Xó e nɔ́ ná wěziza kpódó gbɛ kpó mɛ é
1 Cóbónú Mawu ná ɖó gbɛ ɔ́, xó ɔ́ kó tíin; é kó ɖe kpódó Mawu kpó, bó nyí Mawu. 2 Xó énɛ́ kó ɖe tɛgbɛ xá Mawu ɖo bǐbɛ́mɛ. 3 É jí wɛ è gbɔn bó bló nǔ e ɖo gbɛ ɔ́ mɛ lɛ́ɛ bǐ; è blǒ nǔ ɖěbǔ é mɛ vo ǎ. 4 É mɛ wɛ gbɛ ɖe, bɔ gbɛ ɔ́ ka nɔ ná wěziza gbɛtɔ́. 5 Wěziza ɔ́ ɖo hǐnhɔ́n wɛ ɖo zǐnflú mɛ, bɔ zǐnflú ɔ́ ka sixú wa nǔɖé n'i ǎ. 6 Mawu sɛ́ mɛɖé dó, bɔ nyǐkɔ tɔn nyí Jǎan. 7 É wá ɖe kúnnu nú wěziza ɔ́, bónú mɛ bǐ ná dó ɖi nǔ nú wěziza ɔ́, gbɔn kúnnuɖiɖe tɔn gbla mɛ. 8 É ɖésú wɛ nyí wěziza ɔ́ ǎ; lo ɔ́, é wá, bó ná ɖe kúnnu nú wěziza ɔ́. 9 Wěziza énɛ́ ɔ́ wɛ nyí wěziza nǔgbó e wá gbɛ ɔ́ mɛ, bó hɔ́n dó gbɛtɔ́ lɛ́ɛ bǐ jí é. 10 Xó ɔ́ kó ɖo gbɛ ɔ́ mɛ; é jí wɛ è blǒ gbɛ ɔ́ gbɔn cóbɔ gbɛtɔ́ lɛ́ɛ ka tunwun i ǎ. 11 É wá mɛ tɔn lɛ́ɛ gɔ́n, bɔ mɛ tɔn lɛ́ɛ ka yí i ǎ. 12 Nǔ ɖo mɔ̌ có mɛɖé lɛ́ɛ ka yí i, bó ɖi nǔ n'i. É ná acɛ mɛ énɛ́ lɛ́ɛ, nú yě ná húzú Mawu ví. 13 Yě nyí vǐ gbɔn hun gbla mɛ ǎ; yě ká nyí vǐ gbɔn jlǒ agbaza tɔn gbla mɛ ǎ; yě ká nyí vǐ gbɔn gbɛtɔ́ sín jlǒ gbla mɛ ǎ; lo ɔ́, Mawu wɛ nyí Tɔ́ nú yě. 14 Xó ɔ́ húzú gbɛtɔ́, bó wá nɔ mǐ mɛ; é ɖe fɛ́nú kpódó nǔgbó kpó xlɛ́ mǐ, bɔ mǐ mɔ susu tɔn, susu e Tɔ́ nɔ ná Vǐɖokpónɔ tɔn é. 15 Jǎan ɖe kúnnu n'i, bó sú xó ɖɔ: “Mɛ e xó un ɖɔ nú mi bó ɖɔ: ‘Mɛ ɖokpó ɖo gǔdo ce jǎwe; mɛ énɛ́ hú gǎn mì, ɖó é kó ɖe cóbɔ è wǎ ji mì’ ɔ́ ɖíe.” 16 Nyɔ̌ná tɔn mɛ wɛ mǐ bǐ mɔ dɔkun e nyí mǐtɔn ɔ́ yí ɖe, bó mɔ fɛ́nú yí dó fɛ́nú jí. 17 Đó Mɔyízi jí wɛ Mawu gbɔn, bó ná sɛ́n lɛ́ɛ mǐ, bó gbɔn Jezu Klísu jí, bó ná fɛ́nú kpódó nǔgbó kpán mǐ. 18 Mɛ ɖěbǔ mɔ Mawu kpɔ́n gbeɖé ǎ; lo ɔ́, Vǐɖokpónɔ e nyí Mawu bó ɖo akɔ́n tɔn mɛ ɔ́ wɛ wá ɖe e xlɛ́.
Jǎan Yɛhwesinlɛnúmɛtɔ́ jlá Mawuxó
19 Jwifugán e ɖo Jeluzalɛ́mu lɛ́ɛ sɛ́ vɔ̌sánú-xwlémawutɔ́ lɛ́ɛ kpódó Levíi ví lɛ́ɛ kpó dó, bónú yě ní yi kanbyɔ́ Jǎan ɖɔ mɛ nǎhún wɛ é ka nyí a jí. 20 Ée yě kan nǔ byɔ́ ɛ ɔ́, Jǎan gbɛ́ ǎ; é ɖɔ tawun ɖo mɛ bǐ nukɔn ɖɔ: “Nyɛ wɛ nyí Klísu ɔ́ ǎ.” 21 Bɔ yě kanbyɔ́ ɛ ɖɔ: “Mɛ̌ wɛ a ka nyí lo? Hwi wɛ nyí Elíi ɔ́ a?” Bɔ é gbɛ́ nú yě ɖɔ: “Éeǒ, nyɛ wɛ ǎ.” Yě lɛ́ kanbyɔ́ ɛ ɖɔ: “Gbeyíɖɔ Mawu tɔn ɔ́ wɛ a nyí a?” Bɔ é gbɛ́ nú yě ɖɔ: “Éeǒ.” 22 Yě ká wá kanbyɔ́ ɛ ɖɔ: “Bɔ mɛ nǎhún a ka nyí tawun? Mǐ ɖó ná yi ɖó gbe nú mɛ e sɛ́ mǐ dó lɛ́ɛ; étɛ́ hwi ɖésú ká nyí bó tunwun?” 23 Jǎan yí gbe nú yě ɖɔ: “Nyɛ wɛ nyí mɛ e ɖo xó sú wɛ ɖo gbětótló mɛ é: ‘Mi bló Aklúnɔ sín ali ɖó.’ ” (Nǔ e gbeyíɖɔ Mawu tɔn Ezayíi ɖɔ é nɛ́.) 24 Falizyɛn lɛ́ɛ lɔmɔ̌ ɖo mɛ e è sɛ́ dó Jǎan gɔ́n lɛ́ɛ mɛ. 25 Bɔ yě kan xó élɔ́ byɔ́ ɛ: “Nú a ma nyí Klísu ɔ́ ǎ, bó ma nyí Elíi ǎ, bó ma ka nyí gbeyíɖɔ Mawu tɔn ɔ́ ǎ ɔ́, étɛ́wútu a ka nɔ lɛ yɛhwesin nú mɛ lɛ́ɛ lo?” 26 Jǎan yí gbe nú yě ɖɔ: “Nyɛ ɔ́, sin wɛ un sɔ́ dó ɖo yɛhwesin lɛ nú mi wɛ; lo ɔ́, mɛ ɖokpó ɖo mi tɛ́ntin, bɔ mi tunwun mɛ e é nyí ɔ́ ǎ. 27 Mɛ énɛ́ wɛ nyí mɛ e ɖo gǔdo ce jǎwe ɔ́, bɔ un nyí mɛɖé bó sixú tún afɔkpakan tɔn lɛ́ɛ vɔ́vɔ́ ǎ.” 28 Nǔ énɛ́ lɛ́ɛ jɛ ɖo Betaníi, ɖo Judɛ́ɛn tɔ ɔ́ gúdo, fí e Jǎan ɖo yɛhwesin lɛ nú mɛ ɖe wɛ é.
Lɛ̌ngbɔ́ví Mawu tɔn
29 Ayǐhɔ́ngbe tɔn ɔ́, Jǎan mɔ Jezu jǎwe bó ɖɔ: “Mi kpɔ́n! Lɛ̌ngbɔ́ví Mawu tɔn e nɔ sɔ́ hwɛ kɛ gbɛtɔ́ lɛ́ɛ ɔ́ ɖíe. 30 Mɛ e xó un ɖɔ nú mi bo ɖɔ: ‘Mɛ ɖé ɖo gǔdo ce jǎwe; mɛ énɛ́ hú gǎn mì, ɖó é ko ɖe cóbɔ è wá ji mì ɔ́ nɛ́.’ 31 Mɛ e é ná nyí ɔ́, nyɛ ɖésúnɔ ko tunwun ɖ'ayǐ ǎ; lo ɔ́, bónú Izlayɛ́li togun ɔ́ ná dó tunwun i wú wɛ un wá sɔ́ sin dó ɖo yɛhwesin lɛ nú mɛ wɛ.” 32 Jǎan ɖe kúnnu ɖɔ: “Un mɔ Yɛ Mawu tɔn gosín jǐxwé wá jɛ te dó jǐ tɔn ahwannɛ́ ɖɔhun, bó cí jǐ tɔn. 33 Mɛ e é ná nyí ɔ́, nyɛ ɖésúnɔ ko tunwun ɖ'ayǐ ǎ. Lo ɔ́, mɛ e sɛ́ mì dó, bónú má wá sɔ́ sin dó lɛ yɛhwesin nú mɛ ɔ́, ko ɖɔ nú mì ɖ'ayǐ ɖɔ: ‘Mɛ e jí a nǎ mɔ Yɛ Mawu tɔn ná jɛ te dó, bó ná cí jǐ tɔn ɔ́, mɛ énɛ́ wɛ ná sɔ́ Yɛsinsɛn dó lɛ yɛhwesin nú mɛ.’ 34 Nyi ɖésú wɛ mɔ nǔ e jɛ ɔ́, bó ɖe kúnnu ná ɖɔ é wɛ nyí Mawu ví.”
Jezu sín ahwanvú nukɔntɔn lɛ́ɛ
35 Ayǐhɔ́ngbe tɔn ɔ́, Jǎan ko lɛ́ ɖo fí ɖokpó ɔ́, kpódó ahwanvú tɔn we kpó. 36 Ée é mɔ Jezu wá xweyǐgbe ɔ́, é ɖɔ: “Mi kpɔ́n! Lɛ̌ngbɔ́ví Mawu tɔn ɔ́ ɖíe.” 37 Ée ahwanvú Jǎan tɔn we lɛ́ɛ se xó énɛ́ ɔ́, yě jɛ Jezu gúdo. 38 Jezu lílɛ́ kpan nukɔn yě, bó mɔ ɖɔ yě xwedó émí, lobo kanbyɔ́ yě ɖɔ: “Ani ba wɛ mi ɖe?” Bɔ yě kanbyɔ́ ɛ ɖɔ: “Fítɛ́ wɛ a nɔ́ nɔ, Hlabi?” Hlabi sín tínmɛ wɛ nyǐ Mɛ̌si. 39 Jezu ka yí gbe nú yě ɖɔ: “Mi wá kpɔ́n fí e un nɔ nɔ ɔ́.” Yě ká xwedó e, bo yi mɔ fí e é nɔ́ nɔ ɔ́, bó nɔ gɔ̌n tɔn gbe énɛ́ gbe. (Hwelɛ́kɔ gan ɛnɛ mɛ mɔ̌ wɛ nǔ énɛ́ ɔ́ ɖo jijɛ wɛ.) 40 Andlé e nyí Sinmɔ́ɔ Piyɛ́ɛ sín nɔví ɔ́ lɔ ɖo mɛ we e se Jǎan sín xó, bo xwedó Jezu lɛ́ɛ mɛ. 41 Nǔ nukɔntɔn e Andlé bló ɔ́, é wɛ nyí ɖɔ é yi mɔ nɔví tɔn Sinmɔ́ɔ, bo ɖɔ n'i ɖɔ: “Mǐ mɔ Mɛsíya ɔ́.” 42 Bɔ Andlé kplá nɔví tɔn Sinmɔ́ɔ yi Jezu gɔ́n. Jezu kpɔ́n Sinmɔ́ɔ, bó ɖɔ: “Hwi wɛ nyí Sinmɔ́ɔ, Jǎan sín vǐ ɔ́; amɔ̌, è nǎ nɔ ylɔ́ we ɖɔ Sefási (nyǐkɔ énɛ́ ɔ́ sín tínmɛ wɛ nyí awǐnnya.)”
Jezu ylɔ́ Filípu kpódó Natanayɛ́li kpó
43 Ayǐhɔ́ngbe tɔn ɔ́, Jezu sɔ́ nǔ, bó xwe Galilée. É kpé Filípu, bó ɖɔ n'i ɖɔ: “Xwedó mì!” 44 (Filípu ɔ́, Bɛtisayidanu wɛ, Andlé kpódó Piyɛ́ɛ kpó ɖɔhun.) 45 Filípu yi mɔ Natanayɛ́li, bó ɖɔ n'i ɖɔ: “Mɛ e wú Mɔyízi sín sɛ́n lɛ́ɛ kpódó gbeyíɖɔ Mawu tɔn lɛ́ɛ kpó ɖɔ xó dó ɔ́, mǐ mɔ ɛ. Jezu Nazalɛ́ti tɔn Jozɛ́fu ví ɔ́ wɛ.” 46 Natanayɛ́li ka kanbyɔ́ ɛ ɖɔ: “Nǔ ɖagbe ɖě ká sixú tɔ́n sín Nazalɛ́ti a?” Filípu ka ɖɔ n'i ɖɔ: “Wǎ, bó wá kpɔ́n.” 47 Đěe Jezu mɔ Natanayɛ́li jǎwe ɔ́, é ɖɔ dó wútu tɔn ɖɔ: “Mi kpɔ́n! Izlayɛ́li ví titewungbe ɖokpó ɖíe; é nɔ hízí nǔ ǎ.” 48 Đěe Natanayɛ́li se xó e Jezu ɖɔ dó wútu tɔn nɛ́ ɔ́, é kanbyɔ́ ɛ ɖɔ: “Nɛ̌ a ka wa gbɔn bó tunwun mì?” Bɔ Jezu yí gbe n'i ɖɔ: “Hwenu e a kpo ɖo fígitínsá dɔ̌n ɔ́, un ko mɔ we, cóbɔ Filípu wá ylɔ́ we.” 49 Natanayɛ́li yí gbe n'i ɖɔ: “Mɛ̌si, hwi wɛ nyí Mawu ví ɔ́ nǔgbó; hwi wɛ nyí Izlayɛ́li xɔ́sú.” 50 Jezu ka yí gbe n'i ɖɔ: “Ée un ɖɔ nú we ɖɔ un mɔ we ɖo fígitínsá ɔ́ wútu wɛ a ɖi nǔ; a ka ko mɔ nǔɖé ǎ; a nǎ lɛ́ wá mɔ nǔ e hú gǎn mɔ̌ lɛ́ɛ.” 51 Jezu lɛ́ ɖɔ n'i ɖɔ: “Ma ɖɔ nǔgbó nú mi: mi ná mɔ jǐnukúnsin ná hun, bɔ wɛnsagun Mawu tɔn lɛ́ɛ ná nɔ ɖo jǐ yi wɛ, bó ná nɔ ɖo te jɛ wɛ dó nyɛ Gbɛtɔ́ví ɔ́ jí.”
Jezu jlɛ́ nǔ nukɔn nukɔntɔn ɔ́ ɖo asidida tɛnmɛ ɖo Kana
1 Azǎn tɔn atɔngɔ́ ɔ́ gbe ɔ́, nya ɖé ɖo asi kplá wɛ ɖo Kana Galilée yíkúngban jí. Jezu sín nɔ ɖo alɔwlíwlí ɔ́ tɛn mɛ. 2 È ylɔ́ Jezu kpódó ahwanvú tɔn lɛ́ɛ kpó, bɔ yě lɔmɔ̌ yi tɛn ɔ́ mɛ. 3 Ée vɛ̌ɛn wá vɔ ɔ́, Jezu sín nɔ wá ɖɔ n'i ɖɔ: “Yě sɔ́ ɖó vɛ̌ɛn ɖě ǎ.” 4 Jezu ka yí gbe n'i ɖɔ: “Nyɔ̌nu, é ma ka nyí hwi wɛ ná ɖɔ nǔ e un ná wa ɔ́ nú mì nɛ́; hwenu e un ná wa nǔ dó ɔ́ ko su ǎ.” 5 Nɔ tɔn ka ɖɔ nú nǔɖuɖumátɔ́ lɛ́ɛ ɖɔ: “Mi bló nǔ e é ná zɔ́n mi lɛ́ɛ bǐ.” 6 Dozɛ́n e è sɔ́ awǐnnya dó bló ná ɔ́ ayizɛ́n ká ɖo fínɛ́, bɔ Jwifu lɛ́ɛ nɔ dun sin dó yě mɛ, bó nɔ dó slá wǔ ná. Dozɛ́n énɛ́ lɛ́ɛ ɖokpó ɖokpó nɔ́ hɛn sin lǐtli kanwe (80 ) abǐ kantɔn (120 ) mɔ̌. 7 Jezu ɖɔ nú nǔɖuɖumátɔ́ lɛ́ɛ ɖɔ: “Mi dun sin gɔ́ dozɛ́n élɔ́ lɛ́ɛ!” Bɔ yě dun sin gɔ́ yě flélé. 8 Énɛ́ ɔ́ gúdo ɔ́, Jezu ɖɔ nú yě ɖɔ: “Mi bo wún yi jó nú nǔɖuɖumátɔ́ lɛ́ɛ sín gǎn,” bɔ yě wún yi jó n'i. 9 Nǔɖuɖumátɔ́ lɛ́ɛ sín gǎn ɔ́ ɖɔ́ sin e ko húzú vɛ̌ɛn ɔ́ kpɔ́n; é ka tunwun fí e vɛ̌ɛn énɛ́ gosín ɔ́ ǎ; (mɛsɛntɔ́ e yi dun sin ɔ́ lɛ́ɛ wɛ tunwun.) Gǎn ɔ́ ylɔ́ asisúnɔ ɔ́, 10 bó ɖɔ n'i ɖɔ: “Vɛ̌ɛn ɖagbe ɔ́ wɛ mɛ lɛ́ɛ bǐ nɔ ná mɛ jɛ nukɔn, bɔ hwenu e ahan wá ɖo mɛ jí yi wɛ ɔ́, è nɔ wá zán vɛ̌ɛn e ma nyɔ́ sɔ mɔ̌ ǎ é; bɔ hwɛ ka zé vɛ̌ɛn ɖagbe ɔ́ ɖ'ayǐ káká jɛ din.” 11 Nǔ nukɔn nukɔntɔn e Jezu jlɛ́ é nɛ́; Kana Galilée yíkúngban jí wɛ é jlɛ́ ɖe. Mɔ̌ wɛ Jezu ɖe susu tɔn xlɛ́ gbɔn, bɔ ahwanvú tɔn lɛ́ɛ ɖi nǔ n'i. 12 Énɛ́ gúdo ɔ́, Jezu kpódó nɔ tɔn kpó, kpódó nɔví tɔn lɛ́ɛ kpó, kpódó ahwanvú tɔn lɛ́ɛ kpó wá yi Kafaanawúmu, bó nɔ fínɛ́ xɔ azǎn kpɛɖé.
Jezu nya nǔsatɔ́ lɛ́ɛ sín sinsɛnxɔ mɛ.
13 Ée Dǐndínwáyi sín xwe e Jwifu lɛ́ɛ nɔ ɖu ɔ́ sín azǎn ɖo sisɛyá wɛ ɔ́, Jezu yi Jeluzalɛ́mu. 14 É mɔ mɛɖé lɛ́ɛ ɖo sinsɛnxɔ ɔ́ mɛ, bɔ yě ɖo nyibú sa wɛ, bó ɖo gbɔ̌ sa wɛ, bó ɖo ahwannɛ́ sa wɛ. Akwɛ́ɖyɔ́tɔ́ lɛ́ɛ lɔ ɖo sinsɛnxɔ ɔ́ mɛ, bó ɖo ayǐjínjɔ́n ɖo távo yětɔn lɛ́ɛ kɔn. 15 Ée Jezu mɔ mɔ̌ ɔ́, é sɔ́ kan dó bló bǎ ná, bó nya yě bǐ sín sinsɛnxɔ ɔ́ mɛ, yě kpódó gbɔ̌ yětɔn lɛ́ɛ kpó, kpódó nyibú yětɔn lɛ́ɛ kpó. É fúnfún akwɛ́ɖyɔ́tɔ́ lɛ́ɛ sín akwɛ́, bó flí távo yětɔn lɛ́ɛ xwe. 16 É ɖɔ nú ahwannɛ́satɔ́ lɛ́ɛ ɖɔ: “Mi bɛ́ nǔ mitɔn lɛ́ɛ, bó tɔ́n sín xɔ ɔ́ mɛ. Mi ma zé tɔ́ ce sín xwé dó húzú ajɔ̌xwé ná ó.” 17 Ée ahwanvú tɔn lɛ́ɛ mɔ mɔ̌ ɔ́, yě flín xó élɔ́ e è wlǎn dó Mawuxówéma ɔ́ mɛ ɔ́: “Wǎn yíyí e un ɖó nú xwé towe ɔ́, wǎn yíyí ma ɖó jlɛ̌ ɖé wɛ, bó nɔ́ sɔ́ akpakpa mì.” 18 Lo ɔ́, Jwifu lɛ́ɛ yí xó, bó kanbyɔ́ Jezu ɖɔ: “Étɛ́ a ka ná jlɛ́ nú mǐ, bó ná dó ɖe xlɛ́ mǐ ɖɔ Mawu ná acɛ we ɖɔ a ní wa nǔ gbɔn mɔ̌?” 19 Jezu ka yí gbe nú yě ɖɔ: “Mi gba sinsɛnxɔ élɔ́; un ná sɔ́ azǎn atɔn ɖó te bó ná lɛ́ vɔ́ gbá.” 20 Jwifu lɛ́ɛ ka ɖɔ n'i ɖɔ: “Xwe kanɖé ayizɛ́n (46 ) wɛ è sɔ́ ɖó te, bó dó gbá sinsɛnxɔ élɔ́ ná; bɔ hwɛ ka ɖɔ din ɖɔ émí ná zé azǎn atɔn ɖó te, bó dó vɔ́ gbá ná a?” 21 Lo ɔ́, sinsɛnxɔ e xó ɖɔ nú yě wɛ Jezu ɖe hwenɛ́nu ɔ́, agbaza é ɖésúnɔ tɔn wɛ. 22 Énɛ́ ɔ́ wú wɛ hwenu e Mawu wá fɔ́n Jezu sín kú ɔ́, ahwanvú tɔn lɛ́ɛ flín ɖɔ é ko ɖɔ mɔ̌ ɖ'ayǐ; bɔ yě ɖi nǔ nú Mawuxówéma ɔ́, bó lɛ́ ɖi nǔ nú xó e Jezu ɖɔ nú yě lɛ́ɛ.
Jezu tunwun nǔ e ɖo ayi mɛ ɖokpó ɖokpó tɔn mɛ é
23 Hwenu e Jezu ɖo Jeluzalɛ́mu, Dǐndínwáyixwe hwenu ɔ́, mɛ gěgé ɖi nǔ n'i, ɖó yě mɔ nǔdábaɖa e é jlɛ́ lɛ́ɛ. 24 Jezu ka gán jɛ yě wú ǎ, ɖó é tunwun yě bǐ ganjí; 25 é sɔ́ byɔ́ ɖɔ è nǐ ɖɔ xó n'i dó mɛɖé wú ǎ, ɖó é ɖésúnɔ ko mɔ nǔ jɛ nǔ e ɖo gbɛtɔ́ xomɛ ɔ́ bǐ wú.
