lo. 6 Caemh doxdoengz, mwngz caemh ij naeuz doenghheij vunzsai hauxseng he, naeuz hawj gyoengqde ij rox gag caepcingq bonjfaenh. 7 Yiengq gangj daengz mwngz nej, mwngz caemh ij gag rox, mboujguenj guh guxmaz, caemh ij guh ndei bangjyangq, ij ciuq saedsaeh son vunz, ij guh boux hawj vunz soenhgingq he. 8 Gangj vah wnggai gangj gij hab gangj he, guh boux mij maz ndaej diudik he, hawj doenghheij fanjdeiq mwngz hih roxnginh najmomj mij'z vah ndaej gangj bae. 9 Mwngz caemh ij naeuz doengh boux guh hoiq he, naeuz hawj gyoengqde ij dingq bouxcawj de; mboujguenj guh gijmaz cungj ij guh gij hawj bouxcawj de sim'angq, caemh mbouj ndaej caeuq bouxcawj doxdingj. 10 Guh hoiq hih caemh mbouj ndaej caeg gij doxgaiq bouxcawj; soj guh hih cungj ij hawj vunz raen sinq ndaej goq, yienghmwnq ndaej hawj vunz haenj gij saedsaeh boux gouq raeuz dih Cangqdiq lo, 11 aenvih Cangqdiq dih haijliengh gouq vun gaenq yienh hawj vunz rox lo. 12 Gij haijliengh neix ndaej hawj raeuz rox mbouj wnggai cimyex doenghgij mbouj hab'eiq habhoz Cangqdiq he, caeuq wnggai rox mbouj cimyex aen seiqgyaiq neix hih doenghgij siengjmuengh he, youq seiq neix ndaej gag caepcingq bonjfaenh, ndwn ndaej cingq, goq hab'eiq habhoz Cangqdiq dih saedceij hwj 13 daengj daengz raeuz soj muengh hih gij ronghndongq boux gouq raeuz dih Yehsuh Gihduz, veijdaq dih Cangqdiq, yienh okdaeuj. 14 De vih ij cueg raeuz, hawj raeuz ndaej duet ok sojmiz hih doenghgij doegdoeg siebsieb he hwj sijndaej diuz mingh bonjfaenh, hawj raeuz ndaej guh boux youq ndaw lwgra Cangqdiq suenq dwg boux mij'z coih he, hawj raeuz ndaej gvi haeuj de, hawj gyoengqraeuz ndaej bienqbaenz boux haenj guh ndeisaeh he. 15 Dizdoh hax, mwngz ij dawz doenghgij saeh neix gangj naeuz vunz ni cingsuj; mwngz miz gienz gienq vunz naeuz vunz—mbouj hawj vunz yawj mbouj hwnj mwngz.
1 Dizdoh hax, mwngz ij daezsingj gij vunz, hawj gij vunz dingq doengh boux dang ak he, dingq de cijveih, guh boux nyienh'eiq guh ndeisaeh he. 2 Mwngz caemh ij gienq gyoengqde mbouj ndaej luenhbangh bangjlaih vunz, mbouj ndaej caeuq vunz doxceng; doiq vunz ij ngeihheiq ij swnh semxsemh, ij rox daengz vunz, rox nyiengh vunz. 3 Dizdoh hax, gou vihmaz ij yienghneix naeuz, dwg aenvih gyoengqraeuz gaxgonq caemh mbouj rox gij saeh Yehsuh, ngawz, nga'ngangq, ngaiz fangzvuengz coemx, cungj dwg ngaiz gak cungj yaya yongqyongq siengjmuengh caeuq gwgw angqangq hwj ciemq youq ndaw sim, siengzseiz miz gij doegsieb he, rahoengz he, doxhaenq he. 4 Hoeng, gouq raeuz dih Cangqdiq gaenq yienh ok de dih hojsik caeuq aiq lo, 5 de caemh dunghgoq Hoenzsaenz de ma dauqyungz cauh gyoengqraeuz, caemhdangq naeuz swiq cengh gyoengqraeuz, hawj gyoengqraeuz ndaej gouq, hawj gyoengqraeuz ndaej miz saen dih gaihdaeuz. De yienghneix gouq gyoengqraeuz, mbouj dwg naeuz gyoengqraeuz guh gijmaz ndeisaeh hih, dauq dwg vih de hojsik raeuz lah. 6 Cangqdiq caemh dunghgoq gouq raeuz dih Yehsuh Gihduz ma nyok gij Hoenzsaenz bonjfaenh de hawj raeuz lai hux lai, 7 yienghneix ndaej hawj raeuz vih de dih haijliengh hwj ndaej guh boux youq ndaw lwgra de suenq dwg boux mij'z coih he, ndaej suenq dwg caen lwg de, hawj gyoengqraeuz miz muengh ndaej seiqseiz lix. 8 Gwnz neix gou soj gangj hih vah cungj dwg deng hih, cungj dwg sinq ndaej goq hih, cungj dwg doiq vunz miz ik hih. Gou muengh mwngz dwzbez gangj doenghgij saeh neix cingsuj, hawj doenghheij vunz sinq Cangqdiq he haenj guh ndeisaeh. 9 Hoeng, mwngz mbouj ndaej dep doenghgij mij gijmaz laizyouz hwj doxeuq he caeuq vih doenghheij gyabouh hwj cej rumz cej rengx he, caemh gaejyungh dep doenghheij vih ij soenhsouj Mohsih fazliz dih diuzlaw hwj doxceng he, aenvih doenghgij neix cungj dwg mij'z ik hih, mij'z yungh hih. 10 Doiq doenghheij faen banghbaij hih vunz, mwngz ij gingjgauq boux de mbat daengz song mbat; hauhnaeuz boux de mbouj dingq nex, couh mbouj caeuq boux de laizvangj, 11 aenvih luj doengh cungj vunz neix, de gaenq mbouj ciuq saedsaeh lo, dwg vunz miz coih he, caemh gaenq gag dingh coih hawj bonjfaenh lo. 12 Dizdoh hax, gou siengj baij Yaqdizmaj cixnaeuz Deihgihguj bae mwngz mwnq lo; boux de baex bae daengz he, mwngz couh ij siengj banqfaz bae Nizgohbohlij cimh gou, aenvih gou gyezdingq youq mwnq goq doeng. 13 Mwngz ij haeuj sim bang Sihnaz boux lizswh neix, caeuq bang Yaqbohloz, bang song boux neix cwnjbiq ij bae youz soj yungh he. 14 Gij vunz raeuz ij hag guh ndeisaeh, ij bang doengh boux miz nanh he, mienxndaej baenxseiq vunz cungj mij'z yungh. 15 Dizdoh hax, youq gou dineix hih vunz cam mwngz ndei. Gou caemh cingj mwngz cam doenghheij vih doxdoengz sinq he hwj aiq gyoengqraeuz he ndei. Muengh Cangqdiq seiqseiz doiq faenhsou haijliengh!
1 Gou dwg Baujloz, dwg vih Yehsuh Gihduz hwj ngaiz gyaeng hih, dwg caeuq boux beixnuengx raeuz Dizmohdaiq sij saenq hawj faenhsou hih. Cinhngaiq dih caeuq raeuz itheij guh hong dih Feihliqmaenz beixnuengx, mwngz ndei! 2 Youq ndaw ranz mwngz doxcomz dih gyauqveiq, faenhsou ndei! Yaqfeihyaq dahnuengx caeuq caeuq raeuz itheij swqhaeuh Yehsuh luj boux bing yienghmwnq mbouj lau rai dih Yaqgihbuq, faenhsou ndei! 3 Muengh Cangqdiq daxboh raeuz caeuq Yehsuh Gihduz bouxcawj raeuz doiq faenhsou haijliengh, hawj faenhsou bingzan! 4 Feihliqmaenz, gou siengzseiz haenh Cangqdiq gouz Cangqdiq hih mwhde cungj daez daengz mwngz, siengzseiz vih mwngz hwj docih raeuz dih Cangqdiq, 5 aenvih gou dingq naeuz mwngz doiq bouxcawj raeuz Yehsuh miz sinqsim, caeuq doiq sojmiz gvi haeuj Cangqdiq dih vunz cungj miz aiqsim. 6 Gou muengh mwngz rox daengz Cangqdiq dunghgoq Yehsuh Gihduz hwj nyok hawj mwngz baenxlai ndei le, hawj mwngz caeuq doenghheij sinq Yehsuh hih vunz doxcomz engqgya ndaej raen miz ndeisaeh. 7 Feihliqmaenz beixnuengx hax, gij vunz gvi haeuj Cangqdiq he cungj vih mwngz dih aiqsim hwj roxnginh angq raixcaix; gou caemh vih mwngz dih aiq hwj angq ij rai, caeuq ndaej daengz haujlai dih gujliq. 8 Youq dineix, gannaeuz gou dwg Gihduz dih boux dwzbaijyienz miz gienz ndaej mingqlingq hawj mwngz guh doenghgij wnggai guh hih saeh lah, 9 hoeng, vih aiq hwj gou, Baujloz, seizneix hij boux vunz laux he caeuq boux vih Yehsuh Gihduz hwj ngaiz gyaeng he ma cingj mwngz guh saeh. 10 Couh dwg vih Ahnizsihmaeuz bouxhoiq mwngz hwj gouz mwngz, aenvih youq gou ngaiz gyaeng hih mwhneix, gou daiq de hawj de sinq bouxcawj raeuz Yehsuh; gou caeuq de caemh luj bohlwg ityiengh. 11 De doenghbaez doiq mwngz mij maz ik, hoeng, seizneix doiq mwngz doiq gou cungj miz ik. 12 Gou seizneix dauq hawj de maj laeng mwngz mwnq. De bae aen sim gou caemh gaen de bae lo; de dwg gou gig haenj gig aiq he. 13 Baenjlaiz gou siengj hawj de youq henz ndang gou, hawj de youq gou seizneix vih cenzgangj Cangqdiq dih ndei siuhsiz hwj ngaiz gyaeng hih mwhneix ndaej dingj mwngz swqhaeuh gou hih, 14 hoeng, gou mbouj siengj mijyaengz rox gij cawjeiq mwngz couh yienghneix guh; gou muengh mwngz soj bang gou hih cungj dwg nyienh'eiq he, mbouj dwg hozgaed he. 15 Ahnizsihmaeuz gaxgonq dajlaeng mwngz mwnq deuz bae mbouj gaen mwngz, saekseiz aiq dwg Cangqdiq dih cawjeiq, hawj de camqciz mbouj gaen mwngz lah, vih ij hawj mwngz baezneix ciep de bae, ndaej seiqseiz gaen mwngz he, 16 hawj de mbouj danhcij dwg bouxhoiq he, vanzlij dwg boux beij bouxhoiq vanzlij giengz he dih boux beixnuengx dij he. De doiq gou ma gangj dwg boux dijbauj he; doiq mwngz ma gangj engqgya dwg yienghneix, doiq doxdoengz dwg gvi haeuj Cangqdiq he ma gangj engqgya dwg yienghneix lo. 17 Sojhij, hauhnaeuz mwngz yawj gou dangq boux doengzdoih he nex, couh cingj mwngz ciep de dangq ciep gou yienghmwnq. 18 Hauhnaeuz de guh gijmaz hawj mwngz siedbonj goq cixnaeuz yiemq mwngz gijmaz goq nex, couh cingj mwngz laih haeuj laeng gou daeuj bax. 19 Gou, Baujloz, doiq gawq neix, dwg cinhswq gaem bit sij hawj mwngz he; mbouj lau naeuz gou laih law, gou gaengjdingq boiz mwngz hih, daiqlienz mwngz yiemq gou hih couh dwg diuz mingh mwngz gou cungj suenq lo. Gizsaed, mboujyungh gou naeuz mwngz; mwngz cungj gag rox. 20 Feihliqmaenz beixnuengx hax, gou muengh mwngz aeunaj bouxcawj raeuz hwj bang gou, ciepsou Ahnizsihmaeuz, yienghmwnq hawj gou ndaej sim'angq. 21 Gou sinq mwngz gaengjdingq ciuq gou gangj hih yienghneix bae guh, simqciq cauhgoq gou soj raengq mwngz hih; sojhij, gou cij sij saenq hawj mwngz. 22 Vanzlij miz yiengh haem; gou ij cingj mwngz bang gou, bang gou cwnjbiq funghranz he hawj gou, aenvih gou muengh Cangqdiq dapwngq faenhsou gouz de, hawj gou ndaej bae faenhsou mwnq. 23 Couh sij daengz dineix lo. Vih Yehsuh Gihduz hwj caeuq gou ngaiz gyaeng hih Hijbahfuz cam mwngz ndei. 24 Caeuq gou itheij doxcaeuq guh hong hih Majgoj, Yaqlijdazguj, Dijmaj, Luqgyah caemh cam mwngz ndei. 25 Muengh bouxcawj raeuz Yehsuh Gihduz doiq faenhsou haijliengh!
1 Doenghbaez Cangqdiq dunghgoq boux cenz gij vah de hwj yungh gak cungj fanghfaz ma doiq cojgoeng raeuz gangj vah haujlai mbat; 2 yiengq seizneix youq ciqgyaiq dih duenh gajlaeng, de caiq dunghgoq daeglwg de daeuj doiq gyoengqraeuz gangj vah. De caemh dwg senqsi cix dinghlaeb hawj daeglwg de ciep aeu de sojmiz hih, caemh dunghgoq daeglwg de cauh mbwnmbwn deihdeih sojmiz hih. 3 Caemh dwg daeglwg de ndaej yienh ok Cangqdiq dih najrongh caeuq veijdaq, caemh ndaej yienh ok Cangqdiq bonjfaenh de sojmiz hih. De yungh gij akak rengzrengz bonjfaenh de daiq miz rengz hih vah ma cangjguenj sojmiz hih. De cawz coih le, couh naengh youq gwnzmbwn baixgvaz gienz akak rengzrengz dih Cangqdiq. 4 Daeglwg Cangqdiq dih cinhfaenq beij bouxcai Cangqdiq dih cinhfaenq ndei, cingq luj Cangqdiq nyok hawj de dih gienz beij bouxcai Cangqdiq dih gienz vanzlij ak ityiengh, 5 aenvih Cangqdiq coengzlaiz mij doiq bouxcailaw naeuz goq naeuz: Mwngz dwg daeglwg gou; gou ngoenzneix miz mwngz. De caemh coengzlaiz cungj mij doiq bouxcailaw naeuz goq naeuz: Gou ij guh daxboh mwngz; mwngz ij guh daeglwg gou. 6 Caiq gyacangq Cangqdiq baij daeglwg daeuz de daeuj lajmbwn hih mwhde, de vanzlij naeuz: Sojmiz hih bouxcai Cangqdiq cungj ij gvih de sax de. 7 Yiengq gangj daengz bouxcai, Cangqdiq engq naeuz gyoengqde naeuz: Gou ij hawj bouxcai gou dangq luj rumz, hawj bouxhoiq gou dangq luj feiz. 8 Hoeng, de gangj daengz daeglwg de, de dauq naeuz: Cangqdiq hax, aen lungzeij mwngz seiqseiz youq; mwngz dang vuengz dwg ndwn ndaej cingq hih. 9 Mwngz haenj deng hih, dwgcaengz mbouj deng hih, sojhij Cangqdiq, mwngz dih Cangqdiq, dinghlaeb mwngz. De aeu youz ma raix hawj mwngz, laeb mwngz guh vuengz, hawj mwngz angq; mwngz beij gij doih mwngz ak ndaej lai. 10 De vanzlij caiq naeuz: Bouxcawj hax, gaihcij mwngz cauh deih, caiq caep giek ndei; mbwn caemh dwg mwngz cauh, dwg mwngz dih dinfawz. 11 Cungjsuenq naeuz mbwn deih cungj ij ngaiz byoeng hwjx, hoeng mwngz dauq ij seiqseiz miz. Mbwn deih cungj ij luj diuz buh yienghmwnq bienq gaeuq bienq vaih; 12 mwngz ij dawz aen mbwn dangq luj diuz buh baixrog yienghmwnq gienj hwnjdaeuj lawh bae. Mbwn deih cungj ij ngaiz bienq, hoeng caenhgag mwngz yungjyenj mbouj rox bienq, ngoenzngoenz doxdoengz. Mwngz mbouj miz soq bi soq ngoenz. 13 Yiengq caiq gangj daengz bouxcai, Cangqdiq caemh coengzlaiz mij doiq bouxcailaw naeuz goq naeuz: Mwngz naengh youq baixgvaz gou bax, daengj gou dawz gij dizyinz mwngz bienqbaenz aen daengq mwngz, gawq neix. 14 Bouxcai dwg guxmaz nej? Sojmiz hih bouxcai cungj dwg hoenzsaenz, cungj dwg bouxhoiq Cangqdiq, cungj dwg baij bae bang doenghheij vunz ndaej gouq he.
1 Sojhij, gyoengqraeuz ij engqgya louzsim gyoengqraeuz soj dingq daengz hih saedsaeh, mienxndaej ngaiz lumz ngaiz vwt gij saedsaeh neix. 2 Cangqdiq dunghgoq bouxcai cenz hawj vunz dih fazliz dwg mbouj ndaej gaij hih; famzsoj mbouj dingq mbouj soenhsouj gij fazliz neix hih cungj ngaiz souh daengz wnggai souh hih. 3 Yiengq, giqyienz yienghneix vwz, hauhnaeuz gyoengqraeuz mbouj dawz haeuj rwz Cangqdiq gouq vunz dih gij veijdaq neix, couh ij baenzlaw ndaej duet ok fad nej? Cangqdiq gouq vunz gij siuhsiz neix, heijdaeuz dwg bouxcawj raeuz bonjfaenh de gangj hih, gajlaeng caiq youz boux caenrwz dingq daengz hih cenzgangj naeuz gyoengqraeuz ni, caemh dwg ndaej cingqmingz hih. 4 Cangqdiq caiq guh gak cungj geizmiuj hih saeh caeuq dunghgoq Hoenzsaenz bonjfaenh de ciuq gij cawjeiq bonjfaenh de ma nyok bonjsaeh hawj vunz. De yungh yienghneix ma cingqmingz hwj cingqmingz gyoengqde dih cingqmingz. 5 Vanzlij miz, gyoengqraeuz seizneix soj gangj hih aen ciqgyaiq moq, Cangqdiq gaenhbaenj mij hawj bouxcai de guenj, 6 aenvih ndaw Singqgingh ndaw de miz mwnq he miz vunz sij naeuz: Vunz suenq guxmaz nex; mwngz gingqyienz you de. Lajmbwn hih vunz suenq guxmaz nex; mwngz gingqyienz gvansim de. 7 Mwngz hawj de beij bouxcai mwngz vanzlij haemq yaqyuij di he, hoeng, mwngz dauq hawj de najrongh dangq guh gij cangjbyimj dijbauj he. 8 Mwngz vanzlij hawj gienz hawj de guenj sojmiz hih. Dineix naeuz Cangqdiq hawj de guenj sojmiz hih, iqswh dwg naeuz sojmiz liuxliux mij lw saek yiengh he. Hoeng, seizneix gyoengqraeuz gaenhbaenj mij raen de ndaej guenj sojmiz hih hah. 9 Mboujgoq gyoengqraeuz dauq raen boux beij bouxcai Cangqdiq vanzlij haemq yaqyuij di he hih Yehsuh vih Cangqdiq dih haijliengh hwj dingj sojmiz hih vunz ngaiz rai, yienghneix hawj de ndaej najrongh dangq guh gij cangjbyimj dijbauj he lah. 10 Boux vih bonjfaenh de hwj cauh gwnzmbwn lajdeih sojmiz dih Cangqdiq, de vih ij hawj doenghheij lwg de ndaej najrongh, couh hawj Yehsuh dunghgoq souh nanh hwj ndaej guh boux ndei liuxliux dingxdaeuz gouq vunz he; de yienghneix guh dwg ngamj hih, 11 aenvih boux hawj vunz ndaej guh gij vunz Cangqdiq he caeuq doenghheij ndaej guh gij vunz Cangqdiq he, cungj dwg doxdoengz caemh daxboh he. Couh vih yienghneix, Yehsuh cwng gyoengqde heuh beixnuengx caemh mbouj roxnginh saetnyaenq, 12 cingq luj de doiq Cangqdiq naeuz: Gou ij naeuz gij coh mwngz naeuz gij beixnuengx gou ni; gou ij youq gyoengq vunz doxcomz mwnq ciengq go haenh mwngz. 13 De caiq naeuz: Gou ij sinq mwngz, baengh mwngz. De vanzlij naeuz: Yawj veiq, gou caeuq doenghheij lwg Cangqdiq nyok hawj gou he youq dineix. 14 Yiengq, giqyienz gij lwg Cangqdiq dwg miz lwed miz noh hih vunz, Yehsuh daeuj daengz lajmbwn guh vunz caemh dwg miz lwed miz noh hih. Yienghneix de cij ndaej rai; dunghgoq de rai hwj cij ndaej hawj cangjguenj rai hih Sajdanq fangzvuengz luetgyeuq. 15 Caemh dwg cijaeu yienghneix hwj cij ndaej hawj doenghheij baenxseiq vih lau rai hwj ngaiz guh hoiq hih vunz ndaej duet ok. 16 Gyoengqraeuz cungj rox, daeglwg Cangqdiq neix daeuj, mbouj dwg vih ij bang bouxcai Cangqdiq nej, dauq dwg vih ij bang gij lwglan Yaqbwzlahhanj lah. 17 Sojhij de bietdingh yienghyiengh cungj ij luj gij beixnuengx de, yienghmwnq cij ndaej guh boux goengjsae dajbwiz daeuzdaeuz sinq ndaej goq rox hojsik vunz he hwj swqhaeuh Cangqdiq he, ndaej bang vunz cueg coih he. 18 Aenvih de gaenq souh nanh goq, gaujniemq goq lo, sojhij de seizneix cij ndaej bang doenghheij vunz ngaiz yaeuh hwj famh coih he.
1 Sojhij, caeuq gyoengqraeuz doxdoengz cungj dwg Cangqdiq senj hawj hwnj gwnzmbwn bae hih gak boux beixnuengx hax, faenhsou wnggai ngeixngeix Yehsuh, boux gyoengqraeuz nginh hih dwzbaijyienz caeuq goengjsae dajbwiz daeuzdaeuz neix bax. 2 De dwg boux Cangqdiq dinghlaeb caemh dwg sinq ndaej goq he, caemh dwg luj Mohsih yienghmwnq Cangqdiq doiq de guenjleix gij vunz de yienghmwnq sinq ndaej goq he. 3 Hoeng, de beij Mohsih vanzlij ndaej najrongh ndaej lai, cingq luj boux guh hwnq ranz he beij aen ranz mwnq vanzlij dij. 4 Caiq gyacangq sojmiz hih ranz cungj dwg miz boux hwnq he, hoeng, sojmiz hih cingq dwg Cangqdiq cauh okdaeuj he. 5 Mohsih dwg bouxhoiq ndaw ranz Cangqdiq, dwg lauxsaed sinq ndaej goq he; de dwg yienh ok baezneix ij gangj he. 6 Hoeng, Gihduz dwg daeglwg Cangqdiq, dwg guenjleix Cangqdiq cenz ranz sojmiz hih. Yiengq, hauhnaeuz gyoengqraeuz baujciz mbouj lau, gyenhciz sinq gyoengqraeuz soj muengh hih nginhnaeuz dwg najrongh hih nex, gyoengqraeuz couh dwg ndaw ranz Cangqdiq hih vunz lo. 7 Sojhij cingq luj Hoenzsaenz Cangqdiq naeuz: Seizneix hauhnaeuz faenhsou dingqri daengz gij sing Cangqdiq nex, 8 faenhsou couh mbouj ndaej simgyeng nga'ngangq, mbouj ndaej luj doenghbaez gij vunz Hijswzlez youq rogndoi yienghmwnq sawq Cangqdiq yex Cangqdiq ndatheiq, 9 aenvih mwhde gij cojgoeng faenhsou youq rogndoi youq seiqcib bi ndaw de, gannaeuz yawjraen Cangqdiq soj guh hih lah, hoeng, dauq mbouj sinq Cangqdiq, dauq sawq de, gaujniemq de. 10 Couh vih yienghneix, Cangqdiq cij doiq aen nienzdaiq mwhde hih vunz ndatheiq hwj naeuz: “Aen sim gyoengqde siengzseiz mazmwnh, gingqyienz mbouj rox aen sim gou.” 11 Sojhij Cangqdiq couh ndatheiq hwj fazsiq naeuz: “Gyoengqde gaengjdingq mbouj ndaej miz faenh yangjcouq gij yietbaeg gou.” 12 Gak boux beixnuengx hax, faenhsou ijaeu siujsim, mienxndaej faenhsou ndaw de miz vunz mbouj sinq, sim doegsieb hwj couh yiem seiqseiz lix dih Cangqdiq mbouj gaen seiqseiz lix dih Cangqdiq. 13 Cijaeu vanzlij miz ngoenz he, faenhsou couh ijaeu ngoenzngoenz doxson doxbang, yienghneix couh mienxndaej faenhsou miz vunz souh daengz coih coemx hwj sim bienq gyeng. 14 Caemh cijaeu hauhnaeuz gyoengqraeuz cungj ndaej gyenhciz luj gaxgonq ngamq sinq yienghmwnq sinq Gihduz hih sim gyenhdingq, yungjyenj mbouj bienq, gyoengqraeuz couh ndaej caeuq Gihduz guxdoih. 15 Sojhij, daixgya ijaeu ndaejgeiq, mbouj ndaej lumz ndaw Singqgingh ndaw de soj sij naeuz hih: Seizneix hauhnaeuz faenhsou dingqri gij sing Cangqdiq hih, couh mbouj ndaej simgyeng, nga'ngangq, mbouj ndaej luj gaxgonq yienghmwnq yex Cangqdiq fatheiq. 16 Faenhsou wnggai rox, mbouj dingq gij vah Cangqdiq, yex de fatheiq hih dwg byawz nej? Mbouj dwg doenghheij Mohsih daj Ngaihgiz daiq okma hih vunz maz? 17 Caemh dwg byawz hawj Cangqdiq fatheiq seiqcib bi baenxlai caez nej? Mbouj dwg doenghheij famh coih hwj ngaiz seihaiz baij youq rogndoi hih vunz maz? 18 Cangqdiq caiq doiq byawz fazsiq goq naeuz gyoengqde mbouj ndaej yangjcouq gij yietbaeg de nej? Mbouj dwg doenghheij nga'ngangq mbouj dingq Cangqdiq hih vunz maz? 19 Yiengq, ciuq yienghneix ma yawj, gyoengqde mbouj ndaej yangjcouq gij yietbaeg Cangqdiq hih dwg aenvih gyoengqde mbouj sinq Cangqdiq.
1 Yiengq, giqyienz Cangqdiq baujcingq hawj gyoengqraeuz ndaej yangjcouq gij yietbaeg de vwz, gyoengqraeuz couh ij wnggai siujsim, mienxndaej gyoengqraeuz ndaw de miz vunz ngaiz mbouj ndaej miz faenh yangjcouq gij yietbaeg de, 2 aenvih gyoengqraeuz caemh caeuq gij vunz Hijswzlez doxdoengz, gaenq ndaej dingq daengz gij ndei siuhsiz Cangqdiq lo, cijmboujgoq gyoengqde dingq le, mij dawz haeuj rwz, mbouj sinq, sojhij doiq gyoengqde gangj mij'z maz ikcawq. 3 Hoeng, gyoengqraeuz doenghheij sinq hih vunz ndaej miz faenh yangjcouq gij yietbaeg Cangqdiq lo. Yiengq, doiq doenghheij mbouj sinq hih vunz mwnq nej, cingq luj de, Cangqdiq, soj naeuz hih: Gou ndatheiq hwj fazsiq naeuz: “Gyoengqde baenzbaenz mbouj ndaej miz faenh yangjcouq gij yietbaeg gou.” Gannaeuz Cangqdiq daj gaihcij cauh mbwn cauh deih cix guh sat gij hong de hwj yietbaeg lo, hoeng de vanzlij yienghneix naeuz. 4 Ndaw Singqgingh ndaw de vanzlij miz mwnq he caemh daez daengz: Daengz daixcaet ngoenz, Cangqdiq couh guh sat gij hong de, dingz roengzma yietbaeg lo. 5 Hoeng, doenghbaez gij vunz Hijswzlez vih mbouj dingq Cangqdiq hwj Cangqdiq cij naeuz: Gyoengqde baenzbaenz mbouj ndaej miz faenh yangjcouq gij yietbaeg gou. 6 Couh dwg naeuz gannaeuz gyoengqde sien dingq daengz gij ndei siuhsiz Cangqdiq lah, hoeng, gyoengqde mbouj dawz haeuj rwz, sojhij gyoengqde couh mbouj ndaej miz faenh yangjcouq gij yietbaeg Cangqdiq lo. Hoeng, miz linghvaih hih vunz ndaej hah. 7 Sojhij Cangqdiq youhcaiq dingh ngoenz he, heuh naeuz ‘Ngoenzneix.’ Couh dwg goq haujlai bi le, de dunghgoq Daqveiq goengjvuengz neix ma senhbuq, cingq luj gwnz neix soj yungh daengz hih duenh vah, naeuz: “Ngoenzneix, hauhnaeuz faenhsou dingqri gij sing Cangqdiq nex, faenhsou couh mbouj ndaej simgyeng.” 8 Hauhnaeuz doenghbaez Yozcuhyaq daiq gyoengq vunz haeuj mwnq Cangqdiq baujcingq goq hawj vunz yietbaeg mwnq bae, gyoengq vunz caemh gaenq ndaej yietbaeg lo nex, gajlaeng, Cangqdiq couh mbouj veiq caiq daez daengz daixlingh mwh haem lo. 9 Sojhij, ciuq yienghneix ma yawj, gaengjdingq miz daixlingh ngoenzyietbaeg Cangqdiq cwnjbiq hawj gij vunz de yietbaeg he. 10 Aenvih mboujguenj byawz, ndaej miz faenh yangjcouq gij yietbaeg Cangqdiq hih, boux de couh dwg ndaej dingz hong yietbaeg lo, cingq luj Cangqdiq yienghmwnq dingz hong hwj yietbaeg yienghmwnq. 11 Sojhij gyoengqraeuz wnggai roengzrengz cwnqliengq ndaej miz faenh yangjcouq gij yietbaeg Cangqdiq, mienxndaej miz vunz hag luj doenghbaez gij vunz Hijswzlez mbouj dingq Cangqdiq hwj ngaiz mbouj ndaej miz faenh yangjcouq gij yietbaeg Cangqdiq. 12 Gij vah Cangqdiq dwg lix hih, dwg miz rengz raixcaix rem raixcaix hih, luj fag giemq raeh satsat he ndaej ndaemq loem aen sim vunz, daiqlienz ndok caeuq gvanhcez cungj ndaej, caemh ndaej faen ok ndaw sim vunz dih siengjmuengh caeuq yawjfap. 13 Sojmiz cauh okdaeuj hih mij saek yiengh ndaej baex goq lwgra Cangqdiq; cungj dwg loh langxlangh youq dangqnaj de. Gyoengqraeuz soj guh hih cungj ij yiengq de gyauhdaiq. 14 Sojhij gyoengqraeuz wnggai baujciz gyenhciz nginh gyoengqraeuz soj sinq hih, aenvih gyoengqraeuz miz boux veijdaq dih goengjsae dajbwiz daeuzdaeuz he, couh dwg Yehsuh, daeglwg Cangqdiq; de gaenq hwnj mbwn bae daengz Cangqdiq mwnq lo. 15 Boux goengjsae dajbwiz daeuzdaeuz neix mbouj dwg naeuz mbouj rox gyoengqraeuz siengj guh vaihsaeh hih sim, dauqfanj de caeuq gyoengqraeuz doxdoengz caemh ngaiz souh daengz yaeuh, sawq, cijmboujgoq de mij ngaiz famh coih lah. 16 Sojhij gyoengqraeuz mboujguenj seizlaw, cungj ij wnggai mbeihung mbouj lau hwj gouzhaenh haijliengh dih Cangqdiq goengjvuengz neix; yienghmwnq Cangqdiq goengjvuengz couh hojsik gyoengqraeuz doiq gyoengqraeuz haijliengh hwj bangcoh gyoengqraeuz lo.
1 Famz dwg goengjsae dajbwiz daeuzdaeuz hih cungj dwg daj ndaw gyoengq vunz senj okdaeuj hih, dwg daiqbiuj gyoengq vunz banh gij saeh caeuq Cangqdiq miz gvanhaeh hih, dwg bang gij vunz soengq gij dajbwiz hawj Cangqdiq caeuq bang gij vunz bwiz cueg coih hih. 2 Goengjsae dajbwiz daeuzdaeuz ndaej unqhoz unqsim hwj doiq doenghheij ngawzngad caeuq doenghheij guh loek he, dwg aenvih goengjsae dajbwiz daeuzdaeuz gyoengqde mbangjbaez caemh miz siengj guh vaihsaeh hih siengjfap. 3 Couh vih yienghneix, gyoengqde mbouj danhcij ij bang beksingq dawz gij dajbwiz bae bwiz cueg coih, caemh vanzlij vih bonjfaenh hih coih hwj bwiz cueg coih. 4 Mij'z vunz naeuz ndaej gag siengj guh goengjsae dajbwiz daeuzdaeuz gij hong najrongh neix couh ndaej guh hih, cawzok luj Yaqlwnz yienghneix dwg Cangqdiq senjlaeb he cij ndaej he. 5-6 Caemh doxdoengz, Gihduz caemh mbouj dwg gag ndaej guh goengjsae dajbwiz daeuzdaeuz hwj ndaej najrongh hih nej, dauq dwg Cangqdiq doiq de naeuz goq naeuz: Mwngz couh yungjyenj guh luj Mwzgihsijdwz yienghmwnq hih boux goengjsae dajbwiz daeuzdaeuz he lah. Cingq luj de caemh naeuz goq naeuz: Mwngz dwg daeglwg gou; gou ngoenzneix miz mwngz. 7 Yehsuh Gihduz lij youq lajmbwn guh vunz hih mwhde, de yiengq boux ndaej gouq de hawj de mbouj ngaiz rai dih Cangqdiq riuz raemxra hwj gouz hemq goggog. Couh vih de lauxsaed yawjnaek Cangqdiq, Cangqdiq couh dapwngq de. 8 Gannaeuz de dwg daeglwg Cangqdiq lah, hoeng, de vanzlij dwg vih soj souh hih nanh hwj ndaej hag rox dingq vah. 9 Yiengq, giqyienz Cangqdiq hawj de ndaej bienqbaenz hab guh goengjsae dajbwiz yienghmwnq ndei liuxliux he vwz, de doiq doenghheij vunz dingq de gaen de he ma gangj, dwg yungjyenj ndaej gouq hih doenj. 10 De caemh dwg Cangqdiq senjdingh de guh boux goengjsae dajbwiz daeuzdaeuz luj Mwzgihsijdwz yienghmwnq he. 11 Gangj daengz gvanhhih Yehsuh Gihduz guh goengjsae dajbwiz luj Mwzgihsijdwz yienghmwnq hih gij saeh neix, raeuz vanzlij miz haujlai vah ij gangj haem, hoeng, hoj gaijyiz naeuz faenhsou ni lo, aenvih faenhsou seizneix bienq sim lo, dingq mbouj haeuj rwz lo. 12 Baenjlaiz faenhsou senqsi cix wnggai bae son vunz lo, hoeng, faenhsou gingqyienz vanzlij ij hawj vunz doiqyungz dawz Cangqdiq gangj goq hih ceiq gihbaenj hih dauhleix gangj naeuz sou ni. Faenhsou engq bienqbaenz luj lwgnding yienghmwnq, cij rox gw nauq, mij rox gw hawq gw seuq. 13 Famz lij gw nauq hih lwgnding gaenhbaenj mbouj rox faenbied ndei caeuq yak. 14 Caenhgag doenghheij vunz hung vunz laux he cij ndaej gw gij hawq gij seuq he, couh luj gij vunz miz ginghniemq raixcaix ndaej rox ndaej laeg he, ndaej faenbied ndei caeuq yak he lah.
1-2 Sojhij, gyoengqraeuz mbouj wnggai caenhrox fanjfuz hag gvanhhih Gihduz dih gij ceiq gihbaenj he, beijgangj, caenhrox daezsingj vunz vihmaz ij nginh loek gaijgoq mbouj guh gij hawj vunz satsoq he hah, vihmaz sinq Cangqdiq baengh Cangqdiq hah, caenhrox gaijyiz gijmaz heuh sijlij hah, oemj fawz hawj vunz hah, vunzrai ndaej dauqlix hah, caeuq saemjbuenq le yungjyenj dingh hih hah, doenghgij neix. Dauqfanj gyoengqraeuz ij wnggai lai hag gij ciqsiz laeg he hwj bienqbaenz vunz hung yienghmwnq he. 3 Fanjcingq cijaeu Cangqdiq hawj, gyoengqraeuz cungj ij yienghneix guh. 4 Yiengq, gangj daengz doenghheij gaenq singqsag rox daengz Cangqdiq, ndaej daengz Cangqdiq nyok hawj hih fuk, ndaej daengz Hoenzsaenz Cangqdiq doz youq gwnz ndang lo, 5 ndaej rox gij vah Cangqdiq dwg baenxlai ndei hih, caemh ndaej rox daengz baezneix hih aen ciqgyaiq mwnq cungj dwg miz geizmiuj gingjgyauj he lo 6 hih doengh cungj vunz neix, hauhnaeuz gyoengqde yiem Gihduz nex, couh hoj nginh loek gaijgoq dauq nginh Gihduz lo, aenvih gyoengqde couh dangq caenfawz dawz daeglwg Cangqdiq caiq ding hwnj gwnz gyaq cixcib bae sai de lo. 7 Doengh cungj vunz neix, cingq luj gaiq reihnaz siengzseiz miz fwnraemx he, hwnj doengh go doiq nungzminz miz ik he, Cangqdiq hoh fuk hawj gaiq de he. 8 Hoeng, hauhnaeuz gaiq de hwnj doengh go oen he, doengh go doiq vunz mij'z ik he nex, gaiq de couh ij ngaiz souh daengz mang souh daengz vueng. 9 Mboujgoq, cinhngaiq dih gak boux beixnuengx hax, gyoengqraeuz gan yienghneix naeuz lah, hoeng, gyoengqraeuz sinq faenhsou mbouj veiq luj doengh cungj mwnq yienghmwnq law, sinq faenhsou dwg engqgya ndei hih, dwg ndaej gouq hih. 10 Aenvih Cangqdiq dwg guh goengbingz hih. Faenhsou bang goq gij vunz de, caemh dwg vanzlij giqcuz bang gyoengqde; de gaengjdingq ndaejgeiq faenhsou soj guh hih ndeisaeh caeuq faenhsou yienh ok doiq de dih aiq hih. 11 Hoeng, gou muengh faenhsou gak boux cungj yienghneix roengzrengz roengzbae, sawjhawj faenhsou soj muengh hih cungj ndaej doiqyienh. 12 Caemh muengh faenhsou gak boux mbouj caeggyik, ij hag doenghheij baengh sinq Gihduz hih sim caeuq baengh naenxsim hwj ndaej ciep aeu Cangqdiq baujcingq nyok hawj hih. 13 Doenghbaez Cangqdiq doiq Yaqbwzlahhanj baujcingq hih mwhde, aenvih mij miz ndaej beij bonjfaenh de engq ak engq rem haem hwj ndaej yiengq de fazsiq, sojhij, de cij gag yiengq bonjfaenh de fazsiq naeuz: 14 Gou gaengjdingq ij soengq fuk hawj mwngz, caemh hawj mwngz miz lwg miz lan lailai hwj. 15 Sojhij Yaqbwzlahhanj couh hozraez naenxsim hwj daengj. Gajlaeng cingqgawq gwhraix, cingqgawq luj Cangqdiq soj baujcingq hih yienghmwnq. 16 Gangj daengz vunz fazsiq, bienqnaengz vunz cungj dwg yiengq boux beij bonjfaenh ak he rem he fazsiq lah; gij fazsiq neix couh dwg cingqmingz soj gangj hih cungj dwg saedsaeh hih, dwg gangj daengz guh daengz hih, muzdiz dwg mbouj caiq caeuq vunz doxeuq doxcwngq haem lo. 17 Caemh doxdoengz, Cangqdiq doiq vunz baujcingq hih mwhde, vih ij hawj vunz rox cingsuj gij cawjeiq de mbouj bienq, sojhij de caemh fazsiq, baujcingq de soj gangj hih gaengjdingq guh daengz. 18 Cangqdiq dwg mbouj gangj gyaj hih, sojhij de dih baujcingq caeuq fazsiq gaengjdingq yungjyenj mbouj bienq. Cangqdiq yienghneix guh dwg ijsiengj hawj gyoengqraeuz doenghheij deuznanh bae daengz Cangqdiq mwnq hih vunz ndaej gujliq, ndaej miz mbei gaem ndaet de nyok hawj gyoengqraeuz hih miz muengh hih. 19 Yiengq, gyoengqraeuz miz gij muengh neix le, couh luj miz gij hawj gyoengqraeuz hoenzsaenz ndaej nganhcenz he, ndaej gaenj dwtdwt he, luj miz maxvangzding yienghmwnq ding hwj gaenj dwtdwt he. Gij muengh neix dunghgoq fanyiemz cangqbungz Cangqdiq, haeuj bae daengz mwnq Cangqdiq youq he. 20 Yehsuh luj Mwzgihsijdwz yienghmwnq doxdoengz guh boux goengjsae dajbwiz daeuzdaeuz he, dwg yungjyenj guh he; de gaenq youq gaxgonq gyoengqraeuz vih gyoengqraeuz hwj sien haeuj bae daengz mwnq lo.
