Kəbɛrɛ ka kəcop moloku ma Luk
1 Ntɛ afum alarəm ŋaŋcop kəlompəs ka mes mmɛ mɛnacepər su dacɔ mɔ, 2 pəmɔ tɔkɔ akɔ ŋananəŋk mi dəkəcop, akɔ ŋanasom kəloku ka afum toloku ta Kanu mɔ. 3 Kəleləs kam, Teyofil, itɔ pəwurɛn’em fɔ pəntesɛ ina sɔ, ntɛ intɛn mi bel-bel kəyɛfɛ dəkəcop mɔ. Awa, isɔŋ’am mi kəcərɛ dəmecicəs pəmɔ tɔkɔ inatəkəs mi mɔ, 4 ntɛ tɔŋsɔŋɛ məcərɛ kaŋce ka mes mmɛ antəks’am mɔ.
Mɛlɛkɛ moloku kədekom ka Aŋnabi Saŋ
5 Tɛm ntɛ Herodu ɛnayɔnɛ wəbɛ ka atɔf ŋa Yude mɔ, wəloŋnɛ ka Kanu wəlɔma ɛnayi pac-we kɔ Yakariya, wəka kəgba ka aloŋnɛ nkɛ aŋc-wenɛ wətem Abiya mɔ ɛnayɔnɛ; wəran kɔn pəwur dokom da Aruna, pac-we kɔ Elisabɛt. 6 Mɛrəŋ maŋan fəp ŋanalomp fɔr ya Kanu kiriŋ, ŋacəmɛ sɔ dɔpɔ kɔ mosom ma Kanu Kəpɔŋ fəp darəŋ pəmɔ tɔkɔ pəmar mɔ. 7 Mba ŋanayɔ fɛ wan, bawo Elisabɛt ɛnayɔnɛ fɛ wəran wəkombəra, mɛrəŋ maŋan fəp ŋanasikər. 8 Dɔsɔk dɔlɔma Yakariya pəc-bəc yɛbəc yɔn ya kəloŋnɛ ka Kanu, bawo kəgba kəŋan kənakɔ kətɔmpər kəloŋnɛ kaŋkɔ. 9 Pəmɔ tɔkɔ aloŋnɛ a Kanu ŋaŋyɔ ti mɔ, k’aŋgbal kɔla; kɔ kɔla kəmentər Yakariya dɔsɔk dadɔkɔ kəbɛrɛ ka dəkəfo kəcempi ka kəlɔ kəpɔŋ pəkɔ-motɛ Kanu Kəpɔŋ curay. 10 Afum alarəm ŋanayi nde dabaŋka ŋac-lok-lokər Kanu tɛm tatɔkɔ aŋc-mot curay mɔ. 11 Awa, kɔ mɛlɛkɛ ma Kanu mowurər Yakariya, mɛcəmɛ nde kəca kətɔt ka aŋgbip nŋɛ aŋmot curay mɔ. 12 Ntɛ Yakariya ɛnəŋk mɛlɛkɛ mmɛ mɔ, kɔ pəyi kɔ yama-yama, kɔ kənesɛ kəsumpər kɔ. 13 Mba kɔ mɛlɛkɛ mmɛ moloku kɔ: «Ta mənesɛ Yakariya, bawo Kanu kəlɛk kətola kam: Elisabɛt, wəran kam, endekom’am wan wərkun məde məwe kɔ tewe ta Saŋ. 14 Wan wəkakɔ endesɔŋ’am kəyekti domp pəbɔt’əm sɔ mes; kəkom kɔn kəndesɔŋɛ afum alarəm kəselsər. 15 Bawo fum wəpɔŋ endeyi fɔr ya Kanu Kəpɔŋ kiriŋ; ɔfɔde pəc-mun member, ɔfɔde pəc-mun yomunəs nyɛ yeŋcisəs mɔ, endelarɛ Amera Ŋecempi ŋa Kanu pəsɔrɔ-yi kɛrɛ dəkor. 16 Endeluksɛ awut a Yisrayel alarəm nnɔ Kanu Kəpɔŋ, Kanu kəŋan, kəyi mɔ. 17 Kanu kəndesak Saŋ pəyi Wəbɛ kiriŋ kəderɛnɛ amera kɔ fənɔntər ya wədəŋk wəka Kanu Eliya. Endekafəli bəkəc ya cas nnɔ awut ŋayi mɔ, bəkəc ya ataŋi ləŋəs nnɔ kəsɔk domp ka alompu kəyi mɔ, pəlompəs afum aŋɛ ŋandeyi kiyi ka Kanu Kəpɔŋ tɛm fəp mɔ.» 18 Kɔ Yakariya eyif mɛlɛkɛ: «Cəke cɔ indecərɛnɛ, a kaŋce kɔ-ɛ? Bawo wətem iyɔnɛ kɔ wəran kem sɔ ɛmbɛk.» 19 Kɔ mɛlɛkɛ mɔsɔŋɛ kɔ kəcərɛ, moc-loku kɔ : «Ina ɔyɔnɛ Yibirila nwɛ ɛŋcəmɛ Kanu fɔr kiriŋ mɔ! Asom’im kəsom dəm kədelok-lokər’əm, ilok’əm toloku tɔtɔt tantɛ. 20 Mba ntɛ məntɔlaŋ moloku mem mɔ, məfɔdesɔ-tam kəlok-loku haŋ dɔsɔk ndɛ tendeyi mɔ, tɛm ntɛ Kanu kəndefaŋ mɔ.» 21 Ntɛ afum fəp ŋac-kar Yakariya nde dabaŋka mɔ, kɔ pənde pəciyanɛ ŋa, bawo oŋc-won dəndo kəfo kəcempi. 22 Yakariya endewur, ɛntam fɛ kəlok-lokər ŋa, kɔ afum ŋaŋcərɛ a Kanu kəsɔŋɛ Yakariya kənəŋk tes tɔlɔma dəndo kəfo kəcempi disrɛ. Kɔ Yakariya ɔyɔnɛ wətɔtam kəlok-loku, k’ɛyɛfɛ kəlok-lokərɛ ŋa waca. 23 Ntɛ mataka mɔn ma yɛbəc meŋcepər mɔ, k’olukus nde kəlɔ kɔn. 24 Pəwon fɛ, kɔ wəran kɔn Elisabɛt ɛmbɛkəs. K’ɔŋgbɔpnɛ yof kəcamət, pəc-loku: 25 «Ntɛ tɔ Kanu Kəpɔŋ kəyɔn’em, kəntɛp oŋ kədewosɛ kəwur’em malap nnɔ afum ŋayi mɔ.»
Mɛlɛkɛ moloku kədekom k’Aŋnabi Yesu
26 Ŋof ŋa camət-tin ŋa kəbɛkəs kɔn, kɔ Kanu kəsom mɛlɛkɛ Yibirila nde dare dɔkɔ aŋwe Nasarɛt mɔ, atɔf ŋa Kalile, 27 ndena wan wəran wətɔcərɛ wərkun, nwɛ aŋc-we Mari mɔ. Isifu wəka dokom da Dawuda ɛŋc-fac kɔ. 28 Kɔ mɛlɛkɛ mɛmbɛrɛ ndena Mari, kɔ moloku: «Pəbɔt’əm, məna nwɛ Kanu kəmar kəfili mɔ; Kanu Kəpɔŋ kəsol’am!» 29 Kɔ toloku tatɔkɔ tɔsɔŋɛ kɔ pəyi Mari yama-yama. K’eyifnɛ ntɛ kəyif kaŋkɔ kəloku mɔ. 30 Kɔ mɛlɛkɛ moloku kɔ: «Ta mənesɛ Mari, bawo məsɔtɔ kəmar kəfili nkɛ kəyɛfɛ ndena Kanu mɔ. 31 Mənəŋk fɛ! Kəbɛkəs kɔ mənder, məkom wan wərkun, məde məwe kɔ tewe ta Yesu. 32 Fum wəpɔŋ endeyi, pac-we kɔ wan ka Wəbɛ wəka dareŋc, Kanu Kəpɔŋ kəndesɔŋ kɔ kəŋgbasar ka dɛbɛ da Dawuda, wətem kɔn. 33 Nkɔn endekekərɛ dɛbɛ da doru o doru nnɔ aka dolom da Yakuba ŋayi mɔ, dɛbɛ dɔn dɔfɔdelip.» 34 Kɔ Mari eyif mɛlɛkɛ: «Cəke cɔ tatɔkɔ tɛntam kəyi-ɛ, bawo iŋcərɛ fɛ wərkun?» 35 Kɔ mɛlɛkɛ moloku kɔ: «Amera Ŋecempi ŋa Kanu ŋendeder’əm, fənɔntər fa Wəbɛ wəka dareŋc fəkump’əm katəkəp kɔn. Itɔ endesɔŋɛ wan nwɛ andekom mɔ kəcemp, pac-kulɛ kɔ «Wan ka Kanu.» 36 Mənəŋk fɛ! Elisabɛt wəkomɛnɛ kam, nkɔn sɔ ɛmbɛkəs wan wərkun detembəra dɔn disrɛ. Nkɔn nwɛ aŋc-kulɛ kətɔ-kom mɔ, ŋof ŋɔn ŋa camət-tin ŋa kəbɛkəs ŋeyi ŋaŋɛ, 37 bawo Kanu kəfɔtarpɛnɛ tes o tes.» 38 Kɔ Mari oloku: «Kanu kəyɔn’em tatɔkɔ məntɛp kəc-loku mɔ. Wəcar ka Kanu Kəpɔŋ iyɔnɛ; intola teyi pəmɔ tantɛ məlok’im ti mɔ.» Kɔ mɛlɛkɛ mɛyɛfɛ kɔ day kɔ mɔŋkɔ.
Mari kəkɔtəs ndena Elisabɛt pəkɔ-nəŋk kɔ
39 Mata mamɔkɔ, kɔ Mari ɛyɛfɛ kəkɔ katəna-katəna dare da Yuda dɔlɔma, nde atɔf ŋa dəmɔrɔ. 40 K’ɔŋkɔ pəbɛrɛ kəlɔ ka Yakariya, k’eyif Elisabɛt. 41 Elisabɛt endene kəne dəm kəyif ka Mari, kɔ wan ɛsɛp kɔ dəkor. Kɔ Amera Ŋecempi ŋa Kanu ŋɛlarɛ katin Elisabɛt, 42 kɔ ŋɔsɔŋɛ Elisabɛt kəgbəŋɛ kəloku: «Kanu kəmpoc’am pətɔt aran fəp dacɔ, 43 Ak’ iyɔnɛ ntɛ iya wəka Wəbɛ kem endeder kəyif’im mɔ? 44 Ntɛ ine kəyif kam mɔ, kɔ wan ɛsɛp’im dəkor pəbotu disrɛ. 45 Pəbɔt nwɛ ɛnalaŋ mɔ, bawo ntɛ Kanu Kəpɔŋ kənaloku kɔ mɔ tendeyi.» Teleŋ ta Mari tokor-korɛ Kanu 46 Kɔ Mari oloku oŋ: «Iŋkor-koru Kanu Kəpɔŋ kətam kem fəp, Kanu kəpocɛ pətɔt pokom pa kor kam! 47 Amera ŋem ŋɛlarɛ pəbotu teta Kanu Kəpɔŋ Wəyac kem; 48 bawo owosɛ kəgbal fɔr nnɔ ina, wəcar kɔn wəfəfər iyi mɔ. Ɛy, kəyɛfɛ ndɛkəl haŋ tɛm fəp, afum ŋande ŋac-lok’im a pəmbɔt’im, 49 bawo Wəka fənɔntər nwɛ ɔyɔn’em mes mɔpɔŋ mɔ, tewe tɔn teŋcemp! 50 Kəbɔt ka Kanu amera kəŋyɛfɛ dɛtɛmp kɔ dɛtɛmp akɔ ŋaleləs ki mɔ. 51 Kəmentər fənɔntər fa kəca kɔn: kɔ kəsaməsər afum akɔ ŋanabɛk bəkəc mɔ; 52 kɔ kəŋgbal abɛ apɔŋ dɛbɛ daŋan kɔ kəŋcəmbər afəfər kiriŋ. 53 Kɔ kəsɔŋɛ kənɛmbərɛ pətɔt aŋɛ dor dɛnayɔ mɔ; kɔ kəmbɛləs akɔ ŋanayɔ daka mɔ waca wɔsɔkər. 54 Kɔ kənder kədemar aka Yisrayel, amarəs ɔn: kəmpələrnɛ fɛ kəmentər dobotu amera dɔn 55 a Abraham kɔ yuruya yɔn ta doru o doru —pəmɔ tɔkɔ ɛnaloku ti atem asu mɔ.» 56 Kɔ Mari ŋayi kɔ Elisabɛt haŋ yof maas, k’olukus nde ndɔrɔn.
Kəkom ka Aŋnabi Saŋ Baptist
57 Kɔ tɛm tɛmbəp ntɛ pənamar Elisabɛt pəkom mɔ, k’oŋkom wan wərkun. 58 Andɛ ɔn kɔ akomɛnɛ ɔn ŋane, a Kanu kəntorɛ kɔ pəforu disrɛ, kɔ pəmbɔt ŋa fəp faŋan. 59 Tataka ta camət-maas ta kəkom kɔn, kɔ ŋander kədekəŋc ka wan, kɔ ŋasɔŋɛnɛ kɔ tewe ta kas Yakariya. 60 Mba kɔ kɛrɛ ɛlɛk moloku, k’oloku: «Ala, Saŋ sɔ andewe kɔ.» 61 Mba afum ŋaloku kɔ: «Ali fum eyi fɛ dokom dam nwɛ aŋwe tewe tantɛ mɔ.» 62 Kɔ afum ŋayɛfɛ kəyifətɛ kas waca, tewe ta wan ntɛ ɛfaŋ pawe kɔ mɔ. 63 Kɔ Yakariya ewe tabam, k’eŋcic: «Saŋ sɔ andewe kɔ.» Kɔ pəŋciyanɛ afum fəp. 64 Kɔ kusu kɔn kəmepɛ katina, kɔ temer tɔn tɛyɛfɛ; k’ɛyɛfɛ kəkor-koru ka Kanu. 65 Kɔ kənesɛ kəyi andɛ ɔn fəp, kɔ mes mamɔkɔ mɛmbaŋ atɔf ŋa Yude fəp, pac-yifətɛnɛ mi. 66 Nwɛ o nwɛ ene pac-loku mi, teŋyi kɔ dɛbəkəc, ŋac-yifnɛ: «Ake wan wəkakɔ endeyɔnɛ oŋ-ɛ?» Kɔ fənɔntər fa Kanu Kəpɔŋ fəŋcəmɛ kɔ darəŋ.
Teleŋ ta Yakariya tokor-korɛ Kanu
67 K’Amera Ŋecempi ŋa Kanu ŋɛlarɛ Yakariya papa ka Saŋ, k’ɛyɛfɛ kədəŋk moloku mmɛ Kanu kənasɔŋ kɔ kəloku mɔ, pəc-loku: 68 «Iŋkor-kor’əm məna Kanu Kəpɔŋ, Kanu ka aka Yisrayel, bawo kənder kəmar afum ɔn, kɔ kəmbaŋ ŋa. 69 Kəwurɛ su wəyac wəpɔŋ, dokom da Dawuda, wəmarəs kɔn. 70 —Itɔ Kanu kənalok-lokɛ cusu ca adəŋk ɔn acempi kəyɛfɛ ntɛ pənawon mɔ— 71 kənasɔŋ su temer kədebaŋ su aterɛnɛ asu dəwaca kɔ kətam ka akɔ ŋantɔfaŋɛ su pətɔt mɔ. 72 Itɔ kənamentərɛ amera ŋobotu ŋa ki atem asu, kɔ kəŋcɛm-cɛmnɛ kəcaŋəs kəcempi kəŋan kəyi tes tin. 73 Pəmɔ kədɛrəm kaŋkɔ Kanu kənadɛrmɛ Abraham wətem kosu, itɔ ɛlasɛ su ki, 74 a kɔ kəndebaŋ su aterɛnɛ asu dəwaca-ɛ, kəndesɔŋɛ su tɛm tatɔkɔ pac-kor-koru kɔ bəkəc yoforu disrɛ, 75 ntɛ tɔŋsɔŋɛ pakor-koru kɔ decempi kɔ dolompu disrɛ fɔr yɔn kiriŋ kiyi kosu doru fəp mɔ. 76 Kɔ məna wan kem, wədəŋk wəka Wəbɛ wəka dareŋc ɔ andew’am. Məna endeyi Wəbɛ kiriŋ, məc-lompəs səpɔ sɔn. 77 Məkɔ məsɔŋɛ afum ɔn kəcərɛ a Kanu kənder kədeyac ŋa, kəŋaŋnɛnɛ ŋa kiciya kəŋan. 78 Ɛy! Teta dɛrɛŋc kɔ dobotu amera da Kanu kosu, kəmot su pəwaŋkəra pa dareŋc, mpɛ powurɛnɛ kɔ pəwaŋkəra pa dec dɛpɛŋcɛ mɔ. 79 Ntɛ tɔŋsɔŋɛ akɔ ŋayi kubump kɔ akɔ ŋayi katəkəp ka defi dəntɔf mɔ, ŋasɔtɔ pəwaŋkəra, kəsolɛ su sɔ dɔpɔ da pəforu.» 80 Kɔ wan ɛmbɛk, pəc-sɔtɔ fənɔntər fa amera. K’eyi dəndo dətɛgbɛrɛ haŋ dɔsɔk ndɛ ɛnamentərnɛ nnɔ afum aka Yisrayel ŋayi mɔ.
Kəkom ka Aŋnabi Yesu (Isa)
1 Mata mamɔkɔ mɔ, Okustu wəbɛ wəpɔŋ wəka tɔf ya Rom fəp, osom kəlɔm ka afum aŋɛ ŋanayi dɛbɛ dɔn dəntɔf mɔ fəp. 2 Kəlɔm kəcɔkɔ-cɔkɔ kaŋkɔ kənayi tɛm ntɛ Okustu ɛnacəmbər Kureniyo, pəyɔnɛ wəbɛ ka atɔf ŋa Siri mɔ. 3 Kɔ afum fəp ŋaŋkɔ kəsɔŋnɛ mewe nwɛ o nwɛ nde dare dɔn dɔpɔŋ ndɛ aŋkom kɔ mɔ. 4 Kɔ Isifu nkɔn sɔ ɛmpɛ kəyɛfɛ dare da Nasarɛt atɔf ŋa Kalile kəkɔ dare da Dawuda ndɛ aŋwe Betlɛhɛm mɔ, bawo Isifu wəka kəlɔ kɔ dokom da Dawuda dɔ ɛnayɔnɛ. 5 Ntɛ tɔŋsɔŋɛ pəsɔŋnɛ tewe kɔ Mari, wəran nwɛ ɛŋc-fac mɔ, wəkakɔ pəbɛkəs. 6 Ŋanasɔrɔ-yi di, kɔ tɛm ta Mari tokom tɛmbəp, 7 k’oŋkom wan kɔn wəcɔkɔ-cɔkɔ wərkun. K’ɔfɔktər kɔ dəkəloto, k’ɔŋkɔ pəboc kɔ dətaŋku ntɛ aŋc-bɛrɛ yɔcɔl yeri mɔ, bawo ŋanasɔtɔ fɛ kəfo dəndo dəkarwaŋse.
Mɛlɛkɛ ma Kanu mowurər akɛk yɔcɔl
8 Atɔf ŋin ŋaŋɔkɔ ŋɛnayɔ akɛk aŋɛ ŋaŋc-cepərɛnɛ pibi dəkulum kəbum ka yɔcɔl yaŋan mɔ. 9 Kɔ mɛlɛkɛ ma Kanu Kəpɔŋ mowurər ŋa, kɔ pəmot pa debeki da Kanu Kəpɔŋ pɛŋkɛl ŋa. Kɔ kənesɛ kəpɔŋ kəyi ŋa. 10 Mba kɔ mɛlɛkɛ moloku ŋa: «Ta nənesɛ! Bawo toloku tɔtɔt tɔ inder kədeloku nu, ntɛ tendebɔtəs afum fəp bəkəc mɔ: 11 Mɔkɔ, nde dare da Dawuda disrɛ, aŋkom’on wəyac, nwɛ ɔyɔnɛ Wəbɛ, nwɛ Kanu kəyɛk-yɛk mɔ. 12 Ntɛ tendeyɔn’on tɛnɛpəlɛ taka ti: Nəŋkɔ-bəp kənaka pafɔktər ki dəkəloto, kəfəntərɛ dətaŋku ntɛ ambɛrɛ yɔcɔl yeri mɔ. 13 Pəwon fɛ, kɔ kənay ka mɛlɛkɛe ma dareŋc kəmɛpnɛ katina mɔcɔkɔ-cɔkɔ kəkor-koru ka Kanu, moc-loku: 14 «Debeki da Kanu deyi dareŋc, bəkəc yɔfɔr akɔ ŋayi dəntɔf ak’ ɔmbɔtər ŋa mɔ!»
Akɛk kəkɔ kəŋan Betlɛhɛm
15 Ntɛ mɛlɛkɛe mɛsak ŋa kɔ mɛmpɛ dareŋc mɔ, kɔ akɛk ŋalokɛnɛ: «Awa, paŋkɔn haŋ Betlɛhɛm, pakɔ panəŋk tɔkɔ teyi mɔ, ntɛ Kanu Kəpɔŋ kəsɔŋɛ su kəcərɛ mɔ.» 16 Kɔ akɛk ŋambɛlkər kəkɔ, kɔ ŋaŋkɔ ŋabəp Mari kɔ Isifu, kənaka kəfəntərɛ taŋku pɛbɛrɛ pa yɔcɔl yeri. 17 Ntɛ ŋalip kənəŋk ti mɔ, kɔ ŋalɔm tɔkɔ analoku ŋa teta wan kakɔ mɔ. 18 Akɔ ŋanacəŋkəl moloku mɔkɔ akɛk ŋaŋc-lɔmər ŋa mɔ fəp, kɔ meŋciyanɛ ŋa. 19 Kɔ Mari ɛmɛŋkərnɛ moloku mamɔkɔ fəp, pəc-cɛm-cɛmnɛ mi dɛbəkəc. 20 Kɔ akɛk ŋaluksərnɛ sɔ nde ŋanayɛfɛ mɔ, ŋac-cam debeki da Kanu, ŋaŋc-kor-koru Ki teta moloku mɔkɔ mɛlɛkɛ mɛnaloku ŋa, a kɔ ŋanəŋk sɔ mi mɔ.
Kəwurɛ ka Aŋnabi Yesu doru
21 Ntɛ kəkom ka wan kəsɔtɔ mata camət-maas mɔ, k’aŋkəŋc kɔ, k’awe kɔ Yesu, tewe ntɛ mɛlɛkɛ mɛnaboŋcər ŋa, ta antabɛkəs kɔ mɔ.
Kəmentər ka Aŋnabi Yesu nde kəlɔ kəpɔŋ ka Kanu
22 Ntɛ mataka maŋan ma kəsɔkəsnɛ melip pəmɔ ntɛ sariyɛ sa Musa səloku ti mɔ, kɔ ŋaŋkekərɛ kɔ Yerusalɛm kəkɔ-mentər kɔ Wəbɛ Kanu. 23 Ŋanayɔ mɔyɔ mɔkɔ aŋcic buk ba sariyɛ sa Wəbɛ disrɛ mɔ: «Awut arkun acɔkɔ-cɔkɔ aŋɛ aran ŋaŋkom mɔ fəp, pəmar pasɔŋ ŋa Wəbɛ Kanu ŋayɔnɛ acempi.» 24 Pəmar sɔ akombəra a wan wəkakɔ ŋaloŋnɛ Kanu «mɔpay mɛrəŋ, kɔ pəyɔnɛ fɛ ti-ɛ, ntantoriya yowut mɛrəŋ,» pəmɔ tɔkɔ aloku ti sariyɛ sa Wəbɛ disrɛ mɔ. 25 Tɛm tatɔkɔ fum wəlɔma ɛnayi Yerusalɛm pac-we kɔ Simɔŋ. Fum wəlompu ɛnayi pəcəmɛ dɔpɔ da Kanu darəŋ, pəc-kar nwɛ endeyac Yisrayel mɔ, Amera Ŋecempi ŋa Kanu ŋɛnayi kɔ kəroŋ. 26 Amera Ŋecempi ŋaŋɔkɔ ŋɛnasɔŋɛ kɔ kəcərɛ, a ɔfɔfi ta ɛnəŋk Krist, wəbɛ nwɛ Kanu Kəpɔŋ kəyɛk-yɛk mɔ. 27 Kɔ Amera Ŋecempi ŋa Kanu ŋɔŋcɔŋəs kɔ, k’ɔŋkɔ nde kəlɔ kəpɔŋ ka Kanu. Ntɛ akombəra a Yesu ŋaŋkekərɛ kɔ kəkɔ-yɔnɛ kɔ tɔkɔ sariyɛ səloku mɔ, 28 kɔ Simɔŋ ɛlɛk wan dəwaca k’oŋkor-koru Kanu pəc-loku: 29 «Wəbɛ, məntam oŋ kəsak wəcar kam pəfinɛ abəkəc ŋoforu pəmɔ tɔkɔ mənaloku ti mɔ, 30 bawo fɔr yem yati yɔ inəŋkɛ ntɛ məyɔ kəyac ka afum am mɔ— 31 Nwɛ məlompəs afum fəp fɔr kiriŋ mɔ— 32 endeyɔnɛ pəmɔ pəmot mpɛ pendesɔŋ afum a tɔf ya doru fəp pəwaŋkəra it’ ɔŋsɔŋɛ ŋacərɛ Kanu. Nwɛ endeyɔnɛ pəlel pa afum am, aka Yisrayel.»
Simɔŋ kəloku ka tɔkɔ Kanu kəndeyɔ mɔ
33 Kɔ pəŋciyanɛ akombəra a Yesu ntɛ Simɔŋ oŋc-loku teta Yesu mɔ. 34 Kɔ Simɔŋ ontolanɛ ŋa, k’oloku Mari iya wəka Yesu: «Kanu kəŋkɛrɛ wan wəkawɛ kədesɔŋɛ aka Yisrayel alarəm kətɛmpɛnɛ, pəyekti sɔ alarəm. Paka pa Kanu pɔ mpɛ pendesɔŋɛ afum kəgbɛkəlɛnɛ mɔ. 35 Endebɛr pəwaŋkəra bəkəc ya akɔ ŋayɔ mɛcɛm-cɛmnɛ mɔgbɔpnɛ mɔ. Kɔ məna Mari, pəcuy pendefut’əm abəkəc pəmɔ tɔkɔ kəŋgbasar kəŋfutu mɔ.»
Wədəŋk wəka Kanu wəran Hana
36 Wədəŋk wəran wəlɔma ɛnayi pac-we kɔ Hana, wan ka Panuyɛl, wəka kusuŋka ka Aser. Wəran wəsikər ɛnayi. Ɛnalɔ nda wərkun meren camət-mɛrəŋ kəyɛfɛ ntɛ anagbaŋnɛ kɔ mɔ. 37 Kɔ wos ende pəfi, k’eyi oŋ ta ɔyɔ wərkun-ɛ. Hana pəsɔtɔ meren 84 k’eyi, ta ɔmbɔlɛ kəlɔ kəpɔŋ ka Kanu-ɛ pəc-bəc mɛfaŋ ma Kanu daŋ kɔ pibi kəlok-lokər Kanu kɔ kəsuŋ disrɛ. 38 Kɔ nkɔn ɔŋkɔ sɔ pəbɛrɛ di tɛm tatɔkɔ Simɔŋ oŋc-loku teta wan pəc-kor-koru sɔ Kanu mɔ; pəc-yif Kanu nəwali, pəc-loku teta wan akɔ ŋaŋc-kar Kanu kədeyac Yerusalɛm mɔ.
Kəlukus ka Nasarɛt
39 Ntɛ akombəra a Yesu ŋalip kəyɔ ka mɔyɔ mɔkɔ aloku sariyɛ sa Kanu Kəpɔŋ disrɛ mɔ, kɔ ŋalukus nde ndaraŋan Kalile, nde dare da Nasarɛt. 40 Awa, wan pəc-bɛk, pəc-sɔtɔ fənɔntər. Pəlarɛ kəcərɛ ka pɔkɔt, kəmar kəfili ka Kanu kəyi kɔ kəroŋ.
Aŋnabi Yesu kəkɔ ka nde Kəlɔ kəpɔŋ teren tɔn ta wəco kɔ mɛrəŋ
41 Kəren o kəren, akombəra a Yesu ŋaŋc-kɔ Yerusalɛm kətəŋnɛ kəsata ka aSuyif ka Kəcepər. 42 Ntɛ Yesu ɔsɔtɔ meren wəco kɔ mɛrəŋ mɔ, kɔ akombəra ɔn ŋasolɛ kɔ kəkɔ-təŋnɛ kəsata ka Kəcepər dəndo Yerusalɛm pəmɔ tɔkɔ ŋaŋc-yɔ ti kəren o kəren mɔ. 43 Ntɛ mataka ma kəsata melip mɔ, kɔ akombəra a Yesu ŋasumpər dɔpɔ kəlukus ndaraŋan, mba kɔ wan Yesu nkɔn eyi Yerusalɛm, ta akombəra ɔn ŋaŋcərɛ ti-ɛ. 44 Akombəra ɔn ŋanacɛm-cɛmnɛ a Yesu ŋasol kɔ alukus, kɔ ŋaŋkɔt tataka tin. Kɔ ŋantɛn Yesu akomɛnɛ kɔ acərɛnɛ aŋan dacɔ. 45 Mba ŋananəŋk fɛ kɔ. Kɔ ŋaluksərnɛ sɔ Yerusalɛm ŋac-tɛn kɔ. 46 Mata maas disrɛ, kɔ ŋaŋkɔ ŋanəŋk kɔ nde kəlɔ kəpɔŋ ka Kanu disrɛ, pəndɛ atəksɛ dacɔ pəc-cəŋkəl ŋa, pəc-yifət ŋa moloku. 47 Aŋɛ ŋaŋc-cəŋkəl kɔ mɔ fəp, cusu cənawos ŋa dosoku domp dɔn, kɔ moloku mmɛ oŋc-luksɛ ŋa mɔ. 48 Ntɛ akombəra ɔn ŋanəŋk kɔ mɔ, kɔ pəŋciyanɛ ŋa. Kɔ kɛrɛ eyif kɔ: «Wan kem, ta ake tɔ məyɔnɛ su tantɛ-ɛ? Papa kam kɔ ina, bəkəc yɛlɛcɛ-lɛcɛ su kətɛn kam!» 49 Kɔ Yesu eyif ŋa: «Ta ake tɔ nəntɛn’em-ɛ? Nəŋcərɛ fɛ a mɛnɛ isumpər yɛbəc ya Papa kem?» 50 Mba akombəra ɔn ŋanacərɛ fɛ tedisrɛ ta toloku tatɔkɔ. 51 Kɔ Yesu ɛyɛfɛ kɔ ŋasol kɔ akombəra ɔn kəkɔ ka Nasarɛt, bawo Yesu ɛnaleləs ŋa. Kɔ iya kɔn ɛmɛŋkərnɛ dɛbəkəc mes mamɔkɔ fəp. 52 Yesu pəc-bɛrɛnɛ kəcərɛ pətɔt, pəc-naŋkanɛ kəbɛk, pəc-sɔtɔ kəmar kəfili ka Kanu kɔ afum.
Kawandi ka Aŋnabi Saŋ
1 Teren ta wəco kɔ kəcamət ta wəbɛ wəka atɔf ŋa Tibɛr, tɛm tatɔkɔ sɔ Pɔŋse Pilat pəyɔnɛ wəbɛ wəka atɔf ŋa Yude, Herodu nkɔn pəyɔnɛ wəbɛ ka atɔf ŋa Kalile, wɛŋc Filip pəyɔnɛ wəbɛ wəka tɔf mɛrəŋ: nde Iture kɔ atɔf ŋa Tirakoniti. Lisaniyas pəyɔnɛ wəbɛ nde atɔf ŋa Abilɛn. 2 Tɛm ta aloŋnɛ a Kanu apɔŋ Hana kɔ Kayifa tɛnayi sɔ. Kɔ toloku ta Kanu tender Saŋ, wan ka Yakariya, nde dətɛgbɛrɛ. 3 Kɔ Saŋ ɔŋkɔt sədare sa Yurdɛn fəp, pəc-kawandi kəgbət afum dəromun teta kəsəkpər mera yaŋan, ŋacəmɛ pəlompu darəŋ, ntɛ tɔŋsɔŋɛ Kanu kəŋaŋnɛ ŋa kiciya kəŋan mɔ. 4 Pəmɔ tɔkɔ aŋcic mi nde buk ba moloku ma wədəŋk wəka Kanu Esayi mɔ: «Dim da wəkɔ eyi kəkulɛ-kulɛ nde dətɛgbɛrɛ mɔ dɔ: Nəlompəs dɔpɔ da Kanu Kəpɔŋ, Nəlompɛ mɔpɔ mɔn! 5 Andelas mɔrɔ dacɔ fəp, mɔrɔ kɔ pəŋeci fəp yendetor, Səpɔ sənutəsnɛ fəp səndelomp, Səpɔ səcumbul-cumbul fəp, andeyukur si, 6 Afum fəp ŋandenəŋk kəyac ka Kanu.» 7 Afum alarəm akɔ ŋaŋc-der nkɔn Saŋ pədegbət ŋa dəromun mɔ, ŋɔ oŋc-loku ti: «Nəna aŋɛ nəyi pəmɔ bok mɔ! Anɔ ɛtəks’on kəyɛksər ka mɛtɛlɛ mmɛ mender mɔ-ɛ? 8 Nəmentər dəmɔyɔ a nəŋsəkpər mera, kɔ nəŋcəmɛ pəlompu darəŋ. Nəsak kəc-lokunɛ: ‹Abraham ɔyɔnɛ wətem kosu.› Bawo ic-lok’un a Kanu kəntam kəkafəli masar mamɛ awut a Abraham. 9 Ndɛkəl oŋ tomunt tɛfaŋ kəcop kəcɛpəs tɔk haŋ ntɛntəl ya yi: Kətɔk nkɛ o nkɛ kətɔkom yokom yɔtɔt, aŋcɛp ki paləm ki dənɛŋc.» 10 Kɔ cəgba ca afum cəyɛfɛ kəyifət kɔ: «Cəke cɔ səndeyɔ oŋ-ɛ?» 11 K’oloku ŋa: «Məna nwɛ məŋyɔ suma mɛrəŋ mɔ, məpocɛ wəkɔ ɔntɔyɔ mɔ, məna nwɛ məŋyɔ yeri mɔ, məpocɛ wəkɔ ɔntɔyɔ mɔ.» 12 Kɔ abaŋəs dut ŋander a Saŋ pəgbət ŋa dəromun, ŋac-yifət kɔ: «Wətəksɛ, cəke cɔ pəmar sədeyɔ oŋ-ɛ?» 13 K’oloku ŋa: «Ta nədeŋər mpɛ o mpɛ antɔlok’un kəbaŋ mɔ.» 14 Kɔ asɔdar ŋayif kɔ sɔ: «A səna-a, cəke cɔ pəmar səyɔ oŋ-ɛ?» K’oloku ŋa: «Ta nəmentər nwɛ o nwɛ fənɔntər, ta nədeŋɛ sɔ nwɛ o nwɛ yem, kəway konu kətəŋn’on.» 15 Ntɛ afum fəp ŋanayi kəkar mɔ, kɔ ŋaŋyifnɛ dəbəkəc kɔ pəyɔnɛ bafɔ Saŋ ɔyɔnɛ Krist, nwɛ Kanu kəpɔŋ kəyɛk-yɛk mɔ. 16 Kɔ Saŋ oloku ŋa: «Ina dəromun iŋgbət’un de, mba wəlɔma eyi kəder nwɛ ɔyɔ fənɔntər pətas’im mɔ, ali cɔfta cɔn iyɔ fɛ dofum ndɛ pəmarɛ isikəli ci mɔ. Wəkakɔ, Amera Ŋecempi ŋa Kanu disrɛ kɔ nɛŋc yɔ ende pəc-gbət’un. 17 Pətɔmpər kəgbo kɔn pəc-fɛŋət kur kɔn; endecɛŋ-cɛŋ yika nyɛ endecɔfɛ nɛŋc ndɛ dɔntɔdenimɛ mɔ, pəlɛk malɔ mɔn pəbɛr dəkɛlɛ.» 18 Saŋ oŋc-loku sɔ afum moloku mɔtɔt pəc-yeŋkəs ŋa sɔ bəkəc bel-bel. 19 Mba kɔ Saŋ ɛnal wəbɛ Herodu teta Herodiyas, wəran nwɛ ɛnabaŋər wɛŋc k’ɛnɛŋcɛ mɔ, kɔ teta mes mɛlɛc mɔkɔ Herodu ɛnayɔ mɔ. 20 Kɔ Herodu ende pənaŋkanɛ kələsər: k’osumpər Saŋ, k’ɛmbɛr kɔ dəbili.
Kəsɔkəs ka Aŋnabi Yesu
21 Ntɛ afum ŋasɔtɔ kəgbət dəromun mɔ, kɔ Yesu nkɔn sɔ ɔsɔtɔ kəgbət dəromun. Eyi kəlok-lokər Kanu, kɔ kɔm kəŋgbitɛ, 22 kɔ Amera Ŋecempi ŋa Kanu ŋontorər kɔ, ŋɛtəŋkəlɛ dis d’ abɛmp, pəmɔ antantoriya. Kɔ dim dontor kəyɛfɛ dareŋc: «Wan kem nwɛ imbɔtər mɔ məyɔnɛ, pəbotu pem fəp pɔ imbɛr’əm.»
