1 Go mbomannahb Ellum ni jolo. Ellum nio ni jolo a Esowo. Ellum nio ni jolo Esowo. 2 Ellum nio ni jolo a Esowo go mbomannahb. 3 Ni ni Esowo ko, lim nsol kpee. Ki li ye, kehn ejumjum jolem jolo ji ma jol. 4 Ege wo elkpin jolo no. Elkpin nia ni jolo ellennge ka ane. 5 Ellennge nio li ana agun nya kp'yake go ejannge. Ejannge jio ka tiki lahme agun nyao. 6 Nne awohng jolo go, no Esowo tum-e no, no bo jo lung-e re Jon. 7 Á ba re á ba yiimi ntianse bade ellennge nio, eji ane kpee l'taame tib go alum nya á bungu no. 8 Ye sang jolo ellennge nio. Á ba re á ba yiimi ntianse ka ellennge nio. 9 Etingitingi ellennge ni kpo ka nne awohng awohng ellennge, ni ni ma ba go njini. 10 Á jolo go njini. Ye wo Esowo ko-e, lim njini nyia. Jol njini nyia, we tikem liingi. 11 Á ba go ege ejahbe, ane ebe we koom. 12 Ane bao ba ko-e no, fere taame tv mbing enye, bo ba li ane ba á ka bo nsahm re bo jol abon Esowo. 13 Bo jelem bo ana ane baka baka, jol go elkoro ni anebkal sang, jol bo jelem bo tib ana nne tiri no. Esowo bi jele bo. 14 Ellum nio ni ba siingi nne, fere lene tob-r. Wahr ebnyehn ellub ene, ellub nio ni Nde ka Mmon mmon awohng ewe, no ma gbal go nnoobo, a etingitingi. 15 Jon ji nwohngalahb jo yiimi ntianse ka-e, fere jo rabe re, “Ye wo a, ji n jo bung bada ne re, ‘Nne no kp'bake toon-m go njahm gbale sehnge me. Tibre á tohko jol, me n kehm jini.’ ” 16 Go ege agbal wo, á jo yehke nnoobo, jo ka wahr ane kpee. 17 Moses wo ka atahm. Nnoobo, a etingitingi, Jisos Kraist wo ko ba ka. 18 Nnene limm, no ma ny'nyehn Esowo, sehngem Mmon mmon awohng no li a Esowo bad bad, ye wo ma lim re wahr kahn Esowo. 19 Alum nya ana, nya Jon bungu no. Eji Jus ji jolo go Jerusalem tumu abalimajom, a abon Livai tv-e, bo song bahb-e re, “Ekahmekahme kpee, wo nne awo?” 20 Á kehm lennge ka bo, á gbaamem. Á lennge ka bo re, “Me Kraist sang.” 21 Bo kehm-e kpe bahb re, “Ekahmekahme kpee, wo nne awo fono? Anv, wo Elaija woa?” Á kehm faange re, “E'ee, me Elaija sang.” Bo kpe-e bahb re, “Anv, wo nnyehnamahr no e kp-e siki woa?” Á kpe faange re, “E'ee, me nnyehnamahr noo sang.” 22 Bo kehm-e kpe bahb re, “Anv, wo nne awo? Tong-r, eji e l'song tong ane ba tum-r no. Anv, a kpo bung renan bade elna?” 23 Jon kehm faange re, “Me wo li ‘nne no kp'rabe go elka emahng re, Tuungen mbang nyi Ntul bahke sehnge, wahn lim t'tor’ ana nnyehnamahr Aisaya bungu no.” 24 Ane ba tumu bo, Bab Farisi ba. 25 Bo kehm-e bahbe re, “Eji a tong-r re, wo Kraist sang, wo Elaija sang, wo nnyehnamahr noo sang, anv, jen ji wahnge a kp'wohngo ane alahb?” 26 Jon kehm faange bo re, “N kpo wohngo ane alahb maka maka. Go egahne ellong nne awohng noa yim, no ń kil-e elkahne. 27 Jol eji á kp'b'ba toon-m go njahm, me n fuumem re me n kehme, fannge alehke akpaketa enye.” 28 Nsol nyia kpee limi go Betani, go egbuk Jodan jehko, edi jio ji Jon jo wohngo ane alahb. 29 Etoono efung behko Jon kehm nyehne Jisos kp'bake go ege. Á kehm bungu re, “Nyehnen, Mmon a Njoro no Esowo, no bahke ba rod abiafem nya njini. 30 Nne noa wo, n jo bung bada ne re, Nne no kp'bake toon-m go njahm gbale sehnge me, tibre á tohko jol, me n kehm jini. 31 Mefono antahng, we n tohkem kahn wuku wuku. Ji wahnge m ba no, fere kpi ane alahb wohngo, li, eji abon Israel l'kahn-e.” 32 Jon jo yiimi ntianse re, “N nyehne Etingi Etohko go elfoongo ebbehl ma lohng go ejahbetul Esowo badde ba kuum-e. 33 Mefono antahng, we n tohkem kahn wuku wuku. Esowo bio bi tum-m no re me m ba wohngo ane alahb, ye wo tong-m re, ‘Nne no, a l'nyehn Etingi Etohko ma badde ba kuum-e, ye wo li nne no kpo wohngo ane alahb go Etingi Etohko.’ 34 Me n lohko nyehn, fere yiimi ntianse re, ye wo lohko li Mmon no Esowo.” 35 Etoono efung behko Jon kpe jol ona, a abat'toono ebe, ane abal. 36 Á kehm nyehne Jisos, eji á jo jen abake, kehm bungu re, “Nyehnen, Mmon a Njoro no Esowo!” 37 Eji abat'toono bao na abal wuku ano, bo kehm tahme toono Jisos. 38 Jisos kehm keebe, nyehn bo, eji bo kp-e toono, á kehm bahbe bo re, “Ń kpi jen seb?” Bo kehm-e faange re, “Rabbi (ji lohngo re nt'tibi), gan wo a kpo kang?” 39 Jisos kehm bungu tong bo re, “Baan, wahn ba nyehn!” Bo kehm jeke, song nyehn edi ji á jo kang, kehm tob kang o efung bio. Tibre ngare nyio jolo ejum nkaranka eni nyi elgung. 40 Nne awohng go ellong ane abal bao, no tob wuk ana Jon jo bung, kehm tahme toono Jisos. Bo jo lung-e re Andru ji jolo mmonannyehn a Saimon Pita. 41 Á gbo mbang song nyehn Saimon mmonannyehn, kehm-e tongo re, “Wahr ebnyehn Mesaya,” (ji lohngo re Kraist). 42 Á kehm koko Saimon ba a ne goji Jisos. Jisos kehm-e seenge too, kehm bungu re, “Wo Saimon wo, ji mmon a Jon. Bo bahke fere jo lung-a re Kefas ji lohngo re Pita.” 43 Etoono efung behko Jisos kehm toobo re á bahke tahme go Galili. Owo á nyehne Filip, kehm-e tongo re, “Tahm toon-m!” 44 Filip lohng go Betsaida, ejahbe ji Andru abola Pita lene no. 45 Filip kehm song nyehn Natanael, kehme tongo re, “Wahr ebnyehn nne no Moses nyono bada ne go nwer atahm, no abanyehnamahr Esowo tob nyon fvfo bada ne, Jisos ji Nasaret, ji mmon a Josef.” 46 Natanael kehm faange re, “Anv, ejum ajehng ajehng ji nno jia, ji bahke tiki lohng go Nasareta?” Filip kehm-e faange re, “Ba wahr tahm, wo ba nyehn!” 47 Eji Jisos nyehne Natanael kp'bake go ege, á kehm bungu bada ne re, “Nyehnen, a wo li etingitingi nne Israel, no enehm abehng abehng ki-e wob go atahng.” 48 Natanael kehm bahbe Jisos re, “A limi renan, kehm-m kahne?” Jisos kehm-e faange re, “Re Filip kehm-a lungu, n nyehn-a, a jehk no go nnahb eti ji bo kpo lung re efig.” 49 Natanael kehm bungu re, “Rabbi, a lohko li Mmon no Esowo. Wo wo li Ntul no Israel!” 50 Jisos kehm-e faange re, “Anv, wobtaama, tib eji m ma-a tong re, N nyehn-a go nnahb efiga? A bahke nyehne akpokosi sehnge ana nyi a ma nyehn a.” 51 Jisos kehm kpe bung tong bo re, “Etingitingi, n kp'bungu tong-n re, ḿ bahke nyehne ejahbetul Esowo ma lennge, fere nyehn babenjel kp'tahme go ero, fere jo badde ba goji Mmon no nne.”
1 Eji ma kang nfung ebal, elkak elbal jolo go Kena ji Galili. Nnyehn Jisos jolo ona. 2 Jisos, bo t'tob tiing-e elkak elbal nio, a abat'toono ebe. 3 Eji amahm male no, owo nnyehn Jisos kehm bake ba tong-e re, “Amahm ebmal.” 4 Jisos kehm-e faange re, “Nnenkal, n'nan a kp-m tohngo anv kak go ntong nyia? Ngare ny'nyame ka rehng.” 5 Owo nnyehn Jisos kehm tongo alokeltum ba jolo o re, “Limen ajehng ajehng ji á bahk-n tongo!” 6 Etu ebrakebra jolo ona, nya bo bumu re bo jo ba ru elbo ana atahm ebo bungu no. Jolo agburu atulahb nya nnen a nnen, nya etu ajehng ajehng jo yele rehng egalon eltahl, tohko jol ano eltahl egalon ewubu. 7 Jisos kehm bungu tong bo re, “Song tuken alahb, wahn ba ruru go atulahb nyao!” Bo kehm tuku alahb, ba ruru atulahb nyao kpee. 8 Á kehm tongo bo re, “Limen alahb maa, wahn song ka nfakamahm!” Bo kehm limi, tahm a ma. 9 Nfakamahm no elkak nio kehm wuungu alahb mao ma ma siingi amahm. Á kahnem edi ji lohngo lohng ba. Alokeltum bao ba limi lim alahb mao, bo jo k'kahn. Owo á kehm lungu nlumanne, 10 kehm-e tongo re, “Nne awohng awohng kpo tohko ka amahm ma nno. Eji bo ma wo kp'buumu, á kehm gohro ka bo ma ki ga nob. Wobrod amahm ma nno bum gona tete sik anv!” 11 Ngbokambang a nkpokosi nyi Jisos limi no nyi a, á limi go Kana ji Galili. Owo á tibi ellub ene. Abat'toono ebe kehm taame tv-e. 12 Owo Jisos kehm tahme go Kapenium, a nnyehn, a abonanyehn, a abat'toono ebe. Owo bo kange abon afung ntiil. 13 Ngare nyio elkak ni aneb Jus ni bo kpo lung re Pasova ebkabbe. Owo Jisos kehm tahme go Jerusalem. 14 Etahk Esowo ona wo, á nyehne ane ba jo gungu efong, a ejoro, go mbehl, fere nyehn ane ba jo yaange akpohko jehk no, kp'yaange akpohko go akp'kuru ebo. 15 Jisos kehm soro ko ebr'rare, kam ane kpee yehke go etahk Esowo jio, a efong efong fvfo. Á sale akpohko nya abayaangakpohko, fere gbul akp'kuru ebo tuubu go. 16 Á kehm tongo ane bao ba jo gungu mbehl re, “Roden nsol nyia, wahn song a nyi! Kana rod etahk Nsoo, bum ana edi are!” 17 Abat'toono ebe kehm soro buumu ana nwer Esowo bungu no re, “Ntir nyi n yehke kak, eji n tuungu etahk Esowo, nyi nyi bahke fere wul-m.” 18 Jus kehm-e bahbe re, “Elliingi ani a bahk-r tibi, eji e l'kahn re, a kpi nsahm nyi a kpo lim nsol nyia?” 19 Jisos kehm faange bo re, “Waan etahk Esowo jia, m bahke tuungu si ji nfenfe go nfung era.” 20 Jus kehm bungu re, “Bo ko nnya atahl abal a nnya erakera, si etahk Esowo jia, ji ji a ma fere tong re, a bahke tuungu si go nfung eraa?” 21 Etahk Esowo ji Jisos jo bung bade, ngubjing enye nyi. 22 Ngare nyi á nyahme go elkv, abat'toono ebe b'buumu alum nyao nya á bungu no. Owo bo kehm taame tv nwer Esowo, fere taame tv alum nya Jisos bungu no. 23 Eji Jisos jolo go Jerusalem ngare nyio nyi elkak Pasova, ane gbalee ba taame no tv mbing enye, eji bo nyehne akpokosi nya á jo lim. 24 Á joom bum bo go etingitingi, tibre á jo kahne bo kpee, ana bo li no. 25 Kpeem fuumu re nne awohng awohng tong-e bade ana ane li no, tibre yefono antahng k'kahn ana ntim ane li no.
1 Nne a Farisi awohng jolo gona, no bo jo lung-e re Nekodimos. Á jolo nne no woomo go ellong atubesi Jus. 2 Atv amehng á kehm bake goji Jisos, ba tong-e re, “Rabbi, wahr kp'kahne re, wo li nt'tibi no Esowo tumu no. Tibre nnene limm, no bahke ma lim akpokosi ana nyaa nya a kp'limi, sehngem re no, Esowo bi jol a ne.” 3 Jisos kehm-e faange re, “Etingitingi, n kp'bungu tong-a re, Tohko tiki jol re, nne kpe tuungu jini, á nehm tiki nyehn etul bi Esowo.” 4 Nekodimos kehm-e bahbe re, “Anv, nne bahke kpe tuungu jini renan, eji á ma kul? Á bahke kpe feere na song yel nnyehn go ala, á kpe-e jela?” 5 Jisos kehm faange re, “Etingitingi, n kp'bungu tong-a re, Tohko tiki jol re, nne kpe tuungu jini go alahb, a Etingi Etohko, á nehm nyehn etul bi Esowo. 6 Nne kpo jel nne. Etohko kpo jel etohko. 7 Ki-a kpe kpo esi mbol mbol, tib eji n tong-a re, Tiki li re wahn kpe tuungu jini. 8 Nfeb kpo lim edi ajehng ajehng ji kor-e no. A kpo wuk ewahl ewahl. A kpehme kahn edi ji kp'lohngo abake, a edi ji fi no. Ano wo tob li jang jang a nne no Etingi Etohko jel-e no.” 9 Nekodimos kehm-e bahbe re, “Anv, jia kehm jolo renan ana?” 10 Jisos kehm-e faange re, “Wo ji li na nt'tibi Israel, nsol nyia a nehme kahna? 11 Etingitingi n kp'bungu tong-a re, Wahr kpo bung bada nsol nyi e kp'kahne, fere jo yiimi ntianse go nsol nyi e ma nyehn. Jol ń nehme tiki taame tv etib ebahre. 12 Eji m ma-n tong nsol nyi njini nyia, ń kil eltaame, l'lim renan, ń kehm taame, n l'tong-n nsol nyi ejahbetul Esowo? 13 Nnene limm, no ma j'je go ejahbetul Esowo, sehngem Mmon no nne wo wo ma lohng go ejahbetul Esowo ba.” 14 Ana Moses rodo nnyo kum go ejangnti, rod jahm ngare nyi bo jolo go elka emahng, ano wo fvfo bo bahke tob rod Mmon no nne, kum go ejangnti, rod jahm, 15 eji nne awohng awohng no l'taame tv-e, á l'bel elkpin ni li go njinanjini. 16 Esowo njini kor-e na, wo, á rodo Mmon mmon awohng ewe ka re, nne awohng awohng no l'taame tv-e, á nehm tiki kpo tan, á kpi elkpin ni li go njinanjini. 17 Tibre Esowo tumem Mmon ewe tv go njini nyia re á ba ka njini ebi. Á tum-e re á ba tahre njini nyia. 18 Nne no l'taame tv-e, á nehm li ebi. Nne no tohko taame, yebsi l'li ebi. Tibre á taamem tv mbing nyi Mmon mmon awohng no Esowo. 19 Ana wo li elam, eji ellennge ma ba go njini. Ane, ejannge ji kpi bo kor sehnge ellennge. Tibre nsol nyi bo kp'limi, li ab'bi ab'bi. 20 Tibre nne awohng awohng no kpo lim ab'bi, ellennge kpo sab-e sab. Á kpehme seb re á jen go edi ji ellennge li no, eji bo l'k'nyehn ab'bi enye. 21 Nne no kpo lim jio ji li go etingitingi, ye wo li nne no kp'jene go edi ji ellennge li no, eji nne awohng awohng l'nyehn nnoobo eltum ni á limi no go elfahle ni Esowo. 22 Owo Jisos kehm tahme go Judea, a abat'toono ebe. Ona wo bo kange no, jo wohngo ane alahb. 23 Jon fvfo jo tob wohngo ane alahb go Enon ji li kohlo Salim. Tibre alahb jolo o gbalee. Ane jo je o, song bel ewohngalahb. 24 Ngare nyio, Jon, bo we ka bob kak ngbekobo. 25 Abat'toono Jon, a nne a Jus awohng, bo kehm kehme nfaabe lim bade eljini ni nne bahke jo bum elne saang. 26 Owo bo kehm bake goji Jon, kehm ba tong-e re, “Nt'tibi, nne noo no jolo a na go egbuk Jodan jehko, no a jo yiimi ntianse ka-e, á noa ona, kpi ane alahb wohngo, nne awohng awohng kp'jeke go ege.” 27 Owo Jon kehm faange re, “Nnene limm, no bahke ma bel ejum ajehng ajehng, sehngem re no Esowo bi ka-e. 28 Wahnfono antahng ebwuk ana n tong-n no re, Me sang li Kraist. Bo tum-m na re me n gbo-e mbang. 29 “Nne no kpi nkal, ye wo li nlumanne. Eji ntem no nlumanne yim ona, kp'wuku alum nya á kp'bungu, eltim bahk-e jo yebe sehng. Anv, eyebatahng ejame jia ebgbal. 30 Ye bahke gbale na, me m bahke fere jol reed.” 31 “Ye jio ji lohng go ero ba, á gbale sehnge ane kpee. Nne no lohng go njini, á li ka njini. Á kpo bung nyi njini. Nne no lohng go ejahbetul Esowo ba, á gbale sehnge ane kpee. 32 Á kpo yiimi ntianse go nsol nyi á ma nyehn, fere w'wuk. Nnene limm, no kp'taame tv etib ebe. 33 Nne awohng awohng no l'taame tv etib ebe, bahke lohko tib re, Esowo li go etingitingi. 34 Nne no Esowo m-e tum, á kpo bung alum nya Esowo. Tibre Esowo kpehme gare na etohko eje ka ane. 35 Esowo, Mmon ewe kor-e sehng, owo wahnge á ma yake nsol enye kpee, kak-e go ebo. 36 Nne no l'taame tv Mmon Esowo, á kpi elkpin ni li go njinanjini. Nne no tohko wuk Mmon Esowo, elkpin á nehm bel. Erakatahng ji Esowo ji li a ne.”
