1

Wɔɔnyɩtʋa ya nclɔɔ 'plɩ

1 Bhɔdaa tooto, Wɔɔnyɩtʋa -kʋa. 'Nyɩ Wɔɔnyɩtʋa -ya Laagɔ -kʋa, 'nyɩ Wɔɔnyɩtʋa -glɩa Laagɔ. 2 Bhɔdaa, ʋya Laagɔ -kʋa. 3 Ʋmʋ -ʋ nʋ 'lɛ -tɛtɛa 'fɩan, 'nyɩ lʋʋa ʋ 'ta 'lɛ nʋ na, ʋ 'ta -kʋ. 4 Ʋmʋ nɩkplaan jabhʋa -kʋa 'lɛ 'nyɩ jabhʋa -glɩa 'lɛ ncɛlɩ 'la zezezeli. 5 'Nyɩ zezezelia leli 'tutua nɩkplaan, -ma 'tutua 'ta ŋonu ɩya ʋya zezezelia 'ka dabhlo kʋ 6 Na, Laagɔ ya nclɔɔ bhlo lobhu, ma lɔɔ Zaan. 7 Ɔ ya ci le ɔ 'ka zezezelia 'la -danʋfʋɛ li, ɩya ncɛlɩa 'fɩan 'ka ɔla -danʋfʋɛliliea 'kʋ 'plɩlɩ ɩya ma 'ka pɔɔtɛtɛ 'lɩ. 8 -N 'ta ɔmɔ -ɔ 'taa 'lɛ zezezelia -glɩ, -ma ka ɔ ci 'lɛ ɩya ɔ 'ka zezezelia 'la -danʋfʋɛ li. 9 Wɔɔnyɩtʋa -glɩa 'lɛ zezezelia 'titi, -ɩ ci 'lɛ -laagɔzɔan 'nyɩ -ɩ leli 'lɛ ncɛlɩa 'fɩan 'kʋ na. 10 Ɔmɔa -ɔ -glɩa 'lɛ Wɔɔnyɩtʋa na, ɔ -kʋa -laagɔzɔan, 'nyɩ ɔmɔ -ɔ nʋ 'lɛ -laagɔzɔan, -ma -laagɔzɔan 'tɔɔ cibhlili. 11 Ɔ ya ɔ 'bhlɩ ci, -ma ɔ 'bhlɩnyaa 'tɔɔ kla. 12 'Bhlɩmɔɔn, maa -anʋa -ɔ klɔɔ 'lɛ, 'nyɩ -ɔ -ka 'lɛ ɔla 'ŋlɩa 'la pɔɔtɛtɛ na, ɔ ya maa -jioli 'nyɩ le ma 'plɩ Laagɔ 'la 'cuo. 13 'Nyɩ maa -naa, -n 'ta -dolu, 'nyɛkɛ, -aana nclɔɔ 'la -pɔɔsanʋlɩɛ nɩkplaan ma 'ta 'lɛ -valɩlɩlɩɔ, -ma Laagɔ nɩkplaan. 14 Na, ɔmɔa -ɔ -glɩa 'lɛ Wɔɔnyɩtʋa na, ɔ ya nclɔɔ 'plɩ, 'nyɩ ɔ ya -anyɩ sidiin kʋkan ci. -A ya ɔla 'klʋagbaa 'ciin 'lɩ. 'Klʋagba -naa Toa 'nyɩ 'lɛ ɔla 'ciŋodicoa bhloa dananɔ ɩya -nʋawlɛ -yelio 'lɛ na. 15 Zaan lia ɔla -danʋfʋɛ 'nyɩ ɔ -gaa nɩkplaaan 'nyɩ ɔ claa lebhe: «'Lɩka ɔmɔa 'la wɔlɩa n nyɩtɛ 'lɛ lebhe: 'Na leen nclɔɔ bhlo ci 'yɛpɩ, -ma ɔ yaan 'kʋklʋʋnpʋ, -ofi lebhe 'fɩɔn n ka 'lɛ ci na, ɔ -kʋa tooto.» 16 Ɔla 'nanɩ 'kadɩa nɩkplaan, ɔla 'nyupalɩɛa ya -anyɩa 'fɩan 'kʋ 'kɔsɔ 'ci 'ci. 17 Sa, Moyizi ya -jlɩmaa -lamʋ, -ma Zozii Klisi -lamʋ 'lɛ dananɔ ɩya -nʋawlɛ. 18 Nclɔɔ bhlogbɩɩ 'ta ka -azla Laagɔ 'ciinlɩ. -Ma 'Cʋa bhloa -ɔ -glɩ 'lɛ Laagɔ 'nyɩ ɔ -kʋ 'lɛ Toa cɩ na, ɔmɔ -ɔ palɔɔ 'lɛ -anyɩ.

'Nyuwluzʋnyɔ Zaan 'la -danʋfʋɛlilie

19 Daa Zifʋnyaa tocɩa -ɔ -kʋ 'lɛ Zolizalɛmʋ na, lobhu 'lɛ -teyiyinyaa ɩya mala klalɩnyaa Zaan 'bhlɩ, le ma 'clɔɔ neen nclɔɔa ɔ -glɩa 'lɛ na, 'lɩka -danʋfʋɛa ɔ li 'lɛ na. 20 Ɔ ya maa -nʋawlɛ solu 'kpataa 'nyɩ ɔ ya 'cla lebhe: «-N 'ta -amʋ -ɔ 'ta 'lɛ Laagɔ 'la -Sasanyɔa -glɩ.» 21 'Nyɩ ma yɔɔ neencla lebhe: «Na, ncaasaa -n -glɩnɩ 'lɛ bha? Elii bha?» Ɔ ya maa 'cla lebhe: «N 'ta Elii -glɩ.» Ma ya -awlɛɔ neencla lebhe: «Laagɔnekʋnyɩtɛnyɔa -ɔ cɩ kaa 'lɛ ci na, ɔmɔ -n -glɩ 'lɛ bha?» Ɔ ya maa neenŋonu lebhe: «-Wɔɔ, n 'tɔɔ -glɩ.» 22 Na, ma yanɩɔ 'cla lebhe: «Ncaasaa -n -glɩa 'lɛ bha? Ɩya -a ka maa -ɔ lobhu 'lɛ -anyɩ na, neenŋonusa cibhlili! -Mɔɔ 'titi ncaasaa -n laa 'lɛ ncɩ bha?» 23 Ɔ ya maa 'cla lebhe: «-Amʋ -ɔ -glɩ 'lɛ -blɩɩzɔan -ʋ -gaan 'lɛ 'pʋpʋa nɩkplaan 'nyɩ -ʋ cla 'lɛ lebhe: A 'nylugolu -Kwlenyɔ 'la -gugwiea 'kʋ, saa Laagɔnekʋnyɩtɛnyɔ Izayii 'bhlia 'lɛ 'kʋ na.» 24 Maa ma lobhua 'lɛ na -glɩa Falizɩɛnnya. 25 Na, ma ya -awlɛɔ neencla lebhe: «N 'ta 'lɛ Laagɔ 'la -Sasanyɔa -glɩ, n 'ta 'lɛ Elii -glɩ, 'nyɩ -n 'ta 'lɛ Laagɔnekʋnyɩtɛnyɔa -glɩ na, 'lɩsaa 'la gbʋ -n zʋnɩ 'lɛ ncɛlɩ 'nyu 'wlu bha?» 26 Zaan ya maa neenŋonu lebhe: «-Amʋ, 'nyu nɩkplaan n zʋlʋ 'lɛ ncɛlɩ 'nyu 'wlu. -Ma ɔmɔa a 'ta 'lɛ -ci na -kʋ anyɩ sidiin. 27 Ɔmɔ -ɔ ciin 'lɛ leen 'nyɩ n 'ta 'kʋŋwa le n -blulu ɔla -gbanbʋa 'la 'bhlua.» 28 'Yɛpɩ Betaniidua 'kʋ, Zludɛɛnnyidɔlʋa leen, gbazɩa Zaan zʋlʋa 'lɛ ncɛlɩa 'nyu 'wlu na, 'yɛpɩ ɩmɩ -naa 'plɩlɩa 'lɛ.

Laagɔ 'la 'bhlabhlɩcoa

29 Na, daa -zeli ze 'lɛ na, Zaan ya Zozii 'lɩ, ɔ cilia 'mɔɔ 'bɩɩn 'nyɩ ɔ ya 'cla lebhe: «'Lɩka Laagɔ 'la 'bhlabhlɩcoa -ɔ sa 'lɛ -laagɔzɔan ɩla nyinyia cɩ na. 30 Ɔla wɔlɩ n nyɩtɛ 'lɛ lebhe: 'Na leen nclɔɔ bhlo ci 'yɛpɩ, -ma, ɔ -pʋʋn 'kʋklʋʋn sa 'fɩɔn n 'ka 'lɛ ci na, ɔ -kʋa. 31 -Amʋ 'titi n 'taa 'mɔɔ -ci, -ma Izlayɛlɩlɔlʋ 'kɔɔ 'lɛ cibhlili na, ɩla gbʋ dɛ n ci 'lɛ ncɛlɩ 'nyu nɩkplaan 'nyu 'wlu zʋkan.» 32 Zaan ya -danʋfʋɛ li 'nyɩ ɔ ya 'cla lebhe: «N ya -Kplɔkplɔ -Wugoa 'lɩ 'dablee 'bhisa, ʋ ya -laagɔɔn 'wlʋ, ʋ yɔɔ 'kʋ kwlili 'nyɩ ʋ -kʋa 'mɔɔ 'kʋ. 33 'N 'ta 'mɔɔ -ci, -ma ɔmɔa -ɔ lobhuun 'lɛ le n 'ma 'nyu ɩya n zʋ ncɛlɩ 'wlu na, ɔ yaan 'cla lebhe: Ɔmɔa n cɩ 'ka 'lɛ 'lɩ ɩya 'Wugoa 'ka 'lɛ 'kʋ kwlili ɩya ʋ 'ka 'kʋ kʋ na, ɔmɔ -ɔ zʋ 'lɛ ncɛlɩ -Kplɔkplɔ -Wugoa nɩkplaan. 34 Na, -amʋ n yɔɔ 'lɩ 'nyɩ n li -danʋfʋɛ lebhe ɔmɔ -ɔ -glɩ 'lɛ Laagɔ 'la 'Cʋa.»

Zozii 'la -bɛka -gɩlɩnyaa

35 Daa -zeli ze 'lɛ na, Zaan -kʋa -awlɛ dɩpɩa bhlogbɩɩ, ɔya ɔla gɩlɩnya -mɔsɔ. 36 Ɔ ya Zozii 'plɩda 'lɩ, ɔ yɔɔ 'ciin kope 'cɩɩ 'nyɩ ɔ ya 'cla lebhe: «'Lɩka Laagɔ 'la 'bhlabhlɩcoa.» 37 Gɩlɩnyaa -mɔsɔa 'nuo 'lɛ wɔlɩ -naa neen na, ma ya Zozii gɩlɩ. 38 Zozii ya kwlacala 'nyɩ ɔ 'lɩ 'lɛ le ma gɩlɩa 'mɔɔ na, ɔ ya maa neencla lebhe: «'Lɩsaa a 'matɩa 'lɛ bha?» Ma yɔɔ 'cla lebhe: «-Ghlabii, 'ndagbazɩ -n 'bhisleen -kʋa 'lɛ bha?» -Ghlabiia, ɩ sa -zɔn lebhe Canyɔ. 39 Ɔ ya maa 'cla lebhe: «-A ci ɩya a 'ka 'lɩ.» Na, ma ya mʋ 'nyɩ ma ya daa ɔ -kʋa 'lɛ na 'lɩ, 'nyɩ 'dɛ 'la clɩɩa 'kʋ, ma yɔɔ cɩ kʋ. Ɩ -glɩanɩa 'plɩplɩylʋʋn 'la 'ŋwacɩ -nmɔɔna 'la 'klia nɩkplaan. 40 Simɔɔn Pɩɛlɩ bholi Andlee -glɩa gɩlɩnyaa -naa -mɔsɔa -ɔ 'nua 'lɛ Zaan 'la wɔɔnyɩtʋa 'nyɩ -ɔ gɩlɩ 'lɛ Zozii na, 'la nɩkplaan bhlo. 41 -Bɛɛ, ɔ ya mʋ, ɔ ya ɔmɔ 'titi ɔ bholi Simɔɔn ŋeni 'nyɩ ɔ yɔɔ 'cla lebhe: «-A ya Laagɔ 'la -Sasanyɔa ma la -awlɛ 'lɛ Klisi na 'lɩ.» 42 Ɔ yɔɔ Zozii -la. Zozii yɔɔ 'ciinkope -aan 'nyɩ ɔ yɔɔ 'cla lebhe: «-Mɔ -ɔ -glɩ 'lɛ Simɔɔn, Zaan -yowli. -Mɔ ma cɩ 'kanɩ 'lɛ Sefasɩ la, ɩ sa -zɔn le cokwie.»

Zozii ya Filipʋ ɩya Natanayɛlɩ la

43 Daa -zeli ze 'lɛ na, Zozii ya wɔlɩ kpo 'kʋ zʋ le ɔ 'ka Galileebhlɩa 'kʋ mʋ. Ɔ ya Filipʋ 'lɩ 'nyɩ ɔ yɔɔ 'cla lebhe: «Gɩlɩɩn!» 44 Filipʋ 'wlʋlʋa Bɛsayida, 'dua 'kʋa Andlee ɩya Pɩɛlɩ 'wlʋlʋa 'lɛ na. 45 Filipʋ ya mʋ, ɔ ya Natanayɛlɩ ŋeni 'nyɩ ɔ yɔɔ 'cla lebhe: «Ɔmɔa 'la wɔlɩa ma nyɩtɛ 'lɛ Moyizi ɩya Laagɔnekʋnyɩtɛnyaa 'la -afluwia nɩkplaan na, -a yɔɔ 'lɩ. Ɔmɔ -ɔ -glɩ 'lɛ Nazalɛtɩnyɔ Zozii, Zozɛfʋ -yowlia.» 46 Natanayɛlɩ yɔɔ neencla lebhe: «-Lʋʋ 'nanʋ cɩ Nazalɛtɩ 'wlʋlʋmʋ bha?» -Ma Filipʋ yɔɔ 'cla le: «Ci ɩya -na 'ci 'ka 'lɩ.» 47 Daa Zozii 'lɩ 'lɛ Natanayɛlɩ 'nyɩ ɔ -kʋa 'mɔɔ 'lɛ 'bɩɩn cilida na, ɔ ya ɔla cɩ 'la wɔlɩ nyɩtɛ 'nyɩ ɔ ya 'cla lebhe: «'Lɩka Izlayɛlɩnyɔ 'titi, -kplakpla -ylɛylɛ 'ta 'lɛ nɩkplaan -kʋ na.» 48 'Nyɩ Natanayɛlɩ yɔɔ neencla lebhe: «'Ndaa -n -ciliin 'lɛ bha?» Zozii yɔɔ neenŋonu lebhe: «'Fɩɔn ɩya Filipʋ 'kɔɔ 'lɛ la na, daa -n -kʋa 'lɛ 'figisua -zɔn na, n yɔɔ 'lɩ.» 49 Natanayɛlɩ yɔɔ 'cla lebhe: «Canyɔ, -mɔɔ -glɩ 'lɛ Laagɔ 'la 'Cʋa, -mɔɔ -glɩ 'lɛ Izlayɛlɩlɔlʋ 'la nyɩbhɛlʋa.» 50 Na, Zozii yɔɔ neenŋonu lebhe: «Sa n yɔɔ 'lɛ 'cla lebhe, n yɔɔ 'figisua -zɔn 'lɩ na, dɛ -n -kanɩ 'lɛ 'na pɔɔtɛtɛ -na. -N -cɩ ka nʋnʋgbɩ 'ciin 'lɩ ɩya ɩ 'ka -da 'kʋ zi!» 51 'Nyɩ ɔ ya -awlɛ 'cla lebhe: «N solu anyɩ, ɩ -glɩ -nʋawlɛ, a cɩ 'ka -laagɔɔn 'lɩ, ɩ 'ka 'gbokalɩ, ɩya Laagɔ 'la 'bhlaandleecɩa 'ka Nclɔɔa 'Cʋa 'kʋ 'plɩlɩ, ma 'ka -gblaa ɩya ma 'ka kwli.»

2

Zozii 'la -bɛka -ciinzizielɩlobholi

1 Na, -mɔta -zelia ze 'lɛ, 'cɩcɩɛ -kʋa Galileebhlɩa 'la 'dua ma la 'lɛ Kanaa na 'kʋ. Zozii 'nɔ -kʋa 'dɛ. 2 Ma ya Zozii -ma ɔya ɔla gɩlɩnyaa 'cɩcɩɛnʋtlɔnblɩa 'kʋ la. 3 Sa -diinvɛɛn 'taanɩa 'lɛ -kʋ na, Zozii 'nɔ yɔɔ 'cla lebhe: «Ma 'tanɩ -diinvɛɛn -ka.» 4 -Ma Zozii yɔɔ 'cla lebhe: «N 'nɔ, wɔɔsaa -kʋa 'lɛ n -yɔɔsɔ -gbaaglɩɩn bha? 'Na 'ŋwacɩa 'ta ka ka ŋeni.» 5 Ɔ 'nɔ ya lobhocuoa 'cla lebhe: «Ɩmɩa 'fɩan ɔ cɩ 'ka 'lɛ anyɩ solu na, a nʋɩ.» 6 Cɔkʋnyukondi -ngbʋflʋ -kʋa dɩpɩa, Zifʋnyaa zʋa 'lɛ 'nyuun le ma 'ka cɩ wɔlʋ saa mala -jlɩmaa bhli 'lɛ 'kʋ na. 'Nyukonde bhlo cɩa -sa 'anbhlu bhlo -aana 'anbhlu bhlo ɩya 'kle 'wlʋ. 7 Na, Zozii ya lobhocuoa 'cla lebhe: «A yeli 'nyukondi -naa 'nyu 'kʋ.» 'Nyɩ ma yɩɩ yeli -tɛkɛ -tɛkɛ. 8 Zozii ya 'maa 'cla lebhe: «A 'lunɩ -pɔtɔnʋ ɩya a fa 'tlɔnblɩa toa.» Ma yɔɔ mʋ fa 9 'nyɩ ɔ ya 'nyua -ʋ kaci 'lɛ -diinvɛɛan na neencla. Ɔ 'taa daa ɛ 'wlʋlʋa 'lɛ na -ci, -ma lobhocuoa -ɔ 'lua 'lɛ 'nyua na, maa ma -cia daa ɛ 'wlʋlʋa 'lɛ na. Na, ɔ ya 'cɩcɩɛnʋnyɔa la 10 'nyɩ ɔ yɔɔ 'cla lebhe: «Ncɛlɩa 'fɩan -diinvɛɛn 'nanɛa ma polili 'lɛ -bɛɛ 'nyɩ daa lalanyaa ya 'lɛ 'mla -aan 'nyɩ ma yanɩ 'lɛ lo na, ma lamʋnɩ 'lɛ ɛmɛa -ɛ 'ta 'lɛ -gbɔɔn nanɩ na. -Ma -mɔɔ -n ya -diinvɛɛn 'nanɛa saazʋ -aan -daandanɩ!» 11 Na, 'lɩka -da Zozii 'la -bɛka 'ciinzizielɩlobholia -ɩ 'plɩlɩ 'lɛ 'yɛpɩ Kanaa, Galileebhlɩa 'kʋ na. Ɔ ya ɔla 'klʋagbaa pala 'nyɩ ɔla gɩlɩnyaa ya ɔla pɔɔtɛtɛ 'lɩ. 12 Ɩla leen, ɔya ɔ 'nɔ, ɔ bholiecɩ ɩya ɔla gɩlɩnyaa ya 'dua ma la 'lɛ Kapɛnayumʋ na 'kʋ mʋ, -ma clɩɩ -zlʋsaasa -tɛɛ ma li 'lɛ 'yɛpɩ.

Zozii ya Laagɔpaakadiea -zɔn ble

13 Zifʋnyaa 'la geyliinwlʋfɛtlɩa yaa cɩmɛ 'nyɩ Zozii ya Zolizalɛmʋ mʋ. 14 Ɔ ya Laagɔpaakadiea -zɔn ble 'nyɩ ɔ ya 'yɛpɩ bhlii, 'bhlabhlɩ, 'kpakpɩpɛlʋzʋnya ɩya 'dalakacinyaa sakʋda ŋeni. 15 Na, ɔ ya 'bhli 'ma, ɔ yɩɩ -ngblie cɩ nʋ 'nyɩ ɔ ya maa 'fɩan Laagɔpaakadiea -zɔn 'tli, maya mala 'bhlabhlɩa ɩya mala bhliicɩa. Ɔ ya 'dalakacinyaa 'la 'dalaa dlolu, ɔ ya mala 'tlɔnblɩcɩa sagblii 16 'nyɩ ɔ ya 'kpakpɩpɛlʋzʋnyaa 'cla lebhe: «A -sa -da ɩmɩ -naa 'fɩan ɩya a 'la plea n To 'la -palʋa 'kɔsɛylapalʋ.» 17 Na, ɔla gɩlɩnyaa ya luoli le ɩ -zieo lebhe: «-Naa -palʋa 'la 'tʋ bhlaan -gbɔɔn.» 18 Zifʋnyaa tocɩa yɔɔ neencla lebhe: «Ɩmɩa -n nʋ 'lɛ -sa na, 'ciinzizielɩlobholi saa -n cɩ -kaa 'lɛ nʋ ɩya -n ka -anyɩ pala le -n -ka ɩla -jioli bha?» 19 Zozii ya maa 'cla lebhe: «A gbɔlʋ Laagɔpaakadie -naa, -ma clɩɩ -mɔta -gbaaglɩɩn n cɩ 'kʋʋ 'sla.» 20 Na, Zifʋnyaa yɔɔ 'cla lebhe: «-Palʋ -naa 'la 'slalɩɛa ya liowli -gwlɩɩ -mɔsɔ ɩya -ngbʋflʋ 'ma, 'nyɩ -mɔɔ -n cɩʋ clɩɩ -mɔta -gbaaglɩɩn 'slalɩ bha?» 21 -Ma ɔmɔ, ɔla 'nyɛkɛa 'la wɔlɩ ɔ nyɩtɛa 'lɛ. 22 Na, daa Zozii -bho 'lɛ 'kwɩɩn 'kʋ na, ɔla gɩlɩnyaa ya luoli le ɔ ya sɛɛ 'kʋbhli 'nyɩ ma ya Zieziewɔlɩa ɩya ɔla niwɔlɩa -nʋawlɛ la.

Zozii -ci nclɔɔ

23 Daa Zozii -kʋa 'lɛ Zolizalɛmʋ, Zifʋnyaa 'la geyliinwlʋfɛtlɩa 'kʋ na, ncaabhutukpa yɔɔ mala pɔɔtɛtɛa 'kʋ zʋ, 'ciinzizielɩlobholia ɔ nʋa 'lɛ 'nyɩ ma 'lɩ 'lɛ na 'la gbʋ. 24 -Ma Zozii ɔmɔ ɔ 'taa mala pɔɔtɛtɛ -ka, sa ɔ -cia maa 'fɩan 25 'nyɩ 'ɔ 'matɩ 'taa lebhe ma soluanɩa 'mɔɔ nclɔɔ 'la cɩa wɔlɩ sa ɔmɔ 'titi ɔ -cia ɩmɩa -ɩ -kʋ 'lɛ nclɔɔ nɩkplaan na.

3

Zozii ɩya Nikodɛmʋ 'la dɩzʋlɩɛ

1 Nclɔɔ bhlo -kʋa, ma laa 'mɔɔ Nikodɛmʋ. Ɔ -glɩa Falizɩɛnnyɔ ɩya Zifʋnyaa tocɩa 'la nɩkplaan bhlo. 2 Ɔ ya dobhesa ci, ɔ ya Zozii ŋeni 'nyɩ ɔ yɔɔ 'cla lebhe: «Canyɔ, -a -ci sɛɛ lebhe -n -glɩ canyɔa Laagɔ ya 'lɛ lobhu na, sa nclɔɔ bhlogbɩɩ 'cɩ 'ta mino ɩya ɔ 'ka 'ciinzizielɩlobholia -n nʋ 'lɛ na nʋ, ɩ -ka -kʋ le Laagɔ 'tɔɔ leen -kʋ na.» 3 Zozii yɔɔ 'cla lebhe: «N soluo, -ɩ -glɩ -nʋawlɛ. Nclɔɔ bhlogbɩɩ cɩ 'ta Laagɔ 'la Nyɩbhɛlɩdua 'ciinlɩ, ɩ -ka -kʋ le ɔ 'ta ka -mɔsɔ -mɔsɔ -valɩɔ na.» 4 Nikodɛmʋ yɔɔ 'cla lebhe: «'Nsasa nclɔɔa -ɔ ya 'lɛ -glɛɛ na, ma cɩ 'kɔɔ 'lɛ valɩlɩɛ mino bha? Ɔ cɩ -mɔsɔda ɔ 'nɔ nɩkplaan blelɩɛ mino 'nyɩ ɔ cɩ -awlɛ -valɩɔ bha?» 5 Zozii yɔɔ ŋeennonu lebhe: «N soluo -nʋawlɛ: Ɩ -ka -kʋ le -n 'ta 'nyu ɩya 'Wugoa na, nclɔɔ bhlogbɩɩ cɩ 'ta -mɔsɔ -mɔsɔ -valɩlɩɔ ɩya ɔ 'ka mino, ɔ 'ka Laagɔ 'la Nyɩbhɛlɩdua nɩkplaan ble. 6 Ɩmɩa 'nyɛkɛ valɩ 'lɛ na, ɩ -glɩ 'nyɛkɛ 'nyɩ ɩmɩa 'Wugoa valɩ 'lɛ na, ɩ -glɩ 'lɛ 'wugo. 7 N 'kɔɔ 'cla lebhe: Ɩ -fata lebhe a -valɩlɩɔ -mɔsɔ -mɔsɔ na, ɩ 'la -slɔɔ nikpoo. 8 -Pupolu pulu daa ʋ -wa 'lɛ na, 'nyɩ -n nu ʋla pulɩɛa, -ma -n 'ta daa ʋ 'wlʋlʋ 'lɛ na -ci -aana daa -ʋ mʋnʋ 'lɛ na. 'Sɛtɛɛ bhlogbɩɩ, nclɔɔa -ɔ -valɩlɩɔ 'lɛ 'Wugo na, 'la gbɩa -kʋ 'lɛ.» 9 Nikodɛmʋ yɔɔ neencla lebhe: «'Nsasa ɩmɩ -naa cɩ 'kaa 'lɛ -nʋnʋnʋɔ bha?» 10 Zozii yɔɔ 'cla lebhe: «-Mɔa -ɔ -glɩ 'lɛ Izlayɛlɩbhlɩa 'kʋ 'la canyɔ 'kadie na, -n 'ta wɔlɩ -naa -ci bha? 11 N soluo -nʋawlɛ: Ɩmɩa -a -ci 'lɛ na ɩmɩ -a nyɩtɛ 'lɛ, ɩmɩa -ala 'ci 'lɩ 'lɛ na, ɩla -danʋfʋɛ -a li 'lɛ, -sakɛ 'bhlɩmɔɔn a la 'ta -ala -danʋfʋɛliliea -nʋawlɛ. 12 N solu 'lɛ anyɩ -dʋdʋ 'kʋ 'la wɔlɩ 'nyɩ 'a la 'tɩɩ 'lɛ -nʋawlɛ na, 'nyɩ n -kanɩ anyɩ -laagɔɔn 'la wɔlɩ solu na, 'nsasa a cɩ 'kɩɩ 'lɛ -nʋawlɛ lalalɩ bha? 13 Nclɔɔ bhlogbɩɩ 'ta ka -azla -laagɔɔn -gblaa ɩ -ka -kʋ le n 'ta Nclɔɔa 'Cʋa -ɔ 'wlʋlʋ 'lɛ -laagɔɔn 'nyɩ -ɔ ya 'lɛ kwli na. 14 'Nyɩ saa Moyizi -bhoa 'lɛ tlɛa 'kʋ 'pʋpʋa nɩkplaan na, 'sɛtɛɛ bhlogbɩɩ ɩ -fata 'lɛ lebhe ma -bho Nclɔɔa 'Cʋa 'kʋ 15 ɩya ncaatʋtʋʋntʋa -ɔ -ka 'lɛ ɔla pɔɔtɛtɛ na, ɔ 'ka jabhʋa -ʋ -kʋ 'lɛ 'lʋkʋlʋkʋ ɩya 'lʋkʋlʋkʋ na 'lɩ. 16 -Masa, Laagɔ ya tete ɔ ya -laagɔzɔan wabha, ɩla gbʋ na ɔ ya ɔla 'Cʋa bhlogbɩɩa -sa le ncaatʋtʋʋntʋa -ɔ cɩ ka 'lɛ ɔla pɔɔtɛtɛ kalɩ na, ɔ 'la ka 'ku, -ma ɔ 'ka jabhʋa -ʋ -kʋ 'lɛ 'lʋkʋlʋkʋ ɩya 'lʋkʋlʋkʋ na 'lɩ. 17 Sa Laagɔ 'ta ɔla 'Cʋa -laagɔzɔan lobhu le ɔ 'ka -laagɔzɔan 'tɩtɩpla, -ma ɔ 'ka -laagɔzɔan gbʋʋnsa. 18 Ɔmɔa -ɔ -ka 'lɛ ɔla pɔɔtɛtɛ na, ma cɩ 'tɔɔ 'tɩtɩpla. -Ma ɔmɔa -ɔ 'ta 'lɛ ɔla pɔɔtɛtɛ -ka na, ɔla 'tɩtɩa ya tooto -plɔɔ, -ofi lebhe ɔ 'ta Laagɔ 'la 'Cʋa bhloa 'la 'ŋlɩa -delikʋtɛbhalɩ. 19 'Nyɩ 'lɩka 'tɩtɩplalɩɛa: Zezezelia ya -laagɔzɔan -ci, -masa ncɛlɩ 'la nʋnʋgbɩa -nyu 'lɛ na, ma ya 'tutua wabha 'nyɩ ma ya zezezelia 'kʋzi. 20 Sa, ncaatʋtʋʋntʋa -ɔ nʋ 'lɛ nyinyi na, ka ɔ -zɔɔ 'lɛ zezezeli 'nyɩ ɔ ci 'ta zezezeli nɩkplaan, ɔla nʋnʋgbɩa 'la 'kasɛ -zɔnwlʋ. 21 -Ma ɔmɔa -ɔ nʋ 'lɛ -nʋawlɛgbɩ na, 'ka ɔ ci 'lɛ zezezelia nɩkplaan ɩya ma 'ka ɔla nʋnʋgbɩa 'lɩ, ɩmɩa ɔ nʋnʋ 'lɛ Laagɔ 'la 'ŋlɩa nɩkplaan na.»

'Nyuwluzʋnyɔ Zaan li Zozii 'la -danʋfʋɛ

22 Ɩmɩ -naa 'la leen, Zozii ɩya ɔla gɩlɩnyaa ya Zudeebhlɩa 'kʋ mʋ. Ɔya maasɔ -kʋa 'yɛpɩ 'nyɩ ɔ zʋa ncɛlɩ 'nyu 'wlu. 23 Zaan -ma -kʋa Enɔnʋ, Salimʋdua cɩ 'nyɩ ɔ zʋa ncɛlɩ 'nyu 'wlu, sa 'nyu -zua dɩpɩa na. Ncɛlɩ mʋa 'yɛpɩ le ɔ 'ka maa 'nyu 'wlu zʋ. 24 'Dɛ 'la daa ma 'ta ka kaa Zaan -palʋʋn 'pa. 25 Na, saa ma 'lɩlɩlɩ 'lɛ -kplɔlɩɛ na ɩla wɔɔtʋtʋɛ ya Zaan 'la gɩlɩnyaa ɩya Zifʋnyɔ bhlo -gbaaglɩɩn bhli. 26 Ma ya Zaan ŋeni 'nyɩ ma yɔɔ 'cla lebhe: «Canyɔ, ɔmɔa -n -yɔɔsɔ -kʋa 'lɛ 'yɛpɩ Zludɛɛnnyidɔlʋa leen na, ɔmɔa 'la -danʋfʋɛa -n lia 'lɛ na, 'lɩka ɔ zʋnɩ ncɛlɩ 'nyu 'wlu 'nyɩ ncɛlɩa 'fɩan mʋɔ 'bhlɩ.» 27 Zaan ya maa 'cla lebhe: «Nclɔɔ cɩ 'ta mino ɩya ɔ 'ka lʋʋa Laagɔ 'ta 'kɔɔ 'lɛ 'nyɩ na, 'lɩ. 28 Anyɩ 'titi a -lio 'na -danʋfʋɛ le n ya 'cla lebhe: -N 'ta -amʋ -ɔ 'ta 'lɛ Laagɔ 'la -Sasanyɔa -glɩ, -ma n -glɩ ɔmɔa ma lobhuo 'lɛ 'kʋklʋʋn na. 29 Ɔmɔa -ɔ -ka 'lɛ 'ŋlɔa na, ɔmɔ -ɔ -glɩ 'lɛ 'ŋlɔa -ŋuto. -Ma 'ŋlɔa -ŋuto 'nagɔa -ɔ -kʋ 'lɛ 'dɛ 'nyɩ -ɔ poo 'lɛ 'nyukwliin na, ɔ 'nagɔa 'la -blɩɩzɔan -yelio pɔlɛkʋmɛnɔ. 'Sɛ 'na pɔlɛkʋmɛnɔa -kʋ 'lɛ, ʋ ya 'kʋglalɩ. 30 Ɩ -fata le ɔmɔ, ɔ zi 'kʋ ɩya -amʋ, n -salɩ 'kʋ.

Ɔmɔa -ɔ 'wlʋlʋ 'lɛ -laagɔɔn na

31 Ɔmɔa -ɔ 'wlʋlʋ 'lɛ -laagɔɔn na, ɔ -zilo -tɛtɛa 'fɩan 'kʋ. Ɔmɔa -ɔ -glɩ 'lɛ -dʋdʋa 'kʋ -naanɔ na, -blaanyɛkɛ ɔ -glɩ 'lɛ, 'nyɩ ɔ nyɩtɛ 'lɛ -dʋdʋa 'kʋ 'la ncɛlɩa 'bhisa. Ɔmɔa -ɔ 'wlʋlʋ 'lɛ -laagɔɔn na, 32 ɩmɩa ɔla 'ci 'lɩ 'lɛ 'nyɩ ɔla 'nyukwli 'nu 'lɛ na, ɩmɩ ɔ nyɩtɛ 'lɛ, -ma nclɔɔ bhlogbɩɩ la 'ta ɔla -danʋfʋliliea -nʋawlɛ. 33 Ɔmɔa -ɔ la 'lɛ ɔla -danʋfʋɛliliea na, ɔ li -danʋfʋɛ le Laagɔ -glɩ -nʋawlɛ. 34 -Masa ɔmɔa Laagɔ lobhu 'lɛ na, Laagɔ ne 'kʋ ɔ nyɩtɛ 'lɛ 'nyɩ Laagɔ nyɩɔ ɔla 'Wugoa 'kadieda. 35 Toa -wa 'Cʋa 'nyɩ ɔ yɔɔ -tɛtɛa 'fɩan wlɩɩn zʋ. 36 Ɔmɔa -ɔ -ka 'lɛ 'Cʋa 'la pɔɔtɛtɛ na, ɔ -ka jabhʋa -ʋ -kʋ 'lɛ 'lʋkʋlʋkʋ ɩya 'lʋkʋlʋkʋ na. Ɔmɔa -ɔ zʋ 'ta 'lɛ 'Cʋa na, ɔ cɩ 'ta jabhʋa 'lɩ, -ma Laagɔ 'la dɔgbɛa -kʋɔ 'kʋ.»

