Zyaŋ 1

Jɛ̀ɛ̀ ì rì lɛ, yɔ̀ kìtɛɛtɛn, yɔ̀ cɛɓ

1 A rìtumɛ̀n, Jɛ̀ɛ̀ ì ɓaghà, nni Jɛ̀ɛ̀ ì ɓaghà ɓɛɛ̀ Bɛ̀ll, Jɛ̀ɛ̀ ì ki ɓaghà Bɛ̀ll. 2 I ɓaghà ɓɛɛ̀ Bɛ̀ll a rìtumɛ̀n. 3 Jɛ̀ɛ̀ ìnɛn yɛ̀ɛ kighà ɓyom ɓìcèm, nni ɓi ɓyom ɓi ɓi kilɛ̀ngà, kidɛŋ ki kilɛ̀ngà ɓi kɛ̀ɛ̀ yɔ̀. 4 Cɛɓ ki ɓaghà ɓi Jɛ̀ɛ̀ ìnɛn, cɛɓ kìn ki ki fafa ɓum kìtɛɛtɛn. 5 Kìtɛɛtɛn ki lomlòm ɓi birìm, birìm yɛ̀ kɛɛ̀ ki teɗ kɔ. 6 Bɛ̀ll à romgày ŋwaàdɛŋ ɗii lɛ Zyaŋ. 7 Nnyɛɛ yughày fɛlɛ yɛ̀ɛ wusìnɛ̀ɗ à kìtɛɛtɛn lɛ di ɓum ɓɛɛ gherɛn lɛ rìkpaa ɗii. 8 Nyii ɓaghà ɓi kitɛɛtɛn, kìɓan kifog à yùghày lɛ a kpaà ɓum kìɓan ki kitɛɛtɛn. 9 Jɛ̀ɛ̀ ìnɛn ì ɓaghà kɔɔ̀kɔɔ̀ à kìtɛɛtɛn, ki ki yughà ɓi ziinɛ lɛ kɛɛ kpeŋzi ɓum ɓɛ̀cèm. 10 Jɛ̀ɛ̀ ì ɓaghà ɓi ziinɛ, yɛ̀ɛ ki kìghà ziinɛ, wɔ̀lɛ ziinɛ ì yitìghà ɓi yɔ̀. 11 Ì yughà a ɓum ɓii, ɓum ɓii ɓɛ̀ kɛɛ̀ ki ghàɓ yɔ̀; 12 wɔ̀lɛ ì faghà ɓum ɓɛ̀cèm ɓɛ ɓɛ ghaɓkà kɔ, ɓɛ gherɛ̀n ɗii ɗi yɔ̀, ìtèɗ wulɛ ɓɛɛ ɓa ɓɔn ɓɛ Bɛ̀ll. 13 Ɓumɓɛ̀n ɓɛ ghalà ɓi ɓɔn ɓɛ Bɛ̀ll rì nyoo ì mɛ̀mùù fɛlɛ yɛ̀ɛ ɓɔn ɓɛ ɓum ɓɛɛ̀ yalàg, lɔŋ Bɛ̀ll yɛɛ faghà ɓɔ cɛɓ ki nyɔn. 14 Fɔɔnnɛ jɛ̀ɛ̀ ì ghalà mum ànɛ à ghɛɓkà ɓi nyìinyìm wìs, ǹɗonɛn, rì geesɛ̀n, rì saaɗ, tì ki ghɛngà rìkem ɗii, rìkem ɗìn ɗi ki ɓa ɗi mbobog à Man ànɛ à pɛ̀sɛ̀ngày yɛ̀ɛ Seŋì. 15 Zyaŋ à rɛlìghà wusìnɛ̀ɗ ànɛ ɓi kìɓan kii, à làmɓɛ̀n lɛ: Nnyɛɛ ri ŋwaànɛ ǹkpaaghà mìni lɛ: Roànɛ à rìì mɛ̀ ajɛ̀m, à lokày rì mɛ̀, ɓisuulɛ nyii ɓaghà di mɛ̀ ǹka yin. 16 Ɓìsiìcèm tì mɛ teɗ ɓɛmààgh ɓɛ ɓi rìɓa ɗii ɗi à rì ǹɗonɛn, à saàsàgtàg ɓìsi geesɛ̀n. 17 Ɓisuulɛ, ɓìdɔ̀gsɛna ɓi falɛ̀ngà rì Moyis, geesɛ̀n rì saaɗ ɓi yuiy rì Yeesus Kiris. 18 Mum à ka ghɛngà ɓi Bɛ̀ll, lɔŋ m̀bobog à Man à Bɛ̀ll ànɛ à rì jàŋbog rì Seŋi yɛɛ kighà lɛ ɓɛɛ yi nyi.

Zyaŋ Bàɓtis à kpaa lɛ nyii yin Kiris

19 Fɛlɛ nnɛ Zyaŋ à kpaaghà yɛ̀ɛ Ɓɛ̀yudɛ̀n ɓɛ a Yorisalɛm ɓɛ romgày ɓɛ̀pìrɛɛtìrɛ̀ rì ɓɛ̀levìt lɛ ɓɛɛ tɔg nyi lɛ: Wɔ̀ɔ̀ rì ghɛn? 20 À gherɛ̀ngà kɛ̀ɛ pwàà, à gherɛ̀n, à kpaa lɛ: Mɛ̀ ǹ-yin Kiris. 21 Nni ɓɛ tɔkà nyi lɛ: Wɔ̀ɔ̀ rì min ghɛn? Wɔ̀ yɛɛ ri Eli gìn? Zyaŋ à ɓàg lɛ: Èe èe. Ù rì ǹkpaŋzì-ɓìɓan anɛ̀n? Zyaŋ lɛ: Àg. 22 Fɔɔnnɛ ɓɛ tɔkà nyi lɛ: Wɔ̀ɔ̀ ki rì min ghɛn? Tì ghɛ̀ɛ̀sɛɛ kì sugtii ki kpaà ɓumɓɛ ɓaa romiì ɓìsi rìɓàg. Wɛ̀ɛmiɗ kali ɓìsi! Wɔ̀ɔ̀ rì ghɛn? 23 Nni Zyaŋ à ɓàkà lɛ: Mɛ̀ ǹɗì jɛ̀ɛ̀ ì roànɛ a làalam̀ɓɛ̀n ɓi-reɓ lɛ pègsɛɛna bee ì Kan, lɔŋ yɛ̀ɛ ǹkpaŋzì-ɓìɓan Ezayii à kpaaghà. 24 Ɓumɓɛ ɓɛ romgày ɓɛǹ yɛ̀ɛ Zyaŋ, ɓɛ ɓaghà Ɓɛ̀fàrìzyɛŋ. 25 Nni ɓɛ tɔgtìghà nyi lɛ: I wɔ̀ ki yin Kiris, nsoò lɛ Eli, nsoò ǹkpaŋzì-ɓìɓan, ɓisuucɛ nnɛ u ɓàaɓaɓtì ɓum? Zyaŋ à ɓàg ɓɔ lɛ: 26 Mɛ̀ɛ mɓàaɓaɓtì ɓum rì mɛ̀nig, kìɓan kifog ŋwaàdɛŋ à rì foo ɓi nyìinyìm wìn, ànɛ ɓì yii ɓi; nyi yɛɛ riì mɛ̀ ajɛ̀m. 27 Mɛ̀ ǹwuɓsɛɛ gì ɓi nkoŋ wulɛ ǹfùmì ǹɗig wii wu gòò. 28 Ɓìɓan ɓiǹ ɓi kilɛ̀ngà a Bɛtanii, cɛcɛɗ ki Zyuridɛŋ, ɓi jàŋ inɛ Zyaŋ à ɓààɓàɓtìghà ɓum. 29 Ɓi duri tana, Zyaŋ à ghɛngà di Yeesus à tiì a lɔ̀ŋkii, à kpaa lɛ man à jɔ̀ɔ̀ à Bɛ̀ll ànɛ a pipisi kiɓe ki ɓum ɓi ziinɛ yɛɛ ri lɛ. 30 Nnyɛɛ ri roànɛ mɛ̀ɛ ǹkpaa lɛ ŋwaàdɛŋ à rìì mɛ̀ ajɛ̀m, à lokày mɛ̀ beèbɛ̀y, ɓisuulɛ nyii ɓaghà di mɛ̀ ǹka yin. 31 Mɛ̀ ǹ-yighà ɓi nyi, kìɓan kifog, ǹ-yùghày lɛ mɓaɓti ɓum rì mɛ̀nig, lɛ di Isirayɛl àa yii nyi. 32 Zyaŋ à kpaatìghà lɛ ǹghɛngà di Ǹghay a sɛnsɛn yi aɗyoo yɛ̀ɛ kuùkuù, à yù nyi kì ɓɛ̀lii ɓi nyòò. 33 Mɛ̀ ǹ-yighà ɓi nyi, wɔ̀lɛ roànɛ à romgày mɛ̀ lɛ mɓààɓàɓtì ɓum rì mɛ̀nig, à kpaaghà mɛ̀ lɛ: Ŋwaànɛ ù rì ɓiì ghɛɛ̀ di Ǹghay à sɛniì, ɓi nyoo à rɔ̀ɓ ɓi nyi, roànɛ̀n yɛɛ ɓiì ɓàɓtii ɓum rì Kìtɛntɛ̀ɛ̀n ki Nghay. 34 Mɛ̀ ǹghɛngà kìɓan kiǹ, fɔɔnnɛ ǹkpaaghà miì lɛ, nnyɛɛ ri Man à Bɛ̀ll.

Ɓɛ̀yilàg ɓɛ Yeesus ɓɛ ǹtonto

35 Ɓi duri tana, Zyaŋ à ɓaghà di à kaka wɔɔ ri ɓɛ̀yilàg ɓii ɓɛdɛŋ ɓɛɓɛɛ̀. 36 Yɛ̀ɛ à ghɛngà di Yeesus a ghaghààgh, nni à kpaaghà lɛ: Man à jɔ̀ɔ̀ à Bɛ̀ll innɛ. 37 Kìɓɛ̀ɛ̀ kii ki ɓɛyilàg ki wokà com ki à kpaaghà, ki ki nɔ̀ɔ̀ti Yeesus. 38 Yɛ̀ɛ Yeesus à lɔ̀ɔ̀ghrɛ̀ngày, à ghɛn lɛ ɓɛɛ̀ nɔ̀ɔnɔɔ̀tìì nyi, nni à tɔkà ɓɔ lɛ: Cɛ ɓi kaakàà? Ɓɛ̀roɓɛ̀n ɓɛ kpaa nyi lɛ: Raɓì, yɛɛ lɔɔ lɛ ǹɗèsàg, fennɛ ù kɔ̀kɔrii? 39 Yeesus à kpaa ɓɔ lɛ: Yùunay, di ɓi ghɛǹ. Nni ɓɛ kɛǹgà ɓɛ ghɛn jàŋ inɛ à kɔ̀kɔ̀rìghà, ɓɛ ratɛ̀n kì ghagsii ŋwos anɛ̀n ri nyi, ki ɓaghà nunùg mɛ̀kɛ̀ɛ̀ mɛnin à ŋwos nkɛ̀nɛn. 40 Andire à geni Simɔn Pyɛɛri à ɓaghà kìbog ki ɓi ɓum ɓɛ kiɓɛ̀ɛ̀ ɓɛ ɓɛ wokà kìɓan ki Zyaŋ à kpaaghà, ɓɛ nɔɔ̀tì Yeesus. 41 Andire ànɛn à lokà kì tanɛɛ ri Simɔn à geni, à kpaa nyi lɛ: Tyàa ghɛɛ Mèsii, yɛɛ lɔɔ lɛ Kiris. 42 Fɔɔnnɛ à syògà Simɔn yɛ̀ɛ Yeesus. Yeesus à fiɓì nyi à kpaa lɛ: Simɔn, man à Zyonas ɓɛ ri wɔ̀ ɓiì reŋɗaagh lɛ Sefas, yɛɛ lɔɔ lɛ Pyɛɛri. 43 Ɓi duri tana Yeesus à ɓekà lɛ a kɛǹ a Galile, nni à tanɛ̀ngà Filiɓ à kpaa nyi lɛ: Nɔ̀ɔ̀ti mɛ̀. 44 Filiɓ à ɓaghà ŋwaànɛ a Bɛdsayida, ɓi bàn ì ɓɛ̀-Andire ɓɛɛ̀ Pyɛɛri. 45 Fɔɔnnɛ Filiɓ à tuusɛ̀ngà rì Natanayɛl, à kpaa nyi lɛ: Tyàa ghɛɛ ŋwaànɛ kìɓan kii ki ri kìkànɛn ɓi kaàtà à ɓìdɔ̀gsɛna ɓi Moyis rì ɓi ɓɛ̀kaàtà ɓɛ ɓɛkpaŋzì-ɓìɓan, nnyɛɛ ri Yeesus à man à Yoosɛɓ ànɛ a Naazarɛt. 46 Nni Natanayɛl à kpaaghà Filiɓ lɛ: Cɛ ki cem kɛɛ ri lɛ ki kpaŋ yì a Naazarɛt? Fɔɔnnɛ Filiɓ à kpaaghà nyi lɛ: Yuiy u ghɛǹ. 47 Yɛ̀ɛ Yeesus à ghɛngà di Natanayɛl a yùyuiy nyi a nyoo nni à kpaaghà lɛ: Natanayɛl à rì kɔɔ̀kɔɔ̀ à muu Isirayɛl ànɛ à yin ɗi mɛ̀ɗyɔg. 48 Nni Natanayɛl à tɔkà Yeesus lɛ: Wɔ̀ɔ̀ yii mɛ̀ fe? Yeesus à pɛ̀ɛ̀zì nyi lɛ: Màa ghɛɛ wɔ̀ cààmɛ̀n ki wàa rì a nɗyèm wu fìgyee zi, di Filiɓ à ka reŋii ɓi wɔ. 49 Fɔɔnnɛ Natanayɛl à kpaaghà min Yeesus lɛ: Raɓì, ù rì Man à Bɛ̀ll, ù rì rìfòm ɗi Isirayɛl. 50 Yeesus à bàg nyi lɛ: Yɛ̀ɛ ǹkalii wɔ̀ lɛ màa ghɛɛ wɔ̀ a nɗyèm wu fìgyee zi, nnɛ ù gherɛɛ, ù rì ɓiì ki ghɛɛ̀ ɓìɓan ɓidɛŋ ɓi ɓi teghɛɛ ɓi cee fɔlɔɔ. 51 Ǹkalii mìni kɔɔ̀kɔɔ̀ à rìkpaa lɛ, ɓì rì ɓiì ghɛɛ̀ di ɗyoo ɗi nɛmɓɛɛ, ɓum ɓɛ titom ɓɛ Bɛ̀ll ɓɛ ɓɔɓɔ̀g ɓɛ sɛnsɛ̀n Man à mum a nto.

Zyaŋ 2

1 Ajɛ̀m ì mɛ̀ru mɛraa, kìsɛ̀nɛ̀ ki riwɛy ki ɓaghà a Kana, ɓi zi ì Galile, jɛɛ Yeesus à ɓaghà wɔɔ. 2 Ɓɛ reŋìghà girig Yeesus rì ɓɛ̀yilàg ɓii a kìsɛ̀nɛ̀ kiǹ. 3 Yɛ̀ɛ mɛ̀rɔ̀g mɛ lekà, nni jɛɛ Yeesus à kpaaghà nyi lɛ: Ɓɛ yiìdi ri mɛ̀rɔ̀g. 4 Yeesus à ɓàg nyi lɛ: Giɓ anɛ, cɛ kɛɛ ri lɛ rì mɛ̀ rì wɔ̀? Cààmɛ̀n kɛm̀ ki ka kpaŋ ɓi. 5 Jɛɛ à kpaa ɓɛ̀kìì-ɓìsay lɛ: Kìina com kìcèm ki à rì mìni ɓiì kalii. 6 Bèè yi mɛnig yi yi ɓaghà yì yèŋɛn ɗi gɔ̀g, yi ɓaghà wɔɔ taàfog; bèè yiǹ yi ɓaghà foo lɛ, yɛɛ ghɛɓsi ɓisuu ɓisyɔ̀ɔ̀ ɓi ritɛn ɓi ɓi rìgherɛ̀n ɗi Ɓɛ̀yudɛ̀n; bog ì ɓaghà lɛ ì kpaŋ ɓɛ̀kpɛm ɓɛɓɛɛ̀ nsoò lɛ ɓɛraa. 7 Yeesus à kpaa ɓɔ lɛ: Roòziina mɛ̀nig ɓi bèè yi, fɔɔnnɛ ɓɛ roòzàkà mɛ̀nig miì, lɛ pisa. 8 Yeesus à kpaa ɓɔ lɛ: Ɓɔ̀rina min mɔ, ɓi kɛǹ kì faà ǹkɛ̀ɛ̀sì-ɓìɓan ɓi kisɛ̀nɛ̀. Fɔɔnnɛ ɓɛ kɛngà nyi rì mɔ. 9 Yɛ̀ɛ ǹkɛ̀ɛ̀sì-kìsɛ̀nɛ̀ à ɓoɓtìghà mɛ̀nig mɛ mɛ ɓaghà mɛǹ di maa ghay mɛrɔ̀g, kɛ̀ɛ yi jàŋ inɛ mɛ̀rɔ̀g mɛǹ mɛ ɓaa yì, kɔm̀ lɛ ɓɛ̀kìì-ɓìsay ɓɛ ɓɛ ɓwɛɗkày mɛ̀nig ɓɔɔ yighà. 10 Fɔɔnnɛ à reŋìghà ŋwaànɛ à wɔlɛ̀ngà à kpaa nyi lɛ: Ɓɛ̀ro ɓɛɛ̀ loki kìfaà ɓɛ̀kèn mɛrɔ̀g mɛ syeesyee, ɓɛ siitɛ̀n ɓɔ kìfaà mɛ ɓeɓtɛn di ɓaa ŋwagì; kìɓan kifog wɔ̀ wàa ɓèŋɓeŋi mɛ̀rɔ̀g mɛ syeesyee à kpaŋ ɓigomìnɛ.

11 Fɔlɔɔ nnɛ Yeesus à kìghà dàm yìì i ǹtonto a Kana, ɓi zi ì Galile, à rèsì rìgwey ɗii, ɓɛ̀yilàg ɓii ɓɛ ki gherɛn nyi. 12 Ajɛ̀m ìnɛn, nnɛ à sɛngà a Kapɛrinawum ǹɗaŋ ri jɛɛ, rì ɓɛ̀geni, rì ɓɛ̀yilàg ɓii, ɓɛ ghagsì lɔŋ ɓɔɔ mɛru wɔɔ lɛsàg.

Yeesus à nàɓi ɓum ɓɛ ɓɛ kikìghà fyèè ɓi naà-Bɛ̀ll

13 Yɛ̀ɛ tìcàɓ ti Ɓɛ̀yudɛ̀n ti lɛ Paskà ti kɛɛkɛ̀ɛ̀ghày, nni Yeesus à ɓɔkà a Yorisalɛm. 14 À tanɛ̀n di ɓɛ ri ɓi naà-Bɛ̀ll lɛ rì ɓɛ̀kàɓì sanìnya, rì ɓɛ̀kàɓì bwiy, rì ɓɛ̀kàɓì ɓɛ̀kuùkuù, rì ɓumɓɛ ceeceǹɗìyɛ̀n ɓum mɔ̀ɔ̀ni. 15 Yɛ̀ɛ à kìlɛ̀ngà ǹkpas rì ɓìsɔŋ, nni à nàɓkà ɓɔ ɓɛ̀sɛ̀ɛ̀ ɓɛ̀cèm ɓi naà-Bɛ̀ll, à nàɓkì girig lɛ rì bwiy yaa, rì ɓɛ̀sanìnya ɓaa; à tyàŋzì mɔ̀ɔ̀ni mɛ ɓumɓɛ ɓɛ ceècèǹɗìghà ɓum mɔ̀ɔ̀ni, à tyɔkì ɓɛ̀teɓèrè ɓaa; 16 à ki kpaa ɓɛ̀kàɓì ɓɛ̀kuùkuù lɛ: Pisiina ɓyom ɓi fɛ! Kɛ̀ ɓi ghaasi naa ì Seŋi wɛ̀m mɛɛ mɛ fyèè. 17 Nni Ɓɛ̀yilàg ɓii ɓɛ yitìghà lɛ ki ri kì kànɛn lɛ: Ǹkɔ̀nɛ̀n à naa yɔ̀ɔ̀ à ɓuni mɛ̀ ǹɗem. 18 Ɓɛ̀yudɛ̀n ɓɛ tekà jɛ̀ɛ̀ ɓɛ tɔg nyi lɛ: Dàm ì be yɛɛ̀nɛ ù rì lɛ ù kì, lɛ u resi ɓìsi lɛ, ù rì rì ìtèɗ wulɛ u ki yɛ̀ɛ ù kìi yì lɔɔ? 19 Yeesus à ɓàg ɓɔ lɛ: Wààghiina na-Bɛ̀ll ìnɛ mpɛɛ̀zi yɔ̀ ki toŋì ɓi mɛ̀ru mɛraa. 20 Ɓɛ̀yudɛ̀n ɓɛ pɛɛ̀zì nyi lɛ: Naà-Bɛ̀ll ìnɛ ɓɛ togà bèg mɛ̀tin mɛɓɛɛ̀ rì bèg taàfog, yɛɛ̀nɛ wɔ̀ɔ̀ rì ɓiì pɛ̀ɛ̀zii kitoŋì ɓi mɛ̀ru mɛraa? 21 Wɔ̀lɛ naà-Bɛ̀ll ìnɛ Yeesus à kalìghà, ì ɓaghà nyoo yìì. 22 Yɛ̀ɛ à ghèmɓɛ̀ngày a nyɔ̀ɛ̀y, ɓɛ̀yilàg ɓii ɓɛ yitì lɛ à kpaaghà fɔlɔɔ, fɔɔnnɛ ɓɛ gherɛ̀ngà ɓìɓan ɓi ɓi ri ɓì kànɛn, ɓɛ ki gherɛn ti kìɓan ki Yeesus à kpaaghà kiǹ. 23 Cààmɛ̀n ki Yeesus à ɓaghà a tìcàɓ ti a Paskà Yorisalɛm, ɓum lɛɛ̀gwey ɓɛ gherɛ̀ngà nyi, yɛ̀ɛ ɓɛ ghɛngà dàm yi ɓiɓan yi à kìkìghà. 24 Wɔ̀lɛ Yeesus à tyweeyàkà ɓi ɓɔ ɓisuulɛ, à yighà ɓɔ ɓɛ̀sɛ̀ɛ̀ ɓɛ̀cèm, 25 rì tì lɛ, ki ghɛɓsìghà ɓi nyi com lɛ ɓɛɛ ka rèsi nyi rìɓa ɗi mum, lɛ nyimiɗ a yighà com ki mum a fèfeg ɓi ǹɗem ɓi ɗùm.

Zyaŋ 3

Ìkurè wu lɛ rì Yeesus rì Nikodɛm

1 Nni ŋwaàdɛŋ ànɛ ɓi nɗaŋ wu Ɓɛ̀fàrìzyɛŋ ɗii lɛ Nikodɛm, à ɓaghà kìbog ki ɓi ɓɛ̀lem ɓɛ ɓum ɓɛ Ɓɛ̀yudɛ̀n, 2 à yùghà yɛ̀ɛ Yeesus rì ìru à kpaa nyi lɛ: Raɓì, tì yii lɛ, ù rì ǹɗèsàg ànɛ Bɛ̀ll yɛɛ romiì ɓisuulɛ, ŋwaà yin lɛ à kì dàm yi ɓiɓan yɛ̀ɛ yi wɔ̀ɔ kìki yi, di Bɛ̀ll à yin a lɔ̀ŋkii. 3 Nni Yeesus à ɓàkà nyi lɛ: Ǹkpaa wɔ̀ kɔɔ̀kɔɔ̀ à rìkpaa lɛ, i mum à yalɛɛ tì ɓi nyɔɔnyɔn à rìyalɛ̀n, à yin lɛ à ghɛn kìlɔ̀ŋ ki Bɛ̀ll. 4 Fɔɔnnɛ Nikodɛm à tɔkà nyi lɛ: Lannɛ mum à rì lɛ à yalɛ̀ntì di à ti ǹsɛ̀ɛ̀mɛn? À rì nya lɛ à sugtì ɓi ɗùm ɗi jɛɛ à yalɛ̀ntì? 5 Yeesus à ɓàg nyi lɛ: Ǹkpaa wɔ̀ kɔɔ̀kɔɔ̀ à rìkpaa lɛ, i mum à yalɛɛ ɓi ri mɛ̀nig rì Ǹghay, à yin lɛ à ɗiŋì ɓi kìlɔ̀ŋ ki Bɛ̀ll. 6 Lɛ ŋwaànɛ à yalɛɛ rì mɛ̀mùù, à rì lɔŋ mum à mɛ̀mùù, roànɛ à yalɛɛ rì Ǹghay à rì ǹghay. 7 Fɔɔnnɛ kɔ̀ɔ kuurag lɛ màa kpaa wɔ̀ lɛ, ki ghɛɛ̀sɛɛ lɛ ɓi ɓiìti kì yalɛɛ. 8 Bɛ̀ɓ ì ti ì fɛɓsag jàŋ inɛ ì kɔni, wɔ̀ɔ̀ wowòg lɔŋ lɛ rìfiŋfìŋ kɔ̀ɔ yi fennɛ ì pɛ̀sɛɛ yì, nsoò jàŋ inɛ yɛɛ̀ kɛ̀nkɛ̀n. Fɔlɔɔ nnɛ mum ǹcèm ànɛ à mɛ yalɛn ri Ǹghay à rì. 9 Nni Nikodɛm à pɛ̀ɛ̀zìghà nyi lɛ: Kìɓan kiǹ ki ri lɛ ki kilɛ̀n di ki ɓaɓaa là? 10 Yeesus à kpaa nyi lɛ: Wɔ̀ lɔŋ nɗèsàg ànɛ a Isirayɛl, kɔ̀ɔ ki yi ɓiɓan ɓi? 11 Ǹkpaa wɔ̀ kɔɔ̀kɔɔ̀ à rìkpaa lɛ, ɓìsiì kpaakpaa ɓiɓan ɓi tì yii, tì ki tɛɛtɛɛ̀zì ɓum ɓìɓan ɓi tì ghɛngà, kìɓan kifog kɛ̀ ɓi kɔ̀n lɛ di ɓyàa teri rìrèsì ɗis. 12 I ɓì ti kɛ̀ ɓi gherɛn di ǹkpaa mìni ɓìɓan ɓi ɓi ziinɛ, lannɛ ɓì rì min ɓiì gherɛɛ di ǹkpaa mìni ɓìɓan ɓi aɗyòò? 13 Ŋwaàdɛŋ à ka ɓɔkà ɓi aɗyòò i ki cee ɓi lɛ Man à mum ànɛ à sɛngày aɗyòò. 14 Fɛlɛ yɛ̀ɛ Moyis à pɛ̀sìghà nyoo ɓi kìgeŋ aɗyoo ɓi-reɓ, fɔlɔɔ nnɛ ki ghɛɛ̀sɛɛ girig lɛ, ɓɛɛ pɛsi Man à mum aɗyoo, 15 lɛ di mum ǹcèm ànɛ à gherɛɛ nyi, à ɓa rì cɛɓ ki fiɗyàɓ fikɔ̀ɔ̀. 16 Lɛ Bɛ̀ll à keesìghà ziinɛ à pyàŋdàg fɔlɔɔ nnɛ à faghà m̀bobog wìì a Man lɛ ŋwaànɛ à gherɛɛ nyi kɛ̀ɛ wu, a ɓa lɔŋ ri cɛɓ ki fiɗyàɓ fikɔ̀ɔ̀. 17 Lɛ Bɛ̀ll à romgày ɓi Man wiì ɓi ziinɛ lɛ a fa yɔ̀ bɛ̀lɛn, à romgày lɔŋ nyi lɛ a ghɛɓsi yɔ̀. 18 Ŋwaànɛ à gherɛɛ nyi à yiìdi ri bɛ̀lɛn wɔ̀lɛ roànɛ à gherɛɛ ɓi nyi yɛɛ ti rì bɛ̀lɛn ɓisuulɛ, à gherɛ̀ngà ɓi mbobog à Man à Bɛ̀ll. 19 Bɛ̀lɛn i rì ǹto lɛ: Kìtɛɛtɛn ki yughày ɓi ziinɛ, ɓum ɓɛ ki keesi birìm à cee kìtɛɛtɛn kìn, lɛ mɛ̀kìkìì maa mɛ ɓaghà mɛ̀ɓeɓtɛn. 20 Lɛ mum ǹcèm ànɛ a kìki kiɓe, à ti à ɓèèzàg kìtɛɛtɛn, kɛ̀ɛ ki yù jàŋ inɛ kìtɛɛtɛn ki ri, lɛ ìris wulɛ ɓìɓan ɓii ɓyɛ̀ kɛɛ̀ ki kpagi dan. 21 Wɔ̀lɛ roànɛ à ti à kìlàg ɓìɓan ɓi saaɗ, nnyɛɛ ti à yùlàg jàŋ inɛ kìtɛɛtɛn ki ri, lɛ ɓɛɛ ghɛǹ lɛ tɛntɛ̀ɛ̀n lɛ, a kìki ɓiɓan yɛ̀ɛ kɛɛ̀ kɔ̀ngi Bɛ̀ll.

Zyaŋ à rèsii tì ɓum rìɓa ɗi Yeesus

22 Ajɛ̀m ìnɛn, Yeesus à kɛ̀ngà rì ɓɛ̀yilàg ɓii ɓi ziì Zyude; à ghagsìghà cààmɛ̀n wɔɔ ri ɓɔ, à ki ɓàaɓaɓtì ɓum. 23 Zyaŋ girig à ɓààɓàɓtìghà ɓum a Enɔŋ, jàŋbog rì Salim lɛ mɛ̀nig mɛ ɓaghà wɔɔ lɛɛ̀gwey. Nni ɓum ɓɛ kɛnkɛ̀ngà wɔɔ lɛ a ɓaɓti ɓɔ. 24 Lɛ ki ɓaghà di ɓɛ ka pig ɓi Zyaŋ ɓi naà-zày. 25 Nni nyoey yi kpighà lɛ rì ɓɛ̀yilàg ɓɛ Zyaŋ, rì muu Ɓɛ̀yudɛ̀n ɓi kìɓan ki ritɛn, ɓi ɓìsyɔ̀ɔ̀ ɓi righerɛ̀n ɗi Ɓɛ̀yudɛ̀n. 26 Fɔɔnnɛ ɓɛ̀yilàg ɓɛ kɛngà yɛ̀ɛ Zyaŋ ɓɛ kpaa nyi lɛ: Raɓì, ŋwaànɛ ɓìi nɗì rì nyi cɛcɛɗ ki Zyuridɛŋ, ànɛ wɔ̀ɔ ntɛɛzsii ɓìsi rìɓa ɗii, à ti girig ɓiì ɓàaɓaɓtì ɓum, fɔɔnnɛ ɓum ɓɛ̀cèm ɓɛɛ̀ sùusuùrɛ̀n a lɔ̀ŋkii. 27 Nni Zyaŋ à ɓàkà ɓɔ lɛ: Mum à yin lɛ à ɓa rì com kidɛŋ, ki ki yin ki Bɛ̀ll à faa nyi. 28 Mìniìɓɔmiɗ ɓì rì mɛ̀ ɓɛ̀wusìnɛ̀ɗ lɛ, ǹkpaaghà lɛ, àa mɛ̀ yɛɛ ri Kiris, kìɓan kifog, ɓɛ romgày mɛ̀ lɛ nsyoŋ̀ yì nyi bee. 29 Ŋwaànɛ à rì rì giɓ, yɛɛ ri yii giɓ; wɔ̀lɛ rìghan ɗi yii giɓ ɗi ɗi ri wɔɔ ɗi ti ɗi nyaàràg yɛ̀ɛ mɛ̀nɔ̀ɓɔ̀, lɛ jɛ̀ɛ̀ ì yii giɓ inɛ ɗyɛɛ̀ wowòg. Rìkuu ɗi kinyàà ɗiǹ ɗyɛɛ̀ɗi mɛ̀ ǹɗì ǹɗonɛn ri ɗyɔ̀. 30 Ki ghɛɛ̀sɛɛ lɛ nyii ɓɔɓɔg, mɛ̀ nsisìlì. 31 Ŋwaànɛ à pɛ̀sɛɛ yì aɗyoo, à teŋmɛɛ à cee ɓum ɓɛ̀cèm; roànɛ à pɛ̀sɛɛ yì ɓi ziinɛ, à rì lɔŋ ŋwaànɛ ɓi ziinɛ, fɔɔnnɛ a ki kpaakpaa ɓiɓan ɓi ɓi ziinɛ. Ŋwaànɛ à pɛ̀sɛɛ yì a ɗyoo, 32 ɓìɓan ɓi à ghɛngà rì ɓi à wokà ɓyɛɛ̀ɓi a rèrèsì; nni mum à ki teri ɓi rirèsì ɗii ɗiǹ. 33 I mum à ki teri rìrèsì ɗii, di à gherɛɛ yɛɛ lɔɔ lɛ Bɛ̀ll à ti à kpaaghì saaɗ. 34 Ɓisuulɛ, roànɛ Bɛ̀ll à romgày, a kakali ɓiɓan ɓi Bɛ̀ll; lɛ Bɛ̀ll à ti à roòzàg nyi rì Nghay wìì lɛ pisa. 35 Seŋi à keesii Man, fɔɔnnɛ à faghà ɓìɓan ɓìcèm ɓi ɓyàg ɓii. 36 Nni mum ǹcèm ànɛ à gherɛɛ Man, à rì rì cɛɓ ki fiɗyàɓ fikɔ̀ɔ̀; ŋwaànɛ à woogh ɓi nyi, àa ghɛn ɓi cɛɓ, kìɓan kifog, rìbaŋì ɗi Bɛ̀ll ɗi kaka nyi ɓi nyòò.

