Kristi — yɛ̀ de be tang ɛ, à Reha
1 Yimo e susu mo, gyam na be yong jey, yɛ̀ de be tang ɛ, à Reha à sè. Yɛ à sè tanga Dagwi, ko à sè tyɛng na Dagwi. 2 Yi e susu mo, yɛ à sè tanga Dagwi. 3 À sè yi na yɛ de Dagwi à yong pyɛ̂ mwa. Vit a pyɛ cak de Dagwi à yong sana yɛ. 4 A sé e yɛ wɛ de à nɔ̂ng kayɛ pyɛ neken, ko neken o na nɔ̂ng bemat negbey. 5 Negbey o ne lolo e ji lwīl, ko lwīl o gwa tɔk dal nɛ wɛt. 6 Mwat hwak á sɛ̀ de Dagwi á tomo hɛ; bá tang ɛ, à Yohana. 7 Á vey ha a bemat e ra negbey o, yaga na bemât mwa be bin wok reha mɛ, na be sey tsak o. 8 E yɛ pyɛ mɛ wɛt de á sè womo de a nɔ̂ng negbey, ko á vey ha a bemat e ra nɛ zɔng sede mwât nuha. 9 Negbey o ne mwin o nemo de ne tɛ̀sɛ bemât mwa be di negbey ná sè kyè vey e jey. 10 Yɛ de a sé Reha mo á sè e jey. Ko mwa ano de Dagwi à kana yong jey o yi na yɛ, bemât jey bá tɔk mwat de yɛ á sè wɛt. 11 Yɛ á vey e sevwel mɛ, ko bemat mɛ bá kyɛ́ ɛn hɛ. 12 Ko mwa vemo de bá sey ɛ, de bá to tɛ̀ gap mɛn e ra yɛ, e yɛn vɛ de á wunta a yɛn gwong na be tɛ́ ɛn nèy Dagwi. 13 Yɛn á tɛ́ ɛn nèy Dagwi yi e gwông tɔ̂ bemasi wɛt wɔgɔ, bá tɔ ɛn sede nèy ne da hwak wɛt womo de a sé mwasi. Ko á sè e Dagwi pyɛ mɛ de á tɛ̀, yɛn a tɛ́ ɛn nèy mɛ. 14 Yɛ mo de be tang ɛ, à Reha á tɛ́ ɛ mwasi, ko á vey sangal e tē mot yaga jeng. Wot á di gbɔng nerey mɛ; yɛ á sey nɛ yi na Da mɛ, yaga e yɛ wɛ de a sé Hwey mɛ nju hɛ zɔng. Yɛ á dura a wot nerat mɛ ding-ding, ko á to dura a wot tsak ha mwa e ra Dagwi. 15 Yohana á nɔng nuha e ra yɛ. Á gbɔ, á ye, “Mwat a womo de ma kana ha e ra yɛ wɔgɔ, ‘Mwat hwak e kyè vey e bama hom, ko a dal me na nerey, yaga à kana sè gyam na be tɔ me.’ ” 16 Yɛ a vɔk nerat ding-ding, ko yi na nerat o e sǎ e de tɛ́sɛ nerat e ra wot. 17 Dagwi à kana nɔng ot Badu mɛ yi na Mose; ko a sé yi na Yɛsu Kristi de á dura a wot nerat mɛ tanga tsak há mɛ. 18 Vit a mwat de a ga sang di Dagwi. Hwey mɛ nju hɛ zɔng de ha sé tyɛng na Dagwi, de ha to sé bagat na Dâ hɛ mo arɔng, e hɛ de ha tɛ̀ bemat be tɔk yerê mwat de Dagwi a sé.
Há de Yohana wo batisma a ha
19 E jeng cak, bemât nuyêl BeYuda e Yɛrusalɛm ba tomo behak e ji bepiris tanga BeLevi behak vɔk na Yohana, na be wɔ̀ rangal hɛ, yɛ a sé wà arɛt? 20 Yohana mo a kyɛ́ ɛ nà toyo a yɛn na há mo wɛt, ko a ha a yɛn e bayîs bemât mwa wɛshɛrɛk wɔgɔ, “Ma sé womo wɛt de Dagwi a kasa na a sey bemat.” 21 Yɛn a to rangal hɛ, ba ye, “Hwà sé wà ɛ? Hwà sé Eliya arɛt?” A ye, “Wey, ma sé Eliya wɛt.” Ba to rangal hɛ gbak, “Hwà sé zarap Dagwi de wot a sé gyeng ɛ arɛt?” A ye, “Wey.” 22 Ko yɛn a gwɛ̌ rangal hɛ gbak, ba ye, “Ko sɛ̌ hwà sé wà arɛt? Hā a wot, na wot a wɔ̀ ha a bemat de ba tomo hot. Hwà ye ala e ra tó mo arɛt?” 23 Yohana a yang ɛn, “Ma sé womo de Yɛshaya, zarap Dagwi, à kana ha e ra yɛ wɔgɔ, ‘Be wok fwɔ̂ mwat hwak de gwo mok e hey, gwo tē: Tɛ̀ in a Darwey gwong tas, na a bin kwey ɛ̀!’ ” 24 BeFarisi behak de ba tomo hɛn arɔng, 25 ba hwo rangal hɛ, ba ye, “Sede remo de hwà sé womo wɛt de Dagwi a kasa na a sey bemat, kɛ Eliya, kɛ zarap Dagwi o, yaga sɛ́ de hwà sé tɛ̀sɛ a bemat batisma arɛt?” 26 Yohana a toyo a yɛn, a yang ɛn, “Me, me tɛ̀sɛ a bemat batisma na nshi; ko mwat hwak a sé e ngamo e tē min de yin a tɔk ɛ e ngyen wɛt. 27 E yɛ de e kyè vey e bama hom, ko ma ka vey na me viri batsɛ̂p bekpatak mɛ wɛt.” 28 Pyɛ́ yemo ya té e Bet-Anya e gurâ Rɔt Yɔrdan, e kwɔn de Yohana á sè tɛ̀sɛ a bemat batisma.
Yɛsu Kristi a sé Ketyimit Dagwi
29 Tuk het, Yohana a di Yɛsu á sè kyè vey na yɛ, ko a ye, “Di in, Ketyimit Dagwi kemo de ke jut banɛ̂n bemât jey! 30 Mwat a womo de ma kana ha a yin e ra yɛ e jeng de ma ye, ‘Mwat hwak e kyè vey e bama hom, ko a dal me na nerey, yaga à kana sè gyam na be tɔ me.’ 31 Me pyɛ hom ma kana tɔk mwat de a sé wɛt. Ko pyɛ de ya tɛ̀, me vey na me tɛ̀sɛ a bemat batisma na nshi, ya sé, yaga na me tɛ̀ BeIsrayɛl be tɔk mwat de yɛ a sé.” 32 Ko Yohana a nɔng nuha e ra pyɛ yemo ngan, a ye, “Ma di Gabik Dagwi ha gyirik yi e lagwi sede gwobɔp, ha vey nàra na yɛ. 33 Pere vey e jeng o, ma kana tɔk ɛ wɛt. Ko Dagwi de á kana tomo me na me tɛ̀sɛ a bemat batisma na nshi á kana ha a me, ma rɔda di Gabik de hê gyirik e ra mwat hwak na he nàra na yɛ; e yɛ wɛ de a rɔda tɛ̀sɛ a bemat batisma na Gabik Jɛrɛ.” 34 Yohana a gwɛ̌ ha, a yang ɛn, “Ma ga di pyɛ́ yemo mo, ko me nɔng nuha, yɛ mwat womo mo a sé Hwey Dagwi.”
Bemât masâ fwôm Yɛsu vê susu mo
35 Tuk het, Yohana á sè tumal e hwomo tanga bemât masâ fwom mɛ beba. 36 Jeng de a di Yɛsu a sé kwey, a ye, “Di in, Ketyimit Dagwi!” 37 Bemat mɛ beba mo ba wok há mo, ko ba hwo raa Yɛsu. 38 Yɛsu a doyo, a di ba sé raa hɛ, ko a yang ɛn, “E sɛ́ de yin e jāma arɛt?” Yɛn a yang ɛ, “À Rabi, hwà sé na sangal e gwa arɛt?” — Retîn há hemo “Rabi” ra sé “Mwat Basa.” 39 Yɛsu a yang ɛn, “Vey di in.” Yɛn a hwo kyè na yɛ, ba wɔ̀ di kwɔn de á sè sangal ɛ̀, ko yɛn a nàra e hwomo na yɛ bwang tuk hane mo. Jeng de bá man na Yɛsu mo, yá sè sede dyâm-gwi nyaas nahywegelek. 40 Gwining e ji bemat beba de bá kana wok neha Yohana, de a to raa Yɛsu arɔng, yɛ à Andarawus, gwa Simɔn Bitrus. 41 A lashe jeng wɛt, ko a wɔ̀ jāma gwa mɛ Simɔn, a yang ɛ, “Wot a ga sɛ̀ Mwat de Dagwi a kasa na a sey bemat, womo de wot e tang ɛ, à Mɛsiyas.” — Retîn há hemo “Mɛsiyas” ra sé “Kristi.” — 42 E bama mo, a wɔ́ na Simɔn o na Yɛsu. Yɛsu a bɛrɛng hɛ, ko a yang ɛ, “Reza mō, à Simɔn, hwà sé hwêy Yohana, ko ba rɔda to tang o, à Kefas.” — “Kefas” e lêm BeYuda a sé tyɛng na “Bitrus” e lêm BeGirik, ko cap-hâ baza mo ya sé “gwofwa.”
Yɛsu a yila Filip na Natanayel
43 Tuk het, Yɛsu a yong e yey mɛ na a wɔ́ e Galili. A man na Filip, ko a yang ɛ, “Vey raa me!” 44 Filip o á sè mwât repomô Bet-Saida, repomo mɛ rining o na Andarawus tanga Bitrus. 45 Filip o arɔng a sɛ̀ Natanayel, ko a yang ɛ, “Wot á ga sɛ̀ mwat de Mose à kana jɛk e ra yɛ e Bwok-basa Badu, yɛ womo de bepiris bà kana to jɛk e ra yɛ arɔng. Yɛ wɛ, à Yɛsu wo repomô Nazarɛt, hwêy Yɔsɛf.” 46 Natanayel a yang ɛ, “Pyɛ cak ryat ye tɔk nusu yi e Nazarɛt arɛt?” Ko Filip a ye, “Vey, na hwo di!” 47 Jeng de Yɛsu a di Natanayel a sé kyè vey na yɛ, a hwo hanat, a ye, “Di, tsak WoIsrayɛl de e kwɛlɛng bemat ko tyɔng wɛt!” 48 Natanayel a yang ɛ, “Haà! Hwà tɔk me e rɛ̌ arɛt?” Ko Yɛsu a yang ɛ, “Ma kana di o e sangal e retîn cɔgɔ̂t regwi gyam na Filip a yila hwo.” 49 Ko Natanayel a yang ɛ, “À Mwat Basa, hwà sé Hwey Dagwi! Hwà sé Gbɔng Gwɔ̀m BeIsrayɛl!” 50 Yɛsu a yang ɛ, “Hwà sey tsak o na há hom, yaga ma yang o, ma kana di o e sangal e retîn cɔgɔ̂t regwi arɛt? Mwin, hwà rɔda di pyɛ́ de ya dal yemo.” 51 Ko a gwɛ̌ ha, a ye, “Tsak o mwin me ha a yin: Yin a rɔda di lagwi e wúnta, na betom-lagwi de be turus, be to gyiris vey na Me de ma tɛ́ me mwat.”
Ba ra weneng e Kana
1 E bama nepɔlɔ neba, ba dop weneng e Kana wo Galili. Nêng Yɛsu a wɔ́ e hwomo, 2 ko ba to rini Yɛsu na bemât masâ fwom mɛ arɔng. 3 Jeng de ba sé e hwomo, nshî anap de ba sé sɔ na tala hɛn. Ko nêng Yɛsu a hwo yâng Yɛsu, “Nshî anap na ga tala hɛn.” 4 A toyo a yɛ, a yang ɛ, “À neng-gwɔ, e fwom hom a gwane arɛt? Jeng de ma rɔda dura tó hom ya rɔngɔl e ngyen.” 5 Neng mɛ a yâng bemat de ba sé ra fwom e lɔ mo, “Rá in kayɛ pyɛ de a yang in yin a ra.” 6 Ko di, e kwɔn hane mo, ba vɔk bègbɔng kɛngɛ betyiimin ve beta de ba tik vɛ e hwomo, yaga na be raa mɛ̀ negwɔn kûs pyɛ́ nemo de badu BeYuda ba simo. Kwɛngɛ gwining gwo tɔk re nshi sede betsung betyiimin. 7 Yɛsu a hwo yâng bemât fwom o, “Sila hin kɛngɛ mo na nshi.” Ko ba sila vɛ byɛf. 8 Jeng de ba sila kɛngɛ mo, a yang ɛn, “Vɛ́ in nshi mo, na yin wɔ̀ nɔ̂ng dâ nzem o.” Ba ra sede remo de a ha a yɛn. 9 Bemât fwom o ba tɔk kwɔn de ba vo nshi mo, ko yɛ dâ nzem o a tɔk wɛt. Jeng de a wɔt nshi mo de na ga tɛ́ ɛn nshî anap, a hwo yila rwâs gwel, 10 a yang ɛ, “Mwa bemat be tānga nɔng nshî anap de na ta, ko jeng de bemat ba ga sɔ, nà ga vey a yɛn, be de vey na nane de na mâk ta wɛt. Ko hwo hwà ra ano wɛt; hwà tik nshi de na ta vey e remo.” 11 Pyɛ bes yemo de Yɛsu a ra e Kana wo Galili ya sé ye mɛsɛng de a ra. Yi na yɛ, a dura a bemat gbɔng nerey mɛ, ko bemât masâ fwom mɛ ba tɛ̀ gap mɛn e ra yɛ. 12 E bama mo, Yɛsu, na neng mɛ, na begwa mɛ, tanga bemât masâ fwom mɛ ba sogo, ba kyè vɔk e Kafarnahum, ko ba sangal nepɔlɔ tyɔng e hwomo.
Yɛsu a yel e Gbɔng Duk Re Fongol
13 Jeng ya vey lɛs de BeYuda ba wɔ̀ ra Nzem Gyilsit Nelɔ BeIsrayɛl. Yaga ano, Yɛsu a kyè vɔk e Yɛrusalɛm yaga nɛ. 14 Jeng de a yel e lalâ Gbɔng Duk Re Fongol, a hwo di bemat de be rɛsɛl berɔndɔng, na tyīmit, tanga bebɔp; a di bemât segsâ dyām arɔng de ba sé sangal e betebut fwom mɛn. 15 A jut rik, a vɛ́ mɛ̀ zining, ko a ro mɛ̀ bemat o mwa yi e yɛnɛ̂ duk re fongol o, mwa na tyīmit tanga berɔndɔng; a gangas betebut bemât segsâ dyām arɔng, ko a waram a yɛn dyām mɛn e vwel gwɛshɛk. 16 A nɔ̂ng bemat de ba rɛsɛl bebɔp nu, a ye, “Nusu hin na pyɛ́ yemo! Yin jut lɔ Da hom sede bajang wɛt!” 17 Jeng de bemât masâ fwom mɛ ba di ano, ba hwo bare na há de bà jɛk e Bwok-basa Dagwi wɔgɔ, “À Dagwi, ma tɛ̀ yey na lɔ mō ding-ding; tɛ̂ yey o ha sé sede kya de ha rɔda re me.” 18 Ko bemât nuyêl BeYuda ba hwo yang ɛ, “E yɛ̌ pyɛ bes de hwô ra na hwo dura a wot, hwà vɔk reto na hwo ra ano arɛt?” 19 Ko Yɛsu a yang ɛn, “Gangas hin Gbɔng Duk Re Fongol womo, ko mê to lɔk wɛ e ji nepɔlɔ netat.” 20 Bemât nuyel o ba yang ɛ, “Káa! Ba jut neshey kuru banaas na nɛ netyiimin (46 ) e de lɔ̂k duk womo. Ko hwo, hwô to lɔk wɛ e ji nepɔlɔ netat arɛt?” 21 Ko di, jeng de Yɛsu a ha e ra Gbɔng Duk o, á sè ha e ra rebek mɛ. 22 Ano kwong, e jeng de Dagwi a ga sene hɛ yi e reku, bemât masâ fwom mɛ ba pere bare na neha de á kana ha. Hemo ha tɛ̀, yɛn a sey tsak o na pyɛ́ de bà jɛk e Bwok-basa Dagwi tanga neha de Yɛsu a ha.
Yɛsu a tɔk neyey bemât mwa
23 Jeng de Yɛsu á sè e Yɛrusalɛm e jeng Nzem Gyilsit Nelɔ BeIsrayɛl, a ra pyɛ̂ bes detidetu. Yaga ano, bemat pyak de ba di pyɛ̂ bes o ba tɛ̀ gap mɛn e ra yɛ. 24 Ko Yɛsu a tɛ̀ gap mɛ e ra yɛn wɛt, yaga yɛ a tɔk neyey bemât mwa. 25 Yɛ a jāma na mwat a ha a yɛ pyɛ cak e ra bemat wɛt, yaga yɛ pyɛ mɛ á kana tɔk pyɛ́ de ya sé e ji neyey mɛn.
Yɛsu tanga Nikodemus
1 Mwât nuyêl BeYuda hwak á sɛ̀ de ba tang ɛ, à Nikodemus, ko á sè hwak e ji BeFarisi. 2 Tuhak, a hwo wɔ na Yɛsu nabwalak, a yang ɛ, “À Mwat Basa, wot a tɔk, hwà sé mwât basa de Dagwi a tomo hɛ. Yaga vit a mwat de ê tɔk ra pyɛ̂ bes de hwà sé ra, sɛ̌ Dagwi a sé na yɛ.” 3 Yɛsu a yang ɛ, “Tsak o mwin me ha a hwo: Vit a mwat de ê tɔk di Segwɔm Dagwi, sɛ̌ ba tɔ ɛ tɔ hê neba.”3 :3 tɔ hê neba: kɛ: tɔ yi e lagwi. 4 Nikodemus a rangal hɛ, a ye, “Bê to tɔk tɔ mwat de a ga vey mwat e rɛ̌ arɛt? Ê to tɔk yel e ji jîm neng mɛ, na be to tɔ ɛ tɔ hê neba arɛt?” 5 Yɛsu a yang ɛ, “Tsak o mwin me ha a hwo: Vit a mwat de ê tɔk yel e Segwɔm Dagwi, sɛ̌ ba to tɔ ɛ yi na nshi tanga yi na Gabik Dagwi. 6 Pyɛ de ye yi e rebêk mwasi ya sé pyɛ rebek; ko pyɛ de ye yi na Gabik Dagwi ya sé pyɛ Gabik. 7 Hwo langat hwo wɛt, yaga ma ha a hwo: Gbing-gbing na be to tɔ in tɔ hê neba. 8 Gul gwo pɛsɛl e gwong de gwo simo. Hwó wok wûs gwɛ, ko hwó tɔk kwɔn de gwo yi ɛ̀ kɛ kwɔn de gwo kyè vɔk ɛ̀ wɛt. A sé tyɛng ano na kawɛ mwat de ba to tɔ ɛ yi na retô Gabik Dagwi.” 9 Nikodemus a yang ɛ, “Pyɛ yemo yê tɔk té e rɛ̌ arɛt?” 10 Yɛsu a toyo a yɛ, a ye, “Hwo de hwà sé mwât basâ BeIsrayɛl, hwà tɔk pyɛ de há hemo ha dura wɛt arɛt? 11 Tsak o mwin me ha a hwo: Wot a sé ha a yin e ra pyɛ́ de wot a tɔk, ko wot a sé nɔng nuha e ra pyɛ́ de wot a to di arɔng, ko yin a simo na yin a sey tsak o na há mot wɛt. 12 Ma kana ha e ra pyɛ́ de ye té e ji jey yemo, ko yin a sey tsak o na há hom wɛt. Yi e rɛ̌ de yin ê sey tsak o, ka sede ma sé ha a yin e ra pyɛ́ de ye té e lagwi arɛt? 13 Vit a mwat de a sang tut vɔk e lagwi, sɛ̌ womo de a gyirik yi e hwomo wɔgɔ, Me de ma tɛ́ me mwat. 14 Yimo raane, jeng de Mose tanga bemat mɛ bà kana sè e hey, Mose à tɛ̀ gwɔ̄m de ba yông na dyam shi e ra gwocɔgɔt, ko à nára wɛ e rak o. E gwong gwomo, a sé gbing-gbing na be nára Me de ma tɛ́ me mwat e rak o arɔng, 15 yaga na kawɛ mwat de a tɛ̀ gap mɛ e ra me a bin sɛ̀ neken gbak-gbak. 16 “Dagwi a tɛ̀ yey na bemât jey sizɔng; yaga ano, a nɔng Hwey mɛ de ha sé nju hɛ zɔng, yaga na kawɛ mwat de a tɛ̀ gap mɛ e ra hɛ a bin wey wɛt, ko na a sɛ̀ neken gbak-gbak. 17 Yaga Dagwi a tomo Hwey mɛ, na he gang bemât jey na shɔt wɛt, ko a tomo hɛ, yaga na a sey neken mɛn yi na hɛ. 18 Kawɛ mwat de a tɛ̀ gap mɛ e ra hɛ, bê gang ɛ na shɔt wɛt; ko kawɛ mwat de a tɛ̀ gap mɛ e ra hɛ wɛt, Dagwi a ga gang ɛ na shɔt, yaga a tɛ̀ gap mɛ e ra hemo wɛt de ha sé Hwey Dagwi nju hɛ zɔng. 19 Gwong a gwomo de Dagwi e ra a bemat shɔt: Negbey na vey e jey, ko bemat ba dal na simô lwīl e ra negbey o, yaga be ragas pyɛ́ vyes. 20 Kawɛ mwat de e ragas pyɛ́ vyes e kyɛ́ ɛ negbey, e tele yi e negbey, yaga na bemat be kwon di pyɛ́ vyes de e ragas wɛt. 21 Ko kawɛ mwat de e ragas pyɛ́ de ya sé tsak o e vey e ji negbey, yaga na negbey o ne dura dɛdɛɛt, pyɛ́ de a ra, a ra yɛ̄ yaga a gyenges hâ Dagwi.”
Yɛsu tanga Yohana wo batisma
22 E bamâ pyɛ́ yane, Yɛsu tanga bemât masâ fwom mɛ ba sogo, be kyè vɔk e yɛnɛ̂ sevwêl Yudiya. A sangal e hwomo tanga yɛn jeng tyɔng, ko a sé tɛ̀sɛ a bemat batisma. 23 Yohana á sè sangal e Ainon bagat na Salim, ko a to sé ra a bemat batisma arɔng, yaga kwɔn o ha vɔk nshi bɛɛrɛ. Bemat ba kyese e hwomo, ko a sé ra a yɛn batisma. 24 E jeng o, ba ga kana vo Yohana be tɛ̀ ɛ e lɔ̂ ngyang e ngyen wɛt. 25 Tuhak, bemât masâ fwôm Yohana behak ba hwo ra nenan na WoYuda hwak e ra negwɔn BeYuda ne kûs pyɛ́ haalal. 26 Yaga ano, yɛn a wɔ̀ sɛ̀ Yohana, ko ba yang ɛ, “À Mwat Basa, hwó bare na mwat wane de á kana sè e hworo e gurâ Rɔt Yɔrdan, wane de hwà ha e ra yɛ arɛt? Ko di, yɛ a sé ra a bemat batisma. Mwa bemat ba sé tele vɔk na yɛ!” 27 Yohana a yang ɛn, “Vit a mwat de e tɔk vɔk reto rehak, sɛ̌ Dagwi a nɔng ɛ rɛ. 28 Yin pyɛ min yin á kana wok jeng de ma ye, ma sé womo wɛt de Dagwi a kasa na a sey bemat, ko Dagwi a tānga tomo me e nuyel mɛ. 29 A sé e rwâs gwel de a vɔk gwel o. Ko sa mɛ de a sé gyeng ɛ a sé wet betong na a wok há mɛ, ko jeng de a wok fwɔ mɛ, a vɔk yey pyɛng. A sé ano na me arɔng, ma vɔk yey pyɛng sizɔng. 30 A sé gbing-gbing na yɛ a gwɛ̌ hɛ na nerey, ko me, me tɛt me na nerey.”
Mwat de a yi e lagwi
31 “Mwat de a yi e lagwi a dal bemât mwa. Yɛ de a sé wo jey yemo a sé yerê wo jey o, ko a sé ha e ra pyɛ̂ jey o arɔng. Ko mwat de a yi e lagwi a dal bemât mwa. 32 A sé nɔng nuha e ra pyɛ́ de yɛ̀ pyɛ mɛ a di, de a to wok arɔng. Ko mwa ano, vit a mwat de a sey tsak o na há mɛ. 33 Ko kawɛ mwat de a sey tsak o na há mɛ mo a sé dura tsɛng-tsɛng pyɛ́ de Dagwi a ha ya sé tsak o. 34 Mwat de Dagwi a tomo hɛ a sé ha neha Dagwi, yaga Dagwi e nɔng ɛ Gabik mɛ vit a yɛnɛ mo. 35 Dagwi a tɛ̀ yey na Hwey mɛ, ko a to nɔ̂ng hɛ reto e ra kayɛ pyɛ. 36 Kawɛ mwat de a tɛ̀ gap mɛ e ra Hwey Dagwi a sɛ̀ neken gbak-gbak; ko kawɛ mwat de a gyenges hâ Hwey Dagwi o wɛt a rɔda sɛ̀ neken o wɛt, ko Dagwi ê re nuyel na tɛ̂ shom e ra yɛ.”