4

Zozii -ya Samaliiŋlɔ zʋ 'dɩ

1 Zozii ya sɛɛ cibhlili le Falizɩɛnnyaa yaa 'nu lebhe ɔ lɩa gɩlɩnya -bhutukpa 'nyɩ ɔ zʋa ncaabhutukpa 'nyu 'wlu 'nyɩ ɔ zia Zaan 'kʋ. 2 -Nʋawlɛ nanɩ 'lɛ na, Zozii 'titi zʋ 'taa ncɛlɩ 'nyu 'wlu, -ma ɔla gɩlɩnyaa -ɔ zʋa 'lɛ ncɛlɩ 'nyu 'wlu. 3 Na, ɔ ya Zudeebhlɩa 'kʋ 'wlʋ 'nyɩ ɔ ya Galileebhlɩa 'kʋ cɔlɔ. 4 -Ma ɩ -fataa lebhe ɔ 'ŋatɩa Samaliibhlɩa. 5 Na, ɔ ya Samaliibhlɩa 'la 'dua ma la 'lɛ Sikaa na 'kʋ ŋeni. Dɩpɩa 'taa -dʋdʋa Zakɔpʋ 'nyɩ 'lɛ ɔ -yowli Zozɛfʋ na, cɩ da tlʋ. 6 Dɩpɩa 'titi Zakɔpʋ 'la 'gbjlobhukua -kʋa 'lɛ. -Gugwiea ɔ bhli 'lɛ na, 'la sɛsʋa 'la gbʋ, Zozii -kʋa 'gbojlobhukua cɩ sa. 'Ylʋa yaanɩa dɩdɩ slo. 7 Na, Samaliiŋlɔ bhlo ya 'nyu 'lukan ci. Zozii yɔɔ 'cla lebhe: «'Nyɩɩn 'nyu ɩya n 'ka 'mla.» 8 Ɔla gɩlɩnyaa yaa 'dua 'kʋ lililɩɩ -pɩakan mʋ. 9 Samaliiŋlɔa yɔɔ 'cla lebhe: «'Sʋɛ! -Mɔɔ Zifʋnyɔ, -n 'clalɩɩn 'mlamlanyu, -amʋa -ɔ -glɩ 'lɛ Samalii ŋlɔ na!» -Masa, Zifʋnyaa 'taa -wa le maya Samaliinyaa 'ka wɔlɩ bhlogbɩɩ 'kʋwlalɩ na. 10 Zozii yɔɔ 'cla lebhe: «-N -kaa 'nanɩa Laagɔ nʋ 'lɛ ɩya ɔmɔa -ɔ clɔɔ 'lɛ lebhe: 'Nyɩɩn 'nyu ɩya n 'ka 'mla na -cia na, -mɔ -ɔ -cɩ kaa 'lɛ 'clalɩ ɩya ɔ 'kaa -mɔɔ 'lɛ 'nyua -ʋ 'nyɩ 'lɛ jabhʋa na 'nyɩ.» 11 -Ma 'ŋlɔa yɔɔ neencla lebhe: «-Kwlenyɔ, -n 'ta 'nyulusonu -ka 'nyɩ 'gbojlobhukua tlʋʋn, na 'nda -n -cɩ 'kaa 'lɛ 'nyu -naa -ʋ nyɩ 'lɛ jabhʋa na 'lɩlɩ bha? 12 Ka -n zi 'lɛ -a tokadɔ Zakɔpʋ 'kʋ bha? Ɔmɔ -ɔ 'nyɩ 'lɛ -anyɩ 'gbojlobhuku -naa, ɔmɔ 'titi ya ʋla nɩkplaan 'la 'nyua 'mla, ɔya ɔla 'cuo, ɩya ɔla mla.» 13 Zozii yɔɔ neenŋonu lebhe: «Ncaatʋtʋʋntʋa -ɔ mla 'lɛ nyuu -naa na, 'nyutʋ cɩ 'ka ka -azlɔɔ 'bhla. 14 -Ma ɔmɔa -ɔ -cɩ 'ka 'lɛ 'nyua n cɩ 'kɔɔ 'lɛ 'nyɩ na 'mla na, 'nyutʋ -ylɛylɛ cɩ 'takɩnɩɔ 'bhla. -Masa 'nyua n cɩ 'kɔɔ 'lɛ 'nyɩ na, ʋ cɩ 'kɔɔ nɩkplaan, 'nyukobhua jabhʋa -ʋ -kʋ 'lɛ 'lʋkʋlʋkʋ ɩya 'lʋkʋlʋkʋ na 'wlʋlʋ 'lɛ nɩkplaan na 'plɩlɩ.» 15 'Ŋlɔa yɔɔ 'cla lebhe: «-Kwlenyɔ 'maa 'nyɩɩn 'nyu -naa ɩya 'nyutʋ 'la kanɩɩn 'bhla ɩya 'na kanɩ -da 'nyulukan ci.» 16 -Ma Zozii yɔɔ 'cla lebhe: «Mʋ, la -n -ŋuto ɩya a cɔlɔ -da.» 17 'Ŋlɔa yɔɔ neenŋonu lebhe: «N 'ta ŋodi -ka.» 18 Zozii yɔɔ 'cla lebhe: «-N -ka 'ge 'nyɩ n 'cla lebhe -n 'ta ŋodi -ka. -N ya ŋodie -ngbi 'cɩ 'nyɩ nclɔɔa cɩa -n -kʋnɩ 'lɛ -pɔtɔnʋ na, ɔ 'ta -n -ŋuto -glɩ. Ɩmɩ -naa 'kʋ, -n ya -nʋawlɛ nyɩtɛ.» 19 'Ŋlɔa yɔɔ 'cla lebhe: «-Kwlenyɔ, n lɩ le -n -glɩ Laagɔnekʋnyɩtɛnyɔ. 20 -A tokadɔcɩa ya 'kike -naa 'wlu gʋgwlalɩ 'nyɩ anyɩ, a cla lebhe Zolizalɛmʋ ɩ -fata 'lɛ le ma gʋgwlalɩ bha!» 21 Zozii yɔɔ 'cla lebhe: «Kalɩ 'na pɔɔtɛtɛ, 'ŋwacɩa ci 'yɛpɩ, daa a cɩ 'tanɩ 'lɛ Toa 'kike -naa 'kʋ, -aana Zolizalɛmʋ gʋgwlalɩ na. 22 A gʋgwla ɔmɔa a 'ta 'lɛ -ci na. -Anyɩ, -a gʋgwla ɔmɔa -a -ci 'lɛ na, sa Zifʋlɔlʋa nɩkplaan gbʋʋnsalɩɛ 'wlʋlʋ 'lɛ na. 23 -Ma 'ŋwacɩa ci 'yɛpɩ 'nyɩ ɛ ya tooto ŋeni, daa -nʋawlɛ -gʋgwlanyaa, cɩ 'ka 'lɛ Toa 'wugoa ɩya -nʋawlɛ nɩkplaan gʋgwlalɩ na, -masa 'sɛ 'la -gʋgwlanyaa Toa 'matɩ 'lɛ na. 24 Laagɔ -glɩ 'Wugo, na 'sɛ 'la gbʋ dɛ ɩ -fata 'lɛ lebhe maa -ɔ gʋgwlɔɔ 'lɛ na, ma gʋgwlalɩɔ 'Wugoa 'la klalɩlɩɛ ɩya -nʋawlɛ nɩkplaan.» 25 'Ŋlɔa yɔɔ 'cla lebhe: «N ci sɛɛ lebhe Laagɔ 'la -Sasanyɔa cɩ 'ka ci, ɔmɔa ma la 'lɛ Klisi na. Daa ɔ cɩ 'ka 'lɛ ci na, ɔ cɩ 'ka -anyɩ wɔlɩa -tɛtɛa -zɔnsa.» 26 Na, Zozii yɔɔ 'cla lebhe: «-Amʋa -ɔ soluo 'lɛ na, -amʋ -ɔ -glɩɔ 'lɛ.» 27 Daa Zozii -kʋa 'lɛ ɩmɩ -naa nyɩtɛda na, gɩlɩnyaa ya ci. Ma 'lɩ 'lɛ lebhe ɔya 'ŋlɔ nyɩtɛa na, nikpoo ya maa sla. -Ma bhlogbɩɩ 'tɔɔ neencla lebhe: «'Lɩsaa -n 'matɩa 'lɛ bha?» -Aana: «Wɔɔsaa -n -yɔɔsɔ nyɩtɛa 'lɛ bha?» 28 Na, 'ŋlɔa ya dɩpɩa ɔla 'nyukondea te, ɔ ya duku mʋ 'nyɩ ɔ ya ncɛlɩ 'cla lebhe: 29 «A ci a 'lɩmʋka nclɔɔ. Ɔ yaan 'na wɔlɩa 'fɩan n nʋ 'lɛ na solu. Laagɔ 'la -Sasanyɔa ɔ cɩ 'ta sɛɛ 'lɛ 'plɩ bha?» 30 Na, Samaliinyaa ya -zɔnwlʋ 'nyɩ ma ya mʋ 'nyɩ ma ya Zozii ŋeni. 31 'Dɛ 'la daa, gɩlɩnyaa bhibhiea 'mɔɔ 'nyɩ ma claa lebhe: «Canyɔ, 'maa li -na.» 32 -Ma ɔ ya maa 'cla lebhe: «N -ka nyacea, n 'ka 'lɛ li na, 'nyɩ a 'taa -ci.» 33 Daa ɔ nyɩtɛ 'lɛ -sa na, gɩlɩnyaa 'claclalɩa neen lebhe: «Ka nclɔɔ bhlo -lɔɔ 'lɛ nyɩ bha?» 34 Na, Zozii ya maa 'cla lebhe: «'Na nyɩa, ɩ -glɩ le n nʋ ɔmɔa -ɔ lobhuun 'lɛ na, ɔla pɔɔsa ɩya n bhɩalɩ lobholia ɔ 'nyɩɩn 'lɛ na. 35 Anyɩ 'titi, 'a 'cla 'ta lebhe: -Ɔ -tonɩ 'cɩ -nmɔɔna ɩya gologololɩɩa 'la 'dɩdaa 'ka ŋeni bha? -Ma -amʋ, n solu anyɩ lebhe: A kope ka 'kwlɩa nɩkplaan, gologololɩɩa ya tooto zalɩ. 36 Ɔmɔa -ɔ dɩ 'lɛ na, lɩnɩ tooto ɔla dluuplʋlɩɛ 'nyɩ ɔ 'wlalɩ 'caa jabhʋa -ʋ -kʋ 'lɛ 'lʋkʋlʋkʋ ɩya 'lʋkʋlʋkʋ na, nɩkplaan 'wlu le golonyɔa ɩya ɔmɔa -ɔ dɩ 'lɛ na, 'ka -pɔpʋɛ nebhlo nʋnʋ. 37 Ma pa 'nine 'nyɩ ma cla lebhe: Bhlo golo 'nyɩ -anɔ bhlo dɩ 'lɛ. Ɩmɩ -naa nɩkplaan, ɩ -glɩ -nʋawlɛ. 38 N ya anyɩ 'kwlaa nɩkplaan a 'ta ka azla 'lɛ lobholi nʋnʋ na, 'dɩlɩkan lobhu. -Buun ncɛlɩ ya lobholi nʋ, 'nyɩ anyɩ a lɩnɩ 'lɛ mala lobholia 'la -nvʋsʋɛa.» 39 Duu -naa 'kʋ 'la Samaliinyaa -bhutukpa ya ɔla wɔlɩa -nʋawlɛ la, sa 'ŋlɔa ya -danʋfʋɛ li 'nyɩ ɔ ya maa 'cla lebhe: «Ɔ yaan ɩmɩa 'fɩan n nʋ 'lɛ na, solu.» 40 Na, daa Samaliinyaa ŋeni 'lɛ Zozii cɩ na, maa yɔɔ bhibhie le ɔ kʋ maa cɩ. 'Nyɩ ɔ ya dɩpɩa clɩɩ -mɔsɔ li. 41 Maa -ɔ zʋɔ mala pɔɔtɛtɛa 'kʋ, ɔmɔ 'titi 'la niwɔlɩa 'la gbʋ na, ma -zunɩ -awlɛ -gbɔɔn. 42 'Nyɩ ma claanɩa 'ŋlɔa lebhe: «-N 'tanɩ -naa niwɔlɩa bhlobhlo 'la gbʋ -tɛɛ -a 'tɔɔ 'lɛ -ala pɔɔtɛtɛa 'kʋ zʋ, -ma anyɩ 'titi -a yɔɔ neen 'nu 'nyɩ -a -ci sɛɛ lebhe ɔmɔ -ɔ -glɩ 'lɛ -zaagbʋsa -laagɔzɔan 'la gbʋʋnsanyɔa.»

Zozii ya 'cilee bhlo jabha

43 Clɩɩ -mɔsɔ 'plɩ 'lɛ na, Zozii ya 'dɛ 'wlʋ 'nyɩ ɔ ya Galileebhlɩa 'kʋ mʋ. 44 Ɔmɔ 'titi yaa 'cla lebhe Laagɔnekʋnyɩtɛnyɔ 'ta ɔ 'bhlɩ 'ŋlɩ -ka. 45 -Ma daa ɔ ŋeni 'lɛ Galileebhlɩa 'kʋ na, Galileenyaa yɔɔ 'nanɩ kla, sa maa -ma, ma ya Zolizalɛmʋ, 'fɛtlɩa 'kʋ mʋmʋ 'nyɩ ma ya ɩmɩ 'fɩan ɔ nʋnʋa 'lɛ 'yɛpɩ na 'lɩ. 46 Zozii ya Galileebhlɩa 'la 'dua ma la 'lɛ Kanaa na 'kʋ cɔlɔ, gbazɩa ɔ kacilia 'lɛ 'nyua -diinvɛɛan na. Goonvlalobholinʋyɔ 'kadie bhlo, ɔ -yowli 'taa -ja 'nyɩ ɔ -kʋa 'dua ma la 'lɛ Kapɛnayumʋ na 'kʋ. 47 Ɔ ya 'nu lebhe Zozii ya Zudeebhlɩa 'kʋ 'wlʋ 'nyɩ ɔ ya Galileebhlɩa 'kʋ ci. Ɔ ya mʋ ɔ yɔɔ ŋeni 'nyɩ ɔ yɔɔ bhibhie lebhe ɔ mʋ Kapɛnayumʋ ɩya ɔ jabha ɔla 'cʋa -ɔ ya 'kwɩ clɛ 'lɛ na. 48 Zozii yɔɔ 'cla lebhe: «A 'ta 'ciinzizielɩlobholi ɩya nɩkposlaslawɔlɩ 'lɩ na, a cɩ 'ta kɩnɩ pɔɔtɛtɛ 'lɩ -na!» 49 Nclɔɔa yɔɔ 'cla lebhe: «-A to, mʋ 'faanfan daa 'na 'cʋa 'ta 'ka 'lɛ 'ku na.» 50 Zozii yɔɔ 'cla lebhe: «Mʋ, -ma -naa 'cʋa ya jabha.» Nclɔɔa ya Zozii 'la niwɔlɩa ɔla pɔɔtɛtɛa 'kʋ zʋ 'nyɩ ɔ ya 'plɩ ɔ ya mʋ. 51 Daa ɔ -kʋa 'lɛ mʋda na, ɔla lobhocuoa yɔɔ -gugwie 'kʋ cili 'nyɩ ma yɔɔ 'cla lebhe: «-Naa 'cʋa ya jabha!» 52 Ɔ ya maa neencla 'ŋwacɩa 'kʋa ɔ jabhaa 'lɛ na 'nyɩ ma yɔɔ neenŋonu lebhe: «-Cɩpaa 'la 'plɩplɩylʋʋn 'la 'ŋwacɩ bhlo, dɛ wɔtlɩa 'wlʋɔ 'lɛ 'ciin.» 53 'Cʋa toa ya cibhlili lebhe 'dɛ 'la 'ŋwacɩa 'kʋ 'titi Zozii 'cla 'mɔɔ 'lɛ lebhe: «-N -yowli ya jabha.» 'Nyɩ ɔ ya pɔɔtɛtɛ 'lɩ, ɔmɔ ɩya ɔla 'slinyaa 'fɩan. 54 Na, 'lɩka -mɔsɔ -ciinzizielɩlobholia Zozii nʋ 'lɛ daa ɔ 'wlʋ 'lɛ Zudeebhlɩa 'kʋ 'nyɩ ɔ cɔlɔ 'lɛ Galileebhlɩa 'kʋ na.

5

Zozii ya nclɔɔ bhlo nyɔkwɛclɩɩ 'kʋ jabha

1 Ɩmɩ -naa 'la leen, Zifʋnyaa 'la 'fɛtlɩ bhlo ya ŋeni 'nyɩ Zozii ya Zolizalɛmʋ -gblaa. 2 'Nyikle bhlo -kʋa duu -naa nɩkplaan, gbinea ma la 'lɛ 'bhlabhlɩ 'la gbinea na cɩ. Ebleewɔlɩɩn, 'nyikle -naa ma la 'lɛ Bɛzataa. A -kaa 'plɩlɩdɩ -ngbi, -ɩ -gblio 'lɛ na. 3 Guzenya -bhutukpa pʋaa 'mɩɩ -zɔn: 'Citutunya, bhɩbhlinya ɩya bhubhubhubhunya. 4 5 Nclɔɔ bhlo -kʋa 'dɛ, ɔ -glɩa bhubhubhubhunyɔ 'nyɩ ɔ ya dɩpɩa liowli 'kʋgba -ngbaata li. 6 Zozii yɔɔ 'lɩ, ɔ pʋa 'nyɩ ɔ 'nu 'lɛ lebhe ɔ ya gua nikplaan -gwlɛlɩ na, ɔ yɔɔ neencla lebhe: «-N -wa lebhe -n cɩ jabha bha?» 7 Bhubhubhubhunyɔa yɔɔ neenŋonu lebhe: «-Kwlenyɔ n 'ta nclɔɔ -ka ɩya ɔ 'kaan 'nyiklea nɩkplaan 'pa, daa 'nyua bhɔ 'lɛ 'dɩdɔlɩɛ na. 'Nyɩ da n -ka 'cla le n mʋ na, -buunnaanɔ bhlo ya 'yɛpɩ tooto kwli.» 8 Zozii yɔɔ 'cla lebhe: «-Bho 'kʋ, 'ma -naa 'kʋpʋlʋʋa ɩya -n namʋ.» 9 'Nyɩ 'kplookʋ, nclɔɔa ya jabha. Ɔ ya ɔla 'kʋpʋlʋʋa 'ma 'nyɩ ɔ ya 'namʋ zʋ. 'Dɛ 'la clɩɩa -glɩa Zifʋnyaa 'la nyɔkwɛclɩɩ. 10 Na, Zifʋnyaa ya ɔmɔa -ɔ wlʋa 'lɛ jabhada na, 'cla lebhe: «-Yaka -glɩ nyɔkwɛclɩɩ, -n 'ta -jioli -ka ɩya -n ka -naa 'kʋpʋlʋʋa bhɛ.» 11 -Ma ɔ ya maa 'cla lebhe: «Ɔmɔa -ɔ jabhaan 'lɛ na, ka ɔ 'claan 'lɛ lebhe: 'Ma -naa 'kʋpʋlʋʋa ɩya n namʋ.» 12 Ma yɔɔ neencla lebhe: «Ncaasaa -ɔ -glɩa 'lɛ ɔmɔa -ɔ 'clɔɔ 'lɛ lebhe -n 'ma -naa 'kʋpʋlʋʋa ɩya -n namʋa bha?» 13 -Ma ɔmɔa -ɔ jabhaa 'lɛ na, 'taa nclɔɔa ɔ -glɩa 'lɛ na -ci. Sa Zozii ya -alawleea -ɔ -kʋa 'lɛ dɩpɩa na, sidiin mlɔnʋ. 14 Ɩla leen, Zozii -ya nclɔɔ -naa ya Laagɔpaakadiea -zɔn 'cɩlɩ 'nyɩ ɔ yɔɔ 'cla lebhe: «Kopeka ncɩ, -n ya jabha. -Naa nʋanɩ nyinyi ɩya wɔlɩa -ɩ zi 'lɛ -anɩ -naa 'kʋ na, ɩ 'la kasɛnɩɔ ŋeni.» 15 Nclɔɔa ya mʋ 'nyɩ ɔ ya Zifʋnyaa 'cla lebhe Zozii -ɔ jabhaa 'mɔɔ 'lɛ. 16 Ɩla gbʋ na, Zifʋnyaa ya Zozii wɔlɩ 'kʋ gɩlɩɛ bhɔ, sa ɔ ya ɩmɩ -naa mala nyɔkwɛclɩɩ 'kʋ nʋ. 17 -Ma Zozii ya maa 'cla lebhe: «N To nʋ ka -azla lobholi. -Amʋ -ma, n -kʋ lobholiin.» 18 Wɔɔkle -naa 'la gbʋ na, ma 'matɩnɩa ɔla 'bhlada, -n 'ta le mala nyɔkwɛclɩɩa ɔ zʋ 'ta 'lɛ na 'la gbʋ -tɛɛ, -ma ɔ la -awlɛ 'lɛ Laagɔ ɔ to, 'nyɩ ɔ pala 'lɛ -sa lebhe ka ɔya Laagɔ 'wlʋlʋ 'lɛ na, ɩla gbʋ.

Laagɔ 'la 'Cʋa 'la -jiolia

19 Zozii ya -awlɛ wɔɔnyɩtʋ 'ma, 'nyɩ ɔ ya maa 'cla lebhe: «N solu anyɩ ɩ -glɩ -nʋawlɛ, 'Cʋa mino 'ta ɩya ɔ 'ka ɔla 'wluun lʋʋ bhlogbɩɩ nʋ, -n 'ta le ɩmɩa -tɛɛa ɔ 'lɩ 'lɛ Toa nʋda na. Sa ɩmɩa Toa nʋ 'lɛ na, ɩmɩ 'Cʋa -masɛ nʋ 'lɛ. 20 Sa Toa -wa 'Cʋa 'nyɩ ɔ palɔɔ ɩmɩa -tɛtɛa 'fɩan ɔ nʋ 'lɛ na. Ɔ cɩ 'ka nʋnʋgbɩa -ɩ zi 'lɛ -da 'kʋ na, pala ɩya nikpoo 'ka anyɩ slaa. 21 Saa Toa bho 'lɛ 'ku 'kwɩɩn 'kʋ 'nyɩ ɔ nyɩɩ 'lɛ jabhʋa na, 'sɛɛ -tɛɛ bhlogbɩɩ, 'Cʋa -ma, ɔ nyɩ 'lɛ jabhʋa nclɔɔa ɔ -wa 'lɛ na. 22 Toa -plaa 'ta nclɔɔ bhlogbɩɩ 'tɩtɩ, ɔ ya 'tɩtɩplalɩɛa 'fɩan 'Cʋa wlɩɩn zʋ, 23 ɩya ncɛlɩa 'fɩan 'ka 'Cʋa 'klʋgba lesaa ma gba 'lɛ Toa 'klʋ na. Ɔmɔa -ɔ -gba 'ta 'lɛ 'Cʋa 'klʋ na, Toa -ɔ lobhuo 'lɛ na, ɔmɔ, ɔ -gba 'ta 'lɛ 'klʋ. 24 N solu anyɩ, ɩ -glɩ -nʋawlɛ, ɔmɔa -ɔ po 'lɛ 'na niwɔlɩa 'nyukwliin 'nyɩ -ɔ zʋ 'lɛ ɔla pɔɔtɛtɛa ɔmɔa -ɔ lobhuun 'lɛ na, 'kʋ na, ɔ lɩ jabhʋa -ʋ -kʋ 'lɛ 'lʋkʋlʋkʋ ɩya 'lʋkʋlʋkʋ na. Ɔ 'tanɩ 'tɩtɩplalɩɛ -ka, -ma ɔ ya 'kwɩ 'la -gugwiea 'kʋ 'wlʋ 'nyɩ ɔ ya jabhʋa nɩkplaan ble. 25 'Nyɩ n solu anyɩ, ɩ -glɩ -nʋawlɛ, 'ŋwacɩa ci 'yɛpɩ 'nyɩ ɛ ya tooto ŋeni, daa maa -ɔ -kuo 'lɛ na, cɩ 'ka 'lɛ Laagɔ 'la 'Cʋa 'la -blɩɩzɔan 'nu ɩya maa -ɔ -cɩ 'kʋʋ 'lɛ 'nu na, 'ka jabha na. 26 Na, saa Toa -ka 'lɛ jabhʋa ɔcɩ nɩkplaan na, 'sɛtɛɛ bhlogbɩɩ ɔ 'nyɩ 'lɛ 'Cʋa -jioli le ɔ kalɩmʋ jabhʋa ɔcɩ nɩkplaan. 27 Ɔ yɔɔ 'tɩtɩplalɩɛ 'la -jioli 'nyɩ, sa ɔmɔ -glɩ 'lɛ Nclɔɔa 'Cʋa. 28 Na, -anɩ -naa 'fɩan 'la slaanɩ anyɩ nikpoo! 'Ŋwacɩa ci 'yɛpɩ ɩya maa 'fɩan -ɔ -pʋʋ 'lɛ lesia nɩkplaan na, 'ka ɔla -blɩɩzɔan 'nu, 29 ɩya maa -ɔ ya 'lɛ 'nanɩ nʋ na, 'kɩɩ nɩkplaan 'wlʋ ɩya ma 'ka jabhʋa 'lɩ. -Ma maa -ɔ ya 'lɛ nyinyi nʋ na, cɩ 'kɩɩ nɩkplaan 'wlʋ ɩya ma 'ka gbaylɩsalɩɛ 'lɩ. 30 -Amʋ, 'n 'manɩ 'ta -amʋ 'titi 'na 'wluun ɩya n 'ka lʋʋ nʋ. Ɩmɩa Laagɔ soluun 'lɛ na, ɩmɩ 'kʋ n plalɩ 'lɛ nclɔɔ 'tɩtɩ 'nyɩ 'na 'tɩtɩplalɩɛ 'nylugolu 'kʋ, sa 'n 'matɩ 'ta le n 'ka -amʋ titi 'na pɔɔsa nʋ, -ma ɔmɔa -ɔ lobhuun 'lɛ na, 'la pɔɔsa.

Zozii 'la -danʋfʋɛcɩa

31 Gbazɩ -amʋ 'titi n -ka ncɩ 'la -danʋfʋɛ li na, 'na -danʋfʋɛliliea cɩ 'ta -nʋawlɛ 'plɩ. 32 -Ma -buun nclɔɔ li 'lɛ 'na -danʋfʋɛ 'nyɩ n -ci sɛɛ lebhe 'na -danʋfʋɛa ɔ li 'lɛ na, ɛ -glɩ -nʋawlɛ. 33 A ya Zaan ncɛlɩ 'kʋ lobhu 'nyɩ 'na cɩa wɔlɩa ɔ solu 'lɛ anyɩ na, ɩ -glɩ -nʋawlɛ. 34 -Amʋ, 'n 'matɩ 'ta le nclɔɔ li 'na -danʋfʋɛ, -ma a 'ka 'lɛ gbʋʋnsalɩɛ 'lɩ na, dɛ n nyɩtɛ 'lɛ -sa. 35 Zaan 'la gbɩa -kʋa le -kaniea ma ŋama 'lɛ 'nyɩ ɛ le 'lɛ na 'bhisa. 'Nyɩ anyɩ, a ya ŋonu le a cɩ clɩɩ -zlʋsaasa ɛla lelia nɩkplaan pɔlɛkʋmɛnɔ nʋnʋ. 36 -Ma -amʋ, n -ka -danʋfʋɛliliea -ɛ zi 'lɛ Zaan 'nɛa 'kʋ na. Ɛmɛ -glɩ 'lɛ nʋnʋgbɩa n To 'nyɩɩn 'lɛ nʋda na. N nʋɩ 'nyɩ ɩmɩ -ɩ li 'lɛ 'na -danʋfʋɛ le Toa, ɔmɔ -ɔ lobhuun 'lɛ. 37 'Nyɩ Toa -ɔ lobhuun 'lɛ na, ɔmɔ 'titi -ma ya 'na -danʋfʋɛ li. -Ma a 'ta ka -azla ɔla -blɩɩzɔan 'nu naa, a 'ta ka -azla ɔla 'klʋa 'ciinlɩ. 38 'Nyɩ ɔla niwɔlɩa 'ta anyɩ nɩkplaan -kʋ, sa a 'ta ɔmɔa ɔ lobhu 'lɛ na, 'la pɔɔtɛtɛ -ka na. 39 A 'matɩ Zieziewɔlɩa 'ni, sa a gugu lebhe ɩmɩ nɩkplaan a cɩ 'ka 'lɛ jabhʋa -ʋ -kʋ 'lɛ 'lʋkʋlʋkʋ ɩya 'lʋkʋlʋkʋ na 'lɩlɩ. -Ma ɩmɩ -ma 'na -danʋfʋɛ ɩ li 'lɛ. 40 'Nyɩ a 'ta 'lɛ -wa le a 'kaan cili ɩya a 'ka jabhʋa -ʋ -kʋ 'lɛ 'lʋkʋlʋkʋ ɩya 'lʋkʋlʋkʋ na 'lɩ. 41 'N 'matɩ 'ta ncɛlɩ 'la ŋwleenfalɩlɩɛ. 42 Sa n -ci anyɩ na, n -ci sɛɛ lebhe a 'ta Laagɔ 'la -walʋ pɔlɛɛn -ka. 43 -Amʋ, n ya n to 'la 'ŋlɩa nɩkplaan cili 'nyɩ a 'ta -wa le a 'kaan kla. -Ma -buun -naanɔ bhlo -ka ɔmɔ 'titi ɔla 'ŋlɩ nɩkplaan cili na, a cɩ 'ka 'mɔɔ kla! 44 Anyɩa -ɔ -wa 'lɛ anyɩ bhlobhlo 'la 'ŋwleenfalɩlɩɛ 'nyɩ -ɔ 'matɩ 'ta 'lɛ 'ŋwleenfalɩlɩɛ -ɩ 'wlʋlʋ 'lɛ Laagɔ bhlogbɩɩ wlɩɩn na, 'nsasa a cɩ 'kaa 'lɛ nʋnʋnʋ ɩya a 'ka 'lɛ pɔɔtɛtɛ kalɩ bha? 45 A 'la gugua lebhe -amʋ -ɔ cɩ ka 'lɛ anyɩ Toa -deliin, wɔlɩ 'kʋ gɩ. Nclɔɔa -ɔ -cɩ ka 'lɛ anyɩ wɔlɩ 'kʋ gɩ na, ɔmɔ -glɩ 'lɛ Moyizi, ɔmɔa a 'tɛlɩ 'lɛ -deli 'kʋ na. 46 Sa, ɩ -ka -kʋ lebhe a laa Moyizi 'la zieziewɔlɩa -nʋawlɛ na, -amʋ -ma a cɩ 'kaa 'na pɔɔtɛtɛ -kalɩ, sa 'na cɩa wɔlɩ ɔ zie 'lɛ na. 47 -Ma a la 'ta 'lɛ ɩmɩa ɔ zie 'lɛ na -nʋawlɛ na, 'nsasa a cɩ 'kaa 'lɛ ɩmɩa n nyɩtɛ 'lɛ na -nʋawlɛ lalalɩ bha?»

6

Zozii ya ncaatabhliwli -ngbi nyɩ 'nyɩ

1 Ɩmɩ -naa 'la leen, Zozii ya Galileenyia, ma la -awlɛ 'lɛ Tibeliadɩnyia na 'tɔ. 2 Ncaabhutukpa gɩlɩa 'mɔɔ, sa ma yaa 'ciinzizielɩlobholia ɔ nʋa 'lɛ 'nyɩ ɔ 'nyɩ 'lɛ guzenyaa na 'lɩ. 3 Zozii ya 'kike bhlo 'wlu -gblaa 'nyɩ ɔya ɔla gɩlɩnyaa ya sakʋ. 4 Zifʋnyaa 'la geyliinwlʋfɛtlɩa yaanɩa cɩmɛ. 5 Zozii ya 'wlu 'kʋ 'bhli 'nyɩ ya ncaabhutukpa 'lɩ, ma cia 'mɔɔ 'bhlɩ, 'nyɩ ɔ ya Filipʋ neencla lebhe: «'Ndagbazɩ -a -cɩ kaa 'lɛ 'flawu -pɩalɩ ɩya ncɛlɩ -naa 'kaa 'lɛ li bha?» 6 Ka ɔ nyɩtɛa 'lɛ ɩmɩ -naa ɩya ɔ 'kaa ɔla pɔɔtɛtɛa 'lɩ, sa ɔ -cia tooto ɩmɩa ɔ cɩ 'kaa 'lɛ nʋ na. 7 Filipʋ yɔɔ neenŋonu lebhe: «Ka -a -kaa clɩɩ -gwlɩɩ 'kʋgba 'la lobholi 'la dluuplʋdala 'la 'flawu -pɩa 'titio na, ɩ cɩ 'ta zubholi ɩya nclɔɔ nclɔɔ 'ka 'klipɛ 'bhebhe 'lɩ.» 8 Ɔla gɩlɩnyaa 'la nɩkplaan bhlo, Andlee, Simɔɔn Pɩɛlɩ bholi, yɔɔ 'cla lebhe: 9 «Ŋodico bhlo -kʋ -da, ɔ -ka 'flawu -ngbi ɩya -zlii -mɔsɔ. -Ma, 'Lɩsaa ɩmɩ -naa -glɩa 'lɛ ncaabhutukpa -naa 'la da bha?» 10 Zozii ya 'cla lebhe: «A gba ɩya ma kʋsa.» -Piti -zua 'dɛ 'la -diklea, 'nyɩ ma ya sakʋ. Ma cɩa -sa ncaatabhliwli -ngbi 'wlʋ. 11 Zozii ya 'flawua 'ma, ɔ ya Laagɔ bhɔlʋ 'nyɩ ɔ ya gba ma yɩɩ ncɛlɩa poli. Ɔ ya -zliia -ma 'ma 'nyɩ ɔ ya sɛɛ bhlogbɩɩ nʋ. Saa ma 'clalɩa 'lɛ sɛɛ ɔ nyɩa 'lɛ maa. 12 Daa, ma li 'lɛ 'nyɩ ma lo 'lɛ na, Zozii ya ɔla gɩlɩnyaa 'cla lebhe: «A 'wlalɩ 'klia -ɩ -to 'lɛ na 'wlu ɩya -ylɛylɛ 'la 'ka nyumo.» 13 Ma ya 'flawua -ngbia 'la 'klia -ɩ -toa 'lɛ ncɛlɩa wlɩɩn na 'kʋbhli 'nyɩ ma ya -toku 'kʋgba -mɔsɔ yeli. 14 Ncɛlɩa 'lɩ 'lɛ 'ciinzizielɩlobholi -naa ɔ wlʋ 'lɛ nʋda na 'ciin na, ma ya 'cla lebhe: «-Anɔ -naa, ɔmɔ -ɔ -glɩ 'lɛ -zaagbʋsa Laagɔnekʋnyɩtɛnyɔa, -ɔ -cɩ kaa 'lɛ -laagɔzɔan ci na.» 15 -Masa Zozii -cia 'lɛ sɛɛ lebhe, ka ma cɩ 'kaa 'mɔɔ 'lɛ 'kʋbhli ɩya ma 'kaa 'mɔɔ 'lɛ nyɩbhɛlʋ plee na, ɔ ya dɩpɩa 'wlʋ 'nyɩ ɔmɔ bhlogbɩɩ ya -awlɛ 'kikea 'wlu cɔlɔ.

