The New Testament of our Lord and Saviour Jesus Christ
1 Ebuku y'ekegori kiaye Yesu Kristo, omwana o Daudi, omwana o Ibrahimu. 2 Ibrahimu akamoibora Isaaka, n'Isaaka akamoibora Yakobo; na Yakobo akamoibora Yuda nabamwabo; 3 na Yuda akamoibora Perezu na Zara ase Thamaru; na Perezu akamoibora Hezron; na Hezron akamoibora Ramu; 4 na Ramu akamoibora Aminadabu; n'Aminadabu akamoibora Nahashon; na Nahashon akamoibora Salumon; 5 na Salumon akamoibora Boazu ase Rahabu; na Boazu akamoibora Obedu ase Ruth; n'Obedu akamoibora Yese; 6 na Yese akamoibora omoruoti Daudi. Na Daudi akamoibora Sulemani asare oyio orenge omokungu bw'Uria; 7 na Sulemani akamoibora Rehoboam; na Rehoboam akamoibora Abia; n'Abia akamoibora Asa; 8 n'Asa akamoibora Yehoshafatu; na Yehoshafatu akamoibora Yoram; na Yoram akamoibora Uzia; 9 n'Uzia akamoibora Yotham; na Yotham akamoibora Ahazu; n'Ahazu akamoibora Hezekia; 10 na Hezekia akamoibora Manase; na Manase akamoibora Amon, n'Amon akamoibora Yosia; 11 na Yosia akamoibora Yekhonia nabamwabo, erio kare rigoro bakong'anyigwa gochia Babulon. 12 Erio as'okong'anyigwa gochia Babulon, Yekhonia akamoibora Shealitieli; na Shealitieli akamoibora Zerubabeli; 13 na Zerubabeli akamoibora Abihudu; n'Abihudu akamoibora Eliakim; n'Eliakim akamoibora Azoro; 14 n'Azoro akamoibora Zadoko; na Zadoko akamoibora Akhim; n'Akhim akamoibora Eliudu; 15 n'Eliudu akamoibora Eleazaru; n'Eieazaru akamoibora Mathan; na Mathan akamoibora Yakobo; 16 na Yakobo akamoibora Yusufu, omosacha o Mariamu omoiborete Yesu okorokwa Kristo. 17 Igo biria chigori bionsi korwa Ibrahimu goika Daudi bire ebigori ikomi nabine; na korwa Daudi goika riria okong'anyigwa gochia Babulon nebigori ikomi nabine; na korwa koria okong'anyigwa kwa Babulon goika Kristo nebigori ikomi nabine. 18 Na Yesu Kristo okoiborwa kwaye nigo kwarenge iga; rigoro Mariamu ng'ina ariereire boko na Yusufu, bataraikana ang'e, akarorekana ore morito as'Omoika Omochenu. 19 Noria omosacha oye, oria Yusufu, ekiagerete igarenge omonto oboronge, tarigetie komoa obosoku, akarengereria komotiga bobisi. 20 Rigoro arenge koyarengereria aya, ekero ekio rilaika ri'Omonene rikamochiera as'okorota, rikamotebia, Aye Yusufu, omwana o Daudi, toiroka komoira Mariamu mokao, ekiagera ekio giatongirwe oborito asare nekio Omoika Omochenu. 21 Nere naibore omwana omoisia; nomoroke erieta riaye Yesu; naki nere oratorie abanto baye nebibe biabo. 22 Naya onsi igabaire nario riraikerane eriakwanetwe n'Omonene as'omonwa bw'omobani, okobora, 23 Rigereria, enyaroka nebe morito, naende naibore omwana omoisia, Nere erieta riaye nabamoroke Imanueli; engecho yaye kariraonchorwe, Nyasaye amo naintwe. 24 Na Yusufu agachia koboka korwa ase chitoro chiaye agakora buna achigetwe ne rilaika ri'Omonene; akaira mokaye; 25 nonya komanya tamomanya goika kamoiboire omwana omoisia: akamoroka erieta riaye Yesu.
1 Nekero Yesu aiboretwe aria Bethilehemu ya Boyahudi, as'amatuko omoruoti Herode, ekero ekio abanto abang'aini bakorua ensemo ya mocha, bagacha Yerusalemu, bakobora, 2 Ng'ai are oria oiborwa omoruoti bw'Abayahudi? ekiagera eng'enang'ani yaye eyio twayerorire ase mocha, nigo twachire tonyare komosasima. 3 Ochia koigwa aria, omoruoti Herode akaondoka, ere na Yerusalemu yonsi amo nere. 4 Erio kabasangereirie abagaka abanene nabariki bonsi, akababoria, ng'ai Kristo agocha koiborerwa? 5 Barabwo bakamotebia, Ase Bethilehemu ya Boyahudi, naki nabo arigetwe nokoboko kw'omobani ogotcha, 6 Naye Bethilehemu, ense ya Yuda, Tori moke gatigati y'abanene ba Yuda: Naki korwa asore aye nache oyokogamba Orache kobagambia abanto bane Isiraeli. 7 Erio Herode akabarangeria bobisi baria abanto abang'aini, akabarigia ekeene ekero eng'enang'eni eria yarorekana. 8 Akabaira goika Bethilehemu, akabatebia, Genda morote mono as'amang'ana omwana oria; aba momorora, moche gontebia, nainche ninyare kogenda komosasima. 9 Baria bachia koigwa amang'ana omoruoti bakagenda; nero eng'enang'eni bakayerora mocha, eria, ebatang'aine, goika ekagenda egatenena igoro aroro as'omwana oria omoke arenge. 10 Bachia koyerora eria eng'enang'eni, bakagoka nomogoko omonene mono, 11 Bachia gosoa enyomba bakarora omwana amo na Mariamu ng'ina, bakagwa inse, bakamosasima; bagakunora enibo yabo, bakamokwaneria nebinto ebiya, ethahabu, ubani, na manemane. 12 Erio nyuma kabakurerwa na Nyasaye as'okorota tibairana ase Herode, bakabwatia enchera eng'ao bakagenda sobo. 13 Erio kabamanoire baria, oyo nere, rilaika ri'Omonene, rikamochiera Yusufu as'okorota rikamotebia, Imoka korwa agwo, omoire omwana na ng'ina, otame gochia Misiri, oikaranse aroro goika ningotebie, naki Herode namorigie oria omwana anyare komoita. 14 Nere agatenena akamoira omwana oria na ng'ina, akaimoka botuko, akagenda Misiri; 15 akamenya aroro goika Herode agakwa, rinyare goikerana erio riatebetwe n'Omonene as'omonwa bw'omobani, korwa Misiri nkamorangeria Omwana one. 16 Erio Herode, akerora osekereirwe nabanto baria abang'aini, akaba nekeririanda mono, agatoma abanto, akabaita abana bonsi barenge Bethilehemu nechinsemo chiaye, aase onsi, abakorire emiaka ebere nabatarakora emiaka ebere, buna ekero akeragete nabanto baria abang'aini. 17 Ekero ekio rigaikerana riria riatebetwe as'omonwa bw'omobani Yeremia, ogoteba, 18 Rama kwaigwekanire eriogi, Okorera nogokura; Rakieli nkobarerare abana baye; Tancheti akirigwe, ekiagera tibario. 19 Na Herode erio gakure, rora, rilaika ri'Omonene rikamochiera Yusufu aria Misiri as'okorota, 20 rikamotebia, Imoka, omoire omwana na ng'ina, mogende ense y'Isiraeli: naki bakure baria barenge korigia obogima bw'omwana. 21 Akaimoka akaira omwana na ng'ina akagenda ense y'Isiraeli, 22 korende agachia koigwa ng'a Arikhelau obaire omoruoti Boyahudi ribaga ria Herode ise, akaba nokoiroka as'okogenda aroro; korende erio gakurerwa na Nyasaye as'okorota, akagenda ensemo ya Galili, 23 akagenda agaikaransa omochie oyomo okorokwa Nazareti; rinyare goikerana erio riatebetwe nomonwa bw'omobani, ng'a, igo ararokwe Omonazari.
1 As'amatuko aria akaoroka Omobatisi Yohana, okorandia arenge as'eroro ya Boyahudi, ogoteba, 2 Onchoka, ekiagera obonda bw'igoro bwaikire ang'e. 3 Naki oyio nere bwatoretwe as'omonwa bw'omobani Isaya, are goteba, Eriogi ri'oyokoaka egeturi eroro ime: Rosia enchera y'Omonene; Rongeyia chinchera chiaye. 4 Nomonyene oria Yohana chianga chiaye are kobeka nechia amarionya engamia, ore norokini rwe riyo kenema kiaye, nendagera yaye nechingige noboke bw'orosana. 5 chingaki echio akaba oria ngochierware nabanto aroro, bakorua Yerusalemu na Boyahudi bwonsi, nechinsemo chia Yorodan chionsi; 6 bakobatiswa nere as'oroche rwa Yorodan, aroro bagoteba ebibe biabo. 7 Ochia korora abanto abange as'Abafarisai n'Abasadukai bakomochiera as'okobatisa kwaye, akabatebia, Inwe oroiboro rwe ching'iti. ning'o obakurerete gotama endamwamu egocha-gocha? 8 Gaki ama amatunda agwenerete ogoonchoka: 9 nonya timonagoteba emioyo yaino ime, ng'a, Ntore na tata oito Ibrahimu: naki nabatebirie, ng'a namagena aya Nyasaye nanyare gokora abana as'Ibrahimu. 10 Iga bono egesire kiabekirwe as'emeri y'emete: ker'omote otameti amatunda amaya igo obutorwa otugutwa as'omorero. 11 Inche as'amache nkobatisera as'engecho y'ogoonchoka: korende ere orache nyuma yane nare nechinguru kombua, ntagwenere koimokeria ebikoroto biaye; nere orabatise n'Omoika Omochenu, nomorero. 12 Oroieru rwaye nkoboko kwaye abwate, nekeoreri kiaye nagesibie: nengano nayebongererie gochia kiage; korende nayasambe amatete as'omorero otakorimeka. 13 Erio Yesu akarua Galili, akagenda akamoorokera Yohana, as'oroche rwa Yorodan, anyare kobatiswa nere. 14 Korende Yohana akamotanga, ogoteba, Inche ndigetie kobatiswa naye, naye kogocha asende inche? 15 Yesu akamoiraneria, akamotebia, Ancha iga bono; naki naboigo etogwenerete goikerania oboronge bwonsi. Erio agwo akamwanchera. 16 Na Yesu erio abatiswa agatira korwa as'amache; erio nario igoro akamomanokera akayorora Omoika o Nyasaye ogoika buna riruma, rigocha igoro asare. 17 Neriogi rikorua igoro rigoteba, Oyo nere Omwana one, omwanchi one, asare ere nimogokerete.
1 Erio Yesu akairwa eroro ime n'Omoika Omochenu, gochia gotemwa na saitani. 2 Rigoro eng'atire emebaso emerongo ene omobaso nobotuko, nyuma enchara ekamoroma. 3 Akagenda omotemi oria akamotebia, Onye naye Omwana o Nyasaye, yatebie amagena aya abe amakima. 4 Nere akamoiraneria akamotebia, Narikire, Omonto takoba nobogima as'obokima bwoka, nigo akoba nobogima ase kera ring'ana rikorua omonwa o Nyasaye. 5 Erio oria saitani akagenda nere goika omochie omochenu; akamobeka igoro as'egesuri gie hekalu egetambe mono. 6 Akamotebia, Onye naye Omwana o Nyasaye, etugute gochia inse: naki narikire, Ere nabachike amalaika aye asore: Naende nabakoimokie as'amaboko abo, Tobaisa kogochwa okogoro kwao ase rigena. 7 Yesu akamotebia, Naende narikire, Tomotema Omonene Nyasaye oo. 8 Saitani akamoira naende, akagenda nere as'egetunwa egetambe mono, akamworokia amanda onsi ay'ense, nobonene bwaye; 9 akamotebia, Ebio bionsi ninkoe, korantung'amere nagonsasima. 10 Erio Yesu akamotebia, Genda bwoo Saitani: ekiagera narikire, Mosasime Omonene Nyasaye oo, omokorere ere bweka. 11 Erio saitani akamotiga; na rora, amalaika bagacha bakamokorera. 12 Yesu ochia koigwa ng'a Yohana obekirwe echela, akaimoka akagenda Galili. 13 Akaimoka korwa Nazareti, akagenda, agaikaransa Kaperinaum, noro nomochie ore as'enyancha as'amabebe a Zabulon na Nafutali: 14 rinyare goikerana eriatebetwe nomonwa bw'omobani Isaya, ogoteba, 15 Ense ya Zabuloanense ya Nafutali, Enchera egochia enyancha ng'umbu ya Yorodan, Galili y'ebisaku; 16 Abanto abamenyete omosunte ime Bakarora omobaso omonene, Nabaikaransete ense as'ekiriri ki'amakweri, Omobaso obacheire barabwo. 17 Korwa ekero ekio Yesu agachaka korandia nagoteba, Onchoka, naki bwaikire ang'e obonda bw'igoro. 18 Nere ochia kona goetanana chinsemo chi'enyancha ya Galili, akarora abanto habere, omonto noyomwabo, Simon okorokwa naende Petero, n'Anderea oyomwabo, bakoruta ekeonga enyancha ime; ekiagera nabarubi barenge. 19 Akabatebia, Nchuo montunyane inche, nainche nimbakore mobe abarubi b'abanto. 20 Na barabwo bagatiga ebionga biabo erio kegima, bakamotunyana. 21 Erio akagenda korwa aroro, akarora habere naende, omonto noyomwabo, Yakobo omwana o Zebedi, na Yohana omwabo, bare obwato ime amo na Zebedi is'obo, bakorosia ebionga biabo; akabarangeria. 22 Na barabwo bakabotiga obwato boria, bakamotiga is'obo, bakamotunyana. 23 Erio Yesu nigo arenge kona goetanana as'ense engima ya Galili, okworokereria ase chisunagogi chiabo, okorandia amang'ana amaya ay'obonda, okogwenia namarwaire amanene, noborwaire bwonsi bwarenge as'abanyene ense. 24 chinkuma chiaye chigakuma ense yonsi ya Sham; bakamoretera bonsi abarenge abarwaire, babwatetwe noborwaire bondebonde, nobororo, nababwatetwe nebirecha, nabare chiosi, nabare bakoiguswa; akabagwenia. 25 Ekamotunyana emeganda emenge bakorua Galili, na Dekapoli, na Yerusalemu, na Boyahudi, na ng'umbu ya Yorodan.
1 Ochia koyerora emeganda eria, akarina egetunwa; na rigoro aikaransire, agachierwa naborokigwa baye; 2 akamanora omonwa oye, akaborokereria, ogoteba, 3 Mbare negesio abanyene obotaka bw'omoyo, ekiagera obonda bw'igoro nobwabo. 4 Mbare negesio abaichanete; ekiagera nabwo bagocha koremigwa. 5 Mbare negesio abare nobwororo: ekiagera barabwo nabaire ense. 6 Mbare negesio abare nenchara nerang'o ya boronge: ekiagera barabwo nabaigorigwe. 7 Mbare negesio abare namabera ekiagera barabwo nababerwe. 8 Mbare negesio abachenu emioyo: ekiagera barabwo nabamorore Nyasaye. 9 Mbare negesio abagokora omorembe: ekiagera barabwo nabarokwe abana ba Nyasaye. 10 Mbare negesio abarosigwe as'oboronge: ekiagera obonda bw'igoro nobwabo. 11 More negesio inwe, ekero bakobarama nakobarosia, nokobatebera kera ring'ana ribe as'oborimo, konye nas'inche. 12 Mogoke, nogosasoka: ekiagera eng'eria yaino nenene aria igoro. Naki naboigo babarosetie ababani barenge ritang'ani riaino. 13 Inwe ninwe omonyo bw'ense: korende noria omonyo kosarekire, as'enchera ki orabekwe omonyo? Togwenereti gento kende tatiga ogotugutwa isiko, otiringwe nabanto. 14 Inwe ninwe omobaso bw'ense. Omochie tokobiseka goikaransete as'egetunwa igoro. 15 Nonya nabanto tibagotongia etaya nakoyebeka egetonga ime; korende nas'ekebekerero kiaye, ebaa omobaso bonsi abare nyomba ime. 16 Nomobaso oino obare boigo as'abanto bonsi, goika bayerore emeremo yaino emiya, bamotogie Iso oino ore igoro. 17 Timokaga ng'a nachire inche gosaria ogochika, gose chiria chibuku chi'ababani: tincheti as'ogosaria, korende as'ogoikerania. 18 Naki nekeene nabatebirie, ng'a goika igoro nense biete, tegoeta enuguta eyemo nonya negeke ekemo as'ogochika, goika bionsi biikerane. 19 Gaki omonto bwensi orasarie amachiko aya, erimo as'aya are amake, nakworokereria abanto boigo, oyo narokwe omoke mono as'obonda bw'igoro: noyorayakore nakoyorokereria, oyo nere orarokwe omonene as'obonda bw'igoro. 20 Naki nabatebirie inwe, obwo oboronge bwaino botabueti obwo bw'abariki n'Abafarisai, timogosoa nonya ng'ake as'obonda bw'igoro. 21 Mwaigwete ng'a abanto ba kare mbatebetigwe, Toita; noyo oraite nabe omonto okonacherwa ekina ki'ogokwa. 22 Ko inche nabatebirie ng'a ker'onde omo orageche oyomwabo, oyo nere orabe omonto okonacherwa ekina; noyoramomogorere oyomwabo, nabe omonto bw'ebarasa (agambigwe); noyoramoroke oyonde, Omokayayu, nomogwenere omorero o chaanam. 23 Gaki gokoreta esadaka yao as'esadaka ekoruerwa, gokwainyoire agwo ng'a oyomino nare nering'ana asore, 24 yetige esadaka yao agwo as'esadaka ekoruerwa, genda ritang'ani, mwanchane noyomino, erio irana orue esadaka yao. 25 Anchana nomogosoeri oo bwango, ekero ore nere 'nchera, tabaisa gokoira as'omogambi, nomogambi akobeke as'okoboko gw'esagini, obaise kobekwa echela ime. 26 Nekeene nagotebirie, tokorua aroro nonya ng'ake goika oakane ebesa y'omoerio. 27 Mwaigwete ng'a riatebetwe kare, Totomana: 28 korende inche nabatebirie, ng'a ker'onde omo oramorigererie omokungu as'ogotomana, osaririe nere egeka ekio as'omoyo oye. 29 Naye onye eriso riao ri'okoboko gw'okorio rigokogocha, rirusie oritugute are naye; naki nogwenerete gesire ekimo kiao ekemo, kobua gotugutwa omobere oo omogima ase chaanam. 30 Konye gokogochwa nokoboko kwao gw'okorio, konache ogotugute are naye; naki nogwenerete gesire ekimo kiao ekemo, kobua gotugutwa omobere oo omogima ase chaanam; 31 naende riatebetwe, Oyoratige mokaye, amoe rirube ri'okomotiga. 32 Korende inche nabatebirie, ng'a ker'onde omo oratige mokaye, otanga nas'engecho y'obotomani, nkomobekare as'ogotomana; noyoramonyuome oyotigirwe otomanire. 33 Naende mwaigwete ng'a mbatebetigwe abanto ba kare, Toria emuma ya bosa, korende mochiikerie Omonene chiira chiao. 34 Korende inche nabatebirie, Totiana as'egento gionsi; tari as'igoro, ekiagera nekerogo kia Nyasaye; 35 gose as'ense, ekiagera nao agotorera amagoro aye; gose ase Yerusalemu, ekiagera nomochie bw'Omoruoti omonene. 36 Gose as'omotw'oo totiana, ekiagera tokonyara gokora orochugu oromo robe ororabu gose oromwamu. 37 Amang'ana aino abe, Ee, ee; Taibo, taibo; naki ayakomenteka as'aya, ig'akorua as'oria omobe. 38 Mwaigwete ng'a mbatebetigwe, Eriso as'eriso, erino as'erino; 39 ko inche nabatebirie, Timobaisa gotiemana noria omobe; korende omonto karagoake emboto y'okorio, moonchorere neya kabere. 40 Nomonto origetie gogosoera nakoira eganchwa yao, motigere negoti nero. 41 Nomonto ogokoira nechinguru emaili eyemo, genda nere goika chimaili ibere. 42 Oyo kogosaba moe, noyo origetie singo, tomoa amagega. 43 Mwaigwete mbatebetigwe, Ancha omogisangi oo, nomobisa oo omogeche. 44 Ko inche nabatebirie, Banche ababisa baino, mobasabere ababarosirie; 45 monyare koba abana b'Iso oino ore igoro: ekiagera ere nigo akobabareria omobaso oye, ababe nabaya, abatweria embura abakori boronge nabatakori boronge. 46 Naki kamoranche ababanchete, eng'eria ki more nero? Inee, nonya mbaria bakobanga tibari gokora bo? 47 Nainwe kamorakwanie abamino boka, mbuya ki mwamenta? nonya mbaria ebisaku tibari gokora bo? 48 Gaki inwe namobe abasera, buna Iso oino ore igoro are omosera.
1 Mwerende timokora obuya bwaino as'obosio bw'abanto babarore, naki komogokora ayio, timori neng'eria as'Iso oino ore igoro. 2 Gaki gokorua esadaka, tobugia eng'oma as'obosio bwao, buna baria abang'ainereria bagokora ase chisunagogi nase chinchera chinene chi'emechie, korigia kobakwa nabanto; nekeene nabatebirie, banyorire eng'eria yabo. 3 Korende aye gokorua esadaka, nonya nokoboko kwao gw'okobee tikomanya eki kogokora okoboko kwao gw'okorio. 4 Enyare koba bobisi esadaka yao, n'Iso oyokorora bobisi nakoakane. 5 Kamogosaba, timokoba buna baria abang'ainereria: ekiagera barabwo igo banchete gosaba nagotenena ase chisunagogi nas'amatabekania e chinchera, banyare kororwa nabanto. Nekeene nabatebirie, banyorire eng'eria yabo. 6 Korende aye gogosaba, soa enyomba yao ime, naende kagwasiekire egesieri, mosabe Is'oo ore bobisi; na Is'oo oyokorora bobisi nakoakane. 7 Korende kamogosaba timogotererera amang'ana a bosa buna baria b'ebisaku: naki barabwo nigo bagokaga ng'a nabaigugwe as'amang'ana abo are amange. 8 Gaki timoba omogwekano oyomo nabarabwo: naki Iso oino oyamanyire aya morigetie, rigoro motaramosaba. 9 Inwe gaki saba iga: Tata oito ore igoro, erieta riao ribe buya, obonda bwao boche. 10 Obwanchani bwao bokoreke ense, buna bwakoretwe igoro. 11 Toe ntwe rero endagera yaito. 12 Naye otige ebibe biaito buna intwe twatigire abagotokora bobe. 13 Togotoira as'ogotemwa, ko tokonye noria omobe. Naki obonda, nechinguru, nobonene, nobwao, emiaka nemiaka. Amina. 14 Naki inwe kamorababere abanto ogosaria kwabo, n'Iso oino o igoro nababere inwe. 15 Korende motababereti abanto ogosaria kwabo, n'Iso oino takobabera ogosaria kwaino. 16 Komokweng'ata timokonyiria amasio aino buna baria abang'ainereria, ekiagera barabwo nigo bakonyiria amasio abo banyare kororwa nabanto ng'a barabwo mbeng'atete. Nekeene nabatebirie, banyorire eng'eria yabo. 17 Korende aye gokweng'ata, eake amaguta omotwe oo, bwesibie nobosio bwao. 18 Tobaisa kororwa nabanto ng'a mbweng'atete, ororekane as'Is'oo ore bobisi; na Is'oo, oyokorora bobisi, nakoakane. 19 Timogacha chinibo chiaino as'ense, as'ebio ebigwankwa nobobosu bigosaria, nabaibi bakobochora nakoiba: 20 korende chinibo chiaino chigache igoro, as'egento getagosareka as'ebigwankwa gose obobosu, nabaibi tibakobochora nonya nkoiba. 21 Naki as'enibo yao ere, nenkoro yao nao ekoba. 22 Etaya y'omobere neriso; konye eriso riao rire buya, nomobere oo bwonsi nobe nomobaso. 23 Korende, eriso riao onye rire ribe, nomobere oo ig'orabe omosunte bwonsi. Noria omobaso ore ime asore, onye obaire omosunte, omosunte nobe omonene naki! 24 Onde tari oranyare kobakorera abanene habere, naki nageche oyomo naende nanche oyonde, gose nabwatane noyomo nagochaya oyonde. Timokonyara gokorera Nyasaye nenibo. 25 As'aya nabatebirie inwe, timona korengereria as'obogima bwaino, ekimorarie, gose ekimoranywe; gose as'emebere yaino, ekimorabeke. Inee, boria obogima tibori obuya kobua endagera, noria omobere tori omuya kobua chianga? 26 chirigererie chinyoni chi'igoro; chirochio chitasimeka, chitagesa, chitasangereria as'ebiage; na chirochio Iso oino o igoro nere ngochirageriare. Inee, inwe timogwenereti kobua chirochio? 27 Korende ning'o asemore oranyare as'ogwechanda komenta as'obotambe bwaye ekerengo ki'okoboko okomo? 28 Na chiria chianga na chirochio, naseki mogochiechandera? Inyora ebisicha bi'ebirubo, buna bikomera; tibirigokora emeremo nonya tibirigwesisa; 29 korende nabatebirie, nonya Sulemani nobonene bwaye bwonsi, tabegete chianga buna kere egesicha ekemo ki'ebi. 30 Na boria obonyansi bw'ekerubo, bokororekana rero, na mambia bwarutwa as'endobe, onye Nyasaye okobobisia boigo, takomenta mono igo kobabisia inwe, inwe abake b'okwegena? 31 Gaki, timogwechanda, mogoteba, Ninki torarie? gose, Ninki toranywe? gose, Ninki torabeke? 32 Naki ebi bionsi bikorigigwa na baria b'ebisakusaku; naki Iso oino o igoro omanyire buna morigetie chi bionsi. 33 Korende ritang'ani rigia obonda bwa Nyasaye noboronge bwaye, nebi bionsi namomenterwe inwe. 34 Gaki timogwechandera ay'ankio: ekiagera ankio nariechande rinyene. Bwaisanire rituko obobe bwaye.
1 Timogambia, monyare kogambigwa. 2 Naki ekina mokonacha, nakio morache konacherwa. Nekerengo mokorengera, nakio morarengerwe. 3 Naye inki ogokerigereria ekeogoto kere as'eriso ri'oyomino, ko tomanyeti omoribo ore eriso riao aye? 4 Gose naki oratebie oyomino, Ntiga nkorusie ekeogoto ekio as'eriso riao, nomoribo nore eriso riao aye? 5 Omong'ainereria, erusie aye omonyene omoribo ore eriso riao, nario orarore buya komorusia oyomino ekeogoto kere eriso riaye. 6 Ekere ekiya timoa chisese, gose timoitera chiruru chiaino as'obosio bwe chingurue, tichicha gochitacha namagoro abo, naende chibaonchokere chibatandore. 7 Saba, namoegwe, rigia namorore; tura namoigorerwe. 8 Naki onde bwonsi ogosaba nkonyorare, noyokorigia nkororare, noyogotura naigorerwe. 9 Gose ning'o ore asemore, orasabwe obokima nomwan'oye, oramoe rigena? 10 Gose, oyogosabwa enswe, oramoe eng'iti? 11 Gaki, inwe abamore ababe, onye momanyete kobaa abana baino ebiegwa ebiya, inee, n'Iso oino ore igoro takomenta mono kobaa amaya abwo bakomosaba? 12 Gaki ande onsi moyarigetie mokorerwe nabanto, nainwe bakorere bo. Ekiagera ayio naro ogochika nababani. 13 Soa inwe as'egesieri kere ekegote; ekiagera egesieri nekegare, nenchera nengare ekogenda obosirij nabange bakogesoa ekio. 14 Ekiagera egesieri nekegote, nenchera nenyerere ekogenda as'obogima, nabakonyerora nabake. 15 Mwerende nababani b'oborimo, barabwo abwo bagocha asemore babegete chingobo chie ching'ondi, nabarabwo ime nigo bare chisese chi'orosana chikoria kegima. 16 As'amatunda abo namobamanye. Inee, mogotwa amasabibu as'amagwa? gose amako as'amageri? 17 Naboigo omote bwonsi omuya okwama amatunda amaya, nomote omobe nigokwama amatunda amabe. 18 Omote omuya tokonyara kwama amatunda amabe, nonya nomote omobe tokonyara kwama amatunda amaya. 19 Omote bwonsi otameti amatunda amaya nigokobutorwa otugutwa endobe. 20 Naboigo, nas'amatunda abo morabamanyere barabwo. 21 Tari omonto bwonsi ogontebia, Omonene, Omonene, orasoe ime as'obonda bw'igoro, korende noyogokora obwanchani bwa Tata one ore igoro. 22 Ase rituko riria nabange barantebie, Omonene, Omonene, intwe titware gokora obobani as'erieta riao? nas'erieta riao goseria ebirecha, nas'erieta riao gokora ogokumia okonge? 23 Nainche erio nimbatebie boronge abanto baria, Timbamanyeti inwe nonya ng'ake: karwe asende inwe abakori ebibe. 24 Gaki onde omo oyokoigwa amang'ana ane aya, nakoyabwata, nagwekanigwe nomosacha omonyene obong'aini, oagachete mwaye as'egetare igoro: 25 embura egatwa, omogoko ogacha, amo nomwaga, bigachia as'enyomba eria, tiyagwa: ekiagera oboroso bwaye boagachire as'egetare igoro. 26 Nonde omo oyokoigwa amang'ana ane aya, gotayabwata, nagwekanigwe nomosacha omokayayu, oagachete mwaye as'amaroba: 27 embura egatwa, omogoko ogacha, amo nomwaga, bikaaka enyomba eria ekagwa; nokogwa kwaye gokaba okonene mono. 28 Yesu gakorire amang'ana aya, ekaba ngokumiere emeganda eria as'okworokereria kwaye; 29 naki igarenge koborokereria buna oyore nechinguru, tari buna baria abariki.
1 Yesu ochia korua egetunwa igoro agatunyanwa nemeganda emenge. 2 Rora, agachierwa nomonyene oborwaire bokorokwa ukoma, akamosasima, akamotebia, Omonene, onye korigetie, nonyare gonsibia. 3 Agakorambora okoboko kwaye akamokuna; akamotebia, Nanchire; sibeka. Erio agwo akagwenigwa oborwaire bwaye. 4 Yesu akamotebia, Rigereria totebia 'mont'onde ring'ana; genda omworokie omokuani omobere oo, orue ekeegwa giachigetwe na Musa, obe okweorokia asebare. 5 Naende ochia gosoa Kaperinaum, agachierwa nomonene oyomo bw'abasigari, 6 okomosorora nakomotebia, Omonene, omosomba one nyomba araire, oborwaire b'okomoigusia, nigo akoromwa mono. 7 Yesu akamotebia, Inche ninchiche komogwenia. 8 Oria omonene bw'abasigari akamoiraneria akabora, Omonene, inche tari omonto orachicherwe naye osoe inse as'ekerama kiane: korende atora ring'ana erimo rioka, nomosomba one nagwene. 9 Naki ninche nomonto or'inse as'ogochika, ninde nabasigari inse asende; nainche kondatebie oyo, Genda, ogenda; kondatebie oyo, Nchuo, ocha; kondatebie omosomba one, Kora eri, okora. 10 Yesu ochia koigwa ayio agaichana, akabatebia abamotunyanete, Nekeene nabatebirie, nonya nas'Isiraeli tinanyakorora okwegena okoreng'aine oko: 11 korende nabatebirie ng'a abange nabache korwa mocha na bosongo, nabaikaranse amo n'lbrahimu, n'lsaaka, na Yakobo, as'obonda bw'igoro; 12 na baria abana b'obonda nabatugutwe isiko as'omosunte; nakebe nekerefo nokoriania amaino. 13 Yesu akamotebia omonene bw'abasigari, Genda bwoo, nabe asore koreng'ana nogwancha kwao. Akagwenigwa oria omosomba oye as'ekero keria. 14 Yesu akagenda 'nyomba ase Petero, akarora ng'ina mokaye oraire, orwarete oborwaire. 15 Akamokuna okoboko kwaye, oborwaire bokamotiga; akaimoka korwa as'araire, akaba nkomokorerare. 16 Bwachia koira, bakamoirera abanto abange ababwatetwe nebirechaakabarusia ebirecha ase ring'ana; na bonsi konya banyarekire akabagwenia; 17 rinyare goikerana erio riatebetwe nomobani Isaya, ogoteba, Omonyene akaimokia oboreu bwaito, akayabogoria namarwaire aito. 18 Na Yesu agachia korora oetananirwe nemeganda emenge, agachika koimoka korwa aroro kogenda ng'umbu. 19 Agachierwa nomonto oyomo omoriki, akamotebia, Aye Omworokia, ningotunye as'ogochia onsi. 20 Yesu akamotebia, Ebibwe mbire namakuruma, nechinyoni chi'igoro nchire nebiswa, korende Omwana-o-mwanyabanto tari naas'akobeka omotw'oye. 21 Noyonde as'aborokigwa baye, akamotebia, Omonene, ing'a ribaga ritang'ani ngende gotindeka tata. 22 Yesu akamotebia, Ntunyana inche, obatige abakure batindeke abakure babo. 23 Goika ochia korina obwato agatunyanwa naborokigwa baye 24 Rora, omwaga omonene ogasoa aria as'enyancha, goika obwato bokaba ngotubwabore nemerindo: nere omonyene konya orarire. 25 Bakamochiera aborokigwa baye bakamotura, bakomotebia, Omonene, tokonye; ngosiratore! 26 Akabatebia,Naki mokwoboa inwe! More nokwegena ogoke! Erio agwo agaienena akayekania embeo nenyancha; gokaba ogotoerera okonene. 27 Bagaichana baria abanto, bagateba, Omonto ki oyo, nonya nembeo nenyancha chikomoigwera. 28 Ogochia goika ng'umbu, ense y'Abagadari, akaorokerwa nabanto babere babwatetwe nebirecha, nabarabwo bakarua chimbera; nabatindi mono abanto abwo, goika omonto onde takonyara goeta enchera eria, 29 Nabarabwo bakaaka egeturi, bakobora, Inki ntwe tore naye, Omwana o Nyasaye? Inee, ngwachire aiga gotoita ekero giaito getaraika? 30 Riicho rie chingurue chinyinge ndiarenge aroro, rire are nabarabwo, rikorisia. 31 Ebirecha biria bikamosorora, bikobora, Onye gwatorusia, tiga tosoe ase riicho rie chingurue. 32 Akabitebia Genda. Bikarua abanto baria babere, bikagenda bigasoa ase chingurue; narirorio, erio riicho rionsi rigatirimboka eora, rigasoa enyancha, chigakwa amache ime. 33 Nabarisia bagatama, bakagenda sobo; bakagenda bakarandia ayabanyorete onsi, naya baria babwatetwe nebirecha; 34 nekero ekio bagasoka abanto omochie omogima kogenda koumerana na Yesu: bachia komorora bakamosorora anyare korua ase chinsemo chiabo agende aande.
1 Agasoa obwato akamboka, akagenda omochie oye. 2 Na rigereria, bakamoimokia omonto ore noborwaire bw'okoigusia, oraire 'borere, bakagenda nere asare. Yesu ochia korora okwegena kwabo akamotebia omonyene oborwaire, Enkoro yao tiga ereme, omwana one; ebibe biao biabeirwe. 3 Erio abande as'abariki bakabora as'emioyo yabo, Oyo Nyasaye akorama. 4 Yesu akamanya ebirengererio biabo, akabatebia, Naseki inwe mokorengereria ebirengererio ebibe ase chinkoro chiaino? 5 Naki, erire eriango ndiriri, goteba, Biabeirwe asore ebibe biao, gose goteba, Imoka ogende? 6 Korende monyare kemanya ng'a Omwana-o-mwanyabanto nare nokobua as'ense okwabera ebibe, (erio agwo akamotebia oria omonyene oborwaire), Imoka, obogorie oborere bwao ogende mwao. 7 Agatenena akagenda mwaye. 8 Emeganda yachia korora aria egakumia, bakamotogia Nyasaye, oyokoa mwanyabanto okobua engecho eyio. 9 Goika Yesu ochia goeta korwa aroro akamorora omonto oyomo oikaransete aase bakobangerwa ebango, erieta riaye okorokwa Mathayo: akamotebia, Ntunyana. Akaimoka, akamotunyana. 10 Ekaba ekero ekio oikaransete enyomba okoria endagera, erio bagacha abakorusia ebango abange nabanyene ebibe, bagaikaransa amo na Yesu naborokigwa baye. 11 Na baria Abafarisai, bachia kobarora, bakababoria baria aborokigwa baye, Naki omworokia oino akoria amo nabakorusia ebango nabanyene ebibe? 12 Ochia koigwa akabatebia, Abare buya tibakorigia omorwaria, korende abare abarwaire nabwo bakorigia omorwaria. 13 Genda morinyore engecho yaye ring'ana eri: Inche igo ndigetie amabera, tari ekeng'wanso: naki tincheti kobarangeria ababoronge, korende abanyene ebibe. 14 Erio bakamochiera aborokigwa ba Yohana, bakamotebia, Naki ntwe Abafarisai tokweng'ata botambe, naborokigwa bao tibakweng'ata? 15 Yesu akabatebia, Tibakonyara korera abana b'enyangi kareo omonene bw'enyangi amo nabarabwo, korende amatuko nache arache korusigwa asebare omonene bw'enyangi; nario barache kweng'ata. 16 Gose tari omonto onde okobeka ekeraka ki'eanga enyia as'eanga engotu: naki keria kiabegetwe nigo kegotandora eanga eria, nase yatandogete ake nigo ekonagochiererera. 17 Gose tibakonyara kobeka edivai enyia ase chichuba chingotu: kabarabeke bo, chiria chichuba nigo chigwateka, edivai yaiteka, nechichuba chiasira: korende edivai enyia nigo ekobekwa ase chichuba chinyia, chiasirana chionsi ibere. 18 Ekero akobatebia ayio, erio agacha omonene oyomo, ukamosasima okobora, Omoiseke one bono iga oisire gokwa; korende nchuo aye, omobekere okoboko, nere nagwene. 19 Yesu akaimoka akamotunyana omonto oria, ere naborokigwa baye. 20 Ekero ekio omokungu oyomo, orenge noborwaire bw'okorua amanyinga korwa emiaka ikomi nebere , akamochiera korwa nyuma, agakuna omobarero bw'eanga yaye; 21 ekiagerete agateba omoy'oye ime, Kondakune eanga yaye, ningwene: 22 korende Yesu agaonchoka, ochia komorora akamotebia, Kabe nomoyo omoremu, omosubati; okwegena kwao gwakogwenirie. Akagwena omokungu oria, akaba omogima korwa ekero keria. 23 Yesu ochia goika enyomba y'omonto oria omonene, akabarora abakobugia ebiroria nabanto basangereregete bagokora riroroche, 24 Akabatebia, Irana nyuma: naki omwana takweti, nokorara araire gwoka. Bakamosekerera mono. 25 Erio basokigwa isiko baria basangereregete amo, agasoa ime akamobwata okoboko; akaimoka oria omwana. 26 Amang'ana aya agakuma ense eria yonsi. 27 Yesu ogoeta okorua aaria, abanto babere emeuko bakamotunyana, bakoaka egeturi, bakobora, Tororere amabera, omwana o Daudi. 28 Ochia gosoa nyomba bakamochiera asare emeuko, Yesu akababoria, Inee, mwanchire ng'a ninyare inche gokora ring'ana eri? Bakamotebia, Ee, Omonene, 29 Erio agwo akabakuna amaiso, akabatebia, Koreng'ana nokwegena kwaino abe asemore. 30 Amaiso abo akaramokia. Yesu akabachika bokong'u, Rigereria 'monto onde tabaisa komanya. 31 Barabwo bagasoka isiko, bakarandia amang'ana aye as'ense yonsi. 32 Baria bagochia gosoka isiko ekero ekio, abanto bakamoretera omonto rimama, ore nekerecha. 33 Ekerecha giachia goserigwa riria rimama rigakwana; emeganda egakumia, ekobora, As'Isiraeli 'monto onde tararorekana engeoho buna eye. 34 Baria Abafarisai bakobora, Nigo akobarusia ebirecha as'omonene bw'ebirecha. 35 Yesu agaetanana emechie yonsi nebichie okworokereria ase chisunagogi chiabo, okorandia amang'ana amaya ay'obonda, nakogwenia obonyareku noborwaire bwonsi. 36 Ochia koyerora emeganda y'abanto, akabarorera amabera; ekiagera barenge nokorosa, nogwatananeka buna ching'ondi chkari nomorisia. 37 Erio agwo akabatebia aborokigwa baye, Rigesa ekeene nerinene; korende abakori emeremo nabake. 38 Gaki mosabe Omonene bwe rigesa abatome abakori emeremo ase rigesa riaye.
1 Akabarangeria baria aborokigwa baye ikomi nababere, akabaa okobua as'ebirecha ebibe, as'okobiseria, nokogwenia obonyareku bwonsi noborwaire bwonsi bwa mwanyabanto. 2 Namarieta abo baria abatomwa ikomi nababere naro aya: oyo bwe ritang'ani, Simon okorokwa Petero, n'Anderea momura omwabo; Yakobo omwana o Zebedi na Yohana momura omwabo; 3 Filipo, na Baritholomayo; Thomas, na Mathayo, omobangi ebango; Yakobo bw'Alufayo, na Thadayo; 4 Simon Omokanani; na Yudasi Omoisikariota, nere oyomoruete. 5 Aba ikomi nababere Yesu akabatoma, akabachika, agateba, Enchera y'ebisaku timogenda ende yonsi, nonya nomochie bw'Abasamaria timosoa onde bwonsi. 6 Ko mbuya morachichiere ching'ondi chinsiru chi'enyomba y'Isiraeli. 7 Nainwe as'okogenda kwaino, randia, motebe: Obonda bw'igoro bwaikire ang'e. 8 Nabarwarete bagwenie, abakure babokie, abare noborwaire bw'ukoma basibie, ebirecha birusie. Mwaeirwe bosa,karue bosa. 9 Timokora emonga y'ethahabu, gose efetha, gose chitai as'ebimoya biaino. 10 Timobogoria chisaro chi'orogendo nonya nechikansu ibere, nonya nebikoroto, nonya nenyimbo: naki omokori emeremo nagwenerete endagera yaye. 11 Nomochie onde bwonsi morasoe, nagachie gonsi, rigereria oyogwenerete ime, moikaranse aroro goika mosoke. 12 Nainwe ekero mogosoa enyomba eria, yekwanie. 13 Nero kegwenerete enyomba eria, omorembe oino nonyeikere igoro asere; konye tegwenereti, omorembe oino nobairanere inwe. 14 Noyo otabaroiseti inwe onde bwensi, gose okoigwa amang'ana aino, mobe kamokorua enyomba eria gose omochie oria, kong'onta orotu rw'amagoro aino. 15 Nekeene nabatebirie, nebe buya kobua ase Sodomu na Gomora ase rituko ri'ekina kobua omochie oria. 16 Rigereria, nabatomire inwe, omogwekano bwe ching'ondi gatigati ye ching'iti chi'orosana. Naboigo mobe nobong'aini buna eng'iti, nobwororo buna riruma. 17 Nainwe erende na mwanyabanto; naki barabwo nababasokie nakobaira ase chibarasa chiabo, nase chisunagogi chiabo, nababachwanie chinkini. 18 Nainwe namoirwe goika as'obosio bw'abagavuna nabaruoti asende, koba okweorokia asebare nas'ebisaku. 19 Korende rigoro bakobaira, timoichana buna mogocha koiraneria ase 'nchera ki gose as'amang'ana ki; naki as'ekero keria namoegwe eri mogokwana, 20 naki tari inwe mogokwana, n'Omoika o Iso oino ogokwana asemore ime. 21 Korende oyomwabo namorue oyomwabo akwe, n'ise namorue omwan'oye, nabaria abana nababaimokere abaibori babo kobabeka as'ogoitwa. 22 Nainwe namogechwe nabanto bonsi as'erieta riane; korende oyoraremererie goika omoerio, oyio nakonyeke. 23 Nabarabwo kabarabarosie as'omochie oyo, tama gochia as'oyonde; naki nekeene nabatebirie, timokoyekora emechie y'lsiraeli atacheti oria Omwana-o-mwanyabanto. 24 Omworokigwa takoba omonene as'omworokia oye, gose omosomba takoba omonene as'omonene oye, 25 yamoisanire omworokigwa koba buna omworokia oye, nomosomba buna omonene oye. Inee, ere omonyene enyomba onye bamorokire erieta ria Beelizebuli, tai kobua abwo bare b'enyomba yaye? 26 Gaki timobairoka baria: ekiagera rinde tiriri riakunegetwe ritache gokunorwa kegima, gose riabisegete ritache komanyekana. 27 Eri nkobatebia omosunte ime, ritebe as'omobaso, neri mokoigwa as'ogoto, rirandie igoro ase chinyomba. 28 Nainwe timoiroka abagoita omobere, abatanyare goita oria omoika: kobua moiroke oyo oranyare kobiita omobere nomoika bionsi ase chaanam. 29 Inee, chinchiro ibere tichiri kogorwa egesabwa ekemo? Ko nonya nakamo kaye tigakogwa inse Iso oino atamanyeti. 30 Korende inwe, nonya nechio chitukia chi'emetwe yaino chionsi chiabarirwe. 31 As'ayio timoiroka; inwe nabaya kobua ebinyoni ebinge. 32 As'ayio ker'omonto oranyatore as'obosio bwa mwanyabanto, nainche nanche komwatora as'obosio bwa Tata one ore igoro. 33 Korende oyoranyange as'obosio bwa mwanyabanto, nainche namwange as'obosio bwa Tata one ore igoro. 34 Timokaga ng'a nachire kobeka omorembe as'ense: tincheti koyobeka omorembe, korende nachire kobeka omoro bw'esegi. 35 Naki eki nacheire inche, nokobatanana omonto n'ise, nomosubati na ng'ina, na moka-momura, na ng'inabiara. 36 Nababisa b'omonto nababe abanto b'enyomba yaye. 37 Oyo bwanchete ise gose ng'ina kobua inche, tangwenereti. Noyo bwanchete omwan'oye omomura, gose enyaroka, kobua inche, tangwenereti. 38 Noyo tabwateti omosalaba oye antunyane, tangwenereti inche. 39 Oyoranche obogima bwaye nabosirie, noyorabosirie obogima bwaye as'engecho yane naborore, 40 Oyobanchire inwe, onyanchire nainche; noyonyanchire inche, bwanchire noyo ontomete. 41 Oyobwanchire omobani as'erieta ri'omobani, nanyore eng'eria y'omobani; noyobwanchire oyio oboronge, ekiagera nomonyene oboronge, nanyore eng'eria y'oyio oboronge. 42 Noyo oramosibie oyomo obo as'abake aba egetabo ki'amache amakendu oka as'erieta ri'omworokigwa, nekeene nabatebirie eng'eria yaye tegosira nonya ng'ake.
1 Ekaba Yesu agachia gokora okobachika aborokigwa baye ikomi nababere, akaimoka korwa aaria arenge, akagenda kworokereria nakorandia as'emechie yabo. 2 Nere Yohana ochia koigwa aaria as'agasibire ebitage bia Kristo, agatoma aborokigwa baye komoboria, 3 Aye naye ogocha, gose nomoao tokoganya? 4 Yesu akabairaneria akabatebia, Genda momoiranerie amang'ana Yohana ayamwaigwa naya mwarora; 5 emeuko nkororere, nebirema nkogendabire, nabanyene ukoma ngosibigwabare, nemetino nkoigwere, nebitondo nkobokigwabire, nabataka nkoranderigwabare amang'ana amaya. 6 Nare negesio oyotagochiri asende inche. 7 Nabwo bachia koimoka, Yesu agachaka kobaboria baria emeganda ase Yohana: Inki mwachiete korora aria eroro ime? Egetonto gegotengechigwa nembeo? 8 Korende inki mwagendete isiko gokerigereria? omonto oboirie chianga chinterere? Rigereria, abakweboa chianga chinterere iga bare ase chinyomba chi'abaruoti. 9 Korende inki mwachiete korigereria aaria? Nokorigia korora omobani? Naboigo nabatebirie inwe, naende kobua omobani. 10 Naki oyo nere orikeretwe amang'ana aya: Rigereria, inche namotomire omotomwa one as'obosio bwao, Oyorache korosia enchera yao otang'aine asore. 11 Nekeene, nabatebirie inwe, onde taratoka as'abaiboire nabakungu ore omonene kobua Yohana Omobatisi: nere oyore omoke as'obonda bwa igoro nomonene kobua ere. 12 Korende korwa amatuko aye Yohana Omobatisi goika bono, obonda bw'igoro igo bogosogwa nechinguru, nabwo abanyene chinguru bakoboira nechinguru. 13 Naki ababani bonsi namachiko, iga barekobana goika Yohana. 14 Nainwe onye mwarigirie koriancha, ere nere. Elija ogocha-gocha. 15 Oyore namato akoigwa, aigwe. 16 Korende naki ndakegwekanie ekegori eke? Nkegwekaine nabana bagoikaransa chichiro, bakobarangeria abagisangio babo, bagoteba, 17 Twababugeirie ebiroria, nainwe timogotenga; twarerire, timorigoichana. 18 Naki Yohana nachete, tarekoria gose tarekonywa: bagakwana, Nare nekerecha. 19 Omwana-o-mwanyabanto nachete okoria nakonywa: barabwo bagateba, Oyo nere, omonto omoribobe nagotinda nedivai, omosani bw'ababangi nabanyene ebibe! Nobong'aini bwaeirwe oboronge nabana baye. 20 Erio agwo agachaka koyiomania emechie, as'ebitage biaye bie chinguru biakorekire ime ebinge, ekiagera etaonchogeti. 21 Obobe nobwao, Korazen! obobe nobwao Bethisaida! ekiagera onyore mbiakoregete ase Turo na Sidon ebitage bie chinguru biakoregete asemore, anga mbaonchogete kare nakobeka egetambaa gie chigunia neribu. 22 Nabatebirie inwe nakebe ekiororo ase Turo na Sidon ase rituko ri'ekina kobua ekiaino inwe. 23 Naye Kaperinaum oimokererigwe goika igoro, noche goikigwa goika as'amakweri. Ekiagera ebitage bie chinguru biakorekire asore aye, onye mbiakoregete ase Sodomu anga noikaransete omochie oyio goika rituko ria rero. 24 Korende nabatebirie, inwe, ng'a nakebe ekiororo as'ense ya Sodomu ase rituko ri'ekina kobua ekiao aye. 25 As'ekero keria Yesu akairaneria agakwana, Nakobakire aye Tata, Omonene o igoro nense, ekiagera amang'ana aya kwabisire abare nechisemi nobong'aini, kwabaigoreire abana. 26 Naboigo are, Tata, ekiagera nagwenerete asore abe bo. 27 Amang'ana onsi naeirwe inche na Tata one; gose tari onde omomanyete Omwana tatiga ere Tata, nonya tari onde omomanyete Tata tatiga Omwana, nonde bwonsi oria Omwana aranche komoorokeria. 28 Nchuo asende inwe mwensi abwo mwarosigwe as'emeremo emerito, abwo mwabunekire nechigurube, nainche nimbatimokie. 29 Mwetweke egesibo kiane, mwegere asende, ekiagera inche nomwororonde, nomoitongo bw'omoyo: nainwe namorore ogotimoka as'emebere yaino. 30 Naki egesibo kiane nekiororo, negurube yane nengusu.
1 As'ekero keria Yesu nagendete rituko ri'esabato gatigati y'emegondo; aborokigwa baye bakaba nenchara, bagachaka kobutora ebigara, bakaria. 2 Abafarisai bagachia korora, bakamotebia, Rigereria, aborokigwa bao buna bagokora eritagwenereti gokoreka ase rituko ri'esabato. 3 Nere akabatebia, Timwanyagosoma ayakorete Daudi ekero arenge nenchara, ere nabwo barenge komo? 4 Asoete as'enyomba ya Nyasaye, akayeria eria emegati eyokworokereria, nero tiyagwenerete asare ayerie, gose as'abwo barenge amo nere, tatiga as'abakuani boka abanyene. 5 Gose timwasomete as'amachiko buna amatuko ye chisabato abakuani be hekalu igo bagosaria esabato, nabarabwo tibaba nokomocha? 6 Nainche nabatebirie buna nare aiga oyore omonene kobua hekalu. 7 Korende onye mwamanyete engecho y'amang'ana aya, Nindigetie amabera, tindigetie ekeng'wanso, anga timwababegete ekina abatari nokomocha. 8 Naki oria Omwana-o-mwanyabanto nere omonene bw'esabato, 9 Akaimoka korwa aria, akagenda, agasoa esunagogi yabo. 10 Rora, narenge omonto agwo okoboko kwaye kwomete. Bakamoboria, bagoteba, Inee, negwenerete kogwenia ase rituko ri'esabato? banyare komosoera. 11 Nere akabatebia, Ning'o asemore orabe neng'ondi eyemo: eng'ondi eyio keragwe eirima ase rituko ri'esabato takonyebwata ayerusie? 12 Inee, omonto nabuete eng'ondi goika karenga? gaki abaire naro, agwenerete gokora amaya rituko ri'esabato. 13 Erio agwo akamotebia omonto oria, Rambora okoboko kwao. Agakorambora, gokagwena, gokaba okogima buna okonde, 14 Korende bakaimoka baria Abafarisai bakagenda bakamogamba bamoite, 15 Yesu agachia komanya amang'ana aria, akarua aria akagenda ande: agatunyanwa nabanto abange, akabagwenia bonsi, 16 Akabachika tibamoorokia: 17 rinyare goikerana eri'arigetwe nomobani Isaya, ogoteba, 18 Oyo nere omosomba one nachorire; Omwanchi one, omoy'one ogokigwe asare: Nimobekere Omoika one. Nere nabiranderie ebisaku ekina, 19 Takwomana, gose takoaka egeturi; Nonya nomont'onde takoigwa eriogi riaye ase chinchera chinene. 20 Egetonto giatachetwe tagokebuna, Buna egesibe ki'amatwaro gekoimoka erioki tagokerimia, Goika arete ekina as'okobua. 21 Nas'erieta riaye Ebisaku nabirisemerie. 22 Ekero ekio akareterwa omonyene ekerecha, nere nomouko, naende nerimama: akamogwenia, goika oria omoukorimama agakwana nakorora. 23 Emeganda eria yonsi ekaba ngokumiere, bagakwana, Inee, oyo nere omwana o Daudi? 24 Korende Abafarisai bagachia koigwa bagakwana: Oyo tarikobarusia ebirecha tatiga ase Beelizebuli, omonene bw'ebirecha. 25 Agachia komanya ebirengererio biabo akabatebia, Ker'obonda bwatananekanire bwoka, tibogotenena; na ker'omochie gose enyomba yatananekanire yoka, tegotenena. 26 Na Saitani karaserie Saitani, yabaire bwatananekanire nomobere oye; Inee, obonda bwaye, naki boratenene? 27 Nainche onye nase Beelizebuli ngoseria ebirecha, Inee, abana baino nase ng'o bakobaseria? As'engecho eyio, barabwo nababe abagambi baino. 28 Onye nainche nas'Omoika o Nyasaye ngoseria ebirecha, gaki, obonda bwa Nyasaye nigo bwabacheire. 29 Gose omonto naki aranyare gosoa as'enyomba y'omonyene chinguru gosakora ebinto biaye, atatang'aneti ritang'ani komosiba oria omonyene chinguru? Nario erio aramanye gosakora enyomba yaye. 30 Oyotari amo nainche igare ao nainche. Oyo otari gosangereria amo nainche, nigo agoserebania. 31 As'engecho eyio nabatebirie, ker'obobe nokorama, mwanyabanto nababerwe; tatiga okorama as'Omoika tibakwaberwa. 32 Nomonto orakwane ring'ana as'Omwana-o-mwanyabanto, nariaberwe asare; korende omonto orakwane ring'ana as'Omoika Omochenu, tirikwaberwa asare as'ense eye, nonya nas'eria egocha koba. 33 Kora omote omuya, namatunda aye amaya: gose kora omote omobe, namatunda aye amabe: naki omote nigo okomanyekana as'amatunda aye. 34 Inwe oroiboro rwe ching'iti, naki moranyare gokwana amaya, onye more ababe? Naki ebichire as'enkoro, nabio omonwa ogokwana. 35 Omonto omuya as'emonga engiya akorua amaya, nomonto omobe as'emonga embe akorua amabe. 36 Korende nabatebirie inwe, ng'a kera ring'ana ritari nenchera mwanyabanto barakwane, rituko ri'ekina nabache goteba okobara kwaye. 37 Naki as'amang'ana ao noegwe oboronge, nas'amang'ana ao nobugwe ng'a nomosaria. 38 Erio agwo bakamoiraneria abande as'abariki n'Abafarisai, bakobora, Omworokia, ntorigetie torore egekone asore. 39 Akabairaneria, akabatebia, Ekegori ekebe nobotomani kerigetie egekone, korende tigekoegwa egekone tatiga egekone ki'omobani Yona. 40 Naki buna Yona abete ime as'enda ye nyangumi ekero ki'amatuko atato nemebaso etato, n'Omwana-o-mwanyabanto nere nabe ime as'enkoro y'ense boigo emebaso etato namatuko atato. 41 Abanto ba Nineva nabatenene as'ekina amo nabanto b'ekegori eke nabarabwo nabakenachere ekina gi'okomocha. Ekiagera barabwo nigo baonchogete as'okorandia kwa Yona, naki oyomobuete Yona naigare. 42 Omogambi eting'ana bw'ensemo ya sugusu natenene as'ekina amo nabanto b'ekegori eke, nere nakenachere ekina ng'a giasaririe: ekiagera aruete chinsinyo chi'ense anyare koigwa obong'aini bwa Sulemani, noyobuete Sulemani naigare. 43 Ekerecha ki'eubi gekorua as'omonto, gegoeta aas'atari amache, gekorigia ase gegotimokera, tigekonyora. 44 Erio kiabora, Ning'irane mwane ase naruete. Gegocha gekayerora nenchwa, yaabusirwe, yaomirwe. 45 Erio gekabwatia enchera, gekareta ebirecha binde bitano nabibere, ebibe gokebua ekenyene, bigasoa bikayeikaransa, akaba omonto oria okoba kwaye kw'omoerio nokobe kobua okwe ritang'ani. Naboigo erache koba as'ekegori eke kere ekebe. 46 Nere kare gokwana nemeganda, rora, ng'ina nabamura bamwabo nisiko bateneine, mbarigetie gokwana nere. 47 Omonto oyomo akamotebia, Rora, nyoko nabamura bamino mbare isiko, bateneine, mbarigetie gokwana naye. 48 Akamoiraneria, oria rigokwana komo, akabora, Baba nere ng'o? Nabamura baminto mbarabi? 49 Agakorambora okoboko kwaye ensemo y'aborokigwa baye, akabora, Rigereria baba nabamura baminto. 50 Naki oyo orakore obwanchani bwa Tata one ore igoro, oyo nere momura ominto, nere mosubati ominto, nere baba.
1 Ase rituko riria, Yesu akarua aria nyomba, akagenda agaikaransa as'enyancha mbarabare. 2 Abanto bakamosangererekera emeganda emenge, goika akarina obwato nagoikaransa: noria omoganda bw'abanto bagatenena engegu bonsi. 3 Agakwana nabarabwo amang'ana amange. Akayarenta as'emereng'anio akabora: Omobusuri omanoire kogenda kobusura embusuro. 4 Rigoro akobusura, chimbusuro chinde chikagwa ensemo y'enchera, chinyoni chigacha chigachiria: 5 nechinde chikagwa aas'amagena are, aase amaroba arenge amake: erio chigakumboka ekiagera amaroba atachieti inse. 6 Omobaso ochia kobara chigasusana; nas'okomocha emeri chikoma. 7 Nechinde chikagwa as'amagwa ime, naria amagwa agakina agachimiga. 8 Nechinde chikagwa as'amaroba amaya, chikama, echi emia, nechi'emerongo etano nomo, nechi'emerongo etato. 9 Oyore namato aigwe. 10 Aborokigwa baye bakamochiera bakamotebia, Naseki aye kware gokwana nabarabwo as'emereng'anio? 11 Akabairaneria akabatebia, Ekiagera inwe mwaeirwe koyamanya aya bobisi ay'obonda bwa igoro, korende barabwo tibaeiri. 12 Naki oyore nero naegwe, nere namenteranigwe; korende oyotayebwati naurwe nonya neyio abwate, 13 As'engecho eyio, inche ngokwana nabarabwo as'emereng'anio; ekiagera abakorigereria namaiso tibarora, nabakoigwa namato tibaigwa, nonya nokoinyora tibainyora. 14 Nabarabwo ring'ana ri'Isaya, riabaikeire, rigoteba, Okoigwa namoigwe, ko timoinyora gento kende; Nokorigereria as'amaiso namorigererie, ko timorora gento kende. 15 Naki chinkoro chi'abanto aba, chiabaire chinkong'u, Namato abo igo bakoigwa as'oborito. Namaiso abo bayamiamirie, Tibacha korora namaiso abo, Baigwe namato abo, Bainyore ase chinkoro chiabo, Baonchoke, mbagwenie. 16 Korende inwe mwasesenigwe amaiso aino, ekiagera akorora; mwasesenigwe amato aino, ekiagera akoigwa. 17 Naki nekeene nabatebirie, nabange ababani nabanyene oboronge mbarengereretie koyarora ayio moroche inwe as'amaiso aino, tibayarora, nokoyaigwa ayamokoigwa inwe, tibayaigwa. 18 Gaki yoigwe omoreng'anio bw'omobusuri bw'embusuro, 19 Omonto bwonsi orabe nkoigware ring'ana ri'obonda, gotarinyora, nigo agocha oria omobe, oritaboria riria riasimekirwre as'omoyo oye; oyo nere obusuirwe enchera mbarabare, 20 Noyo obusuirwe amagena ime nere okoriigwa riria ring'ana, akaribwata bwango nomogoko; 21 korende tari nemeri omonyene, ogenderera egeka egeke; korende emechando egochigocha, gose ogochandwa ekiagera ase ring'ana riria, erio ogochwa. 22 Noyo obusuirwe amagwa ime, Oyo nere okoigwa ring'ana riria, riba nkomigwarire ring'ana nokorengereria gw'ense, nokong'ainwa kw'enibo, takwama. 23 Noyo obusuirwe as'amaroba amaya, nere oria okoigwa ring'ana riria, oriinyora; nere ekeene bwama amatunda, aya emia, naya emerongo etano nomo, naya emerongo etato. 24 Akabasokeria omoreng'anio onde, agakwana, Obonda bwa igoro nigo bogwekaine nomonto osimegete embusuro engiya as'omogondo oye; 25 korende rigoro abanto bararire, omobisa oye akagenda agasimeka namabanchore ime as'engano, akagenda. 26 Egachia koorokia korwa inse ekama ebigara, erio namabanchore naro akarorekana. 27 Erio abasomba b'omonyene enyomba bagacha, bakamotebia, Omonene, tigwasimegete embusuro engiya as'omogondo oo? Naki onyorekana namabanchore? 28 Akabatebia, Nomonto omobisa okorete bo, Abasomba bakamotebia, Inee, norigetie tochie toyasangererie? 29 Agateba, Yaya; gose mokoba mogosangereria amabanchore namosimore engano amo naro, 30 Bitige bikine bionsi bibere goika rigesa; rigoro rigesa nintebie abakogesa, Sangereria ritang'ani amabanchore, moyaboe emesaima monyare koyasamba: nengano moyesangererie gochia kiage kiane, 31 Akabasokeria omoreng'anio onde, agakwana: Obonda bwa igoro nigo bogwekaine nentetere y'ekaradali, omonto akayebogoria akayesimeka omogondo oye ime: 32 nero nenke mono kobua chimbusuro chionsi, korende koyamerire, ekaba enene kobua emete yonsi, ekaba omote, goika nechinyoni chia igoro chichia koagacha ebiswa biabo ase chinsagia chiaye. 33 Akabatebia omoreng'anio onde: Obonda bwa igoro nigo bogwekaine nememera, omokungu abogoretie akayebisa as'ebirengo bitato bi'obosie, goika bwonsi bokabota, 34 Aya onsi nigo ayakwanete Yesu nabaria emeganda as'emereng'anio, natatiga as'emereng'anio tabatebetie ring'ana: 35 rinyare goikeranigwa riria riatebetwe nomobani, aregoteba, Nimanore omonwa one as'emereng'anio: Ninyatore ayabisegete korwa ogokorwa gw'ense. 36 Erio agwo Yesu akabatiga baria emeganda, akagenda enyomba; aborokigwa baye bakamochiera, bakabora, Totebererie emereng'anio y'amabanchore a mogondo, 37 Akabairaneria akabora, Oyogosimeka embusuro engiya n'Omwana-o-mwanyabanto; 38 omogondo nense; embusuro eyio engiya nabana b'obonda; namabanchore nabwo abana b'oria omobe, 39 Oria omobisa oyasimegete nere saitani: rigesa nomoerio bw'ense; nabakogesa namalaika. 40 Buna amabanchore agosangererigwa asambwa nomorero naboigo omoerio bw'ense orache koba, 41 Oria Omwana-o-mwanyabanto nabatome amalaika aye, nabarabwo nabasangererie korwa obonda bwaye, amagochwa onsi, nabagokora ebibe. 42 Babatugute as'eriko ri'omorero; babe nekerero aroro nokoriania amaino. 43 Erio, abanyene oboronge nabagirigente buna erioba as'obonda bwa Ise obo, Oyore namato aigwe. 44 Naende obonda bwa igoro nomogwekano bw'enibo yabisire as'omogondo, omonto akayerora akayebisa; as'omogoko oye akagenda, akagora ebiabwate bionsi, akagora omogondo oria, 45 Naende obonda bwa igoro nomogwekano bw'omonto omokori ebiasara, okorigia chiruru chingiya: 46 nere agachikorora eruru eyemo ye rigori rinene, akaimoka akagenda, akagora ebiabwate bionsi akayegora. 47 Naende obonda bwa igoro nomogwekano bw'ekeonga, kiarutetwe as'enyancha, kegasangereria chie chingecho chionsi. 48 Erio. giaichoire bagakeng'usa gocha engegu; bagaikaransa, bagasangereria chiria chingiya as'ebinto, nachiria chimbe bagachituguta. 49 Naboigo arache koba as'omoerio bw'ense; baria amalaika nabaoroke, bache kobatigeria baria ababe korwa egati y'abanyene oboronge; 50 babarute as'eriko ri'omorero. Agwo nebe nekerero nokoriania amaino. 51 Yesu akabatebia, Mwayainyoire aya onsi? Bakamotebia, Ee, 52 Akabatebia, As'engecho eye ker'omoriki oyokorirwe omworokigwa bw'obonda bwa igoro, obaire omogwekano bw'omonto omonyene enyomba, okorua as'enibo yaye ebinto ebiyia nebikoro. 53 Ekaba Yesu ochia gokora emereng'anio eye, akagenda aande. 54 Agachia goika ense yaye omonyene, akaborokereria ase chisunagogi chiabo, goika bagakumia, bagateba, Oyo ng'ai anyora chisemi echi, nogokora gwe chinguru oko? 55 Oyo tari omwana bw'omobachi? ng'ina tari oria okorokwa Mariamu, nabamura bamwabo tari Yakobo, na Yusufu, na Simon, na Yuda. 56 Nabasubati bamwabo bonsi tibari aa seito? Gaki, oyo ng'ai ayanyora aya onsi? 57 Ekaba bakagechigwa asare. Korende Yesu akabatebia, Omobani takomocha ogosikwa tatiga as'ense yaye na mwaye. 58 Korende takorete agwo ebitage ebinge bie chinguru ekiagera batarenge nokwegena.
1 Ekero keria omoruoti Herode akaigwa amang'ana a Yesu, 2 akabatebia abasomba baye, Oyo nere Yohana omobatisi; obokire korwa as'amakweri nas'ayio, chinguru: echio chiaorokire asare. 3 Naki oria Herode konya omobwatire Yohana, akamosiba, akamobeka echela as'okomobunia Herodia, moka Filipu omwabo. 4 Naki Yohana konya omotebirie, Tari buya asore, mokomenyana nere. 5 Goika agachia korigia komoita, akairoka abanto, ekiagera bamwanchire Yohana ng'a nomobani. 6 Rigachia goika rituko ri'okoiborwa kwaye Herode, eria enyaroka ya Herodia egatenga asebare gati, ekamogokia Herode. 7 Erio, akaria eira, komoa kende gionsi ekiararigie. 8 Nere akorokererigwa na ng'ina, akamotebia, Ing'a aiga omotwe o Yohana omobatisi as'esani. 9 Omoruoti agaichana; korende as'eira yaye, nabaria abaikaransete as'endagera amo nere, agachika aegwe. 10 Agatoma omonto, akamonacha omotwe Yohana echela ime. 11 Omotwe oye okarentwe as'esani, enyaroka ekaegwa, ekaira ase ng'ina. 12 Aborokigwa baye bagachia, bakaira omobere oye, bakayotindeka; bakagenda bakamotebia Yesu. 13 Yesu agachia koigwa, akarua agwo nobwato, akagenda bweka aase abanto batari. Nemeganda egachia koigwa, bakamotunya namagoro korwa emechie. 14 Nere Yesu agasoka, akarora emeganda emenge, akabarorera amabera, akabagwenia abarwaire babo. 15 Goika riachia koba mogoroba aborokigwa baye bakamochiera, bakabora, Aas'aa 'banto tibario, nechinsa chiaetire; nyetige emeganda egende emechie, begorere endagera. 16 Yesu akabatebia, Tibarigeti kogenda; inwe bae endagera. 17 Nabarabwo bakamotebia, Titobwati 'gento aiga, tatiga emegati etano nechinswe ibere. 18 Akabora, Ndetera aiga. 19 Agachika emeganda eikaranse inse as'obonyansi; akabwata emegati etano nechinswe ibere, akarigereria igoro, akayesesinia, akayesamunyora, akabaa aborokigwa emegati eyio, naborokigwa bakabaa emeganda. 20 Bakaria bonsi, bakaigota: bakayebogoria eyatigara ebisamunye bi'emegati, ebitonga ikomi nabibere bichire. 21 Nabwo bariete igo barenge abasacha chilifu isano, tiga abakungu nabana abake. 22 Erio Yesu akababetereria aborokigwa baye barine obwato, bamotang'ane kogenda ng'umbu, goika ayetige emeganda egende. 23 Gatigire emeganda yachire, akarina egetunwa bweka gochia gosaba. Riachia koba mogoroba akaba agwo bweka. 24 Naborobwo obwato bwaikire enyancha gati, bokorunda-rundigwa namakundia; naki omwaga norengeo obatangete. 25 Goika okorenda gwa kane kw'obotuko Yesu agacha asebare, okogenda namagoro as'enyancha igoro, 26 Aborokigwa bagachia komorora okogenda namagoro enyancha igoro, bakaondoka, bakabora, Rirengari erio; bakaaka egeturi as'okoiroka, 27 Erio Yesu agakwana nabarabwo, akabora, Remia emioyo; ninche; timoiroka, 28 Petero akamoiraneria, akabora, Omonene, onye naye, ntebia nchiche asore igoro as'amache, 29 Akamotebia, Inchuo, Petero agaika korwa obwato, akagenda namagoro as'amache igoro ogochia ase Yesu. 30 Korende agachia korora omwaga bwe chinguru akairoka: agachaka korimera amache ime, akaaka egeturi, agateba, Omonene, nkonya. 31 Erio Yesu akarambora okoboko kwaye, akamobwata, akajnotebia, Aye omonyene okwegena ogoke, naki kwairoka? 32 Bagachia korina obwato, omwaga okabutoka. 33 Nabarabwo abarenge obwato ime, bakamochiera, bakamosasima, bagateba, Ekeene aye n'Omwana o Nyasaye. 34 Bagachia kwamboka ng'umbu, bagaika ense ya Genesareti, 35 Nabanto b'orogongo roria bagachia komomanya, bagatoma abanto bagende chinsemo chiria chionsi, bakamoretera bonsi abarenge abanyareku; 36 bakamosorora bakune nonya nomobarero bw'eanga yaye; nabakunete bonsi bakagwenigwa kegima.
1 Erio agwo agachierwa n'Abafarisai nabariki bakorua Yerusalemu, bakabora, 2 Naki aborokigwa bao bagosaria amang'ana ay'abagaka? Naki kabakoragera tibari goisaba amaboko, 3 Akairaneria, akabatebia, Naki inwe mogosaria ogochika kwa Nyasaye namang'ana aino? 4 Naki Nyasaye agachika agateba, Sika iso na nyoko: noyoratore bobe as'ise, gose ng'ina, nakwe ogokwa; 5 korende inwe mogoteba, ng'a Oyoratebie ise gose ng'ina, Bionsi ebikogwenerete ogokonywa nainche nesadaka; 6 atamosigeti ise nonya ng'ina, gaki. Mokarisaria ring'ana ria Nyasaye namang'ana aino, 7 Inwe abang'ainereria! mbuya Isaya abanete asemore, okobora, 8 Abanto aba as'omonw'obo bagonchichera ang'e, Nas'ebikoba biabo bagonsika, Korende chinkoro chiabo igachire are nainche. 9 Ko barabwo mbosa bagonsasima, Nobong'aini bakworokereria, bakworokereria amachiko a mwanyabanto. 10 Akabarangeria emeganda bache asare, akabatebia, Igwa, moinyore, 11 tari ekio gegosoa omonwa gekomobeka omonto riko; korende egekorua omonwa nakio gekomobeka riko. 12 Erio aborokigwa baye bakamochiera bakamotebia, Inee, kwamanyire ng'a Abafarisai, rigoro baigwete ring'ana riria, mbagechetigwe? 13 Akabairaneria akabora, Ker'omote otasimekiri na Tata one ore igoro, nosimorwe. 14 Batige: barabwo nemeuko, abatang'ani b'emeuko; nomouko oise gotang'ana omouko onde, nigo baragwe engoro bonsi babere. 15 Petero akamoiraneria, akamotebia, Totebie, omoreng'anio oyio. 16 Akabora, Inee, nonya mbono nainwe timori nobong'aini? 17 Timorainyora ng'a kende gionsi gegosoa omonto as'omonwa nigo gegoeta enda kiagwa kebara? 18 Korende ebikorua omonwa, bikorua as'enkoro; nabio ebio bikobeka omonto riko. 19 Naki as'enkoro nero ekorua okorengereria okobe, ogoita, ogotomana, obonyaka, okoiba, amang'ana ay'oborimo, nokorama. 20 Ayio naro akobeka omonto riko. Korende okoria as'amaboko ataisabiri tari kobeka omonto riko. 21 Yesu akarua aroro, akagenda chinsemo chia Turo na Sidon, 22 naende, rora, omokungu o Kanani, nere nomonto bwe chimbebe chiria, akaoroka akaaka egeturi, akabora; Nyabera Omonene, omwana o Daudi; enyaroka yane yachandirwe mono nekerecha. 23 Nere tamoiraneria ring'ana. Bakamochiera aborokigwa baye, bakamosorora, bakobora, Aioserie, ekiagera akona gototunyana ogotoakera egeturi. 24 Akairaneria akabora, Tinatometwe tatiga ase ching'ondi chiasirete chi'enyomba y'Isiraeli. 25 Nere omokungu akamochiera, akamosasima, okobora, Omonene nkonya. 26 Akairaneria akamotebia, Tari buya koimokia obokima bw'abana gochirutera chisese. 27 Akabora, Ee, Omonene, naki nonya nechisese nkoriachire amatori akogwa korwa chimesa chi'abanene babo. 28 Erio agwo Yesu akamoiraneria akamotebia, Aye omokungu, okwegena kwao nokonene: tig'abe asore buna origetie. Enyaroka yaye ekagwena ensa eyio. 29 Yesu akarua aroro agwo, agacha ensemo y'enyancha ya Galili, akarina egetunwa, agaikaransa aroro. 30 Bakamochiera emeganda emenge barenge nebirema, nemeuko, namamansu, nebisegora, nabande abange, bakababeka as'amagoro a Yesu, akabagwenia. 31 Goika emeganda egakumia bachia korora amamansu agokwana, ebirema biabaire buya, ebisegora bikogenda, emeuko ekorora; bakamobaka Nyasaye o Isiraeli. 32 Yesu akarangeria aborokigwa baye bache asare, akabora, Inche nayeroreire emeganda amabera, ekiagera rero aikire amatuko atato baikaransire nainche batari nendagera, nakobatiga kogenda nenchara tindigeti, tibabaisa koirwa nesiororia enchera. 33 Aborokigwa baye bakamotebia, Aa neroro, ng'ai toranyore emegati emenge eraisane abanto abange buna aba baigote? 34 Yesu akabatebia, More nemegati erenga? Bakabora, etano nebere, nechinswe chinsinini chinke igo. 35 Agachika emeganda eikaranse, 36 akaimokia emegati eria etano nebere, nechinswe chiria, agasaba, akabisamunyora, akabaa aborokigwa baye, nabarabwo bakabaa emeganda eria. 37 Bakaria bonsi, bakaigota; bakaimokia ebitigari biasamunyogete, ebitonga bitano nabibere bichire. 38 Nabariete nigo barenge abasacha chilifu inye, tiga abakungu nabana abake. 39 Agatiga emeganda egende, akarina obwato ime, akagenda chinsemo chia Magdala.
1 Bakamochiera Abafarisai n'Abasadukai, bakamotema, bakarigia aborokie ebikone korwa igoro. 2 Akabairaneria, akabatebia, Rikoba mogoroba, mwabora, Nerakere, ekiagera igoro abaririre: 3 na mambia mwabora, Rero nerirumbe; ekiagera amare namabariri, asung'unanire. Inwe abang'ainereria, erioba rirorio morimanyete obosio bwaye, korende ebikone bi'ebiro ebi timokonyara kobinyora? 4 Ekegori ekebe ki'obotomani nakio gekorigia egekone, ko tigekoegwa egekone tatiga egekone ki'omobani Yona. Erio akabatiga akagenda. 5 Aborokigwa bakagenda ng'umbu, bakeba kobogoria emegati. 6 Yesu akabatebia, Rigereria mwerende nememera y'Abafarisai n'Abasadukai. 7 Bakaborania bagoteba, Nekiagera mbuna totaretete emegati. 8 Yesu akamanya ring'ana riria, akabora, Inki kiagera mokona koborania, inwe abanyene okwegena ogoke, mbuna motabogoretie emegati? 9 Timoramanya, gose timokoinyora emegati eria etano yaetwe baria chilifu isano, gose ebitonga mbirenga mwaimogetie? 10 Nonya nemegati eria etano nebere neya baria chilifu inye, nebitonga. mbirenga mwaimogetie? 11 Naki inwe motari koinyora, ng'a tari as'emegati nigo nkobatebia okwerenda nememera y'Abafarisai n'Abasadukai? 12 Erio agwo bakainyora ng'a tari gwatora as'okwerenda nememera y'emegati, korende nememera y'okworokereria kw'Abafarisai n'Abasadukai. 13 Yesu akagenda chinsemo chia Kaisaria ase Filipi, akababoria aborokigwa baye aroro, okobora, Inee, abanto nigo bakobora Omwana-o-mwanyabanto nere ng'o? 14 Bakabora, Abande babora nomobatisi Yohana, nabande Elija, nabande Yeremia, gose oyomo as'ababani. 15 Akababoria, Nainwe mokobora ng'a ninche ng'o? 16 Simon Petero akamoiraneria, akamdtebia, Aye naye Kristo, Omwana o Nyasaye ore moyo. 17 Yesu akamoiraneria akamotebia, Nore negesio Simon mosinto Yona, ekiagera eri tomanoreiri nomobere namanyinga; oyokomanorera, Tata one ore igoro. 18 Nainche nagotebirie, ng'a aye naye Petero, nainche igoro as'egetare eke ning'agache ekanisa yane; nebisieri bi'amakweri tibikonyebua chinguru. 19 Inche ninkoe ebigorero bi'obonda bwa igoro, nebio orasibe ense nabisibwe na igoro, nebio orasibore ense, nabisiboke na igoro. 20 Erio agwo akabachika baria aborokigwa baye tibatebia 'monto ng'a nere Kristo. 21 Korwa ekero ekio Yesu agachaka koborokereria aborokigwa baye ng'a nemogwenerete kogenda Yerusalemu, nogochandwa okonge nabakuani abanene, nabariki, nagoitwa, nakoboka ase rituko ria gatato. 22 Petero akamobwata agachaka komokania, okobora, Ayio tabaisa gokonyora, Aye Omonene; takoba asore buna ayio. 23 Nere ageonchora, akamotebia Petero, Irana nyuma yane, Saitani: aye nigo origetie kongocha, ekiagera aye torengerereti aya Nyasaye, korende naya mwanyabanto. 24 Erio agwo Yesu akabatebia aborokigwa baye, Onye 'monto origetie kondwa nyuma, ekanye omonyene, etweke omosalaba oye, antunye. 25 Naki omonto bwonsi orarigie gokonya obogima bwaye, oyio nabosirie; nomonto orasirie obogima bwaye asende inche, nabonyore naende. 26 Naki inki keramogwenere omonto karanyore ense yonsi, ko nere asirie obogima bwaye? Gose omonto inki ararue ase ribaga ri'obogima bwaye? 27 Naki oria Omwana-o-mwanyabanto naoroke nobonene bwa Ise amo namalaika aye, nekero ekio ng'ae ker'omonto buna ebio aregokora. 28 Nekeene nabatebirie inwe, abanto mbare aiga as'aba bateneine, nabarabwo tibakoigwa amakweri nonya ng'ake goika bamorore Omwana-o-mwanyabanto ogocha as'obonda bwaye.
1 Naende kaerire amatuko atano narimo, Yesu akaira Petero, na Yakobo, na Yohana momura omwabo, akagenda nabwo, akarina egetunwa egetambe, barabwo boka. 2 Akaonchoka ekieni kiaye asebare, akagirigenta obosio bwaye buna erioba, chianga chiaye chikaraba buna omobaso. 3 Bakarorekana asebare Musa n'Elija bagokwana nere. 4 Petero akairaneria, akamotebia Yesu, Aye Omonene, mbuya intwe koba aiga; onye gwanchire ninkore aiga chigutu bitato, ekemo kebe ekiao, nekemo kia Musa, nekemo ki'Elija. 5 Erio gagokwana, rora, rire rirabu rikabeka ekiriri, neriogi rikarua ase rire rigoteba, Oyo nere Omwana one, omwanchi one, nancheirwe asare, moigwere. 6 Aborokigwa bachia koigwa bakagwa inse maumama, bakabwatwa nokoiroka okonge. 7 Yesu akabachiera akabakuna, akabatebia, Imoka, timobaisa kwoboa. 8 Bagachia koramokia amaiso abo, tibarora 'monto tatiga Yesu bweka. 9 Bagotirimboka korwa egetunwa igoro, Yesu akabachika, akabora, Timotebia 'monto onde okorora oko, goika Omwana-o-mwanyabanto aboke korwa as'amakweri. 10 Aborokigwa baye bakamotebia, bakabora, Naki rende abariki bagokora, babora ng'a Elija nere orache ritang'ani? 11 Nere akabairaneria, akabora, Nekeene Elija ogocha ritang'ani nere narosie onsi. 12 Korende nabatebirie, ng'a Elija otiekire gocha; nabarabwo tibamomanyete, bakamokora buna barigetie: naboigo noria Omwana-o-mwanyabanto, nere nachie konyora emechando asebare. 13 Erio agwo bakainyora baria aborokigwa baye, ng'a nomobatisi Yohana nere are kobatebia. 14 Bachia goika as'omoganda oria, omonto oyomo akamochiera agwo okona komotung'amera, nakobora, 15 Omonene, inwabere omwana one; ekiagera nare nendurume, nigo agochandwa mono. Naki ere botambe nigo akogwa omorero ime, na botambe amache ime. 16 Nkamoreta as'aborokigwa bao, tibanyara komogwenia. 17 Yesu akabairaneria, akabora, Inwe ekegori getari nokwegena, naende ekiangi, nimbe amo nainwe goika ririri? Moimokie momondetere aiga. 18 Yesu akamokania, erio ekerecha gekamotiga, akagwena omwana oria ensa eyio. 19 Erio aborokigwa baria bakamochiera Yesu bobisi, bakabora, Naki intwe totanyara komorusia ekerecha? 20 Akabatebia, Ekiagera motari nokwegena; naki nekeene nabatebirie inwe, moise koba nokwegena koreng'aine nentetere ya garadaii. namogetebie egetunwa eke, Karue agwo asore, ogende aaria, nakerokio nakerue kegende: tirikoba ring'ana ritakonyarekana asemore. 21 Korende buna aya tagosoka tatiga as'ogosaba nokweng'ata. 22 Rigoro baikaransete aroro Galili, Yesu akabatebia, Omwana-o-mwanyabanto nkogendare kobekwa as'amaboko a mwanyabanto, 23 Nabarabwo nabamore, nerituko ria gatato naboke. Bagaichana mono. 24 Bachia goika Kaperinaum, bakamochiera Petero baria bare kobanga enusu-shekeli: (ebango ye hekalu) bakabora, Inee, enusu-shekeli omworokia oino takorua? Akabora, nkorware. 25 Goika ekero agosoa enyomba, Yesu agatang'ana komoboria, ogoteba, Naki oroche Simon? abaruoti b'ense igo bakorusia ebango, nogochoga, ase ng'o? nas'abana babo, gose nas'abana b'abageni? 26 Petero akamotebia, Nas'abana b'abageni. Yesu akamotebia, Gaki, abana babo barabwo mbasiboire, 27 Korende titobaisa kobagochia, genda enyancha aye, orute endobio, enswe egocha ritang'ani, oyebwate: gokomanora omonwa oye norore shekeli, oyeire, obae abwo as'intwe, inche naye,
1 Ensa eria bagachia baria aborokigwa ase Yesu, bakabora, Ning'o ore omonene as'obonda bwa igoro? 2 Akarangeria akana agake, agakabeka agatenena gatigati yabo, 3 akabora, Nekeene nabatebirie, motaonchogeti mobe buna abana abake, timogosoa obonda bwa igoro nonya ng'ake. 4 Gaki, onde bwonsi oyo orororobe omonyene koba buna omwana oyo, oyo nere ore omonene as'obonda bwa igoro. 5 Onde bwonsi oramwanche oyomo omogwekano bw'oyo, as'erieta riane, ninche anchire: 6 noyo oramogoche oyomo bw'aba abake abanchire asende inche, oyio igo agwenerete asungerwe rigoti riaye rigena rinene ri'ogosia, atugutwe as'endiba y'enyancha. 7 Obororo nobw'ense as'engecho y'okogochwa! naki okogochwa tikoring'aina amacha; korende obobe nobwaye omonto oyio okoreta okogochwa! 8 Nekerakogoche, onye nokoboko kwao, nonya nokogoro kwao, konache, ogotugute are naye: mbuya asore osoe as'obogima kore omonungu gose ekerema, kobua gotugutwa kore namaboko abere namagoro abere as'omorero o kare nakare. 9 Onye neriso riao rigokogocha, rirusie, oritugute are naye: mbuya asore osoe as'obogima kore egetong'o, kobua gotugutwa kore namaiso abere as'omorero bwe chaanam. 10 Rigereria timobaisa gochaya oyomo bw'abake aba, naki nabatebirie inwe, nonya namalaika abo igoro tibagotiga koborora obosio bwa Tata one ore igoro. 11 Naki Omwana-o-mwanyabanto igachete gotoria egiasirete. 12 Naki moroche? Omonto karabe neching'ondi emia eyemo, neyemo kerasire, Inee, tagotiga chiria emerongo kianda nakianda, agende gochia ebitunwa, nakorigia eria yasirete? 13 Karayenyore, nekeene nabatebirie, nagoke as'eria kobua chiria emerongo kianda nakianda chitasirete. 14 Naboigo takogwenera as'Iso oino ore igoro onde omo as'aba abake asire. 15 Oyomino karakore ebibe asore, genda omworokererie ogosaria kwaye, aye nere, inwe mweka, karakoigwere, kwamonyorire oyomino. 16 Karabe takoigwera, ira omonto oyomo gose babere, mogende asare mwensi: rinyare koba as'emenwa y'abarori babere gose batato, ring'ana rionsi ritenene. 17 Nere atabaigwereti abwo, tebia ekanisa; naende ataigwereti ekanisa nero, asore aye tiga abe buna omonto bw'Ebisaku na buna abakorusia ebango. 18 Nekeene nabatebirie, ande onsi moraboe as'ense nabe aboirwe na igoro; nande onsi morayasibore as'ense na igoro nasiborwe. 19 Naende eria kabere nabatebirie inwe, onye abande babere kabaratebanie as'ense ase ring'ana rinde rionsi bararisabe, nabakorerwe rirorio na Tata one ore igoro. 20 Naki asebare babere, gose batato, abasangererekeire erieta riane, nainche nao'nde agwo gatigati yabo. 21 Erio agwo Petero akagenda akamotebia, Aye Omonene, ng'ara karenga oyominto arankorere ebibe nainche mwabere? goika gatano nakabere gose? 22 Yesu akamotebia, Tingotebeti komwabera ara gatano nakabere; mwabere nonya ng'ara gatano nakabere ara emerongo etano nebere. 23 Ekiagera obonda bwa igoro iga bogwekaine nomonto oyomo omonda origetie gokora okobara as'abasomba baye. 24 Agachia gochaka gokora okobara nabarabwo, akareterwa omosomba oyomo, omosira omoriete chitalanta chilifu ikomi. 25 Erio aborwa eki'akomoakana, omonene oye agachika agorwe, ere na mokaye, nabana baye, nebiabwate bionsi, na koakanwa ebio ariete. 26 Omosomba oria akagwa inse, akamosasima, ogoteba, Omonene, ing'ira ng'ora, nanche gokoakana bionsi. 27 Agasogwa namabera omonene bw'omosomba oria, akamosibora, akamwabera esira yaye. 28 Korende agachia korwa agwo omosomba oyio akarora as'abasomba bande, oyomo omoriete chidinari emia eyemo, akamobwata rigoti akabora, Ng'akana esira yane. 29 Oria omosemba akagwa inse akamosorora, ogoteba, Ing'ifa ng'ora, nanche gokoakana. 30 Tancha rinde, agachia akamoruta echela goika aakane esira eriaf 31 Abasomba bande bagachia bakamotebia omonene obo onsi ayakoreka. 32 Erio agwo omonene oye akamorangeria, akamotebia, Aye omosomba omobe, inche ngakwabera esira eria yonsi as'ogonsorora gwansorerete: 33 Inee, aye tikwagwenerete komwabera omosomba oria onde, buna nainche nakwaberete? 34 Omonene oye akabea mono, akamobeka as'abasusuri, goika aakane ebiariete bionsi. 35 Naboigo na Tata one ore igoro arabakore nainwe motaberaneti ker'omonto noyomwabo as'emioyo yaino ime.
1 Erio Yesu agachia goikerania amang'ana ayio, akarua Galili, akagenda amabebe a Yudea are ng'umbu ya Yorodan; 2 agatunyanwa nemeganda emenge, akabagwenia aroro, 3 Abafarisai bakamochiera bakomotema aria, bakobora, Inee, mboronge omonto komotiga mokaye ase ring'ana rionsi? 4 Akabairaneria akabatebia, Timwanyagosoma, buna oyobakorete korwa omochakano, akabakora omosacha nomokungu, 5 nakobora, ekiagera ayio omonto namotige ise na ng'ina abwatane na mokaye, nabarabwo baria babere nigo barabe omobere oyomo? 6 Goika baria tibaba babere naende, korende omobere oyomo. Naboigo eki Nyasaye asang'ananirie, mwanyabanto tagiatanana. 7 Bakamoboria, Nas'engecho ki gaki, Musa achigete komoa omokungu rirube ri'ogotigana nakomotiga? 8 Akabatebia, Musa nas'engecho y'obokong'u bw'emioyo yaino arekobaa ribaga kobatiga abakungu baino korende korwa omochakano ayio tarenge bo. 9 Nainche nabatebirie inwe, Oyoratige mokaye tatiga as'engecho y'obotomani, nakomonyuoma oyonde,oyio otomanire; naende oyoranyuome oyotigirwe, otomanire. 10 Bakamotebia baria aborokigwa baye, Amang'ana ay'omonto na mokaye karabe iga, tegwenereti konyuoma. 11 Akabatebia, Tari bonsi baranyare kobwata ring'ana eri, tatiga abwo baetwe. 12 Naki mbare abagomba babiaretwe bo korwa chinda chi'abang'ina babo, naende mbare abagomba bakoretwe koba abagomba nabanto; naende mbare abagomba, bekorete boka abanyene koba abagomba as'engecho y'obonda bwa igoro. Oyoranyare koribwata ring'ana eri, tiga aribwate. 13 Erio akareterwa abana abake ababekere amaboko aye nakobasabera: korende aborokigwa baye bakabakania. 14 Yesu agateba, Batige abana abake, timobaisa kobatanga gocha asende, naki obonda bwa igoro nobwabo omoreng'anio bw'aba. 15 Goika ochia kobabekera amaboko aye, akaimoka korwa aroro akagenda. 16 Omonto oyomo akamochera, akabora, Omworokia omuya, ring'ana ki ndakore rigiya, goika mbe nobogima bwa kare nakare? 17 Akamotebia, Naki okondoka omuya? Tari omuya, tatiga Oyomo: konye naye gokorigia osoe as'obogima, bwata amachiko. 18 Akamotebia, Ayare buna arari? Yesu akamotebia, Toita, totomana, toiba, tobaisa gokwana amang'ana ay'oborimo; 19 Basike so na nyoko; naende, ancha omogisangi oo buna omobere oo. 20 Oria omomura akamotebia, Onsi ayio nayabwatire, Ring'ana ki rimochete? 21 Yesu akamotebia, Onye korigetie koba omonto omuya kegima, gachie, ogore ebiobwate bionsi, oe abataka; naye nobe nenibo igoro; erio oche ombwatie. 22 Ochia koigwa ring'ana erio omomura oria akaimoka ore nobororo, ekiagerete narenge nebinto ebinge. 23 Yesu akabatebia aborokigwa baye, Nekeene nabatebirie, nabe akong'u as'omonto omonyene enibo enyinge gosoa as'obonda bwa igoro. 24 Naende nabatebirie inwe, Albwango engamia egoeta as'ekebao gi'esindani kobua oyore nenibo gosoa obonda bwa Nyasaye. 25 Aborokigwa bagachia koigwa aria, bakaba nogoichana mono nagoteba, Ning'o gaki oranyare gotoreka? 26 Yesu akabarigereria, akabatebia, Ase mwanyabanto tirikonyarekana ring'ana eri, korende ase Nyasaye amang'ana onsi igakonyarekana. 27 Erio Petero akamoiraneria akamotebia. Rora, intwe twatigire bionsi twakobwatirie; inki gaki toranyore? 28 Yesu akabatebia, Nekeene nabatebirie, buna abwo mwantunyanire as'okoiborwa gwa kabere, ekero agocha goikaransa Omwana-o-mwanyabanto as'ekerogo ki'obonene bwaye, ekero ekio nainwe namoikaranse as'ebirogo ikomi nabibere, mokobigambera ebisaku ikomi nabibere bi'Abaisiraeli. 29 Nonde omo otigete enyomba, gose abamura bamwabo, gose abasubati bamwabo, gose ise, gose ng'ina, gose abana, gose emegondo. as'erieta riane, namenteranigwe ara emia, nobogima bwa kare nakare nabonyore. 30 Korende abanto abange abatang'ani nababe aba nyuma, nabare nyuma nababe abatang'ani.
1 Naki obonda bwa igoro nomogwekano bw'omonto omonyene enyomba osogete mambia chuni kogenda korika abaremi, bachie korema omogondo oye bw'emesabibu. 2 Gachia gotebania nabaremi rituko erimo somoni, akabaira as'omogondo oye bw'emesabibu. 3 Agasoka chinsa isato gachiaenre, akarora nabande bateneine echiro, batari nemeremo; 4 akabatebia nabarabwo, Genda nainwe as'omogondo bw'emesabibu, naende nimbae ekere kia boronge. Bakagenda. 5 Agasoka naende chinsa isano nemo gachiaerire, naende chinsa kianda, akanagokora boigo. 6 Goika chinsa ikomi nemo gachiaerire, agasoka, akarora abande bateneine, akabatebia nabarabwo, Nk'igo mwateneneraa bwaira motari nemeremo? 7 Bakamotebia, Ekiagera titorikiri nomonto. Akabatebia, Genda nainwe as'omogondo. 8 Erio rigoro riagoroba, oria omonene bw'omogondo akamotebia omorendi oye, Rangeria abaremi, obae eng'eria yabo, ochake korwa aba nyuma goika abe ritang'ani. 9 Bakagenda baria barigetwe chinsa ikemi nemo, bakaegwa ker'oyomo somonisomoni. 10 Goika bachia gocha abe ritang'ani, bagakaga ng'a nabatumanerigwe, bakanyora nabarabwo somonisomoni. 11 Erio kabaeirwe, bakaba nkwemurunganiabare as'omonyene enyomba, 12 bakabora, Abwo b'omoerio igabakora emeremo y'ensa eyemo yoka, naye kwabatoreng'aneria naintwe, abaremereretie emechando neriberera ri'omobaso bwonsi, 13 Nere akamoiraneria oyomo obo akamotebia, 'Mosani, tingokoreti bobe. 14 Titwatebanetie naye ase somoni? Bwata ekeronge kiao, ogende as'ogochia; nindigetie komoa oyo bw'omoerio koreng'ana naye. 15 Tingwenereti gokora buna ndigetie 'nche omonyene nebinto biane? Gose eriso riao riabaire ribe ekiagera nde omuya? 16 Naboigo aba nyuma nababe abatang'ani, nabatang'ani nababe aba nyuma. 17 Goika Yesu ochia gotira gochia Yerusalemu, akabaira bobisi baria aborokigwa baye ikomi nababere; bachia goika 'nchera akabatebia. 18 Nama, ngotiratore gochia Yerusalemu, noria Omwana-o-mwanyabanto nabekwe as'amaboko ay'abakuani nabariki, nabarabwo nabamonanchere ekina ki'amakweri. 19 Naende nabamobeke as'amaboko ebisaku, banyare komosekereria, naende komoaka chinkini, nakomobamba as'omosalaba. Goika rituko ri'atato naboke, 20 Erio agwo agachierwa na ng'ina abana ba Zebedi amo nabana baye, akamosasima nakongia ring'ana asare. 21 Akamoboria, Inki origetie? Akamotebia, Tebia abana aba bane babere baikaranse oyomo ensemo y'okorio kwao, noyomo ensemo y'okobee kwao, as'obonda bwao. 22 Yesu akairaneria agateba, Eri mokorigia timorimanyeti. Inee, namonyare konywera egekombe ndache konywera inche? 23 Bakamotebia , Natonyare. Akabatebia, Egekombe kiane ekeene namonywe, korende aria ogoikaransa ensemo yane y'okorio, nensemo yane y'okobee tindi nogochika kobaa, tatiga ababekeirwe ang'e na Tata one. 24 Baria ikomi bachia koigwa, bakababea omonto oria na momura omwabo. 25 Ko Yesu ere akabarangeria bache asare, naende akabora, Mwamanyire ng'a abagambi b'ebisaku igo begarete, nabanene babo igo bare nokobua igoro asebare, 26 K'ayio takoba bo asemore inwe, korende 'monto'nde bwonsi orarigie koba omonene asemore, igarabe omosomba oino; 27 noyorarigie koba omotang'ani oino, igarabe omotomwa oino; 28 buna Omwana-o-mwanyabanto nere tachete gokorerwa, tatiga ogokora ere bweka omonyene, nakorua obogima bwaye koba okoboria as'abange. 29 Goika bachia korua Yeriko, agatunyanwa nomoganda omonene. 30 Nabwo abanto babere emeuko baikaransete ensemo y'enchera, bagachia koigwa ng'a Yesu ogoeta aroro, bakaaka egeturi, bakobora, Omonene, twabere, aye omwana o Daudi. 31 Noria omoganda okobatogonyera ng'a banyare gokira, tibakira rinde; bakamenta okwoga, bakobora, Omonene, twabere, aye omwana o Daudi, 32 Yesu agatenena, akabarangeria, erio akabora, Ring'ana ki morigetie mbakorere? 33 Bakamotebia, Omonene, ntorigetie onye gwatoramokia amaiso aito. 34 Yesu agasogwa namabera, akabakuna amaiso abo, erio kegima amaiso abo akarora, bakamotunyana.
1 Goika bachia goika ang'e nomochie o Yerusalemu, bagaika ase Bethifage, as'egetunwa ki'Emezeituni. Erio Yesu agatoma aborokigwa baye babere akabatebia, 2 Soa as'omochie okendokaine korwa as'obosio bwaino, erio namorore etigere esibire, nemori yaye amo nero; mochisibore mondetere. 3 Nomonto karabatebia ring'ana momotebie, Omonene nachirigetie; erio kegima nachitome. 4 Ayio onsi agakoreka anyare goikerana ayatebetwe nomobani, ogoteba, 5 Motebie omoiseke o Zayoni, Oyo nere, Omoruoti oo okogochera; Nomokanyeku, orinire etigere igoro, Nemori y'etigere, akamori g'etigere. 6 Baria aborokigwa bakagenda bagakora buna bachigetwe na Yesu. 7 Bakamoretera etigere nemori yaye, bagachiara chianga chiabo, nere akarina. 8 Nabange b'emeganda bakara chianga chiabo as'enchera: abande bakabutora amato emete, bakwara enchera. 9 Emfeganda ebatang'anete, nabare komorua nyuma, bakaaka egeturi, bagoteba, Hosana as'omwana o Daudi; bwancheirwe oyochire as'erieta ri'Omonene; Hosana as'igoro mono. 10 Erio ochia gosoa Yerusalemu ogasegasega omochie omogima, abanto bakabora, Ning'o oyio? 11 Eria, emeganda ekabora, Oyo nere omobani, erieta riaye okorokwa Yesu, nomonto o Nazareti ya Galili. 12 Erio Yesu agasoa ase hekalu ya Nyasaye, akabasokia isiko bonsi abarenge gotonda nakogora aroro hekalu ime, agachionchorana nechimesa chi'abare goonchoreria chibesa, nebirogo bi'abare gotonda amaruma; 13 nere akabatebia, Nerikire, Enyomba yane igerarokwe enyomba y'ogosaba, nainwe mokoyekora rikuruma ri'abaibi. 14 Bakamochiera emeuko nebirema aria ase hekalu, akabagwenia. 15 Nabakuani abanene nabariki bagachia kobirora ebirage bi'omoichano aregokora, nabana bakoaka egeturi ase hekalu, bakobora, Hosana as'omwana o Daudi, erio agwo bakabea. 16 Bakamotebia, Kwabaigure aba buna bakobora? Yesu akabatebia, Ee; timwasomete ng'a, Nas'emenwa y'abana nabakogonka gwaikeranirie ebako? 17 Akabatiga agasoka isiko korwa as'omochie, akagenda Bethania, akarara aroro. 18 Mambia okoirana omochie, akaromwa nenchara. 19 Akarora omoko oyomo enchera, akayochiera, tarora gento asore, tatiga amato oka; akayotebia, Goika kare nakare tokwama aye naende amatunda. Erio kegima omoko oyio okoma. 20 Aborokigwa bachia korora ring'ana riria bagaichana, bakobora, Naki bono omoko oyo okwoma bwango iga? 21 Yesu akabairaneria, akabatebia, Nekeene nabatebirie, kamorabe nokwegena motakoreti ogosiereria konde, tari erio ri'omote rioka morakore, korende nonya namogetebia egetunwa eke, Tegoka, otugutwe enyancha ime, narikoreke. 22 Nebinto bionsi morasabe, as'ogosaba, komoregene namonyore. 23 Goika ochia gosoa hekalu ime okworokereria, agachierwa nabakuani abanene nabagaka b'abanyene ense, bagoteba, Nas'ogochika ki ogokora amang'ana aya? Nere ng'o okoete egochika oko? 24 Yesu akabairaneria, akabatebia, Ninche nimbaborie ring'ana erimo, Mokong'iraneria, nainche nimbatebie as'ogochika ki ngokora aya. 25 Inee, okobatisa gwa Yohana, ng'ai kwaruete? Igoro kwaruete, gose iga kwaruete as'abanto? Bono bakaba ngotebaniabare barabwo ase barabwo, bakobora, Togoteba, Igoro kwaruete, igaratoborie, Ninki rende engecho yaye motamwancheti? 26 Naende togoteba, Nas'abanto kwaruete, twairoka omoganda, ekiagera abanto bonsi banchire ng'a Yohana nomobani. 27 Bakairaneria Yesu, bakamotebia, Titomanyeti. Nere akabatebia, Nonya ninche tinkobatebia as'ogochika ki ngokora aya. 28 Korende naki moroche? Omonto gete narenge nabana babere; akamochiera oria omonene agateba, Omwana one, genda rero okore emeremo 'mogondo. 29 Akamotebia, Tindigeti; naende nyuma agaonchoka akagenda. 30 Nere akamochiera oyo kabere, akamotebia boigo. Akamoiraneria akabora, Nkogendande, Omonene! gotagenda. 31 Inee, norori ase baria babere okorete obwanchani bwa ise? Bakabora, Noria bwe ritang'ani. Yesu akabatebia, Nekeene nabatebirie ng'a abakorusia ebango nabakungu abatayayi ngotang'anabare asemore gosoa as'obonda bwa Nyasaye. 32 Naki Yohana achete as'enchera y'oboronge, timwamwancha: korende abakorusia ebango, nabakungu abatayayi bakamwancha, nainwe, mokarora erio nyuma, timwaonchoka, monyare komwancha. 33 Tegerera omoreng'anio onde. Narenge omonto orenge nenyomba, nere agasimeka omogondo bw'emesabibu, akayoetananeria orobago, agakunya agakora egetera gi'okomitera amasabibu, akaagacha negesasimo, akayoatananera abaremi, akamanora, akagenda ense y'are. 34 Bono ekero ki'amatunda giachia goika ang'e, agatoma abasomba baye as'abaremi, baegwe amatunda aye. 35 Abaremi bakababwata abasomba baye, oyomo bakamoaka enyimbo, noyonde bakamoita, noyonde bakamoaka amagena. 36 Naende agatoma abasomba bande abange kobua abe ritang'ani: bakabakora bo. 37 Bono nyutna y'ayio onsi akamotoma omwana oye asebare, agateba, Nabamosike omwana one. 38 Abaremi bagachia komorora omwana oye, bagatebania boka abanyene; Oyo nere omonyamwando. Gaki, tomoite, omwando oye toyoire. 39 Bakamobwata, bakamotuguta isiko as'omogondo bw'emesabibu, bakamoita. 40 Inee, karache omonene bw'omogondo, naki arabakore abaremi baria? 41 Bakamotebia, Igarabasirie bobe ababe baria, nabatananere omogondo abaremi bande, abagocha komoa amatunda aye as'ebiro biabo. 42 Yesu akababoria, Timwanyagosoma as'amariko? Rigena abaagachi bangete, Riabaire nario omotwe bw'egetankumba; Riarure as'omonene ring'ana eri, Nario ri'ogoichania as'amaiso aito. 43 As'engecho eye nabatebirie, ng'a obonda bwa Nyasaye naborusigwe asemore, boegwe egesaku gekwama amatunda aye. 44 Noyoragwe igoro ase rigena eri nateke ebisamunye: nere oyoriragwere narirorio narimosie kegima. 45 Goika bachia koyeigwa emereng'anio yaye, abakuani abanene n'Abafarisai bakamanya ng'a mbarabwo agoteba. 46 Bagachia korigia komobwata, bakabairoka emeganda, ekiagera konya banchire ng'a nomobani.
1 Naende Yesu akairaneria agakwana nabarabwo as'emereng'anio eria kabere, akabora, 2 Obonda bwa igoro igo bogwekaine nomonto omoruoti okorerete omwan'oye enyangi. 3 Akabatoma abasomba baye barangerie abarigirie as'enyangi: bakanga gocha. 4 Naende agatoma abande, akabatebia, Batebie abarigirie, eye nero, endagera yane naroisirie; chiombe chiane nebinoru biane bianyenyirwe, nabionsi biabaire ang'e: inchuo enyangi. 5 Korende bakayakora amagusu amang'ana aya, bakagenda, oyomo as'omogondo oye, noyomo as'okoonchereria kwaye; 6 nabatigarete bakababwata abasomba baye bakabakora bobe, bakabaita. 7 Oria omoruoti akabea mono, akarua emeganda yaye ekabasiria abaiti baria, nomochie obo akayosamba nomorero. 8 Erio agwo akabatebia abasomba baye, Enyangi ng'ang'ere, korende abarangeretigwe tibagwenerete. 9 Gaki genda as'amakori e chinchera, nabwo mokorora mobarangerie gocha enyangi. 10 Abasomba baria bagasoka, bagaika ase chinchera, bakabasangereria bonsi abwo baroche, nonya nababe nonya nabaya, enyangi egaichorwa nabageni. 11 Korende omoruoti ochia gosoa korigereria abageni, akarora omonto oyomo aroro otabegete eanga y'enyangi. 12 Akamotebia, 'Mosani, naki gwakorete ogasoa aiga naye otari neanga y'enyangi? Agakirakiri. 13 Erio agwo omoruoti akabatebia abasomba, Moboe amaboko namagoro, momotugute as'omosunte o isiko mono: nakobe nokorera aroro nokoriania amaino. 14 Naki abarangerigwe nabange, k'abachorirwe nabwo abake. 15 Erio agwo Abafarisai bakagenda bagakora ekina buna bagocha komotega as'amang'ana. 16 Bakabatoma aborokigwa babo asare, amo Nabaherode, bakobora, Omworokia, twakomanyire ng'a igore omonto bw'ekeene, nenchera ya Nyasaye nkoyiorokereriore ekeene, nonya 'monto onde bwonsi torikomoiroka: naki torikorigereria amasio a abanto. 17 Gaki totebie naki oroche aye? Mboronge koa Kaisari ebango, gose tai boronge? 18 Yesu akamanya obobe bwabo, akabora, Naki mogontema, inwe abang'ainereria? 19 Nyorokia efetha y'ebango. Bakamoretera edinari. 20 Akababoria, Nekiang'o ekieni eke, nekemanyererio eke? 21 Bakamotebia, Nebia Kaisari. Erio agwo akabatebia, Gaki ebia Kaisari moa Kaisari, nebia Nyasaye moa Nyasaye. 22 Goika bachia koigwa ring'ana riria bagaichana, bakamotiga, bakagenda. 23 Rituko riria bakamochiera Abasadukai, nabarabwo nabanto abagoteba ng'a okobokigwa tikori; bakamoboria, 24 bakabora, Omworokia, Musa natebete ng'a omonto karakwe, nere onye taraibora abana, omomura omwabo oria okure rimenyane nomokungu oye, anyare komoteneneria egesaku. 25 Naboigo, mbarenge abamwabo batano nababere. Oyo bwe ritang'ani akanyuoma, erio agakwa, nekiagera tarenge nomwana, akamotigera omomura omwabo mokaye, 26 Naboigo noyo kabere nere, noyo gatato, goika bakaera bonsi batano nababere. 27 Omoerio obo bonsi omokungu oria agakwa. 28 Inee, as'okobokigwa, mokang'o orabe omokungu oria ase baria batano nababere? ekiagera bonsi barenge nere. 29 Yesu akabairaneria akabatebia, Mwasirire inwe ekiagera motamanyeti amariko, nonya nokobua kwa Nyasaye. 30 Naki as'okobokigwa, tibakonyuoma, tibakonyuomwa, korende igabarabe buna amalaika a Nyasaye are Igoro. 31 Naende as'okobokigwa, timorasoma eri mwatebetigwe na Nyasaye, aregoteba, 32 Inche ninche Nyasaye o Ibrahimu, na Nyasaye o Isaaka, na Nyasaye o Yakobo? Nyasaye tari Nyasaye bw'abwo bakure, korende bw'abare moyo. 33 Bachia koigwa aria, emeganda egakumia as'okworokereria kwaye. 34 N'Abafarisai bagachia koigwa buna abakiririe Abasadukai, bagasangerereka amo. 35 Oyomo ase barabwo, omworokia bw'amachiko, akamoboria as'okomotema, akabora, 36 Aye Omworokia, ngochika ki kore okonene ime as'amachiko onsi? 37 Yesu akamotebia, Mwanche Omonene Nyasaye oo, nomoy'oo bwonsi, nenkoro yao yonsi, nobong'aini bwao bwonsi. 38 Oko nakwo ogochika okonene, naende nakwo kwe ritang'ani. 39 Nogwa kabere kogwekaine nokwo, nakwo oko: Mwanche omogisangi oo buna gwanchire omobere oo. 40 As'amachiko aya abere igabwataine amachiko onsi nababani, 41 Abafarisai bagachia gosangerereka, Yesu akababoria, 42 Okobora, Naki inwe moroche ase Kristo? Nomwana ong'o? Bakamotebia, nomwana o Daudi. 43 Akababoria, Inki gekogera rende Daudi, as'Omoika, akomoroka Omonene? okobora, 44 Omonene namotebetie Omonene one, Ikaransa ensemo y'okoboko kwane gw'okorio, Goika mbabeke ababisa bao inse ase chimbaratero chiao. 45 Gaki onye Daudi okomoroka Omonene, naki achakoba omwana oye naende? 46 Nonya nonde tarenge orekonyara komoiraneria ring'ana; nonya nkorwa rituko riria 'mont'onde tamoboria ring'ana rinde.
1 Erio agwo Yesu agakwana nabaria emeganda naborokigwa baye, okobora, 2 As'ekerogo kia Musa baikaransire abariki n'Abafarisai. 3 Gaki amang'ana onsi bakobatebia yakore, moyarende nakoyabwata; korende timokora omogwekano bw'ogokora kwabo; naki barabwo igo bagoteba, ko tibagokora. 4 Naki igo bakoboa chigurube chindito, batweka abanto bande amagega abo, ko naakong'u kochibogoria, barabwo abanyene tibagwancha kochinyegeria nekiara kiabo. 5 Nogokora kwabo gwonsi igo bagokora ng'a barorwe nabanto: naki igo bakogareyia chifulakteria chiabo, naende bamenta emebarero ye chianga chiabo. 6 Nabarabwo igo banchete aase e ritang'ani as'endagera, nagoikaransa aatang'ani ase chisunagogi, 7 nagokwanigwa ase chichiro, nakorokwa nabanto, Rabii, Rabii. 8 Ko inwe timobaisa korokwa Rabii: naki omworokia oino noyomo, nainwe mwensi nabamo. 9 Nonya ninwe timobaisa komoroka omonto tata as'ense: naki Iso oino noyomo ore igoro. 10 Gose timobaisa korokwa abanene: naki omonene oino noyomo, nere Kristo. 11 Korende oyore omonene asemore igarabe omosomba oino. 12 Noyo oreimokererie igoro omonyene, oyio nairanigwe inse, noyorekeyie naimokererigwe igoro. 13 Korende obobe nobwaino, abariki n'Abafarisai, abang'ainereria! ekiagera egesieri ki'obonda bwa igoro mwagesiekire as'abanto: nakt inwe abanyene timogosoa, nonya nabagosoa timori kobatiga basoe. 14 Obobe nobwaino, abariki n'Abafarisai, abang'ainereria! ekiagera mokoria chinyomba chi'ababoraka, naende as'obong'amereiia mwasaba mono; as'ayio namonyore ekina ekenene kobua. 15 Obobe nobwaino, abariki n'Abafarisai, abang'ainereria! ekiagera mwasiongorokana enyancha nense enyomo konyora omotunyani oyomo; okonyorekana mwamotiga oba omwana bwe chaanam ara kabere kobua inwe abanyene. 16 Obobe nobwaino, abarai emeuko! inwe mogoteba ng'a, Oyorarie emuma ase hekalu, tari gento; korende oyorarie emuma as'ethahabu ye hekalu, bwesibire. 17 Abakayayu inwe nemeuko! naki rinene ndiriri? nethahabu, gose neria hekalu egokora ethahabu enchenu? 18 Naende, oyorarie emuma as'artiathabahu, tai gento; korende oyorarie as'ekeng'wanso ker'igoro as'amathabahu, bwesibire oyio. 19 Abakayayu inwe nemeuko, Naki ekenene nkereki? neria esadaka, gose naria amathabahu akoyekora enchenu esadaka eria? 20 Gaki oyorire emuma as'amathabahu, orire nas'ebire igoro yaye. 21 Noyorire emuma ase hekalu, orire as'eyio, nas'oyo oikaransete ime. 22 Noyorire emuma as'erioba orire as'ekerogo kia Nyasaye nas'oyo oikaransete igoro. 23 Obobe, nobwaino, abariki n'Abafarisai, abang'ainereria! ekiagera iga mokorua etaisi y'ebinzari, nekumini, korende mwatiga amang'ana amanene ayogochika, ekina, namabera, nokwegena: naro ayio nabagwenerete koyakora, amo nagotatiga aria. 24 Abarai emeuko, mwakenonora egechuni, mwamera engamia. 25 Obobe nobwaino, abariki n'Abafarisai, abang'ainereria! ekiagera egekombe nesani mwabisibia korwa isiko, ko ime biaichoire nobouri nobosiri. 26 Aye Omofarisai omoukof sibia ime egekombe nesani ritang'ani, erio n'isiko kenyare koba ekiya. 27 Obobe nobwaino, abariki n'Abafarisai, abang'ainereria! ekiagera inwe mwagwekanire nechimbera chiaagetwe echoka; isiko chiarorekana chingiya, ko ime chiaichoire namauga nchitondo, neuramba yonsi. 28 Nainwe nabo more, isiko mwarorekana as'abanto ng'a nab'ekeene more, ko ime mwaichoirwe nobong'ainereria nobobe obonge. 29 Obobe nobwaino, abariki n'Abafarisai, abang'ainereria! ekiagera mwaagacha chimbera chi'ababani, nagochioma chimbera chi'ababoronge, 30 naende mwateba, Onyore nintwe twarenge aroro kare amatuko ay'abatata baito, anga titwabwatanete na barabwo as'amanyinga ababani. 31 Igo mwetebire inwe abanyene, ng'a ninwe abana babo baria baitete ababani. 32 Gaki bono, geichorie ekerengo ki'abaiso baino! 33 Inwe ching'iti, abana be rirubi, naki morakore motame ekina kie chaanam? 34 Ekiagera aya, rigereria, natomire asemore ababani nabanto b'obong'aini nabariki: abande babo namobaite, namobabambe, nabande babo namobaake chinkini chisunagogi chiaino ime, nakobaseria omochie as'omochie; 35 nario arabachere igoro asemore amanyinga onsi aitegete korwa amanyinga Abeli oria omonyene oboronge, goika aya Zakaria, omwana o Barakia, mwamoitete gatigati ye hekalu namathabahu. 36 Ekeene nabatebirie, amang'ana aya onsi nache as'ekegori eke. 37 Aye Yerusalemu, Yerusalemu, aye oyogoita ababani, nakobaaka namagena abatometwe asore! ng'ara karenga narenge korigia gosangereria abana bao, buna engoko ekobisangereria ebichuchu biaye ime ase chimbaba chiaye, gotimwancha. 38 Rigereria, enyomba yaino mwatigeirwe ritombe. 39 Naki nabatebirie, timokondora naende nonya ng'ake, goika motebe, Bwancheirwe oyogocha as'erieta ri'Omonene.
1 Erio Yesu ochia korua aria hekalu okogenda, aborokigwa baye bakamochiera korigia komworokia amaagacho e hekalu. 2 Akabairaneria akabatebia, Inee, mwabirorire ebi bionsi? Nekeene nabatebirie, aiga tagotigara rigena erimo as'erinde igoro ritayeiri inse. 3 Erio gaikaransire as'egetunwa ki'Emezeituni, agachierwa naborokigwa baye bobisi, bakobora, Totebie, ndi arabe ayio, Naro nkemanyererio ki ki'ogocha kwao, nay'omoerio bw'ense? 4 Yesu akabairaneria akabatebia, Erende timobaisa kong'ainwa na'monto onde bwonsi. 5 Naki abange nabache as'erieta riane, babore, Inche ninche Kristo; nabasirie abanto abange. 6 Nainwe namoigwe amang'ana y'esegi nebirage bi'esegi; rigereria timoondoka, naki bori nabe aya onsi; k'omoerio toracha. 7 Naki ebisaku nabimokerane korwana nebisaku binde, nobonda naboimokerane korwana nobonda bonde; naende enchara nebe, nomotengecho bw'ense, chinsemo-chinsemo. 8 Ayio onsi naro omochakano bw'obororo. 9 Erio agwo nababarusie monyare gochandwa nagoitwa; nainwe namobe abanto bakogechwa nebisaku bionsi as'engecho y'erieta riane. 10 Nekero ekio abanto abange nabagochwe; naende abande nababekane as'amaboko a ababisa babo, barabwo ase barabwo, naende nabagechane barabwo ase barabwo. 11 Nababani b'oborimo nabaimoke abange mono, basirie abanto abange. 12 Nekiagera okomenteka kw'ebibe, obwanchani bw'abange nabokende. 13 Korende Oyoraremererie goika omoerio, oyio nakonyeke. 14 Naende amang'ana aya amaya ay'obonda narandigwe as'ense yonsi koba ekiorokererio as'ebisaku bionsi; erio omoerio ochiche. 15 Gaki naboigo kamogocha korora okogechia kw'ogosaria gwatebetwe nomobani Danieli gwatenenire aase aaya (oyogosoma ainyore), 16 erio agwo abare Boyahudi batame gochia ebitunwa ime. 17 Oyore igoro as'enyomba taika kogenda korusia gento mwaye: 18 oyore 'mogondo tairana nyuma gochia kobogoria chianga chiaye. 19 Korende obobe nobwabo abare abarito nabakogonkia as'amatuko aria. 20 Korende saba ogotama kwaino tikoba ekero ki'obokendu, gose kie rituko ri'esabato. 21 Naki agwo nebe emechando emenene; etanakoba emechando engecho buna eyio korwa omochakano bw'ense goika bono, nonya nyuma tekoba nonya ng'ake. 22 Naende onye amatuko ayio atanachetwe, anga 'monto tatoregete; korende as'engecho ya baria bachoretwe nanachwe amatuko ayio, 23 Nekero ekio omonto karabatebie, Oyo nere Kristo, oyo aa! gose, Oyio oragwo! timwancha. 24 Naki nabaoroke Amakristo oborimo, nababani b'oborimo, nabakore ebikone ebinene namakumia, goika, keranyarekane, nabang'aine nonya nabachoretwe. 25 Nainwe, naro ayio natang'anire kobatebia! 26 Gaki bakobatebia, Oyo nere, eroro ime; timosoka isiko: Oyio, ore ebinunchi bia bobisi; timwancha. 27 Naki buna ekomesa korwa mocha yabara gochia bosongo, naboigo korabe ogocha kw'Omwana-o-mwanyabanto, 28 Naki ase ribego rire, nao chinsoti chigosangerereka. 29 Korende nyuma y'emechando y'amatuko aria, erioba narionchoke ribe omosunte, nomotienyi tokobara, neching'enang'eni nachigwe, nechinguru chia igoro nachitengeche, 30 erio nario kerache kororekana igoro egekone ki'Omwana-o-mwanyabanto: nario ebisaku bionsi bi'ense birarere; naende nabamorore Omwana-o-mwanyabanto ogocha as'amare a igoro, nechinguru, nobonene obonge, 31 Erio natome amalaika aye negeturi ekenene ki'egetureri, nabarabwo nabasangererie abachore baye amo, korwa ase chimbeo inye, korwa ensinyo y'ense goika ensinyo ende. 32 As'omoko eorokererie omoreng'anio. Omote oye gosebokire, naende omerire amato, mwamanyire ng'a ng'ang'e ekero ki'egurugura; 33 naboigo nainwe morachie koyarora ayio onsi, momanye ng'ang'e are, ang'e nagesieri. 34 Nekeene nabatebirie, tigegoeta ekegori eke, goika aya onsi akoreke. 35 Igoro nense nachiete, ko ring'ana riane tirigoeta nonya ng'ake, 36 Nebirage bie rituko riria nensa eria onde tari omanyete, nonya namalaika a igoro, tatiga Tata, ere bweka, 37 Korende buna amatuko aria a Nuhu arenge, naboigo kogocha koba ogocha kw'Omwana-o-mwanyabanto. 38 Naki buna barenge amatuko aria amache ataracha, bare koria, bakonywa, bakonyuoma, bakonyuomerigwa, goika rituko Nuhu asoete as'obwato, tibamanya rinde, 39 goika amache amanene aria agacha, akabaira bonsi; naboigo kogocha koba ogocha kw'Omwana-o-mwanyabanto. 40 Engaki eyio abanto habere nababe omogondo; oyomo airwe, oyomo atigwe; 41 abakungu babere nababe bagosera orogena oromo; oyomo airwe, oyomo atigwe. 42 Naboigo renda, naki timomanyeti rituko ki agocha Omonene oino. 43 Manya ring'ana eri erimo: onye oria omonyene enyomba namanyete ekero agocha-gocha oria omoibi, anga narendete gose anga tare gotiga enyomba yaye ebochorwe. 44 As'ayio nainwe kabe ang'e naki rias'ensa motakagereti agocha oria Omwana-o-mwanyabanto. 45 Gaki ning'o oyio omosomba omwegeni, naende omong'aini, obegetwe nomonene oye igoro as'enyomba yaye, anyare kobaa endagera abasomba as'ekero kiaye? 46 Nare negesio omosomba oria, rigoro omonene oye agocha amonyore ogokora iga. 47 Nekeene nabatebirie namotenenie igoro as'ebia abwate bionsi. 48 Korende omosomba oria omobe karabore as'omoyo oye, Omonene one otebanire; 49 na karachake kobaaka abasomba b'omonene oye, nakoria nakonywa amo nabagotinda; 50 erio omonene oye omosomba oria igarache komochiera ase rituko atakagereti, nensa atamanyeti; 51 nere igaramonachane ebing'ese bibere, namobekere okobara kwaye amo nabang'ainereria, agwo nakebe nekerero nokoriania amaino.
1 Erio obonda bwa igoro naboreng'anigwe nabaiseke ikomi, basogete nechitaya chiabo gochia korotota omonene bw'enyangi. 2 Nase barabwo igo barenge abariri batano, nabang'aini batano. 3 Naki baria abariri bakaimokia chitaya chiabo, ko tibaimokia namaguta: 4 baria abang'aini bakaimokia amaguta as'ebinto biabo amo nechitaya chiabo. 5 Goika ochia gotebana omonene bw'enyangi, bagasundoka bonsi bakarara. 6 Botuko gati gekaba negeturi, Omonene bw'enyangi oyo! soka momorotote. 7 Erio agwo bakaimoka abaiseke baria bonsi, bakaroisia chitaya chiabo. 8 Abariri bakabatebia abang'aini, Twatanere amaguta aino; ekiagera chitaya chiaito chiarimire. 9 Baria abang'aini bakabairaneria, bakabora, Genda, takonyara gotoisana intwe nainwe twensi; mbuya koinoragende kwegorera as'abakogora, 10 Barabwo bagachia koimoka gochia kogora, agacha omonene bw'enyangi; baria babete ang'e bagasoa amo nere as'enyangi, egesieri gegasiekwa. 11 Naende nyuma bagacha baria abaiseke bande bakobora, Omonene, omonene, toigorere! 12 Akabairaneria, akabora, Nekeene nabatebirie, timbamanyeti inwe. 13 Gaki kabe nokorenda, naki timomanyeti rituko nonya nensa. 14 Naki iganga buna omonto okogenda orogendo gochia goikaransa ense ende, akarangeria abasomba baye, akabeka asebare enibo yaye. 15 Akamoa oyomo chitalanta isano, noyo kabere akamoa chitalanta ibere, noyo gatato akamoa etalanta eyemo, ker'omonto koreng'ana nokonyara kwaye. Brio akagenda. 16 Akagenda oria oirete chitalanta isano, agakora emeremo nachio, akanyora chitalanta chinde isano. 17 Noria oirete ibere akanyora ebitoki ibere boigo. 18 Akaimoka oria oirete eyemo, akagenda agakunya inse, akayebisa efetha y'omonene oye. 19 Nyuma k'amatuko achia koera amange, agacha omonene bw'abasomba baria, akarigia ribara asebare, 20 Akagenda oria oirete chitalanta isano, akabogoria nechitalanta isano chinde, akamoirera, akabora, Omonene, nkwang'ete chitalanta isano; rora, nanyorire nechitalanta chinde isano: 21 Omonene oye akamotebia, Gwakorire buya aye, omosomba omuya nomwegeni: kwabaire omwegeni as'ebire ebike, ninkobeke igoro as'ebinge. Soa as'omogoko bw'omonene oo. 22 Naende akagenda oria oirete chitalanta ibere, akabora, Omonene, nkwang'ete chitalanta ibere; rora, nanyorire ibere ching'ao ebitoki. 23 Omonene oye akamotebia, Gwakorire buya aye, omosomba omuya omwegeni: kwabaire omwegeni as'ebire ebike, ninkobeke igoro as'ebinge. Soa as'omogoko bw'omonene oo. 24 Nere agachia kogenda oria oirete etalanta eyemo, akabora, Omonene, iga nakomanyete ng'a nomonto omokong'u ore, igokogesa otasimegeti, igogosangereria otabusureti; 25 erio nkairoka, nkagenda nkayebisa inse etalanta yao; eyio nero, eyao ore nero. 26 Omonene oye akamoiraneria, akamotebia, Nomosomba omobe ore, nomworo, Nkwamanyete ng'a igo nkogesa ntasimegeti, naende iga ngosangereria ntabusureti: 27 gaki nkwagwenerete koyebeka efetha yane as'abakoonchoreria chifetha, nainche ngocha, anga nanyora eyane amo nebitoki biaye. 28 Moure gaki etalanta yaye, omoe omonyene chitalanta ikomi. 29 Naki oyo obwate igakoegwa, naende omenteranigwa; k'oyo otabwati igakourwa eyare nero. 30 Noyo omosomba otagwenereti, motugute as'omosunte o isiko mono; nakebe nekerero nokoriania amaino. 31 Ogocha gocha Omwana-o-mwanyabanto as'obonene bwaye, namalaika onsi amo nere, erio naikaranse as'ekerogo ki'obonene bwaye, 32 nas'obosio bwaye nabisangerereke ebisaku bionsi: nere nabatanane abaiga naba, buna omorisia agwatanana ching'ondi chiaye nechimbori; 33 ching'ondi achibeke as'okoboko kwaye gw'okorio, nechimbori achibeke as'okoboko kwaye gw'okobee. 34 Erio oria omoruoti nabatebie abare okoboko kwaye gw'okorio, Nchuo inwe mwasesenetigwe na Tata one, soa as'obonda mwaroiseretigwe korwa ogotongwa gw'ense. 35 Naki narenge nenchara, mokang'a endagera; narenge nerang'o, mokang'a nkanywa; narenge omogeni, mokandoisia; 36 narenge bosa, mokambisia, narwarete, mogacha kondora, nasibetwe echela, moganchichera. 37 Erio baria abanyene oboronge nabamoiranerie, babore, A! Omonene, naye ndi twakoroche kore nenchara, togakorageria? Gose ndi twakoroche kore nerang'o, togakoa okanywa? 38 Ndi twakoroche kore omogeni, togakoroisia? gose ndi twakoroche kore bosa, togakobisia? 39 Naende, ndi twakoroche kore omorwaire, gose gosibire echela, tokagochichera? 40 Nomoruoti nabairanerie, abatebie, Nekeene nabatebirie inwe, koreng'ana buna mwaregokorera oyomo as'aba abaminto abare abake, ninche mwakororete. 41 Erio agwo nabatebie abare as'okoboko gw'okobee nabarabwo: Imoka korwa asende inwe mwaragereretigwe, mogende as'omorero o kare nakare, ogacheretwe saitani namalaika aye: 42 naki narenge nenchara, timwang'a endagera, narenge nerang'o, timwang'a inywe; 43 narenge omogeni, timwandoisia; narenge bosa, timwambisia: narwarete, nechela ime, timwacha kondora. 44 Agwo nabamoiranerie baria nabarabwo, babore, Omonene, ndi twakoroche aye kore nenchara, gose nerang'o, gose kore omogeni, gose kore bosa, gose korwarete, gose kore echela ime, titwagokorera? 45 Agwo omoruoti nabairanerie, abore: Nekeene nabatebirie, koreng'ana buna motare gokorera oyomo as'aba abare abake, timwankororete inche. 46 Nabanto aba nabagende as'ogoitwa gwa kare nakare, k'abanyene oboronge nabagende as'obogima bwa kare nakare.
1 Erio Yesu kayakorire amang'ana aya onsi, agatebia aborokigwa baye; 2 Alwamanyire ng'a nyuma as'amatuko abere nebe Epasaka, n'Omwana-o-mwanyabanto nere nabekwe as'amaboko a ababisa baye anyare kobambwa. 3 Erio agwo abakuani abanene, nabariki, nabagaka b'abanto, bagasangerereka as'egora y'omokuani oyomo omonene, erieta riaye okorokwa Kaifa; 4 bagakora ekina barabwo ase barabwo, banyare komobwata Yesu ase chisemi nakomoita. 5 Korende bakabora, takoba ase rituko rinene, tiricha koba riroroche as'abanto. 6 Nere Yesu rigoro arenge Bethania as'enyomba ya Simon oyorenge noborwaire bw'ukoma, 7 agachierwa nomokungu ore nechuba y'alabastro y'amanukato aye rigori rinene, akamonyororokeria omotwe oye igoro aria aikaransete as'endagera. 8 Bagachia korora ring'ana riria, baria aborokigwa bakagecha, bakabora, Nobwaki obosiri obo? 9 Naki amanukato aya anga tare kogorwa chishilingi chinyinge nakoegwa abataka? 10 Yesu akamanya aria, akabatebia, Naki mokomoichania omokungu? Ekiagera onkoreire emeremo emiya. 11 Naki abataka igo more nabarabwo amatuko onsi; 12 Naki buna anyororokeria amanukato aya omobere one, nas'engecho y'ogotindekwa kwane akorerete bo. 13 Nekeene nabatebirie, naas'erarandigwe enchili eye as'ense yonsi, neri oyo akorete naritebwe koba okoinyora asare. 14 Nakero ekio akagenda oyomo ase baria ikomi nababere, nere okorokwa Yudasi Omoisikariota, akabachiera abakuani abanene, 15 akabatebia, Ngento ki morang'e inyare kobamobekera as'amaboko aino? Bakamorengera ebisamunye emerongo etato bi'efetha. 16 Korwa ekero ekio akaba nkoririgiare ribaga anyare komorua. 17 Rituko rie ritang'ani as'amatuko ay'omogati otabekiri ememera, Yesu agachierwa naborokigwa baye, bakabora, Ng'ai origetie tonyare koaroisia oriere epasaka? 18 Akabora, Genda as'omochie, moike enyomba ya nyarebe, momotebie, Omworokia oborire, Engaki yane yabaire ang'e; enyomba yao aye nao ndariere epasaka amo naborokigwa bane, 19 Bagakora bo baria aborokigwa buna bachigetwe na Yesu; bakaroisia epasaka. 20 Riachia koba mogoroba oikaransete as'endagera amo nabaria aborokigwa baye ikomi nababere. 21 Bagachia koba nkoriabare, akabora, Nekeene nabatebirie, Oyomo oino nandwe. 22 Bagaichana mono mono, bagachaka ker'oyomo komoboria, Inee, Omonene, ninche? 23 Akabairaneria akabora, Oyo ogosoyia okoboko amo nainche as'esani, oyo nere orandwe. 24 Nekeene Omwana-o-mwanyabanto nkogendare buna arigetwe, korende obobe nobwaye omonto oria, Omwana-o-mwanyabanto arugwa nere. Anga mbuya asare nonya ataiboretwe omonto oria. 25 Yudasi akamoiraneria, nere ogocha komorua, akabora, Inee, Omonene, ninche? Akamotebia, Aye gwatebire. 26 Bachia koba as'okoragera, Yesu akabogoria omogati, akayosesenia, akayosamunyora; akabaa aborokigwa baye, akabora, Bogoria morie; oyo noro omobere one. 27 Akabogoria negekombe, akagesesenia, akabaa, okobora, Kanywe yonsi eye; 28 naki eye nero amanyinga ane ay'emuma enyia, aiteirwe as'abange, as'okorusia kw'ebibe. 29 Korende nabatebirie inwe, korwa bono tinkonywa as'okwama kw'omosabibu goika rituko ngocha gokonywa okoyia nainwe as'obonda bwa Tata. 30 Goika kobakorire ogotera, bagasoka isiko bakagenda egetunwa ki'Emezeituni. 31 Erio Yesu akabatebia, Obotuko bwa rero namogochwe asende inwe mwensi; naki yarigetwe, Nimoake omorisia, neching'ondi chie riicho nachiserebekane. 32 Korende nyuma konabokire, nimbatang'ane as'obosio bwaino gochia Galili. 33 Petero akamoiraneria, akamotebia, Neba abanto bonsi nabagochwe asore aye, inche tinkogochwa nonya ng'ake. 34 Yesu akamotebia, Nekeene nagotebirie ritang'ani, Obotuko obo bwa rero etuoni etaragweya, nonkane ara gatato. 35 Petero akamotebia, Ningwenera gokwa amo naye, tinkogokana nonya ng'ake. Bagateba aborokigwa bonsi boigo. 36 Erio agwo Yesu akagenda nabarabwo, agaika aase akorokwa Gethisemane, akabatebia aborokigwa baye, Karansa aiga goika ngende gosaba aria. 37 Nere akamoira Petero na baria abana ba Zebedi babere, agachaka gosogwa nomoichano, noborito bw'omoyo. 38 Erio akabatebia, Omoyo one nore nobororo mono, goika ogokwa; karansaa asemore, morende amo nainche. 39 Akagenda egeka egeke, akagwa maumama, agasaba nakobora, Aye Tata one, onye nanyarekana, egekombe eke kerwe asende: korende taba buna nyanchete, korende buna bwanchete aye. 40 Akabachiera baria aborokigwa, akabarora bararire, akamotebia Petero, Inee, iga timokonyara korenda nainche nonya nensa eyemo? 41 Renda, mosabe, timobaisa gosoa as'ogotemwa: omoyo oro ekeene nore nobwanchani, korende omobere tori nechinguru, 42 Naende akagenda eria kabere, agasaba; okobora, Aye Tata one, onye egekombe eke tigekong'etera ntakenyweti, abe buna bwanchete. 43 Akagenda naende, akabarora bararire; naki amaiso abo konya aritoire. 44 Akabatiga naende, akagenda; agasaba eria gatato, agakwana amang'ana aria amatang'ani. 45 Erio agwo akabachiera aborokigwa baria, akabatebia, Raru bono, motimoke; ekiagera yaikire ensa, n'Omwana-o-mwanyabanto, obekirwe as'amaboko a abanyene ebibe. 46 Imoka, togende, oyo nere oikire ang'e oria okondwa. 47 Goika erio ogokwana, Oyio nere, Yudasi akaoroka, nere noyomo ase baria ikomi nababere, ore nabanto omoganda omonene amo nere, baimogetie emioro y'esegi nechinungu, bakorua as'abakuani abanene nabagaka as'abanyene ense. 48 Noria okomorua, konya obaeire ekemanyererio okobora, Oyo ndanyunyunte nere oyio, mobwate. 49 Erio kegima agachiera Yesu, akabora, Masoge Omonene; akamonyunyunta. 50 Yesu akamotebia, 'Mosani, kora eri gwachera. Erio agwo bakamorainborera Yesu amaboko, bakamobwata. 51 Noyomo obo as'abarenge amo na Yesu akarambora okoboko kwaye, akang'usa omoro oye, akomoaka omosomba bw'omokuani omonene, akamenacha ogoto. 52 Erio agwo Yesu akamotebia, Irania omoroo aase aye, ekiagera bonsi abakobwata omoro bw'esegi nabasire as'omoro. 53 Gose, tomanyeti ng'a ndaisa gosaba Tata bono iga, takondetera amalaika kobua emeganda ikomi nebere? 54 Korende anga naki aikeranigwa amariko, onye nabo egwenerete koba? 55 Ensa eria Yesu akabatebia emeganda eria y'abanto, Inee, iga mwachire buna mokoyuorera omoibi nemioro y'esegi nechinungu, kong'ira? Amaluko onsi naikaransete ase hekalu ime, nkworokereria, korende timwumbwata. 56 K'ay'onsi abaire anyare goikerangiwa amariko a ababani. Erio agwo aborokigwa bonsi bakamotiga, bagatama. 57 Baria babwatete Yesu bakamoira as'omokuani omonene, Kaifa, ase basangererekanete abariki nabagaka. 58 Na Petero akamotunyana korwa nyuma egeka goika egora y'omokiiani omonene, Goika ochia gosoa ime agaikaransa amo nabasomba, ayorore omoerio. 59 Ekaba abakuani abanene nabe 'barasa yabo bonsi bakamorigeria Yesu amang'ana oborimo, banyare komoita; tibayanyora. 60 Nonya bachete abarori abange b'oborimo, tibanyora. 6i Korende nyuma bagacha abarori babere, bakabora, Oyo niga atebete, Ninyare gotagora hekalu ya Nyasaye, nakoyeagacha as'amatuko atato. 62 Erio agatenena omokuani omonene, akamoboria, Tokoiraneria ring'ana? Abaiga ring'ana ki bagogotebia? 63 Yesu agakira. Erio omokuani omonene akamotebia, Nagotianirie ase Nyasaye ore moyo, ototebie gose naye Kristo Omwana o Nyasaye. 64 Yesu akamotebia, Aye gwatebire: korende nabatebirie inwe, korwa bono namomorore Omwana-o-mwanyabanto oikaransete okoboko gw'okorio gwe chinguru, ogocha namare a igoro. 65 Erio agwo oria omokuani omonene agatandora chianga chiaye, akabora, Oramire Nyasaye oyo: abarori nabaki tokorigia? Eye nero mwaigure emerumi yaye akorama. 66 Naki moroche? Bakamoiraneria, bakabora, Omonto oyo igagwenerete ogokwa. 67 Erio agwo bakamotwera amate obosio, bakamoaka enkundi; abande bakamoaka chindoe; 68 bakabora, Totebie Kristo, ning'o okoagete? 69 Na Petero oikaransete egora isiko; omoiseke oyomo akamochiera, akabora, Naye nkomo kwarenge na Yesu Omogalili. 70 Nere agakana as'obosio bwabo bonsi; akabora, Timanyeti ayio okobora. 71 Nere ochia gosoka isiko egesieri, omoiseke o kabere akamorora; akabatebia abarengeo, Noyo nkomo arenge na Yesu Omonasareti. 72 Akabora eria kabere, akabeka neira, ng'a Omonto oyo timomanyeti inche. 73 Naende egeka egeke bakamochiera abateneine aroro, bakamotebia Petero, Ekeene bori naye noyomo ase barabwo, naki ogokwana kwao gwakoorokirie. 74 Erio agwo agachaka koragereria nagotiana, okobora, Inche timomanyeti omonto oyio. Erio kegima etuoni ekagweya, 75 Erio Petero akainyora ring'ana riria Yesu atebete, ng'a ritang'ani etuoni etaragweya, nonkane ara gatato. Agasoka isiko, akarera nobororo.
1 Bwachia gokia mambia, abakuani abanene bonsi nabagaka as'abanyene ense bakagamba ekina ase Yesu, bamoite. 2 Bakamosiba, bakagenda nere, bakamobeka ase gavuna Pilato. 3 Erio agwo Yudasi, oria omonyene okomorua, agachia komorora onacheirwe ekina, ageitia, akaira biria chisamunye emerongo etato bi'efetha, akabirania as'abakuani abanene nabagaka: 4 akabora, Namochire as'okorua amanyinga atari nabobe bonde. Barabwo bakabora, Gaki, ayio nasetore are intwe? Nabwerorere aye! 5 Nere ochia gotuguta ebisamunye bi'efetha biria ase hekalu ime, akaimoka, akagenda akeng'enta. 6 Abakuani abanene bakabimokia ebisamunye biria bi'efetha, bakabora, Tari boronge kobibeka as'ekungo y'esadaka ya Nyasaye, ekiagera birobio nerigori ri'amanyinga. 7 Bakagamba ekina, bagachia bakagora rigoko ri'omokori chinyongo, ribe aase gotindeka abageni. 8 As'ayio rigoko riria rikarokwa erieta riaye, Rigoko ri'amanyinga, goika rero. 9 Erio agwo rigaika eriatebetwe nomobani Yeremia, ogoteba, Bakabimokia ebisamunye emerongo etato bi'efetha, rigori riaye oria obegetwe rigori, nabana b'Isiraeli bamobegete rigori. 10 Bakabirwa as'okogora rigoko ri'omokori chinyongo, buna anchigete Omonene. 11 Nere Yesu agatenena ase gavuna; na gavuna akamoboria, okobora, Naye omoruoti bw'Abayahudi? Yesu akamotebia, Aye gwatebire. 12 Ochia gosoerwa n'Abakuani abanene nabagaka, tairaneria ring'ana rinde. 13 Erio agwo Pilato akamotebia, Toigweti amang'ana narenga bakonagoteba asore? 14 Nere tairaneria rinde, nonya nering'ana erimo, nonya na gavuna agaichana mono. 15 Nekero kie rituko rinene gavuna engecho yaye kobasiborera omosibwa oyomo, oyo barigetie. 16 Rituko riria mbarenge nomosibwa oyomo omanyekanete, okorokwa Baraba. 17 Erio kobasangererekanire, Pilato akababoria, Norori morigetie mbasiborere, Baraba gose Yesu oyokorokwa Kristo? 18 Ekiagera konya omanyire igo bamorure as'okogecha. 19 Pilato ochia goikaransa as'ekerogo gi'ekina, akareterwa amang'ana na mokaye, ogoteba, Oyio nomonto bw'oboronge tobaisa kwebwatia asare, ekiagera rero nachandetwe namange as'okorota asare. 20 Na baria abakuani abanene nabagaka bakabagenka emeganda banyare komorigia Baraba, na Yesu bamoite. 21 Gavuna akabairaneria akabatebia, As'abanto aba babere norori morigetie mbasiborere? Bakamotebia, Baraba. 22 Pilato akabatebia, Nimokorere ki Yesu okorokwa Kristo? Bakamotebia bonsi, Tiga aitwe! 23 Gavuna akabora, Aseki, mbobe ki akorete? Barabwo bakamenta koaka egeturi, bakobora, Tiga aitwe! 24 Pilato agachia korora tirigwenereti ring'ana, neriroroche rioka rikonakobucha akaimokia amache agaisaba amaboko aye as'amasio emeganda, agateba, Inche igande omochenu as'amanyinga ay'omonto oyo bw'oboronge. Namwerorere abanyene ekerage eke. 25 Bakamoiraneria abanto bonsi, bakabora, Amanyinga aye abe asetore igoro, nas'abana baito. 26 Erio agwo akabasiborera Baraba, akamoaka Yesu orokini, akamobatigera anyare goitwa. 27 Erio agwo abasigari ba gavuna bakamoira Yesu rinyomba ime, bakamosangererekera emoganda omogima. 28 Bakamwaboria chianga chiaye', bakamobekera eanga embariri. 29 Bagatonga egutwa y'amagwa, bakamobekera omotwe, negetonto as'okoboko kwaye gw'okorio; bagatung'sma namaru asare, bakomochecheria, nakobora, Masoge, Omoruoti bw'Abayahudi! 30 Erio bakamotwera amate, bagakebwata egetonto keria, bakamoaka-aka omotwe; 31 rigoro bamochecheirie, bakamorusia eanga eria embariri, bakomobekera chianga chiaye, bakamotang'anania gochia komobamba. 32 Bagachia korua as'omochie bakarora omonto oyomo Omokurene, erieta riaye okorokwa Simon; omonto oyo bakamobetereria ayobogorie omosalaba oye. 33 Bachia goika aase akorokwa Gologotha, engecho yaye erieta erio n'Aase Ekeore, 34 bakamoa chinkama chisang'anirie nendorwe; ogochia koigwa tancha konywa. 35 Kabamobambire bakagabana chianga chiaye, bagakora obomera, rinyare goikerana erietebetwe nomobani, Mbatananete chianga chiane egati yabo, nas'eanga yane mbakorete obomera. 36 Bagaikaransa komorigereria aria. 37 Bakabeka ogosoerwa kwaye igoro as'omotw'oye, korikire, Oyo Nere Yesu, Omoruoti Bw'Abayahudi. 38 Erio abaibi babere bakabambwa amo nere, oyomo okorio, noyomo okobee. 39 Nabarabwo abagoeta nchera bakamorama, bakoakaaka emetwe yabo, bakobora, 40 Aye oyogotagora hekalu nakoyeagacha namatuko atato, etorie omonyene. Onye naye Omwana o Nyasaye, ika korwa agwo ore omosalaba. 41 Na baria abakuani abanene bagakora boigo, bakamokorera echeche amo nabakuani nabagaka, bakobora, 42 Natoretie abanto, omonyene takonyara gwetoria. Onyore nomoruoti o Isiraeli, aike bono korwa as'omosalaba, naintwe rirorio natwanche asare. 43 Igegenete ase Nyasaye: amokonye bono, onye omorigetie; ekiagera natebete ng'a Inche n'Omwana o Nyasaye. 44 Naboigo nabaria abaibi babambetwe amo nere, bakamwogerera. 45 Korwa chinsa isano nemo omosunte okaba ense engima, okaba goika chinsa kianda, 46 chinsa kianda chiachia goika, Yesu akaaka egeturi neriogi rinene, okobora, Eli, Eli, lama sabakithani, engecho yaye, Nyasaye one, Nyasaye one, naki gwantigire? 47 Bagachia koigwa abande ase baria bateneine aroro, bakabora, Elija akorangeria. 4S Erio oyomo obo akaminyoka, akaimokia esifunji, akayeichoria nechinkama, akayebeka as'egetonto, akamoa anywe. 49 Baria abande bakabora, Tiga torore gose Elija ogocha kemotoria. 50 Yesu akaaka eriogi rinene naende, erio agatwekamo. 51 Erio egetambaa gi'okonacha hekalu gegatandoka korwa igoro goika inse chinsemo ibere; ense egatengecha; amagena agatandoka; 52 chimbera chikamanoka chigasama, nemebere emenge y'abanto abachenu abararete ekaimoka; 53 ka barure chimbera, nyuma as'okoboka kwaye, bagasoa Omochie Omochenu, bakabaorokera abange. 54 Esagini y'abasigari emia, nabarenge amo nere, abanto barendete Yesu, bagachia koyorora omotengecho bw'ense nebirage biria biakorekire, bakairoka mono, bakabora, Nekeene oyo igarenge Omwana o Nyasaye. 55 Mbarenge aroro abakungu abange, barigereretie korwa are, nabarabwo abakungu abwo nabwo abatunyete Yesu korwa Galili bakomokorera, 56 Ase barabwo abwo narengeo Mariamu Omomagidali, na Mariamu ng'ina Yakobo na Yose, na ng'ina baria abana ba Zebedi. 57 Riachia koba mogoroba akagenda omofrto oyomo omonda, omonto bw'Arimithea, okorokwa Yusufu, nere omonyene nomworokigwa o Yesu: 58 akagenda oyio ase Pilato, akarigia omobere o Yesu. Erio agwo Pilato agachika aegwe. 59 Yusufu akayoimokia oria omobere o Yesu, akayoboa egetambaa ekiya gi'egatani. 60 Akayobeka as'oboina bwaye oboyia, obwabachete as'egetare: naende agaturunkania rigena rinene as'egesieri ki'oboina, akagenda. 61 Mbarenge aroro Mariamu Omomagidali noria Mariamu o kabere, baikaransete obosio bw'oboina. 62 Rituko ria kabere, nerio nario rigotunya rituko ri'Okorosia, abakuani abanene n'Abafarisai bagasangerereka ase Pilato, 63 bakabora, Omonene, twainyoire ng'a oria omonyaborimo natebete, rigoro are moyo, Nyuma as'amatuko atato nimboke. 64 Gaki chika oboina borendwe goika rituko ri'atato; aborokigwa baye tibabaisa gocha komoiba, babatebie abanto, Obokire korwa as'abakure: kobaise koba okong'ainwa kw'omoerio nakobue koria kwe ritang'ani. 65 Pilato akabatebia, More nabarendi: genda moborende mono oboina buna moranyare. 66 Bakagenda bakaborenda mono oboina, bakabeka rigena ekemanyererio, amo nabarendi.