Yɛsu a ha na hwâ Samariya hwak
1 BeFarisi ba wok wɔgɔ, bemat de ba hwo raa Yɛsu, vemo de a to sé ra a yɛn batisma, ba dal vane de ba sé raa Yohana. 2 (E ji hâ mwin, Yɛsu pyɛ mɛ a ra a mwat hwak batisma wɛt, a sé e bemât masâ fwom mɛ zɔng de ba ragas a bemat batisma.) 3 Jeng de Darwey Yɛsu a wok pyɛ́ de bemat ba ha e ra yɛ, a sogo, a tik sevwêl Yudiya na a toyo vɔk e sevwêl Galili. 4 Gwong vɔk e Galili gwa kwey e ji sevwêl Samariya. 5 E ji kwɛngɛl mɛ mo, a hwo pom e repomo rehak rê Samariya de ba tâng rɛ, à Sikar. Repomo mo ra sé bagat na cap de Yakɔp à kana nɔ̂ng hwey mɛ Yɔsɛf yimo raane. 6 Hwes de gwà kana sè gwô Yakɔp gwa sé e hwomo arɔng. Jeng de Yɛsu a wul kwɔn o, a sangal e vwâ hwes o, yaga a ga ruru na kwɛngɛl. Jeng o ya sé tê-gwi. 7 -8 E jeng o, bemât masâ fwôm Yɛsu bá kana kyè vɔk e ji repomo na be wɔ̀ sey pyɛ̂ re. Ko hwâ Samariya hwak a hwo wɔ e hwomo, na a vo nshi. Yɛsu a yang ɛ, “Nɔt me nshi, na me sɔ.” 9 Hwā mo a yang ɛ, “Hàa! Hwo hwà sé WoYuda wɛt arɛt? Me ma sé hwâ Samariya wɛt a? Ko hwó ra won na me nɔt o nshi a?” A langat hɛ, yaga vit a pyɛ de ya man BeYuda na bemât Samariya. 10 Yɛsu a toyo a yɛ, a ye, “Hwà tɔk yerê mwat de ma sé wɛt. Ka hwà tɔk me, ka a yâng sé e hwo de hwô rangal me na me nɔt o nshi. Dagwi e nɔngɔ̂s bemat nshi e nɔrɔ, nemo de ne vey a yɛn na neken. Ka sede hwà tɔk yerê mwat de ma sé, ka hwô yâng simo na me nɔng o nshi mo, ko ma yâng nɔng o nɛ.” 11 Hwā mo a yang ɛ, “À Da, hwes o gwa sé ciwil, ko hwà vɔk pyɛ vôs nshi mo wɛt. Hwô sɛ̀ nshi nane de ne vey a bemat na neken e gwa arɛt? 12 À kana sè dâ beda mot Yakɔp de à nɔng ot hwes gwomo. Yɛ pyɛ mɛ, na nèy mɛ, tanga berɔndɔng mɛ mwa bà sɔ nshî gwɛ. A sé a hwo hwà dal Yakɔp mo a?” 13 Yɛsu a yang ɛ, “Kawɛ mwat de e sɔ nshi nemo a rɔda to wok yêy hwɔshɔ. 14 Ko kawɛ mwat de e sɔ nshi nane de ma rɔda nɔng ɛ ê sang to wok yêy hwɔshɔ wɛt. Nshi nane de mê nɔng ɛ nɛ nê sè sede jɔt nshi de nê nunus e ji mɛ, de ne nɔngɔs hɛ neken gbak-gbak.” 15 Hwā mo a yang ɛ, “À Da, gabɔk wɛt, nɔt me yerê nshi nane mo, yaga na me kwon to wok yêy hwɔshɔ wɛt, na me to tik vɛsɛ vos nshi e ngamo.” 16 Yɛsu a yang ɛ, “Ci wɔ̀ yila rwas mō, na hwo vey na yɛ.” 17 Hwā mo a yang ɛ, “Ma vɔk rwas wɛt.” Yɛsu a yang ɛ, “Hwà ha yɛt de hwà ye, hwà vɔk rwas wɛt. 18 Hwà ga kana ra weneng zang tungun, ko mwat de hwà sé sangal na yɛ a remo a sé rwâs weneng mō wɛt. Hwà ha tsak o.” 19 Hwā mo a yang ɛ, “À Da, ma di, hwà sé zarap Dagwi. 20 Bedabeda mot ba dopse re a Dagwi fongol e ra tɛ̂t raku womo, ko yin BeYuda, yin a ye, a sé gbing-gbing na bemat be wɔ̀ re a Dagwi fongol e Yɛrusalɛm.” 21 Yɛsu a yang ɛ, “À neng-gwɔ, sey tsak o na há hom: Jeng ya sé kyè vey de bemat bê to re a Dagwi Da fongol e ra tɛ̂t raku womo kɛ e Yɛrusalɛm wɛt. 22 Yin bemât Samariya yin a tɔk yɛ womo de yin e re a yɛ fongol wɛt; ko wot BeYuda wot a tɔk Dagwi de wot e re a yɛ fongol, yaga a sé yi na BeYuda de Dagwi a rɔda sey bemat. 23 Ko jeng ya sé kyè vey — mwin ya ga vey a remo — de Gabik Dagwi hê tɛ̀ bemat be kyɛm be re a Dagwi Da fongol e gwong de gwa sé tsak o. Yerê bemat de be re a yɛ fongol na yey rining — e yɛn vɛ de Dagwi e jāma na be re a yɛ fongol. 24 Dagwi a sé Gabik; bemat be tɔk re a yɛ fongol e gwong de gwa sé tsak o zɔng, ka sede Gabik mɛ ha tɛ̀ ɛn na be kyɛm be ra ano.” 25 Hwā mo a yang ɛ, “Ma tɔk, Mwat de Dagwi a kasa na a sey bemat a rɔda vey. Ko jeng de ê vey o, a rɔda ha a wot kayɛ pyɛ wɛshɛrɛk.” 26 Yɛsu a yang ɛ, “A sé e me de me ha na hwo à mwat wane mo.” 27 E jeng yane mo, bemât masâ fwom mɛ ba toyo; sede ba di ɛ a sé ha na hwā mo, ba langat hɛn. Ko vit a hwak e ji mɛn de a rangâl hwā mo, “E sɛ́ de hwó simo arɛt?” Kɛ a yâng Yɛsu, “Yaga sɛ́ de hwà sé ha na hwā mo arɛt?” 28 Ko hwā mo a tik tsung mɛ e hwomo, a nára hɛ vɔk e ji repomo, ko a hwo ha a bemat, a yang ɛn, 29 “Vey di in mwat de a ha a me pyɛ̂ mwa de ma ga sang ra! Kɛ ê sè e yɛ wɛ à Mwat de Dagwi a kasa na a sey bemat ayi?” 30 Ko bemat ba hwo nunus yi e ji repomo mo, na be wɔ́ e kwɔn de Yɛsu a sé ɛ̀. 31 E jeng de hwā mo a kyè vɔk e ji repomo mo, bemât masâ fwôm Yɛsu ba shonong e ra yɛ, ba ye, “À Mwat Basa, vey re pyɛ́!” 32 Ko Yɛsu a yang ɛn, “Ma vɔk pyɛ̂ re yemo de yin a tɔk hâ yɛ̄ wɛt.” 33 Yaga ano, bemat mɛ mo ba hwo tâng bemɛn. “Hàa! Mwat hwak a ga vey nɔng ɛ pyɛ̂ re arɛt?” 34 Ko Yɛsu a yang ɛn, “Me ra pyɛ́ de yɛ̀ de a tomo me e simo na me ra, ko me yɛnɛ fwom de a ga nɔng me na me ra mo. Jeng de me ra ano, a sé sede ma ga re pyɛ́ à wane. 35 Bemat be tē, ‘Bwang pɛl naas na hywɛp he vey.’ Ko me ma sé ha a yin, bɛrɛng hin hiri! Di in pyɛ́ e ji vɛ ya ga vel, bwang yɛ̂t bwal o. 36 Mwât yɛ̂t bwal a sé sɛsɛm pyɔlɔ mɛ e ji fwom o, a sé vɛ̀sɛ na bemat na be sɛ̀ neken gbak-gbak. Ano kwong, mwat de á kana bere yére mo tanga womo de a yɛt bwal o bê vɔk yey pyɛng mwa hɛn. 37 A sé sede remo de bemat be tē, ‘Mwat hwak e bere yére mo, ko mwat hwak e yɛt bwal o.’ 38 Ma tomo hin, na yin a wɔ̀ yɛt bwal e kwɔn de yin á kana how ɛ̀ cap wɛt. A sé e bemat behak de ba pɛngɛ hɛn na fwom o, ko yin a sé sɛ̀ pyɔlɔ̂ fwom mɛn o.” 39 Bemât Samariya pyak de ba yi e repomo mo ba hwo tɛ̀ gap mɛn e ra Yɛsu, yaga hwā mo a ye, “A ha a me pyɛ̂ mwa de ma ga sang ra.” 40 Yaga ano, e jeng de ba wul na Yɛsu, ba ra won na yɛ na a sangal na yɛn. A simo, ko a sangal e hwomo nepɔlɔ neba. 41 Bemat pyak de ba dal vane ba tɛ̀ gap mɛn e ra yɛ e jeng de ba wok há mɛ. 42 Ko ba yâng hwā mo, “A sé yaga há mō de wot a tɛ̀ gap mot e ra yɛ wɛt; ko a sé yaga wot bato mot wot a ga wok há mɛ mo. A remo, wot a tɔk, e ji hâ mwin, yɛ a sé Mwât Sêy jey.”
Yɛsu a tɛ̀ hwêy gbɔng mwât lɔ gwɔ̀m tyang
43 E bamâ nepɔlɔ neba nane mo, Yɛsu a sogo, a to ɛ vɔk e sevwêl Galili. 44 Yɛ pyɛ mɛ á kana ye, “Bemat be nɔngɔ̂s zarap Dagwi nerey e ji sevwel mɛ wɛt.” 45 Ko jeng de a wul e hwomo, bemat ba sey ɛ na yey pyɛng. Yɛn arɔng bá kana wɔ́ e Yɛrusalɛm e jeng Nzem Gyilsit Nelɔ BeIsrayɛl, ko ba di pyɛ̂ mwa de Yɛsu a ra e jeng nzem o. 46 E bama mo, a to toyo vɔk e Kana wo Galili, kwɔn a hane de á kana sege nshi na ne tɛ́ ɛn nshî anap. Gbɔng mwât lɔ gwɔ̀m hwak á sè de hwey mɛ há sè ro hɛ e Kafarnahum. 47 Jeng de a wok, Yɛsu a sogo yi e sevwêl Yudiya wɔ e sevwêl Galili, a wɔ̀ sɛ̀ ɛ e hwomo, a ra won na yɛ, a yang ɛ, “Vey e Kafarnahum, na hwo tɛ̀ hwey hom tyang; ha vey bagât ku.” 48 Ko Yɛsu a yang ɛ, “Vit a mwat e ji min de ê tɛ̀ gap mɛ e ra me, sɛ̌ a tānga di pyɛ̂ bes detidetu e ngyen.” 49 Ko gbɔng mwat o a yang ɛ, “À Da, vey na wot a kyè, yaga hwey hom ha sé kyè wɔ̀ ku.” 50 Yɛsu a yang ɛ, “Kyè vɔk e lɔ; hwey mō ha sé kyè wɔ̀ dal!” Mwat o a sey tsak o na há de Yɛsu a ha a yɛ, ko a kyè vɔk e lɔ. 51 Jeng de a sé e gwong wɔ e lɔ, bemât fwôm lɔ mɛ ba man na yɛ e gwong, ko ba yang ɛ, “Hwey mō ha ga dal.” 52 A hwo rangal hɛn jeng de hwey o ha hwo wok naka. Ko ba yang ɛ, “Á sè nayos dyam jining nagwi de rebek fes o ra hàla hɛ.” 53 Dâ hwey o a pere tɔk, á sè e jeng a yane de Yɛsu a yang ɛ, “Hwey mō ha sé kyè wɔ̀ dal.” Yaga ano, yɛ tanga bemât lɔ mɛ mwa ba tɛ̀ gap mɛn e ra Yɛsu. 54 Pyɛ bes ye neba a yemo de Yɛsu a to ra e jeng de a toyo yi e Yudiya vɔk e Galili.
Yɛsu a tɛ̀ mwât serɔ tyang e didêng Bet-Esta
1 E bamâ pyɛ́ yane, jeng ya vey de BeYuda be ra nzem mɛn nehak. Yaga ano, Yɛsu a kyè vɔk e Yɛrusalɛm yaga nɛ. 2 E Yɛrusalɛm o, ba vɔk dideng hwak de wa sé bagat na Ruhûp Tyīmit. E ji lêm BeYuda be tâng dideng wane mo, à Bet-Esta. Kwɔn o ha vɔk tam tungun, 3 vemo de bemât serɔ pyak ba dyɛngɛs ɛ̀; yɛn á sè bebók, na bemat nà bol, tanga bemât gyɔ̂t nedem. Bá sè gyeng na be sukta nshi mo. 4 E jeng e jeng, tom-lagwî Darwey hwak e gyirik na a vey sukta nshi mo: E bama de a ga sukta nɛ ano, mwat de a tānga yel e ji nɛ a sɛ̀ netyang yi e mwa yerê serɔ de a vɔk. 5 Mwat hwak á sè e hwomo de a ga ros na serɔ neshey kuru batat na nɛ rwit (38 ). 6 Jeng de Yɛsu a wul kwɔn o, a di ɛ e dyɛngɛ, ko a pere tɔk, a ga ros na serɔ mo, a yang ɛ, “Hwó simo na hwo sɛ̀ netyang arɛt?” 7 Mwât serɔ mo a yang ɛ, “À Da, ma vɔk mwat de ê sɛlɛ me na a tɛ̀ me e ji nshi mo e jeng de ba ga sukta nɛ wɛt; sede ma sé ye ngyɛ́k na me yel ɛ̀, ko mwat hwak e tānga wɔ̀ yel ɛ̀ e ra me.” 8 Yɛsu a yang ɛ, “Sogo, jut gwoput mō na hwo kyè!” 9 Remo-remo, mwat o a tɛ̀ tyang, a gunung gwoput mɛ, a hwo kyè. Tuk hane mo há sè Tuk Shábat. 10 Yaga ano, bemât nuyêl BeYuda ba yâng mwat de ba ga tɛ̀ ɛ tyang, “Hàa! E Tuk Shábat yunung! Hwà tɔk, ka sede hwà jut gwoput mō e Tuk Shábat, ko hwà gyili Badu wɛt a?” 11 Mwat o a yang ɛn, “Mwat de a ga tɛ̀ me tyang o a yang me, me jut gwoput hom na me kyè.” 12 Ba rangal hɛ, ba ye, “E wɛ̌ mwat de a yang o hwo ra ano arɛt?” 13 Ko mwat de ba tɛ̀ ɛ tyang o a tɔk mwat de a tɛ̀ ɛ tyang wɛt, yaga Yɛsu a ga kana nusu hɛ yaang, yaga bemat bá sè pyak e hwomo. 14 E bama mo, Yɛsu a di ɛ e Gbɔng Duk Re Fongol, ko a yang ɛ, “Di, hwà ga tɛ̀ tyang a remo. Hwo re nuyel na ragâs banɛn wɛt, yaga na pyɛ cak vyes de ya dal serɔ mo ye kwon sɛ̀ o wɛt.” 15 Mwat o a wɔ̀ ha a bemât nuyêl BeYuda, a sé e Yɛsu de a tɛ̀ ɛ tyang. 16 E ngamo nuyel, yɛn a tak a Yɛsu reyɔm, yaga a tɛ̀ mwat o tyang Tuk Shábat. 17 Yɛsu a yang ɛn, “Da hom e ragas fwom kayɛ jeng, ko me arɔng ma sé ra fwom ano.” 18 Há hemo ha tɛ̀ bemât nuyêl BeYuda mo be gwɛ̌ jāma na be mɔrɔ hɛ. Yaga a lashe redu mɛn rê Tuk Shábat zɔng wɛt, ko a to yâng Dagwi, à Da mɛ arɔng. Yi ano, a dura, a jut tó mɛ tyɛng na Dagwi.
Reto de Dagwi a nɔ̂ng Hwey mɛ
19 Yɛsu a toyo a bemât nuyêl BeYuda mo na há hemo, a yang ɛn, “Tsak o mwin me ha a yin: Hwey Dagwi he tɔk ra pyɛ cak nju hɛ wɛt; he ragas pyɛ́ de he bɛrɛng Dâ hɛ e ragas. Kayɛ pyɛ de Da mo e ragas, Hwey mɛ he ragas ano arɔng. 20 Yaga Da mo a tɛ̀ yey na Hwey mɛ, ko e dura a hɛ mwa pyɛ́ de yɛ e ragas. Ê to dura a hɛ pyɛ́ de ya dal yane de yin a ga kana di; yaga ano, yin a rɔda langat hin. 21 Sede remo de Dagwi Da e tɛ̀sɛ bemat de ba ga kana kushu be sene na neken, e gwong gwomo, Hwey mɛ he nɔngɔ̂s vemo de he simo neken o arɔng. 22 E rà rehâ râ shɔt arɔng — Da pyɛ mɛ e ra a mwat hwak shɔt wɛt, ko a ga tik retô râ shɔt o e vɔ Hwey mɛ. 23 A ra ano, yaga na bemât mwa be nɔ̂ng Hwey mɛ nerey e gwong de be nɔ̂ng Dâ hɛ nerey arɔng. Ka sede mwat hwak e nɔ̂ng Hwey Dagwi nerey wɛt, ko hane he dura, e nɔ̂ng Da de a tomo Hwey o vey e jey nerey arɔng wɛt. 24 “Tsak o mwin me ha a yin: Kawɛ mwat de a wok há hom, ko a tɛ̀ gap mɛ e ra Dagwi de a tomo me, a ga sɛ̀ neken gbak-gbak. Dagwi a rɔda gang ɛ na shɔt wɛt, ko mwat o a ga kana hàla gwông reku, ko a yel e gwông neken. 25 Tsak o mwin me ha a yin: Jeng ya sé kyè vey — mwin ya ga vey a remo — de bemat de ba ga kana kushu bê ba wok fwɔ̂ Hwey Dagwi; ko vane de bê ba wok fwɔ mɛ mo ba rɔda ba sene na neken. 26 Sede remo de Dagwi Da a vɔk reto na a nɔngɔ̂s bemat neken, ano arɔng a ga nɔ̂ng Hwey mɛ reto na he nɔngɔ̂s bemat neken. 27 A ga to nɔ̂ng Hwey mɛ reto na he ra a bemat shɔt, yaga ha sé Yɛ de a tɛ́ ɛ mwat. 28 Yin kwon langat hin pyɛ́ yemo wɛt! Jeng ya sé kyè vey de mwa bemat de ba ga kana kushu bê ba wok fwɔ mɛ, 29 ko bê ba sogso yi e besak mɛn. Bemat de bá kana ragas pyɛ́ ryat ba rɔda ba sene na be sangal na neken. Ko vane de bá kana ragas pyɛ́ vyes ba rɔda ba sene na be wɔ̀ tumal e nuyêl Dagwi de ê ba gang ɛn na shɔt.”
Vemo de be nɔng nuha e ra Yɛsu
30 “Me tɔk ra pyɛ cak na reto hom nju hom zɔng wɛt sɛ̌ na retô Da hom. Me ra a bemat shɔt e gwong de a ha a me na me ra. Yaga ano, me gas shɔt e tē, yaga me jāma na me ra pyɛ de ya jam a me zɔng wɛt, ko me ra pyɛ de ya jam a Dagwi de a tomo me. 31 “Ka sede ma nɔng nuha e ra tó hom, ko yi e rɛ̌ de bemat bê tɔk, há hom ha sé tsak o arɛt? 32 Ko mwat hwak a sɛ́ de e nɔng nuha e ra me, ko ma tɔk, há mɛ e ra me ha sé tsak o. 33 Yin á kana tomo betom min wɔ na Yohana, na yin a rangal hɛ, na a ha a yin tsak há, ko yɛ a ha a yin tsak há mo. 34 Me pyɛ hom me simo nuha mwat hwak wɛt, ko ma sé bare a yin na neha Yohana mo zɔng, yaga na Dagwi a sey neken min. 35 Yohana mo á kana sè sede kywa-kya de wo lolo, wo nɔngɔs negbey wɛshɛrɛk. Yaga jeng tyɔng yin á simo na yin a wok há mɛ de há sè sede negbey, na he tɛ̀ in na yin a vɔk yey pyɛng. 36 Ko pyɛ cak ya sé de ya dal nuha de Yohana a nɔng e ra me: Yɛ à tomong de Da hom a nɔng me reto na me ra. Tomong o be dura yerê mwat de ma sé, be to dura, a sé e Da hom de a tomo me. 37 Yɛ Da hom de a tomo me, yɛ pyɛ mɛ a ga nɔng nuha e ra me arɔng. Yin a sang wok fwɔ mɛ wɛt, ko yin a sang di ɛ na bayis min arɔng wɛt, 38 yin a to vɔk reha mɛ e ji neyey min wɛt, yaga yin a tɛ̀ gap min e ra womo de a tomo hɛ wɛt. 39 Kayɛ jeng yin a sê bûm basâ Bwok-basa Dagwi, yaga a sé a yin, yin a rɔda sɛ̀ neken gbak-gbak yi na gwɛ. Ko a sé e Bwok-basa mo de gwa sé nɔng nuha e ra me! 40 Ko mwa ano, yin a kyɛ́ in nà vey na me, yaga na yin a bin sey neken nemo mo. 41 “Me, me jāma wɛt na bemat be somo me. 42 Ko ma tɔk yerê bemat de yin a sé. Ma tɔk, yin a tɛ̀ yey na Dagwi wɛt. 43 Ma vey na retô Da hom, ko yin a sey me wɛt. Ko ka sede mwat hwak a vey na retô tó mɛ zɔng, yin ê sey ɛ. 44 Yin e simo na bemin be somo hin, ko yin e jāma wɛt na yɛ de a sé Dagwi nju mɛ zɔng a somo hin. Sede remo de a sé ano, yi e rɛ̌ de yin ê sey tsak o na há hom arɛt? 45 “Yin bare wɛt wɔgɔ, e me de mê tɛ̀sɛ sekun min e nuyêl Da hom. A sé e Mose de e tɛ̀sɛ sekun min. E yɛ wɛ de yin a sɛt yey min e ra yɛ na a sɛlɛ hin. 46 Ka yin a yâng sey tsak o na hâ Mose, ka yin a yâng sey tsak o na há hom arɔng, yaga à kana jɛk há e ra me. 47 Ko sede remo de yin a sey tsak o na há de à kana jɛk wɛt, yi e gwɛ̌ gwong de yin ê sey tsak o na neha hom arɛt?”
Yɛsu a nɔ̂ng beras gu batungun pyɛ̂ re
1 E bamâ pyɛ́ yane, Yɛsu a hwo ye dɔ vɔk e gurâ Gworep Galili de be to tâng gwɛ, à Gworep Tiberiyas. 2 Gbɔng regyɛng bemat ba raa hɛ, yaga bá kana di pyɛ̂ bes de a ra e jeng de a tɛ̀ bemât serɔ tyang. 3 Yɛsu tanga bemât masâ fwom mɛ ba tút vɔk e raku, ko a sangal e hwomo tanga yɛn. 4 E jeng yane mo nzem BeYuda de be tâng nɛ, à Nzem Gyilsit Nelɔ BeIsrayɛl nà kana vey bagat. 5 Yɛsu a hwo ye ganga, ko a di gbɔng regyɛng bemat ba sé kyè vey na yɛ, ko a yâng Filip, “Wot ê sey pyɛ̂ re e gwa, na wot a nɔ̂ng bemat vemo mwa na ye vey a yɛn arɛt?” 6 Yɛsu a ha ano, yaga na a wok pyɛ de Filip ê ye. Yɛ pyɛ mɛ á kana tɔk pyɛ de ê ra. 7 Filip a yang ɛ, “Kée kàa! Ka wot a ka sey kpam-tuk e nû dyâm fwôm mwat yê pɛl rwit, ê ka vey na kawɛ mwat a sɛ̀ kecɛk o wɛt!” 8 Hwak e ji bemât masâ fwom mɛ mo de ba tang ɛ, à Andarawus, gwa Simɔn Bitrus, a yâng Yɛsu, 9 “Wen hwak a sé e ngamo de a vɔk bāgat kpam-tuk batungun tanga betɔk beba. Ko kepyɛ kane kê tɔk ra a yerê nepyak bemat vemo sɛ́ arɛt?” 10 Sɔng lwa gwa sè pyak e kwɔn o. Ko Yɛsu a yâng bemat mɛ, “Há in a bemat o be sangal e vwel.” Bemat o ba hwo sangsal. E ji mɛn beras ba wul sede gu batungun (5 ,000 ). 11 Ko Yɛsu a jut bagat kpam-tuk o, a feng a Dagwi yaga vɛ, ko a hwo gas a bemat de ba sé sangal e hwomo. A to ra ano na betɔk o. Ko mwa hɛn ba re, ba siris. 12 E bama de bemat o ba ga re, ba ga siris mwa, Yɛsu a yâng bemât masâ fwom mɛ, “Tula hin cɛ̂k pyɛ́ mo de ya pɔl, yaga na be kwon lashe pyɛ cak wɛt.” 13 Ba tulsa cɛ̂k pyɛ́ mo, ko ba sila sháp kuru na yɛ bya (12 ) na cɛ̂k pyɛ́ de ya pɔl yi e bagat kpam-tuk batungun de bemat o ba re. 14 Jeng de bemat ba di pyɛ bes yane de Yɛsu a ra, ba hwo ye, “Mwin, mwat womo a sé zarap Dagwi de Mose à kana ha e ra yɛ wɔgɔ, ê vey e jey.” 15 Ko Yɛsu a pere tɔk, bemat vane ba sé simo na be vey jut ɛ, na be tɛ̀ a yɛ negwɔm na retek. Yaga ano, a to toyo vɔk e raku, yɛ nju mɛ.