Zozii ya 'nyi 'kʋtaan namʋnʋ

16 Daa 'ylʋ mʋ 'lɛ na, Zozii 'la gɩlɩnyaa ya 'nyia cɩ wkli. 17 Ma ya gɔlʋ bhlo nɩkplaan 'tɔ, ma tɔa 'nyi 'nyɩ ma mʋnʋa Kapɛnayumʋ -gbazɩa. 'Tutu yaanɩa tooto pla, -ma Zozii 'ta ka kaa maa ŋeni. 18 -Bubo ya 'ma 'nyɩ 'nyia vʋanɩa. 19 Ma ya gɔlʋa 'lu, ma ya mʋ -aan -kiloo -ngbi 'bhisa 'kʋ, 'nyɩ ma ya 'lɛ Zozii 'nyia 'kʋtaan namʋnʋda 'lɩ, ɔ cili gɔlʋa 'bɩɩn. Na, ŋanɔ ya maa pla. 20 -Ma ɔ ya maa 'cla lebhe: «-Amʋ -kʋ 'lɛ, ŋanɔ 'la 'bhlaa anyɩ.» 21 Na, ma yaa wabha le ma 'kaa 'mɔɔ gɔlʋa nɩkplaan 'ma 'nyɩ 'kplookʋ ʋ ya 'lɛ gbazɩa ma mʋa 'lɛ na, 'la 'nyigboa 'kʋ 'pɛ.

-Alawleea 'matɩ Zozii

22 Daa -zeli ze 'lɛ na, -alawleea -a -toa 'lɛ 'nyigboa 'kʋ na, ya luoli lebhe Zozii -ya ɔla gɩlɩnyaa 'taa nebhlo mʋnʋ, -ma gɔlʋa bhlogbɩɩa -ʋ -kʋa 'lɛ 'dɛ na, ʋmʋ gɩlɩnyaa bhlobhlo pla 'lɛ 'nyɩ ma ya 'lɛ mʋ. 23 'Bhlɩmɔɔn, gɔlɩa -anɩ ya Tibeliadɩdua 'kʋ 'wlʋlʋ 'nyɩ ɩ ya daa -Kwlenyɔa bhɔlʋlʋ 'lɛ Laagɔ 'nyɩ ma lili 'lɛ 'flawua na 'pɛ. 24 Na, daa -alawleea 'lɩ lebhe Zozii 'ta 'dɛ -kʋ 'nyɩ ɔla gɩlɩnyaa -ma 'ta 'dɛ kʋ na, ma ya gɔlɩa nɩkplaan 'tɔ 'nyɩ ma ya yɔɔ Kapɛnayumʋdua nɩkplaan 'matɩkan mʋ.

Zozii -glɩ 'lɛ 'flawoa -ʋ nyɩ 'lɛ jabhʋa na

25 Na, ncɛlɩa ya Zozii 'nyigean 'lɩlɩ, 'nyɩ ma yɔɔ neencla lebhe: «Canyɔ, 'nsasa -n nʋnʋ 'lɛ 'ynɩ -n ya 'lɛ -wɔlʋ ŋenia bha?» 26 Zozii ya maa neeŋonu lebhe: «N solu anyɩ, ɩ -glɩ -nʋawlɛ, -n 'taan ka a 'matɩ 'taan 'lɛ, -ofi lebhe a ya ghledɩa a 'lɩ 'lɛ 'ciin na 'la -zɔn 'nu, -ma ka a 'matɩɩn 'lɛ -ofi lebhe a ya 'flawu li 'nyɩ a lo. 27 A 'la nʋa nyɩa -ɩ cɩ ka 'lɛ nyumo na, ɩla lobholi, -ma a nʋ nyɩa -ɩ gwlɛlɩ 'lɛ 'nyɩ ɩ nyɩ 'lɛ jabhʋa -ʋ -kʋ 'lɛ 'lʋkʋlʋkʋ ɩya 'lʋkʋlʋkʋ na 'la lobholi. Nclɔɔa 'Cʋa cɩ 'kɩɩ 'lɛ anyɩ 'nyɩ, sa ɔmɔ To Laagɔ zʋ 'lɛ ɔla 'kukuunkpoa 'kʋ.» 28 Na, ma yɔɔ neencla lebhe: «'Nsasa -a -cɩ kaa 'lɛ Laagɔ 'la lobholia nʋnʋnʋ bha?» 29 Zozii ya maa neenŋonu lebhe: «Laagɔ 'la lobholia, ɩmɩ ɩ -glɩ 'lɛ lebhe a kalɩ ɔmɔa ɔ lobhu 'lɛ na 'la pɔɔtɛtɛ.» 30 Ma ya -awlɛɔ neencla lebhe: «-Ma -mɔ, ghleda saa -n -cɩ ka 'lɛ anyɩ pala ɩya -a ka 'lɛ -naa pɔɔtɛtɛ -kalɩ bha? Lobholi saa -n cɩ kaa 'lɛ nʋ bha? 31 Daa -a tokadɔcɩa -kʋa 'lɛ 'pʋpʋa nɩkplaan na, ma ya nyɩa -ɩ wlʋ 'lɛ -laagɔɔn na li. Saa ɩ -zieo 'lɛ lebhe: Ɔ ya maa 'flawoa -ʋ 'wlʋlʋ 'lɛ -laagɔɔn na, lida 'nyɩ» na. 32 -Ma Zozii ya maa 'cla lebhe: «N solu anyɩ, ɩ -glɩ -nʋawlɛ, -n 'ta Moyizi 'ta 'lɛ anyɩ 'flawoa -ʋ 'wlʋlʋ 'lɛ -laagɔɔn na 'nyɩ, -ma n To, ɔmɔ -ɔ nyɩ 'lɛ anyɩ 'flawoa 'titia -ʋ 'wlʋlʋ 'lɛ -laagɔɔn na. 33 Sa, 'flawoa Laagɔ nyɩ 'lɛ na, ʋmʋ -ʋ -glɩ 'lɛ ʋmʋa -ʋ 'wlʋlʋ 'lɛ -laagɔɔn 'nyɩ -ʋ nyɩ 'lɛ ncɛlɩ jabhʋa na.» 34 Na, ma ya Zozii 'cla lebhe: «-Kwlenyɔ, 'maa 'nyɩ -anyɩ 'flawo -naa clɩɩa 'fɩan.» 35 Zozii ya maa 'cla lebhe: «-Amʋ -glɩ 'lɛ 'flawoa -ʋ nyɩ 'lɛ jabhʋa na. Ɔmɔa -ɔ ciliin 'lɛ na, ŋɔmʋ cɩ 'ta kɩnɩɔ 'bhla. Ɔmɔa -ɔ -ka 'lɛ 'na pɔɔtɛtɛ na, 'nyutʋ cɩ 'ta kɩnɩɔ 'bhla. 36 -Ma n nyɩɩ anyɩ solu: Ala 'ci ya 'lɩ, -ma a 'ta pɔɔtɛtɛ -ka. 37 Maa -tɛtɛa Toa 'nyɩɩn 'lɛ na, cɩ 'kaan cili 'nyɩ ɔmɔa -ɔ ciliin 'lɛ na n cɩ 'tɔɔ -jlukuun 'pa. 38 Sa ka n 'wlʋ 'lɛ -laagɔɔn le n 'ka ɔmɔa -ɔ lobhuun 'lɛ na, 'la pɔɔsa nʋ, -ma -n 'ta -amʋ 'titi 'na pɔɔsa. 39 'Nyɩ ɔmɔa -ɔ lobhuun 'lɛ na, ɔla pɔɔsaa -ɩ -glɩ 'lɛ lebhe 'na tea ne ɩya maa ɔ 'nyɩ 'lɛ na, bhlogbɩɩ 'la mlɔa, -ma bhɩalɩclɩɩa 'kʋ, n -bho maa 'kwɩɩn 'kʋ. 40 'Lɩka n To 'la pɔɔsaa: Ɔ -wa lebhe ncaatʋtʋʋntʋa -ɔ lɩ 'lɛ 'Cʋa 'nyɩ zʋɔ 'lɛ ɔla pɔɔtɛtɛ na, ɔ 'lɩ jabhʋa -ʋ -kʋ 'lɛ 'lʋkʋlʋkʋ ɩya 'lʋkʋlʋkʋ na, ɩya bhɩalɩclɩɩa 'kʋ, n bhoo 'kwɩɩn 'kʋ.» 41 Na, Zifʋnyaa ya Zozii wɔlɩ cɩ gbalɩɛ bhɔ, sa ɔ yaa 'cla lebhe: «N -glɩ 'flawoa -ʋ 'wlʋlʋ 'lɛ -laagɔɔn na.» 42 'Nyɩ ma claa lebhe: «-N 'ta Zozɛfʋ -yowli Zozii bha? -A 'ta ɔ to ɩya ɔ 'nɔ -ci bha? 'Nsasa ɔ cɩ 'lɛ mino 'nyɩ ɔ cɩ 'lɛ -yaka 'cla lebhe -laagɔɔn ɔ wlʋ bha?» 43 Zozii ya -awlɛ wɔɔnyɩtʋ 'ma 'nyɩ ɔ ya maa 'cla lebhe: «A 'nylugolu wɔɔgbalɩɛa! 44 Nclɔɔ bhlogbɩɩ cɩ 'ta mino, ɔ 'kaan cili ɩ -ka -kʋ le Toa -ɔ lobhuun 'lɛ na, 'ta kaan -mɔ -la na, ɩya -amʋ n 'kɔɔ bhɩalɩclɩɩa 'kʋ, 'kwɩɩnkʋbho. 45 Laagɔnekʋnyɩtɛnyaa 'la -afluwaa bhlo nɩkplaan ɩ -zieo lebhe: Laagɔ cɩ ka 'lɛ maa -tɛtɛa ca. Ncaatʋtʋʋtʋa -ɔ po 'lɛ Toa 'nyukwliin, 'nyɩ -ɔ ca 'lɛ ɔla wɔlɩa na, ka -ɔ ciliin 'lɛ. 46 'Nyɩ nclɔɔ bhlogbɩɩ 'ta ka -azla Toa 'lɩ, ɩ -ka -kʋ lebhe -n 'ta ɔmɔa -ɔ 'wlʋlʋ 'lɛ Laagɔ cɩ na. Ɔmɔ, ɔ ya Toa 'lɩ. 47 N solu anyɩ, ɩ -glɩ -nʋawlɛ, ɔmɔa -ɔ -ka 'lɛ pɔɔtɛtɛ na, ɔ -ka jabhʋa -ʋ -kʋ 'lɛ 'lʋkʋlʋkʋ ɩya 'lʋkʋlʋkʋ na. 48 -Amʋ, -ɔ -glɩ 'lɛ 'flawoa -ʋ 'nyɩ 'lɛ jabhʋa na. 49 'Pʋpʋa nɩkplaan, a tokadɔcɩ ya nyɩa ma la 'lɛ 'manɩa na li, -ma ma ya 'ku. 50 -Ma 'flawoa -ʋ 'wlʋlʋ 'lɛ -laagɔɔn na, ncaatʋtʋʋntʋa -ɔ liu 'lɛ na, ɔ cɩ 'tanɩ 'ku. 51 -Amʋ -ɔ -glɩ 'lɛ 'flawoa -ʋ 'wlʋlʋ 'lɛ -laagɔɔn 'nyɩ -ʋ nyɩ 'lɛ jabhʋa na. Ɔmɔa -ɔ cɩ 'ka 'lɛ 'flawo -naa li na, ɔ cɩ kʋ 'lʋkʋlʋkʋ ɩya 'lʋkʋlʋkʋ. 'Nyɩ 'flawoa n cɩ 'ka 'lɛ 'nyɩ na, ʋmʋ -glɩ 'lɛ 'na 'nyɛkɛa n 'nyɩ 'lɛ le -laagɔzɔan 'la ncɛlɩa 'ka jabhʋa 'lɩ na.» 52 Ɩmɩ -naa 'kʋ Zifʋnyaa bhlobhlo 'tɩtɔanɩa wɔlɩ 'nyɩ ma claa lebhe: «'Nsasa -anɔ -naa cɩ 'lɛ -anyɩ ɔla 'nyɛkɛa lida 'nyɩ bha?» 53 -Ma Zozii ya maa 'cla lebhe: «N solu, anyɩ ɩ -glɩ -nʋawlɛ, ɩ -ka -kʋ lebhe a 'ta Nclɔɔa 'Cʋa 'la 'nyɛkɛa li 'nyɩ a 'ta ɔla -dolua 'mla na, a cɩ 'ta jabhʋa acɩ nɩkplaan kalɩ. 54 Ɔmɔa -ɔ li 'lɛ 'na 'nyɛkɛa 'nyɩ -ɔ mla 'lɛ 'na -dolua na, ɔ -ka jabhʋa -ʋ -kʋ 'lɛ 'lʋkʋlʋkʋ ɩya 'lʋkʋlʋkʋ na 'nyɩ -amʋ n cɩ 'kɔɔ leenbhɩalɩclɩɩa 'kʋ 'kwɩɩnkʋbho. 55 Sa, 'na 'nyɛkɛa -glɩ 'lɛ nyɩ 'titi 'nyɩ 'na -dolua -glɩ 'lɛ nʋ 'titi. 56 Ɔmɔa -ɔ li 'lɛ 'na 'nyɛkɛa 'nyɩ -ɔ mla 'lɛ 'na -dolua na, ɔ -kʋʋn nɩkplaan 'nyɩ n -kʋɔ 'lɛ nɩkplaan. 57 Saa jabhʋa Toa -ɔ lobhuun 'lɛ na, gba 'lɛ 'nyɩ jabhʋa -kʋʋn 'lɛ nɩkplaan na, ɔmɔa -ɔ cɩ ka 'lɛ 'na 'nyɛkɛa li na, n cɩ 'ka gba ɩya ɔmɔ -ma, jabhʋa 'kɔɔ nɩkplaan kʋ. 58 Na, 'lɩka 'flawoa -ʋ 'wlʋlʋ 'lɛ -laagɔɔn na. Ʋ 'ta -kʋ le ʋmʋa a tokadɔcɩa li 'lɛ na. Maa, ma ya 'ku, -ma ɔmɔa -ɔ cɩ ka 'lɛ 'flawo -naa li na, ɔ cɩ kʋ 'lʋkʋlʋkʋ ɩya 'lʋkʋlʋkʋ.» 59 'Lɩka wɔlɩa Zozii 'bhli 'lɛ 'kʋ, daa ɔ -kʋa 'lɛ Kapɛnayumʋdua 'la bhibhiepalʋa -zɔn cada na.

Wɔɔnyɩtʋa ʋmʋ -ʋ nyɩ 'lɛ jabhʋa

60 Ma 'nu 'lɛ ɩmɩ -naa na, Zozii 'la gɩlɩnya -bhutukpa ya 'cla lebhe: «Wɔɔnyɩtʋ -naa 'tɛ! Ncaasaa -ɔ cɩ kʋʋ 'lɛ 'kʋŋonu bha?» 61 -Ma Zozii -cia 'lɛ sɛɛ lebhe ɔla gɩlɩnyaa gbaa wɔlɩ na, ɔ ya maa neencla lebhe: «Wɔlɩ -naa, ɩmɩ -ɩ 'dɩdɔ 'lɛ anyɩ bha? 62 'Nyɩ daa a cɩ 'kanɩ 'lɛ Nclɔɔa 'Cʋa 'lɩ ɩya ɔ 'ka 'lɛ gbazɩa ɔ -kʋa 'lɛ -gblaa naa? 63 'Wugoa ʋmʋ -ʋ nyɩ 'lɛ jabhʋa, 'nyɛkɛa bhlobhlo nʋ 'ta lʋʋ -ylɛylɛ. Wɔlɩa n solu 'lɛ anyɩ na, ɩ -glɩ 'Wugo ɩya jabhʋ. 64 -Ma bhloonbhloon -kʋ anyɩ sidiin ma 'ta pɔɔtɛtɛ -ka.» Sa bhɔdaa tooto, Zozii -cia maa -anʋa -ɔ cɩ 'taa 'lɛ pɔɔtɛtɛ -ka ɩya ɔmɔa -ɔ cɩ kaa 'mɔɔ 'lɛ 'pɛlʋ zʋ na. 65 'Nyɩ ɔ ya -awlɛ 'cla lebhe: «'Lɩka wɔlɩa 'la gbʋa n 'cla 'lɛ anyɩ lebhe: Nclɔɔ bhlogbɩɩ cɩ 'ta mino ɔ 'kaan cili ɩ -ka -kʋ lebhe Toa 'tɔɔ ɩla -jiolia 'nyɩ na.» 66 -Ɩ 'manɩɔ 'lɛ 'dɛ na, ɔla gɩlɩnyaa, -bhutukpa ya cɔlɔ 'nyɩ ma 'tanɩɔ gɩlɩ. 67 Na, Zozii ya 'kʋgba -mɔsɔa neencla lebhe: «Anyɩ -ma, a -wa le a cɩ mʋmʋ bha?» 68 Simɔɔn Pɩɛlɩ yɔɔ neenŋonu lebhe: «-Kwlenyɔ, ncaasaa -a cɩ 'ka 'lɛ mʋnʋ bha? -Mɔ -ka 'lɛ wɔɔnyɩtʋa, -ʋ nyɩ 'lɛ jabhʋa -ʋ -kʋ 'lɛ 'lʋkʋlʋkʋ ɩya 'lʋkʋlʋkʋ na. 69 'Nyɩ -anyɩ, -a -ka -naa pɔɔtɛtɛ 'nyɩ -a -ci sɛɛ lebhe, -mɔ -glɩ 'lɛ Laagɔ 'la -Kplɔkplɔnyɔa.» 70 Zozii ya maa 'cla lebhe: «-N 'ta -amʋ -ɔ 'ta 'lɛ anyɩa 'kʋgba -mɔsɔa desla bha? -Ma 'bhlɩmɔɔn, bhlo -kʋ anyɩ nɩkplaan ɔ -glɩ 'devlo!» 71 Zuda, Simɔɔn Iskalɩɔtʋ -yowli ɔ saa 'lɛ, sa ɔmɔ cɩ kaa 'mɔɔ 'lɛ 'pɛlʋ zʋ, ɔmɔa -ɔ -glɩ 'lɛ 'kʋgba -mɔsɔa 'la nɩkplaan bhlo na.

7

Zozii bholiecɩa 'ta ɔla pɔɔtɛtɛ -ka

1 Ɩmɩ -naa 'la leen, Zozii 'plɩlɩa Galileebhlɩa 'la 'dia 'kʋ. Ɔ 'taa -wa lebhe ɔ 'kaa Zudeebhlɩa 'la 'dia 'kʋ 'plɩlɩ, sa Zifʋnyaa tocɩa 'matɩa ɔla 'bhlada na. 2 Zifʋnyaa 'la 'fɛtlɩa ma la 'lɛ -paapli 'la 'fɛtlɩa na, yaa cɩ mɛ. 3 Na, Zozii bholiecɩa yɔɔ 'cla lebhe: «'Plɩ ɩya -n mʋ Zudeebhlɩa 'kʋ ɩya -naa gɩlɩnyaa -ma, ma 'ka lobholia -n nʋ 'lɛ na 'lɩ. 4 -Masa nclɔɔ -ɔ -wa 'lɛ le ma cibhlilio na, ɔ zizieli 'ta ncɛlɩ ɔla nʋnʋgbɩ. Na, lobholi -naa n nʋ 'lɛ na, 'maa gba ɩya ncɛlɩa 'fɩan 'kɔɔ cibhlili.» 5 Ɔ bholiecɩa 'titi -ma, 'ta ɔla pɔɔtɛtɛ -ka. 6 -Ma Zozii ya maa 'cla lebhe: «'Na 'ŋwacɩa 'ta ka ka ŋeni, -ma anyɩ clɩɩa 'fɩan -glɩ ala 'ŋwacɩ. 7 -Laagɔzɔan cɩ 'ta anyɩ zɔbhɛlɩ, -ma -amʋ, ɩ -zɔɔn, -ofi lebhe n li -danʋfʋɛ lebhe ɩla nʋnʋgbɩa -nyu. 8 Na anyɩ, a mʋ 'fɛtlɩa 'kʋ. -Ma -amʋ, n cɩ 'tɩɩ 'kʋ mʋ, sa 'na 'ŋwacɩa 'ta ka ka ŋeni na.» 9 Na, daa ɔ nyɩtɛ 'lɛ -sa na, ɔ ya Galileebhlɩa 'kʋ -to.

Zozii ya paapliifɛtlɩa 'kʋ mʋ

10 -Ma daa ɔ bholiecɩa 'plɩ 'lɛ 'nyɩ ma mʋ 'lɛ 'fɛtlɩa 'kʋ na, Zozii -ma ya 'yɛpɩ 'la -gugwie 'ma, ɔ 'ta gba ɩya ma 'kɔɔ cibhlili, -ma ɔ ya ziziekoteen mʋnʋ. 11 Na, 'fɛtlɩa 'kʋ, Zifʋnyaa tocɩa 'matɩa 'mɔɔ 'nyɩ ma claa neen lebhe: «'Ndaa ɔ -kʋa 'lɛ bha?» 12 -Alawleea sidiin ma 'ŋuŋuoa -gbɔɔn ɔla gbʋ. -Anʋa bhlo claa lebhe: «Ɔ -glɩ ncaananɔ» 'nyɩ -danaanʋaa claa 'lɛ lebhe: «-Wɔɔ, ka ɔ 'nyiglili 'lɛ ncɛlɩa.» 13 'Bhlɩmɔɔn, nclɔɔ bhlogbɩɩ nyɩtɛ 'taa ɔla wɔlɩ -owe -owe, sa Zifʋnyaa tocɩa 'la ŋanɔ bhlaa maa. 14 Daa ma -kʋanɩa 'lɛ 'fɛtlɩa sidiin na, Zozii ya Laagɔpaakadiea -zɔn ble 'nyɩ ɔ ya calɩɛ bhɔ. 15 Ɩ sla Zifʋnyaa nikpoo 'nyɩ ma claa lebhe: «'Nsasa ɔ nʋnʋnʋa 'lɛ 'nyɩ ɔ -cia 'lɛ -sa wɔlɩa bha? Ɔmɔa -ɔ 'ta 'lɛ -afluwaa ca na!» 16 Zozii ya maa neenŋonu lebhe: «'Na cacawɔlɩa 'wlʋlʋ 'taan wlɩɩn, -ma ɩ 'wlʋlʋ ɔmɔa -ɔ lobhuun 'lɛ na wlɩɩn. 17 Nclɔɔa -ɔ -wa lebhe -ɔ ka Laagɔ 'la pɔɔsa nʋ na, ɔ cɩ cibhlili ɩ -ka -kʋ lebhe 'na cacawɔlɩɛa 'wlʋlʋ Laagɔ wlɩɩn -aana ɩ -ka -kʋ lebhe -amʋ 'titi 'na 'wluun 'la wɔlɩ n nyɩtɛ 'lɛ na. 18 Ɔmɔa -ɔ nyɩtɛ ɔla 'wluun 'la wɔlɩ na, ɔmɔ 'titi ɔla 'klʋagba ɔ 'matɩ 'lɛ. -Ma ɔmɔa -ɔ 'matɩ 'lɛ ɔmɔa -ɔ lobhuo 'lɛ 'la 'klʋagba na, ɔ -glɩ -nʋawlɛɛnyɩtɛnyɔ 'nyɩ yodɩ -ylɛylɛ 'tɔɔ nɩkplaan -kʋ. 19 -N 'ta Moyizi 'ta 'lɛ -jlɩmaa anyɩ 'nyɩ bha? -Ma anyɩa nɩkplaan bhlogbɩɩ 'plɩlɩ 'ta -jlɩmaa 'kʋ! Na, 'lɩsaa 'la gbʋ a 'matɩa 'lɛ lebhe a 'kaan 'bhla bha?» 20 -Alawleea yɔɔ neenŋonu lebhe: «'Wugo -nyunyu -kʋɔ nɩkplaan! Ncaasaa -ɔ 'matɩa 'lɛ le -ɔ kɔɔ 'bhla bha?» 21 Zozii ya -awlɛ wɔɔnyɩtʋ 'ma 'nyɩ ɔ ya maa 'cla lebhe: «Wɔlɩ bhlogbɩɩ -tɛɛ n ya 'lɛ nʋ 'nyɩ ɩ ya 'lɛ anyɩa 'fɩan nikpoo -sla. 22 Moyizi ya anyɩ -slikʋdɩjlɩmaa 'nyɩ, 'nyɩ -n 'ta ɔmɔ -ɔ 'ta -awlɛa 'lɛ anyɩ 'nyɩ, -ma tokadɔcɩa, 'nyɩ a dɩ ncɛlɩ 'kʋ nyɔkwɛclɩɩa 'kʋ. 23 Na, gbazɩ ma -ka nclɔɔ nyɔkwɛclɩɩ 'kʋ 'dɩ, 'nyɩ ɩ 'ta Moyizi 'la -jlɩmaa 'la tʋlɩɛ -glɩ na, 'lɩsaa 'la gbʋ pɔlɛ 'kʋ siea 'lɛ anyɩ, -ofi lebhe n ya nclɔɔ 'la -lɩɩbhuoa nyɔkwɛclɩɩ 'kʋ jabha bha? 24 Na, a 'la -plaa -kplakplatɩtɩ, -ma a -pla 'tɩtɩa -ɩ 'nylugolu 'lɛ 'kʋ na.»

Zozii -glɩ 'lɛ Laagɔ 'la -Sasanyɔa bha?

25 Zolizalɛmʋnya -anʋa claa lebhe: «-N 'ta nclɔɔ -naa maa 'matɩ 'taa 'lɛ le ma 'ka 'bhla bha? 26 A 'lɩkɔɔ ɔmɔ -ɔ nyɩtɛlɩ 'lɛ ncɛlɩa 'fɩan 'ci 'kʋ 'nyɩ maa -salɩ 'ta 'lɛ ne! Na, ka ala -kwletocɩa cibhlilisɛnɩ 'lɛ sɛɛ lebhe ɔmɔ -ɔ -glɩ 'lɛ -zaagbʋsa Laagɔ 'la -Sasanyɔa bha? 27 'Bhlɩmɔɔn, -anɔ -naa, -a -ci daa ɔ 'wlʋlʋ 'lɛ na, -ma Laagɔ 'la -Sasanyɔa, daa ɔ cɩ 'ka 'lɛ ci na, nclɔɔ bhlogbɩɩ cɩ 'ta daa ɔ 'wlʋlʋ 'lɛ na cibhlili.» 28 Na, daa Zozii -kʋa 'lɛ Laagɔpaakadiea -zɔn cada na, ɔ ya 'cla lebhe: «A -ciin 'nyɩ a -ci daa n 'wlʋlʋ 'lɛ na! 'Bhlɩmɔɔn, -n 'ta 'na 'wluun n 'ta 'lɛ cili. Ɔmɔa -ɔ lobhuun 'lɛ na, ɔ -glɩ -nʋawlɛɛnyɔ 'nyɩ ɔmɔ, a 'tɔɔ -ci. 29 -Ma -amʋ, n -cio, sa ɔmɔ cɩ n wlʋ 'lɛ 'nyɩ ɔmɔ -ɔ lobhuun 'lɛ.» 30 Na, ma 'matɩa le ma 'kaa 'mɔɔ 'kʋbhli, -ma nclɔɔ bhlogbɩɩ 'tɔɔ cɩkla, sa ɔla 'ŋwacɩa 'ta ka kaa ŋeni na. 31 -Alawleea sidiin, ncaabhutukpa yɔɔ mala pɔɔtɛtɛa 'kʋ zʋ 'nyɩ ma claa lebhe: «Daa Laagɔ 'la -Sasanyɔa cɩ -ka 'lɛ -ci na, ɔ cɩ -awlɛ 'ciinzizielɩlobholi nʋ 'nyɩ ɔ cɩ ɩmɩa -anɔ -naa ya 'lɛ nʋ na, 'kʋ zi bha?»

Ma ya ncɛlɩ Zozii 'kʋbhlikan lobhu

32 Zozii 'la wɔlɩa ma 'ŋuŋuoa 'lɛ -alawleea nɩkplaan na, ya Falizɩɛnnyaa 'nyukwliin bhlili. 'Nyɩ -teyiyinyaa tocɩa ɩya Falizɩɛnnyaa ya mala -bɛnyaa lobhu le maa bhlio 'kʋ. 33 Zozii ya 'cla lebhe: «N -kʋ ka ka anyɩ sidiin clɩɩ -zlʋsaasa ɩya n 'ka ɔmɔ -ɔ lobhuun 'lɛ na 'bhlɩ cɔlɔ. 34 A cɩ 'kaan 'matɩ ɩya a 'la kaan 'lɩ, sa gbazɩa n cɩ 'ka 'lɛ kʋ na, a cɩ 'ta 'yɛpɩ mʋlɩɛ mino.» 35 Na, Zifʋnyaa 'claclalɩa neen lebhe: «'Ndaa ɔ cɩ 'kaa 'lɛ mʋ ɩya -anyɩ -a 'la kanɩɔ 'lɛ 'lɩ bha? Maa -ɔ -dloluo 'lɛ Glɛkɩnyaa sidiin na, maa ŋenikan ɔ cɩ 'lɛ mʋ bha? Glɛkɩnyaa ɔ cɩ 'kanɩ 'lɛ ca bha? 36 Ɔ cla 'lɛ lebhe: A cɩ 'kaan 'matɩ ɩya a 'la kaan 'lɩ, ɩya n gbazɩa n cɩ 'ka 'lɛ kʋ na, anyɩ, a cɩ 'ta 'yɛpɩ mʋlɩɛ mino na, wɔɔnyɩtʋ -naa, 'nsasa ʋ sasalɩa 'lɛ -zɔn bha?»

Zozii nyɩtɛ -kplɔkplɔ -Wugoa 'la wɔlɩ

37 'Fɛtlɩa 'la bhɩalɩclɩɩa 'kʋ, ɩ -glɩ 'lɛ clɩɩ 'kadɩe na, Zozii 'nylugoa, ɔ plikia 'nyɩ ɔ claa lebhe: «Nclɔɔ 'nyutʋ -ka 'bhla na, 'naa ɔ ciin 'bhlɩ. 'Naa ɔ 'mla, 38 ɔmɔa -ɔ -ka 'lɛ 'na pɔɔtɛtɛ na, ɩya saa Zieziewɔlɩa bhli 'lɛ 'kʋ na, 'nyɩdɔlɩa ɩla 'nyua nyɩ 'lɛ jabhʋa na, 'kɔɔ nɩkplaan 'wlʋlʋ ɩya ɩ -ka kɔlɔ.» 39 'Wugoa maa -ɔ zʋɔ 'lɛ mala pɔɔtɛtɛa 'kʋ na, cɩ 'kaa 'lɛ 'lɩ na, ʋla wɔlɩ ɔ nyɩtɛa 'lɛ -sa. -Masa Laagɔ 'ta ka kaa 'wugoa 'nyɩ -ofi lebhe Zozii 'ta ka kaa Laagɔ 'la 'klʋagba nɩkplaan ble na.

-Alawleea ya nɩkplaan do

40 -Alawleea sidiin, ncɛlɩa -ɔ 'nua 'lɛ wɔlɩ -naa na, -anʋa claa lebhe: «Ɔmɔ -ɔ -glɩ 'lɛ -zaagbʋsa Laagɔnekʋnyɩtɛnyɔa -a -bɛa 'lɛ na.» 41 -Anʋa bhlo claa lebhe: «Ɔmɔ -ɔ -glɩ 'lɛ Laagɔ 'la -Sasanyɔa.» -Ma -danaanʋa bhlo claa 'lɛ lebhe: «Laagɔ 'la -Sasanyɔa cɩ Galileebhlɩa 'kʋ 'wlʋlʋ bha? 42 Ka Zieziewɔlɩa 'cla 'ta 'lɛ lebhe Daviti 'la valɩnɩkpla 'la nclɔɔ ɔ cɩ 'ka 'lɛ 'plɩ, ɩya ɔ 'ka Bɛtɩlɛmʋ, Daviti 'la valɩdua 'kʋ 'wlʋlʋ bha?» 43 'Nyɩ Ɔmɔ 'wluku, -alawleea yaan do. 44 Maa nɩkplaan -anʋa yaa wabha lebhe maa 'ka 'mɔɔ 'kʋbhli, -ma nclɔɔ bhlogbɩɩ 'tɔɔ cɩkla. 45 -Teyiyinyaa tocɩa ɩya Falizɩɛnnyaa 'la -bɛnyaa ya cɔlɔ 'ynɩ maa -naa ya ma neencla lebhe: «'Lɩsaa 'la gbʋ a 'tɔɔ 'lɛ -lamʋ bha?» 46 Ma ya maa neenŋonu lebhe: «'Pʋpʋ 'kʋ, nclɔɔ 'ta ka -azla ɔmɔ 'bhisa 'kʋ nyɩtɛ.» 47 Falizɩɛnnyaa ya maa neencla lebhe: «Na, anyɩ -ma, ka ɔ 'nyiglilimʋ 'lɛ anyɩ bha? 48 A ya 'nu lebhe Zifʋnyaa tocɩa -aana Falizɩɛnnyaa nɩkplaan bhlo yɔɔ ɔla pɔɔtɛtɛ 'kʋ zʋ bha? 49 -Ma ncaakpa -naa -ɔ 'ta 'lɛ -ala -jlɩmaa -ci na, maa -tɛtɛ, -munzuenya -naa.» 50 -Ma Nikodɛmʋ, Falizɩɛnnyaa nɩkplaan bhlo, ɔ mʋwaa 'lɛ Zozii 'ciinlɩkan na, ya maa 'cla lebhe: 51 «-Ala -jlɩmaa nyɩ -anyɩ -jioli le -a 'bhla nclɔɔa -a 'ta ka 'lɛ neen 'nu ɩya -a ka wɔlɩa ɔ ya 'lɛ nʋ na cibhlili na bha?» 52 Ma yɔɔ neenŋonu lebhe: «-Mɔɔ -ma, Galileenyɔ -n -glɩnɩ 'lɛ bha? Kope ka Zieziewɔlɩa nɩkplaan 'nanɩ ɩya -n -ka 'lɩ lebhe Laagɔnekʋnyɩtɛnyɔ 'ta ka -azla Galileebhlɩa 'kʋ 'wlʋlʋ.» 53 Ma ya 'kʋbho 'nyɩ nclɔɔ nclɔɔ ya ɔ 'bhisleen mʋ.