1 Esabato egachia koera, kobogokiamoka rituko rie ritang'ani ri'echuma, agacha Mariamu Omomagidali noria Mariamu o kabere korigereria oboina. 2 Rora, ogocha omotengecho omonene bw'ense; ekiagera rilaika ri'Omonene riaigete korwa igoro, rikagenda rigatigeria ensemo riria rigena, rikarikaransera. 3 Nekieni kiaye igo kiarenge buna okomesa kw'embura. 4 Nas'okoiroka kwaye baria abarendi bakaiguswa, bakaba buna abanto bakure. 5 Rilaika rikabairaneria baria abakungu, rikabatebia, Timoiroka inwe, ekiagera namanyire ng'a Yesu mokorigia oria oitwa. 6 Tari aa, naki obokire buna atebete; nchuo morigererie aase Omonene araire. 7 Na genda bwango, mobatebie aborokigwa baye gote obokire korwa as'abakwete; nere otang'anire asemore gochia Galili: naroro nao moramorore; bono inche nabatebirie. 8 Bakaimoka korwa as'oboina bwango, bare nokoiroka nomogoko omonge, bakagenda bwango, bakabaa amang'ana aborokigwa baye. 9 Noyo nere Yesu akaumerana nabarabwo, akabatebia, Masoge. Nabarabwo bagacha bakamobwata amagoro, bakamosasima. 10 Erio Yesu akabatebia, Timoiroka! genda mobae abaminto amang'ana bagende Galili, nabarabwo nabandore aroro. ii Nabarabwo bachia koba nkogendabare nchera, abande ase baria abarendi bagasoa omochie, bakaborokia abakuani abanene amang'ana onsi akoregete. 12 Bagachia gosangerekana nabagaka, bagakora ekina, bakabaa baria abasigari chishilingi chinyinge, 13 bakobora, Teba, aborokigwa baye bachete botuko bakamoiba rigoro intwe twararire. 14 Ring'ana eri koriraigwekane ase gavuna, intwe natoche komogenka, nakomorusia inwe emechando. 15 Bakabogoria chishilingi chiria, bagakora buna borokereretigwe, rikagenda ring'ana eri rigakuma as'Abayahudi goika rituko ria bono. 16 Baria aborokigwa ikomi nomo bakagenda Galili, bagaika egetunwa abachigete Yesu. 17 Bagachia komorora bakamosasima, korende abande bagakora ogosiereria. 18 Yesu akagenda agakwana nabarabwo, akabatebia, Naeirwe okobua gwonsi as'igoro nense, 19 Gaki genda mokore ebisaku bionsi koba aborokigwa, mokobabatisa as'erieta ria Tata, neri'Omwana, neri'Omoika Omochenu: 20 mokoborokereria koyabwata onsi nabachigete; nainche igande amo nainwe amatuko onsi, goika omoerio bw'ense.
1 Omochakano bw'enchili ya Yesu Kristo, Omwana o Nyasaye. 2 Buna yarigetwe as'ebuku y'omobani Isaya, Rigereria, namotomire omotomwa one as'obosio bwao, Oyorarosie enchera yao; 3 Eriogi ri'oyokoaka egeturi eroro ime, Yerosie enchera y'Omonene, Rosia ogoeta kwaye; 4 Akaoroka Yohana, okobatisa eroro ime, nakorandia ebatiso y'okoonchoka ekoreta okorusia kw'ebibe. 5 Bakamogendera ense yonsi ya Boyahudi, nabarabwo bonsi ba Yerusalemu; bakobatiswa nere as'oroche rwa Yorodan, bakabiorokia ebibe biabo. 6 Na Yohana igarenge kweboyia amarionya engamia, norokini rwe riyo 'kenema kiaye, iga are koria chingige noboke bw'orosana. 7 Akarandia, akabora, Ngochare nyuma asende oyore nechinguru kombua, omonto ntagwenere gotung'ama nagochisibora chinuga chi'ebikoroto biaye. 8 Inche nababatisire as'amache; korende ere nababatise as'Omoika Omochenu. 9 Naende amatuko aria, agacha Yesu okorua Nazareti ya Galili, akabatiswa na Yohana ase Yorodan. 10 Erio ogofira korwa as'amache, akarora igoro amanokire, n'Omoika buna riruma rigoika igoro asare: 11 neriogi rikorua igoro, Aye naye Omwana omwanchani one, naye ongwenerete. 12 Erio Omoika okamoraa eroro ime. 13 Akaba aroro eroro ime amatuko emerongo ene ogotemwa na Saitani: nere igarenge amo neching'iti chintindi; namalaika bakamokorera. 14 Goika nyuma Yohana kabekirwe echela ime, Yesu akagenda Galili, akarandia enchili ya Nyasaye, 15 okobora, Ekero giaikeranire, nobonda bwa Nyasaye bwaikire ang'e: onchoka, yianche enchili, 16 Nere agaeta ensemo y'enyancha ya Galili, akabarora Simon na Anderea omomura omwabo Simon bakoruta ekeonga enyancha ime: ekiagera nabarubi barenge. 17 Yesu akabatebia, Nchuo montunyane inche, nainche nimbakore mobe abarubi b'abanto. 18 Erio kegima bagatiga ebionga biabo, bakamotunyana. 19 Akagenderera ake, akamorora Yakobo omwana o Zebedi, na Yohana momura omwabo, nabarabwo bonsi barenge obwato ime bakobirosia ebionga biabo. 20 Erio akabarangeria: bakamotiga ise Zebedi ime as'obwatoamo nabanto b'eng'eria, bakagenda bakamotunyana. 21 Bakabwatia enchera goika Kaperinaum; ne rituko ri'esabato agasoa esunagogi akorokereria. 22 Bagaichana as'okworokereria kwaye: naki arenge koborokereria buna oyore nechinguru, tari buna abariki. 23 Narengeo as'esunagogi yabo omonto omonyene ekerecha ki'eubi; akaaka eriogi, 24 okobora, Nki tore naye, Yesu o Nazareti? gwachire gotosiria? Nakomanyire aye, Omochenu o Nyasaye. 25 Yesu akamokania, okobora, Sieka omonwa, omorue. 26 Keria ekerecha ki'eubi, gekamogaragaria gekarera as'eriogi rinene, gekamorua. 27 Bagakumia bonsi, goika bakaborania, bakabora, Nki eke? Obong'aini obo oboyia mbong'aini ki? Ekiagera as'okobua akobichika ebirecha bi'eubi nabirobio bikomoigwera. 28 Erio chinkuma chiaye chigasarera ense yonsi ensemo ya Galili. 29 Erio agwo, kabasokire as'esunagogi, bagasoa enyomba ya Simon na Anderea, amo na Yakobo na Yohana. 30 Ng'ina moka Simon oraire orwarete esosera; erio bakamotebia amang'ana aye: 31 akamoika ang'e akamoimokia as'okomobwata okoboko; erio esosera ekamotiga, akabakorera. 32 Goika ekaba mogoroba, nerioba korikogwa, bakamoretera bonsi abarenge noborwaire, nabanyene ebirecha. 33 Nomochie bwonsi okaba ngosangererekana ore geita. 34 Akabagwenia abange abarenge namarwaire ande ande, agaseria ebirecha ebinge; tabitiga ebirecha bikwane, ekiagera biamomanyete. 35 Kobogokia, botarakia mono, akaimoka agasoka, akagenda aase atari nabanto, agasaba aroro. 36 Simon nabarenge nere bakamotunyana; 37 bakamorora, bakamotebia, Abanto bonsi ngokorigiabare. 38 Akabatebia, Togende aande goika ebichie bire ang'e, ninyare korandia naroro; ekiagera as'ayio naro naorokeire. 39 Agasoa ase chisunagogi chiabo as'ense yonsi ya Galili, okorandia nagosrria ebirecha. 40 Agacha asare omonto omonyene ukoma, akamosorora, nakomotung'amera, nakomoichia, Korigetie, nonyare gonsibia. 41 Yesu agasogwa namabera, akarambora okoboko kwaye, akamokuna, akamotebia, Nindigetie; sibeka. 42 Erio agwo obokoma bwaye bokamorua, agasibeka. 43 Akamokania bokong'u, akamotebia agende, 44 akamotebia. Rigereria totebia 'monto onde bwonsi amang'ana aya: korende genda enchera yao, bweorokie as'omokuani, orue ekeegwa giachigetwe na Musa as'ogosibeka kwao, erinde obe okweorokia asebare. 45 Nere agasoka, agachaka korandia amange, nakoriorokia riria ring'ana, goika Yesu tanyara naende gosoa omochie ime maiso marore, korende akaba isiko aas'atari nabanto: bakamogendera korwa ker'aase.
1 Agasoa Kaperinaum naende nyuma as'amatuko amake, akaigugwa ng'a nao are enyomba. 2 Erio bagasangerereka abanto abange, tiriatigara ribaga asebare, nonya goika 'gesieri: agakwana nabarabwo ring'ana. 3 Bagacha abanto, bakamoretera omonto omonyene okoiguswa, obogoirie nabanto bane. 4 Bagachia koba tibanyara komoika ang'e as'engecho y'omoganda, bagakebochora ekerama aria as'arenge: kobatiekire gotagora, bakabotirimbokia oborere boria ararerete oria omonyene okoiguswa. 5 Yesu ochia korora okwegena kwabo akamotebia oria omonyene okoiguswa, Omwana one, ebibe biao biabeirwe. 6 Abande as'abariki baikaransete aroro, bakabora as'emioyo yabo, 7 Naki oyo agoteba iga? nkoramare: ning'o oranyare kwabera ebibe tatiga oyomo, nere Nyasaye? 8 Erio Yesu akamanya omoyo oye ime buna bakorengereria iga emioyo yabo, akabatebia, Naki mokorengereria iga emioyo yaino? 9 Ndiriri rire eriango, komotebia omonyene okoiguswa, Ebibe biao biabeirwe; gose goteba, Imoka bwetweke oborere bwao, ogende? 10 Korende monyare komanya ng'a Omwana-o-mwanyabanto nare nokobua as'ense okwabera ebibe (okomotebia oria omonyene okoiguswa), 11 Nagotebirie, Imoka, bwetweke oborere bwao, ogende mwao. 12 Erio akaimoka, agetweka oborere bwaye, akarua as'amasio abo bonsi; goika bagakumia bonsi, bakamotogia Nyasaye, bakabora, Aya are iga titwanyakoyarora nonya ng'ake. 13 Agasoka naende akagenda ensemo y'enyancha; emeganda yonsi bakamogendera, akaborokereria. 14 Goika ochia goeta, akamorora Lawi omwana bw'Alfayo oikaransete aase bakobangerwa ebango, akamotebia, Ntunyana. Akaimoka akamotunyana. 15 Ekaba ekero ekio Yesu gaikaransete enyomba mwaye oria, okoria endagera, abakorusia ebango abange nabanyene ebibe bagaikaransa amo na Yesu naborokigwa baye: ekiagera barenge abange, bakamotunyana. 16 Naende abariki b'Abafarisai, bagachia komorora okoria amo nabanyene ebibe, nabakorusia ebango, bakabatebia aborokigwa baye, Naseki akoria nakonywa amo nabakorusia ebango nabanyene ebibe? 17 Yesu ochia koigwa, akabatebia, abare abagima tibakorigia omogwenia, tatiga abare noborwaire: Tincheti kobarangeria ababoronge, korende abanyene ebibe. 18 Aborokigwa ba Yohana n'Abafarisai barenge kweng'ata: bagacha bakamotebia, Naseki aborokigwa ba Yohana naborokigwa b'Abafarisai bakweng'ata, ko aborokigwa bao tibakweng'ata? 19 Yesu akabatebia, Abana b'enyangi nabanyare kweng'ata, ekero omonene bw'enyangi are amo nabarabwo? ekero omonene bw'enyangi are amo nabarabwo, tibakonyara kweng'ata. 20 Korende amatuko nache, ararusigwe asebare oria omonene bw'enyangi, erio barabwo nabeng'ate ase rituko riria. 21 Gose tari 'monto onde okobeka ekeraka ki'eanga enyia as'eanga engotu: naki keria kiabekwa nigo gegotandora eanga eria, keria ekeyia koyechierereria engotu, etandoke kobua. 22 Gose onde tari okobeka edivai enyia ase chichuba chingotu: gose eria edivai nechiate chichuba, edivai eiteke, ne chichuba chiasira: korende edivai enyia igo ekobekwa ase chichuba chinyia. 23 Ochia koba ngoetare as'emegondo y'engano rituko ri'esabato; aborokigwa baye bagachaka, kabakogenda, bakobutora ebigara bi'engano. 24 Abafarisai bakamotebia, Rora, naki bagokora eritari boronge ase rituko ri'esabato? 25 Akabatebia, Timwanya gosoma ayakorete Daudi ekero arenge nokorigia, akaba nenchara, ere, nabwo barenge amo nere? 26 Buna asoete as'enyomba ya Nyasaye as'ekero Abiathar arenge omokuani omonene, akayeria emegati eyokworokereria, etari boronge koregwa tatiga nabakuani, naende akabaa nabwo barenge amo nere? 27 Akabatebia, Esabato yakoretwe as'engecho y'Omwana-o-mwanyabanto, tari Omwana-o-mwanyabanto as'engecho y'esabato: 28 naki oria Omwana-o-mwanyabanto nere omonene bw'esabato.
1 Agasoa naende as'esunagogi; narenge omonto agwo okoboko kwaye kwomete. 2 Bakamotega korora gose namokonye ase rituko ri'esabato; banyare komosoera. 3 Akamotebia oria omonto okoboko kwomete, Tenena gati gati. 4 Akabatebia, Mboronge rituko ri'esabato gokora amaya, gose gokora amabe? gokonya obogima gose goita? Bagakira. 5 Akabamogoreria amaiso chinsemo chionsi as'okobea, akarora obororo as'engecho y'obokong'u bw'emioyo yabo, akamotebia oria omonto, Rambora okoboko kwao. Agakorambora: okoboko kwaye gokagwena. 6 Erio kegima bagasoka baria Abafarisai bakamokorera ekina amo n'Abaherodiano buna baramoite. 7 Erio Yesu akaimoka ere naborokigwa baye akagenda ensemo y'enyancha; okamotunyana omoganda omonene, abanto barure Galili: nabaruete Boyahudi, 8 na Yerusalemu na Idumea, na ng'umbu ya Yorodan, ne chinsemo chia Turo na Sidon, omosangererekano omonene, bachia koigwa ebirage bi'amang'ana onsi arenge gokora, bakamochiera. 9 Akabatebia aborokigwa baye ng'a obwato oboke bobe ang'e asare, as'engecho y'abanto, ekiagera emeganda temomiga. 10 Ekiagera akonyete abange; goika bonsi abarenge nemechando bakamoimokera banyare komokuna. 11 Na ker'ebirecha bi'eubi, bigachia komorora, bikagwa as'obosio bwaye, bikarera bigateba, Aye naye Omwana o Nyasaye. 12 Akabikania mono tibimoorokia. 13 Akarina egetunwa, akabarangeria abarigetie omonyene; bakamochiera. 14 Agachora ikomi nababere, banyare koba amo nere, nario aranyare kobatoma korandia, 15 nababe nokobua goseria ebirecha; 16 na Simon akamoroka erieta, Petero; 17 na Yakobo, omwana o Zebedi, na Yohana momura omwabo Yakobo, akabaroka erieta Boanergi, engecho yaye, Abana b'enkoba: 18 n'Anderea, na Filipu, na Baritholomayo, na Mathayo, na Thomas, na Yakobo bw'Alufayo, na Thadayo, na Simon Omokanani, 19 na Yudasi Omoisikariota, nere oyomoruete. Erio agasoa enyomba. 20 Nemeganda egasangerereka naende, barabwo abanyene tibanyara nonya nokoria omogati. 21 Abasani baye bagachia koigwa amang'ana, bagasoka kogenda komobwata: ekiagera batebete, Obwatirwe nebarimo. 22 Abariki abaruete Yerusalemu bakabora, Nare na Beelizebul, nas'okobua kw'omonene bw'ebirecha akobiseria ebirecha. 23 Akabarangeria bache asare, akabatebia as'emereng'anio, Naki Saitani aranyare goseria Saitani? 24 Noboruoti koboratananeke ase borobwo obonyene, oboruoti boria tibokonyara gotenena. 25 Nenyomba keratananeke ero yoka, enyomba eria tekonyara gotenena. 26 Naende onye Saitani bweimokeire omonyene, gwatananeka, takonyara gotenena, korende nabe nomoerio. 27 Takonyara omonto gosoa as'enyomba y'omonto omonyene chinguru, nagosakora ebinto biaye, atamosibeti ritang'ani oria omonyene chinguru; nario aramanye gosakora enyomba yaye. 28 Ekeene nabatebirie, Ebibe bionsi nababerwe mwanyabanto, nokorama kwabo bararame gwonsi: 29 korende omonto orarame Omoika Omochenu tari nokwaberwa, nonya ng'ake, igarabe nebibe goika kare nakare: 30 buna batebete, Nare nekerecha ki'eubi. 31 Bagacha ng'ina nabamwabo; bateneine isiko, bakamotomera omonto komorangeria. 32 Nemeganda iga yarenge eikaransete emoetanaine; bakamotebia, Nyoko nabamura bamino mbare isiko, mbakorigetie. 33 Akabairaneria, akabora, Baba nabamura baminto mbarabi? 34 Akabarigereria abwo baikaransete bamoetanaine, akabora, Rora, baba nabamura baminto! 35 Ekiagera oyorakore obwanchani bwa Nyasaye, oyio nere momura ominto, na mosubati ominto, na baba.
1 Agachaka kworokereria naende ensemo y'enyancha. Bakamosangererekera omoganda omonene, goika ere akarina obwato ime, agaikaransa enyancha; omoganda bwonsi nao orenge as'ense enyomo ensemo y'enyancha. 2 Akaborokereria amang'ana amange as'emereng'anio, akabatebia as'okworokereria kwaye, 3 tegerera: Omobusuri agasoka kogenda kobusura: 4 agachia koba, nkobusurare, chimbusuro chinde chikagwa ensemo y'enchera, chinyoni chigacha chigachiria. 5 Nechinde chikagwa as'amagena are, aase amaroba arenge amake; chikamera bwango ekiagera amaroba arenge amake: 6 omobaso ochia kobara, chigasusana; ekiagera chitare nemeri chikonia. 7 Nechinde chikagwa as'amagwa ime, aria amagwa agakina, agachimiga, tichiama amatunda. 8 Nechinde chikagwa as'amaroba amaya, chikama amatunda, chikamera nagokina, nakwama; eyemo emerongo etato, neyemo emerongo etano nomo, naende eyemo emia. 9 Akabora, Oyore namato akoigwera, tiga aigwe. 10 Agachia koba bweka, abanto bakamoetanana nabaria ikomi nababere bakamoboria amang'ana as'emereng'anio. 11 Akabatebia, Inwe mwaeirwe kobomanya obobisi bw'obonda bwa Nyasaye: korende baria bare isiko, amang'ana onsi igagocha asebare buna emereng'anio: 12 korende okorigereria nabarigererie, tibarora; nokoigwa nabaigwe, tibainyora; tibacha goonchoka, baberwe ebibe biabo. 13 Akabatebia, Timomanyeti omoreng'anio oyio? Gaki emereng'anio yonsi naki morayemanye? 14 Omobusuri ne ring'ana agosimeka. 15 Abwo nabwo bare ensemo y'enchera, rigosimekwa ring'ana; nabarabwo bagotieka koigwa, bwango ocha Saitani, orirusia riria ring'ana riasimegetwe emioyo yabo. 16 Naboigo koreng'ana nabwo basimekire as'amagena, ekiagera kobarigure riria ring'ana, erio kegima baribwata nomogoko; 17 naende tibari nemeri ime abanyene, korende bngenderera ekero egeke; erio ekooroka emechando gose ogochandwa ekiagera ase riria ring'ana, bwango bagochwa. 18 Naende aba nabwo baria basimekire as'amagwa; aba nabwo bakoigwa ring'ana, 19 naende okorengereria gw'ense nokong'ainererigwa kw'enibo, naende okorengereria kw'amang'ana ande kogosoa, biarimiga riria ring'ana, riba tirikwama, 20 Naende aba nabwo basimekire as'amaroba amaya; nabanto bakorigwa riria ring'ana, nakoribwata, nakwama amatunda emerongo etato, emerongo etano nomo, naende emia. 21 Akabatebia, Naki moroche? Etaya iga ekoretwa erinde yabekwa inse as'egeionga, gose nyaro y'oborore? teri kobekwa igoro as'ekebekerero? 22 Ekiagera tiriri ring'ana rirabiseke, tatiga rirache koorokigwa; gose riabisegete, tatiga riche koorokigwa maiso marore, 23 Omonto kare namato akoigwera, tiga aigwe. 24 Akabatebia, Rigereria eke mokoigwa: nekerengo mokorengera nakio morarengerwe: ekio naende namomenterwe. 25 Ekiagera oyore nero naegwe; korende oyotabwati naurwe nonya neyio abwate. 26 Akabora, Obonda bwa Nyasaye nigo bogwekaine nomonto osimegete embusuro igoro as'ense. 27 Akarara nakoboka, obotuko nomobaso, nero embusuro ekamera nagokina, atamanyeti ere. 28 Ekiagera ense iga ekwama yoka, ritang'ani omwange, naende ekegara, erio obori oborera as'ekegara. 29 Nonya namatunda gakwama, bwango iga akoira omoyio, ekiagera rigesa riaikire ang'e. 30 Akabora, Tobogwekanie ki obonda bwa Nyasaye? gose tobobeke as'omoreng'anio ki? 31 Buna entetere y'ekaradali, ekero egosimekwa as'ense, nenke kobua chintetere chionsi chire as'ense, 32 koyatiekire gosimekwa, ekina eba enene kobua emete yonsi ye chinyeni, ekoba nechinsagia chinene; goika chinyoni chi'igoro chinyara goikaransa inse as'ekiriri kiaye. 33 As'emereng'anio emenge ere buna eye igarenge gokwana nabarabwo ring'ana, buna banyarete koigwa; 34 gose onye tari omoreng'anio anga takwanete nabarabwo: ko akabatebereria aborokigwa baye amang'ana onsi bobisi. 35 Rituko riria, rigachia koba mogoroba, akabatebia? Twamboke goika ng'umbu. 36 Bakabatiga emeganda, bakamoira amo nabarabwo buna arenge as'obwato boria. Namato ande narenge amo nere. 37 Gekaoroka ekerambauti ekenene ki'omwaga, emerindo egaaka obwato goika bogachaka goichora amache. 38 Ere omonyene igarenge korwa nyuma as'obwato, oraire igoro as'omoito: bakamotura, bakamotebia, Omworokia, tari gento asore gatogosira? 39 Akaboka: akayekania embeo, akayetebia enyancha, Kira, tegerera. Embeo ekaera, gokaba ogotoerera okonene. 40 Akabatebia, Naki mokwoboa inwe? Timoraba nokwegena? 41 Bagasogwa nomoondoko omonene, bagatebania, Ning'o oyo, goika embeo nenyancha chikomoigwera?
1 Bagaika ng'umbu y'enyancha, goika ense y'Abageraseni. 2 Nere agachia goika korwa obwato, bwango akanyorwa nomonto okorua ase chimbera nere igarenge nekerecha ki'eubi, 3 obomenyo bwaye igo bwarenge aria ase chimbera: nonya nomonto tarenge ore konyara komosiba, nonya nase ebinyuri; 4 ekiagera igarenge konya osibirwe ara aange ase chingatare nebinyuri, abibutora biria ebinyuri, nagochibunabuna chiria chingatare: nonya nomonto tarenge orenge nechinguru chi'okomobua. 5 Naende ker'amatuko onsi, obotuko nomobaso, aas'arenge chimbera nebitunwa, okorera, nagwekeba namagena. 6 Agachia komororera Yesu are, akaminyoka chimbero, akamosasima; 7 akarera as'egeturi ekenene, akabora, Inki nde naye, Yesu, Omwana o Nyasaye ore Igoro Mono? Nagotianirie ase Nyasaye ng'a tonsiria. 8 Ekiagera akamotebia, Aye ekerecha ki'eubi, morue omonto oyo. 9 Akamoboria, Erieta riao naki? Akairaneria akamotebia, Erieta riane Nomoganda; ekiagera ntore abange. 10 Akamosorora mono tabaira isiko y'ense eria. 11 Naria egetunwa ndiarenge riicho rinene rie chingurue rikorisia, 12 Ebirecha bionsi bikamosorora, bikabora, Toire ase chingurue, tonyare gochisoa chirochio, 13 Akabia ribaga. Biria ebirecha bi'eubi bigasoka, bigasoa ase chiria chingurue; riicho rionsi rigatirimboka gochia eora, chigasoa enyancha ime, iga chiarenge buna chilifu ibere; chigakwera enyancha ime. 14 Abarisia be chingurue chiria bagatama, bagateba amang'ana as'emechie nemegondo. Bagasoka barore amang'ana aorokire. 15 Bakamochiera Yesu, bakamorora oria omonyene ebirecha oikaransete, bweboetie chianga, ore nobong'aini bwaye, nere orenge nomoganda: bakairoka. 16 Nabarabwo abaroche bakaorokia amang'ana ki amonyora oria omonyene ebirecha, namang'ana chingurue. 17 Bagachaka komosorora arue ase chimbebe chiabo, 18 Ochia korina obwato ime, oria orenge nebirecha akamosorora abe amo nere. 19 Yesu tamwanchera, korende akamotebia, Genda mwao, as'abanto baino, obatebie amang'ana amanene agokorera Omonene, naende buna akwabera. 20 Akagenda bwoye, agachaka korandia use Dekapoli, amang'ana amanene are naki Yesu amokorera: abanto bonsi bagakumia. 2i Goika Yesu kambokire koirana ng'umbu as'obwato boria, okamosangererekera omoganda omonene: nere igarenge ensemo y'enyancha. 22 Ani, ochire omonto oyomo as'abanene b'esunagogi, erieta riaye Yairo; ochia komorora, akagwa amagoro aye, 23 akamosorora mono, okobora, Enyaroka yane enke yaisire gokwa: nagosabire, oche obeke okoboko kwao igoro asare, anyare kogwena, nere abe moyo. 24 Akagenda amo nere: omoganda omonene okamotunyana, bakamomiga. 25 Nomokungu oyomo ore korua amanyinga korwa ekero ki'emiaka ikomi nebere, 26 nogochandwa okonge as'amaboko abagwenia abange, agasiarera chinto bionsi arenge nabio, tikwaniogwenera nonya ng'ake, korende obogima bwaye bokamenteka bobe kobua, 27 erio agachia koigwa amang'ana a Yesu, agaeta as'omoganda korwa nyuma, akayekuna eanga yaye. 28 Ekiagera agateba, Kondakune chianga chiaye chioka, ningwene. 29 Erio kegima ensoko y'amanyinga aye egakama; akaigwa omobere oye ng'a ogwenire korwa as'emechando eria. 30 Yesu akamanya as'omoyo oye ng'a chinguru chiarure asare, ageonchora gati as'omoganda, akabora, Ning'o onkuna chianga chiane? 31 Aborokigwa baye bakamotebia, Kwayororire omoganda buna okomigete, naye gokobora, Ning'o onkuna? 32 Akarigereria chinsemo chionsi erinde amorore oria okora ring'ana eri. 33 Noria omokungu agasogwa nomoondoko nokoiguswa, akamanya eriamonyorire, agacha akamogwera, akamoorokeria ekeene gionsi. 34 Akamotebia, Enyaroka, okwegena kwao gwagokonyire, genda nomorembe, obe omogima korwa as'emechando yao. 35 Ekero are gokwana bagacha abanto korwa as'enyomba y'omonene bw'esunagogi, bakabora, Enyaroka yao yakure; inki okomoroseria Omworokia? 36 Ko Yesu, ochia koigwa ring'ana rigotebwa, akamotebia omonene bw'esunagogi, Toiroka, ancha rioka. 37 Tanchete omonto amotunyane, tatiga Fetero, na Yakobo, na Yohana omomura omwabo Yakobo. 38 Bagaika enyomba y'oria omonene bw'esunagogi; akarora riroroche nabanto bakorera, nokweumia okonge. 39 Agachia gosoa, akabatebia, Naki mogokora riroroche nakorera? omwana takweti, korende iga araire. 40 Bakamosekerera mono. Korende ere gatiekire kobasokia isiko bonsi, akamoira ise oria omwana na ng'ina na baria barenge amo nere, agasoa ime as'arenge oria omwana. 41 Akamobwata okoboko oria omwana, akamotebia, Talitha, kumi; ogoonchorwa kwaye, Omwana, nagotebirie, Imoka. 42 Bwango agatenena oria omwana, akagenda; ekiagera konya okorire emiaka ikomi nebere. Bagaichana nogoichana okonene. 43 Akabachika mono, 'monto onde tamanya amang'ana ayio: agachika aegwe endagera.
1 Akarua agwo; agaika goika ense yaye omonyene; aborokigwa baye bakamotunyana. 2 Nas'ekero gi'esabato„ agachaka kworokereria as'esunagogi: abange bakamoigwa bagaichana, bakabora, Oyo ng'ai ayanyorire aya? mbong'aini ki obo aeirwe oyo, mbikone ki ebi ebinene biakorekire as'amaboko aye? 3 Oyo tari oria omobachi, omwana o Mariamu, nabamura bamwabo Yakobo, na Yose, na Yuda, na Simon? nabasubati bamwabo abaiseke tibari aiga seito? Bakagechigwa nere. 4 Yesu akabatebia, Omobani takomocha ogosikwa, tatiga as'ense yaye, nas'eamate yaye, nas'enyomba yaye. 5 Gose tanyara gokora egekone ekenene aroro, tatiga abegete amaboko aye igoro as'abarwaire abagusu, akabagwenia. 6 Agakumia as'engecho y'ogotancha kwabo. Agaetanana as'emechie eria, okworokereria. 7 Akabarangeria baria ikomi nababere, agachaka kobatoma babere babere; akabaa okobua igoro as'ebirecha bi'eubi; 8 akabachika tibabogoria 'gento as'orogendo, tatiga enyimbo yoka; nonya nomogati, nonya nesaro, nonya nechibesa chi'ekemoya; 9 korende babeke ebikoroto; akabora, Timweboyia chigansu ibere. 10 Akabatebia, Ande onsi komorasoe as'enyomba, ikaransa aroro goika ekero mokoimoka korwa aase aria, 11 Nabanto bonsi batabaroiseti inwe, gose kobaigwa, komokorua aroro, rokong'onte orotu rore inse as'amagoro aino robe kirori asebare. 12 Bagasoka, bakarandia ng'a abanto baonchoke. 13 Bagaseria ebirecha ebinge, bakaaka abanto abange amaguta abarenge abarwaire, bakabagwenia. 14 Omoruoti Herode akaigwa amang'ana; ekiagera erieta riaye rianyarire gokuma: akabora, Yohana Omobatisi obokire korwa as'amakweri, nas'ayio chinguru echi chigokora emeremo ime asare. 15 Abande bakabora, N'Elija. Abande bakabora, Oyo nomobani, ao gose oyomo as'ababani. 16 Korende Herode ochia koigwa, akabora, Oyo nere Yohana, nanachete omotwe, obokire. 17 Ekiagera Herode omonyene igatomete abanto, akamobwata Yohana, akamosiba echela as'engecho ya Herodias, moka Filipo momura omwabo: ekiagera amonyuomete. 18 Nabo Yohana amotebetie Herode, Tai boronge asore koba na moka momura omino. 19 Nabo oria Herodias akaba nokogecha asare, akarigia komoita; tanyara; 20 ekiagera Herode namoirogete Yohana, okomomanya ng'a nomonto oboronge, omochenu, akamorenda. Gachia komoigwa, agakora amang'ana amange, nere igarenge komoigwa nomogoko. 21 Goika rikaoroka rituko rigwenerete, na Herode ase rituko ri'omoyega bw'okoiborwa kwaye agachia kobakorera omoyega abanene, nabatang'ani b'esegi, nabanto abanene ba Galili; 22 erio enyaroka yaye oria Herodias egasoa gotenga, ekamogwenera Herode nabarabwo abaikaransete amo nere as'omoyega; omoruoti akamotebia oria omwana, Nsaba kende gionsi ekiorigetie, ninkoe. 23 Akamoriera eira, kende gionsi ekiorarigie asende, ninkoe, nonya nenusu y'oboruoti bwane. 24 Agasoka, akamotebia ng'ina, Nki ndasabe? Agateba, Omotwe o Yohana Omobatisi. 25 Erio agasoa nokoayerera as'obosio bw'omoruoti, agasaba, akabora, Nindigetie ong'e bono iga as'esani omotwe o Yohana Omobatisi. 26 Omoruoti akaba nogoichana mono, korende as'engecho y'eira yaye, nas'engecho y'abwo abaikaransete as'omoyega, tarigetie kwanga, 27 erio omoruoti agatoma omosigari bw'abarendi baye, agachika koreta omotwe oye: akagenda, akamonacha omotwe aria echela ime, 28 akareta omotwe oye as'esani, akamoa oria enyaroka, nere akamoa ng'ina, 29 Aborokigwa baye bagachia koigwa amang'ana, bakagenda, bakabogoria egetondo kiaye, bakamotindeka. 30 Nabatomwa bagasangerereka ase Yesu; bakamotebia amang'ana onsi ayabakorete, namang'ana onsi ayaborokereretie, 31 Akabatebia, Inchuo imweka abanyene bobisi, aase atari nabanto, motimoke ake. Ekiagera barengeo abanto abange, bagocha, bakogenda, nonya neribaga tiriarenge ri'okoria. 32 Bakagenda as'obwato, aase atari nabanto, abobisi, 33 Abanto bakabarora bakogenda, abange bakabamanya, bakaminyoka bwango, korwa emechie yonsi, bagatang'ana goika asare. 34 Yesu agachia goika korwa obwato, akarora emeganda emenge, akayerorera amabera, ekiagera barenge buna ching'ondi chitari nomorisia: agachaka koborokereria amange. 35 Goika chinsa chigaeta chinyinge chi'omobaso ang'e namogoroba, aborokigwa baye bakamochiera, bakabora, Aase aa neroro, na bono riagorobire: 36 bae ribaga abanto aba, erinde bagende emegondo nemechie aria naria, begorere endagera. 37 Akairaneria, akabatebia, Bae inwe endagera. Bakamotebia, Inee, togende togore emegati ye chidinari chimia ibere, tobae barie? 38 Akabatebia, Emegati nerenga mobwate? genda morore. Bagachia komanya, bakabora, Netano, nechinswe ibere. 39 Akabachika baikaransie bonsi, ebiombe, ebiombe, as'obonyansi obobese. 40 Bagaikaransa ase chindwaro, chindwaro, echinde emia nechinde emerongo etano. 41 Akayebogoria eria emegati etano nachiria chinswe ibere, akarigereria igoro, nkabisesenia, akayesamunyora eria emegati; akabaa aborokigwa baye kobaterekera; nachiria chinswe ibere, akabagabera bonsi. 42 Bakaria bonsi, bakaigota. 43 Bagachora ebisamunye biasamunyoretwe, bikanyara goichora ebitonga ikomi nabibere, nabo nas'ebisamunye bie chinswe. 44 Nabasacha bariete eria emegati iga barenge chilifu isano. 45 Erio akababetereria aborokigwa baye barine obwato, batang'ane kogenda ng'umbu goika Bethisaida, ekero ere akoa emeganda ribaga bagende. 46 Goika agachia gokora gochikana nabarabwo, akagenda egetunwa gosaba. 47 Bogachia koba mogoroba, obwato bokaba gati as'enyancha, nere bweka as'ense enyomo. 48 Akabarora bagwechanda kong'usa obwato, ekiagera embeo yarenge korua ase bakogenda, goika akabachiera ekero gia kane kia botuko, ogotara igoro as'enyancha; akarigia kobaetania: 49 nabarabwo bagachia komorora ogotara igoro as'enyancha, bagakaga nerirengari, bakaaka eriogi: 50 ekiagera bonsi bamoroche, bakaondoka, Bwango agakwana nabarabwo, akabatebia, remia emioyo: ninche timoiroka. 51 Akarina obwato ime asebare; omwaga ogakira: bagaichana mono; 52 ekiagera tibainyorete amang'ana ay'eria emegati, korende emioyo yabo iga yarenge emekong'u. 53 Goika bachia kwamboka bagaika ense ya Genesareti, bakabeka ekerochi. 54 Bachia gosoka korwa obwato ime, abanto bakamomanya bwango, 55 bakagenda bwango bagaetanana ense eria yonsi, bagachaka kobabogoria namarere abo abarenge abarwaire, bakagenda ker'aase bamoigwete ng'a nao are. 56 Ker'aase are kogenda, asoa ebichie, gose emechie, gose emegondo, bakababeka abarwaire chichiro, bakamosorora bakune nonya nomobarero bw'eanga yaye: nabarabwo bonsi abamokunete bakagwena.
1 Erio Abafarisai nabande as'abariki bakorua Yerusalemu, bagasangerereka asare, 2 bakabarora abande as'aborokigwa baye bakoria endagera namaboko are riko, ekiagera ataisabiri. 3 Ekiagera Abafarisai n'Abayahudi bonsi bataisabeti amaboko ritang'ani, tibakoria, iga babwatete engecho y'abagaka babo: 4 naende kobakorua echiro, batesibeti, tibakoria: naende nare amang'ana ande banyarete koyabwata, buna ogosibia ebikombe, nebinyongo, nebinto bie chitai. 5 Nabo baria Abafarisai nabariki bakamoboria, Naki aborokigwa bao batari gochibwata chingecho chi'abagaka, korende bakoria endagera as'amaboko are neriko? 6 Akabatebia, Isaya igabanete buya inwe abang'ainereria, buna yarigetwe, Abanto aba iga bansigete as'emenwa, Korende chinkoro chiabo iga chire are nainche. 7 Korende iga bagonsasima ogosasima kwa bosa, Kobakworokereria borokereria ayare amachiko a mwanyabanto. 8 Iga mogotiga amachiko a Nyasaye, nagochibwata chingecho chia mwanyabanto. 9 Akabatebia, Mwayangire buya amachiko a Nyasaye ng'a monyare kobwata chingecho chiaino. 10 Ekiagera Musa atebete, Basike 'so na nyoko; oyorarame ise gose ng'ina, nakwe: 11 korende inwe mobora, Omonto karamotebie ise gose ng'ina, egento kiane kende gionsi ng'a nanyarete gogokonya, korende nekia Korban, engecho yaye, Ekiarurwe ase Nyasaye; 12 timori komotiga naende amokorere ise gose ng'ina ring'ana rinde; 13 igo mogwatanana ring'ana ria Nyasaye ase chingecho chiaino chia kare mobwate; naende namange mwayakorire omogwekano bw'aya. 14 Akayorangeria omoganda naende, akabatebia, Nyigwa imwensi, inyora: 15 tari egento kere isiko as'omonto kegosoa keranyare komobeka riko: korende ebikorua omonto nabio bikomobeka riko omonto oria, 16 Omonto kare namato akoigwera, tiga aigwe. 17 Goika agachia gosoa 'nyomba, koyotiga omoganda, aborokigwa baye bakamoboria amang'ana as'omoreng'anio oria. 18 Akabatebia, Iga nainwe timori nobong'aini? Timoinyoreti ng'a ker'egento kere isiko as'omonto, gokeramosoe, tigekonyara komobeka riko; 19 ekiagera tigekomosoa enkoro, tatiga enda yoka, erio giasoka kiagwa kebara? As'ogoteba iga, osibirie chindagera chionsi. 20 Akabora, Egekomosoka omonto nakio gekomobeka riko. 21 Ekiagera ime, as'emioyo y'abanto, igakorua amarengererio amabe, nobonyaka bwonsi, 22 oboibi, oboiti, obotomani, okorengereria okobe, obobe, okong'ainereria, okogania okobe, okomogorera, okorama, oboenenu, obokayayu; 23 aya onsi amabe igakorua ime, naro akamobeka omonto riko. 24 Akaimoka korua aria, akagenda goika chimbebe chia Turo na Sidoni, Agasoa as'enyomba, akarigia tamanyekana nomonto; korende tanyara kobiseka. 25 Erio agwo omokungu omwana oye enyaroka yarenge nekerecha ki'eubi, akaigwa amang'ana aye, agacha komogwera amagoro aye. 26 Noria omokungu n'Omoyunani, egesaku kiaye n'Omosurofenisa. Akamosaba amosererie ekerecha korwa as'enyaroka yaye. 27 Akamotebia, Batige abana baigote ritang'ani: ekiagera tari buya koyebogoria endagera y'abana, gotugutera chisese. 28 Nere akamoiraneria, akamotebia, Nabo, Omonene; korende nonya nechisese nyaro ase chimesa iga chikoria amatori abana. 29 Akamotebia, Ekiagera ase ring'ana erio, genda; ekerecha kiarure as'enyaroka yao. 30 Akagenda mwaye enyomba yaye, akamonyora oria omwana bwareirie 'borere, na keria ekerecha kiamorure. 31 Akarua naende ase chimbebe chia Turo agaeta gati gati ya Sidoni, akagenda goika enyancha ya Galili, egati ye chimbebe chia Dekapoli. 32 Bakamoretera omotino, nere orenge gotutura gagokwana; bakamosorora abeke okoboko kwaye igoro asare. 33 Akamwatanana korwa as'emeganda bobisi, akabeka ebiara biaye amato aye, agatwa amate, akamokuna oromeme; 34 akarigereria gochia igoro, agaichana, akamotebia, Effatha, engecho yaye, Igoreka. 35 Bwango amato aye akaigoreka, egesibo ki'oromeme rwaye gekororoba, agakwana buya. 36 Akabachika tibamotebia 'monto: korende buna amentete kobakania, nabo bamentete korandia amang'ana, 37 bagaichana, mono kobua, bakabora, Okorire onsi buya: emetino obakorire baigwe, namamama bakwane.
1 Naende amatuko aria, ekiagera nemenge mono emeganda, nabarabwo tibarenge nagento bakoria, Yesu akabarangeria aborokigwa baye, akabatebia, 2 Nabaroreire amabera emeganda, ekiagera abaire amatuko atato baikaransire amo nainche, batari nagento bakoria: 3 nonya nimbaa ribaga bagende chinyomba chiabo nenchara, nabairwe nesiororia; nabande mbaruete are. 4 Aborokigwa baye bakamoiraneria, Naki aranyare omonto kobaigotia abanto aba naiga neroro? 5 Akababoria, Emegati nerenga mobwate? Bagateba, Netano nebere. 6 Akabachika emeganda eikaranse inse: akayebogoria eria emegati etano nebere, gasasimire, akayesamunyora, akabaa aborokigwa baye koyeterekera emeganda; bakayeterekera emeganda. 7 Iga barenge nebiswe ebike: kabisesenirie, akabora, nebi baterekere. 8 Bakaria, bakaigota; bagasangereria ebitigari ebisamunye ebitonga bitano nabibere. 9 Nabanto bariete iga barenge chilifu inye: akabaa ribaga. 10 Bwango akarina obwato amo naborokigwa baye, akagenda ensemo ya Dalumanutha. 11 Bakaoroka Abafarisai, bagachaka koborania nere, bakarigia asare egekone korwa igoro, bakomotema. 12 Agaichana mono as'omoyo oye, akabora, Naki ekegori eke gekorigia egekone? Ekeene, nabatebirie, Tigekoegwa egekone ekegori eke. 13 Akabatiga, akarina naende obwato ime, akagenda goika ng'umbu. 14 Bakeba kobogoria emegati; nonya nas'obwato tibarenge nagento tatiga omogati oyomo bwoka. 15 Akabachika, akabora, Rigereria, erende nememera y'Abafarisai nememera ya Herode. 16 Bakaamererania barabwo ase barabwo, bakabora, Titori nemegati. 17 Yesu akamanya, akabatebia, Naki mokoamererania, ekiagera motari nemegati? Timorainyora gose timoramanya? Emioyo yaino igere emekong'u goika bono? 18 More namaiso, timorochi? more namato, timoigweti? gose timoinyoreti? 19 Ekero nayesamunyorete eria emegati etano nakobaa baria chilifu isano, mwabogoretie ebitonga birenga bichire nebisamunye? Bakamotebia, Ikomi nabibere. 20 Neria etano nebere kobaa baria chilifu inye, mokabogoria ebitonga birenga bichire nebisamunye? Bakamotebia, Bitano nabibere. 21 Akabatebia, Naki motarainyora? 22 Bagaika Bethesaida. Bakamoretera omouko, bakamosorora amokune. 23 Akamobwata okoboko oria omouko, akamoira isiko as'omochie; kamotwereire amate as'amaiso, akabeka amaboko aye igoro asare, akamoboria, Kwarorire gento? 24 Akarigereria igoro, akabora, Narorire abanto; ko nabarorire buna emete, ekogenda. 25 Erio naende akabeka amaboko aye igoro as'amaiso aye; akamochika arigererie mono, akagwena, akarora ebinto bionsi boronge. 26 Akamotebia genda mwao, akabora, Tosoa nonya nomochie. 27 Yesu agasoka naborokigwa baye bakagenda emechie ya Kaisaria ya Filipo: nas'enchera, akababoria aborokigwa baye, okobaboria, Abanto iga bakobora inche ninche ng'o? 28 Bakamoiraneria, bakabora, Yohana Omobatisi: nabande, Elija; nabande, Oyomo as'ababani. 29 Akababoria, Nainwe mokobora ng'a ninche ng'o? Petere akamoiraneria akamotebia, Aye naye Kristo. 30 Akabachika tibamotebia 'monto amang'ana aye. 31 Agachaka koborokereria, ng'a nemogwenerete Omwana-o-mwanyabanto konyora emechando emenge, nakwangwa nabagaka, nabakuani abanene, nabariki, nagoitwa, na nyuma as'amatuko atato naboke. 32 Agakwana amang'ana aya maiso marore. Petero akamoira agachaka komokama. 33 Ageonchora, akabarigereria aborokigwa baye, akamokania Petero, akabora, Irana nyuma yane, Saitani: ekiagera toyarengerereti aya Nyasaye, korende naya mwanyabanto. 34 Akabarangeria emeganda naborokigwa baye, akabatebia, Oyorigetie gontunyana, ekanye omonyene, etweke omosalaba oye, antunyane. 35 Ekiagera oyorarigie gokonya obogima bwaye, nabosirie; nemento orasiiie obogima bwaye as'engecho yane nas'engecho y'enchili, oyio nabokonye. 36 Naki aramogwenere omonto koyenyora ense yonsi, ko nere asirie obogima bwaye? 37 Gose omonto inki ararue ribaga ri'obogima bwaye? 38 Naki oyio oranyare kondorera obosoku inche namang'ana ane as'ekegori eke ki'obotomani nebibe, Omwana-o-mwanyabanto namororere obosoku ere gagocha as'obonene bw'Ise amo namalaika amachenu.
1 Akabatebia, ekeene nabatebirie, Mbare abanto as'aba bateneine aiga, abataigwe amakweri, goika baborore obonda bwa Nyasaye bogocha nechinguru. 2 Goika nyuma as'amatuko atano narimo Yesu akabaira Petero, na Yakobo, na Yohana, akabaira igoro as'egetunwa egetambe barabwo boka: agaonchoka ekieni kiaye asebare: 3 chianga chiaye chikamekameka, chikaba chindabu mono, buna omorosia bw'ense atanyare gochikora chindabu. 4 Bakaorokerwa n'Elija amo na Musa: nabarabwo iga barenge gokwana na Yesu. 5 Petero akairaneria akamotebia Yesu, Omonene, mbuya intwe koba aiga: koranche tokore ebigutu bitato; ekemo ekiao, ekemo ekia Musa, nekemo ki'Elija. 6 Engecho yaye tamanyete eki agokwana; ekiagera babete nomoondoko emonene. 7 Rikabao rire, rikababeka ekiriri: eriogi rikarua ase rire riria, Oyo n'Omwana one, omwanchwa one: moigwere. 8 Erio bwango kobarigereria aria naria, tibarora 'monto, tatiga Yesu bweka amo nabarabwo. 9 Kabagotirimboka korwa egetunwa, akabachika tibamotebia 'monto ayabaroche, goika Omwana-o-mwanyabanto kabokire korwa as'amakweri. 10 Bakaribwata ring'ana riria, bakaborania barabwo ase barabwo, ng'a okoboka korwa amakweri engecho yaye inki. 11 Bakamoboria, bakobora, Abariki iga bagoteba ng'a nemogwenerete Elija ache ritang'ani. 12 Akairaneria akabatebia, Nekeene Elija ochire ritang'ani, nakorosia onsi: korende, amo naya, naki arikire Omwana-o-mwanyabanto ng'a nachandwe namange nagochaywa? 13 Korende nabatebirie, Elija otiekire gocha, nabarabwo bakamokorera onsi aya barigetie, buna arikeretwe. 14 Kabaikera aborokigwa, bakarora emeganda emenge abaetanaine, abariki bakoborania nabarabwo. 15 Erio emeganda yonsi, kobakomorora, bagaichana mono, bakamochiera bwango bakamokwania. 16 Akababoria, Ninki mokoborania nabarabwo? 17 Omonto oyomo as'emeganda akamoiraneria, Omworokia, Namoreta omwana one asore, nare nekerecha ki'erimama; 18 na gokiamobokire, iga gekomogaragaria: arua risombogoku, nakoriania amaino, as'ayio chinguru chiaye chisira: ngakwana naborokigwa bao banyare kogeseria; tibanyara. 19 Akabairaneria, akabora, Inwe ekegori getari nokwegena, nimbe nainwe goika ririri? nindemererie nainwe goika ririri? mondetere. 20 Bakamoreta asare: ekero kiamorora, bwango keria ekerecha gekamogaragaria; akagwa inse, akegaragaria, agasokia risombogoku, 21 Akamoboria ise, Nkorua kero ki anyoretwe naya? Agateba, Nkorwa obwana bwaye. 22 Ara aange kemoruta as'omorero nas'amache, kemosirie, korende koranyare ring'ana, tororere amabera, otokonye, 23 Yesu akamotebia, Koranyare kwegena, onsi iga akonyarekana asare oyobwanchire. 24 Bwango ise oria omwana akaaka eriogi, akabora, Nanchire, nkonya as'ogotancha kwane. 25 Nere Yesu akarora ng'a emeganda ngosangererekanere bwango, akagekania keria ekerecha ki'eubi, agagetebia, Aye ekerecha rimama nomotino, inche nagochikire, mosoke, tomoiranera naende. 26 Gekarera, gekamogaragaria mono, gekamosoka; akaba buna oyokure; goika abange bakabora, Okure. 27 Korende Yesu akamobwata okoboko, akamoimokia; nere agatenena. 28 Goika agachia gosoa enyomba, aborokigwa baye bakomoboria bobisi, Naki intwe totanyara kogeseria? 29 Akabatebia, as'ayio tigekonyara korwa ase ring'ana rinde rionsi, tatiga as'ogosaba nokweng'ata. 30 Bakarua aria, bagaeta gati gati ya Galili; nere tancha 'monto amanye. 31 Ekiagera arenge kworokereria aborokigwa baye, akabatebia, Ng'a Omwana-o-mwanyabanto nkogendare kobekwa as'amaboko abanto, nabarabwo nabamoite; goika gatiekire goitwa, nyuma as'amatuko atato naboke. 32 Nabarabwo tibarimanya ring'ana riria, bakairoka komoboria. 33 Bagaika Kaperinaum: goika agachia koba 'nyomba, akababoria, Ninki mware koamererania 'nchera? 34 Bagakira: ekiagera barenge koamererania barabwo ase barabwo, ning'o ore omonene. 35 Agaikaransa inse, akabarangeria ikomi nababere; akabatebia, Omonto origetie koba oyo bwe ritang'ani, nabe oyo bw'omoerio kobua bonsi, nomokoreri o bonsi. 36 Akabogoria omwana omoke, akamobeka gati gati yabo; akamoagata, akabatebia, 37 Omonto oramwanche omwana oyomo buna oyo as'erieta riane, onyanchire inche: nomonto oranyanche inche, tanyancheti inche, korende ere oyontomete. 38 Yohana akamoiraneria, akamotebia, Omworokia, ntwamorora omonto ogoseria ebirecha as'erieta riao: tokamokania, ekiagera tari gototunya intwe. 39 Yesu agateba, Timomokania, ekiagera tari 'monto onde oranyare kobikora ebikone as'erieta riane, anyare ekero ekio ekio gonteba bobe. 40 Ekiagera oyo atari ao naintwe, nas'ensemo yaito are. 41 Ekiagera onde bwonsi orabasibie inwe egekombe ki'amache as'erieta riane, ekiagera inwe naba Kristo more, ekeene nabatebirie, tegosira eng'eria yaye nonya ng'ake. 42 Nonde bwonsi oranyare komogocha oyomo as'abake aba banyanchete, mbuya asiberwe rigena ri'ogosia rigoti riaye, nagotugutwa enyancha ime. 43 Nokoboko kwao gokorakogoche, konache: mbuya gosoa as'obogima kore ekerema, kobua koba namaboko abere, nakogenda ase riera rie chaanam, as'omorero otakorimeka: 44 aase amakonde abo atagokwa, nonya nomorero otakorimeka. 45 Nokogoro kwao gokorakogoche, konache: mbuya gosoa as'obogima kore egesegora, kobua koba namagoro abere, nagotugutwa ase riera rie chaanam. 46 Ekiagera amakonde abo tagokwa, nomorero tokorimeka. 47 Neriso riao korirakogoche, ritugute: mbuya gosoa as'obonda bwa Nyasaye kore egetong'o, kobua koba namaiso abere, nagotugutwa ase riera ri'omorero: 48 aase amakonde abo atagokwa, nomorero otakorimeka. 49 Ekiagera ker'omonto nabekwe omonyo as'omonyo. 50 Omonyo nomuya, korende omonyo korasire obwansu bwaye, namoyobeke ki bwanse? Mobe nomonyo asemore ime, moikaranse as'omorembe inwe as'inwe.
1 Akaimoka korwa agwo, agaika chimbebe chia Boyahudi, as'enchera ng'umbu ya Yorodan; abanto abange bagasangerereka naende bakamochiera; akaborokereria naende, buna anarete. 2 Abafarisai bakamochiera, bakamoboria, Inee, mboronge omonto komotiga mokaye? bakomotema. 3 Nere akabairaneria, akabatebia, Inki Musa abachigete? 4. Bagateba, Musa igaruete ribaga korika rirube ri'ogotigana, nakomotiga. 5 Yesu akabatebia, Nas'obokong'u bw'emioyo yaino abarikerete amachiko aya. 6 Korende korwa omochakano bw'ogotongwa gw'ense, Nyasaye iga abakorete omosacha nomokungu. 7 Ekiagera as'ayio omonto namotige ise na ng'ina, abwatane na mokaye; 8 nabwo babere nababe omobere oyomo: goika tibaba babere naende, korende omobere oyomo. 9 Nabo ebiasang'ananirie Nyasaye, mwanyabanto tabiatanana. 10 As'enyomba naende aborokigwa bakamoboria engecho ye ring'ana erio. 11 Akabatebia, Ker'omonto oramotige mokaye, nakonyuoma oyonde, otomanire igoro asare: 12 nomokungu karamotige omosacha oye, nakonyuomwa nomonto onde, otomanire. 13 Bakamoretera abana abake, erinde anyare kobakuna: aborokigwa baye bakabakania. 14 Korende Yesu agachia korora, akabea mono, akabatebia, Batige abana abake bache asende; timobatanga: naki obonda bw'igoro nobwabo omoreng'anio bw'aba. 15 Ekeene nabatebirie, Onde bwonsi otancheti obonda bwa Nyasaye buna omwana omoke tagosoa nonya ng'ake. 16 Akabaimokia as'amaboko aye, akabasesenia, okobeka amaboko aye igoro asebare. 17 Goika agachia koba ogosoka kogenda enchera, omonto oyomo agacha bwango, akamotung'amera, akamoboria, Omworokia omuya, nki ndakore inyare koba nobogima bwa kare nakare? 18 Yesu akamotebia, Naki okondoka omuya? tari omuya tatiga oyomo, nere Nyasaye. 19 Kwayamanyire amachiko, Toita, Totomana, Toiba, Toteba oborimo, Tong'aina, Basike'so na nyoko. 20 Akamotebia, Omworokia, aya onsi nayabwatire korwa obwana bwane. 21 Yesu akamorigereria mono, akamwancha, akamotebia, Kwaremeirwe ring'ana erimo: genda, ogore ebiore nabio bionsi, obae abataka, naye nobe nemonga igoro, erio oche, bwetweke omosalaba oo, ontunyane. 22 Korende ere akanyiria obosio ase ring'ana riria, akagenda nobororo, ekiagera arenge nebinto ebinge. 23 Yesu akarigereria chinsemo chionsi, akabatebia aborokigwa baye, Nabe aakong'u naki as'abanyene enibo gosoa as'obonda bwa Nyasaye! 24 Aborokigwa bagaichana as'amang'ana aye, Yesu akairaneria naende, akabatebia, Abana, nabe aakong'u naki as'abagosemeria enibo gosoa as'obonda bwa Nyasaye! 25 Mbwango engamia goeta as'engoro y'esindani, kobua omonda gosoa as'obonda bwa Nyasaye. 26 Nabarabwo bagaichana mono, bakaborania, Ning'o rende, oranyare gokonyeka? 27 Yesu akabarigereria akabora, Ase mwanyabanto takonyarekana, korende ase Nyasaye taibo: ekiagera onsi iga akonyarekana ase Nyasaye. 28 Petero agachaka komotebia, Rora, intwe twatigire bionsi, twagotunyanire. 29 Yesu akairaneria, akabora, Ekeene, nabatebirie, tari omonto otigire enyomba, gose bamura bamwabo, gose basubati bamwabo, gose ise, gose ng'ina, gose mokaye, gose abana, gose emegondo, as'engecho yane, gose as'engecho y'enchili, 30 tatiga naegwe ara emia as'ekero kia bono, chinyomba, nabamura bamwabo, nabasubati bamwabo, nabang'ina, nabana, nemegondo, amo nemechando; nas'ense egocha obogima bwa kare nakare. 31 Korende abange abare be ritang'ani nababe aba nyuma; naba nyuma nababe abe ritang'ani. 32 Bakaba 'nchera, bagotira kogenda Yerusalemu; na Yesu igarenge kobatang'ana: bagaichana; abatunyanete bakairoka. Akabaira naende baria ikomi nababere, agachaka kobatebia ebirage bi'amang'ana agocha komonyora, 33 akabora, Rigereria, ngotiratore kogenda Yerusalemu; n'Omwana-o-mwanyabanto nabekwe amaboko abakuani abanene nabariki; nabamogambie akwe, nabamobeke amaboko ebisaku: 34 nabarabwo nabamochecherie, nakomoaka chinkini, nakomotwera amate, nakomoita; nyuma as'amatuko atato naboke. 35 Yakobo na Yohana, abana ba Zebedi, bakamochiera, bakamotebia, Omworokia, morigetie otokorere rinde rionsi toranyare gososaba. 36 Akabatebia, Morigetie mbakorere ki? 37 Bakamotebia, Otwanchere intwe toikaranse, oyomo okoboko kwao gw'okorio, noyomo okoboko kwao gw'okobee as'obonene bwao. 38 Yesu akabatebia, Timomanyeti eke mogonsaba. Namonyare konywera egekombe nkonywera inche? nakobatiswa ebatiso mbatisire inche? 39 Bakamotebia, Natonyare. Yesu akabatebia, Egekombe nkonywera inche namokenywere, nebatiso mbatisire inche namobatiswe: 40 korende engecho y'ogoikaransa okoboko kwane gw'okorio nokoboko kwane gw'okobee tindi nogochika kobaa: tatiga barabwo baraegwe abagacheirwe. 41 Ekero baria ikomi bachia koigwa, bagachaka kobabea Yakobo na Yohana. 42 Yesu akabarangeria, akabatebia, Mwamanyire ng'a baria babarirwe koba abagambi b'Ebisaku bakobagambera nechinguru; nabanene babo bakobachika barabwo. 43 Korende takoba bo asemore: korende omonto origetie koba omonene asemore, nabe omokoreri oino. 44 Nomonto orarigie koba oyo bwe ritang'ani asemore, nabe omosomba o bonsi. 45 Ekiagera Omwana-o-mwanyabanto tachete gokorerwa, korende gokora, nakorua obogima bwaye bobe okoboria kw'abange. 46 Bagaika Yeriko: goika agachia koba okobwatia enchera korwa Yeriko, amo naborokigwa baye nomoganda omonene, omwana o Timayo, Baritimayo, oria omouko, igarenge oikaransete ensemo y'enchera, ogosaba ebiegwa. 47 Agachia koigwa ng'a Yesu Omonasereti, agachaka koaka egeturi, nagoteba, Yesu omwana o Daudi, onyabere. 48 Abanto abange bakamotogonyera, ng'a anyare gokira: korende akamenta koaka egeturi kobua, Omwana o Daudi, onyabere. 49 Yesu agatenena, akabora, Morangerie. Bakamorangeria oria omouko, bakamotebia, Remia omoyo, imoka, okorangeirie. 50 Nere, agatuguta eanga yaye, agacharoka, akamochiera Yesu. 51 Yesu akamoiraneria, akamotebia, Ninki origetie ngokorere? Oria omouko okamotebia, Rabii, inyare korora naende. 52 Yesu akamotebia, Genda: okwegena kwao kwagokonyire. Erio kegima akanyara korora, naende agatunyana Yesu gochia nchera.
1 Goika agachia goika Yerusalemu, ang'e na Bethifage, na Bethania, as'egetunwa ki'Emezeituni, akabatoma babere as'aborokigwa baye, 2 akabatebia, Genda goika oria omochie mokoorokera, erio kamogosoa aroro, namonyerore emori y'etigere esibire, etana korinwa nomonto; yesibore, moyendetere. 3 Nomonto karababorie, Naki mogokora iga? teba, Omonene nayerigetie; na bwango nayeiranie aa. 4 Bakagenda, bakayerora emori y'etigere esibire geita, isiko as'enchera enene; bakayesibora. 5 Abande b'abanto bateneine aroro bakababorera, Naki mogokora mokoyesibora emori y'etigere? 6 Bakabatebia buna Yesu abachigete: bakabatiga bagende. 7 Bakamoretera Yesu emori eria y'etigere, bakara chianga igoro asere; agaikaransa igoro asere. 8 Abanto abange bakara chianga chiabo enchera; abande bakanacha chinsagia chi'emete nagochiara enchera. 9 Abanto abatang'aine, nabaria bare komotunya, bakaaka eriogi, bakobora, Hosana (otokonye); nasesenigwe oyochire as'erieta ri'Omontne: 10 bwasesenigwe, oboruoti bogocha, oboruoti bwa tata oito Daudi: Otokonye bono, aye ore igoro. 11 Yesu agasoa Yerusalemu, goika ase hekalu ime: karigereria chinsemo chionsi, ekiagera iga kiarenge ekero kia mogoroba, agasoka akagenda Bethania amo nabaria ikomi nababere. 12 Goika mambia kobakorua Bethania akaigwa enchara. 13 Akarora korwa are omoko ore namato, akagenda, erinde gose narore egento igoro asore: agachia goika tarora gento tatiga amato; ekiagera tikiarenge ekero ki'amako. 14 Yesu akairaneria, akayotebia, Korwa bono goika kare nakare omonto taria amatunda ao. Aborokigwa baye bakaigwa. 15 Bagoika Yerusalemu: Yesu agasoa ase hekalu ime, agachaka kobaseria abanto barenge kogora nagotonda ime ase hekalu, agaonchora chimesa chi'abare koonchoreria chifetha, nebirogo biabo abare gotonda amaruma; 16 tatiga omonto abogorie egento as'egati ye hekalu. 17 Akorokereria, okobatebia, Tiyarigetwe, Enyomba yane nerokwe enyomba y'ogosaba as'ebisaku bionsi? korende inwe mwayekorire koba ribwago ri'abauri. 18 Abariki n'Abakuani abanene bakanyora amang'ana bakarigia enchera y'okomosiria: ekiagera bamoirogete, naki emeganda yonsi egaichana as'obong'aini bwaye. 19 Kobwaba mogoroba akarua omochie. 20 Na mambia kobagoeta, bakayorora oria omoko bwomire bwonsi korwa as'emeri yaye. 21 Petero okoinyora amang'ana aye, akamotebia, Rabi, rora, omoko kwaragereretie bwomire. 22 Yesu akairaneria, akamotebia, Mobe nokwegena ase Nyasaye. 23 Ekeene, nabatebirie, onde bwonsi oragetebie egetunwa eke, Tegoka, getugutwe enyancha; oyo atakoreti ogosiereria omoyo oye, korende anchete ng'a ayio ateba nabe; nakoreke ayio. 24 As'ayio nabatebirie, ebinto bionsi morasabe; ancha ng'a mwabinyorire nabirobio nabibe ebiaino. 25 Nainwe, kera komogotenena nagosaba, abera, onye more nering'ana as'omonto; erinde Iso oino ore igoro ababere nainwe okomocha kwaino. 26 Onyore inwe timokwabera? nonya Iso oino ore igoro takobabera inwe okomocha kwaino. 27 Bagaika Yerusalemu naende; ekero agotara hekalu, bakamochiera abakuani abanene nabariki nabagaka; 28 bakamotebia, Nas'ogochika ki ogokorera aya? Gose ning'o okoeire ogochika oko okoyakorera aya? 29 Yesu akairaneria akabatebia, Ninche nimbaborie ring'ana erimo, nainwe mogontchia, erio nimbatebie as'ogochika ki ngokorera aya. 30 Ebatiso ya Yohana, iga eruete igoro, gose nase mwanyabanto? ng'iranerie. 31 Bagatebania barabwo ase barabwo, bakobora, Gatoratebe, Nkorua igoro; nabore, Naki, rende motamwancheti? 32 Gose gatoratebe, nkorwa ase mwanyabanto bakairoka abanto: ekiagera abanto bonsi bamomanyire Yohana ng'a nomobani bw'ekeene; 33 Bakamoiraneria Yesu, bakobora, Titomanyeti. Yesu akabatebia, Nonya ninche tinkobatebia inwe as'ogochika ki ngokorera aya.
1 Agachaka gokwana nabarabwo as'emereng'anio. Omonto osimegete omogondo bw'emesabibu, agaetanania orobago, akarema agakora egetera akomitera, akaagacha egesasimo, akabeka abaremi, akamanora kogenda ense eng'ao. 2 Goika ekero gi'okwama kwaye agatoma omosomba ase abaremi baria, erinde anyore as'abaremi ensemo y'amatunda emesabibu. 3 Bakamobwata, bakamoaka, bakamosokia isiko tari nagento. 4 Agatoma naende asebare omosomba onde; noyio bakamoaka chingoma as'omotwe, bakamosokia obekirwe obosoku. 5 Akamotoma oyonde; noyio bakamoita; nabande abange; bakabaaka abande, nabande bakabaita. 6 Narenge nomwana oyomo ataratoma, omwanchani oye: oyo nere akamotoma asebare nyuma, akabora, Nabamosike omwana one. 7 Baria abaremi bagatchania, Oyo nomonyamwando; gaki, tomoite, omwando obe oyoito. 8 Bakamobwata, bakamoita, bakamotuguta isiko as'omogondo bw'emesabibu. 9 Bono inki arakore oria omonene bw'emesabibu? nachiche nakobasiria baria abaremi, noria omogondo bw'emesabibu nabae abande. 10 Nonya neririko eri timorarisoma; Rigena abaagachi bangete, Riabaire rigena rinene ri'ekona; 11 Riarure as'Omonene ring'ana eri, Narirorio nogokumia as'amaiso aito? 12 Bakarigia komobwata; bakairoka emeganda; ekiagera bamanyete ng'a oria omoreng'anio nabwo agoteba: bakamotiga, bakagenda. 13 Bagatoma asare abande b'Abafarisai n'Abaherodiani, erinde bamobwate as'amang'ana. 14 Bagachia goika bakamotebia, Omworokia, twamanyire ng'a aye igore omonto bw'ekeene, gose torengerereti 'monto onde: ekiagera tori korigereria chieni bi'abanto. korende as'ekeene okoyiorokereria enchera ya Nyasaye: Inee, mboronge komoa Kaisari ebango gose taibo? 15 Tomoe, gose titomoa? Nere konya omanyire obong'ainereria bwabo, akabatebia, Naseki mogontema? nyendetere eshilingi nyerore. 16 Bakayereta. Akabatebia, Nekiang'o ekieni eke namariko aya? Bakamotebia, nebia Kaisari. 17 Yesu akairaneria akabatebia, Moe Kaisari chire bia Kaisari, nebia Nyasaye moe Nyasaye. Bakamokumia mono. 18 N'Abasadukai, nabanto bagotcha ng'a koboka tikori, bakamochiera; bakamoboria, bakobora, 19 Omworokia, Musa natorikerete, ng'a omomura omwabo omonto karakwe, amotige omokungu oye, onye tari nomwana, momura omwabo amotware oria omokungu oye, omonyorere omomura omwabo abana. 20 Nabo mbarenge abamura batano nababere: oyo bwe ritang'ani akabogoria omokungu, agakwa, tatiga abana; 21 noyokabere nere akamotwaia, agakwa, nonya nere tatiga abana; nonya noyo gatato bo; 22 bakamotwara bonsi batano nababere tibatiga abana. Omoerio o bonsi oria omokungu agakwa nere. 23 Inee! As'okobokigwa nabe mokang'o as'aba? ekiagera bonsi batano nababere mbarenge nere. 24 Yesu akairaneria, akabatebia, Inee! Timori gosira ekiagera as'aya, ekiagera timomanyeti amariko, nonya nokobua kwa Nyasaye? 25 Ekiagera kobaraboke korwa as'amakweri, tibakonyuoma gose tibakonyuomerigwa; korende iga barabe buna amalaika bare igoro, 26 Nas'amang'ana ebitondo, buna bakoboka; timwanya gosoma as'ebuku ya Musa, egesieri ki'Omote, buna Nyasaye amotebetie, okobora, Inche Nyasaye o Ibrahimu, na Nyasaye o Isaaka, na Nyasaye o Yakobo? 27 Ere tari Nyasaye bw'abakure, korende bw'abare moyo; as'ayio iga mogosira mono. 28 Oyomo ase abariki agacha akabaigwa bagotebania nere, akamanya ng'a obairaneirie buya, akamoboria, As'amachiko onsi ndiriri rire rie ritang'ani? 29 Yesu akamoiraneria, As'amachiko onsi eri rie ritang'ani nario eri, Igwa, Israeli; Omonene Nyasaye oito, n'Omonene oyomo: 30 naye mwanche Omonene Nyasaye oo nomoyo oo bwonsi, nenkoro yao yonsi, nobong'aini bwao bwonsi, nechinguru chiao chionsi. 31 Nogwa kabere koreng'aine nakwo, noko, Mwanche omogisangi oo buna omobere oo. Amachiko tari amanene kobua aya. 32 Oria omoriki akamotebia, Ekeene, Omworokia, gwatebire buya ng'a Nyasaye noyomo, nonde tari tatiga ere: 33 nakomwancha as'omoyo bwonsi, nas'okoinyora gwonsi, nas'enkoro yonsi, nase chinguru chionsi, nakomwancha omogisangi oo buna omobere oo, nkogwenerete kobua omosango bwonsi nebing'wanso bionsi. 34 Yesu, agachia korora ng'a iga airaneria as'obong'aini, akamotebia, Aye tori are nobonda bwa Nyasaye. Erio nyuma omonto tamoboria ring'ana naende. 35 Yesu akairaneria, akabora, gakworokereria ime ase hekalu, Naki abariki bakobora ng'a Kristo n'Omwana o Daudi? 36 Ekiagera Daudi omonyene iga atebete, as'Omoika Omochenu, Omonene akamotebia Omonene one, Ikaransa okoboko kwane gw'okorio, Goika mbakore ababisa bao koba inse as'amagoro ao. 37 Daudi omonyene iga akomoroka Omonene; nabo naki aba omwana oye? Noria omoganda omonene iga orenge komoigwa as'omogoko. 38 Akabatebia as'okworokereria kwaye, Erende nabariki, abanchete gotara beboete chianga chintambe, nagokwanigwa chichiro, 39 nagoikaransa aas'eritang'ani as'obosio bw'esunagogi, naase eritang'ani ase emeyega. 40 Bakoria chinyomba chi'ababoraka, nase obong'ainereria basaba ogosaba ogotambe; aba nabanyore ekina ekere ekenene. 41 Yesu agaikaransa koyerigereria esanduku y'emonga, akarigereria buna emeganda ekobeka chifetha as'esanduku: abange abarenge abanda bakabeka chinyinge. 42 Agacha omokungu oyomo, omoboraka, omotaka, akabeka ebisamunye bibere bie chitai, rigori ri'enusu y'ebesa eyenio. 43 Akabarangeria aborokigwa baye, akabatebia, Ekeene, nabatebirie, Oyo omoboraka omotaka obekire chinyinge kobua bonsi abakobeka as'esanduku y'emonga: 44 ekiagera aba bonsi iga babeka korwa as'obonge bw'enibo yabo; korende oyo as'okoremerwa kwaye obekire bionsi ebiarenge nabio, nonya nobogima bwaye bwonsi.
1 Goika gachia gosoka korwa hekalu, oyomo bw'aborokigwa baye akamotebia, Omworokia, naki as'amagena nas'amaagacho! 2 Yesu akairaneria, akamotebia, Noroche amaagacho aya amanene? Aa tirigotigara rigena igoro ase rigena rinde, eritanyare gotagorwa. 3 Erio gaikaransire as'egetunwa ki'Emezeituni, korigereria hekalu, Petero na Yakobo na Yohana na Anderea bakamoboria bobisi, 4 Totebie aya ndi arabe? nkemanyererio ki'ekero ki'aya onsi arabe ang'e goikerana? 5 Yesu akairaneria, agachaka kobatebia, Erende omonto tabang'aina nakobasiria. 6 Ekiagera abange nabache as'erieta riane, babore, Inche ninche ere; nabasirie abange. 7 Naende komoraigwe esegi namang'ana esegi, timoichana: naki bori nabe aya onsi, k'omoerio toracha. 8 Naki egesaku nakeimoke korwana negesaku, nobonda naborwane nobonda: nobe omotengecho ase chinsemo chinsemo; nebe nenchara: aya naro omochakanobw'obororo. 9 Nainwe mwerende emebere yaino: ekiagera nababaire as'amatongo; nase chisunagogi namoakwe; namoirwe gotenena as'amasio abagavuna nas'abaruoti as'engecho yane, koba kirori asebare. 10 Naende negwenerete enchili erandigwe ritang'ani as'ebisaku bionsi. 11 Ekero bakobaira as'ekina, kobabeka as'amaboko abanto, timochaka gwechanda korengereria ayamorigetie gokwana: korende rionsi moraegwe as'ensa eria, rikwane: ekiagera tari inwe mogokwana, korende n'Omoika Omochenu. 12 Na momura omwabo namorwe oyomwabo erinde aitwe, naise nomwana oye; nabana nabaimoke igoro as'ababaibori babo, kobaita. 13 Nainwe namogechwe nabanto bonsi as'engecho y'erieta riane, korende oyoraremererie goika omoerio, oyio nakonyeke. 14 Korende komorakorore ogosareka kw'obobe, gogotenena aas'atagwenereti, (oyogosoma ainyore), erio abare ase Boyahudi batamere ebitunwa: 15 nere oyore igoro as'ekerama taika gosoa enyomba ime, gose tasoa kobogoria egento korwa mwaye: 16 nere oyore as'omogondo tairana nyuma koyebogoria eanga yaye, 17 Obobe nobwabo abare 'barito, nabarabwo abakogonkia amatuko aria! 18 Saba ogotama kwaino tikoba ekero ki'obokendu. 19 Ekiagera amatuko aria nebe emechando, engecho etana koba korwa omochakano bw'ogotonga atongete Nyasaye goika bono, gose tekoba bo naende nonya ng'ake. 20 Naende onye Omonene atayanachete amatuko aria, anga takonyegete omonto onde bwonsi; korende as'engecho y'abachore, abachorete, oyanachire amatuko aria. 21 Nekero ekio omonto karabatebia, Rora, Oyo nere Kristo; gose, Oria aria; timwancha: 22 ekiagera nabaimoke Amakristo oborimo, nababani b'oborimo, nabaorokie ebikone nogokumia, banyare kobasiria, nonya mbaria abachorwa, 23 Korende inwe mwerende: rora, natiekire koborokia onsi ritang'ani. 24 Korende amatuko aria, nyuma as'emechando eria, erioba naribekwe omosunte, nomotienyi tokorua omobaso oye, 25 neching'enang'eni chi'igoro nachibe nkogwachire, nechinguru chire igoro nachitengechigwe. 26 Erio nario baramorore Omwana-o-mwanyabanto ogocha namare amo nechinguru chinyinge nobonene. 27 Erio nabatome amalaika aye, nakobasangereria abachorwa baye korwa chinsemo chie chimbeo inye, na korwa ensemo y'omoerio bw'ense goika ensemo y'omoerio o igoro. 28 As'omoko eorokererie omoreng'anio: orosagia rwaye korwachakire koba orobese, nakoorokia amato aye, mwamanyire ng'a ng'ang'e nekero gi'okwama; 29 naboigo nainwe, komokoyarora aya aorokire, inyora ng'a abaire ang'e nagesieri. 30 Nekeene, nabatebirie, Ekegori eke tigegoeta nonya ng'ake> goika aya onsi anyare koba. 31 Igoro nense nabiete ko amang'ana ane tagoeta nonya ng'ake. 32 Korende amang'ana erituko riria neusa eria onde tari omanyete, nonya namalaika are igoro, nonya n'Omwana, tatiga Tata. 33 Rigereria, renda, saba: ekiagera timomanyeti ekero keria keranyare koba. 34 Iga are buna omonto orekogenda ense eng'ao, konye otigire enyomba yaye, obaeire ogochika abasomba baye, naker'omonto emeremo yaye, akamochika omorendi arende. 35 Renda boigo: ekiagera timomanyeti kagocha omonene bw'enyomba, gose mogoroba, gose mbotuko gati, gose etuoni gekogweya, gose mambia; 36 tacha ababosokane abanyore mwararire, 37 Nerio nabatebirie inwe, nabatebirie inwe mwensi, Renda.
1 Nyuma as'amatuko abere rikaba rituko rinene ri'epasaka, nemegati etabekiri ememera: abakuani abanene nabariki bakarigia enchera bakomobwatera nechisemi, banyare komoita: 2 ekiagera batebete, Tari ekero kie rituko rinene, tanyara gocha koba riroroche as'abanto. 3 Ne rigoro arenge Bethania as'enyomba ya Simon oyorenge noborwaire bw'ukoma, gaikaransete as'endagera, agacha omokungu orenge nechuba engiya, ere namaguta amanukato agotioka buya, ay'erigori rinene; akayiata echuba y'ogotioka, akamonyororokeria omotwe oye. 4 Mbarenge abanto bagechetigwe as'emioyo yabo, bakabora, Naseki gosiria amaguta engecho buna eye? 5 Ekiagera amaguta aya anga nagorwa chidinari chimia isato nakobua, baegwe abataka, Bakamwemurunganeria omokungu oria mono. 6 Yesu agateba, Motige; naseki mokomorosia? onkoreire emeremo emiya. 7 Ekiagera amatuko onsi iga more nabataka amo nainwe, nakera eki mwanchete kobakorera namonyare kobakorera amaya; korende timori nainche amatuko onsi. 8 Okorire eki anyarete: ong'akire omobere amanukato as'engecho y'ogotindekwa kwane. 9 Nekeene, nabatebirie, ker'aase ekorandigwa enchili as'ense yonsi, neri akora oyo nariatorwe as'okoinyora kwaye. 10 Yudas Omoisikariota, nere noyomo bwa baria ikomi nababere, akagenda as'abakuani abanene, anyare komorua asebare. 11 Nabarabwo, bagachia koigwa bakagoka, bagatebania komoa chifetha. Akarigia enchera akomorwera as'ekero kegwenerete. 12 Goika rituko rie ritang'ani ri'emegati etari nememera, ekero gi'okonyenya epasaka, aborokigwa baye bakamotebia, Ng'ai origetie togende tokoroserie oriere epasaka? 13 Agatoma babere as'aborokigwa baye, akabatebia, Genda omochie namoumerane nomosacha obogoretie enyongo y'amache: motunyane; 14 naande onsi arasoe, motebie omonyene enyomba, Omworokia otebire, Ng'ai ere enyomba y'abageni, ndiere epasaka amo naborokigwa bane? 15 Nere omonyene naborokie enyomba enene y'igoro, yaroisigwe yabaire: agwo toroserie. 16 Aborokigwa bagasoka, bakagenda omochie, bakarora buna abatebetie: bakarosia epasaka. 17 Riachikoba mogoroba ogocha amo naikomi nababere. 18 Nabarabwo kobaikaransire as'endagera, bakoria, Yesu akabora, Nekeene nabatebirie, oyomo oino oyokoria amo nainche, nandwe. 19 Bagachaka goichana, bakamoboria oyomo oyomo, Ninche? 20 Akabatebia, Noyomo bw'aba ikomi nababere, ere oyogosoyia amo nainche as'esani. 21 Ekiagera Omwana-o-mwanyabanto nkogendare buna arikeretwe: korende obobe nobwaye omonto oria, Omwana-o-mwanyabanto arurwe nere! mbuya asare nonya ataiboretwe omonto oria. 22 Nabarabwo bakaba nkoriabare, akabogoria omogati, kayosesenirie, akayosamunyora, akabaa, akabora, Bogoria: oyo noro omobere one. 23 Akabogoria egekombe, kagesesenirie, akabaa: bagakenywera bonsi. 24 Akabatebia, Aya namanyinga ane, ay'emuma enyia, aitekire as'engecho y'abange. 25 Ekeene, nabatebirie, Tinkonywa naende nonya ng'ake okwalna Uw'emesabibu, goika rituko riria ndache konywa enyia as'obonda bwa Nyasaye. 26 Kobakorire ogotera, bagasoka kogenda egetunwa ki'Emezeituni. 27 Na Yesu akabatebia, Namogochwe imwensi, naki arigetwe, Nimoake omorisia, neching'ondi nachiserebekane. 28 Korende nyuma as'okoboka kwane, nimbatang'anere kogenda Gaiili. 29 Petero akamotebia, Neba nabagechigwe bonsi, korende tai inche. 30 Yesu akamotebia, Ekeene, nagotebirie aye rero, obotuko obo, ekero etuoni etaragweya ara kabere, nonkane ara gatato. 31 Nere akamenta gokwana mono, Ningwenera gokwa naye, tinkogokana nonya ng'ake, Na bonsi bagateba boigo. 32 Naende bagaika aase erieta riaye Gethisemane; akabatebia aborokigwa baye, Ikaransa aa, ekero ngosaba, 33 Akamoira Petero na Yakobo na Yohana amo nere, agachaka goichana nagwechanda mono. 34 Akabatebia, Omoyo one nore nobororo obonge, koreng'ana ogokwa: ikaransa aiga, morende. 35 Akagenderera ake, akagwa maumama, ogosaba, onye keranyarekane, ensa eye emoetere. 36 Agateba, Abba, Tata, onsi iga akonyarekana asore; onduserie egekombe eke: korende, tai buna ndigetie inche, korende buna origetie aye. 37 Akagenda, akabanyora bararire, akamotebia Petero, Simon, nkwararire? Tonyareti korenda ensa eyemo? 38 Renda, saba, timobaisa gosoa as'ogotemwa: omoyo nore nobwanchani, korende omobere tori nechinguru. 39 Akagenda naende, agasaba, agakwana amang'ana aria amatang'ani. 40 Naende, akagenda akabanyora bararire, ekiagera amaiso abo abaire amarito; gose tibamanya eri bakomoiraneria. 41 Agacha eria gatato, akabatebia, Rara bono gaki, timoka: aisanire; ensa yaikire; rora, Omwana-o-mwanyabanto obekirwe amaboko abanyene ebibe. 42 Imoka, togende: rora, ere oyo omondwa oikire. 43 Erio kegima, kagokwana, Yudas agaika, oyomo bwa baria ikomi nababere, amo nere omoganda bare nemioro nechinungu, bakorua as'abakuani abanene, nabariki, nabagaka. 44 Nere okomorua konye obaeire ekemanyererio, ogoteba, oyo nkonyunyunta, oyio nere, mobwate, moire buya. 45 Agachia gocha bwango akamochiera, akabora, Rabii; akamonyunyunta. 46 Erio bakamobwata, bakamoira. 47 Noyomo ase baria bateneine ang'e akang'usa omoro oye, akamoaka omosomba bw'omokuani omonene, akamobutora ogoto. 48 Yesu akairaneria, akabatebia, Inee, iga mwachire buna mokoimokera omoibi nemioro nechinungu, gocha kong'ira? 49 Iga narenge amatuko onsi amo nainwe ase hekalu ime kworokereria, ko timwambwata: korende aya, akorirwe amariko anyare goikerana. 50 Bonsi bakamotiga, bagatama. 51 Nomomura oyomo akamotunyana, bweboete egetambaa gi'egatani gioka; bakamobwata; 52 nere akagetiga keria egetambaa gi'egatani, agatama ore bosa. 53 Bakamoira Yesu as'omokuani omonene: bakamosangererekera bonsi, abakuani abanene nabagaka nabariki. 54 Petero akamotunyana korwa nyuma are, goika ime as'egora y'omokuani omonene; agaikaransa amo nabasomba, gwota omorero. 55 Abakuani abanene nab'ebarasa bonsi bakarigia birori igoro ase Yesu banyare komoita, tibarora. 56 Ekiagera abange bagateba as'oborimo, nokorora kwabo tikwabwatana. 57 Goika abanto bagatenena bakamobekera oborimo, bakabora, 58 Ntwamoigwete ogoteba, Inche nintagore hekalu eye eyakoregete as'amaboko, nas'amatuko atato ning'agache eyeride eyetakoregeti as'amboko. 59 Nonya iga oborori bwabo tibwarenge boronge. 60 Omokuani omonene agatenena gati gati, akamoboria Yesu, okobora, Tokoiraneria 'ng'ana? Inki aba bakogosoera? 61 Korende agakira, tairaneria 'ng'ana. Omokuani omonene akamoboria naende, akamotebia, Aye naye Kristo, Omwana bw'Omosesenigwa? 62 Yesu agateba, ee Ninche ere: nainwe namomorore Omwana-o-mwanyabanto oikaransete okoboko gw'okorio gwe chinguru, ogocha namare a igoro. 63 Omokuani omonene agatandora chianga chiaye, akabora, Ninki torigererie abarori bande? 64 Mwaigure okorama kwaye: naki moroche? Bonsi bakamonachera ekina ng'a nagwenerete gokwa. 65 Abande bagachaka komotwera amate, nakomomumekeria obosio, nakomoaka chinkundi, nakomotebia, Kora obobani: abasomba bakamoaka chindoe. 66 Na Petero igarenge egora inse, agacha omosomba oyomo bw'abaiseke b'omokuani omonene; 67 akamorora Petero ogwota omorero, akamorigereria, agateba, Aye naye nkwarenge amo noria Omonazereri, Yesu. 68 Agakana akabora, Timomanyeti, nonya tinyigweti eki ogokwana: agasoka 'gesieri; etuoni ekagweya. 69 Noria omoiseke akamorora naende, agachaka kobatebia abateneine ang'e, Oyo noyomo obo. 70 Agakana naende. Egeka egeke naende baria bateneine ang'e bakamotebia Petero, Ekeene igore oyomo obo; ekiagera igore omonto o Galili. 71 Agachaka koragereria nagotiana, Timomanyeti omonto oyio mogoteba. 72 Erio etuoni ekagweya eria kabere. Petero akarinyora ring'ana riria atebetigwe na Yesu, ng'a ritang'ani etuoni etaragweya ara kabere, nonkane ara gatato. Agachia korirengereria, akarera.
1 Erio kobwachia koba mambia abakuani abanene bagakora ekina amo nabagaka nabariki, ne ritongo rigima, bakamosiba Yesu, bakamobogoiia, bakamoira ase Pilato. 2 Pilato akamoboria, Aye naye omoruoti bw'Abayahudi? Akairaneria, akamotebia, Aye gwatebire. 3 Abakuani bakamosoera as'amang'ana amange. 4 Pilato akamoboria naende akabora, Tokoiraneria 'ng'ana? rora amang'ana narenga bagosoeire. 5 Korende Yesu tairaneria 'ng'ana naende; goika Pilato agakumia. 6 Nabo ase rituko rinene abasiborera omosibwa oyomo, oyobarigetie. 7 Narenge omonto ore korokwa Baraba, osibetwe amo nabanto abakorete eriomana, nagokora oboiti as'eriomana. 8 Emeganda ekaaka eriogi riabo, bagachaka gosaba buna anarete kobakorera. 9 Pilato akabairaneria, akabora, Morigetie mbasiborere omoruoti bw'Abayahudi? 10 Ekiagera amanyete ng'a abakuani abanene iga bamorure as'okogecha. 11 Abakuani abanene bakabagenka emeganda, erinde anche kobasiborera Baraba. 12 Pilato akairaneria naende akabatebia, Nimokore naki oyo mogoteba ng'a n'Omoruoti bw'Abayahudi? 13 Bakaaka eriogi naende, Mobambe. 14 Pilato akabatebia, Naki, mbobe ki akorete? Bakamenta mono koaka eriogi, Mobambe. 15 Pilato agancha kobakorera buya emeganda, akabasiborera Baraba, akamorua Yesu, ekero amoakire chinkini, abambwe, 16 Abasigari bakamoira as'enyomba ime, nero Praitorio, bagasangerereka amo omoganda omogima. 17 Bakamoboyia eanga embariri, bagatonga engata y'amagwa, bakamobekera 'motwe; 18 bagachaka komokwania, Mbuya ore, Omoruoti bw'Abayahudi! 19 Bakamoaka omotwe negetonto, bakamotwera amate, bakabeka amaru inse, bakamosasima. 20 Kobamochecheirie, bakamorusia eria eanga embariri, bakamoboyia chianga chiaye omonyene, Bakamoira isiko komobamba. 21 Bakamobetereria omonto orenge goeta, Simon Omokurene, okorua borabu, (ise Isikanderi na Rufo), abogorie omosalaba oye. 22 Bakamoreta aase akorokwa Gologotha, ogoonchora kwaye, Aase ekeore. 23 Bakamoa edivai ebekire manemane anywe: nere tabwata, 24 Bakamobamba, bagatanana chianga chiaye, bagachiakera obomera eki ker'omonto araire. 25 Ekaba chinsa isato, bakamobamba. 26 Namariko ay'ogosoerwa kwaye akarikwa igoro, Omoruoti Bw'Abayahudi. 27 Amo nere bakabambwa abaibi babere, oyomo okoboko kwaye gw'okorio noyomo okoboko kwaye gw'okobee. 28 Nabo ririko rigaikerana eriatebetwe, Obarirwe amo nabasaria. 29 Nabarabwo abare goeta bakamorama, bagotematema emetwe yabo, bagoteba, A! aye oyogotagora hekalu nakoyeagacha as'amatuko atato, 30 ekonye, ika korwa omosalaba. 31 Naboigo nabakuani abanene bakamosekereria barabwo ase barabwo, amo nabariki, bagateba, Nakonyete abande; omonyene takonyara gwekonya. 32 Tiga Kristo, omoruoti bw'Abaisraeli, aike bono korwa omosalaba tonyare korora nagwancha. Nabarabwo ababambetwe amo nere bakamwomania. 33 Ekero chinsa isano nemo chiaika, okaba omosunte igoro as'ense yonsi, goika chinsa kianda. 34 Nechinsa kianda Yesu akaaka egeturi as'eriogi rinene, Eloi, Eloi, lama sabakthani? ogoonchora kwaye, Nyasaye one, Nyasaye one naki ogontiga? 35 Nabande b'abwo abarenge ang'e kobaigwa bakabora, Rora, nkomorangeriare Elija. 36 Omonto akaminyoka bwango, akaimokia esifunji, akayeichoria nendorwe, akayebeka igoro as'egetonto, akamoa anywe, akabora, Tiga torore gose Elija ngochare komoikia. 37 Yesu akarusia eriogi rinene, agatwekamo. 38 Egetambaa gi'okonacha hekalu gegatandoka chinsemo ibere korwa igoro goika nse. 39 Nabo eria esagini, yateneine emorigereretie, egachia korora ng'a okure, akabora, Ekeene omonto oyo igarenge Omwana o Nyasaye. 40 Mbarengeo abakungu barigereretie korwa are: as'aba igarenge Mariamu Omomagidali, na Mariamu ng'ina Yakobo omoke noyo Yose, na Salome: 41 aba nabwo bamotunyanete ekero arenge Galili, nakomokorera; nabande abange abakungu batirete amo nere goika Yerusalemu. 42 Riachikoba mogoroba, ekiagera n'Okwerosia, nario rituko rire ritang'ani ri'esabato, 43 agacha Yusufu, omonto o Arimithea, oyorenge omuya, omonto bwe ritongo ri'ebina, nere omonyene iga aboganyete obonda bwa Nyasaye; agasoa noboremu as'obosio bwa Pilato akayosaba omobere o Yesu. 44 Pilato agakumia, ekiagera otiekire gokwa: akayerangeria eria esagini, akayeboria gose nkare akwete. 45 Goika agachia konyora boronge, akamoa Yusufu egetondo. 46 Akagora egetambaa gi'egatani, akamoikia, akamoboera keria egetambaa, akamobeka as'oboina bwabachetwe egetare ime; akabeka rigena as'egesieri ki'oboina. 47 Mariamu Omomagidali na Mariamu o Yose bakarigereria as'abekwa.
1 Goika esabato koyatiekire goeta, Mariamu Omomagidali na Mariamu o Yakobo na Salome, bakagora amaguta amanukato, banyare kogenda komoaka. 2 Goika mambia chuni, rituko rie ritang'ani ri'echuina, bakagenda oboina, erioba korikooroka. 3 Bagatebanta barabwo ase barabwo, ning'o oranyare gototigereria riria rigena korwa 'gesieri ki'oboina. 4 Goika bagachia korigereria bakarora ng'a riria rigena riatiekire gotigerigwa: narirorio iga riarenge rinene mono. 5 Bagosoa oboina ime bakarora omomura oikaransete ensemo y'okorio, bweboete eanga endabu; bagaichana. 6 Nere akabatebia, Timoichana: nkomorigiamore Yesu Omonazareti, oyobambetwe: obokire, tari aiga: rigereria aase bamobegete! 7 Korende genda, mobatchie aborokigwa baye na Petero, Ng'a obatang'aneire kogenda Galili: agwo nao moramorore, buna abatebetie. 8 Bakarua agwo, bagatama korwa as'oboina; ekiagera basoetwe nokoiguswa nogokumia: tibamotebetie 'monto 'ng'ana; ekiagera bairogete. 9 Kabokire Yesu mambia rituko rie ritang'ani ri'echuma akamoorokera ritang'ani Mariamu Omomagidali, ere oria arusetie ebirecha bitano nabibere. 10 Oyo akagenda akabatebia baria abarenge amo nere korwa kare, bare kweumia nakorera. 11 Nabarabwo, bachia koigwa ng'a moyo are, ororirwe nere, tibancha. 12 Nyuma as'aya akabaorokera abanto babere, ore nekieni kende, ekero barenge gotara enchera kogenda borabu. 13 Nabarabwo bakagenda bakabatebia amang'ana baria abande: tibabancha aba. 14 Naende akarorekana nabaria ikomi nomo ekero barenge koragera; akabomania as'ogotegena kwabo nobokong'u bw'emioyo yabo, ekiagera batabanchete abamoroche kabokire. 15 Akabatebia, Genda inwe as'ense yonsi, moyerandie enchili ase ker'egetongwa. 16 Oyoranche nakobatiswa nakonyeke; ko oyotancheti, nagambigwe. 17 Nebikone ebi nabibatunyane abwo banchire, as'erieta riane nabaserie ebirecha; nabakwane asechimemechinyia; 18 nababwate ching'iti, gose nabanywa egento gegoita, tigekobaita nonya ng'ake; nababeke amaboko abo igoro as'abarwaire, nabarabwo nabagwene. 19 Nabo Omonene, gakwanire nabarabwo, akabogorigwa gochia igoro, agaikaransa okoboko gw'okorio kwa Nyasaye. 20 Nabarabwo bakaimoka, bakarandia chinsemo chionsi, Omonene agakora emeremo amo nabarabwo, nakoriikerania ring'ana as'ebikone biatunyanete narirorio. Amina.
1 Ekiagera abanto abange babekire okoboko korika ebirage bi'amang'ana aria aikeranigwe egati yaito, 2 buna batotebetie baria barenge abarori korwa omochakano, nabasomba be ring'ana, 3 narorire buya nainche, konatiekire kwenyorera amang'ana onsi are boronge korwa omochako, gokorikera as'okoroberia, aye Theofilo bw'amasikani; 4 onyare komanya oboene bw'amang'ana aria kworogetigwe. 5 Narenge as'amatuko Herode, omoruoti bw'Abayahudi, omokuani oyomo erieta riaye Zakaria, oyo bw'ensemo ya Abiya: narenge nomokungu oyomo bw'abaiseke ba Haruni, erieta riaye Elizabeti. 6 Nabarabwo bonsi babere nabanyene oboronge as'obosio bwa Nyasaye, bakogenderera as'amachiko nchina bionsi bi'Omonene batari nekemoa. 7 Nabarabwo tibarenge nomwana, ekiagera Elizabeti igarenge omogomba, nabarabwo bonsi babere abagotu mono. 8 Nabo agachia koba gagokora emeremo y'obokuani as'ensemo yaye as'obosio bwa Nyasaye, 9 buna yarenge engecho y'omokuani; emeremo yaye yarenge gosamba ubani gasoire ase hekalu y'Omonene. 10 Nomogsnda bwonsi bw'abanto iga barenge gosaba isiko, ensa y'ogosamba ubani, 11 Akaorokerwa ne rilaika ri'Omonene, riteneine ensemo y'okoboko gw'okorio kw'amathabao y'ubani, 12 Zakaria agaichana gachia komorora, omoondoko okamobwata. 13 Riria rilaika rikamotebia, Toiroka, Zakaria, ekiagera ogosaba kwao kwaigurwe, na mokao Elizabeti nakoiborere omwana omoisia, nerieta riaye nomoroke Yohana. 14 Naye nobe nomogoko nogosasoka; nabanto abange nabagokere okoiborwa kwaye. 15 Ekiagera nabe omonene as'obosio bwa Nyasaye, takonywa edivai gose ogotinda; nere naichorwe n'Omoika Omochenu, nonya nkorwa enda ya ng'ina, 16 Nabange as'abana b'Isirael nabaonchore as'Omonene Nyasaye obo. 17 Nere natung'ane obosio bwaye as'omoyo nechinguru chi'Elija, koyeonchora emioyo y'abaise as'abana babo, nakobaonchora abamochi as'obong'aini bw'abanyene oboronge; komobekera ang'e Omonene abanto baroisigwe. 18 Zakaria akamotebia rilaika, Naki ndamanye ayio? ekiagera inche nomogotu, na mokane nomong'ina bw'amatuko amange. 19 Rilaika rikamoiraneria, rikamotebia, Inche Gabiriel, ogotenena obosio bwa Nyasaye; ninche natomwa nkwane naye, nagogotebia amang'ana aya amaya. 20 Rora, naye nobe rimama, tonyara gokwana goika rituko riria agocha kooroka ayio, ekiagera otancha amang'ana ane, nayio naikeranigwe ekero kiaye. 21 Nabaria abanto iga bamoganyete Zakaria, bagakumia as'ogotebana kwaye aroro hekalu ime. 22 Goika ekero achia gosoka, tanyara gokwana nabarabwo: bakamanya ng'a igarora okorora aria hekalu ime: nere igarenge koborokereria nokoboko, akanakoba rimama. 23 Ekaba amatuko ogokora kwaye agachia koera, akagenda 'nyomba mwaye. 24 Nyuma y'amatuko aria mokaye Elizabeti akaba morito; akebisa emetienyi etano, ogoteba, 25 Iga nabo ankorera Omonene amatuko aria andigereretie, konduseria obosoku bwane as'obosio bw'abanto. 26 Omotienyi bw'etano nomo rilaika Gabiriel rigatomwa na Nyasaye kogenda omochie o Galili, erieta riaye Nazareti, 27 as'omoiseke oriereirwe 'boko nomosacha, erieta riaye Yusufu, bw'enyomba ya Daudi, nerieta ri'oria omoiseke Mariamu. 28 Agacha asare akabora, Mbuya ore, oyokwaeirwe obuya, Omonene igare amo naye, 29 Nere agaichana mono ase ring'ana eri, akarotarotia omoyo oye ime, Oko ngokwania ki? 30 Rilaika rikamotebia, Toiroka, Mariamu; ekiagera kwanyorire obuya ase Nyasaye. 31 Rora, nobe morito, noibore omwana omoisia, nomoroke erieta riaye Yesu. 32 Oyio nabe omonene, narokwe Omwana oye Oyore Igoro: n'Omonene Nyasaye namoe ekerogo gia Daudi is'oye: 33 nayegambere enyomba ya Yakobo goika kare nakare; nonya noboruoti bwaye tibokoba nomoerio. 34 Mariamu agatchia rilaika, Naki rirabe ring'ana eri, ekiagera timomanyeti omosacha? 35 Rilaika rikairaneria rikamotebia, Omoika Omechenu nogochere, nechinguru chiaye Oyore Igoro nachikobekere ekiriri: as'ayio oyoraiborwe narokwe omochenu, Omwana o Nyasaye. 36 Na rora, Elizabeti eamate yao, nere boigo nare noboriio bw'omwana omoisia as'obogotu bwaye: nomotienyi oyo noyo bw'etano nomo asare ere oyorogetwe omogomba. 37 Ekiagera ring'ana tiriri ritanyarekane ase Nyasaye. 38 Mariamu akabora, Rora, inche nenyaroka y'Omonene; nabe asende buna ring'ana riao. Rilaika rikaimoka korwa asare. 39 Mariamu akaimoka amatuko ayio akagenda ebitunwa as'okoayerera, goika omochie oyomo o Yuda; 40 agasoa 'nyomba mwa Zakaria, akamokwania Elizabeti. 41 Ekaba Elizabeti agachia koigwa ogokwania kwa Mariamu, omwana omoke agatuma as'enda yaye ime; Elizabeti agaichorwa n'Omoika Omochenu; 42 akaaka eriogi riaye ase chinguru, agakwana, Gwasesenigwe aye as'abakungu, noroiboro rw'enda yao rwasesenigwe. 43 Ng'ai riarure ring'ana eri rianyorire, ng'ina Omonene one anchicheire inche? 44 Ekiagera rora, eriogi ri'ogokwania kwao riachia gosoa amato ane, omwana omoke otuma as'omosasoko as'enda yane ime. 45 Nare negesio oyobwanchire, ekiagera as'amang'ana ayio atebigwe n'Omonene naikeranigwe. 46 Mariamu agateba, Omoyo one omotogirie Omonene, 47 Enkoro yane yamogokeire Nyasaye Omokonyi one. 48 Ekiagera oborigereirie obwororo bw'enyaroka yaye: Ekiagera ekeene, korwa rero ebigori bionsi nabindoke omosesenigwa. 49 Ekiagera ere oyore nechinguru onkoreire amanene; Nerieta riaye nerichenu. 50 Namabera aye korwa ebigori goika ebigori As'abwo bamosigete. 51 Okorire chinguru as'okoboko kwaye, Obaserebanirie abaenenu a 'ebirengererio bi'emioyo yabo. 52 Obaikirie abanene korwa asebirogo biabo, Obaimokirie abataka. 53 Abanyene enchara obaigotirie amaya; Abanyene enibo obaseririe amaboko amasa. 54 As'okoinyora amabera Omokonyire Isirael omosomba oye. 55 (Buna abatebetie abatata baito) As'Ibrahimu noroiboro rwaye, goika kare nakare. 56 Mariamu agaikaransa nere egeka ki'emetienyi etato, akairana 'nyomba mwaye. 57 Goika Elizabeti agaikeranigwa ekero kiaye gfekoibora; akaibora omwana omoisia. 58 Bakaigwa abatureti baye neamate yaye ng'a Omonene omomenteire amabera aye; bakagoka amo nere. 59 Ekaba rituko ri'atano natato, bagacha komosaia omwana; bakarigia komoa erieta ria ise, Zakaria. 60 Ng'ina, akairaneria akabora, Taibo; korende narokwe Yohana. 61 Bakamotebia, Tari nonya noyomo as'eamate yao okorokwa erieta erio. 62 Bakamworokia ise as'ebimanyererio, komoboria buna arigetie arokwe, 63 Akarigia ebao y'okorika, akarika, akabora, Erieta riaye Yohana. Bagakumia bonsi. 64 Erio kegima agasiborwa omonwa noromeme rwaye, agakwana, okomosesenia Nyasaye. 65 Okoiroka gogasoa ase bonsi abaikaransete ang'e nabarabwo: agasarera amang'ana aya onsi as'ebitunwa bia Boyahudi. 66 Na bonsi abaigwete bakayabeka emioyo yabo ime, bakabora, 'Mwana ki rende orabe oyo? Ekiagera okoboko kw'Omonene kwarenge amo nere. 67 Zakaria ise agaichorwa n'Omoika Omochenu, akagana, okobora, 68 Abakwe Omonene, Nyasaye bw'Isirael; Ekiagera obacheire abanto baye nakobaboria. 69 Naende otoimokeirie ogotoreka gwe chinguru As'enyomba ya Daudi omosomba oye. 70 (Buna atebete as'emenwa y'ababani baye abachenu korwa omochakano), 71 Tokonywe nababisa baito, nas'amaboko abo bonsi abatogechete; 72 Erinde abakorere amabera abatata baito, Nakoinyora emuma yaye enchenu; 73 Eira amorierete Ibrahimu tata oito, 74 Ng'a natoe intwe, gotorakonyeke namaboko ababisa baito Tomosasime totari nokoiroka, 75 As'obochenu nas'oboronge as'obosio bwaye amatuko aito onsi. 76 Ee, naye, Omwana, norokwe omobani oye Oyore Igoro: Ekiagera notang'ane as'obosio bwaye Omonene oroisie chinchera chiaye; 77 Obae abanto baye ogotoreka, Birusigwe ebibe biabo, 78 As'amabera aye Nyasaye oito, As'ayio amasase a igoro natochere, 79 Ababarere abaikaransete as'omosunte nekiriri ki'amakweri; Nakoraa amagoro aito as'enchera y'omorembe. 80 Oria omwana agakina akamenteka chinguru as'omoyo, akabao ase chiroro ime goika rituko ri'okooroka kwaye as'Isiraeli.
1 Agachia koba as'amatuko aria, ogochika gokarua ase Kaisari Augusto, ng'a ense yonsi erikwe. 2 Okorikwa oko nakwo kwe ritang'ani kwarigetwe ekero Kurenio arenge gavuna o Sham. 3 Abanto bonsi bakagenda korikwa, ker'omonto as'omochie oye. 4 Na Yusufu nere akaimoka korwa Galili korwa as'omochie o Nazareti, agatira kogenda Boyahudi goika omochie o Daudi, okorokwa Bethilehemu, ekiagera igarenge oyo bw'enyomba neamate ya Daudi, 5 erinde arikwe amo na Mariamu, ekiagera onyuomirwe nere, nere igarenge 'morito. 6 Agachia koba as'ogoikaransa kwabo aroro, amatuko aye agaika ay'okoibora, 7 Akamoibora omwana oye omoisia omotangi; akamobeka chianga chi'obwana, akamwareria as'obweri, ekiagera batanyorete ribaga as'enyomba y'abageni. 8 As'ense eyio mbarengeo abarisia baikaransete ebitii, nakorenda botuko riicho riabo. 9 Rilaika ri'Omonene rikabaorokera, obonene bw'Omonene bokababarera: bagasogwa nomoondoko omonge. 10 Rilaika rikabatebia', Timoiroka; ekiagera nabareteire inwe amang'ana amaya ay'omogoko omonene, orabe as'abanto bonsi: 11 ekiagera rero as'omochie o Daudi oiboirwe Omokonyi as'engecho yaino, nere Kristo Omonene. 12 Neke nekemanyererio asemore; Namomonyore omwana obekirwe chianga chi'obwana; bwareirie obweri. 13 Erio bwango barengeo amo na riria rilaika, emeganda y'abanto b'igoro, bakomobaka Nyasaye, bakobora, 14 Obonene ase Nyasaye oyore igoro mono, Nas'ense omorembe, as'abanto abagweneirwe pere. 15 Agachia koba, amalaika achia koimoka kobatiga kogenda igoro, baria abarisia bagatebania, Gaki togende goika Bethilehemu, torore ring'ana eri riakorekire, eri Omonene atotebirie. 16 Bakagenda bwango as'omoayerevo, bakamonyora Mariamu na Yusufu, nomwana bwareirie obweri ime. 17 Bagachia korora, bakaorokia amang'ana ering'ana batebetigwe, ri'oyio omwana. 18 Bonsi abaigwete bagakumia as'aria batebetigwe nabarisia. 19 Korende Mariamu akayagacha amang'ana aya onsi akayarengereria omoyo oye ime. 20 Abarisia bakairana, bakomotogia Nyasaye nakomobaka as'amang'ana onsi baigwete, nayabaroche, buna batebetigwe. 21 Agachia goika amatuko atano natato ayokomosara, akarokwa erieta riaye Yesu, riria riatoretwe ne rilaika ritang'ani atarabogorigwa oborito. 22 Naro amatuko ayogwesibia kwabo agachia goika, as'amachiko a Musa, bakamorfeta Yerusalemu, bamomoe Omonene 23 (buna arigetwe as'amachiko Omonene, ker'omoisia omotangi okoigora enda ya ng'ina narokwe omochenu as'Omonene), 24 nas'okorua esadaka buna yaboretwe as'amachiko Omonene, Amaruma abere, gose amage aya amaruma abere. 25 Nabo narengeo omonto ase Yerusalemu, erieta riaye Simion; noyio nomonto omonyene oboronge, omoronge, oganyete ogosemeria kwTsiraeli: n'Omoika Omochenu, igorenge igoro asare. 26 Nere iga aorokeretigwe n'Omoika Omochenu, ng'a takorora amakweri ataramorora Kristo bw'Omonene. 27 Nabo agacha hekalu ime as'Omoika: nekero abamoibori baye bachia komoreta omwana Yesu, bamokorere as'engecho y'amachiko, 28 erio ere akamobwata as'amaboko aye, akamotogia Nyasaye, akabora, 29 Bono Omonene otige omosomba oo agende as'omorembe, Buna gwatebete; 30 Ekiagera amaiso ane arorire ogotoreka kwao, 31 Oko kwabekire as'amasio abanto bonsi; 32 Omobaso okomoreka ebisaku, Nobonene bw'abanto bao Isiraeli. 33 Yusufu na ng'ina bakaba bagokumia as'aria akwanwa igoro asare; 34 Simeon akabasesenia, akamotebia Mariamu ng'ina, Ekeene oyo obekirwe as'okogwa, nogotenena as'abange asTsiraeli; abe ekiorokererio giatebetwe; 35 ee, omoro nokobete omoyo oo; erinde bioroke ebirengererio bi'emioyo emenge. 36 Narenge oyomo Anna, omobani omokungu, enyaroka ya Fanueli, bw'egesaku ki'Asheri; (nere nomong'ina bw'amatuko amange, obete nomosacha emiaka etano nebere nyuma as'okoera kw'oboiseke bwaye, 37 nere omoboraka bw'emiaka emerongo etano netato nene), atanakorua ase hekalu ime, as'okweng'ata nogosaba nogosasima obotuko nomobaso. 38 Akaoroka nere ensa eria, akamotogia Nyasaye, akabatebia amang'ana aye abanto bonsi barenge baganyete okoborigwa kwa Yerusalemu. 39 Nabarabwo bagachia go kora koyaikerania onsi ayareo as'amachiko Omonene, Dakairana Galili goika omochie obo Nazareti. 40 Omwana oria agakina, akamenteka chinguru, agaichorwa nechisemi; nobuya bwa Nyasaye bokaba amo nere. 41 Nabo abamoibori baye barenge kogenda ker'omwaka ase Yerusalemu ase rituko rinene ri'epasaka. 42 Goika agachia koba nemiaka ikomi nebere, bagatira kogenda Yerusalemu, buna yarenge engecho ye rituko rinene; 43 naende bachia goikerania amatuko, ekero barenge koirana, oria omwana Yesu agatigara nyuma Yerusalemu; nabamoibori tibamanya; 44 bagakaga igare as'omoganda obo, bakagenda orogendo rw'omobaso oyomo; bakamorigia as'eamate yabo naende abwo rimanyaine: 45 ekero batamonyorete, bakairana Yerusalemu, bakomorigia. 46 Agachia koba nyuma as'amatuko atato, bakamonyora hekalu ime, oikaransete gati as'aborokia, okobaigwa, nakobaboria amaboria: 47 bonsi abamoigwete bagakumia as'obong'aini bwaye nokoiraneria kwaye. 48 Nabarabwo bagachia komorora bagaichana mono: ng'ina akamotebia, Omwana one, naki gwatokora iga? rora, iso nainche twarenge gokorigia nomoichano. 49 Akabatebia, Naki mokondigia? Timomanyeti ng'a nengwenerete koba as'enyomba ya Tata one? 50 Tibamanya ring'ana riria abatebia, 51 Agatirimboka amo nabarabwo, agaika Nazareti, akaba nkobaigwerare: ng'ina akayagacha amang'ana aya onsi omoyo oye ime. 52 Yesu akamenta kogenderera as'obong'aini, nas'omobere, nobuya ase Nyasaye nas'abanto.
1 As'omwaka o ikomi netano y'okogamba kwaye Kaisari Tiberio, Pontio Pilato narenge gavuna o Boyahudi, na Herode omoruoti o Galili, na Filipo momura omwabo omoruoti o Iturea nense ya Tarakoniti, na Lusania omoruoti o Abilene, 2 ekero ki'obokuani obonene bw'Anna na Kaifa, ring'ana ria Nyasaye rikamoikera Yohana omwana o Zakaria, as'eroro. 3 Akagenda chinse chionsi chi'ensemo ya Yorodani, okorandia ebatiso y'ogoonchoka gokoreta okorusia kw'ebibe, 4 buna yarigetwe as'ebuku y'amang'ana ay'omobani Isaya, Eriogi ri'oyokoaka egeturi eroro ime, Yerosie enchera y'Omonene, Rosia ogoeta kwaye, 5 Ker'erigoko narichorigwe, Na ker'egetunwa, nekegoro nabikeigwe; Aare bogeka narongeigwe, Nenchera ere ebitunwatunwa nebe enterere; 6 Na bonsi abanyene omobere nababorore obuya bwa Nyasaye. 7 Nabo akayetebia emeganda yachete erinde ebatiswe nere, Inwe oroiboro rwe ching'iti, ning'o obakureire gotama endamwamu egocha gocha? 8 Gaki ama amatunda agwenerete ogoonchoka, gose timochaka kobora emioyo yaino ime, Ntore na tata oito nere Ibrahimu: ekiagera nabatebirie, ng'a Nyasaye as'amagena aya nanyare koyatenenia koba abana ba Ibrahimu. 9 Bono egesire kiabekirwe as'emeri y'emete: nabo ker'omote otameti amatunda amaya onachwa otugutwa as'omorero. 10 Nabarabwo emeganda bakamoboria, bakabora, Tokore ki, rende? 11 Akairaneria akabatebia, Oyore ne chiganchwa ibere amoe ere oyotari nero; noyore nendagera, akore boigo. 12 Bagacha abakorusia ebango erinde babatiswe, bakamotebia, Omworokia, inki torakore? 13 Akabatebia, Timorusia kobua biria mwachigetwe. 14 Abasigari nabarabwo bakamoboria bakabora, naintwe inki torakore? Akabatebia, Timomokorera 'monto onde bwonsi oboenenu, gose timorusia egento getari ekia boronge; naende eng'eria yaino ebaisane. 15 Nabo baria abanto bagachia koba as'okorigereria, bakarengereria bonsi amang'ana a Yohana, ng'a gose nere Kristo, 16 Yohana akairaneria, akabatebia bonsi, Inche iga nkobabatisa as'amache; korende ngochare oyore nechinguru kombua inche, tingwenereti gochisibora chinuga chi'ebikoroto biaye; ere nabatise as'Omoika Omochenu nas'omorero. 17 Oroteru rwaye iga rore okoboko kwaye, nere nagesibie mono ekeoreri kiaye, nasangererie engano yaye kiage kiaye; korende nayasambe amatete as'omorero otakorimeka. 18 Nabo as'ogosorora okonge akabaranderia abanto amang'ana amaya; 19 korende Herode teteraka, agakanigwa nere as'engecho ya Herodia, omokungu o Filipo, momura omwabo, nas'engecho y'amabe onsi Herode akorete, 20 akamenta neri igoro as'onsi akamosiba Yohana echela. 21 Agachia koba abanto bonsi kobabatiswa, Yesu, nere gatiekire kobatiswa, kagosaba, igoro akamanoka. 22 Omoika Omochenu ogaika igoro asare as'omogwekano bwe riruma, eriogi rikarua igoro, Aye naye omwana one, omwanchi one; naye kwangweneire. 23 Nere Yesu omonyene ekero achagete kworokereria, emiaka yaye iga yarenge emerongo etato, agakagwa ng'a nomwana o Yusufu, o Eli, 24 o Mathati, o Lawi, o Meliki, o Yanna, o Yusufu, 25 o Matathia, o Amos, o Nahum, o Esili, o Nagai, 26 o Maathi, o Matathia, o Semei, o Yosef, o Yuda, 27 o Yohana, o Resa, o Zorobabel, o Salathieli, o Neri, 28 o Meliki, o Addi, o Kosani, o Elimadamu, o Eri, 29 o Yesua, o Eliazeru, o Yorimu, o Mathati, o Lawi, 30 o Sumeoni, o Yuda, o Yusufu, o Yona, o Eliakimu, 31 o Melea, o Mainani, o Mattatha, o Nathani, o Daudi, 32 o Yese, o Obedi, o Boazu, o Salamoni, o Nahasoni, 33 o Aminadabu, o Aramu, o Esiromu, o Fares, o Yuda, 34 o Yakobo, o Isaaka, o Ibrahimu, o Tera, o Nahori, 35 o Saruhu, o Ragau, o Felegi, o Eberi, o Sala, 36 o Kainani, o Arifakisadi, o Semi, o Nuhu, o Lameki, 37 o Methusela, o Enoku, o Yaredi, o Maleleeli, o Kainani, 38 o Enosu, o Sethu, o Adamu, o Nyasaye.
1 Na Yesu agaichorwa n'Omoika Omochenu, akairana korwa Yorodani, agatang'anwa n'Omoika kogenda eroro ime, 2 agatemwa na saitani ekero ki'amatuko emerongo ene. Namatuko aria tariete 'gento: goika agachia goikerana, akaigwa enchara. 3 Saitani akamotebia, Onye naye Omwana o Nyasaye ritebie rigena eri ribe omogati, 4 Yesu akamoiraneria, Nerikire, Omonto takoba moyo as'omogati bwoka, 5 Saitani akamoimokereria igoro, akamworokia amanda onsi ay'ense as'egeka ekemo. 6 Saitani akamotebia, Ninkoe obonene obo bwonsi, nobonguru bwaye; ekiagera bwaeirwe inche; ninche iga ndamoe oyo ndigetie. 7 Nabo aye korasasime as'obosio bwane, bionsi nabibe ebiao. 8 Yesu akamoiraneria akamotebia, Nerikire, Mosasime Omonene Nyasaye oo, omokorere ere bweka. 9 Nere akamotang'ana goika Yerusalemu, akamotenenia igoro as'egesuri gie hekalu egetambe mono, akamotebia, Onye naye Omwana o Nyasaye, etugute gochia inse korwa agwo: 10 Naki narikire, Ere nabachike amalaika aye bakorende, 11 Naende, Nabakoimokie as'amaboko abo, Tobaisa kogochwa okogoro kwao ne rigena. 12 Yesu akamoiraneria, akamotebia, Netebire, Tomotema Omonene Nyasaye oo. 13 Goika ochia gokora ogotemwa kwaye gwonsi, saitani, akaimoka korwa asare akamotiga as'ekero. 14 Yesu akairann ase chinguru chi'Omoika goika Galili: chinkuma chiaye chikagenda ense yonsi chinsemo ne chinsemo. 15 Nere akorokereria ase chisunagogi chiabo, ogotogigwa nabanto bonsi. 16 Akagenda Nazareti. aria arereretwe: goika ase riiuko ri'esabato agasoa as'esunagogi yabo buna engecho yaye yarenge, agatenena gosoma. 17 Akaegwa ebuku y'omobani Isaya. Nabo akamanora ebuku eyio, akarora aas'arikire, 18 Omoika bw'Omonene igore igoro yane, Ekiagera ombekeire amaguta kobaranderia aba aka amang'ana amaya: Ontomire kobakonya abasarigwe emioyo, na kobarat deria abasibwa ogosiborwa, Nemeuko enyare korora naende, Kobasibora abasionoretwe. 19 Korandia omwaka bw'Omonene bwancheretwe. 20 Akayemumekeria ebuku, akamoa omokori, agaikaransa: abanto bonsi abarenge as'esunagogi bakamorigereria namaiso. 21 Agachaka kobatchia, Rero okorika oko gwaikeranire asa'amato aino. 22 Bakantobera kirori, bakayakumia amang'ana ay'obuya aruete as'emonwa oye: bakabora, Oyo tari ere omwana o Yusufu? 23 Akabatebia, Gose namontebie omoreng'anio oyo, Omogwenia, ekonye aye omonyene: amang'ina onsi twaigure akorekire Kaperinaum, yakore aiga as'ense yao. 24 Akabatebia, Ekeene nabatebirie, Omobani onde ari oranyare gwancherwa as'ense yaye omonyene. 25 Korende as'ekeene nabatebirie, mbarenge nababoraka abange ase Isiraeli as'amatuko Elija, ekero amare asiegetwe emiaka elato nemetienyi etano nomo, ekero enchara enene yasoete as'ense yonsi; 26 tatometwe Elija as'oyomo obo, tatiga Sarepata, as'ense ya Sidon, as'omokungu oyorenge omoboraka. 27 Naende iga barenge abange abanyene ukoma as'Isirael as'ekero ki'omobani Elisha; onde tari osibegete tatiga Naamani, omoato o Sham. 28 Bagaichorwa nendamwamu bonsi as'esunagogi kobachia koyaigwa aya; 29 bakaimoka bakamosokia isiko as'omochie, bakamoira goika egemi y'egetunwa keria kiagachetwe omochie obo, banyare komoturunkania. 30 Korende ere agaeta egati gati yabo akagenda. 31 Agaikera Kaperinaum, omochie o Galili. Akaba nkworokereriare rituko ri'esabato: 32 bagakumia mono as'okworokereria kwaye, ekiagera ring'ana riaye riare nokobua. 33 Naende narenge omonto as'esunagogi yabo omonyene omoika bw'ekerecha ki'eubi; akaaka eriogi ase chinguru, akabora, 34 A! nki tore naye Yesu o Nazareti? gwachire gotosiria? Nakomanyire aye, n'Omochenu o Nyasaye, 35 Yesu akamokania, okobora, sieka omonwa, omosoke. Keria ekerecha gekamoiyeria gati gati, gekamorua, tikiamokorera 'gento. 36 Ogokumia gokabwata bonsi, bagatebania barabwo ase barabwo, bakabora, Ing'ana ki eri, ekiagera ase chinguru nokobua akobichika ebirecha bi'eubi, nabirobio biasoka? 37 Amang'ana aye agasarera as'ense yonsi chinsemo nechinsemo. 38 Akaimoka korwa esunagogi, agasoa as'enyomba ya Simon. Nabo ng'ina biara Simon igarenge konya obwatirwe noborwaire bw'esosera; bakamosaba as'engecho yaye. 39 Agatenena ang'e nere akayekania eria esosera; ekamotiga: bwango akaimoka akabakorera. 40 Goika erioba rigachia kogwa abanto bonsi abarenge abanyene oborwaire bare namarwaire ao ao bakabareta asare; nere akabeka amaboko aye igoro ase ker'oyomo, akabagwenia. 41 Ebirecha bikabasoka abange, bikaaka eriogi, bikobora, Aye naye Omwana o Nyasaye. Akabikania tabitiga bikwane, ekiagera biamanyete ng'a nere Kristo. 42 Goika ekaba mobaso, agasoka akagenda aas'atari nabanto: emeganda ekamorigiarigia, bakamoikera, bakarigia komotanga taimoka korwa asebare. 43 Akabatebia, Nengwenerete korandia amang'ana amayaay'obonda bwa Nyasaye as'emechie ende nero: ekiagera as'ayio natometwe. 44 Akabaranderia ase chisunagogi chia Galili.
1 Agachia koba nkomigware noria omoganda erinde baigwe ring'ana ria Nyasaye, igarenge gotenena as'enyancha ya Gene' sareti; 2 akarora amato abere ateneine ensemo y'enyancha: nabarubi basokire korwa aroro, ngosibiabare ebionga biabo. 3 Akarina obwato obomo bw'ayio, obwarenge bwa Simion, akamorigia abotigerie are ake nengegu. Agaikaransa, akorokereria emeganda korwa as'obwato. 4 Goika agachia gokora ogokwana kwaye, akamotebia Simion, Sukia goika endiba, moikie ebionga biaino as'okoruba. 5 Simion akamoiraneria akamotebia, Omonene, nabo twakorire emeremo obotuko bwonsi titonyoreti gento: korende ase ring'ana riao natobiikie ebionga. 6 Bagachia gokora iga, bagasangereria chinswe chinyinge mono; ebionga biabo bigachaka gotandoka; 7 bakabasima abagisangio babo barenge as'obwato bwa kabere, bache kobakonya. Bagacha, bakayaichoria amato onsi abere, goika agachaka korimera. 8 Korende Simion Petero, agachia koyarora aya, akagwa as'amaru a Yesu, akabora, Karue asende; ekiagera inche nomonto omonyene ebibe, Omonene. 9 Ekiagera konya oichanire, ere nabonsi abarenge amo nere as'oborubi bwe chinswe barubete; 10 nabo Yakobo na Yohana abana ba Zebedi, igabarenge ababwatani na Simion. Yesu akamotebia Simion, Toiroka; korwa bono nobe omorubi bw'abanto, 11 Naende bachia koreta amato abo gochia engegu, bakabitiga bionsi, bakamotunyana. 12 Agachia koba, ekero arenge as'omochie oyomo obo; rora, narenge omonto omosacha oichire n'ukoma; nere agachia komorora Yesu, akagwa maumama, akamosorora, ogoteba, Omonene, korigetie nonyare gonsibia, 13 Akarambora okoboko kwaye, akamokuna, akamotebia, Nindigetie; sibeka. Erio ukoma bokamorua. 14 Akamochika, tomotebia omonto; korende genda enchera yao, bweorokie as'omokuani, omobere oo, orue ogosibeka kwao buna Musa achigete, ebe ekiorokererio asebare. 15 Korende chinkuma chiaye chikamenteka gokuma: bagasangererekana emeganda emenge gocha komoigwa, nakogwenigwa namarwaire abo. 16 Nere akerusanania akagenda chiroro, agasaba. 17 Agachia koba rituko erimo ri'amatuko aria ekero arenge kworokia; Abafarisai naborokia b'amachiko barenge aroro baikaransete, iga baruete korwa ker'omochie o Galili na Boyahudi, na Yerusalemu: nokobua kw'Omonene iga kwarenge amo nere anyare kobagwenia. 18 Na rigereria, abanto mbabogoretie omonto noborere omonyene okoiguswa: bakarigia komoira ime nakomobeka as'obosio bwaye. 19 Ekiagera batanyorete ribaga riokomoira ime ekiagera as'oria omoganda bw'abanto, bakarina igoro as'ekerama ki'enyomba, bakamoikia korwa kerama noborere bwaye goika gati gati as'obosio bwaye Yesu. 20 Agachia korora okwegena kwabo, akamotebia, Aye omonto, ebibe biao biabeirwe. 21 Baria abariki n'Abafarisai bagachaka korengereria, bakabora, Ning'o oyo ogokwana okorama? Ning'o oranyare kwabera ebibe, tatiga oyomo, nere Nyasaye? 22 Yesu akamanya okorengereria kwabo, akairaneria akabatebia, Naki mokorengereria as'emioyo yaino? 23 Ndiriri eriango, goteba, Ebibe biao biabeirwe; gose goteba, Imoka, ogende? 24 Korende monyare komanya ng'a Omwana-o-mwanyabanto nare nechinguru as'ense kwabera ebibe (akamotebia oria omonyene okoiguswa), Nagotchirie, Imoka, bwetweka oborere bwao ogende mwao. 25 Erio kegima agatenena as'obosio bwabo, agetweka boria are korarera, akagenda as'enyomba yaye, ogotogia Nyasaye. 26 Ogokumia gokababwata bonsi, bakamotogia Nyasaye; bagaichorwa nokoiroka, bakabora, Twarorire amakumia rero. 27 Nyuma as'aya akaimoka, akarora omobangi ebango, erieta riaye Lawi, oikaransete aase bakobangera ebango, akamotebia, Ntunyana. 28 Agatiga bionsi akaimoka akamotunyana. 29 Nere Lawi akamokorera endagera enene 'nyomba mwaye: naende mbarenge nomoganda bw'abakorusia ebango, nabanto bande barengeo baikaransete amo nabarabwo as'endagera. 30 Abafarisai nabariki babo bakabemurunganeria aborokigwa baye, bakobora, Naseki mokoria nakonywa amo nabakorusia ebango nabanyene ebibe? 31 Yesu akairaneria, akabarebia, Abare abagima tibarigeri omogwenia, tatiga abare noborwaire. 32 Tincheti kobarangeria ababoronge korende abanyene ebibe as'ogoonchoka. 33 Barabwo bakamotebia, nasek aborokigwa ba Yohana bakweng'ata ebiro ebinge nagosaba; naborokigwa b'Abafarisai nabo bagokora; korende abao iga bakoria nakonywa? 34 Yesu akabatebia, Inee! namonyare kobang'atia abana b'enyangi ekero Omonene bw'enyangi are amo nabarabwo? 35 Korende amatuko nache; barache kourwa Omonene bw'enyangi, erio nario barache kweng'ata amatuko aria. 36 Akabatebia omoreng'anio; Onde tari ogotandora ekeraka ki'eanga enyia nagokebeka as'eanga engotu: gose nayetandore nakeria ekeyia, nakeria ekeraka ki'eanga enyia tikeri kobwatana neanga eria engotu. 37 Gose omonto tari okobeka edivai enyia ase chichuba chingotu; gose eria edivai enyia nechiate chiria chichuba, edivai enyene eiteke, chichuba chisire. 38 Korende edivai enyia negwenerete ebekwe ase chichuba chinyia. 39 Gose omonto tari onyure edivai ya kare, naende bwango arigie edivai enyia: ekiagera iga agotcha, Eria yakare nengiya kobua.
1 Ekaba rituko ri'esabato ngoeta arenge emegondo y'engano; aborokigwa baye bakabutora ebigara, bakabiria, bakobibunga namaboko abo. 2 Nabo abande as'Abafarisai bakabatebia, Naki mogokora eritari boronge ase rituko ri'esabato? 3 Yesu akairaneria, akabatebia, Nonya nering'ana eri timwanyakorisoma, eriakorete Daudi, ekero arenge nenchara, ere, nabarenge amo nere; 4 buna asoete as'enyomba ya Nyasaye, akayebogoria emegati eyokworokereria, akayeria, akabaa abwo abarenge amo nere; etari yaboronge ekoregwa tatiga abakuani boka abanyene? 5 Akabatebia ng'a Omwana-o-mwanyabanto nere omonene bw'esabato. 6 Ekaba esabato ende agasoa as'esunagogi, akorokereria: narenge omonto agwo, okoboko kwaye gw'okorio kuomete. 7 Abafarisai nabariki bakamotega korora gose nagwenie ase rituko ri'esabato; banyare komosoera. 8 Korende ere akamanya ebirengererio biabo; akamotebia oria omonto omonyene okoboko kuomete, Imoka, otenene gati gati. Akaimoka, agatenena. 9 Yesu akabatebia, Nimbaborie ring'ana erimo, Mboronge rituko ri'esabato gokora amaya gose gokora amabe? gokonya obogima, gose goita? 10 Akabarigereria namaiso bonsi chinsemo chionsi, akamotebia oria omonto, Rambora okoboko kwao. Agakora bo: okoboko kwaye gokagwena. 11 Nabarabwo bagaichorwa nokobea; bagatebania barabwo ase barabwo, buna bakomokora Yesu. 12 Agachia koba as'amatuko aria, akaimoka akagenda as'egetunwa gosaba; akabao obotuko bwonsi, okomosaba Nyasaye. 13 Bogachia gokia mambia akabarangeria aborokigwa baye: akabachora abanto ikomi nababere korwa asebare, as'abwo nabwo arogete abatomwa. 14 Simion nere aete erieta riakabere Petero, n'Anderea, momura omwabo; Yakobo na Yohana, Filipo na Baritholomayo. 15 Na Mathayo na Tomasi, Yakobo bw'Alufayo, na Simion ore korokwa Zelote, 16 Yuda o Yakobo: na Yuda Omoisikariota, nere oyomoruete: 17 agatirimboka amo nabarabwo, agatenena aas'ateremu, amo nomoganda bw'aborokigwa baye, nomoganda bw'abanto baruete Boyahudi onsi, na Yerusalemu, nengegu ya Turo na Sidoni, bagacha bakomoigwa na kogwenigwa amarwaire abo; 18 nabarabwo abachandirwe nebirecha bi'eubi bakagwenigwa. 19 Emeganda yonsi bakarigia komokuna: ekiagera chinguru chiarenge komorua, chikabagwenia bonsi. 20 Nere akaimokia amaiso aye as'aborokigwa baye, akabora, More negesio inwe abataka: ekiagera obonda bwa Nyasaye nobwaino. 21 More negesio inwe abanyene enchara bono: ekiagera namoigotigwe. More negesio inwe abakorera bono: ekiagera namoseke. 22 More negesio inwe, ekero mwanyabanto bakobagecha, nakobarusanania, nakobachaya, nakorituguta erieta riaino isiko buna egento ekebe, as'engecho y'Omwana-o-mwanyabanto. 23 Goka ase rituko riria, mochenge: ekiagera ekeene eng'eria yaino nenene igoro: ekiagera as'engecho eyio abaise babo babakorerete ababani. 24 Korende obobe nobwaino inwe abanda! ekiagera mwanyorire omogoko oino. 25 Obobe nobwaino inwe abamwaigotire! ekiagera namobe nenchara. Obobe nobwaino inwe abamogoseka bono! ekiagera namoichane nakorera. 26 Obobe nobwaino inwe, ekero mogotogigwa na mwanyabanto! ekiagera engecho eyio abaise babo nabo babakorerete ababani b'oborimo. 27 Korende nabatebirie inwe moigwete, Ancha ababisa baino, bakorere amaya abwo babagechete inwe, 28 basesenie abwo bakobaragereria inwe, basabere abwo ababarosirie inwe. 29 Oyo ogokoaka emboto eyemo, moonchorere neya kabere; nere oyogokoura eganchwa yao,tomorina negoti. 30 Ker'oyogogosaba moe; oyogokoura enibo yao, torigia akoiranerie. 31 Naende buna morigetie abanto babakorere inwe, nainwe bakorere bo. 32 Nabo komoranche ababanchete inwe, imbuya ki mobwate? ekiagera nonya nabanyene ebibe iga babanchete abwo ababanchete, 33 Kamorabakorere amaya abwo abakobakorera inwe amaya, mbuya ki mobwate? Ekiagera nonya nabanyene ebibe nabo bagokora. 34 Naende komorarue singo as'abanto mosemeretie konyora egento asebare naende, imbuya ki mobwate? Ekiagera nonya nabanyene ebibe iga bakorua singo as'abanyene ebibe, erinde banyore koreng'ana. 35 Korende banche ababisa baino, bakorere as'obuya, nakorua singo, motari korengereria konyora egento naende; eng'eria yaino nebe enene, namobe abana b'Oyore Igoro Mono: ekiagera ere nomuya as'abanto batari nokoiraneria ng'a mbuya, nababe. 36 Nabo mobe namabera, buna Is'oino are namabera. 37 Timogambia, nainwe timogambigwa: timonachera, nainwe timonacherwa; tigerana, nainwe namotigerwe: 38 karue, nainwe namoegwe; ekerengo ekiya keigateire, kiainyageirwe, giaichoire, nakio abanto barabae inwe ebikuba biaino. Ekiagera ekerengo keria mokorengera, nakio morache korengerwa nainwe. 39 Akabatebia omoreng'anio, Omouko nonyare koraa omouko? tibakogwa bonsi babere engoro? 40 Omworokigwa tari igoro as'omworokia; korende ker'oyomo gaikeranire, nabe buna omworokia oye. 41 Nabo, naki okorigereria ekeogoto kere as'eriso ri'oyomino, nomoribo ore eriso riao ime tori koyorora? 42 Gose naki oratebie oyomino, Oyominto, ntige ndusie ekeogoto kere eriso riao, naye omonyene torochi omoribo ore as'eriso riao? Omong'ainereria, rusia ritang'ani omoribo ore eriso riao, nario orarore buya korusia ekeogoto kere as'eriso ri'oyomino. 43 Ekiagera omote tori omuya okwama amatunda amabe; gose omote omobe okwama amatunda amaya. 44 Ekiagera ker'omote iga okomanyekana as'amatunda aye. Ekiagera as'amagwa tibari gotwa amako, gose as'emekenene tibari gotwa emesabibu. 45 Omonto omuya as'enibo engiya y'omoyo oye igakorua ayare amaya; nomonto omobe as'enibo embe y'omoyo oye igakorua ayare amabe: naki ebichire as'enkoro, nabio omonwa ogokwana, 46 Naseki mokondoka Omonene, Omonene, nainwe timori koyakora aya ngoteba? 47 Ker'omonto ogocha asende nakoyaigwa amang'ana ane nakoyakora nimborokie omogwekano: 48 igagwekaine nomonto okoagacha enyomba, agakunya akarema gochia inse mono, akabeka oboroso bwaye igoro as'egetare: ekero yachia gocha etoigo, eoro ekayeaka enyomba eria nechinguru, tiyanyara koyenyegeria, ekiagera oboroso bwaye bwabegetwe igoro as'egetare. 49 Nere oyokoigwa otari gokora iga agwekaine nomonto oagachete enyomba igoro as'amaroba atari noboroso; nabo eoro ekayeaka nechinguru, ekagwa bwango, nokogwa kw'enyomba eria gokaba okonene.
1 Agachia koyakora amang'ana aye onsi as'amato abanto, agasoa Kaperinaum. 2 Nomosomba oyomo bw'omonene bw'abarwani, konya onyarekire ang'e nogokwa, nere nomonto bwanchire nere mono. 3 Agachia koigwa amang'ana a Yesu agatoma asare abagaka b'Abayahudi komosaba ache amokonye omosomba oye. 4 Nabarabwo bagachia goika ase Yesu, bakamosorora as'omokia, bakabora, Nagwenerete omokorere ring'ana eri: 5 ekiagera nanchete egesaku giaito, nere natoagacherete esunagogi yaito, 6 Nabo Yesu akagenda amo nabarabwo. Goika agachia koba tari are as'enyomba yaye, oria omonene bw'abarwani agatoma abasani asare, okomotebia, Omonene, tibwerosia: ekiagera tingwenereti inche aye osoe inse as'ekerama kiane. 7 As'ayio iga neroche tingwenereti gocha asore: korende kwana ring'ana rioka, nomosomba one nagwene. 8 Naki ninche nomonto ore inse as'ogochika, ninde nabarwani inse asende: Kondamotebie oyo, Genda, ogenda; noyo, Inchuo, oche; nomosomba one, Kora iga, okora. 9 Yesu agachia koigwa aya akamoichanera, akayionchorera emeganda yarenge komotunyana, akabora, Nabatebirie, Nonya nase Isiraeli tindarora okwegena okonge buna oko. 10 Nabo baria batometwe bagachia koirana nyomba mwaye, bakamonyora oria omosomba, konya onyarekire, obaire omogima. 11 Egachia koba nyuma as'aya bwango, akagenda omochie okorokwa Naini; aborokigwa baye bakagenda amo nere, nabanto abange. 12 Nabo, agachia goika ang'e as'egeita ki'omochie, rora, agwo nkiarengeo egetondo kebogoirie isiko, omwana omomoima ase ng'ina oye, nere nomoboraka; nabanto b'omochie abange mbarenge amo nere. 13 N'Omonene agachia komorora akamororera amabera, akamotebia, Torera. 14 Akagenda ang'e akagekuna ekige; baria ababogoria bagatenena. Agakwana, Omomura, nagotebirie, Imoka. 15 Keria egetondo gegaikaransa, gegachaka gokwana. Akamoa ng'ina. 16 Omoondoko okababwata bonsi: bakamotogia' Nyasaye, bakobora, Omobani omonene oorokire as'egati yaito: na Nyasaye obacheire abanto baye. 17 chinkuma echio chigasarera asare ense yonsi ya Boyahudi, nas'ense yonsi yaetanaine. 18 Nabo aborokigwa ba Yohana, bakamotebia aya onsi. 19 Yohana akarangeria babere as'aborokigwa baye, akabatoma as'Omonene, ogoteba, Aye naye ogocha, gose nomoao tokoganya? 20 Nabo abanto abwo bagaika asare, bakamotebia, Yohana Omobatisi ototomire asore okobora, Aye naye ogocha, gose nomoao tokoganya? 21 As'ensa eria akabagwenia abanto abange amarwaire abo, nemechando yabo, nebirecha ebibe; nemeuko emenge akayeramokia ekarora. 22 Akabairaneria, akabatebia, Genda, momotebie Yohana ayamwarora naya mwaigwa: emeuko nkororere, ebisegora ngotarabire, abanyene ukoma ngosibekabare, emetino nkoigwere, ebitondo nkobokigwabire, abataka nkoranderigwabare amang'ana amaya, 23 Nare negesio onde bwonsi oyotagochiri nainche. 24 Nabaria abatomwa ba Yohana, bachia kogenda, agachaka koyetebia emeganda amang'ana a Yohana. Nki mwachiete korora aria eroro ime? Egetonto gekonyegerigwa nembeo? 25 Korende iga mwasogete kogenda korora ki? Nomonto oboirie chianga chinterere? Rigereria, abakweboa chianga chingiya mono nakoba moyo as'obwansu bw'ebinto bakoria, iga bare ase chinyomba chi'abaruoti. 26 Korende iga mwasogete kogenda korora ki? Omobani? Nabo, nabatebirie, kobua omobani. 27 Oyio nere orikeretwe amang'ana aya, Rigereria, inche namotomire omotomwa one as'obosio bwao, Oyoranyare korosia enchera yao as'obosio bwao. 28 Ekiagera nabatebirie, As'okoibora kw'abakungu omobani onde tari omonene kobua Yohana: korende oyore omoke as'obonda bwa Nyasaye nomonene kobua ere. 29 Abanto bonsi nabakorusia ebango bagachia koigwa, bakamoa Nyasaye oboronge, ekiagera babatisirwe as'ebatiso ya Yohana. 30 Korende Abafarisai naborokia b'amachiko bagekanera ekina kia Nyasaye ekiagera batabatisetwe nere. 31 Omonene akabora, Nimbareng'anie nagento ki abanto b'ekegori eke? Nabarabwo iga bareng'aine naki? 32 Iga bareng'aine nabana baikaransete echiro, bakorangerania; bakobora, Twababugeirie ebiroria, nainwe timwatenga; twarerire, nainwe timwarera. 33 Ekiagera Yohana Omobatisi igachete, tarekoria omogati gose tarekonywa edivai; nainwe mogoteba, Nare nekerecha. 34 Omwana-o-mwanyabanto ochire, okoria nakonywa, nainwe mogoteba, Rora nomonto omoribobe, nogotinda neejivai, omosani bw'ababangi nabanyene ebibe! 35 Nobong'aini bwanyorire oboronge bwaye nabana baye bonsi. 36 Omonto oyomo as'Abafarisai akamorigia arie endagera amo nere. Agasoa as'enyomba yaye oria Omofarisai, agaikaransa as'endagera. 37 Na rora, omokungu oyomo as'omochie oria orenge omonyene ebibe; agachia konyora amang'ana ng'a oikaransire as'enyomba y'oria Omofarisai, akareta echuba y'amaguta ayerimisu rigiya, 38 agatenena korwa nyuma ang'e namagoro aye, okorera, agachaka komoiyereria amariga aye as'amagoro aye, nakoyatinyia as'etukia y'omotwe oye, okonyunyunta amagoro aye, nakoyaaka aria amaguta. 39 Oria Omofarisai omorangeretie, agachia koyarora aya, akeboria as'omoyo ime, ogoteba, Omonto oyo onye nomobani orenge, anga namomanya oyo ng'a nere ng'o! gose 'mokungu ki okomokuna, ng'a nomonyene ebibe, 40 Yesu akairaneria akamotebia, Simon, ninde nering'ana ngogotebia, akabora, Omworokia, kwana. 41 Omonto oyomo omorua singo orenge nabasira babere: oyomo omoriete esira ye chidinari chimia isano, noyokabere emerongo etano. 42 Nabarabwo tibarenge nagento bagoakana, akababera bonsi babere. Gaki as'abwo ning'o oramwanche kobua? 43 Simon akairaneria akabora, Iga ndabore noria bwabeirwe nere ebinge. Akamotebia, Kwanachire boronge. 44 Akamweonchorera oriaomokungu, akamoteba Simon, Kwamororire omokungu oyo? Nasoa enyomba yao, tikwang'a amache ay'ogwesibia amagoro: korende oyo osibirie amagoro ane namariga aye, nakoyabusa netukia y'omotwe oye. 45 Tonyunyunteti; korende ere korwa ekero nasoete aa tatigeti konyunyunta amagoro ane. 46 Tong'ageti omotwe one amaguta: korende ere ong'akire amagoro ane amaguta agotioka buya. 47 As'engecho y'ayio, nagotebirie, ebibe biaye ebinge biabeirwe; ekiagera ogwancha kwaye nokonge: nere oyokwaberwa ake iga anchete ake. 48 Akamotebia, Kwabeirwe ebibe biao. 49 Nabaria baikaransete amo nere bagachaka goteba ime as'emioyo yabo, Ning'o oyo okwabera nonya nebibe? 50 Akamotebia oria omokungu, Okwegena kwao gwagokonyire; genda nomorembe.
