1 Anyɔ Bɛt gɔ gi kim nɛ waalɛ, Dɔgl bɔ ginɛ gi ma doosɛ. Dɔgl bɔ gi hi Bɛto, Dɔglɔ gii Bɛto. 2 Dɔgl bɔ gi nɛ gi ma hi Bɛto a waalyɛɛliki. 3 Bɛt gɔn hin sɛw hi Dɔgl bɔ giya; hinza taa gi wooy hi Dɔgl bɔ gɛ gɛ. 4 Za̧a̧tig bɔ fu̧u̧ nɛ a Dɔgl bɔ gedu, Za̧a̧tigɔ gii gaa dood lɛlgaalɛ. 5 Lɛlgaal bɔ gi gaak a lɛlwil du, wɛɛ lɛlwil bɔ nimsig gɛ be. 6 Doo za giro, nuŋgɔ a Yohana, Bɛt yaazig 7 an segya an gi boo lɛlgaal bɔ dɔglɔ. Zaa an dood sɛw hi ɗɔbs Dɔgl bɔ a gi dɔŋgo. 8 Gii hi zulɔ taa lɛlgaal bɔ, gi segya yɔ zaa an gi boo lɛlgaal bɔ dɔglɔ giya. 9 Lɛlgaal rɔb mɔɔt yɔ gi gaasig dood sɛw gii gi zaak nɛ a waal du. 10 Dɔgl bɔ da gi nɛ gi ma a waal du. Bɛt kimn waal bɔ hi Dɔgl bɔ giya; yɔ anbɔ dood waal du hi mɛɛg gɛ hɛw. 11 Dɔgl bɔ zaa a gi waal du a doodɔ hi, wɛɛ doodɔ wɔ hi ta̧a̧g gɛ. 12 Yɛrɛ, dood zaadɛ wɔ hi dagig sɛw, wɔ hi ɗɔbsige, gaahi tɛŋko an hi wɛɛ Bɛt waato. 13 Hí wɛ̄ɛ̄ Bɛt waatɔ an doo yɔ hɛbtdi ha̧a̧g gɛ, zaabe, anyɔ gɔ hi wɛɛsig baa waal du waaɔ gɛ. Bɛt gii mɔɔhi hi zulɔ, gii wɛɛ baaya̧. 14 Dɔgl bɔ wɛɛ doo, waa wɛ teesdu, rɔbo hi rɔbgɔki tɔɔ gi kpoos du. Wɛ gbɛn gbɔlumsɔ, gbɔlums yɔ Bɛt waaɔ gbunsum yɔ dag a Baatɔ ge giya. 15 Yohana boo dɔglɔ gii gi ɓooya̧a̧ gi raa: a nɛ be boo nɛ za̧a̧nɔ dɔglɔ gii, be raa nɛ a Za̧a̧nyɔ gi zaak be kuudu daarinbe gbɔlums daarinu; yɔ be taa nɛ gɛ, ɔnɛ da gi nɛ gi ma. 16 Wɛɛ sɛw wɛ dag gɛmsilɔ bɔ rɔɔsɔ wɛnɛ daarlɛl gbɔɔltɔnɔ. 17 Bɛt gaazɛ maakdɔgl a Muusa ge; rɔbtig hi rɔbo hi fu̧u̧z a Yeesu Kristu ge be. 18 Doo za gbɛndir Bɛt gɛ nɛ zaŋ. Waa gbunsum bɔ gi Bɛto, gi waak a Baa dɔŋdi zaa raasɛ Bɛt bɔ za̧a̧nɔ dɔglɔ an wɛ mɛɛge. 19 Yohana dɔglɔ bɔ boo gɛrɛ. Yɔ Yahuduya wɔ hi yàà Bɛtmaakwookya wɔ hi Lewiya wɔ hi fu̧u̧z a Urusalima hi zaa hi war Yohana a mɔɔ bɔ? 20 Gii be fāā gɛ, ta̧a̧ hi muut du: a be taa Masihu bɔ. 21 Hi wɛɛ hi warige a nɛ mɔɔ bɔ? Mɔɔ gi Eliya ya? Yohana goo a ɛ̧-ɛ̧! Gii gɛ. A mɔɔ gi Bɛtya̧a̧kɛŋkya bɔ wɛ oog ya? Yohana wɛɛ goo a ɛ̧-ɛ̧! Gii gɛ. 22 Hi wɛɛ hi warige a nɛ mɔɔ bɔ ɔnɛ ma nɔ? An wi mɛɛ hinyɔ gɔ wi re wi raas dood wɔ hi yaaziwi, mɔ raa zul mɔ a mɔɔ bɔ? 23 Dɔg ma gɔ a beya, anyɔ Bɛtya̧a̧kɛŋkya bɔ Esaya dɔgɔ, bee gi za̧a̧nza yɔ gi ya̧a̧ɓoolik a hɛtdɔŋdu: a gɛbtsin Waar Bɛt gbɔnɔ gi er bɛttɔnɔ. 24 Dood wɔ hi yaazihi nɛko hi fu̧u̧z a Farisaya wɔ hi teesdu 25 hi warige hi raage a nɛ à mɔ taa Masihu bɔ gii gɛ, mɔ taa Eliya gii gɛ, mɔ taa Bɛtya̧a̧kɛŋkya bɔ gii gɛ be, mɔ hotingo dood hi Bɛtmɛm bɔ ɔnɛ nɔ? 26 Yohana goohi a beya, be hotingo dood hi Bɛtmɛm hi mɛm tɔs. Yɛrɛ doo za giro a nɛ teesɗu, nɛ mɛɛg gɛ, gi zaak be kuudu; 27 bé tūūr doo rɔb a gi muutdu an be hu̧u̧r be pid taal ba̧a̧nɔ gɛ. 28 Dɔgl yɛrɛ daa a Betani, a Urdum zɛ̧ɛ̧rnɔ kasiŋ za, a lɛlyɔ Yohana gi hotingo dood hi Bɛtmɛm ge. 29 Yoosugɔ Yohana gbɛn Yeesu gi zaak a ge, raa a Bɛt Tamwaa bɔ gi ha̧sig hinha̧a̧l a waal du gɛrɛ! 30 Be boo dɔglɔ gii be raa a doo za gi zaak be kuudu, gbɔlumsɔ daaribdaarɔ. Yɔ be taa nɛ gɛ, ɔnɛ da gi nɛ gi ma. 31 Bee bé mɛ̄ɛ̄ nɛ za̧a̧nɔ gɛ, yɛrɛ be zaa dood hotingo hi Bɛtmɛmɛ an be zuns Israhilaya wɔ hi mɛɛge. 32 Yohana wɛɛ boo dɔglɔ raa a be gbɛn Bɛt Mɔkilɔ siz bɛtha an gutu buu, ɗɔɔt a zaan bɔ gi muulɛ. 33 Bee be mɛɛg nɛ gɛ, gɛ Bɛt yɔ yaazib an be hotin dood hi Bɛtmɛm hi mɛmɛ raasibe a Za̧a̧nyɔ gɔ mɔ gbɛn Mɔkil be gi siz gi ɗɔɔt gi muulɛ, Za̧a̧nɔ gii gi hotin dood Bɛtmɛmɛ hi Mɔkil be. 34 Be gbɛn hinɔ giya be dɔgɔ a Bɛt waa bɔ giya. 35 Hɔnɛ yoosugɔ ma Yohana gi erk gɔ a lɛl bɔ ge hi walɛsɛrɛ ɔ̧ɔ̧ eerɛ. 36 Yɔ Yohana gbɛn Yeesu gi daako, raa a Bɛt Tamwaa bɔ gɛrɛ. 37 Walɛsɛrɛ wɔ eer hi bɛɛ lako hi fɔ Yeesu. 38 Yɔ Yeesu zɛmr gi gbɛnihi hi gig fɔko warihi a nɛ ɓɛɛk nɔ? Hi warige: a Rabi, raakɔ a Hingokya , mɔ gi waak ay? 39 Gii wɛɛ raahi a zaan nɛ see lɛlyɔ be waako. Hi rekɔ hi see lɛlyɔ gi waako; hi ɗɔɔt hi naa hi gii nɛɛk bɔ. Yɔ anbɔ ɔ̧t gi isba̧a̧n du. 40 Zaaɔ gbun yɔ kɛm Yohana ya̧a̧boonɔ bɔ gi fɔ Yeesu , nuŋgɔ a Andrɛ, Simɔŋ Piyɛr hindaɔ giya. 41 Gii yɛɛl gi zɛm yɛ̧ɛ̧tɔ Simɔŋ; yɔ zɛŋg raage: a wi zɛm Masihu bɔ zɛmɔ, raakɔ a Kristu. 42 Kamzig Yeesu ge; yɔ Yeesu gbɛnig raage: a mɔɔ gi Simɔŋ, Yohana waawalɔ, yɛrɛ hi elimɔ a Kefas, elkɔ a Piyɛr. 43 Yoosugɔ yɔ Yeesu ha̧a̧g rek a Galile, zɛm Filib raage a fɔbzibe. 44 Filib fu̧u̧z a waal gbɔɔl bɔ Baytizaada gedu a Andrɛ hi Piyɛr lɛldu. 45 Dagtin hi Nataniyɛl raage: a wi zɛm Yusufu waawal Yeesu Nazarɛdya bɔ, Za̧a̧nyɔ Muusa bi̧i̧ dɔglɔ a Bɛtmaak ɗɛɛrwol du; Bɛtya̧a̧kɛŋkya wɔ hi boo nɛ dɔglɔ hɛw. 46 Nataniyɛl warige: a hinza rɔb ɗɛɛ an gi fu̧u̧z a Nazarɛd ya? Filib googe a nɛ zaam mɔ see. 47 Yɔ Yeesu gbɛn Nataniyɛl gi zaak ge, raa: a hɔnɛ Israhilaya rɔb gɛrɛ, taan mɛlɛ. 48 Nataniyɛl warige a mɔ mɛɛb ay? Gii googe a yɔ mɔ gi a yɔmntnɔ bɔ dɔŋgɔ du, yɔ Filib gɔ gi elumɔ, be gbɛnumɔ. 49 Nataniyɛl ta̧a̧ raage a Hingokya , mɔɔ gi Bɛt waa, mɔɔ gi Israhilaya Waar i. 50 Yeesu ta̧a̧ raage: a yɔ be raa a be gbɛnum a yɔmnt dɔŋdu gii mɔ ɗɔbs ya? Mɔ́ gbɛn hin zaadɛ gɛrsya gbɔlɛ hi daar yɛrɛ hɛw. 51 Be raasin hi rɔbo, nɛ gbɛn bɛtha gi kpɛ̧ɛ̧rɔ, Bɛt walɛsɛrɛ ɔ̧ɔ̧ hi karko hi wɛɛ hi sizig a Za̧a̧n Waa bɔ gi muulɛ a hɛbtdi.
1 Yɛms yɔ tal eerɛ lottins gi a Kana a Galile. Yeesu nɔɔtɔ re gi lɛlɔge be. 2 Hi el Yeesu hi walɛsɛrɛ ɔ̧ɔ̧ wɔ hi rek a lottins lɛl bɔ ge be. 3 Dood wɔ hi lekhinɛ hi yɔ̧k bumhob be. Yɔ bumhob bɔ da̧a̧, Yeesu nɔɔtɔ raage a hi taan bumɛ, bum hob bɔ da̧a̧da̧. 4 Yeesu ta̧a̧ge a naadyɔ, dɔgl mɔ nɔ du hi beya? Ɔ̧t be riidir gɛ. 5 Nɔɔtɔ re raa woosya wɔ a hinyɔ Yeesu gɔ gi raan sɛw woon hinɔ. 6 Hɔnɛ Yahuduya maakdɔn gbɔlɛ wɔ hi wɔmn bet hi gi di nɔɔn-gbun be, maakdɔn wɔ Yahuduya wɔ gɔ hi hotingo mɛm du an ɓi̧i̧limya̧ gi da̧a̧. Dɔn wɔ sɛw buuya̧ yɔ loo an liitre yɔ̧ɔ̧lɔ nɔɔnɛ. 7 Yɔ anbɔ Yeesu ɗun raa woosya wɔ a hı̧̀ı̧̀sin dɔn wɛrɛ hi mɛmɛ. Wɔrɔ hi hı̧̀ı̧̀sil dɔn gbɔlɛ wɔ hi mɛm rasras. 8 Wɛɛ raahi a kɔn mɛm bɔ nɛ kams lottinsnaab zulya bɔ gi yɔ̧. 9 Hi kɔ̀bɔ̀ hi kamsige. Yɔ naabzulya bɔ dag mɛm bɔ hi zɛmr gi wɛɛ bumhobo, mɛ̄ɛ̄ lɛlɔ fu̧u̧z du gɛ. Woosya wɔ hi kɔbz nɛ mɛm bɔ ya̧nɛ hi mɛɛmɛ. Lottins naabzulya bɔ el wal nislookya bɔ 10 raage a dood sɛw, gɔ hi kamz nɛ bumhob rɔb yɔ hɛ̧ɛ̧m gii hi gaa dood doosi; gɔ hi yɔ̧ riihi, kuudu wɛɛ kamz ma yɔ hɛ̧ɛ̧m kaasi. Yɛrɛ mɔɔ mɔ gbaa bum yɔ hɛ̧ɛ̧m gis te ya? 11 Gɛrs biitir yɔ Yeesu yɛɛl gi gɔ a Kana a Galile giibɔ an gi zuun gbɔlumsɔ. Yɔ walɛsɛrɛ ɔ̧ɔ̧ wɔ hi gbɛn anbɔ hi ɗɔbsig gɔ. 12 Yɔ hin wɔrɔ hi daa sɛwi Yeesu wɛɛ ɗund rek a Kapɛrnayum hi nɔɔtɔ, hi yɛ̧ɛ̧dɛ ɔ̧ɔ̧ hi walɛsɛrɛ ɔ̧ɔ̧ be. Hi waa hɔ ɔ̧t kaasi. 13 Yɔ Yahuduya Paska naab bɔ gi sɛ̧ɛ̧biko, Yeesu dɔɔ a Urusalima, da gul Bɛtluk du. 14 Yɔ gulɔ zɛm dood hi zebtig naa wɔ, hi tam wɔ hi gutu wɔ hi tus-i̧i̧kya wɔ a Bɛtluk bɔ gedu hi ɗɔɔtugo. 15 Loo ba̧a̧ni haŋ kpooti nininihi a Bɛtluk bɔ gedu hi sɛw hi tamya̧ wɔ hi naaya̧ wɔ, wɛɛ yɛlk tus-i̧i̧kya wɔ tusya̧, yaatir tɛ̧ɛ̧hɛɛk wɔ gɔ hi ɓɛrk tus hage. 16 Wɛɛ raa wɔ hi zebtig gutu: a ha̧sin hin wɛrɛ hɛdi ma mi! Bɔnɛ wɛɛn Baa be lukɔ an hinriŋsluko! 17 Walɛsɛrɛ ɔ̧ɔ̧ wɔ hi mɔk dɔgl yɔ Bɛt ɗɛɛrwolɔ raa nɛko a Bɛto, luk mɔ bɔ hatɔ gi kak be kpoos du an laa! 18 Yahuduya wɔ hi warige a mɔ gisiw nɔ gɛrsɔ zuunik an wi mɛɛn a mɔ gin tɛŋk an mɔ woo hin wɛrɛ lɛ nɔ? 19 Yeesu goohi a ɛ̧brin Bɛtluk yɛrɛ, bee be wɛɛ be wɔŋge ɔ̧t taarɛ. 20 Wɔrɔ hi raage a hi wɔm Bɛtluk yɛrɛ wɛl dumbili nasɔ daa nɔɔn-gbunu, mɔɔ mɔ wɛɛ mɔ raa ri: a be wɔm ɔ̧t taar nɔ? 21 Gii be dɔg Bɛtluk bɔ dɔglɔ goksin muul ɔ̧ɔ̧nɛ. 22 Kuudu, yɔ rɛmla a wɔrk du, walɛsɛrɛ ɔ̧ɔ̧ wɔ hi mɛks a raan hinɔ giya, hi wɛɛ hi ɗɔbs Bɛt ɗɛɛrwol wɔ hi dɔgl yɔ Yeesu dɔg nɛko. 23 Yɔ Yeesu gi nɛ a Paska naab bɔ gedu a Urusalima, dood kittɔnɔ hi ɗɔbsige anyɔ hi gbɛnig gi wook gɛrs wɔ. 24 Yeesu mɛɛhi sɛw mɔ̄kihi gɛ. 25 Yɔ mɛɛ hinyɔ gi doo kpoos du sɛw hi zulɔ, ha̧a̧g an doo za gi dɔgsig doo za dɔgl ma gɛ.
1 Wal za Farisaya giro, nuŋgɔ a Nikodɛm, gi Yahuduya waar yɔ. 2 Zaa yɛms du a Yeesu ge raage a Hingokya , wi mɛɛ a mɔ gi hinmɛɛkya yɔ fu̧u̧z a Bɛt ge; yɛrɛ gɛrs wɔ mɔ wooko, doo za taa an gi ɗɛɛ wookɔ à Bɛt taa hi za̧a̧nɔ gɛ. 3 Yeesu ta̧a̧ raage a be raasum rɔbo, doo gi mɔɔy dɔɔ eesim gɛ ɗɛ̄ɛ̄ an gi gbɛn Bɛt wáátɔ gɛ. 4 Nikodɛm ɛrige a à za̧a̧nɔ gi nɛ ɗɛnti be yɔ wɛɛ yɔ mɔɔy hinɔ ri? Yɔ ɗɛɛ an gi wɛɛ nɔɔtɔ buu du an gi wɛɛ gi mɔɔy dɔɔ eesim ya? 5 Yeesu ta̧a̧ a be raasum rɔbo: doo gi mɔɔy hi mɛmɛ hi Bɛt Mɔkilɔ gɛ, ɗɛ̄ɛ̄ an gi gul a Bɛt wáát du gɛ. 6 Za̧a̧nyɔ mɔɔy hi muulɛ gi muulɛ, yɔ mɔɔy hi Bɛt Mɔkili gi Mɔkilyɔ. 7 Yɔ be raam a gi an nɛ mɔɔy eesimɛ, bɔ hin bɔ lab gi kɔmsum gɛrsɛ. 8 Zɛk fɛ gi rek a lɛlyɔ ha̧a̧g ge, mɔ lak nams yɔ gi gɔk be, wɛɛ mɔ mɛɛ lɛlyɔ gi fu̧u̧zig du gɛ, wɛɛ mɔ mɛɛ lɛlyɔ gi rek du gɛ. Za̧a̧nyɔ mɔɔy hi Bɛt Mɔkili gi anbɔ. 9 Nikodɛm wɛɛ warige a hin bɔ lab rɛ yɔ wooy hinɔ ri nɔ? 10 Yeesu googe a mɔɔ mɔ gi hingokya gbɔɔl a Israhila, mɔ wɛ̄ɛ̄ mɔ mɛɛ hin wɔrɔ lab gɛ ya? 11 Be raasum rɔbo: wi raak hinyɔ wi mɛɛ giya, wi book hinyɔ wi gbɛn dɔglɔ giya, wɛɛ nɛ ta̧a̧ dɔgl winɛ bɔ gɛ. 12 Gɔ be dɔksin hinwɔ hi talik hɛbtdi, nɛ ɗɔ̄bsib gɛ! À be dɔksin hinyɔ gi talik bɛtha rɛ, yɔ nɛ ɗɔbs hinɔ ri? 13 Doo za kadir a bɛtha gɛ, gɛ Za̧a̧n Waa bɔ siz a bɛtha kpɔd. 14 Anyɔ Muusa pɛɛ beks yɔ hi gɔn tushob a tɛ̧ɛ̧ muul a hɛtdɔŋ du, Za̧a̧n Waa bɔ gi pɛɛy anbɔ be, 15 an za̧a̧nyɔ gig ɗɔbsig sɛw gi za̧a̧ faa. 16 Hinɔ anbɔ ro Bɛt gi ha̧a̧g dood waal du gbɔɔltɔnɔ gi gaaz waaɔ gbunsimi an za̧a̧nyɔ ɗɔbsig sɛw kolɔ taa wako gin za̧a̧tig faa. 17 Bɛt yāāz waaɔ a waal du an gi gbaas waal dɔgl gɛ, yaazig an gi za̧a̧s dood waal du. 18 Za̧a̧nyɔ ɗɔbs waa bɔ, hi taasig dɔgl gbaako. Za̧a̧nyɔ ɗɔbsig gɛ dɔgl matig da̧a̧da̧, anyɔ ɗɔbs Bɛt waa gbunsum bɔ gɛ. 19 Lɛlyɔ dɔgl-gbaak gi ge gɛrɛ: lɛlgaal zaa a waal du, wɛɛ dood ha̧a̧hi lɛlwil bɔ giigi daar lɛlgaal bɔ anyɔ woosya̧ ha̧a̧lɔ. 20 Yɔ anbɔ za̧a̧nyɔ gi wook hinha̧a̧lɛ, hā̧a̧g lɛlgaal gɛ. An gɔ gi zaa a lɛlgaal du, hoobha̧a̧gha̧ an bɔ woosɔ ha̧a̧l wɔ hi midɔ. 21 Za̧a̧nyɔ ɔɔ mɛldɔgl gi gi fɔk rɔb be, zaa a lɛlgaal du an hi gbɛn woosɔ rɔbɛ wɔ woo hi Bɛt tɛŋkɔ. 22 Yɔ hin wɔrɔ hi tal sɛwi, Yeesu rek hi walɛsɛrɛ ɔ̧ɔ̧ wɔ a Yahuduya hɛbt du, waa hɔ hi hiya, gi hotingo dood Bɛtmɛmɛ. 23 Yohana hɛw gi hotingo dood Bɛtmɛm a Ayinɔn, a Salim dɔŋdi. Mɛm gi hɔ gbɔɔltɔnɔ be. Dood hi zaako gihi hotingo Bɛtmɛmɛ. 24 Yɔ anbɔ Yohana da gudir nɛ a luknɔ du gɛ. 25 Yohana walɛsɛr ɔ̧ɔ̧ hi yɛɛl hinfaltingo gɔ hi Yahuduya za a maakya̧ muulgaasig dɔŋgo. 26 Hi zaa hi zɛm Yohana hi dɔgsige a Hingokya , Za̧a̧n bɔ gi nɛ hi mɔɔ a Urdum zɛ̧ɛ̧rnɔ kasiŋ za, Za̧a̧nyɔ mɔ boosuw nɛ dɔglɔ gi hotingo dood Bɛtmɛmɛ, wɛɛ dood sɛw hi rek a ge. 27 Yohana goo a doo za ɗɛ̄ɛ̄ an gi dag hinza gɛ, gɛ hinyɔ Bɛt gaage. 28 Nɛɛ hi zul nɛ nɛ kɛmbe a be dɔgɔ a be taa Masihu bɔ, hi yaazib ɔnɛ a Za̧a̧n bɔrɔ gi muutdu. 29 Nislookya bɔ gii gi niszulya, wɛɛ saamɔ bɔ gi erk gi dɔŋdi gi gisig kɛŋko, gɔ lag nislookya bɔ kɔlkɔ dag hat gbɔɔltɔnɔ. Yɔ anbɔ hat benɛ bɔ gi hat gaatyɔ. 30 Gi an gii gi tɔɔ, wɛɛ bee be, be ɓɛ̧ɛ̧rɔ. 31 Za̧a̧nyɔ fu̧u̧z a wɛɛha gi a hin zulha sɛw. Za̧a̧nyɔ fu̧u̧ a hɛbtdi gi hɛbtumyɔ, gi boo hɛbt dɔgl be. Za̧a̧nyɔ fu̧u̧ a bɛtha gi a hin zulha sɛw. 32 Hinyɔ gbɛnɔ hi hinyɔ lagɔ gi dɔk giya, wɛɛ doo za ta̧a̧ dɔglɔ bɔ gɛ. 33 Za̧a̧nyɔ ta̧a̧ dɔglɔ sɛw raa gaatɔ gii a Bɛt gi rɔbo. 34 Za̧a̧nyɔ Bɛt yaazige gi dɔk hinyɔ Bɛt gi dɔk sɛw. Yɔ anbɔ Bɛt gāāzig Mɔkilɔ hi wel gɛ. 35 Baa Bɛt ha̧a̧g a waaɔ bɔ gi muulɛ, wɛɛ gbaa hin sɛw a gi naan du. 36 Za̧a̧nyɔ ɗɔbs Waa bɔ gin za̧a̧tig faa; za̧a̧nyɔ kɛ̄ms waa bɔ tɔn gɛ, taa gbɛnik za̧a̧tig bɔ, wɛɛ Bɛt nɔɔtigɔ gi waak gi zulha.
