Okfu, l'anụ ndzụ
1 Lẹ mbụlembu bẹ onye ono, bụ Okfu Chileke nọduhawaa. Okfu ono bẹ yẹle Chileke nọhaakwa. Okfu ono bụru Chileke. 2 Onye ono bẹ yẹle Chileke shilewho eshi mbụlembu nọduta. 3 Ọo l'ẹka iya bẹ Chileke shi mee iwhe lile. Ọ tọ dụ-zhidua iwhe Chileke meru ọwhu o meru lẹbe ọ nọ iya. 4 Ọo ya bẹ ndzụ shi l'ẹka, ọ bụru ndzụ ono bẹ bụ iwhoro dụru ndiwhe. 5 Iwhoro ono l'echi l'ẹkpuroochi, ẹkpuroochi ono ta adụje ike sọpyabe iwhoro ono. 6 O nweru nwoke ọbu Chileke yeru t'ọ bya. Ẹwha iya bụ Jọnu. 7 Iwhe ọ byarụ bụ t'ọ bya ekfua nke iwhoro ono. Ọ byarụ t'ọ bya ekfuaru iya ọha lile, nke ọwhu whẹ l'a-nụ ozhi ono kweta. 8 Ọ tọ kwa yẹbedua, bụ Jọnu bẹ bụ iwhoro ọbu. Iwhe ọ byarụ kwa t'ọ bya akarụ ndiwhe g'iwhoro ono dụ dụ. 9 Ọo iwhoro ono bẹ bụ ọkpobe iwhoro ọwhu bụ iya byarụ l'eli-mgboko-o bya echilahaaru ndiwhe l'owhu. 10 Onye ono, bụ Okfu Chileke ono nọduhawaa l'eli-mgboko-o. Ọ bụru l'ẹka iya bẹ Chileke shi mee mgboko, ọle ndiwhe ta ahụbedu iya ama. 11 Ọ byakfutaru ndu nkiya, ndu nkiya ono jịka lẹ whẹ ta anatadụ iya. 12 Ọle iwhe bụ ndu natarụ iya nụ, mbụ ndu woru onwowhe ye iya l'ẹka, ndu ono b'ọ meekwaru tẹ whẹ bụru ụnwu Chileke. 13 Abụbu ono, whẹ bụ ụnwu Chileke ta abụkwa gẹ l'aanwụje madzụ b'a nwụru whẹ, tọ bụ l'ọo ẹgu nwa meru a nwụa whẹ, tọ bụ lẹge madzụ rịtaru iya l'obu, onye nwụru whẹ nụ bụakwa Chileke. 14 Tọ dụ iya bụ lẹ Okfu ono abya abụru madzụ, anyi l'iya buru eburu. Anyi gude ẹnya anyi whụa ọdu-biribiri nkiya, bụ ọdu-biribiri rwuberu iya nụ eshi-ọwhu ọ bụ Nwa nwoke lanụ, Nna iya bụ Chileke nwụtaru. Iwhe bụlewho ndzụ iya bụ eze-iwhe-ọma yẹle ire-lanụ. 15 Jọnu bya ekfulahaa nke Nwa Chileke ono arya iya aryarya asụje: “O nokwa onye ọbu, mu shi ekfuru unu okfu iya nteke ono, mu sụru unu: ‘Onye l'ee-bekochaa bya bẹ kakwa mu l'ishi ka mu l'ọkpa, o noo nkele a bya l'aanwụ-deshia mbẹdua, onye ono nọduhawaa nụ.’ ” 16 Eze-iwhe-ọma nkiya kpọru gẹ l'aaa-nọ atụ ọnu iya. Ọ bụru l'eze-iwhe-ọma iya ono bẹ l'ooshije emeru anyi lile eze-iwhe-ọma; o megee ya, ya emeru ọdo tukobe iya. 17 Ọo l'ẹka Mósisu bẹ Chileke shi tụaru anyi iwu. Eze-iwhe-ọma yẹle ire-lanụ shikwanu l'ẹka nke Jisọsu Kuráyisutu bya. 18 O to nwedu onye gudejebuwa ẹnya iya whụ Chileke. Ọo Nwa lanụ ono yẹle Chileke bụ Nna tụgbaru bụru nnanụ ọkpobe iya bẹ bụ onye meru anyi marụ gẹ Chileke dụ dụ.
Ozhi Jọnu onye l'emeje baputizimu
19 Tọ dụ iya bụ, ndu Ju Jerúsalẹmu zhi ndu l'agbajẹ ẹja nụ Chileke mẹe ndu ishi l'eri Lívayi tẹ whẹ je ajịta Jọnu sụ iya: “?Ọo onye b'ị bụ?” 20 Jọnu yelekwaru whẹ who ọnu; ọ tọ jịkakwa l'iya te ekfuduru eyeru whẹ; o kfujalekwaru whẹ iya whọ sụ: “Ọ tọ kwa mbẹdua, bụ Jọnu bẹ bụ Onye-Ndzọta ọbu Chileke kweru ụkwa l'iya l'e-zhi t'ọ bya.” 21 Whẹ jị iya sụ iya: “?Ọ bụhunuru onye b'ị bụ? ?Ọo ghu bụ Eláyija?” Jọnu sụ whẹ: “Wawa; mu ta abụkwa Eláyija.” Whẹ jịpyabe iya ọdo sụ iya: “?Ọo gụbedua bụ onye nkfuchiru Chileke ọbu anyi l'ele ẹnya iya?” Ọ sụ whẹ: “Wawa.” 22 Whẹ sụ iya: “?Ọ bụ-zhihunua onye b'ị bụ? Yeru anyi ọnu t'anyi marụ iwhe anyi l'e-je ekfuru ndu zhiru anyi. ?Ndẹ-zhihunua g'i kfuru okfu ẹhu ghu?” 23 Jọnu gude okfu ono, Ayizáya deru l'ẹkwo yeeru whẹ ọnu sụ: “Ọo mbẹdua bụ onye ono olu mu l'echi mkpu l'echi-ẹgu asụje: ‘Unu mee ụzo Onye-Nwe-Ọha l'e-shi t'ọ kfụru nsụmini!’ ” 24 O noo ya, ndu ono byarụ ọjita Jọnu iwhe ono kwa ndu Fárisii bẹ zhiru whẹ iya nụ. 25 Whẹ jịa Jọnu sụ: “Ọ -bụru l'ị tị bụdu Kuráyisutu, tị bụ Eláyija, tị bụkwawho onye nkfuchiru Chileke, ?ọ nwụhunua agha o gude l'iimeje baputizimu?” 26 Jọnu sụ whẹ: “Ọo mini bẹ mbẹdua gude eme baputizimu. Ọle o nweru onye unu l'iya tso nọdu, unu l'ẹte amaa. 27 Ọo ya bụ onye ọbu l'e-be bya, mbụ onye ka mụbe Jọnu shii, ka mu iya nke ọwhu mu l'edzua gẹ mu l'a-tọfu eri akpọkpa iya.” 28 Ẹka iwhe lile ono mekotaru bụ lẹ Bétani l'azụ ẹnyimu Jọ́danu azụ iya ọwhu, bụ ẹka Jọnu shi anọduje eme ndiwhe baputizimu.
Jisọsu bụ Nwatụru Chileke
29 O be echile iya, Jọnu whụa Jisọsu gẹ l'ooje abyakfuta iya, ọ sụ: “Unu lekwa onye ọbu bụ Nwatụru Chileke. Ọ kwa yẹbedua l'e-gude onwiya gbaa ẹja nwefukota iwhe-dụ-ẹji ndiwhe l'owhu meru. 30 Sụ l'ọ kwa iya bụ onye ono, mu kfuru okfu ẹhu iya nteke ono mu sụru unu l'o nweru onye l'e-be byanụ. L'onye ọbu kakwa mu l'ishi ka mu l'ọkpa, o noo l'aabya l'anwụdeshia mbẹdua bụ Jọnu, onye ono nọduhawanu. 31 Sụ lẹ mbẹdua te eshikwa marụ onye ọbu; ọle ọo nggẹ ndu Ízurẹlu amarụ iya bẹ meru g'o gude mu bya egude mini eme baputizimu.” 32 Jọnu kfukwaawho iwhe o gude ẹnya iya whụa sụ: “Mu whụru Ume Chileke g'o shi l'imigwe dụ-zhiawho g'ọo ndo bya anọdu iya l'ẹhu. 33 Mbẹdua te eshikwa marụ iya, ọle onye ono, zhiru mu tẹ mu bya egude mini mee baputizimu sụru mu: ‘Ọo onye ono l'ịi-whụ gẹ Ume Chileke shi l'imigwe bya anọdu iya l'ẹhu bụ iya bụ onye ọbu l'e-gude Ume-Dụ-Nsọ eme baputizimu.’ 34 Sụa, ntaa bẹ mu gudewaa ẹnya mu whụa ya, mu kfụkwaruwho ekfu l'ọo onye ono bụ Nwa Chileke ọbu.”
Ndu mbụ, l'etso Jisọsu
35 Ọ byakwa ebe echile iya, Jọnu kfụkwaruwho l'ẹka ono yẹle ụmadzu labọ lẹ ndu l'etso ụzo iya. 36 Ọ whụa Jisọsu gẹ l'ọoghata ọ sụ: “Unu lekwa onye ọbu bụ Nwatụru Chileke ọbụ.” 37 Tọ dụ iya bụ l'ụmadzu labọ ono, l'etso iya nụ anụlewho iwhe ono o kfuru, whẹ haa yẹbe Jọnu tsolahaa Jisọsu. 38 Jisọsu bya aghachi whụa whẹ gẹ whẹ l'etso iya. Ọ sụ whẹ: “Ọo gụnu bẹ unu l'achọ?” Whẹ sụ iya: “Rábayi, ?ọo awee bẹ l'ịiraduje?” Iwhe Rábayi fụtaru bụ O-zhi-iwhe. 39 Ọ sụ whẹ: “Unu byanụ bya awhụ iya.” Tọ dụ iya bụ lẹ whẹ etsoru iya je awhụ ẹka ọbu l'ọoraduje. Whẹ l'iya nọfufuwaro mbọku ono. Nteke ono, whẹ byarụ ono bụ l'oke-eswe-urwẹnyashi. 40 Onye lanụ l'ime ụmadzu labọ ono, nụru okfu Jọnu tsolahaa Jisọsu bụ Ánduru, nwune Sáyịmonu Pyita. 41 Ánduru vuru ụzo lọbaru je achovuada nwune iya Sáyịmonu sụ iya: “Anyi whụakwaru Mezáya ọbu.” Iwhe Mezáya bụkwanu bụ Kuráyisutu. 42 O duta Sáyịmonu dutashiaru Jisọsu. Jisọsu lee Sáyịmonu ẹnya sụ iya: “Ọo ghu bụ Sáyịmonu nwa Jọnu. Iwhe l'aa-nọje eku ghu ntaa bụ Kífasu” bụ iya bụ Pyita. Iwhe Pyita fụtaru bụ “Ẹwhuru.”
Jisọsu l'eku Fílipu yẹle Natániyelu
43 O be echile iya, Jisọsu chịa l'iya l'e-je Gálili. Ọ whụa Fílipu bya asụ iya: “Tsoru mu.” 44 Fílipu ono bụ onye Bẹtusáyida. Ọ kwawhọ Bẹtusáyida ono bụ ẹka a nwụru Ánduru yẹle Pyita. 45 Fílipu kwe iya hm, bya eje achọo Natániyelu chọ-vu sụ iya: “Anyi whụakwaru onye ọbu Mósisu deru okfu ẹhu iya l'ẹkwo iwu, tẹmenu ndu nkfuchiru Chileke dekwaa ya whọ. Ọo ya bụ onye ọbu bụ Jisọsu onye Názaretu nwa Jósẹfu.” 46 Natániyelu tụfulewho ọnu sụ iya: “?Oo nwezhiaru iwhe dụ ree l'e-shi lẹ Názaretu?” Fílipu sụ iya: “Byanụ bya awhụ l'ẹnya ghu.” 47 Jisọsu whụlewho gẹ Natániyelu l'eje abyakfuta iya, ọ sụ: “Onye ọwaa bụ ọkpobe onye Ízurẹlu, l'ẹte abụa onye ntuwhu.” 48 Natániyelu sụ iya: “?Ndẹhunu g'i meru marụ mu?” Jisọsu sụ iya: “Mu whụhaadaru ghu rọo nteke whọ i shi nọdu l'ukfu figu whọ tẹmenu Fílipu bya ekua ghu.” 49 Natániyelu sụ iya: “O-zhi-iwhe, ọo gụbedua bụ Nwa Chileke ọbu. Ọo gụbedua bụ Eze ndu Ízurẹlu ọbu.” 50 Jisọsu sụ iya: “?Ọ waa l'ọo lẹ mu sụru ghu lẹ mu whụru ghu l'ukfu figu whọ kpatarụ iwhe i kwetaru? Ii-bekwaroo whụbaa iwhe ọdo kabaa ọwa shii.” 51 Sụ: “Iwhe mu l'akarụ unu bụ: unu l'a-whụ g'igweli gheru ọnu, whụkwaawho gẹ ndu ojozhi Chileke l'enyiba enyiba l'imigwe, enyizetakwawho enyizeta awụ awụ-kfuta Abụbu-Ndiwhe.”
Okee nwanyị lẹ Kena
1 A nọlewho ujiku labọ, o be lẹ nke ẹto iya, o nweru nwanyị, l'eekee lẹ mkpụkpu Kena ọwhu dụ lẹ Gálili. Ne Jisọsu nọdukwawho l'ẹka ono. 2 Jisọsu yẹle ndu l'etso ụzo iya jee ẹka ono, l'eekee nwanyị ono, nkele e kukwanuru whẹ tẹ whẹ bya. 3 Ọ bya ebe nteke a ngụ-geeru mmẹe, a gataru ọ gvụ, ne Jisọsu jekfu iya je asụ iya: “Ndu-a te enwehekwa mmẹe.” 4 Jisọsu sụ iya: “Ha! Nwanyị-a; ?ọo mbẹdua b'ọ dụru? Oge nteke mu l'e-me iwhe ono, ẹnya dụ ghu teke erwudua-o.” 5 Ọle ne iya sụlekwaru-a ndu l'akwashị nri l'ụlo ono: “Iwhe bụ iwhe ọ sụ-zhiaru t'unu mee, t'unu melekwawho iwhe ọbu.” 6 O nweru whọ mgbaja ishii, e gude ụrwa kpụa gvugeeru l'ẹka ono, ndu Ju l'egudeje eme nsọ ọsafu mmerwu. Iwhe l'alajẹ lẹ mgbaja ono nnanụ bụ galọnu ụkporo je l'ụkporo l'iri. 7 Jisọsu sụ ndu nkwashị nri ono: “Unu kujishia mgbaja ono lẹ mini g'ọ hakọta.” Whẹ kujishikota iya ọ kpaa l'ogboromọnu mgbaja ono. 8 Ọ sụ whẹ: “Ngwa, unu gbatawa iya rọo ntaa je anụ onye ono bụ iya bụ ishi l'eriri-a.” Whẹ gbata iya je anụ iya. 9 Onye ishi l'eriri ono bya etsua ọnu lẹ mini ono ghọwaru mmẹe. Ọ tụfu iya ẹhu mbụ ẹka ẹgube mmẹe ono shihunu. Ọlewho ndu ono, l'akwashị nri, bụ whẹ kuru mini ono marụ ẹka o shi. Ọo ya bụ, ọ bya agbaku nwoke ono, byarụ ọlu nwanyị ono oku 10 sụ iya: “Ibe ghu l'evujeedaa ụzo pashịa mmẹe ọwhu dụ ree a ngụada, nteke mmẹe dụlewho madzụ l'ẹnya tẹmenu a pashịde ọjogvu ọjogvu mmẹe. Ọ waa bẹ i gbee kpacha mmẹe ọwhu dụ ree byeye ntaa!” 11 Jisọsu meru iwhe-awhụrulenya mbụlembu ono, o meru lẹ Kena Gálili, mee ya gude goshi ọdu-biribiri nkiya. Ndu l'etso ụzo iya kweta nkiya. 12 E megelewho iwhe ono, Jisọsu, mẹe ne iya, mẹe unwune iya nke nwoke, mẹe ndu l'etso ụzo iya tụgbua jeshia Kapániyọmu. Whẹ je anọo nwidzudzu ono l'ẹka ono.
Jisọsu l'achịshi ndu l'agba nghọ l'eze-ụlo Chileke
13 Oge ono, ndu Ju l'erije, bụ O-je-ghata dụwaa ntse, Jisọsu tụgbua jeshia Jerúsalẹmu. 14 O rwua, ọ bya abahụ l'ime eze-ụlo Chileke dụ lẹ Jerúsalẹmu. Ọ whụa ndu nọ l'ẹka ono ere eswi mẹe atụru mẹe ndo, whụkwaawho ndu l'agbanwe okpoga gẹ whẹ nọkwawho l'ẹka ono agbanweshi okpoga l'eli teburu whẹ. 15 Ọ bya achịta ụdo meta ẹchachi gude chịkashikota whẹ gẹ whẹ ha l'ime eze-ụlo Chileke ono, chịkashigee, mẹe atụru, mẹe eswi ono. Ọ bya aghakashịa okpoga ono, ndu ono l'agbanweshi, kpubegee teburu whẹ iwhu l'alị. 16 Ọ bya abaarụ ndu ọwhu l'ere ndo mba sụ whẹ: “Unu chịfu iwhe ono l'ẹka-a. Ọ tọ dụ ụlo Nna mu bẹ unu l'e-dobe ụlo aswa.” 17 Ndu l'etso ụzo iya bya anyata iwhe ono e deru l'ẹkwo-okfu Chileke, sụru: “Obu, mu yeru ụlo ghu l'enwu whuruwhuru g'ọo ọku, ọ bụru n-yemobu ono l'e-ri ishi mu.” 18 Ọo ya bụ, ndu Ju sụ iya: “?Ndẹnu iwhe l'iimeru goshi anyi, anyi l'e-gude marụ l'iwhe ono, i meru b'i meru l'orwuberu iya?” 19 Jisọsu sụ whẹ: “Unu kutsushia eze-ụlo Chileke-e, ọo ujiku ẹto kpụ bẹ mu l'e-gude tụkwaa ya, ya adụ-whu azụ lẹge o shihawaa dụ.” 20 Ọo ya bụ, ndu Ju ono sụ iya: “?Ị sụru l'ọo ujiku ẹto bẹ l'ii-gude tụ-whu eze-ụlo-ọ azụ, mbụ eze-ụlo, a tụru ụkporo awha labọ l'awha ishii-a b'ị sụru l'ịi-tụ ujiku ẹto?” 21 Ọle eze-ụlo Chileke, Jisọsu l'ekfu okfu iya ọbu bẹ bụ onwiya gẹdegede. 22 O noo iwhe meru ọ nwụhu-gee, Chileke mee ya o shi l'ọnwu teta nọdu ndzụ, ndu l'etso ụzo iya nyata l'ookfujehawaru iwhe ono. Ọ kwa iya bụ lẹ whẹ ekweta iwhe e deru l'ẹkwo-okfu Chileke, kwetakwawho iwhe Jisọsu kfuru.
Jisọsu marụ onyemonye
23 Nteke ono, Jisọsu nọ lẹ Jerúsalẹmu gẹ l'eerikwadu oge O-je-ghata ono bẹ igweligwe madzụ kwetakwaru nkiya. Iwhe meru iya bụkwaru lẹ whẹ whụkotaru iwhe-awhụrulenya l'oomegbabe. 24 Ọle Jisọsu te egudedu ire whẹ ẹka nke l'ọ makọtaru gẹ onyenọnu dụ dụ. 25 Ọ tọ bụdu nke woo t'a bya akọodaru iya gẹ madzụ dụ dụ, eshi-ọwhu yẹbedua l'onwiya makọtaru iwhe dụ madzụ l'obu.
Nikodímọsu l'ejekfu Jisọsu
1 O nweru nwoke lanụ ọbu, ẹwha iya bụ Nikodímọsu. Nikodímọsu bẹ tso l'ọgbo ndu Fárisii. Ọ bụkwaruwho onye ishi ndu Ju. 2 Ọ bya ebe l'ẹnyashi ujiku lanụ, nwoke ono tụgbua byakfuta Jisọsu bya asụ iya: “O-zhi-iwhe, anyi makwarụa l'i bụ onye l'ezhije mmamagụ, tẹmenu ọ bụru Chileke yeru ghu t'ị bya. Ọ tọ dụdu onye fụru ome eze iwhe lile-e l'iimegbabe l'abụa lẹ Chileke kfụru onye ọbu l'azụ.” 3 Jisọsu sụ iya: “Iwhe meru eme bụ ọwa, ọ -bụru l'a ta anwụdu madzụ ọdo bẹ onye ọbu l'a-byakwaa l'e-tso l'onye Chileke bụ eze lẹ ndzụ iya.” 4 Nikodímọsu sụ iya: “?Ndẹe gẹ l'ee-shi nwụa madzụ ọdo nteke ọ kahụwaru akahụ? ?L'ọo-bahụ-whu azụ l'ẹwho ne iya, je anọdu t'a nwụa ya nke ugbo labọ?” 5 Jisọsu sụ iya: “Iwhe mu l'eme t'o doo ghu ẹnya bụ: ọ -bụru l'eete egudedu mini yẹle Ume-Dụ-Nsọ nwụa madzụ ọdo bẹ onye ono l'a-byakwaa l'a-bụ onye Chileke bụ eze lẹ ndzụ iya. 6 Onye madzụ nwụru mẹe iwhe shi l'ẹka madzụ bụkota nke madzụ. Onye Ume-Dụ-Nsọ nwụru mẹe iwhe shi l'ẹka Ume-Dụ-Nsọ, tụkota bụru nke Ume-Dụ-Nsọ. 7 T'ọ bọ dụkwa ghu biribiri lẹ mu sụru l'aanwụ-whuje unu azụ ọdo. 8 Whẹrewhere l'anọje ewhe ala ẹka dụ iya mma, gụ anụlewho ụkporo iya, ọle ị tị makwanụ ẹka o shi, tị ma ẹka l'oowhe ala, o nokwawho g'ọ dụ iwhe bụ onye Ume-Dụ-Nsọ nwụru ndono.” 9 Nikodímọsu sụ iya: “?Ndẹ-zhia g'ẹgube iwhe ono l'e-me nwụa?” 10 Jisọsu sụ iya: “?Ị bụ onye l'ezhi iwhe lẹ Ízurẹlu, iwhe dụ nno te edo ghu ẹnya. 11 Iwhe mu l'akarụ ghu bụ, l'ọo iwhe anyi marụ bẹ anyi l'ekfuje, ọ bụru iwhe anyi whụru l'ẹnya bẹ anyi l'atụje ọnu iya, ọle unu te ekwetadu lẹ nke anyi bụ iya. 12 Mbụ sụ, ọ -bụru lẹ mu kfuru unu iwhe nke mgboko-o, unu te ekweta iya, ?ndẹkwanu g'unu l'e-shi kweta mẹ mu kfuderu unu g'iwhe nke imigwe dụ. 13 Ọ tọ dụdu onye bahụjeru l'imigwe t'a gụfulewho onye ono, shi l'imigwe bya, bụ iya bụ mbẹdua, bụ Abụbu-Ndiwhe. 14 Ọ kwa gẹ Mósisu gudeje mkpụru wolia agwọ ono, e gude ope mee l'echi-ẹgu, bụ g'e wolifutaje Abụbu-Ndiwhe, 15 nke ọwhu bụkwanu onye woru onwiya ye iya l'ẹka, onye ono enweru ndzụ tututu-mịmimi. 16 “Lẹ Chileke bẹ yenukaru ndiwhe obu, yetabe whẹ iya nke ọwhu ọ nụru Nwa lanụ, o nwe kpụ nke ọwhu bụkwanu onye wowaru onwiya ye Nwa iya ono l'ẹka t'onye ọbu ba ala l'iyi. O chia ndzụ tututu-mịmimi bẹ onye ono l'e-nwe. 17 Iwhe Chileke kwoberu zhi Nwa iya t'ọ bya lẹ mgboko-o ta abụkwa t'ọ bya ekpelahaa ndiwhe ikpe. Iwhe ọ byaturu kwa t'e shi l'ẹka iya dzọo ndiwhe. 18 Onye nọ iya l'ẹka bẹ l'ẹte anmakwa ikpe, obekwanu l'onye l'ete ekwee woru onwiya ye iya l'ẹka b'e gbee nmahawarọ ikpe, o noo nkele onye ono te ekwetadu nke Nwa Chileke ono, bụ Nwa lanụ. 19 Gẹ Chileke l'e-gude bua ikpe ono bụ: L'iwhoro ono byarụ lẹ mgboko-o, ndiwhe gbee haa iwhoro ono hatachia ẹkpuroochi, nke l'ọo l'iwhe whẹ l'eme bụkota ejo iwhe. 20 Iwhe meru nụ bụkwaru l'onye l'eme ejo iwhe l'akpọje iwhoro ashị, onye ono te eshitajedu ụzo ẹka iwhoro dụ: a nọnyadawho ejo iwhe ọbu, l'oomegbabe gbafụta iwhe. 21 Ọle onye l'eme ire-lanụ l'afụtaje bya anọdu l'ẹka iwhoro dụ, nke ọwhu l'aa-whụ-dzuru iya marụ l'iwhe l'oome bẹ ẹka Chileke dụkwawho.”
Jisọsu yẹle Jọnu onye l'emeje baputizimu
22 E megelewho, Jisọsu yẹle ndu l'etso ụzo iya tụgbua jeshia alị Judíya. Whẹ kpọo nwụkfu l'ẹka ono, l'oomeshi ndu madzụ baputizimu. 23 Jọnu l'emekwawho baputizimu nkiya lẹ Ínọnu. Ínọnu bẹ dụkube Sélimu ntse. Ọ nọdu l'ẹka ono eme baputizimu nkele mini ha shii l'ẹka ono. Ndiwhe l'awụ awụ-kfuta iya l'ẹka ono, l'oomekaa whẹ baputizimu. 24 Nteke ono bụkwanuru nteke l'ẹteke atụa Jọnu mkpọro. 25 A nọnyaa, ndu l'etso ụzo Jọnu, whẹ l'onye Ju lanụ ọbu tụkfuta ẹgo gẹ l'eemeje nke nsọ ọsafu onwonye mmerwu. 26 O noo ya, whẹ tụru iya byakfuta Jọnu bya asụ iya: “O-zhi-iwhe, ?ị whụnuawho l'onye ọbu gụ l'iya shi nọdu l'azụ Jọ́danu azụ iya ọwhu, mbụ onye ono, i shi atụ ọnu iya, ọ kwa iya nọ l'ẹka-a ntaa eme baputizimu, ndu madzụ l'awụ gidigidi ejekfu iya?” 27 Jọnu sụ whẹ: “Ọ tọ dụkwa onye dụ iwhe ọ bya l'a-nata m'ọ -bụa iwhe Chileke nụru iya. 28 Unubẹdua l'onwunu kabẹkwaa bụru ndu ẹto, nụru nteke mu kfuru sụ l'ọ tọ kwa mụbe Jọnu bụ Kuráyisutu ọbu, Chileke kweru ụkwa iya, l'ọ kwa ezhizhi b'e zhiru mbẹdua tẹ mu vuru iya ụzo bya. 29 Sụa, ọ kwa nwata nwokoro, l'eje ọlu nwanyị bẹ nwanyị ọbu, a bya l'ekee ya nọdu-turu. Ọnya nwata-okoro l'abụjekwa ọ -kfụru l'ẹka ọnya iya ono nọ, anụ iwhe l'ookfu, ẹhu atsọ iya ụtso. Ọo mụbe Jọnu bụ ọnya Jisọsu. Ọ bụru iwhe ono meru ẹhu kwata atsọshi mu ụtso ike ntaa atsọfu mu iya l'ishi. 30 Ẹwha Jisọsu kafụtaje ode ude eje eje, nke mụbe Jọnu aka ọlwali eje eje.
Onye shi l'igwe bya
31 “Ọo onye ono, shi l'igwe bya ono bẹ bụ iya bụ onye kakọta shii lẹ g'a ha. Onye shi lẹ mgboko bụlewho nke mgboko-o, tẹmenu l'ọonojelewho ekfu g'ọo ndu mgboko-o, onye ono, shi l'imigwe bya bẹ bụ iya kakọta shii lẹ g'a ha. 32 Ọo iwhe ọ nụru lẹ nchị iya, whụa ya l'ẹnya bẹ l'ookfuje. Ọle ọ tọ dụdu onye l'ekweje nata ozhi iya. 33 Onye ono, natarụ ozhi, l'oozhi bẹ gudewa ono kweta lẹ Chileke bụ ọkpobe iya. 34 O noo nke l'onye ono, Chileke yeru ono l'ekfu okfu, Chileke kfuru. Iwhe meru iya bụru lẹ Chileke ta ahatadu Ume-Dụ-Nsọ ahata nụ iya. 35 Chileke, bụ Nna yeru Nwa iya obu, o wokotaakwaru iwhe lile-e ye iya l'ẹka. 36 Onye wowaru onwiya ye l'ẹka Nwa Chileke ono bẹ nwewaru ndzụ tututu-mịmimi, ọle onye l'ẹte anụaru Nwa Chileke okfu bẹ ndzụ ono l'abyakwaa l'erwube ẹka. Onye ono bẹ oke-ẹhu-eghughu Chileke l'adụakwaro swiru jeyewaro lẹ tututu-mịmimi.”