8

Ŋodimatɩŋlɔa

1 Zozii ya 'plɩ ɔ ya -Olivʋsikikea 'wlu mʋ. 2 Daa -zelia ze 'lɛ na, -zʋkpasa 'pɩɩ, ɔ ya Laagɔpaakadiea -zɔn cɔlɔ 'nyɩ ncɛlɩa -ɔ -kʋa 'lɛ dɩpɩa na yɔɔ cɩ mɛ. Ɔ ya sakʋ 'nyɩ ɔ ya maa calɩɛ bhɔ. 3 Na, -jlɩmaazienyaa ɩya Falizɩɛnnyaa, ya 'ŋlɔa ma bhlili 'lɛ ŋodimatɩgbiti 'kʋ 'kʋ na, -lamʋ 'nyɩ ma yɔɔ -jleea sidiin zʋ. 4 Ma ya Zozii 'cla lebhe: «Canyɔ, ŋlɔ -naa -a yɔɔ ɔya ŋodi -gbiti 'kʋ 'kʋbhlili. 5 Na, -jlɩmaa nɩkplaan Moyizi ya -anyɩ 'cla lebhe -a bhutili -sa 'la ŋwlɛ -naa cɔkʋʋn -aan ɩya ma 'ku. 'Nyɩ -mɔɔ, -n nabhe 'lɩsaa bha?» 6 Ka ma nyɩtɛa 'lɛ sɛɛ ɩya ma 'kaa 'mɔɔ 'gbuzu -zɔn 'pa ɩya ma 'kɔɔ wɔlɩ 'kʋ gɩ. -Ma Zozii ya sakwlili, 'nyɩ ɔ -ka ɔla -wliciea, ɔ zie -dʋdʋa 'kʋ. 7 Na, Saa ma -kʋa 'lɛ 'dɛ 'nyɩ ma clɔɔ 'lɛ neen na, Zozii ya 'kʋnylugolu 'nyɩ ɔ ya maa 'cla lebhe: «'Naa ɔmɔa -ɔ 'ta ka -azla 'lɛ -nyinyi nʋ na, 'pɔɔ -bɛka -cokwiea.» 8 'Nyɩ ɔ ya -awlɛ sakwlili 'nyɩ ɔ ya -dʋdʋa 'kʋ zie. 9 Ma 'nu 'lɛ wɔlɩ -naa na, -ɩ -bhɔlʋɔ 'lɛ ncaakpasɩa 'kʋ, maa 'fɩan ya 'kubho bhloonbhloon, ma ya 'plɩ ma ya mʋ 'nyɩ Zozii bhlogbɩɩ ya dɩpɩa -to, ɔya 'ŋlɔa. 10 Zozii ya 'kʋnylugolu 'nyɩ ɔ yɔɔ neencla lebhe: «'Ŋlɔ, 'ndaa ma -kʋa 'lɛ bha? Nclɔɔ bhlogbɩɩ 'tɔɔ 'gesalɩ bha?» 11 Ɔ nabhe: «-A to, nclɔɔ -ylɛylɛ.» Na, Zozii yɔɔ 'cla lebhe: «-Amʋ -ma, n cɩ 'tɔɔ 'gesalɩ: Mʋ, -ma -naa nʋanɩ -nyinyi.»

Zozii -glɩ 'lɛ -laagɔzɔan 'la leli

12 Wɔlɩ -naa 'la leen, Zozii ya -awlɛ ncɛlɩa -ɔ -kʋa 'lɛ dɩpɩa na 'cla lebhe: «-Amʋ -glɩ 'lɛ -laagɔzɔan 'la leli. Ɔmɔa gɩlɩɩn 'lɛ na, cɩ 'ta 'tutuun namʋnʋ. Ɔ cɩ 'ka jabhʋa 'la lelia 'lɩ.» 13 Na, Falizɩɛnnyaa yɔɔ 'cla lebhe: «-Mɔɔ 'titi -n li -ncɩ 'la -danʋfʋɛ! -Naa -danʋfʋɛlilie 'ta -nʋawlɛ -glɩ!» 14 Zozii ya maa 'cla lebhe: «Ɩ -glɩ -nʋawlɛ lebhe n li ncɩ -danʋfʋɛ, -ma 'bhlɩmɔɔn -naa -danʋfʋɛlilie -glɩ -nʋawlɛ, sa n -ci daa n 'wlʋlʋ 'lɛ ɩya gbazɩa mʋ 'lɛ na, 'ma anyɩ a 'ta daa n 'wlʋlʋ 'lɛ naa -aana a 'ta gbazɩa n mʋ 'lɛ na -ci. 15 Anyɩ, ncaatɩtɩ a pla 'lɛ, -ma -amʋ, n -plaa 'ta nclɔɔ bhlogbɩɩ 'tɩtɩ. 16 -Ma ɩ -ka -kʋ le n 'ka 'tɩtɩ -plaa na, -naa 'tɩtɩplalɩɛ -glɩ -nʋawlɛ, sa n 'ta bhlo -glɩ na: Ɔmɔa -ɔ lobhuun 'lɛ na, -kʋmʋ 'dɛ. 17 Anyɩ 'titi ala -jlɩmaa nɩkplaan, ɩ -zieo lebhe ncɛlɩ -mɔsɔ 'la -danʋfʋɛlilie -glɩ -nʋawlɛ. 18 -Amʋ 'titi, n li ncɩ -danʋfʋɛ 'nyɩ Toa -ɔ lobhuun 'lɛ na, ɔmɔ -ma ɔ li 'lɛ 'na -danʋfʋɛ.» 19 Na, ma yɔɔ neencla lebhe: «-N to, 'nda ɔ -kʋa 'lɛ bha?» Zozii ya maa neenŋonu lebhe: «A 'taan -ci 'nyɩ a 'ta n To -ci. Ɩ -ka -kʋ lebhe a -kaa -amʋa -ci na, a cɩ 'kaa n To cibhlilimʋ.» 20 Wɔlɩ -naa, daa 'bhaklɔa -kʋa 'lɛ na, dɩpɩa nyɩtɛlɩ 'lɛ, daa ɔ -kʋa 'lɛ Laagɔpaakadiea -zɔn cada na. -Ma nclɔɔ bhlogbɩɩ 'tɔɔ 'kubhli, sa ɔla 'kubhliclɩɩa 'ta kaa ŋeni na.

Gbazɩa n mʋ 'lɛ na, a cɩ 'ta 'yɛpɩ mʋnɩɛ mino

21 Zozii ya -awlɛ maa 'cla lebhe: «Kaan n mʋ 'lɛ. A cɩ 'kaan 'matɩ, -ma a cɩ 'ka ala nyinyia nɩkplaan 'kulu. -Amʋ, gbazɩa -n mʋ 'lɛ na, anyɩ a cɩ 'ta 'yɛpɩ mʋnɩɛ mino.» 22 Na, Zifʋnyaa claa lebhe: «Ɔ cla lebhe: Gbazɩa n mʋ 'lɛ na, a cɩ 'ta 'yɛpɩ mʋnɩɛ mino na, ka ɔ -wa 'lɛ lebhe ɔ 'ka ɔcɩ 'bhla bha?» 23 -Ma, Zozii ya maa 'cla lebhe: «Anyɩ, -dʋdʋa 'kʋ 'la ncɛlɩ a -glɩ 'lɛ, -ma -amʋ, -laagɔɔn 'la nclɔɔ n -glɩ 'lɛ. -Laagɔzɔan 'la ncɛlɩ a -glɩ 'lɛ, -ma -amʋ, n 'ta -laagɔzɔan 'la nclɔɔ -glɩ. 24 Ɩla gbʋ, dɛ n 'cla 'lɛ anyɩ lebhe a cɩ 'ka ala nyinyia nɩkplaan 'kulu. Ɩ -ka -kʋ lebhe a 'ta pɔɔtɛtɛ -ka lebhe n glɩ -zaagbʋsa ɔmɔa n 'cla 'lɛ lebhe n -glɩ na, a ci 'ka ala nyinyia nɩkplaan 'kulu.» 25 Na, ma yɔɔ neencla lebhe: «-Mɔɔ, ncaasaa -n -glɩa 'lɛ bha?» Zozii ya maa neenŋonu lebhe: «Ɔmɔa n 'cla 'lɛ anyɩ bhɔdaa tooto, lebhe n -glɩ na. 26 -Ɩ -glɩ 'lɛ anyɩa cɩa wɔlɩa na, n -ka wɔɔbhutukpa n 'ka 'kubhli ɩya n 'ka anyɩ 'gesalɩ. -Ma ɔmɔa -ɔ lobhuun 'lɛ na, -glɩ -nʋawlɛ 'nyɩ ɩmɩa n 'nunuo 'lɛ na, ɩmɩ -tɛɛ n solu 'lɛ -laagɔzɔan.» 27 Toa 'la wɔlɩ ɔ solua 'lɛ maa, -ma ma 'ta 'nu. 28 Na, Zozii ya maa 'cla lebhe: «Daa ma cɩ 'ka 'lɛ Nclɔɔa 'Cʋa 'kʋbho na, dɛ a cɩ 'ka 'lɛ cibhlili lebhe n -glɩ ɔmɔa n cla 'lɛ lebhe n -glɩ na. A cɩ 'ka cibhlili lebhe n nʋnʋ 'ta wɔlɩ bhlogbɩɩ 'na 'wluun: Ɩmɩa Toa caan 'lɛ na, ɩmɩ -tɛɛ n bhli 'lɛ 'kʋ. 29 N 'ta bhlo -glɩ, -ma Toa -ɔ lobhuun 'lɛ na, ɔ -kʋʋn cɩ, sa n nʋ clɩɩa 'fɩan ɩmɩa -ɔ -kɔɔ 'lɛ 'tʋ na.» 30 Na, daa ɔ -kʋa 'lɛ sa nyɩtɛda, -bhutukpa yɔɔ mala pɔɔtɛtɛa 'kʋ zʋ.

-Ncɩkalɩnya ɩya geye 'la wɔlɩ

31 Na, Zozii ya Zifʋnyaa -ɔ zʋa 'mɔɔ 'lɛ pɔɔtɛtɛa 'kʋ na 'cla lebhe: «A -ka -naa niwɔlia 'kʋ 'plɩlɩ na, a -glɩ -zaagbʋsa 'na gɩlɩnya. 32 A cɩ 'ka -nʋawlɛ cibhlili ɩya -nʋawlɛa 'ka anyɩ -ncɩkalɩnya plee.» 33 Ma yɔɔ neenŋonu lebhe: «Ablaamʋ 'la valɩnɩkplaa 'la ncɛlɩ -a -glɩ 'lɛ 'nyɩ -a 'ta ka -azla nclɔɔ bhlogbɩɩ 'la geye 'plɩ: Na, -ɔ 'kaa 'lɛ 'ŋlɩ 'nyɩ n claa 'lɛ lebhe -a cɩ -ncɩkalɩnya 'plɩ bha?» 34 Zozii ya maa neenŋonu lebhe: «N solu ɩ -glɩ -nʋawlɛ lebhe ncaatʋtʋʋntʋa -ɔ nʋ 'lɛ nyinyi na, ɔ -glɩ nyinyi 'la geyu. 35 'Nyɩ geyu -kʋ 'ta 'slea nɩkplaan 'lʋkʋlʋkʋ, -ma 'cʋa ɔ kʋ 'slea nɩkplaan 'lʋkʋlʋkʋ. 36 Na, ɩ -ka -kʋ lebhe 'Cʋa ɔmɔ -ɔ -ka anyɩ nɩkplaan 'kplɩ na, a cɩ -zaagbʋsa -ncɩkalɩnya 'plɩ. 37 N -ci sɛɛ le a -glɩ Ablaamʋ 'la valɩnɩkplaa 'la ncɛlɩ 'bhlɩɩ, -ma a 'ta 'lɛ -wa lebhe a 'ka 'na nɩwɔlɩa 'kʋ 'plɩlɩ na, dɛ a 'matɩ 'lɛ 'na 'bhlada. 38 Amʋ ɩmɩa n 'lɩlɩ 'lɛ n To cɩ, ɩmɩ n bhli 'lɛ 'kʋ 'nyɩ anyɩ a nʋ 'lɛ ɩmɩa a 'nunu 'lɛ a to cɩ na.» 39 Ma yɔɔ 'cla lebhe: «Ablaamʋ -glɩ 'lɛ -a to.» Zozii ya maa 'cla lebhe: «Ɩ -ka -kʋ lebhe a -ka Ablaamʋ 'la 'cuo -glɩ na, a nʋ Ablaamʋ 'la nʋnʋgbɩa. 40 -Ma a 'matɩnɩ -pɔtɔnʋ 'na 'bhlada, -amʋa -ɔ solu 'lɛ anyɩ -nʋawlɛa n 'nunu 'lɛ Laagɔ cɩ na. Ɩmɩ -naa, Ablaamʋ 'tɩɩ nʋ. 41 Ma anyɩ a to 'la nʋnʋgbɩa a -ka 'lɛ. Ma yɔɔ 'cla lebhe -a 'ta -bozocuo -glɩ, to bhlogbɩɩ -a -ka 'lɛ, ɔmɔ -glɩ 'lɛ Laagɔ.» 42 Zozii ya maa 'cla lebhe: «Laagɔ -kaa a To -glɩa na, a cɩ 'ka -amʋa wabha, sa Laagɔ nɩkplaan n 'wlʋlʋ 'lɛ 'nyɩ n -ya 'lɛ -ci. N 'ta 'na 'wluun n 'ta 'lɛ cili, -ma ɔmɔ -ɔ lobhuun 'lɛ. 43 'Nyɩ 'lɩsaa 'la gbʋ a 'nʋ 'ta 'lɛ 'na wɔlɩa n nyɩtɛ 'lɛ na bha? -Ofi lebhe a mino 'ta ɩya a 'ka 'na wɔɔnyɩtʋa 'nyukwliinpo. 44 Gɔzɛ -glɩ 'lɛ a to 'nyɩ a to 'la pɔɔsa a -wa 'lɛ lebhe a 'ka nʋ. Ɔmɔ -naa, bhɔdaa tooto, ɔ ya ncaabhlalɩɛ wabha. Ɔ ya -nʋawlɛ 'ta ka -azla -plɔ, sa -nʋawlɛ 'tɔɔ nɩkplaan -kʋ na. Ɔ -ka yodi zʋ da -kʋ na, ɔla pɔlɛ 'ciin 'la wɔlɩ ɔ nyɩtɛ 'lɛ, sa ɔ -glɩ yodizʋnyɔ ɩya yodi to na. 45 -Ma -amʋ, n nyɩtɛ 'lɛ -nʋawlɛ na, dɛ a 'ta 'lɛ 'na pɔɔtɛtɛ -ka. 46 Anyɩ sidiin, ncaasaa -ɔ cɩ 'kaa 'lɛ mino ɩya -ɔ 'kaa 'lɛ pala lebhe n -ya nyinyi nʋ bha? 'Nyɩ ɩ -ka -kʋ lebhe -nʋawlɛ n nyɩtɛ 'lɛ na, 'lɩsaa 'la gbʋ a 'ta 'lɛ 'na pɔɔtɛtɛ -ka bha? 47 Ɔmɔa -ɔ -glɩ 'lɛ Laagɔ 'nɔ na, ka po 'lɛ Laagɔ 'la wɔɔnyɩtʋa 'nyukwliin. -Ma a 'ta 'lɛ Laagɔ 'nʋa -glɩ na, dɛ a 'ta 'lɛ -wa lebhe a 'kaan 'nyukwiinpo.»

Zozii ɩya Ablaamʋ

48 Daa Zozii nyɩtɛ 'lɛ -sa na, Zifʋnyaa yɔɔ 'cla lebhe: «A cla 'lɛ lebhe -n -glɩ Samaliinyɔ ɩya 'wugonyinyinyɔ na, -n 'lɩ 'ta lebhe -a -ka 'ge bha?» 49 Zozii ya maa neeŋonu lebhe: «-Wɔɔ, n 'ta 'wugonyunyunyɔ -glɩ. -Ma n To n 'nyɩ 'lɛ 'klʋ, -ma anyɩ, a 'ta -wa lebhe a 'kaan 'klʋ 'nyɩ. 50 'Nyɩ n 'matɩ 'ta ncɩ 'la 'klʋagba. -Ma bhlo -kʋ, ɔmɔ -ɔ 'matɩ 'lɛ 'na 'klʋagba 'nyɩ ɔ pla 'lɛ 'na 'tɩtɩa. 51 N solu anyɩ, ɩ -glɩ -nʋawlɛ: Nclɔɔ -ka 'na niwɔlɩa 'kʋ 'plɩlɩ na, ɔ cɩ 'ta 'ku 'pʋpʋkʋ.» 52 Na, Zifʋnyaa yɔɔ 'cla lebhe: «A -cinɩ lebhe -n -ka 'wugo -nyunyu! Ablaamʋ ya 'ku 'nyɩ Laagɔnekʋnyɩtɛnyaa -ma ya 'ku. 'Nyɩ -mɔɔ, -n cla lebhe: Nclɔɔ -ka 'na niwɔlɩa 'kʋ 'plɩlɩ na, ɔ cɩ 'ta 'pʋpʋkʋ 'ku. 53 -A to Ablaamʋ -ɔ 'ku 'lɛ na, ka -n zio 'lɛ 'kʋ bha? Laagɔnekʋnyɩtɛnyaa -masɛɛ ya 'ku! Na, ncaasaa -n la 'lɛ -ncɩ bha?» 54 Zozii ya maa neeŋonu lebhe: «Gbazɩ -amʋ 'titi n -kaa ncɩ 'klʋagba na, 'na 'klʋagba 'ta lʋʋ -ylɛylɛ -glɩ. N Too -ɔ gbaan 'lɛ 'klʋ, ɔmɔa a cla 'lɛ lebhe -ɔ -glɩ ala Laagɔ na. 55 A 'tɔɔ -ci, -ma -amʋ, n -cio. 'Nyɩ gbazɩ n -ka 'cla lebhe n 'tɔɔ -ci na, 'dɛndlana n -glɩ yodizʋnyɔ, anyɩ 'bhisa. -Ma n -cio 'nyɩ n 'plɩlɩ ɔla niwɔlɩa 'kʋ. 56 A to Ablaamʋ ya wabha lebhe ɔ 'kaa 'na ciclɩɩa 'lɩ. Ɔ yɩɩ 'lɩ 'nyɩ ɔ ya -pɔpʋɛ nʋ.» 57 Na, Zifʋnyaa yɔɔ neencla lebhe: «-N 'ta ka liowli -gwlɩɩ -mɔsɔ ɩya 'kʋgba 'lɩ 'nyɩ n cla lebhe n ya Ablaamʋ 'lɩ bha?» 58 Zozii ya maa neenŋonu lebhe: «N solu, anyɩ ɩ -glɩ -nʋawlɛ lebhe n -kʋ 'fɩɔn 'nyɩ Ablaamʋ y 'lɛ -valɩɔ.» 59 Na, ma ya cɔkʋ 'kʋbhli le ma kaa 'mɔɔ mɩ nɩkplaan 'bhla. -Ma Zozii ya -alawleea sidiin mlɔnʋ 'nyɩ ɔ ya Laagɔpaaakadiea -zɔnwlʋ.

9

Zozii ya 'citutunyɔ bhlo jabha

1 Zozii -kʋ 'lɛ 'plɩda na, ɔ ya nclɔɔ bhlo 'lɩ, ɔ -glɩa 'citutunyɔ 'nyɩ ma yɔɔ 'lɛ valɩ. 2 Ɔla gɩlɩnyaa yɔɔ neencla lebhe: «Canyɔ, ncaasaa nua 'lɛ nyinyi 'nyɩ nclɔɔ -naa -glɩa 'lɛ 'citutunyɔ 'nyɩ ma yɔɔ 'lɛ valɩ bha? Ɔmɔ bha -aana ɔla valɩnya bha?» 3 Zozii ya maa neenŋonu lebhe: «-N 'ta ɔmɔ naa, -n 'ta ɔla valɩnya. -Ma ka ɩ 'plɩ 'lɛ sɛɛ ɩya ncɛlɩ 'ka nclɔɔ -naa nɩkplaan, Laagɔ 'la lobholia 'lɩlɩ! 4 Daa -zeli -ga ka 'lɛ na, ɩ -fata lebhe -a nʋ ɔmɔa -ɔ lobhuun 'lɛ na, 'la lobholia. 'Tutua cɩ 'ka plaa ɩya nclɔɔ bhlogbɩɩ 'la 'kanɩ lobholi nʋlɩɛ mino. 5 Daa n -kʋ ka ka 'lɛ -laagɔzɔan na, -n -glɩ -laagɔzɔan 'la leli.» 6 Daa ɔ nyɩtɛ 'lɛ wɔlɩ -naa na, Zozii ya -daadʋ -dʋdʋ 'kʋ 'pa, ɔ ya ʋya pipia 'cakalɩ, ɩ ya -bʋbɔnzɩ 'plɩ 'nyɩ ɔ yɩɩ 'citutunyɔa 'la 'cia -bʋa. 7 Ɔ yɔɔ 'cla lebhe: «Mʋ 'nyiklea ma la 'lɛ Silowee na nɩkplaan ɩya -n wɔlʋ 'klʋ.» Siloweea sa -zɔn lebhe: «Lobhulobhunyɔ». 'Citutunyɔa ya mʋ, ɔ ya 'klʋ wɔlʋ 'nyɩ daa ɔ cɔlɔ 'lɛ na, ɔ lɩanɩasa. 8 'Dɛ 'la -diklea 'la ncɛlɩa ɩya maa -ɔ lɩa -azlaa 'mɔɔ 'lɛ, sa ɔ -glɩa -zlazlanyɔ na, claa lebhe: «-N 'ta nclɔɔ -naa -ɔ 'taa 'lɛ sakʋ 'nyɩ -ɔ -zla 'taa 'lɛ bha?» 9 -Anʋa claa lebhe: «Ɔmɔ -kʋ 'lɛ 'dɛ.» -Danaanʋaa claa lebhe: «-Wɔɔ -n 'ta ɔmɔ, -ma ka ɔ -yɔɔsɔ 'wlʋlʋ 'lɛ.» -Ma ɔmɔ 'titi claa lebhe: «-Amʋ -kʋ 'lɛ 'dɛ.» 10 Na, ma yɔɔ neencla lebhe: «'Nsasa ɩ 'plɩplɩlɩa 'lɛ 'nyɩ -naa 'cia ya 'lɛ 'gbokalɩ bha?» 11 Ɔ ya maa neenŋonu lebhe: «Nclɔɔa ma la 'lɛ Zozii na, ɔmɔ -ɔ nʋ 'lɛ -bʋbɔzɩ, -ɔ yɩɩ 'lɛ 'na 'cia -bʋa 'nyɩ ɔ yaan 'lɛ 'cla lebhe: Mʋ Silowee ɩya -n wɔlʋ 'klʋ. Na, n ya 'yɛpɩ mʋ 'nyɩ n wɔlʋ 'lɛ 'klʋ na, n ya 'lɛ salɩ.» 12 Ma yɔɔ neencla lebhe: «Ɔmɔ -naa, 'nda ɔ -kʋa 'lɛ bha?» Ɔ ya 'cla lebhe: «N 'ta -ci.»

Falizɩɛnnyaa cla nclɔɔa -ɔ jabha 'lɛ na neen

13 Na, ma ya ɔmɔa -ɔ -glɩ 'lɛ 'citutuyɔ 'nyɩ -ɔ jabha 'lɛ na, Falizɩɛnnyaa 'bhlɩ fa. 14 -Ma clɩɩa 'kʋa Zozii nʋa 'lɛ -bʋbɔzɩa 'nyɩ ɔ kalɩa 'mɔɔ 'lɛ 'ci 'gbo na, -glɩa Zifʋnyaa 'la nyɔkwɛclɩɩ. 15 Falizɩɛnnyaa -ma yɔɔ neencla saa ɩ 'plɩplɩlɩ 'lɛ 'nyɩ ɔ lɩnɩ 'lɛ sa na. Ɔ ya maa neenŋonu lebhe: «Ɔ ya 'na 'cia -bʋbɔzɩ -bʋa, n ya 'lɛ 'klʋ wɔlʋ 'nyɩ n lɩnɩ 'lɛ sa.» 16 Falizɩɛnnyaa -anʋa claa lebhe: «Nclɔɔ -naa 'ta Laagɔ 'la nclɔɔ -glɩ. Sa ɔ 'nyiyi 'ta nyɔkwɛclɩɩa na.» -Ma -danaanʋaa -ma claa lebhe: «'Nsasa nyinyinʋyɔ cɩ 'kaa 'lɛ -sa 'la 'ciinzizɩɛlɩlobholi nʋlɩɛ mino bha?» 'Nyɩ ma ya nɩkplaan do. 17 Na, ma ya -awlɛ 'citutunyɔa neencla lebhe: «'Nyɩ -mɔɔ 'nsasa -n 'lɩlɩlɩ 'lɛ ɔmɔa -ɔ kalɩ 'lɛ -naa 'cia 'gbo na bha?» Ɔ ya maa neenŋonu lebhe: «Laagɔnekʋnyɩtɛnyɔ ɔ -glɩ 'lɛ.» 18 Zifʋnyaa 'taa -wa lebhe ma 'kaa -nʋawlɛ la lebhe ɔ -glɩa -bɛkadaa 'citutunyɔ 'nyɩ ɔla 'cia yanɩ 'lɛ 'gbokalɩ, ɩ gbʋ 'kʋ na, ma ya gba 'nyɩ ɔla valɩnyaa ya ci. 19 Ma ya maa neencla le: «A -yowlia a na a ya 'lɛ 'citutuyɔ cɩ valɩ na, ɔmɔ 'titi -kʋ 'lɛ da bha? Na, 'nsasa ɩ 'plɩplɩlɩa 'lɛ 'nyɩ -yaka ɔ lɩnɩ 'lɛ sa bha?» 20 Ɔla valɩnyaa ya maa neenŋonu lebhe: «-A -lio -danʋfʋɛ lebhe ɔ -glɩ -a -yowli 'nyɩ ɔ -glɩa 'citutunyɔ 'nyɩ -a yɔɔ 'lɛ valɩ. 21 -Ma saa ɩ 'plɩplɩlɩ 'lɛ 'nyɩ ɔ lɩnɩ -pɔtɔnʋ sa na, ɩmɩ 'nyɩ -a 'ta -ci. 'Nyɩ ɔmɔ -ɔ kalɩɔ 'lɛ 'ci 'gbo na, ɔmɔ -ma -a 'tɔɔ -ci. Na, a 'cla ɔmɔ 'titi neen, sa da ɔ yanɩ 'lɛ ŋeni na, ɔ cɩ mino 'nyɩ ɔ cɩnɩ ɔmɔ 'titi 'la wɔlɩ nyɩtɛ!» 22 Ka ɔla valɩnyaa nyɩtɛa 'lɛ sɛɛ -ofi le, ma 'gulua Zifʋnyaa tocɩa na. Sa ma -naa yaa tooto zʋ lebhe ma cɩa ncaatʋtʋʋntʋa -ɔ cɩ 'lɛ 'cla lebhe Zozii -glɩ Laagɔ 'la -Sasanyɔa na, bhibhiepalʋa -zɔn 'tli. 23 Ɩla gbʋ na, dɛ ɔla valɩnyaa 'cla 'lɛ lebhe ɔ -glɩnɩ ɔla 'wlua nclɔɔ, -ma ma 'clɔɔ neen. 24 Na, Falizɩɛnnyaa ya nclɔɔa -ɔ -glɩa 'lɛ 'citutuyɔa na, -mɔsɔda la 'nyɩ ma yɔɔ 'cla lebhe: «'Nyɩ Laagɔ 'klʋ! -Anyɩ, -a -ci sɛɛ lebhe nclɔɔ -naa, -glɩ nyinyinʋnyɔ.» 25 Ɔ ya maa neenŋonu lebhe: «Ɔ -ka nyinyinʋnyɔ -glɩ na, n 'tɩɩ -ci. -Ma wɔlɩ bhlogbɩɩ -tɛɛ n -ci 'lɛ, ɩmɩ -glɩ 'lɛ lebhe: N -glɩa 'citutuyɔ, -pɔtɔnʋ n lɩnɩsa.» 26 Ma yɔɔ neencla lebhe: «'Nsasa ɔ nʋnʋnʋɔ 'lɛ 'nyɩ -naa 'cia ya 'lɛ 'gbokalɩ bha?» 27 Ɔ ya maa 'cla lebhe: «N yɩɩ anyɩ solu tooto, -ma a 'ta ŋonu lebhe a 'kaan 'nyukwliinpo. Na, 'lɩsaa 'la gbʋ a -wa 'lɛ lebhe n solu -awlɛ anyɩ bha? Ka anyɩ -ma acɩ sɛɛ 'lɛ wabha le, a 'ka ɔla gɩlɩnya 'plɩmʋ bha?» 28 Na, ma vlaa 'mɔɔ 'nyɩ ma 'cla lebhe: «-Mɔɔ -glɩ 'lɛ ɔla gɩlɩnyɔ, -ma -anyɩ, Moyizi 'la gɩlɩnya -a -glɩ 'lɛ. 29 -A -lio -danʋfʋɛ lebhe Laagɔ ya Moyizi solu 'lɛ, -ma ɔmɔ -naa, -a 'ta daa ɔ 'wlʋlʋ 'lɛ na -ci.» 30 Nclɔɔa ya maa 'cla lebhe: «'Lɩka ɩmɩa 'titita sla 'lɛ nikpoo na. Ɩmɩ -glɩ 'lɛ lebhe a 'ta ɔla 'wʋlʋdaa -ci, -ma 'bhlɩmɔɔn, ɔ ya 'na 'cia 'gbokalɩ! 31 -A -ci sɛɛ lebhe Laagɔ 'nyɩ 'ta nyinyinʋnya ɩmɩa ma 'clalɩ 'lɛ mala bhibhie nɩkplaan na. -Ma nclɔɔ -ka Laagɔ zʋ 'nyɩ ɔ -ka ɔla pɔɔsa nʋ na, ɔ 'nyɩɔ ɩmɩa ɔ 'clalɩ 'lɛ na. 32 'Nyɩ -a 'ta ka -azla 'nu lebhe nclɔɔ ya nclɔɔa -ɔ -glɩ 'lɛ 'citutunyɔ 'nyɩ ma ya 'lɛ valɩ na, 'la ci 'gbokalɩ. 33 Nclɔɔ -naa 'ta Laagɔ 'la nclɔɔ -glɩa na, ɔ cɩ 'taa mino ɔ 'kaa lʋʋ bhlogbɩɩ nʋ.» 34 Ma yɔɔ 'cla lebhe: «-Mɔa ma -naa -lɩɩbhuo nyinyiin valɩlɩ na, -mɔ -wa 'lɛ lebhe -ɔ -ka anyɩ wɔlɩ ca bha?» 'Nyɩ ma yɔɔ bhibhiepalʋa -zɔn 'tli.

-Anʋasaa -ɔ -glɩa 'lɛ 'citutunyaa 'titi bha?

35 Na, Zozii yaa 'nu le Falizɩɛnnyaa yaa nclɔɔa 'tli. Ɔ -yɔɔsɔ 'cɩlɩ 'lɛ na, ɔ yɔɔ 'cla lebhe: «-N ka Nclɔɔa 'Cʋa 'la pɔɔtɛtɛ bha?» 36 Ɔ yɔɔ neenŋonu lebhe: «-Kwlenyɔ, pala nclɔɔa ɔ -glɩa 'lɛ na ɩya n 'ka ɔla pɔɔtɛtɛ -kalɩ» 37 Zozii yɔɔ 'cla lebhe: «Ɔmɔ -n -jlɛ 'lɛ. Ɔmɔ -ɔ soluo 'lɛ na ɔmɔ -ɔ -glɩɔ 'lɛ.» 38 Na, nclɔɔa ya 'cla lebhe: «-Kwlenyɔ! N -ka -naa pɔɔtɛtɛ.» 'Nyɩ ɔ ya Zozii -deliin -kukoonkplii sasla. 39 Na, Zozii ya 'cla lebhe: «Ka n -ci 'lɛ -laagɔzɔan le ncɛlɩa 'ka 'ci -mɔsɔɔn -polio ɩya 'citutuyaa 'ka salɩ ɩya salɩlɩunyaa 'ka 'citutunya 'plɩ.» 40 Na, Falizɩɛnnyaa -ɔ -kʋa 'mɔɔ 'lɛ cɩ na, daa ma 'nu 'lɛ wɔlɩ -naa na, ma yɔɔ neencla lebhe: «Na, -anyɩ -ma, ka -a -glɩmʋ 'lɛ 'citutunya bha?» 41 Zozii ya maa 'cla lebhe: «Ɩ -ka -kʋ lebhe a 'kaa 'citutunya -glɩa na, a cɩ 'taa ala nyinyi kalɩ. -Ma a cla lebhe: -A 'lɩ sa, 'dɛndlana ala nyinyia -gbɛ anyɩ 'wlu.»

10

Mlakpanyɔa 'la -nyandlaa

1 «N solu anyɩ, ɩ -glɩ -nʋawlɛ: Ɔmɔa -ɔ 'plɩlɩ 'ta 'lɛ gbinea neen ɩya -ɔ 'ka 'bhlabhlɩgbangboa nɩkplaan ble 'nyɩ -ɔ 'mɩanɩ 'lɛ -gbudu 'wlu na, 'dɛnaanɔa -ɔ -glɩ 'winyɔ. 2 -Ma ɔmɔa -ɔ bleli 'lɛ gbinea neen na, ɔmɔ -glɩ 'lɛ 'bhlabhlɩa 'la kpanyɔa. 3 Gbinibɛnyɔa kalɩɔ gbine 'nyɩ 'bhlabhlɩa -ci ɔla -blɩɩzɔan. 'Nyɩ 'bhlabhlɩa -ɩ -glɩ 'lɛ ɔnɩ na, ɔ lalɩ 'lɛ 'bhlabhlɛ 'bhlabhlɛ ɛla 'ŋlɩa 'kʋ 'nyɩ ɔ famʋɩ 'lɛ -jlukuun. 4 Daa ɔ ya 'lɛ 'ɩ 'fɩan -zɔnwlaa na, ɔ plɩɩ 'kʋklʋʋn 'nyɩ ɩ gɩlɩɔ, sa ɩ -ci ɔla -blɩɩzɔan na. 5 Ɩ cɩ 'ta 'pʋpʋkʋ lowlunyɔ gɩlɩ. -Ma kɩɩ cɩ 'kɔɔ 'lɛ 'gulu -ofi lebhe ɩ 'ta ɔla -blɩɩzɔan -ci.» 6 Na, Zozii ya maa -nyandlaa -naa nɩkplaan solulu, -ma ma 'taa ɩmɩa ɔ nyɩtɛa 'lɛ na, 'la -zɔn 'nu.

Zozii -glɩ 'lɛ gbinea

7 Zozii ya -awlɛ 'cla lebhe: «N solu, anyɩ ɩ -glɩ -nʋawlɛ lebhe: -Amʋ -glɩ 'lɛ 'bhlabhlɩa 'la gbinea. 8 Maa 'fɩan -ɔ cili 'lɛ -bɛɛ 'fɩɔn 'nyɩ n ya 'lɛ ci na, -glɩ 'winya ɩya ncaabhlanya, 'nyɩ 'bhlabhlɩa 'ta maa 'nyukwliinpo. 9 -Amʋ -glɩ 'lɛ gbinea: Ɔmɔa -ɔ bleliin 'lɛ neen na, ɔ cɩ 'ka gbʋʋnsalɩɛ 'lɩ, ɔ cɩ ble, ɔ cɩ -zɔnwlʋ 'nyɩ ɔ cɩ nyɩ 'lɩ ɔ cɩ li. 10 Ka 'winyɔ ci 'lɛ le ɔ 'ka ghli, ɔ 'ka 'bhla ɩya ɔ 'ka nyumo bhlobhlo. -Ma -amʋ, ka n ci 'lɛ le ncɛlɩ 'ka jabhʋa 'lɩ ɩya ma 'kʋʋ nikadie 'lɩlɩ.