1 Farisaya wɔ hi lagɔ a Yeesu gi dak walɛsɛrɛ , gi hotingo dood kittɔnɔ Bɛtmɛmɛ, walɛsɛrɛ ɔ̧ɔ̧ hi kit hi daarik Yohana walɛsɛrɛ ɔ̧ɔ̧ wɔ daarɔ. 2 Yɔ anbɔ Yeesu hi zulɔ gii taa hotingo dood Bɛtmɛm bɔ, walɛsɛrɛ ɔ̧ɔ̧ wɔ hii gihi hotingo Bɛtmɛmɛ. 3 Yɔ Waar Yeesu kɛm a Farisaya wɔ hi lag dɔglɔ anbɔ ɔɔ Yahuduya, rek a Galile. 4 Yɔ gi rek hɔ, mɛɛ a gi an gi daa a Samariya hɛbt du. 5 Tuur a Samariya waal za gbɔɔl du nuŋgɔ a Sikar, waalɔ sɛ̧ɛ̧b hi bak yɔ Yakuba da gaa nɛ waawal Yusufu. 6 Yakuba mɛmzɛɛl gi lɛlɔge. Yɔ Yeesu mɔɔ rɔ̀bsɔ bɔ reko, ɗɔɔt a mɛmzɛɛl bɔ dɔŋgɔdi, ɔ̧t sɛ̧ɛ̧b an gi er lurk be. 7 Nis za Samariyaya zaa mɛm kɔk be, Yeesu raage a gaabe mɛm be yɔ̧. 8 Walɛsɛrɛ ɔ̧ɔ̧ wɔ hi rek nɛ lees zebzig a waal gbɔɔl du be. 9 Nis Samariyaya bɔ raage a ri mɔɔ yɔ mɔ gi Yahuduya mɔ gib mɛmɔ ɛrk nɔ? Bee be nis Samariya-yayɔ! (Yahuduya wɔ gɔ hi ɔ̄ks hi Samariyaya wɔ gɛ be.) 10 Yeesu googe a à mɔ mɛɛ nɛ hinyɔ Bɛt ha̧a̧ge an gi gaamɔ, mɔ́ wɛɛ mɔ́ mɛɛ Za̧a̧nyɔ gi mɔ mɛm ɛrk a gaabe be yɔ̧, mɔɔ yɔ ɛr nɛ mɛm a ge, gii yɔ gaam nɛ mɛm za̧a̧tigya bɔ mɔ yɔ̧. 11 Nis bɔ raage a Ɗɛntyɔ, wɔd mɛmkɔmnikya taa a mɔɔ be, mɛmzɛɛl bɔ dub be, mɔ dag mɛm za̧a̧tigya bɔ ay nɔ? 12 Gbɔlums mɔ daar baa wɛ Yakuba yɔ gaaw mɛmkɔk yɛrɛ daar ya? Gii yɔ̧ mɛmɔ hi waatɔ hii hɛw hi hinza̧a̧til wɔ gihi kaŋkig sɛw. 13 Yeesu googe a za̧a̧nyɔ yɔ̧ mɛm yɛrɛ mɛm gi wɛɛ gi ha̧a̧g ɓɛ. 14 Yɛrɛ za̧a̧nyɔ gɔ gi yɔ̧ mɛm yɔ gɔ be gaage taag zaa ha̧a̧k nɛ zaŋ. Mɛm yɔ gɔ be gaage, gi mɛm yɔ gi gburk a gi kpoos du gi tuur a za̧a̧tig faa du giya. 15 Nis bɔ raage a ɗɛnti, gaabe mɛmɔ an bɔ mɛm gi ha̧a̧b zaa, wɛɛ an bɔbe wɛɛz zaa, be kɔb hɛdi. 16 Yeesu raage a rekumɔ mɔ elz wal mɔ mɔ wɛɛza. 17 Nis bɔ raage a wal be taaro. Yeesu wɛɛ raage a yɔ mɔ raa wal be taaro mɔ raa rɔbo. 18 Mɔ loo nɛ walɛ nɔɔnɛ, wɛɛ wal bɔ nɛ waatingo el ɓori taa wal mɔnɛ. Mɔ dɔg rɔbo. 19 Nis bɔ raage a ɗɛntyɔ, yɔ be gbɛn di mɔ gi Bɛtya̧a̧kɛŋkyayɔ. 20 Ɗɛntɛ wi Samariyaya wɔ hi ɗɔbs Bɛt a ga̧a̧t yɛrɛ hage. Nɛɛ Yahuduya wɛ be, gɔ nɛ dɔko a lɛlyɔ gi an hi ɗɔbs Bɛt ge gi a Urusalima. 21 Yeesu raage a naadyɔ, ta̧a̧sibe, lɛlɔ gi riiko, a ɔ̧tɔ ge nɛ taa Baa Bɛt ɗɔbsig a ga̧a̧t yɛrɛ hage, zaabe a Urusalima. 22 Nɛɛ Samariyaya wɛ, nɛ́ mɛ̄ɛ̄ za̧a̧nyɔ nɛ gig ɗɔbsig gɛ. Wii Yahuduya wɔ wi mɛɛ za̧a̧nyɔ wi gig ɗɔbsig winɛ, anyɔ za̧a̧tig bɔ fu̧u̧z a wii ge. 23 Yɛrɛ ɔ̧tyɔ ɗɔbsigya rɔ́bɛ wɔ gɔ hi ɗɔbs Baa bɔ hi rɔbo hi Mɔkili gi tuurɔ, tuur ma hɛw ɓɔryɔ. Baa bɔ gi ɓɛɛk ɗɔbsigya rɔbɛ wɔrɔ lab hiya. 24 Yɔ Bɛt gi Mɔkili, gi an dood wɔ hi gig ɗɔbsugo hi ɗɔbsig hi mɔkili hi rɔbo. 25 Nis bɔ raage a be mɛɛ a Masihu bɔ raakɔ a Kristu gi zaako; gɔ gi zaa gi wadsɛ hin sɛw. 26 Yeesu raage a bee gi Masihu bɔ za̧a̧nɔ, bee yɔ be bookya̧a̧ hi mɔɔ yɔ. 27 Ɓɔrbɔ walɛsɛrɛ ɔ̧ɔ̧ wɔ hi wɛɛzig be, yɔ hi gbɛn Yeesu gi bookya̧a̧ hi nisɛ, hinkɔmsihi gɛrsɛ. Yɔ anbɔ an za̧a̧n za gi warige a ha̧a̧m nɔ, zaabe a mɔ book nɔ hi gii nɔ, warig gɛ. 28 Hɔnɛ nis bɔ ɔɔ mɛmruukɔ bɔ dihɔ wɛɛ wɛɛ a waal gbɔɔl du da raas doodɛ 29 a zaan nɛ see wal zayɔ raasib hinyɔ be woo nɛ sɛw. Wɛɛ bee be fɔ̄ksig nɛ hinza gɛ be. Ger gii taa Masihu bɔ ya? 30 Dood hi tuuz waal gbɔɔl bɔ gedu hi zaak a Yeesu ge. 31 A ɔ̧tɔ ge walɛsɛrɛ wɔ hi zɔ̧k Yeesu an gi lehin be; hi raage a Hingokya , zaam mɔ lehinɛ. 32 Gii ta̧a̧ a be gin lees yɔ nɛ mɛɛ gɛ. 33 Walɛsɛrɛ wɔ hi watinu a za̧a̧n za kamsig lees kams ger ya? 34 Yeesu goohi a lees be gɛ an be woo hinyɔ za̧a̧nyɔ yaazib ha̧a̧ge, be wɛɛ be da̧a̧s woos yɔ gaazib an be woo. 35 Nɛ taa raak a wag sɛɛ nasɔ an totɓɛs gi rii ya? Yɛrɛ be gisin raako, nɛ see bak wɔ bɛttɔnɔ: tot wɔ hi ra̧a̧mɔ, ɓɛrkɔ riiri. 36 Za̧a̧nyɔ gi ɓɛrk tot bɔ gi dag dɔɔrɔɔsɔ, gi wɛɛ gi mɔks tot gaat wɔ za̧a̧tig faa ɔnɛ. Yɔ anbɔ za̧a̧nyɔ lugɔ hi za̧a̧nyɔ ɓɛrɔ hi dag hat lɛlgbunu. 37 Hinyɔ hi raa a dɔgl za du a ꞋꞋzaa lugɔ zaabe ɓɛrɔꞋꞋ gi rɔbo. 38 Be yāānɛ an nɛ ɓɛr hinyɔ nɛ woo woosɔ gɛ; gɛ zaadɛ hi woo woosɔ nɛɛ nɛ ɓɛrk woosya̧ bɔ humlɔ. 39 Anyɔ nis bɔ boos Samariyaya wɔ Yeesu dɔglɔ gi raa a walsib hinyɔ be woo nɛ sɛwi, Samariyaya kittɔnɔ hi ɗɔbs Yeesu gɔ a waal gbɔɔl bɔ gedu. 40 Yɔ hi zaa hi zɛŋge hi zɔ̧g an gi waa hi hiya; Yeesu wɛɛ yɛ̧ɛ̧ra na̧̍a̧̍ hi hii ɔ̧t eerɛ. 41 Yɔ anbɔ, dood zaadɛ kittɔnɔ hi kɛm dɔglɔ bɔ hi ɗɔbsige. 42 Hi wɛɛ hi raa nis bɔ a wi yɛɛl wi ɗɔbsige a hinyɔ mɔ raasiwi gi dɔŋgo, yɛrɛ ɓɔri ma wi kɛmsig dɔglɔ hi zul winɛ wi ɗɔbsɔ, wi mɛɛmɛ ɔnɛ a gii gi waal za̧a̧sigya hi rɔbo. 43 Yɔ ɔ̧t eerɛ wɔrɔ hi talɔ Yeesu ɗund rek a Galile. 44 Yɔ anbɔ gii hi zulɔ hɛw raa a taa an hi ɗɔbs Bɛtya̧a̧-kɛŋkya a gi lɛlɛ. 45 Hɔnɛyɔ tuur a Galile, Galileya wɔ hi dagig rɔbtɔnɔ anyɔ hi gbɛn nɛ hinyɔ woo sɛw a naab ɔ̧ti a Urusalima, hii hi rek nɛ rek a naab bɔ gedu be. 46 Yeesu wɛɛ wɛɛ a Kana a Galile a lɛlyɔ da zɛmr nɛ mɛm gi wɛɛ bumhob ge. Waar gbɔɔl za woosɔya gbɔɔl gi a Kapɛrnayum waawal gi guŋko. 47 Yɔ lag a Yeesu ɔɔ Yahuduya zaa a Galile, rek a ge zɔ̧ge an hi tiitin el a gi lɛlɛ gi re gi za̧tsig waawal bɔ gi a wɔrk durk du. 48 Yeesu raage a à nɛ gbɛn gɛrs hintuusin-goya gbɔlɛ gɛ yɔ nɛ ɗɔbsib gɛ zaŋ. 49 Waar gbɔɔl bɔ woosɔya bɔ raage a Ɗɛntyɔ, yɛwɛ tii an bɔ waa be gi wɔrɔ. 50 Yeesu raage a rekumɔ, waa mɔ wal bɔ za̧a̧za̧ ma. Wal bɔ ɗɔbs Yeesu dɔglɔ bɔ raage rekɔ. 51 Yɔ gi tiik gi lɛlɛ gbaarɛ ɔ̧ɔ̧ wɔ hi dagig gbɔnɔ di hi raasig ramsɔ a waa bɔ za̧a̧za̧. 52 Gii wɛɛ ɛrihi a muulɔ bɔ gogsig lɛlli? Hi raasig a lelɔ, ɔ̧tyɔ yee kaasi, muulsa̧a̧kɔ bɔ da̧a̧ gɔ. 53 Yɔ anbɔ waa gumtil bɔ baatɔ mɔk mɛɛ ɔ̧tyɔ Yeesu raag nɛ du a rekumɔ, waa mɔ bɔ za̧a̧za̧. Gii hi doodɔ sɛw hi wɛɛ hi ɗɔbs Yeesu gɔ. 54 Gɛrs hintuusingoya eesim bɔ Yeesu woo yɔ wɛɛ gi tuu Yahuduya dɔɔ eesimɛ re a Galile hɛbt duge ma bɔ.
1 Yɔ kuudu anbɔ Yahuduya wɔ naabya̧ za giro, Yeesu dɔɔ a Urusalima be. 2 A Urusalima, mɛmzɛɛl hotillɛl gi a tamluk gbarya̧ nuŋgɔ a Ibraniŋko ya̧a̧boon du a Baytizaada, hi wɔm zekslɛl nɔɔnɛ hi gɔ̧ɔ̧nige. 3 Gumtil kittɔnɔ an yɔ̧ɔ̧rɛ wɔ, dɔɔ gumtilya wɔ hi dood zaŋdɛ wɔ hi ɗɔɔt a zekslɛl wɔ gedu hi ook mɛm bɔ naŋkɔ, an hi sil gedu. 4 Bɛtwalsɛr za gɔ siz nams mɛm bɔ a mɛmzɛɛl bɔ gedu. Yɔ bɛɛ mɛm bɔ namsig anbɔ, za̧a̧nyɔ gɔ sil gi dorɔ za̧a̧za̧, an gin nɔ gumsɔ hɛw. 5 Wal za gumtil gi nɛ waak kusig hɔdi, gumsɔ loo wɛl dumbili taarɛ daatɔ gɛ̧ɛ̧sɛ. 6 Yɔ Yeesu zaa gi gbɛnig a kusillɛl di mɛɛmɛ a gin gumsɔ amntyɔ; ɛrige a ha̧a̧mɔ an mɔ za̧a̧ ya? 7 Gumtil bɔ ta̧a̧ge a Ɗɛntyɔ, be taan doo za an gi sisib a mɛmzɛɛl bɔ gedu yɔ mɛm bɔ gɔ gi naŋko. Wɛɛ yɔ gɔ be mɔk muul be an be silɔ, doo za dor siil ma a be muutdu. 8 Yeesu raage a ɗukumɔ, loom sil mɔ mɔ ɛmbɔ. 9 Ɓɔrbɔ wal bɔ za̧a̧za̧, loo silɔ ɛmb rekɔ. A ɔ̧tɔ ge gi holum-ɔ̧t be. 10 Yɔ Yahuduya wɔ hi gbɛn za̧a̧n bɔ hi za̧a̧sig gi ɛmbik anbɔ hi raage a nɛɛk holum-ɔ̧tyɔ! Maak wɛ gaam gbɔnɔ an mɔ pɛɛ sil mɔ a holum-ɔ̧t du ya? 11 Goohi a za̧a̧nyɔ za̧a̧sibe raabe a loom sil mɔ mɔ ɛmbɔ, bee be loo sil be be ɛmb gɔ be. 12 Hi warige a bɔ walɔ raam a loom sil mɔ mɔ ɛmb nɔ? 13 Hɔnɛ wal bɔ hi za̧a̧sig be mɛ̄ɛ̄ za̧a̧nɔ gɛ. Yeesu be da tuu nɛ ɔɔ saal lɛl bɔ rek be. 14 Kuudu Yeesu rek a Bɛtluk du zɛŋge raage a yɛrɛ mɔ za̧a̧ gɔ, ɔɔm hinha̧a̧l mɔ wɔ, an bɔ hinza yɔ daarlɛl gi zɛ̧mɔ. 15 Wal bɔ rek raas Yahuduya wɔ a Yeesu gii za̧a̧sibe. 16 Yahuduya wɔ hi yɛɛl Yeesu ya̧a̧ɗantig tɛmnik an hi gbɔŋge a woosɔ bɔ gi wook a holum-ɔ̧t du gi dɔŋgo. 17 Hɔnɛ gii wɛɛ goohi a yɛrɛ Baa be gi waak hinrɔb wooki, bee be hinrɔb wook be. 18 Yɔ anbɔ Yahuduya wɔ hi wɛɛ hi gig tɛk hi tɛŋko an hi gbɔŋge. Hi tɛ̄ge a yɔ ha̧tir holum-ɔ̧t bɔ gii kpɔd gɛ, hi tɛge a yɔ raa a Bɛt gi Baa be giya, gi goksingo zulɔ hi Bɛt giya. 19 Yeesu wɛɛ raahi a be raasin rɔbo: waawal bɔ ɗɛɛ an gi woo hinza hi zulɔ gɛ, gɛ gi wook hinyɔ gbɛn Baa bɔ gi wooko. Hinyɔ Baa bɔ gi wook sɛw, Waawal bɔ gi wook hin gbun bɔ giya. 20 Yɔ anbɔ Baa bɔ ha̧a̧g a waawal muulɛ, wɛɛ gisig zuunik hinyɔ gii gi wook sɛw hi zulɔ. Gii gi wɛɛ gi zunsig woos gbɔlɛ wɔ hi tɔɔ hi daarlɛl an hin gi wɛɛsin gɛrsɛ. 21 Anyɔ Baa bɔ gi ɗunsig wɔrkɛ wɔ gi wɛɛ gi gihi gaak za̧a̧tigi, waawal bɔ gi gaak za̧a̧tig a za̧a̧nyɔ ha̧a̧g ge anbɔ be. 22 Baa bɔ taas doo za dɔgl gbaako, wɛɛ gàà waawal dɔgl yɔ gɔ hi gbaa sɛw naan du, 23 an dood sɛw hi ɗɔbs waawal bɔ anyɔ hi ɗɔbsig Baa bɔ be. Za̧a̧nyɔ ɗɔbs waawal bɔ gɛ, ɗɔbs Baa bɔ yaazig hɛw gɛ. 24 Be raasin rɔbo: za̧a̧nyɔ gi kɛŋk dɔgl be gi wɛɛ gi ɗɔbsig Za̧a̧nyɔ yaazib sɛw, gin za̧a̧tig faa, wɛɛ hi taasig dɔgl gbaako. Taz wɔrko, tuur a za̧a̧tig faa du. 25 Be raasin rɔbo: lɛlɔ gi riiko, tuur ma hɛw a lɛlyɔ wɔrkɛ wɔ gɔ hi lag Bɛt waaɔ kɔlkɔ ge. Za̧a̧nyɔ gɔ gi lagɔ gi za̧a̧. 26 Anyɔ za̧a̧tig gi fu̧u̧zig a Baa bɔ ge hi zulɔ, yɔ anbɔ gaa waaɔ bɔ tɛŋko an za̧a̧tig gi fu̧u̧ a ge hi zulɔ be. 27 Wɛɛ gaag tɛŋko an gi gbaa dɔglɛ anyɔ gi Za̧a̧n Waa bɔ. 28 Bɔ hin bɔ lab gi wɛɛsin gɛrsɛ, lɛlɔ gi riiko an wɔrkɛ wɔ hi gi loor du sɛw hi lag waawal bɔ kɔlkɔ 29 hi tuuzɔ. Dood hinrɔbwookya wɔ hi ɗund hi dag za̧a̧tigi, hinha̧a̧lwookya wɔ be hi ɗund hi dag dɔgl-gbaaki. 30 Bee be ɗɛɛ hinza wook hi zul be gɛ. Be gbaak dɔgl an hinyɔ Bɛt raabe, wɛɛ dɔgl be gbaak bɔ gi hi gbɔnɔ. Be taa ɓɛɛk hinyɔ ha̧a̧ beya, be ɓɛɛk hinyɔ ha̧a̧ Za̧a̧nyɔ yaazib giya, ya̧a̧nɛ. 31 À be book dɔgl been a be zulha, dɔgl be yɔ taa dɔgl rɔbo. 32 Doo za gi raak dɔglɔ a be zulha, be mɛɛ a dɔglyɔ gi dɔk be zulha gi rɔbo. 33 Nɛ yaas Yohana doo, warig hinɛ, Yohana be raa hinrɔb a be zulha. 34 Benɛ hā̧a̧b doo za dɔglɔ yɔ gi book a be zulha an be zuun a bee bɔ zaanɔ gɛ. Yɛrɛ gɛ be gisin dɔk hin wɔrɔ an nɛ za̧a̧. 35 Yohana gi nɛ an pitila yɔ gi kak laa gi wɛɛ gi gaak giya; wɛɛ nɛ ta̧a̧ an nɛ dag hat am kaasi a gaakilɔ bɔ gedu. 36 Bee be gin dɔgl gbɔɔl daar Yohana ɔnɛ bɔ daarɔ; gɛ woos yɔ Baa be gaazibe an be da̧a̧sɔ. Woos wɔrɔ be wooko hi gi an ɗɛnt sɔɔlɛ hi raak a be zulha a Baa be gii yaazibe. 37 Wɛɛ Baa be yɔ yaazibe raa dɔgl be hi zulɔ hɛw; nɛ lāgdir kɔlkɔ gɛ, wɛɛ nɛ gbɛndir muutɔ gɛ hɛw. 38 Anyɔ nɛ ɗɔbs za̧a̧nyɔ Baa bɔ yaazig gɛ, Baa be dɔglɔ taa waak a nɛɛge. 39 Nɛ zaŋgig Bɛt ɗɛɛrwolɔ hi tɛŋko anyɔ nɛ mɔkig a be zɛm za̧a̧tig gbɔnɔ a gedu, wɛɛ Bɛt ɗɛɛrwol bɔ gi raak dɔgl be. 40 Wɛɛ hā̧a̧n zaak a beege an nɛ dag za̧a̧tig gɛ be. 41 Benɛ hā̧ā̧be bantyɔ gɔ be dag a dood ge gɛ. 42 Be mɛɛ a nɛ taan Bɛt ha̧a̧tigɔ a nɛ kpoos du. 43 Be zaa a Baa be nuŋg du nɛ dagib gɛ. An doo za dɔɔmi zaa hi zulɔ ɔnɛ nɛ dagige. 44 Nɛɛ yɔ nɛ tɛk bant a doodɛ yɔ nɛ ɗɛɛ ɗɔbsugɔ ri? Nɛ́ ɓɛ̄ɛ bant rɔb yɔ gi fu̧u̧zig a Bɛt gbunsum bɔ ge gɛ be. 45 Bɔnɛ mɔk a bee be gɛ̧ɛ̧nin hinza a Baa bɔ gi muut du; za̧a̧nyɔ gin gɛ̧ɛ̧nik hinɛ gɛ Muusa, za̧a̧nyɔ nɛ gbaak mɔkil nɛ a ge a gi ɗaasinɛ. 46 À nɛ ɗɔbs nɛ Muusa, yɔ nɛ ɗɔbs bee hɛw. Muusa bi̧i̧ dɔgl been be. 47 Yɛrɛ anyɔ nɛ ɗɔbs hinyɔ bi̧i̧ gɛ, gi an nɛ ɗɛɛ dɔgl be ɗɔbsigɔ ri?