Zyaŋ 4

Yeesus rì giɓ anɛ a Samari

1 Yeesus à wokà lɛ ɓɛ nkalii Ɓɛ̀fàrìzyɛŋ lɛ nyiì syòŋsyoŋ ɓum à cee Zyaŋ lɛ ɓɛɛ ɓa ɓɛ̀yilàg ɓii, à ki ɓàaɓaɓtì ɓɔ; 2 wɔ̀lɛ ɓi saaɗ à rìkpaa, Yeesus nyimiɗ a ɓààɓàɓtìghà ɓi ɓum, lɔŋ ɓɛ̀yilàg ɓii ɓɛɛ ɓààɓàɓtìghà ɓɔ. 3 Fɔɔnnɛ à pɛ̀sɛ̀ngà a Zyude à sugtì a Galile. 4 Ki ghɛɛ̀sɛ̀ngà lɛ, a fyeè a Samari. 5 Nni à kpagà ɓi bàn ìdɛŋ ìnɛ a Samari ɗii lɛ Sikar, jàŋbog rì dɛm inɛ Yakɔɓ à faghà man wiì ànɛ lɛ Yoosɛɓ. 6 Kìɗig ki Yakɔɓ ki ɓaghà ɓi dɛm inɛ̀n; Yeesus à kɔ̀rìghà ɓi nwɔŋì wu kiɗig kiǹ, di à mɛ fɔy rikɛ̀ɛ̀; ki ghɛɛ̀sɛ̀ngà kì ɓaà nunùg toroɓ. 7 Fɔɔnnɛ giɓ anɛ a Samari à yùghà kì roògh mɛ̀nig, Yeesus à kpaa nyi lɛ: Faa mɛ̀ mɛ̀nig mɛ nɔyɛn. 8 Lɛ ɓɛ̀yilàg ɓii ɓɛ kɛngà kì làghiì ɓìɗilàg ɓi bàn. 9 Nni giɓ anɛ a Samari ànɛn à ɓàkà nyi lɛ: Lannɛ wɔ̀ muu Ɓɛ̀yudɛ̀n, ù lɔni mɛ̀ mɛ̀nig mɛ nɔyɛn, kɔm̀ lɛ mɛ̀ ǹɗì giɓ anɛ a Samari? Lɛ Ɓɛ̀yudɛ̀n ɓɛ ɓaghà ɓi lɛ ɓɛ wooghrɛ̀n ɗì ɓumɓɛ a Samari. 10 Fɔɔnnɛ Yeesus à ɓàkà giɓ anɛ̀n lɛ: I wàa yii rìfa ɗi Bɛ̀ll, ù ki yi roànɛ à lɔni wɔ̀ mɛ̀nig mɛ nɔyɛn, di wɔ̀ yaa rì lɛ, ù lɔn nyi mɛ̀nig mɛ noyɛn, di àa ki faa wɔ̀ mɛ̀nig mɛ cɛɓ. 11 Nni giɓ anɛ̀n à kpaaghà nyi lɛ: Kan, wɛ̀ɛnɛ̀n kɛ̀ɛ̀ com ki lɛ ù rog mɛ̀nig miì, kìɗig ki ki rì kìrimɛn, nni mɛ̀nig mɛ cɛɓ mɛ ri wɔ̀ ɓiì ɓaà yì fe? 12 U fèfeg lɛ wɔ̀ yɛɛ cee seŋi wìs a ǹsɛ̀ɛ̀ anɛ lɛ Yakɔɓ, ànɛ à faghà ɓìsi kìɗig ki, nyimiɗ, rì ɓɔn ɓii, rì ɓìtuwe ɓii, ɓɛ nɔ girig kɔ̀? 13 Yeesus à ɓàg nyi lɛ: Mum ǹcèm ànɛ à nɔɔ mɛ̀nig mɛ, à rì ti lɔŋ ɓiì woògh kìnɔli. 14 Kìɓan kifog, ŋwaànɛ à rì ɓiì nɔɔ̀ mɛ̀nig mɛ ǹɗì nyi ɓiì faà, àa wogtii gɛ ɓi kinɔli. Lɛ mɛ̀nig mɛ ǹɗì nyi ɓiì faà mɛǹ, mɛ ri ɓiì ghalì ǹsim à cɛɓ ki fiɗyàɓ fikɔ̀ɔ̀ ɓi nɗem wii. 15 Nni giɓ anɛ̀n à kpaaghà nyi lɛ: Kan, faa mɛ̀ mɛ̀nig mɛǹ, di kìnɔli kɛ̀ kɛɛ̀ kìti mɛ, kɛ̀ɛ nki yùti kiroògh mɛ̀nig fɛ. 16 Yeesus à pɛ̀ɛ̀zì nyi lɛ: Kɛ̀nay kìreŋii yii wɔɔ̀, di u sugtiì fɛ. 17 Nni giɓ a ɓàkà nyi lɛ: Mɛ̀ ǹ-yin ɗi yii. Yeesus à kpaa nyi lɛ ù kpaa saaɗ yɔɔ̀ kalii lɛ ù yin ɗi yii; 18 ɓisuulɛ, ù ti mɛ̀wɛy mɛtaǹ, nni ŋwaànɛ ù rì rì nyi ɓigomìnɛ, à yin yii wɔɔ̀, fɔɔnnɛ jɛ̀ɛ̀ ìnɛ wàa kpaa ì rì miì. 19 Nni giɓ a kpaaghà nyi lɛ: Kan! Ǹghɛɛ lɛ, ù rì ǹkpaŋzì-ɓìɓan. 20 Ɓɛ̀seŋi ɓis ɓɛ mɓɔgsaagh Bɛ̀ll ɓi dòn ìnɛ, kìɓan kifog mìnii kpaaghì lɛ, a Yorisalɛm nnɛ ɓum ɓɛ ghɛɛ̀sɛɛ kì ɓɔgsaagh Bɛ̀ll. 21 Fɔɔnnɛ Yeesus à kpaaghà nyi lɛ: Giɓ anɛ! Gherɛn rìkpaa ɗyɛ̀m, lɛ cààmɛ̀n ki riì, ki ɓyàa ɓɔgsi ti ɓi Tààta ɓi dòn ìnɛ, nsoò lɛ a Yorisalɛm. 22 Lɛ mìniì ɓɔɔɓɔgsì com ki ɓì yii ɓi, ɓìsiì ɓɔɔɓɔgsì com ki tì yii, lɛ gòri ì ɓum ì pɛ̀sɛɛ yì a Ɓɛ̀yudɛ̀n. 23 Wɔ̀lɛ cààmɛ̀n ki tiì, kiŋcèm ki mɛ ki kpaŋ, ki ɓɛ̀kɔɔ̀kɔɔ̀ ɓɛ ɓɛ̀ɓɔgsì Bɛ̀ll ɓɛ ri ɓiì ɓɔgsii Tààta rì nghay, rì saaɗ. Ɓumɓɛ ɓɛɛ̀ ɓɔɔ̀ɓɔ̀gsì nyi fɔlɔɔ ɓɛɛ̀ɓɛ Tààta a kaakàà. 24 Bɛ̀ll àrì Nghay, fɔɔnnɛ ki ghɛɛ̀sɛɛ lɛ ɓumɓɛ ɓɛɛ̀ ɓɔɔɓɔgsì nyi ɓɛɛ ɓɔgsi nyi rì nghay, rì saaɗ. 25 Fɔɔnnɛ giɓ anɛ̀n à kpaaghà Yeesus lɛ: Ǹ-yii lɛ Mèsii à ɓiì yùu, ànɛ à rì ɗii lɛ Kiris. Yɛ̀ɛ à ri yù, à ri kali ɓisi ɓiɓan ɓìcèm. 26 Yeesus à kpaa min nyi lɛ: Mɛ̀ ànɛ ntòtog anɛ rì wɔ̀, mɛ̀ yɛɛ ri Mèsii. 27 Ɓi cààmɛ̀n kiǹ innɛ ɓɛ̀yilàg ɓɛ Yeesus ɓɛ sugtìghày, ɓɛ kuuràg yɛ̀ɛ ɓɛ ghɛngà nyi di a tòtog ri giɓ, kìɓan kifog, kìbog ki ɓi ɓɔ ki ghɛɛsìghà ɓi lɛ, kɛɛ tɔg nyi lɛ, la yɛɛ ri? Nsoò lɛ cɛ kɛɛ̀ki u kpaakpaa ri giɓ anɛ? 28 Nni giɓ a càɗkà bèè yiì ì mɛ̀nig, à sugtì ɓi bàn, à kpaa ɓumɓɛ wɔɔ lɛ: 29 Yùuna kìghɛɛ̀ ŋwaàdɛŋ ànɛ àa kpaa mɛ̀ ɓìɓan ɓìcèm ɓi m̀mɛ kì, ɓaà yi ɓi nnyɛɛ ri Kiris. 30 Fɔɔnnɛ ɓum ɓɛ pɛsɛ̀ngày ɓi bàn, ɓɛ yu jàŋ inɛ Yeesus à ɓaghà. 31 Ɓi nyìinyìm ànɛn, ɓɛ̀yilàg ɓii ɓɛ ɓɔɔ̀ɓɔ̀ŋzìghà nyi, di ɓɛɛ̀ kpaakpaa lɛ: Raɓì, ɗiya ɓà maa com. 32 Kìɓan kifog Yeesus à ɓàkà ɓɔ lɛ: Ǹɗì rì ɓìɗilàg ɓidɛŋ ɓi nɗi, ɓi mìnii yii ɓì. 33 Fɔɔnnɛ ɓɛ̀yilàg ɓɛ tɔɔ̀ghtɔ̀ɔ̀ghrɛ̀ngà wɔɔ ɓɔ rì ɓɔ lɛ: Ŋwaàdɛŋ àa rì nya lɛ, à yùy nyi rì com ki ɗiyɛn giǹ? 34 Yeesus à kpaa ɓɔ lɛ: Ɓìɗilàg ɓyɛm̀ ɓi ri lɛ nki rìkɔ̀n ɗi roànɛ à romgày mɛ̀, ǹki lègsi kisay ki à faghà mɛ̀. 35 Mìnii ti ɓì kpaaghì lɛ ɓɛ̀ŋwii ɓaa rɔ̀ɓ ɓɛnin lɛ mɛ̀saŋ mɛɛ tumɛn. Nni mɛ̀ ǹkpaa mìni lɛ, pìighna mis ɓi ghɛǹ yɛ̀ɛ ɓyom ɓyaa tèɗ ɓi ɓɛ̀dɛm lɛ, ɓɛɛ saŋ. 36 Ǹsaŋì-mɛ̀saŋ à mɛ teɗ mɛlèɓ mii, à ki taŋzɛn ɓiɗùn ɓisuu cɛɓ ki fiɗyàɓ fikɔ̀ɔ̀, lɛ di m̀ɓɛ̀lì-ɓyom rì ǹsaŋì-mɛ̀saŋ, ɓɛɛ nyaàrɛn ǹɗaŋ. 37 Ɓisuulɛ dàɗkì ìnɛ lɛ, i mum bog à ɓɛ̀li, roàmbog à saŋ, ì rì saaɗ. 38 Ǹɗomgà mìni lɛ ɓi kɛǹ mɛ̀saŋ ɓi dɛm inɛ ɓum ɓɛdɛŋ ɓɛɛ salà, mìnii ki ɗiŋi ɓi jàŋ inɛ ɓɔɔ mɛ say kɛ̀ɛ̀ mɛ̀tɔɓ. 39 Ɓumɓɛ a Samari lɛɛ̀gwey ɓɛ ɓi bàn ìnɛn, ɓɛ gherɛ̀ngà Yeesus, ɓi rìkpaa ɗi giɓ anɛ̀n à kpaaghà ɓɔ lɛ: Ŋwaànɛ àa kpaa mɛ̀ ɓìɓan ɓìcèm ɓi m̀mɛ kì. 40 Nni yɛ̀ɛ ɓumɓɛ a Samari ɓɛ yughày nyi a nyoo, ɓɛ ɓɔŋzàg nyi lɛ a kɔri a lɔ̀ŋkaa. Fɔɔnnɛ Yeesus à ghagsìghà mɛ̀ru mɛɓɛɛ̀ wɔɔ. 41 Ɓum ɓɛdɛŋ lɛɛ̀gwey ɓɛ gherɛ̀ngà ɓisuu ɓiɓan ɓi Yeesus nyimiɗ a kpaakpààghà. 42 Fɔɔnnɛ ɓɛ kpaaghà giɓ anɛ̀n lɛ, àa rìkpaa ɗyɔɔ ɗyɔ rì ɗyɔ ɗyɛɛ kiì lɛ ti gherɛn. Tì gherɛɛ ɓigomìnɛ lɛ ɓìsiìɓɔmiɗ tì woogh ɓìtòkì ɓii, tì ki yi lɛ, à rì Ǹghɛɓsì-ziinɛ a tààkaà.

Yeesus à wɔ̀ɔ̀zii man à ǹkɔ̀mɛ̀n ɓɛ̀sujàà

43 Yɛ̀ɛ mɛ̀ru mɛ kiɓɛ̀ɛ̀ mɛǹ mɛ ghaghìghà, nni Yeesus à pɛ̀sɛ̀ngà wɔɔ lɛ a kɛǹ a Galile. 44 Lɛ nyimiɗ a kalìghà lɛ: Ǹkpaŋzì-ɓìɓan a maà kem ɓi ɓi kìlɔ̀ŋ kii. 45 Yɛ̀ɛ à kpagà a Galile, ɓumɓɛ wɔɔ ɓɛ ghaɓ nyi lɛ syeesyee, lɛ ɓɛ ghɛngà ɓìɓan ɓìcèm ɓi à kìghà a Yorisalɛm, ɓi cààmɛ̀n à tìcàɓ ti Paskà, lɛ ɓumɓɛ̀n ɓɛ kɛǹgà girig tìcàɓ tiǹ. 46 Fɔɔnnɛ à sugtìghà min a Kana, ɓi zi ì Galile, jàŋ inɛ à ghaasìghà mɛ̀nig mɛrɔ̀g. Ǹkɔ̀mɛ̀n-ɓɛ̀sujàà ɓɛ rifòm adɛŋ à ɓaghà a Kapɛrinawum, nni man wiì à baŋì à roròɓkà. 47 Yɛ̀ɛ ŋwaànɛ̀n à wokà lɛ, Yeesus àa m̀pɛ̀sɛɛ yì a Zyude, à yù a Galile, fɔɔnnɛ à kɛ̀ngà nyi a nyoo, à ɓɔ̀ŋzàg nyi lɛ, ɓɔɔ sɛǹ a Kapɛrinawum, ànɛ̀n a wɔɔ̀zi man wiì à baŋì, ànɛ à ɓaghà di à ti ɓiì kɔ̀ɔkɔɔ̀sì. 48 Nni Yeesus à kpaaghà nyi lɛ: Mìnii ri lɔŋ lɛ, i ɓì ghɛɛ ɓi dàm yi ɓiɓan, rì ɓɛ̀koŋnyoo ɓɛ ɓiɓan, kɛ̀ ɓi gherɛn. 49 Fɔɔnnɛ ǹkɔ̀mɛ̀n-ɓɛ̀sujàà à ɓàkà nyi lɛ: Kan yuiy ɓà a mɛɛ mɛm̀ di ŋwɔɓti wɛ̀m à ka maasi ɓi. 50 Yeesus à kpaa nyi lɛ: Kɛ̀na man wɔɔ̀ à rì cem. Ŋwaànɛ̀n à gherɛ̀ngà rìkpaa ɗi Yeesus à kpaaghà nyi ɗìn, fɔɔnnɛ à pɛ̀sɛ̀ngà à kɛ̀n. 51 Yɛ̀ɛ à sɛnsɛ̀ngà a mɛɛ, nni ɓɛ̀kìì-ɓìsay ɓii ɓɛ yughà nyi kìɓoŋì ɓi bee, ɓɛ kpaa nyi lɛ: Man wɔɔ̀ à rì cem. 52 Fɔɔnnɛ à tɔkà ɓɔ lɛ: Fin innɛ nyoo yìì yàa sààmɛɛ? Ɓɛ ɓag̀ nyi lɛ: Ìi nsààmɛɛ rìŋ̀kò ɓi cààmɛ̀n à rìkɛ̀ɛ̀ ɗìfog. 53 Fɔɔnnɛ seŋi man ànɛ̀n à yitìghà lɛ, cààmɛ̀n kiǹ kɛɛ̀ki Yeesus àa nkpaa nyi lɛ: Man wɔɔ̀ à rì cem. Nni à gherɛ̀ngà Yeesus rì rìmɛɛ ɗii ɗicèm. 54 Dàm ìnɛn yɛ̀ɛ ɓaghà dàm ì kìɓɛ̀ɛ̀ inɛ Yeesus à kìghà a Galile, di à ɓaa yì a Zyude.

Zyaŋ 5

Yeesus à wɔ̀ɔ̀zii ŋwaànɛ à ɓaghà kìwɔ̀g, a kìɗig ki lɛ Bɛtzata

1 Ajɛ̀m ìnɛn, Ɓɛ̀yudɛ̀n ɓɛ ɓaghà rì tìcàɓ, fɔɔnnɛ Yeesus à ɓɔkà a Yorisalɛm. 2 A Yorisalɛm, coo kiɗig kidɛŋ ki ri wɔɔ, jàŋbog rì rìɗigì ɗi ɓi bàn ɗi lɛ, ìsuunaa wu jɔ̀ɔ̀, ɓɛ regì kɔ ɓi kìtòkì ki Ɓɛ̀yudɛ̀n lɛ: Bɛtzata; kìɗig kiǹ ki ɓaghà ɓɛ̀tuùtuu mɛtaǹ. 3 Ɓìtuu ɓi ɓɛroroɓ ɓi nɔɔ̀nɔ̀ŋdɛ̀ngà a ɓɛ̀tuùtuu ɓɛ̀n zi, lɛ rì ɓɛ̀ɗyaŋɗyàŋ, rì ɓɛ̀lɛnlɛm, rì ɓìwɔ̀g, ɓɛ ɓoŋɓòŋ lɛ mɛ̀nig mɛɛ nyɛŋ̀ɗɛn. 4 Lɛ ŋwaà-fìtom àa nti à sɛngìì ɓyààmɛ̀n ɓidɛŋ ɓi kìɗig kiǹ, à nyɛ̀ŋzì mɛ̀nig; fɔɔnnɛ ki mɓalàg lɛ, i mɛ̀nig mɛ mɛ nyɛ̀ŋɗɛ̀n, ŋwaànɛ à loogh miì kì kpìi, àa soo roròɓ rìkuu ɗi firoɓ aɗi, à wɔ̀n. 5 Nni roròɓ àdɛŋ à ɓaghà wɔɔ di à mɛ finɛn ɓi fìroɓ, bèg rìtin ɗì ǹtɛ̀ɗ rì taàraa. 6 Yɛ̀ɛ Yeesus à ghɛngà nyi ǹnɔ̀nɔŋiyɛn, à ki yi lɛ, à mɛ finɛn ɓi-kɔ̀ɔ̀ wiǹ, nni à tɔkà nyi lɛ: U kɔ̀nkɔn lɛ di wàa wɔ̀ni? 7 Roròɓ ànɛ̀n à ɓàg nyi lɛ: Kan, ǹ-yin ɗi mum ànɛ lɛ, à pìg mɛ̀ ɓi kìɗig, di mɛ̀nig mɛ mɛ nyɛŋ̀ɗɛ̀n; lɛ ki ti lɛ cààmɛ̀n ki mɛ̀ɛ nka yeeghyeèghkɛ̀n lɛ nkpi ɓi kìɗig, ŋwaàdɛŋ à log rì mɛ̀. 8 Nni Yeesus à kpaaghà nyi lɛ: Pɛ̀sɛn aɗyòò, u teɗ kon wɔɔ̀, u kɛɛ̀ghi. 9 Fɔɔnnɛ ŋwaànɛ̀n à ghàskà kì wɔ̀ni, à teɗ kon wiì, à tumɛ̀n rìkɛ̀ɛ̀kɛ̀ɛ̀. Ŋwos anɛ̀n à ɓaghà ŋwosi Saɓàt. 10 Nni Ɓɛ̀yudɛ̀n ɓɛ kpaaghà ŋwaànɛ ɓɛ wɔɔ̀zìghà ànɛn lɛ: Ŋwosi Saɓàt yɛɛ ri lɛ. Ɓìdɔ̀gsɛna ɓis ɓi gherɛɛ ɓi lɛ, u tɛg kon wɔɔ̀. 11 Ŋwaànɛ̀n à ɓàg ɓɔ lɛ ŋwaànɛ àa wɔ̀ɔ̀zii mɛ̀, àa kpaa mɛ̀ lɛ: Tera kon wɔɔ̀, u kɛɛ̀ghi. 12 Fɔɔnnɛ ɓɛ tɔkà min nyi lɛ: Rìkuu ɗi mum aɗi ɗyaa kpaa wɔ̀ lɔɔ lɛ tera kon wɔɔ̀, u kɛɛ̀ghi? 13 Wɔ̀lɛ, ŋwaànɛ ɓɛ wɔɔ̀zìghà ànɛn à yighà ɓi ŋwaànɛ à kpaaghà nyi fɔlɔɔ, lɛ Yeesus à ɓaghà di à mɛ ɗim ɓi gwìy ì ɓum ìnɛ ì ɓaghà wɔɔ. 14 Ajɛ̀m ìnɛn, Yeesus à tanɛ̀ngà rì ŋwaànɛ̀n ɓi naà-Bɛ̀ll, à kpaa nyi lɛ: Ù ghɛɛ yɛ̀ɛ ù mɛ wɔ̀n, kɔ̀ɔ kìti kiɓe, di ù rì ɓiì tulɛɛ ri ǹtɔɓ wudɛŋ wu wu cee fɔ̀lɔ̀ɔ̀. 15 Fɔɔnnɛ ŋwaànɛ̀n à kɛ̀ngà kì kpaà Ɓɛ̀yudɛ̀n lɛ Yeesus yaa wɔ̀ɔ̀zii nyi. 16 Kɛɛ̀ki Ɓɛ̀yudɛ̀n ɓɛ nɔɔ̀nɔ̀ɔ̀tìghà Yeesus, lɛ à kìghà kìɓan kiǹ ŋwosi saɓàt. 17 Nni Yeesus à ɓàkà ɓɔ lɛ: Seŋi wɛ̀m a ka sasày à kpaŋ ɓigomìnɛ, mɛ̀ ǹsasày girig. 18 Ɓi jɛ̀ɛ̀ ìnɛn nnɛ Ɓɛ̀yudɛ̀n ɓɛ teèsìghà tì nyoo ɓi rìkaakàà ɗi bee inɛ ɓɛɛ wey nyi, àa lɛ rìyogsì ɗi à yoòyògsìghà kìcèlì ki Saɓàt ɗyɔ rì ɗyɔ, lɔŋ ɓisuulɛ à kpaaghà lɛ Bɛ̀ll à rì Seŋi wìì, à foŋɗɛn nyimiɗ ɓi nɗɛli wu Bɛ̀ll.

Ìtèɗ wu Man à Bɛ̀ll wu riì yɛ̀ɛ Seŋi

19 Nni Yeesus à ɓàkà min ɓɔ , à kpaa lɛ: Ǹkpaa mìni kɔɔ̀kɔɔ̀ à rìkpaa lɛ Man à yin lɛ à kì kìɓan kidɛŋ rì nto wìì, a kìki lɔŋ ɓiɓan ɓi a seesèè di Seŋi a kìkì. Fɔɔnnɛ ɓìɓan ɓi Seŋi a kìkì, ɓyɛɛ̀ɓi Man girig a kìkì. 20 Ɓisuulɛ Seŋi à keesii Man, à ti à rèsàg nyi com kìcèm ki a kìkì. À ki rì nyi ɓiì rèsii ɓiɓan ɓi ɓi cee fɔlɔɔ, lɛ ɓi kuùrag. 21 Lɛ fɛlɛ yɛ̀ɛ Seŋi à ti à ghèmzàg ɓìloŋ, à fa ɓyɔ cɛɓ, fɔlɔɔ nnɛ Man à ti à falàg girig ɓumɓɛ à kɔ̀ni cɛɓ. 22 Seŋi à yin ɓiì renɗeni ɓiɓan ɓi ɓum, wɔ̀lɛ Man innɛ à faghà rìren ɗi ɓiɓan ɗicèm, 23 lɛ di ɓum ɓɛ̀cèm ɓɛɛ nyaàsi Man lɔŋ yɛ̀ɛ ɓɛɛ̀ nyaanyaàsì Seŋi. I mum à nyaasii ɓi Man, di à nyaasii ɓi Seŋi ànɛ à romgày nyi. 24 Ǹkalii mìni kɔɔ̀kɔɔ̀ à rìkpaa lɛ, ŋwaànɛ à woogh jɛ̀ɛ̀ yɛ̀m, à ki gherɛn roànɛ à romgày mɛ̀, à ti rì cɛɓ ki fiɗyàɓ fikɔ̀ɔ̀. À yin lɛ à yù a rìren ɗi ɓiɓan, kìɓan kifog, à mɛ pɛ̀sɛn yi ɓi rìwu, à ɗiŋì ɓi cɛɓ. 25 Nkpaa mìni kɔɔ̀kɔɔ̀ à rìkpaa lɛ cààmɛ̀n ki riì, kiŋcèm kɛɛ ti lɛ, kɛɛ̀ki ɓìloŋ ɓi ɓiì woògh jɛ̀ɛ̀ ì Man à Bɛ̀ll. Fɔɔnnɛ ɓɛ̀roɓɛ ɓɛ ri ɓiì woògh jɛ̀ɛ̀ yìì, ɓɛ ɓiì ghɛɓì. 26 Lɛ fɛlɛ yɛ̀ɛ Seŋi à rì rì ìtèɗ wu fayɛn cɛɓ, fɔɔnnɛ à kìghà lɛ, Man a ɓa girig rì ìtèɗ wu fayɛn cɛɓ. 27 À faghà nyi ìtèɗ wulɛ a yɔm̀ ɓìɓan ɓi ɓum lɛ, à rì Man à mum. 28 Nni kɛ̀ ɓi kuurag kiɓan kiǹ; cààmɛ̀n ki tiì, ki ɓum ɓɛ̀cèm ɓɛ ɓɛ ri ɓi zɔ̀ŋ ɓɛ ɓiì woògh jɛ̀ɛ̀ yìì, ɓɛ kpagìì. 29 Fɔɔnnɛ ɓɛ̀roɓɛ ɓɛ kighà kìrɔɔ, ɓɛ ri ɓiì ghemɓɛɛ lɛ ɓɛɛ teɗ cɛɓ; ɓɛ̀roɓɛ ɓɛ kighà kìɓe, ɓɛ ghemɓɛ̀n lɛ ɓɛɛ teɗ bɛ̀lɛn. 30 Mɛ̀ ǹ-yiǹ ɓiì kìkii kiɓan kidɛŋ rì nto wɛ̀m, nɗenɗen ɓiɓan lɔŋ yɛ̀ɛ mɛ̀ɛ nwowòg, fɔɔnnɛ rìren ɗyɛ̀m ɗi ɓiɓan ɗi ri lɛ saaɗ lɛ, ǹ-yin ɓiì kaakaa rikɔ̀n ɗyɛm̀, nkaakaa lɔŋ rikɔ̀n ɗi roànɛ à romgày mɛ̀. 31 I mɛ̀ɛmiɗ yaa rì wusìnɛ̀ɗ ànɛ ɓi kìɓan kɛm̀, di com ki ǹɗì lɛ ǹkpaa ki yin lɛ ki wooghrɛ̀n. 32 Nni yɛ̀ɛ ŋwaàdɛŋ yɛɛ ri wusìnɛ̀ɗ ànɛ ɓi kìɓan kɛm̀, fɔɔnnɛ ǹ-yii lɛ, com ki a kpaakpaa ɓi san wɛ̀m ki ri saaɗ. 33 Ɓì romgà ɓum yɛ̀ɛ Zyaŋ, Zyaŋ à rèsì mìni saaɗ ànɛ ɓi rìɓa ɗyɛ̀m. 34 Ɓi san wɛ̀m, àa mum yɛɛ ri wusìnɛ̀ɗ ànɛ ɓi rìɓa ɗyɛ̀m, kìɓan kifog, ǹkpaa lɔŋ fɔlɔɔ lɛ, di ɓi ɓa rì cɛɓ. 35 Zyaŋ à ɓaghà fɛlɛ yɛ̀ɛ lamɓà ànɛ a ròòròò, à kpeèkpèŋzì jàŋ, nni ki kɔngà mìni lɛ ɓi nyaàrɛn rì kìtɛɛtɛn kii ɓi maa cààmɛ̀n. 36 Ǹɗì rì wusìnɛ̀ɗ ànɛ a rèresi kiɓan kɛm̀, à cee rìrèsì ɗi Zyaŋ à rèsìghà, nnyɛɛ ri ɓìɓan ɓi Tààta à faghà mɛ̀ lɛ nki. Ɓìɓan ɓiǹ ɓyɛɛ̀ rèresi lɛ Tààta yɛɛ romgày mɛ̀. 37 Fɔɔnnɛ Tààta nyimiɗ anɛ à romgày mɛ̀, à rèsìghà girig kìɓan kɛm̀; ŋwos adɛŋ, ɓì ka wokà ɓi jɛ̀ɛ̀ yìì, kɛ̀ ɓi ki ghɛn ìsu wìì. 38 Fɔɔnnɛ ɓìɓan ɓii ɓi yin mini ɓi nɗem, lɛ ɓì gherɛɛ ɓi roànɛ à romgày. 39 Ɓi fifiɓi mɛkànì mɛ kaàtà à Bɛ̀ll, lɛ ɓi fèfeg lɛ ɓi mɛ̀kànì mɛǹ nnɛ ɓì rì ɓiì ɓaà rì cɛɓ ki fiɗyàɓ fikɔ̀ɔ̀. Mɛ̀kànì mɛǹ mɔ yɛɛ̀ ki rèresi kiɓan kɛm̀. 40 Nsoò fɔlɔɔ, ɓì kɔ̀ni ɓi lɛ di ɓyàa yùu yì a lɔ̀ŋkɛm̀ lɛ ɓi ghɛǹ cɛɓ. 41 Ǹ-yin ɓiì kaakaa rikem a ɓum. 42 Wɔ̀lɛ ǹ-yii mìni, ǹkɔ̀nɛ̀n à Bɛ̀ll à yin mini ɓi mɛ̀rem. 43 Ǹ-yùghà ɓi ɗii ɗi Seŋi wɛ̀m kɛ̀ ɓi kɔ̀n lɛ ɓi ghaɓ mɛ̀, wɔ̀lɛ, i ŋwaàdɛŋ à yùu ɓi ɗii ɗii ɗi nyimiɗ, nyi nnɛ ɓì rì ɓiì ghàɓi. 44 Lannɛ ɓì rì lɛ ɓì gherɛ̀n, di ɓi faafàlɛ̀n rìkem mìni rì mìni, kɛ̀ ɓi kaa rikem ɗi ɗi riì yɛ̀ɛ Bɛ̀ll cɛ̀ncii? 45 Kɛ̀ ɓi fèg lɛ ǹɗì mìni ɓiì sɔmɛɛ yɛ̀ɛ Tààta; ŋwaànɛ à rì mìni ɓiì sɔmɛɛ, nnyɛɛ ri Moyis ànɛ ɓì faghà ǹtyweeyi ri nyi, 46 ɓisuulɛ i ɓì gherɛ̀ngà Moyis, di ɓì rì lɛ ɓì gherɛ̀n mɛ̀, lɛ kìɓan kɛm̀ kɛɛ̀ki à kàngà. 47 Nni i ɓì gherɛɛ ɓi ɓiɓan ɓi à kàngà, lannɛ ɓì rì ɓiì gherɛɛ ɓi mɛ̀ ǹkpaa?

Zyaŋ 6

Yeesus à faa ɓum ɓɛ̀tɔɔsìm ɓɛtaǹ ɓìɗilàg

1 Ajɛ̀m ìnɛn, Yeesus à syààghà cɛcɛɗ ki riɓày ànɛ a Galile, ànɛ ɓɛ nɗegì tì lɛ rìɓày ànɛ a Tiɓeriyaadɛ. 2 Fɔɔnnɛ coo kituu ki ɓum ki nɔɔ̀tìghà nyi, lɛ ɓɛ ghɛngà dàm yi à kìkìghà ɓi ɓɛ̀roroɓ ɓɛ à wɔ̀ɔ̀wɔ̀ɔ̀zìghà. 3 Nni Yeesus à ɓɔkà ɓi dòn aɗyòò, à kɔ̀rì wɔɔ ɓi zi, ri ɓɛ̀yilàg ɓii. 4 Fɔlɔɔ a ɓaghà di tìcàɓ ti Ɓɛ̀yudɛ̀n ti lɛ Paskà ti ti jàŋbog. 5 Yeesus à pìkà mis, à ghɛn coo kituu ki ɓum, di kɛɛ̀ yùyuiy nyi a nyoo, fɔɔnnɛ à tɔkà Filiɓ lɛ: Fennɛ tì rì lɛ tì làg bìrɛs ìnɛ lɛ ɓumɓɛ ɓɛ̀cèm ɓɛɛ ɗi? 6 Yeesus à kpaaghà fɔlɔɔ lɛ, a feèghrɛn Filiɓ lɛ, nyimiɗ a yighà com ki à rì ɓiì kìi. 7 Nni Filiɓ à ɓàkà nyi lɛ: Nsoò bìrɛs ì ɓɛ̀hɔnɗɛ̀ɗ ɓɛ ɓɛtɔɔsìm ɓɛɓɛɛ̀, ì yin lɛ ì ghɛ̀ɛ̀sɛ̀n lɛ mum ǹcèm à ɗi maa kìɓɛghà. 8 Fɔɔnnɛ ǹ-yilàg wìì adɛŋ ànɛ lɛ Andire, geni Simɔn Pyɛɛri à kpaaghà nyi lɛ: 9 Maa ŋwɔɓti à baŋì àdɛŋ à rì fɛ lɛ, rì bìrɛs yitaǹ yi ɓɛ kii rì rìkuu ɗi gèŋ ɗilɛ ɔrìzɛ̀, rì ɓìzɛn ɓiɓɛɛ̀, nni ɓi ri lɛ ɓi ki cɛ ri gɛ mum ànɛ? 10 Fɔɔnnɛ Yeesus à kpaaghà ɓɔ lɛ: Kɔ̀ɔ̀siina ɓumɓɛ̀n ɓi zi. Ɓyaaɓi ɓi ɓaghà ɓi jàŋ inɛ̀n lɛɛ̀gwey, nni ɓumɓɛ̀n ɓɛ kɔrìghà min ɓi zi, ɓɛ ɓaghà nunùg ɓum ɓɛ̀tɔɔsìm ɓɛtaǹ. 11 Fɔɔnnɛ Yeesus à tekà bìrɛs, à fa Bɛ̀ll ɓìtògsɛ̀n, à kàɓsì yɔ̀ ri ɓumɓɛ ɓɛ ɓaghà wɔɔ ɓɛǹ; fɔɔnnɛ à fatìghà girig ɓɔ ɓìzɛn gàɓ ìnɛ ɓɛ kɔnkɔ̀ngà lɛ ɓɛɛ ɗi. 12 Yɛ̀ɛ ɓumɓɛ̀n ɓɛ wuràkà, nni Yeesus à kpaaghà ɓɛ̀yilàg ɓii lɛ: Taŋ̀zɛɛna ɓìɓɛghà ɓi bìrɛs ɓi ɓi rɔɓtaagh lɛ com kɛ̀ kɛɛ̀ ɗyoŋ. 13 Nni ɓɛ ɓadɛ̀ngà ɓìɓɛghà ɓi bìrɛs ɓi ɓumɓɛ ɓɛ ɗìghà ɓɛ caɗkà, ɓɛ roòzì ɓìkàɗ ntɛ̀ɗ rì ɓiɓɛɛ̀; ɓi bìrɛs yi kitaǹ yi yi ɓaghà yiǹ yi kìyɛn ɗi ɔrìzɛ̀. 14 Yɛ̀ɛ ɓumɓɛ̀n ɓɛ ghɛngà dàm ì kìɓan inɛ̀n, nni ɓɛ kpaaghà lɛ: Roànɛ à rì lɔŋ ǹkpaŋzì-ɓìɓan anɛ ɓɛ kpaaghà lɛ, à ɓiì yùu ɓi ziinɛ. 15 Yɛ̀ɛ Yeesus à yighà lɛ ɓɛ ti ɓiì kìi lɛ, ɓɛɛ ɓan nyi, ɓɛɛ ɓɔgsi nyi rìfòm ɓi-tèɗ, nni à ghàghìghà à ɓɔgtì ɓi dòn cɛ̀ncii.

