1 À ndùku mô shyəma mbyi yimi, ma tum à Fùyèn hì làwû. Wù ndùku mô ghê Yènfù, a mô kəbi wûn Yènfù, 2 À ndùku mô kə nâ a yìmi, tum à Fùyèn mô kə nâ ghê Yènfù amok. 3 À tì fate wûn mwə̀ mù jɨ̀m a Yènfù a jyak, ma à ndùku bu ha wun ma ghɨ tà tì fati jə shyə ale ghe ghɨ hì mô ma ghɨ ti fatî. 4 Wù ndùku kəta chyənà, chyənà àtɨ̂n fo yi ban ha ghɨta. 5 Ban mi yin bana atɨ̂n à bɨn a finana, ma bɨn a finana mɨ ghɨ̂n wi hi lɨmhî. 6 Yènfù tì tum wùt, ghɨ toŋte na Jon, 7 na wù ben ma wù hi fôktè kum yi ban mi yîn shyəma ghɨta yu gha ghe a wù jìsà ma ghɨ bimi. 8 Jon ndùku wijə yi ban mi yê nâ ha wun a ngɨŋ. Wù tì ben kə te fòktì kum yi ban mi yîn. 9 Ban mi yinâ Jon ndùku mô fòktì àtɨ̂n, ndùku mô kə nâ yi ban hamok te yi tì bèna a mbyî hi fo yi ban ha ghɨt à jɨ̀m. 10 Tum à Fùyèn mi yina ndùku mô a mbyî, biyani ghɨt a mbye mana Wûn nâbi te mbye àtɨ̂n ndùku mô ma à fati Wûn. 11 Wù ben, tan kə nâ a ghɨna yi lak, ghɨt a wuna ghɨ laka tunhi hi fye wûn. 12 Biyani, ghɨt ale fyi wûn bimi ha wûn, wù fo a jyak na ghɨna hi mô wana Fùyènà. 13 Ghɨna tà tì kahi jə a wana Fùyènà wu lum afa wùt kòŋà wu bwɨ mwəlà mù wûn ghɨna hi mô wana wuna. À ndùku mô kə nâ yi lêm yi Fùyènì na ghɨna hi mô wana wuna. 14 Tum mi yinâ tî kahi hì mô kəbi wût, ben chyəti a ghàhnà fùtɨ̂n. Ghàh tì yen jyak a wuna, a mô a jyak a Wâ Fùyèn wù mòk we fu ndùku kəta te wù lo a Bè wun à ngwùŋ ben ma wù ti lun nì kwohi seni fî lun nâ kəbi nì ghə ghe ghɨ mô hamok kum Fùyèn. 15 À mô wûn we Jon ndùku jîsà bê a jyə̂ yì ta na, “Wùna mò a we mu ndùku jîsà ha ghàn na, wùt bênàlò a mu yi bàm, chyâ mu beka ghɨ tì shihi bwə mu ma wù hì mô.” 16 Kwohi seni wuni mô ma yi ti lun kpenâ, ghàhnà à jɨ̀m ghɨ hì kəta yutìnì kə a tô yile. 17 Yènfù tì shihi fo yi sâk yi chya a Musìs a wô. Kwohi seni che shihi bèn, nâbi nì ghə ghe ghɨ mô hamok, chya a Jisòs Klistù a wô. 18 Wùt tà timi yen jə Yènfù, à chwùti Wâ Fùyèn wù mòk we wù mò kəbi Fùyèn, yê mô kə a Bè wun a ngwùŋ chwûtè te Yènfù mò ha ghɨta. 19 Ghɨt a tihena ghɨt a Jûs ghe ghɨ ndùku mô a Jèlusalèm tì tum ngàŋsù ndâ Fùyènsu nì ghɨta yi sah yi nda Lefì na yê buf ha Jon Fo Mòlû na, “Wù mò nde agha?” 20 Te ghɨna yèna hì bufa bê ni, Jon fôktì mihì kə yi mîhì na, “À wijə mu we ghɨ chwoka lema.” 21 Ghɨna fî buf kpenhi ha wun na, “Wò wu hì mô nâ nde? À mò wò Ìlajà ma?” Jon jis na yi wijə Ìlajà. Ghɨna fî buf na wò mò fòktì yì chìk ye ghɨ tì chwùne ma? Jon fî tunhi kə yi tunhî. 22 Ghɨna jis ha wun na, “Fòkti lê ha ghàh na wò mò nde? Ghàh khɨŋa kə nâ hi yu a wo yi jwô shyəma ghàh kahà yê fokti ha ghɨt ghe ghɨ tuma ghàh.” 23 Jon ki fôktì te fòktì Ìsayà tì jìsa na, “Mu mò wut we wù toŋa jîsà bê yi lak yi sùsi ya na, Ghàn fati lumu Bâba ma wu hi nânà ma wù shihi bèn ma wù chya atɨ̂n.” 24 À ndùku mô yâ, ma à tum ghɨt a Falàsî ghɨt ghɨ̂n ha Jon. 25 Ghɨna buf gokhì ha wun na, “Wò wijə we a ghɨ chwoka lema, bu Ìlajà, bu fòktì wù chìk we ghɨ tì chwùne, hì fo mòlû mù ghə?” 26 - 27 Jon fîsì na, “Mu Fo Mòlû ha ghàn kə nì mòlû mù jwò biyani bênà a wùt ashyə̂, wù mô kə nâ a ghàn a fùtɨ̂n chîn, ghàn khə wi, nâ mu kpene wi hi tè fèt te a kwôs ghe ghɨ yêntè gwusu wunsu wùsu.” 28 Nâ gha mɨ ghɨ̂n à jɨ̀m ndùku gânà yi tèk yi Betanì yi jin jwô Jodàn wu lùk afa Jon ndùku fo mòlû. 29 Tuku tì yû, Jon yen te Jisòs bènà, wù chwûtì wûn ha ghɨta jis na, “Wùna mò ni a mô Wâ Njyə̀ we Yènfù chinhe na wù lyê chyakhi be a mbyî. 30 À mò wûn we mu chehì fôktè ha ghàn na, ‘Wùt nè bênàlò a mu yi bàm, chyâ mu, beka ghɨ tì shihi bwə mu ma wù hì mô.’ 31 Mu chehì boŋa khə wi wûn biyani gha ye mu che be hì fo mòlû nì mòlû mù jwò mò hi bakte a təm a ghɨ̂tà shyəma wù nê shihi bèn ma ghɨt a Isalì yen à khɨli wûn.” 32 Yìna ndùku mô kəbi jîs yi fòktì yìlè te Jon tì jìsa na. “Mu yen te Yohnà Yulena chwo bênà a nyə̂ te à làtàta ben ndokò a wun a tû. 33 Mu khə wi wûn. Nâ mu che yen khɨli wûn kə kum gha ye Yènfù tì shihi tum a mu jis na, ‘Wò be yen nâbi nde te Yohnà Yulena chwo ndoko a wun a tû, wo hi khə na à mò wun we wù bèna hi tè fo mòlû ha ghɨta nì Yohnà Yulena.’ 34 Mu ti yen te gha mi yin gàna, hì fôktè ha ghàn na wùt wunâ mò Wâ Fùyèn.” 35 Tuku fî yû, Jon ghê jùmtìbàmsù wunsu sùbà yen timi wu lùk afa ghɨna ndùku yusa atɨ̂n, 36 wù yen Jisòs te wù chyàlà jis ha ghɨna na, “À chyàlà Njyə̀ à Fùyèn ni.” 37 Jùmtìbàmsu wun se yu ya lo hì yênà kə Jisòs yi bàm. 38 Jisòs kaha kî yen ghɨna bênà a wun a yi bàm buf ha ghɨna na, “Ghàn khɨŋa ghə?” Ghɨna fîsì na, “Labi, a mô na chichà, wò chyə afa?” 39 Wù jis ha ghɨna na, “Ghàn bê yen.” Ghê ghɨna yen yen luk we wù chyə̂ atɨ̂n, ma à hì mô a mbɨŋlu sù kìk wu yu kolô ghɨna yus kə afû ni tuku jyə̂ ghɨna ki lô. 40 Wùt wùlè atɨ̂n à ghɨt afa à bà ndùku mô Andùlù wâ nè Samùn Bità a wù tì ywo gha ye Jon jìsa jûmtì Jisòs. 41 Wù lo wu lùk afa Jisòs ndùku mô, khɨŋ yen nì wâ nè wûn Samùn jis ha wun na, “Ghàh ti yen Wùt we ghɨ chwoka lema a mô Klistù.” 42 Ni, wù lyi yen nì Samùn ha Jisòs. Jisòs yen wun jis na, “À mò wò Samùn a wâ Jon, biyani ghɨ nè hì toŋte wò chin na Sefàs.” Sefàs nì Bità mò kə yi yet yì mòk mô na yi wo. 43 À hì mô wu tuk wu kumtenu Jisòs shihi yèn a Galìlî, yen Filîb jis ha wun na wù jumti yi. 44 À ndùku mô ni, ma Filîb fwu ben a yi tèk yi Bèsadà a ye Andùlù ghê Bità ndùku chyə. 45 Filîb khɨŋ yen nì Nàtanyèl jis ha wun na, “Ghàh ti yen wùt we Musìs tì nyàka kum wûn a ŋwàklù yì sak, fòktìsu chiksu boŋ nyâk. Wù mò Jisòs wù Nasalì a wâ Josèf.” 46 Nàtanyèl buf na, “Nasalì, a shyə a jûŋà làhi fwo a Nasalì?” Filîb fîsì na wù ben ma wù yen. 47 Ni te Jisòs yena Nàtanyèl wu bênà, jis ha wun na, “À mò kə nâ wùt à Isalì a wù bênà ni. Wù jìsà kə hamok.” 48 Nàtanyèl buf ha wun na, “Wò gbi yàni hi khɨle mu?” Jisòs fîsì na, “Mu ye yen wò a yu afa wò yê hì mô a sah à fùkàk fu fikfù shyəma Filîb toŋa wò.” 49 Nàtanyèl ki jîs na, “Labi, wò mò Wâ Fùyèn, wò mò fə̀n à ghɨt a Isalì.” 50 Jisòs jis na, “Wò bimi beka mu ye jisa na mu te yen wò a yi sah à fùkàk fu fikfù. Biyani wò nè fê yenalò gha ale ghɨ chyâ yinâ.” 51 Wù jis yâ, fî jis kpenhi na, “Mu jìsà kə nâ hamok na, ghàn bè yenalò te nyə jìme ma anjèlsù Fùyènsu bê hi kwokâ chwô gbê kə tum à Wâ Wùt.”
1 Tuk mù tî chya mù bà, tuku yû, malâ yìlè hì mô yi tèk yi Kanà a Galìlî, nè Jisòs mô afû. 2 A mô ni, ma ghɨ ti boŋ lâkà Jisòs ghê jùmtìbàmsu wunsu a malâ afû. 3 Ghɨ ne nyu mihì mu lûk, nè Jisòs ben jis ha wun na, “Lùkû ti mî wu lùk wu malanu afân.” 4 Jisòs jis na, “Wò wu hì jîsà na mu ni ghə a wùt ywên? Yu mu tà ye kpen jə̂.” 5 Nè Jisòs jis yen ha ghɨt a fetana ghe ghɨ ndùku mô wu lùk wu malanu afû na, “Wù jis kəbi nâ ghə ghàn ni kə yâ.” 6 À ndùku mô ni, ma ghɨt a Jûs ti chwuf te ha khɨ̀ŋ tufa lem hi tè lèmà mòlû atɨ̂n nì hi tè sù wulu atɨ̂n na ghɨna hi yule a Yènfù ashyə̂. À ndùku mô a wu lùk wu malanu afân ma ghɨ ti ben tomti khɨŋ ghɨ̂n tufa, ghɨ ghakle kə ni, ghɨ mô hi kpite tom mù mòlû atɨ̂n mtât shyəma yì mòk lun. 7 Jisòs ki jîs ha ghɨt a fetana tɨna na, “Ghàn lunhi mòlû a khɨ̀ŋ afân.” Ghɨna tu mòlû lunhi khɨŋa tɨna. 8 Wù ki fê jìs ha ghɨna na, “Ghàn sef mùlè ma ghàn yê fo ha wùt we wù tihe gha malani yîn.” Ghɨna sef yen folò. 9 Ni te wù mòmà ma mù ti kahi ha mu lùk wù hì khə wi na mù lo afa agha. Biyani ghɨt a fetana ghe ghɨ tì to mòlû mù tɨ̂n khə. Wù ki toŋa lɨm à wùt ywên, 10 hì jîsà ha wun na, “Ghɨ yè bɨlà fo mu lûk mu jùŋ na ghɨ nyu ashyə̂ ghɨta nyû shihi tè saŋlî ghɨ ki bên nì me mù tòkà jwôfà wi, à gan ghə shyəma wò hi bênà nì mùna chin agha?” 11 Yìna mò gha kanani yi shyə ye Jisòs tì ne yi tèk yi Kanà a Galìlî hi chwùtè mihè a jyak a wuna, jùmtìbàmsu wunsu bimi na à mò we ghɨ chwoka lema. 12 À hì mô yi bàm atɨ̂n wù lô ghê nè wûn nì wana ne wuna nì jùmtìbàmsu wunsu hi chwo yèn yi tèk yi Kàbanùm hi chyəte kwok afû a mu tuk mùlè. 13 À ndùku bakhe yènà a mu tuk afa ghɨt a Jûs yè yə yi yə Daŋa Chyalani, Jisòs lo kwok a Jèlusalèm, 14 yen lye a bɨn a ndâ Fùyènà yen ghɨta mô afû, bəkle nyamsu mbòloŋsu, nì bwusu njyə̀sù, nì làtàmù, ghɨ le mô a tô wu bâŋ kwune mu kâ. 15 Wù fati fukwô sam jum fihi nyamsu na sù jɨ̀m a ndâ afû, sah waŋhi ka we ghɨta kwune, fî bâklì baŋ we ghɨna ndùku kwune ka a tô àtɨ̂n, 16 yen ha ghe ghɨna ndùku bəkle làtà me, kan jis ha ghɨna na, “Ghàn lyê fwu nì munù afân. Kə ghàn fati ndâ Ba mù te wu wən.” 17 Te wù jìsa ni, jùmtìbàmsu yɨ̂ŋtì te ghɨ nyàka a ŋwàklù Fùyèn na, “Səm à mì a wo ndâ, à Yènfù, lùmà kə ni.” 18 Ghɨt a Jûs kaha ben buf ha Jisòs na, “Wò làhi ne yi gha kanani hi chwùtì na a fo Fùyèn jyaka ha wò na wò hi nê gha kanana agha?” 19 Jisòs fîsì jis ha ghɨna na, “Ghàn shyakti ndâ Fùyèn yinâ, ma mu kahà ba kə a mu tuk mù tât.” 20 Ghɨna fî buf ha wun na, “A wò làhi kaha ba nda yinâ a mu tuk mù tât ma ghɨ tì lyi lɨ̂m mkìk njwò tufa hi ba yì yin agha?” 21 À ndùku mò ya Jisòs jîsà a ndâ Fùyèn, a mô kə nâ wu wun wu wunu. 22 Wù tî kpû kaha lôtì, jùmtìbàmsu kaha yɨ̂ŋtì na wù ndùku jîsà kə nâ ni, bimi gha ye ŋwàklù Fùyèn jìsa nì gha ghe Jisòs ndùku jîsà. 23 À ndùku mô te Jisòs mò a Jèlusalèm a mu tuk mù Dàŋa Chyalamù, ghɨta bimi na wù mò wùt we ghɨ chwoka lema, dô kə ni, beka gha kanana ghe ghɨna yena te wù ne. 24 Biyani Jisòs tê fo jə̀ ngɨŋ à wûn ha ghɨna beka wù ndùku khəlò chyənà su ghɨna su nâ sù jɨ̀m. 25 Wùt hì fê bu hi tè fòktì yi fôktì shyə ghe wùt mò ghɨna ha wûn beka wù khəlò kwâktu ghɨ̂tù.
1 Wùt wù tihena ghɨt a Jûs wùlè ndùku lâwû, yet yi wuni mô Nìkòdemùs, a mô wut a yi chìnte ghɨt a Falàsî. 2 Tuku jyə̂ tuk wule, wù yen yen Jisòs toŋti wun jis na, “Chichà ghàh khə kə nâ na à tum Fùyèn nì wò na wò bê hi yike ghɨta. Wùt wijə a wù mò hi tè nè chwènasu gha kanana sina a wò nè ni a bu kə na Yènfù mò ghê wûn.” 3 Jisòs jis ha wûn na, “Mu jìsà ha wò hamok na, wùt wi hi lye lùk wu fə̀n wù Fùyènù a bu kə na ghɨ kaha bwɨ wûn ha fê.” 4 Nìkòdemùs buf ha wun na, “Ghɨ ni mò yàni hi bwə wùt a fê ma wù ti ləma ni? Ba mu khə na wùt ləmâ wi hi kaha lye a nè wûn wu là na ghɨ bwɨ wûn agha?” 5 Jisòs fîsì na, “Mu jìsà ha wò kə nâ hamok na, wùt wi hi lye a wu lùk wu fə̀n wù Fùyènù, a bu kə na ghɨ bwɨ wun te ghɨ bwə ghɨta, fî kaha bwɨ wun a Yòhnà. 6 Wùt bwə kə a chyak a wùna biyani, Yènfù fo a Yohnà. 7 Kə wò hi mô nì kani te mu jìsa ha wò na ghɨ kəta hi kaha bwə ghàn à jɨ̀m a fê. 8 Wùt wi hi khɨle lum we Yènfù fo Yohnà ha ghɨta. Yi mô kəbi yi ghəl te fufa shihi chyà wo hi ywo te ghɨ kwô, khə wi na ghɨ lo afa, yênà afa agha? Kə te yi mô nì bwɨ Yòhnà.” 9 Nìkòdemùs jis ha wun na, “Mu tà yu khɨli gha mi yîn.” 10 Jisòs buf ha wun na, “A ni jìsà nâ wò mô nâ fòktì wù chìk yi lak yi Isalì ni, ywo khɨle wi gha ghɨ̂n?” 11 Mu jìsà ha wò kə nâ hamok na ghàh jìsà a ghâ khə, ma ghàh ti yên biyani ghàn bime wi. 12 Mu shìki jîs ha ghàn fə̂knà nì gha a chyə̂ afân, ghàn bime wi ma mu nê jis gha nyə ha ghàn ma ghàn bimi yàni? 13 Nâ wùt wù mòk tà timi lyi jə̂ a nyə̂ hi tè khə gha ghe ghɨ mô afû, a bu kə mu Wâ Wùt te mu lo a nyə̂ ben a chyə̂. 14 Ghɨ kəta hi ghaŋhe Wâ Wùt a tô fùkàk, kəbi yi ghəl te Musìs tì ghaŋhe funà ywô ghe ghɨ fate nì chani a yi lak yi sùsi, 15 shyəma nâbi nde we wù bime ha wûn ma wù khɨti chyənà ye yì bè mê wi, 16 beka Yènfù tî koŋ ghɨta mbye nâ haŋaŋ tum Wâ wûn wù mòk we wù ndùku kəta na à bimi nâbi nde ha wûn, ma wù nê tè kpû biyani ma wù bê hi kəta chyəna ghe ghɨ bè mê wi. 17 Yènfù tà tì tum jə Wâ wûn a mbyî na wù bê bobhi ghɨta kum besu ghɨna su. Wù tì tum na wù bê bonhi ghɨta. 18 “À bimi nâbi nde ha Wâ Fùyèn, ma Yènfù nê tê bobhe jə̀ wûn, à faŋ nâbi nde hi bimî ma à hi mô na Yènfù ti bobhi wûn beka wù ti tunhi na yi bime wijə a yi yet yi wan wù mòk we Yènfù kəta. 19 Yènfù bè saka à ghɨ̂t kum na bani che ben a mbyî ghɨta hì kôŋà wi, biyani kôŋà kə a bɨn a finana beka ghɨna nè be. 20 Nâ kəbi nde we wù nè gha be kòŋà wi bani, kôŋà wi hi fwo atɨ̂n na kə gha wuna ghɨ be ban a ndan. 21 Nâ kəbi nde we wù chyə chyəna chilichili fwo bè lò yi bân shyəma ghɨta hi yena hamok na wù nè a gha wu lum afa Yènfù khɨŋa.” 22 Te Jisòs jìsa mihe ghê jùmtìbàmsu wunsu, lô lyi yen atɨ̂n à yi lak yi Jùdiyà chyəti kwok ghê ghɨna, fo mòlû ha ghɨta. 23 À mô yâ Jon fo kəbi mòlû yi tèk yi Enòn a dâfà wi hi yè tàn a Salèm beka mòlû ndùku dô afû, ghɨta motè kə ni bê yena wûn wù fo mòlû ha ghɨna. 24 À ndùku mô yâ teka ghɨ lem Jon a chyâk. 25 Tuku yû tuk wule jùmtìbàmsù Jon su yîmì a gùfna ale ghê wùt à Jûs wùlè, kum lum we ghɨt a Jûs sò wunu atɨ̂n a ghɨna chyəna laka hi tè mò na ghɨna yule kpenalò a Yènfù ashyə̂. 26 Jùmtìsù Jon mi sê yen yen wûn, jis ha wûn na, “Chichà, wò ti yen wùt we ghàn à wûn chehì mô yi jin yi Jodàn yâ a we wò tì jìsa na à mò wûn we ghɨ chwoka lema yâ agha? Wù hì fo mòlû ha ghɨta chîn ghɨ yênà kə wun à jɨ̀m.” 27 Jon jis ha ghɨna na, “Nâbi nde nè kə gha ye Yènfù fo jyaka na wù hi nê.” 28 Nâ ghàn khəlò hamok te mu tì jìsa na à wijə mu we ghɨ chwoka lema. Yènfù tum mu ashyə̂ na mu bê fati lum wu wunu. 29 À ywê lɨm yè kəta kə lɨm à wùt ywên. Sô lɨm à wùt ywên we wù yè gâmtè wûn yè gbê kə wun a tum. Saŋle nâ haŋaŋ a yu afa wù ywo te lɨm à wùt ywên jìsà. À mò kəbi wu lum we a mu saŋle atɨ̂n ni. Saŋli mi mò chîn, ma yi ti lun kpên. 30 Wùt mu wunâ kəta hi tè ngaŋte yèn kə ashyə̂ mu chwote yênà kə a chyə̂. 31 We wù lo bena a nyə̂ kokne chyâlò nâbi nde, we wù mò kə wùt à chyə̂, jîsà kum kə a gha chyə. We wù lo bena a nyə̂ ngaŋte chyâlò nâbi nde, 32 fôktè kə ye wù yena fî yu lò biyani ghɨta ywo bime wi. 33 À ki bime nâbi nde gha ye wù jìsà, ma à hi mô na wù ti chwûtì na Yènfù jîsà kə nâ hamok. 34 Wùt mu wuna Yènfù tuma ni fòktè kə gha Fùyènì beka fu ti fo Yohnà wuna ha wûn fo mihì kə yi mihì. 35 Bì kôŋàlò Wâ wûn ma wù ti fo jyaka ha wûn na wù hi saka kə mwə̀ mù jɨ̀m a mbyî. 36 “À bimi nâbi nde ha Wâ Fùyèn, ma wù khɨti chyənà ye yì bè mê wi, ma à faŋ nâbi nde hi bimî ha Wâ Fùyèn, ma wù bê kpu beka lòn à Fùyèn ti faŋ a wun a tû.”
