1 Apa ntangulo pali Izwi ni Izwi lyaliko kuli Leza, nalyo Izwi lyali Leza. 2 Liyo intangulo lyali kuli Leza. 3 Vyonsi vyaombike kuli wiyo na apasi wiyo chitali chiombeke chimwi chino chaombeka. 4 Unkasi munali umuno mwali upuma, nao upuma wali umwengelela uku yantu. 5 Nao umwengelela ukuluswefya un-nchanda, ni chanda chitangi chiuzimye. 6 Kwizile untu atumilwe ukufuma kuli Leza, izina lyakwe Yoane. 7 Wiyo wizile ukuti alande umwengelela, ukuti yonsi yazumile kuli wenewe. 8 Wiyo atali umwengelela, lelo wizile ukuti alande umwengelela. 9 Kwali umwengelela unkola uno ulukozya antu yonsi, ulwiza kuno ukunzi. 10 Izwi lyeliko kuno ukunzi, nukunzi kwene kwaliko kuno lili, lelo akunzi yatammanyile. 11 Wizile kwakwe, lelo ayali yakwe yatammulile. 12 Lelo yonsi yano yammulile. wayapile amaka ayakuwa ana yi Leza, ayano yazumile izina lyakwe. 13 Yano yatavilwe uku wazi, nanti uku kukasama kwa mwili, nanti uku kukasama kwa antu, lelo kwi Leza. 14 Nalyo Izwi lyaombike umwili, likala kuno tuli, neswe twaulola ukulu wakwe, ukulu ndi kuti uMwana wenga wino afumile kuli Tata, uwa nkumbu ni chumi. 15 Yoane wannanzile, awangula ukwizwi lyakwe, ati: “Alawi uwino natasile amazwi yakwe, wino alwiza uku chisila chane, waliko inkolelo yane.” 16 Kuno uku winji wa nkumbu zyakwe, sweswe swensi twapokelile inkumbu apa nkumbu. 17 Kuno Ntambi yafimilwe uku makasa yi Mose, lelo inkumbu ni chumi zizile ukwikasa li Yesu Klisto. 18 Kusi untu wino watana walola Leza nanti limwi; uMwana wi Leza wino ali pa chifuwa chi Tata, wavilwe wenga, uwino watulangilile. 19 Nau uli usyuta wi Yoane. Ayudea pano yantumile yakapela na aLevi ukufuma ku Yelusalemu, ukuti yamtondosye, wati: “Wewe wini?” 20 Nawe wazumile, atachili akane, wazumile vino wene asi Klisto. 21 Yamtondosya, yati: “Nga wewe wini, fwandi? We Elia?” Wavwanga, wati: “Asi nene.’ “Wewe ilau lili?” Wavwanga, wati: “Awe!” 22 Nga yannena, yati: “Wewe wini? Ukuti tukanene yano yatutumile. Wemwi apa lwako ulutuli?” 23 Wati: “Nemwi nene izwi lya ntu lino lilulaizya un-nyika: Ololini inzila ya Mwene; ndi vino ilau Isaya watasile.” 24 Na yaya yano yatumilwe yafumile uku aFaliseo. 25 Yamtondosya nu kunnena, yati: “Nga vino ulubatizya, ndi asi wewe Klisto, nanti Elia, nanti ilau lilye?” 26 Yoane wayanena, wati: “Nene ndubatizya uku manzi. Pali mwemwe awimilile wino mutamanyile mwemwe. 27 Uwino alwiza uku chisila chane, wino nene ntalingine ukutolompola imikowa ya nfwato zyakwe.” 28 Ivintu vi vyaombike uku Betania, umbalama yi Yodani, kuno Yoane wali angi alubatizya. 29 Uwanda wa uwili alola Yesu alwiza kuno ali, walanda, wati: “Lolini, uMwana-nfwele wi Leza, wino alutisya amaifyo ya kunzi. 30 Wiyo uwino navwanzile amazwi yakwe, ukuti: alwiza untu uku chisila chane, wino ali inkolelo yane, kuno waliko inkolelo yane. 31 Nene kwene ntammanyile, lelo kuti amanyike uku Islaeli, ichino nene nizile ndubatizya uku manzi.” 32 Kaili Yoane wavwanzile, ukuti: “Nalola uMwenzo Nswefu ulwika wa nkunda ukufuma umwiyulu, nao wawa pano ali. 33 Nene kwene ntammanyile, lelo wino watumile ukuyubatizya uku manzi, uwino wanenile, wati: Wino walola Mwenzo wamwikila, nu kwikala panali, wiyo uwino alubatizya uku Mwenzo Nswefu. 34 Nene nalola nu kulanda vino wiyo uMwana wi Leza.” 35 Na kaili uwanda wa uwili, Yoane wimilile ponga na alondezi yakwe yaili. 36 Alola Yesu alupita, avwanga, ati: “Lolini, uMwana-nfwele wi Leza!” 37 Yaya alondezi yaili yapulika aluvwanga, yalondela Yesu. 38 Nga Yesu apepela ayalola yannondile, ayanena, ati: “Mulusita chani?” Yannena, yati: “Labi, (alikuti: Kasambilizya) ukulwikala kwi?” 39 Wayanena, wati: “Nguni, mwampalola.” Nga yaya yalola pano akulwikala, yikala ukwakwe uwanda uo. Nalyo lyalile ilila. 40 Andelea unnina wi Simoni. Petlo, walipo pali yaili yano yampulike Yoane nu kulondela Yesu. 41 Intangulo kwene wiyo wawine Simoni unnina, wannena, wati: “Twalola Mesia (alikuti: Klisto).” 42 Nga amtwala kuli Yesu, nawe Yesu annolekesya, avwanga, ati: “Newe uli Simoni, umwana wi Yoane; nakutema we Kefa” (alikuti: Petlo nanti ifi-nga.) 43 Nu wanda wa uwili wakasime ukuya uku Galilea, nawe alola Filipo. Yesu wannena, wati: “Ndondela.” 44 Na Filipo ukumwao uku Betsaida, unkola nzi ponga na Andelea na Petlo. 45 Filipo alola Natanieli, annena, ati: “Twalola wino waandikilwe na Mose um-Maandiko na malau: Yesu, umwana wi Yosefu, untu wa ku Nazaleti.” 46 Natanieli wannena, wati: “Chingawela izwi lizipe ukufuma uku Nazaleti?” Filipo wannena, wati: “Nguna, ulole.” 47 Nga Yesu alola Natanieli alwiza kuno ali, wavwanga nu kunnena amazwi; yakwe, wati: “Lolini, alawi umwIslaeli ningo, unkasi kakwe asi nuchenjezu.” 48 Natanieli wannena. wati: “Wammanya uli?” Yesu wannena, wati: “Pano Filipo achili akwite, pano walu uli umwisika umu samvu, nali nkuwine.” 49 Natanieli wannena, wati: “Labi, wewe uli Mwana wi Leza, we Mwene wa Islaeli.” 50 Yesu wannena, wati: “Kuno nakunena, nati: Nali nkuwine umwisika umu nsamvu, wazumila? Ululola ivintu ivikulu ukuluta vi.” 51 Wannena, wati “Umwenemo, umwenemo, ndumunena: Mululola iyulu lyalepuka na yamalaika yi Leza yalukwela nu kwika apa Mwana-ntu.”
1 Nu wanda wa utatu kwali uwinga uku Kana un-nzi wa Galilea; na nyina wi Yesu wali kweneko. 2 Yesu nawe kwene yannalike uku winga ponga na alondezi yakwe. 3 Nga pano amanzi ya mizabibu yasila, nyina wi Yesu wannena, wati: “Yatakwite amanzi ya mizabibu.” 4 Na Yesu annena, ati: “Mama, tuli ni chintu uli newe? Ilya kuchita viyo lichili lipalamile,” 5 Nga nyina anena aomvi, ati: “Chonsi chino wamunena ukuomba, ombini.” 6 Nga kwali ivyaluzi sita ivya mafinga, vino a Yudea yakuwika ivya kufulalila, na chila chonga chingazyula intungo ziili nanti zitatu. 7 Nga Yesu ayanena, ati: “Zuzyini ivyaluzi amanzi.” Nayo yazuzya mpaka piyulu. 8 Wayanenena, wati: “Ali tapulini, mtwalile kimula.” Nga nayo yatwala. 9 Nawe kimula pano wang'wa, walola amanzi yao iyakola amanzi ya mizabibu. (Lelo atamanyile kuno yafumile, lelo aomvi yamanyile, yao yano yasemvile amanzi.) Kimula wiyo wisile siwinga. 10 Wannena, wati: “Chila litu intangulo akuleta amanzi ya mizabibu yano yanona, na pano antu yanwa yikuta, apano aleta yano yatanonile; wemwi ukuwika amanzi ya mizabibu yano yanona fika nali.” 11 Iyo intangulo ya vilangizyo Yesu wachisile uku Kana, un-nzi wa Galilea, wauswelula ukulu wakwe, na alondezi yakwe yamzumila. 12 Ichisila cha vintu viyo, aya uku Kapenaumu, unkola na nyina nanina yakwe, na alondezi yakwe, yikala kweneko amanda mache. 13 Ni Pasaka ya a Yudea yalile itipalamila, nga Yesu wapita uku Yelusalemu. 14 Azana antu un-ng'anda-nkulu-iyi-Leza, yalukazya ing'ombe ni nfwele ni nkunda, na yano yalukaulula impia yatenzi 15 Atola ichoze, achite chikoti, ayafumya yonsi un-ng'anda-nkulu-iyi-Leza, ni nfwele ni ng'ombe; awita impia zyi yakakaulula ya mpia, apenola imeza zyao. 16 Wayanena yano yalukazya inkunda, ati: “Tisini vi, mutachi chita ing'anda yi Tata ukuwa iya kukalila ivintu.” 17 Nga alondezi yakwe izukila vino chaandikwe: ‘Uzuwa wa ng'anda yako ulundya.’ 18 Nga aYudea yannena, yati: “Ichipezya-mano uli chino ulutulanga, vino uluchita vi?” 19 Yesu wayanena, wati: “Pomolini ing'anda-nkulu-iyi-Leza yi, nene uku manda yatatu nanjikula.” 20 Nga a Yudea yavwanga, yati: “Ing'anda-nkulu-iyi-Leza yi yakuzilwe uku myaka amakumi yani na sita, newe wanjikula uku manda yatatu?” 21 Lelo wene watakanga ing'anda inkulu, umwili wakwe. 22 Nga pano watutuluka uku yafwi, alondezi yakwe izukila vino watasile viyo, yazumila ilyandiko liyo nizwi lino Yesu wayanenile. 23 Nga pano wali uku Yelusalemu uku wanda ukulu uwa Pasaka, antu tupu yazumila izina lyakwe, pano yalola ivipezya-mano vyakwe, vino aluchita. 24 Lelo Yesu unkola atayataile, kuno wayamanyile yonsi. 25 Na kuno atakasime untu ukunnandila ivya yantu, kuno unkola kwene wamanyyi le vino vili un-ntu.
1 Pali untu wenga uwa aFaliseo, izina lyakwe i Nikodemo, uwikolo wa a Yudea. 2 Wene waile. usiku kunali, wannena, wati: “Labi, tumanyile vino we Kasambilizya wafuma kuli Leza; kuno kusi untu wino angachita ivipezyamano vi vino uluchita wewe, ndi Leza asi ponga nawe.” 3 Yesu wannena, wati: “Umwenemo, umwenemo, ndukunena: untu ndi atavilwe amaila yaili, atangi alole uwene-wi-Leza.” 4 Nikodemo wamtondosya, wati: “Angavyalwa uli untu ndi wawa uwikolo? Angingila un-nda yi nyina avyalwe ilya uwili?” 5 Yesu wannena, wati: “Umwenemo, umwenemo ndukunena: untu ndi atavilwe uku manzi nu ku Mwenzo, atangi awingile um-wene-wi-Leza. 6 Chino chavilwe uku mwili, umwili; na chino chavilwe uku Mwenzo, umwenzo. 7 Utachizunguka vino nakunena, nati: Mungale muvyalwe lya uwili. 8 Unza ukuluzuma na kuno ukasime, nunzumo wakwe kuupulika, lelo angi utamanyile kuno ufumile na kuno uyile: iviyo kwene nuntu wino wavyalwa uku Mwenzo.” 9 Nikodemo wannena, wati: “Chingawela uli ukuwa viyo?” 10 Yesu wannena, wati: “Newe we Kasambilizya wa Islaeli, ni vintu vi utavimanyile? 11 uMwenemo, umwenemo, ndukunena: vino lili lino tulimanyile, tukululivwanga, na lino twalola tukululilanda, nu kulanda kwitu mutalukuzumila. 12 Ngi namunena ivya kunzi, mutaluzumila, muluzumila uli ngi namunena ivya mwiyulu? 13 Kusi untu wino watana wakwela umwiyulu, siku wino wika ukufuma umwiyulu, ali Mwana-ntu. 14 “Ndi vino Mose wimike inzoka yiyi unnusanga, ivino nu Mwana-ntu kwene awimikwe. 15 Ukuti chila ntu wino wazumila, awe nupuma wa manda ti mnali. 16 Kuno yiyo Leza wakunda aya munsi, ichaleka wafima uMwana wakwe wavilwe wenga, ukuti chila ntu wino wamzumila, atalowa, lelo awe nupuma wa manda ti. 17 Kuno Leza atatumile uMwana ukuya munsi ukuti ayaputwila milandu, lelo aya munsi yafyukile kuno ali. 18 Wino wamzumila ataluputwilwa milandu; wino atazumile wataputwilwa unnandu, kuno atazumile izina lya Mwana wi Leza, wavilwe wenga. 19 Nau uli uputuzi wa milandu, kuno umwengelela wiza ukunzi. na antu yakunda ichanda ukuluta umwengelela, kuno ivintu vino yaluchita vyaipa. 20 Kuno chila ntu wino aluchita iviipe, akulutuwa umwengelela, atangi awize uku mwengelela, kuno atakasi milimo yakwe iloleke apatiswe. 21 Lelo wino aluomba ivya chumi akulwiza uku mwengelela, ukuti imilimo yakwe iloleke apatiswe vino iluombeka muli Leza.” 22 Ichisila cha vintu viyo, Yesu na alondezi yakwe yapita ukuya un-nsi ya a Yudea; alinda kweneko ponga nayo, angi alubatizya. 23 Yoane nawe wabatizyanga uku Ainoni, apipi ni Salimu, kuno kuwo amanzi yavuzile; na antu yaya kunali, yabatiziwa. 24 Kuno Yoane walile achili anyepwe. 25 Nga yumanya ulupaka alondezi yi Yoane nu mYudea wenga uku nnandu wa kufulala, 26 Yaya kuli Yoane, yati: “Labi, wino wali ponga newe umbalama yi Yodani, wino wamtakanga, lolini, alubatizya, na antu yonsi yaluya kunali.” 27 Yoane wayanena, wati: “Untu atangi apokelele chimwi, siku ndi wapiwa ukufuma umwiyulu. 28 Mwemwe mwe yakola mululanda vino navwanzile, inti: ‘Inene asi ne Klisto, lelo ntumilwe uku mkolelela.’ 29 Wino ali na nawinga ali siwinga; lelo chisindi wi siwinga wino alwimilila lu kumpulika, aluchimbila nkani izwi li siwinga. 30 Ichino vi ukuchimba kwane kukufika. Wene mpaka andusye, nene nchepe.” 31 Wino alwiza ukufuma umwiyulu, alusile yonsi; wino uwa munsi, wene uwa munsi, aluvwanga ivya munsi. Wene wino alwiza ukufuma umwiyulu, alusile yonsi. 32 Vino wawine nu kuvipulika ivino alulanda, lelo kusi umwi wino alupulika amazwi yakwe. 33 Wino wazumila amazwi yakwe, watela akamanyililo vino Leza uwa chumi. 34 Kuno wino watumilwe na Leza, akululanda amazwi yi Leza, kuno atakufumya uMwenzo uku kulinganya. 35 Isi wakunda uMwana, nawe wampa vyonsi um-makasa yakwe. 36 Wino azumila uMwana ali nupuma wa manda ti; wino atazumile uMwana, atalulola upuma, lelo ukali wi Leza umwikalile.