Jisọsu yẹle nwanyị Samériya
1 Ndu Fárisii nụa lẹ ndu l'awụ etso Jisọsu bụwaro ndu l'etso ụzo iya, l'oomeshi whẹ baputizimu bẹ ka mebyi shii, amamẹ ndu ọwhu l'awụ etso Jọnu bụwaro ndu l'etsoje iya l'oomeshi whẹ baputizimu. 2 Ọle ọ tọ dụ-zhikwaa onye Jisọsu gude ẹka iya mee baputizimu, gbahaa ndu l'etso ụzo iya l'emeje iya. 3 Onye-Nwe-Ọha, bụ Jisọsu nụlewho lẹ ndu Fárisii nụwaru nke baputizimu ono, ọ gbalihu lẹ Judíya tụgbua dawhushia azụ lẹ Gálili. 4 Ụzo ọwhu o shiru eje Gálili ono bẹ l'ọoghaja lẹ Samériya. 5 O noo ya, Jisọsu jenyaa, o rwua lẹ mkpụkpu lanụ ọbu, l'eekuje Sáyika lẹ Samériya. Mkpụkpu ono bẹ dụkube ẹgu ono, Jékọpu nụru nwa iya Jósẹfu. 6 O nwekwaruwho wẹlu, Jékọpu tụru, dụ l'ẹgu ono. Nteke Jisọsu rwuru ẹka ono bụru g'ẹnyanwu l'alwawaa l'ishii. O rwudeshia ẹka ono, ike ije gvụwa iya mebyi ree. O je anọdu lẹ mgboro wẹlu ono. 7 O nweru nwanyị, byarụ oseta mini lẹ wẹlu ono. Nwanyị ono bụ onye Samériya. Jisọsu sụ iya: “Nwanyị kee mu nụ mini tẹ mu ngụa.” 8 Nteke ono bẹ ndu l'etso ụzo Jisọsu tụgbuwaru bahụ-shia l'ime mkpụkpu jeshia ọkpata nri, whẹ l'e-ri. 9 Nwanyị Samériya ono sụ iya: “?Ọ dụ-zhia ọdu agha meru iwhe ọ bụ gụbe onye Ju gbee sụ mụbe nwanyị Samériya tẹ mu kee ghu mini t'ị ngụa?” Iwhe nwanyị ono kwoberu kfua nno bẹ bụ lẹ ndu Ju whẹ lẹ ndu Samériya te erigbaduru. 10 Jisọsu sụ iya: “Ha! Nggẹ l'ọo iwhe l'ị marụ iwhe-ọma ono, Chileke l'emejeru madzụ, mbụ ọ -bụru l'ị makwanụru onye-e sụru t'i kee ya nụ mini-a amama owhu mẹe ya ẹgbee bụru gụbedua gẹga aryọ iya mẹe ya anụ ghu mini, l'anụje ndzụ t'ị ngụa.” 11 Nwanyị ono sụ iya: “Onye-Nwe-Ọha, gẹ l'ọodukwanua iwhe i gude, l'ii-gude seta mini ọbu, wẹlu-a b'ị marụ-a l'ọ dụ omilomi. ?Ọ hụnu awe bẹ mini ọbu, l'anụje ndzụ shi ghu? 12 ?T'ị bya aka nnajị ochee anyi Jékọpu shii, bụ iya tụru anyi wẹlu-a, tụ-gee ya, ngụa ya mini, ụnwu iya ngụa ya mini, élwù lile, o nweru ngụkwaa ya whọ mini?” 13 Jisọsu sụ iya: “Ọ tọ dụkwa onye ngụru mini wẹlu-a, mini l'ẹte agụle-ẹ ọdo. 14 Ọle onye, ngụru mini ọwhu ọ bụ mbẹdua l'a-nụ iya bẹ mini l'a-byadụa l'agụbaa agụgu owhu jeyewaro lẹ tututu-mịmimi. O noo lẹ mini ọwhu mu l'a-nụ onye ono l'a-dụwa iya rọ l'ẹhu bụru iya ishi ngele l'anọje anwụshi mini, l'anụje ndzụ tututu-mịmimi.” 15 Nwanyị sụ iya: “Onye-Nwe-Ọha, byiko, nụnu mu ẹgube mini ono tẹ mu ngụ-a nke ọwhu bụ mu -ngụ-gee ya, mini ta abyahẹwaro l'agụbaa ya ọdo, ya ahakwanụa nke ọbyaje okuta mini l'ẹka-a.” 16 Jisọsu sụ iya: “Lanụ je ekua ji ghu tẹ gụ l'iya lịru bya ẹka-a.” 17 Nwanyị ono sụ iya lẹ ya ta alụkwa ji. Jisọsu sụ iya: “Ọo ghu ezhi-okfu. Ị -sụ l'ị tị lụdu ji b'ọ bụ ghu ọkpobe-okfu. 18 Iwhe meru mu sụ l'ọo ọkpobe-okfu b'i kfuru bụ l'ị bụ nwanyị mgbawhe ji. Ị lụwaru unwoke ise, tẹmenu onye ọwhu gụ l'iya bu ntaa ta abụkwanu m'ọo ji ghu. Ọo ire-lanụ b'i kfuru nno.” 19 Nwanyị ono sụ iya: “Onye-Nwe-Ọha, ntaa bẹ mu marụ l'ị bụ onye nkfuchiru Chileke. 20 Nna anyi whẹ bụ l'ugvu-a bẹ whẹ shi anọduje abarụ Chileke ẹja. Ntaa bẹ unubẹ ndu Ju bya asụ l'ọolewho lẹ Jerúsalẹmu bẹ l'aanọduje abarụ Chileke ẹja.” 21 Jisọsu sụ iya: “Nwanyị, kwetalee iwhe mu l'ekfuru ghu, oge l'agbabeekwa nteke l'adụhee onye bya l'anọdu l'ugvu-a baarụ Chileke bụ Nna ẹja, ta anọduhe lẹ Jerúsalẹmu abarụ iyẹ ya. 22 Unubẹ ndu Samériya bẹ bụ iwhe unu l'ẹte amaa bẹ unu l'abarụ ẹja, anyịbedua, bụ ndu Ju bụ iwhe anyi marụ bẹ anyi l'abarụ ẹja nkele ọo l'echilabọ ndu Ju bẹ ndzọta ono shi. 23 Ọle oge l'agbabekwaa mbụ o gbee rwuakwanu erwu, mbụ nteke ndu l'abarụ Chileke, bụ Nna ẹja ọkpobe abarụ l'e-gude Ume-Dụ-Nsọ mẹe obu whẹ g'ọ ha abarụ iyẹ ya lẹge ọ gbarụ. O noo ẹgube ndu ọ dụ Chileke, bụ Nna ree tẹ whẹ bajẹru iya ẹja ndono. 24 Chileke bụ Ume. Ọo ya bụ lẹ ndu l'abarụ iya ẹja gudefutaje Ume-Dụ-Nsọ abarụ iya ẹja ono ọkpobe abarụ.” 25 Nwanyị ono sụ iya: “Mu makwarụ-a lẹ Mezáya ọbu l'a-bya bụ iya bụ onye ọbu, l'eekuje Kuráyisutu, l'ọ -byalẹwho bẹ l'ọo-tụko iwhe g'iwhe ha kọkotaru whẹ.” 26 Jisọsu sụ iya: “Ọo mbẹdua, l'ekfu eyeru ghu bụ iya bụ Kuráyisutu ọbu.” 27 Whẹ l'ekfukwadu-a nno, ndu whọ l'etso ụzo iya shi rwua. Ọ tụfu whẹ ẹhu gẹ whẹ bya awhụa gẹ Jisọsu yẹle nwanyị l'edzu idzu. Ọle ọ tọ dụdu onye ọwhu jịru nwanyị ono sụ iya: “?Ọo gụnu bẹ l'ịicho?” Whẹ ta ajị Jisọsu: “?O kwoberu gụnu ekfuru eyeru nwanyị ono?” 28 Tọ dụ iya bụ lẹ nwanyị ono agbaghaa ite-okumini iya ono l'ẹka ono, gbagbụa gbaba l'ime mkpụkpu ono je echiaru ndu ọdo mkpu sụ whẹ: 29 “Unu byadụwho bya awhụ nwoke, tụkoru iwhe bụ-zhia iwhe mejeru kọshiaru mu. Mu ta amakwa ?ọo-bụ iya bụ Kuráyisutu ọbu, Chileke kweru ụkwa l'ọo-bya?” 30 Whẹ wụfuta l'ime mkpụkpu ono wụ-kfuta Jisọsu. 31 Nteke ono, nwanyị ono tụgburu bẹ ndu l'etso ụzo Jisọsu ryọru iya sụ iya: “O-zhi-iwhe, kabẹro ria nri.” 32 Ọ sụ whẹ: “Mu nwerua nri, mu l'e-ri, unu l'ẹte amaa.” 33 Ọo ya bụ ndu ono, l'etso ụzo iya kfude l'ime onwowhe sụ: “?O nweru onye kabẹ wotaru iya nri?” 34 Jisọsu sụ whẹ: “Iwhe bụ nri mu bụ tẹ mu mee iwhe dụ onye ono, zhiru mu nụ mma l'obu mẹe tẹ mu jekota ozhi, o zhiru mu g'ọ ha jefu iya l'ishi. 35 Tọ dụ unu l'anmajẹ ẹtu sụ: ‘Mbẹ ọ bụwa-a ọnwa ẹno ntaa; ya erwua nteke l'aakpatajẹ iwhe e meberu l'alị.’ Ọle mu l'ekfukwaruwho unu sụ: Unu paliadawho ẹnya leedawho l'okfu, a kọru akọko, gbua ya nke whụduwho l'iwhe e meberu l'alị kashịwaru dụwaa nke akpata. 36 Onye ono, l'akpa iwhe ono, e meberu l'alị bẹ l'aakfụjekwa ụgwo ozhi, o jeru. Onye ono, l'achịkobekwawho mebyi iwhe, l'a-nọdu l'ẹka lanụ ngabẹru ndzụ tututu-mịmimi. Ọ kwanụ iya bụ nke ọwhu ndu ono, l'akụ iwhe ono akụku mẹe ndu ọwhu l'akpa iya akpakpa l'a-tụko swaa ẹswa. 37 O noo ẹka iwhe ọbu, e kfuru gude bụru ọkpobe-okfu, mbụ iwhe ono, e kfuru sụ: ‘Onye lanụ l'emebeje iwhe l'alị, onye ọdo eje akpata iya akpata.’ 38 Mu zhiru unu t'unu je akpata iwhe e meberu l'ẹgu l'ẹka unu l'ete ejee ozhi. Ọo ndu ọdo jeru ozhi l'ẹgu ono, ọle ntaa bẹ unubẹdua jewaa je erilahaa urwu, dụ l'anya ono, whẹ seru.” 39 Igweligwe ndu Samériya, shi lẹ mkpụkpu ono bya bya eworu onwowhe ye Jisọsu l'ẹka nke l'ọo lẹ nwanyị ono sụru whẹ: “Ọ kọshikotaru mu iwhe bụ-zhia iwhe mu mejeru.” 40 Tọ dụ iya bụ lẹ ndu Samériya ono abyakfuta Jisọsu, whẹ ryọo ya tẹ whẹ l'iya nọtabaa. O kwe, whẹ l'iya nọo abalị labọ lẹ mkpụkpu ono. 41 A dụbaa l'igwe kwobe okfu, shi iya l'ọnu kweta. 42 Whẹ sụ nwanyị ono: “Ntaa ta ahẹkwa iwhe i kfuru anyi kpatarụ iwhe anyi kwetaru. Iwhe meru anyi kweta bụkwa l'anyi gudewaa nchị anyi anụ iya l'onwanyi marụ l'ọo ọkpobe-okfu l'ọo onye-e bụ onye ọbu bụ iya bụ Onye Ndzọta mgboko-o l'ezhi.”
Jisọsu meru nwa onye ishi alị; o mehu
43 Ọ nọ-gelewho abalị labọ ono l'ẹka ono, ọ tụgbua jeshia Gálili. 44 O noo nkele ọo Jisọsu ọbu l'onwiya gude ọnu iya kfuhawaro sụ, l'onye nkfuchiru Chileke bẹ l'ẹte akwabẹjedu ugvu l'alị, a nwụru iya. 45 Tọ dụ iya bụ l'o rwulewho Gálili, ndu bu lẹ Gálili ono gbobe ẹka labọ nata iya nkele whẹ whụkotaru iwhe lile ono, o meshiru lẹ Jerúsalẹmu nteke ono, l'eeri oge l'ẹka ono nkele whẹbedua jekwaruwho ori-oge ono lẹ Jerúsalẹmu. 46 Ọo ya bụ, Jisọsu bya atụgbua dawhushia azụ lẹ Kena Gálili bụ iya bụ ẹka ono, o mejeru mini ọ ghọo mmẹe. O nweru onye ọrwu mbeke lanụ, ẹhu l'adụa nwa iya mma lẹ Kapániyọmu. 47 Nwoke ono nụlewho lẹ Jisọsu shiwaa Judíya bya Gálili; o jekfu iya je aryọo ya t'ọ bya emee nwa iya t'o mehu l'ọonwuhukwa anwụhu. 48 Ọo ya bụ, Jisọsu sụ iya: “Ọ -bụdua-a l'unu gude ẹnya unu whụa iwhe-awhụrulenya, dụ biribiri bẹ unu l'ẹte abyakwa l'e-kweta.” 49 Onye ọrwu mbeke ono sụ iya: “Onye-ukfu-l'ọha, byiko byarọ t'anyi je, a nọnyaanu, nwa iya ọbu nwụhu.” 50 Jisọsu sụ: “Tụgbua lashia lẹ nwa ghu ono l'a-nọduru ghu-a ndzụ.” Nwoke ono kweta iwhe ono, Jisọsu kfuru iya ono, tụgbua lashia. 51 Nwoke ono nọdukwadu-a l'ụzo ala, ndu l'ejeru iya ozhi gbata iya ndzuta bya asụ iya lẹ nwa iya ono mehuakwaru. 52 Ọ bya ajị whẹ: “Ọo ẹgube oge nteke ole bẹ nwata ono beberu wata ọka mma?” Whẹ sụ iya: “Ọlekwawho l'orifu nri-eswe l'eswe ụnyawhu4 :52 Gẹ kụloku kụru nnanụ l'eswe ụnyawhu. bẹ ẹwhoku ono nwubuhuru iya.” 53 Nna nwata ono nyata l'ọolewho oge nteke ono gẹdegede bẹ Jisọsu sụru iya tẹ ya lashia lẹ: “Nwa ghu l'a-nọduru ghu-a ndzụ.” Tọ dụ iya bụ lẹ nwoke ono mẹe ndu ibe iya atụko gẹ whẹ ha woru onwowhe ye Jisọsu l'ẹka. 54 O noo bụru iwhe-awhụrulenya nke ẹbo, Jisọsu meru g'o shi lẹ Judíya bya Gálili.
Jisọsu yẹle nwangvụru agụgu okpuru
1 E megelewho, o nweru oge, ndu Ju l'eri. Jisọsu tụgbua jeshia Jerúsalẹmu. 2 Lẹ Jerúsalẹmu b'o nweru nwokpuru ọbu, dụ iya nụ. Ụzo, l'eeshije abahụ l'okpuru ono bẹ dụ uzhi ise. Iwhe l'eekuje okpuru ono l'okfu Arámayiku bụ Bẹtusáta. Okpuru ono dụ lẹ mgboro Ọnoguzo-atụru. 3 Ndu ẹhu l'ẹte adụa mma bẹ ha l'urwu zẹ-gee l'ime ẹka ono, l'eeshije abahụ l'okpuru ono, mbụ ndu l'atsọ ishi mẹe ndu ngvụru mẹe ndu iwhe lọnwushiru ibe ẹhu lanụ. Whẹ tụko zẹshia l'ẹka ono ngabẹru nteke mini ono l'e-me ụkporo. 4 Gẹ l'ọonwujekwanu bụ l'ọobuje a nọtalewho nwanshị, ojozhi-imigwe shi l'ẹka Onye-Nwe-Ọha abya l'okpuru ono bya akparwụa mini ono. Onye iwhe l'eme, vuzhiwaa ụzo ye ọkpa lẹ mini ono nteke ono mẹe a kparwụa ya, onye ọbu emehu l'iwhe l'eme iya nụ. 5 O nweru nwoke lanụ nọdu l'ẹka ono, nyawarụ ẹhu ụkporo awha l'awha iri l'ẹsato. 6 Jisọsu byalẹwho bya awhụa ya marụ l'o shihawa nteke teru ẹnya zẹta l'ẹka ono, ọ sụ iya: “?Ọ dụ ghu ree t'e mee ghu t'i mehu?” 7 Nwoke ono, ẹhu l'eme sụ iya: “Onye-ukfu-l'ọha, ọ tọ dụdu onye mu nweru, l'a-parụ mu chee l'okpuru-a mẹ a -kparwụa mini ono, l'ọobuje nteke mu mederu tẹ mu ye iya ọkpa, onye ọdo evuwaru mu ụzo.” 8 Jisọsu sụ iya: “Gbalihu gwọta ute ghu wata ooje ije.” 9 Nteke onowho nwoke ono mehulekwawho, ọ gwọta ute iya ọbu jelahaa ije. Mbọku ono iwhe ono, nwụru bụru mbọku ọtuta-ume ndu Ju. 10 Ọo ya bụ, ndu Ju sụ nwoke ono, e metaru l'iwhe l'eme iya nụ: “Ntanụ kwa mbọku ọtuta-ume ?ị makwarụa lẹge i gwọtaru ute ghu eje nno b'ị daakwaru l'iwu, dụru anyi ntanụ?” 11 Ọ sụ whẹ: “Ọo nwoke ono, bụ iya meru mu, mu mehu bẹ sụru mu tẹ mu gwọta ute mu jeje ije.” 12 Whẹ jị iya: “?Ọo ẹgube madzụ gụnu bẹ nwoke ọbu bụ, sụru ghu tị gwọta ute ghu jelahaa ije?” 13 Ọwhu ka njọ bụru lẹ nwoke ono, e meru o mehu l'iwhe l'eme iya nụ ta amadụnu m'ọo onye ọbu, metaru iya nụ. Iwhe kparụ iya bụkwaru lẹ Jisọsu kwoberu l'igweligwe madzụ parụ ẹka l'ẹka ono lụfu, ọ bụru iya atụgbu. 14 E megelewho, Jisọsu bya awhụwhu nwoke ono azụ l'ime eze-ụlo Chileke sụ iya: “Lenu lẹ ntaa b'i mehuwaru. Be ejebuhekwaa ome iwhe-dụ-ẹji ọdo nggẹ iwhe ọdo, kabaa njọ ta abyakfuta ghu.” 15 Nwoke ono nyịgobelekwawho lụfu je je akarụ ndu Ju l'ọo Jisọsu bụ onye ọbu, meru iya; ya mehu. 16 O noo iwhe ọbu kpatarụ ndu Ju chịlahaa nta Jisọsu nkele ọo mbọku ọtuta-ume b'o meru iwhe ono. 17 O noo ya, Jisọsu sụ whẹ: “Nna mu l'ejelekwa ozhi gẹ l'ooje iya byeye ntaa, mbẹdua l'ejekwawho.” 18 Iwhe ono Jisọsu kfuru mee ndu Ju kabaanụ anọ achọ ụzo gẹ whẹ l'e-shi gbua ya. Iwhe whẹ kwoberu achọ tẹ whẹ kpawhua ishi iya ta abụlekwa l'ọ tụrwuru nsọ mbọku ọtuta-ume whẹ, ọwhu kabaa whẹ nụ eghughu bụkwa l'o gbee ekunu Chileke “Nna mu” bụ iya bụnu lẹ yẹle Chileke bẹ halẹwho ẹnya nhatanha.
Ike nke Nwa
19 O noo iwhe meru Jisọsu sụ whẹ: “Iwhe unu l'a-malẹwho bụ l'ọ tọ dụkwa iwhe Nwa l'egudeje ike nke ẹka iya eme l'onwiya l'abụa iwhe ọ whụru lẹ Nna iya l'eme; o noo l'ọo iwhe Nna l'eme bụkwawho iwhe Nwa l'emeje. 20 Nna bẹ yeru Nwa iya obu. Oogoshikotaje iya iwhe l'oome l'onwiya. Oo-goshibakwaa ya nụ iwhe ka ọwa shii t'o mee nke ọwhu l'ọo-dụ unu biribiri. 21 L'ọ kwa gẹ Nna l'emeje ndu nwụhuru anwụhu whẹ eshi l'ọnwu teta gbalihu, ya anụ whẹ ndzụ bụ gẹ Nwa Chileke l'e-woru ndzụ nụ ndu dụ iya l'uche. 22 Ọ tọ dụkwa onye Nna l'egude ẹka iya ekpe ikpe, o wokotaru nke ikpe ye Nwa iya ono l'ẹka. 23 Ọo ya bụkwanu nke ọwhu ndiwhe l'owhu l'a-kwabẹje Nwa ugvu gẹ whẹ l'akwabẹje Nna iya. Onye ono l'ẹte akwabẹ Nwa ugvu ta akwabẹkwa iya Nna ono bụ iya bụ onye zhiru iya nụ. 24 “Sụa, iwhe mu l'emekwawho t'o doo unu ẹnya bụ l'iwhe bụ onye ono nụ-zhiwaru okfu nkemu; kweta nke onye ono, bụ iya zhiru mu tẹ mu bya bẹ nwewaa ndzụ tututu-mịmimi, onye ono ta abyadụ l'akfụru t'e kpee ya ikpe, onye ono shiwaa l'ọnwu bahụ lẹ ndzụ. 25 Tẹ mu mekwaa ya t'o doo unu ẹnya ree, mbọku l'agbabeekwa, mbụ o gbee rwuakwanu erwu nteke ndu nwụhuru anwụhu l'a-nụ olu nke Nwa Chileke, ndu ọwhu nụru iya nụ l'a-nọdu ndzụ. 26 Ọo gẹ ndzụ shi Nna l'onwiya l'ẹka bụ gẹ Nna mekwaruwho tẹ ndzụ shi Nwa iya l'ẹka. 27 Ọ nụkwaruwho Nwa ono ike t'o kpejee ikpe, bua ya ebu, nke l'ọo ya bụ Abụbu-Ndiwhe. 28 T'iwhe-e be ejikwa unu ẹnya, lẹ mbọku l'agbabeekwaa nteke iwhe bụkota ndu nọ l'ilu gẹ whẹ hakọta l'a-tụko nụa olu iya. 29 Whẹ eshi l'ilu whẹ fụtachaa. Ndu ọwhu shi eme iwhe dụ ree l'e-teta nọdu ndzụ, ndu ọwhu shi eme ejo-iwhe etetakwawho t'a nma whẹ ikpe.
Iwhe l'egoshi l'ike dụ Jisọsu l'ẹka
30 “Sụa, ọ tọ dụdu iwhe mu l'egudeje ike nke ẹka mu mee l'onwomu, o noo l'ọo gẹ Chileke sụru tẹ mu kpee ikpe bụ lẹge mu l'ekpeje iya, tẹmenu ikpe nkemu bụru ikpe, kfụru nhamụnha. O noo lẹ mu te ekpedu g'ọ dụ mu mma l'obu. Ọlewho g'ọ dụ onye ono, zhiru mu nụ mma l'obu bụ gẹ mu l'ekpeje. 31 “Nteke ọ -bụ lẹ mu gbee bya atụlahaa ọnu onwomu, ọ kwa iya bụ l'iwhe ọbu, mu l'ekfu ta abụdu ire-lanụ. 32 Ọle o nweruroo onye ọdo bụ iya l'atụ ọnu mu, mbụ iwhe ọwhu mu tụberu nvọ bụru l'iwhe onye ono l'ekfu l'okfu ẹka mu bụ ọkpobe-okfu. 33 Ọo unu yefuru ndụ-ozhi tẹ whẹ byakfuta Jọnu, Jọnu kfukwaaru unu nke ọkpobe-okfu ono. 34 Iwhe mu l'ekfu ta abụkwa l'ọo tẹ madzụ bya atụje ọnu mu, iwhe mu kwoberu agba ọkpa l'okfu ono, Jọnu kfuru kwa nggẹ adzọo unu. 35 Jọnu bụ oryọku, l'enwu enwu, ekekwawho jajaja. O shikwawho ewhe unu uwhere t'unu nọdu l'iwhoro iya ono swaa ẹswa, kpọo nwụkfu. 36 Iwhe mu l'emegbabe egoshi unu kakwa ọtu ọnu iya amamẹ ọwhu Jọnu tụru. Iwhe meru iya nụ bụru l'ozhi ono, Nna mu zhiru mu tẹ mu bya ejee, jefu iya l'ishi ono, mbụ ozhi ono g'ọ ha, mu l'eje ntaa, l'atụkwa ọnu mu l'ọo whọ Nna bẹ zhiru mu tẹ mu bya. 37 Nna mu ono, bụ iya zhiru mu tụakwawho ọnu mu. Unu tẹke anụbukwaa olu Nna mu ono, unu ta awhụje iya ọwhu unu marụ g'ọ dụ dụ. 38 Unu ta akwakọbekwa okfu, shi Nna mu l'ọnu l'ime obu unu, o noo l'unu te ekwedu woru onwunu ye onye ono, ọ bụ iya zhiru t'ọ bya ono l'ẹka. 39 Unu l'anọje enyocha iwhe e deru l'ẹkwo Okfu Chileke nọdu sụ l'o noo ẹka unu l'e-shi nweru ndzụ tututu-mịmimi. Ẹkwo okfu Chileke ono tụkotakwaru atụ ọnu mụbe Jisọsu. 40 Ọle lenu l'unu kweru ike l'unu ta abyakfutadu mu nggẹ unu nweru ndzụ.” 41 Ọ sụ whẹ: “Ọ tọ dụkwa nteke mu l'ele ẹnya tẹ ndiwhe bya ajaja mu ama. 42 Ọle mu makwarụ-a l'unu te eyedu Chileke obu. 43 Ọo ike nke Nna mu bẹ mu gude bya. Mu bya, unu jịka mu. Ọle nteke ọ dụlewho onye ọdo, gude ike nke ẹka iya byatashia, o noo onye ọwhu unu l'a-nata. 44 ?Ndẹhunu g'unu l'e-shi woru onwunu ye mụbe Jisọsu l'ẹka? L'unubẹ ndu l'abụje ibe unu l'ajakpọshi unu; ẹhu atsọhu unu rịkpotongu. Tọ bụ m'ọo l'unu l'achọ ụzo, unu l'e-shi tẹ Chileke ono bụ iya bụ Chileke kpụ jaa unu. 45 To bọ dụkwa unu gẹ-woo l'ọo mbẹdua l'e-je agbaa unu mgbamụ l'atatiwhu Nna mu, onye l'agba unu mgbamụ gbekwaanu bụru Mósisu whọ unu chịru ẹka kwẹe whọ. 46 Nggẹ l'ọo iwhe l'unu kweru nke Mósisu mẹ unu ekwekwawho nke mbẹdua, o noo nkele Mósisu deru dekuta mu l'ẹkwo. 47 Nteke bụ l'unu te ekwetadu iwhe o deru ?ndẹhunu g'unu l'e-shi kwe l'okfu mụbe Jisọsu bụ unu iwhe?”
Jisọsu l'anụ ụnu iri l'ẹbo l'ụkporo iri nri
1 E megelewho ya, Jisọsu tụgbua jeshia azụ eze-ẹnyimu Gálili azụ iya ọwhu, bụkwa iya whọ bụ eze-ẹnyimu Tayibíriyasu. 2 Igweligwe madzụ l'awụ gidigidi etso iya nkele whẹ whụwaru iwhe-awhụrulenya, o meshiru nteke ono, o meru ndu ẹhu l'adụa mma whẹ mehuchaa. 3 Jisọsu bya enyikota ẹka ono, bụ ọ-ka-l'ugvu-ugvu ono je anọdu anọdu l'ẹka ono yẹle ndu l'etso ụzo iya. 4 Nteke ono bẹ oge ono, ndu Ju l'erije, l'eekuje oge O-je-ghata dụwa ntse. 5 Jisọsu bya apalia ẹnya whụa lẹ ndu l'awụ abyakfuta iya ha l'igwe shii. Ọ sụ Fílipu: “?Ọo awee bẹ anyi l'a-zụta buredi tẹ ndu-a ria nri?” 6 Iwhe o kwoberu kfua nno ta abụkwa l'ọ tọ madụ iwhe l'oo-me, oomelekwaa tẹ ya maadarụ iwhe Fílipu l'e-kfu. 7 Fílipu sụ iya: “Mẹ l'ee-gudekwa iwhe ka ụkporo pọngu zụa buredi m'ọ -bụruwho l'ee-me t'o rwugbaru whẹ l'ọnu ilile.” 8 Onye lanụ lẹ ndu ono, l'etso ụzo iya, mbụ Ánduru, bụ nwune Sáyịmonu Pyita sụ iya: 9 “O nwekwaru nwata nwokoro nshịi, nọ l'ẹka-a, gude ishi buredi balị ise, ọwa ẹji ẹma labọ, o bekwanu ?ọ dụkwanu iwhe iwhe ono bụ l'ẹka igwe ọha-a nọ?” 10 Jisọsu sụ whẹ: “Unu kfuru whẹ tẹ whẹ nọdu-gee anọdu l'alị.” Whẹ nọshia l'alị l'ẹka ono. Ẹka ono bẹ ụnwu irwu ẹwu dụ shii. Unwoke, nọ l'ẹka ono dụ ụnu iri l'ẹbo l'ụkporo iri. 11 Jisọsu bya achịta buredi ono, bya ekelegelewho Chileke ekele, ọ bya ekeshiaru iya ndu ono, nọ l'ẹka ono. O mekwaawho ọwhube ẹma whọ nno. Onyenọnu rita rijia ẹwho iya. 12 Whẹ rijishichaa ẹwho whẹ, Jisọsu sụ ndu l'etso ụzo iya: “Unu tụtukobe ụnwu ibiribe iya ọwhu whẹ riwhodoru t'ọ bọ dụ ọwhu l'a-la l'iyi.” 13 Whẹ bya atụtua ụnwu ibiribe iya ọwhu shi l'ishi buredi ise ono; tụtu-jia ya nkata-ivu iri l'ẹbo, bụ ọwhu ndu ono riwhodoru. 14 Ndu ono whụlewho iwhe-awhụrulenya ono, Jisọsu meru; whẹ sụ: “Ọ kwa ọkpobe-okfu l'ọo nwoke-e bụ onye nkfuchiru Chileke ọbu, l'a-bya mgboko-o!” 15 Jisọsu malẹruwho lẹ whẹ l'abya iya akpụta nke ẹhuka tẹ whẹ mee ya eze whẹ, o dawhushia azụ ọdo l'ugvu ugvu who nwẹkiya.
Jisọsu l'eje ije l'eli mini
16 O rwulewho l'urwẹnyashi, ndu l'etso ụzo iya tụgbua jeshia l'eze-ẹnyimu whọ. 17 Whẹ bahụ l'ụgbo, ngagbụru iya eme tẹ whẹ ghabua lẹ mini ono jeshia Kapániyọmu. A nọo jeye ọchi kpua ẹhu, Jisọsu ta abyakfuta whẹ. 18 Oke whẹrewhere wata ewhewhe nke ọwhu eze-ẹnyimu ono watarụ ọtu oke akpara-mini atụshi iya ike. 19 Whẹ ngalẹwho ụgbo ono iwhe rwuru manyịru ẹto je l'ẹno; whẹ whụa Jisọsu gẹ l'ooje ije l'eli mini ono eje abyakụbe ụgbo whẹ. Meji tọfu whẹ. 20 Jisọsu sụ whẹ: “Unu ba atsụshi egvu, l'ọ kwa-a mbẹdua!” 21 Ọ bụru l'ookfuru nno meru o whede whẹ uwhere tẹ whẹ kubata iya l'ụgbo whẹ. E jia ekfu, ụgbo whẹ ono lụfuwanu l'eli-mgboko ẹka whẹ l'eje.