1 Bab Farisi kehm wuku re, Jisos kpo wohngo ane alahb sehnge Jon, ane bao fere jo toon-e. 2 Jol Jisos wohngem nne awohng awohng alahb, sehngem abat'toono ebe ba ba jo lim ano. 3 Ntul a Jisos sebe kan kahn ano me, á kehm tahme o Judea asongo go Galili. 4 Tiki jol re, á sehng go Samaria. 5 Á kehm song rehng go ejahbe Samaria ajehng, ji bo jo lung re Sikar, ji jolo kohlo edi ndi ji Jekob ka mmon ewe Josef. 6 Elbing alahb ni Jekob jolo ona. Eji Jisos ma lahng eljen, á kehm ba ji o elbing alahb nio. Ngare nyio jolo ngare efin. 7 Owo nnenkal a Samaria kehm bake re á ba tuk alahb. Jisos kehm-e tongo re, “Ka-m alahb, me n wo!” 8 Ngare nyio abat'toono Jisos ebtahm go nla ejahbe re bo song gunu nsol alehke. 9 Nnenkal a Samaria noo kehm-e faange re, “Jen ji wahnge a kp-m bahbe re, me n ka-a alahb, wo ji li na nne a Jus, gana me nne a Samaria?” Tibre Jus, a Samaria, bo kpehme kod abo. 10 Jisos kehm-e faange re, “Li re a kp'kahne ayare nya Esowo kpo ka, fere kahn nne no kp-a bahbe re, wo ka-e alahb, á wo, kehn a m-e gboongo na, á ka-a alahb mao ma elkpin.” 11 Mmonankal noo kehm-e bahbe re, “Nsoo, ejum limm, ji a bahke koko tuk alahb, gana elbing alahb nia kp'rahbe. Gan wo a bahke bele alahb mao ma elkpin? 12 Anv, wo ga gbal sehnge Jekob, nso ejahre, no ka-r elbing alahb nia? Á jo wo alahb ana, a abon abon ebe, a atohkondi enye kpee.” 13 Jisos kehm-e tongo re, “Nne awohng awohng no l'wo alahb maa, bahk-e kpe kor. 14 Nne awohng awohng no l'wo alahb mao ma m bahk-e kake, ekor bahk-e tane. Alahb mao ma m bahk-e kake, bahke jo tub mb'behl go ege atahng, fere gbo ebgba bi bahke jo fab, rehng go elkpin ni li go njinanjini.” 15 Mmonankal noo kehm-e faange re, “Nsoo, ka-m alahb mao ma ekor bahk-m tane, eji n l'k'kpe ba a, ba tuk alahb elbing nia.” 16 Jisos kehm-e tongo re, “Song, wo song lung nlum ewa, wahn ba!” 17 Mmonankal noo kehm-e faange re, “Nlum awohng awohng n kpimm.” Jisos kehm-e tongo re, “Wobbung etingitingi, eji a tongo re, nlum a kpimm. 18 Wobbel alum na alon. Noo no a jehk-e etahk, etingitingi nlum ewa sang. A lohk-m tong etingitingi.” 19 Mmonankal noo kehm-e tongo re, “Nsoo, me n lohko kahn re, wo nnyehnamahr wo. 20 Babnso ejahre jo kake Esowo go ewong jia. Wahn Jus, ń kpo bung re, Go Jerusalem wo li edi ji fuumu re, ane jo ba, ba kak Esowo.” 21 Jisos kehm-e tongo re, “Nnenkal, taame tv alum enyame nya n kp'bungu tong-a re, Ngare kp'bake nyi ń l'k'kpe kak Esowo Nsoo go ewong jia, jol go Jerusalem fvfo. 22 Wahn aneb Samaria, ń kpo kak ejum ji ń kil elkahne. Wahr Jus, e kpo kak ji e kp'kahne. Tibre eltahre kpo lohng goji Jus. 23 Ngare kp'bake nyi atingitingi abakake Esowo bahke jo kak Esowo Nsoo go etohko, a etingitingi. Tibre elkohn ane ana bao ba, Esowo Nsoo kp'sebe re bo kak-e. Ngare ny'nehm nyi ma rehng a. 24 Esowo, etohko ji. Bao ba kp-e kake, bahke jo kak-e go etohko, a etingitingi.” 25 Mmonankal noo kehm-e tongo re, “N kp'kahne re, Mesaya kp'bake. Mesaya ji bo kpo lung-e re Kraist l'ba, á bahk-r tibi nsol kpee.” 26 Jisos kehm-e faange re, “Me jia ji kp'bungu a na, me wo li Mesaya.” 27 Tvtv ona abat'toono Jisos kehm soro ba. Kpo bo esi area, eji bo nyehne re, á kp'bungu a nnenkal. Nnene jolem go bo ellong no bahbe Jisos re, “Jen ji a kp'sebe?” Jol bo we bahbem re, “Jen ji wahnge a kp'bungu a ne?” 28 Nnenkal noo kehm soro tahm etulahb eje sa, tahm song rehng go nla ejahbe, song tong ane re, 29 “Baan, wahn ba nyehn nne no ma-m tong nsol kpee, nyi n kpo lim. Ma ye wo li Mesaya nji!” 30 Ane bao kehm soro lohng ejahbe jio, tahm song kpiri Jisos. 31 Ngare ny'nehm nyi abat'toono Jisos jo gboongo Jisos re, “Nt'tibi, ko nsol alehke, wo li me!” 32 Á kehm tongo bo re, “N kpi nsol alehke nyi m bahke lehke, nyi ń kil elkahne.” 33 Abat'toono ebe kehm kehme elbahbe atemtem re, “Anv, nne ebko nsol alehke ba ka-ea?” 34 Jisos kehm faange bo re, “Nsol alehke enyame li re, me n lim mbang nyi nne no tum-m no, fere gohro mal eltum ene. 35 Wahn sang kpo kono elbungu re, ‘Ebsa nnyahng eni, ngare elkpake rehnga?’ N kp-n tongo re, wahn tab asamahr enyahne wahre, nyehn ana ebgbe ma kum, ngare ebrehng kpee, nyi elkpake. 36 Nne no l'kpa, á kpo bel eltuuru. Á kpo kpu nsol nyio bum, jol go elkpin ni li go njinanjini, eji mb'bahme, a nkp'kpake, bo l'bel eyebatahng egom egom. 37 Tibre jia ji bo kpo kono elbungu, lohko li go etingitingi re, ‘Nne noko bahm, noko kpa.’ 38 M ma-n tum re, wahn song kpa egbe jio ji ń ki lim eltum anehng anehng. Ane bako ba ma lim eltum o, wahn ebba yel eltum nio, soro asi kp'limi asongo.” 39 Aneb Samaria gbalee ba lene ejahbe jio, kehm taame tv Jisos, tibre mmonankal noo bungu re, “Á tong-m nsol kpee nyi m ma l'lim.” 40 Eji aneb Samaria bao ba goji Jisos, bo gboong-e re, á lub song kang a bo. Owo Jisos kehm song kang a bo nfung ebal. 41 Ane gbalee kpe taame budu, tib go ege alum nya á bungu no. 42 Bo kehm tongo mmonankal noo re, “Wahr ebtaame anv. Lohngem re, wahr ebtaame tib eji a tong-r no. Wahr ebtaame, tibre wahrfono antahng ebwuk. Wahr eblohko kahn go etingitingi re, ye wo li nt'tahre no njini.” 43 Jisos kange kan nfung ebal o me, á kehm tahme go Galili. 44 Tibre Jisos jo yiimi ntianse antahng antahng re, “Nnyehnamahr Esowo kpehme lub go ege ejahbe.” 45 Eji Jisos ba no, ba rehng go Galili, aneb Galili jo vvr-e sehng, tib eji bo nyehne akpokosi nya á limi no go Jerusalem ngare elkak. Tibre bofono t'tob je elkak nio. 46 Á kehm feere tahm go Kena ji Galili, ejahbe jio ji á ko alahb lim, siingi amahm. Ntubesi ejahbe awohng jolo go Kapenium, no mmon ewe jo yam. 47 Á wuku kan re, Jisos eblohng go Judea ba go Galili, á kehm bake goji Jisos, ba gboong-e re, á je go Kapenium, song lim mmon ewe, á nob. Tibre mmon ewe nong go emel elkv. 48 Owo Jisos kehm-e tongo re, “Tohko tiki jol re, ń nyehne akpokosi, ń kpehme tiki taame.” 49 Ntubesi ejahbe noo kehm-e tongo re, “Nsoo, ba wahr tahm, mmon ewame yahke kpo.” 50 Jisos kehm-e faange re, “Song, mmon ewa bahke kpini!” Nne noo kehm soro taame tv alum nya Jisos bungu no tong-e, kehm soro tahm eje. 51 Eji á jo kehnge, alokeltum ebe kehm ba wan-e go mbang, kehm-e tongo re, “Mmon ewa kpeke li go elkpin.” 52 Á kehm bahbe bo ngare nyi mmon ewe kehme elnobo. Bo kehm-e tongo re, “Nyaane ngare efin nkaranka anyehng, owo á nobo arumbum nyao.” 53 Nde mmon kehm soro buumu tvtv re, ngare nyio nyi Jisos tong-e re, “Mmon ewa bahke kpini.” Yefono antahng kehm taame tv-e, a ane ba lene go ege a nlaaga kpee. 54 Etoono nkpokosi nyi a, nyi Jisos kpe lim ngare nyio nyi á longo go Judea, feere go Galili.
1 Eji nsol nyio ma sehng kpee, owo Jisos kehm tahme go Jerusalem. Tibre ngare nyio jolo ngare elkak ni Jus. 2 Go Jerusalem, go eti mbu jio ji bo jo lung re, Eti Mbu Ejoro, owo eto jolo no, ji bo si nkpatahk elon sennge kak. Eto jio bo jo lungu go alum Hibru re Betsata. 3 Ona wo ellong ane gbalee noongo no, jo yam, awakamahr, abanne, a aneb ayam bandiki. (Bo jo baabe re alahb gbehke. 4 Tibre ngare nyimongo enjel nyi Ntul Esowo jo ba yel alahb mao, jo gbehke alahb. Nne eyam awohng awohng no l'fere gbo mbang song yel go alahb, eji kp'gbehke, ye wo bahke nobo eyam ebe, afi á bele elkohn eyam abehng abehng.) 5 Nne awohng jolo noa, no eyam ebe ma kang eltahl a nnya elku a nnya era. 6 Eji Jisos nyehn-e no, fere kahn re, yebnoongo ona edi jio ekidi eblab, á kehm-e bahbe re, “Anv, a kp'sebe re wo noba?” 7 Nne eyam noo kehm-e faange re, “Ee nsoo, wo, nnene n kpimm, no bahk-m rodo kak go eto jia, eji alahb ma kehme elgbehke. N l'tahm re me n song yel, nne noko go tohko gbo mbang ka-m.” 8 Jisos kehm-e tongo re, “Tahm, wo rod ekpa eja, jen song!” 9 Tvtv ona nne noa kehm soro nob eyam ebe, kehm rodo ekpa eje, kehme eljene. Efung bio jolo efung Esabat. 10 Aneb Jus kehm tongo nne noo no ma nob eyam ebe re, “Lela efung Esabat bi. Nobem re wo sol ekpa eja.” 11 Nne noo kehm faange bo re, “Nne no lim-m no, n nob, ye wo tong-m re, ‘Rod ekpa eja, wo jen song!’ ” 12 Bo kehm-e bahbe re, “Nne awo tong-a tong re, wo rod ekpa eja, jen song?” 13 Nne noo no nobo eyam ebe kahnem nne no lim-e lim, á nob. Tibre Jisos t'tahm, eji ellong ane kame no ba rur o. 14 Eji ma ji ntiil, Jisos kehm song nyehn-e go etahk Esowo, kehm-e tongo re, “Nyehnee, anv wobnob. Ka kpe lim abiafem, eji ejum ji sabe sehnge jia l'ki-a kpe lim.” 15 Nne noo kehm tahme song tong Jus re, Jisos wo lim-e no, á nob. 16 Owo wahng ka Jus kehm kehme Jisos gbak, tib eji á limi nne nob efung Esabat. 17 Jisos kehm faange bo re, “Nsoo kpi nlimi nlimi eltum. Me fvfo, n kp'tob lim eltum.” 18 Jia ji wahnge aneb Jus kpe bel erakatahng gbalee tob-e, fere jo seb mbang ana nyi bo bahk-e wulu. Tibre bo jo bungu re, Jisos, ntahm Esabat nyi nyi sang á soodo no, á kpe bung re, Esowo, Nde no we wo, ji lohngo re, á kp'rodo elne bum jang jang a Esowo. 19 Jisos kehm tongo bo re, “Etingitingi, n kp'bungu tong-n re, Mmon nehm ma lim ejumjum go ege a ngang antahng, sehngem ji á l'nyehn Nde kp'limi, ji ji á kpo tob lim. Ajehng ajehng ji Nde l'lim, j'nehm ji Mmon kpo tob lim. 20 Tibre Nde, Mmon ewe kp-e koro sehng, owo wahnge á kp-e tibi nsol kpee nyi yefono antahng kp'limi. Á bahk-e tibi nsol nyi gbale sehnge nyia a, eji l'jo kpo-n esi. 21 Ana Nde kpo nyahme ane go elkv, bo fere bel elkpin, ano wo fvfo Mmon bahke tob ka nne awohng awohng elkpin, no kor-e no. 22 Nsoo kpehme lam nne awohng awohng. Yebfaake elam eje kpee ka Mmon ewe re 23 eji nne awohng awohng l'kak Mmon ewe, jang jang ana bo kpo kak Nde. Nne no tohko kak Mmon ewe, lohngo re, á nehme kak Nde no tum-e no. 24 “Etingitingi, n kp'bungu tong-n re, Nne awohng awohng no l'wuk alum enyame, fere taame tv nne no tum-m no, á kpi elkpin ni li go njinanjini. Bo we nehm kpe lam. Yebsehng elkv sa rehng go elkpin. 25 Etingitingi, n kp'bungu tong-n re, Ngare kp'bake, ngare ny'nehm nyi ma rehng a, nyi akvne bahke wuku alum nya Mmon Esowo. Bao ba l'wuk, bo bahke jolo go elkpin. 26 “Ana Nsoo kpi nsahm antahng nyi á kpo ko, ka elkpin, ano wo fvfo á ma tob lim Mmon ewe re, á tob bel nsahm nyi á bahke tob jo ka elkpin. 27 Á m-e ka nsahm nyi á bahke jo lam alam. Tibre ye wo li Mmon no nne. 28 Nong, ki-n kpe kpo esi mbol mbol. Tibre ngare bahke bake nyi akvne kpee nya wob go alahm bahke wuku alum enye. 29 Bo bahke nyahme lohng go alahm. Bao ba limi nob nob bahke nyahme, jol go elkpin. Bao ba limi ab'bi bahke nyahme, ba yiimi go eti elam. 30 “N nehm ma lim ejumjum go egame eko. Ana n kpo wuk goji Esowo, ano wo n kpo lam. Elam ejame li go etingitingi. Tibre n nehme lim mbang ny'nyame. N kp'limi mbang nyi nne no tum-m no. 31 N l'yiimi ntianse ka elname antahng, ntianse enyame nehm lub. 32 Nne noko noa, no kp'yiimi ntianse ka-m. N kp'kahne re, ntianse nyi á kp'yiimi ka-m, lohko li go etingitingi. 33 Ń tumu ane tv Jon ji jo yiimi ntianse ka etingitingi jia. 34 Jol nnene n sebem re á yiimi ntianse ka-m. M bungu jia, eji wahn l'bel eltahre. 35 Jon jolo ana et'rekahng ji jo lul, fere jo y'ya. Jo kor-n re wahn jo bel eyebatahng mmongare ntiil tib go ege ellennge. 36 “Ntianse nyi me n kpi no, gbale sehnge nyi Jon. Tibre akpokosi nyao nya Nsoo ma-m ka re me n lim, eltum n'nehm ni n kp'limi a, ni ni kp'yiimi ntianse ka-m re, Nsoo wo tum-m no. 37 Nsoo no tum-m no wo yiimi ntianse antahng antahng ka-m. Ellum ene wahn ka wuk a wuk, jol esamahr ebe ń ka nyehn a nyehn. 38 Ellum ene go egahne atahng wobem. Tibre ń nehme taame tv nne no á tum-e no. 39 Ń kpo kpili nwer Esowo, tibre ń kpo tir re, ona wo ḿ bahke bele elkpin ni li go njinanjini. Nwer Esowo nyio nyi kp'yiimi ntianse ka me. 40 “Wahn nehme kor elbake go egame, eji ń l'bel elkpin. 41 “N kpehme ko ellub goji ane. 42 Tibre n kp'sahb k'kahn re, ekor ji Esowo wobem go egahne atahng. 43 M ba go mbing nyi Nsoo. Me ń nehme ko. Nne nondiki l'fere ba go ege a mbing, ye wo ḿ bahk-e koko. 44 Bahke limi renan, ń kehm taame tv Esowo, eji ń kpo ko ellub goji ane? Esowo bi li na abehng, ellub ene ń kpehme seb. 45 “Kana tir re, m bahk-n kake ebi go esamahr Nsoo. Moses wo bahk-n kake ebi, ye jio ji ń kp'kunu ekpu go ege. 46 “Li re ń kp'taame tv Moses, kehn ń kp'tob taame tv-m. Tibre Moses ny'nyon bada name. 47 Eji ń kil eltaame tv alum enye nya á nyono no, bahke limi renan, ń kehm taame tv alum enyame?”