1 Ichino uMwene pano wamanya vino aFaliseo iyapulika vino Yesu atawa na alondezi ainji ukuluta Yoane nu kuyabatizya, 2 —lelo Yesu unkola atabatizyanga, siku alondezi yakwe— 3 watinile uku Yueda, apita aya uku Galilea. 4 Nawe wali uwa kupita apakasi pa nsi ya Samalia. 5 Nga afika umunzi wa Samalia, uno yakuluti Sikali, uno uli pipi ni chalo chino Yakobo wapile Yosefu mwanakwe. 6 Pao kwene pali ichifula chi Yakobo. Nga vino Yesu walile watatonta ni nzila yakwe, awikala apa chifula, kuti apuze. Nao wali unsanya apakasi. 7 Awiza umwanachi unSamalia ukusemba amanzi. Yesu annena, ati: “Mpa amanzi inwe.” 8 Kuno alondezi yakwe yalile yaya uku nzi ukuyukala ivyakulya. 9 Nga umwanachi unSamalia wiyo annena, ati: “Nga chawa uli wewe mYudea ukusita amanzi kuli nene, nene mwanachi unSamalia?” (Kuno aYudea yatuminkine na aSamalia.) 10 Yesu wannena, wati: “Ngi umanyile uwila wi Leza, na kaili ngi umanyile wino aluti: Mpa, nwe! newe wali unnombe, nawe wali akupe amanzi ya upuma.” 11 Nawe wannena, wati: “Mwene, nga vino usi ni chakusembela, ni chifula chazika, nga wanjafuma kwi amanzi yao aya upuma? 12 Chene! we wikolo ukuluta tata witu Yakobo wino watupile ichifula chi? Nawe kwene wanwanga amanzi ya na anakwe ni nyama zyakwe.” 13 Nga Yesu annena, ati; “Wensi wino alunwa amanzi ya; alulola unsala kaili. 14 Lelo wino wanwa amanzi yano nampa nene, atalulola unsala manda yonsi. Lelo amanzi yao yano nampa, yaluwa munali wi kafukoka wa manzi yano yalufukoka nu kumpa upuma wa manda ti.” 15 Nga umwanachi wiyo annena, ati: “Mwene, mpa amanzi yao, ntachilola unsala kaili, nanti ukwiza pa ukwizu semba,” 16 Nga Yesu annena, ati: “Yanga, ukite uwako, mwiza nawe pa.” 17 Nga umwanachi wiyo avwanga, ati: “Ntakwite uwane,” Yesu wannena, wati: “Wavwanga ningo vino usi nu wako. 18 Kuno wawa na yonsi yasano, na wino uli nawe kasalaka, asi wako. Alali walanda ningo.” 19 Apano umwanachi wiyo wannena, wati: “Mwene, nalola vino wewe ilau; 20 Yatata yitu yapepanga uku mwamba u; nemwe muluti: uku Yelusalemu ukuno mupepelange.” 21 Yesu wannena, wati: “Mama, unzumile, isaa ilwiza yino mutalupepa Tata uku mwamba u nanti uku Yelusalemu. 22 Umwemwe mulupepa ichintu chino mutamanyile; swemwi tulupepa chino tumanyile, kuno ufyusi ufumile uku aYudea. 23 Lelo isaa ilwiza, nisaa ilipo, yino alupepa ningo, yalupepa Tata uku mwenzo ni chumi. Kuno Tata alusita antu ndi yao akumpepa. 24 Leza uMwenzo, na yano yalumpepa, yangampepa ku mwenzo ni chumi.” 25 Umwanachi wiyo wanena, wati: “Manyile vino alwiza Mesia, wino yakuluti Klisto; nawe pano wacha wiza, alutuswelwila ivintu vyonsi.” 26 Yesu wannena, wati: “Ne ntu nduvwanga newe, ali nene.” 27 Liyo kwene yiza alondezi yakwe, yazunguka, kuno wavwangaa nu mwanachi. Lelo umwi atachili, ati: “Ulusita chani?” Nanti: “Uku chani uluvwanga nawe?” 28 Nga umwanachi wiyo asya ichaluzi chakwe, aya uku nzi anena antu, ati: 29 “Nguni mlole untu wino wannena ivintu vyane vyonsi vino nachita. Chene! wi angawa i Klisto?” 30 Nga yafuma umunzi yaya kuno ali. 31 Uku chisila alondezi yampapata yati: “Labi, ulye.” 32 Ayanena, ati: “Inene indi ni chakulya chino mutamanyile mwemwe.” 33 Chaleka alondezi yakwe yanenana, yati: “Siku umwi atannetela ichakulya?” 34 Yesu wayanena, wati: “Ichakulya chane alichi: nfikilizye vino akasi wino wantumile nu kumalila imilimo yakwe. 35 Umwemwe mutakuti: kwasyala imyezi yini tuchesye? Lolini, nemwi ndumunena, katusini amanso yino, mulolekesye ivyalo, vino viviswepa, ivifika ukukumbula. 36 Nu wino alusakata akulupiwa amalipo yakwe, nu kukonganika ivikumbule uku upuma wa manda ti, ukuti wino alupela na wino alukumbula yachimbe paliponga. 37 Kuno pao izwi liyo ivino chili: wenga alupela, akumbula unji. 38 Inene namutumile ukukumbula vino mutachulile; anji yachuzile, nemwe mwingila um-machulo yao.” 39 Numunzi uo aSamalia inji yamzumila ukwizwi lya mwanachi wiwi, wino watasile ukuti: Wali annenile ivintu vyonsi vino nachita. 40 Na aSamalia, pano yaya kunali, yapapata kuti awikale ukumwao, nawe wikala kweneko amanda yaili. 41 Na antu ainji nkani yazumila ukwizwi lyakwe. 42 Yannena umwanachi wiwi, yati: “Nga twazumila, lelo asi uku mazwi yako sile, kuno neswe twapulika, swe yakola, kaili twamanya ningo vino alawi uli Nkuluzi wa nsi.” 43 Ni chisila cha manda yaili yao, atina kweneko aya uku Galilea. 44 Kuno Yesu unkola watasile vino ilau atakupiwa unchinzi un-nsi ya kumwao. 45 Nga pano waya uku Galilea, amu Galilea yampokelile, kuno yawine ivintu vyonsi vino wachisile uku Yelusalemu, apa wanda ukulu, kuno nayo kwene yaile ukii wanda uo. 46 Nga aya uku Kana ya Galilea kaili, nako ukuno wasenwile manzi ukuwa amanzi ya mizabibu. Nga kwali diwani wenga umwanakwe unwale uku Kapenaumu. 47 Nga pano wapulika Yesu watiza um-Galilea, ukufuma uku Yudea, waile kunali, wampapata ukuti aye akapozye umwanakwe; kuno wali apa lufu. 48 Nga Yesu wannena, wati: “Ngi mutawine ivilangizyo ni vipezya-mano, mutangi muzumile nanti uche?” 49 Diwani wiyo y wannena, wati: “Mwene, uye zuwa, pano umwanane achili afwe.” 50 Yesu wannena, wati: “Pitanga, umwanako umpuma.” Untu wiyo wazumila izwi liyo lino wanenwa na Yesu, wampita. 51 Na pano wawelanga, aomvi yakwe yamkomenganya, yalanda vino umwanakwe umpuma. 52 Nga ayatondosya ili lino umwana watampa ukuwa ningo; nayo yannena, yati; “Iyulu pano lyasenuka, inzusi yasizile.” 53 Nga isi amanya vino ilili kwene lino Yesu wannenile vino umwanakwe umpuma. Wene wazumila na yonsi ayang'anda umwakwe, 54 Ala chiyo ichilangizyo cha uwili chino Yesu wachisile. pano wafumile uku Yudea ukuya uku Galilea.
1 Ichisila cha vintu viyo wali uwanda ukulu uwa aYudea, na Yesu apita ukuya uku Yelusalemu. 2 Nu ku Yelusalemu kuo apa Nnyango-wa-Nfwele pali chifula, chino uku chiEblania yakuluti: Betzata. Nacho chili ni nsaka zisano. 3 Na muo mwali alwale ainji umuno yawizi, apofu, aitenda, na yano yalemala. Angi yalulolela amanzi yavundoke. 4 Kuno kwali lino malaika wikanga nu kwingila un-chifula, akomya amanzi. Na wino watangula ukwingila pano yakomya amanzi, apola ulwale wakwe wonsi, uno walwile. 5 Na pao kwene kwali untu wino walwale imyaka amakumi yatatu na nnane. 6 Pano Yesu wa nnola awizi, nawe wamanyile vino unwale wa manda tupu, wannenile, wati: “Ulusita ukupola?” 7 Unwale wiyo wavwanga ukuti: “Mwene, inene ntakwite untu uwa kuntela un-chifula, pano yakomya amanzi. Na pano niza, untu unji ankolelela.” 8 Nga Yesu wannena, wati: “Katuka, utwike ichitala chako, upite.” 9 Liyo kwene untu wiyo amwa umpuma, wanyetula ichitala chakwe, wampita. Nu wanda uo wali uwanda wa Sabato. 10 Chaleka aYudea yanena wino wapola, ukuti: “Ilelo uwanda wa Sabato. Chisi ningo kuli wewe ukusenda ichitala.” 11 Wayanena, wati: “Wino ampozizye uwino annenile, ati: ‘Nyetula ichitala chako, upite.’ ” 12 Nga yannena, yati: “Wiyo wino akunenile, wati: ‘Nyetula, upite!’ uwini?” 13 Untu wiyo wino alile wapola atammanyile ngi uwini, kuno Yesu walile atatina, kuno antu yalile yavula penepo. 14 Ichisila cha vintu vi Yesu amzana un-ng'anda-nkulu-iyi-Leza, annena, ati: “Lola, ukuwa mpuma, utachita iifyo kaili, kuti utachi uzanwa niipe ukuluta liyo.” 15 Untu wiyo ampita waya wayanena aYudea, vino Yesu uwino ampozizye. 16 Uku chintu chiyo aYudea yazunya Yesu, kuno wachisile ichintu chiyo uwanda wa Sabato. 17 Lelo wayanena, wati: ‘Tata aluomba imilimo na li kwene li; nene kwene nduomba imilimo.” 18 Chaleka aYudea yalusya ukusita nkani ivyakuti yamumole, kuno atononile uwanda wa Sabato sile, lelo apali ponga na viyo, watangi Leza i Tata, angalu ukolanya na Leza. 19 Nga Yesu wayanena, wati: “Umwenemo, umwenemo, ndumunena: uMwana atangi achite chimwi wenga, siku chino alulola Isi aluchita, kuno wiyo vino aluchita, ivino nu Mwana kwene aluchita. 20 Kuno Isi wakunda uMwana, nawe akulunnanga vyonsi vino akuchita unkola, ni milimo imikulu ukuluta i alunnanga, ukuti mwemwe muzunguke. 21 Ndi vino Tata akulututulula afwi nu kuyapa upuma, iviyo kwene nu Mwana akuluyapa upuma yaya yano akasime. 22 Kaili Tata ataluputwila untu wensi imilandu, lelo wapa uMwana uputuzi wonsi. 23 Ukuti antu yonsi yachindike uMwana, ndi vino yachindika Isi. Wino atachindike uMwana, atachindike isi wino wantumile. 24 “uMwenemo, umwenemo, ndumunena: wino alupulika izwi lyane nu kumzumila wino wantumile, ali nupuma wa manda ti; atalwiza um-uputuzi wa milandu, kuno walamba ukufuma undufu ukuya um-upuma. 25 uMwenemo, umwenemo, ndumunena: isaa ilwiza, na isaa ilipo, pano yafwi yalupulika izwi Iya Mwana wi Leza, na yano yalipulika yaluwa upuma. 26 Ndi kuti vino Tata ali kafumo ka upuma, iviyo kwene ivino wapile nu Mwana ukuwa kafumo ka upuma; 27 Nawe wampa amaka ya kuputula imilandu, kuno uMwana-ntu. 28 Mutachizunguka uku mazwi yao, kuno isaa ilwiza, yino antu yonsi yano yali um-malindi, yalupulika izwi lyakwe. 29 Nayo yalufuma, yaya yano yachisile ivizipe uku kuzyuka kwa upuma, na yalye yano yachisile iviipe, uku kuzyuka kwa kuputwilwa imilandu. 30 “Nene ntangi nchite chimwi nenkola; ndi vino ndupulika ivino nduputula, nuputuzi wane uwa ningo, kuno ntalusita vino nkasime nenkola, lelo vino akasime wino wantumile. 31 Ngi nawimikila nenkola, usyuta wane usi wa ningo. 32 Kuli unji wino alungimikila, nene manyile vino usyuta wakwe uno alungimikila, uwa ningo. 33 Umwemwe mwatumile antu kuli Yoane, nawe wimikile icha kapanga. 34 Lelo inene ntakuzumila usyuta uku yantu. Lelo ndulanda vi, kuti mwemwe mufyuke. 35 Uwino wali ikozyo lilwaka nu kumesa, nemwe mwakasime ukuchimbila um-mwengelela wakwe ukufika pamwi. 36 Lelo usyuta uno ndi nao nene, ulusile uwi Yoane; kuno imilimo ilye yino Tata Wampile kuti njiombe, imilimo kwene iyo yino nduomba, ilungimikila usyuta vino Tata wantumile. 37 Nawe Tata wino wantumile angimikila usyuta. Kusi lino mwatana mupulike izwi lyakwe, nanti usyu wakwe mutachili muulole. 38 Nanti izwi lyakwe musi nalyo ukuti angi litenzi muli mwemwe; kuno mwemwe mutamzumile wiwi wino watumilwe nawe. 39 Mwemwe mululondola um-Maandiko, kuno mulwelengula vino palumwi muli nupuma wa manda ti muli yeneyo. Nayo ayano yangimikile usyuta. 40 Lelo mutakasime ukwiza kunondi, muwe nupuma. 41 “Nemwi ntalusita ukulu uku yantu. 42 Lelo mmanyile mwemwe, vino mutakwite ulukundo lwi Leza muno muli. 43 Nemwi ngizile ukwizina li Tata, lelo mwemwi mutampokelile. Unji ngi wiza ukwizina lyakwe unkola, wiyo mulumpokelela. 44 Mungazumila uli mwemwe yano mulupokelelana ukulu mwenga, nukulu uu uno ufumile kuli Leza wino ali wenga, mutaluusita. 45 Mutachelengula vino nene ndumusongelela kuti Tata; aliko wino alumusongelela, nawe i Mose wino mwemwe mwataila. 46 Kuno ngi mwali muzumile Mose, ngangi munzumile nene kwene, kuno wangaandike. 47 Lelo ngi mutazumile amaandiko yakwe, mungayazumila uli amazwi yane?”