Akombəra a Aŋnabi Yesu
23 Yesu ɛnasɔtɔ meren 30 , a pədecop yɛbəc yɔn. Wan ka Isifu ɛnayi pəmɔ tatɔkɔ anacɛm-cɛmnɛ ti mɔ, wəka Heli, 24 wəka Matat, wəka Lewy, wəka Melki, wəka Yannay, wəka Isifu, 25 wəka Matatiyas, wəka Amɔs, wəka Nahum, wəka Hesəli, wəka Nakay, 26 wəka Mahat, wəka Matatiyas, wəka Semeyin, wəka Yosɛk, wəka Yoda, 27 wəka Yohanaŋ, wəka Resa, wəka Sorobabɛl, wəka Salatiyɛl, wəka Neri, 28 wəka Melki, wəka Adi, wəka Kosam, wəka Ɛlmadam, wəka Er, 29 wəka Yesu, wəka Eliyɛsɛr, wəka Yorim, wəka Matat, wəka Lewy, 30 wəka Simɔŋ, wəka Yuda, wəka Isifu, wəka Yonam, wəka Eliyakim, 31 wəka Meleya, wəka Mɛnna, wəka Matata, wəka Natan, wəka Dawuda, 32 wəka Yisay, wəka Obɛd, wəka Bɔs, wəka Sala, wəka Nasɔŋ, 33 wəka Aminadabu, wəka Admin, wəka Arni, wəka Hɛcəron, wəka Perɛc, wəka Yuda, 34 wəka Yakuba, wəka Isiyaka, wəka Abraham, wəka Terah, wəka Nahor, 35 wəka Seruk, wəka Rehu, wəka Pɛlɛk, wəka Heber, wəka Sala, 36 wəka Kayinan, wəka Arpaksadu, wəka Semy, wəka Nuha, wəka Lɛmɛk, 37 wəka Metusela, wəka Henok, wəka Yɛrɛdu, wəka Mahalalel, wəka Kenan, 38 wəka Enɔs, wəka Sɛt, wəka Adama, wəka Kanu.
Sentani kəfaŋ kəsɔŋɛ Aŋnabi Yesu kəciya
1 Kɔ Yesu ender kəyɛfɛ Yurdɛn, pəlarɛ Amera Ŋecempi ŋa Kanu. Kɔ Amera Ŋecempi ŋaŋɔkɔ ŋeŋkekərɛ kɔ nde dətɛgbɛrɛ, 2 nde sentani sənawakəs kɔ kəsɔŋɛ kɔ kəciya mata 40 disrɛ mɔ. Ali paka ɛnadi fɛ mataka mamɔkɔ disrɛ, ntɛ mataka mamɔkɔ melip mɔ, kɔ dor dɔyɔ kɔ. 3 Kɔ sentani səloku kɔ: «Kɔ məyɔnɛ Wan ka Kanu-ɛ, məloku oŋ tasar tantɛ tɔyɔnɛ kəcom.» 4 Kɔ Yesu oloku sentani: «Aŋcic ti dəbuk ba sariyɛ sa Kanu: ‹Bafɔ kəcom gbəcərəm kəŋsɔŋɛ fum kiyi ka doru.›» 5 Kɔ sentani səmpɛnɛ kɔ sɔ tofo teŋeci kəroŋ, kɔ səmentər kɔ pipic tɔf ya doru fəp. 6 Kɔ səloku kɔ: «Indesɔŋ’əm kətam fəp kɔ pəmot pa pəlel pa dɛbɛ da tɔf yayɛ fəp; bawo anasɔŋ’im yi, ina sɔ ic-tam kəsɔŋ yi nwɛ o nwɛ iŋfaŋ mɔ. 7 Awa, kɔ məna məntontnɛn’em fɔr kiriŋ-ɛ, yayɛ fəp yam yɔ yɔŋyɔnɛ.» 8 Kɔ Yesu oloku sentani: «Aŋcic ti dəbuk ba sariyɛ sa Kanu: ‹Kanu Kəpɔŋ nkɛ kəyɔnɛ Kanu kam mɔ, pəmar məc-tontnɛnɛ; nkɔn gbəcərəm ɔ pəmar sɔ məc-cəpəs tewe tɔn.›» 9 Kɔ sentani səŋkekərɛ kɔ sɔ Yerusalɛm, kɔ səŋkɔ səcəmbər kɔ nde kəlɔ kəpɔŋ ka Kanu kəroŋ. Kɔ səloku kɔ: «Kɔ pəyɔnɛ fɔ Wan ka Kanu məyɔnɛ-ɛ, məyokɛ oŋ ma nnɔ dəntɔf. Bawo aŋcic ti dəbuk ba Kanu: 10 ‹Kanu kəndesak mɛlɛkɛe ɔn aŋɛ ŋande kəc-bum’əm mɔ;› 11 k’aŋcic sɔ: ‹Ŋandetɔmpər’əm dəwaca ntɛ tɔŋsɔŋɛ ta məmpət tasar mɔ.›» 12 Kɔ Yesu oloku Sentani: «Aŋcic ti dəbuk ba sariyɛ sa Kanu: ‹Ta məwakəs Kanu Kəpɔŋ, Kanu kam.›» 13 Ntɛ Sentani səlip kəwakəs Yesu kəciya mɔ, kɔ səmbɔlɛ kɔ haŋ tɛm tɔlɔma.
Aŋnabi Yesu kəcop ka yɛbəc yɔn Kalile
14 Kɔ Yesu olukus Kalile kɔ fənɔntər fa Amera ŋa Kanu disrɛ, kɔ tewe tɔn tɛsam dɔtɔf fəp. 15 Pəc-təksɛ afum nde dəkəcəpəs daŋan, kɔ afum fəp ŋac-cam debeki dɔn.
Kəbɛləs ka Aŋnabi Yesu nde Nasarɛt
16 Kɔ Yesu ender Nasarɛt nde anadusum kɔ mɔ, k’ɛmbɛrɛ dəkəcəpəs simiti, dɔsɔk da kəŋesəm, pəmɔ tɔkɔ ɔŋc-yɔ ti mɔ. K’ɛyɛfɛ kəkɔ-karaŋ, 17 k’asɔŋ kɔ buk ba wədəŋk wəka Kanu Esayi. K’emperi buk, k’ɛmbəp da aŋcic: 18 «Amera ŋa Kanu Kəpɔŋ ŋey’im kəroŋ, bawo Kanu kəyɛk-yɛk’im ntɛ tɔsɔŋɛ iloku afum atɔyɔ daka toloku tɔtɔt mɔ; Kanu kəsom’im kədedəŋk kəyac ka acar aŋɛ asumpər dəkəwan mɔ. Ideloku atɔnəŋk a ŋandenəŋk; kədekekərɛ aŋɛ ŋayi kətam disrɛ mɔ, bəkəc yoforu disrɛ 19 kədedəŋk kəren ka kəmar nkɛ Kanu kəndeŋaŋnɛnɛ afum səbe nsɛ ŋantɔmpər mɔ.» 20 Ntɛ Yesu elip kəkaraŋ mɔ, k’ɛnɛp buk, k’ɔsɔŋ bi wəmarəs nwɛ ɛnatɔmpər teta səbuk mɔ, k’ɔŋkɔ pəndɛ. Akɔ ŋanayi dəkəcəpəs disrɛ mɔ fəp kɔ ŋaŋgbətnɛ kɔ. 21 Kɔ Yesu ɛyɛfɛ kəlok-lokər ŋa: «Mɔkɔ toloku tecic tatɔkɔ nəne mɔ, tɛlarɛ.» 22 Kɔ fəp fəmentər kɔ ntɛ pəmbɔt kɔ nnɔ eyi mɔ, kɔ tɔkɔ pəŋciyanɛ ŋa moloku ma kəmar kəfili mmɛ moŋc-wur kɔ dəkusu mɔ, kɔ ŋaŋyifətɛnɛ: «Bafɔ wan ka Isifu ɔfɔ ba?» 23 Kɔ Yesu oloku ŋa: «Iŋcərɛ a nəndelok’im capafɔ ncɛ: ‹Wətɛn-cɔl mətaməsnɛ məna sərka!› Nəndesɔ-lok’im: ‹Səne mes mɔkɔ məŋcepərɛnɛ Kapɛrnayum mɔ fəp, məyɔ sɔ mes min mayi nnɔ aŋkom’əm mɔ.›» 24 Kɔ Yesu oloku ŋa sɔ: «Kaŋce k’indelok’un: Ali wədəŋk wəka Kanu wəkin afɔselɛnɛ bel-bel nde aŋkom kɔ mɔ. 25 Kaŋce kɔ kaŋkɛ indesɔ-lok’un mɔ: Aran aŋɛ awos aŋa ŋanafi Yisrayel mɔ ŋanala tɛm ta Eliya, tɛm ntɛ kɔm kənagbətnɛ meren maas yof camət-tin mɔ, a kɔ dor dɔpɔŋ dosumpər atɔf mɔ. 26 Mba kənasom fɛ Eliya nda nwɛ o nwɛ, mɛnɛ nda wəran wətɔlɔ wəlɔma, nde Sarepta nde atɔf ŋa Sidɔŋ. 27 Acunɛ sen alarəm ŋanayi sɔ Yisrayel tɛm ta sayibɛ Elise. Mba ali wəkin ŋa dacɔ anasɔkəs fɛ, mɛnɛ Naman wəka Siri.» 28 Ntɛ afum akɔ ŋanayi dəkəcəpəs, ŋanane moloku mamɔkɔ mɔ, kɔ mɛtɛlɛ meyi fəp faŋan. 29 Kɔ ŋayɛfɛ kəbɛləs kɔ kəwurɛnɛ dare, kɔ ŋaŋkekərɛ kɔ nde tɔrɔ teŋeci ta dare da Nasarɛt kəroŋ nde ŋanacəmbər dare daŋan mɔ, kəkɔ-wɛn kɔ pətɛmpɛnɛ. 30 Kɔ Yesu ɛmbɛrɛ-bɛrɛ ŋa dacɔ, k’ɔŋkɔ.
Fum nwɛ ŋɔŋk ŋɛlɛc ŋɛnakafəli-kafəli mɔ
31 Kɔ Yesu ontor dare da Kapɛrnayum atɔf ŋa Kalile; k’ɔŋkɔ pəc-təksɛ simiti, dɔsɔk da kəŋesəm. 32 Pənaciyanɛ afum tatɔkɔ ɛŋc-təksɛ mɔ, bawo kaŋce kənayi moloku mɔn. 33 Fum wəlɔma ɛnayi dəndo dəkəcəpəs, nwɛ ŋɔŋk ŋɛlɛc ŋɔtɔsɔk ŋɛnayi mɔ, pəc-kulɛ-kulɛ pəpɔŋ: 34 «Ta ake tɔ məmbɛrɛnɛ mes mosu-ɛ, Yesu wəka Nasarɛt? Səna ŋɔ mənder kələsər? Iŋcərɛ bel-bel wəkɔ məyɔnɛ mɔ: Wəcempi wəka Kanu!» 35 Kɔ Yesu ɛŋgbəŋ-gbəŋər ŋi, pəc-loku: «Məmɛp kusu! Məwur fum wəkawɛ!» Kɔ ŋɔŋk ŋɛlɛc ŋɛŋgbal fum wəkakɔ dəntɔf afum dacɔ, kɔ ŋowur kɔ, ali pəlɛc ŋɛnayɔ fɛ kɔ. 36 Kɔ cusu cəwos afum fəp, kɔ ŋayɛfɛ kəyifətɛnɛ: «Ake toloku tɔ tantɛ-ɛ? Fənɔntər kɔ kətam kɔn k’oŋlok-lokərɛ yɔŋk yɛlɛc yɔtɔsɔk, yoc-lukus afum darəŋ.» 37 Kɔ tewe tɔn tɛsam dɔtɔf fəp.
Aŋnabi Yesu kətaməs kɔn acuy alarəm
38 Ntɛ Yesu ɛyɛfɛ dəndo dəkəcəpəs mɔ, k’ɔŋkɔ ndena Simɔŋ. K’ɔŋkɔ pəbəp iya wəka wəran ka Simɔŋ pəc-yikcɛnɛ fiba fəpɔŋ, kɔ akakɔ ŋayɛfɛ kəlɛtsɛnɛ Yesu a pəmar ŋa. 39 Kɔ Yesu entilsərnɛ wəran nwɛ k’ɛŋgbəŋ-gbəŋər fiba fafɔkɔ, kɔ fiba fəsak wəran nwɛ. Gbəŋcana babɔkɔ kɔ wəran nwɛ ɛyɛfɛ k’eyerəs afum yeri. 40 Ntɛ dec dɛŋkalɛ mɔ, aŋɛ ŋanayɔ acuy mɔ fəp, kɔ ŋaŋkenɛ ŋa Yesu. K’endeŋəsər ŋa waca fəp, kɔ ŋantamnɛ. 41 Kɔ yɔŋk yɛlɛc yolukus afum alarəm darəŋ, yoc-kulɛ-kulɛ: «Məna ɔyɔnɛ Wan ka Kanu!» Kɔ Yesu ɛŋgbəŋ-gbəŋər yi, ta oŋwosɛ a yolok-loku-ɛ, bawo yɛnacərɛ a nkɔn ɔyɔnɛ nwɛ Kanu kəyɛk-yɛk mɔ.
Aŋnabi Yesu kəkawandi kɔn dəkəcəpəs
42 Dec dendesɔk, kɔ Yesu owur k’ɔŋkɔ nde kəfo kəyer-yer kəlɔma. Kɔ afum alarəm ŋawur kətɛn kɔ, kɔ ŋaŋkɔ ŋabəp kɔ dəndo kəfo kaŋkɔ. Ŋanafaŋ fɛ kəsak Yesu pəkɔ. 43 Mba k’oloku ŋa: «Nəsak’im ikɔ-dəŋk sɔ sədare səlɔma moloku mɔtɔt ma dɛbɛ da Kanu; bawo itɔ anasom’em.» 44 Kɔ Yesu ɛŋkawandi afum dəndo dəkəcəpəs da sədare sa Yude.
Yesu kəwe acɛpsɛ ɔn darəŋ acɔkɔ-cɔkɔ
1 Dɔsɔk dɔlɔma, Yesu pəcəmɛ agbɛp ŋa kəba ka Kenesarɛt, afum ŋamɛpnɛ kɔ ŋac-cəŋkəl toloku ta Kanu. 2 K’ɛnəŋk dəndo kəba kəsək cəbil mɛrəŋ, ncɛ awɛnt ŋanawur disrɛ, ŋac-yak manta maŋan mɔ. 3 Kɔ Yesu ɛmbɛkɛ abil ŋin disrɛ, nŋɛ ŋɛnayɔnɛ ŋa Simɔŋ mɔ, k’oloku kɔ a pəbɔlɛnɛ agbɛp pipic. K’ɛndɛ debil pəc-təksɛ kənay kəŋkɔ kənacəmɛ dəntɔf mɔ. 4 Ntɛ ɛsak kəlok-loku mɔ, k’oloku Simɔŋ: «Məcɔŋnɛ nde pəntukmɛ mɔ, nəgbal manta monu nəsumpər lop.» 5 Kɔ Simɔŋ oloku kɔ: «Wəkiriŋ, pibi pampɛ fəp səc-gbal manta, mba ali paka səsɔtɔ fɛ. Mba ntɛ məloku ti mɔ, kəgbal k’inder manta.» 6 Ntɛ ɛŋgbal manta mɔ, k’osumpər lop yɛlarəm haŋ kɔ manta moŋcop kəwalɛ. 7 Kɔ ŋawe anapa aŋan akɔ ŋanayi abil ŋa mɛrəŋ ŋɔkɔ disrɛ mɔ, kədemar ŋa. Kɔ akakɔ ŋander, kɔ ŋalas cəbil cacɔkɔ mɛrəŋ haŋ cəc-faŋ kəkalɛ. 8 Ntɛ ɛnəŋk tatɔkɔ mɔ, kɔ Simɔŋ Piyɛr ɛntɛmpɛnɛ Yesu wɛcək dəntɔf, k’oloku: «Wəbɛ, məbɔl’em! Fum wəciya iyɔnɛ.» 9 Kɔ kusu kəwos kɔ, nkɔn kɔ akɔ ŋanayi mɔ fəp, teta lop yɔkɔ ŋanasumpər mɔ. 10 Itɔ pənayi sɔ asol a Simɔŋ, Sak kɔ Saŋ, awut a Sebede. Kɔ Yesu oloku Simɔŋ: «Ta mənesɛ! Kəyɛfɛ mɔkɔ, afum ŋɔ mənde məc-fɛkəs oŋ.» 11 K’asumpər lop akakɔ ŋampɛnɛ cəbil dɛgbɛp, kɔ ŋasak ca fəp, kɔ ŋaŋcɛpsɛ Yesu darəŋ.
Yesu ɔsɔkəs wətɔtamnɛ
12 Dare dɔlɔma dɔ Yesu ɛnayi. Kɔ wərkun wəlɔma nwɛ sen sənasumpər dis fəp mɔ, ender. Ntɛ ɛnəŋk Yesu mɔ, k’ɛntɛmpɛnɛ dəntɔf, k’ɛŋcəpɛ Yesu tobu, k’ɛlɛtsɛnɛ kɔ: «Wəbɛ, kɔ məfaŋ-ɛ, məntam kəsɔkəs’im.» 13 Kɔ Yesu ɛntɛŋc kəca, k’oŋgbuŋɛnɛ kɔ, k’oloku: «Ifaŋ ti! Məsɔk!» Gbəŋcana babɔkɔ kɔ sen səsak fum wəkakɔ. 14 Kɔ Yesu oloku kɔ: «Ta məloku ti fum o fum, mba məkɔ məmentərnɛ wəloŋnɛ ka Kanu. Məloŋnɛ sɔ teta kəsɔkəs kam pəmɔ tɔkɔ Musa ɛnacic ti mɔ, ntɛ tɔŋsɔŋɛ afum fəp ŋacərɛ a məntamnɛ mɔ.» 15 Tewe tɔn tɛŋc-sam kəsam dəm, afum alarəm ŋac-loŋkanɛ kəcəŋkəl kɔ, kətɛn ka kətaməs ka docu daŋan. 16 Mba kɔ Yesu owur afum dacɔ, k’ɔŋkɔ nde dətɛgbɛrɛ dəkəlok-lokər Kanu.
Yesu kətaməs kɔn fum nwɛ ɛnatɔ-tam kəkɔt mɔ
17 Dɔsɔk dɔlɔma Yesu pəc-təksɛ. AFarisi kɔ atəksɛ a sariyɛ ŋandɛ. Ŋayɛfɛ-yɛfɛ sədare sa tɔf ya Kalile kɔ Yude, kɔ dare da Yerusalɛm. Kɔ fənɔntər fa Kanu Kəpɔŋ fəyi kɔ Yesu, ntɛ tɔŋsɔŋɛ pəc-taməs acuy mɔ. 18 Kɔ afum ŋander, ŋagbaŋnɛ wətɔkɔt dəyala, ŋac-sɛp kəbɛrɛ kəkɔ-boc kɔ fɔr ya Yesu kiriŋ. 19 Ntɛ dɛlay da afum dɔsɔŋɛ ŋa kətɔsɔtɔ dəkəbɛrɛ mɔ, kɔ ŋafərəŋk kəlɔ kəroŋ, kɔ ŋaŋkɔ ŋafeni kəlɔ dareŋc kəfo kəlɔma, kɔ ŋantorɛ wətɔkɔt nwɛ pəyi dəyala yɔn afum dacɔ, Yesu fɔr kiriŋ. 20 Ntɛ Yesu ɛnəŋk kəlaŋ kəŋan mɔ, kɔ Yesu oloku fum nwɛ: «Aŋaŋnɛn’am kiciya kam!» 21 Atəksɛ sariyɛ kɔ aFarisi ŋayɛfɛ kəcɛm-cɛmnɛ, ŋac-yifnɛ: «Fum wəre ɔfɔ wəkawɛ ɛŋfani Kanu mɔ? Ana ɛntam kəŋaŋnɛnɛ kiciya, kɔ pəntɔyɔnɛ Kanu sona-ɛ?» 22 Kɔ Yesu ɛŋcərɛ pɛcɛm-cɛmnɛ paŋan, k’oloku ŋa: «Ta ake tɔ nəŋcɛm-cɛmnɛnɛ mɛcɛm-cɛmnɛ mamɛ dəbəkəc-ɛ? 23 Ake ’cuca kəloku pətas: ‹Aŋaŋnɛn’am kiciya kam,› kɔ kəkulɛ ka fɔ: ‹Məyɛfɛ məkɔt-ɛ?› 24 Awa kəsɔŋɛ konu kəcərɛ a Wan ka fum ɛntam nnɔ doru kəŋaŋnɛnɛ ka kiciya: K’oloku wətɔtam kəkɔt, ‹Ic-lok’əm: Məyɛfɛ! Məlɛk yala yam, məkɔ nde ndaram!›» 25 Gbəŋcana babɔkɔ kɔ fum wəkakɔ fɔr yaŋan kiriŋ, k’ɛlɛk yala yɔn, k’osumpər dɔpɔ kəkɔ nde ndɔrɔn pəc-cam debeki da Kanu. 26 Kɔ cusu cəwos afum fəp, kɔ ŋayɛfɛ kəcam debeki da Kanu. Kɔ kənesɛ kəyi ŋa, ŋac-loku: «Sənəŋk mɔkɔ ntɛ səntatɔ-nəŋk mɔ.»
Yesu kəwe kɔn Lewy
27 Ntɛ tatɔkɔ teŋcepər mɔ, kɔ Yesu owur k’ɛnəŋk wəbaŋəs dut wəlɔma, nwɛ aŋc-we Lewy mɔ, pəndɛ nde aŋgbaŋcan ŋa abaŋəs dut. Kɔ Yesu oloku kɔ: «Məyɛfɛ məcəm’em darəŋ.» 28 Kɔ Lewy ɛsak mes fəp, k’ɛyɛfɛ k’ɛŋcɛpsɛ Yesu darəŋ. 29 Kɔ Lewy ɔŋkɔ pəbocɛ kɔ kəsata kəpɔŋ nde kəlɔ kɔn. Abaŋəs dut alarəm ŋanayi di, ŋandɛs-ndɛs dəmɛsa kɔ afum alɔma kɔ Yesu. 30 AFarisi kɔ anapa aŋan atəksɛ sariyɛ aŋɛ ŋanayi di mɔ, ŋac-cɔpɛnɛ, ŋac-loku acɛpsɛ a Yesu darəŋ: «Ta ake tɔ nəndinɛ yeri, nəc-munəs kɔ abaŋəs dut kɔ aciya-ɛ?» 31 Mba Yesu oloku ŋa: «Bafɔ atamnɛ ŋafaŋ wətɛn-cɔl de, mba acuy ŋafaŋ kɔ. 32 Bafɔ alompu ŋɔ inder kəwe, mba aciya ŋɔ inder kəwe ŋatam kəsəkpər mera, ŋacəmɛ pəlompu darəŋ.»
Yesu kɔ kəsuŋ
33 Kɔ ŋaloku Yesu: «Acɛpsɛ a Saŋ darəŋ kɔ acɛpsɛ a aFarisi darəŋ, ŋaŋsuŋ tɛm fəp ŋac-cəpəs, kɔ məna akam ŋandi yeri ŋac-mun.» 34 Kɔ Yesu oloku ŋa: «Nəntam kəsɔŋɛ anapa a wəfura kəsuŋ ŋayi kɔ wəfura kəsata kəŋan disrɛ ba? 35 Mataka meyi mmɛ ŋandegbɛyɛnɛ kɔ wəfura mɔ, awa ŋandesuŋ mata mamɔkɔ.» 36 Kɔ Yesu oloku ŋa sɔ capafɔ ncɛ: «Fum o fum ɔfɔwali kəpol dəkəloto kəfu kəkɔ-cəpɛ kəkur. Bawo tɔŋsɔŋɛ kəpol ka kəloto kəfu kaŋkɔ ɛwali mɔ, kətɔmar kəloto kəkur kənkɔ ɛfaŋ kəlompəs mɔ. 37 Fum o fum ɔfɔbɛr member dəkəfala. Kɔ pəyɔnɛ fɛ ti-ɛ, member montoŋ, member moloŋɛ, məyi oŋ ta məsɔtɔ member mam-ɛ; 38 mba pəmar pabɛr member dəcəbuntəlɛ. 39 Nwɛ o nwɛ omun member mokur, ɔfɔsɔ-faŋ mofu, bawo oŋloku: ‹Mokur mɛntəŋnɛ.›»
Aŋnabi Yesu kɔ simiti, dɔsɔk da kəŋesəm
1 Simiti səlɔma, dɔsɔk da kəŋesəm, kɔ Yesu eyi kəcali dalɛ, kɔ acɛpsɛ ɔn darəŋ ŋaŋŋosəru malɔ ŋac-gbac-gbaci mi ŋac-sɔm. 2 Kɔ aFarisi alɔma ŋaloku ŋa: «Ta ake tɔ nəŋyɔnɛ ntɛ antɔwosɛ kəyɔ simiti, dɔsɔk da kəŋesəm mɔ?» 3 Kɔ Yesu oloku ŋa: «Nəmɔmən fɛ yecicəs ya Kanu disrɛ tɔkɔ Dawuda ɛnayɔ, ntɛ dor dɛnayɔ kɔ, kɔ afum ɔn mɔ? 4 —Dawuda ɛnabərɛ kəlɔ kəpɔŋ, k’ɛlɛk kəcom nkɛ aloŋnɛ Kanu nkɛ pəntɔmar fum o fum pəsɔm mɛnɛ wəloŋnɛ ka Kanu mɔ, kɔ nkɔn Dawuda ɔsɔm ki, k’ompocɛ afum ɔn akɔ dor dɛnayɔ mɔ.» 5 Kɔ Yesu oloku ŋa: «Wan ka fum ɔyɔnɛ wəbɛ ka simiti, dɔsɔk da kəŋesəm.»
Fum wəfi kəca
6 Kɔ simiti səlɔma, dɔsɔk da kəŋesəm sənde səbəp, kɔ Yesu ɔŋkɔ nde dəkəcəpəs kətəksɛ afum. Wərkun wəlɔma ɛnayi di, pəfi kəca kətɔt. 7 Atəksɛ sariyɛ kɔ aFarisi ŋaŋkɔkcɛ Yesu bel-bel, kɔ pəyɔnɛ fɔ ɔŋkɔtaməs fum simiti, dɔsɔk da kəŋesəm-ɛ. Ŋanayɔ ti ntɛ tɔŋsɔŋɛ ŋasɔtɔ teyemsɛnɛ kɔ mɔ. 8 Mba Yesu ɛnacərɛ mɛcɛm-cɛmnɛ maŋan, k’oloku wərkun nwɛ kəca kɔn kənafi mɔ: «Məyɛfɛ məcəmɛ nnɔ dacɔ.» Kɔ wəkakɔ ɛyɛfɛ, k’ɛŋcəmɛ. 9 Kɔ Yesu eyif ŋa: «Ic-yif’un ma: Cəke cɔ awosɛ kəyɔ ka simiti, dɔsɔk da kəŋesəm-ɛ? Pəmar payɔ pətɔt, ka pəlɛc pɔ pəmar payɔ; pataməs fum, ka pace kɔ pəfi?» 10 Awa, kɔ Yesu ɔmɔmən ŋa dəcəro fəp faŋan, k’oloku wərkun nwɛ: «Məteŋci kəca!» Kɔ wərkun nwɛ enteŋci kəca, kɔ kəca kɔn kəntamnɛ. 11 Mba kɔ pəntɛlɛ acicəs a sariyɛ kɔ aFarisi, kɔ ŋayɛfɛ kəgbɛkəlɛnɛ ntɛ ŋantam kəyɔ Yesu mɔ.
Yesu kəyɛk-yɛk Asom ɔn wəco kɔ mɛrəŋ
12 Tɛm tatɔkɔ, kɔ Yesu ɛmpɛ nde dətɔrɔ kəkɔ-sali, k’ɔŋkɔ pəcepərɛnɛ pibi fəp kəlok-lokər Kanu. 13 Ntɛ dec dɔsɔk mɔ, k’ewe acɛpsɛ ɔn darəŋ, k’ɛyɛk-yɛk ŋa dacɔ afum wəco kɔ mɛrəŋ, aŋɛ ɛnasɔŋ tewe ta «asom» ɔn mɔ. 14 K’ewe Simɔŋ, nwɛ ɛnasɔŋ tewe ta Piyɛr mɔ; kɔ wɛŋc Andəre, Sak, Saŋ kɔ Filip, Bartelemy, 15 Matiye, Tɔma, Sak, wan ka Alfe, Simɔŋ, wəsaŋka-saŋka 16 Yude, wan ka Sak, kɔ Yudas wəka dare da Iskariya, nwɛ ɛnadesɔŋ Yesu adif ɔn mɔ.
Yesu pəc-təksɛ pəc-taməs
17 Kɔ Yesu ŋantor kəyɛfɛ dətɔrɔ kɔ ŋa, k’ɔŋkɔ pəcəmɛ kəfo kətəŋnɛnɛ nkɛ acɛpsɛ ɔn alarəm, k’afum alarəm alɔma ŋanayi mɔ: afum aka Yude fəp, Yerusalɛm, kɔ afum aka kəba kəsək nde sədare sa Tir kɔ Sidɔŋ. 18 Afum akaŋɛ fəp ŋanader kədecəŋkəl kɔ, pətaməsɛnɛ sɔ docu daŋan. Afum aŋɛ yɔŋk yɛlɛc yɔŋc-tɔrəs mɔ, ŋanatamnɛ. 19 Afum fəp ŋac-sɛp kəgbuŋɛnɛ kɔ, bawo fənɔntər fəŋc-wur kɔ nfɛ fəŋc-taməs acuy fəp mɔ.
Pətɔt kɔ pəlɛc
20 Kɔ Yesu ɔmɔmən acɛpsɛ ɔn darəŋ, k’oloku: «Pəbɔt’un nəna atɔyɔ daka, bawo nəna ɔyɔ dɛbɛ da Kanu! 21 Pəbɔt nəna aŋɛ dor dɔyɔ tantɛ mɔ, bawo nəndenɛmbərɛ! Pəbɔt’un nəna aŋɛ nəyi kəbok mɔ, bawo nəndesel! 22 Pəbɔt’un kɔ afum ŋandeter’un-ɛ, ŋac-bɛləs’un, ŋac-lɔməs’un, ŋac-ləsər’un mewe bawo nəlaŋ dim da «Wan ka fum.» 23 Nəde nəwoləs kɔ dɔsɔk dadɔkɔ dendeder-ɛ, nəyok-yokɛnɛ pəbotu, bawo kəpocɛ kəpɔŋ kəŋkar’un nde dareŋc. Tantɛ tɔ atem aŋan ŋaŋc-yɔ adəŋk a Kanu. 24 Pəlɛc pey’un nəna aŋɛ nəyɔ daka mɔ! Bawo nəlip kəsɔtɔ pɛnɛmpəsɛ ponu mpɛ pənamar’un kədekɔ-sɔtɔ mɔ. 25 Pəlɛc pey’un nəna aŋɛ ca fəp yɛlar mɔ, bawo dor dendekɔ-yɔ nu! Pəlɛc pey’un nəna aŋɛ nəyi kəsel mɔ, bawo nəndekɔ-yi kəbal kɔ kəbok disrɛ! 26 Pəlɛc pey’un nəna nwɛ afum fəp ŋandeloku pətɔt ponu mɔ, tantɛ tɔ atem aŋan ŋaŋc-yɔ kɔ akɔ ŋaŋc-baŋɛnɛ kəyɔnɛ adəŋk a Kanu mɔ.»
Kəbɔtər ka aŋɛ ŋanter’un mɔ
27 «Mba, iŋloku ti nəna aŋɛ nəŋcəŋkəl’im mɔ: Nəbɔtər aterɛnɛ anu, nəyɔ pətɔt aŋɛ ŋanter’un mɔ! 28 Nətolanɛ pətɔt aŋɛ ŋantolan’on pɛlɛc mɔ, nətolanɛ aŋɛ ŋaŋlɔməs’un mɔ! 29 Kɔ fum efer’əm kəca dakaŋca-ɛ, məceŋc sɔ akaŋca ŋa mɛrəŋ ŋɔkɔ pəsut sɔ ŋaŋɔkɔ. Kɔ fum ɛlɛkər’əm duma dakəroŋ-ɛ, məce kɔ sɔ pəlɛk duma dam dedisrɛ. 30 Məpocɛ nwɛ o nwɛ ontol’am mɔ; kɔ fum ɛlɛkər’əm paka mpɛ pɔyɔnɛ pam mɔ, ta məwerəs kɔ pi. 31 Nəyɔnɛ afum tɔkɔ nəfaŋ a ŋayɔn’on mɔ. 32 Kɔ nəmbɔtər gbəcərəm akɔ ŋambɔtər’un mɔ, kəway kəre kɔ nəŋgbɛkər sɔ mera-ɛ? Ali aciya ŋambɔtər aŋɛ ŋambɔtər ŋa mɔ! 33 Kɔ pəyɔnɛ fɔ akɔ ŋaŋyɔn’on pətɔt mɔ gbəcərəm ŋɔ məŋyɔnɛ pətɔt-ɛ, kəway kəre kɔ məntam kəgbɛkər amera-ɛ? Ali aciya tatɔkɔ tɔ ŋaŋyɔ! 34 Kɔ pəyɔnɛ fɔ akɔ nəyɔ amera kədeluks’on mɔ gbəcərəm ŋɔ nəntam kəbɔr-ɛ, kəway kəre kɔ nəna nəntam kəgbɛkər amera-ɛ? Bawo ali aciya sɔ ŋambɔr aciya ntɛ tɔŋsɔŋɛ ŋa kədesɔtɔ pɛtəŋnɛnɛ payi mɔ. 35 Nəbɔtər ater anu, nəbɔr ŋa nəwurɛ kəluksɛ debe dadɔkɔ amera. Nəndesɔtɔ kəpocɛ kəpɔŋ, nəyɔnɛ sɔ awut a Wəbɛ wəka dareŋc, bawo Kanu kəntesɛ nnɔ apələrnɛ pətɔt kɔ ayeŋki bəkəc ŋayi mɔ. 36 Nəbɔt mera pəmɔ tɔkɔ Papa konu ɔmbɔt amera mɔ.»
Ta nəcin afum alɔma
37 «Ta nəcin fum, afɔkɔ-cin nu; ta nəboc kiti ka Kanu nnɔ fum eyi mɔ, afɔdekɔ-kiti nu; nəŋaŋnɛnɛ akɔ, andekɔ-ŋaŋnɛn’on. 38 Nəpocɛ, andekɔ-poc’on; andekɔ-bɛr nde yuba yonu yɔpɔŋ ya duma donu potubucɛ pɔtɔt, pasumpər, pasəŋk-səŋk, pəloŋər. Bawo yotubucɛ nyɛ nəntubucɛ mɔ, yɔ andekɔ-tubucɛ nu kəluksɛ nu kəway. 39 Kɔ Yesu olok-lokər ŋa capafɔ: «Wətɔnəŋk ɛntam kəkɔtɛnɛ wətɔnəŋk ba? Kɔ pəyɔnɛ fɛ ti-ɛ mɛrəŋ maŋan fəp mɔ ŋantɛmpɛnɛ abi disrɛ. 40 Ali wətəkəs wəkin eŋcepər fɛ wətəksɛ kɔn; mba wətəkəs nwɛ ɛntəkəs bel-bel mɔ, eŋyi pəmɔ wətəksɛ kɔn. 41 Ta ake tɔ məŋmɔmənɛ ayika nŋɛ ŋeŋyi wɛŋc’əm dərɔfɔr, a ta məntam kəkɔkcɛ togbu tɔkɔ teyi məna sərka dərɔfɔr mɔ? 42 Cəke cɔ məntam kəloku wɛŋc’əm: ‹Wɛŋc’im məwosɛ a iliŋ’əm ayika nŋɛ ŋey’əm dərɔfɔr mɔ!› məna nwɛ məntɔnəŋk togbu ta dɔfɔr dam mɔ? Məna wəbaŋɛnɛ dofum! Məliŋ kərɛsna togbu ta dɔfɔr dam, itɔ ɔŋsɔŋ’am kənəŋk bel-bel məliŋ ayika ŋɔkɔ ŋeyi wɛŋc’əm dərɔfɔr mɔ.»
Kətɔk kɔ yokom ya ki
43 «Kətɔk kətɔt kəfɔkom yokom yɛlɛc, kətɔk kɛlɛc kəfɔkom yokom yɔtɔt. 44 Kətɔk nkɛ o nkɛ kɔ, yokom ya ki yɔ aŋnɛpəlɛ ki. Afɔpim tumbunyi dəgbɛc, afɔpim rɛsɛŋ dəbɛŋk. 45 Fum wətɔt nde abəkəc ŋɔn ŋɔtɔt ɛŋlɛk mɔyɔ mɔtɔt, kɔ fum wəlɛc nde abəkəc ŋɔn ŋɛlɛc ɛŋlɛk mɔyɔ mɛlɛc. Bawo ntɛ o ntɛ kusu kəŋloku mɔ, ti teyi nde dɛbəkəc.»
Wɔlɔ mɛrəŋ
46 «Ta ake tɔ nəŋwen’em ‹Wəbɛ! Wəbɛ!› ta nəŋyɔ mes mɔkɔ iŋloku mɔ-ɛ? 47 Nwɛ o nwɛ eder’im, pəne moloku mem, pəkɔt mi, imentər’un nwɛ owurɛnɛ mɔ: 48 Owurɛnɛ fum nwɛ eyi kəcəmbər kəlɔ mɔ. Fum wəkakɔ ɛŋkay dəntɔf bel-bel kɔ pəntukmɛ, k’ɛŋcəmbər kəlɔ kɔn tasar kəroŋ. Ali wəcafən ontuf pəlarəm, domun dɛfəntərɛ, kəlɔ kɔn kəfɔtam kətɛmpɛnɛ, bawo anacəmbər ki gbiŋ. 49 Mba nwɛ o nwɛ ene moloku mem, ta ɔŋkɔtɛnɛ mi-ɛ, fum wəkakɔ ŋawurɛnɛ kɔ nwɛ ɛŋcəmbər kəlɔ kɔn katina dəntɔf, ta ɛŋkay pəcəmbər ki tasar kəroŋ mɔ. Kɔ wəcafən ontuf, domun dɛfəntərɛ-ɛ, kəlɔ kaŋkɔ kəntɛmpɛnɛ katina, kəlɛcɛ few!»
