LUKARZI EHVARU YA WORZO 1
1 To nɛ rzai rzai ja hwato hwa ma emeya O li rzaŋga monɔŋgeli mo hweya hwe ma gbɛɛnɛ o tiiteni yarzu, 2 Na oma i maŋgbaahwe na hwaŋga ema Hwa ma ukeya mboŋgi o hwewoteli naa ɛwɔ hwa ma okolɛ eya ya Lohwa. 3 O eŋganɛlɛ tɔ nɛ mbiti na nɔkirzɛ gbaamu hweya hwearzɛ, o hwewoteli e ma hwɛ gbaamu na imba o li o tileya mene meyaŋgo rzilili. O wa Yuumɛ Teohvilurzi, 4 Ema e hwiye e jɔkɛ li hvomɛnɛ Hweŋge hyeya o ma okohwɛlɛ
HWEOHWELI WHE WHEYAELI WHE AMA YOYANIRZƐ WA BAATIRZI
5 O hweyu hweyama Helodɛ Mokaneli wa Yudea, O ma hwɛ moohweli wa eya ya Lohwa a ma hwɛlɛhwɛ Rzakaleya. Wa lihwende la Abija, a ma hwa molana wa mbiiya yama Aloni, Lina leni li ma hwɛ ndi Elirzabɛti. 6 Hwahwakɛ wha ma hwɛ hwataneli o worzo wo Lohwa. Hwa ma uta imbenda na meeka, hwa rzi hwɛnɛ tɔ mɛhwɛlɛ o worzo wo Lohwa; 7 Ndi hwa rzi hwɛnɛ tɔ ŋmana, Ehwanja Elirzabɛti a ma hwɛ ndi yomba, Ndeŋga hwahwakɛ hwa ma hwɛ ndi hwaluni hwa hwato. 8 Wunya wɔkɔ ema lihwende lama Rzakaleya li ma hwe o e wolo ya Lohwa na moohweli wa hwelingɛ O worzo woma Lohwɛ; 9 Li hvayaa na ɛɛmɛ ya hwaohweli hwa hweliŋgɛ mɔ ndi a ma hvɔrzɔwɔo li kpeeya O ndawo ya Lohwa, li rzɛlɛ e rzunjɛ. 10 E ŋgidi ya hwato yarzɛ e ma hwɛ o likanɛ, O ewoka e hvonda ema ama hwɛ li rzɛlɛ e rzunjɛ. 11 Zrii e aŋgeli ya Lohwa e mo wurzeya. 12 Rzakaleya a ma tama e hvonda ema ama ɛnɛ e angeli Rzii a Lembeya woŋgo. 13 Enge aŋgeli rzii e mo ohweya ema: "O rza oka wɔŋgɔ Rzakaleya, Ehwanja likanɛ laŋgɔ li ma hweyahwa. Joojiye Waŋgɔ Elirzabɛti a o nyaeya ŋmana wa mumnyana. O mo hwɛlɛ ndi Yohwanirzɛ." 14 O hwɛnɛ monyɛŋgi na maliŋgo. Hwato rzairzai hwa hwɛnɛ monyɛŋgi o hwenyiyaeli hweni. 15 Ehwanja a o hwɛnɛ eluhwe o worzo woma Taatɛ. A rza o nyo mimba to hwɛnyɔɔni, Ndeŋga a onda na eliŋgɛ ya wotani, Liwoteya o luuŋga lama nyaŋgɛ 16 A o eŋgowa razai ja hwana Wha Irzaɛli omba Taatɛ, Lohwa lawu. 17 A o ɛndɛ o worzo weni, na nginya ya elingɛ yama Elija o li eŋgowa meema me rzaŋgo na hwaana hwawu, Hwaŋga hwa mania, o lihwiye li tɛnɛnɛ. O li rzekeya hwato hwa ambɛlɛlɛ Taatɛ; 18 Rzii Rzakaleya a ijowa eŋge aŋgeli ama, "Nɛ natanɛ na lokɛ ene eya e? Ehwanja imba na ma una Ndeŋga joojiyɛ wami a ma rzɔ mokeka." 19 Rzii e aŋgeli e mo alahwɛ ema; "Imba Gableya, na tɛmɛ o worzo wo Lohwa. Na omahwi o li e ohweya na li e janeya mono ŋmɛndi mo gbamu 20 li woteya naŋgɛ o kpa mbuke, o rza o tanɛ li ohwaɛNatɛɛ eŋge eyuu hwɛnɛ hweya hwe o bgɛɛnɛ, ehwanja o rzi lokɛ ŋmɛndi, mo ondirzɛhwɛ e hvonda e uki tɛ." 21 Ene hvonda yarzɛ hwato hwa ma hwɛ li ambɛlɛ Rzakaleya Hwa ma tameya linda leni o ndawo ya Lohwa. 22 E hvonda a ma wurze. A rzi tanɛ li hwa ohwirzɛnɛ. Aŋga ndi hwa ma embe ema Lohwɛ a mo uŋmwɛlɛ jɛnɛni o ndawo ya Lohwa. Ehwanja a ma hwa uŋmɛlɛ ndi hwɛmɛnɛni, rzii a eleya mbuke. 23 E hvonda a ma kulɛ makanɛ A ma ɛndɛ o ndawo yeni. 24 Hwene hweyu hwe ma aka joojiyɛ weni Elirzabɛti a lita lemi A ma autɛ natɛɛ ŋgbɛndɛ ita rzii a ohwa ama, 25 "Nanu ndi Taatɛ a no gbeeli Hweŋge hweyu ema a ma no ɔŋgɔ O li ulɛ erzamboyami o hwato." 26 O ŋgbɛndɛ motohwa Lohwɛ a ma oma Aŋgeli Gabileya o mbowa ya Narzalɛti 27 li uŋma mɔɔmbɔ mo ŋgɔndɔ moma wandahwa Na munyana mɔkɔ Yorzɛhvu wa Litumba lama Dahviti. Moŋgo mɔɔmbɔ mo ŋgɔndɔ mo ma hwɛlɛhwɛ ndi Maliyɛ 28 A ma jaa li mo ohwya ema Eyɔlɛ na owa ema o hvɔrzɔhvi, Taatɛ a hweli na owa. 29 Ingi ikɔmi i ma takirzɛ Maliyɛ jɔɔjo Rzii a ijowɛ ama, "Ima nyai ja ikɔmi ini?" 30 Rzii e aŋgeli e mo ohweya ema, Maliyɛ! O rza oka wɔŋgɔ Ehwanja o lɔirzɛ na Lohwɛ. 31 O jɔkɛ, o lita lemi, O luuŋga laŋgo, o nyia Ŋmama wa munyana. Lina leni li hwɛ ndi Yerzu. 32 A o hwɛ ndi Mondɛnɛ a aka, hwarzɛ A hwɛlɛhwɛ ndi e Nŋmana wa Lohwa li karzami Taata Lohwa a mo oŋgba likaneya lama rzaŋgɛ Dahwiti; 33 A kaneya e ndawo yama Yakohvo hvɔkɔhvɔkɔ. Ndeŋga likaneya leni li rza hwɛnɛ lirzuku. 34 Rzii Maliyɛ a ijowa e aŋgeli ama, "Na ene eya e gbɛɛnɛ, na hweli ndi mɔɔmbɔ mo ŋgɔndɔ"? 35 E aŋgeli rzii e mo alahwɛ ema, "Eliŋgɛ ya wotani e o jaeya Ndeŋga e ŋginya ya Lohwa e o hwanda. Weŋga e ŋmana a o nyiyahwa a hwɛlɛhwɛ ndi Wotani E ŋmana wama Lohwa." 36 O jɔkɛ ŋmanyɔŋgɔ Elirzabɛti Mohvɛ a liti ŋmana wa munyana ŋgbɛndɛ motohwa naaŋgɛ, mo ema a ma hwɛlɛhwɛ yomba. 37 Ehwanja tɔ eya e rza aka e ŋginya ya Lohwa. 38 Rzii Maliyɛ a mo alahwɛ ama; "na hweli ndi mogbeeli wama Taatɛ; Inyɛ e gbɛɛnɛ na imba na oma o ohwi." Rzii e eŋgeli e ɛndɛ e yeni. 39 O hweŋge hweyu Maliyɛ a ma tɛmɛ rzii a ɛndɛ Karzi karzi o ekome ya mooli o mbowa ya Yuda, 40 rzii a kpeeya o ndawo yama Rzakaleya A kɔmɔ Elirzabɛti. 41 E hvoda Elirzabɛti ama hweye ikɔmi jama Maliyɛ ŋmɛŋgɛ mo ŋmana moma eŋgowɛ o luŋga lama Maliyɛ Elirzabɛti ama onda na elingɛ ya wotani, 42 rzi a tɛ morzeya na monyɛŋgi, "Monamɛ na owa o tiiteni ya hwalana Monamɛ mo hwɛ na e ŋmana a hweli o luŋga laŋgɔ." 43 "Mamɛ ndeŋga na ŋmgbahwi e luhwe nanu e? Ema e nyaŋgo yama ma Tatɛ a no jɛlɛlɛ e?" 44 Na oma ikɔmi njangɔ i uki o mato mami, Ŋmɛŋgɛ mo ma a eŋgowɛ na mɔnyɛŋgi; 45 Monamɛ na o ŋgo ema a lokɛ Ema mamɛ Tatɛ ama mo ohweya e gbeyɛnɛ.
MORZƆKƆ MO MA MALIYƐ
46 Maliyɛ rzi ao hwa ama, Eliŋgɛ yami e karzɛ Tata, 47 ŋmema ŋmami hvɛ mo oki mɔnyɛŋgi na Lohwɛ moŋgirzeli wami. 48 A ɔŋgɛlɛ li arzihwirzɛ la mogbeli weni O eŋganɛlɛ liwoteya naŋgɛ, matumba marzɛ ma o no hwɛlɛ ndi oŋgo a namirzɛhwɛ, 49 ehwanja oŋgo akarzaami ama no gbeeya hweya hwɛndɛnɛ Wotani wohweli na liina leni. 50 Iili jeni I hweli na hwaŋga hwa mooka wɔŋgɔ O nyɔŋgɔni na nyɔŋgɔni 51 A uŋmwɛlɛ e ŋginya ya liya leni, A buulɛ hwaŋga hwaekɛ o maluteya ma meema meyawu, 52 a rzihvirzɛ hwakaneli o makaneya mawu Ndeŋga a karzɛ hwaŋga hwa maluteya ma rzihwi, 53 a ujirzɛ hwaŋga hwa njau na hwema hwe gbamu Ndeŋga hwe waŋgi, a hwe timbirzɛ ŋgundu; 54 A oŋgowani e mogbeeli hweni Irzaeli Ema a oŋgɛlɛ o iili jeni, 55 Na oma a ohwirzɛnɛ irzaŋgo, Ablahamu na e nyɔŋgɔni yeni yarzɛ. 56 Maliyɛ a ma liya na mɔ eya ya ŋmbɛndɛ iyao Rzi a timba o mba eni 57 E hvonda liyali lama Elirzabɛti lima uke, Ama nyia ŋmana wa munyana. 58 Rzi ewɔ hwa ma mokombɛnɛ naa litumba leni hwa ma hweya Ema Tate a mo uŋmɛlɛ iili indɛnɛ, Hwa ma oka monyɛŋgi na mɔ. 59 Hweyu waambi hwe ma uke hwa ma ja li ɛndɛnɛ e ŋmana Hwa ma arza ndi li moŋgbaa lina Rzakaleya naa rzaŋgɛ, 60 nyaŋgɛ rzii a ohwa ama, "Rzɛkɛ nanu, a hwɛlɛhwɛ ndi Yohwanirzi." 61 Rzi hwa moohweya ema Orzenje tɔ mɔkɔ o litumbe langɔ ahwɛlɛhwɛ liŋgi lina 62 Anga ndi hwa ma gbeeya rzaŋgɛ hwɛmɛmɛni Limo ijowa lina ema hwa hwɛlɛ e ŋmana; 63 Rzi aarzirzɛ ehwambo ya li tileya rzi a tila ama, Lina leni liweli ndi Yohwanirzi, hwarzɛ wha ma tama. 64 O wotɛmɛ-tɛmɛ e wana yeni ema lihvoweya, Jɛɛmɛ jeni ima wunduweya rzi ao hwa, aeka Lohwɛ. 65 Wɔɔŋgo wo ma wa kpeya hwarzɛ hwa ma mo kombɛnɛ; Hwene hweya ndi hwe ma o hwawa ɛki yarzɛ na hwato o Yudea e ki yaɛmoli. 66 Hwarzɛ ema hwa ma hweya hwene hweya hwa ma hweyuta O mema meyawu rzi hwa ohwa ema, "Mamɛ ono ŋmana ao hwɛ e? Ehwanja liya lama Tatɛ lima hwɛ na mɔ."
MORZƆKƆ MO MA RZAKALEYA
67 Rzaŋgo eni Rzakaleya ama onda na Eliŋgɛ ya wotani Rzi ao hwa o hweliŋgɛ ama, 68 "Monamɛ mo hwɛ na Tatɛ Lohwɛ wa Irzaeli Ehwanja ama ja ndeŋga ama oŋgirzɛ hwato hweni 69 ndeŋga a karzɛ morzehwa mo joŋgirzɛ O ndawo yama moohveli weni Dahwiti 70 Na oma ama o hwe o wana ja hwagbeli hweni hwa kohwa 71 E ma joŋgirzɛhwɛ o hwaokoeli hwarzu Na oma a ma hwaŋga ema hwa jo kou 72 O li uŋmɛlɛ iili ema a ma kakɛnɛ hwaa Tatɛ Ndeŋga o loŋgɛlɛ wotani wo likakɛnɛ leni. 73 Hwei ema ama atɛ na Rzaŋgoarzu Ablahamu 74 o li joŋmba irzɔ Ema janji o maa ma hwakoeli hwarzu Limo gbeeya e rzi hwɛ tɔ woŋgɔ. 75 O wotani na litɛmɛ ehvehve O worzo hweni hweyu hweyarzɛ hwe loŋgɛ larzu, 76 ndeŋga owa ŋmanami. O hwɛlɛhwɛ ndi moohweli wama Oŋgo Akarzami laka hwarzɛ O loma li ɛndɛ o worzo o lirzeya e njiya yama Tatɛ. 77 O liŋmba lihwiye ema loŋgirzɛ Hwato hweni na lihwa lakirzɛ meyohwe meyawu, 78 li akeya na iili jama Lohwa larzu Ehvonda wunya wojo taneya ema wo uweya o ŋmanyu 79 o li joŋmba ŋmɛnɛni o hwaŋga hwa liyai o jititi; Na o eliŋgɛ ya kpeli o liɛlɛ mataŋga marzu o njeya ya eyɔlɛ." 80 Ndeŋga e ŋmana a ma oŋga rzi a imbama o eliŋgɛ Ama hwɛ o liwɛnja natɛɛ eyu. Ema ama uŋmɛlɛ Irzaeli.
LUKARZI HWEHVARZU HWƐHVAKƐ 2
1 O hweŋge hweyu kairza Agurzi ama akɛlɛ njambɛ ema, hwato hwarzɛ o rze ya likaneya la Lomani hwa aŋgahwe 2 Ini jaŋgi ndi i ma hwɛ e jaa worzo ehvonda Kpilinurzi ama hwɛ E mokaneli wa Rziliya 3 Hwarzɛ hwa ma ɛndɛ o li aŋgahwa. Moto tɛ o lihwende lɛni. 4 Yorzɛhvi hvɛ a ma uweya o Narzalɛti e mbowa ndɛnɛ ya Galileya li akeya o Yudea. E mbowa yama Dahviti e hwɛlɛhwɛ Betilehemi e hwanja ama hwɛ ndi o motende mo ndawo yama Dahwiti. 5 O li aŋgahwa na Maliyɛ ewanda yeni 6 Ema ama rziirzɛ; Ehvonda hwa ma hvɛ aŋga liyali li ma molɛmbɛ 7 Rzi a nyia e ŋmana weni wa worzo wa munyana. A ma mo liŋgɛlɛ ndi hwehvahve hwe maatu ma whami. Rzi a monaŋgɛlɛ o ewoki, eki ema hweembe hwema nyɔeya malihwa. Ehwanja o rzihwɛ ehvolo o teni ya ndawo ya hwaeni. 8 O ma hwɛ hwaɔŋgɛli hwa mɛlɛŋgu eŋge erzooka Hwa mɔŋgeya lihwemba lawu wuu o ewoka. 9 E Aŋgeli yama Tatɛ ema hwa wurzeya rzi ŋmɛnɛni moma Tatɛ moma hwɛ o titeni ya wu. Wha ma onda na wɔŋgɔ, 10 Rzi e Aŋgeli e hwa ohweya ema, "Erza oka wɔŋgɔ; ɔŋgɔtɛ." Na yo janeli di mɛɛndi me gbamu me mɔnyɛŋgi mo ndɛnɛ Ema mo jeeya hwatao hwarzɛ, 11 Yawono o mbowa yama Dahwiti E Moŋgirzeli a yahwi a hwɛlɛhwɛ ndi Kilirzito Tatɛ. 12 Ene ehwɛ ndi emɛnɛni na inyɔyu uŋma ɛ ŋmana a liŋgɛlɛhwɛ ndi na hvehvahve hwe maatu Yu uŋma a naŋgɛlɛhwɛ o ewoki." 13 O wotɛmɛ tɛmɛ mondeŋge mo ma uweya o ŋmanyu li uŋma e Aŋgeli Li eka Lohwaɛ ema, 14 "Eluhwɛ na Lohwɛ Akarzami Ndega eyɔlɛ orze na hwato ema mɔ a okani mɔnyɛgi." 15 E hvonda i Aŋgeli i ma timbe o ŋmanyu ya Lohwa Hwa ɔŋgeli hwa mɛlɛŋgu hwa ma aohwanɛlɛ mɔkɔ na ɔnɛi ema, "Inyɛ jɛndɛ o Betelehem o li ɛnɛ ene eya e gbeyɛnɛi Ema Tatɛ a jo hwilɛi" 16 Hwa ma ɛndɛ karzi-karzi Rzi hwa uŋma Maliyɛ na Yorzɛhvu Na e ŋmaŋa a naŋgɛlɛhwɛ o ewoki. 17 Hwa ma ɛnɛ nanu, hwa ma hwilɛ hwarzɛ mamɛ e ma wohwahwɛlɛ lihvomɛnɛ o no ŋmana: 18 Hwarzɛ hwa ma hweya, hwa ma tama lihweya Mamɛ hwaɔŋgeli hwa mɛlɛŋgu hwa ma wohweya 19 Maliye a ma uta hwene hweya hwe arze o ŋmema ŋmeni 20 Hwaɔŋgeli hwa mɛlɛŋgu hwa ma timba na mɔnyɛŋgi Leka Lohwɛ o mamɛ hwa ma hweye na li ɛnɛ Na oma ema wohwahwɛlɛ 21 Hweyu wambi hwe ma uke ema hwa ma ende e ŋmanaɛhwa ma mo hwɛlɛ Yerzu, lina e Aŋgeli e ma mo ŋgbe ndeŋga a e litahwa o luŋga. 22 E hvonda litanirzɛhwɛ lawu ema uke Na oma e mbenda yama Morzɛ yo ohwi, hwa ma mo ɛndɛnɛ o Yelurzalem o li mo ŋgmba Tatɛ, 23 na oma e tilahwi o mbenda yama Tatɛ ema: "Tɔ ima ŋmana wa munyana ema alihvowi luuŋga, a hwɛlɛhwɛ wotani (na) oma Tatɛ." 24 Ndeŋga o li ŋgmba jahweya na oma E mbenda yama Tatɛ e ohwi "Maahva ma mbeŋga ja ndawo." 25 Oma hwɛ munyana o Yelurzalem Lina leni li ma hwɛ ndi Rzimɔni, A ma hwɛ wotani wo jɔkɛ, A ma ambɛlɛlɛ hwenamirzeli hwe wonya Irzaeli Eliŋgɛ ya wotani e ma hwɛ na mɔ. 26 Eliŋgɛ ya wotani e ma mo hwilɛ ema a rza ɛnɛ kpeli Natɛɛ a ɛnɛ Klirzito wama Tatɛ. 27 Na oma Eliŋgɛ e ma mo kɔmɛlɛ ama ɛnde o ndawo ya Lohwa; E hvonda e rzaŋgo na e nyaŋgo hwa ma jaane ŋmana awu Yerzu o limo gbeeya na oma ɛɛmɛ na embenda ema ohwe; 28 A ma mo wowa o maa meni rzi a eka Lohwɛ ama: "Na oma eya yaŋgɔ ya ohwi, 29 "Tata naŋgɛ hwɛmɛ e mogbeli waŋgɔ a ɛndɛ na eyɔlɛ 30 E hwanja mirzɔ mami ma ma ɛnɛ li oŋgirzɛ laŋgɔ 31 E ma o rzekeli o worzo wo hwato hwarzɛ, 32 etulu o li uŋmɛlɛ ewɔ hwa jititi ndeŋga jeka na hwato hwaŋgɔ Irzael." 33 Rzagɛ na nyaŋgɛ hwa ma tama O mamɛ e ma e ohwahwa li hvomɛnɛ e ŋmana. 34 Rzimɔni ama hwa namirzɛ rzi a ohweya e nyaŋgo yeni Maliyɛ ama: ɔŋgɔ tɛ, ono ŋmana a rzekahwɛlɛ ndi hwe kpeeli na hwetɛmeli hwe rzai o Irzael Ndeŋga emɛnɛni ema yo ohwahwi limo hvomɛnɛ, 35 Ndeŋga e rzɔlɔ hvɛ yo uŋma eliŋgɛ yaŋgɔema maluteya ma rzarzai me ŋmeema me o auŋmɛlɛ. 36 Ndeŋga o ma hwɛ moohweli hwa hweliŋgɛ wa molana, Ana e ŋgɔndɔ Yama Phvaniueli wa lituba la Arza a ma una rzairzai ama liya na mojomɛ weni meya lirzamba o ŋgɔndɔ yeni. 37 Ndeŋga a ma liya mokurze natɛɛ mɛni wambi me meya na menii. Ama hwɛ komba komba na e ndawo ya Lohwa Li eka Lohwɛ na makanɛ na mokia njau ŋmerze ma wuu. 38 Ama ja liŋgi lirzako a ŋgmba Lohwɛ jeka, Ama, "ohweya hwarzɛ ema hwama ambɛlɛlɛ li oŋgirzɛ la Yelurzalem lihvomɛnɛ e ŋmana. 39 E hvonda hwa ma kulɛ li gbeya hweya hwe yarzɛ na o ma e mbende yama Tatɛ yo Ohwi, hwa ma timba o Galileya o mbowa yawu ya Narzaleti. 40 Ndeŋga e ŋmana ama oŋga rzi a imbama A ma onda na lihwiye ndeŋga iili jama Lohwa i ma hvɛ na mɔ. 41 Rzaŋgɛ na nyŋgɛ hwa ma ɛndɛ o Yelurzalem ŋma tɛ o ndema ya li ataatowɛ. 42 E hvonda ama uke liyome la meya na mehwakɛ hwa ma ɛndɛ o ndema lihvomɛnɛ ɛɛmɛ yawu. 43 E hvonda e ndema ema kuuwe, o hwetimbeli hweyawu E ŋmana Yerzu ama liiya o mburza o Yelurzalem E rzi hwɛ rzaŋgɛ na nyaŋgɛ li hwiya. 44 Hwa ma ɔŋgɛlɛ ema a wheli o mondeŋge na wɔ hwa ma ɛndɛ yɔndɔ ya eyu yɔkɔ rzi hwa woteya li mo arza o ŋgindi ya litumba na hweyorza, 45 Hwa rzi mo luwe Rzi hwa timba o Yelurzelem li mo arza 46 Hweyu hweyao hwe maaka rzi hwa mo uŋma o ndawo ya Lohwa A liyai na hwaokoleli li wo okaneya na li hwa ijowa miijohweli 47 hwarzɛ ema hwa ma hweya hwa ma tameya li rzuŋgitɛnɛ na maalahweli ma eni. 48 Ehvonda hwa ma mo ɛnɛ hwa ma jeja Rzi nyaŋgɛ a mo ijowa ama, "Ii ŋmana, mamɛ ndeŋga o jo gbeyani nanu e? 49 Ɔŋgɔ tɛ rzɔŋgɛ na imba i ma o wa rza, rzi a hwa ijowa ama, "mamɛ e na araneya e? "E rzi hwiye ema na aŋgamɛnɛ li hvɛ o ndawo yama Rzaŋgo ami e?" 50 Ndi hwa rzi rzɔŋgitɛnɛ mamɛ a ma hwa ohweya. 51 Rzi a ɔndɔ o Narzalɛti na wɔ, ndeŋga ama hwa hweyana. Nyaŋgɛ a ma uta hwene hweya hwe arzɛ o ŋmema mo eni. 52 Yerzu a ma oŋgana lihwiye, na hwehwɛli na o eluhwe na Lohwɛ naɛhwato.
LUKARZI HWEHVARZU HWEYAO 3
1 O liyomɛ la meya na meta me likaneya la ma Tihweliɔrzi kairza ema Pontiyorzi Pilato mɔ hvɛ a ma hvɛ e mokaneli o Yudea, Helodea ama kaneya Galilyea, ŋmanyango Philipo mɔ hvɛ a ma kaneya Ituleya. Tilakoniti Lirzanya mɔ hvɛ a ma kaneya Ahwilɛnɛ; 2 E hvonda Anarzi na Kaihva hwa ma hwɛ hwaohweli hwa karzami, e ya yama Lohwɛ e ma jeeya Yowanirzi e ŋmana wa ma Rzakaleya o morzanjɛ. 3 A ma ɛndɛ i mbowa ja arzɛ ja ehvarzu ya Yoldan o li ohwa liluhwirzɛ la liaŋgowɛ ema hwa lakirzɛhvɛ o meohvɛ me awu. 4 Na oma e tilahvi o kaati ya hweya hwe moohweli wa hweliŋgɛ Yerzaya ema: Lilo la moohweli mɔkɔ li hwɛlɛ o morzanjɛ, e rzeeya e njiya ya ma Taatɛ e mo gbeeya njiya e tɛnɛnɛ. 5 Molonjo tɛ mo ondirzɛhvɛ tɔ ima hvako na mooli mo rzihwirzɛ hwɛ i njiya jeŋgami i jirzɛhvɛ ehvehve, 6 Ndeŋga hvato hwarzɛ wa hvɛnɛ loŋgirzɛ la ma Lohwɛ. 7 Yowanirzi a ma ohweya e ŋgindi ema ja o liluhwirzɛ leni ema; i nyɔ lihwemba la hvei, njɛnɛ a kokohwɛlɛ e ma e hwaŋge e kokirzɛ ema e jaa e? 8 E uŋmɛlɛ hvehvuma hwe li aeŋgowɛ e rza a ohwanɛlɛ inyɔ mɛnɛ ema, i hwɛni Ablahamu naa rzaŋgo ya arzu, i mba na e ohveya ema, o teni ya manu mayai Lohwɛ a tanɛ a wurzirzɛlɛ Ablahamu hwana. 9 Yoondo e ma maa likahwa o miina me mae tɔ ima gbe ema wo rza nyai hwehvuma hwe gbamu wo kɛɛhwɛ wo hvimbahwa o munya. 10 E ŋgindi e mo ijowa ema Mamɛ rzɔ i tanɛ li gbeya naŋgɛ e?" 11 Yowanirzi a ma alahwɛ ama tɔnjɛ ema a hwɛni meŋgombɛ mehwakɛ aŋgbe oŋgo ema a rza ohvɛ ndeŋga oŋgo ema a hwɛni moleli mɔhvɛ a gbeye nanu mɛnɛ. 12 Hwa rzaŋgirzeli hwa njaŋgɛ hvɛ hwa ma ja o li luhwirzɛhwɛ rzi hwa mo ijowa ema, i mookoleli, mamɛ rzɔ i gbeya e? 13 Ama hwa ohweya ama, "e rza rzaŋgirzɛ li aka na oma e o hwahwɛlɛ. 14 Loŋgo la hwato hwa njuma hvɛ hwa ma mo ijowa ema, ‘mamɛ irzɔhvɛ i gbeya e? a ma hwa alahwɛ ama "erza ɔnjɔnɔ hwato mali ma wu, tɔ li hwa rzɔ njɔmi ja ngundu e uje na etaŋgi yanyu." 15 Hwato hwa ma ambɛlɛnɛ nyirzɛ na hwetamirzeli o ŋmema me a wu, ŋga Yowanirzɛ ndi a tanɛ li hwɛ Kilirzito. 16 Yowanirzi a ma hwa alahwɛ ama na e luhwirzɛ ndi na malihwa, ndi mɔkɔ e ma a imbami li na aka a o ja ema na rza tanɛ li wunduwa merziŋga me hwetabi hweni, mɔ a e luhwirzɛ ndi na eliŋgɛ ya wotani na muunya. 17 Erzɛŋgbɛni e hweli o liya la eni o li rzɛmgbɛ na li rzaŋga i hvɔŋgɔ na li ji ika o woka, ndi a rzɛlɛ liwutu na munya mo rza limirzɛnɛ. 18 Yowanirzi a ma ohweya e ŋgindi meaŋgo me gbamu li akeya na i hvɛ hvɛ nyai ja hweokoleli; 19 Ndi e hvonda Yowhanirzɛ a ma lomeya Helode e mokaneli, o njɔmi ema a ma hwa Helodiarzi, jojiyɛ wama ŋmaŋyago na hwenɛi hweya hwearzɛ hwe wohwe a ma gbeye. 20 Helodea ma ika hvɛ ene o ŋmanyu yahwɛnɛi rzi a umbana Yowanirzi o hwewowa. 21 Ehvonda hwato hwarzɛ hwa ma hwɛ li luhwirzɛhwɛ, Yerzu hvɛ a ma luhwirzɛhwɛ. Na oma a ma hwɛ likanɛ, e ŋmanyu e ma lihwoweya. 22 Rzi eliŋgɛ ya wotani e mo rzihweya o e mɛnɛni naa mbeŋga rzi, Lilo li uweya o ŋmanyu a Lohwa ema "O wa ndi o hweli ŋmanami wa ndiŋgɛ a maliŋgo. 23 Yerzu a ma hwɛ eya ya rzaiyao ya meya e ma a ma woteya ewolo yeni. Hwa ma mo wowa ndi na e ŋmana wa munyana wama Yorzɛhvu eŋmana wa munyana wama Heli 24 na wa ma Matati na wa ma Lehwi na wa ma Meliki na wa ma Yamai na wa ma Yorzɛhvu 25 na wa ma Matatiyarzi na wa ma Amorzi na wa ma Nahumi na wa ma Erzili na wa ma Nagai 26 na wa ma Maati na wa ma Matatiyarzi na wa ma Rzɛmɛni na wa ma Yorzɛki na wa ma Yoda 27 na wa ma Yoanani na wa ma Lerza na wa ma Rzeluhwahwɛli na wa ma Rzitɛli na wa ma Nɛli 28 na wa ma Mɛliki na wa ma Adi na wa ma Korzami na wa ma Elmadami na wa ma Eli 29 na wa ma Yorzuwa na wa ma Elirzɛ na wa ma Yolimi na wa ma Matati na wa ma Lehwi 30 na wa ma Rzimɔni na wa ma Yuda na wa ma Yorzɛhvu na wa ma Yonami na wa ma Eliyakimi 31 na wa ma Meleya na wa ma Mena na wa ma Matahva na wa ma Natan na wa ma Dahwiti 32 na wa ma Yɛrzɛ na wa ma Ohwɛli na wa ma Boarzi na wa ma Rzalimɔni na wa ma Naomi 33 na wa ma Aminadahwi na wa ma Lami na wa ma Herzilɔni na wa ma Pɛlɛrzi na wa ma Yuda 34 na wa ma Yakohvo na wa ma Irzaka na wa ma Ablahamu na wa ma Tela na wa ma Naho 35 na wa ma Rzelɔgi na wa ma Leu na wa ma (Hvelɛli) na wa ma (Ehwɛli) na wa ma Rzela 36 na wa ma Kainan na wa ma Ahvarzadi na wa ma Rzem na wa ma Nowa na wa ma Lamɛki 37 na wa ma Meturzela na wa ma Enɔku na wa ma Jalɛdi na wa ma Mahalalɛli na wa ma Kenani 38 na wa ma Enɔrzi na wa ma Rzɛti na wa ma Adam na wa ma Lohwɛ.