1 Ichisila cha vintu viyo Yesu apita ukuya umbalama yi yemba wi Galilea, nawe uli wa Tibelia. 2 Niumba ikulu linnondela, kuno lyawine ivipezya-mano vino wachitile alwale. 3 Nga Yesu akwela uku mwamba, wikala kuo ponga na alondezi yakwe. 4 Ni Pasaka, uwanda ukulu uwa aYudea walile uwupapamila. 5 Nga pano Yesu wakatusya amanso, alola iumba ikulu lilwiza kunali; wanena Filipo, wati: “Tungakala imikate kwi, ukuti antu ya yalye?” 6 Wavwanzile viyo uku kumwezya, kuno wamanyile unkola chino akuchita. 7 Filipo wannena, wati: “Imikate ya mpia zya dinali imyanda yili yachepa, nanti chila wenga angapiwa kache sile. 8 Apa yalondezi yakwe wenga i Andelea, unnina wi Simoni Petlo, wannena, wati: 9 “Alipo umwanche umwi pa, ali ni mikate isano iya syaili ni nswi ziili, lelo chingawa ichani uku yantu yano yavula ndi kuti ya?” 10 Yesu wanena, wati: “Yatekini antu yikale.” Na pantu pao pali ilazu tupu; nga antu yikala, ayonsi yano yali elfu zisano ichaponga, 11 Nga Yesu watola imikate iyo, wasamalizya, wankanya yano ikazile, iviyo nu ku nswi kwene wayapa, vino yasitanga. 12 Nayo pano yikuta, wanenile alondezi yakwe, wati: “Konganikini ivikunyolwa vino vyasyala, chitalowa nanti chimwi,” 13 Nga yazyola, yazuzya iviyo ikumi na viili, ivikunyolwa vya mikate yisano ivya syaili vino vyayasyalila yalye yano yalile. 14 Nga pano antu yao yalola ichipezya-mano chino wachita, yalanda yati: “Umwenemo alawi ilau wiwi wino alwiza kuno ukunzi.” 15 Na Yesu wamanyile vino yakasime ukwizu nnema nu kumwika uwene, atina, aya uku mwamba kaili, wenga. 16 Na pano yawa amanguzi, alondezi yakwe yatentenka ukuya muli yemba. 17 Yakwela um-wato, yalamba yemba ukuya uku Kapenaumu. Ichanda chalile ichinyepa na Yesu achili aye kuno yali, 18 Na yemba wakatusya amawimbi kuno unza wakoma nkani. 19 Nga pano yaya uku nkolelo, Kilometa zini nanti zisano, yalola Yesu alupita apa manzi ukuya kuno wato uli, yalola ingofi. 20 Nawe wayanena, wati: “Inene, mutachopa.” 21 Nga yasita uku mwingizya um-wato, na liyo kwene wato ufika insi kuno yayanga. 22 Uwanda wa uwili iumba lino limilile umbalama yi yemba lyawine vino kusi wato uwunji kuo kwene, lelo wonga, na kaili Yesu atalipo ponga na alondezi yakwe, lelo alondezi yakwe yapisile yonga. 23 Lelo yiza mato manina ukufuma uku Tibelia, yaya pipi napano yalile imikate pano uMwene wasamalizye, 24 Ngiumba pano lyalola Yesu asiko kuo na alondezi yakwe kwene, yingile um-mato, yaya uku Kapenaumu angi yalusita Yesu. 25 Nga pano yannola umbalama yi yemba, yannena, yati: “Labi, uwizile ku li?” 26 Yesu wayanena, wati: “Umwenemo, umwenemo, ndumunena: umwemwe mulunsita asi kuno mwawine ichipezya-mano, lelo ukuno mwalile imikate mwikuta. 27 Mutachiombela unnimo ichulya chino chilusila, lelo ichulya chino chilwikala fika um-upuma wa manda ti, chino Mwana-ntu alumupa; kuno wene uwino watelwa akamanyililo na Tata ali Leza.” 28 Nga yannena, yati: “Tuchite uli ukuti tuombe imilimo yi Leza?” 29 Yesu wayanena wati: “Unnimo wi Leza uli u: mumzumile wino watumilwe nawe.” 30 Yannena, yati: “Uluchita ichipezya-mano chi lelo, ukuti tulole nu kukuzumila? Uluomba unnimo uli? 31 Yatata yitu yalile imana un-nusanga ndi vino chaandikwe: wayapile ichulya cha mwiyulu kuti yalye.” 32 Yesu wayanena, wati: “Umwenemo, umwenemo, ndumunena: asi Mose wino wamupile ichulya chichi icha mwiyulu, lelo Tata wane uwino alumupa mwemwe ichulya cha ningo, chino chifumile umwiyulu. 33 Kuno ichulya chi Leza ichichi chino chikile ukufuma umwiyulu nu kupa aya kunzi upuma.” 34 Nga yannena, yati: “Mwene, utupe ichulya chiyo manda yonsi.” 35 Yesu wayanena, wati: “Nene ndi chulya cha upuma; wino wacha wiza kuli nene, atalulola inzala nanti uche, na wino anzumile, atalulola unsala nanti uche. 36 Lelo namunenile vino mwandola, lelo mutanzumile. 37 Yonsi yano Tata wampa, yalwiza ukwane, nanti wensi wino wiza ukwane ntalunjalila ukunzi nanti uche. 38 Kuno inene ntizile ukufuma umwiyulu ukuti inchite vino nkasime, lelo vino akasime wino walnumile. 39 Na vino akasime wino wantumile ivi: ukuti, pali yano wampile, ntalovya nanti wenga, lelo intutulule uwanda wa chisila. 40 Kuno vino akasime Tata ivi, ukuti wensi wino alulola uMwana nu kumzumila, awe nupuma wa manda ti, nene ndumtutulula uwanda wa chisila. 41 Apano aYudea yang'wing'wintika, kuno wati: “Nene ndi chulya chino chafumile umwiyulu.” 42 Yalanda, yati: “Alawi asi Yesu umwana wi Yosefu, wino tumanyile isi na nyina? Nga Manda uli wi, ukuti: ‘nikile ukufumu umwiyulu?’ ” 43 Nga Yesu wayanena, wati: “Mutachi ng'wing'wintika. 44 Kusi untu wino angiza kunondi, ndi Tata wino wantumimile, atannesile-ko; nene ndumtutulula uwanda wa chisila. 45 Chaandikwe um-malau: ‘Na yonsi yaluwa yasambiliziwa na Leza.’ Ichino wensi wino wapulika nu kusambilila kuli Tata, akulwiza kunondi. 46 Asi kuti umwi walola Tata, lelo wino wafuma kuli Tata, wene uwino walola Tata. 47 Umwenemo, umwenemo, ndumunena: Wino anzumile ali nupuma wa manda ti. 48 “Nene ndi chulya cha upuma. 49 Yaso ino yalile imana un-nusanga, yafwa. 50 Alachi ichulya chino chikile ukufuma umwiyulu, ukuti untu ndi walya, atafwa. 51 Nene ndi chulya cha upuma chino chikile ukufuma umwiyulu; untu ndi walya ichulya chi, alwikala manda yonsi. Ni chulya chino nanfima nene, umwili wane, uku upuma wa yantu yonsi.” 52 Chaleka aYudea yampazyanya akola na akola, yati: “Untu wi, angatupa uli umwili wakwe kuti tulye?” 53 Nga Yesu wayanena, wati: “Umwenemo, umwenemo, ndumunena: ngi mutalile umwili wa Mwana-ntu nu kunwa uwazi wakwe, musi nu upuma mukasi yino. 54 Wino alulya umwili wane nu kunwa uwazi wane ali nupuma wa manda ti; nene ndumtutulula uwanda wa chisila. 55 Kuno umwili wane ichulya cha mpomvu, nu wazi wane ichakunwa cha mpomvu. 56 Wino alulya umwili wane nu kunwa uwazi wane, alwikala muli nene, nene ndwikala um-unkola. 57 Ndi vino Tata uwa upuma wantumile nene, nene ndi nupuma kuli Tata. Ivino na wino wandya, aluwa nupuma kuli nene. 58 Alachi chakulya chino chikile ukufuma umwiyulu. Chisi wi yaso yano yalile yafwa; lelo wino walya ichakulya chiyo, aluwa nupuma manda yonsi.” 59 Amazwi yao wayavwanzile un-ng'anda yi Leza, pano wasambilizyanga uku Kapenaumu. 60 Nga antu tupu apa yalondezi yakwe pano yapulika, yalanda, yati: “Izwi li lyakoma, uwini wino angalipulika?” 61 Lelo Yesu amanya um-mwenzo wakwe vino alondezi yakwe yang'wing'wintika ukwizwi liyo, wayanena, wati: “Chene! izwi liyo ilya mifulo? 62 Chamwa uli fwandi, pano mwalola uMwana-ntu wakwela kuno wali inkolelo? 63 uMwenzo uwuno ukulutela upuma, umwili utaomvile chimwi. Amazwi yao yano namunena, aya mwenzo kaili upuma. 64 Lelo kuli yamwi pali mwemwe yano yatazumile.” Kuno Yesu wamanyile ukufuma inkolelo ayani yano yatazumile, nawe uwini wino alunfima. 65 Walanda, wati: “Ichaleka namunena vino kusi untu wino angiza kunondi ngi Tata atannesile-ko.” 66 Uku mazwi yao ainji apa alondezi yakwe, yawelela uku chisila, yatachipita nawe kaili. 67 Chaleka Yesu wanena yaya ikumi na yaili, wati: “Chene! nemwe kwene mulusita mupite?” 68 Nga Simoni Petlo wannena, wati: “Mwene, tuye kuli wini? Wewe uli na mazwi ya upuma wa manda ti. 69 Neswe tuzumile, kaili tumanyile vino wewe uli Nswefu wi Leza.” 70 Yesu wayanena, wati: “Chene! nene ntamusolwile mwemwe ikumi na yaili, na wenga pali mwemwe iSyetani?” 71 Watakanga Yuda, umwana wi Simoni Iskaliote, kuno wiyo uwino alumfima, nawe ali wikumi na yaili.
1 Ni chisila cha vintu viyo Yesu wapitananga um-Galilea; kuno atakasime ukupitana um-Yudea, kuno aYudea yasitanga ukumumola. 2 Nu wanda ukulu uwa aYudea uwa Visansa walile uwupalamila. 3 Nga anina yakwe yannena, yati: “Tina pa, uye uku Yudea, kuti alondezi yako nayo yakalole imilimo yako yino uluomba. 4 Kuno kusi untu wino akuchita chimwi ukumbali nawe unkola alusita ukumanyika. Ngi wachita ivintu vi, apano uwumanyisye uku yakunzi.” 5 Kuno nanti anina kwene yatamzumile. 6 Nga Yesu wayanena, wati: “Amanda yane yachili yize, lelo mwemwe amanda yonsi ayino. 7 Ukunzi kutangi kumutuwe, lelo kuluntuwa nene, kuno ndukulanda vino imilimo yakwe imiipe. 8 Mwemwe yangini uku yulya ivimulo; nemwi ntaile, nchili ukuyulya ivimulo vi, kuno amanda yane yachili.” 9 Nawe pano wayanena ivintu vi, asyala tenzi uku Galilea. 10 Lelo pano anina yakwe yapita ukuya uku wanda ukulu, apano nawe kwene wapisile ukuya, apasi patiswe lelo kanti ukumfisa. 11 Chaleka aYudea yamsita apa vimulo, yati: “Alikwi wilye?” 12 Kwawa amang'wing'intiko tupu umwiumba kuli wenewe. Yamwi yati: “Untu wazipa.” Na yamwi yati: “Awe, aluzosya maumba.” 13 Lelo kutali untu wino wantasile apatiswe, kuno yofile aYudea. 14 Nga chali apakasi ya vimulo Yesu wapisile aya awingila un-ng'anda-nkulu-iyi-Leza, asambilizya. 15 Chaleka aYudea yazunguka, yati: “Alawi wamanya uli amaandiko nawe atasambilile?” 16 Ichaleka Yesu wayanena, wati: “Amasambilizyo yane asi yane nene, lelo ayi wino wantumile. 17 Untu ndakasime ukuchita vino akasime, alumanya ivya masambilizyo yao, ndi yafumile kuli Leza, nanti ndi nduvwanga ivya ku mwenzo wane sile. 18 Wino akuluuvwangila wenga apa lwakwe sile, akulusita ukulu wakwe unkola, lelo wino akulusita ukulu wi wino wamtumile, wiyo uli wa ningo, asi nuipe umwi munali. 19 Chene! Mose atamupile iNtambi? Lelo pali mwemwe pasi wino alemile iNtambi. Nga vino mulusita ukungumola?” 20 Iumba lyati: “Ala! Uli ni chiwa! Uwini wino alusita ukukumola?” 21 Yesu wayanena, wati: “Inene naomvile unnimo wonga, nemwe mwazunguka mwemwe mwensi. 22 Mose wamupile kuchita ichibalu. Lelo asi kuti chafumile kuli Mose, lelo kuli yatata-kulu. Nemwe uwanda wa Sabato mukuchita untu ichibalu. 23 Ali nguntu akuluzumila ukuchita untu ichibalu uwanda wa Sabato, kuti iNtambi yi Mose itononeka, uku chani mulundakalikila nene, kimo napozizye untu wawa umpuma ningo uwanda wa Sabato? 24 Ichino mutachiputula uputuzi wa pa manso sile, lelo muputule uputuzi wa ningo.” 25 Apa yantu yam-Yelusalemu, yamwi yati: “Chene! wi asi wino yalusitanga kuti yamumole? 26 Nga fwandi, lolini, aluvwanga na patiswe, lelo yatamvwanzya chimwi. Palumwi ayikolo itu yamanyile ningo vino wi i Klisto? 27 Lelo wi, tummanyile kuno afumile, lelo Klisto, pano wacha wiza, kusi wino alumanya kuno afumile.” 28 Chaleka Yesu wafumya nizwi nkani un-ng'anda-nkulu-iyi-Leza, asambilizya nu kulanda vi: “Inene mmanyile, na kuno nfumile mukumanyile. Lelo ntizile uku kukunda kwane, lelo wino wantumile, uwa Chumi, wino mutammanyile mwemwe. 29 Nemwi mmanyile, kuno nafumile ukwakwe, nawe uwino wantumile.” 30 Nga yasita kuti yanneme, lelo kusi wino wakatwisye ikasa lyakwe, kuti anneme, kuno amanda yakwe yalile yachili yafike. 31 Na antu ainji umwiumba yamzumila, yalanda, yati: “Pano wacha wiza Klisto, Chene! aluchita ivipezya-mano tupu ukuluta vi vino wi aluchita?” 32 aFaliseo yapulika iumba lilung'wing'wintika viyo kuli wenewe, nga aikolo iyakapela na aFaliseo yatuma aomvi kuti yanneme. 33 Nga Yesu wavwanga, wati: “Yasyala manda mache angi ndi ponga nemwe, apano mpite kuli wino wantumile. 34 Mulunsita, lelo mutalundola, nene kuno ndwikala, mwemwi mutangimwize.” 35 Ichaleka aYudea yapwepwezana, yati: “Alawi wanja kwi? Kuno neswe tutangi tunnole? Chene! wampita kuno aGliki yasambalila, nu kuyasambilizya aGliki? 36 Izwi uli liyo lino wavwanga, ukuti: ‘Mulunsita, lelo mutalundola; nene kuno ndwikala mutangi mukwize mwemwi?’ ” 37 Nu wanda wa chisila, uwanda ukulu uwa vimulo, Yesu awimilila, afumya izwi, ati: “Untu ndi walola unsala, awize kunondi, anwe. 38 Wino anzumile ndi vino aMaandiko yavwanzile, inguzi zya manzi ya upuma zilufuma munali.” 39 Ni izwi liyo walilandile uku Mwenzo Nswefu, wino yano yamzumile yalumpokelela uku chisila; kuno uMwenzo Nswefu walile uchili aize; kuno Yesu walile achili apiwe ukulu. 40 Nga yamwi umwiumba pano yapulika amazwi yao, yalanda ukuti: “Umwenemo, alawi ali ilau lili.” 41 Yamwi yatile: “Alawi ali Klisto.” Yamwi yati: “Chene! Klisto angafuma uku Galilea? 42 Ilyandiko litavyanzile vino Klisto alufuma unduko lwi Davidi, nu kufuma uku Betleemu, unzi ulye uno Davidi watenzi?” 43 Chaleka iumba lyapalunkana uku nnandu wakwe. 44 Yamwi pali yeneyo yasita ukunnema, lelo kusi untu umwi wino wakatwisya amakasa yakwe kuti anneme. 45 Nga atumilwe yaya, yawela ku aikolo iyakapela na aFaliseo. Nayo yayanena, yati: “Uku chani mutannesile?” 46 Yaya atumilwe yalanda, yati: “Kusi untu wino watana wavwanga ndi wiwi nanti uche.” 47 Nga aFaliseo yayanena, yati: “Chene! nemwe kwene mwapululwa? 48 Uwini apa yikolo wino amzumile nanti uku aFaliseo? 49 Lelo amaumba yi yano yatamanyile iNtambi, yatipwa.” 50 Nikodemo wino waile inkolelo kunali, wino wali ponga nayo, wayanena, wati: 51 “Chene! iNtambi yitu ikulumputwila untu unnandu inkolelo, angi muchili mupulikisye nu kumanya vino wachisile?” 52 Yannena, yati: “Siku newe kwene ufumile uku Galilea? 53 Sita ulole ndi ukufuma uku Galilea kulufuma ilau.”