1 Owo Jisos kehm tahme go egbuk eto jehko ji Galili, ji bo jo tob lung re eto ji Taibirias. 2 Ellong ane gbalee kehm-e toono, tibre bo jo nyehne akpokosi nya á jo lim aneb ayam, bo nob. 3 Jisos kehm wahre go ewong, song ji a abat'toono ebe. 4 Ngare nyio elkak Pasova ni Jus ebkabbe. 5 Eji Jisos tabe esamahr ebe wahre, nyehn ellong ane bao kp'bake, á kehm bahbe Filip re, “E bahke limi renan, kehm gunu abred nya ane bao kpee bahke lehke?” 6 Á bungu ellum nia re á wuung-e. Tibre yefono antahng jo k'kahn kpee ji á bahke limi. 7 Filip kehm-e faange re, “Mpon eltahl, e l'ko gunu abred, jol nehm tohko b'biingi bo, afi nne awohng awong jo li ntiil.” 8 Nt'toono ewe awohng no bo jo lung-e re Andru ji mmonannyehn a Saimon Pita, kehm-e tongo re, 9 “Mmonse awohng li ana, no kpi ebred na eblon, a abon nsahre na abal. Anv, nyaa a, tohko l'li jen, ka ellong ane ana nia?” 10 Jisos kehm tongo bo re, “Tongen ane bao, bo ji ndi.” Tibre ajele jolo gbalee edi jio. Owo ane bao kehm jehke ndi. Bo jolo ejum aneblum atahltahl nkpel ewubbal atahl awubu (5 ,000 ). 11 Jisos kehm rodo abred nyao, kak Esowo saam, kehm bake ane bao ba ji go ndi. Ano wo fvfo á tob lim go abon nsahre bao. Nne awohng awohng li ana kor-e no. 12 Eji bo ma wohngo ane kpee, Jisos kehm tongo abat'toono ebe re, “Taaren bo erik ji ma sa, eji ejum ajehng ajehng l'k'rannge mbol mbol.” 13 Ebred eblon bi ane bao li no, bo kehm song taare erik ji sa no, ruru ewubu ejeere na ebbal. 14 Ane bao nyehne kan nkpokosi nyi Jisos ma lim, bo kehm kehme elbungu re, “A wo lohko li nnyehnamahr Esowo no e jo wuk re, á bahke bake go njini.” 15 Eji Jisos sebe kahn re, bo yahke ba, ba bob-e etul go nsahm, á kehm tahme bo sa, tahm go ewong ntahngtahng. 16 Eji elgung ba no, abat'toono ebe kehm tahme go nkpe eto, 17 kehm song yel go egbang, kehm kehme elfingi re bo siiri eto jio rehng go Kapenium go egbuk jehko. Ngare nyio ejannge ebgbo. Jisos ka tiki ba, ba kpiri bo. 18 Alahb kehm kehme ebuku lim, tibre nfeb jo limi sehng. 19 Bo fingi kan ejum mmal era, fundiki mmal eni, bo kehm soro nyehn Jisos kp'jene go ero alahb, jo kabbe go bo egbang. Bo kehm kehme elfahle. 20 Jisos kehm tongo bo re, “Kana kpe fahl, me wo!” 21 Eltim yebe bo sehng. Bo kehm-e solo go egbang. Tvtv ona egbang kehm soro rehng egbuk eto jehko ji bo jo j'je. 22 Etoono efung behko, ellong ane ba sa go egbuk eto jehko kehm sebe kahn re, egbang abehng bi bi jolo o. Egbang bio, Jisos yelem. Abat'toono ebe ba, ba yel egbang bio tahm asongo bo bo. 23 Owo agbang nyandiki kehm lohngo go Taibirias ba edi ji bo li abred nyao ngare nyi Ntul a Jisos ma kak Esowo saam. 24 Eji ane bao sebe no kahn re, Jisos, a abat'toono ebe, ona bo limm, bo kehm kpe yel agbang tahm go Kapenium, song seb Jisos. 25 Eji bo nyehn-e no go egbuk eto jehko, bo kehm-e bahbe re, “Nt'tibi, ngare anyi a rehnge a?” 26 Jisos kehm faange bo re, “Etingitingi, n kp'bungu tong-n re, Elsebe ni ń kp-m sebe, me ń nehme seb tib eji ń nyehne akpokosi. Abred nya ń li wohngo, nya nya wahnge ń kp-m sebe. 27 Kana kpe nyennge, jo lim eltum ni ḿ bahke bele nsol alehke nyi bahke tane na. Jo noken mbang nyi ḿ bahke bele nsol alehke nyi bahke jolo go njinanjini, nyi Mmon no nne bahk-n kake. Tibre ye wo, Esowo Nsoo m-e kak elliingi nio ni nsahm enye.” 28 Bo kehm-e bahbe re, “Jen ji e bahke l'lim, kehm jo lim eltum ni Esowo?” 29 Jisos kehm faange bo re, “Eltum ni Esowo kp'sebe re wahn lim, li re, wahn taame tv nne no á tum-e no.” 30 Owo bo kehm-e bahbe re, “Elliingi ani a bahke tibi, ni e bahke nyehne, kehm taame tv-a? Nkpokosi anyi a bahke limi? 31 Babnso ejahre jo li nsol nyi bo kpo lung re mmanna go elka emahng, jang jang ana nwer Esowo bungu no re, ‘Á ka bo abred nya lohng go ejahbetul Esowo re bo li.’ ” 32 Jisos kehm tongo bo re, “Etingitingi, n kp'bungu tong-n re, Moses sang ka-n abred nya lohng go ejahbetul Esowo. Nsoo wo kp-n kake etingitingi ebred ji lohng go ejahbetul Esowo. 33 Tibre ebred ji Esowo li ebred ji lohng go ejahbetul Esowo, ba ka njini elkpin.” 34 Bo kehm-e tongo re, “Nsoo, jo ka-r ebred jio ngare anyehng anyehng!” 35 Jisos kehm tongo bo re, “Me wo li ebred ji elkpin. Nne no l'ba go egame, njal we nehm kpe yam. Nne no l'taame tv-m, ekor alahb bahk-e tane. 36 M ma-n tong re, ḿ ma-m nyehn, jol ń nehme tiki taame. 37 Nne awohng awohng no Nsoo ka-m ye, ye wo bahke bake go egame. Nne no l'ba go egame, we n nehm kam yake go. 38 Tibre n lohngo go ejahbetul Esowo ba re me m ba lim mbang nyi Nsoo no tum-m no. Mbang ny'nyame sang m ba ellimi. 39 Ejum ji ana, ji Nsoo no tum-m no tong-m re me n lim. Á tong-m re, me n k'wahng nne awohng awohng tan, no á ma-m ka. M bahke nyahme bo go elkv es'kohro efung. 40 A wo tob li ejum ji Nsoo kp'sebe re, nne awohng awohng no l'nyehn Mmon ewe fere taame, á bahke bele elkpin ni li go njinanjini. M bahk-e nyahme go es'kohro efung.” 41 Jus kehm kehme elmemme atemtem tob-e, tib eji á bungu re, “Me wo li ebred ji lohng go ejahbetul Esowo ba.” 42 Bo kehm bungu re, “Jisos sang aa, ji li mmon a Josef, ji e kp'kahne nde, a nnyehna? Jen ji wahnge á bahke kehm bungu re, á lohngo go ejahbetul Esowo ba?” 43 Jisos kehm faange bo re, “Kana kpe memme atemtem! 44 Nnene limm, no bahke ma ba go egame, tohko jol re Nsoo no tum-m no wo leeb-e. M bahk-e nyahme go elkv es'kohro efung. 45 Tibre abanyehnamahr Esowo nyono re, ‘Esowo bahke bo tib, bo ane kpee.’ Nne awohng awohng no ma wuk, fere kpili goji Nsoo, á bahke bake go egame. 46 “Jia lohngem re, nne awohng awohng ebnyehn Nsoo, sehngem nne no lohng goji Esowo Nsoo ba, ye wo ma nyehn Nsoo. 47 Etingitingi, n kp'bungu tong-n re, Nne no l'taame, á kpi elkpin ni li go njinanjini. 48 Me wo li ebred ji elkpin. 49 Babnso ejahne jo li mmanna go elka emahng. Bobkpo kpee. 50 “A wo li ebred ji lohng go ejahbetul Esowo ba, ji nne l'li, á l'k'kpo. 51 Me wo li ebred ji elkpin, ji lohng go ejahbetul Esowo ba. Nne awohng awohng no l'li ebred jia, á bahke bele elkpin ni li go njinanjini. Ebred ji m bahke kake njini re bo bel elkpin, ngubjing enyame nyi.” 52 Jus kehm kehme nfaabe lim atemtem re, “Bahke limi renan, nne noa kehm-r kake ngubjing enye, wahr li?” 53 Owo Jisos kehm tongo bo re, “Etingitingi, n kp'bungu tong-n re, Tohko tiki jol re, ń li ngubjing nyi Mmon no nne, fere wo alung eme, ń nehm tiki bel elkpin go egahne atahng. 54 Nne no kpo li ngubjing enyame, fere jo wo alung emame, á kpi elkpin ni li go njinanjini. M bahk-e nyahme go elkv es'kohro efung. 55 Tibre ngubjing enyame lohko li etingitingi ejum alehke. Alung emame tob li etingitingi ejum elwoko. 56 Nne no l'li ngubjing enyame, fere jo wo alung emame, á wob-m go eltim, me n tob wob-e go eltim. 57 Nsoo no li go elkpin wo tum-m. Esi eje ji wahnge n tob li go elkpin. Nne no l'li ngubjing enyame, á bahke tob jol go elkpin tib go egame esi. 58 A wo li ebred ji lohng go ejahbetul Esowo ba. Limm ana elkohn ni babnso ejahne li no, fere kpo. Nne no l'li ebred jia, á bahke jolo go njinanjini.” 59 Jisos jo bungu alum nyaa, eji á jo tib go etahk ero ji jolo go Kapenium. 60 Egom abat'toono Jisos gbalee, eji bo wuku alum nyao, bo kehm bungu re, “Alum nyao kp'riidi sehng. Nne awo bahke ma wuungu atung go nsol nyio?” 61 Eji Jisos sebe kahn re, abat'toono ebe kp'memme bade alum nyao, owo á kehm bahbe bo re, “Anv, alum nya m bungu a, ma-n saba? 62 Ḿ bahke bungu renan, ń l'nyehn Mmon no nne kp'feere go ero edi ji á tohko jol? 63 Etohko ji kpo ka elkpin, ngubjing o mbol mbol wo. Alum nya m ma bung tong-n li etohko etohko, a elkpin. 64 Egom ejahne jindiki jia, ji kil eltaame.” Jisos bungu ellum nia a, tibre á jo kahne kpee mboma mbomo. Á jo kahne egom ji l'k'taame, fere kahn nne no bahk-e gungu. 65 Á kehm bungu re, “Owo wahnge n tong-n no re, Nnene limm, no bahke ma ba go egame, sehngem re no, Nsoo wo limi mbang ka-e.” 66 Tib go alum nyao, egom abat'toono ebe gbalee kehm soro yaam-e sa, tahm ebo. Bo we kpeem jo tiki toono. 67 Jisos kehm bahbe abat'toono ebe, ewubu ane abal re, “Wahn fvfo, ḿ bahke tob yaam-m saa?” 68 Saimon Pita kehm-e faange re, “Ntul, eji nyehne wo, e bahke jeke? Wo wo kpi alum nyao nya elkpin ni li go njinanjini. 69 Wahr ebtaame, fere kahn re, wo wo li Mbarebara nne no Esowo.” 70 Jisos kehm faange re, “Wahn sang n jak-n no yehka, wahn ewubu ane abala? Nne awohng go egahne ellong, nnehm nyi.” 71 Á bungu bade Judas ji mmon a Saimon Iskariot, ji woomo go ellong ane ebe, ewubu ane abal. Tibre ye wo jolo nne no bahk-e gungu.
1 Eji nyao kpee ma mal, Jisos kehm tahme, jo yannge go Galili. Á joom yannge go Judea, tibre Jus jo sebe re bo wul-e. 2 Ngare nyio ona elkak ni Jus jo si nkpatahk jo woomo, ebkabbe. 3 Owo abonanyehn Jisos kehm-e tongo re, “Tahm, wo song go Judea, eji abat'toono eba l'nyehn akpokosi nya a kp'limi me! 4 Nnene limm, no kpo behr nsol nyi á kp'limi, eji á kp'sebe re nne awohng awohng kahn-e. A l'kehme nsol enya lim, jo tib elna go njini.” 5 Jol abonanyehn fvfo joom taame tv-e. 6 Jisos kehm faange bo re, “Ngare enyame ka biingi. Ngare ny'nyahne li ngare anyehng anyehng. 7 Njini nyia, ekv bo wahn nehme ko, me wo, bo kp-m koko ekv, tibre n kpo tong bo re, mbang nyi bo kp'toono nobem. 8 Songen go elkak nio wahn wahn. Me n nehme tahm elkak anv, tibre ngare enyame ka biingi.” 9 Á bungu kan ano me, á kehm sake eje go Galili. 10 Ngare nyi abonanyehn ma tahm go elkak, á kehm tob tahm fvfo. Á joom jen gbul gbul gbuul, á jo jene mbehr mbehr. 11 Jus jo seb-e go elkak nio, fere jo bahb re, “Ye nona?” 12 Ellong ane bao jo bungu aw'wa bada ne. Bandiki jo bungu re, “Á li nnooba nne.” Bandiki re, “E'ee, á kp'nehme na ane.” 13 Tib eji bo jo fahl Jus, nnene jolem, no jo bung gbul gbul gbuul bada ne. 14 Elkak nio kpo kang nfung enehkeni. Elka elka ene wo, Jisos tahme go etahk Esowo, song kehme eltibi. 15 Kehm kpoko Jus esi, bo kehm kehme elbungu re, “Jen ji wahnge nne noa kp'kahne elkahne ana nia, jol eji á ki j'je nwer?” 16 Jisos kehm faange bo re, “Eltibi ename ni n kp'tibi a, n'name sang, ni Esowo bi tum-m no ni. 17 Nne awohng awohng no kp'sebe re, á lim mbang nyi Esowo, á bahke kahne, joare eltibi ename ni n kp'tibi lohko lohng goji Esowo, afi n kpo bung go egama nsahm. 18 Nne no kpo bung go ege a nsahm, á kpo seb ellub n'ne. Nne no kp'sebe ellub ni nne no tum-e no, á lohko li go etingitingi, eb'bi ajehng ajehng á kpimm. 19 Moses sang ka-n atahma? Nne ewahne awohng awohng limm, no kp'bumu atahm nyao. Jen ji wahnge ń kp'sebe re wahn wul-m?” 20 Ane bao kehm faange re, “A kpi ebi etohko go ega atahng. Nne awo kp's'seb re á wul-a?” 21 Jisos kehm faange bo re, “N limi nkpokosi anyehng ana ny'nyehng, jo kpo-n esi, wahn ane kpee. 22 Moses tong-n re, wahn jo yehke abon ebahne nrur. (Lohngem re, Moses wo ko nrur ayehke ba a nyi, lohng goji babnso ejahre.) Wahn kpo yehke mmon nrur efung Esabat. 23 Bo l'yehke mmon nrur efung Esabat, eji atahm nya Moses l'k'range, jen ji wahnge l'lun ntim enyahne kp-n rake tob-m, tib eji n limi nne eyam nob kpee go ege a ngubjing efung Esabat? 24 Kana jo lam alam ane ana ń kp'nyehne esamahr ebo. Jo lamen elam ji nno!” 25 Aneb Jerusalem bandiki kehm bungu re, “Nne noa sang bo kp'sebe re bo wul-ea? 26 Ye sang ana, kp'bungu gbul gbul gbuula? Jol nnene nehme bung ejumjum tob-e. Ma atubesi ebahre eblohko kahn re, ye Mesaya wo nji. 27 Wahr kp'kahne edi ji nne noa lohng no. Mesaya l'ba, nnene limm, no bahke kahne edi ji á bahke lohngo ba.” 28 Eji Jisos jo tib go etahk Esowo, á kehm jo bung wahre wahre re, “Ń kp-m kahne, ń kp'tob kahn edi ji n lohng no ba. M baam antahng a. Nne no tum-m no li go etingitingi. Wahn, we ń nehme kahn. 29 N kp-e kahne, tibre n lohng go ege ba. Ye wo tum-m no.” 30 Owo bo kehm gare re bo bob Jisos, jol nnene jolem, no lak-e abo. Tibre ngare enye ka biingi. 31 Ane gbalee jolo go ellong nio ba taame tv Jisos. Bo jo bungu re, “Anv, Mesaya l'ba, á bahke limi akpokosi sehnge ana nya nne noa ma lima?” 32 Bab Farisi kehm wuku ana ellong ane bao jo bung aw'wa bada Jisos. Owo atubesi abalimajom, a Bab Farisi kehm tumu alokeltum ebo re bo song bob Jisos. 33 Jisos kehm bungu re, “M bahke kpe jol a nahne ana mmongare ntiil, kehm tahme goji nne no tum-m no. 34 Ḿ bahk-m sebe, me ń nehm kpe nyehn. Edi ji m bahke jeke, ń nehm ma ba.” 35 Jus kehm kehme elbahbe atemtem re, “Gan wo nne noa kp'bungu re, á yahke tahm, eji e l'ki-e kpe nyehn? Anv, á yahke tahm goji Jus ji lene go ajahbe Grika, fere song tib aneb Grika? 36 Anv, jio ona lohngo renan, ji á kp'bungu re, ‘Ḿ bahk-m sebe, me ń nehm kpe nyehn. Edi ji m bahke jolo, ń nehm ma ba?’ ” 37 Es'kohro efung bi elkak nio, bi bi jolo egburu efung. Owo Jisos kehm mehle yiimi, kehm bungu wahre wahre re, “Nne awohng awohng no alahb l'kor-e, nong á ba ga egame, ba wo! 38 Ana wo nwer Esowo bungu no re, ‘Nne awohng awohng no l'taame tv-m, aya ma elkpin bahke kehme elfabe go ege eltim lohng.’ ” 39 Jisos bungu ellum nia bade etohko ji ane ba l'taame tv-e bahke bele. Tibre ngare nyio etohko ji Esowo ka ba, eji Jisos kala nyahme go elkv song ji go ege ellub. 40 Eji ane bao wuku alum nyao, egom jindiki kehm bungu re, “Nne noa ana lohko li nnyehnamahr Esowo noo.” 41 Egom jindiki jo bungu re, “Nne noa ana, Kraist wo.” Egom jindiki jo bahbe re, “Anv, Kraist bahke lohngo go Galilia? 42 Nwer Esowo bungu re, ‘Kraist bahke lohngo go et'tohngo ji Devid. Bo bahk-e jele go Betlehem, ejahbe ji Devid.’ ” 43 Owo ane bao kehm kehme elyabe tib go ege esi. 44 Egom jindiki jo sebe re bo bob-e, jol nnene jolem, no lak-e abo. 45 Alokeltum bao kehm feere ebo, tahm goji Bab Farisi, a atubesi abalimajom. Bo kehm bahbe bo re, “Jen ji wahnge ń ki-e bob, ba a ne?” 46 Alokeltum bao kehm faange re, “Nnene limm, no kpo bung ana nne noo.” 47 Bab Farisi kehm bahbe bo re, “Anv, wahn fvfo, á kp-n tob nehma? 48 Wahn ebtiki nyehn ntubesi awohng awohng, a nne a Farisi no ma tiki taame tv-ea? 49 Ellong ane bao nehme kahn atahm nya Moses. Owo wahng ka erakatahng ji Esowo li a bo.” 50 Nekodimos ji ma tohko je goji Jisos, ji woomo go ellong Farisis kehm bungu re, 51 “Atahm enyahre bungu re, wahr k'jo lam na lam nne, eji e kala wuk, fere seb kahn ji á limi no.” 52 Bo kehm faange re, “Anv, wo tob lohng go Galili fvfoa? Lung nwer Esowo, a bahke kahne re, nnyehnamahr awohng awohng limm, no bahke lohngo go Galili.” 53 Ane kpee kehm yaame kehnge.