1 Boux Mwzgihsijdwz neix, couh dwg goengjvuengz Sajlaengj, caemh dwg akak rengzrengz Cangqdiq dih goengjsae dajbwiz he. Mwh Yaqbwzlahhanj hoenxhingz geij goengjvuengz dauq ma hih mwhde, Mwzgihsijdwz bae ciep de caiq hoh fuk hawj de. 2 Gajlaeng, Yaqbwzlahhanj dawz de hoenx ndaej hingz hih doenghheij doxgaiq mwnq aeu cib faenh cih it hawj de. ‘Mwzgihsijdwz’ gij coh neix fanhyiz okdaeuj dih iqswh dwg ‘Ndwn ndaej cingq dih vuengz.’ Vanzlij miz ‘Sajlaengj vuengz,’ ‘Sajlaengj vuengz’ couh dwg ‘Bingzan dih vuengz’ dih iqswh. 3 Mwzgihsijdwz mbouj miz gyabouh, mbouj miz bohmeh, caemh mbouj miz ngoenzseng caeuq ngoenz rai; de caeuq daeglwg Cangqdiq doxdoengz, yungjyenj guh goengjsae dajbwiz. 4 Yiengq sijsaeq ngeixngeix yawj, de gaeuq veijdaq hoh; daiqlienz cojgoeng raeuz Yaqbwzlahhanj cungj dawz bonjfaenh de hoenx ndaej hingz ma hih doenghheij doxgaiq mwnq aeu cib faenh cih it hawj de. 5 Gajlaeng, Liqveiq hih doengh daih gajlaeng, famz dwg ndaej guh goengjsae dajbwiz hih vunz cungj ij ciuq Mohsih dih fazliz gveihdingq, laeng gij vunz bonjfaenh, couh dwg beksingq, sou aeu cib faenh cih it hih cienzcaiz. Gannaeuz cungj dwg doxdoengz dwg Yaqbwzlahhanj hih doengh daih gajlaeng lah, hoeng, cungj caemh ciuqyiengh laeng gyoengqde aeu. 6 Hoeng, Mwzgihsijdwz gaenhbaenj mbouj dwg Liqveiq cuz hih vunz, dauq ndaej sou daengz Yaqbwzlahhanj hih cib faenh cih it dih cienzcaiz; de vanzlij hoh fuk hawj Yaqbwzlahhanj, boux Cangqdiq doiq de baujcingq goq neix. 7 Mij maz ndaej ngeiz, boux hoh fuk hawj vunz mwnq beij boux ndaej vunz hoh fuk hawj mwnq veijdaq. 8 Yiengq, gangj daengz gyoengq ndaej cib faenh cih it cienzcaiz hih goengjsae dajbwiz, gyoengqde dwg rox rai hih, hoeng Yaqbwzlahhanj soj gyau hawj dih cib faenh cih it hih dauq dwg hawj Mwzgihsijdwz, boux ndaw Singqgingh ndaw de soj sij naeuz hih dwg seiqseiz lix hih vunz hih lah. 9 Yiengq, ciuq yienghneix ma yawj, Yaqbwzlahhanj gyau hawj Mwzgihsijdwz cib faenh cih it caemhdangq dwg Liqveiq caemh gyau hawj cib faenh cih it lo, 10 aenvih mwh Mwzgihsijdwz bae ciep Yaqbwzlahhanj hih mwhde, Liqveiq dwg Yaqbwzlahhanj dih lwglan. 11 Beijgangj naeuz, hauhnaeuz gij vunz Liqveiq guh goengjsae dajbwiz hih fazliz ciqduq dwg ndaej hawj vunz bienqbaenz hab'eiq habhoz Cangqdiq liuxliux hih nex, Cangqdiq hozbiet caiq baij daixlingh boux, couh dwg baij boux he daeuj caeuq Mwzgihsijdwz doxdoengz guh goengjsae dajbwiz haem nej? Dauq mij dwg caeuq Yaqlwnz yienghmwnq doxdoengz caemh Liqveiq cuz hih vunz nej? 12 Caiq hauhnaeuz guh goengjsae dajbwiz hih ciqduq gaij hoh nex, fazliz caemh bietdingh ij gaen gaij cij deng, 13 aenvih gyoengqraeuz soj gangj daengz hih boux goengjsae dajbwiz neix, de dwg haeuj daixlingh aen cuz hih; aen cuz mwnq caemh coengzlaiz mij'z vunz guh goq goengjsae dajbwiz haem. 14 Gij iqswh gou dwg naeuz, gyoengqraeuz caemh rox bouxcawj raeuz dwg haeuj aen cuz Youzdaq hih, hoeng, Mohsih gaenhbaenj mij daez daengz aen cuz neix miz vunz guh goq goengjsae dajbwiz goq. 15 Yiengq, ciuq yienghneix ma yawj, gij saehcingz neix engqgya cingsuj lo, aenvih Cangqdiq baij daeuj hih daixlingh boux luj Mwzgihsijdwz yienghmwnq hih goengjsae dajbwiz gaenq ok daeuj lo. 16 De, Yehsuh, ndaej guh goengjsae dajbwiz gaenhbaenj mbouj dwg baengh gij gveihdingq naeuz ij dwg guxmaz guxmaz cuz hwj cij ndaej guh hih, dauq dwg baengh akak rengzrengz mbouj rox rai hih mingh hwj ndaej guh hih lah, 17 aenvih ndaw Singqgingh ndaw de daez daengz de naeuz goq naeuz: Mwngz couh yungjyenj guh luj Mwzgihsijdwz yienghmwnq hih boux goengjsae dajbwiz he. 18 Sojhij, yienzlaiz hih gveihdingq couh bienq mij'z yungh, couh cawz bae lo, 19 aenvih ciuq yienzlaiz hih fazliz gveihdingq gaenhbaenj mij ndaej hawj gijmaz bienqbaenz ndaej hab'eiq habhoz Cangqdiq liuxliux. Couh vih yienghneix, gajlaeng Cangqdiq couh hawj gyoengqraeuz engqgya ndaej miz muengh raixcaix, hawj gyoengqraeuz baengh gij muengh neix hwj ndaej mienx coih, gajlaeng couh ndaej dep Cangqdiq. 20 Gangj daengz guh goengjsae dajbwiz hih, Yehsuh dwg Cangqdiq fazsiq baujcingq naeuz laeb de guh goengjsae dajbwiz hih. 21 Hoeng, Liqveiq vunz ndaej guh goengjsae dajbwiz hih, Cangqdiq gaenhbaenj mij fazsiq baujcingq goq. Mwh Cangqdiq dingh Yehsuh laeb Yehsuh guh goengjsae dajbwiz hih mwhde fazsiq naeuz: Gou, Cangqdiq, fazsiq hawj mwngz yungjyenj guh goengjsae dajbwiz; gou fazsiq hih yungjyenj mbouj ienq. 22 Couh dwg naeuz Yehsuh couh dwg gij baujcingq lienz diuzgyenq engqgya ndei he dih baengzgawq. 23 Doenghbaez ciuq gij gveihdingq gaeuq ndaej guh goengjsae dajbwiz hih vunz gighix lai; gyoengqde cungj dwg ngaiz rai, sojhij mij ndaej guh ndaej caez. 24 Hoeng, Yehsuh dwg seiqseiz lix hih; de ndaej yungjyenj guh goengjsae dajbwiz roengzbae, mboujyungh vuenh vunz. 25 Sojhij, famz baengh de hwj ndaej bae daengz Cangqdiq mwnq hih vunz, de cungj ndaej gouq gyoengqde, hawj gyoengqde yungjyenj ndaej gouq, aenvih Yehsuh dwg seiqseiz lix hih, ndaej bang gyoengqde gouz Cangqdiq hih. 26 Luj yienghneix hih hab'eiq habhoz Cangqdiq hih, mij maz guh doeg guh sieb hih, mij maz ndaej diudik hih; gij vunz miz coih he duek de, de mbouj simdoengh. Ak goq mbwn bae hih goengjsae dajbwiz daeuzdaeuz neix dwg ngamj gyoengqraeuz hih. 27 De caeuq doenghheij goengjsae dajbwiz daeuzdaeuz he mbouj doengz; de mbouj luj gyoengqde ngoenzngoenz ij sien vih bonjfaenh hih coih hwj sien dajbwiz le, gajlaeng cij daengz bang gij beksingq bwiz yienghmwnq, aenvih de mbat dog couh vwt diuz mingh bonjfaenh de hwj vih gij vunz cueg coih couh ndaej lo. 28 Ciuq fazliz ma laeb hih goengjsae dajbwiz daeuzdaeuz cungj dwg mij banqfaz mbouj famh coih hih. Hoeng, gajlaeng Cangqdiq fazsiq hawj daeglwg de guh goengjsae dajbwiz daeuzdaeuz hih dauq dwg yungjyenj ndei liuxliux hih.
1 Gyoengqraeuz gwnz neix soj gangj daengz hih ceiq cungqyauq hih dwg, gyoengqraeuz saedsaeh miz boux goengjsae dajbwiz daeuzdaeuz he, Yehsuh; de gaenq naengh youq gwnzmbwn baixgvaz akak rengzrengz dih Cangqdiq lo. 2 De youq gwnzmbwn aen cingqcaen cangqbungz Cangqdiq swqhaeuh Cangqdiq, dwg Cangqdiq hwnq baenz he, mbouj dwg vunz aeu fawz ma hwnq baenz he. 3 Sojmiz hih goengjsae dajbwiz daeuzdaeuz cungj dwg vih ij soengq doxgaiq hawj Cangqdiq caeuq bwiz Cangqdiq hwj laeb guh hih, sojhij goengjsae dajbwiz daeuzdaeuz gwnzmbwn neix caemh bietdingh ij soengq doxgaiq hawj Cangqdiq. 4 Hauhnaeuz de youq lajmbwn nex, de couh mbouj ndaej guh goengjsae dajbwiz lo, aenvih lajmbwn gaenq miz goengjsae ciuq Mohsih fazliz soj gveihdingq hih yienghmwnq bae guh dajbwiz lo. 5 Cijmboujgoq doengh goengjsae dajbwiz neix, gyoengqde dwg youq aen cangqbungz Mohsih ciuq Cangqdiq youq gwnz bya Sihnaiq yinx hawj de raengq de bae guh hih aen cangqbungz neix lah, couh dwg aen cangqbungz mwh Mohsih ij guh hih mwhde, Cangqdiq doiq de naeuz goq naeuz: Mwngz ijaeu siujsim, mwngz ij ciuq gou yinx hawj mwngz raengq mwngz hih yienghmwnq bae guh hih aen cangqbungz mwnq lah. 6 Hoeng, Yehsuh, gyoengqraeuz dih goengjsae dajbwiz, de soj guh hih beij lajmbwn sojmiz hih goengjsae dajbwiz vanzlij ndei, cingq luj de guh gij baujcingq lienz diuzgyenq engqgya ndei mwnq dih boux cungqgyan he. Gij neix dwg ciuq gij baujcingq Cangqdiq engqgya ndei he ma dinghlaeb hih. 7 Beijgangj, hauhnaeuz gij baujcingq lienz diuzgyenq gaeuq mwnq miz yungh nex, Cangqdiq couh mboujyungh caiq linghvaih laeb gij moq hih lo. 8 Hoeng, Cangqdiq rox gij vunz Hijswzlez miz loek, mbouj ciuq gij gveihdingq gaeuq bae guh, sojhij Cangqdiq couh naeuz: Yawj veiq, mwhde couh ij daengz lo, gou ij caeuq gij vunz Hijswzlez caeuq gij vunz Youzdaq song aen guek neix lingh dingh saen dih baujcingq lienz diuzgyenq. 9 Gij baujcingq lienz diuzgyenq neix mbouj luj doenghbaez gou rag gij fawz gij cojgoeng gyoengqde ok Ngaihgiz ma hih mwhde soj dingh hih; gannaeuz gou rag gij cojgoeng gyoengqde ok Ngaihgiz ma lah, hoeng gij cojgoeng gyoengqde dauq mij soenhsouj gou soj dingh hawj gyoengqde dih gveihdingq, sojhij gou couh mbouj leixlangh gyoengqde, ajcaih gyoengqde vangraeh. 10 Cangqdiq vanzlij caiq naeuz: Baezneix gou ij caeuq gij vunz Hijswzlez dingh gij baujcingq lienz diuzgyenq he, ij dawz gij fazliz gveihdingq ciqduq gou coengq youq ndaw uk gyoengqde, sij youq ndaw sim gyoengqde; gou ij guh gyoengqde dih Cangqdiq, gyoengqde ij guh gij vunz gou. 11 Gyoengqde mboujyungh son doenghheij gekleiz gyoengqde caeuq gij beixnuengx gyoengqde, naeuz: “Mwngz wnggai rox Cangqdiq,” aenvih mwhde mboujguenj hung iq cungj rox gou. 12 Gou caemh ij nyiuz gyoengqde famh hih coih, mbouj caiq geiq gij doegsieb gyoengqde. 13 Yiengq, giqyienz Cangqdiq dawz lingh laeb hih baujcingq lienz diuzgyenq guh saen laeb hih vwz, yienzlaiz laeb hih couh bienqbaenz mij'z yungh, couh majcangq siu liux mij raen ingj.
1 Doenghbaez dingh dih gij baujcingq lienz diuzgyenq gaeuq miz baiq Cangqdiq caeuq gvanhhih aen cangqbungz Cangqdiq vunz guhbaenz he dih diuzliq. 2 Aen cangqbungz neix hih fungh baixrog, ndaw de baij miz gyaqdaeng, miz daiz caeuq bingj dajbwiz. Fungh neix couh heuh ‘fungh dwzbez.’ 3 Aen cangqbungz neix hih fungh baixndaw, couh dwg baixndaw fanyiemz, couh heuh ‘fungh dwzdwzbez;’ 4 ndaw de baij miz aen daiz aeu gim ma guh hwj siu yieng he caeuq aen gvih aeu gim ma baux hwj ndaw de coengq miz aen guenq aeu gim ma guh hwj coux miz mahnaq he caeuq diuz faexbien Yaqlwnz did ngez mwnq caeuq song baj rin cungj dik miz fazliz mwnq. 5 Gwnz aen gvih coengq miz baengzgawq mwnq miz daiqbiuj gij veijdaq Cangqdiq dih gihluqbwz aj fwed hwj goemq youq gwnz de. Youq dineix, gvanhhih doenghgij neix gou mbouj caiq gaiqgaiq geq naeuz liux lo. 6 Aen cangqbungz neix ndaw de couh dwg yienghneix baij lo. Doenghheij goengjsae dajbwiz ngoenznaengz cungj haeuj aen fungh baixrog bae guh gij hong gyoengqde wnggai guh he. 7 Caenhgag goengjsae dajbwiz daeuzdaeuz cij ndaej haeuj fungh baixndaw bae, caemh dwg it bi cij ndaej haeuj bae ngoenz he. Ngoenz mwnq cungj ij daiq lwed haeuj bae vih bonjfaenh caeuq vih gij beksingq mbouj rox hwj ngaiz famh coih hih bwiz Cangqdiq. 8 Hoenzsaenz Cangqdiq yienghneix nganhbaiz dwg ij hawj vunz rox, ciuq gij gveihdingq gaeuq caeuq aen cangqbungz Mohsih guh hih, vunz siengj raen Cangqdiq hih diuz roen neix dwg hengz mbouj doeng hih. 9 Aen cangqbungz Mohsih guh neix cijmboujgoq dwg daiqbiuj aen nienzdaiq neix hih lah. Couh dwg naeuz baengh soengq doxgaiq hawj Cangqdiq caeuq bwiz Cangqdiq dwg mbouj ndaej hawj ndaw sim vunz bienqbaenz doiq ndaej hwnj Cangqdiq hih, 10 aenvih gij gveihdingq gaeuq cijmboujgoq caenhgag dwg doiq gij gw caeuq baenzlaw swiq hih lah, dwg ndaej guenj vunz yawj ndaej raen hih, mij ndaej guenj daengz ndaw sim vunz bae nej. Sojhij, daengj daengz miz gij gveihdingq moq ndei he le, doenghgij gveihdingq gaeuq neix couh ngaiz cawz bae lo. 11 Hoeng, seizneix Gihduz gaenq daeuj lo; de daeuj dwg guh gij ndei hih saen laeb he hih goengjsae dajbwiz daeuzdaeuz. De haeuj aen cangqbungz mbouj dwg vunz aeu fawz ma guh hih, caemh mbouj dwg haeuj aen haeuj aen ciqgyaiq neix hih, dauq dwg haeuj gwnzmbwn hih gyaeugyaeu veijdaq veijdaq hih lah. 12 De haeuj aen cangqbungz neix bae dajbwiz hih mbouj dwg aeu lwed yiengzbya lwed cwzlwg ma guh gij dajbwiz hih nej, dauq dwg aeu gij lwed bonjfaenh de ma guh gij dajbwiz hih lah. De haeuj bae mbat dog couh ndaej yungjyenj vih lajmbwn hih vunz cueg coih lo. 13 Ciuq gij baujcingq lienz diuzgyenq gaeuq, hauhnaeuz dawz lwed yiengzbya caeuq lwed cwzgoeng caeuq daeuh cwzlwgcoh saj haeuj gwnz ndang boux ngaiz guxmaz hwj mbouj ndaej camhgyah gingqbaiq ngiqsiz hih couh ndaej hawj boux de suenq dwg gancengh hih, 14 yiengq, ciuq luj yienghneix ma gangj, gij lwed Gihduz mbouj engqgya haz? De dunghgoq seiqseiz lix dih Hoenzsaenz Cangqdiq, dawz bonjfaenh de ma dangq guh gij dajbwiz mij maz ndaej diudik he hwj bwiz hawj Cangqdiq. Gij lwed de ndaej hawj raeuz mbouj caiq guh gij mij'z yungh he, hawj raeuz mbouj caiq saetnaj saetnyaenq hwj ndaej swqhaeuh seiqseiz lix dih Cangqdiq. 15 Couh vih yienghneix, Gihduz guh boux cungqgyan gij baujcingq lienz diuzgyenq moq he; de vih ij hawj sojmiz Cangqdiq senjdingh okdaeuj hih vunz ndaej daengz Cangqdiq baujcingq nyok hawj hih mbouj rox naeuh hih gyadangq, couh aeu rai ma cueg gij vunz veizfanj gij gveihdingq gaeuq hwj famh coih he. 16 Cingq luj laeb hizcuz; famz miz vunz laeb hizcuz hih, ij daengj daengz boux de rai le gij hizcuz de cij ndaej suenq miz yungh, 17 aenvih boux laeb hizcuz mwnq lij lix hih, gij hizcuz de couh mbouj suenq miz yungh lo. Bietdingh ij daengj daengz boux de rai le, gij hizcuz de cij suenq miz yungh. 18 Couh cingq vih yienghneix hwj, gij baujcingq lienz diuzgyenq gaeuq caemh dwg ij yungh lwed ma laeb cij ndaej suenq dwg miz yungh, 19 aenvih mwh Mohsih ciuq fazliz dawz Cangqdiq dih gak cungj mingqlingq senhbuq naeuz gij vunz Hijswzlez ni le, couh aeu fwn yiengz hoengz caeuq go nywjvaiz yomx haeuj lwed yiengzlwg caeuq raemx doxgyaux hih bae couh saj haeuj gij saw fazliz caeuq gwnz ndang gyoengq vunz bae, naeuz: 20 Gij lwed neix couh dwg Cangqdiq caeuq faenhsou laeb hih baujcingq lienz diuzgyenq dih baengzgawq. 21 Caemh doxdoengz, de caemh dawz lwed saj haeuj aen cangqbungz caeuq gak cungj soj yungh hih doxgaiq bae. 22 Gizsaed ciuq fazliz gveihdingq, gihbaenjcangq sojmiz hih doxgaiq cungj bietdingh ij miz lwed saj haeuj bae cij suenq dwg gancengh he; hauhnaeuz mbouj riuz lwed, vunz caemh mbouj ndaej mienx coih. 23 Gwnz neix daez daengz dih cangqbungz caeuq soj yungh hih doxgaiq, cungj dwg ciuq youq gwnzmbwn hih yienghceij ma guh hih; sojmiz ciuq guh hih bietdingh ij yungh cungj fap neix ma cij ndaej hawj doenghgij de suenq dwg gancengh he. Hoeng, baenjcinh doenghgij youq gwnzmbwn he, engqgya bietdingh ij yungh gij dajbwiz engqgya ndei he bae hawj doenghgij de gancengh. 24 Aenvih Gihduz gaenhbaenj mbouj dwg haeuj cungj cangqbungz vunz ciuq aen caen de ma guh he, dauq dwg haeuj aen gwnzmbwn cingqcaen he bae lah; de vih gyoengqraeuz hwj haeuj bae daengz Cangqdiq mwnq. 25 De caemh mboujyungh haeuj bae mbat caiq mbat hwj dawz bonjfaenh de dangq guh gij dajbwiz hwj bwiz hawj Cangqdiq nej; mbouj dwg luj doenghheij goengjsae dajbwiz daeuzdaeuz yienghmwnq moix it bi cungj ij dawz gij lwed mbouj dwg bonjfaenh he haeuj bae bwiz hawj Cangqdiq nej. 26 Sojhij, hauhnaeuz dwg yienghneix hih nex, Gihduz de daj gaihcij cauh mbwn cauh deih doxdaeuj couh gaengjdingq ij ngaiz souh daengz haujlai mbat nanh lo. Hoeng, seizneix de youq ciqgyaiq dih duenh gatsat he, de cijngamq mbat dog couh dawz bonjfaenh de ma dangq guh gij dajbwiz hwj ndaej cawz coih lo. 27 Yiengq vunz gannaeuz caemh dwg cijngamq rai mbat dog lah, hoeng, vunz rai le ij ngaiz souh daengz saemjbuenq; 28 caemh doxdoengz, gannaeuz Gihduz caemh dwg ngaiz rai mbat dog lah, hoeng, de couh ndaej bang lajmbwn haujlai vunz rap coih lo. Yiengq gangj daengz de caiq dauq daeuj, de dauq daeuj mbouj dwg vih ij caiq rap coih hwj daeuj nej, dauq dwg vih ij gouq doenghheij vunz daengj de mwnq hwj dauq daeuj lah.
1 Mohsih dih fazliz cijmboujgoq dwg luj diuz giuz gaq roen hawj vunz, hawj vunz sien ndaej rox baezneix hih saeh dwg baenxlai ndei hwj lah, gaenhbaenj mbouj dwg ndaej hawj vunz bienqbaenz hab'eiq habhoz Cangqdiq liuxliux law. Ciuq Mohsih dih fazliz, gij vunz mbat caiq mbat, bi caiq bi hwj bae dajbwiz, hoeng, gij dajbwiz baenjcinh de gaenhbaenj mbouj ndaej hawj boux bae dajbwiz mwnq ndaej bienqbaenz youq ndaw lwgra Cangqdiq suenq dwg hab'eiq habhoz liuxliux he nej. 2 Beijgangj naeuz, hauhnaeuz cungj dajbwiz neix ndaej hawj vunz bienqbaenz youq ndaw lwgra Cangqdiq suenq dwg mij'z coih he hih lo, yiengq, couh mbouj caiq caenhrox dajbwiz haem lo. Caiq hauhnaeuz dajbwiz hih vunz, dajbwiz mbat he, couh ndaej yungjyenj mij'z coih lo nex, yiengq ndaw sim gyoengqde couh mbouj caiq roxnginh miz coih haem lo. 3 Hoeng, bibi dajbwiz cijmboujgoq dwg hawj vunz siengzseiz ngeix daengz bonjfaenh dih coih hwj lah, 4 aenvih lwed cwzgoeng caeuq lwed yiengzbya mbouj ndaej cawz coih nej. 5 Sojhij, Gihduz daeuj daengz lajmbwn guh vunz hih mwhde, de doiq Cangqdiq naeuz: Mwngz mbouj haenj vunz soengq hih doxgaiq caeuq gij dajbwiz nej, dauq haenj aen ndang gou, mwngz soj cwnjbiq hih lah. 6 Doenghgij coemh hwj dajbwiz he caeuq gij bwiz cueg coih he, mwngz caemh mbouj haenj. 7 Couh vih yienghneix, gajlaeng gou couh naeuz: “Cangqdiq hax! Gou daeuj lo!” Couh luj ndaw Singqgingh ndaw de sij naeuz hih gvanhhih gou hih saeh hih, naeuz: “Gou daeuj dwg vih ij ciuq gij cawjeiq mwngz hwj daeuj lah.” 8 Yiengq gwnz neix Gihduz soj daez daengz hih, doenghgij doxgaiq vunz soengq hih caeuq doenghgij dajbwiz, caeuq coemh hwj dajbwiz caeuq bwiz cueg coih hih doenghgij neix, gannaeuz cungj dwg ciuq fazliz ma guh lah, hoeng, cungj mbouj dwg Cangqdiq ij aeu ij haenj hih. 9 Gihduz de caemh vanzlij naeuz: Gou daeuj dwg vih ij ciuq gij cawjeiq mwngz hwj daeuj lah. Yiengq, ciuq yienghneix ma yawj, couh dwg de cawz gij gveihdingq gaeuq yienzlaiz dajbwiz he, laeb daixlingh gij gveihdingq, couh dwg yungh bonjfaenh de ma guh gij dajbwiz he hwj cueg coih hih lah. 10 Yehsuh Gihduz, ciuq Cangqdiq dih cawjeiq, de mbat dog couh yungh aen ndang bonjfaenh de ma guh dajbwiz hwj hawj gyoengqraeuz ndaej yungjyenj ndaej guh gij vunz Cangqdiq. 11 Ciuq gij gveihdingq gaeuq, goengjsae dajbwiz ngoenzngoenz cungj ij ndwn youq henz daiz dajbwiz dajbwiz, hoeng gij dajbwiz de mbatmbat cungj caemh dwg doxdoengz he lah. Doenghgij dajbwiz neix yungjyenj mbouj ndaej cawz coih hih. 12 Hoeng, Gihduz, de mbat dog couh dawz bonjfaenh de ma guh gij dajbwiz cueg coih he, caemh dwg ndaej yungjyenj cueg he. Gajlaeng de couh naengh youq baixgvaz Cangqdiq, 13 youq mwnq daengj Cangqdiq dawz gij dizyinz de bienqbaenz aen daengq de. 14 Aenvih de, Gihduz, dawz bonjfaenh de ma dangq guh gij dajbwiz he hwj bwiz mbat dog couh ndaej hawj gij vunz de yungjyenj bienqbaenz hab'eiq habhoz Cangqdiq liuxliux he. 15 Gangj daengz gij neix, Hoenzsaenz Cangqdiq caemh cingqmingz goq naeuz: 16 Baezneix gou ij lingh dingh baujcingq lienz diuzgyenq hawj gyoengqde; gou ij dawz gij fazliz gou coengq youq ndaw sim ndaw uk gyoengqde. 17 Gajlaeng de vanzlij naeuz: Gou mbouj caiq geiq gij doegsieb gyoengqde caeuq gij coih gyoengqde. 18 Yiengq, giqyienz doegsieb caeuq coih cungj ndaej mienx lo vwz, couh mbouj caiq yungh gij dajbwiz cueg coih mwnq haem lo. 19-20 Sojhij gak boux beixnuengx hax, giqyienz Yehsuh Gihduz yungh gij lwed bonjfaenh de ma hoi diuz roen youh moq youh lix he hawj gyoengqraeuz—diux roen neix couh dwg aen ndang de—dunghgoq fanyiemz, ndaej hawj gyoengqraeuz mbouj lau hih hwj haeuj aen cangqbungz daengz mwnq Cangqdiq caeuq vunz doxraen he bae, 21 caemh giqyienz gyoengqraeuz miz boux veijdaq dih goengjsae dajbwiz guenjleix aen gya Cangqdiq he, 22 caiq saj lwed hwj hawj gyoengqraeuz doiq ndaej hwnj liengzsim, caeuq yungh raemx ma swiq cengh aen ndang gyoengqraeuz vwz, gyoengqraeuz couh wnggai caensim caeuq miz sinqsim raixcaix hwj bae dep Cangqdiq, 23 caemh wnggai gyenhciz mbouj bienq sim hwj souj ndei gyoengqraeuz soj nginh soj muengh hih, aenvih boux doiq gyoengqraeuz baujcingq dih Cangqdiq dwg sinq ndaej goq hih. 24 Gyoengqraeuz caemh ij wnggai ngeixngeix yawj ij baenzlaw cij ndaej gujliq vunz doxaiq, guh ndeisaeh. 25 Mbouj wnggai luj miz hih vunz yienghmwnq mbouj haenj doxcomz, dauq ij doxbang doxson; giqyienz gyoengqraeuz rox Gihduz dauq daeuj hih ngoenz mwnq couh ij daengz lo, sojhij gyoengqraeuz couh ij engqgya yienghneix guh. 26-27 Sojhij gak boux beixnuengx hax, yiengq, hauhnaeuz gyoengqraeuz gaenq rox gij saedsaeh Cangqdiq lo, hoeng, vanzlij maixmingz bae famh coih nex, couh caenhgag rox lau fwxfwh hwj daengj daengz ngoenz saemjbuenq mwnq caeuq gij feiz dawz yiegyieg gyemz gij dizyinz mwnq lah, aenvih mbouj caiq miz gij dajbwiz ndaej cueg coih he haem lo. 28 Sojhij famz miz vunz famh Mohsih dih fazliz hih, cijaeu miz song daengz sam boux cingqmingz naeuz boux de famh coih, yiengq boux de couh ij ngaiz rai, mbouj ndaej nyiuz. 29 Yiengq, ciuq luj yienghneix ma yawj, doenghheij dawz daeglwg Cangqdiq ma caij youq laj din, yawj mbouj hwnj gij lwed Cangqdiq aeu ma dinghlaeb saen dih baujcingq lienz diuzgyenq hwj hawj vunz ndaej mienx coih hih, caiq yawj doiq vunz haijliengh dih Hoenzsaenz Cangqdiq ngawz hih doenghheij vunz mwnq, mbouj engqgya haz? 30 Aenvih gyoengqraeuz rox boux naeuz goq naeuz: Boixhaemz youz gou boiz; gou gaengjdingq hawj de bauqwngq dawz. De vanzlij naeuz: Cangqdiq ij saemjbuenq gij vunz de. 31 Sojhij gou naeuz hax, doek youq ndaw fawz seiqseiz lix dih Cangqdiq, dwg baenxlai dih camj hax! 32 Faenhsou wnggai ndaejgeiq, mwh faenhsou ngamq rox Yehsuh Gihduz, ngamq rox gij ndei siuhsiz Cangqdiq hih mwhmwnq, gannaeuz faenhsou souh baenx haujlai nanh lah, hoeng, dauq ndaej gyenhciz roengzbae baujciz mbouj bienq sim. 33 Mizseiz faenhsou youq dangqnaj vunzlai ngaiz vunz yawjngawz, dawz ma nyoujnyak gaijmbwq; mizseiz faenhsou vanzlij haeuj doenghheij ngaiz luj faenhsou yienghneix souh nanh hih. 34 Faenhsou mbouj danhcij hojsik bang doenghgij vunz vih Gihduz hwj ngaiz vunz gyaeng hih, simqciq gij gyadangq bonjfaenh faenhsou cungj ngaiz vunz ciengj aeu lo, faenhsou ciuqyiengh sim'angq, aenvih faenhsou rox faenhsou miz gij gyadangq engq ndei engq dijbauj mbouj rox naeuh he diuh hawj faenhsou he. 35 Sojhij, faenhsou mbouj ndaej saet sinqsim; ij wnggai miz aen sim mbeihung mbouj rox lau he. Miz aen sim yienghneix hih couh gaengjdingq ndaej miz haujlai cangjbyimj lo. 36 Vih ij ciphengz Cangqdiq dih cawjeiq hwj ndaej daengz Cangqdiq dih soj baujcingq hih, faenhsou bietdingh ij gyenhciz naenxsim, 37 aenvih ndaw Singqgingh ndaw de sij naeuz: Goq yaepyet he, boux ij daeuj mwnq couh daeuj lo; de mbouj hawj vunz daengj de law. 38 Boux gou yawj de suenq dwg mij'z coih hih vunz, de gaengjdingq vih sinq hwj ndaej miz mingh. Yiengq, hauhnaeuz de lau hwj mbouj caiq sinq lo nex, gou couh mbouj haenj de lo. 39 Hoeng, gyoengqraeuz mbouj dwg haeuj doengh cungj vunz lau hwj yiem Gihduz hwj ngaiz satsoq hih law, dauq dwg miz sinqsim hwj ndaej gouq hih vunz lah.
1 Yiengq sinqsim dwg gijmaz nej? Sinqsim dwg doiq soj muengh hih saeh miz bajhuz, doiq gij saeh yawj mbouj ndaej raen he ndaej gaengjdingq. 2 Dangqlaux doenghbaez couh dwg vih doiq Cangqdiq miz sinqsim hwj cij ndaej daengz haenh. 3 Aenvih miz sinqsim, sojhij gyoengqraeuz couh rox gyoengqraeuz soj yawjraen hih gwnzmbwn lajdeih sojmiz hih cungj dwg baengh gij vah Cangqdiq hwj cauh baenz he, mbouj dwg baengh gijmaz yawj ndaej raen hih hwj cauh okdaeuj hih. 4 Couh aenvih sinq, Yaqbwz sinq Cangqdiq, sojhij de bwiz hawj Cangqdiq hih gij dajbwiz beij Gaihyinj bwiz hawj Cangqdiq hih gij dajbwiz ndei ndaej lai. Aenvih de sinq, Cangqdiq haenh de soj soengq hawj hih gij dajbwiz, haenh de dwg boux vunz simndei simsoh he. Gannaeuz de gaenq rai hoh lah, hoeng, aenvih de sinq hwj soj guh hih, daengz seizneix cungj lij aeu ma guh bangjyangq hawj gyoengqraeuz. 5 Caemh aenvih sinq, Hijnoz vih sinq Cangqdiq hwj de ndaej daengz Cangqdiq haenh de; de couh mbouj ngaiz rai. Couh vih yienghneix, de couh ndaej daengz Cangqdiq ciep de bae; lajmbwn hih vunz caiq cimh mbouj raen de haem lo. 6 Vunz hauhnaeuz mbouj sinq Cangqdiq, couh mij banqfaz ndaej hawj Cangqdiq haenjheiq; famz byawz siengj dep siengj gaen Cangqdiq hih, bietdingh ij sinq cingqcaen miz Cangqdiq, caemh ij sinq Cangqdiq gaengjdingq cangj hawj doenghheij vunz cingqcaen gouzcimh de he. 7 Caemh aenvih sinq, Nozyaq sinq Cangqdiq; de dingq daengz Cangqdiq daezsingj gingjgauq de naeuz miz raemxdumh mwhde, cungjsuenq naeuz de mijyaengz raen miz ij raemxdumh dih gingjdoengh, hoeng, aenvih de miz aen sim soenhgingq Cangqdiq he, de couh cauh aen ruz he hwj hawj baenx cenz ranz de haeuj bae couh ndaej gouq. Couh vih yienghneix, sawjhawj baenx cenz lajmbwn hih vunz cungj ngaiz dingh miz coih. De nej? De dauq dwg aenvih de sinq hwj ndaej daengz Cangqdiq yawj de dangq dwg boux simndei simsoh he dih vunz. 8 Caemh aenvih sinq, Yaqbwzlahhanj sinq Cangqdiq; mwh de dingq daengz Cangqdiq hawj de bae mwnq Cangqdiq baujcingq nyok hawj de hih mwnq dieg mwnq bae, de couh bae lo. Gannaeuz mwhde de mijyaengz rox ij bae mwnqlaw lah, hoeng, de cungj ciuq Cangqdiq raengq hih yienghmwnq bae lo. 9 Caemh dwg aenvih de sinq Cangqdiq, gajlaeng de couh dap bungz doz youq mwnq Cangqdiq baujcingq nyok hawj de hih mwnq dieg mwnq youq, luj bouxhek yienghmwnq youq. Daiqlienz daeglwg de Hijsaj daeglan de Yajgoz cungj caemh dwg youq mwnq dap bungz youq, aenvih Cangqdiq caemh baujcingq goq hawj mwnq dieg mwnq hawj gyoengqde. 10 Aenvih de ij daengj ndaej buen haeuj Cangqdiq soj sezgiq hwnq hih gij giek yungjyenj gaenj dwtdwt hih aen singz mwnq bae. 11 Caemh aenvih sinq, Yaqbwzlahhanj sinq Cangqdiq doiq de baujcingq hih dwg sinq ndaej goq hih, sojhij gannaeuz bonjfaenh de nienzgeij gaenq laux liux lo, mehyah de Sajlah caemh gaenq cauhgoq ndaej mizndang dih nienzgeij lo, hoeng, Cangqdiq vanzlij hawj de ndaej miz lwg, hawj de ndaej guh daxboh. 12 Sojhij, de, Yaqbwzlahhanj, aen ndang de caenh luj mij'z yungh lo, hoeng, dauq ndaej miz lwg miz lan lai luj gij ndaundeiq gwnzmbwn, luj gij sa henz haij. 13 Gwnz neix daez daengz hih doenghheij vunz neix, caemh aenvih gyoengqde sinq Cangqdiq raixcaix, gyoengqde miz sinqsim daengj muengh Cangqdiq doiq gyoengqde baujcingq, gyoengqde caemh nginh gyoengqde caemh luj bouxhek yienghmwnq doz youq vaihdieg youq. Gyoengqde daengz rai cungj dwg sinq Cangqdiq, hoeng cijmboujgoq mijyaengz ndaej daengj daengz Cangqdiq doiq gyoengqde dih gij baujcingq mwnq lah. 14 Luj gyoengqde miz cungj daiqduq neix hih vunz, dwg cingqmingz gyoengqde siengj gag miz mwnq dieg bonjfaenh he. 15 Gizsaed, gyoengqde gaenhbaenj mbouj dwg siengjniemh mwnq dieg coj gyoengqde hih, aenvih hauhnaeuz gyoengqde siengjniemh mwnq dieg coj gyoengqde hih nex, gyoengqde vanzlij miz gihveiq ndaej dauq maj hah. 16 Gyoengqde soj siengjmuengh hih dauq dwg youq gwnzmbwn mwnq dieg engqgya ndei hih lah. Sojhij Cangqdiq gaenhbaenj mbouj vih gyoengqde yienghneix muengh hwj roxnginh saetnaj saetnyaenq, caemh haenjheiq gyoengqde nginh de dwg gyoengqde dih Cangqdiq, aenvih baenjlaiz Cangqdiq gaenq youq gwnzmbwn cwnjbiq aen singz he hawj gyoengqde lo. 17-18 Caemh aenvih sinq, Yaqbwzlahhanj vih sinq Cangqdiq hwj youq mwh Cangqdiq gaujniemq de hawj de dawz daeglwg de Hijsaj dangq guh gij dajbwiz hwj bwiz hawj Cangqdiq hih mwhde, de couh dingq Cangqdiq lo. Gannaeuz Cangqdiq doiq de baujcingq goq naeuz: “Dwg Hijsaj seng hih lwg cij suenq dwg doengh daih gajlaeng mwngz” lah, hoeng, Yaqbwzlahhanj vanzlij sinq Cangqdiq hwj dawz daeglwg dog de soengq hawj Cangqdiq lo. 19 Yaqbwzlahhanj sinq Cangqdiq ndaej hawj vunzrai dauqlix, sojhij cungjsuenq naeuz Hijsaj rai lo, de caemh sinq Cangqdiq caemh gaengjdingq hawj de ndaej dauqlix. Gizsaed doiq Yaqbwzlahhanj ma gangj, Hijsaj caemhdangq gaenq rai lo, gajlaeng caemhcaiq ndaej dauqlix lo. 20 Caemh aenvih sinq, Hijsaj sinq Cangqdiq; de couh hoh fuk hawj song daeglwg de Yajgoz caeuq Hijsauj gvanhhih gajlaeng hih saeh. 21 Caemh aenvih sinq, Yajgoz youq mwh de ijvanh rai hih mwhde, de hoh fuk hawj song daeglwg Yozswz, gajlaeng caemhcaiq daemx faexdwngx hwj baiq Cangqdiq. 22 Caemh aenvih sinq, Yozswz youq mwh ijvanh rai hih mwhde, de sinq Cangqdiq gaengjdingq daiq gij vunz Hijswzlez daj Ngaihgiz okma, sojhij de couh raengq naeuz daengz mwhmwnq ij dawz gij ndok de itheij daiq okma. 23 Caemh aenvih sinq, bohmeh Mohsih vih sinq Cangqdiq hwj mbouj lau goengjvuengz Ngaihgiz. Mohsih seng le, bohmeh de raen Mohsih baenxmbauq raixcaix le, couh dawz de yo hwnjdaeuj sam ndwen. 24 Caemh aenvih sinq, Mohsih hung le, mbouj nyienh'eiq guh daeglwg dah lwgsau goengjvuengz Ngaihgiz. 25 De mbouj nyienh guh daeglwg dah lwgsau goengjvuengz Ngaihgiz, cingxnyienh guh gij vunz Cangqdiq, caeuq gij vunz Cangqdiq hwj caez souh nanh lah, dauq mbouj nyienh guh gij lwg Ngaihgiz hwj goq ndaek cungj saenghhoz ndaengndwet, camqciz angq yaep he he. 26 Aeu Mohsih ma yawj, youq ndaw lwgra de ndaej vih Gihduz hwj ngaiz souh nanh hih beij ndaej daengz Ngaihgiz hih saizcanj vanzlij dijbauj, aenvih de muengh baezneix dih cangjbyimj. 27 Caemh aenvih sinq, Mohsih vih sinq Cangqdiq hwj mbouj lau goengjvuengz Ngaihgiz, daj Ngaihgiz deuz okma; de gyenhciz sinq mbouj doeknaiq, sinq boux aeu ra ma yawj mbouj raen dih Cangqdiq. 28 Caemh aenvih sinq, de vih sinq Cangqdiq hwj souj aen ciet Bienqgoqbae, caemh ciuq Cangqdiq raengq hih yienghmwnq bae raengq gij vunz Hijswzlez gaj yiengzlwg hwj dawz gij lwed de ma hoz haeuj begdou caeuq goemqdou bae, mienxndaej gij lwgdaeuz gij vunz Hijswzlez ngaiz bouxcai Cangqdiq gaj. 29 Caemh aenvih sinq, gij vunz Hijswzlez goq Hungz Haij caenh luj byaij goq gwnz hawq. Hoeng, gij vunz Ngaihgiz siengj gaen gyoengqde bae, boenq gyoengqde, dauq ngaiz raemx dumh rai. 30 Caemh aenvih sinq, gij vunz Hijswzlez gvaenxgvax aen singz Yehliqgoh caet ngoenz le, gij ciengzsingz veiz aen singz de couh ngaiz doemq lo. 31 Caemh aenvih sinq, Lahhoz dah lauxgawj neix, vih sinq Cangqdiq hwj mbouj ngaiz luj doenghheij mbouj dingq Cangqdiq he ngaiz gajrai, aenvih de nyienh'eiq bang doengh boux gij vunz Hijswzlez baij bae damqdingq aen singz Yehliqgoh he. 32 Luj doenghheij vunz neix, gou vanzlij ij lailai geq okdaeuj haem mah? Hauhnaeuz ij geq, beijgangj Gihdenq hah, Bahlah hah, Canhsoenh hah, Yehfuzdah hah, caeuq Daqveiq hah, Sajmujwj hah, caeuq doengh boux cenz gij vah Cangqdiq hih hah; gyoengq neix cungj dwg sinq Cangqdiq hih, cijmboujgoq gou mij cizgyenh bae geq gyoengqde soj guh hih saeh hih lah. 33 Doengh boux, doengh gyoengq neix cungj dwg vih sinq Cangqdiq hwj ndaej hoenxhingz doengh aen guek caeuq gyoengqde miz haemzcaeuz he, guh gij saeh hab'eiq habhoz Cangqdiq he, ndaej daengz Cangqdiq soj baujcingq he, caemh ndaej fung conghbak duz caiceij he, 34 cix ndaej maet feiz rem, deuz ok caxgyiemq mbouj ngaiz ndaemq rai, doeknaiq bienq gyenhgyangz, doxhoenx yungjgamj mbouj lau rai, hoenxhingz vaihguek. 35 Vanzlij miz, cungj dwg aenvih sinq, doenghheij vunzbaz vih sinq Cangqdiq hwj doenghheij caencik beixnuengx gyoengqde rai couh ndaej dauqlix, hawj gyoengqde dauq ndaej miz doenghheij beixnuengx mwnq. Vanzlij miz hih vunz caemh aenvih sinq Cangqdiq, gyoengqde cingxnyienh souh daengz vunz gaemh dawz goenj dawz dubdoh, haep, cix mbouj cingxnyienh daekcoih Cangqdiq yiem Cangqdiq hwj ndaej hawj vunz coengq gyoengqde ndaej swqyouz, aenvih gyoengqde nginhnaeuz Cangqdiq hawj gyoengqde dauqlix beij gijmaz lij ndei. 36 Caemh cungj dwg aenvih sinq, miz hih vunz ngaiz vunz dawz ma nyoujnyak gaijmbwq, ngaiz vunz faexbien fad, caemh miz hih vunz ngaiz vunz goenj hwnjdaeuj, ngaiz vunz gyaeng. 37 Caemh vanzlij miz hih vunz ngaiz vunz aeu rin ma dub rai, ngaiz vunz aeu gawq ma gawq rai, ngaiz caxgyiemq ndaemq rai gajrai. Caiq miz hih vunz cix gungz cix nanh, caiq souh daengz yawjngawz bwkhaih hwj aeu fwn menzyiengz hah fwn yiengzbya hah ma dangq guh buh hwj bangj, cix mij mwnq youq he, dauqcawq bae liuzlangq, 38 bae daengz cahmoz, rogndoi, conghgamj, doengh mwnq yienghneix youq. Doenghheij vunz neix dij goq aen seiqgyaiq neix bae; aen seiqgyaiq neix boiq mbouj hwnj gyoengqde. 39 Doenghheij vunz neix, aenvih gyoengqde sinq Cangqdiq hwj ndaej daengz Cangqdiq haenh, hoeng, youq gyoengqde lij lix hih mwhde dauq mij ndaej daengz Cangqdiq soj baujcingq hih, 40 aenvih Cangqdiq hawj gyoengqde daeuj caeuq gyoengqraeuz itheij yangjcouq de vih gyoengqraeuz hwj nganhbaiz gij engqgya ndei he. Yienghneix gyoengqde cij ndaej hab'eiq habhoz Cangqdiq liuxliux.