1 Yapisile chila untu uku ng'anda ukwakwe; Yesu nawe wapita uku mwamba wa Mizeituni. 2 Nu ntondo pano kwacha awingila kaili un-ng'anda-nkulu-iyi-Leza, na antu yonsi yaya kunali, nawe awikala angi aluyasambilizya. 3 Yakaandika na aFaliseo yannetela umwanachi wino watalemulwa uku upundu, yamwika apakasi. 4 Yannena, yati: “Kasambilizya, umwanachi wi walemulwa pano walaluchita upundu. 5 Nga un-Ntambi, Mose watunenile ukuyatama na mafinga anachi ya vi; wemwi watuli?” 6 Nayo yavwanzile viyo ukumwezya, kuti yapate apa kunnemela. Lelo Yesu awinama, awaandika nimwe wakwe apansi. 7 Nayo pano yantondosya nkani, wakatuka, wayanena, wati: “Pali mwemwe, wino asi na maifyo, atangule ukumtama nifinga.” 8 Awinama kaili, awaandika nunwe wakwe apansi. 9 Nayo pano yapulika, yatampa ukufuma wenga wenga, yatangwila uku yikolo, kufika nu wa chisila chao; wasyala Yesu wenga nu mwanachi wilye awimilile apakasi. 10 Nga Yesu awinuluka, wanena umwanachi, wati: “Yalikwi yano yakutakilile? Kusi wino ayangwile vino ukonona?” 11 Wannena, wati: “Kusi, Mwene.” Yesu wannena, wati: “Nene kwene nsuputula. Pitanga, lelo utache uchite iifyo kaili.” 12 Nga Yesu wayanena kaili, wati; “Nene ndi mwengelela wa ya kunzi; wino andondile, ataluya un-chanda nanti uche, lelo aluwa nu mwengelela wa upuma.” 13 Nga aFaliseo yannena, yati: “Uwewe uluwimikila wenkola, usyuta wako usi weneo.” 14 Yesu wayanena, wati: “Nemwi nanti nduwimikila nenkola, usyuta wane uli wampomvu, kuno manyile kuno nafumile na kuno njile; lelo mwemwi mutamanyile kuno nafumile nanti kuno njile. 15 Mwemwi muluputula ukulondela ivintu vya mwili, nemwi ntaluputwila untu unnandu. 16 Lelo nanti naputwila untu unnandu, uputuzi wane uwa mpomvu, kuno nemwi insi nenga, lelo inene na wino wantumile. 17 Na kaili uku Ntambi yino chaandikwe vino usyuta wa yantu yaili uwampomvu. 18 Nemwi nduwimikila nenkola, nawe Tata wino wantumile alungimikila.” 19 Nga yannena, yati: “So alikwi?” Yesu wayanena, wati: “Inene mutamanyile, nanti Tata kwene mutammanyile; ngangi mumanyile nene, ngangi mummanyile na Tata kwene.” 20 Amazwi yao wayatasile pano wasambilizyanga un-ng'anda-nkulu-iyi-Leza, uku wizyo wa mpia; lelo kutali untu wa kunnema, kuno amanda yakwe yalile yachili yafike. 21 Nga wayanena kaili, wati: “Nemwi napita, nemwe mulunsita, nemwe mulufwa um-maifyo yino. Inene kuno njile umwemwe mutangi mukwize.” 22 Nga aYudea yati: “Chene! wambumola kuno aluti: inene kuno njile mutangi mukwize?” 23 Wayanena, wati: “Umwemwe, mwe ya pansi, nemwi ne wa mwiyulu; mwemwi mwe ya kimo ukunzi, nemwi asi ne wa kuno ukunzi. 24 Chaleka, namunena, nati: Mulufwa um-maifyo yino; kuno ndi mutazumile vino nene ndi wenewe, mulufwa um-maifyo yino.” 25 Nga yannena, yati: “Ivyo we weni?” Yesu wayanena, wati: “Ndi kuti izwi kwene liyo lino ndumunena. 26 Indi ni vintu tupu ivya kulanda nu kuputula kuli mwemwe, lelo wino wantumile uwa chumi; nene yano napulika uku nkola, ayano ndulanda kuno ukunzi.” 27 Lelo yatamanyile vino aluyatakila Tata. 28 Nga Yesu wayanena, wati: “Pano mwacha mwakatusya uMwana-ntu, apano mulumanya vino nene ndi wenewe, nukuti ntaluomba chimwi, apa lwane nenkola, lelo ndi vino Tata wandangilile ivino nduvwanga. 29 Nawe wino wantumile ali ponga nene; atantile nenga, kuno nduchita manda yonsi vino vimzipile.” 30 Nawe pano wavwanga viyo, ainji yamzumila. 31 Nga Yesu wanena aYudea yalye yano yamzumila, wati: “Umwemwe ngi mwikala umwizwi lyane, mumuwa yalondezi yane aya kapanga. 32 Kaili mulumanya ivya chumi, ni chumi chilumutisya um-uzya.” 33 Yannena, yati: “Sweswe yana yi Ablaamu, tutachili tuwe yazya yantu nanti limwi. Newe ulutuli, ukuti: Muluwa yakauwele?” 34 Yesu wayanena, wati: “Umwenemo, umwenemo, ndumunena: untu wino aluchita amaifyo, unzya wa maifyo. 35 Kuno unzya atakwikala un-ng'anda manda yonsi; umwana akulwikala manda yonsi. 36 Ichino Mwana ndi wamukulula, mwamwa yakauwele ya ningo. 37 “Manyile vino mwemwe luko lwi Ablaamu, lelo mulusita ukungumola, kuno izwi lyane lisimo muli mwemwe. 38 Vino nawine kuli Tata ivino ndulanda; nemwe kwene ndi vino mwapulike kuli yaso ino, ivino muluchita.” 39 Yannena, yati: “Tata witu ali Ablaamu.” Yesu wayanena, wati: “Nga ngi mwe yana yi Ablaamu, ngangi muluomba imilimo yi Ablaamu. 40 Lelo kaili mulusita ukungumola nene, ne ntu ntimunena ilya chumi, lino napulika kuli Leza. Ablaamu atachisile viyo. 41 Mwemwe muluomba imilimo yiso wino.” Yannenile, yati: “Swemwi tutavilwe uku upundu, swemwi tuli na Tata wenga, nawi Leza.” 42 Yesu wayanena, wati: “Ndi Leza wangawe iso wino, ngali munkasime nene, kuno nafumile kuli Leza, niza kuno; lelo ntizile uku lwane, lelo unkola uwino wantumile. 43 Kuno ichani mutalumanya chino nduvwanga? Ukuno mwemwi mutangi mulipulike izwi lyane. 44 Mwemwe yana yi Syetani, ni tama zyi so wino izino mwakasama ukuchita. Wino wali umumozi fuma intangulo, atimilile icha chumi, kuno musi chumi um-nkola. Pano aluvwanga intumpu, akuluuvwangila apa lwakwe, kuno wene uwa ufi, ali isi wa ufi. 45 Nene, kuno ndulanda ilya chumi, mutanzumila. 46 Uwini pali mwemwe wino angangimikila ukuti indi ni ifyo? Nene ngi nalanda icha chumi, nga vino mutalunzumila? 47 Uwi Leza, akulupulika amazwi yi Leza.” 48 aYudea yannena, yati: “Chene! usweswe tutavwanzile ningo vino twati: we unSamalia, newe uli ni chiwa?” 49 Yesu avwanga, ati: “Inene ntakwite ichiwa, lelo nemwi namchindika Tata, nemwe mulungononela unchinzi wane. 50 Lelo nemwi ntalusita ukulu wane; aliko wino alusita nu kuputula imilandu. 51 Umwenemo, umwenemo, ndumunena: untu ndi walema izwi lyane, atalulola infwa manda ti.” 52 Nga aYudea yannena, yati: “Fwandi, nga twamanya vino uli ni chiwa; Ablaamu wafwa na malau yafwa; newe uluti: untu ndi walema izwi lyane, atalulola infwa nanti uche. 53 We wikolo ukuluta tata witu Ablaamu, wino wafwa? Na malau kwene yafwa. Uluuchita we weni?” 54 Yesu wavwanga, wati: “Ngi naukuzya nenkola, ukulu wane chisi chimwi; wino alunkuzya i Tata, wino mwemwe muluti: i Leza witu. 55 Lelo mwemwi mutammanyile, lelo nemwi immanyile; ngi nalanda ukuti: “Ntammanyile, namwa wa ntumpu wi mwemwe; lelo mmanyile nizwi lyakwe ndilemile. 56 Ablaamu, so wino, wachimvile kuno alulola uwanda wane, nawe waulola, wachimba.” 57 Nga aYudea yannena, yati: “Uwewe uchili uwe ni myaka amakumi yasano, newe walola Ablaamu?” 58 Yesu wayanena, wati: “Umwenemo, umwenemo, ndumunena: Ablaamu wiyo achili aloleke, nemwi angi ndiko.” 59 Nga yasola amafinga kuti yantame, lelo Yesu afisama, nga afuma un-ng'anda-nkulu-iyi-Leza.
1 Na pano wapitanga, alola untu, umpofu fuma ukuvyalwa. 2 Alondezi yakwe yamtondosya, yati: “Labi, uwini wachisile iifyo, chaleka wavyalwa umpofu, untu wi nanti avyazi yakwe?” 3 Yesu avwanga, ati: “Alawi atachisile iifyo, nanti avyazi yakwe, lelo kuti imilimo yi Leza iloleke munali. 4 Tuletuombe imilimo yakwe wino wantumile pano uchili unsanya; usiku ulwiza uno ntu atangi aombe chimwi. 5 Amanda yano ndipo kuno ukunzi, nene mwengelela wa ya kunzi.” 6 Pano wavwanga viyo, waswila amati apansi, wazuwa intope zya mati yao, wampaka umpofu um-manso. 7 Wannena, wati: “Yanga ukafulale un-chifula cha Siloamu, (alikuti: wino atumilwe)” Nga wapita waya wafulala, wawela alulola. 8 Nga aya mwipamba na yano yamwine kali vino wali uwakulomba-lomba, yati: “Chene! wi asi wino wikalanga nu kulomba-lomba?” 9 Yamwi yati: “Aliwe.” Yamwi yati: “Asi we, lelo akoline nawe.” Unkola kwene watile: “Ali nene!” 10 Nga yannena, yati: “Amanso yako yawine uli?” 11 Unkola wati: “Untu wiwi wino yaluti i Yesu, wazuwile intope, wanpaka amanso, wanena, wati: ‘Yanga uku Siloamu, ukafulale.’ Nga naya, nafulala, mbwine ndulola.” 12 Yanena, yati: “Alikwi wiyo kwene?” Nawe wati: “Nemwi ntamanyile.” 13 Nga yatwala uku aFaliseo, wiyo wino wali umpofu kali. 14 Nao wali uwanda wa Sabato, pano Yesu wazuwile intope nu kunjula amanso. 15 aFaliseo nayo yantondosya kaili vino watalike ukulola. Wayanena, wati: “Wanpakile intope um-manso, nene nafulala, nali kwene ndulola.” 16 Nga yamwi apa aFaliseo yati: “Untu wi atafumile kuli Leza; kuno atalondile uwanda wa Sabato.” Yamwi yati: “Untu wa maifyo angachita uli ivipezya-mano ndi vi?” Kwawa ukupalunkana apa yakola. 17 Nga yanena umpofu wiyo ilya uwili, yati: “Nga wemwi ulutuli uku ntu wiyo, vino wakuyulila amanso?” Walanda, wati: “Ilau.” 18 Nga aYudea yatachili yazumile amazwi yakwe, ukuti wali umpofu, nga wapiwa ukulola, kufika lino yita avyazi yakwe untu wiyo wino wapiwa ukulola. 19 Yayatondosya, yati: “Alawi umwanino, wino muluti wavilwe umpofu? Nga wali watampa ukulola uli li kwene?” 20 Avyazi yakwe yayanena, yati: “Tumanyile vino alawi ali mwanitu, na kaili wavilwe umpofu. 21 Lelo vino alulola kasalaka, tutamanyile, untu umpuma, angamulandila unkola.” 22 Avyazi yakwe yavwanzile viyo, kuno yofile aYudea, kuno aYudea yalile yazumilizyanya ukuti: ngu untu umwi wazumila vino i Klisto, awingwe un-ng'anda iyi Leza. 23 Ichaleka avyazi yakwe yati: “Untu mpuma, mtondosyini unkola.” 24 Nga yamwita kaili untu wiyo wino wali umpofu, yannena, yati: “Pa Leza utensyo. Swemwi tumanyile vino untu wi uwa maifyo.” 25 Nga untu wiyo wati: “Ngu wa maifyo wiyo nemwi ntamanyile. Manyile ichintu chonga vino nali mpofu na kasalaka ndulola.” 26 Nga yannena, yati: “Wakuchitile chani? Wakuyulile amanso yako uli?” 27 Wayanena, wati: “Inti munena, lelo mutalupulika, kuno ichani mulusita ukupulika kaili? Nemwe kwene mulusita ukuwa yalondezi yakwe?” 28 Nga yantuka, yalanda ukuti: “Wewe uli nnondezi wakwe wiyo, swemwi swe yalondezi yi Mose. 29 Swemwi tumanyile vino Leza wavwanga na Mose, lelo wiyo tutamanyile kuno afumile.” 30 Untu wiyo wayanena, wati: “Alachi icha kuzunguka, ukuti umwemwe mutamanyile kuno afumile, nawe wanjuzile manso. 31 Tumanyile vino Leza atakupulika aya amaifyo, lelo untu wino akupepa Leza ningo nu kuchita vino akasime, wiyo akulupulikwa. 32 Ukufuma kali chitachili chipulikwe vino umwi wayula amanso ya mpofu, wino wavilwe viyo kwene. 33 Ngi wiyo atafumile kuli Leza, atali awezye ukuchita chimwi.” 34 Yannena, yati: “Ala! Wewe wavilwe um-maifyo matupu, newe ungatusambilizya sweswe?” Yamfumya apanzi. 35 Nga Yesu apita vino iyamfumya apanzi, nawe pano wannola, wannenile, wati: “Uwewe uzumile uMwana wi Leza?” 36 Nawe walanda ukuti: “Uwini Mwene, kuti inzumile?” 37 Yesu wannena, wati: “Ukunnola, na wino aluvwanga newe, uliwe.” 38 Nga walanda ukuti: “Nazumila, Mwene.” Wamsukamila. 39 Nga Yesu wavwanga ukuti: “Inene ngizile ukunzi ku uputuzi wa milandu, ukuti yano yatalulola yannola, na yano yalulola, yawe apofu.” 40 Apa aFaliseo yamwi yano yalipo ponga nawe yapulika ivintu viyo, yannena, yati: “Chene! neswe kwene swe yapofu?” 41 Yesu wayanena, wati: “Ngangi mwe yapofu, ngangi mutakwite amaifyo, lelo vino muluti: ‘Tululola,’ ichino amaifyo yino yalipo.