Aŋnabi Yesu kətaməs kɔn wəcar ka wəbɛ ka asɔdar 100
1 Ntɛ Yesu elip kəlok-lokər afum aŋɛ ŋaŋc-cəŋkəl kɔ mɔ, k’ɔŋkɔ Kapɛrnayum. 2 Dəndo kəfo kaŋkɔ, wəbɛ ka asɔdar tasar tin (100 ) wəRom wəlɔma ɛnayɔ wəcar nwɛ tetɔn tɛnayeŋk kɔ mɔ. Wəcar wəkakɔ ɛnatamnɛ fɛ, pəc-faŋ kəfi. 3 Ntɛ wəbɛ ka asɔdar nwɛ ene pac-loku teta Yesu mɔ, k’osom abeki aSuyif alɔma, ŋakɔwenɛ kɔ Yesu pədetaməsɛ kɔ wəcar kɔn. 4 Kɔ abeki akakɔ ŋander ŋabəp Yesu kɔ ŋalɛtsɛnɛ kɔ ŋac-gbɔkərɛ, ŋac-loku: «Ɔyɔ dofum ndɛ pəmar məyɔnɛ kɔ ti mɔ, 5 bawo wəbɛ wəkawɛ ɔmbɔtər atɔf ŋosu, nkɔn ɛnacəmbər dəkəcəpəs dosu.» 6 Kɔ Yesu ɔŋkɔ kɔ ŋa. Ŋanabɔlɛnɛ fɛ kəlɔ ka wəsɔdar, kɔ wəsɔdar osom anapa ɔn kəkɔ-loku kɔ: «Wəbɛ ta mətɔrəsnɛ, bawo isɔtɔ fɛ dofum ndɛ pəmar’am kəbɛrɛ kəlɔ kem mɔ. 7 Itɔ ɔsɔŋɛ ntɛ ina sərka intɔna-kɔ nnɔ məyi mɔ. Mba məloku toloku tin, wəcar kem pətamnɛ. 8 Bawo ina wəkawɛ yati abɛ’em ŋɔ iyi dəntɔf, k’ina sɔ iyɔ asɔdar alɔma aŋɛ ŋay’im dəntɔf mɔ. Nwɛ iŋkulɛ fɔ məkɔ mɔ, wəkayi ɔŋkɔ, k’iloku wəkɔ fɔ məder-ɛ, wəkayi ender. K’iloku wəcar kem fɔ məyɔ ntɛ-ɛ, ɔŋyɔ ti.» 9 Ntɛ Yesu ene moloku mamɔkɔ mɔ, kɔ teta wəsɔdar nwɛ teŋciyanɛ kɔ. K’ɛŋkafəlɛ, k’ɛntɛfərnɛ afum akɔ ŋanacəmɛ kɔ darəŋ mɔ, k’oloku: «Ic-lok’un, ali nde Yisrayel inanəŋk fɛ kəlaŋ pəmɔ kaŋkɛ!» 10 Kɔ asom a wəsɔdar nwɛ, ŋalukus ndɔrɔn. Kɔ ŋabəp wəcar nwɛ ɛnatɔ-tamnɛ mɔ, pətamnɛ keŋ.
Yesu kətimi kɔn wəfi
11 Ntɛ telip mɔ, k’ɔŋkɔ dare ndɛ aŋc-we Nayin mɔ. Atəkəs ɔn kɔ afum alarəm ŋanasol kɔ nkɔn kəkɔ. 12 Ntɛ ŋalɔtərnɛ kəbɛrɛ ka dare mɔ, kɔ ŋambəpɛnɛ kɔ afum ŋaŋc-kekərɛ fum wəfi dəkəwup, mba fum nwɛ sona gboŋ sɔ kɛrɛ ɛnakom kɔ; wos pəfi sɔ. Afum alarəm a dare dadɔkɔ ŋaŋc-kekərɛ wəfi wəkakɔ dəkəwup. 13 Kɔ Yesu ɛnəŋk wəran nwɛ, k’ɔyɔnɛ kɔ nɔnɔfɔr, k’oloku kɔ: «Ta məbok!» 14 Kɔ Yesu ɔŋcɔŋnɛ k’oŋgbuŋɛnɛ kaŋkəra ka wəfi. Aŋɛ ŋanatɔmpər kɔ mɔ ŋaŋcəmɛ. Kɔ Yesu oloku: «Wətɛmp, ina olok’əm: Məyɛfɛ!» 15 Kɔ wəfi ɛyɛfɛ k’ɛndɛ, k’oŋcop kəlok-loku. Kɔ Yesu oluksɛ wəfi nwɛ kɛrɛ. 16 Kɔ fəp fənesɛ; kɔ ŋayɛfɛ kəcam debeki da Kanu, ŋac-loku: «Wədəŋk wəka Kanu wəpɔŋ ɛyɛfɛ su dacɔ! Kɔ Kanu kənder kəmar afum ɔn!» 17 Kɔ tɔyɔ ta Yesu tatɔkɔ tɛsam atɔf ŋa Yude fəp, kəbəp ka sədare səkɔ səŋkɛl Yude mɔ.
Asom a Aŋnabi Saŋ
18 Kɔ acɛpsɛ a Saŋ darəŋ ŋaŋkɔ ŋaloku kɔ mes mamɔkɔ fəp. Kɔ Saŋ ewe acɛpsɛ ɔn darəŋ dacɔ afum mɛrəŋ, 19 k’osom ŋa kəkɔ-yif Wəbɛ Yesu kɔ pəyɔnɛ nkɔn ɔyɔnɛ nwɛ eyi kəder mɔ ba, ka pəmar pakar wəlɔma? 20 Ntɛ ŋambəp kɔ mɔ, kɔ afum aŋɛ ŋaloku kɔ: «Saŋ wəgbət afum dəromun osom su kədeyif’əm: ‹Məna ɔyɔnɛ, nwɛ eyi kəder mɔ ba, ka pəmar səkar wəlɔma?›» 21 Afum akakɔ anasom mɔ ŋaŋkɔ ŋabəp Yesu pəc-taməs docu da atɔtamnɛ alarəm, lanyiru, aŋɛ yɔŋk yɛlɛc yɛŋcəmɛ darəŋ mɔ, k’ɔsɔŋɛ atɔnəŋk alarəm kənəŋk. 22 Kɔ Yesu oloku ŋa: «Nəkɔ nəloku Saŋ tɔkɔ nənəŋk kɔ tɔkɔ nəne mɔ: Atɔnəŋk ŋanəŋk, atorər ŋaŋkɔt, k’asɔkəs aka sen, atɔne ŋane, afi ŋatimɛ, andəŋk toloku tɔtɔt nnɔ atɔyɔ daka ŋayi mɔ. 23 Pəbɔt nwɛ tetem tɔntɔdesɔŋɛ kəloŋɛ mɔ!» 24 Ntɛ asom a Saŋ aŋɛ ŋaŋkɔ mɔ, kɔ Yesu ɛyɛfɛ kəloku afum teta Saŋ pəc-yif: «Ake nənakɔ kəmɔmən nde dətɛgbɛrɛ-ɛ? Awo nŋɛ afef ŋeyikəc mɔ ba? 25 Mba ake nənakɔ oŋ kəmɔmən di-ɛ, fum wəbɛrnɛ duma dɔtɔt? Mba abɛrnɛ suma sətɔt, ŋayi pətɔt disrɛ ŋandɛ wɔlɔ wa abɛ disrɛ. 26 Ake nənakɔ oŋ kəmɔmən-ɛ, wədəŋk wəka Kanu-ɛ? Ɛy, ic-lok’un, Saŋ entesɛ pətas wədəŋk wəka Kanu. 27 Nkɔn ɔyɔnɛ nwɛ yecicəs yecempi yoloku tetɔn mɔ: ‹Isak wəsom pəy’im kiriŋ pəkɔ-cɛpəs dɔpɔ dam fɔr yam kiriŋ.›» 28 Kɔ Yesu oloku: «Ic-lok’un, aŋɛ aran ŋaŋkom mɔ fəp, ali wəkin eyi fɛ nwɛ eŋcepər Saŋ mɔ. Mba nwɛ ɛfɛtɛ nde dɛbɛ da Kanu mɔ, ɔyɔnɛ nwɛ eŋcepər Saŋ mɔ. 29 Afum aŋɛ ŋanane kɔ kəlok-loku mɔ fəp, kəbəp awerəs dut, kɔ ŋawosɛ dolompu da Kanu; ti disrɛ kɔ ŋawosɛ a Saŋ pəgbət ŋa dəromun; 30 mba aFarisi kɔ atəksɛ a sariyɛ ŋanawosɛ fɛ ntɛ Kanu kənafaŋɛ ŋa mɔ, kɔ ŋafati a Saŋ pəgbət ŋa dəromun. 31 Anɔ indetubcɛnɛ afum a dɛtɛmp dandɛ-ɛ? Anɔ ɔ ŋawurɛnɛ-ɛ? 32 Aŋɛ ŋɔ ŋawurɛnɛ: Ŋawurɛnɛ awut aŋɛ ŋandɛ kəfo nkɛ afum fəp ŋambəpsɛnɛ mɔ, a ŋac-wenɛnɛ kəkɔ-loku: ‹Səfulanɛ nu aluk, kɔ nəntɔpisɛ! Kɔ səleŋsɛ nu meleŋ ma defi, kɔ nəntɔbok.› 33 Bawo ntɛ Saŋ wəgbət afum dəromun ɛnader mɔ, ɔŋc-sɔm fɛ kəcom, oŋc-mun fɛ member, kɔ nəloku: ‹Wəka ŋɔŋk ŋɛlɛc ɔfɔ!› 34 Kɔ Wan ka fum ender, pəc-sɔm kəcom pəc-mun member kɔ nəloku: ‹Wəcɛlək kɔ wəcis ɔfɔ, wanapa ka abaŋəs dut k’aciya!› 35 Mba awut a kəcərɛ pətɔt ŋawosɛ dolompu da ki.»
Yesu nde kəlɔ ka Simɔŋ wəFarisi
36 Kɔ wəFarisi wəlɔma ewe Yesu kəkɔ-di yeri kɔ nkɔn. Kɔ Yesu ɛmbɛrɛ nde kəlɔ ka wəFarisi wəkakɔ, k’ɔŋkɔ pəndɛ amɛsa kiriŋ. 37 Wəran wəciya wəlɔma ɛnayi dare dadɔkɔ, ntɛ ene a Yesu ɔŋkɔ nde kəlɔ ka wəFarisi nwɛ mɔ, k’ɛlɛk tɔkɔ-bɔ pɔtɔt pɛlarɛ labundɛ, 38 kɔ wəran nwɛ ɔŋkɔ pəcəmɛ Yesu kumunt darəŋ pəsumpər kɔ wɛcək. K’ɛyɛfɛ kəbok pəc-caŋkəsɛ mɛŋcər mɔn wɛcək wa Yesu, k’ɛfɛŋətɛ wɛcək wa Yesu cəfon cɔn, pəc-cup wi, pəc-loŋsər wi labundɛ. 39 Ntɛ wəFarisi nwɛ ɛnawe Yesu nde ndɔrɔn, ɛnəŋk tatɔkɔ mɔ, k’olokunɛ dɛbəkəc: «Fum wəkawɛ ɔŋyɔnɛ wədəŋk wəka Kanu-ɛ, k’ɛŋcərɛ wəran nwɛ oŋgbuŋɛnɛ kɔ mɔ, fum nwɛ ɔyɔnɛ mɔ—Wəran wəciya.» 40 Kɔ Yesu ɛlɛk moloku, k’oloku: «Simɔŋ, iyɔ toloku tɔlɔma tolok’əm.» Kɔ Simɔŋ oloku kɔ: «Məlok’im ti, Wətəksɛ.» 41 «Wəbɔs-bɔsər wəlɔma afum mɛrəŋ ŋanatɔmpərɛ debe: Wəkin nwɛ pətɔmpərɛ kɔ gbeti mɛŋcəmbəl masar kəcamət (500 ); kɔ wəka mɛrəŋ pətɔmpərɛ kɔ mɛŋcəmbəl 50 . 42 Mba ntɛ wəbɔs-bɔsər nwɛ ɛnəŋk fɔ alɛkər ɔn səbe ŋayɔ fɛ gbeti boluksɛ kɔ mɔ, k’ɛŋaŋnɛnɛ mɛrəŋ maŋan fəp. Akakɔ mɛrəŋ anɔ endenaŋkanɛ kəbɔtər kɔ pətas wəkɔ-ɛ?» 43 Kɔ Simɔŋ oloku kɔ: «Pəwurɛn’em, a wəkɔ ɛnatɔmpərɛ kɔ gbeti bɛlarəm mɔ.» Kɔ Yesu oloku kɔ: «Gbɛs, məloku kaŋce!» 44 Kɔ Yesu ɛŋkafəlɛ k’ɛntɛfərnɛ wəran nwɛ, k’oloku Simɔŋ: «Mənəŋk wəran nwɛ? Imbɛrɛna nnɔ kəlɔ kam mba məsɔŋna f’em domun ibikɛnɛ wɛcək; mba nkɔn ɛŋcaŋkəsɛ wɛcək wem mɛŋcər mɔn, k’ɛfɛŋətɛ wi cəfon cɔn. 45 Məŋcupna f’em, mba nkɔn kəyɛfɛ ntɛ imbɛrɛna nnɔ mɔ, a k’oŋcop kəcupəs’im wɛcək mɔ, haŋ ndɛkəl itɔ eyi kəyɔ. 46 Məsopna f’em moro dəromp, mba wəran wəkawɛ osop’im labundɛ dəwɛcək. 47 Itɔ ɔsɔŋɛ ntɛ intam kəlok’əm fɔ, kiciya kəlarəm nkɛ eŋciya mɔ, aŋaŋnɛnɛ kɔ ki, bawo nkɔn ɔmbɔtər pənaŋkanɛ. Məna nwɛ aŋaŋnɛnɛ pipic mɔ, pipic pɔ məmbɔtər.» 48 Kɔ Yesu oloku wəran nwɛ: «Aŋaŋnɛn’am kiciya kam.» 49 Afum aŋɛ ŋanandɛ amɛsa kiriŋ kɔ nkɔn mɔ, ŋaŋcop kəc-lokunɛ dəbəkəc: «Anɔ ɔfɔ wəkawɛ ɛŋaŋnɛnɛ ali kiciya mɔ?» 50 Mba kɔ Yesu oloku wəran: «Kəlaŋ kam kəyac’əm, məkɔnɛ abəkəc ŋoforu.
Aran aŋɛ ŋaŋsol kɔ Yesu mɔ
1 Ntɛ tɛyɛfɛ dənda mɔ, kɔ Yesu ende pəc-kɔt sədare; pəc-kawandi pəc-dəŋk moloku mɔtɔt ma dɛbɛ da Kanu. Ŋasol kɔ Asom ɔn wəco kɔ mɛrəŋ, 2 kəbɛrɛnɛ ka aran alɔma aŋɛ ɛnataməs docu da dis kɔ da yɔŋk yɛlɛc mɔ: Mari wəkɔ aŋc-we «Wəka Makdala» mɔ, nwɛ anabɛləs yɔŋk yɛlɛc camət-mɛrəŋ mɔ; 3 Yohanna (wəran ka Cusa, wəlompəs ka mes ma kəlɔ disrɛ ka Herodu), Susan kɔ aran alarəm alɔma aŋɛ ŋaŋc-wurɛ daka daŋan kəmar ka Yesu kɔ Asom ɔn mɔ.
Capafɔ ca wəbɔf
4 Kɔ afum alarəm ayɛfɛ sədare səlɔma ŋamɛpənɛ kɔ. Kɔ Yesu oloku capafɔ ncɛ: 5 «Ntɛ wəbɔf owur kəkɔ-gbal malɔ mɔn mɔ, eyi kəgbal malɔ kɔ mɛŋgbɛn mɔlɔma mɛntɛmpɛnɛ dɔpɔ. Afum ŋac-nas-nas mi, kɔ gbaŋa yɔsɔm mi fəp. 6 Kɔ mɛŋgbɛn mɔlɔma mɛntɛmpɛnɛ dəmasar; ntɛ mompoŋ mɔ, kɔ mowos, bawo mɛnayɔ fɛ pədəm. 7 Kɔ mɛŋgbɛn mɔlɔma mɛntɛmpɛnɛ dəbɛŋk, kɔ bɛŋk yompoŋ kɔ mɛŋgbɛn mamɔkɔ kɔ yɛntasərnɛ mi. 8 Kɔ mɛŋgbɛn mɔlɔma mɛntɛmpɛnɛ antɔf ŋɔtɔt kəroŋ. Ntɛ mamɔkɔ mompoŋ mɔ, kɔ yoŋkoməs; kɔ popoŋ mpɛ o mpɛ poŋkom mɛŋgbɛn tasar tin (100 ).» Yesu oŋc-loku toloku tatɔkɔ, pəc-gbəŋɛ: «Məna nwɛ məŋyɔ ləŋəs məc-ne mɔ, məcəŋkəl!»
Ta ake tɔ Yesu oŋc-lokɛ capafɔ-ɛ?
9 Kɔ acɛpsɛ ɔn darəŋ ŋayif kɔ ntɛ capafɔ cacɔkɔ cəloku mɔ. 10 K’oloku: «Nəna ŋɔ asɔŋ kəcərɛ mɔgbɔpənɛ ma dɛbɛ da Kanu; kɔ akɔ dəcapafɔ aloku ŋa ti, mba: ‹Ŋagbətnɛ kɔ ŋantɔ kəc-nəŋk; kɔ ŋaŋcəŋkəl ta ŋaŋne-ɛ.›»
Yesu kəloku tedisrɛ ta capafɔ ca wəbɔf
11 «Tedisrɛ ta capafɔ caŋcɛ tɛntɛ: Defet, toloku ta Kanu tɔ. 12 Mɛŋgbɛn mmɛ mɛntɛmpɛnɛ dɔpɔ dacɔ mɔ, mi mɔyɔnɛ afum aŋɛ ŋaŋne mɔ; ŋɔŋk ŋɛlɛc ŋeder ŋeliŋ ŋa dəbəkəc toloku ta Kanu tɔkɔ ɛnane mɔ, ntɛ tɔŋsɔŋɛ payaməsər ŋa kəlaŋ nkɛ kəntam kəyac ŋa mɔ. 13 Mɛŋgbɛn mɔkɔ meyi dəmasar mɔ, afum ŋɔ, aŋɛ ŋaŋc-kɔna-ne toloku ta Kanu, pəbɔt ŋa mɔ. Mba ŋayɔ fɛ ntɛntəl, ŋalaŋ tɛm tɔlɔma, kɔ tɛm teyeŋki tender ŋa-ɛ, ŋasak. 14 Mɛŋgbɛn mmɛ mɛntɛmpɛnɛ dəbɛŋk mɔ, mi mɔyɔnɛ afum aŋɛ ŋaŋcəŋkəl moloku ma Kanu, kɔ ŋalasərnɛ mes mɔpɔŋ mmɛ mɛntasərnɛ ŋa mɔ: Mɛcɛm-cɛmnɛ mɛlarəm, kəsɔtɔ ka daka kɔ mɛfaŋ mobotu ma doru, ŋa ŋafɔsɔŋ yokom yololu. 15 Mɛŋgbɛn mmɛ meyi antɔf ŋɔtɔt mɔ, afum ŋɔ, aŋɛ ŋaŋcəŋkəlɛ toloku abəkəc ŋɔtɔt ŋosoku, ŋamɛŋkərnɛ ti, ŋacəmɛ ti darəŋ mɔ, ŋa ŋaŋsɔŋ yokom yɔtɔt.»
Capafɔ ca lamp
16 «Nwɛ o nwɛ ɔfɔmot lamp a pəkufun di kaloŋi, ɔfɔsɔ-bɛrsɛnɛ di kəfəŋc dəntɔf; mba ɛndɛt di kədɛt dəm, ntɛ tɔŋsɔŋɛ aŋɛ ŋambɛrɛ dukəlɔ mɔ, ŋanəŋknɛ pəwaŋkəra. 17 Mpɛ o mpɛ pɛmɛŋkənɛ, antam pi kənəŋk. Ntɛ o ntɛ tɔŋgbɔpənɛ mɔ, antam ti kəcərɛ, towur tɛfəntərɛ pəwaŋkəra. 18 Nəkɛmbərnɛ tɔkɔ nəŋcəŋkəl mɔ; bawo andekɔ-bɛrɛnɛ akɔ ŋayɔ mɔ; pabelər akɔ ŋantɔyɔ mɔ ali pɔkɔ ŋaŋgbɛkər mera kəyɔnɛ paŋan mɔ.»
Iya kɔ awɛŋc a Yesu
19 Kɔ iya ka Yesu kɔ awɛŋc ɔn ŋander ŋabəp kɔ, mba ŋaŋc-tam fɛ kəlɔtərnɛ kɔ ntɛ afum ŋala mɔ. 20 K’aŋkɔ paloku kɔ ti: «Iya kam kɔ awɛŋc’əm aŋa ŋayi nde doru, mən’ ɔ ŋafaŋ kənəŋk.» 21 Kɔ Yesu oloku: «Iya kem kɔ awɛŋc’im aŋa, ŋayɔnɛ aŋɛ ŋaŋcəŋkəl toloku ta Kanu ŋacəmɛ sɔ ti darəŋ mɔ.»
Yesu kəcəmbərəs kɔn afef ŋɔpɔŋ
22 Dɔsɔk dɔlɔma kɔ Yesu ɛmbɛkɛ debil kɔ acɛpsɛ ɔn darəŋ. K’oloku ŋa: «Pacali ntende kəba mokuru.» Kɔ ŋaŋkɔ. 23 Ŋayi kəcali, kɔ Yesu endirərnɛ. Kɔ afef ŋɔpɔŋ ŋɛyɛfɛ kəwur dəkəba kɔ abil ŋɛfaŋ kəkalɛ, kɔ ŋayi dəpəwɛy-wɛy. 24 Kɔ acɛpsɛ ɔn darəŋ ŋander ŋatimi kɔ, ŋac-kulɛ-kulɛ: «Wətəksɛ! Wətəksɛ! Kəfi kɔ sənder!» Ntɛ entimɛ mɔ, k’ɛyɛfɛ kəgbəŋ-gbəŋər afef, kɔ yam yɔpɔŋ yɔkɔ yɛnayɛfɛ mɔ, kɔ yɛsak few. Kɔ pəyɔ yeŋ, ali tes aŋc-ne fɛ sɔ. 25 Kɔ Yesu eyif ŋa: «Deke kəlaŋ konu kəyi-ɛ?» Ntɛ ŋanesɛ a kɔ cusu cəwos ŋa mɔ, kɔ ŋayifɛnɛ: «Anɔ ɔfɔ wəkawɛ? Wəkawɛ ɛŋgbəŋ-gbəŋər ali afef kɔ yam, yɛcəmɛ sɔ tɛfaŋ tɔn darəŋ!»
Yesu kətaməs ka fum nwɛ yɔŋk yɛlɛc yɛnacəmɛ darəŋ mɔ
26 Kɔ Yesu ɔŋkɔ pənəŋk yecic yɔlɔma nde atɔf ŋa Kadara, nde pəntɛfərɛnɛ kɔ Kalile mɔ. 27 Ntɛ Yesu ontor dəntɔf mɔ, k’ɛnəŋk fum wəlɔma wəka dare dadɔkɔ fɔr yɔn kiriŋ, nwɛ yɔŋk yɛlɛc yɛlarəm yɛnacəmɛ darəŋ mɔ. Kəyɛfɛ ntɛ pənawon mɔ, ɛŋc-bɛrnɛ fɛ duma, ɛnayɔ fɛ kəlɔ kəyi, mɛnɛ pəyi nde aŋwupɛnɛ mɔ. 28 Ntɛ fum nwɛ ɛnəŋk Yesu mɔ, kɔ ŋɔŋk ŋɛlɛc ŋɔsɔŋɛ kɔ kəkulɛ-kulɛ, k’ɛntɛmpɛnɛ Yesu wɛcək dəntɔf, k’oloku pəpɔŋ: «Cəke cɔ məfaŋər’im-ɛ, Yesu, Wan ka Kanu Wəbɛ wəka dareŋc? Ilɛtsɛn’am ta mətɔrəs’im!» 29 Bawo Yesu oŋc-loku ŋɔŋk ŋɛlɛc nŋɛ ŋɛnabɛrɛ fum wəkakɔ dəris pəwon mɔ kəwur. Gbekce yɔ aŋc-kotərɛnɛ fum wəkawɛ dəkəcək kɔ afɛc ŋɔpɔŋ, mba oŋc-copu gbekce yayɔkɔ, ŋɔŋk ŋɛlɛc ŋosolɛ kɔ ŋekekərɛ nde dətɛgbɛrɛ. 30 Kɔ Yesu eyif kɔ: «Cəke cɔ aŋw’am-ɛ?» Kɔ fum nwɛ oloku Yesu: «Ina aŋwe «Pəlarəm».» Bawo yɔŋk yɛlɛc yɛlarəm yɛnacəmɛ kɔ darəŋ. 31 Kɔ yɔŋk yɛlɛc nyɛ yɛlɛtsɛnɛ Yesu kəsak yi, ta pəsɔŋɛ yi kəwur yɔkɔ dəpəcuca. 32 Awa, ŋanabɔlɛnɛ fɛ sɔp yɛlarəm yɔlɔma nyɛ yɔŋc-sɔmət dəndo tɔrɔ kəroŋ mɔ. Kɔ yɔŋk yɛlɛc yontola Yesu kəwosɛ ka kəbɛrɛ ka dəsɔp nyɛ, kɔ Yesu owosɛ yi. 33 Kɔ yɔŋk yɛlɛc yolukus fum nwɛ dəris, kɔ yɔŋkɔ yɛmbɛrɛ dəsɔp. Kɔ sɔp nyɛ fəp yontor kəyɛfɛ dətɔrɔ, kɔ yɔŋkɔ yotor dəkəba, kɔ yɛŋgbətəsɛ, kɔ yefis-fis fəp. 34 Ntɛ afum aŋɛ ŋaŋc-kɛk sɔp nyɛ ŋanəŋk ti mɔ, kɔ ŋayɛksɛ kɔ ŋaŋkɔ ŋaloku ti dare daŋan kɔ aka sədare səkəsək. 35 Kɔ afum ŋander kəmɔmən tɔkɔ tɛnacepər di mɔ. Kɔ ŋander nnɔ Yesu eyi mɔ, kɔ ŋambəp fum wəkɔ yɔŋk yɛlɛc yɛnalukus darəŋ mɔ, pəndɛ Yesu dəntɔf, pəbɛrnɛ yamos pəc-yɔ mes bel-bel, kɔ afum aŋɛ ŋanader kəmɔmən mɔ ŋanesɛ. 36 Afum akɔ ŋananəŋk mes mamɔkɔ mɛnacepər mɔ, ŋalɔmər akɔ ŋanader kəmɔmən tɔkɔ anayac kɔ mɔ. 37 Kɔ afum a atɔf ŋa Kadara fəp ŋaloku Yesu a pəyɛfɛ ndaraŋan pəkɔ, bawo ŋananaŋkanɛ kənesɛ. Kɔ Yesu ɛmbɛrɛ debil k’olukus. 38 Fum wəkɔ Yesu ɛnaluksɛ yɔŋk yɛlɛc darəŋ mɔ, ɛlɛtsɛnɛ Yesu a pətam kəce kɔ pəyi kɔ dəntɔf. Mba kɔ Yesu ombupərɛ kɔ pəc-loku: 39 «Məlukus nnɔ ndaram. Məkɔ məc-loku afum tɔkɔ Kanu kəyɔn’am mɔ fəp.» Kɔ fum nwɛ ɔŋkɔ pəloku dare disrɛ fəp mes mɔkɔ Yesu ɛnayɔnɛ kɔ mɔ.
Wan wəran wəka Sayirus, kɔ wəran wəkɔ ɛnagbuŋɛnɛ yamos ya Yesu mɔ
40 Yesu kəlukus kɔn, kɔ afum ŋaŋkɔ ŋafaynɛ kɔ, bawo fəp fəŋc-kar kɔ. 41 Kɔ fum wəlɔma, pac-we kɔ Sayirus, nwɛ ɛnayɔnɛ wəbɛ wəka dəkəcəpəs mɔ, owur nde pəc-der. Kɔ Sayirus ɛfəntərɛ dəntɔf, k’osumpər Yesu wɛcək, pəc-lɛtsɛnɛ kɔ kəwosɛ kəder ka kəlɔ kɔn. 42 Bawo ɛnayɔ wan wəran wəkin gboŋ, nwɛ ɛnasɔtɔ meren wəco kɔ mɛrəŋ mɔ, pəc-fi. Ntɛ ɛyɛfɛ kəkɔ mɔ, kɔ kənay kəmɛpnɛ kɔ haŋ ŋac-yaməsər kɔ kəŋesəm. 43 Wəran wəlɔma ɛnayi di, wəkakɔ pəc-yak kəyɛfɛ ka meren wəco kɔ mɛrəŋ ta pəŋcəmbərəs-ɛ. Wəran nwɛ ɛnabɛrsɛ daka dɔn fəp nnɔ atɛn cɔl ŋayi mɔ, ntɛ tɔŋsɔŋɛ pataməs kɔ mɔ. Mba ali fum ɛnatam fɛ kətaməs kɔ. 44 Kɔ wəran nwɛ ɔlɔtərnɛ Yesu tadarəŋ, k’oŋgbuŋɛnɛ dobol da duma dɔn. Gbəŋcana babɔkɔ kɔ kəwur mecir kaŋkɔ kənayi kɔ mɔ kəsakɛ. 45 Kɔ Yesu eyif: «Anɔ ogbuŋɛn’em-ɛ?» Ntɛ afum fəp ŋambupərɛ ti mɔ, kɔ Piyɛr oloku: «Wətəksɛ afum ŋaŋkɛl’əm waca nwɛ fəp!» 46 Kɔ Yesu oloku: «Fum wəlɔma oŋgbuŋɛn’em, bawo iŋcərɛ a fənɔntər fəlɔma fəwur’im dəris.» 47 Ntɛ wəran nwɛ ɛŋcərɛ a Yesu ɛŋcərɛ fɔ fum oŋgbuŋɛnɛ kɔ mɔ, k’ender pəc-yikcɛ, k’ɛntɛmpɛnɛ Yesu wɛcək dəntɔf. K’oloku afum fəp fɔr kiriŋ tes tɔkɔ tɛnasɔŋɛ kɔ kəgbuŋɛnɛ ka duma da Yesu mɔ, kɔ tɔkɔ docu dɔn dɛnatamnɛ gbəŋcana babɔkɔ mɔ. 48 Kɔ Yesu oloku kɔ: «Wan kem, kəlaŋ kam kəyac’əm, məkɔnɛ abəkəc ŋoforu.» 49 Yesu eyi kəlok-loku kaŋkɔ, kɔ fum wəlɔma ender kəyɛfɛ ka ndena wəbɛ ka dəkəcəpəs da dare, k’ender pəloku: «Wan kam efi, ali məntɔrəs fɛ sɔ wətəksɛ kəkɔ di.» 50 Mba Yesu ɛnane fum nwɛ kəloku ka wəbɛ wəka dəkəcəpəs defi da wan kɔn, k’oloku wəbɛ nwɛ: «Ta mənesɛ! Məlaŋ gbəcərəm, wan kam ɛntamnɛ.» 51 Ntɛ ŋalukus dɛkɛr mɔ, Yesu owosɛ fɛ fum kəbɛrɛ kɔ nkɔn mɛnɛ Piyɛr, Saŋ, Sak, wan wəran nwɛ kas kɔ kɛrɛ gbəcərəm, ŋɔ ɛnawosɛ kəbɛrɛ nnɔ wan wəran wəfi nwɛ eyi mɔ. 52 Kɔ afum fəp ŋambok ŋac-lɔm pəcuy paŋan tetɔn. Kɔ Yesu oloku: «Ta nəbok! Efi fɛ, kədirɛ k’ɛndɛ.» 53 Kɔ afum ŋayɛfɛ kəselər Yesu, bawo afum aŋɛ ŋanacərɛ a wan wəran nwɛ efi. 54 Kɔ Yesu osumpər wan wəran nwɛ kəca, k’olokɛ dim dɔpɔŋ: «Wəyecəra, məyɛfɛ!» 55 Kɔ amera ŋɔn ŋender kɔ, gbəŋcana babɔkɔ k’ɛyɛfɛ, kɔ Yesu oloku a pasɔŋ kɔ yeri. 56 Kɔ cusu cəwos akombəra aka wan wəran nwɛ, kɔ Yesu oloku ŋa a ta ŋalɔmər nwɛ o nwɛ ntɛ teŋcepər mɔ.
Yesu osom acɛpsɛ ɔn darəŋ wəco kɔ mɛrəŋ
1 Kɔ Yesu ewe Asom ɔn aŋɛ wəco kɔ mɛrəŋ, k’ɔsɔŋ ŋa fənɔntər kɔ kətam ka kəbɛləs yɔŋk yɛlɛc fəp, kəlɛkɛnɛ kətam ka kətaməs ka docu. 2 Kɔ Yesu osom ŋa kəkɔ-dəŋk dɛbɛ da Kanu, kɔ kətaməs ka docu. 3 K’oloku ŋa: «Ta nətɔmpərɛnɛ daka o daka teta dɔpɔ, ta nətɔmpər togbo, ta nətɔmpər tɔlɔba, ta nətɔmpər tocom, ta nətɔmpər pəsam, ta nwɛ o nwɛ pətɔmpər suma mɛrəŋ. 4 Nnɔ o nnɔ aŋkɔ-baŋ’un waca mɛrəŋ mɔ, nəyi di, difɔ nəndekɔ-wur a nəsumpər dɔpɔ donu kəkɔ. 5 Nnɔ o nnɔ afum ŋantɔkɔ-wos’on kəyi mɔ, kɔ nəndewur dare dadɔkɔ-ɛ, nəkoŋ-koŋ wɛcək wonu, itɔ endeyɔnɛ sede nnɔ ŋayi mɔ. 6 Kɔ asom aŋɛ ŋawur ŋac-kɔt sədare; ŋac-dəŋk toloku tɔtɔt ta Kanu, ŋac-taməs acuy mofo fəp.
Pəciyanɛ pa Herodu
7 Ntɛ Alkaly Herodu ene mes mmɛ meŋc-cepər mɔ, kɔ pəŋciyanɛ kɔ. Bawo alɔma ŋaŋc-loku a Saŋ entimɛ afi dacɔ; 8 alɔma ŋac-loku, a Eliya eder, alɔma ŋac-loku, a wədəŋk wəka Kanu wəcɔkɔ-cɔkɔ wəlɔma oluksərnɛ sɔ kəder. 9 Kɔ Herodu nkɔn oloku: «Inagbinti Saŋ domp! Anɔ ɔyɔnɛ fum wəkawɛ aŋloku tetɔn mɔ-ɛ?» Kɔ Herodu ɛfaŋ kənəŋk kɔ.
Yesu kəsɔŋɛ ka afum wul kəcamət (5000 ) kənɛmbərɛ
10 Kɔ asom ŋander ŋaluksɛ Yesu tɔkɔ ŋanayɔ mɔ fəp. Kɔ Yesu ɛlɛk ŋa kɔ ŋawurnɛ kəsək, ntende dare da Bɛtsayida. 11 Kɔ afum ŋaŋcərɛ kəwur kəŋan kɔ ŋaŋcɛpsɛ ŋa darəŋ. Kɔ Yesu owosɛ ŋa kəder, k’ɔŋkɔ pəc-loku ŋa teta dɛbɛ da Kanu, k’ɛntaməs sɔ aŋɛ ŋanatɔ-tamnɛ mɔ. 12 Ntɛ dec dɛyɛfɛ kəkalɛ mɔ, kɔ Asom ɔn ŋalɔtərnɛ kɔ ŋac-loku: «Məyɔ oŋ məsak afum akaŋɛ ŋakɔ ŋatɛn dəkədirɛ kɔ yeri nde sədare nsɛ səŋkɛl nnɔ mɔ; bawo dətɛgbɛrɛ ayi wəkawɛ.» 13 Kɔ Yesu oloku ŋa: «Nəna nəsɔŋ ŋa yeri.» Kɔ Asom ɔn ŋaloku kɔ: «Cəcom kəcamət kɔ lop mɛrəŋ gbəcərəm yɔ səyɔ, məfaŋ oŋ a səkɔ səwayɛ kənay kaŋkɛ yeri ba?» 14 Mba afum aŋɛ ŋaŋc-bəp afum wul kəcamət (5000 ). Kɔ Yesu oloku Asom ɔn: «Nəyɔ ŋa ŋaloŋkanɛ afum 50 -50 .» 15 Kɔ asom ɔn ŋayɔ tɔkɔ Yesu ɛnaloku ŋa kəyɔ mɔ, kɔ ŋandəs ŋa fəp. 16 Kɔ Yesu ɛlɛk cəcom ncɛ kəcamət kɔ lop nyɛ mɛrəŋ, k’eyekti fɔr dareŋc, k’ontolanɛ yeri nyɛ nnɔ Kanu kəyi mɔ. Kɔ tɛyɛfɛ dənda k’entipi yeri nyɛ a k’endesɔŋəs yi acɛpsɛ a ŋayerəs kənay kaŋkɔ. 17 Kɔ afum akakɔ fəp ŋandi yeri nyɛ kɔ ŋanɛmbərɛ. Ntɛ anawɛtəs yeri yɛləpəs nyɛ mɔ, yɛnayɔ cəfala wəco kɔ mɛrəŋ.
Piyɛr oloku a Yesu ɔyɔnɛ nwɛ Kanu kəyɛk-yɛk mɔ
18 Dɔsɔk dɔlɔma Yesu pəc-lok-lokər Kanu taciŋa, acɛpsɛ ɔn darəŋ ŋaloŋkanɛ kɔ kəsək. Kɔ Yesu eyif ŋa: «Toloku ta afum, anɔ iyɔnɛ-ɛ?» 19 K’acɛpsɛ ɔn darəŋ ŋaloku kɔ: «Ntɛ alɔma ŋaloku mɔ, a Saŋ wəgbət afum dəromun məyɔnɛ, k’alɔma ŋaloku a Eliya məyɔnɛ; alɔma a wədəŋk wəka Kanu wəcɔkɔ-cɔkɔ wəlɔma ɔ məyɔnɛ nwɛ ɛyɛfɛ afi dacɔ mɔ.» 20 Kɔ Yesu eyif ŋa sɔ: «Kɔ cəke cɔ nəna nəŋcɛm-cɛmnɛn’em kəyɔnɛ-ɛ?» Kɔ Piyɛr oloku Yesu: «Wəyɛk-yɛk wəka Kanu məyɔnɛ.»