1 Yiengq, giqyienz miz baenx lai vunz cingqmingz sinq Cangqdiq lai luj miz fwj daeuj guem gyoengqraeuz vwz, gyoengqraeuz couh wnggai yoengq sojmiz gaz dawz gyoengqraeuz hih caeuq ep gyoengqraeuz dih coih hih hwj miz aen sim gyenhdingq he bae byaij diuz roen Cangqdiq yinx hawj gyoengqraeuz byaij he. 2 Gyoengqraeuz caemh wnggai dawz singjsaenz coengq youq gwnz ndang Yehsuh, aenvih de dwg daiq daeuz hawj gyoengqraeuz sinq he, caeuq hawj gyoengqraeuz ndaej gyenhciz sinq raixcaix he. De vih miz gij engqgya angq he hwj daengj de he, de couh naenxsim mbouj dawz de ngaiz ding hwnj gwnz gyaq cixcib bae rai hih dangqbaenz dwg gij saetnaj saetnyaenq he. Seizneix de gaenq ndaej naengh youq baixgvaz Cangqdiq lo. 3 Faenhsou wnggai ngeix daengz de souh daengz vunz vaih fanjdeiq de, caeuq de doxngig, de vanzlij ndaej naenxsim hih, faenhsou couh mbouj doeknaiq lo. 4 Gizsaed faenhsou caeuq doenghgij vunz miz coih he doxbuek, mij ngaiz buek daengz ij vwt mingh bae hah. 5 Cangqdiq gujliq faenhsou caemhdangq luj gujliq lwg bonjfaenh de yienghmwnq. Faenhsou wnggai ndaejgeiq, ndaw Singqgingh ndaw de gujliq naeuz: Lwg gou hax, mwngz mbouj ndaej mbouj dawz haeuj rwz Cangqdiq dih guenjgyauq; ngaiz de ndaq naeuz hih mwhde caemh mbouj ndaej doeknaiq, 6 aenvih de guenjgyauq de soj aiq hih vunz, fad de soj nginh ciengx hih lwg. 7 Sojhij, Cangqdiq guenjgyauq faenhsou hih mwhde, faenhsou ijaeu rox naenxsim, aenvih Cangqdiq doiq faenhsou caemhdangq boh doiq lwg yienghmwnq. Nwjh miz naeuz lwg mbouj ngaiz boh guenjgyauq hih nej? 8 Yiengq, hauhnaeuz faenhsou mbouj ndaej luj doenghheij lwg Cangqdiq ndaej daengz de guenjgyauq nex, faenhsou couh dangq dwg lwgndai, mbouj dwg caen lwg de lo. 9 Gangj daengz gyoengqraeuz, boh seng ciengx gyoengqraeuz, guenjgyauq gyoengqraeuz, gyoengqraeuz vanzlij rox soenhgingq de hwx; gangjnaeuz dwg daxboh hoenzsaenz raeuz, gyoengqraeuz mbouj engqgya ij soenhgingq de haz? Yienghneix gyoengqraeuz mbouj engqgya ndaej miz mingh haz? 10 Daxboh gyoengqraeuz guenjgyauq gyoengqraeuz dwg ciuq gij cawjeiq bonjfaenh de ma camqciz guenjgyauq gyoengqraeuz hih; caenhgag Cangqdiq guenjgyauq gyoengqraeuz cij ndaej hawj gyoengqraeuz cingqcaen miz ik hih, hawj gyoengqraeuz ndaej bienqbaenz luj de dwzbez he, ndei he. 11 Gannaeuz youq mwh ngaiz guenjgyauq hih mwhde cungj dwg roxnginh mbwq, sim mbouj onj lah, hoeng, daengz gajlaeng doenghheij ndaej daengz guenjgyauq hih, ndaej duenqlenq goq hih, cungj ndaej bienqbaenz vunz ndei, ndwn ndaej cingq he, ndaej an'onj he. 12 Sojhij, faenhsou ijaeu miz singjsaenz cengqgengz yingx gij fawz mij'z rengz faenhsou hwnjdaeuj, ndwn soh gij ha naet faenhsou, 13 caemh ij coih bingz diuz roen dangqnaj faenhsou, yienghneix couh ndaej hawj gij vunz ha vaij he mbouj ngaiz laemx, dauqfanj ndaej giengz ndei hwnjdaeuj. 14 Gou naeuz faenhsou hax, faenhsou wnggai cwnqliengq caeuq vunz doxhuz, caemh ij goq cungj saenghhoz hab'eiq habhoz Cangqdiq he, aenvih hauhnaeuz mbouj goq cungj saenghhoz hab'eiq habhoz Cangqdiq he nex, couh mbouj ndaej raen Cangqdiq lo. 15 Faenhsou caemh ijaeu siujsim, mienxndaej miz hih vunz ngaiz mbouj ndaej daengz Cangqdiq dih haijliengh, caemh ijaeu siujsim, mienxndaej miz gijmaz doeg youq faenhsou ndaw de fat hwnjdaeuj hwj gaujluenh faenhsou, hawj faenhsou bienqbaenz mbouj hab'eiq habhoz Cangqdiq. 16 Caemh ijaeu siujsim, mienxndaej miz vunz guh gij ndaengndwet he, cixnaeuz guh gij luj Hijsauj yienghmwnq mbouj yawjnaek Cangqdiq he, vih ij gw donq haeux he hwj daiqlienz gij gienz lwgdaeuz de cungj hai bae he. 17 Faenhsou caemh rox, Hijsauj gajlaeng de gannaeuz daejdaej gouzgouz daxboh de, ij hawj daxboh de hoh fuk hawj de lah, hoeng, cungj mij banqfaz ndaej hawj daxboh de hoh fuk hawj de. 18 Faenhsou gaenhbaenj mbouj luj gij vunz Hijswzlez, mwh gyoengqde youq rogndoi bae daengz aen bya Sihnaiq yienghmwnq, bae daengz aen bya aeu fawz mo couh ndaej daengz he; aen bya neix dawz feiz yiegyieg, fwj cix guem hwj rim bae, cix laep cix miz rumz hung. 19-20 Gyoengqde dingqri miz sing boq gywnhhauh caeuq miz sing mingqlingq goggog naeuz: Famz bungq dawz aen bya neix hih, cungjsuenq naeuz dwg doenghduz, cungj ij ngaiz dawz ma aeu rin dub rai bae. Gij vunz Hijswzlez dingq daengz yienghneix le, cungj lau hwj ij rai, couh gouz gij sing mwnq mbouj hawj gij sing mwnq caiq gangj roengzbae haem lo. 21 Mwhde yawj hwj yungyiemj raixcaix; daiqlienz Mohsih cungj lau hwj naeuz: “Gou lau hwj dungxmbouq ndangsaenz dedded bae.” 22 Hoeng, faenhsou nej, faenhsou dauq dwg ndaej bae daengz aen bya Cizanh, bae daengz aen singz yungjyenj lix dih Cangqdiq, couh dwg youq gwnzmbwn dih Yehluqsajlaengj Singz, bae daengz mwnq miz ciencien fanhfanh bouxcai Cangqdiq angq vaujvauq hwj doxcomz youq hih mwnq, 23 bae daengz mwnq miz gij lwgdaeuz Cangqdiq doxcomz hih mwnq; gij coh gyoengqde gaenq daengh youq gwnzmbwn de lo. Faenhsou dwg ndaej bae daengz saemjbuenq vunzlai dih Cangqdiq mwnq, bae daengz gwnzmbwn doenghheij hoenzsaenz youq ndaw lwgra Cangqdiq suenq dwg mij'z coih he, dwg hab'eiq habhoz de liuxliux he, 24 bae daengz dangqnaj Yehsuh, boux guh Cangqdiq caeuq vunz laeb hih gij baujcingq lienz diuzgyenq moq hih boux cungqgyan neix, bae daengz mwnq saj lwed mwnq; gij lwed neix beij gij lwed Yaqbwz gouz Cangqdiq vanzlij miz ik. 25 Faenhsou bietdingh ijaeu siujsim, baenzbaenz mbouj ndaej yiem Cangqdiq soj gangj hih vah, aenvih doenghbaez Cangqdiq hawj Mohsih gingjgauq gij vunz Hijswzlez, hoeng, gij vunz Hijswzlez mbouj dingq Mohsih, gajlaeng vanzlij ngaiz deuz mbouj ok fad. Sojhij, hauhnaeuz gyoengqraeuz mbouj dingq boux daj gwnzmbwn gingjgauq gyoengqraeuz hih nex, gyoengqraeuz mbouj engqgya deuz mbouj ok ngaiz de fad lo maz? 26 Mwhde Cangqdiq daj gwnz bya Sihnaiq gingjgauq gij vunz Hijswzlez hih mwhde, gij sing de gog hwj deih doengh bae, hoeng, seizneix de baujcingq naeuz: Baezneix gou mbouj danhcij caiq hawj deih doengh mbat haem, vanzlij ij hawj mbwn doengh haem. 27 Gawq ‘caiq mbat haem’ gawq neix dih iqswh dwg naeuz gwnzmbwn lajdeih sojmiz cauh okdaeuj hih cungj ij ngaiz saenqdaenh doengh hwj byoeng bae; lij gag gij mbouj ngaiz saenqdaenh byoeng mwnq ndaej yungjyenj louz youq sat lo. 28 Yiengq, giqyienz gyoengqraeuz ndaej daengz aen guek mbouj ngaiz saenqdaenh doengh byoeng mwnq vwz, gyoengqraeuz couh wnggai rox docih Cangqdiq, wnggai ciuq Cangqdiq haenjheiq hih yienghmwnq bae yawjnaek Cangqdiq, soenhcungq Cangqdiq, swqhaeuh Cangqdiq. 29 Aenvih gyoengqraeuz dih Cangqdiq dwg dangq gij feiz remrem ndaej coemh sojmiz he.
1 Faenhsou ij wnggai siengzseiz doxaiq luj caencik beixnuengx yienghmwnq doxaiq. 2 Ij caensim caen'eiq daih hek, aenvih miz hih vunz couh dwg yienghneix guh hwj engq ndaej daih daengz bouxcai Cangqdiq. 3 Faenhsou ijaeu ngeix daengz doenghheij ngaiz gyaeng youq ndaw lauz hih vunz, gvansim gyoengqde caemh luj gvansim bonjfaenh faenhsou, caenh lujnaeuz faenhsou caemh ngaiz gyaeng yienghmwnq; caemh ij ngeix daengz doenghheij vunz ngaiz bwkhaih he, gvansim gyoengqde caemh luj gvansim bonjfaenh faenhsou, caenh lujnaeuz faenhsou caemh ngaiz vunz bwkhaih yienghmwnq. 4 Faenhsou daixgya cungj ij soenhcungq vwnhyenh; gvanjbaz dih ndaek cungj gvanhaeh mwnq mbouj ndaej boqvaiq, aenvih guh doenghgij ndaengndwet guhyoux hih vunz gaengjdingq ngaiz Cangqdiq saemjbuenq. 5 Faenhsou caemh mbouj ndaej dam cienzcaiz; ij wnggai doiq bonjfaenh soj miz hih rox gaeuq, aenvih Cangqdiq naeuz goq naeuz: Gou yungjyenj mbouj liz faenhsou vwt faenhsou. 6 Sojhij gyoengqraeuz wnggai mbeihung hwj naeuz: “Cangqdiq dwg bang gou hih; gou gaengjdingq mbouj lau. Vunz cix ij dawz gou baenzlaw yiengh bae?” 7 Faenhsou caemh ijaeu ngeix daengz doenghbaez daiq faenhsou, cenz gij vah Cangqdiq naeuz faenhsou ni hih vunz; ij hag gyoengqde miz sinqsim, louzsim gyoengqde baenxseiq vunz dwg baenzlaw saenghhoz, dwg baenzlaw ndaej doiq vunz miz ik. 8 Dwzbez dwg Yehsuh Gihduz; de mboujguenj seizlawz, ngoenzlwenz cixnaeuz ngoenzneix cixnaeuz daengz yungjyenj, cungj dwg doxdoengz. 9 Faenhsou mbouj ndaej gaen doenghheij cenz doenghgij geizheih gingjgyauj he, yaep yiengh yaep yiengh he; wnggai baengh Cangqdiq dih haijliengh hwj sinqsim gyenhdingq cij deng, caemh mbouj ndaej baengh gvanhhih gij gw dih gveihdingq, aenvih baengh gij gveihdingq neix hih vunz gaenhbaenj mbouj ndaej gijmaz ik. 10 Hoeng, gyoengqraeuz miz aen daiz dajbwiz he, gwnz de miz gij dajbwiz hawj Cangqdiq he. Gij dajbwiz neix doiq gyoengqraeuz miz ik hih; doengh boux youq ndaw cangqbungz ciuq gij gveihdingq gaeuq guh goengjsae dajbwiz he cungj mij'z gienz ndaej gw hwx. 11 Yienzlaiz ciuq gij gveihdingq gaeuq, goengjsae dajbwiz daeuzdaeuz ij gaj doenghduz hwj dawz gij lwed de ma dangq guh gij dajbwiz hwj bae daengz cangqbungz Cangqdiq bwiz cueg coih; lij duz de, ij youq rog yingz coemh. 12 Caemh doxdoengz, Yehsuh caemh dwg rai youq rog; de yungh gij lwed bonjfaenh de ma hawj vunz bienqbaenz mij'z coih. 13 Yienghneix gyoengqraeuz caemh wnggai ok rog singz bae cimh de, caeuq de itheij ngaiz souh daengz vunz nyoegnyamx, 14 aenvih aen seiqgyaiq neix mbouj miz aen singz yungjyenj dwg aen gyoengqraeuz he; gyoengqraeuz seizneix cingq muengh daengj aen singz yungjyenj mwnq nex. 15 Gyoengqraeuz wnggai dunghgoq Yehsuh Gihduz hwj siengzseiz yungh haenh ma bwiz hawj Cangqdiq, couh dwg naeuz yungh conghbak raeuz ma gangj, nginh de baenxlai ndei. 16 Gyoengqraeuz caemh mbouj ndaej lumz guh ndeisaeh caeuq bang vunz, aenvih yienghneix guh couh dangq gij dajbwiz Cangqdiq haenjheiq he. 17 Faenhsou caemh ij dingq doenghheij daiq faenhsou he, ij ciuq gij vah gyoengqde bae guh, aenvih gyoengqde dwg hen caeuq baujhuq gij hoenzsaenz faenhsou he, caemh dwg ij yiengq Cangqdiq veiqbauq he. Faenhsou ij dingq gyoengqde, sawjhawj gyoengqde guh gij hong gyoengqde hih mwhde mbouj simfanz, roxnginh haenjheiq; hauhnaeuz gyoengqde simfanz, doiq faenhsou caemh mij maz ik. 18 Ceiqhaeuq, cingj faenhsou bang gyoengqraeuz gouzhaenh Cangqdiq bax! Aenvih gyoengqraeuz gag rox gyoengqraeuz soj guh hih cungj dwg doiq ndaej hwnj liengzsim hih; gyoengqraeuz caemh muengh gyoengqraeuz guh saeh guh ndaej deng. 19 Youq dineix, gou engqgya dwzbez cingj faenhsou bang gou gouz Cangqdiq, gouz de hawj gou ndaej vaiqdi maj faenhsou mwnq. 20 Muengh nyok bingzan dih Cangqdiq, couh dwg boux dunghgoq gij lwed laeb gij baujcingq yungjyenj mbouj bienq hih ma hawj veijdaq dih bouxcawj raeuz Yehsuh boux ciengx yiengz neix daj rai ndaej dauqlix dih Cangqdiq, 21 muengh de nyok hawj faenhsou soj ij yungh hih gij ndei he, hawj faenhsou ndaej ciuq gij cawjeiq de bae guh. Caemh muengh de dunghgoq Yehsuh Gihduz dih rengz hwj youq gwnz ndang faenhsou guh de soj haenj hih saeh. Muengh najrongh yungjyenj gvi hawj de! Ahmaenz. 22 Gak boux beixnuengx hax, gou gyenjdanh sij fung saenq mbouj daiq raez neix; gou cingj faenhsou naiqsim yawj ndaw de gou doiq faenhsou dih gujliq. 23 Gou siengj hawj faenhsou rox Dizmohdaiq boux beixnuengx gyoengqraeuz, de gaenq ndaej coengq okma lo. Hauhnaeuz de ndaej daeuj daengz gou dineix vaiq nex, gou couh caeuq de itheij bae faenhsou mwnq yawj faenhsou. 24 Ceiqhaeuq caiq cingj faenhsou bang gou cam doengh boux daiq faenhsou he ndei, caeuq cam faenhsou mwnq sojmiz hih gij vunz Cangqdiq ndei. Daj Iqdaqliq daeuj hih gij vunz Cangqdiq caemh cam faenhsou ndei. 25 Muengh Cangqdiq doiq faenhsou daixgya haijliengh! Ahmaenz.
1 Gou dwg Yajgoz, dwg bouxhoiq Cangqdiq, caemh dwg bouxhoiq bouxcawj raeuz Yehsuh Gihduz; faensanq youq gak dieg hih cibngeih aen cuz hih gij vunz Cangqdiq, faenhsou ndei! 2 Gak boux beixnuengx hax, faenhsou roeb daengz gak cungj gaujniemq hih, ij wnggai nginh dwg gienh saeh ndei he hwj sim'angq; 3 faenhsou wnggai rox, dunghgoq gaujniemq faenhsou sinq Gihduz hih sim le, faenhsou couh ndaej rox gyenhciz lo. 4 Hoeng, faenhsou ij rox gyenhciz roengzbae, cij ndaej guh daengz mij maz diudik, cibcukcib ndei he. 5 Hauhnaeuz faenhsou miz byawz mbouj coengjmingz geijlai hih, couh wnggai gouz Cangqdiq. Gouz le, de couh nyok coengjmingz hawj faenhsou lo, aenvih de mbouj gvaiq vunz gouz de; de haenjheiq nyok hawj vunz lailai. 6 Cijaeu faenhsou miz sinqsim bae gouz, mbouj ngeiz Cangqdiq, yienghmwnq couh ndaej lo. Hauhnaeuz aen sim faenhsou fouz fedfed, ngeiz Cangqdiq, yiengq couh luj ndaw haij bohlangq, caih rumz ci hwj bubbub babbab fan foedfoed. 7-8 Doenghgij vunz yaepyaep yuekyuek sim mbouj dingh hih, gaej muengh naeuz ndaej dajlaeng Cangqdiq ndaej aeu gijmaz lo. 9 Gungzndangj hih beixnuengx hax, wnggai angq, aenvih faenhsou youq ndaw lwgra Cangqdiq suenq dwg najrongh hih. 10 Fouqmiz hih vunz hax, cijaeu faenhsou rox faenhsou youq ndaw lwgra Cangqdiq suenq dwg boux yaqyuij he, faenhsou couh ndaej vuenheij lo, aenvih fouqmiz hih vunz couh luj duj va go nywj; 11 gyangjngoenz ok daeuj cik, nywj caemh reuq, va caemh loenq. Caemh doxdoengz, boux fouqmiz hih, youq de lauh ngaenz hih mwhde, caemh luj yienghneix gajlaeng caemh ngaiz rai lo. 12 Dingx ndaej gaujniemq hih vunz dwg miz fuk hih, aenvih de dunghgoq gaujniemq ndaej gaeuqgwz le, couh cangjliq ndaej seiqseiz lix dih gij najrongh mwnq lo; gij najrongh neix dwg bouxcawj raeuz baujcingq hawj gij vunz aiq de he. 13 Yiengq, hauhnaeuz ngaiz yaeuh hwj siengj guh vaihsaeh hih mwhde, mbouj ndaej naeuz: “Gou ngaiz Cangqdiq yaeuh lo,” yienghneix naeuz, aenvih Cangqdiq mbouj ngaiz vunz yaeuh hwj guh vaihsaeh, de caemh mbouj yaeuh vunz. 14 Gizsaed, vunz ngaiz yaeuh, dwg vih bonjfaenh dih damsim hwj gag bae guh lah. 15 Yalw dih damsim ndaej hawj vunz famh coih; famh coih ndaej hawj vunz rai. 16 Sojhij, gak boux beixnuengx hax, gaejyungh ngaiz vunz yaeuh. 17 Cauh rongh dih Cangqdiq, de mbouj yaeuh vunz. De caenhrox daj gwnzmbwn soengq gak cungj gak yiengh ndei ndwtndwt he roengzdaeuj lah; de yungjyenj mbouj bienq, cungj dwg doxdoengz hih. 18 De ciuq gij cawjeiq bonjfaenh de yungh gij saedsaeh ndei siuhsiz de ma hawj raeuz ndaej dauqlix, hawj gyoengqraeuz ndaej guh daixit buek de doiqyungz cauh he hwj guh gij vunz de. 19 Gak boux beixnuengx hax, faenhsou wnggai rox, wnggai sijsaeq dingq vunz gangj, gaejyungh gaenj gangj gijmaz vah, caemh gaejyungh singqheiq gaenj fatheiq, 20 aenvih vunz fatheiq couh mbouj ndaej guh gij hab'eiq habhoz Cangqdiq he lo. 21 Sojhij faenhsou wnggai duet ok doenghgij ya'mboujlw mwnq caeuq doenghgij doegsieb mwnq; wnggai miz aen sim docih he hwj ciep aeu Cangqdiq caeng youq ndaw sim faenhsou hih gij saedsaeh mwnq, couh dwg ndaej gouq faenhsou hih gij ndei siuhsiz mwnq. 22 Faenhsou wnggai ciuq gij saedsaeh mwnq bae guh, gaejyungh cij rox dingq, mbouj rox bae guh; hauhnaeuz caenhgag dingq dauq mbouj ciuq bae guh hih, yienghmwnq caemhdangq gag yaeuh bonjfaenh lo, 23 aenvih dingq hoengq mbouj guh, couh luj vunz gag ciuj gingq gag ciuq raen baj naj bonjfaenh; 24 ciuq sat le, caemh lumz gij saeksiengq bonjfaenh lo. 25 Hoeng doengh boux cuqhiq dingq caemh mbouj lumz cix soenhsouj gij fazliz dingh ndaej ndei, hawj vunz ndaej swqyouz hih, doenghheij vunz neix, mboujguenj de guh gijmaz, Cangqdiq cungj soengq fuk hawj de. 26 Yiengq, hauhnaeuz miz cungj vunz he, de gag naeuz bonjfaenh de dwg yawjnaek Cangqdiq hih, hoeng de dauq doeng gangj sae gangj, mij guenj ndei conghbak bonjfaenh, luj yienghneix hih vunz dwg gag yaeuh bonjfaenh hih; de dih yawjnaek dwg mij'z yungh hih. 27 Dauq dwg doenghheij vunz yawjraen lwggyax, raen mehmaiq miz nanh le couh bae bang hih, caemh mbouj bae gaen aen seiqgyaiq neix hih doenghheij yalw he hih, gyoengq vunz neix soj guh hih youq ndaw lwgra Cangqdiq, Bohmbwn raeuz, dwg ndei hih, mbouj miz maz ndaej diudik hih.
1 Gak boux beixnuengx hax, giqyienz gyoengqraeuz dwg lwgsae najrongh dih bouxcawj raeuz Yehsuh Gihduz vwz, yiengq couh mbouj ndaej yawj vunz guh saeh lo. 2 Beijgangj naeuz miz boux vunz fouq he, gwnz fawz de daenj miz haedfawz gim hwj caemh daenj buh gyaeugyaeu ndeindei hwj haeuj ndaw veiqdangz faenhsou bae. Yiengq caemh miz boux vunz gungz he, gij buh de vaih vadvad, caemh haeuj ndaw veiqdangz faenhsou bae. 3 Yiengq, hauhnaeuz faenhsou riu veujveuq hwj doiq boux vunz fouq mwnq naeuz: “Daeuj, cingj mwngz naengh mwnq daixdaeuz neix,” doiq boux vunz gungz mwnq dauq naeuz: “Mwngz couh ndwn youq mwnq bax!” cixnaeuz doiq de naeuz: “Naengh youq henz daengq gak ha gou bax!” 4 Hauhnaeuz dwg yienghneix nex, couh dwg naeuz faenhsou yawj vunz guh saeh, luj doenghheij ndwn mbouj cingq hih saemjbuenqguenh yienghmwnq lo. 5 Gak boux beixnuengx hax, cingj faenhsou dingq gou naeuz sou ni: Cangqdiq senj doenghheij vunz vunz yawj gyoengqde dwg vunz gungz hih okdaeuj, hawj gyoengqde sinq Gihduz raixcaix, caemh hawj gyoengqde ndaej gaep haeuj aen guek de; aen guek de dwg de baujcingq hawj gij vunz aiq de he. 6 Hoeng, faenhsou dauq yawj doenghgij vunz gungz neix ngawz. Gizsaed, hangz faenhsou haep faenhsou, rag faenhsou bae fazdingz hih dauq dwg doenghgij vunz fouqmiz ngaenz he lah! 7 Bangjlaih Yehsuh Gihduz, boux senj faenhsou neix, caemh dwg gyoengqde! 8 Hauhnaeuz faenhsou ndaej guh daengz luj ndaw Singqgingh ndaw de soj sij dih gij veijdaq dih fazliz “Aiq vunz caemh ij luj aiq bonjfaenh” yienghneix nex, couh baenz lo. 9 Hoeng, caiq hauhnaeuz faenhsou yawj vunz guh saeh hih, faenhsou couh dwg famh coih lo, aenvih faenhsou famh fazliz. 10 Mboujguenj byawz famh fazliz hih diuz he, yiengq de couh dangq famh fazliz sojmiz hih lo. 11 Cingq luj Cangqdiq naeuz: “Mbouj ndaej guhyoux,” caemh naeuz: “Mbouj ndaej gaj vunz.” Yiengq cungjsuenq naeuz mbouj guhyoux hwjx, hoeng dauq bae gaj vunz, yiengq ciuqyiengh dwg famh fazliz. 12 Yiengq, giqyienz faenhsou ij souh daengz gij fazliz ndaej hawj vunz swqyouz mwnq dih saemjbuenq vwz, faenhsou soj gangj hih soj guh hih cungj ij hab gij fazliz hawj vunz swqyouz neix. 13 Hauhnaeuz faenhsou doiq vunz youqgaenj, yiengq Cangqdiq saemjbuenq faenhsou caemh youqgaenj; hoeng, faenhsou doiq vunz mbouj youqgaenj sim'unq, Cangqdiq saemjbuenq faenhsou caemh sim'unq, sojhij faenhsou gaejyungh lau. 14 Gak boux beixnuengx hax, hauhnaeuz miz vunz gag naeuz bonjfaenh de sinq Cangqdiq, hoeng dauq mij guh gijmaz ndeisaeh okdaeuj ndaej cingqmingz de sinq, yiengq miz maz yungh; gag naeuz sinq couh ndaej gouq bonjfaenh mah? 15 Caemhdangq naeuz faenhsou raen miz boux beixnuengxlaw mij'z gw mij'z daenj lo, 16 caemh rox naeuz: “Muengh mwngz bingzan! Muengh mwngz gw ndaej imq, daenj ndaej raeuj hwj,” hoeng, dauq mij bae bang de, mij hawj de ij gw ij yungh he, yiengq miz maz yungh nej? 17 Caemh doxdoengz, caenhgag naeuz sinq, sinq, sinq, hoeng dauq mij guh saek yiengh ndeisaeh, yiengq caemh daengjhih lingz. 18 Yiengq, ciuq luj yienghneix ma gangj, gaengjdingq ij miz vunz naeuz: “Mwngz naeuz mwngz sinq, hoeng mwngz caemh mij guh gijmaz ndeisaeh okdaeuj hah; gou mij naeuz gou sinq, hoeng, gou dauq guh ndeisaeh hah. Yiengq mwngz naeuznaeuz yawj dwg bouxlawz sinq lux?” 19 Mwngz sinq naeuz Cangqdiq cijngamq miz boux Cangqdiq dog. Deng hah, mwngz naeuz ndaej deng hah; hoeng mwngz caenhgag sinq mbouj miz yungh hah, aenvih daiqlienz fangz yak cungj caemh sinq miz boux Cangqdiq dog hah, caemh vanzlij lau de haem hwx. 20 Gij vunz ngawz faenhsou hax! Faenhsou mbouj rox caenhgag naeuz sinq hoeng mij guh ndeisaeh hih dwg mij'z yungh hih mah? 21 Gou naeuz sou ni hax, cojgoeng raeuz Yaqbwzlahhanj dawz daeglwg de Hijsaj ma guh gij dajbwiz hwj coengq hwnj gwnz daiz dajbwiz bae bwiz Cangqdiq; nanzdauh de mbouj dwg vih guh gij saeh neix hwj ndaej youq ndaw lwgra Cangqdiq suenq dwg boux mij'z coih hih haz? 22 Faenhsou yawj hux, de yienghneix guh couh ndaej cingqmingz naeuz de sinq hah. Sojhij ciuq luj yienghneix ma yawj, de cix sinq cix guh; sinq caeuq guh doxbangbouj. Vih guh hwj ndaej suenq sinq liuxliux. 23 Yiengq cingq lingz ok ndaw Singqgingh ndaw de sij naeuz: Aenvih Yaqbwzlahhanj sinq Cangqdiq, yiengq de couh ndaej youq ndaw lwgra Cangqdiq suenq dwg boux mij'z coih he hih vunz. Couh vih yienghneix, de caemh ndaej suenq dwg gij baengzyoux Cangqdiq. 24 Sojhij, ciuq luj yienghneix ma yawj, Cangqdiq yawj vunz suenq dwg boux mij'z coih he hih vunz, dwg yawj boux de soj guh hih lah; mbouj dwg vih boux de gag naeuz de sinq law. 25 Caemh doxdoengz, Lahhoz dah guh lauxgawj neix, aenvih de bang song boux Hijswzlez vunz, hawj song boux de ndoj youq ndaw ranz de, gajlaeng, caiq soengq song boux de goq daixlingh diuz roen okbae, couh vih yienghneix hwj, Cangqdiq couh yawj de suenq dwg boux mij'z coih he dih vunz. 26 Caemhdangq naeuz, aen ndangdaej mbouj miz hoenzsaenz hih, aen de caemhdangq rai lo; caemh doxdoengz, sinq, hwng mbouj guh, caemh daengjhih lingz.
1 Gak boux beixnuengx hax, faenhsou mbouj wnggai bouxboux cungj ijsiengj guh goengjsae son gij vah Cangqdiq, aenvih faenhsou caemh gag rox Cangqdiq saemjbuenq boux son vunz hih dwg yiemz hih. 2 Gizsaed gyoengqraeuz siengzseiz cungj guh loek. Yiengq, hauhnaeuz miz byawz ndaej gag guenj ndei conghbak bonjfaenh, mbouj doeng gangj sae gangj gij mbouj hab gangj he hih, boux de couh dwg boux vunz ndei liuxliux he lo; boux de caemhdangq ndaej gag guenj ndei bonjfaenh lo. 3 Caiq hauhnaeuz gyoengqraeuz siengj hawj duz max he dingq vah, cijaeu mwngz dawz diuz giengmax coengq haeuj ndaw bak duz de bae, couh ndaej cijveih de hawj de dingq vah lo. 4 Faenhsou yawj hux, aen ruz hung hux hung, caenhgag rumz hung cij ndaej ci bae lah, hoeng cijaeu miz vunz dawz dihgij dox iq he youq baixlaeng cijveih, couh ndaej ciuq vunz dih cawjeiq goq mwnqlaw mwnqlaw bae lo. 5 Caemh doxdoengz, diuz linx gannaeuz iq lah, hoeng, ndaej hawj conghbak vunz ndau vahvah cungj ndaej. Couh luj ceh saizhoj he; gannaeuz ceh de iq lah, hoeng ndaej cwt dawz baenx aen ndoengfaex liux. 6 Gou naeuz sou ni hax, diuz linx caemhdangq feiz; gij feiz neix caemh dwg Sajdanq diemj dawz hih. Gannaeuz diuz de youq gwnz ndang vunz ciemq dihdi he lah, hoeng ndaej cauh ok baenx geijlwh cungj doegdoeg siebsieb, cenz baenx boux vunz liux, ndaej boqvaiq baenx boux vunz dih saenghhoz. 7 Hawjm'z yawj hux, lajmbwn hih doengh duz cukseng hah, doengh duz roeg mbin hah, doengh duz vuenz he hah, doengh duz ndaw raemx youz hah, vunz cungj ndaej guenjciq gyoengqde. 8 Hoeng gangj daengz diuz linx conghbak, vunz dauq mij saek boux ndaej gag guenj ndei; gizsaed diuz linx caenhrox ndau mbouj dingz, daiq doegsieb lai, cungj dwg haih vunz he. 9 Hawjm'z yawj hux, gyoengqraeuz yungh conghbak bonjfaenh ma haenh bouxcawj raeuz, Cangqdiq Bohmbwn, caemh gag yungh conghbak bonjfaenh ma mang gij vunz Cangqdiq ciuq bonjfaenh de ma cauh okdaeuj he. 10 Gak boux beixnuengx, gou naeuz sou ni hax, haenh caeuq mang cungj dwg doengz conghbak he daj conghbak he ok daeuj, daiq mbouj wnggai lo. 11 Caemhdangq naeuz doengz caemh aen mboq he, ndaej danh ok raemx diemz caeuq raemx haemz okdaeuj maz? 12 Go uzvahgoj ndaej dawz makmbi maz? Go buzdauz ndaej dawz uzvahgoj haz? Mboq raemx ndaengq mbouj ok raemx diemz. 13 Gou naeuz hax, faenhsou miz byawz naeuz bonjfaenh dwg coengjmingz, roxsoq hih, couh mbouj wnggai rasang; wnggai soh semxsemh, wnggai guh gij saeh cingqcuek he cij deng. 14 Yiengq, hauhnaeuz faenhsou rahoengz vunz, caenh rox daengz bonjfaenh mbouj rox daengz vunz hih, couh mbouj ndaej naeuz bonjfaenh dwg coengjmingz, roxsoq he lo; hauhnaeuz faenhsou naeuz, couh dwg gangj gyajvah, couh dwg ngig saedsaeh. 15 Luj yienghneix hih coengjmingz roxsoq mbouj dwg Cangqdiq nyok hawj hih nej, dauq dwg haeuj gij vunz lajmbwn, haeuj doenghgij miz lwed miz noh hih, haeuj fangz yak he lah. 16 Famz mwnqlaw miz rahoengz caeuq caenh rox daengz bonjfaenh mij rox daengz vunz hih, mwnqlaw couh miz luenh caeuq gak cungj vaihsaeh. 17 Caenhgag Cangqdiq nyok hawj hih coengjmingz, cijyauq dwg hawj vunz lauxsaed, vanzlij miz haenj bingzan hah, soh semxsemh hah, roxsoq hah, rox nyiuz vunz hah, guh ndeisaeh hah, mbouj yawj vunz guh saeh hah, mbouj guh gyaj hah. 18 Hawj vunz doxhuz doxndei hih vunz, de guh okdaeuj hih saeh couh ndaej hawj haujlai vunz ndwn ndaej cingq.
1 Faenhsou doxceng doxdaeuq dwg coengz maz daeuj hih nej? Mbouj dwg daj ndaw sim faenhsou soj muengh soj damsim mbouj rox gaeuq hih maz? 2 Faenhsou damsim, siengjmuengh ndaej faenhsou siengj aeu he, hoeng dam mbouj ndaej, muengh mbouj ndaej, couh rahoengz, doxdub doxhangz, simqciq doxgaj. Gizsaed mboujguenj faenhsou baenzlaw, cungj mbouj ndaej gijmaz, aenvih faenhsou mbouj gouz Cangqdiq. 3 Caiq cungjsuenq naeuz faenhsou gouz Cangqdiq hwjx, caemh ciuqyiengh mbouj ndaej law, aenvih faenhsou soj gouz hih cungj dwg vih bonjfaenh faenhsou hih doenghheij yalw siengjmuengh angqangq yangjcouq yangjcouq he lah. 4 Doenghheij mbouj gaen Cangqdiq luj guhyoux hih faenhsou hax! Nanzdauh faenhsou mbouj rox, aiq aen seiqgyaiq neix hih couh dwg caeuq Cangqdiq miz haemzcaeuz lo maz? Sojhij, hauhnaeuz faenhsou byawz siengj gaen aen seiqgyaiq neix hih nex, couh dwg Cangqdiq dih dizyinz lo. 5 Cingq luj ndaw Singqgingh ndaw de soj sij hih: Cangqdiq soengq hawj raeuz hih Hoenzsaenz, de siengsim raeuz gaen aen seiqgyaiq neix; de muengh raeuz caenhgag gaen de. Gawq neix faenhsou naemqnaeuz dwg gangj guxcaemz hih mah? 6 Sojhij de engqgya aiq raeuz bang raeuz, couh luj ndaw Singqgingh ndaw de soj sij hih: Cangqdiq fanjdeiq gij vunz rasang he, dauq bang gij vunz mbouj rasang he. 7 Sojhij faenhsou ij dingq Cangqdiq, ij caeuq Sajdanq fangzvuengz doxngig doxdingj; yienghmwnq fangzvuengz couh daj henz ndang faenhsou deuz lo. 8 Faenhsou ij wnggai siengzseiz ngeix daengz Cangqdiq, mbouj yiem Cangqdiq, yiengq Cangqdiq couh daeuj dep faenhsou gvansim faenhsou lo. Doenghheij famh coih hih vunz hax, faenhsou wnggai gaij goqma mbouj guh vaihsaeh; doenghheij yaepyaep yuekyuek siengj gaen Cangqdiq hoeng caiq siengj gaen aen seiqgyaiq neix hih vunz hax, faenhsou wnggai gaij gij siengjfap faenhsou, mbouj ndaej siengzseiz ngeix daengz aen seiqgyaiq neix. 9 Gou naeuz sou ni hax, faenhsou mbouj wnggai vih aen seiqgyaiq neix hwj riuriu angqangq, dauq ij vih faenhsou mbouj ndaej guh daengz hab'eiq habhoz Cangqdiq hwj ienqienq youyou daejdaej, siengsim siengsim cij deng. 10 Faenhsou ij wnggai gag roxnginh bonjfaenh mbouj boiqndaej bouxcawj raeuz dih aiq, yienghmwnq, bouxcawj raeuz couh ndaej hawj faenhsou najrongh lo. 11 Gak boux beixnuengx hax, faenhsou mbouj ndaej youq boihlaeng gangj vunz vaihvah. Hauhnaeuz byawz naeuz beixnuengx cixnaeuz youq boihlaeng gangj beixnuengx vaihvah hih, couh dangq naeuz gij fazliz hawj raeuz aiq vunz caemh ij luj aiq bonjfaenh hih diuz gveihdingq neix loek lo. Yiengq, hauhnaeuz faenhsou naeuz fazliz mbouj deng, couh dwg naeuz faenhsou yawj mbouj hwnj fazliz, mbouj ciuq fazliz bae guh lo. 12 Caenhgag Cangqdiq cij ndaej laeb fazliz caeuq cij ndaej saemjbuenq vunz; couh dwg naeuz caenhgag de cij ndaej gouq vunz caeuq cij ndaej cawz vunz. Hoeng, mwngz dwg byawz nex, gingqyienz gamj gag bingzbuenq vunz nex? 13 Hawjm'z yawj hux, faenhsou miz hih vunz naeuz: “Ox, ngoenzneix haj cixnaeuz ngoenzcog raeuz ij bae aen singz he, youq mwnq youq bi he guh seng'eiq lauh ngaenz.” 14 Gizsaed gou naeuz sou ni hax, faenhsou gaenhbaenj mbouj rox faenhsou ngoenzcog baenzlaw yiengh. Faenhsou cijmboujgoq luj fwdfauz yienghmwnq, goq yaep he, couh siu liux lo. Lij ij gangj ak guxmaz nex? 15 Gizsaed faenhsou wnggai naeuz: “Hauhnaeuz bouxcawj raeuz nyienh'eiq, mbouj hawj gyoengqraeuz rai, hawj gyoengqraeuz lix nex, gyoengqraeuz couh ndaej guh gaiq dawz gaiq, guh yiengh dawz yiengh lo.” 16 Hoeng faenhsou gingqyienz cungj gag cej byongjbyongj naeuz bonjfaenh ak raixcaix. Doegdoeg siebsieb hih vunz cij gangj doenghgij vah neix. 17 Sojhij, gou naeuz sou ni, hauhnaeuz miz vunz rox gijlaw wnggai guh, hoeng de dauq mij bae guh, yiengq de couh dwg famh coih lo.
1 Doenghheij vunz fouq simya faenhsou hax, gou naeuz sou ni, faenhsou couh ij daej haemz daej gik lo, aenvih faenhsou couh ij nanh dawz lo, 2 aenvih doenghheij doxgaiq faenhsou hah, buh hah couh ij ngaiz naeuh hih naeuh, vaih hih vaih, non sae hih non sae lo, 3 heij gim heij ngaenz faenhsou caemh ij hwnj naej hwnj myaex liux lo. Ngaiz naej ngaiz myaex dwg cingqmingz faenhsou yawjnaek aen seiqgyaiq neix, vih yienghneix couh hawj faenhsou ngaiz souh daengz fad cienfanh naek he, caenh lujnaeuz miz feiz daeuj gyemz dawz faenhsou yienghmwnq, aenvih faenhsou youq ciqgyaiq dih duenh gatsat he caenhgag rox guq rom cienzcaiz lah. 4 Hawjm'z yawj lux, faenhsou goq vunz daeuj gvejgvej sousou haeuxhaeux mienhmienh hawj faenhsou, hoeng, faenhsou gaeu gij ngaenzhong gyoengqde, mbouj fat hawj gyoengqde. Yawj veiq, gyoengqde hemq vuengj lo. Gij sing hemq vuengj mwnq gaenq cenz bae daengz ndaw rwz guenj cien bing fanh max dih Cangqdiq lo. 5 Faenhsou youq lajmbwn gwgw angqangq, gw hwj biz bwdbwd luj duz mou, itcig daengz ngoenz ngaiz gaj he cungj caemh dwg yienghneix. 6 Faenhsou luenh bangjlaih vunz ndei, simqciq gajhaih gyoengqde, hoeng, gyoengqde mbouj fanjgangq. 7 Gak boux beixnuengx hax, faenhsou ij naenxsim daengj bouxcawj raeuz Yehsuh dauq daeuj. Hawjm'z yawj hux, nungzminz dwg hozraez naenxsim hih; gyoengqde itcig daengj daengz seizcwn seizcou miz fwnraemx doek, doek hawj ndaw reihnaz doengh go haeuxmienh ndaej ok riengz, ndaej sou. 8 Caemh doxdoengz, faenhsou caemh ij hozraez, ij naenxsim, sinq Gihduz hih sim ij gyenhdingq, aenvih couh ij daengz ngoenz bouxcawj raeuz ij daeuj hih ngoenz mwnq lo. 9 Gak boux beixnuengx hax, gaejyungh boux ienq boux lo, mienxndaej faenhsou ngaiz saemjbuenq. Hawjm'z yawj lux, boux saemjbuenq vunz hih couh ndwn youq bakdou faenhsou lo. 10 Gak boux beixnuengx hax, faenhsou wnggai luj doengh boux cenz gij vah Cangqdiq mwnq, roeb daengz nanh rox naenxsim. 11 Faenhsou caemh rox, doenghheij gyenhciz naenxsim hih vunz, gyoengqraeuz naeuz gyoengqde miz fuk lo. Faenhsou dingqri naeuz goq Yozbwz roeb daengz nanh baenzlawz gyenhciz naenxsim, caemh rox gajlaeng Cangqdiq soengq hawj de gijmaz; gij neix couh dwg yienh ok Cangqdiq dih sim'unq, hojsik vunz aiq vunz. 12 Gak boux beixnuengx hax, gou naeuz sou ni, ceiq youqgaenj hih dwg mbouj ndaej fazsiq; mboujguenj doiq mbwn, doiq deih, cixnaeuz doiq gijmaz doxgaiq, cungj mbouj ndaej fazsiq. ‘Dwg’ couh naeuz ‘dwg,’ ‘mbouj dwg’ couh naeuz ‘mbouj dwg,’ mienxndaej faenhsou ngaiz Cangqdiq saemjbuenq. 13 Gou naeuz sou ni, hauhnaeuz faenhsou miz byawz roeb daengz nanh hih, couh ij wnggai gouz Cangqdiq; hauhnaeuz miz vuenheij hih, caemh ij wnggai ciengq go haenh Cangqdiq. 14 Hauhnaeuz miz byawz miz bingh hih, couh bae cingj doengh boux gyauqveiq dih lingjdauj daeuj, cingj doengh boux de hij gij mingzhiq Yehsuh ma aeu youz cat hawj de, bang de gouz Cangqdiq. 15 Yiengq, hauhnaeuz doengh boux gouz Cangqdiq mwnq sinq Cangqdiq ndaej yw ndei vunz bingh nex, gyoengqde gouz Cangqdiq, Cangqdiq couh hawj boux vunz bingh mwnq ndaej ndei lo. Hauhnaeuz boux vunz bingh mwnq miz coih nex, Cangqdiq caemh mienx gij coih boux de lo. 16 Sojhij faenhsou ij wnggai doxnginh loek, caemh ij doxbang, boux bang boux gouz Cangqdiq; yienghmwnq Cangqdiq couh yw faenhsou lo. Simndei simsoh hih vunz caensim gouz Cangqdiq, Cangqdiq couh hawj gyoengqde ndaej ciuq ndaw sim gyoengqde soj gouz hih hawj gyoengqde ndaej doiqyienh. 17 Hawjm'z yawj hux, Hijliqyaq boux cenz gij vah Cangqdiq neix caeuq raeuz caemh doxdoengz dwg vunz; de caensim caen'eiq gouz Cangqdiq goq, gouz naeuz mbouj hawj fwn doek, gajlaeng caemh cingqgawq miz sam bi buenq mbouj fwn doek. 18 Gajlaeng de youhcaiq gouz Cangqdiq, gouz hawj fwn doek; gajlaeng caemh cingqgawq miz fwn doek gwhraix, yiengq ndaw reihnaz couh hwnj miz doengh go haeuxmienh lo. 19 Gak boux beixnuengx hax, hauhnaeuz faenhsou miz byawz mbouj dingq gij saedsaeh Cangqdiq, hoeng, hauhnaeuz miz vunz gienq hawj de nginh loek gaij goqma, 20 yiengq couh dangq gouq boux guh loek mwnq, gouq hoenzsaenz de mbouj hawj de ngaiz rai, hawj de ndaej mienx sojmiz hih coih lo.