1 “Umwenemo, umwenemo, ndumunena, wino atalwingila apa nnyango un-chipa cha nfwele, lelo alwingilila apa nina, wiyo umwivi na kaili ikapoka-vya-antu. 2 Wino alwingilila apa nnyango. unchemi wa nfwele. 3 Wene kalolela akulunjulila, ni nfwele zikulupulika izwi lyakwe, nawe akuluzyita infwele zyakwe uku mazina yao nu kuzifumya apanzi. 4 Nawe pano aluzifumya apanzi infwele zyakwe zyonsi, akuluzikolelela, ni nfwele ziyo zinnondela, kuno zimanyile izwi lyakwe. 5 Umweni zitangi zinnondele nanti uche, zilumwituka, kuno zitamanyile izwi lya eni.” 6 Unnumbe uo Yesu wayanenile, lelo wene yatamanyile ivintu vino wayanenile. 7 Nga Yesu wayanenile kaili, wati. “Umwenemo, umwenemo, ndumunena: nene ndi unnyango wa nfwele. 8 Yonsi yano yankolelile aivi na yakapoka-vya-antu, lelo infwele zitayapulike. 9 Nene ndi unnyango; untu ndi wingilila kuli nene, alufyuka. Alwingila nu kufuma, nawe alupiwa ni vyakulya. 10 Umwivi akulwizu wiya nu kuumola nu konona; lelo nemwi nizile ukuti yawe nupuma, kaili yawe nao tupu. 11 “Nene ndi unchemi nzipe. Unchemi nzipe akuluufima upuma wakwe uku nfwele. 12 Lelo untu vino yasêkela, asu nchemi, wino nfwele asi vyuma vyakwe, ngi walola unjinzi ulwiza, asya infwele awituka, nu njinzi uzilema nu kuzisambazya. 13 Wiyo alwituka kuno unsêkelwe, icha nfwele chisi chimwi kuli wenewe. 14 Nene ndi unchemi nzipe, manyile izya kwane, nazyo zimanyile nene. 15 Ndi vino Tata ammanyile nene, nene kwene mmanyile Tata. Nene nduufima upuma wane apa nfwele. 16 Ni nfwele zinina nazyo, zisi zya un-chipa chi; nazyo kwene izyakuti nzilete, nizwi lyane zilupulika; apano kuluwa ufyo wonga nu nchemi wenga. 17 “Ichino Tata wankundila, kuno naufima upuma wane kuti mbutole kaili. 18 Kusi wino aluntisizya, lelo nemwi nduufima nenkola. Nene ndi na maka ya kuufima, na kaili ndi na maka ya kuutola. Amaka ya Tata wapile,” 19 Kwawa ukupalunkana kaili apa aYudea ukwizwi liyo. 20 Alitupu yalanda, yati: “Ali ni chiwa wi, wapena; mulumpulikisya chani?” 21 Yamwi yalanda, yati; “Amazwi ya, yasi yantu wa chiwa; Chene! ichiwa chingayula apofu amanso?” 22 Wali uwanda ukulu wa kwizukila ukuswefya ng'anda-nkulu-iyi-Leza uku Yelusalemu; yali amanda ya nzusi. 23 Yesu nawe walunganaa un-ng'anda-nkulu-iyi-Leza, undukungu lwi Salomoni. 24 Nga aYudea yannizizye, yannena, yati: “Ulutuchuzya imyenzo yitu kufika na li? Ndi wewe uli Klisto, utunene apatiswe.” 25 Yesu wayanena, wati: “Nalimunenile, lelo mutakasi ukuzumila. Imilimo iyo yino nduomba ukwizina li Tata, iyino ilungimikila. 26 Lelo umwemwe mutaluzumila, kuno musimo un-nfwele zyane. 27 Infwele zyane zilupulika izwi lyane, nene nzimanyile, nazyo zilundondela. 28 Nene nduzipa upuma wa manda ti, zitalulowa nanti uche, kusi untu nanti umwi wino angazisompola um-makasa yane. 29 Tata uwazimpile alusile yonsi, lelo kusi nanti umwi wino angazisompola um-makasa yi Tata. 30 Nene na Tata tuli wenga.” 31 Nga aYudea yasola amafinga kaili kuti yantame. 32 Yesu wayanena, wati: “Imilimo tupu imizipe inti mulanga, yino ifumile kuli Tata; uku nnimo chi pali iyo uno mulusita muntamile na mafinga.” 33 aYudea yannena, yati: “Tutalukutama na mafinga uku milimo mizipe, lelo kuno ulusula Leza na kuno wewe wenkola, we ntu uluuchita we Leza.” 34 Yesu wayanena, wati: “Chene! chitaandikwe un-Ntambi ino vino: ‘Nene navwanzile, ukuti: Mwemwe maleza?’ 35 Ngi wataka amaleza yalye yano yizilwe nizwi li Leza na Maandiko yatangi yononeke, 36 Chene! wino Tata waswefya, wamtuma kuno ukunzi, uwino mwemwe muluti: ulusula, kuno nalile, nti: “Nene Mwana wi Leza?’ 37 Ngi ntaluomba imilimo yi Tata, mutachintaila. 38 Lelo ngi nduwomba, nanti mutantaile nene, tailini imilimo kwene iyo, ukuti mumanye nu kupulika vino Tata ali muti nene, nene ndi muli Tata.” 39 Yasita kaili ukunnema, lelo ayatina. 40 Apita kaili uku mbalama yi Yodani, apantu pano Yoane wali intangulo angi alubatizya, ukuno awikala. 41 Na antu tupu yaya kuno ali, yavwanga ukuti: “Umwenemo, Yoane atachili achita ichipezya-mano chimwi, lelo vyonsi vino wavwanzile Yoane uku vintu vi, vyali umwenemo.” 42 Nali tupu yanzumila kweneko.
1 Nga untu umwi wali unwale, Lazalo wa ku Betania, uwa mu-nzi wi Malia nu nnina, Malita. 2 Ali Malia wino wapakile uMwene amafuta, ampyila ni nyele uku mulu yakwe, wino Lazalo kalume wakwe wali unwale. 3 Nga aziche yakwe yatuma kunali, yati: “Mwene, unkundikwa wako unwale.” 4 Nga Yesu pano wapulika, avwanga ukuti: “Ulwale u asi wa lufu, lelo uku utensyo wi Leza, ukuti uMwana wi Leza atensiwe kuliwo.” 5 Na Yesu walile wakunda Malita nunziche na Lazalo. 6 Nga pano wapulika vino unwale, awikala manda yaili kuo kwene kuno watenzi. 7 Nga ichisila wanena alondezi yakwe, wati: “Tuyini uku Yudea kaili.” 8 Alondezi yao yannena, yati: “Labi, wanda unji li kwene li, aYudea yakasi yakutame na mafinga; newe ukuno ulusita uye kaili?” 9 Yesu wayanena, wati: “Chene! insaa zya nsanya zisi ikumi na ziili? Untu ngi alupita unsanya atangi akumike, kuno alulola umwengelela wa nsi i. 10 Lelo ndi ntu alupita usiku akukumika, kuno umwengelela usimo munali.” 11 Wavwanzile ivintu vi, na kaili ichisila wayanena, wati: “Katitu Lazalo awizi, lelo napita kuti nkannansye.” 12 Chaleka alondezi yannena, yati; “Mwene, nga wizi wampola.” 13 Lelo Yesu walandanga ulufu lwakwe; nayo yatangi alulanda ukulala utulo. 14 Chaleka Yesu wayanena apatiswe, wati; “Lazalo watafwa, 15 Nene nduchimba kuli mwemwe kuno nemwi nsi kweneko, ukuti. muzumile; lelo tuini kunali.” 16 Nga Toma wino yatangi; “Ipasa.” wanena alondezi yanina, wati; “Tuini neswe kwene ukuti tufwe ponga nawe.” 17 Walangi pano Yesu wafika, wazana walinda umwilindi amanda yani. 18 Nunzi wa Betania wali apipi ni Yelusalemu, ndi kuti kilometa zitatu. 19 Na antu tupu aYudea yalile iza kwi Malita na Malia ukuyalema amakasa kuli kalume wao. 20 Walangi Malita pano wapulika vino Yesu alwiza, waya ukuyumkomanya, lelo Malia watenzi un-ng'anda. 21 Apano Malita wanena Yesu, wati: “Mwene. ngi walipo pa ngali kalume wane atafwile. 22 Lelo na li kwene manyile vino chonsi chino walomba Leza, akukupa.” 23 Yesu wannena, wati: “Kalume wako wantutuluka.” 24 Malita wannena, wati: “Manyile vino alututiduka apa wanda wa chisila.” 25 Yesu wannena, wati: “Nene ndi ututuluko nupuma; wino wanzumila nene nanti wafwa, aluwa umpuma. 26 Na wensi umpuma wino anzumile, atalufwa nantu uche manda yonsi. Ali wazumila yao?” 27 Wannena, wati: “Endita Mwene, nche nazumila vino wewe uli Klisto, Mwana wi Leza, wino alwiza kuno ukunzi.” 28 Nga pano wavwanga viyo, apita, awita Malia unnina ukumbali, ati: “Kasambilizya atiza, alukwita.” 29 Nawe pano wapulika, akatuka zuwa ukuya kunali. 30 Na Yesu walile achili awingile um-nzi, angachili, ali pano Malita wamkomenginye. 31 Nga aYudea yano yali ponga na Malia un-ng'anda, yano yayile ukuyunnema makasa, pano yalola wakatuka zuwa nu kufuma, yannondela, yatangi palumwi waya ukwilindi akalilange. 32 Nga pano Malia wafika pano Yesu ali, pano wannola, Wapona pa mulu yakwe, wannena, wati: “Mwene, ngangi walipo pa ngali kalume wane atafwile.” 33 Nga pano Yesu walola alulila, na aYudea yano yalondekine nawe yalulila, alola ichikonko um-mwenzo nu kusisinkila. 34 Avwanga ukuti: “Mwamwika kwi?” Yannena, yati: “Mwene, nguna ukalole.” 35 Yesu walila monsozi. 36 Chaleka aYudea yati: “Lolini, vino wankunda.” 37 Lelo yamwi pali yeneyo yati: “Chene! wi wino wayuzile umpofu amanso, atalachite nawi atachifwa?” 38 Chaleka Yesu wawa ni chikonko kaili um-mwenzo wakwe, nga waya ukwilindi Nalyo lyali ichele nifinga lyali penepo. 39 Yesu wati: “Tisini finga.” Malita, unziche wakwe wino wafwile, wannena, wati: “Mwene, alununka, kuno walali chala amanda yani.” 40 Yesu wannena, wati: “Ntali nkunenile vino ndi wazumila wannola ukulu wi Leza?” 41 Nga yatisya ifinga liyo. Yesu akatusya amanso yakwe, alolekesya umwiyulu, avwanga ukuti: “Tata, nakusamalizya kuno wampulika. 42 Nene manyile vino akulumpulika manda yonsi. Lelo uku nnandu wiumba li lino lili pa, ichino navwanga viyo, ukuti yazumile vino wewe uli wino wantumile.” 43 Nga pano wavwanga viyo, awita ukwizwi ikulu, ati: “Lazalo, fuma ukunzi!” 44 Afumila ukunzi wino wafwile unfunde amulu na makasa imyenda ya mwilindi; nu ku manso unfunde ichitambala. Nga Yesu wayanena, wati: “Msapulini, lekini apite.” 45 Ichaleka aYudea ainji, yano yizile kuli Malia pano yalola chino wachita, yazumila. 46 Lelo yamwi yaya uku aFaliseo, yayanena ivintu vino Yesu wachita. 47 Apano aikolo iyakapela na aFaliseo yakonganya itengo, yati: “Twanchita uli? Kuno untu wi aluchita ivipezya-mano tupu. 48 Ndi twamta vi kwene, antu yonsi yakumzumila na aLoma yamwiza yatutisizye uwikalo witu, na antu yitu.” 49 Untu wenga pali yeneyo, wino yatangi Kayafa, wino wali Kapela-nkulu mwaka ulye, wayanena, wati: “Umwemwe mutamanyile chimwi. 50 Mutalwelengula nanti ukwelengula vino chilingine untu wenga afwe uku nnandu wa yantu, kuti antu yonsi yatafwilikanya.” 51 Ni izwi liyo atali vwangile apa lwakwe, lelo kuno wali Kapela-nkulu mwaka ulye, walauzya vino Yesu alufwa uku nnandu wa antu yao. 52 Lelo asi ku antu yao sile, lelo ponga na yao akonganike ana yi Leza yano yasambala, kuti yawe ali yonga. 53 Nga ukufuma uwanda ulye yamba apali ponga vyakuti yamumole. 54 Chaleka Yesu atapitananga kaili apatiswe um-aYudea, lelo atina kweneko, aya pamwi apipi nu lusanga, umunzi uno yatangi Eflaimu, ukuno; awikala ponga na alondezi yakwe. 55 Ni Pasaka ya aYudea yalile itipalamila na inji yafuma um-vyalo yapita ukuya uku Yelusalemu, yakolelela iPasaka ukuti yauswefye. 56 Chaleka yasita Yesu, nga yavwanzyanya, angi yimilile un-ng'anda-nkulu-iyi-Leza, yati: “Mwalola uli? Atalwiza uku wanda ukulu uu?” 57 Na yikolo iyakapela na aFaliseo yalile yafime ichilangaso, ukuti wensi wino wacha wamanya pano ali, awize ayanena kuti yakanneme.
1 Nga amanda sita inkolelo ya Pasaka, Yesu afika uku Betania, kuno Lazalo wali, nawe uwino Yesu watutulwile uku yafwi. 2 Nga kuo kwene yannetela ichakulya cha manguzi, na Malita wayaombelanga, na Lazalo walipo pali yano yalipo apa chulya ponga nawe. 3 Nga Malia awiza nu nsazi wa mafuta ya Nalido azipe, aya mpangila, apaka Yesu amulu, ampulukusa amulu ni nyele zyakwe. Amafuta yanunkilila yalimba ing'anda. 4 Lelo Yuda Iskaliote, wenga apa alondezi yakwe, nawe wino alumfima, wavwanga ukuti: 5 “Uku chani amafuta ya yatakazilwe uku mpia zya dinali imyanda yitatu, yapiwe apina?” 6 Nawe wavwanzile viyo asi kuti wawalile apina, lelo kuno wali umwivi, uli wino walemile imbokosi, watolanga vino vyatelwanga-mo. 7 Nga Yesu avwanga ukuti: “Lekini ayawike uku wanda wa kuzyikwa kwane.’ 8 Kuno apina yali ponga nemwe manda yonsi, lelo nemwi musi nene manda yonsi.” 9 Nga antu tupu uku aYudea yamanya vino ali kweneko, nayo iza, lelo yatayilile Yesu sile, lelo kuti yalole na Lazalo, wino Yesu watutulwile uku yafwi. 10 Nayo aikolo iyakapela yamba apaliponga ukuti yumole na Lazalo kwene. 11 Kuno kuli wenewe aYudea tupu izanga yazumila Yesu. 12 Nu wanda wa uwili antu tupu yano yaile uku wanda ukulu, yapulika vino Yesu wamwiza uku Yelusalemu. 13 Yatola amafwa ya, mitende, yapita ukuyu nkomanya, angi uku mazwi makulu yaluti: “Osana, uwino wapepelelwa alwiza ukwizina lya Mwene! Mwene wa Islaeli!” 14 Nga Yesu pano wazana umwana mpunda, akowela, ndi vino chaandikwe: 15 “Utachopa, mwana kachi wa ku Sioni, lola, uMwene wako alwiza; akwezile umwana mpunda.” 16 Ivintu vi alondezi yakwe apa ntangulo yatavimanyile, lelo pano Yesu watensiwa, apano yizukila vino waandikilwe panali, na vino yachisile ivintu viyo kunali. 17 Nga iumba lino lyalipo pano wisile Lazalo ukufuma umwilindi, wamtutulula, lyamwimikila. 18 Uku chintu chiyo ichino iumba lyaya ukuyumkomanya, kuno yalile iyapulika vino wachisile ichipezya-mano chiyo. 19 Nga aFaliseo yavwanzyanya yonga, yati: “Muwine vino mutachi tumbwile chimwi, lolini antu yonsi iyannondela.” 20 Pali na aGliki yamwi apa yantu yano yaile uku wanda ukulu ukuyupepa. 21 Nga iza kuli Filipo untu wino wali uwa ku Betsaida ya ku Galilea, yantondosya, yati: “Mkombe, tulusita ukulola Yesu.” 22 Filipo waya wanena Andelea, nga Andelea na Filipo yanena Yesu. 23 Nawe Yesu wayanena, wati: “Lilifika ilyakuti uMwana-ntu atensiwe. 24 Umwenemo, umwenemo, ndumunnena: ulupeche lwa ngano ngi lutaponile umu nsili nu kufwa, angi lulilonga kwene; lelo ngi lwafwa lukululeta impeche tupu. 25 Wino akasime upuma wakwe, akuulovya, na wino watuwa upuma wakwe kimo ukunzi, aluwa nao kufika nu um-upuma wa manda ti. 26 Untu ngalumbombela, andondele; nene panondi, apano nu momvi wane angali. Na kaili untu ngi alumbombe la, Tata alumchindika. 27 “Ali umwenzo, wane wawa na masima, na mvwanga chani? Tata, untule apantu pa? Lelo ichino ngizile. 28 Tata, ulitensya izina lyako.” Nga izwi liza ukufuma umwiyulu, lyati: “Nalitensya, nene nanditensya kaili.” 29 Ngi umba lino limilile apipi lyapulika, lyati: “Kwawa unnunkumo.” Yamwi yati: “Malaika aluvwanga nawe.” 30 Yesu wavwanga ukuti: “Izwi li litizile kuli nene, lelo limwizile mwemwe. 31 Li kwene kwawa uputuzi wa milandu ya nsi, li kwene unnâsi wa nsi i wawingwa. 32 Nene ngi pano nakatusiwa umwiyulu un-nsi, ndukwesa yonsi ukwane.” 33 Wavwanzile viyo ukuyalangizya ulufu uli luno alufwa. 34 Ngiumba lyannena, lyati: “Swemwi tumanyile un-Ntambi vino Klisto aluwako manda ti, newe ulutuli kaili ukuti ale uMwana-ntu akatusiwe? uMwana-ntu wi, uwini?” 35 Nga Yesu wayanena, wati: “Umwengelela uchili ponga nemwe amanda mache. Pitangi chino muli nu mwengelela uo, ichanda chitiza chimuzane, kuno wino alupita un-chanda atamanyile kuno aile. 36 Vino muli nu mwengelela, zumilini umwengelela uo, ukuti muwe yana ya mwengelela.” Walangi pano Yesu wavwanga viyo, wapita waufisa yatachinnola. 37 Lelo nanti vino wachisile ivipezya-mano tupu ndi kuti viyo, apa manso yao, yatachili yamzumile. 38 Kuti liwe izwi lino ilau Isaya wavwanzile, ati: “Mwene, uwini wino wazumile amazwi yitu. Nikasa lya Mwene waswelwilwe wini?” 39 Ichaleka yao yatachili yazumile, kuno Isaya wavwa-nzile kaili, ati: 40 “Wayapofuzya amanso, wainwamika imyenzo yao, yatize yalole uku manso yao, yamanye uku myenzo yao, yasenuke, njapozya.” 41 Amazwi yao, wavwanzile Isaya kuno wawine ukulu wakwe, walanda amazwi yakwe. 42 Lelo nunjakulu kwene mwali antu tupu yano yanzumile, lelo uku nnandu wa aFaliseo, yatachi lanzile, kuti yatawingwa un-ng'anda yi Leza. 43 Kuno yakasime ukulu wa ku antu ukuluta ukulu wa kuli Leza. 44 Nga Yesu afumya izwi, ati: “Wino anzumile nene, atanzumile nene, lelo wino wantumile. 45 Na wino alundola nene, alulola wino wantumile. 46 Nemwi nizile ukuti mbwe mwengelela wa kunzi, ukuti untu wensi Wino wanzumila, atacha ikala un-chanda. 47 Nu ntu uwapulika amazwi yane, atayalema, nemwi ntalumputwila unnandu; kuno ntizilu putwila akunzi imilandu, lelo nkulule akunzi. 48 Wino wankana nene, atayazumile amazwi yane, ali na wino alumputwila unnandu: izwi li lino navwanga, ilino lilumputwila unnandu uwanda wa chisila. 49 Kuno inene ntauvwangile apa lwane nenga, lelo Tata wino wantumile, unkola uwino wannena vino ndusunda na vino ndulanda. 50 Nene manyile vino isunde lyakwe upuma wa manda yonsi. Ichino ivintu vino nene ndusunda, ivino Tata wanenile ivino nduvwanga.”