A dụ l'igwe achọ Jisọsu
22 Ọ bya ebelewho echile iya, ndu ọwhu shi nọdu l'azụ eze-ẹnyimu azụ iya ọwhu bebe marụ l'ọo ụgbo lanụ bẹ likwaduru-a l'ẹka ono. Whẹ makwarụwho lẹ Jisọsu te etsodu ndu l'etso ụzo iya bahụ l'ụgbo nke whẹ, l'ọo ndu ono, l'etso ụzo iya tụgburu nwẹka whẹ. 23 O nwekwaruwho igweligwe ụgbo ọdo, shi Tayibíriyasu byakụbe ẹka ono ntse bụ iya bụ mgboro ẹka ono, whẹ nọdu ria buredi whẹ nteke ono, Onye-Nwe-Ọha kelegeleruwho Chileke ekelewho. 24 Ọo ya bụ, igwe-ọha ono whụlewho lẹ Jisọsu ta anọdu l'ẹka ono, ndu l'etso ụzo iya ta anọ iya; whẹ tụko wụba l'ụgbo chọru Jisọsu jeshia Kapániyọmu.
Jisọsu bụ nri, l'anụ ndzụ
25 Whẹ chọ-vulewho Jisọsu l'azụ eze-ẹnyimu ono azụ iya ọwhu, whẹ sụ iya: “O-zhi-iwhe, ?ọ hụnu nteke ole b'i rwuru azụ iya-a?” 26 Jisọsu sụ whẹ: “Iwhe mu l'eme t'o doo unu ẹnya bụ l'iwhe unu kwoberu achọ-whe mu ntaa ta abụkwa l'ọo l'unu whụru iwhe-awhụrulenya, mu meru, iwhe unu kwoberu achọ mu kwa lẹ mu nụru unu buredi, unu ria, rijia ẹwho. 27 Ọwhu t'unu be esegbushihe onwunu l'anya nri ọwhu bụ ọla-l'iyi. Unu sejechia anya nri ọwhu l'a-nọ-zhiewho anụ unu ndzụ tututu-mịmimi bụ iya bụ ọwhu mụbe Abụbu-Ndiwhe l'a-nụ unu. O noo l'ọo mbẹdua, bụ Abụbu-Ndiwhe bẹ Chileke, bụ Nna meru t'e shi l'ẹka whụa ike, l'egoshi l'o noo iwhe meru yẹbe Nna sụ t'ọ bya.” 28 Whẹ jị iya: “Ọo gụnu bẹ anyi l'a-nọ eme ya abụru iya bụ l'anyi l'eje ozhi Chileke?” 29 Jisọsu sụ whẹ: “Iwhe ọbu, bụ ozhi Chileke bụ t'unu woru onwunu ye onye ono, Chileke zhiru t'ọ bya ono l'ẹka.” 30 Ọo ya bụ, whẹ sụ iya: “Ndẹe! ?Ọo ẹgube iwhe-awhụrulenya, dụ ọdu agha bẹ l'ii-meru goshi anyi t'anyi gude ẹnya anyi whụ iya, kwetakwawho woru onwanyi ye ghu l'ẹka ọbu? ?Ndẹnu iwhe ọbu, l'ii-me? 31 Lẹ nteke ndụ-ichee bẹ nna anyi ochee whẹ rikwaru nri ono, bụ mana nteke ono, whẹ nọ l'echi-ẹgu. Ọ kwa iya bụ iwhe ọbu, e deru l'ẹkwo Okfu Chileke sụ: ‘Ọ nụru anyi nri, shi l'imigwe t'anyi ria.’ ” 32 Jisọsu sụ whẹ: “Iwhe mu l'akarụ unu bụ: Nri onona, Nna mu shi l'ẹka Mósisu nụ unu ono kwa nri ọwhu shi l'ọkpobe nri ọwhu shi l'imigwe. 33 Nri ono, Chileke l'anụje ono bẹ bụkwa onye ono, shi l'imigwe bya, tẹmenu ọ bụru iya bụ onye l'anụje ndiwhe ndzụ.” 34 Whẹ sụ iya: “Onye-Nwe-Ọha, byiko nụjenu anyi ẹgube nri onona nteke nteke.” 35 Jisọsu sụ whẹ: “Ọ kwa mbẹdua l'onwomu bụ nri l'anụje ndzụ, onye byakfutaru mu nụ bẹ ẹgu l'a-byadụa l'agụbaa ọdo, ọdo bụru l'onye ono, kweru nọdu mu l'ẹka bẹ ẹgu-mini l'ẹte agụdu ọdo. 36 Ọle mu kfuakwaru iya unu sụ unu l'unu whụwaru mu, obenu l'unu te ekwetadu woru onwunu ye mu l'ẹka. 37 Ọle iwhe bụ ndu lile Nna mu nụru mu l'a-byakfutakota mu, tọ hẹ lẹ mu bya l'a-chịfu iwhe bụ onye byakfutaru mu nụ. 38 O noo l'ọo l'imigwe bẹ mu shi bya. Iwhe mu byarụ ta akwa tẹ mu bya emee uche-obu nke onwomu, ọ kwa uche-obu onye zhiru mu tẹ mu bya bẹ mu byarụ ememe. 39 Iwhe bụkwanu uche-obu onye ono, zhiru mu nụ bụ t'ọ bọ dụkwa ndu lile ono, o yeru mu l'ẹka onye ọwhu l'a-nahụ mu tuwhahu m'ọo nnanụ, gbahaa tẹ mu tụko whẹ mee tẹ whẹ tetakota gbalishihu nọdu ndzụ mbọku ikpazụ. 40 O noo l'iwhe dụ Nna mu ono ree bụ t'iwhe bụ onye whụru Nwa iya, wokwaruwho onwiya ye iya l'ẹka t'onye ono nweru ndzụ tututu-mịmimi. Mu emekwaawho onye ọbu ya eshi l'ọnwu teta nọdu ndzụ mbọku ikpazụ.” 41 Ọo ya bụ, ndu Ju dederu iya nwirinwiri l'ẹka ono nkele ọo l'ọ sụru: “Ọo mbẹdua l'onwomu bụ nri ọbu, shi l'imigwe bya.” 42 Whẹ sụ: “?Mọ tọ nụa nwoke-e bụ Jisọsu nwa Jósẹfu, mbụ onye anyi marụ nna iya, marụ ne iya majia ya ẹnya? ?Ndẹhunu g'o meru ọ bya asụ ntaa lẹ ya shi l'imigwe bya?” 43 Jisọsu sụ whẹ: “Unu be edeshiroo nwirinwiri l'ime onwunu. 44 Ọ tọ dụdu onye ono bya l'a-byakfuta mu nụ, m'ọ -bụa l'ọo Nna mu ono, zhiru mu nụ kulitaru onye ọbu, nteke ono mbẹdua l'onwomu emee onye ono, ya eshi l'ọnwu teta nọdu ndzụ mbọku ikpazụ. 45 Ndu nkfuchiru Chileke dekwaru l'ẹkwo sụ: ‘Ọo Chileke l'e-zhi onyenọnu iwhe.’ Iwhe bụ onye ono, nụwaru nke Nna, nọdukwawho iya whọ l'ẹka, nwụta ẹka iya, l'a-byakfuta mụbe Jisọsu. 46 Iwhe mu l'ekfu ta abụkwa l'ọ dụ onye whụjebuwaru Nna ono, gbahalẹwho onye ono, bụ iya shi Chileke l'ẹka bya. Ọo yẹbedua bụ onye whụjebuwaru iya. 47 Iwhe mu l'ekfuleruwho unu bụ: l'onye woru onwiya ye mu l'ẹka bẹ nọokwa ndzụ tututu-mịmimi. 48 Ọo mbẹdua, bụ Jisọsu bụ nri l'anụ ndzụ. 49 Nna unu oche whẹ riru nri ono, bụ mana l'echi-ẹgu, whẹ nwụhulee. 50 Ọle nri ọwa, shi l'imigwe bẹ bụ nri ọwhu l'anụje ndzụ, mbụ nri ọwhu bụ: onye riru iya nụ, onye ọbu ta anwụhuhedu anwụhu. 51 Ọo mụbe Jisọsu bụ nri, nọ ndzụ, shi l'imigwe bya. Onye bụ-zhia onye riru nri ono l'a-nọgbuwaruroo ndzu jeye lẹ tututu-mịmimi. Nri ono, mu l'a-nụ ono bụ anụ-ẹhu mu. Mu l'e-woru iya nụ l'iswi ẹhu ndu mgboko-o.” 52 Ndu Ju tugbushide onwowhe lẹ ntụtu-ẹgo sụ: “?Ndẹe gẹ nwoke-e l'e-me nụ anyi anụ-ẹhu iya t'anyi ria?” 53 Jisọsu sụ whẹ: “Tẹ mu kfua ya t'o doo unu ẹnya. Ọ -bụdua l'unu riru anụ-ẹhu Abụbu-Ndiwhe, ngụa mmee ya bẹ unu l'ete enwekwa ndzụ l'ime ẹhu unu. 54 Iwhe bụ onye ono, l'eri anụ-ẹhu mụbe Jisọsu, angụ mmee mu bẹ nwewaa ndzụ tututu-mịmimi, tẹhenu mu je l'e-me onye ono ya eshi l'ọnwu teta nọdu ndzụ mbọku ikpazụ. 55 O noo l'anụ-ẹhu mu kwatarụ bụru ọkpobe nri eriri, mmee mu bụkwaruwho ọkpobe iwhe angụngu. 56 Onye ono, l'eri anụ-ẹhu mu, angụkwawho mmee mu nọwaa l'ime mu, mu nọdukwawho onye ono l'ime. 57 Ọo Nna ono bụ iya bụ ishi ndzụ zhiru mu tẹ mu bya, ọ bụkwaru iya whọ bẹ mu kwoberu nọdu ndzụ. O nokwawho g'iwhe bụ onye ono, l'eri anụ-ẹhu mụbe Jisọsu l'e-kwobe mụbe Jisọsu ọbu nọdu ndzụ. 58 Ọo ya bụ l'o noo nri ọbu, shi l'imigwe bya ndono. Ọ tọ bụdu ẹgube iya ọwhu ochee-oroke unu whẹ rigeeru, whẹ nwụhulee. Onye bụ onye riru nri-a l'a-nọgbuwaruroo ndzụ jeye lẹ tututu-mịmimi.” 59 Iwhe ono bụkota iwhe Jisọsu nọdu kfushia nteke l'oozhi iwhe l'ụlo-ndzuko ndu Ju lẹ Kapániyọmu.
Okfu ndzụ tututu-mịmimi
60 Ọo ya bụ, igweligwe madzụ lẹ ndu l'etso Jisọsu bya anụa iwhe ono, whẹ sụ: “Ha! Okfu ọwa l'atakwa ẹrwu lẹ nchị. Ọ t'ọ dụkwa nke anụnu.” 61 Ọle Jisọsu mawarụ l'onwiya lẹ ndu l'etso iya nụ l'ede nwirinwiri l'okfu ono, ya kfuru. Ọ sụ whẹ: “?Ọo iwhe ono, mu kfuru l'eghu unu eghu? 62 ?Ndẹ-zhia gẹ l'ọo-dụ mẹ unu whụa Abụbu-Ndiwhe g'ọ tụgburu imeli alawhu azụ l'ẹka, o shi nọduhawaa? 63 Ọo Ume Chileke l'anụje ndzụ, ọwhube anụ-ẹhu madzụ bẹ bụ iwhe mmaanụ l'ẹte adụa iwhe ọli. Okfu mu shi nkeshi-a kfushitaru unu bụkwa Ume, bụkwaruwho ndzụ. 64 Ọle m'o nwekwaru ndu ọwhu l'ẹteke ekwee woru onwowhe ye mu l'ẹka lẹge unu ha-a.” O noo lẹ Jisọsu shihawaro lẹ mbụlembu marụ ndu ọwhu ọbu, l'ete ekwee woru onwowhe ye iya l'ẹka, makwarụwho onye ọwhu ọbu, l'ee-megee mee t'a kpụta iya. 65 Ọ sụ: “O noo iwhe ọbu, mu kwoberu sụ unu l'ọ tọ dụdu onye fụru byakfuta mu l'abụa l'ọo Nna mu b'o shi l'ẹka.” 66 Jisọsu kfugelewho iwhe ono, ọ bụru iya kpatarụ igweligwe ndu ono, shi etso iya nụ ono tsuwhuchaa azụ, whẹ te etsojehe iya. 67 Jisọsu sụ ọwhube ụmadzu iri l'ẹbo ono, l'etso ụzo iya: “?Ndẹe gẹ unubẹdua l'arị iya, unu l'a-gbakashịhufua?” 68 Sáyịmonu Pyita sụ iya: “Onye-Nwe-Ọha ?ọ hụnu onye ole ọdo bẹ anyi l'a-nọ agba agbakfu? Ọo gụbedua gude okfu, l'anụje ndzụ tututu-mịmimi. 69 Anyi kwetaakwaa, anyi byaakwaa amarụ l'ọo ghu bụ onye ono, dụ nsọ, shi Chileke l'ẹka.” 70 Jisọsu sụ whẹ: “?Tọ dụ mbẹdua gude ẹka mu họta unu, mbụ unubẹ ndu ozhi iri l'ẹbo ono? Ọle ọo onye lanụ l'ime unu gbechia bya abụru Oshifutuswe.” 71 Onye l'ookfu iwhe ono ele ẹnya bụkwanuru Júdasu, bụ nwa Sáyịmonu Isukáriyọtu, o noo l'ọo Júdasu bụ onye ọbu, l'ee-megee gbaa ikumu, e gude iya, mbụ ọ bụkwaru-a onye lanụ l'ime ụmadzu iri l'ẹbo ono, l'etso ụzo Jisọsu.
Jisọsu yẹle unwune iya
1 E megelewho, Jisọsu tsoru Gálili ejewhe. Ọ tọ dụdu iya l'obu tẹ ya jewheje lẹ Judíya. O noo nkele ndu Ju, nọ l'ẹka ono l'achọ ụzo gẹ whẹ l'e-shi gbua ya. 2 Nteke ono bẹ oge ndu Ju tẹwaru l'ụkfu, mbụ Oge-ime-mkpu. 3 Ọo ya bụ, unwune Jisọsu sụ iya: “Shikwawho l'ẹka-a lụfu, tụgbua jeshia Judíya nke ọwhu ndu l'etso ụzo ghu l'a-whụ ẹgube eze iwhe dụ biribiri, l'ime. 4 Ọ tọ dụkwa onye l'anọje edomi iwhe l'oome edomi mẹ onye ọbu l'emewho t'ọha marụ iya. Eshi-ọwhu ị tụkoru ẹgube eze iwhe ono eme, menua tẹ ndu mgboko-o makọtaru ghu.” 5 O noo l'unwune iya l'onwowhe te ekwetazhidaanu nkiya. 6 Ọo ya bụ Jisọsu sụ whẹ: “Ọ tọko gbabedua mbẹdua l'ejeje ntaa, ọle unubẹdua ta adụdu nteke unu gbashiru, unu ta atụgburu jeshia. 7 Ndu mgboko-o ta afụdu kpọ unu ashị, ọle mbẹdua bẹ whẹ kpọru ashị. Iwhe meru whẹ kpọ mu ashị bụ lẹ mu l'anọjelewho ekfuru whẹ l'ọolewho ejo iwhe bẹ whẹ l'eyeje ẹka. 8 Unubẹdua tụgbua jeshia l'oge ono lẹ mbẹdua teke ejedekwaa. O noo lẹ nteke ọwhu mu l'e-me iwhe ono, ẹnya dụ unu teke erwurwedua.” 9 O kfua nno nọ-kirishia lẹ Gálili.
Jisọsu nọ lẹ Oge-ime-mkpu
10 O rwua nteke unwune iya jeshigeleruwho oori Oge-ime-mkpu ono, Jisọsu pyota onwiya epyota jeshia, o to jedu l'ọkpa-jaajaa. 11 Ndu Ju tsoru elewhe ẹnya iya l'ẹka ono, l'eeri oge ono asụje: “?Ndẹhunu ẹka ọ nọ? ?Ndẹhunu ẹka ọ nọ?” 12 Whẹ l'adzụ-whelewho whatawhata ekfu okfu ẹhu iya l'ẹka ono, e jiru ejiji ono. Ndu harụ sụ: “Ọ kwa ọkpobe madzụ.” Ndu sụ: “Ọo ejire, o chia ndiwhe b'o tsoru eduwhushi.” 13 Ọ bụru egvu, whẹ l'atsụ ndu Ju bẹ kpatarụ tọ dụhunu onye dụ ike kfufua iwhe ono nke ọwhu l'aa-nụ iya. 14 O rwudelewho l'echilabọ oge ono, Jisọsu bahụ l'eze-ụlo Chileke je ezhilahaa iwhe. 15 Ọ dụ ndu Ju biribiri. Whẹ sụ: “?Ndẹ-zhia gẹ nwoke-e meru maberu ẹkwo ẹgube-ẹ lẹbe abụ l'ọ gbajẹru ọkpa l'ẹka l'aanwụ ẹkwo ilile?” 16 Ọo ya bụ, Jisọsu sụ whẹ: “Iwhe mu l'ezhi ta abụkwa mu b'o shi l'ẹka. Onye o shi l'ẹka iya bẹ bụ Chileke ono, bụ iya zhiru mu. 17 Onye ono, l'ọogu ẹgu t'o mee obu Chileke l'a-makwaa iwhe-e mu l'ezhi ?o shi l'ẹka Chileke, tọo ike nke onwomu bẹ mu gude ezhi iya. 18 Onye ono, gude ike nke onwiya ekfu bẹ bụ ọja-ama onwiya bẹ l'ọocho, ọle onye ono, l'eme t'onye zhiru iya nụ jaa ya bụwaro onye l'egoshi lẹ ya gbarụ t'e gude ire iya ẹka, ọ tọ dụkwa ẹka ntụpo dụ iya l'ẹhu. 19 ?Tọ dụ Mósisu doberu unu iwu? Ọle, lenu l'ọ tọ dụdu g'unu ha onye ọwhu l'emeje iwhe iwu ono kfuru. ?Unu kwoberu gụnu eme t'unu gbua mu ntaa?” 20 Ndu ono sụ: “Ọo gụ l'ọgvu l'eme. ?O zhia onye l'eme tẹ ya gbua ghu ọbu?” 21 Jisọsu sụ whẹ: “Mbẹ ọ kwadụa iwhe lanụ bẹ mu meru lẹ mbọku ọtuta-ume, ọ tụfu unu ẹhu. 22 Ọo l'ọo lẹ Mósisu sụru, a -nwụjee nwata-nwoke, ọ -nọlewho abalị ẹsato, t'unu bujee ya ugvu meru g'o gude unu l'ebugejee whẹ iya m'e behuduru ọ -daba m'ọo lẹ mbọku ọtuta-ume. T'a gbahakwaarọ l'ọ tọ bụdu Mósisu watarụ nke obu ugvu ono. Ọo rọo ochee-oroke unu whẹ watarụ iya. 23 Ọ -bụru l'iwhe unu l'ekwobeje bua nwata ugvu lẹ mbọku ọtuta-ume bụ nggẹ t'e doswe iwu Mósisu ?ọ bụhunuru gụnu meru iwhe ẹhu l'eghu unu eghu nkele ọo lẹ mu meru onye ẹhu l'ẹte adụa mma, o mehu lẹ mbọku ọtuta-ume? 24 Ọwhu t'unu be elejekwawho madzụ ẹnya l'iwhu ekpe ikpe, unu kfụbeje ikpe nhamụnha kpee.”
Ọo Jisọsu bụ Kuráyisutu ọbu
25 Ọo ya bụ, ndu Jerúsalẹmu harụ sụ: “?Tọ bụnu-a nwoke-e, l'aachọkashi t'e gude gbua bẹ dụ ẹgube-ẹ? 26 Ọ gbẹenu bya akfụru l'edzudzu-ọha l'ẹka-a asa kaa kaa, tọ dụ onye l'eyeru iya ọnu ẹgube-ẹ. ?Tẹ l'ọ bụnu lẹ ndu l'agbajẹ ẹja nụ Chileke mawarụ l'ọo ya bụ Kuráyisutu ọbu, Chileke kweru ụkwa iya? 27 Ọle mẹ nteke Kuráyisutu ọbu l'a-bya ta adụkwa onye l'ama ẹka, o shi. Ọwhube onye ọwa bẹ anyi kabẹkwa marụ ẹka, o shi.” 28 Ọo ya bụ, Jisọsu zhinyaa iwhe l'eze-ụlo Chileke ono, ọ ryaarụ whẹ iya aryarya sụ whẹ: “?Unu madụrunu onye mu bụ ilile? ?Unu marụ-a ẹka mu shi? Ọ tọ kwa ike ẹka mu bẹ mu gude bya. Onye ono, zhiru mu nụ tẹ mu bya ono bụkwa ire-lanụ, ọle unu ta amadụ iya. 29 Ọo mbẹdua marụ iya. Iwhe meru mu marụ iya bụ l'ọo ẹka, ọ nọ bẹ mu shi, tẹmenu ọ bụru iya zhiru mu tẹ mu bya.” 30 Whẹ chọde gẹ whẹ l'e-shi t'ẹka whẹ kpaa ya, ọle ọ tọ dụdu onye ọwhu ẹka iya rwuru iya l'ẹhu nkele oge nkiya teke edzudua. 31 Ndu kweru nkiya l'igwe-ọha ono halẹe mebyi shii. Whẹ l'ekfuje sụ: “Kuráyisutu ọbu -byalẹwho ?l'oo-mebaa iwhe dụ biribiri, l'a-ka ọwaa, nwoke-e shi eshi-a meta-a?”
E yefuru ndu nche tẹ whẹ je egude Jisọsu
32 Ndu Fárisii bya anụa whatawhata ono, ndu madzụ l'adzụ lẹ nke Jisọsu. Ọo ya bụ, ndu ishi ndu l'agbajẹ ẹja nụ Chileke mẹe ndu Fárisii yefu ndu nche tẹ whẹ je egude Jisọsu. 33 Ọo ya bụ, Jisọsu sụ: “Ọ kwa tẹ mu l'unu nọfua nwanshị, mu a-lakfushiakwaro onye ono, bụ iya zhiru mu tẹ mu bya. 34 Mbụ unu l'a-chọ mu nta, chọo mu imo, ọle unu ta abyadụ l'a-whụ mu; ẹka mu nọ bẹ unu l'ẹte afụkwaa bya.” 35 Ndu Ju ono tụko kfulahaa l'ime onwowhe sụ: “O zhia ẹgube awee bẹ nwoke-e l'abya alala, anyi l'ẹte adụ ike jebe? ?Ọo onye marụ l'ọokwakonu nke ojeshi obodo ndu Girísu bụ iya bụ ẹka ndu Ju gbakashịhuru laa je eburu, jeshia ẹka ono je ezhia ndu Girísu iwhe, tọo gụnu? 36 Bụkwanu iya meru g'o gude o kfude sụ l'anyi l'a-chọ iya nta, chọo ya imo, ọle anyi ta abyadụ l'awhụ iya. Sụkwawho ọdo l'ẹka iya nọ bẹ anyi l'ẹte afụkwa bya. ?O zhia gụnu bẹ iwhe ono bu?”
Mini, l'anụ ndzụ
37 O belewho lẹ mbọku l'eerifuta oge ono bụ iya bụkwanu ụboku, kakọta mkpa l'oge ono; Jisọsu gbalihu kfụru akfụru ryaa ya aryarya sụ: “Onye mini l'agụ t'onye ọbu byakfuta mu bya angụta ọkpobe mini. 38 L'onye woru onwiya ye mụbe Jisọsu l'ẹka bẹ iwhe ono, e deru l'ẹkwo Okfu Chileke l'a-vụkota l'ẹhu onye ọbu, mbụ ọwhu, sụru: ‘L'ọo l'ime ẹhu onye ono bẹ ngele ono, l'asọshi mini, l'anụje ndzụ l'a-dụ.’ ” 39 Ọo Ume-Dụ-Nsọ bẹ Jisọsu kwoberu kfua iwhe ono, o kfuru, mbụ Ume-Dụ-Nsọ, ndu woru onwowhe ye iya l'ẹka l'a-nata. Lẹ nteke ono bẹ l'ẹteka anụdua whẹ iya, o noo lẹ Jisọsu bẹ l'eteke ewolidua dobe l'ọdu-biribiri Chileke l'imigwe.
Igwe-ọha l'abọkahu onwowhe ẹbo
40 Igwe-ọha ono nụlewho iwhe ono, o kfuru, whẹ harụ sụ: “Ha! Nwoke-e bụkwa onye nkfuchiru Chileke ọbu, anyi l'ele ẹnya iya ọbu l'ezhi.” 41 Ọle ndu harụ sụ: “Ọo ya bụ Kuráyisutu ọbu, Chileke kweru ụkwa lẹ ya l'e-ye t'ọ bya.” Ndu harụ sụ: “?Ọo nụa lẹ Gálili bẹ Kuráyisutu ọbu l'e-shi bya? 42 Mẹ ẹkwo-okfu Chileke sụkwaru lẹ Kuráyisutu ọbu l'e-shi l'eri Dévidi. L'ọo lẹ Bẹ́tulehemu bẹ l'aa-nwụ iya bụ iya bụ mkpụkpu ẹka, a nwụru Dévidi.” 43 Tọ dụ iya bụ lẹ ndu ono ekwobe okfu ẹhu Jisọsu bọkahu ẹbo. 44 Whẹ harụ chọo ụzo, whẹ l'e-shi t'ẹka whẹ kpaa ya, ọle ọ tọ dụdu onye ọwhu ẹka iya rwuru iya l'ẹhu.
Ndu ishi ndu Ju bụ ekwegekwe
45 Ndu nche ono, whẹ zhiru ozhi dawhu azụ lakfushia ndu ishi ndu ono, l'agbajẹ ẹja nụ Chileke mẹe ndu Fárisii ono, bu whẹ zhiru whẹ ozhi. Whẹ rwua, ndu ono, zhiru whẹ nụ jị whẹ: “Ọo gụnu meru unu ta akpụtahe iya?” 46 Ndu nche ono sụ whẹ: “Ha-a! Anyi tẹke awhụbudua onye l'ekfu g'ọo ya!” 47 Ndu Fárisii ono sụ whẹ: “?O duswefuwaru unubẹdua? 48 ?Akọ kọjeru unu l'onweru onye ishi anyi, ọdua l'ọo onye Fárisii, wojeru onwiya ye iya l'ẹka? 49 A bya abyakwanụ l'ọwhube igweligwe ọha ono, bụ iwu Mósisu bẹ whẹ l'ẹte amadụa bẹ Chileke tụakwaru ọnu.” 50 Ọo ya bụ, Nikodímọsu bụ onye lanụ lẹ ndu Fárisii ono, kwa iya whọ bẹ kpakfujeru Jisọsu sụ whẹ: 51 “E -tsode iwhe iwu anyi kfuru bẹ anyi l'ẹte anmakwa madzụ ikpe mẹ anyi tẹke anụa ọnu okfu iya, marweta iwhe ọbu, o meru.” 52 Whẹ sụ iya: “?Gụbedua bụfua onye Gálili? Lerwenua ẹnya l'ẹkwo Okfu Chileke, gụ awhụ l'ọ tọ dụdu onye nkfuchiru Chileke, l'e-shi lẹ Gálili.”
Nwanyị, e guderu l'ẹka l'oori ogori
53 Whẹ wụkahu, onyenọnu lashia ibe iya.
1 Ọo ya bu, ọwhube Jisọsu tụgburu jeshia ugvu Ólivu. 2 O rwulewho l'ọnma-ẹwa ụtsu echile iya, ọ tụgburu ọdo byatashia l'eze-ụlo Chileke. Igweligwe madzụ zakọo l'ẹka ono bya adọ-whe iya mgburumgburu. Ọ bya anọdu anọdu wata whẹ ozhi iwhe. 3 Tọ dụ iya bụ lẹ ndu l'ezhije iwu mẹe ndu Fárisii kpụru nwanyị, whẹ gudejeru l'ẹka l'oori ogori kpụfutaru iya. Whẹ kpụta iya bya edobe l'echilabọ whẹ l'ẹka ono. 4 Whẹ sụ Jisọsu: “O-zhi-iwhe, nwanyị-a b'e guderu l'ẹka yẹle nwoke zẹe. 5 Lẹ iwu whẹ bẹ Mósisu sụru t'e gudeje ẹwhuru tugbua onye a whụru l'oome ẹgube iwhe dụ nno. ?Ndẹe g'ọ dụ ghu t'e me iya ntaa?” 6 Iwhe ono whẹ l'ekfu nno bẹ bụ ọ́nyà okfu bẹ whẹ gbabẹru iya tẹ whẹ marụ; ọ dụ iwhe whẹ l'e-gude nmata iya, l'o noo ọwhu o mesweru. Jisọsu bya etsukfuru etsukfuru gude mkpụshi-ẹka iya delahaa iwhe l'alị. 7 Whẹ jịnya-zhia ya whọ ajị t'o ye ọnu. A nọnyaa, ọ gbalihu sụ whẹ: “Ọ -bụru l'ọ dụ onye ono lẹ g'unu ha l'ẹka-a, l'ẹteke emebua iwhe-dụ-ẹji, t'onye ono vuru ụzo wota ẹwhuru tụ nwanyị-a.” 8 O tsukfukwaru ọdo gude mkpụshi-ẹka iya delahaa iwhe l'alị ọdo. 9 Whẹ nụlewho iwhe ono, whẹ hahụde nnanụ nnanụ alụfukaa. O noo ya, whẹ shizhiawho ahahụ lẹ ndu bụ ọgurenya alụfu jeye ọ warụa Jisọsu kemoru nwẹkiya yẹle nwanyị ono, kfụru iya l'atatiwhu. 10 Jisọsu bya agbalihu sụ iya: “Nwanyị ?ndẹhunu whẹ? ?Tọ dụhedu onye ọwhu kfụru anma ghu ikpe ọbu?” 11 Nwanyị ono sụ iya: “Ọ tọ dụkwa, Onye-Nwe-Ọha.” Jisọsu sụ iya: “O nokwawho gẹ mbẹdua l'ẹte anma ghu ikpe. Tụgbukwaa lashia, ọle be emehekwa iwhe-dụ-ẹji ọdo.”