Jezu kpódó Nikodɛ́mu kpán
1 Nya ɖokpó tíin ɖo Falizyɛn lɛ́ɛ mɛ, bɔ è nɔ ylɔ́ ɛ ɖɔ Nikodɛ́mu. Gbɛtɔ́ nukúnɖéjí ɖokpó wɛ é nyí ɖo Jwifu lɛ́ɛ mɛ. 2 Nya énɛ́ zɔn zǎn wá Jezu gɔ́n gbe ɖokpó bó ɖɔ n'i ɖɔ: “Mɛ̌si, mǐ tunwun ɖɔ Mawu wɛ sɛ́ we dó, bónú a nǎ kplɔ́n nǔ mǐ. Đó, ényí Mawu ma ɖo kpɔ́ xá mɛɖé ǎ ɔ́, nǔdábaɖa e a nɔ jlɛ́ lɛ́ɛ ɔ́, mɛ ɔ́ sixú jlɛ́ ǎ.” 3 Jezu ka yí gbe n'i ɖɔ: “Má ɖɔ nǔgbó nú we: ényí mɛɖé má vɔ́ jɔ ǎ ɔ́, é sixú mɔ axɔ́súɖuɖu Mawu tɔn ɔ́ ǎ.” 4 Nikodɛ́mu ka kanbyɔ́ Jezu ɖɔ: “Nɛ̌ mɛ e ko nyí mɛxó ɔ́ ná sixú lɛ́ vɔ́ jɔ gbɔn? É ná byɔ́ nɔ tɔn sín xomɛ, bɔ è ná lɛ́ vɔ́ ɛ ji wɛ a?” 5 Jezu yí gbe n'i ɖɔ: “Má ɖɔ nǔgbó nú we: ényí mɛɖé má vɔ́ jɔ gbɔn sin kpódó Yɛsinsɛn kpó mɛ ǎ ɔ́, é sixú byɔ́ axɔ́súɖuɖu Mawu tɔn mɛ ǎ. 6 Vǐ e gbɛtɔ́ ji ɔ́, gbɛtɔ́ sin vǐ wɛ é nyí; mɛ e è ji gbɔn Yɛsinsɛn mɛ ɔ́, Yɛsinsɛn sin vǐ wɛ é nyí. 7 Ma lɔn bónú lɛ̌vɔ́jɔ xó énɛ́ e un ɖɔ nú we ɔ́ ní kpácá we ó. 8 Jɔhɔn nɔ nyi ɖo fí e jló e ɔ́, bɔ a nɔ se zǐngídi tɔn; a ka nɔ tunwun fí e é tɔ́n sín ɔ́, abǐ fí e é xwe ɔ́ ǎ. Lě e é nɔ nyí gbɔn nú mɛ e vɔ́ jɔ gbɔn Yɛsinsɛn mɛ ɔ́ nɛ́.” 9 Nikodɛ́mu ka kanbyɔ́ Jezu ɖɔ: “Nɛ̌ nǔ ka sixú nyí mɔ̌ gbɔn?” 10 Jezu yí gbe n'i ɖɔ: “Nɛ̌ hwi mɛ e nyí mɛ̌si ɖaxó ɖokpó nú Izlayɛ́li togun ɔ́, ma ka tunwun nǔ énɛ́ lɛ́ɛ ǎ gbɔn? 11 Ma ɖɔ nǔgbó nú we: Nǔ e mǐ tunwun ɔ́ sín xó ɖɔ wɛ mǐ ɖe, bó ka ɖo nǔ e mǐ mɔ ɔ́ sín kúnnu ɖe wɛ; mi ka ɖi kúnnuɖiɖe mǐtɔn ǎ. 12 Ényí mi ma ɖi nǔ nú mì hwenu e un ɖo gbɛmɛ fí sín xó lɛ́ɛ ɖɔ nú mi wɛ é ǎ ɔ́, nɛ̌ mi ka na wá sixú ɖi nǔ nú mì hwenu e un ná wá ɖo nǔ e ɖo sɛ́xwé lɛ́ɛ sín xó ɖɔ nú mi wɛ é gbɔn? 13 Mɛ ɖěbǔ yi Mawu gɔ̌n kpɔ́n gbeɖé zɛ Gbɛtɔ́ví e jɛ te sín sɛ́xwé ɔ́ wú ǎ. 14 Lě e Mɔyízi sɔ́ dan ɖó jǐ gbɔn ɖo gbětótló mɛ ɔ́, mɔ̌ ɖokpó ɔ́ wɛ è nǎ sɔ́ Gbɛtɔ́ví ɔ́ ɖó jǐ, 15 bónú mɛ e ná ɖi nǔ n'i ɔ́ ma dɔn ó; lo ɔ́, é ní mɔ gbɛ mavɔ mavɔ. 16 Đó Mawu yí wǎn nú gbɛtɔ́ sɔ mɔ̌, bó sɔ́ Vǐɖokpónɔ tɔn jó, bónú mɛ e ná ɖi nǔ n'i lɛ́ɛ ɖěbǔ ma dɔn ó; lo ɔ́, yě bǐ ní mɔ gbɛ mavɔ mavɔ. 17 Mawu sɛ́ Vǐ tɔn dó gbɛ ɔ́ mɛ, bónú é ná wá ɖó hwɛ nú gbɛtɔ́ lɛ́ɛ ǎ; lo ɔ́, é ná wá hwlɛ́n yě gán wútu wɛ. 18 Mɛ e ɖi nǔ nú vǐ ɔ́, Mawu ná ɖó hwɛ n'i ǎ; mɛ e ma ka ɖi nǔ n'i ǎ ɔ́, Mawu ko ɖó hwɛ nú mɛ énɛ́ xóxó, ɖó é ɖi nǔ nú Vǐɖokpónɔ Mawu tɔn ǎ wútu. 19 Nǔ e ka dɔn hwɛɖónúmɛ énɛ́ wá ɔ́ wɛ nyí ɖɔ: wěziza wá gbɛ ɔ́ mɛ, gbɛtɔ́ lɛ́ɛ ka yí wǎn nú zǐnflú hú gǎn wěziza ɔ́, ɖó nǔ nyanya wiwa yětɔn lɛ́ɛ wútu. 20 Nǔnyanyawatɔ́ nɔ gbɛ́ wǎn nú wěziza, bó nɔ lɔn ná sɛkpɔ́ ǎ; ɖó nǔ nyanya e é nɔ wa lɛ́ɛ táá wá jɛ wěxo. 21 Lo ɔ́, mɛ e nɔ xwedó nǔgbó ɖo nǔwiwa tɔn lɛ́ɛ mɛ ɔ́ nɔ́ wá wěziza nu, bónú è nǎ mɔ nǔ jɛ ɖagbewiwa tɔn lɛ́ɛ wú; ɖó nǔwiwa tɔn lɛ́ɛ sɔgbe xá Mawu sín jlǒ.”
Jezu kpódó Jǎan Yɛhwesinlɛnúmɛtɔ́ kpán
22 Énɛ́ gúdo ɔ́, Jezu kpódó ahwanvú tɔn lɛ́ɛ kpó yi Judée yíkúngban jí. Jezu nɔ fínɛ́ xá yě, bó ɖo yɛhwesin lɛ nú mɛ lɛ́ɛ wɛ. 23 Jǎan lɔ ɖo yɛhwesin lɛ nú mɛ wɛ ɖo Ayinɔ́ni, ɖo malín málín mɛ dó Salímu; ɖó sin sukpɔ́ ɖo fínɛ́. Mɛ lɛ́ɛ nɔ yi gɔ̌n tɔn, bɔ é nɔ lɛ yɛhwesin nú yě. 24 È ko wlí Jǎan dó gankpá mɛ hwenɛ́nu ǎ. 25 Énɛ́ ɔ́, Jǎan sín ahwanvú ɖé lɛ́ɛ wá ɖo nǔ dɔn xá Jwifu ɖokpó wɛ, dó wǔsláslá wú. 26 Yě wǎ yi Jǎan gɔ́n, bó ɖɔ n'i ɖɔ: “Mɛ̌si, nya e kpódó hwi kpó nɔ Judɛ́ɛn tɔ ɔ́ gúdo dɔ̌n, bɔ a ɖe kúnnu n'i ɔ́ lɔmɔ̌ ɖo yɛhwesin lɛ nú mɛ wɛ, bɔ mɛ lɛ́ɛ bǐ ɖo gɔ̌n tɔn yi wɛ.” 27 Jǎan ka yí gbe nú yě ɖɔ: “Mawu má ná nǔɖé mɛɖé ǎ ɔ́, é sixú mɔ ǎ. 28 Mi ɖésúnɔ ná ɖe kúnnu nú mì ɖɔ un ɖɔ: ‘Un nyí Klísu ɔ́ ǎ; lo ɔ́, Mawu sɛ́ mì dó, bɔ un jɛ nukɔn n'i.’ 29 Asisúnɔ tɔn wɛ nyí asi ɔ́; lo ɔ́, asisúnɔ sín xɔ́ntɔn e ɖo asisúnɔ ɔ́ kpá, bó ɖo gbe tɔn se wɛ ɔ́, xomɛ nɔ hun i. Mɔ̌ wɛ xomɛ hun nyɛ lɔmɔ̌ din ɔ́ nɛ́; bɔ xomɛhunhun ce ɔ́, nǔ bǐ vɔ ɖ'é wú. 30 É jɛ xá ɖɔ éyɛ́ ní ɖo susu xɔ wɛ, bónú susu nyɛtɔn ná ɖo ɖiɖe kpo wɛ.”
Mɛ e gosín sɛ́xwé é
31 “Mɛ e gosín sɛ́xwé ɔ́ hú gǎn mɛ bǐ. Mɛ e ka ɖo ayǐkúngban jí ɔ́, ayǐkúngban jí tɔn wɛ é nyí, bó nɔ́ ɖɔ ayǐkúngban jí sín xó. Hǔn, mɛ e gosín sɛ́xwé wá ɔ́ hú gǎn mɛ bǐ nǔgbó. 32 Éyɛ́ ɔ́, nǔ e é mɔ ɔ́, kpódó nǔ e é se ɔ́ kpó sín kúnnu wɛ é nɔ ɖe; bɔ mɛ ɖěbǔ ka ɖi nǔ nú kúnnuɖiɖe tɔn ǎ. 33 Mɛ ɖěbǔ yí kúnnuɖiɖe tɔn ɔ́, mɛ ɔ́ nɔ ɖe xlɛ́ ɖɔ nǔ e Mawu ɖɔ ɔ́, nǔgbó wɛ. 34 Mɛ e Mawu sɛ́ dó ɔ́, Mawuxó wɛ é nɔ ɖɔ; ɖó Mawu nɔ ɖó jlɛ̌ nú Yɛ tɔn e é nɔ ná mɛ e é sɛ́ dó ɔ́ ǎ. 35 Tɔ́ ɔ́ yí wǎn nú Vǐ ɔ́, bó sɔ́ nǔ lɛ́ɛ bǐ dó alɔ tɔn mɛ. 36 Mɛ e ɖi nǔ nú Vǐ ɔ́, mɔ gbɛ mavɔ mavɔ; mɛ e ma ka se tónú nú vǐ ɔ́ ǎ ɔ́, é ná mɔ gbɛ mavɔ mavɔ ǎ; lo ɔ́, xomɛsin Mawu tɔn ɖo jǐ tɔn.”
Jezu kpódó nyɔ̌nu Samalíinu ɖé kpán
1 Falizyɛn lɛ́ɛ se ɖɔ Jezu ɖo ahwan mɔ hú Jǎan wɛ, bó lɛ́ ɖo yɛhwesin lɛ nú mɛ hú Jǎan wɛ. 2 Nǔgbó ɔ́, Jezu ɖésú lɛ yɛhwesin nú mɛɖé ǎ, ahwanvú tɔn lɛ́ɛ wɛ ɖo yɛhwesin lɛ nú mɛ wɛ. 3 Ée Jezu tunwun ɖɔ Falizyɛn lɛ́ɛ se mɔ̌ ɔ́, é gosín Judée bo lɛ́ kɔ yi Galilée. 4 Ée é ka nyí Samalíi wɛ é ɖó ná gbɔn dín yi Galilée ɔ́, 5 é wá yi jɛ Samalíi toxo ɖé mɛ, bɔ è nɔ ylɔ́ toxo ɔ́ ɖɔ Sicáa; Sicáa lín dó gle e Jakɔ́bu ná vǐ tɔn Jozɛ́fu é ǎ. 6 Fínɛ́ wɛ sɛ́tɔ Jakɔ́bu tɔn ɖe. Jezu ɖo fínɛ́ jɛ wɛ gan wěwe mɛ mɔ̌. Nǔ cikɔ n'i, bɔ é gbɔ bo jínjɔ́n tɔ ɔ́ tó. 7 -8 Ahwanvú tɔn lɛ́ɛ ka yi nǔɖuɖu xɔ gbé ɖo toxo mɛ hwenɛ́nu. Hwenɛ́nu ɖokpó ɔ́, nyɔ̌nu Samalíinu ɖé wá sin dun gbé, bɔ Jezu ɖɔ n'i ɖɔ: “Nǎ sin mì má nu.” 9 Nyɔ̌nu ɔ́ ka yí gbe nú Jezu ɖɔ: “Nɛ̌ hwi mɛ e nyí Jwifu ɔ́ ka wá ɖo sin byɔ́ nyɛ mɛ e nyí Samalíinu é wɛ gbɔn?” (Đó Jwifu lɛ́ɛ nɔ jɛ kpɔ́ xá Samalíinu lɛ́ɛ ǎ.) 10 Jezu ka yí gbe n'i ɖɔ: “Ényí a ko tunwun nǔ e Mawu nɔ ná mɛ ɔ́, bó tunwun nyɛ mɛ e ɖɔ nú we ɖɔ: nǎ sin mì ma nu ɔ́ wɛ ɔ́, hwi ɖésú wɛ ná ko byɔ́ sin mì bɔ un ná ko ná sin e nɔ ná gbɛ mɛ ɔ́ we.” 11 Nyɔ̌nu ɔ́ ka ɖɔ nú Jezu ɖɔ: “Mɛɖaxó! A ma ka ɖó nǔɖé, bó ná dó dun sin ɔ́ ná nɛ́, tɔ ɔ́ ka lɛ́ gɔ́ngɔ́n. Fítɛ́ a ka ná ba sin e nɔ ná gbɛ mɛ é sín? 12 Tɔ́gbó mǐtɔn Jakɔ́bu wɛ kun tɔ élɔ́ nú mǐ. É ɖésúnɔ nu sin tɔn; vǐ tɔn lɛ́ɛ kpódó kanlin tɔn lɛ́ɛ kpó nu sin tɔn. Hwɛ lin ɖɔ émí hú gǎn ɛ wɛ a?” 13 Jezu ka yí gbe n'i ɖɔ: “Mɛɖěbǔ nu sin élɔ́ ɔ́, kɔ ná lɛ́ xú i. 14 Mɛ e ka ná nu sin e nyɛ ná ná ɛ ɔ́, kɔ sɔ́ ná xú i gbeɖé ǎ. Sin e nyɛ ná ná ɛ ɔ́, ná húzú tɔjɔtɛn e mɛ sin e nɔ ná gbɛ mavɔ mavɔ mɛ é ná nɔ sa sín é.” 15 Énɛ́ ɔ́, nyɔ̌nu ɔ́ ɖɔ nú Jezu ɖɔ: “Mɛɖaxó, kɛnklɛ́n bó ná sin énɛ́ mì, nú kɔ ma sɔ́ xú mì, bónú ma lɛ́ tɔ́n sin dun gbé wá fí ó.” 16 Jezu ka ɖɔ n'i ɖɔ: “Yi ylɔ́ asú towe wá fí.” 17 Bɔ nyɔ̌nu ɔ́ yí gbe n'i ɖɔ: “Un ma ɖó asú nɛ́;” bɔ Jezu ɖɔ n'i ɖɔ: “Un ɖó asú ǎ e a ɖɔ ɔ́, xó nǔgbó wɛ nyí bɔ a ɖɔ. 18 Đó a ko da asú atɔ́ɔ́n wá yi, bɔ mɛ e kpódó hwi kpó ɖo yiyi wɛ din ɔ́ lɔ nyí asú towe ǎ. Xó énɛ́ e a ɖɔ ɔ́, nǔgbó wɛ.” 19 Nyɔ̌nu ɔ́ ɖɔ nú Jezu ɖɔ: “Mɛɖaxó, un mɔ din ɖɔ gbeyíɖɔ Mawu tɔn wɛ a nyǐ. 20 Tɔ́gbó mǐtɔn lɛ́ɛ sɛn Mawu ɖo só élɔ́ jí, bɔ mi mɛ Jwifu lɛ́ɛ ka nɔ ɖɔ fí e è ɖǒ na sɛn Mawu ɖe ɔ́ wɛ nyí Jeluzalɛ́mu.” 21 Jezu ka ɖɔ n'i ɖɔ: “Nyɔ̌nu; ɖi nǔ nú mì; hwenu ɖo nǎ su wɛ, bɔ é sɔ́ ná nyí só élɔ́ jí wɛ mi ná nɔ sɛn Mawu Tɔ́ ɔ́ ɖe ǎ, é ka sɔ́ ná lɛ́ nyí Jeluzalɛ́mu wɛ mi ná nɔ sɛn ɛ ɖe ǎ. 22 Mi mɛ Samalíinu lɛ́ɛ tunwun nǔ e sɛn wɛ mi ɖe ɔ́ ǎ; lo ɔ́, mǐ mɛ Jwifu lɛ́ɛ tunwun ɖɔ hwlɛngán ɔ́ Jwifu lɛ́ɛ gɔ́n wɛ é gosín. 23 Hwe ɔ́ nu ɖo nǎ su wɛ, éɖíe ka ko su e, bɔ Mawusɛntɔ́ titewungbe lɛ́ɛ ná sɛn Tɔ́ ɔ́ gbɔn hlɔ̌nhlɔ́n Yɛ ɔ́ tɔn mɛ, bó ná sɛn ɛ ɖo nǔgbó mɛ. Đó Mawusɛntɔ́ mɔ̌hunkɔ lɛ́ɛ ba wɛ Tɔ́ ɔ́ ɖe. 24 Mawu ɔ́, Yɛ wɛ é nyí; bɔ mɛ e ná sɛn ɛ lɛ́ɛ ɖó ná sɛn ɛ gbɔn hlɔ̌nhlɔ́n Yɛ ɔ́ tɔn mɛ, bó ná sɛn ɛ ɖo nǔgbó mɛ.” 25 Nyɔ̌nu ɔ́ ka ɖɔ n'i ɖɔ: “Un nywɛ́ ɖɔ Mɛsíya ɔ́ ɖó ná wá: (Mɛsíya ɔ́ sín tínmɛ wɛ nyí Klísu.) Bɔ hwenu e éyɛ́ ná wá ɔ́, é ná tín nǔ bǐ mɛ nú mǐ.” 26 Bɔ Jezu ɖɔ n'i ɖɔ: “Nyɛ mɛ e nyí mɔ̌ ɔ́ ɖíe ɖo xó ɖɔ nú we wɛ e.” 27 Xó énɛ́ ɖɔ wɛ Jezu ɖe kɛ́ɖɛ́ bɔ ahwanvú tɔn lɛ́ɛ lɛ́ kɔ sín toxo mɛ wá. Ée yě mɔ ɖɔ é ɖo xó ɖɔ xá nyɔ̌nu wɛ ɔ́, é kpácá yě tlala; lo ɔ́, yě ɖě ká kanbyɔ́ ɛ ɖɔ: “Étɛ́ kanbyɔ́ nyɔ̌nu ɔ́ wɛ a ɖe.” Abǐ “Étɛ́ sín xó ɖɔ xá ɛ wɛ a ɖe a jí ǎ.” 28 Nyɔ̌nu ɔ́ jó tɔyizɛ́n tɔn dó, bo yi toxo ɔ́ mɛ, bó ɖɔ nú mɛ lɛ́ɛ ɖɔ: 29 “Mi vɛ́ wá kpɔ́n! Nya ɖě ɖíe! É ɖɔ nǔ e un wa ɔ́ bǐ nú mì. Klísu ɔ́ ná ko wɛ ǎ cé?” 30 Ée mɛ lɛ́ɛ se mɔ̌ ɔ́, yě tɔ́n sín toxo ɔ́ mɛ nǔgbó bó ɖidó Jezu gɔ́n. 31 Hwenɛ́nu wɛ ahwanvú Jezu tɔn lɛ́ɛ jɛ vo sa n'i jí ɖɔ: “Mɛ̌si, bo ka ɖu nǔ bó!” 32 Jezu ka yí gbe nú yě ɖɔ: “Nǔɖuɖu e mi ma tunwun ǎ ɔ́ wɛ ɖo así ce.” 33 Ée ahwanvú tɔn lɛ́ɛ se mɔ̌ ɔ́, yě jɛ ɖiɖɔ ɖo yěɖée tɛ́ntin jí ɖɔ: “Mɛ ɖé wɛ ka ko hɛn nǔɖuɖu wá n'i a?” 34 Jezu ka ɖɔ nú yě ɖɔ: “Nǔɖuɖu ce wɛ nyí ɖɔ ma bló jlǒ mɛ e sɛ́ mì dó ɔ́ tɔn, bó ka wa azɔ̌ e é zɔ́n mì ɔ́ yi kpé. 35 Mi nɔ ɖɔ: ‘káká nú sun ná yi ɛnɛ mɔ̌ din ɔ́, è nǎ ya jinukún.’ Nyɛ ka ɖo ɖiɖɔ nú mi wɛ ɖɔ mi ní kpɔ́n gle lɛ́ɛ ganjí; jinukún lɛ́ɛ ko myá go, bó kó su yiya. 36 Nukún-yatɔ́ nɔ yí azɔ̌kwɛ́ tɔn, bó nɔ́ kplé nǔkún lɛ́ɛ nú gbɛ mavɔ mavɔ, bónú nǔdótɔ́ ɔ́ kpódó nukún-yatɔ́ ɔ́ kpó bǐ ná kplé, bó ná j'awǎ. 37 Hǔn nǔgbó ɖɔ wɛ è ɖe, bo ɖɔ: ‘Mɛ ɖěvo nɔ dó nǔ, bɔ mɛ ɖěvo nɔ ya’. 38 Un sɛ́ mi dó nukún ya gbé ɖo gle e mɛ mi ma wa azɔ̌ ɖe ǎ é. Mɛ ɖěvo lɛ́ɛ wɛ ko wa azɔ̌ ɖo gle ɔ́ mɛ, bɔ mi wá ɖo le tɔn ɖu wɛ.” 39 Samalíinu e ɖo toxo énɛ́ mɛ lɛ́ɛ gěgé ɖi nǔ nú Jezu; ɖó kúnnu e nyɔ̌nu ɔ́ ɖe nú Jezu ɔ́ wútu. É wɛ nyí ɖɔ: “É ɖɔ nǔ e un wa lɛ́ɛ bǐ nú mì.” 40 Énɛ́ ɔ́ wɛ zɔ́n, bɔ ée Samalíinu lɛ́ɛ wá yi mɔ Jezu ɔ́, yě sa vo n'i ɖɔ é ní nɔ émí gɔ́n kpɛɖé bɔ Jezu nɔ yě gɔ̌n xɔ azǎn we; 41 mɛ gěgé lɛ́ ɖi nǔ nú Jezu ɖó xó e é ɖésúnɔ ɖɔ nú yě ɔ́ wútu. 42 Yě ɖɔ nú nyɔ̌nu ɔ́ ɖɔ: “É sɔ́ nyí xó e a ɖɔ nú mǐ ɔ́ wú wɛ mǐ ɖi nǔ ǎ, lo ɔ́, é ɖɔ xó bɔ mǐ ɖésúnɔ se, bó tunwun ɖɔ é wɛ nyí Mɛhwlɛ́ngántɔ́ gbɛ ɔ́ tɔn nǔgbó.”
Jezu gbɔ azɔn nú axɔ́súzɔ́watɔ́ ɖaxó ɖé sín vǐ
43 Ée Jezu nɔ Samalíinu lɛ́ɛ gɔ́n xɔ azǎn we ɔ́, é gosín fínɛ́, bó ɖidó Galilée azǎn tɔn atɔngɔ́ ɔ́ gbe. 44 É ɖésú ka ko ɖɔ ɖ'ayǐ ɖɔ mɛɖé kún nɔ sí gbeyíɖɔ Mawu tɔn ɖé ɖo to é ɖésúnɔ tɔn mɛ ó. 45 Galiléenu lɛ́ɛ gěgé yi ɖu Dǐndínwáyixwe ɖo Jeluzalɛ́mu, bó mɔ nǔ e Jezu wa ɖo xwe ɔ́ hwenu lɛ́ɛ bǐ; énɛ́ ɔ́ wú wɛ ée é wá Galilée ɔ́, to ɔ́ mɛ nu lɛ́ɛ yí jǒnɔ tɔn ganjí. 46 -47 Axɔ́súzɔ́watɔ́ ɖé ká tíin, bó nɔ́ nɔ Kafaanawúmu, bɔ vǐ tɔn ɖo azɔn jɛ wɛ. Ée é se ɖɔ Jezu gosín Judée, bo wá xwe Galilée ɔ́, é sɔ́nǔ, bo yi mɔ ɛ, ɖo Kana, Galilée yíkúngban jí fí e Jezu sɔ́ sin dó húzú vɛ̌ɛn ná ɖe é. É dó kɛnklɛ́n n'i, ɖɔ é ní wá yi gbɔ azɔn nú vǐ émítɔn e ɖo kúzán jí ɖo Kafaanawúmu é. 48 Jezu ka ɖɔ n'i ɖɔ: “Ényí mi ma ko mɔ nǔjíjlɛ́ lɛ́ɛ kpódó nǔdábaɖa lɛ́ɛ kpó ǎ ɔ́, mi ná ɖi nǔ ǎ.” 49 Nya ɔ́ ká yí gbe n'i ɖɔ: “Mɛɖaxó, kɛnklɛ́n, yá wǔ bó wá kpɔ́n vǐ ce nú mì, bónú é ma kú ó.” 50 Jezu ka yí gbe n'i ɖɔ: “Yi xwé, vǐ towe ɖo gbɛ.” Nya ɔ́ ka ɖi xó e Jezu ɖɔ n'i ɔ́, bó ɖidó xwé. 51 Xwé li jí ɔ́ wɛ é ɖe, bɔ mɛsɛntɔ́ tɔn lɛ́ɛ wá kpé e, bó ɖɔ n'i ɖɔ: “Vǐ towe ɖo gbɛ!” 52 Bɔ nya ɔ́ kanbyɔ́ yě ɖɔ: “Hwetɛ́nu mɔ̌ wɛ azɔn ɔ́ ka jɛ te kpɔ́n n'i jí?” Bɔ yě yí gbe n'i ɖɔ: “Sɔ hwemɛ, gan ɖokpó mɛ mɔ̌ wɛ avivɔ ɔ́ kɔ́n n'i.” 53 Vǐtɔ́ ɔ́ mɔ ɖɔ hwenɛ́nu pɛ́pɛ́pɛ́ wɛ Jezu ɖɔ: “Vǐ towe ɖo gbɛ.” Bɔ é kpódó xwédo tɔn bǐ kpó ɖi nǔ nú Jezu. 54 Nǔ wegɔ́ e Jezu jlɛ́ hwenu e é lɛ́ kɔ wá Judée, Galilée yíkúngban jí é nɛ́.