Yɛsu a kyè e ra tɛ̂t nshi
16 Jeng de nawiri na vey, bemât masâ fwôm Yɛsu ba gyirik vɔk e hagât gworep o. 17 Ba yel e ji dwa-nshi, ko ba hwo ye dɔ vɔk e Kafarnahum. Kwɔn o ha tɛ́ ɛ mwangalang, ko Yɛsu a rɔngɔl nà vey na yɛn. 18 Nshi mo na hwo lolong, yaga gwogul gwa pɛsɛl nɛ ding-ding. 19 Jeng de ba gangas dwa-nshi mo sede lyōsho tyungun kɛ tyiimin, ba di Yɛsu a sé kyè e ra tɛ̂t nshi, a vey bagat na dwa mɛn o. Yaga ano, bengyip ba vo ɛn, 20 ko Yɛsu a yang ɛn, “A sé e me. Yin wok bengyip wɛt!” 21 Jeng de a hanat ano, ba hwo sey ɛ na yey pyɛng e ji dwa-nshi mo, ko remo-remo, ba pere wul vwâ gworep o e kwɔn de ba sé kyè vɔk ɛ̀.
Bemat ba jāma Yɛsu
22 Tuk het, regyɛng bemat de bá kana nàra e gurâ gworep o ba hwo bare, bá kana vɔk dwa-nshi gwining zɔng e hwomo. Ba to tɔk, bemât masâ fwôm Yɛsu ba ga kyè e ji wɛ nju mɛn zɔng, ko Yɛsu a kyè na yɛn wɛt. 23 Bedwa-nshi behak de bá vey yi e repomô Tiberiyas ba vey e vwâ gworep bagat na kwɔn de bemat bá kana re ɛ̀ kpam-tuk de Darwey Yɛsu á kana feng a Dagwi yaga wɛ. 24 Yaga ano, jeng de regyɛng bemat o ba di, Yɛsu tanga bemât masâ fwom mɛ ba sé e hwomo wɛt, ba yel e ji bedwa mo, ko ba kyè vɔk e Kafarnahum na be bin jāma hɛ.
Yɛsu a sé kpam-tuk de wo nɔngɔ̂s bemat neken
25 Jeng de bemat o ba sɛ̀ Yɛsu e gurâ gworep, ba yang ɛ, “À Mwat Basa, e yɛ̌ jeng de hwá vey e ngamo arɛt?” 26 Yɛsu a yang ɛn, “Tsak o mwin me ha a yin: Yin a sé jāma me, yaga yin á re kpam-tuk, yin á siris; ko yin a sé jāma me wɛt, yaga yin a di pyɛ̂ bes de ma ra. 27 Yin kwon sè bûm jāma pyɛ̂ re yemo de ye lashe hɛ dey-dey, ko sè in e de bûm jāma pyɛ̂ re de ye nɔngɔ̂s bemat neken gbak-gbak e negya. E pyɛ̂ re yemo mo de Me de ma tɛ́ me mwat ma rɔda nɔng in yɛ̄, yaga Dagwi Da hom a dura, yɛ a simo pyɛ de me ra.” 28 Ba hwo rangal hɛ, “E vɛ̌ tomong de wot a rɔda ra vemo de Dagwi e simo na wot a ra arɛt?” 29 Yɛsu a toyo a yɛn, a ye, “Fwom gwomo de Dagwi e simo na yin a ra, gwɛ à: Yin tɛ̀ gap min e ra me de a tomo me.” 30 Ba yang ɛ, “E yɛ̌ pyɛ bes de hwà rɔda ra, na wot a di na bayis mot, na wot a to sey tsak o na há mō arɛt? Hwà rɔda ra sɛ́ arɛt? 31 E ji kwɛngɛl mɛn e hey, bedabeda mot bà kana re pyɛ́ de be tâng yɛ, à mana, sede remo de bà jɛk e Bwok-basa Dagwi wɔgɔ, ‘À nɔng ɛn kpam-tuk yi e lagwi na be re.’ ” 32 Ko Yɛsu a yang ɛn, “Tsak o mwin me ha a yin: Kpam-tuk de Mose à kana nɔng in wà sè kpam-tuk yi e lagwi wɛt. A sé e Da hom wɛ de e nɔngɔs hin tsak kpam-tuk de wo yi e lagwi. 33 Kpam-tuk de Dagwi e nɔngɔs, e wɛ à mwat de e gyiris yi e lagwi, ko e nɔngɔ̂s bemât jey neken.” 34 Ba yang ɛ, “À Da, nɔngɔs hot yerê kpam-tuk womo mo kayɛ jeng.” 35 Yɛsu a yang ɛn, “E me de ma sé kpam-tuk de wo nɔngɔ̂s bemat neken. Kawɛ mwat de ê vey na me ê sang wok vyong wɛt; ko kawɛ mwat de a tɛ̀ gap mɛ e ra me ê sang wok yêy hwɔshɔ arɔng wɛt. 36 Ko a sé tyɛng na pyɛ de ma kana ha a yin wɔgɔ, mwa ano de yin a ga di me na bayis, ko yin a sey tsak o na há hom wɛt. 37 Mwa mwat de Da hom e nɔng me ê vey na me. Kawɛ mwat de ê vey na me, mê sang kyɛ́ me hɛ wɛt. 38 Yaga ma gyirik yi e lagwi, na me ba ra pyɛ de Dagwi, de a tomo me, a simo na me ra. Ko ma gyirik wɛt, na me ba ra pyɛ de me pyɛ hom me simo. 39 Pyɛ de yɛ womo de a tomo me e simo a yet ngan: Me kwon vuru gwining e ji mwa vemo de a nɔng me wɛt, ko na me ba sene hɛn na neken e tuk talâ jey. 40 Yaga pyɛ de Da hom e simo a yet ngan: Kawɛ mwat de e di Hwey Dagwi, ko a to tɛ̀ gap mɛ e ra hɛ a rɔda ba sɛ̀ neken gbak-gbak. Ko e tuk talâ jey mê ba sene hɛ na neken.” 41 Bemat ba hwo gwɔrɔng e ra yɛ, yaga a ye, “Ma sé kpam-tuk de wa yi e lagwi.” 42 Ba ye, “Mwat womo a sé Yɛsu, hwêy Yɔsɛf wɛt a? Wot a tɔk da mɛ na neng mɛ wɛt arɛt? Yi e rɛ̌ de a ye a remo, a gyirik yi e lagwi arɛt?” 43 Yɛsu a yang ɛn, “Tik in gwɔrɔng na bemin! 44 Vit a mwat de e tɔk vey na me, sɛ̌ Da hom, de a tomo me, a vey na yɛ. Ko mê ba sene hɛ na neken tuk talâ jey. 45 A raane, bezarap Dagwi bà kana jɛk wɔgɔ, ‘A sé e Dagwi de ê basa a yɛn pyɛ̂ mwa.’ Kawɛ mwat de e wok basâ Da hom, na a to wet betong na hɛ, ê vey na me. 46 Vit a mwat de a ga di Da hom; me de ma vey yi na Dagwi, a sé e me nju hom zɔng de ma ga di Da hom. 47 Tsak o mwin me ha a yin: Kawɛ mwat de a tɛ̀ gap mɛ e ra me a ga sɛ̀ neken gbak-gbak. 48 E me de ma sé kpam-tuk de wo nɔngɔ̂s bemat neken. 49 Mwa ano de bedabeda min bà kana re mana e ji kwɛngɛl mɛn e hey, ko yɛn a kushu. 50 Ko e rà kpam-tuk de wo yi e lagwi kene — kawɛ mwat de e re wɛ a rɔda ku wɛt. 51 Ma sé kpam-tuk de wo nɔngɔ̂s bemat neken de wa yi e lagwi. Kawɛ mwat de e re kpam-tuk o a rɔda vɔk neken gbak-gbak. Kpam-tuk o, wɛ à rebek hom de mê nɔ̂ng bemât jey, yaga na be bin sɛ̀ neken.” 52 Yaga há mo de Yɛsu a ha, bemat ba hwo ra cuna ding-ding na bemɛn, ba tē, “Yi e rɛ̌ de mwat womo e tɔk nɔng ot rebek mɛ na wot a re arɛt?” 53 Yɛsu a yang ɛn, “Tsak o mwin me ha a yin: Ka sede yin e re rebêk Me de ma tɛ́ me mwat wɛt, na yin e to sɔ nemi hom arɔng wɛt, ko yin a vɔk tsak neken wɛt. 54 Ko kawɛ mwat de e re rebek hom, na e sɔ nemi hom, e yɛ wɛ de a vɔk neken gbak-gbak, ko mê ba sene hɛ na neken tuk talâ jey. 55 Yaga rebek hom ra sé tsak pyɛ̂ re, ko nemi hom arɔng na to sé tsak pyɛ̂ sɔ. 56 Kawɛ mwat de e re rebek hom na a sɔ nemi hom a sé sangal e ji nesa na me, ko me ma sé sangal e ji nesa na yɛ. 57 Da hom de e nɔngɔ̂s bemat neken a tomo me, ko a tɛ̀ me vɔk neken. Ano arɔng, ka sede mwat e re rebek hom, mê tɛ̀ ɛ a vɔk neken. 58 A sé e rebek hom kwong de ra sé tsak kpam-tuk de wa yi e lagwi. Wa sé sede pyɛ̂ re de bedabeda min bà kana re wɛt, yaga pyɛ́ yane mo yà tɔk ro ɛn nà kushu wɛt. Ko kawɛ mwat de e re kpam-tuk de mê nɔng ɛ a rɔda vɔk neken gbak-gbak.” 59 Yɛsu a ha há hemo e jeng de a sé basa a bemat e duk re fongol e Kafarnahum.
Neha Yɛsu de ne nɔngɔ̂s bemat neken gbak-gbak
60 Jeng de bemat de ba raa Yɛsu ba wok há hane, pyak e ji mɛn ba ye, “Há hemo ha sé gbang! E wɛ̌ mwat de ê tɔk sey hɛ arɛt?” 61 Yɛsu a tɔk e yey mɛ, ba sé gwɔrɔng e ra há de a ha. Yaga ano, a yang ɛn, “Há hemo hê tɛ̀ yin a tɛ́ in gbɛrɛk arɛt? 62 Ko sɛ̌ yin ê ye ala, ka sede yin ê ba di Me de ma tɛ́ me mwat mê ba tút vɔk e kwɔn de ma kana yi ɛ̀ arɛt? 63 A sé e Gabik Dagwi de he nɔngɔ̂s bemat neken; bemasi pyɛ vɛ be tɔk ra ano wɛt. A sé yi na neha hom de ma ga ha a yin de yin ê sɛ̀ Gabik o tanga neken. 64 Ko behak ba sé e ji min de ba tɛ̀ gap mɛn e ra me wɛt.” Yaga yimo susu mo, Yɛsu á kana tɔk vane de ba sé kyè wɔ̀ tɛ̀ gap mɛn e ra yɛ wɛt, á to tɔk mwat de a sé kyè wɔ̀ row ɛ arɔng. 65 Ko a to ye, “Pyɛ ma yane de ya tɛ̀, ma kana ha a yin, vit a mwat de ê tɔk vey na me, sɛ̌ Da hom a wunta a yɛ gwong o.” 66 Yi e jeng yane, pyak e ji bemat de bá kana raa Yɛsu ba to ɛn na bama, ba to raa hɛ wɛt. 67 Ano kwong, Yɛsu a rangâl bemât masâ fwom mɛ kuru na vɛ beba, a ye, “Ko yin ɛ̀, yin a sé simo na yin a kyè arɔng arɛt?” 68 Simɔn Bitrus a toyo a yɛ, a ye, “À Darwey, wot ê kyè vɔk na wà arɛt? E neha mō de ne nɔngɔs neken gbak-gbak. 69 Wot a ga sey tsak o, ko wot a tɔk, hwo wɛ de hwà sé mwât Dagwi de yɛ a tomo hɛ.” 70 Yɛsu a yang ɛn, “A sé e me de ma kasa hin, yin bemat kuru na vɛ beba wɛt arɛt? Mwa ano, gwining e ji min a sé gwɔ̀m cēng hwak!” 71 Á sè ha e ra Yuda, hwêy Simɔn Iskaryot. Mwa ano de Yuda mo a sé gwining e ji bemât masâ fwôm Yɛsu kuru na vɛ beba, ko e yɛ de e ba row ɛ e yɛnɛ mo.
Yɛsu tanga begwa mɛ
1 E bamâ pyɛ́ yemo, Yɛsu a kyě kyè e sevwêl Galili. A simo na a wɔ́ e sevwêl Yudiya wɛt, yaga bemât nuyêl BeYuda e hwomo ba jāma na be mɔrɔ hɛ. 2 E jeng o, nzem BeYuda de be tâng nɛ, à Nzem Buk ná kana vey bagat. 3 Yaga ano, begwa Yɛsu ba yang ɛ, “Sogo yi e ngamo, na hwo kyè vɔk e Yudiya, yaga na bemât raa mō e hwomo be bin di pyɛ̂ bes de hwó ra. 4 Vit a mwat de e ra pyɛ́ e lɛrɛ, ka sede e simo bemat be tɔk ɛ. Sede remo de hwà sé ra pyɛ́ yemo, ko rá yɛ̄ wɛshɛrɛk, yaga na jêy mwa ye tɔk pyɛ́ mo e ra hwo!” 5 Ko begwa mɛ ba ka tɛ̀ gap mɛn e ra yɛ wɛt. 6 Yɛsu a yang ɛn, “Jeng de ma rɔda kyè ya rɔngɔl e ngyen; ko yin à — kayɛ jeng ya sé a yin ryat. 7 Bemât jey bê tɔk sɛ̀ pyɛ wɛt de yê tɛ̀ be kyɛ́ ɛn hin; ko me à — ba kyɛ́ ɛn me, yaga me dopse ha a yɛn, tomong mɛn ba sé ves. 8 Kyè in à yin vɔk e dem nzem o. Mê wɔ̂ nzem o wɛt, yaga jeng hom ya rɔngɔl e ngyen.” 9 A ha ano, ko a nàra e Galili.
Yɛsu a wɔ̂ Nzem Buk
10 E bama de begwa mɛ ba ga kyè wɔ̂ nzem o, Yɛsu a kyè wɔ e hwomo arɔng. A kyè gbey-gbey wɛt, ko a kyě lɛsɛ hɛ, yaga na bemat be bin tɔk ɛ wɛt. 11 Bemât nuyêl BeYuda bá sè jāma hɛ e dem nzem o, ko bá sè kyě rangsâl bemat, “A wɛ̌ arɛt?” 12 E ji regyɛng bemat o, bemat behak pyak bá sè ha show-show e ra yɛ; behak ba tē, “A sé mwat rwat”, ko behak ba tē, “Wey, a sé tɛ̀sɛ bemat e gwong vwes.” 13 Ko vit a mwat de a simo na a ha pyɛ cak wɛshɛrɛk e ra yɛ, yaga ba wok bengyip bemât nuyel mɛn. 14 Jeng de ba ga gas nzem o e tē, Yɛsu a yel e lalâ Gbɔng Duk Re Fongol, a hwo basa a bemat. 15 Bemât nuyêl BeYuda ba langat hɛn bása mɛ, ba tē, “Mwat womo á kana sè e nɛ̂n mwât basa hwak wɛt! Yi e rɛ̌ de a vɔk tɔ́k ano arɛt?” 16 Yɛsu a yang ɛn, “Pyɛ́ de me basa ya yi e bare hom wɛt, ko ya yi na Dagwi de a tomo me. 17 Kawɛ mwat de e simo a ra pyɛ de Dagwi e simo ê tɔk kɛ pyɛ de me basa ya yi na Dagwi, kɛ ma sé ha há de ha yi na reto hom zɔng. 18 Mwat de e ha há de ha yi na reto mɛ e dura, e simo nerey yaga tó mɛ zɔng. Ko mwat de e simo na be nɔ̂ng mwat de a tomo hɛ nerey yɛ a sé ha tsak o, a sé kwɛlɛng bemat ko tyɔng wɛt. 19 A sé e Mose de à kana nɔng in Badu wɛt arɛt? Ko vit a hwak e ji min de e gyeng Badu mo. Yaga sɛ́ de yin a sé simo na yin a mɔrɔ me arɛt?” 20 Regyɛng bemat o ba yang ɛ, “Hwó lolong! E wà de e simo a mɔrɔ hwo arɛt?” 21 Yɛsu a yang ɛn, “Ma kana ra pyɛ bes jining e Tuk Shábat, ko mwa hin yin a langat hin. 22 Mose à kana ha a yin na yin a wɔ́ a hwey e cwɛl tuk hê rwit. Yaga ano, yin e tɔk wɔ́ a hwey o e cwɛl e Tuk Shábat mwa arɔng. (Mwin, à kana sè e Mose de à tānga nɔng in redu wɔ́ e cwɛl wɛt, ko à sè bedabeda min de bà hwo ra ano e susu mo.) 23 Sede remo de be tɔk wɔ́ a hwey e cwɛl e Tuk Shábat, yaga na be kwon gyili Badu Mose wɛt, yaga sɛ́ de yin a wok shom na me, yaga ma tɛ̀ mwa rebêk mwat tyang e Tuk Shábat arɛt? 24 Tik in nà ra a bemat shɔt tyɛng na pyɛ́ de yin e bɛrɛng na bayis zɔng, ko rá in yɛ̄ e gwong de gwa sé cik.”
Bemat be ra badu kɛ Yɛsu a sé Mwat de Dagwi a kasa arɛt?
25 Bemât Yɛrusalɛm behak ba ye, “A sé e mwat a womo de ba sé jāma na be mɔrɔ hɛ wɛt arɛt? 26 Ko di in, a sé ha wɛshɛrɛk, ko vit a mwat de a wunta nu na a yang ɛ pyɛ cak. Gyeng rɔ̌ ba ga tɔk, yɛ a sé Mwat de Dagwi a kasa na a sey bemat. 27 Ko wot a tɔk, jeng de Mwat de Dagwi a kasa ê vey, vit a mwat de ê tɔk kwɔn de a yi ɛ̀. Ko mwat womo à, wot a tɔk kwɔn de a yi ɛ̀.” 28 Jeng de Yɛsu a sé basa a bemat e lalâ Gbɔng Duk Re Fongol, a gbɔ, a ye, “Yin a sé tē, yin a tɔk me, ko yin a to tɔk kwɔn de ma yi ɛ̀. Ko ma vey na reto hom pyɛ hom wɛt. Yɛ de a tomo me — be tó yey na yɛ ko tyɔng wɛt. Yin a tɔk ɛ wɛt, 29 ko me ma tɔk ɛ, yaga ma vey yi na yɛ, a to sé e yɛ de a tomo me.” 30 Yaga ano, ba hwo jāma begwong na be vo ɛ. Ko vit a mwat de a ra ɛ, yaga jeng mɛ ya rɔngɔl e ngyen. 31 Pyak e ji regyɛng bemat o ba hwo tɛ̀ gap mɛn e ra yɛ, ba ye, “Jeng de Mwat de Dagwi a kasa na a sey bemat ê vey, ê ra pyɛ̂ bes de ya dal yê mwat womo arɛt?”
Bemât nuyêl BeYuda ba tomo be vo Yɛsu
32 BeFarisi ba wok pyɛ́ de regyɛng bemat ba ha show-show e ra Yɛsu. Yaga ano, ba wuna bato mɛn na begbɔng bepiris, ko ba tomo bemât gyeng Gbɔng Duk Re Fongol na be wɔ̀ vo ɛ. 33 Yɛsu a ye, “Ma rɔngɔl tyɔng na yin e ngyen, sɛ̌ jeng ya vey na me kyè vɔk na womo de a tomo me. 34 Yin ê jāma me, ko yin ê sɛ̀ me wɛt; yaga yin ê tɔk wɔ̀ wul kwɔn de mê sè ɛ̀ wɛt.” 35 Bemât nuyêl BeYuda mo ba hwo yâng bemɛn, “Mwat womo a sé kyè vɔk e gwa de a ye, wot ê sɛ̀ ɛ wɛt arɛt? A sé kyè wɔ na bemat mot de ba shara hɛn e sevwêl BeGirik, na a to basa a BeGirik o arɛt? 36 E hɛ̌ há a hane de a ha wɔgɔ, wot ê jāma hɛ, ko wot ê sɛ̀ ɛ wɛt, ko wot ê tɔk wul kwɔn de ê sè ɛ̀ wɛt arɛt?”
Nshi de ne nɔngɔ̂s bemat neken
37 E tûk talâ nzem o de ha dal mwa na nerey, Yɛsu a sogo, ko a gbɔ, a ye, “Kawɛ mwat de e wok yêy hwɔshɔ, tik na a vey na me na a sɔ. 38 Sede remo de bà jɛk e Bwok-basa Dagwi wɔgɔ, ‘Lèl nshi de ne nɔngɔs neken na rɔda nunus yi e yêy kawɛ mwat de a tɛ̀ gap mɛ e ra me!’ ” 39 Yɛsu a ha há hemo e ra Gabik Dagwi de mwa vemo de ba tɛ̀ gap mɛn e ra yɛ ba rɔda sɛ̀. E jeng o, Dagwi a rɔngɔl nà nɔng Gabik o, yaga ba rɔngɔl na nɔ̂ng Yɛsu gbɔng nerey mɛ na Dagwi e ngyen.
Bemat ba gas ɛn yaga Yɛsu
40 Jeng de ba wok há hemo, behak e ji regyɛng bemat ba ye, “Mwin, mwat womo a sé zarap Dagwi de wot a sé gyeng ɛ!” 41 Bemat behak ba ye, “Yɛ a sé Mwat de Dagwi a kasa na a sey bemat!” Ko behak ba ye, “Mwat de Dagwi a kasa a rɔda yi e Galili wɛt! 42 Bà jɛk e Bwok-basa Dagwi wɔgɔ, Mwat de Dagwi a kasa na a sey bemat a rɔda vey yi e yerê Gbɔng Gwɔ̀m Davit yi e Bet-Lɛhɛm, kerepomo de Davit à kana sè ɛ̀.” 43 Yaga ano, bemat ba gas ɛn yaga Yɛsu. 44 Behak e ji mɛn ba simo be vo ɛ, ko vit a mwat de a ra ɛ.
Bemât nuyêl BeYuda ba kyɛ́ ɛn nà tɛ̀ gap mɛn e ra Yɛsu
45 Bemât gyeng Gbɔng Duk Re Fongol ba to ɛn vɔk na begbɔng bepiris tanga BeFarisi. Yɛn a yang ɛn, “Yaga sɛ́ de yin a vey na yɛ wɛt arɛt?” 46 Bemât gyeng o ba yang ɛn, “Vit a mwat de a sang ha há na reto sede mwat womo!” 47 BeFarisi mo ba yang ɛn, “Hàa! Yin arɔng, a ga kwɛlɛng hin arɛt? 48 Mwat hwak a sɛ́ e ji bemakuk kɛ e ji mot BeFarisi de a ga tɛ̀ gap mɛ e ra yɛ arɛt? 49 A sé e regyɛng bemat zɔng de be ra ano, vemo de ba tɔk Badu Mose wɛt; Dagwi a rɔda wey na yɛn!” 50 Gwining e ji BeFarisi mo, yɛ à Nikodemus de á kana wɔ́ na Yɛsu nabwalak a yang ɛn, 51 “E rà Badu mot, wot ê tɔk gang mwat na shɔt sana wok há mɛ wɛt, yaga na wot a tɔk pyɛ de a ra e ngyen.” 52 Ba yang ɛ, “Hwà sé mwât Galili arɔng a? Bàsa Bwok-basa Dagwi, ko hwô di, vit a zarap Dagwi hwak de e kyè vey yi e Galili.” 53 E bama mo, kawɛ mwat a kyè vɔk e lɔ mɛ,
Ba vo hwā e de râ nejwang
1 Ko Yɛsu a kyè vɔk e Raku Pàt. 2 Tuk het bop nagasi, a to wɔ̀ yel e lalâ Gbɔng Duk Re Fongol. Bemât mwa ba tula hɛn na yɛ, ko a sangal, a hwo basa a yɛn kwong. 3 Bemât basâ Badu tanga BeFarisi ba wɔ́ e kwɔn o. Yɛn a vey na hwā hwak de ba vo e de râ nejwang, ko yɛn a tɛ̀ ɛ a tumal e nuyel mɛn mwa. 4 Ba yâng Yɛsu, “À Mwat Basa, ba vo hwā womo e de râ nejwang. 5 E ji Badu mot, Mose à nɔng redu, be tó yerê hwā womo na beta na be mɔrɔ hɛ. Ko hwo hwà ye ala arɛt?” 6 Ba ha ano, yaga na be tɛ̀ a Yɛsu segun na be di pyɛ de ê ha. Yɛn a simo be sɛ̀ pyɛ tɛ̂ sekun mɛ. Ko Yɛsu a hwo ye ngyuk, a jɛk pyɛ cak e vwel na kwɛn vwɔ mɛ. 7 Sede yɛn a gwɛ̌ rangal hɛ há mo, ko a sǎ cik, a yang ɛn, “Ka sede hwak a sé e ji min de a ga sang ra renɛn wɛt, ko tik na a tānga toro hɛ na gwofwa.” 8 Ano, a to ye ngyuk, a jɛk pyɛ e vwel. 9 Jeng de yɛn a wok há hemo, yɛn a hwo nunus hɛn vivining yi e bekunat vɔk e vê yɛnɛ mɛn. A tɛt ɛ Yɛsu nju mɛ tanga hwā mo de a rɔngɔl e tumal. 10 Yɛsu a hwo to sǎ cik, ko a yang ɛ, “À neng-gwɔ, yɛn a sé e gwa arɛt? Vit a hwak de a pɔl ɛ̀ na a gang o na shɔt arɛt?” 11 Hwā mo a yang ɛ, “À Da, vit a hwak.” Yɛsu a yang ɛ, “Me arɔng ma gang o na shɔt wɛt. Kyè! Ko hwo to gwɛ̌ ra renɛn wɛt.”