1 Ekaba bwango nyuma as'ekero keria, akaba ngoetananare as'emechie nebichie, okorandia nagotebia amang'ana amaya ay'obonda bwa Nyasaye. Nabaria ikomi nababere iga barenge amo nere. 2 Nabakungu bande abakonyetwe nere ebirecha ebibe namarwaire, Mariamu ore korokwa Magdalene, oruetwe nebirecha bitano nabibere, 3 Na Yoana, moka Kuza omorendi bwe Herode, na Susana, nabande abange, iga barenge kobakorera as'enibo yabn. 4 Nekero emeganda emenge yasangererekanete, nabanto ba ker'omochie bakamochera, agakwana as'omoreng'anio: 5 Omobusuri omanoire kogenda kobusura embusuro yaye: ekero akobusura, echinde chikagwa ang'e nenchera; chigatiringwa namagoro, chinyoni chi'igoro chigachiria. 6 Nechinde chikagwa as'egetare; chikamera, chikoma as'okomocha amache. 7 Nechinde chikagwa gati as'amagwa: naro amagwa akamera amo nachirochio, agachimiga. 8 Echinde chikagwa ase riroba rigiya, chikamera, chikama emia eyemo. Ekero akobatchia aya, akaaka eriogi, akabora, Oyore namato aigwe. 9 Aborokigwa baye bakamoboria, bakobora, Omoreng'anio oyio ninki? 10 Agateba, Inwe mwaeirwe kobomanya obobisi bw'obonda bwa Nyasaye: korende abande as'emereng'anio; erinde bakorora, tibarora, naende bakoigwa, tibamanya. 11 Nomoreng'anio nor'oyo: Embusuro ne Ring'ana ria Nyasaye. 12 Nabaria b'enchera, nabwo bakoigwa; erio ochicha saitani, nakorirusia riria ring'ana as'emioyo yabo, erinde tibacha gwancha bakonyeke. 13 Nabaria bare as'egetare nabwo baria, bakorigwa ring'ana, baribwata nomogoko; naba tibari nemeri, bancha as'ekero egeke, nekero gi'ogotemwa berusia. 14 Nechio chiagwete as'amagwa, aba nabwo bakoigwa, nabarabwo kobakogenda enchera yabo bamigwa nokorengereria kw'enibo, nomogoko bw'obogima, tibama as'ogoikerania. 15 Nechinde chire as'amaroba amaya, aba nabwo as'emioyo emiya naende ey'ekeene, bakorigwa ring'ana, baribwata, bama noboremereria botambe. 16 Omonto onde tari ogotongia etaya nakoyemumeka negento gose koyebeka 'berere nyaro; korende iga akoyebeke igoro as'ekebekerero kiaye, erinde abagosoa bayorore omobaso, 17 Ekiagera ring'ana tiriri rirabiseke, ritache kooroka; gose ring'ana rirabiswe, ritache komanyekana maiso marore. 18 Rigereria gaki inwe buna mokoigwa: ekiagera ere oyobwate, naegwe; nere oyotabwati, naurwe nonya keria arengereretie abwate. 19 Ng'ina nabamura bamwabo bakamochiera, korende tibanyara komoika ang'e ekiagera as'omosangererekano. 20 Akairerwa amang'ana, bakamotebia, Nyoko nabamura bamino mbateneine isiko, mbarigetie gokorora. 21 Korende akairaneria akabatebia, Baba nabminto nabw'aba abakoigwa ring'ana ria Nyasaye nakorikora. 22 Rikaba rituko erimo ri'amatuko aria, akarina obwato, ere naborokigwa baye; akabatebia, Twamboke goika ng'umbu y'enyancha: bakamanora, 23 Kobachia kogenda, akarara chitoro; ogacha omwaga omonene igoro as'enyancha; obwato bagachaka goichorwa namache, bakaba as'emechando. 24 Bakamochiera, bakamotura, bakobora, Omworokia, omworokia, ngosiratore. Akaboka, akayekania embeo, nemerindo y'amache: bigakira, gokaba ogotoerera. 25 Akabatebia, Okwegena kwaino ng'ai kore? bakairoka, bagakumia, bagatebania, Oyo nere ng'o, okobichika nonya nembeo nenyancha bikomoigwera? 26 Bagaika engegu as'ense y'Abagadareni, erigereretie Galili. 27 Goika agachia goika engegu, akanyorwa nomonto oyomo bw'omochie oria, orenge nebirecha; nas'ekero ekenene igarenge tarenge kweboyia chianga, tarenge goikaransa 'nyomba, tatiga ase chimbera ime. 28 Agachia komorora Yesu akaaka egeturi, akagwa as'obosio bwaye, agakwana as'eriogi rinene, Ninki nde naye, Yesu, Omwana o Nyasaye Ore Igoro Mono? Nagosabire, tonchanda. 29 Ekiagera ogechikire keria ekerecha ki'eubi komosoka omonto oria. Ekiagera ebiro ebinge iga kiare komobwata: nere osibwa, orendwa nagosibwa nebinyuri ne chingatare; abibutora biria ebisibo, agaserigwa nakeria ekerecha goika chiroro ime. 30 Yesu akamoboria, Naki okorokwa? Agateba, Legioni; ekiagera ebirecha ebinge biamosoire. 31 Bikamosorora tabichika bigende goika as'engoro entambe. 32 Ndiarengeo riicho rie chingurue chinyinge, chiare korisia egetunwa igoro: bikamosorora abie ribaga bichisoe. Akabia ribaga. 33 Biria ebirecha bikamorua omonto oria, bigachisoa chingurue: riicho riria rigatirimboka bwango eora goika chigakwa enyancha ime. 34 Abarisia bagachia korora, bagatama gochia ka, bagateba amang'ana omochie ime nas'emegondo. 35 Bagasoka barore amang'ana aorokire; bakamochiera Yesu, bakamorora oria omonto osokirwe nabiria ebirecha, oikaransete as'amagoro a Yesu: obegete chianga, ore nobong'aini bwaye: bakairoka. 36 Nabarabwo abaroche bakaborokereria buna oria omonyene ebirecha akonywa. 37 Nabanto bonsi b'ense y'Abagadareni chinsemo chiria bakamosaba arue asebare: ekiagera babwatetwe nokoiroka okonge: nabo agasoa obwato akairana. 38 Noria omonto oruetwe nebirecha akamosorora abe amo nere: korende Yesu akamokania, akabora, 39 Irana 'nyomba mwao, oyarandie amang'ana amanene agokoreire Nyasaye. Akagenda enchera yaye, akarandia omochie omogima amang'ana amanene aya Yesu amokorera. 40 Yesu agachia koirana emesangerereko ekamogokera; ekiagera abanto bonsi bamoganyete. 41 Naende rora, omonto oyomo erieta riaye Yairo akamochera, nere igarenge omonene bw'esunagogi: akagwa as'amagoro a Yesu, akamosorora asoe enyomba yaye; 42 ekiagera narenge nomoiseke, omwana omomoima, emiaka yaye konya okorire ikomi nebere, nere igarenge ang'e as'ogokwa. Nas'okogenda kwaye emeganda ekamomiga. 43 Naende omokungu oyomo oyorenge korua amanyinga korwa emiaka ikomi nebere, oyosiareire ebinto bionsi ebiarenge nabio as'abagwenia, tanyara kogwenigwa nabarabwo, 44 akamochiera korwa nyuma, akamokuna omobarero bw'eanga yaye: erio kegima amanyinga aye agakama, 45 Yesu akabora, Ning'o onkuna? ekero abanto bonsi bagakana, Petero nabarabwo barenge amo nere bakamotebia, Omonene, emeganda nigo egoetanaine nagokomiga. 46 Yesu agateba, omonto onkunire: ekiagera narorire chinguru chiandure. 47 Oria omokungu agachia korora tabisegeti, agacha okoiguswa, akamogwera, amworokie as'abanto bonsi engecho yagera omokuna, naende buna agwenigwa ara rimo. 48 Akamotebia, Omwana one, okwegena kwao gwagokonyire: genda as'omorembe. 49 Erio kagokwana, omonto agacha, korwa as'enyomba y'oria omonene bw'esunagogi, akamotebia, Omoiseke oo okure, tomorosia Omworokia. 50 Yesu ochia koigwa erio, akamoiraneria akabora, Toiroka: ancha rioka, nere nakonywe. 51 Agachia goika 'nyomba, tamotiga omonto asoe amo nere, tatiga Petero, na Yakobo na Yohana, n'ise oria omwana na ng'ina. 52 Nabanto bonsi iga barenge korera, bakomweng'erereria; korende akabora, Timorera: ekiagera takweti, korende igaraire. 53 Bakamosekerera mono, kobamanyire ng'a okure. 54 Nere akabaseria bonsi isiko, akamobwata okoboko kwaye, ogoteba, Omoiseke, imoka. 55 Omoika oye okairana, agatenena erio kegima: agachika aegwe endagera arie. 56 Aba moibori baye bagakumia mono, akabachika tibamotebia 'monto ayakoreka.
1 Akabarangeria baria ikomi nababere, akabaa okobua nechinguru igoro as'ebirecha bionsi, nakogwenia amarwaire. 2 Akabatoma koborandia obonda bwa Nyasaye nakogwenia abarwaire. 3 Akabatebia, Timobogoria 'gento ki'orogendo, nonya nenyimbo, gose esaro, gose omogati, gose chifetha; naende timoba nechikansu ibere. 4 Naende enyomba ende yonsi morasoe, ikaransa aroro goika morue aroro. 5 Naende abatabaroiseti, komogosoka korwa omochie oria, kong'onta orotu rw'amagoro aino erinde robe kirori asebare. 6 Bakagenda, bagaetanana as'emechie, bakorandia enchili, nakogwenia chinsemo chionsi. 7 Herode omonene akaigwa onsi ayakoretwe nere: agaichanigwa mono, ekiagera abande bare goteba ng'a Yohana obokire korwa as'amakweri; 8 nabande ng'a n'Elija oorokire; nabande ng'a nomobani oyomo ase baria ba kare obokire. 9 Herode agateba, Yohana namonachete omotwe: korende ning'o oyo rende naigure amang'ana are buna aya? Akarigia komorora. 10 Baria abatomwa bachia koirana bakamotebia amang'ana onsi ayabakora, Akabaira, akagenda bobisi as'omochie okorokwa Bethisaida. 11 Nemeganda egachia korora bakamotunyana: akabagokera, agakwana nabarabwo amang'ana obonda bwa Nyasaye, akabagwenia abarenge nokorigia okogwenigwa. 12 Erioba rigachaka kogwa na baria ikomi nababere bakamochiera, bakamotebia, Nyetige emeganda egende goika as'emechie nechinsemo chietanaine, banyore aase bakorara, nendagera: ekiagera aiga tore aase eroro. 13 Akabatebia, Inwe bae endagera, Bakabora, Titobwati gento tatiga emegati etano nechinswe ibere; tatiga toragende kobagorera endagera abanto aba bonsi. 14 Ekiagera barengeo abasacha ang'e chilifu isano. Akabatebia aborokigwa baye, Baikaransie abanto as'ebiombe, ase ker'ekeombe abanto emerongo etano. 15 Bagakora bo, bakabaikaransia bonsi. 16 Akayebogoria eria emegati etano nachiria chinswe ibere, akarigereria igoro, kabisesenia, akabisamunyora, akabaa aborokigwa, kobibeka as'amasio emeganda. 17 Bakaria, bakaigota bonsi: nabiria ebisamunye ebiatigarete bigachorwa, ebitonga ikomi nabibere. 18 Agachia koba ngosabare ere bweka, aborokigwa baye iga barenge amo nere: akababoria, akabora, Emeganda iga ekobora ng'a ninche ng'o? 19 Bakairaneria, bakabora, Yohana Omobatisi: nabande Elija; nabande ng'a nomobani oyomo ase baria ba kare obokire. 20 Akabatebia, Nainwe iga mokobora ng'a ninche ng'o? Petero akairaneria, akabora, Kristo o Nyasaye. 21 Akabachika nakobakania tibamotebia 'monto ring'ana eri; 22 agateba, Nemogwenerete Omwana-o-mwanyabanto anyore ogochandwa okonge, nakwangwa nabagaka, nabakuani abanene, nabariki, nagoitwa, nerituko ria gatato naboke. 23 Akabatebia bonsi, oyokorigia gontunyana, ekanye omonyene, etweke omosalaba oye kera rituko, antunyane. 24 Naki omonto bwonsi orarigie gokonya obogima oyio nabosirie; nere orasirie obogima bwaye as'engecho yane, oyio nabokonye. 25 Ekiagera inki keramogwenere omonto karanyore ense yonsi nagwesiria? gose ogosiria obogima bwaye? 26 Ekiagera ker'omonto orandorere obosoku inche namang'ana ane, Omwana-o-mwanyabanto namororere obosoku oyio kagocha as'obonene bwaye, nobw'Ise oye, nobw'amalaika amachenu. 27 Ancha, nabatebirie, Mbare abanto as'aba bateneine aa, abataigwe amakweri nonya ng'ake, goika baborore obonda bwa Nyasaye. 28 Agachia koba amatuko atano natato nyuma as'amang'ana aya, akamoira Petero na Yohana na Yakobo, akarina egetunwa gosaba. 29 Ekaba ochia gosaba, ekieni ki'obosio bwaye gegaonchoka, nechianga chiaye chikaba chindabu, chikamekameka. 30 Naende rora, abanto babere barenge bagokwana nere, nabarabwo Musa na Elija; 31 barorekanete as'obonene, bagakwana amang'ana ogokwa kwaye nagwenerete goikerania Yerusalemu. 32 Petero, nabarabwo abarenge amo nere, konya banyarirwe nechitoro: korende bachia koboka, bakaborora obonene bwaye, nabaria abanto babere, batenenete amo nere. 33 Egachia koba ekero abwo barenge gweatanana nere, Petero akamotebia Yesu, Omonene, imbuya intwe koba aiga: tokore ebigutu bitato; ekemo ekiao, ekemo ekia Musa, ekemo ekia Elija: nere tamanyete eki agokwana. 34 Ekero agokwana amang'ana aya, rikabao rire, rikababeka ekiriri: bakairoka kobachia gosoa ase rire. 35 Eriogi rigasoka ase rire riria rigoteba, Oyo n'Omwana one, omwanchi one, moigwere. 36 Neriogi eri riachia gocha, Yesu akarorekana bweka, Nabarabwo bagakira, tibamotebia 'monto as'amatuko aria ring'ana rinde rionsi ri'ayio ayabaroche. 37 Ekaba rituko ria kabere riaye, bagachia goika korwa egetunwa, omoganda okaumerana nere. 38 Naende rora, omonto oyomo as'oria omoganda akaaka egeturi, okobora, Omworokia, nagosabire, omorigererie omwana ene, ekiagera ere nomwana one omomoima: 39 na rora, ekerecha iga gekomobwata, nere bwango iga akorera; naende iga gekomogaragaria, asokia amauro, korende tikeri komorua tatiga as'okomosionora mono. 40 Nabasaba aborokia bao bamoserie tibanyara. 41 Yesu akairaneria akabora, Inwe ekegori getari nokwegena naende ekebe, nimbe amo nainwe goika ririri? morete omwana oo aiga. 42 Agachia koba nkomochierare, keria ekerecha gekamoiyeria gekamogaragaria. Yesu agagekania ekerecha keria, akagwenia oria omwana, akamoiraneria ise oye. 43 Abanto bonsi bagakumia as'okobua kwa Nyasaye. Korende ekero bonsi babete nogokumia as'amang'ana onsi ayakorete, akabatebia aborokigwa. 44 Yabeke amang'ana aya amato aino: ekiagera Omwana-o-mwanyabanto nkogendare kobekwa as'amaboko abanto. 45 Korende tibarimanyete ring'ana riria, rikaba ndiabiswa asebare tibanyara korimanya: bakairoka komoboria engecho ye ring'ana riria. 46 Okoamererania, gokabasoa, ning'o orabe omonene as'egati yabo. 47 Nere Yesu agachia korora okorengereria kw'emioyo yabo, akabogoria akana akamobeka ang'e asare, 48 akabatebia, ker'omonto oraganche akana aka as'erieta riane, onyanchire inche: naende ker'omonto oranyanche inche, omwanchire ere oyontomete. Ekiagera ere oyore omoke as'egati yaino inwe, oyio nabe omonene. 49 Yohana akairaneria, akabora, Omworokia, ntwamorora omonto ogoseria ebirecha as'erieta riao, tokamokania, ekiagera latotunyanete intwe. 50 Yesu akamotebia, Timomokania: ekiagera oyo tari ao naintwe, igare as'ensemo yaito. 51 Rikaba rituko ri'okorinigwa kwaye igoro rigachia koba ang'e goikerana, ere omonyene akaboirania obosio bwaye kogenda Yerusalemu. 52 Agatoma abatomwa gotang'ana as'obosio bwaye: bakagenda bagasoa as'omochie bw'Abasamaria, erinde beroisie babe ang'e asare. 53 Nabarabwo tibamoroisia, ekiagera obosio bwaye oboonchoire kogenda Yerusalemu. 54 Aborokigwa baye Yakobo na Yohana bagachia korora aya, bakabora, Omonene, norigetie toyotebie omorero oike korwa igoro obasirie buna Elija akorete? 55 Ageonchora, akabakania, akabora, Timomanyeti nomoyo ore naki more noro. 56 Ekiagera Omwana-o-mwanyabanto tachete kobosiria obogima bw5abanabamwanyabanto, korende kobokonya. Bakagenda as'omochie onde. 57 Naende bagachia koba nkogendabare 'nchera, omonto oyomo akamotebia, ningotunyane aande onsi okogenda, Omonene. 58 Yesu akamotebia, Ebibwe mbire namakuruma, nechinyoni chi'igoro nchire nebiswa biabo, korende Omwana-o-mwanyabanto tari naase akobeka omotwe oye. 59 Akamotebia oyonde, Ntunyane. Akabora, Omonene, ing'a ribaga ritang'ani ngende gotindeka tata. 60 Akamotebia, Batige abakure batindeke abakure babo; korende aye genda oborandie obonda bwa Nyasaye. 61 Naende oyonde nere akabora, Ningotunyane, Omonene: korende ritang'ani ing'a ribaga mbaakere ng'a morare buya abanto b'enyomba yane. 62 Yesu akamotebia, Omonto tari orabeke okoboko kwaye as'obokombe, naende arigererie nyuma, oragwenere as'obonda bwa Nyasaye.
1 Nabo erio nyuma as'amang'ana aya, Omonene agachora abande emerongo etano nebere, akabatoma babere babere bamotang'anere kogenda ker'omochie naase arengereretie kogenda omonyene, 2 Akabatebia, Rigesa nerinene, korende abakori emeremo nabake: mosabe gaki, Omonene bwe rigesa, anyare gotoma abakori emeremo ase rigesa riaye. 3 Genda chinchera chiaino: rigereria, nabatomire inwe buna chimanwa chie ching'ondi gati gati ye chisese chi'orosana, 4 timobogoria ekemoya, gose esaro, gose ebikoroto: gose timomokwania omonto 'nchera, 5 Nenyomba ende yonsi mogosoa, ritang'ani bora, Omorembe obe enyomba imaa. 6 Onye oreo omwana bw'omorembe, omorembe oino noikaranse asare: korende onye taibo, nobairanere inwe. 7 Ikaransa as'enyomba eyio eyio, morie nakonywa ebi bakobaa: ekiagera omokori emeremo nagwenerete koegwa eng'eria yaye. Timogenda enyomba as'enyomba. 8 Nomochie onde bwonsi morasoe, kobarabaroisie, birie ebinto biria biabekirwe as'amasio aino. 9 Bagwenie abarwaire bareo, batebie, Obonda bwa Nyasaye bwabaikeire ang'e. 10 Nomochie onde bwonsi morasoe, nabarabwo batabaroiseti, soka, komogoeta ase chinchera chiaye, nagoteba, 11 nonya norotu oro rw'omochie oino, rwabwatanire namagoro aito, twarwabusire igoro asemore; korende manya aya, ng'a obonda bwa Nyasaye bwaikire ang'e. 12 Nabatebirie, Nabe aororo Sodomu koremereria rituko riria kobua omochie oria. 13 Obobe nobwao, Korazin! Obobe nobwao Bethisaida! ekiagera onye mbiakoregete ase Turo na Sidon ebikone biakoregete asemore, anga mbaonchogete kare, baikaranse ase chianga chie chigunia neribu. 14 Korende nabe aororo Turo na Sidon koremereria rituko riria ri'ekina, kobua inwe. 15 Naye Kaperinaum, aye oyoimokererigwe goika igoro; noche goikigwa goika amakweri. 16 Oyokobaigwera inwe, nanyigwere inche, nere oyokobanga inwe, onyangire inche; nere oyokonyanga inche omwangire ere oyontomete. 17 Baria emerongo etano nebere bakairana nomogoko, bagoteba, Omonene, nonya nebirecha biatoigwereire as'erieta riao. 18 Akabatebia, Namororire saitani buna okomesa okogwa korwa igoro. 19 Rora, nabaire okobua gochitindacha ching'iti chionsi na nge, nechinguru chionsi chi'oria omobisa gose gento kende tikeri kerarete obororo asemore. 20 Korende timogoka as'aya ng'a ebirecha biabaigwereire; korende goka ekiagera amarieta aino arikirwe igoro. 21 Ensa eria eria Yesu agasasoka as'Omoika Omochenu, akabora, Nakobakire, Tata, Omonene o igoro nense, ekiagera kwababisire abanyene obong'aini nechisemi amang'ana aya, okabayamanorera abana abake: nabo, Tata; ekiagera nabio biagwenerete as'obosio bwao. 22 Naeirwe ebinto bionsi na Tata one: 'monto onde tari omomanyete Omwana gose nere ng'o, tatiga Tata: gose Tata nere ng'o, tatiga Omwana, nomonto onde bwonsi Omwana anchete iga akomoorokeria. 23 Akabeonchorera aborokigwa baye, akabatebia bobisi, Nare negesio amaiso arorire aya mwarorire inwe: 24 naki nabatebirie; ababani abange nabaruoti bakarigia koyarora aya mwarorire inwe, tibayarora, nakoyaigwa aya mwaigure tibayaigwa. 25 Omwana bw'amachiko oyomo agatenena okomotema, akabora, Omworokia, inki ndakore nyore obogima bwa kare nakare? 26 Akamotebia, As'amariko inki kerikire? Naki ogosoma? 27 Nere akairaneria akabora, Mwanche Omonene Nyasaye oo nomoyo oo bwonsi, nenkoro yao yonsi, nechinguru chiao chionsi, nobong'aini bwao bwonsi, nomogisangi'oo mwanche buna bwanchete omobere oo. 28 Akamotebia, Kwairaneirie buya: kora iga, nario orachie kare. 29 Nere akarigia gwekora omonyene oboronge, akamotebia Yesu, Nomogisangi one ning'o? 30 Yesu akairaneria akabora, narenge omonto ore gotirimboka korwa Yerusalemu goika Yeriko: akagwa as'amaboko abauri, bakamorusia chianga, bakamoaka chingoma, bakagenda, bakamotiga oisire gokwa. 31 As'egesio akaoroka omokuani oyomo ogoeta as'enchera eria; akamorora, agaeta ensemo. 32 N'Omolawi boigo agachia goika aase aria akamorora agaeta ensemo. 33 Korende Omosamaria oyomo gagotara, akamochiera: nere agachia komorora akamororera amabera, 34 nabo akamoika ang'e, akamoboa chingoma chiaye, akabeka amaguta nedivai; akamorinia igoro as'eng'iti yaye, akamoreta as'enyomba y'abageni, akamorwaria. 35 Goika mambia yaye akarua chishilingi ibere, akamoa omonyene enyomba, akamotebia, Morende buya; nakende gionsi orarue kobua, kondairane naende, ningoakane. 36 Naki oroche rende as'abaiga batato, norori orenge omogisangio oye ere oyogwete as'amaboko abauri? 37 Akabora, Noria omororerete amabera. Yesu akamotebia, Genda, naye okore boigo. 38 Nabarabwo bagachia koba nkogendabare, agasoa as'omochie oyomo: nomokungu oyomo, erieta riaye Maritha, akamoroisia as'enyomba yaye. 39 Nere narenge noyomwabo omokungu ore korokwa Mariamu, nere iga aikaransete as'amagoro a Yesu, okoigwa amang'ana aye. 40 Korende Maritha igarenge gochandeka as'ogokora okonge; akamochiera, akabora, Omonene, noroche aye buna oyominto antigire gokora inche bweka? Nabo motchie ankonye. 41 Omonene akamoiraneria akamotebia, Maritha, Maritha, iga okwerosia nagweichania as'engecho y'amang'ana amange: 42 korende nkore okorigia kw'egento ekemo gioka, na Mariamu oyechorire ensemo ere engiya, as'ayio takoyeurwa.
1 Egachia koba ore aase gete, ogosaba, gakorire, oyomo as'aborokigwa baye akamotebia, Omonene, tworokie ogosaba buna Yohana aborogetie aborokigwa baye. 2 Akabatebia, Komogosaba, teba: Tata oito ore igoro, Erieta riao ribe buya. Obonda bwao boche. Obwanchani bwao bokoreke ense buna bwakoretwe igoro. 3 Otoe kera rituko endagera yaito. 4 Otwabere ebibe biaito, buna tokwabera ker'omonto otokorire bobe. Totoira as'ogotemwa, korende otokonye noria omobe. 5 Akabatebia, Ning'o asemore ore nomosani oramochiere botuko gati amotebia, 'Mosani, ing'a singo emegati etato: 6 naki omosani one ochire asende, korwa orogendo, ninche tindi nagento nkomoterekera; 7 noria ore ime namoiranerie, nagoteba, Tondosia: egesieri giasiekirwe, nabana bane bararire amo nainche 'borere; tinkonyara koimoka nkoe. 8 Nabatebirie, Nataimoka amoe ekiagera nomosani oye, korende ekiagera oria tari gotiga ogosaba naimoke nakomoa ebi bionsi arigetie. 9 Nainche nabatebirie inwe, saba namoegwe; rigia namonyore; tura namoigorerwe. 10 Ekiagera ker'oyogosaba iga akoegwa: nere oyokorigia iga akonyora; nere oyogotura iga akoigorerwa. 11 Ekiagera ning'o asemore ore ise, omwana oye amosabe obokima, inee, namoe rigena? gose karamosabe enswe, ase ribaga ri'enswe namoe eng'iti? 12 Gose karamosabe rigena, namoe nge? 13 Nabo, onye inwe abamore ababe mwamanyire kobaa abana baino ebiegwa ebiya, inee, Tata oino ore igoro, takomenta mono kobaa bonsi abakomosaba Omoika Omochenu? 14 Yesu ngoseria arenge ekerecha rimama. Gegachia koba keria ekerecha kogiasokire, omonto oria rimama rigakwana; emegznda egakumia. 15 Abande babo bagateba, nase Beelizebuli, omonene bw'ebirecha akorusia ebirecha, 16 Abande as'okomotema bakarigia egekone ki'igoro. 17 Nere, akabimanya ebirengererio biabo, akabatebia, ker'oboruoti bwatananekanire asebore obonyene iga bogokoreka amatongo; nenyomba yatananekanire asere enyene igekogwa. 18 Nere Saitani naboigo karatananeke omonyene, oboruoti bwaye naki boratenene? ekiagera inwe iga mogoteba ng'a iga ngoseria ebirecha ase Beelizebuli. 19 Korende inche kondaserie ebirecha ase Beelizebuli, abana baino iga bakobiseria ase ng'o? nabo as'ayio iga barabe abagambi baino. 20 Korende kondaserie ebirecha as'ekiara kia Nyasaye, nabo obonda bwa Nyasaye bwabachicheire. 21 Oyore nechinguru, omonyene ebinto bi'esegi, gakorenda obweri bwaye, enibo yaye iga ekoba as'omorembe: 22 korende omonyene chinguru oyomobuete ere karache nakomobua, iga akomoura ebinto biaye bi'esegi bionsi ebiegenete, nebisakorwa biaye obiatanana, 23 Omonto otari amo nainche igare ao nainche; nere oyotari gosangereria amo nainche iga agoserebania. 24 Ekerecha ki'eubi gagekomorua omonto, iga gegoeta gati aas'atari namache, gekorigia as'ogotimokera: getanyoreti kiabora, Ning'irane as'enyomba yane aase naruete. 25 Gegocha, kiayerora yaabusirwe, yarosigwe. 26 Erio kiagenda, kiareta ebirecha bitano nabibere binde ebire ebibe gokebua ekenyene; nabirobio biasoa nagoikaransa aroro: okoba kwaye kw'omoerio omonto oyio kwaba okobe kobua okwe ritang'ani. 27 Egachia koba gagokwana aya, omokungu oyomo as'emeganda akaaka eriogi, akamotebia, Nere negesio enda yakobogoretie, ne chimbere kwagongete. 28 Korende ere akabora, mbuya kobua, abare negesio korigwa ring'ana ria Nyasaye nakoribwata. 29 Emeganda iga yarenge emosangererekanerete, agachaka gokwana, Ekegori eke nekegori ekebe: gekorigia egekone; korende tigekoegwa egekone tatiga egekone ki'omobani Yona. 30 Naki buna Yona abete egekone as'abanto ba Nineva, naboigo Omwana-o-mwanyabanto arache koba as'ekegori eke. 31 Omoruoti eting'ana ya Sugusu natenene as'ekina amo nabanto b'ekegori eke, nere nabanachere ekina; ekiagera ere achete korwa ensinyo y'ense erinde aigwe chisemi chia Sulemani; noyobuete Sulemani naiga are. 32 Abanto ba Nineva nabatenene as'ekina keria aino nekegori eke, nabarabwo nabakenachere ekina: ekiagera barabwo baonchogete as'okorandia kwa Yona; na rora oyobuete Yona naiga are. 33 Omonto tari gatongirie etaya okoyebeka aas'abobisi gose inse as'egetonga, korende akoyebeka igoro as'ekebekerero, erinde abagosoa bayorore omobaso. 34 Etaya y'omobere neriso: nabo eriso riao korirabe rigiya, omobere oo bwonsi nore nomobaso; korende eriso riao korirabe ribe, omobere oo bwonsi iga ore nomosunte. 35 Gaki rigereria, oria omobaso ore ime asore tocha koba omosunte. 36 Nabo, omobere oo bwonsi korabe nomobaso, ensemo ende teba nomosunte, omobere oo noichore nomobaso kegima, buna etaya ekomorekera amasase. 37 Erio gagokwana, Omofarisai oyomo akamorangeria arie endagera bwoye: agasoa, agaikaransa koria. 38 Oria Omofarisai agachia korora agakumia ekiagera atesibetie ritang'ani as'endagera. 39 Omonene akamotebia, Bono inwe Abafarisai iga mogosibia egekombe nesani korwa isiko; korende ime yaino iga moichire obouri nobobe. 40 Inwe abakayayu, ere oyogekorete egia isiko, tari ere ogekorete nekia ime nakerokio? 41 Korende karue esadaka ebire ebia ime; naende rora, ebinto bionsi nebichenu asemore. 42 Korende obobe nobwaino Abafarisai! ekiagera mokorua etaisi y'ebinzari, chinyeni, na ker'emboga, mokobotiga oboronge nobwanchani bwa Nyasaye: naro aya abagwenerete koyakora, amo nagotatiga aria. 43 Obobe nobwaino, Abafarisai, ekiagera mwanchete goikaransa aas'atang'ani ase chisunagogi nagokwanigwa ase chichiro. 44 Obobe nobwaino, ekiagera mogwekaine nechimbera chitari kororekana, nabanto bagoeta igoro aroro batachimanyeti. 45 Omonto oyomo omworokigwa bw'amachiko akairaneria akamotebia, Omworokia, gogoteba aya iga ogotwomania naintwe. 46 Agateba, Nainwe abana b'amachiko, obobe nobwaino! ekiagera mokobatweka abanto chigurube chitakobogoreka, nainwe abanyene timori gokuna chigurube echio as'ekemo ki'ebiara biaino, 47 Obobe nobwaino ekiagera mokoagacha chimbera chi'ababani nabaiso baino mbabaitete. 48 Naboigo inwe mwabaire abarori nagwancha ogokora kw'abaiso baino: ekiagera mbabaitete, nainwe mokoagacha chimbera chiabo, 49 Nas'ayio chisemi chia Nyasaye chiatebire, Nintome asebare ababani nabatomwa; nababaite abande babo, nakobachanda; 50 erinde amanyinga ay'ababani bonsi, ay'aitegete korwa omochakano bw'ense narigigwe as'ekegori eke; 51 korwa amanyinga Abel goika amanyinga a Zakaria, oria oitetwe gati as'amathabau ne hekalu: nabo, nabatebirie, narigigwe as'ekegori eke. 52 Obobe nobwaino, inwe abana b'amachiko, ekiagera mwabogoretie ekeigorero ki'obong'aini: nainwe abanyene timwasoa, nabaria abarenge gosoa mwabatangete. 53 Agachia gosoka korwa aroro, abariki n'Abafarisai bagachaka komotuoma bobe, nakomochegia akwane amang'ana amange; 54 nakomoboera, kobwata ring'ana korwa as'omonwa oye, banyare komosoera.
1 Agwo nyuma, omosangerereko bw'abanto, abanio chilifu chinyinge bagachia gosangerereka goika bagatachana, agachaka kobatebia aborokigwa baye ritang'ani, Mwerende nememera y'Abafarisai, engecho yaye nobong'ainereria. 2 Korende ring'ana rinde tiriri riramumekerigwe, ritache komumoi wa: naende, eribisekanete ritache komanyeka naende, 3 Nabo ande onsi ayamwakwanete omosunte, naigugwe as'omobaso: narirorio erimwatebete as'ogoto kw'onionto as'ebinyemba bi'ime narirandigwe igoro as'ekerama, 4 Kerende nabatebiiie inwe abasani bane, Timobairoka abwo abagoita omobere na nyuma tibari negento barakore naende. 5 Korende nimbakurere oyo morairoke: Moiroke oria o1 e nokobua nyuma as'ogoita omonto omoruta ase chaanum: nabo, nabatebirie, Moiroke oria. 6 Tichiri kogorwa chinchiro isano ase chibesa ibere? naende nonya nakamo kabo tikari kwebwa as'obosio bwa Nyasaye, 7 Korende nonya ne chitukia chi'emetwe yaino chiabarirwe chionsi. Timoiroka: inwe nabaya kobua chinchiro chinyinge. 8 Nainche nabatebirie, ker'oyoranyatore as'amasio abanto, Omwana-o-mwanyabanto nere namwatore as'amasio amalaika a Nyasaye: 9 nere oyorankane as'amasio abanto, nakanwe as'amasio amalaika a Nyasaye, 10 Na ker'oyomo orakwane ring'ana igoro as'Omwana-o-mwanyabanto, naberwe: korende ere oyorayorame Omoika Omochenu takwaberwa. 11 Naende kabakchaira as'obosio bw'esunagogi, nabagambi, nas'abanyene chinguru, timoichana buna morairanerie gose buna morakwane: 12 ekiagera Omoika Omochenu noborokererie ensa eyio eyio ayamogwenerete gokwana. 13 Omonto oyomo as'omoganda akamotebia, Omworokia, motebie momura ominto anyatanere omwando oito. 14 Akamotebia, Aye omonto oyo, ning'o ombekire koba omogambi gose omwatanani igoro asemore? 15 Akabatebia, Rigereria, erende nokorengereria: ekiagera obogima bw'omonto tibori korua as'obonge bw'enibo yaye abwate. 16 Akabatebia omoreng'anio, akabora, Omogondo bw'omonto oyomo omonda, okama mono: 17 agachaka korengereria omoyo ime, agateba, Ninki ngokora, ekiagera tindi naase nkobeka okwama kwane? 18 Akabora, Ninkore iga: nintagore ebiage biane, mbiagache chinene kobua: naroro nimbeke endagera yane yonsi, nenibo yane. 19 Erio ninyotebie omoyo one, Aye omoyo, nore nenibo enyinge kwegacheire enionga y'emiaka emenge; timoka, orie, onywe, ogoke. 20 Korende Nyasaye akamotebia, Omokayayu aye, obotuko obo omoyo oo orangigwa; erio ebio kwegacheire ang'e nebiang'o birabe? 21 Naboigo are ere oyokwegachera omonyene emonga, tari omonda as'amaiso a Nyasaye. 22 Akabatebia aborokigwa baye, As'aya nabatebirie, Timona korengereria obogima bwaino, eki morarie; gose emebere yaino eki morabeke. 23 Ekiagera obogima mbobuete endagera nomobere nobuete chianga. 24 Birengererie ebigonkoru, tibiri gosimeka, tibirikogesa; tibiri naase bikobeka emonga gose ekiage; na Nyasaye iga akobirageria. Inwe timobueti rigori rie chinyoni! 25 Ning'o ore asemore as'ogwechanda oranyare komenta ekerengo gi'okoboko okomo as'obotambe bwaye? 26 Nabo onye timori konyara gokora nonya nering'ana rire erike, naseki mogwechandera amang'ana ande? 27 Birigererie ebisicha buna bikomera: tibiri gokora emeremo, gose gwesisa; nainche nabatebirie, nonya Sulemani as'obonene bwaye bwonsi, tabegete chianga buna ekemo ki'ebi, 28 Nabo onye Nyasaye okoboyia obonyansi bw'egetii, oboreo rero, nankio bwatugutwa omorero; takomenta kobaboyia inwe, abamore nokwegena ogoke? 29 Nabo ninwe timorigia eki morarie, gose eki moranywe; gose timoba nomoyo bw'ogosiereria. 30 Ekiagera ebisaku bi'ense iga bikoyarigia ayio onsi; korende Iso oino omanyire ng'a morigetie ebinto ebi bionsi. 31 Korende borigie obonda bwa Nyasaye, nayio onsi namomenterwe inwe. 32 Timoiroka inwe omoganda omoke: naki Iso oino ororire buya kobaa obonda. 33 Bigore ebio more nabio, karue ebiegwa; ekorere ebimoya, bitari kogota, emonga as'igoro etari gokea, aas'atagoika ang'e omoibi, gose chigwankwa gosaria. 34 Ekiagera as'emonga yaino ere nao emioyo yaino eranyare koba. 35 Tiga chinema biaino bisibwe, nechitaya chiaino chigwoka; 36 nainwe mobe buna abanto bamoganyete omonene obo, gakoirana korwa as'omoyega bw'enyangi, erinde gagocha nagotura, banioigorere erio kegima. 37 Mbare negesio abasomba baria ekero omonene obo agocha abanyore barendete: ekeene nabatebirie, neboyie, abaikaransie, nache abakorere. 38 Naende karache okorenda gwa kabere gose karache okor'enda gwa gatato, nakobanyora iga, mbare negesio abasomba baria. 39 Korende manya aya onye omonyene enyomba namanyete ensa agocha-gocha omoibi, anga narendete, anga tatigete enyomba yaye ebochorwe. 40 Nainwe, nabo, mobe ang'e: ekiagera ensa motakagereti, Omwana-o-mwanyabanto agocha, 41 Petero akabora, Omonene, nintwe ogotebia omoreng'anio oyio gose nas'abanto bonsi? 42 Omonene akabora, Ning'o rende, ore omosomba omwegeni omonyene chisemi, obegetwe n'Omonene oye igoro as'enyomba yaye yonsi, abae abanto endagera ekerengo kiabo, as'ekero kegwenerete? 43 Nare negesio omosomba oria ekero omonene oye agocha amonyore ogokora bo. 44 Ekeene, nabatebirie, namobeke igoro as'ebiabwate bionsi. 45 Korende omosomba oria karatebe omoyo oye ime, Omonene one otebanire gocha; karachake kobaaka abasomba baye, abasacha nabakungu, nakoria nagotinda; 46 erio, omonene bw'omosomba oria nachiche rituko atakagereti nensa atamanyeti, namonachane ebing'ese, namoe ensemo yaye amo nabatancheti. 47 Naende omosomba oria omanyete ogochika kw'Omonene oye, tebeka ang'e, gose gokora buna ogochika kwaye, naakwe ebiranya ebinge; 48 korende oria otamanyeti, nere okorire ayagwenerete okoakwa, naakwe ebiranya ebike. Ker'oyoeirwe ebinge, asare ere nabirigigwe ebinge: nere oyobiaeirwe ebinge, asare ere nabarigie ebinge kobua. 49 Nachire koruta omorero as'ense; naende gotiekire goiongigwa ninki ndigetie kobua? 50 Ninde nebatiso nkobatiswa nero; naende ninde nogochandeka okore naki korache goikeranigwa! 51 Inee! mokagete iga nachete nyee ense omorembe? Nabatebirie, Taibo, korende nogwatananeka. 52 Ekiagera korwa bono as'enyomba eyemo nababe abanto batano batananekanete, batato na babere, naende babere na batato. 53 Ise omonto atananeke nomwana oye, nomwana naise oye; ng'ina biara na moka momura oye, na moka momura na ng'ina biara. 54 Akabatebia naende emeganda yonsi, Ekero mokorora rire rikoimoka bosongo, erio mwateba bwango, Embura neche; yaba. 55 Naende ekero mokorora embeo korwa sugusu mwabora, nebe egurugura; yaba. 56 Inwe abang'ainereria, mwamanyire goonchora obosio bw'ense nerioba; korende naki yaba rende, mdtamanyeti kobionchora chiro ebi? 57 Naende naki as'emioyo yaino motari gwatanana ayare boronge? 58 Nabo, ekero mokogenda nomogosoeri oo as'obosio bw'omogambi, kora omokia gwatananeka nere nchera; tachicha gogokurura as'obosio bw'omogambi, oria omogambi akobeke as'amaboko omorendi bw'echela, oria omorendi akorute echela. 59 Nagotebirie, Tokorua agwo nonya ng'ake goika oakane kegima egesabwa ki'omoerio.
1 Ekero ekio mbarenge aroro abanto bamotchetie amang'ana Abagalili baria Pilato asang'anetie amanyinga abo nekeng'wanso kiabo. 2 Akairaneria, akabatebia, Inee! Mokagete ng'a Abagalili abwo iga barenge abanyene ebibe kobua Abagalili bonsi, ekiagera banyorete emechando buna eyio? 3 Nabatebirie Taibo: korende motaonchogeti imwensi namosire boigo. 4 Ao gose baria ikomi nabatano nabatato bagweretwe negesasimo ase Siloam, gekabaita, mokagete ng'a iga barenge abasaria kobua abanto bonsi bamenyete Yerusalemu? 5 Nabatebirie, Taibo: korende motaonchogeti, imwensi namosire boigo: 6 Agakwana omoreng'anio oyio; Omonto oyomo orenge nomoko, osimegetwe as'omogondo oye bw'emesabibu; akagenda korigia amatunda igoro asore, korende tanyora. 7 Akamotebia omorosia omogondo bw'emesabibu, Rora, emiaka etato eye ngecha korigia amatunda as'omoko oyo, tinkonyora: nyonache, naseki ogosaria ense yonsi? 8 Akamoiraneria, akamotebia, Omonene, yotige omwaka oyo noro, goika nyoburugere, nakoyobekere obwoyo. 9 Noro korame amatunda, mbuya; onye taibo, erio oyonache. 10 Akaba okworokereria as'esunagogi eyemo yabo rituko ri'esabato. 11 Naende rora, omokungu orenge nekerecha ki'oboreu emiaka ikomi netano netato: nere konya okogotaire, tare konyara kwerambora nonya ng'ake. 12 Ekero Yesu achia komorora, akamorangeria, akamotebia, Aye omokungu, gwasiboirwe as'oboreu bwao. 13 Akabeka amaboko aye igoro asare, akaramboka erio kegima, agachaka komotogia Nyasaye. 14 Omonene bw'esunagogi eria agasogwa nendamwamu ekiagera Yesu amokonya omonto rituko ri'esabato, akairaneria akayetebia emeganda, Nare amatuko atano narimo agwenerete mwanyabanto bakore emeremo: as'ayio, inchuo mokonywe, korende tari rituko ri'esabato. 15 Korende Omonene akamoiraneria, akabora, Aye omong'ainereria, Inee, ker'oyomo oino tari koyesibora eng'ombe yaye gose etigere yaye korwa 'bweri rituko ri'esabato, ogenda nero koyenyosia? 16 Noyo, nenyaroka ya Ibrahimu, ekiagera Saitani omosibire emiaka ikomi netano netato eye, temogwenereti asiborwe egesibo eke rituko ri'esabato? 17 Naende gagokwana aya, abanto bonsi abare koamererania nere bagasokigwa: omoganda bwonsi okagoka as'engecho y'amang'ana amanene akorirwe nere. 18 Nabo, akabora, Obonda bwa Nyasaye iga boreng'aine ki? Nimboreng'anie naki? 19 Mboreng'aine nentetere y'ekaradali, ayebogoretie omonto, akayeruta as'omogondo oye; egakina, ekaba omote omonene; chinyoni chi'igoro chigwa ase chinsagia chiaye. 20 Agakwana eria kabere, Nimboreng'anie ki obonda bwa Nyasaye? 21 Iga boreng'aine nememera abogoretie omokungu akayebisa as'ebirengo bitato bi'obosie, goika bwonsi bokabota. 22 Akaba ogoetanana as'emechie nebichie, okworokereria, nakogenda Yerusalemu. 23 Omonto oyomo akamotebia Omonene, barabwo abaratorigwe nabake? Akabatebia, 24 Tenia gosoa as'egesieri kere ekegote; ekiagera nabatebirie ng'a abanto abange nabarigie gosoa nabarabwo tibakonyara. 25 Korwa as'ekero keria omonyene enyomba araimoke nagosieka egesieri, nainwe mochake gotenena isiko, nagotura egesieri, mokobora, Omonene, toigorere; nere nabairanerie abatebie, Timbamanyeti ase mokorua; 26 nerio namochake goteba, Tokaria, nakonywa as'obosio bwao, naye nkworokereria kwarease chinchera chiaito; 27 nere natebe, Nabatebirie, Timbamanyeti ase mokorua; karue asende, inwe mwensi abakori obobe. 28 Erio nakobe nokorera nokoriania amaino, komoramorore Ibrahimu n'Isaaka na Yakobo nababani bonsi as'obonda bwa Nyasaye, nainwe abanyene mogotugutwa isiko. 29 Naende nabache abanto korwa mocha, na korwa bosongo na korwa irianyi, na korwa sugusu nabarabwo nabaikaranse as'obonda bwa Nyasaye, 30 Inyora, mbare ab'omoerio barabe abe ritang'ani, naende mbare be ritang'ani barabe ab'omoerio. 31 Rituko riria abande as'Abafarisai bakamochiera, bakamotebia, Imoka korwa aa, ogende aria: ekiagera Herode narigetie gogoita. 32 Akabatebia, genda, moniotchie oria ekebwe, Rora, ngoseriande ebirecha, ngokorande emeremo y'okobagwenia abanto rero na mambia, nainche rituko ria gatato naikeranire. 33 Korende nengwenerete kobwatia enchera yane rero na mambia naankiende, naki temogwenereti omobani asirerigwe isiko tatiga Yerusalemu. 34 Aye Yerusalemu, Yerusalemu, okobaita ababani nakobaaka amagena abatomirwe asore! Ng'ara karenga narigirie kobasangereria abana bao buna engoko ekobisangereria ebichuchu biaye inse ase chimbaba chiaye, korende timwancha! 35 Rora, enyomba yaino mwatigeirwe riiombe: Ancha nabatebirie, Timokondora nonya ng'ake, goika ekero keria moratebe, Osesenigwe ere oyorache as'erieta ri'Omonene.
1 Agachia koba ekero asoete as'enyomba y'omonto oyomo, omonene as'Abafarisai, rituko ri'esabato, arie endagera, mbarenge nkomorigereriabare. 2 Nabo as'obosio bwaye narenge omonto oyomo orenge noborwaire bw'okobimbia omobere. 3 Yesu akairaneria akabatebia aborokigwa b'amachiko n'Abafarisai, akabora, Inee, mboronge kogwenia rituko ri'esabato, gose taibo? 4 Bagakira. Akamobwata, akamogwenia, akamoa ribaga agende. 5 Akairaneria akabatebia, Ning'o asemore omonyene etigere gose eng'ombe yagure engoro, otari koyerusia erio kegima rituko ri'esabato? 6 Nabarabwo tibanyara komoiraneria as'aya. 7 Akabatebia omoreng'anio baria barangeretigwe, gachia korora buna bachorire ebirogo bie ritang'ani; akabatebia, 8 Gokorangerigwa nomonto enyangi, toikaransa as'ekerogo kie ritang'ani, ekiagera gose omonyene amasikani kobua aye orangerigwe nere, 9 ogocha omonyene okorangeirie aye, nere, agotebie motigerere oyo; erio nochake koba nobosoku gogoikaransa aase anyuma. 10 Korende gokorangerigwa, genda oikaranse aase anyuma; erinde gagocha oyokorangeretie, agotebie, 'Mosani, tigera gocha aase ritang'ani; erio nobe nogosikwa as'amaiso abo bonsi abaikaransete amo naye, it Ekiagera ker'oyokweimokereria igoro nairanigwe inse; nere oyokweirania inse naimokererigwe igoro. 12 Akamotebia oria oyomorangeretie, Gogokora endagera ya mambia gose eya mogoroba, tobarangeria abasani bao, gose abamino, gose eamate yao, gose abagisangio bao abanda; babaise gocha nabarabwo gokorangeria aye, onyore ogoakanwa. 13 Korende gogokora omoyega, baragerie abataka, nebirerria, nebisegora, nemeuko; 14 naye nobe negesio; ekiagera tibari nagento bagokoakana; ekiagera noakanwe as'okobokigwa kw'abanyene boronge. 15 Nabo omonto oyomo as'abwo baikaransete as'endagera amo nere, agachia koyaigwa aya, akamotebia, Nare negesio oyoranyare koria omogati as'obonda bwa Nyasaye. 16 Akamotebia, Omonto oyomo okorete omoyega omonene; akarangeria abanto abange: 17 akamotoma omosomba oye ensa y'omoyega kogenda kobarangeria abarigirie, Inchuo; ekiagera ebinto bionsi biabaire ang'e. 18 Bagachaka gokwana chintamera bonsi nomoyo oyomo. Oyo bwe ritang'ani akamotebia, nagorire omogondo, nindigetie kogenda koyorora: nagosabire onyabere. 19 Oyonde akabora, nagorire chieri chichoki isano, nkogendande gochitema: nagosabire onyabere. 20 Oyonde akabora, nanyuomire omokungu, nas'engecho eye tinkonyara gocha. 21 Oria omosomba agacha, akamworokia Omonene oye amang'ana aya. Erio oria omonyene enyomba akabea, akamotebia omosomba oye, Soka bwango ogenda ase chinchera nebichera bi'emechie, orete aa abataka, nebirema, nebisegora, nemeuko. 22 Oria omosomba akabora, Atiekire gokoreka ayio gwanchika, ko ribaga ndire. 23 Oria Omonene akamotebia omosomba oye, Genda ase chinchera nechimbebe, obabetererie basoe erinde enyomba yane enyare goichora. 24 Ekiagera nagotebirie ng'a as'abanto baria barangeretigwe tari nonya nomo oranyare koigwa omoyega one. 25 Iga yarenge amo nere emeganda emenge: ageonchora akabatebia, 26 omonto gagocha asende, nere atamogecheti ise oye, na ng'ina, na mokaye, nabana baye, nabamura bamwabo, nabamwabo abakungu, ee, nobogima bwaye bwonsi, takonyara koba omworokigwa one. 27 Naende omonto onde bwonsi otabogoreti omosalaba oye nakorua nyuma yane, takonyara koba omworokigwa one. 28 Ekiagera ning'o as'inwe, onye origetie koagacha egesasimo, otari goikaransa ritang'ani kobara rigori, gose nabwate ebinto ebikogekora? 29 Tacha gocha, tagekora kabekire oboroso, abanto bonsi bachake komosekerera, 30 bakwane, Omonto oyo nachaka koagacha, korende tanyare gokora. 31 Gose, 'moruoti ki, gakogenda korwana nomoruoti onde, otari goikaransa ritang'ani nagokora ekina onye ere amo nabanto chilifu ikomi nanyare koumerana nere oyokomochera amo nabanto chilifu emerongo ebere? 32 Onye taibo, iga agotoma omogai korigia enchera y'omorembe, omonto oria gakare are. 33 Nabo, ker'oyomo oino otabitigeti ebinto bionsi are nabio takonyara koba omworokigwa one. 34 Omonyo nomuya, korende oria omonyo korabe osarekire, ninki orabekwe bwansere? 35 Togwenereti ense gose etui: abanto iga bakoyotuguta isiko. Oyore namato aigwe.
1 Nabo abakorusia ebango bonsi nabanyene ebibe iga bare komoika ang'e komoigwera. 2 Abafarisai nabariki bakemurungania, bakabora, Oyo iga akoroisia abanyene ebibe, nakoria amo nabarabwo. 3 Akabatebia omoreng'anio oyo akabora, 4 'montoki oino oyore neching'ondi emia, asirerigwe neyemo, otari gochitiga chiria emerongo kianda na kianda eroro ime, nakoyegendera eria yasirire, goika ayerore? 5 Nabo karayenyore oyebeka amareko aye, ogokigwa. 6 Nere gakoirana mwaye obarangeria abasani baye nabagisangio baye, obatebia, Goka amo nainche, ekiagera nayenyorire eng'ondi yane yasirete. 7 Nabatebirie, naboigo nobe omogoko igoro as'omonyene ebibe oyomo oonchokire, kobua as'abanyene oboronge emerongo kianda nakianda, abatarigeti ogoonchoka. 8 Gose 'mokungu ki ore nechishilingi ikomi, asirerigwe neyemo, otari gotongia etaya nakwabusa enyomba, origia nomokia, goika ayenyore? 9 Nabo, okoyenyora, obarangeria abatureti baye nabagisangio baye, obora, Goka amo nainche ekiagera nayenyorire eria eshilingi nasiria? 10 Naboigo nabatebirie inwe, Nore omogoko as'amasio amalaika a Nyasaye as'omonyene ebibe oyomo oonchokire. 11 Agateba, Omonto oyomo narenge nabana babere. 12 Oria orenge omoke akamotebia ise, Tata, ing'a ensemo y'enibo entungetie. Akabatananera ebinto biaye. 13 Goika nyuma y'amatuko atai 'mange oria omoke agasangereria ebinto biaye bionsi, akaimoka kogenda orogendo gochia ense y'are; agasiarera agwo enibo yaye as'ogokora kw'obokayayu. 14 Agachia kobikora bionsi, enchara enene egasoa ense eria, nere agachaka kogania. 15 Akagenda akabwatana noyomo obo bw'abanyene ense eria; nere akamoira ebitii biaye, korisia chingurue. 16 Akaba nkorengereriare koigotia enda yaye as'amasabo aria chikoria chingurue: 'monto onde tarenge ore komoa 'gento. 17 Goika ochia kweirana omonyene, akabora, Abasomba b'eng'eria mbarenga ba tata bakoria endagera nagotigaria, nainche aiga ngokwa as'enchara! 18 Ninyimoke, ngende ase tata, nimotebie, Tata, namochire igoro as'erioba, nas'obosio bwao: 19 tingwenereti naende ndokwe omwana oo: onkore imbe buna oyomo bw'abasomba bao. 20 Akaimoka, akagenda as'ise. Agachia koba okare are, ise akamorora, akamororera amabera, akaminyoka, akamogwera rigoti, akamonyunyunta mono. 21 Oria omwana akamotebia, Tata, nasaririe igoro as'erioba nas'obosio bwao: tingwenereti naende ndokwe omwana oo. 22 Korende ise akabatebia abasomba baye, Reta eganchwa ere engiya, momobekere; beka ebonyi as'ekiara kiaye, nebikoroto as'amagoro aye. 23 Nyerete eria emori ere enoru, moyenyenye, torie nakogoka: 24 ekiagera oyo omwana one konya okure, na bono obokire; konya osirire, nere ororekanire. Bagachaka gokora omogoko. 25 Nabo, oria omwana oye omonene igarenge 'mogondo: agachia gocha nagoika ang'e as'enyomba, akaigwa egeturi gi'ogotera nogotenga. 26 Akamorangeria oyomo obo bw'abasomba akamoboria, amang'ana ayio, engecho yaye inki? 27 Akamotebia, 'Momura omino ochire; na iso omonyenyeire eria emori enoru, ekiagera amonyora ore moyo ore nobogima. 28 Korende akabea, tarigia gosoa: nabo, ise agasoka akamosorora. 29 Akamoiraneria ise akamotebia, Rora, inche nagokoreire emiaka eye emenge: tinsareti ogochika kwao kero kende gionsi: korende tikwanakong'a inche emanwa y'embori, erinde ingoke amo nabasani bane: 30 korende ochia gocha omwana oo oyo, orire ebinto biao amo nabakungu abatayayi, kwamonyenyeire emori enoru. 31 Nere akamotebia, Omwana one, aye amatuko onsi igore amo nainche, nebinto bionsi inde nabirobio nchiao. 32 Naende gokora omogoko nakorora omogoko iga orenge oyoboronge: ekiagera oyo 'momura omino konya okure, nere obokire: konya osirire, nere ororekanire.
1 Naende Yesu akabatebia aborokigwa baye, Narenge omonto omonda, orenge nomorendi; oyio agasoerwa asare ng'a osiareire enibo yaye. 2 Akamorangeria, akamotebia, Ninki eke naigure asore? Orokia amang'ana oborendi bwao; ekiagera tokonyara naende koba omorendi. 3 Oria omorendi akabora as'omoyo oye, Ninki ndakore, ekiagera omonene one, ondusirie oborendi bwane? Tindi nechinguru korema; ogosaba nobosoku. 4 Natiekire komanya eke ndakore, ekero nkorusigwa as'oborendi, bandoisie chinyomba chiabo. 5 Nabo akabarangeria abasira b'omonene, ker'oyomo, akamotebia oyo bwe ritang'ani, Ninki oriete ki'omonene one? 6 Akabora, Ebirengo emia bi'amaguta. Akamotebia, Bogoria ekaratasi yao gaki, ikaransa bwango, rika emerongo etano. 7 Erio, akamotebia oyonde, Naye ninki oriete? Agateba, Ebirengo emia bi'engano. Akamotebia, Bogoria ekaratasi yao, rika emerongo etano netato. 8 Oria omonene akamotogia omorendi otari oboronge, ekiagera akorete ase chisemi: ekiagera abana b'ense eye nabana be chisemi kobua abana b'omobaso, as'ekegori kiabo abanyene. 9 Nainche nabatebirie inwe, Ekorere obosani as'enibo y'obobe: erinde, ekorigia gokea, babaroisie inwe as'ebikaranso bia kare nakare. 10 Oyore omwegeni ase keria ekere egeke, nomwegeni nase keria kere ekenene: noyo otari boronge ase keria kere egeke, nabo tari boronge ase keria kere ekenene. 11 Nabo, onye timobeti abegeni as'enibo y'obobe, ning'o oranyare kobegena koba nenibo y'ekeene? 12 Gaki onye timobeti abegeni as'ekio ki'omonto onde, ning'o oranyare kobaa ekio ekere kiaino abanyene? 13 Tari omosomba oranyare kobakorera abanene babere: ekiagera gose namogeche oyomo, nakomwancha oyonde; gose nabwatane noyomo, nakomochaya oyonde. Timokonyara komokorera Nyasaye nenibo. 14 Abafarisai abarenge abanchi enibo bakaigwa amang'ana aya onsi bakamochecheria. 15 Akabatebia, Inwe ninwe abanto bagwetogia ng'a iga more abanyene oboronge as'obosio bwa mwanyabanto; korende Nyasaye omanyire emioyo yaino: ekiagera ekeimokererete igoro ase mwanyabanto, nekegechia as'obosio bwa Nyasaye. 16 Ogochika nababani mbiarenge aroro goika Yohana: korwa ekero keria, amang'ana amaya obonda bwa Nyasaye arandigwe, na ker'omonto nabosoe ase chinguru. 17 Korende nebiango kobua igoro nense goeta, kobua enuguta eyemo y'amachiko koruao. 18 Ker'oyokomotiga omokungu oye nakomonyuoma oyonde otomanire: nere oyokomonyuoma ere oyotigirwe nomosacha oye, otomanire. 19 Narenge omonto omonda, ore kweboyia chianga chi monyinga nechi'egatani engiya orenge kwegokia kera rituko as'okoria. 20 Isiko as'egesieri kiaye narenge omotaka oyomo omosabi, erieta riaye Lazaro, orenge namaote, 21 akarengereria koigotigwa namatori akogwa korwa as'emesa y'oria omonda; goika chisese nachirochio chicha komomena amaote aye. 22 Egachia koba oria omotaka agakwa, akabogorigwa namalaika akabekwa as'egekuba ki'Ibrahimu: agakwa noria omonda boigo agatindekwa. 23 Nabo as'embera kare as'emechando, akaramokia amaiso aye, akamorora Ibrahimu ore are, na Lazaro ore egekuba kiaye. 24 Akarera, akabora, Tata Ibrahimu, onyabere, omotome Lazaro, akune amache nekiara kiaye mesia, arokendie oromeme rwane; ekiagera nachandirwe as'omorero oyo. 25 Ibrahimu akabora, Omwana one, inyora buna kwanyorete amaya ao as'obogima bwao, na Lazaro boigo akanyora amabe: korende bono ere igare aiga ogokigwe, naye ngochandekore. 26 Nakobua as'aya onsi, egati yaito intwe nainwe eora nereo yabekirwe, erinde abanto abarigerie koruaa bamboke gocha asore, tibanyara, gose baria abaragwo tibamboka gocha asetore. 27 Akabora, Nagosabire tata, omotome as'enyomba ya taia; 28 ekiagera ninde nabamura baminto batano; abatebie tibacha nabarabwo aase aiga emechando. 29 Ibrahimu akabora, Mbare na Musa nababani; babaigwere barabwo. 30 Akabora, Yaya, tata Ibrahimu: korende karagende asebare oyomo korwa as'abakure, nabaonchoke. 31 Akamotebia, bataigweti Musa nababani, naisa koimoka omonto korwa as'abakure, tibakoebererigwa banche.
1 Akabatebia aborokigwa baye, Takomocha kooroka amang'ana ay'okogocha: korende obobe nobwaye omonto oria okoyareta! 2 Iga emogwenerete oyio kobua rigena rigosia risungwe rigoti riaye arutwe enyancha ime, kobua komogocha oyomo bwaba abake. 3 Erende: oyomino karakore ebibe, mokanie; karaonchoke, mwabere. 4 Naende karakore ebibe asore ara gatano nakabere ase rituko erimo, karakoiranere ara gatano nakabere, nagoteba, Naonchokire; mwabere. 5 Abatomwa bakamotebia, Omonene, tomentere okwegena gwaito. 6 Omonene akabora, Komorabe nokwegena buna entetere ye karadali, anga mwayotebia omokenene oyio, Tegoka osimekwe 'nyancha: noro anga nobaigwete. 7 Korende ning'o asemore oyore nomosomba okorema, gose okorisia ching'ondi, oramotebie gakorigia gosoa okorua omogondo, Inchuo bwango ikaransa, orie endagera? 8 Yaya! kobua igaramotebie, Serora endagera, indie; eboyie, onkorere goika ndagere nakonywa; na nyuma norie nakonywa omonyene? 9 Inee, nkomotebiare oria omosomba mbuya ekiagera akora egiachikwa? 10 Naboigo nainwe, komorakore onsi aya mwachikirwe, teba, Intwe abasomba batagwenereti; twakorire ayagwenerete gokora. 11 Egachia koba kobare 'nchera kogenda Yerusalemu, ngoeta arenge egati ya Samaria na Galili. 12 Agachia gosoa omochie oyomo, bakaumerana nere abanto ikomi abanyene ukoma, bateneine are: 13 nabarabwo bakaaka eriogi bakobora, Yesu, Omonene, twabere, 14 Agachia kobarora, akabatebia, Genda mweorokia as'abakuani. Ekaba kobakogenda bagasibeka. 15 Oyomo obo gachia korora ng'a ogwenire, akairana akamobaka Nyasaye as'eriogi rinene; 16 akagwa maumama as'amagoro aye, okomotogia, nere n'Omosamaria. 17 Yesu akairaneria, akabora, Tari bonsi ikomi basibeka? baria kianda ng'ai bare? 18 Tibanyorekanete abakoirana komoa Nyasaye ogotogia kwaye, tatiga omogeni oyo. 19 Akamotebia, Tenena, ogende: okwegena kwao gwagokonyire, 20 Naende agachia koborigwa n'Abafarisai, Obonda bwa Nyasaye indi borache? akabairaneria, akabora, Obonda bwa Nyasaye tibori gocha as'okomongerwa: 21 gose tibakobora, Rora aiga, gose, Aria! naki obonda bwa Nyasaye iga bore ime asemore. 22 Akabatebia aborokigwa baye, amatuko nache morarengererie korora rituko erimo ri'amatuko Omwana-o-mwanyabanto korende timokorirora, 23 Naende nababatebie, Rora aria, gose Rora aiga! timoimoka korwa agwo asemore gose kobatunyana. 24 Naki buna okomesa gokomesa korwa ensemo eyemo inse as'erioba goika ensemo ende inse as'erioba; nabo Omwana-o-mwanyabanto arache koba ase rituko riaye. 25 Korende ritang'ani nagwenerete konyora ogochandwa okonge, nakwangwa nekegori eke. 26 Naende buna yabete amatuko a Nuhu, nabo erabe nas'amatuko Omwana-o-mwanyabanto, 27 Baienge koria, bakonywa, bakonyuoma, bakonyuomerigwa, goika rituko riria Nuhu asoete as'obwato, etoigo egacha, ekabasiria bonsi. 28 Naboigo buna yabete amatuko a Lut; barenge koria, nakonywa, bagotonda, bakogora, bagosimeka, bakoagacha; 29 korende ase rituko riria Lut akorua Sodomu emorero ogatwa nekebiriti korwra igoro, bikabasiria bonsi: 30 naboigo erabe ase rituko riria arache koorokigwa Omwana-o-mwanyabanto. 31 Ase rituko riria, oyore kerama igoro, nebinto biaye bire as'enyomba ime, taika abibogorie: nere oyore mogondo naboigo tairana nyuma. 32 Moinyore moka Lut. 33 Oyorarigie gokonya obogima bwaye nabosirie: oyorasirie obogima bwaye nabonyore. 34 Nabatebirie, Obotuko boria abanto babere nababe as'oborere obomo; oyomo nairwe, noyomo natigwe. 35 Abakungu babere nababe bagosia amo, oyomo nairwe, oyomo natigwe. 36 Abanto babere nababe omogondo, oyomo nairwe, oyomo natigwe. 37 Bakamoiraneria bakamotebia, Ng'ai Omonene? Akabatebia, Ase ribego rire nao chinsoti chigosangererekana.
1 Akabatebia omoreng'anio ng'a nebagwenerete komosaba Nyasaye amatuko onsi, tibakwa emioyo; 2 akabora, Narenge omogambi as'omochie gete, otasigete Nyasaye gose tare koyiera omonto: 3 naende as'omochie oyio narengeo omoboraka orenge komochiera botambe, ogoteba, Ngambera boronge as'omobisa ene. 4 Nere tancha ekero ki'amatuko atai make, nyuma agateba as'omoyo oye, Nenya inche tinsigeti Nyasaye gose tindi koyiera emonto; 5 korende ekiagera omoboraka oyo ondosirie, nimonachere boronge, tacha kondosia as'ogonchichera botambe. 6 Omonene akabora, Igwa aya omogambi otari boronge agoteba. 7 Inee! Nyasaye takobanachera boronge abachore baye abakomorera omobaso nobotuko, nere nomoremereria asebare? 8 Nabatebirie nabanachere bwango boronge. Korende Omwana-o-mwanyabanto kagocha, nanyore okwegena as'ense? 9 Yesu akabatebia omoreng'anio oyo as'abanto bare gwekaga ng'a nabanyene oboronge, bakobachaya abande bonsi: 10 Abanto babere bagatira gochia hekalu gosaba; oyomo Omofarisai, oyo kabere omorusia ebango. 11 Oria Omofarisai agatenena, agasaba iga as'omoyo oye, Nyasaye nakoiranerie ng'a mbuya mono ekiagera inche tindi buna abanto bande, abauri, abatari boronge, abatomani, gose buna oyo omurusia ebango, 12 Iga nkweng'ata ara kabere as'echuma; ndua etaisi y'okonyora kwane gwonsi. 13 Noria omorusia ebango agatenena are, tarigia nonya nkoramokia amaiso aye igoro, korende akeakaaka egekuba, akabora, Nyasaye, ondorere amabera inche omonyene ebibe. 14 Nabatebirie inwe, oyio igaigete nyomba yaye akanyora oboronge kobua oria: ekiagera oyokweimokereria igoro nairanigwe inse, nere oyokweirania inse naimokererigwe igoro. 15 Bakamoretera abana abang'are, erinde abakune: korende aborokigwa baye bachia kobarora bakabakania. 16 Korende Yesu akabarangeria bache asare, agateba, Batige abana abake bache asende, timobaisa kobatanga: naki obonda bwa Nyasaye nobwabo abanto buna aba. 17 Ekeene nabatebirie, Onde bwonsi oyotabwancheti obonda bwa Nyasaye buna omwana omoke takobosoa nonya ng'ake. 18 Nomogambi gete akamoboria, okobora, Omworokia omuya, ninki ndakore inyare konyora obogima bwa kare nakare? 19 Yesu akamotebia, Naki okondoka omuya? Tari omuya tatiga oyomo, nere Nyasaye. 20 Kwayamanyire amachiko, Totomana, Toita, Toiba, Toteba oborimo, Basike 'so na nyoko. 21 Akabora, Aya onsi nayabwatire korwa obwana bwane. 22 Yesu agachia koigwa aya, akamotebia, Ring'ana erimo ndikoremerete: bigore ebinto bionsi ore nabio, obagabere abataka, naye nobe nenibo igoro. Erio ochiche ontunyane. 23 Korende agachia koigwa amang'ana aya akaba nogoichana okonge; naki arenge omonda mono. 24 Nabo Yesu okomorigereria akabora, Nabe aakong'u abare nenibo gosoa obonda bwa Nyasaye! 25 Naki naororo engamia goeta as'ekebao gi'esindani, kobua omonda gosoa as'obonda bwa Nyasaye. 26 Nabarabwo bagachia koigwa, bakabora, Ning'o rende oranyare gokonyeka? 27 Akabora, Ayatakonyarekana ase mwanyabanto, igakonyarekana ase Nyasaye. 28 Petero akabora, Rora, intwe twatigire bionsi twagotunyire aye. 29 Akabatebia, Ekeene nabatebirie, Tari omonto otigire enyomba, gose omokungu, gose abamwabo, gose abaibori, gose abana, as'engecho y'obonda bwa Nyasaye, 30 korende nanyore kobua ara aange bono ekero eke, naende as'ense egocha obogima bwa kare nakare, 31 Erio Yesu akabaira baria ikomi nababere akabatebia, Rora, ngotiratore kogenda Yerusalemu, naende naikeranigwe amang'ana onsi ayarikeretwe Omwana-o-mwanyabanto nababani. 32 Naki nabekwe as'amaboko Ebisaku, nakorerwe echeche nagochegigwa, nagotwerwa amate: 33 naende nabamoake nechinkini, nabamoite: nerituko ria gatato naboke. 34 Nabarabwo tibainyora aya nonya ng'ake; ring'ana eri rikaba iga riabiswa asebare, gose tibayamanya ayatebetwe. 35 Agachia koba gagoika ang'e na Yeriko, narenge omouko oyomo, oikaransete ensemo y'enchera ogosaba ebiegwa: 36 agachia koigwa emeganda egoeta, akabora, inki ekio? 37 Bakamotebia, ng'a Yesu o Nazareti ogoeta. 38 Akaaka eriogi, akabora, Yesu Omwana o Daudi, onyabere. 39 Nabwo batang'aine bakamokania, akire: kerende ere akamenta mono koaka eriogi, Omwana o Daudi, onyabere. 40 Yesu agatenena, agachika aretwe asare; agachia komoika ang'e, akamoboria, 41 Ninki origetie ngokorere? Akabora, Omonene nyore okorora. 42 Yesu akamotebia, Oegwe okorora; okwegena kwao gwagokonyire. 43 Erio kegima akanyora okorora, akamotunyana, okomotogia Nyasaye: nabanto bonsi bagachia korora bakamoa Nyasaye ogotogigwa.
1 Agasoa Yeriko akaba ngeetare egati gati yaye. 2 Narora, omonto oyomo, erieta riaye ore korokwa Zakayo, omonene bw'abakorusia ebango, nere nomonda. 3 Akarigia komorora Yesu, gose 'monto ki: tanyara as'engecho y'emeganda, ekiagera arenge omweng'e. 4 Agatang'ana bwango, akarina igoro as'omoko anyare komorora, ekiagera ngoeta arenge enchera eria. 5 Na Yesu, agachia goika aase aria, akarigereria igoro, akamorora, akamotebia, Zakayo, ika bwango; naki rero ningwenerete goikaransa enyomba mwao. 6 Agaika bwango, akamoroisia as'omogoko, 7 Goika abanto bachia korora bakemurungania bonsi bakabora, ng'a osoire goikaransa as'omonto omonyene ebibe. 8 Zakayo agatenena, akamotebia Omonene, Rora Omonene, enusu y'enibo yane nabaire abataka; naende onye naurete omonto egento as'okomourereria namoiraneirie ara kane. 9 Yesu akamotebia, Rero ogotoreka gwaikire enyomba eye, ekiagera oyo nere nomwana o Ibrahimu, 10 Naki Omwana-o-mwanyabanto igachete erinde arigie egiasirete na gogekonya. 11 Nabarabwo bagachia koigwa aya, akamenta akabatebia omoreng'anio, ekiagera konya oikire ang'e na Yerusalemu, nabarabwo bagakaga ng'a obonda bwa Nyasaye iga borarorekane ekero ekio kegima. 12 Nabo akabora, Omonto oyomo, omobiare, akagenda ense y'are erinde anyare kwenyorera oboruoti nakoirana. 13 Akabarangeria ikomi as'abasomba baye, akabaa ebirengo ikomi bie chifetha, akabatebia, Bionchorerie ebi goika ekero nkoirana. 14 Abanyene ense baye bakamogecha, bagatoma abatomwa komotunya nakobora, Titorigeti omonto oyo atogambere. 15 Agachia koba kairanire, kanyorire oboruoti, agachika abasomba baria baetwe chifetha barangerigwe, erinde anyare komanya ebibanyorete ebitoki as'ogokora kwabo. 16 Oyo bw'e ritang'ani agacha akabora, Omonene, ekerengo kiao kianyorire ebirengo ikomi. 17 Akamotebia Mbuya, aye omosomba omuya, ekiagera kwabaire omwegeni as'egento kere egeke, nabo, obe nechinguru igoro as'emechie ikomi. 18 Agacha noyo kabere, akabora, Ekerengo kiao, Omonene, kianyorire ebirengo bitano. 19 Akamotebia nere boigo, Naye obe igoro as'emechie etano. 20 Agacha oyonde akabora, Omonene, rora ekerengo kiao narenge nakio ekeiga, nakegachete as'egetambaa; 21 naki nakoirogete, ekiagera aye igore omonto omokong'u: iga okobogoria otabegeti, iga okogesa eki otasimegeti. 22 Akamotebia, As'omonwa oo ninkogambie, aye omosomba omobe. Nkwamanyete ng'a inche nomonto omokong'u, nkobogoria eki ntabegeti, nakogesa eki ntasimegeti, 23 naki, rende otabegete efetha yane as'emonga, ninche ngocha anga nayenyora amo nebitoki? 24 Akabatebia abarengeo, Moure ekerengo kiaye, momoe oria oyore nebirengo ikomi. 25 Bakamotebia, Omonene, nare nebirengo ikomi. 26 Nabatebirie, Ker'oyore negento, naegwe; korende ere oyotari negento, nonya nkeria are nakio naurwe. 27 Korende baria ababisa bane batarigeti mbagambere, barete aiga mobaita as'obosio bwane. 28 Agachia gokwana amang'ana aya, agatang'ana gotira kogenda ase Yerusalemu. 29 Goika agachia goika Bethifage na Bethania ang'e negetunwa kia Emezeituni, agatoma babere as'aborokigwa baye, akabora, 30 Genda goika oria omochie mokoorokera inwe, mogosoa ime, namorore emori y'etigere esibire, etanya korinwa nomonto; nyesibore, monyerete. 31 Naende omonto karabatebia, Naki mokoyesibora? motebe iga, Omonene nayerigetie. 32 Nabo, baria batometwe bakagenda, bakarora bo buna abatebetie. 33 Naende bagachia koyesibora, emori y'etigere, abanyene bakababoria, Ninki mokoyesiborera emori y'etigere? 34 Bakabora, Omonene nayerigetie. 35 Bakayereta ase Yesu: bakara chianga chiabo igoro as'emori eria y'etigere, bakamorinia Yesu, 36 Nere gakogenda, bakara chianga chiabo 'nchera. 37 Agachia goika egetirimboko ki'egetunwa kia Emezeituni, omoganda bwonsi bw'aborokigwa baye bagachaka kogoka nakomobaka Nyasaye as'eriogi rinene, as'ebikone bionsi barorire; 38 bakabora, Osesenigwe omoruoti ogocha as'erieta ri'Omonene: omorembe igoro, nobonene bore igoro. 39 Abande as'Abafarisai abarenge as'omosangererekano bakamotebia, Omworokia, bakanie aborokigwa bao. 40 Akairaneria, akabora, Nabatebirie ng'a bagokira7 aba, amagena naake eriogi. 41 Nere agachia goika ang'e akarora omochie, akayorera, 42 akabora, Onye nomanyete ase rituko eri, ayio ayare as'omorembe! korende bono abisirwe as'amaiso aino; 43 naki amatuko nagochere, ababisa bao barakoagachere oruaki goetanana omochie oo, bagosiongororokane, nakobatanga chinsemo chionsi; 44 nabakoiyerie inse, nabana bao ime asore: tibagotigera rigena igoro ase rigena; ekiagera otamanyete engaki y'ogocherwa kwao. 45 Agasoa hekalu ime, agachaka kobasokia abakogora nabagotonda, 46 akabatebia, Nerikire, Enyomba yane nebe enyomba y'ogosaba: korende inwe mwayekorire koba ribwago ri'abaibi. 47 Akaba okworokereria kera rituko ase hekalu. Abakuani abanene nabariki nabanene b'abanto bakarigia komoita: 48 nabarabwo tibarora eri bagokora: naki abanto bonsi barenge ang'e nere, komoigwa.
1 Agachia koba rituko erimo, akaba nkoborokereriare abanto hekalu ime na korandia enchili, abakuani abanene nabariki, naende amo nabagaka, bakamoorokera; 2 bagakwana nere bakabora, Totebie: nas'ogochika ki ogokora aya? Ning'o okoete ogochika oko? 3 Akairaneria, akabatebia, Nainche nimbaborie inwe ring'ana erimo; montebie: 4 ebatiso ya Yohana, ng'ai yaruete, igoro, gose nase mwanyabanto? 5 Bagatebania barabwo ase barabwo, bakabora, Gotoratebe, Nkorua igoro; natebe, Naki motamwancheti rende? 6 Korende gatorabore, Nase mwanyabanto; abanto bonsi nabatoake amagena; naki banchire ng'a Yohana nomobani. 7 Bakairaneria bakamotebia, Titomanyeti as' eruete. 8 Yesu akabatebia, Nonya ninche tinkobatebia iftwe gose nas'ogochika ki ngokora aya. 9 Agachaka kobatebia abanto omoreng'anio oyo: Omonto agasimeka omogondo bw'emesabibu, akayuatananera abaremi, akagenda ense endeas'ekero ki'amatuko amange. 10 Naende ekero kie rigesa agatoma omosomba ase baria abaremi erinde bamoe ensemo y'amatunda emesabibu: abaremi bakamoaka, bakamosokia tari nagento, 11 Agatoma omosomba onde; bakamoaka oyio boigo, bakamosokia, bakamoseria tari nagento, 12 Agatoma naende oyo gatato, bakamoaka chingoma, bakamoseria. 13 Oria Omonene bw'omogondo bw'emesabibu akabora, Inki ndakore? Nimotome omwana one, omwanchani one: gose bakomorora ere nabamosike. 14 Korende baria abaremi, bagachia komorora, bagakora ekina barabwo ase barabwo, bakabora, Oyo nere omonyamwando: tomoite gaki. omwando onyare koba oyoito. 15 Bakamoruta isiko as'omogondo bw'emesabibu, bakamoita. Nabo oria omonene bw'omogondo bw'emesabibu naki arabakore? 16 Nache nakobasiria baria abaremi, noria omogondo bw'emesabibu nabae abande. Bagachia koigwa, bakabora, Nyasaye takora bo. 17 Akabarigereria, akabora, Engecho yaye ninki, ring'ana eri ririkire, Rigena bariangeti abaagachi, Eri riabaire rigena rinene ri'ekona? 18 Ker'omonto okogwa igoro ase rigena erio nabuna-bunekane, nere oyo riragwere narimosie. 19 Abakuani abanene nabariki bakarigia komobwata ensa eyio eyio, bakairoka abanto: ekiagera bakamanya ng'a oria omoreng'anio nabwo agoteba. 20 Bakamoboera, bagatoma abaroti, nabarabwo bagekora buna nabanyene oboronge, erinde bamobwate as'ogokwana kwaye, bamobeke as'obonene nechinguru chia gavuna. 21 Bakamoboria, bakobora, Omworokia, twamanyire ng'a iga ogokwana ayare ekeene nakoyorokereria, gose tori koiroka obonene bw'omonto, korende as'ekeene iga okworokereria enchera ya Nyasaye: 22 Inee mboronge komoa Kaisari ebango gose taribo? 23 Korende akamanya obong'ainereria bwabo, akabatebia, 24 Inyorokia eshilingi, nekiang'o ekieni eke? namariko aya? Bakabora, nebia Kaisari. 25 Akabatebia, Nabo, moe Kaisari ebia Kaisari, nebia Nyasaye moe Nyasaye. 26 Tibanyara komobwata ase ring'ana riaye as'obosio bw'abanto: bagakumia as'okoiraneria kwaye, bagakira. 27 Erio abande as'Abasadukai bakamochiera, abanto bakobora ng'a okoboka tikori; bakamoboria, 28 bakobora, Omworokia, Musa natorikerete ng'a momura omwabo omonto karakwe, nere nare nomokungu, nomonto oyio akwe atari nomwana, nagwenerete momura omwabo amoire oria omokungu, amotenenerie momura omwabo egesaku. 29 Gaki, mbarenge abamura bamwabo batano nababere: oyo bwe ritang'ani akamobogoria omokungu, agakwa atari nomwana; 30 noyo kabere; 31 goika oyo gatato akamobogoria; boigo noyo gatano nakabere tibatiga abana, bagakwa. 32 Omoerio bw'abwo bonsi oria omokungu agakwa nere. 33 Nabo as'okobokigwa, nabe mokang'o as'abwo? ekiagera baria batano nababere barenge nere. 34 Yesu akairaneria akabatebia, Abana b'ense eye iga bakonyuoma na konyuomwa: 35 korende barabwo abarache kobarwa bagwenerete konyora ense eria, nakobokigwa korwa as'amakweri, tibakonyuoma gose tibakonyuomwa: 36 naki tibakonyara gokwa naende: ekiagera iga barabe koreng'ana buna amalaika; naende nabana ba Nyasaye ekiagera nabana b'okobokigwa koria. 37 Korende ekiagera abakure bakobokigwa, Musa nere akorokereria as'egesieri as'Omote, agwo ekero akomwatora Omonene ng'a Nyasaye o Ibrahimu, naende Nyasaye o Isaaka, na Nyasaye o Yakobo. 38 Nabo, ere tari Nyasaye bw'abakure, korende Nyasaye bw'abare moyo: naki bonsi iga bare moyo asare. 39 Abande b'abariki bakairaneria bakabora, Omworokia, gwakwanire buya. 40 Naki 'monto onde taba okomoboria ring'ana nyuma as'aya. 41 Akabatebia, Naseki bagoteba ng'a Kristo nomwana o Daudi? 42 Naki Daudi omonyene igagoteba as'ebuku ya Zaburi, Omonene akamotebia Omonene one, Ikaransa okoboko kwane gw'okorio. 43 Goika mbakore ababisa bao babe inse as'amagoro ao. 44 Daudi, akamoroka Omonene, naki rende aba omwana oye? 45 Ka abanto bonsi bakomoigwa, akabatebia aborokigwa baye, 46 Erende nabariki banchete gotara beboete chianga chintambe, nagokwanigwa chichiro na goikaransa aas'aatang'ani ase chisunagogi, naase are eritang'ani as'emeyega: 47 iga bakoria chinyomba chi'ababoraka, nas'obong'ainereria basaba ogosaba ogotambe: abwo nabanyore ekina kere ekenene kobua.
1 Akaramokia amaiso aye akabarora abanto abanda bakobeka ebiegwa biabo as'esanduku y'emonga. 2 Akamorora omoboraka oyomo omotaka, okobeka ebisabwa bibere. 3 Akabora, Ekeene nabatebirie, Oyo omoboraka omotaka obekire ebinge kobua bonsi: 4 naki aba bonsi babekire korwa as'obonge bw'enibo yabo, korende oyo as'okoremerwa kwaye obekire ebinto bionsi ebiarenge nabio. 5 Ekero abanto batai bake barenge gokwana amang'ana ase hekalu, buna erosirie as'amagena amaya, nechisadaka chi'abanto, agateba, 6 Aya moroche, amatuko nache ritatigare rigena igoro ase rigena eritatagorwe. 7 Bakamoboria, bagoteba, Omworokia aya indi arabe rende? Naende ninki ekiorokererio kiaye ekero aya onsi arabe ang'e goikerana? 8 Akabora, Erende timong'aineka: naki abange nabache as'erieta riane, babore, Inche ninche, nengaki yaikire, nabo timobabwatia abwo. 9 Nainwe namoigwe amang'ana esegi nesugu, timoichanigwa: naki aya bori nache kooroka ritang'ani; korende omoerio toraba ang'e. 10 Erio akabatebia, Egesaku nakeimoke korwana negesaku, nobonda korwana nobonda: 11 nebe emetengecho emenene y'ense chinsemo nechinsemo, nenchara, nenyamokirimbi; nabe namang'ana ogoichania, nebikone ebinene bikorua igoro. 12 Korende ritang'ani as'aya onsi nabababwate nakobachanda, nababaire ase chisunagogi nechichela, namoirwe as'amasio abaruoti nabagavuna as'engecho y'erieta riane. 13 Korende aya nanyare koba 'kirori asemore. 14 Ancha gaki as'emioyo yaino, korwa bono ng'a timorengereria ritang'ani eki morairanerie: 15 naki inche nimbae omonwa nechisemi, abachandi baino tibanyara gokana gose koamererania nabio. 16 Nainwe namorugwe nababaibori baino, nabamura bamino, neamate yaino, nabasani baino; nabarabwo nabababeke abande baino as'ogoitwa. 17 Namogechwe nabanto bonsi as'engecho y'erieta riane. 18 Nonya norochugu rw'etukia y'emetwe yaino tirogosira nonya ng'ake. 19 Nas'okoremereria kwaino namochinyore chinkoro chiaino. 20 Korende, komorarore Yerusalemu oetananirwe nemeganda, erio manya ng'a ogosareka kwaye gwaikire. 21 Erio abare ase Boyahudi batamere ebitunwa; nabare egati gati yaye basoke isiko; nabare borabu tibasoa aroro. 22 Ekiagera aya namatuko egesiomba, onsi ayarigetwe anyare goikeranigwa. 23 Obobe nobwabo abare barito nabakogonkia amatuko aria! naki nebe emechando emenene igoro as'ense, nendamwamu as'abanto aba. 24 Nabarabwo nabagwe ase chinsonga chi'emioro, naboswe bairwe as'ebisaku bionsi: noro Yerusalemu notachwe n'Ebisaku, goika ebiro bi'Ebisaku biikerane. 25 Naende nabibe ebikone as'erioba nomotienyi neching'enang'eni; nas'ense nemechando as'ebisaku, nabatang'ang'e as'okoruma kw'enyancha nemerindo yaye; 26 abanto nabakwe as'okoiroka, nas'okoganya ayakoyechera ense: naki chinguru chia igoro nachinyegere. 27 Nerio nabanyare komorora Omwana-o-mwanyabanto ogocha as'amare ase chinguru nobonene obonge. 28 Ayio karachake koba, rigereria igoro; moimokererie emetwe yaino igoro; ekiagera okoboria kwaino gwaikire. 29 Akabatebia omoreng'anio; Yorore omoko nemete yonsi: 30 ekero egochaka goseboka, mwarora nakomanya as'emioyo yaino ng'a egurugura yaisire koba ang'e. 31 Nainwe naboigo komokorora ayio abaire, manya ng'a obonda bwa Nyasaye ng'ang'e bore. 32 Ekeene nabatebirie, Ekegori eke tigegoeta nonya ng'ake goika aya onsi aikeranigwe. 33 Igoro nense nabiete: korende amang'ana ane tagoeta nonya ng'ake. 34 Nabo, erigererie, emioyo yaino techa korarerwa nokoria bobe nogotinda, nokwerosia kw'obogima obo, rituko riria ribachere as'omobosokano, buna obeto: 35 naki naboigo eranyare kobachera abanto bonsi baikaransete igoro as'obosio bw'ense yonsi. 36 As'ayio renda ker'ekero, mogosaba monyare kobarwa ng'a mwagweneire gokonyerwa aya onsi ayaranyare koba, naende gotenena aase aino as'obosio bw'Omwana-o-mwanyabanto. 37 Naende kera rituko igarenge kworokereria hekalu ime, as'ekero kia mobaso; na ker'obotuko asoka, nakorara as'egetunwa gekorokwa egetunwa ki'Emezeituni, 38 abanto bonsi baka mochiera mambia chuni aria hekalu ime erinde banyare komoigwa.
1 Rigaika rituko rinene ri'emegati etabekire ememera, rikorokwa Epasaka. 2 Abakuani abanene nabariki bakarigia enchera y'okomoita, naki babairogete abanto. 3 Saitani akamosoa Yuda, okorokwa Omoisikariota, nere igarenge as'omobaro bwa baria ikomi nababere. 4 Akagenda agakwana n'Abakuani abanene nabatang'ani buna aranyare komobeka as'amaboko abo. 5 Bakagoka, bakabwatana komoa chifetha. 6 Agancha, akarigia ribaga komorua asebare emeganda etaiyo. 7 Rigaika rituko ri'emegati etabekire ememera, erio epasaka egwenerete konyenywa. 8 Agatoma Petero na Yohana, okobora, Genda motoroserie epasaka, erinde toyerie. 9 Bakamotebia, Ng'ai origetie toyerosie? 10 Akabatebia, Rora ekero mwasoire omochie, namoumerane nomonto omosacha obo gorerie enyongo y'amache; motunyane goika enyomba agosoa. 11 Naende namomotebie omonyene enyomba, Omworokia nkoborare, Ng'ai ere enyomba y'abageni, inyare koriera epasaka aroro amo naborokigwa bane? 12 Nomonto oria naborokie enyomba y'igoro enene erosirie; agwo toroserie. 13 Bakagenda bakarora buna abatebetie, bakayerosia epasaka. 14 Erio ensa egachia goika ang'e agaikaransa, nabatomwa amo nere. 15 Akabatebia, Nindengereretie mono koria epasaka eye amo nainwe, ntarachandwa: 16 naki nabatebirie, Tinkoria nonya ng'ake goika eikeranigwe as'obonda bwa Nyasaye. 17 Agakchwata egekombe, gasasimire, akabora, Bogoria eke, mwatanane inwe as'inwe: 18 naki nabatebirie, Tinkonywa korwa bono okwama kw'emesabibu goika obonda bwa Nyasaye boche. 19 Akabogoria omogati, gasasimire, akayosamunyora, akabaa, akabora, Oyo nomobere one orurue as'engecho yaino: kora iga as'okong'inyora. 20 Nakerokio egekombe nyuma as'okoria, akabora, egekombe eke nemuma enyia as'amanyinga ane, aitekire as'engecho yaino. 21 Korende rigereria, okoboko kwaye oyokondua iga kore amo nainche as'emesa. 22 Ekiagera Omwana-o-mwanyabanto nkogendare, buna yachigetwe: korende obobe nobwaye omonto oria as'engecho arurue nere! 23 Nabarabwo bagachaka koborania barabwo ase barabwo, ning'o ase barabwo oyorakore ring'ana eri. 24 Gokaba nokoamererania asebare, ning'o obarirwe koba omonene. 25 Akabatebia, abaruoti b'Ebisaku bakobagambera; naende abare nechinguru igoro yabo barokwa Abakori abaya. 26 Korende asemore inwe taibo; korende oyore omonene oino abe buna oyore omoke; nere oyogotang'ana buna omokori. 27 Inee! ning'o omonene, noyoikaransete as'endagera gose noyogokora? tari ere oyogoikaransa as'endagera? korende inche nde as'egati yaino buna omokori. 28 Nainwe ninwe mwabaire amo nainche as'ogotemwa kwane; 29 nainche nababekeire inwe obonda, buna ambekerete Tata one, 30 monyare koria nakonywa as'emesa yane as'obonda bwane; nagoikaransa as'chirogo bi'obonene, nakobigambia ebisaku ikomi nabibere bi'Isiraeli. 31 Omonene akabora, Simion, Simion, rora Saitani nabarigetie inwe, anyare kobasonga buna engano: 32 korende nagosabeire, erinde okwegena kwao tigokea: naye gogoonchoka, obabeke abamino chinguru. 33 Akamotebia, Omonene, amo naye inche iga inde ang'e kogenda echela nagokwa. 34 Akabora, Nagotebirie, Petero, etuoni tekogweya rero, ekero otarankana ara gatato ng'a tomanyeti. 35 Akabatebia, Ekero nabatomete motare nebimoya nechisaro, nebikoroto, mwaremeretwe gento? Bagateba, Yaya. 36 Akabatebia, Korende bono omonyene ekemoya akebogorie, nesaro boigo: nere oyotari nomoro, agore eganchwa yaye, atonde oyomo. 37 Naki nabatebirie, Eri riarigetwe ndigwenerete goikefanigwa asende, Oyobaretwe amo nabasaria; naki eringwenerete ndire nomoerio. 38 Bagateba, Omonene, rora, emioro ebere eye. Akabatebia, Nabo aisanire. 39 Agasoka, akagenda goika egetunwa ki'Emezeituni, buna engecho yaye yarenge; aborokigwa baye bakamotunyana. 40 Agachia goika aase aria, akabatebia, Saba, timosoa as'ogotemwa. 41 Ageatanana nabarabwo ekerengo gi'okoruta rigena; akaaka amaru inse agasaba, 42 ogoteba, Tata, koranche, onduserie egekombe eke: korende tari buna ndigetie inche, korende buna origetie aye bikoreke. 43 Rikamoorokera rilaika korwa igoro rikamobeka chinguru. 44 Nere ekiagera arenge nogoichana mono, akamenta gosaba nomokia: ebigeri biaye bikaba buna amatoima amanyinga akogwa inse. 45 Agachia koimoka korwa as'ogosaba, akabachera aborokigwa baye, akabanyora bararire as'ogoichana, 46 akabatebia, Naki mwararire? Imoka, mosabe, timonyara gosoa as'ogotemwa. 47 Nere gagokwana, rora, omoganda, nere oyokorokwa Yudas, oyomo as'ikomi nababere, otang'aine asebare, akamoika Yesu ang'e akamonyunyunta. 48 Yesu akamotebia, Yudas, kwamorure Omwana-o-mwanyabanto as'okomonyunyunta? 49 Nabarabwo abarenge amo nere bagachia korora ayakorigia koba, bakabora, Omonene natoake nomoro? 50 Oyomo obo akamoaka omosomba bw'omokuani omonene, akamonacha ogoto gw'okorio. 51 Yesu akairaneria, akabora, Tiga nkore iga. Akamokuna ogoto akamogwenia. 52 Yesu akabatebia abamocherete, abakuani abanene, nabanene be hekalu, nabagaka, Iga mwachire nemioro nechinungu buna as'omoibi. 53 Ekero narenge amo nainwe ase hekalu, kera rituko timwandamborerete amaboko: korende bono ensa eye neyaino, nobonene bw'omosunte. 54 Bakamobwata, bakamoira, bakamoreta nyomba ime as'omokuani omonene. Na Petero akamotunya korwa nyuma are, 55 Bachia gouta omorero egati y'egora, bagaikaransa amo, na Petero agaikaransa as'egati yabo. 56 Erio, omoiseke oyomo akamorora oikaransete aas'omorero ogwoka, akamobeta amaiso, akabora, Oyo nere igarenge amo nere. 57 Agakana akabora, Omokungu, timomanyeti. 58 Naende ake oyonde akamorora, akabora, Naye noyomo obo. Petero akabora, Aye omonto, tai inche. 59 Na nyuma engaki y'ensa eyemo, omonto onde akabetereria mono, akabora, Ekeene noyo igarenge amo nere: naki nere n'Omogalili. 60 Petero akabora, Aye omonto, timanyeti eriogokwana. Erio kegima kagokwana, etuoni ekagweya. 61 Omonene ageonchora, akamorigereria Petero. Petero akainyora ring'ana ri'Omonene, buna amotebetie, Ritang'ani etuoni etaragweya rero, nonkane ara gatato. 62 Agasoka isiko, akarera nobororo. 63 Nabaria abanto bamobwatete Yesu, bakamosekereria, bakamoaka. 64 Bakamomumekeria amaiso, bakamoboria, bakobora, Bana: ning'o okoaka? 65 Bakamokwana nayande amange as'okorama. 66 Bwachia gokia bagasangerereka abagaka b'abanto, nabakuani abanene, nabariki; bakamoreta as'ekegambero kiabo, bakobora, 67 Onye aye naye Kristo, totebie. Korende akabatebia, Ninsakobatchia, timokonyara gwancha: 68 nainche kondababorie timokong'iraneria. 69 Korende koiwa bono Omwana-o-mwanyabanto naikaranse okoboko gw'okorio kw'obonene bwa Nyasaye. 70 Bakabora bonsi, Nabo, aye naye Omwana o Nyasaye? Akabatebia, Inwe mwatebire ng'a ninche ere. 71 Bakabora, Nabo, inki tokorigeria birori? Naki intwe abanyene twaigure as'omonwa oye.
1 Bakaimoka bonsi, bakamoreta ase Pilato. 2 Bagachaka komosoera, bakabora, Twamororire omonto oyo oonchoire egesaku giaito, obakanirie abanto tibamoa Kaisari ebango, okobora ng'a ere omonyene nere Kristo, omoruoti. 3 Pilato akamoboria, akabora, Naye omoruoti bw'Abayahudi? Akairaneria, akamotebia, Gwatebire aye. 4 Pilato akabatebia abakuani abanene nemeganda, Inche tindochi bobe bonde as'omonto oyo. 5 Nabarabwo bakamobetereria, bakabora, Obaburugire abanto, okoborokereria ase Boyahudi onsi, agachakera Galili goika aiga. 6 Pilato agachia koigwa ring'ana eri, akaboria, Omonto oyo n'Omogalili? 7 Agachia komanya ng'a igare inse as'obogambi bwa Herode, akamoira ase Herode; nere igarenge Yerusalemu amatuko aria, 8 Na Herode agachia komorora Yesu, akagokigwa mono: naki korwa kare igarigetie komorora, ekiagera aigwete amang'ana aye; asemeretie korora egekone gegokoreka asare. 9 Akamoboria as'amang'ana amange, ere tamoiraneria rinde rionsi. 10 Bagatenena abakuani abanene nabariki, bakamosoera ase chinguru. 11 Herode nabasigari baye bakamochaya, bakamosekereria, bakamobekera chianga chingiya mono, akamoirania ase Pilato. 12 Erio Herode na Pilato bakabwatana obosani, rituko riria: naki ritang'ani iga barenge nobobisa barabwo ase barabwo. 13 Pilato akabarangeria amo abakuani abanene, nabanene b'abanto, 14 akabatebia, Mwandeteire omonto oyo, buna oyobaonchoire abanto: nainche nabo nachia komogambia as'obosio bwaino, tindochi bobe as'omonto oyo as'aria mwamosoera: 15 nonya Herode nere: naki omoiranirie asetore, rora, ring'ana tiriri rigwenerete ogokwa riakorirwe nere. 16 Erio konamoakire, nimosibore. 17 Ekiagera nebagwenerete kobasiborera oyomo ekero kie rituko rinene. 18 Bakaaka egeturi bonsi amo, bakabora, Moire oyo, tosiborere Baraba: 19 nere nomonto obegetwe as'echela as'engecho y'esugu yakoregete as'omochie ime, nas'oboiti. 20 Nabo eria kabere Pilato agakwana nabarabwo, akarigia' komosibora Yesu. 21 Nabarabwo bakaaka eriogi, bakabora, Mobambe, mobambe. 22 Nere akabatebia eria gatato, Naki? mbobe ki akorete oyo? Tindochi nonya nering'ana asare rigwenerete ogokwa: nabo konamoakire nimosibore. 23 Korende bakabetereria kobora as'eriogi rinene, bakarigia abambwe. Eriogi riabo, neria abakuani abanene rikabua. 24 Pilato akanacha amang'ana akoreke buna barigetie. 25 Akamosibora ere oyobegetwe echela as'esugu noboiti, oyobarigetie; akamorua Yesu as'okorigia kwabo. 26 Bagachia komoira, bakamobwata Omokurene Simion, orenge korwa borabu, bakamotweka omosalaba, ayobogorie nyuma yaye Yesu. 27 Ekamotunyana emeganda emenge y'abanto, nabakungu, bare kweakaaka, bakweng'ereria. 28 Yesu ageonchora, akabora, abaiseke ba Yerusalemu, timondera inche, korende erere abanyene, nabana baino. 29 Naki amatuko nache bararigie goteba, Mbare negesio abare abagomba, nechinda chitaiboreti, nechimbere chitanakogonkwa. 30 Erio nabachake kobitebia ebitunwa, Togwere; nebigoro, Totube. 31 Ekiagera kobagokora aya ekero omote ore omobese, ekero ki'oria ore omwomo naki arabe? 32 Bakairwa babere naende, abasaria baitwe amo nere. 33 Bagachia goika aas'akorokwa Ekeore, nao bamobambete, nabaria abasaria, oyomo okoboko gw'okorio, noyonde okoboko gw'okobee. 34 Yesu akabora, Tata, obabere; ekiagera tibamanyeti eke bagokora. Bakagabana chianga chiaye, bagakora obomera. 35 Abanto bagatenena, bakarigereria. Nabarabwo abanene bakamokorera echeche, bakobora, Nakonyete abande; tiga ekonye omonyene, onye oyo nere Kristo o Nyasaye, omochore oye. 36 Abasigari bakamosekereria, bakamochera, bakamoa chinkama, 37 nakobora, Onye aye naye omoruoti bw'Abayahudi, ekonye. 38 Nkiarenge nekemanyererio igoro' asare kerikire ase chinuguta chi'Ekeyunani, n'Ekerumi, n'Ekeibirania, Oyo Nere Omoruoti Bw'Abayahudi. 39 Oyomo bwa baria abasaria babambetwe akamorama, akabora, Pari aye ore Kristo? Ekonye omonyene naintwe. 40 Oyo kabere akairaneria, akamokania akabora, Tori komoiroka aye nonya Nyasaye, kore as'ekina keria keria? 41 Naintwe ekeene mboronge; naki intwe twaeirwe eng'eria ya boronge y'ogokora gwaito: korende oyo takoreti ring'ana ritagwenereti. 42 Akamotebia Yesu, ong'inyore gogocha as'obonda bwao. 43 Yesu akamotebia, Ancha nagotebirie rero, nobe amo nainche Igoro. 44 Nekero ekio chikaba chinsa isano nemo, omosunte okaba igoro as'ense yonsi goika chinsa kianda. 45 Omobaso ogakea: egetambaa gi'okonacha hekalu gegatandoka gati gati. 46 Yesu akarera as'eriogi rinene akabora, Tata, as'amaboko ao nayobekire omoika one: ochia gokwana aya agatwekamo. 47 Omotang'anibw' abasigari emia, agachia korora eriakoreka, akamotogia Nyasaye, akabora, Ekeene omonto oyo igarenge omonyene oboronge. 48 Nsende emeganda yonsi abasangererekanete korora aya bagachia korora ayakoreka, bakairana, bakweaka ebikuba. 49 Abasani baye bonsi bagatenenera are, nabarabwo abakungu bamotunyanete ere korwa Galili, bakarigereria aya. 50 Rora, narenge omonto, erieta riaye Yusufu, nere nomonto bw'ekegambero kiabo, omonto omoya, omonyene oboronge 51 (ere tanchete amang'ana abo nonya nogokora kwabo), omonyene bw'ense y'Arimathaya, omochie bw'Abayahudi, nere igaganyete obonda bwa Nyasaye: 52 omonto oyio akamochiera Pilato agasaba aegwe omobere o Yesu. 53 Akayoikia, akayotuba egetambaa ki'egatani, akayobeka as'oboina bwabachetwe as'egetare; ase'monto onde atanya kobekwa. 54 Iga riarenge rituko ri'Okweroisia, esaboto egaika ang'e. 55 Abakungu abachete amo nere korwa Galili, bagatunyana, bakaborigereria oboina, naende buna obegetwe omobere oye. 56 Bakairana bakaroisia amaguta amanukato erimisu rigiya. Nerituko ri'esabato bagatimoka buna yachigetwe.
1 Ase rituko rie ritang'ani ri'echuma, kobogokiamoka, bakagenda oboina, bakareta amanukato aria ayababegete ang'e. 2 Bakarinyora riria rigena riatigerigwe are noboina. 3 Bagasoa, tibayonyora omobere 'bw'Omonene Yesu. 4 Agachia koba ekero baichanete as'aya, rora! abanto babere mbateneine ang'e asebare, beboete chianga chikomekameka: 5 nabarabwo bagasogwa nokoiroka nagotung'ama maumama goika inse, bakabatebia, Naseki mokomorigia oyore moyo as'ebitondo? 6 Tari aa, korende obokire: Inyora buna akwanete nainwe ekero arenge Galili, 7 akabora, ng'a nemogwenerete Omwana-o-mwanyabanto abekwe as'amaboko abanto abanyene ebibe, nakobambwa, nakoboka rituko ria gatato. 8 Bakainyora amang'ana aya. 9 Bakairana korwa as'oboina, bakabatebia baria ikomi nomo nabaria abande bonsi amang'ana ayio onsi, 10 Nabwo babatebetie abatomwa amang'ana aya, Mariamu Magidalene, na Yoanna, na Mariamu ng'ina Yakobo; nabakungu bande barenge amo nabarabwo. 11 Amang'ana abo akarorekana koba ng'a naya bosa asebare; gose tibababwatera. 12 Korende Petero akaimoka, akagenda bwango as'oboina, agatung'ama, akarigereria ime,, akabirora biria ebitambaa bibekire bioka, akairana bwoye, okumetie as'aria aoroka. 13 Rituko riria babere babo nkogenda barenge omochie, erieta riaye Emmao, orenge are ase Yerusalemu ang'e chimail isano naisato. 14 Nabarabwo ngokwanabare aya onsi akorekire. 15 Egachia koba kabagokwana nakoborania, Yesu omonyene agaika ang'e akagenda amo nabarabwo. 16 Amaiso abo akamumekerigwa, tibanyara komomanya. 17 Akabatebia, 'Mang'ana ki aya mokoborania as'orogendo rwaino? naende amasio aino anyirire. 18 Akairaneria oyomo obo, erieta riaye Kiliopa, akamotebia Inee? naye bweka ore omogeni ase Yerusalemu, otamanyeti ayare ime yaye amatuko aya? 19 Akabatebia, 'Mang'ana ki? Bakamotebia, Amang'ana a Yesu Omonazareti, orenge omonto omobani omonyene chinguru as'ogokora nase ring'ana as'obosio bwa Nyasaye nabanto bonsi: 20 buna abakuani abanene nabanene baito bamoruete as'ekina ki'ogokwa, bakamobamba. 21 Naintwe iga twasemeretie ng'a ere nere oraborie Isiraeli. Goika amo naya onsi, rero nerituko ria gatato korwa ekero abete aya. 22 Naende abakungu bande b'ensemo yaito batoichanetie abarenge as'oboina mambia: 23 nekero batanyorete omobere oye, bagacha, bakabora, ng'a baorokeirwe namalaika, bakabatebia ng'a moyo are. 24 Naende abande abarenge amo naintwe bakagenda oboina, bakarora bo buna abakungu batebete: korende ere tibamorora. 25 Nere akabatebia, Inwe abariri, nabanyene emioyo emerito as'okoyancha onsi batebete ababani! 26 Tiyamogwenerete Kristo konyora emechando eye, erio asoe obonene bwaye? 27 Akachaka korwa Musa nababani bonsi akabaonchorera as'amariko onsi amang'ana are igoro asare. 28 Bakayoika omochie barenge kogenda; nere agekora buna igarigetie goeta kogenda, 29 bakamobetereria, bakabora, Ikaransa amo naintwe: ekiagera bwairire, nomobaso oerire bono. Agasoa goikaransa amo nabarabwo. 30 Ekaba gagoikaransa amo nabarabwo koragera, akabogoria omogati, akayosesenia, akayosamunyora, akabaa. 31 Akaramokigwa amaiso abo, bakamomanya; agasira tarorekana nabarabwo. 32 Bagatebania, Inee! Emioyo yaito tiyarenge gwoka ime yaito, ekero aba ngokwanare naintwe inchera, gagotoorokeria amariko? 33 Bakaimoka ensa eria eria, bakairana Yerusalemu, bakabanyora baria ikomi nomo basangererekanire, nabarabwo abarenge amo nabarabwo, 34 bakabora, Ekeene Omonene obokire, oorokeire Simion. 35 Nabarabwo bakabatebia aria 'nchera, buna amanyeka nabarabwo as'ogosamunyora omogati. 36 Ekero bagokwana igo; Yesu omonyene agatenena egati gati yabo akabatebia, Omorembe obe asemore. 37 Bagaichana, bagasogwa nobwoba, bagakaga ng'a barorire rirengari. 38 Akabatebia, Naki mogoichana? naende naki ogosiereria gwasokire korwa emioyo yaino. 39 Rora amaboko ane, namagoro ane, ng'a ninche omonyene: Mbwatabwata, morore; ekiagera rirengari tiriri nomobere namauga, buna mondoche inche inde naro. 40 Naende gakwanire aya akaborokia amaboko aye namagoro aye. 41 Nabo bakaba batarancha as'omogoko, bagakumia, akabatebia, More negento mokoria aa? 42 Bakamoa egesamunye ki'enswe giasambirwe noboke 'boke. 43 Akabibogoria, akabiria as'obosio bwabo. 44 Akabatebia, Aya naro amang'ana ane nabatebetie, rigoro narenge asemore, buna onsi agwenerete goikeranigwa ayanarikeretwe as'amachiko a Musa nas'ababani, nase Zaburi. 45 Erio akaigora obong'aini bwabo, banyare koyamanya amariko amachenu. 46 Akabatebia, Naboigo arigetwe ng'a nemogwenerete Kristo gochandwa, nakoboka rituko ria gatato; 47 nebisaku bionsi biranderigwe as'erieta riaye ogoonchoka nokofusigwe kw'ebibe gochakera Yerusalemu. 48 Nainwe nabarori b'amang'ana aya. 49 Rora, nayetomire eira ya Tata one asemore: korende ikaransa as'omochie oyo Yerusalemu, goika mobekwe chinguru chikorua igoro. 50 Akabatang'ana gochia isiko goika Bethania: akaimokia amaboko aye, akabasesenia. 51 Agachia koba nkobaseseniare, ageatanana nabarabwo, akabogorigwa gochia igoro. 52 Nabarabwo bakamosasima, bakairana Yerusalemu nomogoko omonene: 53 bakaba botambe ime ase hekalu, bakomotogia Nyasaye.
1 Omochakano ndiarengeo Ring'ana, ne Ring'ana iga riarenge amo na Nyasaye, narirorio Ring'ana iga narenge Nyasaye. 2 Oyio omochakano igarenge amo na Nyasaye. 3 Bionsi bigakoreka as'oyio; gose onye tari ere anga tigiakoregete kende gionsi egiakoregete. 4 Ime yaye nao bwarenge obogima; naborobwo obogima iga bwarenge omobaso bw'abanto. 5 Noro omobaso obarire as'omosunte, erio omosunte toyonyara. 6 Akaoroka omonto, otometwe korwa ase Nyasaye, erieta riaye Yohana. 7 Oyo igachete abe kirori erinde atebe omobaso bonsi banyare gwancha asere. 8 Oyio tarenge oria omobaso, korende igachete as'oborori bw'omobaso. 9 Norengeo omobaso bw'ekeene, okomobeka omobaso ker'omonto ogocha as'ense, 10 Nao arenge as'ense ime, ense egakorwa asere, nense tiyamomanya. 11 Agacha as'abaye, nabarabwo abare abaye tibamwancha. 12 Korende bonsi abamwanchete, akabaa okobua babe abana ba Nyasaye, nabwo barianchire erieta riaye: 13 abaiboirwe, tari as'amanyinga, gose tari as'obwanchani bw'omobere, gose tari as'obwanchani bw'omonto, korende ase Nyasaye. 14 Narirorio Ring'ana rigakoreka omobere, agaikaransa asetore, (tokaborora obonene bwaye, obonene buna obw'omwana omomoima orure ase Tata), oichire obuya nekeene. 15 Yohana akamwatora, akaaka egeturi, akabora, Oyo nere natebete amang'ana aye, ng'a Oyorache nyuma yane igare ritang'ani asende: ekiagera arenge ritang'ani asende. 16 Naende as'ogoichora kwaye intwe twensi twanyorire, obuya igoro as'obuya. 17 Ekiagera amachiko aruetwe ase Musa; obuya nekeene iga bwachete ase Yesu Kristo, 18 Omonto onde tari omororire Nyasaye kero kende gionsi; Omwana bweka ore as'egekuba kia Tata nere omoorokirie. 19 Naende obwo nabwo oborori bwaye Yohana, ekero Abayahudi batomete abakuani n'Abalawi korwa Yerusalemu bamoborie, Aye naye ng'o? 20 Nere akaorokia, takana; agateba, Inche tari nche Kristo. 21 Bakamoboria, Naki rende? Naye Elija? Akabora, Inche tari ere. Aye naye omobani oria? Akairaneria, Yaya. 22 Nabo bakamotebia, Naye ng'o, tobae okoiraneria abatotomete. Naki ogweteba? 23 Akabora, Inche neriogi ri'omonto okoaka eriogi eroro ime, Rongeyia enchera y'Omonene, buna atebete omobani Isaya, 24 Nabarabwo abatometwe baruete as'Abafarisai. 25 Bakamoboria, bakamotebia, Naki rende okobatisa, onye aye tori Kristo, gose Elija, gose omobani oria? 26 Yohana akabairaneria akabora, Inche iga nkobatisa as'amache: egati yaino otenenire oyomotamanyeti inwe. 27 Nere ogocha nyuma yane, oyorenge ritang'ani asende, gose inche tingwenereti nyesibore enuga y'egekoroto kiaye. 28 Aya iga akoregete Bethania ng'umbu ya Yorodan, nao arenge Yohana okobatisa. 29 Rituko ria kabere riaye Yohana akamorora Yesu ogocha asare, akabora, Rora, Emanwa y'Eng'ondi ya Nyasaye, oyobogoretie ebibe bi'ense! 30 Oyo nere nare goteba amang'ana aye, Ngochare omonto nyuma yane, oyore ritang'ani asende, ekiagera arenge ritang'ani asende. 31 Nainche tinamomanyete; korende aorokigwe as'Abaisiraeli, nabo as'ayio ngacha nakobatisa as'amache. 32 Yohana agakwana, akabora, Nayororire Omoika ogoika korwa igoro buna riruma, rigaikaransa igoro asare. 33 Nainche tinamomanya: korende ere oyontomete kobatisa as'amache, oyio agantchia, Ere oyoranyare korora Omoika ogoika nagoikaransa igoro asere, oyio nere okobatisa n'Omoika Omochenu. 34 Nainche narorire, naende natebire ng'a oyo n'Omwana o Nyasaye. 35 Naende rituko ria kabere riaye Yohana igarenge otene ne nababere b'aborokigwa baye. 36 Akamorigereria Yesu ogotara, akabora, Rora, Emanwa y'Eng'ondi ya Nyasaye! 37 Baria aborokigwa babere bakamoigwa ogoteba, bakamotunyana Yesu. 38 Yesu ageonchora, akabarora bakomotunyana, akabatebia, Ninki mokorigia? Bakamotebia, Rabii (ogoonchorwa kwaye, Omworokia), ng'ai omenyete? 39 Akabatebia, inchuo morore. Bagacha, bakarora aas'amenyete; bakamenya asare rituko riria: iga yarenge ang'e chinsa ikomi. 40 Anderea, momura omwabo Simon Petero, igarenge oyomo bwa baria babere bamoigwete Yohana nakomotunyana. 41 Oyo akamonyora ritang'ani Simon momura omwabo omonyene, akamotebia, Twamonyorire Masihi, (ogoonchorwa kwaye Kristo). 42 Akamoira ase Yesu. Yesu akamorigere ria, akabora, Aye Simon, omwana o Yona, norokwe Kefa (ogoonchorwa kwaye, Petero). 43 Rituko ria kabere riaye Yesu akarigia koimoka kogenda Galili, akamonyora Filipo: akamotebia, Ntunyana. 44 Nere Filipo igarenge omonto o Bethisaida, omonto bw'omochie bw'Anderea na Petero. 45 Filipo akamonyora Nathaniel, akamotebia, Twamonyorire ere oyorikeretwe na Musa as'amachiko, nababani, Yesu omwana o Yusufu, omonto o Nazareti. 46 Nathaniel akamotebia, Nakenyare egento ekiya korua Nazareti? Filipo akamotebia, Inchuo orore. 47 Yesu akamorora Nathaniel ogocha asare, agakwana asare, Rora, oyo n'Omoisiraeli ekeene ekeene, otari nobong'ainereria ime yaye. 48 Nathaniel akamotebia, Ing'ai kwamanyera? Yesu akairaneria, akamotebia, Ritang'ani Filipo atarakorangeria, ekero kwarenge inse as'omoko, nakoroche. 49 Nathaniel akamoiraneria, akamotebia, Rabii, naye Omwana o Nyasaye, naye omoruoti bw'Abaisiraeli. 50 Yesu akairaneria, akamotebia, Ekiagera nagotebia, nakoroche inse as'omoko, gwanchire? Norore amang'ana amanene kobua aya. 51 Akamotebia, Ekeene, ekeene, nagotebirie, namoyerore igoro ekoigoka, namalaika a Nyasaye akorina, agoika igoro as'Omwana-o-mwanyabanto.
1 Naende rituko ria gatato yarenge enyangi ase Kana ya Galili; na ng'ina Yesu nao arenge. 2 Yesu nere akarangerigwa amo naborokigwa baye as'enyangi. 3 Goika edivai egachia kobaremera, ng'ina Yesu akamotebia, Tibari nedivai. 4 Yesu akamotebia, Omokungu inki nde inche naye? Ensa yane teraika. 5 Ng'ina akabatebia abasomba, Rinde rionsi arabatebie, rikore. 6 Nchiarenge aroro chinsiongo isano nemo chi'amagena, chiabekire aroro as'engecho y'ogwesibia kwabo Abayahudi, ker'eyemo iga yarenge ang'e ekerengo kia chigallon emerongo ebere. 7 Yesu akabatebia, Ichoria chinsiongo namache. Bagachichoria goika igoro. 8 Akabatebia, bono taa, moirere omonene bw'omoyega. Bakaira. 9 Omonene bw'omoyega agachia koyaigwa amache akoregete koba edivai, tamanya ase yarua, (korende abasomba mbamanyete ababuchete amache), omonene bw'omoyega akamorangeria omonene bw'enyangi, 10 akamotebia, Kera omonto ritang'ani iga agochaka edivai ere engiya, goika abanto kobatiekire konywa mono, erio oreta eyetari engiya: aye kwagachire edivai engiya goika bono, 11 Oyio noro omochako bw'ebikone Yesu akorete Kana ya Galili, akaorokia obonene bwaye; aborokigwa baye bakamwancha. 12 Nyuma as'aya akagenda goika Kaperinaum, ere, na ng'ina, nabamwabo, naborokigwa baye: bakamenya aroro amatuko amake. 13 Naende epasaka y'Abayahudi iga yarenge ang'e, Yesu akarina goika Yerusalemu. 14 Akarora hekalu ime abanto barenge gotonda chiombe neching'ondi namaruma, nabanyene koonchora chifetha, baikaransete: 15 agakora orokini ase chingori, akabasokia bonsi korwa ase hekalu, neching'ondi nechiombe; agaitera chifetha chiabo abanyene goonchora chifetha,agachionchora chimesa chiabo; 16 akabatebia baria barenge gotonda amaruma, Yatigerie aya; timokora enyomba ya Tata one koba enyomba y'ebiasara. 17 Aborokigwa baye bakainyora ng'a nerikire, Risemi ri'enyomba yao riandire. 18 Nabo Abayahudi bakairaneria bakamotebia, Ngekone ki ogotworokia, ekiagera ogokora aya? 19 Yesu akairaneria, akabatebia, Yetagore hekalu eye, nainche as'amatuko atato ninyetenenie. 20 Abayahudi bakabora, Hekalu eye yaagachetwe as'engaki y'emiaka emerongo ene netano nomo, naye oyetenenie as'amatuko atato? 21 Korende ere igare kobora amang'ana ase hekalu y'omobere oye. 22 Nabo agachia kobokigwa as'amakweri aborokigwa baye bakainyora ng'a igatebete ring'ana eri, bakariancha riria ririko nariria ring'ana atebete Yesu. 23 Goika agachia kobao Yerusalemu ekero ki'epasaka ase rituko rinene, abanto abange bakariancha erieta riaye, kobarora ebikone arenge gokora. 24 Korende Yesu tegenete asebare, naki abamanyete bonsi, 25 naende ekiagera tarenge nokorigia as'abanto goteba amang'ana igoro ase mwanyabanto; naki ere omonyene amanyete ayare ime as'abanto.
1 Narenge omonto oyomo bw'Abafarisai, erieta riaye Nikodemo, omonene bw'Abayahudi: 2 oyo agacha ase Yesu botuko, akamotebia, Rabii, twamanyire ng'a nomworokia ore, kwarure ase Nyasaye: naki omonto onde tari oranyare kobikora ebikone ebi ogokora, tatiga Nyasaye abe amo nere. 3 Yesu akairaneria, akamotebia, Ekeene, ekeene, nagotebirie, Omonto ataiboiri eria kabere, takonyara koborora obonda bwa Nyasaye. 4 Nikodemo akamotebia, Naki aranyare omonto koiborwa kare omogaka? nanyare gosoa enda ya ng'ina eria kabere aiborwe? 5 Yesu akairaneria, Ekeene, ekeene, nagotebirie, Omonto ataiboiri as'amache n'Omoika, takonyara gosoa obonda bwa Nyasaye. 6 Ekeiboire as'omobere nomobere; nekeiboire as'Omoika nomoika. 7 Tokumia ekiagera nagotebia, Nogwenerete koiborwa naende. 8 Embeo iga ekogenda as'erigetie, negeturi kiaye iga ogokeigwa, korende tomanyeti as'ekorua gose as'ekogenda: naboigo na ker'omonto oiboirwe as'Omoika. 9 Nikodemo akamoiraneria, akamotebia, Naki aranyare koba aya? 10 Yesu akairaneria akamotebia, Inee! Aye nomworokia as'Isiraeli, naya toyainyoreti? 11 Ekeene, ekeene, nagotebirie, Eritomanyete nario togokwana, neri toroche twariteba; noborori bwaito timorigwancha. 12 Kerabe nkobatebia amang'ana ense, nainwe timogwancha, naki moranche, kondabatebie amang'ana a igoro? 13 Naende omonto onde tari orinire igoro, tatiga ere oyoikire korwa igoro Omwana-o-mwanyabanto ore igoro. 14 Naende buna Musa aimogetie eng'iti eroro ime, naboigo Omwana-o-mwanyabanto agwenerete aimokererigwe: 15 erinde tasira omonto onde bwonsi oyomwanchire, korende abe nobogima bwa kare nakare. 16 Naki Nyasaye ayianchete ense, goika akarua Omwana oye omomoima, erinde 'monto onde bwonsi oyomwanchire tasira, korende anyore obogima bwa kare nakare. 17 Naki Nyasaye tamotomete as'ense Omwana oye agambie ense; korende ense ekonywe nere. 18 Oyomwanchire takogambigwa; oyotancheti otiekire kogambigwa, ekiagera atariancheti erieta ria Omwana oyomo bweka o Nyasaye. 19 Neke nakio ekina, ekiagera omobaso ochire ense, abanto bagancha omosunte kobua omobaso; naki ogokora kwabo kwarenge okobe. 20 Naki kera oyogokora amabe igagechete omobaso, gose tagocha as'omobaso, ogokora kwaye tikobaisa gokanigwa. 21 Korende oyogokora ekeene igagocha as'omobaso, ogokora kwaye kororekane ng'a iga gwakorirwe ase Nyasaye. 22 Nyuma as'aya Yesu naborokigwa baye bakagenda goika ense ya Boyahudi, akabera aroro amo nabarabwo okobatisa, 23 Yohana nere igarenge kobatisa aria Ainon, ang'e na Salim, ekiagera narenge amache amange: abanto bakomochiera bakobatiswa. 24 Naki Yohana konya tarabekwa echela. 25 Nabo, gokaoroka okoamererania as'aborokigwa ba Yohana n'Abayahudi as'amang'ana ogwesibia. 26 Bakamochiera Yohana, bakamotebia, Rabii, ere oyorenge amo naye ng'umbu ya Yorodan, oyio kwaorogetie aye, oyio nere nkobatisare, nabanto bonsi nkomochierabare. 27 Yohana akairaneria, akabora, Takonyara omonto konyora ring'ana rinde rionsi tatiga aegwe korwa igoro. 28 Inwe abanyene mwabaire kirori ng'a natebete, Inche tari Kristo, korende natomirwe gotang'ana asare. 29 Oyore nere omoriakari bw'enyangi nere omonene, korende omosani oye bw'omonene bw'enyangi iga agotenena nakomoigwa, origokera eriogi riaye omonene bw'enyangi: nabo oyo omogoko one oikeranire. 30 Ere nagwenerete amenteke, korende inche nkee. 31 Oyochire korwa igoro oyio igare igoro as'onsi: oyore bw'ense, noyo bw'ense, iga agokwana amang'ana ense: ere oyochire korwa igoro oyio igare igoro as'onsi. 32 Ayaroche nakoyaigwa, naro abereire kirori: gose onde tari oyobwanchire oborori bwaye. 33 Oyobwanchire oborori bwaye obekire ekemanyererio kiaye ng'a Nyasaye nekeene, 34 Naki ere oyotometwe na Nyasaye igakoyakwana amang'ana a Nyasaye: naki Nyasaye tari komoa Omoika as'ekerengo. 35 Tata omwanchire Omwana, omoeire bionsi as'amaboko aye. 36 Oyoramwanche Omwana nare nobogima bwa kare nakare; noyotamoigwereti Omwana takorora obogima, korende nendamwainu ya Nyasaye eramoikaransere.
1 Nabo Omonene agachia komanya ng'a Abafarisai baigure ng'a Yesu okorire aborokigwa abange kobua Yohana, nakobatisa, 2 (Yesu omonyene tare kobatisa, korende naborokigwa baye), 3 akarua Boyahudi akagenda Galili eria kabere. 4 Naende nagwenerete goeta gati ya Samaria. 5 Nabo agaika omochie o Samaria, okorokwa Sukar, ang'e nomogondo oria Yakobo amoete Yusufu omwana oye: 6 naende agwo yarenge ensoko ya Yakobo. Nabo Yesu, konya orosire as'orogendo rwaye, agaikaransa iga as'ensoko. Konya yabaire ang'e chinsa isano nemo. 7 Agacha omokungu o Samaria kobucha amache: Yesu akamotebia, Ing'a amache inywe. 8 Naki aborokigwa baye konya bachire omochie kogora endagera. 9 Nabo oria omokungu bw'Abasamaria akamotebia, Naki yaba aye Omoyahudi korigia amache asende, nainche nomokungu bw'Abasamaria? (naki Abayahudi tibari gosanga n'Abasamaria.) 10 Yesu akairaneria akamotebia, Onye nkwamanya ekeegwa kia Nyasaye, nere ng'o okogotebia, Ing'a amache inywe; anga nkwamosaba ere, nere anga nakoa amache are moyo. 11 Oria omokungu akamotebia, Omonene, tori negento gi'okobuchera nensoko yachire inse mono: ng'ai kwayanyorire amache aya are moyo? 12 Inee! aye nomonene kobua tata oito Yakobo, oyotoete ensoko eye, nere omonyene akanywa amache aya, nabana baye bonsi netugo yaye? 13 Yesu akairaneria, akamotebia, Ker'oyokonywa amache aya narore erang'o naende: 14 korende onde bwonsi oyoranywe amache aria ndamoe inche, takoigwa erang'o kare nakare; korende amache aria ndanyare komoa nabe ime yaye ensoko y'amache, agosoka goika obogima bwa kare nakare. 15 Omokungu oria akamotebia, Omonene, ing'a amache ayio tindora erang'o, gose timbaisa gocha aiga kobucha. 16 Yesu akamotebia, Genda, omorangerie omosacha oo oche nere aiga. 17 Omokungu oria akairaneria akamotebia, tindi nomosacha. Yesu akamotebia, gwakwanire buya, tindi nomosacha: 18 naki kwabaire nabasacha batano; nere oyore nere bono tari omosacha oo: as'ayio gwakwanire ekeene. 19 Omokungu oria akamotebia, Omonene, narorire ng'a nomobani ore. 20 Abatata baito iga barenge gosasima as'egetunwa eke; nainwe iga mogoteba ng'a Yerusalemu naase atogwenerete togosasimera. 21 Yesu akamotebia, Aye omokungu, inyancha, ensa neche, motpmosasime Tata as'egetunwa eke, nonya nase Yerusalemu. 22 Inwe iga mogosasima eki motamanyeti: intwe iga togosasima ekitemanyete: naki ogotoreka gokorua as'Abayahudi. 23 Korende ensa neche, nabono nere, abare nogosaba kw'ekeene nabamosasime Tata as'omoika nekeene: naki Tata iga akobarigia abanto buna abwo bamosasime. 24 Nyasaye n'Omoika, nabwo bakomosasima nebagwenerete komosasima as'omoika nekeene. 25 Omokungu oria akamotebia, Namanyire ng'a ngochare Masihi (okorokwa Kristo): karache ere, natoorokerie onsi. 26 Yesu akamotebia, Inche ngokwana naye, nere. 27 Erio bagacha aborokigwa baye bagakumia ekiagera arenge gokwana nomokungu; korende onde tarenge kobora, Inki okorigia? gose, Naki ogokwana nere? 28 Nabo oria omokungu akayetiga enyongo yaye, akagenda omochie ka, akabatebia abanto, 29 Inchuo, morore omonto ontebirie amang'ana onsi ayanakorire: Inee! oyio tari ere Kristo? 30 Bakaimoka korwa omochie bakamochiera. 31 Agwo nyuma aborokigwa bakamosorora bakabora, Rabii, ragera. 32 Akabatebia, Inche ninde nendagera motayemanyeti inwe. 33 Aborokigwa baye bakaborania, Inee? nomonto omoretera endagera? 34 Yesu akabatebia, Endagera yane ney'ogokora obwanchani bwaye oyontomete, nagokora emeremo yaye. 35 Timori goteba inwe, Yatigaire emetienyi ene, erio riche rigesa? Nainche nabatebirie, Ramokia amaiso aino moyerigererie emegondo, ng'a yatiekire koba emerabu ang'e ase rigesa. 36 Oyo okogesa nkonyorare eng'eria, nagosangereria amatunda as'obogima bwa kare nakare; erinde ere oyogosimeka nere oyokogesa bagoke amo. 37 Naki ring'ana riria, Oyomo osimeka, oyonde ogesa, iga rire ekeene. 38 Inche nabatomete moyagese ayamotechandereti; abande bakorire emeremo, nainwe mwasoire as'emeremo yabo. 39 Naende as'omochie oria Abasaniaria abange bagancha as'engecho y'amang'ana ay'oria omokungu, atebete ng'a, Nantebia amang'ana onsi ayanakorire. 40 Nabo ekero baria Abasamaria bachia komochiera, bakamosorora aikaranse amo nabarabwo: agaikaransa aroro amatuko abere. 41 Abanto abange kobua bagancha as'engecho ye ring'ana riaye; 42 bakamotebia omokungu oria, Bono twanchire, tari ekiagera as'amang'ana ao: naki twaigure abanyene, naende twamanyire ekeene ng'a oyo n'Omekonyi bw'ense. 43 Nyuma as'amatuko ayio abere akaimoka korwa agwo, akagenda Galili. 44 Naki Yesu omonyene atebete, ng'a omobani tari nogosikwa as'ense yaye omonyene. 45 Nabo ekero achia goika Galili bakamwancha, ekiagera baroche amang'ana onsi ayakorete Yerusalemu ekero kie rituko rinene: naki nabarabwo bagenderete rituko rinene. 46 Agaika naende Kana ya Galili, agwo akorete amache akaba edivai. Naende yarenge esagini eyemo, yarenge nomwana omorwaire Kaperinaum. 47 Oyio agachia koigwa ng'a Yesu ochire korwa Boyahudi goika Galili, akamochiera, akamosorora achiche amokonye omwana oye; ekiagera konya oisire gokwa. 48 Nabo Yesu akamotebia, Motarochi ebikone namakumigwa timogwancha nonya ng'ake. 49 Oria esagini akamotebia, Omonene, ika ritang'ani atarakwa omwana one. 50 Yesu akamotebia, Bwatia enchera yao: omwana oo moy'are. Omonto oria akariancha riria ring'ana atebetigwe na Yesu, akabwatia enchera. 51 Goika agachia koba ogoika, abasomba baye bagacha komorotota, bakamotebia, bakabora, Omwana oo moy'are. 52 Erio akababoria amang'ana ensa achagete koba buya. Bakamotebia, Igoro, chinsa isano naibere, esosera yamotigete. 53 Erio ise akainyora ng'a nensa eria eria atebetigwe na Yesu, Omwana oo moy'are: agancha ere, nenyomba yaye yonsi. 54 Neke negekone gia kabere akorete Yesu korwa ekero aruete Boyahudi kogenda Galili.
1 Nyuma as'aya ndiarenge rituko rinene ri'Abayahudi; Yesu agatira kogenda Yerusalemu. 2 Naende aria Yerusalemu as'egesieri kie ching'ondi ndiarenge ritibo rikorokwa as'Ekeibirania Bethesaida, narirorio mbiarengeo ebisoero bitano. 3 Ime as'ebio mbarenge abanto abange abarwaire bakorara, emeuko, chirema, ab'ebimo biabo biomire, baganyete amache aseroke. 4 Naki ekero gete rilaika ngoika riarenge riasoa ase riria ritibo, koyaturubania amache: nabo ere oyore gosoa ritang'ani nyuma as'amache agoturubanigwa, igare kogwena oborwaire bwonsi obwamonyorete. 5 Narenge aroro omonto gete oyorenge noborwaire bw'emiaka emerongo etato netano netato. 6 Yesu agachia komorora oyio oraire, akamanya ng'a obaire engecho eye amatuko amange, akamotebia, Norigetie koba omogima? 7 Oria omorwaire akamoiraneria, Omonene, tindi nomonto okombeka ritibo ime, amache gagoturubanigwa: korende ekero ngochicha inche, omonto onde osoa ritang'ani asende. 8 Yesu akamotebia, Tenena, etweke egesero kiao, ogende. 9 Erio kegima omonto oria akaba omogima, agetweka egesero kiaye, akagenda. Nabo yarenge esabato rituko riria. 10 Abayahudi bakamotebia oria okonyetwe, Rero nesnbato, tari boronge asore gwetweka egesero kiao. 11 Akabairaneria, Ere oyonkora koba omogima nere ontebia, Etweke egesero kiao, ogende. 12 Bakamoboria, Oria ogotebia, Etweke egesero kiao ogende, ning'o? 13 Korende oria ogwenetigwe tamomanyete gose ning'o: naki Yesu erusananetie, ekiagera barenge abanto abange aas'aria. 14 Nyuma as'aya Yesu akamonyora hekalu itne, akamotebia, Rora, kwabaire omogima: tokora ebibe naende, ring'ana rire ribe kobua tiricha gokonyora. 15 Oria omonto akagenda, akabatebia Abayahudi amang'ana ng'a Yesu nere onkorete nkaba omogima. 16 As'ayio Abayahudi bagachaka komochanda Yesu, bakarigia komoita, ekiagera akora aya rituko ri'esabato. 17 Yesu akabairaneria, Tata one ngokorare emeremo nonya ngoika bono, nainche ngokorande emeremo. 18 Nabo ekiagera as'aya Abayahudi bakamenta korigia komoita, ekiagera atasareti esabato yoka, korende amo naya namorogete Nyasaye Tata oye, ogwekora koreng'ana buna Nyasaye. 19 Yesu akairaneria, akabatebia, Ekeene, ekeene, nabatebirie, Omwana takonyara gokora ring'ana ere bweka, tatiga riria amororire Tata agokora: naki onsi agokora ere ayio naio n'Omwana agokora, 20 Naki Tata amwanchire Omwana, okomworokia onsi ayagokora omonyene: nemeremo emenene kobua eyeiga namworokie erinde inwe monyare gokumia. 21 Naki buna Tata akobibokia ebitondo nakobia obogima, naboigo n'Omwana akobaa obogima abarigetie. 22 Ekiagera Tata tari komogambia omonto onde bwonsi, korende omoire Omwana okogamba gwonsi; 23 erinde bonsi bamosike Omwana, buna bamosigete Tata. Oyotamosigeti Omwana tamosigeti Tata omotomete, 24 Ekeene, ekeene, nabatebirie, oyokoigwa ring'ana riane, nakomwancha ere oyontomete nare nobogima bwa kare nakare, gose tagoika as'ekina, korende oetire korwa as'amakweri goika as'obogima. 25 Ekeene, ekeene, nabatebirie, Ensa ngochere, nabono nere, ebitondo biraigwe eriogi ri'Omwana o Nyasaye; nabaria bakorigwa nababe moyo. 26 Naki buna Tata are nobogima ime yaye omonyene; naboigo omoeire n'Omwana koba nobogima ime yaye omonyene: 27 akamoa okobua kw'ogokora ekina ekiagera ere n'Omwana-o-mwanyabanto. 28 Timokumia as'aya: naki ensa ngochere, ekero abanto bonsi bare ase chimbera ime baraigwe eriogi riaye, 29 nabarabwo nabasoke; baria abare gokora amaya as'okobokigwa kw'obogima; nabaria abakorire amabe as'okobokigwa gw'ekina. 30 Inche omonyene tinkonyara gokora kende gionsi: buna nkoigwa, nabo nkogamba: nekina kiane iga kere boronge; ekiagera tindi koborigia obwanchani bwane, korende nobwanchani bwaye Tata oyontomete. 31 Inche kondetebe omonyene, ogoteba kwane tari okw'ekeene. 32 Nare oyonde oyokombera kirori; nainche namanyire ng'a oborori bwaye agonteba nobw'ekeene, 33 Inwe mwatomete abanto ase Yohana, noborori bwaye nekeene. 34 Korende inche tindi konyora oborori korwa as'abanto: korende iga ngokwana aya erinde inwe mokonyeke. 35 Ere igarenge etaya egwoka nakomoreka: nainwe mwanchire koyosasokera omobaso oye ekero egeke. 36 Korende oborori nde naborobwo nobonene, kobua boria bwa Yohana: naki emeremo eria naetwe na Tata inyekore, emeremo eyio eyio nayekorire, yambereire kirori ng'a Tata nere ontomete. 37 Nere Tata ontomete obaire kirori asende. Eriogi riaye timwanya korigwa kero kende gionsi, gose ekieni kiaye timorakerora; 38 naende ring'ana riaye timori narirorio ime yaino: naki inwe timwancheti ere oyotomirwe nere. 39 Iga mokorigiarigia mono amariko, ekiagera mokagete ng'a inwe more nobogima bwa kare nakare ime yaye, nayio naro are kirori asende; 40 ko mwangire gocha asende, monyare koba nobogima. 41 Tindi konyora obonene as'abanto. 42 Korende nabsmanyire inwe ng'a timori nobwanchani bwa Nyasaye ime yaino. 43 Inche nachire as'erieta ria Tata one nainwe timori konyancha: oyonde karache as'eiieta riaye omonyene, namomwanche oyio. 44 Naki moranyare gwancha inwe abamokoenana obonene inwe as'inwe, nobonene boria bokorua ase Nyasaye ore bweka timori koborigia? 45 Timokaga ng'a inche nimbasoere ase Tata: nare oyokobasoera, nere Musa, oyomosemeretie inwe. 46 Naki onye mwamwanchete Musa, anga mwanyancha inche; ekiagera nere origete amang'ana ane. 47 Korende motayancheti amariko aye, naki morayanche amang'ana ane?
1 Nyuma as'aya Yesu akagenda ng'umbu y'enyancha ya Galili, nero enyancha ya Tiberia; 2 Omoganda omonene okamotunyana, ekiagera baroche ebikone abakorerete abarwaire. 3 Yesu akarina egetunwa, agaikaransa agwo amo naborokigwa baye. 4 Naende epasaka, rituko rinene ri'Abayahudi, yarenge ang'e. 5 Nabo Yesu agachia koramokia amaiso aye, akarora omoganda omonene ogocha asare, akamotebia Filipo, Ng'ai tokogora emegati, aba banyare koria? 6 Iga aborete aya erinde amoteme: naki amanyete omonyene ekiarakore. 7 Filipo akamoiraneria, Emegati ye chidinari chimia ibere tekobaisana, ker'oyomo anyore omoke bwoka. 8 Oyomo bw'aborokigwa baye, Anderea, momura omwabo Simon Petero, akamotebia, 9 Naraa omosae, oyore nemegati etano y'engano ne chinswe ibere: korende ebi inki as'abanto abange buna iga? 10 Yesu akabora, baikaransie abanto. Mbwarenge aroro obonyansi obonge aase aria. Nabo abasacha bagaikaransa, omobaro obo chilifu isano. 11 Yesu akayebogoria emegati; gasesenirie, akabagabera abaikaransete: naboigo nachiria chinswe koreng'ana buna barigetie. 12 Kobachia koigota, akabatebia aborokigwa baye, Sangereria ebisamunye biatigaire, 'gento tigesira. 13 Nabo bakabisangereria, bagaichoria ebitonga ikomi nabibere as'ebisamunye bi'emegati etano y'engano, ebiatigarete as'abwo bariete. 14 Ekero abanto baria, bachia korora egekone akorete Yesu, bakabora, oyo ekeene nomobani oria ochire as'ense. 15 Nabo Yesu, akamanya ng'a mbarigetie gocha komoira erinde bamokore omoruoti, akerusanania, akagenda naende egetunwa, ere bweka. 16 Egachia koba mogoroba, aborokigwa baye bagatirimboka gochia 'nyancha; 17 bakarina obwato ime bagachaka kwamboka enyancha kogenda Kaperinaum. Naende omosunte konya obaire, na konya Yesu tarabachichera. 18 Enyancha egachaka koimoka, as'engecho y'embeo enyinge yagusete. 19 Nabo kabang'usire obwato chimaili isato gose inye, bakamorora Yesu okogenda igoro as'enyancha, ogoika ang'e as'obwato: bakairoka. 20 Akabatebia, Ninche, timoiroka. 21 Bagancha komosoyia obwato ime: erio kegima obwato bogaika ense barenge kogenda. 22 Inkio yaye omoganda oteneine ng'umbu y'enyancha bakarora ng'a obwato bonde tibwarenge aroro, tatiga boria obomo basoete aborokigwa baye, naende ng'a Yesu tasoete as'obwato boria amo naborokigwa baye korende naborokigwa baye bagendete boka. 23 (Korende amato ande agacha korwa Tiberia ang'e naas'aria bariete emegati ekero Omonene asesenetie): 24 ekero omoganda ochia korora ng'a Yesu tari aroro, nonya naborokigwa baye, barabwo abanyene bagasoa amato ime, bakagenda Kaperinaum bakomorigia Yesu. 25 Goika bagachia komorora ng'umbu as'enyancha, bakamotebia, Rabii, indi gwachete aa? 26 Yesu akabairaneria, akabatebia, Ekeene, ekeene, nabatebirie, Iga mokondigia, tari ekiagera mwaroche ebikone, korende ekiagera mwariete eria emegati, mokaigota. 27 Timoyekorera endagera eyegosareka, korende endagera ekobao goika obogima bwa kare nakare, Omwana-o-mwanyabanto aranyare kobaa: naki oyo nere obegetwe ekemanyererio na Tata, engecho yaye, Nyasaye. 28 Nabo bakamotebia, Ninki togokora tonyare koyekora emeremo ya Nyasaye? 29 Yesu akairaneria, akabatebia, Eye nero emeremo ya Nyasaye, momwanche ere oyotomirwe nere. 30 Bakamotebia, Mbikone ki gwakorire erinde torore twanche? 'Meremo ki ogokora? 31 Abatata baito mbariete manna as'eroro ime; buna yarigetwe, Nabaete omogati korwa igoro barie. 32 Yesu akabatebia, Ekeene, ekeene, nabatebirie, Tari Musa obaete omogati oria oruete igoro; korende n'Tata one okobaa omogati bw'ekeene okorua igoro. 33 Naki omogati o Nyasaye noria ogoika korwa igoro, nakoyea ense obogima. 34 Nabo, bakamotebia, Omonene, amatuko onsi otoe omogati oyio. 35 Yesu akabatebia, Inche nomogati bw'obogima: ere oyogocha asende takoigwa enchara naende, nere oyoranyanche takoigwa erang'o nonya ng'ake. 36 Korende nabatebirie ng'a mwandorire ko timonyancheti. 37 Bonsi Omonene akong'a nabache asende; nere oyogocha asende tinkomotuguta isiko nonya ng'ake. 38 Naki ting'igeti korwa igoro erinde nkore obwanchani bwane, korende obwanchani bwaye oyontomete. 39 Naende obwanchani bwaye Tata oyontomete nabw'obo, ng'a ase bonsi ang'eire tinsiria egento nonya nekemo, korende mbabokie ase rituko ri'omoerio. 40 Nobwanchani bwaye oyontomete nabw'obo, ng'a ker'oyokomorigereria Omwana nakomwancha, nabe nobogima bwa kare nakare; ninche nimobokie ase rituko ri'omoerio. 41 Abayahudi bakamwemurunganeria, as'engecho atebete, Inche nomogati oigete korwa igoro. 42 Bakabora, Oyo tari Yesu, omwana o Yusufu, ntobamanyete ise na ng'ina? Naki akobora oyo, Naikire korwa igoro? 43 Yesu akairaneria, akabatebia, Timwemurungania inwe as'inwe. 44 Omonto onde tari oranyare gocha asende, atang'usiri na Tata oyontomete: nainche nimobokie ase rituko ri'omoerio. 45 Nerikire as'ababani, Na bonsi naborokererigwe na Nyasaye. Kera oyokoigwa nakweorokereria ase Tata, igagocha asende. 46 Tari ng'a omonto omororire Tata, tatiga ere orure ase Nyasaye, oyio nere omororire Tata. 47 Ekeene, ekeene, nabatebirie, Ere oyoranyanche inche nare nobogima bwa kare nakare. 48 Inche nomogati bw'obogima. 49 Abaiso baino mbariete manna eroro ime, naende bagakwa. 50 Oyo nomogati oikire korwa igoro, erinde omonto orayorie, tagokwa. 51 Inche nomogati bw'obogima oigete korwa igoro: omonto kararie omogati oyio, nabe moyo goika kare nakare: nomogati ndarue inche nomobere one, as'engecho y'obogima bw'ense. 52 Erio Abayahudi bakaamererania barabwo ase barabwo, bakabora, Naki omonto oyo aranyare gotoa intwe omobere oye toyorie? 53 Yesu akabatebia, Ekeene, ekeene, nabatebirie, Motayorieti omobere oye Omwana-o-mwanyabanto na koyanywa amanyinga aye, timori nobogima ime yaino. 54 Oyokoyoria omobere one nakoyanywa amanyinga ane nare nobogima bwa kare nakare: nainche nimobokie rituko ri'omoerio. 55 Naki omobere one nendagera y'ekeene, namanyinga ane nekenyugwa ki'ekeene, 56 oyokoyoria omobere one nakoyanywa amanyinga ane igagoikaransa ime asende, nainche ime yaye. 57 Buna Tata are moyo antomete, nainche inde moyo as'engecho ya Tata; koreng'ana ere oyorandie, nabe moyo as'engecho yane. 58 Oyio nomogati oikire kojwa igoro: tari buna abaiso baino bariete manna, bagakwa: oyorarie omogati oyio nabe moyo kare nakare. 59 Amang'ana aya iga ayakwanete esunagogi, kare kworokereria aria Kaperinaum. 60 Nabo abanto abange as'aborokigwa baye bagachia koigwa aya, bakabora, Ring'ana eri nerikong'u; ing'o oranyare korigwa? 61 Ko Yesu akamanya as'omoyo oye ng'a aborokigwa baye bariemurunganeirie ring'ana eri, akabatebia, Ring'ana eri ndiabagochirie? 62 Naki erabe rende, komoramorore Omwana-o-mwanyabanto okorina aria aas'arenge ritang'ani? 63 Omoika noro okobeka obogima; omobere togwenereti gento: amang'ana nabatebirie nomoika, naende nobogima. 64 Korende mbare abande as'egati yaino batancheti. Naki Yesu amanyete korwa omochakano mbarabi abatancheti naende ning'o oranyare komorua. 65 Akabora, As'engecho eye nabatebirie, ng'a omonto onde tari oranyare gocha asende, tatiga oeirwe na Tata one. 66 As'engecho y'aya abange as'aborokigwa baye bakairana nyuma, tibamotunya naende. 67 Erio Yesu akabatebia ikomi nababere, Nainwe morigetie kogenda? 68 Simon Petero akamoiraneria, Omonene! togende ase ng'o? Aye nore namang'ana obogima bwa kare nakare. 69 Naintwe twanchire, naende twamanyire ng'a aye naye Omochenu o Nyasaye. 70 Yesu akabairaneria, Inee! timbachoreti inwe ikomi nababere, noyomo oino nekerecha? 71 Iga amotebete Yudas, omwana o Simon Omoisikariota, ekiagera oyo nere oranyare komorua: nere noyomo bw'ikomi nababere.