1 Yɔ anbɔ Yeesu tal a Galile Mɛmbal yɔ nuŋgɔ zaa a Tiberiya Mɛmbal kasiŋ zaabɔ ge. 2 Saalzanɔ gbɔɔl fɔge anyɔ hi gbɛn gɛrs wɔ gi wook a gumtil wɔ hi muulɛ. 3 Yeesu ɗund da dɔɔ a ga̧a̧t ha hi walɛsɛrɛ ɔ̧ɔ̧ wɔ. 4 Hɔnɛ Yahuduya Paska naab gi sɛ̧ɛ̧bik be. 5 Yɔ Yeesu pɛɛ yɔ̧lɔ anyɔ gi gbɛn saalzanɔ gbɔɔl gi zaak a ge, ɛr Filib a wɛ zɛm kokɔ ay an wɛ gaa dood wɛrɛ hi le nɔ? 6 Gii ɛr Filib hin anbɔ an gi kɛm hinyɔ gɔ gi goosige. Gii mɛɛ hinyɔ gɔ gi woo nɛ hɛw. 7 Filib raage a kok yɔ gɔ wɛ zeb tus gaat tɛmɛrɛ eerɛ yɔ rii an dood sɛw hi dag kaasi hɛw gɛ. 8 Simɔŋ yɔ nuŋgɔ zaa a Piyɛr , yɛ̧ɛ̧tɔ Andrɛ, yɔ gi walɛsɛrɛ ɔ̧ɔ̧ wɔ zaaya̧ gbunu, raage: 9 a walà za gi hɛdi gin kok kiml nɔɔnɛ hi dut dɛɛt eerɛ. Gi rii nɔ ma a dood kit wɔ hi muutdu nɔ? 10 Yeesu raa walɛsɛrɛ ɔ̧ɔ̧ wɔ a raan dood wɔ hi ɗɔɔtɔ. Hɛtyɛ̧s gi lɛlɔge bubudug be. Walɛ wɔ hi ɗɔɔtɔ, kitigya̧ sɛ̧ɛ̧b an duk nɔɔnɛ. 11 Yeesu loo kok kiml wɔ baan Bɛto, wɛɛ raa hi gɛ̧ɛ̧s dood wɔ hi ɗɔɔt a hɛtyɛ̧s wɔ ha. Wɛɛ gɛ̧ɛ̧sihi dut wɔ anyɔ ha̧a̧hi. 12 Yɔ dood wɔ hi le kok bɔ hi bɛɛ hi̧i̧ko, Yeesu raa walɛsɛrɛ ɔ̧ɔ̧ wɔ a mɔglin kok ɓɛɛkil wɔ hi zɛ̧ɛ̧rɔ, an bɔ hinza gi wagɔ. 13 Hi mɔgl kok ɓɛɛkil wɔ hi hi̧i̧s dɛl koobl daatɔ eerɛ a kok kiml nɔɔn wɔ hi le gi zɛ̧ɛ̧r gedu. 14 Yɔ dood wɔrɔ hi gbɛn gɛrs yɔ Yeesu woo anbɔ hi dɔgɔ: a wal yɛrɛ gi Bɛtya̧a̧kɛŋkya yɔ gɔ gi zaa nɛ waal du gii sa̧a̧nɛ! 15 Yɔ Yeesu mɛɛ a hi zaak a ge an hi loog hi tɛŋko hi wɛɛnig Waar gbɔɔlɛ, zol wɛɛ dɔɔ a ga̧a̧t ha gi gbunu. 16 Yɔ lɛɛsig tuurɔ Yeesu walɛsɛrɛ ɔ̧ɔ̧ wɔ hi tii a mɛmbal ya̧di, 17 hi da hi kar a lɛmb du hi kar mɛmbal bɔ an hi rek a mɛmbal kasiŋ zaabɔ ge a Kapɛrnayum, yɛms bul da̧a̧ be. Yeesu zaadir nɛ a hii ket gɛ. 18 Zɛk gi fɛk hi tɛŋko, mɛmɗukil wɔ hi kark be. 19 Yɔ hi nuu lɛmb bɔ hi rek an kilomɛɛtre nɔɔnɛ, zaa nɔɔn-gbunu, hi gbɛn Yeesu ɛmzig a mɛmbal bɔ hage gi zaak a lɛmb lɛl bɔ ge. Yɔ hi gbɛnige hoobha̧a̧hiha̧. 20 Yeesu raahi a beya, bɔ hoob gi ha̧a̧nɛ. 21 Yɔ anbɔ, ha̧a̧hi an hi loog nɛ a lɛmb bɔ gedu, wɛɛ ɓɔrbɔ hi tuur a lɛlyɔ gɔ hi sil nɛ ge. 22 Yoosugɔ yɔ saal wɔ hi kɔm hi erk a mɛmbal kasiŋ bɔ hɔ ge, hi mɔk a gɛ lɛmb gbun bɔ gi nɛ a lɛl bɔ ge kpɔd, hi mɛɛ be a Yeesu kār hi walɛsɛrɛ ɔ̧ɔ̧ wɔ a lɛmb bɔ gedu gɛ, walɛsɛrɛ ɔ̧ɔ̧ wɔ hi rek mukya̧. 23 Anyɔ lɛmb zaadɛ hi fu̧u̧z a Tiberiya hi zaa hi sɛ̧ɛ̧b a lɛlyɔ Yeesu baan Bɛto hi le kok ge, 24 yɔ dood saal wɔ hi gbɛn Yeesu taa lɛlɔge hi walɛsɛrɛ ɔ̧ɔ̧ wɔ hɛw gɛ, hi wɛɛ hi tal a lɛmb wɔ gedu, hi rek hi tɛb Yeesu a Kapɛrnayum. 25 Yɔ hi zɛŋg a mɛmbal kasiŋ zaa bɔ ge hi warige a Hingokya , mɔ zaa bil hɛdi be? 26 Yeesu goohi a be raasinɛ hi rɔbo: nɛ́ tɛ̄be a gɛrs hintuusingoya wɔ nɛ gbɛn be woo dɔŋgɔ gɛ, nɛ tɛb a kok yɔ nɛ le nɛ hi̧i̧ gi dɔŋgo. 27 Bɔnɛ woos lees yɔ gɔ gi da̧a̧ woosɛ, yɛrɛ woosin lees yɔ gɔ gi waa faa gii woosɛ. Za̧a̧n Waa bɔ gii gi gaan leesɔ. Gii gi Za̧a̧nyɔ Baa Bɛt gaag gbɔlums an hi mɛksinge. 28 Hi wɛɛ hi warige a gi an wi gɔ nɔ an wi woo Bɛt woosɔ wɔ ha̧a̧ge? 29 Yeesu goohi a Bɛt woosɔ gɛ: an nɛ ɗɔbs Za̧a̧nyɔ yaazige. 30 Wɔrɔ hi wɛɛ hi warige a mɔ wook nɔ gɛrsɔ an gɔ wi gbɛn wi ɗɔbsum nɔ? Mɔ wook nɔ woosɔ? 31 Baa wi hi le kok gɛrsya bɔ nuŋgɔ a maanyɔ a hɛtdɔŋ du anyɔ Bɛt ɗɛɛrwolɔ raa a gaazihi kok a bɛtha an hi le. 32 Yeesu wɛɛ raahi a be raasin rɔbo, Muusa gāan kok yɔ fu̧u̧z a bɛtha gɛ, Baa be gii gin gaak kok rɔb bɔ fu̧u̧z a bɛtha. 33 Yɛrɛ Bɛt kokɔ gɛ Za̧a̧nyɔ siz a bɛtha gi wɛɛ gi gaak dood waal du za̧a̧tigi. 34 Hi raage a Ɗɛntyɔ, gaawi kok bɔrɔ faa. 35 Yeesu raahi a bee gi kok za̧a̧tigya, za̧a̧nyɔ zaa a be, a̧a̧kil taag zaa ha̧a̧k nɛ zaŋ, wɛɛ za̧a̧nyɔ ɗɔbsibe mɛm taag ha̧a̧k nɛ zaŋ. 36 Yɛrɛ be raasinɛ a nɛ gbɛnibe, wɛɛ nɛ ɗɔbsib gɛ. 37 Dood wɔ Baa be gib gaak sɛw hí zaa a be; za̧a̧nyɔ gɔ gi zaa a be, be taag nɛ bisig zaŋ. 38 Yɛrɛ be siz a bɛtha an be woo hinyɔ ha̧a̧ Za̧a̧nyɔ yaazib giya, taa hinyɔ ha̧a̧ beya. 39 Hinyɔ ha̧a̧ Za̧a̧nyɔ yaazib gɛrɛ: ha̧a̧g an dood wɔ gaab sɛw, bɔbe waks zaaya̧ gbunu, gɔ gi ɔ̧t kuud bɔ gedu, be wɛɛ be ɗunsihi a wɔrk du. 40 Hinyɔ Baa be ha̧a̧g gɛrɛ: an za̧a̧nyɔ gbɛn waawal bɔ gi ɗɔbsige gi dag za̧a̧tig faa, be wɛɛ be ɗunsige a wɔrk du a ɔ̧t yɔ̧ɔ̧sum bɔ gedu. 41 Yahuduya wɔ hi dɔn hinyɔ Yeesu raa a be gi kok yɔ siz bɛtha giya. 42 Hi raa a nɛ Yeesu bɔ za̧a̧nɔ Yusufu waawal gii ma mi? Wɛ mɛɛ baatɔ hi nɔɔtɔ be, yɔ wɛɛ yɔ raa ri ma a be siz bɛtha nɔ? 43 Yeesu goohi a bɔnɛ dɔntinu. 44 Doo za ɗɛ̄ɛ̄ an gi zaa beege gid Baa be yɔ yaazib dizig hi Mɔkilɔ gɛ. Bé wɛɛ bé ɗunsig a ɔ̧t kuud bɔ gedu. 45 Bɛtya̧a̧kɛŋkya wɔ hi bi̧i̧ dɔglɔ a dood sɛw Bɛt gi goksihi hinɛ. Gɔ gi anbɔ za̧a̧nyɔ lag Baa bɔ ya̧a̧ɔ gi wɛɛ gi ta̧a̧ hinyɔ gɔ gi goksige ɓɔr gi zaa a be. 46 Yɛrɛ doo za gbɛn Baa bɔ gɛ, gɛ za̧a̧nyɔ fu̧u̧z a ge gbɛnig kpɔd. 47 Be raasin rɔbo, za̧a̧nyɔ ɗɔbsibe gin za̧a̧tig faa. 48 Bee gi kok za̧a̧tigya. 49 Baa nɛ wɔ hi le kok gɛrsya bɔ nuŋgɔ a maan a hɛtdɔŋ du hi wɔɔrɔ. 50 Kok yɔ siz bɛtha gi hɛdi, za̧a̧nyɔ gɔ gi lege taa wɔrko. 51 Bee gi kok za̧a̧til yɔ siz a bɛtha, za̧a̧nɔ gi le kok yɛrɛ gi waa faa; kok yɛrɛ be gaako gi muul benɛ yɔ be gaak an waal gi za̧a̧ giya. 52 Kuudu Yahuduya wɔ hi faltinhin hi teesdu hi raa a wal yɛrɛ yɔ gaawɛ yɔ̧ktɔ ri an wɛ tɔb nɔ? 53 Yeesu raa a be raasin rɔbo, nɛd lē Za̧a̧n Waa bɔ muulɔ gɛ, nɛ wɛɛ nɛ yɔ̧ ga̧a̧mɔ gɛ, nɛ taan za̧a̧tigi. 54 Za̧a̧nyɔ le muul be gi wɛɛ gi yɔ̧ ga̧a̧m be, gin za̧a̧tig faa, bé wɛɛ bé ɗunsige a ɔ̧t yɔ̧ɔ̧sumi. 55 Muul be gi lees hi rɔbo, ga̧a̧m be gi hinyɔ̧k hi rɔbo, ya̧a̧nɛ. 56 Za̧a̧nyɔ gɔ gi lek muul be gi wɛɛ gi yɔ̧k ga̧a̧m be, gi waak hi beya, bee be waak hi gii be. 57 Baa Bɛt za̧a̧tig gaakya bɔ yaazibe, bee be, be za̧a̧k a gi dɔŋgo. Yɔ anbɔ, za̧a̧nyɔ gɔ gi lebe gi za̧a̧ be dɔŋgo. 58 Kok bɔ siz a bɛtha gi hɛdi; kokɔ taa an kok gɛrsya yɔ baa nɛ hi le a hɛtdɔŋdu hi wɛɛ hi wɔrɔ. Za̧a̧nyɔ gi lek kok yɛrɛ gi za̧a̧ faa. 59 Yeesu dɔg hin bɔrɔ yɔ gis dood hingok a mɔksilluk du a Kapɛrnayum. 60 Yɔ Yeesu walɛsɛrɛ ɔ̧ɔ̧ wɔ hi kɛm hin bɔrɔ, zaadɛya̧ kittɔnɔ hi raa a dɔgl ɓaatil bɔrɔ bɔ ɗɛɛ an gi ta̧a̧ nɔ? 61 Yɔ Yeesu mɛɛ a walɛsɛrɛ wɔ hi dɔntingo dɔgl bɔrɔ, raahi a hin bɔrɔ zɛks mɔkil nɛ zɛks ya? 62 Yɛrɛ à nɛ gbɛn nɛ Za̧a̧n Waa bɔ dɔɔk a lɛlyɔ da giz nɛ ge doosɛ, yɔ nɛ mɔk ri? 63 Bɛt Mɔkili gi gaak za̧a̧tigi, taa an doo muul gi woo hinza ɔnɛ. Dɔgl wɔ be raasinɛ gi Mɔkili hi za̧a̧tigi. 64 Yɛrɛ dood zaadɛ hi gi nɛ teesdu hi taa ɗɔbsugo. (Yɔ anbɔ Yeesu mɛɛ nɛ dood wɔ hi taa nɛ ɗɔbsig zaŋ gɛ gaati, wɛɛ mɛɛ za̧a̧nyɔ gɔ gi rɛ̧ɛ̧sigya̧a̧ be.) 65 Yeesu wɛɛ dɔgɔ a hinɔ gii be raasinɛ a doo za ɗɛɛ an gi zaa beege gɛ gid Baa bɔ gaag gbɔnɔ gɛ. 66 Bɛɛ lɛlɔdi anbɔ, walɛsɛrɛ wɔ kittɔnɔ hi wɛɛ kuudu, hí sɔktin zaa hi Yeesu ma gɛ. 67 Yeesu war walɛsɛrɛ ɔ̧ɔ̧ wɔ koobl daa eerɛ a nɛɛ be, ha̧a̧n reki hɛw ya? 68 Simɔŋ Piyɛr wɛɛ googe a Ɗɛntyɔ, wi re ma bɔge? Mɔɔ gin dɔgl za̧a̧tigya faa be. 69 Wi ɗɔbsɔ, wi wɛɛ wi mɛɛ a mɔɔ gi Kristu doo gaat yɔ fu̧u̧z a Bɛt ge. 70 Yeesu wɛɛ warihi a nɛ bee herin nɛ koobl daa eer ma mi? Nɛ yɛrɛ zaa gbun a nɛ teesdu gi loorɛha̧a̧lɛ! 71 Gi dɔk Simɔŋ waawal Yahuda Iskaryudi dɔgl ɔ̧ɔ̧nɛ. Gi walɛsɛrɛ ɔ̧ɔ̧ wɔ koobl daa eer zaaya̧ gbun yɔ gɔ gi rɛ̧ɛ̧sig ya̧a̧ giya.
1 Yɔ kuudu anbɔ labɔ, Yahuduya wɔ hi ɓɛɛk Yeesu an hi gbɔŋge. Yɔ gbɛn anbɔ, hā̧a̧g waak a Yahuduya gɛ, ɛmb gbɛ̧ɛ̧ka ma Galile. 2 Yahuduya luk gbandilya naab bɔ sɛ̧ɛ̧b be. 3 Yeesu yɛ̧ɛ̧dɛ ɔ̧ɔ̧ hi raage a ɔɔm lɛlyɔdi, mɔ rek a Yahuduya an fɔkya mɔ wɔ hi gbɛn gɛrs yɔ mɔ wooko. 4 Yɔ anbɔ doo za gi ha̧a̧g an dood hi mɛɛge, wōō hin a yaatillɛl gɛ. Mɔ́ gi wook hin wɔrɔ zuunum zul mɔ a waal du. 5 Yɛ̧ɛ̧dɛ ɔ̧ɔ̧ hi ɗɔbsig hɛw gɛ, ya̧a̧nɛ hi booya̧a̧ anbɔ. 6 Yeesu raahi a benɛ ɔ̧t be riid ket gɛ, nɛnɛ ɔ̧t nɛ waa riikyɔ. 7 Waal ɗɛ̄ɛ̄ an gi hɛ̧ɛ̧ninlɔl gɛ; yɛrɛ benɛ be book dɔglɔ a woosɔ wɔ bɛr gɛ, ya̧a̧nɛ gi gib lɔlhɛ̧ɛ̧nuko. 8 Nɛɛ dɔ̀ɔn naab bɔ, benɛ ɔ̧t be riid gɛ, be taa dɔɔk naab bɔ kete. 9 Yɔ raahi anbɔ kɔmz a Galile. 10 Yɔ Yeesu yɛ̧ɛ̧dɛ ɔ̧ɔ̧ hi dɔɔ naab bɔ, gii hi zulɔ zol dɔɔ hɛw. 11 Yɔ anbɔ Yahuduya wɔ hi gig ɓɛɛk be hi gig wark a naab bɔ gedu a gi ma ay nɔ? 12 Hi faltingo dɔglɔ gbɔɔltɔnɔ hi ya̧a̧tamsɛ a saal bɔ gedu. Dood zaadɛ hi raako a doo rɔbo, wɛɛ zaadɛ hi raak be a gi dood waksigyayɔ. 13 Anyɔ hoob gihi ha̧a̧k Yahuduya wɔ, doo za bōō dɔglɔ tuu ha gɛ. 14 A naab teesdu Yeesu dɔɔ a Bɛtluk du mɛɛ hingokyɔ. 15 Yɔ hin gokɔ bɔ kɔms Yahuduya wɔ gɛrsɛ hi warɔ a nɛ za̧a̧n yɛrɛ mɛɛhin ay, wɛɛ zaŋga gɛ be? 16 Yeesu goohi a hingok yɔ be goko, taa fu̧u̧zig a beege, gi fu̧u̧zig a Za̧a̧nyɔ yaazib ge. 17 Doo za gi ha̧a̧g an gi woo Bɛt ha̧a̧tigɔ, gi mɛɛ a hingok wɛrɛ be goko gid fu̧u̧z a Bɛt ge, zaabe, gid be book hin wɛrɛ hi zul beenɛ. 18 Za̧a̧nyɔ gi book hin hi zulɔ tɛŋkɔ, gi ɓɛɛsig zulɔ gbɔlumsɛ; yɛrɛ za̧a̧nyɔ gi ɓɛɛk za̧a̧nyɔ yaazig gbɔlumsɔ be, gii gi za̧a̧n rɔbo, wɛɛ hinza a̧a̧b taa a ge. 19 Muusa gāan Bɛtmaakdɔgl gɛ ya? Wɛɛ doo za gbun fɔ dɔglɔ bɔ gɛ be! Nɛ nɛ ɓɛɛk an nɛ gbɔ̧b a nɔ dɔŋgo? 20 Dood saal wɔ hi gidi hi ta̧a̧ a mɔ gin loorɛha̧a̧lɛ, bɔ gim tɛk an gi gbɔm nɔ? 21 Yeesu goohi a be woowoos gbunu, wɛɛ, nɛɛ sɛw, yɔɔnyɔ. 22 Muusa gaan dɔmsdɔglɛ, hinɔ fu̧u̧z a Muusa ge gɛ, fu̧u̧z a ɗɛntɛ wɛ doos hi. Ya̧a̧nɛ nɛ nak waat nɛ a holum-ɔ̧t hɛw. 23 Nɛ́ gi nak waat a holum-ɔ̧ti, an bɔnɛ ha̧tir Muusa maakɔ, yɛrɛ hin nɔɔnɛ nɔ hi bee ɔnɛ anyɔ bee be za̧a̧s doo a holum-ɔ̧ti? 24 Bɔnɛ gbaa dɔgl a hinyɔ nɛ gbɛnik hi lɔl nɛ hage, yɛ̧ɛ̧n dɔgl hi gbɔnɔ. 25 Dood zaadɛ wɔ hi waak a Urusalima hi warɔ a wali hi gig ɓɛɛk an hi gbɔŋge nɛ gii yɔ ma mi? 26 Yɛrɛ gi bookya̧a̧ a dood muutdu be, wɛ̄ɛ̄ hi wa̧a̧g gɛ be, ri nɔ? Dood wɛ gbɔlɛ wɔ hi mɛɛmɛ ya̧nɛ a Masihu bɔ gii ya? 27 Yɛrɛ wɛ mɛɛ lɛlyɔ wal yɛrɛ fu̧u̧z du, Masihu bɔ gɔ gi zaa, doo za taa mɛɛk lɛlyɔ fu̧u̧ du be. 28 Yɔ Yeesu gi gokhin a Bɛtluk du, raa a nɛ mɛɛbe, nɛ wɛɛ nɛ mɛɛ lɛlyɔ be fu̧u̧z du be! Yɛrɛ bé mɔ̄k hi zul be an be zaa gɛ; Za̧a̧n rɔb yɔ yaazib giro, wɛɛ nɛ mɛɛg gɛ. 29 Benɛ be mɛɛge, be fu̧u̧z a ge, gii yaazibe, ya̧a̧nɛ. 30 Ha̧a̧hi an hi wa̧a̧ge, yɔ ɔ̧tɔ riid gɛ, doo za yaa naan gi muul gɛ. 31 Dood zaadɛ kittɔnɔ a saal bɔ gedu hi ɗɔbsig Yeesu hi raako a Masihu bɔ gɔ gi zaa gi gɔ gɛrs gi daar wal yɛrɛ ɔnɛ bɔ daar ya? 32 Yɔ Farisaya wɔ hi lag dood hi faltingo hin a Yeesu zulha hi ya̧a̧tamsɛ, Bɛtmaakwookya wɔ hi yaaz lɛl-ook-yaadɛ an hi rek hi wa̧a̧ge. 33 Yeesu dɔgɔ: a be gi hi nɛɛ ɔ̧t kaasi ket ɓɛ, kuudu bé wɛɛ be rek a Za̧a̧nyɔ yaazib ge. 34 Gɔ nɛ ɓɛɛbe nɛ zɛ̧b gɛ, wɛɛ nɛ ɗɛɛ an nɛ zaa a lɛlyɔ gɔ be gi ge gɛ. 35 Yahuduya wɔ hi ɛtin hi tees du: a gii gi rek lɛlɔ ay an wɛɛ wɛ zɛŋg gɛ nɔ? Gi rek a dood wɔ hi nɔɔ hi rek a Yonaniŋkoya wɔ hi teesdu hi an gi goksihi hin ya? 36 Dɔglɔ yɔ raa a nɛ ɓɛɛbe nɛ zɛ̧b gɛ, wɛɛ ɗɛ̄ɛ̄ an nɛ zaa a lɛl yɔ be gi ge gɛ, nɔ hinɔ raakɔ anbɔ ɔnɛ? 37 A naab-ɔ̧t yɔ̧ɔ̧sum bɔ yɔ daar ɔ̧t zaadɛ wɔ gedu Yeesu er ɓooya̧a̧ a za̧a̧nyɔ mɛm gig ha̧a̧ko, zaag a bee gi yɔ̧. 38 Za̧a̧nyɔ ɗɔbsibe, zɛɛ gbɔɔl mɛm za̧a̧tigya gi zɔb a gi kpoos du, anyɔ Bɛt ɗɛɛrwol dɔgɔ . 39 Yeesu dɔgn Bɛt Mɔkil yɔ za̧a̧nyɔ gɔ gi ɗɔbsig gi dagig giya. Yɔ anbɔ Bɛt Mɔkilɔ da zaad nɛ ket gɛ be, yɔ Yeesu dagd nɛ gbɔlumsɔ ket gɛ giya. 40 Dood wɔ hi gi saal bɔ gedu hi bɛɛ dɔgl bɔrɔ kɛŋko hi dɔgɔ: a hi rɔbo wal yɛrɛ gi Bɛtya̧a̧kɛŋkya bɔ wɛ gig ook giya. 41 Zaadɛ be hi raak a Masihu bɔ giya. Wɛɛ dood zaadɛ ɓɛ: a Masihu bɔ gii fu̧u̧z a Galile ya? 42 Bɛt ɗɛɛrwol rāā a Masihu bɔ gi fu̧u̧z a Dawda dɔ̧ɔ̧t du a Baytilaama, a lɛlyɔ Dawda gi ge gɛ ya? 43 Dood saal wɔ hi gɛ̧ytin ma gɔ a Yeesu dɔŋgo. 44 Dood zaadɛ hi teesdu ha̧a̧hi an hi wa̧a̧ge, wɛɛ doo za yaa naan gi muul gɛ be. 45 Yɔ anbɔ lɛl-ookya wɔ hi wɛɛ a Bɛtmaakwookya gbɔlɛ wɔ hi a Farisaya wɔ hi. Yɔ hi tuurɔ, wɔrɔ hi warihi: a ri nɛ kāmzig gɛ nɔ? 46 Lɛl-ookya wɔ hi goo: a doo za bood nɛ ya̧a̧ an wal bɔrɔ zaŋ gɛ. 47 Wɛɛ Farisaya wɔ hi warihi: a nɛɛ hɛw hi maatinmaat ya? 48 Waar ɛ wɔ zaaya̧ hi ɗɔbsigɗɔbs ya? Zaabe Farisaya wɔ zaaya̧ hi ɗɔbsigɗɔbs ya ri?! 49 Dood saal wɔrɔ hi mɛɛ Bɛtmaakdɔgl gɛ hi gi bootyaadɛyɔ!! 50 Zaaya̧ gbun yɔ nuŋgɔ a Nikodɛm yɔ zaa nɛ a Yeesu ge yɛms du raahi 51 a maakdɔgl wɛ raa a mɔ kɛ̄m hinyɔ doo gi dɔk kɛn gɛ, mɔ gbɛ̄n hinyɔ gi wook kɛn gɛ, ɗɛ̄ɛ̄ an mɔ matinge dɔgl gɛ. 52 Wɔrɔ hi wɛɛ hi warige a mɔɔ mɔ gi Galileya hɛw ya? Zaŋgum ɗɛɛrwol mɔ rɔbtɔnɔ, mɔ gbɛn a Bɛtya̧a̧kɛŋkya za taa fu̧u̧zig a Galile hɛbt du gɛ! 53 Bɛɛ anbɔ, bɔbe wɛɛ gi raa du be.