Yɛsu a sé negbêy bemât jey
12 Yɛsu a to hwo ha na bemat o, a ye, “E me de ma sé negbêy bemât jey. Kawɛ mwat de e raa me ê sang kyè e ji lwīl wɛt, ko a rɔda vɔk negbey de ne nɔngɔs neken.” 13 BeFarisi ba yang ɛ, “Di, a remo hwà sé nɔng nuha e ra tó mo pyɛ mo. Nuha mō mo ha sé tsak o wɛt.” 14 Ko Yɛsu a yang ɛn, “Mwa ano de ma sé nɔng nuha e ra tó hom, ko pyɛ de me ha ya sé tsak o. Yaga ma tɔk kwɔn de ma yi ɛ̀ na kwɔn de ma sé kyè vɔk ɛ̀. Ko yin, yin a tɔk kwɔn de ma yi ɛ̀ kɛ kwɔn de ma sé kyè vɔk ɛ̀ wɛt. 15 Yin e ra a bemat shɔt tyɛng na negwɔn bemasi; me, me ra a mwat hwak shɔt wɛt. 16 Ko ka sede me yâng ra a bemat shɔt, râ shɔt hom o ha sé tsak o, yaga a sé e me nju hom zɔng de ma sé ra shɔt o wɛt. Da hom de a tomo me a sé tanga me e de râ shɔt o. 17 E Bwok-basa Badu min bà jɛk wɔgɔ, ka sede bemat beba ba nɔng nuha hining o e ra pyɛ cak, ko hemo he dura, pyɛ mo ya sé tsak o. 18 Me ma sé nɔng nuha e ra tó hom, ko Da hom de a tomo me, yɛ a sé nɔng nuha e ra me arɔng.” 19 Ba rangal hɛ, ba ye, “Da mō mo a sé e gwa arɛt?” Yɛsu a toyo a yɛn, a ye, “Yin a tɔk me wɛt, ko yin a to tɔk Da hom arɔng wɛt. Ka yin a yâng tɔk me, ka yin a yâng to tɔk Da hom arɔng.” 20 Yɛsu a ha pyɛ́ yemo e jeng de a basa a bemat e lalâ Gbɔng Duk Re Fongol. Á sè bagat na nekwɔn tɛ́sɛ dyām. Ko vit a mwat de a vo ɛ, yaga jeng mɛ ya rɔngɔl e ngyen.
Yɛsu a ha e ra lɔ mɛ e lagwi
21 Yɛsu a to gwɛ̌ ha na bemat o, a ye, “Ma sé kyè wɔ̀ kyè. Yin a rɔda jāma me, ko yin a rɔda kushu na banɛn min mwa. Yin ê tɔk wɔ e kwɔn de ma sé kyè vɔk ɛ̀ wɛt.” 22 Bemât nuyêl BeYuda ba ye, “Yaga sɛ́ de a ye, wot ê tɔk wɔ e kwɔn de a sé kyè vɔk ɛ̀ wɛt arɛt? A sé kyè wɔ̀ mɔrɔ tó mɛ arɛt?” 23 Yɛsu a yang ɛn, “Yin a sé vê vwel, ko me ma sé yi e rak o. Yin a sé vê jey yemo, ko me ma sé wo jey yemo wɛt. 24 Pyɛ ma yane de ya tɛ̀, ma ha a yin, yin a rɔda kushu na banɛn min mwa. Ko ka sede yin a sey tsak o wɛt wɔgɔ, ma sé womo de me tē ma sé yɛ, ko mwin, yin a rɔda kushu na banɛn min.” 25 Ba rangal hɛ, “Ko sɛ̌ hwà sé wà arɛt?” Yɛsu a yang ɛn, “Ma sé mwat de ma ga ha a yin, ma sé yɛ. Ma ga kana ha a yin ano yimo e susu mo. 26 Pyɛ́ ya sé pyak de mê ha e ra yin, de mê gang in mɛ̀ na shɔt arɔng. Ko yɛ de a tomo me a sé ha tsak o, ko ma sé ha a bemât jey pyɛ́ de ma wok yi na yɛ.” 27 Yɛn a tɔk wɛt wɔgɔ, Yɛsu a sé ha a yɛn e ra Da mɛ e lagwi. 28 Yaga ano, a yang ɛn, “Jeng de yin a nára Me de ma tɛ́ me mwat e rak o, yin a rɔda tɔk, ma sé womo de me tē ma sé yɛ. E jeng o, yin ê to tɔk, me ra pyɛ cak na reto hom wɛt, ko ma sé ha há de Da hom a dura a me hɛ zɔng. 29 Yɛ de a tomo me a sé tanga me; a ga tik me nju hom wɛt, yaga kayɛ jeng me dopse ragas pyɛ́ de ye pɛngɛ a yɛ yey.” 30 Bemat pyak de ba wok há de Yɛsu a ha ba tɛ̀ gap mɛn e ra yɛ.
Bemât washak na besam
31 Yɛsu a yâng vemo de ba ga kana tɛ̀ gap mɛn e ra yɛ, “Ka sede yin e nàra e de gyeng há hom, ko yin a sé bemât masâ fwom hom vê mwin. 32 Yin a rɔda tɔk tsak o, ko tsak o mo wô tɛ̀ in yin a sè washak.” 33 Yɛn a toyo a yɛ, ba ye, “Wot a sé yerê Abraham, ko wot a ga sang sè sam mwat hwak wɛt. Yi e rɛ̌ de hwà ye, ba rɔda hàla hot washak arɛt?” 34 Ko Yɛsu a yang ɛn, “Tsak o mwin me ha a yin: Kawɛ mwat de e ra banɛn a sé sam banɛn. 35 Di, sam a sé wo lɔ de a sé ɛ̀ ting-ting wɛt. Ko hwêy lɔ ha sé hê lɔ mo gbak-gbak. 36 Ka sede a sé e Hwey Dagwi de ha tɛ̀ in washak, ko yin a rɔda sè washak mwin. 37 Ma tɔk, yin a sé yerê Abraham. Ko mwa ano, yin a jāma na yin a mɔrɔ me, yaga yin a tik na há hom he yel e ji neyey min wɛt. 38 Me ma sé ha a yin pyɛ́ de ma ga di na Da hom. Ko yin, yin e ra pyɛ́ de yin a ga wok yi na da min.” 39 Yɛn a toyo a yɛ, yɛn a yang ɛ, “Abraham a sé da mot.” Yɛsu a yang ɛn, “Ka yin a yâng sé nèy Abraham ne mwin, ka yin a yâng ra yerê tomong de Abraham a ra. 40 Ko di, yin e jāma yin a mɔrɔ me, me de ma ga ha a yin tsak há hemo de ma wok yi na Dagwi. Ko Abraham à ra yerê pyɛ yemo wɛt. 41 Yin a sé ra tomong de da min e ra.” Yɛn a yang ɛ, “Wot a sé nèy de ba tɔs e nejwang wɛt, nemo de na vɔk da wɛt. Wot a vɔk Da gwining zɔng, e yɛ à Dagwi pyɛ mɛ.” 42 Yɛsu a yang ɛn, “Ka sede Dagwi a yâng sé Da min mwin, ka yin a yâng tɛ̀ yey na me, yaga ma yi na Dagwi, ko a remo, ma sé e ngamo. Ma vey na reto hom wɛt, ko a sé e yɛ de a tomo me. 43 Yaga sɛ́ de yin a tɔk cap-hâ neha hom wɛt arɛt? A sé yaga yin ê kyɛm yin a wet betong na pyɛ de me ha wɛt. 44 Yin a sé vê da min, yɛ gwɔ̀m cēng, ko yin e simo na yin a ra pyɛ́ de da min o e wokos cwey yɛ̄. Yimo e susu mo, yɛ̀ a sé mwât mɔbɔs bemat. Pyɛ mɛ ya sé na tsak há ko tyɔng wɛt, yaga vit a pyɛ de ya sé tsak o e ji mɛ. Jeng de e vɛ́ bɔs, e ha há de a ga tɔ́k ɛ na hɛ, yaga yɛ a sé mwât bɔs, ko bɔ̂s mwa ha yi na yɛ arɔng. 45 Ko me, me ha a yin tsak há; yaga ano, yin e sey tsak o na há hom wɛt! 46 Hwak e ji min a sɛ́ de e tɔk dura tsɛng-tsɛng, ma ra renɛn rehak arɛt? Ka sede ma sé ha tsak há, ko yaga sɛ́ de yin a sey tsak o na há hom o wɛt arɛt? 47 Mwat de a sé wo Dagwi e wokos neha de Dagwi e ha. Pyɛ de ya tɛ̀, yin e wet betong na me wɛt, ya sé yaga yin a sé vê Dagwi wɛt.”
Yɛsu à sè gyam tɔ̂ Abraham
48 Bemat de bá sè wokos hɛ ba yâng Yɛsu, “Wot a ha tyɛng jeng de wot a ye, hwà sé mwât Samariya, ko hwà vɔk ceng wɛt a?” 49 Yɛsu a toyo a yɛn, a yang ɛn, “Ma vɔk ceng wɛt. Me nɔ̂ng Da hom nerey, ko yin, yin e byɛs me. 50 Ma sé jāma nerey yaga tó hom wɛt. Mwat hwak a sɛ́ de e jāma na be nɔng me nerey, e yɛ à mwât shɔt. 51 Tsak o mwin me ha a yin: Ka sede mwat e gyenges há hom, ko ê ku wɛt gbak-gbak.” 52 Sede bemat o ba wok ano, yɛn a ye, “A remo, wot a tɔk, hwà vɔk ceng! Abraham à kana ku, ko mwa bezarap Dagwi bà kushu arɔng. Ko mwa ano, hwà ye, ka sede mwat e gyenges há mō, ko ê ku wɛt gbak-gbak. 53 Ko sɛ̌ hwà dal da mot Abraham arɛt? Yɛ à ku, ko mwa bezarap Dagwi bà kushu arɔng. Hwó bare, hwà sé wà arɛt?” 54 Yɛsu a toyo a yɛn, “Ka sede ma yâng nɔ̂ng tó hom nerey, ka nerey hom o na yâng sé pyɛ cak wɛt. Da hom, yɛ de yin e tē, a sé Dagwi min, e yɛ wɛ de e nɔngɔs me nerey. 55 Yin a tɔk mwat de yɛ a sé wɛt, ko me ma tɔk mwat de yɛ a sé. Ka sede ma ye, ma tɔk ɛ wɛt, ka ma yâng sé mwât bɔs sede yin. Ko me ma tɔk ɛ, me gyenges há mɛ arɔng. 56 Da min Abraham à kana vɔk yey pyɛng jeng de à wok wɔgɔ, a rɔda di tûk vey hom. À di hɛ, ko yey mɛ yà pɛngɛ.” 57 Bemat o ba yang ɛ, “Kée kaà! Neshey mō na ga ka wul kuru batungun (50 ) mwa wɛt, ko hwà ga di Abraham arɛt?” 58 Yɛsu a toyo a yɛn, a yang ɛn, “Tsak o mwin me ha a yin: Gyam na be tɔ̀ Abraham, me mà sè!” 59 Sede yɛn a wok ano, yɛn a tɔng beta, na be to ɛ mɛ̀ na be mɔrɔ hɛ. Ko Yɛsu a lɛrɛ hɛ, a kyè yi e Gbɔng Duk Re Fongol o.
Yɛsu a tɛ̀ mwat de ba tɔ̀ ɛ bwók tyang
1 Tuhak, Yɛsu á sè kwey, a di mwat de a sé bwók yimo tɔ́ mɛ. 2 Bemât masâ fwom mɛ ba rangal hɛ, ba ye, “À Mwat Basa, e wà de a ra banɛn de ba tɛ̀ ba tɔ mwat womo bwók arɛt? A sé e mwat o kɛ a sé e da na neng mɛ arɛt?” 3 Yɛsu a toyo a yɛn, a ye, “A sé e banɛn de yɛ pyɛ mɛ kɛ beda mɛ ba ra de ba tɛ̀ mwat o bwók wɛt. Ko yɛ a sé bwók, yaga na be bin di gbɔng fwom de Dagwi ê ra na yɛ. 4 Sede remo de jey ya rɔngɔl gbey, a sé gbing-gbing na wot a ra tom yɛ womo de a tomo me. Nabwalak na sé kyè vey, ko vit a mwat de ê tɔk ra fwom. 5 E jeng de ma sé e ngamo e jey, ma sé negbêy jey.” 6 Bama de a ha ano, a tulus netey e vwel, a luk mɛ̀ sebwos na netey o, ko a tɛ̀ sɛ e bayîs mwat o. 7 A yang ɛ, “Ci wɔ̀ kus bayis mō e didêng Silowam.” — Cap-hâ reza mo ya sé, “Mwat de ba tomo hɛ.” — Ano kwong, mwat o a wɔ́, a kus bayis o, ko a vɛ̄ hɛ e lɔ e bɛrɛng jey. 8 Bemât vwara mɛ tanga vemo de bá kana bɛrɛng hɛ e de râ won ba rangâl bemɛn, ba ye, “E yɛ ma womo de a dopse sangsal, na a ra won wɛt arɛt?” 9 Behak ba ye, “A sé e yɛ.” Ko behak ba ye, “Wey, e yɛ wɛt. Bwang bayis o gwa sé sede mwɛ zɔng.” Ko yɛ pyɛ mɛ a yang ɛn, “E me wɛ à mwat o.” 10 Yɛn a yang ɛ, “Yi e rɛ̌ de hwó tɔk bɛɛ jey a remo arɛt?” 11 A toyo a yɛn, a ye, “Mwat de be tang ɛ, à Yɛsu a yong bwos, ko a tɛ̀ hɛ e bayis hom. A yang me, me kyè wɔ e Silowam na me kus bayis o. Yaga ano, ma wɔ́, ma kus vɛ, ko e bama mo, ma tɔk bɛɛ jey.” 12 Yɛn a rangal hɛ, “Ko sɛ̌ mwat o a sé e gwa arɛt?” A yang ɛn, “Ma tɔk wɛt.”
BeFarisi ba ngyɛgɛt rehâ tɛ́ ɛ tyang
13 Yɛn a kyè na mwat de á kana sè bwók vɔk na BeFarisi. 14 Ko di, á sè Tuk Shábat de Yɛsu a yong sebwos na a wunta mɛ̀ bayîs mwat o. 15 Yaga ano, BeFarisi arɔng ba rangal hɛ gwong de ba tɛ̀ ɛ a bɛrɛng jey. Mwat o a toyo a yɛn, a ye, “A tɛ̀ bwos e bayis hom; ma kus vɛ, ko a remo, me bɛrɛng jey.” 16 Behak e ji BeFarisi mo ba ye, “Mwat de a ra ano a sé yi na Dagwi wɛt, yaga e gyeng badu Tuk Shábat wɛt.” Ko behak mɛn ba ye, “Yi e rɛ̌ de mwât banɛn ê tɔk ra pyɛ̂ bes yerê yemo arɛt?” Yi ano, yɛn a gas ɛn zang ba. 17 E yɛnɛ mo, yɛn a to doyo vɔk na bwók o, ba rangal hɛ, “E sɛ́ de hwo pyɛ mo hwô ha e ra yɛ arɛt? A sé e bayis mō de a wunta vɛ.” Mwat o a yang ɛn, “A sé zarap Dagwi.” 18 Ko bemât nuyêl BeYuda ba kyɛ́ ɛn nà sey tsak o, mwat o á kana sè bwók, ko ba ga de wunta a yɛ bayis. Yaga ano, yɛn a tomo be yila a yɛn da na nêng mwat o. 19 Yɛn a rangal hɛn, “Hwey min à hemo arɛt? E yɛ ma womo de yin a ye, ba tɔ ɛ bwók arɛt? Yi e rɛ̌ kwong de e bɛrɛng jey a remo arɛt?” 20 Da na neng o ba toyo a yɛn, ba ye, “Wot a tɔk, yɛ a sé hwey mot, ko wot a to tɔk, ba tɔ ɛ bwók. 21 Ko pyɛ de ya tɛ̀, a tɔk bɛrɛng jey a remo, kɛ mwat de a wunta bayis mɛ mo, wot a tɔk wɛt. Rangal hin hɛ. A ga vey mwat, a rɔda ha pyɛ mɛ!” 22 Da mɛ na neng mɛ yɛn a ha ano, yaga yɛn a tele hɛn bemât nuyêl BeYuda. Bemat o ba ga kana yong ɛ̀ gyam, kawɛ mwat de a ha wɔgɔ, Yɛsu a sé Mwat de Dagwi a kasa na a sey bemat ba rɔda pat ɛ yi e nesâ bemât duk re fongol. 23 Pyɛ ma yane de ya tɛ̀, da mɛ na neng mɛ yɛn a ye, “A ga vey mwat; rangal hin hɛ.” 24 Ba to yila mwat de á kana sè bwók o yíla hê neba, ba yang ɛ, “Hā tsak o e nuyêl Dagwi! Wot a tɔk mwat wane mo a sé mwât banɛn.” 25 A toyo a yɛn, a yang ɛn, “Kɛ a sé mwât banɛn kɛ a sé mwât banɛn wɛt ayi, ma tɔk wɛt. Ko pyɛ jining de ma tɔk à yet ngan: Ma kana sè bwók, ko a remo, me bɛrɛng jey!” 26 Yɛn a to rangal hɛ, ba ye, “Mwat o a ra a hwo sɛ́ arɛt? A wunta bayis mō mo e rɛ̌ arɛt?” 27 A toyo a yɛn, “Ma ga kana ha a yin, ko yin a wok wɛt. Yaga sɛ́ de yin e simo na yin a to wok arɛt? Yin e simo na yin a tɛ́ in bemât raa mɛ arɔng arɛt?” 28 Ko yɛn a tabas a yɛ nengyas, ba ye, “E hwo de hwà sé mwât raà sa womo mo! Ko wot, wot a sé bemât raà Mose! 29 Wot a tɔk, Dagwi à kana ha na Mose, ko e rà sa womo à — wot a ka tɔk kwɔn de a yi ɛ̀ mwa wɛt.” 30 Mwat o a toyo a yɛn, a ye, “Pyɛ̂ langat a yemo! Yin a tɔk kwɔn de a yi ɛ̀ wɛt, ko a wunta a me bayis! 31 Wot a tɔk, Dagwi e wet betong na bemât banɛn wɛt. Ko e wet betong na bemat de be re a yɛ fongol, vemo de be ra pyɛ́ de yɛ̀ e simo be ra. 32 Yimo yi e jeng de bà yong jey, mwat hwak a ga wok rehâ wuntâ bayîs mwat de ba tɔ ɛ bwók wɛt. 33 Ka sede mwat o a yâng yi na Dagwi wɛt, ka a yâng tɔk ra pyɛ cak wɛt.” 34 Yɛn a toyo a yɛ, “Hwo de hwà sé mwât banɛn yi e jeng tɔ mō, hwó simo na hwo basa a wot arɛt?” Ko yɛn a pat ɛ.
Bemat de ba tē, yɛn a sé bebók wɛt
35 Yɛsu a wok, ba ga pat mwat wane mo. A jāma hɛ, ko jeng de a sɛ̀ ɛ, a yang ɛ, “Hwà tɛ̀ gap mō e ra Yɛ de a tɛ́ ɛ mwat arɛt?” 36 Mwat o a yang ɛ, “À Da, e yɛ à wà arɛt? Hā a me, yaga na me bin tɛ̀ gap hom e ra yɛ.” 37 Yɛsu a yang ɛ, “Hwà ga di ɛ, a sé e yɛ de a sé ha na hwo.” 38 Ko mwat o a yang ɛ, “À Darwey, ma tɛ̀ gap hom e ra hwo!” Ko a gaba e nuyel mɛ, a re a yɛ fongol. 39 Yɛsu a ye, “Ma vey e jey yemo na me gas bemat, yaga na bebók be bɛrɛng jey, ko vemo de be bɛrɛng jey be tɛ́ ɛn bebók.” 40 BeFarisi behak de ba sé tanga yɛ ba wok há hemo, ko yɛn a rangal hɛ, ba yɛ, “Ala? Wot a sé bebók arɔng arɛt?” 41 Yɛsu a yang ɛn, “Ka yin a yâng sé bebók, ka yin a yâng vɔk banɛn wɛt. Ko sede remo de yin e tē, yin e bɛrɛng jey, banɛn min bê nàra na yin.”
Gwɔrɔ-há e ra lwêk vyēl
1 Yɛsu a ye, “Tsak o mwin me ha a yin: Mwat de e yel e kwarâ vyēl yi e rwi mo wɛt, ko e tut e jwa-duk na a yel e ji mo yi e gwong hwak a sé gbik, a to sé womo de e seres pyɛ̂ bemat na retek. 2 Mwat de e yel e rwi kwarâ vyēl, e yɛ̀ de a sé lwek vyēl o. 3 Mwât bɛrɛng rwi mo e wuma a yɛ, ko vyēl o ye wet betong na fwɔ mɛ. E yila vyēl mɛ yê tó mɛ na bazâ yɛ̄, ko e kyè e nuyêl yɛ̄ vɔk e jey. 4 Jeng de a ga pat mwa vyēl mɛ mo e jey, yɛ̀ e kyè e nuyêl yɛ̄, ko vyēl o ye raa hɛ, yaga ya tɔk fwɔ mɛ. 5 Ko yê raa kwɛnɛt wɛt; ya rɔda tele e jey yi na yɛ yaga ya tɔk fwɔ̂ kwɛnɛt wɛt.” 6 Yɛsu a ha gwɔrɔ-há hemo, ko bemat de ba wokos hɛ ba tɔk pyɛ de a sé ha a yɛn wɛt.
Yɛsu a sé lwêk vyēl rwat
7 Yaga ano, Yɛsu a to yang ɛn, “Tsak o mwin me ha a yin: E me de ma sé rwi de vyēl ye kweres ɛ̀. 8 Mwa vemo de bá tānga vey e ra me bá sè begbik, bá to sè vemo de be seres pyɛ̂ bemat na retek, ko vyēl o yá wet betong na fwɔ mɛn wɛt. 9 E me de ma sé rwi mo. Kawɛ mwat de e yel yi na me, ba rɔda sey neken mɛ. A rɔda yel, ko a to nusu, ko a rɔda sɛ̀ pyɛ̂ mwa de e simo yaga neken mɛ. 10 Gbik e vey na a ba shigi zɔng, na a mɔbɔs, na a ba wey na pyɛ́ arɔng. Me ma vey, yaga na vyēl hom ye sɛ̀ neken ne mwin, ko yaga na ye sɛ̀ nɛ shɛrɛk. 11 “E me de ma sé lwêk vyēl rwat. Lwêk vyēl rwat e yong ɛ na a nɔng neken mɛ, na a sɛlɛ mɛ̀ vyēl o. 12 Mwat de be talsa hɛ byɛ̂ fwom mɛ, yɛ a sé lwêk vyēl wɛt, ko vyēl o ya sé myɛ arɔng wɛt. Yaga ano, jeng de yerê mwat o a di bwá wo kyè vey, e hàla vyēl o, ko e tele. E bama mo, bwá mo wo hwo e ra vyel cak, ko wo shara bwang o. 13 Mwat o e tele nedemɛ, yaga yɛ a sé mwât byɛ zɔng, ko pyɛ mɛ ya sé na bɛrɛng vyēl o naka wɛt. 14 E me de ma sé lwêk vyēl rwat. Ma tɔk vyēl hom, ko vyēl hom arɔng ya tɔk me, 15 tyɛng sede remo de Da hom a tɔk me, ko me ma tɔk Da hom arɔng. Ko me yong me na me nɔng neken hom, yaga na me sɛlɛ mɛ̀ vyēl o. 16 Ma vɔk vyēl o cak de ya sé yê kwara vyēl gwomo wɛt. A sé gbing-gbing na me vey na yɛ̄ arɔng. Ya rɔda wet betong na fwɔ hom, ko kwara mo gwa rɔda sè gwining na mwât gyeng o gwining arɔng. 17 “Da hom a tɛ̀ yey na me, yaga ma yong me na me nɔng neken hom, yaga na me to sey nɛ arɔng. 18 Vit a mwat de e tɔk sey ɛ̀ neken hom yi na me. Ko me pyɛ hom me tik nɛ, yaga me simo me ra ano. Ma vɔk reto na me tik nɛ, ko ma vɔk reto na me to jut nɛ. E pyɛ ma yemo de Da hom a nɔng me redu na me ra.” 19 Yaga neha nemo, bemat ba to gas ɛn zang ba. 20 Pyak e ji mɛn ba ye, “Yɛ a vɔk ceng! E lolong! Yaga sɛ́ de yin e wet betong na yɛ arɛt?” 21 Ko behak ba ye, “Mwat de a vɔk ceng ê tɔk ha neha yerê nemo wɛt. Yi e rɛ̌ de ceng yê tɔk wunta bayîs bebók arɛt?”