1 Nyuma as'aya Yesu akaba ogotara ase Galili: naki tarigetie gotara ase Boyahudi, ekiagera Abayahudi iga barenge korigia komoita. 2 Naende rituko rinene ri'Abayahudi, rituko rinene ri'ebigutu, iga riarenge ang'e, 3 Abamwabo bakamotebia, Imoka korwa aiga ogende Boyahudi, aborokigwa bao nabarabwo banyare koyerora emeremo yao eyogokora. 4 Naki omonto onde tari ogokora ring'ana bobisi, naende ere omonyene narigetie komanyekana. Kogokora aya, eorokie as'ense. 5 Naki nonya nabamwabo tibamwanchete. 6 Yesu akabatebia, Tikeraika ekero kiane; korende ekero kiaino botambe nkere ang'e. 7 Ense tekonyara kobagecha inwe; korende iga ekongecha inche, ekiagera inche nkoyeteba ng'a emeremo yaye nemebe. 8 Tira inwe mogende ase rituko rinene: inche tingotira kogenda ase rituko eri; ekiagera ekero kiane tikeraika. 9 Agachia gokora kobatebia aya, agaikaransa ase Galili. 10 Goika ekero abamwabo bachia gotira, erio nere agatira kogenda ase rituko rinene, tari maiso marore korende ase bobisi. 11 Nabo Abayahudi bakamorigia ase rituko erio bakabora, Ng'ai are oyio? 12 Gokaba okwemurungania okonene as'emeganda as'engecho yaye: abande bakobora, Igare omonto omuya; nabande bakobora, Taibo, korende igagosiria emeganda. 13 Korende omonto tari omwatorete maiso marore ekiagera as'okobairoka Abayahudi. 14 Goika egachia koba gati gati ye rituko rinene Yesu agatira, agasoa hekalu ime akorokereria, 15 Abayahudi bakamokumia, bakabora, Naki amanyete obong'aini, nere tarasoma? 16 Yesu akabairaneria akabora, Okworokereria kwane tari okwane, korende nokwaye ere oyontomete. 17 Omonto karanche kobokora obwanchani bwaye, namanye amang'ana okworokereria oko, ng'a kwarure ase Nyasaye, gose ninche ngweteba omonyene. 18 Ere oyogwekwana bweka omo nyene iga akorigia obonene bwaye omonyene: korende ere oyokorigia obonene bwaye oyomotomete, oyio noyo bw'ekeene, nonya ime yaye tibori obobe. 19 Oyo obaete amachiko tari Musa? korende tari oyomo oino okorete amachiko? Naki mokorigia kong'ita? 20 Emeganda ekairaneria, ekabora, Nore nekerecha: ning'o okorigia gogoita? 21 Yesu akairaneria, akabatebia, Nakorete omoremo oyomo, nainwe mwensi mwakumirie. 22 Ekiagera as'aya Musa abaete okwaroka, (tari ng'a iga kwaruete ase Musa korende ase chisokoro chiaino); nainwe rituko ri'esabato iga mokomosara omonto. 23 Gaki onye omonto ogasarwa rituko ri'esabato, ogochika kwa Musa tigochagosareka; naki mokombea ekiagera namokora omonto koba omogima kegima rituko ri'esabato? 24 Timogamba ekina as'engecho y'ekieni, korende kora ekina kere kia boronge. 25 Erio ensemo y'abanto ba Yerusalemu bakabora, Oyo tari ere bakorigia komoita? 26 Ani! iga agokwana maiso marore gose tibari komotebia ing'ana? Bori abanene bamanyire ng'a nere Kristo? 27 Korende oyo twamanyire ase arure, korende Kristo karache, onde tari oramanye as'akorua. 28 Erio Yesu akaaka eriogi riaye ase hekalu, okworokereria, okobora, Inche mwamanyire, aase narure mwaamanyire: naende tinchicheti as'inche omonyene, tatiga ere oyontomete noyo bw'ekeene, motamomanyeti inwe. 29 Korende inche namomanyire; ekiagera narure asare, nere ontomire. 30 Gaki bakarigia komobwata: korende onde tari oramborete okoboko kwaye erinde amobwate ekiagera ensa yaye konya teraika. 31 Abanto abange as'emeganda bakamwancha; bakabora, Karachiche Kristo, inee! nakore ebikone ebinge mono kobua ebiga akorire oyo? 32 Abafarisai bakayeigwa emeganda bakwemurungania as'engecho yaye; Abafarisai nabakuani abanene bagatoma abarendi erinde bamobwate. 33 Erio Yesu akabora, nkere ekero egeke inde amo nainwe, erio ningende asare ere oyontomete. 34 Namondigie korende timokonyora; naase inde inche, timokonyara gocha. 35 Nabo Abayahudi bagatchania barabwo ase barabwo, Oyo ng'ai aragende goika intwe titonionyora? Nagende as'Ogwatananeka kw'Abayunani nakoborokereria Abayunani? 36 Ing'ana ki erio akwana, Namondigie korende timokonyora, naase inde inche, inwe timokonyara gocha? 37 Nase rituko ri'omoerio, rituko riria rinene, Yesu agatenena. agakwana neriogi, okobora, Omonto karabe nerang'o, tiga ache asende any we. 38 Oyonyanchire inche buna amariko agoteba, chindoche chi'amache obogima namorue as'enda yaye. 39 Ring'ana eri igarikwanete as'engecho y'Omoika, ekiagera baria abamwanchire nabayonyore nyuma, naki Omoika Omochenu konya torarugwa; ekiagera Yesu konya taraimokererigwa igoro. 40 Nabo abanto abange as'omoganda bagachia koigwa amang'ana ayio, bakabora, Oyo ekeene nomobani oria. 41 Abande bakabora, Oyo nere Kristo. Korende abande bakabora, Inee, Kristo iga ararue Galili? 42 Okorika tikori goteba ng'a Kristo igagocha as'okoibora gwa Daudi, naende ase Bethilehemu, agachie karia aikaransete Daudi? 43 Eriogogasoa as'emeganda ogwatananeka as'engecho yaye. 44 Ensemo yabo bakarigia komobwata; korende omonto taramborete okoboko kwaye erinde amobwate, 45 Baria abarendi bakabachiera abakuani abanene n'Abafarisai; nabarabwo bakabatebia, Naki motamoreta? 46 Baria abarendi bakairaneria, Tarakwana omonto onde bwonsi buna oyo agokwana. 47 Erio Abafarisai bakabairaneria, Inee! inwe nainwe mwang'ainekire? 48 Ning'o as'abanene bamwanchire, gose as'Abafarisai? 49 Korende emesangerereko eyio etamanyete amachiko baragererigwe. 50 Nikodemo akabatebia (noria omochierete botuko, ekiagera noyomo obo), 51 Inee! ogochika gwaito nkonacherware omonto ekina gotoramoigwa ritang'ani nakomanya eki akora? 52 Bakairaneria, bakamotebia, Naye Galili kwarua? Rigia, orore ng'a korua Galili taorogete omobani. 53 Bakagenda ker'omonto 'nyomba mwaye.
1 Korende Yesu akagenda as'egetunwa kie Emezeituni. 2 Mambia chuni agasoa naende hekalu ime, abanto bonsi bakamogendera; nere agaikaransa akaborokereria. 3 Abariki n'Abafarisai bakareta omokungu obwatetwe as'ogotomana; kabamobekire gati gati, 4 bakamotebia, Omworokia, omokungu oyo igabwatwa ogotomana, gagokora bo. 5 Nabo as'amachiko a Musa iga atochigete kobaaka amagena abanto buna abwo: gaki naki aye ogoteba? 6 Bagateba ring'ana eri bakomotema banyore enchera bakomosoera, Korende Yesu agekumba, akarika nekiara kiaye inse. 7 Nabarabwo bakamenta komoboria, akagororoka, akabatebia, Ere oyotari nebibe as'egati yaino abe oyo bwe ritang'ani komoruta rigena. 8 Agekumba naende, akarika, nekiara kiaye inse. 9 Nabarabwo, bagachia koigwa, bagasoerwa nebirengererio biabo, bagasoka oyomo oyomo bagachaka korwa as'abagaka goika as'ab'omoerio; agatigara Yesu bweka, noria omokungu oteneine gati gati. 10 Yesu akagororoka tamorora omonto tatiga oria omokungu, akamotebia, Omokungu, ng'ai bare baria abagosoeri bao? Onde tari ogokogambia? 11 Akamotebia, Onde tari, Omonene. Yesu akamotebia, Ninche tingokogambia; Genda; korende tokora ebibe naende. 12 Yesu agakwana nabarabwo naende, akabora, Inche nomobaso bw'ense: oyogontunyana takogenda as'omosunte, korende nabe omobaso bw'obogima. 13 Erio Abafarisai bakamotebia, Aye igo kwebera kirori omonyene; noborori bwao tibori obw'ekeene. 14 Yesu akairaneria akabatebia, Nonya ngwekwana inche omonyene, oborori bwane nobw'ekeene, ekiagera namanyire ase narure, nase nkogenda; korende inwe timomanyeti ase narure gose ase ngochia. 15 Inwe iga mokogamba as'engecho y'omobere; inche tindi komogambia omonto. 16 Naende ninsakogamba, okogamba kwane nokw'ekeene, naki tari inche bweka, korende inche na Tata oyontomete. 17 Naende as'amachiko aino iga arikire, ng'a oborori bw'abanto babere nobw'ekeene. 18 Inche ninche ngwekwana omonyene, nere Tata oyontomete igagoteba oborori asende. 19 Erio bakamotebia, Ng'ai are Iso? Yesu akairaneria, Inche timomanyeti, nonya Tata timomomanyeti, onye momanyete inche, anga mwamomanyire na Tata one. 20 Amang'ana aya igakwanete Yesu okworokereria ase hekalu, as'enyomba y'emonga: omonto tari omobwatete, ekiagera ensa yaye konya teraika. 21 Yesu akabatebia naende, Inche nkogendande, nainwe namondigie, namokwe as'ebibe biaino: aase nkogenda inche, inwe timokonyara gocha, 22 Abayahudi bakabora, Inee? igareite, ekiagera akobora, Aase nkogenda inche timekonyara gocha? 23 Akabatebia, Inwe naba inse; Inche noyo igoro: inwe nabe ense eye; Inche tindi oyo bw'ense eye, 24 As'ayio nabatebia ng'a namokwe as'ebibe biaino: naki motancheti ng'a inche nere, namokwe as'ebibe biaino. 25 Nabo bakamotebia, Naye ng'o? Yesu akabatebia, Ring'ana erio erio nakwanire nainwe korwa omochakano. 26 Ninde namang'ana amange ngokwana nakogamba as'engecho yaino: korende ere oyontomete noyo bw'ekeene; nainche aya naigure asare, naro ngokwana as'ense. 27 Tibainyora ekiagera abatorera Tata. 28 Erio Yesu akabatebia, Ekero mwatiekire komoimokia Omwana-o-mwanyabanto, erio namomanye ng'a inche nere, naende ng'a tindi gokora ring'ana inche omonyene, korende buna Tata anyorokereretie, nabo ngokwana. 29 Nere oyontomete iga are amo nainche; Tata tantigeti inche bweka; naki inche ngokora amatuko onsi aya akomogwenera. 30 Kagokwana aya, abange bakamwancha. 31 Nabo Yesu akabatebia Abayahudi baria bamwegenete, Komoraikaranse ase ring'ana riane, erio more aborokigwa bane b'ekeene; 32 naende namomanye ekeene, nakerokio ekeene nakebasibore. 33 Bakamoiraneria, Iga tore okoiborwa kw'Ibrahimu, na titoraba abasomba b'omonto kero kende gionsi; ko naki ogoteba, Ng'a namosiborwe? 34 Yesu akabairaneria, Ekeene ekeene; nabatebirie, ker'oyogokora ebibe, nomosomba bw'ebibe, 35 naende omosomba tari komenya 'nyomba botambe, korende omobiare iga akomenya amatuko onsi. 36 Gaki Omwana karabasibore namobe abasibore ekeene, ekeene. 37 Namanyire ng'a iga more okoiborwa kwa Ibrahimu; korende iga mokorigia kong'ita ekiagera ring'ana riane tiriri ime as'emioyo yaino. 38 Aya narorire ase Tata naro ngokwana: nainwe naboigo ayamwarorire as'iso oino, naro mogokora. 39 Bakairaneria, bakamotebia, Tata oito nere Ibrahimu. Yesu akabatebia, Onye mwarenge abana ba Ibrahimu, anga mwakora emeremo yaye Ibrahimu. 40 Korende bono morigetie kong'ita, omonto oyobatebirie ekeene keria naigure ase Nyasaye; Ibrahimu takorete iga. 41 Inwe iga mokoyekora emeremo y'iso oino. Bakamotebia, Intwe titoiboiri as'ogosaria; iga tore na tata oyomo, nere Nyasaye. 42 Yesu akabatebia, Onye Nyasaye narenge iso oino, anga mwanyanchete inche: naki narure ase Nyasaye naende nachire; gose tinchicheti as'inche omonyene korende nere ontomire. 43 Naki motainyoreti amang'ana ane aya ngokwana? Nekiagera motakonyara korigwa ring'ana riane. 44 Inwe nab'iso oino saitani, nokorengereria kw'iso oino nakwo mwanchete gokora. Ere igarenge omoiti korwa omochakano, gose tatenenete as'ekeene, ekiagera ekeene tikeri ime yaye. Kagokwana oborimo, igagokwana ayare aya ye omonyene: naki are omonyaborimo, naise bw'obwo. 45 Nainche, ekiagera ngokwana ekeene, timori konyegena. 46 Ning'o oino ogonteba ng'a ninde nebibe? Kongokwana ekeene naki inwe motakonyegena? 47 Oyore o Nyasaye iga akoyaigwa amang'ana a Nyasaye: as'ayio inwe timori koigwa, ekiagera inwe timori aba Nyasaye. 48 Abayahudi bakairaneria bakamotebia, Titori gokwana buya intwe: ng'a aye igore Omosamaria, naende nore nekerecha? 49 Yesu akairaneria, Inche tindi nekerecha; korende iga nasigete Tata one, nainwe timonsigeti. 50 Nainche tindikoborigia obonene bwane: nare oyokorigia nakogamba. 51 Ekeene, ekeene, nabatebirie, Omonto kararibwate ring'ana riane, takorora amakweri nonya ng'ake. 52 Nabo Abayahudi bakamotebia, Bono twamanyire ng'a nore nekerecha. Ibrahimu okure, nababani; naye igogoteba, Omonto kararibwate ring'ana riane, takoigwa amakweri nonya ng'ake. 53 Aye nomonene kobua tata oito Ibrahimu, nere okure? Naende nababani bakure: naye bwekora obe ng'o? 54 Yesu akairaneria, Kondebake inche omonyene, obonene bwane tari gento: oyokombaka n'Tata one; mokobora inwe ng'a Nyasaye oino; 55 nainwe timomomanyeti; korende inche namomanyire; kondatebe ng'a timomanyeti nimbe omorimo buna inwe: korende namomanyire naende ring'ana riaye naribwatire. 56 Ibrahimu iso oino igagogete anyare korirora rituko riane; akarora akagoka. 57 Abayahudi bakamotebia, Otaraba nemiaka emerongo etano, n'Ibrahimu kwamororire? 58 Yesu akabatebia, Ekeene, ekeene, nabatebirie, Ritang'ani Ibrahimu ataraba, Inche nao nare. 59 Erio bakabogoria amagena bamorute: korende Yesu akebisa agasoka korwa ase hekalu ime.
1 Agachia goeta akamorora omonto, omouko korwa okoiborwa kwaye. 2 Aborokigwa baye bakamoboria, bakobora, Rabii, ning'o okorete ebibe, nomonto oyo, gose nabamoibori baye, goika akaiborwa omouko? 3 Yesu akairaneria, oyo takorete ebibe nonya nabamoibori baye; korende nemeremo ya Nyasaye eorokigwe asare. 4 Nengwenerete inyekore emeremo yaye oyontomete ekero ore omobaso: obotuko ngochabore, atanyare omonto gokora emeremo. 5 Ekero inde as'ense, inche nomobaso bw'ense. 6 Agachia gokora gokwana aya, agatwa amate inse, agakora etintira as'aria amate, akamoaka omouko amaiso as'etintira eria, 7 akamotebia, Genda bwesibie ase ritibo ria Siloam (ogoonchorwa kwaye, Oyotomirwe). Erio akagenda agesibia, akairana, okorora. 8 Nabo abagisangio baye, nabaria abamoroche kare ekero arenge omouko, bakabora, Inee! oyo tari ere oria orenge gosaba, oikaransete? 9 Abande bakabora, Nere: abande bakabora, Yaya, igagwekaine nere. Ere omonyene akabora, Ninche ere. 10 Nabo bakamotebia, Amaiso ao naki aramokigwa? 11 Ere akairaneria, akabora, Omonto okorokwa Yesu okorete etintira, akang'aka amaiso ane, agantebia, Genda goika ritibo ria Siloam, bwesibie; nabo nkagenda ngesibia, nkanyora okorora. 12 Bakamotebia, Ng'ai are oyio? Akabora, Timanyeti. 13 Bakamoira oria orenge omouko ritang'ani as'Abafarisai. 14 Bono iga riarenge rituko ri'esabato ekero Yesu akorete etintira nakomoramokia amaiso. 15 Erio Abafarisai nabarabwo bakamoboria naende buna anyorete okorora. Akabatebia, Iga abeka etintira igoro as'amaiso ane, ngesibia, na bono narorire. 16 Erio abande b'Abafarisai bakabora, Omonto oyo taruete ase Nyasaye, ekiagera tayebwateti esabato. Abande bakabora, naki aranyare omonto omonyene ebibe gokora ebikone buna ebi? Gokaba ogwatananeka egati yabo. 17 Gaki bakamotebia oria omouko eria kabere, Aye naki okobora asare, ekiagera, akoramokia amaiso? Akabora, Igare omobani. 18 Erio Abayahudi tibancha amang'ana aye ng'a igarenge omouko, naende anyarete korora, goika bakabarangeria abamoibori baye oria onyorete okorora, 19 bakababoria, bakabora, Oyo nere omwana oino mogoteba ng'a iga aiboretwe omouko? Naki akora orora bono? 20 Abamoibori baye bakairaneria, bakabora, Twamanyire ng'a oyio nomwana oito, naende ng'a iga aiboretwe omouko: 21 korende buna arora bono, titomanyeti; gose ning'o omoramokia amaiso titomanyeti: ere nomonto omogima, moborie omonyene, nekwanere. 22 Abamoibori baye iga bakwanete 'aya as'okoiroka Abayahudi: naki Abayahudi konya babwatanire ng'a omonto oramoorokie ng'a nere Kristo, aserigwe korwa as'esunagogi. 23 Nero engecho yagerete abamoibori baye bakabora, Ere nomonto omogima, moborie. 24 Erio eria kabere bakamorangeria omonto oria orenge omouko, bakamotebia, Moe Nyasaye obonene: intwe twamanyire ng'a omonto oyio nomonyene ebibe, 25 Erio oria akairaneria akabora, Onye ere nomonyene ebibe timanyeti: namanyire ring'ana erimo, inche iga narenge omouko, korende bono narorire. 26 Bakamotebia naende, Naki agokorerete? Naki akoramogetie amaiso? 27 Akabairaneria, natiekire kobatebia, ko timoigweti: naki morigetie koigwa eria kabere? Inwe nainwe morigetie koba aborokigwa baye? 28 Erio bakamorama, bakabora, Naye omworokigwa oye; korende intwe iga tore aborokigwa ba Musa. 29 Intwe twamanyire ng'a Nyasaye igare gokwana ase Musa: korende as'oyo titomanyeti as'arure. 30 Oria omonto akairaneria akabatebia, Ring'ana eri nerio ogokumia, ng'a inwe timomanyeti as'arure, nere ondamokirie amaiso. 31 Twamanyire ng'a Nyasaye tari kobaigwa abanyene ebibe: korende omonto karabe omosasimi Nyasaye, nagokora obwanchani bwaye, oyio nere akoigwa. 32 Korwa omochakano teraigugwa ng'a omonto oyaramokirie amaiso omouko oiboretwe engecho eye. 33 Onye oyo taruete ase Nyasaye, anga takonyara gokora gento. 34 Bakairaneria, bakamotebia, Aye iga kwaiboretwe as'ebibe bioka, naye ngotworokereriore intwe? Bakamosokia isiko. 35 Yesu akaigwa ng'a bamosokirie isiko; akamorora, akabora, Aye kwegenire Omwana o Nyasaye? 36 Nere akairaneria, akabora, Ning'o Omonene, nyare komwegena? 37 Yesu akamotebia, Kwamororire naende nere ogokwana naye nere oyio. 38 Akabora, Nanchire Omonene; akamosasima. 39 Yesu akabora, Inche nachire ense eye as'ekina, erinde abatari korora barore; nabarabwo abakorora babe emeuko. 40 Ensemo y'Abafarisai abarenge amo nere bakaigwa aya, bakamotebia, Inee naintwe iga tore emeuko? 41 Yesu akabatebia, Onye mwarenge emeuko, anga timori nebibe: korende bono iga mogoteba, Nkororatore: gaki ebibe biaino biaikaransire.
1 Ekeene, ekeene, nabatebirie, Oyotasoeti as'egesieri ki'obueri bwe ching'ondi, korende arinere aande, oyio nomoibi naende nomouri. 2 Oyogosoa as'egesieri nomorisia bwe ching'ondi. 3 Omorendi iga akomoigorera oyo; neching'ondi iga chikomoigwa eriogi riaye: nere igagochirangeria ching'ondi chiaye as'amarieta abo, igagochiira isiko. 4 Gagochirusia isiko ching'ondi echire echiaye, igagochitang'ana; neching'ondi iga chikomotunyana: naki chiarimanyire eriogi riaye. 5 Omogeni tichikomotunyana nonya ng'ake, korende iga chiramotame; ekiagera tichirimanyeti eriogi ri'abageni. 6 Omoreng'anio oyo Yesu akabatebia; korende barabwo tibayamanyete amang'ana ayio abatebetie. 7 Erio Yesu akabatebia naende, Ekeene, ekeene, nabatebirie, Ninche egesieri gie ching'ondi. 8 Bonsi abantang'anerete nabaibi, nabauri: korende ching'ondi tichiabaigwete. 9 Ninche nde egesieri: omonto gagosoa as'inche, nakonyeke, nasoe, nasoke, nanyore oborisia, 10 Omoibi tagocha, tatiga aibe, anyenye, asarie; inche iga nachete babe nobogima, nababe naborobwo obonge. 11 Inche ninche omorisia omuya: omorisia omuya igakobeka obogima bwaye as'engecho ye ching'ondi. 12 Omonto orikire, naende tari ere omorisia, ekiagera ching'ondi tichiri chiaye, gakoyerora esese y'orosana egocha, ochitiga ching'ondi, otama: nesese y'orosana yachisakora, na gochiserebania. 13 Ere igagotama ekiagera nomonto orikire, gose tarengerereti amang'ana e ching'ondi. 14 Inche ninche omorisia omuya; nechire chiane nachimanyire, nechire chiane chiamanyire, 15 buna Tata amanyete, nainche namomanyire Tata; nobogima bwane nabobekire as'engecho ye ching'ondi. 16 Naende ching'ondi chinde mbwate, chitari chie riicho eri; nachirochio nabo engwenerete gochireta, neriogi riane nachirigwe; nachibe riicho erimo nomorisia oyomo. 17 As'ayio Tata nanyanchete, ekiagera nabekire obogima bwane, erinde inyare kobobogoria naende. 18 Tari omonto okonduseria, korende ninche nabobekire omonyene. Ninde nokobua kobobeka naende ninde nokobua kobobogoria naende. Ogochika oko iga nakonyorire ase Tata one, 19 Erio gokaba naende ogwatananeka as'Abayahudi, as'engecho y'amang'ana aya. 20 Abange babo bakabora, Nare nekerecha, naende nebarimo; naseki mokomoigwa? 21 Abande bakabora, Amang'ana aya tari ay'omento omonyene ekerecha. Inee! ekerecha nakenyare koyaramokia amaiso emeuko? 22 Ndiarenge rituko rinene ri'ogosibigwa aria Yerusalemu; nekero ki'obokendu. 23 Na Yesu igarenge gotara hekalu ime, as'egora ya Sulemani. 24 Erio Abayahudi bakamoetanana, bakamotebia, Ngoika ririri oratoichanerie emioyo yaito? Onye naye Kristo, totebie maiso marore. 25 Yesu akabairaneria, Nabatebirie, nainwe timori gwancha: emeremo eye ngokora as'erieta ria Tata one, nero ekombera kirori. 26 Korende inwe timori gwancha ekiagera timori ase ching'ondi chiane. 27 ching'ondi chiane iga chikorigwa eriogi riane, nainche nachimanyire, nachirochio iga chigontunya: 28 nainche nachieire obogima bwa kare nakare; na chirochio tichigosira nonya ng'ake, nonya nomonto tagochitaboria korwa as'okoboko kwane. 29 Tata one oching'eire nomonene kobua bonsi; nonde takonyara gochitaboria korwa as'okoboko kwa Tata. 30 Inche na Tata nobomo. 31 Erio Abayahudi bagachora amagena naende, erinde bamoake. 32 Yesu akabairaneria, Emeremo emiya emenge naborokirie eruete ase Tata; as'emeremo eyio nereri mokong'akera amagena? 33 Abayahudi bakamoiraneria bakabora, As'emeremo emiya titogokoakera amagena, korende nas'okorama; ekiagera aye, ore omonto, ogwekora omonyene ng'a naye Nyasaye. 34 Yesu akabairaneria, Tarikiri as'amachiko aino, ng'a inche natebete, Inwe iga more chinyasaye? 35 Onye obarogete baria chinyasaye abacheretwe nering'ana ria Nyasaye (namariko takonyara gosareka), 36 Inee! iga mogoteba asare, ere Tata asibetie akamotoma as'ense, Nkoramare: ekiagera nateba, Inche n'Omwana o Nyasaye? 37 Onye tindi koyekora emeremo ya Tata one timonyancha. 38 Korende kondayekore, nonya timonyancheti inche, yianche eria emeremo; monyare komanya nagwancha ng'a Tata igare ime yane, nainche ime ase Tata, 39 Bakarigia eria kabere komobwata: akarua as'amaboko abo. 40 Akagenda naende ng'umbu ya Yorodan goika aas'aria Yohana are kobatisera ritang'ani; agaikaransa agwo. 41 Abanto abange bakamochiera, bakabora, Yohana takorete egekone kende gionsi: korende onsi ayatebete Yohana as'omonto oyo igare ay'ekeene, 42 Abange bakamwancha agwo.
1 Nabo omonto gete narenge omorwaire, erieta riaye Lazaro o Bethania, omonto bw'omochie o Mariamu na Maritha mosubati omwabo. 2 Nere Mariamu oria omoagete Omonene amaguta, nakamotinyia amagoro aye as'etukia yaye, naki momura omwabo Lazaro igarenge omorwaire. 3 Nabo baria basubati bamwabo bagatoma omotomwa asare, bakobora, Omonene, ere oyobwanchete orwarire. 4 Yesu agachia koigwa, akabora, Oborwaire obwo tari obw'amakweri, korende nas'obonene bwaye Nyasaye, erinde Omwana o Nyasaye abakwe as'obwo. 5 Nere Yesu igamwanchete Maritha, na mosubati omwabo, na Lazaro. 6 Erio agachia koigwa ng'a nomorwaire, agaikaransa amatuko abere aas'aria arenge. 7 Erio nyuma as'aya akabatebia aborokigwa baye, Togende Boyahudi naende. 8 Baria aborokigwa bakamotebia, Rabii, moisonde Abayahudi iga barenge korigia gokoaka amagena: naye nkogendore aroro naende? 9 Yesu akairaneria, chinsa chi'omobaso tichiri ikomi naibere? Omonto karagende 'mobaso tari kogochwa, ekiagera ayoroche omobaso bw'ense eye. 10 Korende omonto karagende botuko, igakogochwa, ekiagera omobaso tori ime yaye. 11 Akayakwana aya: erio nyuma as'aya akabatebia, Lazaro omosani oito orarire; korende nkogendande inyare komotura. 12 Baria aborokigwa baye bakamotebia, Omonene, onye orarire nagwene. 13 Korende Yesu igakwanete amang'ana amakweri aye: nabarabwo bagakaga ng'a iga agokwana amang'ana okorara chitoro. 14 Erio agwo Yesu akabatebia maiso marore, Lazaro okure. 15 Nainche nagokire as'engecho yaino ekiagera ntarenge aroro, erinde monyare gwancha; korende togende asare, 16 Nabo Thomas, okorokwa Didumo akabatebia aborokigwa bamwabo, Togende naintwe, tokwe amo nere. 17 Erio agachia goika Yesu, akamonyora otiekire koba embera amatuko ane. 18 Bethania iga yarenge ang'e na Yerusalemu, orogendo rwe chimaili ibere; 19 nabanto abange as'Abayahudi bagacha ase Maritha na Mariamu, erinde babaremie as'engecho y'oyomwabo. 20 Nabo Maritha agachia koigwa ng'a Yesu ochire, akagenda komorotota: korende Mariamu igaikaransete nyomba ime. 21 Erio Maritha akamotebia Yesu, Omonene onye naa kwarenge, momura ominto anga takwete. 22 Korende nonya mbono namanyire, ng'a kende gionsi oramosabe Nyasaye, Nyasaye nakoe. 23 Yesu akamotebia, Oyomino naboke naende. 24 Maritha akamotebia, Namanyire ng'a naboke as'okobokigwa kwe rituko ri'omoerio. 25 Yesu akamotebia, Inche nokobokigwa nobogima: oyonyanchire inche, nonya ogokwa, nanyare koba moyo. 26 Naendeker'oyore moyo nakonyancha inche tagokwa nonya ng'ake. Inee! gwanchire aya? 27 Akamotebia, Ee, Omonene: Inche nanchire ng'a aye naye Kristo, Omwana o Nyasaye, oria ogocha ense. 28 Naende gakwanire aya, akagenda, akamorangeria mosubati omwabo, Mariamu, bobisi, akabora, Omworokia ochire, ngokorangeriare. 29 Nere agachia koigwa, akaimoka bwango, akamochiera. 30 (Na Yesu konya taraika omochie ime, korende igarenge aria aria aase riaumeranete na Maritha.) 31 Erio baria Abayahudi barenge amo nere nyomba ime, abakomoremia, bagachia komorora Mariamu buna aimoka bwango nagosoka, bakamotunyana, bagakaga ng'a igakogenda oboina erinde arere aroro. 32 Erio Mariamu, agachia goika aria aas'arenge Yesu, akamorora, akagwa as'amagoro aye, akamotebia, Omonene, onye naa kwarenge, anga oyominto takwete. 33 Erio Yesu agachia komorora okorera, nabaria Abayahudi bachete amo nere bakorera, agasogwa nobororo as'omoyo oye, agaichana. 34 Akabora, ng'ai mwamobekire? Bakamotebia, Omonene, nchuo orore. 35 Yesu akaiyeria amariga. 36 Erio Abayahudi bakabora, Rora buna amwanchete! 37 Korende abande bakabora, Inee! oyoyaramogetie amaiso oria omouko, tanyarete komogwenia oyo takwa? 38 Nabo Yesu oichanete naende as'omoyo oye, agaika oboina. Naborobwo iga bwarenge rikuruma, naende rigena ndiabegetwe igoro yaye. 39 Yesu akabora, Ritigerie rigena. Maritha, mosubati omwabo, oria okwete, akamotebia, Omonene, otiokire bono: naki obaire egetondo amatuko ane. 40 Yesu akamotebia, Tingotebeti ng'a koranche noborore obonene bwa Nyasaye? 41 Nabo bakarirusia riria rigena. Yesu akaramokia amaiso aye igoro, akabora, Tata, nakoiraneirie ng'a mbuya mono ekiagera okong'igwa. 42 Nainche namanyete ng'a iga okong'igwa amatuko onsi: korende as'engecho y'omoganda oyo oetanaine, ngakwana aya, banyare gwancha ng'a naye gwantomete. 43 Erio gakwanire iga, akaaka eriogi rinene, Lazaro, soka isiko. 44 Agasoka oria okwete, oboirie egetambaa amagoro namaboko; obosio bwaye boboirie egetambaa. Yesu akabatebia, Mosansore, momotige agende. 45 Nabo abange as'Abayahudi abachete ase Mariamu nakoyarora ayakorete Yesu, bakamwancha. 46 Korende abande babo bakagenda as'Abafarisai, bakabatebia ayakora Yesu. 47 Abakuani abanene n'Abafarisai bagasangerereka ritongo, bakabora, Ninki togokora, naki omonto oyo agokora ebikone ebinge. 48 Gatoramotige iga, abanto bonsi nabamwanche; n'Abarumi nabache, nabarusie aase aito negesaku giaito. 49 Omonto oyomo asebare, Kaifa, oyorenge omokuani omonene omwaka oria, akabatebia, Inwe timomanyeti kende gionsi. 50 Gose timorengerereti ng'a negwenerete omonto oyomo akwe as'engecho y'abanto aba, ng'a egesaku tigesira ekegima. 51 Naende eri takwanete as'omoyo oye omonyene, korende ekiagera arenge omokuani omonene omwaka oria, akabana ng'a Yesu nakwe as'engecho y'egesaku keria; 52 gose tari as'engecho y'egesaku keria gioka, korende amo naya abasangererie abana ba Nyasaye abatananekire babe abamo. 53 Nabo korwa rituko riria bagakora ekina banyare komoita. 54 Yesu tatarete naende ase maiso marore as'egati y'Abayahudi, korende akarua aria akagenda aase ang'e neroro, goika omochie okorokwa Efuraim; agaikaransa aroro amo naborokigwa baye. 55 Naende epasaka y'Abayahudi iga yarenge ang'e: abange bagatira korwa chinse chionsi kogenda Yerusalemu ritang'ani as'epasaka, erinde besibie. 56 Nabo bakamorigia Yesu, bagatebania barabwo ase barabwo, bagotenena ase hekalu, Naki moroche? Tagocha nonya ng'ake ase rituko eri? 57 Bono abakuani n'Abafarisai bakarua ogochika ng'a omonto karamomanye aas'are, arete amang'ana, banyare komobwata.
1 Nabo Yesu amatuko atano narimo ritang'ani ri'epasaka agaika Bethania, agwo aas'arenge Lazaro, oria okwete obogetigwe nere. 2 Bakamokorera endagera aria: Maritha akamokorera; korende Lazaro igarenge oyomo ase baria baikaransete as'endagera amo nere. 3 Erio Mariamu akabogoria ekerengo ki'eratili eyemo y'amanukato, aye rigori rinene, akamoaka Yesu amagoro, akayatinyia amagoro aye netukia yaye: enyomba egaichora rimisu ri 'amaguta aria. 4 Korende Yudas Omoisikariota omwana o Simon, oyomo bw'aborokigwa baye, oyoramorue, akabora, 5 Naki amaguta aya atagorua chidinari chimia isato, nakoegwa abataka? 6 Iga akwanete aya, tari ng'a igarengereria abataka; korende nekiagera arenge omoibi, naende obwate esanduku ye chishilingi, nagochirusia echiabekire aroro. 7 Erio Yesu agateba, Motige agache aya ase rituko ri'ogotindekwa kwane, 8 Naki abataka more nabarabwo amatuko onsi amo nainwe; korende timori nainche amatuko onsi, 9 Nabo omoganda omonene bw'Abayahudi bakamanya ng'a ere nao are aria: bagacha, tari as'engecho yaye Yesu yoka, korende bamorore Lazaro, ekiagera amobogetie korwa as'ogokwa: 10 Abakuani abanene bagakora ekina bamoite Lazaro nere; 11 naki as'engecho yaye abange b'Abayahudi bakagenda, bakamwancha Yesu. 12 Rituko ria kabere abanto abange abaricherete rituko rinene, kobachia koigwa ng'a Yesu ngochare Yerusalemu, 13 bakabogoria chinsagia chi'amakendo bagasoka isiko kogenda komorotota, bakaaka eriogi, Hosana: Osesenigwe oyochire as'erieta ri'Omonene, omoruoti o Isiraeli. 14 Yesu akanyora emori y'etigeri akayerina; buna yarigetwe, 15 Toiroka, enyaroka ya Zayoni: rigereria, Omoruoti oo ochichire igaikaransete igoro as'emori y'etigere. 16 Amang'ana aya aborokigwa baye tibainyora agwo ritang'ani; korende Yesu agachia kobakwa, erio bakainyora ng'a narikeire aya naende ng'a mbamokorerete aya. 17 Nabo bakamoorokia omoganda abarenge amo nere ekero amorangeretie Lazaro korwa as'oboina ime nakomobokia. 18 As'engecho eyio omoganda okagenda komorotota, naki baigure ng'a okorire egekone eke. 19 Erio Abafarisai bagatebania barabwo ase barabwo, Mwarorire ng'a timokonyara gokora gento; ense yagendire komotunyana ere. 20 Naende mbarenge Abayunani batai bake ase barabwo abanto abatirete kogenda gosasima as'ekero kie rituko rinene; 21 barabwo abwo bakamogendera Filipo o Bethisaida o Galili, bakamoboria, bakobora, Omonene, ntorigetie komorora Yesu. 22 Filipo akagenda, akamotebia Anderea: erio Anderea na Filipo bakamotebia Yesu. 23 Yesu akairaneria, akabora, Ensa yaikire, abakwe Omwana-o-mwanyabanto. 24 Ekeene, ekeene, nabatebirie, Euyeke y'engano etagweti as'ense ekwe iga egoikaransa ero yoka; korende kerakwej iga ekwama okwama okonge. 25 Oyoranche obogima bwaye nabosirie; oyorabogeche obogima bwaye as'ense eye nabogache goika obogima bwa kare nakare. 26 Omonto karankorere, antunyane; inche asende, nao nomosomba one aranyare koba; naende omonto karankorere, Tata namosike. 27 Bono omoyo one oichanire; ninki ngokwana? Tata, onkonye nensa eye. Korende as'engecho y'ayio nayeikeire ensa eye. 28 Tata, oribake erieta riao, erio rigacha eriogi korwa igoro, rigoteba, Naribakire, nainche nandibake naende. 29 Nabo abanto batenenete ang'e bakaigwa, bakabora, ng'a kwabaire okogukura: abande bakabora, Rilaika rigokwana nere. 30 Yesu akairaneria, akabora, Eriogi eri tiribeti as'engecho yane, korende as'engecho yaino. 31 Bono ekina gi'ense eye nkere: bono omonene bw'ense eye natugutwe isiko. 32 Nainche kondaimokererigwe igoro as'ense, nimbang'use bonsi asende. 33 Agakwana aya, erinde aorokie amakweri ki aranyare gokwa. 34 Erio omoganda okameiraneria, Twaigure as'amachiko ng'a Kristo iga akobao goika kare nakare: naye naki okobora ng'a nemogwenerete Omwana-o-mwanyabanto aimokererigwe igoro? Oyo Omwana-o-mwanyabanto nere ng'o? 35 Yesu akabatebia, Omobaso igore amo nainwe ekero egeke. Genda ekero more noria omobaso, omusunte tocha kobabua: nere oyokogenda omosunte ime tamanyeti aas'akogenda. 36 Ekero more nomobaso, yuanche omobaso, monyare koba abana b'omobaso. Ayio akwanete Yesu, akagenda akebisa nabarabwo. 37 Nonya okorete ebikone ebinge as'amasio abo, tibamwanchete: 38 erinde riikeranigwe ring'ana riria ri'omobani Isaya aritebete, Omonene, ning'o oyanchire amang'ana aito? Naende okoboko kw'Omonene kwamanoirwe nang'o? 39 Naki as'engecho eye tibanyara gwancha, naki Isaya atebete naende, 40 Obaukoirie amaiso, okorire chinkoro chiabo chinkong'u; Tibacha korora as'amaiso abo nakomanya ase chinkoro chiabo, Beenchore, Mbagwenie. 41 Amang'ana ayio akwanete Isaya ekiagera akarora obonene bwaye; agatora amang'ana aye. 42 Korende nonya nabo as'abanene abange bakamwancha; korende ekiagera as'engecho y'Abafarisai tibaorogetie, tibacha korusigwa as'esunagogi: 43 naki mbabwanchete obonene bw'abanto kobua obonene bwa Nyasaye. 44 Yesu akaaka eriogi akabora, Oyonyanchire inche, tanyancheti inche, korende noyontomete. 45 Nere oyondigereirie inche, omorigereirie ere oyontomete. 46 Inche nachire imbe omobaso as'ense, erinde ker'oyonyanchire, taikaransa omosunte ime. 47 Naende omonto karaigwe amang'ana ane, ko tayabwata, inche tinkomogambia: ekiagera tincheti kogambia ense, korende nyekonye ense. 48 Oyoranyange inche otancheti amang'ana ane, nare noyoramogambie: ring'ana riria nakwanete, nario riranyare komogambia rituko ri'omoerio. 49 Naki inche tinkwaneti ase inche bweka omonyene; korende nere ontomete, engecho yaye Tata, onchikire aya ngoteba naende ayst ngokwana. 50 Nainche namanyire ng'a ogochika kwaye nobogima bwa kare nakare: nabo aya ngokwana inche buna Tata antebetie, nabo ngokwana.
1 Goika ritang'ani rie rituko rinene ri'epasaka, Yesu akamanya ng'a ensa yaye yaikire akorua as'ense eye kogenda ase Tata, akaba akabancha abanto baye as'ense, akabancha goika omoerio. 2 Ekero ki'endagera, Saitani gatiekire komobeka Yudas omwana o Simon Omoisikariota, omoyo bw'okomorua, 3 Yesu akamanya ng'a Tata omoeire bionsi amaboko aye, naende ng'a igaruete ase Nyasaye, naende nkogendare ase Nyasaye, 4 akaimoka korwa as'endagera, akabeka ensemo chianga chiaye; akabogoria egetambaa, akeboyia. 5 Erio akabeka amache as'esani 3 agachaka kobasibia aborokigwa amagoro abo, nakoyatinyia na keria egetambaa keria eboeretie. 6 Naboagaika ase Simon Petero. Oyo akamotebia, Omonene! Aye ngonsibiore amagoro ane? 7 Yesu akairaneria, akamotebia, Ayangokora inche, tokoyamanya bono; korende noyamanye nyuma. 8 Petero akamotebia, Togonsibia amagoro ane nonya ng'ake. Yesu akamotebia, Ntagosibeti, tori nensemo amo nainche. 9 Simon Petero akamotebia, Omonene tari amagoro ane oka, korende nonya namaboko nomotwe one. 10 Yesu akamotebia, Oyotiekire gwesibia tari nokorigia tatiga ogwesibia amagoro, korende obaire omochenu omobere bwonsi; nainwe more abachenu, korende tai mwensi. 11 Naki amomanyete oyogocha komorua, as'ayio agareba, Timori abachenu imwensi. 12 Nabo ochia gokora kobasibia amagoro abo, nagochibogoria chianga chiaye, nagoikaransa naende, akabatebia. Mwamanyire eki nabakorera? 13. Inwe iga mokondoka Omworokia, naende Omonene: naende inwe mbuya mokobora; naki naboigo inde. 14 Nabo onye inche, inde Omonene naende Omworokia, nabasibirie amagoro aino, nebagwenerete inwe nainwe gosibania dmagoro. 15 Naki nabaire ekiorokererio erinde ayio nabakorera inwe, nainwe moyakore. 16 Ekeene, ekeene, nabatebirie, Omosomba tari omonene kobua omonene oyej gose omotomwa tari omonene kobua ere oyomotomete. 17 Korhorayamanye ayio, more negesio komorayakore. 18 Tindi gokwana asemore imwensi: nabamanyire aba nachorire: erinde okorika konyare goikeranigwa, Oyokoria omogati amo nainche oimokereiri egetingiro kiaye igoro asende. 19 Korwa bono nabatebirie ritang'ani ataraoroka, erinde gakooroka, monyare gwancha ng'a inche nere. 20 Ekeene, ekeene, nabatebirie, Ere oyokomwancha onde bwonsi oyo ngotoma, onyanchire inche; nere oyokonyancha inche omwanchire ere oyontomete. 21 Agachia gokora gokwana aya, Yesu agaichana as'omoyo oye, akaoiokia, agakwana, Ekeene, ekeene, nabatebirie, Oyomo oino nandue. 22 Aborokigwa bakarigererania, bagasinywa komanya gose ning'o atora. 23 Narenge aroro oyomo bw'aborokigwa baye, oyobweegegete Yesu egekuba kiaye, oyo Yesu anchete. 24 Nabo Simon Petero akamosima, akamoboria, Totebie ning'o atora? 25 Ere akamweegeka buna arenge as'egekuba kia Yesu, akamoboria Omonene ning'o? 26 Erio Yesu akairaneria, Nomonto oria ngotongereria egesamunye nakomoa. Akamotongereria egesamunye akamoa Yudas, omwana o Simon Omoisikariota. 27 Naende nyuma ase keria egesamunye Saitani akamosoa. Erio Yesu akamotebia, Ayogokora, yakore bwango. 28 Tarenge omonto ase baria baikaransete as'emesa oyemanyete engecho yagera amotebia iga. 29 Naki abande, ekiagera Yudas are koyebogoria esanduku, bagakaga ng'a Yesu igakomotebia, Gora ebitorigetie ase rituko rinene; gose ng'a abae abataka egento. 30 Nabo oyo, kanyorire keria egesamunye, agasoka bwango: naende iga bwarenge botuko. 31 Erio oyio gasokire, Yesu akabora, Bono obakirwe Omwana-o-mwanyabanto, naende Nyasaye obakirwe ime yaye. 32 Na Nyasaye namobake ime yaye omonyene, nerio kegima namobake. 33 Abana abake, nkere ekero egeke inde amo nainwe. Namondigie: naende buna nabatebetie Abayahudi, Ng'a aase ngochia inche, inwe timokonyara gocha; bono nabatebirie nainwe. 34 Ogochika okoyia nabaire, mwanchane; buna nabanchete inwe, nainwe mwanchane boigo. 35 Iga abanto bonsi nabamanye ng'a naborokigwa bane more, komorabe nobwanchani inwe as'inwe. 36 Simon Petero akamotebia, Omonene, ng'ai okogenda? Yesu akamoiraneria, Aase ngochia, tokonyara gontunya, bono, korende nontunye nyuma. 37 Petero akamotebia, Omonene, naseki ntanyare gogotunyana bono? Nimbobeke obogima bwane as'engecho yao. 38 Yesu akamoiraneria, Inee! obogima bwao nobobeke as'engecho yane? Ekeene, ekeene, nagotebirie, etuoni tekogweya goika gwankanire ara gatato.
1 Timoichana emioyo yaino: mwanche ase Nyasaye mwanche n'asende. 2 As'enyomba ya Tata nere nobomenyo obonge; onye taibo, anga nabatebia; nkogendande kobaroseria aase. 3 Kondagende kobaroseria aase, ninchiche naende, nimbaroisie asende; erinde asende inche, nainwe mobeo. 4 Naende aase nkogenda inche, mwayemanyire enchera. 5 Thomas akamotebia, Omonene, titomanyeti aas'ogochia, naki torayemanye enchera? 6 Yesu akamotebia, Ninche inde enchera, naende ekeene, naende obogima: omonto onde tagocha ase Tata tatiga asende. 7 Onye mwamanyete inche, ang'a mwamomanyete naende Tata: korwa bono mwamomanyire, naende mwamororire. 8 Filipo akamotebia, Omonene, tworokie Tata, atoisane. 9 Yesu akamotebia, Nabaire amo nainwe amatuko aya onsi naye tomanyeti, Filipo? Oyondorire inche, omororire Tata; naki ogoteba aye, Tworokie Tata? 10 Tibwancheti ng'a inche igonde ime ase Tata, na Tata ime yane? Amang'ana nkobatebia inche, tindi gokwana inche bweka: korende Tata ore ime asende iga akoyekora emeremo yaye. 11 Inyancha ng'a inche igande ase Tata, naende Tata ime yane: gose nabo inyancha ekiagera as'emeremo emenyene. 12 Ekeene, ekeene, nabatebirie, Oyoranyanche inche, emeremo ngokora inche nere nayekore; nakore naende emenene kobua eye, ekiagera nkogendande ase Tata. 13 Naende komorasabe kende gionsi as'erieta riane, ekio nangekore, Tata abakwe ime as'Omwana. 14 Komorasabe kende gionsi as'erieta riane, ekio nangekore, 15 Komoranyanche namoyabwate amachiko ane. 16 Naende inche nimosabe Tata, nere nabae Omokonyi onde, aikaranse nainwe goika kare nakare, 17 Omoika bw'ekeene; ense etanyare komwancha; naki tibamorochi, nonya nkomomanya korende inwe mwamomanyire; naki aikaransete asemore, nere nabe ime yaino. 18 Tinkobatiga inwe chintakana; ninchiche asemore. 19 Nkere ekero egeke ense etandore naende; korende inwe mwandorire, ekiagera inche moy'onde, nainwe namobe moyo. 20 Ase rituko riria namomanye, ng'a inche igande ime ase Tata, naende nainwe ime yane, nainche ime yaino. 21 Oyore namachiko ane, nakoyabwata, ere nere onyanchete: nere oyonyanchete nanchwe na Tata one, nainche, nimwanche, nakweorokia asare. 22 Yudas akamotebia (tari ere Omoisikariota), Omonene, naki yaba, ng'a origetie kweorokia asetore, gose tari as'ense? 23 Yesu akamoiraneria akamotebia, Omonto karanyanche, naribwate ring'ana riane; naende Tata one namwanche, naintwe natoche asare, natokore obomenyo bwaito asare. 24 Oyotanyancheti, tayabwateti amang'ana ane: naende ring'ana mwaigure tari eriane korende neriaye Tata ontomete. 25 Aya nabatebirie, kong'ikaransete asemore. 26 Korende Omokonyi Omoika Omochenu, oyo Tata aratome as'erieta riane, ere naborokererie onsi, naende kobainyoria onsi ayanabatebirie. 27 Omorembe nabatigeire: omorembe one nabaruereire: tari buna ense ekorua, nabaruereire. Timoichana emioyo yaino gose timoba nobwoba. 28 Mwaigure ng'a inche nabatebetie, Nkogendande, naende ngochande asemore. Onye mwanyanchete, anga mwagogete, ekiagera nkogendande ase Tata naki Tata nomonene kobua inche. 29 Na bono nabatebirie ritang'ani ataraba, erinde akoba mwanche. 30 Tingokwana nainwe amang'ana amange naende, naki omonene bw'ense ochire: korende tari nagento asende; 31 korende ense emanye ng'a nimwanchete Tata, naende buna Tata anchigete, nabo ngokora, Imoka, togende aria.
1 Ninche inde omosabibu bw'ekeene, naende Tata one nomoroseria. 2 Ker'orosagia ime asende rotameti, igakororusia: na ker'orokwama arosibia erinde romente kwama. 3 Inwe mwaikire koba abachenu as'engecho ye ring'ana nabatebia. 4 Ikaransa ime yane, nainche ime yaino. Buna orosagia rotanyare kwama rwoka oronyene, rotaikaranseti ime as'omosabibu; naboigo nainwe, motaikaranseti ime yane. 5 Inche nomosabibu; nainwe nechinsagia: Oyogoikaransa ime yane, nainche ime yaye oyio name mono: naki motari nainche timokonyara gokora kende gionsi. 6 Omonto ataikaranseti ime yane, igagotugutwa isiko buna orosagia, bwoma; ochisangereria, ochituguta omorero, chiayia. 7 Komoraikaranse ime yane, namang'ana ane karaikaranse ime yaino, namosabe kera ekimorigeti, naende namokorerwe. 8 As'ayio abakwe Tata one, mwame mono; nainwe namobe aborokigwa bane. 9 Buna Tata anyanchete inche, nainche nabanchire inwe; ikaransa as'obwanchani bwane. 10 Komorayabwate amachiko ane, namoikaranse as'obwanchani bwane; buna inche nabwatete amachiko a Tata one, nagoikaransa as'obwanchani bwaye. 11 Aya nabatebirie, erinde omogoko one obe ime yaino, naende omogoko oino oikeranigwe. 12 Ogochika kwane nakwo oko, mwanchane, buna nabanchete inwe. 13 Tari oyore nobwanchani obonge kobua obo, obw'omonto akobeka obogima as'engecho y'abasani baye. 14 Inwe iga more abasani bane, komorakore aya nabachikire. 15 Tinkobaroka naende abasomba; naki omosomba tamanyeti eki agokora omonene oye: korende inwe nabarokire abasani; naki onsi aya naigure ase Tata naborokirie. 16 Tari inwe mwanchorire inche, korende ninche nabachorire inwe, nababekire mogende mwame, okwama kwaino goikaranse: erinde rionsi mogosaba Tata as'erieta riane, igarabae. 17 Aya nabachikire, monyare gwanchana. 18 Ense kerabageche, mwamanyire ng'a yangechire inche etarabagecha inwe. 19 Onye mwarenge ab'ense, anga ense yancha ayare ayaye; korende ekiagera inwe timori ab'ense, naki inche nabachorire inwe korwa as'ense, ekiagera ense yabagechire. 20 Rinyore riria ring'ana nabatebetie, Omosomba tari omonene kobua Omonene oye. Onye banchandete inche, nababachande inwe nainwe; onye baribwatete ring'ana riane nabaribwate neriaino. 21 Korende aya onsi nababakorere as'engecho y'erieta riane, ekiagera tibamomanyeti oyontomete. 22 Onye machete gokwana nabarabwo, anga tibarenge nebibe: bono tibari nogotamera as'ebibe biabo. 23 Oyongechire inche, omogechire na Tata one. 24 Onye ntakorete emeremo asebare atakoreti omonto onde, anga tibabete nebibe: bono batororire inche na Tata one naende batogechire. 25 Korende riikerane ring'ana eriarigetwe as'ogochika kwabo, Iga bangechete bosa. 26 Korende gagocha Omokonyi, oyondabatomere korwa ase Tata, Omoika bw'ekeene okorua ase Tata, ere nambere kirori. 27 Naende inwe mwensi mwabaire birori, ekiagera korwa omochakano mwarenge amo nainche.
1 Amang'ana aya nabatebirie timocha kogochwa. 2 Nababaserie korwa chisunagogi: nabo, ensa yachire, igarakage ker'omonto karabaite ng'a omokoreire Nyasaye ekeng'wanso. 3 Naende ayio nababakore, naki tibamomanyeti Tata nonya ninche. 4 Korende nabatebirie aya, erinde kegocha ensa eria, moyainyore buna inche nabatebetie. Aya timbatebeti korwa omochakano, ekiagera narenge amo nainwe. 5 Korende bono nkogendande as'ere oyontomete; gose onde tari oyomo oino okomboria, Ing'ai ogochia? 6 Korende ekiagera nabatebirie aya ogoichana gwaichoire emioyo yaino. 7 Korende inche nabatebirie erire ri'ekeene; nebagwenerete inwe inche nyimoke: naki ntaimogeti, Omokonyi tagocha asemore; korende kondagende, nimotome asemore. 8 Naende gatiekire gocha ere, nayekanie ense as'amang'ana ebibe, naende oboronge, naende ekina: 9 as'amang'ana ebibe, ekiagera tibanyancheti inche; 10 as'amang'ana oboronge, ekiagera nkogendande ase Tata, gose timokondora naende. 11 As'amang'ana ekina, ekiagera omonene bw'ense eye ogambigwe. 12 Ninde nayande amange atigarete nkobatebia, korende timokonyara koyaremereria bono. 13 Korende ogocha ere, Omoika bw'ekeene, nobarae as'onsi ayare ay'ekeene; naki tagokwana ayare ayaye ere; korende onsi ayaranyare koigwa nayakwane: naende amang'ana agocha nabatebie engecho yaye. 14 Ere nambake inche: naki nabogorie as'ayare ayane, nabayaorokerie. 15 Onsi ayare naro Tata nayane; as'ayio ngateba ng'a nabogorie as'ayare ayane, nabayaorokerie. 16 Nkere ekero egeke, nainwe timokondora naende; nkere ekero egeke namondore, naki nkogendande ase Tata. 17 Nabo abande b'aborokigwa baye bagatebania, Ring'ana ki eri agoteba, Nkere ekero egeke nainwe timokondora; naende nkere ekero egeke morandore: ekiagera nkogendande ase Tata? 18 Nabo bagateba, Ing'ana ki eri agoteba, ng'a nkere ekero egeke? Titomanyeti eri agokwana. 19 Yesu akamanya ng'a mbarigetie komoboria, akabatebia, Eri nario mokoborania inwe as'inwe, erio natebire, Nkere ekero egeke nainwe timokondora, naende nkere ekero egeke naende morandore? 20 Ekeene, ekeene, nabatebirie, Inwe namorere, nakweng'ereria, korende ense negoke: inwe namoichanigwe, korende ogoichana kwaino nagoonchoke koba omogoko. 21 Omokungu okogonkia, igare nogoichana ekiagera ensa yaye yaikire; korende gatiekire kogonkia omwana, tari koboinyora naende obororo, ekiagera as'omogoko bw'okoiborwa omonto as'ense. 22 Nabo nainwe bono iga more nogoichana: korende nimbarore naende, nemioyo yaino negoke, nomogoko oino onde tari orabaure. 23 Ase rituko riria timokomboria ring'ana. Ekeene, ekeene, nabatebirie, Komoramosabe Tata ring'ana as'erieta riane nabae. 24 Goika rero timosabeti ring'ana as'erieta riane; saba, namonyore, omogoko oino obe oikeranete. 25 Aya nayakwanire nainwe as'emereng'anio: ensa neche, tingokwana nainwe naende as'emereng'anio, korende nimborokie maiso marore amang'ana a Tata. 26 Ase rituko riria namosabe as'erieta riane: tinkobatebia, ng'a nimbasabere Tata; 27 naki Tata omonyene iga abanchete inwe, ekiagera inwe mwanyanchire inche, mogancha ng'a inche iga naruete ase Tata. 28 Naruete ase Tata, na bono nachire as'ense: naende, nayetigire ense, nkogendande ase Tata. 29 Aborokigwa baye bakabora, Rora, bono igogokwana maiso marore, gose tori gokwana omoreng'anio onde bwonsi. 30 Bono twamanyire ng'a kwamanyire onsi, torigeti omonto akoborie: as'ayio twanchire ng'a iga kwaruete ase Nyasaye. 31 Yesu akabairaneria, Iga mwanchire bono? 32 Rora, ensa neche, nabo, yatiekire gocha, namwatananeke, ker'oyomo ase mwaye, namontige inche bweka: korende ninche tari inche bweka, ekiagera Tata igare amo nainche. 33 Aya nabatebirie, monyare koba nomorembe ime yane. As'ense namonyore emechando: korende remia emioyo; inche nayebuire ense.
1 Amang'ana ayio ayakwanete Yesu; akaramokia amaiso aye korigereria igoro, akabora, Tata, ensa eria yachire; mobake Omwana oo, erinde Omwana nere akobake aye: 2 buna kwamoete okobua igoro ase ker'oyore nomobere, erinde onsi aya kwamoeire, abae obogima bwa kare nakare. 3 Nobogima bwa kare nakare nobo, bakomanye aye, Nyasaye bw'ekeene bweka, naende Yesu Kristo kwamotomete. 4 Inche nakobakire as'ense, emeremo eria kwang'ete gokora nayekorire. 5 Na bono Tata, ombake inche amo naye, as'obonene boria narenge nabwo amo naye ritang'ani ense etaraba. 6 Erieta riao nabaorokeirie abanto baria kwang'ete korwa as'ense: iga barenge abao, okabang'a inche; naende ring'ana riao baribwatire. 7 Bono bamanyire ng'a onsi aya kwang'ete igarure asore: 8 naki amang'ana kwang'ete nabaeire barabwo; bakayabwata, bakamanya ekeene ng'a iga narure asore, bagancha ng'a naye gwantomete. 9 Inche nabasabeire barabwo: tindi koyesabera ense, korende barabwo aba kwang'aire; naki barabwo nabao: 10 naende onsi ayare ayane nayao, nayare ayao nayane: nainche nabakirwe ime yabo. 11 Nainche tindi naende as'ense ime, ko aba mbare as'ense ime, nainche ngochande asore. Tata Omochenu obarende as'erieta riao baria kwang'ete, babe obomo, buna intwe. 12 Ekero narenge amo nabarabwo as'ense, iga nare kobarenda as'erieta riao baria kwang'ete: iga nabaritete, gose nonya noyomo obo tari oyosirire, tatiga oria omwana bw'ogosira: amariko anyare goikeranigwa. 13 Na bono ngochande asore; naya nayakwanire as'ense ime, erinde babe nomogoko one oikeranigwe ime yabo. 14 Inche nabaeire ring'ana riao; nense yabagechete, ekiagera barabwo tari abanto b'ense, buna ninche ntari oyo bw'ense. 15 Tinsabeti obarusie korwa as'ense, korende obarende noria omobe. 16 Barabwo tari ab'ense, buna ninche ntari oyo bw'ense. 17 Obasibie as'ekeene: ring'ana riao nario ekeene. 18 Buna gwantomete inche ime as'ense, nainche naboigo nabatomire barabwo as'ense ime. 19 Nas'engecho yabo nesibirie, erinde nabarabwo basibigwe as'ekeene. 20 Gose tari barabwo boka nasabeire, korende nabarabwo abaranyare gwancha as'engecho ye ring'ana riabo; 21 bonsi babe obomo; buna aye, Tata, ore ime asende, nainche ime yao, erinde naba babe obomo ime yaito; ense enyare gwancha ng'a naye gwantomete. 22 Nobonene boria kwang'ete nabaeire barabwo; babe obomo, buna intwe tore obomo; 23 Inche ime yabo, naye ime yane, banyare goikerana babe obomo; erinde ense emanye ng'a naye gwantomete, okabancha barabwo, buna kwanyanchete inche. 24 Tata, abwo aba kwang'ete, nindigetie babe amo nainche asende; banyare koborigereria obonene bwane kwang'ete: naki nkwanyanchete ritang'ani okobekwa oboroso bw'ense. 25 Tata omonyene oboronge, ense tiyakomanyete, korende inche nakomanyete; naba bamanyire ng'a naye gwantomete; 26 nabaorokeirie erieta riao, naende nimboorokie; erinde obwanchani boria kwanyanchete inche bobe ime yabo, nainche imbe ime yabo.
1 Yesu gakwanire amang'ana aya, akaimoka naborokigwa baye kogenda ng'umbu y'akaroche Kedron, aas'omogondo orenge, agasoa, ere naborokigwa baye. 2 Yudas nere, oria omoruete naamanyete aas'aria: naki Yesu are kogenda aroro ebiro ebinge amo naborokigwa baye. 3 Nabo Yudas gatiekire konyora omoganda bw'abasigari, naende abasomba baruete as'Abakuani abanene, n'Abafarisai, akagenda aroro nechitaya nebieri, nebinto bi'esegi. 4 Nabo Yesu, okomanya onsi ayaranyare komonyora, akaoroka, akabatebia, Ning'o mokorigia? 5 Bakamoiraneria, Yesu Omonazereti. Yesu akabatebia, Ninche ere. Yudas nere oyomoruete igateneine amo nabarabwo. 6 Nabo ochia kobatebia, Ninche ere, bakairana nyuma, bakagwa inse. 7 Akababoria eria kabere, Ning'o mokorigia? Bakabora, Yesu Omonazareti, 8 Yesu akairaneria, natiekire kobatebia ng'a ninche ere: nabo komokondigia inche batige aba bagende: 9 erinde riikeranigwe riria ring'ana akwanete, Aba kwang'ete tinsireti nonya noyomo obo. 10 Nabo Simon Petero narenge nomoro, akayong'usa, akamoaka omosomba bw'omokuani omonene, akamonacha ogoto kwaye kw'okorio. Noria omosomba erieta riaye igare korokwa Maliko. 11 Erio Yesu akamotebia Petero, omoro oo yoiranie ekerende kiaye: egekombe ang'aire Tata, tinkenywera? 12 Oria omoganda nomonene bw'esegi, nabaria abasomba b'Abayahudi bakamobwata Yesu, bakamosiba. 13 Bakamoira as'Anna ritang'ani; naki arenge ise biara Kaifa, oria orenge omokuani omonene omwaka oria. 14 Na Kaifa nere obaete Abayahudi amang'ana ng'a negwenerete omonto oyomo akwe as'engecho y'abanto. 15 Simon Petero akamotunyana Yesu nomworokigwa onde. Oria omworokigwa iga amanyekanete nomokuani omonene, agasoa amo na Yesu egora ime y'omokuani omonene; 16 korende Petero agatenena gesieri isiko. Nabo oria omworokigwa onde omanyegete nomokuani omonene, agasoka agakwana nomoiseke ore korenda egesieri, akamoreta Petero ime. 17 Erio oria omoiseke orenge omorendi egesieri akamotebia Petero, Aye naye oyomo obo bw'aborokigwa baye omonto oyo? Ere akabora, tari inche. 18 Na baria abasomba nabasikari iga barenge bateneine, baroisirie omorero bw'amakara; naki embeo yarenge; bakaba ngwotabare omorero; Petero nere, iga arenge amo nabarabwo, ogwota omorero. 19 Erio omokuani omonene akamoboria Yesu amang'ana as'aborokigwa baye, namang'ana okworokereria kwaye. 20 Yesu akamoiraneria, Inche nakwanire nense maiso marore: inche amatuko onsi iga narenge kworokereria ase chisunagogi nase hekalu, aase basangereregete Abayahudi amatuko onsi; gose ase bobisi tintebeti ring'ana. 21 Naseki okomboria? baborie baria baigwete eke nakwanete nabarabwo: barabwo bamanyire aya nabatebetie. 22 Gachia gokwana amang'ana aya, oyomo bwa baria abasomba otenenete ang'e akamoaka Yesu oroe, okobora, Igakomoiraneria iga omokuani omonene? 23 Yesu akamoiraneria: Onye nakwanire amabe, yaorokie aria amabe: korende onye nakwanire amaya, ninki okong'akera? 24 Nabo Anna akamoira osibire ase Kaifa omokuani omonene. 25 Na Simon Petero igarenge oteneine, ogwota omorero. Bakamotebia, Aye naye tori oyomo bw'aborokigwa baye? Ere agakana, akabora, Tari inche. 26 Oyomo bw'abasomba b'omokuani omonene, nomoamate bw'oria onachetwe ogoto na Petero, akabora, Inche tinakoroche ime as'omogondo amo nere? 27 Petero agakana naende; erio kegima etuoni ekagweya. 28 Erio bakamoira Yesu korwa ase Kaifa goika enyomba enene y'ekegambero; ekaba egokiamoka; korende barabwo abanyene tibasoa ime as'ekegambero, tibabaisa gocha kobekwa eubi, korende bayerie epasaka. 29 Erio Pilato akabasokera isiko akabora, Mang'ana ki mwareta as'omonto oyo mokomosoera? 30 Bakairaneria, bakamotebia, Onye oyo atarenge omonto omobe, anga titwamoreta asore. 31 Erio Pilato akabatebia, Moire inwe, momogambie as'ogochika kwaino. Abayahudi bakamotebia, Intwe titori neribaga goita omonto: 32 erinde ring'ana riaye Yesu riikeranigwe, eriakwanete, okoorokia ng'a makweri ki aranyare gokwa. 33 Erio Pilato agasoa ekegambero naende akamorangeria Yesu akamotebia, Aye naye omoruoti bw'Abayahudi? 34 Yesu akairaneria, Naye gwatebire omonyene, gose nabanto bande bagotebirie amang'ana ane? 35 Pilato akairaneria, Inee? Inche n'Omoyahudi? Egesaku kiao nabakuani abanene nabwo bakoreta asende: Ninki gwakorire? 36 Yesu akairaneria, Oboruoti bwane tibori obw'ense eye: onye oboruoti bwane bwarenge as'ense eye anga abasomba bane mbandwanerera, tinyara kobekwa as'amaboko Abayahudi: korende bono oboruoti bwane tibori obwaa. 37 Erio Pilato akamotebia, Aye nomoruoti rende? Yesu akairaneria, Aye kwaborire ng'a inche nomoruoti. Inche iga naiboretwe as'engecho y'aya, nas'engecho y'aya ngacha as'ense, erinde mbe kirori as'ekeene. Ker'oyore oyo bw'ekeene igakorigwa eriogi riane. 38 Pilato akamoboria, Ekeene ngento ki? Gakwanire ring'ana eri akabasokera Abayahudi eria kabere, akabatebia, Inche tindochi bobe bonde asare. 39 Korende more nengecho, erinde mbasiborere omonto oyomo as'ekero ki'epasaka; nabo, morigetie mbasiborere Omoruoti bw'Abayahudi? 40 Erio bakaaka egeturi eria kabere, bakabora, Tari oyo, korende Baraba. Nere Baraba igarenge omouri.
1 Erio Pilato akamoira Yesu, akamoaka chinkini. 2 Abasigari bagatwang'a egutwa y'amagwa, bakamobekera 'motwe, bakamobeka eanga embariri; 3 bakamochiera, bakabora, Mbuya ore Omoruoti bw'Abayahudi! bakamoaka chindoe. 4 Pilato akaoroka naende isiko akabatebia, Rora, inche namoretire asemore, monyare komanya ng'a tindochi bobe bonde asare. 5 Erio Yesu agasoka isiko, obegete egutwa eria y'amagwa, neria eanga y'oboruoti embariri. Pilato akabatebia, Rora, Omonto oyo! 6 Erio baria abakuani abanene naende abasomba bagachia komorora, bakaaka eriogi, bakobora, Mobambe, mobambe, Pilato akabatebia, moire inwe, momobambe; naki inche tindochi obobe asare. 7 Abayahudi bakamoiraneria, Intwe ntore nogochika, naende as'ogochika okwo nagwenerete akwe, ekiagera agwekora koba Omwana o Nyasaye. 8 Erio Pilato agachia koigwa ring'ana erio, akaba nobwoba kobua; 9 agasoa as'ekegambero, akamotebia Yesu naende, Ing'ai okorua aye? Korende Yesu tamoa okoiraneria konde. 10 Erio Pilato akamotebia, Tori gokwana nainche? Tomanyeti ng'a ninde nokobua gokobamba naende ninde nokobua gogosibora? 11 Yesu akamoiraneria, anga tori nokobua konde gwonsi, onye otaeiri korwa igoro: as'ayio ere oyombegete amaboko ao nare nebibe ebinene kobua. 12 Korwa agwo Pilato akarigia komosibora: korende Abayahudi bakaaka eriogi bakabora, Koramosibore oyo tori omosani o Kaisari: ker'oyogwekora koba omoruoti igare ao na Kaisari. 13 Erio Pilato, ochia koigwa amang'ana aya, akamoreta Yesu isiko, agaikaransa igoro as'ekerogo ki'ekina, aase akorokwa Atichire namagena, naende as'Ekeibirania, Gabbatha. 14 Nigo yarenge Okwerosia kw'epasaka: naende iga yarenge chinsa isano nemo. Akabatebia, Abayahudi, Rora, omoruoti oino! 15 Korende barabwo bakaaka eriogi, Morusie, morusie, mobambe. Pilato akabatebia, Imobambe omoruoti oino? Abakuani abanene bakairaneria, titori nomoruoti tatiga Kaisari. 16 Erio agwo akamobeka amaboko abo abambwe. Nabo bakamobwata Yesu: 17 agasoka bwebogoreretie omosalaba oye, goika Aase akorokwa ekeore, as'Ekeibirania akorokwa Golgotha: 18 bakamobamba aroro, amo nabande babere, oyonde ensemo noyonde ensemo, na Yesu gati gati. 19 Pilato akarika ekemanyererio, agakebeka igoro as'omosalaba. Iga kiarigetwe, Yesu Omonazareti, Omoruoti bw'Abayahudi. 20 Nabo okorika okwo mbasomete abange as'Abayahudi; naki aase aria abamberetwe Yesu igarenge ang'e nomochie; nakorokwo iga kwarigetwe as'Ekeibirania, Ekerumi, n'Ekeyunani. 21 Erio abakuani abanene n'Abayahudi bakamotebia Pilato. Torika, ng'a Omoruoti bw'Abayahudi; korende, ng'a igarenge kobora ng'a, Inche omoruoti bw'Abayahudi. 22 Pilato akairaneria, Aya narikire narikire. 23 Erio abasigari kobamobambire Yesu, bakabogoria chianga chiaye, bagakora chinsemo inye, ase ker'omosigari ensemo yaye; nero eganchwa: naende eganchwa eria tiyasonetwa, iga yakoretwe yonsi korwa igoro. 24 Nabo bagatchania, Titoyetandora, korende toyekorere obomera, torore gose neyang'o ekoba; okorika goikerane gogoteba, Mbatananete chianga chiane, Naende eganchwa yane bayekorerete obomera. Naboigo bakorete abasigari. 25 Korende as'omosalaba oye Yesu bagatenena ng'ina, naende oyomwabo ng'ina, Mariamu o Kiliopa, na Mariamu Magidali. 26 Erio Yesu ochia komorora ng'ina, naende oria omworokigwa anchete otenenete ang'e akamotebia ng'ina, Omokungu, rora, omwana oo! 27 Nyuma akamotebia omworokigwa, Rora, nyoko! Erio korwa ensa eria omworokigwa oria akamoira bwoye. 28 Nyuma as'aya Yesu, akamanya ng'a onsi atiekire gokorwa, okorika goikeranigwe, akabora, Ninde nerang'o. 29 Nkiarenge aroro egento geichire chinkama, erio bakabeka egetonto geichire chinkama, igoro ase husopo, bakamobekera omonwa. 30 Erio Yesu ochia kochinyora chinkama, agateba, yaerire: agatureka omotwe, agatwekamo. 31 Erio Abayahudi, ekiagera n'Okwerosia, emebere teikaransa igoro as'omosalaba rituko ri'esabato (naki rituko ri'esabato eria iga riarenge rituko rinene), bakamosaba Pilato, amagoro abo abunwe, erusigwe. 32 Erio abasigari bakagenda, bakamobuna amagoro oyo bwe ritang'ani, naende oyo okabere oyobambetwe amo nere. 33 Bagachia komochiera Yesu, bachia korora ng'a otiekire gokwa, tibamobuna amagoro; 34 korende omosigari oyomo ne ritimo akamobeta rikere, akarua bwango amanyinga namache. 35 Nere oyoroche akaorokia, naende okoorokia kwaye nekeene, nere omanyire ng'a igagokwana ekeene, erinde inwe monyare gwancha. 36 Naki aya akaoroka okorika goikerane, Tirikonyara kobunwa riuga riaye. 37 Naende, okorika konde iga gokobora, Nabamorigererie ere oyobabetete. 38 Nyuma as'aya, Yusufu bw'Arimathaya, nere igarenge omworokigwa o Yesu, korende bobisi (naki abairogete Abayahudi), akamosaba Pilato ribaga ayorusie omobere oye Yesu: Pilato akamoa ribaga. Erio akagenda akayorusia omobere oye. 39 Akagenda Nikodemo nere, oria omochierete botuko agwo ritang'ani, akareta ebinto bisang'ananirie manemane n'uudi (ebinto bi'ogotioka) oborito bwaye chiratili emia eyemo. 40 Erio bakayobogoria omobere o Yesu bakayoboa egetambaa ki'egatani, amo naria amaguta amanukato, buna yarenge engecho y'Abayahudi as'ogotindeka, 41 Naende aase aria abamberetwe norengeo omogondo; na ime as'omogondo oboina oboyia konya botarabekwa 'monto onde ime yaye. 42 Agwo ekiagera n'Okwerosia kw'Abayahudi, bakamobeka Yesu; ekiagera boria oboina bwarenge ang'e.
1 Bono ase rituko rie ritang'ani ri'echuma Mariamu Magidali akagenda oboina kobogokiamoka, otarasira omosunte, akarirora rigena riarusigwe oboina. 2 Erio akagenda bwango goika ase Simon Petero, nas'omworokigwa oria onde bwanchetwe na Yesu, akabatebia, Bamorusirie Omonene oboina ime korende titomanyeti ase bamobeka. 3 Petero agasoka, akagenda amo nomworokigwa oria onde, bakabwatia enchera kogenda oboina. 4 Bakagenda ne chimbero bonsi babere: oria omworokigwa onde akagenda bwango kobua Petero, akaba oyo bwe ritang'ani goika as'oboina; 5 agatung'ama, akabirora ebitambaa bibekire; korende tasoa. 6 Erio agacha Simon Petero, akamotunya, agasoa oboina; akabirora ebitambaa bibekire, 7 na keria egetambaa ki'omotwe oye, tikiabekire amo nebitambaa binde, korende iga kiaringire, kebekire ao gioka. 8 Erio agwo agasoa omworokigwa oria onde orenge bwe ritang'ani goika oboina, akarora, agancha, 9 Naki konya tibarainyora okorika, ng'a nemogwenerete koboka korwa as'amakweri. 10 Erio aborokigwa baria bakagenda soba ka. 11 Korende Mariamu igateneine isiko, ang'e noboina okorera; nabo, gakorera, agatung'ama, akarigereria ime as'oboina; 12 akarora amalaika abere, barenge nechianga chindabu, baikaransete, oyomo as'omotwe, naende oyomo as'amagoro, agwo aas'obegetwe omobere o Yesu. 13 Nabarabwo bakamotebia, Omokungu, inki okorera? Akabatebia, Ekiagera bamorusirie Omonene one, korende timanyeti ase bamobeka. 14 Ochia gokwana aya, ageonchora gochia nyuma, akamorora Yesu oteneine, tamanya ng'a Yesu. 15 Yesu akamotebia, Omokungu, ninki okorera? Ning'o okorigia? Ere, agakaga ng'a nomorendi bw'omogondo, akamotebia, Omonene, onye naye kwamoira, ntebia aase kwamobeka, ninche nimorusie. 16 Yesu akamotebia, Mariamu, Ere ageonchora, akamotebia as'Ekeibirania, Raboni (ogoonchora kwaye, Omworokia). 17 Yesu akamotebia, Tonkuna; naki tindagenda ase Tata one: korende genda as'abaminto, obatebie, Nkogendande ase Tata one na Tata oino, ase Nyasaye one na Nyasaye oino. 18 Mariamu Magidali akagenda akabatebia aborokigwa amang'ana ng'a omororire Omonene, naende ng'a omotebirie aya. 19 Ekaba mogoroba ase rituko riria rie ritang'ani ri'echuma, nebisieri kobiasiekirwe aase agwo aborokigwa barenge, ekiagera as'okoiroka Abayahudi, agacha Yesu, agatenena gati gati, akabatebia, Omorembe obe asemore. 20 Gakwanire aya, akaborokia amaboko aye nerikere riaye. Erio aborokigwa bakagoka kobachia komorora Omonene. 21 Yesu akabatebia eria kabere, Omorembe obe asemore: buna Tata antomete, naboigo nabatomire inwe. 22 Gakwanire aya, akabautera omoika akabatebia, Monyore Omoika Omochenu: 23 bande bonsi morarusie ebibe barusigwe; naende bande bonsi morasiekere, basiekeirwe. 24 Ko Thomas, oyomo bw'ikomi nababere okorokwa Didumo, tarengeo amo nabarabwo ekero achete Yesu. 25 Erio aborokigwa bande bakamotebia, Twamororire Omonene. Korende ere akabatebia, Ntarochi amaboko aye nebimanyererio bi'emesumari, nakobeka ekiara as'ebiorokererio bi'emesumari, nakobeka okoboko kwane rikere riaye ime, tingwancha nonya ng'ake. 26 Nyuma y'amatuko atano natato aborokigwa baye mbarenge aroro ime eria kabere, na Thomas amo nabarabwo. Yesu agacha, ebisieri bisiekire, agatenena gati gati, akabora, Omorembe obe asemore. 27 Erio akamotebia Thomas, Reta aiga ekiara kiao, orore amaboko ane; korete okoboko kwao, obeka ase rikere riane: toba oyotancheti, korende oyo bwegenete. 28 Thomas akairaneria, akamotebia, Omonene one, na Nyasaye one. 29 Yesu akamotebia, Ekiagera kwandora, gwanchire: mbare negesio abataroche ko begenire, 30 Nabo mbire ebikone binde ebinge akorete Yesu as'amasio aborokigwa baye, bitarikiri as'ebuku eye: 31 korende ebi biarikirwe monyare gwancha ng'a Yesu nere Kristo, Omwana o Nyasaye; naende as'ogwancha mobe nobogima as'erieta riaye.
1 Nyuma as'aya Yesu akeorokia naende as'aborokigwa baye, as'enyancha ya Tiberia; nere iga eorogetie iga. 2 Simon Petero, na Thomas okorokwa Didumo, na Nathaniel o Kana ya Galili, nabana na Zebedi, nabanto bande babere as'aborokigwa baye, barenge amo. 3 Simon Petero akabatebia, Nkogendande koruba chinswe. Bakamotebia, Naintwe natogende amo naye. Bagasoka, bakarina obwato ime; nobotuko boria tibanyora gento. 4 Goika bogachia goikia mambia, Yesu agatenena engegu: korende aborokigwa tibamanya gose ng'a Yesu. 5 Erio Yesu akabatebia, Abana, more neki mokoria? Bakamoiraneria,Yaya. 6 Akabatebia, Kerute ekeonga ensemo y'okorio y'obwato, nainwe namonyore. Erio bakaruta, korende tibanyara gokeng'usa as'engecho y'obonge bwe chinswe. 7 Omworokigwa oria Yesu anchete akamotebia Petero, Nere Omonene. Erio Simon Petero, agachia koigwa ng'a n'Omonene, akeboyia eanga yaye (ekiagera arenge getirianda), akeruta enyancha ime. 8 Aborokigwa bande bagacha as'obwato (naki tibarenge are as'ense enyomo, ang'e chifuti chimia isato), bakagekurura ekeonga geichire nechinswe. 9 Erio kobachia goika engegu, bakarora omorero bw'amakara aroro, naende enswe ebekire igoro yaye, nomogati. 10 Yesu akabatebia, Reta aiga ensemo ye chinswe echimwarubire bono, 11 Erio Simon Petero akarina obwato ime, agakeng'usa ekeonga goika engegu, geichire chinswe chinene, emia namerongo etano naisato: nonya chiarenge chinyinge buna iga, ekeonga tigiatandogete. 12 Yesu akabatebia, Inchuo morie. Korende omonto onde ase baria aborokigwa tarenge oyorigetie komoboria, Aye ning'o? mbamanyete ng'a n'Omonene. 13 Yesu akagenda akayobogoria omogati, akabaa, nechinswe boigo. 14 Eke nekero kia gatato Yesu arorekanete naborokigwa baye nyuma y'okoboka korwa as'amakweri. 15 Erio kobakorire okoragera, Yesu akamotebia Simon Petero, Simon o Yohana, nonyanchete kobua aba? Akamotebia, Ee, Omonene, aye kwamanyire ng'a ningwanchete. Akamotebia, Risia chimanwa chie ching'ondi chiane. 16 Akamotebia, eria kabere, Simon o Yohana, nonyanchete? Akamotebia, Ee, Omonene aye kwamanyire ng'a ningwanchete, Akamotebia, Risia ching'ondi chiane. 17 Akamotebia eria gatato Simon o Yohana, Nonyanchete inche? Akamotebia, Omonene aye kwamanyire onsi; kwamanyire ng'a ningwanchete. Yesu akamotebia, Risia ching'ondi chiane. 18 Ekeene, ekeene, nagotebirie, Gakwarenge omosae, iga kwarenge kweboyia, kwagenda aase origetie; korende korabe omogaka, norambore amaboko ao, noyonde nagosibe, akoire as'otarigeti. 19 Agakwana eri as'okworokia amakweri ki aramotogie Nyasaye. Erio gakorire gokwana aya, akamotebia, Ntunyana. 20 Petero ogweonchora, akamorora omworokigwa oria bwanchetwe na Yesu ogotunya; nere oria bweegegete gekuba kiaye ekero ki'okoria endagera ya mogoroba, nagokwana, Omonene ning'o orakorue? 21 Petero ochia komorora oyio, akamotebia Yesu, Omonene, noyo rende? 22 Yesu akamotebia, Kondarigie oyo aikaranse goika nchiche ninki erakogwenere? Aye ontunye inche. 23 Erio ring'ana eri rigasarera as'abamwabo ng'a omworokigwa oria tagokwa: korende Yesu tamotebetie, tagokwa; korende, Kondarigie aikaranse goika inchiche nki erakogwenere? 24 Oyo noria omworokigwa oyaroche aya, naende origete aya; naende twamanyire ng'a oborori bwaye nobw'ekeene. 25 Nare naende ayande amange ayakorete Yesu, naro kararikwe erimo erimo, iga ngokaga ng'a nonya nense yonsi tegoisana chibuku echiranyare korikwa.
1 Ebuku eria ye ritang'ani nakorete, Theofilo, ase chingecho chi'amang'ana onsi Yesu achagete gokora na kworokereria, 2 goika rituko riria abachigete as'Omoika Omochenu abatomwa achorete, akabogorigwa gochia igoro. 3 Na nyuma as'ogochandwa kwaye, akabaorokera ng'a moyo are, as'ebiorokererio ebinge, are kobaorokera as'engaki y'amatuko emerongo ene, nagokwana chingecho chiagwenerete as'obonda bwa Nyasaye: 4 naende, agasangererekana nabarabwo, akabachika tibabaisa korwa Yerusalemu, korende baganye eira ya Tata, eria mwaigwete chingecho chiaye korwa asende: 5 naki Yohana akabatisa as'amache; korende inwe namobatiswe as'Omoika Omochenu nyuma as'amatuko aya atai mange. 6 Erio ekero basangererekanete amo, bakamoboria bakobora, Omonene, ekero eke nario orabairanerie Abaisiraeli obonda bwabo? 7 Akabatebia tari emeremo yaino komanya ebiro gose chingaki Tata abibekire as'okobua kwaye omonyene. 8 Korende namonyore chinguru, ekero obacheire Omoika Omochenu: nainwe namobe abarori bane ase Yerusalemu, nase Boyahudi yonsi na Samaria, na goika chinsinyo chi'ense. 9 Erio ochia gokwana aya, ekero barigerereti, akabogorigwa; rire rikamobwata korwa as'amaiso abo. 10 Ekero barenge korigereria mono namaiso abo gochia igoro, ekero arenge kogenda, abanto babere bagatenena ang'e nabarabwo, abarenge nechianga chindabu; 11 bakabora, Abanto ba Galili naki moteneine mokorigereria igoro? oyo Yesu, obogorigwe korwa asemore kogenda igoro, nabo arache omogwekano oyio oyio buna mwamorora akogenda igoro. 12 Erio bakairana kogenda Yerusalemu korwa egetunwa gekorokwa Emezeituni, kiarenge ang'e na Yerusalemu, koreng'ana norogendo rw'esabato. 13 Goika bagachia gosoa, bakarina enyomba y'egoroba igoro, aase baikaransete Petero, na Yakobo na Yohana, na Anderea, na Filipo na Thomas, Baritholomayo na Mathayo, Yakobo bw'Alufayo, na Simon Zelote, na Yuda o Yakobo. 14 Abaiga bonsi igo barenge amo as'omoyo oyomo as'ogosaba, amo nabarabwo abakungu, na Mariamu ng'ina Yesu, nabamura bamwabo. 15 Amatuko ayio agatenena Petero gati y'aborokigwa, akabora (omobaro bw'amarieta igaigete emia namerongo ebere), 16 Baminto negwenerete ririko riikeranigwe, eriakwanete Omoika Omochenu kare as'omonwa o Daudi, ase chingecho chia Yudas, oyorenge omotang'ani obo abamobwatete Yesu. 17 Naki igarenge konya obarirwe amo naintwe, akanyora ensemo y'ogokora oko. 18 (Naboigo omonto oyo agorete omogondo as'eng'eria y'obobe; akagwa maumama agatandoka, amara aye onsi agasoka. 19 Akamanyekana nabanto bonsi bamenyete Yerusalemu; goika omogondo oria okarokwa as'omonwa obo Akeldama, engecho yaye, Omogondo bw'amanyinga.) 20 Naki narikire as'ebuku ya Zaburi, Egeikaro kiaye kebe ritongo, Nonya 'monto onde tabaisa komenyao: Oborendi bwaye omwao aboire. 21 Naboigo as'abanto batarete naintwe as'ekero gionsi eki Omonene Yesu arenge gosoa nagosoka korwa as'egati yaito, 22 agachaka korwa okobatisa kwa Yohana, goika rituko riria aimogetigwe korwa asetore kogenda igoro, ogweneire oyomo obo akorwe kirori bw'okoboka kwaye amo naintwe. 23 Bakabeka babere, Yusufu orenge korokwa Barsaba, here oetwe erieta riakabere Yusto, na Mattiya. 24 Bagasaba, bakabora, Aye Omonene, omanyete emioyo y'abanto bonsi, tworokie, ning'o oyogwachorire as'abaiga babere, 25 abogorie ensemo y'ogokora oko, nobotomwa obo, obwamochete Yudas agende aase aye. 26 Bakabakorera obomera; obomera bokagwa ase Mattiya; agachorwa koba amo nabatomwa ikomi nomo.
1 Goika rigachia goika rituko ria Pentekote nao barenge bonsi aase aamo. 2 Kogacha mobosokano okogusa korwa igoro buna okogusa gw'ekerambauti gekogenda nechinguru, gegaichora enyomba yonsi eria baikaransete. 3 Gokabaorokera chimeme chi'omorero; obaikaranserete igoro ase ker'oyomo obo. 4 Bonsi bagaichorwa n'Omoika Omochenu, bagachaka gokwana as'emenwa ao ao, buna Omoika obaete ogwatora. 5 Naende mbarengeo Yerusalemu Abayahudi abamenyete, abanto abasike, abanto ba ker'egesaku inse as'erioba. 6 Naboigo eriogi eri rigachia koigugwa nomoganda osangererekanete, bakabwatwa nomoondoko, ekiagera ker'oyomo abaigwete bagokwana as'omonwa oye. 7 Bagaichana bonsi, bagakumia, bagotebania, Aba bonsi bagokwana tari Abagalili? 8 Naki aba bono intwe toigwete ker'omonto as'omonwa oito twaiboretwe noro? 9 Abaparthi, n'Abamedi, n'Abaelamiti, nabwo bamenyete Mesopotamia, Boyahudi na Kappadokia, Ponto na Asia, 10 Furugia na Pamfulia, Misiri, nechinsemo chia Libya ang'e na Kurene, n'Abarumi abageni, Abayahudi nabande baonchogete. 11 Abakrete n'Abaarabu, twabaigure abaiga bagokwana as'amang'ana aito ogokora okonene kwa Nyasaye. 12 Bagaichana bonsi, bagasogwa nomoichano, bagatebania, Engecho yaye ninki amang'ana aya? 13 Abande bagasekereria bagoteba, Igobatindire as'edivai enyia. 14 Korende Petero agatenena amo na baria ikomi nomo, akaaka eriogi riaye, akabatebia, Inwe abanto ba Boyahudi, nainwe mwensi momenyete Yerusalemu, ring'ana eri rimanyeke asemore, motegerere amang'ana ane. 15 Taibo buna mokagete; abanto aba tibatindeti, ekiagera nechinsa isato chia mobaso; 16 korende ring'ana erio ndiria riakwanetwe as'omonwa bw'omobani Yoel: 17 Nebe as'amatuko omoerio, otebire Nyasaye, Nimbaiterere abanto bonsi Omoika one; Nabasae baino nabaiseke baino nababane, Nabamura baino nabarore okorora, Nabagaka baino nabarote chindoto: 18 Namatuko aria nimbaiterere abasomba bane abasacha nabakungu Omoika one, nabarabwo nababane. 19 Ning'orokie ogokumia as'igoro, Nebikone as'ense inse; Amanyinga, nomorero, nerikundesi ri'erioki: 20 Erioba narionchoke ribe omosunte, Nomotienyi obe amanyinga, Ritaracha riria rituko ri'Omonene, Rire rinene kegima, namaiso marore: 21 Naende nebe ker'oyorarirangerie erieta ri'Omonene natorigwe. 22 Inwe abasacha b'Isiraeli, igwa amang'ana aya: Yesu o Nazareti, omonto oorogetigwe asemore na Nyasaye as'ebikone nogokumia nchirage chi Nyasaye akorete asare as'egati yaino, buna inwe abanyene momanyete; 23 omonto oyo igairetwe nainwe as'ekina kia Nyasaye giatebetwe, nas'okomanya kwaye korwa kare, nainwe mokamorua as'amaboko amabe mokamoita: 24 Nyasaye akamobokia, akororobia obororo bw'amakweri, ekiagera tare konyarekana abwatwe naro. 25 Naki Daudi omwatoire amang'ana aye, Namororete Omonene as'obosio bwane amatuko onsi; Naki igare as'okoboko kwane gw'okorio, tinyegerigwa: 26 As'ayio enkoro yane ekagokigwa, oromeme rwane rogasasoka: Na kobua omobere one noro noikaranse as'ogosemeria: 27 Ekiagera togontiga omoika one as'embera, Gose tokomorua Omochenu oo arore ogosareka, 28 Kwanyorokereirie chinchera chi'obogima; Nong'ichorie omogoko as'obosio bwao. 29 Baminto, ninyare gokwana nainwe ntari nobwoba as'obosio bwaino amang'ana ay'omogaka oito omonene Daudi, ng'a igakwete agatindekwa, nembera yaye nao ere naintwe goika rero. 30 Nabo ekiagera are omobani, amanyete ng'a Nyasaye omoriereire as'eira ng'a as'oroiboro rw'chibono biaye as'engecho y'omobere namoimokererie igoro Kristo, aikaranse as'ekerogo ki'obonene; ere omonyene; 31 agata ng'ana koyarora aya, agatora amang'ana okoboka kwaye Kristo, ng'a omoika oye totigetwe as'embera, nonya nomobere oye toroche ogosareka, 32 Yesu oyio Nyasaye akamobokia, naintwe twensi igatore abarori baye. 33 Naboigo karinigwe goika as'okoboko gw'okorio kwa Nyasaye, nakonyora ase Tata eria eira y'Omoika Omochenu, ogeiteire egento eke mwakerorire bono na gokeigwa. 34 Naki Daudi tarinete erioba igoro; korende ere omonyene igagoteba, Omonene namotebetie Omonene one, Ikaransa as'okoboko kwane gw'okorio, 35 Goika mbabeke ababisa bao inse as'amagoro ao. 36 Naboigo tiga enyomba ya Isiraeli yonsi emanye boronge ng'a Nyasaye omokorire Yesu oyio mwabambete koba Omonene na Kristo. 37 Bagachia koyaigwa aya bagasambwa ase chinkoro chiabo, bakamotebia Petero nabatomwa bande, Inki togokora abaminto? 38 Petero akabatebia, Onchoka mobatiswe ker'oyomo as'erieta riaye Yesu Kristo, monyore okorusigwa kw'ebibe; nainwe namonyore ekeegwa ki'Omoika Omochenu. 39 Naki eira eye nas'engecho yaino, nabana baino, nabanto bonsi bare are, na bonsi abarache korangerigwa n'Omonene Nyasaye oito. 40 Akabaorokeria as'amang'ana ande amange mono na kobakurera, ogoteba, Etorie nekegori eke getari boronge. 41 Nabarabwo abaribwatete ring'ana riaye as'omogoko bakabatiswa: nerituko riria bakamenterwa abanto koreng'ana chilifu isato. 42 Bakaba ngoikaransabare agwo, as'okworokereria kw'abatomwa, nas'obomo, nas'ogosamunyora omogati, nas'ogosaba. 43 Ker'omonto agasogwa nokoiroka: ogokumia okonge nebikone bigakoreka as'amaboko abatomwa. 44 Na bonsi abanchete igo barenge aase aamo, naende bakaba nebinto bionsi obomo; 45 bagatonda chinibo chiabo nebinto chibarenge nabio, nakobagabera abanto bonsi koreng'ana fauna ker'omonto arigetie. 46 Amatuko onsi as'omoyo oyomo bakaba ime ase hekalu, bagosamunyora omogati enyomba as'enyomba, nakonyora endagera yabo as'omogoko nas'omoyo omorabu, 47 bakomobaka Nyasaye, nakobagwenera abanto bonsi. Omonene akabamentera kera rituko baria barenge gotorigwa.
1 Nabo Petero na Yohana bagachia gotira amo kogenda hekalu ime, chinsa chi'ogosaba, chinsa kianda. 2 Nomonto oyomo orenge ekerema korwa as'enda ya ng'ina orekobogorigwa nabanto, igo barenge komobeka kera rituko as'egesieri gie hekalu, kiarenge korokwa Ekiya, erinde asabe chimbesa as'abanto bagosoa ime ase hekalu. 3 Omonto oyo ochia kobarora Petero na Yohana bagosoa hekalu ime agasaba aegwe chimbesa. 4 Na Petero akamobeta amaiso, amo na Yohana, akabora, Torigererie intwe. 5 Akabarigereria, agasemeria ng'a naegwe egento nabarabwo. 6 Korende Petero agakwana, Efetha timbwati nonya nethahabu; korende eki mbwate nakio ngokoa. As'erieta ria Yesu Omonazareti, tenena, ogende. 7 Akamobwata okoboko gw'okorio, akamoimokereria igoro: erio chimbaratero chiaye nechinengo chi'amagoro aye chikanyora chinguru. 8 Akaimoka bwango agatenena, agachaka kogenda; agasoa ime ase hekalu amo nabarabwo, okogenda, nagotuma, okomobaka Nyasaye. 9 Abanto bonsi bakamorora gakogenda okomobaka Nyasaye: to bakamomanya ng'a nere oria orenge goikaransa nagosaba chimbesa aria as'egesieri Ekiya gie hekalu: bagaichorwa nogoichana bagakumia amang'ana aria amonyorete. 11 Oria ekerema okonyetwe ekero arenge kobabwatabwata Petero na Yohana, abanto bonsi bakabasangererekanera bwango as'ensemo eria yarenge korokwa egesoero gia Sulemani, bagaichana mono. 12 Goika Petero agachia korora aya akabairaneria abanto, Inwe Abaisiraeli, nki mogokumeria aya? gose naseki mogotobeta amaiso intwe, ng'a buna nintwe twamokora oyo ogenda ase chinguru chiaito intwe, gose as'obuya bvvaito intwe? 13 Nyasaye o Ibrahimu na Isaaka na Yakobo, Nyasaye bw'abatata baito, omoimokereirie igoro omosomba oye Yesu; inwe mwamoitete ere na komokana as'obosio bwa Pilato karenge kogamba ekina kiaye amosibore. 14 Inwe mokamokana oria Omochenu, oria Omonyene oboronge, mokarigia moegwe omoiti: 15 mokamoita oria Omonene bw'obogima, ere Nyasaye omobokirie; naintwe igatore abarori baye, 16 Nas'okwegena kw'erieta riaye erieta riaye riamobekire chinguru omonto oyo mwarorire aiga na komomanya: nokwegena koria kore as'enchera yaye ere kwamonyoreire oyo as'obosio bwaino inwe mwensi obogima obo oboikeranu. 17 Na bono baminto, namanyire ng'a igomwakorete aya as'ogotamanya kwaino, buna nabanene baino bakorete. 18 Korende amang'ana aria arandetie Nyasaye korwa kare as'emenwa y'ababani baye bonsi, ng'a Kristo nachandwe, oyaikeranirie bo. 19 Onchoka rende, moirane erinde ebibe biaino bitinyigwe, binyare gocha ebiro bi'ogotimokigwa korwa as'obosio bwaye Omonene; 20 anyare komotoma Kristo oria orandetigwe asemore korwa kare, ere Yesu: 21 Ere yamogwenerete konyorwa igoro goika chiche chingaki chiogokorwa oboyia ebinto bionsi biakwanetwe na Nyasaye as'emenwa y'ababani baye korwa omochakano bw'ense. 22 Ekiagera Musa nabatebetie abatata baito, ng'a Omonene Nyasaye nabaimokererie omobani, oyorache korwa as'abamino baino, buna inche; moigwere ere as'amang'ana onsi ayarakwane. 23 Naende nabe ng'a ker'omonto otamoigwereti omobani oyio igarasirigwe nagwatananwa nabanto baye. 24 Naboigo nababani bonsi korwa Samwel na baria bachete korwa nyuma yaye, bonsi abakwanete, igobare korandia amang'ana amatuko aya. 25 Inwe igomore abana b'ababani nab'emuma eria, ero Nyasaye abwatanete nabaiso baino, amotebetie Ibrahimu, as'okoibora kwao ebisaku bionsi bi'ense nabisesenigwe. 26 Nyasaye gatiekire komobokia omosomba oye Yesu, akamotoma asemore inwe ritang'ani, erinde abasesenie as'okomwatanana ker'oyomo oino nobobe bwaye.
1 Erio bagachia koba ngokwanabare nabanto baria, abakuani nomotang'ani bwe hekalu n'Abasadukai bakabaorokera, 2 bagaichana ekiagera bakworokereria abanto nakorandia okobokigwa kw'abakure gokonyorekana ase Yesu. 3 Bakababwata bakababeka echela goika mambia: naki konya riabaire mogoroba. 4 Korende abange as'abwo abaigwete ring'ana riria bagancha; nomobaro bw'abasacha igorenge koreng'ana chilifu isano. 5 Goika mambia abanene nabagaka nabariki bagasangererekana Yerusalemu; 6 na Anna omokuani omonene narengeo, na Kaifa, na Yohana, na Iskanderi, nabonsi abarenge eamate yaye omokuani omonene. 7 Bakababeka gati gati, bakababoria, nase nguru ki naende nas'erieta riang'o mogokora aya inwe? 8 Erio Petero agaichorwa n'Omoika Omochenu, akabatebia, Inwe abanene b'abanto nabagaka ba Isiraeli, 9 onye tokoborigwa rero amang'ana ay'oria omonto omoreu buna akonywa: 10 manya inwe mwensi nabanto bonsi ba Isiraeli, ng'a as'erieta ria Yesu Omonazareti, ere inwe mwabambete, Nyasaye akamobokia, as'erieta erio omonto oyo otenenire asemore omogima as'obosio bwaino. 11 Ere nere rigena riria riachayetwe nainwe abaagachi, na rirorio riabekirwe koba rigena rinene ri'ekona. 12 Gose tikori gokonyeka as'onde bwonsi; naki erieta rinde tiriri inse as'erioba eribaeirwe abanabamwanyabanto ritogwenerete gotorigwa narirorio. 13 Nabo kobachia korora oboremu bwa Petero na Yohana, nakomanya ng'a nabanto batanya kwegera, batari nobong'aini, bagakumia; bakabamanya ng'a igo barenge amo na Yesu. 14 Bachia komorora oria okonyetwe oteneine amo nabarabwo tibarenge nering'ana bare koiraneria. 15 Bakabachika batigere korwa ase ritongo, bagakora ekina, 16 bagoteba, Inki torabakorere abanto aba? naki egekone ekenene giakorirwe nabarabwo, kere maiso marore as'abanto bonsi bamenyete Yerusalemu: gose titokonyara kogekana. 17 Korende ring'ana eri tiricha koranda as'abanto, tobairokie, tibakwana naende namonto onde bwonsi as'erieta eri. 18 Bakabarangeria, bakabatianera mono tibabaisa gokwana, nonya nkworokereria as'erieta ria Yesu. 19 Petero na Yohana bakabairaneria bakabatebia, Onye mboronge as'obosio bwa Nyasaye kobaigwera inwe kobua Nyasaye, nacha inwe abanyene: 20 naki intwe titokonyara gotiga koyakwana, amang'ana ayatwaroche na koyaigwa. 21 Nabarabwo, kobabagosire, bakabasibora, tibarora enchera y'okobasiba, as'engecho y'abanto; naki abanto bonsi igo barenge bakomobaka Nyasaye as'ayio akoregete. 22 Naki emiaka yaye omonto oria okoreretwe egekone eke ki'ogokonywa konya okorire emiaka emerongo ene. 23 Erio bachia gosiborwa bakagenda as'abanto baho, bakaborokia chingecho chi'amang'ana onsi batebetigwe nabakuani abanene nabagaka. 24 Nabarabwo bachia koigwa, bakamoakera Nyasaye amariogi abo as'omoyo oyomo, bakobora, Omonene, naye gwakorete igoro nense nenyancha nebinto bionsi bire imeo: 25 Naye ngwakwanete as'omonwa o Daudi omosomba oo, Naseki ebisaku biakorete riroroche, Nabanto barengereirie obokayayu? 26 Abaruoti b'ense bechokire, Nabanene bakorire ekina amo, Igoro as'Omonene na igoro ase Kristo oye. 27 Naki nekeene, Herode na Pontio Pilato amo nebisaku nabanto ba Isiraeli, bagasangererekana igoro as'omosomba oo omochenu Yesu, oyokwabegete amaguta, 28 erinde bakore onsi ay'okoboko kwao nebina biao biare goteba korwa kare aoroke. 29 Korende bono, Omonene, rigereria okoirokia kwabo; obakonye abasomba bao gokwana ring'ana riao as'oboremu, 30 orambore okoboko kwao kogwenia; ebikone nogokumia bikoreke as'erieta ri'omosomba oo omochenu Yesu, 31 Goika bagachia gokora gosaba, aas'aria basangeierekanete, agatengechigwa, bonsi bagaichorwa n'Omoika Omochenu, bagakwana ring'ana ria Nyasaye as'oboremu. 32 Nomoganda bw'abanto abanchete igo barenge enkoro eyemo nomoika oyomo: gose onde tarenge nonya nomo oregoteba ng'a gento kende gionsi eki arenge nakio nenibo yaye omonyene; korende igo barenge nebinto bionsi obomo. 33 Nabatomwa bakaorokia amang'ana okoboka kwaye Yesu ase chinguru chinyinge. Obuya obonge bokaba igoro asebare bonsi. 34 Gose tarenge omonto nonya noyomo as'egati yabo, oyorenge nokoremerwa: naki abanto abarenge nemegondo gose chinyomba igobabigorete, bakareta rigori ri'ebinto biria biagoretwe, 35 bakabibeka as'amagoro abatomwa: ker'omonto akagaberwa koreng'ana nokorigia kwaye. 36 Na Yusufu orogetwe nabatomwa Barnaba (engecho yaye, omwana bw'omogoko), Omolawi, egesaku kiaye nomonto o Kupro, 37 narenge nomogondo akayogora, agachireta chishilingi agachibeka as'amagoro abatomwa.
1 Korende omonto oyomo erieta riaye Anania, amo na Safira mokaye, akagora omogondo, 2 agatanga bobisi ensemo ye rigori riaye, mokaye nere namanyete aya, akareta ensemo eyemo akayebeka as'amagoro abatomwa. 3 Petero akamotebia, Anania, inki kiagera Saitani agoichoire omoyo okomotebia oborimo Omoika Omochenu, na gotanga bobisi ensemo ye rigori ri'omogondo? 4 Ekero orenge asore, torenge enibo yao? Naende ekero ogorirwe torenge as'okobua kwao? Naseki kwarengereria ring'ana eri omoyo oo ime? Tikwamotebia oborimo mwanyabanto korende Nyasaye. 5 Anania agachia koigwa amang'ana aya akaaka nse agakwa. Okoiroka okonge gokabanyora abanto bonsi bayaigwete aya. 6 Abamura bakaimoka, bakamobeka as'egetambaa, bakamobogoria gochia isiko, bakamotindeka. 7 Goika ekero kie chinsa isato nyuma, mokaye agasoa, nere tamanyete ayio abete. 8 Petero akamoiraneria, Ntebia, Igomwagorete omogondo ase rigori erio? Agateba, Ee, ase rigori erio. 9 Petero akamotebia, Naki abete mwatebanirie koyotema Omoika bw'Omonene? rigereria, amagoro abo abamotindeka omosacha oo nar'agwo 'gesieri, nabarabwo nabakobogorie aye naye. 10 Erio akagwa as'amagoro aye agakwa: baria abamura bagasoa bakamonyora okure, bakamoimokia gochia isiko, bakamotindeka amo nomosacha oye. 11 Okoiroka okonge gokabanyora ekanisa yonsi nabanto bonsi abayaigwete aya. 12 Nas'amaboko abatomwa bigakoreka ebikone nogokumia okonge as'abanto: nabarabwo bonsi igo barenge as'okorengereria okomo as'egora ya Sulemani. 13 Nase bonsi onde tarenge nonya noyomo onyarete kobwatana nabarabwo; korende abanto bakabatogia; 14 abanchete bakamenteka as'Omonene, abange abasacha nabakungu; 15 nonya nase chinchera chinene basokia abarwaire isiko, babareria igoro as'emeito namarere, erinde, Petero ogocha, omorengari oye bwoka omobekere ekiriri oyomo bw'abwo. 16 Nero emesangererekano y'emechie yare chinsemo chinsemo chia Yerusalemu egasangererekana, bakoreta abarwaire, nabwo bachandirwe nebirecha ebibe; na bonsi bakagwenigwa. 17 Akaimoka omokuani' omonene nabonsi abarenge amo nere, (abwo nabwo barenge ensemo ya Abasadukai), bagaichorwa neribero, 18 bakababwata abatomwa bakababeka ime as'echela. 19 Korende rilaika ri'Omonene rikaigora ebisieri bi'echela botuko rikabasokia, rigateba, 20 Genda motenene ase hekalu ime mobatebie abanto amang'ana onsi ay'Obogima obo. 21 Nabarabwo bagachia koigwa bakagenda rituko ria mambia hekalu ime bagachaka kworokereria. Korende agacha omokuani omonene nabwo barenge amo nere bakabarangeria abanto be ritongo, nabagaka bonsi ab'abana ba Isiraeli, bagatoma abanto echela ime, erinde babarete. 22 Korende abasomba bagachia goika, tibabarora as'echela ime; bakairana, bagakwana, 23 bakabora, Echela igo twayenyora esiekire buya buya kegima, nabarabwo abarendi bateneine obosio bw'egesieri: korende twachia koigora titonyoreti monto ime. 24 Nabo omotang'ani bwe hekalu nabakuani abanene bagachia koigwa aya, bagasogwa nomoondoko as'engecho yabo, naki arabe amang'ana ayio, 25 Omonto oyomo agacha akaborokia amang'ana ng'a, Abanto baria mwabegete echela ime, nchekalu ime bare, bateneine koborokereria abanto. 26 Erio oria omotang'ani akagenda amo nabasomba, bakabareta, korende tari ase chinguru: naki babairogete abanto, tibabaisa kobaruta amagena, 27 Bakabareta, bakababeka ritongo. Omokuani omonene akababoria, akabora, 28 Inee! titwabachigete inwe ase chinguru, timworokereria as'erieta eri: rora, inwe mwaichoirie Yerusalemu, nokworokereria kwaino, naende morigetie koreta amanyinga ay'omonto oria igoro asetore. 29 Petero nabatomwa bakairaneria, bagakwana, Netogwenerete komoigwera Nyasaye kobua mwanyabanto. 30 Nyasaye bw'abatata baito omobogetie Yesu, ere inwe mwamoitete mokamosunga as'omote. 31 Omonto oyio Nyasaye omoimokereirie igoro as'okoboko kwaye gw'okorio, ab'Omonene naende Omokonyi, abae Abaisiraeli okoonchoka nokwaberwa kw'ebibe. 32 Naintwe igotore abarori b'amang'ana aya; amo n'Omoika Omochenu oyio Nyasaye abaeire bonsi abamoigwerete. 33 Bagachia koigwa, bagasambwa chinkoro chiabo; bakagamba ekina babaite. 34 Korende omonto oyomo Omofarisai, erieta riaye Gamaliel, omworokia bw'amachiko, omonto osikire nabanto bonsi, agatenena ase ritongo, agachika abatomwa babekwe isiko ake. 35 Akabatebia, Inwe abasacha ba Isiraeli, erende buna morabakore abanto aba, 36 naki ritang'ani ri'amatuko aya, naimoka Theuda, agetogia ng'a ere nomonto omonene; abanto koreng'ana chimia inye bakabwatana nere: nere agakwa; na bonsi abamwanchete bagatananeka bakaba tari gento. 37 Nyuma as'omonto oyio, akaimoka Yudas Omogalili, amatuko aria ay'okorikerwa ebango, akabang'usa abanto batai bake komotunyana: nere boigo agasira; na bonsi abamwanchete bagaserebekana. 38 Na bono nabatebirie, Eatanane nabanto aba, batige: naki ring'ana eri gose emeremo eye onye neya mwanyabanto, nesarigwe; 39 korende onye neya Nyasaye timokonyara koyesaria; mobaise kororekana ng'a Nyasaye mokorwania. 40 Bagancha amang'ana aye bakabarangeria abatomwa, bakabaaka, bakabachika tibakwana as'erieta riaye Yesu; erio bakabatiga bagende. 41 Nabarabwo bakarua ase ritongo riria, bagogete ekiagera babarirwe ng'a bagweneire gosokigwa as'engecho y'erieta riaye. 42 Na kera rituko ime ase hekalu nechinyomba chiabo ime, tibatigete kworokereria nakorandia amang'ana amaya a Yesu ng'a nere Kristo.
1 Goika amatuko aria aborokigwa barenge komentekana omobaro obo, nkwabete okwemurungania kw'Abaelenisti igoro as'Abaibirania as'engecho y'ababoraka babo abebetwe as'ogokora gwa kera rituko. 2 Baria ikomi nababere bakabarangeria omoganda bw'aborokigwa, bagateba, Tegwenereti intwe koritiga ring'ana ria Nyasaye gokora emeremo y'emesa. 3 Gaki baminto, chora abanto batano nababere korwa gati asemore abagotebwa ng'a nabaya, baichire n'Omoika nechisemi, erinde tobabeke igoro ase ring'ana eri. 4 Naintwe natogenderere as'okomosaba Nyasaye na korikorera ring'ana riaye. 5 Ring'ana eri rikagwenera as'omosangererekano bwonsi: bakamochora Stefano, omonto oichire nokwegena n'Omoika Omochenu, na Filipo, na Prokoro, na Nikanora, na Timon, na Parmena, na Nikolao omworokigwa bw'Antiokia: 6 bakababeka as'obosio bw'abatomwa: erio bachia gokora ogosaba bakabeka amaboko abo igoro yabo. 7 Ring'ana ria Nyasaye rikamenteka; nomobaro bw'aborokigwa okamenteka mono ase Yerusalemu: nomoganda omonene bw'Abakuani bakaigwera okwegena. 8 Na Stefano, oichire nobuya, nokobua, igarenge gokora ogokumia nebikone ebinene as'abanto. 9 Korende abanto bande b'esunagogi yare korokwa esunagogi y'Amaliberitino, ney'Abakurene ney'Abaisikanderia neya baria Abakilikia n'Asia, bakaamererania na Stefano. 10 Korende tibanyarete koamererania nechisemi chiaye nonya n'Omoika are gokwana noro. 11 Goika bakabagenka abanto bare gokwana, twamoigure omonto oyo ogokwana amang'ana ay'okorama Musa na Nyasaye, 12 Bagasega abanto nabagaka nabariki, bakamochiera, bakamobwata, bakamoira as'obosio bwe ritongo. 13 Bagatenenia abarori b'oborimo abare goteba, Omonto oyo tatigeti gokwana amang'ana ay'okorama igoro y'aase achenu na igoro y'amachiko: 14 naki twaigure ogoteba ng'a Yesu oyio Omonazareti naasarie aas'aa, nagochionchora chingecho echi twaetwe na Musa. 15 Abanto bonsi abaikaransete ase ritongo riria bakamobeta amaiso abo, bakamorora obosio bwaye bwabaire buna obosio bwe rilaika.
1 Omokuani omonene akabora, Inee! Amang'ana ayio naboigo are? 2 Nere agakwana, Baminto, nabatata bane, Igwa. Nyasaye bw'obonene namoorokerete tata oito Ibrahimu, ekero arenge ase Mesopotamia, ataramenya Haran, 3 akamotebia, Karue as'ense yao, nas'eamate yao, ogende goika as'ense ndakworokie, 4 Erio akarua as'ense y'Abakalidai, akamenya Haran: akarua agwo nyuma as'ogokwa gw'ise, Nyasaye akamong'anyia goika as'ense eye momenyete inwe bono: 5 nonya tamoete omwando imaa koreng'ana as'okobeka okogoro: akaria eira ng'a namoe, ebe obomenyo bwaye, ney'oroiboro rwaye, nyuma yaye, ekero atarenge nomwana. 6 Nyasaye agakwana iga, ng'a oroiboro rwaye nababe abageni as'ense y'abanto bande, nabarabwo nababakore koba abasomba babo, nakobakora bobe as'engaki y'emiaka chimia inye. 7 Negesaku keria kerabakore abasomba nimbanachere ekina inche, agateba Nyasaye: na nyuma as'ayio nabasoke, nabarabwo nabansasime aas'aiga. 8 Akamoa eira y'okwaroka: erio Ibrahimu akaibora Isaaka, akamosara rituko ri'atano natato; Isaaka akamoibora Yakobo, Yakobo akabaibora baria ikomi nababere abagaka baito, 9 Baria abagaka baito bakamororera ribero Yusufu, bakamogora gochia Misiri: Nyasaye akaba amo nere, 10 akamorusia as'emechando yaye yonsi, akamoa egesio nechisemi as'obosio bwa Farao, omoruoti o Misiri; nere akamokora gavuna o Misiri nenyomba yaye yonsi. 11 Erio enchara ekaba igoro as'ense yonsi ya Misiri na Kanani, nemechando emenge: nabatata baito tibanyorete endagera ebaisanete. 12 Goika Yakobo agachia koigwa ng'a aria Misiri ner'aroro endagera, akabatoma abatata baito ekero kie ritang'ani. 13 Nas'orogendo rwa kabere Yusufu akeorokia as'abamura bamwabo; eamate ya Yusufu ekaorokigwa maiso marore ase Farao. 14 Yusufu agatoma abanto akamorangeria Yakobo ise neamate yaye yonsi pi, abanto emerongo etano nebere nabatano. 15 Yakobo agatirimboka goika Misiri; agakwa ere, nabatata baito; 16 bakaimokigwa goika Sukem, bagatindekwa as'embera eria Ibrahimu ayegorete ase rigori rie chifetha as'abana ba Emmor, aria Sukem. 17 Erio ekero ki'eira eria Nyasaye aete Ibrahimu gegachia koba ngoika kere, baria abanto bakamenteka nakobucha mono aria Misiri, 18 goika omoruoti onde akaimoka, oyotamomanyete Yusufu. 19 Oyio akagekora bobe egesaku giaito, nakobakorera amabe abatata baito, akabachika batugute abana babo ebing'werere, erinde tibaba moyo. 20 Ekero ekio akaiborwa Musa, nere igarenge omuya mono; akarerwa egeka ki'emetienyi etato as'enyomba ya ise: 21 goika agachia gotugutwa, omoiseke o Farao akamoira, akamorera abe buna omwana oye. 22 Musa akorokererigwa chisemi chionsi chia Misiri; akaba omokong'u as'amang'ana nogokora. 23 Emiaka yaye egachia goika emerongo ene akarengereria omoyo oye kogenda kobarora abamura bamwabo abana ba Isiraeli. 24 Akamorora oyomo ogochandwa, akamokonya, akamoakanera egesiomba oria orenge gochandwa, akamoaka Omomisiri. 25 Igakagete ng'a abamwabo nabamanye ng'a Nyasaye obaeire ogokonyeka as'okoboko kwaye; korende tibainyora. 26 Rituko ria kabere riaye akabaorokera ekero barenge koamererania, akarigia kobabwatania, agateba, Inwe abanene bane inwe igo more abamo; nki mokwomanera? 27 Korende oria orenge komochegia oyomwabo akamosukeria are, agateba, Ning'o okobeka obe omonene oito, nomogambi oito? 28 Inee! norigeti kong'ita inche buna kwamoita oria Omomisiri igoro? 29 Musa agatama ase ring'ana erio, akamenya buna omogeni as'ense ya Midiani akaibora abana babere aroro. 30 Goika emiaka emerongo ene egachia koera, rilaika ri'omonene rikamoorokera as'eroro y'egetunwa Sinai, as'ogwoka kw'omorero, as'egetugi. 31 Musa agachia koyorora, agakumia okorora koria: agachia goika ang'e erinde arore, eriogi ri'Omonene rikamochera, 32 Inche Nyasaye bw'abaiso bao, Nyasaye o Ibrahimu, na Nyasaye o Isaaka, na Nyasaye o Yakobo. Musa akaiguswa, tarigia korigereria. 33 Omonene akamotebia, Rusia ebikoroto biao naki aas'aiga oteneine naas'aachenu. 34 Bono narorire emechando y'abanto bane bareo Misiri, naigure okorera kwabo, naikire mbarusie: naboigo bono, ningotome goika Misiri. 35 Musa oyio bamwangete, bagoteba, Ning'o okobeka koba omonene nomogambi? nere otometwe na Nyasaye koba omonene nomokonyi, as'okoboko kwa riria rilaika riamoorokerete ase keria egetugi. 36 Oyio nere obarusetie o, agakora ogokumia nebikone as'ense ya Misiri, nas'enyancha embariri, nas'eroro egeka ki'emiaka emerongo ene. 37 Musa oyio nere obatebetie abana ba Isiraeli, Omonene Nyasaye oino nabaimokererie igoro omobani korwa as'abamino, buna inche: namomoigwere oyio. 38 Ere nere orenge as'ekanisa eroro amo na riria rilaika eriakwanete nere as'egetunwa Sinai, naende amo nabatata baito; nere onyorete amang'ana obogima atoe intwe: 39 omonto oyio abatata baito tibarigeti komoigwera, korende bakamosukeria are, nas'emioyo yabo bakairana Misiri. 40 Bakamotebia Haron, tokorere chinyasaye chiranyare gototang'ana, naki oyio Musa otoruseti as'ense ya Misiri, titomanyeti eriamonyorire. 41 Bagakora emori amatuko aria, bakareta ebing'wanso as'esanamu eria, bakagokera emeremo y'amaboko abo. 42 Korende Nyasaye akaonchoka akabatiga gosasima omoganda o igoro buna arigetwe as'ebuku y'ababani, Inee mwanduseretie ching'iti chinyenyire nebing'wanso, Emiaka emerongo ene as'eroro, Inwe enyomba ya Isiraeli? 43 Nainwe mwabogoreti eema ya Molok, Neng'enang'eni ya nyasaye yaino Refan, chisanamu echimwakorete erinde mochisasime: Nainche nimbang'anyie mogende are goika Babeli. 44 Eema eria y'emuma igo yarenge amo nabatata baito as'eroro, buna achigete ere oyokwanete na Musa, ng'a ayekore boronge kegima buna omogwekano oria aroche. 45 Ero abatata baito mbayebwatete, bakayesoyia amo na Yoshua as'obomenyo bw'ebisaku biria, barabwo Nyasaye abaseretie as'obosio bw'abatata baito, goika amatuko a Daudi; 46 oyonyorete ogwancherwa as'obosio bwa Nyasaye, nere igasabete amonyorere Nyasaye o Yakobo obomenyo. 47 Korende Sulemani namoagacherete enyomba. 48 Korende ere Oyore Igoro tari komenya ase chinyomba echiagachire namaboko, buna agoteba omobani, 49 Erioba nekerogo kiane ki'obonene, Nense naase nkobeka amagoro ane: Inyomba ki moranyare kong'agachera? otebire Omonene: Gose naase ki ndanyare gotimokera? 50 Tari okoboko kwane kwayakorete aya onsi? 51 Inwe abanyene ebigoti ebikong'u, motarogeti emioyo nonya namato, amatuko onsi igo mogotanga Omoika Omochenu: buna abaiso baino barenge gokora, nainwe naboigo. 52 Norori as'ababani abaiso baino batachandete? nabarabwo mbabaitete baria babanete amang'ana ogocha kwaye oria Omonyene Oboronge: ere inwe bono mwabaire abakorua nabaiti; 53 inwe mwanyorete amariko as'ogokora kw'amalaika, gose timwayabwatete. 54 Erio bagachia koigwa amang'ana aya, bagasambwa chinkoro, bakamoromananeria amaino. 55 Nere, oichire n'Omoika Omochenu, akarigereria namaiso aye, akarigereria igoro, akaborora obonene bwa Nyasaye, na Yesu oteneine okoboko gw'okorio kwa Nyasaye. 56 Agateba, Rora narorire igoro amanoirwe, n'Omwana-o-mwanyabanto otenenire okoboko gw'okorio kwa Nyasaye. 57 Bakaaka egeturi as'eriogi rinene, bagakuneka amato abo, bakamorindokera as'omoyo oyomo; 58 bakamosokia isiko as'omochie, bakamoaka amagena: nabwo abarori bagachibeka chianga chiabo as'amagoro omomura oyomo orenge korokwa Saulo. 59 Bakamoaka amagena Stefano, nere agasaba, ogoteba, Omonene Yesu, ira omoika one. 60 Akaaka amaru inse, akarera as'eriogi rinene, Omonene, tobabarera ebibe ebi. Ochia gokora gokwana aya akarara, okorara gw'ogokwa.
1 Na Saulo akarora buya aitwe. Rituko riria emechando egacha emenge igoro as'ekanisa yarenge Yerusalemu; bonsi bagatananekana as'ense ya Boyahudi na Samaria, tatiga abatomwa. 2 Abanto abegeni bakamotindeka Stefano, bakamorera okorera okonge. 3 Korende Saulo akayesaria ekanisa, agasoa ker'enyomba, nakobakurura abasacha nabakungu nakobaira echela. 4 Korende baria batananegete bakagenda chinsemo ne chinsemo bakorandia ring'ana. 5 Na Filipo agatirimboka agasoa omochie o Samaria, akabaranderia Kristo. 6 Nemeganda yonsi as'omoyo oyomo bagancha koigwa amang'ana onsi aregokwanwa na Filipo, bagachia koyaigwa nakorora ebikone ebiarenge gokora. 7 Naki abange barenge nebirecha bi'eubi bikarua asebare, bikarera as'egeturi ekenene: nabanto baringagete nebirema, bakagwenigwa. 8 Okaba omogoko omonge as'omochie oria. 9 Nomonto oyomo, erieta riaye Simon, igarenge gokora oborogi as'omochie oria korwa kare, okobaichania abanto ba Samaria, ogoteba ng'a ere nomonto omonene: 10 bonsi bakamwancha as'egeka ekenge, korwa abake goika abanene, bagoteba, Omonto oyo nokobua kwa Nyasaye koria gokorokwa Okonene. 11 Bakamoigwera, ekiagera egeka ekenene igarenge kobaichania as'oborogi bwaye. 12 Korende bagachia komwancha Filipo, ekero akorandia amang'ana amaya ay'obonda bwa Nyasaye, nerieta riaye Yesu Kristo, bakabatiswa abasacha nabakungu. 13 Nere Simon omonyene agancha akabatiswa, akaba amo na Filipo: agachia korora ebikone nogokumia okonene kware gokoreka, agaichana. 14 Nabatomwa abarenge Yerusalemu kobachia koigwa ng'a Abasamaria babwatire ring'ana ria Nyasaye, bakabatomera Petero na Yohana: 15 bagatirimboka, bakabasabera banyore Omoika Omochenu: 16 naki konyora torahaikera nonya noyomo obo: tatiga babatisetwe rioka as'erieta riaye Omonene Yesu. 17 Bakababekera amaboko abo igoro yabo, nabarabwo bakanyora Omoika Omochenu. 18 Goika Simon agachia korora ng'a abanto igo bakoegwa Omoika Omochenu as'okobekerwa amaboko nabatomwa, akarigia kobaa chifetha, agateba, 19 Ing'a nainche okobua oko, erinde ker'omonto ndabekere amaboko ane, anyore Omoika Omochenu. 20 Petero akamotebia, chifetha chiao chisirere are amo naye, ekiagera ogokaga ng'a ekeegwa kia Nyasaye igo gekonyorekana as'enibo, 21 Tori amo gose tori nensemo ase ring'ana eri: naki omoyo oo tori omoronge as'obosio bwa Nyasaye. 22 Gaki, onchoka as'obobe bwao obo, omosabe Omonene erinde, keranyarekatte, bwaberwe ebirengererio ebi bi'omoyo oo. 23 Naki nakororire nore nobororo buna endorwe, naende igore as'egesibo ki'obobe. 24 Simon akairaneria, agateba, Insabera inwe ase Nyasaye, tabaisa konyora amang'ana aya onsi mwateba. 25 Nabarabwo bagachia koborokia nakorirandia ring'ana ri'Omonene, bakairana Yerusalemu bakorandia enchili as'ebichie ebinge bi'Abasamaria, 26 Rilaika ri'Omonene rigakwana na Filipo, rikamotebia, Manora ogende ensemo ya sugusu goika enchera eria egotirimboka korwa Yerusalemu ekogenda Gaza, naroro neroro. 27 Akaimoka, akagenda: erio rora, akamorora omonto Omoethiopia, omogomba, orenge nobonene inse ase Kandake eting'ana ya Ethiopia, obegetwe igoro as'enibo yaye yonsi, nere igachete Yerusalemu gosasima; 28 ekero akoirana oikaransete egari yaye ogosoma ebuku y'omobani Isaya. 29 Omoika okamotebia Filipo, Ika ang'e negari eye, obwatane nero. 30 Nabo Filipo akagenda bwango, akamoigwa ogosoma ebuku y'omobani Isaya, akabora, Inee! Kwayamanyire aya onsi ogosoma? 31 Akamoiraneria, Naki ndakore imanye, omonto atantang'aneti? Akamosorora Filipo arine aikaranse amo nere. 32 Naase'ay'amariko arenge gosoma nar'aya, Akairwa buna eng'ondi egochia konyenywa: Naende buna emanwa y'eng'ondi etari kwana as'obosio bwaye oria okoyenacha amarionya, Naboigo ere nere tamanorete omonwa oye: 33 As'ogwekeyia kwaye ekina kiaye gekarusigwa: Ning'o oranyare koorokia ekegori kiaye? Naki obogima bwaye bwarusigwe as'ense, 34 Oria omogomba akamoiraneria Filipo, Nagosabire, omobani oyo igagokwana amang'ana aya ase ng'o? nasere omonyene, gose namang'ana omonto onde? 35 Filipo akamanora omonwa oye, ogochakera ririko eri, akamoranderia amang'ana amaya a Yesu. 36 Bakaba bakogenderera nchera bagaika as'amache are: oria omogomba akabora, Inki kerantange timbatiswa? 37 Filipo agateba, koranche as'omoyo oo bwonsi, mbuya. Akairaneria, agakwana, Namwanchire Omwana o Nyasaye ng'a nere Yesu Kristo, 38 Agachika egari eria etenene: bagatirimboka bonsi babere as'amache, Filipo noria omogomba; akamobatisa. 39 Erio, bagachia korwa as'amache, Omoika bw'Omonene okamotaboria Filipo: oria Omogomba tamorora naende, naki igagendete ore nomogoko: 40 Filipo akarorekana as'Azoto, nekero arenge goeta akarandia enchili as'emechie yonsi, goika agaika Kaisaria.
1 Korende Saulo, akamenta okoirokia nakorengereria kobaita aborokigwa b'Omonene, akamogendera omokuani omonene, 2 akarigia amoe amarube ay'okogenda Damesiki, ayarikire ase chisunagogi, erinde gakorora abanto b'Enchera eye, abasacha gose abakungu, abasibe nakobareta Yerusalemu, 3 Goika ekero arenge kogenda agaika ang'e na Damesiki; erio mobosokano amasase akamomesera korwa igoro: 4 akagwa inse, akaigwa eriogi rikomotebia, Saulo, Saulo, naki okondosia? 5 Akabora, Naye ng'o Omonene? Agateba, Inche ninche Yesu kwarosirie aye: 6 korende tenena, osoe omochie, notebigwe ayarakogwenere gokora. 7 Nabanto bagendete amo nere, bagatenena bagakirakiri, bakarigwa eriogi, ko tibarora monto. 8 Saulo akaimoka korwa inse; namaiso aye agachia koramokia tarora gento: bakamobwata okoboko bakamoreta goika Damesiki. 9 Akaba amatuko atato atari korora, nonya nkoria, nonya nkonywa. 10 Nabo narenge omworokigwa Damesiki, erieta riaye Anania; Omonene akamotebia as'okorora, Anania, Akabora, Nao ndaa Omonene. 11 Omonene akamotebia, Imoka ogende enchera eria ekorokwa Endonge, origie ime as'enyomba ya Yudas omonto erieta riaye Saulo o Tariso: ekiagera nao are agosaba; 12 nere omororire omonto erieta riaye Anania, ogosoa, okobeka amaboko igoro asare, anyare korora. 13 Korende Anania akairaneria, Omonene, naigure chingecho chi'omonto oyio as'abanto abange, amabe amange ayabakoreire abachenu bao Yerusalemu: 14 goika aiga igare nokobua as'abakuani abanene abasibe bonsi abagwatora erieta riao. 15 Korende Omonene akamotebia, Bwatia enchera: naki oyio negento egechore asende aribogorie erieta riane as'obosio bw'ebisaku, nabaruoti, nabana ba Isiraeli: 16 naki nimworokie amang'ana amange amanene ayaramogwenere gochandwa as'engecho y'erieta riane. 17 Anania akagenda, agasoa aria nyomba ime; akamobekera amaboko akabora, Oyominto Saulo, Omonene ontomire, Yesu, ere oyokoorokerete as'enchera kware gochichera, onyare ktfrora naende, oichorwe n'Omoika Omochenu. 18 Erio kegima akagwa korwa amaiso aye buna amasabo, akanyora okorora; agatenena, akabatiswa; 19 akaria endagera, akanyora chinguru. Akaba agwo amatuko atai make amo naborokigwa barenge Damesiki. 20 Erio akamorandia Yesu ase chisunagogi, ng'a ere n'Omwana o Nyasaye. 21 Na bonsi abaigwete bagaichana, bagateba, Tari ere oyo orenge kobabwata abare gwatora erieta eri Yerusalemu? Naiga ochire as'engecho eye, erinde abasibe nakobaira as'abakuani abanene? 22 Saulo akamenta koba nechinguru, akabatantania Abayahudi bamenyete Damesiki, akaborokia ng'a oyo nere Kristo. 23 Goika amatuko amange agachia goeta Abayahudi bagakora ekina erinde bamoite: 24 korende ogotiana kwabo gokamanyekana na Saulo. Bakamoboera geita mobaso na botuko banyare komoita. 25 Aborokigwa baye bakamoimokia botuko bakamotirimbokia as'oruaki, bakamoikia as'egetonga ime. 26 Na Saulo agachia goika Yerusalemu agatema kobwatana naborokigwa: nabarabwo igo barenge komoiroka bonsi, tibanyara gwancha ng'a ere nomworokigwa. 27 Korende Barnaba akamoira, akamoreta as'abatomwa, akaborokereria buna amoroche Omonene nchera, naende ng'a nakwanete nere, na buna arandeti noboremu ase Damesiki as'erieta riaye Yesu. 28 Nere akaba amo nabarabwo ase Yerusalemu, ogosoa nagosoka. 29 Akarandia as'erieta riaye Yesu noboremu atari nobwoba: agakwana nakoamererania n'Abaelenesti; nabarabwo bagatema komoita. 30 Korende ekero abamwabo bachia konyora amang'ana, bakamoira goika Kaisaria, bakamotoma gochia Tariso. 31 Erio ekanisa ekanyora omorembe ase Boyahudi yonsi na Galili na Samaria, bakaagacherwa, bakagenderera as'okoiroka kw'Omonene, nokoremia kw'Omoika Omochenu, bakanienteka. 32 Egachia koba Petero ekero arenge konagoetanana chinsemo chionsi akabatirimbokera abachenu bamenyete Ludda. 33 Akamorora omonto oyomo aria, erieta riaye Ainea, omonto oyio oraire 'borere emiaka etano netato: ekiagera arenge omokogotaru. 34 Petero akamotebia, Ainea, Yesu Kristo ogokonyire: imoka, bware oborere bwao. Erio kegima akaimoka. 35 Nabanto bonsi bamenyete Ludda na Saron bakamorora, bakamoonchokera Omonene. 36 Nomworokigwa oyomo orenge Yoppa, erieta riaye Tabitha (engecho yaye Dorika, gose engabi:) omokungu oyo igarenge oichire nogokora okuya nchiegwa ebiarenge korua. 37 Ekaba amatuko aria akarwara, agakwa: erio kabamosibirie, bakamobeka egoroba. 38 Ekiagera Ludda orenge ang'e na Yoppa, nabarabwo baigure ng'a Petero nao are aria, bagatoma abanto babere asare, komosorora tatebana gocha asebare. 39 Petero akaimoka akagenda nabarabwo. Agachia goika bakamoira egoroba igoro: ababoraka bonsi bagatenena ang'e nere bakorera, nakomworokia chiganchwa nechianga echiare gokora Tabitha ekero keria arenge amo nabarabwo. 40 Petero akabasokia bonsi, agatung'ama, agasaba; origereretie gochia as'oborere, agakwana, Tabitha, imoka. Nere akaramokia amaiso aye, agachia komorora Petero akaboka agaikaransa. 41 Akamoa okoboko, akamoimokia; goika ochia kobarangeria baria abachenu nababoraka, akamobeka as'obosio bwabo ore moyo. 42 Akamanyekana ase Yoppa, as'omochie omogima: abanto abange bakamwegena Omonene. 43 Goika Petero akamenya amatuko atai make agwo Yoppa, enyomba y'omonto oyomo, erieta riaye Simon, omorosia amao.
1 Narenge omonto Kaisaria erieta riaye Kornelio, omotang'ani bw'omoganda orekorokwa Ekeitaliano, 2 omonto omuya, oyosigete Nyasaye, ere nenyomba yaye yonsi, nere igarenge kobaa abanto ebiegwa ebinge, nagosaba Nyasaye amatuko onsi. 3 Akarora as'okorora maiso marore, ekero gie chinsa kianda chia niobaso, rilaika ria Nyasaye rikamochera nakomotebia, Kornelio! 4 Akamorigereria mono, akairoka, agateba, Inki Omonene? Akamotebia, Ogosaba kwao nebiegwa biao biaikire igoro nakoba okoinyoria as'obosio bwa Nyasaye. 5 Gaki toma abanto Yoppa, omorangerie Simon okorokwa Petero: 6 Ere nomogeni bw'omonto oyomo, erieta riaye Simon, omoroisia amao, enyomba yaye ere engegu y'enyancha, nagotebie ayakogwenerete gokora. 7 Riria rilaika riakwanete nere agachia koimoka, Kornelio akarangeria abasomba babere b'enyomba yaye, nomosigari oyomo omosike, ase baria bare komokorera botambe; 8 agachia gokora kobatebereria amang'ana onsi akabatoma, bakagenda Yoppa. 9 Goika rituko ria kabere, ekero barenge kogenda nagoika ang'e omochie, Petero akarina kerama igoro, gochia gosaba, ekero gie chinsa isano nemo chia mobaso: 10 akaba nenchara, akarigia koria: korende ekero barenge koroisia ang'e, omoika oye okairwa as'okorota, akaba buna oyokure; 11 akarora igoro amanokire, negento gekomoikera buna egetambaa ekenene, gegotirimbokigwa ase chinsemo chiaye inye goika inse: 12 ime yaye ebisaku bionsi bie ching'iti chire namagoro ane, neching'iti chi'orosana, nachirochio echikwagura, nechinyoni chi'igoro. 13 Eriogi rikamochera, Imoka Petero; onyenye orie. 14 Petero akabora, Yaya Omonene, naki tinanya koria nonya ng'ake egento ekebe gose ekere neubi. 15 Eriogi rikamochera eria kabere, Egiasibigwe na Nyasaye, tokeroka ekebe. 16 Ring'ana eri rigakoreka ara gatato: naende egento keria gekaimokigwa gochia igoro. 17 Goika Petero agachia korora ogwechanda ime as'omoyo oye, inki engecho yaye okorora okwo aroche, rora, baria abanto batometwe na Kornelio, kobarorire enyomba ya Simon, bagatenena obosio bw'egesieri, 18 bakarangeria, bakoboria onye Simon okorokwa Petero nao amenyete imeo. 19 Nekero Petero are korengereria, okorora, okwo, Omoika okamotebia, Mbare abanto batato bakorigetie. 20 Imoka, oike, ogende nabarabwo, toba nogotiting'ara: naki inche nabareta. 21 Petero akabaikera baria abanto batometwe asare na Kornelio, agakwana, Inche nere oyo mokorigia. Igo mwacha as'engecho ki? 22 Bagateba, Kornelio omotang'ani, omonto omonyene oboronge, omoiroki Nyasaye, ore nokobakwa okuya as'egesaku gionsi ki'Abayahudi, nakurerwa nerilaika richenu gotoma abanto asore ogende enyomba yaye anyare koigwa amang'ana ao. 23 Agateba, soa; akabaroisia. Goika rituko ria kabere Petero akaimoka amo nabarabwo, nabande b'abamwabo bamenyete Yoppa bakagenda nere, 24 Goika rituko ria kabere riaye bagasoa, Kaisaria. Na Kornelio igarenge obaganyete, konya osangereirie eamate yaye nabasani baye. 25 Petero ekero arenge gosoa, Kornelio agasoka komorotota, akamogwera amagoro, akamosasima. 26 Petero akamoimokia, agateba, Tenena; inche nainche nomonto. 27 Nas'ogokwana nere agasoa, akarora abanto abange basangererekanire: 28 akabatebia, Mwamanyire ng'a tari boronge omonto ore Omoyahudi abwatane nomonto ore bw'egesaku kende, nonya nokomogendera; korende Nyasaye nankanetie, timoroka monto onde bwonsi, oyo bw'eubi gose omobe. 29 As'engecho eyio ngacha konarangeretigwe tinanga, gaki nkoboriande, ing'ana ki eri mwandangerereti? 30 Kornelio agakwana, Rero nerituko ria kane korwa ekero narenge nyeng'atete goika ensa eye; nechinsa kianda igo narenge ngosaba nyomba mwane; ani! omonto nateneine as'obosio bwane, oyore nechianga chikomekameka, 31 agateba, Kornelio, ogosaba kwao kwaigurwe, nebiegwa biao biainyoirwe as'obosio bwa Nyasaye. 32 Gaki toma abanto gochia Yoppa, omorangerie Simon okorokwa Petero, ache aiga; igakamenyete as'enyomba ya Simon, omoroisia amao ang'e nengegu, nere karache nakwane naye. 33 Erio ngatoma abanto asore, naye gwakorire buya gwachire. Na bono intwe twensi nao tore aiga as'obosio bwa Nyasaye, tonyare koyategerera amang'ana onsi gwatebetigwe na Nyasaye. 34 Petero akamonora omonwa oye, akabora, Ekeene natiekire komanya ng'a Nyasaye tari nagwanchereria: 35 korende ase ker'egesaku omonto omoirogetp nagokora oboronge igagwancherwa nere, 36 Ring'ana riria eri abairerete abana ba Isiraeli, are korandia amang'ana amaya ay'omorembe ase Yesu Kristo (nere Omonene o bonsi) — 37 Ring'ana riria mwarimanyire, riagendereire ase Boyahudi yonsi, rigachakera Galili, nyuma y'ebatiso Yohana arandeti; 38 Amang'ana a Yesu o Nazareti buna Nyasaye amobegete amaguta as'Omoika Omochenu nechinguru: nere agatara chinsemo ne chinsemo, ogokora emeremo emiya nakogwenia bonsi abaregetwe na saitani; naki Nyasaye arenge amo nere. 39 Naintwe igotore abarori b'amang'ana onsi ayarenge gokora as'ense y'Abayahudi nase Yerusalemu; ere bakamoita bakamosunga as'omote. 40 Oyo Nyasaye akamobokia rituko ria gatato akamwanchera kooroka. 41 Tari as'abanto bonsi, tatiga as'abarori abachoretwe na Nyasaye, nabwo intwe, twarenge koria na konywa amo nere nyuma as'okoboka kwaye. 42 Agatochika tobaranderie abanto na kobaorokeria ng'a oyo nere ochoretwe na Nyasaye abe omogambi bw'abare moyo, nabakure. 43 Oyo ababani bonsi bakamwatora, ng'a as'erieta riaye ker'oyoramwanche naegwe okorusigwa kw'ebibe. 44 Petero ekero arenge gokwana amang'ana aya Omoika Omochenu okabaikera bonsi abaigwete amang'ana aye. 45 Na baria abarogete abanchete, bagaichana, abanto bonsi abachete amo na Petero, ekiagera ebisaku nabarabwo baikeirwe nekeegwa ki'Omoika Omochenu. 46 Naki babaigwete bagokwana as'emenwa, bakamotogia Nyasaye. Erio Petero akabora, 47 Omonto nanyare kobakania aba amache, tibabatiswa, abanyorire Omoika Omochenu koreng'ana buna intwe? 48 Agachika babatiswe as'erieta riaye Yesu Kristo. Erio bakamosorora amente komenya amatuko atai make.
1 Nabo abatomwa nabaminto barenge ase Boyahudi bakanyora amang'ana ng'a abanto b'ebisaku nabarabwo baribwatire ring'ana ri'Omonene. 2 Na Petero agachia gotira kogenda Yerusalemu, baria abaroku bakaamererania nere, bagoteba, 3 Ngwasoa as'abanto batarogeti, okaragera nabarabwo. 4 Petero agachaka kobatebereria as'okoroberia amang'ana, agateba, 5 narenge as'omochie o Yoppa, ngosaba: omoika one okairwa as'okorora, nkarora egento buna egetambaa ekenene gegoika, gegotirimbokigwa korwa igoro ase chinsemo chiaye inye; gekang'ikera: 6 ngakerigereria mono, nkorengereria, nkarora ching'iti chi'ense chi'amagoro ane neching'iti chi'orosana, nechio chikwagura, nechinyoni chi'igoro. 7 Nkaigwa eriogi rigontebia, Imoka Petero; onyenye orie. 8 Ngateba yaya, Omonene, naki egento ki'eubi gose ekere ekebe tikianyagosoa omonwa one ime. 9 Eriogi rikang'iraneria ara kabere korwa igoro, Ebiasibirie Nyasaye, tobiroka aye ebibe. 10 Ring'ana rigakoreka ara gatato: naende ebinto bionsi bikang'uswa gochia igoro. 11 Ani, erio agwo abanto batato mbateneine as'obosio bw'enyomba eria narenge ime, abatometwe asende korwa Kaisaria. 12 Omoika ogantebia ngende nabarabwo timbaisa koba nogotiting'ara. Nabaminto aba batano nomo nabarabwo bakagenda amo nainche, togasoa as'enyomba y'omonto oria: 13 agatworokia buna aroche rilaika riteneine mwaye, nakomotebia, Toma abanto kogenda Yoppa omorangerie Simon, okorokwa Petero; 14 oyoragotebie amang'ana naro oratorigwe naro, aye nenyomba yao yonsi. 15 Ekaba ekero nachagete gokwana, Omoika Omochenu okabaikera buna otoikerete intwe omochakano. 16 Nkarinyora ring'ana riria ri'Omonene, buna atebete, Yohana igabatisete as'amache, korende inwe namobatiswe as'Omoika Omochenu. 17 Gaki onye Nyasaye obaeire barabwo ekeegwa keria keria atoete intwe, abatwamwanchete omonene Yesu Kristo, ninche ng'o ndanyare komotanga Nyasaye? 18 Bagachia koigwa amang'ana aya bagakira, bakamotogia Nyasaye, bagoteba, Gaki, Nyasaye obancheire ebisaku nabarabwo okoonchoka gokoreta obogima. 19 Naboigo baria batananegete as'engecho y'emechando eria yabete as'amang'ana a Stefano, bakagenda goika Foiniki na Kupro, na Antiokia, tibarirandia riria ring'ana tatiga as'Abayahudi boka. 20 Na gati yabo mbarenge abanto ba Kupro na Kurene, nabarabwo bagachia goika Antiokia, bagakwana n'Abaelenesti, bakarandia amang'ana amaya Omonene Yesu. 21 Okoboko kw'Omonene gokaba amo nabarabwo: abanto abange bagancha, bakamoonchokera Omonene. 22 Amang'ana ayio ay'abanto abwo, agaika amato ekanisa yarenge ase Yerusalemu: bakamotoma Barnaba, agende goika Antiokia: 23 nere agachia goika nakorora obuya bwa Nyasaye akagoka; akabasorora bonsi babwatane n'Omonene as'okorigia kw'omoyo. 24 Naki igarenge omonto omuya oichoretwe n'Omoika Omochenu nokwegena: abanto abange bakebeka ensemo y'Omonene. 25 Barnaba akarua agwo akagenda Tarso komorigia Saulo: 26 goika agachia komorora akamoreta Antiokia. Gekaba egeka ki'omwaka omogima bagasangererekana amo nekanisa nakoborokereria abanto abange. Naborokigwa agwo Antiokia nao batang'anete korokwa Abakristo. 27 Amatuko ayio ababani bagatirimboka korwa Yerusalemu goika Antiokia. 28 Agatenena oyomo obo erieta riaye Agabo, akorokia as'okobua kw'Omoika Omochenu ng'a enchara enene nechiche ang'e as'ense engima: nero ekaba as'amatuko a Klaudio Kaisari. 29 Nabaria aborokigwa, ker'omonto koreng'ana buna okonyara kwaye, bakang'ea gotoma ogokonywa as'abamwabo bamenyete Boyahudi: 30 bagakora bo, bakabatomera abagaka as'amaboko a Barnaba na Saulo.
1 Nabo as'engaki eria Herode omoruoti akarambora amaboko aye kobachanda mono abanto b'ekanisa. 2 Akamoita Yakobo oyomwabo Yohana as'omoro. 3 Erio karora ng'a abagweneire Abayahudi agachiererera akamobwata Petero nere. Amatuko ayio naro amatuko emegati etabekiri memera. 4 Ochia komobwata akamobeka echela ime, akamobeka amaboko abasigari bane bane, bamorende; akarigia nyuma y'epasaka amosokie as'obosio bw'abanto. 5 Nabo Petero akarendwa echela ime, ogosaba gokaba ngokorekakore as'omokia mono nekanisa as'obosio bwa Nyasaye as' engecho yaye. 6 Goika ekero Herode achia korigia komosokia, obotuko boria boria Petero igarenge oraire gati as'abasigari babere, osibire nebinyuri bibere: abarendi as'obosio bw'egesieri bakarenda echela. 7 Erio rilaika ri'Omonene rigatenena ang'e nere, amasase akamoreka nyomba ime: akamoaka Petero rikere riaye, akamotura, ogoteba, Imoka bwango. Ebinyuri bigasansoka korwa as'amaboko aye. 8 Rilaika rikamotebia, Eboyie, beka ebikoroto. Agakora boigo. Akamotebia, Beka eanga yao, ontunyane. 9 Agasoka, akamotunyana; gose tamanyete ng'a namang'ana ay'ekeene ayakoregete ne rilaika, korende agakaga ng'a nokorota arorire. 10 Bachia goetania okorenda kwe ritang'ani nogwa kabere, bagachia goika egesieri gi'ekioma kegosoera omochie ime; gekabaigokera: bagasoka, bagaeta as'enchera eyemo erio rilaika rikamotiga. 11 Goika Petero ochia komanya, agateba. Bono namanyire bori ng'a Omonene otomire rilaika riaye nakondusia as'okoboko kwa Herode, nokoganya kw'egesaku ki'Abayahudi. 12 Erio gakoyarengereria aya, agaika enyomba ya Mariamu ng'ina Yohana, erieta riaye ria kabere Mariko; nabanto abange nao basangererekanete bagosaba. 13 Na Petero agachia gotura egesieri gia geita, omoiseke erieta riaye Roda, agacha koigwa. 14 Agachia komanya eriogi ria Petero, takeigora egesieri as'omogoko, korende akaminyoka chimbero, agasoa ime akabatebia ng'a Petero ngesieri ateneine. 15 Bakamotebia, Nebarimo ore. Korende akaamereria mono ogoteba ng'a naboigo are. Bagakwana, ne rilaika riaye. 16 Petero akaba okonagokong'onta: goika bagachia komoigorera bakamorora, bagakumia. 17 Nere akabakania nokoboko bakire, akaborokia buna Omonene amosokia korwa echela ime. Akabora, Genda momworokie Yakobo nabaminto amang'ana aya. Akaimoka akagenda ensemo ende. 18 Goika bogachia gokia abasigari bagasogwa nomoondoko omonge, naki Petero abete. 19 Na Herode agachia komorigia, tamorora, akababoria abarendi, agachika baitwe. Nere agatirimboka korwa Boyahudi kogenda Kaisaria, akamenya aroro. 20 Nere Herode nababeete mono abanto ba Turo na Sidon: bakamochiera as'omoyo oyomo, erio kobakorire obosani na Blasto, oienge korenda enyomba y'Omoruoti y'okorara, bakarigia omorembe, ekiagera ense yabo igo yare konyora endagera as'ense y'omoruoti, 21 Erio rigaika rituko erimo ribekire, Herode akeboa chianga chi'oboruoti, agaikaransa as'ekerogo ki'obonene, agakwana nechinguru. 22 Abanto bakaaka eriogi, bagokwana, Neriogi ria nyasaye, tari eriogi ri'omonto. 23 Bwango rilaika ri'Omonene rikamoaka, ekiagera ataete Nyasaye obonene: akaregwa namakonde, agatwekamo, 24 Ring'ana ri'Omonene rikamenta kogenderera. 25 Na Barnaba na Saulo, bagachia gokora goikerania obosomba bwabo, bakairana Yerusalemu bakamoirana amo nabarabwo Yohana ore korokwa Mariko.