1 Te ghɨt a Falàsî tì ywo na Jisòs ti kwoti jùmtìbàmsu, fo mòlû ha ghɨna nâ hidù chyâ su Jon su. 2 Ghɨna ndùku jîsà biyani ma mòlû mù tɨ̂n ndùku fo wi nâbi Jisòs. À ndùku fo jùmtìbàmsu wunsu lesu. 3 Jisòs yu gha mi yin a ghɨ ndùku jîsà kum wûn ni, lo a Jùdiyà kaha yen a Galìlî, 4 shihi yèn tohna lumu a Sàmaliyà. 5 À hì mô te wù chyàlà a Sàmaliyà yen tan a yi tèk yile ghɨ toŋte na Sikà yi bakha yênà wu lùk wu fu chyə we Jakòb tì fo ha wâ wûn Josèf yâ, 6 ki bôt, yen chwo ndokò a ngwùŋ yì be ye Jakòb tì chɨma hi tè to mòlû atɨ̂n. Ma à hì mô nchwì tâ. 7 Wùt ywen wù Sàmaliyà wùlè ben hi to mòlû, Jisòs lon mòlû ha wûn jis na, “Fo mu nì mòlû ma mu nyu.” 8 À ndùku mô ni ma jùmtìbàmsu wunsu ti lyi yen a fùtɨ̂n à yì tèk hi yun a mwə̀ mù yə̂mù. 9 Wùt ywen àtɨ̂n jis ha Jisòs na, “Wò mò wut à Jûs mu mô wùt à Sàmaliyà? Wò gbi yàni hi tè lon a mòlû ha mu agha?” À ndùku mô yani ghɨt a Jûs nì ghɨt a Sàmaliyà nê kwonà wi gha. 10 Te wù bufa ni, Jisòs ki jîs ha wûn na, “Wò ye hì khə mwə̀ me Yènfù fo ha ghɨta fê khə wùt we wù lona mòlû muna ha wò, ma wò ti lon mòlû, a bu mòlû mù jwò, wù fo ha wò.” 11 Wùt ywen àtɨ̂n buf ha wun na, “Wò nè lyê afa mòlû mù tɨ̂n hi fo ha mu a bèbɨn, kəta wi shyə hi tû atɨ̂n, be yi mòlû tɨni laha lye ni agha? 12 A wò kwàktè na wò chyàlò bè bì wâhù Jakòb we wù tì fo be yi mòli yîn ha ghàh, nyo kəbi atɨ̂n kəbi nì mwəlà mù wûn nì nyamsu wunsu agha?” 13 Jisòs jis ha wun na, “À nyu nâbi nde mòlû munâ, ma toŋu wunu hi yimte kə yi yimtî. 14 Biyani, ma à nyu nâbi nde mòlû me mu fo ma kuŋ à mòlû bê tè fè yim a jə̀ wûn. Wùt ki nyo mòlû munâ ma mù kahi te yi tôk ma yi fwo a wun wù wùn, ma mù nì wûn ma wù khɨti chyəna ghe ghɨ bè chyâ mê wi.” 15 Wùt ywên à Sàmaliyà àtɨ̂n jis ha Jisòs na, wù fo mòlû mù tɨ̂n ha yi ma toŋu mòlû bê tè fè yima jə̀ yi, ma yi bê tè shik hi to mòlû yi be afân. 16 Jisòs fî jis kə ha wun na, “Ndu toŋa lɨm wâ ma ghàn à wûn bê yen mu.” 17 Wùt ywen àtɨ̂n jis na yi kəta wi lɨm. Jisòs ki jîs ha wûn na, “Wò jis kə nâ hamok na wò kəta wi lɨm. 18 Wò mò ni ma wò ti bimi lɨmànà à tân fwu kə ghɨna à jɨ̀m. Nâ we wò chyə a wûn a ndâ chîn a laha wijə nâbi lɨm wâ. Yi ni chwùtè na wò jìsà kə nâ hamok.” 19 Wùt ywen àtɨ̂n ki jîs ha wun na, “Mu ti yen na wò mò fòktì wù chìk a bâ. 20 Bì ghaha ndùku kokhe Fùyèn a kun afân biyani ghɨt a Jûs ti lem na ghɨ kəta hi tè kokhe Fùyèn a Jèlusalèm.” 21 Jisòs jis ha wun na, “Wùt ywên, mu jìsà ha wò hamok na, yu kwoka bênàlò a we ghɨ bè hi fê kokhe wi Yènfù a kun afân, kokhe wi nâbi a Jèlusalèm. 22 Ghàn ghɨt a Sàmaliyà ghàn khə wi nâbi wùt we ghàn kokhe, ghàh ghɨt a Jûs khə wùt we ghàh kokhe beka ghàh làhi fòktè lum we Yènfù mò hi bònhè ghɨt à jɨ̀m atɨ̂n. 23 Yu kwoka bênàlò, ghɨ jîsà ni ma wu hì mô kə nâ a chyə̂, ma Yohnà Fùyènà ni ma ghɨta hi kokhe funfu kə hamok a mô nki ghɨ̂t ghe Yènfù khɨŋa na ghɨ hi kokhe wûn 24 Yènfù mò a Yohnà, ghɨt ghe ghɨ kokhe wûn ghɨ kəta hi tè kokhe wûn hamok, kokhe kə nì jyak ghe Yohnà wuna atɨ̂na nè fo.” 25 Wùt ywên àtɨ̂n ki jîs ha wun na, “Mu khə na we ghɨ chwoka lema, a mô Klistù, nè bênàlò mô hi bèn hi fòktì nâbi ghə ha ghàh.” 26 Jisòs ki fôktè mihì ha wun na, “À mò mu we mu jìsà ha wò chin ni.” 27 Kə ni, te Jisòs jìsa, jùmtìbàmsu wunsu kaha ben yen te wù jìsà ghê wùt ywen hì mô nì kani, nâ wùt wù mòk a ghɨna fùtɨ̂n tà tì buf jə gha yile ha wùt ywen àtɨ̂n na, wò khɨŋa ghə agha? Tê buf kəbi gha yile ha Jisòs na, “À mò ghə wù jìsà ghàn à wùt ywen wùna agha?” 28 Wùt ywen àtɨ̂n lo de nam a wuna ghɨ mòla kaha lyi yen a yi tèk jis ha ghɨta na, 29 “Ghàn bê yen wùt we wù fòkte nâ gha ma à jɨ̀m ghe mu ndùku nê. A wi wun we ghɨ chwoka lema agha?” 30 Ghɨta fwu yen hi yen a wûn. 31 Wu mô afû jùmtìbàmsù chyate wun jîsà na, “Chichà yə shyətàfu.” 32 Jisòs jis ha ghɨna na, “Mu hì mô ma mu ti yə shyə yəna, ghàn khə wi gha kum ghə.” 33 Jùmtìbàmsù wunsu hì kante a ghɨna sù ngɨŋ bufa na, “Yi ni mò na wùt lè ye ben nì shyə yəna ha wûn ma?” 34 Jisòs ki jîs ha ghɨna na, “Shyə yəna ma mò kə hi nè yi fêt yi we wù tuma mu nì kôŋì, hi nè mihè yi fêt yi tɨni. 35 Ba ghàn khəlò ngàn yìlè ghɨ mâ na, ghɨ yomelò, a chya kə njoŋ sù kìk ghɨ kpilò. Biyani ghàn yen lê gha yile. Ghàn yusa ke kə yi kî te fùkmù kə̀kà. Mwə̀ mù yə̂mù mò ma mù ti byî mô kə hi tè kpì. 36 Nâ chîn mò ni ma wùt wù kpèna hì kpêlò ghɨ lâkà wûn. Wù kpê ghɨt a bime ghe ghɨ khɨte chyənà ye yì bè mê wi shyəma wûn ghê wùt wu yomena chîntè hi saŋlê. 37 Yi mô na ngàn yinâ na wùt wùlè yomê wùt wùlè kpê mô kə nâ hamok. 38 Mu ti tum ghàn na ghàn shik à kpi mwə̀ mù yə̂mù a fùk teka ghàn fet. Ghɨt a lô che fêt, ghàn mô hi kpì.” 39 Ghɨt a Sàmaliyà bimî yi tèk afû dô kə ni kum yi gha ye wùt ywen we ye jisa ha ghɨna na, “Wù ye fôktì nâbi ghə ghe mu time hì nê.” 40 Ghɨt a Sàmaliyà ben yen Jisòs ni hì chyate wûn na wù faŋ ghê ghɨna, wù chyə ghê ghɨna tuk mù bà. 41 Ghɨta fî ben yu yikî Jisòs bimilò, dô kə ni, 42 ki jîs ha wùt ywen we na, “Ghàh ti bimi chîn à wijə kum nì gha ye wò ye fokte ha ghàh. Chîn ghàh ti yu kə nâ yikînì nì ngɨŋ sahisu khɨli na a mò kə nâ wûn Bònhè à mbyî.” 43 Jisòs chyə tuk me mù bà lo yen a Galìlî. 44 À ndùku mô ni ma wù ti jis kə a wûn a ngɨŋ na, “Ghɨ tà timi hì kokhe fòktè Fùyèn wù lùk afa wù fwo atɨ̂n.” 45 À hì mô te wù ye tana a yi lak yi Galìlî ni, ghɨta afû fyi wûn nâ a jûŋ beka ghɨna mò ma ghɨ tî yên gha à jɨ̀m ghe wù tì ne a Jèlusalèm a mu tuk afa ghɨ ndùku yə Yə Daŋa Chyalani atɨ̂n. 46 Jisòs fî kaha yen yi tèk yi kanà yi lak yi Galìlî, wù lùk afa wù tì ne mòlû mù kahi a mu lùk yâ, yen wùt wù ta wùlè afû, wu fêtà ha fə̀n, wâ wûn mô wu khɨ̀ yafâ. 47 Wùt wù fèt mu wuna ben te wù ywo na Jisòs ti bên a Galìlî ma wù lo ben a Jùdiyà hì chyate Jisòs na wù bê chwuk wâ wûn wù lɨmà wù mò kə hi kpû. 48 Jisòs jis ha wun na, “Wùt ha ghàn wi hi bimî a bu na wù yen a chwena gha kanana te mu ne.” 49 Wùt wù fètana àtɨ̂n fî jis kə na, “Bèbɨn, nyàŋhi bî ma ghàh wò yen, à bu yâ ma wâ mù kpu.” 50 Jisòs ki jîs ha wûn na, “Wo yênà, wan wâ nè talò.” Wùt àtɨ̂n yu kə yâ lo lò, 51 shihi kolo yèn kwônà ghê ghɨta wuna ghɨ fetana ale, ghɨna jis ha wun na, “Wan wâ ti bonâ.” 52 Wu buf ha ghɨna na, gut atɨna ye mi yini? Ghɨna jis na, “Gut atɨ̂na ye mi nchwì.” 53 Bè wan àtɨ̂n khɨli na gut atɨ̂na ye mi kə wu yu afa Jisòs ye jisa ha yi na, “Wan wâ nè talò.” Ghɨt à jɨ̀m a wun yi sah yi nda bimî. 54 Yìna mò gha kanani yi kumteni te Jisòs tì ne a Galìlî te wù kaha yena a Jùdiyà.
1 À ndùku mô te gha mɨ ghɨ̂n gàna chyala, Jisòs kaha lo kwok a Jèlusalèm hi yə tuk wu chiku ghɨt a Jûs ale afû. 2 Chɨm ale mô a Jèlusalèm a ngwùŋ a jwô mbàn à sù njyə̀, ghɨ toŋte na Bèthsidà a jìs yi Hibùlùs. Ma ghɨ ti ba tala wìmù afû mù tân. 3 - 4 Jisòs kwok yen ni, ghɨt a yablena mô nì ghɨt a ngəhana atɨ̂n à mù wìmù tɨ̂n dô kə ni, ghɨt a fefana mô, nì ghɨta ma bâh wù wùnu ti kpû. 5 Wùt lè mô kəbi atɨ̂n à ghɨ̂t afû ma wù ti yaf wu lɨ̀m mtât njwò fama. 6 Jisòs ben yen ni te wù nìŋe afû, khɨli na wù ti yaf nâ wu yu dâ ki buf ha wun na, “Wò kòŋàlò hi ta?” 7 Wùt wù yafana àtɨ̂n jis na, “Bèbɨn, jwò nèkà nâbi wùni yu wùt hi bu shyəma wù lihi mu atɨ̂n. Yì nèkà mu shihi ghàlì hi yèn, ma à hì mô kə ma wùt shyə lyî a mo ashyə̂.” 8 Jisòs jis ha wun na, “Lòti lyì ghâm fafu ma wò hi gbê yênà.” 9 Te wù jìsa ni, wùt àtɨ̂n tâ, lyi ghâm fu wun fu hì gbê yênà. À ndùku mô ni a mô tuk wu laku wu ghɨt a Jûs, 10 ni ghɨt a tihena Jûs ale yen ni, ki jîs ha wùt mu wunâ na, “Lan mò tuk wu laku, saki bime wi na wò làhi tè gbè chyà nì ghâmfù.” 11 Wùt àtɨ̂n jis ha ghɨna na, “À jis wùt we wù chwuka mu na mu lyi ghâm famfu ma mu lo.” 12 Ghɨna buf ha wun na, “À mò nâ nde mu we wù jìsa na wò lyi ghâmfù ma wò hi gbê nì funfu agha?” 13 Ghɨ ndùku bufa ni wùt we Jisòs tì chwuka yâ khə wi na Jisòs mò nde agha, ma Jisòs ti lo lye a ghɨta fùtɨ̂n ghe ghɨ ndùku mô afû. 14 Jisòs fî yen wun a ndâ Fùyèn, jis ha wun na, “Wò ti tâ. Kə wò fî ni be, a bu ni, ma gha nê gan ha wò bəma chyâ yîn.” 15 Wùt àtɨ̂n ki lô a yu mefû yen fôktì ha ghɨt a Jûs na à ye chwuk Jisòs yi. 16 Ghɨna yîmì hi tè khɨŋle Jisòs, jîsà na à mò te wù chwuka wùt a wu tuk wu laku. 17 Biyani Jisòs jis ha ghɨna na, “Bom baha fètà kə yi fêt, mu boŋa kəta kə hi tè fèt kə yâ.” 18 Jîs yi wuni mi yê ni ghɨt a Jûs fî tok khɨŋ wu lum hi ywe wûn, beka wù khɨma sak yi tuk wu laku, tê dè kəbi yâ biyani hì fê toŋte Fùyèn na Bè wûn hi fè chwùtì na yi mò kəbi yi ghəl te Fùyèn. 19 Ghɨ ndùku ngane wun ni, Jisòs ki jîs ha ghɨna na, “Mu jìsà ha ghàn hamok na, wan wi hi nè yi ghâ a wun a ngɨŋ, wù mò hi nì yi gha ye wù yena Bè wûn nê. Beka Bì nè kəbi ghə a mô kə yì yîn ye wan nè.” 20 Yi ni mò ni beka Bì kòŋà wan, chwûtè nâbi ghə ghe wù nè ha wûn. Wù nè chwûtèlò ale ma wan ni, ghɨ chyâlà nâbi ghɨ̂n ma ghàn hi mô nì kani. 21 Kəbi yi ghəl te Bì lòhè ghɨta a yi kpû, wu ni ghɨna hi chyə̂, Wan ki kôŋ ma wù ni ma nâbi nde hi chyə̂. 22 Nâbi yani, Bì bu hi fè sak a wut. Wù ti fo jyaka na Wan hi saka nâ lum tù jɨ̀m, 23 shyəma ghɨt à jɨ̀m nê hi ngumle Wan kə yi ghəl te ghɨ ngumle Bì. Yi ni chwùtè na à faŋ nâbi nde hi ngumle Wan, ma à hi mô na wù tà ngumli jə Bì we wù tuma wûn. 24 “Mu jìsà ha ghàn hamok na, nâbi nde we wù ywo gha ye mu jìsà, bimi ha we wù tuma mu ma wù hi kəta chyə ye yi bè mê wi, ma ghɨ bê tè fè saka wùt mu wunâ. Yi chwûtè na wù ti tohna chya yi kpû hì chyə̂.” 25 Mu jìsà ha ghàn hamok na, tuku hì bakhe bênàlò mu jìsà ni ma wu shyə bakhâ na ghɨt ghe ghɨ mô te ghɨt a kputena yu jyə̀ Wâ Fùyèn. À yu nâbi nde ni te wù khɨŋa ma wù nê hi chyə̂. 26 Yi mô ni beka Bom ti bimi na, Wan hi nê ghɨta chyə̂. 27 Wù ti fo kəbi jyaka na mu hi saka beka mu mò Wâ Wùt. 28 Kə ghàn hi mô nì kani kum yìna meti beka yu bakha bênàlò na ghɨt ghe ghɨ mô a tu sì yu jyə̀ Wâ Wùt, 29 ma ghɨ loti a yi kpû, ma ghe ghɨ ndùku nê jùŋ, kwoti chyə ye yi bè mê wi, ma sak ghe ghɨ chehì nê be. 30 Gha yile wijə ye a mu mò hi nì a mu a jyak. Mu saka kə wu lum afa Yènfù jìsa na mu hi saka atɨ̂n. Yi ni chwùtè na mu saka kə yi ghəl beka mu nè wi gha ye mu kòŋà, biyani nê kə ye wùt we wù tuma mu khɨŋa na mu ni. 31 Mu ki kahi hì jîsà kum ngɨŋ à mì, ma ghàn tè bime jə̀ na gha ye mu jìsà mò hamok. 32 Mu khə na wùt lè jìsà lò kum mu, wù jìsà nâbi ghə kum mu yi hi mô kə hamok. 33 Ghàn che tum ghɨta ha Jon, Jon yen jis kə hamok kum mu. 34 Mu jìsà wi na wùt à mùsòŋ nê hi fôktè kum mu. Mu jìsà kə ni shyəma ghàn bimi ma ghàn bon. 35 Jon chehì mô kə te lâm ha ghàn. À ndùku mô tuk mùlè, ghàn kôŋà hi yute gha ghe wù jìsà, ghɨ bana te lâm, nê na ghàn hi saŋlê. 36 Mu kəta wùt wu jîsà kum mu chyâ Jon. Gha mɨ ghɨ̂n a mu nè jîsà kum mu, a mô ghe Bom fo na mu hi nê. A mô à ghɨ̂n ghe ghɨ chwûtè banhe na à tum Bom mu. 37 Nâbi Bom we wù tuma mu ti jis kum mu. Ghàn tà timi yu jyə̀ wûn, ghàn tà timi yen te wù kə̀kà. 38 Ghàn lèmà wi gha wuni a ghàn a təm beka ghàn tà bimi jə we a wù tuma. 39 Ghàn fatè taŋ ŋwàklù Fùyèn beka ghàn khə na ghàn nè yenalò lumu hi khɨte chyə ye yi bè mê wi. Ŋwàklù Fùyèn yinâ jîsà kəbi kum mu. 40 Biyani, ghàn bime wi hi bèn ha mu hi khɨte yi chyə mi yê. 41 Mu khɨŋa wijə na ghàn hi tuma kumtu ha mu. 42 Mu khəlò nki ghɨ̂t ye ghàn mò yini, khə na ghàn kòŋà wi Yènfù a ghàn a təm. 43 Mu ben ma à tum kə nâ Bom mu, ghàn faŋ hi bimî ha mu. Biyani ma wùt wùlè ki bên a wun a ngɨŋ ma ghàn bimi wûn. 44 Ghàn kòŋà hi tè tuma tu kum ha ngɨŋ sanisu, mômhè wi hi tè khɨte kum we wu bênà ha Yèn fe a fu mô kə fù mòk. Ghàn ni mò ni, ma ghàn bimi yàni? 45 Kə ghàn hi khə na à nè ngane mu ghàn ha Bom, à nè ngane kə Musìs ghàn, we ghàn lèmà kwâktì yani ha wûn. 46 Ghàn ndùku bime ha Musìs ma à hi mô na ghàn ti bimi ha mu beka wù ndùku nyâkà gha kum mu. 47 Ghàn bimi yàni ha mu bime wi gha ye Musìs tì nyàka agha?