1 Jisos kehm tahme go ewong ji bo kpo lung re Oliv. 2 Efungfu atv atv á kehm kpe feere ba go etahk Esowo. Ane kpee kehm kame ba rur senng-e kak. Á kehm jehke, jo tib bo. 3 Bab Farisi, a at'tibi ba atahm kehm koko mmonankal awohng ba a ne, no bo bob-e no, eji á jo lim erehbe, ko-e song yiimi go esamahr ane kpee. 4 Bo kehm tongo Jisos re, “Nt'tibi, mmonankal noa, e m-e bob, eji á jo lim erehbe. 5 Go egahre atahm, Moses tong-r re, elkohn nnenkal noo, wahr jo wul-e na go atal atal. Anv, a bahke bungu renan bada ne?” 6 Alum nyao, bo bungu, eji bo l'gar-e. Bo jo sebe re, bo bel ejum ji bo bahk-e ebi ka. Jisos kehm soro kabe, jo tennge ebnyohkobo go ndi. 7 Eji bo soro asi, jo bahb-e abahbe, Jisos kehm mehle yiimi, kehm tongo bo re, “Nong, nne awohng awohng go egahne ellong no kala l'lim ab'bi, gbo mbang rod eltal tub-e.” 8 Jisos kehm kpe kabe, kpe kehme ebnyohkobo tennge go ndi. 9 Eji bo wuku ano, bo kehm kehme elyaame, go nne awohng awohng, nnenkul abo wo gbo mbang. Jisos sa ntahngtahng, a nnenkal noo no yiimi o. 10 Jisos kehm tabe esamahr ebe, kehm-e tongo re, “Nnenkal, ane bako bana? Nnene limm, no kp-a kpeke ka ebia?” 11 Á kehm faange re, “Ntul, nnene me kpeem ka ebi.” Jisos kehm-e tongo re, “Jol me, wa n nehm tob ka ebi. Song, ka kpe lim ab'bi.” 12 Jisos kehm kpe kehme elbungu a bo re, “Me wo li ellennge ni njini. Nne awohng awohng no l'toon-m, á nehm kpe jen go ejannge, á bahke bele ellennge ni elkpin.” 13 Bab Farisi kehm-e tongo re, “Eji a kp'yiimi ntianse ka elna antahng, ntianse enya limm go etingitingi.” 14 Jisos kehm faange bo re, “Jol afi n kp'yiimi ntianse ka elname antahng, ntianse enyame lohko li go etingitingi. Tibre n kp'kahne edi ji n lohng no ba, fere kahn edi ji n fi no. Wahn nehme kahn edi ji n lohng no ba, jol ń nehme tob kahn edi ji n fi no. 15 Ń kpo lam alam ana ane kpo lam, wo, me n kpehme lam nnene. 16 Li re n kp'lame ane, kehn elam ejame li go etingitingi. Tibre me ntahngtahng sang kpo lam. E kpo lam awahr a Nsoo no tum-m no. 17 Bo ny'nyon go egahne atahm re, ane abal l'yiimi ntianse, bung nnyo amehng, lohngo re, alum nya bo bungu no lohko li etingitingi. 18 N kpo yiimi ntianse ka elname antahng. Nsoo no tum-m no kpo tob yiimi ntianse ka-m fvfo.” 19 Owo bo kehm-e bahbe re, “Nsoo li gan?” Jisos kehm faange bo re, “M-e ń nehme kahnem. Nsoo, w-e ń nehme tob kahn. Li re ń kp-m kahne, kehn wahn ebtob kahn Nsoo fvfo.” 20 Jisos jo bungu alum nyaa, eji á jo tib go etahk Esowo, edi ji bo kpo kuuru akpohko. Nnene jolem, no bob-e no, tibre ngare enye ka rehng. 21 Jisos kehm kpe tong bo re, “M bahke tahme, ḿ bahk-m sebe. Ngare nyio wo ḿ bahke kpoko go egahne abiafem. Edi ji n fi no, ń nehm ma ba.” 22 Jus kehm bahbe re, “Anv, á bahke wulu na elnea, tib eji á kp'bungu re, edi ji á fi no, wahr nehm ma jea?” 23 Jisos kehm tongo bo re, “Wahn lohng go njini nyia. Me n lohng go ero ba. Wahn li ka njini nyia. Me n limm ka njini nyia. 24 M ma-n tong re, ḿ bahke kpoko go egahne abiafem. Tohko tiki jol re, ń taame na tv re, me nne noo wo, ḿ bahke kpoko go egahne abiafem.” 25 Bo kehm-e bahbe re, “Wo nne awo?” Jisos kehm faange bo re, “Li ana m ma-n tohko tong mboma mbomo. 26 N kpi nsol gbalee nyi m bahke bungu bada nahne, fere lam-n. Nne no tum-m no li go etingitingi. Ajehng ajehng ji n wuku go ege, ji ji n kp'lennge ka njini nyia.” 27 Tikem lennge bo re, Jisos jo bungu bada Nde. 28 Owo Jisos kehm bungu tong bo re, “Ngare nyi ḿ ma rod Mmon no nne, kum go ejangnti, rod jahm, owo ḿ bahke kahne re, me nne noo wo, fere kahn re ejumjum limm, ji n kpo lim go egame eko. N kpo bung ana Nsoo tong-m no. 29 Nsoo no tum-m no li a name. Me á ka tahm sa. Tibre n kpo lim ji kpo kor-e ngare anyehng anyehng.” 30 Eji Jisos bungu alum nyaa, ane gbalee t'taame tv-e. 31 Jisos kehm bungu tong aneb Jus ba ma taame tv-e re, “Ń l'soro asi ana, jo toono alum enyame, ḿ bahke lohko jol atingitingi abat'toono ebame. 32 Ḿ bahke kahne etingitingi. Etingitingi bahk-n limi, ń for.” 33 Bo kehm-e faange re, “Wahr lohng go et'tohngo ji Ebraham. E ka jol a jol aju ka nne awohng awohng. Jen ji wahnge a kehm bungu re, bo bahk-r limi, e for?” 34 Jisos kehm faange bo re, “Etingitingi, n kp'bungu tong-n re, Nne awohng awohng no l'lim abiafem, á li nju ka abiafem. 35 Nju kpehme jol etahk nde ngare kpe kpe. Mmon a nde nne wo kpo jol etahk nde ngare kpe kpe. 36 Mmon no Esowo l'lim-n re wahn for, wahn eblohko for go etingitingi. 37 N kp'kahne re, wahn lohng go et'tohngo ji Ebraham, gana ń kp'sebe re wahn wul-m. Tibre ń nehme ko alum enyame nya n kp-n tibi, kak go egahna ntim. 38 N kpo bung jio ji n nyehne goji Nsoo. Wahn kpo lim ji ń wuku goji nso ejahne.” 39 Bo kehm-e faange re, “Ebraham wo li nso ejahre.” Jisos kehm bungu tong bo re, “Li re ń li abon ba Ebraham, kehn ń kp'limi ji Ebraham limi no. 40 Anv a, ń kp'sebe re wahn wul-m, me ji li nne no kp-n tongo etingitingi ji n wuku goji Esowo. Nsol ana nyia Ebraham joom lim. 41 Ń kpo lim nsol nyi nso ejahne limi no.” Bo kehm-e faange re, “Wahr limm abon ba ki nyi babnde. Wahr kpi nde na awohng no li Esowo.” 42 Jisos kehm tongo bo re, “Li re Esowo nso ejahne wo, kehn n kp-n koro. Tibre n lohngo goji Esowo ba. Ye wo tum-m no. M baam go egama ngang antahng. 43 Jen ji wahnge alum nya n kp'bungu kil-n ellennge? Tibre wahn nehme kor re, wahn wuungu atung go egame alum. 44 Wahn li abon ba nnehm nyi nso ejahne. Ń kp'sebe re wahn toono mbang nyi nso ejahne. Á jolo nwulane go mboma mbomo. Ye, a etingitingi, bo kpehme koono. Etingitingi ajehng ajehng á kpimm. Á l'kim efahnge, á kp'limi ana eljini ene li no. Tibre ye nkimfahnge nyi. Afahnge kpee lohng go ege. 45 “N kpo tong-n etingitingi, owo wahng ka ń kil taame tv-m. 46 Nne awo go egahne ellong bahk-m tibi eb'bi ajehng ajehng ji m ma lim? N l'tong-n etingitingi, jen ji wahng ka ń kil taame tv-m? 47 Nne no lohng goji Esowo, ye wo kpo wuk alum nya Esowo. Ejum ji wahnge ń kil wuku alum Esowo, li re, ń limm ka Esowo.” 48 Jus kehm faange Jisos re, “Anv, e l'tong-a re, wo nne a Samaria wo, a kpi ebi etohko go ega atahng, etingitingi sang e kp'bunga?” 49 Jisos kehm faange bo re, “Me, ebi etohko ajehng ajehng n kpimm go egame atahng. Esowo bi li Nsoo. Ye wo n kpo kak-e. Wahn, m-e nehme kak. 50 N nehme seb ellub n'name antahng. Nne noa go, no kp-m ellub ka. Ye wo li nl'lame. 51 Etingitingi, n kp'bungu tong-n re, Nne awohng awohng no l'bum alum enyame, á nehm kpe tiki kpo.” 52 Jus kehm-e tongo re, “Anv, wahr eblohko kahn re, a kpi ebi etohko go ega atahng. Tibre Ebraham kp'kpo, ano wo fvfo abanyehnamahr Esowo tob kpo, gana a kp-r fere tong re, nne no l'bum alum enya, á nehm kpe tiki kpo. 53 Anv, wo wo ga gbal sehnge Ebraham, nso ejahre no ma kpoa? Abanyehnamahr Esowo fvfo t'tob kpo. Anv, a kp'tiri re, wo elkohn nne awo?” 54 Jisos kehm faange re, “N l'ka elname ellub antahng, ellub ename li mbol mbol. Nsoo wo kpo ka-m ellub, ye ji ń kp'tongo re, Esowo ebahne bi. 55 We ń ka tiki kahn. Me n kp-e kahne. N l'tong re, me, we n nehme kahn, n li nkimfahnga nne ana wahn. N kp-e kahne kpee, fere jo bum alum enye. 56 Ebraham, nso ejahne, eltim jo yeb-e sehng re, afung enyame kpir-e. Á ny'nyehn, fere bel eyebatahng.” 57 Jus kehm-e tongo re, “Jol nnya atahl abal a nnya ewubu a ka kang, gana a kp'bungu re, wobnyehn Ebraham!” 58 Jisos kehm faange bo re, “Etingitingi, n kp'bungu tong-n re, Re Ebraham kehm jini, me n noa.” 59 Owo bo kehm fohko atal re bo tuub-e. Jisos kehm beke, biiri eje etahk Esowo o, fere lohng eje tahm.
1 Eji Jisos jo sehng go mbang, á kehm nyehne nne no bo jel-e nwakamahr. 2 Abat'toono ebe kehm-e bahbe re, “Nt'tibi, ye wo limi abiafema, afi nde abola nnyehn ba limi abiafem, ji wahng ka bo kehm-e jele ano?” 3 Jisos kehm faange bo re “Lohngem re abiafem nya nne noa nya, jol nya nde, a nnyehn sang. Jia li, eji ane l'nyehn nkpokosi nyi Esowo bahke limi go ege elkpin. 4 E bahke tiki jo lim eltum ni nne no tum-m no, eji njul kpeke li. Tibre atv bahke behde, ma nnene l'k'kpe ma lim eltum. 5 Me wo li ellennge ni njini, eji n kpeke li go njini.” 6 Á bungu kan ano me, á kehm soro so atel wohngo ndi, nyob ndi, roongo nne noo go amahr, 7 kehm-e tongo re, “Song, wo song ru esamahr eba go eto ji Siloam!” (ji lohngo re “eltumu”). Nwakamahr nyio kehm soro tahm, song ru esamahr ebe, soro nyehn, kehm feere ba. 8 Aneb ebjing ebe, a ane ba jo nyehn-e, eji á jo ji, jo gboongo nsol, kehm kehme elbungu re, “Nne noa sang ana, no kpo kono eljehke, jo gboongo nsola?” 9 Egom jindiki jo bungu re, “Ye wo ana.” Egom jindiki re, “Ye sang, á kp-e foongo na.” Yefono antahng kehm kehme elbungu re, “Me wo ana.” 10 Bo kehme bahbe re, “Anv, á limi renan, amahr enya kehm lennge?” 11 Á kehm faange re, “Nne no bo kpo lung-e re Jisos, ye wo nyobo ndi, roong-m go amahr, kehm-m tongo re, ‘Song go eto ji Siloam, wo song ru esamahr!’ Owo n kehm lohko tahm, song ru esamahr, lohko nyehn.” 12 Bo kehm-e bahbe re, “Anv, nne noo li gan?” Á kehm faange re, “Me n nehme kahno!” 13 Bo kehm soro ko nne noo no tohko wa amahr, tahm a ne goji Bab Farisi. 14 Efung bi Jisos nyobo edob, fere lim nne noo amahr enye lennge, jolo efung Esabat. 15 Bab Farisi kehm-e kpe bahb ana limi lim, á kehm nyehne. Á kehm tongo bo re, “Á roong-m edob go amahr, n kehm song ru esamahr, soro nyehn.” 16 Egom Farisi jindiki kehm bungu re, “Nne no limi ejum jia, á lohngem goji Esowo, tibre á nehme bum ntahm nyi Esabat.” Egom jindiki jo bungu re, “Bahke jolo renan re, nne no li nne abiafem, kehm ma lim akpokosi ana nyaa?” Ane bao kehm kehme elyabe. 17 Owo bo kehm kpe bahb nwakamahr a nne noo no ma nyehn re, “Anv, a kpo bung renan bada ne, eji á ma-a lim amahr enya ma lennge, a ma nyehn?” Nne noo kehm faange re, “Nnyehnamahr wo.” 18 Jus tikem taame re, nne noo l'lohko wa amahr, á ma fere nyehn, tete bo lung nde, a nnyehn nne no ma nyehn, bo ba. 19 Bo kehm bahbe bo re, “Mmon ewahne wo aa, no ń kpo bung re, ń jel-e nwakamahra? Á limi renan, kehm nyehne?” 20 Nde, a nnyehn kehm faange re, “E kp'kahne re, mmon ewahre wo a, no e jel-e nwakamahr. 21 Ana á ma fere nyehn anv, e nehme kahn ana limi lim, á kehm nyehne. E nehme kahn nne no lenng-e amahr. Bahben ye, yebgbal, á bahke ma faange antahng.” 22 Nde, a nnyehn bungu alum nyaa, tibre bo jo fahle Jus. Tib Jus bungu bum nnyo amehng re, nne awohng awohng no l'si b'bung re, Jisos, Mesaya wo, bo bahk-e kame yehke go ero. 23 Esi jio ji wahng ka nde, a nnyehn tongo re, “Yebgbal, bahben ye!” 24 Bab Farisi kehm kpe lung nne noo no bo jel-e nwakamahr, kehm-e tongo re, “Ka Esowo ellub! E kp'kahne re, nne noo, nne abiafem wo.” 25 Á kehm faange re, “Ma nne noo nne abiafem wo nji. Me n nehme kahn. Ejum ajehng ji n kp'kahne, li re, n jolo nwakamahr, anv, me n nyehn.” 26 Bo kehm-e bahbe re, “Anv, á lim-a renan? Á limi renan, kehm lennge amahr enya?” 27 Á kehm faange bo re, “M ma-n tohko tong wuku wuku, ń wuungem atung. Jen ji wahnge ń kp'sebe re, me n kpe-n tong, wahn kpe wuk? Anv, ń kp'sebe re wahn tob jol abat'toono ebea?” 28 Bo kehm-e suku re, “Wo wo li nt'toono ewe, go, wahr abat'toono ba Moses ba. 29 E kp'kahne re, Esowo jo bungu a Moses. Nne noo, wahr nehme kahn edi ji á lohng no ba.” 30 Á kehm kpe faange re, “Anv, ejum jia nkpokosi sanga? Ń nehme kahn edi ji á lohng no, gana yeblennge amahr enyame. 31 E kp'kahne re, Esowo kpehme wuungu aneb abiafem atung. Nne awohng awohng no l'kak-e, fere lim mbang enye, ye wo Esowo kpo wuung-e atung. 32 Bomo go mbomannahb nyi njini bomo no tete rehng anv, nnene limm, no ma w'wuk re, nne noa, no ma l'lennge amahr nne no bo jel-e nwakamahr. 33 Li re nne noo lohngem goji Esowo, kehn á jolem ma lim ejumjum.” 34 Bo kehm-e faange re, “Bo jel-a go abiafem, a ejannge, anv, a kp'sebe re wo tib-ra?” Bo kehm soro kam-e yehke go ero bio. 35 Jisos kehm wuku re, bo m-e kam yehke go ero. Eji á song nyehn-e, á kehme bahbe re, “Wobtaame tv Mmon no nnea?” 36 Á kehm faange re, “Nsoo, nne awo m bahke taame tv-e?” 37 Jisos kehm bungu tong-e re, “A m-e nyehn. Ye wo ana, kp'bungu a na.” 38 Á kehm faange re, “Ntul, me n taame,” fere gbo jamm-e alahng. 39 Jisos kehm bungu re, “Esi elam jio ji wahnge m ba go njini nyia, eji ane ba kil elnyehne l'nyehn, eji ane bao ba kp'nyehne l'fere wa amahr.” 40 Egom Farisi jindiki ji jolo kohl-e, kehm wuku, bo kehm-e bahbe re, “Anv, wahr tob li awakamahra?” 41 Jisos kehm faange bo re, “Li re wahn ebwa amahr, kehn eb'bi ajehng ajehng a nahne limm. Anv, eji ń kp'tongo re, ‘E kp'nyehne,’ ebi jia, a nahne.”