1 Naria Antiokia as'ekanisa mbarenge aroro ababani naborokia, Barnaba na Sumeon okorokwa Niger, na Lukio Omokurene, naManaen oyorenge oyomwabo as'okogonkigwa amo na Herode omoruoti, na Saulo. 2 Naboigo abaiga ekero barenge komokorera Omonene na kweng'ata, Omoika Omochenu ogateba, Ndusananeria Barnaba na Saulo as'emeremo eria nabarangereretie. 3 Erio, kobakorire ogosaba nokweng'ata, bakabeka amaboko abo igoro asebare, bakabatiga bagende. 4 Nabo abanto abwo kobairwa n'Omoika Omochenu bagatirimbokera Selukia; na korwa agwo bagaeta enyancha goika Kupro. 5 Nekero barenge Salamini, bakarirandia ring'ana ri'Omonene ase chisunagogi chi'Abayahudi: nabarabwo igo barenge na Yohana okobakorera. 6 Bagachia gokora goeta egati gati y'egesinka gionsi goika Pafo, bakarora omonto oyomo, omorogi, omobani bw'oborimo, Omoyahudi erieta riaye BarYesu; 7 omonto oyo igarenge amo nomogambi Serigio Paulo, omonto omonyene obong'aini. Ere akabarangeria Barnaba na Saulo bache asare, akarigia koigwa ring'ana ria Nyasaye. 8 Korende Eluma oria omorogi (nero engecho y'okoonchora kw'erieta riaye) akaamererania nabarabwo, akarigia komobeka omogambi oria omoyo bw'ogotiga okwegena. 9 Korende Saulo, ere nere Paulo, agaichorwa n'Omoika Omochenu, akamotogoreria amaiso, agakwana, 10 Aye oichire obong'ainereria, nobobe bwonsi, omwana o saitani, omobisa bw'oboronge bwonsi, torigeti gotiga gochikora bogeka chinchera chi'Omonene chire boronge? 11 Bono, rora okoboko kw'Omonene igakore igoro asore, naye nobe omouko, torora erioba as'egeka egeke. Erio kegima orotutu rokamobwata nomosunte; agatabataba komorigia omonto amobwate okoboko, na komoraa. 12 Erio omogambi agachia koyarora ayakoreka, akegena, agakumia okworokereria kw'Omonene. 13 Erio Paulo nabamwabo bakamanoria obwato bakarua Pafo, bagaika Perga ase Pamfulia: Yohana akabatiga akairana Yerusalemu. 14 Korende barabwo bakarua Perga, bagaeta egati y'ense bagaika Antiokia, omochie o Pisidia; bagasoa ase esunagogi rituko ri'esabato, bagaikaransa. 15 Erio nyuma kamariko asomirwe nebuku y'ababani, abanene b'esunagogi bagatoma omonto asebare, nakobatebia, Baminto onye more nering'ana rikobagwenera abanto aba, rikwane. 16 Paulo agatenena akabaramborera okoboko, agakwana, Inwe abasacha ba Isiraeli, nainwe aba moirogete Nyasaye, tegerera. 17 Nyasaye bw'abanto abaiga Isiraeli nabachorete abatata baito, akabaimokereria igoro abanto, ekero bamenyete buna abageni as'ense ya Misiri, nas'okoboko kwaimokereretigwe akabarusiao, akabaraa, 18 negeka ki'emiaka emerongo ene akaremereria nabarabwo as'eroro. 19 Agachia kobisiria ebisaku bitano nabibere as'ense ya Kanani, akabaa ense yabo ebe omwando, as'ekero ki'emiaka chimia inye namerongo etano. 20 Nyuma as'aya akabaa abagambi goika ekero gia Samweli. 21 Nyuma yaye bagasaba koegwa omoruoti: Nyasaye akabaa Saulo omwana o Kishi, omonto bw'egesaku kia Benjamini, as'egeka ki'emiaka emerongo ene. 22 Naende agachia komorusia oyio, akaimokereria Daudi igoro abe omoruoti obo: akamoorokia ogoteba, Namororire Daudi omwana o Yese, nomonto nyanchete oranyare gokora obwanchani bwane bwonsi. 23 As'oroiboro rwaye omonto oyio Nyasaye obareteire Abaisiraeli omokonyi, nere Yesu, buna ariete eira, 24 Yohana konya obarandeirie abanto bonsi ba Isiraeli engecho y'ebatiso y'okoonchoka ritang'ani ri'ogocha kwaye. 25 Nere Yohana ekero arenge gokora orogendo rwaye nakwanete, Igo mogonkaga ng'a inche ng'o? Inche tari ere. Korende, rigereria ngochare oyomo nyuma yane ere inche tinkogwenera komwororoberia ebikoroto bi'amagoro aye. 26 Abaminto, abana b'ororeria bw'Ibrahimu, nasemore abamomoirogete Nyasaye, asetore intwe ring'ana ri'ogokonyeka oko riatomirwe. 27 Naki abamenyete Yerusalemu nabanene babo, efeiagera tibamomanyete, nonya namariogi ay'ababani bare gosomwa ker'esabato, bayaikeranirie as'okomokanera. 28 Nonya tibanyorete enchera y'okomoita, bakamosaba Pilato aitwe. 29 Goika bagachia gokora onsi ayarikeretwe, bakamoikia korwa as'omote, bakamobeka embera. 30 Korende Nyasaye akamobokia korwa as'amakweri. 31 Akarorwa amatuko amange nabarabwo abare gotira nere korwa Galili goika Yerusalemu, nabwo mbarabwo bare abarori baye as'obosio bw'abanto bonsi. 32 Naintwe nkobaranderiatore eira eria baetwe abatata baito, 33 buna Nyasaye atoisaneirie intwe abana babo eira eyio, as'okomobokia Yesu, buna arigetwe ase Zaburi ya kabere, Aye naye Omwana one, inche rero nakoiboire. 34 Naende ng'a igamobogeti korwa as'amakweri, tanyara koirana as'ogosareka, okwanire iga, Ninkoe aye chingecho chi'obochenu bwa Daudi chire chi'ogwancha. 35 As'ayio okwanire naende ase Zaburi ende, Tokomotiga Omochenu Oo korora ogosareka. 36 Naki Daudi, gatiekire gokorera ekina kia Nyasaye as'ekegori kiaye, nararete, akabekwa amo nabaise baye, akarora ogosareka. 37 Korende oyo obogetigwe na Nyasaye tarora ogosareka. 38 Naboigo, amanyekane asemore, baminto, ng'a as'oyo igomokoranderigwa okorusigwa kw'ebibe: 39 nas'oyo ker'oyoramwanche igakobarwa ng'a tari nabobe as'amang'ana aria atakpnyara kobarwa ng'a nare nobobeas'amariko a Musa. 40 Gaki, erende, tabaisa kobaikera amang'ana aria akwanetwe as'ababani; 41 Rigereria inwe, abamochayete, moichane, mosire; Naki nakorire emeremo inche amatuko aino, Emeremo motancheti nonya ng'ake, omonto naisa kobaorokeria. 42 Nekero barenge korwa as'esunagogi y'Abayahudi, abanto b'ebisaku bakabasoroia, kobatebia amang'ana aya esabato ya kabere. 43 Esunagogi egachia gwatananekana, Abayahudi abange naborokigwa abaya bakabwatana na Paulo na Barnaba: nabarabwo bagakwana nabarabwo, bakababeka omoyo bw'ogoikaransa as'obuya bwa Nyasaye. 44 Goika esabato ya kabere abanto abange, ang'e omochie bwonsi, bagasangererekana barigwe ring'ana ria Nyasaye. 45 Korende Abayahudi, bagachia korora omosangererekano, bagaichorwa neribero, bakayakana amang'ana are gokwanwa na Paulo, bakarama, 46 Paulo na Barnaba bagakwana as'oboremu bagotcha, Igare ng'a negwenerete ring'ana ria Nyasaye rikwanwe asemore ritang'ani. Korende ekiagera mwarisukeirie are, gose timwerochi abanyene ng'a mogwenerete obogima bwa kare nakare, rigereria, twaonchokeire ebisaku. 47 As'engecho eye naboigo twachigetwe n'Omonene, ng'a Nakobekire obe omobaso bw'ebisaku, Onyare koba ogokonyeka goika omoerio bw'ense. 48 Ebisaku bagachia koigwa ayio bakagoka, bakaribaka ring'ana ri'Omonene: nabarabwo abarenge abachikeretwe obogima bwa kare nakare bagancha. 49 Ring'ana ri'Omonene rikaranda as'ense eria yonsi. 50 Korende Abayahudi bakabeka ogwatananeka as'abakungu abaya nabanto abanyene ogosika, nabanene b'omochie, bakagenka abanto babarosie Paulo na Barnaba; bakabarusia korwa ase chimbebe chiabo. 51 Nabarabwo bakabakong'ontera orotu rw'amagoro abo, bakagenda Ikonio. 52 Naborokigwa bagaichorwa nomogoko n'Omoika Omochenu.
1 Ekaba agwo Ikonio bagasoa amo as'esunagogi y'Abayahudi bagakwana, goika omoganda omonene bw'Abayahudi n'Abayunani bagancha. 2 Korende Abayahudi batanchete bagasaria emioyo y'abanto b'ebisaku nakobabeka omoyo omobe igoro as'abaminto. 3 Naboigo bakamenya agwo egeka ekenene, bagokwana as'oboremu as'Omonene, orenge koriorokia ring'ana ri'obuya bwaye, ore kobanchera ebikone nogokumia bikoreke as'amaboko abo. 4 Korende omosangererekano bw'abanto b'omochie ogatananekana; abaiga iga barenge ensemo y'Abayahudi nabaiga ensemo y'abatomwa, 5 Goika gokaoroka okong'orerwa kw'abanto b'ebisaku n'Abayahudi amo nabanene babo igoro yabo, kobakorera amabe nakobaaka amagena, 6 erio bakanyora amang'ana, bagatamera emechie ya Lukania, Lustra na Derbe, nechinse chiarenge chinsemo chinsemo:' 7 bakamenya aroro bakoyerandia enchili. 8 Nagwo Lustra narenge omonto oyomo, okwete amagoro, ekerema korwa enda ya ng'ina, ere tanyakogenda nonya ng'ake. 9 Omonto oyio akamoigwa Paulo kagokwana; nere akamobeta amaiso akarora ng'a nare nokwegena gw'okogwenigwa, 10 agakwana as'eriogi rinene, Tenena as'amagoro ao boronge. Agatenena bwango akagenda. 11 Nemeganda egachia korora ayakora Paulo, bakaaka amariogi abo, bagokwana as'Ekelukania, chinyasaye chiatoikeire as'emegwekano ya mwanyabanto. 12 Bakamoroka Barnaba Zeu; na Paulo Herme, naki nere orenge omonene as'ogokwana. 13 Omokuani o Zeu ere hekalu yaye yarenge as'obosio bw'omochie, akareta chiombe negutwa y'ebisicha goika ebiita, akarigia korua ekeng'wanso amo nemeganda. 14 Korende abatomwa Barnaba na Paulo, bagachia konyora amang'ana, bagatandora chianga chiabo, bakagenda bwango, bagasoa as'emeganda, bakaaka egeturi, 15 bagoteba, Obe abanene, naseki mogokora aya? Intwe naintwe igotore abanto koreng'ana buna inwe, twabarandeirie amang'ana are amaya, moonchoke nagotiga chingecho echi chi'obokayayu na komoonchokera Nyasaye ore moyo, oyotongete igoro nense nenyancha, nebinto bionsi bire imeo: 16 kare as'ebiro biaetire igabatigete ebisaku bionsi batare ase chinchera chiabo abanyene. 17 Korende tetigete atarenge na birori ekiagera are gokora amaya, arekobaa embura korwa igoro, nechingaki chie rigesa, akabaichoria emioyo yaino endagera nomogoko. 18 Nas'amang'ana aya bakabatanga emeganda as'emechando, tibabaruseria ebing'wanso, 19 Korende bagaika Abayahudi korwa Antiokia na Ikonia: bakayegenka emeganda goika bakamoaka Paulo amagena, bakamokurura gochia isiko as'omochie, bagakaga ngra okure. 20 Korende ekero aborokigwa bamoetanaine chinsemo chionsi, agatenena, agasoa omochie ime: ne rituko ria kabere riaye agasoka akagenda amo na Barnaba goika Derbe. 21 Goika bachia gokora koyerandia enchili as'omochie oria, nakonyora aborokigwa abange, bakairana goika Lustra na Ikonio na Antiokia, 22 bakobeka chinguru chinkoro chi'aborokigwa nakoborokereria baikaranse as'okwegena, naende ng'a netogwenerete gosoa as'obonda bwa Nyasaye as'enchera y'emechando emenge. 23 Erio kobachorire abagaka ase ker'ekanisa nagosaba amo nakweng'ata, bakababeka as 'amaboko Omonene, oyo begenete. 24 Bagaeta gati ya Pisidia, bagasoa Pamfulia. 25 Na nyuma y'okorandia ase Perga, bagatirimboka goika Atalia; 26 Na korwa agwo bagaetera enyancha kogenda Antiokia, Agwo nao basaberetwe obuya bwa Nyasaye as'emeremo eria banyarete goikerania, 27 Goika bagachia goika, bagasangereria ekanisa, bakaborokia amang'ana onsi ayakorire Nyasaye amo nabarabwo, buna abaigoreire ebisaku egesieri gi'okwegena. 28 Bakaba agwo egeka getai geke amo naborokigwa.
1 Bagaika abanto baruete Boyahudi bakaborokereria abaminto ng'a, Motarogeti nagotunyana chingecho chia Musa, timokonyara gokonyeka, 2 erio nyuma Paulo na Barnaba kobaamereranirie nabanto aba nakoborania nabarabwo mono. Abaminto bagachika ng'a Paulo na Barnaba nabande korwa egati yabo, batire kogenda Yerusalemu as'abatomwa nabagaka as'engecho y'okoboria okwo. 3 Erio bakairwa nekanisa bagaeta gati as'ense ya Foiniki na Samaria, bakorandia amang'ana okoonchoka kwabo ebisaku; bakabagokia abaminto mono. 4 Bagachia goika Yerusalemu, bakaroisigwa nekanisa nabatomwa nabagaka, nabarabwo bakaborokia amang'ana onsi Nyasaye akorete amo nabarabwo. 5 Korende egati y'ensemo y'Abafarisai, abwo begenete bagatenena, bagateba, Negwenerete kobarokia nakobachika kobwata amachiko a Musa. 6 Abatomwa nabagaka bagasangererekana banyare korengereria ring'ana erio. 7 Na nyuma as'okoboria okonge Petero agatenena, akabatebia, Abaminto, inwe mwamanyire ng'a amatuko aye ritang'ani Nyasaye nachorete korwa asetore, ebisaku baribwate ring'ana ri'enchili korwa as'omonwa one, nakoriancha. 8 Na Nyasaye, omanyete chinkoro chi'abanto akabaorokeria, akabaa Omoika Omochenu koreng'ana buna atoete intwe; 9 gose takorete gwatananekana egati yaito nabarabwo, akabasibia chinkoro mo, kobachora abanto, nakobatoma asemore amo nabanchwa baito Barnaba na Paulo, 26 abanto babekire obogima bwabo as'engecho y'erieta ri'Omonene oito Yesu Kristo. 27 As'ayio twabatomire Yudas na Sila, abaranyare kobatebia amang'ana ayio ayio as'emenwa yabo. 28 Ekiagera namogwenera Omoika Omochenu naintwe, titobatweka egurube tatiga eyio eyere boronge; 29 mweatanane nabinto birure ebing'wanso ase chisanamu, namanyinga, neching'iti ching'entire, nobonyaka, kamoretange nayio namokore buya. Morare buya. 30 Erio baria ekero baegwa ribaga bagatirimbokera Antiokia; nekero babasangereria omoganda bwonsi bakabaa rirube riria. 31 Bakarisoma, bakagoka as'engecho y'ogokonywa koria. 32 Naende Yudas na Sila ekiagera barabwo nababani barenge, bakabaremia emioyo abaminto as'amang'ana amange, bakabakong'ia. 33 Nabarabwo erio bamenya agwo egeka getai geke, bakaegwa ribaga, nabaminto bagende as'omorembe ase baria babatomete. 34 Korende Sila akarora buya komenya aroro, 35 Paulo na Barnaba bakamenya agwo Antiokia, bakworokereria nakorirandia ring'ana ri'Omonene, amo nabanto bande abange. 36 Erio nyuma as'amatuko atai make Paulo akamotebia Barnaba, Imoka! toirane bono, tobarore abaminto ase ker'omochie twarirandirie ring'ana ri'Omonene, gose mbuya bare. 37 Barnaba akarigia komobogoria Yohana orenge korokwa Mariko amo nabarabwo. 38 Korende Paulo tarora buya komoira oyio obatigete aaria Pamfulia, tagenda nabarabwo gokora emeremo eria. 39 Erio agasoka amang'ana ay'eriomana egati yabo goika bagatananekana; Barnaba akamoira Mariko agasoa obwato kogenda Kupro; 40 Paulo akamochora Sila, akaimoka, agasaberwa na baria abaminto, aegwe obuya bwa Nyasaye. 41 Agaeta ase Shami na Kilikia, akaremia chikanisa.
1 Agaika Derbe na Lustra: nagwo narengeo omworokigwa oyomo erieta riaye Timotheo, omwana bw'omokungu oyomo Omoyahudi oyobwegenete; korende ise igarenge Omoyunani. 2 Omonto oyio natoretwe buya nabaminto bamenyete Lustra na Ikonia. 3 Paulo akamorigia oyo agende nere; akamoira, akamosara as'engecho y'Abayahudi barenge aroro chinsemo chiria: naki bonsi mbamanyete ng'a ise n'Omoyunani. 4 Nabo ekero barenge goeta enchera yabo as'egati y'emechie eria, bakabaa amachiko aria ayachigetwe nabatomwa nabagaka barenge Yerusalemu erinde bayabwate. 5 Chikanisa chikabekwa chinguru as'okwegena, okobara kwabo gokamenteka kera rituko. 6 Bagaeta as'ense ya Furugia na Galatia, bagakanigwa n'Omoika Omochenu, tibarirandia ring'ana as'Asia; 7 bagachia goika kororia Alusia, bagatema kogenda Bithunia; korende Omoika o Yesu tobaa ribaga; 8 bagaeta Musia bagatirimbokera Teroa. 9 Paulo akaorokerwa nokorora botuko; akamorora omonto o Makedonia oteneine, okomosorora, okomotebia, Amboka oche Makedonia otokonye. 10 Naboigo gachia korora okorota koria, erio tokarigia koimoka kogenda Makedonia, ekiagera twaroche ekeene ng'a Nyasaye otorangeirie tabaranderie enchili. 11 Tokamanoria obwato korwa Teroa tokagenda boronge goika Samothraki, rituko ria kabere togaika Neapoli; 12 na korwa agwo togaika Filipi, omochie o Makedonia, omochie ore omonene as'ensemo yabo, nero nense y'obogambi bw'Abarumi: takaba as'omochie oyo, togaikaransa amatuko atai make. 13 Ase rituko ri'esabato togasoka isiko ase geita, tokagenda ensemo as'oroche, togakaga ng'a nar'aroro aase ogosaba; togaikaransa, togakwana nabakungu basangererekanete aria. 14 Omokungu oyomo erieta riaye Ludia orenge omoonia erangi emonyinga oyo bw'ense ya Thuatira, omosasimi Nyasaye, agatotegerera: enkoro yaye oyo ekaigorwa n'Omonene ayarore amang'ana aregokwanwa na Paulo. 15 Goika ochia kobatiswa, ere nenyomba yaye, agatosorora, ogoteba, Onye mwandorire ng'a nomwegeni nde as'Omonene, soa nyomba mwane moikaranse. Agatobetererie. 16 Egachia koba ekero twarenge kogenda aase aria as'ogosabera, omoiseke oyomo orenge nekerecha gi'okoorokia, agatonyora, orenge kobanyorera abanene baye enibo enyinge, as'oboragori. 17 Akamotunyana Paulo naintwe, okoaka eriogi, ogoteba, Abanto aba nabasomba ba Nyasaye Ore Igoro, abakobaranderia enchera y'ogokonyeka. 18 Akanagokora ayio amatuko amange. Korende Paulo akabea, ageonchora akamotebia ekerecha keria, Nagochikire as'erieta ria Yesu Kristo, morue oyo. Akamorua ensa eria eria. 19 Erio abanene baye bagachia korora ng'a ogosemeria kw'enibo yabo gwasirire, bakababwata Paulo na Sila, bakabakurura goika echiro as'obosio bw'abagambi b'omochie; 20 bakabaira as'abagambi, bagateba, Abanto aba basaririe omochie oito, nabarabwo n'Abayahudi. 21 Naende igo bakorandia chingecho chi tari chia boronge asetore ng'a tochibwate, nonya nogochitunyana, ekiagera intwe n'Abarumi tore, 22 Emeganda yonsi ekaimoka bakabachiera: abagambi bakabarusia chianga chiabo nechinguru, bakarua ogochika baakwe nechinyimbo. 23 Bagachia kobaaka okoakwa okonge bakabaruta echela ime, bakamochika omorendi bw'echela abarende mono. 24 Nere ochia konyora ogochika oko akabaruta as'akanyomba kaime, akabasiba amagoro ase chingatare. 25 Korende ekero ki'obotuko bw'ekeigoro Paulo na Sila igo barenge konakomosaba Nyasaye nakomoterera ogotera gw'okomotogia, nabasibwa bande igo barenge bagotegerera. 26 Mobosokano okaba omotengecho omonene bw'ense, goika oboroso bw'echela bogatengecha: erio bwango ebisieri bikaigoka; chisibo bi'abanto bonsi bigasansoka. 27 Oria omorendi bw'echela akaboka, akarora ng'a ebisieri bi'echela biaigokire, akang'usa omoyio oye, akarigia gweita, agakaga ng'a abasibwa batamire. 28 Paulo akaaka eriogi rinene, agateba, Tibweita, naki intwe twensi nao tore aa. 29 Akarigia chitaya chiretwe, akarindoka gochia ime, okoiguswa as'omoondoko, akabagwera amagoro Paulo na Sila; 30 akabareta isiko agateba, Abanene bane inki ndakore ntoreke? 31 Bakamotebia, Mwanche Omonene Yesu Kristo, naye notoreke amo nenyomba yao. 32 Bakamotebia ring'ana ri'Omonene, ere nabanto bonsi barenge mwaye. 33 Akabaroisia ensa eria eria ya botuko, akabasibia chingoma chiabo, akabatiswa, ere nabanto bonsi ba mwaye ekero ekio. 34 Akabareta enyomba ime, akabarageria, akagoka mono, ere nenyomba yaye yonsi ekiagera konyora omwanchire Nyasaye. 35 Bogachia gokia abagambi bakabatoma abanene b'abasigari bagoteba, Batige abanto baria bagende, 36 Oria omorendi bw'echela akaborokia Paulo amang'ana aya ng'a abagambi batomire abanto kobasibora: gaki bono, soka isiko, genda nomorembe. 37 Paulo akabatebia, Bagatosusura as'amaiso abanto bonsi, bataratogambia kina, naintwe n'Abarumi tore, naende bagatoruta echela ime; na bono barigetie gotosokia bobisi? yaya, tari bo; tiga bache abanyene batosokie. 38 Abanene b'abasigari bakaborokia abagambi amang'ana aya: nabarabwo bakairoka ekero baigwa ng'a n'Abarumi: 39 bagacha bakabasorora; erio babasokirie isiko bakabasaba basoke korwa omochie oria. 40 Nabarabwo bagasoka korwa echela, bagasoa enyomba ya Ludia; bagachia kobarora abamwabo bakabaremia, bakagenda.
1 Erio bachia goeta egati y'Amfipoli na Apolonia bagaika Thesaloniki, naroro yarengeo esunagogi y'Abayahudi; 2 na Paulo buna engecho yaye yarenge, agasoa aria ime ase barenge, akaamererania nabarabwo as'amang'ana amariko chisabato isato, 3 okoborokereria nakobatebia ng'a nemogwenerete Kristo achandwe, nakoboka korwa as'amakweri; naende ng'a Yesu oyo nkoborokia inwe amang'ana aye, nere Kristo, 4 Abande bagancha, bakabwatana na Paulo na Sila; n'Abayunani bamosigete Nyasaye abange mono, nabakungu bare nogosikwa batai bake. 5 N'Abayahudi abatanchete bakaba neribero, bakang'usa abanto batai bake korwa as'abanto ababe batari nogosikwa, bagasangereria omoganda, bagakora riroroche as'omochie; bakabachiera abanto b'enyomba ya Yasoni, bakarigia kobaira as'obosio bw'abanto b'omochie, 6 Ekero batabanyora, bakamokurura Yasoni nabande as'abaminto gochia as'obosio bw'abanene b'omochie, bakoaka eriogi, bagoteba, Abanto aba baonchoranire ense baikire nonya naa; 7 Yasoni akabaroisia, naba bonsi igo bagokora chingecho chitari amo nogochika gwa Kaisari, bateba ng'a omoruoti onde nare, okorokwa Yesu. 8 Bakabaichania omoganda oria nabanene b'omochie, kobachia koyaigwa ayio. 9 Nabarabwo kobaruseria ekebwate giantenenera Yasoni nabamwabo, bakabatiga bagende, 10 Erio abaminto bakabatoma Paulo na Sila botuko goika Beroya: bagachia goika aaria bagasoa as'esunagogi y'Abayahudi. 11 Abanto aba igo barenge abaya kobua baria ba Thesaloniki, ekiagera baribwatete ring'ana as'obwanchani bw'omoyo, bare korigarigia amariko barore gose amang'ana ayio nab'are. 12 Abanto abange bagancha korua asebare; nabarabwo abakungu b'Abayunani abanyene ogosikwa, nabasacha batai bake. 13 Korende Abayahudi ba Thesaloniki bagachia konyora amang'ana ng'a ring'ana ria Nyasaye riarandigwe na Paulo ase Beroya, bakagenda aroro, bagasaria emeganda. 14 Erio agwo baria abaminto bakamotoma Paulo agende buna igakogenda enchera y'engegu: korende Sila na Timotheo, bagatigara aroro. 15 Nabarabwo bakamokoba Paulo bakamoikia goika Athene, erio kobanyorire ogochika kobareta Sila na Timotheo ng'a tibatebana komotunyana, bakagenda. 16 Ekero Paulo abaganyete as'Athene, akarora omochie oria oichire nechisanamu, omoyo oye okagechigwa mono. 17 Naboigo as'esunagogi akaamererania n'Abayahudi, nabarabwo abamosigete Nyasaye, na kera rituko as'echiro nabaria bare koumerana nere. 18 Nabande b'Abaepikurio n'Abastpiko, n'Abafilosofo bakaumerana nere. Abande bagateba, Orhonto oyo omonyene amang'ana amange, inki arigeti goteba? Abande bagateba, Ororekanire buna omorandia bw'amang'ana e chinyasaye chingeni: ekiagera igarenge korandia amang'ana a Yesu nokobokigwa. 19 Bakamobwata bakamoira goika Areopago, bagateba, Inee, Natonyare komanya engecho ye chisemi chinyia echi chigokwana naye? 20 Naki igokoreta amang'ana amageni as'amato aito: gaki ntorigetie komanya engecho y'amang'ana ayio. 21 (Ekiagera Abathene nabageni bamenyete agwo igobarenge tibare neribaga as'ing'ana rinde rionsi, tatiga okoorokia amang'ana nagotegerera engecho ye ring'ana riyia.) 22 Paulo agatenena gati gati y'Areopago, akabora, Inwe abanto b'Athene, as'amang'ana onsi narorire ng'a inwe nabanto morengereretie mono amang'ana ay'edini. 23 Naki ekero narenge goeta aria naria, nakoyarora amasasimo aino, nkayarora amathabau ayarikire amang'ana aya, Ase Nyasaye Oria Otamanyekaneti. Gaki inche nabarandeirie chingecho chiaye ere oria inwe mogosasima motamanyeti. 24 Nyasaye oyoyekorete ense nebinto bionsi bire imeo, ere, ekiagera n'Omonene o igoro nense, tari komenya ase chihekalu chiagachire namaboko; 25 gose tari gokorerwa namaboko ay'abanabamwanyabanto, buna oyo oremeirwe gento kende gionsi, naki nere okobaa bonsi obogima nomoika, nebinto bionsi; 26 nere agakora ker'egesaku ki'abanabamwanyabanto koba ab'omochakano oyomo, baikaranse igoro as'obosio bw'ense yonsi, gatiekire kobabekera ebiro ebiabachigete korwa kare, nechimbebe chi'obomenyo bwabo; 27 erinde bamorigie Nyasaye, nonya nase ogotabataba, bamorore, nonya tari are na ker'oyomo oino. 28 Naki ime asare igatore moyo, igatogotara, igatore nobogima bwaito; koreng'ana buna oyomo oino, omoriki bw'amang'ana akwanete, Naki ntwe twensi igatore abana baye. 29 Gaki, ekiagera intwe tore ababiare ba Nyasaye, tetogwenereti gokaga ng'a Obonyasaye nomogwekano bw'ethahabu, gose efetha, gose rigena, gose ebinto bibachire ase chisemi, nobong'aini bwa mwanyabanto. 30 Naboigo ebiro biria bi'oboriri Nyasaye igaombetie buna tarochi; korende bono nkobaranderiare abanto bonsi ba ker'aase baonchoke: 31 ekiagera obekire rituko eriagocha kobanachera ekina, ab'ense as'oboronge as'omonto oria achorete; nere obaeire abanto bonsi ekiorokererio ki'amang'ana aya as'okomobokia korwa as'amakweri. 32 Nabo bagachia koigwa amang'ana okobokigwa kw'abakure abande bagasekereria; abande bagateba, Natogotegerere naende amang'ana ayio, 33 Erio Paulo akaimoka akabatiga. 34 Abasacha gete bakabwatana nere, bagancha: as'abwo narenge aroro Dionuso Omoareopago, nomokungu erieta riaye Damari, nabande amo nabwo.
1 Nyuma as'amang'ana aya Paulo akarua Athene agaika Korintho, 2 Akamorora Omoyahudi oyomo erieta riaye Akula omobiare o Ponto; nere agacha korwa ense ya Italia amatuko a bwango amo na Priskilla mokaye, ekiagera Klaudio obachikire Abayahudi bonsi barue Rumi: agaika asebare. 3 Nekiagera emeremo yaye nemeremo yabo neyemo, agaikaransa nabarabwo, bagakora emeremo yabo; naki barenge abarosia chiema, 4 Akaborokereria ase chisunagogi ker'esabato, akabang'usa Abayahudi n'Abayunani bagancha. 5 Korende ekero Sila na Timotheo bachia gotirimboka korwa Makedonia, Paulo agasukigwa as'omoyo oye, okobaorokeria Abayahudi ng'a Yesu nere Kristo. 6 Bagachia koamererania nere nakorama, agakong'onta chianga chiaye, akabatebia, Amanyinga aino tiga abe igoro as'emetwe yaino; inche nomochenu: korwa bono ningende as'abanto b'ebisaku. 7 Akaimoka korwa agwo agasoa as'enyomba y'omonto oyomo erieta riaye Yusto, omosasimi Nyasaye, ere enyomba yaye yarenge ensemo y'esunagogi. 8 Na Krispo, omonene bw'esunagogi, akamwancha Omonene amo nenyomba yaye yonsi; Abakorinto abange bakaigwa, bagancha, bakabatiswa. 9 Omonene akamotebia Paulo ase okorora botuko, Toiroka, korende kwana, tokira. 10 Naki inche igonde amo naye, nonya omont'onde tari orakong'orere erinde agoite: naki inche ninde nabanto abange as'omochie oyo. 11 Akamenya agwo omwaka oyomo nemetienyi etano nomo, akaborokereria ring'ana ria Nyasaye. 12 Korende Gallio ekero arenge Prokonsuli y'Akaya, Abayahudi bakamochiera Paulo as'omoyo oyomo, bakamoreta as'obosio bw'ekerogo gi'ekina, 13 bagateba, Omonto oyo igakobang'usa abanto ng'a bamosasime Nyasaye gotabwataini namachiko aito. 14 Na Paulo ochia korigia komanora omonwa oye, Gallio akabatebia Abayahudi, onye ndiakoregete ring'ana ri'okorega gose ri'okong'ainereria okobe, Inwe Abayahudi,anga mboronge nabategerera nainwe: 15 korende onye nokoboria igoro as'amang'ana namarieta namachiko aino, rigereria inwe abanyene; ekiagera inche tindigeti koba omogambi bw'amang'ana ayio. 16 Akabaseria korwa as'obosio bw'ekerogo gi'ekina. 17 N'Abayunani bonsi bakamobwata Sosthene, omonene bw'esunagogi, bakamosusura as'obosio bw'ekerogo gi'ekina. Na Gallio tarora ng'a amang'ana ayio gose ngento. 18 Paulo akamenta goikaransa agwo amatuko amange, erio agatigana nabaminto akamanora agasoa obwato, akagenda Shami; na Priskilla na Akula bakagenda amo nere; erio kagingire omotw'oye ase Kenkrea; naki narenge neira, 19 Bagaika Efeso, akabatiga agwo: ere omonyene agasoa as'esunagogi akaamererania n'Abayahudi. 20 Bagachia korigia aikaranse ekero ekenge kobua, tancha; 21 korende gatigana nabarabwo, agateba, Nengwenerete gokora rituko rinene eri rikare gocha Yerusalemu: korende ninyirane asemore naende, Nyasaye karanche. Akamanora, korwa Efeso. 22 Agachia gotirimbokera Kaisaria, agatira gochia kobakwania ekanisa, erio agatirimbokera Antiokia, 23 Goika ochia goikaransa agwo amatuko atai make akaimoka, agaeta gati y'ense ya Galatia na Furugia, omochie as'omochie, okobaremia aborokigwa. 24 Nabo Omoyahudi oyomo, erieta riaye Apollo, omobiare o Isikanderia, omonto bwe chisemi, agaika Efeso; nere igarenge omokong'u bw'amariko. 25 Omonto oyo konyora bworokererigwe enchera y'Omonene; as'ayio enkoro yaye iga yarenge gwoka, agachaka gokwana nakworokereria boronge chingecho chi'Omonene; nere igamanyete ebatiso ya Yohana yoka. 26 Agachaka gokwana atari nokoiroka as'esunagogi, Korende ekero Akula na Priskilla bachia komoigwa bakamoira mwabo, bakamworokereria enchera y'Omonene boronge kegima. 27 Erio agachia korigia kwamboka enyancha agende goika Akaya, abaminto bakamokonya, bakamorikera rirube aborokigwa baria bamoroisie; nere agachia goika akabakonya mono baria abanchete as'obuya bwa Nyasaye. 28 Naki ababuete Abayahudi kegima kegima as'obosio bw'abanto bonsi, okoborokia as'amang'ana ay'amariko ng'a Yesu nere Kristo.
1 Egachia koba ekero Apollo arenge Korintho, Paulo gatiekire goeta egati ye chinse chia rogoro agaika Efeso, akanyorana naborokigwa batai bake agwo: 2 akababoria, Mwanyorete Omoika Omochenu ekero mwegenete? Bakamoiraneria, Yaya, nonya no koigwa ng'a Omoika Omochenu nore titoigweti. 3 Akababoria, nas'ebatiso ki mwabatisetwe? Bagateba, as'ebatiso ya Yohana, 4 Paulo agateba, Yohana igabatisete as'ebatiso y'okoonchoka, okobatebia abanto bamwegene ere oyorache nyuma yaye, oyio nere Yesu. 5 Bagachia koigwa aya, bakabatiswa as'erieta ri'Omonene Yesu. 6 Na Paulo ochia kobeka amaboko aye igoro asebare, Omoika Omochenu ogacha igoro yabo; bagachaka gokwana as'emenwa, nakobana. 7 Nomobaro obo igobarenge abasacha ikomi nababere. 8 Agasoa as'esunagogi ime, agakwana noboremu, okoamererania nabanto egeka ki'emetienyi etato, nakobang'usa banche amang'ana obonda bwa Nyasaye. 9 Korende ekero abande bakong'ete bakanga gwancha, bagokwana amabe as'Enchera eria as'obosio bw'omosangererekano; erio akaimoka akabatiga, akabarusanania aborokigwa, akaamererania nabanto kera rituko as'esukul y'omonto oyomo, erieta riaye Tyriano. 10 Amang'ana aya akagenderera egeka ki'emiaka ebere; goika bonsi bamenyete Asia bakarigwa ring'ana ri'Omonene, Abayahudi n'Abayunani. 11 Nyasaye agakora as'amaboko a Paulo ebikone ebinene mono; 12 goika abarwaire bakareterwa ebitambaa nechianga echiakunete omobere oye, amarwaire abo akabarua, ebirecha ebibe bikabarua. 13 Abande as'Abayahudi bare abatayayi, nabarabwo nabaragori b'ebirecha, bagatema gwatora erieta ri'Omonene Yesu igoro yabo, ababwatire nebirecha ebibe, bagoteba, Twabachikire ase Yesu oria orandigwe na Paulo. 14 Nabarabwo abakorete aya igo barenge abana batano nababere, aba Sikewa Omoyahudi omokuani omonene. 15 Keria ekerecha ekebe gekabairaneria, Yesu namomanyire na Paulo namomanyire, korende inwe mbarabi? 16 Noria omonto obwatetwe nekerecha ekebe akabarindokera, akabanyara, akababua, goika bagatama bwango korwa enyomba eria getirianda nechingoma baakirwe. 17 Amang'ana aya akamanyekana n'Abayahudi bonsi n'Abayunani bamenyete Efeso; okoiroka gokabasoa bonsi, erieta ri'Omonene Yesu rikabakwa. 18 Nabange ba baria banchete bagacha bagakwana, nakoorokia ogokora kwabo, 19 Nabarabwo abange ase baria bare gokorera chingecho chi'oboragori, bagasangereria ebitabu biabo, bakabisamba as'amaiso abanto bonsi; bagakora okobara kwe rigori riaye bakarora ng'a nchisanete ebisamunye bi'efetha, chilifu emerongo etano. 20 Nabo ring'ana ria Nyasaye rikamenteka rikabua. 21 Amang'ana aya achia koera, Paulo akagania as'omoyo oye ime goeta egati ya Makedonia n'Akaya, agende Yerusalemu, ogoteba, Nyuma konabaire agwo nengwenerete koyorora na Rumi. 22 Agatoma abanto babere korwa ase baria bare komokorera gochia Makedonia, nabwo Timotheo na Erasto, ere omonyene agaikaransa as'Asia egeka. 23 Goika ekero ekio rigasoka eriomana ritaike as'amang'ana ay'Enchera eria. 24 Naki omonto oyomo, erieta riaye Demetrio, omoturi chifetha, emeremo yaye gokora chihekalu chie chifetha chi'Artemi, igarenge kobanyorera abarosia enibo enyinge; 25 akabasangereria abwo, amo nabande abanyene emeremo eria, akabora, Inwe abasacha, mwamanyire ng'a obotenenku bwaito igo bwarure as'emeremo eye. 26 Naende mwarorire nakoigwa ng'a tari as'Efeso oka, korende nonya n'Asia yonsi pi, Paulo oyio obanchirie abanto abange, nakobaonchora, ogoteba ng'a chinyasaye chigokorwa as'amaboko tari chirochio Nyasaye, 27 Tari ng'a nemeremo eye yaito ere nemechando y'ogochaywa; korende, nonya ne hekalu ya nyasaye omokungu ore omonene, igarabarwe ng'a tari gento, nakourwa obonene bwaye, ere Asia yonsi nab'ense bonsi bakomosasima. 28 Bachia koigwa aya bagaichorwa nendamwamu, bakaaka eriogi bagoteba, Artemi bw'Abaefeso n'Omonene. 29 Omochie bwonsi ogaichorwa neriroroche: bakagenda bwango bagasoa theatro as'omoyo oyomo, erio bakababwata Gayo na Aristariko, abanto ba Makedonia, bare gotara amo na Paulo. 30 Na Paulo agachia korigia asoe egati y'abanto, aborokigwa tibamotiga asoe. 31 Korende abande b'abanene b'Asia, abarenge abasani baye, bagatoma abanto asare, bakamosorora tabaisa kweorokia omonyene ime ase theatro (aase ogosangererekana). 32 Erio abande igabarenge bakorera iga, nabande iga: ekiagera omosangererekano oria konyora osarekire mono; nabare abange tibamanyete engecho y'ogosangererekana kwabo amo. 33 Bakamorusia Iskander as'omosangererekano, Abayahudi bakamobeka as'amasio abanto. Iskander akabakaneria okoboko akarigia kobaa baria abanto okoiraneria. 34 Korende bachia komorora ng'a ere n'Omoyahudi, bakaaka eriogi bonsi pi as'omonwa oyomo as'egeka ki'ang'e chinsa ibere, bakorera, Aritemi bw'Abaefeso nomonene. 35 Nomoriki bw'omochie ochia kobakiria abanto, agateba, Inwe abasacha b'Efeso, monto ki otamanyeti ng'a omochie o Efeso nomorendi bwe hekalu y'Artemi, nyasaye omokungu ore omonene, naende omogwekano oria ogwete korwa igoro? 36 Gaki, ekiagera amang'ana aya takonyara gokanwa, negwenerete gokira, timokora ring'ana ria bwango bwango. 37 Naki iga mwabareta abanto aba bataibeti ebinto bie hekalu gose komorama nyasaye oito omokungu. 38 Gaki onye Demetrio nababachi bare amo nere, bare nering'ana igoro as'omonto, ebigambero mbire, nabagambi mbare: tiga basoerane, 39 Erinde onye mokorigia ring'ana rionsi as'amang'ana ande, igararosigwe as'ogosangererekana kwa boronge. 40 Naki ntore nemechando y'ogosoerwa neriomana as'engecho y'amang'ana a rero, kerabe onye ring'ana tiriri, rirorio as'engecho yaye titokonyara koorokia engecho as'omosangererekano oyo. 41 Erio ochia gokwana aya, akayosaria omosangererekano.
1 Egeturi keria gegachia koera, Paulo akabarangeria aborokigwa agatigana nabarabwo, akaimoka akagenda goika Makedonia. 2 Naende erio gaetire chinsemo chiria nakobaremia as'amang'ana amange, agaika Boyunani. 3 Erio ochia komenya aroro emetienyi etato, Abayahudi bakamokorera esugu, ochia korigia kogenda Shami as'enchera y'enyancha; akarigia koirana as'enchera ya Makedonia, 4 Abanto aba bakagenda nere goika Asia, Sopater Omoberoya, na Arisitariko na Sekundo, abanto ba Thesalonika, na Gayo omonto o Derbe, na Timotheo; na Tukiko na Turufimo abanto b'Asia. 5 Abanto abwo konyora batang'anire bagatoganyera Teroa. 6 Intwe tokamanora nyuma y'amatuko emegati etabekiri memera, tokarua Filipi tokabaikera Teroa orogendo rw'amatuko atano, togaikaransa aroro amatuko atano nabere. 7 Goika rituko rie ritang'ani ri'echuma, aborokigwa kobasangererekanire, erinde basamunyore omogati, Paulo agakwana nabarabwo, akarengereria komanora rituko ria kabere riaye; agachiererera amang'ana aye goika obotuko bw'ekeigoro. 8 Nchiarenge chitaya chinyinge as'egoroba aria aase basangererekanete. 9 Omomura oyomo, erieta riaye Eutuko, oikaransete as'edirisa, akaritoerwa nechitoro; nas'ekiagera Paulo amentete korandia, akaritoerwa nechitoro akagwa korwa egoroba ya gatato, akabogorigwa konya okure. 10 Paulo agaika, akamogwera, akamoumamera, akabora, Timokora riroroche; naki obogima bwaye, nao bore ime yaye. 11 Akarina igoro naende, agasamunyora omogati akaria, akamenta gokwana nabarabwo goika rituko ria mambia, erio akaimoka akagenda. 12 Bakamoreta omosae oria, ore moyo, bagasasoka omosasoko omonene mono, 13 Intwe togatang'ana kogenda obwato, tokagenda goika Assos, tokarengereria komonyora Paulo aria: naki naboigo achigete ere, akarengereria agende namagoro. 14 Agachia gotoikera aria Assos, tokamosoyia, togaika Mitulene. 15 Tokamanora korwa agwo, nerituko ria kabere, togaika aas'arigerereti Kio; rituko ria kabere riaye togaika Samos, togaikaransa Trogullio, rituko ria kabere riaye togaika Mileto. 16 Naki Paulo igarengereretie goeta Efeso nobwato, tabaisa gotebana as'Asia; naki igare koayerera, akarigia goika Yerusalemu rituko ria Pentekote, keranyarekane. 17 Korwa Mileto Paulo agatoma abanto kogenda goika Efeso, akabarangeria abagaka b'ekanisa. 18 Bagachia goika asare, akabatebia, Inwe mwamanyire korwa rituko rie ritang'ani nachagete gotacha aiga Asia, buna narenge asemore ekero gionsi, 19 nkomokorera Omonene as'obokanyeku bwonsi, namariga, nemechando emenge nanyorete as'ogotega kw'Abayahudi: 20 ng'a tinabisete ring'ana rinde rionsi eriranyare kobagwenera, korende naborogetie maiso marore enyomba as'enyomba. 21 Nakobaorokeria Abayahudi n'Abayunani okoonchoka kore ase Nyasaye, nokwegena kore as'Omonene oito Yesu Kristo. 22 Gaki, bono rora, nabwatirie enchera kogenda Yerusalemu nasibirwe as'enkoro yane, timanyeti ayaranyore aria: 23 tatiga ng'a Omoika Omochenu omochie as'omochie igogontebia, ng'a ebisibo nemechando binganyete. 24 Korende timbobareti obogima bwane ng'a negento kie rigori asende, erinde ndokore orogendo rwane, nobosomba boria nanyorete as'Omonene Yesu, koorokia enchili y'obuya bwa Nyasaye. 25 Na bono inche namanyire ng'a inwe mwensi abanaranderetie obonda bwa Nyasaye, nare kogenda aria naria, timokondora obosio bwane naende. 26 As'ayio nabaorokeirie bonsi ase rituko eri ria rero, ng'a inche tindi nabibe as'amanyinga ay'omont'onde bwonsi. 27 Naki tinangete kobaranderia amang'ana ay'okworokereria gwonsi kwa Nyasaye. 28 Erigererie inwe abanyene, neriicho rionsi, erio Omoika Omochenu abaete mobe abarendi, koyerisia ekanisa yaye Nyasaye, eyenyorerete as'amanyinga aye omonyene. 29 Namanyire inche ng'a nyuma as'okoimoka kwane chisese chi'orosana chintindi nachiche asemore, tichiritigera riicho; 30 naende korwa egati yaino nabaimoke abanto, bagokwana ay'obong'ainereria, babang'use aborokigwa gochia nyuma yabo. 31 As'ayio renda, mokoinyora ng'a emiaka etato, obotuko nomobaso, tinare gotiga komokurera ker'omonto as'amariga. 32 Gaki bono baminto nababekire as'amaboko a Nyasaye, nase ring'ana ri'obuya bwaye, asare ere oyoranyare kobaagacha nakobaa omwando amo nabarabwo bonsi abasibekire. 33 Tinarengereretie efetha, nonya nethahabu, nonya neanga y'omonto. 34 Inwe abanyene mwamanyire ng'a amaboko aya akoreire okorigia kwane, nokwabo abarenge amo nainche. 35 Nabaeire omogwekano ase chingecho chionsi, ng'a as'okobwata emeremo iga nebagwenerete kobakonya aba tari nechinguru, nakoyainyora amang'ana ay'Omonene Yesu, buna akwanete omonyene, Negesio korua kobua okonyora. 36 Ochia gokora gokwana aya agatung'ama agasaba amo nabarabwo bonsi. 37 Bakarera mono bonsi, bakamogwera Paulo rigoti riaye, bakamonyunyunta, 38 bagaichana kobua as'engecho ye ring'ana riria atebete, ng'a timokondora obosio naende. Bakamokoba goika obwato.
1 Egachia koba ekero twatananekanire nabarabwo na komanora nobwato, tokagenda boronge goika Koos, ne rituko ria kabere riaye togaika Rodo, na korwa aroro togaika Patara: 2 tokanyora obwato oboranyare kwamboka goika Foiniki, tokarina obwato, tokamanora. 3 Erio togachia korora Kupro, togagetiga ensemo y'okobee; tokagenda goika Shami, togaika Turo: naki agwo nao obwato bwaito bogoikeria ebinto biaye. 4 Twachia kobarora aborokigwa, togaikaransa agwo amatuko atano nabere: nabarabwo bakamotebia Paulo as'okobua kw'Omoika Omochenu tatira gochia Yerusalemu. 5 Goika togachia gokora amatuko aria, tokaimoka tokagenda as'orogendo rwaito; nabanto bonsi, amo nabakungu babo, nabana babo, bagatokoba goika isiko as'omochie: bagatung'ama engegu, togasaba, 6 na nyuma gatwatiganire; tokarina obwato ime, nabarabwo bakairana nka. 7 Gotwachia gokora orogendo rwaito korwa Turo, togaika Ptolemai; tokabakwania abaminto, togaikaransa nabarabwo rituko erimo. 8 Mambia yaye intwe tokaimoka na Paulo, togasoka, togaika Kaisaria, togasoa enyomba ya Filipo omorandia, orenge oyomo o baria batano nababere, togaikaransa nere. 9 Omonto oyo narenge nabaiseke bane abekungi, bare kobana. 10 Erio agwo twarenge toikaransete aroro amatuko amange, omobani oyomo erieta riaye Agabo agatirimboka korwa Boyahudi. 11 Agachia goika asetore, akarobogoria orokini rwa Paulo, agesiba amagoro namaboko, akabora, Omoika Omochenu otebire iga, Naboigo Abayahudi ba Yerusalemu barache komosiba omonto omonyene orikini oro, nabarabwo nabamobeke as'amaboko ay'abanto b'ebisaku. 12 Togachia koigwa aya, intwe, nabanto b'aria, tokamosorora tabaisa gotira gochia Yerusalemu, 13 Erio Paulo akairaneria, Nki eke mogokora, mokorera na kong'ita enkoro? naki inche tari as'ogosibwa gwoka, igonde ang'e nonya nogoitwa ase Yerusalemu as'engecho y'erieta riaye Omonene Yesu. 14 Erio kangire amang'ana aito togakira, togateba, Obwanchani bw'Omonene tiga bokoreke. 15 Nyuma as'amatuko aria tokabogoria ebinto biaito, togatira kogenda Yerusalemu. 16 Abande b'aborokigwa ba Kaisaria, bakagenda amo naintwe, bakamoretana na Mnason, omonto o Kupro, omworokigwa o kare, ere nere toraikaranse bwoye. 17 Togachia goika Yerusalemu, abaminto bagatoroisia as'omogoko. 18 Rituko ria kabere riaye Paulo agasoa ase Yakobo amo naintwe, nabagaka bonsi nao barenge. 19 Kabakwanirie, akaborokia amang'ana onsi erimo erimo aya Nyasaye akorire as'ebisaku as'obosomba bwaye. 20 Nabarabwo, bagachia koigwa, bakamobaka Nyasaye; bakamotebia, Oyominto, kwarorire ng'a Abayahudi abanchire buna bare chilifu chinyinge; nabarabwo bonsi igo bare abakong'u mono as'engecho y'amachiko: 21 nabarabwo batebigwe chingecho chiao, ng'a kwaborokereirie Abayahudi bonsi abamenyete as'ebisaku komotiga Musa, gokobatebia tibarokia abana babo gose tibatunyana chingecho. 22 Gaki, inki? nebagwenerete abanto basangererekane; naki nabaigwe ng'a gwachichire, 23 Gaki kora ring'ana eri toragotebie; Mbare aiga asetore abanto bane abare neira igoro yabo. 24 Imokia abanto aba bwesibie amo nabarabwo, orue eng'eria yabo, erinde bagingire emetwe yabo: erio abanto bonsi banyare komanya ng'a amang'ana aria batebigwe asore ng'a tari ay'ekeene; korende aye omonyene igokogenda buya nakobwata amachiko. 25 Korende ase chingecho chi'abanto b'ebisaku banchire, twanyarire kobeka ekina giaito, barabwo tibabwata gento kende tatiga as'okwerenda emebere yabo nebinto biarusigwe ebing'wanso chisanamu, namanyinga, nebinto bing'entire, nobonyaka. 26 Erio Paulo akabaira abasacha baria, na rituko ria kabere riaye agesibia omobere oye amo nabarabwo, agasoa hekalu ime, goteba amang'ana ay'ogoikerania amatuko ogosibigwa, goika esadaka erusigwe as'engecho ya ker'oyomo obo. 27 Naboigo amatuko aria atano nabere achia koba ang'e goikerangiwa, Abayahudi baruete Asia bakamorora ase hekalu ime, bakabasegeta abanto bonsi, bakamobwata, 28 bakaaka eriogi, Inwe abasacha ba Isiraeli, konya; Omonto oyo nere oria okworokereria abanto ase ker'ensemo ayatagwenereti abanto, namachiko, naase aiga: naende, kobua aya, obasoirie Abayunani ase hekalu, obekire eubi aas'aiga aachenu. 29 Naki bamororire Turufimo Omoefeso, aino nere as'omochie, bagakaga ng'a Paulo namosoirie ase hekalu. 30 Omochie bwonsi ogasogwa nokobea, abanto bagasangererekana bwango bwango, bakamobwata Paulo, bakamokurura bakamosokia korwa ase hekalu: erio ebisieri bigasiekwa, 31 Erinde bagachia koba kobakorigia enchera y'okomoita, amang'ana akamoikera omotang'ani bw'omoganda, ng'a omochie o Yerusalemu osarekire, omochie omogima. 32 Erio bwango akaimokia abasigari nechisagini akabaikera bwango. Nabarabwo bagachia komorora omotang'ani nabasigari, bagatiga komoaka Paulo. 33 Erio omotang'ani agaika ang'e akamobwata, agachika asibwe nebinyuri bibere; akaboria, nere ng'o oyo? naende inki akora? 34 Abande as'omosangererekano bakaaka eriogi bagoteba iga, nabande iga: agachia koba tari konyara komanya oboronge bw'amang'ana aria as'engecho y'egeturi keria, agachika aretwe ime as'enyomba enene y'abasigari. 35 Nabo agachia goika ebirinero, akaba nkobogorigware nabasigari as'engecho y'obotindi bw'omoganda; 36 naki omoganda omonene bw'abanto bakamotunyana bakoaka egeturi, Morusieo oyo. 37 Na Paulo ochia koba ngosoigware ime as'enyomba enene y'abasigari, akamotebia omotang'ani, Ninyore ribaga ngotebie ring'ana? Nere akabora, Inee, nomanyete Ekeyunani? 38 Aye tari oria Omomisiri, ere ritang'ani ri'amatuko aya oyobasegetete baria abanto chilifu inye, barogetwe Abaiti, akabatang'ana as'eroro? 39 Paulo akabora, Inche n'Omoyahudi, omonto o Tariso, omochie o Kilikia omonyene ense bw'omochie otari moke: nagosabire ong'e ribaga nkwane nabanto aba. 40 Erio ochia komoa ribaga, Paulo agatenena ebirinero igoro, akabakiria nokoboko abanto baria; bagachia gokira kiri kegima, agakwana nabarabwo as'omonwa bw'Ekeibirania, ogoteba,
1 Inwe baminto nabatata bane, ntegerera, gonkwegambera omonyene as'amasio aino bono. 2 Bagachia koigwa ng'a igagokwana nabarabwo as'omonwa bw'Ekeibirania, bakamenta gokira: agakwana, 3 Inche n'Omoyahudi, naiboretwe Tariso omochie o Kilikia, nkarererwa as'omochie oyio, as'amagoro a Gamalieli, nkorokererigwa ogochika kw'abatata baito as'oboronge, nkaba omonto oyore nomokia ase Nyasaye, buna inwe mwensi more rero iga. 4 Nkabarosia abanto b'Enchera eye goika ogoitwa, mbasiba, mbaruta echela ime, abasacha nabakungu. 5 Buna Omokuani omonene nere ambere kirori, nabagaka be ritongo bonsi pi; ekiagera naetwe amarube nabarabwo as'abamwabo, nkagenda Damesiki, erio mbarete baria barenge agwo goika Yerusalemu, basibire erinde bachandwe. 6 Erio agwo ekero narenge kogenda, konaikire ang'e Damesiki, ekero kia mobasogati, mobosokano amasase amanene, aruete igoro akamoreka chinsemo chionsi. 7 Nkagwa inse, nkaigwa eriogi rigontebia, Saulo, Saulo, naki okondosia? 8 Nkairaneria, naye ng'o Omonene? Agantebia, Inche Yesu Omonazareti ere aye kwandosirie. 9 Na baria barenge amo nainche mbayaroche amasase aria, bakaba nokoiroka, korende tibarigwete eriogi riria. 10 Ngateba, Ninki ndakore Omonene? Omonene agantebia, Tenena ogende goika Damesiki; nagwo notebigwe chingecho chi'amang'ana onsi ayachikirwe oyakore. 11 Naende ngachia koba tindikorora as'engecho y'obonene bw'amasase aria, nkarawa namaboko abo abarenge amo nainche, ngaika Damesiki. 12 Erio omonto oyomo, Anania, omoiroki Nyasaye as'ogotunyana amachiko, ore gotebwa buya n'Abayahudi bonsi bamenyete agwo. 13 Aganchichera, agatenena ang'e nainche, agantebia, Oyominto, Saulo, ramokia. Nkamoramokeria amaiso ane ensa eria eria. 14 Agateba, Nyasaye bw'abatata baito okorusananirie onyare komanya obwanchani bwaye, nakomorora Omonyene Oboronge, nakorigwa eriogi rikorwa as'omonwa oye, 15 Naki nobe kirori oye as'abanto bonsi, bw'amang'ana ayakwarorire nakoyaigwa. 16 Gaki bono inki ogotebanera? tenena obatiswe, bwesibie ebibe biao, gokorirangeria erieta ri'Omonene. 17 Gekaba nachia koirana Yerusalemu, ekero narenge gosaba ase hekalu ime, nkairwa as'okorota, 18 nkamorora ogontebia, Ayerera bwango, karue ase Yerusalemu bwango: ekiagera tibagwancha oborori bwao ase chingecho chiane, 19 Nainche nkabora, Omonene, bamanyire barabwo ng'a inche igo narenge kobasiba baria bagwanchete nakobaaka ase chisunagogi chiabo: 20 namanyinga a Stefano kirori oo ekero agoiterwa, nainche igo narenge nteneine ang'e, ngancha aitwe, ngachirenda chianga chiabo abamoitete. 21 Nere agantebia, Genda: naki inche ningotome are as'abanto b'ebisaku. 22 Bakamotegerera goika ring'ana riria; erio bakaaka eriogi riabo, bagoteba, Morusieo oyo as'ense: naki tagwenereti abe moyo. 23 Bagachia koba bakonakoaka egeturi nakorusia chianga chiabo, na gosiarasiara ebuse gochia igoro, 24 oria omotang'ani agachika aretwe ime as'enyomba enene y'abasigari, agachika aborigwe chingecho chiaye as'okoakwa, erinde amanye engecho bakomwogerera eriogi buna eri. 25 Goika bagachia komosiba as 'engori, Paulo akamotebia esagini oteneine ang'e nere, Inee! mboronge komosusura omonto Omorumi, nere ataranacherwa kina? 26 Oria esagini ochia koigwa, akagenda akamworokia oria omotang'ani okobora, Naki origeti gokora? ekiagera omonto oyo n'Omorumi. 27 Omotang'ani agacha akamotebia, Ntebia, N'Omorumi ore? agateba, Ee. 28 Omotang'ani akairaneria, Inche igo nanyorete obobiare obo kw'abanyene ense ase rigori ri'enibo enyinge. Paulo agateba, Nainche igo naiboretwe as'engecho eyio. 29 Erio baria barenge ang'e komoboria bakaimoka bakamotiga: noria omotang'ani akairoka, erio kamanya ng'a n'Omorumi, nas'engecho amosibire. 30 Rituko ria kabere riaye, akarigia komanya boronge, nas'engecho ki asoeirwe n'Abayahudi, akamosibora, agachika abakuani abanene neritongo bonsi bache. Akamoreta Paulo inse, akamobeka as'amasio abo.
1 Paulo akababeta amaiso abanto be ritongo akabora, Baminto, inche as'ebirengererio ebiya kegima igande moyo as'obosio bwa Nyasaye goika rero iga. 2 Omokuani akabachika baria bateneine ang'e nere komoaka omonwa oye. 3 Erio Paulo akamotebia, Naye Nyasaye nakoake, enyasi eakire echoka: aye gwaikaransire konachera ekina boronge koreng'ana buna ogochika, naye gogoteba ng'akwe as'enchera etari y'ogochika? 4 Baria bateneine ang'e nere bakabora, Inee! Nomokuani omonene o Nyasaye kwaramire? 5 Paulo agateba, Tinamanyete baminto ng'a ere nomokuani omonene: naki narikire, Tomokwana amabe omonene bw'abanto bao. 6 Korende agachia komanya ng'a ensemo eyemo n'Abafarisai, nensemo ya kabere n'Abasadukai, akaaka eriogi ase ritongo riria, Baminto, Inche n'Omofarisai, omwana bw'Abafarisai: inche igo nkogambigwa as'engecho y'ogosemeria gw'okobokigwa kw'abakure. 7 Erio gakwanire aya, gokaba ogwatananekana egad y'Abafarisai n'Abasadukai, omosangererekano ogatananekana. 8 Naki Abasadukai bagoteba ng'a kobokigwa tikori, nonya namalaika, nonya nomoika: korende Abafarisai igo bagwatora onsi abere, 9 Bikaba ebituri ebinge: abariki b'ensemo y'Abafarisai bagatenena, bakamwomanera, bagoteba, Titorochi bobe bonde as'omonto oyo: korende onyore omoika gose rilaika rigokwana nere titoamererania na Nyasaye. 10 Eriomana rinene riachia kooroka, oria omotang'ani akairoka Paulo tabaisa gotandoranwa nabarabwo, agachika abasigari baike nakomotaboria korwa as'amaboko abo, nakomoreta as'enyomba enene y'abasigari. 11 Obotuko boria Omonene agatenena ang'e nere, agateba, Obe nomoyo omoremu, Paulo; naki buna kwaorokirie chingecho chiane Yerusalemu, nekogwenerete kong'orokia boigo Rumi. 12 Bogachia gokiamoka, ensemo y'Abayahudi bakabwatana, bakeng'ata as'eira bagoteba, Titokoria gose titokonywa goika gatwatiekire komoita Paulo. 13 Nabwo batiananetie igo barenge abanto kobua emerongo ene. 14 Nabarabwo bakagenda as'abakuani abanene nabagaka, bakabora, Tweng'atire as'eira, titoria gento goika ekero twamoitire Paulo. 15 Gaki bono inwe amo nabagaka be ritongo motebie omotang'ani amotirimbokie gocha asemore, buna nabanto morigetie komanya chingecho chiaye buya kobua: naintwe igotore ang'e komoita ataraika ang'e, 16 Omoigwa o Paulo akaigwa amang'ana ay'okoboera kwabo, akagenda agasoa ime as'enyomba enene akamworokia Paulo amang'ana ayio. 17 Paulo akamorangeria esagini oyomo, agateba, moire oyo as'omotang'ani, ekiagera nabwate ring'ana akomworokia. 18 Erio akamoimokia, akamoira as'omotang'ani akamotebia, Paulo, oria omosibwa nandangeria, origia nkoretere omomura oyo ekiagera nare nering'ana agogotebia. 19 Oria omotang'ani akamobwata okoboko, akagenda nere ensemo, akamoboria bobisi, Ing'ana ki obwate origetie konyorokip? 20 Akabora, Abayahudi babwatanire gogosaba omorete Paulo inse ankio, omobeke as'obosio bwe ritongo, ng'a igo morigetie komanya chingecho chiaye as'amaene kobua. 21 Gaki aye tibwancha: naki abanto kobua emerongo ene bamoboeire, beng'atire as'eira tibaria gose tibanywa goika kobamoitire Paulo: nabarabwo igo bare ang'e baganyete eira asore. 22 Erio oria omotang'ani akamotiga omomura oria agende, akamotebia, tomotebia monto onde bwonsi ng'a kwanyorokirie aya. 23 Akarangeria chisagini ibere, agateba, Beka ang'e abasigari chimia ibere kogenda Kaisaria, nabasigari abarini chibarasi emerongo etano nebere, nabanyene amatimo chimia ibere, ekero gie chinsa isato chia botuko. 24 Akabatebia kobeka ang'e ebarasi bamorinie Paulo nakomoira buya ase Feliki gavuna. 25 Akarika rirube buna iga: 26 Klaudio Lusia as'omonene gavuna Feliki, nagokwanirie. 27 Omonto oyo igabwatwa n'Abayahudi, akaba ang'e goitwa nabarabwo, nkagenda amo nomoganda bw'abasigari, nkamotoria, nachia konyora amang'ana ng'a ere n'Omorumi. 28 Naende konachia korigia komanya engecho yaye bakomosoera, nkamoreta inse, nkamobeka as'obosio bwe ritongo: 29 nkarora ng'a igasoeirwe as'engecho y'amaboria ay'amachiko abo, gose tasoeiri ase ring'ana rinde rigwenerete agoitwa nonya ngosibwa. 30 Goika nachia konyora amang'ana baboire omonto oyo, bono namotomire asore, nkabachika nabaria abasoete, bakwane amang'ana aye as'obosio bwao. Orare buya. 31 Erio, baria abasigari bakamoimokia Paulo buna bachigetwe, bakamoira goika Antipatiri botuko. 32 Erio mambia bakabatiga baria abarinete chibarasi bagende amo nere, nabarabwo bakairana as'enyomba enene y'abasigari: 33 nabaria, bagachia goika Kaisaria, bakamoa gavuna rirube riria, bakamobeka Paulo as'obosio bwaye. 34 Nere agachia korisoma, akabora, Omonto oyo noyo nse ki? ochia kworokigwa ng'a nomonto o Kilikia, agateba, 35 ninkoigwe amang'ana ao ekero barache baria abagosoerete: agachika arendwe ase Praitorio ya Herode.
1 Nyuma as'amatuko atano, Anania, omokuani omonene agatirimboka nabande as'abagaka amo nere, nomokwani oyomo, Teritullo; nabarabwo bakainotebereria gavuna amang'ana a Paulo. 2 Naende agachia korangerigwa, Teritullo agachaka komosoera, agateba, Ekiagera asore, twanyorire omorembe omonge aye Feliki omonene, nas'okorigereria kwao amang'ana amabe iga akorosigwa as'engecho y'egesaku eke, 3 gaki iga tokoyanyora ker'ekero na ker'aase, as'obuya bwonsi. 4 Korende tingochanda kobua, nagosoroire ototegerere amang'ana amake as'ogwancha kwao. 5 Naki twamororire omonto oyo omochege, omochaki bw'eriomana as'Abayahudi bare as'ense yonsi, naende nomotang'ani ensemo y'Abanazareti. 6 Naende igatemete koyebeka hekalu ebibe: tokamobwata: tokarigia komogambia as'ogochika gwaito. 7 Korende Lusia omotang'ani agaika, akamorusia as'amaboko aito nechinguru, akabachika baria abamosoeri bache asore, 8 aye omonyene nonyare komoboria nakonyora engecho y'amang'ana aria twamosoeire intwe. 9 Abayahudi nabarabwo bakamosoera, bakabora naboigo are. 10 Erio gavuna akamworokia Paulo okoboko erinde akwane, akairaneria, Ekiagera namanyire ng'a aye kwabaire omogambi as'egesaku eke as'ekero ki'emiaka emenge, igo nakoiraneria as'omoyo bw'omogoko. 11 Ekiagera nonyare komanya ng'a taraeta amatuko kobua ikomi nabere korwa natirete kogenda Yerusalemu gosasima. 12 Abanto aba tibandochi ime ase hekalu, nkwomana nomonto gose ngokora eriogi as'omosangerereko, gose ase chisunagogi gose as'omochie ime. 13 Gose tibakonyara koyaorokia amang'ana aya bansoera bono. 14 Tatiga ring'ana eri naorokia asore, ng'a Enchera eria bakoroka ensemo y'obong'ainereria, nabo nkomosaba Nyasaye bw'abatata baito, nakoyancha onsi ayabwataine namachiko, nayarikire ase chibuku chi'ababani: 15 ninde nogosemeria ase Nyasaye, naende nonya mbarabwo nabarabwo iga bariganyete ng'a nakobe okobokigwa kw'abakure abanyene oboronge nabatari noboronge bonsi. 16 Nainche nabo natemire koba nebirengererio bitari nobobe as'obosio bwa Nyasaye nas'obosio bw'abanto. 17 Nyuma as'emiaka emenge ngaika mbaretere abanto b'egesaku kiane ebiegwa ne chisadaka. 18 Abande as'Abayahudi baruete Asia bakandora ime ase hekalu nasibigwe, timbeti amo nomoganda gose riroroche: 19 nebagwenerete barabwo koba aiga as'obosio bwao nagonsoera, onye barenge nering'ana rinde rionsi igoro asende. 20 Gose abanto aba abanyene batebe, nkomocha ki barora asende ekero natenena ase ritongo, 21 tatiga as'engecho y'eriogi narerete gongotenena egati gati yabo, as'engecho y'okobokigwa kw'abakure nkogambigwa as'obosio bwao iga rero. 22 Korende Feliki, agachia koigwa aya, akabakiria, ekiagera amanyete boronge amang'ana Enchera eria, akabora, Lusia omotang'ani karatirimboke ninache amang'ana ao. 23 Akamochika oria esagini amorende Paulo, korende abe neribaga; gose tamokania nonya noyomo obo bw'abasani baye komokorera, gose gocha komorora. 24 Nyuma as'amatuko atai make Feliki agaika na Drusilla mokaye oyorenge Omoyahudi, akamorangeria Paulo, akamoigwa amang'ana okwegena gwa Kristo. 25 Naende Paulo, agachia koba ngokwanare amang'ana aye as'amang'ana oboronge, oiokwerita, nekina gegocha, Feliki akaba nobwoba, akairaneria, Bono genda, nainche nkonyora ribaga ninkorangerie naende. 26 Naende igasemeretie ng'a naegwe chifetha na Paulo erinde amosibore: as'ayio akamorangeria ebiro ebinge gokwana nere. 27 Korende emiaka egachia koera ebere, Porikio Festo agasoa agambe ribaga riaye Feliki; na Feliki, akarigia gwekorera obuya as'Abayahudi, akamotiga Paulo osibire.
1 Goika Festo gasoire as'obogambi bwaye, nyuma as'amatuko atato agatira gochia Yerusalemu korwa Kaisaria. 2 Abakuani abanene n'Abayahudi bakamotebia amang'ana a Paulo, bakamosorora, 3 na komosaba abanchere, nakorua ogochika aretwe Yerusalemu, banyare komoboera nakomoitera enchera. 4 Festo akairaneria ng'a Paulo narendwe Kaisaria; nere omonyene igare ang'e kogenda aroro bwango. 5 Agakwana, Baria bare nobonene as'egati yaino, nabatirimboke amo nainche bamosoere, onye ring'ana rire ribe as'omonto oyo. 6 Agachia goikaransa asebare amatuko atano natato gose ikomi, agatirimbokera Kaisaria; goika rituko ria kabere agaikaransa as'ekerogo gi'ekina, agachika Paulo aretwe. 7 Agachia gocha, Abayahudi abaruete Yerusalemu bagatenena ang'e nere, bakareta amasoero amange namarito igoro yaye, ayabatanyare koyaorokia boronge; 8 Paulo agekwanera iga, ng'a inche timocheti ring'ana igoro as'amachiko ay'Abayahudi, gose igoro ase hekalu, nonya igoro ase Kaisari. 9 Korende Festo akarigia kwegwenia as'Abayahudi, akamoiraneria Paulo, akabora, norigetie kogenda Yerusalemu, ogambigwe aroro as'obosio bwane? 10 Paulo agateba, Inche natenenire aiga as'obosio bw'ekerogo gi'ekina kia Kaisari, angwenerete kogambigwa: timbamochereti Abayahudi ring'ana buna aye omanyete buya. 11 Onye namochire gose nakorire ring'ana rigwenerete ogokwa, tinyangeti gokwa: korende, onye tari ekeene ring'ana eri bansoeire, onde tari oranyare kombeka amaboko abo. Nindigeti apili ase Kaisari. 12 Erio Festo agachia gokora ogokwana nabanto be ritongo, akairaneria, Norigetie apili ase Kaisari: gaki nogende ase Kaisari. 13 Amatuko atai make agachia goeta, Agrippa omoruoti na Bereniki bagaika Kaisaria, bakamokwania Festo. 14 Naende bagachia goikaransa aroro amatuko amange, Festo akamotebia omoruoti amang'ana a Paulo, agateba, Nar'aa omonto otigetwe na Feliki osibire: 15 nainche ekero narenge Yerusalemu, Abakuani abanene nabagaka b'Abayahudi bagantebia amang'ana aye, bakarigia agambigwe. 16 Nkabairaneria ng'a tari engecho y'Abarumi komorua omonto onde bwonsi aitwe, ritang'ani omonto oria osoerwa atararorana nabamosoeri baye obosio as'obosio, nakoegwa ribaga gwekwanera as'amasoero aye. 17 Nabo bagachia gosangererekana aiga tintebaneti, korende rituko ria kabere ngaikaransa as'ekerogo gi'ekegambero, ngachika omonto oyio aretwe. 18 Nabaria abamosoeri bagachia gotenena ang'e nere, tibamosoera ase ring'ana ribe, buna nakagete; 19 korende iga barenge namaboria igoro asare as'edini yabo abanyene, nas'amang'ana omonto oyomo Yesu, oyotiekire gokwa, oyio Paulo akonagoteba ng'a moyo are. 20 Nainche ngatantana buna nkorigia ekeene ki'amang'ana aya, nkamoboria gose narigetie kogenda Yerusalemu agambigwe aroro as'amang'ana aya. 21 Korende Paulo akarigia abekwe agambigwe n'Augusto, ngachika arendwe goika moire ase Kaisari. 22 Agrippa akamotebia Festo, nainche nindigetie komoigwa omonto oyo, Akabora, Nomoigwe mambia. 23 Goika mambia Agrippa agacha amo na Bereniki as'obonene obonge, bagasoa aase bakoigwera amang'ana, amo nechisagini chinene nabanto abanene b'omochie, Festo akarua ogochika Paulo aretwe. 24 Festo agateba, Omoruoti Agrippa, nainwe mwensi aba moraa amo naintwe, mwamororire omonto oyo, as'ere omoganda bwonsi bw'Abayahudi aria Yerusalemu naa onsi mbandigetie mbakonye, bakoaka eriogi ng'a temogwenereti koba moyo. 25 Korende ngachia korora ng'a takoreti ring'ana rigwenerete aitwe: nere omonyene karigetie agambigwe na Augusto, nkarigia komotoma asare. 26 Nainche tindi nering'ana ri'ekeene komorikera omonene one. As'ayio namoretire aiga obosio bwaino, kobua as'obosio bwao aye omoruoti Agrippa, erinde gatiekire koborokia amang'ana aye, inyore ring'ana nkomorikera. 27 Naki narorire nering'ana ritari nenchera komoira omosibwa, ataorokiri amasoero aria asoerwa.
1 Agrippa akamotebia Paulo, Nore neribaga gokwana amang'ana ao. Erio Paulo akarambora okoboko kwaye, agekwanera. 2 Nerorire omonyene ng'a ninde negesio, aye omoruoti Agrippa, ekiagera ninyekwanere as'obosio bwao rero, as'amang'ana aria onsi nasoerwa n'Abayahudi. 3 Nabo ekiagera aye kwamanyire mono engecho namaboria onsi bare naro Abayahudi: as'ayio nagosabire onyigwe as'oboremereria. 4 Abayahudi bonsi bamanyire obogima bwane korwa oboke bwane, bwarenge korwa omochakano as'egesaku kiane, nase Yerusalemu, onye mbancha koorokia, 5 buna narenge Omofarisai as'okobwata engecho y'edini yaito ere yaboronge kegima. 6 Naende bono natenenire aiga ngambigwe as'engecho y'ogosemeria kw'eira baetwe abatata baito na Nyasaye; 7 as'eyio ebisaku biaito ikomi nabibere basemereti koyeikera, kobaramokerere Nyasaye as'omokia omobaso nobotuko. Nainche nasoeirwe n'Abayahudi as'engecho y'ogosemeria okwo, Aye omoruoti! 8 Naseki rigokagwa nainwe koba nering'ana ritanchegeti, ng'a Nyasaye nkobabokiare abakure? 9 Ekeene, inche omonyene naroche ng'a nengwenerete gokora amang'ana amange ayatananegete nerieta riaye Yesu Omonazareti. 10 Nkayakora aya Yerusalemu: nkabasiba abange as'egati y'abachenu as'echela, konatiekire koegwa ogochika nabakuani abanene, kobagoitwa, iga nanchete abe bo asebare. 11 Naende ebiro ebinge ase chisunagogi chionsi nkabachanda, mbabetereria korama; nkabarorera endamwamu buna igande nebarimo, nkabachanda goika nonya nemechie y'abageni. 12 Nabo as'emeremo eyio iga narenge kogenda Dameski, naeirwe okobua namachiko nabakuani abanene. 13 Aye omoruoti, ekero kia mobasogati as'enchera nkarora amasase akorua igoro abuete okobara kw'erioba, akambarera chinsemo chionsi, naende baria barenge amo nainche. 14 Tokagwa inse ntwensi, nkaigwa eriogi rigokwana nainche as'omonwa bw'Ekeibirania, Saulo, Saulo, naseki okondosia? naakong'u asore koyeaka chintacho ensimano, 15 Nainche nkabora, Naye ng'o Omonene? Omonene agantebia, Ninche Yesu, aye kwandosirie. 16 Korende imoka, otenene: naki nakoorokeire as'engecho y'ogogochora obe omokori na kirori bw'amang'ana aya kwarora, namang'ana ayio ndeorokerie asore; 17 kondagokonye nabanto bao, nabanto b'ebisaku, as'abwo ndagotome, 18 obaramokie amaiso abo, badge omosunte nakoyoiranera omobaso, nagochitiga chinguru chia Saitani nakomoonchokera Nyasaye, banyore okwaberwa kw'ebibe biabo, nomwando as'egati yabo abasibigwe as'okwegena kore ime asende. 19 As'ayio aye omoruoti Agrippa, tinsareti okorora koria kw'igoro: 20 korende ritang'ani iga nabarandereti baria ba Damesiki, na Yerusalemu, nase ense yonsi ya Boyahudi, nabanto b'ebisaku, baonchoke bamoonchokere Nyasaye, bagokora ogokora kobwataine nokoonchoka kwabo. 21 Naki as'ayio Abayahudi bakambwata ime ase hekalu, bagatema kong'ita. 22 Erio konatiekire gokonyora ogokonywa gokorua ase Nyasaye, natenenire goika rero iga nakobatebia abake nabanene, gose tindi gokwana ring'ana tatiga aria ababani na Musa bayakwanete, ng'a nabe; 23 buna Kristo agwenerete achandwe, naende buna ere ritang'ani, as'okobokigwa korwa as'abakure narandie amang'ana omobaso as'abanto baye nas'abanto b'ebisaku. 24 Agachia gwekwanera iga, Festo agakwana as'eriogi rinene, Paulo nebarimo ore; ogosoma kwao okonge gwagoonchoire obong'aini bwao. 25 Korende Paulo agakwana, Tindi ebarimo, aye Festo omonene; korende iga ngokwana amang'ana ekeene nay'obong'aini kegima. 26 Naki omoruoti omanyire engecho y'amang'ana aya naende ninyare gokwana nere ntari nokoiroka: ekiagera namanyire mono ng'a ring'ana tiriri, nonya nerimo as'ayio atamanyeti; naki ring'ana erio tirikoregeti bobisi, 27 Omoruoti Agrippa, kwabanchire ababani? Namanyire ng'anobanchete, 28 Agrippa akamotebia Paulo, as'amang'ana amake norigetie gonkora imbe Omokristo. 29 Paulo akamoiraneria, Namosabire Nyasaye ng'a as'amang'ana amake gose as'amange tari aye bweka, korende naba bonsi abang'igure rero, babe buna inche, tatiga as'ebisibo ebi. 30 Agachia gokora gokwana aya, omoruoti na gavuna na Bereniki nabaria baikaransete amo nabarabwo bagatenena: 31 bakagenda are ake bagatebania, bakabora, Omonto oyo takoreti ring'ana rigwenerete ogokwa nonya nogosibwa. 32 Agrippa akamotebia Festo, Omonto oyo anga nanyara gosiborwa onye atanacha apili ase Kaisari.
1 Nabo egachia gochikwa togende goika Italia, bakamobeka Paulo nabasibwa bande as'amaboko esagini eyemo, erieta riaye Yulio, bw'omoganda bw'Augusto. 2 Togasoa as'obwato bw'Adramutio bwarenge ang'e kogenda goika emechie ye chingegu chi'Asia, tokaimoka, Arisitariko, Omomakedonia o Thessalonika, igarenge amo naintwe. 3 Rituko ria kabere togaika Sidoni; Yulio akamwancha Paulo mono, akamoa ribaga kogenda as'abasani baye gokonywa nabarabwo. 4 Korwa agwo tokagenda as'enyancha orogendo maate ase Kupro, erinde tokengane embeo, ekiagera embeo yarenge korua obosio. 5 Tokayeeta enyancha ensemo ya Kilikia na Pamfulia, togaika Mura, omochie o Lukia. 6 Naria oria esagini akanyora obwato bw'Iskanderia, bwarenge ang'e kogenda goika Italia, agatorinia. 7 Tokagenda ng'ora as'ekero ki'amatuko amange, togaika Kinido as'emechando; nekiagera embeo yatotangete, togaeta ang'e na Kirete maate, erinde twekenge embeo, ang'e na Salmone; 8 tokayeeta as'emechando engegu as'engegu, togaika aase akorokwa Ekiambokero Ekiya. Ang'e nagwo narenge omochie okorokwa Lasaya. 9 Naende ekero ekenge konya giaetire, norogendo rore nemechando bono, ekiagera amatuko Okweng'ata konya aetire, Paulo akabatebia, akabora, 10 Abasacha, narorire ng'a orogendo oro narobe nemechando nogosira okonge, tari as'ebinto nobwato bioka, korende nobogima bwaito bwonsi. 11 Korende oria esagini akabaigwera omogendia nomonyene obwato, kobua aria akwanete Paulo. 12 Nekiagera ekiambokero tikiarenge buya abanto baikaranse ime yaye ekero ki'obokendu, abange bagateba togende torua aiga erinde banyare goika Foiniki, keranyarekane, nagoikaransa aroro ekero ki'obokendu; nakerokia nekiambokero kia Kirete, erigerereti gati irianyi na mocha na sugusu na mocha, 13 Naende embeo ya sugusu egachia kogusa ake, bagakaga banyorire eki barigetie konyora, bakarusia ekerochi, bakagenda ang'e na Kirete ang'e mono nengegu. 14 Nyuma as'ekero egeke omwaga bwe chinguru ore buna ekerambautia, ekorokwa Eurakulo, okaaka obwato: 15 bokabogorigwa, ekiagera tibwanyarete koamererania nomwaga, tokabotiga etoire as'egochia. 16 Togaeta bwango ang'e negesinka egeke gekorokwa Kilaudia, tokanyara as'emechando, kobotiria obwato: 17 bagachia gokora kobotiria, bagakora ogokonywa, bakaboa obwato as'ogoetia engori inse yaye; bakairoka ng'a tibabaisa koratera ase Surtis, bakarusia egetambaa bakairwa igo. 18 Nekiagera konya twaakirwe mono noria omwaga, rituko ria kabere riaye bagachaka gotuguta ebinto enyancha ime; 19 rituko ria gatato bagatuguta ebinto bi'obwato as'amaboko abo abanyene. 20 Erioba neching'enang'eni tichiarorekanete as'ekero ki'amatuko amange, nomwaga nemerindo emenge egatotuba, tokerusia moyo as'ogokonyeka. 21 Togachia goikaransa ekero ekenene totari koria endagera, Paulo agatenena gati gati yabo, akabora, Abasacha, anga yabete egesio onye mwang'igwete, titorua aria Kirete, nakonyora emechando nogosira buna oko, 22 Bono nabatebirie, mobe nomoyo omoremu: naki omonto tagosira, tatiga obwato bwoka. 23 Ekiagera obotuko obo bwa rero rilaika ria Nyasaye, oria inche inde omonto oye, naende nere ngokorera, 24 agatenena ang'e nainche agmtebia, Toiroka, Paulo, nogwenerete gotenena as'obosio bwa Kaisari: naende rora, Nyasaye okoeire abanto bonsi abakogenda amo naye. 25 As'ayio abasacha, remia emioyo, naki namwegenire Nyasaye, ng'a nabe buna natebetigwe. 26 Korende netogwenerete gotugutwa as'egesinka ekemo. 27 Goika obotuko bw'ikomi nane bogachia goika, tokorutwa aria naria as'enyancha y'Adria, obotuko gati abairi bagakaga ng'a baikire ang'e ense enyomo. 28 Bakaruta ekerengo, bakanyora emerongo ebere: bakagenderera ake bakaruta ekerengo naende, bakanyora ebirengo ikomi nabitano. 29 Bakairoka ng'a tibabaisa gotuomerigwa as'ebitare, bakaruta ebirochi bine, bagasaba bokie. 30 Naende abairi bagachia korigia gotama nagotiga obwato, bakaboikia obwato oboke enyancha buna mbarigetie koruta ebirochi korwa obosio bw'obwato. 31 Paulo akabatebia esagini nabasigari, Aba bataikaranseti ime as'obwato timokonyara gokonyeka. 32 Erio abasigari bakachinacha chingori chi'obwato, bakabotiga bogwe. 33 Bogachia gokiamoka, Paulo akabasorora bonsi barie endagera, akabora, Rero namatuko ikomi nane koganya nokweng'ata, timorieti gento kende gionsi. 34 Gaki nabasoroire morie, nebe as'ogotoreka kwaino: naki tirogosira nonya norochugu rw'emetwe yaino korwa asemore mwensi. 35 Gachia gokwana aya akabogoria omogati, akamosasima Nyasaye as'amasio abo bonsi: akayosamunyora, agachaka koria. 36 Erio bonsi bakagongomoka, bakaria endagera abanyene. 37 Naintwe iga twarenge ime as'obwato abanto chimia ibere nemerongo etano nebere nabatano nomo. 38 Bagachia koigota, bagakeania ebinto bi'obwato, bakayetuguta engano enyancha. 39 Bogachia gokiamoka, tibayemanya ense eria; tatiga baroche ekiambokero kere nomokenye, bagatebania kobosoyia obwato aroro, keranyarekane. 40 Bakabituguta biria ebirochi, bakabitiga nyancha, bagachiororobia chingori chi'egeonchori; bagatiria egetambaa kie ritang'ani embeo ekebwate, bagakegendera ekiambokero. 41 Bagaika aase chinsangio chia chinyancha ibere, bakabororia obwato aroro bokaratera, obosio bogasensema omokenye, bokabwatwa kegima, tibwanyegera nonya ng'ake, korende korua nyuma bogatagorwa ase chinguru chi'emerindo. 42 Ekina ki'abasigari iga kiare abasibwa baitwe, omonto terema abaise gotama. 43 Korende esagini ekarigia komokonya Paulo, akabajanga; tibakora buna barengereretie; akabachika baria baranyare kwerema basoe enyancha, baike ense enyomo: 44 nabarabwo abagotigara, abande igoro ase chibao, nabande as'ebinto binde bi'obwato. Naboigo abanto bonsi bakanyara goika ense enyomo buya.
1 Togachia gokonyeka, twensi, erio tokamanya ng'a egesinka keria iga gekorokwa Melita. 2 Abanyene ense bagatokorera obuya boetete engecho: naki bautete omorero, bagatoroisia intwensi, as'engecho embura yatwete, nekiagera as'embeo. 3 Paulo iga arenge gosangereria chinko, nakobeka igoro as'omorero, eng'iti egasoka as'engecho y'omorero oria, ekamwenarera as'okoboko kwaye. 4 Abanyene ense eria bagachia koyerora eng'iti eria egosung'unana korwa as'okoboko kwaye, bagatebania, Takomocha omonto oyo koba omoiti, nonya okonyegete as'enyancha, ekeene tigekomotiga koba moyo. 5 Korende akayesamunsera riko, taba bobe bonde. 6 Bakamorigereria mono bagakaga ng'a nabimbe, gose kogwa inse nagokwa bwango: bagachia korigereria mono, ng'a obobe bonde tibomonyoreti, bagaonchora ebirengererio biabo, bakabora ng'a ere nyasaye. 7 Ang'e naase aria yarengeo emegondo y'omonene bw'egesinka, erieta riaye Publio; omonto oyo agatoroisia as'omoyo bw'obosani, agatokora abageni baye as'ekero ki'amatuko atato. 8 Ekaba ise Publio narenge omonyareku esosera nagosaa amanyinga; Paulo agasoa asare agasaba, akabeka amaboko aye igoro yaye akamogwenia. 9 Ayio agachia gokoreka, abande abarenge namarwaire as'egesinka bagacha, bakagwenigwa. 10 Nabarabwo bagatosika as'ogosika okonene; naende togachia gosoa obwato bagatoa ebinto biria twaremeirwe nabirobio. 11 Nyuma as'emetienyi etato tokagenda as'obwato bw'Isikanderia, bwarenge bwamenyete aria egesinka ekero ki'embeo, nekemanyererio kiaye Diosikuri (engecho yaye abamura chisare). 12 Togaika Surakusa, tokamenyao amatuko atato. 13 Korwa agwo togaetanana, togaikera Regio: Nyuma ye rituko erimo embeo ya sugusu ekagusa, rituko ria kabere togaika Puteoli. 14 Agwo tokanyora abaminto, togasororwa nabarabwo tomenye amatuko atano nabere: naboigo togaika Rumi. 15 Nakorua agwo abaminto, bagachia koigwa amang'ana aito, bagacha gotorotota goika Appiiforo na Trestaberne. Paulo agachia kobarora akamobaka Nyasaye, akarema. 16 Togachia gosoa Rumi, esagini akababeka abasibwa as'amaboko omotang'ani bw'abarendi ba Praitorio: korende Paulo akaegwa ribaga komenya bwoye omonyene amo nomosigari ore komorenda. 17 Akaba nyuma amatuko atato, akabarangeria abanene b'Abayahudi basangerereke: goika bagachia gocha akabatebia, Baminto, gose tinkoreti ring'ana ribe as'abanto baito, gose ring'ana riatananegete nechingecho chi'abatata baito, nkabekwa as'amaboko Abarumi, ngasibwa, korwa Yerusalemu: 18 nabarabwo bagachia gokora komboria bakarigia gonsibora, ekiagera tibabete nengecho ende yonsi y'ogoitwa kwane. 19 Korende Abayahudi bagachia gosokia okoboria igoro as'ekina eke nkabetererigwa korigia apili ase Kaisari; tari ng'a narenge nering'ana ri'okobasoera abanto b'egesaku kiane. 20 Nabo as'engecho y'ayio, nabarangeirie moche kondora nagokwana nainche; ekiagera nasibirwe as'ekenyuri eke as'engecho y'ogosemeria gw'Isiraeli. 21 Baria bakamotebia, Intwe titonyoreti amarube are namang'ana ao korwa Boyahudi, gose onde ominto tari nonya noyomo oikire aiga ipgototebia amang'ana, gose okwanire ring'ana ribe igoro yao. 22 Korende ntorigetie koigwa asore buna oroche aye: naki ase chingecho chi'amang'ana ayio twatiekire komanya ng'a akwanirwe bobe ker'aase. 23 Bachia gokora kobekerana ase rituko, bagacha asare enyomba yaye, abanto abange mono; akabatebereria as'okoorokia amang'ana obonda bwa Nyasaye, akabatebia amang'ana aye Yesu, as'amang'ana amachiko a Musa nababani, korwa mambia goika mogoroba. 24 Abande bagancha ayakwanete, abande tibayancha. 25 Nabo kaba tibabwatana barabwo ase barabwo, bakagenda, Paulo agachia gokora gokwana ring'ana eri erimo ng'a Omoika Omochenu okwanete buya nabatata baito, as'omonwa bw'omobani Isaya, 26 Ogoteba, Genda as'abanto aba, obatebie, Okoigwa namoigwe, korende timokoinyora; Naende okorora namorore, korende timokonyara komanya ring'ana: 27 Naki emioyo y'abanto aba yakong'ire, Naende amato abo namarito as'okoigwa, Namaiso abo bayamiamirie; Tibabaisa gocha korora as'amaiso abo, Naende koigwa as'amato abo, Nakoinyora as'emioyo yabo, Nagoonchora emioyo yabo, Mbakonye. 28 Nabo emanyekane asemore ng'a ogokonyeka oko kwa Nyasaye kwairirwe as'ebisaku: nabarabwo nabaigwe. 29 Agachia gokora gokwana aya, Abayahudi bakagenda bakaborania amange barabwo ase barabwo. 30 Paulo akamenya ekero ki'emiaka ebere emegima as'enyomba yaye are korua rigori, akabaroisia abanto bonsi abarenge komochiera, 31 okorandia amang'ana obonda bwa Nyasaye, nakoborokereria abanto amang'ana Omonene Yesu Kristo, as'oboremu obonge, takanigwa namonto.
1 Paulo, omosomba o Yesu Kristo, orangeretigwe koba omotomwa, orusananetigwe koyerandie enchili ya Nyasaye, 2 ero Nyasaye atang'anete koria eira as'emenwa y'ababani baye as'amariko amachenu, 3 as'amang'ana Omwana oye, oyoiboretwe as'egesaku gia Daudi as'engecho y'omobere, 4 akaorokigwa as'okobua koba Omwana o Nyasaye, as'engecho y'omoika bw'obochenu, as'okobokigwa kw'abakure; Yesu Kristo Omonene oito, 5 asare ere ntwanyorete obuya nobotomwa, erio ebisaku bionsi binyare koigwera as'okwegena, as'engecho y'erieta riaye. 6 As'abaiga nainwe mwabaire mwarangerigwe na Yesu Kristo: 7 ase bonsi abare Rumi abanchire na Nyasaye, barangeretigwe koba abachenu: obuya bobe asemore nomorembe bokorua ase Nyasaye Tata oito, nas'Omonene Yesu Kristo. 8 Ritang'ani namoakeire mbuya mono Nyasaye one ase Yesu Kristo as'engecho yaino mwensi, ekiagera okwegena kwaino kwarandigwe as'ense yonsi. 9 Naki Nyasaye, oyongosasima as'omoyo one as'enchili y'Omwana oye, nere kirori one koreng'ana buna nkonakobatora ntari gokira, botambe as'ogosaba kwane, 10 igo ngosaba nchiche asemore amatuko ay'aiga aya, Nyasaye karanche gonsesenia as'orogendo rwane. 11 Naki igondengereretie mono kobarora, nyare kobaa ekeegwa ki'omoika, erio mobekwe chinguru; 12 ayio ng'a tobekane oboremu inche nainwe, ker'omonto as'okwegena kw'oyonde, okwaino nokwane. 13 Bono timbarigetie timomanya abaminto, ng'a ekero ekenge narengereretie gocha asemore (ngatangwa goika bono), erinde nyare koba namatunda asemore mwensi koreng'ana buna nde naro as'ebisaku binde. 14 As'Abayunani nabanto b'Ebisaku, nabanyene chisemi nabariri, ninde nesira. 15 As'ayio koreng'ana as'okobua kwane, inche igande ang'e koyerandia enchili nonya nasemore abamomenyete Rumi. 16 Naki tinkoyerorera enchili obosoku: ekiagera nero nokobua kwa Nyasaye gokoreta ogotoreka, as'onde bwonsi oyoranche; as'Omoyahudi ritang'ani, nonya nase Omoyunani boigo. 17 Naki oboronge bwa Nyasaye bwaorokigwe ime yaye korwa okwegena goika okwegena: buna yarigetwe, Omonyene oboronge nabe moyo as'okwegena. 18 Naki endamwamu ya Nyasaye yaorokigwe korwa igoro, igoro as'ogosaria gwonsi nobobe bwa mwanyabanto, bagotanga ekeene as'obobe bwabo. 19 Ekiagera aya amanyekanire na Nyasaye aorokirie ime yabo; naki Nyasaye nabaorokeretie. 20 Naki amang'ana onsi atarikororekana korwa ogotongwa gw'ense arorekanire, amanyekanire as'ebitongwa biaye, naro nokobua kwaye gwa kare nakare, nobonyasaye bwaye; tibaba nogotamera: 21 naki kobamomanyire Nyasaye tibamobaka buna Nyasaye, nonya nkomoakera ng'a mbuya mono; korende bagasira as'ebirengererio biabo, nemioyo yabo y'oboriri ekabekwa omosunte. 22 Bagateba ng'a nabanyene chisemi, bakaririeka. 23 Baboonchoreria obonene bwa Nyasaye otari nogosareka as'omogwekano bw'ekieni kia mwanyabanto oyore nogosareka, nobwe chinyoni, nobwe ching'iti chire namagoro ane, nobwe ching'iti echikwagura, 24 As'ayio Nyasaye akabatiga as'okorengereria kw'emioyo yabo, batunyane eubi, goika bagasarerania ogosika as'emebere yabo: 25 as'engecho baonchorete ekeene kia Nyasaye as'oborimo, bagasasima nagokorera egetongwa ribaga ri'Omotongi, oyosesenetigwe kare nakare. Amin. 26 As'ayio Nyasaye akabatiga batunyane okorengereria kwabo kw'obosoku, goika abakungu bagaonchoreria ogokora kwabo kw'omobere gochikire as'ogokora gotarenge kwa boronge. 27 Nabasacha naboigo bagatiga ogokora kw'omokungu okwa boronge, bagasamba as'okorengereria abasacha ase abasacha, bagakora ayatabagwenereti, bakanyora as'emebere yabo okoakanwa kw'ogosira kwabo okwarenge ekeene kiabo. 28 Naende buna bangete koba na Nyasaye ase okorengereria kwabo, Nyasaye akabatiga batunyane obong'aini bwabo botagwenereti bayakore ayatabagwenereti; 29 bagaichorwa nobobe bwe chingecho chinyinge, nebibe, nobokayayu, nokorengereria okobe; bagaichorwa ne ribero, noboiti, neriomana, nobong'ainereria, nokogechana; nobogenki, 30 abang'achi, abamogechete Nyasaye, abachayi, abaenenu, abetogia, abakorosia amang'ana amabe, abatari nokoigwera as'abaibori babo, 31 batari nokoinyora, abagosaria okobwatana, batancheti abamwabo, batari namabera: 32 barabwo abanyene bamanyete mono ogochika kwa Nyasaye, ng'a abakoyakora ay'aiga bagweneire amakweri, tibakorete ay'oka, korende igobagwancherana nabwo bakoyakora.
1 As'ayio, aye omonto okogambia onde bwonsi, tori nogotamera; naki as'ayio okonachera omonto onde ekina naye okwenachera as'omobere oo; naki aye okogambia, naro ogokora. 2 Na twamanyire ng'a ekina kia Nyasaye negi'ekeene igoro as'abwo bagokora ayio. 3 Aye omwana o mwanyabanto okobagambia baria bagokora ayio, naye omonyene naro ayio ogokora, inee! nokagete ng'a aye notame korwa as'ekina kia Nyasaye? 4 Gose ngwachayire obonge bw'obuya bwaye nogotigera kwaye, noboremereria bwaye, tokomanya ng'a obuya bwa Nyasaye igobogokong'usera ogoonchoka? 5 Korende koreng'ana as'obokong'u bwao, nomoyo otari nogoonchoka, kwegacheire emonga y'endamwamu ase rituko riria ri'endamwamu nokomanoka gw'ekina kia boronge kia Nyasaye, 6 oyoranyare komoa ker'omonto koreng'ana nogokora kwaye; 7 ase baria as'okoremereria as'ogokora amaya igobakorigia obonene nogosika, nakorusia ogosareka, obogima bwa kare nakare; 8 korende ase baria abanyene eriomana, bataigwereti ekeene, korende banchete obobe, endamwamu nekeririanda, 9 emechando, nobororo, igoro ase ker'omoyo bw'omwana o mwanyabanto oyogokora obobe, ritang'ani Omoyahudi, n'Omoyunani boigo; 10 korende obonene nogosika nomorembe, ase ker'omonto oyogokora amaya, ritang'ani Omoyahudi n'Omoyunani boigo: 11 naki gwanchereria tikori ase Nyasaye. 12 Naki bonsi abamochire batari namachiko, nabasire batari namachiko: na bonsi abamochire bare namachiko, nabo baranacherwe ekina as'amachiko; 13 ekiagera tari abwo bakoigwa amachiko bare abanyene oboronge as'obosio bwa Nyasaye, tatiga baria bagokora amachiko baranyare kobarwa ng'a nabanyene oboronge: 14 naki abanto b'ebisaku batari namachiko bagokora ase chingecho chiabo ayare ime as'amachiko, abwo batari namachiko, babaire namachiko boka abanyene; 15 abwo igobakoyeorokia emeremo y'amachiko arikirwe ime ase chinkoro chiabo, ebirengererio biabo bikobaorokia, ebirengererio biabo nabinyare kobasoera omonto as'omonto, bikobanachera ekina gose biabatiga; 16 ase rituko riria Nyasaye agocha konacha ekina igoro as'obobisi bwa mwanyabanto, koreng'ana nenchili yane, ase Yesu Kristo. 17 Korende aye, onye gokorokwa Omoyahudi nagosemeria amachiko, nagwetogia ase Nyasaye, 18 nakobomanya obwanchani bwaye, nakoyamanya amang'ana ayare amaya, kwang'ainiigwe as'amachiko, 19 nakomanya ng'a aye omonyene igore omotang'ani bw'emeuko, omobaso obo abare omosunte, 20 omworokia bw'abariri, omworokia bw'abana abake, omonyene chingecho chie chisemi nechi'ekeene as'amachiko; 21 korende aye okomworokereria oyonde, inee! tokweorokereria omonyene? aye okorandia ng'a omonto taiba, igokoiba aye omonyene? 22 Aye ogoteba ng'a omonto tatomana, igogotomana aye omonyene? Aye ogechete chisanamu, igogosakora chie hekalu? 23 Aye ogwetogia as'amachiko, as'ogosaria kwao kw'amachiko igokomosareria Nyasaye ogosika? 24 Naki erieta ria Nyasaye igarigokwanwa bobe as'ebisaku as'engecho yaino, buna arigetwe. 25 Naki okwaroka nkogwenerete onye kore omokori bw'amachiko: korende kore omosaria bw'amachiko, okwaroka kwao kwabaire ogotaroka. 26 Karabe ere oyotarogeti okoyabwata amachiko, inee, ogotaroka kwaye tigokobarwa ng'a kwabaire okwaroka? 27 Nere oyotarogeti as'ekeene, kabwate amachiko, tagokonachera ekina aye, oyore namariko nokwaroka osaririe amachiko? 28 Naki ere tari Omoyahudi ore Omoyahudi as'isiko oka; gose okwaroka tari koria gokororekana isiko: 29 korende ere n'Omoyahudi ore Omoyahudi as'ime; nokwaroka nogw'enkoro, as'omoyo, tari as'amariko, nogotogigwa kwaye tikorueti ase mwanyabanto korende nase Nyasaye.
1 Gaki Omoyahudi nkogwenera ki abwate? nokwaroka inki kogwenerete? 2 Nkogwenerete mono ase ker'enchera: ritang'ani ekiagera baetwe amachiko a Nyasaye. 3 Inki rende onyore abande tibegenete? Ogotegena kwabo nakoonchore okwegena kwa Nyasaye? 4 Yaya! Nyasaye arorekane ng'a nekeene, na ker'omonto omorimo, buna arigetwe, Erinde oegwe oboronge as'amang'ana ao, Obue ekero ogosoa as'ekina. 5 Korende kerabe obobe bwaito bokoboorokia oboronge bwa Nyasaye, inki toratebe rende? Nyasaye nomobe okoreta endamwamu? (Nakwanire as'engecho ya mwanyabanto.) 6 Yaya: onye nabo naki Nyasaye aranyare kogamba ense? 7 Korende kerabe ekeene kia Nyasaye kiamentekire as'engecho y'oborimo bwane goika akanyora obonene, naseki inche nonya mbono nkonakogambigwa buna omonyene ebibe? 8 Naki totagokora obobe, erinde obuya boche? (buna twang'achirwe nabande—na buna abande bakong'irie goteba ng'a nintwe togokwana), okogambigwa kwabo iga kore boronge. 9 Ninki rende? Nabaya tore kobua abande? Nonya ng'ake: naki twabasoeire Abayahudi n'Abayunani ng'a bonsi igobare inse as'ebibe; 10 Buna yarigetwe ng'a, Tari onde omonyene oboronge nonya noyomo; 11 Tari onde ore nokoinyora, Onde tari okomorigia Nyasaye; 12 Bonsi bachire bogeka, bagundire bonsi; Onde tari oyogokora amaya, nonya noyomo: 13 Emioyo yabo noboina bwasie; Ase chimeme chiabo bakorire obong'ainereria: Obosongo bwe ching'iti igobore as'ebikoba biabo: 14 Emenwa yabo yaichoirwe nokoragereria nobororo: 15 Amagoro abo igare amango goitera amanyinga; 16 Obosareku nemechando ase chinchera chiabo. 17 Nenchera y'omorembe tibayemanyeti. 18 Okomoiroka Nyasaye tikori as'amaiso abo. 19 Twamanyire ng'a amang'ana onsi agokwanwa namachiko igagokwanwa ase baria bare inse as'amachiko; erio ker'omonwa bwonsi osiekwe, ense yonsi ebekwe inse as'ekina kia Nyasaye. 20 Ekiagera as'ogokora kw'amachiko omonyene omobere onde tari oyoranyare kobarerwa oboronge as'obosio bwa Nyasaye: naki as'okomanya ebibe igokogocha as'enchera y'amachiko. 21 Korende bono oboronge bwa Nyasaye bwaorokire 'machiko atari, bwatebetwe namachiko nababani; 22 noboronge bwa Nyasaye, bogocha as'okwegena kwa Yesu Kristo, bokobachera abanto bonsi abanchete; naki gwatananeka tikori; 23 naki bonsi bakorire ebibe, barorire ng'a baremeirwe nobonene bwa Nyasaye; 24 baeirwe oboronge bosa as'obuya bwaye, as'enchera y'okoborigwa kore ase Yesu Kristo: 25 ere Nyasaye omobekire abe omobwatania as'amanyinga aye, as'enchera y'okwegena, erinde aorokie oboronge bwaye, as'engecho y'okobitiga ebibe biatang'anete, as'oboremereria bwa Nyasaye; 26 erinde aorokie oboronge bwaye ekero ekeiga: abe omonyene ekeene, nomonyene okomoa oboronge ere oyore nokwegena ase Yesu. 27 Ng'ai kore rende ogwetogia? Gwasiekeirwe egesieri. As'ogochika kore naki? As'ogochika kw'ogokora? Yaya: korende as'ogochika gw'okwegena. 28 Naboigo, tokobara ng'a omonto igakoegwa oboronge as'okwegena kore ao as'ogokora kw'amachiko. 29 Gose Nyasaye n'Nyasaye bw'Abayahudi boka? Tari ere Nyasaye bw'ebisaku bionsi boigo? Ee, noyo bw'ebisaku bionsi: 30 onye togwatora ng'a Nyasaye noyomo, oranyare kobaa baria barogete oboronge bwarure as'okwegena, nabwo batarogeti as'enchera y'okwegena. 31 Korende inee; twagoonchoreire ogochika as'okwegena okwo? Yaya: iga togoikerania ogochika.
1 Inki toratebe rende? Ibrahimu sokoro yaito as'engecho y'omobere inki anyorire? 2 Ekiagera onye Ibrahimu oetwe oboronge as'engecho y'ogokora kwaye, fiare neki agwetogeria; korende tari as'obosio bwa Nyasaye, 3 Naki amariko agoteba? Ibrahimu igamwanchete Nyasaye, nokwegena kwaye gokabarwa asare koba oboronge. 4 Korende as'omonto ogokora emeremo y'eng'eria yaye tekobarwa buna nobuya, korende igekoba esira, 5 Korende as'omonto otari gokora emeremo, korende igegenete ere oria okobaa ababe oboronge, okwegena kwaye omonto oyio kwabarirwe ng'a nokwa boronge. 6 Buna Daudi agoteba egesio kiaye omonto oria ere Nyasaye abarire koba noboronge atari nogokora, 7 Mbare negesio ababeirwe ebibe biabo, Nabwo ebibe biabo biatubirwe, 8 Nare negesio omonto oria ere Omonene atabarereti ebibe. 9 Bono egesio eke nas'abwo barogete, gose nas'abwo batarogeti bonsi? naki togoteba, Ibrahimu as'engecho y'okwegena kwaye akabarwa ng'a noboronge. 10 Naki abaretwe? nekero konya arokire gose nekero konya atararokigwa? Tari ekero konya arokire, korende nekero konya atararokigwa: 11 nere iganyorete ekiorokererio eke gi'okwarokigwa: ekemanyererio ki'oboronge bw'okwegena arenge nakorokwo rigoro atararokigwa: anyare koba ise obo bonsi abanchire, nonya tibarogeti, erinde oboronge bobarwe asebare; 12 na ise bw'okwaroka tari as'abwo abarokire boka, korende as'abwo abagotunyana chimbaratero chi'okwegena kwaye tata oito Ibrahimu arenge nakorokwo ekero konya atararokigwa. 13 Naki eira eria aetwe ng'a naire omwando bw'ense aetwe Ibrahimu nokoibora kwaye, tari as'amachiko korende as'oboronge anyorete as'okwegena. 14 Naki onye baria b'amachiko mbarabwo b'omwando, okwegena kwabaire okwa bosa, neira yasarekire; 15 Naki ogochika nakwo gokoreta endamwamu; korende as'ogochika gotari komocha tikori. 16 As'engecho eyio igaruete as'okwegena, ebe as'enchera y'obuya; erinde eria eira enyare koba eng'ikeranu as'oroiboro rwonsi; tari ase baria b'amachiko boka, korende nase baria ab'okwegena kw'Ibrahimu, ere ore tata oito intwe twensi. 17 (Buna yarigetwe ng'a, Nakobekire koba ise bw'ebisaku ebinge) as'obosio bwaye ere oyomwanchete, nere Nyasaye, omonyene okobabokia abakure, oyokobiatora ebinto bitario, buna mbireo. 18 Ere akegena as'ogosemeria ayatanyare gosemerigwa, erinde abe ise bw'ebisaku ebinge, buna akwanetwe, Naboigo rorabe oroiboro rwao. 19 Tarenge omwororo as'okwegena, ekero akarora ng'a omobere oye obaire buna okure (ekero konya akorire emiaka emia) nonya nas'ogokwa kw'enda ya Sara: 20 gose tabete nogosiereria konde as'eira eria ya Nyasaye, as'ogotegena, korende igo abegetwe chinguru as'okwegena kwaye, akamobaka Nyasaye, 21 Akamanya boronge ng'a Nyasaye nanyare gokora aria abekeire eira. 22 As'engecho eyio ekabarwa asare ng'a noboronge. 23 Korende tiyarigetwe as'engecho yaye yoka, ng'a igo yabaretwe asare; 24 korende nas'engecho yaito, intwe abwo togocha kobarwa boigo, intwe aba tomwegenete ere oyomobogetie Yesu korwa as'amakweri, Omonene oito, 25 oyoruetwe as'engecho y'okomocha gwaito, nakobokigwa erio tonyare koegwa oboronge.
1 Naboigo ekero twabareirwe oboronge bokorwa as'okwegena, tiga tobe nomorembe ase Nyasaye, as'enchera y'Omonene oito Yesu Kristo; 2 asere twanyorire enchera y'okwegena goikera obuya obo iga toteneine ime yaye; naende togogete as'ogosemereia kw'obonene bwa Nyasaye. 3 Gose tari igo rioka, korende igotokogoka nas'emechando yonsi: nakomanya ng'a emechando emeremo yaye nokoreta oboremereria; 4 nemeremo y'oboremereria oboremu bw'omoyo, nemeremo y'oboremu bw'omoyo, ogosemeria: 5 nogosemeria tikori korora obosoku; ekiagera obwanchani bwa Nyasaye bwanyororokigwe as'emioyo yaito as'Omoika Omochenu twaetwe intwe. 6 Naki rigoro twarenge intwe to tarenge nechinguru, erio ekero giaigete, Kristo agakwa as'engecho y'abanyene ebibe. 7 Naki naakong'u omonto gokwa as'engecho y'omonto omonyene oboronge: korende nanyarekane omonto koremereria gokwa as'engecho y'omonto ore omuya. 8 Korende Nyasaye oorokirie obwanchani bwaye asetore, ekiagera Kristo nakwete as'engecho yaito, ekero twarenge abanyene ebibe. 9 Naboigo kobua mono gatwaeirwe oboronge as'amanyinga aye natotorigwe nendamwamu asare. 10 Naki ekero twarenge ababisa tokabwatanigwa na Nyasaye as'amakweri Omwana oye, na kobua mono nyuma gatwabwatanigwe, natotorigwe as'obogima bwaye; 11 gose tari boigo rioka, korende igo tokogoka ase Nyasaye as'Omonene oito Yesu Kristo, ere asare twanyorire okobwatanigwa. 12 As'ayio buna as'omonto oyomo ebibe bigasoa as'ense, nas'ebibe ebio amakweri; naboigo amakweri akabaikera abanto bonsi, naki bonsi bakorire ebibe; — 13 naki ebibe mbiarenge as'ense amachiko atarabekwa: korende ebibe tibikobarwa amachiko ataiyo. 14 Korende amakweri akagamba korwa Adamu goika Musa, naro igagambete nonya nas'abwo batakoreteebibe koreng'ana nokomocha kw'Adamu, ore omogwekano oye ere oyogocha. 15 Korende ekeegwa keria tikiarenge buna okomocha koria. Naki, ekiagera as'okomocha kwaye oria oyomo abange bagakwa, kobua mono obuya bwa Nyasaye, nekeegwa igokere as'obuya bw'omonto oyomo Yesu Kristo, kiamentekire as'engecho ya baria abange. 16 Ekeegwa keria tikeri koreng'ana buna okomocha kw'omonto oyomo; naki ekina igo giachete as'enchera y'omonto oyomo gekareta emechando, korende ekeegwa ki'obuya gegacha as'engecho y'okomocha okonge, gekareta okwaberwa. 17 Naki onye as'okomocha kw'omonto oyomo amakweri akagamba as'engecho y'oria oyomo; kobua mono barabwo babwatire obonge bw'obuya, nakeria ekeegwa ki'oboronge nabagambe as'obogima as'oria oyomo, Yesu Kristo. 18 Naboigo, buna okomocha kw'omonto oyomo abanto bonsi bakanacherwa ekina; ee naboigo as'ogokora okomo kw'oboronge kw'omonto oyomo, abanto bonsi bakaegwa oboronge bw'obogima. 19 Naki buna as'ogosaria kwaye omonto oyomo abanto bonsi bagasoigwa as'engecho y'abanyene ebibe, naboigo as'okoigwera kwaye omonto oyomo abanto bonsi nabasoigwe as'engecho y'abanyene oboronge. 20 Ogochika kogasoa erinde okomocha koria kobe okonene mono; nebibe kobiamentekire, obuya bokamenteka bokaba obonge kobua: 21 erinde, buna biria ebibe biagambete as'amakweri, naboigo as'enchera y'oboronge obuya bogambe as'obogima bwa kare nakare ase Yesu Kristo Omonene oito.
1 Ninki toratebe? Tomenye as'ebibe, erinde obuya bobe obonge kobua? 2 Yaya. Intwe abwo twakure as'ebibe naki torabe moyo as'ebibe naende? 3 Timomanyeti ng'a intwe twensi twabatisetwe ase Yesu Kristo igo twabatisetwe as'amakweri aye? 4 Naboigo twatindegetwe amo nere as'enchera y'ebatiso as'amakweri aye: koreng'ana buna Kristo abogete as'enchera y'obonene bw'Ise, naboigo naintwe, totare as'oboyia bw'obogima. 5 Naki onye twabwatanire amo nere as'omogwekano bw'amakweri aye, naboigo nas'omogwekano bw'okoboka kwaye; 6 gotwamanyire aya, ng'a omonto oito o kare igabambetwe amo nere, erinde omobere bw'ebibe osire, titoba abasomba b'ebibe naende; 7 naki ere oyokure otigirwe obaire are nebibe. 8 Korende onye twakwete amo na Kristo twegenire ng'a natobe moyo amo nere; 9 gotwamanyire ng'a Kristo gatiekire koboka tagokwa naende; amakweri takomobua naende. 10 As'ogokwa koria kwaye, igakwerete ebibe ara rimo rioka: korende koria okoba moyo kwaye, igare moyo ase Nyasaye. 11 Naboigo ninwe mwebare ng'a mwabaire abakure as'ebibe, korende mwabaire moyo ase Nyasaye ase Yesu Kristo. 12 Bono ebibe tibigamba ime as'emebere yaino, ekonyorekana namakweri, mobaise koigwera okorengereria kwaye: 13 gose timobaisa korua ebimo biaino koba ebinto biogokorera as'ebibe; korende mwerue emebere yaino ase Nyasaye buna abare moyo nyuma as'ogokwa, nebimo biaino ase Nyasaye bibe ebinto bi'oboronge. 14 Naki ebibe tibikobagambera inwe: naki timori inse as'ogochika, korende inse as'obuya. 15 Ninki rende? Tokore ebibe as'engecho totari inse as'ogochika, korende inse as'obuya? Yaya! 16 Timomanyeti ng'a asere oria mwarure emebere yaino koba abasomba baye nakomokorera, igo more abasomba baye ere oria moigwerete: onye nobosomba bw'ebibe bokoreta amakweri, gose obosomba bw'okoigwera bokoreta oboronge? 17 Korende Nyasaye aakerwe ng'a mbuya mono, ekiagera mwarenge abasomba b'ebibe korende mokaigwera as'emioyo yaino buna okworokererigwa koria mwabegetwe inse asekore; 18 nekero mwasiboretwe korwa as'ebibe mogakorwa abasomba b'oboronge. 19 Nakwanire as'engecho ya mwanyabanto ekiagera as'oboreu bw'emebere yaino: naki koreng'ana buna mwaruete ebimo biaino bikorerwe as'eubi nebibe monyare gosaria, naboigo na bono karue ebimo biaino bikorerwe as'oboronge monyare gosibigwa. 20 Naki ekero mwarenge abasomba b'ebibe igo mwarenge abasibore as'oboronge. 21 Ngokonywa ki rende mwanyorete amatuko aria ase chingecho echio mwasokeire bono? Ekiagera omoerio bw'amang'ana aya namakweri. 22 Korende bono ekero mwatiekire gosiborwa, nakoba are nebibe, nagokorwa abasomba ba Nyasaye, ogokonywa kwaino more nakwo, nkorokwo ogosibigwa, nomoerio oye, nobogima bwa kare nakare. 23 Naki eng'eria y'ebibe namakweri; korende ekeegwa kia Nyasaye nobogima bwa kare nakare ase Yesu Kristo Omonene oito.
1 Timomanyeti, baminto, (naki ngokwana nabwo abamanyete amachiko), ng'a amachiko igakogamba igoro as'omonto ekero are moyo. 2 Naki omokungu ore nomosacha oye igasibire namachiko as'oria omosacha ekero are moyo: korende karakwe omosacha oria, osiboirwe korwa as'amachiko omosacha. 3 Naboigo ekero are moyo omosacha oye, abe nomosacha onde, igakorokwa omotomani: korende karakwe omosacha oye osiboirwe, tasibiri namachiko ayio, goika ere tari omotomani nonya naba nomosacha onde. 4 As'ayio, abaminto, ninwe mwakwereire amachiko as'enchera y'omobere o Kristo; monyare kobwatana nomoao, nonya asare ere oyobogete, erinde tomwamere Nyasaye amatunda. 5 Naki ekero twarenge as'omobere, okorengereria kw'ebibe, okwarengeo as'engecho y'amachiko, gogakora emeremo as'ebimo biaito goika tokamera amakweri okwama. 6 Ko bono twarusigwe as'amachiko, twakwereire ebibe biria biatobwatete: tonyare gokora intwe engecho enyia ime as'emioyo, tari as'engecho ya kare, as'amachiko arigetwe. 7 Naki rende torakwane? amachiko nebibe? Yaya: Korende tinare komanya ebibe tatiga as'amachiko: naki tinarekomanya okorengereria, onye ogochika gotagoteba, Torengereria: 8 korende ebibe bikanyora ribaga ase koria ogochika, bigakora ime asende kera chingecho chi'okorengereria: naki ebibe bitari nogochika mbikwete. 9 Nainche igo nare moyo agwo ritang'ani gochika gotarenge: korende ekero acha amachiko aria, ebibe bikaboka, nainche ngakwa; 10 nkarora ogochika koria gokoreta obogima, ng'a asende inche kwaretire amakweri: 11 naki ebibe bikanyora ribaga as'ogochika koria, bikang'aina, bikang'ita ase korokwo. 12 Naboigo aria amariko namachenu na koria ogochika nogochenu, nokwa boronge, namaya. 13 Bono inee, riria rire rigiya asende ndiabaire amakweri asende? Yaya! tatiga ebibe, erinde birorekane ng'a nebibe biankorerete amakweri as'enchera y'aria amaya, erinde as'ogochika koria ebibe bimenteke koba ebibe mono. 14 Naki twamanyire ng'a amachiko ekeene kiaye nay'omoyo: korende inche nomonto bw'omobere, igonkorire inse as'ebibe. 15 Naki timanyeti eri ngokora: ekiagera riria nyanchete, tindi korikora, na riria mbeete nario ngokora. 16 Korende onye ngokora riria ntancheti, igo nkoorokia ng'a amachiko aria namaya. 17 Bono, tari inche ngokora korende nebibe biria bimenyete ime asende. 18 Naki namanyire ng'a ime asende, as'omobere one, tirimenyeti ring'ana rigiya: okorigia nkoreo, korende chinguru tichiri chi'ogokora erire rigiya. 19 Naki riria rigiya nyanchete tindi korikora; korende riria ribe ntancheti, nario ngokora. 20 Bono onye riria ntancheti ndirorio ngokora, tari inche nkorikora, korende nebibe biria bimenyete ime asende. 21 Bono narorire ogochika oko, ng'a, kondigeti gokora rigiya, erire ribe ng'ang'e rire nainche. 22 Naki nakogokeire ogochika kwa Nyasaye as'omonto oime; 23 korende as'ebimo biane narorire ogochika konde gokorwana esegi nogochika koria kw'obong'aini bwane, nagonkora omosakorwa bw'ogochika koria kw'ebibe kore as'ebimo biane. 24 Obobe nobwane inche Omwana-o-mwanyabanto! ning'o orankonye nomobere oyo bw'amakweri? 25 Namoakeire Nyasaye ng'a mbuya mono, ase Yesu Kristo Omonene oito. Ee, onye naboigo, as'obong'aini bwane igongogokorera ogochika kwa Nyasaye; korende as'omobere one nkorera ogochika kw'ebibe.
1 Na bono 'kina tikeri igoro as'abwo bare ase Kristo Yesu, batancheti gotara as'ogotunyana chingecho chi'omobere, tatiga echi'Omoika. 2 Naki ogochika kw'Omoika bw'obogima boria bore ase Kristo Yesu bwansiboire, nkaba are nogochika kw'ebibe namakweri. 3 Naki aria atari konyarekana as'ogochika, ekiagera igo kwarenge okoreu as'engecho y'omobere, Nyasaye, as'okomotoma Omwana oye omonyene as'omogwekano bw'omobere ore bw'ebibe, nas'engecho y'ebibe akabigambia ebibe as'omobere: 4 erinde ekerigirie ime as'amachiko geikeranigwe ime yaito, abatari gotara as'ogotunyana chingecho chi'omobere, korende chingecho chi'omoika. 5 Naki baria bagotunyana chingecho chi'omobere igo barengereretie chingecho chi'omobere; korende baria bagotunyana chingecho chi'omoika, igo barengereretie chingecho chi'omoika. 6 Naki okorengereria kw'omobere namakweri; korende okorengereria gw'omoika nobogima nomorembe: 7 ekiagera okorengereria koria kw'omobere nobobisa igoro ase Nyasaye; naki tikori koigwera ogochika kwa Nyasaye, gose tikori konyara. 8 Abagotunyana chingecho chi'omobere tibakonyara komogwenera Nyasaye. 9 Korende korabe Omoika o Nyasaye noikaransete ime yaino, inwe timorigotunyana chingecho chi'omobere, korende chingecho chi'omoika. Korende monto onde bwonsi atari n'Omoika o Kristo, oyio tari omonto oye. 10 Na Kristo karabe ime yaino, omobere okure as'engecho y'ebibe; korende emeika yaino igere moyo as'ensemo y'obogima, ekiagera as'oboronge. 11 Korende onye Omoika oye ere oyomobogetie Yesu korwa as'amakweri omenyete ime yaino, ere oyomobogetie Yesu nabokie nemebere yaino yanyorekanire namakweri, as'Omoika oye oikaranste ime asemore. 12 Naboigo baminto, igotore abasira, tari as'omobere, erinde tonyare koba moyo as'ogotunyana chingecho chi'omobere: 13 naki komorabe moyo as'ogotunyana chingecho chi'omobere iga moranyare gokwa; korende komoraite ogokora kw'omobere as'omoika, namobe moyo. 14 Naki bonsi baria bagotang'anwa n'Omoika o Nyasaye, abwo nabwo abana ba Nyasaye. 15 Naki timonyoreti omoika bw'obosomba bokoreta okoiroka; korende igo mwanyorete omoika bw'ogokorwa abana, as'ayio torera, Tata, Oito. 16 Omoika omonyene obaire kirori amo nemeika yaito, ng'a intwe nabana ba Nyasaye: 17 onye tore abana, naboigo tore ab'omwando, ab'omwando ba Nyasaye, abararie omwando amo na Kristo; nabo gatorachandwe amo nere, erinde tobakwe amo nere. 18 Naki nayebarire emecharido y'ekero kia bono ng'a teri gento onye nenyare koreng'anjgwa nobonene boria bogocha koorokigwa asetore. 19 Naki ebitongwa bionsi igobiganyete okogania okonge rituko riria bagocha koorokerigwa abana ba Nyasaye. 20 Naki ebitongwa bionsi bikaigwerigwa inse as'engecho ya bosa, tari as'ogwancha kwabo, tatiga as'engecho yaye oyobigwereti, 21 as'ogosemeria, ng'a ebitongwa ebinyene nabirobio nabibekwe ebisibore nakorusigwa as'obosomba bw'ogosareka, bisoe ime as'ogosiborwa kw'obonene bw'abana ba Nyasaye. 22 Naki twamanyire ng'a ebitongwa bionsi igobigwechanda amo naende bure nobororo amo nonya goika bono. 23 Gose tari boigo rioka, korende nabo naintwe abanyene abatore nogotongora kw'Omoika, igo togwechanda emioyo yaito, gatoganyete gokorwa abana, okoborigwa kw'emebere yaito. 24 Naki igotwatoretigwe as'ogosemeria, korende egento keria giasemeretigwe kokiarorekanire, gosemeria tikori naende; ekiagera keria omonto aroche, naseki aragesemerie? 25 Korende gatoragesemerie egento totakerochi, igo togokeganya as'oboremereria. 26 Naboigo n'Omoika noro igogotokonya oboreu bwaito: naki titomanyeti gosaba buna etogwenerete; korende Omoika Omonyene igogotosabera as ogwechanda gotakonyarekana gwatorwa, 27 Nere oyokorigarigia emioyo namanyete okorengereria kw'Omoika ng'a igo gokobasabera abachenu buna Nyasaye anchete, 28 Na twamanyire ng'a amang'ana onsi igakoba amo as'ogokora okomo, erio abanyorera amaya baria bamwanchete Nyasaye, barabwo baria barangerigwe as'engecho yaye. 29 Naki baria abwo amanyete korwa kare, akabachora korwa kare bareng'anigwe nomogwekano bw'Omwana oye, erinde abe omotangi as'abamwabo abange: 30 na baria achorete korwa kare, abwo akabarangeria: na baria arangeretie, abwo akababarera oboronge: na baria abarerete oboronge, aba igakobabaka. 31 Bono, nki toratebe nyuma as'ayio? Nyasaye kare ensemo yaito ning'o ore igoro yaito? 32 Ere oyotamotigete Omwana oye ere, korende akamorua as'engecho yaito intwe twensi, naki aramoche gotoa nebinto bionsi amo nere? 33 Ning'o oranyare kobasoera abachore ba Nyasaye? Nyasaye nere okobabarera oboronge. 34 Ning'o oranyare kobanachera ekina? Kristo nere okwete, ee na kobua as'aya obokire korwa as'amakweri, nere igare as'okoboko gw'okorio kwa Nyasaye, naende nere ogotosabera. 35 Ning'o oratwatanane nobwanchani bwa Kristo, Inee, nogochandwa, gose obororo, gose nokorosigwa, gose nenchara, gose gesobono, gose nemechando, gose nemioro? 36 Buna yarigetwe, As'engecho yao igotogoitwa omobaso boira; Twabarirwe koba buna ching'ondi chi'okonyenywa. 37 Korende as'amang'ana aya onsi twabaire ababui, nakobua nas'ere oyotwanchete. 38 Naki natiekire komanya boronge ng'a nonya namakweri takonyara gotwatanana, nonya nobogima, nonya namalaika, nonya nabanyene chinguru, nonya nabanyene okobua, nonya nayare aroro, nonya nayagocha kobao, 39 nonya nayare igoro, nonya nayare inse, nonya negetdngwa kende gionsi, tigekonyara gotwatanana nobwanchani bwa Nyasaye bore ime ase Yesu Kristo Omonene oito.
1 Natebire ekeene ase Yesu Kristo, tintebeti borimo, okorengereria kwane igokote kirori as'Omoika Omochenu, 2 ng'a ninde nobororo obonge, nogwechanda gotari nomoerio as'omoyo one, 3 Naki nasabete inche omonyene mbe ndagererigwe, nagwatananwa na Kristo as'engecho y'abaminto, eamate yane as'engecho y'omobere: 4 barabwo n'Abaisiraeli; abakorirwe abana, ab'obonene, nechimuma, abakoegwa amachiko, nekeng'wanso kia Nyasaye, nechiira chiaye; 5 ekiagera chisokoro nechiabo barabwo, nas'abwo nao aruete Kristo as'engecho y'omobere, oyore igoro as'amang'ana onsi, Nyasaye oyokobakwa kare nakare. Amin. 6 Tari ng'a ring'ana ria Nyasaye riagure. Naki tari bonsi bare Abaisiraeli, bare b'egesaku kia Isiraeli: 7 gose tari bonsi bare abana b'Ibrahimu, ekiagera baruete as'okoibora kwaye: tatiga, as'Isaaka oroiboro rwao rorarangerigwe. 8 Naki, tari abana bare as'engecho y'omobere bare abana ba Nyasaye; korende abana b'eria eira bakobarwa ng'a nokoibora. 9 Naki ring'ana ri'eira neri, Ekero kere bun'eke ninchiche, na Sara nabe nomwana. 10 Gose tarigo rioka; korende Rebeka nere, kabogoirie oborito as'oyomo, nere nere Isaaka tata oito. — 11 Naki bataraiborwa baria abana, nonya konya tibarakora ring'ana rigiya nonya neribe, erinde gotenene okorigia kwa Nyasaye gw'ogochora, tari as'engecho y'ogokora, korende as'engecho y'okorengereria kwaye ere oyokorangeria, 12 igatebetigwe iga, Omonene namokorere omoke. 13 Buna yarigetwe, Namwanchire Yakobo, korende Esau namogechire. 14 Naki toratebe rende? Obobe mbore ase Nyasaye? Yaya. 15 Naki igamotebetie Musa, Nimororere amabebe ere ndarorere amabebe, nimwabere ere oyondabere. 16 Bono, onye naboigo, tari as'okobua kw'oria oyorigetie, nonya nokw'oria okominyoka chimbero, korende nokw'oria okororera amabebe nere Nyasaye. 17 Naki amariko atebire ase Farao, iga, Nagotenenetie, erinde nyorokie chinguru chiane asore, nerieta riane rirandigwe as'ense yonsi. 18 Ee onye naboigo oyo arigetie kororera amabebe, igakomorera amabebe, noyo arigetie gokora omokong'u, igakomokora omokong'u. 19 Gaki, nontebie, naseki nonya mbono akonyora okomocha? Naki ning'o oranyare koamererania nokorigia kwaye? 20 Yaya tari boigo, aye Omwana-o-mwanyabanto, aye naye ng'o okoiraneria Nyasaye? Inee, egento getongire nakemotebie ere oyogetongete, ng'a ninki gwankorerete iga? 21 Gose omokori chinyongo tari nechinguru igoro as'esike, ase ribomba erimo ri'esike gokora egento ekemo, kebe eki'ogosika, nekemo kebe getari nogosika? 22 Naki onye Nyasaye as'okorigia koorokia endamwamu yaye, nakobamanyia okobua kwaye as'oboremereria obonge, akabogorerania nabiria ebinto bi'endamwamu biakorirwe ang'e as'ogosareka: 23 naende aorokie obonda bw'obonene bwaye, ase biria ebinto bi'amabera ebiaroseti korwa kare binyore obonene, 24 nabwo intwe twarangeretigwe nere, tari abanto b'Abayahudi boka, korende nabanto b'Ebisaku boigo? 25 Buna akwanete ase Hosea, Nimbarangerie baria abatarenge abanto bane, babe abanto bane; Nere omwanchani ofte oyotarenge omwanchani one. 26 Nabe aase aria batebigwe, Inwe timori abanto bane, Agwo nabarokwe abana ba Nyasaye ore moyo. 27 Isaya nere osokirie eriogi riaye igoro as'Isiraeli, Okobara kw'abana ba Isiraeli nonya bare buna omokenye o nyancha, nabatigarete babo boka barache gotorigwa: 28 naki Omonene naikeranie ring'ana riaye igoro as'ense, arikore nakorinacha. 29 Na buna Isaya atang'anete gokwana, Onye Omonene o Sabaoth (Omonene bw'emeganda) atatotigerete oroiboro, Anga igatore buna Sodomu, anga igo toreng'anirie na Gomora, 30 Naki toratebe rende? Ng'a abanto b'Ebisaku, batari kobotunya oboronge, mbanyorete oboronge, oboronge boria bore bw'okwegena: 31 korende Abaisiraeli bare gotunyana amachiko a boronge, tibaikerete amachiko aria. 32 Naseki? ekiagera batayatunyanete as'enchera y'okwegena, korende buna nas'enchera y'ogokora. Bakagochwa igoro ase rigena riria rikogocha; 33 Buna yarigetwe, Rigereria nabekire ase Zayoni rigena rikogocha negetare gekoiyeria: Nonde bwonsi oramwanche takorora obosoku.
1 Baminto, okorengereria okuya kw'omoyo one, nogosaba kwane nkomosaba Nyasaye as'engecho y'Abaisiraeli nakw'oko, bakonyeke. 2 Naki nabatebirie ng'a mbare nekinda as'engecho ya Nyasaye korende teri nechisemi. 3 Naki kobarabe tibamanyeti oboronge bwa Nyasaye, naende, bakorigia koboikerania oboronge bwabo abanyene, tibebegeti inse as'oboronge bwa Nyasaye. 4 Naki Kristo nere omoerio bw'amachiko erinde onde bwonsi oyoranche anyore oboronge. 5 Naki Musa igarigete, oboronge boruete as'amachiko, ng'a omonto orakore aya nabe nobogima as'aya. 6 Korende oboronge boria bokonyorekana as'okwegena, igo bogoteba iga, Toteba as'enkoro yao, ning'o orarine ogoro? (engecho yaye komoreta Kristo ins'aa:) 7 gose, Ning'o oranyare goika gochia as'engoro entambe? (engecho yaye komoreta Kristo igoro, korwa as'amakweri.) 8 Korende, naki agoteba? Ring'ana riria igorire ang'e naye, as'omonwa oo, nas'enkoro yao; nering'ana riria neri'okwegena ndiria tokorandia: 9 korende koramoorokie Yesu Kristo as'omonwa oo, nakomwancha as'omoyo oo, ng'a Nyasaye namobogetie korwa as'amakweri, nokonyeke: 10 naki as'enkoro abanto igobakwegena baikera oboronge; nas'omonwa oorokia goika onyora ogotoreka. 11 Naki amariko igagoteba, ker'oyoramwanche takorora obosoku. 12 Korende gwatananeka tikori as'Abayahudi nas'Abayunani: naki ere oria n'Omonene o bonsi, nobonda bobagwenerete abanto bonsi bakomorangeria: 13 naki, onde bwonsi orarangerie erieta ri'Omonene nakonyeke. 14 Inee naki baramorangerie ere bataramwancha? Naende naki baramwanche ere bataramoigwa? Naende naki baramoigwe batari nomorandia? 15 Naende, barandie, batatomiri? Koreng'ana buna arigetwe? Naki are amaya amagoro abo baria bakoreta amang'ana amaya ay'ogokora okuya! 16 Korende tari bonsi baigwerete amang'ana amaya. Naki Isaya natebete, Omonene, ning'o bwanchire amang'ana aito? 17 As'ayio okwegena igagogocha as'enchera y'okoigwa, nokoigwa igogogocha ase ring'ana riaye Nyasaye, 18 Bono, nkoboriande, Barabwo tibaigwete? Ee mbaigwete, Eriogi riabo riasokire riachire ense yonsi, Namang'ana abo goika omoerio bw'ense. 19 Korende nkoboriande, Abaisiraeli tibamanyete? Agwo ritang'ani Musa agakwana, Nimbabekere omoyo bwe ribero as'abanto batari egesaku, As'egesaku getari nobong'aini igo ndababeyie. 20 Na Isaya nare noboremu obonge nagoteba, Nanyorekanete nabatare kondigia; Naorogete asebare abatare komboria. 21 Korende as'Isiraeli igagoteba, Omobaso boira narekobaramborera amaboko abanto batare nokoigwera noboamereria.
1 Ninde nokoboria, Nyasaye igabatuguterete are abanto baye? Yaya: naki inche nainche n'Omoisiraeli nde, oyomo as'okoibora kw'Ibrahimu, omonto bw'egesaku kia Benjamin. 2 Nyasaye tabatugutete abanto baye baria amanyete korwa kare. Gose timomanyeti aria akwanetwe namariko igoro as'Elija? buna amosororete Nyasaye igoro as'Abaisiraeli, 3 Omonene, babaitire ababani bao, batagoire amathabao ao, nainche natigaire inche bweka, nabarabwo nkondigia bare obogima bwane. 4 Korende okoiraneria koria naki gokomotebia? Netigeire abanto chilifu isano naibere batarabeka amaru inse as'obosio bwa Baal. 5 Nabo ekero kia bono, mbare abatigari abachorirwe as'obuya bwa Nyasaye. 6 Korende onye nas'obuya bwaye, tibokoba as'ogokora naende, onye taribo obuya tibokoba obuya naende, nonye nas'ogokora, tibokoba obuya naende, naende agwo ogokora tikwabete ogokora. 7 Naki abaire rende? Egento keria Isiraeli are gokerigia takenyoreti; korende baria bachoretwe mbarabwo bakenyorete, nabande bakabekwa obokong'u: 8 buna arikire, Nyasaye akabaa omoika bwe chitoro, amaiso erinde tibarora, namato erinde tibaigwa goika rero iga. 9 Na Daudi otebire, Emesa yabo ebe egesugunia, nobeto, Negento gekobagocha, nokoakana asebare: 10 Amais'abo abekwe omosunte tibarora, Obakumbe omogongo obo amatuko onsi. 11 Bono ngokwana, Inee! igobagochirwe goika bagure kegima? Yaya: korende as'okomocha kwabo, ogokonyeka gwaikeire abanto b'Ebisaku, erinde barabwo babekwe ribero. 12 Bono onye okomocha kwabo kwabaire obonda bw'ense, nogokea kwabo kwabaire obonda bw'abwo abanto b'Ebisaku, inee, tari kobua mono as'oboikeranu bwabo? 13 Korende ngokwanande ninwe, abanto b'Ebisaku. Koreng'ana buna nde omotomwa bw'abanto b'Ebisaku, nabakire ogokora kwane: 14 erinde inyare kobabeka ribero abare amanyinga ayamo nainche, nakobakonya abande babo. 15 Naki onye ogotugutwa kwabo gokoreta okobwatania as'ense, inee, ogwancherwa kwabo inki korabe onye tari obogima nyuma as'ogokwa? 16 Naende onye ensemo ye ritang'ani kerabe enchenu, naboigo neribomba rionsi: neritina korirabe richenu, nechinsagia chiaye nabo chire. 17 Korende chinsagia chinde gachirabe chianachirwe, naye, omozeituni bw'orosana, igo gwachomirwe gati yabo okaba obomo bwe ritina ri'omozeituni, nobonoru bwaye; 18 tibwetogia igoro ase chinsagia; korende onye gogwetogia, tari aye oimogeti ritina korende neritina rikoimogetie aye. 19 Bono notebe, chinsagia igochianachetwe erinde inche nchomwe. 20 Ee, mbuya, bakanachwa as'ogotegena kwabo, naye igoteneine as'okwegena kwao. Toenena korende oiroke: 21 naki onye Nyasaye taberete chinsagia chia boronge, nonya naye tagokwabera. 22 Inyora obuya nobotindi bwa Nyasaye: ase baria bagure as'obotindi; korende asore obuya bwa Nyasaye, koraikaranse as'obuya obwo: onye taribo, aye naye nonacherwe are. 23 Nabwo bonsi bataikaranseti as'ogotancha kwabo, nabachomwe, ekiagera Nyasaye nanyare kobachoma naende. 24 Naki onye aye kwanachetwe okarusigwa as'omozeituni bw'orosana, ogachomwa as'ogochomwa gotagwenereti, as'omozeituni ore omuya: tari kobua mono aba abare abanyene, bachomwe as'omozeituni obo abanyene. 25 Naki tindigeti abaminto timomanya ayobobisi obo, timwerora ng'a igomore abanyene obong'aini, ng'a ensemo y'obokong'u bwabanyorire Abaisiraeli, goika ogoikerana kw'Ebisaku goikerane; 26 na iga, Abaisiraeli bonsi nabakonyeke, buna yarigetwe, Ere oyogokonya nache korwa Zayoni; Namorusananie Yakobo nobobe bwaye, 27 Neye nero emuma yane nabarabwo, Ngocha kobaruseria ebibe biabo. 28 Naboigo as'amang'ana enchili, babaire ababisa as'engecho yaino: korende as'engecho y'ogochorwa koria, babaire abanchani as'engecho ye chisokoro chiaito. 29 Naki ebiegwa bia Nyasaye nokorangeria kwaye tibiri nogweitia. 30 Naki buna inwe kare motarenge nokoigwera ase Nyasaye, korende bono mwanyorire okwaberwa as'ogotancha kwabo, 31 naboigo nabwo bataigwereti bono, erinde as'okwaberwa kwaino inwe, nabarabwo banyore okwaberwa. 32 Naki Nyasaye obasibire bonsi amo as'ogotaigwera erinde ababere bonsi. 33 Aa! obonda botakorengeka mbore ime ase chisemi nokomanya kwa Nyasaye. Ebina biaye tibikomanyeka, nechinchera chiaye tichikorigeka! 34 Naki ning'o omanyete omoyo bw'Omonene? Gose ning'o okomworokereria ebina biaye? 35 Gose ning'o omoete ere egento ritang'ani, nere naakanwe? 36 Ekiagera ebinto bionsi igobikorua asare, igabire moyo asare, mbire nomoerio asare. Obonene bore nere kare nakare. Amin.
1 Gaki, nabasoroire mono, abaminto, as'amabera aye Nyasaye, morue emebere yaino ebe ekeng'wanso kere moyo, egechenu, ekeranyare gwanchwa na Nyasaye, nakio ogosasima kwaino kobagwenerete. 2 Gose timwereng'ania chingecho chi'ense eye: korende moonchorwe as'ogokora okuya as'emioyo yaino, monyare komanya boronge obwanchani bwa Nyasaye, bomogwenerete noboikeranete. 3 Naki as'obuya naeirwe igo nkomotebia ker'omonto oyore asemore, tarengereria ayare amanene kobua buna emogwenerete korengereria; korende abe nokorengereria koreng'ana, buna Nyasaye atananeire ker'omonto as'ekerengo gi'okwegena kwaye. 4 Koreng'ana buna as'omobere oyomo tore nebimo ebinge, nabirobio ebimo bionsi tibiri gokora omoremo oyomo: 5 naboigo naintwe, tore abange tore omobere oyomo ase Kristo, naintwe twensi igotore nebimo ker'oyomo as'oyomwabo. 6 Naboigo ekiagera tore nebiegwa bire ao ao, koreng'ana as'obuya twaeirwe, onye nobobani tobane koreng'ana as'okwegena; 7 onye nas'ogokora, tobeo as'ogokora gwaito; omonyene okworokereria, as'okworokereria kwaye; 8 omonyene ogokonya as'amang'ana, as'ogokonywa kwaye: oyokorua arue as'omoyo oyomo; oyogotenenera, as'omokia; oyokwabera as'omogoko. 9 Obwanchani bobe botari nobong'ainereria. Mogeche erire ribe; bwatana nerire rigiya. 10 As'obwanchani bw'abamwabo, mobe nokorengereria okuya inwe as'inwe; as'ogosika mogotang'aneria abamino; 11 as'ekinda, timoba aboro: mobe nomokia as'emioyo yaino, mokomokorera Omonene; 12 as'ogosemeria, niogoke; as'emechando moremereria; as'ogosaba, morende; 13 as'okorua as'okoremerwa kw'abachenu; as'okoroisia abageni, mobe abanyamokia. 14 Basesenie abakobarosia; sesenia, timoragereria. 15 Goka amo nabwo bakogoka; rera amo nabwo bakorera. 16 Mobe nokorengereria okomo inwe as'inwe. Timorengereria ayare amanene, korende morengereria ayare ay'oboitongo. Timoba abanto bakoenenera obong'aini. 17 Timomoa omonto obobe as'obobe, tang'ania ayare amaya as'amaiso abanto bonsi. 18 Keranyarekane ensemo yaino mobe nomorembe nabanto bonsi. 19 Timorigia korusia egesiomba abanchani, korende kamwakorirwe bobe tiga ribaga as'endamwamu ya Nyasaye: naki narikire, Egesiomba nekiane inche; inche ning'akane, otebire Omonene. 20 Naboigo omobisa oo karabe nenchara moragerie; karabe nerang'o, moe anywe; ekiagera kogokora iga, nomobekere amakara omorero omotwe oye. 21 Tobugwa nobobe, korende obue obobe as'obuya.
1 Ker'omonto bwonsi abe inse as'okoigwera as'abare nobonene: ekiagera obonene bonde tibori botarueti ase Nyasaye; namanene ayareo achikirwe na Nyasaye. 2 Naboigo oyotarikomoigwera omonyene obonene, igakoamererania namachiko a Nyasaye; nabarabwo abakoamererania nabenyorere ekina. 3 Naki abakogamba tibari obwoba as'engecho y'ogokora okuya, korende as'engecho y'ogokora okobe. Bono, igorigetie tomoiroka oyore nobonene? Kora ayare amaya, nonyore okobakwa as'amaya aria: 4 naki ere nomosomba o Nyasaye asore as'engecho y'amaya. Korende korakore amabe, iroka; naki tabogoreti omoro bosa: ekiagera nomosomba o Nyasaye okoakana egesiomba as'omokori amabe as'engecho y'endamwamu. 5 As'ayio mogwenerete koigwera, tari as'engecho y'endamwamu yoka, korende nas'engecho y'ebirengererio. 6 As'engecho eyio naende nakio mokoruera ebango; naki barabwo nabasomba ba Nyasaye, kobagokora emeremo eyio eyio. 7 Bae bonsi ebia boronge biabo: omonto bw'ebango ebango, nomonto bw'ogochoga ogochoga; oyogwenerete okoirokwa oirokwa; oyogwenerete ogosikwa; osikwa. 8 Timoba nesira as'onde bwonsi, tatiga ogwanchana: naki oyomwanchete omonto omwabo oikeranirie amachiko. 9 Naki koria, Totomana, Toita, Toiba, Toba kirori ki'oborimo, Torengereria, na gokorabeo gochika konde gwonsi, kwabekeranigwe ase ring'ana eri, ng'a Mwanche omogisangi oo buna omobere oo. 10 Obwanchani tibokomokorera omogisangio ring'ana ribe; naboigo obwanchani nabwo oboikerania bw'amachiko. ii Nas'ayio, tonyare komanya ekero, ng'a engaki y'okoboka korwa ase chitoro yaikire: naki bono ogokonyeka igokore ang'e naintwe kobua ekero twegenete. 12 Obotuko bwaerire, omobaso oikire: naboigo torusie ogokora kw'omosunte, tweboe ebinto bi'esegi bi'omobaso. 13 Buna egwenerete nomobaso totare as'oboronge; tari as'okoria bobe nokogosoria, nogotinda, tari as'okorengereria nechingecho chi'obotomani, tari as'eriomana ne ribero. 14 Korende mweboe Omonene Yesu Kristo, timoa omobere ribaga goikerania ebirengererio biaye.