LUKARZI HWEHVARZU 4
MAKEKIRENE MAMA YERZU
1 Yerzu ama onde na elingɛ "Ama uwɛlɛlɛ o Yoldan, ama liyɛlɛhwɛ na Elingɛ o morzanjɛ. 2 Aŋga ndi, mɛni mɛni me meenya, ama kikirzɛwhɛ na elimo arzi le to yoma o meŋge menya meyarzɛ, ndi o lirzuku la meŋge meenya ama oka e njau. 3 Emolimo ema mo ohweya ama, "ohweli tɛ eŋmana wa Lohwa, ohweya lini liyai li aeŋgowɛ yolo! 4 Yerzu ama mo alahwɛ ama, "moto arza liya ndi na hwɛyolo mɛnɛ," 5 Emolimo ama mo liyɛlɛ eki ekarzami, rzi amo uŋmɛlɛ hwekomɛ hwe rze yarzɛ. 6 Rzi amo ohweya ama, "na o ŋgmba hwekaneli hwayarzɛ na gbaamu ehwanja ema noŋgmbaahwa, ndeŋga na tanɛi na ŋgmba to ŋjɛ ema na hwe liŋganeli. 7 O eŋganɛlɛ ono kanɛ tɛ, hweyarzɛ hwe hwɛ ndi hweyaŋgɔ." 8 Yerzu rzi alahwɛ ama " etilahwi ema: kanɛ ndi Lohwa laŋgo ndeŋga o mo gbeeya ndi mo mɛnɛ." 9 Rzi E molimo a mo liyɛlɛ o Yelurzalem, amo tɛmirzɛ o njoŋgo ya ndawo ya Lohwa, ema ema karzama li aka jarzɛ, rzi a mo ohweya ama "ohweli tɛ eŋmana Lohwa, ‘Hvanja liwoteya anu luka orze. 10 Etilahwi ema: a kaneya i aŋgele jeni li hvomɛnɛ owa; o li oŋgeya gbamu. 11 Hwa o karzɛ o maa mawu, nanu ema orza ɛrzɛ litaŋga laŋgɔ o liyai. 12 Yerzu ama alahwɛ ama, "E ohwahwi ema, orza ika Tatɛ Lohwa langɔ o ma keirzɛnɛ, 13 ehvonda emolimo ama kulɛ manu makekirzɛnɛ marzɛ, a ma mo hwɛmɛ natɛɛ lihvɛhvɛ lirzako.
YERZU AMA RZƆRZƆWƆ O NARZALETI
14 Yerzu ama timba o Galeleya, o ŋginya ya eliŋgɛ rzi meyaŋgo meeni me wuweya eki yarzɛ ya mbowa ya toŋgoŋgo. 15 Ama okolɛ o ndawo jawu ja Lohwa, hwato hwarze hwa ma mo eka. 16 Ama ɛndɛ o Narzaleti, eki ema ama oŋgeya, o wunya wo li arziyolɛ ama ɛndɛ o ndawo ya Lohwa na oma ema hwe ɛɛmɛ. Yeni rzi a tɛmɛ o ŋmanyu li laŋga. 17 Motila mo ama e moohweli wa hweliŋgɛ Yorzya mo ma mo ŋgmbaahwa, rzi a mo wuluwa, a luwa eki ema ematilahwa ema, 18 "Eliŋgɛ yama tatɛ ehweli na imba, Ehwanja ano namirzɛ, oli ohweya hwatakeli meyaŋgo me gbamu. A nomi ndi oli wurzirzɛ wonja hwaŋga hwa wowa ndeŋga o li hvowa mirzɔ ewo hwa ndima o liwurzirzɛ ewo hwa takirzɛhwɛ 20 li ohwa ŋmaa mo gbamu moma Lohwɛ. 21 Rzi a woteya li hwa ohweya ema, "yawono hwene hwetileli hwe ondirzɛhwɛ o hwɛ hweeli hwe anyu." 22 Hwarzɛ hwa ma ohwa gbamu onyai ya eni, ndeŋga hwa ma tameya hweya hwe gbamu ema hwe ma wurza o wana yeni, rzii wha ijowanɛ, "rzɛkɛ eŋmana wama Yorzɛhvu ono e?" 23 Yerzu ama wohweya ama o jɔkɛ, e o no kpeeya mono ŋmana ema, "ŋgaŋga a wohwirzɛ owa witi, gbeya anu mbowa yaŋgɔ na oma hweye ema o ma gbeya o Kapenaomi." 24 Rzi awo hweya ama, "na e o hweya ejokɛ, to moohwele wa hweliŋgɛ mɔkɔ arza ekahwa o mbowa ya eni. 25 O jɔkɛ na e ohweya ema, oma hwɛ mekurze me hwalana o Irzaeli ehvonda yama Eliya ehvonda ema eŋmanyu ema umbahwe meya meya na ehvarzu, ema enjau ya ŋginya ema hwɛ, e mbowa yarzɛ 26 ndi Eliya arzi omahwe o iŋgi mbowa liakatɛ o Rzɛlɛpa e mbowa ya Rzidon li uŋma mokurzɛ mo molama. 27 Ndeŋga oma hwɛ rzairzai ja hwato hwa ma okirɛ e nyambɛ ya hwetanɛtanɛ, o eŋge hvonda yama Elirza e mo ohweli wa hweliŋgɛ ndi tɔ mɔkɔ wawu arzi tanirzɛhwɛ li aka tɛ Namani wa Rzilian." 28 Hwato hwarzɛ hwa ma hwɛ o ndawo ya Lohwa hwa ma hweye manu rzi hwa onda na hwetato. 29 Hwa ma tɛmɛ rzi hwa mo hvaya o mbowa, rzi hwa mo ɛndɛnɛ o mbembe ya mooli ema embowa yawu ema hwɛ li arza olimo hvimba o rze ya mɔtɔti. 30 Ndi ama akeya o tiiteni yawu rzi a ɛndɛ e yeeni.
YERZU AMA HVAYA ELIGƐ YA WOHWE
31 Rzi a ondo o Kapanaum mbowa ya Galileya rzi a woteya li okolɛ hwaato o wunya wo li arziyolɛ. 32 Hwarzɛ hwa ma tameya hweokoleli hwe eni ehwanja ŋmɛndi Ŋmeni mo ma ohva maimbi. 33 O teni ya ndawo ya Lohwa o ma hwɛ moto moko ema amo ohva eliŋgɛ ya wohwe. Ama tɛɛ morzeya na lilo likarzami. 34 Ii Yerzu wa Narzalet! O jarzana ma e? O jeli ndi o li jo hvaŋga e? Nahwi njɛ ohweli, E Motaneli wama Lohwɛ. 35 Rzi Yerzu a mo lomeya a ohwa ama umba e wana, wurza o teni yeni, Rzi eŋge elingɛ ya wohwe ekpirzɛ oŋgo moto orze o marzo ma awu rzi e wurza erzihwɛ limo hwenirzɛ. 36 Hwato hwarzɛ hwa ma tama Rzi hwa ohwanɛlɛ mɔkɔ na onɛi ema", ima nyai ya hweokoweli hwene e? ono moto a ohvi wonja na ŋginya o likaneya hweliŋgɛ hwe wohwe, rzi hwe wurza e? 37 Eŋganeli yeni ema ɛndɛ eki yarzɛ.
PETOLO MOKIYA WENI
38 Yerzu ama anjia o ndawo ya Lohwa rzi a ɛndɛ o ndawo yama Rzimoni nyaŋgɛ wa lihva ama lɛmbeya liyeti la ŋginya rzi hwa ohweya Yerzu ema amo oŋgowane. 39 Rzi a ujama o ŋmanyu yeni a lomeya liŋgi liyeti rzi li mo hwɛmɛ, o wotɛmɛtɛmɛ, ama tɛmɛ o li hwa gbeeya.
YERZU AMA WOHWIRZE RZAIRZAI
40 Ehvonda e lohwa lohwa ema rzihwa, hwa ma janeya Yerzu hwaŋga hwarzɛ ema hwa ma okirzɛ o nyai na nyai ja njambɛ na oma ama hwa hwakɛ maa meni o mo tɛ, rzi a hwa wohwirzɛ. 41 Hweliŋgɛ hwe wohwe hve hwe ma wurza o hwato rzai rzai rzi hwe yatɛ ema ohweli ndi e Ŋmana wa ma Lohwɛ, ndi ama hwe lomeya arzi emeya hve ema hwetɛ ewhanja hwe ma hwiya ema mɔ ndi a hweli Klirzirto. 42 O indiŋgɛdingɛ ja wunya, Yerzu ama ɛndɛ eki ema e iŋgameli, hwato hwa ma hwe limo arza hwa ma uke eki ema ama hwɛ hwa rzi arze ema a hwa hwɛmɛ. 43 Ndi ama wowheya ama, "na aŋgamɛnɛi hvɛ li ohweya ihvɛhvɛ mbowa meyango me gbamu me likaneya lama Lohwɛ Ehwanja nanu ndi na omahwɛlɛ. 44 Ama ɛndɛnɛ rzo hweyohweli hwe eni o ndawo ja Lohwa ja Yudea.
LUKARZI HWEHVARZU HWETA 5
HWEHWELELI HWE HWAOKOWELI HWA WORZO
1 Wunya wɔkɔ Yerzu ama tɛmɛ o yulu ya Generzalet, Ama toŋgahwa na hwato hwa ma ja limo o kaneya na oma ama ohwe eya ya Lohwa. 2 O toŋgoŋgo ya malihwa o ma hwɛ mɔlɔ mahwakɛ, ma maliyahwa na hwato hwa morzombo, hwa ma hwɛ lirzorza I mbunja jawu. 3 Ama kpeeya wɔlɔ wɔkɔ, ema wo ma hwɛ e wooma Rzimɔni rzi amo o hweya ama, a wo tindɛlɛ tei o teni ya ŋmanja. Rzi a liya o rze a hwa okolɛ o teni ya wɔlɔ. 4 Ehvonda a ma kulɛ li ohwa, rzi a ohweya Rzimɔni ama, e agmbe imbunja o malihwa marzɔŋgɔ, e lɛmbɛ inyama. 5 Rzimɔnɛ rzi amo alahwɛ ama, Ii Rzaŋgɔ! I taki wono wuu warzɛ, i rza lɛmbi tɔ yoma. Ndi Ehwanja oohwi nanu na agmba i mbunja. 6 Na oma hwa ma gbeyɛ nanu, hwa ma lɛmbɛ nyama rzai rzai natɛɛ imbunja ima woteya li nyaweya. 7 Rzi hwa hvɛtɛlɛ i mbunda jawu ema i ma hwɛ o wonɛi wɔlɔ, ema hwa je hwa woŋgowane, hwamaja rzi hwa ondirzɛ mɔɔlɔ maahwakɛ, ma onda natɛɛ ma woteya li inda. 8 Rzimɔni Petolo, ama ɛnɛ nanu, rzi a kpa o mataŋga mama Yerzu, a ohwa ama, Rzaŋgo, ono anjiya anu, na hweli ndi moto hwa wohwe!" 9 Ehwanja mo na i mbunda jeni jarzɛ hwa ma tameya inyama hwa ma lɛmbɛ. 10 Nanu mɛnɛ hvɛ na Yakohvo na Yowanirzɛ, hwaana hwamba Rzebedio, Rzimɔni imbunda jeni. Rzi Yerzu a ohweya Rzimɔni ama "orza oka wɔŋgɔ, liwotaya naŋgɛ o hwɛ ndi molɛmbɛ wa hwato. 11 "Rzi hwa rziima mɔlɔ o rzaawa, hwa liya hweema hweyarzɛ, Rzi hwa mo nɔŋgɔ.
E MOTO WA NYAMBE YA MƆLƆENGƆ
12 Ehvonda Yerzu ama hwɛ mbowa hvɔkɔ, oma hwɛ moto mɔkɔ enyambɛ ya mɔlɔŋgɔ e monde onyo, na oma a ma ɛnɛ Yerzu, rzi a noŋgama orze, Rzi aujɛ worzo, a mo rzorzomeya ama," I rzaŋgo, o imanɛlɛ tɛ, o ena ono tanirzɛ. 13 Rzi Yerzu a enyowa liya amo lɛmbɛ, Rzi a ohwa ama, na emeli, "Tata!" O wotɛmɛtɛmɛ eŋge nyambɛ, ema mo anjiya. 14 Rzi Yerzu a mokaneya ama, "O rzi ohweya tɔ moto eya, ndi a uŋmɛlɛ owa witi oma emo gbeeli wa eya ya Lohwa, O (gbwe mahweya) Morze a tɛirzɛ, o lihwɛ mboŋgi na wɔ. 15 Ndi meaŋgo me eni mema wuweya weki Yerzu, ema ŋgindi ndɛnɛ ema ja oli mo hweyana ndeŋga o liwohwirzɛlɛwɛ i nyambɛ jawu. 16 Ndi Yerzu a ma ɛŋgɛmeya eki ema ya umbɛi o likanɛ.
YERZU AMA ONGIRZE MOTO WA NJEMBU
17 Wunya wɔkɔ Yerzu ama hwɛ li okolɛ, I, hvalirzaɛ hwaokoleli hwa mbenda hwa ma uweya imbowa jarzɛ ja Galileya na Yudeya na Yelurzalem, hwema liya aŋga. 18 Hwato wɔkɔ hwa ma hwanɛ moto wa njɛmbu o ekaka, hwa ma keka limo kpeyaneya o limo ika o worzo woma Yerzu. 19 Eŋgindi Yeŋga hwa rzi luwe ehvolo o limo kpeyaneya, rzi hwa agba o ŋmanyu ya likaando, Rzi hwa mo rzihwirzɛ na ekaka yeni, o worzo woma Yerzu. 20 Yerzu ama ɛnɛ liloke lawu, rzi a ohwa ama, ŋmai e, meyohwe meaŋgɔ me lakirzɛhwɛi. 21 I hvalirzaɛ na hwaokoleli hwa mbenda hwa ma woteya liluteya wɔ na wɔ "I ma ŋmana moto ono, ema a ohwa ini irzilako e? Njɛnɛ atanɛi lilakirze meyohwe, laka Lohwɛ mɛnɛ. 22 Yerzu ama hwiya mamɛ hwama luteya, Rzi a wa i jowa ama, "mamɛ ndeŋga e luteya hwene hweya o meema meyanyu e?" 23 Ima yɔ ewɔtɔmeli; o li ohwa ema meyohwe meyaŋgɔ me la li rzɛhwɛi tɔ li ohwa ema tɛmɛ o ɛndɛ e? 24 Ndi e hwiye ema, e Ŋmana moto a hwɛni ŋginya o rze, lilakirzɛ meyohwe. Rzi a o hweya oŋgo moto wa njembu" ama, "Na ohweli ema tɛmɛ wowa ekaka yaŋgo o ɛndɛ o ndawo. 25 O wotɛmɛtɛmɛ ama tɛmɛ o marzo mawu, rzi a wowa ekaka yeni, rzi a ɛndɛ o ndawo a eka Lohwaɛ. 26 Hwarzɛ hwa ma tama rzi hwa ŋgba Lohwɛ Jeka. Hwama onda na wɔŋgɔ rzi hwa ohwa ema, Jɛni hweya ema hwerza hvoŋgahwa yawono.
HWE HWELELI HWE A MA LEHWI
27 Ndi omburza ene, Yerzu a ma wurza rzi a ɛnɛ morzaŋgeli wa njaŋge ya likaneya mɔkɔ, liina leni Lehwi, A liyai o liwondo leni la ewolo. 28 Rzi lehwi a tɛmɛ, a liya hweyarzɛ, a mɔnɔŋgɔ. 29 Rzi Lehwi a gbeeya Yerzu ndema ndɛnɛ o ndawo yeni, ŋgindi ndɛnɛ ya hwarzaŋgeli hwa njaŋge, na hwa hvɛhvɛ hwato hwa ma hwɛ o hweleeli. 30 Ndi i hvalirzaɛ, na hwaokoleli hwa mbenda, ema hwa ma hwɛ e yawu ehvehva, Hwa ma ohwa litɔkirzɛnɛ hwaokoweli hweni ema, mamɛ ndeŋga inyɔ ela, na linyɔ, ekiyɔkɔ na hwarzaŋgeli hwa njaŋge na e hwaawɔ whe e? 31 Yerzu rzi ahwaalahwɛ ama, rzekɛtɛ hwaŋga ema hwa liyai gbamu ndi hwaarza i ŋgaŋga, e mooka ndi aarza ŋgaŋga. 32 Narza jeli lihwɛlɛ ewɔ hwatani ndi e wɔ hwa wohwe, o li aeyɛlɛ oɛwohwe wawu.
MOKIYA NJAO
33 Hwa ma moohweya ema hwaokoweli hwama Yowanirzi, hwa liya mokiiya njao na likanɛ, nanu mɛnɛ hvɛ na hwaŋga hwa hvalirzaɛ, ndi e hwaaŋgɔ hwa ɛndɛ ndi lila na linyɔ. 34 Yerzu ama hwa alahwɛ ama, "e tanɛi e gbeya ema hwaɛni hwa e mohwaeli hwa liya mokiya njao ema mɔ a hweli na wɔ e?" 35 Ehvonda e oja, ema emo hwaeli ao wowahwɛ na wɔ, hweŋge hweyu ndi wɔ wooliya mokea njao. 36 Yerzu rzi a hwa kpɛɛya mono ŋmana ama, tɔ moto arza nyawa ehvahve o moŋgombe mo hvenya rzi a kɔlɔ o eluni ya moŋgombe. Agbe tɛ nanu oma anyawi ndi moŋgombe mohvenya, ndeŋga eŋge ehvahve erza lɔɔnɔ eluni ya moŋgombe. 37 Ndeŋga tɔ moto arza rzɔlɛ mimba mahvenya o eluni ya kohwa, Agbe tɛ nanu miimba mahvenya magba eŋge kohwa ma marzoweya ndeŋga ikohwa hvɛ i hvaŋgeya. 38 Jaɛ mimba mahvenya aikahva ndi o kohwa hvenya. 39 Ndi moto ema a nyɔli tina ya mimba arza liŋgana mɛɛwɔ, ao hwa ama e maatina ndi ma lɔu.
LUKARZI HWEHVARZU MOTOHWA 6
TATE WA WUNYA WO LI ARZIOLE
1 Wunya wɔkɔ wo li arziolɛ Yerzu a ma alieya, Oteni ya meyonda me mbarzi Rzi hwaokoweli hweni hwa woteya lihvɔndɔ imbarzi na Li ji tɔndɔ na li ji la. 2 Longo la Hvalirzai hwa ma ijowa ema Mamɛ ndenganɛlɛ inyɔ egbeya eya ema erza aŋgamɛne ligbeyahwa o wunya wo li arziyolɛ? 3 Rzi Yerzu a hwa ijowa ama, Erzi laŋgi mamɛ Dahwiti ama gbeye na i mbunde jeni e hvonda ema hwa ma kpeeya o dawo ya Lohwa, 4 Ama kpeeya o ndawo ya Lohwa, Rzi a la hweyolo hwema namirzɛhwɛ ema arzi hwɛnɛ lila, ehwanja hwe ma rzekahwɛlɛ ndi hwa gbeeli o lila. Rzi a inyɛ hv i mbunda jeni." 5 Yerzu rzi a wohweya hvɛ ama, e ŋmana moto ndi a hweli Tatɛ wa wunya wo li arziolɛ. 6 O wohvɛhvɛ wunya wo li arziolɛ, ama kpeeya o ndawo ya Lohwa o li okolɛ. Moto mɔkɔ amah hwɛ aŋga, ema liya leni la mome li ma ŋwa njɛmbu. 7 I hvalirzaɛ na hwaeyeli hwa mbenda, hwaarza o li mo luwa njɔmi, Rzi hwa mɔɔŋgɔ loŋgoloŋgo, o li enɛ ŋga a wohwirzɛ o wunya wo li arziolɛ. 8 Ndi Yerzu ama hwiya ma luteya mawu, Rzi a ohweya oŋgo moto wa liya la njɛmbu ama, Tɛmɛ o ŋmanyu o worzo wo hwato hwarzɛ, Rzii a tɛmɛ aŋga 9 rzi Yerzu a wohweya ama, "Na e ijowa inyɔ, ŋga, ehweli mbenda o wunya wo li arziolɛ: Ligbeya gbamu ŋga li gbeya wohwe, Li oŋgirzɛ moto ŋga li mo ɔŋwga e? 10 A ma hwa ɔŋgɔ hwarzɛ rzi a ohweya oŋgo moto wa njembu ama, Enyowa mɔɔ mo aŋgɔ, rzi a gbeya nanu, mɔɔ ŋmeni mo timba na monɛi. 11 Ndi hwa onda na hwetato, Rzi hwa woteya li aohwanɛlɛ wɔ na wɔ ema mamɛ hwa tanɛi ligbeya Yerzu.
LIYOME LA HWA GBEELI NA HWAHWAKE
12 Wunya wɔkɔ wo hweŋge hweyu, Yerzu a ma agba o meyoli o likanɛ Lohwɛ wuwu warzɛ. 13 Wuunya wo ma yahwe, a ma hwɛlɛ hwaohoweli hweni Rzi a hvɔrzo liyomɛ na hwahwakɛ, ema ama ika hwagbeeli. 14 Rzimoŋɛ (ama hwɛlɛhwɛ Petolo) ŋmanyaŋgo Andele, Yakohvo, Yowanirzi, Hvilipo, Watolomeyo. 15 Matiyo, Tomarzɛ, Yakohvo, e ŋmana wama Alihviyurzi, Rzimɔni ama hwɛlɛhwɛ Rzilɔti 16 Yudarzɛ ŋmama wama Yakohvo, na Yudarzi Izikaliɔti ema ama ahwirzɛ Yerzu.
MENAMƐ NA MEJEMA
17 Ama ɔŋdɔ na wɔ rzi, a tɛmɛ eki ema etalami. Eŋgindi ya hwaokoweli hweni hwa ma hwɛ aŋga, ndeŋga ewemba ya hwato hwa ma uweya o matoŋgo ma Yudeya, o Yeluzalemi, na o hwe kome hwe rzaawa ya Taya na Rzidoni, 18 hwa ma ja o li mo okaneya, na li wɔhwirzɛhwi nyambɛ jawu, hwaŋga ema hweliŋgɛ hwɛ wohwe hwe ma takirzɛ wɔ hvɛ hwa ma wohwirzɛhwɛ. 19 Hwato hwarzɛ hwa ma arza o li mɔɔkɔ ehwanja ŋginya ema uweya na mɔ o li hwa wohwirzɛ hwarzɛ. 20 A ma ɔŋgɔ hwaokoweli hweni rzi ao hwa ohweya ama, "monamɛ na inyɔ hwaokoweli hweni rzi a ohwa ama monamɛ na hwatakeli ehwanja likaneya la Lohwa, lihweli ndi e laanyu. 21 Monamɛ na inyɔ ema e oka njau maŋgɛ ehwanja e ujirzɛhwɛ. Monamɛ na inyɔ ema yeya luwa naŋgɛ ehwanja e o yɔ? 22 Monamɛ na inyɔ ema hwato hwa kou, na li e ndinda hwa wohwe, o lina la ŋmana moto; 23 "E okɛ monyɛŋgi o woŋgo wunya ehvanje etangi yanyu e koki jɔɔjɔ o ŋmanyu ehwanja nanu ndi irzaŋgo jawu hvɛ imatakirzɛ hwaohweli hwa hweliŋgɛ, 24 ndi mojema na inyɔ ema e nami ehwanja ema maa li arziolɛ 25 mojema na inyɔ ema e uja naŋgɛ, ehwanja e oka njau, mojema na inyɔ ema e uja naŋgɛ, ehwanja e ohwɛnɛ ndutu na luwa. 26 Mojema na inyɔ ehweli ema, hwato hwarze hwa e ohwana gbamu ehwanja nanu mɛnɛ hvɛ ndi irzaŋgo jawu I ma gbeyane hwaohweli hwa hweliŋgɛ.
NDIŊGƐ YA HWAKƆELI
27 Ndi na e ohweya inyɔ ema eno okaneya ema, eliŋgane hwaokoeli hwanyu, egbeeya hwa ŋga ema hwa e kɔu gbamu. 28 Enamirzɛ hwanga ema hwa ejema ekanɛlɛlɛ hwaŋga ema hwa etakirzɛ, 29 ehweli tɛ ema moto a ohvahvi tɛ o liyama, o mo engoweya hvɛ linɛi liyama. Ehweli tɛ ema moto a e wowani tɛ looki langɔ, orzi mo wunana hvɛ mongombe mo aŋgɔ 30 ŋgmba tɔ njɛ ema a ɔmbi tɔ njɛ hvɛ ao wowani mamɛ ema eehweli e yaŋgo o rzi keka li eyarza hvɛ; 31 gbeeya hwanei na oma owa hvɛ o arza ema wɔ hvɛ hwa ogbeeya. 32 Elingani tɛ hwanga ema hwa elingani ima nyai ya morzɛngi enge ehweli na inyɔ e? Ewɔ hwa wohwe hvɛ hwa lingani hwanga ema hwa hwa lingani. 33 Egbeeli tɛ gbamu hwanga ema hwa hweli gbamu na inyɔ, ima nyai ya morzɛŋgi eŋge ehweli na inyɔ e? Ewɔ hwa wowe hvɛ hwa gbeya nanu; 34 Ongirzɛ tɛ hwanga oahvitɛ ema hwa otimbirzɛlɛlɛ, ima nyai ya morzɛŋgi eŋge ehweli na inyɔ e? E wɔ hwa wohwe hvɛ hwa gbeya nanu li ambɛlɛ nanu ema hwa hwa timbirzɛlɛlɛ yarzɛ ema hwa ma hwa ongirzɛ; 35 Ndi e lingane hwa kɔeli hwanyu e hwa gbeeya gbamu e hwa ongirzɛ erzi arza ema hwa e timbirzɛlɛlɛ. Anga ndi etangi yanyu e olowa. E hwɛ hwa ana hwama ongo a karzami li aka hwarzɛ ehwanja mɔ ahweni iili na hwanga ema hwarza aɛkɛnɛi na ewɔ hwa wohwe 36 ehwɛnɛ meema me iili na oma rzango anyu hvɛ ahwɛni iili.
LIKAIRZƐ LA HWAN ƐI
37 E rza kairzɛ e rzija lihwɛ ema inyɔ hvɛ e kairzɛhwɛ. E rza tulɛ e rzija lihwɛ ema inyɔ hvɛ e tulɛhwɛ, e lakirzɛ, ema inyɔ hvɛ e lakirzɛhwɛ. 38 E ngmbe anga ndi inyɔ hvɛ e ngmbaahwa; limɛni la gbamu lirzɛɛhwi hwa rzɛkɛmɛlɛi, li hvuhva Li rzoweya o mahwɛhwɛ ma ŋgɔ. Ehwanja limɛni ema ogbeyani lɔndi hvɛ o mɛnɛhwɛlɛ. 39 Ama hwa kpɛɛya hvɛ mono ŋmana ama, "moto wa ndima a tanei o li timba e hvɛhvɛ ndima e? Rzekɛ wɔ hwahwakɛ hwa unda o ehvɔndi e? 40 E mookoweli a rza akai e mookoleli wa eni ndi tɔ ima mɔ ema a okowi gbamu, a ohwɛ ndi na e mookoleli weni. 41 Mamɛ ndenga e ɔŋgɔ i rzɔwe ja ehwambo ema e hweli o lirzɔ lama ŋmanyɔŋgɔ ndi o rzɛnɛ mɔkɔkɔ mo hweli o lirzɔ langɔ. 42 Ne otanɛi li ohweya ŋmanyɔŋgɔ ema ii ŋmanamowe inyɛ na ulɛ erzɔwɛ ema ehweli o lirzɔ la ŋgɔ e? E ma owa o rza tanɛi li ɛnɛ mɔkɔkɔ moohweli o lirzo laŋgɔ e? Owa moto wa mehvili loma li ulɛ mɔkɔkɔ moohweli o lirzɔ laŋgɔ deŋga o ɛŋɛ gbamu, o li ulɛ erzɔwɛ ema ehweli o lirzɔ lama ŋmanyɔŋgɔ.
GBEE NA HWE HVUMA HWEENI
43 Gbe wo gbamu a rza nyia hwehvuma hwe wohwe, nanu mɛnɛ hvɛ nagbee wo wohwe worzatanɛi li nyia hwa hvuma hwe gbamu. 44 Gbe tɛ wo hwiyahwa ndi na hwehvuma hweeni Rzao e rza komahwa o waŋga ya njenje tɔ hwe hvumaa hwe nyɔhvinya o hwe nyɛngɛnyɛ. 45 Moto wa gbamu a ohwa ndi hweya hwe gbamu ema hwe mohweli o ŋmema ŋmeni ndi e moto wa wohwe hvɛ a ohwa hweya hwe wohve, ema hwe mo hweli o ŋmema ehwanja, mamɛ ema yondi o ŋmema mo moto ɔndi e wana e ohwa.
HWA ƆŊGELI HWA AGO NA EWƆ HWA EETI
46 Mame ndeŋgatɛ e no hwɛlɛ Tata Tata; ndi e rza gbeya mamɛ na ohwa e? 47 Na e yuŋmɛlɛ mamɛ o ŋgo ema a no jeeya a hwɛni lihwɛ ema a hweya hweami rzi a hwe gbeya. 48 A hwe ndi na moto ema a ongi ndawo o mɔnongɔ ema mɔrzɔngɔu natɛɛ o ŋmanyu ya ewoma ya liyai Ehvonda etɔndɛ e ma ɔndɔ, meehwa me tɔndɛ me aɛ rzɛ eŋge ndawo ndi e rzi nyinge, ehwanja ema oŋgahwa gbamu. 49 Ndi ongo ema a hweya hweya hwe yami rzii a rzi hwe gbeyane, a hweli ndi na moto ema a ongi ndawo e rza ohvɛ mɔnɔngɔ. Ehvonda meehwa me tɔndɛ me ma ɛrzɛ enge ndawo e ma kpa rzi ewuweya yarzɛ.
LUKARZI HWEHVARZU LIRZAMBA 7
LILOKƐ LA E MOKANELI WA NJUMA
1 Ehvonda Yerzu a ma kulɛ li ohwa hwene hweya hweyarzɛ hwe ma hweyahwa na hwato, Rzi a kpeeya o Kapɛlnum. 2 Aŋga ndi a ma uŋmanɛlɛ e mo gbeeli wama e mokaneli wa njuma ema oŋgo mokaneli ama liŋgane rzai rzai, a ma ɔkirzɛ likombɛnɛ kpeli. 3 Oŋgo mokaneli ama hweya eŋganeli yama Yerzu, Rzi a oma hwambaki hwa wonya Yuda oma Yerzu, oli mo atɛkɛ nanu ema, a je aɛwohwirzɛ e mogbeeli weni. 4 Hwa ma uke oma Yerzu, rzi hwa mo atɛkɛ njɔjɔ ema, "Ono moto aŋgamɛnɛi ema o mo gbeeya nanu, 5 Ehwanja a liŋgani e mbowa yarzu, ndeŋga a e o ŋgeli hvɛ ndawo ya wheya hwɛ Lohwa. 6 Yerzu rzi a ɛndɛ na wɔ, o likombɛnɛ e ndawo, rzi e mokaneli amoɛɛn, rzi a oma i mbunda jeni, o li mo o hweya ema, "tata o rza atakirzɛ owa mɛnɛ, ehwanja na rza uki tɔ oŋgo ema otanɛi o likpeeya o ndawo yeni. 7 Ɔndeŋga na rzi luteya ema naje mbiti o mbaaŋgɔ. Ndi ohwa eya, e mogbeeli wami a wɔwɔ. 8 Ehwanja imba hvɛ mbiti na hweli ndi orze ya likaneya, ndeŋga imba hvɛ na hwɛni hwaaneli hwa njuma orze yami. Na ohweli tɛ ono, ema ɛndɛ a ɛndɛ na ɔnɛi jaa, aja. Na o hweya mogbeeli wami, gbeya ene, a e gbeya." 9 Ehvonda Yerzu ama hweye nanu, ama mo tameya. Rzi a eŋgowɛlɛlɛ e ŋgindi e ma mɔnɔŋgɔ, rzi a ohwa ama, Na e o hweya ema, na rzi lu, lini lilokɛ li ndɛnɛ tɔ o Irzaeli. 10 Rzi hwaŋa ema hwa ma omahwa, hwa timba o ndawo hwa uŋma oŋgo mogbeeli ama wɔwɔ.