1 Jisòs ni mihì gha mɨ ghɨ̂n lo daŋ yen yi jin yi lwi Galìlî yê, kəbi wu lwî we ghɨ ndùku toŋte na Tàbeliyàs yâ. 2 Shihi dàŋ, ghɨta daŋ a wun a yi bàm dô kə ni, beka ghɨna ndùku mô ma ghɨna ti yen chwesu gha kana se wù ndùku nê ha ghɨt a yablena, ghɨna tâ. 3 Jisòs daŋ ni, yen kwok ndokò a tô kùn ghê jùmtìbàmsu wunsu. 4 À ndùku mô ni, ma tuk mù Yə Daŋa Chyalani mù ghɨt a Jûs hì bakhe bênàlò. 5 Kə ni wù shihi kî yen ghɨta ghɨ dô kə ni, ghɨ bênà, wù buf ha Filîp na, “Ghàhnà nè yuna afa mwə̀ mù yə̂mù hi fo na ghɨt ghɨ̂n yə?” 6 Wù ndùku bufa ni khɨŋa kə hi mòm a Filîb, khə kə nâ gha ye wù mò hi nì. 7 Wù buf ni, Filîb jis na, “Ghɨ ki fêt wu ka a sù njoŋ fama wu wi hi kpên hi yun à mwə̀ mù yə̂mù shyəma nâbi nde afân môm a kə yi môm.” 8 Jùmtìbàm yì wûn yìlè ghɨ toŋte na Andùlù a mô wâ nè Samùn Bità ki jîs na, 9 “Wan wù tetana wùlè làwû afân, ma wù ye hì gbê nì tuk wu ban wù tân a mô ban a saŋa balì nì yila à bà. Biyani mwə̀ mù yə̂mù munâ kpene wi ha ghɨt ghɨ̂n.” 10 Jisòs jis ha jùmtìbàmsù wunsu na, “Ghàn jis ma ghɨt atɨna ndoko a chyə̂.” À ndùku mô ni wəlânù dô kə lùk wu tɨnu ni. Ghɨt atɨna chwo ndokò a chyə̂, lɨmànà mô a ghɨna fùtɨ̂n te kamsù tân. 11 Jisòs ki fye wu ban we fo àyòŋnà ha Yènfù, fo na ghɨ jyati ha ghɨta. Wù fî fyi yila ghê fo àyòŋnà ha Yènfù jyâtì ha ghɨta, nâbi nde yə kwut kə te wù kòŋà. 12 À hì mô te ghɨna yə kwuta, Jisòs jis ha jùmtìbàmsù wunsu na, “Ghàn kumti chyàk se su faŋa kə shyə ale lə̀ha halô.” 13 Ghɨna kumti chyàk se ghɨta tì yə behe, su lun kàsù njwòsù bà. 14 Ghɨt mɨ yen chwena gha kanana yîn a Jisòs ne, hì jîsà na, “À mô kə nâ fòktì yì chìk ye ghɨ tì chwùne na yì bè bênàlò a mbyî ni.” 15 Jisòs yen na ghɨ nè bê khɨte lèmàlò yi ha fə̀n a jyak, fî tok tet kwok yen a tô kùn kə wù nɨ̂ŋ. 16 À hì mô a wu yu kolô, jùmtìbàmsù wunsu kaha chwo yen a wu lwì, 17 lye a ngwùk hì kaha dâŋà yênà a Kàbanùm, tuku hì jyə bênà, Jisòs baha mò teka wù kwoti ghɨna. 18 A mô ni fufa ta ale chyâ shikà jwô nâ haŋaŋ. 19 Jùmtìbàmsu wunsu gbî hì tânà yênà mâlsu kìk, shihi kî yen Jisòs wu gbê bakha bênà ha ghɨna a tô mòlû. Ghɨna hì fânà nâ haŋaŋ. 20 Biyani, Jisòs jis ha ghɨna na, “Kə ghàn fan, à mò mu.” 21 Ghɨna hì saŋlê hi lyè wûn a ngwùk, chin kə ma ghɨna ti daŋ mihì a yi jin afû. 22 Tuku yû, ghɨt ghe yen na à chehì mô ngwùk yì mòk a yi jin yi lwi afû, a mô ye jùmtìbàmsù Jisòs su ye daŋa atɨ̂n, shihi dàŋ ni, Jisòs tê yènà jə̀ ghê ghɨna. 23 Ngwùksu lesu a Tàbeliyàs ben time a ngwùŋ wù lùk afa Jisòs tì bonhe mwə̀ mù yə̂mù yâ fo ha ghɨta na ghɨna yə. 24 Ghɨta dona ghe yen nâbi wùni yu na Jisòs fi wijə afû nì jùmtìbàmsu wunsu, lye a su ngwùk afû hì khɨŋa dâŋà yênà nì wûn a Kàbanùm. 25 Ghɨt atɨ̂na daŋ ni, yen Jisòs buf ha wun na, “Chichà wò ye bena afân a wùni yu?” 26 Jisòs fîsì jis ha ghɨna na, “Mu jìsà ha ghàn kə nâ hamok na, ghàn yê hì khɨŋa mu beka ghàn che yə̂ kwût, à bu njwo ghàn yena khɨle gha kanana ghe mu ne. 27 Kə ghàn hi nyɨŋa yi bàm yi mwə̀ mù yə̂mù mu mô hi bêf. Ghàn hi bɨlà nyɨŋa yi bàm yi mwə̀ mù yə̂mù me mù fo chyəna ghe ghɨ bè mê wi, a mô wûn Wâ Wùt hi fo ha ghàn, beka Bom Yènfù mò ma fu ti chwûtì a ndan na mu kətalò jyak atɨna.” 28 Ghɨna buf ha wun na, “Ghàh mò hi nè ghə hi tè nè gha ye Yènfù khɨŋa agha?” 29 Jisòs fîsì na, “Fêt yì Fùyènì mò na ghàn bimi ha we a ghɨ tuma a mbyî.” 30 Ghɨna fî buf ha wûn na, “Wo te nê nâ yìni chwena gha kanani shyəma ghàh yen ma ghɨ bimi wò? Wò te nê nâ ghə?” 31 Be be ghaha ti yə̂ mwə̀ mù yə̂mù me ghɨ toŋte na manà yâ yi lak yi sùsi, kə yi ghəl te ghɨ mô ma ghɨ ti nyak a ŋwàklù Fùyèn na, ‘Wù tî fo mwə̀ mù yə̂mù ma mù lo a nyə̂ ghɨna yə̂.’ 32 Jisòs jis ha ghɨna na, “Mu jìsà ha ghàn kə nâ hamok na, à tà tì fo jə Musìs mwə̀ mù yə̂mù me mù lo a nyə̂ ha ghàn. À tì bɨ̀li fo Bom mwə̀ mù yə̂mù ma mù lo a nyə̂. 33 Mwə̀ mù yə̂mù Fùyèn mò wut we wù lo a nyə̂, ben hi fo chyəna a mbyî.” 34 Ghɨna toŋti wun jis na, “Bâba, fo mwə̀ mù yə̂mù ha ghàh kə yu mù jɨ̀m.” 35 Jisòs jis ha ghɨna na, “Mu mò mwə̀ mù yə̂mù me mù fo chyə ha ghɨta. À mò ma à ben nâbi nde ha mu ma jìŋ bê tè fè yafa jə̀ wûn, ma à bimi nâbi nde ha mu, ma kuŋ à mòlû bê tè fè yima jə̀ wûn. 36 Mu che jis ha ghàn na, ghàn ti yen kəbi mu, biyani tè bime jə̀. 37 Ghɨt ghe Bom fo ha mu bè kə yi bên ha mu, mu bè jûmà wijə wùt we wù bèna ha mu, 38 beka mu lo a nyə̂ chwo ben a chyə̂ hi nè gha ye we wù tuma mu khɨŋa. A bu gha ye mu khɨŋa a mu ngɨŋ. 39 Wùt we wù tuma mu kòŋà wi na nâ wùt wù mòk te wù fo ha mu ləha. Wù khɨŋa na wù bê kahà lohi ghɨna a yi kpû a tuk wu gokhenu. 40 Bom khɨŋa na nâ ghɨt à jɨ̀m te ghɨ yena mu bime ha mu, chyə̂ faŋ. Ma mu bê kahà lohi ghɨna a yi kpû a tuk wu gokhenu.” 41 Wù jis ni, ghɨt a Jûs yû hì dûmlè kum gha ye wù jìsa na yi mò mwə̀ mù yə̂mù me mù lo a nyə̂. 42 Ghɨna buf na, “Ba wùna mò Jisòs kə nâ wâ Josèf, ghàh khə bè wûn nì nè wûn? Wù gbi yàni hi tè jìs na yi lo ben a nyə̂?” 43 Jisòs jis ha ghɨna na, “Kə ghàn hi fê dûmlè njaŋâ kum nì gha ye mu jìsa. 44 Bì we wù tuma mu ki fâŋ hi gùf a wut na wù ben ha mu, ma wù tê bênà jə̀. Wù ki bên ma mu bê kahà lohi wûn a yi kpû a tuk wu gokhenu. 45 Fòktì yì chìk yìlè ti nyak na, ‘Yènfù bè yike lò ghɨt à jɨ̀m.’ Nâ ghɨt à jɨ̀m ghe ghɨ ywo gha ye Bom jìsa bè lò ha mu. 46 Wùt tà timi yen jə bâ a bu kə we wù lo a Yènfù a ngwùŋ. A mô kə wûn we wù time yena bâ. 47 Mu jìsà ha ghàn kə nâ hamok na, à bimi nâbi nde ma wù chyə faŋ. 48 Mu mò mwə̀ mù yə̂mù me mù fo chyə ha ghɨta. 49 Be be ghana tî yə mwə̀ mù yə̂mù me ghɨ ndùku toŋte na manà a lak yi sùsi, biyani kputi lò. 50 Mwə̀ mù yə̂mù munâ mu jìsà chin ni, à mò mwə̀ mù yə̂mù ma mù chwo ben a nyə̂, ma wùt ki yə̂ ma wù bê tè fê kpû. 51 À mò kə nâ mu mwə̀ mù yə̂mù munâ mù fo chyə ni, te mù chwo bena a nyə̂. À yə nâbi nde mwə̀ mù yə̂mù munâ, ma wù chyə faŋ. Mwə̀ mù yə̂mù munâ a mô wun wu mu we mu fo shyəma ghɨta mbye hi chyə̂.” 52 Jisòs tì jis ni, gha yaf ghɨt a Jûs mu ghê, ghɨna njaŋ nâ haŋaŋ buf na, “Wùt wunâ jìsà na yi làhi fo yàni wun wu wunu ha mwə̀ mù yə̂mù ma ghàhnà yə agha?” 53 Jisòs ki jîs ha ghɨna na, “Mu jìsà ha ghàn kə nâ hamok na, ghàn ki faŋ hi yə wun wu Wâ Wùt ha mwə̀ mù yə̂mù hi fè nyo mu luŋ mù wûn ma hi mô na ghàn chyə wi yi chyə̂. 54 À yə nâbi nde wun wu mu fî nyu luŋ mâmù ma à hi mô na wu kəta lò chyə ye yi mê wi, ma mu bê fê lohi wûn a yi kpû a wu tuk wu gokhenu, 55 beka wun wu mu mò kə nâ mwə̀ mù yə̂mù, luŋ mâmù mô kə nâ a shyə nyona. 56 À yə nâbi nde wun wu mu, fî nyu luŋ mâmù, ma wù hi chyə ha mu, mu chyə ha wûn. 57 À ki yə nâbi nde wun wu mu, ma wù hi chyə kum mu, kə yi ghəl te mu chyə beka we wù tuma mu chyə. 58 Mu mò mwə̀ mù yə̂mù me mù chwo bena a nyə̂. Be be ghàhnà ti yə mwə̀ mù yə̂mù me ghɨ toŋte na manà yani kputilò, biyani à ki yə nâbi nde wun wu mu wunâ ma wù chyə faŋ.” 59 Jisòs hì jìsà ni, yike à ghɨ̂t a ndâ yì yùŋtì à ghɨt a Jûs a Kàbanùm. 60 Jùmtìbàmsu Jisòs su dosu yu yikî yinâ hì jîsà na, “Yikî yinâ ta nâ a be. À mò hi bime nde gha tɨni?” 61 Jisòs khɨle a wun a ngɨŋ na à mò gha ye ghɨna dùmlè kum yini, buf ha ghɨna na, “Yikî yinâ fo ngə̂k ha ghàn nâ a be agha? 62 Ghàn ki yena Wâ Wùt wu kaha lô yênà a nyə̂ a lùk afa wù ndùku mô atɨ̂n ashyə̂, ghàn ni nâ ghə? 63 À fo kə Yohnà Fùyènà chyə faŋani ha ghɨta. Wùt kəta wi gha yile hi nì a wun a ngɨŋ hi chyə fâŋ. Mu hi mò ma mu ti fôktì gha ye ghàn kəta hi nì hi khɨte chyə ye yi bè mê wi a Yohnà Fùyènà fo ni. 64 Mu fòktè kəbi ni, ghàn ale bime wi.” Jisòs ndùku jîsà ni beka wù ndùku khəlò ghɨt ghe ghɨ bè bime wi ha wûn kə nâ a yìmi, fê khə we wù ndùku mô hi bè bəkle wûn. 65 Jisòs fî jis ha ghɨna na, a ni mò gha ye wù jìsa ha ghɨna na, wùt wi hi bèn ha yi a bu kə na à fo Bì jyaka na wù ben. 66 Kum ni, jùmtìbàmsu wunsu dosu tet hì fè jûmtè wijə wûn. 67 Te su teta yâ, wù ki buf ha se njwòsù bà na, “Ghàn boŋa khɨŋa kəbi hi tet à dè mu ma?” 68 Samùn Bità fîsì ha wun na, “Hi fè yèn ha nde a Bâ, à mò hi fòktè nde gha ye yi fo chyə ye yi bè mê wi a bu kə wò? 69 Ghàh bimelò fê khə na a mò wò wùt wù yulena wu Fùyèn we wù lo bena a nyə̂.” 70 Jisòs jis ha ghɨna na, “Ba ghàn khəlò na à che chwok kə nâ mu ghàn ghɨ̂n njwòsù bà biyani wùt wù mòk mô a ghàn a fùtɨ̂n a mô deblì.” 71 Wù ndùku jîsà kum Judàs a wâ Samùn Ìskaliyòt a we wù ndùku mô kəbi atɨ̂n à jùmtìbàmsu wunsu njwòsù bà biyani mô hi bè bəkle wûn.
1 À hì mô yi bàm yi gha afân, Jisòs hì gbê chyâ a Galìlî kôŋà wi hi yèn a Jùdiyà beka ghɨt a Jûs ndùku mô afû, khɨŋa hi ywe wûn. 2 À ndùku mô ni, ma à faŋ kə tuk mù sek ni shyəma ghɨ yə, yi Yə Mùwi ghɨt a Jûs, 3 wana ne Jisòs jis ha wun na, “Wò kəta hi lo afân, hi yèn à Jùdiyà shyəma jùmtìbàm sasu yen gha kanana ghe wò nè. 4 Wùt shìki kôŋ na ghɨ hi khə wûn, wù wi hi tè nyamte nè a ghâ. Te wò nè gha ghɨ̂n ni, yi jwôfàlò na wò ni ma mbyi yì jɨ̀m hi khə wò.” 5 Ghɨna ndùku jîsà ni beka nâbi ghɨna ndùku bime wi ha wûn. 6 Jisòs ki jîs ha ghɨna na, “Yu mu tà kpen jə̂, à mò ha ghàn, ghàn làhi tè yèn a Jèlusalèm nâbi wùni yu. 7 Ghɨt a mbye bànà wi ghàn, biyani bânà mu beka mu chwùtè banhe gha ghɨna ghɨ be. 8 Ghàn yen wu lùk wu yi yə afû. Mu yènà wijə chîn beka yu mu tà kpên.” 9 Wù jis ni faŋ kə a Galìlî. 10 Nâbi te wù jìsa nâbi ni, wana ne wuna lo yen wu lùk wu yi yə afû, wù boŋ yên, biyani nyamte yênà yi yên. 11 Chichàsu ghɨt a Jûs hì khɨŋa wûn afû bufa na, “Wùt mu wunâ lâ?” 12 À ndùku mô ni ghɨta afû nâ hidù nyamte jîsà kum wûn. Ghɨ le jîsà na, “Wù mò kə nâ wut wù jùŋ.” Ghɨ le jîsà na, “À mò kə yi fə̂m. Wù gbè lehe kə à ghɨ̂t.” 13 Ghɨ ndùku jîsà kəbi ni wùt bu hi jìs yi gha a ndan beka ghɨna ndùku fânà chichàsu ghɨna su. 14 Te yə təmne ye ni, Jisòs kwok yen a ndâ Fùyèn yì chìk hì yike ghɨta afû. 15 Chichàsu ghɨt a Jûs yu yikî wuni hì mô nì kani bufa nâ, “Wù gbi yàni hi tè khə gha ghɨ̂n ni teka wù timè yen a ndâ ŋwàklù agha?” 16 Jisòs jis na, “Mu yike wi ghàn nì gha ma ghɨ ngɨŋa. À mò gha Fùyèn fe fu tuma mu. 17 À shìki khɨŋa nâbi nde hi tè nì te Yènfù khɨŋa, ma wù nê yen à khɨli na yikî mi lo ha Yènfù ma mu yike kə gha mi agha? 18 À shìki yike nâbi nde yikî wun yi ngɨŋi ma wù hi khɨŋa kə hi tè kokhe ngɨŋ à wûn, biyani we wù fètà hi kokhe we wù tuma wûn yè jîsà kə hamok wama wi nâ hakoh. 19 Ba Musìs tî fo saktu ha ghàn biyani nâ wùt wù mòk lêmà wi saktu tɨntu. Ghàn khɨŋa hi ywe mu njwô ghə?” 20 Ghɨt atɨna fîsì kə na, “Wò mò ni kəta a yohnà be. À khɨŋa nde hi ywe wò?” 21 Jisòs jis ha ghɨna na, “Mu ti nî kə yi gha yi kanani yì mòk jwo ti yim ghàn à jɨ̀m. 22 Biyani Musìs tì fo saki na ghɨ bwɨ wan wù lɨmà ghɨ fati nama wuna nâbi te à ndùku wijə sak yi Musìs. À ndùku mô sak yi be be ghàhnà. Ghàn fate nama wana wù tuk wu laku. 23 Ghɨ hì mô hi lunhe sak yi Musìs, ghàn hi fê bâŋhè wu lâ na mu ti chwuk wùt wu tuk wu laku wù ti tâ njwô ghə? 24 Kə ghàn hi saka kə wùt yi gha afa ghàn yena. Ghàn hi saka hamok.” 25 Te Jisòs jìsa ni nâbi wùnu yu ghɨt a Jèlusalèm ale hì bufa nâ, “Ba wùna mò wut we ghɨ khɨŋa hi ywî agha? 26 Wùt wunâ jìsà a ghɨta ashyə̂ wùt jîsà wi gha ha wûn. A chichàsu tà lyi kə na à mò wûn we a ghɨ chwoka lema agha? 27 Ghàhnà khəlò luk we wùt wuna lo bena atɨ̂n biyani we ghɨ chwoka lema shìki mô hi bèn ma wùt hi khə wi luk we wu lo bena atɨ̂n.” 28 Ghɨ ndùku jîsà ni Jisòs baha yike kə à ghɨ̂t a ndâ Fùyèn. Jisòs njaŋ yen kə haŋaŋ jis na, “Ghàn kwàktè na ghàn khəlò mu khə luk we mu lo bena atɨ̂n agha? Mu tà ben jə afân a mu ngɨŋ. À tum wùt mu, jîsà kə hamok, ghàn khə wi wûn, 29 biyani mu khə wûn beka mu lo ben a wun a ngwùŋ ma à tum wun mu.” 30 Wù jis ni, ghɨ hì khɨŋa hi kwo wûn, biyani wùt tê mòm beka yu we Yènfù tì lèma na ghɨ bè kwolò wûn atɨ̂n ndùku mô teka wu kpen. 31 Nâbi ya ni ghɨta fî bimi ha wûn dô kə ni beka ghɨna tì yên na wùt lè bè fê bê wi te ghɨ chwoka lema hi bè nè chwesu gha kanasu lesu, su chyâ se wùt wuna nè. 32 Ghɨt a Falàsî tî yû te ghɨta nyamte jîsà gha ghɨ̂n kum Jisòs, ghê ngàŋsù ndâ Fùyènsu chiksu ki tuma sojàsu na su yê kwo wûn. 33 Ghɨna yên, Jisòs jis ha ghɨna na, “Mu nè hì mô kə nì ghàn kə fu yulâ ni ma mu kahà yen ha we wù tuma mu. 34 Ma ghàn nê hi khɨŋa mu bu hi fê yen beka mu nè hì mô wù lùk ghàn bu hi bèn afû.” 35 Ghɨt a Jûs ale hì bufa na, “Wùt wuna khɨŋa hi yèn afa na ghàhnà nê hi fê yena wi wûn agha? Wù boŋa khɨŋa hi yèn a yi lak yi tumi ye ghɨta ghàhnà teta yênà afû hi tè yike ghɨta tumu ghe ma? 36 Ba wù jis na ghàhnà nè hì khɨŋa wûn yena wi beka wù jis na yi yènà wù lùk wùt bu hi yèn afû. Wu ni jìsà ni yi chwûtè na ghə?” 37 À ndùku mô wu tuk wu yə wu gokhenu a mô nâ tuk wu yə wu chiku Jisòs toŋa jis a jyə̂ yì tâ na, “Kuŋ à mòlû shìki yim nâbi nde wu ben ha mu, ma mu fo mòlû ma wù nyu.” 38 ‘À bimi nâbi nde ha mu ma jwò hi fwo a wûn a yi təm kə yi ghəl te ŋwàklù Fùyèn jìsà.’ 39 Jisòs ndùku jîsà kum nì Yohnà ghe ghɨ ndùku mô hi fo ha ghɨt ghe ghɨ bime ha wûn. À ndùku mô ni, Yènfù baha mô teka wù fo yohnà à wun mu ghê beka wù ndùku baha mô teka wù lohê kwok Jisòs a nyə̂ hi fo a jyak ha wûn. 40 Ghɨt ale atɨ̂n à ghɨta dona afû tì yu gha ye Jisòs ndùku jîsà, hì jîsà na, “Wùt wuna mò kə nâ fòktì wù chìk hamok.” 41 Ghɨ le jìsà na, “Wù mò Klistù.” Ale fê bufa kəbi na, “Ma Klistù gbi yàni hi fwu a Galìlî agha? 42 Ba ŋwàklù Fùyèn jis na Klistù bè fwo a fə̀n Defìt yi sah yi nda, ma ghɨ bwɨ wûn a Betùlùhêm a Defìt yì tèk agha?” 43 Te ghɨ jìsa afû ni, jyàhè wùna lôtì kum Jisòs. 44 Ghɨt ale hì khɨŋa hi kwo Jisòs biyani wùt tê mòm. 45 Sojà sê kaha yen, ngàŋsu ndâ Fùyènsu chiksu nì ghɨt a Falàsî buf ha ghɨna na, “Ghàn ye faŋ hi kwo bèn nì wûn njwô ghə?” 46 Sojàsu tɨnsu fîsì na, “Wùt tà timi hì jîsà wu lum afa wùt wuna jìsà atɨ̂n.” 47 Ghɨt a Falàsî njaŋ yên kə ashyə̂ buf nâ, “Ba yi ni mò na wùt wuna ti boŋ lehi kəbi ghàn agha? 48 Ghàn ti timi yu na wùt tihena makə wùt à Falàsî wùlè ti bimi ha wûn agha? 49 Biyani njwo Fùyèn kwo ghɨt ghe ghɨ khə wi saktu Musìs tù.” 50 Biyani Nìkòdemùs kəbi wùt à Falàsî wùlè a we wù tì ye yena Jisòs ntuksu jis ha ghɨna na, 51 “Sak yi ghàhnà jìsà na, a wi hi jìs na wùt ti fen sak teka ghɨ yu jîs yì wuni.” 52 Ghɨna jis ha wûn na, “Wò mò ma wò boŋ fwu kəbi a Galìlî ma, tòkâ kina a ŋwàklù Fùyèn ma wò yen na fòktì wù chìk wi hi fwo jə̀ afû.” 53 Ghɨta jyâhì hì kolê.