Yesu kəcam defi dɔn kɔ kədeyɛfɛ kɔn afi dacɔ
21 Kɔ Yesu entiŋ-tiŋ ŋa kəcaŋkɛ ti, ta ŋaloku ti fum o fum. 22 K’ɔnɔcər a pənamar dis dɔlɔl Wan ka fum bel-bel; abeki, aloŋnɛ apɔŋ kɔ atəksɛ sariyɛ ŋabɛləs kɔ; padif kɔ; pəyɛfɛ defi tataka tɔn ta maas. 23 K’oloku afum fəp ntɛ: «Kɔ fum ɛfaŋ kəcɛps’em-ɛ, wəkayi pəsak kəcɛm-cɛmnɛ tetɔn ta sərka, wəkayi pəwosɛ kəsak mɛfaŋ mɔn pəwosɛ kətɔrɔ haŋ pəfi dɔsɔk o dɔsɔk, pəcəm’em darəŋ. 24 Bawo, nwɛ o nwɛ ɛfaŋ kəyac kəyi doru kɔn mɔ, kəŋsalpər kɔ; mba nwɛ o nwɛ ɔ kiyi kɔn doru kəsalpər kɔ tetem mɔ, ɛyac ki. 25 Ake tɔyɔ fum kəsɔtɔ kɔn doru dandɛ fəp-ɛ, kɔ pəyɔnɛ fɔ wəkayi eyi kəgbalənɛ kɔ pəyɔnɛ fɛ ti wəkayi pəc-ləsərnɛ-ɛ? 26 Nwɛ o nwɛ ɛlapərn’em kɔ moloku mem, Wan ka fum endekɔ-sɔdəmnɛ-wosɛ kəyac məna wəkayi k’endeder pəmot pa pəlel pa dɛbɛ da Papa-ɛ, kɔ mɛlɛkɛe mecempi. 27 Ic-loku nu kaŋce: Afum akin akin ŋayi nnɔ kəfo kaŋkɛ aŋɛ ŋantɔdewak defi ta ŋantanəŋk dɛbɛ da Kanu mɔ.»
Piyɛr, Saŋ kɔ Sak ŋanəŋk Yesu pəyi pəmotu pa debeki da Kanu disrɛ
28 Ntɛ Yesu oloku moloku mamɔkɔ mɔ, kɔ mata camət-maas meŋcepər, k’ɛlɛk Piyɛr, Saŋ kɔ Sak, kɔ ŋampɛ tɔrɔ kəroŋ kəkɔ-lok-lokər Kanu. 29 Yesu eyi kəsali, kɔ kəro kɔn kɛsəkpər, kɔ yamos yɔn yɛnaŋkanɛ kəferɛ yoc-motər-motər. 30 Pəwon fɛ kɔ afum mɛrəŋ ŋayɛfɛ kəlok-loku kɔ nkɔn: Musa kɔ Eliya ŋanayi, 31 aŋɛ aŋc-nəŋk pəmot pa pəlel pa debeki da Kanu disrɛ mɔ. Ŋac-loku Yesu kəkɔ kɔn nkɛ kəŋkɔyi Yerusalɛm mɔ. 32 Tɛtəŋnɛ Piyɛr k’asol ɔn ŋac-dirɛ pəpɔŋ; ntɛ ŋantimɛ mɔ, kɔ ŋanəŋk Yesu pəmot pa debeki da Kanu disrɛ, kɔ afum mɛrəŋ akɔ ŋanacəmɛ kɔ nkɔn mɔ. 33 Tɛm ntɛ afum akakɔ mɛrəŋ ŋaŋc-gbɛyɛnɛ kɔ Yesu mɔ, kɔ Piyɛr oloku kɔ: «Wətəksɛ pəntesɛ su kiyi ka nnɔ. Səcəmbər cəbal cəcɛpɛ-cɛpɛ maas, ŋin ŋam, ŋin ŋa Musa, kɔ ŋin ŋa Eliya.» Piyɛr ɛnacərɛ fɛ ntɛ oŋc-loku mɔ. 34 Ntɛ oŋc-loku tatɔkɔ mɔ, kɔ kəp kənder kəgbəpərnɛ ŋa kɔ kənesɛ kəsumpər acɛpsɛ a Yesu darəŋ ntɛ ŋananəŋk kəp kaŋkɔ kəc-der kəgbəpərnɛ ŋa mɔ. 35 Kɔ dim dowur kəp kaŋkɔ disrɛ, doc-loku: «Wəkawɛ ɔyɔnɛ wan kem, nkɔn iyɛk-yɛk: Nəcəŋkəl kɔ!» 36 Ntɛ ane dim dadɔkɔ mɔ, k’anəŋk Yesu pəcəmɛ sona. K’acɛpsɛ a Yesu darəŋ ŋaŋcaŋk ali fum ɛnaloku fɛ sɔ wəkos tɔlɔma ntɛ ɛnəŋk mɔ mata mamɔkɔ.
Yesu kətaməs ka wan nwɛ ŋɔŋk ŋɛlɛc ŋɛnatoŋkulu-toŋkulu
37 Dɔckɔsɔk ntɛ ŋantor kəyɛfɛ dətɔrɔ mɔ, kɔ afum alarəm ŋander kədefaynɛ Yesu. 38 Kɔ fum wəlɔma oŋkulərnɛ kənay kaŋkɔ dacɔ: «Wətəksɛ ilɛtsɛn’am məmɔmən wan kem, bawo wəkin wəkawɛ gboŋ iyɔ. 39 Ŋɔŋk ŋɛlɛc ŋɔlɔma ŋɛmbɛrɛ kɔ, kɔ ŋɔsɔŋɛ kɔ kəkulɛ-kulɛ gbəŋcana babɔkɔ, kɔ ŋeyikəc kɔ pəpɔŋ, kɔ ŋɔsɔŋɛ kɔ kəfoc kəwur kɔ dəkusu; kɔ ŋɔlɔləs kɔ dis, a kɔ ŋendesak kɔ. 40 Ilɛtsɛnɛ acɛpsɛ-am darəŋ kəbɛləs ka ŋi, mba ŋantam fɛ ti.» 41 Kɔ Yesu oŋkulərnɛ: «Nəna afum alɛc a tɛm tantɛ, atɔlaŋ Kanu, tɛm cəke tɔ pəmar sɔ iyi kɔ nəna-ɛ? Tɛm cəke tɔ pəmar sɔ itɔmpər te tonu-ɛ? Məkɛrɛ wan kam nnɔ.» 42 Ntɛ wan wəkakɔ ɔŋc-lɔtərnɛ Yesu mɔ, kɔ ŋɔŋk ŋɛŋgbal kɔ dəntɔf kɔ ŋeyikəc kɔ pəpɔŋ. Mba kɔ Yesu ɛŋgbəŋ-gbəŋər ŋɔŋk ŋɛlɛc ŋaŋɔkɔ, k’ɛntaməs wan wəkakɔ, k’ɔsɔŋ kɔ kas. 43 Kɔ cusu cəwos afum fəp kənəŋk ka fənɔntər fəpɔŋ fa Kanu.
Yesu kəgbɔkərɛ kɔn kəloku defi dɔn
Ntɛ mes mamɔkɔ Yesu ɔŋc-yɔ mɔ mec-ciyɛnɛ afum mɔ, k’oloku acɛpsɛ ɔn darəŋ: 44 «Nəna nəsu ləŋəs, nəcəŋkəl bel-bel moloku mamɛ: Kəbɛr k’ander Wan ka fum afum dəwaca. 45 Mba acɛpsɛ ɔn darəŋ ŋanacərɛ fɛ tedisrɛ ta toloku tatɔkɔ oŋc-loku mɔ; tɛnagbɔpnɛ ŋa, ntɛ tɔŋsɔŋɛ ta ŋaŋcərɛ ti mɔ. Kɔ ŋanesɛ kəyifət kɔ tedisrɛ ta toloku tatɔkɔ.
Anɔ ecepər nu fəp-ɛ?
46 K’acɛpsɛ ɔn darəŋ ŋayɛfɛ kəyifətɛnɛ ntɛ tɔŋsɔŋɛ ŋacərɛ nwɛ eŋcepər ŋa dəkəcəmɛ mɔ. 47 Yesu nwɛ ɛnacərɛ mɛcɛm-cɛmnɛ mmɛ meyi ŋa dəcor mɔ, ɛlɛk wan wəfɛt wəkin, k’ɛŋcəmbərərnɛ kɔ. 48 Kɔ Yesu oloku ŋa: «Nwɛ o nwɛ ɛbaŋ wan wəkawɛ kəbaŋ kətɔt tetem, ɛmbaŋ’im ina sərka pətɔt; nwɛ o nwɛ ɛbaŋ’im, ɛmbaŋ wəkɔ osom’im mɔ. Bawo fum wəkɔ ɛŋcəmbərnɛ dəkəcəmɛ dɛfɛt mɔ, ɔyɔnɛ wəkɔ eŋcepər nu fəp.»
Nwɛ ɔntɔc’am mɔ, ɛfaŋ’əm
49 Kɔ Saŋ ɛlɛk moloku k’oloku: «Wətəksɛ sənanəŋk fum wəlɔma pəc-bɛləsɛ yɔŋk yɛlɛc tewe tam; kɔ səfaŋ kəmɔnɛ kɔ, bawo wəkayi ɛŋcəmɛ f’am darəŋ pəmɔ səna.» 50 Kɔ Yesu oloku kɔ: «Ta nəmɔnɛ kɔ ti; bawo fum nwɛ ɔntɔc’am mɔ, ɛfaŋ’əm.»
Dare dɔlɔma da Samari kəfati kəbaŋ ka Yesu
51 Ntɛ dɔsɔk dɛlɛk da Yesu doru dɔŋc-lɔtəs mɔ, k’olokunɛ a mɛnɛ pəkɔ Yerusalɛm gbəs. 52 K’osom afum alɔma ŋayi kɔ kiriŋ. Kɔ akakɔ ŋayi kiriŋ kɔ ŋaŋkɔ ŋabəp dare da Samari dɔlɔma, ntɛ tɔŋsɔŋɛ ŋalompəsnɛnɛ kɔ mɔ. 53 Mba kɔ aka dare dadɔkɔ ŋafati kəbaŋ kɔ, bawo Yerusalɛm ŋaŋc-kɔ. 54 Ntɛ afum aŋɛ ŋanəŋk ti mɔ, acɛpsɛ a Yesu darəŋ, Saŋ kɔ Sak ŋaloku: «Wətəksɛ, məfaŋ səloku nɛŋc dotor kəyɛfɛ dəkɔm dɛləsər ŋa?» 55 Kɔ Yesu ɛŋkafəlɛ k’ɛntɛfərnɛ ŋa, k’ɛgbəŋ-gbəŋər ŋa. 56 Kɔ ŋayɛfɛ kɔ ŋaŋkɔ dare dɔlɔma.
Aŋɛ ŋafaŋ kəcəmɛ Yesu darəŋ mɔ
57 Ntɛ ŋanayi dɔpɔ kəkɔ mɔ, kɔ fum wəlɔma oloku kɔ: «Iŋcəm’am darəŋ nnɔ o nnɔ məŋkɔ mɔ.» 58 Kɔ Yesu oloku kɔ: «Yeterer yɔyɔ bi kɔ bɛmp yɔyɔ wɔlɔ wa yi; mba Wan ka fum ɔyɔ fɛ nnɔ ɛntam kəboc domp mɔ.» 59 Kɔ Yesu oloku fum wəlɔma: «Məcəm’em darəŋ.» Kɔ fum wəkakɔ oloku kɔ: «Wətəksɛ, məwos’em kərɛsna ikɔ iwup papa kem.» 60 Kɔ Yesu oloku fum wəkakɔ: «Məsak afi ŋawup afi; kɔ məna, məkɔ mədəŋk dɛbɛ da Kanu.» 61 Kɔ fum wəlɔma oloku: «Kəcəm’am k’inder darəŋ Wəbɛ, mba məkar ikɔ kərɛsna ilembərnɛ aka kəlɔ kem disrɛ.» 62 Kɔ Yesu oloku kɔ: «Nwɛ o nwɛ edebiftɛ cəna a wəkayi pəc-mɔmən tadarəŋ, entesɛ fɛ kədəŋk ka dɛbɛ da Kanu.»
Kəsom ka acɛpsɛ darəŋ 72
1 Ntɛ tatɔkɔ teŋcepər mɔ, kɔ Wəbɛ ɛyɛk-yɛk sɔ afum 72 alɔma, k’osom ŋa mɛrəŋ mɛrəŋ ŋayi kɔ tekiriŋ kəkɔt ka sədare kɔ mofo fəp mmɛ pənamar kɔ kəkɔ mɔ. 2 K’oloku ŋa: «Dalɛ dɛtɛl dɛmbɛk, mba atɛl ŋampicɛ. Nəlɛtsɛnɛ wəka dalɛ dɛtɛl dandɛ, pəsak atɛl ŋade ŋatɛl dalɛ dɔn. 3 Awa! Nəkɔ, isak’un nəkɔ pəmɔ ntɛ aŋsak ŋkesiya calma dacɔ mɔ. 4 Ta nətɔmpərɛnɛ pəsam pa delek, ta nətɔmpərɛnɛ lɔba, ta nətɔmpərɛnɛ cɔfta, ta nəyifɛnɛ sɔ kɔ fum o fum dɔpɔ. 5 Kəlɔ nkɛ o nkɛ nəndekɔ-bɛrɛ mɔ, nəkulɛ kərɛsna: ‹Kanu kəbɛrsɛ pəforu kəlɔ kaŋkɛ!› 6 Kɔ pəyɔnɛ, fum wəka pəforu eyi kəlɔ kaŋkɔ-ɛ, pəforu ponu peŋyi kɔ kəroŋ; kɔ pəyɔnɛ fɛ ti-ɛ, pəforu papɔkɔ poluksərn’on. 7 Nəyi kəlɔ kaŋkɔ, nədi yeri, nəmun domun da kəlɔ kaŋkɔ; bawo pəmar pasɔŋ wəbəc kəway kɔn. Ta nəc-cal-cali wɔlɔ de! 8 Dare ndɛ o ndɛ nəbɛrɛ a pabaŋ’un mɔ, nədi yeri yɔkɔ aŋsɔŋ’un mɔ. 9 Nətaməs acuy akɔ ŋayi di mɔ, nəloku ŋa: ‹dɛbɛ da Kanu dɔlɔtərn’on.› 10 Dare ndɛ o ndɛ nəkɔ ta ambaŋ’un mɔ, nəkɔ nde abaŋka ŋaŋan nəloku: 11 ‹Səŋkoŋər’un kəbof ka dare donu ali nkɛ kəsoptɛ su dəwɛcək mɔ, səluks’on ki; nətam kəcərɛ a dɛbɛ da Kanu dɔlɔtərnɛ.› 12 Ic-lok’un a dɔsɔk dadɔkɔ, tɔyɔ ntɛ andeyɔ dare dadɔkɔ mɔ, tendeyeŋk tecepər ta Sodom.»
Sədare nsɛ səfati kəlaŋ mɔ
13 «Pəlɛcər’əm məna dare da Korasin! Pəlɛcər’əm məna, dare da Bɛtsayida! Bawo mes mɛwɛy-wɛy mmɛ Kanu kəmmentər ayɔ nnɔ ndoronu mɔ, m’ anayɔ sədare sa Tir kɔ Sidɔŋ-ɛ, kɔ ŋanasəkpər mera pəwon, ŋacəmɛ pəlompu darəŋ, ŋabɛrnɛ yamos yaŋan ya kəbal, ŋandɛ ŋamɔŋcnɛ! 14 Itɔ endesɔŋɛ dɔsɔk da kiti ka Kanu dadɔkɔ, pəfɔdeyeŋkər Tir kɔ Sidɔŋ pəmɔ nəna. 15 Kɔ məna, dare da Kapɛrnayum, məŋcɛm-cɛmnɛ a andekɔ-pɛn’am haŋ dareŋc? Ala! Andekɔ-tor’am dəntɔf haŋ nnɔ afum afi ŋayi mɔ. 16 Nwɛ ɛŋcəŋkəl’un mɔ, ɛŋcəŋkəl’im. Kɔ nwɛ ɛŋwɛnəs’un mɔ, ɛwɛnəs’im, k’ɛwɛnəs wəkɔ osom’im mɔ.»
Kəlukus ka acɛpsɛ darəŋ 72
17 Kɔ afum 72 aŋɛ anasom mɔ ŋalukus pəbotu disrɛ kɔ ŋaloku: «Wəbɛ! Ali yɔŋk yɛlɛc fəp yɛnayi su dəntɔf tewe tam.» 18 K’oloku ŋa: «Indenanəŋk Sentani kətɛmpɛnɛ kəyɛfɛ dareŋc pəmɔ tɔkɔ pəŋmot mɔ. 19 Nəcəŋkəl: Isɔŋ’un kətam kəkɔt ka bok kɔ mekəleŋcər kəroŋ kəlɛkɛnɛ fənɔntər fa ater anu fəp, daka o daka dɔfɔtam kəyams’on ti. 20 Mba ta pəbɔt’un ntɛ yɔŋk yɛlɛc yeyi nu dəntɔf mɔ, mba pəbɔt’un ntɛ aŋcic mewe monu nde dareŋc, ndena Kanu mɔ.»
Pəbotu pa Yesu
21 Tɛnatəŋnɛ, Amera Ŋecempi ŋa Kanu ŋɔsɔŋɛ pənaŋkanɛ kəbɔt Yesu, k’oloku: «Iŋyek-yekəs’əm, Papa, Wəbɛ wəka dareŋc kɔ dəntɔf, ntɛ məmɛŋkər abeki kɔ asoku səbomp mes mamɛ, a kɔ məmentər mi awut afɛt mɔ. Ɛy, Papa, bawo tatɔkɔ tɔ məfaŋ ti. 22 Ic-lok’un a Papa kem ɛmbɛr’im ca fəp dəwaca. Nwɛ o nwɛ ɛŋcərɛ fɛ nwɛ ɔyɔnɛ Wan mɔ, kɔ pəntɔyɔnɛ Papa-ɛ; nwɛ o nwɛ ɛŋcərɛ fɛ sɔ nwɛ ɔyɔnɛ Papa mɔ, kɔ pəntɔyɔnɛ Wan-ɛ, kɔ afum akɔ Wan ɛŋfaŋ kəloku ti mɔ.» 23 Kɔ Yesu ɛŋkafəlɛ k’ɛntɛfərnɛ acɛpsɛ ɔn darəŋ, k’ɛyɛl dim, pəc-loku ŋa: «Pəmbɔt fɔr yɔkɔ yɛŋnəŋk mɔkɔ nəyi kənəŋk mɔ! 24 Bawo adəŋk a Kanu kɔ abɛ a tɔf yɛlarəm ŋanafaŋ kənəŋk mmɛ nəyi kənəŋk mɔ, mba ŋananəŋk fɛ mi; ŋanafaŋ kəne mmɛ nəyi kəne mɔ, mba ŋanane fɛ mi.
Capafɔ ca wəSamari wətɔt
25 Kɔ wətəksɛ sariyɛ wəlɔma ɛyɛfɛ k’oloku Yesu, ntɛ ɛfaŋ kəcəpɛ kɔ towul mɔ. K’eyif Yesu: «Wəbɛ, cəke cɔ pəmar iyɔ kəsɔtɔ ka kəyi wəyeŋ katina-ɛ?» 26 Kɔ Yesu eyif kɔ: «Cəke cɔ aŋcic nde buk ba sariyɛ-ɛ? Cəke cɔ məŋkaraŋ bi disrɛ-ɛ?» 27 Kɔ fum nwɛ oloku Yesu: «Pəmar məbɔtərɛ Wəbɛ Kanu abəkəc ŋam fəp, amera ŋam fəp, fənɔntər fam fəp, kɔ kəsɔk kam domp fəp. Kɔ telip-ɛ, məbɔtər wɛŋc’əm pəmɔ tɔkɔ məmbɔtərnɛ məna sərka mɔ.» 28 Kɔ Yesu oloku kɔ: «Məloku ti bel-bel, məyɔ tatɔkɔ ntɛ tɔŋsɔŋ’am kəyi wəyeŋ katina mɔ.» 29 Mba ntɛ wəbɛ wəka sariyɛ nwɛ ɛfaŋ kəmentər dolompu dɔn mɔ, k’eyif Yesu: «Anɔ ɔyɔnɛ wɛŋc’im-ɛ?» 30 Kɔ Yesu ɔŋgbɔkərɛ moloku k’oloku: «Fum wəlɔma ɛnayɛfɛ Yerusalɛm pəc-kɔ Yeriko. Kɔ afum wəkakɔ ɔŋkɔ pəbɛrɛ afum alɛc dacɔ, kɔ afum alɛc akakɔ ŋambaŋər kɔ daka dɔkɔ ɛnatɔmpər mɔ fəp, kɔ ŋasut kɔ haŋ pəc-but kəfi, kɔ ŋasumpər dɔpɔ kɔ ŋaŋkɔ. 31 Kɔ tosurɛnɛ wəloŋnɛ wəlɔma osolnɛ sɔ dɔpɔ din dadɔkɔ; ntɛ wəloŋnɛ nwɛ ɛnəŋk fum wəkɔ anasut mɔ, k’eŋcepər dɔpɔ ntende pəbɔlɛ kɔ. 32 Kɔ wəLewy wəlɔma ender sɔ kəfo kin kaŋkɔ; kɔ wəkakɔ sɔ ɛnəŋk fum nwɛ, kɔ nkɔn sɔ eŋcepər ntende pəbɔlɛ kɔ. 33 Kɔ wəSamari wəlɔma nwɛ ɔŋc-kɔ delek mɔ, ender pəbəp fum wəkawɛ ntɛ ɛnəŋk kɔ mɔ, kɔ nɔnɔfɔr deyi kɔ. 34 Kɔ wəSamari nwɛ ɔlɔtərnɛ fum nwɛ, k’oloŋər ruŋc yɔn member, k’ɔmbɔy yi moro; k’esektər yi. Kɔ wəSamari nwɛ ɛlɛk fum wəkakɔ k’endeŋ kɔ pɔkɔtɛnɛ pɔn kəroŋ, k’eŋkekərɛ kɔ karwaŋse kəlɔma, k’ɔŋkɔ pəboc kɔ di, k’ɛŋcəmɛ tetɔn. 35 Dɔckɔsɔk kɔ wəSamari nwɛ owurɛ gbəleŋ mɛrəŋ ba pəsam, k’ɔsɔŋ bi wəka karwaŋse. K’oloku kɔ: ‹Məgbɛkərɛ kɔ, mpɛ o mpɛ mendesɔŋ kɔ mɔ, indeluks’am pi dəkəlukus dem.›» 36 Kɔ Yesu ɔnɔcər: «Afum akaŋɛ maas dacɔ anɔ ɔ məna məŋcɛm-cɛmnɛ kəyɔnɛ ka wɛŋc ka fum wəkɔ afum alɛc ŋanasut mɔ?» 37 Kɔ wəbɛ wəka sariyɛ nwɛ oloku: «Nwɛ ɛnamentər kɔ amera ŋobotu mɔ.» Kɔ Yesu oloku wəbɛ wəka sariyɛ nwɛ: «Awa, məna sɔ məkɔ məyɔ tatɔkɔ.»
Yesu ndena Marta kɔ Mari
38 Yesu ŋayi dɔpɔ kəkɔ kɔ acɛpsɛ ɔn darəŋ, kɔ ŋambɛrɛ dare dɔlɔma, kɔ wəran wəlɔma pac-we kɔ Marta, ɛmbaŋ kɔ nde ndɔrɔn. 39 Marta ɛnayɔ wɛŋc wəran wəlɔma nwɛ aŋc-we Mari mɔ, kɔ wɛŋc nwɛ ɔŋkɔ pəndɛ Wəbɛ dəntɔf, pəc-cəŋkəl moloku mɔn. 40 Marta nkɔn pəsumpər yɛbəc yɛlarəm. Kɔ Marta ender pəloku Yesu: «Wəbɛ tɔfɔtɔrəs’əm tantɛ wɛŋc’im wəran ende pənd’am dəntɔf pəsakər’em yɛbəc yayɛ sona mɔ? Məloku kɔ pəde pəmar’im.» 41 Kɔ Yesu oloku kɔ: «Marta, Marta! Məyi kəcɛm-cɛmnɛ kɔ kəsimsɛ teta mes mɛlarəm. 42 Mba tes tin gboŋ tɔyɔ dəkəcəmɛ. Mari ɛlɛk da pəntesɛ mɔ, afɔsɔ-baŋər kɔ dənda.»
Yesu kɔ sali
1 Dɔsɔk dɔlɔma Yesu pəc-lok-lokər Kanu kəfo kəlɔma. Ntɛ elip mɔ, kɔ wəcɛpsɛ kɔn darəŋ wəlɔma eyif kɔ: «Wətəksɛ, mətəksɛ su kəlok-lokər Kanu, pəmɔ tɔkɔ Saŋ ɛnatəksɛ acɛpsɛ ɔn darəŋ kəlok-lokər Kanu mɔ.» 2 Kɔ Yesu oloku ŋa: «Kɔ nənde kəc-lok-lokər Kanu-ɛ, nəloku: Papa! Pacərɛ decempi da tewe tam; Dɛbɛ dam deder! 3 Məc-sɔŋ su dɔsɔk o dɔsɔk kəcom kosu ka dɔsɔk; 4 Məŋaŋnɛnɛ su kiciya kosu! Awa, səna sɔ, səŋaŋnɛnɛ nwɛ o nwɛ eŋciyanɛ su mɔ. Ta məsak su səcɛm-cɛmnɛ kəciya.» 5 Kɔ Yesu oloku ŋa sɔ: «Anɔ ɛntam kəyɔ wəkos wəkin nu dacɔ, nwɛ ɛŋyɛfɛ cɛk-cɛk pəkɔ pəbəp wanapa kɔn nde ndɔrɔn pəc-loku kɔ: ‹Wanapa məbɔr’im cəcom maas, 6 bawo wəbɔt kem wəlɔma eder nde nderem cɛk-cɛk caŋcɛ, mba ali paka iyɔ fɛ mpɛ iŋsɔŋ kɔ pədi mɔ.› 7 Kɔ wanapa kɔn wəkakɔ, eyi dukəlɔ mɔ oloku kɔ: ‹Ta mətɔrs’im! Aŋgbət kumba, səfəntərɛ kɔ awut’em, ifɔtam kəyɛfɛ isɔŋ’əm cəcom,› 8 ic-lok’un ti: Ali pəyɔnɛ fɔ ɔfɔyɛfɛ pəsɔŋ kɔ ci bawo wanapa kɔn ɔfɔ, endeyɛfɛ pəsɔŋ kɔ daka o daka ndɛ ɛfaŋ mɔ, bawo wanapa kɔn ɛŋgbəc gbɛs a mɛnɛ pəsɔŋ kɔ. 9 Kɔ ina, ilok’un: Nətola, aŋsɔŋ’un; nətɛn, nəŋnəŋk; nəsut-sut kumba, aŋgbitɛ nu. 10 Bawo məna nwɛ məntola mɔ, ampoc’am; məna nwɛ məntɛn mɔ, məŋnəŋk; pagbitɛ nwɛ oŋsut-sut kumba mɔ. 11 Kas kəre kəyi nu dacɔ, nkɛ wan kɔn ontola kɔ alop, pəsɔŋ kɔ abok mɔ? 12 Kɔ pəyɔnɛ fɛ ti-ɛ, wan kɔn pətola kɔ ames ŋɛgbɛŋ, nkɔn pəsɔŋ kɔ tekəleŋcər? 13 Kɔ pəyɔnɛ fɔ nəna aŋɛ nəlɛcɛ mɔ, nəŋcərɛ kəsɔŋ awut anu ca yɔtɔt, ta ake tɔ Kas nkɛ kəyi nde dareŋc mɔ, kəŋkɔsɔŋ Amera Ŋecempi ŋɔn aŋɛ ŋaŋwer kɔ ŋi mɔ!»
Yesu kəluksɛ moloku ma yem nyɛ anaboŋcɛ kɔ mɔ
14 Dɔsɔk dɔlɔma Yesu pəc-bɛləs ŋɔŋk ŋɛlɛc nŋɛ ŋɛnasɔŋɛ fum wəlɔma kətɔ-lok-loku mɔ. Ntɛ ŋɔŋk ŋɛlɛc ŋaŋɔkɔ ŋowur kɔ mɔ, kɔ wətɔlok-loku wəkakɔ olok-loku, kɔ pəŋciyanɛ afum. 15 Mba kɔ afum alɔma ŋaloku: «Bɛlsebul wəbɛ wəka yɔŋk yɛlɛc, ɛmbɛlsɛ yɔŋk yɛlɛc.» 16 Ntɛ alɔma ŋafaŋ kəsumpər kɔ dəmoloku mɔ, kɔ ŋaloku kɔ a pəmentər tɔyɔ tɛgbɛkərɛ tin ntɛ teŋmentər a Kanu kəsom kɔ mɔ. 17 Mba ntɛ Yesu ɛnacərɛ pɛcɛm-cɛmnɛ paŋan mɔ, k’oloku ŋa: «Dare ndɛ aka di ŋandeyɛfərɛnɛ taŋan mɔ, dɛŋləpsər kəlɛcɛ. Wɔlɔ wa di wɛtɛmpɛnɛ win win. 18 Kɔ pəyɔnɛ fɔ Sentani eyi kəyɛfərɛnɛ kɔ nkɔn sərka-ɛ, cəke cɔ dare dɔn dɛntam kətesɛ-ɛ? Bawo nəloku a Bɛlsebul imbɛlsɛ yɔŋk yɛlɛc. 19 Kɔ pəyɔnɛ fɔ ina Yesu, Bɛlsebul imbɛlsɛ yɔŋk yɛlɛc-ɛ, awut anu oŋ, anɔ ɔ ŋambɛlsɛ yɔŋk yɛlɛc-ɛ? Itɔ ɔsɔŋɛ ntɛ ŋa yati ŋande kiti nu mɔ. 20 Mba kɔ pəyɔnɛ fɔ fənɔntər fa Kanu fɔ imbɛlsɛ yɔŋk yɛlɛc-ɛ, dɛbɛ da Kanu dender haŋ nnɔ nəyi mɔ. 21 Kɔ fum wəka fənɔntər ɔntɔmpər posutnɛnɛ-ɛ, ombum daka dɔn bel-bel ta tɔlɔm o tɔlɔm tɛnəŋk di-ɛ. 22 Mba kɔ fum wəlɔma nwɛ ɛmbɛk kɔ fənɔntər ender pəsut kɔ kəyɛfərɛnɛ pətam kɔ-ɛ, wəkakɔ ɛmbaŋər kɔ yosutənɛnɛ yɔn nyɛ ɛnalaŋ mɔ, pəlɛk ca yɔn fəp pəyerəs. 23 Nwɛ ɔntɔyi kɔ ina mɔ, enter’im; mba nwɛ ɔntɔloŋkan’em mɔ, məŋsaməsər’em.»
Kəlukus ka ŋɔŋk ŋɛlɛc
24 «Ntɛ ŋɔŋk ŋɛlɛc ŋaŋɔkɔ ŋowur fum nwɛ dəris mɔ, ŋɔc-kɔ ŋec-der ŋec-cepər-cepər mofo mowosu, ŋɛc-tɛn dəkəyi. Kɔ ŋɔntɔsɔtɔ, kɔ ŋoloku: ‹Ilukus nde kəlɔ kem nkɛ inayɛfɛ mɔ.› 25 Ntɛ ŋolukus mɔ, kɔ ŋɛbəp kəlɔ kaŋkɔ pafɛŋ ki, palompəs di bel-bel. 26 Awa! Kɔ ŋɔŋk ŋɛlɛc ŋaŋɔkɔ ŋɔŋkɔ, ŋɛtɛn akos aŋi yɔŋk yɛlɛc camət-mɛrəŋ nyɛ yɛnanaŋkanɛ kəlɛcɛ yɛtas ŋi mɔ; kɔ ŋosolɛ yi kɔ yender yɛcəmɛ fum nwɛ darəŋ. Awa, kɔ pəlɛc pɛnaŋkanɛ fum wəkakɔ pətas tɔkɔ pənayi kɔ mɔ.»
Pətɔt posoku
27 Yesu eyi kəloku moloku mamɔkɔ, kɔ wəran wəlɔma oŋkulərnɛ kənay ka afum akakɔ dacɔ: «Pəbɔt kor nkɛ kənabɛkəs’əm mɔ, kɔ mɛsɛ mmɛ anamɛsər’am mɔ!» 28 Mba kɔ Yesu oŋkulɛ: «Pəbɔt aŋɛ ŋaŋcəŋkəl toloku ta Kanu, ŋamɛŋkərnɛ ti mɔ!»
Kəwe ka tɔyɔ tɛgbɛkərɛ tɔlɔma ntɛ tɛyɛfɛ nde Kanu kəyi mɔ
29 Ntɛ kənay kəŋc-mɛpnɛ Yesu mɔ, kɔ ŋayɛfɛ kəloku: «Afum a ndɛkəl ŋantesɛ fɛ; tɔyɔ tɛgbɛkərɛ ntɛ tɛyɛfɛ ndena Kanu mɔ tɔ ŋafaŋ kənəŋk; mba ali tin afɔsɔ-mentər ŋa kɔ pəyɔnɛ fɛ ta Yunusa-ɛ. 30 Bawo tɔkɔ teta Yunusa tɛnayɔnɛ aka Ninewe tɔyɔ tɛgbɛkərɛ mɔ, itɔ teta Wan ka fum tendesɔ-yɔnɛ afum a tɛm tantɛ tɔyɔ tɛgbɛkərɛ. 31 Dɔsɔk da kiti, wəbɛra wəka kəca kətɔt (kɔ məntɛfərnɛ nde dec dɛmpɛ mɔ), endetimɛ tɛm ta kiti, pəcəmɛ afum a ndɛkəl fɔr kiriŋ. Endeyemsɛnɛ ŋa, bawo kəfo kəbol-bolu ka dare dɔlɔma k’ɛnayɛfɛ k’ender kəcəŋkəl kəcərɛ pɔkɔt ka Sulemany. Mba fum eyi nnɔ nwɛ eŋcepər Sulemany mɔ! 32 Dɔsɔk da kiti, afum aka Ninewe ŋandekɔ-yɛfər afum a ndɛkəl ŋayemsɛnɛ ŋa, bawo aka Ninewe ŋanasəkpər mɔyɔ maŋan, kɔ ŋancəmɛ pəlompu darəŋ, ntɛ ŋanane moloku ma Yunusa mɔ. Mba wəlɔma eyi nnɔ nwɛ eŋcepər Yunusa mɔ.»
Capafɔ ca lamp da dis
33 «Fum nwɛ o nwɛ ɔfɔmot lamp pəkəŋk di kɔ pəyɔnɛ fɛ ti-ɛ pəmɛŋk di, mba pəfos pɔ aŋcəmbər di ntɛ tɔŋsɔŋɛ aŋɛ ŋambɛrɛ mɔ ŋanəŋk pəwaŋkəra. 34 Dɔfɔr dam dɔyɔnɛ lamp da dis. Kɔ dɔfɔr dam dentesɛ-ɛ, dis dam fəp doŋmotnɛ; mba kɔ dɔfɔr dam dɔntɔtesɛ-ɛ, dis dam sɔ kubump kɔ deŋyi. 35 Məkɛmbərnɛ ta pəwaŋkəra mpɛ pey’əm dəris mɔ pɔyɔn’am kubump. 36 Kɔ dis dam domot ta tofo o tofo teyi ntɛ teyi kubump mɔ, tɛm tatɔkɔ dis dam fəp dɛmar, pəmɔ tɔkɔ lamp doŋmot’əm kɔ dendemar-ɛ.»
Yesu kəboŋcɛ aFarisi kɔ atəksɛ a sariyɛ kiciya
37 Ntɛ Yesu ɛnayi kəlok-loku mɔ, kɔ wəFarisi wəlɔma ɛlɛtsɛnɛ kɔ kəkɔ-di yeri dɔsɔk dadɔkɔ nde ndɔrɔn. Kɔ Yesu ɛmbɛrɛ k’ɔŋkɔ pəndɛ amɛsa kiriŋ. 38 Kɔ pəŋciyanɛ wəFarisi nwɛ ntɛ Yesu ɛnatɔ-gbət waca dəromun kərɛsna a pədedi yeri mɔ. 39 Mba kɔ Wəbɛ oloku kɔ: «Nəna aFarisi, pəlet kɔ səpɔt tadarəŋ yɔ nəŋsɔkəs, mba bəkəc yonu disrɛ nəlasərnɛ deke dəris kɔ kəyɔ mes mɛlɛc. 40 Nəna atɔcərɛ mes aŋɛ nəyɔnɛ mɔ, Kanu nkɛ kəlompəs tadarəŋ mɔ, bafɔ ki kəlompəs sɔ tedisrɛ ba? 41 Nəc-pocɛ atɔyɔ daka mpɛ peŋyi səpɔt kɔ dəpəlet yonu mɔ, fəp fa yi fəndesɔk nnɔ nəyi mɔ. 42 Mba pəlɛcər’un nəna aFarisi! Bawo nəŋsɔŋ Kanu farilɛ fa mɛrkɛt kɔ malaŋkan; mba nəc-pələr dolompu kɔ kəbɔtər ka Kanu. Tatɔkɔ tɔ pəmar payɔ, ta ampələrnɛ tɔkɔ-ɛ. 43 Pəlɛcər’un nəna aFarisi! bawo nəmbɔtər dəkəndɛ dɔcɔkɔ-cɔkɔ dəkəcəpəs, kɔ kəyif kəlel nde ambəpsɛnɛ mɔ. 44 Pəlɛcər’un! bawo nəyi pəmɔ cufu ncɛ antɔgbɛkərɛ mɔ, pac-kɔt ci kəroŋ ta aŋcərɛ-ɛ.» 45 Kɔ fum wəlɔma atəksɛ a sariyɛ dacɔ ɛlɛk moloku, k’oŋkulərnɛ: «Wətəksɛ, kɔ məloku tatɔkɔ-ɛ, məŋsunu sɔ səna!» 46 Kɔ Yesu oloku: «Pəlɛcər sɔ nəna, atəksɛ a sariyɛ! Bawo nəŋsarəsər afum yɛsarɛ nyɛ ŋantɔtam mɔ, ta nəŋgbuŋɛnɛnɛ yi ali tɛlər tonu-ɛ.» 47 «Pəlɛcər’un! Bawo nəna ɔŋlɔ cufu ca adəŋk a Kanu aŋɛ atem anu ŋanadif mɔ. 48 Kəmentər kɔ məndɛ tantɛ a məna sɔ məwosɛ mɔyɔ ma atem anu mamɔkɔ, bawo ŋa ŋanadif adəŋk a Kanu, kɔ nəna nəŋlɔ cufu cəŋan! 49 Itɔ ɔsɔŋɛ kəcərɛ kətɔt ka Kanu disrɛ, kəloku: ‹Indekɛnɛ ŋa adəŋk kɔ asom.› Kɔ ŋandif alɔma, kɔ ŋantɔrəs alɔma, 50 itɔ endesɔŋɛ afum a ndɛkəl kədekɔ-sarɛ kiciya ka kədif ka adəŋk a Kanu akaŋɛ fəp, kəyɛfɛ ntɛ doru doŋcop mɔ, 51 kəyɛfɛ mecir ma Abɛl, haŋ kəbəp ka ma Yakariya, nwɛ anadif nde Kəlɔ kəpɔŋ ka Kanu, kəfo kəcempi kɔ aŋgbip dacɔ mɔ. Ɛy, iŋlok’un ti: Andekɔ-yif ti afum a tɛm tantɛ.» 52 «Pəlɛcər’un, nəna atəksɛ a sariyɛ! Bawo nəliŋ tasapa pa kəcərɛ; nəna sərka nəmbɛrɛ fɛ, nəwosɛ fɛ sɔ acuru ŋabɛrɛ akɔ ŋanafaŋ kəbɛrɛ mɔ.» 53 Ntɛ Yesu owur nde kəlɔ kaŋkɔ mɔ, kɔ pəntɛlɛ atəksɛ sariyɛ kɔ aFarisi nnɔ eyi mɔ. Kɔ ŋayɛfɛ kəgbəŋ-gbəŋər kɔ, ŋac-yifət kɔ mes fəp, 54 ŋac-cəpɛ kɔ mowul, ntɛ tɔŋsɔŋɛ ŋanenɛ kɔ yem dəmoloku mɔ.