1 Yeesu tuu dɔ̀ɔ̀ a Kɔ̧ɔ̧b Ga̧a̧t ha. 2 Lɛlyɔ bɛɛ gaako, wɛɛ tiiz a Bɛtluk du, dood sɛw hi zaa a ge, gii ɗɔɔt goksihi hinɛ. 3 Yɔ anbɔ Bɛtmaakdɔkya wɔ hi Farisaya wɔ hi kamz nis za yɔ hi wa̧a̧zig gi naak a mans du, hi esig a saal teesdu hi raa Yeesu 4 a Hingokya , nis yɛrɛ wi zɛmzig mans du wi wa̧a̧ wi kamzige. 5 -6 Muusa raaw a maakɔdɔgl bɔ gedu be, a hi zɛm nis gi mansgɔk anyɔ hi wa̧a̧ge hi duutinge bet gi wɔrɔ. (Yɔ ha̧a̧hi an hi ton Yeesu dɔglɛ an kuudu hi mɛɛg wa̧a̧ko) hi warige a yɛrɛ mɔya, mɔ dɔg a nɔ? Yeesu hu̧u̧r bi̧i̧ hin hi naanwalɔ a hɛbtdi. 7 Yɔ hi gig gbork warki, gii wɛɛ ɗundɔ raahi a za̧a̧nyɔ taan hinha̧a̧l a nɛ teesdu gɛ, loog beto gi yɛɛl nis yɛrɛ duuko. 8 Wɛɛ hu̧u̧r bi̧i̧ hin hi naanwalɔ a hɛbtdi. 9 Yɔ wɔrɔ hi lag dɔgl bɔrɔ anbɔ hi hɔms gbunu gbunu hi reekɔ, yɛɛl a ɗɛntɛ, tuur a walɛsɛrɛ wɔ hi sɛw, hi ɔɔ Yeesu gi gbunu hi nis bɔ hi esig nɛ a saal tees bɔ gedu. 10 Yɔ Yeesu wɛɛ gi ɗuks zulɔ ha gbɛn nis bɔ gi gbunu. Wɛɛ warige a nisyɔ, dood wɔ hi gɛ̧ɛ̧num nɛ dɔgl hi gaay nɔ? Doo za wa̧a̧num dɔgl gɛ ya? 11 Nis bɔ ta̧a̧ a Ɗɛntyɔ, doo za taaro. Yeesu wɛɛ raage a bee hɛw be taam dɔgl wa̧a̧nuko, rekumɔ, bɔmɔ wɛɛ mɔ gɔ hinha̧a̧l za. 12 Yeesu wɛɛ dɔgɔ: a bee gi lɛlgaal waal du, za̧a̧nyɔ fɔbe, taa ɛmbik lɛlwil du, gi dag lɛlgaal za̧a̧tigi. 13 Farisaya wɔ hi wɛɛ hi raage a mɔ boosig zul mɔɔn dɔglɛ, dɔgl mɔ bɔrɔ dɔglɔ taa dɔgl rɔbo. 14 Yeesu goohi a an be boosig zul been dɔgl si̧, dɔglɔ gi rɔbo. Be mɛɛ lɛlyɔ be fu̧u̧zɔ hi lɛlyɔ be reko. Yɛrɛ nɛya, nɛ mɛ̄ɛ̄ lɛl yɔ be fu̧u̧z du hi lɛlyɔ be rek du gɛ. 15 Nɛ yɛ̧ɛ̧k dɔgl an dood gɔ hi yɛ̧ɛ̧ko, benɛ bé gbaas doo za dɔgl hinɔ gɛ. 16 Wɛɛ an be gbaak dɔgl si̧, dɔgl be gbaak bɔ gi hi gbɔnɔ. Be taa be gbunu, Baa bɔ yaazibe gi hi beya. 17 Hi bi̧i̧ a nɛ maak ɗɛɛrwol du a dood eerɛ, ya̧a̧ya̧ gi ɔks gbunu, dɔglya̧ gi rɔbo. 18 Be boosig zul been dɔglɛ; wɛɛ Baa be yɔ yaazibe gi book dɔgl beenɛ. 19 Farisaya wɔ hi wɛɛ hi warige a Baa mɔ bɔ gi ay? Yeesu goohi a nɛ́ mɛ̄ɛ̄ bee gɛ, nɛ́ mɛ̄ɛ̄ Baa be hɛw gɛ. À nɛ mɛɛ nɛ Baa be, yɔ nɛ mɛɛ bee hɛw. 20 Yeesu dɔg ɗɔgl wɔrɔ yɔ gi hingok a Bɛtluk du a gaaslɛl yɔ gɔ hi gaak ge; yɔ wa̧a̧k ɔ̧tɔ riid gɛ be, doo za wa̧a̧g gɛ. 21 Yeesu raahi ɓɛ a be gi rekrekɔ, nɛ ɓɛɛbe, nɛ wɛɛ nɛ wɔr a nɛ hinha̧a̧l du. Wɛɛ ɗɛɛ an nɛ tuur a lɛlyɔ be rek ge gɛ. 22 Yahuduya wɔ hi warɔ a yɔ raa a nɛ ɗɛɛ rek a lɛlyɔ be rek ge gɛ rɛ, gi rek zul ɔɔn gbɔŋk ger ya? 23 Wɛɛ raahi a nɛya nɛ fu̧u̧z a wɛɛdisɛ, wɛɛ beya be fu̧u̧z a wɛɛha. Nɛɛ nɛ fu̧u̧ a waal yɛrɛ gedu; beya bé fu̧u̧ a waal yɛrɛ gedu gɛ. 24 Be raanɛ a nɛ wɔr a nɛ hinha̧a̧l du. Yɔ anbɔ nɛ́ ɗɔ̄bs a be gi za̧a̧nɔ gii gɛ, nɛ wɔr a nɛ hinha̧a̧l du. 25 Farisaya wɔ hi warige a mɔɔ bɔ an mɔ booya̧a̧ anbɔ? Yeesu goohi a be gisin hinɔ raak yɛɛl a biitirnaan du. 26 Be gin hin kittɔnɔ an be dɔgɔ an be gbansin dɔglɛ. Yɛrɛ Za̧a̧nyɔ yaazib gi Doo rɔbo. Wɛɛ hinyɔ be kɛm a ge, be book gii a waal du. 27 Hɔnɛ dood wɔ hí kɛ̄m a gi book Baa bɔ dɔglɔ gii gɛ. 28 Yeesu raahi a gɔ nɛ pɛɛ Za̧a̧n Waa bɔ wɛɛha, nɛ mɛks a be giro. Nɛ́ wɛɛ nɛ mɛɛ a bé wōō hinza hi zul be gɛ, be book anyɔ Baa be goksibe. 29 Za̧a̧nyɔ yaazibe gi hi beya, be waak wook hinyɔ bɛsige, ya̧a̧nɛ gi ɔ̄ɔb be gbun gɛ. 30 Anyɔ Yeesu gi dɔk anbɔ, dood kittɔnɔ hi gig ɗɔbsugo. 31 Yeesu wɛɛ raa Yahuduya wɔ hi gig ɗɔbsugo a an nɛ waa a be dɔgl du, nɛ gi walɛsɛrɛ beenɛ hi rɔbo, 32 nɛ wɛɛ nɛ mɛɛ rɔbo, wɛɛ hinrɔb bɔ gi tuus zul nɛ a hinha̧a̧l du gi gbaan aakil du. 33 Hi googe: a wɛya wɛ Abraham waato, wɛɛ wɛ wɛɛsir doo za gbaarɛ hinɔ gɛ be. Mɔ wɛɛ mɔ raak ri a nɛ dag zul nɛ aakil du nɔ? 34 Yeesu goohi a be raasin rɔbo: za̧a̧nyɔ gi wook hin-ha̧a̧lɛ gi hinha̧a̧l gbaaryɔ. 35 Gbaar taa waak raa du faa, waa mɔɔl ɔnɛ gi waak faa. 36 Gid bee Bɛt waa bɔ be tuus zul nɛ a hinha̧a̧l du, hi rɔbo, zul nɛ gi gi aakil du be. 37 Be mɛɛmɛ a nɛ Àbraham waato, yɛrɛ yɔ dɔgl be tal nɛ kpoos du gɛ, ha̧a̧nɛ an nɛ gbɔ̧be. 38 Be raak hinyɔ be gbɛnz a Baa be ge giya. Wɛɛ nɛya nɛ wook hinyɔ nɛ lag a baa nɛ gbaŋ gii be. 39 Hi gòòge a baa wi gɛ Abraham. Yeesu goohi a à nɛ gi nɛ Àbraham waato, yɔ nɛ woo hinyɔ Abraham woo giya. 40 Yɛrɛ ɓɔryɔ nɛ tɛk an nɛ gbɔ̧be, bee yɔ be raasin rɔb yɔ be lag a Bɛt ge gii kpɔd! Abraham wōō hin anbɔ gɛ. 41 Nɛɛ nɛ wook baa nɛ woosɛ. Wɔrɔ hi googe: a wi taa manswaato; wi gin Baa wi gbun kpɔd, gɛ Bɛto. 42 Yeesu raahi a à Bɛt gi nɛ Baa nɛ giya, yɔ ha̧a̧n a be muulɛ, be fu̧u̧z a Bɛt ge ro be zaa waal du. Bé mɔ̄k hi zul benɛ an be zaa gɛ, gii yaazibe. 43 Nɔ nɛ kɛ̄msib ya̧a̧boon be yɛrɛ gɛ? Yɔ ha̧a̧n dɔgl be kɛŋk gɛ giya. 44 Loorɛha̧a̧l gii baa nɛ, wɛɛ ha̧a̧n baa nɛ ɗɔkumɔ ha̧a̧lɔ wɔ hii fɔko. Gii gi doogbɔŋkya yɛɛl a bii-tirnaan du. Yɔ rɔb taa a ge, gi doo-mɛlyayɔ, hā̧a̧g rɔb dɔgl gɛ. Yɔ gi doo ya̧a̧gɔ̧ɔ̧nya, gi ya̧a̧gɔ̧ɔ̧n baatɔ, gɔ gi book ya̧a̧gɔ̧ɔ̧nɛ, gi book ya̧a̧boon ɔ̧ɔ̧nɛ. 45 Yɔ bee be gisin raak rɔb gii nɛ ta̧a̧sib dɔgl be gɛ. 46 Bɔ za̧a̧nɔ gi zuun a nɛ teesdu a be wook hinha̧a̧l nɔ? Nɛ yɔ be raak rɔb be, nɔ nɛ ta̧a̧sib dɔgl be ma gɛ? 47 Za̧a̧nyɔ fu̧u̧z a Bɛt ge gi kɛnk Bɛt dɔglɛ; yɔ nɛɛ nɛ fu̧u̧z a Bɛt ge gɛ be, nɛ kɛm gɛ. 48 Yahuduya wɔ hi googe a nɛ wi raa rɔbo a mɔ Samariyayayɔ, nɛ mɔ gin loorɛha̧a̧l ma mi! 49 Yeesu goohi a be taan loorɛha̧a̧lɛ. Yɛrɛ bee be gi ɗɔbsig Baa be giya, nɛɛ nɛ wɛɛ nɛ gib niiko. 50 Be taa tɛk gbɔlums benɛ; doo gbun ro gi ɓɛɛk gbɔlums be bɔ, za̧a̧nɔ gii gi gbaas dood dɔglɛ. 51 Be raasin hi rɔbo, za̧a̧nyɔ wa̧a̧ dɔgl be a gi kpoos du, taa wɔrk gbɛnk faa. 52 Yahuduya wɔ hi raage a yɛrɛ wi mɛɛ ma gɔ a mɔ gin loorɛha̧a̧lɛ mɔ muul du. Abraham wɔɔrɔ, Bɛtya̧a̧kɛŋkya wɔ hi wɔɔr hɛw. Mɔɔ mɔ raak ri ma a za̧a̧nɔ gi wa̧a̧ dɔgl mɔ taa wɔrk gbɛnik faa nɔ? 53 Mɔ tɔɔ mɔ daar baa wɛ wɔrki Abraham daar ya? Bɛtya̧a̧kɛŋkya wɔ hi wɔr be. Mɔɔ mɔ seek zul mɔ an bɔ? 54 Yeesu goo a an be gi ɗɔbsig zul beenɛ, ɗɔbsig be yɔ wɛɛ hintɔsyɔ. Baa be gib ɗɔbsugo, gii gi Za̧a̧nyɔ nɛ gig raak a Bɛt nɛɛnɛ, 55 nɛ́ wɛɛ nɛ mɛɛg gɛ. Benɛ be mɛɛge; wɛɛ à be raa nɛ a be mɛɛg gɛ, yɔ be riitin hi nɛya. 56 Yɔ baa nɛ Abraham gi nɛ mɔkig amntɔnɔ an gi gbɛn ɔ̧t benɛ, gin nɛ hat gbɔɔltɔnɔ. Gbɛn ɔ̧tɔ gbɛn ma hɛw, wɛɛ dag hat a gedu hɛw. 57 Yahuduya wɔ hi warige a mɔ taan wɛl dumbili nɔɔn hɛwi, mɔ gbɛn Abraham ri? 58 Yeesu raahi a be dɔgsin rɔbo, anyɔ Abraham da mɔɔyd gɛ, bee be giiro. 59 Yɔ anbɔ hi tuu bet an hi duunige, gii yɔ gbɛn anbɔ yaatɔ, tuu ɔɔ Bɛtluk bɔ.
1 Yɔ Yeesu gi daako gbɛn wal za yɔ mɔɔy yɔ̧ɔ̧ri. 2 Walɛsɛrɛ ɔ̧ɔ̧ wɔ hi ɛrig anyɔ lɛ a Hingokya , bɔ gɔ hinha̧a̧l nɔ, wal yɛrɛ gii ya, zaabe baatɔ hi nɔɔtɔ hii gɔ hinha̧a̧l an gi mɔɔy yɔ̧ɔ̧r ya ri? 3 Yeesu wɛɛ goohi a wal yɛrɛ gii hɛw gɛ, baatɔ hi nɔɔtɔ hii hɛw gɛ. Hinɔ wooy an Bɛt tɛŋkɔ gi mid muulɔ ge. 4 A lurk yɔ duge, gi an wɛ woo Za̧a̧nyɔ yaazib woosɔ wɔ. Wag kaasi an yɛms gi bulɔ, a yɛmsɔ gedu doo za ɗɛɛ an gi woo woos ma gɛ. 5 Anyɔ be gi waal du, be gi lɛlgaal a waal du. 6 Yɔ raa anbɔ tus set hɛbtdi ya̧a̧n hɛbto, huus yɔ̧ɔ̧r bɔ yɔ̧l du. 7 Wɛɛ raage a rekum mɔ da mɔ ur muut mɔ a Silowe mɛmzɛɛl bɔ gedu. (Silowe bɔ hinɔ raakɔ a yaayzɔ.) Wal bɔ rek ur muutɔ a mɛm bɔ gedu, wɛɛza gbɛn yɔ̧lɔ bɔ gaattɔnɔ. 8 Naaza zaadɛ wɔ hi sɛbtin di hi wɔ gɔ hi gig nɛ gbɛnik ɗɔɔtugo, hí mɛ̄ɛ̄ a ɛltyayɔ, hi warɔ a nɛ za̧a̧n yɛrɛ wal ɛltya bɔ da gi ɗɔɔtig gbɔnɔya̧ gi gi ɛɛlik gii ma yɔ mi? 9 Dood zaadɛ hi raa a giya, zaadɛ be, hi raa a ɛ̧-ɛ̧ muut rɛɛsɛ. Wal bɔ raa hi zulɔ hɛw a beya. 10 Hii be hi wɛɛ hi warige a yɔ̧l mɔ bɔ kpɛ̧ɛ̧r hinɔ ri? 11 Yɔ̧ɔ̧r bɔ fɔkɔ a wal za bɔ nuŋgɔ a Yeesu gii ya̧a̧ wɔmt gi sɔɔsib yɔ̧l du, wɛɛ raabe a rekum mɔ uz a Silowe mɛmzɛɛl du. Yɔ be rek be uzɔ be gbɛn yɔ̧l be gaa sɛs. 12 Hi wɛɛ hi warige a walɔ gi ay? Gii ta̧a̧ a be mɛɛ gɛ. 13 Hi kam wal bɔ gi nɛ yɔ̧ɔ̧r a Farisaya wɔ hi. 14 Yeesu woo hin bɔrɔ a holum-ɔ̧t ro gi ya̧a̧ wɔmnt bɔ gi kpɛ̧ɛ̧r wal bɔ yɔ̧lɔ wɔ be. 15 Kuudu Farisaya wɔ hi wɛɛ hi warige a yɔ̧l mɔ wɔ hi gaa hinɔ ri? Gii wal bɔ wɛɛ fɔkɔ a wal bɔ ya̧a̧ wɔmnt gi sɔɔsib yɔ̧l du, be rek be uz mɛm du be gbɛnik ma gɛrɛ. 16 Farisaya zaadɛ wɔ hi raa a walɔ taa fɔk holum-ɔ̧t maak bɔ, fu̧u̧z Bɛt ge gɛ. Zaadɛ hi ta̧a̧ a doo hinha̧a̧lya yɔ ɗɛɛ hingɛrsyaadɛ an wɛrɛ wookɔ ri nɔ? Hi gɛ̧ytin gɔ teesɛ. 17 Hi wɛɛ hi war wal bɔ a mɔɔ mɔ raa a nɔ a gi zulha nɔ? Anyɔ kpɛrsum yɔ̧l mɔ rɛ mɔ raa a ri? Wal bɔ goo a benɛ be raa a nɔ, raak be gɛ ma a gi Bɛtya̧a̧kɛŋkyayɔ. 18 Yahuduya wɔ hí ɗɔ̄bs a gi nɛ yɔ̧ɔ̧ri hi wɛɛ hi kpɛrsig yɔ̧lɔ gɛ, hi elz za̧a̧nyɔ lɔlɔ gaa baatɔ hi nɔɔtɔ hi zaa kete. 19 Yɔ hi zaa, hi warihi a waa nɛ bɔ nɛ da nɛ raak a mɔɔy yɔ̧ɔ̧ri giiyɔ ya? Yɛrɛ wɛɛ gi gbɛnik ri ma ɓɔri nɔ? 20 Baatɔ hi nɔɔtɔ hi ta̧a̧ a wi mɛɛ a waa wi bɔ mɔɔy yɔ̧ɔ̧r giya. 21 Yɛrɛ wí mɛ̄ɛ̄ hinyɔ tal gi muul an gi gbɛn yɔ̧l ɓɔri ma gɛ, kinsa bɔ kpɛrsig yɔ̧lɔ? Gii tɔɔtɔ, warinɛge gi fɔksin hinyɔ daa hi zulɔ. 22 Yɔ baatɔ hi nɔɔtɔ hoobha̧a̧hi Yahuduya wɔ gii hi raa anbɔ. Yahuduya wɔ be hi ɔks nɛ ya̧a̧ya̧ hi teesdu da̧a̧da̧ a kinsa za̧a̧n za gɔ gi raa a Yeesu gii gi Masihu hi tuusig a mɔksilluk du, hi seege an ɓi̧i̧limyayɔ. 23 Hinɔ gii baatɔ hi nɔɔtɔ hi raa a gii tɔɔtɔ, warinɛge. 24 Farisaya wɔ hi wɛɛ hi el wal bɔ gi nɛ yɔ̧ɔ̧ri dɔɔ eesimɛ hi raage a ɗɔbsum Bɛto, wi mɛɛ a wal bɔrɔ gi doo hinha̧a̧l-yayɔ. 25 Gii goo a gi gi hinha̧a̧lyayɔ benɛ be mɛɛ gɛ. Be mɛɛ hin gbunu a be da be gi nɛ yɔ̧ɔ̧ri, be wɛɛ be gbɛnik yɔ̧l ɓɔryɔ a gi dɔŋg ma. 26 Hi wɛɛ hi warige a woosum nɔ, kpɛrsum yɔ̧l mɔ wɔ hinɔ ri? 27 Gii wɛɛ goohi a be da be raasin hinɔ raasɔ, hā̧a̧n lak gɛ be, yɛrɛ ha̧a̧n nɔ lak ɓɛ? Ha̧a̧n an nɛ wɛɛ fɔkyaadɛ ɔ̧ɔ̧n hɛw ya? 28 Hi niige a mɔɔ mɔ gi fɔkya ɔ̧ɔ̧nɛ, wii be wi gi Muusa fɔkyaadɛ ɔ̧ɔ̧n be. 29 Wi mɛɛ ɔnɛ a Bɛt booya̧a̧ hi Muusa, yɛrɛ wal yɛrɛ ɔnɛ wí mɛ̄ɛ̄ lɛlɔ fu̧u̧z du gɛ. 30 Wal bɔ raa a eh! Hinɔ kɔmsib ma gɛrsɛ, nɛ́ mɛ̄ɛ lɛl yɔ wali fu̧u̧z du gɛ! Nɛ yɛrɛ kpɛrsib yɔ̧l be ɔnɛ. 31 Wɛ mɛɛ a Bɛt taas hinha̧a̧lya wɔ kɛŋko; za̧a̧nɔ gi gig ɗɔbsugo, gi gisig hinyɔ ha̧a̧g wooko, gi kɛmsig ɔnɛ. 32 Yɔ waal bɛɛ yɛɛluko, hi kɛm hinza a doo za kpɛrs za̧a̧n za yɔ mɔɔy yɔ̧ɔ̧r yɔ̧l hinɔ gɛ. 33 À wal bɔrɔ fu̧u̧z nɛ a Bɛt ge gɛ, yɔ ɗɛ̄ɛ̄ an gi woo hinza gɛ. 34 Wɔrɔ hi wɛɛ hi gòòge a mɔɔ yɔ hi mɔɔm a hinha̧a̧l du zaŋ, mɔɔ mɔ wɛɛ mɔ goks wii hin ya? Hi ninig tuu gɔ fɛd a mɔksilluk bɔ gedu. 35 Yɔ Yeesu kɛm a hi nin wal yɔ̧ɔ̧r bɔ yɔ̧lɔ kpɛr nɛko, rek zɛŋge warige a mɔ ɗɔbsig Za̧a̧n Waa bɔ ya? 36 Wal bɔ yɔ̧lɔ kpɛr ta̧a̧ a ɗɛnti, gii gi bɔ Za̧a̧nɔ? Raasibe an be ɗɔbsige. 37 Yeesu raa a mɔ gbɛnig-gbɛnɔ, za̧a̧nɔ gii gimɔ booko. 38 Wɛɛ raage a Waar i, be gi ɗɔbsigɗɔbsɔ; wɛɛ zagl gi muut du, ɗɔbsige. 39 Yeesu wɛɛ raa a be zaa a waal yɛrɛ gedu an dɔglyɛ̧ɛ̧k gi giro, dood hi gɛ̧ɛ̧y teesɛ, an dood wɔ hi gi yɔ̧ɔ̧ri hi gbɛn yɔ̧lɛ, wɛɛ an wɔ hi gbɛnko hi yɔ̧ɔ̧. 40 Farisaya zaadɛ wɔ hi gi nɛ hi gii hi lag dɔglɔ anbɔ hi raage a wii hɛw wi gi yɔ̧ɔ̧rɛ ya? 41 Yeesu ta̧a̧hi a à nɛ gi nɛ yɔ̧ɔ̧rɛyɔ, yɔ nɛ taan hinha̧a̧lɛ. Yɛrɛ ɓɔri nɛ raak a be gbɛnik-gbɛnɔ, gid hinha̧a̧l nɛ bɔ gi waako.