1 Korende ere oyotari nguru as'okwegena, moroisie, timomogambia as'ebirengererio biaye. 2 Omonto nare nokwegena, nigakoria bionsi, korende oria otari nguru igakoria chinyeni. 3 Ere oyokoria tamochaya oria otari koria, nere oyotarikoria tamogambia oria okoria, naki Nyasaye omwancheire. 4 Aye naye ng'o okomogambia omosomba bw'omonto onde? As'Omonene oye omonyene igateneine gose igakogwa. Ee, natenenigwe, naki Omonene nare nokobua komotenenia. 5 Omonto oyomo narengereretie rituko kobua erinde, noyonde arora ng'a amatuko onsi igareng'aine. Ker'omonto atenene as'obong'aini bwaye omonyene. 6 Ere oyoikeranetie rituko igakoikerania as'Omonene: nere oyokoria igakoria as'Omonene, ekiagera igakomoakera Nyasaye mbuya mono; nere oyotari koria tari koria as'Omonene, nere amoakera Nyasaye mbuya mono. 7 Ekiagera onde tari as'egati yaito ore moyo as'omobere oye omonyene, nonde tari ogokwa bweka omonyene as'omobere oye. 8 Naki onye tore moyo, igo tore moyo as'Omonene; gose onye togokwa igo togokwa as'Omonene: naboigo onye tore moyo gose onye togokwa, igotore ab'Omonene. 9 Ekiagera Kristo nakwete naende akaboka akaba moyo as'engecho eye, erinde abe Omonene as'abare moyo nabakure bonsi. 10 Korende aye inee! naseki okomogambia oyomino? Naye inee naseki okomochaya oyomino? Ekiagera intwe twensi natotenene as'obosio bw'ekerogo gi'ekina gia Kristo. 11 Naki nerikire, As'obogima bwane okwanire Omonene, amaru onsi nabekwe inse as'obosio bwane, Nechimeme chionsi nachimwatore Nyasaye. 12 Bono onye naboigo, ker'omonto ime asetore narusie amang'ana aye omonyene as'obosio bwa Nyasaye. 13 As'ayio titoba nkonakogambania tore, korende anga mbuya mogambe ekina iga, oyominto tabekwa egento gekomogocha gose gi'okomoiyeria. 14 Namanyire naende naenekirie mono as'Omonene Yesu, ng'a gento tikeri kere neubi ekenyene, tatiga asare oyo ogokerora ng'a negento ekebe, asare oyio egento keria nekebe. 15 Noyomino karabe nogoichana, as'engecho y'endagera, gwatigire kogenda as'obwanchani. As'endagera yao tomosaria omonto oria ere Kristo akwete as'engecho yaye. 16 Naboigo tibwatorwa bobe as'obwo obuya bwaino. 17 Naki obonda bwa Nyasaye tari okoria nokonywa, korende as'oboronge nomorembe nomogoko as'Omoika Omochenu. 18 Ekiagera ere oyokomokorera Kristo as'amang'ana aya onsi igakomogwenera Nyasaye, naende igagwancherwa na mwanyabanto. 19 Korende onye naboigo, tiga totunyane chingecho chi'omorembe nechingecho chigwenerete as'okoagachana. 20 As'engecho y'enyama tosaria emeremo ya Nyasaye. Bionsi nebichenu; korende mbobe omonto kararie nokwegocha. 21 Mbuya ogotaria enyama nonya nokonywa edivai gose gokora ring'ana riria riagochire oyomino gose riamoiyeirie gose riamokorire omoreu. 22 Okwegena kwao obe nakorokwo as'omoy'oo as'obosio bwa Nyasaye. Nare negesio omonto oria otenachereti ekina ase ring'ana riria anchire. 23 Korende oyore nemioyo ebere, onye okoria, onacheirwe ekina, ekiagera tarieti as'okwegena. Nogokora gwonsi gotarueti as'okwegena okwo nebibe.
1 Naboigo atogwenerete intwe abwo tore nechinguru kobobogoria oboreu bwabo abatari nechinguru, tetogwenereti kwegwenera emebere yaito. 2 Ker'omonto ore ime yaito tiga amogwenere omogisangio anyore amaya ayaranyare komoagacha. 3 Naki Kristo nere tegwenerete omonyene; korende buna yarigetwe, Emerumi yabo bakoramete yanyorete inche. 4 Naki onsi ayatang'anete korikwa igarigetwe as'ogotworokereria intwe, erinde as'oboremereria nogokonywa kw'amariko tonyare koba nogosemeria. 5 Na Nyasaye omonyene oboremereria nogokonya, abakonye korengereria ayamo inwe ase inwe, buna Yesu Kristo: 6 erio as'omoyo oyomo nas'omonwa oyomo monyare komobaka Nyasaye, Tata bw'Omonene oito Yesu Kristo. 7 Naboigo moroisanie, buna Kristo nere abaroisirie, erinde Nyasaye abakwe. 8 Bono nakwanire, Yesu Kristo okorekire omosomba bw'okwarokigwa as'engecho y'ekeene kia Nyasaye, erinde achiikeranie chiira baetwe abatata baito, 9 Nebisaku bamobake Nyasaye as'engecho y'amabera aye; buna yarigetwe, As'engecho eye ninkobake as'Ebisaku, Nerieta riao ninditere. 10 Naende, otebire, Goka, Ebisaku, amo nabanto baye. 11 Naende, Mobake Omonene Ebisaku bionsi; Abanto bonsi bamobake. 12 Naende Isaya agakwana, Naribe ritina ria Yesse, Nere naoroke kobagambera Ebisaku; Nere Ebisaku barasemerie. 13 Naboigo Nyasaye bw'ogosemeria abaichorie omogoko bwonsi nomorembe nas'okwegena, monyare komenta mono as'ogosemeria, nase chinguru chi'Omoika Omochenu. 14 Nainche omonyene namanyire kegima amang'ana aino, abaminto, ng'a inwe nainwe mwaichoirwe namaya, mwaichoirwe nobong'aini bwonsi, namonyare kworokererania. 15 Korende nabarikeire, abaminto bane, as'oboremu kobua as'ensemo ye rirube eri, ng'a nkobainyoria as'obuya boria naetwe na Nyasaye, 16 erinde mbe omosomba o Yesu Kristo as'abanto b'Ebisaku, nkorere enchili ya Nyasaye emeremo y'obosomba, erinde ebisaku babe nesadaka eyancheire, koyasibigwe n'Omoika Omochenu. 17 Bono ninde nengecho y'okwebaka ase Kristo Yesu as'obosio bwa Nyasaye. 18 Naki tinkonyara gwatora ring'ana eriatakorete Kristo ase emeremo yane, ebisaku binyare koigwera ase ring'ana gose as'ogokora ase chinguru nebikone nogokumia, 19 ase chinguru chi'Omoika Omochenu; erinde korwa ase Yerusalemu nechinsemo chiaye goika Illuriko, natiekire koyerandia enchili ya Kristo as'ogoikerania. 20 Naboigo ngakora okorengereria kwane, koyerandia enchili, timbaisa korandia aria as'erieta ria Kristo riatoirwe, erinde timbaisa koagacha igoro as'oboroso bw'omonto onde. 21 Korende, buna yarigetwe, Baria batarandeirie amang'ana aye nabarore, Na baria bataigweti nabainyore. 22 Nakio kiagerete ngatangwa ebiro ebinge tinaika asemore. 23 Korende bono, ekiagera tindi neribaga naende ase chinsemo echi, naende korwa emiaka emenge, narenge nokorengereria goika asemore, 24 kero kende gionsi, gonkogenda Hispania ninchiche asemore, as'engecho inde namaiga kobarora inwe as'orogendo rwane; nagokobwa nainwe, nomoyo one kogokigwa nainwe ekero egeke. 25 Na bono ningende Yerusalemu, mbe nkobakorerande abachenu. 26 Naki abagweneire abanto ba Makedonia n'Akaya gokora okorua as'engecho y'abachenu ba Yerusalemu abare abataka. 27 Ee, abagweneire, naende nabasira babo. Naki onye abanto b'ebisaku babwatanire nabarabwo nebinto biabo bi'omoika, igobaraakanwe nabarabwo as'okobakorera as'ebinto biabo bi'omobere. 28 Naboigo kondaikeranie ring'ana eri nakobabekera ekemanyererio kie ritunda eri, ning'ete asemore, na nkorua asemore ngende Hispania. 29 Nainche namanyire ng'a kondache asemore ninchiche as'oboichore bw'egesio gi'enchili ya Kristo. 30 Nabasoroire, abaminto, as'Omonene oito Yesu Kristo nas'obwanchani bw'Omoika, kabe nomokia amo nainche as'ogosaba kwaino as'engecho yane as'obosio bwa Nyasaye; 31 erinde ntorigwe na baria bataigwereti ase Boyahudi, naende ogokora kwane inde nakorokwo aria Yerusalemu kogwenere as'abwo abachenu; 32 inyare goika asemore nomogoko Nyasaye karanche, inyare konyora ogotimoka amo nainwe. 33 Nyasaye bw'omorembe abe amo nainwe mwensi. Amin.
1 Nabaeire okobakwa okuya kwa Foibe oyominto, oyore omosomba as'ekanisa ere Kenkrea: 2 erinde monioroisie as'Omonene, buna ebagwenerete abachenu, momokonye ase ring'ana rinde rionsi ararigie asemore, ekiagera ere nere obaire omokonyi bw'abanto abange, agankonya nainche omonyene. 3 Nkwaneria Priska na Akula, abakori emeremo amo nainche ase Kristo Yesu, 4 babete ang'e nonya nkonachwa omotwe as'engecho y'obogima bwane; barabwo nabaakeire ng'a mbuya mono, gose tari inche bweka korende chikanisa chi'Ebisaku: 5 nkwaneria ekanisa ere as'enyomba yabo, Nkwaneria Epaineto omwanchi one, ore bwe ritang'ani as'Asia ase Kristo. 6 Nkwaneria Mariamu bwechandete mono as'engecho yaino. 7 Nkwaneria Androniko na Yunia, abaamate baito, basibetwe amo nainche, abamanyekanete as'abatomwa; na barabwo igo barenge ase Kristo ritang'ani asende. 8 Nkwaneria Amplia, omwanchi one as'Omonene. 9 Nkwaneria Urubano, omokori emeremo amo nainche ase Kristo, na Staku, omwanchi one. 10 Nkwaneria Apele oyo bwancheretwe ase Kristo. Nkwaneria abanto b'enyomba ya Aristobulo. 11 Nkwaneria Herodioni, omoamate one. Nkwaneria abanto b'enyomba ya Nakisso bare ase Kristo. 12 Nkwaneria Turufena na Turufosa, abagokora emeremo as'Omonene. Nkwaneria Perisi omwanchwa, oyokorire omokia mono as'Omonene. 13 Nkwaneria Rufo, omorusananigwa ase Kristo, na ng'ina ore baba, nainche. 14 Nkwaneria Asunkrito, Elegoni, Herme, Patroba, Herma, nabaminto abare amo nabarabwo. 15 Nkwaneria Fililogo na Yulia na Nereu, noyomwabo, na Olumpa, nabachenu bonsi bare amo nabarabwo. 16 Bankwanerie as'ogokwania ogochenu. chikanisa chionsi chia Kristo chiabakwanirie. 17 Nabasoroire, abaminto, mobarigererie baria bakoreta ogwatananeka nechingecho chi'okogocha, kore ao nokworokererigwa mweorokereirie, mweatanane nabarabwo. 18 Naki abwo mbarabwo batari komokorera Omonene oito Kristo, korende nechinda chiabo abanyene; nas'amang'ana amaroro nay'okwegweneria, bang'aina emioyo y'abanto batari ababe. 19 Naki okoigwera kwaino, gwaikeire abanto bonsi. Naboigo nagokire as'engecho yaino, korende nindigetie mobe abanyene chisemi as'amang'ana amaya, nabariri as'amang'ana amabe. 20 Nyasaye bw'omorembe namotache Saitani inse as'amagoro aino bwango. Obuya bw'Omonene oito Yesu Kristo bobe amo nainwe. 21 Timotheo, omokori emeremo amo nainche obakwanirie; na Lukio na Yasoni na Sospatro, abaamate bane. 22 Inche Teritio, oyokorika rirube eri, nabakwanirie as'Omonene. 23 Gayo omoroisia one noyo bw'ekanisa engima, obakwanirie. Erasto omogachi bwe chishilingi bw'omochie obakwanirie, na Kwarito oyominto. 24 Obuya bw'Omonene oito Yesu Kristo bobe amo nainwe mwensi. Amin. 25 Bono asare ere oyoranyare kobakong'ia as'enchili yane, nas'okorandigwa kwa Yesu Kristo, nas'okomanoka kw'obobisi boria bwabisegete korwa kare nakare, 26 korende bono bwaorokire as'amariko ay'ababani, amanyekanire as'ebisaku bionsi buna Nyasaye o kare nakare achigete erinde baigwere okwegena; 27 Nyasaye omonyene chisemi ere bweka, abakwe ase Yesu Kristo, kare nakare, Amin.
1 Paulo, orangeretigwe koba omotomwa o Yesu Kristo as'obwanchani bwa Nyasaye, na Sosthene oyominto, 2 as'ekanisa ya Nyasaye ere ase Korintho, as'abwo basibigwe ase Kristo Yesu, abarangerigwe babe abachenu amo na bonsi abakorirangeria erieta ri'Omonene oito Yesu Kristo ker'aase, Omonene obo noyoito: 3 obuya bobe asemore nomorembe okorua ase Nyasaye Tata oito, nas'Omonene Yesu Kristo. 4 Namoakeire Nyasaye ng'a mbuya mono amatuko onsi as'engecho yaino, as'engecho y'obuya bwa Nyasaye mwaetwe ase Kristo Yesu; 5 ekiagera ase kera ring'ana mogatenengeka as'ere, as'amang'ana onsi, nechisemi chionsi; 6 buna oborori bwa Kristo bwaikeranire asemore: 7 na bono timoremeiri ekeegwa kende gionsi, komoganyete mono okoorokigwa kwaye Omonene oito Yesu Kristo: 8 nere nabakong'ie goika omoerio, timoba nokomocha ase rituko riria ri'Omonene oito Yesu Kristo. 9 Nyasaye noyo bw'ekeene, as'ere mwarangerigwe nere mosoe as'okobwatana kw'Omwana oye, Yesu Kristo Omonene oito. 10 Nabasoroire inwe, baminto, as'erieta ri'Omonene oito Yesu Kristo, mokwane mwensi ayamo, tikoba asemore ogwatananeka; korende mobe moikeranetie as'okorengereria okomo nokorenga okomo. 11 Naki natebigwe amang'ana aino, baminto, na baria bare b'enyomba ya Kloe, ng'a eriomana ndire asemore. 12 Engecho yaye yagera nakwana bo, ng'a ker'omonto ore asemore igagoteba, Inche noyo Paulo; nainche noyo bw'Apolo; nainche noyo Kefa; nainche noyo Kristo. 13 Inee, Kristo bwatananekire? Paulo igabambetwe as'engecho yaino? gose iga mwabatiswa as'erieta ria Paulo? 14 Namoakeire Nyasaye ng'a mbuya mono, as'engecho ntabatisete monto asemore otatiga Krispo na Gayo; 15 omonto tabaisa goteba ng'a mwabatisetwe as'erieta riane. 16 Naende nkabatisa abanto b'enyomba ya Stefano: kobua as'abwo, timanyeti gose nabatisa 'monto onde. 17 Naki Kristo tantometi ng'a mbatise, korende ndandie enchili: tari ase chisemi chi'amang'ana, omosalaba o Kristo tobaisa koba egento kia bosa. 18 Naki ase ring'ana ri'omosalaba as'abwo bagosira nobokayayu; korende asetore intwe twakonyirwe nechinguru chia Nyasaye. 19 Naki nerikire, Ninsarie chisemi chiabo abanyene chisemi, Nobong'aini bwabo abanyene obong'aini nimbwange. 20 Ng'ai are omonyene chisemi? ng'ai are omoriki? ng'ai are oyokoamererania namang'ana ay'ens'eye? inee, Nyasaye takorete chisemi chi'ens'eye koba oboriri? 21 Naki ase chisemi chia Nyasaye, ense etanyarete komomanya Nyasaye ase chisemi chiaye, Nyasaye agancha kobakonya abanchete as'oboriri bwe ring'ana riria rikorandigwa. 22 Ekiagera Abayahudi barigetie ebikone, n'Abayunani bakorigia chisemi: 23 korende intwe iga tokomorandia Kristo, oyobambetwe, as'Abayahudi nekegocha, nas'Abayunani noboriri; 24 korende as'abwo bakorokwa Abayahudi n'Abayunani bonsi, Kristo nechinguru chia Nyasaye, nechisemi chia Nyasaye. 25 Ekiagera oboriri bwa Nyasaye mbore nechisemi kobua echia mwanyabanto; noboreu bwa Nyasaye mbore nechinguru kobua echia mwanyabanto. 26 Naki rora okorangerigwa kwaino, baminto, ng'a tari abange abanyene chisemi chi'omobere, tari abange abanyene chinguru, tari abange bare nobonene, barangerigwe; 27 korende Nyasaye agachora amariri ense abasokie abanyene chisemi; naende akabichora ebinto ebireu bi'ense erinde abare nechinguru basokigwe; 28 nere akabichora ebinto ebioro bi'ense nebichaire, ee, nebinto ebitaiyo, erinde abiranie inse ebireo: 29 erinde omonyene omobere bwonsi tobaisa gwetogia as'obosio bwa Nyasaye. 30 Korende as'ere inwe mwanyarire koba ase Kristo Yesu, orenge asetore chisemi chiruete ase Nyasaye, noboronge, nogosibigwa, nogotorigwa: 31 ng'a, buna arigetwe, Ere oyogwetogia tigetogie as'Omonene.
1 Nainche, ekero nachete asemore baminto, tincheti kobaranderia obobisi bwa Nyasaye as'obuya bw'amang'ana, gose ase chisemi. 2 Naki narengereretie timanya ring'ana rinde rionsi asemore otatiga Yesu Kristo, nere obambirwe. 3 Nainche iga narenge asemore as'oboreu nokoiroka, nokoiguswa okonge. 4 Nering'ana riane nokorandia kwane tikwarenge as'amang'ana aye chisemi chia mwanyabanto echi'okoebereria obong'aini bw'abanto, korende as'ekiorokererio ki'Omoika nechinguru: 5 okwegena kwaino tikoba ase chisemi chi'abanto, korende ase chinguru chia Nyasaye. 6 Korende nchire chisemi togoteba egati y'abaisanire: nachirochio tari chisemi chi'ens'eye, gose echiabo abagambi ens'eye, abakoonchorerigwa: 7 korende tokwana chisemi chia Nyasaye as'obobisi, echio chiabisetwe, echia Nyasaye atebete korwa omochakano as'obonene bwaito: 8 ekiagera abare kogamba ens'eye tibayemanyete nonya noyomo; ng'a onye mbamanyete anga tibamobambete Omonene bw'obonene; 9 korende buna yarigetwe, Amang'ana ay'eriso ritayaroche gose ogoto tikwayaigwa Gose tasoete as'enkoro ya mwanyabanto, Amang'ana aya Nyasaye abaroseirie abamwanchete. 10 Korende Nyasaye otoorokeirie intwe as'Omoika oye, naki Omoika origirie onsi, nonya nobobisi bwa Nyasaye. 11 Naki ning'o oyamanyire amang'ana aya mwanyabanto, otatiga omoyo o mwanyabanto ore ime asare? naboigo amang'ana a Nyasaye tari onde oyamanyete otatiga Omoika o Nyasaye. 12 Naintwe titwanyorete omoika bw'ense, korende omoika oruete ase Nyasaye; tonyare koyamanya aya twaeirwe na Nyasaye. 13 Naro toyakwana, tari as'amang'ana tworokererigwe nechisemi chia mwanyabanto, korende tworokererigwe n'Omoika; tokoyareng'ania amang'ana omoika namang'ana omoika. 14 Nabo mwanyabanto ore nechingecho chia kare takoyanyora amang'ana omoika o Nyasaye, naki asare oyo noboriri; gose takonyara koyamanya, ekiagera igakomanyekana as'engecho y'omoika. 15 Korende omonto bw'omoika igakoyamanya onsi, gose ere takomanyigwa nomonto. 16 Naki ning'o omanyete ebirengererio bi'Omonene, amworokererie? Korende intwe ntore nebirengererio bia Kristo.
1 Nainche, baminto, tinanyarete gokwana, buna abanto b'omoika, korende buna abanto b'omobere, buna nabana abake ase Kristo. 2 Nabarageirie amabere, timbaragereti endagera; ekiagera konya timorayenyara: ee, nonya mbono timorayenyara: 3 ekiagera nonya mbono iga more abanto b'omobere: naki onye more neribero neriomana, nogwatananeka, inee, timori abanto b'omobere inwe, naende iga mokogenda ase chingecho chia mwanyabanto? 4 Ekiagera ekero omonto oyomo akobora, inche noyo Paulo: noyonde inche noyo Apolo: inee, timori abanto b'omobere? 5 Gaki Apolo ning'o? Na Paulo ning'o? Nabakori emeremo ekiagera asebare mwanyorire ogwancha, ker'omonto buna Omonene amoete. 6 Inche ngasimeka, Apolo akabeka amache, korende oyogokinia Nyasaye. 7 Onye nabo oyosimegete tai gento nonya noyokobeka amache, korende Nyasaye ogokinia. 8 Naboigo oyogosimeka, noyokobeka amache nabamo: na ker'omonto nanyore eng'eria yaye koreng'ana buna emeremo yaye omonyene. 9 Naki intwe nabakori emeremo amo na Nyasaye: inwe nomogondo o Nyasaye, noboagacho bwa Nyasaye. 10 As'okoreng'ana nobuya bwa Nyasaye naetwe inche, buna omonene bw'abaagachi omonyene chisemi, nabobekire oboroso, nomonto onde oagacha igoro yaye. Korende ker'omonto arigereria buna aagachire igoro aroro. 11 Naki'boroso bonde tibori 'monto aranyare kobeka, otatiga boria bwatiekire kobekwa, nabwo Yesu Kristo. 12 Korende omonto karaagache igoro as'oboroso ethahabu, gose efetha, gose ebinto bie rigori rinene, gose emete, gose obonyansi, gose chinsiaga; 13 emeremo ya ker'omonto ing'ebe maiso marore. Naki rituko erio ng'eorokie, ekiagera neorokigwe as'omorero; noyio omorero noteme emeremo ya ker'omonto, ng'a naki ere, 14 Emeremo y'omonto aagachete igoro yaye, kerabue oria omorero nanyore eng'eria. 15 Emeremo y'omonto kerayie nasire bosa, korende bweka nakonyeke, korende koria ogokonywa buna ogotaborigwa korwa as'omorero. 16 Timomanyeti ng'a inwe ne hekalu ya Nyasaye, ney'Omoika Omochenu oikaransete ime asemore? 17 Gose omonto karasarie hekalu ya Nyasaye, Nyasaye namosarie omonto oyio; 'naki hekalu ya Nyasaye nechenu, nero ninwe. 18 Omonto tabaisa kweng'aina omonyene. Omonto karerore ng'a nomonyene chisemi gati asemore as'ens'eye, tiga abe omoriri, erinde abe omonyene chisemi. 19 Naki chisemi chi'ens'eye noboriri ase Nyasaye. Naki yarikirwe, Ereoyokobabwata abare nechisemi as'obong'ainereria bwabo: 20 naende, Omonene omanyire okorengereria kw'abanyene chisemi, ng'a nokwa bosa. 21 As'ayio omonto tetogia ase mwanyabanto. 22 Naki bionsi nebiaino; onye Paulo, gose Apolo, gose Kefa, gose ense, gose obogima, gose amakweri, gose biria bire bono, gose ebio birachekoba, bionsi nebiaino; 23 nainwe naba Kristo; na Kristo noyo Nyasaye,
1 Omonto natobare iga, ng'a nabasomba ba Kristo, nabarendi b'obobisi bwa Nyasaye. 2 Naende ayarigirie as'abarendi, naro omonto arorekane ng'a noyo bw'ekeene. 3 Asende, taigento ngambigwe nainwe, gose nokogambigwa kwa mwanyabanto: gose tinkwegambia nonya nomobere one. 4 Naki timanyeti engecho y'ogwesoera omobere one; korende timbareiri oboronge as'engecho y'ayio: korende oyorangambie n'Omonene. 5 As'ayio timogamba ring'ana ritang'ani as'ekero kiaye, goika Omonene ache, nere orabaorokerie ayabisegete as'omosunte, nakoyaorokia amang'ana aye chinkoro; erio ker'omonto aranyore okobakwa kwaye ase Nyasaye. 6 Amang'ana aya, baminto, nayakorire koba omogwekano one noyo bw'Apolo as'engecho yaino, erinde as'amang'ana aito monyare kweyorokereria timotamboka as'amang'ana arikire, omonto onde taenena as'omogisangio, as'engecho y'omonto onde. 7 Naki ning'o ogwatananire aye noyonde? inki ore nakio otaranyora? onye gwakenyorire, inki ogwetogeria buna tonyoreti? 8 Mwatiekire koigota, mwatiekire konyora obotenenku, mwagambire motari naintwe: anga mbuya onye mwagambete, erinde naintwe togambe amo nainwe. 9 Naki, mbora Nyasaye otochorire intwe abatomwa omoerio, buna abanto bagambigwe baitwe: ekiagera twabaire ekiorokererio as'ense, nas'amalaika, nase mwanyabanto. 10 Intwe iga tore abariri as'engecho ya Kristo, korende inwe more abang'aini ase Kristo, intwe nabareu, korende inwe more nechinguru; inwe more nobonene, korende intwe titokonyora ogosikwa. 11 Nonya negeka eke kia bono, ntore nenchara, nerang'o, mbosa tore, igatokoakwa, titori nobomenyo: 12 naende torosa gatogokora emeremo as'amaboko aito abanyene: tokoramwa, twasesenia, tokorosigwa, twaremereria; 13 tokobeigwa, twasorora: twakorirwe buna eogoto y'ense, neubi y'ebinto bionsi goika bono. 14 Tinyarigeti aya kobasokia, korende kobakania buna abana nyanchete. 15 Naki nonya more naborokia chilifu ase Kristo, timori abaise abange. naki ase Kristo Yesu nababoire as'enchili. 16 Gaki nabasoroire, mobe abatunyani bane. 17 As'ayio namotomire Timotheo asemore, ore omwana one omwanchwa, oyo bw'ekeene as'Omonene, orabainyorie chingecho chiane chire ase Kristo, buna nkworokereria ker'aase ase ker'ekanisa. 18 Abande baenenire ng'a buna tindi gocha asemore. 19 Korende ninchiche asemore bwango, Omonene karanche; nainche nimanye, tari ring'ana riabo abakoenena, korende chinguru chiabo. 20 Naki obonda bwa Nyasaye tibori ase ring'ana, korende ase chinguru. 21 Inki morigetie? Ninchiche asemore nenyimbo, gose as'obwanchani nomoika bw'obwororo?
1 Korende amang'ana atebirwe ng'a obotomani mbore as'egati yaino, naende nobotomani buna obo tibwanyakororekana nonya nas'Ebisaku, ng'a omonto oyomo oino nare na moga'ise. 2 Inwe mwaenenire gose timoichaneti, erinde arusigwe egati yaino ere oyokorire ring'ana erio, 3 Korende inche ekeene, nintaba aroro as'omobere, korende kondabeo as'omoika, natiekire komogambia ere oyokorire ring'ana erio, buna nao narenge. 4 As'erieta ri'Omonene oito Yesu Kristo, inwe komogosangererekana amo nomoika one, amo nokobua kw'Omonene oito Yesu Kristo, 5 komoa saitani omonto oyio omobere oye osarigwe erinde omoika okonywe ase rituko ri'Omonene Yesu. 6 Okwebaka kwaino tikori okuya. Timomanyeti ng'a ememera emeke iga ekobotia ribomba rigima? 7 Esibie, moyerusie ememera eria ya kare, erinde mobe neribomba riyia, buna more motabekiri memera. Naki epasaka yaito yatiekire korugwa ekeng'wanso as'engecho yaito, nere Kristo. 8 Gaki torosie as'ekeng'wanso, tari as'ememera ya kare, gose as'ememera y'obobe nobokayayu, korende as'omogati otabekiri memera, nabwo oborabu bw'omoyo nekeene. 9 Nabarikerete ase rirube riane, ng'a timosang'anana nabatomani. 10 Tintebeti timosang'anana kegima kegima nabatomani b'enseye, gose abanyene okorengereria, gose abauri, gose abagosaba chisanamu; korende anga iga mwarua as'ense. 11 Korende bono nabarikeire ng'a timosang'anana nomonto okorokwa oyomino, karabe omotomani, gose oyokorengereria, gose oyogosaba chisanamu gose omorami, gose oyogotinda gose omouri; omonto onga buna oyo timwancha nonya nkoria nere. 12 Korende nangwenerete ki kobagambia baria bare isiko? Nainwe timori kobagambia abare ime? 13 Korende abwo bare isiko Nyasaye nabagambie. Moserie omonto oria omobe, taba asemore.
1 Inee! omonto onde oino karabe nering'ana as'oyomwabo agweneire agambigwe as'abwo batari boronge gose tari as'obosio bw'abachenu? 2 Gose timomanyeti ng'a abachenu nabagambie ense? na onye ense negambigwe nainwe, inee! timogwenereti kogamba ebina ebire ebike? 3 Timomanyeti ng'a natogambie amalaika? tari kchua mono amang'ana obogima obo? 4 Gaki komorabe mokogamba obogima obo, iga mokobeka kogamba abwo batabariri buna negento as'ekanisa? 5 Natebire aya as'okobasokia. Inee, naboigo, ng'a asemore onde tari nonya nomonto oyomo ore nechisemi, oranyare konacha amang'ana ayabamwabo. 6 Korende mwasoerana, abamino nabamino, naende as'obosio bwabo abatancheti. 7 Gaki kwabaire okoremerwa asemore kegima ng'a ngosoerana more inwe as'inwe. Tari buya gokorerwa bobe? Gaki taibuya kourwa enibo yaino? 8 Korende inwe mwakorire abanto bobe, nakobaura enibo yabo; ee nas'abamino. 9 Gose timomanyeti ng'a ababe tibakoira omwando bw'obonda bwa Nyasaye? Timong'aineka: abanyaka tibakonyora obonda bwa Nyasaye, gose abasabi chisanamu, gose abatomani, gose abare buna abakungu, gose abasacha abagwesaria nabasacha, 10 gose abaibi, gose abarengereria, gose abagotinda, gose abarami, gose abauri. 11 Nabande asemore mwarenge abanto buna aba: korende mogasibigwa, korende mwabarirwe koba noboronge as'erieta ri'Omonene Yesu nas'Omoika o Nyasaye oito. 12 Ebinto bionsi mbigwenerete asende, korende tai bionsi bigwenerete. Ebinto bionsi mbigwenerete asende, korende tinkobekwa inse as'okobua kw'egento kende. 13 Endagera ney'enda, nenda ney'endagera; korende Nyasaye nasarie bionsi bibere, enda nendagera. Nomobere tori as'obotomani, korende nas'Omonene: nere Omonene nas'omobere. 14 Na Nyasaye akamobokia Omonene, naende natobokie naintwe as'okobua kwaye. 15 Timomanyeti ng'a emebere yaino nebimo bia Kristo? gaki nimbogorie ebimo bia Kristo nakobikora ebimo bi'omokungu omotayayi? Yaya. 16 Timomanyeti ng'a ere oyobwatanigwe nomokungu omotayayi nomobere oyomo nere? naki otebire, Baria babere nababe omobere oyomo. 17 Korende ere oyobwatanigwe n'Omonene nomoika oyomo. 18 Tama obotomani. Ker'ebibe bigokorwa na mwanyabanto iga bire isiko as'omobere; korende ere oyogokora obotomani okorire ebibe as'omobere oye omonyene. 19 Gose timomanyeti ng'a omobere oino ne hekalu y'Omoika Omochenu ore ime asemore, mwaeirwe na Nyasaye? nainwe timori abaino abanyene; 20 naki mwagorirwe ase rigori: as'ayio motogie Nyasaye as'emebere yaino, nase chinkoro chiaino, nachirochio nechia Nyasaye.
1 Gaki as'amang'ana mwandikerete: Mbuya omosacha takuna omokungu. 2 Korende as'engecho y'obotomani ker'omonto abe na mokaye omonyene, na ker'omokungu abe nomosacha oye. 3 Omosacha ae omokungu ekemogwenerete: naboigo omokungu ae omosacha ekemogwenerete. 4 Omokungu tari nokobua igoro as'omobere oye, korende nomosacha oye: naboigo nomosacha tari nokobua as'omobere oye, korende nomokungu oye. 5 Timorinana otatiga mwatebanirie as'egeka, erinde monyare kwerua as'okweng'ata nogosaba, erinde mobe amo jiaende, erio Saitani tabaisa kobatema as'engecho y'okwerina kwaino. 6 Korende natebire aya, nkorusia ayare ayane; tindueti amachiko. 7 Korende ayanyanchete nabanto bonsi babe buna inche omonyene. Korende kera omonto nare nekeegwa kiaye omonyene gekorua ase Nyasaye, oyo iga, noyo iga. 8 Korende nabatebirie baria bataranyuoma, n'ababoraka mbuya babe buna inche inde. 9 Korende onye tibakonyara gwetanga, tiga banyuome: naki mbuya konyuoma kobua gwoka omorero. 10 Korende baria batiekire konyuomana nachikire, gose tari inche, korende Omonene, Omokungu tatigana nomosacha oye. 11 Korende, karabe otiganire nere, aikaranse tanyuomwa, gose abwatane nomosacha oye naende; naende omosacha tamotiga mokaye. 12 Korende abanto bande nabatebirie inche, gose tari Omonene: Onye onde ominto ore nomokungu otancheti, nomokungu bwanchire koba nere, tamotiga. 13 Nomokungu ore nomosacha otancheti, omosacha oye karanche koba nere, tamotiga. 14 Naki oria omosacha otancheti osibigwe ase mokaye, noria omokungu otancheti osibigwe as'omosacha oye: onye taibo abana baino anga tibari abachenu; korende bono nabachenu. 15 Korende oria otancheti karagende, tigagende: oyominto omosacha gose oyominto omokungu tasibiri: korende Nyasaye otorangeirie as'omorembe. 16 Naki ng'ai oramanyere aye omokungu, onye nomokonye omosacha oo? gose ng'ai oramanyere aye omosacha onye nomokonye omokungu oo? 17 Korende Nyasaye buna abagabeire ker'omonto buna amorangeirie ker'omonto, tiga agende boigo. Naboigo nachigete ase chikanisa chionsi. 18 Mont'onde bwonsi orangerigwe nere otiekire kwaroka? tekora buna tarogeti? Mont'onde orangerigwe tarogeti? taroka. 19 Okwaroka tai gento, nogotaroka tai gento; korende nokoyabwata amachiko a Nyasaye. 20 Ker'omonto tiga aikaranse as'aria arenge naro gakorangerigwa. 4 21 Inee, kwarangeretigwe kore omosomba? torora ng'a mbobe: korende koranyare gosiborwa, mbuya obe bo. 22 Naki oyorangeretigwe as'Omonene karenge omosomba, nomosiborwa as'Omonene: naboigo noyorangeretigwe osiboire, nomosomba o Kristo. 23 Mokagorua ase rigori: timoba abasomba b'abanto. 24 Ker'omonto, baminto, tiga aikaranse boigo buna arangeretigwe. 25 As'amang'ana abaiseke abekungi tindi namachiko as'Omonene: korende nabaeire ayane, buna oyonyorire okwaberwa korwa as'Omonene koba omwegeni. 26 Narorire ng'a ring'ana eri nerigiya as'engecho y'emechando eye tore nero, ng'a mbuya omonto aikaranse buna are. 27 Gwasibirwe as'omokungu? torigia gosiborwa. Gogwasiboirwe? torigia omokungu. 28 Korende, koranyuome, tori nabibe; nomoiseke omwekungi okonyuomwa, tari nebibe. Korende abanto abwo nababe nemechando as'omobere: korende nindigetie kobatanga as'eyio. 29 Korende, natebire iga, baminto, ekero getigarete tai kenene; gaki korwa bono baria bare nabakungu tiga babe buna tibabwati; 30 na baria bakorera buna tibari korera; na baria bakogoka buna tibagogeti; na baria bakogora babe buna tibari nagento. 31 Na baria bamenyete enseye, babe buna batayerengereretie mono; naki amang'ana enseye ngoetare. 32 Korende nindigetie ng'a timoba nogwechanda. Oyotaranyuoma igarengereretie amang'ana Omonene, buna aramogwenere Omonene; 33 korende oyonyuomire igakorengereria amang'ana enseye, buna aramogwenere mokaye. 34 Naende ogwatananeka nkore egati y'omokungu nomoiseke omwekungi. Ere oyotaranyuomwa igakorengereria amang'ana Omonene, anyare koba omochenu as'omobere nas'emoika: korende oyonyuomirwe igakorengereria amang'ana ense, buna aramogwenere omosacha oye. 35 Natebire aya, as'okobakonya: tari buna iga nabategera obeto, nas'engecho ya biria bigwenerete, monyare komokorera Omonene motang'usiri namang'ana ande; 36 korende omonto onde bwonsi kararore ng'a tamokorereti omoiseke omwekungi ayamogwenerete, na onye oeteire obuya bw'obwana bwaye, onye origetie, tiga akore buna aroche; takoreti bibe; tiga banyuomane. 37 Korende oyotenenire as'oboremu bw'omoyo oye, tari nokorigia, korende onyarire kogambera ebirengererio biaye, naende orengereirie omoyo oye komorenda omoiseke omwekungi oye, nakore buya. 38 Gaki oyomonyuomire omoiseke omwekungi okorire buya; noyotamonyuometi okorire buya kobua. 39 Omokungu igasibire ekero omosacha oye are moyo, korende omosacha oye gakure, osiboirwe; nanyare konyuomwa nomonto onde bwonsi oyomorigeti; ko as'Omonene oka. 40 Korende anga mbuya kobua karaikaranse buna are; igo nabo ndoche inche: nainche narengereirie ng'a ninde n'Omoika bw'Omonene.
1 Nas'amang'ana ebinto bikorugwa ekeng'wanso as'esanamu: Twamanyire ng'a intwe intwensi ntore nobong'aini. Obong'aini iga bokoreta oboenenu, korende obwanchani iga bokoagacha. 2 Omonto karakage ng'a namanyete ring'ana rinde rionsi, taramanya nonya mbono, buna amogwenerete amanye. 3 Korende omonto karamwanche Nyasaye, oyo omanyirwe nere. 4 Gaki as'amang'ana okoria ebinto bikorugwa ekeng'wanso as'esanamu, twamanyire ng'a esanamu tai gento as'ense, naende twamanyire ng'a Nyasaye onde tari ande otatiga oyomo bweka. 5 Gaki nonya bare abande bakorokwa chinyasaye, kobarabe igoro gose ense, buna bare chinyasaye chinyinge, nabanene abange; 6 korende asetore intwe nare Nyasaye oyomo bweka, ore Tata, nebinto bionsi biarure asare, naintwe iga tore moyo asare; nare Omonene oyomo Yesu Kristo, nas'engecho yaye nebinto bionsi biabaire, naintwe ntore moyo asare. 7 Korende obong'aini obo tibori ime as'abanto bonsi: korende abande as'okwenaria esanamu eria goika bono, baria buna egento kiarurue ekeng'wanso ase esanamu; nokorengereria kwabo, ekiagera iga kore okoreu, kwabekwa eubi. 8 Korende enyama tegotoreta ang'e ase Nyasaye: ekiagera gatorarie tegotomenta gento, natotaria tegotokeyia gento. 9 Korende rigereria okonyara kwaino tigocha kobagocha baria bare abareu. 10 Naki omonto karakorore aye omanyete chingecho, goikaransete as'endagera ime ase hekalu y'esanamu, inee, ebirengererio bi'omonto oyo, kare omoreu, takonyora oboremu goika arie ebinto bikorugwa ekeng'wanso as'esanamu? 11 Noria omoreu osirigwa as'engecho yao, nere noyomino Kristo akwete as'engecho yaye. 12 As'ayio komorabakorere ebibe abamino nagosaria ebirengererio biabo bire ebireu, mwakoreire Kristo ebibe. 13 As'ayio enyama kerabe nokogocha oyominto tinkoria enyama goika kare nakare, timbaisa komogocha oyominto.
1 Inee, inche tindi omotomwa? inche tindi omosiborwa? timorochi Yesu Kristo Omonene oito? inwe tari emeremo yane as'Omonene? 2 Naki onye inche tindi omotomwa as'abande, korende nomotomwa asemore inwe: naki ekemanyererio ki'obotomwa bwane, ninwe as'Omonene. 3 Okoiraneria kwane baria bakomboria noko. 4 Inee! titori nokobua gw'okoria nakonywa? 5 Titori nokobua kobogoria amo naintwe omokungu ore oyominto, buna abwo abatomwa bande, nabamwabo Omonene, na Kefa? 6 Gose inee, ninche bweka na Barnaba totari nokobua gokora emeremo? 7 Ning'o okogenda esegi kero kende gionsi as'eng'eria yaye omonyene? ning'o osimekire omogondo bw'emesabibu otarie amatunda aye? gose ning'o okorisia riicho, otakonywa amabere aye riicho? 8 Inee, iga nakwanire aya buna mwanyabanto? gose amachiko naro tari goteba boigo? 9 Naki as'amachiko a Musa narikire, tobaisa kobeka eng'ombe ekeokio ekero chigotindacha engano as'okoora. Inee, Nyasaye narengereretie amang'ana aye chiombe? 10 Gose otebire ayio as'engecho yaito? Ee, igarikire as'engecho yaito: buna oyokorema nagwenerete korema as'ogosemeria; nere oyokoora igakoora ogosemeria kwaye konyora ensemo y'ogosemeria kwaye. 11 Onye intwe twabasimekeire ebinto bi'omoika inee! nering'ana rinene gatoragese ebinto biaino bi'omobere? 12 Onye abande babwatanire okobua oko igoro asemore, intwe tari kobua? Korende titorigokorera okobua oko; korende iga tokoremereria amang'ana onsi, titobaisa gotanga enchili ya Kristo. 13 Timomanyeti ng'a baria bagokora emeremo ye hekalu iga bakoria ensemo y'ebinto bie hekalu, na baria bagokorera amathabau mbare nensemo yabo as'ebimo bi'amathabau? 14 N'Omonene naboigo ochikire ng'a baria bakoyerandia enchili banyora korwa enchili. 15 Korende tindakorera amang'ana aya nonya ndimo. Gose tinyarigeti aya erinde abe boigo asende; naki mbuya ninkwa kobua omonto onde bwonsi goonchora okobaka kwane kobe bosa. 16 Naki nonya nkorandia enchili, tindi neri ingwetogeria; naki tindi nande goika nkore; naende obobe nobwane ntayerandeti. 17 Naki kondakore emeremo eye as'ogwancha kwane, ninde neng'eria; onye tari as'ogwancha kwane, korende negenirwe as'oborendi. 18 Gaki eng'eria yane inki? Neye, ng'a gonkorandia nindue enchili ya Kristo eng'eria etaiyo, erinde nintasaba oboronge bwane inde naborobwo as'enchili. 19 Naki nonya inde nsiboire as'abanto bonsi, nekorire omosomba o bonsi, erinde nyore abanto abange kobua. 20 Narenge Omoyahudi as'Abayahudi, erinde mbanyore Abayahudi; ase baria bare inse as'amachiko, narenge buna inse as'amachiko, erinde mbanyore baria bare inse as'amachiko. 21 Ase baria batari namachiko nkaba buna tindi namachiko. Tari buna tindi namachiko as'obosio bwa Nyasaye, korende oyore inse as'amachiko ase Kristo, erinde mbanyore abatari namachiko. 22 As'abareu nkaba omoreu, erinde mbanyore abareu. Iga narenge chinsemo chionsi chi'abanto bonsi, erinde inyare kobakonya abanto ase chinchera chionsi. 23 Nainche iga ngokora aya onsi as'engecho y'enchili inyare koba amo nabande. 24 Timomanyeti ng'a abwo bakoamererania as'okominyoka chimbero, baminyoka bonsi korende noyomo okonyora ekeegwa? Minyoka boigo, erinde monyore. 25 Na kera oyokoamererania ase chigosori igagwetanga as'onsi. Nabo abwo bagokora bo, erinde banyore egutwa egosareka; korende intwe neyetagosareka. 26 Nonya ninche nkominyokande chimbero boigo, tari buna oyogotiting'ara; naboigo nkorwana tari buna oyokorwana nembeo. 27 Korende igankoyoaka omobere one nakoyokoria; teba as'enchera ende yonsi konarandeirie abande, inche omonyene mbe omonto okwangwa.
1 Baminto tindigeti momoche koinyora ng'a abatata baito bonsi iga barenge inse as'amare, bonsi bagaeta egati y'enyancha; 2 bonsi bakabatiswa ase Musa as'amare nas'enyancha; 3 bonsi bakaria endagera eria, eria y'omoika; 4 bonsi bakanywa okonywa koria koria kw'omoika: naki bakanywa as'egetare ki'omoika kiabatunyanete: negetare keria nakio Kristo. 5 Korende abare abange Nyasaye tagweneretwe nabarabwo: naki basiretigwe as'eroro. 6 Aya igarenge ebiorokererio asetore, erinde intwe titoba abanto b'okorengereria amabe, buna baria barengereretie. 7 Gose timoba abasabi esanamu, buna abande babo; buna arikire, Abanto igabaikaransete koria nakonywa, bagatenena kogosoria. 8 Gose titokora obotomani, buna abande babo bakorete, bakagwa ekero kie rituko erimo abanto chilifu emerongo ebere naisato. 9 Gose titomotema Omonene, buna abande babo, bamotemete, bagasirigwa neng'iti. 10 Gose timokwemurungania buna abande babo bemurunganetie, bagasirigwa noria omoiti. 11 Aya akabanyora abwo, as'engecho y'ebiorokererio; akarikwa erinde gotokania intwe, abwo togoikerwa nomoerio bw'ense. 12 Gaki oyogwekaga ng'a nateneine arigereria tagwa. 13 Ogotemwa tikwabanyorete inwe, tatiga koreng'ana buna okwa mwanyabanto baranyare koremereria: korende Nyasaye noyo bw'ekeene, takobatiga motemwe kobua oko moranyare; korende amo nakoria ogotemwa nakore egesieri mogosokera erinde monyare koremereria. 14 As'engecho y'ayio, abanchani bane, tama ogosasima esanamu. 15 Iga ngokwana buna as'abanto bare nobong'aini; moyarenge aya ngokwana. 16 Egekombe keria ki'ogosesenia togosesenia, inee tari okobwatana amanyinga a Kristo? Omogati oria togosamunyora tari okobwatana omobere o Kristo? 17 Naki omogati noyomo, naintwe tore abange igatore omobereoyomo; naki intwe twensi tonyora ensemo y'oria omogati oyomo. 18 Barigererie Abaisiraeli abare as'engecho y'omobere: abwo bare koria ekio ekeng'wanso, inee, tibar kobwatana namathabau? 19 Gaki nkwane ki? ng'a esanamu negento? gose ng'a keria gekorugwa ekeng'wanso as'esanamu negento? 20 Taibo, korende ebinto biria bakorua as'Ebisaku, igabakoruera ebirecha, gose tari Nyasaye: nainche tinyancheti inwe kobwatana amo nebirecha. 21 Timokonyara konywera egekombe ki'Omonene, negekombe ki'ebirecha: timokonyara kobwatana as'emesa y'Omonene nas'emesa y'ebirecha. 22 Gose iga torigetie Omonene abe neribero? Gose ntore nechinguru kobua ere? 23 Ebinto bionsi mboronge asende; korende tari ebinto bionsi bigwenerete. Ebinto bionsi mboronge asende; korende tari ebinto bionsi bikoagacha. 24 Omonto tarigia ebiaye, korende ebi'omogisangio. 25 Ker'egento gegotondwa echiro karie, toboraboria as'engecho y'ebirengererio; 26 naki ense ney'Omonene, nabionsi ebichireo. 27 Nomonto otancheti karabarangerie inwe, as'endagera, nainwe morigetie kogenda; karie ker'egento kiabekirwe as'obosio bwaino motari koboraboria as'engecho y'ebirengererio. 28 Korende omonto karabatebie, Egento ekio kiarurwe ekeng'wanso as'esanamu, timoria, as'engecho yaye ere akworokia, nas'engecho y'ebirengererio: 29 nakwanire, ebirengererio, korende tari ebiao, korende nebia oria oyonde; aseki nkogambigwa ogosiborwa kwane nebirengererio bi'omonto omwao? 30 Kondarie ensemo yane as'okoiraneria ng'a mbuya, naseki nkoramwa as'egento nasabeire? 31 Gaki komokoria, gose mokonywa, gose mogokora ring'ana rinde rionsi kora onsi as'obonene bwa Nyasaye. 32 Timogocha Abayahudi gose Abayunani gose ekanisa ya Nyasaye: 33 koreng'ana buna inche nkobagwenera abanto bonsi as'amang'ana onsi, tinarigia kwegwenera inche omonyene, korende okogwenera kwabo bare abange, erinde banyare gokonywa.
1 Mobe abatunyani bane buna inche inde omotunyani o Kristo. 2 Naende nabatogirie baminto as'engecho mwang'inyoire as'amang'ana onsi, nainwe mwayabwatire aria nabaete koreng'ana buna nabaete. 3 Korende nindigetie momanye ng'a omotwe o ker'omonto omosacha noyo Kristo; nomotwe o ker'omokungu noyo bw'omosacha; nomotwe o Kristo noyo Nyasaye. 4 Ker'omosacha, kagosaba, gose okorua obobani, nere nare negento omotwe, tasigeti omotwe oye. 5 Korende ker'omokungu kagosaba, gose okorua obobani, otabiseti omotwe oye, tasigeti omotwe oye: igareng'aine nere oyonachete etukia yaye. 6 Naki omokungu otabiseti tiga agingire: onye nas'obosoku omokungu kogingira etukia yaye gose kogingirwa, abisie. 7 Naki temogwenereti omosacha kobisigwa omotwe, ekiagera nomogwekano nobonene bwa Nyasaye: korende omokungu nobonene bw'omosacha. 8 Ekiagera omosacha tarueti as'omokungu; korende omokungu as'omosacha. 9 Gose omosacha tatongetwe as'engecho y'omokungu; korende omokungu as'engecho y'omosacha. 10 As'ayio nemogwenerete omokungu abe nekemanyererio gie chinguru omotwe oye, as'engecho y'amalaika. 11 Korende omosacha takoba atari nomokungu, gose omokungu otari nomosacha as'Omonene. 12 Naki buna omokungu aruete as'omosacha, naboigo omosacha nere igakoiborwa nomokungu, korende nebinto bionsi igabiruete ase Nyasaye. 13 Egambie inwe abanyene as'emioyo yaino. Inee! nagwenerete omokungu amosabe Nyasaye atabiseti omotwe oye? 14 Inee, ogochika kw'ebitongwa tikori kworokia ng'a omosacha karabe netukia entambe nobosoku asare? 15 Korende omokungu karabe netukia entambe nobonene bwaye: naki oeirwe eria etukia entambe as'okwebisia. 16 Korende omonto onde bwonsi, karigetie koreta amang'ana as'engecho eyio, intwe titori nengecho ende, nonya nase chikanisa chia Nyasaye. 17 Korende as'okobaa amachiko ayio tinkobatogia, ekiagera iga mogosangererekaha tari as'ogokonya korende ase bosa. 18 Naki ritang'ani komogosangerereka as'ekanisa naigure ng'a ogwatananeka nkore asemore; ayande as'ensemo nanchire. 19 Naki nkogwenerete ogwatananeka kobe as'egati yaino, erinde abancheirwe babe maiso marore asemore. 20 Gaki komogosangererekana amo, tegwenereti koria endagera y'Omonene: 21 naki ker'oyomo igagotang'ana ko bogoria endagera yaye as'okoria, oyomo nare nenchara, noyonde otindire. 22 Inee, timori nenyomba y'okoragera nakonywera? gose mwayechaire ekanisa ya Nyasaye nakobasokia abwo batari nagento? Naki ndabatebie? nimbatogie as'aya? tinkobatogia. 23 Naki inche nkanyora as'Omonene ayanabaeire inwe, ng'a Omonene Yesu obotuko boria aruetwe, akabogoria omogati; 24 gatiekire koiraneria ng'a mbuya, agasamunyora, akabora, Oyo noro omobere one ore as'engecho yaino: kora iga as'okong'inyora inche. 25 Naboigo nekio egekombe nyuma as'okoria, akabora, Egekombe eke neki emuma enyia as'amanyinga ane: kora iga ekero mokonywa as'okong'inyora inche. 26 Naki ekero mokoria omogati oyo nakonywera egekombe eke, mwarandirie amakweri Omonene goika achiche. 27 Gaki ker'oyokoria omogati oyo, gose konywera egekombe eke, atagwenereti, nabe nkwenyorerare obobe as 'engecho y'omobere namanyinga Omonene. 28 Korende omonto erenge omonyene, erio arie omogati nakonywera egekombe. 29 Naki oyokoria nakonywa otagwenereti igakoria nakonywa ekina as'omobere oye, as'ogotamanya omobere bw'Omonene. 30 As'engecho eyio mbare abange asemore abareu nabarwaire, nabanto batai bake bararire. 31 Korende gotoregambie buya emioyo yaito anga titwagambigwa. 32 Gotokogambigwa, igatogokanigwa n'Omonene, titobaisa konacherwa ekina amo nense. 33 Gaki, baminto, komogosangerereka as'okoria moganyane. 34 Omonto karabe nenchara arie ase mwaye; timobaisa gosangerereka as'ekina. N'ayio ayatigaire ngocha ninyarosie.
1 As'amang'ana ebiegwa bi'omoika baminto, tindigeti momoche komanya. 2 Mwamanyire ng'a ekero mwarenge ab'Ebisaku iga mware koirwa ase chisanamu chitagokwana, buna mware gotang'anwa. 3 As'ayio nabatebirie, ng'a 'monto onde ogokwana as'Omoika o Nyasaye, ogokwana, Yesu anathema; gose omonto takonyara gokwana, Yesu n'Omonene, otatiga as'Omoika Omochenu. 4 Nkore ogwatananeka kw'ebiegwa, korende Omoika noro oria oria. 5 Nkore ogwatananeka as'ogokora, n'Omonene nere oria oria. 6 Nkore ogwatananeka kw'ogokora emeremo, korende Nyasaye nere oria oria ogokora emeremo yonsi ase bonsi. 7 Korende ker'oyomo oeirwe okomanorerwa kw'Omoika, erinde akonye bonsi. 8 Naki omonto oyomo as'Omoika aegwa ring'ana ri'obong'aini; nonde ring'ana rie chisemi, as'Omoika oyomo: 9 onde okwegena as'Omoika oyomo; nonde okoegwa gw'okogwenia, as'Omoika oyomo; 10 nonde gokora emeremo y'ebikone; nonde obobani; nonde ogwatanana emeika; nonde chingecho chi'emenwa; nonde ogoonchora emenwa. 11 Korende emeremo eye yonsi ekorwa n'Omoika oyo oyomo, oria oria, okogabera ker'oyomo buna anchete ere. 12 Naki buna omobere ore oyomo, noro nore nebimo ebinge, nebimo bionsi bi'omobere oria, nabirobio nebinge; nomobere noyomo; naboigo na Kristo. 13 Naki as'Omoika oyomo intwe intwensi tokabatiswa togasoa as'omobere oyomo, nonye tore Abayahudi, gose tore Abayunani, onye tore abasomba, gose tore abasibore; naintwe intwensi tokanyoisigwa Omoika oyomo. 14 Naki omobere tori ekimo ekemo, korende ebinge. 15 Okogoro gokoratebe, Inche tindi okoboko, gose tindi oyo bw'omobere, inee! iga tikori okw'omobere as'engecho eyio? 16 Nogoto gokoratebe, Inche tindi eriso, inche tindi oyo bw'omobere; inee! tikori okw'omobere as'engecho eyio? 17 Onye omobere bwonsi ore eriso, ng'ai kore okoigwa? Onye bwonsi nogoto ng'ai kore okonyonka? 18 Korende Nyasaye obekire ebimo ker'ekemo as'omobere buna arigetie. 19 Korende onye bionsi bire ekimo ekemo, omobere anga ng'ai ore? 20 Korende bono ebimo nebinge, nomobere noyomo. 21 Neriso tirikonyara gotebia okoboko tinkorigeti aye, gose naende omotwe tokonyara gotebia amagoro, timbarigeti inwe. 22 Korende kobua mono biria ebimo bi'omobere bigokagwa ng'a tibiri nechinguru, iga birigirie kobua. 23 Na biria bigokagwa ng'a tibiri nogosika, ebimo biria twabieire ogosika kobua; nebimo biaito bitari nobuya, mbire nobuya kobua mono. 24 Naki ebimo biaito bire nobuya tibiremeiri: korende Nyasaye obwatanirie omobere, nagokea ogosika keria ekimo kerenieire; 25 erinde tibiba nogwatananeka as'omobere korende ebimo birendane. 26 Nekimo ekemo kogiachandirwe, ebimo bionsi biachandwa nabirobio, nekimo ekemo gekobakwa, ebimo bionsi bigoka amo. 27 Nainwe more omobere o Kristo, nebimo bi'omobere oyio, oyomo eke noyomo eke. 28 Na Nyasaye obekire abande as'ekanisa, abe ritang'ani abatomwa, abakabere ababani, abagatato aborokia, erio ebikone, erio okoegwa gw'okogwenia oborwaire, nogokonyana, nokogamba, nechingecho chi'emenwa. 29 Inee! bonsi nabatomwa, bonsi nababani? bonsi naborokia? bonsi ngokora bare ebikone? 30 Bonsi mbare nokoegwa gw'okogwenia abarwaire? bonsi ngokwanabare emenwa? bonsi ngoonchorabare? 31 Rigia mono ebiegwa ebiya kobua. Naende naborokirie enchera ere engiya mono.
1 Kondakwane as'emenwa ya mwanyabanto neya amalaika, onye tindi nobwanchani, nabaire buna etai ekwoga, gose endege ekobuga. 2 Nimba nobobani, nakomanya obobisi bwonsi, nechisemi chionsi: nimba nokwegena gwonsi koranyare kong'anyia ebitunwa, korende onye tindi nobwanchani tindi gento inche. 3 Naende ningabera abataka ebinto biane bionsi, naende nindwa omobere one oyie omorero, onye tindi nobwanchani tangwereti gento. 4 Obwanchani iga bokoremereria, iga bogokora amaya; obwanchani tibori koba neribero; tiborikoenena, tiborigwetogia, 5 tibokomocha koba nogosika, tibokorigia ayaye, tibori nendamwamu, tibori kobara amabe; 6 tibokogokera obobe, korende bogoka amo nekeene; 7 boremereria onsi, bwancha onsi, bosemeria onsi, bwaremereria onsi. 8 Obwanchani tibokoremerwa: korende koborabe obobani nabosire; kerabe emenwa neere; kochirabe chisemi nachisire. 9 Naki twamanyire as'ensemo, ngokoratore obobani as'ensemo: 10 korende nagecha ekia boronge, ekere as'ensemo nagesire. 11 Ekero narenge omwana omoke, ngakwana buna omwana, nkamanya buna omwana, nkarengereria buna omwana: korwa bono konabaire omonto omonene, nayatigire amang'ana obwana. 12 Naki ekero kia bono igatokorora as'ekerore, buna omogwekano: ekero keria obosio as'obosio: ekero kia bono namanyire as'ensemo; ekero keria nimanye mono, buna namanyekanete nainche mono. 13 Gaki, bono gwatigaire okwegena, ogosemeria, obwanchani, aya atato; erire rinene as'aya nobwanchani.
1 Tunyana obwanchani, rigia mono ebiegwa bi'omoika, korende kobua monyare kobana. 2 Naki oyogokwana as'omonwa, tari gokwana nabanto, korende ase Nyasaye; naki onde tari okoigwa; korende igagokwana amang'ana a bobisi as'omoika. 3 Korende ere oyokobana igagokwana nabanto amang'ana ay'okobaagacha, nakobaremia, nakobabeka chinguru. 4 Oyogokwana as'omonwa igakweagacha omonyene: korende oyokobana igakwaagacha ekanisa. 5 Nainche nindigeti inwe mwensi mokwane as'emenwa, korende kobua mono monyare kobana: naki ere oyokobana nomonene kobua oyogokwana as'emenwa, otatiga as'ogoonchora, erinde ekanisa enyare koagachwa. 6 Gaki, baminto, kondache asemore nagokwana as'emenwa, inki ndabagwenere, otatiga nkwane nainwe as'enchera y'okomanoka, gose as'enchera y'obong'aini, gose as'enchera y'okobana, gose as'enchera y'okworokereria? 7 Nonya nebinto bitari nobogima, buna ekeroria, gose obokano, nabinyare korua eriogi, ko bitakorua eriogi rire ogwatananeka, naki koramanyekane, ngotera ki gokobugigwa as'ekeroria gose as'obokano? 8 Ekiagera egetureri gogekobuga egeturi getamanyekaneti ning'e orabe ang'e as'esegi? 9 Naboigo nainwe motakwaneti oria omonwa ring'ana rire maiso marore, ring'ana riria rigokwanwa naki riramanyekane? naki morabe iga mogokwana as'embeo yoka. 10 Inyora nere emenwa ere chingecho chinyinge ense, gose onde tori nonya noyomo, otari nengecho yaye. 11 Gaki ntamanyeti engecho y'oria omonwa, nimbe asare ere oyogokwana buna omonanageria, nere nabe asende buna omonanageria. 12 Naboigo nainwe, ekiagera morigeti mono koba abanto bare nekeegwa ki'omoika, rigia momente mono koba nakio erinde mwaagache ekanisa. 13 As'ayio ere oyogokwana as'omonwa tiga asabe abe omoonchori. 14 Naki kondasabe as'omonwa, omoika one ig'ogosaba, korende obong'aini bwane tiborikwama. 15 Naki rende? Ninsabe as'omoika, ninsabe as'obong'aini; nintere as'omoika na nintere as'obong'aini. 16 Naki aye gogosesenia as'omoika, ere oyoikaransete otamanyeti naki araitabe Amin as'ogosasima kwao, nere tayamanyeti ay'ogokwana? 17 Naki nekeene, aye gwasasimire buya, korende oria oyonde taagachiri. 18 Namoakeire Nyasaye one ng'a mbuya, ngokwana as'emenwa kobua inwe mwensi: 19 korende nanchire gokwana amang'ana atano as'ekanisa as'obong'aini bwane, nyare koborokereria abande, kobua as'ogokwana amang'ana chilifu ikomi as'omonwa. 20 Baminto, timoba abana abake as'obong'aini bwaino: korende as'obobe mobe buna abana abake, korende as'obong'aini bwaino mobe abanto abanene. 21 Narikire as'amachiko, ng'a, Ninkwane nabanto aba as'abanto b'emenwa emeao, nemenwa y'abageni; nonya niga tibakonyigwera otebire Omonene. 22 Gaki emenwa nekemanyererio tari as'abanchire, korende as'abatancheti. Korende obobani, nekemanyererio tari as'engecho yabwo abatancheti korende as'engecho yabwo banchire. 23 Gaki onye ekanisa yonsi egosangerereka amo, nabonsi bagokwana as'emenwa, erio basoe abanto abariri gose abatancheti, inee, tibagotcha ng'a igamore chibarimo? 24 Korende bonsi barabane, ogosoa omonto otancheti, gose omoriri, omanigwa na bonsi, agambigwa na bonsi; 25 naboigo obobisi bw'enkoro yaye bwaba maiso marore; nabo igaragwe maumama, namosasime Nyasaye, atore ng'a Nyasaye igare gati asemore ekeene. 26 Naki rende abaminto? komogosangerereka amo, ker'oyomo nare nogotera, nare nokworokereria, nare nomonwa, nare nokomanoka, nare nogoonchora. Amang'ana onsi tiga akoreke as'engecho y'okoagacha. 27 Onye omonto ogokwana as'omonwa, bakwane babere gose batato tai kobua, ko ker'omonto ase ribaga riaye; oyomo aonchore: 28 korende atario oyogoonchora tiga akire as'ekanisa; akwane asare bweka omonyene na Nyasaye. 29 Nababani bakwana babere, gose batato, nabande batanane. 30 Korende oyonde oyoikaransete, karaigorerwe ring'ana, oria bwe ritang'ani tiga akire. 31 Naki imwensi ng'a monyare kobana oyomo oyomo, erinde bonsi banyare kweorokereria, na bonsi baremigwe. 32 Nemeika y'ababani ebaigwera ababani. 33 Naki Nyasaye tari Nyasaye bw'eburuburu, korende oyo bw'omorembe; naboigo are ase chikanisa chionsi chi'abachenu. 34 Abakungu bakire ase chikanisa, naki tibari neribaga ri'ogokwana; korende baigwere, buna gogoteba ogochika. 35 Na kobarigeti kweorokereria ring'ana, tiga baborie abasacha babo boka chinyomba chiabo: naki nobosoku, abakungu gokwana as'ekanisa. 36 Inee, ring'ana ria Nyasaye riarure asemore? gose riabaikeire inwe imweka? 37 Omonto karerore ng'a nomobani, gose oyo bw'omoika, tiga ayamanye aya nabarikeire, ng'a namachiko Omonene. 38 Korende omonto karabe omoriri, tiga abe omoriri. 39 As'ayio baminto, rigia mono okobana, gose timokania as'ogokwana emenwa. 40 Amang'ana onsi akoreke as'obuya nokoroberigwa.
1 Nabatebirie, baminto, enchili nabarandeirie; nero mwanyorire, as'eyio nero moteneine, 2 nas'eyio mwakonyirwe; onye mwayabwatire mono amang'ana nabarandeirie; otatiga mwanchete bosa. 3 Naki nkabaranderia amang'ana ayananyorete ritang'ani, ng'a Kristo igakwete as'engecho y'ebibe biaito, buna agoteba amariko; 4 naende ng'a agatindekwa, naende akaboka, rituko ria gatato, buna agoteba amariko; 5 naende akarorekana na Kefa; naende nabaria ikomi nababere; 6 nyuma akarorekana nabaminto kobua chimia isano amo; as'abwo abare abange moyo bare nonya mbono, abande bakure; 7 nyuma, akarorekana na Yakobo, erio as'abatomwa bonsi. 8 Nomoerio bw'abanto bonsi akarorekana nainche, buna naiboretwe tari as'ekero kiaye. 9 Naki inche nomoke as'abatomwa, ntagwenereti gwatorwa omotomwa, ekiagera nachandete ekanisa ya Nyasaye. 10 Korende as'obuya bwa Nyasaye nabaire buna inde; nobuya bwaye bore asende tibwarenge bosa; korende nkamenta mono kobwata emeremo kobua bonsi: korende tari inche, korende obuya bwa Nyasaye obwarenge amo nainche. 11 Gaki onye ninche, onye mbaria, naboigo tokorandia, naboigo mwanchete. 12 Gaki, onye Kristo orandigwe asemore ng'a obokire, naki abande asemore bagoteba ng'a kobokigwa tikori okw'abakure? 13 Korende onye tikori okobokigwa kw'abakure Kristo nere tabogetigwe: 14 naende onye Kristo tabogetigwe, okorandia gwaito mbosa, nokwegena kwaino mbosa. 15 Ee, naintwe twarorekanire ng'a igatore abarori b'oboriino ba Nyasaye, ekiagera twatebire na Nyasaye ng'a igamobogetie Kristo; ere anga tamobogeti, onye abakure tibakobokigwa. 16 Naki onye abakure tibakobokigwa, Kristo nere tabogetigwe. 17 Na onye Kristo tabogetigwe, okwegena kwaino mbosa; igamore nonya mbono as'ebibe biaino. 18 Nagwo abwo nabarabwo abakure ase Kristo basirire. 19 Buna as'obogima obo bwoka tosemeretie Kristo, intwe nabataka kobua abanto bonsi. 20 Korende bono Kristo obokire, buna ogotongorwa kwabo abakure. 21 Naki amakweri akaretwa nomonto, naboigo nokobokigwa gokaretwa nomonto. 22 Ekiagera as'Adamu bonsi bagakwa, naboigo nase Kristo bonsi nababokigwe. 23 Korende ker'oyomo aase aye; agatongora Kristo, nyuma abare abaye Kristo, kagocha. 24 Erio ocha oria omoerio, gakomoa Nyasaye Tata oboruoti,gagoonchora obogambi bwonsi,nokobua gwonsi nechinguru. 25 Naki negwenerete agambe ere, goika abeke ababisa bonsi inse as'amagoro aye. 26 Omobisa bw'omoerio orasirigwe namakweri. 27 Naki, akabeka ebinto bionsi inse as'amagoro aye. Korende ogoteba, Bionsi biabekirwe inse, maiso marore ng'a ere oyobibegete ebinto bionsi, taiyo. 28 Gaki, ebinto bionsi kobiabekirwe inse asare, erio agwo Omwana nere bweka nabekwe inse asare oyo omobekerete ebinto bionsi asare, erinde Nyasaye abe bionsi ase bionsi. 29 Aba bakobatiswa as'engecho y'abakure, naki bagokora gaki, onye abakure tibakoboka? Naseki bakobatiswa as'engecho yabo? 30 Naintwe, naseki tore nemechando ker'ensa? 31 Ekeene as'ogwetogia kwane nde nakwo asemore ase Kristo, Yesu Omonene oito, iga ngokwa kera rituko. 32 Onye, nas'engecho ya mwanyabanto, nkarwana neching'iti chintindi aria Efeso, inki ekongwenera, batarikoboka abakure? torie, tonywe, naki ankio natokwe. 33 Timong'aineka, ogokwana okobe igakogosaria engecho engiya. 34 Boka buna egwenerete as'oboronge, timokora ebibe; naki abande tibamomanyeti Nyasaye: natebire aya as'okobasokia. 35 Gose omonto natebe, naki baraboke abakure? Nas'omobere ki barache noro? 36 Omokayayu! eke ogosimeka aye, tikeri komera getakweti: 37 nero eyogosimeka, torigosimeka omobere oria ogocha koba, korende embusuro yoka, onye nengano gose ende yonsi; 38 korende Nyasaye ayea omobere buna anchete, na ker'embusuro omobere oye. 39 chinyama chionsi tari chinyama echimo; korende echinde chia mwanyabanto, echinde echie ching'iti, echinde echie chinyoni, echinde chie chinswe. 40 Naende nere emebere y'igoro, nemebere y'ense, korende obonene bwaye bw'igoro iga bore ao, nobonene bwaye bw'ense iga bore ao. 41 Obonene bw'erioba mbore ao, nobonene bw'omotienyi iga bore ao, nobonene bwe ching'enang'eni, iga bore ao; naki nkore ogwatananeka okonene ching'enang'eni ase ching'enang'eni. 42 Naboigo nokobokigwa okw'abakure. Osimekwa as'ogosareka, oboka as'ogotasareka. 43 Osimekwa as'obosoku, oboka as'obonene: osimekwa as'oboreu; oboka ase chinguru. 44 Osimekwa omobere bori; oboka omobere bw'omoika. Onye ore omobere bori noyo bw'omoika nore. 45 Naboigo arikire, Omonto bwe ritang'ani Adamu orenge omobere ore moyo. Adamu bw'omoerio akaba omoika bw'okobokia. 46 Korende oria orenge bw'omoika, tari oyo bwe ritang'ani, korende noria omobere bori orenge ritang'ani, nyuma oria bw'omoika. 47 Omonto bwe ritang'ani akarua inse, as'amaroba: omonto okabere akarua igoro. 48 Buna are oyo bw'amaroba, naboigo bare abare ab'amaroba: na buna are ere oyo igoro, naboigo bare ab'igoro. 49 Na buna tobogoretie ekieni kiaye oyo bw'amaroba, naboigo torabogorie ekieni ki'oyo igoro. 50 Aya ngokwana naya, baminto, ng'a omobere namanyinga tibikonyora omwando bw'obonda bwa Nyasaye: gose ogosareka tigokonyora omwando bw'ogotasareka. 51 Rigereria, nabatebirie aya bobisi: Titogokwa intwe twensi, korende twensi natoonchoke; 52 as'etagika eyemo, okojniamia nakoramokia, ekero ki'egetureri ki'omoerio, ekiagera egetureri nakebuge, nabakure nababoke, tibaba nagosareka, naintwe natoonchoke. 53 Naki ogweneire oyosarekire bweboe ogotasareka, noyo bw'ogokwa bweboe ogotakwa. 54 Korende oyosarekire koranyore ogotasareka, noyo bw'ogokwa koranyore ogotakwa, erio naribe riria ring'ana riarigetwe, Amakweri amerirwe as'okobua. 55 Amakweri ng'ai okobua kwao. kore? Amakweri ng'ai obororo bwao bore? 56 Obororo bw'amakweri nebibe, nechinguru chi'ebibe namachiko. 57 Korende mbuya mono ase Nyasaye otoeire okobua as'Omonene oito Yesu Kristo. 58 Gaki, baminto abanchani, mobe nechinguru, motakonyegerigwa, momente mono gokora emeremo y'Omonene amatuko onsi, ekiagera emeremo yaino teri bosa as'Omonene.
1 Bono as'esadaka y'abachenu, buna nachigete chikanisa chia Galatia, nainwe kora boigo. 2 Rituko rie ritang'ani ri'echuma ker'omonto agache emonga asare, koreng'ana buna ogosesenigwa kwaye, erinde esadaka terugwa ekero nachire. 3 Nainche kondaike nintome baria morachore as'amarube, baire obuya bwaino goika Yerusalemu. 4 Onye ngwenerete kogenda inche nabagende amo nainche. 5 Korende ninchiche asemore, ekero naetire egati ya Makedonia; naki ning'ete egati ya Makedonia. 6 Gose nimenye amo nainwe, ee nimenye seino ekero ki'obokendu, monyare gonkoba ekero kende gionsi aase ndigetie kogenda. 7 Naki tindigeti kororana nainwe bono, as'ogoeta gwoka, ekiagera ndigetie komenya seino egeka egeke Omonene karanyanchere. 8 Korende nimenye as'Efeso goika Pentikote; 9 naki naigoreirwe egesieri ekenene kegwenerete mono, mbare abange abagontanga. 10 Korende, Timotheo ogocha, rigereria amenye amo nainwe koiroka gotari; naki ngokorare emeremo y'Omonene buna inche: 11 gaki mont 'onde bwonsi tamochaya, korende mokobe as'omorembe, erinde ache asende, naki nimoganyete amo nabaminto. 12 Korende as'amang'ana Apolo, oyominto, nkamosorora mono achiche asemore amo nabwo baminto; nere tancha rinde gocha bono; korende nachiche karanyore ribaga. 13 Renda, tenena nechinguru as'okwegena, mobe abasacha, mobe abaremu. 14 Amang'ana aino onsi akoreke as'obwanchani. 15 Naende nabasoroire baminto, (mwayemanyire enyomba ya Stefano nentang'ani as'Akaya, nabarabwo bebekire as'emeremo y'okobakorera abachenu), 16 baigwere abanto buna aba, na ker'omonto oyogokonya emeremo amo nabarabwo, nagokora bo. 17 Nainche nagokire ekiagera as'ogocha kwabo Stefano na Fortunato, na Akaiko; naki aba bakamenta as'amange aya naremeirwe korwa asemore. 18 Naki bakandemia omoyo one nemioyo yaino yonsi: gaki bamanye abanto buna abwo. 19 chikanisa chi'Asia babakwanirie, Akula na Priskilla babakwanirie mono as'Omonene amo nekanisa ere ime as'enyomba yabo. 20 Abaminto bonsi babakwanirie. Kwanania as'okonyunyuntana ogochenu. 21 Oko nogokwania kwane inche Paulo as'okoboko kwane omonyene. 22 Mont'onde bwonsi otamwancheti Omonene Yesu Kristo nabe Anathema. Maranatha. 23 Obuya bw'Omonene Yesu Kristo bobe amo nainwe. 24 Ogwancha kwane kobe amo nainwe imwensi ase Kristo Yesu. Amin.
1 Paulo, omotomwa o Yesu Kristo as'obwanchani bwa Nyasaye, na Timotheo oyominto, as'ekanisa ya Nyasaye ere ase Korintho, amo nabachenu bonsi abare as'ense yonsi y'Akaya: 2 Obuya bobe asemore nomorembe, okorua ase Nyasaye Tata oito nas'Omonene Yesu Kristo. 3 Abakwe Nyasaye, Tata bw'Omonene oito Yesu Kristo, Tata bw'amabera, Nyasaye bw'okoremia gwonsi; 4 oyogotoremia as'emechando yaito yonsi erinde tonyare kobaremia baria bare as'emechando ende yonsi, as'okoremia twaremigwe na Nyasaye. 5 Naki buna emechando ya Kristo yamentekanire asetore, naboigo okoremigwa gwaito kwamentekanire as'enchera ya Kristo. 6 Korende onye intwe tore as'emechando, nas'engecho y'okoremigwa kwaino nogotoreka kwaino, gogokora emeremo yaye as'okoremereria emechando eria eria togochandwa naintwe: gose karabe twaremigwe as'engecho y'okoremigwa kwaino nogotoreka kwaino. 7 Nogosemeria gwaito as'engecho yaino iga kore ogokong'u; gatoramanye ng'a naboigo more ababwatani b'eria emechando, naboigo more ababwatani ase koria okoremigwa. 8 Ekiagera twanchete, baminto, momanye amang'ana ay'emechando eria yatonyorete as'Asia, naki togachandwa mono, kobua chinguru chiaito, goika tokerusia moyo koba moyo. 9 Ee, naintwe abanyene iga twarenge nekina ki'amakweri as'emioyo yaito, erinde titwesemeria emebere yaito, korende Nyasaye, okobabokia abakure: 10 agatokonya intwe namakweri amanene are buna aria, naende natokonye: asare twamosemeirie ng'a nonya mbono natokonye. 11 Inwe nainwe komorakonyane as'engecho yaito as'ogosaba; erinde as'engecho ya biria ebiegwa twaeirwe intwe as'emeremo y'abanto abange, abanto abange baake ng'a mbuya mono as'engecho yaito. 12 Naki ogwetogia gwaito noko, nas'oborori bw'ebirengererio biaito, ng'a as'obochenu noborabu bw'omoyo okorua ase Nyasaye, tari ase chisemi chi'omobere, korende as'obuya bwa Nyasaye, iga twagendete as'ense, korende kobua asemore inwe. 13 Naki titobarikereti inwe ring'ana, tatiga aria mogosoma, nakomanya, nainche nasemeirie ng'a namoyamanye goika omoerio: 14 naboigo buna mwatomanyete as'ensemo, ng'a intwe iga tore ogwetogia kwaino, buna inwe more asetore intwe, ase rituko riria ri'Omonene Yesu. 15 Nas'ogosemeria okwo, nkarigia gocha asemore agwo ritang'ani, erinde monyore ekeegwa gia kabere; 16 na goeta seino nakogenderera goika Makedonia; naende korwa Makedonia koiranera seino, namonkobe inwe kogenda Boyahudi. 17 Gaki, ekero narengereretie aya nakorerete ensara kabere? gose nare korosia amang'ana, iganarosetie as'engecho y'omobere erinde abe iga asende, goteba ee, ee, gose taibo, taibo? 18 Korende buna Nyasaye are oyo bw'ekeene ring'ana riaito asemore tiriarenge ee gose taibo. 19 Naki Omwana o Nyasaye, Yesu Kristo, orandetigwe naintwe gati yaino, nainche na Silivano na Timotheo, tabete ee gose taibo; korende as'ere ee ekanyara kobao. 20 Naki chiira chionsi chia Nyasaye igachire asare ee; nas'ere n'Amina, Nyasaye anyare kobakwa as'emeremo yaito. 21 Gaki Nyasaye oyotokong'irie amo nainwe ase Kristo, nagotobeka amaguta; 22 nere nere otobekerete ekemanyererio, agatoa eira y'Omoika ase chinkoro chiaito. 23 Korende inche iga nkorigia Nyasaye abe omorori igoro as'omoyo one, ng'a as'okobarorera amabera tindagenda Korintho. 24 Tari ng'a ntore nobonene as'okwegena kwaino; korende iga tore abakonyi b'bmogoko oino: ekiagera moteneine as'okwegena,
1 Korende nkarengereria iga as'omoyo one, tinchicha seino naende as'ogoichana. 2 Naki inche kondababeke ogoichana, gaki ning'o orangokie, tatiga oria naichanirie inche? 3 Nainche nabarikerete ring'ana eri eri, erinde ngocha timbekwa ogoichana na baria ngwenerete kobagokera; nasemeretie inwe mwensi ng'a omogoko one ng'a noyoino mwensi pi, 4 Naki as'emechando emenge nas'obororo bw'enkoro iganabarikerete nakorua amariga amange; tari ng'a moichanigwe, korende monyare komanya obwanchani bwane inde nabwo asemore buna bore obonge. 5 Korende onye ore omonto oretire ogoichana, tang'ichaneti inche, korende as'ensemo yaino mwensi, tincha kobararereria mwensi. 6 Amoisanire omonto ore engecho buna eye, obororo boria aetwe nabare abange; 7 korwa nyuma as'aya, mbuya momwabere nakomoremia omonto buna oyo, tabaisa kobekwa as'ogoichana goetete ekerengo. 8 As'ayio nabasoroire momworokie obwanchani bwaino. 9 Naki nkarika as'engecho eye boigo, erinde mbateme inwe komanya onye mwabaire abaigweri as'amang'ana onsi. 10 Naki buna moramwabere omonto rinde rionsi, nainche nanyare kwabera boigo: naki nainche eki nabeire omonto, ring'ana rinde rionsi, namwabeire as'engecho yaino as'obosio bwa Kristo; 11 Saitani tabaisa konyara gotobua; naki intwe titori abariri, as'okorengereria kwaye. 12 Gaki ekero naigete Troa as'engecho y'enchili ya Kristo, nkaigorerwa egesieri as'Omonene, 13 tinanyora omogoko as'omoyo one, ekiagera tinamoroche Tito oyominto, korende nkabatebia morare buya, nkaimoka nkagenda Makedonia. 14 Nyasaye tiga abakwe, ere oyogotoa okobua botambe ase Kristo, oyokoorokia ogotioka okuya gwe chisemi chiaye ker'aase as'emeremo yaito. 15 Naki intwe igatore ogotioka okuya gwa Kristo as'obosio bwa Nyasaye, as'abwo bagokonywa, nas'abwo bagosira; 16 as'abwo ogotioka okuya kw'amakweri abo abakogenda goika amakweri; as'abwo abande ogotioka kw'obogima abwo bakogenda goika obogima. Ning'o oraisane as'amang'ana aya? 17 Naki intwe tari buna abange, bagosaria ring'ana ria Nyasaye: korende buna abanto bagokwana as'oborabu bw'omoyo, buna abanto batomire na Nyasaye, as'obosio bwa Nyasaye, iga togokwana ase Kristo.
1 Korende twachakire, naende gwetogia abanyene? gose ntorigetie buna abande, amarube are nogotogigwa gwaito asemore, gose ayakorua asemore? 2 Rirube riaito ninwe, ririkire ase chinkoro chiaito, rimanyekanete nagosomwa nabanto bonsi; 3 mwaorokigwe ng'a mwabaire rirube ria Kristo, erire emeremo y'ogokora gwaito, eririkire tari as'ewino, korende as'Omoika o Nyasaye ore moyo; tari ase chibao chi'amagena, korende ase chibao chie chinkoro chi'omobere. 4 Nas'ogosemeria okwo tore nakwo as'obosio bwa Nyasaye ase Kristo: 5 tai ng'a twaisanire intwe abanyene, korengereria ring'ana rinde rionsi ng'a neriaito abanyene; korende ogoisanera gwaito iga koruete ase Nyasaye; 6 oyotoisaneirie as'okoba abakori b'emuma enyia; tari ase ririko, korende as'omoika; naki ririko iga rigoita, korende omoika orua obogima. 7 Gaki gokorabe ogokora kw'amakweri as'amariko, ayarikire as'amagena, agacha as'obonene, goika abana ba Isiraeli tibanyarete korigereria namaiso obosio bwa Musa, as'engecho y'obonene bw'obosio bwaye; nobwo obonene bwarenge gosira; 8 Inee! ogokora kw'omoika tigokomenta koba as'obonene? 9 Naki gokorabe ogokora gw'ekina nkore nobonene, ogokora kw'oboronge mbore nobonene kobua mono. 10 Naki koria kobakire tikware nobonene as'engecho eye, as'engecho y'obonene kobua mono, 11 Ekiagera, koborabe boria boetete mbwarenge nobonene bwaye, kobua mono boria boreo mbore nobonene bwa botambe. 12 Gaki ekiagera ntore nogosemeria kore buna oko, igatogokorera oboremu obonge gatogokwana. 13 Naintwe titori buna Musa obegete egetambaa gotuba obosio bwaye, erinde abana b'Isiraeli tibarigereria mono omoerio bw'oria orenge ogoeta: 14 amo nayio okorengereria kwabo gokabekwa obokong'u: ekiagera nonya ngoika rero egetambaa ekio ekio, ekero egosomwa emuma enkoro, keba tigekorusigwa; ekiagera kiarusigwe ase Kristo; 15 korende nonya ndero, Musa gagosomwa, egetambaa ngeikaransete ase chinkoro chiabo. 16 Korende ekero gionsi bakomoonchokera Omonene, nakeria egetambaa iga gekorusigwa. 17 Gaki Omonene nere Omoika oyio; korendeas'ore Omoika bw'Omonene, agwo naoogosibora kore. 18 Korende intwe ntwensi as'obosio botabekiri egetambaa, gotokoborigereria obonene bw'Omonene, buna as'ekerore, igatokoonchorwa na kogwekanigwa nomogwekano oyio oyio, korwa as'obonene goika as'obonene, buna as'obonene bokorua as'Omonene oyore Omoika.
1 As'ayio ekiagera ntore nobosomba obo, buna twabeirwe, titokwa emioyo: 2 korende twangire amang'ana obosoku ayabisegete, gose titorikogenda as'obong'ainereria, gose korisang'ania ring'ana ria Nyasaye noborimo; korende as'okoorokia ayare ay'ekeene tweorokirie ng'a ntore nekeene, as'ebirengererio bi'abanto bonsi as'obosio bwa Nyasaye. 3 Nonya nenchili yaito yabisekanete, iga yabisekanire as'abwo bagosira: 4 as'ayio nyasaye bw'ense eye obamumekeirie obong'aini bw'abwo abatancheti, ng'a tobaikera omobaso bw'enchili y'obonene bwaye Kristo oyore ekieni kiaye Nyasaye, 5 naki titori kweranderia abanyene, korende Kristo Yesu Omonene; naintwe abanyene buna abasomba baino as'engecho ya Kristo. 6 Ekiagera Nyasaye, agateba, Omobaso nobare korwa omosunte, nere obarete ase chinkoro chiaito, gotoa omobaso bwe chisemi chi'obonene bwa Nyasaye as'obosio bwa Yesu Kristo. 7 Korende ntore nobotenenku obo as'ebinto bi'amaroba, erinde okobua okonene gwe chinguru kobe okwa Nyasaye, korende tari ogwaito intwe. 8 chinsemo chionsi iga tokomigwa, korende titokomigeka; iga togoichanigwa, korende titogokwa emioyo; 9 igatogochandwa, korende titorigotigwa; iga tokoakwa inse, korende titorigosirigwa; 10 amatuko onsi iga tokobogoria omobere bw'ogoitwa kwaye Yesu, erinde obogima bwa Yesu naborobwo boorokigwe as'emebere yaito. 11 Naki intwe abatore moyo amatuko onsi twarurue tokwe as'engecho ya Yesu, erinde obogima bwa Yesu boorokigwe as'emebere yaito, ekonyorwa namakweri, 12 Gaki amakweri iga agokora emeremo yaye ime yaito, korende obogima ime yaino. 13 Korende ekiagera ntore nomoika oria oria bw'okwegena, buna arikire, Negenete, nas'engecho eyio ngakwana; intwe naintwe twegenire, nas'engecho eye iga togokwana; 14 twamanyire buna ere oyomobogetie Omonene Yesu natobokie naintwe amo na Yesu, nagotoorokia amo nainwe. 15 Naki amang'ana onsi nas'engecho yaino, erinde obuya obwo bomentwe mono as'abwo abange, okoaka mbuya mono komentwe, Nyasaye abakwe. 16 As'ayio titogokwa emioyo; korende nonya omonto oito o isiko ogosarigwa, korende omonto oito oime akorwe oboyia rituko ase rituko. 17 Naki emechando yaito nemegusu, eyere y'ekero egeke gioka, egotokorera obonene bwa kare nakare obore obonge mono kobua; 18 titobirigereria ebikororekana, korende ebitakororekana: naki ebikororekana nebi'ekero egeke gioka; korende ebitakororekana nebia kare nakare.
1 Naki twamanyire ng'a enyomba y'obomenyo bwaito eyere as'ense kerasarigwe, ntore nokoagacha koruete ase Nyasaye, enyomba etakoriri as'amaboko, eyere ya kare nakare as'igoro. 2 Naki naintwe as'aya iga togwechanda, tokorengereria mono tobekwe okweboyia konde, nakwb obomenyo bwaito bokorwa igoro; 3 kerabe twabekirwe titokororekana tore bosa. 4 Naki intwe abatore as'obomenyo obo iga togwechanda, tokorarererigwa; tari ng'a iga torigetie korusigwa, korende nokoboyigwa konde, erinde egekonyorwa namakweri kemerwe nobogima. 5 Gaki ere oyotokorete as'engecho ye ring'ana eri Nyasaye, oyotoete ekebwaterero ki'Omoika buna as'eira. 6 Gaki amatuko onsi ntore nomoyo omoremu, naende twamanyire ng'a ekero tore aa as'omobere, iga toikaransete are as'Omonene. 7 (Ekiagera iga tokogenda as'okwegena, tari as'okorora.) 8 Korende ntore nomoyo omoremu; natwarorire buya kobua korua as'omobere nakomenya amo n'Omonene. 9 As'ayio, naende, onye tore aa, gose onye titori aa, twerosie komogwenera ere. 10 Naki netogwenerete intwe intwensi koorokigwa as'obosio bw'ekerogo gi'ekina gia Kristo; erio ker'omonto anyore koreng'ana buna are gokora as'omobere, onye bire ebiya gose ebire ebibe. 11 Nabo gatoramanye okoiroka kw'Omonene, twabang'usire mwanyabanto; korende kwaorokigwe as'obosio bwa Nyasaye. Nainche nasemeirie ng'a twaorokigwe ime as'ebirengererio biaino mwensi. 12 Ekiagera titokwebaka abanyene as'obosio bwaino eria kabere, korende twabaire ribaga ri'okwebaka as'engecho yaito, erio monyare koba nakwo as'obosio bwabo as'abakwebaka as'amang'ana ay'isiko oka, gose tari as'amang'ana enkoro ime. 13 Naki onye twasirerigwe nobong'aini bwaito obogima, nas'engecho ya Nyasaye; ao gose onye ntore nobong'aini bwaito obogima, nas'engecho yaino. 14 Naki obwanchani bwa Kristo bwatobetereirie; ekiagera twanachire iga, ng'a onye oyomo okure as'engecho ya bonsi, nabo bakure Bonsi; 15 naende agakwa as'engecho ya bonsi, erio abare moyo tibaba moyo asebare boka abanyene, korende as'engecho yaye ere oyokwete akaboka as'engecho yabo. 16 Goika yabaire, intwe korwa bono titomomanyeti onde'bwensi as'engecho y'omobere, tatiga intwe twamomanyire Kristo as'engecho y'omobere, korende bono titokomomanya iga naende. 17 As'ayio omonto karabe ime ase Kristo negetongwa ekeyia; ebia kare biaetire; rora, bionsi biabaire ebiyia. 18 Korende bionsi bikorua ase Nyasaye, oyotobwatanirie intwe nomobere oye ase Kristo, nere otoeire obosomba bw'okobwatania; 19 ekiagera, Nyasaye arenge ime ase Kristo, akayebwatania ense nomobere oye, tababarera okomocha kwabo, nere obekire asetore ring'ana ri'okobwatania. 20 Nabo tore abagai ase Kristo, buna Nyasaye okobasorora as'emenwa yaito: twabasabeire as'engecho ya Kristo mobwatanigwe na Nyasaye. 21 Ekiagera omokorire ere otamanyeti ebibe koba ebibe asetore, erio intwe tobe noboronge ase Nyasaye asere.
1 Naintwe gatogokora emeremo amo nere twabasoroire timobwata obuya bwa Nyasaye bosa, 2 (naki otebire, Ekero giancheire nakoigwete, Rituko ri'ogotoreka nagokonyete: rora, bono nario ekero giancheire mono; rora, bono nario rituko ri'ogotoreka): 3 titoba nekegocha asebare, ase ring'ana rinde rionsi, obosomba bwaito tibwomanigwa; 4 korende ase kera ring'ana twenyorere ogotogigwa okuya, buna abasomba ba Nyasaye, as'okoganya okonge, as'emechando, as'okoremerwa, as'ogochandwa, 5 as'okoakwa, as'ogosibwa, as'eriomana, us'emeremo, as'okorenda, as'okweng'ata; 6 as'okoba omochenu, as'obong'aini, as'okoremereria, as'obuya, as'Omoika Omochenu, as'obwanchani botari nobong'ainereria. 7 Ase ring'ana ri'ekeene, ase chinguru chia Nyasaye; as'ebinto bi'esegi bi'oboronge bi'okoboko gw'okorio, nebi'okoboko gw'okobee. 8 As'obonene, nobosoku, as'ogotebwa bobe nas'ogotebwa buya; buna bakong'aina, korende nabanto b'ekeene; 9 buna abatamanyegeti, korende abamanyegete mono; buna abakure, na rora, moyo tore; buna abagosusurwa, korende abatagoitwa; to buna abare nomoichano, korende amatuko onsi abanyene omogoko; buna abataka, korende twatenenkire nebinge; buna abatari nagento, korende abanyene ebinto bionsi. 11 Emenwa yaito yabamanokeire inwe, Abakorintho, chinkoro chiaito chiagareyigwe. 12 Timogotigerigwa ime asetore, korende iga mogotigerigwa as'ebirengererio biaino. 13 Nabo, erio moe koreng'ana ekerengo keria keria mwaetwe, nakwanire nainwe buna abana bane, mogareyigwe nainwe chinkoro chiaino. 14 Timosiberanigwa rikorogoto amo nabatancheti: naki nkobwatana ki kore gati as'oboronge nogosaria? naende nkobwatana ki kore gati as'omobaso nomosunte? 15 Naende nkobwatana ki gati ase Kristo na Belial? gose oyobwanchete nare nensemo ki amo noyotancheti? 16 Naende nkobwatana ki ase hekalu ya Nyasaye nechisanamu? naki inwe ne hekalu ya Nyasaye ore moyo; buna Nyasaye atebete, Nimenye ime yabo, naime asebare nintare, ninche nimbe Nyasaye obo, nabarabwo nababe abanto bane. 17 As'ayio, Soka korwa egati yabo, mwatananwe nabarabwo, otebire Omonene, Gose timokuna egento ki'eubi; Nainche nimbarosie, 18 Nimbe Iso asemore, Nainwe namobe asende abana abamura, nabaiseke, otebire Omonene Omobui.
1 Nabo, ekiagera tore nechiira echio, abanchani, twesibie emebere yaito eubi yonsi y'omobere nomoyo, toikeranie obochenu as'ogosika Nyasaye. 2 Toigorere chinkoro chiaino; titomokorereti obobe omonto, titomosareti omonto, titomorieti omonto kiaboama. 3 Tintebeti ring'ana eri erinde mbagambie inwe; naki natang'anire goteba ng'a inwe iga more ase chinkoro chiaito goika ogokwa amo, na koba moyo amo. 4 Ninde noboremu obonge kongokwana nainwe, ogwetogia kwane asemore nokonge: naichoirwe nokoremigwa, as'ogochandwa gwaito gwonsi naichoirwe omogoko goeta ekerengo. 5 Naki togachia koba ngoikatore Makedonia, emebere yaito tiyanyorete ogotimoka, korende togachandwa chinsemo chionsi; isiko ekaba esegi, ime okoiroka. 6 Korende Nyasaye, omonyene okobaremia abaichani, agatoremia as'ogocha kwaye Tito. 7 Gose tari as'ogocha kwaye gwoka, korende ase koria okoremigwa aremetigwe nainwe, agatotebia amang'ana okogania kwaino, nokweng'ereria kwaino, nomokia oino asende, goika nkamenta kogoka. 8 Naki nonya nabaichanetie ase rirube riria tingweitia, nonya neitetie; ekiagera narorire ng'a rirube riria ndiabaichanetie, korende nas'ekero. 9 Bono nagokire, tari ekiagera mogaichanigwa, korende ekiagera mwaichanetigwe goika mogaonchoka; naki mwaichanetigwe as'obosio bwa Nyasaye, timonyora ogosira as'ogokora gwaito ase ring'ana rionsi. 10 Naki ogoichana kore as'obosio bwa Nyasaye iga gogokora okoonchoka gokoreta ogotoreka gotari nagweitia: korende ogoichana gw'ense iga gogokora amakweri. 11 Ekiagera, rora ogoichanigwa okwo as'obosio bwa Nyasaye iga gwakora omokia ore naki ime asemore, ee, nagwekwanera, ee, nokobea, ee, nokoiroka, ee, amaiga, ee, nogwekong'ia, ee, negesiomba! Ase ker'enchera mweorokererie koba abachenu ase ring'ana erio. 12 Nabo, nonya nabarikera, tindigeti as'engecho yaye ere okorete bobe, gose tari asere oyokoreretwe bobe, korende as'amaiga aino asetore anyare koorokigwa asemore as'obosio bwa Nyasaye. 13 As'ayio tokaremigwa: nas'okoremigwa gwaito tokagoka mono kobua ekerengo ekiagera as'omogoko o Tito; ekiagera omoyo oye otimokigwe nainwe mwensi. 14 Naki, onye ngwetogia asare as'engecho yaino, tinasogetigwe; korende buna twabatebia amang'ana onsi as'ekeene, naboigo nogwetogia gwaito, ase Tito iga kwarenge gw'ekeene. 15 Nobwanchani bwaye bw'omoyo asemore bwabaire obonge kobua ekerengo, gakoinyora okoigwera kwaino inwe imwensi, buna mwamoroisetie as'okoiroka nokoiguswa. 16 Nagokire, ekiagera ase kera ring'ana ninde nomoyo omoremu as'engecho yaino.
1 Naende rwabatebirie inwe, abaminto, amang'ana ay'obuya bwa Nyasaye, bwaetwe chikanisa chia Mekedonia; 2 ekero barenge bagotemwa as'emechando emenge, obonge bw'omogoko obo nobotaka bwabo bokaba obonge, bokabamentera obonda bw'okorua kwabo. 3 Naki as'okobua kwabo, nabaire kirori, ee, naende as'ogoeta okobua kwabo, bakarua as'omoyo bw'ogwancha. 4 As'okorigia kwabo abanyene bakarua ebinto biabo; bagatosaba amo nagotosorora tobwate obuya obo, nakobwatana nabarabwo agwo kobakorera abachenu. 5 Naende bagakora iga, tari buna twasemereti, korende ritang'ani bakerua abanyene as'Omonene; erio bagatoa naintwe, as'obwanchani bwa Nyasaye, 6 goika tokamosaba Tito kobaisaneria obuya obo buna abochagete. 7 Korende buna more nobonge bw'ebinto bionsi, okwegena, nogwatoka, nobong'aini, nomokia bwonsi, nobwanchani bwaino asetore intwe: nabo, mobe nobonge bw'obuya obo bwonsi. 8 Tinkwaneti erinde mbachike, korende as'omokia bw'abanto bande nteme ekeene ki'obwanchani bwaino. 9 Naki mwamanyire obuya bw'Omonene oito Yesu Kristo, buna abete omotaka as'engecho yaito, karenge omonda, erinde inwe monyare koba abanda as'obotaka bwaye. 10 Nainche ase ring'ana eri nabaire okorenga kwane: naki ring'ana eri ndibagwenerete inwe abachagete omwaka oeta, iga mwatang'anete tari as'ogokora gwoka korende nonya nokorigia gokora. 11 Korende bono moikeranie koria ogokora nakorokwo; nabo buna mwarenge ang'e korigia, naboigo mobe ang'e goikerania as'okonyara kwaino. 12 Naki, as'omoyo ore, iga bigwancherwa koreng'ana as'ebiare nabio omonto, tari as'ebi atabwanti. 13 Naki tindi goteba aya, erio abande babatigere inwe morarerigwe. 14 Korende amang'ana abe areng'aine; ekero eke kia bono obonge bwaino bobagwenere okoremerwa kwabo, erio obonge bwabo bobagwenere nainwe okoremerwa kwaino; erio amang'ana abe areng'aine. 15 Buna yarigetwe, Oyosangereretie ebinge, tamentegeti, nere oyosangereretie ebike taremeiri. 16 Korende Nyasaye aakerwe mbuya mono, oyobekire omokia oria asemore as'omoyo o Tito. 17 Naki abwatete kobua aria amang'ana ane; nere akamenta koba nomokia, agatara gocha asemore as'ogwancha kwaye omonyene. 18 N'amo nere twamotomire oyominto oria ogotogigwa kwaye as'enchili gwakumire ase chikanisa chionsi. 19 Gose tari as'ayio oka, korende agachorwa nechikanisa atare amo naintwe ase ring'ana ri'obuya obo rigokorerwa naintwe, erinde Omonene abakwe, nakoorokia ng'a emioyo yaino iga yarenge ang'e. 20 Twerende nering'ana eri, omonto tacha gotuomania as'amang'ana okoegwa oko gogokorwa naintwe; 21 gatoratang'ane korengereria ayare amaya, tari as'obosio bw'Omonene bweka, korende nas'obosio bwa mwanyabanto. 22 Naintwe amo nabarabwo twamotomire oyominto, oyotoroche as'amang'ana amange ng'a nare nomokia, na bono nare nomokia kobua, ekiagera as'ogosemeria are nakorokwo asemore. 23 Nabo omonto kararigie komanya amang'ana a Tito, ere nesemba yane, naende omokori emeremo amo nainche, naende kararigie amang'ana aya abaminto, barabwo nabatomwa be chikanisa, naende obonene bwa Kristo. 24 Nabo boorokie as'obosio bwe chikanisa obwanchani bwaino, nas'ogwetogia gwaito asemore.
1 As'amang'ana okobakorera abachenu tindi nokorigia kobarikera. 2 Naki namanyire ogwancha kwaino, netogereti as'Abamakedonia, ng'a Akaya iga orenge ang'e korwa omwaka omogima; nomokia oino obabekire omoyo abanto abange. 3 Korende nabatomire abaminto, as'engecho yaino; nario ogwetogia kwane asemore tikoba bosa ase ring'ana eri; monyare koba ang'e buna natebete: 4 ekiagera, bagocha Abamakedonia amo nainche, nakobanyora timoraba ang'e, titocha gosoka intwe, (titoteba inwe), as'engecho eye y'ogosemeria. 5 Nabo narorire ng'a negwenerete mbatebie abaminto aba batang'ane goika asemore, nakorosia bwango okorua kwaino mwatebete korwa kare, konyare koba ang'e, kobe buna ekerugwa, gose tari buna egento kerure as'obong'iti. 6 Korende natebire ring'ana eri, oyogosimeka ebike igakogesa ebike; oyogosimekaas'ebinge nagese as'ebinge. 7 Ker'omonto akore buna arengerereti as'enkoro yaye, tari as'ogoichana, gose tari as'okobetererigwa: naki Nyasaye bwanchire ere oyokorua nomogoko. 8 Na Nyasaye nanyare kobaichoria obuya bwonsi as'obonge; erio inwe, komorabe nogoisanera gwonsi as'ebimo bionsi, monyare komenta mono as'ogokora okuya: 9 Buna arikire, Osiareire, obaeire abataka, Oboronge bwaye iga boikaransete kare nakare, 10 Nere okorua chimbusuro nakomoa omonyene okobugura, nomogati as'endagera, nabae embusuro y'okobusura asemore naende namente, nere namenteranie amatunda oboronge bwaino. 11 Ekiagera mwatenenkigwe as'ebimo bionsi monyare koba nokorua gwonsi, gokonyorera Nyasaye mbuya mono as'emeremo yaito. 12 Naki emeremo y'ogokora oko tikori kobaisaneria abachenu ogoisanera baremeirwe gwoka, korende omentekire mono koba as'okoaka mbuya mono ara ange ase Nyasaye; 13 ekiagera komoratemwe as'ogokora okwo, namomobake Nyasaye as'okoigwera kwaino as'okoyiatora enchili ya Kristo, nas'okorua kwaino mwabakoreire barabwo nabanto bonsi. 14 Nabarabwo abanyene, kobakobasabera inwe, babarengereirie inwe mono ekiagera ase boria obuya bwa Nyasaye bwamentekire mono ime asemore. 15 Nyasaye airanerigwe mbuya mono as'engecho y'ekeegwa kiaye, totanyare gokebara buna egwenerete.
1 Nainche Paulo, nabasoroire as'oboitongo nobwororo bwa Kristo, inche inde omoitongo, konde amo nainwe, korende ntari aroro nomonyene oboremu asemore: 2 ee, nasabire ng'a kondeo, timba omokong'u as'ogokwana noboremu, ekiagera nabarire koba noboremu igoro ase baria bakagete ng'a intwe iga tokogenda as'engecho y'omobere, 3 Naki nonya tokogenda as'omobere, titori gokora esegi as'engecho y'omobere, 4 (naki ebinto bi'esegi biaito tibiri ebi'omobere, korende mbire nokobua ase Nyasaye koiyeria chinduaki); 5 koiyeria ebirengererio na ker'egento keimokererete igoro, keimokererete igoro as'obong'aini bwa Nyasaye; nagosiba ker'ekerengererio kenyare komoigwera Kristo; 6 gatorabe ang'e gokania obobe bwonsi, okoigwera kwaino gokoraikerane. 7 Iga mokoyarigereria ayare as'obosio bwaino. Omonto karesemerie omonyene ng'a ere nomonto o Kristo, tiga arengererie iga omonyene, ng'a buna ere are omonto o Kristo, naboigo naintwe tore abanto ba Kristo. 8 Naki, ninsagwetogia kobua ake as'engecho y'okobua gwaito (twaeirwe n'Omonene, tonyare kobaagacha inwe gose tari as'okobaiyeria) tingosoka: 9 timbaisa gocha kororekana buna iga nindigeti kobairokia as'amarube ane. 10 Naki batebe, Amarube aye namarito, namakong'u; korende kareo omonyene omobere igare omoreu, namang'ana aye tari gento. 11 Omonto buna oyio arengererie iga. ng'a buna tore as'amang'ana ay'amarube totari aroro, naboigo tore as'ogokora gatoreo. 12 Naki titorigeti kwebara amo nabarabwo abanyene ogwetogia as'emebere yabo, gose kwereng ania nabarabwo: korende barabwo berenge emebere yabo nenvbere yabo, na kwereng'ania emebere yabo nemebere yabo, tibari nobong'aini. 13 Korende intwe titokwebaka kobua ekerengo giaito, korende as'ekerengo ki'oborengi twarengeirwe na Nyasaye, nonya ngoika asemore. 14 Naki titori gwekinia abanyene goeta ekerengo giaito; buna ng'a titobaikera inwe; naki twaikire goika asemore as'enchili ya Kristo. 15 Titori gwetogia kobua as'ekerengo giaito, as'emeremo y'abanto bande; korende gatorabe nogosemeria ng'a koreng'ana buna okwegena kwaino gokomenteka, natobakwe asemore koreng'ana as'ekerengo giaito. 16 Nakonyora koyerandia enchili ase chinse chire ng'umbu as'orobebe rwaino, titwebaka as'okobua kw'omonto onde as'amang'ana atiekire korosigwa. 17 Korende ere oyogwetogia, tiga etogie as'Omonene. 18 Naki omonto omonyene bwancheire tari ere oyogwetogia, korende noyogotogigwa n'Omonene.
1 Anga naba buya onye mwanyabera ake obokayayu bwane: nabe, nyabera. 2 Naki nabaroreire ribero, neribero Tia Nyasaye; naki nabanyuomeire omosacha oyomo, erinde nyare kobareta buna omoiseke omwekungi omochenu ase Kristo. 3 Korende nairokire; buna eria eng'iti yamong'ainete Hawa as'obong'ainereria bwaye, ebirengererio biaino tibisareka mobotige obuya, nobochenu bwaino ase Kristo. 4 Naki ere oyogocha okorandia Yesu onde, ere totamorandeti intwe, gose komoranyore Omoika onde motanyoreti, gose enchili ende motayiancheti, mwakorire buya koremereria nere. 5 Ekiagera iga nkagete ng'a inche tindemeiri gento bare nakio abatomwa abare abanene. 6 Korende aande timanyeti engecho y'ogokwana, korende obong'aini nimbwate; nase kera ring'ana twaorokirie asemore. 7 Inee! nakorire ebibe as'okweirania inse erio mokinigwe, ekiagera nabarandeirie enchili ya Kristo ntari neng'eria? 8 Nachiurire chikanisa chinde enibo yabo, ndusie eng'eria yane asebare, mbakorere inwe. 9 Nainche ekero narenge amo nainwe ekero naremeretwe, timorarereti omonto; naki abaminto bagachia gocha korwa Makedonia bakang'a koreng'ana as'okoremerwa kwane; nas'amang'ana onsi nkerenda as'omobere one timbararereria nonya ng'ake; naende ninyerende bo. 10 Naende buna ekeene gia Kristo kere ime asende, tari omonto oranyare gontanga as'ogwetogia oko, ase chimbebe chi'Akaya. 11 Aseki? nekiagera timbancheti inwe? Nyasaye omanyire. 12 Korende eringokora ninkore, erinde mbatange abakorigia ribaga tibanyora ribaga; erio ase ring'ana erio abagwetogia barorekane koba buna intwe. 13 Naki abwo nabatomwa b'oborimo, bagokora emeremo as'okong'ainereria, abagweonchora babe omogwekano bw'abatomwa ba Kristo. 14 Gose tari ogokumia. Ekiagera Saitani omonyene igagweonchora abe omogwekano bwe rilaika ri'omobaso. 15 Nabo tari ring'ana rinene abakori baye nabarabwo bagweonchora babe omogwekano bw'abakori b'oboronge. Omoerio obo nabe koreng'ana nemeremo yabo. 16 Nakwanire naende, omonto takaga ng'a inche nomokayayu; korende namonkaga bo, monyanche ng'a nomokayayu; inche nainche ninyare gwetogia ake. 17 Eri ngokwana tindi korikwana as'ogochika kw'Omonene, korende buna omoriri, as'oboremu obo bw'ogwetogia. 18 Nonya abange bagwetogia as'engecho y'omobere, nainche nanyetogie. 19 Inwe, ekiagera more nobong'aini, iga mokoremereria nabariri as'omogoko. 20 Naki igamokoremereria nomonto, karababeke obosomba, karabamere, abasakore, kareimokererie igoro, karabaake inwe as'obosio. 21 Iga ngokwana as'engecho y'ogwekeyia buna intwe iga twarenge abareu. Korende, onye ore omonto ore noboremu ase rinde rionsi, (nakwanire as'obokayayu), nainche ninde noboremu. 22 Barabwo n'Abaibirania? nainche. Barabwo n'Abaisiraeli? nainche. Barabwo noroiboro rw'Ibrahimu? nainche. 23 Barabwo abakori ba Kristo? (iga ngokwana buna ebarimo), Inche kobua; as'emeremo kobua mono; as'okoakwa goeta ekerengo; as'ogosibwa kobua mono, as'amakweri ebiro ebinge. 24 As'Abayahudi ara gatano nkanyora okoakwa emerongo ene tatiga okomo. 25 Ara gatato nkaakwa chinyimbo, ara rimo nkaakwa amagena, ara gatato ngatekerwa obwato, omobaso oyomo nobotuko nkanyara goikaransa as'endiba; 26 as'orogendo ara aange; as'emechando ye chindoche, as'emechando y'abauri, as'emechando y'eamate, as'emechando y'Ebisaku, as'emechando y'emechie ime, as'emechando y'eroro; as'emechando y'enyancha ime, as'emechando as'abaminto b'oborimo; 27 as'emeremo nogochandeka,as'okogesa ara aange, as'enchara nerang'o, as'okweng'ata ara aange, as'embeo nakoba getirianda. 28 Tatiga as'amang'ana onsi ay'isiko, nare agonchichera kera rituko, naro okorigereria gwe chikanisa chionsi. 29 Ning'o ore omoreu, timba omoreu nainche? ning'o ogochigwe, nainche tingechigwa? 30 Kongwenerete gwetogia, ninyetogerie amang'ana ay'oboreu bwane. 31 Nyasaye, Tata bw'Omonene oito Yesu Kristo, oyokobakwa goika kare nakare, omanyire ng'a tindi gokwana oborimo. 32 Ase Damesiki gavuna o Areta omoruoti, oyorenge koyorenda omochie o Damesiki, akarigia kombwata; 33 ngatirimbokigwa ime as'egetonga, as'edirisa y'oruaki ime, ngakonyeka as'amaboko aye.
1 Ningwenerete gwetogia, nonya tikongwenereti; korende ning'ikere okorota nokoorokigwa kw'Omonene. 2 Namanyire omonto ase Kristo, yaetire bono emiaka ikomi nene, (onye orenge as'omobere timanyeti; onye orenge isiko as'omobere timanyeti, Nyasaye omanyete), omonto oyio akabogorigwa gochia igoro goika igoro ya gatato. 3 Nainche namomanyire omonto oyio, (onye orenge as'omobere timanyeti; onye orenge isiko as'omobere timanyeti, Nyasaye omanyete), 4 igabogoretigwe goika Obonda bwa Nyasaye, akaigwa amang'ana atagwatoreka, ayatagwenerete omonto ayakwane. 5 As'amang'ana omonto oyio ninyetogie; korende as'engecho yane omonyene tingwetogia, tatiga as'oboreu bwane. 6 Naki onye narigetie gwetogia anga timbeti omoriri, ekiagera nintebe ekeene. Korende ninyetange, omonto tambarera kobua as'aya ayaroche asende gose koyaigwa asende. 7 Nekiagera obonge bw'okooroka okwo, naki as'okwo, tinyara koenena goeta ekerengo, nkaegwa rigwa as'omobere, omotomwa bwe Saitani erinde ang'ake, tinyara gocha koenena goeta ekerengo. 8 As'engecho y'egento eke nkamosaba Omonene ara gatato kendwe. 9 Agantebia, Obuya bwane bwagoisanire: naki okobua kwane gwaikeranire as'oboreu. Nabo ninyetogerie amareu ane as'omogoko omonge, erio okobua gwa Kristo goikaranse igoro asende. 10 As'ayio nagweneirwe namareu, ogoichanigwa, okoremerwa, nokorosigwa, nemechando yonsi, as'engecho ya Kristo: naki konde omoreu erio ninde nechinguru. 11 Nabaire omokayayu, inwe mwambetereirie; naki nengwenerete ntogigwe nainwe; ekiagera tinarenge inse as'abatomwa baria abanene, nonya tindi gento. 12 Ekeene ebikone bi'abatomwa bigakorwa egati yaino as'oboremereria bwonsi, as'ebikone namakumigwa, nechinguru chinyinge. 13 Naki ngento ki mwaremeirwe kobua chikanisa chinde, tatiga as'ekiagera inche timbararereti? monyabere okomocha okwo. 14 Rora ekero eke, negia gatato inche nabaire ang'e gocha asemore; tinkobararereria: naki tindi korigia ebinto biaino, tatiga inwe: ekiagera tibagwenereti abana kobagachera emonga abaise, korende abaise kogachera abana. 15 Nas'omogoko omonge ninyebeke, naende ninyerue as'engecho y'emioyo yaino. Nonya nkomenta kobancha mono, naremeirwe ogwanchwa? 16 Korende abe bo, inche timbararereria; korende ekiagera ninde omong'aini nkabanyora as'obong'ainereria. 17 Inee! Omonto onde bwensi natomete asemore, as'omonto oyio nabaurete egento? 18 Nkamworokereria Tito, nkamotoma oria oyominto amo nere. Inee! Tito nabaurete gento? titogendeti as'Omoika oro oria, nase chimbaratero chiria chiria? 19 Iga mokagete ng'a igatokwegwenia asemore naende? As'obosio bwa Nyasaye twakwanire ase Kristo. Korende aya onsi abanchani, as'okobaagacha. 20 Naki nairokire, kondache, timbaisa kobanyora gose tari buna ndigetie kobanyora, ndorekane asemore tari buna morigetie; tinchicha konyora gose eriomana, ribero, nendamwamu, okoame rerania, nogochayana, nokong'acha, noboenenu, neriroroche; 21 nainche ngocha naende, Nyasaye one ambeke inse asemore, mbaichanere mono abamochete kare, abataonchogete korwa as'eubi, nobotomani, nobonyaka bw'omobere bakorete.
1 Ekero eke negia gatato ngocha asemore. As'emenwa y'abarori babere gose batato kera ring'ana naritenene. 2 Natang'anire kobatebia, ekero narengeo eria kabere, naboigo bono ntaracha natang'anire kobatebia barabwo abakorete ebibe kare, nabande bonsi, ng'a ngocha, tinkwabera; 3 ekiagera morigetie ekiorokererio gia Kristo oyogokwana ime asende; oyotari omoreu asemore, korende nare nokobua ime asemore. 4 Naki, nonya obambetwe as'oboreu, korende moyo are as'okobua kwa Nyasaye. Naki intwe naintwe ntore abareu as'ere; korende natobe moyo amo nere as'okobua kwa Nyasaye, kore ime asemore. 5 Erenge emioyo yaino gose more as'okwegena; eteme emioyo yaino. Gose timwemanyeti emioyo yaino, ng'a Yesu Kristo nare ime asemore, tatiga mwangirwe? 6 Korende nasemeirie ng'a namomanye ng'a intwe titwangiri. 7 Twamosabire Nyasaye, timokora rinde erire ribe; tari ng'a intwe tororekane twancheirwe, korende inwe mokore erire rigiya, natoisa koba intwe buna abangirwe. 8 Naki titokonyara gokora ring'ana igoro as'ekeene, korende as'ekeene. 9 Naki twagokire, ekero tore abareu, nainwe more nechinguru: naende twasabire eri narirorio, moikerane. 10 As'ayio, narikire ayio ekero ntari agwo, erinde nkoba agwo tinkorera obotindi, as'ekerengo ki'okobua koria naetwe n'Omonene erinde ng'agache, tari as'ogotagora. 11 Omoerio, abaminto, morare buya. Moikerane; moremigwe; mobe nomoyo oyomo; moikaranse as'omorembe; na Nyasaye bw'obwanchani nomorembe abe amo nainwe. 12 Kwanania as'okonyunyuntana ogochenu. 13 Abachenu bonsi babakwanirie. 14 Obuya bw'Omonene Yesu Kristo, nobwanchani bwa Nyasaye, nokobwatana kw'Omoika Omochenu, oikaranse nainwe mwensi.
1 Paulo, omotomwa (tari omotomwa bw'abana ba mwanyabanto, gose tatometwe nomwana o mwanyabanto, korende ase Yesu Kristo, na Nyasaye Tata omobogetie), 2 nabaminto bonsi bare amo nainche, ase chikanisa chia Galatia: 3 Obuya bobe asemore, nomorembe okorua ase Nyasaye Tata, nas'Omonene Yesu Kristo, 4 bweruete omobere oye as'engecho y'ebibe biaito, erinde atokonye nense eye embe ere bono, buna anchete Nyasaye, Tata oito: 5 asare ere ore nobonene bwa kare nakare. Amin. 6 Nakumirie ekiagera iga mokomotiga bwango ere oyobarangeretie as'obuya bwa Kristo, 7 mokaonchokera enchili ere eng'ao, korende tari eyende: korende mbare abanto bande bakobachanda bakorigia goonchora enchili ya Kristo. 8 Korende intwe, gose rilaika ri'igoro, tokobaranderia enchili ende yonsi atatiga eria twabaranderetie, naragererigwe. 9 Buna twatang'anete gokwana, na bono ninkwane naende, Omonto onde bwonsi karabaranderie enchili ende yonsi atatiga eria twabaranderetie, naragererigwe. 10 Naki bono rende, iga ndigetie kobwata emioyo ya mwanyabanto, gose Nyasaye? gose nindigetie kobagwenera mwanyabanto? onye nabete goika bono ng'a nagweneire mwanyabanto, anga tinabete omosomba o Kristo. 11 Naki nindigetie koborokia baminto, ng'a enchili nabaranderetie, teri ey'engecho ya mwanyabanto. 12 Naki tinanyorete korwa ase mwanyabanto, gose tinorokereretigwe nomonto, korende as'okomanoka kwa Yesu Kristo. 13 Naki mwaigure ebirage bi'orogendo rwane kare as'edini y'Abayahudi, buna nachandete ekanisa ya Nyasaye goeta ekerengo, nkayesaria: 14 nainche natang'anete as'edini y'Abayahudi kobua abange barenge ekegori kiane as'egesaku kiane, ngakora omokia mono as'okobwata chingecho chi'abatata bane. 15 Korende Nyasaye ondusananetie korwa enda ya baba one akandangeria as'obuya bwaye, 16 komoorokia Omwana oye ime asende, erinde ndanderie Ebisaku amang'ana aye; erio tinarigia koborania nabanyene omobere namanyinga: 17 gose tinatirete kogenda Yerusalemu as'abwo barenge abatomwa ritang'ani riane; korende nkagenda Arabia; nkairana naende Damesiki. 18 Erio nyuma as'emiaka etato, ngatira kogenda Yerusalemu erinde tororane na Kefa, nkamenya nere amatuko ikomi natano. 19 Korende tinarora omotomwa onde atatiga Yakobo oyomwabo Omonene, 20 Nayio nabarikeire, rigereria, as'obosio bwa Nyasaye, tindi gokwana oborimo. 21 Erio nkagenda ensemo ya Shamu na Kilikia. 22 Korende tinamanyekana obosio bwane nechikanisa chia Boyahudi chire ase Kristo. 23 Korende baigure as'okoigwa gwoka, ng'a ere oria otochandete ritang'ani, bono nkorandiare okwegena koria asaretie kare. 24 Bakamotogia Nyasaye as'engecho yane.
1 Korende nyuma y'emiaka ikomi nene, ngatira kogenda Yerusalemu amo na Baranaba, nkamoira Tito amo nainche. 2 Nainche nkagenda as'okoigorerwa; nkabatebia enchili eria nkorandia as'Ebisaku, korende ase bobisi as'abwo abanyene okobakwa, teba gose igo nkominyoka bosa, gose igo naminyogete bosa. 3 Korende Tito orenge amo nainche oyorenge Omoyunani tabetereretigwe okwarokigwa: 4 korende as'engecho y'abaminto b'oborimo basoetigwe bobisi, abwo basoete bobisi banyare kounia ogosiborwa gwaito tore nakorokwo ase Yesu Kristo, erinde batobeke as'obosomba naende, 5 Korende nonya nensa eyemo titwebegete inse asebare, erinde ekeene gi'enchili geikaranse amo nainwe. 6 Korende baria abanyene okobakwa ng'a mbare nobonene (ng'a tari gento asende, nonya mbarenge nobonene bore naki: Nyasaye tari gwanchereria ekieni kia mwanyabanto) — nakwanire, baria bare nokobakwa tibamenterete gento: 7 korende bagachia korora inche ng'a naeirwe enchili y'abatarogeti, buna riria Petero aetwe enchili ya baria bakwaroka 8 (naki ere oyomonyareire Petero koba omotomwa bw'abarogete, nere onyareire kogenda as'Ebisaku); 9 naende bachia komanya obuya boria naetwe, Yakobo, na Kefa, na Yohana, abanyene okobakwa bare buna chisiro, bakang'a inche na Baranaba okoboko gw'okorio gw'okobwatana, erinde intwe togende as'Ebisaku, nabarabwo bagende as'abanto b'okwaroka; 10 korende ring'ana erimo batorigetie tokore, tobainyore abataka; nering'ana erio igo narenge nomokia korikora. 11 Korende Kefa agachia gocha Antiokia, nkaamererania nere obosio as'obosio, ekiagera konyora otiekire konacherwa ekina. 12 Naki konyora bataracha abanto batai bake baruete ase Yakobo, naragerete amo nabanto b'Ebisaku: korende bachia gocha akairana nyuma ageatanana, akabairoka abarogete. 13 Nabwo Abayahudi bande bageonchora amo nere, goika Baranaba agasirigwa nokong'ainereria kwabo. 14 Korende, ngachia korora ng'a enchera yabo tiyare kogenda boronge nekeene gi'enchili, nkamotebia Kefa as'obosio bw'abanto bonsi, Korabe aye kore Omoyahudi kobwatete chingecho chi'Ebisaku, gose tari echia Abayahudi, naseki okobibetereria Ebisaku bibwate chingecho chi'Abayahudi? 15 Intwe tore Abayahudi as'okoiborwa gwaito, gose tari abanyene ebibe bi'Ebisaku, 16 gatomanyete ng'a omonto takobarwa ng'a noyo bw'oboronge as'ogokora kw'amachiko, korende as'okwegena kwa Yesu Kristo, intwe twanchete Yesu Kristo, erinde tobarwe ng'a nab'oboronge as'okwegena gwa Kristo, tari as'ogokora amachiko; korende as'ogokora kw'amachiko tari onde omonyene omobere oranyare kobarwa ng'a noyo bw'oboronge. 17 Korende onye intwe abanyene igo twarenge korigia tobarerwe oboronge ase Kristo, ng'a igo twarorekanete tore abanyene ebibe, Inee! Kristo obaire omosomba bw'ebibe? Yaya. 18 Korende kondayaagache naende aria natagorete, neorokirie omonyene ng'a nomomochi. 19 Naki inche as'amachiko nakwereire amachiko, erinde imbe moyo ase Nyasaye. 20 Nabambirwe amo na Kristo; gose tari inche naende, korende Kristo moyo are ime asende: nobogima inde naborobwo bono as'omobere ninde naborobwo as'okwegena kw'Omwana o Nyasaye onyanchete, akerwa omobere oye as'engecho yane. 21 Tinkoonchora obuya bwa Nyasaye; naki, kerabe oboronge bokonyorekana as'amachiko, gaki Kristo igo akwete bosa.
1 Inwe Abagalatia motari nobong'aini, ning'o obarogete, timwancha ekeene, inwe as'amaiso aino Kristo abegetwe as'okobambwa? 2 Nindigetie kweorokereria ring'ana eri erimo asemore. Inee, igo mwanyorete Omoika as'ogokora kw'amachiko, gose as'okoigwa gokorua as'okwegena? 3 Inee! iga more abariri buna iga? mogachaka as'Omoika, igamorigetie goikeranigwa bono as'omobere? 4 Inee! igo mwanyorete emechando emenene engecho buna eye bosa? gaki kerabe bosa? 5 Nabo ere oyokobaa inwe Omoika nagokora ebikone egati yaino,igagokora ayio as'ogokora kw'amachiko, gose as'okoigwa gokorua as'okwegena? 6 Buna Ibrahimu amwanchete Nyasaye, akabarwa ng'a nomonyene oboronge. 7 Manya gaki, baria bare as'okwegena, abwo nabwo bare abana b'Ibrahimu. 8 Korende ayio amariko akarora korwa kare ng'a Nyasaye nabibarerwe Ebisaku oboronge as'okwegena, akaranderia Ibrahimu enchili kare, okobora, ng'a asore ebisaku bionsi nabisesenigwe. 9 Gaki abwo bare nokwegena nabasesenigwe amo n'Ibrahimu oyo orenge omwegeni. 10 Naki baria bonsi bare as'ogokora kw'amachiko, igo bare inse as'okoragererigwa: naki nerikire, Oragererigwe ker'omonto oyotari kobwata onsi ayarikire as'ebuku y'amachiko, ayakore. 11 Igare maiso marore ng'a tari monto onde obareirwe ng'a nomonyene oboronge as'obosio bwa Nyasaye as'amachiko: naki, Omonyene oboronge nabe moyo as'okwegena. 12 Namachiko tachete as'okwegena korende, Omonto orakore ayio nabe moyo as'ayio. 13 Kristo natoboretie nokoragererigwa kw'amachiko, ekiagera akoretwe okoragererigwa as'engecho yaito: naki, nerikire, Oragererigwe ker'omonto obambirwe igoro as'omote: 14 erinde egesio ki'Ibrahimu geikere Ebisaku ase Yesu Kristo; erinde tonyare koegwa eira y'Omoika as'enchera y'okwegena. 15 Abaminto, ngokwanande buna engecho ya mwanyabanto. Nonya ere emuma y'omwana o mwanyabanto, korende keranyare konacheka, monto onde tari oranyare korionchora, gose korimenta ring'ana. 16 chiira chiakwanetwe as'Ibrahimu, nas'omoiborwa oye. Takwaneti as'oroiboro buna as'abanto abange; korende buna ng'a noyomo as'omoiborwa oo, nere Kristo. 17 Ayangokwana naya; Emuma yakoretwe kegima ritang'ani na Nyasaye, amachiko aorogete emiaka chimia inye namerongo etato, nyuma takoonchora, erinde eira eria ebe eya bosa. 18 Naki omwando korabe as'amachiko, takoba naende as'eira: korende Nyasaye akamoa Ibrahimu as'eira. 19 Amachiko ninki rende? Agasoigwa as'engecho y'okomocha, goika omoiborwa oranyare gocha oetwe eira; egachikwa as'obokori bw'amalaika as'okoboko kw'omobwatania. 20 Oyore omobwatania tari omobwatania bw'oyomo; korende Nyasaye noyomo. 21 Korende, amachiko tabwataini nechiira chia Nyasaye? Yaya: naki, onye amachiko naruetwe akonyara gokora moyo, anga oboronge igo bwanyorekanete as'amachiko. 22 Korende amariko ayasiekire onsi inse ase chinguru chi'ebibe, erinde abagwancha baegwe eira as'okwegena kwa Yesu Kristo. 23 Korende ekero okwegena gotaracha igo twarenge inse as'amachiko, twasibetwe goika goche koria okwegena korache koorokigwa. 24 Naboigo amachiko abaire omworokia ogotorenta ase Kristo erinde tobarerwe oboronge as'okwegena. 25 Korende bono ekiagera okwegena gwachire, titori naende inse as'omworokia. 26 Naki inwe mwensi nabana ba Nyasaye as'enchera y'okwegena ase Yesu Kristo. 27 Ekiagera inwe mwensi mwabatisetwe nagosoigwa ase Kristo mwamweboete Kristo. 28 Tari Omoyahudi gose Omoyunani, tari omosomba gose omosibore, tari omonto omosacha, gose omonto omokungu: naki inwe imwensi noyomo ase Kristo Yesu. 29 Onye inwe naba Kristo, rirorio, mwabaire oroiboro rwa Ibrahimu, nabanyamwando as'eira.
1 Korende nakwanire ng'a omonyamwando, ekero gionsi are omwana, tari nogwatananekana nomosomba, nonya ore omonene as'onsi; 2 korende igare inse as'abariti nabarendi, goika engaki yachigetwe naise. 3 Nabo naintwe ekero twarenge abana, twarenge gokorigwa buna obosomba, inse as'okworokererigwa kwe ritang'ani gw'ense. 4 Korende agwo ogoikerana gw'ekero gwachia gocha, Nyasaye akamotoma Omwana oye, oiboretwe nomokungu, akaiborerwa inse as'amachiko. 5 Erinde, ababorie baria barenge inse as'amachiko, tonyare gosoigwa tobe abana. 6 Nekiagera inwe more abana, Nyasaye agatoma Omoika bw'Omwana oye ase chinkoro chiaito, okorera, Abba, Tata. 7 Onye naboigo, aye tori omosomba naende korende kwabaire omwana; nonya kore omwana, erio nomonyamwando o Nyasaye ase Kristo. 8 Korende engaki eria, ekiagera motamomanyete Nyasaye, mogachikorera chirochio echitarenge boronge buna chinyasaye: 9 korende bono kamwatiekire komomanya Nyasaye, gose kobua komanyekana na Nyasaye, naseki rende mokoiranera as'okworokererigwa kwe ritang'ani okore okworo nokw'obotaka, as'ayio naende morigetie koyakorera? 10 Mobwatete amatuko nemetienyi, nebiro, nemiaka. 11 Nabairokire, teba gose ng'a nerosirie bosa asemore. 12 Nabasoroire, abaminto, mobe buna inche inde, naki inche igande buna inwe. Timonkorerereti bobe bonde: 13 korende mwamanyire, ng'a nabaranderetie enchili, ritang'ani ekiagera as'oboreu bw'omobere; 14 na koria okwarenge buna ogotemwa as'omobere one timwanchayete gose timwanyangete; korende mokandosia buna rilaika ria Nyasaye, buna Yesu Kristo. 15 Ng'ai kore, rende koria ogwetogia kwaino abanyene? naki nabaire kirori, ng'a onye, nanyarekanete, anga mwarusetie amaiso aino, mong'e inche. 16 Korende inee! nabaire omobisa oino ekiagera nabatebirie ayare ekeene? 17 Mbare nomokia asemore korende tari as'enchera engiya, korende mbarigetie kobasiekera isiko erinde mobarigie barabwo. 18 Korende mbuya amatuko onsi korigigwa as'omokia ase ring'ana rire rigiya, tari buna inde agwo amo nainwe rioka. 19 Abana bane abake, ekiagera nabaroreire obororo goika Kristo akorwe ime yaino. 20 Ee, anga nancha koba amo nainwe bono, nakoonchora eriogi riane; ekiagera nabaichanire inwe. 21 Ntebia, inwe morigetie koba inse as'amachiko, timori koigwera aria amachiko? 22 Naki nerikire, Ibrahimu narenge nabana babere abamura, oyomo bw'omoreri, noyomo bw'omokungu omosibore. 23 Korende oria bw'omoreri akaiborwa as'omobere; noria bw'omokungu omosibore akaiborwa as'eira. 24 Amang'ana aya igagokwanwa as'omoreng'anio: naki, abakungu aba babere nabwo chimuma ibere; oyomo korwa egetunwa gia Sinai, gekoibora abana as'obosomba, nere Hajiri. 25 Naki Hajiri negetunwa gia Sinai kere Arabia kereng'aine na Yerusalemu ya bono; naki igare as'obosomba amo nabana baye. 26 Korende Yerusalemu y'igoro nomosibore, nero baba oito. 27 Naki yarikirwe, Goka aye otari koibora; Aka eriogi, orere, aye otari nobororo; Naki abana baye oria otigetwe nabange kobua abaye oyore nomosacha. 28 Gaki, abaminto, intwe ntore abana b'eira buna Isaaka. 29 Korende buna as'ekero keria oria oiboretwe as'engecho y'omobere, ochandete oria oiboretwe as'engecho y'Omoika, goika nonya mbono naboigo. 30 Korende amariko naki agoteba? Moserie oyo omoreri amo nomwana oye: naki omwana bw'omoreri takonyora omwando nonya ng'ake amo nomwana bw'omokungu omosibore. 31 Naboigo abaminto, intwe titori abana b'omoreri, korende ntore abana b'omokungu omosibore.
1 Kristo agatokora abasibore as'ogosiborwa; gaki, tenena boigo, timobwatwa naende as'egesibo ki'obosomba. 2 Inche Paulo nabatebirie inwe ng'a kamorarokigwe, Kristo takobagwenera kende. 3 Ee, natebire naende ase ker'omonto okonyora okwarokigwa, ng'a obaire nesira as'ogoikerania amachiko onsi. 4 Mwatananirwe na Kristo, inwe morigetie kobarerwa oboronge as'amachiko, mwagure korwa as'obuya. 5 Naki intwe as'Omoika ntoganyete ogosemeria kw'oboronge as'enchera y'okwegena. 6 Naki ase Kristo Yesu okwaroka tikogwenereti ing'ana rinde rionsi gose ogotaroka: korende okwegena kogokora emeremo as'obwanchani. 7 Mwarenge kominyoka buya; ning'o obatangete timoigwera ekeene? 8 Okoebereria oko tikwaruete asare ere obarangeretie. 9 Ememera emeke igo ekobotia ribomba rigima. 10 Ninde nogosemeria asemore nas'Omonene, ng'a timokoba nebirengererio binde bionsi: korende ere oyokobachanda nabogorie ekina kiaye, onde bwonsi. 11 Korende inche, abaminto, kerabe nkorandia amang'ana ayokwaroka, na bono, naseki ngochandwa? erio ekegocha ki'omosalaba kiaonchokire 12 Anga nancha abwo bakobabeka emechando benache emebere yabo. 13 Korende inwe abaminto, mwarangeretigwe monyore ogosiborwa; korende ogosiborwa kwaino tikoba as'engecho y'okobwatia omobere, mbuya mokorerane inwe as'inwe as'enchera y'obwanchani. 14 Korende amachiko onsi aisanerigwe ase ring'ana erimo, narirorio nario eri, Omwanche omogisangi oo buna omobere oo. 15 Korende kerabe mokoromana nakoriana, rigereria timocha gosirania. 16 Korende, nakwanire, genda as'Omoika, inwe timokonyara goikerania ebirengererio bi'omobere. 17 Naki omobere norengereretie koamererania n'Omoika, n'Omoika norengereretie koamererania nomobere; ekiagera ebi iga bikorwana; goika timokonyara gokora ayamorigetie gokora. 18 Korende komoratang'anwe n'Omoika, timori inse as'amachiko. 19 Nogokora kw'omobere igo kore maiso marore, nakwoko; obonyaka, eriko, okorengereria kw'omobere, 20 ogosasima chisanamu, oborogi, obobisa, eriomana, ribero, endamwamu, esugu, ogwatananekana, okwerusanania, 21 emoko, nogotinda, chigosori chimbe, nayande areng'aine buna ayio: igoro as'aya natang'anire kobatebia buna riria nakwanete maiso marore, ng'a abwo bagokora amang'ana ayio tibakonyora omwando bw'obonda bwa Nyasaye. 22 Korende okwama kw'Omoika, nobwanchani, omogoko, omorembe, oboremereria, ogokora amaya, obuya, okwegena, 23 obwororo, okwerita as'onsi, igoro as'aya onsi machiko tari. 24 Nabwo bare abanto ba Kristo Yesu babambire omobere amo nokogania okobe nokorengereria kwaye. 25 Gatorabe moyo as'Omoika togende as'Omoika. 26 Titwetogia bosa, gotogochegania, nakoba nemoko intwe as'intwe.
1 Abaminto, omonto karabugwe as'okomocha konde gwonsi, inwe abamore ab'omoika, moiranie omonto oyo as'omoika bw'obwororo, nakwerigereria aye omonyene tobaisa gotemwa. 2 Bogorerania chigurube inwe as'inwe, moikeranie boigo amachiko a Kristo. 3 Naki omonto karekage ng'a negento, nere tari gento, igakweng'aina omonyene. 4 Korende ker'omonto arenge emeremo yaye omonyene, erio nabe nengecho y'ogwetogia omonyene bweka, korende tari okwereng'ania nomogisangio oye. 5 Naki ker'omonto nabogorie egurube yaye omonyene. 6 Korende ere oyokworokererigwa ring'ana, abwatane nere oyokworokereria as'ebimo ebiya bionsi. 7 Timong'aineka; Nyasaye akorerwe echeche: naki kende gionsi arasimeke omonto, nakio arache kogesa. 8 Naki ere oyorasimeke as'omobere oye, as'omobere oye nagese ogosareka; korende ere oyorasimeke as'Omoika, as'Omoika nagese obogima bwa kare nakare. 9 Titorosa as'ogokora amaya; naki natogese as'ekero kiaye, totakweti emioyo. 10 Nabo, gatorabe neribaga tobakorere abanto bonsi amaya; korende kobua abwo abare as'enyomba y'okwegena. 11 Rigereria, buna chire chinene chinuguta nabarikeire as'okoboko kwane omonyene. 12 Bonsi barigetie kororekana buya as'omobere, abwo nabwo bakobachika mwarokigwe; ng'a tibachandwa as'engecho y'omosalaba o Kristo. 13 Naki nonya barabwo abanyene abarokire, tibabwateti amachiko; korende mbabarigetie inwe mwarokigwe, erinde banyare gwetogeria emebere yaino. 14 Kobe are nainche, ogwetogia, tatiga as'omosalaba bw'Omonene oito Yesu Kristo, as'oro ense yabambirwe asende, nainche as'ense. 15 Naki okwaroka tai gento, gose ogotaroka tai gento, korende egetongwa ekeyia. 16 Na bonsi abaragendere ogochika oko, omorembe obe asebare, namabera, n'igoro as'Abaisiraeli ba Nyasaye. 17 Korwa bono monto tambeka emechando; naki naimokirie ekemanyererio kia Yesu omobere one. 18 Obuya bw'Omonene oito Yesu Kristo bobe amo nemioyo yaino. Amin.
1 Paulo, omotomwa o Yesu Kristo, as'obwanchani bwa Nyasaye, as'abachenu bare as'Efeso, nabegeni ase Kristo Yesu: 2 Obuya bobe asemore nomorembe korua ase Nyasaye Tata oito nas'Omonene Yesu Kristo. 3 Abakwe Nyasaye, Tata bw'Omonene oito Yesu Kristo, oyotosesenetie ogosesenia gwonsi kw'omoika, aas'are igoro ase Kristo: 4 buna atochorete asere, ritang'ani ense etarabekwa oboroso, erinde tobe abachenu, totari nekemoa as'obosio bwaye, as'obwanchani: 5 ekiagera atochorete korwa kare erinde tokorwe abana baye ere as'enchera ya Yesu Kristo, as'obwanchani bw'okorigia kwaye, 6 erinde, bobakwe obonene bw'obuya bwaye, atoeire as'oyo Omwanchi oye: 7 asare ntore nokoborigwa as'amanyinga aye, okwabera as'ebibe biaito, as'obonge bw'obuya bwaye, 8 akabokora goichora asetore ase chisemi, nobong'aini bwonsi, 9 gatiekire gotworokia obobisi bw'obwanchani bwaye, koreng'ana nobwanchani bwaye, ayakwanete as'ere oyo, 10 goika as'ekero ki'ogoikeranigwa kw'ebiro, nabekeranie ebinto bionsi bibe nobomo ase Kristo, ebinto bire igoro, nebire as'ense; as'ere oyo: 11 ekiagera ime yaye intwe twanyorire omwando, twatang'anire gochorwa korwa omochakano as'okorigia kwaye ere oyokorete onsi as'engecho y'okorigia kwaye; 12 erinde intwe tobe ogotogigwa kw'obonene bwaye, abwo twatang'anete komogachera Kristo ogosemeria gwaito: 13 As'ere nainwe, komwatiekire koigwa ring'ana ri'ekeene, amang'ana amaya ay'ogokonyeka kwaino, — as'oyio naende komwatiekire komwancha, mokabekwa ekemanyererio n'Omoika oria Omochenu bw'eira. 14 Nere ore ntenenera bw'omwando oito, goika okoborigwa kwe biaye omonyene Nyasaye, as'ogotogigwa kw'obonene bwaye. 15 As'engecho eyio nainche korwa ekero nanyorete amang'ana okwegena kwaino more nakorokwo as'Omonene Yesu, mokworokia as'abachenu bonsi, 16 tintigeti koiraneria ng'a mbuya as'engecho yaino; nakobainyora as'ogosaba kwane; 17 erinde Nyasaye bw'Omonene oito Yesu Kristo, Tata bw'obonene, abae omoyo bwe chisemi noyo okomanoka as'okomomanya ere; 18 amaiso aye chinkoro chiaino abekwe omobaso, momanye ogosemeria gw'okorangeria kwaye, buna bore obonda bw'obonene bw'omwando oye as'abachenu, 19 nobuya bw'obonene bw'okobua kwaye bwatoikeire intwe abatwanchete, as'ekerengo ki'emeremo ye chinguru chiaye nobokong'u. 20 Akorete ase Kristo ekero amobogetie, akamobeka okoboko kwaye gw'okorio as'igoro, 21 igoro mono kobua okogamba gwonsi, nokobua, nechinguru, noboruoti, na kera erieta rigwatorwa, tari ense eye ime oka, korende neria egocha nero; 22 akabibeka ebinto bionsi inse as'amagoro aye, akamobeka abe omotwe igoro y'ebinto bionsi as'engecho y'ekanisa, 23 eyere omobere oye, ogoichoria kwaye ere oichoirie ebinto bionsi ase bionsi.
1 Nainwe agwo ekero mwarenge ebitondo, as'engecho y'okomocha kwaino nebibe biaino, akababokia, 2 mwagenderete kare as'ogotunyana chingecho chi'ense eye, nagotunyana oboruoti bw'okobua kw'amare omoika gati, omoika oria ogokora emeremo bono as'abana b'ogosaria; 3 ebio naintwe intwensi togachigendera, agwo kare, as'okorengereria kw'emebere yaito, togaikerania obwanchani bw'emchere yaito, nebirengererio biaito, tokaba as'orogendo rwaito abana b'endamwamu buna abwo abande: — 4 korende Nyasaye ekiagera arenge nobonge bw'amabera, as'obwanchani bwaye obonene atwanchete, 5 nonya ekero keria twarenge ebitondo as'okomocha gwaito, agatobokia amo na Kristo (mwakonyirwe as'obuya), 6 agatobokia amo nere, agatoikaransia amo nere aase a igoro ase Kristo Yesu: 7 erinde as'ebiro birache naorokie obonge bw'obuya bwaye boetete ekerengo ki'obuya bwaye, asetore ase Kristo Yesu. 8 Naki mwakonyirwe as'obuya, as'enchera y'okwegena; nas'ayio taruete asemore abanyene; nekeegwa kia Nyasaye: 9 gose tari as'ogokora, tacha monto onde bwonsi gwetogia. 10 Naki iga tore emeremo yaye, togatongwa ase Kristo Yesu, tokore ogokora okuya, okwo Nyasaye arosetie korwa omochakano erinde totare naro. 11 As'engecho y'ayio inyora ng'a kare, inwe iga mwarenge abanto b'Ebisaku as'engecho y'emebere, mwarangeretigwe as'erieta riaino buna abanto batarogeti, nabaria barangerigwe as'erieta riabo abarogetigwe, engecho yaye okwaroka kw'omobere as'amaboko; 12 ng'a engaki eria ya kare timwarenge na Kristo, iga mwatananekanete neamate y'Abaisiraeli, abageni, abatarenge nechimuma chi'eira, timwarenge nagosemeria, timwarenge na Nyasaye as'ense. 13 Korende bono, ase Kristo Yesu, inwe mwarenge are agwo ritang'ani, mwabaire ang'e as'amanyinga a Kristo. 14 Naki nere omorembe oito, otokorete intwe intwensi twarenge babere, koba oyomo, agatagora etoto yarenge gati yatwatananete, 15 gatiekire koborusia as'omobere oye boria obobisa, nonya nogochika kw'amachiko are as'amachiko; erinde akore babere koba omonto omoyia oyomo ime as'omobere oye, ogokora omorembe; 16 nakobabwatania bonsi babere na Nyasaye as'omobere oyomo, as'omosalaba, gatiekire goita boria obobisa as'oyio omosalaba: 17 agacha korandia omorembe asemore inwe mwarenge are, nas'abwo abarenge ang'e. 18 Naki as'ere intwe intwensi twanyorire enchera y'okomoika ang'e Nyasaye Tata, as'Omoika oyomo. 19 Gaki korwa bono inwe timori abaeti gose abageni, korende inwe nabanyene amo nabachenu, abanto b'enyomba ya Nyasaye, 20 mwaagachirwe igoro as'oboroso bw'abatomwa nababani, na Kristo Yesu omonyene nerigena rinene ri'ekona; 21 as'ere oboagacho bwonsi kaborabwatanigwe buya, nabokine bobe hekalu enchenu as'Omonene; 22 as'ere nainwe mwaagachirwe amo koba obomenyo bwa Nyasaye as'Omoika,
1 As'engecho eyio inche Paulo, omosibwa o Yesu Kristo as'engecho yaino inwe Ebisaku, 2' onyore mwaigure amang'ana oborendi bw'obuya bwa Nyasaye naetwe as'engecho yaino; 3 buna as'okomanorerwa natebetigwe obobisi boria, buna natang'anete korika as'amang'ana amake, 4 as'ayio komokoyasoma, namonyare koinyora okomanya kwane as'obobisi bwa Kristo; 5 buna atabatebetie abana ba mwanyabanto as'ebigori binde, buna abaigorerete abatomwa baye abachenu nababani as'Omoika; 6 erinde, ng'a Ebisaku biabaire ebinyamwando, amo naintwe, ab'omwando oyomo, nomobere oyomo, nababwatani amo naintwe eira yaye ere ase Kristo as'enchera y'enchili. 7 Nabo ngakorwa omokori oye, as'ekerengo gi'ekeegwa ki'obuya bwa Nyasaye naetwe as'ekerengo ki'ogokora emeremo as'okobua kwaye. 8 As'inche, oyore omoke kobua, oyore omoke as'abachenu bonsi, naetwe obuya obo, kobaranderia Ebisaku obonda bwaye Kristo botakorengeka; 9 nakobabareria abanto bonsi, bamanye oborendi nobobisi boria, ekiagera korwa kare onsi bwabisekanete ase Nyasaye, oyotongete bionsi; 10 erinde bono, as'enchera y'ekanisa, chisemi chia Nyasaye chire chingecho chinyinge chimanyekane namaruoti nechinguru ch'igoro; 11 as'okoreng'ana nokorigia kwaye gwa kare nakare arigetie ase Kristo Yesu Omonene oito. 12 As'ere ntore noboremu bw'okobua ogosoa as'ogosemeria as'enchera y'okwegena kwaye. 13 Gaki nabasabire, timokwa emioyo as'engecho yaino, eyere obonene bwaino. 14 As'ayio natung'amire ase Tata, 15 ekiagera as'erieta riaye ker'obotata bwonsi bw'igoro nobw'ense igo bokorangerigwa, 16 erinde abae, as'okoreng'ana nobonda bw'obonene bwaye, momentwe chinguru as'Omoika oye as'omonto oino oime; 17 Kristo amenye ase chinkoro chiaino as'okwegena; erinde inwe, komorabe nemeri noboroso as'obwanchani, 18 monyare koinyora amo nabachenu bonsi, amagare namatambe, na gochia igoro na gochia inse, 19 nakomanya obwanchani bwaye Kristo, boetete okoinyora, erinde monyare goichorwa goika ogoikera ker'ogoichora kwa Nyasaye. 20 Gaki, asare ere oranyare gokora ebitage bi'ogokumia mono kobua bionsi togosaba gose ebitokorengereria, as'okoreng'ana gwe chinguru chigokora emeremo ime asetore, 21 Asare ere obonene as'ekanisa nase Kristo Yesu goika ebigori bionsi bia kare nakare. Amin.