1 À hì mô te ghɨta kole, Jisòs lo kwok a kùn à sù Olìfs. 2 Tuku hì bɨsa yula bê kə ni ma wù hì mô a ndâ Fùyèn, ghɨta ben ndokò kat a wun a ngwùŋ wù chwo ndokò hì yike ghɨna. 3 Chichàsu saksu ghɨt a Falàsî lyi bên nì wùt ywen ma ghɨ kwo ghê wùt lɨmà chyə̂. Ghɨ ben tom wùt ywên àtɨ̂n a ghɨta ashyə̂, 4 ki jîs ha Jisòs na, “Chichà, ghɨ kwo wùt ywên wuna wù chyə ghê wùt lɨmà a bu lɨm à wûn. 5 Musìs tî nyak a ghàhnà yi sak na ghɨ kwo wùt ywên ni, ghɨ tumli ywi nì te. Wò jis nâ ya na ghə?” 6 Ghɨna ndùku bufa ni tama na Jisòs jis à njah ma ghɨ khɨli gha ye ghɨ mô hi ngane wûn atɨ̂n. Biyani, Jisòs ngumti yen a chyə̂ hì nyâkà gha wuna wu bùt nì wan à wô. 7 Ghɨna hì bufa kə yi bûf gha yîn ha wûn, wù kaha lôhì wu wun jis ha ghɨna na, “Wùt shìki mô a ghàn a fùtɨ̂n teka wù timè ni be wu yitì tum wûn nì ti.” 8 Te wù jìsa ni kaha ngumti yen kə a chyə̂ hi nyaktè a gha wuna. 9 Ghɨna yu ni hì lô kə fù mòk, fù mòk hi yìmì ha ləmanà, ghɨna lô kə ni, à faŋ kə Jisòs ghê wùt ywên àtɨ̂n. 10 Jisòs fî kaha lôhì wu wun buf ha wùt ywên àtɨ̂n na, “Ghɨt ghe yen afa? Nâ wùt wù mòk tà faŋ hi jìs na wò ti fen sak agha?” 11 Wùt ywên àtɨ̂n fîsì jis na, “Nâ wùt wù mòk tà faŋ jə̂ a Bâba.” Jisòs jis ha wun na, “Nâbi mu tà boŋ jis jə̂ na wò ti fen sak. Lô ma wò hi kolê. Wò kolô, kə fî ni be.” 12 Jisòs hi fê jîsà ha ghɨt a Falàsî na, “Mu mò ban yi mbyi. À jùmti nâbi nde mu ma wù khɨti bani a wun a chyənà ma wù hi fê gbê wijə a bɨn a finana.” 13 Ghɨt a Falàsî mu ghê jis ha wûn na, “Ba wò khə na wò mò ni jîsà kə kum ngɨŋ yâ, jîs ya kəta wi luku.” 14 Jisòs jis ha ghɨna na, “Gha ye mu jìsà mò kə nâ hamok nâbi te mu jìsà kum ngɨŋ à mì, beka mu khəlò luk we mu lo atɨ̂n khə we mu yènà atɨ̂n. Biyani wùt ha ghàn khə wi na mu lo afa agha yènà afa agha. 15 Ghàn saka nì tofu mbyi, mu saka wi wùt. 16 Biyani, mu shìki mô hi sak a wût ma mu hi saka kə hamok beka mu wijə mù nɨ̂ŋ. Mu mò ghàh à Bom we wù tuma mu. 17 Saki jìsà na, ghɨta ki time bɨ̀n à sak yi ghâ à bà ma ghɨ hi kəta hi yute gha ye ghɨna jìsà. 18 Mu mò jìsà kum ngɨŋ à mì, Bì we wù tuma mu fê jîsà kum mu.” 19 Ghɨna buf ha wun na, “Ba wù tɨ̂n mò afa?” Jisòs fîsì jis na, “Ghàn khə wi mu, khə wi Bôm. Ghàn yê hì khə mu ma ghàn khəlò Bôm.” 20 Jisòs ndùku yike gha ghɨ̂n mô a bàh a ndâ Fùyènà afa ghɨ ndùku lêmà fotu atɨ̂n. Biyani wùt tê kwo wûn beka yu we Yènfù lèma na ghɨ kwo wûn atɨ̂n ndùku mô teka wu kpen. 21 Jisòs fî jis kpenhi na, “Mu nè lôlò ma ghàn khɨŋ mu, ma ghàn tê yên, ma ghàn kputi a ghàn a sùbe. Mu yènà wu lùk ghàn bu hi bèn afû.” 22 Chichàsù ghɨt a Jûs hì bufa na, “Wù ni jìsà na ghàhnà wi hi yèn wu lùk afa wù yènà yi chwûtè na ghə? Wù khɨŋa hi ywe ngɨŋ à wun ma?” 23 Biyani Jisòs fî jis na, “Ghàn mò ghɨt a mbye afân, biyani mu mô ma mu lo a nyə̂. Ghàn mò ghɨt a mbye mu wijə wut à mbyî. 24 Mu ti jis ha ghàn na ghàn nè kputelò a ghàn a sùbe. Ghàn ki faŋ hi bimî na mu mò wùt we mu jìsà na mu mò wûn, ma ghàn nê kputi a ghàn a sùbe ni te mu jìsa.” 25 Ghɨna buf ha Jisòs na, “Wò mò nâ nde?” Jisòs fîsì na, “Mu mò kə wut we mu che jisa yi fiti na mu mò wûn. 26 Gha dô kə ni a mu mò hi jìs kum ghàn hi fè fo ngə̂k ha ghàn atɨ̂n. Biyani mu nè nê wijə ni beka we wù tuma mu wù jìsà kə hamok, mu jîsà kə gha ye wù jìsa na mu jis ha ghɨt a mbye.” 27 Wù jis ni, ghɨna tê ywo khɨli na wù jìsà kum Bè wûn. 28 Jisòs jis ha ghɨna na, “Ghàn bè kokhe lò Wâ Wùt a tô kàkfùtàfù ma banti nâbi wùni yu ma ghàn khɨli na à mò mu we mu mò, ma fê khɨli na mu nè wijə gha a mu ngɨŋ, biyani jîsà kə gha ye Bom yike mu nì yini. 29 We wù tuma mu wù mò ghàh à wûn. Wù tà de jə mù nɨ̂ŋ beka mu nè kə gha ye wù kòŋà.” 30 Ghɨt a dona yu jis yi Jisòs bimi ha wûn kə wu yu mefû. 31 Jisòs tî jis ha ghɨt a Jûs ghe ghɨ tì bime ha wun na, “Ghàn ki khɨte yikî mi, ma ghàn hi mô kə nâ jùmtìbàm samsu hamok. 32 Ghàn ki khɨle gha ye yi mô hamok kum Yènfù, ma hamok à Fùyèn nê ni ma ghàn hi fê bu wu kwôs.” 33 Wù jis ni, ghɨna buf ha wun na, “Wò jis na hamok mò hi fihe ghàh a yìni ngə̂k agha? Ghàh mò ghɨt a yi sah yi nda Ablàhâm, teka ghàh timè hi mô wu kwôs ha wùt.” 34 Jisòs jis ha ghɨna na, “Mu jìsà ha ghàn kə nâ hamok na, nâbi nde we wu nè be wù mò a kwôs ha be. 35 Kwôsà tà timi hì mô wut à yi sah yi nda, biyani wan wi hi fwu ha wùt à yi sah yi nda. 36 Yi ni chwûtè na Wâ Wùt ki jîs na wò fi wijə a kwôs, ya mò na, wò fi wijə a kwôs hamok. 37 Mu khəlò kə nâ na ghàn fwu a Ablàhâm yi sah yi nda, biyani hi khɨŋa hi ywe mu beka ghàn kòŋà wi hi ywo yikî mi. 38 Mu fòktè kə gha ye a Bom chwùte ha mu, ghàn nê kə yi gha ye ghàn ywo ha bì wânù.” 39 Ghɨna fîsì na, “Ghàh mò wana wana Ablàhâm.” Jisòs fîsì jis ha ghɨna na, “Ghàn ye hì mô wana wana Ablàhâm ma ghàn nè kə gha ghe Ablàhâm ndùku nê. 40 Ghàn mò ni ma ghàn ti lem hi ywe mu, mu fôktè a gha ha ghàn ghɨ mô kə hamok, ma mu yu ha Yènfù. Ablàhâm ndùku nê wi nki gha ghɨ̂n. 41 Ghàn nè kə gha ghe bì wânù nè.” Ghɨna fîsì na, “Yènfù mò kə Bì wù mòk we ghàh kəta, ghàh mô kə wana wuna bâtà wi yi bât.” 42 Jisòs jis ha ghɨna na, “Yènfù yê hì mô kə nâ Bì wânù ma ghàn kòŋàlò mu beka mu lo kə nâ a funfu a ngwùŋ. Mu tà che bèn jə̂ a mu ngɨŋ, à che tum funfu mu. 43 Njwô ghə te ghàn ywo khɨle wi gha ghe mu jìsà agha? Ba à mò njwo ghàn kòŋà wi hi yû. 44 Ghàn mò wana deblì, khɨŋa kə hi tè nè gha ghe a wù kòŋà na ghàn hi nê. Wù ndùku ywitelò ghɨta kə ha yìmi, jîsà wi hamok beka wù mò wut à tu fə̂m. Nâbi yini te wù wama fəmi a hi mô chyənà à wûn beka wù mò wut à tu fə̂m, mô kə nâ bè tu fə̂m. 45 Mu wu hì jîsà kə nâ hamok ghàn bime wi gha ye mu jìsà kum yì yîn 46 Wùt a ghàn a fùtɨ̂n làhi chwùtì na mu ti ni be agha? Mu wu hì jîsà hamok, ghàn bime wi gha ghe mu jìsà njwô ghə? 47 À mò nâbi nde Wâ Fùyèn wu hi ywo gha ghe Yènfù jìsà. Ghàn ywo wi beka ghàn wijə wana Fùyènà.” 48 Ghɨt a Jûs ale ki jîs ha Jisòs na, “Ghàh tê jis kəbi na wò mò wut à Sàmaliyà kəta a yohnà be.” 49 Jisòs jis ha ghɨna na, “Mu kəta wi yohnà be. Mu ngumle Bôm biyani ghàn chaha mu. 50 Mu khɨŋa wi na ghàn hi kokhe mu biyani wùt làwû a wù khɨŋa na ghɨ hi kokhe mu a saka fo wûn sak à mì. 51 Mu jìsà ha ghàn kə nâ hamok na, à yu nâbi nde yikî mi ma wù chyə̂ faŋ.” 52 Ghɨt a Jûs mu ghê yu ni jis na, “Ba ghàh tê jis kəbi na wù mò ni kəta a yohnà be! Nâ Ablàhâm tî kpû fòktìsu chiksu boŋ kputî wò wu hì jîsà na à yu nâbi nde yikî ya ma wù chyə̂ faŋ agha. 53 Ba wò jìsà hi chwùtì na wò chyàlò Ablàhâm bì wâhù ma? Ablàhâm ghe fòktìsu chiksu hì mô ma su ti kputî, wò wu hì mô nâ nde?” 54 Jisòs fîsì jis na, “Mu ye hì kokhe ngɨŋ à mì ma yi hi chwûtè wi gha yile. Bom we a ghàn lyè na mò Yèn fanifu à mò we wù kokhe mu. 55 Ghàn khə wi wûn, biyani mu khə. Mu ki jîs na mu khə wi wûn ma à hi mô na mu wama kəbi te ghàn. Mu khəlò wûn, ywo ha wûn. 56 Bì wânù ndùku khəlò na mu nè bênàlò, gha tɨni nî wù hì saŋle nâ haŋaŋ.” 57 Ghɨt atɨna buf na, “Wò baha yê mô teka wò tan lɨ̀m mtân wo wu hì khə Ablàhâm ma wò tì yen afa wûn?” 58 Jisòs fîsì jis na, “Mu jìsà ha ghàn hamok na, ghɨ tì shihi bwə Ablàhâm Mu mô!” 59 Kə wu yu ghɨna kumti a ti hì khɨŋa hi tumle Jisòs atɨ̂n biyani wù lêt. Nyam lo a bɨn a nda Fùyènà.
1 Jisòs tî lô hì gbê yênà, yen wùt wùlè ma wù tì fêf kə yi bwɨ̂. 2 Jùmtìbàmsù wunsu toŋti wun buf ha wun na, “Chichà à ni be à nde na bə wuna fef kə yi bwɨ̂, a yì bè wûn ma à yì nè wûn ma kə nâ yì wûn agha?” 3 Jisòs fîsì jis na, “À wijə kum be wûn, à wijə kum yì bè wûn nì yì nè wûn. Gha mi yîn gan ni shyəma ghɨta yen à mihi wo fètà kanana Fùyènà a wun wu wùn. 4 Ghàhnà kəta hi tè nè yi fêt yi wùt we wù tuma mu, a baha mô nchwì beka bɨn a fina bênàlò, a mô wu yu we wùt wi hi fè fèt a shyə ale atɨ̂n. 5 Mu kəta hi tè fo yi bân ha ghɨta a mbyî.” 6 Jisòs jis ni, chwu a mchwâ a chyə̂ lamli wu bût yokle a wùt wù fèfana àtɨ̂n a sê, 7 jis ha wun na, “Ndù ma wò ye su kə̂k ya a chɨ̀m a Silwàn.” Silwàn mi yinâ yi jìs yi laki ndùku mô na, “Tûm.” Wùt àtɨ̂n yen su a se wuna kaha kolo yena tu luk. 8 Ghɨt ghe ghɨ ndùku chyə bakhe ha wûn nì ghê ghɨ chehì yena wûn wu lonâ hì bufa na, “Ba wùna mò wut wù lonana we?” 9 Ghɨt ale hì bimî jîsà na, à mò wûn, ghɨ le tunhê jîsà na “Ngàŋ, wù fune yi funâ.” Nâ wùt àtɨ̂n nì ngɨŋ à wûn jis na, “À mò kə nâ mu.” 10 Ghɨna buf ha wun na, “Wò gbi yàni hi tè yen a tu luk agha?” 11 Wùt àtɨ̂n fîsì na, “Wùt wuna ghɨ toŋte na Jisòs ni, ye lamli bûtù yokle a mu sê jis na mu yê su kə̂k yi mi a chɨ̀m a Silwàn, mu ti yen sû, kə wu yu hì yenâ!” 12 Ghɨna buf ha wun na, “Wùt àtɨ̂n lâ?” Wù fîsì na yi khə wi. 13 Ghɨ lyi yên nì wùt we ghɨ chwuka yâ ha ghɨt a Falàsî. 14 À ndùku mô ni ma Jisòs tì lamli bût wûn chwuk wut mu wuna wu tuk wu laku. 15 Ni ghɨt a Falàsî mu ghê ki buf ha wùt mu we na wù gbi yàni hi tè yen a tu luk agha? Wù jis na, “Jisòs ye lamli wu bût yokle a mu sê, mu ti yen su kə̂k yi mi kə wu yu hì yenâ.” 16 Ghɨt a Falàsî ghɨ le jis na, “Wùt mu wuna wijə wut à Fùyèn beka wù bama wi tuk wu laku.” Biyani ghɨ le hì jîsà na wùt wù gha be wi hi tè nè gha kanana ni. Kə wu yu jyàhè wùna gan a ghɨna fùtɨ̂n. 17 Ghɨ motì kə ni ghɨna fî kaha buf ha wùt we Jisòs tì chwuka ya na, “Nâ wò kwàktè na ghə kum wûn? À we wù ye chwuka se gha.” Wùt àtɨ̂n fîsì kə na, “Wù mò fòktì wù chìk.” 18 Chichàsu ghɨt a Jûs hì bime wi na wùt wuna ndùku mô ma wù ti fêf shyəma wù kahè hi yena luktu. Yi ghak ghɨna, ghɨna toŋa bè wûn nì nè wûn, 19 ki buf ha ghɨna na, “Wùna mò wan wânù? We a ghɨ jîsà na ghɨ tì bwɨ ma wù ti fêf, wù che gbi yàni hi tè yen a tu luk chin agha?” 20 Ghɨna bimî jis na, “Ghàh khəlò na à mò wan wâhù, khə na ghɨ tì bwɨ wun ma wù ti fêf. 21 Biyani khə wi na wù gbi yàni hi tè yen a tu luk chin khə wi na à wûn chwuk nde agha? Ghàn buf ha wûn, wù fi wijə wan wù bot. Nâ wûn làhi fòktì gha ye yi gana.” 22 Bè wûn ghê nè wûn ndùku jîsà ni beka ghɨna ndùku fânà chichàsu ghɨt a Jûs. Chichàsu ghɨt a Jûs ndùku mô ma ghɨ ti lem na à tok nâbi nde na Jisòs mò wùt we ghɨ chwoka lema ma ghɨ jum wûn ma wù nê hi fê lye wi a ndâ yi yùŋtì. 23 À nì mò gha ye bè wûn ghê nè wûn tì fise na, “Wù fi wijə wan wù bot. Ghàn buf ha wûn.” 24 Ghɨna fî kunti toŋa wùt wù fèfana àtɨ̂n jis ha wun na, “Fo kokhînì ha Yènfù beka ghàh khəlò na Jisòs wunâ mò wut à gha be.” 25 Wù fî fîsì kə na, “Kə à mò wut à gha be makə wù jùŋ, mu khə kə yi gha yì mòk, na mu chehì yena wi luktu, mu wu hì yena chîn!” 26 Ghɨna fî buf na, “Wù ye ni nâ ghə ha wò na wò hi yena luktu?” 27 Wùt àtɨ̂n jis na, “Mu ye hì mô ma mu ti fôktì ha ghàn, ghàn kôŋà wi hi yû. Ghàn fè bufa hi nè ghə? Yi kə̂kà te ghàn boŋa khɨŋa hi gàn a jùmtìbàmsù wunsu ma?” 28 Ghɨna hì sûlè wun jîsà na, “À mò kəbi wò jùmtìbàm à wùt wunâ! Ghàh mò jùmtìbàmsù Musìs sù. 29 Ghàh khə na Yènfù ti jis ha Musìs, biyani khə wi nâ Jisòs mu wuna lo afa agha?” 30 Wùt wu fèfana àtɨ̂n fîsì na, “À mò yi gha yi kanani na ghàn khə wi na wù lo afa, biyani ma wù ti ni mu wu hì yena luktu! 31 Ghàhnà khəlò na Yènfù yute wi ha ghɨt a be, biyani ywô ha ghɨt ghe ghɨna ngumle wûn gbê te wù khɨŋa. 32 Nâ te mbyî tì yìme, ghɨ tà yu jə na ghɨ ti bwɨ wùt wu yena wi luktu, wùt nî wù hì yenâ. 33 Wùt mu wuna ye hì bu wut à Fùyèn ma wù wi hi nè a gha ni.” 34 Ghɨt atɨ̂na jis na, “Wò mò ni ma ghɨ tì bwɨ wò atɨ̂n à be wo ləma kwôk kə atɨ̂n, wò wu hì khɨŋa hi tè yike ghàh.” Te ghɨna jìsa ni jum fihi wun a ndâ yì yùŋtì. 35 Jisòs yu na ghɨ ti jum fihi wùt we wù tì chwuka ya a ndâ yi yùŋtì, khɨŋ yen yen wûn buf ha wun na, “Wò ti bimi ha Wâ Wùt agha?” 36 Wù fîsì na, “Wâ Wùt mu we mò nde a bèbɨn? Fokti ha mu ma mu bimi ha wûn.” 37 Jisòs jis ha wun na, “Wò hì mô ma wò ti yen wûn. À mò kə nâ wun we wù jìsà ha wò chin ni.” 38 Wùt wù fèfana àtɨ̂n ki jîs na, “Mu ti bimî a Bâba!” Hì kokhe Jisòs. 39 Jisòs ki jîs ha wun na, “Mu ben a mbye afân hi banhe sah a ghɨ̂tà hi nì na ghɨta fefana hi yena luktu, ma ghe ghɨna khə na ghɨna yenalò, ma ghɨ hi fê yena wijə.” 40 Ghɨt a Falàsî ale ghe ghɨna ndùku mô afû buf ha wun na, “Wò jìsà ni yi chwûtè na ghàh ti boŋ fef ma?” 41 Jisòs jis ha ghɨna na, “Ghàn ye hì bime na ghàn yena wi ma be sanisu wijə a ghàn a tû. Biyani chin te ghàn lèma na ghàn yenalò be sanisu ti faŋ a ghàn a tû.”