YERZU AMA HVUMULE MOKURZE MO MOLANA ŊMANA WA ENI
11 O mburza ya hvonda, Yerzu ama ɛndɛ mbowa hvɔkɔ ema, ema hwɛlɛhwɛ Nain, hwaokoweli hweni na ŋgindi ndɛnɛ ema mɔnɔŋgɔ. 12 O likombɛnɛ leni la liyohva la kɔtɔ ya eŋge mbowa, Hwa ma wanɛ e hwembe ya moto, ema ama hwɛ ndi ehvowa ya ŋmana yama ŋyaŋgɛ ema ama hwɛ mokurze mo molana. Ŋgindi ndɛnɛ ema uweya o mbowa hvɛ ema hwɛ na mɔ. 13 Ehwonda tatɛ ama mo ɛnɛ ama mo okeya iili, rzi a mo ohweya ama "orza eya. 14 Rzi a ɛndɛ, a lɛmbɛ iwoŋgo, ewɔ ema hwa ma ji hwanɛ rzi hwa tɛmɛ. Rzi a ohwa ama, "ii mberza, tɛmɛ o ŋmanyu." Oŋgo ema ama ŋwa, rzi a liya o ŋmanyu a woteya li ohwa. Yerzu rzi amo ŋgmba nyaŋgɛ. 15 Wɔ hwarzɛ hwa ma lɛmbeya wɔŋgɔ, rzi hwa eka Lohwɛ "Hwa ohwa ema, "moohweli wa hweliŋgɛ mondɛnɛ ajo wurzeli. Lohwɛ ama jaa li oŋgowana hwato hwene." 16 Mene meyaŋgo me ama Yerzu me ma wuweya Yudeya warzɛ na imbowa ema ima kombɛnɛ.
YERZU WE NA YOWANIRZƐ E MOLUHWIRZELELI
17 Hwa okoweli hwama Yowanirzɛ hwama mo ohweya hwene hweya hweyarzɛ. Rzi a oma hwaokoweli hweni hwahwakɛ, 18 Rzi ahwa oma omba Tatɛ limo ijowa. "Owa ndi o hweli oŋgo ema ama hwɛnɛ olija, ŋga ja ambɛlɛ ndi ohvɛhvɛ e? 19 Ehvonda hwaŋga hwato hwama uke oma Yerzu, Rzi hwa ohwa ema,"Yowanirzɛ emo luhwirzeli ndi a jomi o mbaaŋgɔ lija, ema ŋga jaambɛlɛ ndi ohvɛhvɛ e." 20 Oliŋgi lirzako mɛnɛ Yerzu ama wɔhwirzɛ rzai rzai ema hwama ɔkirzɛ merziyo na nyabbɛ, na hwelinŋgɛ hwe wohwe, ndeŋga rzairzai ja ndima ja hwato hvɛ ima ɛnɛ. 21 Yerzu rzi a hwa alahwɛ ama, "Etimbe e ohweya Yowanirzi manɛ ema e ɛni na ehweyi; I ndima jɛni, wɔ hwa mboko hwa ɛndɛ, ewo hwa mɛloŋgɔ hwa tanirzɛhwɛi, Ewɔ hwa hwetooto, hwa hweya, Ewɔ hwaŋweli hwa hvumulɛhwɛi, ndeŋga meyango me gbamu hvɛ me e ohwahwɛlɛ hwatakeli. 22 Monamɛ na oŋgo ema a rza kpelɛi o nyai ya ami. 23 Ehvonda hwaokoweli hwama Yowanizɛ hwama timbe, Yerzu rzi a woteya li oheya e ŋgindi li hvomɛnɛ Yowanizɛ "mamɛ e mɛndɛ o morzaŋjɛ, li ɛnɛ e? 24 E rzenje tɛ nanu, mamɛ rzɔ emɛndɛ li ɔŋgɔ e? Moto ama wɔtɔ meŋgombe me gbamu e? 25 Hwaŋga ema hwa wɔtɔ maato mandɛnɛ, na li aŋgmbɛ naa hwewaŋgi, hwa I hweli ndi ondawo ja hwakaneli, 26 Ono ndi ahweli emɔ ema ama tilahwɛlɛ ema, ɔŋgɔ tɛ, na e o meya emogbeeli wami o worzo wanyu, olirzeeya e njiya yanyu o worzo wanyu. 27 Na e o hweya ema, "o hwaŋga ema hwa nyiahwi molana orza enje tɔ mɔkɔ a akai Yowanirzi, ndi oŋgo ema aarzihwirzɛ o likaneya la Lohwa mɔ ndi a mo akai. 28 Hwato hwarzɛ, na mɔ mɛnɛ hvɛ na hwarzaŋgeli hwa njaŋge hwa ma hweya hwene hweya hwe ama Yerzu, Rzi hwa emeya nanu ema enjiya yama Lohwɛ e tɛnɛnɛi, Ehwanja Yowanirzi ndi ama hwa luhwirzɛ. 29 Ndi I hvalirzaɛ na hwa hwiyeli hwa mbenda, hwa ma hvaka mamɛ ema Lohwɛ ama hwa tɛirzɛlɛl, Ehwanja hwa rzi luhwirzɛhwɛ naɛYowanirzi. 30 Mamɛ na tanɛ li kiitirzɛnɛ hwato hwa ene nyɔŋgɔnyi e? Nɛ hwa hweli e? 31 Hwa hweli ndi na hwana ema hwa liyai o liwɔ rzi hwa ohwanɛ mɔkɔ na ɔnɛi, nanu ema, I ma toŋga e hvole ndi e rza rzai, ŋgɔmɔ Ima emba mɔrzɔkɔ mo kpeli ndi erza eyi luwa. 32 Yowanirzi e moluhwirzeli, ama jaa, arzi le moleli, arzi nyɔ mimba, ndi ema ohwa ema a hweli ndi elimo. 33 Eŋmana moto amaja, a la, a nyɔ, rzi e ohwa ema, E ɔŋgɔ tɛ ono moto wan njɔŋgu na mboma, yorza ya hwa rzaŋgeli hwa njaŋge ya likaneya na ewɔ hwa wohwe. 34 Ndi lihwiye li ondi, lihwiyɛnɛi na hwaana hweni hwarzɛ.
MOLANA WA WOHWE AMA NYALƐ YERZU LIYƆKI
35 Moto mɔkɔ wa hvalirzaɛ, ama yowɛ Yerzu ema a je a le na mɔ Rzi a ɛndɛ o ndawo yama oŋgo moto wa hwalirza, rzi a liya o hweleeli. 36 O eŋge hvonda mɛnɛ, molana mɔkɔ wa wohwe ama hwɛ o eŋge mbowa, ama hweya ema Yerzu a hweli ala, o ndawo yama oŋgo moto wa hvalirzaɛ, rzi ajaana ŋmana wa itɛŋgɛ ema ima onda na liyɔki la hvɛɛhvɛ. 37 Na oma a ma mo tɛmeya o mburza, o mataŋga meni rzi a eya, rzi a woteya o li rzɔhvirzɛ mataŋga mama Yerzu na miirzɔli meni. Rzi a ma titowana lihvumbu leni la mohvo, rzi a rzɔmbɔ, mataŋga meni, rzi a mo rzowa liŋgi liyɔki o mataŋga. 38 Oŋgo moto wa hvalirzaɛ ema a ma mo yowɛ, a ma ɛnɛ nanu rzi a ohwanɛ mɔ ŋmiti ama, ono moto ama hwɛ tɛ moohweli wa hweliŋgɛ oma a hwi nanu ema, ono molana a mo lɛmbi a hweli ndi wa wohwe." 39 Yerzu ama mo alahwɛ ama, "Zimɔni, na hwɛni eya o li e ohweya Rzimɔni ama, ‘mookoleli’ ohwa." 40 Hwato hwahwakɛ hwa ma oŋgana mooŋgirzɛ wa mali mɔkɔ mali, mɔkɔ ama oŋga hwegbe hweta hwe khava ɔnɛi hvɛ mɛni meta, meɛkhava 41 "Tɔ mɔkɔ wawu arzi ohve o li mo timbirzɛlɛlɛ, weŋganɛlɛ ama hwa lakirzɛ. Naŋg rzɔ ima mɔ wawu a mo liŋgani li aka ɔnɛi e? 42 Rzimɔni rzi alahwɛ ama, "na ɔŋgɛlɛ ema oŋgo ema ama etahwa rzairzai Yerzu rzi amo alahwɛ ama o kairzɛ gbamu; 43 Rzi a eŋgɔwɛ lɔŋgo ongo molana, a ohweya Rzimɔni ama, "O ɛni ono molana? Na kpeeli o ndawo yaŋgɔ, o rza no ŋgmbeli hvɛ tɔ maliwa o li rzorza mataŋga mami, Ndi ono mɔ a rzɔhvirzɛi mataŋga mami na miizɔli meni, rzi a ma titowi hvɛ na lihvumbu leni. 44 Owa rzi no rzɔmbe, ndi ono molana, liwoteya na kpeeli arza hwɛmi li rzɔmbɔ mataŋga mami. 45 Owa orza nyalɛi moohvo ŋmami na liyɔki, ndi ono, ano komi liyɔki la hvɛhwɛ o mataŋga. 46 O eŋganɛlɛ na e ohweya ema, wohwe gbeni ema wo koki rzai rzai wo lakirzɛhwɛi, e whwanj mɔ ama liŋgna jɔɔjɔ, ndi oŋgo ema a liŋgani teiŋ a lakirzɛhwɛ hvɛ ndi teiŋ. 47 Rzi Yerzu a o ohweya oŋgo molana ama, wohwe waŋgɔ wo lakirzɛhwɛi." 48 Hwanɛi hwaɛni hwa woteya li ao hwanɛlɛ ema, "Njɛ hvɛ a tanɛi o li kakirzɛ wohwe e?" 49 Yerzu rzi a o hweya oŋgo molana ama, "lilokɛ laŋgɔ li oŋgirzɛ ɛndɛ na eyɔlɛ."
LUKARZI HWEHVARZU HWAMBI 8
ŊMANAA MO EMOO NELI
1 O mburza ya hwene hweya, Yerzu ama ɛndɛ na liyome leni la hwaokoweli na hwahwakɛ eki yarzɛ, o ma mbowa na hwekome, li ohwea meaŋgo me gbamu me likaneya lama Lohwɛ. 2 Loŋgo la hwalana wɔ hvɛ ema hwa ma hwɔhwirzɛhvɛ i nyambɛ ja hweliŋgɛ hwe wohwe, na Maliyɛ ama hwɛlɛhwɛ Madalenɛ ema ama ulɛhwɛ hweliŋgɛ hwe wohwe lirzamba. 3 Yowana jojiyɛ wama Kurza, e moogbeeli wa ndawo ya ma Helode na Rzurzana na hwa hvɛhvɛ hwa ma oŋgowana Yerzu na hwaokoweli hweni o hweluhweli hweyawu. 4 Na oma ŋgindi ndɛnɛ e ma arzaŋganɛ hwato hwa ma uweya hwekome na hwekome o li jeeya Yerzu, rzi a hwa kpeeya mono ŋmana ama. 5 "Mooneli mɔkɔ a ma ɛndɛ li ona e mbota yeni, na oma ama hwɛ li ona loŋgo lima unda o njiya, ima laalahwa rzi hwenɔni hwe ji la. 6 Loŋgo i ma unda o ewoma ya liyai, ehvonda i ma wurze i ma ŋwa, ehwanja i rzi luwe mɔnyɛ. 7 Enɛi mbota yɔhvɛ e ma unda ndi o njenje, rzi e oŋga na i njenje iŋgi njenje ima uhwirzɛ e mbota rzi e ŋwa. 8 Ndi loŋgo la mbota ema i ma unda o mɔnyɛ mo gbamu i ma oŋga, rzi i ŋya egbe ya ŋgeli li aka mam e ma onahwa. A ma ohwe nanu, rzi a ohwa hvɛ ama: "tɔ njɛnɛ a hwɛni mato o li hweya, a hweye." 9 Hwaokoweli hweni rzi hwa mo ijowa ema: "mamɛ e hweli jaanda ja mono ŋmana e"? 10 Rzi a ohwa ama, "E ŋgmbaahwi o li hwiya hweya hwe utami hwe likaneya lama Lohwɛ, ndi e hweli tɛ na hwanɛi, na hwa kpɛɛya ndi meana, aŋga ndi to nɛ hwa ɔŋgɔ, hwa rza ɛnɛ, tɔ nɛ hwa hweya hwa rza hvɔŋgɛ. 11 Jaanda ja mono ŋmana jɔ iini: "E mbota e hweli ndi eya ya Lohwa. 12 E mbota e undi o njiya ehweli ndi hwaŋga hwa hweya rzi mokarzɛ aja a hwa wowana eya ya Lohwa o meema meyawu, ema hwa rzi ja li lokɛ, na li oŋgirzɛhwɛ. 13 E mbota e undi o ewoma ya liyai, e hweli ndi, hwaŋga ema hwa wowi eya ya Lohwa na mɔnyɛŋgi o meema me awu, ndi hwa rza ohvi meaŋga. Hwa lokɛ o ŋmana hvonda, ndi ehvonda ya makekirzɛnɛ o ma hwa ma kpa. 14 E mbota e ma undi o njenje e hweli ndi, hwaŋga hwa hweya ndi na oma hwa ɛndɛ eya awu, hweya hwe rze hwe hwa liŋga, monamɛ na mɔnyɛŋgi mo ene rze mo rza hwa oŋwirzɛ o li nyai mbota. 15 Ndi embota e undi o mɔnyɛ mo gbamu e hweli ndi hwaŋga ema hwa hwɛni hwɛɛmɛ na meema me gbamu, ema hwa hweya eya, rzi hwa e uta, na liajulɛ o linya mbota.
ETULU E IKAHWI O ŊMANYU
16 Tɔ moto a rza hvaalɛ etulu rzi a e ika o teni ya itɛŋgɛ tɔ o rze ya linɔŋgɔ. Ndi a e ika ndi o eki ya ŋmanyu, aŋga ndi ewɔ ema hwa kpeeya hwa ɛnɛ eki yarzɛ. 17 Ehwanja o rza enje tɔ eya e utama ema e rza hwiyɛnɛ ndeŋga o rza enje tɔ eya e hwandahwa ema e rza hwiyɛnɛ, tɔ ewurzirzɛhwɛ o ŋmete. 18 O eŋganɛlɛ luteya kɔikɔi na oma o okaneya. Tɔ njɛ ema a ohvi a o ŋgmbaahwa hvɛ rzai rzai, oŋgo ema a rza ohvɛ, tɔ eŋge a luteli ema a ohvi, hwa mo wowana eyɔ.
YERZU NYAŊGƐ NA WONYANYAŊGO
19 Wunya wɔkɔ Yerzu nyaŋgɛ na wonyanyaŋgo hwa ma ja li mo ɛnɛ, ndi hwa rzi tanɛ li mo kombɛnɛ, e ŋgindi ye eŋga. 20 Moto mɔkɔ rzi a mo ohweya ama, "nyɔŋgɛ na wonyanyɔŋgo hwa tɛmi o ewoka, hwa arza li o ɛnɛ." 21 Rzi a mo alahwɛ ama, nyaŋmbwami na wonyaŋgo hwa ami hweli ndi hwaŋga ema hwa hweya eya ya Lohwa rzi hwa e ika o li e gbeyana."
YERZU AMA YƆLƐ MUULI
22 Wunya wɔkɔ Yerzu ama ohweya hwaokoweli hweni ama, inyɛ jaaka ɛnɛi ehvarzu ya yulu, Rzi hwa kpeeya o wɔlɔ li aka. 23 O hwe akeli hwe awu, rzi anaŋga. Muuli mo ma jaa o eŋge yulu, na nyai ema wɔlɔ wo ma onda na malihwa, o eŋganɛlɛ hwa ma onda na wɔŋgɔ. 24 Hwa okoweli hwa ma ɛndɛ rzi hwa mo imowa, rzi hwa mo ohweya ema, Tata, Tata, rzɛkɛ ja inda! Rzi a tɛmɛ, a lomeya muuli, na eehwe ya malihwa, Rzi muuli mo kuwa, eki yarzɛ ehwɛ ŋmɛɛ. 25 Yerzu rzi a ijowa hwaokoweli hweni ama, "one lilokɛ lanyu lihweli e"? O wɔŋgo na hwetamirzeli rzi hwa ijowanɛ mɔkɔ na ɔnɛi "njɛ ono e? ema akaneya hvɛ na muuli na malihwa rzi hwe mo hweyana e?
HWE WOHWIRZELI HWE MOTO AMA OHVA ELIŊGE YA WOHWE
26 Hwa ma hwɛ lɛndɛ o mbowa ya Gelarzanɛ, ema ehweli ɛnɛi ehvarzu ya yulu, likombɛnɛ Galileya. 27 E hwonda Yerzu a ma tɛmɛ o toŋgoŋgɛ ya yulu, moto mɔkɔ ema ama ohva eliŋgɛ ya wohwe a ma uweya o mbowa lija oli mo uŋma. Ono moto a rzi rzoŋgɛ maatu, tɔ li liya ndawo o hvoka hvonda, ndi ama liya ndi o rzɔŋgɔ. 28 Na oma ama ɛnɛ Yerzu, rzi a eya o ŋmanyu, a kpa o mataŋga meni, a tɛ hvɛ na lilo li karzami, ii Yerzu e ŋmana wama Lohwa li karzami, "mamɛ ono arzana e? Na o a atɛkɛi orzi no takirzɛ!" 29 Ehwanja Yerzu a ma kaneya eŋge eliŋgɛ ya wohwe o liwurza oŋgo moto onyo. Tɔ nɛ ono moto ama kakakahwe ŋgɔkohwi, o maa na o meende na li ɔŋgɔwaɛlɛ, ama tuma i ŋgɔkohwi, ndi eŋge eliŋgɛ ya wohwe ema ŋmɛndɛnɛ hweki ema hwe ma utama. 30 Yerzu rzi a mo ijowa ama, "liina aŋgɔ njɛ e"? Ama mo alahwɛ ama, Jɔjɔ, Ehwanja jɔjɔ ja hweliŋgɛ hwe wohwe hwe ma mo kpeeya o nyo. 31 Rzi hweŋge hweliŋgɛ hwe mo a tɛkɛ rzai, ema a rzi hwe kaneya o li unda o ndihva. 32 Gbaka wo ŋgowa wo ma hwɛ li la aŋga toŋgongo ya mooli, hweŋge hweliŋgɛ hwe wohwe hwe ma atɛkɛ Yerzu ema, a hwa hwɛmɛ hwa kpeeya o teni ya iŋgi ŋgowa, Rzi a hwa ŋgmba woŋja. 33 E hvonda hwe ma wurze o ma oŋgo moto, rzi hwe kpeeya o iŋgi ŋgowa, rzi woŋgo gbaka wo rzihwa lihwaŋgi o moŋgo mooli wo kpeeya o yulu rzi wo inda. 34 E hvonda whaŋga ema hwa ma ɔŋgeya i ŋgowa, hwama ɛnɛ mamɛ ema egbeyɛnɛi, rzi wha hwaŋga lɛndɛ li ohweya e mbowa na mahwende; 35 Rzi hwato hwa wurza lɛndɛ li ɔŋgo mamɛ e gbeyɛnɛi, Hwa ma je oma Yerzu, rzi hwa uŋma oŋgɔ moto ema hweliŋgɛ hwema wurze, a liyai o mataŋga mama Yerzu awɔtirzɛhwɛi ndeŋga a hweli gbamu; rzi hwa oka wɔŋgɔ. 36 Hwaŋga ema hwa ma ɛnɛ nanu, hwa ma ohweya hwato na ema oŋgo moto wa hweliŋgɛ hwe wohwe awɔhwɔrzɛhwei. 37 Rzi hwato hwarzɛ hwa eŋge erzooka ya Gelarzenɛ hwa ohweya Yerzu ema aanjiye, ehwanja wɔŋgɔ wo ma hwa aka, rzi a kpeeya o wɔlɔ ɛndɛ e yeeni. 38 Oŋgo moto ema hweliŋgɛ hwe wohwe hwe ma wurze aatɛkɛ o li ɛndɛ na Yerzu, ndi Yerzu a ma mo timbirzɛ rzi a ohwa ama, 39 "Timba o mbowa o ohwe mamɛ Lohwɛ a o gbeeli" Rzi oŋgo moto a ɛndɛ, a o hweya e mbowa yarzɛ mamɛ ema a mo gbeli.
E NGƆNDƆ EMA ŊWA NA MOLANA AMA O IKIRZƐ
40 E hwonda Yerzu a ma timbe, ŋgindi ema mo kɔmɔ, e hwanja hwa ma hwɛ li mo ambɛlɛ. 41 O eŋge hvonda mɛnɛ, moto mɔkɔ ema ama hwɛlɛhwɛ Yaliɔrzi e mokaneli wa ndawo ya miteli me eŋge mbowa a ma ja rzi a kpa o mataŋga ma ma Yerzu, o li mo a tɛkɛ ema, a je o ndawo yeni. 42 Ehwanja ehvowa yeni ya ŋgɔdɔ, ya liyome la meya na mehwakɛ aa ŋwa. Na oma Yerzu ama hwɛ li ɛndɛ, e ŋgndi ema mo ihvirzɛnɛ. 43 Ndeŋga o ma hwɛ molana aŋga ema a ma oka e nyambɛ ya hwalana, hvoka ya liyome la meya na mehwakɛ, ndi to moto a rzi tanɛ li mo wɔhwirzɛ. 44 A ma jaa o mburza yeni, rzi a lɛmbɛ lirzuku la moŋgombɛ ŋmeni, o wotɛmɛtɛmɛ maija ema ma ma mo wurza rzi ma kɛɛya. 45 Yerzu rzi a ijowa ama, ɔɔ jɛnɛ ano lɛmbi e? Hwarzɛ hwa ma rzɔrzɔ, rzi Petolo a i jowa ama "Tata, e ŋgindi e koki wɔndi wo aiinɛlɛ. 46 Yerzu rzi a ohwa a ma, "moto a no lɛmbi; Na hwi nanu ema e ŋginya e no anji. 47 Oŋgo molana a ma ɛnɛ nanu, ema a rza tanɛ a ɛndɛ ema a rza embahwɛ, a ma ja na mokambiya a kpa o mataŋga meni. O marzo ma hwato hwarzɛ, a ma o hwa mamɛ ndeŋgatɛ a mo lɛmbi, na n e nyambɛ yeni ya maija e wɔwɔ o wotɛmɛtɛmɛ. 48 Yerzu rzi a mo ohweya ama, "ii ŋgɔndɔ, lilokɛ li aŋgɔ li o ŋgirzɛ ɛndɛ na eyɔlɛ." 49 Na oma Yerzu ama hwɛ li ohwa, moto mɔkɔ ama uwɛlɛlɛ o ndawo yama Yaliɔrzi e mokaneli wa ndawo ya miteli "rzi a moohweya ama, e ŋmana wa aŋgɔ a ma ŋwa, orza takirzɛ moleelɛ hwɛ." 50 Na oma Yerzu ama hweye nanu, rzi a ohweya Yaliɔrzi ama, "O rza oka woŋgɔ; ndi lokɛ, a wɔhwirzɛhwɛ! 51 E hvonda Yerzu ama uke o ndawo yama Yaliɔrzi, a rzi imanɛlɛ nanu ema ohvɛhvɛ moto akpkeeya na mɔ, li aka tɛ Petolo na Yowanirzi na Yakohvo, na erzaŋgo na enyaŋgo ya e ŋmana. 52 Ndi tɔ nanu hwato hwarzɛ hwa ma hwɛ ndi o ndutu na luwa Yerzu rzi a hwa ohwa ama, "e rza eya hvɛ arza ŋweli anaŋgai ndi ijɔ" 53 Rzi hwa mo yɔeya, ehwanja hwa ma hwiya nanu ema ama ŋwa. 54 Rzi a mo wowa liya leni, a ohwa ama, ŋmanami Tɛmɛ o ŋmanyu. 55 Eliŋgɛ yeni ema timba, rzi a tɛmɛ o ŋmanyu. Rzi Yerzu a hwa ohweya ama, emo ŋgmbe yoma a le. 56 Rzaŋgɛ na nyaŋgɛ hwa ma tama, rzi a wa ohwya ama, hwarzi ohwa mamɛ ema e gbeyɛnɛi.
LUKARZI HWEHVARZU LUUHWA 9
HWE OMELI HWE LIYOMƐ LA HWA OKOWELI NA HWAHWAKE
1 Wunya wɔkɔ Yerzu ama hwɛlɛ liyome leni la hwaokoweli na hwahwakɛ, rzi a hwa ŋmba ŋginya na maimbi, o li hvaya hweliŋgɛ hwe wohwe na li wɔhwirzɛ i nyambɛ. 2 Rzi a hwa oma, ema hwa ɛndɛ o li ohwa meaŋgo mɛ likaneya lama Lohwɛ na liwohwizrzɛ ewɔ hwa nyambɛ. 3 Rzi a hwa ohweya hvɛ ama, erzi wowa tɔ yoma o hwɛɛndeli hwe anyu, tɔ motimbo, tɔ likpa tɔ moleli, tɔ woli, tɔ ehvɛhvɛ mbɔti. 4 Tɔ ima nyai ya ndawo ema e kpeeli, e liya aŋga natɛɛ e hwɛmɛ eŋge mbowa. 5 E hweli tɛ ema, hwato hwa rza e o kpɛlɛ tɛ, e hvuhvuwe i rzɔwɛ ja mataŋga manyu, o hwewurzeli hwe anyu, hwe eŋge mbowa, o li hwɛ na mboŋgi li hwa hvomɛnɛ. 6 Rzi hwa wurza o li ɛndɛ, o mambowa,o li ohwa, eya ya Lohwa, na li wohwirzɛ hwato eki yarzɛ. 7 Helodɛ e mokaneli a ma hweya hwene hweya hwe ma gbeyɛnɛ, a ma tama, ehwanja loŋgo hwa ma ohwa nanu ema Yowanirzi mɔ ndi ahvumu o kpeli. 8 Hwanɛi hvɛ, rzi hwa ohwa ema "Eliyarzɛ mɔndi awurzi", loŋgo hvɛ rzi hwa ohwa ema, "moohweli mɔkɔ wa kohvaa mɔ ndi a timbi o loŋgɛ." 9 Helodɛ rzi a ohwa ama, "imba ndi na ma kɛ Yowanirzi moohvo, njɛ hvɛ ono ema nahweyana hwene hweya e? Rzi akeka li arza o li mo ɛnɛ.
HWE LIRZELELI HWE HWEKOLI HWETA HWE HWATO
10 E hvonda hwaokoweli hwa ma timbe, hwa ma ohweya Yerzu mamɛ ema hwa ma gbeye, Rzi a hwa wowa, a hwa ndɛnɛ mbowa hvɔkɔ ema e hwɛlɛhwɛ Hwerzaida. 11 E ŋgindi ema hweye nanu, rzi e mo oŋgama. A ma hwa kɔmɔ rzi a hwa ohweya eya ya likaneya lama Lohwɛ, rzi a wɔhwirz hvɛ hwaŋga ema hwa ma arza liwɔ hwirzɛhwɛ. 12 O lirzako la ŋmerze mo ŋgombe, liyomɛ la hwaokoweli na hwahwakɛ hwa ma ja li mo oŋgama rzi hwa ohwa ema, "ohweya e ŋgindi yɛndɛ o mbowa na o hwekome hwe toŋgoŋgo, o li arza moleli, na li arza hweki hwe hwenaŋgeli, ehwanja i hweli ndi eki e utami. 13 Rzi a alahwɛ ama, "inyɔ mɛnɛ e hwa ŋmgbe yoma hwa le "wɔ hvɛ rzi hwa alahwɛ ema i o hvi nde hweyolo hweta na nyama ja malihwa ihwakɛ. Ehweli tɛ nanu jɛndɛ ndi o li andeya ene ŋgindi moleli." 14 Eya ya hwekoli hweta hwe hwato hwa ma hwɛ aŋga, ndi a ma ohweya hwaokoweli hweni ama, "e hwa liilɛ matuta ma meni meta, meni meta" 15 Hwa okoweli hweni hwa ma gbeya nanu, rzi hwato hwarzɛ hwa liya o rze. 16 A ma wowa hweŋge hweyolo hweyatanɛ, na inyama ja malihwa jaa hwakɛ, rzi aɔŋgɔ o ŋmanyu ya Lohwa, a eka Lohwɛ, a hwɛndɛ hweyolo, rzi a hwe ŋgmba hwaokoweli o li hwe hwaeya hwato. 17 Wɔhwarzɛ hwa ma laa, hwa ma uja, rzi hwaokoweli hwa rzaŋga liyomɛ la ŋgata na ihwakɛ i ma onda na hwehvetɛlɛ.
LI ATATOWE LAMA PETOLO
18 O eŋge hvonda mɛnɛ Yerzu ama aa tindɛ o li ɛndɛ o likanɛ, hwaokoweli hweni hvɛ hwa ma hwɛ na mɔ, rzi a hwa ijowa ama "njɛnɛ eŋgindi e ohwa ema imba na hweli e?" 19 Rzi hwa alahwɛ ema," Loŋgo hwa ɔhwa ema o hweli ndi Yowanirzi e mo luhwirzeli; hwanɛi hvɛ hwama Eliyarɛ, ndi hwa hvɛhvɛ, hwama moohweli wa hweliŋgɛ mɔkɔ wa kohwaa mɔ ndi ama hvumuwɛ." 20 Rzi a hwa ijowa ama, "njɛ inyɔ hvɛ e ohwa ema imba na hweli e?" Petolo rzi a alahwɛ ama, "E Kilirzito yama Lohwɛ." 21 Yerzu ama hwa kokohwɛlɛ nanu ema, "hwa rzi ohwaya tɔ moto ene eya." 22 Rzi a ohwa ama, "e ŋmana moto a hwɛni litaka o hweya rzai rzai, na lirzɔrzɔwɔ na hwambaki na hwaohweli hwa hwelinŋgɛ hwa mbaki, na hwaokoleli hwa mbenda, ndeŋga a hwɛni li oŋwahwa, rzi o menya ema me ukirzɛ meyao a hvumuwa! 23 Rzi a o hweya hwarzɛ ama tɔ njɛ ema ajaa na imba, a hwɛni li a rzirzɛ mɔ ŋmiti, rzi a wowa e mbarza yeni wunya tɛ o li no nɔŋgɔ. 24 Tɔ njɛ hvɛ ema arza o li aŋgoweya loŋgɛ leni a li wɔlɛnɛ, ndi tɔ ŋjɛ hvɛ ema a wɔlɛnɛi loŋgɛ leni o nyai yami a li aŋgoweli. 25 Ima gbamu wohweli moto olihwɛnɛ erze yarzɛ, rzi a wɔlɛnɛ mɔ ŋmiti e? 26 Tɔ njɛ ema a no kani irzɔni, na hweya hweyami, eŋmana moto hvɛ amo okana irzɔni, ehvonda aja o eluhwe yeni na eyɔ yama Rzaŋgɛ na i Aŋgeli ja wotani. 27 Na e ohweya e jɔkɛ, loŋgo ema hwatɛmi anu hwarza o ɛne kpeli, ndeŋga hwa ɛnɛ likaneya lama Lohwɛ.