Zozii -glɩ 'lɛ mlakpanyɔ 'nanɔa

11 -Amʋ -ɔ -glɩ 'lɛ mlakpanyɔ 'nanɔa. Mlakpanyɔ 'nanɔa, ka ɔ ŋonu lebhe ɔ cɩ ɔla 'bhlabhlɩa 'la gbʋ 'ku. 12 -Ma ɔmɔa -ɔ kpa 'lɛ 'bhlabhlɩa le ma 'kɔɔ dluplʋ, 'ta ɩla kpanyɔa 'titi -glɩ 'nyɩ 'bhlabhlɩa 'ta ɔnɩ -glɩ. Na, daa ɔ 'lɩ 'lɛ mlanyinye 'nyɩ ɛ ci 'lɛ 'bhlabhlɩa 'bhlakan na, ka 'wlʋlʋɩ 'lɛ cɩɩn 'nyɩ ɔ gu 'lɛ. 'Nyɩ mlanyinyea bhla -anɩ 'nyɩ 'bhlabhlɩkpaa dlolu, 13 sa nclɔɔ -naa, 'dala 'la gbʋ -tɛɛ, ɔ kpa 'lɛ 'bhlabhlɩa, -ma ɩla wɔlɩ -ylɛylɛ 'tɔɔ cɩɩn kalɩ. 14 -Ma -amʋ -glɩ 'lɛ mlakpanyɔ 'nanɔa. N -ci 'na 'bhlabhlɩa 'nyɩ 'na 'bhlabhlɩa -ciin 'lɛ, 15 lesaa Toa -ciin 'lɛ 'nyɩ n -ci 'lɛ Toa na. 'Nyɩ n ŋonu le n cɩ 'na 'bhlabhlɩa 'la gbʋ 'ku. 16 N -ka -awlɛ 'bhlabhlɩ -anɩ -ɩ 'ta 'lɛ -gbangbo -naa nɩkplaan -kʋmʋ na. Ɩ -fata lebhe n kpamʋɩ, ɩ 'ka 'na -blɩɩzɔan cibhlilimʋ, ɩ 'kanɩ 'bhlabhlɩkpa bhlo 'plɩ ɩya ɩ 'ka kpanyɔ bhlo kalɩ. 17 Ɩla gbʋ Toa -waan 'lɛ, -ofi lebhe n ya ŋonu le n cɩ 'ku ɩya n 'ka -awlɛ 'na jabhʋa 'lɩ. 18 Nclɔɔ bhlogbɩɩ cɩ 'taan 'bhlalɩɛ mino, -ma -amʋ 'titi -ɔ ŋonu 'lɛ n cɩ 'ku. N -ka -jioli ɩya n 'ka 'na jyɩ le ma 'bhlaan, n 'ku 'nyɩ n cɩ mino n cɩabhʋa sɔ 'kʋ -sa, 'nyɩ n -ka 'lɛ -jioli ɩya n 'ka -awlɛʋ 'ma. 'Lɩka ɩmɩa n To zʋ 'lɛ wlɩɩn na.» 19 Wɔɔnyɩtʋ -naa ya Zifʋnyaa nɩkplaan 'dɩ. 20 Maa sidiin ncaabhutukpa claa lebhe: «'Wugo -nyunyu -kʋɔ nɩkplaan, 'wluun yɔɔ nyumo, 'lɩsaa 'la gbʋ a poo 'lɛ 'nyukwliin bha?» 21 -Ma -anʋa claa lebhe: «-N 'ta 'wugonyunyunyɔ 'la wɔɔnyɩtʋ 'ta 'lɛ -da -kʋ. 'Wugo -nyunyu cɩ 'citutunya 'ci 'gbokalɩlɩɛ mino bha?»

Zifʋnyaa 'taa Zozii 'la wɔlɩa 'ma

22 Gude yaanɩa ŋeni, 'nyɩ ma lianɩa Laagɔpaakadiea la nesaclɩɩa 'la 'fɛtlɩa 'yɛpɩ Zolizalɛmʋ. 23 Laagɔpaakadie nɩkplaan, Zozii cɔcɔlʋa 'kʋ, gbinea ma zʋ 'lɛ Salomɔɔn 'ŋlɩ na 'kʋ. 24 Na, Zifʋnyaa yɔɔ didio 'nyɩ ma yɔɔ neencla lebhe: «Bhlaasaan -n cɩ 'ka 'lɛ anyɩ -daandaan nɩkplaan zʋ bha? Ɩ -ka -kʋ lebhe -mɔ -ka Laagɔ 'la -Sasanyɔa -glɩ na, solu sɛɛ -anyɩ 'kpataa!» 25 Zozii ya maa neenŋonu lebhe: «N yɩɩ anyɩ tooto solu, -ma a la 'ta wɔlɩa -nʋawlɛ. Lobholia n nʋnʋ 'lɛ n To 'la 'ŋlɩa nɩkplaan na, ɩ li 'na -danʋfʋɛ, 26 -ma a la 'ta -nʋawlɛ, -ofi lebhe a 'ta 'na 'bhlabhlɩa nɩkplaan -kʋmʋ. 27 'Na 'bhlabhlɩa, ɩ -ci 'na -blɩɩzɔan, 'nyɩ -amʋ -ma n -cii 'nyɩ ɩ gɩlɩɩn 'lɛ. 28 'Nyɩ -amʋ, n 'nyɩɩ jabhʋa -ʋ -kʋ 'lɛ 'lʋkʋlʋkʋ ɩya 'lʋkʋlʋkʋ na. Ɩ cɩ 'tanɩ 'ku 'nyɩ nclɔɔ bhlogbɩɩ cɩ 'ta mino ɩya ɔ 'kaan mɩ wlɩɩn -sa. 29 N Toa -ɔ 'nyɩɩn 'lɛ mɩ na, ɔ zi -tɛtɛa 'fɩan 'kʋ 'nyɩ nclɔɔ bhlogbɩɩ cɩ 'ta mino ɩya ɔ 'ka Toa lʋʋ wlɩɩn -sa. 30 -Amʋ ɩya Toa, -a -glɩ bhlo.» 31 Zifʋnyaa yaa -awlɛ cɔkʋ 'kʋbhli le ma 'kɔɔ mɩɩn 'bhla. 32 -Ma Zozii ya maa 'cla lebhe: «N ya anyɩ 'ci 'kʋ lobholi 'nanɩ -bhutukpa To 'la 'ŋlɩa nɩkplaan nʋnʋ. Na, lobholia -anɩsaa 'la gbʋ, a 'matɩa 'lɛ le a 'kaan cɔkʋ nɩkplaan 'bhla bha?» 33 Zifʋnyaa yɔɔ neenŋonu lebhe: «-N 'ta lobholi 'nanɩ 'la gbʋ -a 'ta 'lɛ -wa le -a kɔɔ 'bhla, -ma Laagɔ 'la vlalɩɛ 'la gbʋ, sa -mɔa -ɔ -glɩ 'lɛ nclɔɔ na, -n la -ncɩ Laagɔ na.» 34 Zozii ya maa 'cla lebhe: «Ɩ 'ta ala -jlɩmaa nɩkplaan -zieo lebhe: N nabhe: A -glɩ -laagɔcɩ bha? 35 -A -ci sɛɛ lebhe nclɔɔ bhlogbɩɩ cɩ 'ta mino ɩya ɔ 'ka ɩmɩa Zieziewɔlɩa bhli 'lɛ 'kʋ na 'dɛ -sa. 'Nyɩ Laagɔ ya maa -ɔ cɩ 'ka 'lɛ ɔla Wɔɔnyɩtʋa 'nu na, -laagɔcɩ la. 36 'Bhlɩmɔɔn, ɔmɔa Laagɔ ya 'lɛ desla 'nyɩ ɔ ya 'lɛ -laagɔzɔan lobhu, a clɔɔ lebhe: -N vla Laagɔ, sa n ya 'cla lebhe n -glɩ Laagɔ 'la 'Cʋa na. 37 Ɩ -ka -kʋ lebhe, 'n nʋ 'ta n To 'la lobholia na, a 'la kalɩa 'na pɔɔtɛtɛ! 38 -Ma ɩ -ka -kʋ lebhe n -kɩɩ nʋ na, ka a 'ta 'na pɔɔtɛtɛ -ka 'titio na, a la lobholi -naa -nʋawlɛ ɩya a 'ka sɛɛ cibhlili ɩya a 'ka ŋonu lebhe Toa -kʋʋn nɩkplaan saa n -kʋɔ 'lɛ nɩkplaan na.» 39 Na, ma ya -awlɛ 'matɩ le ma 'kaa 'mɔɔ 'kʋbhli, -ma ɔ ya maa wlɩɩn -dla 'nyɩ ɔ ya mʋ. 40 Zozii ya Zludɛɛnnyidɔlʋa leen cɔlɔ, daa Zaan zʋlʋa 'lɛ ncɛlɩa 'nyu 'wlu na 'nyɩ ɔ -kʋa 'yɛpɩ. 41 Ncaabhutukpa yɔɔ cili 'nyɩ ma claa lebhe: «Zaan 'taa 'ciinzizielɩlobholi bhlogbɩɩ nʋ, -ma Zozii 'la cɩ wɔlɩa -tɛtɛa ɔ nyɩtɛa 'lɛ na, ɩ -glɩ -nʋawlɛ.» 42 Na, dɩpɩa ncaabhutukpa yɔɔ mala pɔɔtɛtɛa 'kʋ zʋ.

11

Lazalɩ ya 'ku

1 Nclɔɔ bhlo -kʋa Betaniidua 'kʋ, ma laa 'mɔɔ Lazalɩ. Ɔ 'taa -ja. Mɛɛncɩ -mɔsɔ -kʋa du -naa bhlogbɩɩ 'kʋ, ma laa maa Malii ɩya Mata. 2 Malii -naa, ɔ -glɩa 'ŋlɔa -ɔ 'kɔsɔwa 'lɛ -asʋnbanyɩa -Kwlenyɔa 'wlu 'nyɩ -ɔ 'mawa 'lɛ ɔla 'nyɩa 'nyɩ ɔ sɩsɩɛɔ 'lɛ kpli cɩ na. Ɔ bholi Lazalɩ 'taa 'lɛ -ja. 3 Na, mɛɛncɩa -mɔsɔa ya nclɔɔ lobhu le ɔ 'cla Zozii lebhe: «-Kwlenyɔ, -n 'nagɔa -n -wa 'lɛ na, ɔ 'ta -ja.» 4 Daa Zozii 'nu 'lɛ sɛɛ na, ɔ ya 'cla lebhe: «Gu 'naa 'ta 'kwɩ 'la gu -glɩ, -ma ka Laagɔ 'kʋʋ 'kʋ 'lɛ 'plɩlɩ ɩya ɔ -ka 'lɛ ɔla 'klʋagba pala ɩya Laagɔ 'la 'Cʋa 'la 'klʋagbaa 'ka -zɔnwlʋ.» 5 Zozii -waa Mata ɩya ɔ mɛnɔ ɩya ma bholi Lazalɩ. 6 Ɔ ya 'nu lebhe Lazalɩ 'taa -ja, 'bhlɩmɔɔn, ɔ ya -awlɛ daa ɔ -kʋa 'lɛ na clɩɩ -mɔsɔ li. 7 'Nyɩ ɩla leean, ɔ ya ɔla gɩlɩnyaa 'cla lebhe: «A cɔlɔ Zudee.» 8 Gɩlɩnyaa yɔɔ 'cla lebhe: «Canyɔ, Zifʋnyaa -kaa 'lɛ 'matɩ lebhe ma 'kɔɔ 'bhla na, ɩla clɩɩ 'ta 'kaan bɔ -ylɛylɛ 'nyɩ -n 'matɩ lebhe -n ka 'yɛpɩ cɔlɔ bha?» 9 -Ma Zozii ya maa 'cla lebhe: «'Ŋwacɩwli 'kʋgba -mɔsɔ 'ta 'lɛ Zezezeli nɩkplaan -kʋ bha? Nclɔɔ -ka -gagazeliin namʋ na, ɔ gozo 'ta, sa ɔ -jlɛ -laagɔzɔn -naa 'la zezezelia na. 10 -Ma 'tutu -ka -pla 'nyɩ nclɔɔ -ka namʋ na, ka ɔ gozo 'lɛ sa zezezeli 'tɔɔ nɩkplaan 'kʋ na.» 11 Daa Zozii 'bhli 'lɛ wɔlɩ -naa 'kʋ na, ɔ ya -awlɛ 'cla lebhe: «-A 'nagɔ Lazalɩ ya ŋɔmʋ, -ma n cɩ 'ka mʋ ɩya n 'kɔɔ galɔ.» 12 Gɩlɩnyaa yɔɔ 'cla lebhe: «-Kwlenyɔ, ɩ -ka -kʋ lebhe ka ɔ ŋɔmʋ 'lɛ na, ɔ cɩ 'ka jabha.» 13 Lazalɩ 'la 'kwɩa 'la wɔlɩ Zozii -waa 'lɛ lebhe ɔ -kaa nyɩtɛ, -ma maa ma gugua lebhe claa 'titi 'la wɔlɩ ɔ nyɩtɛa 'lɛ. 14 Na, Zozii ya maa solu 'kpataa lebhe: «Lazalɩ ya 'ku, 15 'nyɩ ɩ nʋʋn -pɔpʋɛ anyɩ 'wluku, saa n 'ta 'lɛ 'yɛpɩ -kʋ 'nyɩ ɔ ya 'lɛ 'ku na, ɩya a 'ka pɔɔtɛtɛ 'lɩ. -A mʋɔ cɩ!» 16 Na Tomaa, ma la 'lɛ daplɩcoa na, ya -daa gɩlɩnya 'cla lebhe: «-Anyɩ -masɛɛ -a mʋ ɩya -aya -ala canyɔa 'ka nebhlo 'kulu.»

Zozii -glɩ 'lɛ 'kwɩɩnkubhuɛ ɩya jabhʋa

17 Daa Zozii ŋeni 'lɛ na, ɔ ya 'nu lebhe ma ya Lazalɩ 'la 'kuoa lesuun zʋ, ɩ nʋanɩa clɩɩ -nmɔɔna. 18 Sa Zolizalɛmʋ ɩya Betanii 'ta 'lɛ tlʋ 'nyɩ ɩ nʋ 'lɛ -kiloo -mɔta na, 19 Zifʋnya -bhutukpa ya Mata ɩya Malii 'bhlɩ ci le ma 'ka maa pɔlɛɛn zʋ, ma bholia 'kwɩa 'la gbʋ. 20 Daa Mata 'nu 'lɛ lebhe Zozii cia 'yɛpɩ na, ɔ yɔɔ -gugwie 'kʋ mʋnʋ, -ma Malii -kʋa 'sleen sa. 21 Mata ya Zozii 'cla lebhe: «-Kwlenyɔ, ɩ -ka -kʋ lebhe -n -kaa -da -kʋ na, n bholi cɩ 'taa 'ku. 22 -Ma -pɔtɔnʋ 'titio, n -ci sɛɛ lebhe -tɛtɛa 'fɩan n cɩ 'ka 'lɛ Laagɔ 'clalɩ na, ɔ cɩɔ mɩ 'nyɩ.» 23 Zozii yɔɔ 'cla lebhe: «-N bholi cɩ 'ka 'kwɩɩnkʋbho.» 24 -Ma Mata yɔɔ 'cla lebhe: «N -ci sɛɛ lebhe leenbhalɩ clɩɩa 'kʋ ɔ cɩ 'ka 'kwɩɩnkʋbho.» 25 Na, Zozii yɔɔ 'cla lebhe: «-Amʋ -glɩ 'lɛ 'kwɩɩnkʋbhue ɩya jabhʋa. Ɔmɔa -ɔ -ka 'lɛ 'na pɔɔtɛtɛ na, ka ɔ 'ka 'ku 'titio na, ɔ cɩ 'ka jabha. 26 'Nyɩ ncaatʋtʋʋntʋa -ɔ -ja 'lɛ 'nyɩ -ɔ -ka 'lɛ 'na pɔɔtɛtɛ na, ɔ cɩ 'tanɩ 'ku. -N la ɩmɩ -naa 'la pɔɔtɛtɛ bha?» 27 Ɔ yɔɔ neenŋonu lebhe: «-Ghɛɛ -Kwlenyɔ, n li -danʋfʋɛ lebhe -mɔ -glɩ 'lɛ Laagɔ 'la -Sasanyɔa, Laagɔ 'la 'Cʋa, ɔmɔa -ɔ -cɩ kaa 'lɛ -laagɔzɔan ci na.»

Zozii ya Lazalɩ 'kwɩɩnkʋbho

28 Mata 'bhli 'lɛ ɩmɩ -naa 'kʋ na, ɔ ya 'plɩ ɔ ya mʋ, ɔ ya ɔ mɛnɔ Malii la 'nyɩ ɔ yɔɔ -wɛsɛwɛsɛ solu lebhe: «Canyɔa -kʋ -da, ɔ 'clɔɔ bɩkʋ.» 29 Daa Malii 'nu 'lɛ wɔlɩ -naa -jaa na, ɔ ya 'kʋbho 'fan ɔ ya Zozii 'bɩɩn mʋnʋ. 30 Sa Zozii 'ta ka kaa 'dua nɩkplaan ble, -ma ɔ -kʋ kaa daa Mata ŋenia 'mɔɔ 'lɛ na. 31 Daa Zifʋnyaa -ɔ ya Malii -kʋa 'lɛ -palʋa -zɔn le maa 'kaa 'mɔɔ pɔlɛɛn zʋ na, 'lɩɔ 'lɛ 'nyɩ ɔ bho 'lɛ 'kʋ 'fan na, ma yɔɔ gɩlɩ. Ma gugua lebhe, ka ɔ mʋa 'lɛ lesua 'kʋ ɩya ɔ 'kaa 'tu. 32 Daa Malii ŋeni 'lɛ daa Zozii -kʋa 'lɛ na 'nyɩ ɔ 'lɩɔ 'lɛ na, ɔ yɔɔ -deliin -kukoonkplii sasla 'nyɩ ɔ yɔɔ 'cla lebhe: «-Kwlenyɔ, ɩ -kaa -kʋ lebhe -n -kaa -da -kʋa na, n bholi cɩ 'taa 'ku.» 33 Daa Zozii 'lɩ 'lɛ lebhe ɔ tua 'nyɩ maa -ɔ gɩlɩa 'mɔɔ 'lɛ na -ma 'tumʋa na, ɩ yɔɔ -gbɔɔn 'dɩdɔ. 34 Ɔ ya maa neencla lebhe: «'Ndagbazɩ a zʋlʋ 'lɛ ɔla -blaanyɛkɛa bha?» Ma yɔɔ neenŋonu lebhe: «-Kwlenyɔ, ci ɩya -n 'ka 'lɩ.» 35 'Nyɩ Zozii ya 'tu. 36 Na, Zifʋnyaa claa lebhe: «A kopeka 'saa ɔ -waa 'mɔɔ 'lɛ na!» 37 -Ma maa nɩkplaan bhloonbhloon 'cla lebhe: «Ɔmɔa -ɔ ya 'lɛ 'citutunyɔa 'la 'cia 'gbokalɩ na, ɔ cɩ 'taa mino ɔ 'ka gba ɩya Lazalɩ 'la 'kaa 'ku bha?» 38 Wɔlɩ -naa ya -awlɛ Zozii -gbɔɔn 'dɩdɔ 'nyɩ ɔ ya lesua 'kʋ mʋ. Ʋ -glɩa -cokwiea ma kɔtɔ 'lɛ nɩkplaan, 'nyɩ cokwie kpaslɩlɩɔa 'lɛ ʋla nea na. 39 Na, Zozii ya 'cla lebhe: «A -sa 'dɛ -cokwiea.» Mata, 'kuoa mɛnɔa yɔɔ 'cla lebhe: «-Kwlenyɔ, -a -kaa 'mɔɔ 'lɛ zizie na, ɩ nʋnɩ clɩɩ -nmɔɔna. Na, ɔ sanɩ ŋlɛ.» 40 -Ma Zozii yɔɔ 'cla lebhe: «N 'tɔɔ 'cla lebhe, -n 'ka pɔɔtɛtɛ -ka na, -n -cɩ ka Laagɔ 'la 'klʋagbaa 'ciinlɩ bha?» 41 Ma ya 'dɛ cokwiea -sa. Na, Zozii ya 'wlu 'kʋbhli, ɔ ya -laagɔɔn kope 'nyɩ ɔ ya 'cla lebhe: «To, n bhɔlʋɔ saa -n yaan 'lɛ neen 'nu na. 42 N -ci sɛɛ lebhe -n nuun -azla neen, -ma ncɛlɩa -ɔ -didio 'lɛ na, ma 'la gbʋ n bhli 'lɛ sɛɛ 'ku ɩya ma 'ka -nʋawlɛ la le -mɔɔ lobhuun 'lɛ.» 43 Ɔ bhli 'lɛ -sa 'kʋ na, ɔ yaan -gaa 'nyɩ ɔ ya 'cla lebhe: «Lazalɩ, 'wlʋ -zɔn.» 44 'Nyɩ 'kukukuoa ya -zɔnwlʋ, ala sɩa ɩya ala bhɩa gʋalɩɔa lokupɛlɩ cɩ 'nyɩ ala 'klʋa -wɔlɩa 'lɛ lokwipɛlʋ 'kʋ. Zozii ya ncɛlɩa 'cla lebhe: «A -bluluo ɩya a 'talɩɔ 'cin, ɔ 'ka mʋ!»

Ma ya Zozii 'la 'bhlawɔlɩ gʋa

45 Zifʋnyaa -ɔ cia 'lɛ Malii cɩ 'nyɩ -ɔ 'lɩa 'lɛ ɩmɩa Zozii nʋa 'lɛ na, maa sidiin -bhutukpa yɔɔ mala pɔɔtɛtɛ 'kʋ zʋ. 46 -Ma maa nɩkplaan bhloonbhloon ya mʋ, ma ya Falizɩɛnnyaa ŋeni 'nyɩ ma ya ɩmɩa Zozii nʋa 'lɛ na, 'dɩkʋsalɩ. 47 Na, -teyiyinyaa tocɩa ɩya Falizɩɛnnyaa ya tɩtɩplaakandɩ 'kadiea 'wluwlalɩ 'nyɩ ma 'claclalɩa neen lebhe: «Nclɔɔ -naa nʋ 'lɛ -sa 'ciinzizielɩlobholi -bhutukpa na, 'lɩsaa -a cɩ 'ka 'lɛ nʋ bha? 48 Ɩ -ka -kʋ lebhe -a -kɔɔ ne te na, ncɛlɩa 'fɩan cɩ 'kɔɔ mala pɔɔtɛtɛa 'kʋ zʋ ɩya Wlɔmʋnyaa 'ka ci ɩya ma 'ka -ala Laagɔpaakadiea ɩya -ala 'bhlɩa nyumo.» 49 Mala sidiin 'la nclɔɔ bhlo, ma laa 'lɛ Kayifʋ 'nyɩ ɔ -glɩa 'lɛ 'dɛ 'la lioa nɩkplaan -teyiyinyɔ kpasaa na, ya maa 'cla lebhe: «A 'nʋ 'ta wɔlɩa -ɩ 'plɩ 'lɛ na. 50 A gugu 'ta -ylɛylɛ lebhe ɩ 'nanɩ ala da lebhe nclɔɔ bhlogbɩɩ 'ku ncɛlɩa 'fɩan 'la 'jeen ɩya 'bhlɩa -tɛtɛa 'la ka nyumo bha?» 51 'Bhlɩmɔɔn -n 'ta ɔla 'wluun ɔ 'ta 'lɛ ɩmɩ -naa nyɩtɛlɩ, -masa ɔ -glɩa 'lɛ -teyiyinyɔ -kpasa 'dɛ 'la lioa nɩkplaan na, ka ɔ nyɩtɛa 'lɛ Laagɔ nekʋ lebhe ɩ -fata lebhe Zozii 'kua ɔ 'bhlɩnyaa 'la gbʋ. 52 'Nyɩ -n 'ta maa bhlobhlo 'la gbʋʋ, -ma ɔ 'ka Laagɔ 'la 'cuoa 'fɩan -ɔ -dloluo 'lɛ -laagɔzɔan na, 'wluwlalɩ ɩya ma 'ka bhlo 'plɩ. 53 Na, clɩɩ -naa 'kʋ ma zʋ 'lɛ ɔla 'bhlawɔlɩa kpo 'kʋ. 54 Ɩla gbʋ na, Zozii mʋtaanɩa Zifʋnyaa sidiin. Ɔ ya 'dɛ 'wlʋ 'nyɩ ɔ ya 'bhlɩa -ɩ -mɛɛ 'lɛ 'pʋpʋa cɩ na 'la 'dua ma la 'lɛ Eflayimʋ na 'kʋ mʋ, 'nyɩ ɔ ya ɔla gɩlɩnyaa -kʋanɩa 'yɛpɩ. 55 Zifʋnyaa 'la geyliinwlʋfɛtlɩa yaanɩa cɩmɛ. 'Nyɩ ncaabhutukpa -gblaa Zolizalɛmʋ le ma 'kaa macɩ -kplɔ 'fɩɔn ɩya 'fɛtlɩa 'kaa ŋeni. 56 Ma 'matɩa Zozii 'nyɩ daa ma -kʋa 'lɛ Laagɔpaakadiea -zɔn na, ma 'claclalɩa neen lebhe: «Ɔ cɩ 'fɛtlɩa 'kʋ ci bha? -Ma ɔ cɩ 'ta ci bha? 'Nsasa a 'lɩlɩlɩɩ 'lɛ bha?» 57 -Teyiyinyaa kpasɩa ɩya Falizɩɛnnyaa yaa 'cla lebhe ncaatʋtʋʋntʋa -ɔ cɩ 'lɛ daa ɔ -kʋ 'lɛ na cibhlili na, ɩ -fata lebhe ɔ solu maa ɩya ma 'kɔɔ 'kʋ 'kubhli.

12

Malii ya -asʋnbanyɩ Zozii 'la kplia 'kʋ 'kɔsɔ

1 Daa -ɔ -toanɩa 'lɛ clɩɩ -ngbʋflʋ ɩya ma 'kaa Zifʋnyaa 'la geyliinwlʋfɛtlɩa li na, Zozii ya Betanii, 'dua nɩkplaan Lazalɩ, ɔ galɔa 'lɛ 'kwɩɩn na, -kʋa 'lɛ na, mʋ. 2 Ma yɔɔ 'tlɔnblɩ sapalɩ. Mata zʋa nyɩa. Lazalɩ -kʋmʋa maa -ɔya Zozii -kʋ 'lɛ 'tlɔnblɩa 'kʋ na, sidiin. 3 Na, Malii ya 'pɛlʋtɛtʋ -asʋnbanyɩ 'titi 'la 'litlikle 'ma, ɔ ya Zozii 'la kplia 'kʋ 'kɔsɔ 'nyɩ ɔ ya ɔla 'nyɩa 'ma ɔ yɔɔ kpli cɩ sɩsɩɛ. 'Nyɩ -asʋnbanyɩa 'la 'ŋɔnɔa ya -palʋa 'ma. 4 Na, Zuda Iskalɩɔtʋ, Zozii 'la gɩlɩnyaa sidiin 'la bhlo, ɔmɔa -ɔ -cɩ kaa 'mɔɔ 'lɛ 'pɛlʋ zʋ na, ya 'cla lebhe: 5 «'Lɩsaa 'la gbʋ -a 'ta 'lɛ -asʋnbanyɩ -naa 'pɛlʋ zʋ, -a ka liowlu -totobhuo 'la lobholinʋdala 'lɩ ɩya kaa ŋaazɩnya 'nyɩ bha?» 6 -N 'ta ŋaazɩnya 'la pɔlɛ ɔ ple 'taa 'lɛ, -ma ka ɔ nyɩtɛa ɩmɩ -naa, -ma -ofi lebhe ɔ -glɩa 'winyɔ 'nyɩ ɔ -glɩa 'lɛ mala 'dalaa 'la saazʋnyɔ na, ɔ faa 'maa nɩkplaan sɔ. 7 Na, Zozii ya 'cla lebhe: «'Talɩɔ 'cin 'cɩɩ! 'Na 'nyɛkɛa 'la -gluuzʋlɩɛa 'la gbʋ ɔ nʋ 'lɛ ɩmɩ -naa. 8 Ŋaazɩnyaa, a -ka maa clɩɩa 'fɩan acɩ cɩ, -ma -amʋ, a 'taan clɩɩa 'fɩan -ka.»

Ma ya Lazalɩ 'la 'bhlawɔlɩ gʋa

9 Zifʋnya -bhutukpa ya 'nu lebhe Zozii -kʋa Betanii. Ma ya 'yɛpɩ mʋ, -n 'ta Zozii bhlo 'la gbʋʋ, -ma ma 'kaa Lazalɩ, Zozii galoa 'lɛ 'kwɩɩn na, -masɛɛ 'ciinlɩ. 10 Na, -teyiyinyaa tocɩa ya Lazalɩ -ma ɔla 'bhlawɔlɩ kpo 'kʋ zʋ, 11 sa ɔmɔ 'wluku, Zifʋnya -gbɔɔn wlʋa maa leen 'nyɩ ma zʋa mala pɔɔtɛtɛa Zozii 'kʋ na.

Zozii ble Zolizalɛmʋ

12 Daa -zeli ze 'lɛ na, ncaabhutukpaa -ɔ cia 'lɛ 'fɛtlɩa 'kʋ na, ya 'nu lebhe Zozii cia Zolizalɛmʋ. 13 Na, ma ya -gaagbedi 'dɩ 'nyɩ ma yɔɔ -gugwie 'kʋ mʋnʋ. Ma -gaa nɩkplaan 'nyɩ ma claa lebhe: «'Klʋagba ŋeni Laagɔ! 'Nyupalɩɛ ŋeni ɔmɔa -ɔ cili 'lɛ -Kwlenyɔa 'la 'ŋlɩa nɩkplaan na! 'Nyupalɩɛ ŋeni Izlayɛlɩnyaa 'la nyɩbhɛlʋa!» 14 Zozii ya 'flumuco 'lɩ 'nyɩ ɔ yʋʋ 'kʋ 'tɔ, saa Zieziewɔlɩa bhli 'lɛ 'kʋ na: 15 «Zolizalɛmʋ, Siyɔɔnŋlʋgbɩɔ, ŋanɔ 'la 'bhlɔɔ! Kopeka, -naa nyɩbhɛlʋa ci 'yɛpɩ, ɔ -gbɛ 'flumu 'la 'cilee 'kʋ.» 16 -Bɛɛ, Zozii 'la gɩlɩnyaa 'taa wɔlɩ -naa 'la -zɔn 'nu. -Ma daa Laagɔ gbɔɔ 'lɛ 'klʋ na, ma ya luoli lebhe ɔla gbʋ ɩmɩ -naa -zieoa 'lɛ 'nyɩ ɩmɩ 'titi ma nʋ 'lɛ 'nyɩ ma yɔɔ 'lɛ 'nyɩ. 17 Maa 'fɩan -ɔya Zozii -kʋa 'lɛ 'dɛ, daa ɔ laa 'lɛ Lazalɩ le ɔ 'wlʋ lesua nɩkplaan 'nyɩ ɔ galɔɔ 'lɛ 'kwɩɩn na, ma lia -danʋfʋɛ. 18 Ɩla gbʋ na, dɛ -alawleea cilia 'mɔɔ 'lɛ -gugwie 'kʋ, sa ma yaa 'nu lebhe ɔ yaa 'ciinzizielɩlobholi -naa nʋ na. 19 Na, Falizɩɛnnyaa bhlobhlo solusolulua lebhe: «A lɩ lebhe a cɩ 'tɔɔ mino. 'Lɩka, ka ncɛlɩa 'fɩan gɩlɩɔ 'lɛ.»

Zozii nyɩtɛ ɔla gɩlɩlɩɛ 'la wɔlɩ

20 Lowie -zlʋsaasa, -ɔ -glɩa 'lɛ Glɛkɩnya na ya Zolizalɛmʋ 'fɛtlɩa 'kʋ mʋmʋ le ma 'kaa Laagɔ gʋgwla. 21 Ma ya Filipʋ, -ɔ 'wlʋlʋ 'lɛ Galileebhlɩa 'la 'dua ma la 'lɛ Bɛsayida 'kʋ na, ŋeni 'nyɩ ma yɔɔ 'cla lebhe: «-A to, -a -waa lebhe -a ka Zozii 'ciinlɩ.» 22 Filipʋ yaa mʋ, ɔ ya sɛɛ Andlee solu 'nyɩ maa -mɔsɔa ya mʋ, 'nyɩ ma ya sɛɛ Zozii solu. 23 Zozii ya maa 'cla lebhe: «Nclɔɔa 'Cʋa 'la 'klʋagbaa 'la 'ŋwacɩa ya ŋeni. 24 N solu anyɩ, ɩ -glɩ -nʋawlɛ: Gbazɩ ma 'ta ka 'bleecie -gluu zʋ ɩya ɛ ka zɛ na, 'cie bhlo ɛ -glɩ 'lɛ. -Ma ɛ ka zɛ na, dɛ tlʋ 'lɛ 'caa -bhutukpa. 25 Ɔmɔa -ɔ -wa 'lɛ ɔla jabhʋa na, ɔla jabhʋa cɩ mlɔ, -ma ɔmɔa, -laagɔzɔn, -ɔ cɩ ka 'lɛ ɔla jabhʋa -blɔ na, ɔ cɩ 'kʋ kalɩ -aan jabhʋa -ʋ -kʋ 'lɛ 'lʋkʋlʋkʋ ɩya 'lʋkʋlʋkʋ na nɩkplaan. 26 Nclɔɔ -ɔ -ka -wa lebhe ɔ 'kaan lobho na, 'naa ɔ gɩlɩɩn, ɩya daa n -kʋ 'lɛ na, 'na lobhocoa 'ka dɩpɩa kʋmʋ. Nclɔɔ -ɔ -kaan lobho na, n To cɩ 'kɔɔ 'klʋgba.

Zozii nyɩtɛ ɔla 'kwɩa 'la wɔlɩ

27 -Pɔtɔnʋ, 'na pɔlɛa 'tanɩ 'cɩɩ -kʋ. 'Nyɩ wɔɔsaa n cɩ 'kanɩ 'lɛ nyɩtɛ bha? N 'ka 'cla lebhe: To gba ɩya 'kwlɩbhɩɛ -naa 'la ŋenia bha? -Ma 'kwlɩbhɩɛ -naa 'titi 'la gbʋ n ci 'lɛ -dʋdʋa 'kʋ. 28 To, 'maa -gba -naa 'ŋlɩa 'klʋ.» Daa Zozii nyɩtɛ 'lɛ -sa na, -blɩɩzɔn bhlo ya -laagɔɔn 'wlʋlʋ 'nyɩ ʋ claa lebhe: «N yɩɩ tooto 'klʋagba, 'nyɩ n cɩ 'ka -awlɩɩ 'klʋagba.» 29 -Alawleea -a -kʋa 'lɛ dɩpɩa, 'nyɩ -a 'nua 'lɛ -blɩɩzɔn -naa na, ala nɩkplaan ncɛlɩa -anʋa claa lebhe gude gbɛtɛ 'lɛ 'nyɩ -danaanʋaa claa 'lɛ lebhe 'bhlaandlee bhlo soluo 'lɛ. 30 Na, Zozii ya -awlɛ maa 'cla lebhe: «-N 'ta 'na gbʋ -blɩɩzɔn -naa 'ta 'lɛ nyɩtɛ, -ma ala gbʋ. 31 -Pɔtɔnʋ Laagɔ kanɩ 'lɛ -laagɔzɔn -naa 'tɩtɩpla ɩya ɔ 'ka -laagɔzɔan 'la -kwletoa 'tli. 32 -Ma -amʋ, daa ma cɩ 'ka 'lɛ 'kʋbho na, n cɩ 'ka gba ɩya ncɛlɩa 'fɩan 'kaan cili.» 33 Wɔɔnyɩtʋ -naa nɩkplaan, ka Zozii palaa 'lɛ 'kwɩa ɔ cɩ 'ka 'lɛ 'ku na. 34 Na, -alawleea yɔɔ 'cla lebhe: «-A ya -ala -jlɩmaa 'la -afluwia nɩkplaan 'nunu lebhe, Laagɔ 'la -Sasanyɔa cɩ 'ka kʋ 'lʋkʋlʋkʋ. Na, 'lɩsaa 'la gbʋ -n claa 'lɛ lebhe ma cɩ 'ka Nclɔɔa 'Cʋa 'kʋbho bha? Ncaasaa -ɔ -glɩa 'lɛ 'dɛ 'la Nclɔɔa 'Cʋa bha?» 35 Zozii ya maa neenŋonu lebhe: «Zezezelia -kʋ ka anyɩ cɩ clɩɩ -klipɛ 'titi nɩkplaan. Na, daa a -ka ka 'lɛ zezezelia na a namʋ ɩya 'tutua 'la ka sɛɛ anyɩ -zɔnvu, sa ɔmɔ -ɔ namʋnʋ 'lɛ 'tutuun na, ɔ 'ta daa ɔ mʋ 'lɛ na -ci. 36 Na, daa a -ka ka 'lɛ lelia na, a la lelia -nʋawlɛ ɩya a -ka leli 'la 'cuo 'plɩ.» Zozii bhɩalɩ 'lɛ ɩmɩ -naa nyɩtɛlɩɛ na, ɔ ya maa cɩɩnwlʋlʋ 'nyɩ ɔ ya daa ɔ -ka 'lɛ -kʋ 'nyɩ 'ma cɩ 'tɔɔ 'lɛ 'lɩ na mʋ.