Jezu gbɔ azɔn nú nya ayǐsónɔ ɖé
1 Énɛ́ ɔ́ gúdo ɔ́, Jwifu lɛ́ɛ ja sinsɛn sín xwe yětɔn ɖokpó ɖu gbé, bɔ Jezu yi Jeluzalɛ́mu. 2 Jeluzalɛ́mu fínɛ́, ɖo lɛ̌ngbɔ́ lɛ́ɛ sín hɔntogbó kpá ɔ́, è kun tɔ e mɛ è nɔ lɛ wǔ ɖe ɔ́ ɖokpó ɖó fínɛ́, bɔ è nɔ ylɔ́ dó Ebléegbe mɛ ɖɔ Bɛtizata; è mɛ xɔ gaga axixwɛ ɖɔhun atɔ́ɔ́n ɖé lɛ́ɛ gbɔn tɔ ɔ́ tó. 3 Azinzɔnnɔ gěgé nɔ ɖo ayǐmlɔ́mlɔ́ ɖo xɔ énɛ́ lɛ́ɛ sá: Nukúntíntɔ́nnɔ lɛ́ɛ, sékúnɔ lɛ́ɛ, kpódó mɛ e xwe ayǐsó lɛ́ɛ kpó; bɔ yě bǐ nɔ ɖo te kpɔ́n hwenu e sin ɔ́ ná xo dó ɔ́. 4 Đó wɛnsagun Mawu tɔn ɖokpó nɔ jɛ te hwe ɖé lɛ́ɛ nu, bó nɔ wá xo tɔ ɔ́. Énɛ́ ɔ́, nú sin ɔ́ dán wǔ lě tlóló ɔ́, azinzɔnnɔ e jɛ nukɔn, bó jɛ tɔ ɔ́ mɛ ɔ́, é ná bó ɖo azɔn ɖěbǔ jɛ wɛ ɔ́, azɔn tɔn nɔ gbɔ. 5 Azinzɔnnɔ ɖé ka ɖo fínɛ́, bó ko ɖo azɔn jɛ wɛ sín xwe gbantɔ́n-nukún-atɔn (38 ) ɖíe. 6 Ée Jezu mɔ azinzɔnnɔ énɛ́ ɔ́ ɖo ayǐmlɔ́mlɔ́ ɖo fínɛ́, bó ka tunwun ɖɔ é kó ɖo tɔ ɔ́ tó din ɔ́, é ko lín ɔ́, é kanbyɔ́ ɛ ɖɔ: “A jlǒ bónú azɔn towe ní gbɔ a?” 7 Azinzɔnnɔ ɔ́ ka yí gbe n'i ɖɔ: “Aklúnɔ, un ɖó mɛɖé ɖo fí bɔ é ná sɔ́ mì dó sin ɔ́ mɛ hwenu e é nɔ xo dó ɔ́ ǎ; hwenu e un nɔ ɖo gǎn dó wɛ ɖɔ ma yi jɛ mɛ ɔ́, mɛ ɖěvo nɔ ko jɛ tɔ ɔ́ mɛ jɛ nukɔn nú mì.” 8 Bɔ Jezu ɖɔ n'i ɖɔ: “Sí te, sɔ́ zan towe bo zun zɔnlin.” 9 Azɔn ɖokpó ɔ́, azɔn tɔn gbɔ, bɔ é zé zan tɔn bó jɛ zɔnlin zun jí; gbe énɛ́ gbe ká nyí Jwifu lɛ́ɛ sín gbɔjɛzán gbe. 10 Énɛ́ ɔ́ wútu ɔ́, Jwifugán lɛ́ɛ ɖɔ nú nya e azɔn gbɔ ná ɔ́ ɖɔ: “Égbé ɔ́, gbɔjɛzán gbe wɛ; a ɖǒ ná zé zan gbɔjɛzán gbe ǎ, sɛ́n mǐtɔn gbɛ́.” 11 Nya ɔ́ ká yí gbe nú yě ɖɔ: “Mɛ e gbɔ azɔn nú mì ɔ́ wɛ ɖɔ nú mì ɖɔ: ‘Zě zan towe bo zun zɔnlin.’ ” 12 Yě ká kanbyɔ́ ɛ ɖɔ: “Mɛ̌ ká nyí mɛ e ɖɔ nú we ɖɔ: ‘Zě zan towe bo ɖi zɔnlin’ ɔ́?” 13 Lo ɔ́, nya ɔ́ mɔ nǔ jɛ mɛ e gbɔ azɔn n'i ɔ́ wú ǎ, ɖó Jezu gosín fínɛ́ ɖó agun e kplé ɖo fínɛ́ ɔ́ wútu. 14 Énɛ́ ɔ́ gúdo ɔ́, Jezu wá mɔ mɛ e é gbɔ azɔn ná ɔ́ ɖo sinsɛnxɔ mɛ, bo ɖɔ n'i ɖɔ: “Đǒtó mì! Ée azɔn towe gbɔ din ɔ́, ma sɔ́ hu hwɛ ɖě ó, é ma nyí mɔ ǎ ɔ́, nǔ e nylá hú mɔ ɔ́ ná lɛ́ wá gbo we.” 15 Bɔ nya ɔ́ gosín sinsɛnxɔ ɔ́ mɛ, bó ɖɔ nú Jwifugán lɛ́ɛ ɖɔ Jezu wɛ gbɔ azɔn nú émí. 16 Nǔ e wú wɛ Jwifugán lɛ́ɛ jɛ Jezu gbé nya jí ɔ́ nɛ́, ɖó gbɔjɛzán gbe wɛ é wa nǔ énɛ́. 17 Jezu ka ɖɔ nú yě ɖɔ: “Tɔ́ ce ɖo azɔ̌ wa wɛ tɛgbɛ, bɔ nyɛ lɔ ɖo azɔ̌ wa wɛ.” 18 Xó énɛ́ wútu wɛ Jwifugán lɛ́ɛ ma sɔ́ jló ná mɔ Jezu gbɔ ǎ, bó ɖo biba ná hu i wɛ; é ka nyí gbɔjɛzán e é ɖu su na ɔ́ kɛ́ɖɛ́ wú wɛ ǎ; lo ɔ́, é nɔ́ ɖɔ Mawu nyí Tɔ́ émítɔn, bó nɔ́ sɔ́ éɖée ɖó Mawu há jí.
Acɛkpikpa Jezu tɔn
19 Jezu yí xó, bó ɖɔ nú yě ɖɔ: “Ma ɖɔ nǔgbó nú mi; Vǐ ɔ́ nɔ wa nǔɖé é ɖésúnɔ ǎ; nǔ e é mɔ bɔ Tɔ́ ɔ́ ɖo wiwa wɛ ɔ́ jɛ́n é lɔmɔ̌ nɔ wa; bɔ nǔ e Tɔ́ ɔ́ bló ɔ́, Vǐ ɔ́ lɔmɔ̌ nɔ bló. 20 Đó Tɔ́ ɔ́ yí wǎn nú Vǐ ɔ́, bo nɔ ɖe nǔwiwa tɔn lɛ́ɛ bǐ xlɛ́ ɛ; é ka na lɛ́ wá ɖe nǔwiwa e hú gǎn élɔ́ lɛ́ɛ é xlɛ́ ɛ, bɔ é ná kpácá mi. 21 Đó lě e Tɔ́ ɔ́ nɔ fɔ́n mɛkúkú lɛ́ɛ, bó nɔ ná yě gbɛ gbɔn ɔ́, mɔ̌ ɖokpó ɔ́ wɛ Vǐ ɔ́ lɔmɔ̌ nɔ ná gbɛ mɛ e jló e lɛ́ɛ gbɔn. 22 Tɔ́ ɔ́ nɔ ɖɔ hwɛ xá mɛɖé ǎ. É sɔ́ hwɛɖiɖɔ ɔ́ bǐ dó así nú Vǐ ɔ́; 23 bónú gbɛtɔ́ lɛ́ɛ bǐ ná sɔ́ Vǐ ɔ́ su, lě e yě nɔ sɔ́ Tɔ́ ɔ́ su gbɔn é ɖɔhun. Mɛ e ma sɔ́ Vǐ ɔ́ su ǎ ɔ́, é sɔ́ Tɔ́ e sɛ́ ɛ dó ɔ́ lɔ su ǎ. 24 “Má ɖɔ nǔgbó nú mi: mɛ e ɖótó xó ce, bó ɖi nǔ nú mɛ e sɛ́ mì dó ɔ́ kó mɔ gbɛ mavɔ mavɔ, bɔ è sɔ́ ná ɖó hwɛ n'i ǎ, ɖó é kó xo kú zlɛ́ wá gbɛ. 25 Má ɖɔ nǔgbó nú mi: hwe ɔ́ nu ɖo na su wɛ; éɖíe ka ko su e, bɔ mɛkúkú lɛ́ɛ ná se Mawu ví ɔ́ sín gbe; énɛ́ ɔ́, mɛ e ná se gbe tɔn lɛ́ɛ ná mɔ gbɛ. 26 Đó lě e Tɔ́ ɔ́ ɖó acɛ, bó nɔ ná gbɛ mɛ gbɔn ɔ́, mɔ̌ ɖokpó ɔ́ wɛ é ná ɛ acɛ, bɔ élɔ́ ná ná gbɛ mɛ. 27 Mawu ná acɛ ɛ, bɔ é ná ɖɔ hwɛ xá gbɛtɔ́ lɛ́ɛ, ɖó Gbɛtɔ́ví wɛ é nyí. 28 Hwenu e mɛkúkú lɛ́ɛ ná se gbe tɔn, bó ná fɔ́n ɔ́ ko sɛ yá; mi ma nú é kpácá mi ó. 29 Yě ná tɔ́n sín yɔdo yětɔn lɛ́ɛ mɛ; mɛ e wa nǔ ɖagbe lɛ́ɛ ɔ́, Mawu ná fɔ́n yě sín kú, bó ná ná yě gbɛ mavɔ mavɔ. Lo ɔ́, mɛ e wa nǔ nyanya lɛ́ɛ ná fɔ́n sín kú, bónú Mawu ná ɖó hwɛ nú yě.”
Nǔ e ɖe xlɛ́ ɖɔ Jezu nyí Mawu ví lɛ́ɛ é
30 “Un sixú wa nǔɖé ɖo nyɛ ɖésúnɔ sín acɛ mɛ ǎ. Nǔ e Mawu ɖɔ nú mì ɔ́ wɛ un nɔ xwedó dó ɖɔ hwɛ xá mɛ, bɔ un nɔ dó hwɛjijɔ, ɖó jlǒ nyɛ ɖésúnɔ tɔn wɛ un nɔ wa ǎ; lo ɔ́, mɛ e sɛ́ mì dó ɔ́ sín jlǒ wɛ un nɔ wa. 31 “Ényí nyɛ ɖésú wɛ na ɖe kúnnu nú nyɛɖée ɔ́, xó e ɖɔ wɛ un ɖe ɔ́ sixú ɖe xlɛ́ ɖɔ nǔgbó ɖɔ wɛ un ɖe ǎ. 32 Mɛ ɖěvo wɛ ka ɖo kúnnu ɖe nú mì wɛ, bɔ un tunwun ɖɔ xó e é ɖɔ dó wútu ce lɛ́ɛ nyí nǔgbó. 33 Mi sɛ́ mɛ dó Jǎan, bɔ é ɖe kúnnu nú nǔgbó ɔ́. 34 É ka nyí kúnnuɖiɖe gbɛtɔ́ tɔn sín nǔ wɛ hu dó mì ǎ; lo ɔ́, un ɖɔ xó énɛ́ ɔ́, bónú Mawu ná hwlɛ́n mi gán. 35 Jǎan cí zogbɛ́n e ɖo títá é ɖɔhun nú mi, bɔ mi yí gbe bó j'awǎ kpɛɖé ɖo wěziza tɔn nu. 36 Nǔ ɖěvo ka ɖo kúnnu ɖe nú mì wɛ, bó hú gǎn kúnnu e Jǎan ɖe nú mì é. Azɔ̌ e Tɔ́ ce sɔ́ dó así nú mì, bɔ un ɖo wiwa wɛ lɛ́ɛ ɖe kúnnu nú mì bo ɖe xlɛ́ ɖɔ é wɛ sɛ́ mì dó nǔgbó. 37 Tɔ́ e sɛ́ mì dó ɔ́ ɖésú ɖe kúnnu nú mì. Mi ka se gbe tɔn kpɔ́n ǎ; mi ka mɔ ɛ kpɔ́n ǎ; 38 mi ka hɛn xó tɔn ayi mɛ ǎ; ɖó mi ɖi nǔ nú mɛ e é sɛ́ dó ɔ́ ǎ. 39 Mi nɔ ɖo Mawuxówéma ɔ́ kplɔ́n wɛ, ɖó mi nɔ lin ɖɔ é mɛ wɛ émí ná mɔ gbɛ mavɔ mavɔ ɖe; lo ɔ́, Mawuxó e è wlán lɛ́ɛ ɔ́, nyɛ wɛ yě ɖe kúnnu ná. 40 Có mi ka jló ná wá gɔ̌n ce, bó ná mɔ gbɛ jɔ gbɛ ɔ́ ǎ. 41 “Gbɛtɔ́ lɛ́ɛ ní kpa susu nú mì ba wɛ un ɖe ǎ. 42 Đó un tunwun mi, bó mɔ ɖɔ mi kún yí wǎn nú Mawu ó. 43 Tɔ́ ce sín nyǐkɔ mɛ wɛ un wá dó, bɔ mi ka yí mì ǎ; é ka nyí mɛ ɖěvo wɛ ka wá ɖo nyǐkɔ é ɖésúnɔ tɔn mɛ ɔ́, mi ná yí i. 44 Mi mɛ e nɔ ɖo susu kpa nú miɖée wɛ, bó ma nɔ ba nú Mawu ná sɔ́ mi su ǎ lɛ́ɛ ɔ́, nɛ̌ mi ka sixú ɖi nǔ gbɔn? 45 Mi ma lin ɖɔ nyɛ wɛ ná dó hwɛ mi ɖo Tɔ́ ce nukɔn ó; Mɔyízi e wú wɛ mi ɖeji dó ɔ́ wɛ ná dó hwɛ mi ɖo Tɔ́ ce nukɔn. 46 Ényí mi ko ɖi nǔ nú Mɔyízi wɛ ɔ́, mi ná ko ɖi nǔ nú nyɛ lɔmɔ̌; ɖó nǔ e Mɔyízi wlán ɔ́, nyɛ wú wɛ é ɖɔ xó dó. 47 Ée mi ma ka ɖi nǔ e Mɔyízi wlán lɛ́ɛ ǎ ɔ́, nɛ̌ mi ka sixú ɖi xó ce lɛ́ɛ gbɔn?”
Jezu ná nǔɖuɖu gbɛtɔ́ děgba ɖě afatɔ́n (5.000 )
1 Énɛ́ ɔ́ gúdo ɔ́, Jezu dó asá Galilée tɔ e è nɔ lɛ́ ylɔ́ ɖɔ Tibɛliadi ɔ́, bó jɛ agě ɖě ɔ́ jí dɔ̌n. 2 Ahwan wɔ̌buwɔ́bú ɖé xwedó Jezu, ɖó mɛ lɛ́ɛ mɔ nǔ e jlɛ́ wɛ é ɖe, bó ɖo azɔn gbɔ nú mɛ lɛ́ɛ wɛ é. 3 Jezu xá só ɖé jí, lobo jínjɔ́n ayǐ ɖo fínɛ́ é kpódó ahwanvú tɔn lɛ́ɛ kpó. 4 Jwifu lɛ́ɛ sín xwe e è nɔ ylɔ́ ɖɔ Dǐndínwáyi ɔ́ ko sɛ yá. 5 Jezu zé ta bó mɔ ahwan wɔ̌buwɔ́bú ɖé ja gɔ̌n tɔn, lobo ɖɔ nú Filípu ɖɔ: “Fítɛ́ mǐ ná mɔ nǔɖuɖu xɔ ɖe, bɔ é ná kpé mɛ énɛ́ lɛ́ɛ bǐ?” 6 Jezu ɖɔ mɔ̌, bó ná dó kpɔ́n nǔ e Filípu ná ɖɔ ɔ́, ɖó é ɖésúnɔ kó tunwun nǔ e wa gbé é ja é. 7 Filípu ka yí gbe n'i ɖɔ: “È na bo sɔ́ gankwɛ́ afɔɖé (200 ) ɖó te, bó dó xɔ nǔɖuɖu ná ɔ́, é ná kpé nú yě ɖokpó ɖokpó ná mɔ kpɛɖé kpɛɖé ǎ.” 8 Ahwanvú Jezu tɔn ɖěvo e è nɔ ylɔ́ ɖɔ Andlé, bɔ é nyí Sinmɔ́ɔ Piyɛ́ɛ sín nɔví ɔ́ ɖɔ n'i ɖɔ: 9 “Nyaví ɖé ɖo fí, bó hɛn wɔ̌xúxú atɔ́ɔ́n kpódó hweví we kpó; fítɛ́ nǔ énɛ́ ka sixú jɛ nú mɛ tobutóbú élɔ́ lɛ́ɛ?” 10 Jezu ka ɖɔ nú ahwanvú tɔn lɛ́ɛ ɖɔ: “Mi ɖɔ nú mɛ lɛ́ɛ bǐ nú yě ní jínjɔ́n ayǐ.” Gběhan wɛ́lɛ́wɛ́lɛ́ ka sukpɔ́ ɖo tɛn énɛ́ ɔ́ mɛ, bɔ yě bǐ jínjɔ́n jí. Súnnu mɛxó e ɖo yě mɛ lɛ́ɛ ná yi děgba ɖě afatɔ́n (5.000 ) mɔ̌. 11 Jezu ka fɔ wɔ̌xúxú lɛ́ɛ, bó dó kú nú Mawu, bó má nú mɛ e jínjɔ́n ayǐ ɖo fínɛ́ lɛ́ɛ; mɔ̌ ɖokpó ɔ́, é má hweví lɛ́ɛ nú yě, bɔ mɛ ɖokpó ɖokpó yí lě e é jló e gbɔn é. 12 Đěe yě bǐ ɖu nǔ bó gɔ́ xo ɔ́, Jezu ɖɔ nú ahwanvú tɔn lɛ́ɛ ɖɔ: “Mi bɛ́ nǔ e yě ɖu kpo lɛ́ɛ bǐ, bónú ɖě ma yi gbě ó.” 13 Ahwanvú tɔn lɛ́ɛ ka bɛ́ nǔ e yě ɖu kpo, ɖo wɔ̌xúxú atɔ́ɔ́n lɛ́ɛ mɛ é bǐ, bɔ é gɔ́ xasun wěwe. 14 Ée mɛ lɛ́ɛ mɔ nǔ énɛ́ e Jezu jlɛ́ ɔ́, yě ɖɔ: “Gbeyíɖɔ Mawu tɔn e ɖó ná wá gbɛ ɔ́ mɛ ɔ́ wɛ é nyí nǔgbó.” 15 Ée Jezu mɔ ɖɔ yě ná wá sɔ́ émí kpó hlɔ̌nhlɔ́n kpó, bó ná sɔ́ émí axɔ́sú ɔ́, é gosín fínɛ́, bó tunta sókan ɔ́ mɛ é ɖokpónɔ.
Jezu ɖi zɔnlin gbɔn tɔ jí
16 Ée gbadanu wá su ɔ́, ahwanvú Jezu tɔn lɛ́ɛ jɛ te wá Galilée tɔ ɔ́ tó, 17 bó byɔ́ tɔjíhún mɛ, bó tunta Kafaanawúmu; zǎn ko kú, bɔ Jezu ka ko xwedó yě wú ǎ. 18 Tɔ ɔ́ ɖo adǎn jí hwenɛ́nu, ɖó jɔhɔn ɖaxó ɖé ɖo nyinyi wɛ. 19 Hwenu e ahwanvú Jezu tɔn lɛ́ɛ ɖo hǔn ɔ́ kun wɛ, bó ko bló kilomɛ́tlu atɔ́ɔ́n abǐ ayizɛ́n mɔ̌ ɔ́, yě mɔ Jezu, bɔ é ɖo zɔnlin ɖi wɛ gbɔn tɔ ɔ́ jí ja yě gɔ̌n, bɔ xɛsi jɛ yě jí. 20 É ka ɖɔ nú yě ɖɔ: “Nyɛ wɛ, mi ma ɖi xɛsi ó.” 21 Bɔ ée yě jló ná sɔ́ ɛ dó hǔn ɔ́ mɛ ɔ́, tlóló ɔ́, hǔn ɔ́ yi glín dó tɔ ɔ́ tó, fí e yě xwe é.
Mɛ e Jezu ná nǔɖuɖu lɛ́ɛ ɖo biba ɛ wɛ
22 Gbe e gbe Jezu na nǔɖuɖu mɛ ɔ́ sín ayǐhɔ́ngbe ɔ́, mɛ lɛ́ɛ flín ɖɔ tɔjíhún ɖokpó géé jɛ́n wɛ ɖo tɔ ɔ́ jí, bɔ ahwanvú Jezu tɔn lɛ́ɛ sɔ́ bó ɖidó; Jezu ka xwedó yě ǎ, yě ɖokpónɔ wɛ byɔ́ hǔn ɔ́ mɛ. 23 Lo ɔ́, Tibɛliadi sín tɔjíhún ɖé lɛ́ɛ glín ɖo fí e Aklúnɔ zé wɔ̌xúxú bó dó kú nú Mawu bɔ yě ɖu ɖe é. 24 Bɔ ée mɛ lɛ́ɛ ma sɔ́ mɔ Jezu ǎ, bó ma ka sɔ́ lɛ́ mɔ ahwanvú tɔn lɛ́ɛ lɔ ǎ ɔ́, yě byɔ́ tɔjíhún énɛ́ lɛ́ɛ mɛ, bó ɖidó Jezu ba gbé ɖo Kafaanawúmu.
Jezu wɛ nyí nǔɖuɖu e nɔ ná gbɛ mɛ é
25 Ée yě wǎ yi mɔ Jezu ɖo tɔ ɔ́ gúdo dɔ̌n ɔ́, yě kanbyɔ́ ɛ ɖɔ: “Mɛ̌si, hwetɛ́nu a ka wá yí dě dó?” 26 Jezu ka yí gbe nú yě ɖɔ: “Má ɖɔ nǔgbó nú mi: nǔ e un jlɛ́ bɔ mi mɔ lɛ́ɛ wútu wɛ mi ɖo biba mì wɛ ǎ. Lo ɔ́, wɔ̌xúxú e mi ɖu gɔ́ xo ɔ́ wútu wɛ mi ɖo biba mì wɛ. 27 Mi ma nɔ jɛ tagba dó nǔɖuɖu e nɔ gblé ɔ́ tamɛ ó; lo ɔ́, mi ní nɔ jɛ tagba dó nǔɖuɖu e nɔ́ nɔ ayǐ sɔ́yi gbɛ mavɔ mavɔ é tamɛ. Nǔɖuɖu énɛ́ ɔ́, Gbɛtɔ́ví ɔ́ wɛ ná ná mi, ɖó Mawu Tɔ́ ɔ́ ná acɛ tɔn ɛ.” 28 Yě ká kanbyɔ́ ɛ ɖɔ: “Nɛ̌ mǐ ká ná bló gbɔn, bó wa mawuzɔ̌ lɛ́ɛ?” 29 Jezu ka yí gbe nú yě ɖɔ: “Nǔ e Mawu jló ɖɔ mi ní wa ɔ́ wɛ nyí ɖɔ mi ní ɖi nǔ nú mɛ e é sɛ́ dó é.” 30 Yě ká lɛ́ kanbyɔ́ ɛ ɖɔ jí: “Étɛ́ wɛ a nǎ sixú jlɛ́, bɔ mǐ ná mɔ, bó ná dó ɖi nǔ nú we? Azɔ̌ tɛ́ wɛ a nǎ wa? 31 Tɔ́gbó mǐtɔn lɛ́ɛ kó ɖu nǔɖuɖu e è nɔ ylɔ́ ɖɔ mǎna ɔ́ ɖo gbětótló mɛ lě e è ko wlán gbɔn ɖo Mawuxówéma ɔ́ mɛ é. É wɛ nyí ɖɔ: ‘É ná nǔɖuɖu e gosín jǐxwé ɔ́ yě, bɔ yě ɖu.’ ” 32 Jezu ka yí gbe nú yě ɖɔ: “Ma ɖɔ nǔgbó nú mi: Mɔyízi wɛ ná nǔɖuɖu e gosín jǐxwé ɔ́ mi ǎ; lo ɔ́, Tɔ́ ce wɛ ɖo nǔɖuɖu titewungbe e gosín jǐxwé ɔ́ ná mi wɛ. 33 Đó nǔɖuɖu e Mawu ná ɔ́ wɛ nyí mɛ e jɛ te sín jǐxwé, bó ná gbɛ jɔ gbɛ ɔ́ é.” 34 Yě ká ɖɔ n'i ɖɔ: “Aklúnɔ! Bo nɔ ná nǔɖuɖu énɛ́ mǐ tɛgbɛ.” 35 Jezu ka lɛ́ yí gbe nú yě ɖɔ: “Nyɛ wɛ nyí nǔɖuɖu e nɔ ná gbɛ jɔ gbɛ mɛ é. Mɛ e wá gɔ̌n ce ɔ́, xovɛ́ sɔ́ ná sin i gbeɖé ǎ. Mɛ e ka ɖi nǔ nú mì ɔ́, kɔ sɔ́ ná xú i gbeɖé ǎ. 36 Lo ɔ́, un ko ɖɔ nú mi; mi ko mɔ mì, cóbɔ mi ka ɖi nǔ nú mì ǎ. 37 Mɛ e Tɔ́ ɔ́ ná mì lɛ́ɛ bǐ ná wá gɔ̌n ce; mɛ e ka wá gɔ̌n ce ɔ́, un ná ɖe e tɔ́n ǎ. 38 Đó un jɛ te sín jǐxwé, bó ná bló jlǒ ce ǎ; lo ɔ́, nǔ e jló mɛ e sɛ́ mì dó ɔ́ bló gbé un ja bo wá. 39 Mɛ e sɛ́ mì dó ɔ́ sín jlǒ wɛ ka nyí ɖɔ un ma hɛn mɛ ɖokpó bú ɖo mɛ e é sɔ́ dó así nú mì lɛ́ɛ mɛ ó; lo ɔ́, nú ma fɔ́n yě bǐ sín kú ɖo azǎn gǔdo gúdo tɔn ɔ́ gbe. 40 Nǔ e Tɔ́ ce jló ɔ́ wɛ nyí ɖɔ mɛ e mɔ Vǐ ɔ́, bó ɖi nǔ n'i lɛ́ɛ ní mɔ gbɛ mavɔ mavɔ, bónú má fɔ́n yě sín kú azǎn gǔdo gúdo tɔn ɔ́ gbe.” 41 Ée Jwifu e gbɛ́ wǎn nú Jezu lɛ́ɛ se xó énɛ́ ɔ́, yě jɛ nǔ hlún ɖɔ dó Jezu wú jí, ɖó é ɖɔ “Nyɛ wɛ nyí nǔɖuɖu e jɛ te sín jǐxwé é.” 42 Énɛ́ ɔ́, yě nɔ́ ɖɔ: “Jezu, Jozɛ́fu ví ɔ́ jɛ́n ka nɛ́ hǔn, bɔ mǐ ka tunwun tɔ́ tɔn kpódó nɔ tɔn kpó nɛ́. Nɛ̌ é ka ná ɖɔ nú mǐ din ɖɔ émí jɛ te sín jǐxwé gbɔn?” 43 Jezu yí xó, bó ɖɔ nú yě ɖɔ: “Mi gbɔ nǔ hlún ɖɔ ɖo miɖée tɛ́ntin. 44 Ényí Tɔ́ e sɛ́ mì dó ɔ́ ma dɔn mɛɖé wá nú mì ǎ ɔ́, é sixú wá gɔ̌n ce ǎ; mɛ e ka ná wá gɔ̌n ce ɔ́, un ná fɔ́n ɛ sín kú azǎn gǔdo gúdo tɔn ɔ́ gbe. 45 Gbeyíɖɔ Mawu tɔn lɛ́ɛ ko wlán ɖ'ayǐ ɖɔ: ‘Mawu ɖésú wɛ ná kplɔ́n nǔ yě bǐ.’ Mɛ e ɖótó Tɔ́ ɔ́, bó se nǔkplɔ́nmɛ tɔn ɔ́, mɛ énɛ́ ná wá gɔ̌n ce. 46 É ka nyí ɖɔ mɛɖé mɔ Tɔ́ ɔ́ kpɔ́n ɖɔ wɛ un ɖe ǎ; mɛ e gosín Mawu gɔ́n ɔ́ kɛ́ɖɛ́ jɛ́n mɔ ɛ.” 47 “Ma ɖɔ nǔgbó nú mi: mɛ e ɖi nǔ nú mì ɔ́ mɔ gbɛ mavɔ mavɔ. 48 Nyɛ wɛ nyí nǔɖuɖu e nɔ́ ná gbɛ jɔ gbɛ mɛ é. 49 Tɔ́gbó mǐtɔn lɛ́ɛ ɖu mǎna ɖo gbětótló mɛ, có yě ká kú. 50 Amɔ̌, nǔɖuɖu élɔ́ e jɛ te sín jǐxwé ɔ́, nǔɖuɖu ɖé wɛ bɔ mɛɖé ɖu ɔ́, é ná kú ǎ. 51 Nyɛ wɛ nyí nǔɖuɖu gbɛɖe e jɛ te sín jǐxwé é. Mɛ e ná ɖu ɖo nǔɖuɖu élɔ́ mɛ ɔ́ ná nɔ gbɛ káká sɔ́yi. Nǔɖuɖu e un ka ná ná mi ɔ́, agbaza ce e un ná sɔ́ jó dó gbɛtɔ́ lɛ́ɛ tamɛ ɔ́ wɛ.” 52 Jwifu e gbɛ́ wǎn nú Jezu lɛ́ɛ ka jɛ nǔ dɔn jí syɛ́nsyɛ́n ɖo yěɖée tɛ́ntin bo nɔ ɖɔ: “Nɛ̌ nya élɔ́ ká sixú ná agbaza tɔn mǐ, bɔ mǐ na ɖu gbɔn?” 53 Jezu yí gbe nú yě ɖɔ: “Má ɖɔ nǔgbó nú mi: ényí mi ma ɖu nyɛ Gbɛtɔ́ví ɔ́ sín agbaza, bó nu hun ce ǎ ɔ́, gbɛ jɔ gbɛ ɔ́ ná nɔ mi mɛ ǎ. 54 Mɛ e ɖu agbaza ce, bó nu hun ce ɔ́, mɛ énɛ́ mɔ gbɛ mavɔ mavɔ, bɔ un ná fɔ́n ɛ sín kú azǎn gǔdo gúdo tɔn gbe. 55 Đó agbaza ce ɔ́, nǔɖuɖu titewungbe ɔ́ wɛ é nyí, bɔ hun ce ka nyí nǔ nunu titewungbe ɔ́. 56 Mɛ e ɖu agbaza ce, bo nu hun ce ɔ́ ɖo gbɛ ɖo nyɛ mɛ, bɔ nyɛ lɔ ɖo gbɛ ɖo éyɛ́ mɛ. 57 Tɔ́ ɔ́ e sɛ́ mì dó ɔ́ ɖo gbɛ, bɔ nyɛ ka ɖo gbɛ ɖo acɛ tɔn mɛ. Mɔ̌ ɖokpó ɔ́, mɛɖé ɖu agbaza ce ɔ́, é ná nɔ gbɛ gbɔn acɛ ce mɛ. 58 Nǔɖuɖu e jɛ te sín jǐxwé ɔ́ ɖíe; é cí ɖěe tɔ́gbó mitɔn lɛ́ɛ ɖu cóbó ka kú ɔ́ ɖɔhun ǎ; mɛ e ɖu nǔɖuɖu élɔ́ ɔ́, é ná nɔ gbɛ tɛgbɛ sɔ́yi.” 59 Nǔ e Jezu ɖɔ hwenu e é ɖo nǔ kplɔ́n mɛ lɛ́ɛ wɛ ɖo Kafaanawúmu ɖo kplɔ́ngbasá Jwifu lɛ́ɛ tɔn ɔ́ nɛ́.