Jisọsu bụ iwhoro nke ndu mgboko
12 Jisọsu kfuru yeru whẹ ọdo sụ: “Ọo mbẹdua bụ iwhoro nke ndiwhe, onye bụ onye l'etso mu nụ ta abyadụ l'eje ije l'ẹkpuroochi gbahaa iwhoro ndzụ l'a-dụ iya l'ẹhu.” 13 Ọo ya bụ, ndu Fárisii sụ iya: “Ntaa b'ọ gbee bụru gụbedua l'onwoghu bya atụlahaa ọnu onwoghu, iwhe ono, l'iikfu ta adụkwa ọwhu bụ ire-lanụ.” 14 Jisọsu sụ whẹ: “Wawa, mu l'atụhudu m'ọo ọnu onwomu, unu marụ amarụ l'iwhe mu l'ekfu bụkotakwa ire-lanụ. O noo nkele mu marụ ẹka mu shi, makwarụwho ẹka mu l'ala, ọle unubẹdua ta amadụ ẹka mu shi, unu ta ama ẹka mu l'ala. 15 Unubẹdua l'ekpe ikpe gẹ madzụ l'ekpeje. Mbẹdua ta adụdu onye mu l'ekpe ikpe. 16 Tẹmenu ọ -bụhuduru m'ọo l'ọo tẹ mu kpee ikpe bẹ ikpe nkemu bụ ikpe, kfụru nhamụnha. O noo nkele ọ tọ dụ mbẹdua nwẹka mu l'ekpe ikpe ono. Onye mu l'iya l'ekpe iya bụ Nna ono, bụ iya zhiru mu tẹ mu bya. 17 Ọle e dekwaru iya l'ẹkwo iwu unu sụ lẹ nteke ụmadzu labọ l'agbawa ẹka-ebe l'iwhe bẹ iwhe ono bụnuwho ọkpobe-okfu. 18 Mu l'atụwaa ọnu onwomu, tẹhenu Nna mu ono, bụ iya zhiru mu tẹ mu bya l'atụkwawho ọnu mu.” 19 Ọo ya bụ, whẹ jị iya: “?Ndẹnu Nna ghu ọbu?” Jisọsu sụ whẹ: “Unu ta amakwa mu, unu ta ama Nna mu. Nggẹ l'ọo iwhe l'unu marụ mbẹdua mẹ unu amakwarụwho Nna mu.” 20 Okfu ono b'ọ nọdu l'ẹka l'eedobeje okpoga, a tụkotaru Chileke kfushia nteke ọ nọ l'eze-ụlo Chileke ono ezhi iwhe. Ọle ọ tọ dụkwa onye chiru iya ẹhu nke egude nkele oge nteke l'ee-gude iya teke erwudua.
Unu ta abyadụ ẹka ya l'ala
21 Jisọsu sụ-whu whẹ azụ: “Mu l'a-la, unu l'a-chọ mu nta chọo imo, ọle unu ta achọ-vukwa mu. Unu l'e-vu iwhe-dụ-ẹji, unu meru, unu l'e-vu iya l'ishi g'unu vu iya nwụshihu. Ẹka ọbu, mu l'ala bẹ unu l'afụdua bya.” 22 Ọo ya bụ ọwhube ndu Ju sụ: “?Ọo kabẹhunu gbua onwiya meru g'o gude ọ sụ: ‘Ẹka mu l'ala bẹ unu l'a-fụdua bya’?” 23 Ọ sụ whẹ: “Unubẹdua shi l'ẹka lwarụ alị, ọle mbẹdua shi l'imeli. Unu bụ ndu nke mgboko-o, ọle mbẹdua ta abụdu onye nke mgboko-o. 24 Mu sụru unu l'o noo iwhe meru iwhe unu l'e-vu iwhe-dụ-ẹji, unu meru, unu l'e-vu iya l'ishi g'unu vu iya nwụshihu, mbụ unu jekwa l'a-nọduwaro l'iwhe-dụ-ẹji ọbu, unu metaru ọbu nwụshihu t'a gụfulewho l'unu bya bya ekweta l'ọo mu bụ onye mu bụ.” 25 Whẹ jị iya: “?Ọo onye b'ị bụ?” Jisọsu sụ whẹ: “Ọo onye ono, mu shizhiawho lẹ mbụlembu kfutaru unu lẹ mu bụ ono bẹ mu bụ. 26 O nwegekwaaru igweligwe iwhe mu l'e-kfu kfukuta unu mẹkwawho igweligwe iwhe mu l'e-kpe unu ikpe iya, ọle onye ono, zhiru mu nụ bẹ bụ onye ire-lanụ, tẹmenu ọ bụru iwhe mu nụru l'ọnu onye ono, zhiru mu nụ bẹ mu l'aryajẹ aryarya tẹ ndiwhe nụ-dzuru.” 27 Ndu ono ta ama l'ọo Chileke, bụ Nna bẹ l'ookfu ama ẹka. 28 Ọo ya bụ, Jisọsu sụ whẹ: “Nteke unu l'ewolilewho Abụbu-Ndiwhe kpọpyabe l'oswebe, o noo nteke unu l'a-ma l'ọo ‘Mu bụ onye mu bụ.’ O noo nteke unu l'a-makwawhọ l'ọ tọ dụdu iwhe mu l'egudeje ike ẹka mu mee, l'ọolewho iwhe Nna zhiru mu bẹ mu l'anọje ekfu. 29 Tẹmenu mẹ onye ono, bụ iya zhiru mu ono kfụkwaruwho swiru mu, ọ tọ wehakwa mu, o noo l'o zhiawho iwhe dụ Nna mu ono mma l'obu bẹ mu l'anọje eme nteke nteke.” 30 Igweligwe ndu nụru nteke Jisọsu l'ekfu iwhe ono kweta nkiya.
Ohu lẹ amadụ
31 Ọo ya bụ, Jisọsu sụ ndu Ju ono, kwetaru nkiya: “Ọ -bụru l'unu l'emezhiwaa iwhe-e, mu l'ekfua, mu amarụ l'unu bụwhoo ọkpobe ndu l'etso ụzo mu. 32 Unu amakwanụru ọkpobe-okfu, ya bụru ọkpobe-okfu ono l'a-tọ unu l'uli, mee t'unu ba abụhe ohu.” 33 Whẹ sụ iya: “Mẹ anyi shikwa l'eri Ébirihamu, tẹmenu tọ bụ l'ọ dụje onye gbajẹru anyi ohu iya-e! ?Ọ hụnu ole bụ nke ọto unu l'uli, mee unu t'unu ba abụhe ohu ọwhu l'iikfu?” 34 Jisọsu sụ whẹ: “Unu gebenu tẹ mu karụ unu iwhe mu l'ekfu, l'iwhe bụ onye l'eme iwhe-dụ-ẹji bẹ bụakwa ohu iwhe-dụ-ẹji. 35 Ohu te ebugbujekwaru l'ibe onye-nwe-iya-nụ jeye lẹ tututu-mịmimi. Ọo nwa, a nwụru anwụ l'uwhu l'ebugbujeru iya jeye nteke madzụ nọ-beru. 36 Ọo ya bụ, ọ -bụru lẹ Nwa ono meru t'unu ba abụhe ohu, ọo ya bụ l'unu l'a-bụkwanu ndu a tọru l'uli ọkpobe atọto. 37 Mu makwarụ-a l'unu shi l'eri Ébirihamu, ọle lenu l'unu l'achọ g'unu l'e-shi gbua mu, nke l'ọo l'unu te ekwetadu haa okfu mu t'ọ bata unu l'ẹhu. 38 Iwhe mu l'ekfu okfu mu bụ iwhe mu gudewaa ẹnya mu whụa l'ẹka Nna nọ, iwhe unubẹdua l'emekwanu bụru iwhe unu nụru l'ọnu nna unu whẹ.” 39 Whẹ sụ iya: “M'ọ kwa Ébirihamu bụ nna anyi.” Jisọsu sụ whẹ: “Nggẹ l'ọo iwhe unu bụ ụnwu Ébirihamu mẹ unu emekwaa iwhe Ébirihamu meru. 40 Ọle ntaa bẹ unu l'a-chọ ụzo, unu l'e-shi gbua mu, lẹ mụbe onye bụ ire-lanụ, mu nụru Chileke l'ọnu bẹ mu kfuru unu. Ọ tọ kwa ẹgube iwhe dụ nno bẹ Ébirihamu meru. 41 Ọo iwhe nna unu meru bẹ unu l'eme. ?Unu nụwaru iya?” Whẹ sụ iya: “Ọ tọkwa l'ọkpara b'a gbatarụ anyịbedua, m'ọ kwa Nna lanụ bẹ anyi nwe bụ iya bụ Chileke.” 42 Jisọsu sụ whẹ: “Nggẹ l'ọo Chileke bụ Nna unu mẹ unu eyekwa mụbe Jisọsu obu, o noo nke l'ọo l'ẹka Chileke nọ bẹ mu shi gbalihu byatashia. Mu ta anọnyalekwawho gude ike nke onwomu byatashia. Ọ kwa Chileke zhiru mu tẹ mu bya. 43 ?Ndẹe g'e meru iwhe mu l'ekfu te edoje unu ẹnya? Iwhe meru iya nụ bụ l'unu te ekwetadu l'unu l'a-nụ okfu mu. 44 Unu bụ ụnwu Oshifutuswe. Ọ bụru Oshifutuswe ono bụ nnajị unu. Iwhe dụ unu ree l'obu bụru g'unu l'e-shi mee iwhe dụ nnajị unu ono ree. Nnajị unu ono bẹ shizhiawho lẹ mbụlembu bụtaru onye mgbugbu madzụ. Ẹka iya ta adụjeru l'ire-lanụ nkele ọ tọ dụdu ire-lanụ, dụ iya l'ọnu. Nteke ọ dzụru ejire b'a mawarụ l'ọo iwhe gbarụ ẹgube onye ono, ọ bụ bẹ l'oome, o noo l'ọ bụ ejire maa, tẹmenu ọ bụru iya bụ nnajị ejire l'onwiya. 45 Ọle mbẹdua, bụ Jisọsu l'ekfu ire-lanụ, ọ bụru iwhe ono meru unu te ekwetaje lẹ nkemu bụ iya. 46 Ndẹe g'unu ha onye ọwhu l'afụta bya agbaa ọku l'iya whụjeru iwhe-dụ-ẹji, mụbe Jisọsu mejeru? Nteke bụ l'ọo ire-lanụ be mu l'ekfu ?ọo gụnu kpatarụ unu te ekwetaje lẹ nkemu bụ iwhe? 47 Onye bụa Chileke bẹ bụ Nna iya l'anụje okfu Chileke. Iwhe meru iwhe unu l'ẹte anụje okfu Chileke bụ l'unu ta abụdu ụnwu Chileke.”
Jisọsu yẹle Ébirihamu
48 Ndu Ju sụ iya: “?I cheru sụ l'ọ tọ bụdu anyi ọkpobe-okfu mẹ anyi sụ l'ị bụ onye Samériya, ọgvu dụ l'ẹhu?” 49 Jisọsu sụ whẹ: “Ọ tọ dụkwa ọgvu, dụ anyi l'ẹhu, ọ kwa Nna mu bẹ mu l'akwabẹ ugvu, unu gbee agwọ mbẹdua l'ẹja. 50 Lẹ ba abụ lẹ mu l'adzọ ọja-ama nke ẹka mu. O nweru onye lanụ ọdo, l'achọ t'a jajẹ mụbe Jisọsu ajaja, ọ bụru onye ono l'e-kpe ikpe. 51 Mbụ-a, tẹ mu kanụru unu, l'iwhe bụ onye l'eme iwhe mu l'ekfu ta abyadụ l'a-nwụhu anwụhu jeye lẹ tututu-mịmimi.” 52 Ndu Ju sụ iya: “Ntaa bẹ anyi kabẹ marụ l'ọgvu dụ ghu l'ẹhu l'ezhi. Ébirihamu nọru eli nọo alị, ọ nwụhulee. Iwhe bụkota ndu nkfuchiru Chileke gẹ whẹ ha nwụhukotakwawho, m'ọo ya b'ị bya asụ anyi l'iwhe bụ onye l'eme iwhe i kfuru ta afụdu nwụhu anwụhu jeye lẹ tututu-mịmimi. 53 ?Ị bya aka nnajị anyi Ébirihamu shii, bekochakwaaruro nwụhu anwụhu? Ọwhube ndu nkfuchiru Chileke nwụhukwawho anwụhu. ?O zhia onye bẹ l'iikfu l'ị bụ?” 54 Jisọsu sụ whẹ: “Ọ -bụ l'ọo tẹ mu bya ajajẹ onwomu ntaa mẹ ajaja ono, mu l'aja onwomu ta adụ iwhe ọ gọgo abụ. Ọo Nna mu ono, unu sụru l'ọo Chileke unu l'aja mu ajaja. 55 Ọle unu tẹke amadụa ya. Mbẹdua mawarụ iya. Nggẹ l'ọo iwhe mu sụru lẹ mu ta amadụ iya mẹ ya abụru ejire bẹ mu l'adzụ g'ọo unubẹdua. Ọle mu marụ iya, mu l'anọje eme iwhe o kfuru. 56 Nnajị unu Ébirihamu bẹ ẹhu tsọru ụtso l'o gude ẹnya iya whụa mbọku mụbe Jisọsu l'a-bya. Ọ whụa ya, ẹhu tsọo ya ụtso.” 57 Ọo ya bụ, ndu Ju sụ iya: “?G'ị tịki nọ-bee awha ụkporo ugbo labọ l'awha iri-a, b'i gbee whụwanu Ébirihamu?” 58 Jisọsu sụ whẹ: “Iwhe mu l'eme t'o doo unu ẹnya bụ lẹ: a byakwa l'anwụdeshia Ébirihamu mu bụwaru onye mu bụ.” 59 Ọo ya bụ, whẹ kwakọlahaa ẹwhuru tẹ whẹ bya atụa ya, Jisọsu domia onwiya lụfushia l'eze-ụlo Chileke ono.
Jisọsu l'emeta nwoke, shi ọtso ishi l'ẹwho ne iya
1 Jisọsu l'aghata ejekwaro ẹka l'ooje, ọ whụa nwoke ọbu, shi ọtso ishi l'ẹwho ne iya. 2 Tọ dụ iya bụ lẹ ndu l'etso ụzo iya ajị Jisọsu sụ iya: “O-zhi-iwhe ?ọo onye mesweru? ?Ọo nwoke-e metaru iwhe-dụ-ẹji, tọo ndu nwụru iya nụ, mbụ kpatakwanụru iwhe a bya l'anwụdeshia ya, l'ọotsowaa ishi?” 3 Jisọsu sụ whẹ: “Ọ tọ bụkwa lẹ nwoke-e mesweru, ndu nwụru iya nụ te emeswe, bẹ meru iwhe l'ọotso ishi. Iwhe kparụ iya nụ bụ t'e shichia l'ẹhu iya goshi g'ike Chileke l'erebe ire. 4 Anyi jefutajekwa ozhi nke onye ono, bụ iya zhiru mụbe Jisọsu nteke iwhoro dụkwadu. O noo l'ẹnyashi l'abyawaa, nteke l'adụhee onye l'adụkwadu ike eje ozhi. 5 Lẹ ntaa mu nọkwadu l'eli mgboko-o bẹ bụ mu bụ iwhoro nke ndu mgboko-o.” 6 O kfugelewho iwhe ono, ọ gbụru ọnu-mini tọgbo l'alị, gude ọnu-mini ono gwọ-whube ẹja, meta ẹja ono tee nwoke ono l'ẹnya, 7 sụ iya: “Tụgbua je aswaa iwhu l'okpuru Sayilówamu.” Iwhe Sayilówamu fụtaru bụ: “Onye e zhiru”. Ọo ya bụ, ọ tụgbua je aswaa iwhu l'okpuru ono. Ọ dawhushia azụ l'ọowhuwaa ụzo. 8 Ndu obutobu ono mẹe ndu shi awhụje iya l'ẹka l'ọoryo aryọ jịlahaa sụ; “?Tọ bụnu-a nwoke-e shi anọduje l'alị aryọ aryọ-ọ?” 9 Ndu sụ: “Ọ kwa iya-a!” Ndu sụ: “Ọo ejire, ọ tọ dụ iya, onye ọwa bụ onye shiru iya nụ.” Nwoke ono sụ: “Ọ kwa mu-a-o!” 10 Whẹ jị iya: “?Ndẹe g'e meru ị whụlahaa ụzo?” 11 Ọ sụ whẹ: “Ọo nwoke ọbu, l'eeku Jisọsu gwọru ẹpoto tee mu l'ẹnya labọ, sụ mu tẹ mu tụgbua je aswaa iwhu lẹ Sayilówamu. Ọo ya bụ, mu tụgbua je aswaa iwhu, mu whụlahaa ụzo.” 12 Whẹ jị iya: “?Ndẹe ẹka ọ nọ?” Ọ sụ whẹ: “Mu ta amahẹkwa.”
Ndu Fárisii l'ajị onye ono, shi atsọ ishi ono ajị
13 Whẹ duta nwoke ono, shi dụ mbụ atsọ ishi dukfuta ndu Fárisii. 14 Mbọku ono, Jisọsu gwọru ẹpoto ono tee nwoke ono l'ẹnya ọ whụlahaa ụzo bẹ bụ mbọku ọtuta-ume. 15 Ndu Fárisii bya ajịkwa nwoke ono ọdo t'ọ kọo g'o shiru ọ bụ l'ọ whụde ụzo. Ọ sụ whẹ: “O metaru ẹja tee mu l'ẹnya mu whẹ ẹbo, mu je aswaa iwhu, mu whụlahaa ụzo.” 16 Ndu Fárisii harụ sụ: “Nwoke ono te eshikwa l'ẹka Chileke, nggẹ l'o shi l'ẹka Chileke mẹe ya edobejekwa nsọ, dụ lẹ mbọku ọtuta-ume.” Ndu ọwhu sụ: “?Ndẹ-zhia g'onye l'eme iwhe-dụ-ẹji l'e-me emekota ẹgube iwhe-awhụrulenya ọwhu dụ-gee nno?” Whẹ bọkahu onwowhe ẹbo. 17 A nọnyaa, ndu Fárisii ono bya ajịkwa nwoke ono ọdo sụ iya: “?Ndẹe ọnu ọwhu gụbedua yeru l'okfu ẹhu nwoke ono eshi-ọwhu ọ bụ iya meru ghu, ị whụlahaa ụzo?” 18 Ndu Ju ono te ekwetadu ilile lẹ nwoke ono shi atsọ ishi, a bya emee ya, ọ whụlahaa ụzo ntaa, jeye nteke whẹ je ekua ndu nwụru nwoke ono, e meru ọ whụlahaa ụzo, 19 jị whẹ: “?Ọo onye ọwa bụ nwa unu ọbu, unu shi sụ l'a bya l'anwụ-deshia, l'ọotsowaa ishi? ?Ndẹhunu g'e meru ọ bya awhụlahaa ụzo ntaa?” 20 Ndu nwụru nwoke sụ: “Iwhe anyi mabeleruwho bụ l'onye-e bụ nwa anyi. Iwhe ọdo bụru l'o shi ọtso ishi l'ẹwho ne iya. 21 G'e meru mee ọ bya awhụde ụzo ntaa bẹ anyi l'amahẹkwaa. Tọ hẹkwa l'anyi marụ onye ọbu, meru iya ọ whụlahaa ụzo. Unu jịtakwa iyẹ ya t'o kfua l'ọnu iya eshi-ọwhu ọgurenya iya dụwaa shii.” 22 Iwhe ndu nwụru nwoke ono kwoberu kfua nno bụ lẹ whẹ l'atsụ ndu Ju egvu, o noo lẹ ndu Ju chịhawaru iya sụ l'ọ -bụ l'o nweru onye gude ọnu iya sụ l'edzudzu-ọha l'ọo Jisọsu bụ Kuráyisutu ọbu, whẹ ekefu onye ọbu l'oke, sụ t'o bọ batahẹkwa ụlo-ndzuko whẹ ọdo. 23 O noo iwhe meru, ndu nwụru iya nụ sụ: “Unu jịtakwa iya, o meruroo ree, ọ bụwaru ọgurenya.” 24 Ọo ya bụ, whẹ byakwa ekua nwoke ono, shi atsọ ishi nke ugbo labọ sụ iya: “Kwabẹ Chileke ugvu kfuaru anyi ire-lanụ, l'anyịbedua l'onwanyi bẹ makwarụ-a lẹ nwoke ono bụ onye l'eme iwhe-dụ-ẹji.” 25 Nwoke ono sụ whẹ: “Ọ -bụru lẹ nwoke ono bụ onye l'eme iwhe-dụ-ẹji bẹ mu l'amakwaa, iwhe lanụ, mu ka ogude ẹka bụ lẹ mu shi atsọ ìshì, ọle ntaa bẹ mu l'awhụwaa ụzo.” 26 Whẹ jị iya: “?Ndẹe g'o nwụru gụ l'iya? ?Ndẹe g'o meru mee ghu ọbu, ị whụlahaa ụzo?” 27 Ọ sụ whẹ: “Ọ kwaa iwhe lanụ-a, mu kfuhawaru unu, unu te egbebe iya nchị. ?Unu kwoberu gụnu achọ tẹ mu kfua ya ọdo t'unu nụa? ?Unubẹdua l'achọfua t'unu bụru ndu l'etso ụzo iya?” 28 Whẹ kpọderu iya iwhu sụ iya: “Ọ kwarọo gụbedua bụ onye l'etso ụzo iya, anyịbedua bụkwa ụzo Mósisu bẹ anyi l'etso. 29 Ọ bụru Mósisu bẹ anyi marụ lẹ Chileke kfuru okfu nụ. Ọ bụru onye ọwa bẹ anyi l'ẹte amakwaa ẹka, o shi.” 30 Nwoke ono, shi atsọ ishi bua sụ: “Ha-e! ?Ọ bụru gụnu? Ọ waa dụkwa mbẹdua biribiri! Unu ta amadụ ẹka, o shi, ọle o mewarunu mu saa ẹnya mu whẹ ẹbo whụlahaa ụzo. 31 Iwhe doru ẹnya bụ lẹ Chileke ta angajẹduru ndu l'eme iwhe-dụ-ẹji nchị. Obekwanu l'onye bụa onye l'abarụ Chileke ẹja, eme iwhe dụ Chileke ono ree l'obu bẹ Chileke ono l'angajẹru nchị. 32 Eshi nkeshi mgboko-o dụ bẹ l'ọ tọko dụbukwaa onye nụjeru l'ọ dụ onye mejeru onye shi l'ẹwho ne iya ọtso ishi, ọ bya awhụlahaa ụzo. 33 Nggẹ l'ọo iwhe nwoke-e l'ete eshia Chileke l'ẹka, m'ọ tọ dụkwa iwhe ọ gọgo dụ ike mee.” 34 Whẹ vụ iya pyịi; sụ iya: “?L'ịibya anyi ozhi iwhe lẹ gụbe onye ngụpyaberu ejo ememe l'ẹra?” Whẹ chịfu iya.
Ọtso ìshì nke ndu Fárisii
35 Jisọsu nụa lẹ whẹ chịfuru nwoke ono, ọ bya eje achovu iya sụ iya: “I kweru nke Abụbu-Ndiwhe?” 36 Nwoke ono sụ Jisọsu: “?Ọ hụnu onye bụ Abụbu-Ndiwhe ọbu? Kanụru mu iya nggẹ mu kweta nkiya.” 37 Jisọsu sụ iya: “I gudekwa-a ẹnya ghu whụa onye ọbu. Mbụ ọ kwa iya l'ekfu eyeru ghu ntaa.” 38 Nwoke ono sụ iya: “Oowo, Onye-Nwe-Ọha, lẹ mu kwetaakwaru.” Nwoke ono bya ebua iwhu l'alị baarụ iya ẹja. 39 Jisọsu sụ iya: “Iwhe mu kwoberu bya l'eli-mgboko bụ tẹ mu kpee ikpe nke ọwhu ndu l'atsọ ishi l'a-whụlahaa ụzo, ndu l'awhụ ụzo ekpukota ishi.” 40 Ndu Fárisii, harụ nọkube iya nụa iwhe ono, whẹ sụ iya: “?L'iikfu l'anyịbedua l'atsọfua ishi tọo gụnu?” 41 Jisọsu sụ whẹ: “Nggẹ l'ọo iwhe l'unu l'atsọ ishi m'ọ tọ dụkwa iwhe-dụ-ẹji, gẹge adụ unu l'ẹhu. Obenu ntaa, unu sụru l'unu l'awhụ ụzo-ọ bẹ unu vukwawho iwhe-dụ-ẹji, unu metaru g'unu vu iya.”
Onye l'eche atụru
1 Jisọsu sụ whẹ: “Iwhe mu l'akarụ unu bụ lẹ: onye l'ete eshia l'ọnuzo bahụ lẹ mkpu atụru, onye ono shia ẹka ọdo nyiba iya, onye ono bụkwa iwhuru, bụru onye l'ana nfụ. 2 Ọo onye shiru ọnuzo bahụ lẹ mkpu atụru bẹ bụ onye l'eche atụru. 3 Ọo onye ono bẹ onye l'eche mkpu atụru ono l'agụhajeru ụzo, ọ bụru onye l'eche atụru bẹ atụru ono l'anụje olu iya, ya abya ekugbaru ọwhu bụ atụru nkiya l'ẹwha l'ẹwha chịta whẹ, eduzhi whẹ ụzo. 4 Nteke ọ chịfuta-geleruwho atụru nkiya, ya evuta ụzo, atụru iya lile ono awụ etso iya etso nkele whẹ mawarụ olu iya. 5 Whẹ te ekwetakwa etso onye ọdo. Ọ kwa ọso bẹ whẹ l'agbẹe agbarụ onye ọbu, o noo lẹ whẹ ta amadụ olu ndu shi uswe.” 6 O noo ẹtu, Jisọsu nmarụ whẹ, ọle iwhe l'ookfuru whẹ te edodu whẹ ẹnya.
Jisọsu bụ onye obu-ọma, l'eche atụru
7 Ọo ya bụ, Jisọsu bya asụ-whu whẹ azụ ọdo: “Iwhe mu l'eme t'o doo unu ẹnya bụ l'ọo mbẹdua bụ ọnuzo mkpu atụru. 8 Iwhe bụ ndu vu mu ụzo bya bụkota ndu iwhuru, bụru ndu l'ana nfụ. Ọle atụru ono te eyedu ọnu yeru whẹ. 9 Ọo mbẹdua bụ ọnuzo ono. Onye shiru mu nụ bahụ bẹ l'aa-dzọfutakwa onye ono. Onye ono l'a-nọ abata abata, alụfu alụfu, onye ono awhụjee ẹka l'ọo-tabata nri. 10 Iwhe onye iwhuru l'abyajẹ-zhiawho ememe kpụ bụ tẹ ya zhita oshi mẹe tẹ ya gbua mẹe tẹ ya mee t'iwhe lile laa l'iyi. Ọle iwhe mbẹdua l'onwomu kwoberu bya bụ nggẹ atụru ono enweru ndzụ, tẹ whẹ nweru ndzụ nweru etsutsu iya. 11 “Ọo mbẹdua bụ onye obu-ọma ọbu, l'eche atụru. Onye obu-ọma, l'eche atụru l'ekwobeje iswi atụru iya tụa ishi ndzụ iya. 12 Onye ọwhu e buru ebu l'a-parụ atụru ono haa, gbalaa nteke ọ whụru agụ-nwoghu gẹ l'ọobya ọta-gbushi atụru ono, iwhe meru l'oomeje iya nno bụ nke l'ọ tọ bụdu iya l'eche iya, tọ bụ iya nwe iya. Ọo ya bụ agụ-nwoghu ono abyakfuta atụru ono bya achịkashia whẹ. 13 Onye ono, e butaru ebuta ono l'agbalajẹ nkele ọo ebuta b'e butaru iya. Ọ tọ dụdu iwhe o kuru atụru ono. 14 Ọo mụbe Jisọsu bụ onye obu-ọma ọbu, l'eche atụru. Mu marụ ndu ọwhu bụ nkemu, ndu ọwhu bụ nkemu marụ mu. 15 O nokwawho gẹ Nna mu marụ mu. Mu l'ekwobeje iswi atụru mu tụa ishi mu. 16 Mu nwekwaruwho atụru ọdo l'ete etsoo ndu ọwa. Mu jefutajekwawho je achịtafua whẹ. Whẹ atụko anụ olu mu. Ọo ya bụ, whẹ atụko nmagba bụru igwe atụru lanụ, nweru onye lanụ, l'eche whẹ nụ. 17 “Iwhe kpatarụ iwhe Nna mu yeru mu obu bụ nkele mu tụru ishi ndzụ mu nke ọwhu mu l'a-natawhu iya azụ. 18 O to nwekwa onye bụ iya natarụ mu ndzụ mu ono. Ọ kwa mbẹdua tụru obu mu ama tụa ishi ndzụ mu ọbu. Ọo mbẹdua b'ọ dụ l'ẹka. Mu -sụ lẹ mu l'a-tụ ndzụ mu, mu atụa ya, mu -sụ lẹ mu l'a-natawhu iya azụ, mu anatawhu iya azụ. O noo iwhe Nna mu zhiru mu.” 19 Ndu Ju kwobekwawho okfu ono, Jisọsu kfuru bọkahu onwowhe ẹbo ọdo. 20 Whẹ dụ l'igwe sụ: “Ọ kwa ọgvu dụ nwoke-e l'ẹhu, tẹmenu ọgvu l'emekwa iya who. ?Unu kwoberu gụnu je angabẹ nchị l'iwhe ono, l'ookfu?” 21 Ndu ọdo sụ: “Okfu ọwa, l'ookfushi ta abụkwa okfu onye, ọgvu dụ l'ẹhu. ?Unu whụjeru ẹka ọgvu dụ ike mee onye l'atsọ ishi, ọ whụde ụzo?”