Bemat ba kyɛ́ ɛn Yɛsu
22 Jeng yane yá sè jeng gûl zɛng, ko ba ra Nzem Yong Gbɔng Duk Re Fongol e Yɛrusalɛm. 23 Yɛsu a sé e nelalâ Gbɔng Duk o, a kyě kyè e kwɔn de ba tâng hɛ, à Fwàm Sɔlɔmɔn. 24 Bemat ba tula hɛn, ba gwɔrɔ hɛ, ko ba yang ɛ, “Vɔk e yɛ̌ jeng de hwô tik ot na wot a sè dasap mwat de hwà sé arɛt? Ka sede hwà sé Mwat de Dagwi a kasa na a sey bemat, ko hā a wot wɛshɛrɛk.” 25 Yɛsu a toyo a yɛn, a yang ɛn, “Ma kana ha a yin, ko yin a sey tsak o na há hom wɛt. Tom vemo de me ra e ji rezâ Da hom, e vɛ de be dura a yin yerê mwat de ma sé. 26 Ko yin a sey tsak o na há hom wɛt, yaga yin a sé bemat hom wɛt. 27 Bemat hom ba sé sede vyēl de ye wet betong na fwɔ hom. Ma tɔk vɛ, ko be raa me. 28 Me nɔ̂ng vɛ neken gbak-gbak, ko bê sang wey wɛt. Vit a mwat de ê tɔk tara vɛ yi e vwɔ hom. 29 Da hom de a nɔng me vɛ a dal pyɛ̂ mwa. Vit a mwat de ê tɔk tara vɛ yi e vwɔ̂ Da hom. 30 Me tanga Da hom wot a sé vining o.” 31 Bemat o ba to tɔng beta na be tó ɛ mɛ̀, na be mɔrɔ hɛ. 32 Ko Yɛsu a yang ɛn, “Yin a ga di tom rat pyak de ma ga ra yi na retô Da hom. E gwɛ̌ fwom rwat de gwa tɛ̀, yin a simo yin a tó me na beta yaga gwɛ arɛt?” 33 Yɛn a toyo a yɛ, ba ye, “Wot ê tó o na beta yaga hwak e ji tom rat vemo wɛt, ko yaga gwong de hwó byɛs Dagwi. Yaga hwo de hwà sé mwasi zɔng hwó tē, hwà sé Dagwi.” 34 Yɛsu a toyo a yɛn, a ye, “Bà ga jɛk e ji Badu min neha Dagwi nemo ngan: ‘Ma ga ye, yin a sé bedagwi.’ 35 Wot a tɔk, pyɛ́ de bà jɛk e Bwok-basa Dagwi ya sé tsak o gbak-gbak. Ko di, Dagwi a yila bemat vane mo, à bedagwi, ko a sé e yɛn vɛ de à ha a yɛn há mɛ. 36 Ko me a, Dagwi a tik me jaram na me sè mwɛ, ko a tomo me vey e jey. Yaga sɛ́ kwong de yin e tē ma sé byɛs Dagwi jeng de ma ye, ma sé Hwey Dagwi arɛt? 37 Ka sede pyɛ́ de me ra ya sé tom Da hom wɛt, yin sey tsak o na há hom wɛt. 38 Ko ka sede ma ra tom o, tɛ̀ in gap min e ra há hom yaga tom o, mwa ano de yin a ka sey tsak o na há hom wɛt. Yi ano, yin a rɔda tɔk tsɛng-tsɛng, Da hom a sé gwining na me, ko me arɔng ma sé gwining na Da hom.” 39 Yɛn a to jāma be vo Yɛsu, ko a hywit ɛ e vɔ mɛn. 40 Ano kwong, a ye dɔ a Rɔt Yɔrdan vɔk e kwɔn de Yohana á kana sè tɛ̀sɛ a bemat batisma e negasi ne susu mo, ko a sangal e hwomo. 41 Bemat pyak ba vey na yɛ, ba ye, “Yohana a ra pyɛ bes cak wɛt, ko kayɛ pyɛ de a ha e ra mwat womo ya sé tsak o.” 42 Ko e kwɔn hane mo, bemat pyak ba tɛ̀ gap mɛn e ra Yɛsu.
Rekû Lazarus
1 Mwat hwak á sè de ba tang ɛ, à Lazarus, a ro ɛ. Á sangal e Bet-Anya, kerepomo de Marya na gwa mɛ Marta bá sè ɛ̀. 2 (E Marya gwining wane de a shushu Darwey na něy nesang hyɔɔlɔl, ko a yishing bol mɛ na setôt rato mɛ. Lazarus de a ro ɛ a sé gwa mɛ.) 3 Ano kwong, begwa mɛ behwong o ba tomo na há vɔk na Yɛsu, ba ye, “À Darwey, sâ yey mō e ro ɛ.” 4 Sede Yɛsu a wok ano, a ye, “Serɔ semo sa rɔda yɛnɛ hɛ na reku wɛt. Sa rɔda tɛ̀ bemat be di gbɔng nerêy Dagwi, na be to di gbɔng nerêy Hwey Dagwi arɔng.” 5 Yɛsu a tɛ̀ yey na Marta, na gwa mɛ hwong o, na Lazarus arɔng. 6 Ko mwa ano, jeng de a wok, Lazarus e ro ɛ, a gwɛ̌ sangal e kwɔn de á sè ɛ̀ nepɔlɔ neba. 7 E bama mo, a yâng bemât masâ fwom mɛ, “Tik na wot a to ot vɔk e sevwêl Yudiya.” 8 Ko yɛn a yang ɛ, “À Mwat Basa, nepɔlɔ net de na kwey bemat e hwomo ba jāma be tó o na beta, na be mɔrɔ hwo. Ko a remo, hwó simo na hwo to kyè wɔ e hwomo arɛt?” 9 Yɛsu a toyo a yɛn, a ye, “A sé dyâm-gwi kuru na yɛ bya de jey ye sè gbey wɛt arɛt? Mwat de e kyě kyè nagwi e tiri bwol wɛt, yaga e bɛrɛng jey yi na negbêy jey yemo. 10 Ko a sé e mwat de e kyě kyè naturuk de e tiri bwol, yaga a vɔk negbey wɛt.” 11 E bama de a ha a yɛn ano, a gwɛ̌ ha, a ye, “Sá mot Lazarus a ga vo nevwa. Ko ma sé kyè wɔ e hwomo na me wɔ̀ sene hɛ.” 12 Bemât masâ fwom mɛ mo ba yang ɛ, “À Darwey, ka sede a sê nevwa, ko a rɔda tɛ̀ tyang.” 13 Ko Yɛsu á sè ha a yɛn e ra rekû Lazarus, ko yɛn a bare, a sé ha e ra nevwa de mwat e wɔ̂ nɛ. 14 Yaga ano, a ha a yɛn dɛdɛɛt, “Lazarus a ga ku. 15 Ko yaga yin, ma vɔk yey pyɛng de ma sè e kwɔn o wɛt. Yi ano, yin a rɔda hwo tɛ̀ gap min e ra me. Ko tik na wot a kyè wɔ na yɛ.” 16 Tomas, de ba tang ɛ, à Shambya a yâng bwang bemât masâ fwom o, “Tik na wot a wɔ́ arɔng, na wot a bin wɔ̀ ku tanga yɛ.”
Yɛsu e tɛ̀ bemat be sene yi e reku
17 Jeng de Yɛsu a wul hwomo, a wok, ba ga kana lɛrɛ Lazarus o pɔlɔ naas. 18 Kerepomô Bet-Anya mo ka wul lyōsho tyat yi e Yɛrusalɛm wɛt, 19 ko bemat pyak yi e sevwêl Yudiya ba ga kana vey na Marta tanga Marya, na yɛn a wɔrɔk hɛn yaga rekû gwa mɛn o. 20 Sede Marta a wok, Yɛsu a sé kyè vey, a nusu na a bin wɔ̀ man na yɛ, ko Marya a sangal e ji lɔ. 21 Marta a yâng Yɛsu, “À Darwey, ka hwá kana sè e ngamo, ka gwa hom a yâng ku wɛt. 22 Ko ma tɔk, mwa ano de Lazarus a ga ku, Dagwi a rɔda ra kayɛ pyɛ de hwà rangal hɛ.” 23 Yɛsu a yang ɛ, “Gwa mō a rɔda to sene yi e reku.” 24 Marta a toyo a yɛ, a ye, “Ey, ma tɔk, a rɔda to ba sene e jeng sensa bemat e tuk hê yɛnɛ mo.” 25 Yɛsu a yang ɛ, “E me de me tɛ̀ bemat be sene yi e reku, ko e me de me nɔng ɛn neken. Mwa ano de mwat ê ku, ê re nuyel na sé na neken, ka sede a tɛ̀ gap mɛ e ra me. 26 Ka sede mwat a vɔk neken ne mwin, na a tɛ̀ gap mɛ e ra me, ko ê sang ku wɛt. Hwà sey tsak o na há hemo arɛt?” 27 A yang ɛ, “Ey, à Darwey, ma sey tsak o, hwà sé Mwat de Dagwi a kasa na a sey bemat, hwà sé Hwey Dagwi hemo de Dagwi a ye, hê vey e jey.”
Yɛsu a tosho
28 E bama de Marta a ha há hane, a toyo, a wɔ̀ yila gwa mɛ Marya e hagat, a yang ɛ, “Mwat Basa a ga vey, a sé yila hwo.” 29 Sede Marya a wok ano, a sogo ziri, a kyè wɔ̀ sɛ̀ ɛ. 30 Yɛsu á kana wɔ̀ wul kerepomo mo e ngyen wɛt, á rɔngɔl e dem de Marta á kana man na yɛ. 31 Bemat de bá sè sangal tanga Marya e ji duk na be wɔrɔk hɛ ba di ɛ a sogo ziri, a nusu. Ba tē kɛ gyeng a sé kyè wɔ e sak gwa mɛ, na a wɔ̀ tosho e hwomo, ko ba raa hɛ. 32 Marya a wul e dem de Yɛsu a sé ɛ̀. Jeng de a di ɛ, a gaba e cât bol mɛ, ko a yang ɛ, “À Darwey, ka hwá kana sè e ngamo, ka gwa hom a yâng ku wɛt.” 33 Sede Yɛsu a di ɛ, a sé tosho, ko bemat de ba raa hɛ arɔng ba sé tosho, pyɛ mo ya pere ra a yɛ yey ding-ding, ko ya bɔrɔk hɛ. 34 A rangal hɛn, “Yin a lɛrɛ hɛ e gwa arɛt?” Ba yang ɛ, “À Darwey, vey na hwo di.” 35 Yɛsu a tosho. 36 Bemat o ba yâng bemɛn, “Di, a tɛ̀ yey na yɛ sizɔng!” 37 Ko behak e ji mɛn ba ye, “Mwat womo a vɔk reto na a wunta bayîs bwók; vit a yɛ na reto de ê tɔk dul Lazarus nà ku wɛt arɛt?”
Yɛsu a sene Lazarus yi e reku
38 Pyɛ mo ya to ra a Yɛsu yey ding-ding. A wɔ́ e sak de wa sé fwara, ko ba bang nû wɛ na gwofwa gwohwak. 39 Yɛsu a ye, “Gáng in gwofwa mo e hagat!” Marta, de a sé gwa mwat de a ga ku mo a yâng Yɛsu, “À Darwey, a ga tɛ̀ nesang, yaga a ga ra pɔlɔ naas e sak.” 40 Ko Yɛsu a yang ɛ, “Ma kana ha a hwo, ka sede hwà tɛ̀ gap mō e ra me, ko hwà rɔda di gbɔng nerêy Dagwi.” 41 Ba gang gwofwa mo, ko Yɛsu a bɛrɛng vɔk e lagwi, a ye, “À Da, ma feng a hwo, yaga hwà wok won hom. 42 Ma tɔk, hwó wokos won hom kayɛ jeng. Ko ma ha ano wɛshɛrɛk, yaga nerât bemat vemo de ba sé tumal e ngamo, na yɛn a sey tsak o, a sé e hwo de hwá tomo me.” 43 E bama de a ha ano, a yila na gbɔng fwɔ, “À Lazarus, nusu!” 44 Yɛ de a ga kana ku a nusu. Bá kana hanas vɔ tanga bol mɛ na berugu, bá to hanas bwang bayis mɛ na kerugu. Ko Yɛsu a yang ɛn, “Viri hin hɛ, na yin a hàla hɛ na a kyè.”
Ba wuna nu na be vo Yɛsu
45 Pyak e ji bemat de ba vey di Marya, ko ba to di pyɛ de Yɛsu a ra, ba tɛ̀ gap mɛn e ra yɛ. 46 Ko behak e ji mɛn ba wɔ́ na BeFarisi, ba ha a yɛn pyɛ de Yɛsu a ra. 47 Yaga ano, begbɔng bepiris tanga BeFarisi ba yishi bemakûk badu na be ra tula. Jeng de ba man, ba yâng bemɛn, “E sɛ́ de wot ê ra arɛt? Mwat womo a sé ragas pyɛ̂ bes pyak. 48 Ka sede wot a tik ɛ na a re nuyel na ragâs yerê pyɛ́ yemo, ko mwa bemat ba rɔda tɛ̀ gap mɛn e ra yɛ. Hane hê tɛ̀ BeRoma be vey na be lashe Gbɔng Duk Re Fongol, na be hashe yere mot mwa arɔng!” 49 Gwining e ji mɛn de ba tang ɛ, à Kayafas, de á sè darwêy bepiris e shey hane mo, a yâng bemɛn, “Yin a sé ha pyɛ de yin a tɔk wɛt! 50 Yin a tɔk di wɛt wɔgɔ, ka sede mwat gwining ê ku e tô bemat pyak, ko hane hê sè a yin naka he dal de bê lashe yere mot mwa.” 51 Há hane ha vey yi na báre mɛ pyɛ mɛ wɛt. Á sè e Dagwi de a tɛ̀ ɛ a ha ano, yaga á sè darwêy bepiris e shey o. Á sè ha wɔgɔ, Yɛsu ê ku, yaga na a sɛlɛ mɛ̀ yerê BeYuda mwa. 52 Ko ê ku yaga yere mɛn zɔng wɛt, ko yaga mwa nèy Dagwi de na sé e kahɛ kwɔn e jey arɔng, na a vey na yɛn na be tɛ́ ɛn vining o. 53 Ano kwong, yi e tuk de a ha ano, bemât nuyêl BeYuda ba hwo wuna nu na be jāma gwong na be mɔrɔ Yɛsu. 54 Yaga ano, Yɛsu a to kyě kyè wɛshɛrɛk e sevwêl Yudiya wɛt. Ko a nu ɛ yi e hwomo, a kyè vɔk e repomô Ɛfrayim e bak yɛnɛ̂ vwel de ha sé hey. A sangal e hwomo, yɛ tanga bemât masâ fwom mɛ. 55 Jeng ya vey bagat de BeYuda ba ra Nzem Gyilsit Nelɔ BeIsrayɛl. Yaga ano, bemat pyak yi e nebapomo ba tānga wɔ e Yɛrusalɛm gyam na be ra nzem o, yaga na yɛn a bin tɛ̀ bato mɛn jɛrɛ e bayîs Dagwi. 56 Yɛn a kyě jāma Yɛsu, ko jeng de yɛn a sé tumal e nelalâ Gbɔng Duk Re Fongol, ba sé rangsal bemɛn, “Yin e bare sɛ́ arɛt? A sé a yin, ê vey nzem o arɛt?” 57 Begbɔng bepiris tanga BeFarisi bá kana nɔng nu wɔgɔ, kawɛ mwat de a tɔk dem de Yɛsu a sé ɛ̀ a wɔ̀ ha a yɛn, yaga na be bin vo ɛ.
Marya a shushu Yɛsu na něy
1 Bwang nepɔlɔ netyiimin na be ra Nzem Gyilsit Nelɔ BeIsrayɛl, Yɛsu a wul Bet-Anya; kwɔn a hane de Lazarus á sè na sangal, yɛ de Yɛsu á kana sene hɛ yi e reku. 2 Ba kyé a yɛ pyɛ̂ pɔlɔ e hwomo. Marta a sɛlɛ e de nɔngɔs pyɛ́ mo, ko Lazarus a sé e de rê yɛ̄ tanga Yɛsu. 3 Marya a jut kefus de ka sila na něy nât nerat o. Něy o na sé ne nesang hyɔɔlɔl, ko na vɔk dyām pyak. A shushu Yɛsu na nɛ e bol, ko a to yishing vɛ na setôt rato mɛ. Nesang něy o na pere gwɔrɔ lɔ mo mwa. 4 Ko Yuda Iskaryot, gwining e ji bemât masâ fwôm Yɛsu, yɛ de a sé kyè wɔ̀ row ɛ e yɛnɛ mo a ye, 5 “Yaga sɛ́ de ba row něy nemo, na be nɔ̂ng bepɛng dyām o wɛt arɛt? Dyām nɛ ya sé e nû dyâm fwôm mwat yê shey hining.” 6 Ko mwin, vit a pyɛ de ya man Yuda mo na bepɛng; a ha ano, yaga yɛ á sè gbik. Á sè e yɛ de a tikis a yɛn dyām e ji dap, ko a ga tɔ́k ɛ e de ragas vwɔ e dyām o. 7 Ko Yɛsu a ye, “Tik ɛ! A ga tik něy o, yaga na be bin yong mɛ̀ rebek hom e jeng de be ba lɛrɛ me. 8 Bepɛng bê sè na yin kayɛ jeng, ko me, mê sè na yin kayɛ jeng wɛt.”
Ba jāma gwông mɔrɔ Lazarus
9 Gbɔng regyɛng bemat ba wok, Yɛsu a sé e Bet-Anya, ko ba wɔ́ e hwomo. A sé yaga Yɛsu nju mɛ zɔng de ba wɔ́ wɛt, ko a to sé na be di Lazarus de Yɛsu á kana sene hɛ yi e reku. 10 Yaga ano, begbɔng bepiris ba jāma gwong na be mɔrɔ Lazarus arɔng, 11 yaga BeYuda pyak ba hàla hɛn, ko ba tɛ̀ gap mɛn e ra Yɛsu. Bemat o ba ra ano yaga pyɛ de ya té na Lazarus o.
Bemât Yɛrusalɛm ba sey Yɛsu e gwong
12 Tuk het, gbɔng regyɛng bemat de bá kana wɔ́ e Yɛrusalɛm yaga Nzem Gyilsit Nelɔ BeIsrayɛl ba wok, Yɛsu a sé kyè vey e Yɛrusalɛm o. 13 Yaga ano, yɛn a hwo kwɔrɔs nelang tyet, yɛn a nusu, yaga na be wɔ̀ man na yɛ, yɛn a gbɔ, ba tē, “Hosana! Bē somo Dagwi! Tik na Dagwi a tɛ̀ nerat e ra womo de e kyè vey e ji rezâ Darwey! Tik na Dagwi a tɛ̀ nerat e ra Gbɔng Gwɔ̀m BeIsrayɛl!” 14 Yɛsu a laga hwêy madung hane de a sɛ̀ hɛ, sede remo de bà jɛk e Bwok-basa Dagwi wɔgɔ, 15 “À repomô Siyɔn, hwo wok bengyip wɛt! Di, gbɔng gwɔ̀m mō a sé kyè vey, a sé laga hwêy madung.” 16 E jeng de pyɛ́ yemo ya té, bemât masâ fwom mɛ yɛn a tɔk cap-hâ yɛ̄ wɛt. Ko e bama de ba nɔng ɛ gbɔng nerey mɛ na Dagwi, yɛn a pere bare na pyɛ́ de bà jɛk e Bwok-basa Dagwi wɔgɔ, pyɛ́ yemo yê té ano, ko mwin, ba ga ra a yɛ ano mo. 17 Jeng de Yɛsu á kana yila Lazarus na a nusu yi e sak, ko á sene hɛ yi e reku, regyɛng bemat de bá kana sè na yɛ e hwomo bá hwo ha a bemat pyɛ de yɛn a di. 18 Yaga ano, bemat pyak de ba wok há e ra pyɛ bes yane de Yɛsu a ra ba nusu, na be wɔ̀ man na yɛ. 19 Jeng de BeFarisi ba di ano, ba yâng bemɛn, “Yin a di ā! Kayɛ pyɛ de wot a ra ya sé yapyi zɔng! Mwa jey ya sé raa hɛ!”
BeGirik behak ba simo be di Yɛsu
20 BeGirik behak bá sè e ji vemo de ba wɔ́ e Yɛrusalɛm na be re a Dagwi fongol e jeng nzem. 21 Ba vey na Filip, yɛ de a sé yi e Bet-Saida e sevwêl Galili, ko ba yang ɛ, “À Da, wot e simo wot di Yɛsu.” 22 Filip a sogo, a wɔ̀ ha a Andarawus, ko yɛn beba ba wɔ̀ ha a Yɛsu. 23 Yɛsu a yang ɛn, “Jeng ya ga vey de ba rɔda nɔng Me de ma tɛ́ me mwat gbɔng nerey. 24 Tsak o mwin me ha a yin: Sɛ̌ ba tus yenêng alkama na ye ku, ko yê nàra nju yɛ zɔng. Ko ka sede ya ku, yê ta, ko yê tɛ̀ yéneng pyak. 25 Mwat de e tɛ̀ yey na tó mɛ zɔng a rɔda bidɛ pyɛ̂ mwa; ko mwat de e tɛ̀ yey na tó mɛ zɔng wɛt e jey yemo a rɔda gyeng tó mɛ neshey gbak-gbak. 26 Kawɛ mwat de e simo a ra a me fwom, tik na a raa me. Kahɛ kwɔn de ma sé ɛ̀, mwât fwom hom ê sè na me e kwɔn o arɔng. Da hom a rɔda nɔ̂ng kawɛ mwat de a sé ra a me fwom nerey.”
Yɛsu a ha e ra reku mɛ
27 “Yey hom ye lashe hɛ, ko mê ye ala arɛt? Mê ye, ‘À Da hom, pat me yi e jeng reyɔm yemo’, arɛt? Wey, a sé yaga na me bin sɔ reyɔm de ma vey e jey. 28 À Da, tɛ̀ be nɔ̂ng reza mō nerey!” Ko ba wok fwɔ hwak yi e lagwi, gwa ye, “Ma ga kana ra ano, ko mê to gwɛ̌ ra ano gbak.” 29 Regyɛng bemat de bá kana sè e tumal e hwomo ba wok fwɔ gwane mo. Behak e ji mɛn ba ye, “A sé e gbara de wa lulum.” Ko behak ba ye, “A sé e tom-lagwi de a hanat na yɛ.” 30 Ko Yɛsu a ye, “A sé yaga sɛlɛ min de fwɔ mo gwa vey, ko a sé yaga sɛlɛ hom wɛt. 31 A sé a remo de bê ra a jey yemo shɔt, a to sé a remo de ba rɔda pat yɛ de a sé re negwɔm e ra jey o. 32 Ko me, jeng de ba rɔda nára me e rak o, mê tɛ̀ bemât mwa be vey na me.” 33 Yɛsu a ha ano, yaga na a bin dura mɛ̀ yerê reku de a rɔda ku. 34 Regyɛng bemat o ba yang ɛ, “E Bwok-basa Badu mot bà jɛk wɔgɔ, Mwat de Dagwi a kasa na a sey bemat a rɔda nàra gbak-gbak. Yaga sɛ́ kwong de hwà sé ye, gbing-gbing na be nára Yɛ de a tɛ́ ɛ mwat e rak o arɛt? E wà de a sé Yɛ de a tɛ́ ɛ mwat o arɛt?” 35 Yɛsu a yang ɛn, “Negbey nê sè na yin yaga jeng tyɔng. Kyè in kwɛngɛl min e jeng de negbey o na rɔngɔl na yin, yaga na lwīl gwo kwon sɛ̀ in e gwong wɛt. Mwat de e kyě kyè e ji lwīl e tɔk kwɔn de e kyè vɔk ɛ̀ wɛt. 36 Tɛ̀ in gap min e ra womo de a sé negbey o e jeng de a rɔngɔl na yin, yaga na yin a bin tɛ́ in bemât negbey o.”