Xó e nɔ ná gbɛ mavɔ mavɔ mɛ lɛ́ɛ
60 Ée Jezu sín ahwanvú wɔ̌buwɔ́bú e xwedó e lɛ́ɛ se xó énɛ́ lɛ́ɛ ɔ́, yě mɛ gěgé jɛ ɖiɖɔ jí ɖɔ: “Xó élɔ́ syɛ́n dódó; mɛ ka sixú yí gbe nú xó énɛ́ ɔ́?” 61 Jezu mɔ ɖɔ ahwanvú émítɔn lɛ́ɛ ɖo nǔ hlún ɖɔ dó xó énɛ́ ɔ́ wú wɛ, bó kanbyɔ́ yě ɖɔ: “Xó énɛ́ e un ɖɔ ɔ́ ná nyí afɔklɛ́nnú nú mi wɛ a? 62 Ényí mi ka wá mɔ Gbɛtɔ́ví ɔ́ xwe jǐxwé fí e é ko ɖe ɖ'ayǐ ɔ́, nɛ̌ ka ná cí gbɔn nú mi lo? 63 Yɛsinsɛn wɛ nɔ ná gbɛ mɛ; hlɔ̌nhlɔ́n gbɛtɔ́ tɔn kpé nǔɖé wú ǎ. Xó e un ɖɔ nú mi lɛ́ɛ wɛ nɔ ná Yɛ Mawu tɔn e nɔ ná gbɛ mɛ é. 64 Lo ɔ́, mɛɖé lɛ́ɛ ɖo mi mɛ bó ɖi nǔ ǎ.” Đó sín do wɛ Jezu ko tunwun mɛ e ma ɖi nǔ ǎ lɛ́ɛ, kpódó mɛ e ɖo ná sa ɛ ɖu wɛ ɔ́ kpó. 65 Jezu lɛ́ ɖɔ nú yě ɖɔ jí: “Nǔ e wú un ɖɔ ényí Mawu ma ná gbe tɔn mɛɖé ǎ ɔ́, mɛ ɔ́ kún sixú wá gɔ̌n ce ó é nɛ́.” 66 Sín hwenɛ́nu ɔ́, ahwanvú Jezu tɔn gěgé lɛ́ kɔ, bó sɔ́ nɔ xwedó e ǎ. 67 Jezu ka kanbyɔ́ mɛ wěwe lɛ́ɛ ɖɔ: “Mi lɔmɔ̌ mi jló ná yi a?” 68 Sinmɔ́ɔ Piyɛ́ɛ ka yí gbe n'i ɖɔ: “Aklúnɔ! Mɛ̌ gɔ́n mǐ ka ná lɛ́ yi? É má nyí nu towe wɛ è nɔ se xó e nɔ ná gbɛ mavɔ mavɔ mɛ ɔ́ ɖe ǎ cé? 69 Mǐdɛɛ lɛ́ɛ ɔ́, mǐ ɖi nǔ, bó tunwun ɖɔ hwi wɛ nyí Klísu, mɛ mímɛ́ Mawu tɔn.” 70 Jezu ka lɛ́ ɖɔ nú yě ɖɔ jí: “Nyɛ ɖésú wɛ cyán mi mɛ wěwe lɛ́ɛ, cóbɔ mɛ ɖokpó ka ɖo mi mɛ bó nyí awǒvigbɛtɔ́.” 71 Judási Sinmɔ́ɔ Isikaliɔ́ti ví ɔ́ xó ɖɔ wɛ Jezu ɖe; ɖó é lɔmɔ̌ ɖo ahwanvú wěwe lɛ́ɛ mɛ, cóbó ka ɖo Jezu ná sa wɛ.
Jezu sín nɔví lɛ́ɛ ɖi nǔ n'i ǎ
1 Énɛ́ ɔ́ gúdo ɔ́, Jezu ɖo to e ɖo Galilée gbé jí lɛ́ɛ mɛ gbɔn wɛ; é ka jló ná yi gbɔn Judée ǎ, ɖó Jwifugán lɛ́ɛ ɖo biba ná hu i wɛ. 2 Xwe e Jwifu lɛ́ɛ ja ɖuɖu gbé ɔ́, yě nɔ dó azava bó nɔ́ nɔ sá ɔ́ ko sɛ yá. 3 Bɔ Jezu sín nɔví lɛ́ɛ ɖɔ n'i ɖɔ: “Yi Judée, bónú ahwanvú towe lɛ́ɛ lɔ ná mɔ azɔ̌ e a nɔ wa lɛ́ɛ. 4 Đó mɛ ɖěbǔ jló ɖɔ è nǐ tunwun émí ɔ́, mɛ ɔ́ nɔ́ wa nǔ dó nǔglɔ́ ǎ; ée a ko nɔ jlɛ́ nǔ ɔ́, blǒ bónú mɛ bǐ ní tunwun we.” 5 Đó nɔví tɔn lɛ́ɛ ɖésú ɖi nǔ n'i ǎ. 6 Jezu ka ɖɔ nú yě ɖɔ: “Gan ce ko xo ǎ; lo ɔ́, midɛɛ lɛ́ɛ ɔ́, hwe lɛ́ɛ bǐ nu wɛ nyɔ́ nú mi. 7 Gbɛtɔ́ lɛ́ɛ sixú gbɛ́ wǎn nú midɛɛ lɛ́ɛ ǎ; lo ɔ́, yě gbɛ́ wǎn nú nyɛ, ɖó un nɔ ɖe kúnnu ɖɔ nǔwiwa yětɔn lɛ́ɛ kún nyɔ́ ó. 8 Midɛɛ lɛ́ɛ mi yi ɖu xwe ɔ́; nyɛ xwe xwe ɔ́ ɖu gbé ǎ; ɖó gan e mɛ un ɖó ná yi dó ɔ́ ko xo ǎ.” 9 Ée Jezu ɖɔ mɔ̌ nú yě ɔ́, é cí Galilée.
Jezu yi azavaxwe ɔ́ sín tɛnmɛ ɖo Judée
10 Ée Jezu sín nɔví lɛ́ɛ yi xwe ɔ́ ɖu gbé gúdo ɔ́, é lɔmɔ̌ wá bɛ yɛ, bó yi xwe ɔ́ tɛn mɛ. 11 Jwifugán lɛ́ɛ ba ɛ xwe ɔ́ hwenu káká, yě ká mɔ ɛ ǎ, bó nɔ́ ɖɔ: “Fítɛ́ é ka ɖe ɖo mɛ lɛ́ɛ mɛ tawun?” 12 Mɛ gěgé ɖo mɛ lɛ́ɛ mɛ, bo zé gbe dó do, bo nɔ ɖo xó ɖɔ dó wútu tɔn wɛ, bó nɔ́ ɖɔ: “Gbɛtɔ́ ɖagbe wɛ nyí nya ɔ́ mɛ!” Mɛɖě ká nɔ ɖɔ: “Éeǒ; mɛblɛ́ɖutɔ́ ɖé kpowun wɛ.” 13 Lo ɔ́, mɛ e ɖo xó tɔn ɖɔ wɛ lɛ́ɛ ɖě nɔ glá zé gbe dó jǐ ǎ, ɖó yě ɖo xɛsi ɖi nú Jwifugán lɛ́ɛ wɛ. 14 Yě ɖo xwe ɔ́ ɖu wɛ, bó ko vlɔ́ azǎn nabí e yě ná dó ɖu ná ɔ́ ɖó we, bɔ Jezu yi sinsɛnxɔ mɛ, bó jɛ nǔ kplɔ́n mɛ jí. 15 Lě e kplɔ́n nǔ mɛ gbɔn wɛ é ɖe ɔ́ kpácá Jwifugán lɛ́ɛ káká bɔ yě nɔ ɖɔ: “Nya élɔ́ má ka yi wěmaxɔmɛ kpɔ́n nɛ́! Nɛ̌ é ká wa gbɔn bó tunwun Mawuxówéma ɔ́ sɔ mɔ̌?” 16 Jezu ka yí gbe nú yě ɖɔ: “Nyɛ wɛ ɖó nǔ e kplɔ́n mi wɛ un ɖe ɔ́ ǎ; Mawu e sɛ́ mì dó ɔ́ gɔ́n wɛ é gosín. 17 Mɛ e ɖó jlǒ, bó ná wa jlǒ Mawu tɔn ɔ́, ényí nǔkplɔ́nmɛ ce ɔ́, Mawu gɔ́n wɛ é gosín abǐ acɛ nyɛ ɖésúnɔ tɔn wɛ ɔ́, é ná mɔ do ná. 18 Mɛ e ka ɖo é ɖésúnɔ sín susu ba wɛ ɔ́, acɛ é ɖésúnɔ tɔn mɛ wɛ é nɔ ɖɔ xó dó. Lo ɔ́, mɛ e ɖo mɛ e sɛ́ ɛ dó ɔ́ sín susu ba wɛ ɔ́, nǔgbó wɛ é nɔ ɖɔ, bɔ xó tɔn ɖě nɔ́ nyí nǔvú ǎ. 19 Mɔyízi ko ná sɛ́n lɛ́ɛ mi; lo ɔ́, mi mɛ ɖokpó nɔ́ nyi sɛ́n lɛ́ɛ ǎ; bɔ étɛ́ wú mi ka ɖo nǎ hu mì wɛ?” 20 Ahwan ɔ́ yí gbe n'i ɖɔ: “Yɛ nyanya wɛ ɖo jǐ towe; mɛ̌ ká ɖo nǎ hu we wɛ?” 21 Jezu yí gbe nú yě ɖɔ: “Nǔ ɖokpó wɛ un wa, bɔ é kpácá mi sɔ mɔ̌. 22 Mɔyízi hɛn adagbigbo sɛ́n ɔ́ wá nú mi; (é wɛ ka jɛ sɛ́n énɛ́ nyi jí jɛ nukɔn ǎ, tɔ́gbó mǐtɔn lɛ́ɛ wɛ jɛ jí dó nukɔn), có gbɔjɛzán gbe lɛ́ɛ lɔmɔ̌ ɔ́, mi nɔ gbo ada nú mɛ. 23 É ma nyí Mɔyízisɛ́n ɔ́ nyi wɛ mi ɖe bó nɔ́ gbo ada nú mɛ gbɔjɛzán gbe a? Étɛ́wú mi ka ɖo xomɛ sin dó nyɛ mɛ e gbɔ azɔn nú gbɛtɔ́ blěbǔ ɖokpó gbɔjɛzán gbe ɔ́ wɛ. 24 Mi ma nɔ nɔ gbɛtɔ́ jí ó, mi nɔ nɔ xó jí.”
Jezu jɛ́n ka nyí Klísu ɔ́ a?
25 Jeluzalɛ́munu ɖé lɛ́ɛ nɔ ɖɔ: “É ma nyí nya e wú lɛ́ lɛ̌ dó wɛ yě ɖe bo na hu ɔ́ nɛ́ a? 26 É nɛ́ ka ɖo xó ɖɔ wɛ ɖo agbawungba nɛ́; bɔ yě ká sɔ́ ɖo nǔɖé ɖɔ n'i wɛ ǎ; abǐ gǎn mǐtɔn lɛ́ɛ ka wá mɔ do na ɖɔ é wɛ nyí Klísu ɔ́ wútu wɛ è jó e dó a? 27 É ka nyí Klísu ɔ́ wɛ ɔ́, mɛɖé ma ka na tunwun fí e é gosín ɔ́ nɛ́? Mǐ ká tunwun fí e nya élɔ́ gosín ɔ́ nɛ́!” 28 Hwenu e Jezu ɖo nǔ kplɔ́n mɛ wɛ ɖo sinsɛnxɔ mɛ ɔ́, é sú xó, bó ɖɔ: “Mi tunwun mì, bó tunwun fí e un gosín é. Nyɛ ɖésúnɔ sín acɛ mɛ wɛ un wá dó ǎ, lo ɔ́, mɛ e sɛ́ mì dó ɔ́, nǔgbóɖɔtɔ́ wɛ, bɔ mi ka tunwun i ǎ. 29 Nyɛ tunwun i, ɖó gɔ̌n tɔn wɛ un gosín; é wɛ sɛ́ mì dó.” 30 Hwenɛ́nu ɔ́, yě jló ná wlí i, mɛ ɖěbǔ sín alɔ ka jɛ wú tɔn ǎ, ɖó gan tɔn ko xo ǎ. 31 Mɛ gěgé ɖo agun ɔ́ mɛ bó ɖi nǔ n'i, bó nɔ́ ɖɔ: “Nú Klísu ɔ́ na bo wá ɔ́, é sɔ́ ná lɛ́ jlɛ́ nǔ hú nya élɔ́ wɛ a?”
Vɔ̌sánú-xwlémawutɔ́gán lɛ́ɛ sɛ́ sɔ́ja dó Jezu wlí gbé
32 Falizyɛn lɛ́ɛ se nǔ e mɛ lɛ́ɛ zé gbe dó do, bó ɖo ɖiɖɔ dó Jezu wú wɛ ɖo agun ɔ́ mɛ é, bɔ yě ɖó gbe kpɔ́ xá vɔ̌sánú-xwlémawutɔ́gán lɛ́ɛ, bó sɛ́ sɔ́ja dó, bó ná wlí Jezu. 33 Jezu ɖɔ nú yě ɖɔ: “Hwenu kpɛɖé jɛ́n kpo, bɔ un ná dó nɔ mi mɛ; énɛ́ ɔ́ gúdo ɔ́, un na lɛ́ kɔ yi mɛ e sɛ́ mì dó ɔ́ gɔ́n. 34 Mi ná ba mì, mi ka ná mɔ mì ǎ; ɖó mi ná sixú wá fí e un ɖe ɔ́ ǎ.” 35 Bɔ vɔ̌sánú-xwlémawutɔ́gán lɛ́ɛ jɛ ɖiɖɔ jí ɖo yěɖée tɛ́ntin ɖɔ: “Fítɛ́ nya élɔ́ ka jló ná yi, bɔ mǐ ma sɔ́ ná mɔ ɛ ǎ? É jló ná yi gɔ́ nú Jwifu e gba kpé Glɛ̌sinu lɛ́ɛ mɛ lɛ́ɛ, bó ná kplɔ́n nǔ Glɛ̌sinu lɛ́ɛ wɛ a? 36 Bɔ étɛ́ ná ɖɔ wɛ é ka ɖe bó ɖɔ: ‘Mi ná ba mì, mi ka ná mɔ mì ǎ, ɖó mi ná sixú wá fí e un ɖe ɔ́ ǎ.’ ”
Tɔjɔtɛn e nɔ ná gbɛ mɛ é
37 Gbe e gbe yě ná ɖu xwe ɔ́ fó ɔ́ wɛ nyí azǎn tají. Gbe énɛ́ gbe ɔ́, Jezu nɔ te ahwan ɔ́ nukɔn, bó zé gbe yi jǐ bó ɖɔ: “Sinnugblá sin mɛɖé hǔn, ní wá gɔ̌n ce bó wá nu sin. 38 Lě e Mawuxówéma ɔ́ ko ɖɔ gbɔn ɔ́, mɛ e ɖi nǔ nú mì ɔ́, ná húzú tɔjɔtɛn e mɛ sin e nɔ ná gbɛ mɛ ɔ́ nɔ sa sín é.” 39 Yɛsinsɛn e mɛ e ɖi nǔ n'i lɛ́ɛ ná mɔ yí ɔ́ xó ɖɔ wɛ Jezu ɖe. Hwenɛ́nu ɔ́, Mawu ko na Yɛsinsɛn mɛɖé ǎ; ɖó Jezu ko byɔ́ susu tɔn mɛ ǎ.
Mɛ lɛ́ɛ klán gbe ɖó Jezu wútu
40 Mɛ gěgé ɖo agun ɔ́ mɛ, bɔ ée yě se xó énɛ́ ɔ́, yě ɖɔ: “Dandan mɛ ɔ́, nya élɔ́ wɛ nyí gbeyíɖɔ Mawu tɔn.” 41 Mɛ ɖé lɛ́ɛ ɖɔ: “Klísu wɛ;” lo ɔ́, mɛ ɖěvo lɛ́ɛ nɔ ɖɔ: “Klísu ɔ́ sixú gosín Galilée ǎ. 42 Mawuxówéma ɔ́ ko ɖɔ Davídi ví lɛ́ɛ mɛ wɛ Klísu ɔ́ ɖó ná tɔ́n sín, ɖo Bɛteleyɛ́mu, Davídi tomɛ.” 43 Énɛ́ ɔ́, agun ɔ́ klán gbe ɖó Jezu wútu. 44 Mɛ ɖé lɛ́ɛ ɖo yě mɛ, bo jló ná wlí i; yě mɛ ɖěbǔ sín alɔ ka jɛ wǔ tɔn ǎ.
Vɔ̌sánú-xwlémawutɔ́gán lɛ́ɛ ɖi nǔ nú Jezu ǎ
45 Hwenu sɔ́ja e è sɛ́ dó Jezu wlí gbé lɛ́ɛ lɛ́ kɔ wá ɔ́, vɔ̌sánú-xwlémawutɔ́gán lɛ́ɛ kpódó Falizyɛn lɛ́ɛ kpó kanbyɔ́ yě ɖɔ: “Étɛ́wú mi ma ka kplá ɛ wá ǎ?” 46 Bɔ sɔ́ja e è sɛ́ dó lɛ́ɛ yí gbe nú yě ɖɔ: “È se bɔ mɛɖé ɖɔ xó nya énɛ́ ɖɔhun gbeɖé kpɔ́n ǎ.” 47 Falizyɛn lɛ́ɛ ka kanbyɔ́ yě ɖɔ: “Mi lɔmɔ̌ mi jó miɖée dó n'i bɔ é flú mi wɛ a? 48 Mi mɔ gǎn mǐtɔn lɛ́ɛ ɖě abǐ Falizyɛn lɛ́ɛ ɖě ɖi nǔ n'i a? 49 Mɛ tobutóbú élɔ́ lɛ́ɛ e ma ka tunwun Mɔyízi sɛ́n ɔ́ ǎ, bo ɖo xwixwedó e wɛ lɛ́ɛ ɔ́, nu wɛ è ko dó yě.” 50 Falizyɛn e ɖo fínɛ́ lɛ́ɛ ɖokpó nɔ nyí Nikodɛ́mu; é wɛ wá mɔ Jezu ɖ'ayǐ; é kanbyɔ́ yě ɖɔ: 51 “Đo sɛ́n mǐtɔn mɛ ɔ́, e nɔ ɖó hwɛ nú mɛɖé má se xó ɖé ɖo nu tɔn, ma ka tunwun nǔ e é wa nyi do ɔ́ a?” 52 Bɔ yě yí gbe n'i ɖɔ: “Galiléenu wɛ hwi lɔmɔ̌ nyí a? Kpɔ́n Mawuxówéma ɔ́ mɛ ganjí bo! A ná mɔ ɖɔ gbeyíɖɔ Mawu tɔn ɖě kún gosín Galilée ó.”
Nyɔ̌nu ɖé dó afɔ gbě
53 Énɛ́ ɔ́ gúdo ɔ́, mɛ ɖokpó ɖokpó lɛ́ kɔ yi xwé tɔn gbe.
1 Lo ɔ́, Jezu yi só e è nɔ ylɔ́ ɖɔ olívutín só ɔ́ jí. 2 Ayǐhɔ́ngbe zǎnzǎn tɛɛn ɔ́, é lɛ́ kɔ yi sinsɛnxɔ mɛ, bɔ mɛ lɛ́ɛ bǐ nyi ahwan wá gɔ̌n tɔn, bɔ é jínjɔ́n ayǐ, bó jɛ nǔ kplɔ́n yě jí. 3 Hwenɛ́nu wɛ sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó kplá nyɔ̌nu ɖé wá, bó sɔ́ ɛ ɖó agun ɔ́ nukɔn; nyɔ̌nu énɛ́ ɔ́, afɔ dó gbě wɛ é ɖe bɔ yě gbo e dó. 4 Yě ɖɔ nú Jezu ɖɔ: “Mɛ̌si, nyɔ̌nu élɔ́ ɔ́, afɔ dó gbě wɛ é ɖe bɔ mǐ yi gbo e dó. 5 Mɔyízi sɛ́n ɔ́ ka ɖɔ jí mɛ mɔ̌hunkɔtɔn ɔ́, awǐnnyaglo wɛ è nǎ nyi dó hu i ná. Ani hwɛ ka lin d'é wú?” 6 Xó énɛ́ e yě kanbyɔ́ Jezu ɔ́, mɔ wɛ nyí bɔ yě ɖó n'i, bo na dó ɖó hwɛ n'i. Jezu ka fɛ, bo jɛ nǔ wlán dó kɔ́ mɛ jí kpódó alɔví kpó. 7 Ée yě ɖo nǔ kanbyɔ́ ɛ wɛ magbokɔ ɔ́, é jlɔ́ kɔ bó ɖɔ nú yě ɖɔ: “Mɛ e ɖo mi mɛ bó ma hu hwɛ kpɔ́n gbeɖé ǎ ɔ́ ní nyi awǐnnyaglo dó e jɛ nukɔn.” 8 Ée é ɖɔ mɔ̌ ɔ́, é lɛ́ vɔ́ fɛ, bó jɛ nǔ wlán dó kɔ́ mɛ jí. 9 Ée yě mɛ e kplá nyɔ̌nu ɔ́ wá nú Jezu lɛ́ɛ se mɔ̌ ɔ́, yě jɛ yiyi jí ɖokpó ɖokpó, bɛ́ sín mɛxó lɛ́ɛ jí, bɔ é wá kpo Jezu ɖokpónɔ géé kpódó nyɔ̌nu ɔ́ kpó. 10 Jezu lɛ́ jlɔ́, bó kanbyɔ́ nyɔ̌nu ɔ́ ɖɔ: “Nyɔ̌nu! Fítɛ́ mɛ lɛ́ɛ ɖe? Mɛ ɖěbǔ sɔ́ ɖó hwɛ nú we ǎ cé?” 11 Nyɔ̌nu ɔ́ yí gbe n'i ɖɔ: “Yě ɖěbǔ ɖó hwɛ nú mì ǎ, Aklúnɔ.” Jezu ka ɖɔ n'i ɖɔ: “Nyɛ lɔmɔ̌ un ɖó hwɛ nú we ǎ; bo yi; bɛ́ sín din ɔ́, ma ka sɔ́ hu hwɛ ɖě ó.”