Nəkɛmbərnɛ ta nəbaŋɛnɛ dofum
1 Tɛm tatɔkɔ afum wul wul ŋanaloŋkanɛ, pəwurɛnɛ pəmɔ ŋadeŋsərɛnɛ, kɔ Yesu oloku acɛpsɛ ɔn darəŋ kərɛsna: «Nəkɛmbərnɛ lebin da aFarisi ndɛ dɔyɔnɛ kəbaŋɛnɛ dofum mɔ. 2 Tes o tes tɔgbɔpnɛ teyi fɛ ntɛ pəntɔmar paloku mɔ, ntɛ o ntɛ tɔŋgbɔpnɛ fɛ ntɛ pəntɔmar pacərɛ mɔ. 3 Itɔ ɔsɔŋɛ ntɛ o ntɛ tɔ nəloku kubump, andene ti daŋ peŋ; kɔ ntɛ məŋmɛŋkəs fum dɛləŋəs dukəlɔ mɔ, andedəŋk ti kəlɔ kəroŋ.»
Nwɛ pəmar nənesɛ mɔ
4 «Ic-lok’un ti, nəna anapa’em: Ta nənesɛ aŋɛ ŋandif dis gbəcərəm, kɔ tɛyɛfɛ dənda ta ŋantam tɔlɔm o tɔlɔm sɔ mɔ. 5 Indementər’un nwɛ pəmar nənesɛ mɔ: Nənesɛ nwɛ endif pəkafəlɛ sɔ pətam kələm’əm Yahanama mɔ. Ɛy! Ic-lok’un, nkɔn pəmar nənesɛ! 6 Bafɔ gbaŋa kəcamət y’aŋcaməs pəsam gbəleŋ mɛrəŋ? Awa! Ic-lok’un a Kanu kəfɔpəl ali ŋin yi dacɔ. 7 Ali cəfon ca domp donu alɔm ci fəp. Ta nənesɛ; bawo pəlel ponu peŋcepər pa gbaŋa yɛlarəm!»
Amera Ŋecempi ŋa Kanu ŋendetəksɛ pəmar acɛpsɛ a Yesu kəloku mɔ
8 «Ic-lok’un ti: Nwɛ o nwɛ owosɛ afum alarəm dacɔ a wəcɛpsɛ kem darəŋ ɔyɔnɛ; Wan ka fum endesɔrəmnɛ-wosɛ nnɔ fɔr ya mɛlɛkɛe a Kanu kiriŋ, a wəkɔn fum wəkakɔ ɔyɔnɛ. 9 Mba məna nwɛ məndekɔ-bupərɛ ti afum dacɔ mɔ, Wan ka fum endekɔsɔrəmnɛ-ce məna wəkayi mɛlɛkɛe a Kanu fɔr kiriŋ. 10 Nwɛ o nwɛ oloku pəlɛc pa Wan ka fum, andekɔ-ŋaŋnɛnɛ wəkayi; mba nwɛ o nwɛ ɔlɔməs Amera Ŋecempi ŋa Kanu, afɔdekɔ-ŋaŋnɛnɛ kɔ.» 11 «K’ande pac-liŋəs’un kəkekərɛ nde dəkəcəpəs-ɛ, kɔ pəyɔnɛ fɛ ti nda aboc kiti, kɔ pəyɔnɛ fɛ ti abɛ-ɛ, ta nəcɛm-cɛmnɛ ntɛ nəŋkɔyacnɛ, kɔ tɔkɔ nəŋkɔloku mɔ; 12 bawo Amera Ŋecempi ŋa Kanu ŋendekɔ-təks’on gbəŋcana babɔkɔ tɔkɔ pəmar nəndekɔ-loku mɔ.»
Capafɔ ca wəka daka wətɔcərɛ tes
13 Kɔ fum wəlɔma oloku Yesu kənay kaŋkɔ disrɛ: «Wətəksɛ, məloku wɛŋc’im a səyerɛnɛ kɛ kosu!» 14 Kɔ Yesu oloku fum wəkakɔ: «Anɔ ɔ ’cəmbər’im kəyɔnɛ ka wəboc kiti nu dacɔ, kɔ pəyɔnɛ fɛ ti, wəyer’un daka donu-ɛ?» 15 Kɔ tɛyɛfɛ dənda, kɔ Yesu oloku ŋa: «Nəkɛmbərnɛ kəbɔtər ka kəyɔ daka dɛlarəm, bawo bafɔ daka dadɔkɔ dɔtɔmpər tecepərɛnɛ ta fum doru, ali wəkayi pəyɔ daka dɛlarəm.» 16 Kɔ Yesu oloku ŋa capafɔ cəlɔma: «Fum wəka daka wəlɔma ɛnayɔ ntɔf nyɛ yeŋc-tesɛ yɔbɔf mɔ. 17 Pəc-cɛm-cɛmnɛ, pəc-yifnɛ: ‹Cəke cɔ indeyɔ-ɛ? Bawo iyɔ fɛ kəfo nkɛ iŋkɔ-loŋka yɛtɛl yem fəp mɔ.› 18 Kɔ fum nwɛ olokunɛ, ‹Ntɛ tɔ indeyɔ: Kəwɔkəc kɔ iŋkɔ cɛlɛ cem, isɛl ncɛ cəmbɛk mɔ, iloŋka ci disrɛ malɔ kɔ ca yem yɔlɔma. 19 Kɔ tɛyɛfɛ dənda-ɛ, ilokunɛ dɛbəkəc: «Iyɔ daka dɛlarəm dɛmɛŋkərnɛ meren mɛlarəm; iŋesəm oŋ, idi, imun iwoləs.»› 20 Mba kɔ Kanu kəloku kɔ: ‹Məna Wəbəc, Wətɔcərɛ tes! Pibi pa mɔkɔ yati pɔ andewer’əm kiyi kam doru; tɔkɔ məlompəs mɔ, anɔ ɔ məndesakərɛ ti-ɛ?›» 21 Kɔ Yesu ɔnɔcər: «Itɔ pəyi fum nwɛ endeloŋka daka dɔn, a ta Kanu kəŋnəŋk kəyɔ kɔn daka mɔ-ɛ.»
Kəlaŋ Kanu
22 Kɔ Yesu oloku acɛpsɛ ɔn darəŋ: «Itɔ ɔsɔŋɛ ntɛ ilok’un: Ta nəcɛm-cɛmnɛ teta doru donu—ake nəndedi-ɛ. Ta nəcɛm-cɛmnɛ sɔ teta dis donu—ake nəndebɛrnɛ-ɛ. 23 Bawo kəyi doru kəŋcepər yeri, kɔ dis deŋcepər yamos. 24 Nəkɔkcɛ bɛmp ya ser: Yɔfɔbɔf, yɔfɔtɛl, yɔfɔmɛŋkərnɛ, yɔyɔ fɛ cɛlɛ, mba Kanu kəŋsɔŋ yi yeri. Nəna nəŋcepər bɛmp yayɔkɔ pəbɔlɛ! 25 Anɔ ɔ kəcɛm-cɛmnɛ kɔn kəntam kəbɛrɛnɛ kururu katin gboŋ kəwon kɔn doru-ɛ? 26 Kɔ pəyɔnɛ a nəfɔtam ali tes tɛfɛt-ɛ, ake nəŋkɔcɛm-cɛmnɛnɛ tɔkɔ tɛŋcəmɛ mɔ? 27 Nəgbətənɛ ntɛ yɛlɛŋk ya dalɛ yompoŋ mɔ: Yɔfɔbəc, yɔfɔdu yamos, mba ic-lok’un, ali wəbɛ Sulemany kɔ daka da debeki dɔn, ɛnayɔ fɛ yamos nyɛ yɛnatesɛ pəmɔ pɛlɛŋk papɔkɔ pin mɔ. 28 Yika yeyi mɔkɔ dalɛ, alna pac-ləm yi dənɛŋc, mba Kanu kəŋsɔŋɛ pəmar yi. Nəna, aŋɛ kəlaŋ konu kəmpicɛ mɔ, nəntam kəlaŋ tes tin: Pipicɛ oŋ cəke o cəke, itɔ Kanu kəndeyɔn’on! 29 Kɔ nəna, ta nətɔrəsnɛ kəcɛm-cɛmnɛ teta yeri yɔkɔ nənde nəc-di mɔ, ta nəcɛm-cɛmnɛ teta yomunəs yɔkɔ nənde nəc-munəs mɔ. 30 Bawo acuru a doru dandɛ ŋaŋcɛm-cɛmnɛ teta ca yayɔkɔ. Kɔ nəna, Papa konu ɛŋcərɛ a nəfaŋ yi. 31 Nətɛn dɛbɛ da Kanu; nkɔn Kanu endesɔŋ’un yɛləpəs yɔkɔ.»
Daka kiyi ka dareŋc
32 «Ta mənesɛ, Atəkəs’em darəŋ! Bawo pəmbɔt Papa konu kəsɔŋ konu daka da dɛbɛ dɔn fəp. 33 Nəcaməs daka donu, nəpocɛ kəway kaŋkɔ atɔyɔ daka. Ntɛ tɔŋsɔŋɛ nəmɛŋkərnɛ daka da alna ndena Kanu mɔ. Daka da ndena Kanu dɔfɔlip! Dəndo wəke eyi fɛ nwɛ ɔŋlɔtərnɛ di mɔ; ate ŋeyi fɛ nŋɛ ŋɔŋsɔm di mɔ. 34 Bawo da daka donu deŋyi mɔ, difɔ abəkəc ŋonu ŋeŋyi.»
Abəc aŋɛ ŋambum mɔ
35 «Nəgbəŋcnɛ səbɛlɛt dəfi, nəmot səlamp sonu, nəcəmɛ bel-bel! 36 Nəyi pəmɔ abum aŋɛ ŋandekar wəbɛ kəŋan kəder kəyɛfɛ dəŋgbaŋnɛ mɔ, ntɛ tɔŋsɔŋɛ wəkakɔ ɔŋc-kɔna-der pəsut-sut kumba, ŋa ŋagbitɛ kɔ ki katəna mɔ. 37 Pəbɔt acar akakɔ wəbɛ kəŋan, ɔŋc-kɔna-der pəbəp kɔ pəc-kar kəgbitɛ kɔ mɔ. Amina! Ic-lok’un ti: Endegbəŋcnɛ bɛlɛt, pədəs acar akakɔ dəmɛsa kəkɔ-di yeri, nkɔn pəyerəs ŋa yi. 38 Ali pəyɔnɛ fɔ cɛk-cɛk cɔ ender, kɔ pəyɔnɛ fɛ ti-ɛ dɔsɔka, mba k’ɛmbəp ŋa ta ŋandirɛ-ɛ, pəbɔt ŋa!» 39 «Nəcərɛ bel-bel a kɔ wəbɛ wəka kəlɔ ɛŋcərɛ tɛm ntɛ wəke ender mɔ-ɛ, ɔfɔsak kɔ pəwɔkəc kəlɔ kɔn. 40 Nəna sɔ, nəcəmɛ bel-bel! Bawo Wan ka fum endeder tɛm ntɛ nəntɔyɔ kɔ amera mɔ.»
Wəbəc wəlompu kɔ wəbəc wətɔlomp
41 Kɔ Piyɛr eyif Yesu: «Wəbɛ, səna gbəcərəm ŋɔ məŋloku capafɔ caŋcɛ, ka fəp fɔ məŋloku ti ba?» 42 Kɔ Wəbɛ oloku: «Wəcəmbər-cəmbər daka wəre olomp, pəsɔk domp-ɛ? Nkɔn ɔyɔnɛ nwɛ wəbɛ oŋloku: ‹Isɔŋ’əm yɛbəc nyɛ: Məc-sɔŋ yeri afum aŋɛ ŋayi kəbəc’em mɔ, tɛm ntɛ pəmar mɔ.› 43 Pəbɔt wəcar wəkakɔ wəbɛ kɔn oŋlukus pəbəpɛ kɔ yɛbəc yayɔkɔ mɔ! 44 Ilok’un ti, kaŋce kɔ: Nkɔn ɔ wəbɛ kɔn ɔŋsɔŋ yɛbəc ya kəcəmbər-cəmbər ka daka dɔn fəp! 45 Mba kɔ wəcar olokunɛ dɛbəkəc: ‹Wəbɛ kem ɛntayɛfɛ fɛ kəder,› pəyɛfɛ kəsut ka amarəs arkun kɔ aran-ɛ, pəc-di, pəc-mun haŋ pəcis-ɛ, 46 wəbɛ ka wəcar kakɔ endeder dɔsɔk ndɛ ɔntɔyɔ kɔ amera mɔ, dec ndɛ ɔntɔcərɛ mɔ, tɛm tatɔkɔ ɛmbɛləs wəcar wəkakɔ, pəsɔŋ kɔ kəway nkɛ pəmar pasɔŋ acar atɔnenɛ wəbɛ kəŋan mɔ. 47 Wəcar nwɛ ɛŋcərɛ tɛfaŋ ta wəbɛ kɔn mɔ, ta olompəsnɛnɛ kɔ mɔ, ta ɔŋyɔ tɔkɔ wəbɛ kɔn ɛfaŋ mɔ, aŋsut wəcar wəkakɔ kəsut kəpɔŋ. 48 Mba wəcar nwɛ ɔntɔcərɛ tɛfaŋ ta wəbɛ kɔn mɔ, pəciya-ciya kəlompəs mɔ, wəcar wəkakɔ pəpic pɔ aŋsut kɔ. K’anasɔŋ fum pəlarəm-ɛ, pəlarəm pɔ aŋwer kɔ. K’anasɔŋ kɔ kəmɛŋk pəlarəm-ɛ, aŋnaŋkanɛ kəwer kɔ pəlarəm.»
Teta Yesu tɔsɔŋɛ afum kəgbɛyɛnɛ
49 «Nɛŋc d’ inder kəbɛr doru, k’ifaŋɛ di kəmar! 50 Pəmar isɔtɔ kəgbət dəromun, kɔ kəŋwon’im kəyi. 51 Nəŋcɛm-cɛmnɛ a pəforu pɔ iŋkɛrɛ kəsɔŋ doru ba? Ala de, mba kəgbɛy k’iŋkɛrɛ. 52 Kəyɛfɛ oŋ tantɛ aŋɛ o aŋɛ ŋayi kəcamət kəlɔ disrɛ, ŋandegbɛyɛnɛ akɔ ŋayi maas akɔ ŋayi mɛrəŋ. 53 Kas kəgbɛy wan wərkun, wan wərkun pəgbɛy kas; kɛrɛ kəgbɛy wan wəran, wan wəran pəgbɛy kɛrɛ; kɔŋcəra kəgbɛy wəran ka wan kɔn, wan-sɔ pəgbɛy kɔŋcəra.»
Kəcərɛnɛ ka kɔm
54 Kɔ Yesu oloku sɔ kənay: «Kɔ nənəŋk kəp kəgbəpərnɛ ntende dec dɛŋkalɛ mɔ, nəŋkulɛ katina: ‹Kəder kɔ wəcafən endeder!› Pəfɔ-won wəcafən pəder. 55 Mba kɔ nənəŋk afef ŋa kəca kətɔt ŋoc-wur-ɛ, nəloku: ‹Kəwonɛ kɔ pənder,› tɔkɔ nəŋloku ti mɔ, itɔ teŋyi. 56 Nəna Abaŋɛnɛ dofum! Nəntam kəcərɛ mɛgbɛkərɛ ma tɔkɔ antɔf kɔ kɔm yeŋyi mɔ; ta ake tɔ nəntɔtam kəcərɛnɛ tɛgbɛkərɛ ta tɛm tantɛ, ntɛ tɛyɛfɛ ndena Kanu mɔ-ɛ?»
Mətɛn kətəŋnɛ kɔ wəterɛnɛ kam
57 «Ta ake tɔ nəntɔcərɛnɛ nəna sərka tɔkɔ pəmar nəyɔ mɔ-ɛ? 58 Kɔ məndekɔ kɔ wəyɛfərɛnɛ kam dəŋkiti-ɛ, məwosɛ nətəŋnɛ dɔpɔ kərɛsna. Kɔ pəyɔnɛ fɛ ti-ɛ, eŋkekər’am dabɛ. Wəboc kiti pəsɔŋ’əm wəsɔdar, wəsɔdar ɛbɛr’əm dəbili. 59 Ic-lok’əm məfɔwur dəbili kɔ məntɔlip kəsɔŋ pəsam pɔkɔ məntɔmpərɛ wəkekərɛ kam dəbili mɔ.
Nəsəkpər mera, nəcəmɛ pəlompu darəŋ, kɔ pəyɔnɛ fɛ ti-ɛ, nəfi!
1 Tɛm tatɔkɔ kɔ afum alɔma ŋander ŋalɔmər Yesu tɔkɔ Pilat ɛnadifət aKalile alɔma ntɛ ŋaŋc-loŋnɛ Kanu mɔ. Itɔ tatɔkɔ Pilat ɛnanɔŋkəl mecir ma afum kəloŋnɛ kəŋan. 2 Kɔ Yesu oloku ŋa: «Nəŋcɛm-cɛmnɛ a k’anadifət aKalile akakɔ tatɔkɔ-ɛ, a tementər oŋ a ŋananaŋkanɛ kəciya ŋatas aKalile aləpəs akɔ anatɔ-dif mɔ ba? 3 Ala! Ic-lok’un: Mba kɔ nəntɔsəkpər mera nəcəmɛ pəlompu darəŋ-ɛ, tatɔkɔ tɔ nəndeləsərnɛ fəp pəmɔ akakɔ. 4 Kɔ pəyɔnɛ fɛ ti-ɛ, afum aŋɛ wəco kɔ camət-maas aŋɛ kəlɔ ka Siloye kənawɛkərnɛ kədif mɔ, nəŋcɛm-cɛmnɛ a ŋa ŋananaŋkanɛ kəciya ŋatas aka Yerusalɛm aləpəs aŋɛ ba? 5 Ala, ic-lok’un, mba kɔ nəntɔsəkpər mera nəcəmɛ pəlompu darəŋ-ɛ, nəna sɔ fəp nəŋfi pəmɔ ŋa!»
Capafɔ ca kətɔk kəkom nkɛ kənatɔ-yɔ yokom mɔ
6 Kɔ Yesu oloku sɔ capafɔ ncɛ: «Fum wəlɔma ɛnabɔf kətɔk ka tumbunyi dalɛ dɔn dacɔ. K’ender kətɛn yokom ya ki, mba k’ɛmbəp kətɔk ka tumbunyi nkɛ ta kəŋkom-ɛ. 7 Awa, k’oloku wəbəc kɔn wəkɔ oŋc-bumɛ kɔ dalɛ mɔ: ‹Meren maas mɔ mamɛ ntɛ inder kəpim yokom ya kətɔk kaŋkɛ mɔ, mba ifɔsɔtɔ. Awa məcɛp ki! Ta ake tɔ kəndecəmɛnɛ, kəbaŋ antɔf gbəcərəm-ɛ?› 8 Kɔ wəbum ka dalɛ oloku kɔ: ‹Wəbɛ, məsak kətɔk kəkom kaŋkɛ kəren nkɛ gbəcərəm pamɔmən sɔ; indekay haŋ inɔŋkər, ibɛr ma sɔ ŋcɛk-cɛk-a. 9 Kɔ tatɔkɔ teyi-ɛ, tɔlɔma kəŋkom dok, kɔ pəyi fɛ ti-ɛ, məcɛp ki.›»
Yesu kətaməs ka wəran wəlɔma simiti, dɔsɔk da kəŋesəm
10 Kətəksɛ kɔ Yesu ɛŋc-ndɛ dəkəcəpəs dɔlɔma, simiti, dɔsɔk da kəŋesəm. 11 Wəran wəlɔma ɛnayi dənda nwɛ ŋɔŋk ŋɛlɛc ŋɛnasɔŋɛ kətɔ-kɔt kəyɛfɛ meren wəco kɔ camət-maas mɔ; ɛnanutnɛ, ta ɛntam kətɛŋcɛ-ɛ. 12 Ntɛ Yesu ɛnəŋk wəran nwɛ mɔ, k’ewe kɔ, k’oloku kɔ: «Wəran, docu dam dɛsak’əm.» 13 Kɔ Yesu endeŋ kɔ kəca. Gbəŋcana babɔkɔ kɔ wəran nwɛ ɛntɛŋcɛ, k’ɛyɛfɛ kəcam debeki da Kanu. 14 Mba kɔ pəntɛlɛ wəbɛ wəka dəkəcəpəs dadɔkɔ, ntɛ Yesu ɛnataməs wəran wəkakɔ simiti, dɔsɔk da kəŋesəm mɔ, kɔ wəbɛ nwɛ oloku afum: «Mata camət-tin meyi mmɛ pəmar pac-bəc mɔ, nəder nətɛn kətaməsnɛ mata mamɔkɔ disrɛ, mba ta nəder simiti, dɔsɔk da kəŋesəm.» 15 Kɔ Yesu oloku kɔ ntɛ: «Nəna abaŋɛnɛ dofum: Simiti, dɔsɔk da kəŋesəm, anɔ ɔntɔgbeki wana wɔn, kɔ pəyɔnɛ fɛ ti-ɛ, sɔfale sɔn pəkekərɛ kəkɔ-mun-ɛ? 16 A wəran nwɛ owur dokom da Abraham, a kɔ Sentani səsumpər səkot kəyɛfɛ meren wəco kɔ camət-maas mɔ, pəmar fɛ pasikəli kɔ bənda yayɔkɔ simiti, dɔsɔk da kəŋesəm ba?» 17 Yesu kəloku moloku mamɔkɔ, kɔ tɔsɔŋɛ ater ɔn fəp kəlapərnɛ; mba pənabɔt kənay fəp, mɔyɔ mɔpɔŋ mamɔkɔ Yesu ɔŋc-yɔ mɔ.
Capafɔ ca tɛŋgbɛn tɛfɛt
18 Kɔ Yesu oloku sɔ: «Ake dɛbɛ da Kanu dowurɛnɛ-ɛ? Ak’ indetubcɛnɛ di-ɛ? 19 Tɛŋgbɛn tɛfɛt ntɛ fum ɛlɛk, pələm dalɛ dɔn disrɛ mɔ. Tɛŋgbɛn tatɔkɔ topoŋ, pɔyɔnɛ kətɔk kəpɔŋ, bɛmp yeder yɔlɔ wara wawɔkɔ kəroŋ mɔ.»
Capafɔ ca lebin
20 Kɔ Yesu oloku sɔ: «Ak’ indetubcɛnɛ dɛbɛ da Kanu-ɛ? 21 Dɛbɛ da Kanu dowurɛnɛ kɔ lebin ndɛ wəran ɛŋlɛk pəbɛr kəcom nkɛ ɛnalompəs kɔ abek ŋa farin dacɔ mɔ, a kɔ kəcom kaŋkɔ kəmpɛ fəp mɔ.»
Capafɔ ca dəkəbɛrɛ dɛwɛkɛnɛ
22 Ntɛ Yesu ɛŋcali sədare səfɛt kɔ səpɔŋ kəkɔ ka Yerusalɛm mɔ, pəc-təksɛnɛ sɔ afum. 23 Kɔ fum wəlɔma eyif kɔ: «Wətəksɛ, afum apic ŋɔ Kanu kəndekɔ-yac ba?» Kɔ Yesu oloku ŋa: 24 «Nəna sɔ nəsɛp nədekɔ nəbɛrɛ dəkəbɛrɛ dɛwɛkɛnɛ dadɔkɔ, bawo ic-lok’un: Afum alarəm ŋandesɛp kəbɛrɛ ka di, mba ŋafɔdekɔ-tam.» 25 «Kɔ wəka kəlɔ endekɔ-yɛfɛ pəcaŋ kumba, nəna aŋɛ nəŋyi doru mɔ, nədeyɛfɛ kəsut-sut kumba, nəc-loku: ‹Wətəksɛ! Məgbitɛ su!› Tɛm tatɔkɔ endekulɛ nu: ‹Iŋcərɛ fɛ kəca nkɛ nəyɛfɛ mɔ!› 26 Tɛm tatɔkɔ tɔ nəndekɔ-cop kəloku: ‹Sənadi yeri, səmun kɔ məna, məc-təksɛ nde mirit mɔpɔŋ ma dare dosu.› 27 Nkɔn pəc-lok’un, ‹Iŋcərɛ fɛ aka nde nəyɔnɛ mɔ! Nəbɔl’em day, nəna akaŋɛ nəŋyɔ mes mɛlɛc mɔ!› 28 Difɔ afum ŋandekɔ-bok, ŋac-ŋaŋərɛnɛ sek, kɔ nəŋkɔnəŋk Abraham, Isiyaka, Yakuba kɔ adəŋk a Kanu fəp dɛbɛ da Kanu dəntɔf, a paləm nəna dabaŋka-ɛ. 29 Afum ŋandekɔ-yɛfɛ kəca nkɛ dec dɛmpɛ kɔ nkɛ dec dɛŋkalɛ mɔ, kəca kətɔt, kɔ kəmerya, ŋader ŋandɛ dɛmɛsa nde dɛbɛ da Kanu dəntɔf. 30 Tɛm tatɔkɔ, alɔma aŋɛ ŋayɔnɛ mɔkɔ aləpsər mɔ, ŋandekɔ-yɔnɛ akiriŋ; akɔ ŋayɔnɛ akiriŋ mɔ, ŋayɔnɛ aləpsər.»
Yesu kɔ Yerusalɛm
31 Tɛm tatɔkɔ, kɔ aFarisi alɔma ŋander ŋaloku kɔ: «Məyɛfɛ nnɔ mɔkɔ! bawo Herodu ɛfaŋ kədif’əm.» 32 Kɔ Yesu oloku ŋa: «Nəkɔ nəloku ayɔfən ŋaŋɔkɔ: Kəbɛləs yɔŋk yɛlɛc kɔ kətaməs k’iyinɛ mɔkɔ kɔ alna, a indeləpəs yɛbəc yem tataka ta maas. 33 Mba mɛnɛ ikɔt mɔkɔ, alna kɔ dɔsɔkɔ; bawo pəmar fɛ wədəŋk wəka Kanu efi kəfo kəcuru ta pəyɔnɛ Yerusalɛm-ɛ.» 34 «Yerusalɛm! Yerusalɛm! Nŋɛ ŋendif adəŋk a Kanu mɔ, ŋɛc-cacas aŋɛ Kanu kəsom nnɔ ŋeyi mɔ; pənabas’im kəloŋka ka awut’am pəmɔ ntɛ acɔkɔ ŋokombəra ŋoŋloŋka awut baŋca ya ŋi dəntɔf mɔ! Mba kɔ nəntɔfaŋ ti. 35 Awa, kəsakər’on k’ander kəlɔ konu. Mba ic-lok’un: Nəfɔsɔ-nəŋk’im, haŋ tɛm tɛbəp ntɛ nəndeloku: ‹Kanu kəpocɛ pətɔt nwɛ endeder tewe ta Kanu Kəpɔŋ mɔ.›»
Yesu kətaməs ka wəcuy wəlɔma
1 Dɔsɔk da kəŋesəm da aSuyif dɔlɔma, k’awe Yesu nde kəlɔ ka wəbɛ ka aFarisi wəlɔma kəkɔ-di yeri, kɔ akakɔ ŋaŋkɔkcɛ kɔ. 2 Kɔ fum wəlɔma nwɛ docu dɛnakəfəs mɔ, pəcəmɛ kɔ fɔr kiriŋ. 3 Kɔ Yesu eyif atəksɛ a sariyɛ kɔ aFarisi: «Aŋwosɛ kətaməs ka wətɔtamnɛ simiti, dɔsɔk da kəŋesəm ba, ka afɔwosɛ?» 4 Kɔ afum aŋɛ ŋaŋcaŋk. Awa kɔ Yesu oŋgbuŋɛnɛ wətɔtamnɛ nwɛ, kɔ wəkakɔ ɛntamnɛ, k’ɛsak kɔ a pəkɔ. 5 Ntɛ teŋcepər mɔ, kɔ Yesu eyif ŋa: «Anɔ eyi nu dacɔ nwɛ wan kɔn, kɔ pəyɔnɛ fɛ ti wana wɔn wɛntɛmpɛnɛ dəkələmp simiti, dɔsɔk da kəŋesəm, ta ɛmpɛnɛ wi dɔsɔk dadɔkɔ mɔ?» 6 Kɔ abɛ akakɔ ŋantɔtam kəluksɛ kɔ mɔcɔp.
Ntɛ aŋyɛk-yɛk dəkəndɛ, kɔ ntɛ aŋwenɛ fum tes mɔ
7 Kɔ Yesu olok-lokər afum aŋɛ anawe dəkəsata mɔ, bawo ɛnakɔkcɛ ntɛ akakɔ aŋc-gbutəlɛnɛ dəkəndɛ dɔcɔkɔ-cɔkɔ mɔ. K’oloku ŋa: 8 «Kɔ fum ew’am kəkɔ-təŋnɛ kəsata ka kəgbaŋnɛ kɔn-ɛ, ta məkɔ məndɛ dəkəndɛ dɔcɔkɔ-cɔkɔ, bawo tɔlɔma wəka kəsata ewe sɔ fum wəlɔma kəsata kaŋkɔ, nwɛ eŋcepər məna mɔ. 9 Ta tɔsɔŋɛ wəkɔ ewe nu kəsata mɔ, kədelok’əm: ‹Məyɛfɛ məsakərɛ nwɛ dəkəndɛ dadɔkɔ.› Kəlapərnɛ kɔ məŋkɔ kəyɛfɛ dəkəndɛ dɔcɔkɔ-cɔkɔ dadɔkɔ kəkɔ-ndɛ dadarəŋ dɔkɔ. 10 Mba, k’aw’am kəsata-ɛ, məkɔ məndɛ dəkəndɛ dadarəŋ, ntɛ tɔŋsɔŋɛ nwɛ ew’am kəsata mɔ k’ender pənəŋk’əm-ɛ, pəlok’əm: ‹Wanapa, məcɔŋnɛ kiriŋ.› Awa tɛm tatɔkɔ məna məlelɛ nnɔ afum aŋɛ nəŋkɔ-paŋnɛ amɛsa kədi yeri mɔ. 11 Nwɛ o nwɛ ɛlɛknɛ, andetorɛ kɔ; nwɛ o nwɛ otorɛnɛ andepɛnɛ kɔ.» 12 Kɔ Yesu oloku fum nwɛ ɛnawe kɔ kəsata mɔ: «Kɔ məwe afum kədi yeri yɛraŋ, kɔ pəyɔnɛ fɛ ti yɔrɔfɔy-ɛ, ta məwenɛ yi akos’əm aŋa, ta məwenɛ yi awɛŋc’əm aŋa, ta məwenɛ yi akomɛnɛ am, ta məwenɛ yi andɛ am aka daka. Ntɛ tɔŋsɔŋɛ ta ŋadetam kəluksɛ ayɛk ŋa kəwenɛ yeri mɔ. 13 Mba kɔ məndewenɛ afum yeri-ɛ, məwe atɔyɔ daka, lanyiru, atorər kɔ atɔnəŋk. 14 Tɛm tatɔkɔ pəbɔt’əm, bawo ŋayɔ fɛ daka ndɛ ŋaŋkɔ-luks’am kəway ka pətɔt papɔkɔ mɔ. Kanu gbəcərəm kəndekɔ-tam kəluks’am kəway kaŋkɔ, nde ayɔ pətɔt ŋandekɔ-yɛfɛ defi mɔ.»
Capafɔ ca yeri ya kəsata
15 Ntɛ afum ŋane moloku mamɛ mɔ, kɔ fum wəlɔma nwɛ ɛnandɛ dɛmɛsa mɔ, oloku Yesu: «Pəbɔt məna nwɛ məndekɔ-di yeri nde dɛbɛ da Kanu dəntɔf mɔ!» 16 Kɔ Yesu oloku fum wəkakɔ: «Fum wəlɔma ɛnaboc kəsata kəpɔŋ, k’ewenɛ ki afum alarəm. 17 Ntɛ tɛm ta kədi yeri yayɔkɔ tendebəp mɔ, k’osom wəcar kɔn kəkɔ-loku afum aŋɛ ewe kəsata mɔ: ‹Nəder! Alip kəcoŋ.› 18 Mba kɔ kan-kan ɛyɛfɛ kəlɛtsɛnɛ kɔ. Kɔ wəcɔkɔ-cɔkɔ oloku kɔ: ‹Məŋaŋnɛn’em, dalɛ d’ iway idɔ pəmar ikɔ imɔmən; ilɛtsɛn’am ta məsumpər’em ti!› 19 Kɔ wəka mɛrəŋ oloku kɔ: ‹Iway cəna cəbifti wəco, ic-’ ifaŋ kəkɔ-wak; ilɛtsɛn’am ta məsumpər’em ti!› 20 Kɔ wəka maas oloku sɔ: ‹Intɛp kəc-gbaŋnɛ, itɔ intɔtam kəkɔnɛ!› 21 Kɔ wəcar olukus k’ɔŋkɔ pəloku moloku mamɔkɔ wəbɛ kɔn. Kɔ pəntɛlɛ wəbɛ kɔn, k’oloku wəcar: ‹Məkɔ katəna nde mofo mɔpɔŋ kɔ nde dəmirit ma dare! Məwen’em atɔyɔ daka, lanyiru, atorər kɔ atɔnəŋk.› 22 Kɔ wəcar ender pəloku kɔ: ‹Wəbɛ ntɛ məsom’im mɔ telip, mba yeri yɔsɔrɔcəmɛ!› 23 Kɔ wəbɛ oloku kɔ sɔ: ‹Məkɔ dɔpɔ da dəkulum kɔ dəŋgbaŋcan, məloku afum ŋabɛrɛ ntɛ tɔŋsɔŋɛ kəlɔ kem kəlarɛ mɔ.› 24 Bawo, ic-lok’un: Arkun akakɔ inanuŋkɛnɛ kəwe kəsata kaŋkɛ mɔ, ali wəkin ɔfɔsɔ-di yeri ya ki.»
Cəke cɔ aŋyi a patam kəyɔnɛ wəcɛpsɛ ka Yesu darəŋ-ɛ
25 Kənay kənacəmɛ Yesu darəŋ, kɔ Yesu ɛŋkafəlɛ, k’oloku ŋa: 26 «Məna nwɛ məŋcɛps’em darəŋ mɔ, pəmar mətam kəce papa kam kɔ iya kam, kɔ wəran kam, kɔ awut’am, awɛŋc’əm aŋa arkun, akirɛ am kɔ kiyi kam doru yati, kɔ pəyi fɛ ti-ɛ, fum wəkakɔ ɔfɔtam kəyɔnɛ wəcɛpsɛ kem darəŋ. 27 Məna nwɛ o nwɛ məntɔwosɛ kəgbaŋnɛ kətɔk kəpandən ka defi nkɛ aŋcaŋ aŋɛ ŋandif afum mɔ, məfɔtam kəyɔnɛ wəcɛpsɛ kem darəŋ. 28 Bawo nəna akaŋɛ dacɔ, məna nwɛ məŋfaŋ kəcəmbər kəlɔ mɔ, məfɔndɛ kərɛsna məlɔm daka dɔkɔ məŋkɔbɛrsɛ teta kəlɔ kam mɔ, kɔ pəyɔnɛ fɔ daka dadɔkɔ dɛntam kəlip kəcəmbər ka kəlɔ kaŋkɔ-ɛ. 29 Mba kɔ nəŋcop kəcəmbər kəlɔ ta nəlip kəcəmbər ki, nwɛ o nwɛ ɛnəŋk ki, endeselər’un 30 pəc-loku: ‹Afum akaŋɛ ŋaŋcop kəcəmbər kəlɔ mba ŋantam fɛ ki kələpəs.› 31 Itɔ pəyi wəbɛ nwɛ ɛŋfaŋ kəkɔ-sutɛnɛ kɔ wəbɛ wəlɔma mɔ, mɛnɛ pəndɛ pəmɔmən kɔ pəyɔnɛ, afum wul wəco (10 .000 ) ŋantam kəsutɛnɛ kɔ afum wul wəco mɛrəŋ (20 .000 ) aka wəbɛ wəkɔ ŋaŋkɔsutɛnɛ mɔ. 32 Kɔ pəyɔnɛ fɛ ti-ɛ, ŋaŋsɔrɛbɔlɛnɛ, wəbɛ wəka afum wul wəco (10 .000 ) pəsom nda wəbɛ wəka afum wul wəco mɛrəŋ (20 .000 ) wəkɔ ŋaŋkɔsutɛnɛ mɔ, ntɛ pəmar pəkɔt ta ŋasutɛnɛ mɔ. 33 Awa, məna nwɛ o nwɛ məntɔce ca yɔkɔ məyɔ mɔ, məfɔtam kəyɔnɛ wəcɛpsɛ kem darəŋ.»