1 Yeesu wɛɛ raa a be raasin rɔbo, za̧a̧ni guz a wagl bɔ gedu gɛ gi kar wɔmnt ha gi gul a tamluk du, gi luuri, luur wɔdwɔɔlikya. 2 Yɛrɛ za̧a̧ni tal a wagl bɔ gedu, gi tamnɛɛrayɔ. 3 Gbɔnɔ-ookya bɔ gi kpɛrsige, tam wɔ hi lag kɔlkɔ; gi el tamɔ wɔ hi gi zulumsɔ nuŋgo hi nuŋgo gi dosihi gbɔnɔ a lakdi. 4 Gɔ gi tuus tamɔ wɔ sɛwi gi gisihi gbɔnɔ dorko, tam wɔ hi mɛɛ kɔlkɔ hi fɔge. 5 Tam wɔ hi taa fɔk rɔ̀bi, hi nɔɔk dɔŋgɔ anyɔ hí mɛ̄ɛ̄ rɔ̀b bɔ kɔlkɔ gɛ. 6 Yeesu dɔgsihi ya̧a̧daanik bɔrɔ, wɛɛ hii be hi kɛm hinyɔ gisihi dɔk gɛ. 7 Yeesu wɛɛ raahi ɓɛ a be raasin rɔbo, bee gi tam waglɛ. 8 Wɔ hi dosib nɛ zaakɔ sɛw hi gi luurɛyɔ, luurɛ wɔd wɔɔlikyaadɛ, wɛɛ tam wɔ hi kɛmsihi kɔlkya̧ gɛ be. 9 Bee gi tamlukgbɔnɔ. Za̧a̧ni guz a beege gi za̧a̧; gi gulɔ gi wɛɛ gi tuu gi rek a leeslɛlɛ. 10 Luur gɔ zaa an gi loo hinluur kpɔd, gi gbɔmɔ, gi wɛɛ gi ha̧tiro. Beya be zaa an tam wɔ hi dag za̧a̧tig gi daarlɛlɛ. 11 Bee gi tamnɛɛra rɔbo, nɛɛra rɔb bɔ gi gaak kolɔ a tam wɔ hi dɔŋgo. 12 Tuswoosya yɔ taa tamnɛɛra gɛ gi gbɛn lergum gi zaako, anyɔ tam wɔ hi taa ɔnɛ gɛ be, nɔɔ ɔɔhi dihɔ lergum zaa wa̧a̧lihi, hɛksihi. 13 Za̧a̧n bɔ gi wook tuswoosɛ, dɔglɔ taa du ro gi nɔɔ gi ɔɔhi. 14 Bee gi tamnɛɛra rɔbo. Be mɛɛ tam be wɔ, tam be wɔ be hi mɛɛbe, 15 anyɔ Baa be mɛɛbe, bee be mɛɛ Baa be be, be wɛɛ be gaak kol be a tam wɔ hi dɔŋgo. 16 Be gin tam zaadɛ wɔ hi taa a luk yɛrɛ gedu. Tamya̧ gi an be kamzihi, hi kɛm kɔlk be hi ɔks maasya̧ gbunu, hi nɛɛra gbunu. 17 Be gaak kol be an kuudu be wɛɛ be looge. Ya̧a̧nɛ Baa be gi ha̧a̧g a be muulɛ. 18 Doo za taa look kol be, yɛrɛ be gig gaak hi zul be; be gin tɛŋko an be gaa kol be, be wɛɛ be gin tɛŋko an be wɛɛ be looge. Hinɔ Baa be gaabe gbɔnɔ an be woo giibɔ. 19 Hinfaltingo wɛɛ mɛɛ gɔ a Yahuduya wɔ hi teesdu a dɔgl bɔrɔ geha. 20 Dood kittɔnɔ hi teesdu hi raa a wal bɔ yooyɔ, gin loorɛha̧a̧lɛ, nɛ gisig lak nɔ? 21 Zaadɛ hi raa be a loorɛha̧a̧lya gɔ bōōya̧a̧ anbɔ gɛ. Loorɛha̧a̧l yɔ ɗɛɛ an gi kpɛrs yɔ̧ɔ̧r lɔl ya? 22 Hi nak ma Bɛtluk naab yɔ gɔ hi el a Hanuka a Urusalima a zɛrk tee du. 23 Yeesu gul gi ɛmbik Bɛtluk du a Sulemaanu gbag dɔŋdu. 24 Yahuduya wɔ hi zaa hi rɔge hi raage a gi tuur nɛ bil an mɔ ɔsiw rɔb dɔk gaattɔnɔ be? Gid mɔ gi Masihu bɔ giya, raasiwi rɔbtɔnɔ. 25 Yeesu raahi a nɛ be raasin nɛ ta̧a̧ gɛ ma mi! Woos wɔ be wook a Baa be nuŋg du hi zuunik dɔgl beenɛ. 26 Nɛ yɔ nɛ taa tam benɛ gɛ gii nɛ ɗɔbs gɛ. 27 Tam be wɔ hi gi kɛŋk kɔlk be, be mɛɛhi, hi gib fɔko. 28 Be gihi gaak za̧a̧tig faa. Hi taa nɛ wak zaŋ, wɛɛ doo za taa an gi wɔɔdihi be naan du be. 29 Baa be yɔ gaahi be naan du tɔɔ daar hin sɛw; doo za ɗɛɛ an gi wɔɔdihi a Baa be naan du gɛ be. 30 Baa be hi beya wi gi gbunu. 31 Yɔ Yahuduya wɔ hi lag anbɔ hi wɛɛ hi loo bet an hi duutinge gi wɔrɔ. 32 Yeesu raahi a be zunsin woos rɔbɛ wɔ Baa be gaaz kittɔnɔ, nɛ gib duuk a woosɔ nɔni dɔŋg nɔ? 33 Yahuduya wɔ hi googe a wi taam duuk a woos rɔb dɔŋgo. Yɔ mɔ book ya̧a̧ha̧a̧l a Bɛt zulha gii wi gim bet duutingo an mɔ wɔrɔ. Yɔ mɔ gi doo tɔs, mɔ wɛɛnik zul mɔ ri an Bɛt nɔ? 34 Yeesu raa a nɛ hi bi̧i̧ a nɛ maakɗɛɛrwol du a Bɛt raa a be raa a nɛɛ gi bɛt a waal du da ma mi? 35 Wɛ mɛɛ a hinza ɗɛɛ an gi kɔm tɔs a Bɛt ɗɛɛrwol du gɛ. Yɔ anbɔ, maak bɔ gi el dood wɔ Bɛt dɔgl zaa a hiige a nɛɛ gi bɛto. 36 Yɛrɛ beya, Bɛt heribe yaazib waal du, ri nɛ ɗɛɛ raak a be book ya̧a̧ha̧a̧l a Bɛt zulha nɔ? Nɛ yɔ be raa a be gi Bɛt waa gii ma mi? 37 Woos yɔ be wook gi taa a Baa be tɛŋk du gɛ, bɔnɛ ɗɔbsibe. 38 Yɛrɛ yɔ be wook woos a gi tɛŋk du, gid nɛ ta̧a̧b nɛ gɛ si̧, ɗɔbsin woos wɔ ɔnɛ an nɛ mɛɛ, nɛ kɛm bɛttɔnɔ a Baa be ɔks gbun hi beya, bee be, be ɔks gbun hi Baa be. 39 Hi tɛb an hi wa̧a̧ge, wɛɛ hi wa̧a̧g gɛ be. Wir hi naan du reekɔ. 40 Yeesu wɛɛ rek a Urdum zɛ̧ɛ̧rnɔ kasiŋ zaa bɔ ge a lɛlyɔ Yohana da gi nɛ hotingo dood Bɛtmɛm a biitirnaan duge, ɗɔɔt waa hɔ. 41 Dood kittɔnɔ hi rek a ge hi raako a Yohana wōō gɛrs gbun mɔɔt gɛ, yɛrɛ hinyɔ dɔg a wal yɛrɛ gi zulha sɛw gi rɔbo. 42 Dood kittɔnɔ hi ɗɔbsig a lɛlɔ ge.
1 Wal za giro nuŋgɔ a Laazar, guumɔ, lɛlɔ a Betani, a Mariyama hi yɛ̧ɛ̧tɔ Marta lɛlɛ. 2 Mariyama ɔ̧ɔ̧ gii sɔɔs nɛ Waar Yeesu ɗaasɛrɛ kurum ki̧i̧lhɛmntya gi wɛɛ gi pugdsinge dɔɔɔ wɔ hi susugi. Waŋtɔ Laazar gii gumɔ. 3 Siŋdɛ wɔ hi yaa doo za gɔ a Yeesu ge a hi raasig a Waar i, sa̧a̧m mɔ guumɔ. 4 Hɔnɛyɔ Yeesu lag anbɔ raa a gumsɔ taa wɔrkya, gumsɔ gi an gi zuun Bɛt tɛŋk an hi ɗɔbsinu, gi wɛɛ gi zuun waaɔ bɔ gbɔlumsɔ an hi ɗɔbsig be. 5 Yeesu ha̧a̧g a Marta muulɛ hi yɛ̧ɛ̧tɔ hɛw, hi waŋtɔ Laazar hɛw. 6 Yɔ mɛɛ ma a Laazar guumɔ, kɔm ɔ̧tɔ eerɛ a lɛl bɔ gi ge. 7 Yɔ kuudu anbɔ, wɛɛ raa walɛsɛrɛ ɔ̧ɔ̧ wɔ a wɛ wɛɛ a Yahuduya. 8 Walɛsɛrɛ ɔ̧ɔ̧ wɔ hi raage a Hingokya , Yahu-duya wɔ hi gim nɛ ɓɛɛk nɔgansɛ an hi duutinmɔ beto mɔ wɔrɔ, kɔmri gi ha̧a̧mɔ wɛɛk a Yahuduya ɓɛ? 9 Yeesu ta̧a̧ a nɛ lɛlgaal gɔ yɛɛl bi̧i̧l du tuur lɛɛsig du mi? À za̧a̧n za gi ɛmbik a lurk du, yɔ simdɔɔ gɛ anyɔ gi gbɛnik lɛlgaal a waal du. 10 Yɛrɛ à za̧a̧n za gi ɛmbik a yɛms du gi taan lɛlgaalɛ, yɔ simdɔɔsimɔ. 11 Yɔ dɔg anbɔ wɛɛ raahi a saam wɛ Laazar gi yokyo. Yɛrɛ be gig rek kpookyɔ. 12 Walɛsɛrɛ ɔ̧ɔ̧ wɔ hi raage a Waar i, à gi yokyo yɔ za̧a̧za̧ ro! 13 Yeesu ha̧a̧g nɛ raak a Laazar wɔɔrɔ. Yɔ anbɔ, walɛ-sɛrɛ ɔ̧ɔ̧ wɔ be hi rum a gi book yoom rɔb dɔglɛ; 14 wɛɛ wadsihi dɔglɔ gɔ a Laazar wɔɔrɔ. 15 Ànyɔ be taa lɛlɔdi gɛ, be dag hat a nɛ dɔŋgo an nɛ ɗɔbsɔ. Yɛrɛ yɛnwɛ rek a ge. 16 Tumas yɔ nuŋgɔ a Kumbili, raa naaza walɛsɛrɛ wɔ a wɛ́ɛ́ be, yɛnɛ an wɛ ɗa wɛ wɔr elo hi Waar Yeesu. 17 Yɔ Yeesu tuurɔ zɛm Laazar gi loor du ma am ɔ̧tɔ nasɔ. 18 Betani sɛ̧ɛ̧b hi Urusalima di kaasi, an kilomɛɛtre nɔɔnɛ. 19 Yɔ Marta hi Mariyama waŋya̧ Laazar wɔrɔ, Yahuduyaadɛ kittɔnɔ hi zaa hi gihi rɔɔko an hi ɓatsihi muulɛ. 20 Yɔ Marta lag a Yeesu gi zaako rek dagzige, Mariyama ɗɔɔt raa du be. 21 Marta raa Yeesu a Waar i, an mɔ gi nɛ dihɛ waŋ be yɔ wɔr nɛ gɛ ro! 22 Yɛrɛ be mɛɛ a hinyɔ gɔ mɔ war Bɛt ge sɛw gi gaamɔ. 23 Yeesu googe a waŋ mɔ gi rɛmla. 24 Marta raage a bé mɛ̍ɛ̍ a gi rɛml a ɔ̧t yɔ̧ɔ̧sum bɔ ge du, a wɔrkɛ rɛmtig ɔ̧ti. 25 Yeesu goo a bee gi rɛmtigi hi za̧a̧tigi. Za̧a̧nyɔ ɗɔbsibe gi za̧a̧, an wɔr nɛ hɛw. 26 Za̧a̧nyɔ gi za̧a̧tili gi ɗɔbsibe taa nɛ wɔrk zaŋ. Mɔ ɗɔbsig hin wɔrɔ ya? 27 Marta ta̧a̧ a hɔɔ, Waar i, be ɗɔbs a mɔɔ gi Masihu bɔ Bɛt waaɔ yɔ gɔ gi zaa a waal du. 28 Yɔ dɔg anbɔ rek da elz hindaɔ a yaaklɛlɛ raage a hingokya bɔ gi hɛdi gi mɔ ɛrko. 29 Yɔ Mariyama bɛɛ lako ɗun nɔɔktɔnɔ rek a ge. 30 Yeesu da gudir nɛ a waal bɔ gedu ket gɛ, gi a lɛlyɔ Marta dagig nɛ ge. 31 Yɔ Yahuduya wɔ hi zaa Mariyama rɔɔk a gi raa du hi wɛɛ hi gbɛnig gi ɗuk nɔɔktɔnɔ gi tuu, hi fɔge. Hi rum a gi rek a waŋya̧ loorlɛl bɔ ge an gi kaa wɔrk bɔ giya. 32 Yɔ Mariyama tuur a lɛl bɔ Yeesu gi nɛ ge gi gbɛnige, zagl gi dɔŋdi raage a Waar i, an mɔ gi nɛ dihɛ waŋ be yɔ wɔr nɛ gɛ ro! 33 Yɔ Yeesu gbɛn nis bɔ gi kaako, Yahuduya wɔ hi zaatinu hi kaak be, hin bɔ lab pɛɛ kpoosɔ, wɛɛ mɔkilɔ ɗukɔ, 34 wɛɛ warihi a nɛ i̧i̧g loorɔ ay? Hi googe a Ɗɛntyɔ, zaamɔ mɔ see lɛlɔ hi i̧i̧ge. 35 Yeesu zɔbs mɛɛko. 36 Yahuduya wɔ hi gbɛn anbɔ hi dɔgɔ a eh! seenɛ, ha̧a̧gha̧ gi muul ro! 37 Wɛɛ dood wɔ zaadɛya̧ hi dɔgɔ a gii yɔ kpɛ̧rs yɔ̧ɔ̧r bɔ yɔ̧lɛ, ɗɛ̄ɛ̄ nɛ an gi woo hinza an bɔ za̧a̧n yɛrɛ gi wɔr gɛ gɛ ya? 38 Yɔ Yeesu kpoosɔ wɛɛ gi ɗɔbɔ, rek gɔ a loorlɛl bɔ ge. Loor bɔ gi zɛŋk gbeeti a hɛɛl du hi kpɛ̧ɛ̧n bet fɛɛti. 39 Yeesu raa a mibrin bet fɛɛt yɛrɛ. Wɔrk bɔ siŋtɔ Marta raage A Waar i, wɔrk bɔ ɔ̧tɔ nas ma hɛdu, gi huur ma ɔnɛ. 40 Yeesu raage a bé rāāmɔ a mɔ́ ɗɔbsɔ mɔ́ gbɛn Bɛt gbɔlumsɔ gɛ ya? 41 Hi ha̧s bet fɛɛt bɔ a loorya̧. Yeesu wɛɛ pɛɛ yɔ̧lɔ wɛɛha raa a Baa, be baanumɔ anyɔ mɔ kɛmsibe. 42 Be mɛɛ a mɔ gisib kɛŋk faa. Yɛrɛ be gi dɔk a dood saal wɔ hi rɔ̄be hi dɔŋgo, an hi ɗɔbs a mɔɔ yaazibe. 43 Yɔ dɔg anbɔ ɓooya̧a̧ ha̧a̧ltɔnɔ raa a Laazar, tuuzumɔ! 44 Wɔrk bɔ Laazar tuuzɔ, dɔɔɔ wɔ hi naanɔ wɔ hi wɔy hi kɔmas zukkru, muutɔ bɔ yɛ̧ɛ̧y hi gbandili. Yeesu raahi a pidinɛge nɛ ɔɔge gi rekɔ. 45 Yahuduya wɔ hi zaatin nɛ hi Mariyama hi gbɛn hinyɔ Yeesu woo, zaadɛya̧ kittɔnɔ hi ɗɔbsig gɔ. 46 Dood zaadɛ hi teesdu be, hi rek hi zɛm Farisaya wɔ hi fɔksihi hinyɔ Yeesu woo. 47 Hɔnɛyɔ Bɛtmaakwookya gbɔlɛ wɔ hi Farisaya wɔ hi lag anbɔ hi mɔks Yahuduya ɗɛntɛ dɔgl-yɛ̧ɛ̧kya wɔ hi wɔ̀ dɔglɛ hi raa a wɛ woo nɔ, walɔ gi wook gɛrs gbɔɔltɔnɔ be? 48 An wɛ ɔɔg gi wook hin anbɔ, dood sɛw hi ɗɔbs giya. Romaya wɔ be, yɔ hi zaa hi ha̧tir Bɛtluk wɛ gaat bɔ ha̧tir hi hɛbt wɛ. 49 Zaaya̧ gbun bɔ nuŋgɔ a Kayafas yɔ gi nɛ Bɛtmaak-wookya gbɔɔl mɔɔt a wɛlɔ gedu raahi a nɛya nɛ mɛ̄ɛ̄ nɛ hinza nɛ gɛ zaŋ. 50 Nɛ mɔk gɛ ya? An doo gbunu wɔr a dood sɛw dɔŋgo, yɔ daarɔ, hi anyɔ dood hɛbtdi sɛw gɔ hi wagɔ. 51 Bɛtmaakwookya gbɔɔl mɔɔt bɔ dɔ̄g hin bɔ lab hi zulɔ gɛ. Anyɔ gi Bɛtmaakwookya gbɔɔl mɔɔti a wɛlɔ gedu be, gi dɔgnik Bɛtdɔglɛ a Yeesu gii gi wɔr a dood Yahuduya wɔ sɛw hi dɔŋgo. 52 Za̧a̧nɔ taa an gi wɔr wɔrkɔ a Yahuduya wɔ hi dɔŋg kpɔd, gi an gi kamz Bɛt waatɔ wɔ hi hɛks nɛ lɛl sɛw gi ɔksihi lɛlgbunu. 53 Yɔ anbɔ, yɛɛl a ɔ̧tɔ ge hi ɔks dɔglɔ gbunu an hi gbɔŋge. 54 Yɔ anbɔ Yeesu zuun muutɔ rɔbtɔnɔ a Yahuduya wɔ hi tees du ma gɛ. Ɗund rek a hɛbt za dɔɔmi a hɛt du a waal za gbɔɔl du nuŋgɔ a Efrayim, waa hɔ hi walɛ-sɛrɛ ɔ̧ɔ̧ wɔ. 55 Yɔ Yahuduya Paska naab bɔ sɛ̧ɛ̧b an dood kittɔnɔ hi fu̧u̧ a waal zaadɛ du sɔmsɔm a hɛt du hí dɔ̀ɔ̀ a Urusalima hí gaas muulya̧, 56 hi ɓɛɛ Yeesu hi wɛɛ hi erk Bɛtluk du hi watingo gbunu gbunu a nɛ mɔk ri, Yeesu taa zaak naab bɔ ya? 57 Bɛtmaakwookya gbɔlɛ wɔ hi Farisaya wɔ hi raa nɛ be, a doo za gi mɛɛ lɛlyɔ Yeesu gi du hi raasihi an hi wa̧a̧ge.
1 Yɔ Paska naab bɔ wag yɛms nɔɔngbun an gi tuurɔ, Yeesu tuur a Betani a lɛlyɔ Laazar, za̧a̧nyɔ da rɛmsig a wɔrk du gi waak ge; 2 hi gaag lees a lɛlɔge; Marta gii gi lees bɔ dɔɔzugo. Laazar gi hi dood zaadɛ wɔ hi elzihi nɛ hi hinlek hi Yeesu be. 3 Mariyama wɛɛ loo naar kurum ki̧i̧lhɛmntya tik gbunu, zekɔ gumntɔnɔ, hi ɔ̄ksin hinza gɛ, gubs Yeesu dɔɔ muulɛ wɛɛ pugdin hi susugɔ. Luk bɔ hi̧i̧s gɔ hi kurum bɔ ki̧i̧lɔ hɛmnt bɔ seserkum. 4 Yeesu walɛsɛrɛ ɔ̧ɔ̧ wɔ zaaya̧ gbun nuŋgɔ a Yahuda Iskaryudi yɔ gɔ gi rɛ̧ɛ̧s Yeesu ya̧a̧ raa gɔ: 5 a nɔ hi zebr kurum ki̧i̧lhɛmntya yɛrɛ tus gaat tɛmɛrɛ taarɛ an hi gaa ya̧a̧rya wɔ gɛ nɔ? 6 Rāā hin bɔrɔ anyɔ ya̧a̧rya wɔ hi gisig ya̧a̧rha̧a̧k gii gɛ, yɔ gi doo luur giigi raanɔ; gii gi tus saa kaŋkigya. Gɔ gi ɓek zaa luur gi gbaak ɔnɛ be. 7 Yeesu wɛɛ raage a ɔɔmɔge, gbaa kurum bɔ an gi gɛbsin loor beenɛ a ɔ̧tyɔ gɔ hi i̧i̧b gedu. 8 Ya̧a̧rya wɔ hi gi hi nɛɛ faa, bee be, be taa gik hi nɛɛ faa. 9 Yɔ Yahuduyaadɛ kittɔnɔ hi lag a Yeesu gi a Betani hi zaa; hí zāā a gi dɔŋg kpɔd gɛ, hi zaa an hi see Laazar yɔ rɛmsig nɛ a wɔrk du be. 10 Ya̧a̧nɛ Bɛtmaakwookya gbɔlɛ wɔ hi wɔ̀ya̧a̧ an hi gbɔm Laazar hɛw. 11 Yahuduya zaadɛ kittɔnɔ hi hed a zaadɛ teesdu hi ɗɔbsig Yeesu a Laazar rɛmtigɔ bɔ gi dɔŋgo, ya̧a̧nɛ gi ha̧a̧hi an hi gbɔŋge. 12 A yoosugɔ ge saalzanɔ gbɔɔl hi zaa naab bɔ yɔ hi lag a Yeesu gi zaak a Urusalima. 13 Hi gbobz tɛ̧ɛ̧kpas wɔ hi gbaa daak-kpas wɔ hi rek hi dagtin hi Yeesu hi zaan a gi muutdu hi ya̧a̧ɓolti a Hozana, raakɔ a seko gbɔɔltɔnɔ, rɔbs gi a Za̧a̧nyɔ gi zaak a Waar Bɛt nuŋg du ge, rɔbs gi a Waar Israhila ge! 14 Yeesu zɛm pɛɛzumwaa za kar ɗɔɔt hage anyɔ Bɛt ɗɛɛr-wolɔ raa 15 a bɔ hoob gi ha̧a̧mɔ, Siyona waasiŋ, yɛrɛ Waar mɔ gbɔɔl bɔ gi zaako, ɗɔɔt a pɛɛzumwaa yɛlha. 16 Walɛsɛrɛ ɔ̧ɔ̧ wɔ be hí kɛm hin wɔrɔ hi zul du ket gɛ. Hɔnɛ kuudu, yɔ Yeesu tal a gi gbɔlums du, hi mɛks ma gɔ a Bɛt ɗɛɛrwol bɔ raa nɛ hinyɔ hi woosig yɔ dɔglɔ giya. 17 Dood kit wɔ hi gi nɛ hi Yeesu hı̄ gbɛ̄nig nɛ gi el Laazar a loor du a wɔrk du gi ɗunsige, hi dɔg dɔglɔ hɛw. 18 Dood saal wɔ hi kɛm dɔglya̧ hi lag a Yeesu gɔ nɛ gɛrs bɔrɔ, ya̧a̧nɛ hi mɔks gi muutdu. 19 Yɔ anbɔ, Farisaya wɔ hi watinu a sɔ̧ɔ̧nɛ, dood waal du sɛw hi gig fɔk gɛrɛ, wɛɛ taa an nɛ ɗɛɛ hinza wook be. 20 Yonaniŋkoya zaadɛ wɔ hi gi a dood wɔ hi dɔɔ naab bɔ teesɔ gedu an hi ɗɔbs Bɛto, 21 hi zaa a Filib yɔ fu̧u̧z a Baytizaada a Galile ge, hi raage a ɗɛnti, ha̧a̧w an wi gbɛn Yeesu giya. 22 Filib rek raas Andrɛ; Andrɛ hi Filib hi rek hi dɔks Yeesu. 23 Yeesu goohi a ɔ̧tyɔ Za̧a̧n Waa bɔ gɔ gi dag gbɔlumsɔ gedu riiri ma. 24 Be raasin rɔbo à totlɛŋks zāā hɛbtdi gi wɔr gɛ, gi kɔŋk bundikyɔ; gi wɔr be, gi tuusig gaatɔ kittɔnɔ. 25 Za̧a̧nyɔ ha̧a̧g kolɔ, gi waksige, za̧a̧nyɔ hā̧a̧g kolɔ a waal yɛrɛ gedu gɛ be, gi za̧a̧sig faa. 26 Za̧a̧n za gi ha̧a̧ge an gi woosib hinɛ fɔbzigbe! À lɛl yɔ be gi ge, woosya be gi gi lɛlɔge be. Za̧a̧nyɔ gisib hin wooko, Baa be gi ɗɔbsige. 27 Yɛrɛ kpoos be luutɔ, bé wɛɛ be dɔg hinɔ a nɔ? Baa Bɛto, za̧a̧sibe a hinyɔ gɔ gi tuur gedu a ɔ̧t yɛrɛ gedu? Ɛ̧-ɛ̧, lab gɛ, be zaa be tuur a ɔ̧t yɛrɛ gedu a hinyɔ gɔ gi tursib gi dɔŋgo, an be yɔ̧ ya̧a̧rhanto. 28 Baaba, ɗɔbsum nuŋg mɔ! Yɔ anbɔ, ya̧a̧booyz a bɛtha raa a be ɗɔbsigɗɔbsɔ, be wɛɛ be ɗɔbsig du ɓɛ. 29 Yɔ saal wɔ hi gi lɛlɔdi hi kɛm anbɔ hi dɔgɔ a bɛldɔntilyɔ; zaadɛ be a Bɛtwalsɛr boozige. 30 Yeesu dɔgɔ a ya̧a̧ bɔrɔ booyz be dɔŋg gɛ, booyz a nɛ dɔŋgo. 31 Yɛrɛ ɔ̧tyɔ Bɛt gɔ gi gbaas waal dɔglɛ riiri ɓɔri ma; waal bɔ waar ɔ be hi bisig-bisɔ. 32 Wɛɛ, benɛ, gɔ hi doobe a dɔ̧ɔ̧r ha hi pɛɛb a hɛbt wɛɛha, be dir dood sɛw hi zaa a beege. 33 Yɔ gi book anbɔ gi zuunik wɔrkɔ yɔ gɔ gi wɔr giya. 34 Dood saal wɔ hi goo a wi kɛm hinɔ a maakdɔgl du a Masihu gi waak faa. Mɔ wɛɛ mɔ raak ri a gi an Za̧a̧n Waa bɔ gi pɛɛy wɛɛha nɔ? Bɔ Za̧a̧n Waa bɔrɔ ma ɓɛ? 35 Yeesu wɛɛ raa a yɛrɛ lɛlgaal gi hi nɛɛ ɔ̧t kaasi ɓɛ a nɛ tees du. Fɔn gbɔnɔ anyɔ lɛlgaal gi hi nɛya, an bɔ lɛlwil gi kpɛ̧ɛ̧nɛ. Za̧a̧nyɔ gi ɛmbik a lɛlwil du mɛ̄ɛ̄ lɛlyɔ gi rek du gɛ. 36 Yɔ nɛ gin lɛlgaalɛ ɗɔbsin lɛlgaal bɔ an nɛ wɛɛ lɛlgaal waat be. Yɔ Yeesu dɔg hin wɔrɔ anbɔ ɗun rekɔ da yaat zulɔ hɛmltɔnɔ sɛ̧ɛ̧b dɔŋya̧ gɛ. 37 Anyɔ woo gɛrs kittɔnɔ a hi muutdu si̧, hi ɗɔbsig gɛ, 38 an hinyɔ Bɛtya̧a̧kɛŋkya bɔ Esaya dɔg nɛ gi wooyyɔ a Waar Bɛto, bɔ ta̧a̧ dɔgl wi? Bɔ gbɛn Waar Bɛt naanɔ tɛŋk be? 39 Yɔ anbɔ, hí ɗɛ̄ɛ̄ ɗɔbsig gɛ. Esaya wɛɛ dɔg be 40 a Bɛt yɔ̧ɔ̧s dood wɔ yɔ̧lya̧ wɛɛ ɓaas kpoosya̧, an bɔ yɔ̧lya̧ gi gbɛn hinɛ, an bɔ kpoosya̧ gi mɛɛ hinɛ, bɔhi zɛmr kpoosya̧ a be ge, be za̧a̧sihi. 41 Esaya dɔg anbɔ yɔ gbɛn nɛ Masihu bɔ gbɔlumsɔ gi dor giya gi wɛɛ gi boo dɔglɔ. 42 A dood gbɔlɛ Yahuduya wɔ hi teesdu hɛw, zaadɛ kittɔnɔ hi ɓɛ̧ɛ̧y hi ɗɔbs Yeesu be; hɔnɛ anyɔ gɔ hi ta̧a̧ dɔglɔ be, hoobha̧a̧hi Farisaya wɔ be, an bɔhi ninihi hi tuu a mɔksillɛl du, 43 Yɔ anbɔ ha̧a̧hi dood bant giigi daar Bɛt bantɔ. 44 Yeesu wɛɛ ɓooya̧a̧ dɔgɔ a za̧a̧nyɔ ɗɔbsibe ɗɔbs bee gɛ, ɗɔbs Za̧a̧nyɔ yaazib giya. 45 Wɛɛ za̧a̧nyɔ gbɛnibe, gbɛn za̧a̧nyɔ yaazib giya. 46 Be zaa an lɛlgaal a waal du, an za̧a̧nyɔ gɔ gi ɗɔbsibe bɔgi kɔm a lɛlwil du. 47 Za̧a̧nyɔ kɛm dɔgl be gi wɛɛ gi wā̧ā̧ a kpoos du gɛ, bee be taasig dɔgl gbaako; ya̧a̧nɛ, bé zaa an be gbaas waal dɔgl gɛ, yɛrɛ be zaa an be za̧a̧s waalɛ. 48 Za̧a̧nyɔ inibe gi wɛɛ gi tā̧ā̧ dɔgl be wɔ gɛ, za̧a̧nyɔ gɔ gi gbaasig dɔgl giro; dɔglyɔ be dɔg yɔ gii gi gbaas za̧a̧nɔ dɔgl a ɔ̧t yɔ̧ɔ̧simi. 49 Yɔ anbɔ, bé dɔg hin bɔrɔ hi zul benɛ gɛ, Baa be yɔ yaazib gii raabe hi zulɔ dɔgl yɔ gɔ be dɔgɔ . 50 Be mɛɛ dɔgl wɔ gi gaako gi dɔgl za̧a̧tigya faa. Yɛrɛ hinyɔ be dɔko, be gi dɔk dɔgl yɔ Baa bɔ raasib giya.