LI AEŊGOWE LA MA YERZU
28 Eya ya menya wambi me maaka, ema Yerzu ama ohwe hwene hweya, rzi awowa Petolo, Yowanirzi na Yakohvo a hwa agbana o ŋmanyu ya hvako o likanɛ. 29 Na oma ama hwɛ likanɛ, ehwɛeli yaworzo weni, ema aeŋgowɛ, megombe meeni hvɛ me ma aeŋgowɛ ndi ŋgɛi ŋgɛi naa liŋmɛti la Lohwa. 30 Hwato hwa hwakɛ Morze na Eliyarzɛ, 31 Hwa ma wurza na merzɔmbirzɔmbi rzi hwa ohwa wɔ na Yerzu. Hwa ma ohwa ndi lihvomɛnɛ yɔndɔ yeni, ema mɔ ama hwɛnɛ li ondirzɛ o Yelurzalem. 32 Petolo wɔ na imbunda jeni, hwa ma hwɛ li naŋga ijɔ, e hvonda hwama imowe, hwa ma ɛnɛ ŋmɛɛneni moma Yerzu na hwaŋga hwato hwaahwakɛ hwa ma tɛmɛ na mɔ. 33 Na oma hwaŋga hwato hwaahwakɛ hwa ma liye Yerzu aŋga, Petolo rzi amo ohweya ama, Rzaŋgo, ehweli gbamu, ema iliya anu oma. Inyɛ i oŋge mawondo mayao - lɔkɔ e laŋgɔ (A rzi hwiye mamɛ a ma ohwe) linɛi e la ma Morze – linɛi hvɛ e lɔ la ama Eliarzɛ. 34 Na oma ama hwɛ li ohwa, limbaki lima rzihwa, rzi li hwa liŋga, rzi hwa lɛmbeya wɔŋgɔ, oteni ya liŋgi limbaki. 35 Lilo lima uweya o limbaki, rzi li ohwa ema, "ŋmana ami ono, ema na hvɔrzi, e mo hweyane." 36 Ehvonda ema liŋgi lilo li ma ohwe rzii wa ɛnɛ nanu ema Yerzu ama liiya ndi mɔ ŋmiti. Hwaokoweli weni hwa ma uta hwene hweya o meema meawu, hwa rzi oweya tɔ moto mamɛ hwa ma ɛn o eŋge hvonda.
LI WƆHWIRZƐ WA MBERZA WA ELIŊGE YA WOHWƐ
37 Wɔnei wunya ema hwa ma uweya o hvako, ŋgindi ndɛnɛ e ma mo unma. 38 Moto mɔko a ma hwɛ o enge ngindi a ma hwɛlɛ o ŋmanyu ama "mookoleli; na o a tɛkɛ manu ema ɔŋgɔ ŋmana wami; e hvowa yami ya ŋmanu. 39 Eliŋge ya wohwe e mo urzuweya o wotɛmɛtɛmɛ a woteya li tɛ, e mokpirzɛ rzii a hvokowa rzii i hvulu ja mo wurza o wana. E rzi mo hwɛmɛ karzi o enga yɔ yaa mo hvanga. 40 Na maatɛkɛ hwaokweli waŋgɔ o li e hvaya ndi hwa rzi tanɛ. 41 Yerzu rzii a owa ama "ii inyɔ e ne nyɔŋgɔni ya ikɔli ja mato; na liya na inyɔ na li e liyalɛnɛ natɛɛ na ima hvonda e? Jana ŋmana wa aŋgɔ anu." 42 Na oma e ŋmana a ma hwɛ li ja eŋge elingɛ e ma mokpirzɛ na li hvokowa, a wɔhwirzɛ oŋgo ŋmana rzii a mo ŋgbaa rzaŋgɛ. 43 Hwarzɛ wha ma tameya e ŋginya ya ma Lohwɛ. Na oma hwarzɛ hwa ma tameya mamɛ Yerzu a ma gbeye, rzii a ohweya hwaokoweli weni ama, 44 "E o kaneya kɔikɔi mamɛ na arza li e ohweya. A ŋwana moto a hweni li a hwirzɛhwɛ o whato." 45 Ndi wha rzii hvɔŋgɛ janda ja ene eya. E ma wa utameya, o eŋga hwa rzi (hvɔŋgɛ) hwiye, rzi woka woŋga o li mo ijowa eyɔ.
NJƐNƐ A OHWƐ Ɛ MONDƐNƐ E?
46 O ma hwɛ mbunak na hwaokweli weni o li hwiya jɛnɛ a o hwɛ e mondɛnɛ. 47 Yerzu a ma a embɛ maluteya mawu rzii a wowa ŋmana morzali a mo tɛirzɛ o tiŋoŋgo yeni. 48 Rzii a wa o hweya ama? To jɛnɛ ema a wohwi ono ŋdenga tɔ njɛnɛ ema a no wohwi imba a wohwi oŋgo ema a no omi. Ehwanja oŋgo ema aarziwirzɛ o tiitemi ya anyu - mɔndi a hweli e mɔ ndɛnɛ." 49 "Yowanirzɛ rzii a ohwa ama, "Rzaŋgo" "I ma ɛnɛ moto a wurzirzɛ hweliŋgɛ hwe wohwe o lina (laŋgo) li aŋgɔ rzii i keka li mo keka ehwanja a rzii hwɛ mɔkɔ wa arzu." 50 Yerzu rzii a ohwa ama, "E rzi mo keka ehwanja tɔ jɛnɛ ema a rza e teŋgɛnɛ a hweli ndi na inyɔ."
LITENGENEHWE LA MA YERZU O RZAMALIA
51 Na oma e hvonda yeni ya li wowahwa o ŋmanyu ya Lohwa e ma kombɛnɛ, Yerzu a ma arzekɛlɛ li ɛndɛ o Yelurzalem, 52 Rzii a oma hwagbeeli o worzo, hwa ma ɛndɛ mbowa hvɔkɔ ya Rzamaliya o lirzekeya hwejeeli hweni. 53 Ndi hwato hwa eŋge mbowa hwa ma emeya ehwanja ama tukaneya ndi li ɛndɛ o Yelurzalem. 54 Ehwonda hwaokoeli hwa ɛni Yakohvo na Yowanirzɛ hwa ma ɛnɛ nanu, rzi hwa mo ijowa hwama, "Ii Tata o arza nanu ema i hwɛlɛ munya mo uuweya o ŋmanyu ya Lohwa mo hwa oŋhwa e? 55 Ndi Yerzu a ma aegowɛ rzii a hwa lomeya, 56 Rzii hwa ɛndɛ ehvɛhvɛ mbowa.
ETANGI YA LINƆNGƆ YERZU
57 Na oma hwa ma hwɛ li ɛndɛ e njiya yarzɛ, moto mɔkɔ rzii a mo ohweya ama, "Na o nɔŋgɔ tɔ ima eki o ɛndɛ." 58 Yerzu a ma a lahwɛ ama, "Hwerzo hwe hweni hvoko, hwenɔni hvɛ hwe hwɛni muumba, Ndi e ŋmana moto mo arza hwɛni tɔ eki a nangɛlɛ moohvo ŋmeni. 59 A ma ohweya hvɛ o hvɛhvɛ moto ama "o no nɔŋge" Ndi oŋgo moto ama timbirzɛlɛlɛ ama, "o mee roŋgo li no hwɛlɛ, na ɛndɛ o li imeya rzaŋgo yami. 60 Yerzu rzii a mo ohweya ama "inyɛ e wo hwa ŋweli hwa imeya e hwaa nweli hwawu, Ndi o wa ndei ohweye ndi meango me likaneya la Lohwa." 61 O hvɛhvɛ mɔ a ohwa ama "Tata no nɔngɔ ndi o mee rza lino hwɛmɛ na ɛndɛ na aakpanɛ litumba lami. 62 Yerzu rzi a timbirzɛlɛlɛ ama, "Tɔ jɛnɛ ema a lɛmbi ŋmaa o litiya rzi a ɔŋgɔ o mburza a rza tanɛ li gbeya ewolo o likaneya la ma Lohwɛ.
LUKARZI HWEHVARZU LIOMƐ 10
YERZU AMA OMA MENI LIRZAMBA NA HWAHWAKE
1 O mburza nanu, Rzaŋgo ama hvɔrzɔ hwahvɛhvɛ, hwa ma hwɛ mɛni lirzamba na hwahwakɛ, rzi a hwa oma hwahwakɛ hwahwakɛ li ɛndɛ o worzo tɔ ima mbowa na eki mɔ ama hwɛnɛ li ɛndɛ. 2 Rrzi a hwa ohweya ama, "E mbota ekoki, ndi hwagbeeli hwa tuu. E ijowa Rzaŋgo wa mbota, ema, a ome hwagbeeli o moonda ŋmeni. 3 E ɛndɛ! Na e oma ndi naa mɛlɛŋgu o tiiteni ya njɔɔ. 4 E rzi oka li ohva likpa la woli tɔ erzaŋgo tɔ hwetambi. Ndeŋga erzi oka likɔmɔ tɔ moto o njia. 5 "E kpeeli tɛ ndawo, e lome li ohwa ema, "eyɔlɛ na ene ndawo." 6 O hweli tɛ moto wa eyɔlɛ aŋga, eyɔlɛ ya anyu ehwɛ na mɔ; orzenje tɛ, eyɔlɛ ya anyu etimba na inyɔ." 7 E liya o eŋge ndawo, e le e nyɔ tɔ mamɛ ema hwa e ŋmgbeli, Ehwanja emo gbeeli a kanɛi etaŋgi yeni. Erzi oka li ahwa ndawo tɛ ndawo tɛ. 8 "E kpeeli tɛ mbowa, rzi hwa ekɔmɔ, e le tɔ mamɛ ema hwa e ŋmbeli. 9 E wɔhwirzɛ e wɔ hwa nyambɛ ema hwa hweli aŋga. Na li hwa ohweya ema, likaneya lama Lohwɛ li kombɛnɛi. 10 Ndi ekpeeli tɛ mbowa, rzi hwa rzi ekɔme, e ɛndɛ o moombo mo njiya jawu e ohwe ema, 11 To irzɔwɛ ja mbowa janyu ema ikakimɛnɛi o mataŋga marzu je e hvuhvuweli ejo. Tɔ nanu e hwiye ema: likaneya lama Lohwa lima kombɛnɛ. 12 Na e o hweya nanu ema e ohwɛ wohwe na eŋge mbowa o woŋgo wunya li aka Rzodom. 13 Mojema na inyo Kolarzin! Mojema na inyo Betrzida! Ehwanja, hwetamirzeli ema hwe egbeyahwɛlɛ, hwema gbeyahwa tɛ o Taye na o Rzidon, oma hwa ma inda li aeŋgowe, li liya o liwu na maɛhwɛ. 14 Ndi ehwɛ gbamu na Taye na Rzidon o hwekairzeli li aka inyɔ. 15 Ndeŋga inyɔ, Kapanum, e tanɛi li agbɛɛlɛ hvɛ o ŋmanyu ya Lohwa e? Jaɛ e ɔndɔ ndi orzeɛ rzeɛ. 16 To njɛ ema a e ohweyani, a no hweyani ndi imba, oŋgo hvɛ ema arza e ohweyanɛi arza no hwayani. 17 Mɛni lirzamba, na hwahwakɛ hwa ma timba na monyɛŋgi, rzi hwa ohwa ema, "Rzango, na hweliŋgɛ hwɛ wohwe hvɛ, hwe arzihwirzɛ orzɛ yarzu o lina laŋgɔ." 18 Rzi a wohweya ama, "Na ma ɛnɛ mokarzɛ aundi na liŋmɛti ŋmɛti ndi li undi o ŋmanyu ya Lohwa. 19 Na e o ŋgmbeli maimbi o li laala maahwa na mawohwe ma mihvendo, na li aka eŋginya yarzɛ ya e mokɔeli; Tɔ yoma erza e o hwenirzɛ. 20 Ndi to nanu erza oka mɔnyɛŋgi ema Hweliŋga hwe arzi hwirzɛ orze yanyu. Ndi e oke mɔnyɛŋgi ehwanja mina manyu matilahwi o ŋmanyu ya Lohwa. 21 Yerzu ama onda na mɔnyɛŋgi mo Eliŋgɛ ya Wotani o liŋgi lirzako, rzi a o hwa ama, "Tata Nao eki Lohwa la ŋmanyu na erze ehwanja, o uteli ewɔ ema hwa aŋgo na hwaŋga ema hwa oko hwene hweya, Ndi o hwɛ hwilɛi hwana hwarzali a worzo waŋgɔ. E Tata, e uŋmɛlɛ gbamu o worzo wo aŋgɔ. 22 "Hweya hweyarzɛ hwe no ngmbaahvi na Rzaŋge ami. Tɔ moto arza hwi njɛnɛ ema ahweli e Ŋmana, li aka tɛ e Rzaŋgo, ndeŋga to moto arza hwi njɛnɛ hvɛ a hweli e Rzaŋgo li aka tɛ e Ŋmana." Na hwaŋga ema e Ŋmana a hvɔrzi o lihwilɛ Rzaŋgɛ. 23 Rzi a e ŋgowɛlɛlɛ hwaokoweli hweni a hwa ohweya wundɛ ama, "monamɛ na miirzɔ ema ma ɛnɛ mamɛ inyɔ ya ɛni. 24 Ehwanja na e o hweya ema, Hwaohweli na hwakaneli rzairzai hwa ma arza li ɛnɛ mamɛ inyɔ e ɛni, ndi hwa rzi ɛnɛ, na li hweya mamɛ inyɔ e hwei, ndi hwa rzi hweye.
ŊMANA MO MOTO WA GBAMU WA RZAMALIYA
25 Erzɔlɛ yɔkɔ, mohwiya mbenda mɔkɔ a ma tɛmɛ o li kekirzɛ Yerzu, "rzi a mo ijowa ama ii mookoleli, mamɛ na tanɛi li gbeya o li luwa loŋgɛ ema lirzakuwa e? 26 "Yerzu rzi amo ijowa ama, "mamɛ etilahwi o mbenda e? Nɛ o laŋgi e? 27 Rzi oŋgo mohwiya mbenda a alahwɛ ama, "Liŋgana Lohwa laŋgɔ, na ŋmeema ŋmaŋgɔ ŋmarzɛ, na eliŋgɛ yaŋgɔ yarzɛ, na mɔŋgɛlɛ ma aŋgɔ ma arzɛ ndeŋga oliŋgane hwato na oma o aliŋganɛi owa witi. 28 Yerzu rzi a mo alahwɛ ama, "o ohwi gbaamu gbeya rzɔ nanu, o hwɛnɛ loŋgɛ." 29 Ndi e mohwiya mbenda ama arza li auŋmɛlɛ ŋmiti, rzi a ijowa Yerzu ama, njɛnɛ ahweli e moto wami wa toŋgoŋgo e? 30 Yerzu rzi a timbirzɛlɛ ama; "moto mɔkɔ ama uweya o Yelurzalem rzi a ondo o Yeliko, rzi hwekɛnɛŋgɛ hwɛ molɛmbɛ, hwe mo kɔrzɔ morzombo, hwe mo anana natɛɛ arza li ŋwa, hwe mo liya aŋga rzi hwe ɛndɛ, 31 Moogbeeli wa Lohwa mɔkɔ mɔhvɛ ama ɔndɔ o eŋge njiya, na oma ama ɛnɛ oŋgo moto, rzi aakeya ndi ɛnɛi ehvarzu ya njiya. 32 Nanu mɛnɛ hwe na mombaki wa ŋmemba mɔkɔ, wa litumba la wonya Lehwi ama uke eŋge eki, e moto a ma naŋga, ama mo ɛnɛ, rzi aakeya ndi ɛnɛi ehvarzu. 33 Ndi moto mɔkɔ wa Rzamalia, ama hwɛ li ɛndɛ, ama uke eŋge eki e moto a ma naŋga, amo ɛnɛ rzi a mookeya iili. 34 Ama mo tuna hwehwena hweeni na hwenyɔɔni, rzi a mo nyalɛ hvɛ mauja, na liɔki a mo kaka hwehwena hweeni, ndeŋga a e mo agbɛlɛ o jakarzi jeni, a mo ɛndɛnɛ o ndawo ya hwaɛni, rzi a mo aŋgoweya. 35 Wonɛi wunya a ma wowa kahva ihwakɛ, rzi a ji ŋgmba e mooŋgeli wa ndawo ya hwaɛni. 36 O hwanu hwato hwaayɛ, ima mo oluteli ema ahweli e moto watoŋgoŋgo wama oŋgo moto ema hwekɛnaŋgɛ hwe maanane e? 37 E mo hwiya mbenda a ma alahwɛ ama, "oŋgo ema amaa mookeya iili Yerzu ama moohweya ama, ɛndɛ o wa hvɛ o gbeye nanu mɛnɛ."
ENDAWO YAMA MATA NA MALIYƐ
38 Na oma Yerzu na hwaokoweli hweni, hwa ma hwɛ lɛndɛ, hwa ma uka mbowa hvɔkɔ ema molana mɔkɔ ema ama hwɛlɛhwɛ Mata ama hwa lihvoweya e ndawo yeni. 39 Ama hwɛnɛ ŋmanyaŋgo eni mɔkɔ ema ama hwɛlɛhwɛ Maliyɛ, Ama liya ndi o mataŋga mama Rzaŋgo Yerzu, Li okaneya mamɛ ama hwɛ li okolɛ. 40 Ndi Mata ewolo ema mo ihvirzɛnɛ; rzi a ɛndɛ li uŋma Yerzu. A mo ijowa ama, "Tata orza ɛni nanu ema ŋmanyɔŋgɔ wami a no hwɛmɛli ewolo imba mbiti e? O mo ohweya ano oŋgowane." 41 Yerzu rzi aalahwɛ ama, Mata, Mata, o atakirzɛ o hweya rzairzai. 42 Ndi eya yɔkɔ ndi yarzahwa, Maliya ama hvɔrzɔ eyɔ ya jɔkɛ, ema erza tanɛi limo wowahwɛnɛ.
LUKARZI HWEHVARZU LIOME NA YƆKƆ 11
YERZU AMA OKOLƐ LI KANE
1 Wunya wɔkɔ Yerzu a ma hwɛ eki yɔkɔ o li kanɛ. A ma kulɛ rzi mookoweli hweni mɔkɔ a mo ohweya ama, "Rzaŋgo, o e okol li kanɛ na oma Yowanirzi a ma okolɛ hwaohweli hwa eni. 2 Rzi Yerzu a wa ohweya ama, "Ekanɛ tɛ, e ohwe ema: "Tata, liina li aŋgɔ li karzami, likaneya laŋgɔ li je. 3 O e jo ŋgmbe lila larzu la wunya tɛ. 4 O e lakirzɛ wohwe warzu, na oma irzɔ hvɛ i lakirzɛ tɔ njɛ ema a jo gbeyani wohwe. Orzi jo liyɛlɛ o makekirzɛnɛ ma wohwe. 5 Rzi a wa ohweya ama, "Ehweli tɛ ema mɔkɔ wanyu a hwɛni tɛ yorza, rzi a o jeeya e tiiteni ya wuu, rzi a ohwa ama ŋmai e, o no oŋgirzɛ hweyolo hweyau, 6 Ehwanja mbundami mɔkɔ a uwɛlɛlɛ yɔndɔ a jeeli o mbaami, ndi na rza ohvi tɔ yoma o li mo ŋgmba. 7 Rzi e mo wa teni ya ndawo a alahwɛ ama, "O rza no takirzɛ. Liyohva li maa ma li umbahwa, ndeŋga hwaana hwami hwa hweli na imba o linɔŋgɔ. Na rza tanɛi li tɛmɛ li o ŋgmba tɔ yoma. 8 Na e o hweya ema, tɔ na rza tanɛi li tɛmɛ o li mo ŋgba yolo ehwanja a hweli ndi e mbunda yeni; ndi li ihvirzɛnɛ lama mbunda eni li ma gbeya a ma tɛmɛ, rzi a mo ŋgmba na oma ama arze. 9 O eŋganɛlɛ na e ohweya ema; e ijowe e ŋgmbaahwa; E arze e luwa, e kumbe liyohva li e lihvowahwɛlɛ. 10 Ehwanja tɔ njɛ ema a ijo a ŋgmbaahwa; tɔ njɛ ema aarzi a luwa ndeŋga oŋgo ema a kumbi, liyohva limo lihvowahwɛlɛ. 11 I ma rzaŋgo o tiiteni yanyu ema ŋmaneni aarzi tɛ nyama rzi a mo ŋgmba ndi gbahwa e? 12 To aarzi tɛ ŋmeyo rzi a mo ŋgmba ndi liwohwe la mehvendo e? 13 E hweli tɛ ema inyɔ ema ehweli hwato hwa wohwe; e hwi tɛ li ŋgmba hwaana hwanyu maahweya ma gbamu, ŋgeli i ti na Rzaŋgo wanyu wa ŋmanyu arza tanɛi li ŋgmba eliŋgɛ ya wotani o hwaŋga ema hwa mo arzana eyɔ!" 14 Yerzu a ma hvaya eliŋgɛ ya wohwe ya mbuke. Ehvonda eliŋgɛ ya wohwe ema anjiye, e moto ema a ma hwɛ mbuke ama ohwa, rzi e ŋgindi e tama. 15 Ndi loŋgo la awu hwa ma ohwa ema, "E ŋginya ya ma Belrzabu, e ŋgumu ya hwelimo yɔndi Yerzu a hvayana hweliŋgɛ hwe wohwe." 16 Hwa hvɛhvɛ hwa ma mo kekirzɛ o li mo arzana emɛnɛni ema e uweya o ŋmanyu ya Lohwa. 17 Yerzu a ma hwiya maluteya ma wu, rzi a wohweya ama: "Tɔ ima likaneya ema li ahwaanɛ lɔ liti li kpa, ndeŋga tɔ ima ndawo ema ya ahwaanɛ yɔ yiti e kpa. 18 Ehweli tɛ ema mokarzɛ aahwaanɛi mɔ ŋmiti, nɛ rzɔ likaneya leni li tɛmɛ e? Na ohwi nanu ehwanja inyɔ e ohwa ema, i mba na hvaya ndi hweliŋgɛ hwe wohwe na e ŋginya yama Belrzebu eŋgumu ya hwelimo. 19 Ehweli tɛ ema e ŋginya yama Belrzebu ndi i mba na hwayana hweliŋgɛ hwe wohwe, e ŋginya yama njɛnɛ hvɛ hwagbeeli hwanyu hvɛ hwa hvayana e? O eŋganɛlɛ rzɔ wɔ hwa o hwɛ hwakairzeli hwanyu. 20 Ndi imba na hvaya tɛ hweliŋgɛ hwe wohwe na jɔnɔ jama Lohwɛ, oma likaneya lama Lohwɛ lima e jeeya. 21 Ehweli tɛ ema, moto wa ŋginya, ema a hwɛni maimbi kɔikɔi a ɔŋgeya e ndawo yeni, erzaŋgo yeni erza ihwahwa. 22 Ndi ehweli tɛ ema o jeli moto ema aimbami limo aka, rzi a mo anana, amo wowana hwɛɛkɛ hweeni hwe maimbi ema ama ika lihvita, rzi a hwa erzaŋgo ema a mo lumbani. 23 Oŋgo ema arza enje na imba a no teŋgenɛ, ndeŋga tɔ njɛ hvɛ ema a rza rzaŋgɛ na imba a wuulɛ. 24 Ehvonda ema Eliŋgɛ ya wohwe e wurza moto onyo e ahwa ndi eki yarzɛ, li arza eki ema e arziyolɛ, ndi erza luwa, oma ema ohwa ema, na timbe o eŋge ndawo ema nama hwɛ. 25 E jeli tɛ e uŋma e ndawo e ma tutahwa nɛɛnɛ na li rzaŋgirzɛhwɛ, 26 Rzi e ɛndɛ, e wowa hvɛ hwehvɛhvɛ hweliŋgɛ lirzamba ema hwe imbami li aka, rzi hwe kpeeya hwe liya aŋga. Hwe hwɛɛli hwema e moto hwe lirzuku, hwe hwɛɛ wohwe li aka e hwee worzo. 27 Na oma Yerzu ama hwɛ li ohwa hwene hweya, molana mɔkɔ ema ama hwɛ o ŋgindi ama tɛɛ ama, "monamɛ na e nyaŋgo ema yoo nyai na li o nyɔŋgirzɛ." 28 Yerzu mohvɛ rzi aalahwɛ ama monamɛ na hwaŋga ema hwa hweya eya ya Lohwa, rzi hwa e ika.
EMENENI YAMA YONA
29 Na oma e ŋgindi ema ahwatɛ, Yerzu ama ohwa ama, "ene nyɔŋgɔnyi ya wohwe, e arza ndi hwemɛnɛni hwe manyaka. Ndi tɔ emɛnɛni yɔkɔ e rza hwa ŋgbaahwa, li aka tɛ eyɔ yama Yona. 30 Na oma Yona ama hwɛ emɛnɛni o hwato hwa Ninihwe, nanu mɛnɛ hvɛ ndi e ŋmana wa moto a o hwɛɛ o ene nyɔŋgɔnyi. 31 Oŋgo molana wa hweluhwe hwɛndɛnɛ a o hvumuwa o hwekairzeli na hwato hwa ene nyɔŋgɔnyi oli hwa tulɛ; ehwanja mɔ ama uweya ndi o marzuku ma rzee o hwekondo, o li okaneya liwiye lama Rzalomoni. Ndi o naŋgɛ emo ema aakai Rzalomoni ahweli anu. 32 Hwato hwa Ninihwe hwa o tɛmɛ o hwekairzeli na ene nyɔŋgɔnyi o li e tulɛ, ehwanja wo hwa ma eŋgowɛ o hwe eohweli hwe ama Yona, ndi o naŋgɛ mɔkɔ ema a akai Yona a hweli anu.
ETULU YA NYO
33 To moto arza hvaalɛ etulu rzi a e ika eki e utami, tɔ li ekumɛnɛ ewoki, ndi a e ika ndi eki ya ŋmanyu, aŋga ndi ewɔ ema hwa kpeeya hwa ɛnɛ ŋmɛɛnɛni. 34 Liirzɔ laŋgɔ ndi li hweli etulu ya e nyo yaŋgɔ ehweli tɛ ema miirzɔ maŋgɔ ma hweli tɛ gbamu e nyo yaŋgɔ hvɛ e onda na ŋmɛnɛni, ndi ma hvaŋgeli tɛ e nyo yaŋgɔ hvɛ e onda na jititi. 35 Ɔŋgɔ, o ɛnɛ nanu ema, ŋmɛɛnɛni mo hweli, mo rzi timba jititi. 36 O eŋganɛlɛ, e nyo yaŋgɔ e ondi tɛ na ŋmɛnɛni rzi erzihwɛ ema enama yaŋgɔ yɔk e hweli o jititi e nyo yaŋgɔ yarz hvɛ ehwɛ o ŋmɛnɛni na oma ŋmɛnɛni mo etulu mo hwɛɛ o worzo waŋgɔ. 37 E hvonda Yerzu ama kulɛ li ohwa, moto mɔkɔ wa hvalirzaɛi ama mo hwɛlɛ ema a je a le na mɔ o ndawo yeni, rzi a ɛndɛ, a liya na mɔ o hweleeli. 38 Oŋgo moto wa Hvalirzaɛi a ma tama o li ɛnɛ nanu ema, Yerzu a woteli lila ema a rza atutɛ. 39 Rzi Rzaŋgo a mo ohweya ama, "ɔŋgɔ tɛ, inyɔ Hvalirzaɛi etanirzɛ e mburza ya liwonde na e ya mɔnjɔ, ndi o teni yanyu e ondi ndi na wɔɔ na wohwe. 40 Inyɔ hweeti hwe hwato, rzeke oŋgo ema ama weka e mburza mɔmɛnɛ hvɛ ndi ama weka eteni e? 41 Ndi ŋgmba hwatakeli mamɛ ema e hweli o teni ya mɔnjɔ, aŋga ndi hweyarzɛ hwe o hwɛɛ wotani na inyɔ. 42 "Mojema na inyɔ Hvalirzaɛi, ehwanja e ŋgmba Lohwɛ e teiŋ ya ndiŋgɛ ya Lohwa. E aŋgamɛnɛ li okowa li gbeya hwenɛi hweya, erzi hwɛ li hwɛmɛ e hweyɔ hwe molomɛ. 43 Mojema na inyɔ Hvalirzaɛ, ehwanja e liŋgani iŋgi mboko ja worzo na li kɔmɔwɔ o hweki hwe hweluwe. 44 "Mojema na inyɔ, e hwanja e hweli ndi naa irzɔŋgɔ ema irza embahwɛlɛ ema hwa akeya o ŋmanyu, erzi hw lihwiya." 45 Mohwiyeli wa mbenda mɔkɔ rzi a mo alahwɛ ama, "Ii mookoleli, hwene hweya ema o ohwa nanu o e hwɛnyɛnɛ hvɛ na irzɔ." 46 Yerzu rzi a timbirzɛlɛlɛ ama, "Inyɔ hwa hwiya mbenda, mojema hvɛ na inyɔ, ehwanja, e oŋgolɛlɛ hwato meyuna ema hwa rzatanɛi li hwanɛ, ndi inyɔ mɛnɛ erza ika tɔ jɔnɔ jɔkɔ o li hwa oŋgowana. 47 Mojema na inyɔ, ehwanja e oŋga irzɔŋgɔ ema i mbamba janyu ima imeya hwaohweli hwa hweliŋgɛ ema hwa ma oŋwe. 48 O eŋga inyɔ eŋgba mboŋgi nanu ema, mamɛ imbamba janyu ima gbeye ema lɔɔ; hwa ma oŋwa hwaohweli hwa hweliŋgɛ, rzi inyɔ hvɛ ya oŋga irzɔŋgɔ jawu. 49 O eŋganɛlɛ Lohwɛ o lihwiye leni ama ohwa ama, Na hwa o meya hwaohweli hwa hweliŋgɛ na hwaokoleli ema hwa oŋwa loŋgo lawu, rzi hwatakirzɛ hvɛ hwɛnɛi. 50 O eŋganɛlɛ rzɔ, ene nyɔŋgɔnyi e o hwɛlɛhwɛ o maija ma hwaohweli hwa hweliŋgɛ ema ma rzoweli liwoteya o hwewoteli hwe rze. 51 Liwoteya maija ma ama Abɛli na e mɔ ma ama Rzakaleya, ema ama oŋwahwa o tiiteni ya liyɔ la maahweya, na o eki ya wotani. Eei, na e o hweya ema, ene nyɔŋgnyi e o hwɛlɛhwɛ o hwene hweya hweyarzɛ. 52 Mojema na inyɔ hwa hwiya mbenda, ehwanja ema wowa ilihvowani ja lihwiye. Ndi inyɔ mɛnɛ e rza kpeeli, rzi e kekai hvɛ hwaŋga ema hwaarza o li kpeeya. 53 E hvonda Yerzu ama anjiye aŋga rzi, i Hvalirzaɛi na hwaokoleli hwa mbenda hwa woteya o li moteŋgɛnɛ gbeegbe na li mo takirzɛ na miijoweli. 54 O li ambɛlɛlɛ ŋga hwa mo lɛmbɛnɛ eya ema a tanɛi li ohwa.