1 Jisos kehm kpe tong bo re, “Etingitingi, n kp'bungu tong-n re, Nne awohng awohng no tohko yel go mbutahk mi etahk ejoro, á l'fere wahr edi jindiki yel, nne noo ona nwajv nyi. 2 Nne no l'yel go mbutahk, ye wo li mbaabebul. 3 Ye wo, nne no kpo baabe mbu bahke lennge ka-e, á yel. Ejoro ebe kpo wuk ellum ene. Á kpo lung ejoro ebe go bo abing, fere lohng a bo. 4 Á l'yehke bo kpee, á kpo fere gbo bo mbang, ejoro jo toon-e go njahm. Tibre bo kp'liingi ellum ene. 5 Njenne, bo we nehm toono. Bo bahk-e beke na, yaam-e sa. Tibre alum ajenne, bo nehme liingi.” 6 Eji Jisos tubu bo elgan nia, bo kahnem ejum ji á jo t'tong bo. 7 Jisos kehm kpe tong bo re, “Etingitingi, n kp'bungu tong-n re, “Me wo li mbutahk mi ejoro. 8 Egom jehko kpee ji gbo mbang ba ka me, awajv nya. Ejoro joom wuungu bo atung. 9 Me wo li mbutahk. Nne awohng awohng no l'yel go mbutahk mio, á bahke bele eltahre. Á bahke yele, fere lohng, song li efa. 10 Nwajv kpo ba re á ba v, fere wul, fere r'rannge. Me m ba re me m ba ka bo elkpin budu sahb gb'gbal. 11 “Me wo li nnooba mbaabebul, nnooba mbaabebul no bahke kake elkpin ene go esi ejoro ebe. 12 Nne no bo lak-e na, no ki li nfono ejoro, á l'nyehn ebi nnyam kp'bake, á bahke beke, ejoro bio sa. Ebi nnyam nyio bahke bake, ba bob ejoro bindiki, behko yaame ebo kpee. 13 Nne noo bahke beke, tibre bo lak-e na, á nehme tiiri ejoro bio. 14 “Me wo li nnooba mbaabebul. N kp'kahne ejoro b'bame, ejoro ebame kp-m tob kahn. 15 Ana Nsoo kp-m kahne, ano wo fvfo n kp'tob kahn Nsoo. Me n yake elkpin ename ka go esi ejoro ebame. 16 N kpi ejoro bindiki, bi ki wob go ellong nia. Bo fvfo, m bahke tob ko bo ba. Bo bahke wuku alum enyame, fere jol ellong anehng, a mbaabebul awohng. 17 Ana wo wahnge n kp'koro Nsoo, tibre me n yake elkpin ename ka, goji n l'fere kpe ko elkpin ename. 18 “Nnene limm, no bahke ma taare elkpin ename, sehngem re no, n ka na antahng. N kpi nsahm nyi m bahke yake elkpin ename ka, fere bel nsahm nyi m bahke fere ko elkpin ename. Tibre ano wo Nsoo tong-m re me n lim.” 19 Jus kehm kpe kehme elyabe, tib go alum nyao nya Jisos bungu no. 20 Egom Jus gbalee jo bungu re, “Á kpi ebi etohko go ege atahng. Yebgbo esahl. Jen ji wahnge ń kp-e wuungu atung?” 21 Egom jindiki jo bungu re, “A alum nya nne no kpi ebi etohko sang. Anv, ebi etohko bahke ma lennge nwakamahr amahra?” 22 Elkak nio ni elbuumu ni bo kpe lennge etahk Esowo jolo go Jerusalem. 23 Ngare nyio jolo ngare elkoko. Jisos jo yannge go nlaaga nyi etahk Esowo, edi ji bo jo lung re etahk Solomon. 24 Jus kehm kame ba rur senng-e kak, kehm-e bahbe re, “Bahke kpe kang renan, a kehm-r tongo? Wahr ga li-r ekpehlekpehle. Joare wo Mesaya wo, lennge tong-r.” 25 Jisos kehm faange bo re, “M ma-n tohko tong, ń nehme taame. Ntum nyi n kp'limi go mbing nyi Nsoo, nyi nyi kp'yiimi ntianse ka-m. 26 Wahn nehme taame, tibre ń wobem go ellong ejoro ebame. 27 “Ejoro ebame kpo wuk alum enyame. N kp'kahne bo, bo kp-m toono. 28 N kpo ka bo elkpin ni li go njinanjini. Bo nehm tiki kpo tan. Nnene limm, no bahke ma fooro bo go egame abo, tahm a bo. 29 Nsoo no ka-m bo, gbale sehnge nne awohng awohng. Nnene limm, no bahke ma fooro bo go ebo bi Nsoo. 30 Wahr awahr a Nsoo, e li ajehng.” 31 Owo Jus kehm kpe fohko atal re bo tuub-e. 32 Jisos kehm faange bo re, “Me n lim nnoobo gbalee ka-n, nnoobo nyi Nsoo ka-m no re me n lim. Go nsol nyia kpee, ekahmekahme ejum aji wahnge ń kp'sebe re, wahn tuub-m atal?” 33 Jus kehm-e faange re, “E nehme seb re, wahr tuub-a atal tib go nnoobo nyi a kp'limi. E kp'sebe re, wahr tuub-a atal tib eji a kp'suku Esowo, eji a kp'rodo elna, jo bum ana Esowo, wo ji li na nne.” 34 Jisos kehm faange bo re, “Bo nyono go egahne atahm re, ‘Esowo re, wahn li are Esowo bi.’ 35 “E kp'kahne re, ji nwer Esowo bungu no, nnene limm, no bahke ma range alum nya Esowo. Esowo kpo lung ane bao ba á ka bo alum enye re, ‘Esowo’, 36 jen ji wahnge ń kp-m tongo re, n kp'suku Esowo, tib eji n tong-n re, me Mmon Esowo wo, me ji Esowo Nsoo yehke no, fere tum tv go njini nyia? 37 N tohko lim eltum ni Nsoo, kana taame tv-m! 38 N l'fere lim eltum ni Nsoo, ń tohko taame tv-m, lub taamen tv eltum ni n kp'limi, eji ń l'kahn, fere taame re, Nsoo noa, wob-m go atahng, me n tob wob Nsoo go atahng.” 39 Bo kehm kpe gare re bo bob-e, Jisos kehm weele eje be. 40 Á kehm feere song siiri Jodan, song kang eje go egbuk jehko, edi jio ji Jon gbo mbang jo wohngo ane alahb. 41 Ellong ane gbalee kehm bake go ege, kehm ba bung re, “Jol eji Jon ki l'lim nkpokosi anyehng anyehng, ejum ajehng ajehng ji á bungu no bada nne noa eblohko jol go etingitingi.” 42 Ane tvv t'taame tv-e edi jio o.
1 Nne awohng jolo gona, no bo jo lung-e re Lasaros ji jo yam. Á lene go Betani, ejahbe ji Meri lene no, a Mata mmonannyehn. 2 Meri jio wo yaange akehng ma nno a nno wohngo Ntul a Jisos, fere ko alv esi enye dohk-e akpade. Ye wo, Lasaros mmonannyehn jo yam. 3 Abonanyehn Lasaros bao kehm tiingi etib tv Jisos re, “Ntul, ekpondahme eja ji kpo kor-a s'sehng kp'yame.” 4 Eji Jisos wuku no, á kehm bungu re, “Eyam bio, eyam elkv sang, li re Esowo tib ellub ene, eji Mmon Esowo l'bel ellub.” 5 Jisos, Mata jo kor-e sehng, a Meri mmonannyehn, go Lasaros. 6 Jisos wuku kan re, Lasaros kp'yame, á kpe kang nfung ebal edi jio ji á jolo no. 7 Owo á kehm tongo abat'toono ebe re, “Ba, wahr feeren go Judea!” 8 Abat'toono ebe kehm-e tongo re, “Nt'tibi, nyanjehle Jus jo sebe re bo tuub-a atal, anv ana, a kp'kpeke seb re wo kpe feere goa?” 9 Jisos kehm faange bo re, “Ewubu awa na abal sang li go efung kohro kohra? Nne awohng awohng no l'jen ngara njul, á kpehme seele. Tibre á kp'nyehne ellennge ni njini nyia. 10 Nne awohng awohng no l'jen go ejannge, á kpo s'seele. Tibre ellennge go ege atahng limm.” 11 Ana wo Jisos bungu no, kehm kpe soro asi bung tong bo re, “Lasaros, nte ewahre kp'lale. N kp'tahme song nyahm-e.” 12 Abat'toono ebe kehm-e tongo re, “Ntul, l'jol re Lasaros kp'lale na, eyam ebe bahk-e tele.” 13 Jisos bungu bade elkv ni Lasaros. Bo jo tiri re, Jisos bungu bade ellu nehka nehka ni nne kpo lal. 14 Owo Jisos kehm lennge tong bo re, “Lasaros ebkpo. 15 Esi ejahne ji wahnge eltim kp-m yebe, eji n ki jol ona, eji ń l'taame. Nong, wahr tahmen go!” 16 Tomos ji bo jo lung-e re Ayafele, kehm tongo abat'toono Jisos bako re, “Nong, wahr tob tahmen toon-e, eji afi jolo elkv, e l'tob kpo a ne a ne.” 17 Eji Jisos ba no, á sebe kahn re, Lasaros, bo m-e kak elahm, ebkang nfung eni. 18 Tahm go Betani rehng go Jerusalem labem, jolo mmal na ebal. 19 Jus gbalee ji ba no re bo ba ji, jo kak Mata, a Meri eltim, tib go elkv ni mmonannyehn ebo ma kpo. 20 Eji Mata wuku re, Jisos kp'bake, á kehm tahme song wan-e. Meri ji eje ga etahk. 21 Mata kehm tongo Jisos re, “Ntul, li re, a jolo jol ana, kehn mmonannee jolem kpoko. 22 Jol anv, n kp'kahne re, ejum ajehng ajehng ji a l'bahb Esowo, á bahk-a kake.” 23 Jisos kehm-e faange re, “Mmonanne bahke nyahme go elkv.” 24 Mata kehm-e tongo re, “N kp'kahne re, á bahke nyahme go elkv go es'kohro efung bi ane kpee bahke nyahme.” 25 Jisos kehm-e tongo re, “Me wo li enyahme ngubjing go elkv. Me wo li elkpin. Nne no l'taame tv-m, afi á kpo na, á bahke fere jol go elkpin. 26 Nne no l'jol go elkpin, fere taame tv-m, á nehm kpe tiki kpo ekpokokpoko. Wobtaame ana n tong-a noa?” 27 Á kehm-e faange re, “Ee Ntul, me n taame re, wo wo li Kraist ji Mmon no Esowo no bo tong-r re, á kp'bake go njini.” 28 Eji Mata bungu ano mal, á kehm tahme song lung Meri mmonannyehn, kehm-e tongo go aw'wa re, “Nt'tibi ebba, á kp-a lungu.” 29 Meri wuku kan ano me, á kehm mehle tahm re, á song kpir-e. 30 Ngare nyio o Jisos ka rehng go ejahbe jio, á kpeke yim go edi ji Mata kpir-e no. 31 Eji aneb Jus ba ji a Meri go ege etahk, jo kak-e eltim, nyehne re, yebmehl fi, bo kehm tob tahm toon-e. Tibre bo jo tiri re, Meri fi song ling go elahm. 32 Meri ba kan a, ba rehng edi ji Jisos jolo no, á kehm soro nyehn-e, soro gbo jamm-e alahng, kehm bungu tong-e re, “Ntul, li re, a jolo jol ana, kehn mmonannee jolem kpoko.” 33 Eji Jisos nyehn-e no, á kp'lingi, fere nyehn Jus ji toon-e no ba, kp'tob ling, owo ndon kehm-e fili go eltim, fere moong-e go atahng. 34 Á kehm-e bahbe re, “Gan wo ń kak-e no?” Bo kehm-e tongo re, “Ntul, ba wahr tahm, wo ba nyehn!” 35 Jisos kehm lingi. 36 Owo Jus kehm bungu re, “Nyehnen ana á kp-e korae!” 37 Egom ane bandiki jo bungu re, “Ye sang lennge nwakamahr amahra? Anv, á jolem ma lim nne noa, á k'kpoa?” 38 Jisos, ndon kehme kpe gbal go eltim. Á kehm bake go elahm. Elahm bio o, bo rahme go ekpartal, fere bannge eltal bulu go nnyo elahm. 39 Jisos kehm bungu re, “Banngen eltal nio, wahn bum go nkpe!” Mata ji mmonannyehn nkvne kehm-e tongo re, “Ntul, á bahke vohko t'tokko sehng, tibre ebkang nfung eni nyi á kpo no.” 40 Jisos kehm-e faange re, “Wa n tongem re, a l'taame, a bahke nyehne ellub ni Esowoa?” 41 Owo bo kehm bannge eltal nio bum go nkpe. Jisos kehm kpiidi amahr go ero, kehm bungu re, “Nsoo, m ma-a kak saam, tibre a ma-m wuk. 42 N kp'kahne re, a kpo wuk-m ngare anyehng anyehng. M bungu jia tib go esi ji ane baa ba yim a, eji bo l'taame re, wo wo lohk-m tum.” 43 Jisos bungu kan ano me, á kehm rabe wahre wahre re, “Lasaros, lohng me!” 44 Nne no kpo no, kehm soro lohng go elahm, a abomo nya bo kpenng-e no go abo, a akpade akpade. Esamahr ebe, bo tob kpenng-e mbomo. Jisos kehm tongo bo re, “Fanngen ye, wahn yak-e, á song!” 45 Jus gbalee ji ba no, ba ji a Meri, fere nyehn ji Jisos limi no, bo soro taame tv-e. 46 Egom jindiki kehm tahme goji Bab Farisi, song tooro tong bo ana ji Jisos ma lim. 47 Owo atubesi abalimajom, a Bab Farisi kehm lungu atubesi nfam, bo ba kono edi ajehng. Bo kehm kehme elbungu atemtem re, “Anv, e bahke limi renan, tib eji nne noa kp'limi akpokosi gbalee? 48 E l'yak-e, á l'soro asi ana, nne awohng awohng bahke taame tv-e. Aneb Rom bahke bake, ba rannge ejahbe ejahre, fere rannge mbarebare etahk Esowo jia.” 49 Nne awohng no tob woomo go ellong ane bao, no bo jo lung-e re Kayafas ji jolo ntubesi abalimajom go elya nio, kehm bungu tong bo re, “Ń nehme tohko k'kahn ejumjum. 50 Ń nehme kahn re, nobo re, nne awohng kpo, tib go esi ane kpee, sehnge re ejahbe kohro kohro rannga?” 51 Alum nya á bungu no, á bungem go ege a ntir. Tib eji á jolo ntubesi abalimajom, owo wahnge á nyehne amahr nya Esowo re, nobo re Jisos kpo go esi ejahbe kohro kohro. 52 Lohngem re ejahbe Jus ji ji, fvfo tob li ka abon Esowo ba ma yaame rur go njini, eji bo l'fere jol ajehng. 53 Bomo efung bio asongo, owo bo toobo no ana bo bahk-e wulu. 54 Owo wahnge Jisos ki kpe jo jen gbul gbul gbuul, jo yannge go Judea. Á jo tahme ona, song rehng go ejahbe ji li kohlo elka emahng, ji bo jo lung re Efraim. Owo á jolo no eje, a abat'toono ebe. 55 Ngare nyio elkak ni Jus ni Pasova ebkabbe. Ane gbalee jo tahme ajahbe nyako, jo je go Jerusalem, eji bo l'song bum elbo saang, elkak nio kehm rehnge. 56 Bo jo sebe Jisos. Eji bo song kono asi go etahk Esowo, bo kehm kehme elbahbe atemtem re, “Anv, ń kp'tiri renan? Á nehm ba go elkak niaa?” 57 Ngare nyio nyi atubesi abalimajom, a Bab Farisi kehm tongo re, nne awohng awohng no l'kahn edi ji Jisos li no, á ba tong bo, eji bo l'je, song bob-e.
1 Eji ma sa nfung erakera, Pasova rehng, Jisos kehm tahme go Betani, edi ji Lasaros lene no, ji á nyahme go elkv. 2 Owo bo kehm lame nsol ka-e. Mata wo jo loko bo. Lasaros t'tob woomo go ellong ane ba ji ekp'kuru nsol alehke a Jisos. 3 Meri kehm koko egburu elom akehng ji sahb k'kim ekun, ba a ji, ba yaange wohngo Jisos go akpade, kehm fere ko alv esi enye, jo dohk-e akpade. Es'svv akehng mao kehm yeele na yeele ekp'kpa jio. 4 Judas Iskariot ji woomo go ellong abat'toono Jisos, ye jio ji bahk-e gungu, kehm bungu re, 5 “Jen ji wahnge bo ki gungu akehng maa, ko eltahl a mpon ewubu ka akpak?” 6 Alum nyaa nya á bungu no, lohngem re á tiiri akpak, lohngo re á tiiri elne. Tibre ye jolo nwajv. Á jolo nne no jo kuuru akpohko, fere jo yehke o, jo kak elne ebo. 7 Jisos kehm bungu re, “Yaken nnenkal noo! Á kuuru akehng maa sik elkv ename. 8 Akpak li a nahne ngare anyehng anyehng, wo, me n limm a nahne ngare anyehng anyehng.” 9 Eji ellong Jus tvv wuku no re, Jisos li o, bo kehm jeke. Bo jeem tib Jisos wo wo. Bo je re, bo tob song nyehn Lasaros ji Jisos nyahm-e go elkv. 10 Atubesi abalimajom kehm toobo re, bo tob wul Lasaros fvfo. 11 Tib go ege esi wo wahnge egom Jus gbalee jo yake bo, fere jo taame tv Jisos. 12 Etoono efung behko ellong ane gbalee ba, ba go elkak kehm wuku re, Jisos kp'bake go Jerusalem. 13 Owo bo kehm jake amang mbohng, tahm a nya re bo song wan-e. Bo kehm kehme elrabe re, “Tehken Esowo! Elfuulu li a nne no kp'bake go mbing nyi Ntul Esowo. Elfuulu li a ntul no Israel!” 14 Jisos nyehne mmombvankang no nse, kehm kuumu, ana bo nyono go nwer Esowo re, 15 “Ka kpe fahl Jerusalem, mmon a Sayon. Nyehn, ntul ewa kp'bake, á kun go mmombvankang no nse.” 16 Abat'toono ebe wakem lennge bo ngare nyio. Eji Jisos ma bel ellub ene, owo bo kehm buumu re, edi nwer Esowo jio ji bo nyono bada Jisos. Eblohko jol ano ka-e. 17 Ellong ane ba jolo o ngare nyi á lungu Lasaros go elahm, fere nyahm-e go elkv, bo ba yiimi Jisos ntianse. 18 Owo wahnge ellong ane kame no re bo ba kpiri Jisos, tibre bo wuku re, ye wo ma lim nkpokosi nyio. 19 Bab Farisi kehm bungu atemtem re, “Ń kp'nyehne re, ń nehm ma lim ejumjum. Nyehnen ana njini kpee ma tahm kp-e toono.” 20 Aneb Grik bandiki woomo go ellong ni ane ba je elkak go Jerusalem re bo song kak Esowo. 21 Aneb Grik bao kehm bake goji Filip ji lohng go Betsaida ji Galili, kehm ba tong-e re, “Nsoo, e kp'sebe re wahr nyehn Jisos.” 22 Filip kehm tahme song tong Andru. Andru abola Filip, bo kehm tahme ano, song tong Jisos. 23 Jisos kehm faange bo re, “Ngare ebrehng nyi Mmon no nne, bo bahk-e egburu ellub ka. 24 Etingitingi, n kp'bungu tong-n re, Tohko tiki jol re mmohk eti fooro na gbo go ndi kpo, bahke sake ano ano. L'kpo, bahke kabe akab gbalee. 25 Nne no elkpin ene l'kor-e, á kp'tane na elkpin ene. Nne no elkpin ene l'sab-e go njini nyia, á kp'kuuru na elkpin ene bum go njinanjini. 26 Nne awohng awohng no l'tong re á kp-m loko, á bahk-m tiki toono. Edi ji n li no, owo nlokeltum ewame bahke tob jol. Nne awohng awohng no l'lok-m, á bahke jo lub Nsoo. 27 “Anv, eltim ename kp-m gbiingi. M bahke bungu renan a? L'li re me m bung re, ‘Nsoo, tahr-m go ngare nyiaa?’ E'ee, j'nehm ana ji wahnge m ba no re me m ba nyehn erem ngare nyia. 28 Nsoo, lim, goji mbing enya l'bel ellub!” Bo kehm soro wuk ellum go ejahbetul Esowo ni bungu re, “Me n lim re, mbing enyame bel ellub, m bahke kpe lim, kpe bel ellub.” 29 Ellong ane ba yiimi kohlo o w'wuk ellum nio. Egom jindiki kehm bungu re, ndan ebta. Egom jindiki bungu re, enjel nyi ma bung a ne. 30 Jisos kehm faange bo re, “Ellum nia a, ba tib go egahne esi, go egame esi sang wahnge. 31 Anv wo li ngare nyi njini nyia yim go eti elam. Ngare nyia nyi ntubesi no njini nyia, bo bahk-e kame yake go. 32 Ngare nyi bo ma-m kum go ejangnti, rod jahm, owo m bahke leebe ane kpee tv elname.” 33 Jisos bungu ellum nia, goji á l'tib ane elkohn elkv ni á bahke kpoko. 34 Ellong ane bao kehm-e faange re, “Wahr ebwuk go atahm nya Esowo re, Mesaya bahke jolo go njinanjini. Jen ji wahnge a kehm bungu re, Mmon no nne, bo bahk-e kumu go ejangnti, rod jahm? Nne awo li Mmon no nne?” 35 Jisos kehm faange bo re, “Ellennge nia, li a nahne mmongare ntiil. Jo jenen, eji ellennge kpeke li, goji ejannge l'ki-n kpiri. Nne no kp'jene go ejannge, á kpehme kahn edi ji á fi fi. 36 Eji ellennge nia, kpeke li a nahne, taamen tv ellennge nia, eji ń l'jol abon ba ellennge.” Jisos bungu kan a mal, á kehm tahme song seb edi biiri, eji bo l'ki-e nyehn. 37 Jus tikem taame tv Jisos, jol eji á jo l'lim akpokosi gbalee, tib bo. 38 Jia jolo, tib goji ellum ni nnyehnamahr Aisaya bungu no l'lohko jol go etingitingi, ni á bungu re, “Ntul, nne awo ma taame tv etib ebahre? Nne awo no Ntul Esowo m-e tib nsahm enye?” 39 Tib go esi alum nyao, bo tikem ma taame. Tibre Aisaya kpe bung re, 40 “Esowo ebwa bo amahr, fere lim asi ebo tahne. Ki li ano, kehn bo kp'nyehne go bo amahr, fere kahn go bo a ntim, fere sennge, feere go egame, eji n l'lim bo, bo nob.” 41 Aisaya bungu alum nyaa, tibre á nyehne ellub ni Mesaya, fere bung bada ne. 42 Tvtv o, atubesi Jus gbalee t'taame tv Jisos. Tib eji bo jo fahl Bab Farisi, bo joom bung gbul gbul gbuul, eji bo l'k'kam bo yehke go ero. 43 Tibre ellub ni bo kpo ko goji atem, ni ni jo ga kor bo, sehnge ellub ni Esowo. 44 Jisos kehm kehme elbungu wahre wahre re, “Nne no l'taame tv-m, á taamem tv me me, á tob taame tv nne no tum-m no. 45 Nne no l'nyehn-m, yebnyehn nne no tum-m no. 46 M ba go njini nyia ba jol ellennge, eji nne awohng awohng no l'taame tv-m, á l'k'kpe sa go ejannge. 47 Nne awohng awohng no l'wuk alum enyame, k'fere bum alum nyao, we n nehm lam. Tibre m baam re me m ba lam njini nyia. M ba na re me m ba tahre njini nyia. 48 “Nne no l'ten-m, k'ko alum enyame, ye wo elam nong kp-e siki. Alum nya m ma bung a, nyanehm nya bahk-e lame go es'kohro efung. 49 Tibre alum nya m bungu no, nyanyame sang. Nsoo no tum-m no, ye wo tong-m ji m bahke bungu, fere tib. 50 N kp'kahne re, alum enye kpo ka elkpin ni li go njinanjini. Owo wahng ka n kpo bung ana Nsoo tong-m no re me m bung.”