Ndu l'ajịka Jisọsu
22 O rwua nteke ono, l'eeri oge lẹ Jerúsalẹmu bụ iya bụ oge ono, l'eerije gude nyata nteke ono, a tụ-geeru eze-ụlo Chileke, woru iya ye iya l'ẹka; nteke ono bẹ bụ nteke oyi l'anọje atsụshi ike. 23 Jisọsu l'ejewhe l'ime eze-ụlo Chileke, l'ibẹka eze-ụlo ono, ibiya ọwhu bụ Ọnuzo Sólomọnu. 24 Ọo ya bụ, ndu Ju bya adowhe iya mgburumgburu sụ iya: “?Ndẹe nteke bụ anọ-be iya tẹ gụ emee t'anyi kabẹ zhia ume? Ọ -bụru l'ọo ghu bụ Kuráyisutu ọbu, salẹwho ọnu kfuru iya anyi.” 25 Jisọsu sụ whẹ: “Mu dụhaakwa mbụ kfuru iya unu, unu jịka ekweta. Iwhe bụkota ozhi ono, mu l'eje ono, bụ ozhi Nna mu zhiru tẹ mu jee, bụkota iwhe l'agbarụ mu ẹka-ebe. 26 Ọle unu te ekwekwawho nkele unu ta alịdu lẹ ndu ọwhu bụ atụru nke mụbe Jisọsu. 27 Atụru nkemu l'anụkaa olu mu, mu marụ whẹ, whẹ l'anọje awụ etso mu. 28 Iwhe mu l'anụje whẹ bụ ndzụ tututu-mịmimi. Whẹ ta afụkwa laa l'iyi, tọ dụ onye bya l'anafụ whẹ l'ẹka mu. 29 Ọo Nna mu ono, bụ iya yeru whẹ l'ẹka mu, bẹ bụ onye kakọta shii, tọ dụ onye l'a-dụ ike anafụ whẹ l'ẹka Nna mu ono. 30 Mbẹdua mu lẹ Nna mu bụ onye lanụ.” 31 O noo ya, ndu Ju ono bya akwakọo ẹwhuru nke ugbo labọ tẹ whẹ tụa ya. 32 Jisọsu sụ whẹ: “Mu goshiakwaru unu igweligwe ẹguru ozhi, shi Nna mu l'ẹka ?O zhia ole l'iwhe ono, mu meshiru ono bẹ unu kwoberu atụ mu ẹwhuru?” 33 Ndu Ju ono sụ iya: “Ọ tọ kwa nke ẹguru ozhi, l'iije bẹ anyi kwoberu eme t'anyi tụ ghu ẹwhuru. Iwhe anyi kwoberu eme t'anyi tụ ghu ẹwhuru kwa l'iikfurwushi ẹwha Chileke. O noo nkele ọo gụbe madzụ mmaanụ wotaru onwoghu mebe Chileke.” 34 Jisọsu jị whẹ: “?T'e dedu iya ede l'ẹkwo iwu unu sụ: ‘Mu sụru l'unu bụkota chi l'ẹhu l'ẹhu.’ 35 Anyi makwarụ-a l'iwhe e deru l'ẹkwo Okfu Chileke te enwedu echikpo, ọ -bụru lẹ Chileke kuru ndu ono, o yeru okfu iya l'ẹka chi l'ẹhu l'ẹhu, 36 ?ndẹe iwhe meru unu sụ l'ọo ekfurwushi bẹ mu l'ekfurwushi ẹwha Chileke nkele ọo lẹ mu sụru: ‘Ọo mbẹdua bụ Nwa Chileke’? Mbụ m'ọ kwa Chileke ọbu họtaru mu zhi mu tẹ mu bya lẹ mgboko. 37 Ọ bụru l'iwhe mu l'emekaa te eshidu l'ẹka Nna mu, t'unu be ejekwaro okweta nkemu. 38 Nteke ọ bụa l'ọo iwhe shi Nna mu l'ẹka bẹ mu l'emekaa, unu kwetanu l'iwhe lile ono, mu l'eme ono shi Nna ono l'ẹka, e beruro unu te ekwetanu m'ọo nke mụbe Jisọsu. Unu -kweta, ọo ya bụkwanu ya edoo unu ẹnya, unu amakwarụwho lẹ Nna nọ mu l'ime, mbẹdua nọdu Nna l'ime.” 39 Whẹ wulihu ọdo tẹ whẹ gude iya, ọ nyịkufu whẹ l'ẹka. 40 Ọ tụgbua ọdo, je adaa Jọ́danu lụfu azụ iya ọwhu, rwua ẹka ono, Jọnu shi anọje eme baputizimu lẹ mbụ je anọdu l'ẹka ono. 41 A dụ l'igweligwe wukfu iya. Whẹ l'ekfukaa sụ: “Ọ tọ dụkwa iwhe-awhụrulenya, Jọnu meru, ọle iwhe bụ iwhe Jọnu kfuru l'okfu ẹhu nwoke-e bụkotakwa ọkpobe-okfu.” 42 Igweligwe madzụ kweta nkiya l'ẹka ono.
Ọnwu Lázarọsu
1 O nweru nwoke lanụ ọbu, ẹwha iya bụ Lázarọsu, bụ onye Bétani. Nwoke ono bẹ ẹhu l'adụdua mma. Bétani bụ mkpụkpu Méri yẹle nwune iya nke nwanyị, bụ Mata bu. 2 Méri-a bụ nwanyị ono, mekochaaru wota mmanụ, l'eshi mkpọ bya etee Onye-Nwe-Ọha l'ọkpa iya whẹ ẹbo gude ẹgbushi dụ iya l'ishi huchashia ye ya. Ọ bụru nwune iya nke nwoke ono, bụ Lázarọsu bẹ ẹhu guderu. 3 Ọo ya bụ, unwune iya nke nwanyị whẹ zhia ozhi t'e zhia Jisọsu l'ọnya iya ono, o yeru obu bẹ ẹhu l'eme. 4 Jisọsu nụle iya whọ; ọ sụ: “Ẹhu ono, l'eme Lázarọsu te emetakwa iya nke anwụhu. Ọ kwa iwhe l'e-gude kwabẹ Chileke ugvu, eshikwa iya whọ jaa Nwa Chileke ajaja.” 5 Jisọsu yenukaru Mata obu mẹe nwune iya nke nwanyị mẹe Lázarọsu. 6 Ọo ya bụ, Jisọsu nụlewho lẹ Lázarọsu daburu l'ẹhu; ọ kpọo nwụkfu nọfua abalị labọ l'ẹka ono, ọ nọ. 7 E megelewho, ọ sụ ndu l'etso ụzo iya: “Unu t'anyi dawhu azụ lẹ Judíya.” 8 Ndu l'etso ụzo iya sụ iya: “O-zhi-iwhe m'ọ bụ-wokwaa ntaa bẹ ndu Ju shi eme tẹ whẹ gude ẹwhuru tugbua ghu. ?Ọo ya b'ị sụru l'iidawhu azụ l'ẹka ono ọdo?” 9 Jisọsu sụ: “?Tọ dụ awa iri l'ẹbo bẹ dụ l'eswe ujiku lanụ? Onye ono, l'eje iwhe l'echi-eswe ta akpokutajekwa iwhe daa, o noo l'onye ono gude iwhoro nke eli-mgboko-o awhụ ụzo. 10 Ọle onye l'eje ije l'ẹnyashi l'akpokutaje iwhe daa nkele iwhoro ono ta adụdu iya l'ẹhu.” 11 O kfugelewho iwhe ono, ọ sụ whẹ: “Ọnya anyi Lázarọsu bẹ mgbẹnya rwekotaakwaru, ọle mu l'e-jekwaa je ekutee ya lẹ mgbẹnya ọbu.” 12 Whẹ sụ iya: “Onye-Nwe-Ọha, ọ -bụru l'ọo mgbẹnya bẹ l'ooku bẹ l'oo-mehuakwaro nteke o tehuru.” 13 Ndu l'etso ụzo iya gbẹenu nọdu g'ọo mgbẹnya mmaanụ bẹ Lázarọsu l'eku. Ọle iwhe Jisọsu l'ekfu nteke ono bụ l'ọ nwụhuwaru anwụhu. 14 Tọ dụ iya bụ lẹ Jisọsu ekfuru whẹ iya kajaa ya akaja sụ whẹ: “Lázarọsu nwụhuakwaru. 15 Ọ kwarọ iswi ẹhu unu bẹ meru ẹhu l'atsọ mu ụtso lẹ mu ta anọdudu l'ẹka ono. Ọo iwhe ono l'e-me t'unu kweta, ọle ọbu, unu gbashi t'anyi jekfu iya.” 16 Tọ́mosu, bụ onye l'eekuje Ejima sụ ndu gẹ whẹ tụkoru etso ụzo Jisọsu: “Unu t'anyi tsokwaru Onye-Nwe-Ọha jee nke ọwhu anyi l'iya l'a-nwụhukota l'ẹka lanụ.”
Jisọsu l'onwiya bụ oteta l'ọnwu bụru ndzụ
17 Ọo ya bụ nteke Jisọsu byarụ, ọ whụa lẹ Lázarọsu b'e gbee liwanu, ọ nọ-kwewanu idzu l'ilu ono. 18 Bétani bẹ dụkubekwaa Jerúsalẹmu ntse. Iwhe ọ bụ bụlewho iwhe ha g'ọo manyịru labọ m'e -shi Jerúsalẹmu. 19 O noo iwhe meru ndu Ju ha l'igweligwe byakfuta Mata yẹle Méri tẹ whẹ bya awhụaru whẹ imiko nke nwune whẹ ono, nwụhuru nụ. 20 Mata nụlewho lẹ Jisọsu l'abya; ọ gbaje iya ndzuta. Méri nọduro l'ụlo nteke ono. 21 Mata sụ Jisọsu: “Onye-Nwe-Ọha, ọ -bụ l'ọo iwhe l'ị nọ l'ẹka-a mẹ nwune mu nwoke ono tẹge anwụhukwa. 22 Mbụkwa mẹe ntaa bẹ mu malẹkwaru-a l'iwhe bụ-zhia iwhe ị sụru tẹ Chileke meeru ghu bẹ l'oo-melekwaru ghu-a iwhe ọbu.” 23 Jisọsu sụ iya: “Nwune ghu nwoke l'e-tetakwa-a nọdu ndzụ ọdo.” 24 Mata sụ iya: “Mu makwarụ-a l'oo-teta nọdu ndzụ ọdo mbọku ikpazụ nteke madzụ l'e-shi l'ọnwu teta nọdukota ndzụ”. 25 Jisọsu sụ iya: “Ọo mbẹdua bụ onye ọbu l'emeje ndu nwụhuru anwụhu whẹ eteta, mu anụ whẹ ndzụ. Iwhe bụ onye woru onwiya ye mu l'ẹka l'a-nọdu ndzụ, e behuduru onye ọbu nwụhu anwụhu. 26 Tẹmenu iwhe bụ onye nọ ndzụ woru onwiya ye mu l'ẹka ta abyadụ l'a-nwụhu anwụhu jeye lẹ tututu-mịmimi. ?I kweru l'okfu mu ono, tẹ ti kwetadu?” 27 Mata sụ iya: “Ee-e! Onye-Nwe-Ọha, lẹ mu kwekwaru-a l'ọo ghu bụ Kuráyisutu ọbu, bụ Nwa Chileke bụ iya bụ onye ọbu, l'a-bya lẹ mgboko-o.”
Ẹnya-mini ghakahụru Jisọsu l'ẹnya
28 Mata kfugelewho nno, ọ bya alaa je ekucha nwune iya Méri ekucha, dzụaru iya ndzụdzuka sụ iya: “O-zhi-iwhe nọkwa l'ẹka-a, mbụ l'ookukwa ghu oku.” 29 Ọ nụle iya whọ, o zhilihulekwawho lọbaru jekfushia Jisọsu. 30 Nteke ono bẹ Jisọsu l'ẹteke abatakwaanụ m'ọo l'ime mkpụkpu ono. Ẹka, ọ nọ bụkwaduro l'ẹka whọ Mata jekfuru iya. 31 Ndu Ju ono, whẹ lẹ Méri nọ l'ụlo whẹ l'aadụ iya obu ono wụfuta, wutsoru iya gẹ whẹ whụru g'o zhilihuru kfụfu etezhi. Whẹ gbee nọdu nụ gẹ l'oojewaa l'ilu ono ọorya ẹkwa l'ẹka ono. 32 Ọo ya bụ, Méri byarwutalewho ẹka ono, Jisọsu nọ; ọ bya awhụle iya whọ, ọ bya arwezhita iya lẹ mgboro ọkpa sụ iya; “Onye-Nwe-Ọha, ọ -bụ l'ọo iwhe l'i nọduhawaa l'ẹka-a mẹ nwune mu nwoke tẹge anwụhukwa.” 33 Jisọsu whụlewho Méri gẹ l'ọorya ẹkwa mẹkwawho gẹ ndu Ju whẹ lẹ Méri ọbu lị tụkoru aryakaa ẹkwa, ẹhu ghulahaa ya eghu, iwhe ono l'atsụkwa iya whọ l'ẹhu atsụshi iyẹ ya ike. 34 Ọ sụ whẹ: “?Ọo l'awee bẹ unu liru iya?” Whẹ sụ iya: “Onye-Nwe-Ọha, bya bya awhụ ẹka ọbu.” 35 Ẹnya-mini ghakahụ Jisọsu l'ẹnya. 36 Ọo ya bụ: ndu Ju sụ: “Oowa-ee! Unu lewaro g'o yeberu Lázarọsu obu.” 37 O nweru ndu ọwhu harụ sụ: “?Ọ fụtaru lẹ nwoke-e meru onye l'atsọ ishi, ọ whụlahaa ụzo tẹge adụdu ike mee Lázarọsu t'ọ bọ nwụhushi?”
Jisọsu l'eme tẹ Lázarọsu shi l'ọnwu teta gbalihu
38 Anwụhu Lázarọsu ono ghulahaa Jisọsu eghu ọdo, ọ tụgbua jeshia l'ilu ẹka ono, e liru Lázarọsu. Ilu ọbu bẹ bụ ọgba, e gudekwawho eze-ẹwhuru swichia ọnu iya. 39 Jisọsu sụ: “Unu swifu eze-ẹwhuru ono.” Ọo ya bụ: Mata bụ iya bụ onye ọbu, nwune iya nwụhuru ọbu sụ iya: “Onye-Nwe-Ọha mẹ ntaa bẹ l'ọo-nọokwanu eshi nshi. M'ọ kwarọo ntanụ bụ idzu-a b'e liru iya.” 40 Jisọsu sụ iya: “?Mu ta asụdu ghu l'ọ -bụru l'i kwetaru, bẹ l'ii-gude ẹnya ghu whụ lẹge Chileke gude egoshi gẹ ya dụ-be biribiri.” 41 Ọo ya bụ lẹ whẹ abya eswifu ẹwhuru ono; Jisọsu bya apalia iwhu imeli sụ: “Nna, mu l'ekele ghu ekele nkele ị nụwaru olu mu. 42 Mu makwarụ-a l'ọ tọ dụdu nteke l'ịiti nụje olu mu. Ọle ọo iswi ẹhu ndu-a kfụkube ẹka-a bẹ mu kwoberu ekfu ọwa nke ọwhu whẹ l'e-kweta l'ọo ghu-a zhiru mu tẹ mu bya.” 43 O kfugelewho nno, ọ ryashịa ya ike sụ: “Lázarọsu; fụta l'ẹka ono.” 44 Nwoke ono, nwụhuru anwụhu bya afụta yẹle ẹkwa ọcha ono, e gude whuchia ya ẹka mẹe ọkpa mẹe ẹkwa-odzu ọwhu e gudekwawho whuchia ya iwhu. Jisọsu sụ whẹ: “Unu tọshia ya iwhe ono haa ya t'ọ lashia.”
Idzu nke t'e gbua Jisọsu
45 Igweligwe ndu Ju ono, wutsoru Méri bya egude ẹnya whẹ whụa iwhe ono, Jisọsu meru, whẹ kweta nkiya. 46 Ọle o nweleru-a ndu ọwhu jekfuru ndu Fárisii je akọoru whẹ iwhe ono, Jisọsu meru. 47 Tọ dụ iya bụ lẹ ndu ishi ndu l'agbajẹ ẹja nụ Chileke mẹe ndu Fárisii abya akpakọo ọgbo-ikpe, l'etsoje whẹ ekpe ikpe sụ: “?Ndẹe g'anyi l'e-me iwhe-e? Nwoke-e l'emeshinukakwa igweligwe iwhe-awhụrulenya. 48 Ọ -bụru l'anyi haa ya t'o meje iwhe-e l'oome, bẹ madzụ lile l'a-tụkokwa kwetakota nkiya, ndu Romu l'a-byakwa atụko eze-ụlo anyi-a mẹe mba anyi l'owhu lwụa ọlwu-ọchi.” 49 Ọle onye lanụ l'ime whẹ, ẹwha iya bụ Káyafasu bụ iya bụ onye ishi ndu l'agbajẹ ẹja nụ Chileke nke awha ononalanụ bẹ sụru whẹ: “Unu ta amakwa iwhe ilile. 50 ?Unu ta amadụ l'ọo-karụ unu mma t'onye lanụ nwụhu-chiaru ndu Ju l'owhu, amamẹ l'onye lanụ nọ ndzụ; ọha l'owhu tụko bụru kpurupyata?” 51 Ọ tọ bụkwa iya gude ike nke onwiya kfua okfu ono, ọle eshi ọ bụ iya bụ onye ishi ndu l'agbajẹ ẹja nụ Chileke nke awha ono b'ọ whụru lẹ Jisọsu l'e-bekochaa nwụ-chiaru ọha l'owhu ọnwu. 52 Mbụ ọ tọlekwaa ọha nwẹkiya bẹ l'ọo-nwuchiru ọnwu, ọle ọ kwawhọ nggẹ o shi nno chịkobe ụnwu Chileke ono, gbakashịhuru dzuru mgboko-o tẹ whẹ bụru nnanụ. 53 Ọo ya bụ, ndu ishi ndu Ju shiwaro eshi mbọku ono chịlahaa idzu gẹ whẹ l'e-shi kpanyia ya ẹnya. 54 Ọo ya bụ iwhe meru Jisọsu ta akpahẹ ntụsaru-ẹhu l'echi ndu Ju. O shi l'ẹka ono tụgbua jeshia alị ọbu, dụkube echi-ẹgu, je abahụ lẹ mkpụkpu ọbu, dụ l'ẹka ono, l'eekuje Ífuremu. Ọ laa ẹka ono je anọdu yẹle ndu l'etso ụzo iya. 55 Nteke ono bẹ oge O-je-ghata ndu Ju tẹwaru l'ukfu. Igweligwe madzụ shichaa l'alị ndu Ju jeshia Jerúsalẹmu eje emeedaa nsọ ọsafu onwonye mmerwu tẹmenu abahụ lẹ oge ono. 56 Whẹ tụko elewhe ẹnya Jisọsu. Whẹ dzukolewho l'eze-ụlo Chileke; whẹ l'ajịkaa ibe whẹ: “?Ndẹe gẹ unubẹdua l'arị iya? ?Ọ dụ unu gẹ l'ọo-bya ori-oge-e?” 57 Ndu ishi ndu l'agbajẹ ẹja nụ Chileke mẹe ndu Fárisii kfuwaru iya kepyaa ya akụ, sụ l'ọ -bụru l'ọ dụ onye marụ ẹka ọ nọ, t'onye ọbu mee tẹ whẹ marụ nke ọwhu whẹ l'e-je egude iya.
Jisọsu b'a kwabẹru ugvu lẹ Bétani
1 O wudulewho abalị ishii tẹmenu a bahụ l'ori-oge O-je-ghata ono, Jisọsu tụgbua jeshia Bétani. Bétani bụ mkpụkpu Lázarọsu bu bụ iya bụ nwoke ono, Jisọsu mejeru o shi l'ọnwu teta nọdu ndzụ. 2 O rwua ẹka ono, whẹ shiaru iya nri ẹbyii. Ọ bụru Mata bụ onye ọwhu l'akwashịru whẹ nri, ọwhube Lázarọsu tsoru lẹ ndu whẹ lẹ Jisọsu tụkoru eri nri ono. 3 Ọo ya bụ, Méri gbalihu je ewota akpamụ, ọ dụ mbụ mmanụ ọbu, l'eshi mkpọ, vu aswa. Mmanụ ono bụ nadụ, guru egu b'e gude mee ya. O je ewota iya bya etee Jisọsu gude ẹgbushi iya huchashia ọkpa Jisọsu ono. Mkpọ mmanụ ono tụko ụlo ono vọo kfurukfuru. 4 Ọle ọwhube Júdasu Isukáriyọtu, bụ onye lanụ l'ime ndu l'etso ụzo iya, bụ iya bụ onye ọbu, l'e-bekoo mee t'e gude Jisọsu, tụfuleruwho ọnu sụ: 5 “?Ndẹe iwhe meru t'e wota mmanụ ọwa je eree reta owhu pọngu lẹ pọngu iri wota keeru ndu l'amaa gẹ whẹ l'eme?” 6 Iwhe Júdasu kwoberu kfua iwhe ono ta abụkwa l'ọo g'ọ bya eyebe ndu l'amaa gẹ whẹ l'eme obu. Iwhe o kwoberu ekfu iya kwa l'ọ bụ iwhuru. Ọo ya l'egudeje ẹkpa, okpoga whẹ l'adụje, l'oozhitaje iwhe e yeru iya. 7 Jisọsu sụ iya: “Sefu nwanyị-a ọnu l'ẹhu, parụ iya haa t'ọ kwakọbe iwhe o gude dobe ngabẹru mbọku l'ee-li mụbe Jisọsu. 8 Unu lẹ ndu l'adụa g'ọ harụ whẹ bupyabe nteke nteke, ọle mbẹdua ta abyadụ nke tẹ mu l'unu bupyabe ebupyabe.”
Idzu t'e gbua Lázarọsu
9 Ọ bya ebe nteke igweligwe ndu Ju nụru l'ọo lẹ Bétani bẹ Jisọsu nọ, whẹ wụru jeshia ẹka ono. Ọ tọ lẹkwaa Jisọsu bẹ whẹ chọru jee kpụ. Whẹ jekwaruwho tẹ whẹ whụada Lázarọsu, bụ onye ono, o meru o shi l'ọnwu teta. 10 Ndu ishi ndu l'agbajẹ ẹja nụ Chileke chịkwaawho idzu lẹ whẹ l'e-gbufukwaawho ọwhube Lázarọsu ono. 11 Iwhe meru whẹ sụ lẹ whẹ l'e-gbufua ọwhube Lázarọsu bụ nkele ọo l'okfu ẹhu iya bẹ igweligwe ndu Ju kwoberu anashịhu ndu ishi whẹ agbakashịhu, ejekaa okweta nke Jisọsu.
Jisọsu l'abahụ Jerúsalẹmu
12 O rwua echile iya, ọha ono, byarụ ori-oge O-je-ghata ono nụa lẹ Jisọsu l'abya Jerúsalẹmu. 13 Ọo ya bụ, whẹ gbafụta-gee, bya abakọo igu-nkfụ gude agbata iya ndzuta. Whẹ l'atụ orooroo asụje: “Ndo-o! Onye Chileke gọru ọnu-ọma b'ọ bụ, mbụ onye ono Onye-Nwe-Ọha zhiru t'ọ bya. Ajaja bụ nke Eze ndu Ízurẹlu!” 14 Ọo ya bụ, Jisọsu bya awhụa nwa nkakfụ-ịgara, o nokoru iya bụ iya bụ iwhe ọbu, e deru l'ẹkwo Okfu Chileke sụ: 15 “Ba atsụkwa egvu, gụbe nwada Záyọnu, lẹ ntaa bẹ eze ghu nọokwaa l'eli nwa nkakfụ-ịgara abya.” 16 Iwhe ono te eshi edoje ndu l'etso ụzo iya ẹnya lẹ mgbe mbụ. Ọle ọ bya ebelewho nteke ono, Chileke kubataru Jisọsu l'ime igwe, kwabẹ iya ugvu ka l'ugvu, whẹ gbee nteke ono rịta iwhe ono, e deru l'okfu ẹka iya. Whẹ mewaru iya iwhe ono, ẹkwo-okfu Chileke kfuru. 17 Nteke ono, Jisọsu kuru Lázarọsu oku mee ya ọ nọdu-whu ndzụ azụ, shi l'ẹka ono, e liru iya fụta b'a ha l'igweligwe dọru l'ẹka ono. Ọ bụru igweligwe ndu ono bẹ kfukashiru ndu ọdo iwhe ono, nwụru nụ. 18 O noo iwhe meru a habe l'igweligwe nno gbata Jisọsu ndzuta. Whẹ nụhawaru l'ọo Jisọsu bẹ meru iwhe-awhụrulenya ono. 19 Ndu Fárisii l'ekfuje l'ime onwowhe asụje: “Unu awhụwaa, l'idzu anyi ọbu abadẹnu l'alị, unu lewaro gẹ mgboko owhu zelihuru awụ etso iya.”
Ndu Girísu harụ achọ Jisọsu
20 Ndu shi alị Girísu harụ lịru lẹ ndu jeru ọbaru Chileke ẹja lẹ Jerúsalẹmu nteke ono, l'eeri oge ono. 21 Ndu ono bya awụ-kfuta Fílipu. Fílipu bụ onye Bẹtusáyida, bụ mkpụkpu, dụ lẹ Gálili. Whẹ wukfuta iya je asụ iya: “Nwoke ibe mu ?ndẹnu gẹ l'eeme t'anyi lẹ Jisọsu whụ?” 22 Ọo ya bụ, Fílipu je ekfuru iya Ánduru. Ánduru yẹle Fílipu lịru je ekfuru iya Jisọsu. 23 Jisọsu sụ whẹ: “Ẹhee! O rwuwaru nteke ọbu, l'aa-whụ Abụbu-Ndiwhe l'ọdu-biribiri iya. 24 Iwhe unu l'a-malẹwho bụ l'ọo gẹ akpụru witi lanụ l'adabajẹ l'alị rehu tẹmenu ya amịde, bụkwa gẹ mbẹdua nwụhuje. Mu -anwụhua bẹ mu l'a-bụkwa nkụnyi. Ọle mu -nwụhu, mu adụ g'ọo akpụru witi lanụ ono, megeeru vuta bya amịshia mebyi, bụ iya bụ l'aa-dụ l'igwe shi l'ẹka mu nweru ndzụ ọwhuu. 25 Onye yeru ẹnya lẹ ndzụ iya l'e-tuwhakwa iya, ọle onye kpọru ndzụ iya ashị lẹ mgboko-o bẹ l'e-gude iya gbata ndzụ tututu-mịmimi. 26 Onye bụ onye l'ejeru mu ozhi, t'onye ọbu bya etsoru mu nke ọwhu bụkwanu: ẹka, mu nọ bẹ bụkwawho ẹka onye ọbu, l'ejeru mu ozhi l'a-nọ. Onye bụ onye l'ejeru mu ozhi bẹ Nna mu l'e-yejeru ugvu.
Jisọsu l'ekfu okfu ọnwu iya
27 “Sụa, ọ kwa ntaa bẹ obu l'awa mu mini. ?Ndẹe iwhe mu l'e-kfu? ?Tọo tẹ mu sụ: ‘Nna, dzọo mu l'awa ọwa’? Tụswekwa, o kwa iwhe-e l'abya ememe l'awa-a bẹ mu kwoberu bya. 28 Nna menua t'a whụ ọdu-biribiri ẹwha ghu!” Tọ dụ iya bụ l'o nweru olu, shi l'imigwe, sụru: “Mu meekwaru a whụa ọdu-biribiri ono, mu jekwanu l'e-mebaa t'a whụ iya ọdo.” 29 Igwe-ọha, ono kfụkube ẹka ono nụa olu ono, whẹ sụ l'ọo igweli deru edede. Ndu harụ sụ: “Ọ kwa ojozhi-imigwe kfuru yeru iya.” 30 Jisọsu sụ whẹ: “Ọo iswi ẹhu unu b'e kwoberu kfua okfu ono. Ọ tọ kwa mbẹdua b'e kwoberu kfua ya. 31 Ọ kwa ntaa bẹ Chileke l'e-kpe ndu mgboko-o ikpe. Ọ kwa ntaa b'a bya l'e-chikpo ike nke onye ono bụ iya bụ ishi l'achị ndu mgboko-o. 32 Nteke ono l'ee-wolilewho mụbe Jisọsu l'alị bẹ mu l'atụko onyemonye dutakota tẹ whẹ tsoru mu.” 33 O kfuru nno gude goshi l'aa-kpọpyabe iya l'eli oswebe, ya anọdu l'ẹka ono nwụhu. 34 Igwe-ọha ono sụ iya: “Anyi nụwaru iwhe e deru l'ẹkwo iwu whẹ sụ lẹ Kuráyisutu ọbu l'a-nọgburu jeye lẹ tututu-mịmimi. ?Ndẹe g'o gude i gbee sụ lẹ Abụbu-Ndiwhe nwụhufutaje? ?O zhia onye bụ Abụbu-Ndiwhe ọbu?” 35 Jisọsu sụ whẹ: “Iwhoro ono bụfukwaa nwanshị bẹ l'ọo-dụfua l'echilabọ unu. Unu lọbakwaawho nlọba ije nteke iwhoro dụkwadu l'echilabọ unu, a nọnyaduawho, ọochi gude unu. O noo l'onye l'eje ije l'ẹkpuroochi ta amajẹdu ẹka l'oowhuku eshi eshi. 36 Ọwhu t'unu kweta nke iwhoro ono nteke iwhoro ono dụkwadua swiru unu nke ọwhu unu l'a-bụ ndu bu l'ẹka iwhoro l'echi.”