Zifʋnyaa 'ta Zozii 'la pɔɔtɛtɛ -ka

37 Zozii ya 'ciinzizielɩlobholi -bhutukpa maa 'ci 'kʋ nʋnʋ, -ma ma 'taa ɔla pɔɔtɛtɛ -ka, 38 ɩya wɔlɩa Laagɔnekʋnyɩtɛnyɔ Izayii ɔ 'bhlia 'lɛ 'kʋ na, ɩ 'kaa 'kʋglalɩ, daa ɔ claa 'lɛ lebhe: «-Kwlenyɔ, ncaasaa -ɔ ya 'lɛ -ala niwɔlɩa -nʋawlɛ bha? Ncaasaa -Kwlenyɔ pala 'lɛ ɔla 'tɛtɩa bha?» 39 Izayii ya -awlɛ wɔlɩa 'la gbʋa 'ma cɩ 'ta 'lɛ pɔɔtɛtɛ 'lɩlɩɛ mino na 'kʋbhli 'nyɩ ɔ ya 'cla lebhe: 40 «Laagɔ ya maa 'tutu 'ciin zʋ 'nyɩ ɔ ya mala pɔlɩa titlili le ma 'la ka mala 'cia nɩkplaan salɩlɩ, ma 'la ka wɔlɩ pɔlɛcɩfalɩ, ma 'la ka kwlacala, ɩya ma 'la kaan 'bɩɩn cili ɩya 'na ka sɛ maa jabha.» 41 Ka Izayii nyɩtɛa 'lɛ wɔlɩ -naa, sa ɔ yaa Zozii 'la 'klʋagbaa 'ciinlɩ 'nyɩ ɔ yaa ɔla wɔlɩ nyɩtɛ. 42 'Bhlɩmɔɔn Zifʋnyaa tocɩa nɩkplaan, -bhutukpa ya mala pɔɔtɛtɛa Zozii 'kʋ zʋ, -ma Falizɩɛnnyaa 'la gbʋ na, 'ma nyɩtɛlɩ 'taa 'mɩɩ ncaacikʋ, ma 'la ka sɛa maa bhibhiepalʋa -zɔn 'tli. 43 Sa ma -waa ncɛlɩ 'la 'ŋwleenfalɩlɩɛa 'nyɩ ma zia Laagɔ 'nɩa 'kʋ na.

Zozii -glɩ 'lɛ zezezelia

44 Zozii ya nɩkplaan -gaa 'nyɩ ɔ ya 'cla lebhe: «Ɔmɔa -ɔ -ka 'lɛ 'na pɔɔtɛtɛ na, -n 'ta -amʋ 'na pɔɔtɛtɛ -ɔ 'ta 'lɛ -ka, -ma ɔmɔa -ɔ lobhuun 'lɛ na. 45 'Nyɩ ɔmɔa -ɔ -jlɛɛn 'lɛ na, ɔmɔa -ɔ lobhuun 'lɛ na, ɔ -jlɛ 'lɛ. 46 -Amʋ, n ya -laagɔzɔan ci le n 'ka ɩla zezezeli 'plɩ ɩya ncaatʋtʋʋntʋa -ɔ zʋʋn 'lɛ ɔla pɔɔtɛtɛa 'kʋ na, ɔ 'la kanɩ 'tutuun kʋ. 47 Gbazɩ nclɔɔ -ka 'na niwɔlɩa 'nu 'nyɩ ɔ 'tɩɩ 'kʋplɩlɩ na, -n 'ta -amʋ -ɔ cɩ 'tɔɔ 'lɛ gbaylɩsa. Sa n 'ta ci le n 'ka -laagɔzɔan 'tɩtɩpla, -ma ka n ci 'lɛ le n 'kɩɩ gbʋʋnsa. 48 Na, ɔmɔa -ɔ paan 'lɛ 'kwlaan 'nyɩ -ɔ 'ma 'ta 'lɛ 'na niwɔlɩa na, ɔ -ka ɔla 'tɩtɩplanyɔ: Wɔɔnyɩtʋa -ʋ 'wlʋlʋ 'lɛ neen na, ʋmʋ -ʋ -cɩ kɔɔ 'lɛ bhɩalɩclɩɩa 'kʋ 'tɩtɩpla. 49 -Amʋ, n 'ta 'na 'wluun 'manɩ ɩya n 'ka nyɩtɛ, -ma Toa -ɔ lobhuun 'lɛ na, ɔmɔ 'titi -ɔ palaan 'lɛ ɩmɩa n cɩ 'ka 'lɛ nyɩtɛ ɩya saa n cɩ 'kɩɩ 'lɛ nyɩtɛnyɩtɛlɩ na. 50 'Nyɩ n -ci sɛɛ lebhe ɔ nyɩtɛ 'lɛ na, ɩ nyɩ jabhʋa -ʋ -kʋ 'lɛ 'lʋkʋlʋkʋ ɩya 'lʋkʋlʋkʋ na. Na, ɩmɩa n nyɩtɛ 'lɛ na, saa Toa soluun 'lɛ na, sɛɛ n nyɩtɩɩ 'lɛ.»

13

Zozii ya ɔla gɩlɩnyaa kpli cɩ wɔlʋ

1 -Zeli 'kaa ze ɩya ma 'kaa Zifʋnyaa 'la geyliinwlʋfɛtlɩa li, Zozii ya sɛɛ cibhlili lebhe clɩɩa 'kʋa ɔ cɩ 'ka 'lɛ -laagɔzɔn -naa 'wlʋ ɩya ɔ 'ka Toa cɩ mʋ na, ka ɩ yaa 'lɛ ŋeni. Saa ɔ wabha 'lɛ maa -ɔ -glɩ 'lɛ ɔ 'nʋa -laagɔzɔn -naa na, ɔ ya maa wabha -aan ɔ ya 'wluko. 2 'Ylʋva bhlo, Zozii -ya ɔla gɩlɩnyaa -kʋa 'tlɔnblɩ 'kʋ. Gɔzɛ yaa tooto Simɔɔn -yowli Zuda Iskalɩɔtʋ, Zozii 'la 'pɛlʋzʋ wɔɔgugwie 'wluun zʋ. 3 -Ma Zozii -cia sɛɛ lebhe Laagɔ cɩ ɔ 'wlʋlʋ 'lɛ 'nyɩ Laagɔ cɩ ɔ cɔlɔa 'lɛ. 'Nyɩ ɔ -cia -awlɛ sɛɛ lebhe Toa yɔɔ lɩa -tɛtɛa 'la -jioli 'nyɩ. 4 Ɔ ya nyalitlɔnblɩa cɩ 'kʋbho, ɔ ya ɔla 'wlukʋlokwia nɩkplaan -sa, ɔ ya 'tawo 'ma 'nyɩ ɔ ya guoongʋalɩ. 5 Ɔ ya 'nyu 'cɛnzɩɩn 'kɔsɔ, ɔ ya ɔla gɩlɩnyaa kpli cɩ wɔlʋlɩɛ bhɔ 'nyɩ ɔ maa 'tawoa ɔ -gʋalɩa 'lɛ guoon na 'nyɩ ɔ sɩsɩa 'mɩɩ cɩ. 6 Na, ɔ ya Simɔɔn Pɩɛlɩ 'kʋ ŋeni. 'Nyɩ Simɔɔn Pɩɛlɩ yɔɔ neencla lebhe: «-Kwlenyɔ, -n kaan kpli cɩ wɔlʋ bha?» 7 -Ma Zozii yɔɔ neeŋonu lebhe: «Ɩmɩa n nʋ 'lɛ na, -n cɩ 'ta -pɔtɔnʋ ɩla -zɔn 'nu, -ma ɩ -ka -kʋ -aan na, -n -cɩ ka 'nu.» 8 Simɔɔn Pɩɛlɩ yɔɔ 'cla lebhe: «-Wɔɔ, -n cɩ 'taan 'pʋpʋkʋ kpli cɩ wɔlʋ!» -Ma Zozii yɔɔ 'cla lebhe: «Ɩ -ka -kʋ le n 'tɔɔ kpli cɩ wɔlʋ na, -n 'tanɩ 'naanɔ -glɩ.» 9 Simɔɔn Pɩɛlɩ yɔɔ 'cla lebhe: «'Dɛndlana, -Kwlenyɔ, -naa wɔlʋa kplia bhlo -tɛɛ cɩ, -ma 'maa wɔlʋmʋ 'na -kɔgbʋa ɩya 'na 'wlua.» 10 -Ma Zozii yɔɔ 'cla lebhe: «Ɔmɔa -ɔ ya 'lɛ budo na, 'ɔ 'matɩ 'tanɩ -awlɛ budolɩɛ, -ma kpli cɩ -tɛɛ ɔ wɔlʋnɩ 'lɛ, sa ɔla -lɩɩbhuoa -kplɔ na. Na anyɩ -ma, a -kplɔ, -ma 'bhlɩmɔɔn -n 'ta anyɩa 'fɩan.» 11 Zozii -cia ɔmɔa -ɔ -cɩ kaa 'mɔɔ 'lɛ 'pɛlʋ zʋ na, dɛ ɔ 'cla 'lɛ lebhe: «-N 'ta anyɩa 'fɩan -ɔ 'ta 'lɛ -kplɔ.» 12 Daa ɔ bhɩalɩ 'lɛ maa kpli cɩ wɔlʋlɩɛ na, ɔ ya ɔla lokwia nɩkplaan -pla, ɔ ya 'tlɔnblɩa 'kʋ cɔlɔ 'nyɩ ɔ ya maa 'cla lebhe: «A nu ɩmɩa n wlʋ 'lɛ anyɩ cɩ nʋda na, 'la -zɔn bha? 13 A laan Canyɔ ɩya -Kwlenyɔ 'nyɩ a -ka 'ge, sa n -glɩɔ. 14 -Ma gbazɩ -amʋa -ɔ -glɩ 'lɛ Canyɔa ɩya -Kwlenyɔa, n -ka anyɩ kpli cɩ wɔlʋ na, 'dɛndlana anyɩ -ma sɛɛ, ɩ -fata le a wɔlʋwɔlʋmʋ kpli cɩ. 15 Sa nʋnʋgbɩ n pala 'lɛ anyɩ: Ɩmɩa n ya 'lɛ anyɩ cɩ nʋ na, anyɩ -ma a nʋmʋɩ. 16 N solu anyɩ, ɩ -glɩ -nʋawlɛ, lobhoco 'ta ɔ to 'kʋzi 'nyɩ lobhulobhunyɔ 'ta ɔmɔa -ɔ lobhuo 'lɛ na 'kʋzi. 17 Na, a -cinɩ 'lɛ ɩmɩ -naa nʋ na, a kʋ 'nanɩ, ɩ -ka -kʋ le a -kɩɩ 'kʋ 'plɩlɩ na. 18 -N 'ta anyɩa 'fɩan 'n sa 'ta 'lɛ. N -ci maa -anʋa n sla 'lɛ de na. -Ma ɩ -fata lebhe Zieziewɔlɩa nɩkplaan 'la wɔɔkle -naa -glalɩ 'kʋ: Ɔmɔa n -yɔɔsɔ lili 'lɛ -dakɔa bhlo nɩkplaan na, ɔ yaan 'kɔkʋʋn -tla. 19 Ka n solu 'lɛ anyɩ wɔlɩ -naa 'kplookʋ, ɩya ɩ -ka ŋeni na, a 'ka -danʋfʋɛ li lebhe -amʋ n -kʋ. 20 N solu anyɩ, ɩ -glɩ -nʋawlɛ, ncaatʋtʋʋntʋa -ɔ -cɩ ka 'lɛ ɔmɔa n lobhu 'lɛ na, 'nanɩ kla na, -amʋ ɔ kla 'lɛ 'nanɩ 'nyɩ ncaatʋtʋʋntʋa -ɔ klaan 'lɛ 'nanɩ na, ɔmɔa -ɔ lobhuun 'lɛ na, ɔmɔ ɔ kla 'lɛ 'nanɩ.»

Zozii nyɩtɛ ɔla 'pɛlʋzʋwɔlɩ

21 Daa Zozii nyɩtɛ 'lɛ wɔlɩ -naa na, ɔ -kaa cɩɩnkalɔ 'kadie 'nyɩ ɔ ya 'cla 'kpataa lebhe: «N solu anyɩ, ɩ -glɩ -nʋawlɛ, anyɩ sidiin bhlo cɩ 'kaan 'pɛlʋzʋ.» 22 Daa ɔ nyɩtɛa 'lɛ wɔlɩ -naa na, gɩlɩnyaa kopekopelia 'ciin, ma 'taa nclɔɔa 'titia ɔ saa 'lɛ na -ci. 23 Gɩlɩnyaa nɩklplaan bhlo, ɔmɔa Zozii -waa 'lɛ -gbɔɔn na, -kʋa 'mɔɔ cɩ. 24 Na, Simɔɔn Pɩɛlɩ yɔɔ 'ci 'kpatɩlɩ le ɔ 'claa Zozii neen, ɩya ɔ 'kaa maa nclɔɔa ɔ saa 'lɛ na pala. 25 Na, gɩlɩnyɔa ya Zozii 'wlu cɩ fa 'nyɩ ɔ yɔɔ neencla lebhe: «-Kwlenyɔ, ncaasaa bha?» 26 Zozii yɔɔ neeŋonu lebhe: «Ɔmɔa n cɩ 'kaa 'lɛ 'flawuklea n cɩ 'ka 'lɛ nyɩa nɩkplaan 'ŋwa na, 'nyɩnɩ na, ɔmɔ -kʋ 'lɛ.» 'Nyɩ Zozii ya 'flawukle 'ma, ɔ yʋʋ 'ŋwa 'nyɩ ɔ yʋʋ Simɔɔn Iskalɩɔtʋ -yowli Zuda 'nyɩnɩ. 27 Daa Zuda 'ma 'lɛ 'flawuklea -jaa na, Sataan yɔɔ nɩkplaan ble. Na, Zozii yɔɔ 'cla lebhe: «Ɩmɩa -n -cɩ 'ka 'lɛ nʋ na, 'maa nʋɩ 'faanfan.» 28 Maa 'fɩan -ɔ -kʋa 'lɛ 'tlɔnblɩa 'kʋ na, bhlogbɩɩ 'ta wɔlɩa 'la gbʋa Zozii solua 'mɔɔ 'lɛ ɩmɩ -naa na, 'nu. 29 Sa Zuda -glɩa 'lɛ mala 'dalaa 'la saazʋnyɔ na, -anʋa ya gugu lebhe ka Zozii 'claa 'mɔɔ 'lɛ lebhe ɔ mʋa ɩya ɔ 'kaa 'fɛtlɩa 'la lilɩɩ -pɩa, -aana ɔ 'maa 'dala ɩya ɔ nyɩ ŋaazɩnya. 30 Na, daa Zuda 'ma 'lɛ 'flawuklea -jaa na, ka ɔ 'wlʋ 'kplookʋ -zɔn. 'Tutu yaanɩa pla.

-Jlɩmaa -lele

31 Na, daa Zuda 'wlʋ 'lɛ -zɔn na, Zozii ya 'cla lebhe: «-Pɔtɔnʋ Nclɔɔa 'Cʋa ya 'klʋagba 'lɩ ɩya ncɛlɩ 'kɔɔ nɩkplaan Laagɔ 'la 'klʋagbaa 'lɩlɩ. 32'Nyɩ ma -kɔɔ nɩkplaan Laagɔ 'la 'klʋagbaa 'lɩlɩ na , Laagɔ 'titi -ma cɩ 'Cʋa 'la 'klʋagbaa pala. 'Nyɩ ɩ 'tanɩ -gwlɛlɩ. 33 'Na 'cuonyɩ, clɩɩ -klipɛ -tɛɛ n cɩ kanɩ 'lɛ anyɩ cɩ li. A cɩ 'kaan 'matɩ. Na, ɩmɩa n solua 'lɛ Zifʋnyaa na, n solunɩ anyɩ -pɔtɔnʋ: Gbazɩa n mʋ 'lɛ na, 'a cɩ 'ta 'yɛpɩ mʋnɩɛ mino. 34 -Jlɩmaa -lele N nyɩ 'lɛ anyɩ: A wabhawabhalɩ. A wabhawabhalɩ saa n wabha 'lɛ anyɩ na. 35 A -ka -wawalɩ na, dɛ ncɛlɩa 'fɩan cɩ 'ka 'lɛ cibhlili lebhe a -glɩ 'na gɩlɩnya.»

Zozii nabhe Pɩɛlɩ cɩ 'kɔɔ -blɔ

36 Na, daa Zozii nyɩtɛ 'lɛ wɔlɩ -naa na, Simɔɔn Pɩɛlɩ yɔɔ neencla lebhe: «-Kwlenyɔ, 'ndagbazɩ -n mʋa 'lɛ bha?» Zozii yɔɔ neenŋonu lebhe: «Gbazɩa n mʋ 'lɛ na, -n cɩ 'ta -pɔtɔnʋ mino ɩya -n kaan gɩlɩ, -ma ɩ -ka -kʋ -aan na, -n -cɩɩn gɩlɩ.» 37 -Ma Pɩɛlɩ yɔɔ 'cla lebhe: «-Kwlenyɔ, 'lɩsaa 'la gbʋ 'n cɩ 'tɔɔ 'lɛ -pɔtɔnʋ gɩlɩlɩɛ mino bha? N -bhɔsʋa le n cɩ -naa gbʋ 'ku!» 38 -Ma Zozii yɔɔ 'cla lebhe: «-N -bhɔsʋa -zaagbʋsa le -n cɩ 'na gbʋ 'ku bha? N soluo, ɩ -glɩ -nʋawlɛ, 'fɩɔn ɩya -gʋgɔ 'ka 'lɛ 'pa na, -n cɩ ka dɩ -mɔta cɩcɛlɩlɩ lebhe -n 'taan -ci.»

14

Zozii -glɩ 'lɛ -gugwiea -ɛ mʋ 'lɛ Toa cɩ na

1 «Pɔɔvʋ 'la 'bhlaa anyɩ. A kalɩ Laagɔ 'la pɔɔtɛtɛ ɩya a kalɩ 'na pɔɔtɛtɛ. 2 N To 'la 'slea nɩkplaan, sakʋdɩ -bhutukpa -kʋ 'yɛpɩ. Ɩ 'taa sɛɛ -kʋ na, n cɩa anyɩa 'claa lebhe n mʋ ka ɩya n 'ka anyɩ sakʋda bhɔsʋa bha? 3 Daa n cɩ 'ka 'lɛ mʋ ɩya n 'ka 'lɛ anyɩ daa a cɩ 'ka 'lɛ kʋ na bhɔsʋa na, n cɩ 'ka cɔlɔ ɩya n 'ka anyɩ 'ma ɩya daa n -kʋ 'lɛ na, anyɩ -ma, a 'ka dɛ kʋmʋ. 4 Gbazɩa n mʋ 'lɛ na, a -ci 'yɛpɩ 'la -gugwiea.» 5 Na, Tomaa yɔɔ 'cla lebhe: «-Kwlenyɔ, -a 'ta daa 'titia -n mʋ 'lɛ na -ci. Na, 'nsasa -a -cɩ kaa 'lɛ 'yɛpɩ 'la -gugwiea cibhlili bha?» 6 -Ma Zozii yɔɔ 'cla lebhe: «-Amʋ -glɩ 'lɛ -gugwiea, -nʋawlɛa ɩya jabhʋa. Nclɔɔ bhlogbɩɩ cɩ 'ta Toa cɩ mʋ, ɩ -ka -kʋ le ɔ 'taan 'kʋ 'plɩlɩ na.» 7 Ɩ -ka -kʋ le a -kaa -amʋa -ci na, a cɩ 'kaa Toa -ma cibhlili. -Ma -pɔtɔnʋ, a cɩnɩɔ 'nyɩ a yɔɔ 'lɩ. 8 Na, Filipʋ yɔɔ 'cla lebhe: «-Kwlenyɔ, pala anyɩ Toa, ɩmɩ -tɛɛ -a 'matɩ 'lɛ.» 9 -Ma Zozii yɔɔ 'cla lebhe: «Filipʋ, n ya anyɩ sidiin -gwlɛlɩ. Na, -n 'ta ka -azlaan cibhlili bha? Ɔmɔa -ɔ yaan 'lɛ 'lɩ na, ɔ ya Toa 'lɩ. 'Nyɩ 'lɩsaa 'la gbʋ -n claa 'lɛ lebhe: Pala anyɩ Toa bha? 10 -N la 'ta -nʋawlɛ lebhe n -kʋ n Toa nɩkplaan 'nyɩ Toa -kʋʋn 'lɛ nɩkplaan bha? Wɔlɩa n solu 'lɛ anyɩ na, -n 'ta 'na 'wluun 'n nyɩtɛlɩ 'tɩɩ 'lɛ. -Ma Toa -ɔ -kʋʋn 'lɛ nɩkplaan na, ɔmɔ 'titi -ɔ nʋ 'lɛ ɔla lobholia. 11 Na, n cla 'lɛ anyɩ lebhe, n -kʋ Toa nɩkplaan 'nyɩ Toa -kʋʋn 'lɛ nɩkplaan na, a lɩɩ -nʋawlɛ. 'Nyɩ ka a 'tɩɩ -nʋawlɛ la 'titio na, a lɩɩ -nʋawlɛ, lobholia n nʋ na 'la gbʋ. 12 N solu anyɩ, ɩ -glɩ -nʋawlɛ, ɔmɔa -ɔ -ka 'lɛ 'na pɔɔtɛtɛ na, ɔmɔ -ma, ɔ cɩ lobholia n nʋ 'lɛ na nʋ, 'nyɩ ɩ cɩ 'dɛ 'kʋ zi, sa ka n mʋ 'lɛ Toa cɩ na. 13 Ɩmɩa -tɛtɛa a cɩ 'ka 'lɛ 'na 'ŋlɩa nɩkplaan 'clalɩ na, n cɩ 'kɩɩ nʋ ɩya 'Cʋa ka gba ɩya Toa 'la 'klʋagba 'ka -zɔnwlʋ. 14 Gbazɩ a -kaan lʋʋ 'na 'ŋlɩa nɩkplaan 'clalɩ na, n cɩ kʋʋ nʋ.

A cɩ 'ka -Kplɔkplɔ -Wugoa 'lɩ

15 A -kaan -wa na, a cɩ 'ka 'na -jlɩmaa 'kʋ 'plɩlɩ. 16 Ɩya -amʋ, n 'ka Toa bhibhie ɩya ɔ 'ka anyɩ 'kʋcinyɔ 'nyɩ ɩya ɔ 'ka anyɩ cɩ kʋ 'lʋkʋlʋkʋ ɩya 'lʋkʋlʋkʋ. 17 Ɔmɔ -ɔ -glɩ 'lɛ -nʋawlɛ -Wugoa. -Laagɔzɔan cɩ 'tʋʋ 'lɩlɩɛ mɩno -ofi lebhe -laagɔzɔan 'tʋʋ -jlɛ 'nyɩ ɩ 'tʋʋ -ci. -Ma anyɩ, a -ciu -ofi lebhe ʋ -kʋ anyɩ cɩ 'nyɩ ʋ cɩ 'ka anyɩ nɩkplaan kʋ clɩɩa 'fɩan. 18 N cɩ 'ta anyɩ kuyliin te, n cɩ 'ka anyɩ sidiin cɔlɔ. 19 Na, -ɔ -to 'pɛpɛ ɩya -laagɔzɔan 'la kanɩɩn 'lɩ. -Ma anyɩ, a cɩ 'ka 'kaan 'lɩ, -ofi lebhe n -ja ɩya anyɩ -masɛɛ a 'ka jabha. 20 'Dɛ 'la clɩɩa 'kʋ, a cɩ cibhlili lebhe n 'kʋ Toa nɩkplaan 'nyɩ a -kʋʋn 'lɛ nɩkplaan 'nyɩ -amʋ n -kʋ 'lɛ anyɩ nɩkplaan. 21 Ɔmɔa -ɔ 'plɩlɩ 'lɛ 'na -jlɩmaa 'kʋ 'nyɩ -ɔ zʋa 'lɛ sa na, ɔmɔ -glɩ 'lɛ ɔmɔa -ɔ -waan 'lɛ na. Ɔmɔa -ɔ -waan 'lɛ na, n To cɩɔ wabha. -Amʋ -ma n cɩɔ wabha 'nyɩ n cɩɔ ncɩ pala.» 22 Na, Zuda, -n 'ta Iskalɩɔtʋ -yowlia, yɔɔ 'cla lebhe: «-Kwlenyɔ, -ɔ -kaa 'lɛ 'ŋlɩ 'nyɩ -n cɩ 'ka 'lɛ anyɩ -ncɩ pala 'nyɩ -n pala 'ta 'lɛ -ncɩ -laagɔzɔan bha?» 23 -Ma Zozii yɔɔ 'cla lebhe: «Ɔmɔa -ɔ -waan 'lɛ na, ɔ cɩ 'na niwɔlɩa 'kʋ 'plɩlɩ 'nyɩ n To cɩɔ wabha. -A cɩɔ 'bhlɩ ci 'nyɩ -a cɩɔ 'kʋpla. 24 -Ma ɔmɔa -ɔ 'taan 'lɛ -wa na, ɔ 'plɩlɩ 'ta 'na niwɔlɩa 'kʋ. Wɔlɩ -naa 'ta 'na 'wluun -naanɩ -glɩ, -ma ɩ -glɩ Toa -ɔ lobhuun 'lɛ na, 'la niwɔlɩ. 25 Daa n -kʋ kaa 'lɛ anyɩ cɩ na, n ya anyɩ wɔlɩ -naa solu. 26 -Ma 'kʋcinyɔa -ɔ -glɩ 'lɛ -Kplɔkplɔ -Wugoa Toa cɩ 'ka 'lɛ anyɩ 'na 'ŋlɩa nɩkplaan tlɛlɩ na, ʋmʋ -ʋ -cɩ 'ka 'lɛ anyɩ wɔlɩa -tɛtɛa ca ɩya ʋ 'ka anyɩ wɔlɩa -tɛtɛa n solua 'lɛ anyɩ na luoli. 27 Pupue n te 'lɛ anyɩ, 'na pupuea n nyɩ 'lɛ anyɩ. N nyɩ 'tɛɛ anyɩ -laagɔzɔan 'bhisa. Pɔɔvʋ 'la bhlaa anyɩ, pɔlɛɛn 'la 'wlʋa anyɩ. 28 A yaan neen 'nu 'nyɩ n ya 'lɛ 'cla lebhe: N mʋka -ma n cɩ 'ka anyɩ sidiin cɔlɔ. A -ka -amʋa -wa na, 'na Toa 'bhlɩ mʋlɩɛa cɩ 'kaa anyɩa -pɔpʋɛ nʋ, -ofi lebhe Toa ziin 'kʋ na. 29 Ka n solu 'lɛ anyɩ wɔlɩ -naa 'fɩɔn ɩya ɩ 'ka ŋeni, ɩya daa ɩ cɩ 'ka 'lɛ ŋeni na, a 'kɩɩ -nʋawlɛ la. 30 N -ya anyɩsɔ cɩ 'tanɩ -gbɔɔn nyɩtɛ, sa 'wugo -nyunyua -ʋ -kwle 'lɛ -laagɔzɔan na, ci 'yɛpɩ. Ʋ 'taan -jioli -ylɛylɛ 'kʋ -kalɩ 'bhlɩmɔɔn, 31 -ma ɩ -fata lebhe -laagɔzɔan cibhlili sɛɛ lebhe n -wa Toa 'nyɩ saa Toa solu 'lɛ na, sɛɛ n nʋ 'lɛ. A -bho 'kʋ, -a 'wlʋ -da!»

15

A mɛɛn cɩ

1 «-Amʋ -glɩ 'lɛ -ghlɛzɛɛnbhlukpoa 'titi 'nyɩ n To -glɩ 'lɛ 'kwlaato. 2 'Labhʋa -tɛtɛa -ʋ mɛɛn 'lɛ cɩ 'nyɩ -ʋ tlʋ 'ta 'lɛ 'ca na, ka ɔ dɩʋ 'lɛ. -Ma 'labhʋa -tɛtɛa -ʋ tlʋ 'lɛ 'ca na, ka ɔ kpɔtʋʋ 'lɛ le ʋ 'ka -kplɔ ɩya ʋ 'ka -awlɛ -gbɔɔn tlʋ. 3 Na, wɔɔnyɩtʋa n solu 'lɛ anyɩ na, ʋ ya anyɩ tooto -kplɔ. 4 A mɛɛn cɩ ɩya n 'ka anyɩ cɩ mɛ! 'Labhʋa -ʋ 'ta 'lɛ 'bhlukpoa cɩ -mɛɛ na, ʋ tlʋ 'ta 'ca. 'Sɛtɛɛ bhlogbɩɩ, anyɩ -ma a 'taan cɩ -mɛɛ na, a cɩ 'ta mino ɩya a 'ka 'ca tlʋ. 5 -Amʋ -glɩ 'lɛ -ghlɛzɛɛnbhlukpoa, 'nyɩ a -glɩ 'lɛ 'labhɩa. Na, ɔmɔa -ɔ mɛɛn 'lɛ cɩ 'nyɩ n -mɛɛ 'lɛ cɩ na, 'dɛ -naanɔa cɩ 'ka 'ca -bhutukpa tlʋ, -ma a 'taan wlɩɩn -ka na, 'a cɩ 'ta lʋʋ bhlogbɩɩ nʋlɩɛ mino. 6 Ɩ -ka -kʋ le nclɔɔ 'taan cɩ -mɛɛ na, ka ma pɔɔ 'lɛ -jlukuun, 'labhʋa ma 'dɩ 'lɛ, 'nyɩ -ʋ yɛ 'lɛ na 'bhisa. 'Labhɩ -sʋsʋɔa, ka ma bhlii 'lɛ 'kʋ, ma pɩɩ 'lɛ -kosuun 'nyɩ ɩ si 'lɛ. 7 Ɩ -ka 'kʋ le a 'kaan cɩ -mɛɛ 'nyɩ 'na wɔɔnyɩtʋa -ka anyɩ nɩkplaan -kʋ na, a 'clalɩ ɩmɩa a -wa 'lɛ na, -ma a cɩɩ 'lɩ. 8 A -ka 'ca -bhutukpa tlʋ 'nyɩ a -ka 'na gɩlɩnya -glɩ na, ɩ -glɩ n To 'la 'klʋagba. 9 Saa Toa -waan 'lɛ na, 'sɛtɛɛ amʋ -ma n -wa anyɩ. Na, a kʋ 'na -walʋa nɩkplaan. 10 A ka 'na -jlɩmaa 'kʋplɩlɩ na, a cɩ 'ka 'na -walʋa nɩkplaan kʋ, saa n 'plɩlɩ 'lɛ n To 'la -jlɩmaa 'kʋ 'nyɩ n -kʋ 'lɛ ɔla -wawʋa nɩkplaan na. 11 Ka n solu 'lɛ anyɩ wɔlɩ -naa ɩya 'na pɔlɛkʋmɛnɔa 'ka anyɩ nɩkplaan kʋ ɩya ala pɔlɛkʋmɛnɔa 'la 'kʋglalɩ. 12 'Lɩka 'na -jlɩmaa: A wabhawabhalɩ lesaa n wabha 'lɛ anyɩ na. 13 -Walʋ bhlogbɩɩ 'ta 'ghli ɩya ʋ 'ka ʋmʋa -ʋ gba 'lɛ 'nyɩ nclɔɔ ŋonu 'lɛ le ɔ cɩ maa ɔ -wa 'lɛ na 'la gbʋ 'ku na, 'kʋzi. 14 A -ka ɩmɩa n 'clalɩ 'lɛ anyɩ na nʋ na, 'dɛndlana a -glɩ n 'nagwɩɛcɩ. 15 N la 'tanɩ anyɩ lobhocuo, sa lobhoco 'ta ɩmɩa ɔ toa nʋ 'lɛ naa -ci. N 'nagwɩɛcɩ n lanɩ 'lɛ anyɩ, sa ɩmɩa -tɛtɛa n 'nunu 'lɛ Toa neen na, n nyɩɩ anyɩ solu. 16 -N 'ta anyɩ -ɔ 'taan 'lɛ desla, -ma -amʋ -ɔ sla 'lɛ anyɩ de 'nyɩ n ya 'lɛ anyɩ zʋ le a 'ka mʋ, a 'ka 'ca tlʋ ɩya ala 'caa 'ka kʋ. Na, tɛtɛa 'fɩan a cɩ 'ka 'lɛ Toa 'clalɩ 'na 'ŋlɩa nɩklplaan na, ɔ cɩ 'kɩɩ anyɩ 'nyɩ. 17 -Ma ɩmɩa n 'clalɩ 'lɛ anyɩ na, ɩmɩ -glɩ 'lɛ le a wabhawabhalɩ.

-Laagɔzɔan -zɔɔ Zozii 'la gɩlɩnyaa

18 Gbazɩ -laagɔzɔan -ka anyɩ -zɔ na, a cibhlili sɛɛ lebhe -amʋ ɩ zɔbhɛlɩlɩ 'lɛ -bɛɛ. 19 Ɩ -ka -kʋ le a -kaa -laagɔzɔan 'nʋa -glɩ na, -laagɔzɔan cɩ 'kaa lʋʋa -ʋ -glɩ 'lɛ ʋ 'nʋ na wabha. -Ma a 'ta -laagɔzɔan 'nʋa -glɩ. Ka n sla 'lɛ anyɩ de lebhe a 'la 'kanɩ -laagɔzɔan 'nʋa 'plɩ. 'Lɩka wɔlɩ 'la gbʋa -laagɔzɔan -zɔ 'lɛ anyɩ na. 20 A luoli wɔlɩa n solua 'lɛ anyɩ na. Lobhoco 'ta ɔ to 'kʋzi. Na, ma yaan 'lɛ gbaylɩ -sa na, anyɩ -ma sɛɛ ma cɩ 'ka anyɩ gbaylɩ -sa. -Ma ɩ -kaa -kʋ le ma ya 'na niwɔlɩa 'kʋplɩlɩ na, anyɩ -ma ma cɩ anɩa 'kʋ 'plɩlɩmʋ. 21 -Ma 'na 'ŋlɩa 'la gbʋ, ma cɩ 'ka 'lɛ anyɩ ɩmɩ -naa 'fɩan cɩ nʋ, -ofi lebhe ma 'ta ɔmɔa -ɔ lobhuun 'lɛ na -ci. 22 Ɩ -kaa -kʋ le n 'taa ci 'nyɩ n 'taa maa solu na, mala nyinyia 'la -tobhua cɩ 'ta maa 'wlu -gbɛ, -ma -pɔtɔnʋ, ma 'tanɩ 'wluslalɩɛ -ka. 23 Ɔmɔa -ɔ -zɔɔn 'lɛ na, n To ɔ -zɔ 'lɛ. 24 Ɩ -kaa -kʋ le n 'taa lobholi -naa -buun nclɔɔ 'ta ka -azla 'lɛ nʋ, maa sidiin nʋnʋ na, mala nyinyia 'la -tobhua cɩ 'taa maa 'wlu -gbɛ. -Ma -pɔtɔnʋ, ma yanɩɩ 'ciinlɩ, -ma ma -zɔ ka -azla n -ya n To. 25 -Ma ka ɩ 'plɩ 'lɛ sɛɛ ɩya wɔlɩa -ɩ -zieo 'lɛ mala -jlɩmaa 'la -afluwaa nɩkplaan lebhe: Ma yaan 'kpɔkpɔsa zɔbhɛlɩ na, 'ka 'kʋglalɩ. 26 Daa 'kʋcinyɔa, n cɩ 'ka 'lɛ anyɩ tlɛlɩ na, cɩ 'ka 'lɛ ci na, -nʋawlɛ -Wugoa -ʋ 'wlʋlʋ 'lɛ Toa cɩ na, ʋ cɩ 'ka 'na -danʋfʋɛ li 27 ɩya anyɩ -ma sɛɛ, bhɔdaa tooto, a -kʋa -amʋa cɩ na, a 'ka 'na -danʋfʋɛ li.»