1 Ngare nyio ebsa efung abehng elkak Pasova rehng. Jisos k'kahn re, ngare ebbiingi nyi á bahke tahme njini nyia song rehng goji Nde. Ane ba jolo ane ebe go njini nyia, jo kor-e s'sehng. Bo jo kor-e tete rehng go es'kohro. 2 Eji Jisos, a abat'toono ebe jo li nsol, ngare nyio nnehm ebkak Judas Iskariot ji mmon a Saimon ntir go ege eltim re á gungu Jisos. 3 Jisos k'kahn re, Nde m-e kak nsol kpee go ebo. Á jo tob kahne re, á lohng goji Esowo ba, á bahke kpe feere goji Esowo. 4 Jisos kehm mehle go ekp'kuru nsol alehke yiimi, kehm soro fannge mbomo eme, fere rod ntawehre bobo. 5 Á kehm yaange alahb kak ngbanggbang, jo ru abat'toono ebe akpade, fere jo dohk bo go ntawehre nyi á bobo go ebun. 6 Á kehm bake goji Saimon Pita. Saimon Pita kehm-e tongo re, “Ntul, anv, a yahk-m ru akpada?” 7 Jisos kehm-e faange re, “Ji n kp'limi a, a nehme kahn anv, behnjehle go wo bahk-a lennge.” 8 Pita kehm-e tongo re, “A nehm tiki ru akpade enyame!” Jisos kehm-e faange re, “N tohk-a ru, lohngo re, wo nne ewame sang.” 9 Saimon Pita kehm-e faange re, “Ntul, akpade enyame nya nya sang, a bahk-m ruku. Fvfo, a bahk-m tob ru abo enyame, a esi.” 10 Jisos kehm-e faange re, “Nne no ma wuumu alahb, kpeem li re á kpe ru akidi, tibre yebbar kpee, sehngem re akpade enye nya ano á bahke kpe ru. Wahn ebbar kpee, fvfo, wahn ane kpee sang.” 11 Tibre Jisos jo k'kahn nne no bahk-e gungu. Owo wahnge á bungu no re, “Wahn ane kpee sang ma bar.” 12 Á ru kan bo akpade mal, á kehm rodo mbomo eme bobo, feere song ji go ege a nji, kehm bahbe bo re, “Ń kp'kahne ji n lim-n aa? 13 Ń kpo lung-m re nt'tibi, fere lung-m re Ntul. Kp'nobo, eji ń kpo lung-m ano. Tibre ano wo n lohko li. 14 Me wo li ntul ewahne, a nt'tibi ewahne. M ma-n ru akpade enyahne. Nobo re wahn fvfo, wahn tob jo ru atemtem akpade. 15 M ma-n tib ntugare, eji wahn fvfo ń l'tob lim ana m ma lim ka-n. 16 Etingitingi, n kp'bungu tong-n re, Nlokeltum kpehme gbal sehnge nde no á kp-e loko. Ntiingetib awohng awohng limm, no kpo gbal sehnge nde no tum-e no. 17 Eji ń kp'kahne nsol nyia, ń l'lim, elfuulu bahke jolo ka-n. 18 “N nehme bung bade wahn ane kpee. N kp'kahne bao ba m ma yehke. Bahke tiki jol go etingitingi ana nwer Esowo bungu no re, ‘Nne no jo li nsol alehke enyame, ye wo jolo nne no ma lam kak-m.’ 19 N kp-n tongo anv ana re kehm limi, eji l'lim, ń l'taame re, me nne noo wo. 20 Etingitingi, n kp'bungu tong-n re, Nne awohng awohng no l'ko nne no n tum-e no, á ko me. Nne no l'ko-m, á tob ko nne no tum-m no.” 21 Jisos bungu kan ano mal, ndon kehm-e gbale go ege atahng. Á kehm kehme elbungu gbul gbul gbuul re, “Etingitingi, n kp-n tongo re, Nne awohng go egahne ellong bahk-m gungu.” 22 Abat'toono ebe kehm kehme elkeebe, seenge atemtem. Bo joom kahn nne no á jo b'bung bada ne. 23 Nt'toono awohng no Jisos jo kor-e s'sehng ji kohlo Jisos. 24 Saimon Pita kehm-e faake ebo, kehm bungu re, “Tong-r nne no á kp'bung bada ne.” 25 Owo nt'toono noo kehm jeere kohlo Jisos, kehm-e bahbe re, “Ntul, nne awo me?” 26 Jisos kehm faange re, “Ye ji m bahk-e kake ejum alehke jia ji m bahke tohko go abehne wo.” Jisos kehm rodo ejum alehke jio, tv abehne, kehm faake ka Judas ji mmon a Saimon Iskariot. 27 Eji Jisos ma lim ano, nnehm kehm soro yel Judas. Jisos kehm-e tongo re, “Ejum ji a fi ellimi, song lim elwaare.” 28 Nnene jolem no ji ekp'kuru jio, no kahne ji wahnge Jisos bung ano. 29 Egom jindiki jo tiri re, eji Judas jo kuuru akpohko, owo wahnge Jisos tong-e no re, á song gunu nsol nyi bo bahke lehke go elkak nio. Egom jindiki tiri re, “Fundiki Jisos tong-e re, á yehke apene song ka akpak.” 30 Eji Judas ma taare ejum alehke jio, á kehm soro lohng tvtv tahm. Ngare nyio atv ebbehde. 31 Eji Judas ma lohng fi, Jisos kehm bungu re, “Anv wo, Mmon no nne ma bel ellub ene. Eji á ma bel ellub, owo Esowo ma tob bel ellub. 32 Esowo l'bel ellub ni Mmon ewe, á bahke kpe feere a ni, ka Mmon ewe. Á bahke limi ano elwaare. 33 Abon ebame wahn, m bahke gohro jol a nahne mmongare ntiil. Ḿ bahk-m sebe. Ana m bungu tong Jus, ano wo n kp-n tob tong re, Edi ji n fi no, ń nehm ma ba. 34 N kp'jehke ntahm nyi nfenfe ka-n anv re, wahn bel elkoro atemtem. Ana ń kp-m koro, nobo re wahn tob bel elkoro atemtem. 35 Ń l'bel elkoro atemtem, owo ane kpee bahke kahne re, wahn lohko li abat'toono ebame.” 36 Saimon Pita kehm bahbe Jisos re, “Ntul, gan wo a kp'tahme?” Jisos kehm-e faange re, “Edi ji n fi no, me a nehm ma toono anv. Ngare es'song wo, a bahk-m toono rehng edi jio.” 37 Pita kehm-e bahbe re, “Ntul, jen ji wahnge n l'ki-a ma toono anv? Me n taame re, m bahke kake elkpin ename, kpo go ega esi.” 38 Jisos kehm-e faange re, “Anv, a bahke taame, yake elkpin ena ka go egame esia? Etingitingi, n kp'bungu tong-a re, a bahke gbaame nkpel era re, me, m-e a nehme kahn, nkok kehm kuku.
1 “Kana jo taame re, ntim enyahne jo gbiing-n! Taamen tv Esowo, wahn tob taame tv me! 2 Go etahk Nsoo akimi nyaa tvv. Tibre n fi song toobo edi bum-n. Ki li ano, kehn wahn n jolem tongo. 3 N l'je song toobo edi jio bum-n, wo m bahke kpe feere ba, ba ko-n tahm a nahne go edi ji n li no, eji ń l'tob jol go edi jio ji n li no. 4 Anv, wahn ebkahn mbang nyi ḿ bahke sehnge rehng go edi ji n fi no.” 5 Tomos kehm bungu tong-e re, “Ntul, e nehme kahn edi ji a fi no. E bahke limi renan, kehm kahne mbang?” 6 Jisos kehm-e faange re, “Me wo li mbang, me wo li etingitingi, me wo li elkpin. Nnene limm, no bahke sehnge rehng goji Nsoo, tohko tiki jol re á sehnge go egame. 7 Li re ń kp-m kahne, kehn ń kp'tob kahn Nsoo. Bomo anv asongo ń kp-e kahne, tibre ḿ m-e nyehn.” 8 Filip kehm bungu tong Jisos re, “Ntul, tib-r Esowo Nsoo. Ejum jia ji e kp'sebe.” 9 Jisos kehm-e faange re, “Filip, me n jol a nahne afung tvv. Me a nehme tiki kahna? Nne no l'nyehn-m, yebnyehn Esowo Nsoo. Jen ji wahnge a bahke kpe bung re, ‘Tib-r Esowo Nsoo?’ 10 A nehme taame re, me n wob Nsoo go atahng, Nsoo tob wob-m go atahnga? Alum nya n kp'bungu tong-n, nyanyame sang. Nsoo no wob-m go atahng, ye wo n kpi eltum ene lim. 11 Taamen tv-m re me n wob Nsoo go atahng, Nsoo tob wob-m go atahng. Tohko jol ano, lub taamen tib go eltum ename ni n kp'limi. 12 “Etingitingi, n kp'bungu tong-n re, Nne no l'taame tv-m, á bahke tob lim eltum ni n kp'limi. Jol á bahke limi na eltum ni gbale gbal sehng eltum ni n kp'limi. Tibre n kp'tahme goji Nsoo. 13 Ejum ajehng ajehng ji ń l'bahb go egama mbing, m bahke limi ka-n, eji Mmon l'tib ellub ni Nde. 14 Ejum ajehng ajehng ji ń l'bahb go egama mbing, m bahke limi ka-n. 15 “N l'kor-n, ḿ bahke bumu atahm enyame. 16 M bahke gboongo Nsoo, á fere tum nkakebo noko tv-n, eji á l'ba jol a nahne go njinanjini. 17 Nne noo, Etingi Etohko ji, ji njini l'k'ma bel. Tibre njini we nehme nyehn, jol bo we nehme kahn. Wahn ba kp-e kahne. Tibre á bahke jolo a nahne, fere woom-n go egahne atahng. 18 “Wahn n nehm yake abo, ń jol ana abon akubin. M bahke kpe feere ba go egahne. 19 Mmongare ntiil, njini nyia me nehm kpe nyehn. Wahn bahk-m jo ny'nyehn. Tib eji me n li go elkpin, owo wahnge ḿ bahke tob jol go elkpin. 20 Efung bio bi ḿ bahke kahne re, me n wob Nsoo go atahng, wahn wob-m go atahng, me n tob wob-n go atahng. 21 “Nne no l'wuk atahm enyame, fere bum, ye wo li nne no n kp-e koro. Nne no, me n l'kor-e, á bahke tob kor Nsoo. Me fvfo, á bahk-m tob kor, n fere lennge elname ka-e.” 22 Judas jehko ji mmon a Jems kehm-e bahbe re, “Ntul, bahke jolo renan re wo lennge elna ka-r, k'tob lennge elna ka njini?” 23 Jisos kehm-e faange re, “Nne no, me n l'kor-e, á bahke bumu alum enyame. Á bahke koro Nsoo. Me, a Nsoo, e bahke bake, ba lene tob-e go ege atahng. 24 Nne no, me n tohk-e kor, á nehm jo bum alum enyame. Alum nya ḿ ma wuk, alum nyanyame sang, nya Nsoo no tum-m no nya. 25 “Nsol nyia a, n kp'bungu a nahne, eji n kpeke li a nahne. 26 Nkakebo no Nsoo bahke tumu go egama mbing, no li Etingi Etohko, á bahk-n tibi nsol kpee, fere buum-n nsol kpee nyi m ma-n tohko tong. 27 N kp'tahme elkoono sa-n. Elkoono n'name ni m bahk-n kake. Wahn n nehme ka ana njini nyia kpo ka. Kana ga jo tiiri, fere jo fahl mbol mbol! 28 “Ń w'wuk, eji n tong-n no re, ‘M bahke tahme, kehm kpe feere ba go egahne.’ Li re n kp-n koro, kehn ń jol bele eyebatahng. Tibre n kp'tahme goji Nsoo. Nsoo wo ga gbal sehnge me. 29 Anv, m ma-n tohko tong, ngare nyio kehm rehnge, eji l'kehme ellimi, ń l'taame. 30 N nehm kpe ga bung a nahne gbalee. Tibre ntubesi no njini nyia kp'bake. Jol we n wobem go elwo. 31 N kpo lim ana Nsoo tong-m no, eji njini nyia l'kahn re, Nsoo kpo kor-m sehng. Tahmen, wahr tahm edi jia!
1 “Me wo li etingitingi evain. Nsoo wo li nne no kpo lim eltum go etahngga, jo kuuru nti enye. 2 Mb'bo eti anyehng anyehng nyi tohko kab akab, á gbahk tub go. Mb'bo eti anyehng anyehng nyi l'kab akab, á kpo tele na sere, eji l'kpe kab akab gbalee budu. 3 Wahn ebsi b'bar tib go alum nya m ma bung tong-n. 4 Jolen a name, m bahke tob jol a nahne. Ana mbo eti l'k'ma kab akab antahng, tohko tiki jol re á laake go ek'kv eti, ano wo tob li ka-n fvfo re, ń nehm ma kab akab, tohko tiki jol re ń laake me. 5 “Me wo li ek'kv eti, wahn ba li ab'bo eti. Nne no l'ya laak-m, ye wo m bahke tob laak-e, á bahke kabe akab gbalee. Tib tohko tiki jol re, ń ya laake me, ń nehm ma lim ejumjum. 6 Nne no tohko ya laake me, bo bahk-e kimi tub go ana mb'bo eti. Á bahke wuudu sa o kpo. Ab'bo nyao, bo bahke kpuku na luk edi ajehng, jahm agun. 7 Ń l'ya laak-m, alum enyame tob jol a nahne, bahben ajehng ajehng ji ń kp'sebe, ḿ bahke bele. 8 Ana wo Nsoo bahke jo bel ellub, ń l'jo kab akab. Tibre nyao nya bahke tibi re, wahn abat'toono ebame ba. 9 Ana n kp'koro Nsoo, ano wo wahn kp-m tob kor. Jolen go egame elkoro! 10 Ń l'bum atahm enyame, ḿ bahke jolo go egame elkoro, jang jang ana m ma bum atahm nya Nsoo, fere jol go ege elkoro. 11 M ma-n tong nsol nyia ana, goji eyebatahng ejame l'jol a nahne, fere rur go egahna ntim. 12 “A wo li ntahm enyame, nyi li re, wahn bel elkoro atemtem, ana ń kp-m koro. 13 Elkoro anehng anehng limm, ni nne bahke ma bel, ni biingi a nia ni li re, nne yake elkpin ene ka go esi atem. 14 Wahn ate ebame ba, ń l'lim ji n tong-n no. 15 “Wahn n nehme kpe lung re alokeltum nkpel anyehng anyehng. Tibre nlokeltum kpehme kahn ji nde kp'limi. M ma-n lung re ate ebame. Tibre nsol kpee nyi n wuku goji Nsoo, me n lennge kpee ka-n. 16 Wahn sang yehke me, me wo yehk-n na re wahn song kab akab, akab enyahne jol k'bol. Owo bahke wahnge ajehng ajehng ji ń l'bahb Nsoo go egama mbing, á bahk-n kake. 17 Ji n kp-n tongo li re, wahn bel elkoro atemtem. 18 “Njini nyia l'ko-n ekv, nobo re wahn kahn re, bo gbo mbang ko me ekv, kehm tob ko-n ekv. 19 Li re ń wob go njini nyia, kehn ḿ bahke jo kor njini nyia, are wahn ane ebe ba. Eji ń ki wob go njini nyia, m ma-n jak yehke go njini nyia a, owo wahnge njini nyia kp-n koko ekv. 20 “Jo buumen ellum ni m bungu tong-n re, ‘Nlokeltum kpehme gbal sehnge nde.’ Ana bo jo gbak-m, ano wo fvfo bo bahke tob jo gbak-n. Ana bo jo bum alum enyame, ano wo fvfo bo bahke tob jo bum alum enyahne. 21 Bo bahk-n limi nsol nyia kpee tib go egame esi. Tibre bo nehme kahn nne no tum-m no. 22 “Ki li re m ba, ba bung a bo, kehn bo jolem lehke ebi go bo abiafem. Wo anv, aneb abiafem bao, ejum ellaange kunu ajehng ajehng bo kpeem kpi. 23 Nne no l'ko-m ekv, á tob ko Nsoo ekv. 24 “Li re n limem akpokosi nyao go bo ellong, nya nne awohng awohng kala l'lim, kehn bo jolem lehke ebi go bo abiafem. Anv, bobnyehn nsol kpee nyi n limi no, jol bo kp-m koko ekv tv o, fere tob ko Nsoo ekv. 25 Jia li, eji ellum ni bo nyono go bo atahm l'lohko jol go etingitingi, ni li re, ‘Bo ko-m ekv, eji n ki lim ejumjum.’ 26 “Nkakebo no li a Nsoo l'ba, no m bahk-e tumu tv-n, ye ji li Etingi Etohko ji lohng goji Nsoo, á bahke jo yiimi ntianse ka-m. 27 Wahn fvfo, wahn tob li atianse enyame, tibre ń jolo a name, go mbomannahb.