1 Cinhngaiq dih gak boux beixnuengx hax, gou dwg Bijdwz, dwg Yehsuh Gihduz dih boux dwzbaijyienz he. Gou sij saenq hawj doenghheij Cangqdiq senj okdaeuj hih vih deuznanh hwj faensanq bae daengz Baenjduh hah, Gyahlahdaiq hah, Gyahbaqdohgyah hah, Yaqsiqyaq hah, Biqdeihniz hah doenghheij aen saengj neix doz youq hih lwgsae. 2 Faenhsou dwg Cangqdiq Bohmbwn senqsi cix rox cix senjdingh okdaeuj hih lo; Hoenzsaenz de hawj faenhsou bienqbaenz boux hab'eiq habhoz Cangqdiq hwj dingq Yehsuh Gihduz, caiq baengh gij lwed Yehsuh Gihduz hwj hawj faenhsou guh gij vunz de. Muengh Cangqdiq doiq faenhsou haijliengh raixcaix, hawj faenhsou bingzan! 3 Bouxcawj raeuz Yehsuh Gihduz dih Cangqdiq daxboh wnggai haenh hih! De hojsik gyoengqraeuz raixcaix; de dunghgoq bouxcawj raeuz Yehsuh Gihduz daj rai ndaej dauqlix hwj hawj gyoengqraeuz ndaej dauqyungz seng, hawj gyoengqraeuz ndaej miz saen hih mingh, hawj gyoengqraeuz miz muengh raixcaix, 4 hawj gyoengqraeuz ndaej ciep aeu gij saizcanj de louz youq gwnzmbwn mbouj rox naeuh mbouj rox lanh, mbouj rox siu, mbouj rox uq—cengh yupyup he. 5 Cangqdiq vih faenhsou sinq de hwj de couh yungh gij akak rengzrengz de ma baujhuq faenhsou, hawj faenhsou ndaej de soj cwnjbiq hih, couh dwg youq ngoenz gatsat yienh hawj gyoengqraeuz rox ndaej gouq dwg baenxlai dih ndei. 6 Sojhij faenhsou ij wnggai angq raixcaix, hoeng, cijmboujgoq seizneix faenhsou camqciz aiq ij roeb daengz gak cungj gaujniemq hwj roxnginh siengsim. 7 Faenhsou souh daengz gaujniemq dih muzdiz dwg ij cingqmingz faenhsou sinq Gihduz hih sim dwg cingqcaen, dwg beij gij gim dunghgoq feiz ma dizlenq okdaeuj hoeng vanzlij rox vaih hih, vanzlij dijbauj lah; yienghneix faenhsou daengz mwh Yehsuh Gihduz dauq daeuj hih mwhde, faenhsou couh ndaej haenh, ndaej najrongh, ndaej hawj vunz soenhcungq faenhsou lo. 8 Gannaeuz faenhsou mij raen goq Gihduz lah, hoeng, faenhsou dauq aiq de; gannaeuz seizneix faenhsou vanzlij mijyaengz ndaej raen de, hoeng, faenhsou dauq sinq de. Couh vih yienghneix, faenhsou ndaej najrongh caeuq angq hwj mbouj rox hih ij baenzlawz bae. 9 Caiq aenvih faenhsou sinq de baengh de hwj le, faenhsou dih hoenzsaenz couh ndaej gouq. 10 Yiengq gangj daengz Cangqdiq haijliengh gouq vunz, doenghbaez gyoengq boux cenz gij vah Cangqdiq cenzgangj ndaej gouq hih, gyoengqde doiq ndaej gouq caemh mbouj daiq rox geijlai, sojhij gyoengqde caemh nienx caemh faenhsiz goq. 11 Couh dwg Hoenzsaenz Gihduz youq gwnz ndang boux cenz gij vah Cangqdiq hawj gyoengqde ndaej sien rox Gihduz ij ngaiz souh nanh caeuq gajlaeng ij ndaej najrongh hih, hoeng, mwhde gyoengqde gaenhbaenj mbouj rox ij daengz mwhlaw cixnaeuz baenzlaw fatseng gij saeh neix. 12 Hoeng, Hoenzsaenz de hawj gyoengqde rox gyoengqde soj cenz hih ndei siuhsiz gaenhbaenj mbouj dwg vih gyoengqde aen nienzdaiq mwnq, dauq dwg vih faenhsou aen nienzdaiq neix hih lah. Seizneix de daj gwnzmbwn baij Hoenzsaenz de daeuj hawj vunz cenz gij ndei siuhsiz neix naeuz faenhsou ni. Gij ndei siuhsiz neix baenxlai ndei, daiqlienz bouxcai Cangqdiq cungj siengj rox cingsuj. 13 Sojhij, faenhsou ij singqsag guh ndei cwnjbiq, wnggai miz sinqsim, mbouj doeknaiq hwj muengh daengj daengz Yehsuh Gihduz dauq daeuj hih mwhde doiq faenhsou haijliengh. 14 Faenhsou ijaeu luj gij lwg Cangqdiq yienghmwnq naeuzdingq; mbouj ndaej luj doenghbaez yienghmwnq ngawzngad, moengxcwenx gijmaz cungj mbouj rox hwj siengj guh gijmaz couh guh gijmaz. 15 Dauqfanj ij guh gij saeh mij gijmaz ndaej diudik he, cingq luj senj faenhsou dih Cangqdiq de dwg boux ndei liuxliux mij gijmaz ndaej diudik he. 16 Couh vih yienghneix, ndaw Singqgingh ndaw de sij naeuz: Faenhsou ij guh boux mij gijmaz ndaej diudik he, aenvih gou dwg boux ndei liuxliux mij gijmaz ndaej diudik he. 17 Hauhnaeuz faenhsou cwng Cangqdiq—couh dwg boux ciuq gak vunz soj guh hih ma gunghbingz gunghcingq saemjbuenq vunz dih Cangqdiq—heuh guh boh lo, yiengq, faenhsou camqciz doz youq lajmbwn hih vunz couh ij wnggai siujsim, mbouj ndaej guh gij saeh daekcoih Cangqdiq he, 18 aenvih faenhsou caemh rox, faenhsou ndaej cueg, ndaej duet ok dajlwh cojgoeng faenhsou cix cenz roengzdaeuj hih mij dij saek haux cienz hih cungj saenghhoz mwnq, mbouj dwg baengh doenghgij rox naeuh rox lanh hih gim hah, ngaenz hah ndaej cueg ndaej duet ok hih, 19 dauq dwg baengh Gihduz dijbauj dih lwed lah; gij lwed de couh luj gij lwed duz yiengzlwg ndei ndwtndwt giencangq he. 20 Yiengq, couh vih gij neix hwj Cangqdiq daj cauh mbwn cauh deih cihsenz cix gyezdingq senjdingh Gihduz lo, hoeng, vih faenhsou hwj de dauj youq ciqgyaiq dih duenh gatsat de, couh dwg seizneix, cij yienh okdaeuj lah. 21 Faenhsou dunghgoq de hwj sinq boux hawj de daj rai ndaej dauqlix caiq hawj de ndaej najrongh dih Cangqdiq; sojhij faenhsou sinq caeuq miz muengh dungjdungj cungj dwg Cangqdiq. 22 Yiengq, giqyienz faenhsou dingq saedsaeh ciuq saedsaeh hwj ndaej bienqbaenz boux mij'z coih cingqcaen rox aiq vunz he lo, faenhsou couh ij luj beixnuengx caemh nginz caemh rag yienghmwnq caensim caen'eiq doxaiq. 23 Faenhsou wnggai yienghneix guh, aenvih Cangqdiq hawj faenhsou ndaej doiqyungz seng, ndaej doiqyungz miz mingh. Faenhsou ndaej doiqyungz seng, ndaej miz saen dih mingh, mbouj dwg daj rox rai hih, miz lwed miz noh hih vunz seng hih, dauq dwg daj gij vah Cangqdiq miz mingh hih yungjyenj mbouj rox cied hih ndaej miz saen dih mingh lah. 24 Cingq luj ndaw Singqgingh ndaw de sij naeuz: Famz miz lwed miz noh hih dungjdungj cungj luj go nyaengq; sojmiz hih ing'yungz cungj luj duj va nyaengq. Nyaengq rai, va caemh loenq; 25 caenhgag gij vah Cangqdiq cij yungjyenj mbouj rox cied, cij seiqseiz miz. Gij vah neix couh dwg soj cenz hawj faenhsou hih ndei siuhsiz lo.
1-3 Yiengq, giqyienz faenhsou gaenq rox bouxcawj raeuz doiq faenhsou ndei lo, faenhsou couh mbouj wnggai guh gij doegsieb he, yaeuh vunz he, gyajcang guh ndei he, rahoengz vunz bangjlaih vunz he lo, dauq ij gaenj ranxranx hwj hag rox gij vah Cangqdiq cij deng, gaenj ranxranx luj lwgnding yienghmwnq ij gw gij nauq daxmeh de, yienghneix couh ndaej maj hung baenz vunz, couh dwg naeuz ndaej gouq lo. 4 Faenhsou ij wnggai gaep haeuj bouxcawj raeuz Yehsuh Gihduz, aenvih de dangq dwg lix hih rin; gannaeuz vunz vwt de yiem de lah, hoeng, Cangqdiq dauq yawj de dij, senj de ma guh ngauq rin mbouj ndaej noix he. 5 Faenhsou gaep haeuj de, caemh bienqbaenz ngauq rin lix he, Cangqdiq caemh aeu ma hwnq aen ranz hawj Hoenzsaenz bonjfaenh de. Faenhsou caemh guh goengjsae dajbwiz hwj daeuj swqhaeuh Cangqdiq, caiq dunghgoq Yehsuh Gihduz hwj guh gij hab'eiq habhoz Cangqdiq he ma dajbwiz soengq hawj de. 6 Cingq luj ndaw Singqgingh ndaw de sij naeuz: Yawj veiq! Gou youq Cizanh coengq ngauq rin he, couh dwg soj senj hih ceiq dijbauj hih ngauq rin gok ranz mbouj ndaej noix he. Sinq de baengh de hih vunz gaengjdingq mbouj saetmuengh. 7 Sojhij doiq faenhsou doenghheij sinq de hih vunz ma gangj, Gihduz, ngauq rin neix dwg dijbauj hih, hoeng, doiq doenghheij mbouj sinq de hih vunz ma gangj, Gihduz, ngauq rin neix couh dangq luj youq ndaw Singqgingh ndaw de soj sij naeuz hih: Doenghheij canghranz dajcaep yiem de vwt de he, seizneix dauq dwg ngauq rin gok ranz mbouj ndaej noix he. 8 Ndaw de vanzlij caiq sij naeuz: Ngauq rin neix dwg hawj vunz daemjndoet he, caemh dwg hawj vunz daemjndoet laemx he. Gij vunz daemjndoet laemx dwg aenvih gyoengqde mbouj sinq gij vah Cangqdiq; gij neix dwg Cangqdiq dih cawjeiq hih. 9 Hoeng, faenhsou caeuq gyoengqde mbouj doxdoengz. Faenhsou dwg Cangqdiq soj senj hih minzcuz, dwg gij vunz aen guek de he, dwg guh Cangqdiq goengjvuengz dih goengjsae dajbwiz he, dwg gvi haeuj Cangqdiq he. Cangqdiq senj faenhsou dwg hawj faenhsou daj ndaw laep ok daeuj haeuj ndaw rongh sagsag de bae cenzgangj gij ndei raixcaix de. 10 Doenghbaez faenhsou mbouj baenz guxmaz minzcuz, hoeng, seizneix dauq dwg gij vunz Cangqdiq lo; doenghbaez faenhsou mbouj ndaej daengz hojsik, hoeng, seizneix dauq ndaej daengz Cangqdiq dih hojsik. 11 Cinhngaiq dih gak boux beixnuengx hax, faenhsou dwg vunz hek camqciz doz youq lajmbwn he; gou gienq faenhsou wnggai haed aen ndang bonjfaenh. Gaejyungh vih aen ndang bonjfaenh hwj siengjmuengh gij yalw ndaengndwet he, aenvih cungj yalw siengjmuengh neix cungj dwg caeuq hoenzsaenz bonjfaenh doxngig hih. 12 Faenhsou caeuq doenghheij mbouj rox Cangqdiq hih vunz youq itheij hih ijaeu siujsim, gangj vah guh saeh cungj ij gangj gij hab gangj he, guh gij hab guh he, yienghmwnq couh ndaej hawj doenghheij bangjlaih faenhsou guh vaihsaeh hih raen faenhsou guh ndei le, daengz bouxcawj raeuz Yehsuh Gihduz dauq daeuj hih ngoenz mwnq couh haenh Cangqdiq. 13 Faenhsou ij vih bouxcawj raeuz hwj dingq aen seiqgyaiq neix sojmiz miz gienz he, mboujguenj dwg dang vuengz he haj 14 cixnaeuz dwg goengjvuengz baij daeuj fad vunz, cangjliq hawj vunz he, 15 aenvih Cangqdiq dih cawjeiq dwg ij hawj faenhsou guh ndaej deng hwj fung conghbak doenghheij vunz ngawzngad moengxcwenx he. 16 Gannaeuz faenhsou dwg boux swqyouz vunz he lah, hoeng, faenhsou dwg bouxhoiq Cangqdiq hah. Sojhij mbouj ndaej naemqnaeuz bonjfaenh dwg boux swqyouz vunz he hwj le couh ndaej seizbienh guh doenghgij doegsieb he. 17 Faenhsou dauq ij soenhcungq sojmiz hih vunz, ij aiq sojmiz sinq bouxcawj raeuz Yehsuh Gihduz hih beixbeix nuengxnuengx, ij yawjnaek Cangqdiq, caemh ij soenhgingq dang vuengz he. 18 Yiengq gangj daengz faenhsou guh bouxhoiq hih, mboujguenj guxmaz cungj ij soenhcungq bouxcawj dingq bouxcawj, mbouj danhcij doiq boux soh boux simndei he yienghneix, doiq boux ged boux youqgaenj he caemh ij yienghneix. 19 Hauhnaeuz faenhsou vih liengzsim doiq ndaej hwnj Cangqdiq hwj souh daengz mbouj hab souh hih, hoeng ndaej naenxhoz naenxheiq hih, yiengq Cangqdiq dwg haenjheiq hih. 20 Danghyienz, hauhnaeuz faenhsou vih guh loek hwj ngaiz doh ngaiz fad hwj caemh ndaej naenxhoz naenxheiq hih, cix ij miz maz haenh? Hoeng, hauhnaeuz faenhsou dwg vih guh ndeisaeh hwj ngaiz doh ngaiz fad caemh ndaej naenxhoz naenxheiq hih, yiengq aeu Cangqdiq ma yawj dwg haenjheiq hih. 21 Cangqdiq senj faenhsou dih muzdiz dwg ij hawj faenhsou yienghneix guh hih, aenvih Gihduz caemh vih faenhsou hwj ngaiz souh nanh, hawj faenhsou guh ndei bangjyangq, hawj faenhsou gaen de guh, hag de. 22 Gihduz de mij famh coih goq, caemh mij gangj gyajvah goq. 23 De ngaiz vunz yug, mbouj boiz bak; ngaiz vunz haih, mbouj haep vunz, caenhgag dawz bonjfaenh gyau hawj gunghbingz gunghcingq saemjbuenq vunz dih Cangqdiq lah. 24 De ngaiz ding hwnj gwnz gyaq cixcib bae rai, caenndang rap gij coih gyoengqraeuz, hawj gyoengqraeuz ndaej duet ok coih mbouj caiq ngaiz coih gaemhanh, hawj gyoengqraeuz ndaej goq cungj saenghhoz Cangqdiq haenjheiq he. Aenvih de soj souh hih sieng, faenhsou ndaej yw ndei lo. 25 Faenhsou doenghbaez couh dangq duz yiengz ngaiz loengj roen he, hoeng, seizneix dauq ndaej ma daengz gvi haeuj boux ciengx faenhsou baujhuq hoenzsaenz faenhsou he.
1-2 Caemh doxdoengz, gangj daengz guh yah hih, faenhsou ij wnggai dingq caeuq swnh goeng gojyez bonjfaenh, yienghneix cungjsuenq naeuz miz hih gojyez, de mbouj sinq gij vah Cangqdiq hwjx, guh yah hih cungj mboujyungh gangj gijmaz; gyoengqde cungj veiq vih faenhsou dih caepcingq caeuq soenhcungq vunz hwj doengh daengz sim. 3 Faenhsou gyaeu mbouj gyaeu mbouj dwg gauq cang raeuj cangj ndang, daiq gim venj ngaenz, daenj buh gyaeu buh ndei hih nej, 4 dauq dwg ndaw sim caeng miz hih yungjyenj mbouj rox bienq hih simsoh simdingh hih lah. Yienghneix hih gyaeu, aeu Cangqdiq ma yawj dwg dijbauj hih, 5 aenvih doenghbaez doenghheij vunzbaz gaep haeuj Cangqdiq gauq muengh Cangqdiq baengh Cangqdiq he hih doenghheij vunzbaz neix, gyoengqde dwg yienghneix sawjhawj bonjfaenh ndaej suenq gyaeu hih lah, gyoengqde cungj dwg dingq swnh goeng gojyez bonjfaenh he, 6 cingq luj Sajlah yienghmwnq mbouj lau hwj dingq swnh goeng gojyez de Yaqbwzlahhanj; de cwng goeng de heuh bouxcawj. Yiengq hauhnaeuz faenhsou caemh dwg yienghneix mbouj lau hwj dingq swnh goeng gojyez bonjfaenh, guh gij hab guh he, yiengq couh ndaej luj Sajlah yienghmwnq suenq dwg vunzbaz ndei, gyaeu he lo. 7 Caemh doxdoengz, faenhsou guh goengjgvan hih caemh ij soenhcungq mehyah, ij rox gvansim de, aenvih gyoengqde mbouj ndaej beij mwngz giengz. Hoeng, de caeuq mwngz doxdoengz caemh miz Cangqdiq nyok hawj hih saen hih mingh. Hauhnaeuz faenhsou ndaej yienghneix guh, faenhsou gouzhaenh Cangqdiq hih mwhde couh mbouj miz maz gaz dawz lo. 8 Mboujguenj guxmaz, sungj hih ma naeuz, gou gienq faenhsou hawj faenhsou doxcaezsim, doxgvansim, doxaiq, doxhojsik, doxnyiengh, mbouj ndaej gyauhngauq. 9 Mbouj ndaej vunz famh mwngz mwngz caemh famh vunz, vunz yug mwngz mwngz caemh yug vunz; dauqfanj ij hoh fuk hawj vunz, aenvih Cangqdiq senj faenhsou dwg hawj faenhsou yienghneix guh hih, dwg vih ij hawj faenhsou ndaej daengz de dih fuk hih. 10 Cingq luj ndaw Singqgingh ndaw de sij naeuz: Famz aiq saenghhoz hih, muengh ndaej goq ndei saedceij hih, bietdingh ij gimqcij diuz linx bonjfaenh gangj vah doeg vah sieb, mbouj hawj conghbak gangj gyajvah. 11 Bietdingh ij yiem doeg hwj guh ndei, bietdingh ij haenj hozbingz gouz hozbingz, 12 aenvih Cangqdiq dwg cauqguq simndei simsoh hih vunz hih, dwg dingq gyoengqde gouzhaenh hih, dwg fanjdeiq guh doeg guh sieb hih. 13 Yiengq, hauhnaeuz faenhsou haenj guh ndeisaeh, cix ij miz byawz haih faenhsou nej? 14 Caiq hauhnaeuz faenhsou vih guh ndaej ndei ndaej cingq hwj ngaiz souh nanh hih, faenhsou cungj caemh miz fuk hih; sojhij faenhsou gaejyungh lau vunz haep, gaejyungh simvueng. 15 Dauqfanj, faenhsou ij gingqbaiq Gihduz, nginh de dwg bouxcawj mwngz. Hauhnaeuz miz vunz cam faenhsou vihmaz miz muengh nex, faenhsou ij gaijyiz naeuz vunz ni, ndaw sim caemh ij cwnjbiq ndei seizlawz cungj ndaej gaijyiz naeuz vunz ni, daiqduq caemh ij ngeihheiq. 16 Caemh ij doiq ndaej hwnj liengzsim, yienghneix couh ndaej hawj doenghheij bangjlaih faenhsou hih, couh dwg doenghheij bangjlaih faenhsou vih Gihduz hwj soj guh hih ndeisaeh hih roxnginh najnyaenq lo. 17 Yiengq, hauhnaeuz faenhsou vih guh ndeisaeh hwj ngaiz souh nanh, caemh dwg Cangqdiq dih cawjeiq hih, couh giengz goq vih guh vaihsaeh hwj ngaiz souh nanh hih. 18 Gihduz de caemh dwg yienghneix; de vih ij mbat dog couh ndaej bang gyoengqraeuz daixgya rap coih hwj ngaiz rai lo, hoeng, de coengzlaiz cungj mij famh coih goq, dauq vih gij vunz miz coih hih hwj ngaiz rai lah, vih dwg ij daiq gyoengqraeuz bae daengz Cangqdiq mwnq. De yienghneix ngaiz rai, ciuq ndangnoh ma gangj, de rai lo, hoeng, ciuq hoenzsaenz ma gangj, de dauqlix lo. 19 Yiengq gangj daengz hoenzsaenz Gihduz, doenghbaez de cenzgangj gij vah Cangqdiq hawj vunz ni, hoeng, gyoengqde mbouj dingq, sojhij gyoengqde dih hoenzsaenz couh ngaiz gyaeng haeuj ndaw laep mwnq Cangqdiq fad vunz mwnq bae lo. 20 Doenghheij vunz neix couh dwg doenghbaez Nozyaq cauh ruz hih mwhde Cangqdiq naenxsim daengj gyoengqde gaijgoq, hoeng, gyoengqde mbouj dingq, ngaiz rai youq ndaw raemx hih doenghheij vunz mwnq lo. Mwhde ndaej haeuj ruz bae ndaej daj ndaw raemx ndaej gouq hih vunz mbouj lai, cijngamq miz bet boux lah. 21 Ciengz raemxdumh neix, dwg beijgangj gyoengqraeuz sijlij lo, hoeng, sijlij mbouj dwg naeuz swiq aen ndang faenhsou cengh hwj ndaej gouq nej, dauq dwg daiqbiuj faenhsou gouz Cangqdiq hawj faenhsou bienqbaenz mij gijmaz doiq mbouj hwnj liengzsim he, dwg baengh Yehsuh Gihduz dauqlix hwj ndaej gouq hih lah. 22 Yehsuh Gihduz gaenq hwnj mbwn bae lo, gaenq naengh youq baixgvaz Cangqdiq lo. Sojmiz hih bouxcai Cangqdiq caeuq doenghheij gaem gienz dang ak he cungj dingq de cungj ngaiz de guenj.
1 Yiengq, giqyienz Gihduz souh nanh goq lo, faenhsou caemh ij wnggai caeuq de doxdoengz miz aen sim he cwnjbiq souh nanh, aenvih ngaiz souh nanh goq hih vunz gaenq caeuq coih doxbiek, duet ok coih lo. 2 Faenhsou miz aen sim yienghneix, daj seizneix hwnj, faenhsou goq saedceij couh mbouj caiq ngaiz ciuq vunz dih baenjsingq, siengjmuengh hwj gaemhanh dawz lo; cij rox ciuq Cangqdiq dih cawjeiq hwj goq saedceij lah, 3 aenvih faenhsou doenghbaez caeuq doenghheij mbouj rox Cangqdiq hih vunz doxdoengz, dawz cizgyenh sai youq doenghheij saeh faenhsou haenj guh he bae, couh dwg guh gij yalw ndaengndwet, siengjmuengh, gw laeuj fiz, baenx gyoengq baenx raq gwgw angqangq rek ruxrux, simqciq baiq you, gij saeh dwgcaengz neix he. 4 Mboujgoq faenhsou seizneix mbouj caiq caeuq gyoengqde gaen gyoengqde haem lo. Yienghneix gyoengqde couh raen geizheih, couh riu faenhsou, yawj mbouj hwnj faenhsou lo. 5 Yiengq, doenghheij vunz neix, gyoengqde gaengjdingq ij yiengq boux saemjbuenq vunzlix caeuq vunzrai dih Cangqdiq gyauhdaiq. 6 Cingq vih yienghneix, Cangqdiq dih ndei siuhsiz caemh cenz hawj doenghheij seizneix gaenq rai hih; yienghneix, gyoengqde gannaeuz luj sojmiz hih vunz doxdoengz ngaiz souh daengz saemjbuenq hwj ngaiz rai lah, hoeng, seizneix gyoengqde dih hoenzsaenz dauq ndaej caeuq Cangqdiq itheij lix. 7 Sojmiz hih couh ij daengz gatsat lo, sojhij faenhsou ij siujsim ij baujciz daezsingj, gag rox haed bonjfaenh, yienghneix couh ndaej haemq ndei gouzhaenh Cangqdiq lo. 8 Ceiq cungqyauq hih dwg faenhsou ij caensim doxaiq, aenvih aiq ndaej nyiuz haujlai coih. 9 Faenhsou caemh ij haenj daih hek, mbouj ndaej naj ndaem ndetndet. 10 Faenhsou gak vunz cungj ndaej daengz Cangqdiq nyok hawj hih bonjsaeh, cijmboujgoq gak vunz ndaej hih mbouj doxdoengz; faenhsou ij ciuq Cangqdiq soj nyok hawj hih bae doxbang. 11 Byawz miz caiz cenzgangj gij vah Cangqdiq hih, couh ij ciuq gij vah Cangqdiq bae gangj; byawz miz caiz ndaej bang vunz hih, couh ij yungh Cangqdiq nyok hawj hih rengz bae bang vunz. Yienghneix, couh ndaej hawj sojmiz hih dunghgoq Yehsuh Gihduz hwj ndaej hawj Cangqdiq najrongh lo. Muengh akak rengzrengz najrongh yungjyenj cungj dwg gvi hawj Cangqdiq! Ahmaenz. 12 Cinhngaiq dih gak boux beixnuengx hax, faenhsou gaejyungh vih roeb daengz nanh dih gaujniemq hwj geizheih, lujnaeuz yienghneix mbouj dwg cingqcangz he, 13 dauqfanj ij vih miz gihveiq luj Gihduz yienghmwnq souh nanh hwj angq cij deng. Yienghneix, daengz Gihduz najrongh hih mwhde, couh dwg Gihduz de dauq daeuj hih mwhde, faenhsou couh ndaej engqgya angq. 14 Sojhij, hauhnaeuz faenhsou vih gaen Gihduz hwj ngaiz vunz yug, ngaiz vunz yawjngawz hih, faenhsou couh miz fuk lo, aenvih yienghneix couh dwg naeuz veijdaq dih Hoenzsaenz Cangqdiq doz youq gwnz ndang faenhsou lo. 15 Mboujgoq, faenhsou mbouj wnggai vih gaj vunz, guxcaeg, guh doeg guh sieb cixnaeuz guenj henzsaeh hwj souh nanh. 16 Hoeng, hauhnaeuz faenhsou vih dwg gaep haeuj Gihduz hwj ngaiz souh nanh hih, gaejyungh saetnaj saetnyaenq, dauq ij vih dwg gaep haeuj Gihduz hwj haenh Cangqdiq cij deng, 17 aenvih Cangqdiq saemjbuenq vunz lajmbwn hih mwhde daengz lo. Ij saemjbuenq, couh ij daj gij vunz bonjfaenh Cangqdiq gaihcij saemjbuenq. Yiengq, hauhnaeuz daj gyoengqraeuz gaihcij saemjbuenq, doenghheij mbouj sinq Cangqdiq dih ndei siuhsiz hih vunz ij baenzlawz yiengh nej? 18 Ciuq ndaw Singqgingh ndaw de sij naeuz: Vunz ndei hih vunz mbouj yungzheih ndaej gouq hih, yiengq doenghheij mbouj gingqbaiq Cangqdiq hih caeuq miz coih hih vunz ij baenzlawz yiengh nej? 19 Sojhij, doenghheij Cangqdiq hawj souh nanh hih, ij gyenhciz guh ndeisaeh roengzbae, ij dawz bonjfaenh gyau hawj sinq ndaej goq hih cauh sojmiz hih Cangqdiq.
1 Gou dwg gyauqveiq dih lingjdauj, caemh dwg caenra raen Gihduz souh nanh he, caiq dwg ndaej yangjcouq de baezneix ij yienh okdaeuj hih veijdaq he. Gou gienq faenhsou gak boux gyauqveiq dih lingjdauj, 2 faenhsou ij ciengx ndei gyoengq yiengz Cangqdiq gyau hawj faenhsou he, ij ciuq Cangqdiq dih cawjeiq guenj ndei gyoengqde; mbouj ndaej hozgwg, cix mbouj ndaej vih cienzcaiz, dauq ij dwg nyienh'eiq caensim hwj ciengx he cij deng. 3 Caemh mbouj ndaej dwg vih ij guenjciq gyoengqde, dauq dwg ij vih gyoengqde hwj guh ndei bangjyangq. 4 Yienghneix daengz Cangqdiq dih boux ciengxyiengz daeuzdaeuz, Yehsuh Gihduz, yienh okdaeuj hih mwhde, faenhsou gaengjdingq ndaej daengz gij cangjbyimj rongh sagsag yungjyenj mbouj rox gaeuq mbouj rox vaih he. 5 Caemh doxdoengz, gou seizneix gienq faenhsou doenghheij hauxseng he, faenhsou ij wnggai dingq doenghheij nienzgeij laux he. Hoeng, faenhsou daixgya mboujguenj bouxlaux hauxseng cungj mbouj ndaej gyauhngauq, ij rox doxbang, aenvih Cangqdiq fanjdeiq gyauhngauq hih vunz, doiq doenghheij mbouj gyauhngauq hih vunz haijliengh. 6 Sojhij faenhsou ij dingq ij fug akak rengzrengz dih Cangqdiq, mbouj ndaej gyauhngauq; yienghneix daengz mwhde, de gaengjdingq hawj faenhsou najrongh. 7 Faenhsou ij dawz sojmiz hih yousim simnyap gyau hawj Cangqdiq, aenvih de gvansim faenhsou. 8 Mboujgoq faenhsou ij siujsim, ij daezfuengz dizyinz fangzvuengz faenhsou; de luj duz guk iek maenj humxhumx dauqcawq byaij bae byaij dauq cimh vunz gyan gw he, de caemh dwg cauh baenz hawj vunz miz nanh he. 9 Faenhsou sinq Gihduz ij gyenhdingq hwj dijgangq goq de, aenvih faenhsou rox lajmbwn sojmiz sinq Gihduz hih gak boux beixnuengx cungj caemh doxdoengz ngaiz souh nanh, cungj caemh ij dijgangq de. 10 Hoeng, faenhsou souh goq duenh nanh he le, boux doiq vunz haijliengh raixcaix aiq vunz raixcaix dih Cangqdiq, couh dwg senj faenhsou, hawj faenhsou dunghgoq Gihduz ndaej yungjyenj najrongh dih Cangqdiq, gaengjdingq caenndang hawj faenhsou ndaej fuk hwnjdaeuj, hawj faenhsou sinqsim gyenhdingq, hawj faenhsou miz rengz mbouj doeknaiq, hawj faenhsou ndaej caep giek ndei. 11 Muengh gienz akak rengzrengz yungjyungj yenjyenj gvi hawj Cangqdiq! Ahmaenz. 12 Gou youq dineix gyenjdanh sij fung saenq dinj neix hawj Sihlah dawz bae hawj faenhsou. Sihlah boux beixnuengx neix gou yawj de dwg boux lauxsaed sinq ndaej goq he. Gou sij fung saenq neix dwg ij gienq faenhsou, caemh dwg ij cingqmingz Cangqdiq saedsaeh dwg aiq vunz doiq vunz haijliengh raixcaix he, sojhij, faenhsou bietdingh ij baengh de dih aiq hwj gyenhciz roengzbae mbouj doeknaiq mbouj bienq sim. 13 Vanzlij miz, youq Bahbijlwnz caeuq faenhsou doxdoengz dwg Cangqdiq senj hih gyauqveiq cam faenhsou ndei, caeuq dangq luj daeglwg gou hih Majgoj caemh cam faenhsou ndei. 14 Faenhsou caemh ij miz aiqsim hwj doxcam ndei. Muengh faenhsou gak boux gaep haeuj Gihduz hih vunz bingzan!
1 Gou dwg Sihmaenz-Bijdwz, dwg bouxhoiq Yehsuh Gihduz, caemh dwg boux dwzbaijyienz de he. Gou sij saenq hawj faenhsou doenghheij caeuq gyoengqraeuz doxdoengz vih Cangqdiq raeuz, bouxcawj gouq vunz dih Yehsuh Gihduz, ndwn ndaej cingq hih hwj ndaej miz aen sim dijbauj sinq Gihduz hih hwj sij hih. 2 Muengh faenhsou yied rox Cangqdiq caeuq bouxcawj raeuz Yehsuh, faenhsou couh yied ndaej daengz de doiq faenhsou haijliengh caeuq ndaej bingzan! 3 Cangqdiq yungh gij akak rengzrengz de ma dawz gyoengqraeuz ij goq cungj saenghhoz hab'eiq habhoz de he soj yungh hih nyok hawj gyoengqraeuz lo. Gyoengqraeuz soj ndaej hih dwg vih gyoengqraeuz rox de, boux senj gyoengqraeuz daeuj hawj gyoengqraeuz ndaej miz faenh gij najrongh de caeuq ndaej yangjcouq gij haijliengh de dih Cangqdiq. 4 Aenvih de yienghneix veijdaq, haijliengh, sojhij de couh baujcingq nyok hawj gyoengqraeuz ceiq dijbauj ceiq veijdaq he, hawj gyoengqraeuz ndaej duet ok aen seiqgyaiq neix hih siengjmuengh yalw hawj vunz ngaiz satsoq he hwj hawj gyoengqraeuz ndaej miz faenh miz gij baenjsingq Cangqdiq. 5 Couh vih yienghneix hwj faenhsou ij engqgya lai roengzrengz; faenhsou mbouj danhcij ij miz aen sim sinq Gihduz he, caemh vanzlij ijaeu byimjdwz ndei; byimjdwz ndei, caemh vanzlij ijaeu miz ciqsiz cij ndaej; 6 miz ciqsiz lo, caemh ijaeu gag rox haed bonjfaenh cij ndaej; rox gag haed bonjfaenh lo, caemh ijaeu rox naenxsim cij ndaej; rox naenxsim lo, caemh ijaeu yawjnaek Cangqdiq cij ndaej; 7 yawjnaek Cangqdiq lo, caemh ij miz aen sim aiq beixnuengx he cij ndaej; miz aen sim aiq beixnuengx he lo, caemh ij rox aiq vunzlai cij ndaej. 8 Hauhnaeuz faenhsou miz doenghgij byimjdwz neix lo, caiq gyacangq mbouj dingz hih gyahgyangz roengzbae lo, yienghneix faenhsou rox bouxcawj raeuz Yehsuh Gihduz cij miz yungh, cij ndaej hawj faenhsou guh ndeisaeh. 9 Hoeng, hauhnaeuz faenhsou mbouj miz doenghgij byimjdwz neix nex, faenhsou couh dwg ginqciqyenj yawj mbouj ndaej gyae, couh dangq rafangz lo, yawj mbouj raen Yehsuh Gihduz vih faenhsou soj guh hih saeh lo, lumz gaxgonq bonjfaenh faenhsou dih coih gaenq ndaej duet lo. 10 Sojhij, gak boux beixnuengx hax, faenhsou wnggai engqgya lailai roengzrengz, guh daengz gwnz neix dih geij yiengh neix; yienghneix couh ndaej cingqmingz faenhsou saedsaeh dwg Cangqdiq soj dingh soj senj hih vunz lo. Hauhnaeuz faenhsou yienghneix guh, couh gaengjdingq yungjyenj mbouj ngaiz byaij loek lo. 11 Mbouj danhcij yienghneix, faenhsou vanzlij ndaej miz gienz ndaej gaep haeuj aen guek bouxcawj gouq raeuz Yehsuh Gihduz mbouj rox cied he, caemh dwg ndaej daengz vuenhringz raixcaix he. 12 Yiengq, gannaeuz faenhsou gaenq rox daengz gij saeh neix caeuq baujciz sinq gij saedsaeh Cangqdiq mbouj bienq sim he lo, hoeng, gou vanzlij dwg ij siengzseiz daezsingj faenhsou. 13 Gou naemj hax, gou vanzlij dwg cijaeu gou vanzlij lix youq ngoenz he, couh ij wnggai siengzseiz daezsingj faenhsou, hawj faenhsou ndaejgeiq, 14 aenvih bouxcawj raeuz Yehsuh Gihduz gaenq hawj gou rox cingsuj, mbouj geijlwh caez gou couh ij rai gvaqseiq lo. 15 Sojhij gou couh ij cwnqliengq roengzrengz hawj faenhsou daengz gou rai le vanzlij yungjyenj ndaejgeiq doenghgij saeh neix. 16 Gaxgonq gyoengqraeuz gangj naeuz sou ni bouxcawj raeuz Yehsuh Gihduz dih bonjsaeh caeuq de dauq daeuj hih saeh hih gaenhbaenj mbouj dwg gag cauh goqsaeh cej daixbauq, dauq dwg gyoengqraeuz caenra raen de dih veijdaq lah, 17-18 aenvih mwh de dajlaeng Cangqdiq Bohmbwn mwnq ndaej daengz najrongh hih mwhde, gyoengqraeuz caemh caeuq de youq aen bya Cangqdiq mwnq caenrwz dingqri miz gij sing daj gwnzmbwn rongh sagsag cenz okdaeuj he doiq de naeuz: “Boux neix dwg lwg gou. Gou gig aiq de; de hawj gou roxnginh hab'eiq habhoz he.” 19 Couh vih yienghneix hwj hawj gyoengqraeuz engqgya sinq boux cenz gij vah Cangqdiq gangj goq hih vah; sojhij faenhsou ij wnggai louzsim dingq gij vah gyoengqde, aenvih gij vah gyoengqde caenh luj aen daeng rongh youq ndaw laep he, itcig rongh daengz ranzrongh, daengz ndauhaet youq ndaw sim faenhsou ok daeuj hih mwhde. 20 Hoeng, faenhsou ij wnggai sien rox ndaw Singqgingh ndaw de soj sij hih vah cungj mbouj dwg boux cenz gij vah Cangqdiq dih iqswh hih, 21 aenvih gij vah Cangqdiq hawj boux cenz gij vah de gangj okdaeuj hih coengzlaiz cungj mbouj dwg ciuq vunz dih cawjeiq ma gangj hih, dauq dwg Hoenzsaenz Cangqdiq hawj de angq hwj gangj okdaeuj hih lah.
1 Doenghbaez youq Hijswzlez miz boux gyaj hih boux cenz gij vah Cangqdiq; caemh doxdoengz, baezneix faenhsou ndaw de caemh ij miz boux gyaj hih gyauqveiq lauxsae he ok daeuj, gangj gij vah coemx vunz he, daeuj gangj gij caeuq gij saedsaeh Cangqdiq doxngig he, hawj vunz satsoq he. Gyoengqde mbouj nginh gouq gyoengqde dih bouxcawj mwnq; couh vih yienghneix, sawjhawj gyoengqde satsoq engqgya vaiq. 2 Gannaeuz yienghneix lah, hoeng, engq miz haujlai vunz gaenhangx gyoengqde, guh doenghgij ndaengndwet yalw he, guh hwj gij saedsaeh Cangqdiq vih gyoengqde hwj ngaiz souh daengz bangjlaih. 3 Aenvih gyoengqde damsim, sojhij couh gag cauh ndaek cungj goqsaeh he hwj yaeuh faenhsou, coemx faenhsou aeu cienzcaiz. Doengh cungj vunz neix Cangqdiq senqsi cix dingh ij saemjbuenq gyoengqde lo, gyoengqde caemh gaengjdingq ij satsoq vaiq. 4 Sojhij, cungjsuenq naeuz bouxcai Cangqdiq famh coih hwj, Cangqdiq cungj caemh mbouj veiq nyiuz gyoengqde, dauqfanj ij dawz gyoengqde gveng roengz ndaw vaengz laep fad fangz he bae gyaeng gyoengqde, gyaeng daengz ngoenz saemjbuenq mwnq. 5 Cangqdiq caemh mbouj nyiuz dangqlaux doenghbaez, dauq vanzlij hawj raemxdumh dumh dawz doenghheij mbouj yawjnaek de he, caenhgag baujhuq Nozyaq, boux gienq vunz hawj vunz guh vunz ndei neix hih cenz ranz bet boux lah. 6 Cangqdiq vanzlij saemjbuenq Sojdohmaj caeuq Ngozmohlah, hawj song aen singz neix feiz gyemz coemh dawz liux. De yienghneix guh dwg vih ij gingjgauq doenghheij mbouj yawjnaek de he. 7-8 Hoeng, de dauq daj Sojdohmaj Singz gouq Lozdwz boux vunz ndei neix okma, aenvih boux vunz ndei neix de youq ndaw doenghheij vunz vaih mwnq siengzseiz yawjraen, siengzseiz dingqri gyoengqde guh doenghgij doegsieb he; de siengzseiz vih doenghheij guh doeg guh sieb ndaengndwet yalw he hwj siengsim gikheiq. 9 Couh vih yienghneix hwj couh ndaej cingqmingz Cangqdiq rox baenzlaw gouq doengh boux yawjnaek de he duet ok nanh, de caemh rox baenzlaw dawz doenghheij vunz vaih he gven haeuj ndaw fad vunz mwnq bae, hawj gyoengqde youq mwnq ngaiz souh daengz mbouj dingz hih fad hwj daengj daengz ngoenz saemjbuenq. 10 Dwzbez dwg doiq doenghheij ciuq ndangnoh bonjfaenh hwj siengjmuengh ndaengndwet yalw hih, mbouj dawz haeuj rwz doenghheij miz gienz he, engqgya yienghneix. Doenghheij vunz neix mbeihung raixcaix, cungj naemqnaeuz bonjfaenh rem raixcaix, gingqyienz gamj bangjlaih doengh boux youq gwnzmbwn ndaej najrongh he. 11 Hawjm'z yawj hux, daiqlienz doenghheij bouxcai ak miz rengz he cungj mbouj gamj youq dangqnaj bouxcawj raeuz bangjlaih gyoengqde hwx. 12 Hoeng, doenghheij vunz neix caenh luj doenghduz mbouj rox ngeix daengz gijmaz, seng okdaeuj couh dwg hawj vunz gaemh bae gaj he. Gyoengqde bangjlaih doenghheij saeh gyoengqde mbouj rox he; baezneix gyoengqde couh ij ngaiz luj doenghduz yienghmwnq ngaiz gaj. 13 Gyoengqde haih vunz haih bonjfaenh, gag caij daengqgyauz hau raeuj. Gyoengqde mbouj rox nyaenq, cungj haenj youq doengxngoenz guh ndaeng guh ndwet, angq ruxrux, simqciq daiqlienz caeuq faenhsou itheij caemh daiz gw haeux cungj caemh dwg yienghneix; cingqcaen dwg faenhsou dih uekcueg caeuq sainaj. 14 Cehra gyoengqde cenmonz yawj haeuj laeng lauxgawj bae, ndaengndwet siengjmuengh, siengzseiz famh coih mbouj dingz goq. Gyoengqde yaeuh longx doenghgij vunz sim fouz mbouj dingh he; gyoengqde damsim gvenq lo. Doengh cungj vunz neix cungj dwg ngaiz Cangqdiq mang he. 15 Gyoengqde vwt gij saedsaeh Cangqdiq bae gaen gij vaih gij doegsieb he, guh gij saeh daeglwg Bijwj, couh dwg Bahlanz, soj guh hih saeh he. Bahlanz haenj doenghgij de guh doeg guh sieb soj ndaej he. 16 Gajlaeng de ngaiz vih bonjfaenh de soj guh hih loek hwj ngaiz souh daengz duz lawz ndaq; gannaeuz duz lawz mbouj rox gangj vah lah, hoeng, duz de gingqyienz ndaej luj vunz yienghmwnq hwj gangj vah okdaeuj ndaq de, sujcij de mbouj hawj de luenh siengj luenh guh. 17 Doenghgij vunz neix couh dangq luj aen cingj hawq he, mij'z yungh, caemh luj gij fwj ngaiz rumz ci sanq he. Cangqdiq gaenq louz mwnq ceiq laep ceiq ndaem he hawj gyoengqde lo, 18 aenvih gyoengqde cungj haenj gag haenh bonjfaenh, naemqnaeuz bonjfaenh cungj rem raixcaix, haenj gangj rumz gangj rengx hwj hawj doenghheij ngamqngamq gaijgoq, mbouj caiq goq yienzlaiz dih saenghhoz hih vunz hwj bae guh doenghgij ndaengndwet he. 19 Gyoengqde baujcingq hawj vunz swqyouz, hoeng, bonjfaenh dauq gag guh gij yalw famh coih he hwj bienqbaenz coih dih hoiq—aenvih vunz ngaiz guxmaz guenjciq, couh dwg guxmaz dih hoiq lo. 20 Yiengq, hauhnaeuz vunz rox bouxcawj raeuz, gouq vunz dih Yehsuh Gihduz hwj ndaej duet ok aen seiqgyaiq neix hih yalw lo, hoeng, gajlaeng caiq ngaiz aen seiqgyaiq neix hih yalw geuj dawz, gaemhanh boiz, luj yienghneix hih vunz daengz gajlaeng beij gaxgonq de engqgya camj. 21 Yiengq, ciuq luj yienghneix ma yawj, hozmboujyienz coengzlaiz cungj mbouj rox ij baenzlawz goq cungj saenghhoz hab'eiq habhoz Cangqdiq he, dauq ak goq rox le caiq mbouj dawz haeuj rwz gij mingqlingq Cangqdiq hwx. 22 Sugvah naeuz ndaej deng: “Ma vueg caiq doiqyungz gag gw; mou swiq cengh le, caiq doiqyungz bae gueg naez,” couh dwg doengh cungj vunz neix lo.