1 Jisòs tî ma ngàn yìlè jis na, “Mu jìsà ha ghàn kə nâ hamok na, wùt ki bên de yi jwo mbànì hi lye atɨ̂n yen kwok lyi lum wu lùk wu lô ma wù nê hi mô kə nâ wùt wù chwoŋana. 2 Wùt we wù mò kə nâ chìn à sù njyə̀ wù yè lye kə yi jwô mbàn. 3 Wù shihi lyî, wùt we wù chìnà jwo mbànì, jimì ha wûn. Njyə̀su hi ywo khɨle jyə̀ chìn à sù njyə̀ mi yinâ. Wu toŋâ, su yu khɨle jyə̀ wûn, wu lyê fwu nì sinsu. 4 Wù lyi fwu nì njyə̀su wunsu sîn nâ sù jɨ̀m ni, wu hi gbê tôknè nì sinsu. Su hi yênà kə wun a yi bàm beka su ywo khɨlelò jyə̀ wûn. 5 Njyə̀ sîn wi hi yèn a wùt yi bàm khə wi wûn. Su ki yen a wùt wù lò su tet kə yi têt beka su ywo khɨle wijə jyə̀ wûn.” 6 Jisòs ma ngàn yina ni biyani ghɨt ghe ghɨ ndùku yute tê khɨlî na wù jìsà nâ ghə agha. 7 Jisòs fî jis kpenhi na, “Mu jìsà ha ghàn kə nâ hamok na, mu mò jwo mbàn ye njyə̀su kəta hi tè tohna atɨ̂n.” 8 Nâ ghɨt à jɨ̀m ghe ghɨ tì bèna a mu ashyə̂ ndùku mô kə nâ ghɨt a chwoŋana, biyani njyə̀sù tê ywo jə̀ ghɨna. 9 Mu mò yi jwô yi mbànì, ma a tohna nâbi nde atɨ̂n, ma wù bon ma wù hi chyə̂. Lyê, fê chyâ fwô kəta wù kòŋà, fê kəta mwə̀ mù yə̂mù hi tê yə̂. 10 Wùt wù chwoŋana yè bê kə hi chwôŋ, bê kə hi bobhî nì hi fè ywî. Ha mu, mu ben a mbyî hi nì na ghɨta nê hi chyə̂ gha wi shyə ale. 11 À mò kə nâ mu chìn à sù njyə̀ wù jùŋ. Chìn à sù njyə̀ wù jùŋ mò we wù mò hi kpû kum njyə̀ se wù chìnà. 12 À mò wu yu afa ghɨ lâkà wùt na wù hi chînà njyə̀sù a bu chìn à sù njyə̀ makə bè sù njyə̀, wù yen a wu yu afâ nyàm à bâ bènà wu tet de njyə̀su, yi ben kwoti njyə̀su tɨnsu sulesu tet jyâhìlò. 13 Wù yè teta de ni beka ghɨ lâkà wûn yi lâk, ma à koŋ ma à gan nâbi ghə ha njyə̀su tɨnsu. 14 Mu mò kə nâ chìn à sù njyə̀ wù jùŋ mu khəlò njyə̀ samsu, su khə mu, 15 kəbi yi ghəl te Bom khə mu, mu khə wûn. Mu mô hi kpû kum njyə̀ samsu. 16 Mu kətalò njyə̀ samsu lesu su bu atɨ̂n à mbàn afân. Mu kəta hi lyè bèn nì sinsu na su hi ywo jyə̀ mì, mô a nôn a mòk kəta chìn wù mòk. 17 “Bom kòŋàlò mu beka mu kəta hi kpû shyəma wù kahà lohi mu na mu hi chyə̂. 18 Wùt wijə hi ywe mu, à kòŋà kə nâ mu hi fo ngɨŋ à mì ha kpu. Mu kətalò jyaka hi fo ngɨŋ à mì ha kpu, kəta kəbi a jyak hi kaha lòtì hi tè chyə̂. Jyak mɨ ghɨ̂n mò ma à fo Bom ha mu.” 19 Te wù jìsa ni, ghɨt a Jûs fî yîmì gùfna kə ghɨna ngɨŋ. 20 Ghɨ dona hì jîsà na, “Wù kəta a yohnà be, jyakâ. Ghàn ywo ghə ha wun agha?” 21 Biyani ghɨ le jîsà na, “Yìna wijə jis yi wùt we wù kəta yohnà à be. Wùt we wù kəta yohnà be làhi nì na wùt wù fèfana kaha yen luktu agha?” 22 Yu yi Yə we ghɨ ndùku kwâktè te ghɨ tì kaha fo ndâ Fùyèn yì chìk a Jèlusalèm ha Yènfù tì kpên a mô mbɨ̀ŋ. 23 Jisòs hi gbê chyâ a bàh a nda Sòlomùn a bɨn a ndâ Fùyèn, 24 ghɨt a Jûs ale ben yûŋtì a wun a ngwùŋ jis ha wun na, “Ghàh nè kwâktè gha hi yè tàn yini? Wò shìki mô kə nâ we ghɨ chwoka lema wo fôktì banhi ha ghàh.” 25 Jisòs fîsì jis na, “Mu hì mô ma mu ti fôktì ha ghàn, biyani ghàn ti tê bimî. Gha kanana ghe mu nè a Bom a jyak fòktèlò wùt we mu mò wunù, 26 biyani ghàn bime wi beka ghàn wijə njyə̀ samsu. 27 Njyə̀ samsu ywolò jyə̀ mì, jûmtè mu, mu khə sinsu. 28 Mu fo chyə ye yi bè mê wi ha njyə̀ mu sîn, su bu hi bè fè kputî. Wùt bu hi khɨte fye sinsu a mu wô. 29 Bom we wù fo njyə̀ mu sîn ha mu chyàlò nâbi nde. Yi ni chwùtè na wùt wi hi khɨte fye a Bom a wô. 30 Ghàh à Bôm mò kə ha wùt wù mòk.” 31 Wù jis ni ghɨt a Jûs kumti a ti hi tumle wûn atɨ̂n. 32 Jisòs buf ha ghɨna na, “Bom ti fo jyaka na mu hi nê gha kanana ha ghɨta ghɨ dô kə ni. Ghàn khɨŋa hi tumle mu chin kum yìni?” 33 Ghɨna fîsì na, “Ghàh khɨŋa wi hi tumle wò yi gha yile atɨ̂n à gha afân. Ghàh khɨŋa hi tumle wò beka wò mò kə wût sûlè Fùyèn jîsà na, wò mò kəbi te Fùyèn.” 34 Jisòs ki buf ha ghɨna na, “Ba ghɨ ti nyak a ghàn yi sâk na, ‘Ghàn mò mù yèn’? 35 Yènfù ki toŋte ghɨt ghe gha Fùyènì tì bèna ha ghɨna na ‘mù yèn,’ ghàhnà khə na ghɨ wi hi kwuna yi gha Fùyènì, 36 à nè fè kwuna nâ nde ma Bom ti chwok mu ha wùt à wûn, tum a mbye? Yi shìki mô ni ghàn hi fê ngane mu ha ghə na mu ti sûlì Yènfù, jîsà na mu mò Wâ wûn agha? 37 Mu skìki nê wi fêt ye Bom tuma mu na mu hi nê kə ghàn bimi ha mu. 38 Biyani mu shìki nê fêt yi tɨni ghàn faŋ nâbi hi bimî ha mu ghàn bimi kum gha kanana ghe mu nè shyəma ghàn yiki hi tè khə na ghàh à Bom mò wùt wù mòk hanɨ̂ŋ bu.” 39 Wù jis ni ghɨt atɨna hi mômhè hi kwo wûn biyani wù tet lô. 40 Wù lo kaha daŋ yi jin yi jwô à Jodàn a bàh afa Jon ndùku yità fo mòlû ashyə̂, faŋ kə afû. 41 Ghɨta jûmtì wûn dô kə ni jîsà na, “Nâbi te Jon tà ti chwûtì jə̂ chwe yì gha kanani yìlè, nâbi ghə te wù tì jìsa kum wut wunâ mò kə hamok.” 42 Ghɨ bimi ha wûn afû dô kə ni.
1 Wùt lè ndùku yafalò yet yi wuni mô Lasalòs, wu chyə yi tèk yi Betanì, a mô kəbi tèk ye Mèli ghê wâ nè wûn ndùku chyə atɨ̂n. 2 Lasalòs wuna a wù ndùku yafa ni, à ndùku mô wâ nè Mèli, Mèli wuna ndùku mô kəbi Mèli we wù tì sùha yûhì ye a Jisòs wu wù yah nì nyuŋsu wunsu tusu yâ. 3 Jâmtì sîn ki tuma tum ha Jisòs jîsà na, “Bâba wùt we wò kòŋà yâ, yafalò.” 4 Jisòs yu tum àtɨ̂n jis na, “Wù yafa kəbi ni, bu hi kpû. Yaf yi tɨni ben shyəma Yènfù chwuti jyak a wuna. Wâ Fùyèn nè chwûtèlò jyak ghe ghɨ fo ha wun tohne a yi yaf afân.” 5 Jisòs ndùku kôŋàlò Matà ghê wâ nè wûn Mèli nì Lasalòs, 6 biyani yu na Lasalòs yafalò faŋ kə wu lùk afa wù ndùku mô, tuk mù bà chyâ, 7 wù ki jîs ha jùmtìbàmsu wunsu na, “Ghàhnà kahà yen a Jùdiyà.” 8 Jùmtìbàmsu wunsu toŋti wun jis na, “Chichà, à ndùku mô kə yi bàm yi mu tuklâ ni ghɨt a Jûs hì khɨŋa hi tumle wò nì te, wò wu hì fê khɨŋa hi yè nè ghə afû agha?” 9 Jisòs buf ha ghɨna na, “Ba tuku kəta mbɨŋlu njwòsù bà agha? Wùt wi hi damta gbì nchwì beka wu gbè yena ban yi mbyi. 10 Wù mò kə hi damta a wu yu afa wù gbè ntuksu beka wù kəta wijə bani, yena wi.” 11 Jisòs jis ni ki jîs na, “Sô ghàhnà Lasalòs ti bwunî biyani mu kəta hi yè yèmhè wûn.” 12 Jùmtìbàmsu wunsu toŋti wûn jis na, “Bâ, à shìki mô ma wù ti bwunî ma à hi mô na wù nè yemàlò.” 13 Jisòs ndùku jîsà ni, jîsà na Lasalòs ti kpû, jùmtìbàmsu wunsu yu ni hì khə na wù jìsà kə kàntè sù bwuni. 14 Jisòs fôktì mihì ha ghɨna na, “Lasalòs ti kpû, 15 kum ghàn. Mu saŋlê beka mu yê hì wijə afû. Ghàn ti yimèlò hi bimi chîn. Ghàhnà yê yen wûn.” 16 Kə wu yu Tomòs we ghɨ ndùku toŋte kəbi na Didimùs jis ha jùmtìbàmsu Jisòs sulesu na, “Ghàhnà boŋà yen kə a chichà yi bàm, wù hì mô hi kpû ma ghàhnà boŋà kputè yen.” 17 Jisòs yen tan a Betanì yen ma Lasalòs ti chyə a yi sì a mu tuk mù kìk. 18 À ndùku mô hi lò a Betanì hi yèn a Jèlusalèm yaka wi mâl sù bà, 19 ghɨt a Jûs mô afû dô kə ni te ghɨna bèna hi kukte Matà ghê Mèli a wâ nè ghɨna yi kpû. 20 Matà yu na Jisòs wu hì bênà, fwu yen hi yè fye wûn, Mèli faŋ kə a ndâ. 21 À hì mô te Matà ye yena Jisòs jis na, “Bâ, wò chehì mô afân ma wâ nôm tà che kpu jə̂. 22 Nâbi yani, mu khəlò na wò buf nâbi ghə ha Yènfù chin ma fu nê kə ha wò.” 23 Jisòs jis ha wun na, “Wâ nâ nè kaha lôtèlò ma wù hi chyə̂.” 24 Matà jis ha wun na, “Mu khəlò na ghɨ bè shihi kaha lòtì a yi kpû wù tuk wu gokhenu ma wù boŋà loti.” 25 Jisòs jis ha wun na, “À mò mu we mu lòhè ghɨta a yi kpû fo a jyak na ghɨna hi chyə̂. À bimi nâbi nde ha mu kpu kəbi yi kpû ma wù bê kaha loti ma wù hi chyə̂. 26 À hì chyə nâbi nde bimi ha mu ma wù bê tè kpû nâ hakoh.” Jisòs jis ni buf ha Matà na, “Wò ti bimi yina agha?” 27 Matà bimî jis na, “Mu ti bimî a Bâ, na wò mò we ghɨ chwoka lema, Wâ Fùyèn we wù ndùku mô hi bèn a mbyî.” 28 Matà jis ni kaha yen nyamti jis ha wâ nè wûn Mèli na, “Chichà ti ben hì bufa wò.” 29 Mèli yu ni nyâŋhì fwu hi yè yen a Jisòs. 30 À ndùku mô ni Jisòs baha yè mò kə wu lùk afa Matà tì kwòna ghê wûn wu lum yâ teka wù lyi atɨ̂n à yì tèk. 31 Mèli shihi fwo yèn, ghɨt ghe ghɨ tì bèna hi kukte wûn a ndâ fwu hì yênà kə wun a yi bàm kwâktè na wù yè a yi sì hi tè jyè wâ nè wûn afû. 32 Wù yen tan wu lùk afa Jisòs ndùku mô, te wù yena ye nì Jisòs ni, fen a wun ashyə̂ jis na, “Bâ, wò chehì mô afân ma wâ nôm tà che kpu jə̂.” 33 Jisòs yen te wù jyè ghê ghɨt ghê ghɨna yê hì mô, gha tɨni hì fo ngə̂k ha wûn yafa wûn nâ haŋaŋ. 34 Wù buf ha ghɨna na, “Ghàn che guma afa wûn.” Ghɨna jis na, “Bî ma wò yê yen a Bâ.” 35 Jisòs jî. 36 Ghɨta yen te wù jyè jis na, “Wù chehì kôŋà wûn nâ haŋaŋ!” 37 Biyani ghɨt ale hì jîsà na, “À wi wun we wù jìmè se ghɨt a fefana, wù che faŋ hi nì na kə Lasalòs kpu njwô ghə?” 38 Jisòs lo yen tan a Lasalòs yi sì gha tɨni baha yê fo ngə̂k ha wûn. Sî tɨni ndùku mô wu tə̂n ma ghɨ chuf a yi wo. 39 Jisòs jis na, “Ghàn chyàkhi ti tɨni.” Biyani Matà a mô wâ nè wùt wù kpona, Lasalòs jis na, “Tuk mù ti chyâ chîn mù kìk a Bâ, te ghɨ guma wûn, ma yuk yi be làhi fwu atɨ̂n bəmâ.” 40 Jisòs jis ha wun na, “Ba mu ye jis ha wò na wò bimi ma wò yen jyak a Fùyènà agha?” 41 Wù jis ni, ghɨ jîhì ti tɨni. Wù ki kokhi a nyə̂ jis na, “Mu fo àyòŋnà gha a Bâ, beka wò yè yusa yute ki yi yutî ha mu, 42 mu khə kə nâ na mu yè jîsà wo ywô. Biyani mu jìsà chîn kum jùŋ à ghɨt ghe ghɨ mô afân shyəma ghɨna ywô bimi na à tum wò mu!” 43 Wù jis ni, toŋa jis a jyə̂ yi tâ na, “Lasalòs, fwu bî!” 44 Wù fwu bên, ma ghɨ ti kwut wo nì wulu wunu nì bâh wù sùnju fî kwut kə̂k yi wuni nì njusu lesu. Jisòs jis na, “Ghàn yenti gûm wûn a wun wu wùn ma wù lo.” 45 Ghɨt a Jûs a dona ghe ghɨ tì bèna hi yena Mèli tì yen gha ye Jisòs tì ne bimi ha wûn. 46 Biyani ghɨta kahi yen fôktì gha ye Jisòs ne ha ghɨt a Falàsî. 47 Ghɨna khɨti yi yûŋtì ghê ngàŋsu ndâ Fùyènsu chiksu nì ghɨt a sakana buf na, “Ghàhnà gbè yàni, yen gha kanana ghe wùt wuna mòmà. 48 Ghàhnà ki dê wûn ma ghɨt à jɨ̀m nê ghaŋ gha ma bimi ha wûn. Yi bàm àtɨ̂n ma ghɨt a Lûmà nê bè bobhi ndâ Fùyèn yì ghàhnà yi chìk ma fê bobhi nâ ghɨt a ghàhnà ghɨ laka.” 49 Wùt lè a ghɨna fùtɨ̂n ghɨ toŋte na Kàyafàs, a mô ngàŋ à ndâ Fùyèn yì ngaŋtena a lɨ̀m afû jis na, “Ghàn khə wi gha nâ hakoh! 50 Ba yi mô na ghàn yena wi na yi bɨlà jwôfà na wùt wù mòk kpu a ghɨt à jɨ̀m a tû chyâ shyəma ghɨ bobhi lak yì jɨ̀m agha?” 51 Wù ndùku jîsà ni bu a wun wu tof biyani fôktè tum à Fùyèn te ngàŋ à ndâ Fùyèn yì ngaŋtena a lɨ̂m afû na Jisòs kpu a ghɨt a Jûs a tû. 52 Wù tà tì kpu jə kə ha ghɨna. Wù tì kpu kəbi a wana Fùyènà a tû ghe ghɨ jyahe mbyî, shyəma ghɨna kahà yûŋtè ben ma ghɨ hi mô ha shyə̀ à mòk. 53 Hi yìmì wu tuk afû ghɨna hì bakte hi ywe Jisòs. 54 Jisòs yen ni, hì fê lye wijə wu lùk afa ghɨt a Jûs mò hi yen a wûn. Wù bɨlì tet yen yi tèk yile ghɨ toŋte na Efèlèm, a bàh a lak ale ghɨ bakhe yênà yi lak yi sùsi hì chyə afû ghê jùmtìbàmsù wunsu. 55 Tuk mù Dàŋa chyalamù ghɨt a Jûs hì bakhe bênà, ghɨta kolo kwoka a Jèlusalèm dô kə ni, hi yè sò ngɨŋsu ghɨnasu a ghɨna chyənà yì lak shyəma tuk wu Daŋa chyalanu ben. 56 Ghɨna yen ya faŋ hì bufa kə Jisòs, yen timi a bɨn a ndâ Fùyènà bufa kə ghɨna sù ngɨŋ na, “Wò yena yàni? A wù nè bènàlò wu lùk wu yi yə afân agha?” 57 À ndùku mô ni ma ngàŋsu ndâ Fùyènsu chiksu nì ghɨt a Falàsî ma ghɨ ti chyâhì saki na, à khə nâbi nde luk we Jisòs mò atɨ̂n wu fôktì ma kwo wûn.
1 À tì faŋ kə mu tuk tufa shyəma tuk mù Dàŋa chyalamù yimi, Jisòs yen a Betanì a mô tèk yi Lasalòs we wù tì lohe a yi kpû yâ. 2 Ghɨ kolo ghan mwə̀ mù yə̂mù ha Jisòs, Matà chyâhì ha wûn. Ghɨ shihi yə̂ Lasalòs boŋ yə̂. 3 Mèli lyi fùshàŋ fu yûhì yì lɨ̀mtena ma ghɨ fati nì nât, a mô kə nâ yûhì yì jùŋ, yi lɨ̂mtè jwôfà kə ni, ta wu kâ nâ jùŋ, yuhi a Jisòs wu wù, yah nì nyuŋsu wunsu tusu. Te wù yuhe ni, yì lɨ̂m kə ndâ yì jɨ̀m. 4 Jùmtìbàm yì Jisòs yìlè a ghɨ ndùku toŋte na Judàs Ìskaliyòt, a mô kəbi wun we wù ndùku mô hi bəkle Jisòs njaŋ jis na, 5 “Ghɨ yê làhi bəkle yûhì yinâ wu ka wu dô kə ni hi fo ka tɨnu ha ghɨt a fufana.” 6 Wù tà tì jis ni beka wù ndùku tôknè ha ghɨt a fufana. À ndùku mô ni, beka wù ndùku chwoŋa, lêmà bàlì wù kâ faŋa wi hi lyè wule hi nè gha wuni yi kòŋì atɨ̂n. 7 Wù jis ni, Jisòs jis na, “Ghàn de wùt ywên wunâ,” fî jis na, “Wù ndùku lêmà yûhì yina hi yuhe mu a wu tuk afa ghɨ guma mu atɨ̂n. 8 Ghɨt a fufana mò kə ghàn a fùtɨ̂n kə yu mù jɨ̀m. Biyani mu bu hi faŋ ghàhnà.” 9 Ghɨt a Jûs tì yu dô kə ni na Jisòs mò a Betanì, lo yen afû hi yen a wûn nì hi fê yen a Lasalòs we wù tì lòhe a yi kpû yâ. 10 Ngàŋsu ndâ Fùyènsu chiksu yen ni, hì bakte hi boŋa ywe Lasalòs, 11 beka ghɨt a dona ndùku jûmtè yênà kə Jisòs yì bàm, bime ha wun kum nì gha ye wù ne ha Lasalòs. 12 Tuku bis yû, ghɨt ghe ghɨ tì be hi yə yi Dâŋà chyà, yu na Jisòs bênàlò a Jèlusalèm, 13 gbət wu bâ somu fwu yen hi kwote wun a wu lûm, bwata jîsà yênà na, “Hòsanà! Yutìnì mò ha we wù bènà a Bâba yi yet. Yènfù bonhi fə̀n à ghɨt a Isalì!” 14 Jisòs khɨŋ wâ jàkâs kwok a tû hì bênà, a mô kə yi gha ye ghɨ tì nyàka na, 15 Ghɨt a tèk yi Sayòn, “Kə ghàn fan, fə̀n wânù wu bènà, gbê a tô wâ jàkâs.” 16 À ndùku mô te gha ghɨ̂n gàna ni, jùmtìbàmsù Jisòs su yena khɨle wi. Ni te Jisòs tì lòte a yi kpû kahi yen a wun wu lùk wu kokhenu, ghɨna ki yɨ̂ŋtì na à mò a gha ma ghɨ tì nyak kum wûn nâ à jɨ̀m, ghɨta fê nê ha wûn. 17 À ndùku mô ni, ma ghɨt ghe ghɨ ndùku mô ghê wûn ma ghɨ ti fâŋ hì fôktè yênà kə ha ghɨta na, wù ti yen toŋa Lasalòs yi sì, wù ti lôtì a yi kpû. 18 Ghɨt a dona fwu hi yen a wûn beka ghɨna tì ywo na à mò yi gha kanani ye wù ne. 19 Ghɨt a Falàsî hì jîsà ha ngɨŋsu ghɨna su na, “Yi ni chwùtè na gha yile fi wijə shyəma ghàhnà ni. Yen te mbyî yì jɨ̀m hì yênà kə wun a yi bàm!” 20 Ghɨt ale ti bên kəbi hi kokhe Yènfù a lùk wu yi yə afâ a bu ghɨt a Jûs, 21 yen Filîb a mô wùt yi tèk yi yile a Galìlî ghɨ toŋte na Bèsadà chyati wûn jis na, “Bèbɨn ghàh kòŋàlò hi yen a Jisòs.” 22 Filîb yen fôktì ha Andùlù ghê wûn yen fôktì ha Jisòs. 23 Jisòs jis ha ghɨna na, “Yu ti kpên chin shyəma Yènfù lohi kpen wu Wâ Wùt a nyə̂. 24 Mu jìsà ha ghàn kə nâ hamok na, ghɨ ki faŋ hi tumhe a yi se ngwìk a chyə̂ ma yi faŋ à kə ha ngwìk. Biyani ma ghɨ ki tumhî, yì kpû ma yì mu saŋa ghɨ dô kə ni. 25 À koŋ nâbi nde hi tè chyə a mbye afân ma wù kpu. À hì bânà nâbi nde hi tè chyə a mbye afân ma wù bê khɨti chyəna ghe ghɨ bè mê wi. 26 À fètà nâbi nde ha mu, ma wù nê hi kəta hi tè jùmtè mu, shyəma ghàh à wùt fètana mù nê hi mô wu luk wù mòk. Bom màktèlò wùt we wù fètà ha mu.” 27 Jisòs fî jis na, “Chin mò ni, təm a ma fo ngə̂k ha mu nâ haŋaŋ, mu khə wi na mu ti jîsà na ghə agha. Mu ti jìsà na, ‘Bôm, kə wò bimî na ngə̂k mi yinâ ben ha mu ma?’ Nâ biyani mu che ben a chyə̂ kə hi yena ngə̂k mi yìnâ. 28 Chwùti jyak gha ha ghɨta a Bâ!” Kə ni jyə̀ fwu a nyə̂ jîsà na, “Mu mò ma mu ti chwûtì, fê mò hi chwùtè kpenhî.” 29 Ghɨt ghe ghɨ ndùku mò afû yu jyə̀ atɨ̂n, ghɨ le hì jîsà na à bwat wuli, ghɨ le jîsà na à jìsà anjèl à Fùyèn ha wûn. 30 Biyani Jisòs jis ha ghɨna na, “Jyə̀ yinâ tà ben hi gàmtè mu, yì jis hi gàmtè ghàn. 31 Yu ti kpên shyəma Yènfù bobhi ghɨta a mbyî kum besu ghɨna su, nì hi fê jùmà fihe fə̀n à mbyî chîn. 32 Ghɨ bè lôhè mu a yi kpû ma mu toŋa nâ ghɨt à jɨ̀m ma ghɨ ben ha mu.” 33 Wù ndùku jîsà ni, fôktè nki kpû ye wù nè kpo. 34 Ghɨt ghe buf na, “Sak yahi yike na Klistù kəta hi chyə fâŋ, wò ti gbi yàni hi jìs na ghɨ kətalò hi lòhè Wâ Wùt a nyə̂ agha? Wâ Wùt mu wùna mô nâ nde?” 35 Jisòs ki jîs ha ghɨna na, “Ghàn baha kəta yi ban kə a fu yulâ ni. Ghàn hi gbê luktu baha banâ kə bɨn a finana nê baŋ ghàn. Wùt shìki gbî a bɨn a finana ma wù nê hi khə wi na yi yènà afa agha? 36 Ghàn bimi bani baha mô a ghàn a fùtɨ̂n shyəma ghàn hi mô wana yi bana.” Jisòs jis gha mɨ ghɨ̂n ni, tet yen let lò. 37 Jisòs ndùku nê nâ gha kanana ghɨ̂n à jɨ̀m ni ghɨna tunhi hi bimi ha wûn. 38 Yi tì gan ni, shyəma tum à Fùyèn ye fòktì Ìsayà tì jìsa kpen na, “Bâ, à bimi nde tum yâhì? À yen nde jyak a Bâba?” 39 Ghɨna tì faŋ hi bime wu lûm na Ìsayà tî jîs kəbi na, 40 “Yènfù ti nî ghɨna ti fêf fî tahi a təm a ghɨna shyəma ghɨna nê hi ke kəbi yi kî yena wi, kwàktè kəbi gha khɨle wi, beka ghɨna shìki yên fè khɨle a ghâ ma ghɨna kahà ben ha Yènfù ma fu chwuk ghɨna.” 41 Ìsayà ndùku jîsà a gha mɨ ghɨ̂n kum Jisòs beka wù ndùku mô ma wù ti yen jyak a wuna. 42 Nâ biyani, chichàsu ghɨt a Jûs sulesu bimi ha Jisòs dô kə ni biyani tê chwùtè jə̀ ngɨŋsu ghɨna su beka ghɨna ndùku fânà na ghɨna ki chwûtè ngɨŋsu ma ghɨt a Falàsî nê jum ghɨna a ndasu yuŋtesu. 43 Ghɨt a Falàsî ndùku kôŋàlò na ghɨta hi kokhe ghɨna chyâ te ghɨ kokhe Yènfù. 44 Jisòs ti fî jîs nâ a jyə̂ yì tâ na, “À bimi nâbi nde ha mu ma à hi mô na wù ti bimî ha wùt we wù tuma mu. 45 À yen nâbi nde mu, ma à hi mô na wù ti yen wùt we wù tuma mu. 46 Mu ben a mbyî te yi bân, ma à bimi nâbi nde ha mu ma wù tè faŋa jə̀ a bɨn a finana. 47 À yu nâbi nde jîs yi mi faŋ hi nì te mu jìsà, mu wi hi saka wûn beka mu tà ben jə a mbyî hi sak à ghɨ̂t, mu bɨ̀li ben na ghɨta bon. 48 À ki mana kəbi nde mu, faŋ hi ywo jîs yi mi, ma gha ghe mu jìsà ma ghɨ bê sak wûn wu tuk wu gokhenu. 49 Mu ndùku jîsà wijə gha ma ghɨ ngɨŋa, à tum Bom mu na mu jis, fî fôktì lum we mu mò hi jìs atɨ̂n. 50 Mu khə na gha ye Bom jìsa kəta chyə ye yi bè mê wi. Mu bè jîsà nâbi ghə a mô kə gha ye Bom jìsa na mu jis.”