1 N tong-n alum nyaa, eji ń l'k'gbo. 2 Tibre bo bahke jo kam-n yehke go ero. Etingitingi, ngare kp'bake nyi nne awohng awohng no l'wul-n, á bahke tiri re, á kpi Esowo loko. 3 Bo bahke jo lim ana, tibre bo me nehme kahn, jol Nsoo bo we nehme kahn. 4 M ma-n tong nsol nyia re, eji ngare nyio l'biingi nyi bo bahke limi ano, ń l'buumu nsol nyi n tong-n no bada bo. Wahn n tongem nsol nyia go mbomannahb, tibre n jolo a nahne. 5 “Anv, n kp'tahme goji nne no tum-m no. Nne ewahne awohng awohng limm, no kp-m bahbe re, ‘Gan wo a kp'tahme?’ 6 Alum nya m ma-n tong nya wahnge ndon ma-n jol go atahng gbalee. 7 N kp-n tongo etingitingi re, bahke nobo a nahne sehng, n l'tahm. N tohko tahm, Nkakebo nehm ba. N l'tahm, m bahk-e tumu tv-n. 8 “Á l'ba, á bahke ba lennge ane ba li njini nyia bade ana abiafem li no, fere lennge bo bade ana eno alehke li no, go elam ji Esowo ji kp'bake. 9 Abiafem nyao nya li nya bo kil taame tv-m. 10 Eno alehke jio, j'jame ji. Tibre n kp'tahme goji Nsoo, bo me nehm kpe tiki nyehn. 11 Elam jio ji li elam ji bo ma lam ntubesi no njini nyia. 12 “N kpe kpi nsol tvv nyi n jol kpe bung a nahne. Anv, ngare nyia, kp'riidi re wahn kehm kahne. 13 “Etingi Etohko jio l'ba, á bahke jo tib-n mbang anyehng anyehng nyi etingitingi. Tibre á nehm jo bung alum nyanye go ege a nsahm. Ajehng ajehng ji á wuku no, j'nehm ji á bahke bungu. Á bahk-n lennge nsol nyi kp'bake go es'song. 14 Á bahke me ellub ka. Á bahke koko nsol ny'nyame, ba lennge ka-n. 15 “Ejum ajehng ajehng ji Nsoo kpi no, tob li j'jame. Ana wo wahnge n tong-n re, á bahke koko j'jame, ba lennge ka-n. 16 “Mmongare ntiil me ń nehm kpe nyehn. L'kpe kang mmongare noko, ḿ bahk-m kpe nyehn.” 17 Abat'toono ebe bandiki kehm kehme elbungu atemtem re, “Anv, alum nyaa lohngo renan, nya á kp-r tongo a re, ‘Mmongare ntiil me ń nehm kpe nyehn, l'kpe kang mmongare noko, ḿ bahk-m kpe nyehn,’ a ellum nehko ni kpe li re, ‘Tibre n kp'tahme goji Nsoo?’ ” 18 Bo kehm bahbe re, “Anv, ‘mmongare ntiil’ lohngo renan? E nehme kahn ji á kp'sebe re á bung tong-r.” 19 Jisos k'kahn re, bo kp'sebe re bo bahb-e. Owo á kehm tongo bo re, “M bungu re, ‘Mmongare ntiil me ń nehm kpe nyehn. L'kang mmongare noko, ḿ bahk-m kpe nyehn.’ Ellum nia ni, ń kp'bahbe atemtem ana lohngo noa? 20 Etingitingi, n kp'bungu tong-n re, Ḿ bahke lingi, fere jo ka agohrobi, gana njini bahke jo bel na eyebatahng. Ḿ bahke jo ji ndon ndon, ndon enyahne bahke fere siingi eyebatahng ka-n. 21 Eji nnenkal yahke jel, á kpo nyehn erem, tibre ngare erem enye ebrehng, ngare nyi á ma jel mmon, á nehm kpe tiki buumu erem bi á nyehne no, tib go eyebatahng ji á ma jel mmon kak go njini nyia. 22 Mbang ny'nehm nyi, ń li go ndon anv, ḿ bahk-m kpe nyehn. Ngare nyio ntim enyahne bahke gbale go eyebatahng. 23 Efung bio me ń nehm kpe jo bahb ejumjum. Etingitingi, n kp'bungu tong-n re, Ajehng ajehng ji ń l'bahb Nsoo, á bahk-n kake tib go egama mbing. 24 Jol tete sik anv, ń ka tiki bahb ejumjum go egama mbing. Bahben, ḿ bahke bele, goji eyebatahng ejahne l'kpe gbal go egahne atahng. 25 “Alum nya m bungu tong-n, m bungu go ngaane. Ngare kp'bake nyi n l'k'kpe bung a nahne go ngaane. M bahke jo bung gbuul tong-n bada Nsoo. 26 Afung nyao l'biingi, ḿ bahke jo bahb Nsoo go egama mbing. Wahn n nehme tong re, m bahke jo bahb Nsoo ka-n. 27 Tibre yefono Nsoo, wahn kp-e koro, tib eji me n kp-n koro, ḿ ma fere taame re, n lohng goji Nsoo ba. 28 N lohng goji Nsoo ba go njini nyia. Anv, n kp'tahme njini nyia, feere goji Nsoo.” 29 Abat'toono ebe kehm-e tongo re, “Anv, a kp'bungu gbuul tong-r, go ngaane sang. 30 Anv, wahr ebkahn re, a kp'kahne ejum ajehng ajehng. Kpeem fuumu re, nne awohng awohng bahb-a mbahbe. Owo wahng ka e ma taame re, a lohko lohng goji Esowo ba.” 31 Jisos kehm faange bo re, “Anv wo, ḿ ma kehm rahng taama? 32 Ngare kp'bake nyi nne awohng awohng ewahne bahk-m yaame sa, tahm go ege ejahbe. Ngare ny'nehm nyi a. Jol fvfo, n nehm tiki jol antahng. Nsoo noa a name. 33 M bungu alum nyaa tong-n, eji ń l'bel elkoono tib go egame esi. Go njini nyia ḿ bahke jo bel afemfem. Kana jo tiiri, me n ga njini nyia.”
1 Eji Jisos ma bung alum nyao kpee mal, á kehm kpiidi amahr enye go ero, kehm kehme ero kak re, “Nsoo, ngare ebbiingi. Ka mmon ewa ellub, eji mmon ewa l'tob ka-a ellub. 2 Tibre wobyake ane kpee kak go ege elwo, eji á l'ka ane ba a yehke no ka-e elkpin ni li go njinanjini. 3 “Elkpin ni li go njinanjini ni li elkahne ni ane ma-a kahn, fere kahn re, wo ntahngtahng wo li etingitingi Esowo, tob kahn Jisos Kraist ji a tum-e no. 4 Eji n jolo go njini, n jo ka-a ellub. Me n lim eltum ni a ka-m no mal. 5 Nsoo, ka-m ellub anv go ega esamahr, ellub ni m bele go ega ngare nyi njini kala jol. 6 “Me n lennge mbing enya tong ane ba a yehke no go njini nyia ka-m. Bo jolo ane eba, ba a yehke no ka-m. Boblohko bum alum enya. 7 Anv, bo kp'kahne re, ajehng ajehng ji a ka-m no lohng go ega. 8 Tibre me m bung alum enya tong bo, nya a tong-m no. Bobtaame tv alum nyao, fere kahn go etingitingi re, me n lohng go ega ba. Boblohko taame re, wo wo tum-m no. 9 N kp'kake ero ka bo. N nehme kak ero ka njini nyia a. N kp'kake ero ka bao ba a ka-m no. Tibre bo ane eba ba. 10 Ejum ajehng ajehng ji n kpi no, j'ja ji. Ajehng ajehng ji a kpi no, j'jame ji. Bo ba kp'tibi ellub ename. 11 Anv, n kpeem li go njini, bo ba kpeke li go njini. N kp'bake go ega. Mbarebara Nsoo, jo fili bao ba a ka-m no go nsahm nyi li go ega mbing, eji bo l'jol ajehng ana wahr li ajehng. 12 Eji n jolo a bao ba a ka-m no, n jo fili bo go ega mbing, fere jo baabe bo. Nne awohng awohng limm, no ma tan, sehngem nne no tiki jol re á tan, ye wo ma tan, eji nwer Esowo l'lohko jol go etingitingi. 13 “Anv, n kp'bake go ega. Alum nya n kp'bungu ga njini nyia li, eji eyebatahng ejame l'gbal go bo atahng. 14 Me m bung alum enya tong bo. Njini ebko bo ekv, tibre bo wobem go njini nyia, jang jang ana me n ki tob wob go njini nyia. 15 N nehme kak ero re, wo yehke bo go njini nyia. N kp'kake ero re, wo baabe bo nob nob, eji ab'bi l'k'yel go bo atahng. 16 Bo wobem go njini, ana mefono antahng ki tob wob go njini. 17 “Ko etingitingi, wo yehke bo, bo jol ebo ebo. Alum enya, etingitingi ji. 18 Ana a tum-m no tv go njini nyia, ano wo fvfo m ma tob tum bo tv go njini. 19 Tib go bo esi wo wahnge, n kp'rodo elname ka, eji bofono antahng l'jol ebo ebo, fere sa go etingitingi. 20 “N kp'kake ero ka bo, fere tob kak ero ka ane bako fvfo, bao ba bahke tob taame tv-m tib go bo alum. 21 Nsoo, n kp'kake ero re bo jol ajehng, bo ane kpee, ana a wob-m go atahng, me n tob wob-a go atahng, eji bo kpe l'tob woom-r go atahng, eji l'toono o, njini nyia tob taame re, wo wo tum-m no. 22 Ellub ni a ma-m ka, me n faake a ni ka bo, eji bo l'jol ajehng ana wahr li ajehng, 23 m bahke woomo go bo atahng ana wo wob-m go atahng, eji bo l'lohko jol na ajehng ana j'jehng. Ano wo bahke wahnge njini kahn re, wo li nne no tum-m no, fere kahn re, bo kp-a koro ana n kp-a koro. 24 “Nsoo, n kp'sebe re, ane ba a ka-m no jol a name edi ji n li no, eji bo l'nyehn ellub ni a ma-m ka, tib go ega elkoro ni n kor-a no ngare nyi njini kala jol. 25 Nnobonoba nsoo, njini nyia ana wa ka kahn. Wo, me n kp-a kahne. Ane baa ana kp'kahne re, wo wo tum-m no. 26 Me n lennge mbing enya ka bo. M bahke soro asi, jo lim ano ano, eji elkoro ni n kp-a koro l'woomo go bo atahng, me n fere tob woomo go bo atahng.”
1 Eji Jisos ma kak ero mal, á kehm tahme, a abat'toono ebe, song siiri ebgba bi bo jo lung re Kidron. Etahngga jolo ona edi jio. Jisos kehm yele ona, a abat'toono ebe. 2 Judas ji gungu Jisos jo tob kahn edi jio. Tibre Jisos, bo jo kono eljeke ona song kono, a abat'toono ebe. 3 Judas kehm song kpiri atubesi abalimajom, a Bab Farisi. Bo kehm-e kake nsoja, a egom ane bandiki ba kpo baabe etahk Esowo. Bo fili at'rekahng, fili nr'rare nyi bo bunu no, jo ko nyaale agun, fere fili nsol ebta, tahm a nyi edi jio o. 4 Jisos k'kahn nsol kpee nyi bahk-e limi. Á kehm jeere song kpiri bo, kehm bahbe bo re, “Nne awo ń kp-e sebe?” 5 Bo kehm-e faange re, “Jisos ji Nasaret wo.” Jisos kehm tongo bo re, “Me wo a.” Judas ji gung-e no, tob yiimi o go bo ellong. 6 Eji Jisos tongo bo re, “Me wo a,” bo kehm feere njahm njahm, song gbo go ndi. 7 Á kehm kpe bahb bo re, “Nne awo ń kp-e sebe?” Bo kehm-e tongo re, “Jisos ji Nasaret wo.” 8 Jisos kehm kpe faange bo re, “N tong-n re, ‘Me wo ana.’ Joare me wo ń kp-m sebe, yaken ane baa, bo song.” 9 Á bungu ellum nia, eji l'lohko jol go etingitingi, ana á tohko bung re, “Ane ba a ka-m no, nne awohng awohng limm, no ma tan.” 10 Saimon Pita bele ekahngkahng ona, á kehm wobo go mbak, kpale nju nyi ntubesi abalimajom etung eboblum. Nju nyio, bo jo lung-e re Malkus. 11 Jisos kehm tongo Pita re, “Feere ekahngkahng eba, wo kak go mbak. Anv, me n k'wo go nkob erem nyi Nsoo ka-m noa?” 12 Ntubesi a nsoja, a nsoja enye nyio, a egom ane ba jo baabe etahk Esowo kehm ba bob Jisos, fere gba-e alehke. 13 Bo tohko gbo mbang ko-e tahm a ne goji Annas ji jolo nde nkal a Kayafas, Kayafas ji jolo ntubesi abalimajom go elya nio. 14 Kayafas wo jolo nne no tubu Jus elle re, “Nobo re nne awohng kpo go esi ane kpee.” 15 Saimon Pita, a nt'toono Jisos noko, bo kehm kehme Jisos toono. Nt'toono Jisos noko kehm song yange go nlaaga nyi ntubesi abalimajom, tibre ntubesi abalimajom noo jo kahn-e kpee. 16 Pita ji gana kohlo mbuga. Nt'toono Jisos noko no ntubesi abalimajom jo kahn-e, kehm lohngo song tong nnenkal no jo baabe mbuga re á nongo Pita yange. 17 Nnenkal noo no jo baabe mbuga kehm bahbe Pita re, “Anv, wo nt'toono a nne noo sanga?” Pita kehm faange re, “Ee, me nt'toono ewe sang.” 18 Ngare nyio ona alohk jo f'fili. Owo alokeltum bao, a ab'baabe edi kehm kono agun go akal nsehng. Bo kehm yiimi sennge agun nyao kak, jo wooro. Pita yiimi go bo ellong o, tob jo wooro. 19 Ntubesi abalimajom jo bahbe Jisos bade abat'toono ebe, fere bahb-e bade eltibi ene. 20 Jisos kehm-e faange re, “N jo bungu gbul gbul gbuul tong nne awohng awohng. Ngare anyehng anyehng n jo tibi eltibi ename go ntahk ero, fere jo tib go etahk Esowo, edi ji Jus kpee jo ba kono. Ejumjum limm, ji n jo bung mbehr mbehr. 21 Jen ji wahnge a kp-m abahbe bahb? Bahb ane ba wuku nsol nyi m bungu no. Bo kp'kahne nsol nyi m bungu no.” 22 Eji Jisos bung ano, owo mb'baabe awohng no yiimi kohl-e kehm-e rumu elkpal, kehm-e tongo re, “Jen ji wahnge a kehm faange ntubesi abalimajom elkohn nfaange ana nyia?” 23 Jisos kehm-e faange re, “Joare me n soodo, eji m bungu a, lennge tong nne awohng awohng ji n soodo no. Joare ellum ni m bungu no, m bungu go etingitingi, jen ji wahnge a kehm-m rumu elkpal?” 24 Owo Annas kehm tumu Jisos, a alehke alehke nya bo gba-e no tv goji Kayafas ji jolo ntubesi abalimajom. 25 Eji Saimon Pita kpeke yim, kpi agun wooro, bo kehm-e kpe bahb re, “Wo nt'toono a nne noo sanga?” Pita kehm kpe gbaame re, “Ee, me nt'toono ewe sang.” 26 Nlokeltum a Ntubesi abalimajom awohng no jolo mmonannyehn nne no Pita kpal-e etung, kehm bahbe Pita re, “Wo sang n nyehn-a no go etahngga, a nne nooa?” 27 Pita kehm kpe gbaame. Nkok kehm soro kuk tvtv. 28 Efungfu atv atv bo kehm koko Jisos go etahk Kayafas, tahm a ne go etahk ntubesi ejahbe. Jus joom yel go ekp'kpa ntubesi, tibre bofono antahng jo sebe re bo bum elbo saang, eji bo l'mal li elkak Pasova. 29 Owo Pailet kehm lohngo go elatahk, ba kpiri bo, kehm ba bahb bo re, “Ejum aji wahnge wahng ń kpi nne noa ebi ka?” 30 Bo kehm-e faange re, “Li re nne noa ebi nne sang, kehn we e jolem koko ba a ne.” 31 Pailet kehm tongo bo re, “Koon ye, wahn lam-e ana atahm enyahne bungu no.” Jus kehm-e faange re, “Bo nehm taame re, wahr wul nne.” 32 Jia limi, eji ebung ji Jisos bungu no l'lohko jol go etingitingi, ana á bungu no bade elkohn elkv ni á bahke kpoko. 33 Pailet kehm feere song yel go ege ekp'kpa, kehm lungu Jisos, kehm-e bahbe re, “Anv, wo wo li ntul no Jusa?” 34 Jisos kehm-e faange re, “Anv, mbahbe nyia a tiri antahnga, afi ane bandiki ba tong-a bada name?” 35 Pailet kehm bungu re, “Anv, me nne a Jus woa? Ane eba, a atubesi abalimajom, bo ba yak-a no ka-m. Anv, a limi jen?” 36 Jisos kehm faange re, “Me ntul sang go njini nyia. Li re n li ntul go njini nyia, kehn alokeltum ebame jol noko ka-m, eji bo l'ki-m yake kak Jus go ebo. Tibre me ntul sang go njini nyia.” 37 Pailet kehm-e bahbe re, “Anv, lohngo re wo ntul woa?” Jisos kehm-e faange re, “Ee, wobbung etingitingi re, me ntul wo. M ba go njini nyia re, me m ba bung bade etingitingi. Tibre esi jia ji wahnge bo jel-m no. Nne awohng awohng no l'jol ka etingitingi jio, á kpo wuk alum enyame.” 38 Pailet kehm-e bahbe re, “Ejum aji li re etingitingi?” Eji Pailet ma bung ano mal, á kehm kpe lohng go elatahk, ba kpiri Jus, kehm ba tong bo re, “Ebi ajehng ajehng n nyehnem ji nne noo ma lim. 39 Ń kpi eljini ni n kpo kono nne a ngbekobo ewahne awohng yehke yake ngare elkak Pasova. Ń kp'sebe re me n yehke ntul ewahne noo yaka?” 40 Bo kehm-e faange wahre wahre wahre re, “Barabas wo e kp'sebe re wo yehk-e yake. Nne noo sang!” Barabas jolo nne no jo jen, jo taare ane nsol go nsahm.