1 Anyɔ Paska naab gɔ gi tuurɔ, Yeesu mɛɛmɛ a ɔ̧t be rii an be ɔɔ waalɛ be rek a Baa be ge. Anyɔ ha̧a̧g doodɔ waal du, zunsihi hatɔ tuur a da̧a̧ki. 2 Yɔ hi gi lees lɛɛsumgbar bɔ leko loorɛha̧a̧l raa nɛ Simɔŋ waawal Yahuda Iskaryudi da̧a̧da̧ a gi rɛ̧ɛ̧ Yeesu. 3 Yeesu be mɛɛ a Baa be Bɛt gaab hin naan du sɛw. Be fu̧u̧ nɛ a Bɛt ge, wɛɛ be wɛɛk a Bɛt ge. 4 Ɗund ɔɔ leeslɛl bɔ, hod gbandilɔ, loo gbandil fɛɛt yɔ gɔ hi pugdin muulɛ malɔ. 5 Wɛɛ loo mɛmɛ kpel a dak fɛɛt du yɛls walɛsɛrɛ ɔ̧ɔ̧ dɔɔya̧ nɛɛki, wɛɛ gisihi pugdig hi gbandilɔ fɛɛt yɔ gi tabuko. 6 Wɛɛ dɔŋg a Simɔŋ Piyɛr ge. Piyɛr yɔ gbɛn anbɔ raage a Waar i, mɔɔ gisib ma dɔɔ nɛɛk ya? 7 Yeesu raage a hinyɔ be wooko, mɔ́ mɛɛ hinɔ ɓɔri gɛ, gɔ gi kuudu kaasi mɔ kɛm hinɔ. 8 Piyɛr raage a ɛ̧-ɛ̧, mɔ taasib nɛ dɔɔ be nɛɛk zaŋ! Yeesu raage a be taasum nɛɛk gɛ, mɔ taa waak ɔks hi beya. 9 Simɔŋ Piyɛr wɛɛ raage a Waar i, bɔmɔ nɛɛsib dɔɔ wɔ kpɔd, nɛɛsib naan wɔ hi zul bɔ hɛw. 10 Yeesu raage a za̧a̧nyɔ hotɔ gi an gi nɛɛ dɔɔɔ wɔ hii kpɔd, muulɔ sɛw gi gaa bɛttɔnɔ. Nɛnɛ nɛ dood gaatɛyɔ, nɛ́ gaa nɛ sɛw gɛ. 11 Yɔ mɛɛ za̧a̧nyɔ gɔ gi rɛ̧ɛ̧sig ya̧a̧ gii gi dɔg a nɛ taa dood gaatɛ nɛ sɛw. 12 Yɔ nɛɛsihi dɔɔya̧ wɔ gi da̧a̧ loo gbandilɔ hegɔ wɛɛ ɗɔɔt raahi a nɛ mɛɛ hinyɔ be woosin ya? 13 Nɛ gib elko a Hingokya , zaabe a Waar i; nɛ gi raak lɛlɔ ge, be gi za̧a̧nɔ giya. 14 Bee Waar i, bee Hingokya bé nɛɛsin dɔɔ nɛ, gi an nɛɛ hɛw nɛ nɛɛtin dɔɔ be. 15 Be goksin gbɔnɔɔ giya an nɛ woo an bee yɔ be woo be. 16 Be raasin rɔbo, gbaari tɔ̄ɔ̄ daar raatzulya gɛ. Tɔmsya tɔ̄ɔ̄ daar za̧a̧nyɔ yaag gɛ. 17 À nɛ mɛɛ hin wɔrɔ nɛ wɛɛ nɛ wooko, hat gi nɛɛge. 18 Bé bōō nɛ zulha sɛw gɛ, be mɛɛ dood wɔ be herihi, be gɔ an hinyɔ Bɛt ɗɛɛrwol bɔ raa gi wooyyɔ a za̧a̧nyɔ letin kok hi beya wɛɛsib lɔlhɛ̧ɛ̧nikyayɔ. 19 Be raasin dor an hin bɔ lab gi ɔɔ tuuruko. Hinɔ gɔ gi tuurɔ nɛ ɗɔbs gɔ a bee Za̧a̧nɔ. 20 Be raasin rɔbo: za̧a̧nyɔ dag za̧a̧nyɔ be yaazig sɛw, dag beya. Za̧a̧nyɔ dag beya, dag Za̧a̧nyɔ yaazib giya. 21 Yɔ Yeesu dɔg hin bɔrɔ anbɔ kpoosɔ gi luutɔ, wɛɛ raa deg a be raasin rɔbo: doo za gbun a nɛ teesdu gi rɛ̧ɛ̧sib ya̧a̧. 22 Walɛsɛrɛ wɔ hi seetinu. Hinɔ yɔɔhiyɔ hi mɛɛ za̧a̧nyɔ gi book dɔglɔ gi zulha gɛ. 23 Walɛsɛrɛ wɔ zaaya̧ gbun yɔ Yeesu ha̧a̧g gi muulɛ kus Yeesu dɔŋdi a gi kpoos du. 24 Simɔŋ Piyɛr kpa̧l walsɛr zaa bɔrɔ hi lɔlwiiko warige a raasiwi za̧a̧nyɔ Yeesu gi book dɔglɔ gi zulha. 25 Walsɛr bɔ yees a Yeesu kpoos du warige a Waar i, bɔ za̧a̧nɔ ɔnɛ? 26 Yeesu googe: a za̧a̧nyɔ gɔ be gaag kok-ɔ̧ɔ̧kil yɛrɛ gɔ be ɓa̧a̧n bisɛ. Yɔ ɔ̧ɔ̧ kok bɔ gi ɓa̧a̧n bis bɔ, gaa Simɔŋ waawal Yahuda Iskaryudi. 27 Yɔ Yeesu gaa Yahuda kok-ɔ̧ɔ̧kil bɔ anbɔ, Saydanu gul a Yahuda kpoos du. Yeesu raage a hinyɔ gɔ mɔ woo, woom hinɔ nɔɔktɔnɔ. 28 Hɔnɛ wɔ hi ɗɔɔt hi gii hi hinleko hi mɛ̄ɛ̄ hinyɔ raag anbɔ dɔŋgɔ gɛ. 29 Dood zaadɛ hi rum a Yahuda yɔ gi kaŋkig tus saa gi naan du gii Yeesu gi gig raako a rekum mɔ zebz hinyɔ gɔ wɛ gɔn naabo, zaabe a gi gaa ya̧a̧rya wɔ tusɛ. 30 Yɔ Yahuda loo kok-ɔ̧ɔ̧kil bɔ anbɔ wɛɛ tuu nɔɔktɔnɔ a yɛms bɔ gedu rekɔ. 31 Yɔ Yahuda tuu gi rekɔ, Yeesu raa a yɛrɛ hi ɗɔbs Za̧a̧n Waa bɔ ɗɔbs ma. Hí ɗɔbs Bɛt a gi zulɛ. 32 Gid hi ɗɔbs Bɛt a Waaɔ zulɛ, Bɛt gi ɗɔbs Waa bɔ ɗɔbs a gi zul be, gi ɗɔ̀bsig ɓɔr sɛ̧ɛ̧li hɛw. 33 Ya̧a̧mwaat be wɛ, be gi hi nɛɛ ɔ̧t kaasiwaanɔ. Nɛɛ be, nɛ́ tɛbe. Be raa Yahuduya wɔ a lɛlyɔ be rék ge, hi ɗɛ̄ɛ̄ an hi rek ge gɛ. Yɛrɛ ɓɔryɔ, be gisin raak hin gbun bɔ gii hɛw: a lɛlyɔ be rék ge, ɗɛ̄ɛ̄ an nɛ rek ge gɛ. 34 Be gin gaak dɔgl sego a yɛ gi hatinnɛ, anyɔ ha̧a̧b a nɛ muul be, nɛɛ yɛgi hatinnɛ anbɔ be. 35 Dood sɛw gɔ hi gbɛn a nɛ gin hatingo, hi mɛɛn a nɛya nɛ gi fɔkyaadɛ beenɛ. 36 Simɔŋ Piyɛr warige a Waar i, mɔ gi rek ay nɔ? Yeesu goo a lɛlyɔ be rek ge, ɗɛɛ an mɔ fɔb lɛlɔge ɓɔri gɛ, wɛɛ gɔ gi kuudu kaasi mɔ fɔbe. 37 Piyɛr raage a Waar i, nɔ be ɗɛɛ an be fɔm lɛlɔge ɓɔri gɛ? Bé gaa kol be a mɔ dɔŋgo. 38 Yeesu warige a mɔ raa ri, a mɔ gaa kol mɔ a be dɔŋgo? Be raasumɔ rɔbo, an kɔba gi kekɔ, mɔɔ mɔ faabe gi dor dɔɔ taarɛ.
1 Bɔ kol nɛ gi namɔ, ɗɔbsin Bɛto, ɗɔbsin bee be. 2 Ɗɔɔtillɛl kittɔnɔ hi gi a Baa be raa du. À ɗɔɔtillɛl taa nɛ gɛ, yɔ be raa nɛ a bé rek bé gɛmnsin lɛl gɛ. 3 Gɔ be rekɔ be gɛmnsin lɛlɛ be wɛɛzɔ be loonɛ wɛ retinu. Yɔ anbɔ lɛlyɔ be giza ge, nɛɛ nɛ gi a lɛlɔ ge be. 4 Nɛ mɛɛ lɛlyɔ be reko nɛ wɛɛ nɛ mɛɛ gbɔnɔ bɔ be. 5 Tumas raage a Waar i wí mɛ̄ɛ̄ lɛlyɔ mɔ rek du gɛ, wí mɛɛ ma gbɔnɔ bɔ hinɔ ri? 6 Yeesu raage a bee gi gbɔnɔ, bee gi rɔbo hi za̧a̧tigi. Doo za gi daa a bee ket gɛ, ɗɛɛ an gi tuur a Baa be ge gɛ. 7 À nɛ mɛɛ nɛ beya, yɔ nɛ mɛɛ nɛ Baa be hɛw. Yɛɛl ɓɔryɔ nɛ mɛɛge, nɛ wɛɛ nɛ gbɛnig hɛw. 8 Filib raage a Waar i, zunsiwi Baa bɔ za̧a̧nɔ, gi riiwi. 9 Yeesu raage a Filibi, be waa hi nɛɛ a̧a̧mɔ, mɔ mɛɛb gɛ ya? Za̧a̧nyɔ gbɛnibe gbɛn Baa bɔ giya; ri mɔ wɛɛ mɔ raak a zunsibe Baa bɔ gii nɔ? 10 Mɔ́ ɗɔbs a be waak ɔksi hi Baa bɔ, Baa bɔ be gi waak ɔksi hi bee gɛ ya? Dɔgl wɔ gɔ be gisin dɔko be taasin dɔk hi zul benɛ. Wɛɛ Baa yɔ gi waak hi beya gii gi wook woosɔ wɔrɔ. 11 Ɗɔbsinbe, be waak ɔksi hi Baa bɔ, Baa bɔ be gi waak ɔksi hi beya, zaa gi lab gɛ, ɗɔbsin a woos wɔ hi dɔŋg kpɔd. 12 Be raasin rɔbo za̧a̧nyɔ ɗɔbsibe gi woo woos yɔ be wook hɛw, gi woo gi daarin benɛ bɔ lɛl hɛw. Yɔ be gi rek a Baa bɔ ge giya. 13 Wɛɛ hinyɔ gɔ nɛ ɛr hi nuŋg be, be woo hinɔ an hi wɛɛn Baa bɔ doo gbɔɔlɛ a waaɔ bɔ gi dɔŋgo. 14 Gid nɛ ɛr hinza hi nuŋg be be woo hinɔ. 15 Gi ha̧a̧nɛ beya, nɛ fɔ dɔgl be wɔ be gaako. 16 Wɛɛ beya be zɔ̧b Baa be gi gaan ɗaakya za an gi waatin hi nɛɛ faa: 17 gɛ Mɔkilɔ rɔb yɔ fu̧u̧z a ge. Waal ɗɛɛ an gi ta̧a̧g gɛ; hi gbɛnig gɛ be, wɛɛ hi mɛɛg gɛ be. Yɛrɛ nɛya, nɛ mɛɛge, gi waak hi nɛya, wɛɛ gí ɗɔɔt a nɛ kpoos du be. 18 Be taan ɔɔk wɔrawaato, be wɛɛzugo a nɛɛge. 19 Gɔ gi am kaasi waal taab zaa gbɛnko. Yɛrɛ nɛɛ nɛ gib gbɛnko. Yɔ bee be za̧a̧ko, nɛɛ hɛw nɛ za̧a̧kza̧. 20 A ɔ̧tɔ ge nɛ mɛɛ a be waak ɔksi hi Baa be, nɛɛ be nɛ waak ɔksi hi beya, beya be waak ɔksi hi nɛya. 21 Za̧a̧nyɔ gin dɔgl be gi wa̧a̧k gi kpoos du, ha̧a̧g hi beya; za̧a̧nyɔ ha̧a̧g a be muulɛ, Baa be gi ha̧a̧g gi muul be, gi wɛɛ gi ha̧a̧be a gi muul be, be zuun zul be a ge. 22 Yahuda warige (Yahuda Iskaryudi gii gɛ) warige a Waar i, ri gi ha̧a̧mɔ an mɔ zunsiw zul mɔ, mɔ́ zūns waal du zul mɔ ɔnɛ gɛ nɔ? 23 Yeesu googe a za̧a̧n za gi ha̧a̧ge a be muulɛ, gi fɔ̀b dɔgl be, wɛɛ Baa be gi ha̧a̧g a za̧a̧nɔ muulɛ. Wi zaa wi waa hi giya. 24 Za̧a̧nyɔ hā̧a̧g bee gɛ taa wa̧a̧k dɔgl be wɔ a gi kpoos du, wɛɛ dɔgl yɔ nɛ lako taa benɛ, gi Baa be yɔ yaazib ɔ̧ɔ̧nɛ. 25 Anyɔ be gi hi nɛɛ ɓɔryɔ kete, be dɔgsin hin wɛrɛ. 26 Yɛrɛ ɗaakya bɔ, Mɔkil yɔ Baa bɔ gɔ gi yaazig a be nuŋg du, gi goksin hin sɛw, gi wɛɛ gi mɛnsin hinyɔ be dɔksin sɛw. 27 Be gisin ɔɔk ɗɔɔtil saŋtumi, be wɛɛ be gaan ɗɔɔtil be saŋtum bɔ. Be taan hinɔ gaak anyɔ waal gɔ gi gaako. Bɔ mɔkil nɛ gi namɔ, bɔ kol gi tuu̧nɛ. 28 Nɛ lag be raa a be rekrekɔ, bé wɛɛ be wɛɛz a nɛɛge. À ha̧a̧n nɛ a be muulɛ, yɔ nɛ dag nɛ hato. Be rék a Baa be ge be. Yɛrɛ Baa be gbɔlumsɔ daaribdaarɔ, ya̧a̧nɛ. 29 Yɛrɛ be raasin hin wɛrɛ gi dorɔ an kuudu hi ɔɔ tuuruko. Gid hi tuurɔ nɛ ɗɔbsibɗɔbsɔ. 30 Be taa ya̧a̧bootingo zaa hi nɛɛ yɛ̧ltɔnɔ. Waal yɛrɛ waar ɔ gi zaako. Za̧a̧nɔ taan tɛŋk a bee zulha. 31 Yɛrɛ an waal gi mɛɛ a ha̧a̧b Baa bɔ, ya̧a̧nɛ be wook woosɔ anyɔ yanzibe. Ɗundinɛ wɛ rekɔ.
1 Yeesu raa a bee gi tɛ̧ɛ̧humlya rɔbo, Baa be gii balkya. 2 Waahams wɔ hi gi a be muulɛ, wɔ hi taa huŋk gɛ sɛw, Baa be gi hɛbtirihi. Waahams wɔ hi huŋk be, gi raatihi an hi wɛɛ hi hum hi kitɔ hi daarin lɛlɛ. 3 Baa be raatin da̧a̧da̧ hi dɔgl yɔ be dɔgsinɛ, nɛ wɛɛ nɛ gaa ma gɔ. 4 Waan ɔksi hi beya, bee be waak ɔksi hi nɛɛ be. Gid nɛ́ wāā ɔksi hi bee gɛ, gi wɛɛ gi ha̧a̧n hinza wooko, yɔ nɛ ɗɛɛ gɛ, anyɔ waahams bɔ ɗɛɛ an gi hum hi zulɔ gi gbun gɛ. Gi kɔ̄m ɔks hi tɛ̧ɛ̧humlya bɔ gɛ, ɗɛɛ an gi dag tɛŋk gi hum gɛ. 5 Bee gi tɛ̧ɛ̧humlya bɔ, nɛɛ be nɛ gi waahamsyɔ. Za̧a̧nyɔ gi waak ɔksi hi beya, wɛɛ bee be waak ɔksi hi giya, za̧a̧nɔ gii gi huŋk huml kittɔnɔ. Yɔ anbɔ, nɛ́ waa ɔksi hi bee gɛ, nɛ́ ɗɛɛ hinza wook gɛ. 6 Za̧a̧nɔ gi wāā ɔks hi bee gɛ hi bisig a lako an tɛ̧ɛ̧has hi kootɔ, kuudu hi wɛɛ hi tuuhi hi yaahi hi dɔ̧ɔ̧ laa du. 7 Gid nɛ waak ɔksi hi beya, wɛɛ dɔgl be gi gi waak ɔksi hi nɛɛ be, ɛrin Baa be hinyɔ ha̧a̧n sɛw, nɛ dagɔ. 8 Nɛ́ gi gaak huml kittɔnɔ, hi ɗɔbsin Baa be hi hinɔ giya, nɛ wɛɛ nɛ zuunik a nɛ gi walɛsɛrɛ beenɛ. 9 Ha̧a̧be a nɛ muulɛ anyɔ Baa be ha̧a̧g a be muul be; waan a be hat du. 10 Nɛ́ wa̧a̧k dɔgl be wɔ, nɛ waa a be hat du; an bee yɔ be wa̧a̧ Baa be dɔglɔ wɔ a be kpoos du, be waak a gi hat du. 11 Be dɔgsin hin wɔrɔ an nɛ dag hat be a nɛ kpoos du an kpoos nɛ gi kpɛ̧ɛ̧ gi daarin lɛlɛ. 12 Dɔgl benɛ gɛrɛ a yɛgi hatinnɛ a nɛ teesdu anyɔ ha̧a̧be a nɛ muul be. 13 Ha̧a̧tig za yɔ gɔ gi daar za̧a̧nyɔ gi gaak kolɔ an gi wɔr a saamɔ hi dɔŋg hatɔ giir ya? Taaro. 14 Nɛya, nɛ́ gi wook hinyɔ be raanɛ, nɛ gi saam be hiya. 15 Be taan zaa elik ma a woosya be wɛ, anyɔ woosya gɔ mɛ̄ɛ̄ hinyɔ ɗɛntɔ gi wook gɛ. Yɛrɛ nɛya, be gin elik a saam be wɛ, anyɔ be goksin hinyɔ be lag a Baa be ge sɛw. 16 Nɛɛ her bee gɛ, bee her nɛya. Be gbaan an nɛ rek nɛ humɔ, huml nɛ bɔ gi waa. An hinyɔ gɔ nɛ zɔ̧ Baa be a be nuŋg du sɛw, gi gaan hinɔ. 17 Be raan hin gbunu: yɛgi hatinnɛ. 18 Waal gi gin lɔlhɛ̧ɛ̧nuko, mɛɛn a yɛɛl bee lɔlhɛ̧ɛ̧nuko. 19 À nɛ gi nɛ dood waalyaadɛ, waal yɔ ha̧a̧g a nɛɛge anyɔ nɛ gi doodɔ; yɛrɛ nɛ taa dood waalyaadɛ, be hedin waal teesdu, a dɔŋgɔ ro waal gi gin lɔlhɛ̧ɛ̧nuko. 20 Mɛksin dɔgl yɔ be da be dɔgsinɛ a gbaari tɔ̄ɔ̄ daar ɗɛntɔ gɛ. Gid hi ɗantibe, hi ɗant nɛɛ hɛw. Gid hi fɔ dɔgl benɛ, hi fɔ dɔgl nɛnɛ hɛw. 21 Yɛrɛ anyɔ hi mɛɛ Za̧a̧nyɔ yaazib gɛ, hi woosin hin wɔrɔ sɛw a be nuŋg dɔŋgo. 22 À be zaa nɛ be dɔ̄ksihi hinza gɛ, yɔ hi taan hinha̧a̧lɛ. Yɛrɛ be dɔgsihi za̧a̧tig dɔglɛ, wɛɛ hi iinɔ. Yɛrɛ hi taan hinza yɔ gɔ hi dɔks zulya̧ gi wɛɛsihi ya̧a̧gɔ̧ɔ̧n lɛl an hi bits hinha̧a̧lya̧. 23 Za̧a̧nyɔ hɛ̧ɛ̧niblɔlɛ, hɛ̧ɛ̧n Baa be lɔl hɛw. 24 À be woo nɛ woosyɔ doo za woodir nɛ hi teesdu gɛ gɛ, yɔ hi taan hinha̧a̧lɛ. Yɛrɛ ɓɔryɔ hi gbɛn woos wɔ gbɛnɔ, hi wɛɛ hi hɛ̧ɛ̧nib lɔlɛ, hi wɛɛ hi hɛ̧ɛ̧n Baa be lɔl hɛw. 25 Yɛrɛ hin bɔ lab tuur an dɔgl yɔ hi bi̧i̧ a maakya̧ dɔgl du a hi hɛ̧ɛ̧nib lɔl ditɔs, gi wooyyɔ . 26 Yɛrɛ ɗaakya bɔ gɔ gi zaa, Mɔkil hinrɔbya yɔ fu̧u̧z a Baa be ge, be yaazige a nɛɛge, gii gi boo dɔgl benɛ. 27 Nɛɛ be, yɔ nɛ waatin hi bee gi yɛɛl a biitirnaan du, nɛ gi segyaadɛ beenɛ.