1 Gaki nabasoroire, inche omosibwa as'Omonene, mogende buna egwenerete okorangerigwa kwaino mwarangereretigwe, 2 as'obokanyeku bwonsi nobwororo, as'oboremereria, mokobogorerania as'obwanchani; 3 mokore omokia konyora obomo bw'Omoika as'egesibo ki'omorembe. 4 Omobere noyomo, n'Omoika noyomo, buna mwarangeretigwe as'ogosemeria okomo gw'okorangerigwa kwaino; 5 Omonene oyomo, okwegena okomo, ebatiso eyemo, 6 Nyasaye oyomo, nere Tata o bonsi, oyore igoro ase bonsi, nas'onsi, naime ase bonsi. 7 Korende ker'oyomo oito naetwe obuya, as'okoreng'ana ekeegwa gia Kristo. 8 As'ayio otebire, Ekero arinete igoro, agasakora abasakore, Akabaa abanto ebiegwa. 9 (Gaki, ring'ana riria, Akarina, engecho yaye inki tatiga igaigete nonya goika ensemo y'ense inse? 10 Oyoigete nere orinete igoro mono kobua igoro onsi, ebinto bionsi bichore nere.) 11 Nere akabaa abande babe abatomwa; nabande babe ababani; nabande babe abarandia; nabande babe abarisia naborokia; 12 as'okobaikerania abachenu, as'ogoikera emeremo y'obosomba, omobere o Kristo oagachwe: 13 goika intwensi toranyare koboikera obomo bw'okwegena, nakomomanya mono Omwana o Nyasaye, tobe abanto abaikeranu, goika obonene bw'ogokina kw'oboikeranu bwa Kristo; 14 erinde titoba naende abana abasinini, togotugutwa aria naria, nakoirwa ase ker'embeo y'okworokereria, as'obobe bw'abanto, as'obong'ainereria, tokobwatia chinchera chi'ogosira; 15 korende as'ogokwana ekeene as'obwanchani, tokine goika tomoikere ere as'onsi, ore omotwe, Kristo; 16 as'ere omobere bwonsi korasang'ananigwe kobwatanigwa, as'ogokonya gwa ker'ekimo, as'okoreng'ana emeremo ya ker'ensemo eyemo eyemo, egokinia omobere onyare kweagacha omonyene as'obwanchani. 17 Gaki nakwanire ring'ana eri, naende natebire as'Omonene, korwa bono timogenda buna Ebisaku bikogenda, as'oboenenu bwe chisemi chiabo, 18 obong'aini bwabo bwabekirwe omosunte, bamenyeire are nobogima bwa Nyasaye, ekiagera as'oboriri bwabo bore asebare, as'engecho y'obokong'u bwe chinkoro chiabo; 19 abanto basarekire kegima, bebekire ase chingecho chimbe chi'omobere banyare gokora kera chingecho chi'eubi as'okorengereria. 20 Korende inwe timweorokerereti iga amang'ana a Kristo; 21 onye mwamoigwete mokorokererigwa asere, buna kere ekeene ase Yesu: 22 morusie as'amang'ana ay'engecho ye ritang'ani omonto okare, oyosarigwe as'okobwatia okorengereria gw'okong'ainereria; 23 mokorwe abayia as'omoika bw'ebirengereria biaino, 24 mweboyie omonto omoyia, oyotongetwe as'engecho ya Nyasaye as'oboronge nobochenu bw'ekeene. 25 Gaki, borusie oborimo, mokwane ekeene ker'omonto nomogisangi oye: naki igatore ebimo intwe as'intwe. 26 Mobee, korende timokora ebibe: erioba tirigwa nainwe more nendamwamu: 27 gose timoa saitani ribaga. 28 Omoibi taiba naende: mbuya akore emeremo nomokia as'amaboko aye gokora ayare amaya, erinde abe negento akomwatanera oyoremeire. 29 Ring'ana rionsi rire ribe tirirua omonwa oino, korende erire rigiya ri'okomogwenera oyore nokorigia, ribae obuya abakoigwa. 30 Gose timoichania Omoika oria Omochenu o Nyasaye; asere mokabekwa ekemanyererio goika rituko ri'okoboria. 31 Obororo bwonsi, nendamwamu, nokobea, neriomana, nemeruini, bimsigwe asemore, amo na ker'obobe: 32 mobe nobuya inwe as'inwe, nakororerana amabebe, nakwaberana inwe as'inwe, buna na Nyasaye ase Kristo ababerete inwe.
1 Gaki mobe abatunyani ba Nyasaye, buna abana banchire; 2 mogende as'obwanchani, buna Kristo abanchete inwe, akerua as'engecho yaito, esadaka nekeng'wanso ase Nyasaye, kobe ogotioka okuya. 3 Korende obotomani, neubi yonsi, gose okorengereria, tigokwanwa asemore kegima, buna ebagwenerete abachenu; 4 gose eubi, gose amang'ana ay'obokayayu, gose ogosekereria aya tagwenereti; korende mbuya kobua koiraneria ng'a mbuya mono. 5 Naki ring'ana eri mwarimanyire kegima, ng'a tari omotomani, gose oyo bw'eubi, gose omonto bw'okorengereria, nere omosabi esanamu, ore nomwando as'obonda bwa Kristo na Nyasaye. 6 Omonto tabang'aina as'amang'ana atari nengecho, ekiagera as'aya okobea kwa Nyasaye iga gogochera abana b'ogosaria. 7 Gaki timobwatana nabarabwo. 8 Naki kare mwarenge omosunte, korende bono omobaso as'Omonene; genda buna abana b'omobaso 9 (naki okwama kw'omobaso nas'obuya bwonsi noboronge nekeene), 10 komoramanye ekemogwenerete Omonene. 11 Gose timobwatana nogokora gotakwama okw'omosunte, korende mogokanie; 12 naki nobosoku nonya nokoyakwana amang'ana ayio agokorwa nabwo ase bobisi. 13 Korende onsi ayakanire naorokigwe nomobaso; naki ker'egento kiaorokigwe nomobaso. 14 As'ayio otebire, Boka, aye osundogete, boka korwa as'amakweri, na Kristo nakobarerie. 15 Rigereria mono, gaki, buna mokogenda, tari buna abanto batari nobong'aini, korende buna abare nobong'aini; 16 nagogekorera ekero, ekiagera amatuko aya namabe. 17 As'engecho eye timoba abariri, korende abanto bakoinyora ng'a inki obwanchani bw'Omonene. 18 Naende timotinda as'edivai, ekiagera mboreo obokayayu, korende moichorwe n'Omoika; 19 motchereranie as'esaburi, nomosasoko nogotera kw'emioyo, motere namokomogokera Omonene ase chinkoro chiaino; 20 mokomoakera mbuya mono Nyasaye Tata amatuko onsi, as'amang'ana onsi, as'erieta riaye Omonene oito Yesu Kristo; 21 mogokorerana as'okoiroka gwa Kristo. 22 Inwe abakungu, bakorere abasacha baino buna okomokorera Omonene oito. 23 Naki omosacha nomotwe bw'omokungu, buna Kristo are omotwe bw'ekanisa, nere nomokonyi bw'omobere. 24 Naboigo buna ekanisa ekomokorera Kristo, naboigo nabakungu babakorere abasacha babo ase kera ring'ana. 25 Nainwe abasacha, banche abakungu baino, buna Kristo anchete ekanisa, akerua as'engecho yaye; 26 erinde ng'a anyare koyesibia as'amache, nase ring'ana; 27 erinde anyare kwenyorera ekanisa y'obonene, etari nobobe gose kemoa, gose rinde rionsi buna aya, korende ebe enchenu etari nebimoa. 28 Naboigo abagwenerete abasacha kobancha abakungu babo buna emebere yabo abanyene, Oyomwanchete mokaye bweyanchire omobere oye; 29 naki tari omonto obeete omobere oye; korende iga akoyorisia nakoyorenda, buna Omonene akorerete ekanisa; 30 ekiagera tore ebimo bi'omobere oye, nechinyama chiaye, namauga aye. 31 As'engecho eyio omonto natige ise na ng'ina bamenyane na mokaye; nabarabwo babere babe omobere oyomo. 32 Obo nobobisi obonene: korende ngokwanande amang'ana a Kristo nekanisa. 33 Korende omonto anche mokaye buna omobere oye omonyene; nomokungu tamocha koigwera omosacha oye.
1 Abana, moigwere abaibori baino as'Omonene: ekiagera obo nabwo oboronge. 2 Basike 'so na nyoko (ogochika oko nakwo ogochika kwe ritang'ani as'eira), 3 erinde ebe buya asore, oikaranse mono as'ense. 4 Nainwe, abatata, timobachegia abana baino; korende barere as'amasikani nokworokereria kw'Omonene. 5 Abasomba, moigwere abanene baino ase chingecho chi'omobere buna nokomoigwera Kristo; as'obwoba nokoiguswa, as'obomo bw'omoyo; 6 gose tari as'obosomba bw'amaiso buna abegwenia ase mwanyabanto; korende buna abasomba ba Kristo, mogokora obwanchani bwa Nyasaye as'enkoro; 7 as'omoyo omuya mokomokorera Omonene gose tari mwanyabanto: 8 inomanye ng'a ring'ana rigiya agokora omonto, naegwe erio n'Omonene, karabe omosomba, gose onye nomosibore. 9 Nainwe, abanene, bakorere ayio ayio, motige kobairokia: momanye ng'a ere oyore Omonene obo noyoino oyore igoro, nasare gwanchereria tikoiyo. 10 Abaminto, mobe abakong'u as'Omonene, nas'okobua gwe chinguru chiaye. 11 Eboe ebinto bionsi bi'esegi bia Nyasaye, monyare gotenena korwania obong'ainereria bwa saitani. 12 Naki okoamererania gwaito tari igoro as'amanyinga nechinyama, korende igoro as'oboruoti nokobua, igoro as'abanene b'omosunte bw'enseye, naigoro y'emeganda y'ebirecha ebibe as'ense y'omoika. 13 As'ayio bogoria ebinto bionsi bi'esegi bia Nyasaye, monyare koamererania nerituko ri'obobe, na kamwaikeranirie onsi, gotenena. 14 Tenena, gaki, mweboyie ekeene ebinema biaino, nakobeka oboronge ebikuba biaino, 15 nagosiberwa amagoro engecho y'okoba ang'e twanyorire as'enchili y'omorembe; 16 kobua onsi bogoria enguba y'okwegena, as'eyio namonyare korimia emegwe yonsi y'omorero y'oria omobe. 17 Naende moyenyore egutwa y'ogokonyeka, nomoro bw'Omoika, oro nering'ana ria Nyasaye; 18 as'ogosasima gwonsi nogosaba mogosasima ker'ekero gionsi as'Omoika, nagotagesia ase ring'ana erio, mogokora omokia mono, nakobasabera abachenu bonsi, 19 amo nainche, ng'egwe ogokwana, as'okomanora omonwa one, as'oboremu, ndandie obobisi bw'enchili, 20 as'ayio nigande omogai as'egesibo; nyore oboremu as'ogokwana chingecho chingwenerete gokwana. 21 Korende inwe nainwe monyare koyamanya amang'ana ane engecho are, Tukiko, oyominto omwanchwa, omokori omwegeni, as'Omonene, nabatebie amang'ana onsi: 22 ere namotomete asemore as'engecho eye eye monyare koyamanya amang'ana aito, nere nabaremie chinkoro chiaino. 23 Omorembe as'abaminto, nobwanchani amo nokwegena, bokorua ase Nyasaye Tata, nas'Omonene Yesu Kristo. 24 Obuya bobe amo nabonsi abamwanchete Omonene oito Yesu batari nabobe.
1 Paulo na Timotheo abatomwa ba Yesu Kristo, as'abachenu bonsi ase Kristo Yesu, abare hilipu amo nabatang'ani, nabakori: 2 Obuya bobe asemore nomorembe bokorua ase Nyasaye Tata nas'Omonene Yesu Kristo. 3 Namoakeire ng'a mbuya mono Nyasaye one engaki nkobamyora, 4 amatuko onsi nkobasabera inwe imwensi, nkwana ogosasima kwane nomogoko, 5 naki okobwatana kwaino as'okorandia enchili, korwa amatuko omochakano goika iga rero; 6 erinyanchete nario eri, ng'a ere oyochagete emeremo emiya emioyo yaino ime nayekore goika rituko ria Yesu Kristo: 7 buna bore boronge asende korengereria aya igoro asemore mwensi, ekiagera nainwe more enkoro yane ime; ekiagera as'ogosibwa kwane nas'emeremo y'okoyerenda enchili nakoyebeka chinguru, nainwe imwensi mwabwatanire nainche nobuya obo. 8 Naki Nyasaye nkirori one, engecho mbarengereretie inwe as'amabera are ime ase Kristo Yesu. 9 Noko nakwo ogosaba kwane, obwanchani bwaino bomenteke bobe obonge mono, as'obong'aini nokoinyora gwonsi. 10 Monyare koyancha ayare amaya, erinde mobe nemioyo emerabu, motari nakomocha, goika rituko ria Kristo; 11 mwaichoirwe nokwama kw'oboronge as'enchera ya Yesu Kristo, nas'obonene nokobakwa kwa Nyasaye. 12 Korende, abaminto, narigirie momanye ng'a amang'ana onsi anyorete achire kobua as'okogendereria enchili; 13 goika ogosibwa kwane kwarorekanire maiso marore ase Kristo, nas'abarendi bonsi b'omoruoti, nas'abande bonsi. 14 Nabare abange baminto bare as'Omonene, bakanyara goikerania as'engecho y'ogosibwa kwane, bamentekanire mono korikwana ring'ana ri'Omonene batari nobwoba. 15 Abande nkorandiabare amang'ana a Kristo, as'engecho y'emoko neriomana; nabande barandia as'omoyo omuya: 16 naba abande as'obwanchani, bakomanya ng'a nabekirwe erinde inyerende enchili. 17 Aba bakomorandia Kristo as'esugu gose tari as'omoyo omorabu, bakaga ng'a nkomentabare obororo bwane nogosibwa kwane; 18 Inki rende? korende ase chinchera chionsi, onye nas'obobe, ao gose nas'ekeene, Kristo akorandigwa; nas'ayio nagokire, ee, ningoke. 19 Naki namanyire ng'a aya nang'onchokere koba ogokonyeka kwane, as'engecho y'ogosaba kwaino nekeegwa ki'Omoika o Yesu Kristo, 20 koreng'ana nokoganya, nogosemeria kwane, ng'a tingosokigwa nagento gionsi, korende as'oboremu bwonsi, buna amatuko onsi, na bono naende Kristo nabakwe as'omobere one, kerabe as'obogima bwane, ao as'ogokwa kwane; 21 naki asende inche koba moyo Kristo, nogokwa nokonyora. 22 Korende kerabe koba moyo as'omobere, — asende inche nokwama kw'emeremo yane, gaki erindigetie gochora timanyeti. 23 Namigirwe as'egati y'amang'ana abere, iga ndengereretie kogenda bwone imenye na Kristo; naki mbuya kobua: 24 korende koba as'omobere nkorigirie mono as'engecho yaino. 25 Nainche kondasemerie aya, namanyire ng'a nimenye nagoikaransa amo nainwe, erinde mogenderere monyare kogoka as'okwegena; 26 erinde ogwetogia kwaino konyare komenteka ase Kristo Yesu as'engecho yane, as'engecho y'okoba kwane amo nainwe imwensi naende. 27 Korende orogendo rwaino robe buna egwenerete enchili ya Kristo, erinde ngocha kobarora inwe, ao gose ntaiyo nyaigwe amang'ana aino, ng'a moteneine bokong'u as'omoika oyomo, as'omoyo oyomo mokorwanera okwegena gw'enchili; 28 gose timoiroka ababisa baino, as'ing'ana rinde rionsi: as'abwo negekone kere maiso marore ki'ogosira, korende asemore inwe egekone ki'ogokonyeka kia Nyasaye. 29 Korende mwaeirwe as'engecho ya Kristo, tari okomwancha gwoka, korende nogochandwa as'engecho yaye. 30 Kamorabe nokoamererania koria koria mwarorire asende, mokoigwa ng'a ninde nakwo goika bono.
1 Gaki gakorabe okoremia konde gwonsi ase Kristo, gose ogokiria kw'omoyo konde gwonsi kw'obwanchani, gose okobwatana kw'Omoika, karabe amabera ande onsi namabebe, 2 ichorerania omogoko one, erinde mobe nokorengereria okomo, abanyene obwanchani obomo, abanyene omoyo oyomo, nokorengereria okomo. 3 Timokora ing'ana rinde rionsi as'okoamererania nas'oboenenu, korende as'oboitongo, ker'omonto amobare oyomwabo ng'a nomuya komobua omonyene. 4 Ker'omonto tarigereria ebinto biaye omonyene, korende ker'omonto arigererie ebinto bi'abande. 5 Naki mobe nomoyo oyo ime yaino oyoreiige ime ase Kristo Yesu: 6 Ere omochakano igarenge omogwekano buna Nyasaye, nere tabarete gose ngento koba koreng'ana buna Nyasaye, 7 korende agekora buna tari nobonene, akaimokia omogwekano bw'omosomba, akaba omogwekano bw'abana ba mwanyabanto; 8 naende, ochia kororekana igare nekieni buna mwanyabanto, agakanyeka, akaba omoigweri goika amakweri, naro namakweri ay'omosalaba. 9 As'ayio naende Nyasaye akamoimokia mono, akamoa erieta riria ribuete ker'erieta; 10 erinde as'erieta ria Yesu kera riru riringwe, eri'ebinto bi'igoro, nebinto bi'ense, nebire inse as'ense, 11 ker'oromeme rwatore ng'a Yesu Kristo n'Omonene, as'obonene bwa Nyasaye Tata. 12 Gaki, abanchwa, buna mwaigwete amatuko onsi, tari ekero narenge aroro, korende bono kobua ekero inche ntaiyo, isaneria ogotoreka kwaino abanyene as'okwoboa nokoiguswa; 13 naki Nyasaye ogokora ime yaino, okorigia kwaino nogokora kwaino, as'engecho y'omogoko oye omuya. 14 Yakore amang'ana onsi motari nokwemurungania nokoamererania; 15 monyare koba abana ba Nyasaye, abatari nekemoa, gose okong'ainereria, gose motari nobobe gati y'ekegori ekere ekebe nekia bogeka, aroro as'egati yabwo mororekane koba buna emebaso as'ense, 16 mobwatete ring'ana ri'obogima; inyore engecho y'okwebaka ase rituko ria Kristo, ng'a tinaminyogete bosa, gose tinkoreti emeremo bosa. 17 Ee, kondaiterwe igoro y'ekeng'wanso nogokora gw'okwegena kwaino, nagokire; naende nagokire amo nainwe imwensi. 18 Ninwe naboigo goka, naende goka amo nainche. 19 Korende nasemeirie as'Omonene Yesu komotoma Timotheo achiche bwango asemore, ndemigwe nainche kondamanye buna more. 20 Naki tindi nomonto onde ore nomoyo oyomo nainche, oranyare korigereria buna more ekeene. 21 Naki bonsi nebiabo bakorigia abanyene, tari ebia Yesu Kristo. 22 Korende ekerengo kiaye, ng'a koreng'ana omwana akomokorera ise, nabo ankorerete inche as'okorandia enchili. 23 Gaki, nasemeirie komotoma oyo ekero ndanyare komanya ayaranyare konyora. 24 Korende negenire as'Omonene ng'a inche ninchiche omonyene bwango. 25 Korende nkarora yangweneire gotoma Epafrodito, oyominto, omokori emeremo amo nainche, omorwani amo nainche; naende nomotomwa oino nomokori bw'okorigia kwane. 26 Ekiagera abarengereretie inwe imwensi mono, naende agaichana mono, ekiagera mwaigwete ng'a igarenge omorwaire. 27 Naki arenge omorwaire ekeene, ang'e nogokwa: korende Nyasaye akamwabera, gose tari as'ere bweka, korende as'inche nabo, timba nogoichana igoro as'ogoichana. 28 Gaki nakorire omokia omonge komotoma naende, erinde, ekero moramorore, monyare kogoka, nainche ninkeanerigwe ogoichana kwane. 29 Moroisie gaki as'Omonene, as'omogoko bwonsi; erinde mobare abanto bare buna oyo koba abanto bagosikwa. 30 Ekiagera as'engecho y'emeremo ya Kristo akaba ang'e as'ogokwa, tarenda obogima bwaye as'engecho y'ogoisaneria ayaremete as'ogokora kwaino asende.
1 Omoerio, abaminto, goka as'Omonene. Kobarikera inwe aria aria tanchandete inche, korende nokobagwenere inwe. 2 Mwerende nechisese, mwerende nabwo bagokora amabe, erende nabwo bakwenacha. 3 Naki intwe abwo twarogete, togosasima Nyasaye as'Omoika, nagwetogia ase Kristo Yesu. titosemereti omobere: 4 korende nonya inche kondasemerie omobere, omonto onde bwonsi karerore ng'a nare nengecho y'ogosemeria omobere, inche nkobua: 5 narogete rituko ria gatano nagatato, nomonto bw'egesaku ki'Abaisiraeli, bw'egesaku kia Benjamin, Omoibirania bw'Abaibirania; as'amang'ana ogotunya amachiko, Omofarisai; 6 as'amang'ana omonyene ogochanda ekanisa, as'engecho y'oboronge bokonyorekana as'amachiko, tinarenge nakomocha. 7 Korende amang'ana aria arenge kogwenera asende, nkayarora abaire bosa as'engecho ya Kristo. 8 Ee, nayabarire onsi, ng'a abaire bosa as'engecho y'obuya bo tari nekerengo gi'okomomanya Kristo Yesu, Omonene one; korende as'engecho yaye nanyorire ogosira kw'ebinto bionsi, nakobibara ng'a biabaire buna esike, erinde imonyore Kristo, 9 naende ndorekane asere, timba noboronge boria bokonyorekana as'amachiko, korende boria bokonyorekana as'okwegena kore ase Kristo, oboronge boria bokorua ase Nyasaye, as'okwegena: 10 imomanye ere, nokobua gw'okobokigwa kwaye, nobomo bw'ogochandwa kwaye, kondagwekanigwe nogokwa kwaye; 11 erinde inyore as'enchera ende yonsi goikera okobokigwa kw'abakure. 12 Tari ng'a natiekire goika, gose natiekire koba omoikeranu: korende ngotunyande ndibwate riria erio as'engecho yaye nabwatirwe na Kristo Yesu. 13 Baminto, tinyekageti omonyene ng'a natiekire kobwata: korende ninkore egento ekemo gioka; kweba ayare nyuma, ndambarie ayatang'aine, 14 nakong'irie orogendo, ng'ikere eng'eria y'okorangerigwa okonene kwa Nyasaye ase Kristo Yesu. 15 Gaki intwe abwo tore abaikeranu torengererie ayio; komorabe nokorengereria ayande onsi, Nyasaye nabaigorere erio narirorio. 16 Korende, agwo twaigete togende as'engecho eyio eyio. 17 Mobe abegi bane, abaminto, morigererie abwo bakogenda as'ogotunyana omogwekano oria oito twabaete. 18 Naki abange bakogenda, nabatebirie amang'ana abo botambe, nonya mbono nabatebirie as'amariga, ng'a nababisa b'omosalaba o Kristo; 19 omoerio obo nogosareka, nyasaye obo nenda, obonene bwabo nas'obosoku bwabo, bakorengereria amang'ana ense. 20 Naki intwe, obomenyo bwaito igoro bore; korwa agwo naende ntomoganyete omokonyi, Omonene Yesu Kristo: 21 oranyare koonchora omobere oito bw'obosoku, onyare kogwekana nomobere oye bw'obonene, as'okoreng'ana ogokora kwaye aranyare kobibeka ebinto bionsi inse asare.
1 Gaki, abaminto, abanchwa bane, abwo nabaroreire amaiga, omogoko one, negutwa yane, tenena bokong'u as'Omonene, abanchi bane. 2 Namosoroire Euodia, namosoroire na Suntoke babe nomoyo oyomo as'Omonene. 3 Ee, nagosoroire naye bo, omobwatani bw'ekeene, obakonye abakungu abwo, ekiagera bakorete emeremo y'enchili amo nainche, na Klementi nere, nabaria abande bakorete emeremo amo nainche, abwo amarieta abo are ime as'ebuku y'obogima. 4 Goka as'Omonene amatuko onsi: neria kabere natebire, Goka. 5 Obwororo bwaino bomanyekane as'abanto bonsi. Omonene ng'ang'e are. 6 Timwechandera ing'ana rinde rionsi; korende ase kera ring'ana as'ogosasima nogosaba, amo nokoiraneria ng'a mbuya mono, okorigia kwaino komanyekane ase Nyasaye. 7 Nomorembe o Nyasaye obuete obong'aini bwonsi, norende chinkoro chiaino, nebirengererio biaino ase Kristo Yesu. 8 Omoerio, abaminto, onsi ayare ay'ekeene, onsi ayare ay'ogosika, onsi ayare ayaboronge, onsi ayare amachenu, onsi ayagwenerete, onsi ayagokuma buya; kobore obuya bwonsi, gakorabe ogotogigwa okuya gwonsi, yarengererie aya. 9 Amang'ana mweorokereretie asende nakoyabwata, nakoyaigwa, nakoyarora asende, yakore aya: na Nyasaye bw'omorembe nabe amo nainwe. 10 Nagokire mono as'Omonene, ekiagera bono as'omoerio, mwabokirie ebirengererio biaino as'engecho yane; buna mwarenge korengereria okoba kwane, korende timwanyora ribaga. 11 Tari ng'a nakwana aya, ekiagera inde nokoremerwa: naki neorokereirie, nimba as'engecho ere naki, goisanerwa nero. 12 Namanyire ogokeyigwa, naende namanyire okomenteka: as'engecho yonsi? nas'amang'ana onsi, norokererigwe okoigota nakorora enchara, nokomenteka, nokoremerwa. 13 Ninyare gokora amang'ana onsi as'ere ombekire chinguru. 14 Korende mwakorete buya mono, mwabwatanete nainche as'emechando yane. 15 Nainwe mwensi, inwe abanyene mwamanyire, inwe Abafilipi, ng'a as'omochakano bw'enchili, ekero naruete Makedonia, ekanisa ende tiyarenge yabwatanete nainche as'amang'ana aya y'okorua nokonyora, tatiga inwe mweka. 16 Naki nonya nase Thesaloniki mwandeterete ogokonywa gw'okoremerwa kwane gose tari ara rimo rioka. 17 Tari ng'a ninkerengereretie keria ekeegwa; nindengereretie okwama gokomenteka koba okonge, as'okobara kwaino. 18 Korende ninde nebinto bionsi nakobua; naende naichoire mono, nanyorire as'okoboko kw'Epafrodito ebinto biaruete asemore, ogotioka kw'amanukato, esadaka yancheirwe, emogwenerete Nysasaye. 19 Na Nyasaye nabaichorerie ker'eke morigetie as'ekerengo ki'obonda bwaye, as'obonene ime ase Kristo Yesu. 20 Bono Nyasaye, Tata oito, abakwe kare nakare Amin. 21 Monkwanerie ker'omochenu ase Kristo Yesu. Abaminto bare amo nainche babakwanirie. 22 Abachenu bonsi babakwanirie, kobua abwo bare b'enyomba ya Kaisari. 23 Obuya bw'Omonene oito Yesu Kristo bobe amo nemioyo yaino.
1 Paulo, omotomwa o Yesu Kristo as'obwanchani bwa Nyasaye, na Timotheo oyominto, 2 as'abaminto abachenu nabegeni abare ime ase Kolosai: Obuya bobe asemore nomorembe okorua ase Nyasaye Tata oito nas'Omonene Yesu Kristo. 3 Twamoakeire ng'a mbuya mono Nyasaye, Ise Omonene oito Yesu Kristo, amatuko onsi twabasabeire, 4 ekero twaigwete amang'ana aya okwegena kwaino ase Kristo Yesu, nobwanchani more nabwo as'abachenu bonsi, 5 as'engecho y'ogosemeria mwagacheirwe emonga igoro, amang'ana aya mwayaigwete kare ase ring'ana ri'ekeene as'enchili, 6 yaikire asemore buna ere as'ense yonsi, ekwama amatunda nagokina, buna yakinire asemore, korwa rituko mwaigwete nakoinyora mono obuya bwa Nyasaye as'ekeene; 7 buna mworokereretigwe na Epafra omogisangio omwanchwa oito, ore omokori omwegeni ase Kristo as'engecho yaino, 8 nere agatworokereria obwanchani bwaino as'Omoika. 9 Naki as'ayio naintwe korwa rituko twaigwete, titotigeti kobusabera, nogosaba asemore, moichorigwe chisemi chi'obwanchani bwaye as'obong'aini bwonsi, nokoinyora kw'omoyo ime; 10 mogende buna abagwenerete as'Omonene, momogwenere kegima; ase ker'emeremo emiya mokwama amatunda, momenteke ase chisemi chia Nyasaye; 11 momentwe chinguru as'okobua gwonsi, as'okoreng'ana gwe chinguru chi'obonene bwaye, as'oboremereria bwonsi amo nomogoko, 12 mokomoakera ng'a mbuya mono Tata, oyotogweneirie intwe tonyore ensemo y'omwando bw'abachenu as'omobaso; 13 otokonyete korwa chinguru chi'omosunte, agatong'anyia nagotosoyia as'obonda bw'obwanchani bwaye; 14 ekiagera asere ntore nokoborigwa as'amanyinga aye, okwabera kw'ebibe: 15 nere nomogwekano o Nyasaye otarikororekana, omotongi as'ebitongwa bionsi; 16 naki asere ebinto bionsi bigatongwa, ebire igoro nebire igoro as'ense, ebikororekana, nebitarikororekana, nonya nebirogo bi'obonene, gose oboruoti, gose obonene gose okobua; ebinto bionsi bigatongwa as'enchera yaye, nas'engecho yaye; 17 nere igo arengeo ritang'ani ri'ebinto bionsi, nebinto bionsi bibwataine asare. 18 Nere nomotwe bw'omobere, engecho yaye ekanisa: nere nomochakano, omoiborwa bwe ritang'ani as'abakwete; erio abe omotang'ani ase bionsi. 19 Naki ise agancha boria bwonsi oboikeranu boikaranse asare; 20 nas'ere kobibwatania ebinto bionsi nere, gakorire omorembe as'amanyinga omosalaba oye; nas'ere kobirabe ebinto hire igoro as'ense, gose ebire igoro. 21 Nainwe, igoniwareuge agwo ritang'ani, mwatananetwe nere, nababisa as'ebirengererio biaino, as'ogokora kwaino okobe, obasang'ananirie bono, 22 as'omobere bw'euyama yaye as'ogokwa kwaye, erio abarente inwe as'obosio bwaye, abachenu, motari nokomocha gose kemoa: 23 komoraikaranse botambe as'okwegena, mwabaire igoro as'oboroso naende abakong'u, motaonchoiri nagotiga ogosemeria gw'enchili mwaigwete amang'ana aye, arandigwe as'ebitongwa bionsi bire inse as'erioba; as'ayio inche Paulo ngakorwa omokori oye. 24 Bono nagokeire ogochandwa inde nakwo as'engecho yaino; naende nayaikeranirie aria aremete as'ogochandwa gwa Kristo as'omobere one, as'engecho y'omobere oye, engecho yaye ekanisa yayej 25 as'ayio nabaire omokori oye, as'oborendi bwa Nyasaye, naetwe ensemo yaino, ng'ikeranie ring'ana ria Nyasaye, 26 obobisi boria bwabisetwe korwa kare nakare, nakorwa ebigori bionsi: korende bono bwaigoreirwe as'abachenu baye. 27 Korende Nyasaye agancha koborokia engecho y'obotenenku bw'obonene bw'obobisi obo as'Ebisaku, nario Kristo ime yaino, ogosemeria kw'obonene: 28 ere twarandirie amang'ana aye, komokurera ker'omonto, nakomworokereria ker'omonto ase chisemi chionsi, tonyare komoreta ker'omonto omoikeranu ase Yesu Kristo; 29 nainche ngokorande emeremo as'engecho eyio, nagokora omokia koreng'ana as'ogokora kwaye, ogokora emeremo asende ase chinguru.
1 Korende nindigetie momanye omokia one inde noro as'engecho yaino, nase baria ba Laodikia, nabaria batarandora obosio bwane as'omobere; 2 erinde baremigwe chinkoro chiabo, kobarabwatanigwe as'obwanchani, banyore obotenenku bwonsi bw'okoinyora oboikeranu, banyare komanya kegima obobisi bwa Nyasaye, engecho yaye Kristo, 3 ime asare nchireo chinibo chionsi chi'obong'aini nechisemi chibisekanete. 4 Nakwanire ring'ana eri, omonto tacha kobang'aina as'amang'ana ay'okoebereria. 5 Naki nimba tindi aroro as'omobere, igande amo nainwe as'omoika, kondagoke nakorora okorobera kwaino, noboremu bw'okwegena kwaino ase Kristo. 6 Gaki buna mwamonyorire Yesu Kristo Omonene, genda boigo asere, 7 abanyene emeri, nokoagachwa asere, mwakorirwe abakong'u as'okwegena, buna niworokereretigwe, momenteke as'okoiraneria ng'a mbuya. 8 Rigereria monto onde tabaisa kobasiria as'obong'ainereria bwaye, nokong'aina kwa bosa, as'engecho y'ogotunyana chisemi chia mwanyabanto, as'engecho y'okworokereria gw'ense, korende tari as'engecho ya Kristo: 9 naki asere nao boikaransere oboikeranu bwonsi Obonyasaye as'engecho y'omobere. 10 Nainwe mwaichoirwe asere, oyore omotwe bw'obonene bwonsi nokobua: 11 asere mwarokigwe as'okwaroka ogotakoregeti as'amaboko, as'okorusia oria omobere bwe chinyama, as'okwaroka gwa Kristo; 12 kamoratindekwe amo nere as'ebatiso, nas'okwo mwabokigwe amo nere, as'okwegena ogokora kwa Nyasaye oyomobogetie korwa as'amakweri. 13 Nainwe, konyora mwakure ekiagera as'okomocha kwaino nas'ogotaroka kw'emebere yaino, akabakora moyo amo nere, gatiekire gotwabera okomocha gwaito gwonsi; 14 gatiekire gotinyia riria rirube riarigetwe as'amachiko, rigotosoera; eriarenge nobobisa asetore: oritigeirie, tiriba gati yaito nere, akariakeraas'omosalaba; 15 gatiekire kwerusia obonene nokobua, akabiorokia maiso marore, akagoka igoro ase biro bio as'omosalaba. 16 Gaki, monto tabagambia inwe as'endagera gose ebikonyugwa, gose as'engecho ye rituko rinene gose okooroka kw'omotienyi, gose esabato: 17 amang'ana ayio nekiriri as'amang'ana agocha gocha; korende omobere noyo Kristo. 18 Monto onde tabaura ekeegwa kiaino as'okorigia kwaye, as'okweororobia as'ogosasima amalaika, nakwebeka as'amang'ana ayarorire, nakoenena bosa as'obong'aini bw'omobere oye, 19 korende tabwateti Omotwe, ekiagera korwa as'oro, omobere bwonsi okonyora onsi nakobwatanigwa ase chinengo nemeki, gokina as'ogokina koruete ase Nyasaye. 20 Gaki onye mwakure amo na Kristo mogatiga okworokereria gw'ense, naseki mokoba inse as'ekina, buna nabamenyete as'ense, 21 timobwata, timoigwa, timokuna. 22 (Amang'ana ayio onsi igagosareka ekero ki'ogokorerwa), komokobwata amachiko nokworokereria kwa mwanyabanto? 23 Amang'ana ayio arorekanire buna nare nechisemi, nase chingecho cht'ogosaba, nobokanyeku, mwekoreire inwe mweka, nas'okogambera omobere as'obotindi; korende takogwenera gento as'okorengereria kw'omobere.
1 Gaki onye mwabokire amo na Kristo, rigia ayare igoro aase Kristo aikaransete, as'okoboko gw'okorio kwa Nyasaye. 2 Rigia ayare igoro, tari ayare as'ense. 3 Ekiagera mwakwete, nobogima bwaino bwabisirwe amo na Kristo ase Nyasaye. 4 Kristo karache kororekana oyore obogima bwaito, erio nainwe namororekane amo nere as'obonene bwaye. 5 Gaki biite ebimo biaino bire as'ense; obotomani, eubi, okorengereria okobe, okogania okobe, nokorengereria, nakwo ogosasima esanamu; 6 as'engecho y'ayio endamwamu ya Nyasaye yabaikeire abana b'ogosaria. 7 As'ayio nainwe igo mware gotara kare, iga mwabete as'aya. 8 Korende bono yabeke are aya onsi; okobea, endamwamu, nobobe, nokorama, nogokwana okobe gokorua as'emenwa yaino: 9 timotebania oborimo; ekiagera mwamorusirie omonto okare, amo nogokora kwaye, 10 mwamobekire omonto omoyia, okorirwe omoyia anyore chisemi as'omogwekano oye ere oyomotongete. 11 Agwo tari Omoyunani gose Omoyahudi, okwarokigwa gose ogotarokigwa, oyotamunyeti gento, gose Omosikuthi, omosomba, gose omobiare; korende Kristo nas'onsi, nase bonsi. 12 Gaki ekiagera more abachore ba Nyasaye, abachenu banchire, beka omoyo bw'amabera, obuya, oboitongo, obwororo, oboremereria; 13 mobogoreranie, nakwaberana, omonto karabe nering'ana igoro as'omonto onde; buna Kristo ababerete inwe, naboigo nainwe kora boigo. 14 Igoro as'aya onsi beka obwanchani, nabwo egesibo ki'oboikeranu. 15 Nomorembe o Nyasaye ogambe ase chinkoro chiaino, noro mwarangererigwe as'omobere oyomo; mobe abanto bakoiraneria ng'a mbuya mono. 16 Ring'ana ria Kristo rikaranse as'obonge ime yaino ase chisemi chionsi, mworokereranie nagokanania as'esaburi nogotera, nogotera kw'omoyo, as'obuya mokomoterera Omonene ase chinkoro chiaino ime. 17 Na kera erimogokora, ase ring'ana gose ogokora, kora onsi as'erieta ri'Omonene Yesu, mokoiraneria ng'a mbuya Nyasaye Tata asere. 18 Inwe abakungu, igwera abasacha baino, buna egwenerete as'Omonene. 19 Nainwe abasacha, ancha abakungu baino, timoba nobororo asebare. 20 Nainwe abana moigwere abaibori as'amang'ana onsi; naki ring'ana eri ndigwenerete as'Omonene, 21 Nainwe abatata, timochegia abana baino, tibabaisa gokwa emioyo. 22 Nainwe abasomba mobaigwera abwo bare as'omobere ng'a nabanene baino; as'amang'ana onsi, tari obosomba bw'amaiso buna abakwegwenia ase mwanyabanto, korende as'obuya bw'enkoro, mokomosika Nyasaye, 23 Rinde rionsi mogokora, rikore as'omoyo, buna as'Omonene, gose tari ase mwanyabanto; 24 komoramanye ng'a namonyore as'Omonene eng'eria y'omwando; ekiagera mokomokorera Omonene Kristo. 25 Naki oyorakore bobe, igo aranyore naende obobe bwaye akorire: korende gwanchereria tikoiyo.
1 Ninwe abanene bae abasomba baino ekere kia boronge, mokomanya ng'a nainwe more n'Omonene igoro. 2 Kora mono as'ogosaba, komokorenda as'ogosaba nakoiraneria ng'a mbuya; 3 nogotosabera naintwe twensi, Nyasaye atoigorere egesieri ase ring'ana riaye, tokwane obobisi bwa Kristo, naki as'engecho yaye nasibirwe, 4 erio ng'orokie, buna ingwenerete gokwana, 5 Genda as'obong'aini as'obosio bw'abwo abare isiko, mogokorera ekero. 6 Amang'ana aino abe nobuya amatuko onsi, ansere buna omonyo monyare komanya buna chagwenerete koiraneria ker'omonto. 7 Tukiko, oyominto omwanchwa, omosomba omwegeni, omosomba omogisangio one as'Omonene, naborokie amang'ana ane onsi; 8 ere namotomire asemore, as'engecho eyio eyio, momanye amang'ana aito, abaremie chinkoro chiaino; 9 amo na Onesimo, oyominto omwegeni, omwanchwa, ore omonto oino. Nababorokie amang'ana onsi ayare aiga. 10 Aristariko, osibetwe amo nainche obakwanirie, na Marko, omoigwa o Baranaba, oyio mwanyorire amachiko as'amang'ana aye; karaikeasemore moroisie. 11 Na Yesu, okorokwa Yusto; abwo nabanto barogete: abwo boka nabakori emeremo amo nainche as'engecho y'obonda bwa Nyasaye; nabarabwo igo barenge kondemia. 12 Epafra, ore omonto o seino, omosomba o Yesu Kristo, obakwanirie, okorire omokia amatuko onsi as'engecho yaino as'ogosaba kwaye, erinde motenene abaikeranu abamanyete mono as'obwanchani bwonsi bwa Nyasaye. 13 Naki nabaire kirori ng'a nare nomokia omonge as'engecho yaino, nas'engecho y'abwo bare ase Laodikia, nas'engecho yabwo bare Hieropoli. 14 Luka, oria omorwaria omwanchwa, obakwanirie, na Dema. 15 Bakwanie abaminto bare ase Laodikia, na Numfa, nekanisa ere as'enyomba yaye. 16 Rirube eri karirasomwe asemore, tiga risomwe naende as'ekanisa ya Laodikia; nariria ria Laodikia risomwe nainwe. 17 Motebie Arikippo, arigererie mono obosomba boria kwaetwe as'Omonene, erio aboikeranie. 18 Ogokwania kwane inche Paulo, as'okoboko kwane inche bweka. Inyora ebisibo biane. Obuya bobe amo nainwe.
1 Paulo, na Silivano, na Timotheo, as'ekanisa y'Abathesaloniki, ase Nyasaye Tata, n'Omonene Yesu Kristo: Obuya bobe asemore nomorembe. 2 Twamobakire Nyasaye amatuko onsi as'engecho yaino mwensi, igo tokobatora as'ogosaba gwaito; 3 gose titori gotiga koinyora emeremo yaino nokwegena, nogwechanda kwaino as'obwanchani, noboremereria bwaino as'ogosemeria kore as'Omonene Yesu Kristo, as'obosio bwa Nyasaye Tata oito. 4 Gatoramanye, abaminto mwanchire na Nyasaye, obochore bwaino. 5 Ekiagera enchili yaito tebaikereti as'amang'ana oka, korende nase chinguru, nas'Omoika Omochenu, nas'ogoichora okonge; buna mwamanyire chingecho chiaito chiarenge asemore, as'engecho yaino. 6 Mokaba abatunyani baito, nab'Omonene, mokanyora ring'ana as'ogochandwa okonge, amo nomogoko bw'Omoika Omochenu; 7 goika mokaba omogwekano bw'abanto bonsi abanchete ase Makedonia, nas'Akaya. 8 Naki korwa asemore ring'ana ria Nyasaye riaigurwe, tari ase Makedonia na Akaya oka; korende ker'aas'onsi okwegena kwaino more nakwo ase Nyasaye kwarandire, goika titorigeti gokwana ande onsi. 9 Naki barabwo boka baorokirie amang'ana aito, buna engecho yarenge ogosoa gwaito asemore; na buna mwamoonchokerete Nyasaye, mwachitigete chisanamu, erinde mokorere Nyasaye ore moyo, bw'ekeene, 10 nakomoganya Omwana oye korwa igoro, oyio abogetie korwa as'amakweri, Yesu, otokonyire nendamwamu eranyare gocha.
1 Korende inwe mweka, baminto, mwakomanyire ogosoa gwaito asemore, ng'a tikwabete bosa: 2 korende gatwatiekire gochandwa ritang'ani nagokorwa bobe, buna mwamanyire, ase Filipi, tokaba noboremu ase Nyasaye oito koyekwana enchili ya Nyasaye asemore, as'okoyeamereraneria mono. 3 Naki ogokurera gwaito tikori as'ogosira gose as'eubi, gose as'obong'ainereria: 4 korende buna twancheirwe na Nyasaye, koba abarendi b'enchili, nabo togokwana; tari buna abakogwenera mwanyabanto, korende ase Nyasaye oyogotorenga chinkoro chiaito. 5 Naki titwarenge kero kende gionsi namang'ana ayakobagwenera abanto, buna mwamanyire, gose amang'ana akobisa okorengereria, Nyasaye nkirori; 6 titorikorigia ogotogigwa nabanto, gose nainwe, gose nabande, igotwarenge twanyarire kobaritoera buna abatomwa ba Kristo. 7 Korende igo twarenge abororo gati asemore, buna omoreri akorenda abana baye omonyene: 8 naboigo igo naintwe tobarengereretie as'obwanchani obonge, tokarora omogoko kobaa, tari enchili ya Nyasaye yoka, korende nemioyo yaito yonsi, ekiagera mwabaire abanchi baito. 9 Naki, baminto mwainyoire emeremo yaito emekong'u nogokora gwaito: ekiagera omobaso nobotuko togakora emeremo titocha komorarereria monto oino, tokabaranderia enchili ya Nyasaye. 10 Nainwe mbirori, na Nyasaye boigo, buna twaikaransire asemore nainwe mwanchire, as'obochenu, nas'oboronge, botari komocha: 11 naboigo buna mwamanyire engecho twamokanetie ker'oyomo oino buna ise akobakania abana baye, tokababeka omoyo nagokwana, 12 erio mogende buna ebagwenerete ase Nyasaye, obarangeirie mosoe as'obonda bwaye nobonene bwaye. 13 Korende as'ayio intwe naintwe twamoiranerie Nyasaye ng'a mbuya totari gotiga, ekiagera ekero mwanyorete riria ring'ana ri'obotomwa bwa Nyasaye mwaigwete asetore, mokaribwata tari buna ring'ana ria mwanyabanto; korende buna ring'ana ria Nyasaye; naboigo rire ekeene ekeene, rigokora emeremo ime asemore inwe abwo mwanchire. 14 Naki inwe, baminto, mwarenge abatunyani be chikanisa chia Nyasaye chire ase Boyahudi ase Yesu Kristo; naki mwanyorete emechando eria eria as'abanto b'egesaku kiaino, banyorete nabwo as'Abayahudi; 15 abamoitete Omonene Yesu nababani babo boka abanyene, bagatoseria intwe, korende tibagwenera Nyasaye, naende tibabwataini nabanto bande; 16 bagatotanga titokwana nebisaku binde binyore ogokonywa; erio baikeranie ebibe biabo amatuko onsi; korende endamwamu yabaikeire goika omoerio. 17 Korende intwe, baminto gotoratananekane nainwe as'egeka, as'obosio, tari as'enkoro, tokarengereria kobua kobarora amasio aino, namaiga amange: 18 as'ayio tokarigia gocha asemore naende, ee, ninche Paulo, erie ritang'ani, neria kabere. Saitani agatotanga. 19 Naki ogosemeria gwaito, gose okogoka gwaito ninki? Gose egutwa y'ogwetogia ninki? Tari inwe, as'obosio bw'Omonene oito Yesu Kristo ekero ki'ogocha kwaye? 20 Naki inwe nobonene bwaito, nomogoko oito.
1 Naboigo as'ayio, ekiagera titwanyarete koremereria kobua, tokarora buya totigwe Athene intwe tweka; 2 tokamotoma Timotheo oyominto, omosomba o Nyasaye, omokori emeremo amo naintwe as'enchili ya Kristo, kobakora inwe abakong'u, nakobaremia inwe as'engecho y'okwegena kwaino; 3 erinde omonto onde taichanigwa nogochandwa oko; naki inwe mweka mwamanyire ng'a ntogacheire aya. 4 Naki ekero twarenge amo nainwe, togatang'ana kobatebia ng'a natonyore ogochandwa, buna abete, nainwe mwamanyire. 5 As'ayio inche nainche ekero narenge tinanyarete koremereria naende, ngatoma omonto erinde imanye okwegena kwaino, tacha oria omotemi kobatema, gose emeremo yaito teba eya bosa 6 Korende Timotheo ekero atocherete amatuko aya korwa asemore, agatoretera amang'ana amaya ay'okwegena kwaino nobwanchani bwaino, buna ng'a iga mogotoinyora buya amatuko onsi, morengereretie gotorora intwe, koreng'ana buna intwe nainwe; 7 as'engecho eyio tokaremigwa baminto, as'amang'ana aino, as'emechando nogochandwa gwaito gwonsi, as'okwegena kwaino. 8 Naki bono tore moyo, kerabe inwe moteneine bokong'u as'Omonene. 9 Naki okoiraneria ki toranyare komoa Nyasaye as'engecho yaino, as'omogoko oria bwonsi twagokeire, as'engecho yaino as'obosio bwa Nyasaye oito. 10 Obotuko nomobaso togasaba as'omokia, erinde tonyare kobarora obosio bwaino, nakorosia ekiaremire as'okwegena kwaino. 11 Naboigo Nyasaye omonyene, Tata oito, Nomonene oito Yesu Kristo atotang'ane enchera yaito toike seino; 12 Omonene abatang'ane nakobamenta nakobaichoria as'ogwanchana, inwe as'inwe, nas'abanto bonsi, buna intwe tore nainwe; 13 anyare gokong'ia chinkoro chiaino chibe chitari nekemoa as'obochenu as'obosio bwa Nyasaye, Tata oito, ekero ki'ogocha kwaye Omonene oito Yesu amo nabachenu baye bonsi.
1 Eriatigaire, baminto, twabasoroire, nakoborokereria as'Omonene Yesu, buna mwanyorete asetore, engecho ebagwenerete kogenda nakomogwenera Nyasaye, buna mokogenda, monyare komenteka mono mono. 2 Naki mwamanyire amachiko ki twabaire korwa as'Omonene Yesu. 3 Naki obo nabwo obwanchani bwa Nyasaye, ogosibigwa kwaino, mwerusananie nobotomani; 4 ker'oyomo oino amanye koyobua omobere oye, as'obonene nogosika, 5 tari as'okorengereria kw'omobere, buna Ebisaku ebitamomanyeti Nyasaye; 6 erinde omonto tasaria, nakomomochera oyomwabo ase ring'ana eri: ekiagera Omonene nere okorusia egesiomba as'aya onsi, buna twabatebirie nakoborokereria mono ritang'ani. 7 Naki Nyasaye tatorangereretie as'eubi, korende tobe as'ogosibigwa. 8 Gaki ere bwangire, tangeti omwana o mwanyabanto, korende Nyasaye, okobaa Omoika oye Omochenu. 9 As'amang'ana obwanchani, timori nokorigia mbarikere: naki inwe mweka mworokererigwe na Nyasaye gwanchana; 10 naki mwakorire ring'ana eri as'abamino bonsi bare ase Makedonia. Korende twabasoroire, baminto, momenteke mono; 11 naende mobe ang'e kweorokereria gokira, nagokora emeremo yaino, nagokora emeremo as'amaboko aino abanyene, buna twabachigete; 12 erinde mogende as'amasikani obosio bw'abwo bare isiko, timoba nokorigia konde. 13 Korende, baminto, titorigeti ng'a timoinanya amang'ana abo abwo bararire; mobaise goichana buna abande, batari nogosemeria. 14 Naki onye twanchire Yesu okwete naende akaboka, naboigo nabwo bararire ase Yesu Nyasaye nabarete amo nere. 15 Naki twabatebirie aya ase ring'ana ri'Omonene, ng'a intwe abwo tore moyo, twatigaire goika ekero ki'ogocha kwaye Omonene, titokobatang'anera abwo batiekire korara. 16 Naki Omonene omonyene, naike korwa igoro neriogi rinene, negeturi kie rilaika rinene, negetureri kia Nyasaye: nabwo bakwete ase Kristo nababoke ritang'ani: 17 erio nyuma ntwe abwo tore moyo, twatigaire, natobogorigwe amo nabarabwo as'amare, komorotota Omonene as'omoika gati: erio natobe amo n'Omonene kare nakare. 18 Naboigo, remania as'amang'ana aya.
1 Korende, as'amang'ana ay'ebiro nechingaki baminto, timori nokorigia mbarikere. 2 Naki mwamanyire inwe mweka ng'a ase rituko ri'Omonene igorirache buna omoibi agocha botuko. 3 Ekiagera ekero bagoteba, Omorembe nobuya, erio ogosareka gokobachera as'omobosokano bwango, buna obororo bokomochera oyore morito, nabwo tibagokonywa. 4 Korende inwe, baminto, timori as'omosunte, obotuko boria bobanyore buna omoibi. 5 Naki inwe mwensi nabana b'smasase, nabana b'omobaso: intwe titori ab'obotuko, gose ab'omosunte; 6 nabo titorara buna abande, korende torende, nakoba nokwerita. 7 Naki abwo bakorara ba ara botuko. nabwo bagotinda batinda botuko. 8 Korende intwe abatore ab'omobaso, tobe nokwerita, tweboyie chikuba okwegena nobwanchani: negutwa yaito ebe ogosemeria kw'ogotoreka. 9 Naki Nyasaye tatobegeti as'endamwamu yaye, korende tonyore ogotoreka, as'Omonene oito Yesu Kristo, 10 oyokwete as'engecho yaito, erio tomenye amo nere, kerabe twarendire gose kerabe twararire. 11 Naboigo remania nakoagachana, ker'omonto noyomwabo, nabo buna mogokora. 12 Korende, baminto, ntorigetie momanye baria bagokora emeremo as'engecho yaino, nabare igoro asemore as'Omonene, nakobakonya; 13 mobasike mono as'obwanchani, as'engecho y'emeremo yabo. Mobe nomorembe inwe as'inwe. 14 Twaba oroire, baminto bakonye abwo bataikaranseti buya, babeke chinguru bare nemioyo ekwete, babogorie abareu, remereria nabanto bonsi. 15 Rigereria monto onde bwonsi tamoa oyomwabo obobe as'obobe; korende amatuko onsi bwatia ayare amaya, inwe as'inwe, nas'abanto bonsi. 16 Goka amatuko onsi; 17 saba motari gotiga; 18 iraneria ng'a mbuya ase kera ring'ana naki obo nabwo obwanchani bwa Nyasaye asemore ase Kristo Yesu. 19 Timorimia Omoika; 20 timochayaobobani; 21 temabionsi, bwataekereekiya; 22 erusananie nobobe bore kera chingecho. 23 Nyasaye bw'omorembe omonyene abasibie kegima; nainwe emioyo yaino nechinkoro chiaino nemebere yaino erosigwe kegima, etari nakemoa, ekero ki'ogocha kwaye Omonene oito Yesu Kristo. 24 Ere nomwegeni obarangeirie, nere nakore. 25 Baminto tosabere. 26 Obakwanie abaminto as'okonyunyunta ogochenu. 27 Nabachikire as'Omonene, basomerwe abaminto bonsi rirube eri. 28 Obuya bw'Omonene oito Yesu Kristo bobe amo nainwe.
1 Paulo, Silivano, na Timotheo, as'ekanisa ya Abathesaloniki ere ase Nyasaye Tata oito, n'Omonene Yesu Kristo; 2 Obuya bobe asemore nokwegena gokorua ase Nyasaye Tata oito, n'Omonene Yesu Kristo. 3 Netogwenerete koiraneria ng'a mbuya ase Nyasaye amatuko onsi as'engecho yaino, baminto, buna egwenerete, naki okwegena kwaino kwamentekanire mono, nobwanchani bwa ker'omonto oino as'abamwabo bwabaire obonge. 4 Nonya naintwe abanyene twetogirie ase chikanisa chia Nyasaye as'engecho y'oboremereria bwaino, nokwegena more nakwo as'okorosigwa kwaino gwonsi nogochandwa mwaremereirie; 5 ekio nekiorokererio gi'ekina ki'oboronge kia Nyasaye; erio mogwenere gosoa obonda bwa Nyasaye, ekiagera as'engecho yaye mwachandirwe, 6 Ekiagera mboronge ase Nyasaye kobaakana emechando baria bakobachanda inwe, 7 nakobaakana inwe mogochandwa omogoko amo naintwe ekero ki'okoorokigwa kwaye Omonene Yesu korwa igoro amo namalaika ay'okobua kwaye, 8 as'omorero ogwoka, kobaakana endamwamu barabwo abatamomanyeti Nyasaye, nabwo abataigwereti enchili y'Omonene oito Yesu Kristo: 9 abaranyare gochandwa as'ogosareka gwa kare nakare, korwa obosio bw'Omonene nakorua obonene bwe chinguru chiaye, 10 ekero agocha erinde abakwe as'abachenu baye, nagokumigwa ase bonsi abanchete (ekiagera oborori bwaito bwancheirwe asemore) ase rituko riria. 11 As'ayio twabasabeire inwe amatuko onsi, erio Nyasaye oito ababare ng'a mwagweneire okorangerigwa kwaino, aikeranie ker'okorigia okuya na ker'emeremo y'okwegena, ase chinguru: 12 erinde erieta ri'Omonene oito Yesu ribakwe asemore, nainwe ime asare, as'obuya bwa Nyasaye oito nobw'Omonene Yesu Kristo.
1 Gaki twabasoroire, baminto, as'amang'ana ay'ogocha kwaye Omonene oito Yesu Kristo, nogosangererekana gwaito obosio bwaye; 2 timotengechigwa bwango nagotiga ebirengererio biaino, gose timoichanigwa, as'omoyo gose ase ring'ana, gose ase rirube rigokagwa ng'a neriaito, ng'a rituko ri'Omonene riabaire; 3 monto onde bwonsi tabang'aina as'enchera ende yonsi: naki tirigocha gotaracha ritang'ani koria ogwatananeka, aorokigwe oria omonto bw'ebibe, omwana bw'ogosira, 4 oria okorwana nakweimokereria igoro omonyene igoro ase ker'egekorokwa Nyasaye gose egegosasimwa; goika ere omonyene igaikaransete ase hekalu ya Nyasaye, buna Nyasaye, okweorokia omonyene ng'a nere Nyasaye. 5 Timorikoinyora ng'a ekero narenge amo nainwe nabatebetie ayio? 6 Na bono erimotangete mwarimanyire, anyare koorokigwa oyo ekero kiaye. 7 Naki boria obobisi bw'ogosaria iga bono bwakorire emeremo: koionde nare oyotangete bono, goika arusigwe. 8 Erio agwo naorokigwe oria omosaria, oyio Omonene Yesu namoite as'omoika bw'omonwa oye, nakomosiria as'okoorokigwa kwaye kagocha; 9 ere, ogocha kwaye nkore as'omogwekano bw'ogokora emeremo yaye Saitani, as'okobua gwonsi nebikone bi'ogokumia kw'oborimo, 10 nas'okong'aina gwonsi as'obobe bwabo abagosira; ekiagera tibagianchete ekeene, banyare gotorigwa. 11 As'ayio Nyasaye nabaretere chinguru chi'ogosira, babwanche oborimo: 12 bagambigwe bonsi abatancheti ekeene, korende abarenge kwegokia as'obobe. 13 Korende netogwenerete intwe komoiraneria Nyasaye ng'a mbuya mono amatuko onsi as'engecho yaino, baminto, mwanchetwe n'Omonene, naki Nyasaye obachorire korwa omochakano monyore ogotoreka as'ogosibigwa kw'Omoika nagwancha ekeene: 14 ekiabarangereretie inwe as'enchili yaito, as'okonyora obonene bw'Omonene oito Yesu Kristo. 15 Nabo, baminto, tenena bokong'u, mobwate chingecho mworokereretigwe, onye nas'amang'ana gose ase rirube riaito. 16 N'Omonene oito Yesu Kristo omonyene, na Nyasaye Tata oito otwanchete agatoa okoremia gwa kare nakare nogosemeria okuya, as'obuya, 17 abaremie chinkoro chiaino, nagochikora chinkong'u ase kera ring'ana nogokora okuya.
1 Omoerio, baminto, tosabere, ring'ana ri'Omonene rirande, ribakwe boigo buna rire asemore; 2 tokonywe nabanto abatari boronge, nababe; ekiagera tai bonsi bare nokwegena. 3 Korende Omonene noyo bw'ekeene, oranyare kobakora mobe abakong'u, nakobakonya noria omobe. 4 Naintwe, twamosemeirie Omonene as'amang'ana aino, erinde ng'a mwayakorire ayatwabachigete, naende namoyakore. 5 Omonene abatang'ane emioyo yaino monyore obwanchani bwa Nyasaye, noboremereria bwa Kristo. 6 Twabachikire, baminto, as'erieta ri'Omonene oito Yesu Kristo, erusananie abanyene na ker'oyomino otari kogenda boronge, oyotabwateti chingecho borokereretigwe asetore. 7 Naki mwamanyire abanyene buna ebagwenerete gotobwatia: naki titogendeti bobe asemore; 8 gose titorieti endagera y'omonto onde bwonsi bosa, korende nas'enieremo nogokora, omobaso nobotuko, togakora emeremo, erio titomorarereria omonto oino: 9 tari ng'a titori nokobua, korende twekorire abanyene tobe ekiorokererio asemore, erinde mototunyane. 10 Ekiagera nonya nekero keria twarenge amo nainwe tokabachika ring'ana eri, Ng'a onye omonto tarigeti gokora emeremo, abe takoria ndagera. 11 Naki twaigure ng'a mbare abanto asemore batakogenda buya, aba tari gokora emeremo nonya ng'ake, korende igo bakorengereria ayabanto bande. 12 Nabo twabachikire abwo nakobakonya as'Omonene oito Yesu Kristo, bakore emeremo as'ogokira, nakoria endagera yabo abanyene. 13 Korende, inwe, baminto. timorosa gokora amaya. 14 Karabe omonto onde bwonsi otabwateti ring'ana riaito ase rirube eri, erusananie nomonto oyio, gose timokwana nere, anyare gosoka. 15 Korende timomobara ng'a nomobisa, korende mokonye buna oyomino. 16 Bono, Omonene bw'omorembe omonyene, abae omorembe amatuko onsi ase chinchera chionsi. Omonene abe amo nainwe mwensi. 17 Ogokwania kwane inche Paulo, as'okoboko kwane inche omonyene, eke nakio ekemanyererio ase kera rirube: naboigo nkorika, 18 Obuya bw'Omonene oito Yesu Kristo bobe amo nainwe mwensi.
1 Paulo, omotomwa o Yesu Kristo, as'amachiko a Nyasaye Omokonyi oito, na Yesu Kristo ogosemeria gwaito; 2 ase Timotheo, omwana one bori as'okwegena: Obuya, namabera, nomorembe, bikorua ase Nyasaye Tata, nase Yesu Kristo Omonene oito. 3 Buna narigetie oikaranse Efeso, ekero narenge kogenda Makedonia, erinde obachike abande tiborokereria okworokereria konde, 4 gose timoigwa emegano ya kare gose koborania amang'ana ase chisokoro atari nomoerio, akoreta okoboria, gose tari oborendi bwa Nyasaye bore as'okwegena; gaki bono nagochikire boigo. 5 Korende ogoikerana kw'amachiko nobwanchani bokorua as'enkoro endabu nebirengererio ebiya, nokwegena gotari nokong'ainereria: 6 abande bakomocha ayio basirire, bakoonchokera amang'ana aya bosa; 7 banchete koba aborokia b'amachiko, ko tibamanyeti ayabagokwana gose amang'ana aria bagoteba nechinguru. 8 Korende twamanyire ng'a amachiko namaya, omonto karakorere as'enchera y'amachiko; 9 naye omanye ring'ana eri, ng'a amachiko tabekiri as'omonto oboronge, korende as'abakomocha nabatari nokoigwera, nabanto abatamomanyeti Nyasaye, nabakori ebibe, nabatari abachenu, nabatasigeti Nyasaye, nabaiti abaise babo, nabaiti abang'ina babo, nabaiti, 10 nabatomani, nabagwesaria abasacha as'abasacha, nabakoiba abanto, nabanyaborimo, nabakoria eira y'oborimo, na korirabe ring'ana rinde rionsi ritabwataini nokworokereria kw'obogima; 11 koreng'ana buna enchili y'obonene bwa Nyasaye akobakerwa, yabegetwe as'okorendwa kwane. 12 Nainche namobakire Kristo Yesu Omonene oito oyombegete chinguru ekiagera nandoche ng'a noyo bw'ekeene, akambeka as'obosomba bwaye; 13 inche narenge ritang'ani omorami, oyokorosia abanto, omonyene obotindi: korende nkaberwa ekiagera nakorete bo as'oboriri nas'ogotaba nokwegena. 14 Nobuya bw'Omonene oito bokamenteka mono amo nokwegena nogwancha kore ase Kristo Yesu. 15 Nering'ana ri'ekeene, rigwenerete gwancherwa nabanto bonsi, ng'a Kristo Yesu nachete ense abakonye abanyene ebibe; nainche noyo bwe ritang'ani asebare. 16 Korende as'engecho eye nkaberwa, erinde as'inche, buna oyo bwe ritang'ani, Yesu Kristo aorokie oboremereria bwonsi, imbe omogwekano ase baria baranyare komwancha nyuma banyore obogima bwa kare nakare. 17 As'Omoruoti o kare nakare, otakonyara korora ogosareka, otakororekana, Nyasaye bwe chisemi ere bweka, asare ere ogosika nobonene kare nakare. Amin. 18 Ogochika oko nakoeire kobe emonga, omwana one Timotheo, as'engecho y'amang'ana obobani ayatang'aine igoro asore, erinde as'ayio orwane esegi engiya; 19 obe omonyene okwegena nokorengereria okuya; abande bachisereria are echio, bagasaria engecho y'okwegena. 20 As'abwo mbareo Humenayo na Iskanderi, abwo nabaire Saitani, erinde borokererigwe tibarama Nyasaye.
1 Gaki ritang'ani as'amang'ana onsi, ogosorora, nogosaba, nokoboria Nyasaye, nokoiraneria ng'a mbuya mono, akoreke as'engecho yaino. 2 As'engecho y'abaruoti, na bonsi abare nobonene, erinde tonyare koba as'obogima bw'oboitongo nomorembe as'okoba nechingecho chia Nyasaye nogosika. 3 Naki eri nerigiya, naende ndiancheire as'Omokonyi oito Nyasaye; 4 origetie abanto bonsi bakonywe banyare komanya mono ayare ay'ekeene. 5 Naki Nyasaye noyomo, nomobwatania egati ya Nyasaye namwanyabanto noyomo, ere oyore Omwana-o-mwanyabanto, Kristo Yesu, 6 bweruete omonyene koba omokonyi as'engecho ya bonsi, oranyare gwatorwa as'ekero kiaye; 7 as'engecho y'ayio nkabekwa imbe omorandia nomotomwa (natebire ekeene, tintebeti oborimo), omworokia bw'Ebisaku as'okwegena nekeene. 8 Gaki nindigetie abasacha basabe aas'onsi, bakoimokia amaboko amachenu, atari nendamwamu nakoamererania. 9 Naboigo abakungu beboyie chianga chi'ogosika amo nogosika okuya, nobong'aini boisanete; tari as'okomina etukia, gose as'ethahabu neruru, gose ase chianga chie rigori rinene; 10 korende (buna ebagwenerete abakungu bakoorokia chingecho chia Nyasaye) as'ogokora okuya. 11 Omokungu tiga eorokererie as'ogokira nokoigwera ker'engecho. 12 Ting'eti omokungu ribaga kworokia, gose komogambera omosacha, korende abe as'ogokira. 13 Naki Adamu nere otongetwe ritang'ani, na Hawa nyuma. 14 N'Adamu tang'ainetwe, korende omokungu akang'ainwa agasoa as'okomocha. 15 Korende nakonywe, ase roria oroiboro, kabarakore as'okwegena nobwanchani nobochenu amo nobong'aini boisanete.
1 Ring'ana eri neri'ekeene, Omonto karigetie emeremo y'oboaskofu, (omotang'ani) orengereirie emeremo emiya. 2 Gaki nagwenerete omoaskofu koba omonto otari kwomanigwa, omonto ore nomokungu oyomo, omweriti, nakwerenga ne chisemi, omonyene chingecho chigwenerete, omoroisia abageni, omworokereria; 3 tari omonto onarete edivai, tari omoaki, tari omonto bwanchete chifetha; korende abe omwororo, taba omonto okoamererania; 4 ab'omonto otenenetie enyomba yaye buya, omanyete kobakania abana baye amo nobong'aini boisanete; 5 (omonto otamanyeti gotenenera enyomba yaye buya omonyene, naki ararende ekanisa ya Nyasaye?) 6 tari omonto omoyia, tabaisa gocha koenena, agwe as'ekina kia saitani. 7 Nagwenerete gwatorwa ng'a nomuya nabanto bare isiko, tabaisa kogwa as'obobe nobeto ya saitani. 8 Naboigo nabadikoni, babe abanto b'obokanyeku, tari abare nemenwa ebere, tari abanto bakonywa edivai enyinge, babe abanto batakorengereria chifetha chi'obosoku; 9 babwate obobisi bw'okwegena as'ebirengererio ebiya. 10 Naba bonsi batemwe ritang'ani; nyuma bakorere obodikoni kobatiekire kororekana batari nabibe. 11 Naboigo abakungu babe abanto b'obokanyeku, tari abang'achi, abanto aberiti, ab'ekeene as'amang'ana onsi. 12 Abadikoni babe nomokungu oyomo, nakobatenenera abana babo buya nechinyomba chiabo. 13 Naki abagokora emeremo y'obodikoni buya, benyoreire obonene obuya, noboremu obonge as'okwegena kore ase Kristo Yesu, 14 Nakorikeire aya, nindengereretie gocha asore bwango. 15 Korende kondatebane onyare komanya mono buna ebagwenerete abanto kogenda as'enyomba ya Nyasaye, ere ekanisa ya Nyasaye ore moyo, esiro noboroso bw'ekeene. 16 Naende nering'ana ritari nokoamererania nobobisi bw'okoba nechingecho chia Nyasaye; Ere oorogetigwe as'omobere, akabarerwa oboronge as'omoika, akarorekana namalaika, akarandigwa as'ebisaku, akegenwa as'ense, akabogorigwa igoro as'obonene.
1 Omoika okwanire maiso marore, ng'a ekero ki'omoerio abanto ng'abeatanane nokwegena, bakoigwera emeika y'okong'ainereria, nokworokereria kw'ebirecha. 2 As'okong'ainereria kw'abanto bagokwana oborimo, basambwa ebirengererio biabo nekioma ki'omorero; 3 babakania abanto tibanyuoma, nakobachika beatanane nendagera eye Nyasaye atongete enyorwe as'okobaka as'abwo bare nokwegena nabare bamanyete mono ekeene. 4 Naki ker'egetongwa kia Nyasaye nekiya, gose tikeri gekwangwa, onye kianyorirwe as'okobakwa: 5 naki giasibigwe ase ring'ana ria Nyasaye nogosaba. 6 Korabainyorie abaminto ayio, nobe omokori omuya o Yesu Kristo, nomonarigwa amang'ana okwegena, nokworokereria okuya koria gwatunyanete: 7 korende emegano ey'okorama ney'abang'ina, oyiange. Naria omoyo oo as'okogenderera koba nechingecho chia Nyasaye: 8 naki koba ang'e konyora chinguru chi'omobere nkogwenerete ake; korende okoba nechingecho chia Nyasaye nkogwenerete as'amang'ana onsi, naki nkore neira y'obogima bwa bono nakoria korache koba. 9 Ring'ana eri neri'ekeene, ndigwenerete gwancherwa na bonsi. 10 Naki twerosirie na koba ang'e ase ring'ana eri, ekiagera tomosemeretie Nyasaye ore moyo, ore omokonyi bw'abanto bonsi, kobua as'abwo banchire. 11 Obachike abanto ayio nakoborokereria bo. 12 Omonto tachaya obosae bwao; korende obe omogwekano as'abwo banchire, as'ogokwana, nas'orogendo, nas'obwanchani, nas'okwegena, nas'obochenu. 13 Goika nchiche kora omokia as'ogosoma, nas'okorandia, nas'okworokereria. 14 Totiga gokorera keria ekeegwa kere ime asore, kwaetwe aye as'obobani, nas'okobekerwa amaboko ay'abagaka. 15 Oyarengereria ayio; bwerue kegima as'ayio; okogenderera kwao kobe okuya as'abanto bonsi. 16 Erende omoyo oo, nokworokereria kwao. Kora ayio botambe; riaki as'ogokora iga nabwekonye omonyene, nabwo bakoigwa asore.
1 Totogonyera omogaka, korende omosorore buna isoo; nabake bao buna abamino: 2 abakungu abang'ina buna abanyoko; abakungu abasubati buna abamino, as'obochenu bwonsi. 3 Basike ababoraka abare ababoraka b'ekeene. 4 Korende omoboraka karabe nabana gose abachokoro, beorokererie ritang'ani babe nobuya as'enyomba yabo abanyene, nakobaakana abaibori babo: naki ring'ana eri nerigiya, ndigwenerete as'obosio bwa Nyasaye. 5 Korende ere oyore omoboraka ekeene ekeene, nagotigwa bweka, nasemeretie ase Nyasaye, igakoba as'ogosaba nogosorora obotuko nomobaso. 6 Ere oyokwerigeria omogoko, okure nonya ore moyo, 7 Obachike aya, erinde babe tibari nekemoa. 8 Korende omonto otarendeti abare abaye, ko kobua ab'enyomba yaye, okanire okwegena, naende nomobe kobua oyotancheti. 9 Omoboraka onde bwonsi tarikwa, onye emiaka yaye etaraika emerongo etano nomo, nere oyorenge omokungu bw'omosacha oyomo, 10 nagwatorwa as'ogokora okuya; onye okinirie abana, onye obaroisirie abageni, onye obasibirie abachenu amagoro, onye obakonyire abagochandwa, onye obwatete ker'ogokora okuya, 11 Korende ababoraka abare abake bwange kobarika: naki ekero baranyore okorengereria gotabwataini na Kristo, nabarigie konyuomwa; 12 nabwo mbare nekina ekiagera batigire okwegena kwabo kwe ritang'ani. 13 Amo nayio beorokereirie koba aboro, bagoetanana enyomba as'enyomba; gose tari aboro boka, korende abatoratoria, bakwerosia namang'ana ay'abande, bagokwana amang'ana atabagwenereti. 14 Gaki nanchire ababoraka batari abang'ina banyuomwe, baibore abana, barende amang'ana a nyomba, libaa omobisa ribaga ri'okorama: 15 naki abande batiekire koonchoka nagotunyana saitani. 16 Omosacha gose omokungu bwanchete, karabe nababoraka bamwabo, abakonye, ekanisa terarerigwa; erinde ebakonye baria bare ababoraka ekeene. 17 Abagaka abagambi mbuya baegwe ogosika ara kabere, korende kobua abwo bare nemeremo ye ring'ana nakworokia. 18 Naki amariko atebire, Tobaisa kobeka eng'ombe ekeokio ekero egotindacha engano as'okoora, naende, Omokori emeremo nagwenerete eng'eria yaye. 19 Tibwancha ogosoerwa as'omogaka tatiga as'emenwa y'aburori babere gose batato. 20 Baria bagokora ebibe bakanie as'obosio bw'abanto bonsi, erinde abande bairoke. 21 Nagochikire as'obosio bwa Nyasaye, nase Kristo Yesu, nas'amalaika amachorwa, oyabwate ayio otari nokorega, tokora ring'ana rinde rionsi as'ogwanchereria. 22 Tobekera omonto amaboko bwango, gose tobwatana nebibe bi'abanto bande: bwerende omoyo oo obe omochenu, 23 Korwa bono tonywa amache oka, korende onywa edivai enke, as'engecho y'enda yao namarwaire akonyorire ebika ebinge. 24 Ebibe bi'abanto bande iga bire maiso marore, biatang'anire kogenda ekina, abanto bande ebibe biabo iga bikobatunya. 25 Naboigo ogokora okuya iga kore maiso marore, nakoria gotari maiso marore tigokonyara kobiswa.
1 Bonsi bare inse as'ebisibo as'obosomba, babare abanene babo ng'a mbagwenerete ogosikwa gwonsi, erieta ria Nyasaye tiriramwa gose okworokereria gwaito. 2 Na baria bare nabanene banchete, tibabachaya ekiagera nabamwabo; korende mbuya babakorere, ekiagera abwo babwataine eria emeremo emiya babaire abanyene okwegena nogwanchwa. Oborokie amang'ana aya nakoyakwana. 3 Omonto karorokie okworokereria konde okoao, nere tancheti amang'ana ayagwenerete ay'Omonene oito Yesu Kristo, gose okworokia kobwataine nechingecho chia Nyasaye; 4 oenenire, nere tainyoreti ring'ana rinde rionsi, korende engecho yaye buna ney'omonto omorwaire, as'amang'ana okoboria nokoamererania namang'ana, naki as'ayio boreta okogecha, neriomana, nokorama, nokorengereria okobe, 5 nokoamererania kw'abanto basarigwe obong'aini bwabo abamochete ekeene, bakaga ng'a okoba nechingecho chia Nyasaye nenchera y'okonyora; eatanane nabanto buna abwo: 6 korende okoba nechingecho chia Nyasaye amo nomogoko bw'omoyo, nokonyora okonene. 7 Naki titocheti nagento as'ense, naende titokonyara koimoka nagento; 8 korende gatorabe nendagera nechianga natoisanere nebinto ebio. 9 Abarigeti koba abanda igabakogwa as'ogotemwa nobeto nokorengereria gotari nangecho, echi'ogosaria, chikorimeria mwanyabanto as'ogosira nogosareka. 10 Naki ritina ri'obobe bwonsi nogwancha chishilingi: naki abande kobakorengereria ayio iga bagwatananekana nokwegena, nakwebeta emebere yabo as'obororo obonge. 11 Korende aye, omonto o Nyasaye, tama ayio; otunyane oboronge, nechingecho chia Nyasaye, okwegena, obwanchani, oboremereria, obwororo. 12 Rwana esegi ere engiya y'okwegena, bwata obogima bwa kare nakare, kwarangereretigwe, kwaorogetie okoorokia okuya as'obosio bw'abarori abange. 13 Nagochikire, as'bbosio bwa Nyasaye oyokobia ebinto bionsi obogima, nase Kristo Yesu, oorogetie okoorokia okuya ase Pontio Pilato, 14 renda ogochika oko gotari nakemoa, gotari nokomocha, goika okooroka kwaye Omonene oito Yesu Kristo: 15 naki as'ekero kiaye omonyene naorokie, ere oyosesenetigwe, nomonyene okobua gwonsi, Omoruoti bw'abaruoti, Omonene bw'abanene; 16 ere bweka otari konyorekana namakweri, oikaransete as'omobaso otanyare goikwa ang'e; gose tari onde mwanyabanto omoroche, gose oranyare komorora: asare ere abe nogosika nokobua gwa kare nakare. Amin. 17 Obachike abwo bare abanda as'ense eye tibaenena, gose gosemeria obonda bogosira, korende Nyasaye ore moyo ogotoa ebinto bionsi as'obonge, tobikorere as'omogoko; 18 bakore amaya, babe abanda as'ogokora okuya, babe ang'e korua enibo yabo, babwatane nabande as'omoyo; 19 bebekere emonga ebe oboroso obuya as'ekero kegocha erinde banyore obogima bwa kare nakare. 20 Timotheo renda ayabekirwe asore, bweatanane namang'ana atari ay'edini, atari nengecho, nokoamereria obong'aini bokorokwa obong'aini bw'oborimo; 21 abande bagwatora ayio bamochire okwegena. Obuya bobe amo naye.
1 Paulo, omotomwa o Yesu Kristo, as'ogwancha kwa Nyasaye, as'eira y'obogima bore ase Yesu Kristo: 2 ase Timotheo omwana one omwanchwa: Obuya, namabera, nomorembe, bikorua ase Nyasaye Tata nase Kristo Yesu Omonene oito. 3 Namoiranerie Nyasaye ng'a mbuya, nare gosasima korwa abagaka bane ba kare as'okorengereria ogochenu, buna ngokoinyora aye botambe as'ogosaba kwane, mobaso na botuko, 4 nindengerereti mono gokorora, nkoinyora amariga ao, erinde ng'ichore omogoko; 5 gonkoinyora okwegena ore nakorokwo gotari nokong'ainereria, kwarenge ritang'ani ase nyogokoro oo Loisi, na nyoko Eunike; nainche nanchire ng'a naye nobwate. 6 As'engecho eyio nakoinyoirie, igereria ekeegwa kia Nyasaye kere ime asore as'okobekerwa amaboko ane. 7 Naki Nyasaye tatoeti omoika bw'okoiroka; korende oyo bwe chinguru, noyo bw'obwanchani nomoyo bw'okwerenga nobong'aini. 8 Gaki tosokera oborori bw'Omonene oito, gose inche omosibwa oye: korende oremererie emechando amo nenchili koreng'ana nechinguru chia Nyasaye; 9 oyotokonyete, agatorangeria as'okorangerigwa ogochenu, tari koreng'ana nogokora gwaito, korende koreng'ana nokorigia kwaye omonyene nobuya bwaye, twaetwe intwe ase Kristo Yesu ritang'ani as'ekero gia kare, 10 na bono bwaorokigwe as'okomanorwa kwaye Omokonyi oito Yesu Kristo, oonchoreretie amakweri, nakoorokia obogima nagotasareka maiso marore, as'enchera y'enchili, 11 oyonkorete omorandia, nomotomwa, nomworokia bw'Ebisaku. 12 As'engecho eyio nanyorire emechando eye: korende tingosoka, naki namomanyire ere oyonyegenete, nagwancha ng'a nanyare gokerenda keria nabegete asare goika amatuko aria. 13 Bwata ekiorokererio ki'amang'ana obogima ayakwaigwete asende, as'okwegena nobwanchani bore ase Kristo Yesu. 14 Renda keria ekiya kiabegetwe asore, okerende as'Omoika Omochenu oikaransete ime asetore. 15 Kwamanyire eri, ng'a bonsi bare ase Asia bantigire; nas'abwo Figello na Hermogene. 16 Omonene abae amabera abare b'enyomba y'Onesiforo; naki ebiro ebinge agantimokia, gose tasokereti ekenyuri kiane; 17 korende ekero arenge ase Rumi, akandigia nomokia, akanyora. 18 (Omonene namoe anyore amabera, as'Omonene rituko riria) na buna are gonkorera as'ebinto ebinge as'Efeso, aye kwamanyire mono.
1 Gaki aye, omwana one, obe nechinguru as'obuya bore ime ase Kristo Yesu. 2 Naria kwaigwete asende as'abarori abange, oyabeka ayio as'abanto abegeni, abagwenerete koborokia abande boigo. 3 Bwatana nemechando amo nainche, buna omorwani omuya o Yesu Kristo. 4 Tari omorwani esegi orebeke ase chingecho chi'obogima obo, erinde amogwenere ere oyomorigete abe omorwani. 5 Gose omonto karaamereranie as'okoamererania, takoegwa egutwa ataamereraneti boronge. 6 Nemogwenerete omoremi oyobwechandeire emeremo, abe oyo bwe ritang'ani koria amatunda. 7 Yamanye mono ayio ngoteba; naki Omonene nakoe obong'aini as'amang'ana onsi. 8 Moinyore Yesu Kristo, oyobogete korwa as'abakure, bw'oroiboro rwa Daudi, koreng'ana buna enchili yane: 9 as'eyio ngachandwa goika ngasibwa, buna omokori amabe, korende ring'ana ria Nyasaye tirigosibwa. 10 As'engecho y'eyio naremereirie onsi, as'engecho y'abachorwa, erinde barabwo banyore ogotoreka kore ase Kristo Yesu amo nobonene bwa kare nakare. 11 Ring'ana eri nering'ana ri'ekeene: Naki onye togokwa amo nere natobe moyo amo nere intwensi: 12 onye tokoremereria, natogambe amo nere: onye tokomokana ere, nere natokane intwe: 13 onye titwegeneti, ere igakoba oyo bw'ekeene; takonyara gwekana omonyene. 14 Obainyorie ayio, gokobakania as'Omonene, tibaba nokoamererania kw'amang'ana atagwenereti, korende basaria abakoigwa. 15 Kora omokia kweorokia ng'a gwancheirwe na Nyasaye, omokori emeremo otagosokigwa, ogokorera boronge ring'ana ria Nyasaye. 16 Eatanane namang'ana atari nengecho, amo nogochaya nokorama Nyasaye: 17 naki rikoria buna rikwege ri'esiri, as'abwo Humenayo na Fileto; 18 abamochete ekeene bakobora ng'a okobokigwa gwatiekire koba, nabwo baonchora okwegena kw'abanto bande. 19 Korende oboroso bwa Nyasaye bore nechinguru mboteneine, abare nekemanyererio eke, Omonene obamanyire abare abaye: naende, ker'oyogwatora erieta ri'Omonene tiga atige obobe. 20 Gaki as'enyomba tibiri ebinto bie chithahabu nechifetha chioka, korende nebio omote, nebia amaroba; ebinde mbire nogosika, ebinde tibiri nogosika. 21 Gaki karabe omonto ogwesibia as'ogweatanana naba, nabe egento gekonyora ogosikwa, giasibigwe, kemogwenerete Omonene, kiarosigwe ase ker'emeremo ere emiya. 22 Korende tama okorengereria kw'obosae, tunyana oboronge, nokwegena, nobwanchani, nomorembe, amo nabwo bakomorangeria Omonene as'enkoro enchenu. 23 Korende kwange okoboria kw'obokayayu, gotari nobong'aini, gokwamanyire ng'a igakorarete eriomana. 24 Naende tai buya omosomba bw'Omonene koba omonyariomana, korende koba omwororo as'abanto bonsi, oranyare kworokia, omoremereria, 25 abakanye as'obwororo abwo bakoamererania nere, erinde gose keranyarekane, Nyasaye abae okoonchoka nobong'aini bw'ekeene, 26 banyare komanya nagosoka korwa as'obeto ya saitani, basakorwe nomosomba bw'Omonene, koyakora ayanchete Nyasaye.
1 Korende omanye ring'ana eri, ng'a amatuko ay'omoerio nakebe ekero ki'emechando. 2 Naki abanto nababe abanvene gweancha emebere yabo, abanchete chifetha, abagwetogia, abakoenena, abarami, abatakoigwera abaibori babo, abatari koiraneria ng'a mbuya, abatari abachenu, 3 abatari nobwanchani bogwenerete, abatarigetie kobwatana, abagenkani, abatari gwetanga, abatindi, abatancheti amaya, 4 abasigani, abatagokanigwa, abaenenu, abanchete kwegokia kobua komwancha Nyasaye; 5 abare nomogwekano bw'okoba nechingecho chia Nyasaye, korende bakana chinguru chiaye; bweatanane nabwo. 6 Naki as'aba mbare baria bagwesoyia ase chinyomba chi'abanto, nagosakora abakungu abariri bare nechigurube chi'ebibe, abairetwe nokorengereria gwe chingecho chinyinge, 7 bakweorokereria amatuko onsi, tibanyara kegima goikera obong'aini bw'ekeene. 8 Naboigo buna Yanne na Yambare barwanete na Musa, naboigo naba bakorwana nekeene; nabanto basarekire obong'aini bwabo, bangirwe as'amang'ana okwegena. 9 Korende tibakogenderera mono: naki obokayayu bwabo nabobe maiso marore as'abanto bonsi buna nabwo barenge. 10 Korende ave kwabwatire okworokia kwane, norogendo rwane, nokorigia kwane, nokwegena, nobwororo, nobwanchani, noboremereria, 11 nokorosigwa kwane nemechando yanyorete ase Antiokia, ase Ikonio, na Lustra; kera chingecho chi'okorosigwa echi naremereretie: nere Omonene agankonya as'onsi. 12 Ee, nabonsi banchete koba moyo ase chingecho chingiya ase Kristo Yesu nabachandwe. 13 Korende abanto ababe abang'ainereria nabamentekane kobua as'obobe, bakong'aina na kong'aineka. 14 Korende aye kabe as'aria kworokereretigwe nagoikeranigwa, ekiagera kwamanyire ning'o kweorokereretie asare; 15 naki korwa obwana kwayamanyire amariko amachenu, ayaranyare gokong'ainiyia goika onyore ogotoreka as'okwegena kore ase Kristo Yesu. 16 Kera ririko, rire nomoika o Nyasaye, ndigwenerete as'okworokia, nas'okobakonya abanto okomocha kwabo, nas'okobatang'ana, as'okobankonya as'enchera y'oboronge: 17 erinde omonto o Nyasaye abe oisanerete, oisanerigwe erinde akore ker'ogokora okuya.
1 Nagochikire as'obosio bwa Nyasaye, n'Omonene Yesu Kristo, oranyare kobagambia abare moyo nabakure, as'okooroka kwaye nas'obonda bwaye; 2 randia ring'ana, kora omokia, ekero kegwenerete nekero getagwenereti: kania, nakwomania, okonya as'oboremereria bwonsi nokworokereria. 3 Naki nageche ekero baranyare kwanga okworokereria kw'obogima; korende as'ogotunyana okorengereria kw'emebere yabo boka ng'abenyorere aborokia abange mono, ekiagera mbare namato ekiagaso. 4 Nabwo nabeatanane nokoigwa ayare ay'ekeene, nabaonchokere emegano y'oborimo. 5 Korende aye obe nekerengo as'onsi, remereria emechando, kora emeremo y'omorandia, ikerania ogokora kw'obosomba bwao. 6 Naki inche bono naiteirwe, nerituko ri'ogosiborwa kwane riaikire. 7 Narwanire esegi ere engiya, narokorire orogendo, nakorendire okwegena: 8 nyuma as'aya nagacheirwe egutwa y'oboronge, eyio Omonene omogambi bw'oboronge arang'e ase rituko riria: gose tainche bweka, korende abanto bonsi abanchete okooroka kwaye. 9 Kora omokia gocha asende bwango: 10 naki Dema ontigire, otiekire koyiancha ens'eye ya bono, akagenda Thesaloniki; Kreske ase Galatia, Tito ase Dalamatia. 11 Luka bweka ore aiga amo nainche. Bogoria Mariko, omorete amo naye; naki ongweneire as'emeremo y'ogonkorera. 12 Korende Tukiko namotomire Efeso. 13 Eanga namotigerete Karipo ase Teroa, korache retana, nebio ebitabu, kobua biria bi'amasankwa. 14 Iskander omoturi chitai agankorera amabe amange: Omonene namoakane koreng'ana nogokora kwaye. 15 Naye erende noyo, naki nagechete mono amang'ana aito. 16 As'okoiraneria kwane kwe ritang'ani tari monto oteneine amo nainche, korende bonsi bagantiga: tibabarerwa ebibe ase ring'ana eri. 17 Korende Omonene agatenena amo nainche akambeka chinguru, erinde as'emeremo yane boria obotomwa borandigwe as'ogoikerana, Ebisaku bionsi bigwe: ngakonywa as'omonwa bw'esibwori. 18 N'Omonene nankonye ase ker'ogokora okobe, nagonkonya goika boche obonda bwaye bwa kare nakare. Amin. 19 Nkwaneria Priska, na Akula, nenyomba ya Onesiforo. 20 Erasto akamenya Korintho: korende Trofimo nkamotiga Mileto omorwaire. 21 Kora omokia gocha ritang'ani ri'ekero ki'obokendu. Eubulo ogokwanirie, na Pudente, na Lino, na Klaudia, nabaminto bonsi. 22 Omonene Yesu Kristo abe amo nomoyo oo. Obuya bobe nainwe.
1 Paulo, omosomba o Nyasaye, omotomwa o Yesu Kristo, as'ekerengo gi'okwegena kw'abachorwa ba Nyasaye, nobong'aini bw'ekeene bokoreta chingecho chia Nyasaye. 2 As'ogosemeria kw'obogima bwa kare nakare, naki Nyasaye takonyara gokwana oborimo, ariete eira ritang'ani as'ekero gia kare; 3 akamanora ring'ana riaye as'ekero kiaye as'amang'ana aria, nancheretwe inche as'ogochika kw'Omokonyi oito, Nyasaye. 4 Ase Tito, omwana one as'okwegena tobwateranete: Obuya nomorembe bikorua ase Nyasaye Tata nas'Omonene Yesu Kristo, Omokonyi oito. 5 As'engecho eye nkagotiga Krete, erinde oyarosie ayatigarete, nakobeka abagaka ase ker'omochie, buna nagochigete; 6 onye omonto okororekana tari nebimoa, nere nomosacha bw'omokungu oyomo, ore nabana banchete, batagosoerwa ng'a nabakayayu nabatakoigwera. 7 Naki nemogwenerete omoaskofu (omotang'ani) abe omonto okororekana atari nekemoa, ekiagera nomorendi o Nyasaye; taba omonto oyokwegwenera omonyene, taba omwango bw'okobea, taba omonari edivai, taba omoaki, taba omwanchi enibo y'obosoku; 8 korende abe omoroisia, omwanchi amaya, ore nobong'aini boisanete, omonyene oboronge, omochenu, oyokwerita omobere oye; 9 obwatete ring'ana ri'okwegena buna orokereretigwe, anyare kobakonya abanto as'okworokereria kw'obogima, na kobabua abakorwana nere. 10 Naki mbare abange abatari nokoigwera, abare namang'ana atari nengecho, abang'ainereria, korende kobua baria barogete, 11 naki mbagwenerete basiekwe emenwa yabo; abwo nkoonchorabare chinyomba chingima, bakworokereria ayatabagwenereti, as'engecho y'enibo y'obosoku. 12 Omonto obo oyomo, omobani obo abanyene, otebire, Abakrete nabanyaborimo amatuko onsi, ching'iti chi'orosana chimbe, abaribobe batagokora emeremo. 13 Ogokwana oko nogwe ekeene. As'engecho eyio bakanie bokong'u banyore obogima as'okwegena, 14 tibategerera emegano y'Abayahudi, namachiko a mwanyabanto beatananire nekeene. 15 Ebinto bionsi nebichenu as'abwo bare abachenu: korende tikeri ekere egechenu as'abwo bare neubi, abatancheti; korende obongo bwabo nebirengererio biabo bionsi biabaire neubi. 16 Batora ng'a mbamomanyete Nyasaye, korende as'ogokora kwabo bamokana; nabare nobobe, abatari nokoigwera, ase ker'ogokora okuya tibagwenereti.
1 Korende aye kwana amang'ana agwenerete okworokereria kw'obogima, 2 ng'a abagaka babe abanyene okwerita emebere yabo, abare nogosika, abare nobong'aini boisanete, abagima as'okwegena, nas'obwanchani, nas'oboremereria. 3 Nabakungu abagotu naboigo babe norogendo rw'obochenu, tibaba abang'achi, tibaba abakonywa edivai enyinge, korende abakworokia ayare amaya; 4 erinde bakworokereria abakungu abasubati banche abasacha babo, nagwancha abana babo, 5 nakoba abare nobong'aini boisanete, nakoba abaya, abanyene ogokora emeremo chinyomba chiabo ime, abororo, koigwera abasacha babo abanyene, erinde ring'ana ria Nyasaye tiriramwa. 6 Nabamura naboigo obakanie koba nobong'aini boisanete. 7 As'amang'ana onsi bweorokie koba ekiorokererio ki'ogokora okuya, as'okworokereria kwao gokoborokia ayatasaregeti, nobokanyeku, 8 namang'ana are nobogima atanyare kogambigwa, erinde oria okorwana naye asoke, ekiagera tari nering'ana ribe ri'ogokwana igoro asetore. 9 Abasomba babaigwere abanene babo, babagwenere as'amang'ana onsi; tibaba abakoiraneria; 10 tibaba abaibi, korende baorokie obwegeni nobuya bwonsi, erinde bakweboyie okworokereria kw'Omokonyi oito as'amang'ana onsi. 11 Naki obuya bwa Nyasaye bogokonya mwanyabanto bonsi bwarorekanire; 12 bogotworokia kwanga obobe nokorengereria gw'ense, nakoba moyo as'obong'aini boisanete, noboronge, nakoba nechingecho chia Nyasaye, as'ense eye ya bono; 13 gatorigereretie ogosemeria gosesenirie, nokoorokia kw'obonene bwa Nyasaye omonene Omokonyi oito Yesu Kristo; 14 oyobweruete omonyene as'engecho yaito, erinde atoborie nogosaria gwonsi, nagwesiberia abanto babe abanyorwa baye, abare nomokia as'ogokora okuya. 15 Kwana amang'ana ayio, naende orokereria nagokania as'okobua gwonsi. Omonto onde bwonsi tagochaya.
1 Bainyorie bakanyeke as'abagambi, nabare nokobua, nakoba nokoigwera, babe ang'e ase ker'emeremo emiya, 2 tibakwana bobe as'omonto onde bwonsi, tibaba abanyariomana, babe abororo, bakoorokia obwororo bwonsi as'abanto bonsi. 3 Naki intwe agwo kare iga twarenge titori nobong'aini, abasaria, twang'ainetwe, gokorera okorengereria gwe chingecho chinyinge chi'okwegokia, tokogenda as'omoyo bw'okogechana, nemoko, abanyene okobea, tokobeana. 4 Korende ekero obuya bw'Omokonyi oito Nyasaye nobwanchani bwaye ase mwanyabanto bwarorekanete, 5 agatokonya, tari as'ogokora kw'oboronge twakorete, korende as'amabera aye, as'ogosibigwa gw'okoiborwa gwa kabere, nagokorwa omoyia as'Omoika Omochenu, 6 oyio atoitererete obonge as'enchera ya Yesu Kristo Omokonyi oito; 7 erinde, gotwabarirwe abanyene oboronge as'obuya bwaye, tonyare gokorwa abanyori omwando bw'obogima bwa kare nakare, buna kore ogosemeria gwaito. 8 Ring'ana eri neri'ekeene, namang'ana ayio nindigetie oyakwane nechinguru, erinde baria bwamwanchete Nyasaye bainyore kogenderera as'ogokora okuya. Aya namaya, naende nagwenerete ase mwanyabanto. 9 Korende okoboria kwa bosa, namang'ana e chisokoro, neriomana, nokoamererania kw'amachiko; weatanane naro, ekiagera tagwenereti, naende mbosa are. 10 Omonto omobe ekero kwamokanitie ritang'ani, neria kabere, mwange; 11 gokwamanyire ng'a omonto buna oyo oonchokeire are, naende okorire ebibe, bwenacheire ekina omonyene. 12 Kondamotome Artema asore gose Tukiko, kora omokia gocha asende goika Nikopoli: naki aria narengereretie komenya ekero ki'obokendu. 13 Zena omomanyi amachiko, na Apollo obatome as'omokia, tibaremerwa kende gionsi. 14 Abanto baito tiga beorokererie kogenderera nogokora okuya as'ogokora kogwenerete, erinde tibaba tibari kwama. 15 Abanto bonsi bare amo nainche bagokwanirie. Tokwanerie baria batwanchete as'okwegena. Obuya bobe amo nainwe mwensi.
1 Paulo, omosibwa o Kristo Yesu, na Timotheo ore oyominto, ase Filemon omwanchwa oito, omokori emeremo amo nainche, 2 nas'Appia, oyominto, nas'Arikippo omorwani omogisangio oito, nas'ekanisa ere as'enyomba yao: 3 Obuya bobe nainwe nomorembe bikorua ase Nyasaye Tata oito, nas'Omonene Yesu Kristo. 4 Namobakire Nyasaye one, amatuko onsi ngokoinyora as'ogosaba kwane, 5 nkoigwa amang'ana obwanchani bwao, nokwegena ore nakwo as'Omonene Yesu as'abachenu bonsi; 6 erinde okobwatana gw'okwegena kwao okore emeremo yaye as'obong'aini bwa ker'egento ekiya kere asemore ase Kristo Yesu. 7 Naki narenge nomogoko omonge nokoremia as'engecho y'obwanchani bwao, ekiagera chinkoro chi'abachenu chiatimokigwe naye, oyominto. 8 As'ayio, nimba noboremu bwonsi ase Kristo kogochika erikogwoierete, 9 korende, as'engecho y'obwanchani nagosoroire, ekiagera buna nde Paulo omogaka, na bono omosibwa o Yesu Kristo. 10 Nagosoroire as'engecho y'omwana one naiborete as'egesibo kiane, Onesimo, 11 ere kare takogwenerete, korende bono okogweneire mono, aye nainche: 12 namotomire asore as'omobere oye omonyene, engecho yaye, nenkoro yana: 13 naki inche namorigetie abe nainche, anyare gonkorera ribaga riao as'ebisibo bi'enchili; 14 korende tinarigetie gokorabo otatiga as'amang'ana ao, erinde obuya bwao tiboba buna obw'okobetereria, korende as'ogwancha kwao. 15 Naki ande, nakio kiagerete agatananwa naye as'ekero, erinde obe nere naende kare nakare; 16 korwa bono tari buna omosomba, korende kobua as'omosomba, oyominto omwanchwa, asende inche mono, nasore aye kobua mono, as'omobere nas'Omonene. 17 Gaki korambare inche nomobwatani naye, mwanche oyo buna inche. 18 Na onye okomocheire, gose okorire esira egento, okerike asende. 19 Inche Paulo narikire as'okoboko kwane omonyene, ning'akane. Tingotebeti ng'a nore nesira nainche, nonya nomobere oo. 20 Ee, oyominto, nyore omogoko asore as'Omonene; ontimokie enkoro yane ase Kristo. 21 Kondegene okoigwera kwao nakorikeire, namanyire ng'a nokore kobua as'ayio ngokwana. 22 Namo nayio ombekere ang'e aase nkomenya; naki nasemeiri as'ogosaba kwaino, namwancherwe konyora. 23 Epafara osibetwe amo nainche ase Kristo Yesu, ogokwanirie; 24 na Mariko, na Aristariko, na Dema, na Luka, abakori emeremo amo nainche. 25 Obuya bw'Omonene oito Yesu Kristo bobe amo nemioyo yaino. Amin.
1 Ase chinsemo chinyinge nase chingecho chinyinge Nyasaye kare agakwana nabatata baito as'ababani, 2 omoerio bw'amatuko aya okwanire naintwe as'Omwana oye, abegete koba omonyamwando bw'ebinto bionsi, as'ere okorete ense. 3 Ere ekiagera nomobaso bw'obonene bwaye, nekieni ki'omobere oye, akabirosia ebinto bionsi ase ring'ana ri'okobua kwaye, gatiekire gokora ere bweka ogosibigwa kw'ebibe biaito, agaikaransa as'okoboko gw'okorio kw'obonene; 4 agakoreka buya mono kobua amalaika, ekiagera onyorire erieta ri'obonene ribuete barabwo. 5 Naki rilaika ki atebetie kero kende gionsi, Naye nomwana one, Inche rero nakoiboire? naende, Inche nimbe asare ise, Nere asende abe omwana one? 6 Ekero akoreta omobiare bwe ritang'ani as'ense, okwanire, Amalaika bonsi ba Nyasaye bamosasime. 7 Nas'amang'ana amalaika okwanire, Okorire amalaika aye koba chimbeo, Nabasomba baye koba chinsase chi'omorero: 8 Korende as'amang'ana Omwana otebire, Ekerogo kiao, Nyasaye, nekia kare nakare; Nenyimbo y'oboruoti bwao, nenyimbo ya boronge. 9 Gwanchire oboronge, kwagechire amabe; As'engecho eyio Nyasaye, Nyasaye oo, okobekire amaguta, Amaguta omogoko kobua abasani bao. 10 Naye, Omonene, omochakano okabeka ense oboroso, N'igoro nemeremo y'amaboko ao; 11 Ebi nabisareke, korende aye noikaransete: Ebi nabigote buna eanga; 12 Nochiringe buna eanga, Nachirochio nachionchoke: Korende aye naye oria, Nemiaka yao tekoera. 13 Inee, ndire rilaika rinde riatebetigwe nere amang'ana aya kero kende gionsi, Oikaranse okoboko kwane gw'okorio, Goika mbeke ababisa bao inse ase chimbaratero chi'amagoro ao? 14 Abwo bonsi tari emeika y'ogokorera bagotomwa kobakorera baria bagocha koira omwando bw'ogokonyeka?
1 As'ayio yatogweneire koyarigereria kobua ayatwaigure titocha koyamocha. 2 Naki onye riria ring'ana riakwanetwe namalaika igo riarenge nechinguru, na ker'okomocha nogosaria nkwanyorete eng'eria ya boronge; 3 intwe rende, inee, naki toranyare gwekonya totarendeti ogotoreka okonene okore buna oko? okwo ritang'ani gwakwanetwe n'Omonene, naende gogaikeranigwa asetore nase baria baigwete; 4 Nyasaye nere akaba kirori amo nabarabwo, as'ebikone bi'ogokumigwa, nechinguru, ase chingecho chinyinge, nas'ebiegwa bi'Omoika Omochenu, buna anchete ere omonyene. 5 Naki atayebegete inse y'amalaika ense eria egocha togoteba. 6 Korende omonto oyomo okwanete iga, aase gete, Omwana o mwanyabanto ninki goika omoinyore? Gose omwana o mwanyabanto goika omorigererie? 7 Kwamokorire omoke kobua amalaika; Kwamobekire egutwa y'obonene nogosika, Kwamobekire igoro as'emeremo y'amaboko ao: 8 Kwabekire ebinto bionsi inse ase chimbaratero chiaye. Naki obibekire ebinto bionsi asare inse, tatigete egento getabekiri inse asare. Korende bono titorarora ebinto bionsi bikobekwa asare inse. 9 Korende twamororire ere okoretwe omoke ake kobua amalaika, nere Yesu, ekiagera as'ogochandwa kw'amakweri, obekirwe egutwa y'obonene nogosika, erinde as'obuya bwa Nyasaye aigwe amakweri as'engecho ya ker'omonto. 10 Naki yamogwenerete ere, as'engecho yaye nas'emeremo yaye, ebinto bionsi biabaire, as'okoreta abana abange goika obonene, komoikerania omotang'ani omonene bw'ogokonyeka kwabo as'ogochandwa. 11 Naki ere oyogosibia nabarabwo bagosibigwa bonsi iga bakorua as'oyomo. as 'engecho yaye takorora obosoku kobaroka abamwabo, 12 okobora, Nindirandie erieta riao as'abaminto, Egati gati, y'ekanisa nintere ogotogigwa kwao, 13 Naende, Nimosemerie. Naende, Rora, inche nao inde aiga nabana naetwe na Nyasaye. 14 Gaki, ekiagera abana babwatanire namanyinga nomobere, ere nere naboigo abwatanete nayio ayio; erinde as'enchera y'amakweri amosarie ere oyorenge nechinguru chi'amakweri, engecho yaye saitani; 15 abakonye baria bonsi, abwo abarenge koiroka amakweri, barenge as'obogima bwabo bwonsi inse as'obosomba. 16 Naki namaene, tari kobwata engecho y'amalaika, korende abogorie oroiboro rw'Ibrahimu. 17 As'ayio yamogwenerete agwekanigwe buna abamwabo as'amang'ana onsi, erinde anyare koba omokuani omonene omonyene amabera, omwegeni as'amang'ana a Nyasaye, akore okorusia as'ebibe bi'abanto. 18 Naki achandetwe garemirwe, nanyare kobakonya abwo bagotemwa.
1 As'ayio abaminto abachenu, abanyene babwataine nokorangerigwa kw'igoro, morengererie mono Omotomwa, n'Omokuani Omonene bw'okoorokia gwaito, 2 Yesu, oyorenge omwegeni asare ere omokorete, buna Musa arenge as'enyomba yaye yonsi. 3 Naki oyo obarirwe ng'a nagwenerete obonene kobua Musa, buna ere arosetie enyomba arenge nogosika kobua enyomba eyio. 4 Naki ker'enyomba igekorosigwa nomonto; korende ere oyorosetie ebinto bionsi Nyasaye. 5 Na Musa igo arenge omwegeni as'enyomba yaye yonsi buna omosomba, abe kirori as'amang'ana arache gokwanwa. 6 Korende Kristo, buna omwana, igoro as'enyomba yaye; ere enyomba yaye nintwe, gatorabwatane bokong'u noboremu bwaito nokwebaka gwaito as'ogosemeria goika omoerio. 7 As'ayio buna Omoika Omochenu okwanire, Rero, komoraigwe eriogi riaye, 8 Timokora emioyo yaino emekong'u, buna ekero ki'okongechia, Buna rituko ri'ogotemwa as'eroro, 9 Agwo abaiso baino bagantema, as'okondenga, Bakarora ogokora kwane emiaka emerongo ene. 10 As'ayio nkagechigwa nekegori eke, Ngateba, Abanto aba igo bakomocha botambe ase chinkoro chiabo: Tibamanyeti chinchera chiane; 11 Buna narire eira as'endamwamu yane, Tibagosoa as'ogotimoka kwane. 12 Rigereria, abaminto, taba as'oyomo oino, omoyo omobe bw'ogotancha, as'okwerusanania na Nyasaye ore moyo: 13 korende mokonyane kera rituko, ekero gekorokwa ekia Rero; oyomo oino takorwa omokong'u as'okong'ainererigwa kw'ebibe: 14 naki twabaire ababwatani na Kristo, onye tokobwatana nomochakano bw'okwegena gwaito goika omoerio; 15 Agwo gegokwanwa, Rero, komoraigwe eriogi riaye, Timokora emioyo yaino emekong'u buna ekero gi'okongechia. 16 Naki mbarabi bamogechetie, ekero bamoigwete? Tari baria bonsi baruete ase Misiri batang'anetwe na Musa? 17 Ning'o ogechetwe, nabarabwo emiaka emerongo ene? tari baria bamochete, abwo amabego agwete as'eroro? 18 Ning'o obarierete eira ng'a tibagosoa as'ogotimoka kwaye, tari baria batanchete? 19 Gaki twarorire ng'a tibanyarete gosoa as'engecho y'ogotancha kwabo.
1 Gaki, onyore ner'aroro eira y'ogosoa as'ogotimoka kwaye, natoiroke, oyomo oino tanyara kororekana oyemochire. 2 Naboigo nekeene, intwe naintwe twaranderigwe amang'ana amaya buna barabwo: korende ring'ana riria riaigwetwe tiriabagwenerete barabwo, ekiagera tiriasang'anete nokwegena ime yabo abaigwete. 3 Naki intwe twegenete iga togosoa as'ogotimoka koria buna akwanete, Narire eira as'endamwamu yane, Tibagosoa as'ogotimoka kwane: nonya eria emeremo yaerete korwa ense yabegetwe oboroso. 4 Naki otebire rituko riatano nabere aase gete iga, Nyasaye agatimoka rituko riatano nabere, agatiga emeremo yaye yonsi; 5 naiga naroro, Tibagosoa as'ogotimoka kwane. 6 Gaki, ekiagera atigaire ng'a mbare abanto barache gosoa, nabaria baranderetigwe amang'ana amaya kare bamochete gosoa ekiagera as'okomocha kwabo, 7 obekire naende rituko gete, ogoteba ase Daudi nyuma y'ekero ekenge buna iga, Rero: buna yakwanetwe korwa kare, Rero onye namoigwe eriogi riaye, Timokora chinkoro chiaino chinkong'u. 8 Naki onye Yoshua nabaete ogotimoka, anga takwanete rituko rinde korwa nyuma. 9 Bono, gwatigaire gaki ogotimoka gw'esabato as'abanto ba Nyasaye. 10 Naki ere oyosoire as'ogotimoka kwaye otimokire ere omonyene korwa as'emeremo yaye, buna Nyasaye atimogete korwa as'emeremo yaye. 11 Gaki, tokore omokia gosoa as'ogotimoka koria, monto onde tacha kogwa as'omogwekano oyio oyio bw'ogosaria. 12 Naki ring'ana ria Nyasaye iga rire moyo, naende ndire nechinguru, naende ndire nobwoge kobua obwoge bw'omoro okonacha chinsemo ibere, naende igo rikobeta as'ogwatanana omobere nomoyo, nechinengo nebitinya bire ime yaye, neriango kobimanya ebirengererio nokorenga gw'enkoro. 13 Naende egetongwa kende tikeri getari maiso marore as'obosio bwaye: korende ebinto bionsi mbire bosa, nakomanorerwa as'amaiso aye, ere oyore namang'ana aito. 14 Gaki, onye tore nomokuani omonene osoete igoro, Yesu, Omwana o Nyasaye, tobwate mono okoorokia gwaito. 15 Naki titori nomokuani onde otanyare kobogoria amang'ana aito ay'oboreu; korende ere igatemetwe koreng'ana buna intwe as'amang'ana onsi, atari nabibe. 16 Gaki toike ang'e as'ekerogo ki'obuya, erinde tonyore amabera, nakonyora obuya bogotokonya as'ekero gi'okorigia.
1 Naki ker'omokuani omonene orusetigwe ase mwanyabanto, obekirwe as'engecho ya mwanyabanto as'amang'ana amogwenerete Nyasaye, erinde arue ebiegwa nebing'wanso as'engecho y'ebibe: 2 oranyare kobabogoreria as'obwororo barabwo batamanyeti, nabaria bagosira, ekiagera ere omonyene igaetananire noboreu; 3 nas'engecho as'ayio yamogweneire, buna as'engecho y'abanto, naboigo as'engecho yaye omonyene, korua ekeng'wanso as'engecho y'ebibe. 4 Tari monto onde bwebogoreirie ogosika oko, korende ere oyorangerigwe na Nyasaye buna Haruni. 5 Naboigo Kristo ere tetogeti omonyene akorwe omokuani omonene, korende ere oyokwanete nere: Omwana one naye, Inche rero nakoiboire: 6 Buna akwanete aase ande, Aye nomokuani okare nakare, As'omogwekano bw'ekerengo kia Melkizedeki. 7 Ere amatuko ayio omobere oye, akamoruseria ere, oranyare komokonya nakomorusia as'amakweri, ogosaba nagosorora amo nokorera mono namariga, akoigugwa as'engecho y'ogosika kwaye, 8 nonya orenge Omwana, akeorokereria okoigwera as'emechando eye yamonyorete; 9 nere gatiekire goikeranigwa, akaba as'engecho y'ogokonyeka gwa kare nakare as'abanto bonsi baranyare komoigwera; 10 bwatoirwe na Nyasaye, ng'a nomokuani omonene as'omogwekano bw'ekerengo kia Melkizedeki. 11 Korende more namang'ana amange togokwana as'amang'ana aye; nakong'u koyaorokia, ekiagera mwabaire aboro as'okoigwa. 12 Naki igebagwenerete koba aborokia ekiagera ebiro ebinge biaetire, morigetie kworokererigwa nomonto okworokereria kwe ritang'ani kw'amang'ana a Nyasaye; nainwe mwabaire buna abarigetie amabere gose tari endagera enkong'u. 13 Ekiagera ker'omonto okoriera amabere tamanyeti mono ring'ana ri'oboronge; naki nomwana omoke. 14 Korende endagera enkong'u ney'abanto abanene, abwo chisemi chiabo, as'ogokorerwa, chianarigwe gwatanana amaya namabe.
1 As'engecho y'ayio totige gokwana okworokereria kwe ritang'ani gwa Kristo, tokong'ie orogendo toikerere oboikeranu; titobeka oboroso bonde naende bw'okoonchoka kw'emeremo y'amakweri, nokwegena ase Nyasaye, 2 nokworokereria kwe chibatiso, nakobekera amaboko, nokobokigwa kw'abakure, nekina gia kare nakare. 3 Natokore ayio Nyasaye karatokonye. 4 Naki as'abwo batiekire koegwa omobaso, nakomena ekeegwa keria ki'igoro, nagokorwa ababwatani b'Omoika Omochenu, 5 nakomena ring'ana rigiya ria Nyasaye, nechinguru chia kare chirache gocha, 6 erio bakogwa nyuma y'ayio, tekonyarekana bakorwe abayia naende ase okoonchoka; ekiagera bamoitire Omwana o Nyasaye eria kabere as'emebere yabo, nakomosokia maiso marore. 7 Naki nense ekonywa embura egotwa, egocha naende, naende, nakwama chinyeni chigwenerete as'engecho y'abwo bakoyerema, yanyora egesio kia Nyasaye; 8 korende gekwama amagwa namageri, yangwa nakoba ang'e nokoragererigwa; omoerio oye nogosambwa. 9 Korende, abanchani, nonya togokwana ayio, twamanyire ng'a namochore amang'ana ayare amaya kobua, ayakoreta ogotoreka: 10 naki Nyasaye tari omobe goika ebe emeremo yaino, nogwancha koria mwaorogetie as'erieta riaye, ekiagera mwabakoreire abachenu, na goika iga bono nkobakoreramore. 11 Naintwe twarigirie ker'oyomo oino aorokie omokia oria oria as'oboikeranu bw'ogosemeria oko goika omoerio: 12 korende timoba aboro, korende mobe abatunyani babo b'omwando bw'eira as'okwegena nokoremereria. 13 Naki Nyasaye, ekero amoete Ibrahimu eira, ekiagera arenge tari omonene kobua omonyene, bw'okomoriera eira, akaria eira omonyene, 14 agateba, Ekeene ogosesenia ningosesenie, okomenteka, ninkomentere. 15 Naboigo as'okoremereria akanyora eira eria. 16 Naki abana ba mwanyabanto igo bakomoriera eira ere oyore omonene: nomoerio bw'okoamererania kwabo gwonsi kw'amang'ana, nemuma ekoyaikerania, 17 Ase ring'ana erio Nyasaye, akarigia koborokia abaraire omwando oria bw'eira chingecho buna atanyare koonchora ebina biaye, akabeka emuma gati gati: 18 erinde as'ebinto bibere bitanyare koonchora, ime as'ebio Nyasaye takonyara gokwana oborimo, tonyore okoremia kore ogokong'u, intwe abwo twatameire obotamero kobwata ogosemeria koria kwabekirwe as'obosio bwaito; 19 tore nakwo buna ekerochi ki'omoyo, ogosemeria kore nechinguru gotari goonchoka, egosoa aria are ime as'epasia (egetambaa gi'okonacha); 20 asoete Yesu as'engecho yaito, omotang'ani oito obaire omokuani omonene buna engecho ya Melkizedeki goika kare nakare.
1 Naki oyo Melkizedeki, omoruoti o Salemi, omokuani o Nyasaye Ore Igoro, oumeranete na Ibrahimu nyuma y'okobaaka abaruoti, akamosesenia, 2 Ibrahimu akamwatananera ensemo y'ikomi y'ebinto biaye bionsi (ritang'ani, as'okoonchora, Omoruoti bw'oboronge, naende, Omoruoti o Salemi, engecho yaye, Omoruoti bw'omorembe; 3 tari na ise, tari na ng'ina, tari nechisokoro chiaye, tari nomochakano bw'amatuko aye, gose omoerio bw'obogima bwaye korende ogwekanigwe buna Omwana o Nyasaye), igakoba omokuani goika kare nakare. 4 Gaki rigereria buna omonto oyo arenge omonene, ere Ibrahimu, tata oito omonene, amoete ensemo y'ikomi y'ogosakora. 5 Nas'abana ba Lawi, baria bakonyora obokuani, mbare namachiko koira ensemo y'ikomi y'abanto as'engecho y'amachiko, engecho yaye, abamwabo, nonya barure as'oroiboro rw'Ibrahimu. 6 Korende ere, ekiagera chisokoro chiaye tichiabaretwe ng'a iga chiaruete as'abwo, akaira ensemo y'ikomi korwa as'Ibrahimu, akamosesenia ere, oyorenge neira eria. 7 Okoamererania tikori nonya ng'ake, ng'a omoke ogosesenigwa nomonene. 8 Naiga mwanyabanto abanyene ogokwa, nkonyorabare ensemo y'ikomi; korende agwo ere oyogwatorwa ng'a moyo are. 9 Ninyare goteba ng'a as'enchera y'Ibrahimu, nonya Lawi oyenyorete ensemo y'ikomi, akarua ensemo y'ikomi; 10 naki arenge as'oroiboro rw'ise, ekero Melkizedeki aumeranete nere. 11 Gaki, onye oboikeranu bwarenge agwo as'obokuani bwa Lawi (naki as'obwo abanto baria banyorete amachiko), nkogania ki kwarenge naende omokuani onde aimoke as'engecho ya Melkizedeki, gose tari as'engecho ya Haruni? 12 Naki obokuani boria koboraonchoke, ande tari namachiko, nabo araonchoke. 13 Ekiagera ere oyokwanetwe ayio igabwataine negesaku kende, korende tarenge omonto bw'egesaku eke oyore gokorera amathabau. 14 Naki maiso marore, ng'a Omonene oito igaruete ase Yuda; as'egesaku ekio Musa atakwanete ring'ana rinde rionsi riakegwenerete as'amang'ana obokuani. 15 Naende ayio togokwana igare maiso marore mono kobua, kerabe omokuani onde okooroka as'omogwekano o Melkizedeki. 16 Oyotarenge omokuani as'amachiko ay'ekina kere chingecho chi'omobere, korende ase chinguru chi'obogima botari nomoerio: 17 naki obaire kirori asare, ng'a, Aye nomokuani okare nakare As'ekerengo kia Melkizedeki. 18 Naki nkore okoonchorerigwa as'amachiko aria atang'anete, as'engecho y'oboreu bwaye, nogotagwenera kwaye, 19 (Naki amachiko aria taikeranetie ring'ana), amo naya gokareta ogosemeria kore okuya kobua, nas'ayio twamoikire ang'e Nyasaye, 20 nas'okobatikwarenge gotari nemuma, 21 (naki baria bakoretwe abakuani batari nemuma; korende ere, amo nemuma, as'ere omotebetie, Omonene orire eira, gose tagweitia, Aye nomokuani goika kare nakare); 22 Gaki as'ekerengo eke Yesu obaire negiantenenera as'emuma ere engiya kobua. 23 Naende baria bakorirwe abakuani abange, ekiagera batangirwe nogokwa tibaikaransa: 24 korende ere, ekiagera aikaransete kare nakare, nare nobokuani botari koonchoka. 25 As'ayio, nere, nanyare kobakonya kegima abwo bagocha ase Nyasaye as'ere; ekiagera moyo are amatuko onsi kobasabera. 26 Naki omokuani omonene buna oyo igatogwenerete intwe, nere pre omochenu, otarenge nobobe, otarenge nakemoa kende gionsi, orusananetigwe nabasaria, orenge igoro kobua erioba igoro; 27 otarenge nokorigia kera rituko, buna omogwekano bwa baria abakuani abanene bande, korua ritang'ani ekeng'wanso as'engecho y'ebibe biaye omonyene, erio as'engecho y'ebibe bi'abanto: naki ere akorete iga ara rimo, ekero eruete omobere oye. 28 Naki amachiko akobabeka abana ba mwanyabanto abare noboreu, babe abakuani abanene; korende ring'ana ri'emuma, riachete nyuma as'amachiko, riamobekire Omwana, oyoikeranete goika kare nakare.
1 Gaki, as'ayio togokwana, ring'ana rire rinene nario eri: Ntore nomokuani omonene ore buna iga, oikaransete okoboko gw'okorio gw'ekerogo ki'Obonene bw'igoro, 2 omokoreri bwe hekalu, noyo bw'eema y'ekeene, eye Omonene abegete, tari mwanyabanto. 3 Naki ker'omokuani omonene igakobekwa erinde orua ebiegwa nebing'wanso: as'ayio nagwenerete omokuani omonene oyo, abe negento akorua. 4 Onye nabete as'ense, anga tabete omokuani, ekiagera mbare bakorua ebiegwa buna amachiko achigete; 5 abagokorera as'omogwekano nekiriri ki'amang'ana ay'igoro, buna Musa achigetwe na Nyasaye, ekero arenge ang'e gokora eria eema: naki agoteba, Rigereria obikore ebinto bionsi as'omogwekano oria kworogetigwe as'egetunwa. 6 Korende bono onyorire obosomba bore obuya kobua, koreng'ana buna are omokonyi bw'emuma ere engiya, yachigetwe ase chiira chiria chingiya nagochiegena. 7 Naki onye riria rie ritang'ani ndiarenge tiriri nokomocha anga ribaga tiriarigetwe ase riria riakabere. 8 Naki as'okonyora okomocha ime yabo otebire, Rora, amatuko nache, otebire Omonene, Nainche ninyekore enyomba y'Isiraeli nenyomba ya Yuda emuma enyia; 9 Tekoba buna emuma eria nakorete nabaise babo, Ase rituko riria nababwatete amaboko abo mbarusie as'ense ya Misiri; Naki tibabete as'emuma yane, Nainche tinabarigereria, okwanire Omonene. 10 Naki eye nero emuma ndanyare gokorerana nenyomba y'Isiraeli Nyuma y'amatuko aria, okwanire Omonene; Nimbeke amachiko ane as'ebirengererio biabo, Nase chinkoro chiabo ninyarike: Nainche nimbe Nyasaye obo, Nabarabwo nababe abanto bane. 11 Barabwo tibakonyara kworokererania ker'omonto nomogisangio oye, Na ker'omonto noyomwabo, ogoteba, Momanye Omonene: Naki bonsi nabamanye inche, Korwa omoke obo goika omonene obo. 12 Naki nimbabere obobe bwabo, Nebibe biabo tinkobinyora naende. 13 Ase koria ogokwana, Emuma enyia, oyekorire eria ye ritang'ani koba enkoro. Korende egento gokiabaire egekoro, nakogota, ng'ang'e kere gosira.
1 Gaki nonya emuma eria ye ritang'ani yarenge namachiko y'ogokorera ogochenu, ne hekalu yaye, hekalu y'ense eye. 2 Naki yarenge eema yarosetigwe eria ye ritang'ani, imeo yarenge etaya, nemesa, nemegati yarenge korugwa ase Nyasaye; are korokwa, aase Aachenu. 3 Na nyuma as'egetambaa gia kabere, eria eema ekorokwa Aachenu ay'aachenu; 4 eyarenge negetabo gi'ethahabu, nesanduku y'amachiko yakunekire nethahabu chinsemo chionsi, imeo kiarenge egetono gi'ethahabu kiarenge nendagera ekorokwa manna, nenyimbo ya Haruni yasebogete, nechibao chi'emuma; 5 na igoro yaye omogwekano bw'amalaika ay'obonene; are kobekera ekiriri oboikaranso bw'amabera; korende titori neribaga toratebe amang'ana ebinto ebi ekemo ekemo. 6 Korende, ebinto ebi kobiarosigwe igo, abakuani basoa eema ye ritang'ani amatuko onsi, koyaisaneria amang'ana ogokora; 7 korende, eema ya kabere omokuani omonene osoa ere bweka, ara rimo ker'omwaka; korende takonyara gosoa atari namanyinga, arenge korua as'engecho yaye omonyene, nas'ebibe bi'ogotamanya kw'abanto: 8 Omoika Omochenu okworokereria ring'ana eri, ng'a enchera y'ogosoa aachenu teraorokigwa, ekero eema ye ritang'ani eteneine. 9 Oyo noro nomogwekano bw'ekero eke kia bono; as'engecho yaye bikorugwa ebiegwa nebing'wanso ebitanyare komoikerania omonto oyo ogosaba as'ebirengererio biaye, 10 ekiagera namachiko aye chingecho chi'omobere chioka, ebi'okoria, nebinyugwa, nogosibia konde konde, biachigetwe goika ekero gi'okorosigwa okoyia. 11 Korende Kristo gatiekire gocha omokuani omonene bw'ayio amang'ana amaya ayaranyare gocha, as'eema, ere enene eikeranete kobua, eyetakoretwe namaboko, engecho yaye, etari ey'ense eye, 12 gose tari as'amanyinga echimbori nechimori, korende as'amanyinga aye omonyene, agasoa ara rimo aas'aachenu gatiekire konyora okoborigwa gwa kare nakare. 13 Naki onye amanyinga echimbori naye chieri, neribu ri'amatororo echiombe bare goitororerwa abanyene eubi, asibia goika ogosibigwa kw'omobere: 14 korende tari kobua as'amanyinga aye Kristo, ere as'Omoika obotambe akerwa omonyene ase Nyasaye koba ekeng'wanso getari nakemoa, gosibia ebirengererio biaino korwa emeremo ekwete, komokorera Nyasaye ore moyo? 15 As'engecho eye, ere nomokonyi bw'emuma enyia, ekiagera amakweri gatiekire gokoreka as'okoboria okomocha as'emuma ye ritang'ani, barangereretigwe bayenyore eira y'omwando o kare nakare. 16 Naki as'emuma y'omwando ere, igegwenerete ab'aroro amakweri aye oyoyekorete. 17 Naki emuma nere nechinguru gatiekire gokwa omonto: korende teri nechinguru nonya ng'ake ekero ere oyoyekorete are moyo. 18 As'ayio neria ye ritang'ani tiyachagetwe etari namanyinga. 19 Naki ker'ogochika gogwatiekire gokwanwa na Musa as'abanto bonsi, buna yachigetwe as'amachiko, akabogoria amanyinga echimori naye chimbori, amo namache namarionya amabariri, jia husopo, akanyororokeria ebuku enyene, nabanto bonsi, 20 agateba, Aya namanyinga emuma mwachigetwe na Nyasaye. 21 Neria eema nebinto bionsi bi'ogokora akabinyororokeria amanyinga engecho eria eria. 22 Nas'engecho y'amachiko ang'e ebinto bionsi bigosibigwa namanyinga, onye ataiteiri amanyinga, okorusigwa tikori. 23 Gaki yagwenerete emegwekano y'ebinto bire igoro bisibigwe as'ebi; korende ebinto bi'igoro ebinyene as'ebing'wanso bire ebiya kobua ebi, 24 Naki Kristo tasoete aas'aachenu akoretwe namaboko, naro omogwekano bw'aachenu asare aachenu ekeene; korende agasoa igoro anyene, arorekane bono obosio bwa Nyasaye as'engecho yaito intwe: 25 gose tari buna ng'a erue omonyene ebiro ebinge, buna omokuani omonene ogosoa aas'aachenu ker'omwaka namanyinga atari ayaye; 26 onye nabo, anga yamogwenerete achandwe ebiro ebinge korwa ogotongwa gw'ense: korende bono, ara rimo rioka, as'omoerio bw'ense ororekanire, arusie ebibe as'ekeng'wanso ki'omobere oye. 27 Buna abanto bagacheirwe ogokwa ara rimo rioka, na nyuma y'ogokwa ekina; 28 naboigo Kristo nere, gatiekire korugwa ekeng'wanso ara rimo, abirusie ebibe bi'abanto abange, eria kabere, atari nabibe, narorekane nabarabwo abamoganyete goika banyore ogotoreka.
1 Gaki amachiko nekiriri ki'amaya aranyare gocha, tari ekieni ekenyene ki'amang'ana, as'ebing'wanso biria biria barenge korua ker'omwaka botambe, takonyara ebiro bionsi kobaikerania abwo abagoika ang'e. 2 Onyore yanyarete, anga mbatigete kobirua; ekiagera abwo barenge gosasima, kobatiekire gosibigwa ara rimo rioka, anga tibarenge kwerora ng'a mbare nebibe naende? 3 Korende as'ebio nkore okoinyora kw'ebibe ker'omwaka. 4 Naki takonyarekana amanyinga echieri naye chimbori korusia ebibe. 5 As'ayio karache ense, otebire, Ebing'wanso nakorua torigeti, Korende omobere kwandosoirie; 6 Ase chisadaka chi'ogosambwa nebing'wanso bi'ebibe togokiri nabirobio: 7 Erio ngakwana, Rora, nachire (as'ensemo y'ebuku narikeirwe) Mbokore obwanchani bwao, Nyasaye. 8 Agwo igoro agokwana agwo, Ebing'wanso nechisadaka, nechio chigosambwa chi'ebibe, tigwachirigetie, gose tikwagogetigwe (nachirochio echiaruetwe as'amachiko), 9 erio akabora, Rora nachire mbokore obwanchani bwao. Orusie ekie ritang'ani erinde ng'a atenenie egia kabere. 10 As'obwanchani obwo twanyorire ogosibigwa, as'okorugwa omobere o Yesu Kristo ara rimo rioka. 11 Na ker'omokuani iga agotenena kera rituko gokora obosomba, korua ebing'wanso biria biria, ebiro ebinge; nabirobio tibikonyara nonya ng'ake korusia ebibe: 12 korende oyo, ochia korua ekeng'wanso ekemo gioka as'ebibe, gekoba goika kare nakare; agaikaransa as'okoboko gw'okorio kwa Nyasaye; 13 akaganya goika ababisa baye babekwe inse atorere amagoro aye. 14 Naki as'okorugwa okomo obaikeranirie goika kare nakare abwo abasibigwe. 15 Nomoika Omochenu otobereire kirori: naki nyuma gakwanire ring'ana eri, 16 Eye nemuma ndabae Nyuma y'amatuko ana, okwanire Omonene; Nimbeke amachiko ane ase chinkoro chiabo, Nas'ebirengererio biabo ninyarike; erio agateba, 17 Ebibe biabo nogosaria kwabo tinkobinyora naende nonya ng'ake. 18 Gaki okorusigwa kw'aya gakorabeo, korusigwa kw'ebibe tigokoba naende. 19 Gaki, abaminto, ekiagera more noboremu bw'ogosoa aase aachenu as'amanyinga a Yesu, 20 enchera atochakerete enyia, enchera enyia ere moyo, egoeta as'egetambaa, engecho yaye, omobere oye; 21 nomokuani omonene igoro as'enyomba ya Nyasaye. 22 Toike ang'e nenkoro y'ekeene, as'oboikeranu bw'okwegena, twanyororokerigwe chinkoro chiaito, totige ebirengererio bi'ebibe, twasibigwe emebere as'amache amachenu: 23 tobwate mono okoorokia gw'ogosemeria gwaito tikoonchoka; naki ere oriete eira nomonyene oboronge: 24 torengereranie ekerengo gi'ogosukania as'obwanchani nemeremo emiya; 25 titotiga gosangererekana amo, buna ere engecho y'abande, korende tworokereranie; nakobua mono, ekero moroche rituko erio rigoika ang'e. 26 Naki gatorakore ebibe nechinguru nyuma y'okonyora chisemi chiria chi'ekeene, tigetigareti naende ekeng'wanso as'engechoy'ebibe; 27 korende korigereria ekinagi'okoondoka, nobotindi bw'omorero ogocha kobaria abwo bakoamererania. 28 Omonto oyorenge gochaya amachiko a Musa igarenge gokwa atari namabera, ase ring'ana ri'abarori habere gose batato: 29 naki moroche? temogwenereti obororo obonene kobua omonto oria otachete Omwana o Nyasaye, nakobara amanyinga emuma asibetigwe naro koba egento kia bosa, nagokorera Omoika bw'amabera oboenenu? 30 Naki mwamomanyire ere okwanete, Okorusia egesioinba igakere igoro yane, inche ning'akane. Naende, Omonene nabanachere ekina abanto baye. 31 Nering'ana ri'ogoichania kogwa as'amaboko a Nyasaye ore moyo. 32 Korende yainyore amatuko eritang'ani, ayio mwatiegete kobekwa omobaso, mokaremereria okoamererania okonene kw'ogochandwa; 33 ake mokarorerigwa as'emerumi nogochandwa; n'ake, mokabwatana nabaria bakoreretwe ayio. 34 Naki mokabarorera amabera baria barenge as'ebisibo, mogancha nomogoko kourwa chinibo chiaino, mokamanya as'emioyo yaino ng'a more nenibo igoro ere engiya kobua etari nomoerio. 35 Gaki timotuguta oboremu bwaino, ekiagera mbore neng'eria enene. 36 Naki morigetie oboremereria, erinde, kamwatiekire gokora obwanchani bwa Nyasaye namonyore eria eira. 37 Naki nkere egeka egesinini mono, Ere oyorache, nache gose tagotebana. 38 Korende omonyene oboronge nabe moyo as'okwegena: Nere karasukwane, omoyo one tori nomogoko nere. 39 Korende intwe titori amo nabwo bagosukwana nagosire; korende as'abwo bare nokwegena as'ogokonya emioyo yaito.
1 Gaki okwegena nakwo gokobeka chinguru amang'ana ayio asemeirie, nekeene ki'ayio atarikororekana. 2 Naki as'ayio abagaka baito bagotebwa. 3 As'okwegena twamanyire ng'a ense igo yakoretwe ase ring'ana ria Nyasaye, nonya nebinto bikororekana tibiakoretwe as'ebinto bire maiso marore. 4 As'okwegena Abel akaa Nyasaye ekeng'wanso kere ekiya kobua egia Kain, as'ayio agatorwa ng'a nomonyene oboronge, Nyasaye agatora as'engecho y'ebiegwa biaye: as'ayio nonya okure, ngokwanare goika nonya mbono. 5 As'okwegena Enok akang'anyigwa tacha korora amakweri; tarorekanete ekiagera Nyasaye namong'anyetie: naki ritang'ani ri'ekero gi'okong'anyigwa kwaye igatoretwe ng'a' namogwenerete Nyasaye. 6 Korende okwegena gotaiyo tekonyarekana komogwenera; naki omonto ogocha ase Nyasaye nagwenerete gwancha ng'a nareo, naende igakobaa eng'eria baria bakomorigia. 7 As'okwegena Nuhu gatiekire gokurerwa na Nyasaye amang'ana atararorekana, as'okoba nogosika okuya ase Nyasaye, akarosia obwato, anyare gokonya enyomba yaye; as'ayio akanachera ense ekina, akaba omoiri omwando oboronge bokonyorekana as'okwegena. 8 As'okwegena Ibrahimu gatiekire korangerigwa, akaigwa, akagenda goika aase aria aranyare koanyora koba omwando; akaimoka tamanya as'agochia. 9 As'okwegena akamenya as'ense eria y'eira, buna as'ense etari eyaye, akamenya ase chiema amo n'Isaaka na Yakobo, abanyamwando amo nere as'eira eria eria. 10 Naki arigereretie omochie oyore noboroso, korende omonyene oyoagachete nakoyorosia Nyasaye. 11 As'okwegena nonya Sara omonyene akanyora okobua koba morito, konyora oeteire ekero kiaye; ekiagera amoroche ere oyoriete eira ng'a nomwegeni. 12 Nas'engecho eyio bakaiborwa as'omonto oyomo, nere igarenge buna oyokure, abanto abange buna ching'enang'eni chi'igoro obonge bwabo; na buna omokenye ore engegu y'enyancha, otanyare kobarwa. 13 Aba bonsi bagakwa as'okwegena, tibanyora chiira chiria, korende bagachirora nagochikwania korwa are, bagatora ng'a igo barenge abageni, nabatari igoro as'ense. 14 Naki abagokwana amang'ana buna ayio nkoorokiabare maiso marore ng'a nkorigiabare ense yabo abanyene. 15 Na onye mbainyorete ense eria baruete, anga mbanyorete ribaga bakoiranerao. 16 Korende bono barengereirie ense ere engiya, engecho yaye, ense y'igoro, as'ayio Nyasaye takorora obosoku korokwa Nyasaye obo; ekiagera obaroseirie omochie. 17 As'okwegena Ibrahimu ochia gotemwa, akarua Isaaka, abe ekeng'wanso; nere oyoirete chiira nomogoko, akarua omwana oye, oyoiboretwe omomoima; 18 ere natebetigwe, As'Isaaka oroiboro rwao norangerigwe: 19 akabara ng'a Nyasaye nanyare komobokia korwa as'amakweri; akamonyora naende korwa agwo as'omogwekano. 20 As'okwegena, Isaaka akabasesenia Yakobo na Esau, goika as'amang'ana arache koba nyuma. 21 As'okwegena Yakobo ekero arenge ang'e nogokwa, akamosesenia ker'oyomo as'abana ba Yusufu; agasasima bwesirerete enyimbo yaye. 22 As'okwegena Yusufu, konyora obaire ang'e nomoerio oye, agatora amang'ana okorua kwabo abana b'Isiraeli, akabachikera amauga aye. 23 As'okwegena Musa, ekero aiboretwe akabiswa emetienyj etato nabamoibori baye, ekiagera bakarora ng'a nomwana omuya; gose tibairoka ogochika kw'omoruoti. 24 As'okwegena Musa agachia koba omonto omonene, akanga korokwa omwana bw'omoiseke o Farao; 25 agachora ng'a mbuya konyora emechando amo nabanto ba Nyasaye kobua kwegokia as'ebibe egeka; 26 akabara ogochaywa kwaye Kristo nobonda obonge kobua enibo ya Misiri: naki akarigereria goikera eng'eria ya boronge. 27 As'okwegena akarua Misiri, tairoka endamwamu y'omoruoti; naki akaremereria buna oyomororire ere otari kororekana. 28 As'okwegena agakora epasaka, nakonyororokeria aria amanyinga, ng'a oyokobaita abana abatangi tabakuna barabwo, 29 As'okwegena bagaeta egati y'enyancha Embariri, buna as'ense enyomo: Abamisiri bagachia koyetema gokora bo bakamerwa. 30 As'okwegena chinduaki chia Yeriko chikagwa, gachiaetananirwe amatuko atano nabere. 31 As'okwegena Rahabu oria omotayayi, taitwa amo nabaria bataigwerete, ekiagera abaroisetie abaroti nomorembe. 32 Nkwane ki naende? naki ekero tigekonyara kong'isana koreta amang'ana a Gidion, na Baraki, na Samson, na Yefitha; na Daudi na Samweli nababani; 33 abwo as'okwegena bakabua amanda, bagakora oboronge, bakanyora eira, bagasiba emenwa ye chisibwori. 34 Bakarimia chinguru chi'omorero, bagakonyeka nobwoge bw'omoro, bakabekwa chinguru nyuma; as'okoba abareu, bakaba abatindi as'esegi, bagaseria emeganda y'abageni. 35 Abakungu bakanyora abakwete babo babogetigwe: nabande bagachandwa, abatanchete okoborigwa; banyore okobokigwa okore okuya: 36 abande bagatemwa as'echeche nokoakwa, ee, as'ebisibo, nas'okobekwa echela: 37 bakaakwa amagena, bakanachwa nechinseke, bagatemwa, bagaitwa nemioro; bagaetanana ogoetanana bakeboyia chingobo chie ching'ondi nechingobo chie chimbori; bakaba abaremeru, bakorosigwa, bagakorwa bobe: 38 (abanto ense etagwenerete koba nabarabwo), igabarenge goetanana ogoetanana ase chiroro nas'ebitunwa nas'amabwago, nase chingoro chi'ense. 39 Nabanto aba bonsi kabatieka gotebwa as'engecho y'okwegena kwabo, tibayenyora eira: 40 ekiagera Nyasaye otang'anire gotogachera intwe egento ekere ekiya, erinde tibaisanerigwa batari naintwe.
1 Nabo naintwe as'engecho eye, ekiagera twaetananirwe nerire rinene ri'abarori buna iga, tobeke ensemo ker'omosigo omorito, nebibe bigotobwata bwango, tominyoke bwango as'okoremereria, as'okoamererania koria kwabekirwe as'obosio bwaito, 2 koniorigereria Yesu, oyochagete okwegena gwaito nagogoikerania, ere oyo as'engecho y'omogoko obekirwe obosio bwaye akayoremereria omosalaba nagochaya obosoku, nere oikaransire okoboko gw'okorio gw'ekerogo ki'obonene bwa Nyasaye. 3 Naki morengererie mono ere oyoremereretie ogotangwa okonene buna oko kw'abanyene ebibe igoro as'emebere yabo, timocha kwebutokania nagokwa emioyo yaino. 4 Timorarwana esegi as'okoamererania nebibe goika ogoitera amanyinga: 5 naende mwebire ogosorora koria, gogokwana nainwe buna abana, Omwana one, tochaya ogokanigwa kwaye Omonene, Gose, tokwa moyo korakanigwe nere; 6 Naki ere Omonene anchete igakomokania, Nakomoaka ker'omwana anchete. 7 Ekiagera as'engecho y'ogokanigwa mwaremereria; ekiagera Nyasaye akobakora buna abana; naki omwana ki otari gokanigwa naise? 8 Gaki onye mokoba timogokanigwa, nokwo babwataine bonsi, mwabaire abana b'ebimerwa, gose tari abana ba boronge. 9 Amo naya ntwarenge nabatata b'omobere oito bagotokania, tokabaigwera; gaki tari buya mono kwabeka inse ya Tata bw'emioyo yaito nakoba moyo? 10 Naki ekeene barabwo as'amatuko amake batokanetie buna baroche buya abanyene; korende ere as'okogwenera gwaito, erinde tobwatane nobochenu bwaye. 11 Ker'okoakwa engaki yaye gokororekana tikori egento ki'omogoko, korende neki'emechando: korende kwabaruseria barabwo abanarire nakwo amatunda aboronge nay'omorembe. 12 As'ayio yaimokie amaboko arorobire, namaru aringakire; 13 mogokorera amagoro aino chinchera chindonge, erinde egento kere ekerema tigesirigwa, korende kobua gekonywe. 14 Tunyana omorembe as'abanto bonsi, nobochenu, ekiagera tari 'monto oramorore Nyasaye atari naborobwo: 15 mokorigereria mono omonto onde taremerwa obuya bwa Nyasaye; ritina ri'obororo tiricha gokumbaria nakobachanda, abanto abange babekwe nobobe as'erio; 16 taba agwo omotomani gose oyotasigeti Nyasake, buna Esau, ogorete omwando oye bw'okoiborwa as'engecho y'endagera eyemo. 17 Naki mwamanyire goika agachia korigia nyuma omwando bw'ogosesenia agakanigwa (naki tarora ribaga ri'okoonchoka), nonya origetie mono namariga. 18 Naki timoraika egetunwa keranyare gokunwa, gegwoka omorero, gose rire rimwamu, nomosunte, nekembobe, 19 nokobuga kw'egetureri, neriogi ri'amang'ana; erio baria baigwete bagasorora tibatebigwa ring'ana rinde rionsi; 20 naki tibanyarete koremereria ring'ana riria riachigetwe, nonya eng'iti yarenge gokuna egetunwa neakwe amagena, gose yabetwa neritimo; 21 naya arorekanete igarenge ayakwoboyia, goika Musa agateba, Nabwatirwe nobwoba nokoiguswa. 22 Korende inwe mwageikeire egetunwa gia Zayoni, nomochie o Nyasaye ore moyo, Yerusalemu o igoro, nemeganda y'amalaika chilifu chinyinge, 23 nekanisa y'omoiborwa bwe ritang'ani barigetwe igoro, na Nyasaye omogambi bw'abanto bonsi, nemioyo y'abanto abanyene oboronge abaikeranirie, 24 na Yesu omonyene okoreta emuma enyia namanyinga akonyororokerigwa agokwana amaya kobua aria Abel, 25 Rigereria timomwanga ere ogokwana. Naki onye baria tibakonyegete abamwangete ere oyobakonyete igoro as'ense, kobua mono intwe titogokonyeka gotoratananeke nere ogotokonya korwa igoro: 26 oyio eriogi riaye rianyegeretie ense ekero keria: korende bono orire eira otebire, Ara rimo naende ninyegerie ense gose tari ense yoka, korende naigoro onsi. 27 Ring'ana riria, Ara rimo naende, rieorokirie maiso marore kobing'anyia biria bikonyara gotengechigwa buna ebinto biatongetwe, erinde ebinto bitanyare gotengechigwa bikaranse. 28 Gaki gotaranyore obonda botanyare gotengechigwa, tobe nobuya, erinde agwo tomoe Nyasaye ekeng'wanso gekomogokia, amo nobokanyeku bw'okoiroka; 29 naki Nyasaye oito nomorero okoria.
1 Obwanchani bw'abaminto bobeo. 2 Timweba koorokia obwanchani as'abageni; naki as'enchera eye abande mbaroisetie amalaika batabamanyeti. 3 Bainyore abasibetwe buna mwasiberanigwe amo nabarabwo; barabwo bakoreretwe amabe, ekiagera inwe more as'omobere. 4 Enyangi esikwe nabanto bonsi, nebirarero bibe ebichenu; naki abanyaka nabatomani Nyasaye nabanachere ekina. 5 Timoba nengecho y'ogwancha enibo; mobe nogoisanerigwa nebinto more nabio; naki ere omonyene otebire, Tingokoremera nonya ng'ake, gose tingogotiga nonya ng'ake. 6 Goika twachaka goteba nomoyo omoremu, Omonene nere orankonye; tinkwoboa: Mwanyabanto inki arankorere? 7 Bainyore baria bare nokobua igoro asemore, ababatebetie ring'ana ria Nyasaye; naende, korengereria mono omoerio bw'obogima bwabo, ega okwegena kwabo, 8 Yesu Kristo, igoro, na rero, nere oria goika kare nakare. 9 Timoirwa nokworokereria kore nechingecho chinde chinde, nokogeni: naki mbuya omoyo obekwe chinguru as'obuya, gose tari as'endagera, as'ero barabwo abagendete nero tiyabanyorerete kogwenera konde. 10 Ntore namathabau aria baria bagokorera eema tibari neribaga koria ebinto biaye. 11 Naki ching'iti chiria amanyinga abo akorentwa ime aachenu nomokuani omonene as'engecho y'ebibe, emebere yabo yasamberwa isiko as'omochie. 12 As'engecho eye Yesu nere, erinde abasibie abanto baye as'amanyinga aye omonyene, agachanderwa as'egesieri isiko. 13 Gaki togende asare isiko as'omochie, tobogorie nemerumi yaye. 14 Ekiagera aiga titori nomochie oranyare goikaransa, korende toyorigie oria orache. 15 Gaki tomoe Nyasaye ekeng'wanso gi'okomotogia botambe; engecho yaye, amatunda emenwa y'abanto bakoorokia erieta riaye. 16 Korende timweba gokora amaya nogokonyana nabanto; naki ebing'wanso buna ebi nabio bikomogwenera Nyasaye. 17 Baigwere abwo bare nokobua igoro yaino, nakweororobia asebare, naki barabwo iga bakorenda as'engecho y'emioyo yaino, buna abanto baranyare korua okobara; erinde bakore igo as'omogoko gose tari as'okweumia; naki anga tiyabagwenerete inwe. 18 Tosabere: naki rwanchire ng'a ntore nebirengererio ebiya, gatorarigie koba norogendo oruya as'amang'ana onsi. 19 Nainche nabasoroire mono kobua gokora ayio erinde ng'iranigwe asemore bwango. 20 Bono, Nyasaye bw'omorembe oyomoretete naende korwa as'amakweri, omorisia bwe ching'ondi ore omonene, as'amanyinga emuma ya kare nakare, Omonene oito Yesu. 21 Abakore mobe abaikeranu ase ker'ogokora okuya, monyare kobokora obwanchani bwaye, nere ogokora ime yaito erigwenerete as'obosio bwaye, ase Yesu Kristo; obonene mbore nere kare nakare. Amin. 22 Nabasoroire, abaminto, riremererie ring'ana eri rinyene ogosorora: naki nabarikeire as'amang'ana amake. 23 Manya ng'a oyominto Timotheo otiekire gosiborwa; amo nere nimbarore, karache bwango. 24 Bakwanie bonsi abwo babatang'aine, nabachenu bonsi. Abwo b'Italia babakwanirie. 25 Obuya bobe nainwe imwensi. Amin.