LUKARZI HWEHVARZU LIOMƐ NA HWEHWAKƐ 12
VEKIMA NA LI KOMƐLƐ
1 O eŋge hvonda mɛnɛ, ŋgindi ya hwakaneli na hwekoli hwe hwato hwa ma arzaŋganɛ nyai ema hwa ma woteya li alalanɛ mɔkɔ na ɔnɛi. Rzi Yerzu a woteya li ohweya hwaokoweli hweni ama, "e aŋgoweya ehwindi ya i Hvalirzaɛi ema e hweli ndi molaŋga. 2 O rza eŋje tɔ eya ema e utama, ema erza o hwiyɛnɛ, tɔ li utahwa ema erza hwiyahwa. 3 Tɔ mamɛ ema e ma ohwɛ o jititi, e o hwiyahwa o ŋmete. Ndeŋga tɔ ima erzarza e ohweli moto o lito o teni ya iluku e o hwiyɛnɛ natɛ o makaando ma ndawo. 4 "Wonya moe, na e o hweya ema, "E rzi keka li oka hwaŋga ema hwa oŋwa e nyama ya nyo wɔŋgɔ, ndi o mburza nanu hwarzatanɛi li gbeya ehvɛ eya." 5 Ndi na e uŋmɛlɛ njɛnɛ ema e hwɛni li oka wɔŋgɔ: e o ka ndi oŋgo wɔŋgɔ ema a o ŋwi tɛ e nyama ya nyo, a hwɛni hvɛ maimbi o li e aŋgmba o munya. Ee, na e o hweya, e mo oke wɔŋgɔ. 6 Rzekɛ hwewumbuwa hweta hwe andahwa ndi kahwa ihwakɛ? Ndi tɔ jɔkɔ irza hvoŋgahwi na Lohwɛ. 7 O jokɛ, i rzowe jaŋgɔ ja mohvo i aŋgahwi jarzɛ. Erza oka wɔŋgɔ, inyɔ e akai hwewumbuwa rzairzai. 8 Na e o hweya ema, tɔ njɛ ema a no ŋgmbeli jeeka o marzo ma hwato e ŋmana wa moto hvɛ a mo ŋgmba jeka o marzo ma i aŋgeli jama Lohwɛ. 9 Ndi oŋgo ema a mo rzɔrzi o marzo ma hwato, mohvɛ a o rzɔrzɔwɔ o marzo ma i aŋgeli jama Lohwɛ; 10 Ndeŋga tɔ njɛnɛ hvɛ ema a ohwi eya liteŋgɛnɛ eŋmana moto, a o lakirzɛhwɛ, ndi to njɛ hvɛ a ohwa lihwena liteŋgɛnɛ Eliŋgɛ ya wotani a rza lakirzɛhwɛ. 11 "Yerzu rzi a hwata hvɛ ama, "e hweli tɛ ema hwa ejaani o ndawo ja hwekairzeli na o marzo ma hwakaneli na hwambaki hwa mbowa, e rza a takirzɛ li luteya mamɛ ehwɛni li alahwɛ, tɔ mamɛ e hwɛni li ohwa, 12 Ehwanja, Eliŋgɛ ya wotani e o okolɛ o liŋgi lirzako mɛnɛ, mamɛ ehwɛni li ohwa." 13 Moto mɔkɔ o eŋge ŋgindi, rzi a mo ohweya ama, "mookoleli ohweya ŋmanyɔŋgɔ wami ema ihwaɛnɛ erzaŋgo." 14 Rzi Yerzu a mo alahwɛ ama "ii moto njenɛ a no hvɔrzi o li hwɛ mokairzeli o tiiteni ya nyu e?" 15 Rzi a hwa ohweya ama, e aŋgowa! E aŋgoweya hvɛ inyai ja hweya hwe wɔɔ jarzɛ; loŋgɛ la moto li rza enje ndi o erzaŋgo ya rzairzai ema o hwɛni. 16 A ma hwa kpɛɛya hvɛ mono ŋmana ama; "monyɛ moma ewaŋgi ya moto yɔkɔ (mɔkɔ) mo ma nyai mbota ya gbamu." 17 A ma luteya mo ŋmiti, rzi a ohwa ama, na gbeya nɛ e? Naŋgɛ na rza hwɛni tɔ eki o li ika e mbota yami. 18 "Rzi a ohwa ama, nanu ndi na gbeya naŋgɛ. Na wuulɛ wokao wami worzali, rzi na oŋga wondɛnɛ ema na ika e mbota yami na hwe hvɛhvɛ hwema. 19 Na ohwanɛ imba mbiti ema, "O hwɛni hwɛ hwema hwe e gbamu rzairzai ema hwe ikahwi aŋga, o meya rzairzai. Wowa loŋgɛ hviyai; la, nyɔ, ndeŋga o oke monyɛŋgi. 20 "Ndi Lohwɛ ama moohweya ama, "owa eeti ya moto!" Wono wu mɛnɛ, loŋgɛ laŋgɔ lo arzahwɛnɛ, njɛnɛ rzɔ a o hwɛnɛ mamɛ yarzɛ ema aarzaŋgɛlɛ e? 21 "Nanu ndi e o hwɛ na tɔ ima moto ema a utɛlɛ hwema na mɔ ŋmiti, rzi arzi hwɛ ewaŋgi o worzo woma Lohwɛ.
ERZA ATAKIRZƐ
22 Yerzu rzi a ohweya hwaokoweli hweni ama; "O e ŋganɛlɛ na e o hweya ema, erza atakirzɛ lihvomɛnɛ moŋgɛ manyu o mamɛ e laa; tɔ mamɛ ema e rzoŋgɛ o nyo. 23 Loŋgɛ li akai moleli, e nyo hvɛ e akai liwɔti. 24 E ɔŋgɔ tɛ hwenɔni, ema hwe rza ona, to li rzaŋga moleli, ndi Lohwɛ a hwe lirzɛ, ngeli iti na inyɔ ema ehweli wolito li aka hwɛnɔni! 25 Ima mɔ wanyu ema o li atakirzɛ leni atanɛi lika eyu yɔkɔ o loŋgɛ leni e? 26 Nɛ tɛ e rza tannɛi li gbeya ono ŋmana eya morzali, mamɛ rzɔ e a takirzɛ o hwɛnɛi hweya e? 27 "E ɔŋgɔ tɛ na oma imbonji joŋga. I rza atakirzɛ tɔ li agbeyɛlɛ meŋgombe. Ndi na e ohweya ema, tɔ e mokaneli Rzalomoni o ewaŋgi yeni yarzɛ, a rzi a wotirzɛ li uka ini mbonji. 28 Ehweli tɛ ema nanu ndi Lohwɛ a wɔtirzɛ hwewule hwe waŋga, ema yawono hwehweli, ŋmɛlɛ hwe aŋgbahwa o munya, ŋgeli iti na inyɔ, nɛ rzɔ a rza e wɔtirzɛ, ii inyɔ hwato hwa malokɛ marzali! 29 O eŋganɛlɛ rzɔ e rza ika meema meyanyu o lituteya mamɛ ilaa tɔ li nyɔ; e rza atakirzɛ, meema. 30 Ehwanja ewɔ hwa rze ema hwa rza lokɛi wɔndi hwa ahvahvɛ o li arza hwene hweya hweyarzɛ, ndeŋga Rzaŋgo anyu a hwi ema e arza hwene hweya. 31 Ndi e arze likaneya leni, aŋga ndi hwene hweya hwe e ŋgbaahwa. 32 "E rza oka wɔŋgɔ", inyɔ lihwemba lirzali, Ehwanja Rzaŋgo wanyu a oki mɔnyɛŋgi o li e ŋgmba likaneya. 33 E ahwirzɛ erzaŋgo yanyu e ŋgmbe hwatakeli. E a o hvɛlɛ inyɔ mɛnɛ makpa ema ma rza una ma hwɛ liwuta la nyu o ŋmanyu ema lirza kuwa, eki ema ŋmihwe arza kombɛnɛ tɔ lirziyɛi li rza hvaŋga. 34 Ehwanja eki ema liwuta la aŋgɔ li hweli aŋga hvɛ ndi ŋmeema ŋmaŋgɔ hvɛ mo hweli.
LI ANGOWƐLƐLƐ
35 "E a wɔtirzɛ e woŋgirzɛnɛ o ewolo e ika hvɛ hwetulu hwe anyu hwe oŋwe, 36 naa hwato hwa ambɛlɛlɛ Rzaŋgo awu ema a uwɛlɛlɛ o ndema ya lihwa, aŋga rzɔ ndi a jeli tɛɛ rzi a kumba, hwa mo lihvoweya o wɔtɛmɛtɛmɛ. 37 E ɔhwɛ gbamu na hwaŋga hwagbeeli ema Rzaŋgo awu o hwetimbeli hweeni a uŋma hwa ŋmaambɛlɛ. Na e o hweya e jɔkɛ aarzeelɛ mɔ ŋmiti o hweliyeli rzi a hwaa ŋgmba moleli. 38 E o hwɛ gbamu na hwaŋga hwagbeeli ema Rzaŋgo awu a uŋma hwa ma woŋgirzɛnɛ, tɔ a ja ndi o lirzako la hwehvɔwɛ hwe ukirzɛ hwehwa tɔ hweyau hwe wu. 39 Ndi e hwiye nanu ema; e mɔhwɛni wa ndawo a ma hwiya tɛ e hvonda ema e ŋmihwɛ a ja o ma a rzi hwɛmɛ e ndawo yeni e gbaahwa. 40 Inyɔ hvɛ e aŋgamɛnɛ li woŋgirzɛnɛ, ehwanja e ŋmana moto a o ja o lirzako ema e rza mo ahvitɛ. 41 Rzi Petolo a ijowa Yerzu a ma: "Ii Rzaŋgo, Irzɔ ndi o kpɛɛli mono ŋmana e, ŋga hwanɛi hwarzɛ e? 42 Yerzu rzi a mo alahwɛ a ma; "ŋjɛnɛ rzɔ a hweli e mokaneli wa lihwiye na lilokɛ, ema Rzaŋgo a ikai o li oŋgeya hwagbeeli hweni, o li hwa ŋgmba e laawu loŋgo o hvonda ya jokɛ e? 43 E hwɛ gbamu na oŋgo mogbeeli ema Rzaŋgo a jeli tɛ a uŋma a gbeya nanu. 44 Na e ohweya e jokɛ nanu ema, Rzaŋgo a mo ika o li oŋgeya erzaŋgo yeni yarzɛ. 45 E hweli tɛ ema oŋgo mogbeeli a ohwi tɛ o ŋmema ŋmeni ama, "Rzaŋgo wami a i ndɛli o yɔndɔ; a rzi timbi, rzi a woteya li anana hwanɛi hwagbeeli ewɔ hwa hwalana na ewo hwa wunyana na li laa na li nyɔ na li woma." 46 E rzaŋgo ya oŋgo mogbeeli a o ja o wunya ema arza mo ahvitɛ, na o hvonda ema a rza o hwiyɛ. A mo kɛ, a mo kerzɛ rzi a mo ika eki yɔkɔ na hwaŋga ema hwa rza lokɛ. 47 "Oŋgo mogbeeli ema a hwi hwe tɛirzeli hwe ama Rzaŋgɛ rzi a rzi ika tɔ ligbeya na oma Rzaŋgɛ aarza, aanahwɛnɛ na yorzilao rzairzai. 48 Ndi oŋgo mogbeeli ema a rza hwiyɛ rzi a gbeya hweya hwe matona mɔ hvɛ a kokirzɛhwɛ ndi a rza uŋmahwa yorzilao rzairzai. Tɔ ima mɔ ema a ŋgbaahwi rzai rzai arzahwɛnɛ hvɛ rzai rzai, ndeŋga tɔ njɛ hvɛ ema a liyahwɛlɛ rzai rzai a i jowahwa hvɛ rzai rzai.
RZƐKƐ MONYƐŊGI NDI LI A HWAANƐ
49 "Na jeli ndi li kotaa munya o rze, ndi maluteya mami ma ohwa ndi ema oma tɛ moma maa li oŋwa! 50 Na hwɛni liluhwirzɛ oli luhwirzɛhwɛ, ndeŋga ŋmeema ŋmami mo kpeli natɛɛ egbeyɛnɛ. 51 E ɔŋgɛlɛ nanu ema na jaani ndi eyɔlɛ anu rze e? Jaɛ na e o hveya ema na jaani ndi mbaali. 52 Liwoteya naŋgɛ, o hwɛ hwato o litumba lɔkɔ wo a hwaanɛ, hwayao hwa teŋgɛnɛ hwahwakɛ, ndeŋga hwahwakɛ hvɛ hwa teŋgɛnɛ hwayao. 53 O hwɛ mbaali ya Rzaŋgo na ŋmana, wa eni wa munyana, ndeŋga e nyaŋgo hvɛ na e ŋmana wa eni wa molana, ndeŋga e nyaŋgo ya lihwa na mokia ŋmeni mo lihwa, ndeŋga e ŋmana wa lihwa na nyaŋgo eni wa lihwa.
HWETELELI HWE HVONDA
54 Yerzu am ohweya e ŋgindi ama "e ɛni tɛ embaki e uhwɛlɛlɛ watee, o wotɛmɛtɛmɛ e ohwa ema e mbuwa e ja ndeŋga eyɔ. 55 E ɛni tɛ e mbehvɛni e uhweli mbɛŋgɛ oma ya ohwa ema wuunya wo hwɛni litumbana ndeŋga wo tumbana. 56 Inyɔ hwato hwa molaŋga: "e hwi li lalowa hweɛneli hwe rze na loohwa la ŋmanyu. Mamɛ ndeŋga tɛ e rza hwi li lalowa hweya hwe ene hvonda e? 57 Mamɛ ndeŋgatɛ e rza tanɛ li akairzɛ inyɔ mɛnɛ, o mamɛ ema ehvomɛnɛi? 58 Na oma o ɛndɛlɛnɛ na e mokoeli waŋgɔ, o ma e mokairzeli, keka na ŋginya o li ɛnɛ ema egbei eyɔlɛ o njiya, e rzija lihwɛ ema mo a o koohwi oma emo kairzeli mondɛnɛ, rzi oŋgo mokairzeli mondɛnɛ a o aŋgɛ o hwewowa. 59 Na e ohweya ema, orza wurza aŋga natɛɛ o taŋga e kahva ya lirzuku.
LUKARZI HWEHWARZU LIOMƐ NA HWEYAO 13
LI AEŊGOWE TƆ LIKONA
1 O ma hwɛ loŋgo la hwato ema hwa ma ukeya liŋgi lirzako ema hwa ma owheya Yerzu li hvomɛnɛ hwato hwa Galelelea ema maija mawu Pilato a ma hvuŋguhwe na maahweya. 2 Rzii Yerzu a hwa alahwɛ ama li hvuŋguwana maija na maahweya mawu inyɔ e ɔŋgɛlɛ ema hwanu hwato hwa Galeleya hwa ma taka nanu ehwanja hwa ma hwɛ wohwe li aka hwanɛi hwarzɛ e? 3 Na e ohweya ima jaɛ e hweli tɛ ema e rza eŋgowɛ tɛ inyɔ hvɛ ekona nanu mɛnɛ. 4 Na liŋgi liyome la hwato na wambi ema e njoŋgo ya Rziloami ema rzuuhweya rzi e hwa oŋwa hwa ma hwɛ hwato hwa wohwe li aka hwanɛ hwarzɛ hwa ma hwɛ o Yelurzalɛm e? 5 Jaɛ! na e ohweya ema e hweli tɛ ema e rza eŋgowɛtɛ hwegbeeli hwe anyu i nyɔ hvɛ e kuwa likona nanu mɛnɛ. 6 Rzii a hwa kpɛɛya mono ŋmana a ma moto mɔkɔ ama ona gbe wo hwehvuma o hvaya yeni, rzii a ɛndɛ li arz hwehvuma a rzi luwe tɔ ehvuma yɔkɔ. 7 Rzii a ohweya e mogbeeli hwa hvaya ama, ɔŋgo tɛ meya meyau naŋgɛ na ma ja anu li arza ehvuma o wono wohvuma, erzihwɛ li luwa tɔ yɔkɔ, O wɔkɛ nɛ wo gbeyana mɔnyɛ ŋgundu e? 8 Rzii a mo alahwɛ nanu ema, "Tata o wo hwɛmɛ hvɛ mono ŋma Natɛɛ na ima o tina yeni na wokoma erzɔmbɛ rzɔmbɛ ya luutu. 9 Etena wo yai tɛ hvehvuma monɛi ŋma oma eya ya gbamu, ndi wo rza yai tɛ o tanɛi li wo kɛ." 10 Yerzu ama hwɛ li okolɛ o ndawo ya miteli o wunya wo li arziyolɛ, 11 Oma hwɛ molana aŋga ema ama hwɛnɛ nyambɛ ya njɛmbu. Ama unama ema a rzi tanɛ liatɛnɛnɛ. 12 Ehonda Yerzu ama mo ɛnɛ ama mo hwɛlɛ rzi a mo ohweya ama ii molana enyambɛ yanŋgɔ e ku. 13 Rzii a mo hwakɛ maa meni o mohvo, oŋgo molana a tɛnɛnɛ ŋgeli hvɔkɔ rzi a ŋgmba Lohwɛ jeka. 14 Ndi e mokaneli wa ndawo ya miteli a ma tata ehwanja Yerzu a ma oŋgirzɛ moto o wunya wo li arziyolɛ, rzi a ohweya hwato ama, "menya motohwa me tɛirzɛhwɛ o li gbeya ewolo. E je rzɔ o meŋge menya li liirzɛhwɛ rzɛkɛtɛ o wunya wo li arziyolɛ." 15 Rzi Tatɛ a mo alahwɛ a ma inyɔ hwato hwa mehvili o hweli mɔkɔ wanyu a rza wunduwa e nyaka tɔ jaakarzi jeni o jehwɛ, li ji wurzirzɛ, o li jinyirzɛ malihwa o wunya wo liarziyolɛ e? 16 Nɛ rzɔ o no molana, e ŋgɔndɔ yama Ablaham, ema mokarzɛ a ma liiŋgɛ o hvoka ya liyomɛ la meya na wambu a rza tan li wunduwahwa o ene tiŋgɛ o wunya wo li arziyolɛ e? 17 A ma ohwa nanu rzi hwokoeli hweni hwarzɛ hwa lɛmbeya irzɔni, hwato hwarzɛ hwa ma oka mɔnyɛŋgi li hvomɛnɛ hweŋge hweya hwe manyaka ema Yerzu a ma gbeye. 18 Rzii a hwa ijowa ama, "nɛ li kaneya lama Lohwɛ li ɛneya e? ima nyai ya emɛmɛni na tanɛi li li kitirzɛnɛ e? 19 Likaneya lama Lohwɛ li hweli ndi na ŋmana hvɔŋgɔ ya ekumbɛ ema moto a ma wohwe rzi a ona o moonda ŋmeni rzii e oŋga eja gbe hwɛnoni hwe ŋmanyu hwe oŋga muumbu o hwɛkɔkɔ; 20 Rzii a timba hvɛ li hwa ijowa ama i ma nyai ya ɛmɛnɛni na tanɛi likitirzɛnɛ na likaneya lama Lohwɛ e? 21 Li gbei ndi na e hwindi ema molana mɔkɔ ama wowe rzii a ika o teni a mawonde mayau ma mehvoLohwolo natɛɛ marz ma ita." 22 Yerzu rzii a ɛndɛ li akeya i mbowa ndɛnɛ na i mbowa rzali, li okolɛ o yɔndɔ yeni ya Yelurzalem. 23 Moto mɔkɔ rzi a mo ijowa a ma, "Tata ŋgurzu ja hwato mɛnɛ ndi e ogirzɛhwɛ e?" 24 Ekeke na ŋginya o li kpeeya o liyohva lihvi, na e ohweya ema, "rzairzai ja hwato hwa o arza likpeya ndi hwa rza o luwa ehvolo." 25 Etena e mo hwɛnɛ wa ndawo a tɛmi tɛ rzi a umba liyohva e tɛmɛ ndi o ewoka likumba na litɛ na li mo atɛkɛ ema o e lihvoweya liyohva, ndi mɔhvɛ a hwa alahwɛ ema, na rza hwi tɔ onei e uwɛlɛlɛ, 26 Oma erza arzarzowɛ ema i ma lalɛnɛ na li nyɔɛnɛ na owa ndeŋga o okolɛ o meyombo meyarzɛ. 27 Ndi a alahwɛ ema, "o jokɛ na rza e hwi tɔ onei e uwɛlɛlɛ. E no anjiya anu, inyɔ hwato hwa wohwe." 28 Aŋga ndi e woteya li eya na li kɔkɔ la mehvehve ehvonda e ɛnɛ Ablaham, lrzaki na Yakohvo na hwaohweli hwa hweliŋgɛ hwarzɛ o likaneya lama Lohwɛ rzii inyɔ e hvakahwa o ewoka. 29 Hwato hwa uweya o matoŋgo ma aniyɛ ma ene rze li liya o mboko ya ndema ya likaneya lama Lohwɛ. 30 Ɔŋgɔ tɛ, loŋgo la hwato hwa mburza hwa o hwɛ e hwa worzo, ŋdeŋga loŋgo la hwato hwa worzo wa o timba o mburza. 31 Liŋgi lirzako mɛnɛ loŋgo la hwato hwa Hvalirzaɛ hwa ma jaa rzii hwa ohweya Yerzu ema, "a anjiya anu oma o ɛndɛ ehvɛhvɛ eki ehwanja Elode a rza li oŋwa." 32 Rzii a wohweye a ma, "ya ɛndɛ e ohweya eŋge erzo, ɔŋgɔ tɛ na hvaya hweliŋgɛ hwe wohwe na oŋgirzɛ hwato yawono na ŋmɛlɛ ndeŋga o hweyu hwe ukirzɛ hweyau nakulɛ ewolo yami. 33 Tɔ mamɛ e gbeyɛnɛ li ɛndɛnɛ ewolo yami yawono, ŋmɛlɛ na wonɛi wunya–o jokɛ mo ohweli hwa hweliŋgɛ a rza tanɛ li ŋweeya ehvɛhvɛ mbowa li aka tɛ o Yelurzalem." 34 "Jiiyei! i hwato hwa Yelurzalem e o nwa hwaohweli hwa hweliŋgɛ na li uŋma hwaŋga hwana hwa e omeya mayai, ngeli iti na ma kekɛ li erzaŋga hwaana hwanyu, na o ma e wuhwa e hwanda i ŋguma o ma hvahve meni ndi inyɔ e rza emeya! 35 Ɔŋgɔ tɛ e ndawo yanyu e kinyɛlɛhwɛ na e o hweya e tɛɛti, ema, erza o nɛnɛ hvɛ natɛɛ e ohwa ema monamɔ na oŋgo ajeli o lina lama Tatɛ.
LUKARZI HWEHWARZU LIOMƐ NA HWENII 14
YERZU O NDAWO YA MƆKƆ WA HVALIRZAI
1 Wunya wɔkɔ wo marzo motohwa, Yerzu a ma ɛndɛ li la o ndawo ya moto mɔkɔ wa hvalirzaɛi ema a ma hwiyɛnɛ rzi hwa a mo inja nɔki nɔki. 2 Aŋga worzo weni o ma hwɛ moto mɔkɔ a ma okirzɛ nyambɛ ya itimɛtimɛ. 3 Yerzu a ma ijowa i hvalirzaɛi na e hwa hwiya mbenda ema; "o tɛirzɛhwɛ mbenda ema moto a rza oŋgirzɛhwɛ o wunya wo marzo motohwa e?" 4 Ndi hwa ma kina, a ma mo wowe rzi a mo oŋgirzɛ a mo ohweya ama a ɛndɛ e yeeni. 5 Rzi a hwa ijowa a ma, "mɔkɔ wanyu a hwɛni tɛ ŋmana tɔ nyaka rzi e unda o e hvɔndi ya malihwa o wunya wo li arziyolɛ, o rza muulɛ oteni wɔtɛmɛtɛmɛ e?" 6 Hwa rzi hwɛnɛ tɔ eya o li ohwa. 7 Na o ma a ma ɛnɛ nɛ hwaɛni hwa hvɔrzɔ i mboko ja hweluhwe o li liya rzi a hwa kpeeya mono ŋmana ama, 8 "Moto a o yowɛ tɛ o ndema ya lihwa e rza oka li liya eki ya eluhwe, ehwanja moto ema a karzami eluhwe li o aka a tanɛ li yowɛhwɛ. 9 O gbe tɛ nanu e mɔ a hwɛlɛ e ndema e ma a e yowɛ inyɔ hwahwakɛ a ja li ohweya a ma ŋgmba ono moto e mboko yaŋgɔ. O eŋgowahwa o mboko ema erza hwɛnɛ eluhwe na irzɔni. 10 O eŋganɛlɛ o yowɛhwɛ tɛ ndema, wowa e mboko ema erza hwɛnɛ eluhwe, aŋga ndi e mohwɛnɛ hwa ndema a jeli tɛ a ohweya ema ii ŋmai, tɛmɛ agba o liya o mboko ya eluhwe aŋga ndi o hwɛnɛ e luhwe na hwaŋga ema hwa yowɛhwɛ. 11 Tɔ ima mɔ ema aa karzɛ ŋmiti a rzihwirzɛhwɛ ndi e mɔ ema aa rzihwirzɛ a karzɛhwɛ. 12 Rzi Yerzu a ohweya e mɔ ema a ma yowɛ ema "o hwɛlɛ tɛ ndema o rza yowɛ hweyorza hweyaŋgɔ wonya nyɔŋgɔ tɔ litumba laŋgɔ tɔ hwewaŋgi hwe okombɛnɛ, o gbe tɛ nanu wɔhvɛ hwa tanei li o yowɛ o li o timbirzɛlɛ naa etaŋgi." 13 O hwɛlɛ tɛ ndema, yowe hwatakeli, i mboko, i njɛmbu na i ndima, aŋga ndi o namirzɛhwɛ; 14 O hwe hvumuweli hwe hwataneli. 15 Rzi mɔkɔ hwa hwaŋga a ma liya o hweleeli, na o ma a ma hweye nanu, a ma ohweya Yerzu a ma: "Monamɛ na oŋgo a o lɛɛ o ndema ya likaneya Lama Lohwɛ. 16 Yerzu rzi a timbirzɛlɛlɛ ama, "moto mɔkɔ a ma woŋgirzɛnɛ ndema ndɛnɛ, rzi a yowɛ ŋgindi. 17 E hvonda ya ndema e ma uke, a ma oma e mogbeeli hweni o li ohweya hwaŋga hwa ma yowɛhwɛ e ma e je anu ehwanja hweyarzɛ hwe ma tirzɛhwɛ. 18 Hwarzɛ na lilo lɔkɔ hwateya li ahwaŋgɛlɛ, wa worzo rzi a o hwa "a ma, na andi moonda na aŋgamɛnɛi li ɛndɛ li mo ɔŋgɔ rzoni, o no lakirzɛ." 19 Ohvɛhvɛ a ma, "na aŋgamɛnɛi ndi na andi ŋguma ja nyaka, ikaa na ɛndɛ rzɔ na ji kekirzɛ, rzoni o no lakirzɛ." 20 Onɛi hvɛ a ma; "naŋgɛ mɛnɛ ndi na hwai o eŋga narza tanɛi li jaa." 21 E mogbeeli a ma timba li ohweya rzaŋgɛ nanu, rzi e rzaŋgo ya ndawo a tata, rzi akaneya e mogbeeli hweni a ma ɛndɛ onɛi meyombo na o hwewoka hwe mbowa karzi karzi o jaane hwatakeli na i mboko na i ndima na i njɛmbu. 22 E mogbeeli ama, "ii tata ema gbeyɛnɛ na oma o arzi, ndeŋga ehvolo ehweli nanu mɛnɛ." 23 E rzaŋgo ya ndema e ohweya e mogbeeli hweni a ma o ɛndɛ o meyombo na manjeya o hwa hwɛlɛ, hwa je hwa ondirzɛ e ndawo yami. 24 Na e ohweya e jokɛ ema tɔ mɔkɔ hwa hwaŋga e ma hwa ma yowɛhwɛ, a rza o keka tɔ teŋi o ndema yami. 25 Ngindi ndɛnɛ ima hwɛ li ɛndɛ na Yerzu, rzi a eŋgowɛ a hwa ohweya a ma: 26 "Tɔ njɛnɛ ema a ja na imba rzi a rzi kɔɔ rzaŋgɛ na nyaŋgɛ, na jojiyɛ hweni na hwaana, na wonyanyaŋgo na i ndome – na loŋgɛ – a rza o hwɛ mookoweli hwami. 27 Ndeŋganɛlɛ tɔ jɛnɛ ema a rza hwanɛ e mbarza ya eni o li no nɔŋgɔ, a rza tanɛ li hwɛ e mogbeeli wami. 28 Ehweli tɛ ema mɔkɔ wanyu arza li oŋga njoŋgo, Arza loma li liya o rze o li kɔkɔ woli o li ɔŋgɔ ŋga a ohvi woli o li e kulɛ? 29 A kɔki tɛ mɔnɔŋgɔ rzi arzi tanɛ li kulɛ tɔ njɛ ema a ɛnɛ nanu a mo yɔeeya. 30 Li ohwa ema, ‘ono moto a ma woteya li oŋga ndi a rza tanɛ li kulɛ tɔ njɛ ema a ɛnɛ nanu a mo yɔeeya’. 31 Tɔ ima mokaneli e ma arza li ɛndɛ li ana njuma na ohvɛhvɛ mokaneli a rzi lome li liya o rzɛ li luteya ŋga a tanɛi na liyome la hwekoli hwe hwato o lihvomɛnɛ e mo a mɔ jeeya na mbaŋgɛ ya hwekoli e? 32 A rza tanɛi tɛ a oma hwato, ehvonda e ma onɛi a hweli hvoohvo o li atɛkɛ o nyai ya eyɔlɛ. 33 Nanu mɛnɛ hvɛ na tɔ ima mɔ wanyu ema a rza hwɛmɛ hweyarzɛ ahwɛni, a rza tanɛi li hwɛ mookoweli wami. 34 Ikpa i lou ndi i wolɛnɛi tɛ wotɛu (wotɛlu) hweni nɛ i tanɛi li hwɛlɛhwɛ ikpa hvɛ e? 35 I rza lɔɔni hvɛ tɔ monyɛ tɔ na erzɔmbɛ rzɔmbɛ ya luutu, i rzowahwa ndi onɛi, "oŋgo ema a hw ni mato o li hweya a hweya."
LUKARZE 15
1 Hwarzaŋgeli hwa njaŋgi ya likaneya, na e wɔ hwa wohwe hwa ma arzaŋganɛ aŋga, o li okaneya. 2 Hwato hwa Hvalirzai na whaokoleli hwa mbenda ya kaati ya Lohwa hwa ma aiŋgowɛ ema: "ono moto a wowhwa e hwa wohwe, na lilalɛnɛ na wɔ." 3 Yerzu rzi a hwa kpɛya mono ŋmana ema: 4 "Mɔkɔ wa anyu a hwɛni tɛ egbe ya mɛlɛŋgu rzi a wɔlɛnɛ mɔkɔ. A rza o liya meni luuwa na luuwa aŋga rzi a ɛndɛ li arza e mo ema mo wɔu na tɛ a mɔ luwa e?" 5 A mo lu tɛ, a mo toowɛ na mɔnyɛŋgi o maata meni. 6 Rzi a mo timbana o ndawo, a hwɛlɛ hweyorza hweeni na e wɔ hwa mo kombɛnɛ rzi a ohwa ama: "yoke mɔnyɛŋgi na imba, ehwanja na lu moolɛŋgu mo ami mo ma wɔ." 7 Na e ohweya ema, nanu mɛnɛ ndi e o hwɛɛ monyɛŋgi mo ndɛnɛ o ŋmanyu ya Lohwa li hwomɛnɛ moto wa wohwe, mɔkɔ ema a eyɛlɛ li aka meni luuwa na luuwa me, hwataneli ema hwa rza hwɛni hvɛ li a e yɛlɛ. 8 E hweli tɛ ema molana a hwɛni liyomɛ la kahva rzi a wɔlɛnɛ hvɔkɔ. A rza o hvaɛlɛ etulu, a tuta e, ndawo rzi arza kɔi kɔi natɛ a e luwa e? 9 A e lu tɛ, a hwɛlɛ hweyorza weni na e wɔ wa mo kombɛnɛ rzi a ohwa ama: eno okane, mɔnyɛŋgi: na ma luuwa e kahva yami e, ma wɔ. 10 Na e, ohweya ema nanu mɛnɛ ndi o hwɛ mɔnyɛŋgi o titeni ya aŋgeli ja Lohwa, na moto wa wowe mɔkɔ a e, yɛlɛ.