Mɛr mmɛ mɛndɛŋcɛ mɔ
34 «Paka pɔtɔt pɔ mɛr mɔyɔnɛ, mba kɔ mɛr mɛndɛŋcɛ-ɛ, ak’ antam mi kəbɔtsɛ-ɛ? 35 Mɛr mɛdɛŋc mɔfɔtesɛ tɛm tatɔkɔ antɔf, mɔfɔtesɛ ŋcɛk-cɛk ya yɔbɔf, mɛnɛ pagbal mi dəyika. Məna nwɛ məŋyɔ ləŋəs məc-ne mɔ, məne ti!»
Capafɔ ca aŋkesiya nŋɛ ŋɛnasɔlɛ, k’anəŋk sɔ ŋi mɔ
1 Abaŋəs dut kɔ afum aciya ŋalɔtərnɛ Yesu kəkɔ-cəŋkəl kɔ. 2 AFarisi kɔ acicəs a sariyɛ ŋac-cɔpɛnɛ: «Fum wəkawɛ eŋselɛnɛ aciya, pəwosɛ kədi yeri kɔ ŋa.» 3 Mba kɔ Yesu oloku ŋa capafɔ ncɛ: 4 «Nəna afum akaŋɛ dacɔ, anɔ ɔŋyɔ ŋkesiya tasar tin (100 ), a ŋin ŋɔsɔlər kɔ, a pəsak yɔkɔ 99 dətɛgbɛrɛ kəkɔ-tɛn ŋin ŋɔkɔ ŋɔsɔlər kɔ mɔ, haŋ pənəŋk ŋi-ɛ? 5 Kɔ wəkayi ɔŋkɔ pənəŋk ŋi-ɛ, pəgbaŋnɛ ŋi amera ŋobotu disrɛ, 6 ɔŋc-kɔna-bɛrɛ nde ndɔrɔn, ewe anapa ɔn kɔ andɛ ɔn nde ndɔrɔn, pəloku ŋa: ‹Nəwoləs kɔ ina, bawo inəŋk aŋkesiya ŋem ŋɔkɔ ŋɛnasɔlər’im mɔ.› 7 Ic-lok’un: Pəbotu pɔŋkɔ-yi darɛŋc teta fum wəkin nwɛ ɔŋkɔ-səkpər amera pəcəmɛ dɔpɔ dolompu darəŋ mɔ, pətas teta afum 99 aŋɛ ŋantɔmar kəsəkpər mera, bawo ŋalomp mɔ.»
Capafɔ ca pəsam gbəleŋ mpɛ pɛnasɔlɛ, k’anəŋk sɔ pi mɔ
8 «Kɔ pəyɔnɛ fɛ ti-ɛ, wəran wəre ɔŋyɔ pəsam gbəleŋ wəco, a gbəleŋ bin bɔsɔlər kɔ ta omot lamp, ta ɛfɛŋ kəlɔ, ta ɛntɛn pi bel-bel, haŋ pənəŋk pi mɔ? 9 Kɔ wəran nwɛ ɛnəŋk pəsam gbəleŋ mpɛ-ɛ, eŋwe anapa ɔn, kɔ andɛ ɔn, pəloku ŋa: ‹Nəwoləs kɔ ina bawo inəŋk pəsam gbəleŋ mpɛ pɛnasɔlər’im mɔ.› 10 Ic-lok’un, pəbotu peyi mɛlɛkɛe a Kanu dacɔ teta fum wəciya wəkin gboŋ nwɛ ɛŋsəkpər amera pəcəmɛ pəlompu darəŋ mɔ.
Capafɔ ca wətɛmp wəsɔlɛ, k’anəŋk kɔ sɔ mɔ
11 Kɔ Yesu oloku sɔ: «Fum wəlɔma ɛnayɔ awut arkun mɛrəŋ. 12 Kɔ wəkɔ ɛfɛtɛ mɔ, oloku kas: ‹Papa məsɔŋ’im da pəmar idesɔtɔ kɛ kam mɔ.› Kɔ kas eyer daka dɔn awut ɔn akaŋɛ mɛrəŋ dacɔ. 13 Ntɛ mataka mepic meŋcepər mɔ, kɔ wan wəfɛt ɛŋcaməs daka dɔkɔ ɛnasɔtɔ mɔ fəp. K’osumpər dɔpɔ k’ɔŋkɔ pəbɔlɛ, atɔf ŋocuru. Nde ɛnakɔ pəyi yama-yama pəc-ləsər-ləsər daka dɔkɔ ɛnayɔ mɔ. 14 Ntɛ wan nwɛ elip kədi daka dɔn mɔ, kɔ dor dɔpɔŋ dɛmbɛrɛ atɔf ŋaŋɔkɔ ɛnayi mɔ, kɔ ca yoŋcop kəbut kɔ. 15 K’ɔŋkɔ pəyi nda fum wəlɔma wəka atɔf ŋaŋɔkɔ, wəkɔ ɛnasɔŋ kɔ kəkɛk ka sɔp yɔn mɔ. 16 Wan nwɛ pəfaŋ kədi yeri ya sɔp, mba ali fum ɛnasɔŋ fɛ kɔ yi. 17 Awa, k’ɛyɛfɛ kəcɛm-cɛmnɛ teyi tɔn, k’olokunɛ: ‹Afum cəke ŋayi kəbəc ndena papa kem aŋɛ ŋayɔ cəcom cəlarəm mɔ, a ina ic-finɛ nnɔ dor. 18 Kəyɛfɛ k’inder ikɔ ndena papa kem ikɔ iloku kɔ: Papa iŋciya Kanu, k’iŋciya sɔ məna. 19 Imbut pəleli mpɛ pəmar məsumpər’em pəmɔ wan kam. Mba məsumpər’im oŋ pəmɔ wəbəc kam.› 20 Kɔ wan nwɛ ɛlɛk dɔpɔ k’olukus ndena kas.» «Ɔsɔrɔbɔlɛ, kɔ kas ɛnəŋk kɔ, kɔ nɔnɔfɔr dɔpɔŋ dosumpər kɔ. Kɔ kas ɛyɛksɛ kəkɔ-fayənɛ kɔ, k’ɛnɛpsərnɛ kɔ dəkilim, k’ocup kɔ. 21 Kɔ wan oloku kɔ: ‹Papa, iŋciya Kanu, k’iŋciy’am, pəmar fɛ sɔ məsumpər’im pəmɔ wan kam.› 22 Mba kɔ kas kəloku acar ɔn: ‹Nəkɛrɛ duma dɔtɔt nəbɛr kɔ! Nəbɛr kɔ kurundɛ dətɛlər, nəsɔŋ kɔ cɔfta! 23 Nəkɛrɛ tana tetifi tɔkɔ, nədif pi. Padi yeri, pawoləs! 24 Bawo wan kem wəkawɛ nəŋnəŋk mɔ, ɛnafi, mba olukus sɔ kəder doru! Ɛnasɔlɛ, mba inəŋk kɔ sɔ!› Kɔ ŋayɛfɛ kəwoləs. 25 Tɛnatəŋnɛ Coco pəyi dalɛ. Ntɛ wəkakɔ ender pəlɔtərnɛ kəlɔ kəŋan mɔ, k’ene tɔkɔ aŋfer pac-pisɛ mɔ. 26 Kɔ Coco ewe wəcar wəkin k’eyif kɔ tes ntɛ teyi kəlɔ kəŋan mɔ. 27 Kɔ wəcar oloku Coco: ‹Wɛŋc’əm eder, mba ntɛ olukus kətamnɛ disrɛ mɔ, itɔ papa kam endifɛ tana petifi pɔkɔ.› 28 Kɔ pəntɛlɛ Coco nwɛ, ta ɛfaŋ sɔ kəbɛrɛ dɛkɛr-ɛ. Kɔ kas owur kəkɔ-lɛtsɛnɛ kɔ. 29 Mba kɔ wan wəcɔkɔ-cɔkɔ nwɛ oloku kas: ‹Meren mɛlarəm mɔ mamɛ, iyi’əm darəŋ ic-bəc’am pəmɔ wəcar, ali dɔsɔk din iŋgbɛkəl fɛ mosom mam, mba ali dɔsɔk din sɔ məna məsɔŋ f’em tir idif səwoləs kɔ anapa’em. 30 Mba ntɛ wan kam wəkawɛ ender mɔ, nwɛ ɔŋkɔ pələsər-ləsər daka dam kɔ aran ayama-yama mɔ, nkɔn taŋ məndifɛ kɔ tana petifi pɔkɔ!› 31 Kɔ kas kəloku Coco, ‹Məna wan kem, səna eyi dɛ kɔ məna, daka ndɛ o ndɛ iyɔ nnɔ mɔ, dam dɔ! 32 Mba pəmar yati paboc kəsata, pawoləs: Bawo wɛŋc’əm wəkawɛ məŋnəŋk mɔ, ɛnafi, k’olukus sɔ kəyi doru; ɛnasɔlɛ, k’anəŋk kɔ sɔ.›»
Capafɔ ca wəcəmbər-cəmbər daka
1 Kɔ Yesu oloku acɛpsɛ ɔn darəŋ mɔ: «Fum wəka daka wəlɔma ɛnayɔ wəcəmbərɛ-cəmbərɛ daka, k’ander payemsɛnɛ kɔ, a ɛŋləsər-ləsər daka da wəbɛ kɔn. 2 Kɔ wəbɛ nwɛ ewe kɔ, pəc-loku kɔ: ‹Cəke cɔ ine te tam-ɛ? Məsɔŋ’em kəcərɛ tɔkɔ məŋcəmbər-cəmbər daka dem mɔ, bawo məfɔsɔ-yɔnɛ wəcəmbər-cəmbər daka dem.› 3 Kɔ wəcəmbər-cəmbər daka nwɛ olokunɛ dɛbəkəc: ‹Cəke cɔ indeyɔ-ɛ, bawo wəka daka nwɛ oloku kəwur’em kəcəmbər-cəmbər daka dɔn? Iyɔ fɛ fənɔntər kədeyɔnɛ wəbifti antɔf, ilapərnɛ sɔ kəc-tola. 4 Iŋcərɛ oŋ ntɛ indeyɔ, a afum ŋabaŋ’im wɔlɔ waŋan disrɛ kɔ wəkawɛ owur’em kəcəmbər-cəmbər daka dɔn-ɛ.› 5 Kɔ wəcəmbər-cəmbər daka nwɛ ewe fum wəcɔkɔ-cɔkɔ wəkɔ ɛnatɔmpərɛ wəbɛ kɔn debe mɔ. K’eyif kɔ: ‹Cəke cɔ məntɔmpərɛ wəbɛ kem debe-ɛ?› 6 Kɔ wəkakɔ oloku kɔ: ‹Moro m’olif cokos tasar tin (100 ).› —‹Awa, məlɛk areka, məndɛ məcic: 50 .› 7 K’eyif sɔ wəlɔma: ‹A məna-a, cəke cɔ məntɔmpər-ɛ?› Kɔ wəkakɔ oloku: ‹Malɔ busul tasar tin (100 ).› —‹Awa, məndɛ məlɛk areka, məcic 80 .› 8 Kɔ wəka daka nwɛ oŋkor-koru wəcəmbərɛ-cəmbərɛ kɔn daka wətɔlomp nwɛ ntɛ ɔŋkɔt bel-bel mɔ. Awa, afum a doru ŋaŋcərɛ kəyɔ mes taŋan pətas akɔ ŋayɔnɛ aka pəwaŋkəra mɔ.» 9 Kɔ Yesu ɔnɔcər: «Ic-lok’un: Nətɛnɛ daka dɔtɔsɔk anapa, itɔ ɔŋsɔŋɛ kɔ dendelip-ɛ, pabaŋ’un nde nəkɔyi doru o doru mɔ. 10 Məna nwɛ aŋlaŋ teta tes tɛfɛt mɔ, antam sɔ kəlaŋ’əm teta tes tɔpɔŋ. Məna nwɛ məntɔlomp teta tes tɛfɛt mɔ, məfɔlomp teta tes tɔpɔŋ. 11 Kɔ məntɔlomp kəcəmbər-cəmbər ka daka dɔtɔsɔk ndɛ deyi doru dandɛ mɔ, anɔ endesɔŋ’əm kəcəmbər-cəmbər ka daka dosoku-ɛ? 12 Kɔ məntɔlomp teta daka da fum-ɛ, anɔ endesɔŋ’əm ndɛ dɔyɔnɛ dam mɔ-ɛ? 13 Ali wəcar wəkin ɔfɔtam kəbəcɛ abɛ mɛrəŋ. Kɔ pəyi ti-ɛ, enter wəkin pəbɔtər wəka mɛrəŋ; kɔ pəyɔnɛ fɛ ti-ɛ, pəcəŋkəlɛ wəkin ta ɛŋcəŋkəlɛ wəka mɛrəŋ-ɛ. Nəfɔtam kəbəcɛ Kanu kɔ pəsam.»
Moloku mɔnɔŋksəl ma Yesu
14 AFarisi, aŋɛ ŋanabɔtər pəsam mɔ, kəne ka moloku mamɛ, kɔ ŋayɛfɛ kəfani Yesu. 15 Kɔ Yesu oloku ŋa: «Nəna, nəŋcəmbərnɛ afum alompu nnɔ awɛŋc’un aŋa ŋayi mɔ, mba Kanu kəŋcər’on bəkəc; bawo ntɛ afum ŋampɛnɛ dareŋc mɔ, itɔ Kanu nkɔn eŋce. 16 Tɛm ta sariyɛ sa Musa kɔ yecicəs yecempi ya adəŋk a Kanu tɛnawon haŋ tɛm ta Saŋ. Kəyɛfɛ oŋ tɛm tatɔkɔ, k’aŋcop kədəŋk moloku mɔtɔt ma dɛbɛ da Kanu, nwɛ o nwɛ kəsɛp k’ɛndɛ kəbɛrɛ ka di. 17 Mba pəfəfərɛnɛ kɔm kɔ antɔf kəsɔlɛ, pətas tofo tɛfɛt ta pecic pin pa sariyɛ kətɛmpɛnɛ. 18 Məna nwɛ məŋce wəran kam mənɛŋcɛ sɔ wəlɔma mɔ, məyi kiciya kəpɔŋ disrɛ. Məna nwɛ məŋnɛŋcɛ wəran nwɛ wos eŋce mɔ, dalakɔ dɔ nəyi disrɛ.»
Capafɔ ca wəka daka kɔ Lasar
19 «Wəka daka wəlɔma ɛnayi, pəc-bɛrnɛ yamos yɔtɔt, yeyeŋki kəway; dɔsɔk o dɔsɔk pəyi pətɔt disrɛ, pəc-di yeri yɔtɔt. 20 Kəlɔ kɔn kiriŋ, fum wətɔyɔ daka o daka wəlɔma, nwɛ aŋc-we Lasar mɔ, pəyɔ ruŋc, pəfəntərɛ kusuŋka kɔn. 21 Lasar nwɛ pəfaŋ kəc-wɛtəs yeri nyɛ yɛntɛmpɛnɛ-tɛmpɛnɛ amɛsa dəntɔf ŋa wəka daka nwɛ mɔ, pədi. Mba kɔ cen yender yɛc-nɛntəs ruŋc yɔn. 22 Kɔ Lasar efi, kɔ mɛlɛkɛe mender mɛlɛk kɔ, kɔ meŋkekərɛ kɔ kəkɔ-ŋesəm nde Abraham kəsək. Kɔ wəka daka nwɛ ender pəfi, k’awup kɔ. 23 Nde kəfo nkɛ afi ŋaŋkɔ mɔ, kɔ wəka daka eyekti fɔr; k’ɛnəŋk pəbɔlɛ Abraham kɔ Lasar pəc-ŋesəm kɔ kəsək. 24 Kɔ wəka daka nwɛ oŋkulərnɛ: ‹Papa Abraham, məyɔn’em nɔnɔfɔr! Məsom Lasar pəgbət tɛlər tɔn dəromun pəder pəcaŋkəs’im temer; bawo kətɔrɔ k’indɛ nnɔ nɛŋc dandɛ.› 25 Kɔ Abraham oloku kɔ: ‹Wan kem, məcɛm-cɛmnɛ a mənasɔtɔ daka dam ntɛ mənayi doru mɔ, kɔ Lasar nkɔn ɔsɔtɔ pəcuy kiyi kɔn doru. Ndɛkəl oŋ, kəŋesəm k’eyi, məna məyi sɔ dəmnɛ pəcuy. 26 Kɔ tɛyɛfɛ dənda-ɛ, dobo dɔpɔŋ deyi su dacɔ kɔ nəna ntɛ tɔŋsɔŋɛ nwɛ ɛŋfaŋ kəcepər pəder nnɔ səyi mɔ, ta ɛntam-ɛ.› 27 Kɔ wəka daka nwɛ oloku: ‹Ilɛtsɛn’am, Papa, məsom Lasar nde kəlɔ ka papa kem. 28 Bawo, iyɔ di awɛŋc aŋa kəcamət, Lasar pəkɔ pəloku ŋa ntɛ teyi nnɔ mɔ, ntɛ tɔŋsɔŋɛ ta ŋa sɔ ŋadeder nnɔ pəcuy pampɛ peyi mɔ.› 29 Kɔ Abraham oloku: ‹Ala, awɛŋc’əm aŋa ŋayɔ Musa kɔ adəŋk a Kanu; ŋacəŋkəl ŋa.› 30 Kɔ wəka daka nwɛ oloku Abraham: ‹Ala, Papa, kɔ fum ɛyɛfɛ nnɔ afi ŋayi mɔ pəkɔ pəlok-lokər ŋa-ɛ, ŋaŋsəkpər mera ŋacəmɛ pəlompu darəŋ.› 31 Kɔ Abraham oloku kɔ: ‹Kɔ ŋantɔcəŋkɛl Musa kɔ adəŋk a Kanu, ali fum ɛyɛfɛ nnɔ afi dacɔ, ŋafɔkɔ-cəŋkəl wəkayi.›»
Kiciya kɔ kəŋaŋnɛ
1 Kɔ Yesu oloku acɛpsɛ ɔn darəŋ: «Pəfɔ-tam kəyi ta mes meyi mmɛ mɔsɔŋɛ fum kəciya mɔ. Mba pəlɛc pəyi wəkɔ ɔŋsɔŋɛ ti mɔ. 2 Pəfəfərɛnɛ kəkot wəkayi tasar tɔpɔŋ dəkilim pagbal kɔ dəkəba, kɔ pəyɔnɛ wəkayi pəsɔŋɛ wəfəfər wəkin kəloŋɛ-ɛ. 3 Nəkɛmbərnɛ bel-bel! Kɔ wɛŋc’əm eŋciya-ɛ, məgbəŋ-gbəŋər kɔ; k’ɛsəkpər amera pəcəmɛ pəlompu darəŋ-ɛ, məŋaŋnɛnɛ kɔ. 4 Kɔ wɛŋc’əm eŋciy’am camət-mɛrəŋ dɔsɔk din disrɛ-ɛ, a pəluksərnɛ kəder’əm camət-mɛrəŋ pəc-lok’əm: ‹Kəsəkpər k’inder amera few, iŋcəmɛ pəlompu darəŋ-ɛ,› məŋaŋnɛnɛ kɔ.» 5 Kɔ asom a Yesu darəŋ ŋaloku Wəbɛ: «Məbɛrɛnɛ su kəlaŋ!» 6 Kɔ wəbɛ oloku ŋa: «Kɔ nəntɔmpər kəlaŋ nkɛ kəyi pəmɔ tɛŋgbɛn tɛfɛt mɔ, nəntam kəloku kətɔk nkɛ: Məgbuktɛ nnɔ məkɔ məcəmɛ nde dəkəba, kətɔk kaŋkɔ kəyɔ tɛfaŋ tonu.» 7 «Nəna akaŋɛ dacɔ, anɔ ɔyɔ wəcar nwɛ embifti, kɔ pəyɔnɛ fɛ ti wəkayi pəc-kɛk, a pəc-kɔna-yɛfɛ dalɛ, pəloku kɔ: ‹Məder katəna məder məndɛ dɛmɛsa!› 8 Ntɛ oŋloku kɔ mɔ: ‹Məlompəs’em yeri yem, məbɛrnɛ duma məsɔŋ’im yeri, haŋ ilip kədi yeri imun; k’ilip-ɛ, məna mədi yeri məmun.› 9 Wəka wəcar kakɔ eŋyek-yekəs kɔ bawo ɔyɔnɛ kɔ mes mɔkɔ ɛfaŋ mɔ ba? Ala! 10 Tin tayi tɔ kɔ nəna, kɔ nəlip k’ɔyɔ mes mɔkɔ afaŋər’un mɔ fəp-ɛ, nəloku: ‹Acar gbəcərəm ŋɔ səyɔnɛ; ntɛ pəmar su kəyɔ mɔ, tɔ səyɔ.›»
Yesu kətaməs kɔn aka sen wəco
11 Yesu eyi kəkɔ Yerusalɛm, kɔ Yesu ɛyɛfɛ kəcali atɔf ŋa Samari kɔ ŋa Kalile dacɔ mɔ. 12 Eyi kəbɛrɛ tadare tɔlɔma, kɔ afum wəco aka sen alɔma ŋander ŋafaynɛ kɔ; kɔ ŋaŋcəmɛ pəbɔlɛ. 13 Kɔ ŋampɛnɛ sim ŋac-loku: «Yesu, Wəkiriŋ, məyɔnɛ su nɔnɔfɔr!» 14 Ntɛ Yesu ɛnəŋk ŋa mɔ, k’oloku ŋa: «Nəkɔ nəmentərnɛ aloŋnɛ nde kəlɔ kəpɔŋ ka Kanu.» Afum aŋɛ ŋayi kəkɔ, kɔ pəyɔnɛ fɔ ŋasɔk a kɔ ŋandebɛrɛ di. 15 Ntɛ wəkin ɛnəŋk fɔ ɛntamnɛ mɔ, k’oluksərnɛ pəc-cam debeki da Kanu dim dɔpɔŋ. 16 K’ɛfəntərɛ dəntɔf, k’osumpər Yesu wɛcək, k’eyek-yekəs kɔ. Fum wəkakɔ, wəSamari ɛnayi. 17 Kɔ Yesu eyif kɔ: «Bafɔ asɔkəs afum aŋɛ wəco? Deke aləpəs aŋɛ camət-maŋkəlɛ ŋayi-ɛ? 18 Ali wəkin ɛŋcɛm-cɛmnɛ fɛ kəluksərnɛ pədecam debeki da Kanu, mɛnɛ wəcikəra wəkin wəkawɛ?» 19 Kɔ Yesu oloku kɔ: «Məyɛfɛ məkɔ, kəlaŋ kam kəyac’əm.»
Kəder ka dɛbɛ da Kanu
20 Ntɛ aFarisi ŋayif Yesu tɛm ntɛ dɛbɛ da Kanu dendeder mɔ, k’oloku ŋa: «Dɛbɛ da Kanu dɔfɔder pagbətnɛ di fəp. 21 Afɔkulɛ di, ‹Idɛndɛ nnɔ!›, ‹Idɔkɔ nde!› Bawo dɛbɛ da Kanu nəna ŋɔ deyi dacɔ.» 22 Ntɛ Yesu elip kəloku ŋa ti mɔ, k’oloku acɛpsɛ ɔn darəŋ: «Dɔsɔk dendebəp ndɛ nəndefaŋ kənəŋk dɔsɔk din da Wan ka fum mɔ, mba nəfɔsɔ-nəŋk di. 23 Andelok’un: ‹Eyi nnɔ!› kɔ pəyɔnɛ fɛ ti-ɛ ‹Eyi nde!› Ta nədekɔ di, ta nədeyɛksərnɛ kəkɔ ka di. 24 Pəmɔ tɔkɔ pəmot poŋmot a pəyɔ waŋkəra dareŋc kəyɛfɛ kəsək kin haŋ ka mɛrəŋ mɔ, tatɔkɔ tɔ Wan ka fum endeyi kɔ dɔsɔk dɔn. 25 Mba mɛnɛ pətɔrɔ pəpɔŋ kərɛs, afum a tɛm tantɛ ŋawɛnəs kɔ. 26 Tɔkɔ tɛnacepər tɛm ta Nuha mɔ, tendecepər sɔ dɔsɔk da Wan ka fum. 27 Afum ŋaŋc-di yeri, ŋac-mun, arkun kɔ aran ŋac-nɛŋcɛnɛ, haŋ dɔsɔk ndɛ Nuha ɛnabɛrɛ debil mɔ: Kɔ domun dɛlarəm dender ndɛ dɛnamələk ca fəp mɔ. 28 Pəndeyi pəmɔ tɛm ta Lɔt. Afum ŋaŋc-di yeri, ŋac-mun, ŋac-way, ŋac-caməs, ŋac-bɔf, ŋac-cəmbər wɔlɔ. 29 Mba dɔsɔk ndɛ Lɔt owur Sodom mɔ, nɛŋc kɔ pərbəlɔ yɛnatuf Sodom kɔ yɛmələk ca ya di fəp. 30 Itɔ pəndeyi dɔsɔk ndɛ andementər Wan ka fum mɔ.» 31 «Dɔsɔk dadɔkɔ məna nwɛ məŋyi dɛkɛr, ca yam yeyi dukəlɔ mɔ, məfɔtam kəbɛrɛ məlɛk yi. Məna nwɛ tɛmbəp dalɛ mɔ, məfɔtam kəluksərnɛ kəlɔ kam nde dare. 32 Nəcɛm-cɛmnɛ wəran ka Lɔt. 33 Məna nwɛ məndesɛp kəkɛkəs kəyi doru kam mɔ, kəndesalpər’əm, kɔ məna nwɛ kənasalpər mɔ, məndesɔtɔ ki. 34 Ic-lok’un: Pibi papɔkɔ, afum mɛrəŋ ŋandefəntərɛ kəfəŋc kin, pasumpər wəkin pasak wəkɔ; 35 -36 aran mɛrəŋ ŋandeyi kəcɔ kirir kin, pasumpər wəkin pasak wəkɔ. 37 Kɔ acɛpsɛ ɔn darəŋ ŋayif kɔ: «Deke tatɔkɔ tendekɔ-yi-ɛ, Wəbɛ?» Kɔ Yesu oloku ŋa: «Nde pefi peyi mɔ, difɔ yɔfən yoŋloŋkanɛ.»
Capafɔ ca wəran nwɛ wos efi mɔ, kɔ wəboc kiti
1 Kɔ Yesu oloku ŋa capafɔ, kəmentər ŋa fɔ mɛnɛ ŋac-lok-lokər Kanu tɛm o tɛm ta dis dɔlɔl ŋa. 2 K’oloku: «Dare dɔlɔma dɛnayi dɔyɔ wəboc kiti nwɛ ɛnatɔ kəc-nesɛ Kanu mɔ, ali fum ta eleləs-ɛ. 3 Dare dadɔkɔ dɔyɔ sɔ wəran wətɔlɔ wəlɔma nwɛ eŋc-der pəc-loku kɔ: ‹Məboc’em kiti kɔ wəyɛfərɛnɛ kem dacɔ!› 4 Kɔ wəboc kiti nwɛ ɛfatər kɔ haŋ, k’ende pəlokunɛ dɛbəkəc: ‹Ali ntɛ intɔcərɛ Kanu, ta ileləs nwɛ o nwɛ mɔ; 5 ntɛ wəran nwɛ wos efi, ɔlɔləs’im dis mɔ, ibocɛ kɔ kiti kɔ wəyɛfərɛnɛ kɔn dacɔ, ntɛ tendesɔŋɛ kɔ kətɔ-gbɔkərɛ-gbɔkərɛ sɔ kəder mɔ, pədenaŋkanɛ kəlɔləs’im dis mɔ.›» 6 Kɔ Wəbɛ Yesu ɔnɔcər: «Nəcəŋkəl ntɛ wəboc kiti wətɔlomp oŋloku mɔ. 7 Kanu nkɔn ɔfɔdekɔ-bocɛ afum ɔn aŋɛ kiti ba, aŋɛ ŋambokər kɔ pibi kɔ daŋ mɔ? Endesɔŋɛ ŋa kəwon kəkar ba? 8 Ic-lok’un: Ɔfɔdesɔŋɛ ŋa kəwon kəkar, endebocɛ ŋa kiti katəna-katəna. Mba kɔ Wan ka fum endeder-ɛ, endebəp kəlaŋ doru ba?»
Capafɔ ca wəFarisi kɔ wəwerəs dut
9 Kɔ Yesu oloku sɔ capafɔ ncɛ afum alɔma aŋɛ ŋanacɛm-cɛmnɛ kəlomp, a ŋac-fəfərəs akɔ mɔ: 10 «Kɔ afum mɛrəŋ ŋampɛ kəkɔ-tola Kanu nde kəlɔ kəpɔŋ ka Kanu; wəkin nwɛ pəyɔnɛ wəFarisi, wəkɔ pəyɔnɛ wəwerəs dut. 11 WəFarisi nwɛ pəcəmɛ pəc-lok-lokər Kanu dɛbəkəc ntɛ: ‹Kanu, iyek-yekəs’əm ntɛ intɔyi pəmɔ afum aləpəs akɔ ŋayɔnɛ abaŋəs ca ya afum mɔ, ta ŋalomp, ŋac-sumpər dalakɔ, kɔ intɔyi pəmɔ wəwerəs dut nwɛ mɔ. 12 Kəmɛrəŋ k’iŋsuŋ dɔsɔk doluksər disrɛ, ic-sɔŋ sɔ farilɛ fəp fa yɔsɔtɔ yem.› 13 Wəwerəs dut nwɛ nkɔn pəcəmɛ pəbɔlɛ, pəc-nesɛ kəyekti fɔr dareŋc yati, mba pəc-sut-sutnɛ abəkəc kəc-loku: ‹Kanu məŋaŋnɛn’em, ina wəciya!› 14 Ic-lok’un: Fum wəkakɔ ɛnalomp nnɔ Kanu kəyi mɔ, a k’endelukus nde ndɔrɔn; mba wəFarisi ɛnalomp fɛ nnɔ Kanu kəyi mɔ. Nwɛ o nwɛ ɛlɛknɛ, andetorɛ kɔ; nwɛ o nwɛ otontnɛ, andepɛnɛ kɔ.»
Yesu kətolanɛ kɔn awut afɛt
15 Afum ŋac-kɛrɛ Yesu ali cənaka ntɛ tɔŋsɔŋɛ pəc-deŋər ŋa waca pətolanɛ ŋa mɔ. Ntɛ acɛpsɛ ɔn darəŋ ŋanəŋk ti mɔ, kɔ ŋaŋgbəŋ-gbəŋər ŋa. 16 Mba kɔ Yesu ɔlɔtərnɛnɛ awut pəc-loku: «Nəce awut ŋader nnɔ iyi mɔ! Ta nəmɔnɛ ŋa, bawo dɛbɛ da Kanu, aŋɛ ŋayi pəmɔ awut mɔ, ŋayɔ ŋi. 17 Awa! Ic-lok’un nwɛ o nwɛ ɔntɔbaŋ dɛbɛ da Kanu pəmɔ wan wəfɛt mɔ, ɔfɔbɛrɛ ŋi disrɛ few!»
Wərkun wəka daka dɛlarəm
18 Kɔ wəbɛ wəlɔma eyif kɔ: «Wəbɛ wətɔt, cəke cɔ pəmar’im kəyɔ, isɔtɔ kəyi wəyeŋ katina-ɛ?» 19 Kɔ Yesu eyif kɔ: «Ta ake tɔ məŋwen’em «Wətɔt»-ɛ? Ali fum ɔyɔnɛ fɛ wətɔt, mɛnɛ Kanu gbəcərəm. 20 Məŋcərɛ mosom ma Kanu: Ta məsumpər dalakɔ; ta mədif fum; ta məkiyɛ; ta məbaŋɛ fum yem disrɛ; məleləs akombəra am- papa kam kɔ iya kam.» 21 «Iŋcəmɛ mamɔkɔ fəp darəŋ kəyɛfɛ ntɛ inafɛtɛ mɔ,» fum wəkakɔ pəc-loku. 22 Ntɛ Yesu ene kɔ dim mɔ, k’oloku kɔ: «Awa tes tin tobut’əm: Məcaməs daka dam, məyer pəsam papɔkɔ atɔyɔ daka, məndekɔ-sɔtɔ daka dɔpɔŋ nde dareŋc. Kɔ tɛyɛfɛ dənda-ɛ, məder məcɛps’em darəŋ.» 23 Ntɛ fum nwɛ ene moloku ma Yesu mɔ, kɔ abɔc ŋɛmbɛrɛ kɔ, bawo ɛnayɔ daka dɛlarəm. 24 Ntɛ Yesu ɛnəŋk kɔ abɔc ŋɛmbɛrɛ kɔ mɔ, k’oloku: «Pəŋcuca aka daka kəbɛrɛ ka dɛbɛ da Kanu dəntɔf. 25 Pəfəfərɛnɛ yɔkɔmɛ kəbɛrɛ ka abi ŋa tɛsɛmbɛ pətas wəka daka kəbɛrɛ ka dɛbɛ da Kanu dəntɔf.» 26 Aŋɛ ŋaŋc-cəŋkəl Yesu mɔ ŋayif kɔ: «Anɔ antam oŋ kəyac-ɛ?» 27 Kɔ Yesu oloku ŋa: «Ntɛ tɛntambər afum mɔ, Kanu kəntam ti.» 28 Kɔ Piyɛr oloku: «Səna səsak daka dosu kɔ səŋcəm’am darəŋ.» 29 K’oloku ŋa: «Awa! Ic-loku nu kaŋce: Fum eyi fɛ, nwɛ ɛŋsak kəlɔ kɔn, wəran kɔn, wɛŋc, akomɛnɛ ɔn, kɔ awut ɔn teta dɛbɛ da Kanu, 30 ta wəkayi ɔŋkɔsɔtɔ pəlarəm doru dandɛ, kɔ dekiriŋ nde aŋkɔyi wəyeŋ katina mɔ.»
Yesu ɛndəŋk ta maas defi dɔn kɔ kədeyɛfɛ kɔn afi dacɔ
31 Kɔ Yesu ɛlɛk Asom ɔn wəco kɔ mɛrəŋ, k’oloku ŋa: «Yerusalɛm andepɛ. Mes mmɛ adəŋk a Kanu ŋanacicəs teta Wan ka fum mɔ fəp, mendekɔ-yi. 32 Bawo andekɔ-bɛr kɔ atɔyɔnɛ Suyif dəwaca; andekɔ-fani kɔ, andekɔ-tɔrəs kɔ, andekɔ-yuksər kɔ lin, 33 andekɔ-sutɛ kɔ tɔrɔŋkɔn, a padedif kɔ. Tataka ta maas ta defi dɔn, pəyɛfɛ afi dacɔ.» 34 Mba Asom ɔn ŋanane fɛ ti tɔlɔm o tɔlɔm. Ŋanacərɛ fɛ ntɛ tatɔkɔ toloku mɔ.
Yesu kətaməs kɔn wətɔnəŋk
35 Ntɛ ŋayi kəlɔtərnɛ Yeriko mɔ, tɛtəŋnɛ wətɔnəŋk wəlɔma pəndɛ dɔpɔ kəsək pəc-tola. 36 K’ene pɔkɔt pa kənay, k’eyif daka ndɛ dender mɔ. 37 K’aloku kɔ: «Yesu wəka Nasarɛt eyi kəcepər!» 38 K’oŋkulərnɛ: «Yesu wəka Dawuda məyɔn’em nɔnɔfɔr!» 39 Aŋɛ ŋanasol kɔ Yesu ŋayi kɔ tekiriŋ mɔ, ŋayɛfɛ kəgbəŋ-gbəŋər kɔ a pəcaŋk, mba wəkakɔ pəc-naŋkanɛ kəkulɛ-kulɛ: «Wəka Dawuda məyɔn’em nɔnɔfɔr!» 40 Kɔ Yesu ɛŋcəmɛ, k’osom a pakɛrɛ kɔ fum nwɛ. Ntɛ alɔtərnɛnɛ kɔ mɔ, k’eyif kɔ: 41 «Cəke cɔ məfaŋ a iyɔn’am-ɛ?» K’oloku: «Wəbɛ, iluksərnɛ sɔ kənəŋk!» 42 Kɔ Yesu oloku kɔ: «Məluksərnɛ sɔ kənəŋk! Kəlaŋ kam kəyac’əm.» 43 Gbəŋcana babɔkɔ kɔ fum nwɛ ɛnəŋk, k’ɛyɛfɛ k’ɛŋcəmɛ kɔ darəŋ pəc-cam debeki da Kanu. Ntɛ afum fəp ŋanəŋk tatɔkɔ mɔ, kɔ ŋayɛfɛ kəkor-koru Kanu.