1 Ngi nkolelo ya wanda ukulu uwa Pasaka, Yesu wamanyile vino amanda yakwe iyasila akufuma kuno ukunzi ukuya kuli Tata, nawe wakunda antu yakwe kimo ukunzi, wayakunda chimwi. 2 Na pa chakulya amanguzi, chiwa walile atatela Yuda umwana wi Simoni Iskaliote um-mwenzo, ukuti amfime. 3 Na Yesu wamanyile vino Tata wampa vyonsi um-makasa yakwe, na vino wafumile kuli Leza nawe ayile kuli Leza. 4 Watinile apa chakulya, wawika imyenda yakwe uku mbali, watola ichitambala, wanyepa umu nsana. 5 Nga atela manzi un-chogelo, atampa ukuyafula mulu alondezi nu kuyapulukusa ni chitambala chino walile watanyepa umu nsana. 6 Nga awiza kuli Simoni Petlo. Wene wannena, wati: “Mwene, wewe unfule nene amulu?” 7 Yesu wannena, wati: “Chino nduchita li kwene utachimanyile, lelo uluchimanya ichisila.” 8 Petlo wannena, wati: “Wewe utangi unfule amulu nanti uche.” Na Yesu wannena, wati: “Ngi ntakufuzile, usi ninkula ponga nene.” 9 Simoni Petlo wannena, wati: “Mwene, nfula asa mulu yane mpela, lelo na makasa yane nuntwe wane kwene.” 10 Yesu wannena, wati: “Wino watafulala asi na chimwi, siku ukufula amulu mpela, lelo umwili wonsi uswefile Nemwe mwaswepa, lelo asi mwensi.” 11 Kimo wamanyile wino alumfima; ichino wavwanzile ukuti: “Asi mwensi yano mwaswepa.” 12 Nga pano wayafula amulu nu kutola imyenda yakwe nu kwikala kaili, wayanena, wati: “Chene! mwamanya chintu chino namuombela? 13 Mwemwe mulungita muti: ‘Kasambilizya,’ nu: ‘Mwene.’ Mulutaka ningo, kuno ivino ndi. 14 Ali ngi nene ndi Mwene na Kasambilizya namufula amulu, chingamuzipila nemwe kwene ukufulana amulu. 15 Kuno namupa ichilangililo, ukuti ndi vino nene namuombela, ivino nemwe ombangi. 16 Umwenemo, umwenemo, ndumunene: Umomvi atangi alute umwene wakwe, nanti katumwa atangi alute wino amtumile. 17 Ngi mwamanya ivintu vi, muli ni nkata ngi mwaviomba. 18 “Ntalumuvwangila mwemwe mwensi; manyile yaya yano nasolwile, lelo kuti Ilyandiko lifikilile ukuti: ‘Wino alile ichakulya chane, wankatuzizya akantunta kakwe.’ 19 Kufuma li kwene ndumunena lino chichili chiloleke, ukuti pano chaloleka, muzumile vino nene ndi wenewe. 20 uMwenemo, umwenemo, ndumunena: Uwacha wapokelela untu wensi wino ntumile, aluwa atampokelela nene, nuwa mpokelela nene aluwanga atampokelela wino wantumile.” 21 Nga pano wavwanga ivintu viyo, Yesu asima ummwenzo, alanda ukuti: “Umwenemo, umwenemo, ndumunena: Umwi pali mwemwe wanfima.” 22 Alondezi yalolana nanti kumanya ngalutaka wini. 23 Nga kwali unnondezi wakwe wenga wino Yesu wakunda, wasekamile apa chifuwa chi Yesu. 24 Nga Simoni ansinizya, annena, ati: “Tondosya, alutaka wini?” 25 Nga nawe wino wasekamila apa chifuwa chi Yesu, wamtondosya, wati: “Mwene, uwini?” 26 Nga Yesu wannena ukuti: “Untu wino nasondela itonje nu kumpa.” Wasonda itonje, wapa Yuda, umwana wi Simoni Iskaliote. 27 Pano walya itonje, Syetani amwingila. Nga Yesu, wannena, wati: “Chino uluomba, ombanga zuwa.” 28 Nga pali yano yali apa chakulya, kusi wino wamanyile kuno ichani wannena viyo. 29 Kuno yamwi yatile, vino Yuda akulusenda imbokosi, Yesu wannena ukuti: “Ukale vino tulusita uku wanda ukulu,” nanti: “Ukupa apina chimwi.” 30 Nga wene pano wapokelela itonje liyo, amfuma liyo kwene; nao wali usiku. 31 Nga pano wafuma, Yesu ati: “Li kwene watensiwa uMwana-ntu, na Leza watensiwa munali. 32 Ngi Leza nawe watensiwa muli wenewe, Leza aluntensya munali umwisikikulu, nawe wamtensya liyo kwene. 33 Mwe yana yanono, nchili ndipo uche ponga nemwe, mulunsitai, ndi vino nanenile aYudea, ukuti: ‘Kuno nduya, mwemwi mutangi mukwize,’ ivino nemwe kwene namunena. 34 “Ichilangaso chipya namupa: mukundane; ndi vino namukunda mwemwe, nemwe kwene ivino mukundane. 35 Apano na antu yonsi yalumanya vino mwawa alondezi yane, ndi mwakundane.” 36 Simoni Petlo wamtondosya, wati: “Mwene, nga wanja kwi?” Yesu wannena, wati: “Kuno njile, utangi undondele apa kasalaka, lelo ulundondela apa chisila.” 37 Petlo wannena, wati: “Mwene, kimo ichani ntangi nkulondele apa kasalaka? Ichakuti chikulye wewe, chikundya nene.” 38 Yesu wannena, wati: “Chene! Wewe wanfima upuma wako pali nene? Umwenemo umwenemo, ndukunena: Nkolwe asulamula kufika lino wewe wankana amaila yatatu.
1 “Mutachisima um-myenzo yino; mwazumila Leza, nzumilini nene kwene. 2 Un-ng'anda yi Tata muli umwakwikala mwavula; ngi kusi nali munena, kuno naya ukuyumuteyanyizizya apa kwikala, 3 Nga ngi napita ukuyumuteyanyizizya apa kwikala, nduwela kaili ngize mutwale ukwane, ukuti panondi nene, angi nemwe mulipo. 4 Nene kuno njile, inzila muimanyile.” 5 Toma wannena, wati. “Mwene, usweswe tutamanyile kuno, wanja, nga tumanyile uli inzila?” 6 Yesu wannena, wati: “Nene ndi nzila, ni chumi, nu upuma; untu atalwiza kuli Tata, ngi atapitile kuli nene. 7 Ngangi mumanyile nene, ngangi mumanyile na Tata; ukufuma li kwene mummanyile na kaili mwannola.” 8 Filipo wannena, wati: “Mwene, utulange Tata, kuno chingatuzipila.” 9 Yesu wannena, wati: “Inene nikala ponga nemwe amanda yonsi ya, newe utammanyile, Filipo? Wino wandola nene, walola Tata; nga wewe watuli ukuti: ‘Utulange Tata?’ 10 Utazumile vino nene ndi muli Tata, na Tata ali muli nene? Amazwi ya yano ndumunena nene, ntaluyavwanga apa lwane, lelo Tata wino ali muli nene, aluomba imilimo yakwe. 11 Zumilini vino nene ndi muli Tata na Tata ali muli nene; ngi mutazumile viyo, zumilini nanti milimo kwene. 12 Umwenemo, umwenemo, ndumunena: wino wanzumila nene, imilimo yino nduomba nene, nawe kwene wanjiomba, endita, ni mikulu ukuluta yi aluomba, kuno nemwi naya kuli Tata. 13 Nemwe ngi mwalomba chimwi ukwizina lyane, ngamupa, ukuti Tata atensiwe umMwana. 14 Ngi mwalomba chimwi ukwizina lyane, ngamupa. 15 “Ngi mwankunda, mwannema ivilangaso vyane. 16 Nene ndulomba Tata, nawe alumupa uMwazwilizi unji, kuti awe ponga nemwe manda yonsi, 17 Ali Mwenzo wa Chumi, uno aya mu nsi yatangi yampokelele, kuno yatalunnola nanti ukummanya awe. Lelo mwemwi mummanyile, kuno alwikala nemwe, aluwa muno muli. 18 “Ntalumusya ulanda, ndwiza kuno muli. 19 Kwasyala manda mache na yakunzi yatalundola kaili; lelo mwemwi mulundola, na kuno ndi nupuma, nemwe kwene muluwa nao. 20 Uwanda uo mulumanya vino ndi muli Tata, nemwe muli nene, nene muli mwemwe. 21 Wino ali ni vilangaso vyane nu kuvilema, wiyo uwino wankunda nene, alukundikwa na Tata, nene ndunkunda nu kuuswelula kunali.” 22 Yuda (wino asi Iskaliote) wannena, wati: “Mwene, chawa uli vino ulusita ukuuswelula kuli sweswe, lelo asi ku ya munsi?” 23 Yesu wannena, wati: “Untu wino wankunda, akulema izwi lyane, na Tata alumkunda, neswe tulwiza kunali nu kwikala munali. 24 Untu wino atankunzile, atalemile amazwi yane; nizwi lino mulupulika lisi lyane, lelo ilyi Tata wino wantumile. 25 “Ala viyo ivino namunenile pano nchili ntenzi ponga nemwe. 26 Lelo uMwazwilizi wiyo, uMwenzo Nswefu, wino Tata aluntuma ukwizina lyane, alumusambilizya vyonsi nu kumwelenguzya vyonsi vino namunenile. 27 “Namusyile uwelezyo, uwelezyo wane namupa; vino namupa nene asi vino amunsi yakulupa. Mutachisima ummyenzo yino nanti ukuwa ni ngofi. 28 Mwapulika vino namunenile, ukuti: ‘Napita, kaili ndwiza kuno muli.’ Ngangi mwankunda, ngangi muluchimba kuno naya kuli Tata, kuno Tata unkulu andusile. 29 Nga li kwene namunena pano chichili chiloleke, kuti pano chaloleka, muzumile. 30 Inene ntaluvwanga nemwe amazwi tupu kaili, kuno alwiza unnâsi wa nsi i; nawe asi na maka kunondi. 31 Lelo akuno ukunzi yamanye vino nakunda Tata, na vino Tata wampa ichilangaso, ivino nduchita. Katukini, tupite.
1 “Nene nsabibu wa chumi, na Tata unnimi. 2 Itai lyonsi munondi lino litalusêka, akululitisya, ni tai lyonsi lino lilusêka, akulupambwila, kuti lisêke nkani. 3 Mwemwi mwaswepa ukwizwi lili lino namunenile. 4 Ikalini muli nene, nene muli mwemwe. Ndi vino itai litangi lisêke lyonga, ngi litikazile un-nsabibu, ivino nemwe ngi mutatenzi muli nene. 5 Nene nsabibu, nemwe mwe matai; wino atenzi muli nene, nene muli wenewe, uwino alusêka nkani, kuno ngi musi muli nene, mutangi muchite izwi limwi. 6 Untu ngi atatenzi muli nene, asumbwa apanzi nu kunyala wi tai, antu yayakonganika nu kuyasumbila um-moto, yasikisa. 7 Nemwe ngi mwikala muli nene, na mazwi yane ngi yikala muli mwemwe, lombini chonsi chino mukasime, mwampiwa. 8 Tata angi alutensiwa uku vintu viyo, kuno muluseka nkani, apano muluwa alondezi yane. 9 Ndi vino Tata wankunda, ivino nene kwene namukunda; wikalini undukundo lwane. 10 Ngi mwalema ivilangaso vyane, mwamwikala undukundo lwane, ndi vino nemwi nalema ivilangaso vyi Tata nu kwikala undukundo lwakwe. 11 “Namunena viyo ukuti ukuchimba kwane kuwe muli mwemwe, nu kuchimba kwino kuvulisye. 12 Ichilangaso chane ichi: Mukundane ndi vino nene namukunda. 13 Kusi wino ali nu lukundo tupu kuluta lu, ulwa ntu ukufima upuma wakwe uku nnandu wi yakatakwe. 14 Umwemwe mwawa yakatane, ndi mwanchita vino ndumusunda. 15 Ntalumwita yazya kaili, kuno unzya atamanyile chino umwene wakwe aluomba; lelo mwemwi namwita yakatane, kuno vyonsi vino napulika kuli Tata namumanyisya. 16 Asi mwemwe mwansolwile, lelo inene namusolwile mwemwe, nene namuwika muye mukasêke ivisêke, ni visêke vino vikale, ukuti chonsi chino mwalomba Tata ukwizina lyane, amupe. 17 Namusunda vi mwemwe kuti mukundane. 18 “Nga ukunzi yamutuwa, mumanye vino iyantuwa nene inkolelo ya kumutuwa mwemwe. 19 Ngangi mwe yakunzi, ngangi ukunzi kwamukunda ali yakwe. Lelo kuno asi mwe ya kuno ukunzi, lelo nene namusolwile uku yakuno ukunzi, ichino viyo akunzi yalumutuwa. 20 Mwiyusye izwi lili lino namunenile, ukuti: ‘Unzya atalusile umwene wakwe.’ Ngi yanzunyile nene, nemwe kwene yalumuzunya; ngi yalemile izwi lyane, yalulema ni lino kwene. 21 Lelo ivintu vyonsi vi, yalumuchitila uku nnandu wizina lyane, kuno yatammanyile wino wantumile. 22 Ngi ntalingize ukwizu vwanga nayo ngangi yatakwite amaifyo; lelo apa kasalaka yatakwite ukanilo ku maifyo yao. 23 Wino wantuwa nene angi watuwa na Tata kwene 24 Ngangi ntali mbombe imilimo yino unji ataomvile ukuyakola, ngangi yatakwite amaifyo. Lelo kasalaka yailola na kututuwa nene na Tata. 25 Lelo kuti lifikilile lili lino lyandikwa un-Ntambi yao, ukuti: ‘Yantuwile chaka.” 26 “Lelo uMwazwilizi wiyo pano wacha wiza, wino ndutuma ukufuma kuli Tata, uo uMwenzo wa chumi ufumile kuli Tata, wiyo alungimikila. 27 Nemwe kwene mulungimikila, kuno fuma intangulo mwali ponga nene.