BeYuda ba tɛ̀ gap mɛn e ra Yɛsu wɛt
E bama de Yɛsu a ha há hane, a tik kwɔn o, ko a wɔ̀ lɛrɛ hɛ. 37 Mwa ano de Yɛsu a ga ragas pyɛ̂ bes yemo mwa e bayis mɛn, ba tɛ̀ gap mɛn e ra yɛ wɛt. 38 Pyɛ mo ya té ano, yaga na há de Yɛshaya, zarap Dagwi, à kana ha he sila hɛ. Há ma het ngan: “À Darwey, e wà de a sey tsak o na yɛgɛt mot arɛt? E wà de a ga di retô Darwey arɛt?” 39 Pyɛ ma yemo de ya tɛ̀, bemat vemo be tɔk sey tsak o wɛt; yaga Yɛshaya a to ha wɔgɔ, 40 “Dagwi a ga bang a yɛn bayis, ko a tɛ̀ neyey mɛn ne sè kashalang arɔng, yaga na be kwon bɛrɛng na bayis mɛn wɛt, kɛ na be tɔk tsak o e neyey mɛn wɛt, kɛ na be doyo arɔng wɛt — yaga na me Dagwi, me tɛ̀ ɛn tyang.” 41 Yɛshaya à ha ano, yaga à kana di gbɔng nerey de Yɛsu a rɔda ba vɔk, ko à ha há mo e ra yɛ. 42 Mwin, pyak e ji bemakûk BeYuda ba tɛ̀ gap mɛn e ra Yɛsu. Ko ba ha ano wɛshɛrɛk wɛt, yaga ba wokos bengyip, BeFarisi bê paa ɛn e nesâ bemât duk rê fongol. 43 Bemakuk o ba simo bemat be nɔng ɛn nerey, ko nerey o na dal a yɛn nemo de ne yi na Dagwi.
Ba rɔda ra a bemat shɔt yi na neha Yɛsu
44 Yɛsu a gbɔ, a ye, “Kawɛ mwat de a tɛ̀ gap mɛ e ra me, a sé e ra me nju hom zɔng wɛt, ko a sé e ra mwat de a tomo me arɔng. 45 Kawɛ mwat de e di me e di yɛ de a tomo me. 46 Ma vey e jey, na me tɛ̀ bemat be sè e ji negbey, yaga na kawɛ mwat de a tɛ̀ gap mɛ e ra me a kwon to nàra e ji lwīl wɛt. 47 Ka sede mwat hwak a wokos neha hom, ko a gyenges nɛ wɛt, a sé e me wɛ de mê gang ɛ na shɔt wɛt. Yaga ma vey e jey na me gang bemât jey o na shɔt wɛt, ko ma vey na me sey neken mɛn. 48 Mwat de a kyɛ́ ɛ me, ko a to sey neha hom wɛt, pyɛ cak ya sé de yê gang ɛ na shɔt. Pyɛ mo, yɛ à neha de ma ha; nà rɔda gang ɛ na shɔt e tuk talâ jey. 49 Yaga ma ha neha hom o na reto hom pyɛ hom wɛt, ko a sé e Da hom de a tomo me de a nɔng me redu e ra pyɛ de ma rɔda ha, na e ra gwong de ma rɔda ha yɛ arɔng. 50 Ma tɔk, pyɛ de a nɔng redu e ra yɛ ye tɛ̀ bemat be vɔk neken gbak-gbak. Ano kwong, neha de me ha na sé nemo de Da hom a ha a me na me ha.”
Yɛsu a kus bol bemât masâ fwom mɛ
1 Nusu hwol na be ra Nzem Gyilsit Nelɔ BeIsrayɛl, Yɛsu a tɔk, jeng ya ga vey de a rɔda tik jey yemo, na a kyè vɔk na Da mɛ. A ga dopse tɛ̀ yey na bemat de ba sé bemɛ e jey yemo, ko a to tɛ̀ yey na yɛn vɔk e yɛnɛ mo. 2 Nawiri, Yɛsu tanga bemât masâ fwom mɛ bá sè re pyɛ́. Gwɔ̀m cēng a ga kana tɛ̀ bare e yêy Yuda Iskaryot, hwêy Simɔn, na a row Yɛsu. 3 Yɛsu a tɔk, Da mɛ a ga tik kayɛ pyɛ e vɔ mɛ. A to tɔk, a vey yi na Dagwi, ko a sé kyè wɔ̀ toyo vɔk na yɛ. 4 A sogo, a pat gwogbɔng gworugu mɛ, a tik gwɛ, ko a jut kerugu, a rɔgɔs e rawit mɛ. 5 E bama mo, a vɛ́ nshi, a shusha e shǐ, ko a hwo kus mɛ̀ bol bemât masâ fwom mɛ, ko a yishing vɛ na kerugu de a rɔgɔs e rawit mɛ. 6 A wul na Simɔn Bitrus. Yɛ Bitrus o a yang ɛ, “À Darwey, hwo, hwó simo na hwo kus bol hom arɛt?” 7 Yɛsu a toyo a yɛ, a ye, “Pyɛ de ma sé ra, hwà tɔk cap-hâ yɛ a remo wɛt, ko wɔ e nuyel, hwà rɔda tɔk yɛ wɛshɛrɛk.” 8 Bitrus a yang ɛ, “Kɛ̀ɛ̄ wey! Hwô sang kus bol hom wɛt neshey gbak-gbak!” Yɛsu a toyo a yɛ, a yang ɛ, “Ka sede mê kus bol mō wɛt, a dura, vit a pyɛ de yê man me na hwo.” 9 Simɔn Bitrus a yang ɛ, “Ano kwong, à Darwey, a sé e bol hom zɔng wɛt de me simo na hwo kus vɛ, ko tik na a sè mwa na vɔ hom tanga rato hom!” 10 Yɛsu a yang ɛ, “Mwat de a ga kus ɛ mwa, a to simo a kus ɛ wɛt sɛ̌ bol mɛ zɔng; a sé haalal mwa. Yin mwa yin a sé haalal — sɛ̌ mwat gwining zɔng.” 11 Yaga Yɛsu á kana tɔk mwat de a sé kyè wɔ̀ row ɛ. Pyɛ ma yane de ya tɛ̀, a ye, “Yin mwa yin a sé haalal sɛ̌ mwat gwining zɔng.” 12 E bama de Yɛsu a yɛnɛ kûs bol mɛn, a to jut gwogbɔng gworugu mɛ, a tɛ̀, ko a wɔ̀ sangal. A rangal hɛn, a ye, “Yin a tɔk cap-hâ pyɛ de ma ra a yin arɛt? 13 Yin e yishi me, à Mwat Basa na, à Darwey, ko yin a ha yɛt, yaga ma sé ano. 14 Me ma sé Darwey min na Mwat Basa min, ko mwa ano, ma kus a yin bol. Sede remo de me ma ra a yin ano, ê sè naka na yin a kus a bemin ano arɔng. 15 Ma ga dura a yin pyɛ de yin a rɔda masa, yaga na yin arɔng yin a ra a bemin, sede remo de ma ga ra a yin. 16 Tsak o mwin me ha a yin: Vit a sam de a dal darwey mɛ na nerey, ko vit a tom de a dal mwat de a tomo hɛ. 17 A remo de yin a tɔk pyɛ́ yemo, yin a rɔda vɔk yey pyɛng, ka sede yin ê ra yɛ̄. 18 “Ma sé ha há hemo e ra yin mwa wɛt. Ma tɔk yerê bemat de ma ga kasa hɛn. Ko pyɛ de bà jɛk e Bwok-basa Dagwi yê té mwin wɔgɔ, ‘Yɛ mwat de wot a re pyɛ́ e shǐ hining na yɛ a ga tɛ́ ɛ mwât repugu hom!’ 19 Ma sé ha a yin pyɛ yemo gyam na ye té. Yi ano, jeng de yê té, yin ê sey tsak o, ma sé womo de me tē ma sé yɛ. 20 Tsak o mwin me ha a yin: Kawɛ mwat de a sey mwat de ma tomo, a sé e me de a sey arɔng; ko kawɛ mwat de a sey me a sey Da hom de a tomo me.”
Yɛsu a ha e ra mwat de ê row ɛ
21 E bama de Yɛsu a yɛnɛ há hemo, yey mɛ ya beseng ding-ding, ko a ha wɛshɛrɛk, a ye, “Tsak o mwin me ha a yin: Gwining e ji min e kyè wɔ̀ row me.” 22 Bemât masâ fwom mɛ ba hwo bɛrɛng bemɛn, a sé a yɛn kpɛɛ, yaga yɛn a tɔk mwat de e ha e ra yɛ wɛt. 23 Gwining e ji mɛn, yɛ de Yɛsu a dal na tɛ̂ yey na yɛ, a sé sangal bagat na Yɛsu. 24 Simɔn Bitrus a ye gumat na rato, ko a yang ɛ, “Rangal hɛ mwat de a sé ha e ra yɛ.” 25 Yaga ano, mwat o a ye yɛndɛng vɔk na Yɛsu, a rangal hɛ, a ye, “À Darwey, e wà arɛt?” 26 Yɛsu a toyo a yɛ, a ye, “E mwat de ma rɔda gyira cɛ̌k kpam-tuk e ji shǐ na me nɔng ɛ, e yɛ à mwat o.” Ko a gyira cɛ̌k kpam-tuk o, a nɔ̂ng Yuda Iskaryot, hwêy Simɔn. 27 E ji jeng de Yuda a sey cɛ̌k kpam-tuk o, remo-remo Shetan a yel e yey mɛ. Ko Yɛsu a yâng Yuda mo, “Pyɛ de hwó simo hwo ra, rá yɛ dey-dey!” 28 E ji bemat de ba sé sangal e de rê pyɛ́ mo, vit a hwak de a tɔk pyɛ de ya tɛ̀ Yɛsu a ha a yɛ ano. 29 Sede remo de Yuda á sè mwât tikîs dyām, behak e ji bemât masâ fwom o ba bare, ê wɔ̀ seres pyɛ́ de yɛn e simo yaga nzem o, kɛ ê wɔ̀ gas a bepɛng pyɛ́ cak ayi. 30 Sede Yuda a sey cɛ̌k kpam-tuk o, remo-remo a nusu vɔk e jey. Jeng yane yá sè naturuk. Redu repas 31 E bama de Yuda a nusu, Yɛsu a ye, “Jeng ya ga vey de bemat bê di gbɔng nerêy Yɛ de a tɛ́ ɛ mwat, ko yi na yɛ bê di gbɔng nerêy Dagwi arɔng. 32 Ko jeng de bemat ba ga di nerêy Dagwi yi na yɛ, Dagwi pyɛ mɛ a rɔda dura a bemat gbɔng nerêy Yɛ womo de a tɛ́ ɛ mwat, ko ê ra ano remo-remo. 33 À nèy hom, bwang jeng tyɔng zɔng na me tik in. Yin a rɔda jāma me; ko sede remo de ma kana ha a bemât nuyêl BeYuda, ano arɔng ma sé ha a yin: Kwɔn de ma sé kyè vɔk ɛ̀, yin ê tɔk wɔ ɛ̀ wɛt. 34 Ma sé nɔng in redu repas, rɛ à ret ngan: Tɛ̀ in yey na bemin. Sede remo de ma ga tɛ̀ yey na yin, e gwong gwomo arɔng, tɛ̀ in yey na bemin. 35 Ka sede yin a tɛ̀ yey na bemin, ko bemât mwa bê tɔk, yin a sé bemât masâ fwom hom.”
Bitrus a rɔda tono tɔ̂k Yɛsu
36 Simɔn Bitrus a rangal hɛ, a ye, “À Darwey, hwà sé kyè wɔ e gwa arɛt?” Yɛsu a toyo a yɛ, a yang ɛ, “Kwɔn de ma sé kyè vɔk ɛ̀, hwô tɔk raa me a remo wɛt, ko hwà rɔda ba raa me tuhak.” 37 Bitrus a yang ɛ, “À Darwey, yaga sɛ́ de mê tɔk raa hwo a remo wɛt arɛt? Ma rɔda nɔng neken hom yaga nerat mō!” 38 Ko Yɛsu a yang ɛ, “Ano ā! Hwô nɔng neken mō yaga me a? Tsak o mwin me ha a hwo: Gyam na rungat wa ba dak segwɔm, hwà ga kana tono na me zang tat!”
Yɛsu a sé gwong vɔk na Da mɛ
1 Yɛsu a yâng bemât masâ fwom mɛ, “Yin tik pyɛ cak ye bɔrɔk hin wɛt. Tɛ̀ in gap min e ra Dagwi, ko tɛ̀ in gap min e ra me arɔng. 2 E lɔ Da hom nekwɔn sangal na sé pyak, ko ma sé kyè wɔ̀ yong a yin kwɔn e hwomo. Ka a sé ano wɛt, ka ma yâng ha a yin. 3 Ano kwong, me kyè wɔ na me yong a yin kwɔn; e bama mo, mê toyo, na me jut in na yin a sè tanga me. Kwɔn de ma sé ɛ̀, a sé e hɛ de yin ê sè ɛ̀ arɔng. 4 Ko yin a tɔk gwong de yin ê raa vɔk e dem de ma sé kyè vɔk ɛ̀.” 5 Tomas a yang ɛ, “À Darwey, wot a tɔk dem de hwà sé kyè vɔk ɛ̀ wɛt. Yi e rɛ̌ de wot ê tɔk gwong de mwat ê wul e hwomo arɛt?” 6 Yɛsu a toyo a yɛ, a yang ɛ, “E me de ma sé gwong wɔ e hwomo; a sé yi na me de mwat ê sɛ̀ tsak há e ra Dagwi, na a sey neken ne mwin arɔng. Vit a gwong hwak wɔ na Da hom sɛ̌ yi na me. 7 Ka sede yin a tɔk mwat de ma sé, ko yin a yâng tɔk mwat de Da hom a sé arɔng. Ko e ngamo nuyel, yin a tɔk ɛ, ko yin a ga di ɛ arɔng.” 8 Filip a yang ɛ, “À Darwey, dura a wot Da mō mo, ko a ga vey a wot ano.” 9 Yɛsu a yang ɛ, “Ma ga ros na yin yimo, à Filip, ko vey e remo hwà tɔk me wɛt arɛt? Kawɛ mwat de a ga di me a ga di Da hom arɔng. Yaga sɛ́ kwong de hwà ye, me dura a yin Da hom o arɛt? 10 Hwà sey tsak o wɛt, me ma sé gwining na Da hom, ko Da hom arɔng a sé gwining na me arɛt? Neha de me ha a yin na yi na reto hom pyɛ hom wɛt. Ko a sé e Da hom de a sé nàra e ji nesa na me de a sé ra fwom mɛ. 11 Séy in tsak o na há hom wɔgɔ, ma sé gwining na Da hom, ko Da hom arɔng a sé gwining na me. Ka sede yin e sey tsak o na há hom wɛt, ko séy in tsak o, yaga yerê pyɛ́ de ma ra, yēmo de yin a di na bayis min. 12 Tsak o mwin me ha a yin: Kawɛ mwat de a tɛ̀ gap mɛ e ra me a rɔda ra yerê pyɛ́ de ma ra. Ê ra pyɛ́ de ya dal yemo de ma ra, yaga ma sé kyè vɔk na Da hom. 13 Kayɛ pyɛ de yin e ra wôn yɛ e ji reza hom, ma rɔda ra a yin yɛ. Yi ano, Hwey hê tɛ̀ bemat be bin di gbɔng nerêy Dagwi. 14 Ka sede yin e ra wôn kayɛ pyɛ e ji reza hom, ko ma rɔda ra yɛ.”
Yɛsu a ye, ê tomo na Gabik Jɛrɛ
15 “Ka sede yin a tɛ̀ yey na me, yin ê gyeng badu hom. 16 Mê ra won na Da hom, ko yɛ ê tomo a yin na Mwat Sɛlɛ hwak de ê sè na yin gbak-gbak. 17 Mwat Sɛlɛ mo, yɛ à Gabik de he dura tsak há e ra Dagwi wɛshɛrɛk. Bemât jey bê tɔk sey Mwat Sɛlɛ mo e neyey mɛn wɛt, yaga be di ɛ wɛt, ko be to tɔk ɛ wɛt. Ko yin, yin a tɔk ɛ, yaga yɛ ê nàra na yin, ko ê sè e neyey min arɔng. 18 “Ma rɔda tik in na yin a sè sede nehyɛn wɛt. Mê toyo vey na yin. 19 Bwang jeng tyɔng zɔng, bemât jey ba rɔda to be di me wɛt, ko yin, yin a rɔda to di me. Me ma vɔk neken; yaga ano, yin a rɔda vɔk neken arɔng. 20 E tuk hane mo, yin a rɔda tɔk, ma sé sangal e ji nesa na Da hom. Yin ê to tɔk, yin a sé sangal e ji nesa na me, ko me arɔng ma sé sangal e ji nesa na yin. 21 “Kawɛ mwat de a tɔk badu hom, na a gyenges vɛ, e yɛ de a tɛ̀ yey na me. Ko kawɛ mwat de a tɛ̀ yey na me, Da hom arɔng ê tɛ̀ yey na yɛ; me arɔng ma rɔda tɛ̀ yey na yɛ, ko mê dura a yɛ tó hom wɛshɛrɛk.” 22 Yuda hwak — á sè Yuda Iskaryot wɛt — a yâng Yɛsu, “À Darwey, yaga sɛ́ de hwó simo hwo dura tó mo na wot zɔng ko na bemât jey wɛt arɛt?” 23 Yɛsu a toyo a yɛ, a ye, “Ka sede mwat hwak a tɛ̀ yey na me, ko a rɔda gyeng há hom. Da hom a rɔda tɛ̀ yey na yɛ, ko me tanga Da hom wot a rɔda vey na yɛ, ko wot ê sangal tanga yɛ. 24 Ko kawɛ mwat de a tɛ̀ yey na me wɛt e gyeng há hom wɛt. Há de yin a wok yi na me ha yi na báre hom wɛt, ko ha yi na Da hom de a tomo me. 25 “Ma ga ha a yin pyɛ́ yemo e jeng de ma rɔngɔl na yin. 26 Ko Mwat Sɛlɛ, yɛ Gabik Jɛrɛ, de Da hom a sé kyè wɔ tomo na yɛ e ji reza hom, a rɔda basa a yin kayɛ pyɛ, ko ê tɛ̀ in na yin a bare na pyɛ̂ mwa de ma ga kana ha a yin. 27 “Me tɛ̀ neyey min ne dyɛng; yêy dyɛngɛ de me nɔng in ha sé yerê hemo de me pyɛ hom ma vɔk. A sé e yerê gwông jey wɛt de me tɛ̀ neyey min ne dyɛng. Yin tik pyɛ cak ye bɔrɔk hin, kɛ yin vɔk bengyip arɔng wɛt. 28 Yin a wok ma ye, ma sé kyè wɔ̀ kyè, ko mê toyo vey na yin. Ka sede yin a tɛ̀ yey na me, ka yin a yâng vɔk yey pyɛng, yaga ma sé kyè wɔ na Da hom; yaga Da hom a dal me na nerey. 29 Ma ga ha a yin pyɛ́ yemo a remo gyam na ye té, yaga na jeng de yê té, yin a rɔda sey tsak o na há hom. 30 Ma rɔda gwɛ̌ ha na yin pyak wɛt; yaga yɛ de a sé re negwɔm e ra jey yemo a vey bagât vey. Yɛ a vɔk reto rehak e ra me wɛt. 31 Ko ma sé ra pyɛ́, tyɛng sede remo de Da hom a ha a me. Ma sé ra ano, yaga na bemât jey be tɔk, ma tɛ̀ yey na Da hom. “Sogo hin, na wot a hàla kwɔn hemo!”
Tsak retîn cɔgɔ̂t anap
1 Yɛsu a ye, “E me de ma sé tsak retîn cɔgɔ̂t anap. Da hom a sé mwât fwôm bwi. 2 Kahɛ lâng cɔgɔt de he tɔs nèy wɛt, e kwɔrɔ hɛ na a bomo. Ko kahɛ lang de he tɔs nèy, e yong hɛ naka, yaga na he gwɛ̌ tɔs nèy. 3 Yin a sé sede nelang cɔgɔt de ba ga yong nɛ, yin a ga kana tɛ́ in jɛrɛ yi na reha hom de ma ga ha a yin. 4 Nàra hin e ji sangâl nesa na me, ko me arɔng mê nàra e ji sangâl nesa na yin. Lang he tɔk tɔs nèy pyɛ hɛ wɛt, sɛ̌ ha nàra e ji retîn cɔgɔt o. Ano arɔng, yin e tɔk ra pyɛ cak wɛt, sɛ̌ yin a nàra e ji sangâl nesa na me. 5 “E me de ma sé cɔgɔ̂t anap, ko yin a sé nelang o. Ka sede mwat e nàra e ji sangâl nesa na me, ko me, me nàra e ji sangâl nesa na yɛ, ko a rɔda sè sede lang de he tɔs nèy pyak, yaga yin e tɔk ra pyɛ cak wɛt, sɛ̌ yin a sé tanga me. 6 Ka sede mwat e nàra e ji sangâl nesa na me wɛt, ko a sé sede lâng cɔgɔt de ba kwɔrɔ hɛ na be bomo hɛ, ko he hworok. Be tula nelang yerê nemo mo, be bomo nɛ e kya, ko kya he re nɛ. 7 Ka sede yin e nàra e ji sangâl nesa na me, ko neha hom ne nàra e neyey min, ko yin ê tɔk ra wôn kayɛ pyɛ de yin e simo, ko bê nɔng in yɛ. 8 Pyɛ de yê tɛ̀ be di gbɔng nerêy Da hom a yet: Yin a sè sede nelang cɔgɔt de ne tɔs nèy pyak. Ka sede yin e ra ano, ko bemat bê tɔk, yin a sé bemât raa hom. 9 Tyɛng sede remo de Da hom a tɛ̀ yey na me, ano arɔng ma tɛ̀ yey na yin. Nàra hin e ji sangâl nesa na me, yaga na me tɛ̀ yey na yin. 10 Ka sede yin e gyeng badu hom, ko ma rɔda re nuyel na tɛ̂ yey na yin, tyɛng sede remo de ma ga gyenges badu Da hom, ko yɛ e re nuyel na tɛ̂ yey na me. 11 “Ma ga ha a yin pyɛ́ yemo, yaga na yin a vɔk yerê yey pyɛng de ma vɔk, yaga na yey pyɛng min ye sila hɛ ding-ding arɔng. 12 Redu de me nɔng in a ret ngan: Tɛ̀ in yey na bemin, tyɛng sede remo de ma tɛ̀ yey na yin. 13 Vit a mwat de a vɔk tɛ̂ yey de ha dal hemo, hɛ à mwat a nɔng neken mɛ yaga besa mɛ. 14 Yin a sé besa hom, ka sede yin e ra pyɛ́ de me nɔng in redu e ra yɛ̄. 15 Mê to me tang in, à bemât fwom wɛt, yaga mwât fwom a tɔk pyɛ de dalɔ mɛ a sé ra wɛt. Ko mê tang in, à besa, yaga ma ga ha a yin kayɛ pyɛ de ma wok yi na Da hom. 16 A sé e yin vɛ de yin a kasa me wɛt; ko a sé e me wɛ de ma kasa hin, na me tɛ̀ in na yin a wɔ̀ ra pyɛ́ ryat pyak yerê yemo de yê ros. Ano kwong, Da hom a rɔda nɔng in kayɛ pyɛ de yin e ra wôn yɛ e ji reza hom. 17 Ma sé nɔng in redu remo ngan: Tɛ̀ in yey na bemin.”
Bemât jey bê kyɛ́ ɛn bemât raà Yɛsu
18 “Ka sede bemât jey be kyɛ́ ɛn hin, ko bàre hin, bá kana kyɛ́ ɛn me gyam na be kyɛ́ ɛn hin. 19 Ka sede yin a yâng sé bemât jey yemo, ka bemât jey o ba yâng simo hin sede bemɛ̀n. Ko ma ga kasa hin yi e ji bemât jey o, ko yaga ano, yin a sé vê jey yemo wɛt. Pyɛ ma yemo de ya tɛ̀, bemât jey o be kyɛ́ ɛn hin. 20 Bàre hin na há de ma kana ha a yin wɔgɔ, ‘Vit a mwât fwom de a dal dalɔ mɛ na nerey.’ Sede remo de behak ba ga tak a me reyɔm, ano arɔng yɛn a rɔda tak a yin reyɔm. Sede remo de behak ba ga gyeng reha hom, ano arɔng yɛn a rɔda gyeng reha min. 21 Ko yɛn a rɔda tak a yin reyɔm, yaga yin a sé benang; yɛn a rɔda ra ano, yaga yɛn a tɔk yɛ mwat de a tomo me wɛt. 22 Ka sede ma yâng vey na me ha na yɛn wɛt, ka ba yâng vɔk banɛn wɛt. Ko a remo de ma ga ha na yɛn, ba vɔk pyɛ de bê ha na be dul mɛ̀ bato mɛn wɛt. 23 Kawɛ mwat de e kyɛ́ ɛ me e kyɛ́ ɛ Da hom arɔng. 24 Ka sede ma yâng ra e tē mɛn yerê tomong de vit a mwat de a ga sang ra vɛ, ka yɛn a yâng vɔk banɛn wɛt. Ko a remo, ba ga di pyɛ́ de ma ga ra mo, ko mwa ano, yɛn a kyɛ́ ɛn me mwa na Da hom arɔng. 25 Ko pyɛ́ yemo ya té, yaga na há de bà jɛk e Bwok-basa Badu mɛn he bin sila wɔgɔ, ‘Ba bɛɛ me ves, mwa ano de ma ra pyɛ cak vyes wɛt.’ 26 “Mwat Sɛlɛ a sé kyè vey. E yɛ à Gabik de he dura tsak há e ra Dagwi wɛshɛrɛk, ko he yi na Da hom. Jeng de mê kyè wɔ na Da hom, mê tomo hɛ̄ vey na yin, ko hê ha a yin há e ra me sede mwât nuha. 27 Ko yin arɔng yin ê ha a bemat há e ra me, yaga yin á kana sè tanga me yimo jeng de ma hwo basa a bemat.