Yesu kɔ Sasey
1 Ntɛ Yesu ɛmbɛrɛ Yerikɔ mɔ, k’ɛŋcali dare. 2 Awa, kɔ fum wəlɔma, nwɛ aŋc-we Sasey, nwɛ ɛnayɔnɛ wəbɛ ka awerəs dut, pəyɔ daka dɛlarəm, 3 pəc-tɛn kəcərɛ fum nwɛ aŋwe Yesu mɔ; mba ɛŋc-tam fɛ ti, bawo afum ŋanala, nkɔn pəbumpsɛnɛ. 4 Kɔ fum nwɛ eŋcepər kiriŋ k’ɔŋkɔ pəfərəŋk dəkətɔk ntɛ tɔŋsɔŋɛ kɔ kənəŋk Yesu mɔ, bawo dif’ ɛnakɔ kəcepər. 5 Ntɛ Yesu ɛmbəp kətɔt kaŋkɔ dəntɔf mɔ, k’eyekti fɔr k’ɛnəŋk fum nwɛ, k’oloku kɔ: «Sasey məkufɛ mətor; bawo nde kəlɔ kam iŋkɔ mɔkɔ iyi.» 6 Kɔ Sasey ɛmbɛlkər kətor, k’ɛmbaŋ Yesu pəbotu disrɛ. 7 Ntɛ afum ŋanəŋk ti mɔ, kɔ ŋayɛfɛ kəcɔpɛnɛ, ŋac-loku: «Ndena fum wəciya ɔŋkɔ pəyi.» 8 Mba Sasey nwɛ ɛnacəmɛ wəbɛ fɔr kiriŋ mɔ, oloku: «Wəbɛ, indesɔŋ atɔyɔ daka dacɔ da kəsɔtɔ kem; nwɛ o nwɛ inanaŋkanɛ kəbaŋər pɛlarəm mɔ, indesɔŋ wəkayi kəmaŋkəlɛ ka tɔkɔ inabaŋər kɔ mɔ.» 9 Kɔ Yesu oloku kɔ: «Mɔkɔ, Kanu kəyac aka kəlɔ kaŋkɛ, bawo məna sɔ wəka Abraham məyɔnɛ! 10 Bawo Wan ka fum ender kədetɛn kɔ kəyac ka aŋɛ ŋanasɔlɛ mɔ.»
Capafɔ ca mɛŋcəmbəl ma kɛma
11 Afum ŋayi kəcəŋkəl Yesu. Kɔ Yesu ɔnɔcər capafɔ cəlɔma, bawo ŋanalɔtərnɛ Yerusalɛm, afum ŋac-cɛm-cɛmnɛ a dɛbɛ da Kanu dɔŋkɔwur gbəŋcana babɔkɔ. 12 Kɔ Yesu oloku: «Fum wətɔt tokom wɔlɔma, ɛnayɛfɛ k’ɔŋkɔ atɔf ŋobol-bolu kəkɔ-tɛn dɛbɛ a pədeder. 13 Kɔ fum nwɛ ewe acar ɔn wəco, k’ɔsɔŋ ŋa nwɛ o nwɛ kɛmɛ kəpɔŋ kin, k’oloku ŋa: ‹Nəc-kafəlɛ-kafəlɛ ki waca haŋ ic-der.› 14 Mba afum aka dare dadɔkɔ ŋanater kɔ, kɔ ŋasom kəkɔ-loku nde fum nwɛ ɔŋc-kɔ kətɛn dɛbɛ mɔ: ‹Səfaŋ fɛ a fum wəkawɛ pəyɔnɛ su wəbɛ!› 15 Kɔ fum nwɛ ɔŋkɔ pəsɔtɔ dɛbɛ, ntɛ olukus mɔ, k’ewe acar ɔn aŋɛ wəco kədecərɛ ntɛ nwɛ o nwɛ ɛŋkafəli-kafəli waca mɔ. 16 Kɔ wəcar wəcɔkɔ-cɔkɔ ender, k’oloku: ‹Wəbɛ, isɔtɔ wəco wa kɛma kəŋkɔ mənasɔŋ’im mɔ.› 17 Kɔ fum nwɛ oloku: ‹Tentesɛ, wəcar wətɔt məyɔnɛ, bawo məlomp teta tes tɛfɛt, indesɔŋ sədare wəco məyɔnɛ wəbɛ kəŋan.› 18 Kɔ wəcar wəka mɛrəŋ ender, kɔ wəkakɔ oloku kɔ: ‹Wəbɛ, kəcamət ka kəŋkɔ mənasɔŋ’im mɔ, k’isɔtɔ.› 19 Kɔ fum nwɛ oloku sɔ wəkakɔ: ‹Isɔŋ’əm sədare kəcamət, məyɔnɛ wəbɛ kəŋan.› 20 Kɔ wəlɔma ender pəloku: ‹Wəbɛ kɛma kam kəŋkɛ, inafɔktər ki dəkəloto kətɔt imɛŋk. 21 Bawo inanes’am ntɛ məŋcuca mes mɔ: Məŋlɛk mpɛ məntɔboc mɔ; mətɛl nde mənatɔ-bɔf mɔ.› 22 Kɔ fum nwɛ oloku wəcar kɔn: ‹Moloku mam m’ indekit’əm, məna wəcar wəlɛc! Mənacərɛ a iŋcuca; k’iŋlɛk mpɛ intɔboc mɔ, ic-tɛl da intɔbɔf mɔ. 23 Ak’ ɛnasɔŋɛ ntɛ mənatɔ-bɔs-bɔsər pəsam pem mɔ, kɔ ntɛ ilukus mɔ, k’iŋkɔ ibaŋ pi padeŋərɛn’em kəntaŋgbɛ?› 24 K’oloku afum akɔ ŋanayi di mɔ: ‹Nəbaŋər kɔ kɛma kaŋkɔ nəkenɛ ki wəkɔ ɔsɔtɔn’em wəco mɔ.› 25 Kɔ afum ŋaloku: ‹Wəbɛ, wəkakɔ ɔsɔtɔ wəco!› 26 Kɔ fum nwɛ oloku ŋa: ‹Ic-lok’un: Məna nwɛ məyɔ mɔ, ambɛrɛnɛ sɔ məna wəkayi. Mba məna nwɛ məntɔyɔ mɔ, ambaŋər’əm ali depic pɔkɔ məyɔ mɔ. 27 Ta mɛrəŋ tayi, nəkɛr’em ater’em aŋɛ ŋanatɔ-faŋ a iyɔnɛ ŋa wəbɛ mɔ, nəfay ŋa mera fɔr yem kiriŋ.›»
Yesu kəkɔ kɔn Yerusalɛm
28 Ntɛ Yesu elip kəloku afum moloku mamɔkɔ mɔ, k’osumpər dɔpɔ afum kiriŋ kəkɔ Yerusalɛm. 29 Ntɛ Yesu ɔlɔtərnɛ sədare sa Bɛtfase kɔ Betani mɔ, kəca ka tɔrɔ tɔkɔ aŋwe Tɔrɔ ta Olif mɔ, kɔ Yesu osom acɛpsɛ ɔn darəŋ mɛrəŋ. 30 K’oloku ŋa: «Nəkɔ nde dare ndɛ antɛfərnɛ mɔ, kɔ nəŋkɔbɛrɛ-ɛ, nəŋkɔbəp di sɔfale səfɛt pakot si, nsɛ fum o fum ɛntatɔ-ndɛ mɔ. Nəsikəli si, nəkɛrɛ. 31 Kɔ fum eyif nu: ‹Ta ake tɔ nəŋsikəlɛ si-ɛ?› Nəloku kɔ gbəcərəm: ‹Bawo Wəbɛ ɛfaŋ si.›» 32 Kɔ afum aŋɛ anasom mɔ ŋaŋkɔ, kɔ ŋaŋkɔ ŋabəp sɔfale səfɛt pakot si pəmɔ tɔkɔ Yesu ɛnaloku ŋa mɔ. 33 Ŋayi kəsikəli sɔfale səfɛt, kɔ asərka ŋayif ŋa: «Ta ake tɔ nəŋsikəlɛ sɔfale sasɔkɔ-ɛ?» 34 Kɔ acɛpsɛ ɔn darəŋ mɛrəŋ aŋɛ ŋaloku aka sɔfale: «Wəbɛ ɛfaŋ si.» 35 Kɔ afum aŋɛ ŋaŋkenɛ Yesu sɔfale səfɛt nsɛ, kɔ ŋandeŋəsər si suma səŋan, kɔ Yesu ɛndɛ si kəroŋ. 36 Tɔkɔ ɔŋc-kɔ kiriŋ mɔ, itɔ afum ŋaŋc-perɛ kɔ suma səŋan dɔpɔ. 37 Ntɛ ŋalɔtərnɛ Yerusalɛm nde pətəmbələr pa Tɔrɔ ta Olif mɔ, kɔ pəmbɔt kənay kəŋkɔ kənacɛpsɛ kɔ darəŋ mɔ fəp. Kɔ ŋayɛfɛ kəkor-koru Kanu pəpɔŋ, bawo ŋananəŋk mes mɛwɛy-wɛy mmɛ Kanu kəmmentər mɔ. 38 Kɔ ŋac-loku: «Kanu Kəpɔŋ kəpocɛ pətɔt wəbɛ nwɛ enderɛnɛ tewe tɔn mɔ! Pəforu peyi dareŋc, kɔ pəmot pa pəlel pa dɛbɛ dɔn peyi dareŋc!» 39 AFarisi akin akin akɔ ŋanayi kənay kaŋkɔ dacɔ mɔ, ŋaloku Yesu: «Wəbɛ, məloku acɛpsɛ am darəŋ ŋacaŋk!» 40 Kɔ Yesu oloku ŋa: «Kɔ ŋaŋcaŋk-ɛ, masar moŋkulɛ-kulɛ!»
Yesu kəbok kɔn teta Yerusalɛm
41 Ntɛ ŋalɔtərnɛ Yerusalɛm, a kɔ Yesu ɛnəŋk dare mɔ, k’ɛyɛfɛ kəbok teta di, 42 k’oloku: «Yerusalɛm, məna ɛŋcərɛ mɔkɔ tɔkɔ aŋyɔ pasɔtɔ pəforu mɔ! Mba ndɛkəl tatɔkɔ tɔŋgbɔpən’am, məfɔtam ti kənəŋk. 43 Bawo dɔsɔk dendeder ndɛ ater’am ŋandenɔŋkər’əm kandɛ, ŋakɛl’əm, a ŋadewɛpərɛn’am waca fəp mɔ. 44 Ŋandeləsər’əm haŋ awut am, ali tasar tin ŋafɔdesakər’am mpɛ pəndeŋərnɛ pɔlɔm mɔ, bawo mənacərɛ fɛ tɛm ntɛ Kanu kənader kəmar’əm mɔ!»
Yesu kəbɛrɛ kɔn nde kəlɔ kəpɔŋ ka Kanu
45 Ntɛ Yesu ɛmbɛrɛ nde kəlɔ kəpɔŋ ka Kanu mɔ, k’ɛyɛfɛ kəbɛləs acaməs. 46 K’oloku ŋa: «Dəyecicəs Kanu kəloku: ‹Kəlɔ kem, tofo nde aŋlok-lokər Kanu tɔ, mba nəna nəŋkafəli ki aŋgbaŋcan nŋɛ akiyɛ ŋaŋgbɔpnɛ mɔ.›» 47 Dɔsɔk o dɔsɔk Yesu ɛŋc-təksɛ afum dəndo kəlɔ kəpɔŋ ka Kanu disrɛ. Aloŋnɛ apɔŋ, atəksɛ sariyɛ, kɔ abeki a dɔtɔf ŋac-tɛn kədif kɔ. 48 Mba ta ŋaŋcərɛ ntɛ ŋaŋyɔ, bawo afum fəp ŋaŋc-cəŋkəl moloku ma Yesu, ta ŋafaŋ kəbut ali toloku tɔn tin kəne-ɛ.
Deke kətam mes ka Yesu kəyɛfɛ-ɛ?
1 Dɔsɔk dɔlɔma, ntɛ Yesu eyi kətəksɛ afum nde kəlɔ kəpɔŋ ka Kanu mɔ, pəc-dəŋk moloku mɔtɔt. K’aloŋnɛ apɔŋ, kɔ atəksɛ a sariyɛ kəlɛkɛnɛ abeki a dɔtɔf ŋambɛrər kɔ, 2 kɔ ŋaloku Yesu: «Məloku su ma sariyɛ nsɛ səsɔŋ’am kəyɔ ka mes mamɛ mɔ, kɔ pəyɔnɛ fɛ ti-ɛ, məboŋcər su nwɛ osom’əm kəyɔ ka mi mɔ.» 3 Kɔ Yesu oloku ŋa: «Ina sɔ, k’iyif’un k’ inder toloku tin: 4 Anɔ ɛnasom Saŋ kədegbət fum dəromun-ɛ, Kanu ba, ka afum?» 5 Kɔ ŋayɛfɛ kəgbɛkəlɛnɛ taŋan, ŋac-loku: «Kɔ səloku fɔ Kanu-ɛ, eŋyif su: ‹Ta ake tɔ nənatɔ-laŋ-ɛ?› 6 Mba kɔ səloku ndɛkəl fɔ: ‹Afum ŋanasom kɔ-ɛ,› afum a dɔtɔf fəp ŋaŋcacas su, bawo ŋaŋcərɛ fəp a Saŋ wədəŋk wəka Kanu ɔ ɛnayɔnɛ.» 7 Kɔ ŋaloku Yesu: «Səŋcərɛ fɛ.» 8 Kɔ Yesu oloku ŋa: «Ina sɔ ifɔboŋcər’un nwɛ osom’im kəyɔ ka mes mamɛ mɔ.»
Capafɔ ca abum dalɛ alɛc bəkəc
9 Kɔ Yesu ɛyɛfɛ kəloku afum capafɔ ncɛ: «Fum ɛnabɔf tɔk yokom dalɛ, k’ɛŋcəmbər yi sɛkɛ, k’owur k’ɔŋkɔ atɔf ŋɔlɔma nŋɛ ɛnakɔ pəwon mɔ. 10 Ntɛ tɛm tɛmbəp mɔ, kɔ fum nwɛ osom wəcar nnɔ abum a dalɛ aŋɛ ŋayi mɔ, a ŋapocɛ kɔ yokom yɔlɔma ya tɔk yayɔkɔ. Mba kɔ abum a dalɛ ŋasut kɔ, kɔ ŋasak kɔ, k’olukus waca wɔsɔkər. 11 Kɔ fum nwɛ ɔŋgbɔkərɛ sɔ kəsom ka wəcar wəlɔma; kɔ abum a dalɛ ŋasut sɔ wəkakɔ, kɔ ŋalapəs kɔ, kɔ ŋasak kɔ, k’olukus waca wɔsɔkər. 12 Kɔ fum nwɛ osom sɔ wəka maas, kɔ abum a dalɛ ŋambopər wəkakɔ, kɔ ŋambɛləs kɔ. 13 Kɔ wəka dalɛ nwɛ eyifnɛ: ‹Cəke cɔ indeyɔ-ɛ? Wan kem nwɛ imbɔtər mɔ indesom; tɔlɔma ŋaŋkɔleləs wəkakɔ.› 14 Mba ntɛ abum a dalɛ ŋanəŋk wəkakɔ mɔ, kɔ ŋalokɛnɛ: ‹Wədelɛk kɛ kɔn ɔfɔ wəkakɔ. Padif kɔ ntɛ tɔŋsɔŋɛ dalɛ dede dɔyɔnɛ dosu mɔ.› 15 Kɔ abum a dalɛ aŋɛ ŋasumpər wan ka wəka dalɛ, kɔ ŋawurɛnɛ kɔ dalɛ kəsək kɔ ŋandif.» Kɔ Yesu eyif acəŋkəl ɔn, «Cəke cɔ pəmar wəka dalɛ nwɛ pəyɔ ŋa-ɛ?» 16 Kɔ Yesu ɔnɔcər: «Pəmar wəka dalɛ nwɛ pəder pədif abum a dalɛ akakɔ fəp, pəbaŋ sɔ dalɛ pəsɔŋ abum alɔma.» Ntɛ afum ŋane moloku mmɛ mɔ, kɔ ŋaloku: «Ta tatɔkɔ tɛtam kəyi!» 17 Kɔ Yesu ɛŋkafəli kəro k’ɔmɔmən ŋa, k’eyif: «Cəke cɔ toloku tecic tantɛ toloku oŋ-ɛ?: ‹Tasar ntɛ acəmbər kəlɔ ŋanace mɔ, ipede pɔyɔnɛ oŋ tasar mpɛ posumpər kəlɔ mɔ.› 18 Nwɛ o nwɛ ɛtɛmpɛnɛ pi kəroŋ, ɛntɛpɛ; məna nwɛ pɛntɛmpɛnɛ sɔ kəroŋ mɔ, pomputək’əm.»
Abɛ a dine aSuyif kəfaŋ kəŋan kəkaŋkəla-kaŋkəla Yesu
19 Atəksɛ a sariyɛ kɔ aloŋnɛ apɔŋ ŋac-tɛn kətəp kɔ waca tɛm tatɔkɔ, bawo ŋanacərɛ a te taŋan tɔ Yesu ɛnalokɛ capafɔ cacɔkɔ; mba ŋac-nesɛ afum akɔ ŋanayi di mɔ. 20 Kɔ ŋayɛfɛ kəkaŋkəla-kaŋkəla Yesu. Ti disrɛ, kɔ ŋasom afum aŋɛ ŋanabaŋɛnɛ kəcəŋkəl moloku mɔn mɔ. Afum ŋanayi aŋɛ anasom kəkɔ-sumpər Yesu dəmoloku mɔ, ntɛ tɔŋsɔŋɛ ŋatam kəbɛr kɔ wəbɛ dəwaca, nwɛ ɛnatɔmpər kətam kɔ fənɔntər dɔtɔf mɔ. 21 Kɔ afum asom aŋɛ ŋaŋcaŋ kɔ moloku: «Wətəksɛ, səŋcərɛ fɔ moloku mamɛ məŋloku məc-təksɛ mi afum mɔ mɔsɔk; məfɔkiti fum kənəŋk kɔn, mba kaŋce kɔ məntəksɛ afum kəkɔt nkɛ kəmbɔt Kanu mɔ. 22 Awa, məloku su ma, pəmar kəsɔŋ dut dosu wəbɛ wəka Rom ba, ka pəmar fɛ ti?» 23 Mba kɔ Yesu ɛnɛpəl kɔta kəŋan, k’oloku ŋa: 24 «Nəmentər’im pəsam gbəleŋ bin. Kəro ka ana kəyi pəsam papɔkɔ-ɛ, kɔ tewe ta wəkayi?» Kɔ ŋaloku, «Wəbɛ wəka Rom.» 25 Kɔ Yesu oloku ŋa: «Awa, nəsɔŋ wəbɛ wəka Rom pɔkɔ pɔyɔnɛ pɔn mɔ, kɔ Kanu sɔ pɔkɔ pɔyɔnɛ pa Ki mɔ.» 26 Afum aŋɛ ŋantam fɛ kəsumpər kɔ dəmoloku kənay nkɛ dacɔ; mba ntɛ moloku ma Yesu meŋciyanɛ ŋa mɔ, kɔ ŋaŋcaŋk.
Kəyif ka kədeyɛfɛ ka defi afi dacɔ
27 Kɔ aSadisi alɔma ŋander nnɔ Yesu eyi mɔ. ASadisi akakɔ ŋaŋc-loku a k’afi-ɛ, kəyɛfɛ kəyi fɛ sɔ. Kɔ ŋayif Yesu moloku mmɛ: 28 «Wətəksɛ, ntɛ tɔ Musa ɛnacicɛ su: ‹Kɔ wɛŋc ka fum efi pənɛŋcɛ mba ta ɔyɔ wan-ɛ, wɛŋc wəkɔ eyi doru mɔ, ɛntam kənasər wəran ka wəfi pəkomɛ kɔ awut.› 29 Mba awɛŋc camət-mɛrəŋ ŋanayi tɔlɔma. Kɔ wəcɔkɔ-cɔkɔ ɛnɛŋcɛ, k’efi ta ɛsak wan-ɛ. 30 Kɔ wəka mɛrəŋ ɛnasər wəran kɔn, 31 kɔ tɛyɛfɛ dənda kɔ wəka maas ɛnasər kɔ. Tatɔkɔ tɔ tɛnakɔ haŋ kɔ awɛŋc aŋa aŋɛ camət-mɛrəŋ fəp ŋanɛŋcɛ wəran wəkin nwɛ, ta nwɛ o nwɛ ɛsak wan-ɛ. 32 Tɛləpəs oŋ, kɔ wəran nwɛ efi. 33 Kɔ dɔsɔk dɛyɛfɛ da afi dendebəp-ɛ, anɔ endelɛk wəran wəkawɛ-ɛ? Bawo awɛŋc aŋa akaŋɛ camət-mɛrəŋ fəp ŋananɛŋcɛ kɔ!» 34 Kɔ Yesu oloku ŋa: «Arkun kɔ aran a doru dandɛ ŋaŋnɛŋcɛnɛ. 35 Mba nde doru dakɔ dender mɔ, Kanu kənəŋk fɔ pəmar alompu ŋayɛfɛ defi, a ŋasɔtɔ kəyi wəyeŋ doru dadɔkɔ-ɛ, ŋafɔde ŋac-nɛŋcɛnɛ. 36 Ŋafɔtam sɔ kəfi, bawo pəyi ŋa pəmɔ mɛlɛkɛe, ŋa ŋandeyɔnɛ awut a Kanu, bawo Kanu kəyekti ŋa defi. 37 Musa oloku pəsoku pɛs a afi ŋandeyɛfɛ defi. Kəfo nkɛ aŋcic teta tɛrəntəm ntɛ tɛŋc-mar mɔ, Musa ewe Kanu dənda ‹Kanu ka Abraham, Kanu ka Isiyaka, Kanu ka Yakuba.›» 38 Kɔ Yesu ɔnɔcər, «Kanu bafɔ ka afi kɔ, mba ka ayi wəyeŋ; bawo nnɔ Kanu kəyi mɔ, fəp fəŋyi wəyeŋ.» 39 Kɔ acicəs a sariyɛ alɔma ŋalɛk moloku, kɔ ŋaloku: «Wətəksɛ, məloku bel-bel!» 40 Kɔ ŋaŋc-nesɛ sɔ kəyif kɔ moloku mɔlɔma.
Wəyɛk-yɛk wəka Kanu kɔ Dawuda
41 Kɔ Yesu oloku ŋa: «Cəke cɔ antam kəloku a Wəyɛk-yɛk wəka Kanu wəka Dawuda ɔyɔnɛ-ɛ? 42 Bawo Dawuda nkɔn yati oloku buk ba Yabura Dawuda disrɛ: ‹Wəbɛ ɛnaloku wəbɛ kem: Məder məndɛ nnɔ kəca kem kətɔt, 43 Ifaŋ kəbocər’əm aterɛnɛ am dəntɔf mənas-nas ŋa.› 44 Kɔ Dawuda ewe wəsom ka Kanu «wəbɛ kɔn»-ɛ, cəke cɔ wəkakɔ ɛntam kəyɔnɛ wan kɔn-ɛ?»
Yesu oloku a pakɛmbərnɛ mɔyɔ ma atəksɛ sariyɛ
45 Ntɛ afum ŋayi kəcəŋkəl Yesu mɔ, k’oloku acɛpsɛ ɔn darəŋ: 46 «Nəkɛmbərnɛ atəksɛ sariyɛ: Ŋambɔtər kəkɔtəsɛ suma səpɔŋ, ŋambɔtər pac-yif ŋa kəyif kətɔt mofo mmɛ mɛŋlarɛ mɔ, ŋambɔtər dəkəndɛ dəcɔkɔ-cɔkɔ dəkəcəpəs, kɔ səcɔm səcɔkɔ-cɔkɔ mofo mmɛ aŋkɔ kədi yeri mɔ. 47 Ŋa ŋambaŋər aran aŋɛ awos aŋa ŋafi mɔ daka daŋan, ŋa ŋambɔləsɛ sali ntɛ tɔŋsɔŋɛ pagbɛkərɛ ŋa mɔ. Andekɔ-kiti ŋa kiti kəyeŋki!»
Kəpocɛ ka wəran wətɔyɔ daka nwɛ wos ɛnafi mɔ
1 Kɔ Yesu eyekti fɔr, k’ɛnəŋk ntɛ aka daka ŋaŋc-bɛr kəpocɛ kəŋan dətafala ta kəlɔ kəpɔŋ ka Kanu mɔ. 2 K’ɛnəŋk sɔ wəran wətɔyɔ daka wəlɔma nwɛ wos efi mɔ, pəc-bɛr mɛŋcəmbəl mɛfɛt mɛrəŋ ma kɔpər. 3 K’oloku: «Ic-lok’un, kaŋce: Wəran wətɔyɔ daka wəkawɛ wos ɛnafi mɔ, ompocɛ pətas aka fəp. 4 Bawo afum aləpəs aŋɛ fəp, ntɛ daka dɛlar ŋa mɔ, itɔ ŋambɛr kəpocɛ kəŋan dənda, mba nkɔn, kətɔyɔ kɔn daka, ɔsɔŋ pɔkɔ pəmar pɔsɔŋɛ kɔ kətam kəyi doru mɔ.»
Yesu kədəŋk kədeləsər ka kəlɔ kəpɔŋ
5 Afum alɔma ŋaŋc-loku teta kəlɔ kəpɔŋ ka Kanu: «Kəntesɛ k’alompəsɛ ki masar mɔtɔt kɔ ca yɔtɔt ya ki nyɛ aŋsɔŋ Kanu kəpocɛ mɔ.» Kɔ Yesu oloku: 6 «Dɔsɔk dendeder, ndɛ nəntɔdenəŋk tasar tedeŋsɛ tasar kəroŋ mɔ, fəp fayi andewuŋ yi.
Pəlɛc kɔ kətɔrəs
7 Kɔ ŋayif kɔ: «Wətəksɛ, ake tɛm tɔ tatɔkɔ tendeyi-ɛ? Tɔyɔ tɛgbɛkərɛ tere tendementer mes mamɔkɔ mɛmbəp-ɛ?» 8 Kɔ Yesu oloku ŋa: «Nəkɛmbərnɛ, ta nəsaknɛ patalər’un! Bawo afum alarəm ŋadeder ŋac-kɔtɛnɛ tewe tem, ŋac-lok’un: ‹Ina ɔyɔnɛ wəsom ka Kanu,› kɔ, ‹Tɛm tɛmbəp!› Mba ta nədecəmɛ ŋa darəŋ! 9 Kɔ nəndene teta kəwan, k’afum a dɔtɔf ŋayeŋkər abɛ aŋan bəkəc-ɛ, ta nənesɛ; bawo mɛnɛ tatɔkɔ toŋnuŋkɛnɛ teder kərɛsna, mba bafɔ ndɛkəl doru dandɛ dendelip.» 10 K’oloku ŋa sɔ: «Afum alɔma ŋandeyɛfərɛnɛ kɔ afum alɔma, atɔf ŋɔlɔma ŋayɛfərɛnɛ kɔ atɔf ŋɔlɔma; 11 antɔf ŋendeyikcɛ mofo mɔlɔma, dor kɔ docu yendeyi mofo mɛlarəm; mes mɛwɛy-wɛy mendeyi, kɔ mɛgbɛkərɛ mɔpɔŋ mmɛ mendeyɛfɛ nde Kanu Kəyi mɔ. 12 Mba mamɔkɔ mendebəp, pasumpər’un, patɔrəs’un, pasɔŋ’un kəkɔ-kiti dəkəcəpəs a padebɛr’un dəbili. Abɛ a dɔtɔf ŋandekit’un teta tewe tem. 13 Tatɔkɔ tendemar’un kəloku ka tɔkɔ nəŋcərɛ tetem mɔ. 14 Ta tɔyɔ nu kəcɛm-cɛmnɛ tɔkɔ nəndeyɔ a nəyacnɛ mɔ. 15 Ina wəkawɛ yati ina endesɔŋ’un temer kɔ kəcərɛ ka kətɔt nkɛ ater anu, nwɛ o nwɛ ɔntɔdetam kəgbɛkəl mɔ. 16 Akomɛnɛ, awɛŋc aŋa, anapa, kɔ abɔt anu yati ŋandesɔŋ nu, ŋasɔŋɛ alarəm kəfi nu dacɔ. 17 Fəp fəndeter’un, teta tewe tem. 18 Mba ali kəfon konu ka dəromp kin kəfɔdesɔlɛ; 19 Kɔ nəmbɛrɛnɛ kəsumpər bel-bel-ɛ, nəndeyacnɛ nəyi doru.»
Yesu ɛndəŋk kədeləsər ka Yerusalɛm
20 «Kɔ nəndenəŋk asɔdar ŋakɛl Yerusalɛm-ɛ, nəcərɛ tɛm tatɔkɔ a kələsər ka di kəlɔtərnɛ. 21 Tɛm tatɔkɔ akɔ ŋayi Yude mɔ, ŋac-yɛksɛ kəpɛrnɛ ka dəmɔrɔ; akɔ ŋayi Yerusalɛm dacɔ mɔ, ŋac-wur; akɔ ŋayi dəkulum mɔ, ta ŋabɛrɛ sɔ dare-ɛ. 22 Bawo dɔsɔk dadɔkɔ d’ andeboc kiti, ntɛ tɔŋsɔŋɛ mes mmɛ anacic mɔ fəp meyi. 23 Pəlɛc peyi dɔsɔk dadɔkɔ aran aŋɛ ŋambɛkəs, kɔ akɔ ŋaŋmɛsər mɔ! Bawo pəyeŋki pɔpɔŋ pendeyi dɔsɔk dadɔkɔ dɔtɔf, kɔ mɛtɛlɛ mɔpɔŋ ma Kanu nnɔ afum akakɔ ŋayi mɔ. 24 Sakma sɔ andedifətɛ ŋa, tɔf fəp yosumpər-sumpər ŋa yekekərɛ ŋa pəbɔlɛ; tɛm tatɔkɔ afum acuru ŋabaŋ Yerusalɛm, haŋ tɛm ntɛ asɔŋ ŋa mɔ tec-lip.»
Kəder ka Wan ka fum
25 «Mɔyɔ mɛgbɛkərɛ mmɛ mɛyɛfɛ nde Kanu kəyi mɔ mendeyi dədec, dəŋof kɔ dəcɔs; dəntɔf, bəkəc yendelɛcɛ-lɛcɛ afum teta pukulɛ-kulɛ pa dəkəba kɔ yam ya ki. 26 Afum ŋandefinɛ kənesɛ ka kəcɛm-cɛmnɛ ka tɔkɔ tendeder dəntɔf mɔ, bawo fənɔntər fa kɔm fəndeyikcɛ. 27 Tɛm tatɔkɔ tɔ andenəŋk Wan ka fum kəder dəkəp; dəfənɔntər, kɔ dəpəmot pa pəlel pa dɛbɛ dɔn disrɛ d’ ender. 28 Kɔ mɔyɔ mamɔkɔ mendecop kəder-ɛ, nəlomp, nəyekti səbomp, bawo kəsɔŋ konu kəway kəlɔtərnɛ.»
Cəke cɔ kətɔk kəkom kənatəksɛ-ɛ?
29 Kɔ Yesu oloku ŋa capafɔ cin: «Nənəŋk kətɔk kəkom kɔ tɔk yɛləpəs nyɛ. 30 Nəŋc-kɔna-nəŋk yi yopoŋ bɔpər, nəcərɛ katin a kətəŋ kəlɔtərnɛ. 31 Itɔ nəna nəndesɔ-yɔ, kɔ nəndenəŋk mes mamɔkɔ mec-der-ɛ, nəcərɛ fɔ dɛbɛ da Kanu dɔlɔtərnɛ. 32 Ic-lok’un kaŋce: Afum a tɛm tantɛ ŋafɔdelip kəfi fəp, a ta teyi-ɛ. 33 Kɔm kɔ antɔf yendesɔlɛ mba moloku mem mɔfɔdesɔlɛ.» Ta nədirərnɛ! 34 «Nəkɛmbərnɛ bel-bel! Ta nəsak bəkəc yonu yɛtasərnɛ cəsata kɔ kəcis, kɔ kəcɛm-cɛmnɛ ka doru dandɛ, kɔ pəyi ti tatɔkɔ-ɛ, dɔsɔk dɔpɔŋ dadɔkɔ dendebəpɛn’am, 35 pəmɔ ntɛ manta mɛŋgbəpərnɛ lop mɔ. Bawo dɔsɔk dadɔkɔ dendebəpɛnɛ afum a doru fəp. 36 Ta nədirərnɛ, nəc-lok-lokər Kanu tɛm fəp, ntɛ tɔŋsɔŋɛ nəde nəsɔtɔ fənɔntər fəmulpɛnɛ mes mɔkɔ mendeder mɔ fəp, nədekɔ nəcəmɛ, nəmentərnɛ Wan ka fum, ta nəlapərnɛ.» 37 Dɔsɔk dadɔkɔ, Yesu pəc-təksɛ afum dəndo kəlɔ kəpɔŋ ka Kanu, k’owur kəkɔ-cepərɛnɛ pibi nde aŋwe «Tɔrɔ ta Olif» mɔ. 38 Afum fəp, kɔ dec dɔsɔk-ɛ, ŋaŋc-kɔ nde kəlɔ kəpɔŋ ka Kanu kəkɔ-cəŋkəl kɔ.
Abɛ kətəŋnɛ kəyɔ ka Yesu pəlɛc
1 Kɔ kəsata ka aSuyif ka sali sa cəcom cətɔnɔŋkəl lebin nkɛ aŋwe «Pak» mɔ kəlɔtərnɛ. 2 Aloŋnɛ apɔŋ kɔ atəksɛ sariyɛ ŋayɛfɛ kətɛn ka ntɛ ŋaŋyɔ a ŋadif Yesu mɔ, mba ŋac-nesɛ afum.
Yudas kəwosɛ kɔn kəmar abɛ a aSuyif a ŋasumpər Yesu
3 Kɔ Sentani səmbɛrɛ Yudas, nwɛ aŋc-we Iskariyɔt mɔ, nwɛ aŋc-lɔm asom a Yesu wəco kɔ mɛrəŋ dacɔ mɔ. 4 Kɔ Yudas ɔŋkɔ ŋanenɛnɛ kɔ aloŋnɛ apɔŋ kɔ abɛ aŋɛ ŋaŋc-bum kəlɔ kəpɔŋ ka Kanu mɔ, tɔkɔ pəmar pəsɔŋ ŋa Yesu mɔ. 5 Kɔ pəmbɔt ŋa, kɔ ŋantəŋnɛ kəpocɛ kɔ pəsam. 6 Kɔ Yudas owosɛ. K’ɛyɛfɛ oŋ kətɛn tɔyɔ ntɛ ɔŋyɔ a pəsɔŋ Yesu ta afum ŋaŋcərɛ ti mɔ.
Yesu kəsɔŋ ka kəlompəs yeri ya Pak
7 Kɔ dɔsɔk da sali sa cəcom cətɔnɔŋkəl lebin dɛmbəp ndɛ pəmar padif aŋkesiya ŋoloŋnɛ mɔ. 8 Kɔ Yesu osom Piyɛr kɔ Saŋ, pəc-loku ŋa: «Nəkɔ nəlompəsɛ su yeri ya Pak, ntɛ tɔŋsɔŋɛ səde sədi yi mɔ.» 9 Kɔ ŋayif Yesu: «Deke məfaŋ a səlompəs yi-ɛ?» 10 Kɔ Yesu oloku ŋa: «Kɔ nəndena nəc-bɛrɛ dare disrɛ-ɛ, nəŋkɔbəpɛnɛ kɔ wərkun wəlɔma pəsarɛ tɔbɔl pa domun. Nəcəmɛ kɔ darəŋ haŋ nde kəlɔ kəŋkɔ ɔŋkɔbɛrɛ mɔ. 11 Nəloku wəka kəlɔ kaŋkɔ: ‹Wəbɛ osom su a səder səyif’əm, a dukəlɔ dere d’endedi yeri ya Pak kɔ acɛpsɛ ɔn darəŋ-ɛ?› 12 Endekɔ-mentər’un kəlɔ kəroŋ, dukəlɔ dɔpɔŋ kɔ ca yɔkɔ pəmar mɔ fəp. Dəndo kəfo kaŋkɔ kɔ nəŋkɔlompəs yeri ya Pak. 13 Kɔ afum aŋɛ ŋaŋkɔ, kɔ ŋaŋkɔ ŋabəp ca fəp pəmɔ tɔkɔ Yesu ɛnaloku ŋa ti mɔ, kɔ ŋalompəs yeri ya Pak.
Kəyer ka kəcom ka Pak
14 Ntɛ tɛm tɛmbəp mɔ, kɔ Yesu ɛndɛ dɛmɛsa kədi yeri kɔ Asom ɔn. 15 Kɔ Yesu oloku: «Pəmbas’im kədi yeri ya Pak yayɛ kɔ nəna, a idetɔrɔ. 16 Bawo ic-lok’un, ifɔsɔ-di yi, haŋ tɛm ntɛ teta yi tendekɔ-larɛ nde dɛbɛ da Kanu dəntɔf mɔ.» 17 Kɔ Yesu ɛlɛk apɔt, k’okor-koru Kanu, k’oloku: «Nəlɛk apɔt nŋɛ, nəyerɛnɛ pedisrɛ pa ŋi; 18 bawo ic-lok’un, ifɔsɔ-mun wɛn haŋ dɛbɛ da Kanu deder.» 19 Kɔ tɛyɛfɛ day, k’ɛlɛk kəcom, ntɛ elip kəkor-koru Kanu mɔ, k’entepi ki, k’ɔsɔŋ ŋa pəc-loku: «Dis dem dɔ dandɛ, ndɛ asɔŋɛ te tonu mɔ; nəde nəc-cɛm-cɛmn’em.» 20 Ntɛ ŋalip kədi yeri mɔ, k’ɛlɛk sɔ apɔt, k’ɔsɔŋ ŋa, pəc-loku: «Apɔt ŋaŋɛ ŋɔyɔnɛ kəcaŋəs kəfu kəyi ka tes tin kɔ Kanu. Wɛn wawɛ weyi apɔt ŋaŋɛ disrɛ mɔ, wɔyɔnɛ mecir mem mmɛ aloŋɛ tes tonu mɔ. 21 Ti disrɛ, fum nwɛ endesɔŋ’im padif mɔ, ɛndɛ nnɔ amɛsa ŋaŋɛ kɔ ina. 22 Wan ka fum ɛntas, pəmɔ tɔkɔ aloku ti mɔ; mba pəlɛc peyi fum wəkakɔ endesɔŋ kɔ padif mɔ.» 23 Kɔ acɛpsɛ a Yesu darəŋ ŋayɛfɛ kəyifətɛnɛ dənda, fum nwɛ eyi ŋa dacɔ nwɛ endesɔŋ kɔ padif mɔ. Anɔ ecepər’un fəp-ɛ? 24 Kɔ kəgbɛkəlɛnɛ kəpɔŋ kəyɛfɛ acɛpsɛ a Yesu darəŋ dacɔ, teta kəcərɛ ka nwɛ eŋcepər ŋa dacɔ fəp mɔ. 25 Kɔ Yesu oloku ŋa: «Abɛ a tɔf ŋayi afum aŋan kəroŋ pəmɔ abɛ, aŋɛ ŋaŋkɔtɛnɛ kətam nnɔ ŋayi mɔ, ŋafaŋ a pawe ŋa «abɔt a afum». 26 Bafɔ tin tayi tɔ kɔ nəna! Mba mɛnɛ nwɛ eŋcepər’un fəp mɔ, pəyi pəmɔ nwɛ ɛfɛtɛ nu dacɔ fəp mɔ; nwɛ ɔyɔnɛ wəbɛ mɔ, pəyi pəmɔ wəcar. 27 Bawo, nwɛ eŋcepər nu mɔ ɔyɔnɛ, nwɛ ɛndɛ dɛmɛsa mɔ ba, ka nwɛ ɛŋkɛrɛ kɔ yeri dənda mɔ? Bafɔ nwɛ ɛndɛ dɛmɛsa mɔ ɔfɔ? Kɔ ina, iyi nu dacɔ, pəmɔ nwɛ ɛŋkɛrɛ nu yeri dɛmɛsa mɔ.» 28 «Nəna ɛnasiməs kɔ ina tɛm ntɛ inayi tɔrɔ disrɛ mɔ. 29 Itɔ ɔsɔŋɛ ntɛ papa kem ɔsɔŋ’im dɛbɛ mɔ, ina sɔ isɔŋ’un di: 30 Ntɛ tɔŋsɔŋɛ nədi yeri, nəmun amɛsa ŋem kəroŋ nde dɛbɛ dem dəntɔf mɔ. Nəndɛ səcɔm sa abɛ kəroŋ, nəboc kiti ka cəsuŋka wəco kɔ mɛrəŋ ca Yisrayel.