MWANA MO MOOŊGOŊGO MO ŊMANA
11 Yerzu rzii a wha owheya ama, o ma hwɛ moto mɔkɔ a ma hwɛnɛ hwana hwa wunyana hwahwakɛ. 12 Enɔŋgɔni e ma ohweya rzaŋgɛ ema taata, o no gbe e laa mi likai la erzaŋgo, rzi rzaŋgɛ a hwa hwaeya erzaŋgo. 13 O rzi kuwe mbɔ rzi enɔŋgɔni e rzaŋga mamɛ yarzɛ a ma hwɛnɛ, rzi a ɛndɛ ekome e ma rzɔlɛnɛ aŋga ndi ama hvaŋge monamɛ ŋmeni o loŋgɛ la eeti. 14 A ma kulɛ li hwaŋga mamɛ yarzɛ ama hwɛnɛ, O ma ja njao o eŋge mbowa yarzɛ rzi a hwɛ o litake. 15 Rzi a ɛndɛ li a timbirzɛ na mokomi wa moto mɔkɔ wa eŋge mbowa rzi a mo oma o waŋga yeni li woŋgowa i ngowa. 16 A ma okeya li aajurzɛ na moleli i ŋgowa i ma hwɛ li laa ndi tɔ moto arzi mo gbe. 17 Ehvonda a ma jee o lihwiye leni rzi a i jowɛ mo ŋmiti ama, jɔjɔ ja hwagbeeli hwa ma taatɛ hwa hwɛni moleli mo hwa akao lila, rzi imba na ŋwaana e njao anu e? 18 Na anjiiya na timba o ma taatɛ na mo ohweya ema: taata na gbee wohwe li tatirzɛ e ŋmanyu na owa, 19 Na rza uki hvɛ tɔ o li hwɛlɛhwɛ ŋmana wa aŋgɔ, o no timbirzɛ naa mɔkɔ wa hwagbeeli hwaŋgɔ. 20 Rzi a anjiya, a ɛndɛ li uŋma rzaŋgɛ; Na oma a ma uweya onɛi hvoo, rzaŋgɛ a ma mo ɛnɛ, a ma lɛmbeya iili, rzi a hwaŋga li mo arzaŋgalɛnɛ na li mo rzɔmbɔ, 21 Rzi e ŋmana a mo ohweya ama: "taata, na tonani e ŋmanyu na Lohwa, na rza uki hvɛ tɔ oŋgo a tanɛ li hwɛlɛhwɛ ŋmana waŋgɔ." 22 Rzi rzaŋgɛ a ohweya hwa gbeeli hweni ama! "E jaane moŋgobe mo lɔu li aka mearzɛ e mo wɔtirzɛ e mɔ karzikarzi. E mo rzoŋgɛ jɔndɔ o jɔnɔ jeni na hwetambi o mataŋga; 23 E jaane monani mo nyaka mo wɔki e mo oŋwe. Inyɛ i le e oke mɔŋyɛŋgi, 24 Ehwanja, o no ŋmana wami ama ŋwa ndi a timbi hwɛ li hwɛ loŋgɛ. Aɛma wɔ ndi a luwahwi. Rzi wa woteya li oka ɔŋyɛŋgi. 25 Eŋge hvonda e ŋmana wa molulu a ma hwɛ o waŋga. A ma je li kombɛnɛ e ndawo a ma hweya jeembo ja mawɔmi na ŋgɔmɔ. 26 Rzi a hwɛlɛ mogbeeli mɔkɔ a mo ijowa ama, "mamɛ e gbeyenɛ." 27 Rzi a mo alahwɛ ama "manyɔŋgɔ a jeli," rzi rzɔŋgɛ a oŋwi moonani mo nyanka mo wɔki ehwanja a timbi na li liya la gbamu. 28 Ŋmanyaŋgo wa molulu a ma tata, a rzi emeya li kpeeya o ndawo. Rzi rzaŋgɛ a wurza a ɛndɛ li mo atɛkɛ. 29 Ndi a ma ohweya rzaŋgɛ ama, "ɔŋgɔ tɛ! Mene meya mearzɛ ema na ma o gbeeya e rzi hwɛ maniya; ndi o rzi no gbeli tɔ ŋmana mboli hvɔkɔ ema mbahwɛ na oke mɔnyɛŋgi na hweyorza hwe ami. 30 Ndi o no ŋmana wa aŋgɔ a hvaŋgi erzaŋgo ya aŋgɔ na hwalana hwa akpala a jeli rzi o mo oŋweli moonani mo nyanka mo wɔki." 31 Rzi rzaŋgɛ a mo alahwɛ ama, "ŋmana ami ɔ, o hweli na imba i hvonda jarzɛ ndeŋga to mamɛ na hwɛni e hweli ndi e ya aŋgɔ, 32 O eŋga i oka mɔnyɛŋgi ehwanja o no ŋmanyɔŋgɔ a ma ŋwa rzi a timbi hwɛ o loŋge ama wɔ rzi a luhwahwi."
LUKARZI HWEHVARZU LIOMƐ NA MOTOWA 16
ŊMANA MO E MOGBEELI WA WOHWE
1 Yerzu a ma ohweya hwaɔokoweli hweni ema: O ma hwɛ e waŋgi ya moto yɔkɔ a ma hwɛn mogbeeli ema hwa ma rzambe ema a hvaŋga e rzaŋgo ya ma rzaŋgɛ. 2 A ma mo hwɛlɛ rzi a mo ijowa ama; Mamɛ ene na hweya nanu li o teŋgɛnɛ e? O noŋgbe hwɛkɔkeli hwe ewolo yaŋgo ehwanja o rza tanɛ li hwɛ e mogbeli wami hvɛ. 3 E mogbeeli a ma arzarzowɛ ama, mamɛ na gbeya naŋgɛ e? Rzaŋgo ya ami a no ulɛ o ewolo. Na rza imbami o li ima, ndeŋga na o ka irzɔni o li ɔmbɔ. 4 Na hwi mamɛ na hwɛni li gbeya aŋga nanu na ulɛhwɛ tɛ o ewolo yami anu, hwato hwa no wowa o ndawo jawu, 5 A ma hwɛlɛ hwato rzaŋgɛ a eta maɛmɛ mɔkɛ, mɔkɛ. A ijowa e wa worzo ema, Mamɛ rzaŋgo yami a o eta e? 6 A ma mo alahwɛ ama hwegbe wambi hwe meloŋga me mauja ma njahwi. Rzi a mo ohweya ama, "Wowa e kaati ya aŋgo ya liyɛmɛ, liya o rze karzikarzi, o tile hwegbe weni. 7 Rzi a ijowa hvɛ onɛi a ma mamɛ wa hvɛ o etahwa e? Ama mo alahwɛ a ma ikoli ja meloŋga me mbarzi. Rzi a mo ohweya ama wowa e kaati ya aŋgɔ ya liyɛmɛ, o tile hwegbe wambi 8 Enge ewaŋgi ya moto rzi a eka oŋgo mogbeeli wa wowɛ ehwanja a gbeyani gbaŋgo, ehwanja hwato hwa ene rze hwa hwɛnɛ maluteya ma gbamu na wonya nyaŋgo li aka hwaŋga ema hwa hweli o ŋmɛnɛni. 9 Ndi na e ohweya ema, e gbeyane monamɛ mo ene rze o li luwa hweyorza, O li arza nanu ema mo ku tɛ, o wo hwahwa o likaneya la loŋgɛ la gbinda na gbinda 10 Oŋgo ema a hweli jɔkɛ o hweya hwe rzali a tanɛ hvɛ li hwɛ jɔkɛ o hweya hwe ndɛnɛ, ndeŋga o ŋgo ema arza enje jɔkɛ o hweya hwe rzali a rza hwɛ hvɛ jɔkɛ o hweya hwe ndɛnɛ. 11 E hweli tɛ ema o rza enje tɛ jɔkɛ o li wowa monamɛ mo ene rze, njɛnɛ a tanɛ li o hwɛmeya monamɛ mo jɔkɛ e? 12 E hweli tɛ ema o rza enje jɔkɛ o erzaŋgo ya hwahvɛhvɛ hwato, njɛnɛ a o ŋgba e yaŋgɔ erzaŋgo e? 13 Tɔ mogbeeli arza tanɛ li gbeeya rzaŋgo ihwakɛ. A tanɛ a kɔɔ mɔkɔ rzi a liŋgana o nɛi, tɔ a aŋgbɛ mɔkɔ rzi a rzɔnjɛlɛ o nɛi. E rza tanɛ li gbeeya Lohwɛ na woli wo ene rze. 14 I Hvalirzai, ima liŋgana woli wo ene rze hwa ma hweye hwene hweya hwe arzɛ rzi hwa luŋgɛ Yerzu. 15 Rzi a hwa ohweya ama, inyɔ ndi ya a rzuulɛ inyɔ mɛnɛ o mirzɔ ma hwato, ndi Lohwɛ a hwi meema me anyu. E ŋge ema moto a wohwi woli tɔ e tanɛ li kɔɔwɔ o worzo woma Lohwɛ. 16 E mbenda na hwa ohweli hwa hweliŋgɛ hwe ma wurzirzɛ hvɛ na tɛɛ na e hvonda yama Yovanirzɛ. Liwoteya eŋge hvonda, mɛɛndi me gbamu me likaneya lama Lohwɛ me hweli me ohwahwa, ndeŋga tɔ njɛ a hweli li ainɛlɛ likpeeya o teni. 17 E rzaambi e ŋmanyu na erze li ŋyɔŋgɔ li aka ema litɔti la erzau li ulɛhwɛ o mbenda. 18 Tɔ njɛ ema a hwai jojiyɛ weni rzi a hwa ohvɛhvɛ a undi mbenda morzonje, ndeŋga e mo hwɛ a hwai oŋgo a wurzirzɛhwɛ o lihwa mɔ hvɛ a undi mbenda ya morzonje.
E WAŊGI YA MOTO NA LARZALORZI
19 O ma hwɛ ewaŋgi ya moto yɔkɔ e ma hwɛ li awɔtirzɛ na mawɔti ma hwandɛnɛ ama liya o hweliyeli hwe karzami ŋmenya tɛ 20 Aŋga liyohva leni la kɔtɔ o ma ikahwa mogbeeli a ma hwɛlɛhwɛ Larzalorzi, e nyo yeni e ma onda na hveya 21 A ma okeya li laa i mbumbu ema i ma unda o eki ya hweleeli hwe eŋge ewangi ya moto. I ŋgbaa i ma ja li tɛmbɛ i hveya jeni. 22 E hvonda e ma uke o ŋgo mogbeeli rzi a ŋwa, i aŋgeli i ma mo hwanɛ rzi i mo i ka o toŋgoŋgo yama Ablahamu. Enge, ewaŋgi ya moto yɔ hvɛ e ma ŋwa, rzi hwa mo imeya. 23 Rzi a embɛ ema a hweli ndi o ekome ya kweli ya litake, a ma ɔŋgɔ o. Ŋmanyu rzi a ɛnɛ Ablahamu onɛi hvohvo na Larzalorzi o toŋgoŋgo ya eni. 24 Rzi a tɛ morzeya a hwɛlɛ, "Taata Ablahamu, ono okeya iili o ome Larzalorzi a tɔte e rzɔ ya jɔnɔ jeni o malihwa a no rzimirz jɛɛmɛ, ehwanja na rzeeli o teni a mono munya. 25 Rzi Ablahamu a mo alahwɛ ama, "Ii ŋmana ɔŋgɛlɛ e hvonda o ma hvɛ o loŋgɛ o ma luwa hweema hwe aŋgɔ hwe gbamu, ndi Larzalorzi a ma luwa ndi e hwee wohwe, ndi o nangɛ mo a hweli gbamu anu ndi o wa o hweli o ndutu. 26 Li aka hvɛ tɔ nanu, O tiiteni yarzu na owa o hweli mbɛŋgu e ikahwi, ema hwaŋga hwa arza li aka oŋgo hwa rza tanɛ, to hwaŋga hvɛ hwa hweli oŋgo hwa rza tanɛ li ja o no. 27 A ma mo alahwɛ ama, "Na o a tɛkɛ, taata, oma Larzalorzi o ndawo yama rzaŋgɔ ami, 28 Ehwanja na hwɛni wonyanyaŋgoami hwata. A hwa kokohwɛlɛ, wɔ hvɛ hwa rzi ja li jaa anu eki ya ndutu. 29 Ablahamu a ma a lahwɛ ama, "Hwa hwɛni Morze na hwaohweli hwa hweliŋgɛ; inyɛ hwa wo okaneya. 30 Rzi a ohwa ama "jaɛ taata Ablahamu," ndi mɔkɔ a uwɛlɛlɛ tɛ o ekome ya kpeli o li hwa uŋma hwa tikowa. 31 Ablahamu rzi a mo ohweya ama, hwa rza hweyani tɛ Morze na hwa ohweli hwa hweliŋgɛ, hwa rza tan li eŋgowahwa tɔ e hwɛ ndi ema mɔkɔ a hvumu o kweli.
LUKARZI HWEHVARZU LIOMƐ NA LIRZAMBA 17
WOHWE – LIKOKƐ – EWOHO
1 Yerzu ama ohweya hwa okoweli hweni hweya ema hwe gbeya hwato hwa gbeya wohwe amah, "we hwɛni lija, ndi mojema na oŋgo ema awe jaana; 2 A lɔu ndi likakahwa liyai li ndɛnɛ o liwɔ, rzi hwa mo hvimba o teni ya ŋmanja, laka mo li tonirzɛ mɔkɔ wa hwanu hwarzsali." 3 O eŋganɛlɛ e aŋgowɛlɛ inyɔ mɛnɛ. Ŋmanyɔŋgo a toni tɛ; o mo lomeya, e hweli tɛ ema a eŋgowa tɛ omo lakirzɛ. 4 A o gbeyani tɛ wohwe ŋgeli lirzamba o wunya, Rzi a o timbeya hvɛ ŋgeli lirzamba, li ohweya nanu ema natoni, omo lakirzɛ. 5 Hwabgeeli hweni hwa ma mo ohweya ema, "Rzaŋgo ojo hwateya lilokɛ." 6 A ma timbirzɛlɛlɛ ama "e hwɛni tɛ lilokɛ ema li tu, na hvɔŋgɔ ya ekumbɛ, o tanɛi li ohweya wono wuma ema wuŋguweya o na hwe onɛ o ŋmanja, wo o hweyana. 7 E hweli tɛ ema mɔkɔ wanyu a hwɛni tɛ mogbeeli wa waŋga, tɔ wa aoŋgeya mɛɛlɛŋgu. Atanɛi, li ohweya e mogbeeli ema auwɛlɛlɛ o waŋga ema, ja naŋgɛ liya orze ole e?" 8 A rza o mo ohweya ndi ama, ono ihvɛlɛlɛ moleli mo ami, woŋgirzɛnɛ o li ambɛlɛl na oma na laa na linyɔ o mburza nanu ohwa hvɛ otanɛi li la na linyɔ. 9 A eka oŋgo mogbeeli ema a gbei mamɛ ema a ohwahwɛlɛ o li gbeya, ohwa ndi ema i rzenje hwagbeeli hwa gbamu, i gbei ndi ewolo yarzu. 10 O eŋganɛlɛ, owa hvɛ o ma gbeya tɛ mamɛ yarzɛ ema ohwahwɛlɛ o ligbeya, ohwa ndi ema i rzenje hwagbeeli hwa gbamu, i gbei ndi ewolo yarzu.
LIYOME LI MA OŊGIRZƐHWƐ
11 Na oma Yerzu ama hwɛ li ɛndɛ o Yelurzalem, ama akeya o toŋgoŋgo ya Rzamaliya na Galileya. 12 Na oma ama kpeeya mbowa hvɔkɔ, liyome la hwato ema hwa ma ɔkirzɛ enyambɛ ya mɔlɔŋgɔ, hwa ma uŋma Yerzu, ndi hwa ma tɛmɛ hvohvo, 13 Rzi hwa mo hwɛlɛ na lilo li karzami ema, Rzaŋgo Yerzu o jokeya iili. 14 Na oma ama hweye rzi, a hwa ohweya ama, e ɛndɛ e auŋmɛlɛ o hwagbeeli hwa hweliŋgɛ, na oma hwa ma hwɛ li ɛndɛ rzi hwa wɔwɔ. 15 Mɔkɔ wawu ama ɛnɛ nanu ema ama wɔwɔ, Rzi a timba o mburza o li eka Lohwɛ na lilo li karzami, 16 A ma kpa o mataŋga mama Yerzu, limo eka, ndeŋga ama hwɛ hvɛ ndi moto wa Rzamaliya. 17 Yerzu rzi a ijowa ama, Rzɛkɛ e mahwɛ liyome ema e wohwirzɛhwɛ e? Onɛi luuwa lihweli e? 18 Tɔ mɔkɔ arza timbi o liŋgmba Lohwɛ jeka laka ono mojili e? 19 Rzi amo ohweya ama, Tɛmɛ o ɛndɛ, lilokɛ li aŋgɔ li o wohwirzɛ. 20 Hwonda hvɔkɔ i Hvalirzaɛi ima ijowa nanu ema, "ima hvonda likaneya lama Lohwɛ lija e?" Yerzu rzi ahwalahwɛ ama; 21 Tɔ hwato wa ohwa ema li rzaja na nyai ema yɛneya o mirzo, Ehwanja likaneya lama Lohwɛ li hweli na inyɔ. 22 Yerzu rzi ao hweya hwaokoweli hweni ama, "Ehvonda ehweli eja ema e o warzo o li ɛnɛ wunya wɔkɔ woma e ŋmana moto, ndi e rza wo ɛnɛ." 23 Hwato hwa eyohweya ema, mɔ ɔnɛi tɔ mɔ ono, e rzi keka lihwa nɔŋgɔ. 24 Ehwanja e ŋmana moto, o wunya hweni, ao hwɛ ndi naa liŋmɛti-ŋmɛti la Lohwa li ŋmɛtɛ o ŋmanyu yarzɛ. 25 Ndi a loma litaka rzarzai ndeŋga li rzɔrzɔwɔ na ene nyɔŋgɔni, ndeŋga aja. 26 Na oma ema gbeyɛnɛ ehvonda yama Nowa, nanu mɛnɛ hvɛ ndi e ohwɛ menya mema e ŋmana moto. 27 Hwato hwa ma hwɛ lila, na linyɔ. Lihwa na ligbaawa o mahwa, natɛɛ wuunya ema Nowa ama kpeeya o iwoŋgo. Rzi e mbuwa ya muumbe eyɔ, e hwa oŋgwa hwarzɛ. 28 Nanu mɛnɛ ndi ema hwɛ ehvonda yama lɔti. Hwato hwa ma hwɛ lila, linyɔ, li anda li a hwirzɛ, li ona na li oŋga. 29 Ndi wuunya ema Lɔti ama anjiye o Rzodom, muunya na hwekaando hwe ma yɔ na mbuwa o li hwa rzɛlɛ hwarzɛ. 30 Nanu mɛnɛ ndi e ohwɛɛ o wunya ema e ŋmana moto a uŋmɛlɛhwɛ. 31 O woŋgo wunya oŋgo ema a ohwɛ o ŋmanyu ya likaando arza tanɛ lirzihwa o li hwewowa. Nanu mɛnɛ na hwaŋga hwa ohwɛɛ o waŋga hwa rza o timba liwowa to yoma. 32 Oŋgɛlɛ jojiyɛ wama Lɔti; 33 Tɔ njɛ ema aarza kombɛ loŋgɛ leni, ali wɔlɛnɛ. Ndeŋga to jɛ hvɛ ema a wolɛnɛ loŋgɛ leni a li kombɛ. 34 Na e ohweya ema, o woŋgo wu, hwato hwahwakɛ hwa o naŋga linɔŋgɔ lɔkɔ, mɔkɔ a wowahwa, ndi ɔnɛi a liiya. 35 Hwalana hwahwakɛ hwa ohwɛ o li rzika i hvɔŋgɔ, mɔkɔ awowahwa ndi onɛi a liiyahwa. 36 Hwato hwahwakɛ hwa o hwɛ o waŋga, mɔkɔ a wowahwa ndi ɔnɛi a liiyahwa. 37 Rzi hwa mo ijowa ema, "Tata one e?" Ama hwa alahwɛ ama, "to ima eki ehweli miimba aŋga ndi ikaka i arzaŋganɛ."
LUKARZI HWEHVARZU LIOME NA HVAMBI 18
ŊMANA MO MOKURZE EMA MO OHVIRZƐI
1 Yerzu ama kpɛɛya hwaokoweli hweni mono ŋmana ema, "o li hwa uŋmɛlɛ nanu ema, hwa hwɛni likanɛ ihvonda jarz erzihwɛ lɔtɔ." 2 Yerzu rzi a ohwa ama; "Mokairzeli mɔkɔ a ma hwɛ mbowa hvɔkɔ, a rzi oke Lohwɛ wɔŋgɔ, ndeŋga arzi hwɛnɛ hvɛ tɔ hvonda na hwato. 3 O ma hwɛ hvɛ mokurze mo molana o eŋge mbowa, ema mo maje ŋgɛlɛŋgɛlɛ o limo atɛkɛ "ama o no rzuulɛ ŋmaŋgo ema na hwɛni na e mokɔeli wami. 4 " O hwewoteli oŋgo mokairzeli a rza imanɛlɛ, ndi o lirzuku ama a ohwanɛlɛ mɔ ŋmiti ama," To nɛ na rza oka Lohwɛ wɔŋgɔ, ndeŋga na rza hwɛnɛ hvɛ hvonda na hwato: 5 Ndi nɛ tɛ mono mokurze mo molana mono takirzɛ rzarzai na aŋgamɛnɛi li ɛnɛ nanu ema na mo rzuulɛ, anga nanu a rzao no jeeya hvɛ o li no takirzɛ." 6 Rzaŋgo rzi ao hwa ama, "e o kaneya mamɛ emokairzeli wa wohwe a ohwa. 7 Rzekɛ Lohwɛ hvɛ a o rzuulɛ ewɔ hweni ema a hvɔrzi, ema hwa mo eyeyaa ŋmerze na wuuwu e? A o hwata ndi o li hwa hvaya onɛi e? 8 Na e ohweya ema, a ɛnɛ nanu ema, a hwa rzuulɛ karzi karzi. Ndi tɔ nanu, ehvonda e ŋmana moto a o jɛ, ao uŋma lilok orze e?
ŊMANA MO MOTO WA HVALIRZA Ɛ NA EMORZAŊGELI WA NJAŊGE YA LIKANEYA
9 Yerzu ama kpɛɛ hvɛ mono ŋmana, o lihvomɛnɛ hwato ema hwa ma awowɛ ema hwatɛmi ehvehve, rzi hwaa ndinda hwanɛi, 10 "Hwato hwahwakɛ hwa ma ɛndɛ o ndawo ya Lohwa li kanɛ, mɔkɔ ama hwɛ ndi moto wa hvalirzaɛ, onɛi hv morzaŋgeli wa njaŋge ya Likaneya. 11 E moto wa hvalirzai ama tɛmɛ o ŋmanyu rzi aakanɛlɛlɛ mo iti ama "Lohwa, na o eki nanu ema na rza enje naa hwa hvɛhvɛ hwato wa hwaihwe, hwagbeya wohwe, ewɔ hwa morzonje tɔ naa ono morzaŋgeli wa njange ya likaneya. 12 Na liya mokia njao ŋgelɛ ihwakɛ o menya lirzamba. Ndeŋga na ŋgmba maahweya ma loŋgo lɔkɔ o liome o mamɛ yarzɛ ema nahwɛni na luwa. 13 Ndi emorzaŋgeli wa njaŋge ya likaneya mɔ hvɛ ama tɛmɛ hvoohvo a rzi tanɛ hvɛ tɔ li ɔngɔ o ŋmanyu ya Lohwa ndi ama ika maa meni o mahwembe rzi a ohwa ama, "Lohwa o no okeya iili imba moto wa wohwe." 14 Na e ohweya ema ono moto rzeketɛ o nɛi a matimba ondawo Yeni na morzuulɛ oworzo woma Lohwɛ Ehwanja tɔ njɛ ema aakarzɛ mɔ ŋmiti a rzihwirzɛhwɛ ndeŋga oŋgo ema a arzihwirzɛ, mɔ ŋmiti akarzɛhwɛ.
HWAANA HWARZALI NA YERZU
15 Hwato hvɛ hwama janeya Yerzu hwaana hwarzali, ema a hwa lɛmbɛ. Ehvonda hwaokoweli hweni hwa ma ɛnɛ nanu hwa ma hwa lomeya. 16 Ndi Yerzu ama hwɛlɛ hwaŋga hwana, Rzi a ohwa ama, Ehwɛmɛ hwaana hwarzali hwa je na imba erza hwa wunana ehwanja likaneya lama Lohwɛ li hweli ndi elaawu. 17 Na e ohweya ejɔkɛ tɔ ima mɔ ema arza wowɛ likaneya lama Lohwɛ naa ŋmana morzali arza li kpeeya.
EMOKANELI ANAMI
18 Mokaneli mɔkɔ ama mo ijowa ama, Ii mookoleli wa gbamu, mamɛ natanɛi li gbeya o liluwa loŋgɛ ema li rzakuwa e? 19 "Yerzu rzi a mo alahwɛ ama, "mamɛ ndeŋga tɛ o no hwɛlɛ wa gbamu e? Tɔ mɔkɔ a rza enje gbamu, li aka tɛ Lohwaɛ mo ŋmiti." 20 O hwi i mbenda: O rza itɛ morzonje, o rza oŋwa, o rza ihwa o rza tɛmɛ mboŋgi ya molaŋga, lokɛ rzɔŋgɛ na nyɔŋgɛ: 21 E mokaneli rzi a ohwa ama "na ikai hwene hweyarzɛ li woteya ema na hweli ŋmana. 22 Yerzu a ma hweye nanu Rzi a mo ohweya ama, "o tɛɛni hvɛ eya yɔkɔ a hwirzɛ hweyarzɛ ema o hwɛni, o ŋgmbe hwatakeli aŋga ndi o hwɛnɛ liwuta o ŋmanyu ya Lohwa ndeŋga o ja li no nɔŋgɔ. 23 E mokaneli ama hweye nanu ama tata rzai-rzai ehwanja ama nama rzai-rzai. 24 Yerzu ama mo ɔŋgɔ rzi a ohwa ama "e ambani hvɛ e waŋgi o li kpeeya o likaneya lama Lohwɛ! 25 O jokɛ erza ambani kameli o likpeeya lihvɔndi la ndɔndɔki liaka ewaŋgi ya moto o li kpeeya o likaneya lama Lohwɛ. 26 Ewɔ ema hwama hweya nanu hwa ijowa ema, "Eyaa njɛnɛ rzɔ a tanɛi li oŋgirzɛhwɛ e? 27 Yerzu rzi aalahwɛ ama, "mamɛ ema e ambani hwato, erzaambi na Lohwɛ." 28 Petolo rzi a mo ohweya ama, ima hwɛmɛ hweyarzɛ o li o nɔŋgɔ; 29 "Yerzu rzi a hwa ohweya ama, na e jɔkɛ, "orzenje to mɔkɔ wanyu ema ahwɛmi embowa yeni, jojiyɛ weni, wonyanyaŋgo, Rzaŋgɛ na nyaŋgɛ to hwaana hweni, o gbamu wo likaneya lama Lohwɛ. 30 Ema hwa rza oluwɛ rzairzai o lini loŋgɛ na elɔ ema li ojɛ, ema lirzakuwa.
YERZU A MA OHWA LIHVOMENE EKPELI YENI
31 Yerzu ama wowa Liyome leni la hwaokoweli na hwa hwakɛ rzi a hwa a tindamɛ o toŋgoŋgo, rzi a hwa ohweya ama, "jaɛndɛ lɛlu o Yelurzalem ndeŋga tɔ mamɛ ema e tilahwi na hwaohweli hwa hweliŋgɛ lihvomɛnɛ e ŋmana wa moto e o ndirzɛhwɛ. 32 Hwa mo ŋgmba o maa ma hwato hwa rza hwiyɛ Lohwɛ. Hwa mo rzilɛ hwa mo hwɛnyɛ hwa mo rzɔeya hweyɔli, hwa mo anana ndeŋga hwa mo oŋwa. 33 O hweyu hweukirzɛ hweyao a hvumuwa." 34 Hwaokoweli hweni hwarzi rzɔŋgitɛnɛ hwene hweya. Hweteleli hwe hwene hweya hwe ma hwa utahwɛlɛ, ndeŋga hwa rzi hwiye mamɛ ama hwɛ li ohwa.
E MOTO WA NDIMA WA JƆƆMBI AMA ENE
35 Na oma Yerzu ama Kombɛnɛ Yeliko, Moto wa ndima mɔkɔ a ma liya o Toŋgoŋgo ya njiya o li ɔmbɔ. 36 Na oma ama hweye eŋgindi e aka, rzi a ijowa o li hwiya mamɛ ema egbeyɛnɛi. 37 Rzi hwa mo ohweya ema " Yerzu wa Narzalɛti mɔ ndi aaka." 38 Rzi oŋgo moto wa ndima a tɛ morzeya, limo hwɛlɛ ama, "ii Yerzu e ŋmana wama Dahwiti ono keya iili!" 39 Hwaŋga ema hwama hvuŋgana hwa ma mo lomeya, rzi hwa mo ohweya ema, aandame, ndi ama tɛ hvɛ ndi nanu mɛnɛ, "eŋmana wama Dahwiti, ono keya iili." 40 Yerzu a ma tɛmɛ a hwa kaneya ama, "hwa mo janeya oŋgo moto." Na oma ama kombɛnɛ, rzi Yerzu amo ijowa ama: 41 "Mamɛ o arza o ma na ogbeeya e?" Rzi aalahwɛ ama, "Rzaŋgo e, naɛarza ema na ɛnɛ." 42 Yerzu rzi a mo ohweya ama, ɛnɛ; lilokɛ laŋgɔ li o wɔhwirzɛi. 43 O wotɛmɛtɛmɛ ama ɛnɛ rzi anɔŋgɔ Yerzu a eka Lohwɛ na oma hwato hwarzɛ hwa ma ɛnɛ nanu, wɔhvɛ hwa ma eka Lohwɛ.
LUKARZI HWEHVARZU LIOME NA LUWA 19
RZAKIO E MORZAŊGELI WA NJAŊGE YA LIKANEYA
1 Yerzu o yɔndɔ yeni rzi a kpeeya o Yeliko. 2 Moto mɔkɔ a ma hwɛ e mondɛnɛ wa hwarzaŋgeli hwanjaŋge ya likaneya, ndeŋga ama hwɛ ndi ewaŋgi, 3 A ma arza li ɛnɛ njɛ Yerzu a hweli, nɛ tɛ a ma utuwe, a rzitanɛ, ehwanja e ŋgindi e ma koka. 4 A ma hwaŋga li ɛndɛ o worzo. Rzi aagba gbee wo Rzikamo, o li mo ɛnɛ, Ehwanja Yerzu ama hwɛnɛ ndi li akeya o eŋge njiya. 5 Ehvonda Yerzu ama uke o eŋge eki, rzi aɔŋgɔ o ŋmanyu, amo mo ɛnɛ, rzi amo ohweya ama, "Rzakiyo rzihwa karzi-karzi. Na aŋgamɛnɛi lihwɛ o ndawo yaŋgo yawono. 6 Rzi a rzihwa o wotɛmɛtɛmɛ, amo kɔmɔ na monyɛŋgi. 7 Hwato hwarzɛ hwama ɛnɛ nanu, rzi hwa woteya o li aiŋgowɛ, ema a ɛndi ndi lihwɛ ŋmɛni o ndawo yama moto wa wohwe. 8 Ndi Rzakiyo a ma tɛmɛ o ŋmanyu, rzi a ohweya Rzaŋgo ama, "Rzaŋgo, oŋgo tɛ! O naŋgɛ mɛnɛ na ŋgmba hwatakeli ehvarzu ya lirzaŋgo lami, ndeŋga e hweli tɛ ema na malɔkɔnɔ tɛ moto yoma na mo taŋgeya ŋgele inɛi ja mamɛ ema na ma mo wowanɛ." 9 Yerzu rzi a mo ohweya ama, "O yaono li oŋgirzɛ likpeeli o ene ndawo, Ehwanja ono moto, mo hvɛ, ahweli ndi ŋmana wama Ablahamu. 10 Ehwanja e ŋmana wa moto a jeli ndi o li arza na li oŋgirzɛ waŋga ema wa wɔ.