1 Cinhngaiq dih gak boux beixnuengx hax, gou seizneix sij daixngeih fung saenq hawj faenhsou. Gou sij hih song fung saenq cungj dwg daezsingj faenhsou, gujliq faenhsou, hawj faenhsou swhsiengj gyenqgangh, 2 hawj faenhsou ndaejgeiq boux cenz gij vah Cangqdiq sien rox sien gangj goq hih vah caeuq gij mingqlingq bouxcawj gouq vunz hawj dwzbaijyienz cenz hawj faenhsou he. 3 Ceiq cungqyauq hih dwg faenhsou bietdingh ijaeu rox, ij ngeix daengz seiqgyaiq hih ngoenz gatsat, ij miz gij vunz ngaiz ndangnoh guenjciq he ok daeuj lengxriu faenhsou 4 naeuz: “Yehsuh mbouj dwg baujcingq goq ij dauq daeuj maz; de youq mwnqlaw? Cojgoeng raeuz gaenq rai lo, hoeng, sojmiz hih mbouj dwg cungj dwg caeuq ngamq cauh mbwn cauh deih hih doxdoengz maz?” 5 Gyoengqde yienghneix naeuz dwg guqiq lumz daj gaihcij cix dwg Cangqdiq yungh gij vah bonjfaenh de ma cauh mbwn cauh deih he, caiq hawj gij dieg daj ndaw raemx loh okdaeuj he, 6 gajlaeng caiq yungh gij vah bonjfaenh de ma hawj lajmbwn sojmiz hih cungj ngaiz raemx dumh byaeu liux hih gij saedsaeh neix he. 7 Hoeng, gyoengqde wnggai rox, seizneix dih mbwn deih caemh dwg baengh gij vah Cangqdiq hwj ndaej louz daengz seizneix. Daengj daengz doenghgij vunz mbouj yawjnaek Cangqdiq he ngaiz saemjbuenq, ngaiz byaeu hih ngoenz mwnq, mbwn deih couh ij ngaiz feiz gyemz byaeu liux bae. 8 Hoeng, cinhngaiq dih gak boux beixnuengx hax, faenhsou gaejyungh lau doenghgij vunz mwnq lengxriu naeuz bouxcawj raeuz mijyaengz dauq daeuj; miz gienh saeh he faenhsou ijaeu ndaejgeiq, couh dwg: aeu bouxcawj raeuz ma yawj, ngoenz he couh dangq luj cien bi, cien bi couh dangq luj ngoenz he. 9 Bouxcawj raeuz gaenhbaenj mbouj luj doenghheij vunz mwnq siengj hih yienghmwnq dohdoh lahlah mbouj doiqyienh de soj baujcingq hih; gizsaed dauq dwg de nyiuz faenhsou, naenxsim daengj, muengh sojmiz hih vunz cungj nginh loek gaijgoq hwj ndaej gouq ndaej mienx coih hwj mij saek boux ngaiz satsoq lah. 10 Mboujgoq, bouxcawj raeuz dauq daeuj hih ngoenz mwnq, couh luj bouxcaeg sawqmwh daeuj daengz yienghmwnq. Mwhde aen mbwn couh yiengj ndaek sing hung he couh byaeu liux, gwnzmbwn sojmiz hih cungj ngaiz feiz coemh siu liux. Diqgiuz caeuq gwnz diqgiuz sojmiz hih cungj ngaiz feiz coemh byaeu liux. 11 Giqyienz sojmiz hih cungj ij luj yienghneix ngaiz byaeu liux vwz, yiengq faenhsou guh vunz couh ij wnggai guh gij hab'eiq habhoz Cangqdiq he, yawjnaek Cangqdiq he hwj 12 muengh daengj daengz ngoenz Cangqdiq dingh hih ngoenz mwnq, aenvih ngoenz mwnq Cangqdiq gaengjdingq ij hawj aen mbwn daiqlienz aen mbwn gwnz de sojmiz hih cungj ij ngaiz feiz gyemz byaeu liux yungz liux siu liux. 13 Hoeng, gyoengqraeuz soj muengh hih couh dwg Cangqdiq soj baujcingq goq hih: de ij nyok hawj raeuz aen mbwn moq caeuq aen diqgiuz moq youq mwnq cungj dwg vunz mbouj famh coih he. 14 Sojhij cinhngaiq dih gak boux beixnuengx hax, giqyienz faenhsou muengh daengj doenghgij saeh neix, couh ij wnggai roengzrengz hawj faenhsou mij maz loek, mij maz ndaej diudik he, mij naeuz mboujeiqseiq he hwj caeuq Cangqdiq doxhuz. 15 Vanzlij ijaeu rox, bouxcawj raeuz hozraez naenxsim daengj couh dwg ij hawj vunz miz gihveiq ndaej gouq, couh luj gyoengqraeuz cinhngaiq dih Baujloz boux beixnuengx neix, de yungh Cangqdiq soj nyok hawj dih coengjmingz sij saenq naeuz faenhsou yienghmwnq. 16 De sij dih moix it fung saenq cungj dwen daengz gij saeh neix. Ndaw saenq de miz hih hoj rox, yiengq doenghheij vunz mbouj miz ciqsiz geijlai he simfouz he lijgaij goq daixlingh gok bae he, cingq luj gyoengqde luenh lijgaij Singqgingh dih gizdah mwnq ityiengh. Doengh cungj vunz neix couh dwg gag ra rai he. 17 Sojhij cinhngaiq dih gak boux beixnuengx hax, giqyienz faenhsou gaenq sien rox doenghgij saeh neix lo, couh ij wnggai siujsim, mienxndaej ngaiz gij vunz vaih guh loek he yaeuh faenhsou, hawj faenhsou byaij haeuj mbouj wnggai byaij he bae, hawj faenhsou sinq Gihduz gyenhdingq bienqbaenz mbouj gyenhdingq. 18 Dauqfanj faenhsou dauq ij yied ngoenz yied luj bouxcawj gouq raeuz Yehsuh Gihduz yienghmwnq haijliengh, caemh ij yied ngoenz yied rox de. Muengh de yungjyenj najrongh! Ahmaenz.
1 Gyoengqraeuz seizneix sij saenq naeuz faenhsou ni gvanhhih gij vah Cangqdiq daiq miz mingh he. Gij vah daiq miz mingh neix couh dwg daj gaihcij cix senqsi miz hih, caemh dwg gyoengqraeuz soj dingqri, soj yawjraen hih, caeuq gyoengqraeuz soj mo goq hih. 2 Gij mingh neix gaenq yienh okdaeuj lo; gyoengqraeuz caemh yawjraen goq, caemh ndaej cingqmingz naeuz dwg saedsaeh he. Gij mingh neix daj gaihcij cix caeuq Bohmbwn itheij he; de caemh yienh okdaeuj hawj gyoengqraeuz raen goq. Gyoengqraeuz seizneix cenz naeuz sou ni hih couh dwg gij mingh mbouj rox rai neix. 3 Gyoengqraeuz dawz soj yawjraen hih, soj dingqri hih cungj cenz naeuz faenhsou ni, hawj faenhsou rox le, couh gaep haeuj buek vunz gyoengqraeuz, yiengq caemhdangq ndaej gaep haeuj Bohmbwn caeuq daeglwg de Yehsuh Gihduz lo. 4 Gyoengqraeuz sij saenq naeuz faenhsou ni dwg hawj gyoengqraeuz bouxboux ndaw sim cungj angq. 5 Seizneix gyoengqraeuz dawz gij siuhsiz dajlaeng Yehsuh Gihduz dingq daengz hih cungj cenz naeuz faenhsou ni, couh dwg Cangqdiq dwg rongh hih; youq ndaw sim de mbouj miz saek di laep. 6 Yiengq, hauhnaeuz gyoengqraeuz naeuz gyoengqraeuz caeuq de caemh buek vunz he, hoeng, gyoengqraeuz goq dih saedceij cungj dwg laep saengxsaengx he, yiengq couh dwg naeuz gyoengqraeuz gangj gyajvah, mbouj ciuq saedsaeh goq saedceij lo. 7 Yiengq, caiq hauhnaeuz gyoengqraeuz goq dih saedceij cungj dwg rongh sagsag he, luj Cangqdiq youq ndaw rongh yienghmwnq, gyoengqraeuz couh ndaej doxgaep guh buek vunz he lo, gij lwed daeglwg de Yehsuh caemh dawz gij coih raeuz swiq cengh lo. 8 Hoeng, hauhnaeuz gyoengqraeuz naeuz gyoengqraeuz mij'z coih, yiengq couh dangq bonjfaenh gag yaeuh bonjfaenh, ndaw sim gyoengqraeuz couh mbouj miz saedsaeh lo. 9 Yiengq, hauhnaeuz gyoengqraeuz nginh coih, Cangqdiq couh mienx gij coih gyoengqraeuz, swiq cengh gij uekcueg gyoengqraeuz, aenvih Cangqdiq dwg boux gangj vah gw vah he, caemh dwg ciuq saedsaeh bae guh he. 10 Hauhnaeuz gyoengqraeuz naeuz gyoengqraeuz mij famh coih goq, yiengq gyoengqraeuz couh dangq dawz Cangqdiq ma yawj dwg boux gangj gyajvah he hih vunz lo, ndaw sim gyoengqraeuz caemh mbouj miz gij vah de lo.
1 Cinhngaiq dih lwg gou hax, gou sij doenghgij saeh neix naeuz faenhsou ni dwg vihliux mbouj hawj faenhsou caiq famh coih. Hoeng, hauhnaeuz miz vunz famh coih nex, gyoengqraeuz miz Yehsuh Gihduz, boux mij'z coih neix, daeuj bang gyoengqraeuz, bang gyoengqraeuz youq dangqnaj Bohmbwn gangj vah. 2 Yehsuh aeu rai ma cueg gij coih gyoengqraeuz. De mboujdanh caenhgag vih gyoengqraeuz cueg coih, vanzlij caemh vih baenx cenz lajmbwn hih vunz cueg coih. 3 Hauhnaeuz raeuz dingq gij vah Cangqdiq nex, couh suenq gyoengqraeuz gaenq rox de lo. 4 Hauhnaeuz miz vunz naeuz: “Gou rox Cangqdiq hwj!” hoeng boux de dauq mij dingq gij vah de, yiengq boux mwnq couh dwg boux gangj gyajvah he, ndaw sim de couh mbouj miz gij saedsaeh Cangqdiq. 5 Yiengq, hauhnaeuz miz vunz dingq gij vah Cangqdiq hih, couh dwg naeuz boux de caensim caen'eiq aiq Cangqdiq, caemh ndaej cingqmingz boux de dwg haeuj buek vunz Cangqdiq. 6 Sojhij, hauhnaeuz bouxlawz naeuz bonjfaenh de dwg haeuj buek vunz Cangqdiq hih, de couh ij hag Yehsuh. 7 Cinhngaiq dih baengzyoux hax, gou sij hawj faenhsou hih mbouj dwg gij mingqlingq moq law; dwg gij faenhsou dajlwh ngamqngamq gaihcij cix dingqri cix rox hih gij mingqlingq gaeuq hih lah. 8 Hoeng, gou vanzlij dwg dawz gij neix dangqbaenz gij mingqlingq moq he sij hawj faenhsou. Yienghneix yawj Yehsuh caeuq yawj faenhsou couh yawj ndaej ok gij vah Cangqdiq dwg saedsaeh hih, caemh rox rongh (couh dwg naeuz gij saedsaeh Cangqdiq) gaenq daengz lo; mbwn laep couh ij goq lo. 9 Hauhnaeuz miz vunz naeuz bonjfaenh de dwg youq mwnq rongh he, hoeng de vanzlij haemz doenghheij beixnuengx de, yiengq boux mwnq ciuqyiengh vanzlij suenq dwg youq mwnq laep he. 10 Aiq beixnuengx hih vunz, cij suenq dwg youq mwnq rongh he, cij mbouj miz gijmaz ndaej hawj de ngaiz laemx. 11 Doengh boux haemz beixnuengx hih, couh dwg naeuz de vanzlij dwg boux byaij youq mwnq laep mbouj rox fuengyiengq he, aenvih cehra de yawjraen hih cungj dwg laep saengxsaengx, caenh lujnaeuz rafangz nwih. 12 Lwg hax, gou sij saenq hawj faenhsou dwg aenvih faenhsou baengh Yehsuh hwj ndaej mienx coih lo. 13 Guh boh hih vunz hax, gou sij saenq hawj faenhsou dwg aenvih faenhsou rox boux daj gaihcij cix miz he hih. Hauxseng hih vunz hax, gou sij saenq hawj faenhsou dwg aenvih faenhsou gaenq giengz goq Sajdanq boux doegsieb neix lo. Lwg hax, gou sij saenq hawj faenhsou dwg aenvih faenhsou rox Bohmbwn. 14 Guh boh hih vunz hax, gou caemh sij saenq hawj faenhsou dwg aenvih faenhsou rox boux daj gaihcij cix miz hih. Hauxseng hih vunz hax, gou sij saenq hawj faenhsou dwg aenvih faenhsou ndwn ndaej cingq. Ndaw sim faenhsou siengzseiz caeng miz gij vah Cangqdiq; faenhsou caemh giengz goq Sajdanq boux doegsieb neix. 15 Faenhsou gaejyungh aiq lajmbwn caeuq lajmbwn sojmiz hih; hauhnaeuz faenhsou aiq nex, ndaw sim faenhsou couh mbouj aiq Bohmbwn lo, 16 aenvih famz dwg lajmbwn sojmiz hih—couh luj ndangnoh yienghmwnq siengjmuengh hah, ra yawjraen le siengjmuengh hah, caeuq vunz sojmiz hih rasang naemqnaeuz bonjfaenh ak raixcaix hih hah, doenghgij neix—cungj mbouj dwg Bohmbwn dih cawjeiq; dwg daj lajmbwn gag fat hih lah. 17 Aen seiqgyaiq neix caeuq sojmiz siengjmuengh hih, couh ij menhmenh byoeng lo. Caenhgag gij vunz ciuq gij cawjeiq Cangqdiq bae guh hih mbouj ngaiz byoeng, ndaej seiqseiz lix hoh lo. 18 Lwg hax, lajmbwn couh ij daengz ngoenz gatsat hih lo. Faenhsou gaenq dingqri naeuz goq boux caeuq Yehsuh Gihduz doxngig hih boux mwnq ij daeuj, hoeng seizneix gaenq miz haujlai boux caeuq de doxngig hih daeuj lo, sojhij gyoengqraeuz rox lajmbwn dih ngoenz gatsat couh ij daengz lo. 19 Doenghgij vunz neix mbouj dwg gaep buek vunz raeuz law. Hauhnaeuz dwg gaep buek vunz raeuz nex, couh mbouj daj ndaw gyoengqraeuz ok bae lo; daj ndaw gyoengqraeuz ok bae hih, couh mbouj suenq dwg gij vunz raeuz lo. 20 Faenhsou gaenq ndaej Gihduz soengq hawj hih Hoenzsaenz Cangqdiq lo, sojhij, faenhsou cungj rox gij saedsaeh de. 21 Gou sij saenq hawj faenhsou, mbouj dwg naeuz vih faenhsou mbouj rox gij saedsaeh Cangqdiq, dauq dwg vih faenhsou cungj rox gij saedsaeh de, caemh rox sojmiz gyaj hih mbouj dwg daj ndaw saedsaeh de ok daeuj. 22 Yiengq, byawz dwg boux gangj gyajvah he nej? Mbouj dwg boux mbouj nginh Yehsuh dwg Gihduz, Cangqdiq baij daeuj hih vuengz hih maz? Mbouj nginh Bohmbwn caeuq mbouj nginh daeglwg de hih, couh dwg boux caeuq Gihduz doxngig he lo. 23 Famz mbouj nginh daeglwg Bohmbwn hih, couh dwg mbouj haeuj buek vunz Bohmbwn lo; nginh daeglwg Bohmbwn hih, couh dwg haeuj buek vunz Bohmbwn lo. 24 Sojhij faenhsou ij dawz gij daj gaihcij cix dingqri dih gij siuhsiz mwnq geiq youq ndaw sim. Hauhnaeuz ndaw sim faenhsou siengzseiz cungj caeng miz gij daj gaihcij cix dingqri hih gij siuhsiz mwnq nex, faenhsou couh ndaej caeuq Yehsuh caeuq boh de Cangqdiq caemh buek vunz he lo. 25 Gij neix couh dwg de baujcingq hawj raeuz dih seiqseiz lix hih lo. 26 Gou sij doenghgij saeh neix naeuz faenhsou ni dwg ceij doenghheij vunz ij coemx faenhsou hih lah. 27 Hoeng gangj daengz faenhsou, Yehsuh gaenq dawz Hoenzsaenz Cangqdiq nyok hawj faenhsou lo, hawj de doz youq gwnz ndang faenhsou; sojhij faenhsou couh mboujyungh hawj vunz son faenhsou lo, aenvih de dawz sojmiz hih saeh cungj son faenhsou, caemh cungj dwg son gij saedsaeh he, mbouj dwg son gij gyaj he. Sojhij faenhsou couh ij ciuq de son, siengzseiz gaen de. 28 Lwg hax, faenhsou ij siengzseiz baengh Yehsuh gaen Yehsuh cij ndaej. Yienghmwnq, daengj daengz de caiq yienh okdaeuj hih mwhde, gyoengqraeuz couh miz sinqsim, couh mbouj miz maz mboujeiqseiq lo. 29 Giqyienz faenhsou rox de ndwn ndaej cingq he, yiengq faenhsou couh ij wnggai rox, ndwn ndaej cingq hih vunz cungj dwg lwg Cangqdiq.
1 Faenhsou yawj hux, Bohmbwn baenxlai aiq gyoengqraeuz, aiq daengz naeuz gyoengqraeuz suenq dwg lwg de bae—gizsaed gyoengqraeuz caemh dwg lwg de raix! Yiengq aen seiqgyaiq neix hih vunz vihmaz mbouj rox gyoengqraeuz nej? Dwg aenvih gyoengqde mbouj rox boh gyoengqraeuz, Cangqdiq. 2 Cinhngaiq dih baengzyoux hax, seizneix gyoengqraeuz gaenq dwg lwg Cangqdiq lo, hoeng gyoengqraeuz lij mbouj rox guh lwg de ij baenzlaw yiengh; caenhgag rox daengj daengz mwh he, gyoengqraeuz couh ndaej luj de baenx ndei, aenvih gyoengqraeuz gaengjdingq ndaej raen de cingsuj. 3 Famz muengh ijsiengj luj de hih vunz cungj dwg gag gaij ndei, gaij luj de yienghmwnq ndei. 4 Famz famh coih hih couh dwg fanj Cangqdiq, aenvih coih couh dwg sauqfanj. 5 Faenhsou caemh rox, Yehsuh dwg mij'z coih hih. De daeuj lajmbwn dwg vih ij hawj vunz youq ndaw lwgra Cangqdiq bienqbaenz mij'z coih he. 6 Sojhij, doengh boux siengzseiz gaen de baengh de hih cungj mbouj famh coih; doengh boux caenhrox famh coih hih couh dwg mij raen de goq, caemh mbouj rox de goq. 7 Lwg hax, gaejyungh ngaiz vunz coemx; ndwn ndaej cingq hih vunz cij dwg vunz simndei simsoh, caemh luj Yehsuh yienghmwnq simndei simsoh. 8 Caenhrox famh coih hih couh dwg caemh buek fangzvuengz he, aenvih fangzvuengz daj gaihcij cix famh coih lo. Couh vih yienghneix, daeglwg Cangqdiq cij yienh okdaeuj, dwg ij boqvaiq fangzvuengz soj guh hih. 9 Lwg Cangqdiq dwg mbouj famh coih hih, aenvih gyoengqde miz gij singqciz Cangqdiq; giqyienz Cangqdiq dwg daxboh gyoengqde, gyoengqde couh mbouj famh coih. 10 Cangqdiq dih lwg caeuq fangzvuengz dih lwg dwg mbouj doxdoengz hih; doengh boux mbouj ndwn ndaej cingq hih, mbouj aiq gij beixnuengx bonjfaenh hih, couh mbouj dwg lwg Cangqdiq. 11 Faenhsou daj gaihcij cix dingqri hih, couh dwg gyoengqraeuz ij caezgya doxaiq. 12 Gyoengqraeuz mbouj ndaej luj Gaihyinj yienghmwnq. De dwg haeuj buek fangzvuengz he; de gajrai daegnuengx bonjfaenh. De vihmaz gaj daegnuengx de nej? Aenvih de guh doeg guh sieb, daegnuengx de dauq dwg guh soh guh ndei he. 13 Sojhij, gak boux beixnuengx hax, hauhnaeuz gij vunz haenq faenhsou nex, faenhsou gaejyungh geizheih. 14 Aenvih gyoengqraeuz aiq beixnuengx, sojhij couh rox gyoengqraeuz gaenq caeuq rai doxbiek, caeuq lix doxdep lo; doengh boux mbouj rox aiq he couh dwg vanzlij youq ndaw rai de. 15 Famz dwgcaengz gij beixnuengx bonjfaenh hih couh dangq gaj vunz; faenhsou caemh rox, famz gaj vunz hih couh mbouj ndaej seiqseiz lix. 16 Yehsuh Gihduz vih gyoengqraeuz rai. Aeu gij neix ma yawj, gyoengqraeuz couh rox gijmaz dwg aiq. Yiengq gyoengqraeuz caemh wnggai vih beixnuengx hwj sijndaej diuz mingh bonjfaenh. 17 Hauhnaeuz miz vunz raen beixnuengx miz nanh, de caemh guh ndaej daengz bang de hwj, hoeng de cungj mbouj leix mbouj langh hih, yiengq ij baenzlawz naeuz de dwg aiq Cangqdiq nej? 18 Lwg hax, gyoengqraeuz doxaiq mbouj dwg naeuz bak lai myaiz led; wnggai saedsaeh guh okdaeuj cij ndaej. 19-20 Yienghneix gyoengqraeuz couh rox gyoengqraeuz dwg haeuj gij saedsaeh he lo. Cungjsuenq naeuz ndaw sim gyoengqraeuz gag gvaiq bonjfaenh hwjx, gyoengqraeuz youq dangqnaj Cangqdiq caemh roxnginh sim'onj hah, aenvih Cangqdiq beij aen sim gyoengqraeuz vanzlij ak; de yawj gijmaz cingx goq gingq bohliz bae. 21 Sojhij, cinhngaiq dih baengzyoux hax, hauhnaeuz gyoengqraeuz guh hih cungj dwg doiq ndaej hwnj aen liengzsim bonjfaenh hih, yiengq youq Cangqdiq mwnq gyoengqraeuz couh mij maz lau lo. 22 Yienghmwnq, mboujguenj gyoengqraeuz gouz de gijmaz, de cungj nyok hawj raeuz, aenvih gyoengqraeuz dingq gij vah de, guh gij hab'eiq habhoz de. 23 Gij vah de couh dwg hawj gyoengqraeuz sinq daeglwg de Yehsuh Gihduz, ciuq de raengq hih yienghmwnq bae doxaiq. 24 Byawz dingq gij vah Cangqdiq hih, byawz couh ndaej gaep haeuj buek Cangqdiq; Cangqdiq caemh caeuq de youq. Aenvih Cangqdiq soengq Hoenzsaenz de hawj gyoengqraeuz, sojhij gyoengqraeuz couh rox Cangqdiq caeuq gyoengqraeuz youq.
1 Cinhngaiq dih baengzyoux hax, faenhsou gaejyungh baex dingq bouxlawz naeuz Hoenzsaenz Cangqdiq naeuz yienghneix yienghneix couh sinq; faenhsou dauq ij ngeixngeix yawj dwg mbouj dwg cingqcaen Hoenzsaenz Cangqdiq naeuz cij ndaej, aenvih lajmbwn gaenq miz haujlai boux gyaj hih boux cenz gij vah Cangqdiq he daeuj lo. 2 Yiengq, faenhsou ij baenzlawz cij ndaej rox cingqcaen dwg Hoenzsaenz Cangqdiq naeuz hih nej? Couh dwg byawz nginh Yehsuh Gihduz dwg daeuj lajmbwn guh vunz hih, byawz couh dwg cingqcaen daj Cangqdiq mwnq baij daeuj hih lo. 3 Byawz mbouj nginh Yehsuh Gihduz dwg daeuj lajmbwn guh vunz hih, byawz couh mbouj dwg Cangqdiq baij daeuj hih; boux de dauq dwg daj boux caeuq Gihduz doxngig hih boux mwnq daeuj hih lah. (Doenghbaez faenhsou dingq daengz naeuz boux caeuq Gihduz doxngig hih boux mwnq ij daeuj hwj; gannaeuz boux de mijyaengz daeuj lah, hoeng, boux de gaenq ingjyangj baenx cenz lajmbwn lo.) 4 Lwg hax, faenhsou dwg haeuj buek vunz Cangqdiq hih, faenhsou caemh gaenq giengz goq doengh boux gyaj hih boux cenz gij vah Cangqdiq he lo, aenvih youq laeng faenhsou dih gij Hoenzsaenz mwnq ak goq lajmbwn dih gij hoenzsaenz mwnq. 5 Doengh boux neix dwg haeuj lajmbwn hih, sojhij gyoengqde dih yawjfap caemh dwg haeuj lajmbwn hih yawjfap, gij vunz cungj caemh dingq gyoengqde. 6 Hoeng gyoengqraeuz dwg haeuj buek vunz Cangqdiq. Rox Cangqdiq hih vunz cungj dingq gyoengqraeuz; mbouj haeuj buek vunz Cangqdiq hih couh mbouj dingq gyoengqraeuz. Yiengq, ciuq yienghneix ma yawj, gyoengqraeuz couh rox baenzlaw nginh ok miz saedsaeh dih Hoenzsaenz caeuq mbouj miz saedsaeh dih hoenzsaenz lo. 7 Cinhngaiq dih baengzyoux hax, gyoengqraeuz caezgya ij doxaiq, aenvih aiq gij doenj de dwg dajlaeng Cangqdiq daeuj hih. Famz miz aiq hih cungj dwg Cangqdiq dih lwg caemh rox Cangqdiq. 8 Doenghheij mbouj miz aiq hih couh mbouj rox Cangqdiq, aenvih Cangqdiq couh dwg aiq. 9 Cangqdiq baij daeglwg dog de daeuj lajmbwn, hawj gyoengqraeuz baengh de ndaej miz mingh; Cangqdiq yienghneix guh dwg hawj gyoengqraeuz rox de baenxlai aiq gyoengqraeuz. 10 Mbouj dwg gyoengqraeuz aiq Cangqdiq, dauq dwg Cangqdiq aiq gyoengqraeuz lah. De baij daeglwg de daeuj vih ij cueg gij coih gyoengqraeuz hwj vwt mingh. Gij neix couh dwg aiq. 11 Cinhngaiq dih baengzyoux hax, giqyienz Cangqdiq baenxlai aiq gyoengqraeuz, yiengq gyoengqraeuz caemh ij wnggai doxaiq. 12 Mij'z vunz raen goq Cangqdiq, hoeng hauhnaeuz gyoengqraeuz doxaiq, Cangqdiq couh caeuq gyoengqraeuz youq; gyoengqraeuz doxaiq couh dwg naeuz gij aiq de dunghgoq gyoengqraeuz ma fazveih okdaeuj liuxliux lo. 13 Cangqdiq nyok gij Hoenzsaenz de hawj gyoengqraeuz, hawj gyoengqraeuz rox gyoengqraeuz caeuq de caemh buek vunz he, de caemh caeuq gyoengqraeuz youq. 14 Gyoengqraeuz raen goq, caemh ndaej cingqmingz, Cangqdiq baij daeglwg de daeuj lajmbwn, dwg daeuj guh boux gouq vunz he. 15 Doengh boux nginh Yehsuh dwg daeglwg Cangqdiq hih, Cangqdiq couh caeuq de youq, de caemh dwg haeuj buek vunz Cangqdiq. 16 Sojhij, gyoengqraeuz caemh rox, caemh sinq Cangqdiq aiq gyoengqraeuz. Cangqdiq couh dwg aiq; ndaw sim bouxlawz miz aiq, bouxlawz couh youq ndaw rumq Cangqdiq youq, Cangqdiq couh caeuq boux de youq. 17 Yienghneix, aiq youq ndaw sim gyoengqraeuz ndaej fazveih, hawj gyoengqraeuz ndaej youq ngoenz saemjbuenq mwnq mbouj you mbouj heiq, aenvih Cangqdiq dwg yienghlawz aiq vunz, gyoengqraeuz youq lajmbwn caemh dwg yienghlawz aiq vunz. 18 Ndaw aiq ndaw de mbouj miz lau; cingqcaen aiq ndaej boenq deuz lau, aenvih lau couh dwg lau ngaiz fad. Lau hih vunz, couh dangq naeuz de mijyaengz ndaej guh daengz Cangqdiq yauhgyiuz hih gij aiq mwnq. 19 Gyoengqraeuz aiq vunz, dwg aenvih Cangqdiq sien aiq gyoengqraeuz. 20 Hauhnaeuz miz vunz naeuz: “Gou aiq Cangqdiq,” hoeng de dauq haenq gij beixnuengx de, yiengq couh naeuz de gangj gyajvah; de cungj mij aiq de soj yawjraen hih beixnuengx, yiengq de ij baenzlaw bae aiq boux yawj mbouj ndaej raen dih Cangqdiq nej? 21 Sojhij, Gihduz mingqlingq gyoengqraeuz, aiq Cangqdiq caemh ij aiq beixnuengx.
1 Famz sinq Yehsuh dwg Gihduz, Cangqdiq baij daeuj dih vuengz hih, cungj dwg lwg Cangqdiq. Aiq boh hih vunz caemh aiq lwg boh de. 2 Hauhnaeuz gyoengqraeuz aiq Cangqdiq, caemh dingq gij vah de, yiengq gyoengqraeuz couh rox gyoengqraeuz aiq gij lwg de lo. 3 Dingq gij mingqlingq Cangqdiq couh dwg aiq Cangqdiq. Gij mingqlingq Cangqdiq mbouj dwg hawj vunz dingx mbouj ndaej, 4 aenvih lwg Cangqdiq cungj ndaej giengz goq lajmbwn sojmiz hih. Hawj gyoengqraeuz ndaej giengz goq lajmbwn hih couh dwg gyoengqraeuz hih sinq Gihduz dih sim. 5 Yiengq, byawz ndaej giengz goq lajmbwn nej? Mbouj dwg caenhgag sinq Yehsuh dwg daeglwg Cangqdiq hih cij ndaej giengz goq hih maz? 6 Boux Yehsuh Gihduz daeuj lajmbwn guh vunz neix, de dwg dunghgoq sijlij dih raemx caeuq rai dih lwed; de mbouj danhcij naeuz dunghgoq raemx, vanzlij dwg dunghgoq raemx caeuq lwed. Hoenzsaenz Cangqdiq caemh ndaej cingqmingz gij neix dwg saedsaeh he, aenvih Hoenzsaenz Cangqdiq couh dwg saedsaeh. 7 Ndaej cingqmingz gij neix hih miz sam cungj, 8 couh dwg Hoenzsaenz Cangqdiq, raemx caeuq lwed; sam cungj neix cungj dwg cingqmingz doxdoengz he. 9 Yiengq, giqyienz gyoengqraeuz cungj sinq gij cingqmingz vunz lo, gij cingqmingz Cangqdiq mbouj engqgya miz yungh haz, aenvih gij cingqmingz neix dwg Cangqdiq vih daeglwg de hwj cingqmingz hih. 10 Sojhij, byawz sinq daeglwg Cangqdiq, ndaw sim byawz couh sinq gij cingqmingz neix; byawz mbouj sinq Cangqdiq, couh dwg dangq naeuz Cangqdiq gangj gyajvah, aenvih de mbouj sinq gij cingqmingz Cangqdiq. 11 Gij cingqmingz neix couh dwg: Cangqdiq nyok hawj gyoengqraeuz ndaej seiqseiz lix hih mingh; seiqseiz lix hih mingh dwg youz daeglwg de hawj he. 12 Ndaw sim byawz miz daeglwg Cangqdiq hih, byawz couh miz gij mingh neix; byawz mbouj miz daeglwg Cangqdiq hih, byawz couh mbouj miz gij mingh neix. 13 Gou sij doenghgij saeh neix naeuz faenhsou sinq daeglwg Cangqdiq hih vunz ni, hawj faenhsou rox faenhsou ndaej seiqseiz lix. 14 Cingq vih yienghneix, gyoengqraeuz youq dangqnaj Cangqdiq cungj dwg mbouj you mbouj heiq hih, couh dwg naeuz gyoengqraeuz rox, hauhnaeuz gyoengqraeuz ciuq gij cawjeiq de ma gouz nex, de couh dingq gyoengqraeuz lo. 15 Giqyienz gyoengqraeuz rox de dingq gyoengqraeuz soj gouz hih, yiengq gyoengqraeuz caemh rox gyoengqraeuz gouz de hih, de gaengjdingq soengq hawj raeuz. 16 Hauhnaeuz miz vunz raen beixnuengx famh coih mbouj daeng hab rai hih, couh ij bang de gouz Cangqdiq, Cangqdiq couh nyok mingh hawj boux de; hoeng doenghheij famh coih daeng hab rai hih, faenhsou couh mboujyungh vih de hwj gouz Cangqdiq lo. 17 Sojmiz mbouj deng dih saeh cungj dwg coih, hoeng caemh miz mbouj daeng hab rai hih coih. 18 Gyoengqraeuz rox gij lwg Cangqdiq mbouj dwg caenhrox famh coih hih, aenvih daeglwg Cangqdiq hen gyoengqde hwj, mbouj hawj Sajdanq, boux guh doeg guh sieb neix, haih gyoengqde. 19 Gyoengqraeuz rox, gannaeuz aen seiqgyaiq neix hih vunz cungj dwg ngaiz boux guh doeg guh sieb neix guenjciq lah, hoeng gyoengqraeuz mbouj ngaiz de guenjciq; gyoengqraeuz vanzlij dwg gij vunz Cangqdiq. 20 Gyoengqraeuz rox daeglwg Cangqdiq gaenq daeuj lo. De vanzlij soengq coengjmingz hawj gyoengqraeuz, hawj gyoengqraeuz rox caen dih Cangqdiq. Gyoengqraeuz caemh dwg haeuj buek vunz caen dih Cangqdiq, caemh dwg haeuj buek vunz daeglwg de, Yehsuh Gihduz—de couh dwg caen dih cwnz, caemh dwg gij mingh mbouj rox rai he. 21 Lwg hax, faenhsou mbouj ndaej dep duz you!
1 Gou dwg boux vunz laux gangj vah vunz couh dingq he; gou sij saenq hawj Cangqdiq senj hih gyauqveiq caeuq gyauqveiq sojmiz hih vunz. Gou caensim aiq faenhsou, hoeng, mbouj gag gou aiq faenhsou law; sojmiz rox saedsaeh he dih vunz cungj caemh aiq faenhsou, 2 aenvih ndaw sim faenhsou caeuq ndaw sim gyoengqraeuz yungjyenj miz saedsaeh. 3 Gou rox Cangqdiq Bohmbwn caeuq daeglwg de Yehsuh Gihduz ij doiq gyoengqraeuz haijliengh, ij cojgvaq gyoengqraeuz, caeuq ij hawj gyoengqraeuz bingzan; doenghgij neix cungj dwg de daj ndaw sim dih aiq caeuq saedsaeh he. 4 Bohmbwn mingqlingq gyoengqraeuz ciuq gij saedsaeh de bae guh; gou caemh angq raixcaix, aenvih gou raen gij vunz faenhsou ndaw de miz hih vunz rox gij saedsaeh de, ciuq gij saedsaeh de bae guh. 5 Sojhij, cinhngaiq dih gyauqveiq hax, gou seizneix doiq mwngz naeuz, gyoengqraeuz daixgya ij doxndei doxaiq. Gij neix mbouj dwg gou linghvaih saen dingh dih mingqlingq, dauq dwg gyoengqraeuz daj gaihcij cix dingq hih diuz mingqlingq mwnq lah. 6 Aiq couh dangq dwg gyoengqraeuz soenhsouj Bohmbwn dih mingqlingq; faenhsou daj gaihcij soj dingq dih mingqlingq couh dwg ij seiqseiz aiq. 7 Seizneix lajmbwn miz haujlai yaeuh vunz hih vunz. Gyoengqde mbouj nginh Yehsuh Gihduz daj gwnzmbwn roengz lajdeih daeuj guh vunz dih gij saedsaeh neix. Cungj vunz neix yaeuh vunz, dwg Yehsuh Gihduz dih dizyinz. 8 Sojhij faenhsou ij siujsim; siujsim le, faenhsou soj guh hih cij mbouj ngaiz vwt vangh, cij ndaej cangjliq liux. 9 Famz miz vunz mbouj ciuq Yehsuh gangj hih yienghmwnq ma guh, dauqfanj gag ciuq bonjfaenh dih siengjfap ma guh hih, couh dwg ndaw sim de mbouj miz Cangqdiq; doengh boux gyenhciz sinq gij saedsaeh Yehsuh hih vunz, ndaw sim de couh miz Bohmbwn caeuq miz daeglwg de. 10 Yiengq, hauhnaeuz miz vunz bae daengz laeng faenhsou mwnq, hoeng mbouj cenzgangj gij saedsaeh neix hih, couh mbouj ciep boux de haeuj ranz faenhsou bae, mbouj daih de, mbouj leixlangh boux de, 11 aenvih leixlangh boux de caemhdangq caeuq boux de caemh buek vunz he guh vaihsaeh lo. 12 Gou vanzlij miz haujlai vah ijsiengj caeuq faenhsou gangj, hoeng, mbouj siengj aeu ceij aeu maeg ma caeuq faenhsou gangj; siengj bae daengz faenhsou mwnq bae, caenndang naj doiq naj caeuq faenhsou gangj lah, yienghmwnq ndaej hawj gyoengqraeuz lai raen sim'angq. 13 Gyoengqraeuz gyauqveiq, Cangqdiq senj dih gyauqveiq, caeuq gyauqveiq sojmiz hih vunz cungj cam faenhsou ndei.
1 Gou dwg boux vunz laux gangj vah vunz couh dingq he; gou sij saenq hawj gou cinhngaiq dih baengzyoux Gaihyouz, couh dwg gou ciuq gij saedsaeh Cangqdiq ma aiq dih baengzyoux. 2 Cinhngaiq dih baengzyoux hax, gou hoh mwngz ndangdaej giencangq, yienghyiengh swnh, ndangdaej caeuq aen sim mwngz doxdoengz giencangq. 3 Gou angq ij rai, miz beixnuengx daeuj gou dineix naeuz gou ni mwngz lauxlaux saedsaed mbouj doeknaiq hih ciuq gij saedsaeh Cangqdiq bae goq saedceij. 4 Mij gijmaz naeuz ndaej beij dingq daengz gyoengq lwg gou cungj dwg ciuq saedsaeh bae guh hih yienghmwnq angq law lo. 5 Cinhngaiq dih baengzyoux hax, mwngz baenxlai caensim bae bang gyoengq beixnuengx; mboujguenj doengh boux mwngz mijyaengz raen naj goq, najseng he, mwngz cungj ciuqyiengh caensim bae bang. 6 Gyoengqde youq dineix gyauqveiq cungj haenh naeuz mwngz simndei, aiq vunz. Yiengq, daengz gyoengqde bae hih mwhde, mwngz ij bang gyoengqde, caemh ij ciuq Cangqdiq haenj hih yienghmwnq bae bang gyoengqde, 7 aenvih gyoengqde dwg vih ij hawj vunz rox gij coh Yehsuh hwj ok bae he; gyoengqde caemh mij laeng doenghheij vunz mbouj rox Cangqdiq he aeu gijmaz. 8 Sojhij, luj doenghheij beixnuengx neix, gyoengqraeuz wnggai daih gyoengqde; yienghneix gyoengqraeuz couh dangq caeuq gyoengqde itheij guh gvanhhih saedsaeh hih gij hong neix. 9 Gou sij saenq hawj gyauqveiq goq, hoeng boux caenh haenj guh fexfex he Diuhdwzfeih, de mbouj dawz haeuj rwz gij vah gou. 10 Sojhij, hauhnaeuz gou bae mwnq nex, gou couh ij byoengq gij haexnyangj de okdaeuj hawj vunz rox, couh dwg naeuz de gangj doenghgij vah doegdoeg siebsieb he ma ngig gyoengqraeuz hih, luenh bangjlaih gyoengqraeuz hih. De mbouj danhcij yienghneix, vanzlij mbouj vuenhringz gyoengq beixnuengx mwnq; bonjfaenh de mbouj vuenhringz cixbah lo, hoeng vanzlij lanz hwj mbouj hawj doengh boux siengj vuenhringz he, simqciq boenq doengh boux de ok gyauqveiq bae. 11 Cinhngaiq dih baengzyoux hax, gou naeuz hax, gaejyungh hag gij vaih he; wnggai hag gij ndei he. Guh ndei hih vunz cij suenq dwg buek vunz Cangqdiq; guh rwix guh vaih hih vunz, couh dwg naeuz de mbouj rox Cangqdiq. 12 Daixgya cungj haenh Dihmijdiuh guh ndeisaeh; miz saedsaeh ndaej cingqmingz de. Gyoengqraeuz caemh ndaej cingqmingz de dwg yienghneix; faenhsou caemh rox gyoengqraeuz soj gangj hih cungj dwg saedsaeh he. 13 Gou vanzlij miz haujlai vah ijsiengj caeuq mwngz gangj haem, hoeng, gou mbouj siengj aeu bit aeu maeg ma caeuq mwngz gangj lo. 14 Gou muengh vaiqdi ndaej raen naj mwngz, ndaej naj doiq naj caeuq mwngz gangj. 15 Muengh mwngz bingzan! Gij baengzyoux dineix cungj cam mwngz ndei. Youq dineix, gou caemh cingj mwngz bang gou naj doiq naj hwj cam youq mwnq dih gak boux baengzyoux ndei bax!