Yesu ɛndəŋk a Piyɛr endebaŋɛnɛ kətɔcərɛ kɔ
31 Kɔ Yesu oloku Simɔŋ Piyɛr: «Simɔŋ, Simɔŋ! Məkɛmbərnɛ! Sentani səntola kədɛs-dɛs’un dəsifitɛ pəmɔ kəcom. 32 Mba intolan’am, ntɛ tɔŋsɔŋɛ ta abəkəc ŋɛkafəl’am mɔ. Kɔ məndeder’im-ɛ, məyeŋkəs bəkəc ya awɛŋc’əm aŋa.» 33 Kɔ Piyɛr oloku kɔ: «Wəbɛ, iwosɛ kəkɔ dəbili kɔ məna, kɔ pəyɔnɛ fɛ ti-ɛ, ifi kɔ məna.» 34 Mba kɔ Yesu oloku kɔ: «Piyɛr, ic-lok’əm, məndebaŋɛnɛ kətɔ-cər’em kəmaas a kicipi kəc-cam.»
Pəsam pa delek, alɔba, kɔ dakma
35 Kɔ Yesu eyif ŋa: «Ntɛ iŋc-som’un ta iŋsɔŋ’un pəsam, ta iŋsɔŋ’un alɔba ŋɛbɛrɛ yamos, ta iŋsɔŋ’un cɔfta cəbɛrnɛ mɔ, paka penayi yi dacɔ mpɛ nənatɔ-sɔtɔ mɔ ba?» Kɔ acɛpsɛ ɔn darəŋ ŋaloku: «Ala! Ali pin pɛnayi fɛ.» 36 Kɔ Yesu oloku ŋa: «Ndɛkəl mes mɛsəkpɛ! Məna nwɛ məŋyɔ pəsam mɔ, məlɛkɛnɛ pi; məna nwɛ məŋyɔ alɔba ŋɛbɛrɛ yamos mɔ, məlɛkɛnɛ ŋi; kɔ məna nwɛ məntɔyɔ dakma mɔ, məcaməs yamos yam, məway din! 37 Bawo, ic-lok’un: Mɛnɛ tɔkɔ aŋcic mɔ tɛlarɛ nnɔ iyi mɔ: ‹Analɔm kɔ ayeŋki bəkəc dacɔ.› Ntɛ tɔyɔnɛ temi mɔ, kəyi kɔ tender.» 38 Kɔ acɛpsɛ ɔn darəŋ ŋaloku kɔ: «Wəbɛ məbaŋ sakma nsɛ mɛrəŋ.» Kɔ Yesu oloku ŋa: «Pəntəŋnɛ tantɛ.»
Yesu kəlok-lokər Kanu nde tɔrɔ ta Olif
39 Pəmɔ tɔkɔ ɔŋc-yɔ ti mɔ, Yesu endewur k’ɔŋkɔ nde tɔrɔ ta Olif. K’acɛpsɛ ɔn darəŋ ŋaŋcɛpsɛ kɔ. 40 Ntɛ ŋambəp kəfo kaŋkɔ mɔ, k’oloku ŋa: «Nəlok-lokər Kanu, ta nəsaknɛ nəbɛrɛ kiciya disrɛ.» 41 K’ɔmbɔlɛ ŋa, pəmɔ kələm ka tasar katin, k’ɛŋcəp suwu, k’ontola Kanu, 42 pəc-loku: «Papa kɔ məwosɛ-ɛ, məbɔlɛn’em pəcuy pampɛ. Ti disrɛ, ta tɛfaŋ tem teyi, mba tam teyi.» 43 Kɔ mɛlɛkɛ mɔlɔma mowurər kɔ kəyɛfɛ dareŋc, kədeyeŋkəs kɔ abəkəc. 44 K’abəkəc ŋɛlɛcɛ-lɛcɛ kɔ, k’ɛyɛfɛ kəlok-lokər Kanu, k’abəkəc ŋɛmpɛ kɔ, kɔ kawonɛ kɔn kəyi pəmɔ ntɛ mocul ma mecir mendetɛmpɛnɛ dəntɔf mɔ. 45 Kɔ Yesu ɛsak sɔ kəlok-lokər Kanu kəŋkɔ ɛnayi mɔ, k’ɔŋkɔ pəbəp acɛpsɛ ɔn darəŋ ŋadirɛnɛ bəkəc yɛrɛŋc. 46 Kɔ Yesu eyif ŋa: «Ta ake tɔ nəndirɛnɛ-ɛ? Nəyɛfɛ, nəlok-lokər Kanu ta nəsaknɛ nəbɛrɛ kiciya disrɛ!»
Kəsumpər ka Yesu
47 Yesu ɛnalip fɛ kəlok-loku kɔ afum alarəm ŋander, fum wəkɔ aŋc-we Yudas, acɛpsɛ ɔn darəŋ wəco kɔ mɛrəŋ dacɔ mɔ, pəyi ŋa kiriŋ. K’ɔlɔtərnɛ Yesu kəkɔ-cup kɔ. 48 Kɔ Yesu eyif kɔ: «Yudas, kəcup kɔ məndelɛkɛ Wan ka fum məsɔŋ kɔ ater ɔn ba?» 49 Ntɛ asol a Yesu ŋanəŋk tatɔkɔ tɛnakɔ-cepər mɔ, kɔ ŋayif Yesu: «Wəbɛ, səntam kəsutnɛnɛ sakma sosu ba?» 50 Kɔ fum wəkin asol a Yesu dacɔ, ɛŋcɛp wəcar ka wəloŋnɛ wəpɔŋ aləŋəs ŋa kəca kətɔt. 51 Kɔ Yesu ɛyac ŋa pəc-loku: «Nəce tatɔkɔ!» K’oŋgbuŋɛnɛ aləŋəs ŋa fum wəkakɔ, k’ɛntamnɛ. 52 Kɔ Yesu eyif aloŋnɛ apɔŋ, abɛ a abum a kəlɔ kəpɔŋ ka Kanu kɔ abeki a dɔtɔf aŋɛ ŋanader kəsumpər kɔ mɔ: «Pəmar nəder nətɔmpər sakma kɔ tɔk, pəmɔ ntɛ nənder kəsumpər kalbante mɔ ba? 53 Dɔsɔk o dɔsɔk səna aŋc-yi nde kəlɔ kəpɔŋ ka Kanu kɔ nəna, mba nənasumpər f’em. Ndɛkəl oŋ, tɛm tonu tɛbəp, kɔ kətam ka kubump.»
Piyɛr ɛmbaŋnɛ kətɔ-cərɛ Yesu
54 Ntɛ ŋalip kəsumpər Yesu mɔ, kɔ ŋaŋkekərɛ kɔ nde kəlɔ ka wəloŋnɛ wəpɔŋ. Mba kɔ Piyɛr ɛŋgbɛkərɛ ti pəbɔlɛ. 55 Kɔ ŋamot nɛŋc abaŋka dacɔ kɔ ŋandɛ. Kɔ Piyɛr ɛndɛ ŋa dacɔ. 56 Ntɛ wəcar wəran wəlɔma ɛnəŋk kɔ pəndɛ ŋa dacɔ nɛŋc kiriŋ mɔ, k’oloku: «Ŋa ŋayina kɔ fum wəkawɛ.» 57 Mba kɔ Piyɛr ɛŋgbɛkəl wəran nwɛ, pəc-loku: «Wəran, iŋcərɛ fɛ fum wəkawɛ!» 58 Pəwon fɛ kɔ wəlɔma ɛnəŋk kɔ, k’oloku: «Məna sɔ akin ayi ŋɔ nəyɔnɛ.» Kɔ Piyɛr oloku wərkun nwɛ: «Ala! Bafɔ akin ayi ŋɔ səyɔnɛ.» 59 Kɔ dec din dɛŋcɛpər mɔ, kɔ fum wəlɔma ɛŋgbəc kəloku: «Fum wəkawɛ oŋwurɛnɛ kənayi kɔ nkɔn, bawo wəKalile ɔfɔ.» 60 Kɔ Piyɛr oloku: «Məna, ina iŋcərɛ fɛ tantɛ məŋkɛrɛ kəloku mɔ.» Ŋayi kəlok-loku kɔ kicipi kəŋcam. 61 Kɔ wəbɛ Yesu ɛŋkafəlɛ k’ɛŋgbətnɛ Piyɛr. Kɔ Piyɛr ɛŋcɛm-cɛmnɛ toloku tɔkɔ wəbɛ Yesu ɛnaloku kɔ mɔ: «Məndebaŋɛnɛ kətɔ-cər’em kəmaas a kicipi kəc-cam.» 62 Kɔ Piyɛr owur nde dabaŋka, k’ɔŋkɔ pəbok bel-bel.
Kəlɔməs kɔ kəsut ka Yesu
63 Arkun aŋɛ ŋaŋc-bum Yesu mɔ ŋafani kɔ, ŋac-sut kɔ. 64 Ŋac-kump kɔ kəro, a ŋac-yifət kɔ ntɛ: «Məmentər su oŋ a wədəŋk wəka Kanu ɔ məyɔnɛ! Məboŋc ma nwɛ osut’əm mɔ!» 65 Kɔ ŋales-les kɔ moloku mɔlɔməs mɛlarəm.
Yesu nde aboc kiti apɔŋ fɔr kiriŋ
66 Ntɛ dec dɔsɔk mɔ, kɔ abeki a dɔtɔf, aloŋnɛ apɔŋ, k’atəksɛ sariyɛ ŋambəpəsɛnɛ. Kɔ ŋaŋkekərɛ Yesu nde aboc kiti aŋan apɔŋ ŋayi mɔ. 67 Kɔ ŋayif kɔ: «Kɔ pəyɔnɛ fɔ məna ɔyɔnɛ nwɛ Kanu kəyɛk-yɛk mɔ-ɛ, məloku su ti.» Kɔ Yesu oloku ŋa: «K’iloku nu ti-ɛ, nəfɔlaŋ ti, 68 k’iyif’un sɔ-ɛ, nəfɔluks’em moloku. 69 Kəyɛfɛ ndɛkəl, Wan ka fum endekɔ nde kəca kətɔt ka fənɔntər fa Kanu.» 70 Kɔ afum fəp ŋambaŋɛnɛ: «Məna ɔyɔnɛ oŋ Wan ka Kanu ba?» K’oloku ŋa: «Nəna oloku ti: Nkɔn iyɔnɛ.» 71 Kɔ ŋaloku: «Cəke cɔ afaŋ sɔ kəcərɛ-ɛ? Səna yati, səna enenɛ kɔ ti dəkusu.»
Yesu fɔr ya Pilat kiriŋ
1 Kɔ ŋayɛfɛ fəp faŋan, kɔ ŋasolɛ Yesu kəkekərɛ kɔ nde fɔr ya Pilat kiriŋ. 2 Kɔ ŋayɛfɛ kəyemsɛnɛ kɔ, ŋac-loku: «Wəkawɛ səŋkɔ səbəp pəc-gbiŋər afum kəyeŋkər su səbomp, ŋafati kəsɔŋ wəbɛ ka doru fəp dut, pəc-wenɛ sɔ «Wəyɛk-yɛk wəka Kanu, wəbɛ wəka atɔf».» 3 Kɔ Pilat eyif kɔ: «Wəbɛ wəka aSuyif məyɔnɛ?» Kɔ Yesu oloku kɔ: «Məna oloku ti.» 4 Kɔ Pilat oloku wəloŋnɛ wəpɔŋ wəka kəlɔ kəpɔŋ ka Kanu kɔ kənay ka afum: «Inəŋk fɛ tɔlɔm o tɔlɔm ntɛ pəmar pasumpərɛ wərkun wəkawɛ mɔ.» 5 Mba kɔ ŋaŋgbəc gbɛs, kəloku: «Afum ŋɔ eŋgbiŋər, pəc-təksɛ afum atɔf ŋa Yude disrɛ fəp kəyɛfɛ atɔf ŋa Kalile nde ɛnacop mɔ, haŋ nnɔ.»
Yesu fɔr ya Herodu kiriŋ
6 Ntɛ Pilat ene teta Kalile mɔ, k’eyif kɔ: «Wəka Kalile məyɔnɛ ba?» 7 Ntɛ Pilat ene a wəka Kalile ɔfɔ mɔ, k’oloku a fum wəkawɛ, Herodu pəmar pəkiti kɔ. K’oloku a pakenɛ kɔ Herodu nwɛ ɛnayi mata mamɔkɔ Yerusalɛm mɔ. 8 Ntɛ Herodu ɛnəŋk Yesu mɔ, kɔ pəmbɔt kɔ, bawo ɛŋc-tɛn kənəŋk kɔ kəyɛfɛ ntɛ pənawon mɔ, teta mes mɔkɔ eŋc-ne pac-loku tɔn mɔ, pəyɔ amera kənəŋk kɔ, pəyɔ tɔyɔ tɛgbɛkərɛ ntɛ tɛyɛfɛ nde Kanu kəyi mɔ fɔr yɔn kiriŋ. 9 Kɔ Herodu eyifət Yesu mes mɛlarəm, mba Yesu ɛnaluksɛ fɛ kɔ ntɛ o ntɛ. 10 Wəloŋnɛ wəpɔŋ kɔ atəksɛ sariyɛ ŋanayi di, ŋac-naŋkanɛ kəyemsɛnɛ kɔ. 11 Herodu kɔ abum ɔn ŋafani kɔ, kɔ ŋayɔ kɔ pəlɛc pəlɛc; kɔ ŋambɛr kɔ yamos ya abɛ, kɔ ŋasɔŋ kɔ a pakenɛ Pilat. 12 Dɔsɔk dadɔkɔ yati dɔ Pilat kɔ Herodu ŋanabɔt oŋ, ŋanaterɛnɛ cɔkɔ-cɔkɔ.
Antəŋnɛ kədif Yesu
13 Kɔ Pilat ewe wəloŋnɛ wəpɔŋ, abɛ a dɔtɔf, kɔ afum. 14 K’oloku ŋa: «Nəŋkɛr’em fum nwɛ a nkɔn eŋgbiŋər afum kəyeŋk səbomp. Mba fɔr yonu kiriŋ iyifət kɔ, ali tes tin inəŋk fɛ ntɛ ɔyɔ mes mamɛ nəmboŋcɛ kɔ mɔ, ntɛ pəmar padifɛ kɔ mɔ. 15 Herodu sɔ ɛnəŋk fɛ ali tin, bawo oluksɛ su kɔ. Awa! Fum wəkawɛ ɔyɔ fɛ ntɛ o ntɛ pəmar padifɛ kɔ mɔ. 16 Kəsak kɔ k’inder k’andelip kəsut kɔ-ɛ.» 17 Kəsata ka Pak nkɛ o nkɛ, Pilat ɛŋc-sakɛ ŋa wəyi dəbili wəkin. 18 Kɔ ŋambaŋɛnɛ fəp kəkulɛ-kulɛ: «Mədif wəkawɛ! Məsakɛ su Barabas!» 19 Anabɛr Barabas dəbili teta kədifətɛnɛ kəlɔma nkɛ kənayi dare mɔ, kɔ kədif ka fum. 20 Kɔ Pilat ɔŋgbɔkərɛ sɔ kəloku ŋa kəfaŋ kɔn kəsak Yesu. 21 Mba kɔ ŋaloku gbɛs: «Məcaŋ kɔ dəkətɔk ka defi! Məcaŋ kɔ!» 22 Kɔ Pilat eyif ŋa sɔ tamaas: «Pəlɛc pere pɔyɔ-ɛ? Inəŋk fɛ ntɛ o ntɛ pəmar padifɛ kɔ mɔ. Kəsak kɔ k’inder k’alip kəsut kɔ-ɛ.» 23 Kɔ ŋampɛnɛ sim kəbupərɛ, ŋac-loku: «Pacaŋ kɔ!» Kɔ sim səŋan səŋkalərnɛ. 24 Kɔ Pilat owosɛ kəyɔ tɔkɔ ŋanafaŋ mɔ. 25 Kɔ Pilat ɛsak Barabas wəkɔ ŋanawer kɔ mɔ. Barabas nwɛ anabɛr dəbili teta kədifətɛnɛ, kɔ kədif ka fum mɔ. Kɔ Pilat ɛlɛk Yesu, k’ɛmbɛr ŋa dəwaca ŋayɔ kɔ tɔkɔ ŋanafaŋ mɔ.
Kəcaŋ ka Yesu
26 Ntɛ ŋayi kəkekərɛ Yesu mɔ, kɔ ŋambəpɛnɛ kɔ wərkun wəlɔma pac-we kɔ Simɔŋ, wəka atɔf ŋa Sirɛn ɛnayi pəyɛfɛ dalɛ, kɔ ŋasarsər kɔ kətɔk kəpandən ka defi a pəcəmɛ Yesu darəŋ pəkekərɛ ki. 27 Kɔ kənay ka afum alarəm kɔ aran ŋaŋcəmɛ kɔ darəŋ ŋac-sut-sutnɛ bəkəc ŋac-yɔnɛ kɔ nɔnɔfɔr. 28 Kɔ Yesu ɛŋkafəlɛ nnɔ ŋayi mɔ, k’oloku: «Aran a Yerusalɛm, ta nəbokɛ tetem! Mba nəbokɛ te tonu kɔ ta awut anu! 29 Bawo dɔsɔk dendeder ndɛ andeloku: ‹Pəmbɔt aran aŋɛ ŋantɔbɛkəs mɔ, pəmbɔt cor ncɛ cəntɔkom mɔ, kɔ mɛsɛ mmɛ mɔntɔmɛsər mɔ!› 30 Afum ŋandeloku mɔrɔ dɔsɔk dadɔkɔ: ‹Mətɛmpɛnɛ su kəroŋ!› kɔ mofo meŋeci, ‹Məgbəpərnɛ su!› 31 Bawo k’ayɔ ti kətɔk kəcaŋk-ɛ, cəke cɔ andeyɔ kəwosu-ɛ? 32 Kɔ ŋasolɛnɛ sɔ kəkekərɛ calbante mɛrəŋ aŋɛ anakɔ-difɛnɛ kɔ Yesu mɔ. 33 Ntɛ ŋambɛrɛ kəfo kaŋkɔ aŋwe «Kəmbɛmbəlɛ» mɔ, kɔ ŋaŋcaŋ kɔ dəkətɔk kəpandən ka defi dəndo. Kəlɛkɛnɛ calbante akakɔ mɛrəŋ; wəkin pəyi kɔ kəca kətɔt, wəkɔ pəyi kɔ kəca kəmerya. 34 Kɔ Yesu oloku: «Papa məŋaŋnɛnɛ ŋa, bawo ŋaŋcərɛ fɛ ntɛ ŋayi kəyɔ mɔ.» Kɔ asɔdar akaŋɛ ŋayerɛnɛ yamos yɔn ŋac-gbalɛ ti kɔla. 35 Afum ŋacəmɛ, ŋac-mɔmən. Abɛ ŋac-fani Yesu, ŋac-loku: «Bawo ɛyac akɔ, pəyacnɛ oŋ ma nkɔn sərka, kɔ pəyɔnɛ fɔ Krist, nkɔn ɔyɔnɛ Wəyɛk-yɛk nwɛ Kanu kəsom mɔ-ɛ!» 36 Kɔ asɔdar sɔ ŋaŋcɔŋnɛ kəkɔ-fani kɔ, kɔ ŋasɔŋ kɔ member modokət. 37 Ŋac-loku: «Kɔ pəyɔnɛ fɔ məna ɔyɔnɛ wəbɛ ka aSuyif-ɛ, məyacnɛ oŋ ma, məna sərka!» 38 Anacic kɔ domp takəroŋ: «Wəkawɛ ɔyɔnɛ wəbɛ ka aSuyif.» 39 Kalbante kin akakɔ anacaŋ mɔ, pəc-lɔməs Yesu, pəc-loku: «Bafɔ məna ɔyɔnɛ Wəyɛk-yɛk wəka Kanu? Məyacnɛ oŋ ma, kɔ səna!» 40 Mba kɔ kalbante kamɛrəŋ kəŋkɔ anacaŋ mɔ, kəŋgbəŋ-gbəŋər kɔ, kəc-loku: «Cəpɔ məfɔnesɛ Kanu ba, məna nwɛ andeyɔ pəmɔ səna mɔ?» 41 «Ta səna, kaŋce kɔ, tantɛ tɔ pəmar pasɔŋ su kəway ka mɛləsər mosu; mba wəkawɛ ɔyɔfɛ tɔlɔm o tɔlɔm tɛlɛc.» 42 K’oloku: «Yesu məde məcɛm-cɛmn’em kɔ məndekɔ-bɛrɛ dɛbɛ dam dəntɔf-ɛ.» 43 Kɔ Yesu oloku kɔ: «Kaŋce kɔ, ic-lok’əm: Mɔkɔ, səna aŋkɔyi Ariyana kɔ məna.»
Defi da Yesu
44 Daŋ dɛnabəp, dec dosurɛnɛ afum dəsəbomp, kɔ kubump kəkəbaŋ atɔf fəp, tɛnabɔlɛ kətɛŋc haŋ dec maas. 45 Dec dɛnakalɛ, pənabiyɛ. Kɔ kəloto nkɛ anagbɛk kəkump ka kəfo kəcempi ka kəlɔ kəpɔŋ ka Kanu mɔ, kəwalɛ dacɔ. 46 Kɔ Yesu oŋkulərnɛ dim dɔpɔŋ: «Papa, ilɛk amera ŋem, k’imbɛr’əm dəwaca!» Ntɛ elip kəloku moloku mamɔkɔ mɔ, k’eŋgbiŋ kifir. 47 Ntɛ wəsɔdar wəRom wəbɛ ka asɔdar tasar tin (100 ) ɛnəŋk mes mamɔkɔ mɛnacepər mɔ, k’ɛŋcam debeki da Kanu pəc-loku: «Kaŋce kɔ, fum wəkawɛ ɛnalomp!» 48 Ntɛ kənay ka afum aŋɛ ŋanader kədetəŋnɛ mes mamɔkɔ mɔ, ŋanəŋk ntɛ tɛnacepər mɔ, kɔ ŋalukus ŋac-sut-sutnɛ bəkəc nɔnɔfɔr. 49 Aŋɛ ŋanacərɛ Yesu mɔ fəp, kɔ aran akɔ ŋanacəmbər kɔ kəyɛfɛ Kalile mɔ, ŋanacəmɛ pəbɔlɛ, ŋac-mɔmən tɔkɔ mes meŋcepər mɔ.
Kəbɛr ka Yesu dəkufu
50 Wərkun wəlɔma ɛnayi pac-we kɔ Isifu. Wəboc kiti wəpɔŋ wəlɔma nkɔn ɛnayɔnɛ sɔ; fum wətɔt, pəlomp. 51 Nkɔn ɛnawosɛ fɛ kətəŋnɛ kəsek ka moloku mamɔkɔ, kɔ mɔyɔ ma akɔ sɔ mɔ. Wəka dare da Arimate ɛnayɔnɛ, atɔf ŋa Yude; pəc-kar dɛbɛ da Kanu. 52 K’ɔŋkɔ nde Pilat eyi mɔ, k’ewer kɔ fure fa Yesu. 53 K’ontorɛ kɔ dəkətɔk nde anacaŋ kɔ mɔ, k’ɛnɛpsər kɔ kasaŋkɛ, k’ɔŋkɔ pəboc kɔ nde dəkufu nkɛ anakay dətasar mɔ; kufu kənayi nkɛ anatɔ-boc fum o fum ki disrɛ kərɛsna mɔ. 54 Yuma yɛnayi, dɔsɔk da kəlompəsnɛnɛ Simiti, nsɛ aŋŋesəm mɔ səc-faŋ kəcop. 55 Aran aŋɛ ŋanacəmbər Yesu kəyɛfɛ Kalile mɔ, ŋander kɔ Isifu; kɔ ŋamɔmən kufu disrɛ, kɔ ŋanəŋk tɔkɔ anaboc Yesu mɔ. 56 Ntɛ ŋalip kəmɔmən kɔ mɔ, kɔ ŋalukus dare, kəkɔ-lompəs moro kɔ labundɛ da dəris. Simiti, kɔ ŋaŋesəm, pəmɔ tɔkɔ Kanu kəsom ti mɔ.
Yesu kəyɛfɛ kɔn afi dacɔ
1 Sandeŋ bət-bət suy, kɔ aran aŋɛ ŋaŋkɔ sɔ dəndo dəkufu, ŋakekərɛ moro mobotu ambɔŋc mmɛ ŋanalompəs mɔ. 2 Kɔ ŋaŋkɔ ŋabəp pabiŋkəli tasar tɔkɔ anasuŋcɛ kufu mɔ; 3 kɔ ŋambɛrɛ, mba ŋanabəp fɛ fure fa Yesu. 4 Ntɛ tes tatɔkɔ teŋciyanɛ ŋa mɔ, kɔ arkun mɛrəŋ ŋawurər ŋa, ŋabɛrnɛ yamos yomotər-motər. 5 Kənesɛ kəŋan disrɛ, kɔ ŋaŋcəp cəro fəp faŋan dəntɔf; mba kɔ afum aŋɛ mɛrəŋ ŋayif ŋa: «Ta ake tɔ nəntɛnɛ wətɔfi afi dacɔ-ɛ? 6 Eyi fɛ dɛ! Ɛyɛfɛ afi dacɔ! Nəcɛm-cɛmnɛ tɔkɔ ɛnalok’un ntɛ nənayi kɔ nkɔn atɔf ŋa Kalile mɔ. 7 Ntɛ oŋc-loku: ‹Mɛnɛ palɛk Wan ka fum pabɛr kɔ aciya dəwaca, ŋacaŋ kɔ dəkətɔk ka defi, pəyɛfɛ defi tataka tɔn ta maas.›» 8 Kɔ ŋaŋcɛm-cɛmnɛ toloku ta Yesu tatɔkɔ. 9 Kɔ ŋayɛfɛ dəndo dəkufu kəkɔ-loku ti asom a Yesu aŋɛ wəco kɔ pin, kəbəp ka afum aləpəs akɔ. 10 Mari Madelɛn, Yohanna, Mari wəka Sak kɔ aran alɔma; aŋɛ ŋananəŋk sɔ mes mamɔkɔ mɔ, ŋaloku sɔ tin tayi asom a Yesu. 11 Mba moloku mamɔkɔ mɛnayi ŋa pəmɔ ntɛ abəc ŋandelok-lokər ŋa mɔ, ŋanalaŋ fɛ moloku ma aran akakɔ. 12 Kɔ Piyɛr ɛyɛfɛ, k’ɛyɛksɛ kəkɔ nde dəkufu. Ntɛ ontulnɛ kəmɔmən mɔ, ɛnəŋk fɛ daka o daka mɛnɛ mopol ma kəloto mɔkɔ mɛnafəntərɛ dəntɔf mɔ; k’ɛyɛfɛ k’ɔŋkɔ ndɔrɔn, pəciyanɛ kɔ tɔkɔ ɛnəŋk mɔ.
Nde dɔpɔ da Emayus
13 Dɔsɔk din dadɔkɔ, acɛpsɛ a Yesu darəŋ mɛrəŋ ŋac-kɔ dare dɔlɔma ndɛ aŋc-we Emayus mɔ, dare dɛnayi, ndɛ dɛnabɔlɛnɛ Yerusalɛm kəkɔt ka dec mɛrəŋ mɔ. 14 Afum akaŋɛ mɛrəŋ ŋac-lokɛnɛ mes mɔkɔ meŋcepər mɔ fəp. 15 Ŋayi kəlokɛnɛ mes mamɔkɔ, ŋac-gbɛkəlɛnɛ, kɔ Yesu ɔlɔtərnɛ ŋa, kɔ ŋasol. 16 Mba paka pɔlɔma pɛŋc-yaməs ŋa kənɛpəl kɔ. 17 Kɔ Yesu eyif ŋa: «Ake moloku mɔ nəyi tantɛ nəŋkɔ mɔ?» Kɔ ŋaŋcəmɛ, kɔ dis dɛndɛŋcɛ ŋa. 18 Kɔ wəkin wəkɔ aŋc-we Kəleyopas mɔ, oloku kɔ: «Məna sona gboŋ, məna eyi mɔkɔ Yerusalɛm nwɛ ɔntɔcərɛ ntɛ teŋcepər mata mamɛ mɔ?» 19 K’eyif ŋa sɔ: «Ake?» Kɔ akakɔ ŋaloku kɔ: «Ntɛ teŋcepər teta Yesu wəka Nasarɛt, nwɛ ɛnayɔnɛ wədəŋk wəka Kanu wəpɔŋ mɔ; ɛnamentər ti dəmɔyɔ kɔ dəmoloku, fɔr ya Kanu kiriŋ, kɔ nnɔ afum ŋayi mɔ. 20 Aloŋnɛ apɔŋ asu, kɔ abɛ asu aka dɔtɔf ŋalɛk kɔ, kɔ ŋambɛr kɔ afum dəwaca, k’aŋcaŋ kɔ dəkətɔk kəpandən ka defi. 21 Səŋcɛm-cɛmnɛ fɔ nkɔn enader kəwurəs pəbaŋ Yisrayel, mba mamɛ oŋ fəp, tataka ta maas tɔ tantɛ, ntɛ mes mamɛ meŋcepər mɔ. 22 Kaŋce kɔ: A aran alɔma ŋayi su dacɔ, aŋɛ ŋasɔŋɛ kɔ pəciyanɛ su mɔ; ŋanuŋkɛnɛna kəkɔ nde dəkufu, 23 ntɛ ŋantɔna-nəŋk fure fa Yesu mɔ, kɔ ŋander ŋaloku su a mɛlɛkɛe mowurərna ŋa, kɔ moloku a eyi doru. 24 Kɔ afum alɔma ŋayina su dacɔ, kɔ ŋaŋkɔ dəndo dəkufu, kɔ akakɔ ŋaŋkɔ ŋabəp mes pəmɔ tɔkɔ aran ŋalokuna su mɔ, mba nkɔn, ŋa ŋanəŋkna fɛ kɔ.» 25 Kɔ Yesu oloku ŋa: «Nəna afum atɔsɔk səbomp, bəkəc yonu yoŋwon kəlaŋ moloku mmɛ adəŋk a Kanu ŋanaloku mɔ! 26 Pənamar dis dɔlɔl Krist Wəyɛk-yɛk wəka Kanu tantɛ a pədebɛrɛ debeki dɔn dɔn disrɛ?» 27 Kəyɛfɛ ka buk ba Musa kəbəp ka yecicəs yecempi ya adəŋk a Kanu aləpəs aŋɛ fəp, kɔ Yesu ɔlɔmər ŋa tɔkɔ Yecicəs yosoku fəp yoloku tetɔn mɔ. 28 Ntɛ ŋalɔtərnɛ tadare tɔkɔ ŋaŋc-kɔ mɔ, kɔ Yesu ɔyɔ pəmɔ ntɛ ɛŋfaŋ kəcepər pəkɔ pəbɔlɛ mɔ. 29 Mba kɔ ŋamɔnɛ kɔ kəcepər, ŋac-loku: «Məyi nnɔ kɔ səna, dec dɛfaŋ kəkalɛ, kəbiyɛ kɔ pəndɛ. Kɔ Yesu ɛmbɛrɛ kəkɔ-yi di kɔ ŋa.» 30 Ŋandɛ dɛmɛsa kəkɔ-di yeri, kɔ Yesu ɛlɛk kəcom, k’ontola Kanu; k’entepi ki k’ɔsɔŋ ŋa. 31 Kɔ fɔr yaŋan yemepɛ, kɔ ŋanɛpəl kɔ; mba k’ɔsɔlɛ sɔ fɔr yaŋan kiriŋ. 32 Kɔ afum aŋɛ ŋayɛfɛ kəlokɛnɛ: «Pəyina fɛ pəmɔ ntɛ nɛŋc deŋyi su dəcor, ntɛ endenasɔkəsɛ su moloku mecic nde dɔpɔ mɔ?» 33 Kɔ ŋayɛfɛ gbəŋcana babɔkɔ kɔ ŋalukus Yerusalɛm, kɔ ŋaŋkɔ ŋabəp acɛpsɛ darəŋ a Yesu aŋɛ wəco kɔ pin ŋac-loŋkanɛ kɔ asol aŋan, 34 ŋac-loku: «Kaŋce kɔ: Wəbɛ ɛyɛfɛ afi dacɔ, k’ɔŋkɔ pəwurər Simɔŋ!» 35 Kɔ afum aŋɛ mɛrəŋ ŋalɔm sɔ tɔkɔ tɛnacepər dɔpɔ mɔ, kɔ tɔkɔ ŋananɛpəl kɔ kətepi kɔn kəcom pəsɔŋ ŋa mɔ.
Yesu kəmentərnɛ kɔn acɛpsɛ ɔn darəŋ
36 Ŋayi kəloku moloku mamɔkɔ, kɔ Yesu nkɔn sərka owurər ŋa, k’oloku: «Pəforu peyi nu!» 37 Kɔ ayek-yek ŋontorər ŋa, kɔ ŋanesɛ, kɔ pəyi ŋa pəmɔ ntɛ ŋaŋnəŋk tubɛri mɔ. 38 Mba kɔ Yesu eyif ŋa: «Ta ake tɔ pəyinɛ nu yama-yama tantɛ-ɛ, ta ake tɔ nəŋgbɛkəlnɛnɛ dəbəkəc-ɛ? 39 Nəmɔmən ma wɛcək wem kɔ waca wem-a, ina ɔfɔ yati! Nəgbuŋɛn’em, nəmɔmən! Tubɛri tɔyɔ fɛ sɛm, tɔyɔ fɛ bɛnt. Mba ina, iyɔ yayɔkɔ fəp.» 40 Yesu eyi kəloku moloku mamɔkɔ, k’ementər ŋa waca wɔn kɔ wɛcək. 41 Mba ntɛ pənanaŋkanɛ kəbɔt ŋa haŋ ta ŋantam kəlaŋ mɔ, kɔ ŋayi pəciyanɛ disrɛ. Kɔ Yesu eyif ŋa: «Nəyɔ paka pɔlɔma pedi ba?» 42 Kɔ acɛpsɛ ɔn darəŋ ŋawurɛ alop ŋɛnɛkət ŋin kɔ ŋasɔŋ kɔ. 43 Kɔ Yesu ɛlɛk alop ŋaŋɔkɔ k’ɔsɔm ŋi fɔr yaŋan kiriŋ. 44 Ntɛ elip kəsɔm alop nŋɛ mɔ, k’oloku ŋa: «Mes mamɛ m’ iŋc-lok’un ntɛ inayi kɔ nəna mɔ; mɛnɛ mes mɔkɔ aŋcic tetem Tawureta Musa, yecicəs yecempi ya adəŋk a Kanu kɔ Yabura Dawuda mɔ fəp meyi.» 45 Kɔ Yesu ɔsɔŋɛ ŋa kəsɔk səbomp ntɛ tɔŋsɔŋɛ ŋacərɛ Yecic ya Kanu fəp mɔ. 46 Kɔ Yesu oloku ŋa: «Ntɛ tɔ aŋcic dəyecicəs ya adəŋk a Kanu, a dis dendelɔl Wəyɛk-yɛk wəka Kanu, kɔ tɛyɛfɛ dənda-ɛ, pəde pəyɛfɛ afi dacɔ tataka tɔn ta maas. 47 Mɛnɛ pacamɛ kəsəkpər mera pacəmɛ pəlompu darəŋ tewe tɔn, kəyɛfɛ ka Yerusalɛm, ntɛ tɔŋsɔŋɛ paŋaŋnɛnɛ afum a tɔf fəp kiciya kəŋan mɔ. 48 Nəna ŋɔ mes mamɛ meŋcepər fɔr yonu kiriŋ. 49 Kɔ ina, kəkɛrɛ nu k’inder daka ndɛ Papa kem ɛnasɔŋ’un temer kəsɔŋ mɔ; nəyi nnɔ dare dandɛ haŋ Kanu kəlas nu fənɔntər fa dareŋc.»
Yesu kəpɛ kɔn dareŋc
50 Kɔ Yesu osolɛ ŋa k’eŋkekərɛ dare kəsək ntende Betani, ntɛ ŋambəp di mɔ, k’ɛmpɛnɛ waca dareŋc, k’ontolanɛ ŋa. 51 Eyi kətolanɛ ŋa, k’ɛsak ŋa, k’ɛmpɛ dareŋc. 52 Kɔ ŋaŋcəpɛ kɔ mobu kəsɔŋɛ kɔ pəleli, kɔ ŋalukus Yerusalɛm, pəbotu disrɛ; 53 tɛm o tɛm ŋaŋc-kɔ oŋ nde kəlɔ kəpɔŋ ka Kanu, ŋac-kor-koru Kanu.