ŊMANA MO WOLI EMA WO HWƐLƐHWƐ MAYINA
11 Na oma hwa ma hwɛ o li mookaneya, Rzi a hwa kpɛɛya hvɛ ŋmana, Ehwanja ama kombɛna Yelurzalem, weŋga hwato hwa ma oŋgɛlɛ ndi ema likaneya lama Lohwɛ li ja ndi naŋgɛ mɛnɛ. 12 Rzi aohwa ama: "moto moko a ma yahwɛnɛ eluhwe, A ma ɛndɛ ekome ema rzɔlɛnɛ, a maarza ema hwa mo hvɔrze mokaneli ndeŋga a etimba. 13 Rzi a hwɛlɛ liyomɛ leni la hwagbeeli, ahwa ŋgmba liyome la (kahva), rzi a hwa ohweya ama, e ika wono woli o ewolo natɛɛ naja." 14 "Ndi hwato hweni hwa ma mo kɔɔ (hwa rzi mo liŋgane) weŋga hwa ma mo omeya hwato, o li mo ohweya ema, "Irzɔ i rza o a rza ema ohwɛ emokaneli warzu." 15 Ndi tɔ nanu ama liilɛhwɛ e mboko o likaneya eŋge mbowa ema ama ɛndɛ, ndeŋga a e timba o mbowa yeni. Rzi aarzirzɛ hwa gbeeli hweni ema ama liiya woli, o li arza o lihwiya mamɛ ema hwalu naa morzɛŋgi. 16 "E mogbeeli wa worzo a maja, rzi aohwa ama, Tata, woli oma no ŋgmbe, wo nyai liyomɛ la ŋgele. 17 "Mɔhvɛ rzi a ma mo alahwɛ ama, ohweli ndi mogbeeli wami wa gbamu, ehwanja o uŋmɛlɛ e jɔkɛ o hweya hwerzali, o eŋganɛlɛ na o ŋgmbeli liyomɛ la mabowa o likaneya." 18 "E mɔ ema a ukirzɛ hwahwakɛ mohvɛ a maja, rzi a ohwa ama, Tata, woli oma no ŋgmbe wonyai ŋgele ita. 19 "Rzaŋgɛ ama mo alahwɛ ama, o kaneya mbowa ita." 20 Rzi ohvɛhvɛ mogbeeli aja, a ohwa ama, Tata, woli waŋgo wo ono; nama wokaka o moenja mo lihwato rzi na wo uta. 21 Na ma oka waŋgɔ ehwanja o ambirzɛnɛ. O wowa mamɛ ema erza enje yaŋgɔ, ndeŋga o wowa hvɛ mamɛ ema o rza onɛ. 22 "Rzaŋgɛ a ma mo alahwɛ ama, na o kairzɛ lihvomɛnɛ embɔrzi yaŋgo, o wa moogbeeli wa wohwe, Rzeke o ma hwiya ema nahweli ndi moto aambirzɛnɛ, ema na wowa mamɛ ema narza hwɛnɛi, na li wowa mamɛ ema na rza onɛi e? 23 Mamɛ ndeŋga o rza ika woli wami o ndawo ya mawuta, aŋga ndi na oma na jeli nanu na wo luana morzɛŋgi. 24 "Rzi ao hweya hwaŋga hwa ma tɛmɛ aŋga ema, emo wowane e kahva yeni, ye e ŋgmbe emɔ ema a o hvi liyome la kahvaɔ hvɔŋgi." 25 Rzi hwa mo ohweya ema, "ii Tata, mɔ a lomi li ohva liyome!" 26 Yerzu rzi a hwa ohweya ama, "tɔ njɛnɛ ema ao hvi aŋgmbaahwa hvɛ rzai rzai. Ndeŋga oŋgo ema arza ohvɛ tɔ yoma, tɔ eŋge teiŋ hvɛ ema a ohvi e mo wowahwɛnɛ. 27 Ndi hwaŋga hwakoeli hwami ema hwarzi arzɛ ema na hwɛ e mokaneli wawu ehwa jaana anu, ehwa oŋwe oworzo wami. 28 E hwonda Yerzu ama kulɛ li ohwa hwene hweya, a ma ɛndɛ o worzo li agba o Yelurzalem. 29 Na oma a ma kombɛnɛ o Hwetihveji na Hwetani, o mooli mo hwɛlɛhwɛ e hvako ya njahwi, rzi a oma hwaokoweli hweni hwahwakɛ, rzi a wo hweya ama. 30 "E ɛndɛ o eŋge mbowa ehweli o worzo, na oma ekpeeli o teni, e uŋmanɛlɛ jakarzi i kakahwi aŋga, Ema i rzi liyahwi tɔ moto. E ji wunduwe, e ji jaane anu. 31 Moto a e ijowi tɛ ema, mamɛ e ji wunduwana e? E mo o hweya ema, Rzaŋgo ndi a jarzi." 32 Hwaŋga ema hwa ma omahwa, hwa ma ɛndɛ rzi hwa ji uŋma i kakahwi na oma ama ohwe. 33 Na oma hwa ma hwɛ liwunduwa iŋgi jakarzi, ewɔ ema hwa ma ji hwɛnɛ hwa ma ijowa ema, mamɛ ndeŋgatɛ e wunduwa iŋgi jakarzi? 34 Rzi hwa wa alahwɛ ema, "Rzaŋgo ndi a ji arzi." 35 Hwama ji janeya Yerzu, Rzi hwataalɛ maato mawu o ŋmanyu ya jakarzi, rzi hwaagbɛlɛ Yerzu oŋmanyu ya iŋgi jakarzi. 36 Na oma ama hvɛ li ɛndɛ, hwato hwama hwɛ litaalɛ maatu mawu onjiya. 37 E hvonda a makombɛnɛ eki ema e njiya ema ema ɔndɔ o hvako ya njahwi, e ŋgindi yarzɛ ya hwaokoweli hweni hwama woteya li oka monyɛŋgi, na li eka Lohwɛ, na malou ma karzami, o hweya hwe hwetamirzeli ema hwa ma ɛnɛ. 38 "Monamɛ na e mokaneli ema a jeli o lina lama Rzaŋgo-Eyɔlɛ ehwɛ na Lohwa, ndeŋga Eluhwe e hwɛ na Lohwa li karzami. 39 Loŋgo la hwato hwa hvalirzaɛ, o teni ya eŋge ŋgindi, hwama ohweya Yerzu ema, "Mookoleli, lomeya hwaokoweli hwaŋgɔ." 40 Rzi aalahwɛ ama, "Na e ohweya ema, hwa andami tɛ, mayai ma tɛ (li lela) o ŋmanyu. 41 Naoma ama kombɛnɛ o Yelurzalem, ama ɛnɛ embowa, rzi a eya: 42 A o hwa ama "E hweli tɛ ema inyɔ mɛnɛ ema hwiya tɛ njɛnɛ a ejaaneli eyɔlɛ o wono wunya, ndi ene naŋgɛ ye utameli o mirzɔ manyu. 43 Meenya me e ojeeya, ema hwakoeli hwanyu hwa e koeya hwerzu o li e toŋga na li e rzila hwehvarzu hweyarzɛ. 44 Hwe e kpirzɛ o rze, inyɔ na hwaana hwanyu, o hwerzu hwe anyu: Hwarza liya tɔ lɔkɔ o ŋmanyu ya linɛi, Ehwanja inyɔ erzi embe ehvonda Lohwɛ ama hwɛnɛ li ejeeya.
YERZU O NDAWO YA LOHWA
45 Rzi Yerzu a kpeeya o ndawo ya Lohwa, a woteya li hvaya hwaŋga hwama hwɛ li ahwirzɛ. 46 A hwa ohweya ema, e tilahwi ema, "e ndawo yami, e hwɛni ndi li hwɛ e ndawo ya makanɛ ndi inyɔ ema egbeya ndi eki ya hwaihwe. 47 Wunya tɛ a ma hwɛ li okolɛ o ndawo ya Lohwa, Ndi hwaohweli hwandɛnɛ hwa eya ya Lohwa, na hwaokoleli hwa mbenda, na hwatimbeli hwa hwato, hwa ma arza ndi o limo oŋwa. 48 Ndi hwa rzi luwe nɛ hwama aŋgamɛnɛ limo lɛmbeya, Ehwanja hwato hwarzɛ hwa ma emeya hweya hwe eni?
LUKARZI HWEHVARZU MBANGE 20
HWEKANELI HWEMA YERZU
1 Wunya wɔkɔ, na oma ama hwɛ li okolɛ hwato, o ndawo ya Lohwa, na li ohwa miyaŋgo me gbamu, rzi hwaohweli hwa ndɛnɛ hwa eya ya Lohwa, na hwaokoleli na hwambaki, hwa ma ja oli muŋma. 2 O jo ohweya, na ima ŋginya, ogbeyana hwene hweya, "Jɛnɛ ao gbeli ene ŋginya ema ogbeyana hwene hweya! 3 Rzi aalahwɛ ama, "Imba hvɛ na e ijowa meijoweli; eno hweya; 4 Li duwirzɛ lama Yowanirzi, lima uweya ndi o ŋmanyu ya Lohwa, ŋga na hwato e?" 5 Rzi hwa ohwanɛlɛ wɔ na wɔ ema, i ohwi tɛ ema o ŋmanyu Ya Lohwa, a jo ijowa ema, mamɛ ndeŋgatɛ irzi mo lokɛ e? 6 Ndi johwi tɛ ema, o hwato, hwato hwarzɛ hwa jo uŋma mayai, Ehwanja hwa ma ɛneya nanu ema Yowanirzi ama hwɛ ndi moohweli wa hweliŋgɛ. 7 Rzi hwa mo alahwɛ ema, "Irzɔ irza hwi eki ema li ma uweya." 8 Rzi Yerzu a wa ohweya ama, "Tɔ imba hvɛ narza tanɛi li e ohweya eŋginya yama njɛ na gbeyana hwene hweya.
ŊMANA MO JOOŊGI JA WAŊGA
9 Yerzu rzi ahwa kpɛɛya mono ŋmana ama, "moto mɔkɔ a ma ona hvaya, rzi a e oŋgirzɛ hwagbeeli wɔkɔ, rzi aɛndɛ yɔndɔ ai ndeya oteni. 10 E hvonda ya morzaŋgeli mo mbota ema uke, rzi a oma mogbeeli weni mɔkɔ, oma ewɔ ema a mooŋgirzɛ eŋge hvaya, ema hwa mo ŋgbee loŋgo la eŋge mbota ya eŋge waŋga. Ndi ewɔ ema hwa ma oŋga eŋge waŋga, hwa ma anana oŋgo mogbeeli rzi hwa mo timbirzɛ maa matou. 11 A ma oma ohvɛhvɛ mogbeeli, mo hvɛ hwa mo anana, hwa mo okirzɛ irzɔni, rzi hwa mo timbirzɛ maa matou. 12 A ma oma e mo a ma ukurzɛ hwayau, hwama mo hwenirzɛ rzi hwa mo tindɛlɛ o ewoka. 13 "Rzi emɔ ema a ma hwɛnɛ e hvaya a ohwa ama, "mamɛ rzɔ na gbeya hvɛ e?" Na oma e ŋmana wami ema naliŋgani, etanɛi lihwɛ ema mɔ, hwa mɔ gmba eluhwe. 14 "Hwaɔŋgeli hwa eŋge hvaya hwa ma mo ɛnɛ, rzi hwa timba hvɛ li a ohwanɛlɛ ema, ewonja yeni yɔ ene o eŋganɛlɛ inyɛ imo oŋwe, oma erzaŋgo yeni e ma hwɛ ndi e yaarzu. 15 Hwa ma mo tindɛlɛ ɔnɛi mburza ya waŋga, rzi hwa mo oŋwa. Mamɛ rzɔ emo hwɛni wa hvaya ahwa gbeyana e? 16 Aja o li oŋwa hwaŋga hwaoŋgeli hwa eŋge hvaya, Rzi a ŋgmba hwahvɛhvɛ hwato eŋge hvaya." Ehvonda hwaŋga hwato hwa ma hweye nanu, rzi hwa ohwa ema "erza oka ligbeyɛnɛ nanu." 17 Yerzu a ma hwa ɔŋgɔ loŋgoloŋgo, rzi a hwa ijowa ama, "mamɛ ehweli jaande ja eŋge ema e tilahwi "liyai ema hwa oŋgeli hwa ma hvimbe, lɔndi lima timbɛ liwondo la wooŋgi. 18 Tɔ imamɔ ema a undi o lini liyai a gbeeya kɛrzɛ kɛrzɛ, ndi oŋgo ema li undeli, li mo nyɔkɔ. 19 Hwaokoleli hwa mbenda, na hwaohweli hwa ndɛnɛ hwa eya ya Lohwɛ hwa ma arza nɛ hwa mo lɛmbeya aŋga mɛnɛ, ehwanje hwama hwiya ema wɔndi akpɛɛli mono ŋmana, ndi hwa ma oka e ŋgindi wɔŋgɔ.
LITANGEYA E MOKANELI E NJANGE
20 Hwa ma hwɛ li mo ɔŋgɔ hvɛnyɛhwɛnyɛ, rzi hwa oma hwarzɔeli ema hwama aahwaŋgɛlɛ naa hwato hwa gbamu. Hwa ma arza li mo luwana njɔmi o johwi ama hwɛ li ohwa, aŋga nanu oma hwama mo lɛmbɛ rzi hwa mo akɛlɛlɛ e mokaneli. 21 Rzi hwaŋga hwa rzɔeli hwa mo ijowa ema ‘Ii mookeleli i hwi nanu ema, owa oohwa na li okolɛ mamɛ ema ehweli ejɔkɛ ndeŋga owa orza uŋmɛlɛ ndando, o okolɛ ndi ejɔkɛ ya hwetɛizeleli hwe ama Lohwɛ. 22 E hweli gbamu ema na irzɔ Ii taŋgeya e mokaneli e njaŋge e? 23 Na oma ama a embe meyano me awu, rzi a hwa ohweya ama; 24 E no uŋmɛlɛ kahva hvɔkɔ. Worzo na liina lama njɛnɛ li hweli aŋga e? 25 Hwa ma mo alahwɛ ema ‘E mokaneli’ Yerzu rzi a hwa ohweya hvɛ ama, E ŋgbe e mokanali mamɛ ema ehweeli e yɔ yeni ndeŋga Lohwɛ hvɛ eyɔ (e hweli e yeeni) ema e hweli e yɔ yeni. 26 Hwa ma aɛmbɛnɛ li mo undirzɛ lihvayana e mbɔrzi yeni ema ama ohwe o ŋgindi. Li alahwɛ leni li ma hwa tamirzɛ rzi hwa andama.
HWE HVUMUWELI NA LIHWA
27 Loŋgo la hwato hwa Rzalorziya ema hwa ohwa ema orzenje hwehvumumuweli, hwa ma jaa oma Yerzu na miijoweli nanu ema; 28 "Ii mookoleli Moze a ma jo tileya ema munyana ŋmanyaŋgo a ŋweli tɛ rzi a liya mokurze, erzi hwɛ ema hwa hw ni ŋmana, ŋmanyaŋgo aaŋgamɛnɛi li rzaŋgowa moŋgo mokurze o li nyaeya ŋmanyaŋgo hwana. 29 O ma hwɛ rzo wonyanyaŋgo lirzamba e molulu ama hwa molana rzi a ŋwa a rzi hwɛnɛ ŋmana. 30 Oŋgo a ukirzɛ hwahwakɛ, 31 Na emo ema a ukirzɛ hwayau hwama rzaŋgowa moŋgo mokurze nanu mɛnɛ hvɛ na emo a ukirzɛ lirzamba mo hvɛ ama mo hwa erzi hwɛ linya hwana; 32 O lirzuku moŋgo mokurze hvɛ mo ma ŋwa; 33 Naŋgɛ rzɔ, o hwe hvumuweli, oŋgo molana a ohwɛ ndi wama njɛnɛ na oma lirzamba li arzɛ lima mohwa e? 34 Yerzu ama hwa alahwɛ ama "hwato hwa ene nyɔŋgɔni hwa hwaa ndeŋga hwa hwalɛ. 35 Ndi hwaŋga ema hwa rzekahwɛlɛ oli hwɛ ɛnɛi nyɔŋgɔni na o hwe hvumuweli hwe kpeli, hwa rza ohwa tɔ li ŋgmbaahwa o mahwa; 36 Ehwanja hwa rza o ŋwa hvɛ hwa hweli ndi naa i Aŋgeli. Hwa hweli ndi hwana hwama Lohwɛ nɛ tɛ hwa hweli ndi hwana hwa hwehvumuweli. 37 Ndi tɔ Morze hvɛ ama uŋmɛlɛ mamɛ e ma gbeyɛnɛ o waŋga nanu ema ewɔ hwa ŋweli hwa hvumuwa e hwanja a ma hwɛlɛ Rzaŋgo Lohwa la ma Ablahamu na Lohwa la ma Irzaki, na Lohwa La ma Yakohvo. 38 Arza enje Lohwa lama ewo hwa ŋweli, Lohwa la hwahvenya ehwanja na mo hwarzɛ hwa hweli loŋgɛ. 39 Loŋgo la hwaokoleli hwa mbenda hwa ma timbirzɛlɛlɛlɛ ema o ohwi gbamu mookoleli; 40 Tɔ moto arzi tanɛ limo ijowa mehvɛhvɛ miijoweli hvɛ.
E ŊMANA WAMA NJƐNƐ AHWƐLƐHWƐ KLIRZITO
41 Rzi Yerzu a wohweya a ma "Nɛ e hweli nanu ema hwa ohwa ema Klirzito a hweli ndi e ŋmana wama Dahwiti e? 42 Dahwiti mɔ ŋmiti a uŋmɛlɛ o kaati ya merzɔkɔ me eni ama, "Rzaŋgo a ma ohweya Rzaŋgo a ma, Liyaa o liya lami la mome. 43 Natɛɛ na gbeya hwakɔeli hwaŋgo hwatimba ndi naa eki owa o ika mataŋga." 44 Dahwiti a ma mo hwɛlɛ ndi Rzaŋgo nɛ rzɔ atanɛi lihwɛ ŋmana weni wa munyana e? 45 Na oma hwato hwa rzɛ hwa ma hwɛ li okaneya, Rzi Yerzu a ohweya hwaokoweli hweni ama; 46 "E aŋgoweya hwaokoleli hwa mbenda ema hwaliŋgani li ahwa na meŋgombe me wawi, hwaliŋgani hvɛ likɔmɔnawɔ na eluhwe o hweluwa ndeŋga oliliya imboko ja worzo o ndawo ja Lohwa na o hwe li hve hweluhwe hwe ndema; 47 Hwa lɔkɔnɔ mekurzɛ i ndawo jawu na o li auŋmɛlɛ lawu, hwa kanɛ makanɛ ma wahwi, iŋgi nyai ja hwato i luwa kɔkirzɛ ndɛnɛ."
LUKARZI 21
LI AHWEYA LA MOKURZE
1 Na oma Yerzu a ma ɔngɔ o nmanyu. Rzi a ɛnɛ hwewaŋgi hwe ikai maahweya mawu o ŋgata ya njange o ndawo ya Lohwa. 2 Rzi a ɛnɛ hvɛ Mokurze mo molana ema mo ma taka, mɔ hvɛ mo ma ika hwana hwa hwehvarzu hwe kahva hwehwakɛ. 3 Rzi a ohwa a ma "na e ohweya ejɔke," o no motakeli wa mokurze mo molana a ŋgmbeli li aka hwanɛi hwarzɛ. 4 Hwanu hwato hwarzɛ hwa ŋgmbeli ndi maahweya mawu o monamɛ mo awu; ndi mɔ, na litake li eni, a ikai mamɛ arzɛ ema ama hwɛnɛ o longɛ leni.
HWE MƐ NƐ NI HWE LIRZUKU LA ŊMEMBA
5 Longo la hwaokoweli hweni hwama hwɛ li ohwa, na o ma e ndawo ya Lohwa e oŋgahwɛnɛi na mayai ma gbamu na maahweya ma ŋgmbaahwi Lohwɛ. 6 Rzi Yerzu a ohwa ama "lihvomɛnɛ mamɛ e ɛni anu, e hvonda e o ja ema tɔ liyai lɔkɔ lirza ohwɛ o ŋmanyu ya linɛi mɔ marzɛ ma rza ulɛhwɛ orze." 7 "Rzi hwa mo ijowa ema "ii mookoleli ima hvonda hwene hweya hwe o gbeyɛnɛ e? Ndenga mamɛ e hwɛɛ eembaneli o li uŋmɛlɛ ema hwene hweya hwe uka o li gbeyɛnɛ e? 8 Rzi aalahwe ama, "E aŋgowa ema erza oka li ɔnjɔwɔ, rzai rzai wa o ja o lina lami li awowɛ. "ema nahweli ndi mɔ," ndeŋga "Ehvonda ema kombɛnɛ. Erza oka li hwa nɔŋgɔ. 9 E woteli tɛ li hweya i njuma na mehvuŋgu e rzi nyiŋga. Hwene hweya hwe loma li gbeyɛnɛ, ndi lirzuku lirza uka eŋge hvonda, 10 Rzi a hwa ohweya ama "Ekome e tɛmɛ li teŋgɛnɛ e nɛi E kome, ndeŋga mabowa hvɛ ma tɛmɛ li teŋgɛnɛ e nɛi mbowa. 11 O ohwɛ menyiŋgirzɛnɛ mendɛnɛ, njau na nyambɛ ja wohwe eki yarzɛ na hweya ema hwe okirzɛnɛ wɔŋgɔ na hwe embaneli hwe ndɛnɛ hwe uweya o ŋmanyu. 12 "Ndi hwene hweya hwe ehwiya ligbeyɛnɛ, hwa e ɛlɛmbɛ rzi hwa etakirzɛ. Hwa ɛndɛnɛ o ndawo ja hwekairzeli, na liika o hwewowa na marzo ma hwakaneli, hwene hweyarzɛ hwe gbeyɛnɛ, ndi o lina lami. 13 Ene e ye janeya inyɔ, lihwa tɛmeya wɔ mboŋgi. 14 Ndi e yetirzɛ meema me anyu ema erzaatakirzɛ, ndeŋga na ehvonda e uka, nɛ e tanɛ li a wunɛ inyɔ hwiti. 14 Ndi e yetrizɛ meema me anyu ema erzaatakirzɛ nɛ e tanɛ li a wunɛɛ inyɔ hwiti ndeŋgana e hvonda e uka. 15 Ehwanja imba na e ŋgba hweya na lihwiye ema tɔ mɔkoeli wanyu mɔkɔ a rza o tanɛ li e ŋgowa tɔ li wunduwa. 16 E yo wahwirzɛhwɛ na irzaŋgo, na wonyanyango anyu, na matumba na hweyorza: Ndaŋga wɔ wo oŋwa hvɛ loŋgo lanyu. 17 Hwato hwarzɛ hwa ekɔ, o lina lami, 18 Ndi tɔ rzowe hvɔkɔ o meyohvo me anyu erza wɔ. 19 Li ajulɛ lanyu li e oŋgirzɛ hweliŋgɛ hweyanyu. 20 "E hvonda ema yɛnɛ hwa aneli hwa njuma hwa toŋgi Yelurzalem E hwiye nanu ema lihvaŋgeya leni lima koombɛnɛ. 21 Hwaŋga ema hwa hweli o Yudya, hwa hwaŋge, hwa ndɛ o hvako, hwaŋga hvɛ ema hwa hweli o hwekome hwa rzi kpeeya o mambowa. 22 Ehwanja e hvonda ya hwekɔkirzeli yɔ enɛ, o li ondirzɛ mamɛ ema tilahwa. 23 E ɔhwɛ wohwe o meŋga menya, na hwaalana ema hwa liti memi, na ewɔ ema hwanyɔŋgirzɛ! Ehwɛ hvɛ wohwe rzai rzai orze na ndutu li hvomɛnɛ hwanu hwato. 24 Hwa lɛmbɛhwɛ na i rzɔlɔ, rzi hwa wowahwa whakomi o Yelurzalem a o kanahwɛlɛ na ewɔ ema hwarza hwiyɛ Lohwɛ natɛɛ ehvonda yawu e uka. 25 "O ohwɛ hwemɛnɛni o igbei, o ŋmɛli na i rzombe. Anu rze, hwekomɛ hwe ohwɛ o litake lindɛnɛ na hwetamirzeli hwe hvemeli na hwe hvuŋguweli hwe ŋmanja. 26 Wɔɔŋgɔ wo gbeya hwato hwa kpa irzou, o mamɛ ehweli ligbeyɛnɛ, orze, Ehwanja hwato hwa ŋmanyu ya Lohwa hvɛ hwa o nyiŋga. 27 O enge hvonda ndi hwa o ɛnɛ e ŋmana moto aja o teni ya limbaki na ŋginya na eluhwe endɛnɛ. 28 Ehvonda hwene hweya hwe woteya ligbeyɛnɛ, Etɛmɛ o ŋmanyu, ekarzɛ meyohvo me anyu o ŋmanyu, ehwanja li oŋgirzɛ li anyu li ma kombɛnɛ. 29 A ma hwa kpɛɛya mono ŋmana a ma: "e ɔŋgɔ tɛ gbee wo rzao, manɛi mae marzɛ; 30 Woma wurzirzɛ tɛ i ndɔndɔ ja hweyali, inyɔ mɛnɛ yɛnɛ ema yokpe e ma kombɛnɛ; 31 Nanu mɛnɛ hwɛ e ɛni tɛ hwene, hweya hwe ya gbeyɛnɛ, Ehwiye ndi ema likaneya la ma Lohwɛ li ma kombɛnɛ. 32 "Na e ohweya ejɔkɛ ema, ene nyɔŋgɔnyi e rzaaka ema hwene hweya hweyarzɛ hwe rza o gbeyɛnɛ. 33 E ŋmanyu na erze wo aka, ndi johwi jami i rza aka. 34 "E aŋgowa, e rzija li hwɛ nanu ema meema me anyu me rzi tihwa na mboma, na e nyirzɛ ya lini loŋgɛ, ema woŋgo wunya wo rzi e jeeya tɛi na ŋgundeli, 35 Ehwanja woŋgo wunya wo ojeya ndi hwato hwarzɛ ema hwa hweli o ene rze. 36 Ehwɛ rzɔ ndi o li ɔŋgɔ hvɛnyɛ – hvɛnyɛ, na likanɛ i hvonda jarzɛ, aŋga nanu e tanɛi li karzowa o hweyarzɛ worzo woma eŋmana moto. 37 Wunya tɛ Yerzu ama hwɛ li okolɛ o ndawo ya Lohwa, Ngombe tɛ a ma ɛndɛ o li yɛlɛlɛ o mooli ema mo ma hwɛlɛhwɛ e hvako ya maɛ ma njahwi. 38 Hwato hwarzɛ hwama ja eelele o li mo okaneya o ndawo ya Lohwa.
LUKARZI HWEHVARZU MBANGE NA HWEHWAKE 22
YUDA A MA EMEYA OLI AHWIRZE YERZU
1 Na oma e ndema ya yolo e ma e rza gbeyahwɛnɛ ehwindi ema e hwɛlɛhwɛ Akaɔnɛi, e ma kombɛnɛ; 2 Rzi hwagbeeli hwandɛnɛ hwa ndawo ya Lohwa, na hwaokoleli hwa mbenda hwa ma hwɛ li luteya meano nɛ hwa tan li oŋwa Yerzu, ehwanja hwa ma oka e ŋgindi ya hwato woŋgo. 3 Aŋga ndi mokarzɛ aa kpeeya Yuda, a ma hwɛlɛhwɛ Irzikaliɔti a ma hwɛ mɔkɔ wa liyomɛ la hwaokoweli na hwahwakɛ. 4 Yuda rzi a ɛndɛ li uŋma hwagbeeli hwandɛnɛ hwa ndawo ya Lohwa na hwaoŋgeli hwa ndawo ya Lohwa rzi hwa ohwirzɛnɛ nɛ a tanɛ li hwa ahwirzɛlɛlɛ Yerzu. 5 Hwa ma liŋga rzai, rzaihwa imanɛlɛ o li mo ŋgbaa woli. 6 A ma emeya, rzi a ɔŋgɔ o li luwa e hvolo o li hwa ŋgbaa Yerzu ema e ŋgindi e rza ukelɛ.
LI LAA LA LIRZUKU
7 Rzi wuunya wo yolo ema e rza hwɛnɛ ehwindi wo ma uke ema hwa ma hwɛnɛ li oŋwa monani mo mɔlɛŋgu naa jahweya o ndema e hwɛlɛhwɛ Akaɔnɛi. 8 Yerzu a ma oma Petolo na Yowanirzi, rzi a hwa ohweya ama, "E ɛndɛ e woŋgirzɛnɛ li laa larzu la Akaɔnɛi." 9 "Rzi hwa mo ijowa ema, i ma eki o arza ema i woŋgirzɛnɛ e ndema e?" 10 A ma hwa alahwɛ ama; "Na oma e kpeeya o mbowa, moto ema a hwanɛ itɛŋgɛ ja malihwa a e uŋma. E mo nɔŋge o ndawo ema a kpeeya; 11 E ohweya e mohwɛneli wa eŋge ndawo ema, e Mookoleli a ijowi ama one iluku ja hwaeni, aŋga ndi na hwɛni li leeya e ndema ya Akaonɛi na hwaokoweli hwami. 12 A e uŋmɛlɛ iluku ndɛnɛ o ŋmanyu ya ndɛki i rzeyahwɛlɛ e woŋgirzɛnɛ e ndema aŋga. 13 Hwa ma ɛndɛ rzi hwa uŋmanɛlɛ hweya na oma Yerzu a ma hwa ohweya. Rzi hwa woŋgirzɛnɛ e ndema ya Akaonɛi. 14 Lirzako li ma uke Yerzu na hwagbeeli hweni rzi hwa liya o hweleeli. 15 Rzi a hwa o hweya a ma, "Na hwɛni nyirzɛ o li laa ene ndema ya Akaɔnɛi na inyɔ ndeŋgana, na e taka. 16 E ɔŋgɔtɛ, na e ohweya ema, na rza laa ene ndema hvɛ natɛɛ e ondirzɛhwɛ o likaneya la ma Lohwɛ. 17 A ma wowa liwonde, rzi a ŋgba jeka a ohwa ama "E wowe e hwaɛnɛ inyɔ na inyɔ." 18 Na e ohweya ema na rza o nyɔ hvɛ hwenyɔni hwe hwene hwehvuma hwe wono gbee natɛɛ likaneya la ma Lohwɛ li ja." 19 Rzi a wowa yolo, a ŋgba jeka a e hwɛndɛ, rzi a hwa ŋgbaa eyo, rzi a ohwa ama, "E nyo yami ene ye e ŋgbaahwi; e gbeye nanu o li no oŋgɛlɛ." 20 Nanu mɛnɛ hwa ma kulɛ li laa rzi a wowa liwonde, a ohwa ama, Lini liwonde ndi li hweli e mbenda hvenya ya maija mami, ema ma e rzowahwɛlɛ. 21 Ndi oŋgo ema a hwɛni li no ahwirzɛ a hweli na imba anu hweleeli. 22 E ŋmana moto a o ɛndɛ na oma e tɛirzɛhwɛi, ndi mojema na oŋgo moto ema a mo ahwirzɛi." 23 Rzi hwagbeeli hwa woteya li aijowanɛ wɔ na wɔ ema, njɛnɛ warzu a tanɛ li gbeya ene eya e? 24 Ndeŋganɛlɛ o ma hwɛ mbunakɛ o tiiteni yawu o li arza li hwiya e mɔ ema a hwɛɛ e mokaneli wawu. 25 Yerzu a ma hwa ohweya ama "Hwakaneli hwa ewɔ hwa rza hwiyɛ Lohwɛ ndenga e wɔ ema hwa ma awowɛ hwa a hwɛlɛ wɔ hwiti hwagbeya gbamu. 26 Ndi inyɔ e rza hwɛni li hwɛ nanu. O eŋganɛlɛ e mokaneli o tiiteni yanyu a hwɛni ndi li hwɛ naa enɔŋgɔni, ndeŋga e mɔ ema a kaneya, a aŋgamɛnɛ ndi li hwɛ naa emɔ ema a kanahwɛlɛ. 27 Njɛnɛ rzɔ a hweli e mɔndɛnɛ e mɔ a liyai eki ya hweleeli o li ambɛlɛ, ŋga oŋgo ema a akɛlɛ moleli e? Rzɛkɛ oŋgo ema a liyai o li ambɛlɛ e? Ndi imba na hweli na inyɔ, naa mɔkɔ ema a e gbeeya. 28 Inyɔ e hweli ndi hwaŋga ema hwa hweli o mburza yami o makekirzɛnɛ mami. 29 O eŋganɛla na e ŋgbeli likaneya, na oma rzaŋgo ami a no ŋgbeli. 30 Aŋga ndi e laa, na li nyɔ o hwelieli hwe likaneya lami na li liya o makaneya, li kairzɛ liyomɛ la matumba na mahwakɛ ma Irzilaeli. 31 Yerzu rzi a ohwa a ma, Rzimoni, Rzimoni, mokarzɛ a arza li o rzeŋmbɛ naa hvɔŋgɔ. 32 Ndi Rzimoni imba na ma o kanɛlɛlɛ, nanu ema, li lokɛ laŋgo li rza kpa. E hvonda o ma aeyɛlɛ tɛ o embɛ wonyanyɔŋgɔ. 33 Rzi Rzimoni a timbirzɛlɛlɛ a ma; "Rzaŋgo, na ɛkɛmeli li ɛndɛ na owa, o hwewowa na o kpeli." 34 Yerzu a ma alahwɛ ama, "Petolo, na o ohweya ema, e mome wa wuhwa a e hwiya li toŋga yawono, o no rzɔrzɔ ŋgeli iyao ema o rza no hwi." 35 Rei Yerzu a hwa ijowa ama; "e hvonda ema na ma e ome ema e rzi ohvɛ makpa to hwetambi e ma takeya yoma e?" Hwa ma alahwɛ ema; "To yoma." 36 A ma hwa ohweya a ma "Ndi o naŋgɛ, o hwɛni tɛ likpa o li wowe, ndeŋga o rza ohvi tɛ rzɔlo ahwirzɛ moŋgombe mo aŋgɔ o ande hvɔkɔ. 37 E tilahwi ema mɔ hvɛ a ma aŋgahwɛnɛ na hwato hwa wohwɛ; na e o hweya ema, e ne e hwɛni li ondirzɛhwɛ na imba, Ee mamɛ ema e tilahwi li no hvomɛnɛ, ya uka o li ondirzɛhwɛ." 38 Hwaokoweli hwa ma ohwa ema "Rzaŋgo, ɔŋgɔ, rzɔlɔ ihwak jɔ ini." Mɔ a ma hwa timbirzɛlɛlɛ ama "iŋgi i lɔɔni."