1 Gou dwg Youzdaq, dwg daegnuengx Yajgoz, dwg bouxhoiq Yehsuh Gihduz. Seizneix gou sij saenq hawj faenhsou doenghheij Cangqdiq Bohmbwn senjdingh okdaeuj he, aiq he, Yehsuh Gihduz goqhoh he. 2 Muengh Cangqdiq hojsik faenhsou raixcaix, aiq faenhsou raixcaix, hawj faenhsou bingzan raixcaix! 3 Cinhngaiq dih gak boux beixnuengx hax, gou itcig cungj siengj sij saenq hawj faenhsou, caeuq faenhsou gangjgangj gvanhhih gyoengqraeuz daixgya cungj ndaej gouq dih vaenqdiz, hoeng, gou roxnginh seizneix miz yiengh he engqgya gaenj ij sij saenq hawj faenhsou, couh dwg gou gienq faenhsou ij caenhrengz souj ndei gij saedsaeh Cangqdiq. Gij saedsaeh neix dwg Cangqdiq mbat dog couh cenz hawj liux he, couh dwg cenz hawj sojmiz hih gij vunz Cangqdiq he. 4 Gou yienghneix naeuz dwg aenvih miz gij vunz mbouj yawjnaek Cangqdiq he gaenq caegcaeg ndonj haeuj faenhsou mwnq bae lo. Gyoengqde dawz Cangqdiq dih haijliengh ma dangq dwg ndaej seizbienh siengj guh gijmaz couh guh gijmaz, guh doenghgij mij'z naj ndaej gangj ok bak he; gyoengqde mbouj nginh bouxcawj raeuz Yehsuh Gihduz caenhgag de cij ndaej guenjciq gyoengqraeuz he. Luj cungj vunz neix ndaw Singqgingh gaenq senqsi cix sij naeuz gyoengqde ij ngaiz dingh miz coih lo. 5 Laj neix, doenghgij saeh neix gannaeuz faenhsou gaenq rox hoh lah, hoeng, gou vanzlij ij caiq daezsingj faenhsou. Doenghbaez Cangqdiq gouq gij vunz de, couh dwg gij vunz Hijswzlez, daj Ngaihgiz ok ma, hoeng, gajlaeng de dauq dawz gyoengqde doenghheij vunz mbouj sinq de he cawz bae. 6 Gou vanzlij caiq miz yiengh haem ij daezsingj faenhsou, couh dwg doenghheij vwt gij hong bonjfaenh, gag guh gij lauxlied he hih doenghheij bouxcai Cangqdiq mwnq; Cangqdiq gaenq yungh lienh ma lienh hawj gyoengqde yungjyenj mbouj ndaej duet ok, hawj gyoengqde yungjyenj youq ndaw lauz laep daengj daengz ngoenz saemjbuenq saeh hung mwnq. 7 Vanzlij miz yiengh haem, faenhsou caemh ijaeu ndaejgeiq, mbouj ndaej lumz, couh dwg Sojdohmaj caeuq Ngozmohlah caeuq doenghheij seiqhenz singz de hih vunz, caemh luj doenghheij bouxcai mwnq, gyoengqde haenj guh gijmaz couh guh gijmaz, guh doenghgij ndaengndwet, yalw he, daengz gajlaeng ngaiz feiz gyemz byaeu liux. Gij neix couh dwg gingjgauq daezsingj gyoengqraeuz. 8 Caiq gangj daengz gou gwnz neix gangj daengz hih, doenghheij vunz gaenq caegcaeg ndonj haeuj faenhsou mwnq bae hih doenghheij vunz mwnq caemh doxdoengz. Gyoengqde gag nginhnaeuz dwg fangxngwnzloq hawj gyoengqde guh doenghheij yalw ndaengndwet he hwj famh coih; gyoengqde gag uq aen ndang bonjfaenh, mbouj dawz haeuj rwz gij gienzveih goeng'ak, yawj mbouj hwnj doengh boux najrongh mwnq. 9 Hoeng, gou naeuz sou ni hax, Mijgyahlwz bouxcai Cangqdiq daeuzdaeuz neix youq de caeuq fangzvuengz doxceng gij seihaiz Mohsih hih mwhde, de vanzlij mbouj gamj ndaq naeuz de miz coih hwx; de caenhgag naeuz gawq: “Muengh Cangqdiq ndaq mwngz!” gawq neix sat lo. 10 Hoeng, gou gangj naeuz hih doenghheij vunz mwnq, gyoengqde gingqyienz gamj riu doenghgij saeh bonjfaenh gyoengqde mbouj rox he; gizsaed gyoengqde soj rox hih cijmboujgoq ndaej luj doengh duz cukseng yienghmwnq, mbouj rox siengj gijmaz, cij rox ciuq gij baenjsingq bonjfaenh bae guh lah, guh hwj daengz gajlaeng gag haih bonjfaenh ngaiz satsoq. 11 Gou naeuz doenghheij vunz neix hax, couh ij satsoq lo, aenvih gyoengqde famh haeuj Gaihyinj soj famh hih, caemh vihliux cienzcaiz hwj yamq haeuj Bahlanz soj famh he bae; hoeng, daengz gajlaeng gaengjdingq luj Gojlah yienghmwnq vih caeuq Mohsih doxngig hwj ngaiz byoeng. 12 Doengh cungj vunz neix gannaeuz caeuq gij lwgsae doxcaemh daiz gw haeux lah, hoeng, caemh luj oenciq meh ndaw boengz. Gyoengqde dwg boux dajciengx, hoeng, mbouj ciengx ndei doenghduz, cij rox guq gw bonjfaenh, najna raixcaix cix mbeihung. Gyoengqde caemh luj gvaq fwj yienghmwnq raemh fubfub, hoeng, mij fwn doek. Gyoengqde caemh luj go mak daengz seizcou mij dawz mak, hab rai hab ciemz, wnggai lienz rag lienz goenq ciemzcag hwnjdaeuj. 13 Gyoengqde caemh luj ndaw haij bohlangq biu gij fwdfauz de, biu gij mbouj rox nyaenq najna de, caemh luj cungj ndaundeiq he, youzyouz dangqdangq ngaiz yungjyenj youq ndaw laep. 14 Doengh cungj vunz neix, Yaqdangh dih daixcaet daih lan, Hijnoz, gaenq cenz gij vah Cangqdiq naeuz goq naeuz: Yawj veiq, bouxcawj daiq ciencien fanhfanh bouxcai de caeuq de itheij daeuj! 15 De ij saemjbuenq sojmiz hih vunz, fad doenghheij mbouj yawjnaek Cangqdiq hih vunz, aenvih gyoengqde soj guh hih cungj dwg mbouj hab'eiq habhoz Cangqdiq, gangj gij vah daekcoih Cangqdiq he, yienghneix naeuz lo. 16 Doengh cungj vunz neix siengzseiz cungj dwg ienq vunz gvaiq vunz, cungj dwg ciuq bonjfaenh soj siengjmuengh hih bae guh, cixcaemh haenj gag cej bonjfaenh, vih ij ciemq bienxngeiz cungj dwg bungj vunz. 17 Hoeng, gou naeuz faenhsou gak boux beixnuengx hax, faenhsou ijaeu ndaejgeiq gij dwzbaijyienz bouxcawj raeuz Yehsuh Gihduz soj gangj goq hih vah. 18 Gyoengqde doiq faenhsou naeuz goq naeuz: “Daengz ciqgyaiq dih ngoenz gatsat he ij miz gij vunz yawj vunz mbouj hwnj rwz riu vunz he ciuq gij siengjmuengh yalw doegsieb bonjfaenh de bae guh he ok daeuj.” 19 Doenghheij vunz neix ok daeuj nauhsaeh faen banghbaij; gyoengqde mbouj miz Hoenzsaenz Cangqdiq doz youq gwnz ndang gyoengqde, cungj dwg ciuq ndangnoh bonjfaenh soj siengjmuengh hih bae guh. 20 Sojhij faenhsou gak boux beixnuengx hax, faenhsou wnggai doxbang doxson, hawj faenhsou sinqsim engqgya gyenhdingq mbouj doeknaiq sinq Cangqdiq, caemh ij baengh Hoenzsaenz Cangqdiq hwj gouzhaenh Cangqdiq, 21 caemh ij baux ndei Cangqdiq dih aiq, daengj bouxcawj raeuz Yehsuh Gihduz dauq daeuj hojsik gyoengqraeuz, nyok hawj gyoengqraeuz seiqseiz lix. 22 Doiq doenghheij yaepyaep yuekyuek sinq Gihduz hih sim mbouj gyenhdingq hih vunz, faenhsou ij hojsik gyoengqde bang gyoengqde. 23 Hoeng, doiq miz hih vunz, faenhsou ij wnggai gouq gyoengqde, yienghmwnq couh dangq luj daj ndaw feiz gouq gyoengqde okma lo. Yiengq, doiq miz hih lingh cungj vunz nej, faenhsou ij hojsik gyoengqde, hoeng, ijaeu siujsim; doenghheij ciuq bonjfaenh dih siengjmuengh bae guh doenghgij yalw hih doenghheij vunz neix, faenhsou ij siujsim, daiqlienz gij buh de cungj ij siujsim mbouj ndaej bungq dawz. 24-25 Cangqdiq cij dwg gouq gyoengqraeuz hih bouxcawj. De ndaej baujhuq faenhsou, mbouj hawj faenhsou ngaiz famh coih, hawj faenhsou ndaej guh boux mij gijmaz ndaej diudik he, ndaej angq vaujvauq hwj ndwn youq dangqnaj de. Muengh dunghgoq bouxcawj raeuz Yehsuh Gihduz, najrongh miz vi miz rengz miz gienz daj gaihcij daengz seizneix daengz yungjyenj cungj dwg gvi hawj caenhgag de cij dwg Cangqdiq he! Ahmaenz.
1 Laj neix dwg Cangqdiq hawj Yehsuh Gihduz dawz gij saeh ijvanh fatseng he gangj naeuz doengh bouxhoiq de ni. Couh vih yienghneix, Yehsuh Gihduz couh baij bouxcai de daeuj naeuz gou, Yozhanq bouxhoiq de ni. 2 Gajlaeng gou, Yozhanq couh dawz gij vah Cangqdiq caeuq Yehsuh Gihduz soj cingqmingz hih, fanjcingq bonjfaenh gou soj yawjraen hih soj dingqri hih, cungj sij hwnjdaeuj guh baengzgawq. 3 Doeg bonj saw neix hih vunz caeuq dingq daengz ndaw saw neix soj sij hih gij vah Cangqdiq hih caemh ciuq ndaw de soj naeuz hih yienghmwnq bae guh hih vunz miz fuk lo, aenvih mwhde couh ij daengz lo. 4 Gou, Yozhanq, sij saenq hawj Yaqsiqyaq Saengj caet aen gyauqveiq. Muengh boux gaxgonq seizneix baezneix yungjyenj miz dih Cangqdiq caeuq youq dangqnaj aen lungzeij de hih caet gij hoenzsaenz 5 caeuq boux lauxsaed sinq ndaej goq dih cingqyinz, daixit boux daj rai ndaej dauqlix, guh lajmbwn sojmiz vuengz hih vuengz dih Yehsuh Gihduz doiq faenhsou haijliengh, hawj faenhsou bingzan. De aiq gyoengqraeuz, vih ij hawj gyoengqraeuz ndaej duet ok coih hwj ngaiz riuz lwed vwt mingh; 6 de hawj gyoengqraeuz ndaej laeb baenz aen guek he, hawj raeuz ndaej guh boux goengjsae dajbwiz daxboh de, Cangqdiq. Muengh najrongh caeuq gienzveih cungj yungjyungj yenjyenj gvi hawj de! Ahmaenz. 7 Gou naeuz sou ni, cenz lajmbwn sojmiz hih vunz cungj ij yawjraen de caeuq gij fwj daj gwnzmbwn roengz daeuj, daiqlienz ndaemq de hih vunz cungj ij yawjraen de. De daeuj hih mwhde, lajmbwn sojmiz hih minzcuz cungj siengsim gikheiq hwj daej. Doenghgij saeh neix gaengjdingq ij fatseng. Ahmaenz. 8 Bouxcawj raeuz Cangqdiq naeuz: “Gou dwg Ahlahfaz, gou dwg Ngozmeizgyaz; gou dwg boux gaxgonq seizneix baezneix yungjyenj miz dih akak rengzrengz gaiqgaiq cungj ndaej guh daengz dih Cangqdiq.” 9 Gou dwg Yozhanq, dwg caeuq faenhsou doxdoengz vih Yehsuh Gihduz hwj souh nanh, doxdoengz ndaej youq ndaw guek Cangqdiq yangjfuk, doxdoengz naenxsim mbouj doeknaiq hih beixnuengx. Caemh dwg vih ij cenz gij vah Cangqdiq caeuq vih ij guh Yehsuh dih cingqyinz hwj ngaiz boenq bae daengz aen dauj heuh Bazmoh he youq he. 10 Miz ngoenzsinghgiz he, Hoenzsaenz Cangqdiq doz youq gwnz ndang gou, hawj gou ndaej dingqri baixlaeng gou caenh lujnaeuz boq gywnhhauh yienghmwnq gog saxsax doiq gou naeuz: 11 “Mwngz ij dawz mwngz soj yawjraen hih sij hwnjdaeuj, fak bae hawj Hijfuzsoj Singz hih gyauqveiq hah, Swqmeijnaz Singz hih gyauqveiq hah, Bezgyahmoh Singz hih gyauqveiq hah, Deihyajdeihlah Singz hih gyauqveiq hah, Sajdiz Singz hih gyauqveiq hah, Feihlahdezfeih Singz hih gyauqveiq hah, Laujdijgyah Singz hih gyauqveiq hah, caet aen gyauqveiq neix.” 12 Gou dingqri yienghneix le, couh siengj veq goqma yawjyawj dauqdaej dwg byawz doiq gou gangj vah. Gou yienghneix naemj le, couh veq goqma yawj. Baex yawj he, engq yawjraen miz caet aen gyaqdaeng gim. 13 Caet aen daeng neix hih cungqgyan de miz boux he luj vunz nwih. De daenj buh raez rangxrangh, raez daengz laj din de, aen aek de cug miz sai gim hwj, 14 gij byoem de bieg supsup luj mwi caemh luj fwn yiengz bieg, cehra de ronghndongq luj duj feiz, 15 song gij ha de ndongq ndwtndwt myig myiengzmyiengz caenh luj gij doengz youq ndaw luz dizlenq goq cat goq he yienghmwnq, gij sing de luj raemxfai biu yienghmwnq gog saxsax. 16 Gij fawz gvaz de dawz miz caet aen ndaundeiq, conghbak de hamz miz fag giemq raeh satsat he, gij byai giemq de dwg yiengq doxok he. Baj naj de rongh sagsag luj gyangjngoenz yienghmwnq. 17 Gou baex yawjraen he, couh lau hwj laemxdengx youq dangqnaj de, iet sohsangh luj vunzrai nwih. De raen yienghneix le, couh aeu fawz gvaz de ma oemj gwnz ndang gou doiq gou naeuz: “Gaej lau, gaej lau! Gou dwg gaihcij, gou dwg gatsat lah. 18 Gou dwg seiqseiz lix hih. Gou rai goq, hoeng gou seizneix dwg lix hih; mbouj danhcij naeuz dwg lix, vanzlij dwg yungjyungj yenjyenj lix, caemh dwg cangjguenj rai caeuq ndawlaep hih seiz dou. 19 Sojhij, gou naeuz mwngz, mwngz ij dawz mwngz soj yawjraen hih, couh dwg seizneix caeuq baezneix ij fatseng hih, cungj ij sij geiq hwnjdaeuj. 20 Gangj daengz mwngz soj yawjraen hih, couh dwg fawz gvaz gou dawz caet aen ndaundeiq caeuq caet aen gyaqdaeng gim, gij iqswh de dwg naeuz: caet aen ndaundeiq dwg daiqbiuj caet aen gyauqveiq dih caet bouxcai; caet aen gyaqdaeng gim couh dwg daiqbiuj caet aen gyauqveiq.”
1 Boux de yienghneix naeuz le, gajlaeng vanzlij caiq doiq gou naeuz: “Mwngz ij sij saenq hawj bouxcai Hijfuzsoj gyauqveiq; mwngz ij yienghneix sij naeuz: Boux fawz gvaz dawz caet aen ndaundeiq, youq cungqgyan caet aen gyaqdaeng gim mwnq byaij hih boux mwnq yienghneix naeuz: 2 Gou rox mwngz soj guh hih dwgrengz caeuq gyenhciz roengzbae, caemh rox mwngz dwgcaengz vunz rwix vunz vaih. Mwngz caemh caz goq doenghheij gag naeuz bonjfaenh dwg dwzbaijyienz he, caz ndaej ok gyoengqde dwg gyaj hih, doenghheij vunz mwnq. 3 Gou caemh rox mwngz vih gou hwj dwgrengz sinhoj, mbouj doeknaiq. 4 Hoeng, miz gienh saeh he, gou ij naeuz mwngz, couh dwg naeuz mwngz mbouj luj gaxgonq yienghmwnq miz aiqsim laem lo. 5 Mwngz gag ngeixngeix yawj, mwngz bienq vaih daengz yienghlaw bae lo. Mwngz ij nginh loek gaijgoq, ij dauqyungz luj gaxgonq yienghmwnq miz aiqsim hwj bae guh saeh. Mbouj nex, gou couh bae mwngz mwnq, dawz aen gyaqdaeng mwngz daj mwnq yienzlaiz he dawz deuz. 6 Cijmboujgoq nex, mwngz vanzlij miz gij ndei he, couh dwg mwngz caeuq gou doxdoengz cungj dwg dwgcaengz gij vunz gaep haeuj Nizgohlah gyauqbaij soj guh hih. 7 Hoenzsaenz Cangqdiq yiengq gak aen gyauqveiq soj gangj hih vah, faenhsou cungj ijaeu dawz haeuj rwz dingq! Ndaej hingz hih vunz, gou couh nyok gienz hawj de, hawj de ndaej gw gij mak ndaw suen Cangqdiq hih gij mak go faex hawj vunz ndaej miz mingh mwnq.” 8 Boux de vanzlij caiq naeuz: “Mwngz caemh ij sij saenq hawj bouxcai Swqmeijnaz gyauqveiq; mwngz ij yienghneix sij naeuz: Boux gaihcij caeuq gatsat caemh dwg rai le dauqlix he yienghneix naeuz: 9 Gou rox mwngz souh nanh caemh gungz, hoeng gizsaed mwngz dwg fouqmiz hih. Gou caemh rox, doenghheij gag naeuz bonjfaenh dwg Youzdaiq vunz hih bangjlaih mwngz—gizsaed gyoengqde gaenhbaenj mbouj dwg Youzdaiq vunz, dauq dwg buek vunz Sajdanq fangzvuengz lah. 10 Gou naeuz mwngz ni, mwngz gaej lau mwngz ij ngaiz souh daengz hih nanh, couh dwg fangzvuengz ij dawz faenhsou ndaw de geij boux bae gyaeng, bae sawq, bwkhaih cib ngoenz. Mwngz cungj ij gyenhciz, rai cungj mbouj lau; yienghmwnq gou couh nyok cangjbyimj hawj mwngz ndaej seiqseiz lix. 11 Hoenzsaenz Cangqdiq yiengq gak gyauqveiq soj gangj hih vah, faenhsou cungj ijaeu dawz haeuj rwz dingq! Ndaej hingz hih gaengjdingq mbouj ngaiz rai daixngeih mbat.” 12 Boux de vanzlij caiq naeuz: “Mwngz ij sij saenq hawj bouxcai Bezgyahmoh gyauqveiq; mwngz ij yienghneix sij naeuz: Boux miz fag giemq bak giemq huz giemq cungj raeh he yienghneix naeuz: 13 Gou rox, gannaeuz mwngz youq mwnq Sajdanq fangzvuengz soj guenjciq hih deixfueng lah, hoeng mwngz vanzlij dwg gyenhciz mbouj yiem gou, mbouj vwt gou, simqciq mwh Anhdizbaq boux sinq ndaej goq neix dih boux cingqyinz gou youq faenhsou mwnq, couh dwg youq Sajdanq soj youq hih deixfueng, ngaiz gaj hih mwhde, mwngz vanzlij gyenhciz sinq gou, mbouj doeknaiq. 14 Hoeng gou miz geij gienh saeh ij naeuz mwngz, couh dwg youq mwngz mwnq miz vunz dingq Bahlanz soj son hih; boux Bahlanz neix aux Bahlwz goq, aux de hawj de bae yungx gij vunz Hijswzlez famh coih, yungx gyoengqde bae gw doenghgij bwiz goq duz you he, aux gyoengqde guh ndwet guh youx. 15 Mbouj danhcij yienghneix, vanzlij miz vunz gaep haeuj Nizgohlah gyauqbaij he. 16 Sojhij, gou naeuz hax, mwngz ij wnggai nginh loek gaijgoq; mbouj nex, gou couh ij bae laeng mwngz mwnq, yungh fag giemq ndaw bak gou ma hoenx gyoengqde. 17 Hoenzsaenz Cangqdiq yiengq gak gyauqveiq soj gangj hih vah, faenhsou cungj ijaeu dawz haeuj rwz dingq! Ndaej hingz hih, gou gaengjdingq ij nyok gij mahnaq yo hwnjdaeuj mwnq hawj de. Mbouj danhcij nyok gij neix, vanzlij ij nyok ngauq rin bieg he hawj de. Ngauq rin neix gwnz de sij miz gij coh moq he. Caenhgag doengh boux ndaej daengz ngauq rin neix hih vunz cij rox gij coh neix dwg gijmaz; doengh boux mbouj ndaej hih gaenhbaenj mbouj rox.” 18 Boux de vanzlij caiq naeuz: “Mwngz ij sij saenq hawj bouxcai Deihyajdeihlah gyauqveiq; mwngz ij yienghneix sij naeuz: Daeglwg Cangqdiq, couh dwg boux cehra de ronghndongq luj duj feiz, gij ha de myig luj doengz he, de yienghneix naeuz: 19 Gou rox mwngz soj guh hih aiqsim hah, sinqsim hah, swqhaeuh hah, caeuq gyenhciz hah, caemh rox mwngz seizneix soj guh hih ndeisaeh beij gaxgonq guh ndaej lai. 20 Hoeng, gou miz gienh saeh he ij naeuz mwngz, couh dwg mwngz mbouj naeuz Yehsijbez meh vunz gag naeuz bonjfaenh de dwg boux cenz gij vah Cangqdiq he hih meh neix; de yungx doenghheij hoiq gou bae guh ndwet guh youx, caemh yungx gyoengqde hawj gyoengqde gw gij bwiz goq duz you he. 21 Gou hawj de gihveiq nginh loek gaijgoq hwj, hoeng, de cungj mbouj haenj gaij gij ndaengndwet guhyoux de. 22 Sojhij, gou couh ij hawj de bingh hwj mbouj ndaej hwnq congz. Doenghheij caeuq de guhyoux hih vunz, hauhnaeuz gyoengqde mbouj nginh loek gaijgoq nex, gou caemh gaengjdingq hawj gyoengqde caeuq de doxdoengz ngaiz souh gij nanh neix. 23 Mbouj danhcij naeuz yienghneix, gou vanzlij ij gaj doenghheij vunz gaen de he, yienghmwnq couh ndaej hawj gyauqveiq rox gou dwg boux yawj vunz cingx goq gingq bohliz bae he, caemh dwg ij ciuq faenhsou gak vunz soj guh hih ma bauqwngq hawj gak vunz he. 24 Doiq doenghheij youq Deihyajdeihlah lij lw hih mbouj dingq mbouj gaen meh vunz mwnq hih, caemh mbouj hag Sajdanq dih ndaek cungj geizheih hawj vunz hoj rox hih cungj dauhleix mwnq hih vunz, gou naeuz sou ni, gou mbouj hawj faenhsou miz maz law. 25 Hoeng, faenhsou ij gyenhciz sinq gij saedsaeh Cangqdiq, itcig gyenhciz daengz gou daeuj. 26 Doenghheij ndaej hingz hih ndaej gyenhciz ciuq gou soj gangj hih yienghmwnq bae guh hih, gou ij nyok gienz hawj de, hawj de ndaej guenjciq lajmbwn sojmiz hih guek, 27 caemh luj boh gou nyok hawj gou hih yienghmwnq; de ij aeu mbaenq diet ma guenj gyoengqde, guenj gyoengqde caemh luj dub doengh aen aeu vax ma guh he yienghmwnq dub soiq gyoengqde. 28 Gou caemh ij nyok ndauhaet hawj de. 29 Hoenzsaenz Cangqdiq yiengq gak gyauqveiq soj gangj hih vah, faenhsou cungj ijaeu dawz haeuj rwz dingq!”
1 Boux de vanzlij caiq naeuz: “Mwngz ij sij saenq hawj bouxcai Sajdiz gyauqveiq; mwngz ij yienghneix sij naeuz: Boux miz caet gij Hoenzsaenz Cangqdiq caeuq miz caet aen ndaundeiq hih naeuz: Gou rox mwngz soj guh hih; gou caemh rox, gannaeuz miz vunz naeuz mwngz dwg lix hih, hoeng, gizsaed mwngz dauq dwg rai hih! 2 Sojhij mwngz ij singqsag goqdaeuj, dawz mwngz lij lw hih ij rai senxsenx hih fuk hwnjdaeuj, hoenz hwnjdaeuj bax, aenvih gou raen mwngz soj guh hih mij saek yiengh ndaej youq ndaw lwgra Cangqdiq gou suenq dwg guh ndaej liux he. 3 Sojhij mwngz ijaeu ndaejgeiq mwngz soj dingq soj hag hih, cungj ij ciuq bae guh, caemh ij nginh loek gaijgoq. Hauhnaeuz mwngz mbouj singqsag goqdaeuj nex, gou couh luj bouxcaeg yienghmwnq sawqmwh bae daengz mwngz mwnq; gou seizlaw bae daengz mwngz mwnq, mwngz gaenhbaenj mbouj rox. 4 Cijmboujgoq youq Sajdiz mwngz mwnq vanzlij miz mbangj hih vunz mij ngaiz coih uq dawz; doenghgij vunz neix boiqndaej daenj buh bieg hwj caeuq gou gaen gou. 5 Doenghheij ndaej hingz hih vunz couh ij daenj buh bieg. Doenghheij vunz neix, gou gaengjdingq mbouj daj ndaw bonjbouh daengh miz doenghgij coh doengh boux miz mingh he duz bae; mbouj danhcij yienghneix, vanzlij youq dangqnaj daxboh gou caeuq dangqnaj gyoengq cai daxboh gou nginh de dwg gij vunz gou. 6 Hoenzsaenz Cangqdiq yiengq gak gyauqveiq soj gangj hih vah, faenhsou cungj ijaeu dawz haeuj rwz dingq!” 7 Boux de vanzlij caiq naeuz: “Mwngz ij sij saenq hawj bouxcai Feihlahdezfeih gyauqveiq; mwngz ij yienghneix sij naeuz: Boux gvi haeuj Cangqdiq, sinq ndaej goq he, dawz gij seiz Daqveiq goengjvuengz neix he, caemh hoi dou le mij'z vunz ndaej haep he, haep le caemh mij'z vunz ndaej hoi he hih boux mwnq naeuz: 8 Gou rox mwngz soj guh hih; gannaeuz mwngz rengz noix lah, hoeng, mwngz dauq gyenhciz ciuq gou soj gangj hih yienghmwnq bae guh, caemh nginh dwg lwgsae gou, mbouj yiem gou. Sojhij gou youq dangqnaj mwngz hoi aen dou he hawj mwngz; aen dou neix dwg mij'z vunz ndaej haep hih. 9 Gou naeuz mwngz ni hax, doenghheij gaep haeuj Sajdanq baij hih doenghheij vunz mwnq gag naeuz bonjfaenh gyoengqde dwg Youzdaiq vunz, gizsaed cungj dwg gyaj hih. Doenghheij vunz neix gou ij hawj gyoengqde daeuj daengz dangqnaj mwngz gvih youq henz din mwngz baiq mwngz sax mwngz, hawj gyoengqde rox gou aiq mwngz hih. 10 Aenvih mwngz gyenhciz ciuq gou gangj hih yienghmwnq bae guh, sojhij daengz baezneix lajmbwn sojmiz hih vunz cungj souh daengz daixnanh, cungj ngaiz sawq hih mwhde, gou gaengjdingq ij baujhuq mwngz. 11 Gou naeuz mwngz ni, gou couh ij daeuj daengz lo. Mwngz ij baux ndei mwngz soj miz hih, mienxndaej ngaiz vunz dued aeu gij cangjbyimj mwngz ijvanh ndaej daengz hih. 12 Ndaej hingz hih vunz, gou ij hawj de bienqbaenz diuz saeu ndaw gunghdenq Cangqdiq gou, hawj de ndaej seiqseiz youq mwnq. Gou caemh ij youq gwnz ndang de sij gij coh Cangqdiq gou, caeuq gij coh moq gou, caeuq gij coh aen singz Cangqdiq gou, couh dwg daj gwnzmbwn Cangqdiq gou mwnq roengz daeuj hih aen singz moq Yehluqsajlaengj. 13 Hoenzsaenz Cangqdiq yiengq gak gyauqveiq soj gangj hih vah, faenhsou cungj ijaeu dawz haeuj rwz dingq!” 14 Boux de vanzlij caiq naeuz: “Mwngz ij sij saenq hawj bouxcai Laujdijgyah gyauqveiq; mwngz ij yienghneix sij naeuz: Boux ahmaenz, couh dwg boux lauxsaed sinq ndaej goq dih cingqyinz, boux Cangqdiq cauh sojmiz hih doenj he, de yienghneix naeuz: 15 Gou rox mwngz soj guh hih, caemh rox mwngz mbouj caep mbouj ndat. Hoeng, gou dauq cingxnyienh mwngz ganhseiq caep, cixnaeuz ganhseiq ndat suenq lo. 16 Aenvih mwngz luj raemx raeuj remxremh yienghmwnq, mbouj caep mbouj ndat mij'z yungh, sojhij gou ij daj ndaw bak gou byiq mwngz okdaeuj. 17 Gou caemh rox mwngz gag naeuz: ‘Gou fouqmiz hwx, gaenq fatcaiz lo; gijmaz cungj miz.’ Hoeng, gou naeuz mwngz hax, mwngz gaenhbaenj mbouj rox bonjfaenh mwngz baenxlai camj, baenxlai siliengz, baenxlai gungz, ra cix fangz, cix mij'z buh daenj, loxgenz loxgangh. 18 Sojhij gou vanzlij dwg gienq mwngz laeng gou cawx gij gim gaenq dizlenq goq he suenq lox, yienghmwnq hawj mwngz ndaej bienqbaenz cingqcaen fouqmiz he, hawj mwngz ndaej cawx buh bieg, ndaej daenj hwj cw aen ndangnoh hawj vunz rox saetnaj saetnyaenq mwngz, caemh ndaej cawx yw ra ma cat cehra mwngz, hawj mwngz yawj ndaej raen. 19 Famz dwg gou aiq hih, gou cungj naeuz cungj guenj. Sojhij mwngz mbouj ndaej caiq mbouj caep mbouj ndat haem lo; ij ndat hwnjdaeuj cij ndaej, caemh ij nginh loek gaijgoq. 20 Gou naeuz mwngz ni, gou youq baixrog dou ndaek dou; hauhnaeuz miz vunz dingqri le couh hoi dou hawj gou hih, gou couh haeuj bae caeuq de itheij gw haeux. 21 Doenghheij ndaej hingz hih vunz, gou couh ij nyok hawj de miz gienz ndaej caeuq gou itheij naengh youq aen lungzeij gou, caemh luj gou ndaej hingz le caeuq daxboh gou itheij naengh youq aen lungzeij de yienghmwnq. 22 Hoenzsaenz Cangqdiq yiengq gak gyauqveiq soj gangj hih vah, faenhsou cungj ijaeu dawz haeuj rwz dingq!”
1 Boux de gangj sat doenghgij vah neix le, gajlaeng gou caiq yawjraen gwnzmbwn miz aen dou he hoi hwj. Gaxgonq gou dingqri goq hih gij sing gog saxsax luj boq gywnhhauh mwnq caiq doiq gou naeuz: “Mwngz hwnj dineix daeuj; gou ij naeuz mwngz ni baezneix gaengjdingq ij fatseng hih saeh.” 2 Gou dingqri gij sing neix yienghneix naeuz le, Hoenzsaenz Cangqdiq couh majcangq doz youq gwnz ndang gou hawj gou yawjraen gwnzmbwn miz aen lungzeij he; aen de miz boux he naengh hwj. 3 Baj naj boux de rongh sagsag luj bizhiq caeuq luj hungzbaujsig nwih; seiqhenz eij de miz luj luzbaujsig, caemh luj saijdoengz yienghmwnq gvaengx goqbae. 4 Seiqhenz eij de caemh vanzlij miz ngeihseiq mwnq naengh, caemh miz ngeihseiq boux boux gangj vah couh baenz he daenj buh bieg hwj, gwnz raeuj gyoengqde caemh gyok miz gyokraeuj gim hwj, naengh youq mwnq. 5 Aen lungzeij mwnq miz byajmyig byajraez, miz sing yiengj rumxrumx. Dangqnaj aen lungzeij mwnq diemj miz caet aen daeng; caet aen daeng neix couh dwg caet gij Hoenzsaenz Cangqdiq. 6 Dangqnaj aen lungzeij mwnq miz aen haij bohliz he myig myiengzmyiengz luj ceijsingh nwih. Seiqhenz aen lungzeij mwnq couh dwg ngeihseiq aen eij caeuq lungzeij dih cungqgyan de miz seiq duz doenghduz; doengh duz de dangqnaj baixlaeng cungj miz ra. 7 Daixit duz luj duz caiceij, daixngeih duz luj cwzlwg, daixsam duz baj naj de luj baj naj vunz, daixseiq duz luj duz yiuh mbin. 8 Seiq doenghduz neix duzduz cungj miz roek gij fwed, baixndaw baixrog cungj miz ra hwj rim bae. Gyoengqde ngwnzngoenz cungj mbouj dingz hih haenh naeuz: Singq hwx! Singq hwx! Singq hwx! Bouxcawj raeuz Cangqdiq, gaxgonq seizneix baezneix yungjyungj yenjyenj miz dih akak rengzrengz gaiqgaiq cungj ndaej guh daengz dih Cangqdiq! Singq hwx! 9 Moix it mbat roeb daengz seiq duz mwnq haenh najrongh ing'yungz docih cungj dwg gvi hawj boux seiqseiz lix hih boux naengh youq aen lungzeij mwnq hih mwhde, 10 ngeihseiq boux boux gangj vah couh baenz mwnq cungj gvih bomz roengz dangqnaj boux seiqseiz lix hih boux naengh youq aen lungzeij mwnq bae sax de, caemh duet aen gyokraeuj gim coengq youq dangqnaj aen lungzeij mwnq hwj haenh naeuz: 11 “Bouxcawj raeuz, Cangqdiq raeuz, mwngz dwg boiqndaej najrongh, ing'yungz caeuq gaem gienz he, aenvih mwngz cauh liux sojmiz hih; sojmiz hih cungj dwg ciuq mwngz dih cawjeiq hwj ndaej cauh ndaej miz he.”
1 Gou vanzlij raen boux naengh youq aen lungzeij mwnq, fawz gvaz de dawz miz gienj saw ndaw rog cungj sij miz saw he; gienj saw neix mwnq gienj sat de miz caet mwnq aeu lab ma demj hwj fung he. 2 Gou vanzlij yawjraen boux bouxcai Cangqdiq hoenz hwdhwd rengz dwddwd he hemq goggog naeuz: “Byawz miz swhgwz boiqndaej mbek caet mwnq lab fung gienj saw neix hwj hoi gienj saw neix nej?” 3 Boux de yienghneix hemq naeuz, hoeng, gwnzmbwn, lajdeih, laj lajdeih cungj mij'z vunz miz swhgwz boiqndaej hoi gienj saw neix hwj doeg. 4 Gou raen mij'z vunz ndaej miz swhgwz boiqndaej hoi gienj saw neix hwj doeg le, couh doeknaiq hwj daej goggog hwnjdaeuj. 5 Yiengq, doengh boux boux gangj vah couh baenz he hih ndaw de miz boux he couh doiq gou naeuz: “Gaej daej, gaej daej; hawjm'z yawj hux, boux daj Youzdaq cuz ok daeuj hih caiceij, Daqveiq dih doengh daih gajlaeng dih boux mwnq, gaenq ndaej hingz lo. De ndaej mbek caet mwnq fung mwnq, ndaej hoi gienj saw mwnq lo.” 6 Gajlaeng gou caiq yawjraen duz yiengzlwg luj ngaiz vunz gaj goq he ndwn youq gaenh aen lungzeij baixndaw seiq duz doenghduz mwnq; gwnz ndang de miz caet gij gok caeuq caet cehra, couh dwg baij bae daengz ciqgyaiq gak dieg dih caet gij Hoenzsaenz Cangqdiq he. 7 Duz yiengzlwg mwnq byaij goqbae, daj ndaw fawz gvaz boux naengh youq aen lungzeij mwnq aeu gienj saw mwnq ma. 8 Couh youq mwhneix, seiq duz doenghduz mwnq caeuq ngeihseiq boux boux gangj vah couh baenz mwnq cungj gvih bomz roengz dangqnaj duz yiengzlwg mwnq bae, gak duz, gak boux ndaw fawz cungj dawz miz aen gimz he caeuq riuj miz aen luz gim coux rim gij yieng he. Gij yieng neix couh dwg daiqbiuj gij vunz Cangqdiq gouzhaenh de he. 9 Gyoengqde ciengq diuz go moq he, ciengq naeuz: Mwngz boiqndaej dawz gienj saw, Boiqndaej mbek gij lab fung, Aenvih mwngz ngaiz vunz gaj goq. Mwngz yungh gij lwed mwngz Daj gak cuz, gak minzcuz, gak guek, gak mwnq vunz gangj mbouj doengz hih vah, Cueg gij vunz ma gvi hawj Cangqdiq, 10 Hawj gyoengqde ndaej bienqbaenz gij vunz aen guek Cangqdiq, Guh boux goengjsae dajbwiz Cangqdiq; Gyoengqde ij youq lajmbwn guh vuengz gaem gienz. 11 Gyoengqde yienghneix ciengq le, gajlaeng, gou vanzlij caiq yawjraen caemh dingqri youq seiqhenz aen lungzeij mwnq caeuq seiq duz doenghduz mwnq caeuq doengh boux boux gangj vah couh baenz mwnq miz ciencien fanhfanh boux bouxcai Cangqdiq 12 hemq goggog naeuz: Ngaiz gaj goq hih yiengzlwg boiqndaej gaem gienz, Boiqndaej fouqmiz, Boiqndaej coengjmingz, Boiqndaej miz rengz, Boiqndaej ing'yungz, Boiqndaej najrongh caeuq haenh. 13 Gajlaeng, gou vanzlij caiq dingqri gwnzmbwn, lajdeih caeuq laj lajdeih, caeuq ndaw haij, caeuq lajmbwn sojmiz cauh okdaeuj hih cungj naeuz: Muengh haenh, ing'yungz, najrongh, gaem gienz cungj yungjyungj yenjyenj gvi hawj boux naengh youq aen lungzeij mwnq caeuq duz yiengzlwg mwnq! 14 Gyoengqde yienghneix naeuz sat le, seiq duz doenghduz mwnq couh naeuz: “Ahmaenz!” Gyoengq doengh boux gangj vah couh baenz mwnq caemh bomz roengzbae sax.
1 Gajlaeng gou yawjraen duz yiengzlwg mwnq mbek caet mwnq lab fung gienj saw mwnq hih daixit mwnq hih mwhde, gou dingqri seiq duz doenghduz mwnq hih duz he gij sing de luj byajraez nwih naeuz: “Daeuj!” 2 Gajlaeng gou couh yawjraen miz duz max bieg he; boux gwih youq gwnz gumq duz de dawz naqgung hwj. Boux de ciep aeu aen dang vuengz cij ndaej daenj hih aen gyokraeuj mwnq le, couh bae doxhoenx lo. De dwg hingz le caiq ndaej hingz. 3 De mbek daengz daixngeih mwnq lab fung hih mwhde, gou caiq dingqri daixngeih duz naeuz: “Daeuj!” 4 Gajlaeng gou couh yawjraen miz duz max hoengz he; boux gwih duz de mwnq ndaej ndaek fag giemq hung he, ndaej miz gienz ndaej hawj lajmbwn fatseng hoenxciengq, ndaej hawj vunz doxgaj. 5 De mbek daengz daixsam mwnq lab fung hih mwhde, gou dingqri daixsam duz naeuz: “Daeuj!” Gajlaeng gou couh yawjraen miz duz max ndaem he; boux gwih duz de ndaw fawz de dawz miz aen denhbingz he. 6 Gajlaeng gou caiq dingqri youq ndaw seiq duz mwnq lujnaeuz miz sing naeuz: “Ngoenz he dih ngaenzhong cijngamq ndaej cawx it cingh hih mienh'iq; ngoenz he dih ngaenzhong cijngamq ndaej cawx sam cingh hih mienhhung. Youz caeuq laeuj mbouj ndaej luenh sai.” 7 De mbek daengz daixseiq mwnq lab fung hih mwhde, gou dingqri daixseiq duz naeuz: “Daeuj!” 8 Gajlaeng, gou couh yawjraen miz duz max mong he; boux gwih duz de mwnq gij coh de heuh ‘Rai,’ gaen youq gajlaeng de hih couh dwg ‘Ndawlaep.’ Gyoengqde miz gienz ndaej aeu giemq aeu iekvangh aeu binghraq caeuq aeu duz nyaen yak ma byaeu gij vunz lajmbwn dih seiq faenh cih it. 9 De mbek daengz daixhaj mwnq lab fung hih mwhde, gou yawjraen laj aen luz dajbwiz miz doenghheij vunz vih cenzgangj gij vah Cangqdiq caeuq vih gij saedsaeh Cangqdiq guh cingqyinz hwj ngaiz gaj hih doenghgij vunz mwnq hih hoenzsaenz, 10 hemq goggog naeuz: “Veijdaq dih caenhgag mwngz cij dwg caencwnz dih Cangqdiq hax, ij daengj daengz seizlaw mwngz cij saemjbuenq doenghgij vunz gaj raeuz he, hawj gyoengqde bauqwngq dawz nej?” 11 Gyoengqde yienghneix hemq naeuz le, gajlaeng gijgij hoenzsaenz cungj ndaej diuz buhbauz bieg he. Gajlaeng, caiq miz sing doiq doenghheij hoenzsaenz mwnq naeuz, hawj gyoengqde caiq daengjdaengj, daengj daengz doenghheij caeuq gyoengqde doxdoengz swqhaeuh Cangqdiq dih doenghheij beixbeix nuengxnuengx caemh ij ngaiz gaj he daeuj caeuq gyoengqde ndaej gaeuq soq le cij ndaej. 12 De mbek daengz daixroek mwnq lab fung hih mwhde, gou raen deih doengh youqgaenj raixcaix, gyangjngoenz cix laep saengxsaengx liux, laep hwj ndaem luj boiq ndaem bae, aen ndwen bienq hoengz luj lwed nwih, 13 ndaundeiq gwnzmbwn doek byoegbyoeg roengzbae luj go mak uzvahgoj gij mak mijyaengz sug he ngaiz rumz hung ci hwj doek yienghmwnq. 14 Aen mbwn luj gienj saw ngaiz gienj hwnjdaeuj yienghmwnq mij raen haem lo; bya'bya ndoindoi haijdauj haijdauj cungj daj mwnq yienzlaiz he nod deuz lo. 15 Lajmbwn sojmiz hih vuengz hah, daqcwnz hah, canghgywnh hah, vunz fouq hah, miz gienz miz ciq hih hah, caeuq sojmiz hih hoiq caeuq swqyouz hih vunz hah cungj ndoj haeuj ndaw gamj ndaw rin bae liux. 16 Gyoengqde vanzlij gouz bya, gouz rin naeuz: “Laemx roengz gwnz ndang raeuz daeuj bax! Dawz gyoengqraeuz yo hwnjdaeuj, hawj raeuz ndaej ndoj goq boux naengh youq aen lungzeij mwnq caeuq duz yiengzlwg mwnq dih aeuqheiq bax! 17 Aenvih mwh gyoengqde aeuqheiq hih daengz lo; miz byawz ndwn ndaej gaenj nej?”