Jezu wɛ nyí wěziza nú gbɛ ɔ́
12 Jezu lɛ́ jɛ nǔ kplɔ́n mɛ lɛ́ɛ jí ɖo sinsɛnxɔ mɛ, bo ɖɔ nú yě ɖɔ: “Nyɛ wɛ nyí wěziza gbɛ ɔ́ tɔn; mɛ e xwedó mì ɔ́ na gbɔn zǐnflú mɛ gbeɖé ǎ, lo ɔ́ é ná mɔ wěziza e nɔ ná gbɛ jɔ gbɛ mɛ é.” 13 Falizyɛn lɛ́ɛ ka ɖɔ n'i ɖɔ: “A ɖo kúnnu ɖe nú hwiɖée wɛ; énɛ́ ɔ́ wú ɔ́, xó towe nyí nǔgbó ǎ.” 14 Jezu ka yí gbe nú yě ɖɔ: “É ná bó nyí kúnnu ɖe nú nyɛɖée wɛ un ɖe ɔ́, xó e ɖɔ wɛ un ɖe ɔ́, nǔgbó wɛ é nyí; ɖó un tunwun fí e un gosín ɔ́, bo ka lɛ́ tunwun fí e un xwe ɔ́. Midɛɛ lɛ́ɛ ka tunwun fí e un gosín ɔ́ ǎ; mi ka lɛ́ tunwun fí e un xwe ɔ́ ǎ. 15 Lě e gbɛtɔ́ lɛ́ɛ nɔ ɖɔ hwɛ gbɔn ɔ́ wɛ mi nɔ ɖɔ hwɛ gbɔn; nyɛ ɔ́, un nɔ ɖɔ hwɛ xá mɛɖé ǎ. 16 Ényí un ka ɖɔ hwɛ ɔ́, hwɛjijɔ wɛ un nɔ ɖɔ; ɖó un ɖo nyɛ ɖóɖó ǎ; Tɔ́ e sɛ́ mì dó ɔ́ kpódó nyɛ kpó wɛ ɖo kpɔ́. 17 È ka ko wlán dó Mawuxówéma mitɔn mɛ ɖɔ: ‘Nǔ e mɛ we ɖe kúnnu ɖokpó ɔ́ ná ɔ́, nǔgbó wɛ é nyí.’ 18 Un ɖo kúnnu ɖe nú nyɛɖée wɛ, bɔ Tɔ́ e sɛ́ mì dó ɔ́ lɔ ka ɖo kúnnu ɖe nú mì wɛ.” 19 Yě kanbyɔ́ ɛ ɖɔ: “Fítɛ́ Tɔ́ towe ɔ́ ká ɖe?” Jezu yí gbe nú yě ɖɔ: “Mi tunwun mì ǎ; mi ka lɛ́ tunwun Tɔ́ ce ǎ. Ényí mi ko tunwun mì wɛ ɔ́, mi ná ko tunwun Tɔ́ ce lɔmɔ̌.” 20 Hwenu e Jezu ɖo xó énɛ́ lɛ́ɛ ɖɔ wɛ ɔ́, nǔ kplɔ́n mɛ wɛ é ɖe ɖo sinsɛnxɔ ɔ́ mɛ, ɖo gbǎ e mɛ è nɔ sɔ́ akwɛ́ dó ɔ́ kpá; mɛ ɖěbǔ ka wlí i ǎ, ɖó gan tɔn ko xo ǎ.
Mi sixú yi fí e un xwe ɔ́ ǎ
21 Jezu ka lɛ́ ɖɔ nú yě ɖɔ: “Un xweyǐgbe; mi na ba mì, lo ɔ́, mi ná kú dó hwɛ mitɔn lɛ́ɛ mɛ, ɖó mi sixú yi fí e un xwe ɔ́ ǎ.” 22 Jwifugán lɛ́ɛ ka jɛ ɖiɖɔ jí ɖo yěɖée tɛ́ntin ɖɔ: “Éɖée hu gbé wɛ é ka ja a? Đó é ɖɔ: ‘Mi sixú yi fí e un xwe ɔ́ ǎ.’ ” 23 Jezu yí gbe nú yě ɖɔ: “Midɛɛ lɛ́ɛ ɔ́, ayǐkúngban jí fí tɔn wɛ mi nyí, amɔ̌, nyɛ ɔ́, jǐxwé tɔn wɛ un nyí: gbɛ élɔ́ tɔn wɛ mi nyí, amɔ̌, nyɛ ɔ́, un nyí gbɛ élɔ́ tɔn ǎ. 24 Énɛ́ wútu wɛ un ko ɖɔ nú mi ɖɔ hwɛ mitɔn mɛ wɛ mi ná kú dó. Ényí mi ma ɖi nǔ ɖɔ un nyí mɛ e un nyí é ǎ ɔ́, mi ná kú dó hwɛ mitɔn lɛ́ɛ mɛ.” 25 Yě ká lɛ́ kanbyɔ́ ɛ ɖɔ: “Mɛ̌ a ka nyí?” Jezu yí gbe nú yě ɖɔ: “Mɛ e un ko ɖɔ nú mi sín do ɖɔ un nyí ɔ́ wɛ un nyí. 26 Un ɖó nǔ gěgé bó ná ɖɔ dó mi wú, bó ná ɖɔ hwɛ dó nǔ gěgé wú nú mi; lo ɔ́, mɛ e sɛ́ mì dó ɔ́, nǔgbóɖɔtɔ́ wɛ, bɔ nǔ e un se ɖo nu tɔn ɔ́ kɛ́ɖɛ́ ɖɔ nú gbɛ ɔ́ wɛ un ɖe.” 27 Yě ká mɔ nǔ jɛ wú ɖɔ Tɔ́ ɔ́ sín xó ɖɔ nú émí wɛ é ɖe ǎ. 28 Bɔ Jezu ɖɔ nú yě ɖɔ: “Hwenu e mi ná wá sɔ́ Gbɛtɔ́ví ɔ́ dó jǐ ɔ́, mi ná tunwun ɖɔ un nyí mɛ e un nyí ɔ́, bó kún nɔ́ ɖɔ nǔ ɖěbǔ ɖo nyɛ ɖésúnɔ sín acɛ mɛ ó; nǔ e Tɔ́ ɔ́ kplɔ́n mì ɔ́ kɛ́ɖɛ́ wɛ un nɔ ɖɔ. 29 Mɛ e sɛ́ mì dó ɔ́ ka ɖo kpɔ́ xá mì; é jó mì dó ǎ, ɖó nǔ e nyɔ́ nukún tɔn mɛ ɔ́ wɛ un nɔ bló tɛgbɛ.” 30 Ée Jezu ɖo xó ɖɔ wɛ gbɔn mɔ̌ ɔ́, mɛ gěgé ɖi nǔ n'i.
Kannumɔ lɛ́ɛ kpódó mɛ e ɖo yě ɖésú sí lɛ́ɛ kpó
31 Jezu ɖɔ nú Jwifu e ɖi nǔ n'i lɛ́ɛ ɖɔ: “Ényí mi se gbe nú mì ɔ́, mi nyí ahwanvú ce lɛ́ɛ nǔgbó. 32 Mi ná tunwun nǔgbó ɔ́, bɔ nǔgbó ɔ́ ná ɖe mi sín kannumɔgbénu.” 33 Yě ká yí gbe n'i ɖɔ: “Ablaxámu ví wɛ mǐ nyí, mǐ nɔ mɛɖé kannu kpɔ́n gbeɖé ǎ; étɛ́wútu a ka ɖɔ è nǎ ɖe mǐ sín kannumɔgbénu?” 34 Jezu ka ɖɔ nú yě ɖɔ: “Má ɖɔ nǔgbó nú mi: mɛ e nɔ hu hwɛ é ɖěbǔ ɔ́, hwɛ sín kannumɔ wɛ é nyí; 35 lo ɔ́, mɛ e nyí kannumɔ ɔ́ nɔ́ nɔ xwé gbe sɔ́yi ǎ; xwéví wɛ nɔ́ nɔ xwé gbe sɔ́yi. 36 Ényí Vǐ ɔ́ ɖe mi sín kannumɔgbénu ɔ́, mi ná gosín kannumɔgbénu nǔgbó. 37 Un tunwun ɖɔ Ablaxámu ví wɛ mi nyí nǔgbó; lo ɔ́, mi ɖo biba ná hu mì wɛ, ɖó mi ɖi nǔ nú xó ce lɛ́ɛ ǎ wútu. 38 Nǔ e un mɔ ɖo Tɔ́ ce gɔ́n ɔ́ ɖɔ wɛ un ɖe; mi lɔmɔ̌ ka ɖo nǔ e mi se ɖo tɔ́ mitɔn nu ɔ́ bló wɛ.” 39 Yě yǐ gbe n'i ɖɔ: “Ablaxámu wɛ nyí tɔ́ mǐtɔn.” Jezu ka ɖɔ nú yě ɖɔ: “Ényí Ablaxámu ví wɛ mi ko nyí nǔgbó ɔ́, mi ná ko nɔ wa nǔ Ablaxámu ɖɔhun. 40 Amɔ̌, din ɔ́, nyɛ ka ɖɔ nǔgbó e un se ɖo Mawu nu ɔ́ nú mi; có mi ka lɛ́ ɖo biba na hu mì wɛ; Ablaxámu ka wa nǔ mɔ̌hunkɔtɔn ɖě ǎ. 41 Nǔ e tɔ́ mitɔn wa ɔ́ wa wɛ jɛ́n mi ɖe.” Ée é ɖɔ mɔ̌ ɔ́, yě yǐ gbe n'i ɖɔ: “Mǐ nyí agaví ǎ; Mawu wɛ nyí Tɔ́ ɖokpó géé e mǐ ɖó é.” 42 Jezu ka yí gbe nú yě ɖɔ: “Nú Mawu jɛ́n nyí Tɔ́ mitɔn nǔgbó ɔ́, mi na ko yí wǎn nú mì, ɖó Mawu gɔ́n wɛ un gosín bó wá. Jlǒ nyɛ ɖésúnɔ tɔn mɛ wɛ un wá dó ǎ; lo ɔ́, é wɛ sɛ́ mì dó. 43 Étɛ́wú mi ma ka mɔ nǔ jɛ xó ce lɛ́ɛ wú ǎ? Đó xó ce nɔ vɛ́ se nú mi. 44 Awǒvi wɛ nyí tɔ́ mitɔn, bɔ nǔ e nɔ jló e lɛ́ɛ wiwa wɛ nɔ myá nukún nú mi. Mɛhutɔ́ wɛ é ko nyí sín do, é yí wǎn nú nǔgbó ǎ, ɖó nǔgbó ɖě ɖo nu tɔn ǎ; é ná ɖó nǔvú ɔ́, nǔ ɖo gaan wɛ, ɖó é ɖésúnɔ bǐ wɛ ko nyí adingbannɔ, bo nyí adingbannɔ lɛ́ɛ sín tɔ́. 45 Amɔ̌, nyɛ ɔ́, nǔgbó wɛ un nɔ ɖɔ; énɛ́ ɔ́ wú wɛ mi ma nɔ ɖi nǔ nú mì ǎ. 46 Mɛ̌ ká ɖo mi mɛ, bó ná sixú ɖe xlɛ́ ɖɔ un hu hwɛ kpɔ́n? Ényí un ka ɖo nǔgbó ɖɔ wɛ ɔ́, aniwú wɛ mi ma nɔ ɖi nǔ nú mì ǎ? 47 Mɛ e nyí Mawu tɔn ɔ́, Mawuxó wɛ é nɔ ɖótó; midɛɛ lɛ́ɛ ɔ́, mi ka nɔ ɖótó Mawuxó ɔ́ ǎ, ɖó mi nyí étɔn ǎ wú.”
Jezu ko tíin có Ablaxámu wá jɔ
48 Jwifu e gbɛ́ wǎn nú Jezu lɛ́ɛ ka yí gbe n'i ɖɔ: “Ée mǐ ɖɔ Samalíinu wɛ a nyǐ, bɔ yɛ nyanya ɖo jǐ towe é ɔ́, a ma mɔ ɖɔ hwɛ mǐtɔn jɔ a?” 49 Jezu ka yí gbe nú yě ɖɔ: “Yɛ nyanya ɖě ɖo jǐ ce ǎ; Tɔ́ ce sɔ́ su wɛ un ɖe, bɔ midɛɛ lɛ́ɛ ka ɖo hɛ̌n dó mì wɛ. 50 Nyɛ ɖésú wɛ nɔ sɔ́ nyɛɖée su ǎ; Mawu wɛ nɔ sɔ́ mì su, bo nɔ ɖɔ hwɛ. 51 Má ɖɔ nǔgbó nú mi: ényí mɛɖé se xó ce, bó bló ɖ'é jí ɔ́, mɛ ɔ́ ná kú gbeɖé ǎ.” 52 Jwifu e gbɛ́ wǎn nú Jezu lɛ́ɛ yí gbe n'i ɖɔ: “Mǐ mɔ din ɖɔ yɛ nyanya wɛ ɖo jǐ towe nǔgbó; Ablaxámu ko kú wá yi, bɔ gbeyíɖɔ Mawu tɔn lɛ́ɛ bǐ ko kú, hwɛ ka wá ɖɔ din ɖɔ: ‘Ényí mɛɖé se xó ce bó bló ɖ'é jí ɔ́, mɛ ɔ́ ná kú gbeɖé ǎ.’ 53 Hwɛ hú gǎn tɔ́gbó mǐtɔn Ablaxámu wɛ a? Éyɛ́ ko kú, bɔ gbeyíɖɔ Mawu tɔn lɛ́ɛ lɔmɔ̌ ko kú. Mɛ̌ a ka nɔ sɔ́ hwiɖée dó mɔ?” 54 Jezu ka yí gbe nú yě ɖɔ: “Ényí nyɛ ɖésú wɛ nɔ sɔ́ nyɛɖée su ɔ́, susu ce na xɔ akwɛ́ ǎ. Tɔ́ ce wɛ ka nɔ sɔ́ mì su. Mi ɖíe ka ɖɔ é wɛ nyí Mawu nú émí e, 55 có mi ka tunwun i ǎ; nyɛ ɔ́, un tunwun i. Ényí un ɖɔ un kún tunwun i ó ɔ́, un ná nyí nǔvúɖótɔ́ mi ɖɔhun. Lo ɔ́, nyɛ tunwun i, bó nɔ́ bló xó tɔn lɛ́ɛ ɖ'é jí. 56 Awǎjijɛ ɖaxó wɛ nyí nú tɔ́gbó mitɔn Ablaxámu, ɖó é ɖo nukún ɖó wiwa ce wɛ; é ka mɔ nǔgbó, bɔ xomɛ hun i.” 57 Jwifu e gbɛ́ wǎn nú Jezu lɛ́ɛ ka kanbyɔ́ ɛ ɖɔ: “A ko ɖó xwe kanɖé wǒ (50 ) vɔ́vɔ́ ǎ, bó ka mɔ Ablaxámu a?” 58 Jezu ka ɖɔ nú yě ɖɔ: “Ma ɖɔ nǔgbó nú mi: cóbónú Ablaxámu ná jɔ ɔ́, nyɛ ko tíin.” 59 Bɔ yě fɔ awǐnnyaglo, bó ná nyi dó e; Jezu ka bɛ, bó tɔ́n sín sinsɛnxɔ ɔ́ mɛ.
Jezu hun nukún nú nukúntíntɔ́nnɔ ɖé
1 Jezu wá xweyǐgbe, bó mɔ nya ɖé, bɔ è ji nukúntíntɔ́nnɔ tɔn. 2 Jezu sín ahwanvú lɛ́ɛ kanbyɔ́ Jezu ɖɔ: “Mɛ̌si, mɛ̌ wɛ hu hwɛ bɔ è ka ji nya élɔ́ nukúntíntɔ́nnɔ tɔn mɔ̌? É ɖésú wɛ hu hwɛ a, abǐ mɛ e ji i lɛ́ɛ ɖě wɛ hu hwɛ?” 3 Jezu ka yí gbe nú yě ɖɔ: “É ɖésúnɔ ɔ́ hu hwɛ wú wɛ ǎ, mɛ e ji i lɛ́ɛ ɖě ká hu hwɛ wú wɛ ǎ; é tɔ́n nukún, bónú Mawu ná dó ɖe hlɔ̌nhlɔ́n tɔn xlɛ́ dó wǔtu tɔn. 4 Din e kéze kpo ɖo te ɔ́, mǐ ɖó ná wa mɛ e sɛ́ mì dó ɔ́ sín azɔ̌, ɖó zǎn ko ɖo nǎ kú wɛ, bɔ mɛɖé sɔ́ ná sixú kpé nǔɖé wú bó wa ǎ. 5 Hwenu e un sigǎn kpo ɖo gbɛ ɔ́ mɛ ɔ́, nyɛ wɛ nyí wěziza nú gbɛ ɔ́.” 6 Ée Jezu ɖɔ mɔ̌ ɔ́, é tún atán kɔn nyi kɔ́ mɛ, bó dó fan babá ná, bó sá dó nukún nú nya ɔ́, 7 bo ɖɔ n'i ɖɔ: “Yi klɔ́ ɖo Silowée tɔnu.” (Silowée ɔ́ sín tínmɛ wɛ nyí mɛsɛ́dó.) Nya nukúntíntɔ́nnɔ ɔ́ ka yi klɔ́ ɖo tɔ ɔ́ nu nǔgbó; ée é lɛ́ kɔ ɔ́, é mɔ nǔ céɖécéɖé. 8 Mɛ e ɖo xwé tɔn kpá lɛ́ɛ kpódó mɛ e ko nɔ mɔ ɛ ɖo nǔ byɔ́ ɖu wɛ ɖ'ayǐ lɛ́ɛ kpó nɔ ɖɔ: “É ma ka nyí nya e nɔ jínjɔ́n ayǐ, bo nɔ ɖo nǔ byɔ́ ɖu wɛ ɔ́ nɛ́ a?” 9 Mɛɖě nɔ ɖɔ: “É wɛ”, mɛ ɖěvo lɛ́ɛ ka nɔ ɖɔ: “Gbeɖé, mɛɖimɛ wɛ.” É ɖésúnɔ ka ɖɔ nú yě ɖɔ: “Nyɛ jɛ́n wɛ.” 10 Yě ká kanbyɔ́ ɛ ɖɔ: “Nɛ̌ nukún towe lɛ́ɛ ka hun gbɔn?” 11 Bɔ é yí gbe nú yě ɖɔ: “Mɛ e è nɔ ylɔ́ ɖɔ Jezu ɔ́ wɛ fan babá, bó sá dó nukún nú mì, bó ɖɔ nú mì ɖɔ: ‘Yi tɔ e è nɔ ylɔ́ ɖɔ Silowée ɔ́ nu, bó yi klɔ́.’ Ɖěe un ka yi tɔ ɔ́ nu bó yi klɔ́ ɔ́, un mɔ nukúnnú.” 12 Yě ká kanbyɔ́ ɛ ɖɔ: “Fítɛ́ mɛ ɔ́ ka ɖe?” Bɔ é yí gbe nú yě ɖɔ: “Un tunwun ǎ.”
Falizyɛn lɛ́ɛ kan nǔ byɔ́ nya e Jezu hun nukún ná é
13 Yě kplá nya e ko nyí nukúntíntɔ́nnɔ ɖ'ayǐ ɔ́ yi jó nú Falizyɛn lɛ́ɛ. 14 Gbe e gbe Jezu ka fan babá, bó dó hun nukún n'i ɔ́, gbɔjɛzán Jwifu lɛ́ɛ tɔn gbe wɛ. 15 Énɛ́ ɔ́ wú wɛ Falizyɛn lɛ́ɛ lɔ kan nǔ byɔ́ ɛ dó lě e nukún tɔn hun gbɔn ɔ́ wú. É ka ɖɔ nú yě ɖɔ: “É fan babá bó sá dó nukún nú mì, bɔ un yi klɔ́, bó ka jɛ nǔ mɔ jí.” 16 Falizyɛn lɛ́ɛ ɖě ɖɔ: “Mɛ e bló nǔ mɔ̌hunkɔ ɔ́ sixú gosín Mawu gɔ́n ǎ; ɖó é gba sɛ́n e ɖɔ xó dó gbɔjɛzán ɔ́ wú é.” Mɛ ɖěvo lɛ́ɛ ɖɔ: “Nɛ̌ hwɛhutɔ́ ɖé ka sixú jlɛ́ nǔ mɔ̌hunkɔtɔn lɛ́ɛ gbɔn?” Bɔ gbe yětɔn sɔ́ ɖo kpɔ́ ǎ. 17 Yě ká lɛ́ kanbyɔ́ nya e ko nyí nukúntíntɔ́nnɔ ɖ'ayǐ ɔ́ ɖɔ: “Hwɛ ɔ́, mɛ e hun nukún nú we ɔ́, étɛ́ a ka lin dó wǔ tɔn?” É ka yí gbe nú yě ɖɔ: “Gbeyíɖɔ Mawu tɔn ɖé wɛ.” 18 Nǔ ɖo mɔ̌ có Jwifugán lɛ́ɛ jló ná ɖi ɖɔ nya ɔ́ ko nyí nukúntíntɔ́nnɔ ɖ'ayǐ, cóbó wá ɖo nukúnnú mɔ wɛ ǎ, lobo ylɔ́ mɛ e ji i lɛ́ɛ, 19 bó kanbyɔ́ yě ɖɔ: “Vǐ mitɔn ɔ́ jɛ́n ɖíe a? Nukúntíntɔ́nnɔ tɔn wɛ mi ji nǔgbó a? Nɛ̌ nǔ ka nyí gbɔn bɔ é ɖo nǔ mɔ wɛ din?” 20 Mɛ e ji i lɛ́ɛ ka yí gbe nú yě ɖɔ: “Vǐ mǐtɔn wɛ, bɔ mǐ ji nukúntíntɔ́nnɔ tɔn. 21 Amɔ̌, lě e nǔ nyí gbɔn, bɔ é wá ɖo nǔ mɔ wɛ din ɔ́, mǐ mɔ do ná ǎ; mɛ̌ to hun nukún n'i hǔn, mǐ tunwun ǎ. Mi kan xó byɔ́ ɛ, é ko ɖó xwe e ná ɖɔ xó dó éɖée nu ɔ́; é ɖésúnɔ ná tínmɛ nú mi.” 22 Mɛ e ji i lɛ́ɛ ɖɔ mɔ̌, ɖó yě ɖo xɛsi ɖi nú Jwifugán lɛ́ɛ wɛ, ɖó yě ko kplé, bó ɖɔ ɖó alɔ ɖokpó ɔ́ jí ɖɔ mɛɖé mɔ Jezu dó mɔ Klísu ná ɔ́, émí ná nya mɛ ɔ́ sín kplɔ́ngbasá émítɔn. 23 Nǔ e wú mɛ e ji i lɛ́ɛ ɖɔ é ko ɖó xwe e ná ɖɔ xó dó éɖée nu ɔ́ nɛ́, bó ɖɔ è nǐ kan nǔ byɔ́ é ɖésúnɔ. 24 Jwifugán lɛ́ɛ lɛ́ vɔ́ ylɔ́ nya e ko nyí nukúntíntɔ́nnɔ ɖ'ayǐ ɔ́ azɔn wegɔ́ ɔ́, bó ɖɔ n'i ɖɔ: “Kpa susu nú Mawu; mǐdɛɛ lɛ́ɛ ɔ́, mǐ tunwun ɖɔ dǎwe énɛ́ ɔ́, hwɛhutɔ́ wɛ.” 25 Éyɛ́ ka ɖɔ nú yě ɖɔ: “E to nyí hwɛhutɔ́ oo, é to ma nyí hwɛhutɔ́ oo, un tunwun ǎ; nǔ ɖokpó géé e un tunwun ɔ́ wɛ nyí ɖɔ: nukúntíntɔ́nnɔ wɛ un nyí ɖ'ayǐ; amɔ̌ din ɔ́, un ɖo nǔ mɔ wɛ.” 26 Yě lɛ́ kanbyɔ́ ɛ ɖɔ: “Nɛ̌ é ká bló gbɔn nú we? Nɛ̌ é ká hun nukún nú we gbɔn?” 27 Bɔ é yí gbe nú yě ɖɔ: “Un ko ɖɔ lě e nǔ lɛ́ɛ nyí gbɔn ɔ́ nú mi, bɔ mi dó tókúse mɛ; nɛ̌ ka gbɔn din bɔ mi jló nú ma lɛ́ vɔ́ wlí ɖɔ nú mì? Mi lɔmɔ̌ jló ná húzú ahwanvú tɔn lɛ́ɛ wɛ a?” 28 Ée nya ɔ́ ɖɔ mɔ̌ nú yě ɔ́, yě bɔ zun ɖó n'i, bó ɖɔ: “Hwi wɛ nyí ahwanvú dǎwe énɛ́ tɔn, mǐdɛɛ lɛ́ɛ ɔ́, ahwanvú Mɔyízi tɔn wɛ mǐ nyí. 29 Mǐdɛɛ lɛ́ɛ tunwun ɖɔ Mɔyízi wɛ Mawu ɖɔ xó ná; amɔ̌, mɛ énɛ́ ɔ́, mi tunwun fí e éyɛ́ gosín ɔ́ ǎ.” 30 Nya ɔ́ ka yí gbe nú yě ɖɔ: “É kpácá mì bɔ mi tunwun fí e é gosín ɔ́ ǎ, có é ka hun nukún nú nyɛ. 31 Đó mǐ tunwun ganjí ɖɔ Mawu kún nɔ ɖótó hwɛhutɔ́ lɛ́ɛ ó; mɛ e ka nɔ sí Mawu bo nɔ blǒ nǔ e Mawu jlǒ lɛ́ɛ ɔ́, mɛ énɛ́ ɔ́ wɛ Mawu nɔ ɖótó. 32 È se gbeɖé kpɔ́n ɖɔ mɛɖé hun nukún nú mɛ e ko tɔ́n nukún sín nɔ tɔn xo mɛ ɔ́ ǎ. 33 Ényí nya énɛ́ ma ka gosín Mawu gɔ́n ǎ ɔ́, é ná sixú wa nǔɖé ǎ.” 34 Yě ká yí gbe n'i ɖɔ: “Hwi ɖésúnɔ bǐ ɔ́, hwɛ mɛ wɛ è ji we dó, bɔ a ka wá ja nǔ kplɔ́n mǐdɛɛ lɛ́ɛ gbé.” Bɔ yě ɖe e sín agun yětɔn mɛ.
Mɛ e ma mɔ nukúnnú jɛ Mawu wú ǎ lɛ́ɛ
35 Ée Jezu se ɖɔ yě ɖe dǎwe e é hun nukún ná ɔ́ sín agun yětɔn mɛ ɔ́, é wá yi kpé e ɖo alixo, bó kanbyɔ́ ɛ ɖɔ: “A ɖi nǔ nú Gbɛtɔ́ví ɔ́ a?” 36 Dǎwe ɔ́ ka yí gbe n'i ɖɔ: “Mɛɖaxó, mɛ̌ ka nyí mɛ ɔ́, ɖɔ nú mì bónú má ɖi nǔ n'i.” 37 Jezu ka ɖɔ n'i ɖɔ: “Mɛ ɔ́ ɖíe mɔ wɛ a ko ɖe e; é wɛ nyí nyɛ mɛ e ɖo xó ɖɔ nú we wɛ din é.” 38 Bɔ nya ɔ́ ɖɔ n'i ɖɔ: “Un ɖi nǔ nú we, Aklúnɔ,” bó jɛ kpo, bó ɖe kɔ́ n'i. 39 Jezu ka ɖɔ: “Un wá gbɛ ɔ́ mɛ bó ná ɖe nǔwanyido gbɛtɔ́ lɛ́ɛ tɔn nyi wěxo, bónú mɛ e ma mɔ nǔ ǎ lɛ́ɛ ná mɔ nǔ, bónú mɛ e ka ɖo nǔ mɔ wɛ lɛ́ɛ ná húzú nukúntíntɔ́nnɔ.” 40 Falizyɛn ɖé lɛ́ɛ ka ɖo fínɛ́ xá Jezu, bó se xó énɛ́ ɔ́, bó kanbyɔ́ ɛ ɖɔ: “Mǐ lɔmɔ̌ nyí nukúntíntɔ́nnɔ wɛ a?” 41 Jezu ka yí gbe nú yě ɖɔ: “Ényí nukúntíntɔ́nnɔ wɛ mi ko nyí ɔ́, hwɛ mitɔn sɔ́ ná kpo ɖo kɔ nú mi ǎ. Lo ɔ́, ée mi nɔ ɖɔ émí nɔ mɔ nukúnnú ɔ́, hwɛ mitɔn lɛ́ɛ kpo ɖo kɔ nú mi.”