Yeesus a kɛ̀ɛ̀kɛɛ ɓi mɛ̀nig aɗyòò

16 Yɛ̀ɛ cɛŋkò ki kpagà, nni ɓɛ̀yilàg ɓii ɓɛ sɛngà ɓi rìɓày. 17 Ɓɛ ɓɔg ɓi kìkɔm lɛ ɓɛɛ syaà cɛcɛɗ ki riɓày a Kapɛrinawum; birìm ì kpìghà di Yeesus à ka tanɛn ɓi lɔŋ ɓɔ. 18 Fɔɔnnɛ bɛ̀ɓ ì fɛɛ̀fɛ̀ɓsìghà rì ìtèɗ, rìɓày à pìpìg ɓìkus. 19 Yɛ̀ɛ ɓɛ ɓaghà di ɓɛ mɛ fyèè riɓày fɛlɛ yɛ̀ɛ ɓɛ̀kilòmɛɛ̀tɛ̀rɛ̀ ɓɛtaǹ nsoò lɛ taàfog, nni ɓɛ ghɛngày Yeesus di a kɛ̀ɛ̀kɛɛ yi ɓi rìɓày aɗyòò, à yùyùy jàŋbog rì kìkɔm, ìris wu ɓan ɓɔ. 20 Nni Yeesus à kpaaghà ɓɔ lɛ: Mɛ̀ yɛɛ ri, kɛ̀ ɓi risi. 21 Ɓɛ mɛɛ̀ kìghà lɛ, ɓɛɛ teɗ nyi ɓi kìkɔm, nni ki ghaskà kì lomì ɓi bèn ì rìɓày jàŋ inɛ ɓɛ kɛnkɛ̀ngà.

Yeesus à rì bìrɛs ì cɛɓ

22 Ɓi duri tana, kìtuu ki ɓum ki ki rɔɓkày cɛcɛɗ ki riɓày, ki ghɛngà lɛ, kìkɔm kìfog kɛɛ nɗì wɔɔ. Nni Yeesus àa nki ɓɔɔgh ɓi ɓi kìkɔm kiŋcèm ǹɗaŋ ri ɓɛ̀yilàg ɓii, lɔŋ ɓɔ yɛɛ nkɛ̀ɛ ɓi kìkɔm kìn cɛ̀ncaa. 23 Wɔ̀lɛ ɓìkɔm ɓidɛŋ ɓi ɓaghày a Tiɓeriyaadɛ, jàŋbog rì jàŋ inɛ ɓɛ ɗighà bìrɛs, di Kan à mɛ fa Bɛ̀ll ɓìtògsɛ̀n. 24 Yɛ̀ɛ ɓumɓɛ̀n ɓɛ ghɛngà lɛ nsoò Yeesus nsoò ɓɛ̀yilàg ɓii, àdɛŋ à ɓaghà ɓi wɔɔ, fɔɔnnɛ ɓɔmiɗ ɓɛ ɓɔkà ɓi ɓìkɔm ɓìn, ɓɛ kɛǹ kì kaà Yeesus a Kapɛrinawum. 25 Ɓɛ kɛǹgà nyi kìtanɛɛ cɛcɛɗ ki riɓày, ɓɛ tɔg nyi lɛ: Raɓì, wɔ̀ɔ n-yùu fɛ̀ fin? 26 Yeesus à ɓàg ɓɔ lɛ: Ǹkpaa mìni kɔɔ̀kɔɔ̀ à rìkpaa lɛ, àa ɓisuulɛ ɓìi nghɛɛ dàm nnɛ ɓi kaakaa mɛ; ɓi kaakaa mɛ lɛ, yɛ̀ɛ ɓìi nɗii bìrɛs ɓì wuràg. 27 Kɛ̀ ɓi say ɓisuu ɓiɗilàg ɓi ɓi ri lɛ ɓi ɗyoŋ, salina ɓisuu ɓiɗilàg ɓi ɓi ri lɛ ɓi kɔrì à kpaŋ ɓi cɛɓ ki fiɗyàɓ fikɔ̀ɔ̀, ɓyɛɛ̀ ɓi Man à mum à rì mìni ɓiì faà, lɛ nyi nnɛ Bɛ̀ll Seŋi à fogà kìrèmzɛnà ki rilàmì ɗii ɓi nyi. 28 Nni ɓɛ tɔkà Yeesus lɛ: Tì ghɛ̀ɛ̀sɛɛ kì kìi cɛ ɓi ɗi lɛ ti say ɓisuu ɓiɓan ɓi Bɛ̀ll a kɔ̀nkɔ̀n? 29 Yeesus à ɓàg ɓɔ lɛ: Kìsay ki Bɛ̀ll ki ri lɛ, ɓi gherɛn roànɛ Bɛ̀ll à romgày. 30 Nni ɓɛ tɔkà nyi lɛ: Dàm ì kìɓan aɗi yɛɛ̀ nnɛ ù kìi, ìnɛ ìrì lɛ, i tì ghɛɛ, tì gherɛ̀n wɔ̀? Kìsay aɗi kɛɛ̀ki wɔ̀ɔ kìkì? 31 Ɓɛ̀seŋi ɓis ɓɛ ɗighà manà ɓi-reɓ yɛ̀ɛ ki ri kìkànɛn lɛ: À faghà ɓɔ bìrɛs ìnɛ ì rìì aɗyoo lɛ ɓɛɛ ɗi. 32 Yeesus à kpaa ɓɔ lɛ: Ǹkalii mìni ɓi saaɗ lɛ, àa Moyis yɛɛ faghà mìni bìrɛs ìnɛ ì sɛngày aɗyòò, kìɓan kifog Seŋi wɛ̀m yɛɛ faa mìni kɔɔ̀kɔɔ̀ à bìrɛs ànɛ à rìì aɗyòò. 33 Lɛ bìrɛs ì Bɛ̀ll ì rì bìrɛs ìnɛ ì sɛniì aɗyòò, ì ki fa ziinɛ cɛɓ. 34 Nni ɓɛ kpaaghà min nyi lɛ Kan, falag ɓìsi bìrɛs ìnɛ̀n ɓyààmɛ̀n ɓìcèm. 35 Yeesus à kalìghà ɓɔ lɛ: Mɛ̀ ǹɗì bìrɛs ì cɛɓ, ŋwaànɛ à yùu a lɔ̀ŋkɛm̀ zày, yàa kɔɔdii gɛ ɓi nyi. Ŋwaànɛ à ki gherɛɛ mɛ̀, kìnɔli kaa kitii gɛ ɓi nyi. 36 Ǹki kpaaghà mìni fɔlɔɔ, ɓì ghɛn mɛ̀, kɛ̀ ɓi ki gherɛn. 37 Ɓum ɓɛ̀cèm ɓɛ Tààta à faa mɛ̀, ɓɛ ri ɓiì yùu a lɔ̀ŋkɛm̀, nni màa ki kpaŋzi ɓi ŋwaànɛ à yùu yì a lɔ̀ŋkɛm̀ ɓi ɗyɔ̀m. 38 Ɓisuulɛ, ǹsɛngày ɓi aɗyoo lɛ nki rìkɔ̀n ɗyɛm̀, ǹsɛngày lɔŋ lɛ nki rìkɔ̀n ɗi roànɛ à romgày mɛ̀. 39 Nni rìkɔ̀n ɗi roànɛ à romgày mɛ̀ ɗyɛɛ̀ɗi: Lɛ kɛ̀ɛ nɗimzi nsoò mum bog, ɓi ɓum ɓɛ̀cèm ɓɛ à faghà mɛ̀. Ǹghɛ̀ɛ̀sɛɛ lɔŋ ɓɔ kì ghèmzii, ɓi siitòn a ŋwos. 40 Lɛ rìkɔ̀n ɗi Seŋi wɛ̀m ɗyɛɛ̀ɗi: Lɛ mum ǹcèm ànɛ à ghɛɛ Man, à ki gherɛn nyi, a ɓa rì cɛɓ ki fiɗyàɓ fikɔ̀ɔ̀, mɛ̀ ǹki ghèmzii gɛ nyi ɓi siitòn a ŋwos. 41 Fɔɔnnɛ Ɓɛ̀yudɛ̀n ɓɛ ŋwɔŋwɔ̀ŋìghà nyi lɛ, à kpaaghà lɛ: Mɛ̀ ǹɗì bìrɛs ìnɛ ì sɛngày aɗyòò. 42 Ɓɛ kpaakpààghà lɛ: Àa Yeesus à man à Yoosɛɓ yɛɛ ri lɛ? Tì yii lɛ rì seŋi rì jɛɛ, nni lannɛ a kpaaghi ɓigomìnɛ lɛ, nyii ri bìrɛs ìnɛ ì sɛngày aɗyòò? 43 Yeesus à pɛ̀ɛ̀zìghà ɓɔ lɛ: Kɛ̀ ɓi ŋwɔ̀ŋwɔŋi, mìni rì mìni. 44 Mum à yin lɛ à yù a lɔ̀ŋkɛm̀ di Tààta ànɛ à romgày mɛ̀ à syòŋiì ɓi nyi, mɛ̀ ǹki ghèmzii gɛ ŋwaànɛ̀n miì ɓi siitòn a ŋwos. 45 Ki ri kìkànɛn ɓi kaàtà à ɓɛ̀kpaŋzì-ɓìɓan lɛ: Bɛ̀ll à rì ɓiì rèsaagh ɓɔ ɓɛ̀sɛ̀ɛ̀ ɓɛ̀cèm, fɔɔnnɛ mum ǹcèm ànɛ à wokà jɛ̀ɛ̀ ì Tààta, à ki teɗ rirèsàg ɗii, nnyɛɛ ri lɛ à yù a lɔ̀ŋkɛm̀. 46 Fɔlɔɔ a rèsii ɓi lɛ ŋwaàdɛŋ à ka ghɛngà Tààta, lɔŋ roànɛ à ɓaghày yɛ̀ɛ Bɛ̀ll yɛɛ ghɛngà Tààta cɛ̀ncii. 47 Ǹkpaa mìni kɔɔ̀kɔɔ̀ à rìkpaa lɛ ŋwaànɛ à gherɛɛ mɛ̀, à rì rì cɛɓ ki fiɗyàɓ fikɔ̀ɔ̀. 48 Mɛ̀ yɛɛ ri bìrɛs ì cɛɓ. 49 Ɓɛ̀seŋi ɓin ɓɛ ɗighà manà ɓi-reɓ, ɓɛ ki cuu. 50 Lɔŋ bìrɛs ìnɛ ì sɛngày aɗyoo, yɛɛ̀nɛ, lɛ ŋwaànɛ à ɗii yɔ̀, kɛ̀ɛ wù. 51 Ǹɗì bìrɛs ì cencem ìnɛ ì sɛngày aɗyòò, ŋwaànɛ à ɗii bìrɛs ìnɛ̀n, à rì ɓiì ghɛɓì fìɗyàɓ fikɔ̀ɔ̀. Bìrɛs ìnɛ m̀ɓiì faà ìnɛ̀n, yɛ̀ɛ ri nyoo yɛ̀m ìnɛ ǹɗì ɓiì faà, lɛ ziinɛ yɛ̀ɛ ɓa rì cɛɓ. 52 Ɓi jɛ̀ɛ̀ ìnɛn, Ɓɛ̀yudɛ̀n ɓɛ tumɛ̀ngà rìnyoònyòlɛ̀n ɓɔ rì ɓɔ, ɓɛ kpaakpàà lɛ: Lannɛ ŋwaànɛ à rì lɛ à fa ɓìsi nyoo yìì lɛ ti ɗi yɔ̀? 53 Nni Yeesus à kpaaghà ɓɔ lɛ: Ǹkpaa mìni ɓi saaɗ lɛ, i ɓì ɗii ɓi nyoo ì Man à mum, kɛ̀ ɓi ki nɔ bwaɓ yii, ɓì yin lɛ ɓì ɓa rì cɛɓ ki kɔɔ̀kɔɔ̀. 54 Ŋwaànɛ à ɗii nyoo yɛ̀m, à ki nɔ bwaɓ yɛm̀, à rì rì cɛɓ ki fiɗyàɓ fikɔ̀ɔ̀, ǹɗì ɓiì ki ghèmzii nyi ɓi siitòn a ŋwos. 55 Lɛ nyoo yɛ̀m ì rì ɓìɗilàg ɓi kɔɔ̀kɔɔ̀, bwaɓ yɛm̀, kɔɔ̀kɔɔ̀ à com ki nɔyɛ̀n. 56 Ŋwaànɛ à ɗii nyoo yɛ̀m, à nɔ bwaɓ yɛm̀, à rì ǹɗàrɛn ɗi mɛ̀, mɛ̀ girig ǹɗàrɛn ɗi nyi. 57 Fɛlɛ yɛ̀ɛ Tààta ànɛ à rì cem a romgày mɛ̀, mɛ̀ ǹki ɓa ri cɛɓ lɛ nyi, fɔlɔɔ nnɛ ŋwaànɛ à ɗii mɛ̀, à ɓiì ghɛɓì lɛ mɛ̀. 58 Bìrɛs ìnɛ ì sɛngày aɗyoo yɛ̀ɛ ri lɛ; ì yin yɛ̀ɛ ìnɛ ɓɛ̀seŋi ɓin ɓɛ ɗighà ɓɛ cuu; nni ŋwaànɛ à ɗii bìrɛs ìnɛ, à rì ɓiì ghɛɓì fìɗyàɓ fikɔ̀ɔ̀. 59 Yeesus à kpaaghà ɓìɓan ɓi, yɛ̀ɛ à rèèrèsàkà ɓum ɓi naà-bɔ̀ŋzɛ̀n ìnɛ a Kapɛrinawum. 60 Yɛ̀ɛ ɓɛ̀yilàg ɓɛ wokà ɓìɓan ɓi Yeesus à kpaaghà ɓiǹ, nni kìgwey ki kalìghà lɛ: Ɓìtòkì ɓi ɓi teèsɛɛ, ghɛn yɛɛ ri lɛ à cenɛ̀n ɓyɔ rìwowòg? 61 Yɛ̀ɛ Yeesus à yighà ɓi nɗem wii lɛ ɓɛ̀yilàg ɓii ɓɛɛ̀ ŋwɔ̀ŋwɔŋi nyi ɓi kìɓan kiǹ, nni à kpaaghà ɓɔ lɛ: Kìɓan kiǹ ki kɛɓtii mìni fìɓàg? 62 I ɓì ki ghɛɛ Man à mum di a ɓɔɓɔg aɗyoo jàŋ inɛ à ka ɓaghà, ki ɓa min la? 63 Ǹghay wɛɛ̀ fafa cɛɓ, mɛ̀mùù mɛ yin ɗi gɛɓsɛ̀n. Fɔɔnnɛ ɓìɓan ɓi màa kpaa mìni ɓi ri ɓìɓan ɓi Nghay, rì ɓi cɛɓ. 64 Kìɓan kifog, ɓum ɓɛdɛŋ ɓɛ ɓi nyìinyìm wìn ɓɛ gherɛɛ ɓi. Lɛ a rìtumɛ̀n Yeesus à yighà ɓumɓɛ ɓɛ gherɛ̀ngà ɓi, rì roànɛ à ghɛ̀ɛ̀sɛ̀ngà nyi kìkàɓi. 65 Fɔɔnnɛ à kpaaghà lɛ: Kìɓan ki kɛɛ̀ki ǹkpaaghà mìni miì lɛ mum à yin lɛ à yù a lɔ̀ŋkɛm̀ di Tààta à faa ɓi nyi fèg ànɛ̀n. 66 À tumɛ̀n ɓi cààmɛ̀n kiǹ, ɓɛ̀yilàg ɓii lɛɛ̀gwey ɓɛ ghaaghràkà, ɓɛ̀ kɛɛ̀ nɔ̀ɔ̀ti ti nyi. 67 Nni Yeesus à kpaaghà min ɓɛyilàg ɓɛ kiǹtɛ̀ɗ rì ɓɛɓɛɛ̀rɛn lɛ: Mìnii kɔni ɓi lɛ ɓi ghaàrag girig? 68 Simɔn Pyɛɛri à pɛ̀ɛ̀zìghà nyi lɛ: Kan, tì ɓiì kɛ̀ɛ yɛ̀ɛ ghɛn? Ù rì rì ɓìɓan ɓi cɛɓ ki fiɗyàɓ fikɔ̀ɔ̀. 69 Fɔɔnnɛ tì mɛ gherɛ̀n, tì ki yi lɛ wɔ̀ yɛɛ ri roànɛ à rì ǹtenɛn ànɛ à ɓaghày yɛ̀ɛ Bɛ̀ll. 70 Yeesus à pɛ̀ɛ̀zì ɓɔ lɛ: Mɛ̀ɛ nti mɛ̀ yɛɛ ɓɔngà mìni ɓɛ̀sɛ̀ɛ̀ ntɛ̀ɗ rì ɓɛɓɛɛ̀? Ǹsoò fɔlɔɔ, kìbog ki ɓi mìni ki ri Satàn. 71 Zyudas à man à Simɔn Iskariyot innɛ à kpaakpààghà lɔɔ lɛ nnyɛɛ ɓaghà kìbog ki ɓi ɓɛ̀yilàg ǹtɛ̀ɗ rì ɓɛɓɛɛ̀ , ki ki ghɛɛ̀sɛ̀ngà nyi kì kàɓi.

Zyaŋ 7

Ɓɛ̀geni ɓɛ Yeesus ɓɛ gherɛɛ ɓi nyi

1 Ajɛ̀m ìnɛn, Yeesus à rerènìghà ziì Galile lɛ à kɔ̀ngà ɓi lɛ a kɛǹ kì kɛ̀ɛ̀kɛɛ a Zyude, lɛ Ɓɛ̀yudɛ̀n ɓɛ kaakààghà lɛ ɓɛɛ wey nyi. 2 Tìcàɓ ti Ɓɛ̀yudɛ̀n ti lɛ tìcàɓ ti ɓilaa ti ɓaghà di ti ti jàŋbog. 3 Nni ɓɛ̀geni ɓɛ Yeesus ɓɛ kpaaghà nyi lɛ: Pɛ̀sɛn fɛ, u kɛǹ a Zyude, di Ɓɛ̀yilàg ɓɔɔ ɓɛɛ ghɛǹ girig ɓìɓan ɓi u kìki fɛ. 4 Mum à yin lɛ à kìkì ɓìɓan a rìnyam di a kɔ̀nkɔn lɛ ɓɛɛ yi nyi. Nni yɛ̀ɛ u kìki ɓiɓan yɛ̀ɛ ɓi, kpaŋzi ɓyɔ mum bimiɗ a yi wɔ̀. 5 Lɛ nsoò ɓɛ̀geni ɓii ɓɛ gherɛ̀ngà ɓi nyi. 6 Yeesus à kalì ɓɔ lɛ: Cààmɛ̀n kɛm̀ ki ka kpaŋ ɓi, mìni yɛɛ ri rì syeesyee à cààmɛ̀n ɓyààmɛ̀n ɓìcèm. 7 Ziinɛ ì yin lɛ ì ɓèèzɛ̀n mìni wɔ̀lɛ mɛ̀ɛnɛ yɛɛ̀ ɓèeɓeèzɛ̀n, lɛ ǹti ǹkalàg lɛ, mɛ̀kìkii mɛ yɔ̀ mɛ rɔɔtɛɛ ɓì. 8 Mìnii ɓɔɔghna ɓi kɛǹ tìcàɓ, ɓi san wɛ̀m, mɛ̀ ǹka yin ɓiì ɓɔɓɔɔgh wɔɔ lɛ, cààmɛ̀n kɛm̀ ki ka ghɛɛ̀sɛn ɓi. 9 Yɛ̀ɛ à kpaaghà ɓɔ fɔlɔɔ, nni à rɔ̀ɓkà a Galile.

Yeesus a Tìcàɓ ti ɓilaa ti a Yorisalɛm

10 Yɛ̀ɛ ɓɛ̀geni ɓɛ ɓaghà di ɓɛ mɛ ɓɔg a tìcàɓ, nni nyimiɗ a ɓɔkà girig wɔɔ, wɔ̀lɛ à ɓɔkà ɓi ɓi mɛ̀tàna, lɔŋ a rìnyam nnɛ à ɓɔkà. 11 Nni Ɓɛ̀yudɛ̀n ɓɛ kaakààghà nyi ɓi cààmɛ̀n à tìcàɓ di ɓɛɛ̀ kpaakpaa lɛ: À rì fe? 12 Fɔɔnnɛ ɓumɓɛ ɓi gwìy ìnɛn ɓɛ rurùmìghà lɛɛ̀gwey ɓi kìɓan kii. Ɓɛ̀ro ɓɛdɛŋ lɛ: À rì syeesyee à mum; ɓɛ̀ro ɓɛmbog lɛ: Àg! A nàanaàzì gì kɔm̀ ɓum bee. 13 Nsoò fɔlɔɔ, mum à ghɛɛsìghà ɓi lɛ a ɓuŋ nyi fɛlɛ lɛ tɛntɛ̀ɛ̀n ɓi mɛ̀reè mɛ ɓum lɛ ɓɛ rirìsìghà Ɓɛ̀yudɛ̀n. 14 Yɛ̀ɛ tìcàɓ ti ɓaghà di ti ti ɓi nyìinyìm, Yeesus à ɗiŋìghà ɓi naà-Bɛ̀ll, à tum rìrèsàg ɗi ɓum. 15 Nni Ɓɛ̀yudɛ̀n ɓɛ kuùkùùghràkà ɓɛ kpaakpàà lɛ: Ki ɓaa la lɛ, a yi ɓìɓan ɓi ɓi ri ɓìkànɛ̀n, kɛ̀ɛ̀fɛ à yilaagh ɓyɔ? 16 Fɔɔnnɛ Yeesus à ɓàkà ɓɔ lɛ: Ɓìɓan ɓi nɗèeresàg ɓi, ɓi yin ɓiɓan ɓyɛm̀ ɓi mɛ̀ɛmiɗ, ɓi ri lɔŋ ɓiɓan ɓi roànɛ à romgày mɛ̀. 17 Ŋwaànɛ à kɔ̀ni lɛ a ki rìkɔ̀n ɗi Bɛ̀ll yɛɛ ri ɓiì yiì ǹkòo ɓìɓan ɓi Bɛ̀ll ɓyɛɛ̀ɓi nɗèrèsì, nkòo ɓiŋkɛ̀m ɓi mɛ̀ɛmiɗ. 18 Ŋwaànɛ a kpaakpaa ɓiɓan ɓii ɓi nyimiɗ yɛɛ̀ kaakaa rikem ɗii, wɔ̀lɛ roànɛ a kaakaa rikem ɗi roànɛ à romgày nyi, nnyɛɛ̀ kpaakpaa saaɗ, kɛ̀ɛ ki ɓa ri kìɓan kidɛŋ ki ki ri kìtɛ̀ŋtɛ̀ŋ. 19 Mɛ̀ɛ nti Moyis à faghà mìni ɓìdɔ̀gsɛna kìɓan kifog, nsoò wààdɛŋ ù ɓèŋi ɓi ɓidɔ̀gsɛna ɓiǹ; nni ɓi kaakaa lɛ ɓi wey mɛ̀ lɛ cɛ? 20 Nni gwìy ì ɓum ì ɓàkà nyi lɛ: Ù rì rì kìɓeɓtàg ki nghay; ghɛn yɛɛ̀ kɔ̀nkɔn lɛ a wey wɔ̀? 21 Yeesus à pɛ̀ɛ̀zì ɓɔ lɛ: Mɛ̀ɛ ǹkìi lɔŋ kiɓan kifog, kɛɛ ǹkegsii mìni lɛ ɓɛ̀sɛ̀ɛ̀ ɓɛ̀cèm. 22 Ɓì ti ɓì kɛ̀ɗkì mum ŋwosi Saɓàt lɛ yɛ̀ɛ Moyis yɛɛ faghà mìni ìtèɗ ɓisuu kɛ̀rɛ̀n; nsoò yɛ̀ɛ ki yin lɛ Moyis yɛɛ kpagày rì nyi, lɔŋ ɓɛ̀seŋi ɓin ɓɛ ɓɛsɛ̀ɛ̀mɛn ɓɛɛ lokà kì kpaŋìì rì nyi. 23 I ɓì rì lɛ ɓì kɛ̀ɗ ŋwɔɓti ŋwosi Saɓàt, fɔlɔɔ kɛ̀ɛ ki yogsi ɓidɔ̀gsɛna ɓi Moyis, nni lannɛ ɓi woki bim ri mɛ̀ lɛ mɛ̀ɛ ǹwɔ̀ɔ̀zii mum lɛ kɔɔ̀kɔɔ̀ ŋwosi Saɓàt? 24 Kɛ̀ ɓi teki ɓiɓan ɗyoo rì ɗyoo, ɓàkiina kìɓan yɛ̀ɛ saaɗ a kɔ̀nkɔ̀n. 25 Ɓum ɓɛdɛŋ ɓɛ a Yorisalɛm ɓɛ kpaakpààghà lɛ àa ŋwaànɛ ɓɛɛ̀ kaakaa lɛ ɓɛɛ wey yɛɛ ri lɛ? 26 Nni ghɛɛna min yɛ̀ɛ a tòtog lɛ fwàafwàày ɓi nyìinyìm à ɓum, ɓɛ̀ kɛɛ̀ ki kpaa nyi com. Ɓɛ̀làmì ɓis ɓɛ mɛ konag nya kì yiì lɛ nnyɛɛ ri Kiris gìn? 27 Ɓìsii yii jàŋ inɛ ŋwaànɛ à pɛ̀sɛɛ yì, wɔ̀lɛ yɛ̀ɛ Kiris à ri yù mum àa yi ɓi fennɛ à pɛ̀sɛɛ yì. 28 Yɛ̀ɛ Yeesus à rèrèsàkà ɓum fɔlɔɔ ɓi naà-Bɛ̀ll, nni à kpaaghà jɛ̀ɛ̀ aɗyoo lɛ: Ɓì yii mɛ̀, ɓì ki yi fennɛ m̀pɛ̀sɛɛ yì; kɔm̀ lɛ m̀pɛ̀sɛ̀ngày ɓi ri nto wɛ̀m, kìɓan kifog roànɛ à romgày mɛ̀ yɛɛ̀ kpaakpaa saaɗ, nyi nnɛ ɓì yii ɓi. 29 Mɛ̀ ǹ-yii nyi lɛ ǹɗì fɛ ɓisu wii, rì tì lɛ, nnyɛɛ romgày mɛ̀. 30 Fɔɔnnɛ ɓɛ kaakààghà bee inɛ ɓɛɛ ɓaǹ nyi, kìɓan kifog mum à ki saghìghà ɓi nyi càg ɓi nyoo, ɓisuulɛ, cààmɛ̀n kii ki ɓaghà di ki ka kpaŋ ɓi. 31 Ɓi gwìy ìnɛn, ɓum lɛɛ̀gwey ɓɛ gherɛ̀ngà nyi, ɓɛ kpaakpàà lɛ: Yɛ̀ɛ Kiris à ri yù, à ri kì nya dàm yi yi cee yi ŋwaànɛ a kìkì? 32 Ɓɛ̀fàrìzyɛŋ ɓɛ wokà yɛ̀ɛ ɓum ɓɛ ŋwɔŋwɔ̀ŋìghà fɔlɔɔ ɓi kìɓan kii; nni ɓɛ̀pìrɛɛtìrɛ̀ ɓɛgwey rì Ɓɛ̀fàrìzyɛŋ ɓɛ romgà ɓɛ̀sujàà lɛ ɓɛɛ ɓaǹ nyi. 33 Yeesus à kpaa lɛ: Mɛ̀ ǹkaka tì rì mìni ɓi maa cààmɛ̀n, fɔɔnnɛ ǹɗì ɓiì kɛ̀ɛ min yɛ̀ɛ roànɛ à romgày mɛ̀. 34 Ɓì rì mɛ̀ ɓiì kaà, kɛ̀ ɓi ghɛn mɛ, lɛ ɓì yin lɛ ɓì kpaŋ jàŋ inɛ m̀ɓiì ɓaà. 35 Nni Ɓɛ̀yudɛ̀n ɓɛ tɔɔghrɛ̀ngà ɓɔmiɗ lɛ: Fennɛ àrì ɓiì kɛ̀ɛ ɓi ɗi lɛ tyɛ̀ ki ghɛn nyi? A kɛ̀n nya a Ɓɛ̀yudɛ̀n ɓɛ ɓɛ ri ɓɛ̀sààtɛn ɓi bàn yi Gìrɛg, à rèèrèsàg ɓumɓɛ ɓɛ ri Gìrɛg wɔɔ giǹ? 36 Jɛ̀ɛ̀ ìnɛ à kpaa lɛ: Ɓì rì mɛ̀ ɓiì kaà, ɓyɛ̀ ki ghɛn mɛ; rì ìnɛ lɛ: Jàŋ inɛ ǹɗì ɓiì ɓaà, ɓì yin lɛ ɓì kpaŋ wɔɔ, yi ri azi lɛ cɛ? 37 Ɓi ŋwos a siitòn, ànɛ à ɓaghà gɛn à ŋwos a tìcàɓ tiǹ, Yeesus à pɛ̀sɛ̀ngà aɗyoo, à làmɓɛ̀n lɛ: I mum a wowog kinɔli, a yu a lɔ̀ŋkɛm̀, a nɔ. 38 Ŋwaànɛ à gherɛɛ mɛ̀, mɛ̀syòm mɛ mɛnig mɛ cɛɓ mɛ ri nyi ɓiì ɓɛ̀nɓɛniì ɓi nɗem fɛlɛ yɛ̀ɛ ki ri kìkànɛn. 39 Kìɓan ki Nghay ànɛ ɓumɓɛ ɓɛ gherɛɛ nyi ɓɛ ghɛɛ̀sɛ̀ngà kìterì kɛɛ̀ki à kpaakpààghà lɔɔ. Ɓisuulɛ cààmɛ̀n kiǹ ki ɓaghà di ɓɛ ka rom yi ɓi Nghay, rì tì lɛ Yeesus à ɓaghà di à ka teɗ ɓi rìkem ɗìì. 40 Ɓum lɛɛ̀gwey ɓɛ ɓaghà lɛ, ɓɛ mɛ wog ɓitòkì ɓiǹ, nni ɓɛ kpaaghà lɛ: Ki ri lɔŋ kɔɔ̀kɔɔ̀ lɛ ŋwaànɛ yɛɛ ri ǹkpaŋzì-ɓìɓan. 41 Ɓɛ̀ro ɓɛdɛŋ ɓɛ kpaa lɛ: À rì Kiris, ɓɛ̀ro ɓɛmbog ɓɛ kpaa lɛ: Kiris à rì lɛ à ɓay a Galile? 42 Mɛ̀kànì mɛɛ̀ kpaaghi lɛ Kiris à rì ɓiì ɓaà yì ɓi boo ì mum ì Davit, ɓi bàn ì Bɛtilɛhɛm, jàŋ inɛ Davit à yalɛ̀ngà. 43 Nni ɓum ɓɛ rɔɓkà fɔlɔɔ, mɛ̀rɛli dɛŋ dɛ̀ŋ dɛŋ ɓi kìɓan kii. 44 Fɔɔnnɛ ɓum ɓɛdɛŋ ɓɛ ɓi nɗaŋ wu ɓumɓɛ̀n, ɓɛ mɛɛ̀ fèkà lɛ ɓɛɛ ɓaǹ nyi, kìɓan kifog mum à saghìghà ɓi nyi càg ɓi nyòò. 45 Ɓɛ̀sujàà ɓɛ sugtìghà a Ɓɛ̀pìrɛɛtìrɛ̀ ɓɛgwey rì a Ɓɛ̀fàrìzyɛŋ, ɓɛ̀roɓɛ̀n ɓɛ tɔg ɓɔ lɛ: Ɓì yùu yì ɓi ri nyi lɛ cɛ? 46 Ɓɛ̀sujàà ɓɛ ɓaàg lɛ: Mum à ka tokàkà ɓi yɛ̀ɛ ŋwaànɛ̀n. 47 Nni Ɓɛ̀fàrìzyɛŋ ɓɛ pɛɛ̀zìghà ɓɛ̀sujàà ɓɛǹ lɛ: Mìni girig ɓyàa càrɛɛ lɛ a yegsi mìni wa? 48 Mìnii mɛ ghɛn nya di ǹlàmì àdɛŋ, nsoò lɛ Fàrìzyɛŋ àdɛŋ à gherɛɛ nyi? 49 Mìni ɓumɓɛ ɓi gwìy ìnɛ ì yii ɓi ɓidɔ̀gsɛna ɓi Moyis, ɓì rì ɓumɓɛ ɓɛ ri ɓɛ̀cɛ̀mɛn. 50 Nikodɛm ànɛ à kɛ̀ngà kì ghɛɛ̀ Yeesus à ɓaghà kìbog ki ɓi ɓumɓɛ̀n, nni à kpaaghà ɓɔ lɛ: 51 Ɓi ɓìdɔ̀gsɛna ɓis, ɓɛ ri nya lɛ ɓɛ ren kìɓan ki mum di ɓɛ ka wog ɓi nkpaà wii, ɓɛ ki yi kiɓan ki à kìi? 52 Nni ɓɛ ɓakà nyi lɛ: Wɔ̀ɔ̀ rì nya girig ŋwaànɛ a Galile? I ù konaagh kì kaà, ù ɓiì ghɛɛ̀ lɛ, Ǹkpaŋzì-ɓìɓan a ka ɓaghày ɓi a Galile. 53 Nni ɓɛ sukàkà a ɓɛ̀mɛɛ ɓaa.

Zyaŋ 8

Giɓ anɛ à kìghà fìsɔ̀mɔ̀g

1 Fɔɔnnɛ Yeesus à kɛ̀ngà ɓi dòn ì ɓɛ̀òlìvyee. 2 Wɔ̀lɛ yɛ̀ɛ duri i tangà, à sugtìghà ɓi naà-Bɛ̀ll, ɓum ɓɛ̀cèm ɓɛ yu nyi a nyòò. Fɔɔnnɛ à kɔ̀rìghà ɓi zi à tumɛ̀n ɓɔ rìrèsàg. 3 Nni Ɓɛ̀rèsàg-ɓìdɔ̀gsɛna rì Ɓɛ̀fàrìzyɛŋ ɓɛ yughày nyi rì giɓ anɛ ɓɛ siìdìghà di a kìki fisɔ̀mɔ̀g, 4 ɓɛ kɔɔ̀sì nyi ɓi nyìinyìm à ɓum, ɓɛ kpaa Yeesus lɛ: Ǹɗèsàg, ɓaa sììdii giɓ anɛ di a kìki fisɔ̀mɔ̀g. 5 Moyis à siitàkà ɓìsi ɓi ɓìdɔ̀gsɛna lɛ tì ghɛ̀ɛ̀sɛɛ kì welì mɛ̀kuu mɛ ɓɛ̀yiɓ mɛ fɛlɛ, di tì rogii mɔ gɔ̀g, nni wɔ̀ɔ̀ kpaa la? 6 Ɓɛ kpaaghà fɔlɔɔ lɛ, ɓɛ ranɗàmgà Yeesus di ɓɛɛ ɓa rì bee inɛ lɛ ɓɛɛ sɔmɛn nyi. Wɔ̀lɛ Yeesus à tuŋìghà à tumɛ̀n rìkàn ɓi zi ri manàcàg. 7 Yɛ̀ɛ ɓɛ kɛnkɛ̀ngà asu rì mɛ̀tɔɔ̀ghtɔɔgh, nni Yeesus à pɛ̀sìghà ǹto, à kpaa ɓɔ lɛ: Kìbog ki ɓi mìni ki ki ka kighà ɓi kiɓe, kɛɛ log nyi kì roŋì gɔ̀g. 8 Fɔɔnnɛ à sugtìghà kìtuŋii, à tumɛ̀n tì rìkànkàn ɓi zi. 9 Yɛ̀ɛ ɓum ɓɛ wokà fɔlɔɔ, ɓɛ tum rìghaghààgh lɛ bog bòg bog à tumɛ̀n ɓi ɓɛ̀roɓɛ ɓɛsɛ̀ɛ̀mɛn, à kpaŋ ɓi ɓɛ siitòn. Nni Yeesus à cɛɛnɛ̀ngà foo ɓɛɛ̀ giɓ anɛ à ɓaghà ànɛn ɓi nyìinyìm. 10 Yeesus à pɛ̀sìtì min nto, à tɔg nyi lɛ: Giɓ anɛ, ɓumɓɛ ɓaa yùu wɔ̀ kìsɔmɛɛ ɓɛ ti fe? Ŋwaà faa ɓi wɔ zɔɔ? 11 Giɓ a ɓàg lɛ: Mum à faa ɓi mɛ zɔɔ Kan. Fɔɔnnɛ Yeesus à kpaaghà min nyi lɛ: Nsoò mɛ̀ girig ǹfaa ɓi wɔ zɔɔ; kɛ̀na, kìɓan kifog kɔ̀ɔ kìti kiɓe yaà.