1 Doenghgij saeh neix goq le, gajlaeng gou caiq luj fangxngwnzloq yienghmwnq yawjraen miz seiq boux bouxcai Cangqdiq ndwn youq lajmbwn, ndwn youq seiq mienh, it boux it mienh dangx seiq mienh hih rumz, dangx mbouj hawj rumz ci lajdoem, ci haij, caeuq ci faex. 2 Gajlaeng, gou caiq yawjraen miz daixlingh boux bouxcai Cangqdiq dawz aen yaenq yungjyenj mbouj rox rai dih Cangqdiq daj baixdoeng daeuj, daeuj doiq seiq boux bouxcai ndaej miz gienz ndaej sienghaih dieg caeuq haij caeuq faex mwnq hemq naeuz: 3 “Faenhsou mbouj ndaej sienghaih dieg, haij caeuq faex; daengj raeuz sien yaenq aen cangh haeuj najbyak doenghheij hoiq Cangqdiq bae gaenq.” 4 Gajlaeng, gou dingq naeuz youq najbyak yaenq miz yaenq hih, miz cibseiqfanh seiq Hijswzlez vunz, ndaw de gak aen cuz hih vunz cungj miz, couh dwg: 5 Youzdaq cuz miz fanhngeih vunz, Lijbenq cuz miz fanhngeih vunz, Gyahdwz cuz miz fanhngeih vunz, 6 Yaqsez cuz miz fanhngeih vunz, Nazfuzdahliq cuz miz fanhngeih vunz, Majnazsih cuz miz fanhngeih vunz, 7 Sihmenj cuz miz fanhngeih vunz, Liqveiq cuz miz fanhngeih vunz, Hijcazgyah cuz miz fanhngeih vunz, 8 Sihbuqlwnz cuz miz fanhngeih vunz, Yozswz cuz miz fanhngeih vunz, Benqyajminj cuz miz fanhngeih vunz. 9 Gajlaeng gou caiq yawjraen miz baenxbienh vunz, geq cungj hoj geq ndaej liux he, daj ciqgyaiq gak guek, gak cuz, gak minzcuz, gak mwnq vunz gangj mbouj doengz hih vah daeuj. Gyoengqde daenj buh bieg, fawz caemh dawz mbaw faex luj mbaw bingqbeiz he hwj ndwn youq dangqnaj aen lungzeij caeuq duz yiengzlwg 10 hemq goggog naeuz: “Ndaej gouq cungj dwg coengz naengh youq aen lungzeij dih Cangqdiq caeuq duz yiengzlwg!” 11 Gyoengq cai Cangqdiq caemh ndwn youq seiqhenz aen lungzeij caeuq gyoengq boux gangj vah couh baenz he caeuq seiq duz doenghduz mwnq, naj yiengq aen lungzeij bae baiqsax Cangqdiq, 12 naeuz: “Ahmaenz! Haenh, najrongh, coengjmingz, docih, ing'yungz, miz gienz, miz rengz, cungj dwg gvi hawj raeuz dih Cangqdiq, itcig yungjyenj roengzbae. Ahmaenz!” 13 Gajlaeng, doengh boux gangj vah couh baenz mwnq miz boux he cam gou naeuz: “Gyoengq daenj buh bieg neix dwg byawz lah? Dwg daj nwjh daeuj lah?” 14 Gajlaeng gou han boux de naeuz: “Goengjau, mwngz rox hih.” Gajlaeng boux de couh naeuz: “Doenghheij vunz neix dwg dunghgoq daixnanh, dwg daj ndaw nanh gouq okdaeuj hih, dwg yungh gij lwed duz yiengzlwg ma swiq gij buh gyoengqde hwj bieg hih. 15 Sojhij, gyoengqde ndwn youq dangqnaj aen lungzeij Cangqdiq, caemh youq aen cangqbungz Cangqdiq fungh baixndaw ngwnzngoenz swqhaeuh Cangqdiq. Boux naengh youq aen lungzeij mwnq caemh baujhuq gyoengqde, 16 baujhuq gyoengqde mbouj hawj gyoengqde caiq ngaiz iek, ngaiz hozhawq, mbouj hawj gyoengqde ngaiz gyangjngoenz nditndat yag dawz gyoengqde, sieng dawz gyoengqde, 17 aenvih youq cungqgyan dangqnaj henz aen lungzeij mwnq hih duz yiengzlwg ij ciengx gyoengqde, daiq gyoengqde bae daengz mwnq doenj raemx miz mingh he bae. Gyoengqde sojmiz hih raemxra, Cangqdiq caemh swk hawq hawj gyoengqde.”
1 Duz yiengzlwg caiq mbek daengz daixcaet mwnq lab fung hih mwhde, gwnzmbwn mij saek dij sing, dingh cubcub, daihgaiq dingh miz buenq aen cunghdaeuz yienghneix. 2 Gajlaeng, gou yawjraen ndwn youq dangqnaj Cangqdiq hih caet boux bouxcai mwnq ciep aeu caet aen gywnhhauh. 3 Gajlaeng, caiq miz daixlingh boux bouxcai Cangqdiq dawz aen luz gim diemj yieng he daeuj ndwn youq henz aen luz gim coemh doenghgij dajbwiz. De ciep aeu haujlai yieng, gajlaeng couh dawz yieng coengq hwnj gwnz gij vunz Cangqdiq soj gouzhaenh Cangqdiq hih, youq gwnz aen luz gim dangqnaj aen lungzeij mwnq bae, itheij coemh hwj dajbwiz. 4 Yiengq gij oenq yieng mwnq caeuq gij vunz Cangqdiq soj gouzhaenh hih cungj daj ndaw fawz bouxcai Cangqdiq swng hwnjbae daengz dangqnaj Cangqdiq. 5 Gajlaeng bouxcai Cangqdiq dawz aen luz diemj yieng coux rim gij feiz ndaw luz coemh hwj dajbwiz hwj couh raix roengz lajmbwn bae. De baex raix roengzbae he couh doq miz byajmyig byajraez, miz sing yiengj rumxrumx, caeuq deihdoengh. 6 Gajlaeng, caet boux bouxcai dawz gywnhhauh mwnq couh gaihcij boq lo. 7 Boux daixit boq, couh doq miz byagcaej caeuq feiz gyaux lwed hwj doek roengz lajmbwn bae, yiengq couh doq miz sam faenh cih it hih dieg caeuq sam faenh cih it hih faex caeuq sojmiz hih nywj cungj ngaiz gyemz coemh liux. 8 Yiengq daengz daixngeih boux boq, couh miz luj ndaek aen bya hung he feiz dawz ngaiz gveng roengz haij bae. Gajlaeng sam faenh cih it dih raemx haij couh bienqbaenz lwed, 9 ndaw haij ndaw de dih doenghduz doenghgo cungj ngaiz rai bae sam faenh cih it, ruz caemh ngaiz vaih bae sam faenh cih it. 10 Yiengq daengz boux daixsam boq, couh miz aen ndaundeiq hung he luj duj feiz dawz he daj gwnzmbwn doek roengzbae, doek roengz sam faenh cih it dih dah bae, caeuq doek roengz mboq bae. 11 Aen ndaundeiq hung mwnq gij coh de heuh ‘Haemz,’ sojhij sam faenh cih it dih raemx cungj bienq haemz liux, guh hwj miz haujlai vunz gw gij raemx haemz mwnq cungj ngaiz rai lo. 12 Yiengq daengz daixseiq boux boq, aen gyangjngoenz dih sam faenh cih it, aen ndwen dih sam faenh cih it caeuq sam faenh cih it dih ndaundeiq cungj ngaiz ngig dawz, cungj ngaiz laep. Sam faenh cih it dih doengxngoenz, sam faenh cih it dih doengxhaemh cungj mbouj miz rongh. 13 Gajlaeng gou caiq yawjraen miz duz yiuh he mbin youq gwnzmbwn, caemh dingqri duz de hemq naeuz: “Satsoq lo! Satsoq lo! Lajmbwn hih vunz satsoq lo! Vanzlij miz sam boux bouxcai haem couh ij boq lo!”
1 Yiengq daengz daixhaj bouxcai boq, gou couh yawjraen miz aen ndaundeiq daj gwnzmbwn doek roengz lajmbwn bae he. Doek roengzbae le, aen de couh ciep aeu gij seiz aen vaengz he. 2 Gajlaeng aen de couh hoi aen vaengz mij daej mwnq hih mwnq he, yiengq couh miz oenq daj ndaw vaengz ok daeuj; gij oenq de caenh lujnaeuz daj ndaw aen luzfeiz oenq okdaeuj nwih, oenq hwj gyangjngoenz caeuq aen mbwn cungj amq fubfub liux bae. 3 Gajlaeng engq miz daek daj ndaw oenq mbin okdaeuj, mbin roengz doem bae. Gyoengqde caemh ciep aeu gij rengz luj duz ceh he. 4 Gajlaeng vanzlij dingqri miz sing raengq gyoengq daek, raengq mbouj hawj gyoengqde sienghaih nywj caeuq faex caeuq gak cungj doenghgo heu he, caenhgag ndaej sienghaih doenghheij vunz najbyak mbouj yaenq miz aen yaenq Cangqdiq he. 5 Hoeng, mbouj ndaej gaj gyoengqde, caenh hawj gyoengqde souh nanh haj ndwen ndaej lo; gij nanh neix caenh luj ngaiz duz ceh ndat dawz yienghmwnq. 6 Youq haj ndwen ndaw de, gij vunz cungj cingxnyienh rai hoh lo, hoeng, rai mbouj ndaej; siengj rai cungj hoj rai. 7 Gou vanzlij yawjraen gij yiengh duz daek caenh luj duz max ij bae hoenxciengq yienghmwnq, ndaek raeuj de daiq miz aen gyok gim hwj, baj naj luj baj naj vunz, 8 byoemraeuj luj byoemraeuj vunzbaz, faenz luj faenz caiceij. 9 Aen aek gyoengqde miz baj he luj baj dangj aek diet he nwih. Gyoengqde mbin miz sing hwj, caenh luj duz max doxhoenx riq yienghmwnq hih sing. 10 Gij rieng gyoengqde luj rieng duz ceh yienghmwnq ngaeu, miz doeg hwj, ndaej doeg vunz haj ndwen baenx lai. 11 Gyoengqde miz boux daeuzdaeuz he guenj hwj; boux de couh dwg bouxcai guenj aen vaengz mwnq. Gij coh de ciuq Hihbwzlaiz vah ma heuh couh dwg Yaqbahdoenq, ciuq Hihlaz vah ma heuh couh dwg Yaqbohlwnz, iqswh dwg naeuz ‘boux boqvaiq.’ 12 Yiengq gij nanh daixit goq le, gajlaeng vanzlij ij miz song yiengh nanh haem. 13 Daengz daixroek boux boq, gou couh dingqri miz sing daj aen luz gim dajbwiz dangqnaj Cangqdiq hih seiq gij gok dod de ok daeuj, 14 raengq daixroek bouxcai boq gywnhhauh mwnq naeuz: “Dawz seiq boux bouxcai goenj youq diuz dah hung Youqfazlahdij mwnq coengq bae.” 15 Gajlaeng seiq boux bouxcai mwnq couh ndaej coengq lo. Seiq boux neix Cangqdiq gaenq senqsi cix cwnjbiq ndei ij hawj gyoengqde youq bi neix, ndwen neix, ngoenz neix, mwh neix, gaj lajmbwn sam faenh cih it hih vunz rai bae lo. 16 Gou caemh dingqri miz siuhsiz naeuz gyoengqde daiq miz bingmax song'iq. 17 Yiengq gou youq ndaw luj fangxngwnzloq gou yawjraen gyoengq bingmax hih baj dangj aek de hoengz luj feiz caeuq lamz luj lamzbaujsig caeuq henj luj liuzvangz. Ndaek raeuj gyoengq max luj raeuj caiceij, conghbak gyoengqde boq miz feiz miz oenq miz liuzvangz sam cungj neix ok daeuj hwj. 18 Sam cungj neix dwk rai lajmbwn gij vunz sam faenh cih it. 19 Doenghheij max mwnq hih rengz cungj dwg cizcungh youq conghbak caeuq gij rieng. Gij rieng gyoengqde luj duz ngwz, miz raeuj hwj; gyoengqde cungj dwg aeu gij raeuj neix ma haih vunz he. 20 Gou vanzlij raen doenghheij vunz mij ngaiz doenghgij neix haih dawz rai hih cungj lij mbouj vih bonjfaenh soj guh hih hwj nginh loek gaijgoq, vanzlij dwg bae baiq fangzfangz gveijgveij, caeuq baiq doenghheij aeu gim, aeu ngaenz, aeu doengz, aeu rin, aeu faex ma dik baenz guhbaenz hih, mij ndaej yawjraen hih, mij ndaej dingqri hih, cixcaemh mij ndaej byaij hih doenghheij you mwnq. 21 Gyoengqde caemh mbouj vih bonjfaenh gaj vunz hah, coengqfap hah, ndaengndwet hah, guxcaeg hah hwj nginh loek gaijgoq.
1 Gajlaeng gou caiq yawjraen miz daixlingh boux bouxcai Cangqdiq miz rengz raixcaix he daj gwnzmbwn roengz bae. Gwnz ndang de miz fwj guem hwj, gwnz raeuj de caemh miz saijdoengz, baj naj de luj gyangjngoenz, song gij ha de luj diuz saeu feiz he, 2 ndaw fawz de dawz miz gienj saw iq hoi he. Ha gvaz de yamq youq gwnz haij; ha swix de yamq youq gwnz doem. 3 Boux de hemq goggog luj gij sing duz caiceij yienghmwnq gog. De hemq sat le, couh miz caet mbat byajraez. 4 Caet mbat byajraez goq le, gou cingq ij dawz gij iqswh byajraez mwnq sij geiq hwnjdaeuj lo. Hoeng, couh youq mwhneix, miz sing daj gwnzmbwn doiq gou naeuz: “Caet mbat byajraez soj gangj hih vah mwngz mbouj ndaej sij okdaeuj, ij baujmiz.” 5 Gajlaeng gou caiq yawjraen bouxcai ha he yamq youq gwnz haij ha he yamq youq gwnz doem hih bouxcai mwnq, fawz gvaz de yingx hwnj gwnzmbwn, 6 yinx laeng boux cauh mbwn cauh deih, cauh haij caeuq cauh sojmiz hih seiqseiz lix dih Cangqdiq bae fazsiq baujcingq naeuz: “Cizgyenh daengz lo! 7 Daengj daixcaet boux bouxcai boq gywnhhauh mwhde, Cangqdiq dih giqvaq miqmiz couh ij doiqyienh lo, couh dwg de doiq bouxhoiq de, gyoengq boux cenz gij vah de, gangj goq hih gij giqvaq miqmiz mwnq.” 8 Gajlaeng gou caiq dingqri gij sing gaxgonq daj gwnzmbwn doiq gou gangj vah hih gij sing mwnq caiq doiq gou naeuz: “Bae! Mwngz bae laeng boux gij ha de yamq youq gwnz haij caeuq yamq youq gwnz doem hih bouxcai mwnq aeu gienj saw iq hoi mwnq ma.” 9 Gou dingqri daengz yienghneix le, couh byaij bae daengz bouxcai mwnq, doiq bouxcai mwnq naeuz: “Cingj mwngz dawz gienj saw iq neix hawj gou bax.” Boux de dingq le, couh doiq gou naeuz: “Dawz bae bax, dawz bae gyan roengz dungx bae. Gienj de gaengjdingq hawj aen dungx mwngz haemzhaemz saepsaep, hoeng, conghbak mwngz gaengjdingq dauq diemz subsub, diemz luj dangzrwi nwih.” 10 Couh yienghneix, gou couh daj ndaw fawz bouxcai mwnq aeu gienj saw iq mwnq ma, aeu ma couh gw roengzbae. Gw hih mwhde, ndaw bak gou cingqgawq diemz subsub, hoeng, daengj daengz gou gyan roengzbae le, aen dungx gou cingqgawq roxnginh haemzhaemz saepsaep. 11 Gajlaeng bouxcai mwnq caiq doiq gou naeuz: “Mwngz bietdingh ij dawz gij vah Cangqdiq gvanhhih lajmbwn sojmiz hih vunz hih saeh cenzgangj naeuz vunz ni; mboujguenj aen minzcuzlaw, aen gueklaw, goeng'aklaw, gangj guxmaz vah, cungj ij cenzgangj.”
1 Bouxcai mwnq yienghneix naeuz le, gajlaeng gou vanzlij luj fangxngwnzloq yienghmwnq ciep aeu diuz ganj em luj diuz cik yienghmwnq he, caemhcaiq dingqri miz sing doiq gou naeuz: “Hwnq! Mwngz bae raurau aen laeuz gunghdenq Cangqdiq caeuq aen luz dajbwiz de, caemh geqgeq doenghheij vunz youq ndaw gunghdenq de baiq de he. 2 Hoeng, mboujyungh rau baixrog aen laeuz gunghdenq baixndaw veizciengz mwnq hoengq mwnq lo, aenvih mwnq gaenq hawj doenghheij mbouj dwg gij vunz Cangqdiq he lo. Doenghheij vunz mwnq boqvaiq aen singz gvi hawj Cangqdiq seiqcib ngeih ndwen. 3 Gou ij hawj gienz hawj song boux cingqyinz gou, hawj song boux de daenj buh daehmaz hwj, hawj song boux de bae cenzgangj gij vah Cangqdiq, ij cenz itcien songbak roekcib ngoenz.” 4 Song boux cingqyinz mwnq couh dwg song go makmbi caeuq song aen gyaqdaeng youq dangqnaj bouxcawj lajmbwn sojmiz hih mwnq lo. 5 Song boux mwnq, hauhnaeuz miz vunz siengj haih song boux de nex, couh miz feiz daj conghbak song boux de ok daeuj, gyemz dawz gij vunz haemzcaeuz song boux de rai. Fanjcingq sojmiz ij haih song boux de hih cungj dwg ngaiz yienghneix rai. 6 Song boux mwnq youq mwh cenzgangj gij vah Cangqdiq hih mwhde, miz gienz ndaej fung aen mbwn, mbouj hawj aen mbwn fwn doek, caemh miz gienz ndaej hawj raemx bienq lwed, caemhcaiq miz gienz ndaej seizbienh hawj gak cungj nanh dawz lajmbwn sojmiz hih dieg. 7 Song boux cingqyinz mwnq cenzgangj liux le, miz duz nyaen geizheih he daj ndaw vaengz mwnq ok daeuj hoenx song boux de, hoenxhingz song boux de, gajrai song boux de. 8 Gij seihaiz song boux de baij youq gwnz gai aen singz hung. Aen singz neix aeu beijgangj ma heuh couh dwg heuh Sojdohmaj Singz, caeuq heuh Ngaihgiz, couh dwg mwnq dieg bouxcawj song boux de ngaiz ding hwnj gwnz gyaq cixcib bae hih mwnq lo. 9 Gij seihaiz song boux de baij youq mwnq sam ngoenz buenq, mbouj hawj vunz dawz bae moek, coengq hwj lajmbwn mboujguenj guxmaz vunz cungj ndaej raen: gak minzcuz hah, gak aen cuz hah, gak gangj mbouj doengz hih vah hah, gak guek hah cungj miz vunz raen gij seihaiz song boux de. 10 Lajmbwn hih vunz cungj vih song boux de ngaiz rai hwj angq ij rai, cungj doxsoengq laex, aenvih song boux cenz gij vah Cangqdiq neix hawj gij vunz lajmbwn souh nanh goq. 11 Hoeng, sam ngoenz buenq goq le, Cangqdiq couh hawj gij heiq miz mingh he haeuj gwnz ndang song boux de bae, yiengq song boux de couh ndaej ndwn hwnjdaeuj, guh hwj youq mwnq sojmiz yawjraen hih vunz cungj lau hwj ij rai. 12 Gajlaeng, gou vanzlij dingqri miz sing daj gwnzmbwn doiq song boux de mwnq gangj goggog naeuz: “Hwnj dineix daeuj!” Song boux de dingqri yienghneix le, couh caeuq gij fwj hwnj mbwn bae lo, yiengq doenghheij caeuq song boux de miz haemzcaeuz he caemh yawj song boux de hwnj bae. 13 Couh youq mwh song boux de hwnj mbwn bae hih mwhde, deih doengh youqgaenj raixcaix, guh hwj aen singz mwnq doemq bae baenx cib faenh cih it, vunz cixcaemh ngaiz rai bae caetcien vunz. Lij lix hih vunz cungj lau hwj ij rai bae, couh haenh naeuz youq gwnzmbwn dih Cangqdiq veijdaq raixcaix. 14 Yiengq daixngeih mbat nanh goq lo; daixsam mbat nanh couh ij daengz lo. 15 Yiengq daengz daixcaet boux bouxcai boq gywnhhauh. Boq hih mwhde, gwnzmbwn miz sing hemq goggog naeuz: “Aen ciqgyaiq neix gaenq bienqbaenz aen guek Cangqdiq caeuq aen guek Yehsuh, Cangqdiq soj laeb dih Gihduz lo! Cangqdiq ij yungjyungj yenjyenj guh vuengz gaem gienz roengzbae!” 16 Yiengq youq dangqnaj Cangqdiq hih ngeihseiq boux boux gangj vah couh baenz hih, gag naengh youq mwnq naengh bonjfaenh hih mwnq, dingq daengz yienghneix le, couh bomz roengz doem bae baiqsax Cangqdiq, 17 naeuz: “Gaxgonq, seizneix dih Cangqdiq, akak rengzrengz gaiqgaiq cungj ndaej guh daengz dih Cangqdiq bouxcawj, gyoengqraeuz docih mwngz, aenvih mwngz guh vuengz gaem gienz. 18 Lajmbwn hih vunz cungj fatheiq, hoeng, mwngz caemh fatheiq lo. Mwngz saemjbuenq vunzrai hih mwhde caemh daengz lo. Mwngz cungj cangjliq hawj doengh boux cenz gij vah mwngz hih bouxhoiq mwngz, caeuq gij vunz mwngz yawjnaek mwngz hih; mboujguenj dang ak cixnaeuz yaqyuij, mwngz cungj cangj hawj. Mwngz caemh ij hawj doenghheij boqvaiq ciqgyaiq hih vunz satsoq lo!” 19 Couh youq mwh gyoengqde yienghneix haenh naeuz hih mwhde, aen cangqbungz gwnzmbwn Cangqdiq fungh baixndaw hoi lo; aen gvih coengq miz baengzgawq ndaw cangqbungz mwnq yienh sagsag lo. Gajlaeng, couh miz byajmyig byajraez byagcaej, miz sing yiengj rumxrumx, cix miz deihdoengh.
1 Couh youq mwhneix, gou yawjraen gwnzmbwn miz ndaek gij gingjdoengh he: miz boux vunzbaz he ndwn youq aen ndwen; aen ndang de miz aen gyangjngoenz guem hwj, gwnz raeuj de gyok miz aen guraeuj aeu cibngeih aen ndaundeiq ma guhbaenz he. 2 De mizndang hwj, couh ijvanh seng lwg lo. Sojhij in hwj swenj vauxvaux bae. 3-4 Gajlaeng gwnzmbwn caiq miz daixlingh gij gingjdoengh: miz ndaek duz lungz hoengz hunghung he, gij rieng duz de dawz gwnzmbwn sam faenh cih it dih ndaundeiq baet doek roengz lajdoem bae. Gajlaeng duz de caiq ndwn youq dangqnaj boux vunzbaz ijvanh seng lwgngez mwnq, ndwn hwj ij daengj boux vunzbaz mwnq seng lwg okdaeuj le ndaej gw laeq lwgngez de. Duz de miz caet ndaek raeuj caeuq cib gij gok; caet ndaek raeuj de gyok miz aen guraeuj. 5 Gajlaeng, boux vunzbaz mwnq seng miz laeq lwgmbauq he. Laeq lwg neix dwg baezneix ij dawz mbaenq diet he hwj guenj lajmbwn sojmiz hih guek hih. Gajlaeng laeq lwg neix ndaej gouq hwnj mbwn bae, bae daengz Cangqdiq caeuq aen lungzeij de mwnq. 6 Boux vunzbaz mwnq gajlaeng caemh ndaej deuz bae daengz rogndoi mwnq Cangqdiq cwnjbiq ndei hawj de mwnq, hawj de youq mwnq ndaej daengz itcien songbak roekcib ngoenz dih cauqguq. 7 Gajlaeng gwnzmbwn couh miz doxhoenx. Mijgyahlwz, couh dwg bouxcai Cangqdiq dih daeuzdaeuz, daiq gyoengq cai de daeuj hoenx duz lungz. Yiengq duz lungz caemh caeuq doenghheij cai bonjfaenh de hoenx gyoengq cai, 8 hoeng, hoenx mij ndaej hingz gyoengq cai. Hoenx mij ndaej hingz le, duz de caeuq doenghheij cai de couh mij caiq ndaej youq gwnzmbwn youq haem lo, 9 ngaiz daj gwnzmbwn gveng roengz doem bae lo. Duz lungz neix couh dwg duz fangzvuengz mwnq, caemh dwg heuh Sajdanq hih yaeuh baenx cenz lajmbwn hih duz ngwz laux mwnq lo. De ngaiz gveng roengz doem bae; doenghheij cai de caemh ngaiz gaen gveng roengz doem bae. 10 Couh youq mwh gyoengqde ngaiz gveng roengz doem bae hih mwhde, gou vanzlij dingqri gwnzmbwn miz sing hemq goggog naeuz: “Seizneix couh dwg Cangqdiq gouq vunz hih mwhde daengz lo! Dwg yienh ok Cangqdiq dih gienzveih caeuq guenjciq lo, dwg yienh ok de laeb dih Gihduz dih gienzveih fazveih lo! Aenvih ngwnzngoenz cungj youq Cangqdiq mwnq gauq gij beixnuengx raeuz hih gaenq ngaiz daj gwnzmbwn gveng roengz doem bae lo. 11 Gyoengq beixnuengx ndaej hingz dwg baengh yiengzlwg riuz hih lwed caeuq baengh bonjfaenh gyoengqde soj cenzgangj dih gij saedsaeh Cangqdiq, sijndaej diuz mingh bonjfaenh hwj guh Yehsuh Gihduz dih cingqyinz hwj ndaej hingz hih. 12 Sojhij gwnzmbwn caeuq youq gwnzmbwn hih faenhsou angq bax! Hoeng lajdoem caeuq ndaw haij hih couh ij satsoq lo, aenvih Sajdanq fangzvuengz rox bonjfaenh de dih cizgyenh mbouj geijlai lo, couh aeuqheiq dengxdengx hwj roengz bae daengz faenhsou mwnq lo.” 13 Gajlaeng, duz lungz raen bonjfaenh de ngaiz gveng roengz doem bae le, couh ij bae haih meh vunzbaz ngamq seng lwg vunzsai mwnq. 14 Hoeng, Cangqdiq soengq song gij fwed luj duz yiuh cij miz hih song gij fwed hawj meh vunzbaz mwnq, hawj de ndaej mbin bae daengz rogndoi mwnq cwnjbiq ndei hawj de he mwnq, hawj de ndaej ndoj goq duz lungz mwnq. Youq mwnq, de caemh ndaej daengz sam bi buenq dih cauqguq. 15 Gajlaeng duz lungz mwnq daj ndaw bak boq raemx okdaeuj, boq okdaeuj luj diuz dah he nwih, siengj cung meh de deuz. 16 Hoeng, gij dieg engq aj bak dawz duz lungz boq okdaeuj hih raemx gyan roengzbae liux, bang meh de. 17 Duz lungz raen yienghneix le, couh aeuqheiq meh vunzbaz mwnq hwj ij rai, couh fanjgoqma bae gunghoenx meh vunzbaz mwnq hih gizdah lwg, couh dwg doenghheij soenhsouj Cangqdiq dih mingqlingq gyenhciz vih Yehsuh hwj guh de dih cingqyinz hih gyoengq vunz mwnq. 18 Gajlaeng, duz lungz youq anjsa henz haij ndwn.
1 Gajlaeng, gou caiq yawjraen miz duz nyaen he daj ndaw haij hwnj daeuj. Duz de miz cib gij gok caeuq caet ndaek raeuj; cib gij gok de gokgok cungj gyok miz aen gyokraeuj he, caet ndaek raeuj ndaekndaek cungj sij miz gij goujhauq daekcoih Cangqdiq he. 2 Duz de luj duz gukbeuq, hoeng, gij ha de dauq luj gij ha duz goujyungz, conghbak de luj conghbak duz caiceij. Duz de daj ndaw haij hwnj daeuj le, duz lungz mwnq couh dawz gij rengz bonjfaenh de caeuq aen lungzeij bonjfaenh de caeuq gij gienz bonjfaenh de cungj gyau hawj duz de. 3 Duz nyaen mwnq miz ndaek raeuj he lujnaeuz ngaiz sieng hwj ij rai hoh nwih, hoeng, gaenq ndei lo. Cenz lajmbwn hih vunz cungj geizheih hwj gaen youq gajlaeng hangx duz de. 4 Yiengq, aenvih duz lungz mwnq cungj dawz gij gienz bonjfaenh gyau hawj duz nyaen mwnq lo, sojhij gyoengq vunz baiq duz lungz mwnq caemh baiq duz nyaen mwnq, vanzlij naeuz: “Byawz ndaej caeuq duz nyaen neix beij nej? Byawz ndaej ak goq de nej?” 5 Gajlaeng duz nyaen mwnq caiq ndaej miz conghbak gangj daixbauq he caeuq gangj gij vah daekcoih Cangqdiq he. Duz de vanzlij ndaej gij gienz ndaej seizbienh haenj guh gijmaz couh guh gijmaz baenx seiqcib ngeih ndwen. 6 Duz nyaen mwnq ndaej miz doenghgij neix le, couh gaihcij gangj gij vah daekcoih Cangqdiq he, yawj mbouj hwnj Cangqdiq caeuq yawj mbouj hwnj aen cangqbungz Cangqdiq caeuq yawj mbouj hwnj sojmiz youq gwnzmbwn youq he, 7 caemh bae hoenx gij vunz Cangqdiq, caemh hoenx ndaej goq, caemh bae guenjciq lajmbwn sojmiz hih minzcuz, gak aen cuz hah, gak gangj mbouj doxdoengz hih vah hah, gak guek hih vunz hah. 8 Lajmbwn sojmiz hih vunz, famz dwg daj cauh mbwn cauh deih doxdaeuj hih gij coh mij daengh youq ndaw bonj yiengzlwg ngaiz gaj hih ndaw bonjbouh miz mingh hih vunz, cungj baiq duz de. 9 Miz rwz ndaej dingq hih couh wnggai dingq bax! 10 Ij ngaiz gaemh dawz hih vunz gaengjdingq ngaiz gaemh dawz; ij ngaiz giemq ndaemq rai hih gaengjdingq ij ngaiz rai youq bakgyiemq. Sojhij naeuz dwg gij vunz Cangqdiq hih ijaeu miz naenxsim caeuq miz sinqsim. 11 Gajlaeng, gou vanzlij caiq yawjraen miz daixlingh duz nyaen daj laj doem hwnj daeuj. Duz de miz song gij gok luj gok yiengz; gij sing duz de luj sing duz lungz. 12 Duz de hwnj daeuj le couh yungh gij gienz duz nyaen daixdaeuz soj miz hih, hawj youq lajmbwn sojmiz hih vunz cungj baiq duz ngaiz sieng hwj ij rai hoeng gaenq ndei hih duz nyaen daixdaeuz mwnq. 13 Duz de caemh ndaej guh gij geizmiuj hih saeh, simqciq vanzlij ndaej youq dangqnaj vunzlai hawj feiz daj gwnzmbwn doek roengz doem bae. 14 Duz de ndaej miz gienz bang duz daixdaeuz guh gij geizmiuj hih saeh, guh hwj ndaej coemx lajmbwn hih vunz, hawj gij vunz lajmbwn guh duz you nyaen, guh duz nyaen daixdaeuz ngaiz giemq ndaemq sieng hwj ij rai hoeng gaenq ndei hih duz nyaen mwnq. 15 Duz de vanzlij miz gienz ndaej hawj gij heiq miz mingh he ndaenj haeuj laeng duz you nyaen mwnq bae, ndaej hawj duz you nyaen mwnq gangj vah, caemh hawj doenghheij vunz mbouj baiq duz you nyaen mwnq ngaiz rai. 16 Duz de vanzlij ep sojmiz hih vunz, mboujguenj dang ak cixnaeuz mij dang saek yiengh yaqyuij he, mboujguenj fouq cixnaeuz gungz, mboujguenj swqyouz cixnaeuz guh hoiq hih, cungj ij youq fawz gvaz cixnaeuz youq najbyak yaenq aen yaenq he guh geiqhauh. 17 Aen yaenq geiqhauh neix couh dwg gij coh duz nyaen mwnq cixnaeuz dwg gij coh duz de dih hauqmaj. Famz mbouj yaenq miz aen yaenq neix hih vunz, mbouj ndaej hai mbouj ndaej cawx. 18 Gangj daengz gij hauqmaj duz nyaen dwg gijmaz, mwngz bietdingh ij dwg coengjmingz hih vunz cij ndaej rox. Yiengq, hauhnaeuz mwngz dwg coengjmingz hih vunz nex, couh ndaej suenq okdaeuj lo, aenvih gij hauqmaj mwnq dwg daiqbiuj it boux vunz dih coh, couh dwg roekbak roekcib roek.
1 Gajlaeng gou caiq luj fangxngwnzloq yienghmwnq yawjraen duz yiengzlwg mwnq ndwn youq gwnz bya Cizanh. Caeuq duz de ndwn youq mwnq hih miz cibseiqfanx seiq vunz, najbyak gyoengqde cungj sij miz gij coh duz yiengzlwg mwnq caeuq gij coh daxboh de. 2 Gajlaeng, gou dingqri gwnzmbwn miz sing luj sing raemxfai yienghmwnq biu saxsax caenh luj byajraez, cixcaemh luj sing vunz danz gimz yienghmwnq. 3 Gyoengqde youq dangqnaj aen lungzeij Cangqdiq caeuq youq dangqnaj seiq duz doenghduz caeuq gyoengq vunz gangj vah couh baenz mwnq ciengq gij go moq. Diuz go moq neix, caenhgag doenghheij daj lajmbwn cueg ma hih, couh dwg cibseiqfanx seiq hih doenghheij vunz neix, hag ndaej rox ciengq sat hoh. 4 Doenghheij vunz neix cungj dwg mijyaengz yaek haeuj laeng vunzbaz bae goq he hih vunzsai. Gyoengq vunz neix cungj dwg daj ndaw gij vunz lajmbwn cueg ma gvi haeuj Cangqdiq caeuq gvi haeuj duz yiengzlwg hih daixit buek he. Gyoengqde mboujguenj duz yiengzlwg bae daengz mwnqlaw, gyoengqde cungj caemh gaen bae daengz mwnqlaw. 5 Gyoengqde coengzlaiz mbouj gangj gyajvah, cungj dwg mij maz ndaej diudik he hih. 6 Gajlaeng gou vanzlij caiq yawjraen miz boux bouxcai Cangqdiq he mbin youq gwnzmbwn. De miz seiqseiz mbouj rox bienq dih ndei siuhsiz ij cenz hawj lajmbwn sojmiz hih vunz, mboujguenj aen gueklaw, aen minzcuzlaw, aen cuzlaw, gangj gijmaz vah, de cungj cenz. 7 Boux de mbin youq gwnzmbwn hemq goggog naeuz: “Ij soenhgingq Cangqdiq, ij haenh de veijdaq! Aenvih de saemjbuenq vunz lajmbwn hih mwhde couh daengz lo. Wnggai baiq boux cauh mbwn cauh deih cauh haij caeuq cauh sojmiz doenj raemx hih boux neix.” 8 Gajlaeng, gou caiq dingqri daixlingh boux bouxcai ciep boux bouxcai daixdaeuz mwnq naeuz: “Doemq lo! Doemqdak liux lo! Doemqdak liux lo! Bahbijlwnz aen singz hung neix doemqdak liux lo! Aenvih de hawj sojmiz hih vunz caeuq de guh ndaeng guh ndwet, hawj gyoengqde luj gw laeuj get fiz yienghmwnq guh ndaeng guh ndwet!” 9 Gajlaeng caiq miz daixsam boux bouxcai caemh gaen song boux bouxcai gaxgonq mwnq hemq goggog naeuz: “Byawz baiq duz nyaen caeuq baiq duz you nyaen, caeuq youq najbyak cixnaeuz youq gwnz fawz yaenq miz yaenq hih, 10 caemh ij ngaiz gw gij laeuj get Cangqdiq lo; gij laeuj neix dwg caem youq aen cenj coux Cangqdiq aeuqheiq he. Mbouj danhcij yienghneix, vanzlij ij youq dangqnaj boux bouxcai Cangqdiq caeuq youq dangqnaj duz yiengzlwg ngaiz souh daengz feiz caeuq liuzvangz gyemz dawz. 11 Gyemz dawz gyoengqde hih feiz yungjyenj mbouj rox maet. Doenghheij baiq duz nyaen caeuq baiq duz you nyaen hih caeuq doenghheij yaenq miz gij coh duz nyaen hih gyoengqde ngwnzngoenz cungj mbouj ndaej an'onj.” 12 Hoeng gangj daengz doenghheij soenhsouj Cangqdiq dih mingqlingq, sinq Yehsuh hih doenghheij vunz Cangqdiq, gyoengqde ijaeu gyenhciz naenxsim. 13 Couh youq mwhneix, gou caiq dingqri miz sing daj gwnzmbwn naeuz: “Mwngz ij dawz doenghgij vah laj neix sij hwnjdaeuj, couh dwg: ‘Daj seizneix hwnj, doenghheij gvi haeuj bouxcawj raeuz hih vunzrai hih miz fuk lo!’” Gajlaeng gou dingqri Hoenzsaenz Cangqdiq han naeuz: “Deng lo! Mbouj loek! Seizneix gyoengqde ndaej souhong yietbaeg lo, aenvih gyoengqde soj guh hih caemh gaengjdingq ndaej yangjcouq.” 14 Gajlaeng gou vanzlij caiq yawjraen miz vangq fwj bieg he. Gwnz fwj gwnz de naengh miz boux he caenh luj vunz nwih; ndaek raeuj de gyok miz aen gyokraeuj gim he, ndaw fawz de dawz miz fag liemz raeh rwdrwd he. 15 Gajlaeng gou caiq yawjraen miz boux bouxcai Cangqdiq he daj ndaw cangqbungz Cangqdiq ok daeuj, yiengq boux naengh youq gwnz fwj mwnq hemq goggog naeuz: “Dawz fag liemz mwngz okdaeuj gvej sou lo bax, aenvih lajmbwn sojmiz hih ndaej daeng sou lo.” 16 Bouxcai mwnq yienghneix hemq naeuz le, boux naengh youq gwnz fwj mwnq couh dawz fag liemz de yiengq lajmbwn bae vanghvangh vadvad. Gajlaeng, lajmbwn sojmiz hih couh doq sou ndaej liux seuqset lo. 17 Gajlaeng, gou caiq yawjraen miz daixlingh boux bouxcai ndaw fawz de caemh dawz miz fag liemz raeh rwdrwd he hwj daj aen cangqbungz gwnzmbwn ok daeuj. 18 Gajlaeng, caemhcaiq miz boux bouxcai guenj feiz he daj aen luz dajbwiz ok daeuj. Ok daeuj le, couh yiengq boux bouxcai dawz fag liemz raeh rwdrwd mwnq hemq goggog naeuz: “Dawz fag liemz raeh rwdrwd mwngz hwnjdaeuj sougvej lajmbwn hih mak buzdauz bax! Aenvih doenghheij mak neix gaenq sug lo!” 19 Bouxcai mwnq yienghneix hemq le, bouxcai dawz liemz raeh mwnq couh dawz liemz yiengq lajmbwn bae vadvad vanghvangh; gajlaeng, couh dawz buzdauz sou liux lo, caemh dawz buzdauz gveng haeuj aen ciz Cangqdiq aeuqheiq hwj caij buzdauz bae. 20 Aen ciz caij buzdauz neix youq rog singz. Gij mak buzdauz youq ndaw ciz ngaiz caij le, couh miz lwed daj ndaw ciz riuz okdaeuj, riuz okdaeuj lai hwj laeg daengz ndaej luj daengz conghbak duz max yienghneix baenxlai laeg bae, riuz bae baenx sambak gunghleix baenxlai gyae.
1 Gajlaeng, gou caiq luj fangxngwnzloq yienghmwnq yawjraen gwnzmbwn miz daixlingh gij gingjdoengh. Gij gingjdoengh neix cix hung cix geizheih, couh dwg caet boux bouxcai Cangqdiq cangjguenj caet gij nanh gatsat mwnq, aenvih Cangqdiq sojmiz hih fatheiq cungj dwg fat youq ndaw caet gij nanh neix. 2 Gajlaeng gou caiq yawjraen aen haij he; aen haij neix caenh lujnaeuz dwg bohliz haij, ndaw de cab miz feiz hwj. Gwnz haij miz doenghheij vunz ndaej hingz goq duz nyaen caeuq hingz goq duz you nyaen caeuq gij vunz yiem gij hauqmaj caeuq gij coh duz nyaen he, ndwn youq gwnz de. Ndaw fawz gyoengqde dawz miz Cangqdiq soengq hawj hih gimz, 3 ciengq gij go Mohsih bouxhoiq Cangqdiq caeuq gij go duz yiengzlwg. Gyoengqde ciengq naeuz: Akak rengzrengz gaiqgaiq cungj ndaej guh daengz dih Cangqdiq bouxcawj hax! Mwngz soj guh hih cix veijdaq cix geizmiuj! Fanh guek dih vuengz hax! Mwngz dih guhfap cix deng cix saedsaeh! 4 Bouxcawj hax! Miz byawz gamj mbouj yawjnaek mwngz, mbouj haenh mwngz? Aenvih caenhgag mwngz cij dwg caen hih cwnz. Lajmbwn sojmiz hih vunz cungj ij daeuj daengz dangqnaj mwngz baiq mwngz sax mwngz, Aenvih mwngz soj guh hih gaenq yienh okdaeuj lo, cungj dwg ndwn ndaej cingq hih. 5 Gajlaeng gou caiq yawjraen aen cangqbungz gwnzmbwn aen fungh coengq miz aen gvih coengq miz baengzgawq mwnq hoi hwj. 6 Caet boux bouxcai guenj caet gij nanh mwnq daenj buh siqmaz bieg supsup, aen aek cug miz sai gim hwj daj ndaw de ok daeuj. 7 Yiengq seiq duz doenghduz mwnq hih duz he dawz caet aen vanj gim hawj caet boux bouxcai mwnq; aen'aen vanj gim cungj coux rim seiqseiz lix dih Cangqdiq dih gij aeuqheiq de. 8 Ndaw cangqbungz cungj dwg yienh ok gij rongh Cangqdiq caeuq gij rengz daiq miz oenq he, sojhij mij'z vunz ndaej haeuj bae, ij daengj daengz caet boux bouxcai roengz caet gaiq nanh liux bae cij ndaej.