YERZU A MA KANɛ O HVAKO YA MAE MA NJAHWƐ
39 Yerzu a ma ɛndɛ o Hvako ya mae ma njahwɛ, na oma a ma hwɛ li ɛndɛ rzi hwaokoweli hweni hwa mo nɔŋgɔ. 40 Hwa ma uke eŋge eki rzi a hwa ohweya ama, "E kan ema e rza unda o makekirzɛnɛ." 41 A ma atindɛ na wɔ hvoka ya li aŋgmba la liyai, rzi a rzuma maɔŋgɔŋgɔ o rze a kanɛ ama; 42 "Tata, o emelitɛ, o no wowane lini liwonde; ndi rzeketɛ o hwearzeli hwe ami ndi o hwearzeli hwe aŋgɔ e gbeyɛnɛ." 43 Aŋgeli e ma uweya o ŋmanyu ya Lohwa e mo wurzeya rzi e mo embɛ. 44 Na oma a ma hwɛ o ndutu ndɛnɛ, a ma hwata li kanɛ na ŋginya ndeŋga etoko yeni e ma hwɛ ndi naa matɔu ma maija ema ma ma tɔ oɛrze. 45 Ehvonda a ma kulɛ li kanɛ a ma timba o li uŋma hwaokoweli hweni, rzi a uŋma hwa ma naŋga na liyɔtɛ na e ndutu. 46 "A ma hwa ijowa ama "Mamɛ ndeŋgatɛ e naŋga e? "E tɛmɛ e kanɛ aŋga nanu e rza unda o makekirzɛnɛ."
LI LƐ MBƐ HVƐ LA MA YERZU
47 Na oma a ma hwɛ li ohwa e ŋgindi e ma jaa, mɔkɔ wa liyome na hwahwakɛ ema a ma hwɛlɛhwɛ Yudarzi Irikaliotɛ mɔ ndi a ma timba eŋge ŋgindi, a ma tombeya Yerzu o li mo rzɔmbɔ. 48 Yerzu rzi a mo ijowa ama "Ii Yudarzi, o ahwirzɛ ndi e ŋmana moto na lirzɔmbɔ e?" 49 E hvonda hwanɛi hwaokoweli hwa ma ɛnɛ mamɛ e ma hwɛnɛ li gbeyɛnɛ rzi hwa ohwa ema Rzaŋgo e! I kɛ na irzɔlɔ jarzu e? 50 Mɔkɔ wa hwaŋga hwa ma hwɛ na Yerzu a ma rzenjowa litou la mome lama e mogbeeli wa ma e mogbeeli mondɛnɛ wa eya ya Lohwa. 51 Ndi Yerzu a ma alahwɛ (timbirzɛlɛlɛ) ama "E rza gbeya nanu hvɛ!" Rzi a wowa liŋgi litou a li kukɛ rzi a wɔwɔ. 52 Rzi Yerzu a ohweya hwagbeeli hwandɛnɛ hwa eya ya Lohwa na hwaɔŋgeli hwa ndawo ya Lohwa na hwambaki e ma hwa ma mo jeeya ama, "na timbi ndi hwato hwa kayɛ ema e no janeya na irzɔlɔ na metɔni e? 53 Na ma hwɛ na inyɔ o ndawo ya Lohwa wunya tɛ e rzi no lɛmbɛ hvɛ tɔ. Ndi lirzako lanyu lɔ lini ema jiititi i e kaneya.
PETOLO A RZƆRZI YERZU
54 Rzi hwa lɛmbɛ Yerzu hwa mo timba li mo ɛndɛnnɛ o ndawo ya ma e mogbeeli mondɛnɛ wa eya ya Lohwa. Petolo a ma hwa nɔŋgɔ hvoka. 55 Ndi na oma hwa ma kote muunya o tiiteni ya ndawo ya merzaŋgo rzi hwa liya aŋga Petolo mo hvɛ a ma liya na wɔ. 56 Ŋmana wa ŋgɔndɔ mɔkɔ wa mogbeeli wa hwaŋga hwato a ma ɛnɛ Petolo a liyai o (o hvowa liyɔ) eki ya munya rzi a mo ɔŋgɔ loŋgo loŋgo a ohwa ama "ono moto a ma hwɛ na mɔ." 57 Ndi Petolo a ma rzɔ rzɔ. Rzi a ohwa ama "molana e, imba na rza mo hwi." 58 O ma aka ŋmana hvonda ɔhvɛhvɛ rzi a mo ɛnɛ rzi a ohwa ama "owa hvɛ ohweli ndi mɔkɔ wawu." Ndi Petolo a ma timbirzɛlɛlɛ ama, "munyana e, na rza enje!" 59 O hvoka e ma aka ohvɛhvɛ a ma ohwa ama "e tɛtɛ ono moto a ma hwɛ na mo, ehwanja a hweli ndi moto wa Galileya." 60 Petolo ama alahwɛ ama "munyana e, na rza hwi mamɛ o hweli o ohwa!" Na oma a ma hwɛ li ohwa rzi e momɛ wa Wuhwa a toŋga. 61 Rzaŋgo Yerzu rzi a eŋgowɛ a ɔŋgɔ Petolo o worzo. Aŋga ndi Petolo a ma ɔŋgɛlɛ eya Rzaŋgo Yerzu a ma mo ohweya ema, "Ndeŋga na e mome wa wuhwa a toŋga yawono o no rzɔ rzɔ ngele iyao." 62 Petolo a ma wurza o ewoka a eya maija.
HWAGBEELI HWA NJUMA HWA MA RZILƐ YERZU
63 Hwato hwa ma hwɛ li oŋgeya Yerzu, hwa ma woteya li mo rzilɛ na li mo anana. 64 Hwa ma mo kaka miirzɔ, rzi hwa mo ijowa ema, "o hwa njɛnɛ a o hvahvi e?" 65 Rzi – hwa mo ohwana hweya rzai hwe irzɔni na hweyoli.
YERZU O WORZO WO MA PILATO NA HELODE
66 O hweyahweli hwe wunya, hweliyeli hwe hwambaki hwa hwato, na hwaohweli hwa eya ya Lohwa hwandɛnɛ na hwaokoleli hwa mbenda hwa ma arzaŋganɛ, rzi hwa hwa janeya Yerzu. 67 Rzi hwa ohwa ema "o e ohweya ŋga owa ndi o hweli Kilirzito e?" Yerzu alahwɛ ama, Na e ohweli tɛ e rza no lokɛnɛ: 68 Ndeŋga na e ijowi tɛ e rza no alahwɛ. 69 Ndi li woteya naŋgɛ, e ŋmana wa moto a liya ndi o liya la mome la ma Lohwa li karzami. 70 Rzi hwarzɛ hwa mo ijowa ema "O eŋga owa ndi o hweli e ŋmana wa Lohwa e? Rzi a timbirzɛlɛlɛ ama "E loŋgamɛnɛi na oma e ohwi ema na hweli." 71 Rzi hwa ohwa ema "Mamɛ i janeya ehvɛhvɛ mboŋgi e? I ma hweya mamɛ e mo wurzi o wana yeni."
LUKARZI HWEHVARZU 23
1 Rzi e ŋgindi yarzɛ e tɛmɛ, o li mo ɛndɛnɛ oma Pilato; 2 Rzi hwa woteya li mo kɔeya hweya, nanu ema, "i lu ono moto ema a e hwaŋgeya e mbowa yarzu. A rza imanɛlɛ nanu ema, e njaŋge ya likaneya e taŋgahwɛlɛ Kairza ndeŋganɛlɛ a awowɛ ema mɔ ndi a hweli Klirzito e mokaneli." 3 Pilato rzi a ijowa Yerzu ama, "o wa ndi o hweli e mokaneli wa wonya Yuda e?" Yerzu rzi, a alahwɛ ama, "Ee ehweli ndi na oma o ohwi." 4 Rzi Pilato awurzirzɛ e njambɛ o li hwilɛ e mokaneli wa eya ya Lohwa a karzami na e ŋgindi ya hwato ema "Na rza lu tɔ litɔti o li rzɔ ono moto njɔmi." 5 Ndi hwa ma hwata li ohwa ema, "A eŋgowa hwato hwa Yudeya yarzɛ, hwe okoweli hwe eni. Ama woteya onɛi Galileya, rzi ama uka hvɛ natɛɛ na anu." 6 Na oma Pilato ama hweye nanu rzi a ijowa ŋga ono moto ahweli ndi moto wa Galileya. 7 Na oma a ma ohwahwɛlɛ ema, Yerzu ahweli ndi orze ya likaneya lama Helode, rzi a mo oma o ma Helode, ema a ma hwɛ o Yelurzalem o e ŋge hwonde mɛnɛ. 8 Na oma Helode a ma ɛnɛ Yerzu a ma oka monyɛŋgi rzai rzai ehwanja ene hvonda yarzɛ, a ma hwe li arza nɛ mɔ a ɛneya Yerzu o mamɛ yarzɛ ama hweye limo hvomɛnɛ. Ama hwɛnɛ nyirzɛ o li mo ɛnɛ, ema a gbeye hweya hwe manyaka. 9 A ma mo ijowa me ijoweli rzairzai, ndi Yerzu a rzi mo alahwɛ. 10 Hwakaneli hwandɛnɛ hwa ndawo ya Lohwa, na hwaokoleli hwa mbenda, hwa ma tɛmɛ aŋga, na hweloma na hwetato o li mo rzɔ njɔmi. 11 Rzi Helode na hwato hweni hwa njuma, hwa woteya limo rzilɛ, limo rzaawa, na li mo hwɛnyɛ. Hwa ma mo wɔtirzɛ moŋgombe mo eluhwɛ, Rzi hwa mo timbirzɛ oma Pilato. 12 O woŋgo wunya mɛnɛ, Helode na Pilato ema hwa ma hwɛ ehwa, hwa ma timba li lɛŋgɛ. 13 Pilato a ma hwɛlɛ hwakaneli hwa ndɛnɛ hwa ndawo ya Lohwa na hwambaki na hwato hwarzɛ, rzi a hwa ohweya ama, 14 E no janeli ndi ono moto naa mɔkɔ ema aunduwa hwato ema hwa rzi keka o li hweyana e? Na ma mo gbeya njarzo o marzo manyu ndi na rza mo luwani tɔ ŋjɔmi, li hvomɛnɛ mamɛ yarzɛ inyɔ e mo ohwani. 15 Tɔ Helodɛ mɔ hvɛ a e timbirzɛlɛlɛ e mɔ nanu inyɔ etanɛi li ɛnɛ ema arza gbei to eya ema emo janeya kpeli. 16 E hweli tɛ nanu inyɛ na mo kɔkirzɛ ndeŋga ee mo hwɛmɛ. 17 O wunya wo ndema wo AKAƆNEI, a hwɛni li hwa wurzirzɛlɛlɛ moto mɔkɔ wa hwewowa. 18 Hwarzɛ hwa ma tɛ na lilo lɔkɔ ema "E ɛndɛnɛ ono moto o e wurzirzɛɛlɛlɛ Hwanahwarzi!" 19 Hwanahwarzi ema ama aŋgɛhwɛ o hwewowa, ehwanja ama teŋgɛnɛ likaneya la mbowa, na li oŋwa la hwato. 20 O li arza nanu ema a rzuulɛ Yerzu, Pilato a ma hwa rzorzomeya hvɛ. 21 Ndi hwa ma hwata ndi o li tɛ nanu mɛnɛ ema, "o mo hvanɛ! O mo hwanɛ!" 22 Rzi Pilato a hwa ohweya o ŋgeli e ma ukirzɛ iyao ama, "O mamɛ ndeŋga e? I ma li tumba la eya ya wohwe ono moto a gbe e? I rza moluwani tɔ njɔmi ema etanɛi o li mo ŋgmbaahwe kɔkirzɛ ya kpeli. O eŋganɛlɛ na mo kɔkirzɛ, rzi na mo hwɛmɛ." 23 Ndi na malo makarzami hwa ma umbɛlɛlɛ ndi nanu ema, hwa mo hvanɛ, rzi me rzeya me awu me hweyahwa. 24 Pilato ama emeya o li gbeya na oma hwa ma arze. O liteŋgɛnɛ likaneya, na li oŋwa la hwato, emɔ ema hwa ma arze, Rzi a hwa ŋgmba Yerzu. Ema hwa mo gbeyane o hweyarzeli hwe awu. 25 A ma wurzirzɛ oŋgo moto ema ama aŋgehwɛ o hwewowa o liteŋgɛnɛ likaneya, na li oŋwa la hwato, e mo ema hwa ma arze, rzi a hwa ŋmgba Yerzu ema hwa mo gbeyane o hweyarzeli hwe awu.
LI HVANƐHWƐ LAMA YERZU
26 Na oma hwa ma mo timbe o li mo ɛndɛnɛ, rzi hwa lɛmbɛ Rzimoni ema a ma uweya o Rzilenɛ, a ma uweya ndi eyeeni o lija o mbowa rzi hwa mo hwanirzɛ e mbarza o mburza yama Yerzu. 27 Ŋgindi ndɛnɛ ya hwato, e ma mo nɔŋgo, na hwalana ema hwa ma whɛ o limo eyeya. 28 Yerzu ama a e ŋgowɛ, rzi a hwa ohweya ama "li ŋgɔndɔ ja Yelurzalem erza no eya imba; e aeyɛ ndi inyɔ hwiti na hwaana hwanyu. 29 E hvonda e o ja ema e ohwa ema, monamɛ nah hweyomba hwe hwalana, hwewoni hwe rza nyai, na mahwɛ ema ma rzi nyɔŋgirzɛ. 30 Rzi "Hwa ohweya i hvako ema o jo rzuuweya! Ndeŋga meyoli: e jo kumɛnɛ!" 31 E hweli tɛ ema hwato hwa gbeyana gbe wohvenya hwene hweya, mamɛ egbeyenɛ ehwonda ema wo ŋwɛɛ e? 32 Hwato hwahwakɛ hvɛ ema hwa ma gbeya wohwɛ wɔ hvɛ hwa ma timbahwa na mɔ o li hvanɛhwɛ. 33 Ehvonda hwa ma uke eki ema hwama hwɛlɛ "Ekeke ya mohvo", aŋga ndi hwa ma mɔ hvanɛlɛlɛ, na hwaŋga hwato hwa wohwe, mɔkɔ o liya la mome, onɛi hvɛ oliya la ŋmali. 34 Yerzu rzi a ohwa ama, "Tata o hwa lakirzɛ ehwaŋja, hwarzahwi mamɛ ema hwa gbeya." Rzi hwa oka e njiŋge o li hwaɛnɛ meŋgombe me ama Yerzu. 35 Hwato hwa ma tɛmɛ o li mo ɔŋgɔ ndeŋga hwakaneli hvɛ hwa ma mo inja; Rzi hwa ohwa ema, "ama oŋgirzɛ hwanɛi inyɛ a o ŋgirzɛ hvɛ mɔ ŋmiti, a hwitɛ nanu ema mɔndi a hweli e Klirzito yama Lohwɛ, e mɔ ahvɔrzɔhwi." 36 Hwa aneli hwa njuma hvɛ hwa ma ja, rzi hwa mo inja, Rzi hwa mo ŋmgba hwelandi. 37 Hwaŋga hwato rzi hwa ohwa ema, "ohweli t e Mokaneli wa Wonya Yuda, aoŋgirzɛ owa witi." 38 O ma hwɛ motila, mo ma tilahwa o ŋmanyu yeni mo ma ohwa ema: E MOKANELI WA WONYA YUDA ONO. 39 Moto wah wohwe mɔkɔ ema a ma hvanɛhwɛ na Yerzu, ama woteya li mo rzaawa, ama "Rzekɛ owa ndi ohweli Klirzito e? A o ŋgirzɛ owa witi na irzɔ!" 40 Ndi ɔnɛi moto wa wohwe ama mo lomeya ama; "O rza oka Lohwɛ wɔŋg, "Tɔ nɛ inyɔ na mo e lu kɔkirzɛ hvɔkɔ e? 41 I rzɔ i kɔkirzɛhwɛ ndi o tɛɛtɛ, ɔ ndeŋgatɛ i luwa morzaweli mo hwe gbeeli hwe arzu, ndi ono moto mɔ a rza gbe tɔ eya ya wohwe." 42 Rzi a ohwa ama, "Yerzu koko, ono ɔŋgɛlɛ; o kpeeli tɛ o likaneya laŋgo. 43 Yerzu rzi amo alahwɛ ama "Na ohweya e jɔkɛ, O yawono owa o hwɛ na imba o Hvaladirzi."
E KPELI YAMA YERZU
44 O ma hwɛ lirzako la eya ya motohwa mo ŋgɛŋgi, rzi jiititi i liŋga erze yarzɛ natɛa na lirzako la luuwa. 45 Igbei ima lima, Lihwato ema lima kekahwa o liyɔ la ndawo ya Lohwa hvɛ lima nyaweya hwe hvarzu hwe hwakɛ. 46 Yerzu a ma hwɛlɛ na lilo likarzami. A ma "Tata o maa maŋgo ɔndi na ikai eliŋgɛ yami." A ma kulɛ li o hwa nanu, rzi a rziyowa muulu mo lirzuku. 47 E moŋgeli ama ɛnɛ mamɛ ema e ma gbeyɛnɛ, a eka Lohwa a ohwa ama, "O jɔkɛ ono moto ama hwɛ ndi moto wa gbamu." 48 E hvonda hwato hwarzɛ ema hwa ma arzaŋganɛ o li ɔŋgo mamɛ ema gbeyɛnɛ, hwa ma ɛnɛ nanu, rzi hwa hvahva mahwembe mawu, rzi hwa ɛndɛe e yaawu. 49 Ndi hwaŋga hwarzɛ ema hwa ma mo hwiya, na hwaalana ema hwa ma mo nɔŋgɔ li uwyeya o Galileya, hwa ma tɛmɛ hvoka, o li ɔŋgɔ hwene hweya.
LI IMAHWƐLƐ LAMA YERZU
50 O ma hwɛ moto mɔkɔ ema a ma hwɛlɛhwɛ Yorzɛhvu wa Alamatiya a ma hwɛ ndi mɔkɔ wa hwakairzeli, moto wa gbamu ema ama tɛmɛ ehvehve. 51 Mɔ arzi liŋgane e mbako na hwegbeeli hweawu. A ma uweya ndi ombowa ya Yudeya, o ekome ya Alimatiya, a ma hwɛ ndi li ambɛlɛlɛ likaneya lama Lohwɛ. 52 A ma ɛndɛ o ma Pilato, o li mo atɛkɛ, o li wowa ehwembe yama Yerzu. 53 Rzi a e rzihwirzɛ orze, a e liŋgɛlɛ maatu, rzi a e ika o rzɔŋgɔ ya liyai e ma li ma hvomahwa, ema tɔ moto a rza ikahwi o teni. 54 O ma hwɛ ndi wunya wo li woŋgirzɛnɛ, ema wuunya wo li arziyolɛ woma kombɛnɛ o liwoteya. 55 Hwaalana ema hwa ma uweya na Yerzu, liwoteya o Galileya, hwa ma nɔŋgɔ Yorzɛhvu, rzi hwa ɛnɛ e rzɔŋgɔ, nɛ ehwembe yeni e ma naŋgɛlɛhwɛ o teni. 56 Rzi hwa timba o mandawo, li woŋgirzɛnɛ maɔki ma uŋmgba hvɛhvɛ. Ndi hwa ma arziyolɛ o wunya wo li arziyolɛ, o li hwayana e mbenda.
LUKARZI 24
HWE HVUMUWELI HWEHVUMUWELI
1 O wunya wo worzo, wo hweyu lirzamba, Eelele kpilili, Hwaalana hwa ma wowa maŋga maɔki ma hvɛhvɛ ema hwa ma ombɛlɛ rzi hwa ɛndɛ o rzɔŋgɔ; 2 Hwa ma uŋma liyai ema li ma kekahwɛnɛ e rzɔŋgɔ li ma ulɛhwɛ. 3 Ndi na oma hwama kpeeya, hwa rzi uŋma ŋmiimba moma Rzaŋgo Yerzu. 4 Na oma hwa ma hwɛ litameya hwene hweya o wotɛmɛmɛ hwato hwahwakɛ ema hwa ma wɔtɔ maatu ema mamɛneya ŋgɛiŋgɛi na liŋmɛtiŋmɛti hwatɛmi otoŋgoŋgo yawu. 5 O wɔŋgɔ wo awu, hwaŋga hwalana hwa ma ujɛ marzo mawa o rze rzi hwaŋga hwato hwa ijohwa ema, onɛ e arza e ŋmenya o teni ya hwa ŋweli e? 6 Arza enje anu, ama hvumuwa. E ɔŋgɛlɛ na oma ama, e ohweya ehvonda e ma a ma hwɛ na inyɔ o Galileya ama, 7 "Eŋmana moto a hwɛni oli ŋgmbaahwa o maa ma hwato hwa wohwe o li hvanɛhwɛ rzi o meenya meyau ahvumulɛhwɛ" 8 rzi hwa oŋgɛlɛ hweya hweeni. 9 Ehvonda hwa ma uwɛlɛlɛ o rzɔŋgɔ hwa ma ohweya liyome leni la hwaokoweli na mɔkɔ hwene hweya hweyarzɛ, 10 Hwa ma hwɛ ndi Maliyɛ na Mataena, Yowana Maliyɛ e nyaŋgo yama Yakohvo na hwanɛi ema hwa ma hwɛ na wɔ wɔndi hwa ma ohweya hwa nɛi hwagbeeli. 11 Ndi hwa rzi lokɛnɛ hwaŋga hwalana mamɛ hwa ma ohwe hwa ma ewowa ndi na eti ya mbɔrzi, 12 Ndi tɔ nanu Petolo a ma tɛmɛ rzi a hwaŋga o lɛndɛ o rzɔŋgɔ a ma ujama rzi a ɛnɛ maatu ma mbɔmi ema hwa ma mo liŋgɛlɛ, Maliyeli a ma hwɛ aŋga moŋmiti rzi a timba na hwetamirzeli o mamɛ ema e gbeyɛnɛ.
O NJIYA YA EMAURZI
13 O woŋgo wunya mɛnɛ hwa gbeeli hwa hwakɛ, hwa ma hwɛ o li ɛndɛ mbowa hvɔkɔ ema emahwɛlɛhwɛ Emaurzi, Emahwɛ hvoka ya eya yaa mayai lirzamba o limɛni, li uka o Yelurzalɛmi. 14 Hwa ma hwɛ oli a ohwanɛlɛ wɔ na wɔ o hweŋge hweya hweyarzɛ ema hwe ma gbeyɛnɛ. 15 Na oma hwa ma hwɛ li okwa, na lituhwa mendeŋga o hwene hweya wɔ na wɔ, Yerzu mo ŋmiti a maja, a woteya li ndɛ na wɔ. 16 Ndi ema wutahwɛlɛ, oli mo emba, 17 Rzi a ijowa, "Mamɛ inyɔ e ao hwanɛlɛ inyɔ na inyɔ na oma e ɛndɛ e? Hwama tɛmɛ rzi hwa ujɛ marzo orze." 18 Mɔkɔ wawu ema a ma hwɛlɛhwɛ Klohwarzi, rzi a mo ijowa ama, "Ohweli ndi ŋmɛni o Yelurzalem ema arza hwiyɛi hweya ema hwema gbeyɛnɛ aŋga o mene menya e?" 19 Rzi a hwijowa ama, "ima hweya e?" Hwa mo alahwɛ ema, "Lihvomɛnɛ Yerzu wa Narzalet, ema a ma hwɛ emoohweli wa hweliŋgɛ, ama imbama o hweohweli, na o hwegbeeli, o worzo woma Lohwɛ na hwato hwarzɛ. 20 Ema hwakaneli hwa ndɛnɛ hwa eya ya Lohwa, na hwakaneli hwarzu hwa ma akɛlɛ mbako ya kpeli, rzi hwa mo hvanɛ. 21 Ndi irzɔ ima ɔŋgɛlɛ nanu ema mɔndi a hweli oŋgo ema a oŋgirzɛ wonya Irzraeli, li aka hvɛ nanu, menya meyau Yawono ema hwene hweyarzɛ hwe gbeyɛnɛi. 22 O li hwata hvɛtɛ nanu, loŋgo la hwalana hwarzu hwa jo tamirzɛ. Hwa ɛndeyai o rzɔŋgɔ ene elele, ndi hwa rza uŋmai ŋmuimba ŋmeni. 23 Hwa jeeyai li johweya ema, hwa ɛneyai ndi hweliŋgɛ hwe Aŋgeli hwe wo hweyai ema, a hweli loŋgɛ. 24 Rzi loŋgo la mbunda jarzu hvɛ hwa ɛdeyai o rzɔŋgɔ, wo hvɛ wuŋmai na oma hwaalana hwa ohweyai, ndi mɔ, hwarza mo ɛneyai." 25 Rzi a hwa ohweya ama, "ima tumba hweeti hwe hwato ema inyɔ ehweli, ndeŋganɛlɛ mamɛ ndeŋgatɛ meema meyanyu merza lokɛ karzi hweyarzɛ ema hwa e ohweli hwa hweliŋgɛ hwa ma ohwe? 26 Rzekɛ e Klirzito ema hwɛnɛ o litaka o hwene hweya, ndeŋga na a e kpeeya o Likaneya leni la Eluhwe e? 27 Liwoteya Morze, ma hwa ohweli hwa hweliŋgɛ hwarzɛ ema hwa uŋmɛlɛ mamɛ ema ema ohwahwa o hwetileli hweyarzɛ li mo hvomɛnɛ. 28 Na oma hwa ma kombɛnɛ embowa ema hwa ma hwɛ li ɛndɛ, Yerzu a ma a ahwaŋgɛlɛ na aaka ndi o worzo. 29 Ndi hwa ma mo atɛkɛ na ŋginya ema, "Hwɛ na irzo, e hwanja e ŋgombe ema kombɛnɛ, wuunya wo ako. "Rzi a ɛndɛ o lihwɛ na wɔ." 30 Na oma a ma hwɛ o hweleeli na wɔ, Rzi a wowa yolo, aŋgmba jeka, Rzi a woteya di li hwa ŋgmba eyo. 31 Aŋga ndi mirzɔ mawu ma lihvoweya, ndeŋga hwa mo emba, Rzi a nyɔŋgɔ o mirzɔ mawu: 32 Rzi hwa ijowanɛ mɔkɔ na ɔnɛi ema, "Rzekɛ meema me arzu, me tumbaneyai ndi joli joli, liŋgi lirzako ema ahwɛɛyai lijo ohwirzɛnɛ o njiya, o lijoŋgɛlɛnɛ hwetileli e? 33 Hwa ma tɛmɛ o wotɛmɛtɛmɛ, hwa timba o Yelurzalem Aŋga ndi hwa ma uŋma liyome la hwa okoweli na mɔkɔ, na hwanɛi ema hwa ma arzaŋganɛ na wɔ. 34 Rzi hwa wo hweya ema, "Ehweli ndi jɔkɛ! Rzaŋgo ama hvummuwa, a uŋmɛlɛ Rzimɔni." 35 Aŋga ndi wo hwa ahwakɛ hwa ma ohweya eŋgindi mamɛ ema egbeyɛnɛ onjiya, na nɛ hwa ma embeya Yerzu, Lirzako ama hwa hwɛndeya Yolo.
YERZU A MA UŊMƐLƐ HWAOKOWELI HWA ENI
36 Na oma hwama hwɛ li ohwa lihvomɛnɛ hwene hweya, Yerzu, mɔ ŋmiti a ma tɛmɛ o tiiteni yawu, rzi a ohwa ama, "Eyɔlɛ e hwɛ na inyɔ." 37 Rzi hwa lɛmbeya mokambiya na wɔŋgɔ hwa ma ɔŋgɛlɛ ndi ema hwa ɛni ndi molimo. 38 Rzi a hwa ohweya ama, "Mamɛ ndeŋgatɛ e a takirzɛ, na ma luteya manyu ma ondi na lihwamɛ e? 39 E ɔŋgɔ maa mami na mataŋga mami. Imba mɛnɛ ono! Eno lɛmbɛ, e ɔŋgɔ: Elimo erza hwɛni nyama ya nyo. 40 Na oma a ma ohwe nanu, rzi auŋmɛlɛ maa na mataŋga ma eni. 41 Nɛtɛ hwa rzi lokɛ, Ehwanja o mɔnyɛŋgi na manyaka, rzi a hwa ijowa ama, "(E ohvi) Yohvi juumɛ ja lila anu e? 42 Rzi hwa mo ŋgmba morzɔrzɔ mo nyama ya malihwa ema hwa ma ihvɛ. (tumbɛ) 43 Rzi a e wowa, a e laa o mirzɔ ma wu. 44 Rzi a hwa o hweya ama, "Hweya hweyɔ hweene ema imba na ma e ohweya e hvonda na ma hwɛ na inyɔ: Hweya hwe arzɛ hwe hwɛni li ondirzɛhwɛ, na oma e tilahwi o li no hvomɛnɛ o mbenda yama Morze na hwaohweli hwa hweliŋgɛ, na o mɛrzɔkɔ me ama Dahwiti. 45 Rzi a hwa lihvowa ma luteya mawu o li rzɔŋgintanɛ hwetileli. 46 Ama hwa ohweya ama; "Nanu ndi etilahwi: Eklirzito e aŋgamɛnɛi litaka na lihvumuwa o kpeli, o wunya wo ukirzɛ meyau. 47 Li aeyɛlɛ na li lakirzɛhwɛ la wohwe li ohwahwa o Lina leni, o hwekome hweyarzɛ, liwoteya o Yelurzalem. 48 Ehweli mboŋgi o hwene hweya. 49 Na hwɛni li e omeya mamɛ ema Tatɛ a ma kakɛnɛ, ndi e ambɛlɛ anu mbowa natɛɛ e rzoŋgɛhwɛ na e ŋginya e uweya o ŋmanyu. 50 Ehvonda a ma hwa liyɛlɛ, likombɛnɛ Hwetani, Rzi akarzɛ maa meni, a hwa namirzɛ. 51 Na oma ama hwɛ lihwa namirzɛ, A ma hwa hwɛmɛ, Rzi a wowahwa o ŋmanyu ya Lohwa. 52 Rzi hwa mo kanɛ, hwa timba o Yelurzalem na mɔnyɛŋgi mo ndɛnɛ. 53 Rzi hwa hwɛ i hvonda jarzɛ o ndawo ya Lohwa, "li eka Lohwɛ."