1 Pailet kehm kake nsahm re, bo ko Jisos song dv-e. 2 Nsoja nyio kehm koko akpiri, tahng ekpasi, konng-e go esi. Bo kehm rodo ekpawobo kak-e, mbilibili ekpawobo ji atul kpo kono elkake. 3 Bo kehm jo ba lim ayok re, “E ma-a kak nnyo, ntul no Jus,” fere jo ruum-e nkpal. 4 Pailet kehm kpe lohng go elatahk, kpe song tong Jus re, “M bahke kpe lohng a ne ba, eji ń l'kahn re, ejumjum n nyehnem ji á limi no.” 5 Owo Jisos kehm lohngo ba go elatahk, a ekpasi akpiri jio go esi, a mbilibili ekpawobo ji bo kak-e no. Pailet kehm tongo bo re, “Nyehnen nne noa ga.” 6 Eji atubesi abalimajom, a ab'baabe nyehn-e no, bo kehm kehme elrabe re, “Kum-e lake go ekros! Kum-e lake go ekros!” Pailet kehm tongo bo re, “Koon ye antahng, wahn song kum-e, tibre ejumjum n nyehnem ji á limi no.” 7 Jus kehm-e faange re, “E kpi ntahm, tib go ntahm nyio ona fuumu re á kpo. Tibre yebrod elne bum re, ye Mmon Esowo wo.” 8 Eji Pailet wuku alum nya bo bungu no, á kpe f'fahl na budu. 9 Á kehm kpe maade yel go ege ekp'kpa, song bahb Jisos re, “Anv, a lohng gan?” Jisos we faangem efaangefaange. 10 Owo Pailet kehm-e bahbe re, “A nehm bung a nama? Anv, a nehme kahn re, n kpi nsahm nyi m bahk-a ma yake, a fora, fere bel nsahm nyi m bahk-a ma kum go ekrosa?” 11 Jisos kehm-e faange re, “Ki li re Esowo bi ka-a nsahm, kehn a jolem ma bel nsahm nyi a bahk-m wulu. Nne no ko-m no, ba kak-a go abo, ye wo ma ga lim abiafem.” 12 Pailet wuku kan alum nyao o, á kehm kehme elsebe mbang ana nyi á bahk-e yehke yake. Jus kehm kpe kehme elrabe re, “A l'yehke nne noo yake, a nehm kpe jol ntem a ntul no Rom. Tibre nne awohng awohng no l'tong re, ye ntul wo, á li nnekv no ntul a Rom.” 13 Pailet wuku kan alum nyaa a me, á kehm soro yehke Jisos lohng a ne go elatahk, kehm fere song ji go ege eti elam, edi ji bo jo lung re Pevment ji bo jo lung go alum Hibru re Gabata. 14 Efung bio jolo efung bi bo jo toobo ebjing bi Pasova. Ngare efin Pailet kehm tongo Jus re, “Nyehnen, ntul ewahne gana!” 15 Bo kehm rabe re, “Tahmen a ne! Tahmen a ne! Song kumen ye go ekros!” Pailet kehm bahbe bo re, “Anv, ń kp'sebe re me n kum ntul ewahne go ekrosa?” Atubesi abalimajom kehm faange re, “Ntul awohng awohng e kpimm, sehngem ntul a Rom wo wo e kpi no.” 16 Pailet kehm yake Jisos ka bo re bo song kum-e go ekros. Bo kehm-e koko tahm a ne. 17 Jisos kehm solo ekros eje, song rehng go edi ji bo jo lung re edi nkpakesi, ji bo jo lung go alum Hibru re Golgota. 18 Owo bo kum-e lake go ekros. Ane abal ba bo tob kum bo o, nne noko go ejang eboblum, noko go ejang ebobkal, Jisos woomo go elka elka. 19 Pailet nyono mmonwer lake go ekros, no bungu re, “Jisos ji Nasaret, ntul no Jus wo ana.” 20 Aneb Jus gbalee ba jo lung mmonwer noo. Tibre edi ji bo kumu Jisos jolo kohlo go nla ejahbe. Mmonwer noo bo nyono go Hibru, fere nyon go Latin, fere nyon go Grik. 21 Atubesi abalimajom kehm tongo Pailet re, “A jolem nyono re Ntul no Jus, a jol nyono re, Nne noa bungu re, ye ntul no Jus wo.” 22 Pailet kehm faange re, “Ji m ma nyon, tiki li ana n nyono no.” 23 Ngare nyi nsoja nyio ma kum Jisos go ekros, bo kehm rodo nsol ebjing enye baange, bo ane ani. Bo t'tob rodo nsubu enye nyi bo tubu no, nyi ki bel nkon anyehng anyehng. 24 Bo kehm kehme elbungu atemtem re, “Nong, wahr k'kiimi nsubu nyia baange, wahr tub na elfaange, nyehn nne no bahke bele.” Jia limi, eji nwer Esowo l'lohko jol go etingitingi ana bungu no re, “Bobbaange nsol ebjing enyame, fere tub elfaange, gohro ko nsubu enyame.” 25 Owo nsoja nyio kehm limi ano. Nnyehn Jisos yiimi ona kohlo go ekros, a mmonannyehn, a Meri nkal a Klopas, go Meri ji lohng go Magdala. 26 Eji Jisos nyehne nnyehn, a nt'toono ewe no jo sahb kor-e kor yim kohlo o, á kehm tongo nnyehn re, “Nnenkal, nyehn mmon ewa o!” 27 Á kehm tongo nt'toono ewe noo re, “Nne no wa wo a.” Bomo ngare nyio asongo nt'toono noo kehm-e koko tahm a ne go ege etahk, á song lene tob-e. 28 Eji ma jol ano, Jisos k'kahn re, nsol kpee ebmal. Owo á kehm bungu re, “Alahb ma-m kor,” goji alum Esowo l'lohko jol go etingitingi. 29 Etu jekke ona, ji bo kake alahb ma bo kpo lung re evinegar. Bo kehm soro tub nd'dahng kak go alahb mao, tung go ebti, song koor-e go nnyo. 30 Jisos wo kan alahb mao, á kehm bungu re, “Ebmal,” kehm soro yake elkpin ene ka go, bahk emel kpo. 31 Efung bio jolo efung ebjing atoobo bi Esabat. Jus kehm song bahb Pailet, joare á bahke taame re, bo song banne ane ba kpaake go akros akpade, fere fono bo. Bo joom seb re, akv ebo kpe kpaake go akros egburu efung Esabat bi jolo etoono efung behko. 32 Nsoja kehm bake, ba banne nne noko no bo kum-e kohlo Jisos akpade, fere kpe banne nne noko akpade fvfo. 33 Eji bo ba rehng goji Jisos, bo sebe kahn re, yeblohko kpo. Bo we bannem akpade. 34 Nne a nsoja awohng kehm-e jahme elkong go ngbaange. Owo alung kehm lohngo, semme alahb. 35 Nne noo no nyehne ji ma lim o, ye wo yiimi ntianse, goji wahn fvfo l'tob taame. Ntianse enye lohko li go etingitingi. Á kp'kahne re, alum enye lohko li go etingitingi. 36 Nsol nyia kpee limi, goji nwer Esowo l'lohko jol go etingitingi, nyi bungu re, “Ekahb eje ajehng ajehng limm, ji bo bahke bahne.” 37 Edi nwer Esowo jehko kpe bung re, “Ane bahke seenge nne noo no bo jahm-e elkong.” 38 Josef ji lohng go Arimatia kehm song bahb Pailet, joare á bahke taame, á fono ekv ji Jisos tahm a ji. Josef jo toono Jisos mbehr mbehr, tib á jo fahle Jus. Pailet kehm taame, owo Josef kehm bake, ba fono ekv ji Jisos tahm a ji. 39 Nekodimos ji tohko je goji Jisos atv amehng kehm koko nsol nyi kpo v es'svv ji nno a nno, ba a nyi, nyi jo lub ana ekpa akang ji nnen. Nsol nyio bo ko anyane nya bo kpo lung re mmir, a aloe semme, kehm limi. 40 Bo ane abal abal kehm rodo ekv ji Jisos ba a ji, ba wohngo nsol nyio, kpennge abarebare abomo, ana eljini elkv alimi ni Jus jolo no. 41 Etahngga jolo edi ji bo kumu Jisos go ekros. Elahm jolo go etahngga jio, bi bo kala k'kak nnene. 42 Eji jolo efung bi bahke sene efung Esabat, tibre elahm bio jolo kpidi kpidi, owo bo kehm koko ekv ji Jisos song kak elahm bio.
1 Ngbokambang efung go erahde, Meri ji lohng go Magdala kehm fungu go elahm efungfu atv atv, kehm song nyehn eltal ni bo bannge bulu go nnyo elahm ma bannge noongo go nkpe. 2 Á kehm beke tahm goji Saimon Pita, a nt'toono Jisos noko go fvfo, no jo sahb k'kor Jisos, kehm song tong bo re, “Bobyehke Ntul ewahre go elahm fi a ne. E nehme kahn edi ji bo m-e song bum.” 3 Pita, a nt'toono noko, bo kehm mehle tahm gona elahm. 4 Bo ane abal abal jo be abahl. Nt'toono noko be sehnge Pita, gbo mbang song rehng go elahm. 5 Á kehm song kehme, jo fahng go elahm, kehm nyehne abarebare abomo nyao nong no go atahng. Á yelem go atahng. 6 Saimon Pita ji jo tob toon-e, kehm bake, ba sehng na sehng, yel go elahm, kehm nyehne abarebare abomo nyao nong no, 7 fere nyehn mbomo mi bo kpennge Jisos go esi. Noongem edi ajehng a abarebare abomo nyako. Mbomo mio mi bo kpennge Jisos go esi noongo elfehd. 8 Owo nt'toono noko no gbo mbang rehng go elahm, kehm tob yel song nyehn, fere taame. 9 Tibre wuku wuku bo tikem kahn edi nwer Esowo ji bungu re, á bahke nyahme go elkv. 10 Abat'toono Jisos bao kehm feere kehnge. 11 Meri yiimi eje kohlo elahm, jo ling. Eji á jo ling, á kehm kehme, jo fahng go elahm. 12 Á kehm nyehne enjel na ebal nyi kake abarebare nsol jehk no go edi jio ji bo kake ekv ji Jisos, noko ji edi ji esi Jisos noongo no, noko ji edi ji akpade nya Jisos noongo no. 13 Enjel nyio kehm-e bahbe re, “Nnenkal, jen ji wahnge a kp'lingi?” Á kehm faange bo re, “Tibre bobyehke Ntul ewame fi a ne. N nehme kahn edi ji bo bum-e no.” 14 Á bungu kan ana mal, á kehm soro keebe, nyehn Jisos yim no. Á kahnem re, Jisos wo. 15 Jisos kehm-e bahbe re, “Nnenkal, jen ji wahnge a kp'lingi? Nne awo a kp-e sebe?” Meri jo tiri re, nne no kpo lim eltum etahngga jio wo. Owo á kehm-e tongo re, “Nsoo, joare wo wo rod-e, tib-m edi ji a bum-e no, eji n l'song rod-e tahm a ne.” 16 Jisos kehm-e lungu re, “Meri!” Meri kehm keebe, kehm bungu go ellum Hibru re, “Rabbuni,” ji lohngo re nt'tibi. 17 Jisos kehm-e tongo re, “Ka ma lak abo, eji n kala tahm go ero goji Nsoo. Song goji abonanee, wo song tong bo re, n kp'tahme go ero goji Nsoo, no tob li Nso ejahne. N fi goji Esowo ebame, bi tob li Esowo ebahne.” 18 Meri ji lohng go Magdala kehm tahme song kpiri abat'toono Jisos, kehm tongo bo re, “Me n nyehn Ntul,” fere tong bo ana Jisos bungu no tong-e. 19 Efung b'nehm ona bi jolo ngbokambang efung go erahde, elgung nio ona, abat'toono Jisos woomo ekp'kpa ajehng, gbaange abutahk kpee tv elbo, tibre bo jo fahle Jus. Jisos kehm bake, ba yiimi go bo ellong, kehm kake bo nnyo re, “Belen elkoono!” 20 Á bungu kan ano mal me, á kehm tibi bo abo enye, a ngbaange. Abat'toono ebe bele eyebatahng sehng, eji bo nyehne Ntul abo. 21 Jisos kehm kpe kak bo nnyo re, “Belen elkoono! Ana Nsoo tum-m no, ano wo fvfo n kp-n tob tum.” 22 Á bungu kan ano mal me, á kehm soro fahle elfeb wohngo bo, kehm bungu tong bo re, “Taaren Etingi Etohko! 23 Ń l'tahm ka nne go ege abiafem, yeblohko bel eltahmeka. Ń tohko tahm ka nne go ege abiafem, á bahke sake ano go ege abiafem.” 24 Tomos ji woomo go ellong abat'toono Jisos, ewubu ane abal, ji bo jo lung-e re Ayafele, á jolem a bo ona ngare nyi Jisos ba no. 25 Owo abat'toono Jisos bako kehm-e tongo re, “Wahr ebnyehn Ntul.” Á kehm faange bo re, “Tohko tiki jol re, n nyehne anv nya abang aba go ege abo, nya bo kum-e no, fere kooro ebnyohkobo go anv nyao, fere lak ebo ebame go ege a ngbaange, n nehm tiki taame.” 26 Eji ma kang nfung enehkeni, abat'toono Jisos kpe je edi jio. Tomos jolo a bo o fvfo. Bo ta abutahk kpee. Jisos kehm kpe ba lohng go bo ellong, kpe kak bo nnyo re, “Belen elkoono!” 27 Á kehm tongo Tomos re, “Koor-m ebnyohkobo a, wo fere nyehn abo enyame. Tanne ebo eba, wo lak-m go ngbaange. Ka kpe faabe, taame na taame!” 28 Tomos kehm-e faange re, “Wo wo li Ntul ewame, a Esowo ebame!” 29 Jisos kehm-e bahbe re, “Wobtaame tib eji a ma-m nyehna? Elfuulu li ka ane ba ki nyehn go amahr, bo taame na taame.” 30 Jisos limi akpokosi gbalee go esamahr abat'toono ebe, nya ki wob nwer nyia. 31 Nyaa bo nyono, goji ń l'taame re, Jisos wo li Kraist ji Mmon no Esowo. Ń l'taame, ḿ bahke bele elkpin go ege a mbing.
1 Owo Jisos kehm kpe song tib elne go ellong abat'toono ebe go eto ji Taibirias. Ana wo á tibi elne. 2 Saimon Pita, a Tomos ji bo jo lung-e re Ayafele, go Natanael ji lohng go Kena ji Galili, a abon ba Sibidi, go abat'toono ebe bako na abal, bo ane kpee jolo o edi ajehng. 3 Saimon Pita kehm tongo bo re, “N kp'tahme nsahre.” Bo kehm-e faange re, “E bahke tob tahm toon-a.” Bo kehm soro tahm, song yel go egbang. Jol ejumjum bo bobem atv mao ona. 4 Eji efungfu yahke se, Jisos kehm bake ba yiimi go nkpe eto. Abat'toono ebe we liingem re, Jisos wo. 5 Jisos kehm bahbe bo re, “Abon ebame, ḿ b'bob nsahra?” Bo kehm-e faange re, “E'ee, ejumjum e bobem.” 6 Jisos kehm tongo bo re, “Yaken erim ebahne kak alahb go ejang eboblum bi egbang, ḿ bahke bobo nsahre.” Owo bo kehm limi ano. Bo kpeem ma tohng erim bio, tibre nsahre ruru go erim sehng. 7 Nt'toono no jo kor Jisos s'sehng, kehm tongo Pita re, “Ntul ewahre wo o!” Saimon Pita wuku kan a re, Ntul wo, á kehm soro kak nsol enye go ege a ngubjing, nyi á yehke no lim eltum, kehm soro yehb yel go alahb. 8 Abat'toono Jisos bako fingi egbang, ba rehng go nkpe egbuk. Bo jo tohngo erim bi nsahre ma gbo gbalee, tibre nkpe egbuk gaam jol fee, jolo ejum eyake ego ewaya ajehng. 9 Eji bo rehnge go egbuk, bo kehm nyehne agun nya bo fohko go akal nsehng, fere nyehn nsahre kun go akal ngun, a ebred. 10 Jisos kehm tongo bo re, “Koono nsahre nyindiki ba a nyi, nyi ń kp'na bobo.” 11 Owo Saimon Pita kehm tahme song tohng erim bio ona, lohng a bi go egbuk. Erim bio nsahre ruru sehng. Nfange enyamalahb bio jolo nnyamalahb atahl asehma kunu ewubu a nnyamalahb era. Jol eji nsahre ruru rur ano, erim yarem. 12 Jisos kehm tongo bo re, “Baan, wahn ba bob ala go elehke ejum jia.” Jol nt'toono ewe awohng awohng jolem, no sahbe no bahb-e re, “Wo nne awo?” Tibre bo jo k'kahn re, Ntul a Jisos wo. 13 Jisos kehm bake ba rod ebred jio ka bo, tob rod nsahre nyio ka bo. 14 Nkpel nyia nyi biingi nkpel era nyi Jisos tibi abat'toono ebe elne, bomo eji á nyahme go elkv. 15 Eji bo ma li nsol alehke mal, Jisos kehm bungu tong Saimon Pita re, “Saimon ji mmon a Jon, anv, n kp-a koro sehnge ane bakoa?” Pita kehm faange re, “Ee Ntul, a kp'kahne re, a kpo kor-m sehng.” Jisos kehm-e tongo re, “Le abon ejoro ebame!” 16 Jisos kehm-e kpe bahb go nkpel ebal re, “Saimon ji mmon a Jon, anv, n kp-a kora?” Pita kehm-e faange re, “Ee Ntul, a kp'kahne re, a kp-m koro.” Jisos kehme tongo re, “Baabe ejoro ebame!” 17 Jisos kehm-e kpe bahb go nkpel era re, “Saimon ji mmon a Jon, anv, n kp-a kora?” Pita atahng kehm-e moongo, tib eji Jisos bahb-e nkpel era re, “N kp-a kora?” Á kehm faange re, “Ntul, a kp'kahne ejum ajehng ajehng. A kp'kahne re, a kp-m koro.” Jisos kehm-e tongo re, “Le ejoro ebame! 18 Etingitingi, n kp'bungu tong-a re, Ngare nyi a jolo njangkun, a jo gbaange egbaange eja go ebun, jo je edi ajehng ajehng ji kor-a no. Eji a ma kul, a bahke tanne abo enya. Nne nondiki bahk-a gbaange egbaange eja go ebun, ko-a tahm a na go edi ji ki-a kor re wo je.” 19 Jisos bungu alum nyaa re, á tib Pita elkohn elkv ni á bahke kpoko, ka Esowo ellub. Owo Jisos kehm-e tongo re, “Tahm toon-m!” 20 Pita kehm keebe, nyehn nt'toona Jisos noko, kpi bo toono, no jo kor Jisos s'sehng, no ji kohlo Jisos, eji bo jo li nsol alehke elgung, fere bahb-e re, “Ntul, nne awo li nne no bahk-a gungu?” 21 Eji Pita nyehn-e no, á kehm bahbe Jisos re, “Ntul, nne noa mee?” 22 Jisos kehm faange Pita re, “L'kor-m re á jol a, tete me n feere ba, elam eja sang, wo toon-m na toono!” 23 Eka jia kehm yeere na yeere go ellong aneb Esowo re, nt'toono a Jisos noo nehm kpo, jol eji Jisos ki-e t'tong ejumjum re, á nehm kpo. Alum nya Jisos bungu no li re, “L'kor-m re á jol a, tete me n feere ba, elam eja sang.” 24 Nt'toona Jisos noo wo kp'yiimi ntianse go nsol nyia a. Ye wo fere nyon nwer nyia. E kp'kahne re, alum enye nya á yiimi ntianse lohko li go etingitingi. 25 Nsol nyehko nyia gbalee, nyi Jisos limi no. Li re bo nyono nsol kpee kak go awer, me m bum re, njini ebse sehng re awer nyaa kpee jol.