1 À ndùku mô shyəma tuku yu ma yə, Yə Daŋa chyalani, ma Jisòs hì khə na yu ti kpen shyəma yi lo a mbye afân, ma yi yen a Bì wî a ngwùŋ. Wù hì kôŋà ghɨt a wuna ghe ghɨ ndùku mô a mbyî, faŋ hì kôŋà kə yi kôŋ ghɨna shyəma wù de mbyi yinâ. 2 Ghɨ kolo a hì mô a leŋ a yu kolô te ghɨna yə, a mô ni ma deblì ti fo kwâktìnì ha Judàs Ìskaliyòt wâ Samùn, na wù bəkli Jisòs. 3 Jisòs hì khə kə nâ na Bì ti fo jyaka ha wûn a tô mwə̀ mù jɨ̀m, khə na yi lo a Yènfù a ngwùŋ mô hi kaha yèn. 4 Wù lôtì wu lùk wu yənu chwok nju se wù tì wafa, tam bàtàli, 5 sef mòlû a kaŋ a sona wùna hì sô wulu jùmtìbàmsu wunsu atɨ̂n, yâhà nì bàtàli ye wù tì tama yâ, 6 ben tan ha Bità, wù ki buf ha wun na, “A wò jìsà na wò khɨŋa kə nâ hi sò wulu mu a Bâ?” 7 Jisòs jis ha wun na, “Wò yena khɨle wijə gha ye mu nè chîn, biyani mô hi bè yen a khɨlî.” 8 Bità tunhî jis na, “Wò bè sô wijə wulu mu tuk wule.” Jisòs jis ha wun na, “Mu hì bu hi sò wulu wa, ma ghàh wò jyahi.” 9 Samùn Bità ki jîs na, “Yi hì mô ni a Bâ, kə su kə wulu mu, wo boŋ su wo mu nì to ma!” 10 Jisòs jis na, “À su nâbi nde wunu, wu hi fê kəta wi hi sò wunu wù jɨ̀m beka wun wu wunu hì yulelò. Ghàn à jɨ̀m chin mò nì yulînì a bu kə wùt wù mòk.” 11 Jisòs tì jis yâ na ghɨna mò nì yulînì a bu kə wùt wù mòk beka wù ndùku mô ma wù hì khə wùt we wu nè bəkle wûn. 12 Jisòs su mihì wulu ghɨna kaha mak njusu wunsu wafa sê yen ndokò a wu lùk afa wù ye ndoko, ki buf ha jùmtìbàmsù wunsu na, “Ghàn ti yen khɨli gha ye mu ne ha ghàn ni agha?” 13 Ghàn toŋte mu na chichà fê toŋte mu na Bâba, yi mô kə nâ hamok. 14 Mu ti su wulu wanu chîn mô Bâba fê mò chichà. Yi chwûtè na nâbi nde a ghàn a fùtɨ̂n kəta hi tè sò wulu wâ nè wunu. 15 Mu ni chwùti a chwena ha ghàn shyəma ghàn nê hi nê kə te mu nè. 16 Mu jìsà ha ghàn hamok na, wùt yi fèt tà timi hì chyâ bì yì fèt à wûn, wùt wù tumana chyâ wi wùt we wù tuma wûn. 17 Ghàn hì khəlò gha mɨ ghɨ̂n, ma ghàn shìki nî kə ni ma ghàn nê hi kəta yutìnì. 18 “Mu jìsà wi ha ghàn à jɨ̀m, mu khəlò ghe a mu chwokte. Biyani gha ye ghɨ nyaka a ŋwàklù Fùyèn na, ‘Wùt yə ghàh à wûn ma wù ti kaha ki mu a yi kə̀k, yi kəta hi kpên. 19 Mu fòktè gha mi yin ha ghàn chin ni, yi baha mô teka yi gan shyəma yi nê gan, ma ghàn bimi na à mò kə nâ mu, Mu mò we Mu mò’ 20 Mu jìsà ha ghàn kə nâ hamok na, à fyi nâbi nde wùt te mu tuma ma à hi mô na wù ti fyi mu, à fyi nâbi nde mu ma à hi mô na wù ti fyi we wù tuma mu.” 21 Jisòs tì jis gha mɨ ghɨ̂n ni, kwâktì wuni hì fo ngə̂k ha wûn nâ haŋaŋ. Wù ki jîs à banhî na, “Mu jìsà ha ghàn kə nâ hamok na wùt wù mòk làwû a ghàn a fùtɨ̂n mô hi bəkle mu.” 22 Jùmtìbàmsù hì mô nì kani, kante na wù jìsà kum nde agha. 23 À ndùku mô ni jùmtìbàm à wûn yê wù ndùku kôŋà hanɨ̂ŋ mô ma wù ti ndokò bakha a wun a ngwùŋ. 24 Samùn Bità jis ha jùmtìbàm àtɨ̂n na wù buf ha Jisòs na wù jìsà kum nde agha. 25 Wù yikti yen a Jisòs wù wùn buf ha wun na, “Wò jìsà ha nde a Bâ?” 26 Jisòs jis na, “Mu ti chukà a ban ghɨ̂n a mbàh ma mu fo ha wùt we mu jìsà kum wûn.” Wù jis ni chuk fo ha Judàs wâ Samùn Ìskaliyòt. 27 Te Judàs fye kə a ban ghe ni, satàn lyi a wun wu wùn. Jisòs jis ha wun na, “Nyaŋhi nì gha ye wò khɨŋa hi nì.” 28 Biyani wùt tê khɨlî a wu lùk wu yənu afa na wù jìsà kum ghə agha. 29 Wù jis ni jùmtìbàmsu Jisòs su lesu hì kwàktè na wù jìsà na Judàs ye yun mwə̀ mù yə̂mù na tuku yu ma ghɨ yə tuk wu yi yə atɨ̂n, à hì bu ni, ma à hi mô na wù jìsà na wù fo ka ha ghɨt a fufana. 30 Kə wu yu te Judàs fye ban ghe ha Jisòs fwu yen kə bɨn a finana. 31 À ndùku mô te Judàs fwo yena yâ, Jisòs ki jîs na, “Yu ti kpên shyəma ghɨ yen jyak a Wâ Wùt, ma fê yen jyak ghe Yènfù fo tohne a wun wu wùn. 32 À nè hì mô a wu yu afa ghɨ yena jyak a Fùyènà tohne a wun wu wùn ma Yènfù ni ghɨ boŋa yen jyak a wuna. Yènfù ni ma gha mi yîn nyâŋhè gan. 33 Mwəlà mânù mu nè hì mô kə nì ghàn a fu yulâ, hi chwùtè ngɨŋ à mì. Ghàn nè khɨŋalò mu moŋ ma mu ti yen wu lùk, ghàn bu hi bèn afû. Mu fòktè ha ghàn kə yi ghəl te mu mò ma mu ti fôktì ha ghɨt a Jûs. 34 Mu fo yi sak yi fe ha ghàn chîn, ghàn hi kôŋà ngɨŋ sanisu, mu ti koŋ ghàn. Ghàn hi kôŋà kəbi ngɨŋ sanisu yâ. 35 Nâ ghɨt à jɨ̀m nê yen à khɨli na ghàn mò jùmtìbàm samsu wu lum afa ghàn kòŋà ngɨŋ sanisu.” 36 Jisòs jis ni Samùn Bità buf ha wun na, “Wò yènà afa a Bâ?” Wù fîsì na “Wò wi hi yèn a wu lùk afa mu yènà atɨ̂n chîn, biyani mô hi bè jùmtè bèn.” 37 Bità buf ha wun na, “Mu wi hi yèn chîn njwô ghə a Bâ? Mu mò nì fati wùni hi kpû kum wò.” 38 Jisòs kaha buf ha wun na, “Wò mò kə nâ nì fati wùni hi kpû kum mu agha? Mu jìsà ha wò kə nâ hamok na, lɨm à ngwû nè shihi toŋ lan ma wò ti mana mu a ghan à tât.”
1 Jisòs jis ha jùmtìbàmsu wunsu na, “Kə ghàn hi fumhe ngɨŋ sanisu. Ghàn bimi ha Yènfù ma ghàn fê bimi kəbi ha mu. 2 Bɨn a Boma kəta sù ndâ su dô kə ni, à ye hì wijə ni, ma mu ti fôktì ha ghàn. Mu yènà hi fate wu luk afû ha ghàn. 3 Mu ki yê fatî, ma mu kahà bê lyi ghàn shyəma ghàn yen à hi mô ghàhnà wu lùk afa mu mò atɨ̂n. 4 Ghàn khəlò lum we wu yênà wu lùk afa mu yènà atɨ̂n.” 5 Tomòs ki buf ha wun na, “Ghàh mò hi khɨle yàni lumu a Bâ, khə wi nâbi nâ luk we wò yènà agha?” 6 Jisòs jis ha wun na, “Mu mò wu lûm, mô hamok fê mô a chyəna ghe ghɨ bè mê wi, wùt wi hi yèn ha Bì, a bu na wù tohna a mu wùn. 7 Ghàn shìki fate khə mu, ma ghàn hi boŋa khə Bôm. Hi yìmì chîn hi yèn ashyə̂, ghàn khəlò wûn ma ghàn ti yen wûn.” 8 Filîb jis ha wun na, “Bâba, ghàh khɨŋa kə yi gha yì mòk na wò chwuti Bì ha ghàh.” 9 Jisòs fîsì na, “Ba yi ni mô na mu ti chyə ghàhnà ghɨ̂n a wu yu dâ ni wo khə wi mu agha? Nâbi nde we wù yena mu, mò ma wù ti yen Bì, wò wu hì fê jîsà na mu chwuti wùni Bì ha ghàn? 10 Ba yi mô na wò bime wi na mu nì Bì mò kə ha wùt wù mòk agha? Gha ghe mu jìsà ha ghàn à wijə gha ma ghɨ ngɨŋa. À mò a gha a Bì we wù fo jyaka ha mu a yu mù jɨ̀m.” 11 Ghàn bimi te mu jìsa na, ghàh à Bì mò kə ha shyə̀ à mòk bu ni, ghàn bimi lê kə kum nì gha kanana ghe a ghàn yena. 12 Mu jìsà ha ghàn hamok na, à bimi nâbi nde ha mu ma wù nê hi nê nki tu gha te mu nè, fê nê chyâ nâbi ya beka mu kaha yênà ha Bì. 13 Mu nè nêlò nâbi ghə ghe a ghàn bufa a mu yi yet shyəma Bì chwuti koknì wuni tohne a Wâ wûn. 14 Ghàn ki buf nâbi ghə a mu yi yet ma mu nê ni ha ghàn. 15 Ghàn shìki kôŋà mu, ghàn hi lêmà sak tamtu. 16 Mu nè bufalò ma Bì fo gàmtì wùlè ma wù faŋ ghàn à ghɨna kə yu mù jɨ̀m. 17 Gàmtì mi yinâ mò a Yohnà Fùyènà ghe ghɨ chwûtè hamok kum Yènfù. Ghɨt a mbye wi hi fye a gàmtì mi yinâ beka ghɨna yena wi wûn, khə wi wûn. Biyani ghàn khə wûn beka wù chyə ghàn à ghɨna, mô hi tè mò a ghàn a fùtɨ̂n. 18 “Mu lò de wijə ghàn na ghàn faŋ te wana nkwô. Mu nè lôlò ma mu kahà ben. 19 Kə fu yulâ ni ghɨta mbye nè fè yena wi mu, biyani ghàn yenâ. Beka mu chyə, ma ghàn nê hi boŋa chyə̂. 20 À bè hì mô wu tuk afa mu kaha bena ha ghàn ma ghàn khɨli na ghàh à Bôm mò kə ha wùt wù mòk, ma ghàhnà ghɨ̂n hi boŋa mô kə ha shyə̂ à mòk. 21 Wùt we wù kòŋà mu mò wut we wù ywo sak tamtu. À hì kòŋà nâbi nde mu, ma Bôm nê hi boŋa kôŋà wûn, chwûtè lum tamtu ha wûn.” 22 Wù jis ni Judàs, a bu Judàs Ìskaliyòt buf na, “Wò nè chwûtè yàni lum tatu ha ghàh a Bâ, ma wò faŋ hi chwùtì ha mbyî agha?” 23 Jisòs fîsì ha wun na, “À koŋ nâbi nde mu, ma Bôm nê hi boŋa kôŋà wûn, ma ghàh à wûn nê ben ma ghɨ hi chyə̂ ghê wùt mu wê. 24 Wùt hì kôŋà wi mu ma wù hi ywo wi yikî mi. Yikî yin a ghàn ywo ni à wijə yikî mi yi ngɨŋi, à mò yi yikî Bì we wù tuma mu.” 25 “Mu ti fôktì gha mɨ ghɨ̂n ha ghàn kə nâ à jɨ̀m baha mô nì ghàn. 26 Gàmtì ye a Bì nè tuma a mu yi yet a mô a Yohnà Yulena ghɨ nè yikelò ghàn nâ nì gha à jɨ̀m, ma wù fê yɨŋti nâbi ghe mu mò ma mu ti jis ha ghàn. 27 “Mu ti lo de yutì yi mi ha ghàn. Mu fo kə nâ yutì mi ha ghàn. Mu fo wi yutì mi yîn ha ghàn te mbyi fo. Kə ghàn de na təm ghana hi fo ngək ha ghàn, kə ghàn hi fânà. 28 “Ghàn tê yu te mu ye jisa na, ‘Mu lò de ghàn hi yèn hi kaha bèn.’ Ghàn shìki kôŋà mu ma ghàn hi saŋle na mu yènà a Bì a ngwùŋ beka Bì ngaŋte chyâlàlò mu. 29 Mu ti fôktì gha ghɨ̂n ha ghàn chîn ghɨ baha mô teka ghɨ gan shyəma ghɨ nê shihi gàn ma ghàn bimi. 30 Mu tê fê jîsà wi ha ghàn chin hadà beka fə̀n à mbyî wuna hì bènàlò. Wù kəta wi jyak ale a mu a tû, 31 biyani ghɨt a mbye mô hi khɨlî na mu kòŋàlò Bì njwo mu nè kə gha ye wù jìsa na mu hi nê. “Ghàn ben ma ghàhnà lo afân.”
1 Jisòs tî jis na, “Mu mò kə nâ kàntè fùkàk, Bom mô bè fùk. 2 Wu gbêtà mâkà kpoŋ te tu mo wi tamu a mu wùn, chwokte tosu a tu kpoŋ afa tu mo tamu, shyəma tu hi tôkà mo tamu. 3 Ghàn mò nì yulînì a yi yike afa mu yike ghàn. 4 Ghàn faŋ à kə ha mu ma mu faŋ à kə ha ghàn. Kpoŋtu fù kàktù wi hi mo jə tamu kə ha wun a ngɨŋ, fu kəta kə hi tè mò a fùkàk shyəma wu mu tamu. Yi ni mò kəbi yi ghəl te ghàn wi hi mo tamu a bu na ghàn faŋ a mu wùn.” 5 “Mu mò fùkàk, ghàn mô tu kpôŋ. Wùt ki fâŋ a mu wùn, ma mu faŋ ha wûn ma wù mu tamu wu dô kə ni. À hì bu ha mu, ghàn wi hi nè gha yile.” 6 À faŋ nâbi nde hi tè mò a mu wùn ma wù hi mô kəbi te kpoŋ wu fùkàkù a wu yu afa ghɨ gbet a maka, wu yimlò, ghɨ boŋti kpoŋtu tɨntu ghɨ nyok a wù wùs. 7 Ghàn ki faŋ kə a mu wùn, yikî mi faŋ kə ghàn a tû, ghàn buf nâbi ghə te ghàn kòŋà ha Bôm, ma wù fo ha ghàn. 8 À mò a wu yu afa ghàn mo tamu hidù, yi hi chwûtè na ghàn mò jùmtìbàm samsu, nâ mbyî yì jɨ̀m hi yena jyak a Boma. 9 Mu kòŋà ghàn kə yi ghəl te Bom kòŋà mu. Ghàn faŋ à kə a mu yi kòŋ. 10 Ghàn ki lêmà sak tamtu, ma ghàn faŋ a mu yi kòŋ, kəbi yi ghəl te mu faŋa a Bom yi kòŋ beka mu lèmà saktu wun tu. 11 Mu fòktè gha mɨ ghɨ̂n ha ghàn shyəma ghàn hi kəta saŋlî ye mu kəta, a mô yi saŋlî ma yi ti lûn kpên. 12 Yìna mò sak yi mi na, ghàn hi kòŋà ngɨŋ sanisu kəbi yi ghəl te mu kòŋà ghàn. 13 Wùt wi hi fè chwùtì yi kôŋ yi chyâ yìna na, wùt koŋ sunsu wunsu ma wù kpu ha ghɨna. 14 Ghàn hì nê te sak yi mi jìsà ma ghàn hi mô sun samsu. 15 Mu fè toŋte wi ghàn chin na ghɨt a fetana beka wùt wù fètana wi hi tè khə gha ye bì yi fèt à wûn nè. Mu toŋte ghàn chin na sun samsu beka mu ti fôktì ha ghàn gha ghe mu ywo ha Bôm nâ à jɨ̀m. 16 À tà ghàn mu chwôk, à che lo mu chwok ghàn tum na ghàn yê mu tam we wu bè mê wi. Ghàn ni ma Bom fo nâbi ghə ghe ghàn bufa ha wûn tohna a mu yi yet. 17 Yìna mò sak yi mi na, ghàn hi kôŋà ngɨŋ sanisu. 18 Ghɨt a mbye hì bânà ghàn, ghàn yɨ̂ŋtì te ghɨ ndùku bânà mu ashyə̂. 19 Ghàn yê hì mô ghɨt a mbye ma ghɨna kòŋàlò ghàn. Chin hì mô mu ti chwokti fihi ghàn a mbyî, ghàn fê bu ghɨt a mbye. À mò yi gha ye ghɨt a mbye bànà ghàn. 20 Kə ghàn yìta gha ye mu che yike ghàn atɨ̂n na ‘Wùt fètana tà timî hì chyâ bì yi fèt à wûn.’ Ghɨ mô ma ghɨ chehì bânàlò mu, ma ghɨ nê hi bânà ghàn kəbi yâ. Ghɨ shìki mô ma ghɨ chehì yutelò yikî mi, ma ghɨ nê hi boŋa yute yani kəbi yâ. 21 Ghɨ nè hì nêlò gha mɨ ghɨ̂n ha ghàn à jɨ̀m ni, kə kum mu beka ghɨna khə wijə wùt we wù tuma mu. 22 Mu ndùku faŋa hi bèn hi jìs ha ghɨna kum besu ghɨna su ma yi chwûtè wijə na ghɨna ti ni be te yi chwûtè chîn. Ghɨna fè kəta wijə gha yile chin hi jìs kum besu ghɨna su. 23 À bànà nâbi nde mu ma yi nê hi chwûtè na wù bànàlò kəbi Bôm. 24 À ndùku mô na mu faŋ hi nè yi ghâ a ghɨna fùtɨ̂n, teka wùt timè ni, ma yi chwûtè wijə na ghɨna ti nî be te yi chwûtè chîn. Chin mò ma ghɨna ti yen gha kanana ghɨ̂n biyani fî ban kə yi bân mu bakha kə nì Bôm. 25 Nâbi ni, yi chehì kətalò hi gàn ni, shyəma gha ye ghɨ nyaka a ghɨna yi sâk kpen na, ‘Ghɨ che ban mu kə halô.’ 26 Gàmtì nè bênàlò ma à tum mu ma wù nê hi jîsà kə hamok kum mu. Wù nè lô a Bom a ngwùŋ, a mô a Yohnà wun ghe ghɨ jîsà kə hamok. 27 Ghàn nè boŋa jîsà kə hamok ha ghɨta kum mu, beka ghàhnà chehì mô amok kə a yìmi.
