/1 Ento Mungu nyutho mer pare gire iwa, kum, kinde ma fodi wa judubo, Kristu 
tho piwa.
Nwang'u kan agba mi kadhukuwijo fokutundo ngo, Yesu m'ung'eyo nia saa pare 
tundo m'ebiai ko i ng'ombuni ecidho ba Wego, m'edaru maru pare ma dhe ma gini 
i ng'om, emarugi cil i kajikne.
M'uai de ba Yesu Kristu, ma en e jamulembe mandha, m'e kayu mi ju m'utho, man 
jabim mir ubimo m'i mg'om; Ire m'emaruwa, m'egonyowa kud i dubo mwa ku rimbe.
Yehova wok i bang'a con, ewacu kumae, Eyo, ameri ku mer mi nja: ka kumeno apei 
ku mer mi bero.
Kum Mungu maru ng'om mumbe, ketho emio Wode kulong', kara ng'atu ma tek uyie 
kud erwiny ki, endre ebed ku kwo ma rondo ku rondo.

/2 Nie maeni ceke timbre, kara lembe ma yang' Rwoth uyero ku dhu jubila timbre 
kakare, m'uwacu kumae, Nen, nyaku ma sumba ma ng'won bibedo ku ic, man 
gibilwong'o nyinge Imanuel; thelembene, ka juloke, Mungu wakugi.
Yesu wacu ire kumae, Nindo ma wabedo wakudu ie hai ngi e, fodi ing'eya ngo, 
Filipo? ng'atu m'uneno an nwang'u eneno Wego; nedi iwacu kumae, Nyuth iwa 
Wego?.
Iyio ngo nia ani i Wego, man Wego de ni i ia?.
Ebedo mi piem ungo nia giramung'a mi bedo ma ayi Mungu ni kume e dit; Ng'atu 
m'unyuthre ku kum, Tipo nwang'u lembe pare ber, malaika de gineno, juyero pire 
de i kind thek, juyie de i ng'om, jujole de malu i dwong'.
Ku kwong'a Lembe nuti, Lembe de bedo ku Mungu, Lembene de en e Mungu.
Man Lembe doko kum, ebedo de i kindwa (man waneno dwong'ne, dwong' ma calu pa 
nyodo ma kulong' pa Wego), m'epong' ku bero ku lemandha de.

/3 Ng'atu ma tek bituco nia Yesu en e Wod Mungu, nwang'u Mungu bedo i ie, en 
de i Mungu.
Kum nyathin unyole iwa, man nyathin ma nico mire iwa; e bim bibedo wi goke: 
man jubilwong'o nyinge Wang'uic, Japorlembe, Mungu ma Jatego, Wego mi Nja, 
Jaditmawijo mi Kwiocwiny.
Kinde m'ebeweco, nen, afuru m'urieny uketho tipo i wigi: man nen, dwal uwacu 
ku i afuru kumae, Meni Woda ma jamerna, ma anyong'a nega i kume; wuwinje.
Kum Rucwic upong' thur i ie ma ku kum.
Malaika dwoko lembe ewacu ire kumae, Tipo Maleng' bibino i wii, man tego pa 
Ng'atu ma Malu Ngbir tipone biumi: kum kumeno bende gin maleng' m'ibinyolo 
jubilwong'o Wod Mungu.

/4 Yesu wacu igi kumae, Andhandha, awacu iwu, Ku kwong'a ma fodi jukunyolo 
Ibrahim ungo, nwang'u anuti.
Ma fodi ani i ng'om, an a der mi ng'om.
Ka kumeno Yesu wacu igi kendo kumae, Andhandha, awacu iwu, An a dhugola mi 
rombe.
Yesu wacu igi kumae, An a kwen mi kwo: ng'atu m'ubino i bang'a kec binege ngo, 
ng'atu m'uyia de rieu binege ki ngo.
Wulwong'a Japonji, man Rwoth: e wuyero dre; kum an a kumeno.
E ewacu igi kumae, Wun wuai piny; an aai malu: wun wu mi ng'om maeni; an a mi 
ng'om maeni ngo.
Yesu wacu ire kumae; An a cer, ku kwo de: ng'atu m'uyio ira kadok etho ento 
ebibedo kwo.

/5 E eng'olo ya udul dhanu gibed piny wi lum; man egamu lungu kwen abic, ku 
rec ario, eng'ayu wang'e de malu i polo, emio mugisa, man eng'weko emio lungu 
kwen de ba julub, julub ke ni udul dhanu.
E kagi ceke gicamu, giyeng' de: man gicoko dong' kwen m'ang'weka, upong'o 
katoko apar wi ario.
Man dhanu ma gicamu jumaco gi ve rubango abic, ku mon man nyithindho bende.
Man nen, dhanu ario ma abinga gibedo dhu yo, ka giwinjo nia Yesu bekadhu, 
gikok akoka, giwacu kumae, Rwoth, bed ku kisa i kumwa, in i wod Daudi.
E Yesu, ma ngisi benege, emulo wang'gi; e eni eni gimaku neno piny, man gilubo 
ng'eye.
Kan eweko weco lembe, ewacu ni Simon kumae, Cwal ka ma thuth, wulur voi i pi 
kara wutwom.
Simon uloko lembe ewacu kumae, Japonji, wamula ku tic ku diewor soro, e 
wakwanyu gin moko ngo: ento kum lem peri abiluro voi.
E ka gitimo maeni, gitwomo rec udul dupa; voi migi de maku cot.

/6 Mungu en e mandha, ma julwong'owa ni kume i ripocwiny pa Wode ma Yesu 
Kristu Rwoth mwa.
Dong' juot pa Israel ceke ging'ei ma cwinygi kwio, nia Mungu ketho Yesu maeni 
ma wugure, ni Rwoth ku Kristu bende.
Kum gin ceke cwire ni kume, ma ni i polo ku ma wi ng'om bende, gin ma nen ku 
gin ma nen ungo bende, kadok komker kadi kero kadi ker kadi tego; gin ceke 
cwire ni kume, pire bende.
Gin ceke cwire ni kume; man gin moko mbe m'ucwire ma kucwire ni kume ngo.
Mungu, i dong' nindo maeni eyero iwa i Wode, m'ekethe ni jacampacu mi gin 
ceke, piny bende ecwio ni kume.
Kum pi lembe nini Kristu tho man ecer kendo, kara ebed Rwoth mi ju m'utho ku 
ju ma kwo bende.

/7