1 Be dɔksin hin wɛrɛ sɛw an bɔnɛ ɔɔ ɗɔbsugɔ. 2 Hí tuusin a mɔksilluk wɔ hi du hi seen an dood ɓi̧i̧lim-yaadɛ; ɔ̧tɔ gi zaako, an bɔ ɓɛ gi gbɔ̧nɛ a ɔ̧tɔ ge, gi mɔk a be woosig Bɛt woosɛ. 3 Anyɔ hi mɛɛ Baa bɔ hi mɛɛ bee gɛ hɛw hi woo anbɔ. 4 Be dɔksin hin wɛrɛ an ɔ̧tɔ gɔ gi tuurɔ nɛ mɛksin a be da be dɔksin hin wɔrɔ dɔks anbɔ. Anyɔ be waatingo nɛ hi nɛya, bé da bé rāāsin hin bɔrɔ a biitirnaan du gɛ. 5 Yɛrɛ be rekrekɔ a Za̧a̧nyɔ yaazib ge; wɛɛ an doo nɛ za gbun gɔ gi warib a mɔ rek ay? Warib gɛ. 6 Yɛrɛ anyɔ be dɔksin hin wɔrɔ, kpoos nɛ ɗɔɔbɔ. 7 Yɛrɛ be gisin rɔb raako: an be reekɔ yɔ bɛsinɛ. À be rek gɛ be, ɗaakya bɔ yɔ zaa a nɛɛge gɛ. Yɛrɛ bé rēkɔ̄ be yaasinge. 8 Gɔ gi zaa, gi zuns dood waal du a̧a̧bya̧ gaattɔnɔ a hinha̧a̧l ha, hi hinriit ha, hi dɔgl-gbaak ha. 9 Gi zunsihi a yɔ hi ɗɔbsib gɛ, hi gi hinha̧a̧l-yaadɛyɔ. 10 Gi zunsihi a yɔ be gi rek a Baa be ge, gid nɛ taab zaa gbɛŋko, be gi doo riityɔ. 11 Gi wɛɛ gi zunsihi a yɔ Bɛt gbaas waal yɛrɛ waar ɔ dɔgl gi da̧a̧ be, dɔgl-gbaak giro. 12 Be gin dɔgl zaadɛ kittɔnɔ an be dɔksinɛ wɛɛ yɔ daarin daar kete. 13 Bɛt Mɔkil rɔb bɔ gɔ gi zaa, gi kan a gbɔnɔ rɔb du sɛw; yɔ anbɔ taa an gi dɔg hin hi zulɔ, gi boo hinyɔ kɛm giya, wɛɛ gi goksin hinyɔ gɔ gi tuur sɛw giya. 14 Bɛt Mɔkilɔ gi loo hinyɔ gi benɛ, gi dɔksinɛ. Gi ɗɔbsib anbɔ. 15 Hinyɔ Baa be gin sɛw gi beenɛ. Be raasin hinɔ giya a gi loo hinyɔ gi benɛ gii gi dɔksinɛ. 16 Yɛrɛ wag kaasi nɛ taab gbɛnko, wɛɛ gɔ gi kuudu kaasi ɓɛ nɛ wɛɛ nɛ gbɛnibe. 17 Walɛsɛrɛ wɔ zaadɛya̧ hi watin gɔ a nɔ gi gisɛ raak a wag kaasi nɛ taab gbɛnko, wɛɛ gɔ gi kuudu kaasi ɓɛ nɛ gbɛnib nɔ? Nɔ hinɔ raakɔ ɓɛ a yɔ be rék a Baa be ge gii nɔ? 18 Hi ɛtin a gisɛ nɔ raak a kuudu kaasi ɔnɛ? Wɛ́ mɛ̄ɛ̄ hinyɔ gi raanik gɛ. 19 Yɔ Yeesu mɛɛ a ha̧a̧hi an hi warig hinɔ, gii warihi: a nɛ watingo hinyɔ be raa a wag kaasi nɛ taab gbɛnko wɛɛ gɔ gi kuudu kaasi ɓɛ nɛ wɛɛ nɛ gbɛnib gii ya? 20 Be raasin rɔbo: nɛ́ mimɔ, nɛ́ kaa, wɛɛ waal gi dag hat be; nɛ́ gi a mimnt du, mimnt nɛ bɔ gi wɛɛ hato. 21 Nis gɔ gi waa gulko gi miŋko anyɔ kosgumn bɔ ɔ̧tɔ tursige. Gɔ bɛɛ waa bɔ gulko wɛɛ mɔ̄k kosgumnɔ bɔ ma gɛ. Anyɔ mɔɔ doo a waal du, kpoosɔ kpɛ̧ɛ̧kpɛ̧ ma. 22 Gbunɔ, nɛya, nɛ miŋk ɓɔryɔ, yɛrɛ gɔ be wɛɛ be gbɛnin ɓɛ, kpoos nɛ gi kpɛ̧ɛ̧, wɛɛ doo za taa an gi ha̧s hat nɛ bɔ be. 23 A ɔ̧tɔ ge nɛ taab dɔgl za warko, be raasin rɔbo, an nɛ ɛr nɛ nɔ Baa be hi nuŋg benɛ, gi gaan hinɔ. 24 Àgiyɔ te, nɛ́ zɔ̧̄ hinza a be nuŋg du gɛ. Ɛrinɛ nɛ dagɔ an kpoos nɛ gi kpɛ̧ɛ̧ gi daarlɛlɛ. 25 Be dɔksin hin bɔrɔ hi ya̧a̧daanikyɔ; ɔ̧tɔ gɔ gi tuurɔ, a gedu, be taasin hinza book hi ya̧a̧daaniki. A ɔ̧tɔ ge be dɔksin Baa be dɔglɔ gaattɔnɔ. 26 A ɔ̧tɔ ge nɛ zɔ̧b Bɛt be nuŋg du, be taan raak a be zɔ̧bsin Baa be. 27 Anyɔ ha̧a̧n be muulɛ nɛ wɛɛ nɛ ɗɔbsig a be fu̧u̧z a Baa be ge, Baa be hi zulɔ ha̧a̧g a nɛ muulɛ, ya̧a̧nɛ. 28 Be fu̧u̧z a Baa be ge ro be zaa a waal du, yɛrɛ be ɔɔk waalɛ be wɛɛ be wɛɛk a Baa be ge. 29 Walɛsɛrɛ ɔ̧ɔ̧ wɔ hi raage a eh! yɛrɛ mɔ book dɔgl rɔbo, mɔ taa boonik hi ya̧a̧daanik ma. 30 Yɛrɛ ɓɔri wi mɛɛ a mɔ mɛɛ hin sɛw. Wɛɛ yɔ mɔ mɛɛ hinyɔ gi doo kpoos du gaati hā̧a̧m an doo gi warum dɔgl za ma gɛ. Hinɔ gii wi ɗɔbs a mɔ fu̧u̧z a Bɛt ge. 31 Yeesu warihi a nɛ ɗɔbsigɗɔbs ɓɔri ma ya? 32 Yɛrɛ ɔ̧tɔ gi riiko, riiri ma hɛw, a ɔ̧tɔ gedu nɛ hɛksɔ bɔbe gi rek a gi lɛlɛ, nɛ ɔɔb be gbunu. Yɛrɛ be taa be gbunu, Baa be gi hi beya. 33 Be dɔksin hin wɛrɛ sɛw an nɛ dag ɗɔɔtil saŋtumi a ɔksig wɛ bɔ gedu. A waal du nɛ dag zɛksili. Yɛrɛ ɓaasin kpoos nɛ, bee be ɗɛɛ waal ɗɛɛ.
1 Yɔ Yeesu booya̧a̧ anbɔ pɛɛ lɔlɔ bɛtha zɔ̧b Bɛto a Baa, ɔ̧tɔ riiri, ɗɔbsum waa mɔ beya an bee be ɗɔbsum be. 2 Mɔ gaab tɛŋk a dood zulha sɛw be an be gaa dood wɔ mɔ gaahi be naan du sɛw za̧a̧tig faa. 3 Za̧a̧tig faa bɔ hinɔ gɛrɛ: hí mɛɛ a mɔɔ gi Bɛt rɔb mɔ gbunu, hí wɛɛ hí mɛɛ Yeesu Kristu yɔ mɔ yaazige. 4 Be ɗɔbsum hɛbtdi, be wɛɛ be da̧a̧s woos yɔ mɔ gaazib nɛ an be woo. 5 Yɛrɛ Baa, gaabe gbɔlumsɛ a mɔ muutdu an gbɔlums yɔ be gin nɛ a mɔ dɔŋdi yɔ waal ki̧y nɛ ket gɛ. 6 Be mits dood wɔ mɔ loohi a waal du mɔ gaab nuŋg mɔ an hi mɛɛmɔ; hi gi nɛ dood mɔɔnɛ, mɔ loohi mɔ gaabe, hii be hi wa̧a̧ dɔgl mɔ hi kpoos du. 7 Yɛrɛ hi mɛɛ a hinyɔ mɔ gaazib sɛw fu̧u̧z a mɔɔge. 8 Be gaahi dɔgl yɔ mɔ gaabe, be dɔksihi dɔglɔ hi ta̧a̧. Hi mɛɛ rɔbtɔnɔ a be fu̧u̧z mɔɔge, hi ɗɔbs a mɔɔ yaazibe. 9 Be zɔ̧bsig hii mɔya, bé zɔ̧̄bs waal gɛ. Be zɔ̧bsig dood wɔ mɔ gaab hii mɔya. Hi gi dood mɔnɛ be. 10 Wɛɛ hinyɔ be gin sɛw gi mɔɔnɛ, hinyɔ mɔ gin be, gi beenɛ. Gbɔlums be mid hi zulɛ. 11 Yɛrɛyɔ be rék a mɔɔge, be taa ɗɔɔtig ma a waal du, hii be, hi gi waal du kete. Baa Gaati, oomɔhi a nuŋg mɔ yɔ mɔ gaabe tɛŋk du, hi ɔksa gbunu an wɛɛ yɔ wɛ gi gbun be. 12 Yɔ be gi hi hii a waal du be gihi ook a mɔ nuŋg du. Be oo dood wɔ mɔ gaabe, zaa gbun wāg hi teesdu gɛ; gɛ za̧a̧nyɔ gɔ gi wagɔ an hinyɔ hi bi̧i̧ mɔ ɗɛɛrwol du gi wooyyɔ . 13 Yɛrɛ be gi rek mɔɔge ɓɔryɔ. Be dɔk hin yɛrɛ waal du an hi dag hat be an kpoosya̧ gi kpɛ̧ɛ̧ gi daarlɛlɛ. 14 Be gaahi dɔgl mɔ, wɛɛ waal hɛ̧ɛ̧nihi lɔlɛ. Hi taa dood waalduyaadɛ an bee yɔ be taa doo waalduya be, ya̧a̧nɛ. 15 Bé zɔ̧̄mɔ an mɔ ha̧sihi waal du gɛ, be zɔ̧mɔ an mɔ oohi a hinha̧a̧l du. 16 Hi taa dood waalduyaadɛ an bee yɔ be taa doo waalduya be. 17 Gogsumɔhi hinrɔbo an hi wɛɛ dood mɔ gaatɛ. Dɔgl mɔ gii gi hinrɔbo. 18 Be yaahi waal du an mɔɔ yɔ mɔ yaazib waal du be. 19 Bee hi zul be, be gaam muul be sɛw a hi dɔŋgo an be wɛɛ doo mɔ gaati an hii be, hi wɛɛ dood mɔ gaatɛ hi rɔbo. 20 Be taas hii zɔ̧k kpɔd. Be gi zɔ̧bsig dood zaadɛ wɔ gɔ hi ɗɔbsib hɛw, wɔ gɔ hi ɗɔbsib a hinyɔ dood wɛrɛ gɔ hi dɔksihi be zulha gi dɔŋgo. 21 Be gim zɔ̧k an hi sɛw hi ɔks gbunu. Baa, an hi ɔks gbun hi wɛya, anyɔ mɔɔ mɔ ɔks hi beya, bee be, be gi gbun hi mɔya. Ɔksihi gbunu an waal gi ɗɔbsɔ a mɔɔ yaazibe. 22 Be gaahi gbɔlums yɔ mɔ gaazibe an hi gi gbunu an wɛɛ yɔ wɛ gi gbun be. 23 Bee be gi gbun hi hiya, wɛɛ mɔɔ be mɔ gi gbun hi bee be. Gɔmɔ an hi ɔks gbun bɛttɔnɔ an waal gi mɛɛ a mɔɔ yaazibe, gi wɛɛ gi mɛɛ a ha̧a̧mɔ a hii be anyɔ ha̧a̧ mɔɔ a bee be. 24 Baa, ha̧a̧be an lɛlyɔ be gige, dood wɔ mɔ gaab naan du hi gi hi bee a lɛlɔge hɛw an hi gbɛn gbɔlums be, gbɔlums yɔ mɔ gaazibe anyɔ ha̧a̧mɔ a bee doosi yɔ da waal ki̧ydir nɛ gɛ. 25 Baa riiti, waal mɛɛmɔ gɛ, benɛ be mɛɛmɔ. Hii be hi mɛɛ a mɔɔ yaazibe. 26 Be goksihi nuŋg mɔ an hi mɛɛmɔ, bé wɛɛ bé goksihi nuŋg mɔ ɓɛ an ha̧a̧k yɔ ha̧a̧ mɔɔ a be muulɛ gi hi̧i̧s kpoosya̧, bee be woo a hi kpoos du be.
1 Yɔ Yeesu zɔ̧ Bɛt anbɔ rek hi walɛsɛrɛ ɔ̧ɔ̧ wɔ a zɛɛwaa za doosɛ a Kederɔŋ, a lɛlyɔ bak gi ge. Tal a bak bɔ gedu hi walɛsɛrɛ ɔ̧ɔ̧ wɔ. 2 Anyɔ Yeesu gɔ gi waak mɔksig lɛlɔge hi walɛsɛrɛ ɔ̧ɔ̧, Yahuda, za̧a̧nyɔ gɔ gi rɛ̧ɛ̧sig ya̧a̧ mɛɛ lɛl bɔ be. 3 Yɔ anbɔ, Yahuda dag layaadɛ maas gbunu hi lɛl-ookya zaadɛ wɔ Bɛtmaakwookya gbɔlɛ wɔ hi Farisaya wɔ hi yaazihi, hi zaatin gɔ a lɛl bɔ ge. Hi kamz laakpooki a pitila wɔ hi du hi a hɛtwɔbtig wɔ hi muul be, hi daŋbɛsim wɔ hi sɔɔl wɔ an hi wa̧a̧ Yeesu . 4 Yɔ Yeesu mɛɛ hinyɔ gɔ gi tursig sɛwi, sɔɔ warihi a nɛ tɛk bɔ? 5 Hi ta̧a̧ a wi tɛk Yeesu Nazarɛdya bɔ giya. Yeesu wɛɛ ta̧a̧hi a bee Za̧a̧nɔ. Yahuda, ya̧a̧rɛ̧ɛ̧kya bɔ gi erko hi wɔrɔ. 6 Yɔ bɛɛhi raak a bee za̧a̧nɔ, hi wɛɛ kuudu hi matil hɛbtdi. 7 Wɛɛ warihi ɓɛ a nɛ tɛk bɔ? A wi tɛk Yeesu Nazarɛdya bɔ giya. 8 Yeesu wɛɛ ta̧a̧ a be raasin a bee Za̧a̧nɔ. Gid nɛ tɛk beya, ɔɔn wɛrɛ hi rekɔ. 9 Dɔg hin bɔrɔ an gi da̧a̧s dɔglɔ yɔ dɔg nɛko a bé wāks hinyɔ mɔ gaab zaaɔ gbun gɛ. 10 Simɔŋ Piyɛr gin nɛ daŋbɛsim gi naan du, hɔ̧bɔ gbob Bɛtmaakwookya gbɔɔl mɔɔt bɔ gbaarɔ tɔnɔ bɔ naanrɔbo. Gbaar bɔ nuŋgɔ a Malikus. 11 Yɔ Yeesu gbɛn anbɔ raa Piyɛı a wɛɛnum daŋbɛsim mɔ bɔ saŋk du. Gi an be da̧a̧s hinyɔ gi a ya̧a̧rhant dakwaa yɔ Baa be gaab gedu an be yɔ̧ ro! 12 Laaya maas bɔ hi laaya wɔ gbɔɔlya̧ bɔ hi Yahuduya lɛl-ookya wɔ hi wa̧a̧ Yeesu hi wɔge, 13 hi kaŋg a Hanas ge kete; gii gi nɛ Bɛtmaakwookya gbɔɔl mɔɔt a wɛlɔ gedu, wɛɛ gi Kayafas gbarɔ be. 14 Kayafas bɔ gii dɔks nɛ dood hinɛ a rii an doo gbun gi wɔr a dood sɛw dɔŋgo. 15 Simɔŋ Piyɛr hi walsɛr za gbunu hi fɔ́k Yeesu. Yɔ Bɛtmaakwookya gbɔɔl mɔɔt bɔ mɛɛ walsɛr bɔ, walsɛr bɔ gul lɛlgbun hi Yeesu a Bɛtmaakwookya gbɔɔl mɔɔt bɔ gi raa du. 16 Piyɛr be kɔm a luk gbɔnɔya̧ a lakɗi. Walsɛr bɔ Bɛtmaak-wookya gbɔɔl mɔɔt bɔ mɛɛge tuuz raa nis gbɔnɔ-ookya bɔ hinɛ wɛɛ gus Piyɛr a raa bɔ gedu. 17 Hɔnɛ nissɛr gbɔnɔ-ookya bɔ raa Piyɛr a mɔɔ be, nɛ mɔ gi wal yɛrɛ walɛsɛrɛ ɔ̧ɔ̧ zaa gbuni ma mi? Gii faafa a bee gɛ. 18 Yɔ saŋks gi saŋko, gbaarɛ wɔ hi lɛl-ookya wɔ hi gi nɛ hɔdi hi sɔn laasɛml hi tɛɛko. Piyɛr er hi hii gi laa bɔ tɛɛk be. 19 Bɛtmaakwookya gbɔɔl mɔɔt bɔ war Yeesu walɛsɛrɛ ɔ̧ɔ̧ wɔ dɔglya̧ hi hingokɔ bɔ dɔglɔ hɛw. 20 Yeesu ta̧a̧ raage a be dɔg hin a dood muutdu a waal du, be waak hingok a mɔksillɛl du hi a Bɛtluk du a lɛlyɔ Yahuduya wɔ sɛw gɔ hi waak mɔksig gedu, bé bōō hinza a yaatillɛl gɛ. 21 Mɔ gib nɔ warko? Warum dood wɔ hi kɛm dɔgl yɔ be dɔg hiya. Yɛrɛ hii hi mɛɛ hinyɔ be dɔgɔ . 22 Yɔ dɔg anbɔ lɛl-ookya wɔ zaaya̧ gbun dɛm Yeesu wɛɛ warige a gɔ hi ta̧a̧ Bɛtmaakwookya gbɔɔl mɔɔt bɔ anbɔ ya?! 23 Yeesu ta̧a̧ge a gid be booya̧a̧ ha̧a̧l duge, raasibe ha̧a̧lɔ be boo ma! Nɛ an be dɔg rɔbo, mɔ dɛ̧b a nɔ dɔŋgo? 24 Hanas wɛɛ yaag a naaza Kayafas ge, yɔ gi Bɛtmaakwookya gbɔɔl mɔɔt hɛw a wɛlɔ gedu. 25 Yɔ Simɔŋ Piyɛr er gi laa bɔ tɛɛko, hi warige a mɔɔ be nɛ mɔ walɛsɛrɛ wɔ zaaya̧ gbuni ma mi? Piyɛr faa dɔgɔ a ɛ̧-ɛ̧ bee gɛ. 26 Bɛtmaakwookya gbɔɔl mɔɔt bɔ gbaarɛ ɔ̧ɔ̧ wɔ zaaɔ, za̧a̧nyɔ Piyɛr dɛ̧ɛ̧r nɛsɔ za tɔnɔ warige a bé gbɛ̄num nɛ a bak du hi wal bɔ lɛlgbun gɛ ya? 27 Piyɛr wɛɛ faa ɓɛ. Ɓɔrbɔ kɔba kek gɔ. 28 Hi fu̧u̧n Yeesu a Kayafas lɛlɛ hi renig a Pilatu dɔgl-gbaak luk du bi̧i̧l du. Hí gul hi zulya̧ a dɔgl-gbaak luk bɔ gedu gɛ an bɔhi ɓi̧i̧l muulya̧, an hi le Paska naab lees bɔ rɔbtɔnɔ. 29 Kuudu Pilatu tuu rek a hiige warihi a nɔ hingɛ̧ɛ̧-nikɔ nɛ gɛ̧ɛ̧n wal yɛrɛ gii nɔ? 30 Hi ta̧a̧ hi raage a à taa nɛ hinbɔbtin wookya gɛ yɔ hi kamzig nɛ a mɔɔ ge gɛ. 31 Pilatu raahi a loonɛg hi zul nɛ nɛ da nɛ gbaasig dɔgl anyɔ maak nɛ dɔgɔ . Yahuduya wɔ hi wɛɛ hi raage a nɛ hi gāaw gbɔnɔ an wi gbaas doo dɔgl wi gbɔŋg gɛ be. 32 Hin bɔ lab da̧a̧s dɔgl yɔ Yeesu dɔg gi raan wɔrk yɔ gɔ gi wɔrɔ. 33 Pilatu wɛɛ gul a dɔgl-gbaak luk bɔ gedu elz Yeesu warige a mɔɔ gi Yahuduya Waar ya? 34 Yeesu wɛɛ warig be a mɔ dɔg hin bɔrɔ lab hi zul mɔɔn ya, dood dɔgsum hinɔ be zulha ya? 35 Pilatu wɛɛ warige a bee be Yahuduya ya? Dood mɔɔnɛ hi Bɛtmaakwookya gbɔlɛ wɔ hii gɛ̧ɛ̧num dɔglɛ hi kamzum a bee. Mɔ gɔ nɔ hinɔ? 36 Yeesu goo a waar ums be taa waal du waar umsɛ. À waar ums be gi nɛ waal du, ookya be wɔ hi woosib nɛ gabs woosɔ an bɔ Yahuduya wɔ hi wa̧a̧be. Yɛrɛ waar ums be taa waaldu. 37 Pilatu warige a nɛ mɔ gi waar i ma ya? Yeesu goo a anyɔ mɔ raa, be gi waar yɔ. Be mɔɔyyɔ be zaa a waal du hɛdi an be dɔg rɔbo. Za̧a̧nyɔ ha̧a̧g rɔbo gi kɛmsib kɔlk be. 38 Pilatu ɛrige a nɔ hinɔ a rɔb nɔ? Yɔ Pilatu ɛr anbɔ wɛɛ tuu a Yahuduya wɔ hi, raahi a bé zɛ̄m dɔgl za a̧a̧b an gi mat wal yɛrɛ gɛ. 39 Yɛrɛ ha̧a̧n an be woosin hinyɔ be rɔ̧ɔ̧s wook a nɛ tees du, anyɔ gɔ be gisin bisig doo luknɔya za gbun a Paska naab-ɔ̧t ya? Ha̧a̧n rɛ an be bitsin Yahuduya Waar bɔ ya? 40 Hɔnɛyɔ dood hi kɛm anbɔ hi wɛɛ hi ɓooya̧a̧ sɛw hi raa a gii gɛ! Bisum Barabas giya! (Barabas ɔnɛ gi luur wɔdwɔɔlikyayɔ.)