1 “Mu jis a gha ghɨ̂n à jɨ̀m ha ghàn ni na kə ghàn nè mâkà bimî yani.” 2 Ghɨ nè jûmà fihelò ghàn a ndasu yuŋtesu. Mu jìsà ha ghàn hamok na, yu bakhe bênàlò a wùt nè ywe ghàn ma wù hi kwâktè na yi ni yi fêt ha Yènfù. 3 Ghɨta nè hi nê a gha mɨ ghɨ̂n ha ghàn beka ghɨna khə wijə mu, khə wi Bì. 4 Mu fòktè a gha ghɨ̂n ha ghàn ni shyəma yu tɨnu nê kpen, ma ghɨ nê shihi nì ha ghàn ma ghàn yɨŋti te mu tì fòkte ha ghàn. Mu tà che fôktì jə̂ gha mɨ ghɨ̂n ha ghàn ashyə̂ beka mu ndùku mô ghàhnà amok. 5 Chîn mô mu yênà a wùt we wù tuma mu a ngwùŋ, biyani ghàn bufa wi na mu yènà afa agha? 6 Mu ti fôktì gha mɨ ghɨ̂n ha ghàn ghɨ hì fo ngə̂k ha ghàn. 7 Biyani, mu jìsà ha ghàn hamok na, à mò jùŋ ha ghàn ni te mu lò. Mu ki faŋ hi lò, ma gàmtì tê bènà jə̀ ha ghàn, biyani mu ki lô, ma mu yê tum wûn ha ghàn. 8 Wù bènà hi chwùtè a gha ghe ghɨ befa kum nì mbyî ha ghɨt a mbye, hi chwùtè lum te tu mô chilichili nì hi chwùtè lum we Yènfù bè saka ghɨta ha ghàn. 9 Ma wù chwùti gha ye yi befa kum mbyî beka ghɨta bime wijə ha mu, 10 ma wù fê chwùti lumtu chilichili tu beka mu hì mô a Bom a ngwùŋ, ghàn bu hi fè yen a mu. 11 Ma wù chwùti lum we Yènfù bè saka mbyî yìna atɨ̂n beka fə̀n we wù saka mbyî hì mô ma wù ti fen sak. 12 Mu baha kəta a gha hidù hi jìs ha ghàn, biyani ma ghàn yu chin ma ghɨ hi fo ngə̂k ha ghàn. 13 Biyani Yohnà Yulena ghe ghɨ chwûtè hamok bènàlò ma ghɨ tihi ghàn, ma ghàn hi khə nâbi yìni gha ye yi mô hamok. Wù nè bê ma wù hi jîsà wijə gha wun ghɨ ngɨŋa. Wù nè bênà ma wù hi jîsà gha ghe ghɨ fokte ha wûn, fôktè a ghâ ghɨ baha mô hi bè gàn. 14 Wù nè bênà ma wù ni ma ghàn hi khə gha ma, ma ghàn yen koknâ ye mu kəta. 15 Nâ mwə̀ mù Bôm mù jɨ̀m mò mâmù. À mò gha ye mu jìsà na, Yohnà Yulena nè bênàlò ma ghɨ lyi gha ma, ma ghɨ ni ma ghàn hi khə. 16 “Ghàn nè motè kə ni ma ghàn tê fê yena jə̀ mu, ma fê motè kə ni ma ghɨ yen mu.” 17 Jùmtìbàmsu wunsu lesu hì bufa kə a ghɨna sù ngɨŋ na, “Wù ni jìsà na ‘Ghàn nè motè kə ni ma tê fè yena mu,’ ma fê motè kə ni ma ghɨ yen mu, yi chwûtè na ghə? Wù ni jìsà ni na beka mu yènà a Bì à ngwùŋ, yi chwûtì na ghə” 18 Ghɨna hì kwâktè bufa na, “Motì mi yinâ a wù jìsà chwûtè na ghə? Ghàhnà khə wi na wù jìsà na ghə agha.” 19 Jisòs khɨli na ghɨna ni khɨŋa hi bufa gha mi yîn ha wûn, ki jîs ha ghɨna na, “A ghàn kante gha ye mu jìsa na ‘Ghàn nè motè kə ni ma ghàn tê fê yena jə̀ mu, ma motè kə ni ma kahà yen mu.’ 20 Mu jìsà ha ghàn kə nâ hamok na, ghàn nè hì jyêlò, gûnà, mbyi saŋlê. Ghàn nè hì kwohe yi sên biyani ma seni kwolani tɨni kahi a yi saŋlî.” 21 Wùt ywen shihi bwɨ̂, wu hi ywo yi yaf beka yu ti kpên na wù bwɨ, biyani wù bwɨ wu yità yaf mi yê, kum yi saŋlî te wan hì mô a wô. 22 Yi ni mò kəbi yi ghəl ha ghàn chin te ghàn kwohe seni, biyani mô hi nè fè yen ghàn na ghàn hì saŋlê, wùt bu hi fè nì na kə ghàn saŋli. 23 “Tuk wu tɨnu nè kpenâ ma ghàn tê fè bufa yi gha ha mu. Mu jìsà ha ghàn hamok na, Bì nè folò nâbi ghə ghe ghàn bufa tohne a mu yi yet.” 24 Hi tàn chîn ghàn tà buf jə shyə tohne a mu yi yet. Ghàn buf ma ghàn kwoti, ma ghàn hi kəta saŋlînì luneni. 25 Mu tumle kə a gha ha ghàn yi tumlî, biyani yu mô hi bèn na mu nê hi fê jîsà wi wu lum afân. Mu nè hì fôktè mihè kə yi mihì gha ha ghàn kum Bì. 26 Tuk wu tɨnu nè kpenâ ma ghàn nê hi bufa mwə̀lû ha Bôm tohne a mu yi yet kə ghàn a sù ngɨŋ. Mu jìsà na à nè fè bufa wi mu shyə ha Bì a ghàn a wu lùk, 27 Beka Bì nâ a wun a ngɨŋ kòŋàlò ghàn beka ghàn kòŋàlò mu, fê bime na mu lo a Bì a ngwùŋ. 28 Mu che lo a Bì a ngwùŋ shyəma mu ben a mbyî, kaha yênà a Bì a ngwùŋ. 29 Jisòs ndùku jîsà ni, jùmtìbàmsu jis na, “Wò jìsà kə nâ a ndan chîn, fe tumle wijə yi tumlî gha. 30 Ghàh ti yen chîn na wò khəlò gha à jɨ̀m, yen na wùt kəta wi hi tè fè buf yi bûf gha ha wò. Yen na yina ti nî na ghàh bimi na wò lo ben a Yènfù a ngwùŋ.” 31 Jisòs buf ha ghɨna na, “A ghàn ti bimî chîn! 32 Yu nè bènàlò, mu jìsà ma à hì mô kə nâ wù wûn, ghàn mô hi jyàhì na nâbi nde hi kolê. Ghàn nè dêlò mu ma mu hi mô mù nɨ̂ŋ, biyani laha bu mù nɨ̂ŋ beka Bì mò ghàh à wûn. 33 Mu fòktè a gha mɨ ghɨ̂n ha ghàn ni, shyəma ghàn faŋ ha mu ma ghɨ hi kəta yutìnì. Ghàn nè kwotelò ngə̂k a mbye afân. Biyani kə wùt nè bota! Mu ti ta chyâ mbyî.”
1 Jisòs jis mihì gha mɨ ghɨ̂n ki kokhi a nyə̂ jəm na, “Bâ, yu ti kpen chîn. Nì ma ghɨta yen jyak a Wan wâ ghɨ kanana shyəma wù ni ma ghɨta yen jyak gha, 2 beka wò ti fo jyaka ha wûn nâ a ghɨt à jɨ̀m a tû shyəma wù ni ma ghe wò fo ha wûn khɨti chyəna ghe ghɨ bè mê wi.” 3 Hi khɨte chyənà ye yì bè mê wi, mò na, ghɨna hi khə wò we wò mò Fùyèn fù mòk a fe fu mô hamok, fê khə Jisòs Klistù we wò tuma. 4 Mu ti chwûtì jyak gha a chyə̂ wu lum na, mu ti ni mihì fêt ye wò che fo na mu ni. 5 Bâ mù, lyi mu chîn a wo ngwùŋ shyəma ghɨta hi fo kokhînì ha mu a ye ghàh à wò ndùku kəta shyəma ghɨ fati mbyî. 6 “Mu ti chwûtì wò ha ghe wò che chwokte fihe a mbyi fo ha mu. À chehì mô ghɨt gha ghe wò fo ha mu a ghɨna ywo tum yâ. 7 Chîn wu hì mô ghɨna khə nâbi ghə ghe mu kəta mò ma ghɨ lo ha wò, 8 beka mu ti fôktì tum yâ ye a wò che lakne na mu fokti ha ghɨna, ghɨna che yû bimilò. Ghɨna chehì khəlò hamok na mu lo a wo ngwùŋ, bimi na à tum wò mu.” 9 Mu jə̀mà wi ha ghɨt a mbyî. Mu jə̀mà ha ghɨ̂n ghe wò fo ha mu, a mô a ghɨt gha. 10 Nâbi ghə ghe a mu kəta a mò gha, nâbi ghə gha a mô ghama. Ghɨna ti nî mu wu hì kəta kokhînì. 11 Chin wu hì mô mu bu hi faŋ a mbyî, biyani ghɨna baha mô kə a mbyî. Bom wù yulena tòkna nì ghɨna a wo a jyak, a mô a jyak ghe wò che fo ha mu shyəma ghɨna hi mô ha shyə̀ a mòk kəbi yi ghəl te ghàh à wò mò ha shyə̀ à mòk. 12 Mu che tôknà ha ghɨna te ghàh à ghɨna chehì baha mô amok, lem ghɨna a jûŋ nì jyak ghe wò fo ha mu. Nâ wù mòk tê lə̀hà a bu kə we wù chehì mô hi bè lə̀hà shyəma gha ye ŋwàklù jìsa ni kpen. 13 Chîn mò mu bênà ha wò, biyani jîsà a gha mɨ ghɨ̂n baha mô kə a mbyî hi nì na ghɨna hi kəta saŋlînì a ghɨna təm, yi kpene kəbi yi ghəl te mu kəta. 14 Mu ti fôktì tum yâ ha ghɨna, ghɨta mbye ghɨ hì bânà ghɨna beka ghɨna wijə te ghɨt a mbye, kəbi yi ghəl te mu wijə wut à mbyî. 15 Mu jə̀mà wi na wò lye fihi ghɨna a mbyî, mu jə̀mà na wò tokna ma wò tesi ghɨna ha deblì. 16 Ghɨna wijə ghɨt a mbye, kəbi yi ghəl te mu wijə wut à mbyî. 17 Gha ya jìsà kə hamok. Nì ghɨna ma ghɨna hi mô nì yulînì, tohne a wo yi gha afa yi mô hamok. 18 Mu ti tum ghɨna a mbyî kəbi yi ghəl te wò che tuma mu na mu yen a mbyî. 19 Mu ti fo ngɨŋ à mì ha wò shyəma ghɨna boŋà fo ngɨŋsu ghɨna su ha wò hamok. 20 Mu jə̀mà wi kə ha ghɨna. Mu jə̀mà kəbi ha ghe ghɨ bè ywo tum à mì ha ghɨna ma bimi ha mu. 21 Mu jə̂mà a Bâ na ghɨna nê hi chîntè mô ha shyə̀ à mòk nâ à jɨ̀m kəbi yi ghəl te ghàh à wò mò kəbi ha shyə̀ à mòk. Nê ma ghɨna faŋ ha ghàh à wò shyəma ghɨt a mbyi ghɨ̂n bimi na wò ti tum mu. 22 Mu ti fo ban yi chiki ha ghɨna a mô ye a wò che fo ha mu shyəma ghɨna hi mô kə ha shyə̀ à mòk, kəbi yi ghəl te ghàh à wò mò kəbi ha shyə̀ à mòk. 23 Mu jə̀mà hi tè mò kə ha shyə̀ à mòk ghàh à ghɨna, ghàh à wò mô kə ha shyə̀ à mòk shyəma ghɨna kahè hi mô kə ha shyə̀ à mòk kə nâ ha ghɨna sù ngɨŋ, hi nì na mbyî hi khə na wò che tum mu, kôŋà ghɨna kəbi yi ghəl te wò kòŋà mu. 24 “Mu khɨŋa a Bôm na ghe wò fo ha mu bê hi mô kə wù lùk wù mòk shyəma ghɨna yen ghak yi mi, a mô ye wò tì kòŋa mu fo ha mu, shyəma wò fati mbyî. 25 Bì wù jùŋ we wù saka chilichili, ghɨt a mbye khə wi wò biyani mu khə, ghɨ̂n a wò fo ha mu ni khə na à tum wò mu. 26 Mu ti chwûtì wò ha ghɨna, mô kə hi tê baha chwùtè yèn kə ashyə̂ shyəma ghɨna hi kəta kôŋì ha ngɨŋsu ghɨna su, beka mu mò a ghɨna fùtɨ̂n. Kôŋ mi yîn mò kəbi yi kôŋ ye wò kəta ha mu.”
1 Te Jisòs jə̀ma mihe ghê jùmtìbàmsu wunsu lo daŋ a fuŋla Kìdilòn, yen lyi a ngun à sù Olìfs sulesu. 2 À ndùku mô yâ, Judàs we wù bəkle Jisòs khə luk wu tɨnu beka Jisòs ghê jùmtìbàmsu wunsu ndùku nyâŋhè yênàlò afû. 3 Te Jisòs ye lye a ngun afû ni, Judàs boŋ ben, chwûtè bênà nì lumu ha sojà sulesu nì ghɨt ale ghe ghɨ chînà ndâ Fùyèn, ma à tum ngàŋsu ndâ Fùyènsu nì ghɨt a Falàsî. Ghɨna ndùku bênà yâ kəta mwə̀ mù wòŋ nì khə̀ksù nì lâmsù. 4 À ndùku mô yâ, Jisòs khə nâbi ghə ghe ghɨ ndùku mô hi gàn ha wûn. Wù fwuti ben buf ha ghɨna na, ghàn khɨŋa nde. 5 Ghɨna fîsì na, “Ghàh khɨŋa wâ wùt à Nasalì wunâ ghɨ toŋte na Jisòs ni.” Jisòs jis na, “À mò mu ni.” Wù ndùku jîsà yâ Judàs we wù tì bəkle wûn mô kəbi afû ghê ghɨt mu ghê. 6 À hì mô te Jisòs jìsa ya na, “À mò mu ni,” ghɨna kaha kôtì yen a yi bàm fenti a chyə̂. 7 Wù fî buf ha ghɨna na, “Ghàn khɨŋa nde agha?” Ghɨna fî fîsì kə na, “Ghàh khɨŋa wâ wùt à Nasalì wunâ a ghɨ toŋte na Jisòs.” 8 Jisòs fî jis na, “Mu ti jis ha ghàn na à mò mu ni. Ghàn hì khɨŋa mu, ghàn delò ma jùmtìbàm sam sîn lo.” 9 Wù jis ni shyəma gha ye wù tì jisa ha Bè wûn kpen na, “Nâ wùt tà ləhà atɨ̂n à ghɨ̂t afa wò tì fo ha mu.” 10 À ndùku mô yani Samùn Bità kəta yi fâ, wù chwôk kat tən a tûŋla kpen wu wo ta wùt wù fètana a ngàŋ à ndâ Fùyèn yì ngaŋtena, yet yi wùt wù fètana àtɨ̂n mô Malkùs. 11 Jisòs jis ha Bità na, “Kaha lihi fâ ya a mba. Wò kwâktè na mu kòŋà wi hi yena ngə̂k wu lum afa Bom lèma na mu yen atɨ̂n agha?” 12 Sojà sê nì wùt a ghɨna wù tâ, bakha nì ghɨt a Jûs ghe ghɨna ndùku chînà ndâ Fùyèn yì chìk tî kwo Jisòs kwut wûn, 13 lyi yen nì wûn a Anàs ashyə̂, a mô bà ywê Kàyafàs we wù ndùku mô ngàŋ à ndâ Fùyèn yì ngaŋtena a lɨ̀m afû. 14 Kàyafàs mu we ndùku mô kəbi we wù tì tobhe ghɨt a Jûs na yi jwôfà na wùt wù mòk kpu a ghɨta à jɨ̀m a tû. 15 Ghɨ kwo Jisòs ni shihi yèn, Samùn Bità yen a wun yi bàm ghê jùmtìbàm à Jisòs wùlè. Jùmtìbàm à Jisòs mi yê yen boŋ lyi kə yi lyî ghê Jisòs a bɨn a ngàŋ à ndâ Fùyèn yì ngaŋtena beka ngàŋ à ndâ Fùyèn àtɨ̂n ndùku khəlò wûn, 16 biyani Bità timi ki yi jwô bɨn. Jùmtìbàm à Jisòs yê a ngàŋ à ndâ Fùyèn ndùku khə kaha fwu yen a yi ywô bɨn, chyati wan wù ywên we wù ndùku fêtà afû wu yu mefû wù lyi lyi nì Bità. 17 Ghɨna shihi lyi ni wan wù ywên mu we ki buf ha Bità na, “Ba wò mò ni mô kəbi jùmtìbàm à wùt mu wuna wùlè agha?” Bità tunhî jis na, “Mu wijə jùmtìbàm à wûn.” 18 À ndùku mô ni, ngàŋ à ndâ Fùyèn yì ngaŋtena bakha nì sojàsù ti fati wusu beka luktu ndùku sana, Bità boŋ yen timi ghê ghɨna hì yotê. 19 Ngàŋ à ndâ Fùyèn yì ngaŋtena hì bufte a gha ha Jisòs kum jùmtìbàmsu wunsu nì yikî wuni. 20 Jisòs fîsì jis na, “Mu chehì jîsà kə a ndan ha ghɨta à jɨ̀m yike a ndasu chintesu makə a ndâ Fùyèn yì chìk a tu lùk afa ghɨt a Jûs bè chîntè atɨ̂n. Mu tà ye timi hì nyamte jîsà yi jîs gha. 21 Wò bufte kə nâ a gha ghɨ̂n ha mu njwô ghə? Wò buf ha ghɨt ghe ghɨ chehì yute jîs yi mi. Ghɨna khəlò gha ghe mu chehì jîsà.” 22 Te Jisòs ndùku jîsà bê ni, sojà yìlè sam a wo a wun a jyə̀k buf ha wun na, “Wò gbi yàni hi tè jìs ha ngàŋ à ndâ Fùyèn yì ngaŋtena ni?” 23 Jisòs fîsì na, “À shìki mô ma mu ti jis njahû, wo fôktì gha be ye mu jìsa, à hì mô ma mu jis yi gha hamok, wò fôktì na wò mu sam ha ghə agha?” 24 Anàs jis na ghɨ lyê yen nì Jisòs ha Kàyafàs ngàŋ à ndâ Fùyèn yì ngaŋtena. Jisòs baha mô kə sù kùl. 25 Bità hì baha mô yote kə wu wus, ghɨ fî buf ha wûn na, “Ba wò ni mô kəbi jùmtìbàm à wùt mu wuna wùlè?” Bità tunhî jis na, “Mu wijə jùmtìbàm à wûn.” 26 Wùt wù fètana à ngàŋ à ndâ Fùyèn yì ngaŋtena a we à mò wut ha wùt we Bità tì kak a təna tûŋla wuna yâ buf ha wun na, “Mu tà che yen ghàn à wûn a ngun à sù Olìfs agha?” 27 Bità fî tunhi kə yi tunhî lɨm à ngwû tôŋ. 28 Ghɨ bɨs lyi Jisòs a Kàyafàs à bɨn yen nì wun a tôk à wùt we à fə̀n à Lûm tì lèma na wù hi saka bâh à yi lak mu ghê. Ghɨt a Jûs yen tan afû tən hi lye a tôk beka ghɨna khɨŋa hi tè mò nì yulînì a ghɨna chyəna laka shyəma ghɨna khɨli hi yə Yə Daŋa chyalani. 29 Balèt fwu ben buf ha ghɨna na, “Ghàn jis na wùt wuna bobhi ghə?” 30 Ghɨna fîsì kə na, “À yê hì mô na wù tà gha bobhî, ma ghàh tà ben jə̂ nì wûn ha wò.” 31 Balèt jis ha ghɨna na, “Ghàn lyi lê wûn ma ghàn sak kə ghàn a sù ngɨŋ kə te sak yani yi laki chwùtè.” Ghɨt a Jûs mu ghê tunhî jis ha wun na, “Ghàh kəta wi jyaka hi ywe wùt.” 32 Ghɨna jîsà ni, hi lunhe gha ye Jisòs tì jisa kum nì nki kpu ye wù ndùku mô hi bè kpû. 33 Balèt kaha lye a tôk toŋa Jisòs buf ha wun na, “Wò mò fə̀n ha ghɨt a Jûs ma?” 34 Jisòs fîsì buf ha wun na, “Wò bufa kə nâ ha wo ngɨŋ ma, wò bufa kəta ghɨ tì fôktì gha ha wò kum mu ma?” 35 Balèt buf ha wûn na, “Wò kwàktè na mu mò kəbi wùt à Jûs ma. À lo a ghɨt gha nì ngàŋsu ndâ Fùyènsu ben nì wò ha mu. Wò bobhi ghə?” 36 Jisòs jis na, “Mu saka wijə fə̂n wù mu a mbye afân. Bu ni ma ghɨt a ma ghɨ fetana no hi tàmtì na kə ghɨt a Jûs kwo mu. Mu saka fə̂n wù mu wu lùk wu lô.” 37 Balèt buf ha wun na, “Ba yi ni chwùtè na wò mò fə̀n agha?” Jisòs fîsì jis na, “Wò jìsà kə nâ hamok na mu mò fə̀n. Ghɨ bwɨ kə nâ mu ha fə̀n, mu ti ben a mbyî te fə̀n hi tè fòktè gha ye yi mô hamok. Nâbi nde we wù jìsà hamok ywolò jyə̀ mì.” 38 Balèt buf ha Jisòs na, “Hamok mò na ghə?” Te wù bufa, kaha fwu yen a bɨn jis ha ghɨt a Jûs ghe na, “Mu tà yen jə̂ gha ye ghɨ mô hi kwo wûn atɨ̂n, 39 biyani khə na à yè bê tânà wu yu Daŋa chyalanu wun, ghàn fôktì wùt mu fihi a chyâk. Mu fihi fə̀n a ghɨt a Jûs ha ghàn chîn agha?” 40 Ghɨna bwati jis kə na, “Ngàŋ, kə fihi wûn! Bɨ̀li fihi Bàlabàs ha ghàh!” À ndùku mô yâ Bàlabâs mô wut wù chwoŋana.