1 “Amazwi ya namunena kuti mutata uzumilo wino. 2 Yalumuwinga un-ng'anda zyi Leza, endi, insaa ilwiza yino chila untu wino alumumola, aluti kunde aluombela Leza. 3 Ni vintu vi yalumuchuzya, kuno yatammanyile Tata nanti nene. 4 Lelo namunena viyo, kuti insaa ii pano yacha yafika, mulwelengula vino nene namunenile. “Ntachili munene viyo ukufuma intangulo kuno nalipo ponga nemwe. 5 “Lelo kasalaka, napita ukwakwe wino wantumile na kusi umwi wino aluntondosya, ati: ‘Waya kwi?’ 6 Lelo kuno namunena ivintu vi, imyenzo yino yazyula amalanda. 7 Lelo nemwe ndumunena icha chumi: chingamuzipila mwemwe, nene ntine; kuno ngi ntatinile, uMwazwilizi wiyo atangi awize kuno muli, lelo ngi napita ndunneta kuno muli. 8 Nawe wiyo alula wiza, alumanyisya amunsi nku nnandu wa maifyo, ni chumi nu uputuzi. 9 Uku nnandu wa maifyo, kuno yatanzumile nene. 10 Uku nnandu wa chumi, kuno napita kuli Tata nga musundola kaili. 11 Uku nnandu wa uputuzi wa milandu, kuno unnâsi wa kuno ukunzi wataputwilwa unnandu. 12 “Nchili ndi ni vyavula ivya kumunena, lelo mutangi muvileme kasalaka. 13 Lelo pano wacha wiza uo Mwenzo wa Chumi, alumukolelela nu kumutwala un-chumi chonsi. Kuno ataluvwangila apa lwakwe sile, lelo vyonsi vino wacha wapulika alulanda, ni vintu vino vilwiza alumumanyisya amazwi yakwe. 14 Aluntensya nene, kuno alutola um-vyane nu kumumanyisya. 15 Na vyonsi vino Tata ali navyo, ivyane. Ichino nvwanzile ukuti alutola um-vyane nu kumumanyisya. 16 “Kwasyala manda mache mutalundola na kaili kwasyala manda mache, nemwe mulundola.” 17 Nga alondezi yakwe yamwi yavwanzyanya, yati: “Chino watunena ichani, vino wati: ‘Kwasyala kache, mutalundola, na kaili kwasyala kache mulundola?’ Na kaili: ‘Kuno napita ukuya kuli Tata?’ ” 18 Nga yati: “Izwi uli lio lino walanda: ‘Kwasyala kache?’ Twaula ukumanya chino wavwanga.” 19 Yesu wamanyile vino yalusita yantondosya, wayanena, wati: “Ichino muluntondosya chiyo, chino namunena, nati: ‘Kwasyala kache nemwe musundola na kaili kwasyala kache nemwe mulundola?’ 20 Umwenemo, umwenemo, ndumunena: umwemwe mululila nu kulosya, lelo aya kunzi yaluchimba; umwemwe mululola malanda, lelo amalanda yino yalusenuka yawe ukuchimba. 21 Umwanachi pano alupapa, ali na malanda kuno chamfikila; lelo pano wapapa umwana, atakwelengula kaili ukuwaya kuku, uku kuchimba kwa kuvyalwa untu kuno ukunzi. 22 Ichino nemwe li, muli na malanda, lelo nene ndumulola kaili, ni myenzo ino iluchimba, nu kuchimba kwino kusi wino alumupoka, 23 Na kaili uwanda uo mutaluntondosya chimwi. Umwenemo, umwenemo, ndumunena Ngi mwalomba Tata chimwi, alumupa ukwizina lyane. 24 Kufika kasalaka muchili mulombe chimwi ukwizina lyane. Lombini nemwe mulupiwa, kuti ukuchimba kwino kufikilile. 25 “Ivintu vi namunena uku milumbe. Lilwiza lino ntaluvwanga nemwe uku milumbe kaili, lelo ndumunena apatiswe amazwi ya kuli Tata. 26 Nu wanda uo mululomba ukwizina lyane, lelo ntalumunena ukuti ndumulombela kuli Tata, 27 kuno Tata unkola wamukunda kuno mwankunda nene nu kuzumila vino nene nafumile kuli Tata. 28 Nafumile kuli Tata, nene niza kuno ukunzi; na kaili natina kuno ukunzi naya kuli Tata.” 29 Nga alondezi yakwe yati: “Lola, li kwene ululanda apatiswe, nga utaluvwanga ku nnumbe umwi, 30 Nga twamanya vino fwandi umanyile ivintu vyonsi, nanti utalusita umwi akutondosye chimwi; ichaleka twazumila vino wafumile kuli Leza.” 31 Nga Yesu wayanena, wati: “Chene! nga mwazumila kasalaka? 32 Lolini, kuluwa, endita, ikuwa nu kuwa lino mwansambala mwensi wenga wenga nu kunsya nene nenga. Lelo nene nsi nenga, kuno Tata ali ponga nene. 33 Ivintu vi namunena, kuti mwikale mutekini muli nene. Ukunzi ku muli na machulo; lelo tekini myenzo, nemwi napota insi.”
1 Amazwi ya Yesu wavwanzile, alingamila umwiyulu, avwanga ukuti: “Tata, ilifika ilya kutensya umwanako, ukuti umwanako nawe akutensye. 2 Ndi vino wampile amaka uku yantu yonsi, ukuti yonsi yano wampa, ayape upuma wa manda ti. 3 Nupuma wa manda yonsi uli u, yakumanye we Leza wenga uwa chumi na Yesu Klisto wino watumile. 4 Nati nkutensya kuno ukunzi, kuno natimala unnimo uno wanpile mbuombe. 5 Nga kasalaka Tata, unkuzye nene ponga newe, uku ukulu uu kwene uno nali nao ponga newe intangulo ya kulengwa kwansi. 6 “Izina lyako nayamanyisya antu yaya yano wampile ukunzi. Yali ayako, wampa nene, nizwi lyako yalilema. 7 Nga yamanya vino vyonsi vino wampile, vyafumile kuli wewe. 8 Kuno amazwi yano wampile, nayapa, nayo yayapokelela, yamanya ningo vino nafumile kuli wewe, yazumile vino wewe wantumile. 9 “Nene nduyapepela; ntalupepela ayanaunsi, lelo yao yano wampile, kuno yao ayako. 10 Na yonsi ayane ayako, na yako ayane; nene natensiwa muli yeneyo. 11 Nemwi nta-chili-mo kaili un-nsi, lelo ya yalimo un-nsi, nene niza kunuli. Tata Nswefu, uyasunge ya ukwizina lyako lino wampile, ukuti yawe ali yonga ndi yino tuli, 12 Pano nali ponga nayo, nayasungaa ukwizina lyako, lino wampile, nayachingila, kusi nanti wenga pali yeneyo wino walowa, siku mwana wa kulowa, kuti Lyandiko lifikilile. 13 Lelo kasalaka niza kunuli, na mazwi ya nduyavwanga un-nsi, ukuti ukuchimba kwane kuzyule um-myenzo yao. 14 Nene nayapa izwi lyako, nukunzi kwayatuwa, kuno yao asi ya kunzi, ndi vino nene asi ne wa kunzi. 15 Ntalupepa ukuti uyatisye ukunzi, lelo uyasunge uku njipe. 16 Yao asi ya kunzi, ndi vino nene asi ne wa kunzi. 17 Uyaswefye un-chumi; izwi lyako ali chumi. 18 Ndi vino wantumile nene ukunzi, ivino nene kwene nayatumile ukunzi. 19 Nu ku milandu yao nauswefya, ukuti nayo yaswepe un-chumi. 20 “Ntalupepela yao sile, lelo na yaya yano yacha yanzumila uku nnandu wizwi lyao. 21 Yonsi yawe ichili chonga ndi vino newe Tata uli muli nene, nene muli wewe, nayo yawe muli sweswe; ukuti amunsi yazumile vino wewe wantumile. 22 Nene ukulu uo uno wampile nayapa, ukuti yawe ichili chonga ndi vino neswe tuli ichili chonga. 23 Nene muli yeneyo, newe muli nene, ukuti yawe ningo paliponga, ukuti amunsi yamanye vino wewe wantumile, wayakunda ndi vino wankunda nene. 24 “Tata, yao yano wampile, ndusita yawe ponga nene ponsi panondi, ukuti yalole ukulu wane uno wampa, kuno wankunda fuma inkolelo ya kulengwa kwansi. 25 Tata wa chumi, amunsi yatakumanyile, lelo nemwi nakumanyile, na yao yamanyile vino wewe wantumile. 26 Nene nayamanyisya izina lyako, na kaili nanjamanyisya, ukuti ulukundo lulu luno wankasama nene luwe muli yeneyo, nene mbwe muli yeneyo.”
1 Walangi Yesu wavwanga amazwi ya, afuma na alondezi yakwe alamba kaluzi ka Kedloni pano pali chalo, aya mwenemo na alondezi yakwe. 2 Na Yuda wino wasitanga ukumfima, wapamanyile apantu pao, kuno Yesu wayanga amaila tupu kweneko ponga na alondezi yakwe. 3 Nga Yuda pano wapiwa iumba lya asalifi, na aomvi yano yafumile uku yikolo iyakapela na aFaliseo, yaya kweneko ni tala ni vyaka ni vyanzo. 4 Nga Yesu vino wamanyile ivintu vino vyamnzana, afuma, ayanena, ati: “Uwini wino mulusita?” Nayo yati: 5 “Yesu wa ku Nazaleti.” Yesu Wayanena, wati: “Inene.” Na Yuda wino wamfimile, wimilile ponga nayo. 6 Nga pano wayanenile ukuti: “Inene,” yawela chindansizi, yapona pansi. 7 Nga wayatondosya kaili, wati: “Mulusita wini?” Yati: “Yesu wa ku Nazaleti.” 8 Yesu wayanena, Wati: “Ntimunena, nti: Inene! Ngi mulunsita nene, lekini ya yapite.” 9 Kuti liwe lino wavwanzile ukuti: “Yano wampile ntachili ndovye nanti wenga.” 10 Nga Simoni Petlo wali ni mpanga, wasomola, wakoma umomvi wi Kapela-nkulu, wamsesula ikutwi lya kwi lunji. Nu momvi wiyo izina lyakwe i Maluko. 11 Nga Yesu wanena Petlo, wati: “Someke impanga un-chipata. Chene! ulwako luno Tata wampa, ntalunwela?” 12 Nga asalifi nu wikolo wao naomvi ya aYudea yalema Yesu, yannyepa. 13 Intangulo yatana yantwala kwi Anasi, kuno wali isivyala wi Kayafa, wino wali Kapela-nkulu umwaka uo. 14 Nawe Kayafa uwino wapile aYudea izwi, lyakuti: “Chingazipa untu wenga afwile antu.” 15 Nga Simoni Petlo nu unnondezi unnina yalondile Yesu. Nu nnondezi wiyo walile wamanyika na Kapela-nkulu, wingile ponga na Yesu un-ng'anda yi Kapela nkulu. 16 Lelo Petlo wimilila apanzi lwa pannyango. Nga unnondezi umwi wino wamanyike na Kapela-nkulu, afuma avwanga nu nnolezi wa nnyango, wingizya Petlo unkasi. 17 Nga unsungu wiyo wino wali unnolezi wa nnyango, wannena Petlo, wati: “We, newe kwene asi we unnondezi wa ntu wi?” Nawe wakana, ati: “Asi nene!” 18 Nga azya nasalifi yimilile apanzi yalile iyapemba umoto wa makala, kuno kwali nzusi, angi yalota umoto, Petlo nawe wali ponga nayo angi alota umoto. 19 Nga Kapela-nkulu watondosya Yesu ivya pa alondezi yakwe na masambilizyo yakwe. 20 Yesu wannena, wati: “Inene navwangaa na akunzi apatiswe; manda yonsi nasambilizyanga un-ng'anda zyi Leza nu ng'anda-nkulu-iyi-Leza, muno yakukongana aYudea yonsi, ukumbali ntachili nvwange izwi nanti limwi. 21 Uluntondosezya chani nene? Tondosya yano yapulike chino nayanenanga; wene yamanyile ivintu vino navwangaa.” 22 Nga pano wavwanga viyo, umomvi wenga wino wimilile apipi, wuma Yesu ikofi, wati: “Ulunnena Kapela-nkulu viyo?” 23 Yesu wannena, wati;, “Ngi navwanga chino chaipa, ngimikila uipe uo, lelo ngi nvwanzile ningo, ulungumila chani?” 24 Nga Anasi wamtwala kwi Kayafa, Kapela-nkulu, angi anyefilwe. 25 Na Simoni Petlo kwene wali penepo angi awimilile alota umoto. Nga yannena, yati: “We, newe kwene asi we nnondezi wakwe?” Nawe wakana, wati: “Asi nene!” 26 Unzya umwi uwi Kapela-nkulu, nawe uluko lwi wino Petlo waseswile ikutwi, wati: “Ntali nkuwine uli ponga nawe un-chalo?” 27 Nga Petlo akana kaili, na liyo kwene nkolwe alamula. 28 Nga pano kwacha yafumya Yesu kwi Kayafa, yantwala uku ng'anda ya kuputwila imilandu, Lelo wene yatingila un-ng'anda ya milandu, yatiza yafite imyenzo, lelo kuti yalye iPasaka. 29 Nga Pilato afuma panzi, aya kuno yali, ati: “Unnandu chi uno muletile untu wi?” 30 Yannena, yati: “Untu wi ngasuchita iviipe, ngangi tutannesile kunuli.” 31 Nga Pilato wayanena, wati: “Ali nsendai mwemwe, mukamputwile unnandu uku ntambi yino.” aYudea yannena, yati: “Tutapiwilwe amaka ya kumola untu.” 32 Ukuti lifikilile lino Yesu wavwanzile, lino walanzile infwa ya kundya. 33 Nga Pilato awingila kaili un-ng'anda ya milandu, awita Yesu, annena, ati: “Chene! We mwene wa aYudea.” 34 Yesu annena, ati: “Wewe walanda viyo apalwako, nanti anji yakunenile mazwi yane?” 35 Pilato wannena, wati: “Ala! Chene! nene mYudea? Antu yako na yikolo iyakapela ayano yakulesile kuli nene. Nga wachita chani?” 36 Yesu wavwanga ukuti: “Uwene wane asi wa kuno ukunzi. Ngangi uwene wane uwa kimo ukunzi, aomvi yane yali yandwile kuti ntalemwa um-makasa ya aYudea. Lelo uwene wane asi wa pa.” 37 Nga Pilato wannena, wati: “Chene! We mwene?” Yesu wannena, wati: “Wewe wataka, vino nene Mwene. Nemwi navilwe uku nnandu wa vintu vi, nu ku vintu vi ichileka nizile kuno ukunzi, ukuti ngimikile ichumi. Untu wensi uwa chumi akulupulika izwi lyane.” 38 Pilato wannena, wati: “Ichumi ichili chani?” Nga pano wavwanga izwi liyo, afumila kaili uku aYudea, ayanena, ati: “Ntawine unnandu apa ntu wi. 39 Lelo muli ni ntambi yakuti musapwile untu wenga apa Pasaka, Nga mulusita msapwile umwene wa aYudea?” 40 Nga yuma ichongo kaili, yati: “Wiyo pole, sapula Balaba.” Na Balaba wali kapoka-vya antu.