Jezu hun nukún nú nukúntíntɔ́nnɔ ɖé
1 “Má ɖɔ nǔgbó nú mi: mɛ e ma gbɔn hɔnlinu byɔ́ lɛ̌ngbɔ́kpó ɔ́ mɛ ǎ, bó fán nǔ gbɔn fí ɖěvo byɔ́ mɛ ɔ́, mɛ énɛ́ ɔ́, ajotɔ́ axánsúnxó wɛ é nyí. 2 Lo ɔ́, mɛ e gbɔn hɔnlinu byɔ́ mɛ ɔ́, é wɛ nyí lɛ̌ngbɔ́nyitɔ́ ɔ́. 3 Éyɛ́ wɛ hɔnjínɔtɔ́ nɔ hun hɔn ná, bɔ lɛ̌ngbɔ́ lɛ́ɛ nɔ ɖótó gbe tɔn; é nɔ́ ylɔ́ lɛ̌ngbɔ́ tɔn lɛ́ɛ ɖokpó ɖokpó sín nyǐkɔ, bó nɔ́ ɖe yě tɔ́n. 4 Ényí é ɖe lɛ̌ngbɔ́ e nyí étɔn lɛ́ɛ bǐ tɔ́n ɔ́, é nɔ́ jɛ nukɔn yětɔn, bɔ lɛ̌ngbɔ́ lɛ́ɛ nɔ xwedó e; ɖó yě se gbe tɔn ɔ́, yě nɔ́ tunwun. 5 Amɔ̌, yě nɔ xwedó jǒnɔ ǎ; é nyɔ́ wa ɔ́, hɔn wɛ yě nɔ hɔn n'i; ɖó yě tunwun gbe tɔn ǎ.” 6 Lǒ wɛ nyí bɔ Jezu dó bó dó ɖɔ xó nú yě, yě ká mɔ nukúnnú jɛ nǔ e é jlǒ ná ɖɔ nú yě ɔ́ mɛ ǎ.
Jezu wɛ nyí lɛ̌ngbɔ́nyitɔ́ ɖagbe ɔ́
7 Jezu lɛ́ ɖɔ nú yě ɖɔ: “Má ɖɔ nǔgbó nú mi: nyɛ wɛ nyí hɔn nú lɛ̌ngbɔ́ lɛ́ɛ. 8 Mɛ e ko jɛ nukɔn nú mì lɛ́ɛ bǐ wɛ nyí ajotɔ́ axánsúnxó, lɛ̌ngbɔ́ lɛ́ɛ ka ɖótó yě ǎ. 9 Nyɛ wɛ nyí hɔn ɔ́. Mɛ e ná gbɔn jǐ ce ɔ́, è nǎ hwlɛ́n ɛ gán; é ná nɔ́ yi, bó ná nɔ́ wá, bó ná nɔ́ mɔ nǔ ɖu. 10 Ajotɔ́ ɔ́, ajogbé wɛ é nɔ́ tɔ́n, bó nɔ́ tɔ́n mɛ hu gbé, bó nɔ́ tɔ́n nǔ hɛn gblé gbé. Nyɛ ɔ́, un wá bónú lɛ̌ngbɔ́ lɛ́ɛ ná mɔ gbɛ, bó mɔ gbɛ dó gbɛ jí. 11 “Nyɛ wɛ nyí lɛ̌ngbɔ́nyitɔ́ ɖagbe ɔ́, lɛ̌ngbɔ́nyitɔ́ ɖagbe ɔ́ nɔ́ sɔ́ gbɛ tɔn dó sá vɔ̌ dó lɛ̌ngbɔ́ tɔn lɛ́ɛ tamɛ. 12 Azɔ̌watɔ́ e ka ɖo lɛ̌ngbɔ́ lɛ́ɛ nyi wɛ ɖó akwɛ́ kɛ́ɖɛ́ wútu, bɔ lɛ̌ngbɔ́ lɛ́ɛ ma nyí étɔn ǎ ɔ́, ényí é mɔ hla jǎwe ɔ́, hɔn wɛ é nɔ hɔn jó lɛ̌ngbɔ́ lɛ́ɛ dó, bɔ hla nɔ byɔ́ yě mɛ, bó nɔ́ wlí ɖě, bó nɔ́ gba ɖě lɛ́ɛ dó. 13 Mɛ énɛ́ ɔ́ nɔ hɔn, ɖó akwɛ́ kɛ́ɖɛ́ ba wɛ é ɖe. Lɛ̌ngbɔ́ lɛ́ɛ sín gbɛ nɔ vɛ́ n'i ǎ. 14 -15 Nyɛ wɛ nyí lɛ̌ngbɔ́nyitɔ́ ɖagbe ɔ́. Lě e Tɔ́ ɔ́ tunwun mì, bɔ nyɛ lɔ tunwun i gbɔn ɔ́, un tunwun lɛ̌ngbɔ́ ce lɛ́ɛ, bɔ yě lɔ tunwun mì, bɔ un sɔ́ gbɛ ce dó sá vɔ̌ dó ta yětɔn mɛ. 16 Un lɛ́ ɖó lɛ̌ngbɔ́ ɖěvo lɛ́ɛ bɔ yě ɖo wutó élɔ́ mɛ ǎ; un ɖó ná kplá yě lɔmɔ̌ wá fí, bɔ yě ná se gbe ce, bɔ lɛ̌ngbɔ́hwan ɔ́ ná nyí ɖokpó, bɔ lɛ̌ngbɔ́nyitɔ́ lɔmɔ̌ ná nyí ɖokpó. 17 “Tɔ́ ɔ́ yí wǎn nú mì, ɖó un sɔ́ gbɛ ce dó sá vɔ̌ ná, bó ná sixú lɛ́ vɔ́ yí. 18 Mɛɖěbǔ ná yí gbɛ ce sín así ce ǎ; lo ɔ́, nyɛ ɖésú wɛ jló bó sɔ́ jó; ɖó un ɖó acɛ e sɔ́ gbɛ ce jó é, bó ka lɛ́ ɖó acɛ e lɛ́ vɔ́ yí é. Tɔ́ ce wɛ ná acɛ énɛ́ ɔ́ mì. Lě e Tɔ́ ce zɔ́n mì gbɔn ɔ́ nɛ́.” 19 Gbemanɔkpɔ́ lɛ́ byɔ́ Jwifu e gbɛ́ wǎn nú Jezu lɛ́ɛ mɛ, ɖó xó énɛ́ lɛ́ɛ wútu. 20 Bɔ mɛ gěgé ɖo yě mɛ, bó ɖɔ: “Yɛ nyanya wɛ ɖo jǐ tɔn; taɖunɔ wɛ; étɛ́wú mi ka ɖo tó ɖó e wɛ?” 21 Mɛ ɖěvo lɛ́ɛ ɖɔ: “Mɛ e jí yɛ nyanya ɖe ɔ́ sín xó ɖiɖɔ nɛ́ ǎ; yɛ nyanya ɖě sixú hun nukún nú nukúntíntɔ́nnɔ lɛ́ɛ a?”
Jwifu lɛ́ɛ gbɛ́ Jezu
22 Hwenɛ́nu ɔ́, Jwifu lɛ́ɛ kplé ɖo Jeluzalɛ́mu, bó ɖo hwenu e yě sɔ́ sinsɛnxɔ yětɔn dó alɔ mɛ nú Mawu ɔ́ sín xwe ɖu wɛ. Avivɔ ɖaxó hwenu wɛ, 23 bɔ Jezu ɖo sa ɖi wɛ gbɔn Salomɔ́ɔ sín agba jí, ɖo sinsɛnxɔ ɔ́ mɛ. 24 Jwifu e gbɛ́ wǎn nú Jezu lɛ́ɛ lɛ́ lɛ̌ dó e, bó kanbyɔ́ ɛ ɖɔ: “Káká jɛ hwetɛ́nu a nǎ ɖɔ xó jɔ xó nú mǐ, bɔ mǐ ná gɔn nǔ xokpɔ́n dó? Ényí hwi wɛ nyí Klísu ɔ́ hǔn, ɖɔ nú mǐ tawun.” 25 Jezu ka yí gbe nú yě ɖɔ: “Un ko ɖɔ nú mi, mi ka ɖi ǎ. Nǔ e wa wɛ un ɖe ɖo Tɔ́ ce nyǐkɔ mɛ lɛ́ɛ nɔ ɖe kúnnu nú mì. 26 Lo ɔ́ mi ka ɖi ǎ, ɖó mi ɖo lɛ̌ngbɔ́ ce lɛ́ɛ mɛ ǎ. 27 Lɛ̌ngbɔ́ ce lɛ́ɛ nɔ ɖótó gbe ce, un tunwun yě bɔ yě nɔ xwedó mì. 28 Un nɔ ná gbɛ mavɔ mavɔ yě; yě ná kú gbeɖé ǎ; mɛ ɖěbǔ ka ná yí yě sín alɔ ce mɛ ǎ. 29 Tɔ́ ce e sɔ́ yě dó así nú mì ɔ́, hú gǎn nǔ bǐ, mɛ ɖěbǔ sixú xo nǔɖé yí sín alɔ tɔn mɛ ǎ. 30 Nyɛ kpódó Tɔ́ ɔ́ kpó ɔ́, ɖokpó wɛ mǐ nyǐ.” 31 Jwifu e gbɛ́ wǎn nú Jezu lɛ́ɛ fɔ awǐnnyaglo bó ná nyi dó hu i ná, 32 bɔ Jezu ɖɔ nú yě ɖɔ: “Nǔ ɖagbe e gosín Tɔ́ ce gɔ́n lɛ́ɛ ɔ́, un ɖe gěgé xlɛ́ mi; ɖě tɛ́ wútu wɛ mi jló ná nyi awǐnnyaglo dó hu mì?” 33 Yě yí gbe n'i ɖɔ: “Nǔ ɖagbe e a ɖe xlɛ́ mǐ lɛ́ɛ ɖě wútu wɛ mǐ jló ná nyi awǐnnyaglo dó hu we ǎ, nu e a nylǎ dó Mawu wú ɔ́ wútu wɛ. Đó hwi mɛ e nyí gbɛtɔ́ yǎyá ɔ́, a nɔ sɔ́ hwiɖée dó ɖó Mawu ná.” 34 Jezu ka yí gbe nú yě ɖɔ: “È ma wlán dó Mawuxówéma mitɔn mɛ ɖɔ: ‘Un ɖɔ jí: mawu wɛ mi nyí’ ǎ cé? 35 Mawuxówéma ɔ́ nɛ́ è ma ka sixú gbídí nǔ ɖěbǔ ɖ'é mɛ ǎ nɛ́. Ényí è ka ylɔ́ mɛ e ɖɔ Mawuxó ná wɛ è ɖe lɛ́ɛ ɖɔ mawu ɔ́, 36 étɛ́wú nyɛ mɛ e Mawu ka ɖe ɖó vo, bó sɛ́ mì dó gbɛ ɔ́ mɛ ɔ́, un ɖɔ nú mi ɖɔ Mawu ví wɛ un nyí, bɔ mi ka ɖɔ un nylá nu dó Mawu wú? 37 Nú un ma ɖo azɔ̌ e nyí Tɔ́ ce tɔn lɛ́ɛ wa wɛ ǎ hǔn, mi ma ɖi nǔ nú mì ó. 38 Ényí un ka ɖo azɔ̌ e nyí étɔn lɛ́ɛ wa wɛ hǔn, mi na bo ma ɖi nǔ nú mì ǎ hǔn, mi bo ɖi nǔ ɖó azɔ̌ énɛ́ lɛ́ɛ wútu. Bónú mi tunwun, bó mɔ nǔ jɛ wú ɖɔ Tɔ́ ɔ́ ɖo nyɛ mɛ, bɔ un ɖo Tɔ́ ɔ́ mɛ.” 39 Ée Jezu ɖɔ mɔ̌ ɔ́, yě lɛ́ jló ná wlí i, bɔ é ka hɔn sín yě mɛ. 40 É lɛ́ yi Judɛ́ɛn tɔ gúdo, fí e Jǎan lɛ yɛhwesin nú mɛ lɛ́ɛ ɖe ɔ́, bó cí fínɛ́. 41 Gbɛtɔ́ gěgé wá gɔ̌n tɔn bó nɔ́ ɖɔ: “Jǎan Yɛhwesinlɛnúmɛtɔ́ jlɛ́ nǔ ɖěbǔ ǎ; lo ɔ́, nǔ e é ka ɖɔ dó nya élɔ́ wú ɔ́ bǐ wɛ nyí nǔgbó.” 42 Bɔ fínɛ́ ɔ́, mɛ gěgé ɖi nǔ nú Jezu.
1 Nya ɖé tíin, bó ɖo azɔn jɛ wɛ, bɔ è nɔ ylɔ́ ɛ ɖɔ Lazáa Betaníi tɔn; Betaníi ɔ́, Mali kpódó nɔví tɔn Maati kpó sín gletoxo wɛ. 2 Mali énɛ́ wɛ nyí nyɔ̌nu e sá célu nú Jezu, bó zé ɖa tɔn dó súnsún afɔ tɔn lɛ́ɛ ná é; nɔví tɔn wɛ ka nyí Lazáa e ɖo azɔn jɛ wɛ é. 3 Lazáa sín nɔví nyɔ̌nu we lɛ́ɛ ka sɛ́ wɛn dó Jezu bó ɖɔ: “Aklúnɔ, xɔ́ntɔn towe vívɛ́ná ɔ́ ɖo azɔn jɛ wɛ.” 4 Ée Jezu se mɔ̌ ɔ́, é ɖɔ jí: “Kú wɛ ná ɖu ɖo azɔn élɔ́ jí ǎ; é ná ɖe susu Mawu tɔn xlɛ́, bɔ Mawu ví ɔ́ ná xɔ susu gbɔn gbla tɔn mɛ.” 5 Jezu ka yí wǎn nú Maati kpódó nɔví tɔn nyɔ̌nu ɔ́ kpó, kpódó Lazáa kpán. 6 Lo ɔ́, hwenu e Jezu se ɖɔ Lazáa ɖo azɔn jɛ wɛ ɔ́, é lɛ́ nɔ to e mɛ é ɖe ɔ́ nú azǎn we d'é jí. 7 Énɛ́ ɔ́ gúdo ɔ́, é wá ɖɔ nú ahwanvú tɔn lɛ́ɛ ɖɔ: “Mi nú mǐ ná lɛ́ kɔ yi Judée.” 8 Ahwanvú tɔn lɛ́ɛ ka ɖɔ n'i ɖɔ: “Mɛ̌si, ayisɔnmɔ tófí jɛ́n wɛ Judéenu lɛ́ɛ ja huhu we gbé kpódó awǐnnyaglo kpó ɖo dɔ̌n, bɔ a nǎ lɛ́ lɛ́ kɔ yi dɔ̌n a?” 9 Jezu ka ɖɔ nú yě ɖɔ: “Ganxixo wěwe wɛ ɖo kéze ɖokpó mɛ; ényí mɛɖé ɖo yiyi wɛ kéze ɔ́, é nɔ klɛ́n afɔ ǎ, ɖó gbɛ mɛ nɔ za wě. 10 É ka nyí zǎn mɛ wɛ é ɖo yiyi wɛ ɔ́, é nɔ klɛ́n afɔ, ɖó wěziza ɖo é ɖésúnɔ mɛ ǎ.” 11 Énɛ́ ɔ́ gúdo ɔ́, é lɛ́ ɖɔ nú yě ɖɔ: “Xɔ́ntɔn mǐtɔn Lazáa ɖo amlɔ dɔ́ wɛ; un ná yi fɔ́n ɛ.” 12 Énɛ́ ɔ́, ahwanvú tɔn lɛ́ɛ kɛ nu bo ɖɔ: “Aklúnɔ, ényí ɖɔ amlɔ dɔ́ wɛ jɛ́n é ɖe ɔ́, azɔn tɔn ná gbɔ.” 13 Lazáa ko kú ɖɔ nú yě wɛ Jezu ɖe, cóbɔ yědɛɛ lɛ́ɛ ka vɛdó ɖɔ amlɔ dɔ́ wɛ é ɖe, bó ɖo gbigbɔ jɛ wɛ sín. 14 Bɔ Jezu gbɔ bo ɖɔ nyi wɛn nú yě ɖɔ: “Lazáa kú; 15 fínɛ́ e un ma ka ɖe cóbɔ é kú ǎ ɔ́ víví nú mì ɖó mi wútu; énɛ́ ɔ́ ná zɔ́n bɔ mi ná sixú ɖi nǔ. Mi bo nú mǐ ná yi gɔ̌n tɔn.” 16 Hwenɛ́nu ɔ́, Tɔmáa e è nɔ lɛ́ ylɔ́ ɖɔ hǒxo ɔ́ ɖɔ nú ahwanvú ɖě lɛ́ɛ ɖɔ: “Mi nú mǐ lɔmɔ̌ ná xwedó e hɛn yi, bó ná yi kú xá ɛ.”
Jezu wɛ nyí fínfɔ́n sín kú bó lɛ́ nyí gbɛ
17 Ée Jezu wá Betaníi ɔ́, é mɔ ɖɔ è ko ɖi Lazáa, bɔ azǎn tɔn ko yi ɛnɛ. 18 Betaníi yá dó Jeluzalɛ́mu bó ɖo kilomɛ́tlu atɔn mɔ̌ dó e. 19 Bɔ Judéenu lɛ́ɛ gěgé ko wá nǔwamɛgbe dó Maati kpódó Mali kpó gbé ɖó nɔví yětɔn e kú ɔ́ wú. 20 Ée Maati se ɖɔ Jezu jǎwe ɔ́, é yi kpé e ɖo alixo; lo ɔ́, Mali cí xwé gbe. 21 Ée Maati yi mɔ Jezu ɔ́, é ɖɔ: “Aklúnɔ, ényí fí wɛ a ko ɖe ɔ́, nɔví ce ná kú ǎ. 22 Có din ɖésú ɔ́, un tunwun ɖɔ a byɔ́ nǔ ɖěbǔ Mawu ɔ́, é ná ná bǐ we.” 23 Jezu ka ɖɔ n'i ɖɔ: “Nɔví towe ná fɔ́n.” 24 Bɔ Maati yí gbe n'i ɖɔ: “Un tunwun ɖɔ é ná fɔ́n ɖo fínfɔ́n sín kú mɛkúkú lɛ́ɛ tɔn hwenu, ɖo azǎn gǔdo gúdo tɔn ɔ́ gbe.” 25 Jezu ka ɖɔ n'i ɖɔ: “Nyɛ wɛ nyí fínfɔ́n sín kú, bo lɛ́ nyí gbɛ; mɛ ɖěbǔ ɖi nǔ nú mì ɔ́, é ná bo kú ɔ́, é ná nɔ gbɛ. 26 Mɛ e ka ɖo gbɛ bo ɖi nǔ nú mì ɔ́ ná kú gbeɖé ǎ. A ɖi nǔ ɖɔ nǔ ná nyí mɔ̌ a?” 27 Maati ka yí gbe n'i ɖɔ: “Ɛɛn Aklúnɔ, un ɖi nǔ ɖɔ hwi wɛ nyí Klísu Mawu ví e ɖó ná wá gbɛ ɔ́ mɛ é.”
Jezu ya avǐ
28 Ée Maati ná xósin énɛ́ ɔ́ Jezu ɔ́, é yi ylɔ́ nɔví tɔn Mali bó ɖe kpá ɛ ɖɔ: “Mɛ̌si wá bo ɖo ylɔ̌ylɔ́ we wɛ.” 29 Ée Mali se mɔ̌ ɔ́, é sí te vawun, bo ɖidó Jezu kpé gbé. 30 Jezu ko byɔ́ gletoxo ɔ́ mɛ hwenɛ́nu ǎ, é kpo ɖo fí e Maati yi kpé e ɖe é. 31 Ée Judéenu e wá bo ɖo xwé ɔ́ gbé xá Mali, bo ɖo gbɔ dó n'i wɛ lɛ́ɛ mɔ bɔ é sí te vawun mɔ̌ bo tɔ́n ɔ́, yě xwedó e, ɖó yě vɛdó ɖɔ yɔ ɔ́ jí ya avǐ ɖe gbé wɛ é xwe sín. 32 Ée Mali yi mɔ Jezu ɖo fí e é ɖe ɔ́, é jɛ kpo ɖo nukɔn tɔn, bó ɖɔ n'i ɖɔ: “Aklúnɔ, ényí a ko ɖo fí wɛ ɔ́, nɔví ce ná kú ǎ.” 33 Ée Jezu mɔ ɖɔ é ɖo avǐ ya wɛ, bɔ Judéenu e xwedó e lɛ́ɛ lɔ ɖo avǐ ya wɛ ɔ́, lanmɛ tɔn slɔ́ fún, bɔ ayi tɔn bǐ gbadó; 34 bɔ é kanbyɔ́ ɛ ɖɔ: “Fítɛ́ mi ka sɔ́ ɛ ɖó?” Yě ká yí gbe n'i ɖɔ: “Aklúnɔ, wǎ kpɔ́n fí e mǐ sɔ́ ɛ ɖó ɔ́.” 35 Bɔ Jezu ya avǐ. 36 Ée Judéenu lɛ́ɛ mɔ mɔ̌ ɔ́, yě ɖɔ: “Mi kpɔ́n lě e é yí wǎn n'i sɔ é.” 37 Mɛ ɖé lɛ́ɛ ka ɖo yě mɛ bó ɖɔ: “Éyɛ́ mɛ e hun nukún nú nukúntíntɔ́nnɔ ɔ́, é sixú bló bónú nya énɛ́ gɔn kúkú ǎ cé?”
Jezu fɔ́n Lazáa
38 Wǔ lɛ́ kú Jezu, bɔ é ɖidó yɔdo ɔ́ kɔn; yɔdo ɖé wɛ bó ɖo sóxo mɛ bɔ è blǐ awǐnnya nyi nu. 39 Ée Jezu jɛ fínɛ́ ɔ́, é ɖɔ nú mɛ lɛ́ɛ ɖɔ: “Mi blí awǐnnya ɔ́ síin.” Bɔ mɛ e kú ɔ́ sín nɔví nyɔ̌nu Maati ɖɔ nú Jezu ɖɔ: “Aklúnɔ, cyɔ ɔ́ ná ko dó cyɔ mɛ! Đó azǎn ɛnɛ ɖíe ɖokpóó wɛ é ko ɖo fínɛ́.” 40 Jezu ka ɖɔ n'i ɖɔ: “Un ko ɖɔ nú we ɖɔ nú a ɖi nǔ ɔ́, a ná mɔ susu Mawu tɔn ǎ cé?” 41 Bɔ yě blí awǐnnya ɔ́ síin. Jezu ka zé ta yi jǐ, bó ɖɔ: “Tɔ́ ce, un dó kú nú we, ɖó a ɖǒtó mì. 42 Un tunwun ɖɔ a nɔ ɖótó mì tɛgbɛ; amɔ̌, mɛ e lɛ́ lɛ̌ dó mì lɛ́ɛ wútu wɛ un ka ɖo xó ɖɔ wɛ bónú yě ná dó ɖi nǔ ɖɔ hwi wɛ sɛ́ mì dó.” 43 Ée Jezu ɖɔ xó énɛ́ vɔ ɔ́, é sú xó syɛ́nsyɛ́n bo ɖɔ: “Lazáa tɔ́n, bó wá.” 44 Bɔ mɛkúkú ɔ́ tɔ́n sín yɔdo ɔ́ mɛ nǔgbó, bɔ avɔ e è lɛ̌ dó afɔ tɔn lɛ́ɛ kpódó alɔ tɔn lɛ́ɛ kpán é bǐ ɖo mɔ̌, bɔ avɔ e è dǒ blǎ gba n'i ɔ́ ɖo nukún mɛ n'i. Jezu ɖɔ nú yě ɖɔ: “Mi tún gba n'i, bo jó e dó nú é yi.”
È blǎ Jezu gbé
45 Ée Judéenu e wá Mali gɔ́n lɛ́ɛ mɔ nǔ énɛ́ e Jezu jlɛ́ ɔ́, yě mɛ gěgé ɖi nǔ n'i. 46 Nǔ ɖo mɔ̌ có mɛɖé lɛ́ɛ ɖo yě mɛ, bó yi mɔ Falizyɛn lɛ́ɛ, bó wlí nǔ e Jezu wa é bǐ ɖɔ nú yě. 47 Bɔ vɔ̌sánú-xwlémawutɔ́gán lɛ́ɛ kpódó Falizyɛn lɛ́ɛ kpó ylɔ́ kplé toxóɖɔtɔ́ lɛ́ɛ tɔn, bó ɖɔ: “Nɛ̌ mǐ ká ná bló gbɔn nú nya élɔ́? Éɖíe ɖo nǔ gěgé jlɛ́ wɛ e. 48 Ényí mǐ jó e dó, bɔ é ɖo nǔ wa gbɔn mɔ̌ wɛ ɔ́, mɛ bǐ ná ɖi nǔ n'i, bɔ Hlɔ̌manu lɛ́ɛ ná wá gba sinsɛnxɔ mǐtɔn, bó ná gba to ɔ́ dó ta nú mǐ.” 49 Mɛ ɖokpó ka ɖo yě mɛ, bó nɔ́ nyí Kayífu; é wɛ ɖo vɔ̌sánú-xwlémawutɔ́ ɖaxó sín azɔ̌ wa wɛ xwe énɛ́ xwe, bó ɖɔ nú yě ɖɔ: “Mi tunwun nǔɖé ǎ. 50 Hǔn mi mɔ ɖɔ mɛ ɖokpó géé kú dó mɛ bǐ tamɛ ɔ́, é nyɔ́ hú to ɔ́ bǐ sésé ní vɔ ǎ cé?” 51 É ɖésú wɛ ka ɖo xó énɛ́ ɖɔ wɛ ǎ; lo ɔ́, xwe énɛ́ xwe ɔ́, é wɛ nyí vɔ̌sánú-xwlémawutɔ́ ɖaxó ɔ́, bɔ Mawu ɖɔ xó gbɔn jǐ tɔn ɖɔ Jezu ná kú dó togun ɔ́ bǐ tamɛ. 52 É ka nyí ɖɔ togun énɛ́ ɔ́ kɛ́ɖɛ́ tamɛ wɛ é ná kú dó ǎ; é ná lɛ́ kplé Mawu ví e gbadó lɛ́ɛ bǐ ɖó bǔ. 53 Sín gbe énɛ́ gbe ɖokpóó wɛ yě ko ɖe gbeta tɔ́n ɖɔ émí ná hu i. 54 Énɛ́ ɔ́ wútu wɛ Jezu sɔ́ nɔ zé éɖée xlɛ́ Judéenu lɛ́ɛ agbawungba ǎ, bɔ é kpódó ahwanvú tɔn lɛ́ɛ kpó yi cí to e è nɔ ylɔ́ ɖɔ Eflayímu é mɛ, ɖo malín málín mɛ dó gbětótló mɛ. 55 Dǐndínwáyixwe Jwifu lɛ́ɛ tɔn ko sɛ yá; bɔ to ɔ́ mɛ nu lɛ́ɛ gěgé ko yi Jeluzalɛ́mu bó ná yi slá wǔ, cóbɔ xwe ɔ́ ná wá. 56 Yě ɖo Jezu ba wɛ, bó jɛ kinkanbyɔ́ yěɖée jí ɖo sinsɛnxɔ ɔ́ mɛ ɖɔ: “É ná wá xwe ɔ́ tɛnmɛ ǎ wɛ a? Étɛ́ mi ka mɔ dó nǔ énɛ́ wú?” 57 Vɔ̌sánú-xwlémawutɔ́gán lɛ́ɛ kpódó Falizyɛn lɛ́ɛ kpó ɖé gbeta tɔn, bó ɖɔ: “Ényí mɛ ɖěbǔ tunwun fí e é ɖe ɔ́ hǔn, ní wá ɖɔ, bónú è nǎ yi wlí i.”