Yeesus àrì kìtɛɛtɛn ki ɓi ziinɛ

12 Yeesus à tòòghrɛ̀ngà tì rì ɓɔ à kpaa lɛ: Mɛ̀ ǹɗì kìtɛɛtɛn ki ɓi ziinɛ; ŋwaànɛ à nɔ̀ɔ̀tii mɛ̀, àa kɛ̀ɛ̀ghi ɓi ɓi birìm, à rì lɔŋ ɓiì ɓaà rì kìtɛɛtɛn ki cɛɓ. 13 Ɓɛ̀fàrìzyɛŋ ɓɛ kpaaghà nyi lɛ: Wɛ̀ɛmiɗ yɛɛ̀ rèresi kiɓan kɔɔ, fɔɔnnɛ com ki u kpaakpaa ki yin saaɗ. 14 Yeesus à ɓàg ɓɔ lɛ: Ki soo rì lɛ mɛ̀ yɛɛ̀ rèresi kiɓan kɛm̀ mɛ̀ɛmiɗ, com ki nkpaakpàà ki ri saaɗ, lɛ mɛ̀ ǹ-yii fe nnɛ nkɛ̀nkɛ̀n, kìɓan kifog, mìnii yii ɓi jàŋ inɛ m̀ɓaghày, nsoò jàŋ inɛ nkɛ̀nkɛ̀n. 15 Mìnii ti ɓì fiɓɓàg ɓìɓan ri ɗyomzɛ̀n ɗi ɓi mɛ̀mùù, ɓi ɓɛg wɛ̀m, mɛ̀ ǹ-yɔ̀mi ɓi mum. 16 Nsoò màa ki yɔ̀mi, rìren ɗyɛ̀m ɗi kiɓan ɗi ri lɛ saaɗ ɓisuulɛ ǹ-yin cɛ̀ncɛm, tì rì ɓɛɛ̀ Tààta ànɛ à romgày mɛ̀. 17 Ki ri kìkànɛn ɓi ɓìdɔ̀gsɛna ɓin lɛ: Rìtɛɛ̀zì ɗi kiɓan ɗi ɓum ɓɛɓɛɛ̀ ɗi ri saaɗ. 18 Mɛ̀ɛ nɗèresi saaɗ ànɛ ɓi kìɓan kɛm̀ mɛ̀ɛmiɗ, fɔɔnnɛ Tààta ànɛ à romgày mɛ̀ a rèresi kiɓan kɛm̀. 19 Nni ɓɛ kpaaghà nyi lɛ Soŋi à rì fe? Yeesus à ɓàg ɓɔ lɛ: Ɓì yii ɓi mɛ, ɓyɛ̀ ɓi ki yi Seŋi wɛ̀m, i ɓyàa yii mɛ̀, di ɓì rì lɛ ɓì yi girig Seŋi wɛ̀m. 20 Yeesus à kpaaghà ɓìɓan ɓiǹ yɛ̀ɛ à rèrèsàkà ɓum ɓi naà-Bɛ̀ll, ɓi jàŋ inɛ ɓɛ ǹnyamgì ìkum; mum kɛ̀ɛ ki ɓan nyi, lɛ cààmɛ̀n kii ki ɓaghà di ki ka kpaŋ ɓi. 21 Yeesus à kpaatìghà ɓɔ lɛ: Mɛ̀ɛ nkɛ̀nkɛ̀n, ɓì rì mɛ̀ ɓiì kaà, ɓì ki wu ɓi kìɓe kin ɓiɗùm. Ɓì yin lɛ ɓì kpaŋ jàŋ inɛ ǹkɛ̀ɛ. 22 Fɔɔnnɛ Ɓɛ̀yudɛ̀n ɓɛ kpaaghà lɛ: Àrì ɓiì wolɛɛ nyimiɗ giǹ, yɛ̀ɛ a kpaaghi lɛ: Ɓì yin lɛ ɓì kpaŋ jàŋ inɛ ǹkɛ̀ɛ? 23 Nni Yeesus à kalìghà ɓɔ lɛ: Mìnii pɛsɛɛ wɔɔ fɛ ɓi ziinɛ, mɛ̀ m̀pɛ̀sɛɛ yì aɗyòò; mìnii ri ɓumɓɛ ɓi ziinɛ, mɛ̀ ǹ-yin ŋwaànɛ ɓi ziinɛ. 24 Fɔlɔɔ nnɛ màa kpaa mìni lɛ, ɓì ɓiì wiì ɓi ɓìɓe ɓin ɓiɗùm; lɛ i ɓì gherɛɛ ɓi lɛ Mɛ̀ nɗì... , di ɓì wii ɓi ɓìɓe ɓin ɓiɗùm. 25 Nni ɓɛ tɔkà nyi lɛ: Ù rì ghɛn? Yeesus à ɓàg ɓɔ lɛ: Mɛ̀ ǹɗì roànɛ ǹkpaaghà mìni lɛ ǹɗì a rìtumɛ̀n. 26 Ǹtèghɛɛ ɓìɓan ɓi kpaakpaayɛn, rì ɓi yɔ̀mɛn ɓi kìɓan kin, kìɓan kifog roànɛ à romgày mɛ̀, a kpaakpaa saaɗ, fɔɔnnɛ nkpaakpaa ziinɛ ɓìɓan ɓi ǹwokà rì nyi. 27 Ɓɛ wokà ɓi lɛ kìɓan ki Seŋi kɛɛ̀ki à kpaakpààghà ɓɔ. 28 Nni Yeesus à kpaaghà min ɓɔ lɛ: Yɛ̀ɛ ɓì ri pɛ̀si Man à mum aɗyoo, lɛ teŋtèŋ̀ŋ̀, fɔɔnnɛ ɓì ri yi min lɛ Mɛ̀ yɛɛ ri, rì tì lɛ mɛ̀ ǹ-yin ɓiì kìkii kiɓan kidɛŋ rì nto wɛ̀m, kìɓan kifog, mɛ̀ɛ nkpaakpaa ɓiɓan ɓi Seŋi wɛ̀m à rèsàkà mɛ̀. 29 Roànɛ à romgày mɛ̀ à rì nɗaŋ ri mɛ̀, à càɗkà ɓi mɛ cɛ̀ncɛm ɓisuulɛ, ǹti ǹkìlàg ɓìɓan ɓi ɓyɛɛ̀ kɔ̀ngi nyi ɓyààmɛ̀n ɓìcèm. 30 Yɛ̀ɛ à kpaakpààghà ɓìɓan ɓiǹ, ɓum lɛɛ̀gwey ɓɛ gherɛ̀ngà nyi. 31 Nni Yeesus à kpaaghà Ɓɛ̀yudɛ̀n ɓɛ ɓɛ gherɛ̀ngà nyi lɛ: I ɓì nɔ̀ɔ̀tii ɓìɓan ɓyɛm̀ kɛ̀ ɓi pas, ɓì rì ɓiì ɓaà ɓɛ̀kɔɔ̀kɔɔ̀ ɓɛ ɓɛyilàg ɓɛm. 32 Ɓì rì ɓiì yiì saaɗ, saaɗ ànɛ̀n à ghaasì mìni ɓɛ̀kan. 33 Nni ɓɛ tɔkà nyi lɛ: Tì rì boo ì mum yì Abiraham, tì ka ɓaghà ɓi ɓɛkpàn ɓɛ mum. Nni lannɛ ù kpaa lɛ ɓì rì ɓiì ɓaà ɓɛ̀kan? 34 Yeesus à ɓàg ɓɔ lɛ: Mɛ̀ ǹkpaa mìni kɔɔ̀kɔɔ̀ à rìkpaa lɛ, mum ǹcèm ànɛ a kìki kiɓe, à rì ǹkpàn a kìɓe. 35 Ǹkpàn a maà ɓa ɓi lɔŋ ŋwaànɛ ɓi naa ì ɓum ɓyààmɛ̀n ɓìcèm, kìɓan kifog man ànɛ ɓi naa ì ɓum ìnɛ̀n, nnyɛɛ ri ŋwaànɛ ɓi naa ìnɛ̀n ɓyààmɛ̀n ɓìcèm. 36 Fɔɔnnɛ i Man yɛɛ ghaasii mìni ɓɛ̀kan, ɓì ɓa ɓɛ̀kɔɔ̀kɔɔ̀ ɓɛ ɓɛ̀kan. 37 Ǹ-yii lɛ, ɓì rì boo ì mum yì Abiraham, kìɓan kifog, ɓi kaakaa lɛ ɓi wey mɛ̀ lɛ, ɓìɓan ɓyɛm̀ ɓi ghɛɛ ɓi ikɔ̀ɔ̀ ɓi mɛ̀rem min. 38 Mɛ̀ɛ ǹkpaakpaa ɓiɓan ɓi ǹghɛngà yɛ̀ɛ Seŋi wɛ̀m; mìniì yɛɛ̀ kìki lɔŋ ɓiɓan ɓi seŋi wìn à kpaaghà mìni. 39 Nni ɓɛ ɓakà nyi lɛ: Abiraham yɛɛ ri seŋi wìs. Yeesus à kpaa ɓɔ lɛ: I ki ri saaɗ lɛ ɓì rì ɓɔn ɓɛ Abiraham, kìina min ɓiɓan ɓi nyii kighà. 40 Wɔ̀lɛ ɓi cààmɛ̀n ki, ɓi kaakaa lɛ ɓi wey mɛ̀. M̀òànɛ ǹkpaaghà mìni ɓìɓan ɓi ǹwokày rì Bɛ̀ll, com ki Abiraham à kìghà ɓi. 41 Ɓi kìki ɓiɓan ɓi seŋi wìn a kìlàg? Nni ɓɛ ɓakà nyi lɛ: Tì yin ɓɔn ɓɛ tìsɔ̀mɔ̀g, tì rì lɔŋ Seŋi bog lɛ Bɛ̀ll. 42 Yeesus à kpaa lɛ: I kaa rì saaɗ lɛ Bɛ̀ll yɛɛ ri Seŋi wìn, di ɓì keesii mɛ̀; lɛ ɓi Bɛ̀ll nnɛ ǹfuu yì, wɔɔ nnɛ ǹki ɓaghày; ǹ-yùghày ɓi ri nto wɛ̀m, lɔŋ nyi yɛɛ romgày mɛ̀. 43 Ɓisuucɛ nnɛ ɓì woogh ɓi kitòkì kɛm̀? Lɛ ɓì yin lɛ ɓì wog jɛ̀ɛ̀ yɛ̀m. 44 Satàn yɛɛ ri seŋi wìn fɔɔnnɛ ɓi kɔ̀nkɔn lɛ di ɓyàa kìi rìkɔ̀n ɗi seŋi wìn. A ɓalag ǹwolì-ɓum à tumɛ̀n a rìtumɛ̀n, à ki ka rɛlìghà ɓi ɓi saaɗ nsoò ŋwos bog, ɓisuulɛ, saaɗ a maà ɓa ɓi a lɔ̀ŋkii; cààmɛ̀n ki a pwààpwaa ɓum, lɔŋ com ki ki riì nyi ɓi nɗem kɛɛ̀ki a kpaakpaa ɓɔ, lɛ à rì pwààpwaà, à ki ɓa ti seŋi ɓɛ̀pwàà. 45 Ɓì gherɛɛ ɓi mɛ lɛ yɛ̀ɛ mɛ̀ nkpaakpaa saaɗ. 46 Ghɛn anɛ ɓi mìni yɛɛ ri lɛ à rèsì nsoò maa rìnàn ɓi cɛɓ kɛ̀m lɛ tɛntɛ̀ɛ̀n? I mɛ̀ ǹki kpaa saaɗ, ɓi cɛ nnɛ ɓì gherɛɛ ɓi mɛ? 47 Ŋwaànɛ àrì mum à Bɛ̀ll, a woki jɛ̀ɛ̀ ì Bɛ̀ll; nni yɛ̀ɛ ɓì yin ɓum ɓɛ Bɛ̀ll, nnɛ ɓì woogh ɓi jɛ̀ɛ̀ yìì. 48 Nni Ɓɛ̀yudɛ̀n ɓɛ ɓakà nyi lɛ: Ki ri lɔŋ saaɗ yɛ̀ɛ tìi nkpaa lɛ, ù rì ŋwaànɛ a Samari, ù ki ɓa ti ri kìɓeɓtàg ki nghay. 49 Yeesus à pɛ̀ɛ̀zì lɛ: Ǹ-yin ɗi kìɓeɓtàg ki nghay, kìɓan kifog nkeekem̀zì Seŋi wɛ̀m, mìnii ki sòosoòtì mɛ̀. 50 Mɛ̀ n-yin ɓiì kaakaa rikem ɗyɛ̀m, ŋwaàdɛŋ yɛɛ̀ kaakaa ɗyɔ, nnyɛɛ̀ ki yɔ̀myɔm ɓum. 51 Ǹkalii mìni kɔɔ̀kɔɔ̀ à rìkalì lɛ: I ŋwaà ɓèŋi ɓìɓan ɓyɛm̀, ŋwaànɛ̀n à wii gɛ ɓi. 52 Nni Ɓɛ̀yudɛ̀n ɓɛ kpaaghà nyi lɛ: Ɓigomìnɛ tì yii lɛ ù rì rì kìɓeɓtàg ki nghay. Abiraham à wughà, ɓɛ̀kpaŋzì-ɓìɓan ɓɛ cuu girig, wɔ̀ɔ̀ ki kpaa lɛ: Ŋwaànɛ à ɓèŋi ɓìɓan ɓyɛm̀ à wii gɛ ɓi. 53 Wɔ̀ yɛɛ cee Abiraham à seŋi wìs anɛ à wughà? Rì ɓɛ̀kpaŋzì-ɓìɓan ɓɛ ɓɛ cuughà girig? Wɔ̀ɔ fèfeg lɛ ù rì cɛ? 54 Nni Yeesus à ɓàkà lɛ: I màa ɓɔɔ̀ɓɔ̀gsɛ̀n di rìkem ɗyɛ̀m ɗi ri ɗi zɛy rì zɛy. Nni Seŋi wɛ̀m ànɛ ɓi kalag lɛ à rì Bɛ̀ll wìn yɛɛ̀ ɓɔɔɓɔgsì mɛ̀. 55 Ɓì ki yii ɓi nyi; mɛ̀ ǹ-yii nyi. I ǹkpaa lɛ ǹ-yii ɓi nyi, di ǹɗì pwààpwaà yɛ̀ɛ mìni. Kiɓan kifog mɛ̀ ǹ-yii nyi, mɛ̀ɛ ǹki ɓèŋɓeŋ jɛ̀ɛ̀ yìì. 56 Abiraham à seŋi wìn a nyààrɛ̀ngà rì fèg ànɛ lɛ, à ɓiì ghɛɛ ŋwos wɛm̀, à ki ghɛngà nyi à wog kìrɔɔ lɛɛ̀gwey. 57 Nni Ɓɛ̀yudɛ̀n ɓɛ kpaaghà nyi lɛ: Wɔ̀ kɛ̀ɛ̀ kìkpaŋì bèg mɛ̀tin mɛɓɛɛ̀ rì ǹtɛ̀ɗ, ù ki kpaa lɛ ù ghɛngà Abiraham? 58 Yeesus à kpaa ɓɔ lɛ: Mɛ̀ ǹkpaa mìni ɓi saaɗ lɛ, di Abiraham à ka yin, mɛ̀ m̀ɓaghà. 59 Fɔɔnnɛ ɓɛ pɛsàkà gɔ̀g lɛ ɓɛɛ rogi nyi, wɔ̀lɛ Yeesus à nyamzɛ̀ngà à kpaŋ ɓi naà-Bɛ̀ll.

Zyaŋ 9

Yeesus à wɔ̀ɔ̀zii ŋwaànɛ à yalɛ̀ngà rì tìɗyaŋ

1 Yɛ̀ɛ Yeesus à ghaghàghìyà, nni à ghɛngà ŋwaàdɛŋ ànɛ à yalɛ̀ngà rì tìɗyaŋ. 2 Ɓɛ̀yilàg ɓii ɓɛ tɔg nyi lɛ: Raɓì, ŋwaànɛ à yalɛ̀ngà fɛlɛ rì tìɗyaŋ lɛ nyimiɗ yɛɛ kighà kìɓe gìn ɓɛ̀yalì ɓii? 3 Yeesus à ɓàg lɛ: Ki yin lɛ nyimiɗ, nsoò lɛ ɓɛ̀yalì ɓii ɓɛɛ kighà kìɓe, wɔ̀lɛ ki ri lɔŋ fɔlɔɔ lɛ, di mɛ̀kìkìì mɛ Bɛ̀ll mɛɛ ghɛnɛn a lɔ̀ŋkii. 4 Ki ghɛɛ̀sɛɛ lɛ ti ki ɓìsay ɓi roànɛ à romgày mɛ̀, di ŋwos a kaka, lɛ ìru wɛɛ̀ yùyuiy, wɛɛ̀wu mum àa ɓa ti ɓi ri bee inɛ à kì kìsay miì. 5 Cààmɛ̀n ki ǹkaka ɓi ziinɛ, ǹɗì kìtɛɛtɛn ki ɓi ziinɛ. 6 Yɛ̀ɛ à kpaaghà fɔlɔɔ, nni à tuughà tìtyɛɛ̀ ɓi zi, à kì kìtɔ̀tɔ̀ɓ rì tìtyɛɛ̀ tii, à siŋì ŋwaànɛ̀n ɓi mis, 7 à kpaa nyi lɛ: Kɛ̀na kìsòo ìsu ɓi kìɗig ki a Silowe; ɗii ɗìn ɗi ri azi lɛ: Ǹɗomɛn. Nni ɗyaŋɗyàŋ à kɛ̀ngà, à sòò ìsu, à sugtìì di à mɛ ghɛnɛ̀n. 8 Ɓumɓɛ ɓɛ woŋzɛ̀ngà mɛɛ ri ɓɔ, rì ɓɛ̀roɓɛ ɓɛ nghɛngì nyi abɛ̀y di a lɔnlɔn ɓyom ɓi bee, ɓɛ kpaakpàà lɛ: Àa ŋwaànɛ yɛɛ nti à kɔ̀ràg fɛ à lɔnlɔ̀n ɓum ɓyom? 9 Ɓɛ̀ro ɓɛdɛŋ ɓɛ kpaaghà lɛ nnyɛɛ ri, ɓɛ̀ro ɓɛmbog lɛ àg! Àa nyi yɛɛ ri, lɔŋ kìpisɛn kii kɛɛ ri. Wɔ̀lɛ nyimiɗ a ki kpaakpaa lɛ: Lɔŋ mɛ̀ yɛɛ ri. 10 Nni ɓɛ tɔkà min nyi lɛ: Mis mɔɔ maa ghɛnɛɛ di ki ɓaa là? 11 Nni à ɓakà ɓɔ lɛ: Ŋwaànɛ ɓɛɛ̀ regi lɛ Yeesus yaa tɔɓi zi, à siŋì mɛ̀ ɓi mis, à kpaa mɛ̀ lɛ: Kɛ̀na kì sòo ìsu ɓi Silowe. Fɔɔnnɛ màa kɛ̀ɛ, ǹsòò ìsu, ǹghɛnɛ̀n. 12 Nni ɓɛ tɔkà nyi lɛ: Ŋwaà ǹcèm à rì fe? Nyii pɛɛ̀zì lɛ: Mɛ̀ ǹ-yii ɓi. 13 Fɔɔnnɛ ɓɛ kɛǹgà rì ŋwaànɛ à ka ɓaghà rì tìɗyaŋ ànɛ̀n a Ɓɛ̀fàrìzyɛŋ. 14 Kɔɔ ki ɓaghà foo lɛ, ŋwosi Saɓàt nnɛ Yeesus à tɔɓkà zi, à kì lɛ, mis mɛ ŋwaànɛ̀n mɛɛ ghɛnɛn. 15 Fɔlɔɔ nnɛ Ɓɛ̀fàrìzyɛŋ ɓɛ tɔkà girig ŋwaànɛ̀n lɛ, a kali ɓɔ lannɛ kaa kìlɛɛ lɛ a ghɛnɛn. Nni à kpaaghà ɓɔ lɛ: Àa siŋii mɛ̀ kìtɔ̀tɔ̀ɓ ɓi mis, ǹsòò ìsu, nnɛ nghɛɛghɛnɛ̀n lɛ. 16 Fɔɔnnɛ Ɓɛ̀fàrìzyɛŋ ɓɛdɛŋ ɓɛ kpaaghà lɛ: Ŋwaànɛ à pɛ̀sɛɛ yì ɓi yɛ̀ɛ Bɛ̀ll ɓisuulɛ à cèlii ɓi Saɓàt. Ɓɛ̀ro ɓɛmbog ɓɛ tɔg lɛ: Lannɛ ǹkìì-kìɓe a rì lɛ à kì mɛ̀kuu mɛ dàm yɛ̀ɛ mɛ? 17 Fɔɔnnɛ ɓɛ ghasɛ̀ngà gàɓ yiɓɛɛ̀; ɓɛ tɔgtì ɗyaŋɗyàŋ ànɛ̀n lɛ: Ɓi ɓɛg wɔ̀ɔ̀, wɔ̀ɔ̀ kpaa la ɓi kìɓan ki ŋwaànɛ àa kìi lɛ mis mɔɔ mɛɛ ghɛnɛn? Nni ŋwaànɛ̀n à pɛ̀ɛ̀zìghà ɓɔ lɛ: Mɛ̀ ǹghɛɛ lɛ à rì ǹkpaŋzì-ɓìɓan. 18 Ɓɛ̀yudɛ̀n ɓɛ gherɛ̀ngà ɓi lɛ ŋwaànɛ̀n à ka ɓaghà rì tìɗyaŋ nni à mɛ ghɛnɛ̀n, cààmɛ̀n ki ɓɛ ɓaghà di ɓɛ ka reŋii ɓi ɓɛyalì ɓii. 19 Fɔɔnnɛ ɓɛ tɔkà ɓɛ̀yalì ɓii lɛ: Man wiǹ ànɛ ɓi kpaaghi lɛ à yalɛ̀ngà rì tìɗyaŋ yɛɛ ri lɛ? Nni lannɛ à ti ɓiì ghɛnɛɛghɛnɛ̀n ɓigomìnɛ? 20 Ɓɛ̀yalì ɓii ɓɛ ɓaàg lɛ: Ɓìsii yii lɛ man wìs yɛɛ ri lɛ, à ki yalɛ̀ngà rì tìɗyaŋ. 21 Kìɓan kifog, tì yii ɓi com ki ki kiì lɛ a ghɛnɛn, tyɛ̀ ki ki yi nsoò ŋwaànɛ àa ŋwàri nyi mis. Tɔɔghna nyi, à ti ǹsɛ̀ɛ̀mɛn ɓi lèg ànɛ lɛ à ɓàg kìɓan ki ki seesee nyi. 22 Ɓɛ̀yalì ɓii ɓɛ kpaaghà fɔlɔɔ ɓisuulɛ, ɓɛ rirìsìghà Ɓɛ̀yudɛ̀n; rì tì lɛ Ɓɛ̀yudɛ̀n ɓɛ ɓaghà di ɓɛ mɛ wooghrɛn jɛ̀ɛ̀ lɛ, ŋwaànɛ à gherɛɛ lɛ Yeesus à rì Kiris, ɓɛ ren nyi ɗii ɓi naà-bɔ̀ŋzɛ̀n. 23 Kìɓan kiǹ kɛɛ kighà lɛ ɓɛ̀yalì ɓii ɓɛɛ kpaa lɛ: À ti ǹsɛ̀ɛ̀mɛn, tɔɔghna nyi. 24 Fɔɔnnɛ Ɓɛ̀fàrìzyɛŋ ɓɛ reŋìghày tì ŋwaànɛ à ka ɓaghà ànɛ̀n rì tìɗyaŋ, ɓɛ kpaa nyi lɛ: Kali saaɗ ɓi mis mɛ Bɛ̀ll ɓìsii yii lɛ ŋwaànɛ̀n à rì ǹkìì-kìɓe. 25 Nni ŋwaànɛ̀n à ɓàkà lɛ: Mɛ̀ ǹ-yii ɓi nkòo à rì ǹkìì-kìɓe; com ki mɛ̀ ǹ-yii ki ri lɛ, m̀ɓalag ri tìɗyaŋ, nni m̀mɛ ghɛnɛn ɓigomìnɛ. 26 Ɓɛ tɔkà nyi lɛ: Cɛ kɛɛ̀ ki àa kìi wɔ̀? Lannɛ àa kìi lɛ mis mɔɔ mɛɛ ghɛnɛ̀n? 27 À ɓàg ɓɔ lɛ: Màa kpaa mìni kìɓan ki, kɛ̀ ɓi kɔ̀n lɛ ɓi wog. Ɓisuucɛ nnɛ ɓi kɔ̀nkɔn lɛ ɓi wogti kɔ? Ɓi kɔ̀nkɔn girig lɛ ɓi ɓa ɓɛ̀yilàg ɓii? 28 Fɔɔnnɛ ɓɛ sɛmgàkà ŋwaànɛ̀n, ɓɛ kpaa nyi lɛ: Wɔ̀ yɛɛ ri ǹ-yilàg wìì, ɓìsii ri ɓɛ̀yilàg ɓɛ Moyis. 29 Tì yii lɛ, Bɛ̀ll à tòòghrɛ̀ngà rì Moyis; wɔ̀lɛ roànɛ, tì yii ɓi fennɛ à pɛ̀sɛɛ yì. 30 Ŋwaànɛ̀n à ɓàg ɓɔ lɛ: Kìɓan ki ki yeesɛɛ rìwog ki ri lɛ, mìnii yii ɓi fennɛ à pɛ̀sɛɛ yì, wɔ̀lɛ nyaa ki ŋwàri mɛ̀ mis! 31 Tì yii lɛ Bɛ̀ll à ti kɛ̀ɛ wog bɔ̀ŋzɛ̀n yi ɓɛ̀kìì-kìɓe, kìɓan kifog, à ti à wokì bɔ̀ŋzɛ̀n yi ŋwaànɛ à kuuraagh nyi, à ki kìlag rikɔ̀n ɗii. 32 Tì ka wokà ɓi di ɓɛɛ̀ kpaakpaa lɛ, ŋwaàdɛŋ à mɛ kìghà lɛ mis mɛ ŋwaànɛ à yalɛɛ rì tìɗyaŋ mɛɛ ghɛnɛ̀n. 33 I ŋwaànɛ kɛ̀ɛ ɓay yɛ̀ɛ Bɛ̀ll, di à yin lɛ à kì com. 34 Nni ɓɛ ɓakà nyi lɛ: Wàànɛ ù yalɛ̀ngà ɓi kìɓe wɛ̀ɛmiɗ bimiɗ, wɔ̀ yɛɛ̀ kɔ̀nkɔn lɛ u resag ɓìsi? Fɔɔnnɛ ɓɛ naɓkà nyi. 35 Yɛ̀ɛ Yeesus à wokà lɛ, ɓɛ nnàɓi ŋwaànɛ̀n, nni à tuusɛ̀ngà rì nyi, à kpaa nyi lɛ: Ù gherɛɛ nya Man à mum? 36 Ŋwaànɛ̀n à pɛ̀ɛ̀zì nyi lɛ: Nnyɛɛ ri ghɛn Kan, yɛ̀ɛ ǹɗì lɛ ǹgherɛ̀n nyi? 37 Yeesus à kpaa nyi lɛ: Ù mɛ ghɛn ancèm, nyimiɗ yɛɛ̀ ki tòtog lɛ rì wɔ̀. 38 Fɔɔnnɛ ŋwaànɛ̀n à kpaaghà lɛ: Kan ǹgherɛɛ; à ɓag mɛ̀ɗu ɓi zi, à ɓɔgsì nyi. 39 Yeesus à kalì min nyi lɛ: Ǹ-yùghà ɓi ziinɛ lɛ rìren ɗi ɓìɓan ɗyɛɛ ghɛnɛn lèg ànɛ lɛ, ɓumɓɛ ɓɛ ri rì tìɗyaŋ ɓɛɛ ghɛnɛn, ɓɛ̀roɓɛ ɓɛɛ̀ ghɛɛghɛnɛ̀n ɓɛ ɗiŋì tìɗyaŋ. 40 Yɛ̀ɛ Ɓɛ̀fàrìzyɛŋ ɓɛdɛŋ ɓɛ Yeesus à ɓaghà rì ɓɔ ɓɛ wokà ɓìtòkì ɓiǹ, ɓɛ tɔg nyi lɛ: Ɓìsii ri nya girig rì tìɗyaŋ? 41 Yeesus à ɓàg ɓɔ lɛ: I ɓyàa rì rì tìɗyaŋ, di ɓì yiǹ lɛ ɓì ɓa rì kìɓe; nni yɛ̀ɛ ɓi kpaakpaa lɛ ɓi ghɛɛghɛnɛ̀n, fɔlɔɔ nnɛ kìɓe kin ki kaka.

Zyaŋ 10

Syeesyee à m̀ɓèŋì-jɔ̀ɔ̀

1 Ǹkpaa mìni kɔɔ̀kɔɔ̀ à rìkpaa lɛ ŋwaànɛ à fyee ɓi asuunaa lɛ a ɗiŋi ɓi kìlaa ki jɔ̀ɔ̀, kìɓan kifog à ɓɔg gari ɓi jàŋ idɛŋ à ɗinì ɓi kìlaa, à rì lɛ nyi wiiwìì, nyi tì zyaàzyaa. 2 Lɔŋ roànɛ à ɗiŋii asuunaa yɛɛ ri syeesyee à m̀ɓèŋì-jɔ̀ɔ̀ yiǹ. 3 M̀ɓèŋì-ìsuunaa à nɛm ŋwaànɛ̀n ìsuunaa lɛ a ɗiŋi, jɔ̀ɔ̀ yii yi wog jɛ̀ɛ̀ yìì; à ki regi jɔ̀ɔ̀ yii lɔŋ ɓi mii, à kɛ̀n ɗì yɔ ɓidan. 4 I à mɛ kpaŋzi jɔ̀ɔ̀ yii yicèm, à syòŋ yɔ bee, yɔɔ nɔɔ̀nɔ̀ɔ̀tì nyi lɛ, yi yii jɛ̀ɛ̀ yìì. 5 Yi yin lɛ yi nɔɔ̀tì ǹkèn a mum, kìɓan kifog yi ri ɓiì ghɛŋii nkèn a mum fìràɓ lɛ yi remzii ɓi jɛ̀ɛ̀ yi ɓɛ̀kèn. 6 Yeesus à tekà ɓɔ dàɗkì ìnɛn, kìɓan kifog ɓɛ̀ kɛɛ̀ wog kiɓan ki a kpaaghà ɓɔ. 7 Nni Yeesus à kpaatìghà ɓɔ lɛ: Ǹkpaa mìni kɔɔ̀kɔɔ̀ à rìkpaa lɛ mɛ̀ yɛɛ ri ìsuunaa wu gari ì jɔ̀ɔ̀. 8 Ɓum ɓɛ̀cèm ɓɛ ɓɛ lokày kì yùu ri mɛ̀, ɓɛ ri, ɓɛ̀wiiwìì, rì ɓɛ̀zyaàzyaa. Wɔ̀lɛ jɔ̀ɔ̀ yi wokà ɓi rikpaa ɗyàà. 9 Mɛ̀ yɛɛ ri ìsuunaa, ŋwaànɛ à fyee a lɔ̀ŋkɛm̀ à ɗiŋì à ɓiì ghɛɛ̀ cɛɓ. À ɓiì kìi lɛ à ɗiŋì, à kpaŋ à ki tanɛn ɓiɗilàg. 10 Wiiwìì à ti à yùlàg lɔŋ lɛ, a yiì, à wey, à ki cuusi. Ɓi mɛ̀, mɛ̀ ǹ-yùghà lɛ, jɔ̀ɔ̀ yɛɛ ɓa rì cɛɓ, yi ki ɓa ri kɔ lɛɛ̀gwey. 11 Mɛ̀ yɛɛ ri syeesyee à m̀ɓèŋì-jɔ̀ɔ̀. Syeesyee à m̀ɓèŋì-jɔ̀ɔ̀ a falag cɛɓ kii ɓisuu jɔ̀ɔ̀ yii. 12 Wɔ̀lɛ ŋwaànɛ a ɓèŋɓeŋ jɔ̀ɔ̀ lɛ ɓɛɛ leɓ nyi, kɛ̀ɛ ki ɓa mɓèŋì-jɔ̀ɔ̀, jɔ̀ɔ̀ yɛ̀ kɛɛ̀ ki ɓa lɛ yiŋkii, à ti à kìlàg lɛ, i à ghɛɛ ǹgɔn, à rinì jɔ̀ɔ̀, à làn. Ǹgɔn à yù kì ɓangii jɔ̀ɔ̀, à san yɔ. 13 Ŋwaànɛ̀n à ti à làngì fɔlɔɔ ɓisuulɛ, a kìki kisay ɓisuu mɔ̀ɔ̀ni, ǹɗem wii wɛ̀ kɛɛ̀ kɛsi ri jɔ̀ɔ̀. 14 Mɛ̀ yɛɛ ri syeesyee à m̀ɓèŋì-jɔ̀ɔ̀. Ǹ-yii jɔ̀ɔ̀ yɛm̀, jɔ̀ɔ̀ yɛm̀ yi ki yii mɛ̀, 15 lɔŋ yɛ̀ɛ Tààta à yii mɛ̀, mɛ̀ ǹki yi Tààta; mɛ̀ ǹki faa cɛɓ kɛ̀m ɓisuu jɔ̀ɔ̀ yɛm̀. 16 Ǹɗì tì rì jɔ̀ɔ̀ yidɛŋ yi yi ka yin ɓi kìlaa ki. Ki ghɛɛ̀sɛɛ lɛ nteɗ yì girig yɔ; yi ri ɓiì woògh jɛ̀ɛ̀ yɛ̀m, fɔɔnnɛ kìtuu ki jɔ̀ɔ̀ ki ɓiì ɓaà kìfog, m̀ɓèŋì à ɓa bog. 17 Tààta à keesii mɛ̀ ɓisuulɛ, ǹfaa cɛɓ kɛ̀m lɛ di nki teeti kɔ. 18 Mum à ɓàtɛɛ ɓi mɛ cɛɓ, lɔŋ mɛ̀ɛmiɗ yɛɛ faa kɔ̀. Ǹɗì rì ìtèɗ wulɛ nfa kɔ, ǹki ɓa ti ri ìtèɗ wulɛ ǹteetì kɔ̀; kìɓan ki Seŋi wɛ̀m à reɓsìghà mɛ̀ lɛ nki kɛɛ̀ kìn. 19 Fɔɔnnɛ Ɓɛ̀yudɛ̀n ɓɛ ghasɛ̀ngà tì gàɓ yiɓɛɛ̀ ɓisuu ɓitòkì ɓiǹ. 20 Kìgwey ki ɓi ɓɔ ki kpaakpààghà lɛ: Yeesus à rì rì kìɓeɓtàg ki nghay, à ki ɓa ti ndùŋɛn, ɓisuucɛ nnɛ ɓi wowog ɓiɓan ɓii? 21 Ɓɛ̀ro ɓɛmbog ɓɛ kpaakpàà lɛ: Ɓìtòkì ɓi ŋwaànɛ ɓi yin ɓitòkì ɓi ŋwaànɛ à rì rì kìɓeɓtàg ki nghay. Kìɓeɓtàg ki nghay ki ri nya lɛ ki ŋwaɗ mis mɛ ɓɛɗyaŋɗyaŋ?