16

1 «Ka n solu 'lɛ anyɩ ɩmɩ -naa -tɛtɛa, ɩya ala pɔɔtɛtɛa 'la 'ka bhli. 2 Ma cɩ 'ka anyɩ bhibhiepalɩa -zɔn 'tli. Ɩya clɩɩ bhlo 'ka ŋeni, ɩya maa -ɔ -cɩ ka 'lɛ anyɩ 'bhla na, ma 'ka gugu lebhe, Laagɔ ma gʋgwla 'lɛ -sa. 3 Ka ma cɩ 'ka 'lɛ sɛɛ nʋ, sa ma 'ta Toa cibhlili naa, ma 'taan cibhlili. 4 -Ma ka n solu 'lɛ anyɩ ɩmɩ -naa ɩya daa mala clɩɩa cɩ 'ka 'lɛ ŋeni na, a 'ka sɛ luoli lebhe n yaa 'mɩɩ anyɩ solu.

-Kplɔkplɔ -Wugoa 'la nʋnʋlobholia

N 'ta anyɩ sɛɛ bhɔdaa solu, sa n -kʋ kaa anyɩ sidiin na. 5 -Ma -pɔtɔnʋ, ka n mʋnɩ ɔmɔa -ɔ lobhuun 'lɛ na cɩ 'nyɩ anyɩa nɩkplaan bhlogbɩɩ 'cla 'taan gbazɩa n mʋ 'lɛ 'la wɔlɩ neen. 6 -Masa cɩɩnkalɔ ya ala pɔlɩa yeli, ɩmɩ -naa solu 'lɛ anyɩ na 'la gbʋ. 7 -Ma 'bhlɩmɔɔn -nʋawlɛ n solu 'lɛ anyɩ. Ɩ nanɩ ala da lebhe n mʋ, -masa n 'ta mʋ na, 'kʋcinyɔa cɩ 'ta anyɩ 'kʋ ci. -Ma gbazɩ n -ka mʋ na, dɛ n cɩ 'kɔɔ 'lɛ anyɩ -la. 8 Na, ɔ ka ci na, ɔ cɩ 'ka -laagɔzɔan ɩla mlɔlɩɛa ɩ mlɔ nyinyi, 'kʋnylugolulɩɛ ɩya 'tɩtɩplalɩɛa 'la gbazɔ na, pala. 9 Mala nyinyia -glɩ 'lɛ lebhe ma 'ta -wabha le ma 'kaan mala pɔɔtɛtɛa 'kʋ zʋ. 10 'Kʋnylugolulɩɛa 'la gbazɔ -laagɔzɔan ya -awlɛ mlɔ, sa ka n mʋ 'lɛ Toa cɩ 'nyɩ a cɩ 'tanɩ 'lɩ na. 11 Tɩtɩplalɩa 'la gbazɔa, Laagɔ ya 'wugo -nyuynua -ʋ -kwle 'lɛ -laagɔzɔan na tooto 'gesalɩ. 12 N -ka -awlɛ wɔɔbhutukpa ɩya n 'ka anyɩa solu, -ma a cɩ 'ta ka kɩɩ mino. 13 -Ma daa -nʋawlɛɛ -Wugoa cɩ 'ka 'lɛ ci na, ʋ cɩ ka gba ɩya a 'ka -nʋawlɛa -tɛtɛa cibhlili. Sa -n 'ta ʋla 'wluun ʋ cɩ 'ta 'lɛ nyɩtɛlɩ, -ma ɩmɩa ʋ 'nu 'lɛ na, ɩmɩ ʋ cɩ 'ka 'lɛ anyɩ solu ɩya ʋ 'ka anyɩ wɔlɩa -ɩ -cɩ ka 'lɛ ŋeni na -zɔnsa. 14 Ʋ cɩ 'kaan 'klʋagba, sa 'na niwɔlɩa, ɩmɩ ʋ cɩ 'ka 'lɛ anyɩ -zɔnsa. 15 Lɩɩa -tɛtɛa Toa -ka 'lɛ na, ɩ -glɩ 'naanɩ. Na, ɩla gbʋ dɛ n 'cla 'lɛ lebhe ʋ cɩ 'ka 'na niwɔlɩa 'ma ɩya ʋ 'ka anyɩ solu.

Ala cɩɩnkalɔa cɩ 'ka pɔlɛkʋmɛnɔ kaci

16 Clɩɩklipɛ nɩkplaan, 'a cɩ 'tanɩɩn 'lɩ, ɩya clɩɩklipɛ nɩkplaan, a 'ka -awlɛɛn 'lɩ.» 17 Na, ɔla gɩlɩnyaa -anʋa 'claclalɩa neen lebhe: «Ɔ claa 'lɛ lebhe: Clɩɩklipɛ nɩkplaan, 'a cɩ 'tanɩɩn 'lɩ, ɩya clɩɩklipɛ nɩkplaan, a 'ka -awlɛɛn 'lɩ, 'nyɩ ɔ cla -awlɛ 'lɛ lebhe: N mʋ ka Toa cɩ na, wɔɔsaa ɔ na ɔ 'kaa 'lɛ nyɩtɛ bha?» 18 'Nyɩ maa claa -awlɛ lebhe: «Clɩɩklipɛa, 'nsasa ɩ sasalɩa 'lɛ -zɔn bha? -A 'nu 'ta wɔlɩa 'titia ɔ na ɔ 'ka 'lɛ nyɩtɛ na.» 19 Na, Zozii -ci 'lɛ sɛ lebhe ma 'matɩa le ma 'kaa 'mɔɔ neencla na, ɔ ya maa 'cla lebhe: «N 'cla 'lɛ anyɩ lebhe clɩɩklipɛ nɩkplaan, 'a cɩ 'tanɩɩn 'lɩ, ɩya clɩɩklipɛ nɩkplaan, a 'ka -awlɛɛn 'lɩ na, ɩla -zɔn a 'matɩ 'lɛ le a 'ka cibhlili, dɛ anyɩ bhlobhlo 'claclalɩ 'lɛ neen bha? 20 N solu anyɩ, ɩ -glɩ -nʋawlɛ, daa -laagɔzɔan cɩ 'ka 'lɛ -pɔpʋɛ nʋ na, anyɩ, a cɩ 'ka 'tu ɩya a 'ka cɩɩnkalɔɔn kʋ. A cɩ 'ka cɩɩnkalɔɔn kʋ, -ma ala cɩɩnkalɔa cɩ 'ka pɔlɛkʋmɛnɔ kaci. 21 'Ŋlɔ -kanɩ 'matɩ le ɔ 'ka valɩ na, ɔ kʋ cɩɩnkalɔɔn, -masa ɔla valɩda ya ŋeni na, -ma daa ɔ ya 'lɛ 'cileea valɩ na, ɔ bolu ɔla 'kwlɩbhɩɛa 'kʋ 'nyɩ -pɔpʋɛ bhlilio nɩkplaan, sa ɔ ya nclɔɔ 'pʋpʋa 'kʋ -la na. 22 Na, 'sɛtɛɛ bhlogbɩɩ a -kʋ 'lɛ -pɔtɔnʋ cɩɩnkalɔɔn. -Ma n cɩ 'ka -awlɛ anyɩ 'lɩ ɩya pɔlɛ 'kʋ 'ka anyɩ mɛma, ɩya pɔlɛkʋmɛnɔ -naa, nclɔɔ bhlogbɩɩ 'la kʋʋ anyɩ -salɩ. 23 Na, daa 'dɛ 'la clɩɩa cɩ 'ka 'lɛ ŋeni na, 'a cɩ 'tanɩɩn wɔlɩ -ylɛylɛ neencla. -Ghɛɛ, n solu anyɩ, ɩ -glɩ -nʋawlɛ, lʋʋa -tɛtɛa a cɩ 'ka 'lɛ Toa 'na 'ŋlɩa nɩkplaan 'clalɩ na, ɔ cɩ 'kʋʋ anyɩ 'nyɩ. 24 -Ma daa tootoa -aan -yaka, a 'ta ka -azla lʋʋ bhlogbɩɩ 'na 'ŋlɩa nɩkplaan 'clalɩ. A 'clalɩ ɩya a 'ka 'lɩ ɩya ala pɔlɛkʋmɛnɔa 'la ka 'kʋglalɩ.

Zozii ya -laagɔzɔan -sɩa

25 -Nyandla nɩkplaan n solulu 'lɛ anyɩ ɩmɩ -naa -tɛtɛa, -ma clɩɩ bhlo cɩ 'ka ŋeni ɩya n 'la kanɩ anyɩ -sa solu. -Ma n cɩ 'kanɩ anyɩ Toa 'la wɔlɩa 'kpataa solu. 26 Na, 'dɛ 'la clɩɩa 'kʋ, a cɩ 'kanɩ 'na 'ŋlɩa nɩkplaan 'clalɩ 'nyɩ n cla anyɩ lebhe 'a cɩ 'tanɩ 'matɩ lebhe n bhibhie Toa ala da, 27 sa Toa 'titi -wa anyɩ, -ofi lebhe a yaan wabha 'nyɩ a li -danʋfʋɛ le Laagɔ cɩ n 'wlʋlʋ 'lɛ. 28 Toa cɩ n 'wlʋlʋ 'lɛ 'nyɩ n ya 'lɛ -laagɔzɔan ci. -Ma -pɔtɔnʋ, ka n wlʋnɩ 'lɛ -laagɔzɔan 'nyɩ n cɔlɔ 'lɛ Toa cɩ.» 29 Na, ɔla gɩlɩnyaa yɔɔ 'cla lebhe: «'Lɩka -pɔtɔnʋ 'kakanɩ -n nyɩtɛnɩ 'lɛ 'kpataa, 'nyɩ -n nyɩtɛlɩ 'tanɩ 'lɛ -nyandla nɩkplaan. 30 -Pɔtɔnʋ, -a -cinɩ sɛɛ lebhe -n -ci wɔlɩa -tɛtɛa 'nyɩ -n 'matɩ 'tanɩ lebhe ma 'clɔɔ neen. Ɩla gbʋ, dɛ -a li 'lɛ -danʋfʋɛ lebhe -n 'wlʋlʋ Laagɔ cɩ.» 31 -Ma Zozii ya maa 'cla lebhe: «A kanɩ -pɔtɔnʋ 'na pɔɔtɛtɛ bha? 32 'Lɩka clɩɩa ci 'yɛpɩ 'nyɩ ɩ ya ŋeni ɩya a 'ka 'gu, nclɔɔ nclɔɔ 'ka ɔla da 'manɩ, ɩya a 'ka 'dɛ -amʋ bhlo te. -Ma n 'ta bhlo -glɩ, sa Toa -kʋʋn cɩ na. 33 Na, ka n solu 'lɛ anyɩ ɩmɩ -naa -tɛtɛa ɩya a 'kaan nɩkplaan pupue 'lɩlɩ. 'Kwlɩ cɩ 'ka anyɩ bhɩa -laagɔzɔan. -Ma a zʋ 'tɛtɩ, sa n ya -laagɔzɔan -sɩa na!»

17

Zozii bhibhie ɔla gɩlɩnyaa 'la da

1 Daa Zozii bhɩalɩ -sa nyɩtɛlɩɛ na, ɔ ya 'wlu 'kʋ 'bhli, ɔ ya -laagɔɔn kope 'nyɩ ɔ ya 'cla lebhe: «To, clɩɩa ya ŋeni. -Gba -naa 'Cʋa 'klʋ ɩya -naa 'Cʋa -ma 'kɔɔ 'klʋgba. 2 -N yɔɔ -jioli 'nyɩ le ɔ -kwle ncɛlɩa 'fɩan ɩya ɔ 'nyɩ maa -n 'nyɩɔ 'lɛ na, jabhʋa -ʋ -kʋ 'lɛ 'lʋkʋlʋkʋ ɩya 'lʋkʋlʋkʋ na. 3 'Nyɩ jabhʋa -ʋ -kʋ 'lɛ 'lʋkʋlʋkʋ ɩya 'lʋkʋlʋkʋ na -glɩ lebhe ma cibhlilio, -mɔ bhlogbɩɩa -ɔ -glɩ 'lɛ Laagɔ 'titi na ɩya ma cibhlili Zozi Klisi, ɔmɔa -n lobhu 'lɛ na. 4 -N yɔɔ -dʋdʋa 'kʋ 'klʋgba, n ya lobholia -n 'nyɩɩn 'lɛ nʋda na 'wluko. 5 Na, To, -mɔɔ -ma, gba ɩya n 'lɩnɩ -pɔtɔnʋ -naa 'klʋʋn, 'klʋagbaa n -kaa 'lɛ daa n -kʋa -mɔɔ 'lɛ cɩ 'fɩɔn -n ya 'lɛ -laagɔzɔan nʋ na. 6 N ya gba 'nyɩ maa -n 'manɩ 'lɛ -laagɔzɔan 'nyɩ -n 'nyɩɩn 'lɛ na, yɔɔ cibhlili. Ma -glɩa -naanʋa, -n yaan maa 'nyɩ, 'nyɩ ma ya 'lɛ -naa niwɔlɩa 'kʋ 'plɩlɩ. 7 Ma -cinɩ sɛɛ -pɔtɔnʋ lebhe ɩmɩa -tɛtɛa -n 'nyɩ 'lɛ na, 'wlʋlʋɔ wlɩɩn, 8 sa wɔlɩa -n soluun 'lɛ na, ɩmɩ n solu 'lɛ maa 'nyɩ ma yɩɩ 'ma. Ma ya sɛɛ cibhlili lebhe -zaagbʋsa n 'wlʋlʋɔ cɩ 'nyɩ -mɔɔ lobhuun 'lɛ. 9 Mala da n bhibhie 'lɛ. N bhibhie 'ta -laagɔzɔan 'la da, -ma maa n 'nyɩɩn 'lɛ na 'la da. -Nanʋa ma -glɩ 'lɛ. 10 -Tɛtɛa 'fɩan n -ka 'lɛ na, ɩ -glɩ -na 'nɩ, saa -tɛtɛa 'fɩan -n -ka 'lɛ na, ɩ -glɩ 'lɛ 'naa 'nɩ na. 'Nyɩ 'na 'klʋagba ya maa nɩkplaan -zɔnwlʋlʋ. 11 N cɩ 'tanɩ -laagɔzɔan 'kʋ. -Ma maa, ma -kʋ ka -laagɔzɔan 'nyɩ -amʋ, n mʋɔ 'lɛ 'bhlɩ. -Kplɔkplɔ To, 'lɩ maa 'klʋ -naa 'ŋlɩa -n zʋʋn 'lɛ na nɩkplaan ɩya ma 'ka bhlo 'plɩ lesaa -a -glɩ 'lɛ bhlo na. 12 Daa n -kʋ kaa 'lɛ maa cɩ na, n lɩa maa 'klʋ 'ŋlɩa -n zʋʋn 'lɛ na, nɩkplaan. N ya maa 'kʋtɩtɔlʋ 'nyɩ maa sidiin 'la bhlogbɩɩ 'ta mlɔ, -n 'ta le ɔmɔa -ɔ cɩ 'kaa 'lɛ mlɔ ɩya Zieziewɔlɩa 'ka 'kʋglalɩ na. 13 -Ma -pɔtɔnʋ, ka n mʋnɩɔ 'lɛ 'bhlɩ 'nyɩ n nyɩtɛlɩ 'lɛ wɔlɩ -naa ɩya pɔlɛkʋmɛnɔa -ʋ 'ta 'lɛ 'yʋ -ka na, ka maa nɩkplaan kʋ. 14 N ya maa -naa nɩwɔlɩa 'nyɩ, 'nyɩ -laagɔzɔan ya maa zɔbhɛlɩ, sa ma 'ta -laagɔzɔan 'nʋa -glɩ lesaa n 'ta 'lɛ -laagɔzɔan 'nɔ -glɩ na. 15 N bhibhie 'tɔɔ lebhe -n -sa maa -laagɔzɔan, -ma tlʋbhalɩ maa gɔzɛ cɩ da. 16 Ma 'ta -laagɔzɔan 'nʋa -glɩ lesaa n 'ta 'lɛ -laagɔzɔan 'nɔ -glɩ na. 17 'Plɩlɩ -nʋawlɛ ɩya -n 'bhɛlɩ maa -ncɩ, sa -naa wɔɔnyɩtʋa -glɩ 'lɛ -nʋawlɛ na. 18 N ya maa -laagɔzɔn lobhu lesaa n lobhuun 'lɛ -laagɔzɔan na. 19 Mala gbʋ n 'bhɛlɩɔ 'lɛ ncɩ ɩya maa -masɛɛ ma 'ka -zaagbʋsa -nanʋa 'plɩ. 20 N 'ta maa bhlobhlo 'la da -tɛɛ 'n bhibhie 'ta 'lɛ, -ma maa -anʋa mala -danʋfʋɛliliea 'la gbʋ, -ɔ -cɩ 'kaan 'lɛ mala pɔɔtɛtɛ 'kʋ zʋ-nʋawlɛ la na, mala da -masɛɛ. 21 'Naa maa 'fɩan 'plɩ bhlo lesaa -mɔ, n To, n -kʋʋn 'lɛ nɩkplaan 'nyɩ -amʋ -masɛɛ n -kʋɔ 'lɛ nɩkplaan na, 'naa maa -masɛɛ ma kʋmʋ anyɩ nɩklplaan ɩya -laagɔzɔan 'ka -nʋawlɛ la lebhe -mɔ lobhuun 'lɛ. 22 N ya maa 'klʋagbaa -n 'nyɩɩn 'lɛ na 'nyɩ le ma 'ka bhlo 'plɩ le saa n -yɔɔsɔ -a -glɩ 'lɛ bhlo na. 23 Ɩ sa -zɔn le n -kʋ maa nɩkplaan 'nyɩ -mɔɔ, -n -kʋʋn 'lɛ nɩkplaan. -Sa ma cɩ 'ka 'lɛ -zaagbʋsa bhlo 'plɩ ɩya -laagɔzɔan 'ka sɛɛ cibhlili lebhe -mɔ lobhuun 'lɛ 'nyɩ -n -wa maa le saa -n -waan 'lɛ na. 24 To, maa -n 'nyɩ 'lɛ na, n -wa lebhe daa n -kʋ 'lɛ na, ma kʋmʋ 'dɛ ɩya ma 'ka 'na 'klʋagbaa -n 'nyɩɩn 'lɛ na 'ciinlɩ, sa 'fɩɔn ɩya -laagɔzɔan 'ka 'lɛ -nʋɔ na, -n -waa -amʋa tooto. 25 To, -mɔɔa -ɔ -glɩ 'kʋnylugolunyɔ na, -laagɔzɔan 'tɔɔ cibhlili. -Ma -amʋ, n yɔɔ cibhlili 'nyɩ -anʋa -naa ya cibhlili lebhe -mɔ lobhuun 'lɛ. 26 N ya gba 'nyɩ ma ya -na 'ŋlɩa cibhlili 'nyɩ n cɩ 'ka gba ma 'ka -awlɩɩ cibhlili ɩya -wawʋa -n -waan 'lɛ na, 'ka maa nɩkplaan kʋ ɩya -amʋ -ma n 'ka maa nɩkplaan kʋ.»

18

Ma ya Zozii 'kʋ bhli

1 Daa Zozii bhɩalɩ 'lɛ -sa nyɩtɛlɩɛ na, ɔya ɔla gɩlɩnyaa ya 'nyidɔlʋa ma la 'lɛ Sedlɔɔn na, leen mʋ. 'Kɔɔkuo -kʋa dɩpɩa, ɔya ɔla gɩlɩnyaa yaa nɩkplaan ble. 2 Zuda, ɔmɔa -ɔ zʋa 'mɔɔ 'lɛ 'pɛlʋ na, -cia dɩpɩa da, sa ka Zozii -ya ɔla gɩlɩnyaa mʋa -azla 'yɛpɩ na. 3 Na, Zuda -ya 'sojaa 'la 'kpaa ɩya Laagɔpaakadiea 'la -bɛnyaa, -teyiyinyaa tocɩa ɩya Falizɩɛnnyaa -sa 'lɛ na, ya 'kɔkuoa kla. Ma bhɛa ylɩ, -kaniecɩ ɩya 'papalɩɩ. 4 Na, Zozii -cia 'lɛ ɩmɩa -tɛtɛa -ɩ -cɩ kaa 'mɔɔ 'lɛ ŋeni na, ɔ ya maa 'bɩɩnmʋnʋ 'nyɩ ɔ ya maa neencla lebhe: «Ncaasaa a 'matɩa 'lɛ bha?» 5 Ma yɔɔ neenŋonu lebhe: «Nazalɛtɩnyɔ Zozii.» Ɔ ya maa 'cla lebhe: «-Amʋ -kʋ 'lɛ.» Zuda, ɔmɔa -ɔ zʋa 'mɔɔ 'lɛ 'pɛlʋ na, 'nylugoa maa sidiin. 6 Na, daa Zozii 'cla 'lɛ maa lebhe: «-Amʋ -kʋ 'lɛ na», maa 'fɩan ya leenleen mʋnʋ 'nyɩ ma ya bhli. 7 'Nyɩ Zozii ya -awlɛ maa neen 'cla lebhe: «Ncaasaa a 'matɩa 'lɛ bha?» Ma yɔɔ neenŋonu lebhe: «Nazalɛtɩnyɔ Zozii» 8 Na, Zozii ya maa 'cla lebhe: «'N ya anyɩ sɛɛ tooto 'cla lebhe -amʋ -kʋ 'lɛ. Na, ɩ -ka -kʋ le -amʋ a 'matɩ 'lɛ na, 'dɛndlana a 'talɩ -anʋa -naa 'cin ɩya ma mʋ.» 9 'Lɩka -sa ɩmɩa ɔ 'bhlia 'lɛ 'kʋ na -glalɩ 'lɛ 'kʋ, daa ɔ 'claa 'lɛ lebhe: «Maa -n 'nyɩɩn 'lɛ na, n 'ta bhlogbɩɩ damlɔ.» 10 Na, Simɔɔn Pɩɛlɩ -kaa lɛtɛ. Ɔ yɛɛ ɛla tɩkpaa nɩkplaan -sa, ɔ ya -teyiyinyɔ -kpasa 'la lobhocoa 'kʋpa 'nyɩ ɔ ya ɔla 'lipasɔnyukwlia 'kʋdɩ. Lobhoco -naa, ɔmɔ ma laa 'lɛ Makusu. 11 -Ma Zozii ya Pɩɛlɩ 'cla lebhe: «Cala -naa lɛtɛa ɛla tɩkpaa nɩkplaan. -Kɔbhɛa n To 'nyɩ 'lɛ na, n cɩ 'tɛɛ 'mla bha?»

Ma ya Zozii -teyiyinyɔ Anɩ -deliin fa

12 'Sojanyaa 'la 'kpaa -ya mala -kwletoa ɩya Zifʋnyaa tocɩa 'la -bɛnyaa ya Zozii 'kʋbhli 'nyɩ ma yɔɔ gʋa. 13 -Bɛɛ, ma yɔɔ -teyiyinyɔ Anɩ -deliin fa. Ɔmɔ -naa -glɩa Kayifʋ, -ɔ -glɩa 'lɛ 'dɛ 'la lioa nɩkplaan -teyiyinyɔ -kpasaa na, ɔla 'mɩsɩa. 14 Kayifʋ -naa, ɔmɔ 'cla 'lɛ Zifʋnyaa lebhe: «Ɩ nanɩ ala da lebhe nclɔɔ bhlogbɩɩ 'ku ncɛlɩa 'fɩan 'la 'jeen.»

Pɩɛlɩ ya cɩcɛlɩ

15 Simɔɔn Pɩɛlɩ ɩya -daa gɩlɩnyɔ bhlo yaa Zozii gɩlɩ. Sa gɩlɩnyɔ -naa -cia 'lɛ -teyiyinyɔ kpasaa na, ɔya Zozii ya ɔ 'bhisleen ble. 16 -Ma Pɩɛlɩ ya -jlukuun 'sligbinea cɩ -to. Na, -daa gɩlɩnyɔa -teyiyinyɔ kpasaa -cia 'lɛ na, ya -zɔnwlʋ, ɔ ya 'ŋlɔa -ɔ -bɛa 'lɛ gbinea na solu 'nyɩ 'ŋlɔa ya Pɩɛlɩ blee. 17 Lobhoŋlɔa -ɔ -bɛa 'lɛ gbinea na, ya Pɩɛlɩ neencla lebhe: «-Mɔɔ -masɛ, -n 'ta nclɔɔ -naa 'la gɩlɩnyɔ -glɩmʋ bha?» -Ma Pɩɛlɩ yɔɔ neenŋonu lebhe: «N 'ta maa nɩkplaan kʋmʋ.» 18 Lobhocuoa ɩya Laagɔpaakadiea 'la -bɛnyaa ya -kosu -zla 'nyɩ ma wɔlɔa, sa wɔtlɩa cia na. Pɩɛlɩ -kʋmʋa maa cɩ 'nyɩ ɔ wɔlɔa -kosu.

-Teyiyinyɔ -kpasaa claa Zozii neen

19 Anɩ, -teyiyinyɔ kpasaa ya Zozii ɔla gɩlɩnyaa ɩya ɔla cacawɔlɩa 'la cɩa wɔlɩ neencla. 20 Zozii yɔɔ neenŋonu lebhe: «'Clikpoon n solulu 'lɛ ncɛlɩa 'fɩan. Bhibhiepalɩa -zɔn n calɩ 'lɛ clɩɩa 'fɩan. 'Nyɩ Laagɔpaakadiea -zɔn, daa Zifʋnyaa 'fɩan 'wlalɩ 'lɛ 'wlu na, n calɩ'ta wɔlɩ -ylɛylɛ ziziekoteen nyɩtɛlɩ. 21 Na, 'lɩsaa la gbʋ -n claan 'lɛ neen bha? Ɩmɩa n nyɩtɛ 'lɛ na, clɩɩ maa -ɔ 'nuɩ 'lɛ na neen. Ma -ci ɩmɩa n nyɩtɛ 'lɛ na wɩaan.» 22 Na, daa Zozii 'bhli 'lɛ wɔlɩ -naa 'kʋ na, -bɛnyaa nɩkplaan bhlo -ɔ -kʋa 'mɔɔ 'lɛ cɩ na, yɔɔ 'ciinsɛpɛ 'nyɩ ɔ yɔɔ 'cla lebhe: «-Sa -n solu 'lɛ -Teyiyinyɔ -kpasaa bha?» 23 -Ma Zozii yɔɔ 'cla lebhe: «Ɩ -ka 'kʋ le n ya wɔɔnyinyi nyɩtɛ na, 'maa -sɩɩ -zɔn. 'Nyɩ ɩ -ka -kʋ le 'nanɩ n nyɩtɛ 'lɛ na, 'lɩsaa 'la gbʋ -n bhlaan 'lɛ bha?» 24 Na, Zozii 'la gʋagʋa -naanɔa Anɩ 'cla 'lɛ lebhe ma fa -teyiyinyɔ kpasaa ma la 'lɛ Kayifʋ na, 'bhlɩ.

Pɩɛlɩ ya -awlɛ cɩcɛlɩ

25 'Dɛ 'la daa, Simɔɔn Pɩɛlɩ -kʋa -kosua cɩ ɔ wɔlɔa. Ma yɔɔ neencla lebhe: «-Mɔɔ -ma, -n 'ta ɔla gɩlɩnyaa nɩkplaan bhlo -glɩmʋ bha?» -Ma Pɩɛlɩ ya cɩcɛlɩ 'nyɩ ɔ ya 'cla lebhe: «N 'ta maa nɩkplaan -kʋmʋ.» 26 -Teyiyinyɔ -kpasaa 'la lobhoco bhlo, -ɔ -glɩa 'lɛ nclɔɔa Pɩɛlɩ 'dɩa 'lɛ 'nyukwlia 'kʋ na, 'la 'lɔlʋnyɔ na, yɔɔ neencla lebhe: «N 'ta -n -yɔɔsɔ 'kɔkuoa nɩkplaan 'lɩ bha?» 27 -Ma Pɩɛlɩ ya -awlɛ cɩcɛlɩ 'nyɩ dɩpɩa bhlogbɩɩ -gʋgɔ ya 'pa.

Zozii -kʋ Pilatɩ -deliin

28 Na, ma ya Zozii Kayifʋ 'bhlɩ 'ma 'nyɩ ma yɔɔ goonvlaa 'bhisleen fa. Ɩ -glɩanɩa -zʋkpasa 'pɩɩ. -Ma Zifʋnyaa tocɩa 'ta goonvlaa 'la 'slea nɩkplaan blemʋ, sa ma -waa le ma 'kaa cɩkplɔ ɩya ma 'kaa geyliinwlʋfɛtlɩa lilɩɛ mino. 29 Na, Pilatɩ, -ɔ -glɩa 'lɛ goonvla na, ya maa -jlukuun ŋeni 'nyɩ ɔ ya maa neen 'cla lebhe: «Wɔɔnyinisaa a gɩa 'lɛ nclɔɔ -naa 'kʋ bha?» 30 Ma yɔɔ neenŋonu lebhe: «Ɩ -ka -kʋ le nclɔɔ -naa 'ta wɔɔnyinyi nʋ na, -a cɩa -mɔɔ mɔ -la bha?» 31 Na, Pilatɩ ya maa 'cla lebhe: «A 'mɔɔ ɩya a 'plɩlɩ anyɩ 'titi ala -jlɩmaa 'kʋ ɩya -pla ɔla 'tɩtɩa.» -Ma, ma yɔɔ 'cla lebhe: «-A 'ta -jioli -ka ɩya -a ka nclɔɔ 'bhla.» 32 'Lɩka -sa wɔlɩa Zozii nyɩtɛa 'lɛ le ɔ 'kaa saa ɔ cɩ 'kaa 'lɛ 'kukulu na, pala na, -glalɩ 'lɛ 'kʋ. 33 Na, Pilatɩ ya ɔla -palʋ -zɔn ble, ɔ ya gba ma ya Zozii la, 'nyɩ ɔ yɔɔ neen 'cla lebhe: «-Mɔ -glɩ 'lɛ Zifʋnyaa 'la nyɩbhɛlʋa bha?» 34 Zozii yɔɔ 'cla lebhe: «-Naa 'wluun n nyɩtɛlɩ 'lɛ ɩmɩ -naa bha -ma ka -buun ncɛlɩ soluo 'lɛ 'na wɔlɩ, dɛ -n gugu 'lɛ sɛɛ bha?» 35 -Ma Pilatɩ yɔɔ neenŋonu lebhe: «-Amʋ, Zifʋnyɔ n -glɩ bha? -N 'bhlɩnya 'titi ɩya -teyiyinya kpasɩaa -sɔɔ 'lɛ 'nyɩ -ɔ yaan 'lɛ 'nyɩ. Na, wɔɔsaa -n nʋa 'lɛ bha?» 36 Zozii yɔɔ neenŋonu lebhe: «'Na Nyɩbhɛlɩdua 'ta -dʋdʋ -naa 'kʋ -naanʋ -glɩ. Ɩ -kaa -kʋ le 'na Nyɩbhɛlɩdua -kaa -dʋdʋ -naa 'kʋ -naanʋ -glɩa na, 'na lobhocuoa cɩ 'kaa 'na da vʋ ɩya ncɛlɩ 'la kaa -amʋa Zifʋnyaa tocɩa wlɩɩnzʋlɩɛ mɩno. -Ma 'na Nyɩbhɛlɩdua 'ta -wɔlʋ -naanʋ -glɩ.» 37 Na, Pilatɩ yɔɔ neencla lebhe: «Na, nyɩbhɛlʋ -n -glɩ 'lɛ -na!» Zozii yɔɔ neenŋonu lebhe: «Ɩmɩ -n bhli 'lɛ 'kʋ: Nyɩbhɛlʋ n -glɩ 'lɛ. Ka ma valɩɩn 'lɛ 'nyɩ n ya 'lɛ -laagɔzɔan ci le n 'ka -nʋawlɛ 'la cɩa wɔlɩ nyɩtɛ. Na, ncaatʋtʋʋntʋa -ɔ -glɩ 'lɛ -nʋawlɛɛnyɔ na, 'plɩlɩ ɩmɩa n nyɩtɛ 'lɛ na 'kʋ.» 38 Na, Pilatɩ yɔɔ neen 'cla lebhe: «'Lɩsaa ma laa 'lɛ -nʋawlɛ bha?»

Ma ya Zozii 'la 'bhlawɔlɩ kpo 'kʋ zʋ

Daa Pilatɩ nyɩtɛ 'lɛ wɔlɩ -naa na, ɔ ya -awlɛ mʋ, ɔ ya Zifʋnyaa -jlukuun ŋeni 'nyɩ ɔ ya maa 'cla lebhe: «'N 'lɩ 'ta wɔlɩa 'wluku 'titia n cɩ 'ka 'lɛ 'cla le ma 'bhla nclɔɔ -naa na. 39 -Ma saa n 'talɩa -azla 'lɛ -palʋʋnpapanyɔ bhlo 'cin ala geyliinwlʋfɛtlɩa 'kʋ 'nyɩ n nyɩ 'lɛ anyɩ na, a -wa lebhe n 'talɩ Zifʋnyaa 'la nyɩbhɛlʋa 'cin, n 'nyɩ anyɩ bha?» 40 Ma yaan -gaa 'nyɩ ma yɔɔ 'cla lebhe: «-N 'ta ɔmɔ, -ma Balabasɩ -a -wa 'lɛ.» -Ma Balabasɩ -naa -glɩa -bhɩakpanyɔ.