1 “Ma ga ha a yin pyɛ́ yemo, yaga na yin kwon ye bugurɛk wɛt. 2 Ba rɔda pat in yi e ji nesâ bemât duk rê fongol. Mwin, jeng ye kyè vey de kawɛ mwat de ê mɔrɔ hin ê bare, a sé ra pyɛ de ya jam a Dagwi. 3 Bê ra a yin ano, yaga yɛn á kana tɔk Da hom kɛ me wɛt. 4 Ko ma ga ha a yin pyɛ́ yemo, yaga na jeng de yê té, yin ê bare, ma kana ha a yin e ra yɛ̄ gyam.”
Fwôm Gabik Jɛrɛ
“Ma ga ha a yin pyɛ́ yemo yimo yi e jeng de yin a hwo raa me wɛt, yaga ma kana sè tanga yin. 5 Ko a remo, ma ga vey bagât toyo vɔk na mwat de a tomo me. Ko vit a mwat hwak e ji min de a sé rangal me kwɔn de ma sé kyè vɔk ɛ̀. 6 A remo, yey min ye lashe hɛ, yaga pyɛ́ de ma ga ha a yin. 7 Ko ma sé ha a yin tsak o: A dal a yin na me kyè. Yaga, ka sede ma kyè wɛt, ko Mwat Sɛlɛ a rɔda vey na yin wɛt. Ko ka sede ma kyè, mê tomo hɛ vey na yin. 8 Jeng de ê vey, a rɔda dura a bemât jey wɛshɛrɛk wɔgɔ, báre mɛn ha sé tyɛng wɛt e ra pyɛ de banɛn ba sé, na e ra mwat de a sé cik e bayîs Dagwi, na e ra gwong de Dagwi a rɔda ra shɔt. 9 Báre mɛn o ha sé tyɛng wɛt e ra pyɛ de banɛn ba sé, yaga yɛn a tɛ̀ gap mɛn e ra me wɛt. 10 Báre mɛn o ha sé tyɛng wɛt e ra womo de a sé cik e bayîs Dagwi, yaga mê toyo vɔk na Da hom, ko yin ê to di me wɛt. 11 Ko báre mɛn o ha sé tyɛng arɔng wɛt e ra gwong de Dagwi a rɔda ra shɔt, yaga ba ga kana gang womo de a sé re negwɔm e ra jey yemo na shɔt. 12 “Ma vɔk bwang pyɛ́ pyak de ma rɔda ha a yin e ngyen, ko yê dal gap min a remo. 13 Ko jeng de Gabik de he dura tsak há e ra Dagwi hê vey, hê tɛ̀ in na yin a tɔk tsak hâ mwa de he yi na Dagwi. Hê ha há yi na retô hɛ pyɛ hɛ wɛt, ko hê ha há de he wokos yi na Da hom; hê to dura a yin pyɛ́ de ya sé kyè wɔ̀ té. 14 Hê tɛ̀ bemat be di gbɔng nerey hom, yaga hê jut há hom na he ha a yin hɛ. 15 Kayɛ pyɛ de Da hom a vɔk ya sé nyang. Pyɛ ma yemo de ya tɛ̀, ma ye, Gabik o hê jut há hom, ko hê ha a yin hɛ.”
Lashê yey hê tɛ́ ɛ yey pyɛng
16 “Bwang jeng tyɔng zɔng, yin ê to di me wɛt, ko e bamâ jeng tyɔng, yin ê to di me.” 17 Bemât masâ fwom mɛ behak ba yâng bemɛn, “E sɛ́ de a sé ha arɛt? A ye, bwang jeng tyɔng zɔng, wot ê to di ɛ wɛt, ko e bamâ jeng tyɔng, wot ê to di ɛ. Ko a to ye, pyɛ́ yemo mo yê té, yaga a sé kyè wɔ na Da mɛ. 18 E sɛ́ de a ha jeng de a ha neha nemo wɔgɔ, ‘jeng tyɔng’ arɛt? Wot a tɔk há de a sé ha wɛt.” 19 Yɛsu a tɔk, yɛn e simo be rangal hɛ. Yaga ano, a yang ɛn, “Há hom hemo de ma ye, ‘bwang jeng tyɔng zɔng, yin ê to di me wɛt, ko e bamâ jeng tyɔng, yin ê to di me’, a sé e há ma hemo de yin a sé rangsâl bemin arɛt? 20 Tsak o mwin me ha a yin: Yin a rɔda tosho, yin ê ra sesin arɔng, ko e jeng yane bemât jey bê vɔk yey pyɛng. Neyey min na rɔda lashe hɛn, ko lashê yey min o ha rɔda tɛ́ ɛ yey pyɛng. 21 Bàre hin na jeng de hwā a sé rus e jeng tɔ: E sɔ reyɔm, yaga jeng tɔ mɛ ya ga vey. Ko e bama de a ga tɔ hwey o, e ye bam na reyɔm de a ga kana sɔ; e vɔk yey pyɛng, yaga a ga sɛ̀ mwat pwas. 22 A sé ano arɔng na yin: Neyey min ne lashe hɛn a remo, ko ma rɔda to ba di in. E jeng yane, neyey min na rɔda pɛngɛ, ko vit a mwat de ê tɔk sey ɛ̀ yey pyɛng min o yi na yin. 23 “E tuk o, yin ê ba rangal me pyɛ cak wɛt. Tsak o mwin me ha a yin: Kayɛ pyɛ de yin ê ra won na Da hom e ji reza hom, a rɔda nɔng in yɛ. 24 Vey e remo, yin a rɔngɔl nà ra wôn pyɛ cak e ji reza hom. Rá in wôn pyɛ́, ko bê nɔng in, yaga na yey pyɛng min ye sila hɛ.”
Yɛsu a ga re como e ra jey
25 “Vey e remo, ma ga ha a yin e ra pyɛ́ yemo na gwɔrɔ-há, ko jeng ye kyè vey de mê to ha a yin na gwɔrɔ-há wɛt. Ma rɔda ha na yin wɛshɛrɛk e ra Da hom. 26 E jeng o, e yin vɛ de yin a rɔda ra wôn pyɛ́ e ji reza hom. Me ye, e me wɛ de mê ra won o e to min wɛt, 27 yaga Da hom pyɛ mɛ a tɛ̀ yey na yin. A tɛ̀ yey na yin, yaga yin a tɛ̀ yey na me, ko yin a sey tsak o arɔng, ma vey yi na yɛ. 28 Ma vey yi na Da hom vey e jey yemo; ko a remo, ma ga vey bagât tik jey o, na me toyo vɔk na yɛ.” 29 Bemât masâ fwom mɛ ba yang ɛ, “Di, pyɛ de hwà sé ha a remo ya sé a wot tɛɛrɛ, hwà to sé ha na gwɔrɔ-há wɛt. 30 A remo, wot a tɔk, hwà tɔk kayɛ pyɛ. A sé a hwo gbing-gbing wɛt na hwo rangâl bemat pyɛ de ba sé bare, ka sede hwó simo na hwo tɔk nerangsal de yɛn a vɔk. Pyɛ ma yemo de ya tɛ̀, wot a sey tsak o, hwà vey yi na Dagwi.” 31 Yɛsu a yang ɛn, “A sé a remo wɛ de yin a sé sey tsak o arɛt? 32 Ko jeng ye kyè vey, mwin ya ga vey, de ba rɔda shara hin. Kawɛ e ji min ê kyè vɔk e lɔ mɛ, ko yin ê tik me nju hom. Ko mwa ano, ma sé nju hom wɛt, Da hom a sé tanga me. 33 Ma ga ha a yin pyɛ́ yemo, yaga na yey min ye dyɛng, yaga yin a sé sangal e ji nesa na me. E jey yemo yin a rɔda di reyɔm. Ko vɔk in yey ting, ma ga re como e ra jey!”
Yɛsu a ra won yaga tó mɛ
1 E bama de Yɛsu a yɛnɛ neha nemo, a tɛ̀ bayis mɛ vɔk e lagwi, a ye, “À Da, jeng ya ga vey. Dura a bemat gbɔng nerêy Hwey mō, yaga na Hwey mō mo he bin dura a yɛn gbɔng nerey mō. 2 Yaga hwà ga nɔ̂ng hɛ reto e ra bemât mwa, yaga na he bin nɔ̂ng mwa bemat de hwà tɛ̀ vɛ e vɔ hɛ neken gbak-gbak. 3 Ko neken gbak-gbak o na sé ngan: Bemat o bē tɔk o, hwo nju mō zɔng de hwà sé tsak Dagwi, na be to tɔk Yɛsu Kristi de hwà tomo hɛ vey e jey. 4 Ma ga dura a bemat gbɔng nerey mō e jey yemo; ma ga yɛnɛ fwom de hwà nɔng me na me ra. 5 A remo, à Da, nɔng me gbɔng nerey e nuyel mō, yerê gbɔng nerey de ma kana vɔk tanga hwo gyam na be yong jey.”
Yɛsu a ra won yaga bemât masâ fwom mɛ
6 “Ma ga dura hwo wɛshɛrɛk na bemat de hwà kasa e jey yemo na hwo nɔng me hɛn. Bá sè bemo, ko hwà nɔng me vɛ. Bá gyenges reha mō, 7 ko a remo, ba tɔk, kayɛ pyɛ de hwà nɔng me ya yi na hwo. 8 Ma ga ha a yɛn reha de hwà ha a me, ko ba ga sey rɛ. Ba tɔk, a sé mwin, ma vey yi na hwo, ko ba to sey tsak o, a sé e hwo de hwà tomo me. 9 “Ma sé ra won yaga yɛn. A sé yaga bemât jey de ma sé ra won wɛt, ko a sé yaga vemo de hwà nɔng me vɛ, yaga yɛn a sé bemo. 10 Mwa vemo de ba sé benang ba to sé bemo, ko mwa vemo de ba sé bemo ba to sé benang arɔng. A sé yi na yɛn de be di gbɔng nerey hom. 11 Ma ga vey bagât toyo vey na hwo. Mê sè e ji jey yemo wɛt, ko yɛn ê rɔngɔl e ji jey o. À Da, hwo de hwà sé jɛrɛ, gyepes hɛn na retô reza mō, reza de hwà kana nɔng me. Gyebes hɛn, yaga na yɛn a tɛ́ ɛn vining, sede remo de wot a sé vining arɔng. 12 E jeng de ma rɔngɔl na yɛn, ma gyepes hɛn, ko ma gyenges hɛn na retô reza mō de hwà kana nɔng me. Vit a hwak e ji mɛn de a ga wey, sɛ̌ yɛ de a sé gbing-gbing na a wey, yaga na pyɛ de bà jɛk e Bwok-basa Dagwi ye sila. 13 A remo, ma ga vey bagât toyo vey na hwo. Ko ma sé ha pyɛ́ yemo jeng de ma rɔngɔl e ngamo e jey, yaga na yɛn a bin vɔk yey pyɛng ding-ding e gwong de me ma vɔk yey pyɛng ding-ding. 14 Ma ga ha a yɛn há mō. Yaga ano, bemât jey ba kyɛ́ ɛn hɛn, yaga yɛn a sé vê jey o wɛt, tyɛng sede remo de me arɔng ma sé wo jey o wɛt. 15 Ma sé ra won wɛt na hwo pat ɛn yi e jey yemo; ko ma sé ra won na hwo bin gyepes hɛn, yaga na Shetan, wo neves, a kwon ra ɛn wɛt. 16 Yɛn a sé vê jey yemo wɛt, tyɛng sede remo de me arɔng ma sé wo jey yemo wɛt. 17 Tik ɛn jaram, na yɛn a sè bemo na tsak o. Há mō ha sé tsak o. 18 Tyɛng sede remo de hwà tomo me e jey, ano arɔng ma tomo hɛn e jey o. 19 A sé yaga na me sɛlɛ hɛn de ma sé tik tó hom jaram. Ma sé ra ano, yaga na yɛn arɔng yɛn a tik bato mɛn jaram mwin, na be sè bemo.”
Yɛsu a ra won yaga bemât raa mɛ mwa
20 “A sé yaga yɛn zɔng de ma sé ra won wɛt, ko a sé yaga vemo de ba rɔda wok reha hom yi na yɛn arɔng, ko yi ano, yɛn ê tɛ̀ gap mɛn e ra me. 21 Ma sé ra won, yaga na yɛn mwa yɛn a bin sè vining. Tyɛng sede remo de hwo, à Da, hwà sé gwining na me, ko me ma sé gwining na hwo, ano arɔng, tik na yɛn a sangal e ji nesa na wot. Yi ano, bemât jey ba rɔda sey tsak o, a sé e hwo de hwà tomo me. 22 Gbɔng nerey de hwà kana nɔng me, e nɛ de ma nɔng ɛn arɔng, yaga na yɛn a bin sè vining, tyɛng sede remo de hwo tanga me wot a sé vining. 23 Cap-hâ vining a yet ngan: Me ma sé sangal e ji nesa na yɛn, ko hwo hwà sé sangal e ji nesa na me. Tik na be tɛ́ ɛn vining mwa, yaga na bemât jey be tɔk, a sé e hwo de hwà tomo me, ko hwà tɛ̀ yey na bemât raa hom, tyɛng sede remo de hwà tɛ̀ yey na me. 24 “À Da, me simo na yɛn vemo de hwà nɔng me be bin sè tanga me e kwɔn de ma sé ɛ̀, na yɛn a di gbɔng nerey hom. Hwà kana nɔng me gbɔng nerey, yaga hwà tɛ̀ yey na me yimo gyam na be yong jey. 25 À Da, hwo de hwó gas badu e tē, mwa ano de bemât jey ba tɔk o wɛt, ko me ma tɔk o. Ko bemât raa hom vemo ba tɔk, a sé e hwo de hwà tomo me. 26 Ma ga dura a yɛn wɛshɛrɛk mwat de hwà sé, ko mê re nuyel na ra ano. Yi ano, yɛn ê kyɛm na yɛn a tɛ̀ yey na behak e gwong de hwo hwà tɛ̀ yey na me, ko me, mê sangal e ji nesa na yɛn.”
Bemat ba vo Yɛsu
1 E bama de Yɛsu a yɛnɛ won o, yɛ tanga bemât masâ fwom mɛ ba hàla kwɔn o, ko ba ye dɔ a Kerɔt Kidrɔn. E gura gworo mo, bwi hwak gwa sɛ̀, ko BeYɛsu mo ba wɔ̀ yel e ji gwɛ. 2 Yuda, de a sé kyè wɔ̀ row Yɛsu, á kana tɔk kwɔn o, yaga Yɛsu tanga bemât masâ fwom mɛ ba dop manas e hwomo. 3 Ano kwong, Yuda a jut regyɛng bemât como, tanga bemât gyeng Gbɔng Duk Re Fongol behak de begbɔng bepiris tanga BeFarisi ba tomo hɛn; ko mwa hɛn ba kyè vɔk e bwi mo. Ba vɔk ɛ̀ bekywa-kya, na nekya semwol, tanga pyɛ̂ como. 4 Yɛsu á kana tɔk kayɛ pyɛ de ya sé kyè wɔ té na yɛ. Yaga ano, a vey e nuyel, a sɛ̀ ɛn, ko a yang ɛn, “Yin e jāma wà arɛt?” 5 Ba toyo a yɛ, ba ye, “Yɛsu wo Nazarɛt.” A yang ɛn, “A sé e me wɛ.” Yuda de a row ɛ a sé tumal e hwomo tanga yɛn. 6 Jeng de Yɛsu a yang ɛn, “A sé e me wɛ”, yɛn a gwɛ̌ sek na bama, yɛn a gaba e vwel. 7 A to gwɛ̌ rangal hɛn gbak, a ye, “Yin e jāma wà arɛt?” Yɛn a yang ɛ, “Yɛsu wo Nazarɛt.” 8 Yɛsu a yang ɛn, “Ma ga ha a yin, a sé e me wɛ. Ka sede a sé e me de yin e jāma, ko tík in bemat vemo be kyè.” 9 A ha ano, yaga na há de á kana ha he sila wɔgɔ, “À Da, e ji bemat de hwà nɔng me, vit a mwat gwining de ma ga vuru hɛ.” 10 Ko Simɔn Bitrus de a vɔk wal a hwɔltɔ wɛ, ko a tara sam darwêy bepiris, a tùt a yɛ fwông vwɔ yege. Ba tâng sam o, à Malkus. 11 Yɛsu a yâng Bitrus, “Gyira wal mō e ji fwal wɛ! A sé a hwo, mê sɔ shî reyɔm de Da hom a nɔng me na me sɔ wɛt arɛt?”
Ba wɔ́ na Yɛsu e nuyêl Hanas
12 Gwɔ̀m bemât como tanga bemat mɛ, mwa na bemât gyeng Gbɔng Duk Re Fongol ba vo Yɛsu, ko ba rɔgɔs hɛ. 13 Ba tānga wɔ na yɛ na Hanas e ngyen. Hanas o á sè tya Kayafas, de á sè darwêy bepiris e shey o. 14 Á sè e Kayafas o de á kana nɔ̂ng bemât nuyêl BeYuda redu wɔgɔ, a dal naka na mwat gwining a ku e tô mwa bemat.
Bitrus a tono na Yɛsu
15 Simɔn Bitrus tanga mwât masâ fwôm Yɛsu mo hwak ba raa Yɛsu. Mwat wane mo á sè mwat de darwêy bepiris á kana tɔk ɛ. Yaga ano, ba tik ɛ na a raa Yɛsu wɔ e lalâ lɔ darwêy bepiris. 16 Ko Bitrus a tumal e ruhûp lɔ mo e majey. Mwat de darwêy bepiris á kana tɔk ɛ a to ɛ, a wɔ̀ hanat na hwong de a gyenges ruhup o, ko a yel na Bitrus. 17 Hwong o a yâng Bitrus, “Hwo arɔng hwà sé gwining e ji bemât masâ fwôm mwat o wɛt arɛt?” Bitrus a yang ɛ, “Wey, ma sé wɛt.” 18 Gul gwa sɛ́; yaga ano, bemât fwôm lɔ mo tanga bemât gyeng Gbɔng Duk Re Fongol ba pɛl kya na hwalang, ba sé tumal e hwomo, ba sé wok kya. Ko Bitrus a wɔ̀ tumal e de wôk kya mo arɔng.
Darwêy bepiris a rangsâl Yɛsu neha
19 Darwey bepiris a rangsâl Yɛsu neha e ra bemât masâ fwom mɛ tanga e ra basa mɛ. 20 Yɛsu a yang ɛ, “Ma ga ha a jey neha wɛshɛrɛk. Kayɛ jeng ma ga basa e beduk re fongol tanga e Gbɔng Duk Re Fongol, e nekwɔn de BeYuda mwa be tula hɛn ɛ̀, ko vit a há de ma ha e lɛrɛ. 21 Yaga sɛ́ de hwà sé rangsal me arɛt? Rangâl bemat de ba wok neha hom, na be ha a hwo. Yɛn a tɔk pyɛ de ma ga ha a yɛn.” 22 Jeng de Yɛsu a ha há hane, gwining e ji bemât gyeng Gbɔng Duk Re Fongol de a sé tumal e hwomo a fala hɛ, a yang ɛ, “Gwong a gwane de hwô ha na darwêy bepiris arɛt?” 23 Yɛsu a yang ɛ, “Ka sede ma ha há ves, dura a bemat nevês hɛ.” 24 Ko Hanas a tomo na yɛ e rɔgɔs vɔk na Kayafas, yɛ darwêy bepiris.
Bitrus a to tono na Yɛsu gbak
25 Simɔn Bitrus a rɔngɔl e tumal e de wôk kya. Bemat o behak ba yang ɛ, “Hwà sé gwining e ji bemât masâ fwôm mwat o wɛt arɛt?” Bitrus a tono, a ye, “Wey, ma sé wɛt.” 26 Gwining e ji besam darwêy bepiris de a sé câng mwat de Bitrus á kana tùt a yɛ fwong a yang ɛ, “A sé e hwo de ma kana di o e ji bwi tanga yɛ wɛt arɛt?” 27 Bitrus a to tono, ko e ji jeng o, rungat wa dak segwɔm.
Ba wɔ́ na Yɛsu e nuyêl Pilatus
28 Bop nagasi, ba sogo yi e lɔ Kayafas, ba kyè na Yɛsu vɔk e gbɔng lɔ gwɔmna de á sè WoRoma. BeYuda pyɛ mɛn yɛn a yel e lɔ mo wɛt, yaga yɛn a simo be tik bato mɛn jɛrɛ, yaga na yɛn a bin re pyɛ̂ Nzem Gyilsit Nelɔ BeIsrayɛl. 29 Yaga ano, Pilatus a nusu wɔ na yɛn, a rangal hɛn, “Yin a tɛ̀ kûn mwat womo e ra sɛ́ arɛt?” 30 Yɛn a toyo a yɛ, yɛn a ye, “Ka mwat womo a sé mwat vwes wɛt, ka wot a yâng nára hɛ e vɔ mō wɛt.” 31 Pilatus a yang ɛn, “Kyè in na yɛ pyɛ min, na yin a ra a yɛ shɔt e gwông badu min.” Ko BeYuda mo yɛn a yang ɛ, “Wot a vɔk reto na wot a yɛrɛ a mwat shɔt reku wɛt.” 32 Ko di, pyɛ yemo ya té ano, yaga na Yɛsu a bin ku e gwong de á kana ha, ê ku. 33 Pilatus a to yel e ji lɔ mo, a yila Yɛsu, a rangal hɛ, “Hwo wɛ hwà sé Gbɔng Gwɔ̀m BeYuda arɛt?” 34 Yɛsu a toyo a yɛ, a ye, “Rángal hemo ha vey yi na báre mō, kɛ ha sé há de ba ha a hwo e ra me arɛt?” 35 Pilatus a yang ɛ, “A sé a hwo, ma sé WoYuda arɛt? A sé e bemat mō vɛ tanga begbɔng bepiris de ba nára hwo e vɔ hom. Hā a me, e sɛ́ de hwà ra arɛt?” 36 Yɛsu a ye, “Segwɔm hom sa sé sê jey yemo wɛt. Ka segwɔm hom sa sé sê jey yemo, ka bemât raa hom ba yâng ra yol, yaga na be dul BeYuda nà vo me. Wey, segwɔm hom sa sé sê jey yemo wɛt.” 37 Pilatus a yang ɛ, “Ano ā! Hwà sé ha wɔgɔ, hwà sé gbɔng gwɔ̀m a?” Yɛsu a toyo a yɛ, a ye, “Hwà ha yɛt wɔgɔ, ma sé gbɔng gwɔ̀m. Pyɛ de ya tɛ̀, ma vey e jey à yemo, ya sé yaga na me ha a bemat e ra tsak há. Pyɛ ma yemo de ya tɛ̀, ba tɔ me e ji jey yemo. Kawɛ mwat de e simo tsak há e wet betong na neha hom.” 38 Pilatus a rangal hɛ, a ye, “E sɛ́ de be tâng yɛ, à tsak há arɛt?”
Ba yɛrɛ a Yɛsu shɔt reku
E bamâ há hane, Pilatus a to nusu wɔ e majey vɔk na BeYuda, a yang ɛn, “Me ma sɛ̀ mwat womo na pyɛ cak de mê gang ɛ mɛ̀ wɛt. 39 Ko e ra negwɔn min me dopse viri a yin mwât ngyang gwining e jeng kanɛ Nzem Gyilsit Nelɔ BeIsrayɛl. Yin e simo me viri a yin Gbɔng Gwɔ̀m BeYuda arɛt?” 40 Yɛn a shusha gwolwɛlɛ, ba tē, “Wey, wot e simo hɛ wɛt! Wot e simo Barabas!” Yɛ Barabas o á kana sè gbik.