Ɓɛ̀yudɛ̀n ɓɛ ɓeni Yeesus

22 Tìcàɓ ti gòn inɛ ɓɛ faghà naà-Bɛ̀ll rì Bɛ̀ll ti ɓaghà a Yorisalɛm, ki ɓaghà ɓi cààmɛ̀n à bùmà. 23 Nni Yeesus à kɛ̀ɛ̀kɛ̀ɛ̀ghà ɓi naà-Bɛ̀ll ɓi tuùtuu anɛ ɓɛ nɗegì lɛ, tuùtuu a Salomɔŋ. 24 Ɓɛ̀yudɛ̀n ɓɛ taŋzɛ̀ngà nyi a nyoo, ɓɛ kpaa nyi lɛ: U kɔ̀nkɔn lɛ mɛ̀rem mɛɛ ɗiìɗìlɛ̀n ɓìsi ɓi mùm à kpaŋ ɓigomìbe? Nkòo wɔ̀ yɛɛ ri Kiris, kali ɓìsi lɛ tɛntɛ̀ɛ̀n. 25 Nni Yeesus à ɓakà ɓɔ lɛ: M̀mɛ kpaa mini, kɛ̀ ɓi gherɛn. Ɓiɓan ɓi nkìki ɓi ɗii ɗi Seŋi wɛ̀m, ɓyɔ yɛɛ rèresi rikuu ɗi mum ɗi ǹɗì. 26 Kìɓan kifog, ɓì gherɛɛ ɓi lɛ, yɛ̀ɛ ɓì yin jɔ̀ɔ̀ yɛm̀. 27 Jɔ̀ɔ̀ yɛm̀ yi ti yi wokì jɛ̀ɛ̀ yɛ̀m, mɛ̀ ǹ-yii yɔ, yɔɔ ki ti yi nɔɔ̀tàg mɛ̀. 28 Ǹti ǹfalàg yɔ cɛɓ ki fiɗyàɓ fikɔ̀ɔ̀, yàa wu ɓi nsoò ŋwos bog, mum à ki yin lɛ à ɓàtɛ̀n yɔ ɓi càg kɛm̀. 29 Seŋi wɛ̀m ànɛ à faghà mɛ̀ yɔ, à cee ɓum ɓɛ̀cèm, fɔɔnnɛ mum à yin lɛ à ɓàtɛ̀n yɔ ɓi càg ki Tààta. 30 Rì mɛ̀ rì Tààta, tì rì lɔŋ mum bog. 31 Fɔɔnnɛ Ɓɛ̀yudɛ̀n ɓɛ ɓadɛ̀ngà tì gɔ̀g lɛ ɓɛɛ rogi nyi. 32 Nni Yeesus à kpaatìghà min ɓɔ lɛ: Mɛ̀ɛ nkìi ɓɛ̀gɛn ɓɛ ɓiɓan lɛɛ̀gwey ɓi mis min, rì ìtèɗ wu Tààta, nni ɓi ɓìɓan ɓiǹ, kibe kɛɛ̀ki ɓì ti mɛ̀ ɓiì rogii gɔ̀g miì? 33 Ɓɛ̀yudɛ̀n ɓɛ ɓag nyi lɛ: Tì yin lɛ tì rogì wɔ̀ gɔ̀g ɓi syeesyee à kìɓan anɛ ù kìi, wɔ̀lɛ tii rogì wɔ̀ gɔ̀g ɓisuu zɛɛtɛn yi ù rì rì yɔ ɓi san ànɛ yɛ̀ɛ Bɛ̀ll, ɓisuulɛ, wɛ̀ɛnɛ lɔŋ mum, ù ki kɔ̀n lɛ u terɛn wɛ̀ɛmiɗ yɛ̀ɛ Bɛ̀ll? 34 Nni Yeesus à ɓàkà ɓɔ lɛ: Ki yin kikànɛn ɓi ɓìdɔ̀gsɛna ɓin lɛ: Bɛ̀ll à kpaaghà lɛ ɓì rì bɛ̀ll? 35 Tì yii lɛ mum à yin lɛ à pisì kìɓan ki ki ri kìkànɛn; nni i mɛ̀kànì mɛ regii ɓumɓɛ Bɛ̀ll à tòòghrɛ̀ngà rì ɓɔ lɛ bɛ̀ll, 36 mìnii kalì roànɛ Bɛ̀ll à ɓɔ̀ngà à rom yì lɛ à sɛɛtii Bɛ̀ll, ɓisuulɛ màa kalii lɛ, ǹɗì Man à Bɛ̀ll? 37 I ǹki rɔ̀ɓi kɛ̀ɛ nkì ɓisay ɓi Seŋi wɛ̀m, ɓì rɔ̀ɓ kɛ̀ ɓi gherɛn mɛ. 38 Kìɓan kifog, i nkìki ɓisay ɓii, nsoò ɓyàa gherɛɛ ɓi mɛ, gherɛɛna ɓyɔ, fɔɔnnɛ ɓì ɓiì kìi lɛ, ɓì yi, ɓì ki ghɛn lɛ Tààta à rì ɓi mɛ̀, mɛ̀ ɓi Tààta. 39 Fɔɔnnɛ ɓɛ mɛɛ̀ kaatìghà bee inɛ ɓɛɛ ɓaǹ nyi; wɔ̀lɛ Yeesus à sɔtɛ̀n ɓɔ ɓi ɓyàg. 40 Nni Yeesus à kɛ̀ɛ̀dìghà cɛcɛɗ ki Zyuridɛŋ, ɓi jàŋ inɛ Zyaŋ à ka ɓààɓàɓtìghà ɓum, à kɔ̀rì wɔɔ. 41 Fɔɔnnɛ ɓum lɛɛ̀gwey ɓɛ yughày nyi a nyoo, ɓɛ kpaakpàà lɛ: Zyaŋ à kìghà ɓi dàm nsoò bog, kìɓan kifog, ɓìɓan ɓìcèm ɓi Zyaŋ à kpaaghà à ràɗ ɗì ŋwaànɛ ɓi ɓaghà saaɗ. 42 Nni ɓum lɛɛ̀gwey ɓɛ gherɛ̀ngà Yeesus.

Zyaŋ 11

Yeesus à ghèmzii Lazaari

1 Ŋwaàdɛŋ ɗii lɛ Lazaari, yɛɛ roròɓkà; à ɓaghà ŋwaànɛ a Bɛtanii, ɓi kìlɔ̀ŋ ki ɓɛ-Marii ɓɛɛ̀ Maata à geni. 2 Marii ànɛn yɛɛ sisìŋìghà Kan tìrààre, à ki tɔ̀si nyi mɛ̀kòò ri tyòŋ tii; nni geni Marii à baŋì yɛɛ roròɓkà lɔɔ lɛ Lazaari. 3 Rìgeni ɗi ɓɛ̀yiɓ ɗiǹ, ɗi romgà mum lɛ a kali Yeesus lɛ: Kan, mum wɔɔ̀ ànɛ u keesàg, à yin cem. 4 Yɛ̀ɛ Yeesus à wokà fɔlɔɔ, nni à kpaaghà lɛ: Fìroɓ fìn fi yin nyi ɓiì wowoli, fi ri ɓisuu rikem ɗi Bɛ̀ll, lɛ Man à Bɛ̀ll a teɗ rìkem ɓi fìroɓ fìn. 5 Yeesus à keesìghà lɛ, rì Maata rì geni à giɓ, rì Lazaari girig. 6 Yɛ̀ɛ à wokà lɛ Lazaari à yin cem, à laatìghà mɛ̀ru mɛɓɛɛ̀ ɓi jàŋ inɛ à ɓaghà. 7 Ajɛ̀m ìnɛn nnɛ à kalìghà ɓɛ̀yilàg ɓii lɛ: Ti sugtiina a Zyude. 8 Ɓɛ̀yilàg ɓɛ kpaa nyi lɛ: Raɓì, ki ka finɛn ɓi yɛ̀ɛ Ɓɛ̀yudɛ̀n ɓɛ m̀mɛɛ̀ rogi wɔ gɔ̀g, wɔ̀ɔ̀ ki kɔ̀ɔ̀di lɛ u sugti wɔɔ? 9 Yeesus à ɓàg ɓɔ lɛ: Mɛ̀ɛ nti ŋwos a rìlàg ɓɛ̀hawò ǹtɛ̀ɗ rì ɓiɓɛɛ̀? I mum a kɛ̀ɛ̀kɛɛ ri ŋwos, à yin lɛ à ɓàgtɛ̀n, ɓisuulɛ a seesee kitɛɛtɛn ki ɓi ziinɛ. 10 Wɔ̀lɛ i mum a kɛ̀ɛ̀kɛɛ ri ìru, à rì lɛ à ɓàgtɛ̀n ɓisuulɛ à yin ɗi kìtɛɛtɛn ɓi nyimiɗ. 11 Yɛ̀ɛ à tòòghrɛ̀ngà fɔlɔɔ, nni à kpaaghà ɓɔ lɛ: Reŋkàŋ wìs Lazaari àa nlali, kìɓan kifog ǹɗì ɓiì kɛ̀ɛ nyi kìghèmzii. 12 Ɓɛ̀yilàg ɓii ɓɛ kpaa lɛ: Kan i ki ri lɛ àa nlali di à ɓiì ɓaà lɛ syeesyee. 13 Rìwu ɗi Lazaari ɗyɛɛ̀ɗi à kpaaghà, wɔ̀lɛ ɓɔɔ fekì nya lɛ fìlo fi zɛy fyɛɛ̀fi à kpaa. 14 Fɔɔnnɛ Yeesus à kpaaghà ɓɔ lɛ tɛntɛ̀ɛ̀n lɛ: Lazaari à rì kìloŋ. 15 Nni kìnyàà ki ri mɛ̀ kìronɛn ɓi nɗem ɓisu win lɛ, mɛ̀ɛ ǹ-yin wɔɔ, fɔlɔɔ yɛɛ ɓiì kìi lɛ ɓi gherɛn. Wɔ̀lɛ ti kɛ̀ɛna jàŋ inɛ à rì. 16 Fɔɔnnɛ Tomas ànɛ ɓɛ nɗegì lɛ, Didim, à kpaaghà ɓɛ̀yilàg ɓɛmbog lɛ: Ti kɛ̀ɛna girig, ti wu nɗaŋ ɗi nyi. 17 Yɛ̀ɛ Yeesus à kpagà wɔɔ, à tanɛ̀n di Lazaari à ti ɓi zɔ̀ŋ mɛ̀ru mɛnin. 18 Yɛ̀ɛ Bɛtanii à ɓaghà jàŋbog ɗì Yorisalɛm nunùg ɓɛ̀kilòmɛɛ̀tɛ̀rɛ̀ ɓɛraa, 19 Ɓɛ̀yudɛ̀n lɛɛ̀gwey ɓɛ yughày yɛ̀ɛ ɓɛ̀-Maata ɓɛɛ̀ Marii, lɛ ɓɛɛ fɔɔ̀si ɓɔ mɛ̀rem ɓi rìwu ɗi gèni wàà. 20 Yɛ̀ɛ Maata à wokà lɛ Yeesus à tiì, nni à kɛ̀ngà nyi kìɓoŋì ɓi bee, Marii nyii rɔɓkà lɔŋ ki kɔ̀kɔrii ɓi nàà. 21 Fɔɔnnɛ Maata à kpaaghà Yeesus lɛ: Kan, i wɔ̀ɔ nɗì fɛ, di gèni wɛ̀m àa yin lɛ à wu. 22 Kìɓan kifog, ǹ-yii lɛ nsoò ɓigomìnɛ, com kìcèm ki ù rì ɓiì tɔɔ̀gh Bɛ̀ll, à rì wɔ̀ kɔ ɓiì faà. 23 Yeesus à kpaa Maata lɛ: Goni à ɓiì ghèmɓɛɛ. 24 Maata à ɓàg nyi lɛ: Ǹ-yii lɛ à ɓiì ghèmɓɛɛ ɓi cààmɛ̀n ki ɓìloŋ ɓi ri ɓiì ghèmɓɛɛ, ɓi ŋwos a siitòn. 25 Yeesus à kpaa nyi lɛ: Mɛ̀ yɛɛ ri rìghèmɓɛ̀n ɗi ɓiloŋ, rì cɛɓ; ŋwaànɛ à gherɛɛ mɛ̀, à ɓiì ɓaà rì cɛɓ nsoò àa wìì. 26 Fɔɔnnɛ mum ǹcèm ànɛ a ghɛghɛ̀ɓ à ki gherɛn mɛ, àa wu ɓi; ù gherɛɛ nya kìɓan kiǹ? 27 Maata à ɓàg lɛ: Ɛ̀ɛ̀ Kan! ǹgherɛɛ lɛ wɔ̀ yɛɛ ri Kiris, Man à Bɛ̀ll ànɛ à ghɛ̀ɛ̀sɛ̀ngà kì yùu ɓi ziinɛ. 28 Yɛ̀ɛ Maata à kpaaghà fɔlɔɔ, nni à kɛ̀ngà kì reŋii geni à giɓ anɛ lɛ Marii, à kɔ̀ŋɗɛ̀n nyi a dwìɗ lɛ: Ǹɗèsàg à rì fɛ, a ki regi wɔ. 29 Lɔŋ yɛ̀ɛ Marii à wokà fɔlɔɔ, à ghàs kì pɛ̀sɛɛ, à kɛ̀n yɛ̀ɛ Yeesus. 30 Lɛ Yeesus à ɓaghà di à ka ɗiŋi ɓi ɓi kìlɔ̀ŋ, à ɓaghà di à kaka jàŋ inɛ Maata à tulɛ̀ngà rì nyi. 31 Ɓɛ̀yudɛ̀n ɓɛ ɓɛ ɓaghà ɓi naa rì Marii ɓɛ fɔɔfɔ̀ɔ̀sì nyi nɗem, ɓɛ ghɛngà lɔŋ di à mɛ pɛ̀sɛn aɗyoo lɛ fòos, à kpaŋ ɓi ɗyɔ̀m; fɔɔnnɛ ɓɛ nɔɔ̀tìghà nyi, ɓɛ fekì lɛ à kɛ̀ɛ kì rèni a zɔ̀ŋ. 32 Yɛ̀ɛ Marii à kpagà jàŋ inɛ Yeesus à ɓaghà, à ghɛn Yeesus, à kpì nyi a mɛ̀kòò, à kpaa nyi lɛ: Kan i wɔ̀ɔ nɗì fɛ, di geni wɛ̀m àa ŋwii ɓi. 33 Yɛ̀ɛ Yeesus à ghɛngà di Marii a rènɗèn, Ɓɛ̀yudɛ̀n ɓɛ ɓɛ ɓaghày ǹɗaŋ ri nyi ɓɛ renɗèn girig, nni nyìinyìg ì ɓangà nyi lɛɛ̀gwey, ǹɗem wu nyɛŋɗɛ̀n nyi ɓiɗùm, 34 à tɔg lɛ: Fe nnɛ ɓìi mɓòmi nyi? Ɓɛ ɓaàg nyi lɛ: Kan yuiy u ghɛǹ. 35 Nni Yeesus à rèngà. 36 Ɓɛ̀yudɛ̀n ɓɛ kpaa min lɛ: Ghɛɛna yɛ̀ɛ àa nti à keesàg nyi. 37 Gàɓ ìdɛŋ ìnɛ ɓi ɓɔ ì kpaa lɛ: Nyi ànɛ à ŋwàɗkà ɗyaŋɗyàŋ mis, àa yin lɛ à kì lɛ Lazaari kɛ̀ɛ wu? 38 Fɔɔnnɛ ǹɗem wu Yeesus wu nyɛŋɗɛ̀ngà tì ɓi ɗùm, à kɛ̀n a zɔ̀ŋ. Zɔ̀ŋ ìncèm ì ɓaghà ǹtuɓɛn ɓi gɔ̀g ɓɛ simì gɔ̀g ìdɛŋ a ŋwɔm. 39 Nni Yeesus à kpaaghà lɛ: Pisiina gɔ̀g ìnɛ ɓi ŋwɔm wu zɔ̀ŋ. Maata, a geni Lazaari ànɛ à wughà, à kpaa Yeesus lɛ: Kan, à ti ɓiì nùnnumi; lɛ mɛ̀ru mɛnin gɛɛ̀nɛ yɛ̀ɛ ɓɛ mɓòmi nyi. 40 Yeesus à ɓàg nyi lɛ: Màa kpaa wɔ̀ lɛ i ù gherɛɛ ù ɓiì ghɛɛ rìgwey ɗi Bɛ̀ll! 41 Nni ɓɛ pisìghà gɔ̀g ìnɛn, Yeesus à ɓegsì mis aɗyoo, à kpaa lɛ: Tààta ǹtògsaagh wɔ̀ ɓisuulɛ, wàa ɓàagh bɔ̀ŋzɛ̀n yɛ̀m. 42 Ɓi ɓɛg wɛ̀m, ǹ-yii lɛ ù ti ù ɓàkì bɔ̀ŋzɛ̀n yɛm̀ ɓyààmɛ̀n ɓìcèm, kìɓan kifog ǹkpaa fɔlɔɔ ɓisuu ɓumɓɛ ɓɛ ri fɛ, lɛ di ɓɛɛ gherɛn lɛ wɔ̀ yɛɛ romgày mɛ̀. 43 Yɛ̀ɛ à kpaaghà fɔlɔɔ, nni à pɛ̀sìghà jɛ̀ɛ̀ aɗyoo rì ìtèɗ à kpaa lɛ: Lazaari kpaŋay. 44 Fɔɔnnɛ kìloŋ ki kpagày, ɓyàg rì mɛ̀kòò ɓì kàgakɛn ri ɓɛ̀ɓanɗas, ìsu wù kàŋɛn ɗi sànjà. Yeesus à kpaa ɓɔ lɛ: Fùmiina nyi, ɓi caɗ nyi a kɛǹ.

Sànèdìrɛŋ à reni lɛ ɓɛ ghɛɛ̀sɛɛ kì wolì Yeesus

45 Kìgwey ki ɓi Ɓɛ̀yudɛ̀n ɓɛ ɓɛ yuyùghà yɛ̀ɛ Marii, ɓɛ ghɛn kìɓan ki Yeesus à kìghà kiǹ, ɓɛ gherɛ̀ngà nyi. 46 Wɔ̀lɛ gàɓ ìdɛŋ ìnɛ ɓi ɓɔ ì kɛ̀ngà kì ghɛɛ̀ Ɓɛ̀fàrìzyɛŋ, ì kpaa ɓɔ kìɓan ki Yeesus à kìghà. 47 Fɔlɔɔ nnɛ ɓɛ̀pìrɛɛtìrɛ̀ ɓɛgwey rì Ɓɛ̀fàrìzyɛŋ ɓɛ taŋzɛ̀ngà Sànèdìrɛŋ ɓɛ kpaa lɛ: Ti ki la? Lɛ ŋwaànɛ a kìki dàm lɛɛ̀gwey. 48 I tì càri nyi lɛ a kiki fɔlɔɔ, ɓum ɓɛ̀cèm ɓɛ ri ɓiì gherɛɛ nyi, à kpaŋ yɛ̀ɛ Ɓɛ̀ròmɛŋ ɓɛ ɓiì yùu, ɓɛ yogsì lɛ rì naa yìs i Bɛ̀ll, rì kìlɔ̀ŋ kis. 49 Nni mum bog ànɛ ɓi ntaŋzɛn lɛ Kayif, ànɛ à ɓaghà ǹlàmì-ɓɛ̀pìrɛɛtìrɛ̀ ɓɛgwey ɓi bèg ìnɛn, à kpaaghà ɓɔ lɛ: Ɓì yii ɓi lɔ̀ŋ com. 50 Ɓì ghɛɛ ɓi lɛ ki ri mìni kìrɔɔ lɛ mum bog a wu ɓisuu kilɔ̀ŋ di fɔlɔɔ nnɛ kìlɔ̀ŋ kìcèm kɛ̀ kɛɛ̀ ɗyaŋ? 51 À kpaaghà ɓi fɔlɔɔ ɓi ɗyomzɛ̀n ɗii ɗi nyimiɗ, wɔ̀lɛ yɛ̀ɛ nnyɛɛ ɓaghà ǹlàmì-ɓɛ̀pìrɛɛtìrɛ̀ ɓi bèg ìnɛ̀n nnɛ à kalìghà kìɓan ki di ki kakay, lɛ Yeesus à ghɛ̀ɛ̀sɛɛ kì wiì ɓisuu kilɔ̀ŋ ki Ɓɛ̀yudɛ̀n. 52 Àa lɔŋ kìlɔ̀ŋ kiǹ kɔ rì kɔ, à ghɛ̀ɛ̀sɛɛ girig kì wiì lɛ a taŋzɛn ɓɔn ɓɛ Bɛ̀ll ɓɛ̀cèm, ɓɛ ɓɛ ri ɓɛ̀sààtɛn, ɓɛɛ ɓa kìbyɔg kìfog. 53 À tumɛ̀n ŋwos anɛ̀n innɛ ɓɛ rengà lɛ ɓɛɛ wey Yeesus. 54 Fɔɔnnɛ Yeesus à casɛ̀ngà kɛ̀ɛ rèsɛn ti lɛ tɛntɛ̀ɛ̀n ɓi nyìinyìm à Ɓɛ̀yudɛ̀n. À pɛ̀sɛ̀ngà foo, à kɛ̀n ɓi kòdò àdɛŋ ànɛ à ɓaghà jàŋbog rì ìreɓ, ɓi bàn ìnɛ lɛ Efirayim, à kɔ̀rì wɔɔ ri ɓɛ̀yilàg ɓii. 55 Paskà à Ɓɛ̀yudɛ̀n à ɓaghà di à ti jàŋbog; ɓum lɛɛ̀gwey ɓɛ ɓi jɛ̀m yi ɓilɔ̀ŋ ɓɛ ɓɔkày a Yorisalɛm di Paskà à kakay ɓisuu zòghɛ̀n. 56 Fɔɔnnɛ ɓɛ kaakààghà Yeesus, ɓɛ tɔɔ̀tɔ̀ɔ̀ghrɛ̀n wɔɔ ɓɔ rì ɓɔ ɓi naà-Bɛ̀ll lɛ: Mìnii ghɛɛ lɛ à rì lɛ à yù tìcàɓ gìn, àa yù ɓi? 57 Foo ɓɛ̀pìrɛɛtìrɛ̀ ɓɛgwey rì Ɓɛ̀fàrìzyɛŋ ɓɛ reɓsìghà lɛ, ŋwaànɛ à yii jàŋ inɛ Yeesus à rì, a ɓag ɓɔ gɔɔ, ɓɛɛ kɛǹ nyi kìɓanì.

Zyaŋ 12

Yeesus à rì a Bɛtanii

1 Yɛ̀ɛ Paskà à ɓaghà di à mɛ rɔ̀ɓ mɛru taàfog, Yeesus à kɛ̀ngà a Bɛtanii, jàŋ inɛ Lazaari ànɛ à ghèmzìghà ɓi zɔ̀ŋ à ɓaghà. 2 Ɓɛ lamgà nyi ɓìɗilàg wɔɔ, Maata à kàɓkì ɓum ɓyɔ̀. Lazaari à ɓaghà kìbog ki ɓi ɓumɓɛ ɓɛ ɗiɗìghà ǹɗaŋ ri Yeesus. 3 Nni Marii à tekà coo ɓeŋ à tìrààre ti ti ɓaghà tì kɛŋɛn lɛɛ̀gwey; ti ɓaghà tì kìyɛn ɗi caaɓi kidɛŋ lɛ naàr, à sùùrì Yeesus tìrààre tìn ɓi mɛ̀kòò, à ki tɔ̀si nyi mɔ rì tyòŋ tii; fɔɔnnɛ mɛ̀rùù mɛ tirààre mɛ saàghà naa bimiɗ. 4 Nni kìbog ki ɓi ɓɛ̀yilàg ɓɛ Yeesus lɛ Zyudas Iskariyot ànɛ à ghɛ̀ɛ̀sɛ̀ngà nyi kì kàɓi, à kpaaghà lɛ: 5 Ɓi cɛ nnɛ ɓaa kàɓi ɓi tirààre tìn ɓɛ̀tɔɔsìm ɓɛraa ɓɛ fa mɔ̀ɔ̀ni mɛ̀n ɗì ɓɛ̀soghàsogha 6 À kpaaghà ɓi fɔlɔɔ lɛ à ɓiisɛ̀ngà kì ɓɔmì ɓɛ̀soghàsogha, wɔ̀lɛ à kpaaghà lɔŋ fɔlɔɔ lɛ, à ɓaghà wiiwìì. Nni yɛ̀ɛ nyi yɛɛ m̀ɓègì ɓàm à mɔ̀ɔ̀ni, àa ntekì mɔ̀ɔ̀ni mɛ ɓɛ nfogì miì. 7 Nni Yeesus à kpaaghà lɛ: Càra nyi a nyam tìrààre tìn ɓi ŋwos anɛ ɓɛ ri ɓòm mɛ. 8 Ɓì rì rì ɓɛ̀soghàsogha ɓyààmɛ̀n ɓìcèm, kìɓan kifog mɛ̀ màa ɓa ti ɓi ri mìni ɓyààmɛ̀n ɓìcèm. 9 Kìtuu ki Ɓɛ̀yudɛ̀n lɛɛ̀gwey ki wokà lɛ Yeesus à rì a Bɛtanii, nni ɓɛ yughày wɔɔ, àa lɔŋ lɛ ɓɛɛ ghɛǹ nyi, ɓɛ yughày girig lɛ ɓɛɛ ghɛǹ Lazaari ànɛ Yeesus à ghèmzìghà ɓi zɔ̀ŋ. 10 Ɓɛ̀pìrɛɛtìrɛ̀ ɓɛgwey ɓɛ rengà lɛ ɓɛɛ wey girig Lazaari. 11 Ɓisuulɛ Ɓɛ̀yudɛ̀n lɛɛ̀gwey ɓɛ ghɛŋìghà ɓɔ, ɓɛ kɛǹ kì gherɛɛ Yeesus lɛ kìɓan kii.

Yeesus à ɗiŋii a Yorisalɛm

12 Ɓi duri tana ɓum lɛɛ̀gwey ɓɛ ɓɛ yughà tìcàɓ ti Paskà ɓɛ wokà lɛ, Yeesus a yùyu a Yorisalɛm. 13 Fɔɔnnɛ ɓɛ tekà maŋ mɛ mɛtɛn ɓɛ kpaŋ lɛ ɓɛɛ kɛǹ nyi kìɓoŋì. Ɓɛ kpaakpàà jɛ̀ɛ̀ aɗyoo lɛ: Ozana! Bɛ̀ll a maŋ rìfòm ɗi Isirayɛl, roànɛ a yùu yì ɓi ɗii ɗi Kan. 14 Yeesus à ghɛngà man à jàɗki, à ɓɔg mii aɗyoo lɔŋ yɛ̀ɛ ki ri kìkànɛn lɛ: 15 Wɔ̀ gɔ̀n ì Siyon, kɔ̀ɔ risi, ghɛna rìfòm ɗyɔɔ ɗi riì ɓi man à jàɗki aɗyoò. 16 Ɓɛ̀yilàg ɓɛ Yeesus ɓɛ yighà ɓi azi anɛ ɓi kìɓan kiǹ ɓi cààmɛ̀n kiǹ; kìɓan kifog yɛ̀ɛ Yeesus à ɓaghà di à mɛ teɗ rikem, fɔɔnnɛ ɓɛ yitìghà min lɛ, ɓìɓan ɓiǹ ɓi ɓaghà ɓìkànɛn ɓisu wii, nni ɓyɛɛ̀ɓi ɓɛ kighà nyi lɔ̀ɔ̀. 17 Fɔɔnnɛ gwìy ì ɓumɓɛ ɓɛ ɓaghà ǹɗaŋ ri Yeesus, cààmɛ̀n ki à regìghà Lazaari lɛ a kpaŋ yi ɓi zɔ̀ŋ, à ghèmzì nyi, ì kalìghà kìɓan ki ɓɛ ghɛngà kiǹ. 18 Fɔlɔɔ yɛɛ kighà lɛ ɓum ɓɛɛ kɛǹ nyi kìɓoŋì lɛɛ̀gwey, lɛ ɓɛ wokà lɛ à kìghà dàm ì kìɓan inɛ̀n. 19 Nni Ɓɛ̀fàrìzyɛŋ ɓɛ kpaaghà min wɔɔ ɓɔ rì ɓɔ lɛ: Ɓì ghɛɛ! ɓyàa kpaŋzɛn ɓi kiɓan ki, ghɛɛnà yɛ̀ɛ ɓum ɓɛ̀cèm ɓɛ mɛ nɔ̀ɔ̀ti nyi.

Gìrɛg yɛ̀ɛ tɔtɔg lɛ ɓɛɛ ghɛǹ Yeesus

20 Ɓum ɓɛdɛŋ ɓɛ a Gìrɛg ɓɛ ɓaghà ɓi nɗaŋ wu ɓumɓɛ ɓɛ ɓɔkày a Yorisalɛm lɛ ɓɛɛ ɓɔgsi Bɛ̀ll ɓi cààmɛ̀n à tìcàɓ. 21 Fɔɔnnɛ ɓɛ kɛngà yɛ̀ɛ Filiɓ ànɛ à ɓaghà ŋwaànɛ a Bɛdsayida ɓi zi ì Galile, ɓɛ tɔg nyi lɛ: Kan ti kɔ̀nkɔn lɛ ti ghɛǹ Yeesus. 22 Nni Filiɓ à kɛ̀ngà kì kpaà Andire fɔlɔɔ, ɓɛ ki ɓasɛn min lɛ rì nyi rì Andire, ɓɛ kɛǹ kì kpaa Yeesus. 23 Yeesus à ɓàg ɓɔ lɛ: Cààmɛ̀n ki lɛ Man à mum a teɗ rìkem ki kpaŋi. 24 Ǹkalii mìni ɓi saaɗ lɛ: I ɗis ɗi bààzì ɗi kpii ɓi ɓi zi ɗi wu, di ɗi rɔɓi lɔŋ ɗyɔ rì ɗyɔ, wɔ̀lɛ i ɗi wii ɗi ɓa tì rì mis mɛdɛŋ lɛɛ̀gwey. 25 Nni ŋwaànɛ à keesii cɛɓ kii, à rì kɔ ɓiì ɗimzii; roànɛ à ɓèèzɛɛ cɛɓ kii ɓi ziinɛ, nnyɛɛ ri ɓiì ɓèŋi kɔ ɓisuu cɛɓ ki fiɗyàɓ fikɔ̀ɔ̀. 26 I mum à kɔ̀ni lɛ a ki mɛ̀ kìsay, a nɔɔ̀ti mɛ̀, fɔɔnnɛ ǹkìì-kìsay wɛm̀ à ɓiì ɓaà jàŋ inɛ mɛ̀ ǹɗì. Seŋi wɛ̀m à ɓiì ki kemzii ŋwaànɛ a kìki mɛ kìsay.

Yeesus à ɓùŋi kìɓan ki riwù ɗiì

27 Ɓi cààmɛ̀n ki, ǹɗem wɛ̀m wu ri wù ɓùùsɛn, ǹɗì lɛ ǹkpaa la? Nkpaà nya lɛ Tààta, ghɛɓsi mɛ̀ ɓi kìɓan ki ki yuu kì ghɛnɛɛ a lɔ̀ŋkɛm̀ ɓi cààmɛ̀n ki? Wɔ̀lɛ ɓisuu cààmɛ̀n kɔm̀ kiǹ nnɛ ǹ-yùghà. 28 Tààta, kemzi ɗii ɗyɔɔ. Nni jɛ̀ɛ̀ ì ɓaghày aɗyoo lɛ: M̀mɛ kemzi ɗyɔ, m̀ɓiì ki kemzii ti ɗyɔ̀. 29 Gwìy ì ɓum ìnɛ ì ɓaghà wɔɔ, ì wokà jɛ̀ɛ̀ ìnɛn, ì kpaa lɛ: Baàbàn yɛ̀ɛ ɓoogh. Ɓɛ̀ro ɓɛmbog lɛ: Ŋwaàfìtom yɛɛ toòghrɛɛ rì nyi. 30 Fɔɔnnɛ Yeesus à kpaaghà ɓɔ lɛ: Àa ɓisu wɛ̀m nnɛ jɛ̀ɛ̀ ìnɛn yàa tòòghrɛɛ. 31 Ɓi cààmɛ̀n ki, kìɓan ki ziinɛ ki yuù kì renɛɛ, ɓigomìnɛ. Ɓɛ yuù kì màagh rifòm ɗi ziinɛ ɓi dan. 32 Nni mɛ̀ ǹɗì ɓiì ɓaà lɛ, i ɓɛ mɛ pisi mɛ ɓi zi, ɓɛ ɓɔgsì mɛ̀ aɗyoo, ǹsyòŋ yì ɓum ɓɛ̀cèm a lɔ̀ŋkɛm̀. 33 À kpaaghà fɔlɔɔ lɛ a resi rìkuu ɗi riwù ɗi à ghɛ̀ɛ̀sɛɛ kì wiì. 34 Nni gwìy ìnɛn ì ɓàkà nyi lɛ: Ɓìsii yilàkà ɓi ɓìdɔ̀gsɛna lɛ: Kiris à ɓiì kɔ̀rii fiɗyàɓ fikɔ̀ɔ̀. Nni lannɛ ù kpaa lɛ: Ki ghɛɛ̀sɛɛ lɛ ɓɛɛ ɓɔgsi Man à mum aɗyoo? Ghɛn yɛɛ ri kɔm̀ Man à mum àncèm? 35 Yeesus à kpaa ɓɔ lɛ: Kìtɛɛtɛn ki kaka a lɔ̀ŋkin ɓi maa cààmɛ̀n, fɔɔnnɛ kɛ̀ɛ̀ghiina, cààmɛ̀n ki ɓì kaka rì kìtɛɛtɛ̀n; lɛ, birìm yɛ̀ kɛɛ̀ ràɗ mini. Ŋwaànɛ a kɛ̀ɛ̀kɛɛ ɓi birìm à yii ɓi fe nnɛ a kɛ̀nkɛ̀n. 36 Cààmɛ̀n ki ɓì rì rì kìtɛɛtɛn, gherɛɛna kɔ, di fɔlɔɔ nnɛ ɓi ɓa ɓɔn ɓɛ kitɛɛtɛn. Yɛ̀ɛ Yeesus à kpaaghà ɓìɓan ɓiǹ, nni à pɛ̀sɛ̀ngà à kɛ̀n kìnyamzɛɛ fìràɓ.