Ndu Ju bụ ekwegekwe
Jisọsu kfugelewho iwhe ono, ọ lụfu l'ẹka ono je edomia onwiya, whẹ ta awhụhe iya. 37 Ọo ezhi-okfu l'o mehawaru iwhe-awhụrulenya, ha l'igweligwe l'iwhu whẹ, ọle whẹ te ekwetadu l'ọo ya bụ onye ọbu, Chileke zhiru t'ọ bya ọbu. 38 Ọ bụru iya bụ l'iwhe ọbu, o kfuru mbụ Ayizáya, bụ onye nkfuchiru Chileke avụkota g'o kfuru iya. Ọ sụru: “Onye-Nwe-Ọha, ?ọo onye ngabẹ-zhiaru nchị l'iwhe anyi l'ekfu? ?Ọo onye bẹ Chileke goshiru ike shi iya l'ẹka?” 39 O noo iwhe meru whẹ te ekweta. Nkele Ayizáya kfukwaruwho ọdo sụ: 40 “Chileke mewaru whẹ, whẹ tsọlahaa ishi. O mewaru whẹ, whẹ bụru obu-l'akpụ-njọ, A nọnyadaawho, whẹ gude ẹnya whẹ whụa ụzo, Ọriri rwua whẹ ọhu ẹwho, Whẹ bya agbanwee lwakfuta mu tẹ mu gwọkwaa whẹ.” 41 Ọo Jisọsu bẹ Ayizáya l'ekfu okfu iya ono. Iwhe o kwoberu kfua iwhe ono bụ l'ọ whụhawaruro ọdu-biribiri nkiya. 42 E jia ekfu, a dụakwawho l'igweligwe kweta l'ọo ya bụ onye ọbu, Chileke yeru t'ọ bya, mbụkwa je akpaa lẹ ndu ishi kwetagekwaaru l'ọo ya. Ọle whẹ ta adụdu ike kfufuta iya nkele whẹ l'atsụnuka ndu Fárisii egvu; a nọnyadaawho e kefu whẹ l'oke sụ tẹ whẹ ba abatajẹhe ụlo-ndzuko. 43 O noo lẹ whẹ ka oye ẹnya l'ọja ama ọwhu ndiwhe l'aja whẹ amamẹ ọwhu Chileke gẹge aja whẹ.
Okfu, Jisọsu kfuru l'ekpe madzụ ikpe
44 Jisọsu ryaa ya aryarya sụ: “Onye ono, woru onwiya ye mụbe Jisọsu l'ẹka ta abụkwa mụbe Jisọsu bẹ onye ọbu woru onwiya ye l'ẹka, ọ kwa onye ono, zhiru mu tẹ mu bya bẹ onye ọbu woru onwiya ye l'ẹka iya. 45 Onye whụru mụbe Jisọsu whụakwaru onye ono, zhiru mu tẹ mu bya. 46 Mbẹdua l'onwomu byarụ tẹ mu bya abụru iwhoro l'eli-mgboko-o nke ọwhu bụkwanu onye woru onwiya ye mu l'ẹka t'onye ọbu ba anọduhe l'ẹkpuroochi. 47 Onye nụ-geru-a iwhe-e mu l'ekfu-a, onye ono te emehe iya ememe, mu te ekpekwa onye ono ikpe, o noo lẹ mu ta abyadụ okpe ndiwhe ikpe. Iwhe mu byarụ bụkwa tẹ mu dzọta ndiwhe. 48 Sụa, onye ono jịkaru mu nụ, onye ono te ekwe nata iwhe mu l'ekfu bẹ nwekwaruro onye l'ekpe iya ikpe. Ọo okfu ono, mu kfuru l'a-bụ onye ikpe iya lẹ mbọku ikpazụ. 49 O noo nkele ọ tọ bụdu ike nkemu bẹ mu gude ekfu iwhe mu l'ekfu. Ọo Nna ono, bụ iya zhiru mu, mu bya bụ onye karụ mu iwhe mu l'e-kfu, kakwarụ mu whọ gẹ mu l'ekfu iya. 50 Mu makwarụwho l'iwhe ono, ọ sụru tẹ mu kfua bẹ l'anụje ndzụ tututu-mịmimi. Ọo ya bụ l'iwhe bụ iwhe mu l'ekfu bẹ bụlewho iwhe Nna sụru tẹ mu kfua bẹ mu l'ekfu.”
Jisọsu l'akwọ ọkpa ndu l'etso ụzo iya
1 O wudukwadu ujiku lanụ a bahụ l'ori-oge O-je-ghata. Jisọsu mawarụ lẹ mbọku gbabewaru nteke ya l'a-ha mgboko-o lakfushia Nna iya. Jisọsu shizhiawho lẹ mbụ yeta ndu ọwhu bụ nkiya lẹ mgboko-o obu; o yezhia whẹ iya whọ jeye l'ikpazụ. 2 Tọ dụ iya bụ lẹ Jisọsu yẹle ndu l'etso ụzo iya anọdukota tụko eri nri-ẹnyashi. Oshifutuswe bẹ yehawaru Júdasu Isukáriyọtu, bụ nwa Sáyịmonu ọriri l'obu iya t'o je ebyiaru ndu ọhogu Jisọsu ụzo, whẹ l'e-shi gude iya. 3 Jisọsu malẹkwaru-a lẹ Nna iya bẹ yekotaru iya iwhe lile l'ẹka, marụ l'ọo l'ẹka Chileke bẹ ya shi bya, ọ bụkwaruwho Chileke ono bẹ ya l'alakfu. 4 Tọ dụ iya bụ lẹ Jisọsu agbalihu l'ẹka ono, ọ nọdu ria nri-ẹnyashi ono, chịru uwe ugwẹhu iya wụshi, bya achịta anụma-ọghu-ẹhu kee onwiya l'ukfu. 5 Ọ bya ekuru mini ye l'efere ọghu-ẹhu wata ọkwocha ọkpa ndu l'etso ụzo iya, gude anụma-ọghu-ẹhu ono, o keberu onwiya l'ukfu ehuchashi whẹ mini ono l'ọkpa. 6 Ọ bya abyarulewho l'ẹka Sáyịmonu Pyita nọ, Pyita sụ iya: “Tụswekwa, Onye-Nwe-Ọha ?o gbechia bụru ghu l'abya mu ọkwo ọkpa?” 7 Jisọsu sụ iya: “Iwhe mu l'eme bẹ l'ịiti makwa ntaa, ọ kwarọ nteke e megeedaru bẹ l'oo-do ghu ẹnya.” 8 Pyita sụ ya: “E jekwa ewhowho, ị tị kwọkwa mbẹdua ọkpa ilile.” Jisọsu sụ iya: “Ọ -bụru lẹ mu ta akwọchadu ghu ọkpa ono, mu lẹ ghu ebukahu.” 9 Sáyịmonu Pyita sụ iya: “Onye-Nwe-Ọha, ọ -bụru l'ọ dụwaa nno bẹ l'ọoto bụkwaa ọkpa bẹ l'ịi-kwọ mu nwẹkiya, ịi-kwọfukwaa mu rọo ẹka kwọo mu ishi.” 10 Jisọsu sụ iya: “Onye a ghụwaru ẹhu bẹ mkpa ọghu ẹhu ọdo l'adụhedua. Ọ waa ọkpa bẹ onye ono l'akwọje eshi inyi l'adụa ya l'ẹhu ilile. Unu g'unu ha l'egbukota temutemu, ọle ọ tọ bụ-gekwa g'unu ha.” 11 Iwhe Jisọsu kwoberu kfua l'ọ tọ bụdu whẹ gẹ whẹ ha l'egbukota temutemu bụ l'ọ marụ onye ọwhu bụ iya l'a-gbarụ iya ye l'ẹka ndu ọhogu iya. 12 Ọ kwọcha-gele whẹ whọ ọkpa ono, ọ chịta uwe ugwẹhu iya ono yee je anọdu-whu azụ l'ẹka, o shihawaa nọdu. Ọ jị whẹ sụ whẹ: “?Unu marụa iwhe ono, mu meru unu ono? 13 Unu l'anọje eku mụbe Jisọsu O-zhi-iwhe mẹe Onye-Nwe-Ọha. Ọ bụru unu ezhi-okfu nkele o noo iwhe mu bụ ndono. 14 Ọo ya bụ, eshi-ọwhu ọ bụ mbẹdua, bụ Onye-nwe-unu bụkwaruwho onye l'ezhije unu iwhe gbee bya akwọchaa unu ọkpa, ọ kwa iya whọ bụ l'o rwuberu unu t'unu kwọchajee ibe unu ọkpa lẹge mu kwọru iya unu. 15 L'ọ kwa iwhe unu l'e-letaje mee bẹ mu meru goshi unu nno nke ọwhu unubẹdua l'eletaje iya mee gẹ mu meru. 16 Iwhe unu l'amalẹwho bụ l'ohu ta akajẹkwa onye gbarụ iya nụ, tọ hẹkwanu l'onye, e zhiru ozhi l'abyajẹ aka onye ọbu, zhiru iya ozhi ono shii. 17 Unu makọtaru iwhe lile ono. Ọ -bụru l'unu tụkoru iya eme eme bẹ Chileke l'agọkwaru ẹhu-ụtso nụ unu. 18 “Ọ tọ bụkwa unu l'ọha bẹ mu l'ekfu okfu-a anụ. Mu makwarụ-a gẹ ndu mu họtaru dụ dụ. Ọle iwhe e deru l'ẹkwo Okfu Chileke vụfutajekwa lẹge e deru iya. Mbụ iwhe ono, e deru sụ: ‘Onye ono riru nri mu gbee bya eselia ọkpa eje t'ọ tsụru mu.’ 19 Mu l'ekfukwaru iya whọ unu ntaa l'ọ tọko nwụdee, nke ọwhu bụ nteke ọ nwụderu, unu ekweta l'ọo ‘Mu bụ onye ọbụ.’ 20 Tẹ mu mekwaa ya t'o doo unu ẹnya ree; onye bụ onye natarụ onye ono, mu zhiru ozhi nabatakwaru mbẹdua; onye natarụ mbẹdua nabatakwawhọ onye bụ iya zhiru mu tẹ mu bya.”
Jisọsu l'ekfu l'aa-gbarụ iya ye ndu ọhogu iya l'ẹka
21 Jisọsu kfugelewho iwhe lile ono, meji kụlahaa ya whẹriwheri. Ọ sụ whẹ: “Iwhe mu l'eme t'unu marụ bụ lẹ-a: ọ kwa onye lanụ l'ime g'unu ha l'e-seru mu ye.” 22 Ndu ono, l'etso ụzo iya bya elegba onwowhe ẹnya nkele iwhe ono tụfuru whẹ ẹhu, whẹ ta ama onye ọwhu ọbu, l'ookfuru ekfuru. 23 Onye lanụ l'ime ndu ono, l'etso ụzo iya bụ iya bụ onye ọwhu Jisọsu kakọta oye obu bẹ nọkubekwa iya whọ ntse nteke ono. 24 Tọ dụ iya bụ lẹ Sáyịmonu Pyita ajibuaru onye ono ẹnya, sụ iya t'ọ jịtaadaa ya onye ọwhu ọbu, l'ookfuru. 25 Ọ bya anọkubebaa Jisọsu ntse sụ iya: “Onye-Nwe-Ọha ?ọo onye bẹ l'iikfu ama ẹka?” 26 Jisọsu sụ iya: “Ọo onye ono, mu l'a-nụ ibiribe buredi-a, mu tsutaru l'iwhe-e l'eeri nri bẹ bụ onye ọbu.” Ọ bya etsutalewho ibiribe buredi ono, o woru iya nụ Júdasu, bụ nwa Sáyịmonu Isukáriyọtu. 27 Júdasu tagelewho ibiribe buredi ono, Sétanu wheba iya l'ẹhu. Jisọsu sụ iya: “Iwhe bụ iwhe l'ịibya ememe, mee ya ẹgwegwa.” 28 Tọ dụ ndu gẹ whẹ ha nọdu l'ẹka ono eri nri ono dụ onye ọwhu marụ iwhe o kwoberu kfuru iya okfu ono. 29 Ndu harụ rịa sụ l'eshi ọ bụ Júdasu bẹ l'egudeje ẹkpa, okpoga whẹ l'adụje bẹ iwhe Jisọsu l'ekfuru iya bụ t'ọ zụta iwhe whẹ gude eri oge-e, a bya l'eri, ọdukwanua l'iwhe Jisọsu l'ekfuru Júdasu bụ t'ọ nụ ndu ụkpa iwhe. 30 Ọo ya bụ, ọ natagelewho ibiribe buredi ono, ọ tụgbua lụfu-shia. Nteke ono bụwarunu ẹnyashi.
Iwu ọwhuu
31 Júdasu tụgbuleruwho, Jisọsu sụ: “Ọo ntaa b'e goshiru ọdu-biribiri Abụbu-Ndiwhe. Ọ bụkwaruwho l'ẹka mu b'e shiru whụa ọdu-biribiri nke Chileke. 32 Ọo ya bụ, ọ -bụru lẹ Abụbu-Ndiwhe meru t'a whụa ọdu-biribiri nke Chileke, o nokwawho gẹ Chileke l'e-me t'e shi l'ẹka iya whụa ọdu-biribiri nke Abụbu-Ndiwhe. Mbụkwa ntaa bẹ l'oo-me t'a whụa ọdu-biribiri iya ọbu. 33 Ụnwu mu, mu l'unu ta anọhekwa iwhe barụ ishi ntaa, unu achọlahaa mu. Ọle ọo iwhe ono, mu kfuru ndu Ju bẹ mu l'ekfuru unu ntaa. Ẹka mu l'eje bẹ unu l'ẹte adụkwa ike abya. 34 Ọle iwu ọwhuu bẹ mu l'atụru unu: unu ye ibe unu obu, mbụ t'ọ bụleruwho lẹge mu yeru unu obu bụ g'unu l'e-yeje ibe unu. 35 Ọo obu ono, unu l'e-ye ibe unu bẹ ndu ọdo l'e-gude marụ l'unu bụ ndu l'etso ụzo mu.”
Jisọsu l'ekfu lẹ Pyita l'agowhu iya
36 Sáyịmonu Pyita jị iya: “Onye-Nwe-Ọha ?ọo awee bẹ l'ịila?” Jisọsu sụ iya: “Ẹka mu l'ala bẹ l'ị tị dụkwa ike etsoru mu ala ntaa. O chikwa alwakfu bẹ l'ii-gbee lwakfuta mu l'ẹka ono nteke e megeeru.” 37 Pyita sụ iya: “Onye-Nwe-Ọha ?ndẹe g'o gude mu te etsoleru ghu who ntaa? Mẹ mu l'e-kwobekwa iswi ẹhu ghu swee ẹnya lẹ ndzụ mu.” 38 Jisọsu sụ iya: “?Ị sụru lẹ l'ịi-dụ ike swee ẹnya lẹ ndzụ ghu l'okfu ẹhu mu? Iwhe mu l'emekwawho tẹ mu kfuru ghu bụ l'okọku chi-asahu bya l'aryadeshia ọrya b'ị gọokwaru ẹgo ugbo ẹto sụ l'ị tị madụ onye mu bụ.”
Ọo Jisọsu bụ ụzo, e shi alakfu Nna
1 Jisọsu sụ whẹ: “Tẹ unu ba ayọkwa ọshi l'ime obu unu. Unu woru onwunu ye Chileke l'ẹka, unu ewokwaruwho onwunu ye mụbe Jisọsu l'ẹka. 2 L'ibe Nna mu bẹ ụlo ebubu ha l'igweligwe. Nggẹ l'ọ tọ dụ nno ?ndẹhunu gẹ mu g'eme sụ unu lẹ mu l'eje tẹ mu je emechaaru unu ẹka, unu l'a-nọ? 3 Mu -jelewho je emechageleruwho unu ẹka ọbu, bẹ mu l'a-bya ọdo bya ekuta unu dokube onwomu, nke ọwhu bụ ẹka mu nọ, unu anọdukwa iya whọ. 4 Unu mawarụ ẹka mu l'ala, unu makwarụwho ụzo, mu shi ala.” 5 Tọ́mosu sụ iya: “Onye-Nwe-Ọha mẹ anyi ta amakwa ẹka ọbu, l'ịila ọbu. ?Ndẹhunu g'anyi meru marụ ụzo, e shi ala ẹka ọbu?” 6 Jisọsu sụ iya: “Ọo mu l'onwomu bụ ụzo ono, ọ bụru mu bụ ọkpobe-okfu ono, ọ bụkwaru mu whọ bụ ndzụ ono. Ọ tọ dụdu onye l'abyakfuta Nna l'ẹte abụa l'ẹka mụbe Jisọsu bẹ onye ọbu l'e-shi. 7 Unu -mazhiwaru mbẹdua bẹ unu l'a-makwawhọ Nna mu. Ọle wata ntaa tụgburu bẹ unu mawarụ Nna, unu whụakwa iya.” 8 Fílipu sụ iya: “Onye-Nwe-Ọha, goshinu anyi Nna ọbu nggẹ obu nmakfuru anyi anmakfuru.” 9 Jisọsu sụ iya: “Fílipu, eshi nkeshi-a bẹ mu l'unu shi nọduta t'ị ma mu. Onye whụru mbẹdua whụakwaru Nna; ?ndẹhunu g'e meru ị sụ tẹ mu goshi unu Nna ọbu? 10 ?T'i kwetadu lẹ mbẹdua nọ Nna l'ime, Nna nọdu mu l'ime? Okfu, mu l'anọje ekfuru unu ta abụkwa l'ike ẹka mu bẹ mu l'egudeje ekfu iya. Ọo Nna mu ono, bu mu l'ime bẹ l'eshije mu l'ime eje ozhi. 11 Ọlewho t'unu kweta lẹ mu nọ Nna mu l'ime, Nna mu nọdu mbẹdua l'ime, ọ dụanu t'unu kwobe iswi iwhe mu l'emeshikaa kweta iwhe mu l'ekfu. ?Unu nụwaru iya? 12 Iwhe mu l'ekfuleruwho unu bụ lẹ: iwhe bụ onye nọ mụbe Jisọsu l'ẹka l'a-dụkwawho ike mee iwhe mu l'emekaa. Onye ọbu l'a-kabakwaanụ ome ọwhu ka ọwa shii. O noo lẹ mbẹdua l'alakfuwa Nna mu. 13 Sụa, iwhe bụ-zhia iwhe unu gudezhiwaa ẹwha mu sụ tẹ Nna mu meeru unu bẹ mu l'e-mekotaru unu. Ọ kwanụ iya bụ nke ọwhu l'ee-shi lẹ Nwa whụa ọdu-biribiri nke Nna. 14 Ọ -dụ-zhia iwhe unu gudezhiwa ẹwha mu sụ tẹ mu meeru unu bẹ mu l'e-meru unu iwhe ọbu.
Jisọsu l'ekwe ụkwa Ume-Dụ-Nsọ
15 “Sụa, ọ -bụru l'unu yeru mụbe Jisọsu obu, t'unu mekotaje iwhe bụ iwhe mu tụru unu l'iwu t'unu mee. 16 Mu l'e-kfuru Nna t'o wotaru unu Onye Ọgbata ọdo, l'a-nọduwaro swiru unu jeye lẹ tututu-mịmimi. 17 Onye Ọgbata ono, Nna l'a-nụ unu bụ Ume-Dụ-Nsọ bụ iya bụ Ume nke ire-lanụ, mbụ onye ndiwhe l'ẹte abyaa l'a-nata nkele whẹ ta awhụjedu iya, whẹ ta ama iya. Obekwanu l'unubẹdua marụ iya. O noo nkele o bu ebu l'ime unu. O jekwawho l'a-nọdugburu l'ime unu. 18 “Mu ta ahakwa unu t'unu dajẹ ndamere nwa nwogbee, mu l'a-byakfutakwaa unu. 19 Mbụ m'o wuduakwaru nwanshị ntaa ndu mgboko-o eje awhụbahee mu ọdo, ọle unubẹdua l'a-whụ mu. Eshi-ọwhu mu nọdu-a ndzụ bẹ unubẹdua l'a-nọdukwawho ndzụ. 20 Ọo mbọku ono bẹ unu l'a-ma lẹ mu nọdu Nna mu l'ime, unubẹdua nọdukwanu mbẹdua l'ime, mu nọdukwawho unu l'ime. 21 “Ọo onye marụ iwu, mu tụru, eme iya ememe bẹ bụ onye yeru mu obu. Onye yeru mu obu, Nna mu eyekwawho onye-ọ obu; mbẹdua eyekwawho onye-ọ obu; mu egoshigezhia onye ọbu onwomu.” 22 Júdasu l'abụkwaa Júdasu Isukáriyọtu sụ iya: “Onye-Nwe-Ọha, ?ndẹe gẹ l'ii-shi goshi anyi onwoghu; to chidua ndiwhe bẹ l'ii-goshi onwoghu?” 23 Jisọsu sụ iya: “Onye yeru mu obu l'a-nọje eme iwhe mu kfuru. Nna mu l'e-yekwa onye ono obu. Mu lẹ Nna mu alwakfuta onye ọbu, anyi l'iya eburu eburu. 24 Onye l'ete eyee mu obu te emekwa okfu mu. Unu manụrua l'okfu unu l'anụ ta abụkwa okfu mu. Ọ kwa okfu Nna ono, bụ iya zhiru mu tẹ mu bya. 25 “Mu kfukotaakwaru unu iwhe lile-e ntaa, mu l'unu nọdukwadu. 26 Ọle ọo Onye Ọgbata ono bụ iya bụ Ume-Dụ-Nsọ, mbụ Onye ono, Nna l'e-shi mu l'ẹka zhitaru unu bẹ l'ezhikota unu iwhe lile, ya emekwaawho t'unu nyatajẹ iwhe lile, mu kfuhawaru unu. 27 “Sụa, mu hawarụ unu ẹhu-ọdu-guu. Ọo ẹhu-ọdu-guu nkemu bẹ mu l'anụ unu. Ọ tọ bụkwa ẹgube ẹhu-ọdu-guu ọwhu ndu mgboko l'anụje bẹ mu l'anụ unu. T'obu ba awajẹkwa unu mini. Unu ba atsụjekwa egvu. 28 Unu nụnurua nteke mu sụru unu: ‘Lẹ mu l'alakwaa, ọle mu l'a-lwakfutakwaa unu ọdo.’ Nggẹ l'ọo iwhe l'unu yeru mu obu mẹ unu aswakwaa ẹswa nkele mu l'alakfu Nna. O noo lẹ Nna ono ka mbẹdua shii. 29 Ntaa bẹ mu tụkookwaru iwhe g'iwhe ha tụjashiaru unu nteke l'ọo tọo nwụdee. Ọo ya bụkwanu nke ọwhu unu l'e-kweta nteke ọ nwụderu. 30 Mu te ekfuhekwaru unu okfu anọ ọdu ntaa, o noo nkele onye ishi, l'achị ndu mgboko l'abyawaa, ọle ọ tọ dụdu iwhe l'ọodu ike emebata mu. 31 Iwhe meru mu l'emeje iwhe Nna zhiru mu tẹ mu mee bụ nggẹ ndu mgboko owhu amakwanụru lẹ mu yeru Nna mu obu.” O kfugee nno sụ whẹ: “Unu gbalihu t'anyi lụfu l'ẹka-a.”
Jisọsu bụ ọkpobe oshi vayịnu
1 Jisọsu kfulashia sụ whẹ: “Ọo mụbe Jisọsu bụ ọkpobe oshi vayịnu. Nna mu bụ onye l'eleta mgbabu vayịnu ono ẹnya. 2 Iwhe bụ ẹkali, dụ mụbe Jisọsu l'ẹhu ndu ọwhu l'ẹte amịje mebyi bẹ l'ọokwafuje. Ẹkali ndu ọwhu l'amịje mebyi bẹ l'ọonoje akọcha akọcha nke ọwhu l'ọo-dụ ree kabaa ọomi mebyi. 3 Okfu ono, mu kfuru yeru unu ntaa mewaru unu, unu dụkota ree. 4 Unu nọdu mu l'ime; tẹ mbẹdua nọdu unu l'ime. Ọo gẹ ẹkali oshi l'afụa mịa mebyi nke ẹka iya, m'ọ -bụa l'ọ kakfụru l'oshi vayịnu, bụkwawho g'unu l'afụa yee mebyi m'ọ -bụ-zhidua lẹ mu l'unu tụgbaru bụru nnanụ. 5 “Ọo mbẹdua bụ oshi vayịnu, unubẹdua bụru ẹkali iya. Onye ọwhu nọdu mu l'ime, mbẹdua nọdu l'ime onye ọbu bẹ onye ọwhu ọbu l'amị mebyi mịshia ya ike, o noo nkele ọ tọ dụdu iwhe unu l'a-dụ ike eme ilile mẹ mu l'unu atụgbaa bụru nnanụ. 6 Iwhe bụ onye mu l'iya l'ẹte atụgbaa bụru nnanụ bẹ l'ee-tuwhakwa etuwha g'ọo ẹkali oshi a kọchafuru akọchafu, ya akpọo nkụ. Ẹgube ẹkali oshi dụ nno bẹ l'aa-chịta ye l'ọku, ọku ekepyashia. 7 Ọ -bụru lẹ mu l'unu tụgbaru bụru nnanụ, okfu mu buru unu eburu l'ẹhu, ọ tọ dụdu iwhe bụ iwhe dụ unu ree, unu sụru t'e meeru unu l'eete emeru unu. 8 O noo ụzo, l'ee-shi goshi ọdu-biribiri nke Nna mu, mbụ t'unu mịa mebyi mịshia ya ike, gude nno goshi l'unu bụ ndu l'etso ụzo mu. 9 Ọo gẹ Nna mu yeru mu obu bụ gẹ mu yeru unu. Unu nọpyabelekwawho l'ime n-yemobu ono, mu yeru unu. 10 Ọ -bụru l'unu l'emee iwhe lile, mu sụru t'unu mee bẹ unu l'a-nọpyabekwaa lẹ n-yemobu nkemu, mbụnu-a gẹ mbẹdua mekotaru iwhe Nna mu sụru tẹ mu mee, mu nọpyabe lẹ oye obu nke Nna mu ono. 11 “Sụa, iwhe lile-e bẹ mu l'ekfukotaru unu nke ọwhu ẹhu-ụtso nkemu l'a-bụ nkunu mẹe t'ẹhu tsọo unu ụtso tsọfu iya unu l'ishi. 12 Ọ waa bụ iwhe mu tụru unu iwu iya: Unu ye ibe unu obu lẹge mu yeru unu obu. 13 O to nwedu n-yemobu ọdo, madzụ l'eye ibe iya, ka ọwa, mbụ lẹ madzụ kwoberu iswi ọnya iya whẹ swefu ẹnya lẹ ndzụ iya kweta lẹ ya l'a-nwụhu. 14 Unu bụkota ọnya mu mẹ unu l'e-mewaa iwhe mu sụru t'unu mee. 15 Mu te ekubahekwaa unu nwozhi ọdo, o noo nkele nwozhi ta amajẹdu iwhe Onye-nwe-iya-nụ l'eme. Iwhe mu l'e-ku unu bụ ọnya mu whẹ nkele iwhe mu nụru l'ọnu Nna mu bẹ mu mekotawaru unu marụ. 16 Ọ tọ bụkwa unubẹdua họtaru mu, ọ kwa mbẹdua gbechia họta unu dobe iche nke ọwhu unu l'a-dụ g'ọo oshi-ọmi mịa mebyi ono, l'a-nọdugbuwaruro. Ọ kwanụ iya bụ nke ọwhu bụ iwhe unu shi mu l'ẹka sụ tẹ Nna nụ unu; ya anụ iya unu. 17 Iwhe bụ iwu, mu l'a-tụru unu bụ t'unu ye ibe unu obu.
Ndụmashi nke ndu mgboko
18 “Ndu mgboko -kpọo unu ashị, t'unu nyatakwa lẹ whẹ vuhaadaro ụzo kpọ mu ashị ono tẹhenu whẹ bya akpọde iya unubẹdua. 19 Nggẹ l'ọo iwhe unu bụ ndu nke mgboko-o mẹe ndu mgboko-o eye unu obu l'unu bu nke whẹ. Ọle mu họfutawaru unu lẹ mgboko-o dobe iche, unu ta abụhe nke whẹ. O noo iwhe meru whẹ kpọ unu ashị. 20 Unu nyatakwa iwhe ono, mu kfuru unu ono; mu sụru lẹ nwozhi ta akajẹkwa onye nwe iya nụ shii. Ọo gẹ whẹ mekparu mbẹdua ẹhu bụ gẹ whẹ l'e-mekpa iya unu. Ọ bụru gẹ whẹ l'ete emeje iwhe mu kfuru bụ gẹ whẹ l'ete emekwawho iwhe ọwhu unu kfuru. 21 Iwhe whẹ l'e-kwobe mekota unu iwhe ono bụ nkele ọo l'unu bụ nkemu, o noo lẹ whẹ ta amadụ onye ono, bụ iya bẹ mu shi l'ẹka bya. 22 Nggẹ l'ọo iwhe mu ta abya bya ekfuru yeru whẹ m'ọ tọ bụkwa whẹ ome iwhe-dụ-ẹji, ọle eshi mu byawaru bẹhunu l'ọ tọ dụhekwaa iwhe whẹ l'e-gude gọfu nke iwhe-dụ-ẹji, whẹ metaru. 23 Iwhe bụ onye kpọru mu ashị bẹ kpọkwaruwho Nna mụbe Jisọsu ashị. 24 Nggẹ l'ọo iwhe mu l'ete emeshia iwhe onye ọdo l'ẹte adụa ike mee l'echilabọ whẹ mẹe tọ bụkwa whẹ ome iwhe-dụ-ẹji. Ọle ntaa bẹ whẹ gude ẹnya whẹ whụkota iwhe mu meshiru; whẹ kpọle mu-a ashị; kpọkwa iya whọ Nna mu. 25 E dekwaru l'ẹkwo iwu sụ: ‘Whẹ kpọru mu ashị l'ẹbe adụ iwhe mu meru whẹ. Iwhe ono bẹ vụkotaakwaru lẹge e deru iya.’ 26 “Sụa, mu l'e-shi l'ẹka Nna mu zhi Onye Ọgbata ono; ya alwakfuta unu. Onye Ọgbata ono, bụ Ume-Dụ-Nsọ, bụ iya bụ Ume ire-lanụ shi Nna mu l'ẹka. Ọ -byalẹwho, ya ekfua okfu ẹhu mụbe Jisọsu yeru unu. 27 Unubẹdua l'onwunu bụfukwaawho ndu l'a-nọ ekfu iwhe ono, unu gude ẹnya unu whụa lẹ nke mụbe Jisọsu, o noo lẹ mu l'unu shizhiewho lẹ mbụlembu nọduta.
1 “Mu kfushikotaru unu okfu lile-e-ya nke ọwhu l'eete eme t'unu shiswee ụzo. 2 Ndu Ju l'e-kefukwa unu l'oke t'unu ba abatajẹhe ụlo-ndzuko whẹ. ?Unu nụwaru iya? Mbọku l'abyaakwaa nteke bụ onye gbujeru unu, ya arịnu l'ọo Chileke bẹ ya l'ejeru ozhi. 3 Iwhe whẹ l'e-kwobe eme iwhe dụ nno bụ lẹ whẹ ta amadụ Nna, whẹ ta ama mụbe Jisọsu. 4 Mu tụkookwa iwhe ono kfukotaru unu nke ọwhu bụ: o -rwukwanua nteke whẹ l'e-me iwhe ono, unu anyatajẹ lẹ mu kfuhawaru unu okfu ẹhu whẹ. Mu te ekfuhaakwaaru unu iwhe-e lẹ mbụlembu, iwhe meru iya nụ bụru lẹ mu shi nọdukwadu swiru unu.