1 Gajlaeng, gou caiq dingqri miz sing goggog daj ndaw cangqbungz Cangqdiq doiq caet boux bouxcai mwnq naeuz: “Faenhsou bae dawz caet aen vanj Cangqdiq coux hih gij fatheiq de raix roengz lajdeih bae.” 2 Gij sing mwnq yienghneix naeuz sat le, daixit boux bouxcai couh dawz vanj de mwnq raix roengz lajdoem bae. Gajlaeng doenghheij miz yaenq geiqhauh duz nyaen hih, caemh baiq duz you nyaen hih vunz, baenx ndang cungj hwnj rim cix haeu cix miz doeg hih baeznok. 3 Yiengq daengz daixngeih boux bouxcai raix vanj de mwnq raix roengz haij bae. Ndaw haij hih raemx couh doq bienq lwed, bienq luj lwed vunzrai, ndaw haij sojmiz hih doenghduz cungj caemh rai liux lo. 4 Daengz daixsam boux bouxcai raix vanj de mwnq raix roengz dah caeuq mboq bae. Gajlaeng, gij raemx caemh bienq lwed liux. 5 Gajlaeng gou dingqri boux guenj raemx hih bouxcai naeuz: “Gaxgonq, seizneix, gag mwngz cij dwg Cangqdiq hih hax, mwngz soj fad hih doenghgij neix dwg goengbingz hih, 6 aenvih gyoengqde gaj doenghgij vunz mwngz caeuq doengh boux cenz gij vah mwngz; seizneix mwngz hawj lwed hawj gyoengqde gw. Gij neix cungj dwg gyoengqde wnggai dang hih!” 7 Gajlaeng gou caiq dingqri miz sing daj aen luz dajbwiz han naeuz: “Deng lo! Akak rengzrengz gaiqgaiq cungj ndaej guh daengz dih Cangqdiq bouxcawj hax, mwngz dih saemjbuenq dwg goengbingz hih, dwg saedsaeh hih!” 8 Yiengq daengz daixseiq boux bouxcai raix vanj de mwnq, raix haeuj aen gyangjngoenz bae. Aen gyangjngoenz couh doq bienq ndat luj feiz yienghmwnq, ndaej yag dawz vunz. 9 Gajlaeng gij vunz ngaiz gyangjngoenz yag dawz le, couh mang miz gienz ndaej cangjguenj doenghheij nanh neix dih Cangqdiq, caemh mbouj nginh loek gaijgoq haenh Cangqdiq. 10 Daengz daixhaj boux bouxcai raix vanj de mwnq, raix haeuj aen lungzeij duz nyaen mwnq bae. Gajlaeng aen guek duz nyaen couh bienq amq fubfub. Yiengq gij vunz de vih gij baeznok gwnz ndang indot hwj gag haeb diuz linx bonjfaenh. 11 Gyoengqde caemh vih hwnj baez caeuq indot hwj mang Cangqdiq, dauq mbouj vih bonjfaenh soj guh hih hwj nginh loek gaijgoq. 12 Yiengq daengz daixroek boux bouxcai raix vanj de mwnq, raix roengz diuz dah Youqfazlahdij bae. Gajlaeng diuz de couh majcangq doq hawq liux lo, vih ij cwnjbiq diuz roen he hwj hawj doenghheij vuengz daj baixdoeng daeuj he. 13 Couh youq mwhneix, gou caiq yawjraen miz sam duz fangz yak luj duz goep daj conghbak duz lungz caeuq conghbak duz nyaen caeuq conghbak boux gyaj hih boux cenz gij vah Cangqdiq ok daeuj. 14 Doenghheij fangz mwnq rox doeng loengh sae loengh doenghgij geizmiuj he. Gyoengqde ok bae cimh lajmbwn sojmiz hih vuengz, cimh gyoengqde hawj gyoengqde doxcomz hwj cwnjbiq daengz ngoenz akak rengzrengz gaiqgaiq cungj ndaej guh daengz hih Cangqdiq saemjbuenq vunz lajmbwn hih ngoenz dwzbez mwnq doxhoenx. 15 Gajlaeng gou couh dingqri miz sing naeuz: “Aex! Yawj bax! Gou daeuj dwg luj bouxcaeg yienghmwnq sawqmwh caegcaeg daeuj daengz. Boux singqsag hih, siengzseiz raek buh youq henz ndang hih miz fuk lo! Aenvih boux de mbouj ngaiz loxgenz loxgangh byaij hawj vunz raen le ngaiz saetnaj saetnyaenq.” 16 Caiq gangj daengz doengh duz fangz mwnq ok bae hawj doenghheij vuengz he doxcomz youq mwnq dieg he, mwnq dieg mwnq aeu vah Hihbwzlaiz ma heuh couh dwg naeuz Hahmijgizdohdoenq he. 17 Yiengq daengz daixcaet boux bouxcai raix vanj de mwnq, raix youq cungqgyan mbwn. Gajlaeng couh doq miz sing goggog daj aen lungzeij ndaw cangqbungz cenz okdaeuj naeuz: “Sat lo!” 18 Couh youq mwhneix, couh doq miz sing yiengj, caemh miz byajmyig byajraez, deihdoengh youqgaenj raixcaix; dajlwh lajmbwn miz vunz doxdaeuj, mij miz saek mbat luj yienghneix deihdoengh cienfanh yungyiemj he, 19 doengh hwj Bahbijlwnz aen singz hung neix aq faen baenx sam mbiengj bae, gak aen guek hih singz caemh doemq liux. Cangqdiq ngeix daengz Bahbijlwnz aen singz hung neix hih coih, couh dawz bonjfaenh de aeuqheiq hih cenj laeuj neix hawj aen singz hung neix. 20 Gajlaeng sojmiz hih haijdauj caeuq bya'bya ndoindoi cungj bingzbwd liux, mij raen ingj haem lo. 21 Mbouj danhcij yienghneix, gajlaeng vanzlij miz byagcaej doek roengzbae dub dawz vunz; ngauq byagcaej aiq naek miz goujcib gaen naek yienghneix. Yiengq gij vunz ngaiz nanh byagcaej yungyiemj raixcaix le, couh daenduenq Cangqdiq.
1 Gajlaeng ndaw caet boux bouxcai dawz vanj mwnq hih boux he daeuj doiq gou naeuz: “Mwngz dineix daeuj, gou ij hawj mwngz yawj boux lauxgawj geq naengh youq geij diuz dah mwnq soj souh daengz hih fad. 2 Gou naeuz mwngz ni, lajmbwn hih vuengz cungj caeuq de guhyoux, lajmbwn hih vunz cungj caemh luj gw laeuj fiz yienghmwnq caeuq de guh ndaeng guh ndwet.” 3 Gajlaeng gwnz ndang gou miz Hoenzsaenz Cangqdiq doz hwj, bouxcai Cangqdiq mwnq couh daiq gou bae daengz rogndoi. Youq rogndoi gou yawjraen miz boux vunzbaz he gwih duz nyaen hoengz he. Duz nyaen neix miz caet ndaek raeuj, cib gij gok, baenx ndang cungj sij miz gij goujhauq daekcoih Cangqdiq he. 4 Boux vunzbaz mwnq daenj hih buh dwg saekaeuj caeuq saekhoengz, gwnz ndang de venj miz gim hah, baujsig hah, cinhcuh hah hwj guh gij ndeiyawj he. Ndaw fawz de dawz miz aen cenj gim coux rim gij uekcueg de guh ndaeng guh ndwet Cangqdiq dwgcaengz he. 5 Najbyak de sij miz gawq iqswh laeg hoj rox he, dwg naeuz: “Aen singz hung Bahbijlwnz, daxmeh gij vunz guh lauxgawj caeuq daxmeh doenghheij Cangqdiq dwgcaengz hih.” 6 Gajlaeng gou caiq yawjraen boux vunzbaz mwnq gw gij lwed gij vunz Cangqdiq vih Yehsuh hwj guh cingqyinz ngaiz rai he fiz lo. Gou yawjraen de yienghneix le, couh doeksaet ij rai bae. 7 Bouxcai raen gou doeksaet le, couh doiq gou naeuz: “Mwngz vihmaz yienghneix doeksaet nej? Gou ij gangj naeuz mwngz ni boux vunzbaz neix caeuq de gwih duz nyaen caet ndaek raeuj caeuq cib gij gok hih gij miqmiz de naeuz mwngz ni. 8 Mwngz yawjraen hih duz nyaen neix doenghbaez dwg lix hih, hoeng, seizneix gaenq rai lo. Duz de couh ij daj ndaw vaengz he hwnj daeuj, gajlaeng caiq byaij haeuj gij satsoq he bae. Lajmbwn doenghheij dajlwh cauh mbwn cauh deih doxdaeuj gij coh mij ndaej daengh haeuj ndaw bonjbouh miz mingh he bae hih vunz raen duz doenghbaez lix, seizneix rai, gajlaeng caiq dauqlix hih duz nyaen mwnq cungj geizheih ij rai. 9 “Laj neix ij uk maenh hih vunz cij ndaej rox, couh dwg: caet ndaek raeuj mwnq couh dwg ceij boux vunzbaz mwnq soj naengh hih caet aen bya lo, 10 caemh dwg ceij caet goengjvuengz. Yiengq caet goeng ndaw de miz haj goeng gaenq rai lo, lij miz goeng he vanzlij youq, vanzlij miz goeng he mijyaengz daeuj; daengj goeng de daeuj nex, goeng de ceiq lai dingz ndaej duenh he. 11 Yiengq duz gaxgonq lix goq seizneix gaenq rai hih duz nyaen mwnq couh dwg daixbet goengjvuengz lo; goeng de caemh caeuq caet goeng mwnq doxdoengz, caemh dwg yamq haeuj gij satsoq he bae. 12 “Mwngz yawjraen hih cib gij gok mwnq couh dwg daiqbiuj cib goeng mijyaengz ndaej dang vuengz he, hoeng, gyoengqde caemh ndaej caeuq duz nyaen mwnq gaem gienz ndaej duenh he. 13 Gyoengqde dih muzdiz cungj dwg doxdoengz, cungj dwg dawz bonjfaenh sojmiz hih rengz caeuq gienz gyau hawj duz nyaen mwnq. 14 Gyoengqde ij caeuq duz yiengzlwg doxhoenx, hoeng, duz yiengzlwg gaengjdingq hoenx ndaej hingz gyoengqde, aenvih de dwg sojmiz bouxcawj dih cawj, sojmiz vuengz dih vuengz. Doenghheij de senj hih heuh daeuj hih, yungjyenj gaen de mbouj bienq sim hih, caemh ndaej hingz.” 15 Gajlaeng, bouxcai vanzlij caiq doiq gou naeuz: “Mwngz yawjraen boux lauxgawj mwnq soj naengh hih geij diuz dah mwnq couh dwg daiqbiuj gak cungj vunz, gak aen minzcuz, gak aen guek, gak gangj mbouj doengz hih vah he. 16 Mwngz yawjraen hih duz nyaen mwnq caeuq cib gij gok de cungj dwgcaengz boux lauxgawj mwnq, dwgcaengz hwj ij dued aeu de sojmiz hih, hawj de loxgenz loxgangh, gw gij noh de, aeu feiz ma gyemz coemh dawz de liux bae, 17 aenvih Cangqdiq hawj cib goengjvuengz mwnq cungj ciuq de dih cawjeiq bae guh, hawj gyoengqde dawz gij gienz gyoengqde gyau hawj duz nyaen mwnq, itcig daengz gij vah Cangqdiq lingz okdaeuj. 18 Mwngz yawjraen hih boux vunzbaz mwnq couh dwg guenjciq lajmbwn sojmiz hih vuengz hih aen singz hunghung mwnq lo.”
1 Gij saeh neix goq le, gajlaeng, gou caiq luj fangxngwnzloq yienghmwnq yawjraen daixlingh boux bouxcai daj gwnzmbwn roengz daeuj. Boux de gij gienz de loet hwx; gij ronghndongq de myig baenx cenz lajmbwn. 2 Boux de roengz daeuj le, couh hemq goggog naeuz: “Satsoq lox! Bahbijlwnz singz hung satsoq lox! Aen de satsoq hwj bienq dieg fangz yak youq hih dieg, bienqbaenz rongz fangzfangz gveijgveij roeg yalw youq he lux, 3 aenvih gak guek hih vunz cungj luj gw laeuj get yienghmwnq fiz hwj caeuq de guh ndaeng guh ndwet. Lajmbwn hih vuengz cungj caeuq de guhyoux; sojmiz lajmbwn guh seng'eiq hih vunz cungj vih de hih ak cajbaizcangz, haenj cang hwj ndaej fatcaiz.” 4 Gajlaeng, gou caiq dingqri daixlingh gij sing daj gwnzmbwn naeuz: “Gij vunz gou hax, vaiqdi daj aen singz mwnq ok ma bax, mienxndaej ngaiz souh coih souh nanh gajlaeng hangx de, 5 aenvih de doegdoeg siebsieb famh daengz mbwn, de sojmiz hih doegsieb Cangqdiq cungj ndaejgeiq. 6 De baenzlaw doiq vunz, faenhsou caemh ij baenzlaw doiq de; ciuq de soj guh hih, gya boix bauqwngq hawj de. Yungh aen cenj boiq laeuj de gya boix boiq hawj de gw. 7 De baenzlaw haenj cang baenzlaw cajbaizcangz, faenhsou caemh ij hawj de baenzlaw haemzhoj gikheiq, aenvih ndaw sim de siengzseiz gag naemj naeuz: ‘Gou dwg nijvangz, mbouj dwg mehmaiq; gou gaengjdingq mbouj miz maz gikheiq siengsim.’ 8 Couh vih yienghneix, de youq ngoenz he couh ij ngaiz nanh dawz caezcup, couh dwg iekvangh hah, siengsim hah, rai hah. De caemh ngaiz feiz gyemz coemh liux, aenvih saemjbuenq de dih Cangqdiq bouxcawj dwg ak raixcaix hih. 9 “Doenghheij caeuq de guhyoux hih vuengz ij caenra raen gij oenq ngaiz feiz gyemz dawz de he, caemh daej de. 10 Gyoengqde doiq de soj souh daengz hih nanh cungj lau hwj ij rai, cungj ndwn youq gyae'gyae naeuz: ‘Camj hoh! Camj hoh! Aen singz hunghung loetloet dih Bahbijlwnz camj hoh! Aen de ngamq baex yaepyet he, mbouj daengz diemjcung cizgyenh he, couh ngaiz fad hwj byaeu liux lo!’ 11 “Lajmbwn guh seng'eiq hih vunz caemh ij vih de hwj siengsim gikheiq daej vauxvaux, aenvih caiq mij'z vunz daeuj cawx gij doxgaiq gyoengqde lo. 12 Mij'z vunz cawx gij gim, gij ngaenz, gij baujsig, gij cinhcuh, gij boiq siqmaz, boiq aeuj boiq hoengz, couzcouz duenqduenq caeuq gak cungj faex rang, gak cungj faenz duzciengh guhbaenz hih doxgaiq caeuq gak cungj dijbauj hih faex hah, caeuq doengzdoengz dietdiet, daqlijsiz hih daqlijsiz hah, 13 gveiqbiz hah, yanghliuq hah, yieng hah, mozyoz hah, yeijyangh hah, laeuj hah, youz makmbi hah, mbamienh hah, ceh mienh hah, doenghgij neix haem lo. Caemh vanzlij mij'z vunz cawx gij cwzcwz yiengzyiengz, maxmax cici hah, caeuq vunzhoiq hah, vunz hah haem lo. 14 “Gyoengqde caemh gaengjdingq ij doiq Bahbijlwnz aen singz hung neix naeuz: ‘Mwngz haenj doenghgij doxgaiq gyaeundei he cungj mbouj raen lo; sojmiz hih gyaeugyaeu ndeindei dijbauj dijbauj cungj bienq raemz bienq reb liux lo, mbouj caiq miz haem lo.’ 15 “Doenghheij gauq hai doenghgij neix hawj de ndaej fatcaiz hih vunz caemh vih de soj souh hih nanh hwj lau hwj ij rai, caemh ndwn youq gyae'gyae siengsim hwj daej 16 naeuz: ‘Camj hoh! Camj hoh! Aen singz hung neix camj hoh! Mwngz soqlaiz cungj dwg daenj hoengz daenj henj, daenj buh boiq siqmaz, cixcaemh daiq gim daiq baujsig daiq cinhcuh hwj cang guh gyaeu guh ndei. 17 Hoeng, mbouj daengz diemjcung he, baenx lai hih cienzcienz ngaenzngaenz gyadangq hih gyadangq cungj byoeng liux!’ “Sojmiz hih cawjruz, hek ruz, fouruz caeuq sojmiz gauq gwnz haij gw hih cungj ndwn youq gyae'gyae, 18 gyoengqde ndwn youq gyae'gyae yawj aen singz Bahbijlwnz ngaiz gyemz dawz oenq ngaujngauq, couh hemq naeuz: ‘Miz aen singzlaw ndaej beij aen singz hung neix nej?’ 19 Gyoengqde yienghneix hemq le, vanzlij gag aeu boenqcingh ma vanq hwnj gwnz dingjraeuj bonjfaenh bae daej ngwdngwd hemq naeuz: ‘Camj lux! Camj lux! Aen singz hung neix hax! Camj lux! Famz miz ruz youq gwnz haij hih cungj dwg gauq de fatcaiz; de gingqyienz mbouj daengz diemjcung he couh ngaiz byaeu liux lux!’” 20 Gou caemh vanzlij caiq dingqri gij sing mwnq daj gwnzmbwn hemq naeuz: “Mbwn hax, vih de yienghneix hwj angq bax! Gij vunz Cangqdiq caeuq gyoengq dwzbaijyienz caeuq gyoengq boux boux cenz gij vah Cangqdiq hax, faenhsou vih de hwj angq bax! Aenvih Cangqdiq gaenq bang faenhsou gauq de fad de lo.” 21 Gajlaeng gou caiq yawjraen boux bouxcai akak rengzrengz he yingx ndaek ngauq rin he, ngauq rin de hung luj famuh nwih, gveng roengz haij bae, naeuz: “Bahbijlwnz aen singz hung neix caemh ij luj yienghneix ngaiz gveng roengz haij bae, it di cungj mij raen lo. 22 Mwngz mbouj caiq ndaej dingqri sing gimz, sing go, sing boq dig, sing boq yangzhauh haem lo. Youq mwngz dimwnq mbouj caiq ndaej raen miz gij vunz miz dinfawz he haem lo, sing muh caemh mbouj caiq miz haem lo, 23 caemh mbouj caiq miz daeng rongh haem caeuq mbouj caiq miz sing aeu bawx haq sau haem lo. Gaxgonq gij vunz mwngz guh seng'eiq dwg lajmbwn ceiq lek he; lajmbwn sojmiz hih vunz cungj ngaiz gij fap mwngz haeuj liux, moengx liux. 24 Doengh boux cenz gij vah Cangqdiq caeuq gij vunz Cangqdiq caeuq lajmbwn sojmiz ngaiz gaj hih vunz hih lwed cungj youq aen singz mwngz dimwnq yienh okdaeuj lo.”
1 Gajlaeng gou caiq luj fangxngwnzloq yienghmwnq dingqri miz haujlai sing vunz youq gwnzmbwn hemq goggog naeuz: “Hahliqluqyaq! Hahliqluqyaq! Ndaej gouq, najrongh, akak rengzrengz cungj dwg gvi hawj Cangqdiq! 2 De dih saemjbuenq dwg gunghbingz gunghcingq hih, saedsaeh hih; de saemjbuenq boux lauxgawj geq haih baenx cenz lajmbwn mwnq, bang gij hoiq bonjfaenh ngaiz de haihrai boixhaemz.” 3 Vanzlij caiq hemq naeuz: “Hahliqluqyaq! Gyemz lauxgawj geq hih oenq yungjyenj oenq mbouj rox sat.” 4 Gij sing mwnq yienghneix hemq le, gou caiq yawjraen ngeihseiq boux vunz gangj vah couh baenz mwnq caeuq seiq duz doenghduz mwnq couh bomz sax naengh youq aen lungzeij mwnq dih Cangqdiq; gyoengqde naeuz: “Ahmaenz! Hahliqluqyaq!” 5 Couh youq mwhneix, miz sing daj aen lungzeij mwnq gangj vah okdaeuj naeuz: “Sojmiz Cangqdiq dih hoiq, famz yawjnaek de hih, mboujguenj dang ak cixnaeuz mij dang saek yiengh, yaqyuij hih vunz, cungj ij haenh raeuz dih Cangqdiq!” 6 Gajlaeng, gou caiq dingqri lujnaeuz baenxbienh vunz cix lujnaeuz raemxfai biu cix lujnaeuz byajraez yienghmwnq gog saxsax hemq naeuz: “Hahliqluqyaq! Bouxcawj raeuz akak rengzrengz gaiqgaiq cungj ndaej guh daengz dih Cangqdiq guh vuengz lux! 7 Gyoengqraeuz ij haenjheiq, ij angq! Sojmiz hih najrongh cungj dwg gvi hawj de, aenvih duz yiengzlwg gaenq daengz mwh aeu yah he lo; bawxmoq gaenq cwnjbiq ndei lo. 8 De ndaej miz buh siqmaz bieg daenj hwj.” (Dineix dih ‘buh siqmaz’ dwg daiqbiuj gij vunz Cangqdiq guh ndaej hab'eiq habhoz de he.) 9 Gajlaeng, bouxcai Cangqdiq doiq gou naeuz: “Mwngz ij sij gawq vah neix hwnjdaeuj, couh dwg: ‘Famz ndaej cingj daeuj camhgyah gw gij laeuj duz yiengzlwg gyezvwnh hih miz fuk lo!’” Gajlaeng bouxcai caiq naeuz: “Gawq vah neix dwg gij vah Cangqdiq he, caemh dwg saedsaeh hih.” 10 Gou dingq daengz yienghneix le, couh gvih bomz roengz dangqnaj bouxcai mwnq bae ij baiqsax de lo, hoeng, de dauq naeuz: “Ciengeiz mbouj ndaej! Mwngz caeuq gou caeuq doenghheij sojmiz vih Yehsuh hwj guh cingqyinz hih doenghheij beixbeix nuengxnuengx cungj dwg doxdoengz dwg bouxhoiq Cangqdiq hih. Mwngz ij gvih ij baiq wngdang gvih baiq Cangqdiq, aenvih boux cenz gij vah Cangqdiq soj gangj hih vah, cungj dwg gvanhhih Yehsuh he.” 11 Gajlaeng gou caiq luj fangxngwnzloq yienghmwnq yawjraen aen mbwn hoi hwj, caemh yawjraen miz duz max bieg he miz boux vunz he gwih youq gwnz gumq duz de hwj; boux gwih duz de mwnq gij coh de heuh ‘Saedsaeh’ caeuq ‘Sinq ndaej goq.’ Boux de saemjbuenq dwg goengbingz hih, doxhoenx caemh dwg gw leixdauh hih. 12 Cehra boux de luj duj feiz he, ndaek raeuj de gyok miz haujlai aen guraeuj, gwnz ndang de caemh sij miz gij coh he. Gij coh neix caenhgag de cij rox dwg gijmaz iqswh; mij'z vunz ndaej rox. 13 De daenj miz diuz buh cimq roengz lwed bae hwj hoengz liux he. Gij coh de heuh ‘Gij Vah Cangqdiq.’ 14 Gaen youq gajlaeng de miz gij bing gwnzmbwn gwih max bieg hwj; gyoengqde daenj buh siqmaz youh bieg youh cengh. 15 Conghbak de hamz miz fag giemq raeh rwdrwd he, gij byai giemq de dwg yiengq doxok he. De dwg yungh fag giemq neix ma hoenxhingz lajmbwn sojmiz hih guek, yungh mbaenq diet ma guenjciq gyoengqde, caemh caij benj gij buzdauz ndaw ciz, yienghneix ndaej yienh ok akak rengzrengz gaiqgaiq cungj ndaej guh daengz dih Cangqdiq dih aeuqheiq. 16 Diuz buh de caeuq gwnz bangqha de sij miz naeuz: “Vuengz hih Vuengz, Cawj hih Cawj,” gawq neix. 17 Gajlaeng gou caiq yawjraen boux bouxcai he ndwn youq gwnz aen gyangjngoenz, doiq sojmiz mbin youq cungqgyan mbwn hih roeg hemq naeuz: “Daeuj bax, doxcaeuq bae camhgyah gw gij laeuj Cangqdiq, 18 bae gw gij noh lajmbwn hih vuengz, caeuq gw gij noh canghgywnh hah, binggyep hah, caeuq gw gij noh max caeuq boux gwih duz max de, caeuq gij noh sojmiz hih swqyouz vunz caeuq guh hoiq hih vunz, caeuq mboujguenj dang ak cixnaeuz yaqyuij hih vunz he.” 19 Gajlaeng gou caiq yawjraen duz nyaen mwnq caeuq lajmbwn hih vuengz caeuq gij bing gyoengqde cungj doxcomz hwnjdaeuj ij caeuq boux gwih max bieg mwnq caeuq gyoengq bing de doxhoenx. 20 Hoeng, gajlaeng duz nyaen mwnq engq ngaiz gaemh dawz lo, daiqlienz boux youq dangqnaj duz nyaen mwnq doeng loengh sae loengh hwj coemx vunz, hawj vunz yaenq miz gij yaenq duz nyaen caeuq baiq duz you nyaen hih boux gyaj hih boux cenz gij vah Cangqdiq cungj ngaiz gaemh dawz lo, cungj ngaiz itheij gveng haeuj mwnq liuzvangz dawz feiz mwnq luj aen huz he bae lo. 21 Lij lw hih caemh ngaiz fag giemq boux gwih max bieg mwnq iet okdaeuj ndaemq dawz rai liux lo. Sojmiz hih roeg caemh ndaej gw gij noh gyoengqde hwj imq lo.
1 Gajlaeng, gou caiq luj fangxngwnzloq yienghmwnq yawjraen miz boux bouxcai he dawz fag seiz aen vaengz mwnq caeuq dawz diuz lienh hung he daj gwnzmbwn roengz daeuj. 2 De roengz daeuj le, couh gaemh dawz duz lungz mwnq, couh dwg duz ngwz doenghbaez yaeuh vunz mwnq, caemh heuh fangzvuengz Sajdanq hih mwnq, gaemh dawz duz de goenj hwnjdaeuj, goenj cien bi. 3 Caemh dawz duz de gveng roengz aen vaengz he bae gyaeng, suj hwj mbouj hawj de caiq ndaej coemx lajmbwn hih vunz, itcig suj daengz goq cien bi le, cij ndaej camqciz coengq duz de. 4 Gajlaeng, gou caiq yawjraen miz geij aen lungzeij miz vunz naengh hwj, gyoengq vunz neix caemh ndaej miz gij gienz saemjbuenq he hwj. Gajlaeng, gou caiq yawjraen doenghgij hoenzsaenz doenghheij vih Yehsuh hwj guh cingqyinz caeuq vih cenzgangj gij vah Cangqdiq hwj ngaiz vunz raemj ndaek raeuj gat hih doenghheij vunz mwnq, yawjraen gyoengqde cungj ndaej dauqlix lo, cungj ndaej caeuq Gihduz itheij guh vuengz itcien bi. Doenghheij vunz neix, gyoengqde dwg mij baiq goq duz nyaen caeuq duz you nyaen, caemh mij youq najbyak cixnaeuz youq gwnz fawz yaenq miz gij geiqhauh he he. 5 Mbat neix dwg daixit mbat dauqlix; lij lw hih vunzrai vanzlij mijyaengz ndaej dauqlix, ij daengj daengz cien bi mwnq sat le cij ndaej. 6 Doenghheij ndaej haeuj daixit mbat dauqlix hih vunz dwg miz fuk hih, dwg gij vunz Cangqdiq hih. Gyoengqde mbouj caiq ngaiz rai daixngeih mbat haem lo; gyoengqde ij ndaej guh goengjsae dajbwiz Cangqdiq caeuq Gihduz he, caemh ij caeuq Gihduz itheij guh vuengz cien bi. 7 Yiengq cien bi mwnq goq le, Sajdanq ndaej daj ndaw vaengz coengq okdaeuj. 8-9 De ndaej coengq okdaeuj le, gaengjdingq bae coemx lajmbwn sojmiz hih guek—Gohgwz caeuq Majgoz couh dwg daiqbiuj sojmiz hih guek—bae hawj gyoengqde bae mwnq dieg gvangq he doxcomz, hawj gyoengqde cwnjbiq bae doxhoenx. Gij vunz gyoengqde lai hux lai. Gyoengqde bae gvaeg gij vunz Cangqdiq soj youq hih yingz, couh dwg aen singz Cangqdiq haenj he. Hoeng, miz feiz daj gwnzmbwn roengz daeuj gyemz dawz gyoengqde, byaeu liux. 10 Coemx gyoengqde hih fangzvuengz ngaiz gveng haeuj mwnq liuzvangz dawz feiz bae, couh dwg mwnq duz nyaen caeuq boux gyaj hih boux cenz gij vah Cangqdiq youq he. Youq mwnq ngwnzngwnz ngoenzngoenz yungjyungj yenjyenj souh haemz souh hoj mbouj dingz. 11 Gajlaeng, gou caiq yawjraen miz boux he naengh youq aen lungzeij bieg hunghung he; mbwn caeuq dieg cungj daj dangqnaj de deuz hwj maetlaenq bae, mij raen ingj haem lo. 12 Gajlaeng, gou caiq yawjraen miz vunzrai, mboujguenj boux dang ak, cixnaeuz boux mij dang saek yiengh yaqyuij he, cungj ndwn youq dangqnaj aen lungzeij mwnq, caemh raen miz geij gienj saw hoi hwj, caemhcaiq raen miz daixlingh gienj ndaw de sij miz gij coh doengh boux ndaej lix he, dwg bonjbouh miz mingh he; gienj de caemh hoi hwj. Yiengq gij vunz gaenq rai he hih gij vunz neix, Cangqdiq cungj ciuq gyoengqde soj guh hih sij youq ndaw gienj saw hih ma saemjbuenq gyoengqde. 13 Daiqlienz ndaw haij hah, ndaw moh hah, ndaw laep hah, cungj coengq doenghheij vunzrai he okdaeuj. Gyoengqde cungj caemh ngaiz ciuq gyoengqde soj guh hih ma souh daengz saemjbuenq. 14 Gajlaeng, rai caeuq ndawlaep cungj ngaiz gveng haeuj mwnq feiz dawz mwnq bae. Gij feiz neix couh dwg daixngeih mbat rai. 15 Famz gij coh byawz mij daengh youq ndaw bonjbouh miz mingh hih cungj ngaiz gveng haeuj mwnq feiz dawz mwnq bae.
1 Gajlaeng gou caiq luj fangxngwnzloq yienghmwnq yawjraen aen mbwn moq he caeuq deih moq. Yienzlaiz hih mbwn caeuq deih gaenq mij raen lo, haij caemh mij lo. 2 Gajlaeng gou caiq raen aen singz Cangqdiq, couh dwg Yehluqsajlaengj Singz moq daj gwnzmbwn Cangqdiq mwnq roengz daeuj. Aen de cang hwj gyaeu gywtgywt, luj bawxmoq cang gyaeu hwj daengj gojyez moq yienghmwnq. 3 Gajlaeng, gou dingqri miz sing daj aen lungzeij hunghung mwnq cenz okdaeuj naeuz: “Neq, yawj veiq! Aen cangqbungz Cangqdiq hwnq youq mwnq vunz youq he; de ij caeuq vunz doxcaeuq youq. Vunz ij guh gij vunz de; de ij guh vunz dih Cangqdiq. 4 Cangqdiq ij bang gyoengqde swk raemxra hawq liux bae, hawj gyoengqde mbouj caiq miz rai, miz siengsim, miz daej, miz indot, hawj doenghbaez hih saeh goq couh goq lo, mbouj caiq miz haem lo.” 5 Couh youq mwhneix, boux naengh youq aen lungzeij mwnq naeuz: “Neq, yawj hux, gou dawz sojmiz hih cungj bienq moq lo!” De caiq naeuz: “Dawz gij vah gou sij hwnjdaeuj, aenvih doenghgij vah neix cungj dwg saedsaeh hih, sinq ndaej goq hih.” 6 Gajlaeng de vanzlij doiq gou naeuz: “Guh sat lo! Gou dwg Ahlahfaz, gou dwg Ngozmeizgyaz; gou dwg gaihcij, gou dwg gatsat. Gou ij dawz gij raemx mboq miz mingh he begbeg soengq hawj gij vunz hozhawq he gw. 7 Doenghheij ndaej hingz hih vunz gaengjdingq ndaej doenghgij fuk neix; gou ij guh gyoengqde dih Cangqdiq, gyoengqde caemh ij guh gij lwg gou. 8 Hoeng, doenghheij mbeiiq, mbouj sinq, yalw, gaj vunz, guh ndaeng guh ndwet, doeng loengh sae loengh coengqfap, baiq duz you caeuq gangj gyajvah hih vunz, cungj ij ngaiz gveng haeuj mwnq liuzvangz dawz feiz yiegyieg he bae. Gij neix couh dwg daixngeih mbat rai lo.” 9 Gajlaeng caet boux bouxcai dawz vanj gim coux rim caet gij nanh mwnq hih boux he doiq gou naeuz: “Daeuj, gou ij hawj mwngz yawj boux bawxmoq mwnq, couh dwg mehyah duz yiengzlwg.” 10 Couh youq mwhneix, Hoenzsaenz Cangqdiq doz youq gwnz ndang gou hwj, bouxcai mwnq couh daiq gou bae daengz gwnz bya hung sang he, hawj gou yawjraen daj gwnzmbwn Cangqdiq roengz daeuj hih aen singz Cangqdiq mwnq, couh dwg Yehluqsajlaengj Singz. 11 Aen singz neix miz gij rongh Cangqdiq hwj rongh sagsag, myig myiengzmyiengz, myig luj dijbauj dih baujsig, caeuq luj bizhiq, hoeng gij bizhiq neix dwg cingx hih. 12-13 Aen singz neix miz veizciengz hwj sang gvangxgvangx, caemh miz cibngeih bakdou, doeng sae namz baek gak mbiengj cungj miz sam aen dou, caemh miz cibngeih boux bouxcai Cangqdiq souj hwj, it aen it boux. Gwnz dou gwnz de sij miz Hijswzlez dih cibngeih aen cuz hih coh. 14 Gij veizciengz mwnq caemh miz cibngeih ngauq rin hunghung guh giek; doengh ngauq rin hung gwnz de sij miz yiengzlwg hih cibngeih boux dwzbaijyienz dih coh. 15 Gajlaeng, bouxcai doiq gou gangj vah mwnq dawz diuz cik gim he daeuj ij rau aen singz mwnq caeuq doenghheij dou de caeuq gij veizciengz de. 16 Aen singz neix dwg seiq cingq seiq gok he, raez caeuq gvangq cungj dwg doxdoengz. Bouxcai mwnq sien rau aen singz neix; aen de miz fanhngeih swhdahdiz raez, gvangq, sang, cungj dwg doxdoengz. 17 Gajlaeng de caiq rau gij veizciengz hih gij na de, dwg ciuq vunz dih cikconq ma rau he, rau ndaej itgungh miz itbak seiqcib seiq caeuz. 18 Gij veizciengz neix dwg aeu bizhiq ma caep baenz he. Aen singz neix dwg aeu cwnz hih gim ma hwnq baenz he; gij gim de cingx luj bohliz nwih. 19 Doengh ngauq rin hung giek veizciengz dwg aeu gak cungj baujsig ma cang haeuj bae he. Ngauq daixdaeuz dwg bizhiq, ngauq daixngeih dwg lamzbaujsig, ngauq daixsam dwg luzmajnauj, ngauq daixseiq dwg luzbaujsig, 20 ngauq daixhaj dwg hungzmajnauj, ngauq daixroek dwg hungzbaujsig, ngauq daixcaet dwg vangzbizcij, ngauq daixbet dwg ceijcanghhiq, ngauq daixgouj dwg hungzbizcij, ngauq daixcib dwg feijseiq, ngauq daixcib'it dwg aeujmajnauj, ngauq daixcibngeih dwg swjsingh. 21 Diuz veizciengz hih cibngeih bakdou de dwg aeu cibngeih ceh cinhcuh ma mbongq guh he; moix it bakdou dwg yungh ceh cinhcuh he ma guhbaenz hih. Doengh diuz gai ndaw aen singz neix dwg aeu cwnz hih gim ma guh he; gij gim neix cingx luj bohliz nwih. 22 Hoeng, gou mij yawjraen ndaw singz neix miz cangqbungz Cangqdiq, aenvih akak rengzrengz gaiqgaiq cungj ndaej guh daengz dih Cangqdiq bouxcawj caeuq duz yiengzlwg couh dangq dwg aen cangqbungz lo. 23 Aen singz neix mboujyungh gyangjngoenz caeuq aen ndwen rongh nej, aenvih miz gij ronghndongq Cangqdiq caeuq miz duz yiengzlwg dangq dwg aen singz neix hih daeng he. 24 Lajmbwn sojmiz hih minzcuz cungj dwg baengh gij rongh neix byaij roen he. Lajmbwn hih vuengz cungj ij daiq gij rongh bonjfaenh daeuj daengz aen singz neix. 25 Aen singz neix gaengjdingq mbouj gven dou, aenvih ndaw singz mbouj miz doengxlaep. 26 Lajmbwn sojmiz minzcuz hih fuqgveiq yungzdaeuz cungj daiq haeuj aen singz neix bae. 27 Hoeng, famz mbouj hab'eiq habhoz Cangqdiq hih, guh doenghgij doegsieb, simya, yalw, gangj gyajvah hih cungj mbouj ndaej haeuj aen singz neix bae; caenhgag doenghheij vunz ndaej daengh haeuj ndaw bonjbouh duz yiengzlwg, bonjbouh miz mingh mwnq bae hih, cij ndaej haeuj aen singz neix bae.
1-2 Gajlaeng, bouxcai mwnq caiq hawj gou raen doenghheij diuz gai ndaw singz mwnq hih diuz he dih cungqgyan de miz diuz dah miz mingh he. Diuz dah neix dwg daj aen lungzeij Cangqdiq caeuq duz yiengzlwg mwnq riuz okdaeuj he. Gij raemx de cingx luj ceijsingh nwih. Song hamq dah de cungj miz go faex hawj vunz ndaej miz mingh he. Go de binaengz cungj dawz cibngeih dangq mak, it ndwen it dangq. Gij mbaw de ndaej guh yw hwj, ndaej yw lajmbwn sojmiz minzcuz hih vunz. 3 Aen singz neix mij gijmaz ngaiz souh daengz mang, aenvih ndaw singz neix miz aen lungzeij Cangqdiq caeuq duz yiengzlwg youq ndaw de. Bouxhoiq Cangqdiq caemh ij swqhaeuh Cangqdiq, 4 caemh ndaej yawjraen de, gij coh de caemh gaengjdingq yaenq youq najbyak gyoengqde. 5 Aen singz neix mbouj caiq miz doengxhaemh; gyoengqde mboujyungh daeng caeuq gyangjngoenz, aenvih gij rongh Cangqdiq bouxcawj ndaej ciuq rongh hawj gyoengqde. Gyoengqde caemh ij yungjyenj guh vuengz. 6 Gajlaeng bouxcai doiq gou gangj vah mwnq caiq doiq gou naeuz: “Sojmiz mwngz luj fangxngwnzloq yienghmwnq soj yawjraen soj dingqri hih doenghgij saeh neix cungj dwg saedsaeh hih, sinq ndaej goq hih. Couh dwg boux soengq Hoenzsaenz hawj doenghheij boux cenz gij vah Cangqdiq he dih boux Cangqdiq neix hawj bouxcai de daeuj naeuz bouxhoiq de ni gij saeh ijvanh fatseng he.” 7 Gajlaeng gou couh dingqri Yehsuh naeuz: “Yawj hux, gou couh ij daeuj lo! Famz ciuq gij vah ndaw saw neix bae guh hih miz fuk lo!” 8 Gwnz neix sojmiz hih cungj dwg gou, Yozhanq, luj fangxngwnzloq yienghmwnq caenra raen, caenrwz dingqri he. Gou caenra raen caenrwz dingqri doenghgij neix le, couh bomz roengz dangqnaj bouxcai naeuz gou ni doenghgij saeh neix hih bae, ij baiq de. 9 Hoeng, de engq doiq gou naeuz: “Ciengeiz mbouj ndaej yienghneix! Mwngz caeuq gou caeuq doenghheij beixnuengx, couh dwg doenghheij boux cenz gij vah Cangqdiq he caeuq doenghheij ciuq gij vah mwngz soj sij hwnjdaeuj hih bae guh hih, cungj dwg doxdoengz dwg bouxhoiq Cangqdiq. Mwngz ij baiq ij sax, wnggai baiqsax Cangqdiq!” 10 Boux de vanzlij caiq doiq gou naeuz: “Mbouj ndaej dawz doenghgij mwngz sij hwnjdaeuj he, couh dwg mwngz soj yawjraen soj dingqri hih sij hwnjdaeuj hih, muenz hwnjdaeuj, aenvih mwhde couh ij daengz lo; doenghgij saeh neix couh ij fatseng lo. 11 Sojhij ajcaih doenghheij guh doeg guh sieb he vanzlij guh doeg guh sieb roengzbae, simya hih vanzlij simya roengzbae. Guh ndei hih, baujciz guh ndei roengzbae; guh hab'eiq habhoz Cangqdiq hih, baujciz guh hab'eiq habhoz Cangqdiq roengzbae bax.” 12 Youq ndaw loq gou, gou caiq dingqri Yehsuh naeuz: “Yawj bax, gou couh ij daeuj lo! Daengz mwhde, gou ij ciuq gak vunz soj guh hih ma bauqwngq gak vunz. 13 Gou dwg Ahlahfaz, gou dwg Ngozmeizgyaz; gou dwg daixdaeuz caemh dwg gatyet; gou dwg gaihcij, caemh dwg gatsat. 14 “Famz saeg gij buh bonjfaenh cengh hih vunz miz fuk lo! Gyoengqde miz gienz ndaej gw gij mak go faex hawj vunz miz mingh mwnq. Mbouj danhcij yienghneix, caemh vanzlij ndaej daj baksingz haeuj singz bae. 15 Hoeng, doenghheij vunz vaih, mageq he, mehsien, guhyoux he, gaj vunz he, baiq duz you he, haenj gangj gyajvah he, coemx vunz he, cungj mbouj ndaej haeuj singz bae. 16 “Gou, Yehsuh, baij bouxcai gou bae daengz gak gyauqveiq bae naeuz faenhsou ni doenghgij saeh neix, couh dwg gou, Yehsuh, dwg Daqveiq dih doengh daih gajlaeng de, dwg aen ndauhaet rongh sagsag mwnq.” 17 Hoenzsaenz caeuq bawxmoq naeuz: “Daeuj!” Dingqri hih vunz caemh wnggai naeuz: “Daeuj!” Hozhawq hih vunz caemh wnggai daeuj; haenj aeu gij raemx hawj vunz miz mingh hih vunz cungj ndaej daeuj begbeg aeu ma gw. 18 Gou, Yozhanq, gingjgauq sojmiz dingq daengz yawj daengz gou soj sij hih doenghgij vah neix hih vunz: hauhnaeuz miz vunz doeng gya sae gya gijmaz vah haeujbae nex, Cangqdiq gaengjdingq dawz gij nanh sij youq ndaw de gya hawj boux de. 19 Yiengq, caiq hauhnaeuz miz vunz gemj gij vah ndaw de bae nex, Cangqdiq caemh gaengjdingq gemj mbouj hawj boux de ndaej gij fuk gij mak go faex hawj vunz miz mingh he caeuq gij fuk aen singz ndei liuxliux mwnq. 20 Boux cingqmingz doenghgij saeh neix hih boux mwnq caiq naeuz: “Deng lo, gou couh ij daeuj lo.” Ahmaenz! Yehsuh bouxcawj raeuz hax, gou muengh mwngz daeuj! 21 Muengh Yehsuh bouxcawj raeuz doiq gij vunz Cangqdiq haijliengh! Ahmaenz.