1 Pilatu wɛɛ raa dood hi loo Yeesu hi lɛmnig kpootyɔ hi yɛ̧ɛ̧n tusɛ. 2 Laaya wɔ hi kat kal kobsya hi hegsig zulha, hi wɛɛ hi hegsig gbandil gbɔɔl hob muulɛ. 3 Hi sɔɔz gi dɔŋdi hi baanige a seko, Waar Yahuduya! Hi wɛɛ hi gig lɛk zulha. 4 Pilatu wɛɛ tuuza raa Yahuduya wɔ a be kamsinge gɛrɛ lakdi an nɛ mɛɛ a bé zɛm dɔgl za a̧a̧b yɔ gɔ gi matig gɛ. 5 Yeesu tuuz hi kal kobsya bɔ zulha hi gbandil gbɔɔl hob bɔ muulɛ. Pilatu wɛɛ raa a wal bɔ gɛrɛ. 6 Yɔ Bɛtmaak-wookya gbɔlɛ wɔ hi lɛl-ookya wɔ hi gbɛnige, hi ɓoolya̧a̧ hi raa a doomɔg dɔ̧ɔ̧r ha! Doomɔg dɔ̧ɔ̧r ha! Pilatu wɛɛ raahi a bee bé zɛ̄m ɗɔgl za a̧a̧b yɔ matig gɛ, nɛɛ, loonɛg nɛ re nɛ dooge. 7 Yahuduya wɔ hi ta̧a̧ hi raage a wi gin maak za dɔgl yɔ dɔg a gi an gi wɔrɔ. Gi wɛɛnik zulɔ an Bɛt waayɔ. 8 Yɔ Pilatu lag dɔgl bɔrɔ kol yɛ̧sig tuukɔ gɔ. 9 Wɛɛ gul a dɔgl-gbaak luk du ɛr Yeesu a mɔ fu̧u̧z ay? Yeesu gōō hinza fɛŋ mɔɔt gɛ. 10 Pilatu wɛɛ warige a mɔ taa hinza gook ya? Mɔ́ mɛ̄ɛ̄ a be gin tɛŋk an be bisumɔ, be wɛɛ be gin tɛŋk an be doom dɔ̧ɔ̧r ha gɛ ya? 11 Yeesu goo a à Bɛt a wɛɛha gaazum tɛŋkɔ gɛ, yɔ mɔ taan nɛ tɛŋk a be zulha zaŋ. Yɔ anbɔ, za̧a̧nyɔ gaam bee naan du woo hinha̧a̧l daarɔ. 12 Dɔgl bɔrɔ bɛɛ tuuk anbɔ Pilatu ɓɛɛ gbɔnɔ an gi bisig gi rekɔ. Hɔnɛ Yahuduya wɔ hi gbɛn anbɔ hi wɛɛ hi ɓooya̧a̧ hi raa a gid mɔ bisige, mɔ taa waar gbɔɔl bɔ Kaysara saamɔ ma. 13 Pilatu yɔ bɛɛ lak anbɔ tunz Yeesu wɛɛ ɗɔɔt a dɔglyɛ̧ɛ̧k ɗɔɔtillɛl bɔ ge, a lɛlyɔ gɔ hi elik a Hitaanbetlɛl ge. (Gɔ hi el a Ibraniŋko ya̧a̧boon du a Gabata.) 14 A ɔ̧tɔ ge hi gɛmsig Paska naab wɔdɛ, ɔ̧t gi lurk tees be. Pilatu raa Yahuduya wɔ a Waar nɛ bɔ gɛrɛ. 15 Hi wɛɛ hi ɓooya̧a̧ a gi wɔɔrɔ! Gi wɔɔrɔ! Doomɔg dɔ̧ɔ̧r ha. Pilatu wɛɛ warihi a nɛ raa a bé doo waar nɛ bɔ doo? Bɛtmaakwookya gbɔlɛ wɔ hi goo a wi taan waar za gɛ Kaysara. 16 Wɛɛ gaahige gɔ an hi kaŋg hi dooge. 17 Yeesu pɛɛ dɔ̧ɔ̧rɔ bɔ tuurin a lɛl za yɔ gɔ hi el a zullɛŋklɛlɛ, lɛlɔ nuŋgɔ a Ibraniŋko ya̧a̧boon du a ꞋꞋGolgotaꞋꞋ. 18 Hi doog lɛlɔge ro hi dood eerɛ a bɛrkɔya̧ wɔ hi. Yeesu gi tees du. 19 Pilatu bi̧i̧ hinmɛksingoya a tɛ̧ɛ̧fɛɛt ha hi doo a dɔ̧ɔ̧r bɔ zulɔ ya̧di a YEESU NAZARƐDYA, YAHUDUYA WAAR YƆ. 20 Yahuduya kittɔnɔ hi zaŋg bi̧i̧sɔ. Lɛlyɔ hi doo Yeesu ge sɛ̧btin hi waal gbɔɔl bɔ. Bi̧i̧s bɔ hi bi̧i̧ a Ibraniŋko ya̧a̧boon du hi Roma ya̧a̧boon du hi Yonaniŋkoya ya̧a̧boon du. 21 Yahuduya wɔ Bɛtmaak wook-yaya̧ gbɔlɛ wɔ hi raa Pilatu a bɔmɔ bi̧i̧ a Yahuduya waar yɔ, bi̧i̧m a wal yɛrɛ dɔgɔ a be gi Yahuduya waar yɔ. 22 Pilatu goo a hinyɔ be bi̧i̧, be bi̧i̧bi̧ ma. 23 Yɔ laaya wɔ hi doo Yeesu a dɔ̧ɔ̧r ha, hi loo gbandilɔ bɔ hi gɛ̧ɛ̧ du nasɔ, laaya gbunu gin taakil ɔnɛ gbun be. Hi wɛɛ hi loo gbandilɔ fɛɛt yɔ kunsig baak daa muulɔ gɛ, wɛɛha hi wɛɛdisɛ tɛɛkɔ gbunu. 24 Hi wɛɛ hi watin hi teesdu a bɔwɛ taarɔ wɛ ɔɔ anbɔ wɛ len subudi, wɛ see za̧a̧nyɔ gɔ gi le. Hin bɔrɔ tuur an hinyɔ Bɛt ɗɛɛrwolɔ dɔgɔ gi wooyyɔ: a hi gɛ̧ɛ̧ gbandil be wɔ teesdu, hi len subud a be gbandil fɛɛt bɔ hage. Hinyɔ laaya wɔ hi woo giibɔ. 25 Yeesu nɔɔtɔ gi erko a Yeesu dɔ̧ɔ̧r dɔŋdi hi yɛ̧ɛ̧tɔ hi Mariyama Kolopas nisɔ hi Mariyama a Magdala be. 26 Yɔ Yeesu gbɛn nɔɔtɔ hi walɛsɛr ɔ̧ɔ̧ za gbun yɔ ha̧a̧g gi muulɛ hi erko, raa nɔɔtɔ a naadyɔ, waa mɔ gɛrɛ. 27 Wɛɛ raa walsɛrɔ bɔ be a nàà mɔ gɛrɛ. A lɛlɔdi walsɛr bɔ loo Mariyama zaanig gi raa du. 28 Yɔ hin wɔrɔ hi daa, Yeesu gi mɛɛ be a hin sɛw da̧a̧da̧, raa a mɛm gib ha̧a̧ko. Raa hin bɔ lab an hinyɔ Bɛt ɗɛɛrwol dɔg nɛ gi wooyyɔ . 29 Dɔn za gi nɛ di mɛm haatil hi̧i̧s gedu. Laaya wɔ hi loo bɔɔmɛ hi tɔ̧ɔ̧ mɛm haatil bɔ hi̧i̧s gedu, hi sa̧a̧ kok mɛs ha hi dɔɔnsig ya̧a̧gbarɔ. 30 Yɔ Yeesu yɔ̧ mɛm haatil bɔ raa a hin sɛw da̧a̧da̧! Tiis zulɔ, wɔr gɔ. 31 Yɔ gi a wɔd gɛbsig ɔ̧ti, wɛɛ gi hā̧ā̧ Yahuduya wɔ an wɔrk wɔ hi kɔm a dɔ̧ɔ̧r wɔ hage gi tuur a holum-ɔ̧t gɛ, yɔ holum-ɔ̧t bɔrɔ gi ɔ̧t gbɔɔl be, hi rek hi ɛr Pilatu an gi yaa laya wɔ hi ɓɛdil dood wɔ hi doohi a dɔ̧ɔ̧r ha dɔɔya̧, hi ha̧sihi. 32 Laaya wɔ hi zaa hi ɓɛdil doo biitir bɔ dɔɔɔ wɔ hi zaa bɔ hi doog hi Yeesu lɛl-gbunu. 33 Hɔnɛyɔ hi tuurɔ hi zɛm Yeesu wɔr da̧a̧da̧ ma ɔnɛ, hí ɓɛdil dɔɔ ɔnɛ wɔ gɛ. 34 Laaya wɔ zaaya̧ gbun zaa bàà Yeesu hi goo a yɛ̧br muulɛ ga̧a̧m tuuz hi mɛmɛ. 35 Mii Yohana yɔ mi gbɛn hin bɔrɔ gii mi gi dɔglɔ dɔko, wɛɛ dɔgl mi bɔ gi rɔbo. Mi mɛɛ a mi dɔk rɔbo, mi wɛɛ mi gisin hinɔ gii dɔk an nɛɛ hɛw nɛ ɗɔbsɔ. 36 Hin wɔrɔ hi tuur an hinyɔ Bɛt ɗɛɛrwol dɔgɔ gi wooyyɔ a lɛŋkɔ zaa gbun taa ɓɛdugo. 37 Bɛt ɗɛɛrwol wɛɛ raa ɓɛ a lɛlza a hi sɔ̧ɔ̧ za̧a̧nyɔ hi baage. 38 Doo za Yeesu fɔkya giro, nuŋgɔ a Yusufu, fu̧u̧z a Arimate. Yɔ hoobha̧a̧g Yahuduya wɔ, gi fɔk Yeesu a luurlɛlɛ. Yɔ kuudu anbɔ, rek zɔ̧b Pilatu gaag gbɔnɔ an gi re gi loo Yeesu wɔrkɔ bɔ. Yɔ dag gbɔnɔ anbɔ, zaa looge. 39 Nikodɛm, za̧a̧nyɔ da zaa nɛ a Yeesu ge yɛms du, zaa hɛw, kamz yɛ̧ɛ̧s ki̧i̧lhɛmntya kilo dumbili taarɛ hi gɔn tɛ̧ɛ̧mɔto nuŋgɔ a ɗaasɛrɛyɔ hi ɔksin tɛ̧ɛ̧ ki̧i̧lhɛmntya zu̧u̧k nuŋgɔ a alowɛsyɔ. 40 Yusufu hi Nikodɛm hi loo Yeesu wɔrkɔ bɔ, hi wɔbtin gbandil buu hi gub yɛ̧ɛ̧smɛk ki̧i̧lhɛmntya bɔ ha ge anyɔ Yahuduya wɔ hi rɔ̧ɔ̧s wook a wɔrkya̧ muulɛ. 41 A lɛl bɔ hi doog dɔ̧ɔ̧r hage bak gi lɛlɔ ge. Loor seg gi a bak bɔ gedu be, hi i̧i̧dir nɛ doo za gedu kɛn gɛ. 42 Anyɔ gi nɛ Yahuduya wɔ wɔdya̧ gɛbsig ɔ̧ti, hi i̧i̧ Yeesu wɔrkɔ bɔ hɔ ro. Yɔ loor bɔ sɛ̧ɛ̧b be samsihi ma du hɛw.
1 A dimaas ɔ̧t bi̧i̧ltɔnɔ Mariyama a Magdala rek a Yeesu loorlɛl bɔ ge, lɛl da gaadir nɛ rɔbtɔnɔ ket gɛ. Yɔ tuurɔ gbɛn hi ha̧s loorbet bɔ ha̧sɔ. 2 Nis bɔ yɔ gbɛn anbɔ nɔɔ rek a Simɔŋ Piyɛr ge hi a Yeesu walɛsɛrɛ ɔ̧ɔ̧ za gbun yɔ Yeesu ha̧a̧g gi muul ge, raasihi a Waar bɔ wɔrkɔ bɔ hi a̧a̧d a loor du, be mɛ̄ɛ̄ lɛlyɔ hi gbaag du gɛ. 3 Piyɛr hi walsɛr bɔ hi tuuz hi rek a loorlɛl bɔ ge. 4 Hi nɔɔ, hi rek, hi eer sɛw. Hɔnɛ walsɛr zaa bɔ nɔɔ daar Piyɛr dihɔ dor a loorlɛl bɔ ge; 5 yɔ tuurɔ hu̧u̧r lɛ, yoo lɔl a loor du, wɛɛ gbɛn gbandil wɔ hi wɔbtinge a hɛbtdi a lɛlyɔ hi hog nɛ Yeesu wɔrkɔ ge. Anyɔ gɔ gi gul loor gbeet bɔ gedu be, gul gɛ. 6 Wɛɛ Simɔŋ Piyɛr fɔbzig kuudu zaa tuurɔ gbor gulk a loor bɔ gedu gbɛn gbandil wɔ hi gidi, 7 hi gbandil fɛɛt bɔ hi yɛ̧ɛ̧n nɛ Yeesu zulɔ bɔ ɔks hi gbandil zaadɛ wɔ gɛ, kɔm wɔbiy gi gbunu a aakil du. 8 Hɔnɛ walsɛr zaa bɔ doz nɛ a loorlɛl bɔ ge gul hɛw, yɔ gbɛn hin wɔrɔ ɗɔbs gɔ. 9 Hí kɛ̄m nɛ hinyɔ Bɛt ɗɛɛrwol raa nɛ a gi an Yeesu gi rɛml a wɔrkɛ teesdu rɔbtɔnɔ kɛn gɛ be. 10 Yɔ anbɔ walɛ-sɛrɛ wɔ hi wɛɛ hi lɛl be. 11 Mariyama er a loor ya̧a̧gbar bɔ ge gi kaako. Yɔ gi kaako hu̧u̧rɔ yoo lɔl a loor bɔ gedu. 12 Gbɛn Bɛt walɛsɛrɛ eerɛ hi heg gbandil buudɛ muulɛ hi ɗɔɔtig a lɛl bɔ hi hog nɛ Yeesu wɔrkɔ ge: gbunu ɗɔɔt a zullɛl bɔ hi gbaag nɛ ge, zaa gbunu a dɔɔ-lɛl bɔ hi gbaag nɛ ge. 13 Bɛtwa-lɛsɛrɛ wɔ hi warige a naadyɔ, mɔ kaak nɔ? Gii ta̧a̧ a yɔ hi ha̧s waar be wɔrkɔ bɔ gii be kaako, wɛɛ bé mɛ̄ɛ̄ lɛl yɔ hi gbaag du hɛw gɛ. 14 Yɔ dɔg anbɔ zɛmrɔ gbɛn Yeesu gi erko, mɛɛ a Yeesu gii gɛ. 15 Yeesu warige a naadyɔ, mɔ kaak nɔ, mɔ ɓɛɛk nɔ ɔnɛ? Nis bɔ mɔk a za̧a̧nbakya bɔ gii gib warko. Wɛɛ raage a ɗɛntyɔ, gid mɔɔ loo Yeesu wɔrkɔ bɔ raasibe lɛlɔ mɔ gbaa du, be re be loozɔ. 16 Yeesu elige a Mari-yama! Mariyama wɛɛ zɛmrɔ ta̧a̧ a Rabuni, a Ibraniŋko ya̧a̧boon du raakɔ a Hingokya. 17 Yeesu raage a bɔmɔ ki̧i̧be, be kadir a Baa be ge ket gɛ. Yɛrɛ rekumɔ mɔ zɛm yɛ̧ɛ̧dɛ be hiya, mɔ raasihi a be dɔɔk a Baa be yɔ gi Baa nɛ ge, hi a Bɛt be, yɔ gi Bɛt nɛ ge. 18 Mariyama a Magdala rekɔ raas Yeesu walɛsɛrɛ ɔ̧ɔ̧ wɔ a be gbɛn Waar bɔ, gii raasib hin wɛrɛ sɛw. 19 A ɔ̧t gbun bɔ lɛɛsigɔ gedu a dimaas ɔ̧t biitir bɔ ge du, walɛsɛrɛ ɔ̧ɔ̧ wɔ hi mɔks a luk za du hi kpɛ̧ɛ̧tɔ, yɔ hoob gihi ha̧a̧k Yahuduya wɔ. Yaala Yeesu zaa mid hi teesdu raahi a ɗɔɔtil saŋtum gi hi nɛya! 20 Yɔ dɔg hin bɔrɔ anbɔ zunsihi naanɔ wɔ hi yɛ̧brɔ bɔ. Yɔ walɛsɛrɛ ɔ̧ɔ̧ wɔ hi bɛɛg gbɛnko hi dag hato. 21 Yeesu wɛɛ raahi a ɗɔɔtil saŋtum gi hi nɛya, bee be yaan waal du anyɔ Baa be yaazib waal du be. 22 Yɔ dɔg anbɔ ul zɛk hi zulha, raahi a zen Bɛt Mɔkilɔ. 23 Dood wɔ gɔ nɛ bitsihi hinha̧a̧lya̧, hinha̧a̧lya̧ gi bisɔ. Dood wɔ gɔ nɛ wa̧a̧ hinha̧a̧lya̧, hinha̧a̧lya̧ gi wa̧a̧y be. 24 Yɔ Yeesu mits walɛsɛrɛ wɔ, koobl daa eer wɔ zaaya̧ gbun bɔ nuŋgɔ a Tumas Kumbili, taatin ma hi naaza wɔ ɔksi. 25 Walɛsɛrɛ zaadɛ wɔ hi fɔksige a wi gbɛn Waar bɔ gbɛnɔ. Gii wɛɛ raa be a bé gbɛ̄n pɔnti wɔ hi doo gi naan du taalya̧ gɛ, be yāā naanwal be a pɔnti lɛl wɔ hi doo gedu gɛ, be yāā naan be a yɛ̧brɔ bɔ gedu gɛ, be taa nɛ ɗɔbsig zaŋ. 26 Ɔ̧t yɔ tal di gɛ̧ɛ̧sɛ, Yeesu walɛsɛrɛ ɔ̧ɔ̧ wɔ hi wɛɛ hi ɗɔɔtig a luk du ɓɛ, Tumas gi du be hi hiya. Gbɔnɔ wɔ hi kpɛ̧ɛ̧t be. Yeesu zaa mid hi teesdu ɓɛ raahi a ɗɔɔtil saŋtum gi hi nɛya! 27 Kuudu wɛɛ raa Tumas a yaazum naanwal mɔ bɔ hɛdi mɔ wɛɛ mɔ sɔ̧ɔ̧ naan be wɔ; yɔdzum naan mɔ mɔ wɛɛ mɔ kiin yɛ̧br be. Bɔmɔ faa zaa, ɗɔbsum kpɔd. 28 Tumas raa a Waar be! Bɛt be! 29 Yeesu raage a yɔ mɔ gbɛnib ro mɔ ɗɔbsɔ. Hat gis dood wɔ hi gbɛnib gɛ hi ɗɔbsɔ. 30 Yeesu wɛɛ woo gɛrs hinmɛksingoya zaadɛ kittɔnɔ a walɛsɛrɛ ɔ̧ɔ̧ wɔ hi muutdu, hi bi̧i̧ gɛrsya̧ a ɗɛɛrwol yɛrɛ gedu gɛ. 31 Yɛrɛ hi bi̧i̧ hin wɛrɛ an nɛ ta̧a̧ a Yeesu gi Masihu bɔ giya, gi Bɛt Waawal giya, an nɛ wɛɛ nɛ ɗɔbsɔ nɛ dag za̧a̧tig a gi nuŋg du.
1 Yɔ kuudu anbɔ Yeesu wɛɛ zuns walɛsɛrɛ ɔ̧ɔ̧ wɔ muutɔ ɓɛ a mɛmbalya̧ a Tiberiya. Muutɔ bɔ zuunukɔ zuun nɛ rɛ gɛrɛ. 2 Simɔŋ Piyɛr hi Tumas yɔ nuŋgɔ zaa a Kumbili, Nataniyɛl yɔ fu̧u̧ a Kana a Galile, Zebede waatwalɛ ɔ̧ɔ̧ wɔ hi Yeesu walɛsɛrɛ ɔ̧ɔ̧ zaadɛ eerɛ hi gi lɛlgbunu. 3 Simɔŋ Piyɛr raahi a be rek dut wa̧a̧ko. Hi raage a wi retin hi mɔya. Hi tuu hi kar lɛmb du hi rekɔ. Yɔ hi rekɔ, yɛmsɔ gedu hi wa̧a̧ hinza gɛ. 4 Yɔ lɛl gi gaako Yeesu zaa er a mɛmbal ya̧di. Wɔrɔ be hí mɛ̄ɛ̄ a Yeesu gii gɛ. 5 Yeesu warihi a wāāt be wɛ, nɛ taan dut ya? Hi goo a hinza taaro. 6 Yeesu raahi a gbalin zagr bɔ a lɛmb naanrɔbo nɛ wa̧a̧ dutu. Hi gbal gɔ. Yɔ hi gbalɔ dut wɔ hi leg hi hi̧i̧s a zagr bɔ gedu deder. Yɔ dut wɔ hi hi̧i̧s du hɔ anbɔ, hí ɗɛ̄ɛ̄ zagr bɔ wɛnzig a lɛmb du gɛ. 7 Hɔnɛ walsɛr bɔ Yeesu ha̧a̧g gi muulɛ raa Piyɛr a Waar bɔ giya! Piyɛr be, da hod nɛ gbandilɔ an gi woowoos be. Yɔ lag a Waar bɔ giya, mal gbandilɔ bɔ see du, gi̧i̧ mɛmbal bɔ gedu. 8 Walɛsɛrɛ zaadɛ wɔ hi zaan lɛmb bɔ hi diz zagr bɔ dut hi̧i̧s gedu a lɛmb kuudu. Lɛl bɔ sɛ̧ɛ̧b hi kasiŋ bɔ be. Hɛmlikɔ an hi taa dɔɔ yɔ̧ɔ̧lɔ nɔɔnɛ. 9 Yɔ hi sil hɛbtdi hi gbɛn laa-ɛ̧ɛ̧ko hi dut hage hi koko. 10 Yeesu raahi a kamzin dut wɔ nɛ wa̧a̧z zaadɛya̧. 11 Simɔŋ Piyɛr kar a lɛmb bɔ gedu diz zagr bɔ dut gbɔlɛ hi hi̧i̧s gedu yɔ̧ɔ̧lɔ nɔɔnɛ daatɔ dumbili nɔɔnɛ daa taarɛ. Hi mɔkɔ a dut bɔ tɔɔ gi daarlɛl gi taar zagr bɔ taarɔ, wɛɛ taar gɛ be. 12 Yeesu elihi a zaan nɛ lehinɛ. Walsɛrɔ zaa gbun mɔk an gi warig a mɔɔ bɔ gɛ, anyɔ hi mɛɛmɛ a Waar bɔ giya. 13 Yeesu sɛ̧ɛ̧bɔ loo kok bɔ gaahi, wɛɛ gaahi dut bɔ anbɔ be. 14 Tuur dɔɔ taasimɛ Yeesu gi gis walɛsɛrɛ ɔ̧ɔ̧ wɔ muutɔ zuunik anyɔ bɛɛ ɗundig a wɔrkɛ teesdu a loor du. 15 Yɔ Yeesu lehin gi da̧a̧, war Simɔŋ Piyɛr a Simɔŋ, Zonas waawalɔ, ha̧a̧m a be muul daar ha̧a̧tig ya̧nɛ bɔ ya? Simɔŋ goo a hɔɔ, Waar i, mɔ mɛɛ a harib hi mɔya. Yeesu raa a ɛ̧ɛ̧num tam be waat wɔ. 16 Wɛɛ warig dɔɔ eesimɛ a Simɔŋ Zonas waawalɔ, ha̧a̧m a be muul ya? Piyɛr googe a hɔɔ, Waar i, mɔ mɛɛ a haribe hi mɔya. Yeesu wɛɛ raage a oom tam be wɔ. 17 Yeesu warig dɔɔ taasumɛ, a Simɔŋ Zonas waawalɔ, harim be muul ya? Yɔ Yeesu warig hin dɔɔ taasim bɔ anbɔ, a harim be muul ya? Piyɛr miimɔ. Wɛɛ googe a Waar i, mɔ mɛɛ hin sɛw, mɔ mɛɛ a harib a mɔ muulɛ. Yeesu wɛɛ raage a ɛ̧ɛ̧num tam be wɔ. 18 Be raasum rɔbo yɔ mɔ gi sɛrɔ mɔ heg hi̧i̧l mɔ see du mɔ naanɛ, mɔ rekɔ a lɛlyɔ ha̧a̧mɔ ge. Yɛrɛ gɔ mɔ wɔmɔ, mɔ́ yɔd naan mɔ, za̧a̧nza gi yɛ̧ɛ̧ naan mɔ wɔ, gi wɛɛ gi ka̧m a lɛl yɔ ha̧a̧m ge gɛ. 19 Yeesu raahi n bɔ lab an gi zuun wɔrk yɔ Piyɛr gɔ gi wɔrɔ kuudu gi wɛɛ gi ɗɔbsin Bɛto. Yɔ anbɔ wɛɛ raage a fɔbzibe. 20 Yɔ Piyɛr zɛmr lɛ, gbɛn walsɛrɔ Yeesu ha̧a̧g gi muul gi zaak hi kuudu, walsɛr bɔ da yees nɛ a Yeesu kpoos du yɔ hi gi hinleko gi warige a Waar i, za̧a̧n bɔ gɔ gi rɛ̧ɛ̧m gɛ bɔ? 21 Yɔ Piyɛr gbɛnige war Yeesu a Waar i, yɛrɛ gii be nɔ gi tursige? 22 Yeesu raage a an ha̧a̧be an gi waa gi tuur an be wɛɛz be zɛŋge, dɔgl mɔ gi du ya? Mɔnɛ fɔbzibe sa! 23 Hinɔ anbɔ ro dɔgl bɔrɔ gi hɛks a naaza hi teesdu a walsɛr bɔrɔ taa wɔrko. Bɔ lab Yeesu rāā Piyɛr gii a ɔnɛ taa wɔrk gɛ, raa a an ha̧a̧be gi waa gi tuur an be wɛɛza be zɛŋge, dɔglɔ taa du. 24 Yeesu walsɛr bɔrɔ gii gi book hin wɔrɔ dɔglɔ labɔ gii wɛɛ gi bi̧i̧ hinya̧, wɛ wɛɛ wɛ mɛɛ a dɔglɔ gi rɔbo. 25 Yeesu wɛɛ woo hinza kittɔnɔ ɓɛ. À hi bi̧i̧ nɛ hin wɔrɔ gbunu gbunu sɛw, dɔglɔ yɔ hi̧i̧s nɛ ɗɛɛrwol kittɔnɔ; mi mɔk a ɗɛɛrwolya̧ yɔ hi hi̧i̧s waal yɛ̧ltɔnɔ, waal yɔ riihi gɛ hɛw. Aanbɔ.