Mali kɔn célu dó afɔ nú Jezu
1 Dǐndínwáyixwe kpo azǎn ayizɛ́n, bɔ Jezu yi Betaníi fí e Lazáa e é fɔ́n sín kú ɔ́ nɔ́ nɔ é. 2 Ée é yi fínɛ́ ɔ́, yě ná nǔɖuɖu i, bɔ é kpódó Lazáa kpó ɖo ɖuɖu wɛ, bɔ Maati ɖo ká sɛn wɛ. 3 Mali ka sɔ́ célu axivɛ́nu lǐtli vlɔ́, bɔ è sɔ́ nǎ akú dó bló ná, lobo kɔn dó afɔ tɔn lɛ́ɛ jí, bó dɔn ɖa tɔn dó súnsún ná, bɔ célu ɔ́ sín wǎn gba kpé xwé ɔ́ gbe bǐ. 4 Jezu sín ahwanvú Judási Isikaliɔ́ti e ɖo nǎ sa ɛ wɛ ɔ́ ɖɔ: 5 “Étɛ́wú è ma ka sixú sɔ́ célu énɛ́ e è nǎ mɔ gankwɛ́ afɔɖé kanwe ko (250 ) cóbó xɔ ɔ́ sɔ́ sa, bó má akwɛ́ tɔn nú wamamɔnɔ lɛ́ɛ ǎ?” 6 É ka nyí ɖɔ wamamɔnɔ lɛ́ɛ sín kan vɛ́ wɛ é ɖe, bo ɖɔ mɔ̌ ǎ; lo ɔ́, ajotɔ́ wɛ n'i, ɖó é wɛ nɔ hɛn akwɛ́ yětɔn, bó nɔ ɖo finfin ɖ'é mɛ wɛ. 7 Jezu ka ɖɔ: “Mi jó nyɔ̌nu ɔ́ dó ní hɛn nǔ e é ɖó ɔ́ nú gbe e gbe è nǎ ɖi mì é. 8 Midɛɛ lɛ́ɛ ɔ́, wamamɔnɔ lɛ́ɛ ɖo mi mɛ tɛgbɛ; nyɛ ka ɖo mi mɛ tɛgbɛ ǎ.”
Yě blá Lazáa gbé
9 Hwenɛ́nu ɔ́, Judéenu lɛ́ɛ gěgé se ɖɔ Jezu ɖo Betaníi, bó nyi ahwan ɖidó dɔ̌n; é ka nyí Jezu kɛ́ɖɛ́ gbé wɛ yě tɔ́n ǎ, lo ɔ́, yě jló ná yi kpɔ́n Lazáa e é fɔ́n sín kú ɔ́ lɔ. 10 Vɔ̌sánú-xwlémawutɔ́gán lɛ́ɛ ka ɖe gbeta tɔ́n, bó ná hu Lazáa lɔmɔ̌, 11 ɖó éyɛ́ wútu wɛ Judéenu lɛ́ɛ gěgé jó vɔ̌sánú-xwlémawutɔ́gán yětɔn lɛ́ɛ dó, bó ɖi nǔ nú Jezu.
Jezu byɔ́ Jeluzalɛ́mu
12 Ayǐhɔ́ngbe tɔn ɔ́, yě mɛ wɔ̌buwɔ́bú e wá xwe ɖu gbé ɖo Jeluzalɛ́mu lɛ́ɛ se ɖɔ Jezu ja fínɛ́; 13 bɔ yě ba děma hɛn alɔ mɛ, bo ɖo xó sú wɛ káká bo yi kpé e; bo nɔ ɖɔ: “Ozána! Susu nú Mawu! Susu nú mɛ e jǎwe ɖo Aklúnɔ nyǐkɔ mɛ é: susu nú axɔ́sú Izlayɛ́li tɔn.” 14 Jezu mɔ tócíví ɖokpó bó jínjɔ́n jí, lě e è ko wlán dó Mawuxówéma ɔ́ mɛ gbɔn ɔ́ ɖɔ: 15 “Mi ma ɖi xɛsi ó Sinyɔ́ɔnu lɛ́ɛ mi, axɔ́sú mitɔn ɖíe jǎwe bó jínjɔ́n tócíví jí e!” 16 Ahwanvú Jezu tɔn lɛ́ɛ ka yá wǔ mɔ nǔ jɛ nǔ énɛ́ lɛ́ɛ e ɖo jijɛ wɛ lɛ́ɛ mɛ ǎ; lo ɔ́, hwenu e è sɔ́ Jezu su ɔ́, yě flín ɖɔ nǔ énɛ́ lɛ́ɛ e jɛ ɔ́ bǐ wɛ è ko wlán dó wú tɔn ɖ'ayǐ nǔgbó. 17 Mɛ e ɖo te hwenu e Jezu ylɔ́ Lazáa sín yɔdo mɛ, bo fɔ́n ɛ sín kú ɔ́ ɖɔ nǔ e yě mɔ ɔ́. 18 Nǔ énɛ́ wútu wɛ mɛ lɛ́ɛ nyi ahwan wá kpé e, ɖó yě se ɖɔ é jlɛ́ nǔ mɔ̌hun. 19 Falizyɛn lɛ́ɛ ka jɛ ɖiɖɔ jí ɖo yěɖée tɛ́ntin ɖɔ: “Mi ma mɔ din ɖɔ mǐ kún sixú ɖo nǔ ɖěbǔ wú na kpé wɛ ó a? Énɛ́ mɛ lɛ́ɛ bǐ ɖo xwixwedó e wɛ nɛ́!”
Glɛ̌sinu ɖé lɛ́ɛ ɖo Jezu ba wɛ
20 Glɛ̌sinu ɖé lɛ́ɛ ɖo mɛ e wá Mawu sɛn gbé ɖo Jeluzalɛ́mu xwe ɔ́ hwenu lɛ́ɛ mɛ. 21 Yě yi mɔ Filípu e gosín Bɛtisayida ɖo Galilée yíkúngban jí ɔ́, bo ɖɔ n'i ɖɔ: “Mɛɖaxó, mǐ jló ná mɔ Jezu.” 22 Filípu ka yi ɖó xó énɛ́ te nú Andlé, bɔ yě mɛ we lɛ́ɛ zɔn kpɔ́, bo yi ɖɔ nú Jezu. 23 Jezu ka yí gbe nú yě ɖɔ: “Hwenu e è nǎ sɔ́ Gbɛtɔ́ví ɔ́ su ɔ́ sín gan ɖíe xo lo e. 24 Ma ɖɔ nǔgbó nú mi, ényí jinukún má yi do bó kú ǎ ɔ́, é nɔ ná nǔkún ǎ; kú wɛ é nɔ́ kú, cóbó nɔ gba kún. 25 Mɛ e yí wǎn nú gbɛ éɖée tɔn ɔ́, gbɛ tɔn ná bú dó e; mɛ e ka gbɛ́ wǎn nú gbɛ éɖée tɔn ɖo gbɛ mɛ fí ɔ́ ná hɛn gbɛ tɔn ɖ'ayǐ nú gbɛ mavɔ mavɔ. 26 Mɛ ɖé jló ná nyí mɛsɛntɔ́ ce hǔn, mɛ ɔ́ ní xwedó mì, bɔ fí e un ná nɔ ɔ́ wɛ é lɔmɔ̌ ná nɔ. Ényí mɛɖé nyí mɛsɛntɔ́ ce ɔ́, Tɔ́ ce ná sɔ́ mɛ ɔ́ su.”
Jezu ɖɔ xó dó kú tɔn wú
27 Jezu ɖɔ: “Din ɔ́, ayi ce bǐ wɛ gbadó. Nɛ̌ un ka sixú ɖɔ gbɔn? Daá, xɔ mì ɖo wǔvɛ́ e jǎwe nú mì é sí wɛ un ka na ɖɔ a? Éeǒ, un ná ɖɔ mɔ̌ ǎ; énɛ́ wútu wɛ un wá. 28 Hǔn Daá, bo sɔ́ nyǐkɔ towe su.” Hwenɛ́nu ɔ́, gbe ɖé ka ɖi sín jǐxwé, bó ɖɔ: “Un ko sɔ́ nyǐkɔ ce sɔ́ su; un ka ná lɛ́ sɔ́ ɛ su.” 29 Ée ahwan e ɖo fínɛ́ lɛ́ɛ se gbe ɔ́, yě ɖɔ: “Jǐ wɛ ɖo gbe dó wɛ.” Mɛ ɖěvo lɛ́ɛ ka ɖɔ: “Wɛnsagun Mawu tɔn ɖé wɛ ɖɔ xó n'i.” 30 Jezu ka yí xó bo ɖɔ: “Nyɛ wú wɛ gbe énɛ́ ɖi ǎ; midɛɛ lɛ́ɛ wútu wɛ. 31 Hwenu e Mawu ná ɖɔ hwɛ xá gbɛ élɔ́ dó ɔ́ ɖíe su e; din wɛ Mawu ná nya axɔ́sú gbɛmɛ fí tɔn ɔ́ tɔ́n. 32 Hwenu e è nǎ sɔ́ mì sín ayǐkúngban jí dó jǐ ɔ́, un ná dɔn gbɛtɔ́ lɛ́ɛ bǐ dó wǔ.” 33 Kú alɔkpa e kú gbé Jezu ja ɔ́ xó ɖɔ wɛ é ɖe. 34 Mɛ lɛ́ɛ ka yí gbe n'i ɖɔ: “Mǐ xa ɖo Mawuxówéma ɔ́ mɛ ɖɔ Klísu ɔ́ kún ná kú gbeɖé ó, bɔ hwɛ ka ɖo ɖiɖɔ nú mǐ wɛ din ɖɔ è nǎ sɔ́ Gbɛtɔ́ví ɔ́ dó jǐ. Mɛ̌ ká nyí Gbɛtɔ́ví énɛ́?” 35 Jezu ka ɖɔ nú yě ɖɔ: “Wěziza kpo ɖo mi tɛ́ntin nú hwenu kpɛɖé; mi ɖi zɔnlin hwenu e wěziza kpo ɖo mi tɛ́ntin é, bónú zǐnflú má wá fyán mi ó; ɖó mɛ e ɖo zɔnlin ɖi wɛ ɖo zǐnflú mɛ ɔ́ tunwun fí e é xwe ɔ́ ǎ. 36 Hǔn, din e wěziza ɔ́ kpo ɖo te nú mi ɔ́, mi bo ɖi nǔ n'i, bó ná húzú wěziza gbɛtɔ́.”
Jwifu lɛ́ɛ ɖi nǔ nú Jezu ǎ
Ée Jezu ɖɔ xó énɛ́ lɛ́ɛ gúdo ɔ́, é gosín fínɛ́, bó sɔ́ éɖée hwlá dó yě. 37 Jezu jlɛ́ nǔ tobutóbú énɛ́ lɛ́ɛ ɖo nukún yětɔn mɛ, có yě ká ɖi nǔ n'i ǎ; 38 bónú xó e Mawu ko ɖɔ ɖ'ayǐ gbɔn gbeyíɖɔ tɔn Ezayíi jí ɔ́ ná dó jɛ; é wɛ nyí ɖɔ: “Aklúnɔ, mɛ̌ ka ɖi nǔ nú xó e mǐ ɖɔ lɛ́ɛ? Mɛ̌ Aklúnɔ ka ɖe hlɔ̌nhlɔ́n tɔn xlɛ́?” 39 Yě sixú ɖi nǔ nǔgbó ǎ, ɖó Ezayíi lɛ́ ɖɔ: 40 “Mawu va nukún yě, nú yě má mɔ nukúnnú ó; é cyɔ́n nǔ ayi yětɔn jí, nú yě ma mɔ nukúnnú jɛ nǔ mɛ ó. Mawu ɖɔ: ‘Un bló mɔ̌, bónú yě ma lɛ́ kɔ wá gɔ̌n ce nú má gbɔ azɔn nú yě ó.’ ” 41 Ezayíi ɖɔ xó énɛ́ lɛ́ɛ, ɖó é mɔ susu e Jezu ɖó é, bó ɖɔ xó dó wǔ tɔn. 42 Nǔ ɖo mɔ̌ có Jwifugán lɛ́ɛ gěgé ɖi nǔ nú Jezu; yě ká ɖe nǔɖiɖi yětɔn xlɛ́ ǎ, Falizyɛn lɛ́ɛ táá wá nya yě tɔ́n sín kplɔ́ngbasá lɛ́ɛ. 43 Đó susu xɔ ɖo gbɛtɔ́ lɛ́ɛ gɔ́n myá nukún nú yě hú susu xɔ ɖo Mawu gɔ́n.
Jezu xó lɛ́ɛ wɛ ná ɖɔ hwɛ xá mɛ
44 Jezu zé gbe yi jǐ, bo ɖɔ: “Mɛ e ɖi nǔ nú mì ɔ́, nyɛ kɛ́ɖɛ́ wɛ é ɖi nǔ ná ǎ; é lɛ́ ɖi nǔ nú mɛ e sɛ́ mì dó é. 45 Mɛ e mɔ mì ɔ́, mɔ mɛ e sɛ́ mì dó ɔ́ lɔmɔ̌. 46 Nyɛ ɔ́, un wá gbɛ ɔ́ mɛ wěziza ɖɔhun, bónú mɛ e ɖi nǔ nú mì ɔ́ ma nɔ zǐnflú mɛ ó. 47 Ényí mɛɖé se xó ce, bó ma bló ɖ'é jí ǎ ɔ́, nyɛ wɛ ná ɖó hwɛ n'i ǎ, ɖó un tɔ́n hwɛ ɖó nú mɛ gbé bó wá gbɛ ɔ́ mɛ ǎ; gbɛ ɔ́ hwlɛngán gbé wɛ un ja bó wá. 48 Mɛ e gbɛ́ mì, bó ma yí xó ce lɛ́ɛ ǎ ɔ́, é ko ɖó nǔ e na ɖɔ hwɛ xá ɛ lɛ́ɛ; xó e un ɖɔ lɛ́ɛ wɛ ja hwɛ ɖɔ xá ɛ gbé ɖo azǎn gǔdo gúdo tɔn ɔ́ gbe. 49 Đó nyɛ ɖésúnɔ sín acɛ mɛ ɖɔ xó dó wɛ un ɖe ǎ; lo ɔ́, nǔ e Tɔ́ e sɛ́ mì dó ɔ́ zɔ́n ɖiɖɔ mì ɔ́ ɖɔ wɛ un ɖe. 50 Un ka tunwun ɖɔ nǔ e Tɔ́ e sɛ́ mì dó ɔ́ zɔ́n ɔ́ nɔ ná gbɛ mavɔ mavɔ. Hǔn, xó e ɖɔ nú mi wɛ un ɖe lɛ́ɛ bǐ ɔ́, lě e Tɔ́ ce zɔ́n mì gbɔn ɔ́ ɖɔ gbɔn wɛ un ɖe.”
Jezu klɔ́ afɔ nú ahwanvú tɔn lɛ́ɛ
1 Dǐndínwáyixwe kpo sɔ, bɔ Jezu tunwun ɖɔ gan e mɛ émí ná gosín gbɛ mɛ fí, bó ná yi Mawu gɔ́n dó ɔ́ xo. É yí wǎn nú mɛ e nyí étɔn ɖo gbɛ ɔ́ mɛ lɛ́ɛ bó ɖó wǎn yíyí nú yě káká yi kú. 2 Jezu kpódó ahwanvú tɔn lɛ́ɛ kpó ɖo gbada nǔɖuɖu ɖu wɛ. Awǒvi ka ko sɔ́ linlin nyanya dó ayi mɛ nú Judási Sinmɔ́ɔ Isikaliɔ́ti ví ɔ́, ɖɔ ní sa Jezu. 3 Ée Jezu ka tunwun ɖɔ Mawu ko sɔ́ nǔ bǐ dó alɔ mɛ nú émí, bɔ gɔ̌n tɔn wɛ e mi gosín, bó ka lɛ́ lɛ́ kɔ xwe gɔ̌n tɔn ɔ́, 4 é sí te sín nǔɖuɖu ɔ́ kɔn, bó ɖe awu tɔn lɛ́ɛ, bó sɔ́ avɔ ɖé sin dó alin. 5 Énɛ́ gúdo ɔ́, é wún sin dó gannú mɛ, bó jɛ afɔ klɔ́ nú ahwanvú tɔn lɛ́ɛ jí ɖokpó ɖokpó, bó nɔ́ dɔn avɔ e é sin dó alin ɔ́ dó súnsún afɔ nú yě. 6 É wá jɛ Sinmɔ́ɔ Piyɛ́ɛ jí, bɔ éyɛ́ ɖɔ: “Aklúnɔ, hwi wɛ ná klɔ́ afɔ nú mì a?” 7 Jezu ka yí gbe n'i ɖɔ: “Nǔ e wa wɛ un ɖe ɔ́, a ko tunwun din ǎ; amɔ̌, a nɔ káká ɔ́, a nǎ wá tunwun.” 8 Piyɛ́ɛ lɛ́ ɖɔ nú Jezu ɖɔ: “A nǎ klɔ́ afɔ nú mì gbeɖé ǎ!” Bɔ Jezu ɖɔ n'i ɖɔ: “Ényí un ma klɔ́ afɔ nú we ǎ ɔ́, hǔn a sɔ́ nyí ahwanvú ce ǎ.” 9 Énɛ́ ɔ́, Sinmɔ́ɔ Piyɛ́ɛ ɖɔ n'i ɖɔ: “Nú ényí mɔ wɛ hǔn Aklúnɔ, é ní ma nyí ɖɔ afɔ ce lɛ́ɛ kɛ́ɖɛ́ wɛ a nǎ klɔ́ ó; klɔ́ alɔ ce lɛ́ɛ, bó klɔ́ ta ce lɔmɔ̌ d'é jí.” 10 Jezu ka yí gbe n'i ɖɔ: “Mɛ e ko lɛ wǔ ɔ́, afɔ kɛ́ɖɛ́ jɛ́n kpo n'i bɔ é ná klɔ́, bó ná mɛ́; ɖó mǐmɛ́ jí wɛ mi ko ɖe; amɔ̌ mi bǐ ka wɛ ǎ.” 11 Jezu ɖɔ mɔ̌, ɖó é ko tunwun mɛ e ɖo nǎ sa ɛ ɖu wɛ ɖo yě mɛ é; nǔ e wú é ɖɔ é kún nyí yě bǐ wɛ nyí mɛ mímɛ́ ó ɔ́ nɛ́. 12 Ée é klɔ́ afɔ nú yě bǐ yi fó ɔ́, é lɛ́ sɔ́ awu tɔn lɛ́ɛ dó, bó yi jínjɔ́n tɛn tɔn mɛ ɖo nǔɖuɖu ɔ́ kɔn, bó kanbyɔ́ yě ɖɔ: “Mi ka mɔ nǔ jɛ nǔ e un bló nú mi din ɔ́ mɛ a? 13 Mi nɔ ylɔ́ mì ɖɔ ‘Mɛ̌si’, bó nɔ́ ylɔ́ mì ɖɔ ‘Aklúnɔ’; hwɛ mitɔn jɔ, ɖó nǔ e un nyí ɔ́ nɛ́. 14 Hǔn, ényí nyɛ mɛ e nyí Aklúnɔ mitɔn, bó nyí Mɛ̌si mitɔn ɔ́ ka klɔ́ afɔ nú mi ɔ́, é jɛ xá ɖɔ mi ná nɔ́ klɔ́ afɔ nú miɖée. 15 Đó kpɔ́ndéwú ɖé wɛ é nyí, bɔ un ná mi, bónú mi lɔmɔ̌ ná nɔ́ bló lě e un bló gbɔn nú mi é. 16 Má ɖɔ nǔgbó nú mi: mɛsɛntɔ́ nɔ hú gǎn gǎn tɔn ǎ; mɔ̌ ɖokpó ɔ́, wɛnsagun nɔ hú gǎn mɛ e sɛ́ ɛ dó ɔ́ ǎ. 17 Nǔ lɛ́ɛ bǐ mɛ nɛ́ mi mɔ nukúnnú jɛ nɛ́; ényí mi bló ɖ'é jí ɔ́, é ná nyɔ́ nú mi. 18 Mi bǐ xó ɖɔ wɛ un ka ɖe ǎ, ɖó un tunwun mɛ e un cyán lɛ́ɛ; nǔ e Mawuxówéma ɔ́ ka ko ɖɔ ɔ́ ɖó ná jɛ. É wɛ nyí ɖɔ: ‘Mɛ e nɔ ɖu nǔɖuɖu ce ɔ́ húzú kpan nukɔn mì.’ 19 Un ɖo ɖiɖɔ nú mi wɛ din, cóbónú é ná wá jɛ; bónú é wá jɛ ɔ́, mi na ɖi nǔ ɖɔ nyɛ wɛ nyí mɛ e un nyí é. 20 Má ɖɔ nǔgbó nú mi: mɛ e yí mɛ e un sɛ́ dó ɔ́ ɖěbǔ sín jǒnɔ ɔ́, nyɛ ɖésúnɔ wɛ é yí, bɔ mɛ e ka yí mì ɔ́, mɛ e sɛ́ mì dó ɔ́ wɛ é yí.”
Jezu ɖɔ nú ahwanvú tɔn lɛ́ɛ ɖɔ mɛ ɖokpó ɖo yě mɛ, bó ná sa émí
21 Ée Jezu ɖɔ xó énɛ́ lɛ́ɛ gúdo ɔ́, ayi tɔn bǐ gbadó, bɔ é ɖɔ: “Má ɖɔ nǔgbó nú mi: mɛ ɖokpó ɖo mi mɛ, bó ná sa mì.” 22 Ahwanvú tɔn lɛ́ɛ ka tunwun mɛ e xó ɖɔ wɛ é ɖe ɖo yě mɛ ɔ́ ǎ, bɔ yě jɛ yěɖée kpɔ́n jí. 23 Ahwanvú Jezu tɔn e é ɖó wǎn yíyí ná tlala ɔ́ ka ɖo akpá tɔn ɖo nǔɖuká ɔ́ kɔn. 24 Sinmɔ́ɔ Piyɛ́ɛ sɔ́ ta dó ɖɔ xó n'i ɖɔ ní kanbyɔ́ Jezu ɖɔ mɛ xó ɖɔ wɛ é ɖe ají. 25 Éyɛ́ ka nya dó Jezu sín akɔ́nnu, bó kanbyɔ́ ɛ ɖɔ: “Aklúnɔ, mɛ̌ ka nyí mɛ ɔ́?” 26 Bɔ Jezu yí gbe n'i ɖɔ: “Mɛ e un ná sɔ́ wɔ̌xúxú gǒ ɖokpó, bó sún nǔsúnnú, bó sɔ́ ná ɔ́, mɛ ɔ́ wɛ.” Nǔgbó ɔ́, Jezu sɔ́ wɔ̌xúxú gǒ ɖokpó, bó sún nǔsúnnú, bó sɔ́ nú Judási Sinmɔ́ɔ Isikaliɔ́ti ví ɔ́. 27 Ée Judási yí wɔ̌xúxú ɔ́, Satáan wá ayi tɔn mɛ, bɔ Jezu ɖɔ n'i ɖɔ: “Nǔ e ná bló wɛ a ɖe ɔ́, yǎ wǔ bló.” 28 Yě mɛ e ɖo nǔ ɖu xá Jezu wɛ lɛ́ɛ ɖěbǔ mɔ nǔ jɛ nǔ e wú Jezu ɖɔ xó énɛ́ nú Judási ɔ́ mɛ ǎ. 29 Ée é ka nyí Judási wɛ nɔ hɛn akwɛ́ yětɔn ɔ́, mɛɖé lɛ́ɛ vɛdó ɖɔ é ní yi xɔ nǔ e è nǎ dó ɖu xwe ɔ́ ná ɔ́, abǐ é ní ná nǔɖé wamamɔnɔ lɛ́ɛ ɖɔ n'i wɛ é ɖe sín. 30 Ée Judási yí wɔ̌xúxú ɔ́, é tɔ́n tlóló. Zǎn ko kú hwenɛ́nu.