Ɓɛ̀yudɛ̀n ɓɛ gherɛɛ ɓi Yeesus

37 Nsoò yɛ̀ɛ Yeesus à kìghà dàm yi ɓiɓan lɛɛ̀gwey ɓi mis maa, ɓɛ gherɛ̀ngà ɓi nyi, 38 lɛ kɛɛ kilɛn lɔŋ yɛ̀ɛ ǹkpaŋzì-ɓìɓan Ezayii à kpaaghà lɛ: Kan, ghɛn yɛɛ gherɛ̀ngà ɓɔlɛ ànɛ tì kpaaghà? Càg ki Kan ki resɛ̀ngà yɛ̀ɛ ghɛn? 39 Ɓɛ ɓaghà ɓi lɛ ɓɛ gherɛ̀n ɓisuulɛ Ezayii à kpaatìghà lɛ: 40 À ɗiŋzìghà ɓɔ tìɗyaŋ, à ki kì lɛ ɓɛ̀ kɛɛ̀ ɓa ti ri syeesyee à ɗyomzɛ̀n, lɛ ɓɛ̀ kɛɛ̀ ghɛnɛn ti rì mis maa, mɛ̀rem maa mɛ̀ kɛɛ̀ fègti kiɓan ki syeesyee, lɛ ɓɛ ɓiì ki lɔ̀ɔ̀ghrɛɛ mɛrem, ǹki wɔ̀ɔ̀zi ɓɔ. 41 Kìɓan kiǹ kɛɛ̀ki Ezayii à kalìghà yɛ̀ɛ à ghɛngà rìkem ɗi Yeesus, ɓi cààmɛ̀n ki à kpaakpààghà kìɓan kii. 42 Nsoò fɔlɔɔ mɛ̀fòm mɛ Ɓɛ̀yudɛ̀n mɛdɛŋ lɛɛ̀gwey mɛ gherɛ̀ngà nyi, kìɓan kifog, ɓɛ resìghà ɓi kiɓan kiǹ lɛ tɛntɛ̀ɛ̀n ɓi mis mɛ ɓum, lɛ Ɓɛ̀fàrìzyɛŋ ɓɛ ɓiì ki nàɓi ɓɔ ɓi naà-bɔ̀ŋzɛ̀n. 43 Ɓisuulɛ ɓɛ ɓiisɛ̀ngà kì kɔ̀ni rikem ɗi ɓum à cee ɗi Bɛ̀ll. 44 Nni Yeesus à kpaaghà jɛ̀ɛ̀ aɗyoo lɛ: Ŋwaànɛ à gherɛɛ mɛ̀, à gherɛɛ ɓi lɔŋ lɛ mɛ̀, à gherɛɛ girig roànɛ à romgày mɛ̀. 45 I mum à ghɛɛ mɛ̀, di à ghɛɛ roànɛ à romgày mɛ̀. 46 Mɛ̀ ǹ-yùghà ɓi ziinɛ fɛlɛ yɛ̀ɛ kìtɛɛtɛn, lɛ mum ǹcèm ànɛ à gherɛɛ mɛ̀ kɛ̀ɛ ɓa ɓi birìm. 47 I mum à woogh ɓìɓan ɓyɛm̀, kɛ̀ɛ ɓèŋ ɓyɔ, àa mɛ̀ yɛɛ ri nyi ɓiì faà bɛ̀lɛn, lɛ ǹ-yùghà ɓi ki faà ziinɛ bɛ̀lɛn, ǹ-yùghà lɔŋ lɛ nghɛɓsi yɔ̀. 48 Nni ŋwaànɛ à ɓèni mɛ̀, kɛ̀ɛ ghàɓ ɓiɓan ɓyɛm̀, à rì rì ŋwaànɛ à ɓiì renì kìɓan kii. Ɓìɓan ɓi ǹkalìghà ɓyɛɛ ri ren kiɓan kii ɓi siitòn a ŋwos. 49 Lɛ ɓìɓan ɓi nkpaakpàà, ɓi yin ɓiɓan ɓyɛm̀ ɓi mɛ̀ɛmiɗ, lɔŋ Tààta nyimiɗ anɛ à romgày mɛ̀, nnyɛɛ siŋdɛ̀ngà mɛ̀ ɓìɓan ɓi ǹghɛ̀ɛ̀sɛɛ kì kpaà, rì ɓi ǹghɛ̀ɛ̀sɛɛ kì rèsaagh ɓum. 50 Fɔɔnnɛ ǹ-yii lɛ ǹsiŋdɛn wii wu ri cɛɓ ki fiɗyàɓ fikɔ̀ɔ̀. Nni ɓìɓan ɓi nkpaakpàà, mɛ̀ɛ nkpaakpaa lɔŋ ɓyɔ yɛ̀ɛ Tààta à kalìghà mɛ̀ lɛ ǹkpaà.

Zyaŋ 13

Mɛkurè mɛ Yeesus mɛ siitòn rì ɓɛ̀yilàg ɓii

Yeesus à sòo ɓɛ̀yilàg ɓii mɛkòò

1 Di tìcàɓ ti Paskà ti kakay, Yeesus à yighà lɛ cààmɛ̀n kii ki lɛ a pɛsɛn ɓi ziinɛ a kɛǹ yɛ̀ɛ Seŋi ki kpaŋi. À keesìghà ɓum ɓii ɓɛ ɓɛ ɓaghà fɛ ɓi ziinɛ; nni à keesìghà ɓɔ, à kpaŋ a sugtag. 2 Yɛ̀ɛ Yeesus rì ɓɛ̀yilàg ɓii ɓɛ ɗiɗìghà, di Satàn à mɛ ɗiŋzi Zyudas à man à Simɔn, fèg ànɛ lɛ a tɔkɛn Yeesus ɓi nɗem, 3 Yeesus à yighà lɛ Seŋi à faghà ɓìɓan ɓìcèm ɓi ɓyàg ɓii, à ki yi lɛ à pɛ̀sɛ̀ngày yɛ̀ɛ Bɛ̀ll, nni wɔɔ nnɛ à yùu kì sugtii, 4 fɔɔnnɛ à pɛ̀sɛ̀ngà aɗyoo, à sɔ̀ŋɗɛ̀n ɓìlàà, à teɗ sànjà, à sìnɛ̀n ɓi kìɓon. 5 Ajɛ̀m ìnɛn nnɛ à sùùrìghà mɛ̀nig ɓi taasà, à tumɛ̀n ɓɛ̀yilàg ɓii rìsòò ɗi mɛkòò di a tɔ̀tɔsi mɔ rì sànjà ànɛ à ɗyeɓɓɛ̀ngà yɛ̀ɛ kànɗa. 6 Yɛ̀ɛ à kpagà yɛ̀ɛ Simɔn Pyɛɛri, Simɔn à tɔg nyi lɛ: Kan! Lɔŋ wɔ̀ yɛɛ soò mɛ̀ mɛ̀kòo? 7 Yeesus à ɓàg nyi lɛ: Ɓigomìnɛ, ù yii ɓi azi anɛ ɓi kìɓan ki nkìki ki, wɔ̀lɛ ù rì nyi ɓiì siitɛɛ ki yiì ajɛ̀m. 8 Pyɛɛri à kpaa nyi lɛ: Ɓɛ̀pwàà! wàa sòò ɓi mɛ mɛ̀kòò nsoò ŋwos bog. Yeesus à ɓàg nyi lɛ: I ǹsòo ɓi wɔ mɛ̀kòò, wàa ɓa ɓi ri gàɓ a lɔ̀ŋkɛm̀. 9 Simɔn à kpaa min nyi lɛ: Kan, kɔ̀ɔ sòò lɔŋ mɛ mɛ̀kòò mɔ rì mɔ, u soò mɛ̀ girig lɛ, rì ɓyàg, rì ǹto. 10 Yeesus à kpaa nyi lɛ: Ŋwaànɛ à mɛ wùɓɓɛ̀n, à yin lɛ ɓɛ wuɓsì tì nyi, i ki cee ɓi lɛ mɛ̀kòò mii mɛɛ̀mɛ ɓɛ soò, lɛ nyoo yìì bimiɗ ì rì ǹtɛnɛn. Nni, mìnii ri ɓɛ̀tɛnɛn, wɔ̀lɛ, àa mìniìcèm. 11 Yeesus à yighà ŋwaànɛ à rì nyi ɓiì tɔ̀kɛɛ, kɛɛ̀ki à kpaaghà miì lɛ: Ɓì yin ɓɛtɛnɛn ɓɛsɛ̀ɛ̀ ɓɛ̀cèm. 12 Yɛ̀ɛ à lègsìghà kìsòo mɛkòò, à pɛ̀ɛ̀zɛ̀n kì waatɛɛ ɓilàà, nni à sugtìghà kì kɔ̀rii ɓi zi, à tɔg ɓɔ lɛ: Ɓì yii azi anɛ ɓi kìɓan ki ǹkìi mìni kìn? 13 Ɓì ti ɓì regì mɛ̀ lɛ ǹɗèsàg, ɓì regì tì mɛ̀ lɛ Kan, ɓì ki ti ɓì kpaaghì miì lɛ ǹɗì ǹɗèsàg, mɛ̀ tì Kan. 14 Nni i màànɛ ǹɗì Kan, mɛ̀ ǹɗèsàg ǹsòo mìni mɛ̀kòò, mìni girig, ɓì ghɛ̀ɛ̀sɛɛ kì sòòraagh mɛkòò mìni rì mìni. 15 Lɛ ǹfaa mìni kìfèèghrɛnà lɛ di mìni girig ɓi kilag yɛ̀ɛ mɛ̀ ǹkìi yì mìni. 16 Ǹkpaa mìni kɔɔ̀kɔɔ̀ à rìkpaa lɛ: ǹkìì-kìsay adɛŋ à cee ɓi masà wìì; ǹkɛ̀nì-fìtom kɛ̀ɛ ki cee ŋwaànɛ à romi nyi. 17 I ɓì yii ɓìɓan ɓiǹ, di ɓì rì ɓɛ̀mààghmaagh, nni kɛɛ̀ tɔtɔg lɛ ɓi ki ɓyɔ̀. 18 Àa ɓisuu miniìcèm nnɛ ǹkpaa kìɓan kiǹ. Mɛ̀ ǹ-yii ɓɛ̀roɓɛ m̀ɓɔ̀ngà wɔ̀lɛ, ki ghɛɛ̀sɛɛ lɛ jɛ̀ɛ̀ ìnɛ ì rì ǹkànɛn lɛ: Roànɛ ti ɗiɗi bìrɛs yɛ̀m ɓɛɛ̀ nyi à ghali mɛ̀ ŋaŋ-ŋaŋ ɓi nyoo, yɛ̀ɛ roǹ. 19 Ǹkpaa mìni kɔ ɓigomìnɛ di ki ka kilɛn ɓi, lɛ yɛ̀ɛ ki ri ɓiì kìlɛɛ, ɓì gherɛ̀n lɛ Mɛ̀ ǹɗì roànɛ ǹɗì. 20 Ǹkpaa mìni saaɗ à rìkpaa lɛ, i mum à ghàɓi mum wɛm̀ à fìtom, di mɛ̀ nnɛ à ghàɓi, i mum à ki ghàɓi mɛ̀, di à ghàɓi roànɛ à romgày mɛ̀.

Yeesus à kpaa ɓɛ̀yilàg ɓii lɛ: Zyudas à rì nyi ɓiì tɔ̀kɛɛ

21 Yeesus à ɓaghà lɛ, à mɛ kpaa fɔlɔɔ nni nɗem wu ɓuùsɛ̀ngà nyi ɓi ɗùm, à kalì lɛ: Ǹkpaa mìni saaɗ à rìkpaa lɛ kìbog ki ɓi mìni ki ri mɛ̀ ɓiì kàɓi. 22 Ɓɛ̀yilàg ɓɛ pɛɓsɛ̀n ɓɔmiɗ a mɛ̀su, ɓɛ̀ kɛɛ̀ yi ghɛn innɛ à kpaakpààghà. 23 Kìbog ki ɓi ɓɛ̀yilàg ɓii ki àa nkeesàg ki kɔkɔ̀rìghà nyi jàŋbog. 24 Simɔn Pyɛɛri à tòòghrɛ̀n ɗì ǹ-yilàg ànɛ̀n ɗì càg lɛ, a tɔg nyi ghɛn innɛ a kpaaghì. 25 Nni ǹ-yilàg àncèm à loŋmɛ̀ngà Yeesus ɓi-reè, à kpaa lɛ: Kan ghɛn innɛ u kalàg? 26 Yeesus à ɓàg nyi lɛ: Lɔŋ roànɛ m̀ɓiì nɔ̀ɔgh bìrɛs ǹfa rì nyi nnɛ nkalàg. Nni à nɔ̀kà kìɓɛghà ki bìrɛs à fa rì Zyudas à man à Simɔn Iskariyot. 27 Lɔŋ yɛ̀ɛ Zyudas à ghàɓkà kìɓɛghà ki bìrɛs kiǹ, Satàn a ɗiŋì nyi ɓi nɗem. Yeesus à kalì nyi lɛ: Com ki u ɓeɓeg lɛ u ki, kìya kɔ lɛ fyɛ̀ɗ. 28 Ŋwaàdɛŋ ànɛ ɓi ɓumɓɛ ɓɛ ɗiɗìghà ɓìɗilàg ɓiǹ, à yighà ɓi ɓisuucɛ nnɛ Yeesus à kpaaghà nyi fɔ̀lɔ̀ɔ̀. 29 Ɓɛ̀ro ɓɛdɛŋ ɓɛ fefèkà lɛ, yɛ̀ɛ Zyudas àa nti à ɓègì ɓàm à mɔ̀ɔ̀ni, nnɛ Yeesus à kpaakpààghà nyi lɛ a lag ɓyom ɓi ɓi ghɛɛ̀sɛɛ rì ɓɔ ɓisuu ticàɓ, nsoò lɛ a fa ɓɛ̀soghàsogha com. 30 Yɛ̀ɛ Zyudas à ghàɓkà kìɓɛghà ki bìrɛs, à ghàs kì kpaŋì. Ìru wu ɓaghà di wu mɛ fìn.

Kìdɔ̀gsɛna ki nyɔ̀n

31 Yɛ̀ɛ Zyudas à ɓaghà di à mɛ kpaŋ ɓi dan, nni Yeesus à kalìghà lɛ: Ɓigomìnɛ, Man à mum à mɛ kem, Bɛ̀ll à mɛ kem girig ɓi nyi. 32 I Bɛ̀ll à mɛ kem ɓi nyi, cààmɛ̀n lɛsàg Bɛ̀ll à rì girig nyi ɓiì kemzii ɓi nyimiɗ. 33 Ɓɔn ɓɛm, ǹkaka tì rì mìni ɓi maa cààmɛ̀n. Ɓì rì mɛ̀ ɓiì kaà fɛlɛ yɛ̀ɛ ǹkalìghà rì Ɓɛ̀yudɛ̀n lɛ: Jàŋ inɛ ǹkɛ̀ɛ, ɓì yin lɛ ɓì yù wɔɔ. Ǹkpaa girig mìni fɔlɔɔ ɓigomìnɛ. 34 Ǹfaa mìni kìdɔ̀gsɛna ki nyɔn lɛ: Kɔ̀nɛɛna. Fɛlɛ yɛ̀ɛ mɛ̀ ǹkeesìghà mìni, mìni girig, kɔ̀nɛɛnà. 35 I ɓì kɔ̀nɛɛ, ɓum ɓɛ̀cèm ɓɛ ri ɓiì yiì lɛ ɓì rì ɓɛ̀yilàg ɓɛm.

Yeesus à kpaa Pyɛɛri lɛ, à rì nyi ɓiì roòzɛɛ

36 Nni Simɔn Pyɛɛri à tɔkà nyi lɛ: Kan fennɛ ù rì ɓiì kɛ̀ɛ? Yeesus à ɓàg nyi lɛ: Jàŋ inɛ ǹkɛ̀ɛ, ù yin lɛ ù nɔ̀ɔ̀tì mɛ̀ wɔɔ ɓigomìnɛ; kìɓan kifog ù ri nɔ̀ɔ̀tii gɛ mɛ̀ ajɛ̀m. 37 Pyɛɛri à kpaa nyi lɛ: Lɛ cɛ nnɛ ǹ-yin lɛ ǹnɔ̀ɔ̀tì wɔ̀ ɓigomìnɛ? Ǹɗì m̀pègsɛn lɛ nɗimzi cɛɓ kɛ̀m ɓisu wɔ̀ɔ̀. 38 Ù ɓiì ɗimzii cɛɓ kɔɔ ɓisu wɛ̀m ɛ̀ɛ? Ǹkpaa wɔ̀ saaɗ à rìkpaa lɛ, ù rì mɛ̀ ɓiì roòzɛɛ gɛ̀n yiraa di ǹlem à zag a ka rɔŋ ɓi.

Zyaŋ 14

Yeesus à rì bee inɛ ì kɛ̀ɛ yɛ̀ɛ Bɛ̀ll

1 Mɛ̀rem min mɛ̀ kɛɛ̀ ɓùùsɛn, gherɛɛna Bɛ̀ll, ɓì gherɛ̀n girig mɛ̀. 2 Ɓìden ɓi naa ɓi ri lɛɛ̀gwey ɓi mɛɛ mɛ Seŋi wɛ̀m; i kɛ̀ kɛɛ̀ ɓa fɔlɔɔ, di ǹkalìghà mìni. Ǹkɛ̀ɛ mìni kì pègsɛɛ jàŋ. 3 M̀ɓiì ɓaà lɛ, i ǹkɛ̀ɛ, i m̀mɛ pègsɛn mini jàŋ, ǹsugtìì lɛ nteɗ mìni a lɔ̀ŋkɛm̀, lɛ di mìni girig, ɓi ɓa jàŋ inɛ mɛ̀ ǹɗì. 4 Ɓì yii bee inɛ ɓi jàŋ inɛ ǹkɛ̀ɛ. 5 Nni Tomas à kpaaghà nyi lɛ: Kan! Tì yii ɓi jàŋ inɛ ù kɛ̀ɛ, nni lannɛ tì rì lɛ tì yi bee inɛ ì kɛ̀ɛ wɔ̀ɔ̀? 6 Yeesus à ɓàg nyi lɛ: Mɛ̀ yɛɛ ri bee, rì saaɗ, rì cɛɓ. Mum à yin lɛ à kpaŋ yɛ̀ɛ Tààta di à fyee ɓi a lɔ̀ŋkɛm̀. 7 I ɓyàa yi mɛ̀, di ɓì rì lɛ ɓì yi Seŋi wɛ̀m. Nni à tumɛ̀n ɓigomìnɛ, ɓì yii nyi, ɓì mɛ ki ghɛn nyi. 8 Nni Filiɓ à kpaaghà nyi lɛ: Kan rèsi ɓìsi Tààta, mɛ̀rem mis mɛɛ kpi ɓi mùm. 9 Yeesus à kpaa nyi lɛ: Filiɓ, fìɗyàɓ fi maà ɓa rì mìni, ù ka yighà ɓi mɛ? Ŋwaànɛ à mɛ ghɛn mɛ, à mɛ ghɛn Tààta, nni lannɛ ù kpaa lɛ rèsi ɓìsi Tààta? 10 Ù gherɛɛ ɓi lɛ, ki ri lɛ mɛ̀ ɓi Tààta, Tààta ɓi mɛ̀? Ɓìɓan ɓi nkpaakpaa mini ɓi, ɓi yin ɓiɓan ɓi mɛ̀ɛmiɗ yɛɛ ɓekii lɛ nkpaà, lɔŋ Tààta ànɛ à rì a lɔ̀ŋkɛm̀, yɛɛ̀ kìki ɓiɓan ɓii. 11 Gherɛɛna mɛ̀ yɛ̀ɛ ǹkpaa mìni lɛ, ki ri lɛ mɛ̀ ɓi Tààta, Tààta ɓi mɛ̀; i ɓì ɓèni fɔlɔɔ, ɓì gherɛ̀n ɓisuu ɓiɓan ɓi nkìkì. 12 Ǹkalii mìni saaɗ à rìkpaa lɛ, ŋwaànɛ à gherɛɛ mɛ̀, à ɓiì kìi girig ɓìɓan ɓi mɛ̀ɛ nkìkì, à ki kì kɔm̀ ɓìɓan ɓi ɓi cee ɓiǹ ɓisuulɛ ǹkɛ̀ɛ yɛ̀ɛ Tààta. 13 Fɔɔnnɛ com kìcèm ki ɓì rì ɓiì tɔɔ̀gh rì ɗii ɗyɛ̀m, ǹɗì mìni kɔ ɓiì kìi, lɛ Tààta a teɗ rìkem ɓi Man. 14 I ɓì tɔɔgh com rì ɗii ɗyɛ̀m m̀ɓiì kìi kɔ.

Ǹkàg wu riyù ɗi Kitɛntɛ̀ɛ̀n ki Nghay

15 I ɓì keesii mɛ̀, ɓì ɓiì ɓèŋi ɓidɔ̀gsɛna ɓyɛm̀. 16 Fɔɔnnɛ m̀ɓiì ɓɔ̀ŋzii Tààta, à rom yì mìni m̀maasì mɛ̀rem adɛŋ, ànɛ à ɓa rì mìni fìɗyàɓ fikɔ̀ɔ̀. 17 Nnyɛɛ ri Ǹghay à ɓɛ̀kɔɔ̀kɔɔ̀ ɓɛ ɓiɓan ànɛ ziinɛ ì yin lɛ ì teɗ, ɓisuulɛ ì ghɛɛ ɓi nyi, yɛ̀ kɛɛ̀ ki yi nyi. Lɔŋ mìni yɛɛ yii nyi ɓisuulɛ à rì ɓi mìni. 18 Màa càɗ ɓi mini ɓɔɔ̀zii, ǹɗì ɓiì sugtii yi a lɔ̀ŋkin. 19 Cààmɛ̀n lɛsàg ziinɛ yàa ghɛɛ̀di ɓi mɛ, lɔŋ mìni yɛɛ ri mɛ̀ ɓiì seesee ɓisuulɛ ǹɗì cem, nni mìni girig ɓì ɓiì ɓaà rì cɛɓ. 20 Ŋwos anɛ̀n ɓì yii gɛ lɛ, ǹɗì ɓi Seŋi wɛ̀m, mìni ɓi mɛ̀, mɛ̀ ɓi mìni. 21 Ŋwaànɛ à rì rì ɓìdɔ̀gsɛna ɓyɛm̀ à ki ɓèŋ ɓyɔ, nnyɛɛ keesii mɛ̀. Nni ŋwaànɛ à keesii mɛ̀ innɛ Seŋi wɛ̀m à ɓiì kesii, mɛ̀ ǹkeesì girig nyi, ǹki rèsɛn nyi lɛ a yi mɛ̀. 22 Fɔɔnnɛ Zyuudɛ, àa roànɛ lɛ Iskariyot, a kpaaghi nyi lɛ: Kan! Ki ɓaa la lɛ ɓìsi ɓɛɛ̀ɓɛ u resɛn lɛ ti yi wɔ̀, kɔ̀ɔ rèsɛn ziinɛ? 23 Yeesus à ɓàg nyi lɛ: I mum à keesii mɛ̀, à ɓiì ɓèŋi jɛ̀ɛ̀ yɛ̀m, Seŋi wɛ̀m à rì nyi ɓiì keesi; tì ɓiì yùu a lɔ̀ŋkii, tì pègsɛ̀n ìkɔ̀ɔ̀ wis a lɔ̀ŋkii. 24 Mum ànɛ à kessi ɓi mɛ, à yin lɛ à ɓèŋ ɓìɓan ɓyɛm̀; nni jɛ̀ɛ̀ ìnɛ ɓi wowog inɛ, ì yin jɛ̀ɛ̀ yɛ̀m, ì rì lɔŋ jɛ̀ɛ̀ ì Tààta ànɛ à romgày mɛ̀. 25 Ǹkpaa mìni ɓìɓan ɓiǹ yɛ̀ɛ ǹkaka lɛ rì mìni. 26 Kìɓan kifog m̀maasì mɛ̀rem ànɛ à rì Kìtɛntɛ̀ɛ̀n ki Nghay ki Tààta à ɓiì romìì ɓi ɗii ɗyɛ̀m, yɛɛ ri mìni ɓiì rèsaagh ɓiɓan ɓìcèm, à ki kì lɛ, ɓi yiti ɓìɓan ɓìcèm ɓi ǹkalìghà mìni. 27 Ǹcàri mìni fyòoog, ǹfaa mìni fyòoog wɛ̀m. Mɛ̀ ǹfaa ɓi mini nyi yɛ̀ɛ ziinɛ ì ti ì falàg. Mɛ̀rem min mɛ̀ kɛɛ̀ cɛɛcɛɛ̀rɛ̀n, nsoò lɛ mɛ yeèghyèèghkɛ̀n. 28 Ɓyàa woogh fɛlɛ yɛ̀ɛ màa kpaa mìni lɛ ǹkɛ̀ɛ, m̀ɓiì ki sugtii yi a lɔ̀ŋkin. I ɓyàa keesii mɛ̀ di ɓì rì lɛ ɓì nyààrɛ̀n lɛ, ǹkɛ̀ɛ yɛ̀ɛ Tààta ɓisuulɛ, Tààta à ceetii mɛ̀. 29 Ǹkpaa mìni ɓìɓan ɓiǹ ɓigomìnɛ di ɓi ka kilɛn ɓi, lɛ yɛ̀ɛ ɓi ri ɓiì kìlɛɛ, ɓì gherɛ̀n. 30 Tyàa tòki ti ɓi ri mìni, ɓisuulɛ rìfòm ɗi ziinɛ ɗi tiì, nni ɗi yin ɗi ìtèɗ wulɛ ɗi ki mɛ̀ com. 31 Wɔ̀lɛ ki ghɛɛ̀sɛɛ lɛ, ziinɛ yɛ̀ɛ yi lɛ, ǹkeesii Tààta rì tì lɛ, nkìki ɓiɓan lɔŋ yɛ̀ɛ Tààta à kpaaghà mɛ̀ lɛ nki. Pɛ̀sɛɛna aɗyoo, ti pɛsɛn fɛ̀.

Zyaŋ 15

Yeesus à rì ǹɗyèm, ɓɛ̀yilàg ɓii myaɓ

1 Mɛ̀ ǹɗì kɔɔ̀kɔɔ̀ à dɛm i viìnyɛ̀, Seŋi wɛ̀m m̀pègsɛ̀n dɛm. 2 Ŋwaɓ wucèm wu wu ri wù ròŋɛn ɓi mɛ̀, wɛ̀ kɛɛ̀ wum ɓiɗùn, à ti à rengì wɔ. Ŋwaɓ wucèm wu wu wumi ɓìɗùn, à farì wɔ lɛ wɛɛ konag tì kì wumì. 3 Ɓì ti ɓɛ̀tɛnɛn, lɛ ɓìɓan ɓìcèm ɓi mɛ̀ɛ ǹkpaa mìni. 4 Ràrɛɛna rì mɛ̀ yɛ̀ɛ ǹɗì ǹɗàrɛn ri mìni. Ŋwaɓ wu yin lɛ wu wum ɓìɗùn wɔ rì wɔ, di wu yin wu ràrɛn ɗi ǹɗyèm. Fɔlɔɔ nnɛ mìni girig ɓì yin lɛ ɓì wum ɓìɗùn di ɓì yin ɓɛràrɛn ɗi mɛ̀. 5 Mɛ̀ ǹɗì ǹɗyèm, mìnii ri myaɓ. Nni ŋwaànɛ à rì ǹɗàrɛn ri mɛ̀ yɛ̀ɛ mɛ̀ ǹɗì ǹɗàrɛn ri nyi, à ɓiì wumì ɓìɗùn lɛɛ̀gwey; lɛ ɓì yin lɛ ɓì kì com kɛ̀ɛ̀ mɛ̀. 6 Ŋwaànɛ à yin nɗàrɛn ɗi mɛ̀, ɓɛ mag nyi ɓi dan yɛ̀ɛ ŋwaɓ wu kite, à womdàg; ɓɛ ɓadɛ̀n min myaɓ mɛ ɓiloŋ mɛǹ, ɓɛ pig mɔ ɓi ɗuu, mɛ ɗikì. 7 I ɓì rì a lɔ̀ŋkɛm̀, ɓiɓan ɓyɛm̀ ɓi ɓa rì ìkɔ̀ɔ̀ ɓi mìni, tɔɔghna com kìcèm ki ɓì kɔ̀ni, ɓɛ ri mìni kɔ ɓiì faà. 8 I ɓì wumi ɓìɗùn lɛɛ̀gwey, fɔlɔɔ nnɛ Seŋi wɛ̀m à ɓiì terì rìkem, mìnii ki ɓa ɓɛyilàg ɓɛm. 9 Fɛlɛ yɛ̀ɛ Tààta a keesag mɛ, nnɛ mɛ̀ girig mɛ̀ ǹkeesii mìni. Kɔ̀riina ɓi nkɔ̀nɛ̀n wɛ̀m. 10 I ɓì ɓèŋi ɓìdɔ̀gsɛna ɓyɛm̀, ɓì ɓiì kɔ̀rii ɓi nkɔ̀nɛ̀n wɛ̀m, fɛlɛ yɛ̀ɛ mɛ̀ m̀ɓègà ɓìdɔ̀gsɛna ɓi Seŋi wɛ̀m fɔɔnnɛ ǹkɔ̀kɔrii ɓi nkɔ̀nɛ̀n wìì. 11 Ǹkalii mìni fɔlɔɔ lɛ, kìnyàà ki ǹɗì rì kɔ, kɛɛ ɓa a lɔ̀ŋkin, kìnyàà kin ki ki ron lɛ kɔɔ̀kɔɔ̀. 12 Kìdɔ̀gsɛna kɛm̀ ki ri lɛ: Kɔnɛɛna mìni rì mìni, fɛlɛ yɛ̀ɛ mɛ̀ ǹkeesìghà mìni. 13 Ǹkɔ̀nɛ̀n àdɛŋ à cee ɓi anɛ lɛ, mum a fa cɛɓ kii ɓisuu mɛghan mii. 14 Ɓì rì mɛ̀ghan mɛm̀, di ɓì kìi ɓìɓan ɓi ǹsiŋ̀dɛɛ mìni. 15 Màa reŋdi ɓi mini lɛ ɓɛ̀kìì-ɓìsay, ɓisuulɛ, ǹkìì-kìsay a ti kɛ̀ɛ yi com ki masà wìì a kìkì. Wɔ̀lɛ ǹɗeŋii mìni lɛ mɛ̀ghan mɛm̀ ɓisuulɛ m̀mɛ rèsag mìni ɓìɓan ɓìcèm ɓi ǹwokà rì Seŋi wɛ̀m. 16 Àa mìni yɛɛ ɓɔngà mɛ̀, lɔŋ mɛ̀ yɛɛ ɓɔngà mìni, ǹki rɛ̀si mini lɛ, ɓi kɛǹ, ɓi wum̀ ɓìɗùn, ɓìɗùn ɓin ɓi ki ɓa ɓiɗùn ɓi ɓyɛɛ finɛn, fɔɔnnɛ com kìcèm ki ɓì ɓiì tɔɔ̀gh Tààta rì ɗii ɗyɛ̀m, à rì mìni kɔ ɓiì kìi. 17 Kìɓan ki mɛ̀ ǹsiŋ̀dɛɛ mìni ki ri lɛ, ɓi kɔnɛn mìni rì mìni.

Ziinɛ ì ɓèèzɛɛ Yeesus rì ɓɛ̀yilàg ɓii

18 I ziinɛ ì ɓèèzɛɛ mìni yiina lɛ ì lokà mɛ̀ kì ɓèèzɛɛ ri mìni. 19 I ɓi ɓa ɓum ɓɛ ziinɛ, di ziinɛ ì rì lɛ ì keesì mìni fɛlɛ yɛ̀ɛ com ki yɔ̀. Nni yɛ̀ɛ ɓì yin ɓum ɓɛ ziinɛ, ki ki ɓa lɛ m̀ɓɔ̀ngà mìni, m̀pisì mìni ɓi ziinɛ, kɛɛ̀ki ziinɛ yɛɛ̀ ɓèeɓeèzɛ̀n mìni miì. 20 Yitiina jɛ̀ɛ̀ ìnɛ ǹkpaaghà mìni lɛ: Ǹkìì-kìsay a cee ɓi masà wìì. I ɓɛ yeesìghà mɛ̀, ɓɛ ri yeesi girig mìni. I ɓɛ ɓegà ɓìɓan ɓyɛm̀, ɓɛ ɓiì ɓèŋi girig ɓiŋkìn. 21 Wɔ̀lɛ ɓɛ ri kì mini ɓìɓan ɓiǹ ɓìcèm ɓisu wɛ̀m, lɛ ɓɛ yii ɓi roànɛ à romgày mɛ̀. 22 I ǹ-yùghà ɓi, kɛ̀ɛ nki tòòghrɛn ri ɓɔ, di ɓɛ yin lɛ ɓɛ ɓa rì bɛ̀lɛn; nni ɓigomìnɛ, ɓɛ yin ɗi com ki kpaayɛn ɓisuu kiɓe kaa. 23 Ŋwaànɛ à ɓèèzɛɛ mɛ̀ à ɓèèzɛɛ girig Seŋi wɛ̀m. 24 I kɛ̀ɛ nkì ɓɛgɛn ɓɛ ɓiɓan ɓɛ ŋwaàdɛŋ à ka kighà ɓi ɓi nyìinyìm wàa, di ɓɛ yin ri bɛ̀lɛn. Nni ɓigomìnɛ, ɓɛ nghɛɛ ɓìɓan ɓi mɛ̀ɛ nkìi, ɓɛ ki ɓèèzɛn lɛ rì mɛ̀ rì Seŋi wɛ̀m. 25 Wɔ̀Lɛ ki kilɛɛ fɔlɔɔ, lɛ kɛɛ ɓa yɛ̀ɛ ki ri kìkànɛn ɓi ɓìdɔ̀gsɛna ɓyaa lɛ: Ɓɛ ɓeèzɛ̀ngà mɛ̀ kɛ̀ɛ̀ ǹto wu kiɓan. 26 Yɛ̀ɛ m̀maasì-mɛ̀rem ànɛ ǹɗì ɓiì romiì à ɓiì yùu, nnyɛɛ ri Ǹghay à ɓɛ̀kɔɔ̀kɔɔ̀ ɓɛ ɓiɓan ànɛ à pɛ̀sɛɛ yì yɛ̀ɛ Tààta, à ɓiì tɛɛ̀zii ɓum kìɓan kɛm̀. 27 Mìni girig, ɓì ri tɛɛzi ɓum kìɓan kɛm̀ ɓisuulɛ, rì mɛ̀ rì mìni, tì rì ǹɗaŋ, à tumɛ̀n a rìtumɛ̀n.

Zyaŋ 16

1 Màa kpaa mìni ɓìɓan ɓiǹ lɛ kɛ̀ ɓi kɛ̀ɓtɛn fìɓàg. 2 Ɓɛ ri nàɓ mini ɓi naa yi bɔ̀ŋzɛ̀n; cààmɛ̀n ki riì kɔm̀, kɔ yɛɛ ri ɓa lɛ, i mum à woli kìbog ki ɓi mìni, à fèkì lɛ à kìi Bɛ̀ll kìsay. 3 Ɓɛ ri ɓiì kìkii fɔlɔɔ lɛ, ɓɛ yighà ɓi Tààta, ɓɛ̀ kɛɛ̀ ki yi mɛ. 4 Wɔ̀lɛ màa kpaa mìni ɓìɓan ɓiǹ lɛ yɛ̀ɛ cààmɛ̀n ki ri kpaŋ, ɓì yitì lɛ ǹkalìghà mìni ɓyɔ̀. Ǹkalìghà ɓi mini ɓyɔ a rìtumɛ̀n ɓisuulɛ m̀ɓaghà rì mìni.