1 Apano Pilato atola Yesu, amuma ni mikowa. 2 Na asalifi yasuka inkata ya myonga, yamzwika uku ntwe, yamzwika nu mwenda wa zambalau. 3 Angi yaluya nu kunnena, yaluti: “Tulukulaula, mwene wa aYudea.” Yamuma na makofi. 4 Nga Pilato afumila apanzi kaili, ayanena, ati: “Untu wi nanneta panzi kuli mwemwe, mumanye vino nemwi ntawine unnandu umwi uku ntu wi.” 5 Apano Yesu wafuma apanzi angi azwite inkata ya myonga uku ntwe nu mwenda wa zambalau. Pilato wayanena, wati: “Lolini, untu wi.” 6 Nga pano aikolo iyakapela naomvi yao pano yannola, yuma ichongo nukuti: “Akonkomelwe! Akonkomelwe!” Pilato wayanena, wati: “Ali nsendini mwemwe, mkankonkomele, kuno nemwi ntawine unnandu wakwe.” 7 aYudea yannena, yati: “Swemwi tuli ni ntambi, nu ku ntambi iyo aumolwe, kuno wauchita wa mwana wi Leza.” 8 Nga lino Pilato wapulika imivwangilo yao, aopa nkani. 9 Awingila kaili un-ng'anda ya milandu, Wanena Yesu, wati: “We, wafuma kwi?” Lelo Yesu atachili amvwanzye chimwi. 10 Nga Pilato wannena, wati: “Utalunvwanzya? Utamanyile vino ndi na maka ya kukusapula nu kukumola?” 11 Yesu wannena, wati: “Uwewe utali uwe na maka yamwi kuli nene, ngi utali upiwe ukufuma umwiyulu. Ichino viyo wino antezile um-makasa yako ali ni yifyo ikulu nkani.” 12 Kufuma pao Pilato wasita ukunsapula, lelo aYudea yuma ichongo, yati: “Ngi wansapula wi, usi ninkula na Kaisali; chila untu wino akuuchita umwene, akulunyata Kaisali.” 13 Nga pano Pilato wapulika amazwi yao, waleta Yesu apanzi, wikala apa chisumbi cha kuputwila imilandu, pano yakuluti: “Unsolo wa mafinga,’ na ku chiEblania: ‘Gabata.’ 14 Wali uwanda wa kutea iPasaka, angi unsanya pakasi. Wanena aYudea, wati: “Lolini, umwene wino.” 15 Nga yuma ichongo, yati: “Mtisye, mtisye! Umkonkomele!” Pilato wayanena, wati: “Chene! Nkonkomele umwene wino?” Aikolo iyakapela yannena, yati: “Swemwi tusi nu mwene, siku Kaisali mpela.” 16 Apano wamfima um-makasa yao kuti yamumole. Nayo yamsenda Yesu. 17 Wafuma angi asenzile unsalaba wakwe, afika pano yakuluti: “Ipanga lya ntwe, nu ku chiEblania: “Golgota.” 18 Apano yankonkomelela, na yamwi yaili ponga nawe, wenga ku nunji ku, na Yesu apakasi. 19 Na Pilato waandika ichimanyisyo, wawika apiyulu apa nsalaba, angi chitile vi: “YESU WA KU NAZALETI, UMWENE WA AYUDEA.” 20 Ngi chimanyisyo chiyo aYudea tupu yachisomanga, kuno pano yakonkomelile Yesu pala pipi nunzi, na cho chaandikwe uku chiEblania, chiLoma ni chiGliki. 21 Nga aikolo iyakapela ya aYudea yannena Pilato, yati: “Utachaandika ukuti: ‘Umwene wa aYudea,’ lelo uti wino akuluti: ‘Nene mwene wa aYudea.’” 22 Pilato wayanena, ukuti: “Chino ningaandika, nindangaandika.” 23 Na asalifi pano yakonkomela Yesu, yatola imyenda yakwe, yachita imituli yinni, chila nsalifi ituli lyakwe; ni nkanjo. Ni nkanjo iyo itasumilwe, lelo yali nduke yonsi fuma ukwiyulu. 24 Nga yanenana, yati: “Tutachiilepula, lelo tuchite ichimala-mpaka, ngiwe iyini.” Kuti lifikilile Ilyandiko lino litile: “Yankinye ivizwalo vyane; ni nkanjo yane yaichitila ichimala-mpaka.” Ivino asalifi yaya yachisile. 25 Na pa nsalaba wakwe Yesu pali nyina nakachi unnina wi nyina, Malia nka Klopa, na Malia wa ku Magdala angi yimilile. 26 Nga Yesu pano walolekesya nyina nu nnondezi wino wakunda awimilile apipi, anena nyina, ati: “Mama, ulole umwanako.” 27 Na kaili anena unnondezi wiyo, ati: “Ulole nyoko.” Nu kufuma liyo kwene unnondezi wiyo amsenda uku ng'anda ukwakwe. 28 Pa chisila cha vintu viyo, kuno Yesu wamanyile vino ivintu vyonsi ivimalilika, kuti lyandiko lifikilile, avwanga, ati: “Nafwa umu nsala.” 29 Na pao kwene kwali ichivya chimwi angi chizyuzile amanzi ya malimao, nga yatela inkamu um-manzi ya malimao, nga yatunga umwitete, yatwala uku nnomo wakwe. 30 Nga pano Yesu watola manzi ya malimao, wavwanga Ukuti: “Chasila!” Nga ainama untwe, umwenzo umputuka. 31 Nga aYudea kuno yalalilile uwanda ukulu uwi Leza, ivyala vitasyala uku nsalaba uwanda uwa Sabato, (kuno uwanda uo wali ukulu) yalomba Pilato kuti yayavune amulu yao yayatisye. 32 Nga asalifi yaya, yavuna uwa ntangulo amulu nu wa uwili wino wakonkomelwe ponga nawe. 33 Lelo pano yiza kuli Yesu, yalola watafwa, yatachili yamvune amulu. 34 Lelo unsalifi wenga wamtosile ni sumo unduwazu, liyo kwene uwazi na manzi yafuma. 35 Na wino wawine wimikila, nu usyuta wakwe uwa chumi, nawe amanyile vino wavwanga ichumi; ukuti nemwe muzumile. 36 Ivintu vi vyaombike ukuti Ilyandiko lifikilile, lino litile: “Kusi fupa lyakwe lino liluvunwa.” 37 Na kaili Ilyandiko ilinina litile: “Yalunnola wino yatosile.” 38 Ichisila cha vintu vi Yosefu wa ku Alimatea, nawe wali unnondezi wi Yesu, lelo uku ufisa ukukopa aYudea, Walomba Pilato azumile atisye ichala chi Yesu. Pilato wamzumile. Nga waya wisya ichala chakwe. 39 Nikodemo nawe kwene, wino waile usiku ulye inkolelo, waleta mane-mane yano yuminkine nu udi, aya kilo amakumi yasano. 40 Nga yatola ichala chi Yesu, yachifunda um-mwenda untiswe ponga na mafuta yao, ndi vino aYudea yakuluchita apa kuzyika. 41 Napano yamkonkomlelile pali chalo, un-chalo unkasi mwali ilindi ipya, lino umwi atatana wazyikwa mwenemo. 42 Nga vino uku aYudea wali uwanda wa kuteya, yamzyika mwenemo, kuno ilindi lyali apipi.
1 Nga apa wanda wa ntangulo uwa juma, Malia wa ku Magdala waile ukwilindi usiku-siku, angi kuchili kufisile, alola ifinga itisye apilindi. 2 Nga wituka ulwilo waya kuli Simoni Petlo nu ku nnondezi wiwi wino Yesu walile wakunda, wayanena, wati: “Iyatisya uMwene tunwiindi nga tutamanyile kuno iyamwika.” 3 Nga Petlo nu nnondezi unnina yafuma, yalondela inzila ya kwilindi. 4 Yachonchomala ulwilo yonsi yaili. Ngu nnondezi wiwi witukisya nkani ukulusya Petlo, wawa uwa ntangulo ukufika ukwilindi. 5 Nga winama wasungamila, walola ivitambala ivitiswe vitulikwe; lelo atachili awingile. 6 Nga Simoni Petlo awiza angi annondile, wingila umwilindi, walola ivitambala vino vitulikwe. 7 Nileso yino yali ukuntwe wakwe, itatulikwe ponga ni vitambala, lelo yatulikwe ukumbali yonga. 8 Nga pano unnondezi wiwi unnina wino walile uwa ntangulo ukufika ukwilindi wingila nawe, walola nu kuzumila. 9 Kimo yalile yachili yamanye Ilyandiko lino litile: Aluzyuka. 10 Nga alondezi yao yapita kaili yaya ukumwao. 11 Lelo Malia asyala awimilile pipi nilindi apanzi angalulila. Nga pano alulila, winama nu kusungamila umwilindi. 12 Walola yamalaika yaili aya myenda imitiswe, yatenzi wenga ukuntwe na wenga uku mulu, apantu pano Yesu wawizi ichala. 13 Nayo yannena, yati: “Mama, ululila chani?” Wayanena, wati: “Kuno iyatisya umwene wane, nga ntamanyile kuno iyamwika.” 14 Nga pano wavwanga viyo, asenuka uku chisila, alola Yesu awimilile, atamanyile vino iYesu. 15 Yesu wannena, wati: “Mama, ululila chani? Ulusita wini?” Nawe watangi kunde ikalima wa chalo, nga wannena, wati: “Nkombe, ngu kumsenda wewe, undange kuno ukumwika, nene nkumtisya,” 16 Yesu wannena, wati: “Malia!” Nawe waseleuka, wannena uku chiEblania, wati: “Laboni!” (alikuti: Kasambilizya wane.) 17 Yesu wannena, wati: “Utandema, kuno nchili mpite ukuya kuli Tata; lelo pita uku yachane, ukayanene vino: napita ukuya kuli Tata, nawe iSo wino, kuli Leza wane, nawe iLeza wino.” 18 Nga Malia Mandalena ampita, aya anena alondezi ukuti: “Nalola uMwene, nawe wanena amazwi yao.” 19 Pano yawa amanguzi uwanda wuwo kwene uwa ntangulo ya juma, pano alondezi yali, yalile iyayala imilyango yopanga aYudea, Yesu aya awimilila apakasi, ayanena, ati: “Uwelezyo uwe nemwe.” 20 Nga pano wavwanga viyo, wayalanga amakasa yakwe nu luwazu lwakwe. Alondezi yachimba kuno yalola uMwene. 21 Nga Yesu wayanena kaili, wati: “Uwelezyo uwe nemwe! Ndi vino Tata wantumile nene, nene namutuma mwemwe.” 22 Nga pano wavwanga vi, ayaputila umpu, ati: “Pokelelini uMwenzo Nswefu. 23 Yonsi yano mwelela amaifyo, yalwelelwa, na yonsi yano mwanyepela amaifyo, angi yanyepelwa.” 24 Lelo wenga uwi kumi na yaili, Toma wino yatangi Ipasa, atalipo ponga nanina, pano Yesu wizile. 25 Nga alondezi yanina yannena, yati: “Twali twalola uMwene!” Nawe wayanena, wati: “Nemwi ngi ntawine amayamba ya mizumali um-makasa yakwe nu kutela unwe wane un-chipongo cha mizumali nu kutela ikasa lyane unduwazu, ntangi nzumile.” 26 Nga ichisila cha manda nnane, alondezi yali unkasi kaili, na Toma walipo. Yesu awiza, ni milyango angi imiyale, wimilila apakasi yao, wati: “Uwelezyo uwe nemwe.” 27 Nga wanena Toma, wati: “Leta pa unwe wako, ulole amakasa yane, ulete ikasa lyako, ulitele unduwazu lwane, utawa untazumila, lelo wino aluzumila.” 28 Toma wannena, wati: “Mwene wane na Leza wane!” 29 Yesu wannena, wati: “Uwewe wazumila kuno wandola? Yali ni nkata yano yaluzumila nanti kulola.” 30 Nga kuli ivipezya-mano ivinji tupu vino Yesu wachisile apa manso ya alondezi yakwe, vino vitaandikwe un-chitabu chi. 31 Lelo vi vyandikwe ukuti mumanye vino Yesu i Klisto, Mwana wi Leza, nu kukuzumila, muwe nu upuma ukwizina lyakwe.
1 Ichisila cha vintu vi Yesu auswelula kali uku alondezi yakwe pali yemba wa Tibelia, Nawe wauswelwile vi. 2 Simoni Petlo na Toma wino yatangi Ipasa, na Natanieli wa ku Kana ya Galilea, na ana yi Zebedeo na alondezi anji yaili yali pali ponga. 3 Simoni Petlo wayanena, wati: “Naya ukuyuwela inswi.” Nayo yannena, yati: “Neswe kwene twanja ponga newe.” Nga yankatuka ukupita yankwela um-wato. Lelo usiku uo yatapasile chimwi. 4 Nu ntondo pano kwacha, Yesu wimilile umbalama, lelo alondezi yatamanyile vino i Yesu. 5 Nga Yesu wayanena, wati: “Yanane, muli ni nyenyi?” Yati “Awe!” 6 Wayanena, wati: “Sumbini isumbo ukwi lunji lya wato, nemwe mwannonda.” Nga yasumba, nga kaili yapotwa ukuukwesa kuno inswi zyavula. 7 Nga unnondezi wiwi wino Yesu wakunda, wannena Petlo, wati: “Umwene!” Nga nawe Simoni Petlo pano wapulika vino uMwene, wanyepa umwenda wakwe (kuno wali tupu) aitivya muli yemba. 8 Na alondezi yanina yiza um-wato, kuno yatali ukutali nu mbalama, yangawa makasa imyanda ili, na kuno yalukwesa isumbo lino lili ni nswi. 9 Nga pano yika ukalusele-senga, yalola umoto wa makala ni nswi itipanikwa penepo nu nkate. 10 Yesu wayanena, wati: “Letini pa inswi zimwi zino mwafuma mwela li kwene.” 11 Nga Simoni Petlo aya um-wato, akwesela isumbo undusele-senga, lizyuzile inswi inkulu, umwanda na makumi yasano na zitatu; nanti vino zyavula viyo isumbo litachili lilepuke. 12 Yesu wayanena wati: “Nguni mutisye indoto.” Lelo kutali umwi apa alondezi yakwe wino wezizye kumtondosya, ati: “We weni?” Kuno yamanyile vino uMwene. 13 Yesu awiza atola unkate ayapa, ninswi kwene. 14 Liyo ilya utatu Yesu ukuuswelula uku yalondezi yakwe, ichisila cha kuzyuka uku yafwi. 15 Nga pano yalya, Yesu wanena Simoni Petlo, wati: “Simoni, mwana wi Yoane, wewe wankunda ukuluta ya?” Wannena, wati Endita Mwene, wewe umanyile vino nakukunda,” Wannena, wati: “Upaye ana ya nfwele zyane ichakulya.” 16 Wannena kailiilya uwili; wati: “Simoni, mwana wi Yoane; wankunda? Wannena, wati: “Endita, Mwene, wewe umanyile vino nakukunda.” Wannena, wati: “Uchemanga infwele zyane.” 17 Wannena ilya utatu, wati “Simoni, mwana wi Yoane, wankunda?” Petlo alola malanda, kuno wannena ilya utatu, Wati: “Wankunda?” Wannena, wati: “Mwene, wewe umanyile vyonsi, wewe umanyile vino nakukunda.” Yesu wannena, wati: “Upae infwele zyane ichakulya. 18 Umwenemo, umwenemo, ndukunena: Pano wali unnumendo, waunyepanga wenkola nukuya kuno ukasime, lelo pano wacha wawa nkombo, ulukatusya makasa yako, nunji alukunyepa nu kukusenda kuno utakasime.” 19 Wavwanzile viyo ukummanyisya infwa chi yino alufwa, nu kutensya Leza kuli yeneyo. Nga pano wavwanga viyo, ati: “Ndondela.” 20 Petlo asenuka, alola unnondezi wino wakundikwa na Yesu alondile; (Nawe uwino wasekime apa chifuwa chakwe pano yalyanga ichakulya cha manguzi, ati: ‘Mwene, uwini wino alukufima?’) 21 Uwino Petlo walola, wanena Yesu Wati: “Mwene, nga nawi?” 22 Yesu wannena, wati: “Ngi kasime ukuti angalipo ukufika lino nacha niza, ungakanila chani? Wemwi ndondela.” 23 Nga izwi liyo lilumbuka unjanina vino unnondezi wiyo atalufwa. Lelo Yesu atannenile vino atalufwa, lelo watile: “Ngi nkasime ukuti angalipo ukufika lino nacha niza, ungakanila chani?” 24 Alawi alu nnondezi wino wimikila, uwino waandike vintu vi, neswe tumanyile vino usyuta wakwe uwa kapanga. 25 Nga kuli ni vintu ivinina tupu vino Yesu Wachisile; vino ngi vyandikwa chonga chonga, ndwelengula palumwi ni nsi yachepa, vitangi vilimbe ivitabu vino vingaandikwa.