19

1 Na, Pilatɩ ya gba ma ya Zozii famʋ 'nyɩ ma yɔɔ -ngblieen bhutili. 2 'Sojanyaa ya 'ŋwu glipie ca, ma yɔɔ 'wlu zʋ 'nyɩ ma yɔɔ lokwi -zalɛ nɩkplaan -pla. 3 Ma yɔɔ cɩ mɛ 'nyɩ ma yɔɔ 'claa lebhe: «-Ayoka, Zifʋnya 'la nyɩbhɛlʋ!» 'Nyɩ ma yɔɔ 'ciinsɛpɛlɩɛ bhɔ. 4 Pilatɩ ya -awlɛ -zɔnwlʋ 'nyɩ ɔ ya Zifʋnyaa 'cla lebhe: «A poon 'nyukwliin! N cɩ 'ka gba ma 'kɔɔ anyɩ -da -jlukuun -la ɩya a 'ka sɛɛ cibhlili lebhe n 'lɩ 'ta wɔlɩa 'la gbʋa n cɩ 'lɛ nclɔɔ -naa 'bhla na.» 5 Na, Zozii ya -zɔnwlʋ. Ɔ -zʋa 'ŋuglipiea 'wlu 'nyɩ ɔ -plaa lokwi -zalɛa nɩkplaan. Pilatɩ ya maa 'cla lebhe: «'Lɩka nclɔɔa!» 6 -Ma daa -teyiyinyaa tocɩa ɩya mala -bɛnyaa 'lɩɔ 'lɛ na, ma ya 'kasɛ 'palɩɛ bhɔ 'nyɩ ma claa lebhe: «Bhoo dabhlalɩsu 'ciin! Bhoo dabhlalɩsu 'ciin!» -Ma Pilatɩ ya maa 'cla lebhe: «Anyɩ 'titi a 'mɔɔ ɩya a bhoo dabhlalɩsua 'ciin, -masa -amʋ, 'n 'lɩ 'ta wɔlɩa 'la gbʋa n 'kɔɔ 'lɛ 'bhla na.» 7 Zifʋnyaa yɔɔ 'cla lebhe: «-Anyɩ, -a -ka -ala -jlɩmaa bhlo. -Jlɩmaa -naa cla lebhe ɩ -fata lebhe ɔ 'ku, -ofi lebhe ɔ ya 'cla lebhe ɔ -glɩ Laagɔ 'la 'Cʋ na.» 8 Daa Pilatɩ 'nu 'lɛ wɔlɩ -naa na, ɔla ŋanɔa ya 'kʋzʋlʋ. 9 Ɔ ya ɔla -palʋa -zɔn ble 'nyɩ ɔ ya Zozii neencla lebhe: «'Ndagbazɩ -n 'wlʋlʋa 'lɛ bha?» -Ma Zozii 'tɔɔ nesalɩ. 10 Na, Pilatɩ yɔɔ 'cla lebhe: «-N 'ta -wa lebhe -n kaan neenŋonu bha? -N 'ta sɛɛ -ci lebhe n cɩ -jioli 'nyɩ le ma 'talɩɔ 'cin -aana ma bhoo dabhlalɩsu 'ciin bha?» 11 -Ma Zozii yɔɔ neenŋonu lebhe: «-N 'ta -jioli bhlogbɩɩ 'kʋ kalɩ -n 'ta le ɩmɩa -ɩ 'wlʋlʋ 'lɛ -laagɔɔn 'nyɩ ma 'nyɩɔ 'lɛ naa. Ɩla gbʋ, nclɔɔa -ɔ -zʋlʋ 'lɛ -mɔ wlɩɩn 'pɛlʋ na, ɔla nyinyia 'ghli ɩ zi -nanɩa 'kʋ.» 12 Na, -ɩ bhɔlʋ 'lɛ dɩpɩa na, Pilatɩ 'matɩa saa ɔ cɩ 'kaa 'lɛ nʋnʋnʋ ɩya ɔ 'ka Zozii 'cintalɩ na, -ma Zifʋnyaa ya nɩkplaan -gaalɩɛ bhɔ 'nyɩ ma claa lebhe: «Gbazɩ -n -ka nclɔɔ -naa 'cintalɩ na, 'dɛndlana -n 'ta nyɩbhɛlʋ Sezalɩ 'nagɔ -glɩ! -Masa ncaatʋtʋʋntʋa -ɔ la 'lɛ ɔcɩ nyɩbhɛlʋ na, -glɩ Sezalɩ 'la -zɔbhɛlɩgbanyɔ!» 13 Daa Pilatɩ 'nu 'lɛ wɔlɩ -naa na, ɔ ya gba ma ya Zozii -zɔnwlaa 'nyɩ ɔ ya ɔla tɩtɩplakpoa 'kʋ 'plɩ ɔ ya sakʋ, daa ma la 'lɛ cɔkʋkplua 'nyɩ ma la 'lɛ Ebleewɔlɩɩn Gabataa na. 14 Ɩ -glɩa geyliinwlʋfɛtlɩa 'la bhɔsʋaclɩɩ. Dɩdɩ yaanɩa slo. Pilatɩ ya Zifʋnyaa 'cla lebhe: «'Lɩka ala nyɩbhɛlʋa!» 15 -Ma ma ya nɩkpaan -gaalɩɛ bhɔ 'nyɩ ma claa lebhe: «'Maa 'bhlɔɔ! 'Maa 'bhlɔɔ! Bhoo dabhlalɩsu 'ciin!» Pilatɩ ya -awlɛ maa neencla lebhe: «N bho ala nyɩbhɛlʋa dabhlalɩsu 'ciin bha?» Zifʋnyaa tocɩa yɔɔ neenŋonu lebhe: «-Anyɩ, -a 'ta -buun nyɩbhɛlʋ -ka, ɩ -ka -kʋ le -n 'ta Sezalɩ na.» 16 Na, Pilatɩ ya maa Zozii 'nyɩnɩ le ma 'kɔɔ dabhlalɩsua 'ciin bho.

Ma ya Zozii dabhlalɩsua 'ciin bho

17 Ma ya Zozii 'ma 'nyɩ ma yɔɔ ɔmɔ 'titi ɔla dabhlalɩsua bhɛda 'nyɩ. 'Nyɩ ma -yɔɔsɔ ya daa ma 'lɛ 'wlukoklo 'la da 'nyɩ ma la 'lɛ Ebleewɔlɩɩn Gɔlʋgotaa na, mʋ. 18 Dɩpɩa ma bholuo 'lɛ dabhlalɩsua 'ciin ɔya -buun ncɛlɩ -mɔsɔ. Bhlo 'lipasɔ 'kʋ ɩya bhlo 'daba 'kʋ 'nyɩ Zozii -kʋ 'lɛ sidiian. 19 Pilatɩ ya gba 'nyɩ ma ya kpluukpaakpʋ 'kʋ zie 'nyɩ ma yʋʋ dabhlalɩsua 'kʋ bho. Ʋ -zieoa kʋ lebhe: «Nazalɛtɩnyɔ Zozii, Zifʋnya 'la nyɩbhɛlʋ». 20 Daa ma bholu 'lɛ Zozii dabhlalɩsua 'ciin ɩya 'dua 'taa 'lɛ cɩ da tlʋtlʋlʋ, 'nyɩ kpluukpakpʋa 'kʋ 'la wɔlɩa -zielioa 'lɛ Ebleewɔlɩɩn, Wlɔmʋwɔlɩɩn ɩya Glɛkɩwɔlɩɩn na, Zifʋnya -bhutukpa yɩɩ zɛlɩ. 21 Na, Zifʋnyaa 'la -teyiyinya kpasɩaa ya Pilatɩ 'cla lebhe: «-Naa ziea Zifʋnya 'la nyɩbhɛlʋ, -ma 'maa zie lebhe: Ɔmɔ -naa nabhe ɔ -glɩ Zifʋnya 'la nyɩbhɛlʋ.» 22 -Ma Pilatɩ ya maa 'cla lebhe: «Ɩmɩa n ya 'lɛ zie na, ɩ ya -zieo.» 23 Daa 'sojaa bhɩalɩ 'lɛ Zozii dabhlalɩsua 'ciin bholɩɛ na, ma ya ɔla lokua 'ma 'nyɩ ma yɩɩ 'ci -nmɔɔnaan poli, nclɔɔ nclɔɔ 'la 'ce. -Ɔ -tonɩa 'bubua: Lokukli -totobhuo ma mɛmɛnɩ 'lɛ cɩ, ma ya 'lɛ 'wlu 'kʋ bhɔlʋ ma ya 'lɛ kpla -aan 'nyɩ ma ya 'lɛ gozɔn ŋeni. 24 Na, 'sojaa ya macɩ 'cla lebhe: «-A 'la 'ŋatɩɛ, -ma -a kɛɛ -nigbe cɩ 'pa ɩya a ka nclɔɔa -ɔ -kɛɛ 'lɛ 'ma na, cibhlili.» Na, 'lɩka saa Zieziewɔlɩa -glalɩ 'lɛ 'kʋ, -ɩ cla 'lɛ lebhe: «Ma ya 'na lokua macɩ poli. 'Nyɩ ma ya 'na 'kʋtaan -lokwia -nigbe cɩ 'pa.» 'Lɩka ɩmɩa 'sojaa nʋ 'lɛ na. 25 Zozii 'nɔ, ɔ 'nɔ mɛnɔ Malii, Klopasɩ nʋŋlɔ ɩya Malii Madala ŋlɔa 'nylugoa Zozii 'la dabhlalɩsua cɩ. 26 Na, daa Zozii 'lɩ 'lɛ ɔ 'nɔ 'nyɩ ɔ 'lɩ 'lɛ gɩlɩnyɔa ɔ -waa 'lɛ na, ɔ 'nɔ cɩ na, ɔ ya ɔ 'nɔ 'cla lebhe: «'N 'nɔ, 'lɩka -naa 'cʋ.» 27 'Nyɩ ɔ ya 'lɛ gɩlɩnyɔa 'cla lebhe: «'Lɩka -n 'nɔ.» Na, 'dɛ 'la clɩɩa bhlogbɩɩ 'kʋ, gɩlɩnyɔa yɔɔ 'sleen famʋ.

Zozii ya 'ku

28 Daa wɔlɩ -naa 'plɩ 'lɛ na, Zozii ya sɛɛ cibhlili lebhe wɔlɩa -tɛtɛa yaa 'wluko, -ma Zieziewɔlɩa 'ka 'lɛ 'kʋglalɩ na, ɔ ya 'cla lebhe: «'Nyutʋ bhlaan.» 29 'Nyukonde -kʋa dɩpɩa 'nyɩ a yea -diinvɛɛn -nyinye 'ku. Na, 'sojaa ya -vada 'ma, ma yaa sua ma la 'lɛ -izɔpʋ na 'la 'labhʋ 'ciingʋalɩ, ma yaa -diinvɛɛn -nyinyea nɩkplaan 'ŋwa 'nyɩ ma yɔɔ ma nea 'kʋ 'takalɩ. 30 Na, daa -diinvɛɛn -nyinyea mʋɔ 'lɛ neen 'nyɩ ɔ 'mla 'lɛ na, ɔ ya 'cla lebhe: «Wɔlɩa -tɛtɛa ya 'wluko!» Ɔ ya 'wlu -dʋdʋ 'kʋ -la 'nyɩ ɔ ya 'klʋsa.

'Sojanyɔ bhlo ya Zozii 'la gbakɩa 'fiti

31 'Dɛ 'la clɩɩa -glɩa 'lɛ clɩɩa nyɔkwɛclɩɩa gɩa 'lɛ 'kʋ, 'nyɩ 'dɛ la nyɔkwɛclɩɩa bhlilia 'lɛ 'fɛtlɩclɩɩ 'kadie 'kʋ na, Zifʋnyaa 'ta -wabha lebhe -blaanyɛkɛa -toa dabhlalɩsua 'ciin. Na, ma ya Pilatɩ 'cla lebhe ɔ gba ɩya ma 'kɔtɔ ncɛlɩa ma bho 'lɛ dabhlalɩsia 'ciin na 'la bhɩa ɩya ma -sa maa sia 'ciin. 32 Na, 'sojanyaa ya mʋ. Ma ya -bɛka nclɔɔa 'la bhɩa 'kɔtɔ ɩya -mɔsɔ -naanɔa ma bhoa 'lɛ ma -yɔɔsɔ nebhlo dabhlalɩsia 'ciin na. 33 -Ma daa ma ŋeni 'lɛ Zozii 'kʋ na, ma ya 'lɩ lebhe ɔ yaa tooto 'ku. Ɩ ya gba na, ma 'ta ɔ 'nɩa 'kɔtɔmʋ. 34 -Ma 'sojanyaa nɩkplaan bhlo ya li 'ma 'nyɩ ɔ ya ɔla gbakie 'fiti 'nyɩ -dolu ɩya 'nyu ya 'yɛpɩ 'wlʋ. 35 Ɔmɔa -ɔ 'lɩ 'lɛ wɔlɩ -naa 'ciin na, ɔmɔ -ɔ li 'lɛ ɩla -danʋfʋɛ, 'nyɩ ɔla -danʋfʋɛliliea -glɩ -nʋawlɛ. 'Nyɩ ɔ -ci sɛɛ lebhe ɩmɩa ɔ bhli 'lɛ 'kʋ na, -glɩ -nʋawlɛ ɩya anyɩ -ma sɛɛ, a 'ka pɔɔtɛtɛ 'lɩ. 36 Ka ɩmɩ -naa 'fɩan 'plɩ 'lɛ -sa ɩya Zieziewɔlɩa 'la wɔɔklea -naa 'ka 'kʋglalɩ, -ama -a cla 'lɛ lebhe: «'Ma cɩ 'ta ɔla 'kwie bhlogbɩɩ 'kɔtɔ na.» 37 Wɔɔkle bhlo cla -awlɛ lebhe: «Ɔmɔa ma bho 'lɛ 'lia na, ɔmɔ ma cɩ 'ka 'lɛ 'ciinkope.»

Ma ya Zozii lesuun zʋ

38 Ma laa nclɔɔ bhlo Zozɛfʋ, ɔ -glɩa 'dua ma 'lɛ Alimatee na 'kʋ 'la nclɔɔ. Ɔ -glɩa Zozii 'la gɩlɩnyɔ -ma -ɔ ziziea 'mɩɩ -ofi lebhe ɔ 'gulua Zifʋnyaa tocɩa. Na, daa wɔlɩ -naa 'fɩan 'plɩ 'lɛ na, ɔ ya Pilatɩ -jioli 'clalɩ lebhe ɔ 'ka Zozii 'la -blaanyɛkɛa dɩpɩa -sa. Pilatɩ ya ŋonu 'nyɩ ɔ ya 'dɛ 'nyɛkɛa -sa. 39 Nikodɛmʋ, nclɔɔ -naa -ɔ mʋwaa 'lɛ Zozii dobhesa 'ciinlɩkan na, ɔmɔ -masɛɛ ɔ ya ci. Ɔ ya -pitia ma 'lɛ 'mili na ɩya ɩmɩa ma la 'lɛ -alowɛsɩ na 'cakalɩ 'nyɩ ɔ ya -lamʋ. Ɩ cɩa -sa -kiloo -glʋʋ ɩya 'kʋgba 'wlʋ. 40 Ncɛlɩ 'naa -mɔsɔa ya Zozii 'la -blaanyɛkɛa 'ma. Ma ya 'ŋɔnɔpalɩɩ lokupɛlɩ cɩ 'moni 'nyɩ ma yɩɩ 'ma, ma yɔɔ cɩ gʋa, saa Zifʋnyaa zizie -azla 'lɛ mala 'kuo na. 41 Daa ma bholua 'lɛ Zozii dabhlalɩsua 'ciin na, 'kɔkuo mɛa 'dɛ cɩ. Lesua -kʋa 'kɔkuoa nɩkplaan, ma 'ta ka -azlʋʋ nclɔɔ nɩkplaan zizie. 42 Na, sa Zifʋnyaa 'la nyɔkwɛclɩɩa mʋanɩa 'lɛ ŋenikan na, 'nyɩ lesua mɛa 'lɛ 'dɛ cɩ na, ma yʋʋ nɩkplaan Zozii zʋ.

20

Zozii ya lesua nɩkplaan 'wlʋ

1 Nyamaclɩɩ -zʋkpaa 'pɩɩ, daa daa -plaa ka ka 'lɛ 'tutu na, Malii Madalaaŋlɔa ya lesua 'kʋ mʋ, 'nyɩ ɔ ya 'lɩ lebhe ma ya cokwiea lesua ne 'kʋ -sa. 2 Ɔ ya sɔmɩ fa, ɔ ya Simɔɔn Pɩɛlɩ ɩya -daa gɩlɩnyɔa Zozii -waa 'lɛ -gbɔɔn na ŋeni, 'nyɩ ɔ ya maa 'cla lebhe: «Ma ya -Kwlenyɔa lesua nɩkplaan -sa 'nyɩ -a 'ta daa ma zʋlʋɔ 'lɛ na -ci.» 3 Na, Pɩɛlɩ ɩya -daa gɩlɩnyɔa ya 'plɩ 'nyɩ ma ya lesua 'kʋ mʋ. 4 Maa -mɔsɔa faa sɔmɩ -ma -daa gɩlɩnyɔa ya ylɩbhalɩ ɔ ya Pɩɛlɩ 'kʋ zi 'nyɩ ɔ ya lesua 'kʋ -bɛɛ ŋenini. 5 Ɔ ya sakwlili 'nyɩ ɔ ya lokupɛlɩa -dʋdʋa 'kʋ 'lɩ. -Ma ɔ 'ta ble. 6 Simɔɔn Pɩɛlɩ -ɔ gɩa 'mɔɔ 'lɛ 'kʋ na, ɔmɔ -ma -ɔ ya ŋeni. Ɔ ya lesua nɩkplaan ble 'nyɩ ɔ ya lokupɛlɩa -dʋdʋa 'kʋ 'lɩ 7 ɩya -awlɛ lokwia ma -wɔlɩa 'lɛ Zozii 'wlu 'kʋ na. Lokwi -naa ɩya lokupɛlɩa 'taa dabhlo -kʋ -ma ɛ -kʋa ɛcɩɩn -buun da. 8 Na, -daa gɩlɩnyɔa -ma, ɔmɔa -ɔ ŋeninia 'lɛ lesua 'kʋ -bɛɛ na, ya ble. Ɔla 'ci ya 'lɩ 'nyɩ ɔ ya -nʋawlɛ la. 9 'Bhlɩmɔɔn ma 'ta ka ka 'dɛ 'la daa Zieziewɔlɩa -ɩ cla 'lɛ Zozii cɩ 'ka 'kwɩɩn 'kʋ -bho na, 'la -zɔn 'nu. 10 Ɩla leen, gɩlɩnyaa -mɔsɔa ya 'plɩ 'nyɩ ma ya 'sleen mʋ.

Zozii ya Madalaaŋlɔ Malii 'ciinfutolu

11 Malii -kʋa -jlukuun lesua cɩ 'nyɩ ɔ tua. Na, daa ɔ -kʋa 'lɛ 'tuda na, ɔ ya sakwlili le ɔ 'ka lesua nɩkplaan kope. 12 Ɔ ya 'bhlaandleecɩ -mɔsɔ 'lɩ. Ma -plaa loku 'pɔpʋ nɩkplaan 'nyɩ ma -kʋa da ma zʋa 'lɛ Zozii 'la -blaanyɛkɛa na sa. Bhlo -kʋa 'wlua 'la daa 'nyɩ bhlo -kʋa 'lɛ bhɩa 'la daa. 13 'Bhlaandleecɩa yɔɔ neencla lebhe: «'Ŋlɔ, 'lɩsaa 'la gbʋ -n tua 'lɛ bha?» Ɔ ya maa neenŋonu lebhe: «Ma ya 'na -Kwlenyɔa famʋ 'nyɩ n 'ta daa ma zʋlʋɔ 'lɛ na -ci.» 14 Ɔ -kʋ 'lɛ nyɩtɛda na, ɔ ya kwlacala 'nyɩ ɔ ya Zozii 'lɩ, -ma ɔ 'ta sɛɛ cibhlili lebhe ɔmɔ. 15 Zozii yɔɔ neencla lebhe: «'Ŋlɔ, 'lɩsaa 'la gbʋ -n tua 'lɛ bha? Ncaasaa -n 'matɩa 'lɛ bha?» -Ma Malii ya gugu lebhe 'kɔkuoa 'la -bɛnyɔa -kʋa 'lɛ 'dɛ. Na ɔ yɔɔ 'cla lebhe: «-A to, ɩ -ka -kʋ le -mɔ -ka ɔla -blaanyɛkɛa famʋ na, palaan daa -n zʋlʋɛ 'lɛ na ɩya n 'kɛɛ 'ma -kaan mʋ.» 16 Zozii yɔɔ 'cla lebhe: «Malii!» Ɔ yɔɔ 'klʋtla 'nyɩ ɔ yɔɔ Ebleewɔlɩɩn 'cla lebhe: «-Ghlabunii!» Ɩ sa -zɔn le canyɔ. 17 Zozii yɔɔ 'cla lebhe: «-Naa klaa kaan cɩ, sa n 'ta ka toa 'bhlɩ -gblaa na. -Ma mʋ -n solu n bholiecɩa lebhe n -gblaa ka n To, -ɔ -glɩ 'lɛ anyɩ -ma a to na 'bhlɩɩ, 'na Laagɔ -ɔ -glɩ 'lɛ anyɩ -ma ala Laagɔ na 'bhlɩ.» 18 Na, Madalaaŋlɔ Malii ya gɩlɩnyaa 'bhlɩ mʋ 'nyɩ ɔ ya maa 'cla lebhe: «N ya -Kwlenyɔa 'lɩ!» 'Nyɩ ɔ ya maa ɩmɩa Zozii solua 'mɔɔ 'lɛ na 'dɩ 'kʋ -salɩ.

Zozii ya gɩlɩnyaa 'ciinfutolu

19 Clɩɩ -naa bhlogbɩɩa -ɩ -glɩa 'lɛ nyamaclɩɩ -ylʋvaa na, gɩlɩnyaa yaa -palʋ bhlo -zɔn 'wluwlalɩ. Ma ya gbinia 'safɛɛn tʋlʋ, sa ma 'gulua Zifʋnyaa tocɩa na. Zozii ya ci, ɔ ya maa sidiin 'plɩ 'nyɩ ɔ ya 'nylugo. 'Nyɩ ɔ ya maa 'cla lebhe: «Pupue kʋ anyɩ 'kʋ!» 20 Daa ɔ -kʋa 'lɛ nyɩtɛda na, ɔ ya maa ɔla -kɔgbʋa ɩya ɔla gbakɩa pala. Gɩlɩnyaa cibhlili 'lɛ le -Kwlenyɔa -ɔ -kʋ 'lɛ 'dɛ na, pɔlɛkʋmɛnɔ ya maa yeli. 21 Zozii ya -awlɛ maa 'cla lebhe: «Pupue kʋ anyɩ 'kʋ. Saa Toa lobhuun na, -amʋ -masɛɛ n lobhu anyɩ!» 22 Ɔ nyɩtɛ 'lɛ -sa na, ɔ ya maa nyɔmʋ 'kʋ 'pa 'nyɩ ɔ ya maa 'cla lebhe: «-Kplɔkplɔ -Wugoa kʋ anyɩ 'kʋ!» 23 'Nyɩ ɔ ya -awlɛ maa 'cla lebhe: «Maa a cɩ 'ka 'lɛ mala nyinyia va na, ɩ cɩ maa 'ka -vɔɔ. Maa a cɩ 'ta 'lɛ mala nyinyia va na, ɩ cɩ 'ta maa -vɔɔ.»

Zozii ya ɔcɩ Tomaa pala

24 Tomaa, 'kʋgba -mɔsɔa nɩkplaan bhlo, ma la 'lɛ daplɩcoa na, 'taa dɩpɩa -kʋ, daa Zozii pala 'lɛ ɔcɩ ɔla gɩlɩnyaa na. 25 Na, -daa gɩlɩnyaa yɔɔ 'cla lebhe: «-A ya -Kwlenyɔa 'lɩ.» -Ma Tomaa ya maa 'cla lebhe: «Ɩ -ka -kʋ lebhe n 'ta ɔla -kɔgbʋa nɩkplaan gblɔlɩa 'la 'kpafɩa 'lɩ, ɩya n 'ka 'na -wlɩciea 'ma, n 'ka gblɔlɩa 'la 'kpafɩa ko ɩya n ka 'na sɔa ɔla gbakiea nɩkplaan fa na, 'n cɩ 'ta ala wɔlɩ -nʋawlɛ la -ylɛylɛ.» 26 Nyamaclɩɩa 'cɩlɩ 'lɛ 'kʋ na, Zozii 'la gɩlɩnyaa ya -awlɛ -palʋa -zɔn 'wluwlalɩ. Tomaa -kʋmʋnɩa 'dɛ. Gbinia -tʋlʋa 'safɛɛn, -ma Zozii ya ci, ɔ ya maa sidiin 'nylugo 'nyɩ ɔ ya maa 'cla lebhe: «Pupue kʋ anyɩ 'kʋ!» 27 'Nyɩ ɔ ya Tomaa 'cla lebhe: «Zʋ -da -naa -wliciea ɩya kope 'na -kɔgbʋa. -Glɔɔ -naa sɔa nɩkplaan ɩya -n fʋʋ 'na gbakiea nɩkplaan. -Naa -saanɩ gbɩ -zɔn, -ma 'maa kalɩ pɔɔtɛtɛ!» 28 Tomaa yɔɔ 'cla lebhe: «'Na -Kwlenyɔ ɩya 'na Laagɔ.» 29 Zozii yɔɔ 'cla lebhe: «Sa -n yanɩɩn 'lɛ 'lɩ na, -n -kanɩ pɔɔtɛtɛ! -Ma maa -ɔ 'lɩ 'lɛ 'nyɩ -ɔ -ka 'lɛ pɔɔtɛtɛ na, ma -kʋ 'nanɩ.» 30 Zozii ya -awlɛ ɔla gɩlɩnyaa 'ci 'ku 'ciinzizielɩlobholi -bhutukpa nʋnʋ, -ɩ 'ta 'lɛ -afluwaa -naa nɩkplaan -kʋ na. 31 -Ma ɩmɩa -ɩ -kʋ 'lɛ -afluwaa -naa nɩkplaan na, ka ɩ -zieo 'lɛ 'yɛpɩ lebhe a 'ka -nʋawlɛ la lebhe Zozii -glɩ 'lɛ Laagɔ 'la -Sasanyɔa, Laagɔ 'la 'Cʋa ɩya a -kɔɔ ala pɔɔtɛtɛa 'kʋ zʋ na, a 'ka ɔla 'ŋlɩa nɩkplaan, jabhʋa 'lɩlɩ.

21

Zozii ya gɩlɩnyaa -ngbɔɔsɔa 'ciinfutolu

1 Ɩmɩ -naa 'la leen, Zozii ya -awlɛ ɔcɩ gɩlɩnyaa pala, Tibeliadɩ 'la 'nyɩa cɩ. 'Lɩka saa ɔ palapalalɩ 'lɛ maa ɔcɩ na. 2 Simɔɔn Pɩɛlɩ, Tomaa ma la 'lɛ daplɩcoa na, Natanayɛlɩ -ɔ 'wlʋlʋ 'lɛ Galileebhlɩa 'kʋ 'la 'dua ma la 'lɛ Kanaa 'kʋ na, Zebedee 'la 'cuoa ɩya -daa gɩlɩnya -mɔsɔ, -kʋa nebhlo. 3 Simɔɔn Pɩɛlɩ ya maa 'cla lebhe: «N mʋ ka 'nyɩ 'kʋtaan.» Ma yɔɔ 'cla lebhe: «Ka -ayɔɔsɔ mʋ 'lɛ.» 'Nyɩ, ma ya 'kʋbho, ma ya gɔlʋa nɩkplaan 'tɔ 'nyɩ ma ya mʋ. -Ma 'dɛ 'la dobhea ma 'taa lʋʋ -ylɛylɛ 'lɩ. 4 Na, daa -zeli mʋ 'lɛ zekan na, Zozii -kʋa 'nyia cɩ. -Ma gɩlɩnyaa 'taa sɛɛ -ci lebhe ɔmɔ -kʋa 'lɛ 'dɛ. 5 Zozii ya maa neencla lebhe: «'Naa 'cuonyɩ, a 'ta -zlii pɛ -ka bha?» -Ma yɔɔ neenŋonu lebhe: «-Wɔɔ!» 6 Na, ɔ ya maa 'cla lebhe: «A 'palɩ -dadaa gɔlʋa 'la 'lipasɔa 'kʋ ɩya 'ka -zlii 'kʋbhli.» Ma ya -dadaa 'pa 'nyɩ saa 'tɩtɩa -zliia ma bhli 'lɛ 'kʋ na, ɩ -zua 'lɛ na, maa mino 'taanɩa ɩya ma 'kaa -dadaa 'nyiin -sa. 7 Na, gɩlɩnyɔa Zozii -waa 'lɛ -gbɔɔn na, ya Pɩɛlɩ 'cla lebhe: «-Kwlenyɔa -kʋ 'lɛ!» Daa Simɔɔn Pɩɛlɩ 'nu 'lɛ wɔlɩ -naa na, ɔ ya ɔla nɩkplaanplalokwia guoon gʋalɩ, 'nyɩ ɔ ya 'nyiin bhlili, sa ɔ 'taa nɩkplaaan pla na. 8 -Daa gɩlɩnyaa ya gɔlʋa 'lu, ma ya -dadaa -a yea 'lɛ -zlii 'kʋ na jli 'nyɩ ma ya 'nyigboa 'kʋ 'pɛ. Daa ma -kʋa 'lɛ na, ɩya 'nyigboa 'kʋ cɩa -sa 'mɛtlɩ -gwlɩɩ -ngbi nʋ. 9 Daa ma 'wlʋ 'lɛ gɔlʋa nɩkplaan, 'nyɩ ma kwli 'lɛ na, ma ya dɩpɩa -kosu ŋeni, -zlii -gbɛa 'mʋʋ 'kʋ 'nyɩ 'flawo -kʋa dɩpɩa. 10 Zozii ya maa 'cla lebhe: «-Zliia a bhli 'lɛ 'kʋ na, a -lamʋ -zlʋsaasa.» 11 Simɔɔn Pɩɛlɩ ya gɔlʋa nɩkplaan 'tɔ, ɔ ya -dadaa jli, 'nyɩ ɔ yaa 'nyɩgbo 'kʋ -la. A yee -zlii 'kadɩ -gwlɩɩ -ngbɔɔsɔ ɩya 'kʋgba -mɔta 'lɛ 'kʋ. -Zliia -zua 'bhlɩɩ, -ma -dadaa 'ta 'ŋatɔ. 12 Zozii ya maa 'cla lebhe: «A ci ɩya a 'ka li.» Gɩlɩnyaa -cia sɛɛ lebhe -Kwlenyɔa -kʋ 'lɛ 'bhlɩ, -ma maa nɩkplaan bhlogbɩɩ 'lɩ 'taa 'tɛtɩ ɩya ɔ 'ka 'mɔɔ neecla lebhe: «Ncaasaa -n -glɩa 'lɛ bha?» 13 Na, Zozii ya -kosua cɩ ci, ɔ ya 'flawoa 'ma, ɔ yʋʋ maa poli. Ɔ ya maa -zliia -ma poli. 14 Daa Zozii -kaa 'lɛ 'kwɩɩn 'kʋ -bho na, -mɔtada ɔ futolu 'lɛ ɔla gɩlɩnyaa 'ciin.

Zozii ya ɔla 'bhlabhlɩa Pɩɛlɩ wlɩɩn zʋ

15 Daa ma bhɩalɩ 'lɛ lilɩɛ na, Zozii ya Simɔɔn Pɩɛlɩ neecla lebhe: «Zaan -yowli Simɔɔn, -n -waan 'nyɩ -n zi -anʋa -naa 'kʋ bha?» Pɩɛlɩ yɔɔ neenŋonu lebhe: «-Ghɛɛ, -Kwlenyɔ, -n -ci sɛɛ lebhe n -wɔɔ.» Na, Zozii yɔɔ 'cla lebhe: «Kpa 'na 'bhlabhlɩa.» 16 Zozii yɔɔ -mɔsɔda neencla lebhe: «Zaan -yowli Simɔɔn, -n -waan bha?» Ɔ yɔɔ neenŋonu lebhe: «-Ghɛɛ, -Kwlenyɔ, -n -ci sɛɛ lebhe n -wɔɔ.» Zozii yɔɔ 'cla lebhe: «'Plɩ 'na 'bhlabhlɩa kpanyɔ.» 17 Ɔ ya -awlɛɔ -mɔtada neencla lebhe: «Zaan -yowli Simɔɔn, -n -waan bha?» Pɩɛlɩ ya cɩɩkalɔ 'lɩ, -ofi lebhe Zozii yɔɔ -mɔtada neencla lebhe: «-N -waan bha?» 'Nyɩ ɔ yɔɔ neeŋonu lebhe: «-Kwlenyɔ, -mɔa -ɔ -ci 'lɛ wɔlɩa -tɛtɛa na, -n -ci sɛɛ lebhe n -wɔɔ -ma!» Na, Zozii yɔɔ 'cla lebhe: «Falɩ 'na 'bhlabhlɩa pɔlɛ cɩ.» 18 'Nyɩ ɔ ya -awlɛɔ 'cla lebhe: «N soluo mɩ, ɩ -glɩ -nʋawlɛ, daa -n -glɩa 'lɛ nyɩgbɩɔ na, -mɔɔ 'titii ylo 'lɛ -ncɩ 'nyɩ -n mʋ 'lɛ daa -n -wa 'lɛ na. -Ma daa -n -cɩ ka 'lɛ -glɛɛglɛnyɔ 'plɩ na, -n -cɩ ka -naa sɩa neen lɛlɩ ɩya -buun nclɔɔ 'kɔɔ 'lɛ ylo ɩya ɔ kɔɔ 'lɛ gbazɩa -n 'ta 'lɛ -wa na, fa.» 19 Ka Zozii nyɩtɛ 'lɛ -sa ɩya ɔ 'ka 'kwɩa Pɩɛlɩ cɩ 'ka 'lɛ 'ku ɩya ɔ 'ka 'lɛ Laagɔ 'klʋgba na pala. Na daa Zozii 'bhli 'lɛ ɩmɩ -naa 'kʋ na, ɔ ya Pɩɛlɩ 'cla lebhe: «Gɩlɩɩn.»

Pɩɛlɩ ɩya Zozii nyɩtɛ Zaan 'la wɔlɩ

20 Daa Pɩɛlɩ cala 'lɛ kwla na, ɔ ya gɩlɩnyɔa Zozii -waa 'lɛ -gbɔɔn na, macɩ leen 'lɩ. Ɔmɔ -ɔ faa 'lɛ ɔla 'wlua Zozii cɩ, daa ma -kʋa 'lɛ lida na, 'nyɩ ɔ yɔɔ 'lɛ neencla lebhe: «-Kwlenyɔ, ncaasaa -ɔ cɩ kɔɔ 'lɛ 'pɛlʋzʋ bha?» 21 Na, daa Pɩɛlɩ 'lɩɔ 'lɛ na, ɔ ya Zozii neencla lebhe: «-Kwlenyɔ, 'nyɩ -anɔ -naa, wɔɔsaa -ɩ cɩ kɔɔ 'lɛ ŋeni bha?» 22 -Ma Zozii yɔɔ 'cla lebhe: «Ɩ -ka -kʋ lebhe n -ka -wa lebhe ɔ kʋ -aan ɩya 'na cidaa 'ka ŋeni na, 'lɩsaa ɩ cɩ kɔɔ 'lɛ nʋ bha? -Mɔɔ, 'maa gɩlɩɩn!» 23 Na, wɔlɩ -naa ya -daa gɩlɩnyaa cɩ ŋeni le gɩlɩnyɔ -naa cɩ 'taa 'ku. 'Bhlɩmɔɔn, Zozii 'ta ka Pɩɛlɩ 'cla lebhe 'dɛ 'la gɩlɩnyɔa cɩ 'taa 'ku, -ma ka ɔ 'clɔɔ 'lɛ lebhe: «N -ka -wa lebhe ɔ kʋ -aan ɩya 'na cidaa 'ka ŋeni na, 'lɩsaa ɩ cɩ kɔɔ 'lɛ nʋ bha?»

Bhɩalɩwɔlɩ

24 Gɩlɩnyɔ -naa, ɔmɔ li 'lɛ wɔlɩ -naa 'la -danʋfʋɛ 'nyɩ ɔ yɩɩ 'lɛ zie. 'Nyɩ -a -ci lebhe ɔla -danʋfʋɛliliea -glɩ -nʋawlɛ. 25 Zozii ya -awlɛ -buun wɔlɩ -bhutukpa nʋ. -Ma ɩ -ka -kʋ le ma -kaa ɩmɩa -tɛtɛa bhloonbhloon zie na, n gugu 'ta lebhe -afluwia -ɩ cɩ kaa 'lɛ -zieo na, ɩ cɩ 'kaa -laagɔzɔan plalɩɛ mino.