1 E bama mo, Pilatus a jut Yɛsu, a tɛ̀ be dak ɛ na zining. 2 Bemât como ba tsipta kpîn negwɔm na serɔgɔ, ko yɛn a tɛ̀ a yɛ wɛ e rato. Yɛn a to tɛ̀ a yɛ gwogbɔng gworugu yerê gwo begbɔng begwɔ̀m de gwa sé zwey. 3 Yɛn a sǎ e de kyese na yɛ, ba tang ɛ, “Nekên Gbɔng Gwɔ̀m BeYuda ne ros!” Ko yɛn a dak ɛ na vɔ mɛn. 4 Pilatus a to nusu e majey wɔ na BeYuda, a yang ɛn, “Di, ma sé kyè wɔ̀ nusu na mwat womo mo, yaga na yin a tɔk, ma sɛ̀ ɛ na pyɛ cak de mê gang ɛ mɛ̀ wɛt.” 5 Jeng de Yɛsu a nusu, a rɔngɔl na kpîn negwɔm serɔgɔ e rato mɛ, ko a rɔɔ tɛ̀ gwogbɔng gworugu de gwa sé zwey o arɔng. Ko Pilatus a yang ɛn, “Di in, mwat a womo!” 6 Sede begbɔng bepiris tanga bemât gyeng Gbɔng Duk Re Fongol ba di ɛ, ba shusha gwolwɛlɛ, ba tē, “Bē kak ɛ e ra cɔ́gɔt! Bē kak ɛ e ra cɔ́gɔt!” Ko Pilatus a yang ɛn, “Kyè in na yɛ, yin pyɛ min, na yin a wɔ̀ kak ɛ e ra cɔ́gɔt. Me ma sɛ̀ ɛ na pyɛ cak de mê gang ɛ mɛ̀ wɛt.” 7 BeYuda mo ba yang ɛ, “Wot a vɔk redu, ko e ra redu mo, a sé gbing-gbing na a ku, yaga yɛ a jut tó mɛ, a sé Hwey Dagwi.” 8 Jeng de Pilatus a wok há hemo, bengyip ba gwɛ̌ vo ɛ. 9 Ko a to yel e ji lɔ, a yâng Yɛsu, “Hwà sé yi e gwa arɛt?” Ko Yɛsu a toyo a yɛ na pyɛ cak wɛt. 10 Yaga ano, Pilatus a yang ɛ, “Hwó simo na hwo ha na me wɛt arɛt? Hwà tɔk, ma vɔk reto na me viri hwo, kɛ na me tɛ̀ be kak o e ra cɔ́gɔt wɛt arɛt?” 11 Yɛsu a toyo a yɛ, a yang ɛ, “A sé e Dagwi de a nɔng o reto rane mo. Ka a yâng sé ano wɛt, ka hwô yâng vɔk reto rehak e ra me wɛt. Yaga ano, renɛ̂n mwat de a nára me e vɔ mō ra dal remo.” 12 Jeng de Pilatus a wok ano, a jāma gwong na a viri Yɛsu; ko BeYuda ba re nuyel na shushâ gwolwɛlɛ, ba tē, “Ka sede hwô viri mwat womo à, ko hwà dura, hwà sé sâ Da vwel BeRoma wɛt. Yaga kawɛ mwat de a jut tó mɛ sede gbɔng gwɔ̀m a sé ra retek na Da vwel BeRoma.” 13 Jeng de Pilatus a wok há hane, a nusu na Yɛsu e majey, a sangal e gwofwa mwât shɔt e kwɔn de ba tâng hɛ, à Kwɔn De Ba Lolom Hɛ. E ji relêm BeYuda ba tâng hɛ, à Gabata. 14 Tuk hane mo há sè tûk yong pyɛ́ e jeng Nzem Gyilsit Nelɔ BeIsrayɛl. Jeng o yá sè sede tê-gwi. Ko Pilatus a yâng BeYuda mo, “Di in, Gbɔng Gwɔ̀m min a womo!” 15 Ko yɛn a shusha gwolwɛlɛ, ba tē, “Kyè na yɛ! Wey na yɛ! Kak ɛ e ra cɔ́gɔt!” Pilatus a rangal hɛn, “Yin e simo na me kak gbɔng gwɔ̀m min e ra cɔ́gɔt arɛt?” Ko begbɔng bepiris ba toyo a yɛ, ba ye, “Wot a vɔk gbɔng gwɔ̀m gwining zɔng, yɛ à Da vwel BeRoma.” 16 Ano kwong, Pilatus a nára Yɛsu e vɔ mɛn, yaga na be kak ɛ.
Ba kak Yɛsu e ra cɔ́gɔt
Bemât como ba jut Yɛsu, ba kyè. 17 Yɛ pyɛ mɛ a wut cɔ́gɔt-kak mɛ, a nusu yi e repomo vɔk e kwɔn de ba tâng hɛ, à Kwɔ̂n Gwokup Ratô Mwat. E ji relêm BeYuda ba tâng hɛ, à Gɔlgɔta. 18 Kwɔn a hane de ba kak ɛ e ra cɔ́gɔt. Yɛn a to kak bemat behak beba, gwining e kahɛ hagat mɛ. Yɛsu a sé e tē mɛn. 19 Pilatus a jɛk pyɛ de ya tɛ̀ ba kak ɛ, ko ba tɛ̀ e ra cɔ́gɔt o. Pyɛ de a jɛk a yet ngan: YƐSU WO NAZARƐT, GBƆNG GWƆM BEYUDA. 20 Ba jɛk pyɛ mo e ji balem batat, vɛ à relêm BeYuda, na rê BeRoma, na rê BeGirik. Bemat pyak ba basa jɛk o, yaga kwɔn de ba kak ɛ̀ Yɛsu ha sé bagat na repomo. 21 Ko begbɔng bepiris vê BeYuda ba yâng Pilatus, “Hwo jɛk ‘Gbɔng Gwɔ̀m BeYuda’ wɛt; jɛk ngan: ‘Mwat womo a ye, a sé Gbɔng Gwɔ̀m BeYuda.’ ” 22 Ko Pilatus a ye, “Pyɛ de ma ga jɛk, e yɛ à yane.” 23 E bama de bemât como ba kak Yɛsu e ra cɔ́gɔt, yɛn a jut berugu mɛ, ba gas vɛ nelɔ nenaas, kawɛ mwat na lɔ mo mɛ. Yɛn a to jut rugu mɛ gwo ji mo de ba tolo gwɛ wɛt, ba lɔk gwɛ sana man gwɛ e dem hak. 24 Yɛn a ye, “Wot hama gwɛ wɛt. Tik na wot a ra cáca e ra gwɛ, na wot a tɔk mwat de ê re gwɛ.” Hemo ha té, yaga na pyɛ de bà jɛk e Bwok-basa Dagwi ye sila wɔgɔ, “Yɛn a gas berugu hom e bato mɛn. Yɛn a ra cáca e ra rugu hom gwo ji mo, na be tɔk mwat de ê re gwɛ.” Ko pyɛ ma yane de bemât como mo ba ra. 25 Bemat de ba tumal bagat na cɔ́gɔt de ba kak ɛ̀ Yɛsu, yɛn vɛ à neng mɛ, na gwa neng mɛ hwā mo, na Marya hwâ Kilopas, tanga Marya wo Magdala. 26 Jeng de Yɛsu a di neng mɛ tanga mwât masâ fwom mɛ de a tɛ̀ yey na yɛ ba sé tumal bagat, a yâng neng mɛ, “À neng-gwɔ, hwey mō a hemo.” 27 Ko a yâng mwât masâ fwom mɛ mo, “Neng-gwɔ mō a womo.” Yi e jeng o, mwât masâ fwom mɛ mo a pere jut ɛ na a sangal na yɛ.
Rekû Yɛsu
28 E bamâ pyɛ́ yane, Yɛsu a tɔk, fwom mɛ mwa gwa ga yɛnɛ hɛ. Ko a ye, “Yey hom ye hwɔshɔ.” A ha ano, yaga na pyɛ de bà jɛk e Bwok-basa Dagwi ye sila. 29 Nshî jwaatat na sé e rwey e hwomo. Ko yɛn a jut sòso, ba sing wɛ e ji nshi mo, ko yɛn a tɛ̀ wɛ e ra mapâk hísɔ̀p, ba nára wɛ e nu mɛ. 30 Yɛsu a suyu nshi mo, a ye, “Gwa ga yɛnɛ hɛ.” Ko a ye det a rato mɛ, a hàla neken mɛ.
Ba luga Yɛsu e kuhagat
31 Tuk hane há sè tûk yông pyɛ́ gyam yaga Tuk Shábat. E rà negwɔn BeYuda, a jam na bavîn bemat be sè e ra tɛ̂t cɔ́gɔt-kak e Tuk Shábat wɛt. Tuk Shábat o há sè gbɔng tuk. Yaga ano, bemât nuyêl BeYuda ba ra won na Pilatus na a simo be kwɔrɔs bol bemat o, yaga na be gyirik vɛ̄ yi e ra cɔ́gɔt-kak o. 32 Ano kwong, bemât como ba vey kwɔrɔs bol mwat o wo mɛsɛng tanga ve vane arɔng de ba kak ɛn tanga Yɛsu. 33 Ko jeng de yɛn a wul na Yɛsu, yɛn a di, a ga kana ku. Yaga ano, yɛn a kwɔrɔ bol mɛ wɛt. 34 Gwining e ji bemât como mo a jut bāra mɛ, ko a luga mɛ̀ Yɛsu e kuhagat. Ko e ji jeng o, nemi tanga nshi na nusu yi e rebek mɛ. 35 Mwat wane de a di pyɛ́ yane mo a nɔng nuha e ra yɛ̄, ko nuha mɛ mo ha sé tsak o. Yɛ a tɔk, a sé ha tsak o, ko a sé ha a yin pyɛ́ yemo, yaga na yin arɔng yin a sey tsak o. 36 Pyɛ́ yemo ya té ano, yaga na há de bà jɛk e Bwok-basa Dagwi wɔgɔ, “Bê kwɔrɔ kup mɛ hwak wɛt”, he sila. 37 E kwɔn o hak e Bwok-basa mo, bà to jɛk: “Bemat ba rɔda bɛrɛng mwat de ba luga hɛ.”
Lɛrɛ̂ Yɛsu
38 E bama mo, Yɔsɛf wo Arimatiya de á sè mwât raà Yɛsu e lɛrɛ, yaga a wokos bengyip bemât nuyêl BeYuda, a wɔ̀ ra won na Pilatus, na a simo a yɛ a jut revîn Yɛsu, na a wɔ̀ lɛrɛ. Pilatus a simo a yɛ, ko a wɔ̀ jut rɛ, a kyè na rɛ. 39 Nikodemus arɔng, yɛ de á kana wɔ́ na Yɛsu nabwalak, a raa Yɔsɛf. A vey na behal mir tanga alowe de ba wuna vɛ. Nedirîk behal o na sé sede kilo kuru batat (30 ). 40 Yɛn beba ba jut berugu bepɛng berat o, ko ba hanas revîn Yɛsu na vɛ, ba tɛ̀sɛ behal nesang nerat o mo tyɛng na negwɔn lɛsɛ̂ bemat ne BeYuda. 41 E kwɔn de ba kak ɛ̀ Yɛsu mo, bwi hwak gwa sɛ̀. Ko e ji bwi mo, sak pas bá sɛ̀ de ba ga sang lɛrɛ ɛ̀ mwat wɛt. 42 Sede remo de tuk o há sè tûk yông pyɛ́ gyam yaga Tuk Shábat, ko yaga sak o bá sè bagat na kwɔn o, yɛn a lɛrɛ Yɛsu e ji mo.
Sene Yɛsu yi e reku
1 Bop nagasi Tuk Wusal jeng de jey ya rɔngɔl mwangalang, Marya wo Magdala a wɔ́ e sak o. Sede a wul, a di ba ga kana gang gwofwa yi e rwi sak o. 2 Yaga ano, a tele wɔ na Simɔn Bitrus tanga mwât masâ fwom de Yɛsu a tɛ̀ yey na yɛ, a yang ɛn, “Ba ga jut Darwey yi e sak, ko wot a tɔk kwɔn de ba tik ɛ ɛ̀ wɛt!” 3 Ko Bitrus tanga mwât masâ fwom o yɛn a sogo, yɛn a kyè vɔk e sak o. 4 Mwa hɛn yɛn a tele, ko yɛ mwât masâ fwom o a sey ɛ̀ yêl Bitrus, a tānga wul sak o. 5 A ye ngyuk, a ye ganga e ji sak o, a di berugu bepɛng berat o, ko a yel e ji mo wɛt. 6 E bama mo, Simɔn Bitrus a wul e bama mɛ, a pere yel e ji sak o, ko a di berugu de ba sé e hwomo. 7 A to di kerugu de bá kana tɛ̀ e ra ratô Yɛsu. Ka sé na berugu bepɛng berat o mo wɛt, ka sé e kwɔn o hak detu e gunung. 8 Ano kwong, yɛ mwât masâ fwom de a tānga wul e sak o a yel arɔng, a di pyɛ́ yane mo, ko a sey tsak o, ba ga sene Yɛsu yi e reku. 9 Vey e jeng o, yɛn a rɔngɔl nà tɔk cap-hâ pyɛ de bà jɛk e Bwok-basa Dagwi wɔgɔ, gbing-gbing na Yɛsu a sene yi e reku. 10 E bama mo, bemât masâ fwôm Yɛsu mo ba toyo vɔk e lɔ.
Yɛsu a dura a Marya wo Magdala tó mɛ
11 Marya á sè tumal e jey e vwâ sak o, a sè tosho. Sede a sé tosho ano, a ye ngyuk na a ye ganga e ji sak o, 12 ko a di betom-lagwi beba de ba tɛ̀ berugu bepɛng. Ba sé sangal e kwɔn de bá kana lasha ɛ̀ revîn Yɛsu, gwining e dem de rato mɛ á kana sè ɛ̀, ko gwining e dem de bol mɛ bá kana sè ɛ̀ arɔng. 13 Yɛn a rangal hɛ, ba ye, “À neng-gwɔ, hwó tosho sɛ́ arɛt?” A toyo a yɛn, a ye, “Ba ga jut Darwey hom. Ko ma tɔk kwɔn de ba tik ɛ ɛ̀ wɛt.” 14 Sede a ha ano, a doyo, a di Yɛsu e tumal e hwomo, ko a tɔk, e Yɛsu wɛt. 15 Yɛsu a yang ɛ, “À neng-gwɔ, hwó tosho sɛ́ arɛt? Hwó jāma wà arɛt?” A sé a Marya sede e mwât fwôm bwi mo. Yaga ano, a yang ɛ, “À da, ka sede a sé e hwo de hwà jut ɛ, ko dura a me kwɔn de hwà tik ɛ ɛ̀, yaga na me wɔ̀ jut ɛ.” 16 Ko Yɛsu a yang ɛ, “À Marya!” A doyo, a di ɛ, ko a yang ɛ na relêm BeYuda, “À Raboni!” Hɛ à, à Mwat Basa. 17 Yɛsu a yang ɛ, “Hwo kaba me wɛt, yaga ma rɔngɔl nà toyo vɔk na Da hom e ngyen. Ko kyè, na hwo wɔ̀ ha a begwa hom, ma sé kyè wɔ toyo vɔk na womo de a sé Da hom na Da min arɔng, a sé Dagwi hom na Dagwi min arɔng.” 18 Ano, Marya wo Magdala a kyè, a wɔ̀ ha a bemât masâ fwôm Yɛsu, a ga di Darwey, ko a ha a yɛn mwa pyɛ́ yane de a ha a yɛ.
Yɛsu a dura a bemât masâ fwom mɛ tó mɛ
19 Nahywegelêk tûk mɛsɛng e sati mo, bemât masâ fwôm Yɛsu ba tula hɛn e lɔ hak, ko ba bangas ri duk, yaga ba wokos bengyip bemât nuyêl BeYuda. E jeng o, Yɛsu a vey, a tumal e tē mɛn, ko a yang ɛn show, a ye, “Tik na neyey min ne dyɛng!” 20 E bama de a ha ano, a dura a yɛn vɔ mɛ tanga kuhagat mɛ. Ko jeng de bemât masâ fwom mɛ ba di Darwey mɛn, ba vɔk yey pyɛng sizɔng. 21 Yɛsu a to yang ɛn, “Tik na neyey min ne dyɛng! Sede remo de Da hom a tomo me, ano arɔng, ma sé tomo hin.” 22 Ko a pɛl ɛn na nesong mɛ, a ye, “Séy in Gabik Jɛrɛ. 23 Ka sede yin e hàla a mwat hwak banɛn mɛ, Dagwi a ga hàla a yɛ vɛ, ko ka sede yin e hàla a mwat hwak banɛn mɛ wɛt, Dagwi a ga hàla a yɛ vɛ wɛt.”
Yɛsu tanga Tomas
24 Tomas, gwining e ji bemât masâ fwom kuru na vɛ beba, de ba to tang ɛ, à Shambya, á kana sè tanga yɛn wɛt jeng de Yɛsu á kana wɔ̀ dura a yɛn tó mɛ. 25 Ko bwang bemât masâ fwom o ba yang ɛ, “Wot a ga di Darwey!” Tomas a yang ɛn, “Sɛ̌ ma tānga di bavis bekpɛk e vɔ mɛ e ngyen, na me tɛ̀ kwɛn vwɔ hom e bavis o, na me to tɛ̀ vwɔ hom e kuhagat mɛ, ko mê sey tsak o na há hemo ko tyɔng wɛt.” 26 E bamâ sati gwining, bemât masâ fwôm Yɛsu ba to tula hɛn e ji lɔ mo. Tomas arɔng a sé e hwomo na yɛn. Ri duk o ba sé e banga, Yɛsu a vey, a tumal e tē mɛn, ko a yang ɛn show, a ye, “Tik na neyey min ne dyɛng!” 27 Ano, a yâng Tomas, “Tɛ̀ kwɛn vwɔ mō e ngamo, ko di vɔ hom! Nára vwɔ mō, na hwo ra mɛ̀ kuhagat hom! Hwo to tó yey wɛt, ko sey tsak o, a sé e me!” 28 Tomas a yang ɛ, “Hwà sé Darwey hom! Hwà sé Dagwi hom!” 29 Yɛsu a yang ɛ, “Hwà sé sey tsak o, yaga hwà sé di me na bayis arɛt? Vê yey pyɛng a vemo de be tɛ̀ gap mɛn e ra me sana di na bayis mɛn.”
Retîn hâ bwok-basa gwomo
30 Yɛsu á kana to ra pyɛ̂ bes cak pyak e bayîs bemât masâ fwom mɛ. Ba jɛk pyɛ́ mo e bwok-basa gwomo wɛt. 31 Ko pyɛ́ yemo, ba jɛk yɛ̄ e bwok-basa gwomo, yaga na yin a sey tsak o, Yɛsu a sé Hwey Dagwi, ko a to sé Mwat de Dagwi a kasa na a sey bemat. Ba jɛk yɛ̄, yaga na yin a bin sɛ̀ neken, ka sede yin a tɛ̀ gap min e ra yɛ.
Yɛsu a dura a bemât masâ fwom mɛ tó mɛ
1 E bamâ pyɛ́ yemo, Yɛsu a to dura a bemât masâ fwom mɛ tó mɛ e jeng de yɛn á sè e Gworep Tiberiyas. Pyɛ mo ya té ngan: 2 Simɔn Bitrus, na Tomas de ba to tang ɛ, à Shambya, na Natanayel de á sè yi e Kana wo Galili, na nèy neba ne Zɛbɛdayus, tanga bemât masâ fwôm Yɛsu beba behak bá sè e dem hining mwa hɛn. 3 Simɔn Bitrus a yâng bemɛn, “Ma sé kyè wɔ̀ vos betɔk.” Ko yɛn a yang ɛ, “Wot ê wɔ tanga hwo arɔng.” Yɛn a nusu, ba yel e ji dwa-nshi, ko mwa naturuk nane yɛn a vo pyɛ cak wɛt. 4 Sede gasi ha vey bagât ye gbey, Yɛsu a vey, a tumal e rekwogom. Ko bemât masâ fwom mɛ yɛn á kana tɔk, a sé e yɛ, wɛt. 5 Yɛsu a rangal hɛn, “À bewen, yin a ga vo pyɛ cak wɛt arɛt?” Yɛn a yang ɛ, “Ey.” 6 A yang ɛn, “Barak hin segun min e vwɔ yegê dwa-nshi mo, ko yin ê sɛ̀ vɛ.” Ano, yɛn a barak segun o, ko yɛn a vos betɔk o pyak, yɛn a tɔk hwɔshɔ segun o wɛt, yaga betɔk o ba kat. 7 Mwât masâ fwôm Yɛsu de Yɛsu a tɛ̀ yey na yɛ a yâng Bitrus, “A sé e Darwey!” Jeng de Simɔn Bitrus a wok, a sé e Darwey, a rɔgɔs rugu mɛ gwo ji mo, yaga á kana pat gwɛ, ko a gyili e ji gworep o. 8 Bwang bemât masâ fwôm Yɛsu ba raa hɛ e ji dwa-nshi, ko yɛn a hwɔshɔ segun de betɔk ba kana sila sɛ. Yi e kwɔn de yɛn á kana sè ɛ̀ vɔk e rekwogom a sé yikyik wɛt, a sé sede mita naga (100 ) zɔng. 9 Jeng de yɛn a nu ɛn e rekwogom o, yɛn a di kyâ hwalang. Yɛn a di betɔk e ra kya mo na kpam-tuk arɔng. 10 Yɛsu a yang ɛn, “Vey in na behak e ji betɔk de yin a sé mɛsɛ̂ng vo mo.” 11 Simɔn Bitrus a yel e ji dwa-nshi, ko a hwɔshɔ segun o vey e rekwogom. Begbɔng betɔk ba sila sɛ, nepyak vɛ na sé naga na kuru batungun na vɛ betat (153 ). Mwa ano de betɔk o ba sé pyak, ko segun o sa hama hɛ wɛt. 12 Yɛsu a yang ɛn, “Vey, ré in pyɛ́.” E ji bemât masâ fwom mɛ mo, vit a hwak de a vɔk yey ting na a rangal hɛ, “Hwà sé wà arɛt?” Yɛn a tɔk, a sé e Darwey. 13 Yɛsu a vey, a jut kpam-tuk o, a nɔng ɛn, ko a ra ano na betɔk o arɔng. 14 Hemo ha sé hê netat de Yɛsu a dura a bemât masâ fwom mɛ tó mɛ yi e jeng de bá kana sene hɛ yi e reku.
Yɛsu a ha na Bitrus
15 E bama de ba yɛnɛ rê pyɛ́, Yɛsu a yâng Simɔn Bitrus, “À Simɔn, hwêy Yohana, hwà tɛ̀ yey na me hwo dal mɛ̀ vemo arɛt?” Bitrus a yang ɛ, “Ey, à Darwey, hwà tɔk, me simi hwo.” Yɛsu a yang ɛ, “Bɛrɛng nèy tyīmit hom naka.” 16 A to yang ɛ hê neba, “À Simɔn, hwêy Yohana, hwà tɛ̀ yey na me arɛt?” A toyo a yɛ, a ye, “Ey, à Darwey, hwà tɔk, me simi hwo.” Yɛsu a yang ɛ, “Gyenges tyīmit hom.” 17 A to yang ɛ hê netat, “À Simɔn, hwêy Yohana, hwó simi me arɛt?” Bitrus a lashe yey, yaga Yɛsu a rangal hɛ hê netat, “Hwó simi me arɛt?” A yang ɛ, “À Darwey, hwà tɔk kayɛ pyɛ, hwà tɔk, me simi hwo.” Yɛsu a yang ɛ, “Bɛrɛng tyīmit hom naka. 18 Tsak o mwin me ha a hwo: Jeng de hwá rɔngɔl wen, hwá kana tɛ̀sɛ yɔ̀m mō pyɛ mō, ko hwá kyě kyè vɔk e kahɛ kwɔn de hwá simo. Ko jeng de hwô kwop, hwà rɔda nára vɔ mō, ko mwat hwak a rɔda tɛ̀ a hwo yɔ̀m mō na a kyè na hwo vɔk e kwɔn de hwó simo wɛt.” 19 Yɛsu a ha ano, yaga na a bin dura mɛ̀ yerê gwong de Bitrus ê ku, ko yi e gwong gwane ê nɔ̂ng Dagwi nerey. E bama de a ha ano, a yang ɛ, “Raa me!”
Yɛsu na mwât masâ fwom mɛ hwak
20 Bitrus a doyo, a di mwât masâ fwom de Yɛsu a tɛ̀ yey na yɛ, a sé raa hɛn. A sé e yɛ de á kana ye yɛndɛng vɔk na Yɛsu e dem rê pyɛ́, na a rangal hɛ, “À Darwey, e wà de ê row o arɛt?” 21 Jeng de Bitrus a di ɛ, a rangâl Yɛsu, “À Darwey, mwat womo ɛ?” 22 Yɛsu a yang ɛ, “Ka sede me simo na yɛ a nàra sɛ̌ jeng de mê ba toyo, sɛ́ mo ya sɛ́ arɛt? Raa me zɔng à hwo.” 23 Yaga ano, há ha shara hɛ e ji bemât raà Yɛsu wɔgɔ, mwât masâ fwom o ê ku wɛt. Ko Yɛsu a ha wɛt wɔgɔ, ê ku wɛt; a ye, “Ka sede me simo na yɛ a nàra sɛ̌ jeng de mê ba toyo, sɛ́ mo ya sɛ́ arɛt?” 24 E yɛ mwât masâ fwôm Yɛsu de a ha há e ra pyɛ́ yemo, ko a jɛk yɛ̄ arɔng. Wot a tɔk, nuha mɛ ha sé tsak o.
Yɛnɛ mo
25 Pyɛ́ cak ya sé pyak de Yɛsu a ra. Ka sede ba yâng jɛk pyɛ́ yane mo mwa jijining e bebwok-basa, a sé a me sede jey pyɛ yɛ ya yâng tɔk jut bebok-basa de ba yâng jɛk o wɛt.