1 Yakobo, omosomba o Nyasaye, n'Omonene Yesu Kristo, as'ebisaku ikomi nabibere Ebiatananegete, ogokwania. 2 Kara ng'a nomogoko bwoka, abaminto, komoragwe as'ogotemwa kore ao, ao; 3 momanye ng'a ogotemwa okwegena kwaino igagokoreta okoremereria. 4 Nokwo okoremereria nakobe nemeremo eikeranete, monyare koba abaikeranu, naende abagima, motaremeiri egento. 5 Korende omonto oino kararemerwe chisemi, asabe ase Nyasaye, oyokobaa abanto bonsi as'obonge gose tari gotogonya; oyio naegwe. 6 Korende asabe as'okwegena, atari nogosiereria konde: naki omonyene ogosiereria igare buna emerindo y'enyancha ekoirwa nomwaga, nakoirwa gochia aria naria. 7 Naki omonto oria takaga nanyore egento as'Omonene; 8 omonto ore nemioyo ebere, igagotiting'ara ase chinchera chiaye chionsi. 9 Korende oyominto otari nobonene agoke as'okoimokererigwa kwaye: 10 nomonda ekiagera nairanigwe inse: ekiagera buna egesicha ki'obonyansi naete. 11 Naki erioba rikooroka nomwaga ogosamba bwomia obonyansi; egesicha kiaye kiaroroka, obuya bw'ekieni kiaye bwasira: naboigo nere omonda arasire ase chinchera chiaye. 12 Nare negesio oyoraremererie ogotemwa: naki gatiekire gotemwa, nanyore egutwa y'obogima, Omonene abarierete eira abamwanchete. 13 Omonto gagotemwa, tateba, natemirwe na Nyasaye: naki Nyasaye takonyara gotemwa namabe, gose ere omonyene tagotema omonto. 14 Korende ker'omonto igagotemwa ekero ang'usirwe nokong'ainwa, nebirengererio biaye omonyene. 15 Nakoria okorengereria gokwabogoirie oborito bwaibora ebibe; na biria ebibe bigokina, biareta amakweri. 16 Timong'ainwa, abaminto bane abanchani. 17 Ker'ekerugwa ekiya, nakera egekorugwa geikeranete, iga gekorwa igoro, geika korwa ase Tata bw'emebaso, asare tikori koonchoka, gose ekiriri kende gekoonchokaonchoka. 18 Agancha agatoibora intwe ase ring'ana ri'ekeene, tobe buna ogotongorwa kw'ebitongwa biaye, 19 Abaminto nyanchete mono, momanye ring'ana eri, Ker'omonto abe omwango bw'okoigwa, o ng'ora as'ogokwana, o ng'ora as'endamwamu: 20 naki endamwamu ya mwanyabanto terigokora emeremo y'oboronge bwa Nyasaye. 21 As'ayio beka are eubi yonsi nobonge bw'amabe, bwata as'obwororo ring'ana riasimekirwe, eriranyare gokonya emioyo yaino. 22 Mobe abakori be ring'ana, tari abakoigwa boka, mokweng'aina abanyene. 23 Naki omonto karabe omoigwa bwe ring'ana rioka, gose tari omokori, omonto oyo igare buna omonto okwerigereria obosio bwaye omonyene as'ekerore. 24 Naki igakwerigereria, naende ogenda as'agochia, erio kegima bweba buna arenge. 25 Korende oyorarigererie amachiko amaikeranu, ay'ogosiborwa, nagoikaransa aroro, taba omoigwa omwebi, korende omokori emeremo, oyio nabe negesio as'ogokora kwaye. 26 Omonto karakage nare nedini, nere tatangeti oromeme rwaye as'ekeokio, korende bweng'aina enkoro yaye, edini yaye omonto oria tegwenereti. 27 Edini ere enchenu, etari neubi as'obosio bwa Nyasaye Tata neye, okobachiera chintakana nababoraka as'emechando yabo, nakwerenda atari nekemoa as'ense.
1 Abaminto bane, timoba nokwegena kw'Omonene oito Yesu Kristo, Omonene bw'obonene, as'ogwanchereria abanto. 2 Naki karasoe as'omosangererekano oino omonto omonyene ebonyi y'ethahabu nechianga chingiya, nakarasoe omotaka ore nechianga chimbe; 3 nainwe mwamosika oria bweboetie chianga chingiya, nakomotebia, Ikaransa aye aiga aas'aaya; nakomotebia oria omotaka, Tenena aye aria, gose ikaransa aa amagoro ane, 4 inee, timori gokora ogwanchereria as'emioyo yaino, naende mwabaire abagambi abanyene okorengereria okobe? 5 Igwa, abaminto abanchani bane; Nyasaye tabachoreti abataka b'ense babe abanda b'okwegena, nabanyamwando b'obonda as'abwo abarierete eira abamwanchete? 6 Korende inwe mwamosareirie ogosika oria omotaka. Inee, abwo abanda tibabaregeti inwe nakobang'usa goika obosio bw'ebirogo b'ekina? 7 Inee, tibari korirama erieta riria rigiya mwarangererigwe? 8 Korende mogoikerania amachiko ay'obonda buna arikire, Mwanche omogisangi' oo buna bwanchete omobere oo, mwakora buya: 9 korende komorabe nogwanchereria abanto, mwakorire ebibe, nagokanerwa namachiko ng'a nabasaria. 10 Naki omonto bwonsi oyoranyare kobwata amachiko onsi, amo nayio, karagochwe ase ring'ana erimo, omochire igoro as'onsi. 11 Naki ere oyotebete, Totomana, agateba, Toita, naende. Gaki kerabe totomaneti, korende gwaitire, kwabaire omosaria bw'amachiko. 12 Kwana bo, nakora boigo, buna abanto barache kogambigwa as'enchera y'amachiko atasibiri. 13 Naki ekina tikeri namabera as'ere oyotari namabera: namabera igagwetogia igoro as'ekina. 14 Nokogwenera ki, baminto, omonto karatebe nare nokwegena, nere tari nogokora? Inee, koria okwegena nakonyare komokonya? 15 Kerabe oyominto omosacha gose omokungu ore bosa, oremeirwe endagera emoisanete, 16 nomonto oyomo oino amotebie, Gejida as'omorembe, mwote omorero nakoigota; korende tabaa ebibaremeirwe as'omobere, nagwenere ki? 17 Naboigo nokwegena, gotari nogokora, gwakure okonyene. 18 Korende omonto natebe, Aye nore nokwegena, nainche ninde nogokora: nyorokia okwegena kwao nainche ninkworokie okwegena kwane as'ogokora kwane. 19 Aye gwanchire ng'a Nyasaye noyomo; gwakorire buya: ebirecha nabirobio bianchire nokoiguswa. 20 Korende norigetie komanya, aye omwana o mwanyabanto otari gento, ng'a okwegena gotari nogokora nokogomba? 21 Inee, tata oito Ibrahimu tabaretwe ng'a nomonyene oboronge as'ogokora, agwo ekero amoruete Isaaka omwana oye igoro as'amathabau? 22 Mwarorire ng'a okwegena ngwakorete emeremo amo nogokora kwaye, nokwegena koria gogaikeranigwa as'ogokora koria. 23 Amariko aria agaikeranigwa aregoteba, Ibrahimu igegenete Nyasaye, ekabarwa asare okoba noboronge: nere akarokwa omosani o Nyasaye. 24 Mwarorire ng'a Omwana-o-mwanyabanto iga akobarwa ng'a nomonyene oboronge as'ogokora kwaye, tari as'okwegena gwoka. 25 Na Rahab, oria omotayayi nere, inee, tabaretwe ng'a nomonyene oboronge as'ogokora, ekero abaroisetie abatomwa, akabasokia isiko as'enchera ende? 26 Naki buna ore omobere otari nomoika okure, naboigo nokwegena gotari nogokora gwakure.
1 Timoba aborokia abange, baminto, momanye ng'a natonyore ekina ekenene kobua. 2 Naki tokwegocha intwe twensi as'amang'ana amange. Omonto otegocheti as'ogokwana, oyio nomonto omoikeranu, oranyare gotanga nomobere oye bwonsi buna as'ekeokio. 3 Rigereria, twabekire ebiokio as'emenwa ye chibarasi, erinde chitoigwere, naende togoonchora emebere yabo yonsi. 4 Yarigererie amato, nonya are amanene naki, nakoirwa nomwaga omotindi, aonchorwa nekeonchori egeke mono, onsi arengereretie kogenda oria omoiri. 5 Naboigo oromeme narororwo nekimo egeke, narororwo rwetogia as'amang'ana amanene. Rigereria buna omorero omoke ogosamba chinko chinyinge mono. 6 Noruo oromeme nomorero, ense y'obobe. Naro amang'ana oromeme as'ebimo biaito, igarokobeka ebimoa omobere bwonsi, nagotongia omorero goetanana egesingo ki'ogotongwa, nachirochio chiatongigwa omorero bwe chanaam. 7 Naki ker'ebisaku bie ching'iti, nebie chinyoni, nebie ching'iti chikwagura, nebi'ebinto bire enyancha ime, igabigotugeka, nabirobio bianyarire gotugwa na mwanyabanto. 8 Korende oromeme tari mwanyabanto oranyare korotuga; nobobe botagokira, boichire obosongo bokoreta amakweri. 9 As'oruo twamosesenia Nyasaye Tata oito; nas'oruo twabaragereria mwanyabanto bakoretwe as'omogwekano o Nyasaye: 10 as'omonwa oria oria orua ebisio nokoragereria. Baminto amang'ana aya tagwenereti koba igo. 11 Inee, ensoko as'entuboka eyemo nerete amache amaya namache amaroro? 12 Baminto, omoko nonyare kwama amazeituni, gose omosabibu amako? Nabo oroche tirokonyara koreta amache ay'omonyo namache amaya. 13 Ning'o ore nobong'aini nokoinyora asemore? naorokie emeremo yaye as'orogendo rwaye oruya, as'obwororo bw'obong'aini. 14 Korende, komorabe neribero abanyene obotindi neriomana emioyo yaino timwetogia, gose timokwana oborimo igoro y'ekeene. 15 Obong'aini obo tari boria bogocha korwa igoro, korende nobw'ense, naende nobwe chingecho chia mwanyabanto, nechia ebirecha. 16 Naki agwo ribero rire, nokoamererania, nao eriomana rire, na ker'ogokora kw'obosoku, 17 Korende obong'aini bokorua igoro, ritang'ani nobochenu, naende nobw'omorembe, nobwororo, bore ang'e koigwa amang'ana abanto, igoboichire namabera namatunda amaya, atari neriomana gose obong'ainereria. 18 Amatunda ay'oboronge igagosimekwa as'omorembe ase baria bagokora omorembe.
1 Esegi nokorwana ere gati yaino ng'ai ekorua? tari aroro as'okorengereria kwaino gogokora esegi as'ebimo biaino? 2 Morengereria, ko timori nagento; moita, nagokora ribero, natimokonyara konyora. Mokora esegi nakorwana, korende timori nagento ekiagera timori gosaba. 3 Ngosabamore ko timorikonyora, ekiagera iga mogosaba bobe, erinde mobikorere as'okorengereria kwaino. 4 Inwe abatomani abasacha nabakungu, timomanyeti ng'a obosani bw'ense nobobisa ase Nyasaye? Gaki oyorigetie koba omosani bw'ense bwekorire koba omobisa o Nyasaye. 5 Gose iga mogokaga ng'a amariko igagoteba bosa? Omoika oikaransete ime yaito igokorengereria ekerengo gi'okorora ribero? 6 Korende otoire intwe obuya obonge kobua. As'ayio otebire, Nyasaye igagotanga abagwekinia, korende abaa obuya abaitongo. 7 Gaki mwebeke inse ase Nyasaye; mwange Saitani, nere nabatame. 8 Moike ang'e Nyasaye, nere nabaike ang'e nainwe. Esibie amaboko aino, inwe abanyene ebibe; chisibie chinkoro chiaino, inwe abanyene emioyo ebere. 9 Eichanie, nakweng'ereria, nakorera. Ogoseka kwaino goonchorwe kobe okweng'ereria, nomogoko oino koba ogoichana. 10 Ekanye abanyene as'obosio bw'Omonene, nere nabaimokereria igoro. 11 Timong'achana baminto: oyokong'acha oyomwabo, gose komogambia oyomwabo. igakong'acha amachiko nakogambia amachiko. Korende ekero oragambie amachiko, tori omokori amachiko, korende omogambia. 12 Omorusia amachiko nomogambia noyomo bweka, oranyare gokonya nagosiria: naye ng'o okomogambia omogisangi'oo? 13 Gaki, inwe bono abwo mogoteba, Rero gose ankio natosoe omochie gete nagoikaransa aroro omwaka omogima, nagokora ogoonchoreria nakonyora ebitoki: 14 nainwe timomanyeti ayarabe ankio. Obogima bwaino ninki? Naki inwe neritaturi rikororekana as'egeka, naende riasira. 15 Naki mogwenerete goteba, Omonene karanche, natobe moyo, nagokora iga, gose iga. 16 Korende bono iga mogwetogia as'oboenenu bwaino: ogwetogia gwonsi konga buna oko nokobe, 17 Nabo ere oyomanyete gokora amaya, ko tayakora, asare oyo nebibe.
1 Gaki bono inwe, abanda, rera nakoaka egeturi, ekiagera emechando yaino yabacheire. 2 chinibo chiaino chiagundire, nechianga chiaino chiarirwe nobobosu, 3 chithahabu chiaino ne chifetha chiaino chiasoirwe nobobosu; nobobosu bwaye bwabaire kirori asemore, naborobwo naborie emebere yaino buna omorero. Mwegacheire emonga as'amatuko ay'omoerio. 4 Rigereria, eng'eria y'abaremi bagesire emegondo yaino, yatangirwe nainwe as'okoura, yaakire eriogi: nebirero biabo abagesete biasoire amato Omonene o Sabaothu. 5 Mwarire ebio omogoko as'ense, nakwegokia as'okorengereria; mwerageirie chinkoro chiaino buna rituko ri'okonyenya. 6 Mwamogambire omonyene oboronge nakomoita: nere taamereranetie nainwe. 7 Nabo remereria, abaminto, goika ogocha kwaye Omonene. Morigererie omoremi, igakoganya okwama gw'ense okore kwe rigori, aremereria as'engecho yaye goika anyore embura ye ritang'ani ney'omoerio, 8 Nabo, nainwe remereria; kong'ia chinkoro chiaino, naki ogocha kwaye Omonene kwabaire ang'e. 9 Timwemurungananerania, baminto, timocha kogambigwa. Rigereria omogambi otenenire obosio bw'egesieri. 10 Bwatia ababani abaminto, abakwanete as'erieta ri'Omonene babe omoreng'anio bw'okoremereria obobe, noboremereria. 11 Rigereria, twabarokire abanyene egesio abwo bakoremereria. Mwaigure amang'ana okoremereria kw'Ayubu, mwarorire omoerio bw'Omonene, ng'a Omonene nomonyene amabebe amange namabera. 12 Korende kobua onsi, abaminto, timoria emuma ende yonsi, as'igoro gose as'ense; korende ee yaino ebe ee, na yaya yaino ebe yaya; timocha kogwa inse as'ekina. 13 Omonto oino karanyorekane nemechando tiga asabe. Onde oino nare nomoyo bw'ogosasoka? tiga atere ogotera. 14 Omonto oino obaire omorwaire? arangerie abagaka b'ekanisa bamosabere, bainoake amaguta as'erieta ri'Omonene: 15 na koria ogosaba gw'okwegena nakomokonye omorwaire oria, n'Omonene namotenenie; onye okorire ebibe, naberwe. 16 Orokia ebibe biaino inwe as'inwe, nagosaberana, monyore ogokonywa. Ogosaba kwaye omonyene oboronge nkogwenerete mono, karasabe nomokia. 17 Elija igarenge omonto omonyene chingecho echimo naintwe, agasaba nomokia embura tetwa: nembura tiyatwa igoro y'ense egeka ki'emiaka etato nemetienyi etano nomo. 18 Agasaba naende, igoro ekareta embura, ense ekama amatunda aye. 19 Baminto, kerabe omonto oino karasire nagotiga keria ekeene, nomonto onde amoiranie; 20 amanye ng'a ere omoiranirie omonyene ebibe, arwe as'enchera y'ogosira, nakonye omoyo oye omonto oria korwa as'amakweri, nagotuba obonge bw'ebibe.
1 Petero, omotomwa o Yesu Kristo, as'abachore b'Ogwatananeka, baikaransete abageni ase Ponto, Galatia, Kappadokia, Asia na Bithunia, 2 buna Nyasaye atang'anire kobamanya korwa kare as'ogwesibia kw'Omoika, goika okoigwera na konyororokerigwa amanyinga a Yesu Kristo: Obuya nomorembe bimenteke asemore. 3 Nabakwe Nyasaye Tata bw'Omonene oito Yesu Kristo, ere as'amabera aye amange, agatoibora eria kabere tonyore ogosemeria okonyene obogima as'okobokigwa kwaye Yesu Kristo, 4 tonyore omwando otagosareka, otari neubi, otari gosira, ogachire igoro as'engecho yaino, 5 abwo morendire nechinguru chia Nyasaye as'enchera y'okwegena monyore ogotoreka kore ang'e koorokigwa ekero ki'omoerio. 6 Mwagokire mono as'engecho yaye, nonya bono as'ekero egeke, onye negwenerete, moichanigwe as'ogotemwa chingecho chire ao ao, 7 erinde ogotemwa gw'okwegena kwaino, kore nerigori rinene kobua ethahabu egosira, nonya egotemwa as'omorero, erorekane koba as'ogotogigwa nobonene nogosikwa, as'okoorokigwa kwaye Yesu Kristo; 8 ere mwamwanchire, nonya timoramorora; ere nonya timomorochi bono, mwamwegenire, nakogoka mono as'omogoko otarigotebeka oichire nobonene: 9 mokonyora omoerio bw'okwegena kwaino, ogotoreka kw'emioyo yaino. 10 As'amang'ana ogotoreka okwo bakarigiarigia nakounaunia ababani babanete amang'ana ay'obuya boranyare kobachera: 11 bakorigia nkero ki, naende nkero buna kereki kiaorokigwe n'Omoika o Kristo orenge ime yabo, otang'anete koyiatora emechando eramonyore Kristo, nobonene borache koba nyuma as'ayio. 12 Baigoreretwe tari as'engecho yabo abanyene, korende as'engecho yaino, barenge gokora as'amang'ana ayio, ayio bono akorandigwa asemore nabaria babaranderetie inwe enchili as'Omoika Omochenu otometwe korwa igoro; amang'ana ayio amalaika mbarengereretie koyarigereria. 13 As'ayio eboe ebinema bi'ebirengererio biaino, mobe nobong'aini, as'oboikeranu kobosemeria boria obuya morareterwe as'okomanoka kwaye Yesu Kristo. 14 Buna abana b'okoigwera timwereng'ania nokorengereria kwaino kwe ritang'ani, kw'oboriri bwaino: 15 korende buna ere oyobarangeirie are omochenu, inwe nainwe mobe abachenu as'orogendo rwaino rwonsi; 16 ekiagera nerikire, Namobe abachenu; naki inche nomochenu. 17 Na kerabe mokomoroka Tata, ere oragambie ker'omonto atari nogwanchereria, as'ekerengo ki'emeremo yaye, genda nokoiroka as'ekero kiaino gi'ogoikaransa aiga buna abageni; 18 momanye ng'a timogoriri as'ebimo bigosareka, ase chifetha gose chithahabu, monyare korua as'orogendo rwaino rotagwenereti mwanyorete as'abaiso baino; 19 korende as'amanyinga aye rigori, buna ay'emanwa y'eng'ondi etari nobobe, etari nabimoa, amanyinga a Kristo: 20 omanyekanete korwa kare, ritang'ani ense etarabekwa oboroso; korende akaigorerwa omoerio bw'ekero as'engecho yaino, 21 ere as'ere mwamwanchire Nyasaye, omobogetie korwa as'amakweri, akamoa obonene; erinde okwegena kwaino nogosemeria kwaino kobe ase Nyasaye. 22 Komwaikire gwesibia emioyo yaino as'okoigwera keria ekeene, koboikera obwanchani bw'abamino botari nokong'ainereria, gaki anchana bono korwa as'enkoro: 23 ekiagera mwaiboirwe eria kabere, tari as'embusuro egosareka, korende eyetari gosareka, ase ring'ana ria Nyasaye rinyene obogima, na rikobao goika kare nakare. 24 Naki, Omobere bwonsi buna obonyansi, Nobonene bwaye bwonsi buna egesicha ki'obonyansi. Obonyansi igabokwoma negesicha kiaye kegwa; 25 Korende Ring'ana ri'Omonene iga rikobao goika kare nakare. Nering'ana erio nering'ana rigiya riarandetigwe asemore.
1 Gaki komorabeke are obobe bwonsi nokong'aina gwonsi, nobong'ainereria bwonsi, nemoko, nogokwana okobe gwonsi, 2 buna abana abake, baiboirwe bono yarengererie amabere aria ay'obong'aini atari nobong'ainereria, erinde as'ayio monyare gokina naro goika as'ogotoreka; 3 kerabe onye mwatemire ng'a Omonene nomonyene amaya: 4 komoramochiere ere, rigena rire moyo, riangetwe na mwanyabanto, korende ase Nyasaye nerichore, rire nerigori, 5 nainwe nabo, buna amagena ayare moyo, mwaagachirwe mobe enyomba y'Omoika, obokuani obochenu, morue ebing'wanso bi'omoika, biranyore ogwancherwa ase Nyasaye ase Yesu Kristo. 6 Ekiagera naro are ime as'amariko, Rigereria, nabekire ase Zayoni rigena rinene ri'ekoiia, richore, rire nerigori: Na ker'oyoramwanche takonyara gosokigwa. 7 Naki rigori eri asemore inwe abamwanchire, korende as'abwo abatancheti, Rigena bangete abaagachi. Riabaire rigena rinene ri'ekona; 8 Naende, Rigena ri'okogocha okogoro, negetare gi'okoiyeria; naki begocha ase ring'ana riria, ekiagera tibakorigwera: nabarabwo igababegetwe banyore ayio. 9 Korende inwe nabaiborwa abachore, obokuani bw'oboruoti, egesaku egechenu, abanto b'obogambi bwa Nyasaye, monyare gotaria amaya aye oyobarangeretie morue omosunte, mosoe as'amasase aye ay'ogokumia: 10 inwe mwarenge ritang'ani tari egesaku, korende bono negesaku kia Nyasaye: igamwarenge timwanyorete amabera, korende bono mwanyorire amabera. 11 Abanchani, nabasoroire inwe buna abaei i nubageni, eatanane nokorengereria kw'omobere gokorwana nomoyo; 12 mobe nechingecho chingiya egati y'Ebisaku, erinde nonya bakobang'acha ng'a iga mogokora amabe, banyare korora ogokora kwaino okuya, bamotogie Nyasaye rituko ri'ogocha kobarora. 13 Mwebeke inse ase ker'egiachikirwe nabanto, as'engecho y'Omonene: onye nomoruoti, buna omonene; 14 onye abanene, buna batomirwe nere okobaakania egesiomba abakori amabe nakobatogia abakori amaya; 15 naki nabwo obwanchani bwa Nyasaye, as'ogokora amaya mosieke emenwa y'oboriri bw'abanto abakayayu: 16 buna abasibore, nabatari gokorera obosibore as'ogotuba obobe, korende buna abasomba ba Nyasaye. 17 Basike abanto bonsi. Ancha abamino. Mosike Nyasaye. Moe ogosika omoruoti. 18 Inwe abasomba, baigwere abanene baino as'okoiroka gwonsi; tari as'abwo bare abaya nabanyene obwororo boka, korende nabwo abare abatindi. 19 Naki obo nabwo obuya mono omonto kararemererie ogoichana as'okomoinyora Nyasaye, ogochandwa gotari kwa boronge. 20 Naki ngotogigwa ki koremereria, komogokora ebibe nakoakwa chindoe? korende koremereria, komogokora amaya nakonyora emechando obo nabwo obuya obonene as'obosio bwa Nyasaye. 21 Naki naro mwarangereretigwe: ekiagera Kristo nere igachandetwe as'engecho yaino, obatigeire omogwekano, motunye chimbaratero chiaye: 22 ere takorete ebibe, gose obong'ainereria tibwarorekanete omonwa oye; 23 ere, gakoramwa, tairanetie okorama; gachandetwe, tatianete; korende akebeka asare ere oyokogamba as'oboronge: 24 ere omonyene akabogoria ebibe biaito as'omobere oye igoro as'omote, erinde, gatwakure as'amang'ana ay'ebibe, tobe moyo as'amang'ana ay'oboronge; as'okoakwa kwaye mwagwenigwe. 25 Naki iga mware buna ching'ondi chiasirire; korende bono mwairanire as'Omorisia n'Omoaskofu bw'emioyo yaino.
1 Naboigo, inwe abakungu, mwebeke inse as'okobaigwera abasacha baino; erinde onye, abande mbare aroro abataigwereti riria ring'ana, banyorekane as'orogendo rw'abakungu babo, batari nering'ana riria; 2 bakorora orogendo rwaino orore oruya, orore nokoiroka. 3 Okweboa kwabo, tikoba okweboa gw'isiko, as'okomina chitukia, nakobeka ebinto bie chithahabu, nakweboa chianga; 4 korende as'omonto bw'enkoro otari kororekana, as'okweboa okwo gotarigosareka; nomoika bw'obwororo nobokanyeku obore rigori rinene as'obosio bwa Nyasaye, 5 Naki okwo nakwo okweboa kw'abakungu abachenu ba kare, abamosemeretie Nyasaye, bakobakorera abasacha babo; 6 buna Sara amoigwerete Ibrahimu, akamoroka omonene: nainwe nabana baye komogokora amaya, gose timokoirokigwa as'ogoichana konde gwonsi. 7 Nainwe abasacha boigo, ikaransa nabakungu baino ase chisemi; mokomoa omokungu ogosika buna egento getari nechinguru, na buna abanyamwando amo nobuya bw'obogima; erinde ogosaba kwaino tigotangwa. 8 Ring'ana ri'omoerio neri; mobe nomoyo oyomo, abakororerana amabera, gwanchana buna abamwabo, abare nemioyo y'amabera, abanyene obokanyeku: 9 abanto batari koakanana amabe as'amabe, gose okorama as'okorama; korende abagosesenia; ekiagera naro mwarangererigwe ng'a monyore omwando bw'ebisio. 10 Naki, Oyorigetie gwancha obogima, Nakorora amatuko amaya, Arotange oromeme rwaye takwana amabe, Nebikoba biaye tibikwana obong'ainereria: 11 Atige amabe, akore amaya; Arigie omorembe, ayotunye mono. 12 Naki amaiso Omonene igare igoro as'abanyene oboronge, Namato aye igakoigwa ogosaba kwabo: Korende obosio bw'Omonene igabore igoro as'abwo abagokora amabe. 13 Nere ning'o orabakorere amabe, komorabe nomokia as'ayare amaya? 14 Korende komorachandwe as'engecho y'oboronge, more negesio: timoiroka okoirokia kwabo, gose timoichana; 15 korende mosibie Kristo Omonene ase chinkoro chiaino; mobe ang'e amatuko onsi komoiraneria ker'omonto okobaboria amang'ana ay'ogosemeria kore ime yaino, as'obwororo nas'okoiroka; 16 komorabe nokorengereria okuya, mwang'achirwe ng'a nabakori amabe, erinde basokigwe baria bakorama orogendo rwaino oruya ase Kristo. 17 Naki mbuya gochandwa as'ogokora amaya, kaborabe nabwo obwanchani bwa Nyasaye, kobua as'ogokora amabe. 18 Ekiagera Kristo nere agachandwa ara rimo as'engecho y'ebibe, omonyene oboronge, as'engecho y'abwo batan ba boronge, erinde atorete ase Nyasaye; omobere oye ogaitwa, korende ogakorwa moyo as'omoika. 19 As'ayio agachiera emeika yaikaransete as'ebisibo, 20 akabaranderia abanto bataigwerete agwo kare, okoremereria kwa Nyasaye kwaganyete amatuko a Nuhu, ekero obwato bwarenge korosigwa, ime yaye abanto abake, engecho yaye, abanto batano nabatato bakonyegete as'amache. 21 Omogwekano bw'amang'ana aya nebatiso, erabakonye nainwe amatuko aya; tari okobeka are eubi y'omobere, korende okoiraneria kw'ebirengererio bire ebiya obosio bwa Nyasaye, as'okoboka kwaye Yesu Kristo; 22 oyore okoboko gw'okorio kwa Nyasaye, ochire igoro; amalaika nokobua nechinguru biaigwerigwe inse asare.
1 Nabo ekiagera Kristo achandetwe as'omobere oye, nainwe naboigo eboyie omoyo oria oria buna ebinto bi'esegi; naki ere ochandirwe as'omobere, otiganire nebibe, 2 korwa bono titogenderera as'okoba moyo as'okorengereria kwa mwanyabanto, korende as'obwanchani bwa Nyasaye, ekero giaito ki'ogoikaransa aiga ense getigarete. 3 Naki ekero ki'obogima bwaito giaetire bwaisanire as'ogokora ayabianchete Ebisaku, okogenda ase chingecho chi'omobere, nokorengereria, nokonywa, nemeyega y'okoria bobe, nogotinda, nogosaba chisanamu chitari chia boronge: 4 as'ayio barabwo bakorora ng'a nogokumia as'inwe motari kogenda amo nabarabwo bwango goika as'obokayayu botari nekerengo, bakobarama: 5 baranyare korusia okobara asare ere oyore ang'e kobagambia abare moyo nabakure. 6 Naki as'engecho y'ayio nabarabwo abakure mbaranderetigwe enchili, erinde bagambigwe as'omobere koreng'ana buna mwanyabanto; babe moyo as'omoika as'okomoigwera Nyasaye. 7 Omoerio bw'amang'ana onsi oikire: nabo, kabe nobong'aini, morende as'ogosaba: 8 kobua as'onsi mobe nomokia as'ogwanchana, naki obwanchani igabokobisia obonge bw'ebibe: 9 mobe abaroisania inwe as'inwe, motari nokwemurungania: 10 kera oyomo koreng'ana as'ekerengo anyorire, gekorere as'ogokorerana; buna abarendi abaya b'obuya bwa Nyasaye bore chingecho chinyinge. 11 Omonto karakwane, nakwane buna amachiko a Nyasaye; omonto karakorere nakore ase chinguru aeirwe na Nyasaye: erinde Nyasaye atogigwe as'amang'ana onsi ase Yesu Kristo, obonene nokobua nobwaye goika kare nakare. Amin. 12 Abanchani, timorora ng'a nogokumia eria emechando yabanyorire buna omorero ng'a niotemwe, onye gose negento ekegeni kiabanyorire: 13 korende buna mwahwatanete nemechando ya Kristo goka; erinde as'okomanoka kw'obonene bwaye mogoke as'ogosasoka. 14 Komorachaywe as'engecho y'erieta ria Kristo more negesio; ekiagera Omoika bw'obonene, noyo Nyasaye igoikaransete igoro yaino; as'abwo akoramwa, korende as'inwe abakwe. 15 Naki oyomo oino tachandwa buna omoiti, gose omoibi, gose omokori amabe, gose buna omonto okwerosia namang'ana ay'abanto bande. 16 Korende kerabe omonto ogochandwa as'engecho y'Obokristo, tarora obosoku; korende amobake Nyasaye as'erieta eri. 17 Naki ekero giaikire ekina gechakere enyomba ya Nyasaye; na gokerachake asetore, ninki omoerio obo abwo batayeigwereti enchili ya Nyasaye? 18 N'omonyene oboronge karakonyeke as'emechando, oria otamoirogeti Nyasaye nomonyene ebibe ng'ai ararorekane? 19 Nabo abwo bagochandwa buna Nyasaye anchete bamobekere emeika yabo egachwe asare, as'ogokora amaya, buna as'Omotongi omwegeni.
1 Nabasoroire abagaka bare asemore, inche inde omogaka omogisangi obo, na kirori bw'ogochandwa kwa Kristo, nomobwatani bw'obonene borache koigorerwa naende: 2 ririsie riicho ria Kristo rire asemore, na koritenenera, tari as'okobetererigwa, korende as'ogwancha; buna ase Nyasaye; tari as'okorigia chifetha chi'obosoku, korende nas'omoyo bw'ogwancha; 3 tari gwekora abanene igoro as'abwo mwaetwe, korende as'ogwekora omogwekano ase riria riicho. 4 N'Omorisia omonene karaoroke namonyore egutwa y'obonene eria etari gosareka. 5 Naboigo abake baigwere abagaka. Nabo imwensi eboe oboitongo buna orokini, monyare gokorerana: naki Nyasaye igakoamererania nabanyene oboenenu, nakobaa abaitongo obuya. 6 Nabo ebeke inse as'okoboko kwa Nyasaye okore ogokong'u, nabaimokererie igoro as'ekero kiaye; 7 mokomotweka emechando yaino yonsi, naki ere igakwerosia mono as'engecho yaino. 8 Kabe nobong'aini bw'okwerira, renda, ekiagera omobasoeri oino saitani, buna esibwori ekoruma, egoetanana tanana, ekorigia omonto emorie; 9 mwange, mobe abakong'u as'okwegena, momanye ng'a ogochandwa koria koria gwaikeranigwe as'abamino abare as'ense. 10 Na Nyasaye bw'obuya bwonsi obarangeirie mosoe obonene bwaye bwa kare nakare ase Kristo, komwatiekire gochandwa as'ekero egeke, ere omonyene nabaroisie, nabaikeranie, ababeke chinguru. 11 Okobua nokwaye ere goika kare nakare. Amin. 12 As'okoboko kwa Silivano, oyominto omwegeni buna ndoche, nabarikeire as'amang'ana amake, koborokereria nagoteba ng'a obo nabwo obuya bw'ekeene kia Nyasaye: tenena bokong'u as'ekio. 13 Ere (ekanisa) enchore, omogisangi oino ore ase Babel, obakwanirie, na Mariko omwana one. 14 Kwanania as'okonyunyuntana kw'obwanchani. Omorembe obe asemore mwensi, ase Kristo Yesu.
1 Simon Petero, omosomba nomotomwa o Yesu Kristo, as'abwo banyorete okwegena okomo naintwe, kore nerigori, as'oboronge bwa Nyasaye oito, n'Omokonyi oito Yesu Kristo. 2 Obuya bobe asemore nomorembe omentwe as'okomomanya Nyasaye na Yesu Omonene oito; 3 ekiagera okobua kwa Nyasaye gwatoire ebinto bionsi ebinyene obogima nakoba nechingecho chia Nyasaye, as'okomomanya ere otorangeretie as'obonene bwaye nobuya bwaye omonyene; 4 as'ayio twaeirwe chiira chinene mono chie rigori; erinde as'echio monyare koba ababwatani be chingecho chia Nyasaye, komorakonywe nogosareka kore ense as'engecho y'okorengereria. 5 Ee, as'engecho eyio eyio inwe momentwe omokia omonge, as'okwegena kwaino lneiua ubuya, nas'obuya bwaino chisemi; 6 nase chiseini chiaino okwerita; nas'okwerita kwaino okoremereria; nas'okoremereria kwaino nokoba nechingecho buna Nyasaye; 7 nas'okoba nechingecho buna Nyasaye ogwanchana kw'abamino; nas'ogwanchana kw'abamino, obwanchani. 8 Naki amang'ana ayio karabe ayaino nagoichora, nabakore inwe koba tari aboro gose tari abanto batari nokwama as'okomomanya Omonene oito Yesu Kristo. 9 Naki ere oyotari naya nomouko, takonyara korora ebinto bire are, bwebire koria ogosibigwa ebibe biaye bia kare. 10 As'ayio baminto, kora omokia kobua gokora okorangerigwa kwaino nogochorwa kwaino kobe ogokong'u: naki komorakore ayio timokogochwa nonya ng'ake. 11 Naki iga narentwe asemore as'obonge mosoe obonda bwa kare bw'Omonene oito, Omokonyi Yesu Kristo. 12 As'ayio tinkomocha kobainyoria ayio amatuko onsi, nonya moyamanyete, nagoikeranigwa ase keria ekeene kiabaikeire. 13 Nainche narorire ng'a mboronge, ekero nde inche as'obomenyo obo, kobatura as'okobainyoria; 14 nakomanya ng'a koria okobeka are obomenyo bwane gwachire bwango, buna Omonene oito Yesu Kristo anyorogetie boronge. 15 Korende ninkore omokia, ng'a ker'ekero nyuma y'ogokwa kwane monyare koyainyora amang'ana aya. 16 Naki titotunyaneti emegano yaganetwe ase chisemi, ekero twabatebetie inwe chinguru chiaye Omonene oito Yesu Kristo nogocha kwaye, korende igatwarenge abarori b'obonene bwaye. 17 Naki iganyorete ase Nyasaye Tata ogosikwa nobonene, agwo areteretwe eriogi riaruete as'obonene mono buna iga, Oyo nere omwana one nyanchete, asare nagweneirwe nere. 18 Neriogi eri nario twaigwete rikorua igoro ekero twarenge amo nere as'egetunwa keria egechenu. 19 Naintwe ntore nering'ana riria ri'obobani rire rikong'u kobua, ase rirorio morakore buya komoraririgererie buna etaya ekobara aas'are omosunte, goika kobogokia, neng'enang'eni ya mambia ekooroka ase chinkoro chiaino. 20 Komoramanye ring'ana eri ng'a obobani bonde tibori as'amariko bokonyara goonchorwa buna anchete omonto gete bweka. 21 Naki obobani tibwaretetwe kare as'obwanchani bwa mwanyabanto: korende mwanyabanto abachenu ba Nyasaye, bagakwana, as'ogotang'anwa n'Omoika Omochenu.
1 Korende bakaimoka ababani b'oborimo as'egati y'abanto, buna arabe asemore baranyare koba aborokia b'oborimo, baranyare gosoyia bobisi as'okworokereria gotagwenereti kw'ogosiria, bakomokana nonya Omonene obagorete, bakweretera ogosareka gotari gotebana. 2 Nabange nabatunye ogokora kwabo kw'omobere; as'abwo enchera y'ekeene nekwanwe nobobe. 3 Nas'okorengereria nabenyorere okwegwenera asemore as'amang'ana arosigwe: ekina kiabo korwa kare tigegotebana, gose ogosira kwabo tigokorara. 4 Naki buna Nyasaye atababerete amalaika ekero bamochete, korende akabaruta engorg, akababeka as'ebisibo bi'omosunte, barendwe goika ekina geche; 5 gose tayiaberete eria ense ya kare, korende akamokonya Nuhu omosomba bw'oboronge, nabanto bande batano nababere, agwo ekero aretete amache igoro as'ense y'abatamosigete Nyasaye; 6 akayenachera ekina emechie ya Sodomu na Gomora, akayeonchora akayekora ribu, akayekora ebe ekiorokererio as'abanto batanyare komosika Nyasaye nyuma y'aya; 7 akamokonya Lut, omonyene oboronge, ore goichanigwa norogendo rw'obotomani bw'abwo abasaria; 8 (naki omonto oyo omonyene oboronge akamenya asebare, as 'okorora nokoigwa, agechanda as'omoyo oye omonyene oboronge, amatuko as'amatuko, as'ogokora kwabo gotari namachiko) ; 9 Omonene namanyete kobakonya abamosigete korwa as'ogotemwa, nakobabeka abatari ba boronge inse as'okoakwa goika rituko ri'ekina; 10 ko kobua baria bakobwatia omobere as'okorengereria kw'amang'ana eubi, nagochaya obonene. Abatari koiroka, abanyene oboenenu, tibakoiguswa kobakoborama obonene: 11 nonva amalaika, bare abanene kobua as'okobua nechinguru, tibarikoreta ogosoera okobe igoro as'obosio bw'Omonene. 12 Korende abwo buna ching'iti chitari nobong'aini, iga bare agwo ching'iti chioka chikobwatwa nagosirigwa, bakorama as'amang'ana batamanyeti, nabasirigwe as'ogosirigwa kwabo, 13 bakonyorwa nobobe buna eng'eria y'ogokora okobe; bagokaga nogotinda nokwegokia ekero ki'omobaso nobwansu; nebimoa nobosoku, bagotunyana okwegokia as'emeyega yabo y'obwanchani, kobagokora omoyega amo nainwe; 14 abanyene amaiso aichoire nobotomani, abanto batari gotiga gokora ebibe, igabakobang'aina abare nemioyo etari nechinguru; abanyene chinkoro chianarigwe nokorengereria, abana b'okoragereria; 15 abatigire enchera erambogete, bagasira, bagatunya enchera ya Balaam omwana o Bosor, bwanchete eng'eria y'ogokora okobe; 16 korende agakanigwa as'ogosaria kwaye omonyene: etigere etari gokwana, egakwana as'eriogi ri'omwana o mwanyabanto, gotanga obobarimo bwaye omobani oria. 17 Abaiga nechinsoko chitari namache, namare akoirwa nomwaga; naki babekeirwe obomwamu bw'omosunte. 18 Naki bagokwana amang'ana ay'oboenenu obonene mono, as'okobang'usa as'okorengereria kw'omobere nas'obotomani, abwo bachakire kobatama baria bare as'obong'ainereria; 19 bakobarigeria ogosiborwa, nabarabwo abanyene nabasomba b'ogosareka. Naki omonto karabugwe nomonto, igakoba omosomba bw'omonto oria. 20 Ekiagera baria batiekire koyetama eubi y'ense as'okomomanya Omonene, Omokonyi Yesu Kristo, bakobwatwa naende nakobugwa nero, engecho yabo y'omoerio nebe embe kobua eria ye ritang'ani. 21 Naki anga igabete buya onye tibayemanyete enchera y'oboronge, kobua koyemanya, nakoirana nyuma as'ogochika ogochenu baetwe. 22 Korende obaikeire omoreng'anio oria bw'ekeene, Esese yairaneire amaroki aye enyene, nengurue yasibigwe kwegaragaria as'etintira.
1 Abanchani, rirube eri nario ria kabere nabarikeire inwe; as'ayio nabibokirie ebirengererio biaino ebiya as'okobainyoria, 2 monyare koyainyora amang'ana akwanetwe kare nababani abachenu, naria amachiko Omonene Omokonyi aretetwe nabatomwa baye. 3 Momanye ritang'ani ring'ana eri ng'a as'amatuko omoerio nabache abanto abanyene esekererio, bagotunyana okorengereria kwabo abanyene, 4 nagoteba, Ng'ai ere eira eria y'ogocha kwaye? naki, korwa agwo chisokoro chiaito bararete, ebinto bionsi igobikaransete engecho eyio eyio, korwa omochakano bw'ogotongwa. 5 Naki igabamiametie amaiso abo tibarora ring'ana eri, iga yarenge aroro igoro korwa kare, nense boigo, egakorwa as'amache ekarua as'amache, ase ring'ana ria Nyasaye; 6 as'ayio ense eria y'ekero keria egasarigwa namache, egasira. 7 Korende igoro ya bono nense biagachirwe emonga as'omorero, ase ring'ana erio erio, birendwe goika rituko ri'ekina, neri'ogosirigwa kwabo mwanyabanto abatamosigeti Nyasaye. 8 Korende, abanchani, timorieba ring'ana eri, ng'a as'Omonene rituko erimo igarire buna emiaka elifu, nemiaka elifu buna rituko erimo. 9 Omonene tatchaneti goikerania eira yaye, buna abande bakobara ogotebana; korende igaremereretie asemore, tancheti monto onde bwonsi asire, korende bonsi baikere ogoonchoka. 10 Korende rituko ri'Omonene nariche buna omoibi; ase rituko erio igoro naruo as'eriogi rinene, nebitongwa bi'igoro nabisire nomorero ogotetenya, nense nemeremo ereo ime yaye neyie. 11 Naboigo ekiagera ebinto ebi bionsi nabisire, nebagwenerete inwe koba abanto b'engecho ki as'orogendo orochenu nechingecho chia Nyasaye, 12 mokorigereria nagosemeria mono goika riche rituko riria ria Nyasaye, ekiagera as'ayio igoro nesirigwe nakoyia, ebitongwa bionsi nabinyititoke nomorero omonene. 13 Korende, as'engecho y'eira yaye toganyete igoro ayia nense enyia, as'eyio oboronge bwaye boikaransete ime yaye, 14 As'ayio, abanchani, ekiagera moganyete ayio, kora omokia erinde mororekane ng'a timori nabimoa gose obosoku as'obosio bwaye as'omorembe. 15 Bara okoremereria kw'Omonene oito ng'a nogotoreka; buna oyominto omwanchani Paulo abarikerete ase chisemi aetwe; 16 naende buna amarube aye onsi akoreta amang'ana ayio; imeo nareo amang'ana ayare amakong'u koyamanya, namang'ana ayio abanto batari nobong'aini, batari nechinguru bayasaria, buna basaririe namariko ande, as'ogosira kwabo abanyene. 17 Gaki abanchani, komwatang'anire koyamanya aya, erende, timobaisa gosirigwa nokomocha kwabo abw'abasaria, mogwe nagotiga obokong'u bwaino. 18 Korende kina as'obuya, nas'okomomanya Omonene oito, Omokonyi oito Yesu Kristo. Obonene nobwaye ere bono na goika kare nakare. Amin.
1 Naro arenge korwa omochakano, twaigwete, twaroche namaiso aito, twarigereretie, namaboko aito akabwata, ase Ring'ana ri'obogima, 2 (nobogima obwo bokaorokigwa, naintwe tokarora, twabaire kirori, nakobaranderia boria obogima bwa kare nakare, bwarenge ase lata, bokaorokigwa asetore); 3 naro twayarorire nakoigwa, twabarandeine nainwe, erinde nainwe monyare kobwatana amo naintwe: nokobwatana gwaito iga kore amo na Tata, n'Omwana oye Yesu Kristo: 4 naya twabayerikeire, erinde omogoko oino oikeranigwe. 5 Naya naro amang'ana twaigwete asare, twarandirie asemore, ng'a Nyasaye nomobaso, nonya 'mosunte onde bwonsi tori ime asare. 6 Gatogoteba twabwatanire nere, naende gatoragende as'omosunte, twatebire oborimo, titogokora eria ekeene, 7 korende gatoragende omobaso ime, buna ere are as'omobaso, twabwatanire intwe as'intwe, namanyinga aye Yesu Kristo, Omwana oye natosibie ebibe biaito bionsi. 8 Gatoratebe titori nabibe, iga tokweng'aina, nonya nekeene tikeri asetore. 9 Gatorabioorokie ebibe biaito, ere nomonyene ekeene noy'oboronge natorusie ebibe biaito, nagotosibia obobe bwonsi. 10 Gatoratebe titokoreti ebibe, twamokorire omorimo, nonya nering'ana riaye tiriri asetore.
1 Abana bane abake, nabarikeire aya, erinde timokora ebibe. Nonya omonto nakora ebibe, ntore n'Omosaberi ase Tata, Yesu Kristo omonyene oboronge: 2 nere nomobwatania as'ebibe biaito; gose tari as'ebibe biaito bioka, korende nebi'ense yonsi. 3 Naiga twamanyire ng'a twamomanyire, onye twabwatire amachiko aye. 4 Ere oyogotcha, namomanyire, nere takobwata amachiko aye, nomorimo, nekeene tikeri ime asare: 5 korende ere oyokobwata ring'ana riaye, as'oyio obwanchani bwa Nyasaye bwaikeranire ime asare ekeene ekeene. Iga twamanyire ng'a iga tore ime asare. 6 Ere oyogoteba ng'a iga aikaransete ime asare, nagwenerete kogenda omonyene buna ere are kogenda. 7 Abanchani, timbarikereti ogochika okoyia, korende koria gwa kare mwarenge nakorokwo korwa omochakano: nakona ogochika gwa kare nakwo ring'ana mwaigwete korwa omochakano. 8 Naende, nabarikeire ogochika okoyia, ring'ana rire ekeene ime asare n'ime yaino, ekiagera omosunte oetire, noria omobaso bw'ekeene otiekire kobara. 9 Ere oyogoteba ng'a igare as'omobaso, nere namogechete oyomwabo, igare as'omosunte ime nonya mbono. 10 Ere oyobwanchete oyomwabo, igaikaransete as'omobaso, nonya ime asare kogochwa tikoiyo. 11 Korende ere oyomogechete oyomwabo igare as'omosunte, naende igakogenda as'omosunte, tamanyeti nonya nas'agochia, ekiagera omosunte omoribirie amaiso. 12 Nabarikeire inwe, abana abake, ekiagera mwabeirwe ebibe biaino, as'engecho y'erieta riaye. 13 Nabarikeire inwe, abatata, ekiagera mwamomanyire ere oyorenge korwa omochakano. Nabarikeire inwe abamura, ekiagera mwamobuire oria omobe. Nabarikeire inwe abana ekiagera mwamomanyire Tata. 14 Nabarikeire inwe abatata, ekiagera mwamomanyire oyorenge korwa omochakano. Nabarikeire inwe abamura, ekiagera more nechinguru, nering'ana ria Nyasaye riaikaransire ime asemore, namwamobuire oria omobe. 15 Timwancha ense, nonya nebinto bireo as'ense. Omonto karanche ense, okomwancha Tata tikoiyo asare. 16 Naki ekereo ime ense, nokorengereria kw'omobere, nokorengereria kw'amaiso, noboenenu bw'obogima obwo, tiborueti ase Tata, korende iga boruete as'ense. 17 Nense igegoeta, nokorengereria kwaye: korende ere oyogokora obwanchani bwa Nyasaye igakobao goika kare nakare. 18 Abana, nekero ki'omoerio: na buna mwaigwete ng'a omobisa o Kristo ochire, nonya mbono ababisa abange ba Kristo batiekire kobao; ekiagera as'ayio twamanyire ng'a nekero ki'omoerio. 19 Abaruete asetore, korende tibarenge asetore; ekiagera onye mbarenge asetore, anga mbaikardnsete amo naintwe: korende barureo erinde baorokigwe ng'a tai bonsi bare asetore. 20 Nainwe mwaakirwe amaguta nere oyore Omochenu namwamanyire onsi. 21 Timbarikereti inwe, ekiagera timokemanyeti ekeene, korende nekiagera mokemanyete, naende nonya noborimo tibori bonde bwonsi bokorua as'ekeene. 22 Ning'o ore omorimo tatiga ere oyogokana ng'a Yesu nere Kristo? Oyio nere ore omobisa o Kristo, okomokana Tata n'Omwana. 23 Ker'oyokomokana Omwana, tari na Tata; ere oyogwatora omwana igare na Tata nere. 24 Nabo aikaranse ime asemore amang'ana aria mwaigwete korwa omochakano. Ring'ana riria mwarigwete korwa omochakano koriraikaranse asemore, nainwe namoikaranse ime as'Omwana, na ime ase Tata. 25 Neye nero eira abaire inwe, obogima bwa kare nakare. 26 Nabarikeire aya as'amang'ana abanto bakorigia kobasiria. 27 Nainwe, amaguta aria mwanyorete asare aikaransire ime asemore, nainwe timori nokorigia omonto okoborokereria; korende buna aria amaguta mwaakirwe abarokererie amang'ana onsi, naende nekeene, tan borimo, na buna abarokererie, mwaikaransire ime asare. 28 Na bono, abana bane abake, ikaransa ime asare; erinde, gakorigia koorokigwa, tobe noboremu, titoba nobosoku as'obosio bwaye as'ogocha kwaye. 29 Komokomanya ng'a ere nomonyene oboronge, manya ng'a oyogokora boronge oiboirwe nere.
1 Rora, obwanchani bore naki atoeire lata, erinde torokwe abana ba Nyasaye: nabo tore. Naki as'engecho eye ense tetomanyeti, ekiagera temomanyeti ere. 2 Abanchani, bono ntore abana ba Nyasaye, korende taraorokigwa buna torache koba. Korende twamanyire ng'a rigoro araoroke, natogwekane nere; naki natomorore buna are. 3 Naende omonto bwonsi oyomosemereti iga, igagwesibia, buna ere are omochenu. 4 Ker'oyogokora ebibe, igagokora ogosaria; ekiagera ebibe nogosaria. 5 Naende mwamanyire ng'a ere igaorogete erinde arusie ebibe biaito; nabibe tibiri ime asare. 6 Ker'oyoikaransete ime asare tagokora ebibe: ker'oyogokora ebibe tamorochi, nonya nkomomanya. 7 Abana bane abake omonto onde bwonsi tabasiria: oyogokora oboronge nare noboronge, buna ere are noboronge: 8 oyogokora ebibe noyo o saitani; naki saitani igakorete ebibe korwa omochakano. As'engecho eye Omwana o Nyasaye akaorokigwa, erinde ayesarie emeremo ya saitani. 9 Ker'omonto oiboretwe na Nyasaye tagokora ebibe, ekiagera oroiboro rwaye roikaransete ime asare; korende takonyara gokora ebibe ekiagera oiboirwe korwa ase Nyasaye. 10 Naboigo abana ba Nyasaye bare maiso marore, nabana ba saitani: omonto bwonsi otari gokora boronge tarueti ase Nyasaye, nonya noyotancheti oyomwabo. 11 Naki aya naro amang'ana twaigwete korwa omochakano, twanchane intwe as'intwe; 12 tari buna Kain arenge bw'oria Omobe, akamoita oyomwabo. Nere igamoitete aseki? Ekiagera ogokora kwaye kwarenge okobe, nokw'oyomwabo kwarenge okwa boronge. 13 Timokumia, baminto, ense kerabageche. 14 Intwe twamanyire ng'a twaetire korwa amakweri goika as'obogima ekiagera twabanchire abaminto. Oyotancheti, igaikaransete as'amakweri. 15 Oyomogechete oyomwabo nomoiti: namwamanyire omoiti tari nobogima bwa kare nakare ime asare. 16 Iga twabomanyire obwanchani, ekiagera obekire obogima bwaye as'ense asetore: naintwe ntogwenerete kobeka obogima bwaito inse as'abaminto. 17 Korende oyore nebinto bi'ense eye, amorore oyomwabo oyoremeirwe, atange amabera aye komoikera, inee, naki obwanchani bwa Nyasaye borabe ime asare oyio? 18 Abana bane abake, titwancha ase ring'ana gose as'oromeme, korende as'ogokora nas'ekeene. 19 Iga natomanye ng'a iga tore ab'ekeene, nas'obosio bwaye natoremie chinkoro chiaito: 20 ase ring'ana rinde rionsi chinkoro chiaito chigotogainbia; ekiagera Nyasaye nomonene kobua chinkoro chiaito, nere igayamanyete onsi. 21 Abanchani, chinkoro chiaito chitatogambeti, ntore noboremu ase Nyasaye; 22 naende rinde rionsi togosaba, iga tokorinyora asare; ekiagera toyabwatete amachiko aye, naende tokoyakora ayamogwenerete as'amaiso aye. 23 Korende oko nakwo ogochika kwaye, torianche erieta ri'Omwana oye Yesu Kristo, nagwanchana, buna atoete ogochika. 24 Naende ere oyokoyabwata amachiko aye igagoikaransa ime asare, nere ime asare. Naende iga twamanyire ng'a iga aikaransete ime asetore, as'Omoika atoeire.
1 Abanchani, timwancha ker'omoika, korende yeteme emeika, onye eruete ase Nyasaye: ekiagera ababani b'oborimo abange baorokire as'ense. 2 Iga mwayomanyire Omoika o Nyasaye: ker'omoika ogoteba ng'a Yesu Kristo ochire as'omobere orure ase Nyasaye: 3 naende ker'omoika otagoteba ng'a Yesu Kristo ochire as'omobere, torueti ase Nyasaye. Naende oyo noro omoika omobisa o Kristo buna mwaigure ng'a ngochare; na bono otiekire kobao as'ense ime. 4 Inwe, abana bane abake, mwarure ase Nyasaye; naende mwababuire: ekiagera oyore ime asemore ere nomonene kobua ere oyore as'ense. 5 Abwo nab'ense: as'ayio iga bagokwana ay'ense, ense ebaigwera. 6 Intwe iga tore aba Nyasaye: ere oyomanyete Nyasaye igagotoigwera, ere oyotari oyo Nyasaye tagotoigwa. Iga twayomanyire Omoika bw'ekeene, nomoika bw'ogosira. 7 Abanchani, twanchane: ekiagera obwanchani nobwa Nyasaye; na ker'oyobwanchire oiboirwe na Nyasaye, nere omomanyire Nyasaye. 8 Oyotancheti, tamomanyeti Nyasaye; naki Nyasaye nobwanchani. 9 Iga obwanchani bwa Nyasaye bwarorekanire asetore, ekiagera Nyasaye omotomire Omwana oye omomoima as'ense, tonyore obogima asare. 10 Obo nabwo obwanchani, korende tai intwe gose twamwanchire Nyasaye, korende nere otwanchire intwe, akamotoma Omwana oye koba omobwatania as'ebibe biaito. 11 Abanchani, onye Nyasaye otwanchete iga, ntogwenerete naintwe gwanchana intwe as'intwe. 12 Tari omonto omororire Nyasaye kero kende gionsi. Gatoranchane, Nyasaye igaikaransete ime asetore, nobwanchani bwaye bwaikeranigwe ime asetore. 13 Iga twamanyire ng'a iga toikaransete ime asare, nere ime asetore, ekiagera otoeire as'Omoika oye. 14 Naintwe twarorire, nagoteba ng'a Tata omotomire Omwana koba Omokonyi bw'ense. 15 Ker'oyogoteba ng'a Yesu n'Omwana o Nyasaye, Nyasaye igaikaransete ime asare nere ase Nyasaye. 16 Naintwe twabomanyire obwanchani obware nabwo Nyasaye ime asetore nakobwancha. Nyasaye nobwanchani, nere oyogoikaransa as'obwanchani, igagoikaransa ime ase Nyasaye, na Nyasaye ime asare. 17 Iga obwanchani bwaikeranigwe asetore erinde tobe noboremu ase rituko ri'ekina; ekiagera, buna ere are, naboigo tore naintwe as'ense ime. 18 Obwanchani tibori nokoiroka: korende obwanchani oboikeranu iga bogotuguta okoiroka isiko, ekiagera okoiroka nkore nokoakwa; nomonyene okoiroka taikeraniri as'obwanchani. 19 Intwe twanchire ekiagera ere ritang'ani natwanchete intwe. 20 Omonto karabore, Namwanchire Nyasaye, nere namogechete oyomwabo, nomorimo: naki oyotamwancheti oyomwabo ere oyo aroche, takonyara komwancha Nyasaye ekiagera tamorochi. 21 Nogochika oko twaeirwe nere, ere oyobwanchete Nyasaye, anche noyomwabo boigo.
1 Ker'omonto oyoranche ng'a Yesu nere Kristo, oiboirwe na Nyasaye: na ker'oyoramwanche omonyene okomoibora omwanchire noyo oiboirwe nere. 2 Ase ring'ana eri twamanyire ng'a twabanchire abana ba Nyasaye, gatoramwanche Nyasaye, nakobwata amachiko aye. 3 Naki obwo nabwo obwanchani bwa Nyasaye, ng'a tonyare kobwata amachiko aye: nayio amachiko aye tari amarito. 4 Naki ker'ekiaiboirwe na Nyasaye, iga gekobua ense: nokwo okobua gokobua ense, nokwegena gwaito. 5 Omonyene okobua ense ning'o, tatiga ere oyobwanchire ng'a Yesu n'Omwana o Nyasaye? 6 Oyo nere ochire as'amache nas'amanyinga, Yesu Kristo; tari as'amache oka, korende nas'amache namanyinga. 7 N'Omoika noro obaire kirori ekiagera Omoika noro ekeene. 8 Naki batato aba babaire kirori, Omoika, namache, namanyinga: nabatato aba iga babwataine as'amang'ana ayamo. 9 Gatorabwate oborori bwa mwanyabanto, noborori bwa Nyasaye nobonene kobua: ekiagera oborori bwa Nyasaye nobo, ng'a etiekire koba kirori as'Omwana oye. 10 Ere oyogwancha asare Omwana o Nyasaye nere ore noborori ime yaye: ere oyotancheti Nyasaye otiekire komokora omorimo; ekiagera atancheti boria oborori bwarorirwe na Nyasaye as'Omwana oye. 11 Nabwo oborori, ng'a Nyasaye otoeire obogima bwa kare nakare, nobogima obwo iga bore as'Omwanaoye. 12 Oyore nere Omwana, nare nobogima; oyotari nere Omwana o Nyasaye tari nobogima. 13 Nabarikeire amang'ana aya, erinde momanye ng'a more nobogima bwa kare nakare, inwe abwo mwarianchire erieta ri'Omwana o Nyasaye. 14 Nobo nabwo oboremu tore nabwo asare, erinde, gatorasabe egento buna anchete, igagotoigwa. 15 Naende gatoramanye ng'a igagotoigwa, eki togosaba gionsi, twamanyire ng'a intwe ntore na keria twasaba. 16 Omonto karamorore oyomwabo ogokora ekebe, getari ki'amakweri, nasabe, nere Nyasaye namoe obogima as'engecho y'abwo bagokora ebibe bitari bi'amakweri. Nkere ekebe kia amakweri: tintebeti ng'a asabe as'engecho y'ekio. 17 Kera eritari eria boronge nebibe: nkere ekebe getari ki'amakweri. 18 Twamanyire ng'a ker'omonto oiboirwe na Nyasaye takomocha; korende ere oyoiboirwe na Nyasaye igakwerenda, noria omobe takomokuna. 19 Twamanyire intwe igatore aba Nyasaye, ense yonsi igeifearansete as'oria omobe. 20 Twamanyire ng'a Omwana o Nyasaye otiekire gocha, nere otoeire obong'aini, erinde tomomanye ere oyore bw'ekeene, naintwe iga tore ime asare ere oyo bw'ekeene, ime as'Omwana oye Yesu Kristo. Oyio nere ore Nyasaye bw'ekeene naende obogima bwa kare nakare. 21 Abana bane abake, erende emioyo yaino ase chisanamu.
1 Omogaka as'omokungu omochore, nabana baye nyanchete as'ekeene: korende tari inche bweka, korende baria bonsi bakemanyete keria ekeene; 2 as'engecho ya keria ekeene geikaransete ime asetore, nakerokio nakebe amo naintwe goika kare nakare, 3 Obuya, namabera, nomorembe bikorua ase Nyasaye Tata nas'Omonene oito Yesu Kristo bibe amo naintwe as'ekeene nas'obwanchani. 4 Nagokire mono ekiagera nabarorire abande as'abana bao bakogenda as'ekeene, buna twanyorete ogochika ase Tata. 5 Na bono omokungu, nagosabire, tari ng'a nakorikeire ogochika okoyia, korende koria twarenge nakorokwo korwa omochakano, ng'a twanchane. 6 Nobwo nabwo obwanchani, togende toyatunyane amachiko aye. Oko nakwo koria ogochika buna mwaigwete korwa omochakano ng'a mogende as'okwo. 7 Naki abang'ainereria abange basoire as'ense, abatari koorokia ng'a Yesu Kristo ngochare as'omobere. Oyio nere oria omong'ainereria naende omobisa o Kristo. 8 Erigererie emioyo yaino timoyasiria ayatwakorire, korende monyore eng'eria eng'ikeranu. 9 Ker'oyokogenderera atang'ane, ataikaranseti as'okworokereria kwa Kristo, tari na Nyasaye: ere oyoikaransete as'okworokereria kwa Kristo, omonto oyio nare na Tata n'Omwana nere. 10 Omonto karache asemore, nere atareteti okworokereria oko, timomoroisia as'enyomba yaino, gose timomokwania: 11 naki oyoramoe ogokwania obwatanire nemeremo yaye emebe. 12 Ekiagera ninde namang'ana amange aya nkobarikera, tindigeti koyarika as'ekaratasi newino: korende ninsemeretie gocha asemore gokwana nainwe obosio as'obosio, erinde omogoko oino oikeranigwe. 13 Abana b'omosubati omino ore omochore, bagokwanirie.
1 Omogaka ase Gaio omwanchani oyonyanchete as'ekeene. 2 Omwanchani, nasabire ogenderere buya as'amang'ana onsi, naende koba nobogima obuya, buna omoyo oo ore buya. 3 Naki nagogete mono ekero bachete abaminto nagoteba ekeene kiao, buna okogenda as'ekeene. 4 Tindi nomogoko ore omonene kobua oyo, koigwa ng'a abana bane bakogenda as'ekeene. 5 Omwanchani, gwakorire emeremo y'ekeene ase ker'emeremo kwabakoreire abwo abare abaminto nabageni; 6 abarenge kirori as'obwanchani bwao as'obosio bw'ekanisa: nokore buya korabakobe as'erogendo rwao buna egwenerete ase Nyasaye. 7 Ekiagera as'engecho y'Erieta erio, bagasoka, tibanyoreti egento as'Ebisaku. 8 Nabo etogwenerete intwe kobaroisia abanto buna abwo, erinde tobe abakori emeremo amo nekeene. 9 Narigete ring'ana as'ekanisa, korende Diotrefe oyobwanchire koba oyo bwe ritang'ani gati asebare, tatwancheti. 10 As'ayio kondache, nimoinyorie ogokora kwaye agokora, agokwana obebe igoro asetore amang'ana amabe: gose taisaniri nayio, ere omonyene tari kobaroisia abaminto, nabaria bakorigia kobaroisia abatanga, nakobarusia as'ekanisa. 11 Omwanchani, tibwega obobe, korende ega ekere ekiya. Ere oyogokora amaya noyo Nyasaye: ere oyogokora amabe tamorochi Nyasaye. 12 Demetrio bwatoirwe nabanto bonsi, naende nakeria ekeene ekenyene. Naintwe intwensi twarorire, naye kwamanyire ng'a oborori bwaito nobw'ekeene. 13 Narenge namang'ana amange ngokorikera, korende tinyancheti gokorikera as'ewino nekaramu: 14 korende ninsemeretie gokorora ang'e nagokwana naye obosio as'obosio. Omorembe obe asore. Abasani baito bagokwanirie. Bakwanie abasani, ker'omonto as'erieta riaye.
1 Yuda, omosomba o Yesu Kristo, oyomwabo Yakobo, as'abwo banchirwe ase Nyasaye Tata, barendire as'engecho ya Yesu Kristo, nyuma y'okorangerigwa. 2 Amabera nomorembe nobwanchani momenterwe. 3 Abanchani, ekero narenge gokora omokia mono kobarikera amang'ana ogotoreka gwaito intwe twensi, nkarora ng'a nengwenerete mbarikere, mborokererie moamereranie nomokia mono as'okwegena gwaetwe abachenu ara rimo rioka. 4 Naki mbare abanto besoine ase bobisi, abanto barikeretwe kare ekina eke, abanto batari ba boronge bakoonelmra obuya bwa Nyasaye oito bobe okorengereria kw'obotomani, nabarabwo bamokana Omonene oito ore bweka, n'Omonene oito Yesu Kristo. 5 Bono nanchire kobainyoria, nonva mwatiekire komanya aya onsi, buna Omonene nyuma y'okobakonya abanto as'ense ya Misiri, nabasiretie abatamwegenete. 6 Namalaika batarendete obonene bwabo, bakabotiga obomenyo bwabo, obabekire as'ekina keria ekenene as'ebisibo bia kare nakare inse as'omosunte. 7 Buna Sodomu na Gomora, nemechie yaetanaine, batunyanete obotomani as'engecho eyemo naba, bakagenda batunyane amang'ana ay'omobere atari aya boronge, yabekirwe koba ekiorokererio, bakonyora ekina ki'omorero o kare nakare. 8 Nabo naba, as'okorota kwabo. babeka omobere eubi, banga okogamberwa, barama obonene. 9 Korende Mikael, rilaika rinene, ekero aamereranetie na saitani nakwomana nere as'engecho y'omobere o Musa, tanyara komosoera as'amang'ana amabe, korende agateba, Omonene agokanie. 10 Korende abanto aba igabakorama amang'ana ayabatamanyeti: namang'ana bamanyete as'oboronge besaria naro buna ching'iti chitari nobong'aini. 11 Obobe nobwabo! naki bagendete as'enchera ya Kain, na gwetuguta as'okomocha kwa Baalam, as'engecho y'eng'eria, nabarabwo basirire as'okomocha kwa Kora. 12 Abanto aba nebitare ebinyene emechando as'emeyega yaino y'obwanchani, abagbkora emeyega amo nainwe, nabo nabarisia abanyene bakwerisia, batari koiroka, namare atari namache, akoirwa nomwaga; nemete yaarorokire amato etari namatunda, yakure eria kabere, nagosimorwa kegima; 13 nemermdo y'enyancha etagotangeka, ekoorokia obosoku bwabo abanyene buna riuro, neching'enang'eni chigosira, echio omosunte noro emonga yabo chiabekeirwe kare nakare. 14 Na Enok, o gatano nakabere nyuma y'Adamu, nakwanete amang'ana ay'obobani igoro y'abwo, ogoteba, Rigereria Omonene nache nechilifu ikomi chi'abachenu baye, 15 erinde abanachere abanto bonsi ekina, nakobanachera bonsi abatari nechingecho chia Nyasaye, as'engecho y'emeremo yabo yonsi baregokora as'ogotamosika Nyasaye, nas'engecho y'amang'ana amakong'u onsi abwo abanyene ebibe batamosigeti Nyasaye bagokwana igoro yaye. 16 Abanto aba nabanyene okwemurungania, nabanyene okwerera, bakogenda as'okorengereria kwabo, nemenwa yabo ekwana amang'ana ay'oboenenu amanene mono, banchereria abanto abanyene enibo as'engecho y'okwegwenera. 17 Korende inwe, abanchani, yainyore amang'ana akwanetwe kare nabatomwa b'Omonene oito Yesu Kristo, 18 buna babatebetie as'ekero ki'omoerio, Nababeo abanto abanyene esekererio, bagotunya okorengereria kwabo abanyene. 19 Abanto abwo nabwo bakoreta ogwatananeka, abanto b'ense eye yoka, batari n'Omoika. 20 Korende inwe, abanchani, mweagache as'okwegena kwaino kore ogochenu, nagosaba as'Omoika Omochenu, 21 erende as'obwanchani bwa Nyasaye, mokoganya amabera a Omonene oito Yesu Kristo, goika monyore obogima bwa kare nakare. 22 Babere abande abare nogotiting'ara; 23 Korende abande bakonye as'okobataboria korwa omorero; abande mobabere nokoiroka; mokoyegechia eria eanga ebekire riko nomobere. 24 Asare ere oranyare kobarenda inwe timogochwa, nakobatenenia as'obosio bw'obonene bwaye motari nebimoa as'omogoko omonene, 25 ere ore Nyasaye bweka Omokonyi oito; asare ere obonene, nobonguru, nokobua, nechinguru ase Yesu Kristo korwa kare, na bono, na goika kare nakare. Amin.
1 Okomanoka kwa Yesu Kristo aetwe na Nyasaye, aborokie abasomba baye amang'ana agwenerete goikeranigwa bwango: agatoma as'okoboko kwe rilaika riaye komworokia omosomba oye Yohana; 2 oyorenge kirori ase ring'ana ria Nyasaye nokogana kwa Yesu Kristo, amang'ana onsi ayaroche. 3 Nare negesio ere oyogosoma, nabarabwo bakoyaigwa amang'ana ay'obobani obo, nakoyakora ayarikireo: ekiagera ekero ng'ang'e kere. 4 Yohana ase chikanisa isano naibere chire as'Asia: Obuya bobe asemore nomorembe okorua asare ere oyoreo, noyorengeo, naende oyorache kobao; nakorwa as'emeika etano nebere ere as'obosio bw'ekerogo kiaye ki'obonene; 5 na korwa ase Yesu Kristo, oyore omorori omwegeni, omoiborwa bwe ritang'ani bw'abakure, nomogambi bw'abaruoti b'ense. Asare ere oyotwanchete nagotosibia ebibe biaito as'amanyinga aye; 6 naende agatokora koba oboruoti, nabakuani ase Nyasaye, Is'oye; nobonene nobonguru iga bore asare ere goika kare nakare. Amin. 7 Rigereria ngochare namare; na ker'eriso narimorore, nabwo bamobetete; nebisaku bionsi bi'ense nabirere as'engecho yaye. Nabo, Amin. 8 Inche n'Alifa n'Omega, omochakano nomoerio, otebire Omonene Nyasaye, oyoreo, oyorengeo, noyorache kobao, Omobui. 9 Inche Yohana, omomura omino nomobwatani amo nainwe as'emechando noboruoti noboremereria bore ime ase Yesu Kristo, narenge as'egesinka gekorokwa Patimo, as'engecho ye ring'ana ria Nyasaye nas'okogana kwa Yesu. 10 Narenge as'Omoika rituko ri'Omonene, nkaigwa eriogi rinene nyuma yane, buna eriogi ri'egetureri, 11 rikobora, Inche n'Alifa n'Omega, oyo bw'omochakano, noyo bw'omoerio. Ebi kwarora birike as'ebuku, oyetome ase chikanisa isano naibere chire as'Asia; as'Efeso, na Sumurina, na Perigamo, na Thuatera,na Saridi, na Filadelifia, na Laodikia. 12 Ngeonchora ndirore riria eriogi rigokwana nainche. Ngachia gweonchora, nkarora ebibekerero bie chitaya bitano nabibere bi'ethahabu; 13 gati gati ase biria ebibekerero nkarora omonto omogwekano bw'Omwana-o-mwanyabanto, bweboeti eanga eigete amagoro, nagosibwa norokini rw'ethahabu egekuba. 14 Omotwe oye netukia yaye iga yarenge endabu buna amarionya amarabu, buna amagena embura; namaiso aye buna ogwoka kw'omorero; 15 namagoro aye buna etai yatinyigwe mono buna iga yasibigwe ase eriko ri'omorero; neriogi riaye buna eriogi ri'amache amange, 16 Nere igarenge neching'enang'eni isano naibere as'okoboko kwaye gw'okorio: nomoro ore omwoge chinsemo ibere, okorua as'omonwa oye: nobosio bwaye buna amasase erioba akobara ase chinguru chiaye. 17 Ngachia komorora nkagwa as'amagoro aye buna omonto okure. Akabeka okoboko kwaye gw'okorio igoro asende, agantebia, Toiroka: Inche noyo bw'omochakano noyo bw'omoerio, 18 oyore Moyo; nainche konya nakure, narigereria igande moyo goika kare nakare. Nainche ninde nebigorero bi'amakweri nebie chimbera. 19 Nabo, yarike amang'ana ayakwaroche, nayareo, naro arache koba nyuma as'ayio. 20 Obobisi bwe ching'enang'eni chiria isano naibere kwaroche as'okoboko kwane gw'okorio, nabiria ebibekerero bie chitaya chi'ethahabu bitano nabibere. chiria ching'enang'eni isano naibere namalaika a chiria chikanisa isano naibere, nabiria ebibekerero bitano nabibere kwaroche nechikanisa isano naibere.
1 Ase rilaika ri'ekanisa ere as'Efeso rika: Ayagokwana ere oyochibwatete ching'enang'eni isano naibere as'okoboko kwaye gw'okorio, oyokogenda gati gati ase biria ebibekerero bitano nabibere bi'ethahabu: 2 namanyire ogokora kwao, emechando yao, noboremereria bwao, nekiagera otari konyara kobwatana nabanto ababe, naende okabatema baria bakweroka abatomwa, nabarabwo taibo, okabarora ng'a nab'oborimo; 3 naende okaremereria, nas'engecho yane, naende toroseti. 4 Korende ninde nering'ana eri igoro asore, ekiagera gwatigire obwanchani bwao bwe ritang'ani. 5 Nabo, inyora ase kwagwerete, oonchoke, okore ogokora kwao kwe ritang'ani. Korende, otakoreti bo, ninchiche asore bwango, nindusie ekebekerero kiao aas'aye, otaonchogeti. 6 Korende nore nering'ana eri buna kwagechire ogokora kw'Abanikolaiti, okwo ngechete nainche. 7 Ere oyore namato, aigwe ring'ana eri Omoika ogochitchia chikanisa. Ere oyorabue, nimoe koria amatunda ay'omote bw'obogima ore gati gati as'Omogondo o Nyasaye. 8 Nase rilaika ri'ekanisa ere ase Sumurina rika: Ayagokwana ere oyore bw'omochakano nomoerio, orenge konya okure, akaba moyo. 9 Namanyire ogochandwa kwao nobotaka bwao (korende nore nobonda), nokoramwa kwabo bagoteba ng'a n'Abayahudi, nabarabwo taibo, nesunagogi ya Saitani, 10 Toiroka ayio arache gogochanda bwango: rigereria, omosoeri nabarute abande asemore echela ime monyare gotemwa; nainwe namobe nogochandwa amatuko ikomi. Obe omwegeni goika ogokwa, nainche ninkoe egutwa y'obogima. 11 Oyore namato aigwe ring'ana eri Omoika ogochitebia chikanisa. Ere oyorabue takonyorekana nobororo bw'amakweri akabere. 12 Nase rilaika ri'ekanisa ere Perigamo, rika: Ayagoteba ere oyore nomoro omwoge chinsemo ibere: 13 namanyire aas'oikaransete, nao as'ekerogo ki'obonene bwa Saitani: naye noribwatete mono erieta riane, naye togokaneti okwegena kwane, nonya nas'amatuko Antipa omorori one, omwegeni one, oyoitetwe egati yaino, agwo aas'aikaransete Saitani. 14 Korende ninde namang'ana amake igoro asore, ekiagera nore nabanto aria babwatete okworokereria kwa Balaam, ere oyomworogetie Balaki abeke okogochwa as'obosio bw'abana b'Isiraeli, as'okobiria ebinto biaruetwe ebing'wanso ase chisanamu, nagotomana. 15 Naboigo aye naye nore nabanto bakobwatete okworokereria kw'Abanikolaiti, okwo ngechete. 16 Onchoka; otaonchogeti ninchiche asore bwango, ninkore esegi igoro as'abwo nomoro bw'omonwa one. 17 Ere oyore namato aigwe ring'ana eri Omoika ogochitebia chikanisa. Ere oyorabue nimoe koria ensemo ya maana abisire, nainche nimoe rigena rirabu, n'igoro ase rigena erio ririkwe erieta riyia, erieta ritamanywe nomonto tatiga ere oyorieirwe. 18 Nase rilaika ri'ekanisa ere ase Thuatera rika; Ayagokwana Omwana o Nyasaye, ere oyore namaiso buna ogwoka kw'omorero, namagoro aye omogwekano bw'etai yatinyigwe mono. 19 Namanyire ogokora kwao, nobwanchani bwao nobosomba bwao nokwegena kwao noboremereria bwao: naende ogokora kwao kw'omoerio, kwabuire koria kwe ritang'ani, 20 Korende ninde namang'ana aya igoro asore, ekiagera kwamotigire oria omokungu Yezebel, ere oyokweroka omobani; nere iga akworokereria abasomba bane nakobasiria, banyare gotomana, nakoria ebinto biarurue ebingwanso ase chisanamu. 21 Nainche namoeire ribaga anyare goonchoka; nere tarigeti goonchoka atige obotomani bwaye. 22 Rigereria, nimotugute as'oborere, nabwo batomanire amo nere banyore ogochandwa okonene, bataonchogeti ogokora kwabo. 23 Nainche nimbaite abana baye namakweri. Nechikanisa chionsi nachimanye ng'a inche ninyare komana ebirengererio bi'emioyo ime: ninche nimoe ker'oyomo oino koreng'ana nogokora kwaino. 24 Korende nabatebirie inwe, abande bare ase Thuatera, abwo bonsi batari nokworokereria oko, batabomanyeti obobisi bwa Saitani, buna bagoteba; Tinkobeka igoro asemore egurube ende. 25 Korende eki more nakio kebwate, goika nchiche. 26 Nere oyorabue nagokorenda ogokora kwane goika omoerio, nimoe okobua igoro as'ebisaku: 27 nere nabagambie nenyimbo y'ekioma, buna ebinto bi'omokori chinyongo bigwatwa ebisamunye; buna nanyorete ase lata one: 28 nainche nimoe eng'enang'eni ya mambia. 29 Ere oyore namato aigwe ring'ana eri Omoika ogochitchia chikanisa.
1 Nase rilaika ri'ekanisa ere ase Saridi rika: Ayagokwana ere oyore nemeika etano nebere ya Nyasaye, nachiria ching'enang'eni isano naibere: Namanyire ogokora kwao, ekiagera nore nerieta ng'a'igore moyo, naye gwakure. 2 Obe omorendi, oyakore amang'ana ayatigarete, ayare ang'e gokwa: naki tindochi ogokora kwao gwaikeranire as'obosio bwa Nyasaye, 3 Nabo inyora buna kwanyorete, naende buna kwaigwete; yabwate ayio nakoonchoka. Korende otarendeti ninchiche asore buna omoibi, naye tokomanya ensa ngocha asore. 4 Korende nore namarieta amake ase Saridi, abanto batachibegeti chianga chiabo eubi: nabarabwo nabagende amo nainche ase chianga chindabu, ekiagera bagweneire. 5 Ere oyorabue nabekwe chianga chindabu; nainche tinkoritinyia erieta riaye korwa as'ebuku y'obogima nonya ng'ake, nainche nindiatore erieta riaye as'obosio bwa Tata one, nas'obosio bw'amalaika aye. 6 Ere oyore namato aigwe ring'ana eri Omoika ogochitebia chikanisa, 7 Nase rilaika ri'ekanisa ere ase Filadelifia rika; Ayagokwana ere oyore omochenu, ore bw'ekeene, oyore nekeigorero gia Daudi, oyokoigora naende onde tari ogosieka, nere ogosieka gose onde tari okoigora. 8 Namanyire ogokora kwao. (Rora, nakoeire egesieri keigoire as'obosio bwao, gose onde tari oranyare gosieka), ekiagera nore nechinguru chinke, naye kwarirendire ring'ana riane, gose torikaneti erieta riane. 9 Rora, nakoeire abare b'esunagogi ya Saitani, bagoteba ng'a barabwo n'Abayahudi, nabarabwo taibo, korende iga bagoteba oborimo. Rora, nimbakore bache batung'ame amagoro ao, nakomanya ng'a ningwanchete. 10 Ekiagera kwaribwatire ring'ana ri'oboremereria bwane, nainche ninche ninkorende orue as'ensa y'ogotemwa, eyere ang'e gochera ense yonsi, kobatema abaikaransete igoro as'ense. 11 Rigereria, ninchiche bwango: bwata mono ekiore nakio, tacha omonto ayeire egutwa yao. 12 Ere oyorabue, nimokore esiro ase hekalu ya Nyasaye one, nere tagosoka koruao nonya ng'ake: nainche nindike igoro yaye erieta ria Nyasaye one, nerieta ri'omochie o Nyasaye one, Yerusalemu ore omoyia, ogoika korwa igoro ase Nyasaye one, nerieta riane omonyene, rire riyia. 13 Ere oyore namato aigwe ring'ana eri Omoika ogochitebia chikanisa. 14 Nase rilaika ri'ekanisa ere ase Laodikia rika; Ayagoteba ere oyore Amin, omorori oyore omwegeni, omochakano bw'ebitongwa bia Nyasaye. 15 Namanyire ogokora kwao, ng'a tori omokendu gose tori 'morero; anga mbuya onye nkwaba omokendu gose 'morero. 16 Nabo, ekiagera ore igatwa, gose tori omokendu gose omorero, ningotwe buna amate korwa as'omonwa one. 17 Ekiagera ogoteba, Inche nomonda, netenenkirie, tindigeti 'gento; naye tomanyeti ng'a igore omonto bw'emechando, noyogochandeka, nomotaka, nomouko, nagetirianda: 18 ninkorigetie ogore asende ethahabu yasibigwe as'omorero, onyare koba omonda; nechianga chindabu onyare kweboyia obosoku bw'egetirianda kiao tibororekana; neriogo ri'amaiso okweaka amaiso ao, onyare korora. 19 Inche iga nkobakania bonsi abanyanchete, nakobaaka: nabo obe nomokia, nakoonchoka. 20 Rigereria, natenenire egesieri gotura; omonto karaigwe eriogi riane nakoigora egesieri, ninsoe asare, nindagere amo nere, nere amo nainche. 21 Ere oyorabue, nimoe goikaransa amo nainche as'ekerogo kiane ki'obonene, buna inche nabuete ngaikaransa amo na lata one as'ekerogo kiaye ki'obonene, 22 Ere oyore namato aigwe ring'ana eri Omoika ogochitebia chikanisa.
1 Erio nyuma as'aya nkarora, rora egesieri gekaigoka igoro, neriogi rie ritang'ani naigwete buna eriogi ri'egetureri, rigokwana nainche, rikobora, Rina goika aria, nainche ninkworokie amang'ana agwenerete koba korwa nyuma as'ayio. 2 Erio kegima narenge as'Omoika; rora, ekerogo ki'obonene kiabekirwe igoro, n'igoro ase keria ekerogo naikaransete oyomo; 3 nere oyoikaransete igarenge omogwekano buna rigena ria yasipi na saridio, nomokubinyongo bw'embura ogogeetanana ekerogo keria ki'obonene, buna zumaridi. 4 Nebirogo emerongo ebere nabine, bigeetanaine ekerogo ki'obonene: n'igoro ase biria ebirogo, nkarora abagaka emerongo ebere nabane, baikaransete, babekire chianga chindabu; n'igoro as'emetwe yabo barenge nechigutwa chi'ethahabu. 5 Nase keria ekerogo ki'obonene gokorua okomesa nokogukura gw'enkoba namariogi. Nechitaya isano naibere chi'omorero chigwoka as'obosio bw'ekerogo keria ki'obonene, nero Emeika etano nebere ya Nyasaye. 6 Nas'obosio bwa keria ekerogo ki'obonene, omogwekano bw'enyancha y'ekerore ekerabu se, buna kirusitallo; na gati gati keria ekerogo ki'obonene, nechinsemo chionsi chie keria ekerogo, ching'iti inye, chichire amaiso as'obosio na nyuma. 7 Neng'iti ye ritang'ani iga yarenge omogwekano bw'esibwori, neng'iti ya kabere omogwekano bw'emori, neng'iti ya gatatu enyene obosio buna obosio bw'omwana o mwanyabanto, neng'iti ya kane omogwekano bw'ensoti ekoiruruka. 8 Nechi ching'iti inye chire moyo, ker'eyemo iga yarenge nechimbaba isano nemo, chinsemo chionsi, na ime iga chichire namaiso: nachirochio tichigotimoka 'mobaso na 'botuko, iga chigoteba, Omochenu, omochenu, omochenu, n'Omonene Nyasaye Omobui, oyorenge aroro, nere nao are, nere oyorache kobao. 9 Nechi ching'iti chire moyo, chiramoe ere oikaransete igoro as'ekerogo ki'obonene ere ore moyo goika kare nakare, obonene nogosika, nokobaka, 10 erio aba abagaka emerongo ebere nabane nabagwe as'obosio bwaye oyoikaransete as'ekerogo ki'obonene, nabarabwo nabamosasime ere oyore moyo goika kare nakare, nabarabwo nabatugute chi gut wa chiabo as'obosio bw'ekeiogo ki'obonene, bagoteba, 11 Kwagweneire, Omonene, Nyaiaye oito, kobonyora obonene nogosika nokobua: naki aye naye kwabitongete ebinto bionsi; nekiagera as'obwanchani bwao iga biabete aroro, bigatongwa.
1 Nkarora as'okoboko gw'okorio kw'oyoikaransete igoro as'ekerogo ki'obonene ebuku erikire ime na nyuma, yabekirwe chimanyererio bitano nabibere. 2 Nkarora rilaika omonyene chinguru okorandia negeturi ekenene, Ning'o ogwenerete koyeigora ebuku nagosibora ebimanyererio biaye? 3 Tarenge monto igoro, nonya igoro as'ense, nonya inse as'ense, oyonyarete koyeigora ebuku gose koyerigereria. 4 Nkarera mono ekiagera atarorekanete omonto ogwenerete koyeigora ebuku na koyesoma, gose koyerigereria. 5 noyomo bwa baria abagaka agantebia, Torera; rora, Esibwori ere as'egesaku kia Yuda, ritina ria Daudi, ere onyorire okobua gw'okoigora ebuku nakobisansora biria chimanyererio bitano nabibere. 6 Nkarora, gati gati y'ekerogo ki'obonene neve ching'iti inye echire moyo, na gati gati ya baria abagaka, Emanwa y'Eng'ondi eteneine, igere buna yaitirwe, enyene chingunchara isano naibere, namaiso atano nabere, eichire n'Emeika etano nebere ya Nyasaye, yatomirwe as'ense yonsi. 7 Agacha, akayebogoria ebuku as'okoboko gw'okorio kwaye oyoikaransete igoro as'ekerogo keria ki'obonene. 8 Goika ochia koyebogoria ebuku eria, ching'iti inye chire moyo nabaria abagaka emerongo ebere nabane bakagwa as'obosio bw'Emanwa y'Eng'ondi, ker'oyomo obo nare nobokano, nchitabo bi'ethahabu, bichire amanukato, ekiagera naro nogosaba kw'Abachenu. 9 Nabarabwo bagotera ogotera okoyia bagoteba, Kwagweneire aye koyebogoria ebuku nakobigora chimanyererio biaye, naki ngwaitetwe, okamogorera Nyasaye as'amanyinga ao abanto ba ker'eamate, nemenwa, nabanio, nchisaku. 10 okabakora koba oboruoti nabakuani ase Nyasaye oito: nabarabwo bakogamba igoro as'ense. 11 Nkarora, nkaigwa eriogi ri'amalaika abange chinsemo chionsi chia keria ekerogo ki'obonene, nachiria ching'iti chire moyo, nabaria abagakaj nokobara kwabo, chilifu ikomi ara chilifu ikomi, ne chilifu ara chilifu, 12 bagoteba as'eriogi rinene, Yagweneire Emanwa y'Eng'ondi eyaitetwe konyora okobua, nobonda, nobong'aini, nechinguru, nogosikwa, nobonene, nogosesenigwa. 13 Na ker'egetongire ekere igoro, n'igoro as'ense, n'inse as'ense, n'igoro as'enyancha, nebinto bionsi bire ime aroro, nkabigwa, bigoteba, Egesio nogosika nobonene nokobua nas'ere oyoikaransete igoro as'ekerogo ki'obonene, nas'Emanwa y'Eng'ondi goika kare nakare, 14 Na chiria ching'iti inye chire moyo chikabora, Amin. Nabaria abagaka emerongo ebere nabane bakagwa bakamotung'amera ere ore moyo kare nakare.
1 Nkarora agwo ekero Emanwa y'Eng'ondi egachia koigora ekemo ase biria ebimanyererio, nkaigwa eyemo ase chiria ching'iti chire moyo ekobora, buna eriogi ri'okogukura, Nchuo, orore. 2 Nkarora, naende rora, ebarasi endabu, nere oyoyerinete narenge nobota; akaegwa egutwa: agasoka, akabua naende anyare kobua. 3 Agachia koigora ekemanyererio gia kabere, nkayeigwa eng'iti ya kabere ekobora, Inchuo orore, 4 egasoka ebarasi ende embariri mono, nere oyoyerinete naetwe koyorusia omorembe as'ense, erinde baitane barabwo ase barabwo: ekaegwa omoro omonene. 5 Agachia koigora ekemanyererio gia gatato nkayeigwa eng'iti ya gatato ere moyo ekobora, Inchuo, orore. Nkarora, ebarasi emwamu, nere oyoyerinete narenge neratili y'okorenga as'okoboko kwaye. 6 Nkaigwa eriogi gati gati ye ching'iti inye chire moyo, rikobora, Ekemunu ki'engano as'eshilingi, nebimunu bitato bia shairi as'eshilingi, toyasaria amaguta nedivai. 7 Agachia koigora ekemanyererio gia kane, nkaigwa eriogi ri'eng'iti ya kane ekobora, Inchuo, orore, 8 Nkarigereria, nkarora, ebarasi y'erangi ematosi: nere oyoyerinete erieta riaye n'Amakweri, ne chimbera chimotunyaine. Bakaegwa okobua igoro as'ensemo ya kane y'ense baite as'omoro bw'esegi, nas'enchara, nas'amakweri, nase ching'iti chi'orosana chi'ense. 9 Agachia koigora ekemanyererio gia gatano, nkarora inse as'amathabau emeika yabo abwo baitetwe as'engecho ye ring'ana ria Nyasaye, nas'engecho y'obogani barenge nabwo. 10 Bakarera neriogi rinene, bagoteba, Aye Omonene, omochenu, omonyene ekeene, ngoika ririri orabanachere ekina nakorusia egesiomba amanyinga aito as'abwo baikaransete igoro as'ense? 11 Bakaegwa ker'oyomo eanga entambe endabu; bagatebigwa batimoke ake ekero egeke, goika goikerane okobara kw'abachore barabwo nabamwabo baranyare goitwa buna barabwo. 12 Nkarora, gakoigora ekemanyererio kia gatano narimo, norenge omotengecho omonene bw'ense; erioba rikaba rimwamu buna etukia y'egunia emwamu, omotienyi okaba buna amanyinga; 13 ching'enang'eni chikagwa igoro as'ense buna omoko okoiyeria amako aye, gokonyegerigwa nembeo enyinge. 14 Igoro ekarusigwa buna risankwa rikoringwa, na ker'egetunwa negesinka bikang'anyigwa birue aas'abo, 15 Nabaruoti b'ense, nabanene, nabanda, nabatang'ani esegi, abanyene chinguru, na ker'omosomba, nomobiare, bakebisa as'amabwago ense, nas'ebitare bi'ebitunwa; 16 bakabitebia ebitunwa nebitare, Togwere, totube, titorora obosio bwaye oyoikaransete as'ekerogo ki'obonene, nonya nendamwamu y'Emanwa y'Eng'ondi: 17 naki rituko rire rinene ri'endamwamu yabo yachire; ning'o oranyare gotenena?
1 Nyuma as'aya nkarora amalaika bane bateneine ase chinsemo inye chi'ense, bagochitanga chimbeo inye chi'ense, embeo tegusa igoro as'ense, nonya igoro as'enyancha, nonya igoro as'omote onde bwonsi. 2 Nkarora rilaika rinde, rikorina korwa aas'erioba rikorua, ore nekemanyererio kia Nyasaye ore moyo: akabaakera egeturi as'eriogi rinene, baria amalaika bane baetwe gosaria ense nenyancha, 3 bagoteba, Timosaria ense gose enyancha, nonya nemete goika ekero toratieke kobabeka ekemanyererio abasomba b'Omonene Nyasaye igoro as'amasio abo. 4 Nkaigwa okobara kwabo ababekirwe ebimanyererio, ase ker'egesaku ki'abana b'Isiraeli, abanto chilifu emia nemerongo ene nabane. 5 Ab'egesaku kia Yuda chilifu ikomi naibere ababekirwe ekemanyererio: Ab'egesaku kia Reuben chilifu ikomi naibere: Ab'egesaku kia Gad chilifu ikomi naibere: 6 Ab'egesaku ki'Asher chilifu ikomi naibere: Ab'egesaku kia Nafutali chilifu ikomi naibere: Ab'egesaku kia Manase chilifu ikomi naibere: 7 Ab'egesaku kia Simion chilifu ikomi naibere: Ab'egesaku kia Lawi chilifu ikomi naibere: Ab'egesaku ki'Isakaru chilifu ikomi naibere: 8 Ab'egesaku kia Zabulon chilifu ikomi naibere: Ab'egesaku kia Yusufu chilifu ikomi naibere: Ab'egesaku kia Benjamin chilifu ikomi naibere ababekirwe ekemanyererio. 9 Erio nyuma as'aya nkarora, rora omosangerereko omonene mono ekiagera omonto tarenge ore konyara koyobara, abanto ba ker'ebisaku, neamate, nabanto, nemenwa, bateneine as'obosio bw'ekerogo keria ki'obonene, nas'obosio bw'Emanwa y'Eng'ondi, babekirwe chianga chindabu, bare namato amakendo amaboko abo; 10 bakorera as'eriogi rinene bakobora, Ogotoreka ase Nyasaye oito oyoikaransete as'ekerogo ki'obonene, nas'Emanwa y'Eng'ondi. 11 Namalaika bonsi bateneine chinsemo chionsi chi'ekerogo ki'obonene, nase chinsemo chi'abagaka nase biria ebitongwa bine bire moyo; bakagwa maumama as'obosio bw'ekerogo ki'obonene, bakamosasima Nyasaye, 12 bakobora, Amin: Ogosesenigwa, obonene, nobong'aini, nokobaka, nogosika, nokobua, nechinguru, ase Nyasaye oito goika kare nakare. Amin. 13 Akairaneria oyomo bwa baria abagaka agantebia, Abanto aba babekirwe chianga chindabu mbarabi? ng'ai barure? 14 Nkamotebia, Omonene one kwamanyire aya aye. Agantebia, Aba nabwo barure as'emechando eria emenene, nabarabwo basibirie chianga chiabo bagachikora chindabu as'amanyinga Emanwa y'Eng'ondi. 15 As'ayio nakio kiagera bare as'obosio bw'ekerogo ki'obonene kia Nyasaye; nabarabwo iga bakomokorera 'mobaso nabotuko ase hekalu yaye; nere oyoikaransete as'ekerogo ki'obonene narambore eema yaye igoro asebare. 16 Tibakoigwa enchara naende, tibakoigwa erang'o naende; nonya nomobaso tokobaaka, nonya neriberera rinde rionsi. 17 Naki Emanwa y'Eng'ondi ere gati gati as'ekerogo ki'obonene nabarisie, nere nabarae ase chinsoko chi'amache are moyo; na Nyasaye nayatinyie amariga onsi as'amaiso abo.
1 Goika agachia koigora ekemanyererio gia gatano nakabere igoro agakirakiri as'ekero gi'enusu y'ensa. 2 Nkabarora amalaika batano nababere bateneine as'obosio bwa Nyasaye, bakaegwa ebitureri bitano nabibere. 3 Rilaika rinde rigacha rigatenena obosio bw'amathabau, ore negetabo gi'ethahabu, akaegwa amanukato amange anyare koyabeka amo nogosaba kw'abachenu bonsi igoro as'amathabau y'ethahabu are as'obosio bw'ekerogo ki'obonene. 4 Nerioki ri'aria amanukato rikarina amo nogosaba kw'abachenu, as'okoboko kwa rilaika, as'obosio bwa Nyasaye. 5 Rilaika rigakebogoria egetabo, rigageichoria omorero bw'amathabau, akayoruta igoro as'ense; ekaba neriogi nenkoba nokomesa nomotengecho bw'ense. 6 Nabaria amalaika batano nababere abanyene ebitureri bitano nabibere bakebeka ang'e banyare kobibugia. 7 Rilaika rie ritang'ani rikabugia egetureri, ekaba embura y'amagena nomorero bisang'aine namanyinga, bikarutwa igoro as'ense: ensemo ya gatato y'ense egasambwa, ensemo ya gatato y'emete egasambwa, obonyansi bwonsi obobese bogasambwa. 8 Rilaika ria kabere rikabugia egetureri, negento buna omogwekano bw'egetunwa ekenene gegwoka omorero, gekarutwa as'enyancha: ensemo ya gatato y'enyancha ekaba amanyinga. 9 Bigakwa ensemo ya gatato y'ebitongire bire as'enyancha, ebire moyo; ensemo ya gatato y'amato agasarigwa. 10 Rilaika ria gatato rikabugia egetureri, eng'enang'eni enene ekagwa korwa igoro, yarenge gwoka buna etaya, ekagwa igoro as'ensemo ya gatato ye chindoche, n'igoro ase chinsoko chi'amache. 11 Nerieta riaye eng'enang'eni eria iga ekorokwa Abisintho: nensemo ya gatato y'amache ekaba abisintho; nabanto abange bagakwa as'amache ayio ekiagera abekirwe obororo. 12 Rilaika ria kane rikabugia egetureri, ensemo ya gatato y'erioba ekaakwa, nensemo ya gatato y'omotienyi, nensemo ya gatato ye ching'enang'eni, erio ensemo ya gatato ebekwe omosunte, omobaso tobara ensemo ya gatato yaye, nonya noboruko boigo. 13 Nkarora, nkaigwa ensoti ekoiruruka gati gati igoro, egokwana neriogi rinene, Obobe, obobe, obobe, nobwabo, abaikaransete igoro as'ense, as'engecho y'eriogi ritigarete ri'ebitureri bi'amalaika batato, bare ang'e kobugia.
1 Rilaika ria gatano akabugia egetureri, nkarora eng'enang'eni ekorua igoro, ekogwa igoro as'ense; akaegwa ekeigorero ki'engoro y'eora. 2 Akayeigora engoro y'eora; erioki rigasoka korwa engoro eria buna erioki ri'eriko rinene; nerioba nomoika bikabekwa omosunte as'engecho y'erioki riria ri'engoro. 3 chingige chikarua as'erioki riria, chikagenda igoro as'ense, chikaegwa chinguru buna chinguru chia nge y'ense. 4 chigatebigwa tichiria obonyansi bw'ense nonya negento kende gionsi kere ekebese, gose omote onde bwonsi, tatiga abanto baria batari nekemanyererio kia Nyasaye as'amasio abo. 5 Bakaegwa ogochika tibabaita, korende babachande emetienyi etano: nokoromwa kwabo iga kwarenge buna okoromwa kwa nge, gekoroma omonto. 6 Nas'amatuko aria mwanyabanto nabarigie amakweri, nabarabwo tibakoyarora; nabarigie ogokwa, namakweri nabatame. 7 Nebieni bie chingige chiria iga bire buna chibarasi chiabekirwe ang'e as'esegi; n'igoro as'emetwe yabo buna chigutwa, omogwekano obo nethahabu, namasio abo igare buna amasio aya mwanyabanto. 8 Nigo barenge netukia buna ney'abakungu. Namaino abo igarenge buna amaino chisibwori. 9 Nabarabwo iga barenge namasabo buna chiganchwa chi'ebioma; neriogi rie chimbaba chiabo iga riarenge buna eriogi rie chigari, na buna chibarasi chinyinge chikogenda bwango as'esegi. 10 Naende nchire nebimincha buna ebia nge, igachire nemchurera as'ebimincha biabo. Nechinguru gochanda mwanyabanto emetienyi etano. 11 N'igoro asechire nchire nomoruoti, rilaika ri'eora: erieta riaye as'Ekeibirania Abaddon, nas'Ekeyunani erieta riaye Apollion. 12 Obobe bwe ritang'ani bwaetire, Rora, amabe abere atigarete, arache nyuma. 13 Rilaika ria gatano narimo rikabugia egetureri, nkaigwa eriogi erimo rikorua use chiria chingunchara chi'amathabau ay'ethahabu, ayare as'obosio bwa Nyasaye, 14 rikoritebia riria rilaika ria gatano narimo orenge negetureri, Basibore amalaika bane basibire as'oroche oronene Eufarati. 15 Baria amalaika bane bagasiborwa, ababegetwe ang'e as'ensa eria nerituko nomotienyi nomwaka, banyare goita ensemo ya gatato ya mwanyabanto. 16 Nokobara kw'emeganda erinete chibarasi ne chimilion chimia ibere. 17 Naboigo nachiroche chibarasias'okorora kwane, nabwo baikaransete igoro ase chire, mbare nebioma ebikuba biabo buna nebi'omorero, na samawati, nekebiriti: nemetwe ye chibarasi echio buna emetwe ye chisibwori; nakorua as'emenwa yabo yaruete omorero nerioki nekebiriti. 18 Ensemo ya gatato ya mwanyabanto bagaitwa as'atato ayio, as'omorero oyio nerioki erio nekebiriti ekio, kiaruete as'emenwa yabo. 19 Naki chinguru chiabo chibarasi nas'emenwa yabo, nas'ebimincha biabo: naki ebimincha biabo nomogwekano bwe ching'iti, echire nemetwe, ase ero iga chikoroma. 20 Na mwanyabanto batigarete, bataitetwe as'amaakwa ayio, tibeitetie as'emeremo y'amaboko abo erinde tibasasima ebirecha, nechisanamu chi'ethahabu, nechi'efetha, nechi'etai, nechi'amagena, nechi'emete; chitakonyara korora, nonya nkoigwa, gose kogenda: 21 nonya nogoita kwabo tibeitetie, nonya noborogi bwabo, nonya nobotomani bwabo, nonya nokoiba kwabo.
1 Nkarora rilaika rinde rire nechinguru ogoika korwa igoro, bweboete rire; nomokubinyongo bw'embura igoro as'omotwe oye, obosio bwaye bwarenge buna erioba, namagoro aye buna chisiro chi'omorero; 2 nas'okoboko kwaye narenge nebuku enke yamanoirwe: akabeka okogoro kwaye gw'okorio igoro as'enyancha, nogw'okobee igoro as'ense; 3 akarera as'eriogi rinene, buna esibwori ekoruma: agachia korera buna chinkoba isano naibere chikoaka eriogi riabo. 4 Ekero chinkoba isano naibere chigachia koaka eriogi riabo nkaba ang'e korika: nainche nkaigwa eriogi rikorua igoro rigoteba, Yabeke ekemanyererio amang'ana aya atebwa nechinkoba isano naibere, toyarika. 5 Na riria rilaika naroche agatenena igoro as'enyancha na igoro as'ense akaimokereria okoboko kwaye korigereria igoro. 6 Agatiana as'ere ore moyo goika kare nakare, oyotongete igoro nebinto bireo, nense nebinto bireo, nenyancha nebinto bireo, ng'a tigekoba ekero nyuma as'aya: 7 tariga as'amatuko aria aya rilaika ria gatano nakabere karabe ang'e koaka, erio agwo obobisi bwa Nyasaye naboikeranigwe, buna aria amang'ana amaya abarandeitie abasomba baye ababani. 8 Neriogi riria naigwete korwa igoro riakwanete nainche naende, rigateba, Genda oyebogorie ebuku eria enke yamanoirwe as'okoboko kwa riria rilaika riteneine igoro as'enyancha n'igoro as'ense. 9 Nkarigendera rilaika riria nkamotebia, Ing'a ebuku eria enke. Agantebia, yebogorie, oyerie; nero nekobeke obororo enda yao, korende as'omonwa oo nebe enyansu buna oboke. 10 Nkayebogoria ebuku eria enke as'okoboko kwa rilaika riria nkayeria; nero akaba enyansu buna oboke as'omonwa one, ngachia koyeria enda yane ekabekwa obororo. 11 Agantebia, Nekogwenerete kobana naende igoro as'abanto abange nas'ebisaku, nemenwa, nabaruoti.
1 Nainche nkaegwa emoti omogwekano bw'enyimbo: oyomo agantebia, Imoka, oyerenge hekalu ya Nyasaye, namathabau, nabwo bagosasima aroro. 2 Nekio ekeoreri kere isiko ase hekalu, ogetige isiko, tokerenga; naki ebisaku biakeeirwe ekio: nabarabwo nabayotache omochie omochenu emetienyi emerongo ene nebere. 3 Nainche nimbae abwo abarori bane babere, nabwo nabaorokie obobani amatuko elifu eyemo nechimia ibere namerongo etano nomo, babekirwe chianga chie chigunia. 4 Abwo nabwo eria emezeituni ebere nabiria ebibekerero bie chitaya bibere biteneine as'obosio bwa Nyasaye bw'ense. 5 Nomonto kararigie kobachanda, omorero norue as'emenwa yabo nakobaria ababisa babo: nomonto kararigie kobachanda, naboigo emogwenerete aitwe. 6 Aba mbare nokobua gosieka igoro, embura tenyara gotwa as'amatuko ay'obobani bwabo: naende mbare nokobua igoro as'amache koyaonchora koba amanyinga, nakoyeaka ense ase ker'okoakwa, koreng'ana buna barigetie. 7 Ekero barakore oborori bwabo, eria eng'iti ekorua as'eora nekore esegi nabarabwo, nere nababue nakobaita. 8 Nebitondo biabo nabibe as'enchera y'omochie oria omonene okorokwa as'engecho y'omoika Sodomu, na Misiri, aas'Omonene obo abambetwe. 9 Na korwa as'abwo abanto, neamate, nemenwa, nebisaku, nababirigererie ebitondo biabo amatuko atato nenusu, tibagotiga ebitondo biabo bibekwe embera ime. 10 Nabarabwo abaikaransete igoro as'ense nabakore omogoko igoro asebare nagochenga: nabairerane ebiegwa; ekiagera ababani abwo babere bakabachanda barabwo abaikaransete igoro as'ense. 11 Brio nyuma as'amatuko atato nenusu omoika ore moyo okorua ase Nyasaye okabasoa, bagatenena; okoiroka okonene gokabagwera abanto babaroche. 12 Bakaigwa eriogi rinene korwa igoro rikobatebia, Rina goika aria. Bakarina igoro as'amare; ababisa babo bakabarigereria. 13 Nas'ensa eria ekaba omotengecho bw'ense omonene, nensemo y'ikomi y'omochie ekagwa; abanto chilifu isano naibere bagaitwa as'omotengecho oria: nabatigarete bagasogwa nomoondoko, bakamotogia Nyasaye o igoro. 14 Obobe bwa kabere bwaetire: rora, Obobe bwa gatato naboche bwango. 15 Rilaika ria gatano nakabere rikabugia egetureri; akaba amariogi amanene igoro, agoteba, Oboruoti bw'ense bwabaire oboruoti bw'Omonene oito, nobwa Kristo oye: nere nagambe goika kare nakare. 16 Nabaria abagaka emerengo ebere nabane baikaranseteo as'obosio bwa Nyasaye as'chirogo bi'obonene biabo bakagwa maumama, bakamosasima Nyasaye, 17 bagateba, Twakobakire Omonene Nyasaye, Omobui, oyore aroro, naende kwarenge arero, ekiagera kwabogoirie okobua kwao kore okonene, okagamba. 18 Nebisaku bikabea, endamwamu yao egacha, nekero bakogambigwa abakure, nekero gi'okobaa eng'eria yabo abwo abatomwa bao ababani, nabachenu, nabwo basigete erieta riao, abake nabanene, nakobasaria abwo bakoyesaria ense. 19 Hekalu ya Nyasaye ekaigorwa igoro; nesanduku y'emuma ekarorekana ime ase hekalu yaye; bikaba nokomesa, negeturi, nenkoba, nomotengecho, nembura y'amagena enyinge mono.
1 Negekone ekenene gekarorekana igoro, omokungu bweboetie erioba, nomotienyi orenge inse as'amagoro aye, n'igoro as'omotwe oye egutwa ya ching'enang'eni ikomi naibere. 2 Nere igsrenge morito: akarera, akaba nobororo nakoromwa aibore. 3 Egekone kende gekarorekana igoro; rora enchoka enene embariri, eyarenge nemetwe etano nebere, nechingunchara ikomi, n'igoro as'emetwe yaye chigutwa isano naibere. 4 Nekemincha kiaye gegakurura ensemo ya gatato ye ching'enang'eni chi'igoro, nagochiyeria as'ense. Neria enchoka egatenena as'obosio bw'omokungu oria ore ang'e koibora, erio okoibora emorie omwana oye. 5 Akaibora omwana omoisia, oranyare kobigambia ebisaku bionsi nenyimbo y'ekioma; nomwana oye akabogorigwa goika ase Nyasaye nas'ekerogo kiaye ki'obonene. 6 Omokungu oria agatama gochia eroro aas'aroseretigwe na Nyasaye, erio bamorende aroro amatuko elifu eyemo nechimia ibere nemerongo etano nomo. 7 Yarenge esegi igoro: Mikael namalaika aye bakarwana nenchoka; enchoka ekarwana namalaika aye amo; 8 nabarabwo tibabua nonya naase abo tarorekana naende igoro. 9 Enchoka egatugutwa, eria enene, eng'iti ya kare, ekorokwa Omogenki na Saitani, omong'ainereria bw'ense yonsi; egatugutwa goika inse, namalaika aye agatugutwa amo nero. 10 Nkaigwa eriogi rinene igoro, rigoteba, Bono ogotoreka gwaito kwabaire, nokobua, nobonda bwa Nyasaye oito, nokobua gwa Kristo oye; naki otugutirwe omosoeri bw'abaminto, okobasoera as'obosio bwa Nyasaye oito, omobaso nobotuko. 11 Nabarabwo bakamobua as'amanyinga Emanwa y'eng'ondi, nase ring'ana ri'okogana kwabo; tibancha obogima bwabo nonya ngoika ekero gi'ogokwa. 12 As'ayio goka, igoro, nainwe abamoikaranseteo. Obobe nobw'ense nenyancha: ekiagera oria omogenki oikire asebare omonyene endamwamu enyinge, omanyire ng'a igare nekero egeke. 13 Nenchoka eria egachia korora ng'a yatugutirwe as'ense, ekamochanda omokungu oria omoiborete omwana omoisia. 14 Omokungu oria akaegwa chimbaba ibere buna echi'ensoti eria enene, anyare koiruruka agende as'eroro, goika aas'aye, agwo akorendwa ekero, nebiro, nenusu y'ekero, arue as'obosio bw'eyio enchoka. 15 Enchoka ekarusia as'omonwa oye, nyuma y'omokungu, amache buna oroche, amokore kobogorigwa noroche roria. 16 Ense ekamokonya omokungu, ense ekamanora omonwa oye, ekaromera oroche roria yarusetie eria enchoka as'omonwa oye. 17 Enchoka ekamobeera omokungu, ekagenda erinde ekore esegi igoro as'oroiboro rwaye rwatigarete, abayabwatete amachiko a Nyasaye, nakoba nokogana kwa Yesu Kristo.
1 Ngatenena igoro as'omokenye bw'enyancha. Nkarora eng'iti ekorua as'enyancha eyere nemetwe etano nebere, nechingunchara ikomi, n'igoro ase chingunchara chiria chigutwa ikomi, n'igoro as'emetwe yaye amarieta ay'okorama. 2 Neria eng'iti naroche iga yarenge omogwekano bw'egwachi, namagoro aye igarenge buna amagoro edubba, nomonwa oye buna omonwa bw'esibwori; eria enchoka ekayea chinguru chiaye, nekerogo kiaye ki'obonene, nokobua okonge. 3 Nkarora oyomo bw'emetwe yaye buna bwatekire orogoma rw'amakweri, Okoakwa kwaye kw'amakweri gokagwenigwa; ense yonsi egakumia nyuma as'eng'iti eria. 4 Bakayesasima eria enchoka, bakabora, Ning'o oreng'aine neng'iti? Ning'o oranyare gokora esegi nero? 5 Ekaegwa omonwa ogokwana amang'ana amanene, ay'okorama. Ekaegwa okobua gokora emeremo yaye emetienyi emerongo ene nebere. 6 Ekamanora omonwa oye emorame Nyasaye, nakorirama erieta riaye, nobomenyo bwaye, nabwo bamenyete igoro. 7 Ekaegwa gokora esegi nabachenu nakobabua: ekaegwa okobua igoro as'eamate, nabanto, nemenwa, negesaku. 8 Abanto bonsi abamenyete igoro y'ense nabayesasime, ker'oyomo erieta riaye ritarikiri as'ebuku y'obogima y'Emanwa y'eng'ondi yaitetwe ritang'ani ense etarabekwa oboroso. 9 Omonto karabe namato, aigwe. 10 Omonto karasakore, nasakorwe. Omonto karaite as'omoro, naitwe as'omoro. Naboigo kore okoremereria nokwegena kw'abachenu. 11 Nkarora eng'iti ende egotira korwa inse; nero iga yarenge nechingunchara ibere omogwekano buna emanwa y'eng'ondi, egakwana buna enchoka. 12 Egokbrera okobua gwonsi kw'eng'iti eria ye ritang'ani as'obosio bwaye. Nakoyekora ense nabonsi abamenyeteo ime bayesasime eng'iti ye ritang'ani, ero eyio orogoma rwaye rw'amakweri rwagwenigwe. 13 Nero yakorire ebikone ebinene, erinde ekore omorero goika korwa igoro as'ense, as'obosio bwa mwanyabanto. 14 Nero ekobang'aina abamenyete igoro as'ense, as'engecho y'ebikone biria yaetwe kobikora as'obosio bw'eng'iti, ekabatebia abamenyete igoro as'ense, koyekorera esanamu eng'iti eria, yarenge norogoma rw'amakweri, ekaba moyo. 15 Ekaegwa kobeka omoika as'esanamu y'eng'iti, goika eria esanamu y'eng'iti ekwane, nagokora bonsi abatasasimeti esanamu y'eng'iti baitwe. 16 Nere obakorire bonsi, abake nabanene, abanda nabataka, abasibore nabasomba, babekwe ekemanyererio as'okoboko kwabo gw'okorio, gose as'amasio abo; 17 erinde omonto onde bwonsi tagora gose gotonda, tatiga ere oyore nekemanyererio keria gose erieta ri'eng'iti eria, gose okobara kw'erieta riaye. 18 Obong'aini naiga bore. Ere oyore nechisemi, nabare okobara kw'eng'iti eyio; naki nokobara kw'omwana o mwanyabanto: nokobara kwaye ne chimia isano nemo, namerongo etano nomo naisano nemo.
1 Nkarora, na rora, Emanwa y'eng'ondi yatenenire igoro as'egetunwa kia Zayoni, abanto chilifu emia nemerongo ene nainye, amo nere, abare nerieta ri'Ise oye, riarikirwe as'amasio abo. 2 Nkaigwa eriogi korwa igoro buna eriogi ri'amache amange, naende buna eriogi ri'enkoba enene: nkaigwa eriogi abakobugia amakano, bakoyabugia amakano abo: 3 nabarabwo bagotera ogotera, okore buna nokoyia as'obosio bw'ekerogo ki'obonene, nas'obosio bwe ching'iti inye echire moyo, nabaria abagaka: omonto tari oranyare kwegera ogotera koria tatiga baria chilifu emia namerongo ene nainye, abagorirwe korwa as'ense. 4 Aba nabwo batabekiri nobobe amo nabakungu, naki nabekungi. Aba nabwo bakoyetunya Emanwa y'eng'ondi ker'aas'ekogenda. Abagorirwe korwa as'ense, babe abe ritang'ani ba Nyasaye nas'Emanwa y'Eng'ondi. 5 Nas'emenwa yabo oborimo bonde tibwarorekanete: ekiagera tibari nakemoa as'obosio bw'ekerogo ki'obonene bwa Nyasaye. 6 Nkarora rilaika rinde rikoiruruka gati gati igoro, omonyene enchili ya kare nakare, okobaranderia abamenyete igoro as'ense, na ker'egesaku neamate nemenwa nabanto; 7 agateba as'eriogi rinene, Sika Nyasaye, mobake; naki ensa y'ekina kiaye yachire: mosasime ere oyekorete igoro nense nenyancha nechinsoko chi'amache. 8 Rilaika rinde rikamotunya, rikabora, Ogure, ogure Babeli, omochie oria ore omonene, ekiagera noro onyoisirie ebisaku bionsi edivai y'endamwamu y'obotomani bwaye. 9 Rilaika ria gatato rikabatunya, rigakwana as'eriogi rinene, Omonto karayesasime eng'iti nesanamu yaye, nakonyora ekemanyererio as'obosio bwaye gose as'okoboko kwaye, 10 nere nanywe edivai y'endamwamu ya Nyasaye eyarosigwe etasang'anirie namache as'egekombe ki'endamwamu yaye; nere naromwe as'omorero nekebiriti obosio bw'amalaika abachenu, naende as'obosio bw'Emanwa y'eng'ondi. 11 Nerioki ri'obo roro bwabo rikorina igoro goika kare nakare; nabarabwo tibari nogotimoka omobaso nobotuko, abwo bayesasimire eng'iti nesanamu yaye, na ker'oyokenyorire ekemanyererio ki'erieta riaye. 12 Agwo nao okoremereria kw'abachenu, babwatete amachiko a Nyasaye, nokwegena kwa Yesu. 13 Nkaigwa eriogi korwa igoro rigoteba, Rika, Mbare negesio abakure, abagokwa as'Omonene korwa bono: ee, ogoteba Omoika, banyare gotimoka korwa as'ogokora emeremo yabo; naki ogokora kwabo igo gokobatunyana. 14 Nkarora, na rora, rire rirabu; n'igoro ase rire erio naikaransete oyomo, omogwekano bw'Omwana-o-mwanyabanto, oyore negutwa y'ethahabu igoro as'omotwe oye, nas'okoboko kwaye omoyio omwoge. 15 Rilaika rinde rigasoka korwa hekalu, as'eriogi rinene okomorera ere oyoikaransete igoro ase rire riria, Beka omoyio oo, ogese: naki ensa ya rigesa yachire; ekiagera rigesa ri'ense riomire mono. 16 Nere oyoikaransete igoro ase rire akaruta omoyio oye igoro as'ense, ense ekageswa. 17 Rilaika rinde rikarua ase hekalu ere igoro, nere boigo nare nomoyio omwoge. 18 Ne rilaika rinde rikarua as'aria amathabau, omonyene chinguru igoro as'omorero; as'eriogi rinene akamorera oria omonyene omoyio oria omwoge, akabora, Beka omoyio oo omwoge, sangereria ebisago bi'omosabibu bw'ense, naki emesabibu yaye yatobire mono. 19 Rilaika riria rikaruta omoyio oye goika ense, agasangereria omosabibu bw'ense, akaruta as'ekemitero, y'endamwamu ya Nyasaye, eria enene. 20 Ekemitero keria gegatachwa isiko as'omochie, amanyinga akarua as'ekemitero goika as'ebiokio bie chibarasi, orogendo rwa chimaili chimia ibere.
1 Nkarora egekone kende as'igoro, ekenene gi'ogokumia, amalaika atano nabere amanyene amaakwa atano nabere ay'omoerio; naki ime as'aro endamwamu ya Nyasaye yaikeranire. 2 Nkarora omogwekano bw'enyancha y'ekerore esang'aine nomorero; nabarabwo abanyene okobua nagweatanana neria eng'iti, nesanamu yaye, nekemanyererio kiaye, nokobara kw'erieta riaye, batenenire igoro as'enyancha y'ekerore, abanyene amakano a Nyasaye. 3 Nabarabwo bagotera ogotera kwa Musa omosomba o Nyasaye, nogotera kw'Emanwa y'eng'ondi, bagoteba, Okonene kw'ogokumia ogokora kwao, aye Omonene Nyasaye, Omobui; echi'ekeene, nechi'oboronge chinchera chiao, aye Omoruoti bw'abachenu. 4 Ning'o otagosigeti, Omonene, nakoribaka erieta riao? naki aye bweka ore omochenu: naki ebisaku bionsi nabiche nagosasima as'obosio bwao; ekiagera ogokora kwao nokw'oboronge gwatiekire koorokigwa. 5 Nyuma as'aya nkarora, hekalu y'eema y'okogana as'igoro ekaigorwa: 6 nabaria amalaika atano nabere, abanyene amaakwa atano nabere, bakarua ase hekalu, babekirwe chianga chi'egatani engiya endabu, basibirwe ebikuba biabo nechinkini chi'ethahabu. 7 Neyemo ya chiria ching'iti inye chire moyo, ekabaa amalaika aria atano nabere ebitabo bitano nabibere bi'ethahabu, bichire endamwamu ya Nyasaye, ore moyo goika kare nakare. 8 Hekalu egaichorwa nerioki rikorua as'obonene bwa Nyasaye nokobua kwaye; tarenge omonto oranyare gosoa ime ase hekalu goika aikeranigwe amaakwa atano nabere a baria amalaika atano nabere.
1 Nkaigwa eriogi rinene korwa hekalu ime, rikobatebia baria amalaika atano nabere, Genda, mobitere biria ebitabo bi'endamwamu ya Nyasaye igoro as'ense. 2 Akagenda oyo bwe ritang'ani, agaitera egetabo kiaye igoro as'ense; ekaba rigumba ribe ri'obobe, igoro ase baria abanto abanyene ekemanyererio ki'eng'iti, nabaria abagosasima esanamu yaye. 3 Rilaika ria kabere rigaitera egetabo kiaye igoro as'enyancha; ekaba amanyinga buna amanyinga ay'omonto okure, ebinto bionsi bire moyo bigakwa as'enyancha. 4 Rilaika ria gatato rigaitera egetabo kiaye igoro ase chindoche, nase chinsoko chi'amache, chikaba amanyinga. 5 Nkaigwa rilaika ri'amache rigoteba, Aye nomonyene oboronge, aye oreo, noyorengeo, Omochenu, ekiagera kwanachire iga: 6 naki baiterete amanyinga ay'abachenu nababani, naye kwabaeire amanyinga bayanywe: nabarabwo bagweneire. 7 Nkaigwa amathabau agoteba, Nabo, Omonene Nyasaye, Omobui, nebi'oboronge, nebi'ekeene ebina biao. 8 Rilaika ria kane rigaitera egetabo kiaye igoro as'erioba; rikaegwa kobarura abana ba mwanyabanto as'omorero. 9 Na mwanyabanto bakarurwa neriberera rinene; bakarirama erieta ria Nyasaye oyore nokobua igoro as'amaakwa onsi, gose tibeitetie nakomoa obonene. 10 Rilaika ria gatano rigaitera egetabo kiaye igoro as'ekerogo ki'obonene ki'eria eng'iti; oboruoti bwaye bokabekwa omosunte; bagatakuna chimeme chiabo as'engecho y'obororo bwabo, 11 bakamorama Nyasaye o igoro as'engecho y'obororo bwabo, nekiagera as'amagumba abo; gose tibeitetie as'ogokora kwabo. 12 Rilaika ria gatano narimo rigaitera egetabo kiaye igoro as'oroche roria oronene Eufarate; amache aye agakama, erio enchera erosigwe as'abaruoti bakorua as'erioba rikorua. 13 Nkarora emeika etato y'eubi buna ebioto, ekorua as'omonwa bw'eria enchoka, nas'omonwa bw'eria eng'iti, nas'omonwa bw'oria omobani bw'oborimo. 14 Naki eyio nemeika y'ebirecha, egokora ebikone, ekorua nakobagendera abaruoti b'ense yonsi, kobasangereria as'esegi ye rituko riria rinene ria Nyasaye, Omobui. 15 (Rigereria, ngochande buna omoibi. Nare negesio oyokorenda, noyokorosia chianga chiaye, tagenda getirianda, barore obosoku bwaye.) 16 Akabasangereria goika aase akorokwa as'Ekeiberania, HariMagedon. 17 Rilaika ria gatano nakabere rigaitera egetabo kiaye as'omoika; eriogi rinene rikarua ase hekalu y'igoro, nas'ekerogo keria ki'obonene, rigoteba, Yatiekire koba: 18 ekaba eriogi nenkoba nokomesa; okaba omotengecho bw'ense omonene, korwa ekero abana ba mwanyabanto babete igoro as'ense tiyanya koba buna igo, omotengecho omonene buna oyio. 19 Nomochie oria omonene ogatananeka chinsemo isato, nemechie y'ebisaku ekagwa: na Babeli oria omonene okainyorwa as'obosio bwa Nyasaye, amoe egekombe ki'edivai y'obotindi bw'endamwamu yaye. 20 Ker'egesinka gegatama, nebitunwa tibiarorekana naende. 21 Nembura y'amagena enene mono, ey'amagena amarito buna etalanta, egaika korwa igoro as'abana ba mwanyabanto. Mwanyabanto bakamorama Nyasaye as'engecho y'okoakwa koria kw'embura y'amagena; naki okoakwa kwaye nokonene mono.
1 Agacha oyomo bw'amalaika aria atano nabere omonyene biria ebitabo bitano nabibere, agakwana nainche, agateba, Nchuo aiga, ninkworokie ekina ki'oria omotomani omonene oikaransete igoro as'amache amange; 2 er'oyio abaruoti b'ense batomanire nere, nabwo bamenyete as'ense batindire as'edivai y'obotomani bwaye. 3 Akambogoria as'Omoika goika eroro: nkarora omokungu oikaransete igoro as'eng'iti embariri mono, eichire namarieta ay'okorama, ere nemetwe etano nebere nechingunchara ikomi. 4 Nomokungu oria igarenge obekirwe eanga y'omonyinga nembariri, orosigwe as'ethahabu namagena ayare nerigori nechiruru, ore negekombe gi'ethahabu okoboko kwaye geichire obobe, neubi y'obotomani bwaye. 5 Nas'obosio bwaye narenge nerieta, riarikirwe, Obobisi, Babeli Omonene, Ng'ina Abatomani Nobobe Bw'ense, 6 Nkamorora oria omokungu otindire as'amanyinga abachenu, namanyinga abarori ba Yesu, Ninche ngachia komorora ngakumia nogokumia okonene. 7 Riria rilaika rigantebie, Naki ogokumia? Ningotebie obobisi bw'omokungu oyio, neng'iti emobogoretie, ere nemetwe eria etano nebere, nachiria chingunchara ikomi. 8 Eria eng'iti kwaroche yarenge aroro, nero terio; nero ng'ang'e ere korina korwa as'eora, nakogenda as'ogosira. Nabarabwo abamenyete igoro as'ense, abatarikiri amarieta abo as'ebuku y'obogima korwa ekero ense ekobekwa oboroso, nabakumie bakoyerora eria eng'iti, buna yarenge aroro, nero teiyo, nero nebeo. 9 Agwo nao bore obong'aini nechisemi, Eria emetwe etano nebere nebitunwa bitano nabibere as'aikaranserete omokungu oria: 10 nabirobio nabaruoti batano nababere; batano batiekire kogwa, noyomo nareo, noyonde taracha; nere karache nemogwenerete aikaranse ekero egeke. 11 Neria eng'iti yarenge aroro nero teiyo, ero nero y'isano naisato, nero neyemo ya chiria isano naibere; nero nkogendere as'ogosira. 12 Na chiria chingunchara ikomi kwaroche nabaruoti, abatarabonyora oboruoti goika bono; korende banyorire chinguru buna abaruoti as'ensa eyemo amo neria eng'iti. 13 Aba mbare nokorengereria okomo, nabarabwo bayeeire eng'iti eria chinguru chiabo nokobua kwabo. 14 Aba nabakore esegi n'Emanwa y'eng'ondi, n'Emanwa y'eng'ondi nebabue, naki n'Omonene bw'abanene, n'Omoruoti bw'abaruoti; nabwo abarangerigwe, abachore, abegeni, nababue amo nere. 15 Agantebia, Amache aria kwaroche, as'aikaransete oria omotomani, nabanto nemesangerereko, nebisdku, nemenwa. 16 Nachiria chingunchara ikomi kwaroche igoro as'eng'iti, abwo nabamogeche oria omotomani, nabamokore koba bosa negetirianda, nabamorie chinyama chiaye, nabamosambe kegima nomorero. 17 Naki Nyasaye obekire emioyo yabo gokora okorengereria kwaye, nagoikera okorengereria okomo, nakoa eria eng'iti oboruoti goika amang'ana a Nyasaye aikeranigwe. 18 Noria omokungu kwaroche, noro oria omochie omonene, omonyene oboruoti igoro as'abaruoti b'ense.
1 Nyuma as'aya nkarora rilaika rinde rigoika korwa igoro, omonyene chinguru chinene; ense ekarabigwa as'obonene bwaye. 2 Akarera nechinguru, as'eriogi rinene, ogoteba, Ogure, ogure Babeli oria omonene, obaire obomenyo bw'ebirecha, noborendi bwa ker'omoika bw'eubi, noborendi bwa ker'enyon y'eubi enyene okogechia. 3 Naki ebisaku bionsi biagure as'edivai y'endamwamu y'obotomani bwaye; nabaruoti b'ense batomanire nere, nabanda b'ense banyorire enibo ase chinguru chi'oboenenu bwaye. 4 Nkaigwa eriogi rinde korwa igoro, rigoteba, Karue asare, inwe abanto bane, timobwatana nebibe biaye, erinde timonyora okoakwa kwaye, 5 Naki ebibe biaye biaikire nonya igoro, na Nyasaye oinyoire obobe bwaye. 6 Moakane buna aruete, momoe ara kabere koreng'ana buna emeremo yaye; as'egekombe ekio asang'ananirie mosang'ananerie ara kabere. 7 As'okoreng'ana buna etogirie nagokora obwansu, moe obororo nogoichana koreng'ana boigo: naki otebire as'enkoro yaye, Naikaransire eting'ana omoruoti, nainche tindi omoboraka, gose tinkorora ogoichana nonya ng'ake. 8 As'ayio amaakwa aye nache ase rituko erimo, amakweri, ogoichana, nenchara; nere nasambwe nomorero: naki Omonene Nyasaye omogambetie nare nechinguru. 9 Nabaruoti b'ense batomanire nere nagokora obwansu amo nere nabarere nakomweumeria, kobakorirora erioki ri'okoyia kwaye, 10 bagotenena are as'okoiroka obororo bwaye, bagoteba, Obobe, obobe nobwaye omochie oria ore omonene, Babeli, omochie oria ore nechinguru, naki as'ensa eyemo ekina kiao giachire. 11 Nabanda b'ense barerire nakomweumeria, naki omonto tari oragore ebinto biaye naende; 12 ebinto bi'ethahabu, nebi'efetha, nebi'amagena aye rigori rinene, nechiruru, negatani nomonyinga, nariri, neanga embariri; na ker'omote bw'ogotioka, na ker'egento kerosirie namaino enchogu, na ker'egento ki'omote bwe rigori rinene, negi'etai, negi'ekioma, neki'amagena akomekameka; 13 na mdalasini, n'uvumba, namanukato, n'ubani, nedivai, namaguta ay'emezeituni, nobosie obuya, nengano, nechiombe, neching'ondi, ne chibarasi, nechigari chi'esegi, nemebere; nemeika y'abana ba mwanyabanto. 14 Namatunda arengereirie nomoyoo agosireirie, nebinto bionsi bire ebiterere nebinto bi'obonene biagosireirie; gose tokonyara kobirora naende nonya ng'ake. 15 Nabaonchoreria b'ebinto ebio, banyorire enibo asare, nabatenene are, as'okoiroka obororo bwaye, bakorera nakweumia: 16 bagoteba, Obobe, obobe nobwaye omochie oria omonene obekire egatani, nomonyinga, neanga embariri, nakorosigwa as'ethahabu nerigena rie rigori rinene neruru! 17 Naki as'ensa eyemo obonda obonge bore buna iga bwabaire bosa. Na ker'omonene bw'obwato, na ker'oyokogenda ime as'obwato, nabairi obwato, nabwo bonsi bagokora emeremo as'enyancha, bagatenena are, 18 bakarera mono, kobachia korirora erioki ri'okoyia kwaye, bagateba, Omochie ki ore omogwekano bw'omochie oyio omonene? 19 Bakaruta ebuse igoro as'emetwe yabo, bakarera, bakaiyeria amariga, nakweumia, bagoteba, Obobe, obobe nobwaye omochie oria ore omonene, or'oyio ime yaye bonsi abanyene amato ase chinyancha banyorire enibo as'obonda bwaye; naki as'ensa eyemo obaire ritongo. 20 Goka igoro yaye, inwe igoro, nainwe abachenu, nabatomwa, nababani; naki Nyasaye onachire ekina kiaino igoro asare. 21 Rilaika rinde rire nechinguru rikaimokia rigena, buna rigena rinene rigosia, akariruta as'enyancha, akabora, Iga ase chinguru chinyinge norutwe Babeli, omochie oria omonene, gose tokonyara kororekana nonya ng'ake. 22 Neriogi ri'ababugia amakano, nebinanda, nechisirimbi, nebitureri, tibikoigugwa ime asore naende nonya ng'ake; nonya nomorosia onde bwonsi bw'emeremo ende yonsi takororekana ime asore naende, nonya ng'ake; nonya neriogi ri'orogena rogosia tirikoigugwa ime asore naende nonya ng'ake; 23 Nonya nokobara gw'etaya tekomoreka ime asore naende nonya ng'ake, nonya neriogi ri'omonene bw'enyangi nomoriakari bw'enyangi tirikoigugwa ime asore naende; naki abaonchoreria asore iga barenge abanene b'ense; ekiagera ebisaku bionsi biang'ainirwe as'oborogi bwao. 24 Na ime yaye akarorekana amanyinga ababani nay'abachenu, naya baria bonsi abaitetwe igoro as'ense.
1 Nyuma as'aya nkaigwa eriogi ri'emeganda emenge, eriogi rinene as'igoro, rigoteba, Haleluya; Ogotoreka, nobonene, nechinguru, igachire as'Omonene Nyasaye oito: 2 naki ebina biaye nebi'oboronge nebi'ekeene: naki omogambirie oria omotomani omonene, oyoyesaririe ense as'obotomani bwaye, oakanire as'egesiomba amanyinga abasomba baye as'amaboko aye. 3 Bagateba eria kabere, Haleluya. Nerioki riaye rikaimokerera igoro goika kare nakare. 4 Nabaria abagaka emerongo ebere nabane, nachiria ching'iti inye chire moyo chigatung'ama gosasima Nyasaye oikaransete as'ekerogo ki'obonene, bagoteba, Amin; Haleluya. 5 Eriogi rigasoka korwa as'ekerogo ki'obonene rigoteba, Mobake Nyasaye oito, inwe abasomba baye bonsi, inwe abamosigete, abake nabanene. 6 Nkaigwa eriogi buna eriogi ri'emeganda emenge, naende buna eriogi ri'amache amange, naende buna eriogi ri'enkoba ere nechinguru, rigoteba, Haleluya: naki Omonene Nyasaye oito, Omobui, ogambire. 7 Togoke, tochenge, tomoe obonene bwaye: naki enyangi y'Emanwa y'Eng'ondi yachire, nomokungu oye bwebekire ang'e. 8 Nere oeirwe kobekwa negatani engiya, ekomekameka, endabu: naki egatani eyio nogokora kw'oboronge kw'abachenu. 9 Agantebia, Rika, Mbare negesio abarangerigwe as'omoyega, bw'enyangi y'Emanwa y'eng'ondi, Agantebia, Amang'ana aya nay'ekeene a Nyasaye. 10 Nkagwa as'amagoro aye, komosasima. Agantebia, Rora, tokora iga: inche nomosomba omogisangi oo, naende oyomo bw'abamino bare nokogana kwa Yesu: mosasime Nyasaye: naki okogana kwa Yesu nomoika bw'obobani. 11 Nkarora igoro aigokire; na rora, ebarasi endabu, nere oyoyerinete, okorokwa Omwegeni, n'Oyo bw'ekeene, nere as'oboronge akogamba nagokora esegi. 12 Namaiso aye igarenge buna ogwoka kw'omorero, naende igoro as'omotwe oye chigutwa chinyinge; nere nare nerieta ririkire, ritamanyiri nomonto tatiga ere omonyene. 13 Nere obekeirwe eanga yatobekirwe as'amanyinga: nerieta riaye iga akorokwa Ring'ana ria Nyasaye, 14 Nemeganda ere igoro ekamotunya, barinete chibarasi chindabu, naende chibekire egatani engiya endabu. 15 Nomoro omwoge okarua as'omonwa oye, abiake ebisaku as'oyio: nere nabagambie as'enyimbo y'ekioma: nere otachire ekemitero ki'edivai y'obotindi bw'endamwamu ya Nyasaye Omobui. 16 Nere nare nerieta riarikirwe as'eanga yaye, Omoruoti Bw'Abaruoti, Nomonene Bw'Abanene. 17 Nkarora rilaika rinde riteneine as'erioba; okorera as'eriogi rinene, ogochitebia chinyoni chionsi chikoiruruka gati gati y'igoro, Nchuo mosangerereke as'omoyega o Nyasaye omonene; 18 monyare koria chinyama chi'abaruoti, nechinyama chi'abatang'ani b'esegi, nechinyama chi'abanto bare nechinguru, nechinyama chie chibarasi, nechi'abanto bagochirina, nechinyama chi'abanto bonsi, ababiare nabasomba, abake nabanene. 19 Nkayerora eng'iti, nabaruoti b'ense, nemeganda yabo, basangererekanire gokora esegi nere oikaransete igoro y'ebarasi eria, nemeganda yaye. 20 Eria eng'iti ekabwatwa, nomobani bw'oborimo ore amo nere, ere oyokorete ebikone as'obosio bwaye, as'ebio igabang'ainete abanto baria babwatete keria ekemanyererio ki'eng'iti, nabarabwo abasasimete esanamu yaye: abwo babere bakarutwa bare moyo ase riria riera ri'omorero ogwoka bw'ekebiriti: 21 nabaria batigarete bagaitwa nomoro oye ere oyoikaransete igoro as'ebarasi eria, okorua as'omonwa oye: nechinyoni chionsi chikaigota nechinyama chiabo.
1 Nkarora rilaika rigoika korwa igoro, omonyene ekeigorero ki'engoro, nekenyuri ekenene as'okoboko kwaye. 2 Akayebwata enchoka, eria enchoka ya kare, ere Engenki, Saitani, akayesiba emiaka elifu, 3 akayetuguta as'engoro, akayebeka ekemanyererio igoro asere, erinde tenyara kobang'aina ebisaku naende, goika emiaka eria elifu eere; na nyuma as'aya nemogwenerete esiborwe ekero egeke, 4 Nkarora ebirogo bi'obonene, bagaikaransa igoro asebire, bakaegwa ekina: nkarora emeika yabo abanachetwe emetwe as'engecho y'obogani bwa Yesu, nas'engecho ye ring'ana ria Nyasaye, nabwo batasasimete eng'iti, nonya nesanamu yaye, gose kobwata ekemanyererio kiaye as'amasio abo, gose as'amaboko abo; bakaba moyo, bakamenya amo na Kristo emiaka elifu. 5 Nebitondo biatigarete tibiaba moyo, goika ekaera eria emiaka elifu. Okwo nakwo okobokigwa kwe ritang'ani. 6 Nare negesio, omochenu, oyore nensemo as'okobokigwa kwe ritang'ani; igoro as'abwo amakweri akabere tari nechinguru, korende nababe abakuani ba Nyasaye na Kristo, nabarabwo nabagambe amo nere emiaka elifu. 7 Neria emiaka elifu keraere, Saitani nasiborwe arwe as'egesibo kiaye, 8 nere nasoke kobing'aina ebisaku bire ase chinsemo inye chi'ense, Gog na Magog, kobasangereria as'esegi: okobara kwabo iga kore buna omokenye o 'nyancha. 9 Bakarina igoro as'obogare bw'ense, bakanaria omochie bw'abachenu, nomochie bwanchire: omorero ogaika korwa igoro korwa ase Nyasaye, okabaria. 10 Noria omogenki, oria obang'ainete, akarutwa ase riera ri'omorero nekebiriti, as'ere eria eng'iti noria omobani bw'obonmo. Nabaromwe omobaso nobotuko goika kare nakare. 11 Nkarora ekerogo ki'obonene, ekerabu, ekenene, nere oyoikaransete igoro asekere; ense n'igoro chigatama as'obosio bwaye, n'aase abo tarorekana. 12 Nkarora ebitondo ebinene nebike, biteneine as'obosio bwa Nyasaye; chibuku chikamanorwa: ebuku ende ekamanorwa ere y'obogima; ebitondo bikagambigwa as'amang'ana arikire ase chibuku, koreng'ana nogokora kwabo. 13 Enyancha ekabirusia ebitondo bire ime yaye, Amakweri ne chimbera chikabirusia ebitondo bire ime yabo: bakagambigwa ker'omonto koreng'ana nogokora kwabo. 14 Amakweri ne chimbera chigatugutwa ase riria riera ri'omorero. Aya naro amakweri akabere, engecho yaye enyancha y'omorero. 15 Na kerabe omonto tarorekaneti orikire as'ebuku y'obogima, narutwe ase riera riria ri'omorero.
1 Nkarora igoro ayia nense enyia: naki igoro ye ritang'ani nense ye ritang'ani chiatiekire goeta; nonya nenyancha teri naende. 2 Nainche Yohana nkayorora omochie oria omochenu, Yerusalemu omoyia, ogoika korwa igoro ase Nyasaye, obekirwe ang'e buna omoriakari bw'enyangi oyotiekire korosigwa as'omosacha oye. 3 Nkaigwa eriogi rinene rikorua igoro rigoteba, Rora, obomenyo bwa Nyasaye mbore amo na mwanyabanto, nere namenye amo nabarabwo, nere nabe Nyasaye obo. 4 Nere natinyie kera ririga as'amaiso abo; amakweri takobao naende; nonya nokweumia, nonya nokorera, nonya nobororo tibokobao naende: ekiagera amang'ana eritang'ani atiekire goeta. 5 Nere oyoikaransete igoro as'ekerogo ki'obonene agateba, Rora, nakorire onsi koba amayia. Agantebia, Rika; naki aya namang'ana ay'ekeene, nay'obwegeni. 6 Agantebia, Atiekire koba. Inche n'Alifa n'Omega, omochakano nomoerio. Inche nimoe omonyene erang'o amache ay'ensoko y'amache obogima, bosa. 7 Ere oyorabue nayanyore aya; nainche nimbe Nyasaye oye, nere nabe Omwana one. 8 Korende aboba, nabatancheti, nabagokora bobe, nabaiti, nabatomani, nabarogi, nabwo bagosasima chisanamu, nab'oborimo bonsi, ensemo yabo nase riria riera rigwoka omorero nekebiriti. Aya naro amakweri akabere. 9 Agacha oyomo bwa baria amalaika atano nabere oyorenge nebitabo biria bitano nabibere bichire aria amaakwa atano nabere ay'omoerio; agakwana nainche, ogoteba, Nchuo aiga, nainche ninkworokie oria omoriakari, omokungu bw'Emanwa y'eng'ondi. 10 Akambogoria as'Omoika goika egetunwa ekenene, egetambe, akanyorokia omochie oria omochenu, Yerusalemu, ogoika korwa igoro ase Nyasaye, 11 oyore nobonene bwa Nyasaye: nokomekameka kwaye kwarenge buna rigena rire nerigori rinene, buna rigena ria yasipi, buna ekeraori: 12 oyorenge noruaki oronene, norotambe; oyore nebisien ikomi nabibere, nase biria ebisieri amalaika ikomi nabere; namarieta arikire, korende namarieta ebisaku ikomi nabibere bi'abana b'Isiraeli. 13 Ensemo ya mocha ebisieri bitato; nensemo ya irianyi ebisieri bitato; nensemo ya sugusu ebisieri bitato; naende ensemo ya bosongo ebisieri bitato. 14 Noruaki rw'omochie rwarenge amaroso ikomi nabere, n'igoro yabo amarieta abatomwa ikomi nababere b'Emanwa y'eng'ondi. 15 Nere oyokwanete nainche igarenge nemoti y'ethahabu anyare korenga omochie nebisieri biaye noruaki rwaye. 16 Noria omochie noyo bw'omoraba, nobotambe nobogare bwaye iga boreng'aine. Akayorenga omochie as'emoti eria, chimaili elifu eyemo nachimia isano; obotambe, nobogare bwaye, nakogenda igoro kwaye areng'aine. 17 Akarorenga oruaki rwaye, nechiwari emerongo etano nebere naibere, as'ekerengo kia mwanyabanto, engecho yaye, eki'amalaika. 18 Noboagacho bw'oruaki roria nobwa yasipi: nomochie oria nethahabu engiya, omogwekano bw'ekerore ekiya. 19 Namaroso ay'oruaki rw'omochie bwarosigwe ase ker'amagena aya rigori rinene. Oboroso bwe ritang'ani yasipi; obwa kabere sapfiro, obwa gatato kelkedo; obwa kane smaragdo; 20 obwa gatano sardonuksi; obwa gatano narimo sardio; obwa gatano nakabere krusolitho; obwa gatano nagatato berullo; obwa kianda topazio; obwa ikomi krusopraso; obwa ikomi nomo obwa huakintho; nobwa ikomi nakabere amathusto. 21 Nebisieri ikomi nabibere nechiruru ikomi naibere: ker'egesieri neruru eyemo. Nenchera y'omochie nethahabu engiya buna ekerore getagotanga omobaso. 22 Nainche tinarora hekalu imeo; naki Omonene Nyasaye Omobui, n'Emanwa y'eng'ondi, ne hekalu yaye. 23 Nomochie oria torigetie erioba nonya nomotienyi bimoreke: naki obonene bwa Nyasaye bwabekire amasase, netaya yaye n'Emanwa y'eng'ondi. 24 Nebisaku abwo bakonyirwe nabatare as'amasase aye: nabaruoti b'ense nabarete obonene bwabo nogosika kwabo imeo. 25 Nebisieri biaye tibigosiekwa nonya ng'ake 'mobaso (naki agwo tibori obotuko): 26 Nabarete obonene nogosika kw'ebisaku imeo. 27 N'imeo tigegosoa nonya ng'ake kende gionsi kere ekioro, gose ere ogokora amabe noborimo: tatiga baria barikire as'ebuku y'obogima y'Emanwa y'Eng'ondi.
1 Akanyorokia oroche rw'amache ay'obogima, rokomekameka buna ekeraori, rokorua as'ekerogo ki'obonene bwa Nyasaye, nekia Emanwa y'eng'ondi, 2 gati gati y'enchera enene yaye. Ensemo nensemo ende y'oroche, norenge omote bw'obogima, okwama amatunda ikomi nabere, okorua amatunda aye ker'omotienyi: namato omote oyio ayakobigwenia ebisaku. 3 Okoragererigwa konde gwonsi tigokobao naende: nekerogo ki'obonene kia Nyasaye neki'Emanwa y'eng'ondi nakebe imeo: nabasomba baye nabamokorere; 4 Nabarabwo nabamorore obosio bwaye; nerieta riaye naribe as'amasio abo. 5 Obotuko tibokobao naende; gose tibarigeti etaya gose amasase erioba; naki Omonene Nyasaye obabekire amasase, nabarabwo nabagambe goika kare nakare. 6 Agantebia, Aya namang'ana ay'obwegeni nay'ekeene: Omonene Nyasaye bw'ababani abachenu atomete rilaika riaye koborokia abasomba baye amang'ana ayagwenerete koba bwango. 7 Rigereria, ninchiche bwango. Nare negesio ere oyoyabwatete amang'ana ay'obobani bw'ebuku eye. 8 Inche Yohana, ninche inde omonyene naroche aya nakoyaigwa. Ngachia koyaigwa nakoyarora nkagwa nsasime as'obosio bw'amagoro rilaika riria rianyorogetie aya. 9 Agantebia, Rigereria, tokora iga: inche nomosomba omogisangi oo amo nabamino ababani, n'amo na baria babwatete amang'ana ebuku eye: mosasime Nyasaye, 10 Agantebia, Timoyabeka ekemanyererio amang'ana obobani bw'ebuku eye, naki ekero ekio giaikire. 11 Omonyene ogokora bobe nakore obobe naende; nomonyene eubi nabe neubi naende, nomonyene oboronge nakore oboronge naende, nomochenu abe omochenu naende, 12 Rigereria, nachire bwango: neng'eria yane igere amo nainche, komoa ker'omonto buna emeremo yaye ere. 13 Ninche Alifa n'Omega, omochakano nomoerio, oyo bwe ritang'ani noyo bw'omoerio. 14 Mbare negesio abasibirie chianga chiabo, abwo nabanyare koyogendera omote bw'obogima, nagosoa omochie as'ebisieri biaye. 15 Korende isiko nchireo chisese, nabarogi, nabatomani, nabaiti, nabwo bagosasima chisanamu, na ker'omonto bwanchete oborimo nakobokora. 16 Inche Yesu natomire rilaika riane kobatebia inwe amang'ana ayio ase chikanisa. Inche ninche ritina noroiboro rwa Daudi, eria eng'enang'eni ekoraba, ya mambia. 17 N'Omoika nomoriakari bw'enyangi bagoteba, Nchuo. Nere oyokoigwa atebe, Nchuo. Nere oyore nerang'o nache; oyobwanchete ayabogori amache obogima bosa. 18 Namotebirie ker'omonto okoyaigwa amang'ana obobani bw'ebuku eye, Omonto onde bwonsi karayamente, Nyasaye namomentere amaakwa ayarikire as'ebuku eye: 19 nomonto onde bwonsi kararusie ensemo y'amang'ana obobani bw'ebuku eye, Nyasaye narusie ensemo yaye as'oria omote bw'obogima, nas'oria omochie omochenu, oyio amang'ana aye arikire as'ebuku eye. 20 Ere omonyene okoyateba aya otebire, Nabo: ninchiche bwango, Amin: oche Omonene Yesu, 21 Obuya bw'Omonene Yesu Kristo bobe amo nainwe imwensi. Amin.