Kìsay ki Kitɛntɛ̀ɛ̀n ki Nghay

5 Ɓigomìnɛ ǹkɛ̀ɛ yɛ̀ɛ roànɛ à romgày mɛ̀. Nsoò wààdɛŋ ù tɔɔgh ɓi mɛ lɛ, ù kɛ̀ɛ fe? 6 Wɔ̀lɛ bim i mɛ ron mini ɓi mɛ̀rem ɓisuulɛ, màa kpaa mìni ɓìɓan ɓiǹ. 7 Ǹsoò fɔlɔɔ, ǹkpaa mìni saaɗ lɛ ki ri mìni kìrɔɔ lɛ nkɛǹ; lɛ i ǹkɛ̀ɛ ɓi, m̀maasì-mɛ̀rem à yin lɛ à yù a lɔ̀ŋkin; wɔ̀lɛ i ǹkɛ̀ɛ, ǹɗom yì mìni nyì. 8 Nni yɛ̀ɛ à ri yù, à ri konag ki rèsii ɓumɓɛ ɓi ziinɛ lɛ, mɛ̀yitì maa ɓi kìɓan ki kiɓe, rì ɓi saaɗ, rì ɓi rìren ɗi ɓiɓan ɗi Bɛ̀ll, mɛ ri kìtɛ̀ŋtɛ̀ŋ. 9 Mɛ ri kìtɛ̀ŋtɛ̀ŋ ɓi kìɓan ki kiɓe ɓisuulɛ, ɓɛ gherɛɛ ɓi mɛ. 10 Mɛ ɓa zɛ̀ɗ ɓi kìɓan ki saaɗ ɓisuulɛ, mɛ̀ ǹkɛ̀ɛ yɛ̀ɛ Tààta, ɓyàa ghɛɛ̀di ɓi mɛ. 11 Mɔ zɛ̀ɗ ɓi kìɓan ki riren ɗi ɓiɓan ɗi Bɛ̀ll, ɓisuulɛ, kìɓan ki rifòm ɗi ziinɛ ki mɛ renɛ̀n. 12 Ǹkaka rì ɓìɓan lɛɛ̀gwey ɓi lɛ nkpaà mìni, nni ɓì yin lɛ ɓì wog ɓyɔ ɓigomìnɛ. 13 Lɔŋ yɛ̀ɛ Nghay à ɓɛ̀kɔɔ̀kɔɔ̀ ɓɛ ɓiɓan a ri yù, à ri rèsi mini saaɗ bimiɗ. Lɛ, àa kpaa ɓi mini ɓìɓan ɓi nyimiɗ yɛɛ ɓekii lɛ a kpaà, à rì lɔŋ mini ɓiì kpaà ɓìɓan ɓìcèm ɓi à woogh, à ki kpaa mini ɓìɓan ɓi ɓi ghɛɛ̀sɛɛ kì kìlɛɛ ɓi mɛ̀ru mɛ asu. 14 À rì mɛ̀ ɓiì kemzii ɓisuulɛ à ri teɗ ɓiɓan ɓyɛm̀, à kpaa mìni ɓyɔ̀. 15 Ɓìɓan ɓìcèm ɓi Tààta à rì rì ɓyɔ, ɓi ri ɓiŋkɛ̀m, fɔlɔɔ nnɛ màa kpaa miì lɛ, Nghay à ri teɗ ɓiɓan ɓyɛm̀, à kpaa mìni ɓyɔ̀.

Ǹɗemi-kɛŋɛn wu ɓiì lɔ̀ɔ̀ghrɛɛ kinyàà

16 Cààmɛ̀n lɛsàg ɓyàa ghɛɛ̀di ɓi mɛ; nni yɛ̀ɛ maa cààmɛ̀n à ɓiì ghaghii ti, ɓì ghɛɛ̀di mɛ̀. 17 Fɔɔnnɛ ɓɛ̀yilàg ɓii ɓɛdɛŋ ɓɛ tɔɔghrɛ̀ngà wɔɔ ɓɔ rì ɓɔ lɛ: Kìɓan ki à kpaa ɓìsi ki, ki ri ɓà azi lɛ cɛ? À kpaa lɛ: Cààmɛ̀n lɛsàg ɓyàa ghɛɛ̀di ɓi mɛ. Yɛ̀ɛ maa cààmɛ̀n à ɓiì ghaghii ti, ɓì ghɛɛ̀dì mɛ̀, rì tì lɛ ǹkɛ̀ɛ yɛ̀ɛ Tààta. 18 Fɔɔnnɛ ɓɛ kpaaghà lɛ: Cààmɛ̀n lɛsàg ànɛ à kpaa ànɛ, à rì azi lɛ cɛ? Ɓìsii woogh ɓi com ki a kɔ̀nkɔn lɛ a kpaà. 19 Yeesus à yighà lɛ ɓɛɛ̀ kɔ̀nkɔn lɛ ɓɛɛ tɔg nyi kìɓan kiǹ; fɔɔnnɛ à kpaaghà ɓɔ lɛ: Ɓi tɔɔtɔɔ̀ghrɛ̀n azi anɛ ɓi kìɓan ki màa kpaa mìni lɛ, cààmɛ̀n lɛsàg ɓyàa ghɛɛ̀di ɓi mɛ, nni yɛ̀ɛ maa cààmɛ̀n à ɓiì ghaghii ti ɓì ghɛɛ̀dì mɛ̀. 20 Ǹkalii mìni saaɗ à rìkalì lɛ ɓì ɓiì kìi lɛ ɓì rèn, ɓì ki seeghkɛn, ziinɛ yɔ̀ɔ̀ nyàànyàà. Ɓì ri ɓa ri ǹɗemi-kɛŋɛn, kìɓan kifog ǹɗem win wu kɛŋɛn wu ɓiì lɔ̀ɔ̀ghrɛɛ kinyàà. 21 Cààmɛ̀n ki giɓ a kɔ̀rii ɗyem, à rì nɗem wu ɓeɓtɛn lɛ cààmɛ̀n kii ki ntɔɓ ki kpaŋi. Nni i man à mɛ yalɛ̀n, à ɗimzɛ̀n rìkɛŋ ɗii ɗiǹ lɛ kìnyàà ki à rì rì kɔ lɛ ǹto wu mum wu yalɛɛ ɓi ziinɛ. 22 Fɔlɔɔ nnɛ mìni girig bì rì rì ǹɗemi-kɛŋɛn ɓigomìnɛ, kìɓan kifog ǹɗi ghɛɛ̀di mini. Nni yɛ̀ɛ ǹɗi ghɛɛ̀di mini, mɛ̀rem min mɛ ri wog kinyàà, mum àa ki ɓàtɛn ti ɓi mini kìnyàà kiǹ. 23 Ŋwos anɛ̀n, ɓyàa tɔg ti ɓi mɛ kìɓan. Ǹkpaa mìni ɓi saaɗ lɛ: Com kìcèm ki ɓì ri tɔg Tààta, à ri fa mini kɔ ɓi ɗii ɗyɛ̀m. 24 À kpaŋ ɓigomìnɛ, ɓì ka tɔg ɓi com kidɛŋ ɓi ɗii ɗyɛ̀m. Tɔɔghna, ɓɛɛ fa mìni, di fɔɔnnɛ kìnyàà kin kɛɛ roǹ. 25 Màa kpaa mìni ɓìɓan ɓiǹ ɓi dàɗkì. Cààmɛ̀n ki riì kɛɛ̀ki màa tòòghrɛn ti ɓi ri mìni ɓi dàɗkì, ǹɗi kpaa lɔŋ mini ɓìɓan ɓi ɓi seesee Tààta lɛ tɛntɛ̀ɛ̀n. 26 Ŋwos anɛ̀n ɓì tɔɔgh gɛ Tààta ɓìɓan ɓi ɗii ɗyɛ̀m, nni mɛ̀ ǹki kalii ɓi mìni lɛ, m̀ɓɔ̀ŋzaagh gɛ Tààta ɓisu wiǹ; 27 lɛ Tààta nyimiɗ a keesii mìni ɓisuulɛ ɓì keesìghà mɛ̀, ɓì ki gherɛn lɛ m̀pɛ̀sɛ̀ngày yɛ̀ɛ Bɛ̀ll. 28 M̀pɛ̀sɛ̀ngày yɛ̀ɛ Tààta, ǹ-yùy ɓi ziinɛ. Nni ɓigomìnɛ m̀pɛ̀sɛɛ ɓi ziinɛ, ǹsugtì yɛ̀ɛ Tààta. 29 Fɔɔnnɛ ɓɛ̀yilàg ɓii ɓɛ kpaaghà nyi lɛ: Ghɛna ɓà min yɛ̀ɛ u tòtog ri ɓìsi ɓigomìnɛ lɛ tɛntɛ̀ɛ̀n, kɛ̀ɛ̀ dàɗkì. 30 Ɓigomìnɛ tì mɛ yi lɛ ù yii ɓìɓan ɓìcèm, rì tì lɛ, ki ghɛɓsii ɓi com lɛ mum a tɔg wɔ̀ ǹtɔɔ̀tɔɔgh. Fɔlɔɔ nnɛ tì gherɛɛ miì lɛ ù ɓaghày yɛ̀ɛ Bɛ̀ll. 31 Nni Yeesus à ɓàkà ɓɔ lɛ: Ɓigomìnɛ nnɛ ɓì mɛ gherɛ̀n? 32 Ɓì ghɛɛ! Cààmɛ̀n ki riì, kiŋcèm ki mɛ kpaŋ, kɛɛ̀ki ɓì ɓiì tyàŋzɛɛ, mum ǹcèm à nɔ̀ɔ̀tì bee yiì, ɓi càɗ mɛ̀ cɛ̀ncɛm; nsoò fɔlɔɔ, ǹ-yin cɛ̀ncɛm, lɛ Tààta à rì ɓɛɛ̀ mɛ̀. 33 Mɛ̀ɛ ǹkpaa mìni ɓìɓan ɓiǹ lɛ, ɓi ɓa rì fyòoog a lɔ̀ŋkɛm̀. Ɓì ɓiì ɓaà rì ǹ-yeesɛ̀n ɓi ziinɛ nni sììriina mɛ̀rem, mɛ̀ m̀mɛ yag ziinɛ ɓi-tèɗ.

Zyaŋ 17

Yeesus à ɓɔ̀ŋzii Bɛ̀ll ɓisuu ɓɛyilàg ɓii

1 Yɛ̀ɛ Yeesus à kpaaghà ɓìɓan ɓiǹ, nni à ɓegsìghà mis aɗyoo, à kpaa lɛ: Tààta, cààmɛ̀n ki mɛ kpaŋ, kemzi Man wɔɔ̀, di Man wɔɔ̀ a kemzi girig wɔ̀. 2 Fɛlɛ yɛ̀ɛ ù faghà nyi ìtèɗ wu lɛ a lami ɓum ɓɛ̀cèm, à fa ɓɛ̀sɛ̀ɛ̀ ɓɛ̀cèm ɓɛ ù faghà nyi cɛɓ ki fiɗyàɓ fikɔ̀ɔ̀. 3 Cɛɓ ki fiɗyàɓ fikɔ̀ɔ̀ ki ri lɛ, ɓɛɛ yi wɔ̀, lɛ wɔ̀ yɛɛ ri m̀bobog à kɔɔ̀kɔɔ̀ à Bɛ̀ll, ɓɛ ki yi Yeesus Kiris, roànɛ ù romgày. 4 Mɛ̀ɛ ǹkemzii wɔ̀ ɓi ziinɛ, ǹlègsì kìsay ki ù faghà mɛ̀ lɛ nki. 5 Nni ɓigomìnɛ, Tààta wɔ̀ɔ̀ kemzi mɛ̀ jàŋbog rì wɛ̀ɛmiɗ, rì rìkem ɗi m̀ɓaghà rì ɗyɔ jàŋbog rì wɔ̀, di ziinɛ ì ka yin. 6 Ǹɗèsìghà ɗii ɗyɔɔ a ɓumɓɛ ù faghà mɛ̀ ɓi ziinɛ; ɓɛ ɓaghà ɓum ɓɔɔ, nni ù faghà mɛ̀ ɓɔ, ɓɛ ki ɓèŋ jɛ̀ɛ̀ yɔ̀ɔ̀. 7 Ɓigomìnɛ, ɓɛ mɛ yi lɛ, ɓìɓan ɓìcèm ɓi ù faghà mɛ̀, ɓi riì a lɔ̀ŋkɔɔ. 8 Ɓisuulɛ ǹfaghà ɓɔ ɓìɓan ɓi ù faghà mɛ̀, ɓɛ ghaɓ ɓyɔ, ɓɛ ki konag ki yiì lɛ, m̀pɛ̀sɛ̀ngày a lɔ̀ŋkɔɔ, ɓɛ ki gherɛn lɛ wɔ̀ yɛɛ romgày mɛ̀. 9 Ɓisu waa nnɛ m̀ɓɔ̀ŋzàg. Ǹ-yin ɓiì ɓɔ̀ɔɓɔ̀ŋzì ɓisuu ziinɛ, m̀ɓɔ̀ŋzii ɓisuu ɓɛroɓɛ ù faghà mɛ̀, ɓisuulɛ ɓɛ ri ɓɛnkɔ̀ɔ̀. 10 Com kɛm̀ kìcèm ki ri kiŋkɔɔ, fɔɔnnɛ kiŋkɔɔ kicèm ki ri girig kiŋkɛ̀m. Ɓi ɓɔ nnɛ rìkem ɗyɛ̀m ɗyɛɛ̀ rèeresɛ̀n. 11 Mɛ̀ ǹ-yiìdi ti ɓi ziinɛ, ɓɔ yɛɛ rɔɓi ɓi ziinɛ, yɛ̀ɛ mɛ̀ ǹ-yùu a lɔ̀ŋkɔɔ. Tààta ànɛ à rì ǹtɛnɛn, ɓèŋa ɓumɓɛ ù faghà mɛ̀ rì ɗii ɗyɔɔ, lɛ di ɓɛɛ ɓa ɓɛ̀ràrɛn yɛ̀ɛ ɓìsii ri ɓɛ̀ràrɛn lɛ rì mɛ̀ rì wɔ̀. 12 Cààmɛ̀n ki mɛ̀ɛ nɗì rì ɓɔ, mɛ̀ɛ mɓèŋɓeŋi ɓɔ, ɓì ɗii ɗyɔɔ, mɛ̀ɛ nkàakàmɛ̀n ɗì ɓɔ, nsoò kìbog ki ɓi ɓɔ kɛ̀ kɛɛ̀ ɗyaŋ; i ki cee ɓi lɛ roànɛ à ghɛ̀ɛ̀sɛ̀ngà kìɗyaŋì lɛ mɛ̀kànì mɛɛ roǹ. 13 Nni ɓigomìnɛ, ǹ-yùu a lɔ̀ŋkɔɔ; ǹki kpaa ɓìɓan ɓi, cààmɛ̀n ki ǹkaka ɓi ziinɛ, lɛ di ɓɛɛ ɓa rì kìnyàà. 14 Ǹfaghà ɓɔ ɓìɓan ɓyɔɔ, fɔɔnnɛ ziinɛ ì ɓèèzɛ̀ngà ɓɔ lɛ ɓɛ yin ɓumɓɛ ɓi ziinɛ, yɛ̀ɛ mɛ̀ ǹ-yin ŋwaànɛ fɛ ɓi ziinɛ. 15 M̀ɓɔ̀ŋzii ɓi wɔ lɛ u pisi ɓɔ ɓi ziinɛ, mɓɔ̀ŋzàg lɔŋ wɔ lɛ, u lɛgsi ɓɔ kìɓe. 16 Ɓɛ yin ɓumɓɛ fɛ ɓi ziinɛ fɛlɛ yɛ̀ɛ mɛ̀ ǹ-yin ŋwaànɛ fɛ ɓi ziinɛ. 17 Kìya lɛ rì saaɗ wɔ̀ɔ̀, ɓɛɛ ɓa ɓum ɓɔɔ; ɓìɓan ɓyɔɔ ɓi ri saaɗ. 18 Fɛlɛ yɛ̀ɛ ù romgày mɛ̀ ɓi ziinɛ, mɛ̀ girig mɛ̀ɛ nɗomi ɓɔ ɓi ziinɛ. 19 Mɛ̀ɛmiɗ mɓèeɓeŋɗɛ̀n ntɛnɛn lɛ ɓɔ, lɛ di ɓɔ girig ɓɛɛ ɓa ɓɛ̀tɛnɛn ɓi saaɗ ɓi ɗùm. 20 M̀ɓɔ̀ŋzii ɓi wɔ ɓisu waa lɔŋ cɛ̀ncaa, m̀ɓɔ̀ŋzii wɔ̀ girig ɓisuu ɓum ɓɛ̀cèm ɓɛ ɓɛ ɓiì gherɛɛ mɛ lɛ rìghagsì ɗyaa ɗi ɓɔlɛ̀ ànɛ ɓɛ ri ɓɔ ɓiì ghagsii. 21 M̀ɓɔ̀ŋzii wɔ̀ lɛ ɓɛɛ ɓa ɓɛ̀ràrɛn kìbyɔg kìfog Tààta, yɛ̀ɛ ù rì ɓi mɛ̀, mɛ̀ ɓi wɔ̀, kìya lɛ ɓɔ girig ɓɛɛ ɓa ɓɛ̀ràren ɓi ɓìsi di fɔɔnnɛ ziinɛ yɛ̀ɛ gherɛn lɛ, wɔ̀ yɛɛ romgày mɛ̀. 22 Mɛ̀ ǹfaghà ɓɔ rìkem ɗi ù faghà mɛ̀, lɛ ɓɛɛ ɓa ɓɛ̀ràrɛn kibyɔg kìfog yɛ̀ɛ ɓìsi. 23 Mɛ̀ ɓi ɓɔ, wɔ̀ ɓi mɛ̀, lɛ di ɓɛɛ ɓa ɓɛ̀ràrɛn lɛ kɔɔ̀kɔɔ̀ kìbyɔg kìfog, ziinɛ ì ki yi lɛ wɔ̀ yɛɛ romgày mɛ̀, nni ǹkeesìghà ɓɔ yɛ̀ɛ wɔ̀ɔ̀ keesìghà mɛ̀. 24 Tààta kɛɛ̀ kɔ̀nkɔn mɛ lɛ, jàŋ inɛ ǹɗì, ɓumɓɛ ù faghà mɛ̀, ɓɛɛ ɓa girig wɔɔ nɗaŋ ri mɛ̀, di ɓɛɛ ghɛǹ rìkem ɗyɛ̀m ɗi ù faghà ɓisuulɛ ù keesìghà mɛ̀ di ziinɛ ì ka kilɛn ɓi. 25 Tààta ànɛ à rì lɛ saaɗ, ziinɛ ì yighà ɓi wɔ, lɔŋ mɛ̀ yɛɛ yighà wɔ̀, ɓɛ̀roɓɛ ɓɛ ki yi lɛ wɔ̀ yɛɛ romgày mɛ̀. 26 Ǹɗèsìghà ɓɔ ɗii ɗyɔɔ, m̀ɓiì ki rèsii ti ɓɔ ɗyɔ lɛ di ǹkɔ̀nɛ̀n ànɛ ù rì rì nyi ɓisu wɛ̀m a ɓa a lɔ̀ŋkaa, mɛ̀ɛmiɗ m̀ɓa a lɔ̀ŋkaa.

Zyaŋ 18

Rìwu rì rìghèmɓɛ̀n ɗi Yeesus

Ɓɛ ɓani Yeesus

1 Yɛ̀ɛ Yeesus à kpaaghà ɓìɓan ɓiǹ, nni à pɛ̀sɛ̀ngà rì ɓɛ̀yilàg ɓii, ɓɛ kɛǹ cɛcɛɗ ki maa ǹsyòm ànɛ lɛ Sedirɔŋ. Ɓɛ ɗiŋì rì ɓɛ̀yilàg ɓii ɓi dɛm idɛŋ ìnɛ ì ɓaghà wɔɔ. 2 Zyudas ànɛ à ghɛ̀ɛ̀sɛ̀ngà nyi kì kàɓi a yighà jàŋ inɛ̀n, lɛ Yeesus rì ɓɛ̀yilàg ɓii ɓɛ nti ɓɛ taŋzàg wɔɔ. 3 Nni Zyudas à tekà lɛ rì nɗaŋ wu ɓɛsujàà, rì ɓɛ̀ɓèŋì-naà-Bɛ̀ll, ɓɛ ɓɛ̀pìrɛɛtìrɛ̀ ɓɛgwey rì Ɓɛ̀fàrìzyɛŋ ɓɛ romgày, à yùy rì ɓɔ wɔɔ ɓi dɛm inɛ̀n. Ɓɛ ɓaghày lɛ rì ɓɛ̀lamɓà, rì tìŋwɔkì rì ɓyom ɓi ribaŋì. 4 Nni yɛ̀ɛ Yeesus à yighà ɓìɓan ɓìcèm ɓi ɓi ghɛɛ̀sɛ̀ngà nyi kì tanɛɛ, fɔɔnnɛ à tyɛ̀ɛ̀tɛ̀ngà ɓɔ a nyoo, à tɔg ɓɔ lɛ: Ghɛn innɛ ɓi kaakàà? 5 Ɓɛ ɓaàg lɛ: Ti kaakaa Yeesus ànɛ a Naazarɛt. Yeesus à kpaa ɓɔ lɛ: Mɛ̀ɛ nɛ. Zyudas ànɛ à kàɓkà nyi à ɓaghà rì ɓɔ mɛ̀rɛy. 6 Lɔŋ yɛ̀ɛ Yeesus à kpaghà ɓɔ lɛ: Mɛ̀ɛ nɛ, ɓɛ sugtìghà rì jɛ̀m ɓɛ kpilàg ɓi zi. 7 Yeesus à tɔgtì ɓɔ lɛ: Ghɛn innɛ ɓi kaakàà? Ɓɛ ɓaàg lɛ: Ti kaakaa Yeesus ànɛ a Naazarɛt. 8 Nni Yeesus à ɓàkà ɓɔ lɛ: Màa kalii mìni lɛ, mɛ̀ɛ nɛ. I ki ri lɛ mɛ̀ nnɛ ɓi kaakàà, càrina ɓum ɓɛmbog ɓɛǹ, ɓɛɛ ghaàgh. 9 À kpaaghà fɔlɔɔ lɛ kɛɛ ɓa lɔŋ yɛ̀ɛ à kalìghà lɛ: Mɛ̀ɛ nɗimzii ɓi nsoò kìbog ki ɓi ɓumɓɛ ù faghà mɛ̀. 10 Nni Simɔn Pyɛɛri ànɛ à ɓaghà rì gàfàg ɓi ɗyaŋ, à sɔŋìghày yɔ̀ à kpɛ̀ɛ̀ ǹkìì-kìsay a rìfòm ɗi ɓɛpìrɛɛtìrɛ̀ à syaŋ nyi ìreè wu weèlem. Ǹkìì-kìsay àǹcèm à ɓaghà ɗii lɛ Malkus. 11 Yeesus à kpaa Pyɛɛri lɛ: Pɛ̀ɛ̀zi gàfàg ɓi ɗyaŋ. Mɛ̀ m̀ɓiì rɔ̀ɓi kɛ̀ɛ nnɔ ɓeŋ ànɛ Tààta à faghà mɛ̀ lɛ nnɔ?

Ɓɛ kɛɛ rì Yeesus yɛ̀ɛ Ann rì yɛ̀ɛ Kayif

12 Fɔɔnnɛ ǹɗaŋ wu ɓɛsujàà wiǹ, rì Ǹkɔ̀mɛ̀n wàà, rì Ɓɛ̀yudɛ̀n ɓɛ ɓɛ mɓègì naà-Bɛ̀ll ɓɛ ɓangà Yeesus, ɓɛ kaŋ̀ nyi bɛn. 13 Ɓɛ ka kɛ̀ngà ɗì nyi yɛ̀ɛ Ann; lɛ Ann à ɓaghà seŋi gili Kayif. Kayif àncèm yɛɛ ɓaghà rìfòm ɗi ɓɛpìrɛɛtìrɛ̀ ɓi bèg ìnɛn. 14 Nyi yɛɛ ki reɓkà Ɓɛ̀yudɛ̀n lɛ, ki ri kìrɔɔ lɛ mum a wu bog ɓisuu kilɔ̀ŋ.

Pyɛɛri à roòzɛɛ Yeesus

15 Simɔn Pyɛɛri rì ǹ-yilàg àdɛŋ, ɓɛ nɔɔ̀nɔ̀ɔ̀tìghà Yeesus. Nni yɛ̀ɛ rìfòm ɗi ɓɛpìrɛɛtìrɛ̀ ɗi yighà ǹ-yilàg ànɛ̀n, nyii ɗiŋìghà ɓɛɛ̀ Yeesus ɓi nlɛmɓog wu rifòm ɗi ɓɛpìrɛɛtìrɛ̀. 16 Wɔ̀lɛ Pyɛɛri à rɔɓkà ɓi dan, jàŋbog rì ìsuunaa. Nni ǹ-yilàg àmbog ànɛ à yisɛ̀ngà rì rìfòm ɗi bɛ̀pìrɛɛtìrɛ̀ à kpagày, à tòòghrɛ̀n ɓɛɛ̀ giɓ anɛ à ɓèŋɓèŋgà ìsuunaa, à ɗiŋzì min Pyɛɛri. 17 Nni giɓ anɛ à ɓèŋɓèŋgà ìsuunaa ànɛ̀n à tɔkà Pyɛɛri lɛ ù rì girig kìbog ki ɓi ɓɛ̀yilàg ɓɛ ŋwaànɛ wa? Pyɛɛri à ɓàg lɛ: Àg, ǹ-yin n-yilàg wìì. 18 Ɓɛ̀kìì-ɓìsay rì ɓɛ̀ɓèŋì naà-Bɛ̀ll ɓɛ rɛrɛ̀lìghà wɔɔ, di ɓɛɛ̀ wowog ɗuu ɗi ɓɛ ghɛŋzɛ̀ngà lɛ kìfɛɓ ki ɓaghà ɓiì kìkii. Pyɛɛri à rɛrɛ̀lìghà ǹɗaŋ ri ɓɔ, à wowòg girig ɗuu. 19 Nni rìfòm ɗi ɓɛpìrɛɛtìrɛ̀ ɗi tɔkà Yeesus kìɓan ki ɓi ɓɛ̀yilàg ɓii, rì ɓìɓan ɓi à ti à rèèrèsàg ɓɔ. 20 Yeesus à ɓàg nyi lɛ: Mɛ̀ɛ ǹtòtoogh lɛ tɛntɛ̀ɛ̀n rì ɓumɓɛ ɓi ziinɛ. Mɛ̀ nɗèresii ɓum ɓyààmɛ̀n ɓìcèm ɓi naa yi bɔ̀ŋzɛ̀n, rì ɓi naà-Bɛ̀ll, jàŋ yi Ɓɛ̀yudɛ̀n ɓɛ ti ɓɛ taŋzàg, kɛ̀ɛ nki kpaa kiɓan kidɛŋ a rìnyam. 21 Nni lannɛ mɛ̀ɛnɛ u tɔtɔg mɛtɔɔ̀ghtɔɔgh? Tɔgha ɓumɓɛ ɓɛ nwowoogh ɓìɓan ɓi mɛ̀ɛ nkpaakpaa, ɓɛɛ kpaà wɔ̀ com ki mɛ̀ɛ nkpaa ɓɔ, lɛ ɓɛ yii ɓìɓan ɓi mɛ̀ɛ nkpaakpaa. 22 Yɛ̀ɛ Yeesus à kpaaghà fɔlɔɔ, nni kìbog ki ɓi ɓumɓɛ ɓɛ mɓègì naà-Bɛ̀ll ɓɛ ɓɛ rɛrɛ̀lìghà foo, ki ɓokà nyi rìɓɛn, ki kpaa lɛ: Rìɓàg ɗi u ɓàɓag rifòm ɗi ɓɛpìrɛɛtìrɛ̀ ɗyɛɛ̀ɗìn? 23 Yeesus à ɓàg nyi lɛ: I màa sɛ̀rii kìɓàagh, rèsi mɛ̀ jàŋ inɛ zɛ̀ɗ i rì, wɔ̀lɛ i màa ki konaagh kì ɓàagh, ɓi cɛ nnɛ ù ɓoogh mɛ̀? 24 Nni Ann à romgà nyi ǹkàŋɛn yɛ̀ɛ Kayif ànɛ à ɓaghà rìfòm ɗi ɓɛpìrɛɛtìrɛ̀. 25 Simɔn Pyɛɛri à ɓaghà wɔɔ, à wowòg ɗuu, nni ɓɛ tɔkà nyi lɛ: Wɔ̀ɔ̀ yin irig kìbog ki ɓi ɓɛ̀yilàg ɓii? Pyɛɛri à roòzɛ̀n, à kpaa lɛ: Àg, ǹ-yin n-yilàg wìì. 26 Nni kìbog ki ɓi ɓɛ̀kìì-ɓìsay ɓɛ rifòm ɗi ɓɛpìrɛɛtìrɛ̀ ki ki ɓaghà càŋàcaŋa ki ŋwaànɛ Pyɛɛri à rengà ìreè, ki kpaaghà lɛ màa ghɛɛ ɓi wɔ ɓi dɛm i ɓìte nɗaŋ ɗi nyi? 27 Pyɛɛri à roòzɛ̀n tì, nni ǹlem à zag a ghàskà kì rɔŋì.

Yeesus à rɛlii ɓi mis mɛ gɔmìnà ànɛ lɛ Pilat

28 Nni ɓɛ pɛsɛ̀ngà rì Yeesus yɛ̀ɛ Kayif, ɓɛ kɛǹ ɗì nyi a kìkpanà ki ɓɛyɔ̀m ɗì sariwa lɛ ɓuɓ. Ɓɔmiɗ ɓɛ ɗiŋìghà ɓi ɓi kìkpanà ki ɓɛyɔ̀m kiǹ, lɛ ɓɛ̀ kɛɛ̀ foŋɗɛn ɓɔmiɗ kìsyeg ɓi nyòò, lɛ ɓɛɛ ɗi Paskà. 29 Fɔɔnnɛ gɔmìnà ànɛ lɛ Pilat à kpagày, à kɛ̀n jàŋ inɛ ɓɛ ɓaghà, à kpaa lɛ: Kìɓan adi kɛɛ̀ki ɓi kpaaghì ɓì ràɗ rì ŋwaànɛ? 30 Ɓɛ pɛɛ̀zì nyi lɛ: I àa yin fàràfara, di tì yùu yì ɓi ri nyi a lɔ̀ŋkɔɔ. 31 Nni Pilat à kpaaghà ɓɔ lɛ: Mìniìɓɔmiɗ terina nyi, ɓi yɔm̀ nyi ɓi ɓìdɔ̀gsɛna ɓin. Ɓɛ̀yudɛ̀n ɓɛ kpaa Pilat lɛ: Tì yin ɗi ìtèɗ wulɛ tì ren lɛ ɓɛɛ wey mum. 32 Ki kilɛ̀ngà fɔlɔɔ lɛ, di jɛ̀ɛ̀ ìnɛ Yeesus à kpaaghà lɛ a resi rìkuu ɗi riwù ɗi à ghɛ̀ɛ̀sɛ̀ngà kìwiì, yɛ̀ɛ ron. 33 Nni Pilat à sugtìghà kì ɗiŋii ɓi kìkpanà ki ɓɛyɔ̀m, à reŋì Yeesus, à tɔg nyi lɛ: Ù rì nya rìfòm ɗi Ɓɛ̀yudɛ̀n? 34 Yeesus à ɓàg nyi lɛ: Wɔ̀ yɛɛ kpaa kìɓan kiǹ gìn, ɓum ɓɛdɛŋ ɓɛɛ kalii wɔ̀ fɔlɔɔ ɓɛ raɗ rì mɛ̀? 35 Pilat à ɓàg lɛ: Mɛ̀ ǹɗì muu Ɓɛ̀yudɛ̀n gìn? Ɓumɓɛ ɓi kìlɔ̀ŋ kɔɔ, rì ɓɛ̀pìrɛɛtìrɛ̀ ɓɛgwey ɓɔ yaa yùu rì wɔ̀ a lɔ̀ŋkɛm̀, nni kìɓan aɗi kɛɛ̀ki wɔ̀ɔ nkìi? 36 Yeesus à ɓàg nyi lɛ: Kìlɔ̀ŋ kɛm̀ ki yin fɛ ɓi ziinɛ, i kaa rì ɓi ziinɛ, di ɓɛ̀kìì-ɓìsay ɓɛm ɓɛ nfaa rìbaŋì lɛ ɓɛ̀ kɛɛ̀ kɛ̀n ɗi mɛ̀ a mɛ̀fòm mɛ Ɓɛ̀yudɛ̀n. Wɔ̀lɛ kìlɔ̀ŋ kɛm̀ ki yin fɛ ɓi ziinɛ. 37 Pilat à tɔg nyi lɛ: Yɛɛ lɔɔ lɛ ù rì rìfòm wa? Yeesus à ɓàg lɛ: Ù kpaa miì, ǹɗì rìfòm. Mɛ̀ ǹ-yalɛ̀ngà, ǹki yù ɓi ziinɛ lɛ ntɛɛ̀zag ɓum ɓìɓan ɓi saaɗ, fɔɔnnɛ mum ǹcèm ànɛ à rì ŋwaà saaɗ, à ti à wokì jɛ̀ɛ̀ yɛ̀m. 38 Nni Pilat à tɔkà nyi lɛ: Saaɗ innɛ cɛ? Yɛ̀ɛ à kpaaghà fɔlɔɔ, nni à kpaŋdìghà, à kɛ̀n jàŋ inɛ Ɓɛ̀yudɛ̀n ɓɛ ɓaghà, à kpaa ɓɔ lɛ: Mɛ̀ ǹghɛɛ ɓi kiɓan ki ɓeɓtɛn ki ŋwaànɛ à kìi. 39 Nni yɛ̀ɛ ki ri mìni kìsyɔ̀ɔ̀ lɛ, ncaɗ mìni kìmbùŋ kìfog ɓi cààmɛ̀n à tìcàɓ ti Paskà, nni ki kɔni mìni lɛ rìfòm ɗi Ɓɛ̀yudɛ̀n ɗyɛɛ̀ɗi ncaɗ gìn? 40 Fɔɔnnɛ ɓɛ tumɛ̀ngà tì rìkpaa jɛ̀ɛ̀ aɗyoo lɛ: Èe èe àa nyi, lɔŋ Ɓaraɓas innɛ u caɗ. Kɔlɛ Ɓaraɓas à ɓaghà zyaàzyaa.