1 Balèt lyi fo Jisòs na ghɨ sam. 2 Sojàsù ba a fot a tu tùŋà so a wun a tû. Mâk njumù tù fə̀n su baŋasu a wun wu wùn, 3 hì motè kə ni bê time a wun ashyə̂ bɨ̂nà wûn jîsà na, “Yuchwî yi satani yi ghɨt a Jûs.” Bɨ̂ŋtè ni sama wûn a yi kə̀k. 4 Balèt kaha fwu ben jis ha ghɨt a Jûs ghe na, “Mu ti lyê fwo bênàlò nì wûn ha ghàn shyəma ghàn hi khə na mu tà yen jə gha ye wù bobhe.” 5 Jisòs fwu bên ma wù ti mak nju mù tù fə̀n nì fota tu tùŋà a wun a tû. Balèt jis ha ghɨt atɨ̂na na, “Wùt àtɨ̂n wunâ!” 6 Ngàŋsù ndâ Fùyènsu nì sojà se su ndùku chînà ndâ Fùyèn yì chìk yen ben nì wûn ni yîmì hì bwata jîsà kə na, “Ma ghɨ banti wûn a kàkfùtàfù!” Balèt jis ha ghɨna na, “Ghàn lyi lê wûn ma ghàn yê banti. Mu tà yen jə gha ye wù bobhe.” 7 Ghɨt a Jûs ghê fî jis kpenhi kə na, “Sak yahi chwùtè na wù kəta hi kpû beka wù jìsà na yi mò Wâ Fùyèn.” 8 Balèt yu ni hì fânà. 9 Wù fî kaha lyi Jisòs lyi nì wûn a tôk buf ha wûn na, “Wò lo nâ afa?” Jisòs tê fîsì. 10 Balèt buf ha wun na, “Wò wun mu agha? Wò khə wi na mu kətalò jyaka hi jìs na, ghɨ de wò makə hi jìs na ghɨ banti wò a kàkfùtàfù?” 11 Jisòs fîsì jis na, “Wò kəta wi jyak ale a mu a tû, a bu kə ghe a Yènfù fo ha wò. Yi chwûtè na be yì chìk mò ma à ni wùt we wù ye fo mu ha wò.” 12 Balèt yu ni hì khɨŋa hi dè wûn, biyani ghɨt a Jûs ghê hì fê bwate jîsà kə na, “Wò ki de wùt wunâ wù lô, ma à hi mô na wò kòŋà wi fə̀n wù chìk a Lûm. À jìsà nâbi nde na yi mò fə̀n ma à hi mô na wù nò fə̀n wù chìk a Lûm.” 13 Balèt yu ni, lyi fwu ben nì Jisòs, ndokò wu wən a yi ti saki, ghɨ toŋte yi jìs yi Hibùlùs na, “Gabatà.” 14 À ndùku mò ni, ma à hì mô kə nâ nchwì tâ, a mô tuk we ghɨ ndùku fate wunu na tuku yu ma yimi hi yə tuk wu Daŋa chyalanu. Balèt ndokò wu kpòk ki jîs ha ghɨt a Jûs ghe na, “À mò fə̀n wânù ni!” 15 Biyani ghɨna bwati jis kə na, “Lô nì wûn! Lô nì wûn! Ma ghɨ banti wûn a kàkfùtàfù!” Balèt buf ha ghɨna na, “Ghàn jìsà na mu banti fə̀n wânù agha?” Ngàŋsù ndâ Fùyènsu jis na, “Ghàh kəta wi fə̀n wùlè a bu kə fə̀n wù chìk a Lûm.” 16 Balèt ki fo Jisòs na ghɨna yê banti. Jisòs hì gbê chyâ kə sojàsu wu wô. 17 Wù bêkà kâkfùtàfù wun fu kə nì ngɨŋ à wûn lyi yen nì funfu wu lùk afa ghɨ ndùku toŋte na Wok yi tu, ghɨ toŋte luk wu tɨnu yi jìs yi Hibùlùs na, “Golgotà.” 18 Ghɨ banti Jisòs afû, fî banti kəbi ghɨt ale à bà, banti wù mòk a kàkfùtàfù lefu a Jisòs a bàh à kpen wu wo ta, fî banti wùlè a wun a bàh à kpen wu wo kôwì. Jisòs hì mô fùtɨ̂n, fùtɨ̂n. 19 Balèt jîs ghɨ nyak a tô shyə̀ na, “Wun mò Jisòs a wù Nasalì fə̀n à ghɨt a Jûs,” ghɨ bantî à ghɨ̂n a tô kàkfùtàfù. 20 Ghɨt a Jûs nâ hidù hì taŋa agha atɨna, beka luk we ghɨ tì bante Jisòs atɨ̂n ndùku bakhe yênà yi tèk, gha mu ghê mô ma ghɨ tì nyak yi jìs yi Hibùlùs fî nyak yi jìs yi Lûm nì yi jìs yì Gɨlìs. 21 Ngàŋsu ndâ Fùyènsu hì tunhe ha Balèt na wù wijə fə̀n à Jûs. Jis ha wun na wù bɨ̀li nyak na, ‘Wùt wunâ chehì jîsà na yi mò fə̀n à Jûs.’ 22 Balèt fîsì na, “Gha tɨni nè faŋa kə te mu jìsa na ghɨ nyak.” 23 À hì mô te sojàsu bante mihe Jisòs, ghɨna jyâtì njusu wunsu wu bàh wù kìk nâbi nde hì lyê kə a bâh à mòk, à ben faŋ kə sùju sê wù tì màka a fùtɨ̂n, su mô ma ghɨ tum kə sufûblù teka ghɨ yuŋ luk wule. 24 Sojà sê jis kə ha ngɨŋsu ghɨna su na, “Kə ghàhnà nè bâtè sìnâ. Ma ghàhnà tum byè, ma ghɨ yen na à kəta nde agha.” Gha mi yîn gan ni shyəma gha ye ghɨ tì nyàka a ŋwàklù Fùyèn kpen na, “Ghɨ tî jyâtì nju samsu hì tuma byè hi yə nju samsu.” Sojà mu sîn ni gha mi yîn. 25 Ghɨ banti Jisòs, nè wûn nì wâ nè wûn wùlè bakha nì Mèli ywê Kèlobàs nì Mèli wù Madalà yen timi bakha a wûn a ngwùŋ à kàkfùtàfù. 26 À hì mô te Jisòs yena nè wûn afû, fî yen hi kî yen jùmtìbàm à wûn yìlè we wù ndùku kôŋà yâ, wù jis ha nè wûn na, “Wùt ywên, wo khə na wùna mò wan wâ.” 27 Fî kaha jis ha jùmtìbàm àtɨ̂n na, “Wo khə na wùna mò nâ.” Hi yìmi wu tuk afû jùmtìbàm à Jisòs àtɨ̂n lyi nè Jisòs, ghê wûn hi chyə̂ a wun a bɨn. 28 Yu tì kpên, Jisòs yen na nâbi ghə ti mî, wù hì fê khɨŋa hi lunhe gha ye ghɨ ndùku mô ma ghɨ ti nyak a ŋwàklù Fùyèn ki jîs na, “Kuŋ à mòlû yimalò mu.” 29 Ghɨ ben nì sàl à mu lùk ma mù ti tâ, ghɨ chwu a kùncha fahi lihi a tô fùkàk chin kokhi yen a wun a yi jwô. 30 Te wù fye lùk mù tɨ̂n jis na, “Yi ti mî.” Ni yâ, tuŋhi a to wuna a chyə̂ fo gokhì a yohnà wuna. 31 À ndùku mô ni ghɨ fate wu wun na tuku yu ma ghɨ yə tuk wu laku, wu mô hanɨ̂ŋ, beka à ndùku mô kəbi tuk wu Daŋa Chyalanu. Ghɨt a Jûs jis na Balèt ni ma khɨmti fwəni ghɨna ma ghɨna tahi nyàŋhè kpû, ma chwohi gun tu ghɨna tu a chyə̂. 32 Sojàsu bên khɨmti fwəni wùt we ghɨ tì bante ghê Jisòs, fî yen ha wùlè we khɨmtilò. 33 Shihi yèn ha Jisòs, yen ma wù shyə kpû, tê fê khɨmte jə̀ fwəni wuni. 34 Sojà wùlè ki bɨlà lyè yi woŋ ki so bùk a bàh a wùn a wuna atɨ̂n, luŋû bîn hì fwo bakhe nì mòlû. 35 À gha mi yîn fòkti wùt we wù tì yena te yi gana. Wu khə na yi jìsà kə nâ hamok, fôktè gha mi yîn na wò yu ma wò boŋà bimi. 36 Gha mɨ ghɨ̂n gan shyəma gha ghe ghɨ nyaka a ŋwàklù Fùyèn kpen na, “Nâ wufa wuna à mòk ghɨ bè khɨma wi.” 37 Kəbi nì yê ghɨ tì nyàka na, “Ghɨta bè hì kelò wûn we ghɨ so buka.” 38 Jisòs tî kpû, Josèf wù Àlìmàtiyà yen jis ha Balèt na yi khɨŋa hi lyè gun yi Jisòs hi gùmà. Josèf ndùku mô yâ, a mô kəbi jùmtìbàm à Jisòs, kòŋà wi hi fwu a ndan beka wù ndùku fânà ghɨt a Jûs. Wù buf ni, Balèt bimî, wù lo yen hi lyè lò nì gun yi tɨni. 39 Wù ndùku gbê ghê Nìkòdemùs we wù tì ye mote ghê Jisòs ntuksu yâ. Nìkòdemùs yen nì mə̂ bakhi nì yûhì yìlè ma ghɨ ti fəh a nam a chika. 40 Ghɨna yen yok yûhì yê wu bàh wu sùnju, lɨm Jisòs atɨ̂n. Ghɨna ndùku nê ki gha ye ghɨt a Jûs ye shihi gùmà wût, ghɨ nilò. 41 Ghɨ tì banti Jisòs wu lùk fuk à mtama bakha bênà afû, sî yile mô a fùk afû, teka ma ghɨ ye timè guma wùt atɨ̂n. 42 Ghɨ gûmà Jisòs atɨ̂n, beka sî tɨni ndùku bakhe bê afû ni, ghɨ fê fate wu wun na tuku yu ma ghɨ yə tuk wu laku ghɨt a Jûs.
1 Te tuku yula bênà a tuk wu shyə a ngâm, Mèli wù Màtalà lo bɨn a baha fina kə ni, yen a Jisòs yi jwô yì sì yen ma ghɨ ti bɨŋhi châkhì ti ye yi jwô àtɨ̂n. 2 Wù kahi kə nì nyiŋi yen yen Bità nì jùmtìbàm we a wù ndùku kôŋà yâ, jis ha ghɨna na, “Ghɨ ti fihi Bâba a yi sì, ghàh khə wi na ghɨ yen lem afa wun agha!” 3 Bità ghê jùmtìbàm yìlè lô hì yênà a jwô yi sì afû, 4 ghɨna à jɨ̀m hì gbê nyiŋa kə yi nyîŋ biyani, jùmtìbàm yìlè yê nyiŋ chya Bità yen tan yi jwô yi sì ashyə̂. 5 Te wù ye time ni, ngumti ki yi sì, yen bâh wu sùnju we ghɨ tì lima Jisòs atɨ̂n, biyani tê lye jə̀. 6 Samùn Bità ben yi bàm chya lyi ki yi lyî atɨ̂n à yi sì yen kə bâh wu sùnju we afû, 7 kəbi nì gûm ghe ghɨ tì lima to wuna atɨ̂n, ghɨ mô kə yi ghəl te ghɨ tì limte mô kə hanɨ̂ŋ. 8 Jùmtìbàm à Jisòs yê yì ye bena ashyə yâ ki boŋa lyi a yu mefû hi yen, ki bimî. 9 Ghɨna hì baha mô teka ghɨna tòkà khɨli luk wu ŋwàklù we wu jîsà na Jisòs ndùku kəta hi lòtè a yi kpû. 10 Jùmtìbàmsù Jisòs yen yâ, kahi hì kolê. 11 Biyani, Mèli faŋ ki yi jwô yi sì hi jyê, shihi ki lihi atɨ̂n à yi sì, 12 yen anjèlsu Fùyènsu sùbà, ma su ti mak njumù fufamù, su mô a lùk afa ngun yi Jisòs chehì mô atɨ̂n. Anjèl yìlè ndùku mô a lùk afa to wuna ndùku mô, yìlè mô a lùk afa wulu wunu chehì mô. 13 Anjèlsu tɨnsu buf ha Mèli na, “Wùt ywen, wò jyè ghə?” Wù fîsì jis na, “Ghɨ ti lyi lo nì Bâba mù, mu khə wi na ghɨ yen lem afa wûn agha?” 14 Mèli jis ni shihi bɨ̀nhì wu wun yen Jisòs, wu boŋa mô afû biyani tê khɨlî jə̀ na à mò wûn. 15 Jisòs buf ha wun na, “Wò jyè ghə a wùt ywên? Wò khɨŋa nde?” Mèli hì kwâktè na à mò wut wù fètana a fùk à mu tama afû, jis ha wun na, “À hì mô ma à lyi lo wò nì wûn, a bèbɨn, wò fôktì luk we wò ye lema wûn atɨ̂n ha mu, ma mu kahè yê lyi.” 16 Jisòs fî toŋti kə wun yi yet na, “Mèli!” Mèli kahi ki wun a yu mefû bwat jis a jìs yi Hibùlùs na, “Làbonì!” Ma wù ya toŋti wun na, ‘Chichà’. 17 Jisòs jis ha wun na, “Kə khɨti mu beka mu tà kaha yen jə ha Bì. Bɨ̀li ndù ma wò jis ha wana noma na mu kaha yênà hi yen a Bôm, a mô kəbi Bè à ghɨna, Yèn famfu mô kəbi Fùyèn fu ghɨna fu.” 18 Mèli wù Màtalà kahi yen ha jùmtìbàmsù Jisòs su jis ha ghɨna na, yi ti kək Bâba, wù ti fôktì gha mɨ ghɨ̂n ha yi. 19 À ndùku mô a leŋ a yu kolô, a tuk wu shyə a ngâm, jùmtìbàmsù Jisòs sù mô kə wu luk wù mòk, ma ghɨna ti sen ndâ a ghɨna a tû beka ghɨna ndùku fânà ghɨt a Jûs. Jisòs bûŋhì fwu timi a ghɨna fùtɨ̂n jis na, “Yutìnì mò ha ghàn.” 20 Te wù jìsa ni, kahi chwûtì wu wo wunu nì lâ wuni ha ghɨna. Jùmtìbàmsù Jisòs yen wûn hì saŋle nâ haŋaŋ. 21 Jisòs fî jis kpenhi ha jùmtìbàmsu wunsu na, “Yutìnì mò ha ghàn! Mu tuma ghàn kəbi te Bom che tuma mu.” 22 Wù jis ni, yohnà a ghɨna a tû, jis na, “Ghàn ko Yòhnà Yulena. 23 Ghàn ki lêhèfo nâbi be nde, ma Yènfù lêhèfo wûn, ghàn ki faŋ hi lèhèfo wùt, ma Yènfù tê lèhèfo jə̀ wûn.” 24 Te Jisòs tì bèna ha jùmtìbàmsu wunsu, yìlè ye yet yi wuni ndùku mô Tomòs, a mô kəbi wùt wù mòk atɨ̂n à se njwòsù bà ghɨ toŋte kəbi na Didimùs, bu ghê ghɨna. 25 Jùmtìsùbàmsu lesu fôktì ha Tomòs na ghɨna ti yen Bâba. Tomòs jis na, “Mu ki faŋ hi yen bûk wù mbanu a wun a wô nì wulu, hi lihe wana ma ghɨ wo atɨ̂n hi fè mòmtè bî là wuni, ma mu nê tê bimî.” 26 À hì mô te ngàm chyàla, jùmtìbàmsu wunsu hì mô a ndâ ghê Tomòs, Jisòs bûŋtì timi a ghɨna fùtɨ̂n, nâbi te jwô ndâ ndùku mô ma ghɨ ti sen falò, wù fî jis na, “Yutìnì mò ha ghàn.” 27 Wù jis ha Tomòs na, “Lèm wan à wo wâ a wu lùk afân. À mò wo mu ni. Nàhi bî nì wo gha ma lem a mu yi bi là. Bimî, kə fi kanti yi kantî.” 28 Tomòs toŋti wûn jis na, “Bâba mù, Yèn famfu!” 29 Jisòs jis ha wun na, “Wò ti bimî chîn beka wò yena mu. Biyani, jùŋ mò ha ghê ghɨna tà yen, bimilò.” 30 Gha kanana ghɨ le làwû dô kə ni te Jisòs tì nê kə nâ a jùmtìbàmsu wunsu ashyə̂ teka ghɨ nyak a ŋwàklù afân. 31 Ghɨ nyak ghɨ̂n ni shyəma ghàn yu, ma ghɨ bimi na Jisòs mò kə nâ Klistù a Wâ Fùyèn, ma bimî mi yîn ni na ghàn khɨti chyəna ghe ghɨ bè mê wi.
1 Jisòs tì fî fwu kpenhi a jùmtìbàmsu wunsu yì kə̀k sàmba tuk lefu yi bi lwi Tàbeliyàs. Gha tɨni tì gan wu lum afân ni. 2 Jùmtìbàmsù Jisòs ndùku chîntè mò kə wu lùk wù mòk sàmba, a mô Samùn Bità ghê Tomòs we ghɨ ndùku toŋte kəbi na Didimùs nì Nàtanyèl a wâ wùt a yi tèk yi Kanà a lak yi Galìlî nì wana Sebedì, kəbi nì jùmtìbàmsu wunsu lesu sùbà. 3 Samùn Bità jis ha ghɨna na, “Mu shika yênà hi kwo a yi.” Ghɨna fîsì na, “Ghàhnà nè shika kə amok.” Ghɨna jis ni yen lye a ngwùk, biyani tuku yû teka ghɨna kwo shyə ale. 4 Chwì hì sate bênà kə ni, Jisòs ben timi a bi jwôlì, biyani jùmtìbàmsu wunsu tà khɨlî jə na à mò wûn. 5 Wù toŋti buf ha ghɨna na, “Ghàn tà kwo jə shyə ale, a bə ghɨ̂n?” Ghɨna fîsì na, “Ghɨna tà kwo jə̂.” 6 Wù jis na, “Ghàn tum wə wanu a bàh à kpen wu wo ta ma ghàn kwo.” Ghɨna tûm kwo a yi nâ hidù wəlu tɨnu hì jîtà ghaka ghɨna hi sèn à lihi a ngwùk. 7 Jùmtìbàm à Jisòs we wù ndùku kôŋà hanɨ̂ŋ yâ, jis ha Bità na, “Wùt we mò yani a mô Bâba!” Samùn Bità yu ben ni, lyi mak njusu wunsu chem chwo a jwô. Wù ndùku mô ya ma wu ye chwok nju se wù ye maka. 8 Jùmtìbàmsu lesu boŋ yen kə Bità yi bàm gufà yênà nì wəlu yì wê. À ndùku mò ni, a fê dàfà wi hi yè tàn a yi bi jwôlì. 9 Ghɨna yen fwu yi bi jwôlì yen wusu bamê yila mô a tô atîn nì bana. 10 Jisòs jis ha ghɨna na, “Ghàn ben nì yila le ghe ghàn kwola kə chîn ni.” 11 Samùn Bità kahi lye a ngwùk guf ben nì wəlu yì we a bi jwôlì. Yila ndùku chîntè mô atɨ̂n wu wə nì mtân jwòsù tât, ghakle kə ni. Ghɨ ndùku dô yâ wəlu tɨnu tà tentî. 12 Jisòs ki jîs ha ghɨna na, “Ghàn ben ma yə shyə mbisìmbisi.” Wù ndùku jîsà ni, nâ jùmtìbàm à wûn yì mòk tà môm jə̂ hi buf na, “À mô wò nde?” Beka ghɨna ndùku khə na à mò Bâba. 13 Jisòs yen lyi a ban ghe fo ha ghɨna fî ni kəbi ya nì yila. 14 Jisòs tì chwùti ngɨŋ à wûn ha jùmtìbàmsu wunsu a lùk afân na à hi mô a ghan à tât te wù kahe lote a yi kpû. 15 À ndùku mô te ghɨna yə mihe, Jisòs toŋti Samùn Bità buf ha wun na, “Samùn, wâ Jon, wò fate kôŋàlò mu hamok chyâ ghɨt ale ghɨ̂n agha?” Wù bimî jis na, “Bâ, wò khəlò na mu kòŋàlò wò.” Jisòs jis ha wun na, “Wo yəhe wana ma ghɨ njyə̀là.” 16 Jisòs fî buf kpenhi ha wun na, “Samùn, wâ Jon wò fate kôŋàlò mu hamok agha?” Wù bimî jis na, “Bâ wò khəlò na mu kòŋàlò wò.” Jisòs jis ha wun na, “Wo kine njyə̀ samsu.” 17 Jisòs fî toŋti wûn na à hi mô a ghan à tât, “Samùn, wâ Jon, wò kòŋàlò mu?” Gha tɨni hì fo ngə̂k ha Bità te Jisòs fe kunte bufa ni beka wù tì buf a ghan à tât na, “Wò kòŋàlò mu?” Wù ki jîs ha Jisòs na, “Bâ, wò khə nâbi ghə. Wò khəlò na mu kòŋàlò wò.” Jisòs jis ha wûn na, “Wo yəhe njyə̀ samsu. 18 Mu jìsà ha wò hamok na, à ndùku mô te wò baha mô ha walà, wo lafa yênà nâbi afa te wò kòŋà. Biyani, a wu yu afa wò jùna wo nâhè kpen wa wùt hi labhe wò lyê yênà nì wò wu lùk wo kôŋà wi.” 19 Jisòs ndùku jîsà ni, hi fôktì lum we Bità bè kpo atɨ̂n yi bênà nì kokhînì ha Yènfù. Jisòs tì jis ni, kahi jis na, “Jùmti mu.” 20 Bità kahi ki yen jùmtìbàm ye Jisòs ndùku kôŋà hanɨ̂ŋ yâ, yi bênà a ghɨna yi bàm, a mô kəbi we wù tì yikte yena a Jisòs wù wùn a yu yənu yâ, buf ha wun na, “Bâ, à bəkli nde wò?” 21 Bità yen ni buf ha Jisòs na, “Yi bè hì mô yàni ha wùna a Bâ?” 22 Jisòs fîsì jis na, “Mu ki de na wù hi chyə kə yi chyə̂ nâ hi yaka te mu bè kahe bênà, ma ngə̂k yâ hi mô ghə atɨ̂n? Wò kəta hi jûmtè mu.” 23 À mò gha ye yi tì ne shyəma jùmtìbàmsù Jisòs hi jîsà yênà kə na wùna meti bè kpo wi. Biyani, Jisòs tà tì jis jə na wù bè kpo wi. Wù tì jis na, “Mu ki de na wù hi chyə kə yi chyə̂ ma ngə̂k yâ atɨ̂n hi mô nâ ghə?” 24 Jùmtìbàm à Jisòs mu yîn ndùku mô ye yì fòktè gha mɨ ghɨ̂n, a mô kəbi wun we wu tì nyàka gha mɨ ghɨ̂n. Ghàh khə na gha ye wù jîsà mò kə hamok. 25 Gha baha mò kə nâ hidù te Jisòs tì ne, ma ghɨ ndùku mô hi nyàk kə à jɨ̀m, mu kwâktè na mbyî yîn yì jɨ̀m ndùku ghaka kpene wi hi lèma ŋwàklù àtɨ̂n.