Ozhi, Ume-Dụ-Nsọ l'ejeje
5 “Ntaa bẹ mu l'alakfuwaa onye ono, bụ iya zhiru mu tẹ mu bya ono. Ọle, mbẹ ọ tọ dụdu g'unu ha onye jịjeru mu ẹka ọbu, mu l'ala. 6 O gbee bụru unu iwhe áwhụ, l'ọo lẹ mu tụkoru iwhe lile-e ekfuru unu. 7 Ọle g'ọ dụlee, tẹ mu mekwaa ya t'o doo unu ẹnya, o gbechikwaa karụ unu ree tẹ mu laa. Ọ -bụru lẹ mu ta aladụ bẹ Onye-Ọgbata ono l'ẹte alwakfutakwa unu. Ọle ọo nteke mu larwuleruwho; mu ezhi iya t'ọ lwakfuta unu. 8 Nteke ọ byalẹruwho bẹ l'oo-goshi ndiwhe l'ọ tọ bụdu iwhe whẹ l'arị l'ego l'iwhe-dụ-ẹji bụ, b'ọ bụ, goshikwa whẹ whọ l'ọ tọ bụdu iwhe whẹ rịru l'ọo ya bụ ọdu chịriri bẹ bụ iya nụ, goshi whẹ l'ọ tọ dụ iwhe whẹ rịru l'ọo ikpe Chileke bẹ bụ iya nụ. O noo gẹ l'oogude goshi whẹ l'ikpe nmarụ whẹ ndono. 9 Oo-goshi l'anọno ono, whẹ l'ẹte anọo l'ẹka mụbe Jisọsu bẹ bụ iwhe-dụ-ẹji, whẹ l'eme iya. 10 Oo-goshikwa whẹ whọ iwhe bụ ọdu chịriri nke Chileke, o noo l'ọo lẹ mu dụ chịriri meru mu l'alakfu Nna, unu ta abyahẹ l'a-whụ mu ọdo, 11 goshikwa whẹ whọ iwhe ikpe nke Chileke bụ nkele onye ono, l'achị mgboko b'e kpewaru ikpe. 12 “Okfu, mu gege ekfuru unu hakwadụro l'igweligwe, ọ kwa lẹ mu kfushigee ya bẹ l'ọo-panụkaru unu l'igwe nke ntaa. 13 Nteke Ume-Dụ-Nsọ ono bụ iya bụ Ume ire-lanụ byalẹruwho, ya atụko-gewaro iwhe bụ ire-lanụ g'ọ ha kpozhikotaru unu ụzo iya, o noo l'ọ tọ dụ ike nke ẹka iya bẹ l'oo-gude ekfu. Ọlewho iwhe ọ nụru lẹ nchị iya bẹ l'oo-kfuje, ya ekfukwaaruwho unu iwhe l'e-me lẹ mgbe l'iwhu. 14 Ọo Ume-Dụ-Nsọ ono l'e-goshi unu ọdu-biribiri nke mụbe Jisọsu, o noo l'oo-wota iwhe ọwhu ọ nụru mu l'ọnu bya akọoru unu. 15 Iwhe bụ iwhe nke Nna bụkota nke mụbe Jisọsu. Ọo ya meru mu sụ l'oo-wota iwhe ọ nụru mụbe Jisọsu l'ọnu bya akọoru unu.
Ndu ryarụ ẹkwa l'a-chịkwaa ọchi
16 “O wuduwarua nwanshị, unu eje awhụhe mu, a -nọkwaa nwanshị, unu awhụa mu ọdo.” 17 O kfugelewho nno, ndu l'etso ụzo iya harụ jịde ibe whẹ sụ: “?Ọo ẹgube iwhe gụnu bẹ l'ookfuru anyi ẹgube-ẹ? Ọ sụ lẹ: ‘O wuduwarua nwanshị, unu eje awhụhe mu, a -nọkwa nwanshị, a whụkwaa mu ọdo.’ Sụkwawho: ‘Mu l'alakfuakwa Nna.’ ” 18 Whẹ sụ: “?O zhia ole bụ nke l'o wuduru nwanshị? Anyi ta amakwa iwhe l'ookfu ekfu ishi.” 19 Jisọsu marụ lẹ whẹ bya l'ajị iya ajị. Ọo ya bụ, ọ sụ whẹ: “?Unu l'ajị onwunu nke iwhe-e mu shi kfua sụ: ‘O wuduwarua nwanshị, unu eje awhụhe mu, a nọkwaa nwanshị, unu awhụkwaa mu ọdo’? 20 Iwhe mu l'eme tẹ mu karụ unu bụ l'unu l'arya ẹkwa gụa áwhụ, ọle ọwhube ndiwhe bẹ ẹhu l'a-nọ atsọ ụtso. Unu l'a-nọkwa atsụ ude l'ime obu, ọle ude ono l'e-megekwaa gbanwee, unu anwụa ọnu-ọchi. 21 Ọo nteke ime l'eme nwanyị bẹ l'ọobuje iwhe-ọtsulanu swiru iya nkele iwhe nkumẹhu nkiya rwuwaru. Ọle ọobuje, nwanyị ono zedalewho, ya anyazọshia iwhe-ọtsulanu ono, shi swiru iya nụ. Ẹhu atsọlahaa ya ụtso lẹ ya doberu akọ l'eli-mgboko-o. 22 O nokwawho g'ọ dụ l'ẹhu unu ndono. Ntaa bẹ unu l'a-nọ atsụ ude, ọle ujiku lanụ bẹ mu l'unu l'a-whụkwaa ọdo, nteke ono bẹ unu l'a-nwụ ọnu-ọchi. Ọ tọ dụhedu onye l'anafụbaa unu ẹhu-ụtso unu ono nteke ono. 23 “O -rwulewho nteke ono bẹ l'ọo tọ dụheduwaro iwhe unu bya l'ajị mu. Iwhe mu l'eme t'o doo unu ẹnya bụ lẹ-a: iwhe bụ iwhe unu shi mu l'ẹka sụ tẹ Nna nụ unu bẹ l'ọo-nụkota unu. 24 Mbụ-a, ọ tọko dụbukwaa iwhe unu shije mu l'ẹka sụ t'a nụ unu byeye ntaa. Unu kfujeru Chileke t'ọ nụ unu iwhe mkpa iya dụ unu, ọo-nụ iya unu. Ọ kwanụ iya bụ nke ọwhu ẹhu l'a-tsọ unu ụtso tsọfu iya unu l'ishi.
Jisọsu mewaru mgboko-o eriri
25 “Mu gudeekwaa ẹtu ẹtu kfuru unu iwhe-e. Mbọku l'abyakwaa nteke mu l'ẹte anmahẹru unu ẹtu ẹtu, mbụ mu ekfujeeru unu nke Nna ono kfujaa ya ekfuja. 26 O rwulewho nteke ono bẹ unu l'eshi mu l'ẹka sụ tẹ Nna nụ unu iwhe mkpa iya dụ unu, ọle mu ta asụkwa unu lẹ mu l'e-kwobe iswi ẹhu unu je ekfuru yeru iya. 27 O noo lẹ Nna l'onwiya yeru unu obu nkele unu yeru mụbe Jisọsu obu, kweta lẹ mu shi l'ẹka Chileke nọ bya. 28 Ọo ẹka Nna nọ bẹ mu shi fụta byatashia l'eli-mgboko-o, mbụ mu l'alụfuakwaa lẹ mgboko-o alakfu Nna.” 29 Ọo ya bụ, ndu l'etso ụzo iya sụ: “Aa-oo! Lenu lẹ ntaa b'ị tụkowaru iwhe lile tụjashiaru anyi. Ị tị nmahẹdu iya l'ẹtu l'ẹtu. 30 Ntaa bẹ anyi marụ l'ị makọtaru iwhe lile. Ọ tọ gbahẹdu nke tọ dụ onye l'a-bya ajịde ghu ajị. Iwhe ọwa mewaru anyi kweta l'i shia l'ẹka Chileke nọ bya.” 31 Jisọsu sụ whẹ: “?Unu kwetawaru ntaa? 32 Mbọku l'agbabeekwa, mbụ ọ gbee rwuwanu erwu nteke l'aa-chịkashi unu nnanụ nnanụ, onyenọnu agbarụ ala ibe iya, unu atụko haa mu. Mu ekeru nwẹkinyi mu, ọle mu te ekekwaru nkụnyi mu, o noo lẹ Nna kfụkwaru-a swiru mu. 33 Mu kfuwaru unu iwhe-e nke ọwhu ẹhu l'a-dụ unu guu mẹ mu l'unu tụgba bụru nnanụ. Ọlewho áwhụ bụ iwhe l'atsụru unu l'ọnu lẹ mgboko-o, ọle t'unu nwekwaru iya obu. Mu meekwaru mgboko eriri, tụru okoo kpua ya!”
Jisọsu l'ekfu anụ Chileke
1 Jisọsu kfugelewho iwhe ono, ọ palia ẹnya imeli ele igweli sụ: “Nna, m'ọ gbabeekwaru; menu-a tẹ ndiwhe whụa ọdu-biribiri nke Nwa ghu nke ọwhu Nwa ono l'e-mekwawho tẹ ndiwhe whụa ọdu-biribiri nke ghu. 2 O noo l'ọo ghu nụru iya ike, ọ kakọta madzụ lile ẹkuku. Iwhe i kwoberu mee ya nno bụ nke ọwhu l'ọo-nụje ndu ono, i yeru iya l'ẹka ndzụ tututu-mịmimi. 3 Ndzụ tututu-mịmimi ono bụru tẹ whẹ marụ ghu, gụbe onye ono, bụ ghu bụ ọkpobe Chileke ono kpụ, whẹ amakwarụwho Jisọsu Kuráyisutu, bụ onye ọ bụ ghu zhiru t'ọ bya. 4 Mu nọdukwa l'eli-mgboko-o goshi ndiwhe ọdu-biribiri nke ghu, eshi-ọwhu mu tụkoru iwhe lile ono, i zhiru mu tẹ mu bya emee mekota. 5 Nna, menua ntaa tẹ mu nọdu l'ọdu-biribiri ono, mu shihawa nọdu l'atatiwhu ghu; mbụ ọdu-biribiri ono, mu shihawaa nọduta tẹmenu mgboko dụde. 6 “Mu meekwaru ndu ono, ị họtaru lẹ mgboko-o ye mu l'ẹka ono, whẹ marụ ghu. Ọo gụbedua nwehawa whẹ, ọ bụru gụbedua woru whẹ ye mu l'ẹka, whẹ mekotawaa okfu ghu. 7 Ntaa bẹ whẹ mawarụ l'iwhe lile, ị nụru mu bẹ shi ghu l'ẹka. 8 O noo lẹ mu zhiwaru whẹ ozhi ono, i zhiru mu, whẹ natawa iya. Whẹ makwarụwho l'ọo ọkpobe-okfu, mbụ l'ọo ẹka, ị nọ bẹ mu shi bya, whẹ kwetaakwa l'ọo ghu zhiru mu tẹ mu bya. 9 “Mu l'ekfu anụ ghu l'iswi ẹhu whẹ. Ọ tọ kwa ndu mgboko bẹ mu l'ekfuru ghu okfu ẹhu whẹ. Ọ kwa ndu ono, i yeru mu l'ẹka bẹ mu l'ekfu nke whẹ, o noo lẹ whẹ bụ nke ghu. 10 Iwhe lile bụ nke mbẹdua bụkwawho iwhe ghu, iwhe lile ọwhu bụ nke ghu bụkwaruwho nke mbẹdua. Ọ bụru whẹ l'egoshi ọdu-biribiri nke gụbe Chileke. 11 Lee lẹ ntaa bẹ mu l'alwakfutawa ghu. Mu ta anọhekwa lẹ mgboko-o, ọle whẹbedua nọdukwadu-a lẹ mgboko. Nna, dụ Nsọ, gudenu ike ono, dụ l'ẹwha ghu kwachia whẹ, mbụ ẹwha ghu ono, ị nụru mu ono nke ọwhu whẹ l'a-bụ nnanụ gẹ mu lẹ ghu bụ nnanụ. 12 Nteke ono, mu shi nọdu swiru whẹ ono bụkwa ike ono, dụ l'ẹwha ghu ono, ị nụru mu bẹ mu shi gude kwachia whẹ. Akwachi ono bụ lẹ mu cheekwaru whẹ tọ dụ m'ọo onye lanụ, whuhuru ewhuhu, t'a gụfulewho onye ono, ọ gbarụ t'o tuwhahu. Iwhe meru iya bụkwaru nggẹ iwhe e deru l'ẹkwo Okfu Chileke emee g'e kfuru iya. 13 Ọle ntaa bẹ mu l'alwakfutawa ghu. Iwhe lile bẹ mu tụkoru ekfushikaaru ghu ntaa, mu nọkwadu lẹ mgboko-o nke ọwhu whẹ l'e-nweru ẹhu-ụtso nkemu, ya edzua whẹ oke l'ẹhu. 14 Mu kfuwaru whẹ okfu, shi ghu l'ọnu; ndu mgboko kpọwaa whẹ ashị, nke l'ọo lẹ whẹ ta abụdu ndu nke mgboko-o, lẹge mbẹdua l'abụa onye nke mgboko-o. 15 Mu te ekfukwaru ghu t'i wofu whẹ lẹ mgboko, gbahaa t'ị kwachia whẹ t'ọ bọ dụ iwhe Onye-Ejo-Ụboku ono, bụ Oshifutuswe l'e-me whẹ. 16 Ọo gẹ mu l'ẹte abụa onye nke mgboko-o bụ gẹ whẹ l'abụa ndu nke mgboko-o. 17 Okfu nke ghu bụ ọkpobe-okfu. Gudenu ọkpobe-okfu ghu ono mee whẹ tẹ whẹ bụru ụnwu ghu. 18 Ọ kwawhọ lẹ g'i zhiru mu tẹ mu bya lẹ mgboko, bụ gẹ mu l'ezhi whẹ tẹ whẹ je lẹ mgboko. 19 Ọ bụkwaruwho okfu ẹhu whẹ be mu kwoberu wota onwomu gbaa ẹja ẹhu whẹ nke ọwhu whẹbedua l'a-bụ nke ghu ọkpobe abụbu. 20 “Ọ tọ bụlekwaa ndu ọwa kpụ bẹ mu l'ekfu anụ ghu l'okfu ẹhu whẹ; mu l'ekfukwawho anụ ghu l'okfu ẹhu iwhe bụ ndu lile l'a-nụ ozhi-ọma, whẹ l'e-zhi kweta nke mbẹdua. 21 Mu l'ekfukwawho anụ ghu t'i mee tẹ whẹ bụru nnanụ gẹ whẹ ha. T'ọ bụleruwho lẹge gụbedua, bụ Nna nọ mu l'ime, mu nọdu ghu l'ime bụ lẹge whẹ l'a-nọdu anyi l'ime, tẹ whẹ bụru nnanụ nke ọwhu ndu mgboko-o l'e-kweta l'ọo ghu zhiru mu tẹ mu bya. 22 Ọdu-biribiri ono, ị nụru mu bẹ mu wookwaru ye whẹ l'ẹka nke ọwhu whẹ l'a-bụ nnanụ lẹge mu lẹ ghu bụ nnanụ. 23 Mu nọdu whẹ l'ime, gụbedua anọdu mbẹdua l'ime nke ọwhu whẹ l'a-bụ nnanụ ọkpobe abụbu nggẹ ndu mgboko amakwanụru l'ọo ghu zhiru mu, makwarụwho l'ọo lẹge i yeru mbẹdua obu bụ g'i yeru whẹ iya. 24 “Nna, i wowaru whẹ ye mu l'ẹka. Iwhe mu l'ekfu bụru t'ọ bụru l'ẹka mu nọ bẹ ndu ono l'a-nọdukwawho. Ọ kwanụ iya bụ nke ọwhu whẹ l'egude ẹnya whẹ whụ ọdu-biribiri nkemu, mbụ ọdu-biribiri ono, i kwoberu l'i yeru mu obu nụhaada mu rọo tẹmenu mgboko bya adụ. 25 Gụbe Nna dụ chịriri, ndiwhe tẹke amakwaa onye ị bụ, ọle mbẹdua makwarụ ghu, tẹhenu ndu-a maakwarụ l'ọo gụbedua zhiru mu tẹ mu bya. 26 Mu mewaru whẹ marụ ghu, mu jekwa l'e-me tẹ whẹ marụ ghu reereeree nke ọwhu n-yemobu ono, i yeru mụbe Jisọsu l'a-dụ l'ime whẹ, mbẹdua anọdukwawho l'ime whẹ.”
Eegude Jisọsu
1 Jisọsu kfugelewho okfu ono yẹle ndu l'etso ụzo iya lịru tụgburu je adafụ azụ ọnu-iyi Kidirọnu. O nweruwho mgbabu, dụ l'azụ mini ono azụ iya ọwhu. Jisọsu yẹle ndu ono, l'etso ụzo iya bahụ lẹ mgbabu ono. 2 Júdasu bụ iya bụ onye ọbu, l'agbarụ iya ye makwarụwho ẹka ono nkele Jisọsu bẹ yẹle ndu l'etso ụzo iya l'edzukojehawaa l'ẹka ono nteke nteke. 3 Ọo ya bụ lẹ Júdasu abyatashia ẹka ono. Ndu ishi ndu l'agbajẹ ẹja nụ Chileke mẹe ndu Fárisii, yeru iya ndu ojọgu ndu Romu, yekwaru iya whọ ndu nche eze-ụlo Chileke b'o dutaru whẹ jeshia ẹka ono. Nteke whẹ l'abya bẹ whẹ chịgbaa oryọku mẹe ọku ogọwa mẹe ngwọgu. 4 Jisọsu dụhawaa mbụ marụ iwhe l'abya iya ememe, ọ gbata whẹ ndzuta bya asụ whẹ: “?Ọo onye bẹ unu l'achọ?” 5 Whẹ sụ iya: “Ọo Jisọsu, onye Názaretu.” Jisọsu sụ whẹ: “Ọo mbẹdua bụ iya.” Júdasu, bu iya bụ onye ọbu, dụ l'idzu tẹ whẹ gude iya; kfụkubekwa whẹ whọ l'ẹka ono. 6 Nteke ono Jisọsu sụru whẹ: “Ọo mbẹdua bụ iya.” Ndu ono byarụ iya egude kpọo galagala laa l'azụ l'azụ je adashịa l'alị gbii gbii. 7 Jisọsu jịkwa whẹ ọdo sụ whẹ: “?Ọo onye bẹ unu l'achọ?” Whẹ sụ iya: “Ọo Jisọsu, onye Názaretu.” 8 Jisọsu sụ whẹ: “Mu sụru unu l'ọo mbẹdua bụ iya. Ọ -bụru l'ọo mbẹdua bẹ unu l'achọ, ọo ya bụ tẹ ndu ọwa tụgbunua lashia.” 9 Iwhe ono bụ-gezhia nggẹ okfu ono, shi iya l'ọnu avụkota, o kfuru sụ: “Nna, ọ tọ dụkwa m'ọo onye lanụ, whuhuru ewhuhu lẹ ndu lile ono, i yeru mu l'ẹka.” 10 Ọo ya bụ, Sáyịmonu Pyita turuwho nkogo iya. Ọ mịta nkogo ono gbu nwohuta onye ishi ndu l'agbajẹ ẹja nụ Chileke; ọ bụru l'ụzo-nchị b'o gburu iya mma ono; tụkole iya whọ nchị ẹka-ụtara pafụ. Ẹwha nwohuta ono bụ Málukọsu. 11 Jisọsu sụ Pyita: “Mịru nkogo ghu ye l'ọbo iya. ?Mu ta akabẹ-zhihedua ngụkota-gee iwhe l'angụ angụ, dụ l'omogo iwhe-ọtsulanu, Nna mu nụru mu?”
A kpụ Jisọsu akpukfu Ánasu
12 Ọo ya bụ, ndu ojọgu ono mẹe onye ishi whẹ mẹe ndu nche ndu Ju, bya egude Jisọsu kee ya ẹgbu. 13 Whẹ vuru ụzo kpụta iya kpukfu Ánasu. Ánasu bụ nnajị, keru Káyafasu nwa iya nwanyị. Ọ bụkwanuru Káyafasu l'onwiya bụ eze onye ishi ndu l'agbajẹ ẹja nụ Chileke nke awha ono. 14 Ọ bụkwaruwho Káyafasu ono bụ onye ono, chịshijeru ndu Ju idzu sụ l'ọ kachia mma t'onye lanụ nwụhu-chiaru ọha.
Pyita l'agọ l'iya ta amadụ onye Jisọsu bụ
15 Sáyịmonu Pyita l'etsokwawho Jisọsu l'azụ l'azụ, onye lanụ ọdo l'ime ndu l'etso ụzo Jisọsu l'etsokwa iya who. Onye lanụ onona bẹ yẹle eze onye ishi ndu ono, l'agbajẹ ẹja nụ Chileke matahawarụ. Ọo ya bụ, o tsoru Jisọsu bahụ l'ọma ogboduwhu ibe eze onye ishi ndu l'agbajẹ ẹja nụ Chileke ono. 16 Ọwhube Pyita kfụruroo l'etezhi l'ọnu-ọguzo. Ọo ya bụ, onye ọwhua l'etso ụzo Jisọsu, tso iya bahụ ụlo-ikpe whọ bụ iya bụ onye ọwhu eze onye ishi ono marwetaru, fụta bya eje ekfuru yeru nwata nwamgbọko, bụ iya l'eche ọnoguzo ono. Nwata nwamgbọko ono haa ya, o dubata Pyita. 17 Nwamgbọko ono, l'eche ọnoguzo ono sụ Pyita: “?Ọ dụ g'ị lịnu-a lẹ ndu l'etsoje nwoke-e, e guderu-a?” Pyita sụ: “Tụswekwa, ọ tọ bụkwa mu.” 18 Nteke ono bẹ oyi l'atsụ, ọo ya bụ, ndu l'eezhije ozhi mẹe ndu nche dụhawaa mbụ kpọbe ọku icheku kfụ-whe iya mgburumgburu anya. Pyita bya akfụkubekwa whẹ whọ, anyagba ẹhu nkiya.
Ánasu l'ajị Jisọsu ajị
19 Ọo ya bụ, eze onye ishi ndu l'agbajẹ ẹja nụ Chileke ono bya ajịlahaa Jisọsu ajị nke ndu l'etso ụzo iya mẹe nke iwhe l'ọonoje ezhi. 20 Jisọsu sụ iya: “Mu tụkowaru iwhe lile tụjashiaru ndu mgboko, mu l'anọjelewho ezhi whẹ iwhe l'ụlo-ndzuko ndu Ju mẹe l'eze-ụlo Chileke, bụ ẹka ndu Ju l'edzukobeje. Ọ tọ dụkwa iwhe mu kfuru dụ ọwhu mu kfuru l'edomi. 21 ?I kwoberu gụnu ajị mu ẹgube ajị ono? Jị ndu nụru iwhe mu kfuru, lẹ whẹ marụa iwhe mu kfuru.” 22 Nteke Jisọsu kfuleruwho nno, onye lanụ l'ime ndu nche ono, kfụkube Jisọsu ọbu bya agbakpọo ẹka byia ye ya l'ishi-nchị sụ: “?I marụ l'ọo eze onye ishi ndu l'agbajẹ ẹja nụ Chileke bẹ l'iituburu okfu nno?” 23 Jisọsu sụ iya: “Ọ -bụru l'ọ dụ iwhe-dụ-ẹji, mu kfuru, kfuru edzudzu ọha-a iwhe-dụ-ẹji ọbu, mu kfuru; tẹ whẹ nụ. Nteke bụ l'ọ waa iwhe kfụru nhamụnha bẹ mu kfuru ?ndẹe iwhe i kwoberu echi mu ẹka?” 24 Tọ dụ iya bụ, Jisọsu nọdukwaa l'ẹgbu ono, e keru iya, Ánasu zhi a kpụta iya kpụ-jeshiaru Káyafasu bụ iya bụ eze onye ishi ndu l'agbajẹ ẹja nụ Chileke.
Pyita l'agọkwawho ọdo l'iya ta amadụ Jisọsu
25 Sáyịmonu Pyita kfụkwaduru-a l'ẹka ono, ọ kfụru anyagba ẹhu. A nọnyaa, whẹ sụ iya: “?T'ị lịnua lẹ ndu ono, l'etsoje onye ono?” Pyita sụ whẹ: “Tụswekwa, ọ tọ bụkwa mu.” 26 Onye lanụ lẹ ndu l'ejeru eze onye ishi ndu l'agbajẹ ẹja nụ Chileke ono ozhi, bụ abụbu nwoke who Pyita ghebufuru nchị, tụfulewho ọnu jị Pyita sụ iya: “?Mu ta awhụdu ghu-a gẹ gụ l'iya nọ l'ime mgbabu who?” 27 Pyita gọfukwa ọdo, okọku ryalẹkwawho ọrya nteke onowho.
Jisọsu nọ l'iwhu Páyileti
28 Tọ dụ iya bụ lẹ whẹ akpụfuta Jisọsu l'ibe Káyafasu, kpụru jeshia l'eze-ụlo ikpe ọ-chị-ọha Romu, l'achịnu. Nteke ono bụwaru ishi ẹnyangge. Ọle whẹbe ndu Ju ta abahụkwa l'eze-ụlo ono nggẹ whẹ ta atụru nsọ nke ọwhu whẹ l'etso ria oge O-je-ghata ono. 29 Ọo ya bụ, Páyileti bya ejekfu whẹ l'etezhi je asụ whẹ: “?Ọo ẹgube iwhe-dụ-ẹji gụnu bẹ unu sụru lẹ nwoke-e meru?” 30 Whẹ sụ iya: “Nggẹ l'ọo iwhe lẹ nwoke-e l'abụa onye l'eme ẹjo iwhe mẹ whẹ ta akpụtakwaru ghu iya.” 31 Páyileti sụ whẹ: “Unubẹdua l'onwunu kpụta iya je egude ekemu-alị unu kpee ya ikpe.” Ndu Ju sụ iya: “A tụkwaru iya anyi l'iwu sụ t'anyi ba akfugbujekwa madzụ.” 32 Iwhe ono bụ-gezhia nke ọwhu iwhe ono, Jisọsu kfuru l'a-vụkota, bụ iwhe o kfuru gude tụa ọnu ẹgube anwụhu, ya l'a-nwụhu. 33 Páyileti bya abahụ-whu azụ ọdo l'eze-ụlo ono bya ekua Jisọsu sụ iya: “?Ọo gụbedua bụ Eze ndu Ju?” 34 Jisọsu jị iya: “?Ọo gụbedua nyịtaru ọnyi ẹhu ghu ekfu iya, t'ọo ndu ọdo sụru ghu l'o noo iwhe mu kfuru?” 35 Páyileti sụ iya: “?Mu bụ onye Ju? M'ọ kwarọo ndu alị ghu mẹe ndu ishi ndu l'agbajẹ ẹja nụ Chileke kpụ ghu kpụtaru mu. ?Ọo gụnu b'i meru?” 36 Jisọsu sụ iya: “Abụbu ono, mu bụ eze te eshikwa lẹ mgboko-o, ọ -bụ l'abụbu, mu bụ eze shi lẹ mgboko-o mẹ ndu ozhi mu ekwe ọgu mẹ tẹge akpụru mu nụ ndu Ju. Obenu l'abụbu, mu bụ eze te eshidu lẹ mgboko-o.” 37 Páyileti sụ iya: “Ha! ?Ọo ya bụ l'ị bụ eze?” Jisọsu sụ: “Mu bụkwa eze. Ọ kwawhọ gụbedua bẹ gudewaa ọnu ghu kfua ya. Ọo tẹ mu bụru eze b'e kwoberu nwụa mu, ọ kwarụwho iwhe ono bẹ mu kwoberu bya mgboko-o tẹ mu bya egoshi ndiwhe iwhe ọkpobe-okfu bụ. Iwhe bụ ndu l'etso ọkpobe-okfu ono l'anụje olu mu.” 38 Páyileti jị sụ iya: “?Ọo ẹgube iwhe gụnu bụ ọkpobe-okfu?”
E kperu Jisọsu nkfugbu
Ọo ya bụ, Páyileti jị-gele iya who ajị ono, ọ bya alụfu jekfuwhu ndu Ju ono azụ ọdo je asụ whẹ: “Ọ tọ dụkwa ejo-iwhe mu whụru nwoke-e meru. 39 Ọle eshi-ọwhu omelalị unu bụ tẹ mu hajẹeru unu onye mkpọro lanụ t'ọ la m'e ridelewho oge O-je-ghata ?ọ dụ ree mẹ mu haarụ unu Eze ndu Ju ọbu?” 40 Whẹ swọkporohu sụ: “Ọ tọ bụdu onye ọwa bẹ l'ịi-harụ anyi-o, hachiaru anyi Barábasu t'ọ la!” Barábasu ọbu, whẹ sụru t'a haarụ whẹ bẹ bụkwa onye l'ana nfụ.