Zyaŋ 19

1 Nni Pilat à yùghà min ɗi Yeesus à reɓsì lɛ ɓɛɛ nyi kìtòn. 2 Fɔɔnnɛ ɓɛ̀sujàà ɓɛ togà min tàm à ɓìlɔ̀ɔ̀, ɓɛ saàgh Yeesus ɓi nto, ɓɛ waasì nyi kìlàà ki ɓàŋ. 3 Ɓɛ tyɛɛ̀tɛ̀n nyi a nyoo di ɓɛɛ̀ kpaakpaa lɛ: Rìfòm ɗi Ɓɛ̀yudɛ̀n, tì tògsii wɔ̀, ɓɛ ɓoòɓòkì nyi mɛ̀ɓɛn. 4 Nni Pilat à kpaŋdìghày, à kpaa Ɓɛ̀yudɛ̀n lɛ: Ghɛɛna, ǹti lɛ, nkpaŋziì mìni nyi; ɓì ghɛ̀ɛ̀sɛɛ kì yiì lɛ, ǹghɛɛ ɓi kiɓan ki ɓeɓtɛn ki à kìi, ki ki ri lɛ ɓɛ sɔmɛ̀n nyi miì. 5 Nni Yeesus à kpagày min. À ɓaghà rì tàm à ɓìlɔ̀ɔ̀ ɓi nto, rì kìlàà ki ɓàŋ ɓi nyoo, Pilat à kpaa ɓɔ lɛ: Ghɛɛna! mum innɛ̀n. 6 Wɔ̀lɛ yɛ̀ɛ ɓɛ̀pìrɛɛtìrɛ̀ ɓɛgwey ɓɛ ghɛngà nyi, ɓɛ kpaa jɛ̀ɛ̀ aɗyoo lɛ: Kpana nyi ɓi kɔrɔs, kpana nyi ɓi kɔrɔs. Pilat à kpaa ɓɔ lɛ: Mìniìɓɔmiɗ terina nyi, ɓi kpaǹ nyi ɓi kɔrɔs. Ɓi ɓɛg wɛ̀m, mɛ̀ ǹghɛɛ ɓi kiɓan ki ɓeɓtɛn ki à kìi, ki ki ri lɛ ɓɛ sɔmɛ̀n nyi miì. 7 Ɓɛ̀yudɛ̀n ɓɛ ɓaàg Pilat lɛ: Tì rì rì kìdɔ̀gsɛna, nni kìdɔ̀gsɛna kiǹ kɛɛ̀ kpaaghi lɛ à ghɛ̀ɛ̀sɛɛ kì wiì ɓisuulɛ àa nɗɛ̀ŋii kì kpaà lɛ, à rì Man à Bɛ̀ll. 8 Yɛ̀ɛ Pilat à wokà tì jɛɛ ìnɛn, à risì tì lɛɛ̀gwey, 9 fɔɔnnɛ à ɗiŋìghà tì ɓi kìkpanà ki ɓɛyɔ̀m, à tɔg Yeesus lɛ: Wɔ̀ɔ̀ fuu yì fe? Wɔ̀lɛ Yeesus à ɓàkà ɓi nyi, Pilat à kpaa min nyi lɛ: 10 Mɛ̀ nnɛ ù mìnɛɛ? Ù yii ɓi lɛ ǹɗì rì ìtèɗ wulɛ, ǹcàɗ wɔ̀, nsoò lɛ ǹkpaǹ wɔ̀ ɓi kɔrɔs? 11 Yeesus à ɓàg lɛ: Ù ɓaghà ɓi lɛ, ù ɓa rì ìtèɗ wulɛ, ù kì mɛ̀ com di Bɛ̀ll à faghà ɓi wɔ wɔ. Kìɓan kiǹ kɛɛ̀ki mum ànɛ à kàɓi mɛ̀ rì wɔ̀, à kìi kìɓe ki ki cee. 12 À tumɛ̀n ɓi cààmɛ̀n kiǹ, Pilat à kaakààghà bee inɛ lɛ a caɗ nyi, kìɓan kifog, Ɓɛ̀yudɛ̀n ɓɛ kpaakpààghà jɛ̀ɛ̀ aɗyoo lɛ: I ù càri ŋwaànɛ̀n di ù yin righan ɗi Kaaza, lɛ mum ǹcèm ànɛ à kalii lɛ à rì rìfòm, à rì ŋwaànɛ a ɗùùɗuu ri Kaaza. 13 Yɛ̀ɛ Pilat à wokà fɔlɔɔ, nni à kpaŋzìghày Yeesus à kɔ̀rì ɓi-kɔ̀ɔ̀ wu riren ɗi ɓiɓan, ɓi jàŋ inɛ ɓɛ nɗegì lɛ pàveè, ɓi rì ebìreegh lɛ Gaɓata. 14 Ŋwos anɛ̀n à ɓaghà ŋwos anɛ ɓɛ peèghpègsɛ̀ngà tìcàɓ ti Paskà di ki ti nunùg toroɓ, Pilat à kpaa Ɓɛ̀yudɛ̀n lɛ: Rìfòm ɗin ɗyɛɛ̀ɗi. 15 Wɔ̀lɛ ɓɛ teŋzìghà jɛ̀ɛ̀ ɓɛ kpaa lɛ: A wu, a wu, kpana nyi ɓi kɔrɔs. Pilat à kpaa ɓɔ lɛ: Ɓi kɔ̀nkɔn lɛ, mɛ̀ɛ ǹkpaǹ rìfòm ɗin? Ɓɛ̀pìrɛɛtìrɛ̀ ɓɛgwey ɓɛ ɓàg nyi lɛ: Ɓìsii yin ɗi rìfòm ɗiɗɛŋ i ki yin lɛ Kaaza. 16 Nni Pilat à faghà min ɓɔ Yeesus lɛ ɓɛɛ kpan ɓi kɔrɔs. Fɔɔnnɛ ɓɛ tekà nyi, ɓɛ kɛǹ ɗì nyi.

Ɓɛ kpani Yeesus ɓi kɔrɔs

17 Yeesus à tɛ̀tɛ̀kà kɔrɔs wìì nyimiɗ ɓi ɗi lɛ ɓɛɛ pɛsɛn ɓi bàn, ɓɛɛ kɛǹ ɗì nyi ɓi jàŋ inɛ ɓɛ nɗegì lɛ kìtɛtɛg ki nto, yɛ̀ɛ ri ɓi rì ebìreegh lɛ Gɔlgɔta. 18 Wɔɔ nnɛ ɓɛ kpangà nyi ɓi Kɔrɔs ǹɗaŋ ri ɓum ɓɛdɛŋ ɓɛɓɛɛ̀, lɛ roànɛ nyi ɓi kìmɛŋ, roàmbog nyi ɓi weèlem, Yeesus ɓi nyìinyìm wàà. 19 Pilat à kàngà girig ɓi kìɓoŋ, ɓɛ ɓaàtì kɔ ɓi kɔrɔs. Mɛ̀kànì mɛǹ mɛ ɓaghà lɛ: Yeesus ànɛ a Naazarɛt, rìfòm ɗi Ɓɛ̀yudɛ̀n. 20 Ɓɛ̀yudɛ̀n lɛɛ̀gwey ɓɛ ɓalà kìɓoŋ kiǹ, lɛ jàŋ inɛ ɓɛ kpangà Yeesus ì ɓaghà jàŋbog rì bàn. Kìɓoŋ kiǹ ki ɓaghà kìkànɛn lɛ, rì ɓi rì ebìreegh, rì ɓi rìgìrɛg, rì ɓi rìlàtɛŋ. 21 Ɓɛ̀pìrɛɛtìrɛ̀ ɓɛgwey ɓɛ Ɓɛ̀yudɛ̀n ɓɛ kpaaghà Pilat lɛ: Kɔ̀ɔ kàn lɛ rìfòm ɗi Ɓɛ̀yudɛ̀n, kàna lɛ, àa nkpaa lɛ, nyii ri rìfòm ɗi Ɓɛ̀yudɛ̀n. 22 Nni Pilat à ɓàkà ɓɔ lɛ: Ki m̀mɛ kàn, ki ti kì kànɛn. 23 Ɓɛ̀sujàà ɓɛ ɓaghà lɛ, ɓɛ mɛ kpan Yeesus ɓi kɔrɔs, ɓɛ teɗ ɓìlàà ɓii, ɓɛ kaɓsì ɓyɔ gàɓ yinin, sujàà bimiɗ à teɗ gàɓ bog; ɓɛ tekà girig jɔmpàs wìì, àncèm à ɓaghà kɛ̀ɛ̀ jàŋ i ǹɗàrɛn, à ɓa ǹtoŋɛn lɛ ɗyɔɔg, à tumɛ̀n aɗyoo, à kpaŋ azi. 24 Ɓɛ̀sujàà ɓɛǹ ɓɛ kpaaghà wɔɔ ɓɔmiɗ lɛ: Tyɛ̀ ki ghàski jɔmpàs ànɛ, ti ɓog ǹtɔ̀ŋ, di ti ghɛǹ ŋwaànɛ à rì nyi ɓiì terì. Ki kilɛ̀ngà fɔlɔɔ lɛ kɛɛ ɓa lɔŋ yɛ̀ɛ ki ɓaghà kìkànɛn lɛ: Ɓɛ kaɓɓàkà ɓìlàà ɓyɛm̀, ɓɛ ki ɓog ntɔ̀ŋ ɓi jɔmpàs wɛ̀m. Com ki ɓɛ̀sujàà ɓɛ kighà kɛɛ̀kìn. 25 Ɓɛ̀yiɓ ɓɛ lɛ: rì jɛɛ Yeesus, rì geni jɛɛ Yeesus, rì Marii à gili Kileyopas, rì Marii Madelɛn, ɓɛ rɛrɛ̀lìghà jàŋbog rì kɔrɔs à Yeesus. 26 Yɛ̀ɛ Yeesus à ghɛngà jɛɛ, à ghɛɛ̀dì tì ǹ-yilàg ànɛ àa nkeesàg ǹɗɛrɛliyɛn jàŋbog rì jɛɛ wìì, nni à kpaaghà jɛɛ lɛ: Giɓ anɛ, man wɔɔ̀ nnɛ̀n lɔɔ. 27 Fɔɔnnɛ à kpaaghà rì ǹ-yilàg ànɛ̀n lɛ: Gaa nnɛ̀n lɔɔ. À tumɛ̀n ɓi cààmɛ̀n kiǹ, ǹ-yilàg ànɛ̀n à tekà jɛɛ Yeesus a mɛɛ mii. 28 Ajɛ̀m ìnɛn, yɛ̀ɛ Yeesus à yighà lɛ ɓìɓan ɓìcèm ɓi mɛ kpaŋzɛ̀n, nni à kpaaghà lɛ: Kìnɔli kɛɛ̀ kìki mɛ, lɛ di ɓìɓan ɓi ɓi ri ɓìkànɛn ɓyɛɛ roǹ. 29 Fɔlɔɔ nnɛ ɓɛ̀sujàà ɓɛ tekày dɛ̀ɓ ɓɛ nɔg ɓi ɓìkpamà ɓi mɛrɔ̀g ɓi ɓi ɓaghà wɔɔ ɓi kìbɔkɔ̀ kidɛŋ, ɓɛ ɓam̀ yɔ̀ ɓi kìgeŋ, ɓɛ namzì nyi a ŋwɔm. 30 Yɛ̀ɛ Yeesus à syògà ɓìkpamà ɓi mɛrɔ̀g ɓiǹ, nni à kpaaghà lɛ: Ɓìɓan ɓìcèm ɓi roni. Fɔɔnnɛ à tuŋzìghà nto à maasì. 31 Ŋwos anɛ̀n à ɓaghà ŋwosi jumɓa, di Saɓàt à rì yɛ̀ɛ rìduri. Ɓɛ̀yudɛ̀n ɓɛ kɔngà ɓi lɛ ɓìloŋ ɓyɛɛ rɔɓ fɔlɔɔ ɓikpanɛn ɓi kɔrɔs à kpaŋ ɓi Saɓàt, lɛ Saɓàt ànɛn à ɓaghà coo gòn i kìcèlì. Fɔɔnnɛ ɓɛ tɔkà Pilat lɛ a fa ɓɔ ìtèɗ wulɛ ɓɛɛ ɓwingi ɓɔ mɛ̀kòò, ɓɛ ki kɔ̀sag yi ɓɔ ɓi ɓɛ̀kɔrɔs. 32 Nni ɓɛsujàà ɓɛ yughà ɓɛ ɓungì mɛ̀kòò mɛ kibog ki ɓi ɓumɓɛ ɓɛ kpangà ǹɗaŋ ri Yeesus, ɓɛ ɓungì tì mɛ roàmbog. 33 Yɛ̀ɛ ɓɛ kpagà ɓi Yeesus, ɓɛ tanɛ̀n lɛ à mɛ wu ɓɛ̀ kɛɛ̀ ɓwingi nyi mɛ̀kòò. 34 Wɔ̀lɛ kìbog ki ɓi ɓɛ̀sujàà ki tuɓkà nyi bèn ɗì rìkɔ̀ŋ, mɛ̀nig rì bwaɓ ɓi ghas kì kpaŋì. 35 Ŋwaànɛ a kpaakpaa ɓiɓan ɓi, à ghɛngà ɓyɔ (rì mis). Nni com ki a kpaakpàà ki ri saaɗ, nyimiɗ a yii lɛ, a kpaakpaa saaɗ lɛ, di mìni girig ɓi gherɛn. 36 Ki kilɛ̀ngà fɔlɔɔ lɛ, kɛɛ ɓa yɛ̀ɛ ki ri kìkànɛn lɛ nsoò kìwoɓ kii kifog, ɓaa ɓun ɓi. 37 Ki ri tì kìkànɛn ɓi jàŋ idɛŋ lɛ ɓɛ ri pɛ̀ɛ̀zii gɛ mis rì roànɛ ɓɛ tuɓkà bèn.

Ɓɛ ɓomi Yeesus

38 Ajɛ̀m ìnɛn, Yoosɛɓ, ŋwaànɛ a Arimate, à ɓaghà ǹ-yilàg à Yeesus a rìnyam lɛ à rirìsìghà Ɓɛ̀yudɛ̀n. Nni à tɔkà Pilat ìtèɗ wulɛ a teɗ kìloŋ ki Yeesus, Pilat à gherɛ̀n. Fɔɔnnɛ à yùghà, à teɗ kìloŋ ki Yeesus. 39 Nikodɛm ànɛ à lokà kì kɛ̀ɛ yɛ̀ɛ Yeesus ɗì ìru, à yùghày gìrig; à ɓanɛ̀n yì bùtag i ɓyom ɓi ɓi ɓaghà lɛ ɓi kpaŋ ɓɛ̀kilò rìtin ɗì ǹtɛ̀ɗ, ɓi ɓaghà mɛ̀kuu mɛ tirààre mɛ lɛ: rì miìr, rì àlòwɛs. 40 Nni kìɓɛ̀ɛ̀ ki ɓum kìn ki tekà min kiloŋ ki Yeesus, ɓɛ kagì kɔ rì ɓɛ̀ɓandas, di ɓɛɛ̀ mìmisi tirààre miì yɛ̀ɛ Ɓɛ̀yudɛ̀n ɓɛ nkìlàg di ɓɛ ti ɓiì ɓòmi mum. 41 Dɛm idɛŋ ì ɓaghà jàŋ inɛ ɓɛ kpangà Yeesus ɓi kɔrɔs, nni zɔ̀ŋ ì nyɔn ìnɛ ɓɛ ɓaghà di ɓɛ ka ɓom̀ ɓi mum miì, ì ɓaghà ɓi dɛm inɛ̀n. 42 Miì nnɛ ɓɛ ɓomgà Yeesus, ɓisuulɛ Ɓɛ̀yudɛ̀n ɓɛ ɓaghà di ɓɛ ti ɓiì ɓùuɓuŋɛ̀n Saɓàt, rì tì lɛ, zɔ̀ŋ ì ɓaghà wɔɔ jàŋbog.

Zyaŋ 20

Rìghèmɓɛ̀n ɗi Yeesus

1 Ŋwosi sɔnɗì sariwa, Marii Madelɛn à pongà a zɔ̀ŋ rì tìrììriì, à ghɛn lɛ, gɔ̀g ìnɛ ì ɓaghà ɓi ŋwɔm wu zɔ̀ŋ ì ti m̀pisiyɛn. 2 Fɔɔnnɛ à pɛ̀sɛ̀ngà rì mɛ̀ree, à kɛ̀n kì ghɛɛ̀ lɛ rì Simɔn Pyɛɛri, rì ǹ-yilàg àmbog ànɛ Yeesus àa nkeesàg, à kpaa ɓɔ lɛ: Ɓaa pisii Kan ɓi zɔ̀ŋ, nni tì yii ɓi fennɛ ɓaa foŋi nyi. 3 Nni Pyɛɛri ɓɛɛ̀ ǹ-yilàg àmbog ɓɛ pɛsɛ̀ngà ɓɛ kɛǹ a zɔ̀ŋ. 4 Ɓɔɔ̀cèm ɓɛ kɛnkɛ̀ngà ɗì mɛ̀ree, kìɓan kifog, ǹ-yilàg àmbog à fyàgà Pyɛɛri ɓi mɛ̀ree, à log kì kpaŋì a zɔ̀ŋ ɗì nyi. 5 Fɔɔnnɛ à laŋmɛ̀ngà lɛ a tɛg wɔɔ ɓi ɗùm, à ghɛn ɓɛ̀ɓanɗas ɓɛ̀ nɔ̀nɔŋiyɛn, wɔ̀lɛ à ɗiŋìghà ɓi ɓi zɔ̀ŋ. 6 Nni Simɔn Pyɛɛri ànɛ à ɓaghày nyi ajɛ̀m à kpagà, à ɗiŋì ɓi zɔ̀ŋ, à ghɛn ɓɛ̀ɓanɗas ɓɛ̀nɔ̀nɔŋiyɛn, 7 kìlàà ki ki ɓaghà Yeesus ɓi nto, kɛ̀ kɛɛ̀ ki ɓa jàŋbog rì ɓɛ̀ɓanɗas, kɔɔ ɓa kì takakɛn fɔlɔɔ ki nɔ̀ŋziyɛn yi kìpàs. 8 Nni ǹ-yilàg àmbog ànɛ à lokà kìkpaŋì a zɔ̀ŋ, à ɗiŋìghà girig, à ghɛn à ki gherɛn. 9 Lɛ ɓɛ̀yilàg ɓɛ ɓaghà di ɓɛ ka wog ɓi azi anɛ ɓi rìkàn ɗi ɗi kpaakpààghà lɛ ki ghɛɛ̀sɛ̀ngà lɛ Yeesus a ghemɓɛn yì a ɓìloŋ. 10 Fɔɔnnɛ ɓɛ̀yilàg ɓɛ pɛsɛ̀ngà, ɓɛ sugtì a mɛɛ. 11 Marii à rɛrɛ̀lìghà ɓi dan, ǹwɔŋì rì zɔ̀ŋ, à renɗèn. Yɛ̀ɛ à rènɗengà, nni à laŋmɛ̀ngà lɛ a ghɛn zɔ̀ŋ ɓi ɗùm. 12 Fɔɔnnɛ à ghɛngà ɓum ɓɛ titom ɓɛɓɛɛ̀, rì ɓìlàà ɓi puɓ, di ɓɛ kɔkɔrii ɓi jàŋ inɛ ɓɛ nɔŋzìghà kìloŋ ki Yeesus ɓɛ ki lɛ, roànɛ a nto, roàmbog a mɛ̀kòò. 13 Ɓum ɓɛ titom ɓɛǹ ɓɛ tɔg nyi lɛ: Giɓ anɛ, cɛ u rènɗèn? Nyii ɓaàg ɓɔ lɛ: Ɓaa pisii Kan wɛ̀m nni mɛ̀ ǹ-yii ɓi jàŋ inɛ ɓaa foŋi nyi. 14 Yɛ̀ɛ à kpaaghà fɔlɔɔ, nni à lɔ̀ɔ̀ghrɛ̀ngà, à ghɛn Yeesus ǹɗɛrɛriyɛn, kìɓan kifog, à yighà ɓi lɛ Yeesus yɛɛ ri. 15 Nni Yeesus à tɔkà nyi lɛ: Giɓ anɛ, ɓi cɛnnɛ u rènɗèn? Ghɛn innɛ u kaakàà? Nyii fefèkà lɛ m̀ɓèŋì-dɛm yɛɛ ri. Fɔɔnnɛ à kpaaghà nyi lɛ: Kan! i wɔ̀ yaa pisii nyi fɛ, kali mɛ̀ jàŋ inɛ wàa foŋi nyi di mɛ̀ɛ nteɗ yì nyi. 16 Yeesus à kpaa nyi lɛ: Marii! nni à lɔ̀ɔ̀ghrɛ̀ngà, à kpaa Yeesus ɓi rì ebìreegh lɛ: Ràɓunì! yɛɛlɔɔ lɛ ǹɗèsàg. 17 Yeesus à kpaa nyi lɛ: Kɔ̀ɔ kòm mɛ, ɓisuulɛ ǹka ɓɔg ɓi yɛ̀ɛ Seŋi wɛ̀m; kìɓan kifog kɛ̀na a ɓɛ̀geni ɓɛ̀m, u kpaa ɓɔ lɛ m̀ɓɔɔgh yɛ̀ɛ Seŋi wɛ̀m, nnyɛɛ ri girig Seŋi wìn, yɛ̀ɛ Bɛ̀ll wɛ̀m, ànɛ à rì girig Bɛ̀ll wìn. 18 Fɔɔnnɛ Marii madelɛn à kɛ̀ngà kì kpaà ɓɛ̀yilàg lɛ nyaa ghɛɛ Kan, ànɛ̀n à kpaa nyi ɓìɓan ɓi nyii kpaa ɓɛǹ ɓin.

Yeesus à rèsɛɛ a ɓɛ̀yilàg ɓii

19 Cɛŋkò ki ŋwosi sɔnɗì nyimiɗ anɛ̀n, mɛ̀suunaa mɛ ɓi naa ìnɛ ɓɛ̀yilàg ɓɛ ɓaghà wɔɔ ɓɛtaŋzɛn, mɛ ɓaghà mɛ̀rogakɛn lɛ, ɓɛ rirìsìghà Ɓɛ̀yudɛ̀n. Nni Yeesus à yùghà, à rɛlì ɓi nyìinyìm wàà, à kpaa ɓɔ lɛ: Fyòoog a ɓa rì mìni. 20 Yɛ̀ɛ à kpaaghà fɔlɔɔ, nni à rèsìghà ɓɔ lɛ, rì ɓyàg ɓii, rì bèn yìì. Ɓɛ̀yilàg ɓɛ nyaàrɛ̀n yɛ̀ɛ ɓɛ ghɛngà Kan. 21 Yeesus à ɓììtì ɓɔ kìkpaà lɛ: Fyòoog a ɓa rì mìni. Fɛlɛ yɛ̀ɛ Tààta à romgày mɛ̀, mɛ̀ ǹɗomi girig mìni. 22 Lɔŋ yɛ̀ɛ à kpaaghà fɔlɔɔ, nni à fɛɓkà ɓɔ bɛ̀ɛ̀bɛ̀ɛ̀ ɓi nyoo, à kpaa ɓɔ lɛ: Terina Kìtɛntɛ̀ɛ̀n ki Nghay. 23 Ɓum ɓɛ̀cèm ɓɛ ɓì ɓiì cenɛɛ ɓiɓe, ɓɛɛ̀ɓɛ ɓìɓe ɓyaa ɓi ri ɓiì ɓaà ɓì cenɛn, ɓɛ̀roɓɛ ɓì cenɛɛ ɓi ɓiɓe, ɓìɓe ɓyaa ɓi rɔɓ kɛ̀ɛ̀ rìcenɛ̀n. 24 Tomas ànɛ ɓɛ nɗegì lɛ Didim, kìbog ki ɓi ɓɛ̀yilàg ɓɛ Yeesus ntɛ̀ɗ rì ɓɛɓɛɛ̀, à ɓaghà ɓi wɔɔ cààmɛ̀n ki Yeesus à yùghày kiǹ. 25 Nni ɓɛ̀yilàg ɓɛmbog ɓɛ kpaaghà nyi lɛ: Tyàa ghɛɛ Kan. Tomas à ɓàg ɓɔ lɛ: I ǹghɛɛ ɓi ɓifìlì ɓi tyɛmì ɓi ɓyàg ɓii, kɛ̀ɛ nki foŋ manàcàg wɛm̀ ɓi ɓìfìlì ɓi tyɛmì nsoò lɛ ǹfoŋ càg kɛm̀ ɓi bèn yìì, ǹ-yin lɛ ǹgherɛ̀n. 26 Ajɛ̀m ì mɛ̀ru taàraa, ɓɛ̀yilàg ɓɛ Yeesus ɓɛ ɓatìghà ɓɛ̀taŋzɛn ɓi naa, Tomas à ɓaghà wɔɔ ri ɓɔ. Mɛ̀suunaa mɛ ɓaghà mɛ̀rogakɛn, nni Yeesus à yùghày, à rɛlì ɓɔ ɓi nyìinyìm, à kpaa ɓɔ lɛ: Fyòoog a ɓa rì mìni. 27 Fɔɔnnɛ à kpaaghà Tomas lɛ: Nàmay manàcàg wɔɔ̀ fɛ, ù ki ghɛn ɓyàg ɓyɛm̀; nàmay càg u kom̀ bèn yɛ̀m; kɔ̀ɔ teteɗ nyoey, gherɛn. 28 Tomas à ɓàg nyi lɛ: Kan wɛ̀m, rì Bɛ̀ll wɛ̀m! 29 Yeesus à kpaa nyi lɛ: Ù gherɛɛ ɓisuulɛ ù mɛ ghɛn mɛ? Mààgh rì ɓɛ̀roɓɛ ɓɛ gherɛ̀ngà ɓɛ̀ kɛɛ̀ ghɛn. 30 Yeesus à kìtìghà dàm yi ɓiɓan yidɛŋ lɛɛ̀gwey ɓi mis mɛ ɓɛyilàg ɓii, yi yi yin fɛ yì kànɛn ɓi kaàtà ànɛ. 31 Kìɓan kifog, gàɓ ìnɛ ì rì ǹkànɛn lɛ di ɓi gherɛn lɛ Yeesus à rì Kiris, Man à Bɛ̀ll, rì tì lɛ, i ɓì gherɛɛ, ɓì ɓa rì cɛɓ lɛ nyi.

Zyaŋ 21

Yeesus à rèsɛɛ tì ɓɛ̀yilàg ɓii ɓi bèn ì rìɓày ànɛ a Tiɓeriyaadɛ

1 Ajɛ̀m ìnɛn, Yeesus à rèsɛ̀ngà tì ɓɛ̀yilàg ɓii ɓi bèn ì rìɓày ànɛ a Tiɓeriyaadɛ. 2 Ɓɛ̀-Simɔn Pyɛɛri ɓɛɛ̀ Tomas ànɛ à rì ɗii lɛ, Didim, rì Natanayɛl ànɛ à rì ŋwaànɛ a Kana a Galile, rì ɓɔn ɓɛ Zeɓede, rì ɓɛ̀yilàg ɓɛ Yeesus ɓɛdɛŋ ɓɛ̀sɛ̀ɛ̀ ɓɛɓɛɛ̀ ɓɛ ɓaghà ǹɗaŋ. 3 Simɔn Pyɛɛri à kpaa ɓɔ lɛ: Ǹkɛ̀ɛ kì pìigh dam. Ɓɛ̀roɓɛ̀n ɓɛ kpaa nyi lɛ: Ɓìsi girig, ti kɛ̀nkɛn nɗaŋ ɗi wɔ̀. Fɔɔnnɛ ɓɛ pɛsɛ̀ngà ɓɛ ɓɔg ɓi kìkɔm, wɔ̀lɛ ìru wìn, ɓɛ wolà ɓi com. 4 Yɛ̀ɛ duri i tangà, nni Yeesus à rɛrɛ̀lìghà ɓi bèn ì rìɓày, kìɓan kifog ɓɛ̀yilàg ɓɛ̀ kɛɛ̀ yi lɛ Yeesus yɛɛ ri. 5 Yeesus à kpaaghà ɓɔ lɛ: Ɓɔɓti ɓɛ! ɓì yin foo ri com ki ɗiyɛn? Ɓɛ ɓaàg nyi lɛ: Àg. 6 À kpaa ɓɔ lɛ: Pìighna dam ɓi ɓɛg à kìkɔm à weèlem di fɔɔnnɛ ɓi ɓan ɓìzɛn. Nni ɓɛ pikà min dam, bee inɛ ɓɛɛ tug yì yɔ̀ yɛ̀ kɛɛ̀ ɓa ti, lɛ ɓìzɛn ɓi ɓaghà miì lɛɛ̀gwey. 7 Fɔɔnnɛ ǹ-yilàg ànɛ Yeesus àa nkeesàg à kpaaghà Pyɛɛri lɛ: Kan yɛɛ ri. Lɔŋ yɛ̀ɛ Simɔn Pyɛɛri à wokà fɔlɔɔ, à pùrɛ̀n kìlàà, ɓisuulɛ à ɓaghà kìtòn zɛy, à kpì ɓi rìɓày. 8 Nni ɓɛ̀yilàg ɓɛm̀bog ɓɛ yughày ɓi kìkɔm, di ɓɛɛ̀ syòŋsyoŋ yi dam ìnɛ ɓìzɛn ɓi ɓaghà miì lɛ pisa, ɓisuulɛ ɓɛ ɓiisɛ̀ngà ɓi ki ràɓsɛɛ ri ǹwɔŋì wu riɓày. Ǹwɔŋì wu riɓày wu ɓaghà di wu mɛ rɔ̀ɓ yi ɓɔ nunùg ɓɛ̀mità mɛ̀tin mɛtaǹ. 9 Yɛ̀ɛ ɓɛ sɛngà a cɛɗ, nni ɓɛ ghɛngà ɗuu ɗi ɓɛ̀ràŋ, rì ɓìzɛn miì aɗyoo rì bìrɛs. 10 Yeesus à kpaa ɓɔ lɛ: Yùunay rì ɓìzɛn ɓi ɓì ɓaniì. 11 Simɔn Pyɛɛri à ɓɔg ɓi kìkɔm à tùg yì dam ìnɛ ì ɓaghà rì ɓìzɛn lɛ pisa. Ɓìzɛn ɓincèm ɓi tɔɔghràkà, ɓi ki ɓaghà ɓìcèm ɓìzɛn mɛ̀tin taàɓɛ̀ɛ̀ rì ɓìzɛn ǹtɛ̀ɗ rì ɓiraa. Nni nsoò yɛ̀ɛ ɓi teghɛ̀ngà fɔlɔɔ dam ì ghàghàskà ɓi. 12 Yeesus à kpaa ɓɔ lɛ: Yùuna kì ɗiì, kɛ̀ɛ̀ kìbog ki ɓi ɓɛ̀yilàg ki ki ghɛɛsìghà lɛ kɛɛ tɔg nyi lɛ: Ù rì ghɛn? Lɛ ɓɛ yighà lɛ Kan yɛɛ ɓaghà. 13 Fɔɔnnɛ Yeesus à tyɛ̀ɛ̀tɛ̀ngà à teɗ bìrɛs, à fa ɓɔ, à fa girig ɓɔ ɓìzɛn. 14 Gɛ̀n i kìraa ìnɛ lɛ Yeesus a resɛn ɓɛ̀yilàg ɓii, à tumɛ̀n yɛ̀ɛ à ghèmɓɛ̀ngà a ɓìloŋ yɛ̀ɛ ɓaghà lɔɔ. 15 Ɓɛ ɓaghà lɛ, ɓɛ mɛ ɗi, Yeesus à kpaa Simɔn Pyɛɛri lɛ: Simɔn, man à Zyonas, ù keesii nya mɛ̀ ù cee lèg ànɛ ɓɛ̀roɓɛ ɓɛ keesii mɛ̀? Simɔn à ɓàg lɛ: Ɛ̀ɛ̀, Kan, ù yii lɛ ǹkeesii wɔ̀. Yeesus à kpaa nyi lɛ: Ɓèŋa jɔ̀ɔ̀ yɛm̀. 16 Nni Yeesus à kpaatìghà nyi ɓi gɛ̀n i kìɓɛ̀ɛ̀ lɛ: Simɔn man à Zyonas ù keesii nya mɛ̀? Pyɛɛri à ɓàg nyi lɛ: Ɛ̀ɛ̀, Kan, ù yii lɛ ǹkeesii wɔ̀. Yeesus à kpaa nyi lɛ: Ɓèŋa jɔ̀ɔ̀ yɛm̀. 17 Nni à kpaatìghà nyi ɓi gɛ̀n i kìraa lɛ: Simɔn man à Zyonas ù keesii nya mɛ̀? Pyɛɛri à ɓàg nyi lɛ: Kan, ù yii ɓìɓan ɓìcèm, ù ki yii lɛ ǹkeesii wɔ̀. Yeesus à kpaa nyi lɛ: Ɓèŋa jɔ̀ɔ̀ yɛm̀. 18 Ǹkpaa wɔ̀ ɓi saaɗ à rìkalì lɛ, cààmɛ̀n ki ù ɓaghà kìɓwɛɗ ki mum, wɔ̀ɔ nti ù sìnàg kànɗa wɛ̀ɛmiɗ, ù kɛ̀n jàŋ inɛ ù kɔ̀ni. Kìɓan kifog, yɛ̀ɛ ù ɓiì rùni, ù ri nàmgi ɓyàg ɓyɔɔ, ŋwaàdɛŋ yɛɛ siǹ wɔ̀ kànɗa, à ki kɛ̀n ɗi wɔ̀ jàŋ inɛ ù kɔ̀ni ɓi. 19 À kpaaghà fɔlɔɔ lɛ, a resi rìkuu ɗi riwù ɗi Pyɛɛri à ri kemzi Bɛ̀ll rì ɗyɔ. Yɛ̀ɛ à kpaaghà fɔlɔɔ, nni à kpaaghà Pyɛɛri lɛ: Nɔ̀ɔ̀ti mɛ̀! 20 Yɛ̀ɛ Pyɛɛri à lɔ̀ɔ̀ghrɛ̀ngà, nni à ghɛngà ǹ-yilàg ànɛ Yeesus àa nkeesàg di a nɔ̀ɔnɔɔ̀tì ɓɔ. N-yilàg ànɛ̀n yɛɛ loŋmɛ̀ngà Yeesus ɓi-reè di ɓɛɛ̀ ɗiɗì, à tɔg nyi lɛ: Kan, ghɛn yɛɛ ri wɔ̀ ɓiì kàɓi? 21 Yɛ̀ɛ Pyɛɛri à ghɛngà nyi, à tɔg Yeesus lɛ: Kan, cɛ kɛɛ̀ki roànɛ à ɓiì tulɛɛ ri kɔ̀? 22 Yeesus à ɓàg nyi lɛ: I ǹkɔ̀ni lɛ a ɓaɓa ɓi cɛɓ à kpaŋ yɛ̀ɛ ǹɗi sugtiì, ki ri wɔ̀ a cɛ? Wɔ̀ɔ̀ nɔ̀ɔ̀ti mɛ̀. 23 Ɓi jɛ̀ɛ̀ ìnɛn nnɛ ɓɔlɛ à sààghà ɓi nyìinyìm à ɓɛ̀geni ɓɛ ɓi rìgherɛ̀n lɛ ǹ-yilàg ànɛ̀n àa wu ɓi; kɔm̀ lɛ Yeesus à kpaaghà ɓi Pyɛɛri lɛ ǹ-yilàg ànɛ̀n àa wu ɓi. À kpaaghà lɔŋ lɛ: I ǹkɔ̀ni lɛ a ɓaɓa ɓi cɛɓ à kpaŋ yɛ̀ɛ ǹɗi sugtiì ki ri wɔ̀ a cɛ? 24 Ǹ-yilàg ànɛ̀n yɛɛ̀ ki tɛɛtɛɛ̀zì ɓìɓan ɓi, nnyɛɛ ki kàngà ɓyɔ. Ɓìsii ki yii lɛ com ki a kpaa ki ri saaɗ. 25 Yeesus à kìtìghà ɓìɓan ɓidɛŋ lɛɛ̀gwey. I ɓɛɛ kaǹkan ɓyɔ lɛ, kìfog kìfog, di ziinɛ bimiɗ ìrì lɛsàg, ɓi rìghɛn ɗyɛ̀m, ɓi kìɓan ki jàŋ inɛ ɓɛɛ foŋ̀ ɓɛ̀kaàtà ɓɛ ɓɛ ɓaghà lɛ ɓɛ kanɛ̀n.