1 Ọo ya bụ, Páyileti bya akpụta Jisọsu sụ t'e chia ya iwhe. E chia ye ya, chigoo ya echigo. 2 Ndu ojọgu bya egude ogvu kpaa okpu-eze bya ekpube iya l'ishi, bya achịta uwe mkpẹelanu, l'eke uswe uswe yee ya. 3 Whẹ byakfuta iya bya asụje iya: “Anyi ekele ghu-o, Eze ndu Ju!” Whẹ l'echikwa iya whọ ẹka. 4 Páyileti bya ejekfu ndu Ju ono ọdo je asụ whẹ: “Unu lekwa lẹ mu l'akpụfutaakwaru unu nwoke-e nke ọwhu unu l'a-ma l'ọ tọ dụdu ejo-iwhe mu whụru, o meru.” 5 Ọo ya bụ, Jisọsu futashia kpuru okpu-eze ono, e gude ogvu kpaa, yekwaawho uwe mkpẹelanu ono, l'eke uswe uswe. Páyileti sụ whẹ: “Unu lee nwoke ọbu.” 6 Ọ bya ebe nteke onye ishi ndu l'agbajẹ ẹja nụ Chileke mẹe ndu nche whụru iya, whẹ tụko chishia sụ: “Kpọpyabe iya l'oswebe! Kpọpyabe iya l'oswebe!” Páyileti sụ whẹ: “Unubẹdua l'onwunu kputa iya je akpọpyabe iya l'oswebe ọbu, o noo l'ọ tọ dụdu ejo-iwhe mu whụru, o meru.” 7 Ndu Ju sụ iya: “Eshi-ọwhu o gudezhiwaa ọnu iya sụ l'ọo ya bụ Nwa Chileke ọbu b'a kfugbujekwa iya, o noo g'iwu anyi sụru t'e mejee onye kfuru nno.” 8 Páyileti nụlewho iwhe ono, ọ kabaanụ ọotsu egvu. 9 Ọ bya abahụ-whu azụ l'ụlo ono je ajị Jisọsu sụ iya: “?Ọ nụ-a awee b'i shi?” Jisọsu gbagbua ya lẹ nkụchi. 10 Ọo ya bụ, Páyileti sụ iya: “?T'i yeduru mu ọnu? ?Ọ dụ gẹ tị madụ l'ọo mu b'ọ tụkoru dụ l'ẹka? Mu -sụ t'a haa ghu, a haa ghu; nteke mu -sụru t'a kfugbua ghu l'oswebe, a kfugbua ghu.” 11 Jisọsu sụ iya: “Ị tị ge enwekwa ẹgube ike ọwhu dụ nno l'ẹka mu nọ, nggẹ l'ọ tọ bụ Chileke, bu l'igwe nụru ghu iya. Ọo ya bụ, l'iwhe-dụ-ẹji, o meru mbụ onye ono, meru e gude mu bya akpụru nụ ghu bẹ ka nke ghu shii.” 12 Páyileti nụlewho iwhe ono, ọ chọkashilahaa ụzo, ya l'e-shi haa Jisọsu. Ọle ndu Ju chishiaru mkpu sụ: “I -hazhiwaa nwoke-e t'ọ la, anyi amarụ l'ị tị tụduru ike yeru ishi ọ-chị-ọha, bụ Siza. Iwhe bụ onye gude ike nke ẹka iya mebe onwiya eze bụakwaa ọhogu Siza.” 13 Páyileti nụlewho iwhe lile ono, whẹ kfuru, o dufuta Jisọsu etezhi, yẹbedua bya anọdu anọdu lẹ nggada ọbu, onye l'ekpeje ikpe l'aanọduje ekpe ikpe, dụ l'ẹka ọbu, l'eekuje: Ẹka, e gude ẹwhuru nmalia anmali. Iwhe l'eekuje iya l'okfu Arámayiku bụru Gabata. 14 Ọ bya ebedelewho l'ẹnyanwu-ọlwa-l'ishi lẹ mbọku ono, bụ chi sahụ, ya abụru mbọku l'aawata ori-oge O-je-ghata ono, Páyileti sụ ndu Ju: “Unu lee eze unu.” 15 Whẹ chishia sụ: “Kfugbua ya! Kfugbua ya! Kpọpyabe iya l'oswebe!” Páyileti jị whẹ sụ whẹ: “?Unu l'ekfu tẹ mu kpọpyabe eze unu l'oswebe?” Ndu ishi ndu l'agbajẹ ẹja nụ Chileke ono sụ: “Anyi te enwehekwa eze ọdo t'a gbahaa ishi ọ-chị-ọha, bụ Siza.” 16 Tọ dụ iya bụ, Páyileti kpụru iya nụ ndu ojọgu tẹ whẹ je akpọpyabe iya l'oswebe.
Aakpọpyabe Jisọsu l'oswebe
17 Ọo ya bụ, whẹ kpụta Jisọsu whẹ l'iya lịru tụgbushia, ọ bụru iya vu oswebe iya ono jeye whẹ rwua ẹka ọbu, l'eekuje “Ọkpokoro ishi.” Iwhe l'eekuje ẹka ono l'okfu Arámayiku bụ Gọlugóta. 18 Ọ bụru l'ẹka ono bẹ whẹ kpọpyaberu iya l'oswebe. Whẹ kpọpyabekwawho unwoke labọ ọdo l'ẹka ono, kpọpya-begee whẹ iche iche; onye lanụ l'ẹka iya ọwaa, onye ọwhu l'ẹka iya ọwhu. Jisọsu nọdu whẹ l'echi. 19 Páyileti bya edekwawho iwhe edede kfube l'eli oswebe ono. Iwhe ọbu, o deru bụ: JISỌSU, ONYE NÁZARETU, EZE NDU JU. 20 Igweligwe ndu Ju gụa iwhe ono, o deru ono nkele ẹka ọbu, a kpọpyaberu Jisọsu ọbu dụkube mkpụkpu ono ntse. Okfu, e gude dee ya bụru Arámayiku mẹe Látinu mẹe Giríku. 21 Ọo ya bụ, ndu ishi ndu l'agbajẹ ẹja nụ Chileke mẹe ndu Ju bya asụ Páyileti: “Be edeshi lẹ nwoke-e bụ Eze ndu Ju. Iwhe l'ii-dechia bụ lẹ: Nwoke-e sụru l'ọo yẹbedua bụ Eze ndu Ju.” 22 Páyileti sụ: “Iwhe mu deru bẹ mu dewaru.” 23 Ọo ya bụ, ndu ojọgu ono kpọpya-begelewho Jisọsu l'eli oswebe ono, whẹ bya achịta uwe iya l'ooyeje l'ẹhu kee ụzo ẹno; onye ọwhu nọnu lẹ ndu ojọgu ono, ya ahata ụzo lanụ. Whẹ bya achịtakwawho eze uwe ime ẹhu iya. Ọwhube ono bụ uwe mkpẹelanu, l'ẹte adụa ẹka a gbagbabẹru iya agbagbabẹ m'ọo l'ẹka lanụ; e shizhiawho l'imeli kwee uwe mkpẹelanu ono byeye l'ụzo alị. 24 Ọo ya bụ, ndu ojọgu ono sụ onwowhe: “T'anyi ba alakakwa uwe-e alaka, t'anyi tụa ido marụ onye l'achịta iya nụ.” Iwhe ono tụkoru mekota, e shi nno iwhe e deru l'ẹkwo Okfu Chileke vụkota, bu iwhe e deru sụ: “Whe kekashiru uwe mu l'ime onwowhe, O be l'ọwhube uwe ọwhu mu l'eyeje l'ime ẹhu, whẹ tụa ido tẹ whẹ marụ onye l'a-chịta iya nụ.” O noo iwhe ndu ojọgu ono meru ndono. 25 Ndu kfụru lẹ mgboro oswebe Jisọsu ono nteke ono bụ ne iya mẹe nwune ne iya nke nwanyị mẹe Méri nyee Kulọ́pasu mẹe Méri Mágudala. 26 Jisọsu whụlewho ne iya mẹe onye ono, l'etso ụzo iya, o yeru obu gẹ whẹ kfụkube ẹka ono, ọ sụ ne iya: “Nwanyị, lekwa nwa ghu nwoke.” 27 Ọ sụkwawho onye ono, l'etso ụzo iya: “Lekwa ne ghu.” Shitalekwawho mbọku ono, onye ono, l'etso ụzo Jisọsu ono duta Méri lashia ibe iya yẹle iya je eburu.
Anwụhu Jisọsu
28 E megelewho, Jisọsu marụ l'iwhe lile gvụkotawaru ntaa. Ọo ya bụ ọ sụ: “Ẹgu mini l'agụkwa mu.” Iwhe ono b'o kfuru nggẹ iwhe e deru l'ẹkwo Okfu Chileke a-vụkota g'e deru iya. 29 O nweruwho nwa ite sụru l'ẹka ono mmẹe vayịnu, shihuru ụka jiru eji. Ọo ya bụ, whẹ bya ewota sapo tsẹe lẹ mmẹe oshihu-ụka ono, ọ ngụgole iya whọ; whẹ bya etsebe iya l'ẹkali oshi ịsopu mabẹ iya t'o rwua ya l'ọnu. 30 Nteke Jisọsu ngụtaleruwho mmẹe oshihu-ụka ono; ọ sụ: “Ọ gvụwaru.” O whozeta ishi, ọ bụru iya ọtu-buhu ume.
Anmafuru Jisọsu mgburẹku
31 E megelewho, ndu Ju je aryọo Páyileti tẹ whẹ je akukwoshia ndu ono, a kpọpyaberu l'oswebe ono oshi ọkpa, nke ọwhu l'a-patakọta whẹ pafụ. Ishi iya bụru lẹ mbọku ono bẹ bụwaa chi -sahụ; ya abụru mbọku ọtuta-ume. Whẹ l'emekwa nụ t'odzu ndu ono ba atụko dụ-gee l'eli oswebe ono lẹ mbọku ọtuta-ume ono. Mbọku ọtuta-ume onona bẹ bụ whẹ eriri eriri. 32 Ọo ya bụ, ndu ojọgu ono bya akukwoshia ọkpa onye nke mbụ, kukwoshikwaawho ọkpa onye ọwhu, mbụ ndu ono, a tụkoru whẹ lẹ Jisọsu kpọpyabe. 33 Whẹ bya erwua ẹka ọwhube Jisọsu nọ, whẹ whụa l'ọ nwụhuhawaruroo, whẹ haa ya, whẹ ta akukwoshihe yẹbedua ọkpa. 34 Tọ dụ iya bụ l'onye ojọgu lanụ agbashilekwawho wota arwa iya nma Jisọsu lẹ mgburẹku. E jia ekfu, mmee yẹle mini shi iya l'ẹka ono alwa patapata. 35 Ọo onye whụkotaru iwhe lile-e nteke l'ọnwu bẹ tụru ọnu iwhe ọ whụru. Iwhe ono, o kfuru tụkoru bụkotaru ọkpobe-okfu, yẹbedua l'onwiya makwarụwho l'ọo ire-lanụ bẹ ya l'ekfu. Ọo ya bụ, t'unubẹdua l'onwunu kwetakwawho. 36 Iwhe lile ono mekotaru nke ọwhu iwhe e deru l'ẹkwo Okfu Chileke l'a-vụkota lẹge e deru iya. Ọ sụru: “Ọ tọ dụkwa ọkpu, dụ iya l'ẹhu ọwhu a bya l'a-kukwo akukwo m'ọo nnanụ.” 37 Tẹmenu o nwekwaru ẹka ọdo, e deru l'ẹkwo Okfu Chileke sụ: “Whẹ l'e-gude ẹnya whẹ ele onye ono, whẹ nmarụ arwa.”
Eeli Jisọsu
38 E megelewho, Jósẹfu, onye Arimatíya jekfu Páyileti je aryọo ya tẹ ya pata odzu Jisọsu. Páyileti kweta t'ọ pata iya. Ọo ya bụ, o bya eje apazeta odzu Jisọsu ono pata pafụ. Jósẹfu ono bụkwawho onye l'etso ụzo Jisọsu, ọle ootso iya l'edomi nke l'ọotsu ndu Ju egvu. 39 Nikodímọsu byakwawhọ. Ọo ya bụ onye ono dụ mbụ byakfutajehawa Jisọsu l'ẹnyashi. Ọ byata vuru mmanụ-ehuhu mẹru, a gwọkoberu iwhe l'eekuje alozu. Mmanụ ono l'eshikaa mkpọ mebyi shii. A tukobe mmanụ ono l'igwe, l'aatụje ẹrwa iwhe bẹ ẹrwa iya hakwa g'ọo ẹrwa ẹkpa unu labọ, unu jigeeru eji. 40 Whẹ bya apazeta odzu Jisọsu bya egude ẹkwa-odzu, l'acha ụcha yẹle mmanụ ono, nshishi iya l'atsọ ụtso kwaa ya, bụ gẹ whẹbe ndu Ju l'akwajẹ odzu whẹ nke elili. 41 O nweruwho mgbabu, dụ l'ẹka ono, a kpọpyaberu Jisọsu l'oswebe. O nwekwaruwho ilu, dụ lẹ mgbabu ono. Ilu ono b'a tụru nke ọwhuu; tọko dụhawaa onye ọdo, e lijeru iya. 42 Ọo ya bụ, whẹ pata Jisọsu je elia l'ẹka ono eshi mbọku ono bụwaa mbọku nkwakọ nke mbọku ọtuta-ume ndu Ju, ilu ono bya adụfuaro ntse.
Ilu ọbu daburu iwhoro
1 Ọ bya erwua lẹ gẹregere chi-asahu, lẹ mbọku mbụ l'idzu abalị ẹsaa bụ iya bụ mbọku Sọnde, g'ọochi dụkwadua, Méri Mágudala gbarụ bya l'ilu ono. Ọ bya awhụa l'a gbụfuwaru ẹwhuru ono, e shi gude swichia ọnu ilu ono. 2 Ọo ya bụ, o gude ntụtu-ọso gbakfu Sáyịmonu Pyita mẹe onye ọwhunalanu, l'etso ụzo Jisọsu, Jisọsu yeru obu; je asụ whẹ: “A pafụakwaru Onye-Nwe-Ọha l'ilu ono. Tọ hẹ l'anyi marụ ẹka a tọgboru iya.” 3 Pyita yẹle onye ono, l'etso ụzo Jisọsu gbalihu tụgburu jeshia l'ilu ono. 4 Whẹ whẹ ẹbo ono tụko ye ọkpa l'ọso agba eje. Ọle onye ọwhuna, l'etsokwawho ụzo Jisọsu gbagharu Pyita; vuru iya ụzo gbarwua ilu ono. 5 Ọ bya ewhuru ewhuru nyoo ime ilu ono, whụa ẹkwa ọcha ono, e gude kwaa Jisọsu lia; g'ọ wụshiru l'ẹka ono. Ọle ọ tọ bahụdu l'ime ilu ono. 6 Sáyịmonu Pyita l'agbawa-a etso iya l'azụ. Ọ byarwua ẹka ono, ọ bahụ l'ime ilu ono; ọ whụa ẹkwa ọcha ono g'ọ wụshiru, 7 mẹe ẹkwa ono, e gude whukpua ya l'ishi. Ẹkwa nke ishi ono yẹle ẹkwa ọcha whọ ta awụshiduru l'ẹka lanụ. A whụwhukoberu ẹkwa nke ishi dobe iche. 8 Tọ dụ iya bụ l'onye l'etso ụzo Jisọsu ọwhuna, bụ iya vu ụzo gbarwua l'ilu ono; bya abahụkwawho. O je egude ẹnya iya whụa, o kweta. 9 O noo lẹ nteke ono bẹ whẹ l'ẹteke amadụaro iwhe e deru l'ẹkwo Okfu Chileke, sụru lẹ Jisọsu shifutajẹ l'ọnwu teta nọdu ndzụ. 10 Tọ dụ iya bụ lẹ ndu ono, l'etso ụzo Jisọsu atụgburu, onye ọwhu nọnu; ya alashia ibe nkiya.
Jisọsu l'egoshi Méri Mágudala onwiya
11 Méri bya akfụru lẹ mgboro ọnu ilu ono arya ẹkwa. Ọ ryanyaa ẹkwa ono, o whuzeta ewhuzeta enyo ime ilu ono. 12 Ọ whụa ojozhi-imigwe labọ, yekotaru uwe ọcha; nọdu anọdu l'ẹka ono, e shi dobe ọdzu Jisọsu ono. Onye lanụ nọdu l'ụzo ishi, onye ọwhu nọdu l'ụzo ọkpa. 13 Whẹ sụ iya: “Nwanyị ?ọo gụnu bẹ l'ịiryaru?” Ọ sụ whẹ: “Iwhe mu l'aryaru bụ l'a patawarụ Onye-nwe-mu-nụ, tọ hẹ lẹ mu marụ ẹka whẹ tọgboru iya.” 14 Ekfuge, l'ookfuge iwhe ono; ọ bya aghachi whụa Jisọsu g'ọ kfụru, ọle ọ tọ madụ l'ọo Jisọsu. 15 Jisọsu sụ iya: “Nwanyị ?ọo gụnu bẹ l'ịiryaru? ?Ọo onye bẹ l'ịicho?” Méri nọdunu sụ g'ọo onye l'eche mgbabu ono. Tọ dụ iya bụ lẹ Méri asụ iya: “Byiko, ọ -bụru l'ọo ghu patarụ iya pafụ, kanụru mu ẹka, ị parụ iya je atọgbo tẹ mu je apata iya.” 16 Jisọsu ku iya: “Méri.” Méri bya aghachi gude okfu Arámayiku sụ iya: “Rabónayi” bụ iya bụ O-zhi-iwhe. 17 Jisọsu sụ iya: “T'ẹka ghu be erwukwa mu l'ẹhu, o noo lẹ mu tẹke alarwudua l'imigwe jekfu Nna mu. Ọo l'ọ bụ, tụgbua jekfu ụnwunna mu whẹ je asụ whẹ lẹ mu l'alawaa imigwe alakfu onye ono, bụ Nna mu, bụru Nna unu, mbụ onye ono bụ iya bụ Chileke mu, bụkwaruwho Chileke unu.” 18 Méri Mágudala jekfu ndu ono, l'etso ụzo Jisọsu je asụ whẹ: “Mu gudeekwaa ẹnya mu whẹ ẹbo ẹbo whụa Onye-Nwe-Ọha.” Ọ sụ whẹ l'ọ kwa iya zhiru iya ozhi-a.
Jisọsu l'egoshi ndu l'etso ụzo iya onwiya
19 O rwua l'urwẹnyashi mbọku ono bụ iya bụ mbọku mbụ l'idzu abalị ẹsaa, ndu l'etso ụzo Jisọsu swochikota iwhe l'ụlo, whẹ dọkoberu nkele whẹ l'atsụ ndu Ju egvu. A bya l'amadeshia, Jisọsu byawaa bya akfụru whẹ l'echi kele whẹ ekele sụ whẹ: “Unu bukwaru guu.” 20 O kelegelewho nno, ọ bya egoshi whẹ ẹka iya whẹ ẹbo; goshi whẹ mgburẹku iya. Ẹhu tsọo ndu ono, l'etso iya ụtso gẹ whẹ whụru Onye-Nwe-Ọha. 21 Jisọsu sụkwa whẹ ọdo: “T'unu bukwaru guu. Ọo gẹ Nna mu zhiru mu bụ gẹ mu zhiru unu.” 22 O kfugelewho nno, ọ bya ekushi whẹ Ume sụ whẹ: “Unu nata Ume-Dụ-Nsọ. 23 Iwhe bụ ndu unu gụru nvụ l'iwhe-dụ-ẹji, ndu ọbu meru bẹ Chileke gụakwaru ndu ọbu nvụ. Ndu lile, unu l'agụaru nvụ l'iwhe-dụ-ẹji, whẹ meru bẹ Chileke l'ẹte agụkwaaru nvụ.”
Jisọsu yẹle Tọ́mosu
24 Ọo ya bụ, o nweru nwoke lanụ, ẹwha iya bụ Tọ́mosu, l'ẹte anọo l'ẹka ono. Tọ́mosu ono bẹ lịkwa-a l'ụmadzu iri l'ẹbo ono, l'etso ụzo Jisọsu. T'ọ nọ l'ẹka ono nteke ono, Jisọsu byarụ. Iwhe ọdo, l'eekujefua ya bụ Ejima. 25 Ọo ya bụ, e megelewho, ndu ọwhu whẹ l'iya tụkoru etso ụzo Jisọsu sụ iya: “Anyi whụakwaru Onye-Nwe-Ọha ọbu.” Tọ́mosu sụ whẹ: “Mu te ekwetakwa gbahakwaa lẹ mu gude ẹnya mu whẹ ẹbo-ẹbo whụa ichi aga ono l'ọbochi-ẹka iya, mbụ mu woru mkpụshi-ẹka mu ye l'ẹka ono, aga shi dụ iya, woru ẹka mu pyokwaawho lẹ mgburẹku iya. Ọ dụa nno bẹ mu l'ete ekwetakwa.” 26 A nọlewho abalị ẹsato, ndu l'etso ụzo Jisọsu nọdukwa l'ụlo ono ọdo whẹ lẹ Tọ́mosu. A swochikotakwa mgbo ụlo ono aswochi. Jisọsu byalẹkwaa bya akfụru whẹ l'echi, kele whẹ ekele sụ whẹ: “T'unu bukwaru guu.” 27 O kfugee nno bya asụ Tọ́mosu: “Ngwa, rwụa mu mkpụshi-ẹka l'ọbochi-ẹka mu l'ẹka-a. Ngwa, mee mu ẹka lẹ mgburẹku ọbu. Tọ́mosu, ba abụhekwa ekwegekwe. Kwetaje!” 28 Tọ́mosu sụ iya: “Onye-nwe-mu-nụ, bụ Chileke mu!” 29 Jisọsu sụ iya: “?Ọo nke l'ọo l'ị whụru mu ntaa kpatarụ iwhe i kwetaru? Ẹhu-ụtso b'a gọru nụ ndu l'awhụa l'ẹnya whẹ kwetalee!”
Iwhe e kwoberu dee ẹkwo-ọ
30 Jisọsu nọdukwawho megbabe igweligwe iwhe ọdo, a whụrulenya l'iwhu ndu l'etso ụzo iya, ọle e te edekotadu iwhe ono g'o ha l'ẹkwo. 31 Ọle ndu ọwhu e deru b'e deru nke ọwhu unu l'e-gude iya kweta l'ọo Jisọsu bụ Kuráyisutu ọbu, Chileke kweru ụkwa iya, bụ Nwa Chileke mẹe t'unu woru onwunu ye iya l'ẹka nke ọwhu unu l'e-shi iya l'ẹka nweru ndzụ.
Jisọsu l'egoshi ụmadzu ẹsaa lẹ ndu l'etso ụzo iya onwiya
1 E megekwaawho, Jisọsu bya egoshikwawho ndu l'etso ụzo iya onwiya ọdo l'agụga eze-ẹnyimu Tayibíriyasu. Ọ waa g'o gude goshi whẹ onwiya ọbu ndọwa. 2 Lẹ Sáyịmonu Pyita mẹe Tọ́mosu, l'eekuje Ejima mẹe Natániyelu, onye Kena Gálili mẹe ụnwu Zébedi mẹfukwawho ụmadzu labọ ọdo l'ime ndu ono, l'etso ụzo Jisọsu, tụkoru nọdukota l'ẹka lanụ. 3 Tọ dụ iya bụ lẹ Sáyịmonu Pyita asụ whẹ: “Mbẹdua l'ejeekwa l'aga-ẹma.” Whẹ sụ iya: “Anyi l'e-tsokwa ghu eje.” Whẹ tụko wụfu jeshia l'aga. Whẹ jerwua je atụko bahụ l'ụgbo ono. Whẹ tụko ẹnyashi owhu ono dekota aga, whẹ ta anmata t'ọ kadụ mma l'ọo ikpọkpa. 4 O rwulewho lẹ gẹregere ẹnyangge, whẹ bya l'eledeshia ẹnya, Jisọsu kfụwaru l'agụga mini ono, whẹbe ndu ono, l'etso ụzo iya ta ama l'ọo Jisọsu kfụru l'ẹka ono. 5 Jisọsu sụ whẹ: “Ụnwu mu ?ọ dụ ẹma, unu nmatarụ?” Whẹ sụ iya: “Waawa, ọ tọ dụkwa.” 6 Ọ sụ whẹ: “Unu ghaa ụgbu unu ọbu l'ụzo ẹka-ụtara ụgbo ono, oo-nwee iwhe unu l'aharụ nmata.” Ọo ya bụ, whẹ bya aghaa ụgbu whẹ ono, whẹ ta adụhenu ike lọbata iya l'ime ụgbo whẹ nkele ẹma, whẹ nmatarụ bẹ ha l'igweligwe. 7 Ọo ya bụ onye onona, l'etso ụzo Jisọsu, Jisọsu yeru obu sụ Pyita: “Ọ kwa Onye-Nwe-Ọha!” Anụnu, Sáyịmonu Pyita nụru l'ọo Onye-Nwe-Ọha, ọ chịta uwe iya yee nkele o to shidu yee uwe iya, gvuda lẹ mini ono gvufushia. 8 Ọwhube ndu l'etso ụzo Jisọsu ọwhu nọdu l'ime ụgbo ono l'alọkaa ụgbu ono, ẹma jiru godogodo, eshita ụzo eli-mgboko nkele whẹ ta anọdudu otẹnya l'ụzo eli-mgboko. Whẹ nọdua iwhe ha g'ọo nha-ọkpa ụkporo ise. 9 Whẹ lụfutalewho eli-mgboko, whẹ whụa ovokọku l'ẹka ono. Whẹ whụa ẹma, daburu l'ọku ono mẹkwawho buredi. 10 Jisọsu sụ whẹ: “Unu hataada ẹma ọbu, unu nmatarụ ntaa bya.” 11 Ọo ya bụ, Sáyịmonu Pyita je abahụkwa l'ụgbo ono ọdo je alọfuta ụgbu ono eli-mgboko. Iwhe jiru iya nụ bụ-zhiaruwho akarakpoto akarakpoto ẹma. Ẹma ono, dụ iya nụ tụkoru dụ ụkporo ẹma ugbo ẹsaa l'ẹma iri l'ẹbo. Ẹma ono hakwa l'igweligwe g'ọ ha nno, ọle ụgbu ono ta adụkwa ẹka o jeru ome kinyangu nke alakahụ. 12 Jisọsu sụ whẹ: “Unu bya akpọo ọkpuchi.” Tọ dụhe ndu ono, l'etso ụzo iya onye ọwhu tụru ama nke tẹ ya jị iya sụ: “?Ọo onye b'ị bụ?” Gẹ whẹ tụkowaru marụ l'ọo Onye-Nwe-Ọha. 13 Jisọsu bya abya ewota buredi ono nụ whẹ, ọ nụfukwaa whẹ whọ ẹma whọ. 14 Egoshi onona, o goshiru whẹ onwiya kwewa iya ugbo ẹto, Jisọsu goshiru ndu l'etso ụzo iya onwiya g'o shilewho l'ọnwu teta nọdu ndzụ.
Jisọsu yẹle Pyita
15 Whẹ kpọ-gelewho ọkpuchi ono, Jisọsu sụ Sáyịmonu Pyita: “Sáyịmonu nwa Jọnu; ?Ị ka oye mbẹdua obu l'ezhi karụ gẹ ndu lile-e yeru mu iya?” Pyita sụ iya: “Ee, Onye-Nwe-Ọha, ị marụ lẹ mu yeru ghu obu.” Jisọsu sụ iya: “Nụjekwa ụnwu atụru mu nri.” 16 Jisọsu byakwa eku iya nke ugbo labọ: “Sáyịmonu nwa Jọnu ?i yeru mu obu l'ezhi?” Pyita sụ iya: “Ee, Onye-Nwe-Ọha, ị marụ lẹ mu yeru ghu obu.” Jisọsu sụ iya: “Letajekwaru mu atụru mu ẹnya.” 17 Ọ byakwa eku iya nke ugbo ẹto: “Sáyịmonu nwa Jọnu ?i yeru mu obu?” Áwhụ bya Pyita l'ẹhu lẹ Jisọsu jịru iya nke ugbo ẹto sụ iya: “?I yeru mu obu?” Pyita sụ iya: “Onye-Nwe-Ọha, gụbedua l'onwoghu tụkoru iwhe lile makọtaru, ị marụa lẹ mu yeru ghu obu.” Jisọsu sụ iya: “Nụjekwa atụru mu nri.” 18 Sụ iya: “Iwhe mu l'akarụ ghu bụ lẹ: nteke ị bụ nwokorọbya b'ọ bụ ghu l'agbashije chịta ẹkwa ghu weru l'ukfu, lọbaru jeshia ẹka, dụ ghu uwhere, ọle nteke ị kahụleruwho bẹ l'ii-chili ẹka ghu whẹ ẹbo, onye ọdo abya ewebe ghu ẹkwa ghu l'ukfu, duta ghu jeshia ẹka l'adụa ghu uwhere ejeje.” 19 Iwhe ono b'o kfuru gude tụa ọnu gẹ Pyita l'e-gude nwụhu, shi nno goshi ọdu-biribiri Chileke. Jisọsu kfugelewho iwhe ono, ọ sụ Pyita: “Tsoru mu.”
Jisọsu yẹle onye l'etso ụzo iya ọwhuna
20 Pyita bya aghaa ẹnya l'azụ, whụa onye ọwhuna, bụkwawho onye l'etso ụzo Jisọsu, o yeru obu gẹ l'ootso whẹ. Ọo ya bụ onye onona, nọkube Jisọsu ntse gẹ whẹ l'eri nri-ẹnyashi whọ, bụ iya jịru iya sụ iya: “Onye-Nwe-Ọha ?ọo onye bụ onye ọbu, l'e-seru ghu ye ọbu?” 21 Pyita whụle iya whọ, ọ jị Jisọsu sụ iya: “Onye-Nwe-Ọha ?ndẹe gẹ nke onye ọwa dụ dụ?” 22 Jisọsu sụ iya: “Ọ -bụru l'ọo uche-obu mụbe Jisọsu l'ọo-nọdu ndzụ jeye nteke mu l'a-bya ọdo ?ẹka ghu dụ iya l'awee? Tsojezhiawho mụbe Jisọsu!” 23 O noo ya, iwhe bụ ụnwunna gẹ whẹ ha kfulahaa l'iwhe ono, o kfuru nno bẹ bụ l'onye onona, l'etsokwawho ụzo Jisọsu ta abyadụ l'anwụhu anwụhu. Ọle iwhe Jisọsu kfuru iya ta abụkwa l'ọ tọ byadụ l'anwụhu. Iwhe o kfuru bụkwa l'ọ sụru: “Ọ -bụru l'ọo uche-obu mụbe Jisọsu l'ọo-nọdu ndzụ jeye nteke mu l'a-bya ọdo ?ẹka ghu dụ iya l'awee?” 24 Ọo onye ono, l'etso ụzo Jisọsu bẹ l'ekfu iwhe o gude ẹnya iya whụa l'iwhe lile-e g'ọ ha. Ọ bụkwaru iya whọ deru iwhe lile-e, mbụ anyi marụ l'iwhe o deru b'o kfuru ire-lanụ. 25 O nwegekwaruroo igweligwe iwhe ọdo, Jisọsu meshiru. Iwhe mu l'arịkwanu bụru lẹ nggẹ l'ọo iwhe e mederu t'a tụko iwhe ono g'ọ ha dekota l'ẹkwo nnanụ nnanụ mẹe mgboko-o l'owhu tẹge edzukwa odobe ẹkwo, e dekotaru iya.