Jezu ɖe sɛ́n yɔ̌yɔ́ ɖěvo tɔ́n
31 Ée Judási tɔ́n ɔ́, Jezu yí xó bó ɖɔ: “Din ɔ́, Gbɛtɔ́ví ɔ́ ko xɔ susu, bɔ Mawu ko xɔ susu gbɔn jǐ tɔn. 32 Ée Mawu xɔ susu gbɔn vǐ tɔn gbla mɛ ɔ́, Mawu lɔ ná sɔ́ vǐ tɔn su ɖo é ɖésúnɔ gɔ́n; é ka ná sɔ́ ɛ su ɖo malín málín mɛ. 33 Yɔkpɔ́ ce lɛ́ɛ mi, un sɔ́ ɖo mi gɔ́n ná nɔ wɛ gěgé ɖé ǎ. Mi ná ba mì. Xó ɖokpó e un ko ɖɔ nú Jwifugán lɛ́ɛ ɔ́ ɖɔ nú mi lɔmɔ̌ wɛ un ɖe. É wɛ nyí ɖɔ: ‘Fí e un xwe ɔ́, mi ɖě sixú yi ǎ.’ 34 Un ɖo sɛ́n yɔ̌yɔ́ ɖokpó ná mi wɛ: mi yí wǎn nú miɖée. Mi ɖó ná yí wǎn nú miɖée lě e un yí wǎn nú mi gbɔn é. 35 Wǎn yíyí e mi ná ɖó nú miɖée ɔ́, wɛ ná ɖe xlɛ́ mɛ lɛ́ɛ bǐ ɖɔ mi nyí ahwanvú ce nǔgbó.”
Jezu ɖɔ Piyɛ́ɛ ná gbɛ́ ɖɔ émí kún tunwun émí ó
36 Sinmɔ́ɔ Piyɛ́ɛ kanbyɔ́ Jezu ɖɔ: “Aklúnɔ, fítɛ́ a ka xwe?” Jezu ka yí gbe n'i ɖɔ: “Fí e un xwe ɔ́, a sixú xwedó mì yi din ǎ; lo ɔ́, é ko wá yá ɔ́, a nǎ xwedó mì yi.” 37 Piyɛ́ɛ lɛ́ kanbyɔ́ Jezu ɖɔ: “Aklúnɔ, étɛ́wútu un ma ka sixú xwedó we yi din ǎ? Un ɖo gbesisɔ mɛ, bó ná kú ɖó ta towe mɛ.” 38 Jezu ka yí gbe n'i ɖɔ: “A ɖo gbesisɔ mɛ bó ná kú ɖó ta ce mɛ nǔgbó a? Má ɖɔ nǔgbó nú we: cóbónú kokló ná kɔ́ así ɔ́, a nǎ ko gbɛ́ azɔn atɔn ɖɔ émí kún tunwun mì ó.”
Jezu wɛ nyí ali e nɔ kplá mɛ yi Mawu gɔ́n é
1 Jezu ɖɔ nú ahwanvú tɔn lɛ́ɛ ɖɔ: “Mi ma nú ayi mitɔn gbadó ó. Mi ɖi nǔ nú Mawu, bó ɖi nǔ nú nyɛ lɔmɔ̌. 2 Nɔtɛn gěgé wɛ ɖo Tɔ́ ce xwé bɔ un ná yi bló tɛnmɛ ɖó ɖ'ayǐ nú mi; ényí nǔ ma nyí mɔ̌ ǎ ɔ́, un ná ɖɔ nú mi ǎ. 3 Nú un ko yi bló nɔtɛn ɖó ɖ'ayǐ nú mi vɔ ɔ́, un ná lɛ́ kɔ wá kplá mi, bɔ fí e un ɖe ɔ́, mi lɔmɔ̌ ná nɔ fínɛ́. 4 Mi ko tunwun ali e kplá mɛ yi fí e un xwe é.” 5 Tɔmáa ka ɖɔ: “Aklúnɔ, mǐ tunwun fí e a xwe ɔ́ ǎ, nɛ̌ mǐ ka sixú tunwun ali ɔ́ gbɔn?” 6 Jezu ka yí gbe n'i ɖɔ: “Nyɛ wɛ nyí ali ɔ́, bó nyí nǔgbó ɔ́, bó ka lɛ́ nyí gbɛ ɔ́. Mɛɖěbǔ sixú yi Tɔ́ ɔ́ gɔ́n nyɛ mɛ vo ǎ. 7 Ényí mi tunwun mì ɔ́, mi ná tunwun Tɔ́ ce lɔmɔ̌; sín din ɔ́, mi tunwun i, bó mɔ ɛ.” 8 Filípu ka ɖɔ n'i ɖɔ: “Aklúnɔ, xlɛ́ Tɔ́ ɔ́ mǐ; nǔ e ba wɛ mǐ ɖe ɔ́ bǐ nɛ́.” 9 Jezu ka yí gbe n'i ɖɔ: “Filípu, sín tɛgbɛ wɛ un ko ɖo kpɔ́ xá mi, bɔ a ka ko tunwun mì káká jɛ din ǎ. Mɛ e mɔ mì ɔ́ ko mɔ Tɔ́ ɔ́; aniwútu a ka ɖɔ: ‘Xlɛ́ Tɔ́ ɔ́ mǐ?’ 10 A ɖi ɖɔ un ɖo Tɔ́ ɔ́ mɛ, bɔ Tɔ́ ɔ́ ɖo nyɛ ɖésúnɔ mɛ ǎ cé? Xó e ɖɔ nú mi wɛ un ɖe lɛ́ɛ ɔ́, xo ce mɛ wɛ un nɔ kpɔ́n kpowun, bó nɔ́ ɖɔ ǎ; lo ɔ́, Tɔ́ e ɖo nyɛ mɛ ɔ́ sín nǔwiwa wɛ. 11 Mi ɖi xó e ɖɔ nú mi wɛ un ɖe, bó ɖɔ: un ɖo Tɔ́ ɔ́ mɛ, bɔ Tɔ́ ɔ́ ka ɖo nyɛ ɖésú mɛ é. Nú mi na bo ma ka jló ná ɖi xó ce ǎ hǔn, mi bo kpɔ́n dó nǔ e wa wɛ un ɖe lɛ́ɛ wú vɔ́vɔ́, bó ɖi nǔ nú mì. 12 Ma ɖɔ nǔgbó nú mi: mɛ e ɖi nǔ nú mì ɔ́ ná jlɛ́ nǔ e jlɛ́ wɛ un ɖe lɛ́ɛ, bó ná lɛ́ jlɛ́ hú mɔ̌; ɖó un ko xwe Tɔ́ ɔ́ gɔ́n. 13 Bɔ nǔ e mi na byɔ́ gbɔn nyǐkɔ ce mɛ ɔ́, un ná ná bǐ mi, bónú Tɔ́ ɔ́ ná sixú xɔ susu gbɔn Vǐ ɔ́ jí. 14 Ényí mi ylɔ́ nyǐkɔ ce, bó byɔ́ nǔ ɖěbǔ ɔ́, un ná bló nú mi.”
Jezu dó Yɛsinsɛn sín akpá nú ahwanvú tɔn lɛ́ɛ
15 “Nú mi yí wǎn nú mì ɔ́, mi ná nyi sɛ́n ce lɛ́ɛ. 16 Nyɛ ka ná sa vo nú Tɔ́ ɔ́, bɔ é ná sɛ́ gbɔdónúmɛtɔ́ ɖěvo dó mi, bɔ é ná nɔ kpɔ́ xá mi tɛgbɛ. 17 Éyɛ́ wɛ nyí Yɛ nǔgbónɔ, bɔ mɛ e nyí gbɛ ɔ́ tɔn lɛ́ɛ sixú yí i ǎ; ɖó yě sixú mɔ ɛ ǎ; yě ká lɛ́ sixú tunwun i ǎ. Midɛɛ lɛ́ɛ ɔ́, mi ka ko tunwun i, ɖó é ɖo kpɔ́ xá mi, bó ɖo mi mɛ. 18 “Un ná jǒ mi dó nyi tɔ́cyɔvǐ nɔcyɔvǐ gbɛ mɛ ǎ; un ná lɛ́ wá mi gɔ́n. 19 Zaanɖé din ɔ́, mɛ e nyí gbɛ ɔ́ tɔn lɛ́ɛ sɔ́ ná mɔ mì ǎ; amɔ̌, midɛɛ lɛ́ɛ ɔ́, mi ná mɔ mì; ɖó un ɖo gbɛ, bɔ mi lɔmɔ̌ mi ná nɔ gbɛ. 20 Azǎn énɛ́ gbe ka wá su ɔ́, mi na tunwun ɖɔ un ɖo Tɔ́ ce mɛ, bɔ mi ɖo nyɛ mɛ, bɔ nyɛ ɖo mi mɛ. 21 “Mɛ e hɛn sɛ́n ce lɛ́ɛ ayi mɛ, bó nɔ́ nyi yě lɛ́ɛ ɔ́, mɛ énɛ́ wɛ yí wǎn nú mì. Tɔ́ ce ná yí wǎn nú mɛ e yí wǎn nú mì ɔ́, bɔ nyɛ lɔ ná yí wǎn n'i, bó ná ɖe nyɛɖée xlɛ́ ɛ.” 22 Judi ka kanbyɔ́ Jezu ɖɔ: “Aklúnɔ, nɛ̌ ka gbɔn bɔ mǐdɛɛ lɛ́ɛ kɛ́ɖɛ́ jɛ́n a nǎ ɖe hwiɖée xlɛ́, bó ma ka ná ɖe hwiɖée xlɛ́ gbɛtɔ́ lɛ́ɛ bǐ ǎ?” (É ka nyí Judási Isikaliɔ́ti wɛ ǎ). 23 Bɔ Jezu ka yí gbe n'i ɖɔ: “Ényí mɛɖé yí wǎn nú mì ɔ́, é ná bló ɖó xó ce lɛ́ɛ jí, bɔ Tɔ́ ce na yí wǎn n'i, bɔ mǐ ná wá gɔ̌n tɔn, bó ná nɔ kpɔ́ xá ɛ. 24 Mɛ e ma ka yí wǎn nú mì ǎ ɔ́, é nɔ bló ɖó xó ce lɛ́ɛ jí ǎ. Nyɛ ɖésúnɔ gɔ́n wɛ xó e ɖɔ nú mi wɛ un ɖe lɛ́ɛ ka nɔ gosín ǎ, Tɔ́ ce e sɛ́ mì dó ɔ́ gɔ́n wɛ xó énɛ́ lɛ́ɛ nɔ gosín. 25 “Un ɖɔ xó énɛ́ lɛ́ɛ nú mi, hwenu e un kpo ɖo kpɔ́ xá mi é. 26 Lo ɔ́, mɛ e ná d'alɔ mi ɔ́, Yɛsinsɛn e Tɔ́ ɔ́ ná sɛ́ dó mi ɖo nyǐkɔ ce mɛ é wɛ; é ná kplɔ́n nǔ bǐ mi, bó ná flín nǔ e un ɖɔ nú mi lɛ́ɛ bǐ mi. 27 “Fífá wɛ un jó dó nú mi; fífá ce wɛ un ná mi. Un ná mi lě e gbɛ ɔ́ nɔ ná mɛ gbɔn ɔ́ ǎ; ado ma hu mi ó; xɛsi ma ɖi mi ó. 28 Mi se bɔ un ɖɔ nú mi ɖɔ: ‘Un xweyǐgbe; un ka ná lɛ́ kɔ wá mi gɔ́n.’ Ényí ɖɔ mi yí wǎn nú mì wɛ ɔ́, xomɛ wɛ ná ko hun mi, ɖó Tɔ́ ɔ́ gɔ́n e un xwe ɔ́ wútu, ɖó Tɔ́ ɔ́ hú gǎn mì. 29 Un ko ɖɔ nǔ énɛ́ lɛ́ɛ nú mi din, cóbɔ yě ná wá jɛ, lobo nú yě wá jɛ ɔ́, mi ná ɖi nǔ. 30 Un sɔ́ ɖo xó gěgé ɖé ná ɖɔ xá mi wɛ ǎ, ɖó axɔ́sú gbɛ élɔ́ tɔn ko jǎwe; é ɖó acɛ ɖěbǔ ɖo jǐ ce ǎ. 31 Amɔ̌, nú gbɛtɔ́ lɛ́ɛ ná dó tunwun ɖɔ un yí wǎn nú Tɔ́ ɔ́, un ná wa nǔ lě e Tɔ́ ɔ́ zɔ́n mì gbɔn é; mi sí te nú mǐ ná gosín fí.”
Jezu wɛ nyí vǐwuntín titewungbe ɔ́
1 “Nyɛ wɛ nyí vǐwuntín titewungbe ɔ́, bɔ Tɔ́ ce ka nyí vǐwunglejíkpɔ́ntɔ́ ɔ́. 2 Ala ɖěbǔ ɖo wú ce, bó ma nɔ ná sínsɛ́n ǎ ɔ́, tɔ́ ce nɔ sɛ́n síin; ée ka nɔ́ ná sínsɛ́n ɔ́, é nɔ́ jlá ala tɔn lɛ́ɛ bónú é ná sixú lɛ́ sɛ́n d'é jí. 3 Midɛɛ lɛ́ɛ ɔ́, xó e un ɖɔ nú mi ɔ́ zɔ́n, bɔ mi ko húzú mɛ mímɛ́. 4 Mi nɔ nyɛ mɛ, lě e nyɛ ɖo mi mɛ ɔ́ ɖɔhun, ɖó vǐwuntín sín ala sixú sɛ́n é ɖóɖó, ma nɔ vǐwuntín dodó ɔ́ wú ǎ; mɔ̌ ɖokpó ɔ́, mi lɔmɔ̌ mi ma nɔ nyɛ mɛ ǎ ɔ́, mi sixú ná sínsɛ́n ɖěbǔ ǎ. 5 “Nyɛ wɛ nyí vǐwuntín dodó ɔ́, bɔ midɛɛ lɛ́ɛ ka nyí ala lɛ́ɛ. Mɛ e ɖo nyɛ mɛ, bɔ nyɛ lɔ ka ɖo éyɛ́ mɛ ɔ́, é ná sɛ́n gěgé. Đó nyɛ mɛ vo ɔ́, mi sixú kpé nǔ ɖěbǔ wú bo wa ǎ. 6 Mɛ e ma ɖo nyɛ mɛ ǎ ɔ́, Mawu nɔ sɔ́ ɛ nyi gbě lě e è nɔ sɛ́n atínla, bɔ yě nɔ xú, bɔ è nɔ bɛ́ kɔn nyi myɔ mɛ, bɔ yě nɔ ji zo é ɖɔhun. 7 Ényí mi nɔ nyɛ mɛ, bónú xó ce lɛ́ɛ jínjɔ́n ayi mɛ nú mi ɔ́, mi byɔ́ nǔ e jló mi ɔ́, mi ná mɔ yí. 8 Ényí mi ná sínsɛ́n gěgé ɔ́, susu wɛ é ná nyí nú Tɔ́ ce, bɔ mi ná nyí ahwanvú ce. 9 Lě e Tɔ́ ɔ́ yí wǎn nú mì gbɔn ɔ́, nyɛ lɔ un yí wǎn nú mi; mi bo nɔ wǎn yíyí ce mɛ. 10 Ényí mi nyi sɛ́n ce lɛ́ɛ ɔ́, mi ná nɔ wǎn yíyí ce mɛ, lě e nyɛ nyi Tɔ́ ce sín sɛ́n lɛ́ɛ, bó ɖo wǎn yíyí tɔn mɛ ɔ́ ɖɔhun. 11 “Un ɖɔ mɔ̌ nú mi, bónú xomɛ ní hun mi, lě e xomɛ nɔ hun nyɛ gbɔn é, bónú awǎjijɛ mitɔn ɔ́, nǔ bǐ ní vɔ ɖ'é wú. 12 Sɛ́n ce ka ɖíe: mi yí wǎn nú miɖée, lě e un yí wǎn nú mi gbɔn é. 13 Wǎn yíyí nú mɛ ɖě sɔ́ hú è sɔ́ gbɛ mɛɖée tɔn dó sá vɔ̌ dó xɔ́ntɔn mɛtɔn lɛ́ɛ tamɛ ǎ. 14 Ényí mi nɔ bló nǔ e un zɔ́n mi lɛ́ɛ ɔ́, xɔ́ntɔn ce wɛ mi nyí. 15 Un sɔ́ nɔ ylɔ́ mi ɖɔ mɛsɛntɔ́ ǎ, ɖó mɛsɛntɔ́ nɔ mɔ do nú nǔ e wa wɛ gǎn tɔn ɖe ɔ́ ǎ. Un nɔ ylɔ́ mi ɖɔ xɔ́ntɔn, ɖó nǔ e un se ɖo Tɔ́ ce nu lɛ́ɛ bǐ wɛ un ɖe xlɛ́ mi. 16 Mi wɛ sɔ́ mì ǎ; lo ɔ́, nyɛ wɛ cyán mi, bó sɛ́ mi dó gbɛ ɔ́ mɛ, bónú mi ná sɛ́n, bó gba kún káká sɔ́yi; énɛ́ ɔ́, mi byɔ́ nǔ ɖěbǔ Tɔ́ ɔ́ ɖo nyǐkɔ ce mɛ ɔ́, é ná ná bǐ mi. 17 Nǔ e zɔ́n mi wɛ un ɖe ɔ́ wɛ nyí ɖɔ mi ní ɖó wǎn yíyí nú miɖée.”
Gbɛtɔ́ lɛ́ɛ gbɛ́ wǎn nú Jezu kpódó mɛ e nyí étɔn lɛ́ɛ kpó
18 “Ényí mɛ e nyí gbɛ ɔ́ tɔn lɛ́ɛ gbɛ́ wǎn nú mi hǔn, mi tunwun ɖɔ yě ko gbɛ́ wǎn nú nyɛ jɛ nukɔn nú mi. 19 Ényí gbɛ ɔ́ tɔn wɛ mi nyí ɔ́, mɛ e nyí gbɛ ɔ́ tɔn lɛ́ɛ na ko yí wǎn nú mi. Lo ɔ́, nyɛ cyán mi, bó ɖe mi sín gbɛ ɔ́ mɛ, bɔ mi sɔ́ nyí gbɛ ɔ́ tɔn ǎ; énɛ́ ɔ́ wútu wɛ mɛ e nyí gbɛ ɔ́ tɔn lɛ́ɛ gbɛ́ wǎn nú mi. 20 Mi vɛ́ nɔ flín xó e un ko ɖɔ nú mi é: ‘Mɛsɛntɔ́ nɔ hú gǎn gǎn tɔn ǎ.’ Ényí yě dó ya nú mì ɔ́, yě ná dó ya nú mi lɔmɔ̌; yě ká xwedó xó ce lɛ́ɛ ɔ́, yě ná xwedó xó mi lɔmɔ̌ tɔn lɛ́ɛ. 21 Nyɛ wútu wɛ è nǎ wa nǔ énɛ́ lɛ́ɛ bǐ xá mi, ɖó yě tunwun mɛ e sɛ́ mì dó ɔ́ ǎ. 22 Ényí un ma ko wá, bó ɖɔ xó nú yě ǎ ɔ́, yě ná nyí hwɛhutɔ́ ǎ; din e un ka wá, bó ɖɔ xó nú yě ɔ́, yě sɔ́ sixú mɔ nǔ ɖěbǔ ɖɔ, bó dó hwlɛ́n yěɖée gán sín hwɛ yětɔn lɛ́ɛ mɛ ǎ. 23 Mɛ e gbɛ́ wǎn nú mì ɔ́, é gbɛ́ wǎn nú Tɔ́ ce lɔmɔ̌. 24 Ényí un ma ko jlɛ́ nǔ e mɛ ɖěbǔ ma jlɛ́ kpɔ́n gbeɖé ɔ́ ɖo nukún yětɔn mɛ ǎ ɔ́, yě ná nyí hwɛhutɔ́ ǎ. Amɔ̌, din ɔ́, yě mɔ nǔjlɛ́jlɛ́ énɛ́ lɛ́ɛ có bó ka gbɛ́ wǎn nú nyɛ, bó lɛ́ gbɛ́ wǎn nú Tɔ́ ce. 25 Lo ɔ́, nǔ e è wlán dó sɛ́nwéma yětɔn mɛ ɔ́ ná dó jɛ wútu wɛ; é wɛ nyí ɖɔ: ‘Yě gbɛ́ wǎn nú mì nǔɖé ma sín nǔɖé wú.’ 26 “Gbɔdónúmɛtɔ́ ɔ́ ná wá. Yɛ e nyí nǔgbó, bó gosín Tɔ́ ɔ́ gɔ́n ɔ́ wɛ. Un ná sɛ́ ɛ dó mi sín Tɔ́ ɔ́ gɔ́n. Hwenu e é ná wá ɔ́, é ná ɖe kúnnu nú mì; 27 bɔ mi lɔmɔ̌ ná ɖe kúnnu nú mì, ɖó mi ko ɖo kpɔ́ xá mì sín bǐbɛ́mɛ.
1 “Un ɖɔ xó énɛ́ lɛ́ɛ bǐ nú mi din, bónú nǔɖiɖi mitɔn ní ma jɛ ayǐ ó. 2 È nǎ wá ɖe mi sín kplɔ́ngbasá lɛ́ɛ. Gan ɔ́ ko ɖo nǎ xo wɛ lɔ, bɔ mɛ ɖěbǔ hu mi ɔ́, mɛ ɔ́ ná vɛdó ɖɔ Mawu sín azɔ̌ wa wɛ émí ɖe nɛ́ sín. 3 Yě ná wa nǔ gbɔn mɔ̌, ɖó yě tunwun Tɔ́ ce ǎ; yě ká tunwun nyɛ lɔmɔ̌ ǎ. 4 Hǔn, un ɖo xó élɔ́ lɛ́ɛ ɖɔ nú mi wɛ, bónú gan tɔn wá xo ɔ́, mi ná flín ɖɔ un ko ɖɔ xó énɛ́ lɛ́ɛ nú émí ɖ'ayǐ.”
Azɔ̌ e Yɛsinsɛn nɔ wa lɛ́ɛ
“Un ɖɔ xó élɔ́ lɛ́ɛ nú mi sín do ǎ, ɖó un ɖo kpɔ́ xá mi. 5 Amɔ̌, din ɔ́, un xwe mɛ e sɛ́ mì dó ɔ́ gɔ́n, bɔ mɛ ɖěbǔ ka ɖo mi mɛ, bó kanbyɔ́ mì ɖɔ fítɛ́ a xwe ají ǎ. 6 Ée un ɖɔ mɔ̌ nú mi ɔ́, wǔ jɛ́n kú mi, 7 có nǔgbó ɖɔ nú mi wɛ un ɖe: yiyi ce ná ɖó le nú mi hú; ɖó ényí un ma yi ǎ ɔ́, gbɔdónúmɛtɔ́ ɔ́ ná wá mi gɔ́n ǎ. Un ka yi ɔ́, un ná sɛ́ ɛ dó mi. 8 Nú é ko wá ɔ́, é ná ɖe xlɛ́ gbɛtɔ́ lɛ́ɛ ɖɔ linlin e yě ɖó dó hwɛhuhu wú, bó ɖó dó jlǒ Mawu tɔn kpódó hwɛɖiɖɔ kpán wú ɔ́ kún sɔgbe ó. 9 Linlin e yě ɖǒ dó hwɛhuhu wú ɔ́ kún sɔgbe ó; ɖó yě ɖi nǔ nú mì ǎ. 10 Linlin e yě ɖǒ dó jlǒ Mawu tɔn wú ɔ́ sɔgbe ǎ, ɖó un xwe Tɔ́ ce gɔ́n, bɔ mi sɔ́ ná mɔ mì ɖě ǎ. 11 Linlin e yě ɖǒ dó hwɛɖiɖɔ Mawu tɔn wú ɔ́ sɔgbe ǎ, ɖó Mawu ko ɖó hwɛ nú axɔ́sú gbɛmɛ fí tɔn ɔ́. 12 “É kpo nǔ gěgé, bɔ un ɖó ná ɖɔ nú mi; lo ɔ́, mi sixú mɔ nukúnnú jɛ yě mɛ ǎ. 13 Hwenu e Yɛ e nɔ ɖe nǔgbó Mawu tɔn xlɛ́ ɔ́ ná wá ɔ́, é ná bló, bɔ mi ná tunwun nǔgbó ɔ́ bǐ; ɖó acɛ é ɖésúnɔ tɔn mɛ wɛ é ná ɖɔ xó dó ǎ; lo ɔ́, nǔ e é se ɔ́ wɛ é ná ɖɔ, bó ná ɖɔ nǔ e ɖo na jɛ wɛ lɛ́ɛ nú mi. 14 É ná sɔ́ mì su, ɖó nǔ e un ɖɔ n'i ɔ́ wɛ é ná ɖɔ nú mi. 15 Nǔ e nyí Tɔ́ ɔ́ tɔn ɔ́ bǐ wɛ nyí ce. Énɛ́ wútu wɛ un ɖɔ nú mi ɖɔ: nǔ e un ɖɔ n'i ɔ́ wɛ é ná ɖɔ nú mi.”
Aluwɛ ná wá húzú awǎjijɛ
16 “Zaanɖé din ɔ́, mi na ba mì kpo; é ka nɔ zaanɖé ɔ́, mi ná mɔ mì, ɖó un xwe Tɔ́ ce gɔ́n.” 17 Ée Jezu ɖɔ mɔ̌ ɔ́, ahwanvú tɔn lɛ́ɛ ɖěe jɛ nǔ kanbyɔ́ yěɖée jí, bo nɔ ɖɔ: “Étɛ́ ɖɔ nú mǐ wɛ é ka ɖe, bo ɖɔ: ‘Zaanɖé din ɔ́, mi na ba mì kpo; zaanɖé din ɔ́, mi ná mɔ mì; bo ka lɛ́ ɖɔ: ɖó un xwe Tɔ́ ɔ́ gɔ́n!’ 18 Ani ka nyí: ‘Zaanɖé din’ ɔ́? Mǐ ma mɔ nǔ jɛ xó e ɖɔ nú mǐ wɛ é ɖe ɔ́ mɛ nɛ́!” 19 Jezu ka tunwun ɖɔ yě jló ná kan nǔ byɔ́ émí, bó ɖɔ nú yě ɖɔ: “Ée un ɖɔ nú mi ɖɔ zaanɖé din ɔ́, mi ná ba mì kpo, é ka lɛ́ nɔ zaanɖé ɔ́ mi ná mɔ mì ɔ́, wú kan nǔ byɔ́ miɖée dó wɛ mi ɖe a?” 20 Má ɖɔ nǔgbó nú mi: mi ná nɔ́ ɖo avǐ ya wɛ, bó ná nɔ́ ɖo alě ná wɛ, bɔ mɛ e nyí gbɛmɛ fí tɔn lɛ́ɛ ka ná nɔ́ ɖo awǎ jɛ wɛ. Mi ná nɔ aluwɛ mɛ, lo ɔ́, aluwɛ mitɔn ná wá húzú awǎjijɛ nú mi. 21 Nyɔ̌nu ja vǐ ji gbé ɔ́, wǔ nɔ́ kú i, ɖó wǔvɛ́ mimɔ tɔn sín gan wɛ xo; é ka ji vǐ ɔ́ gúdo ɔ́, é sɔ́ nɔ́ flín wǔvɛ́ e é mɔ lɛ́ɛ ǎ, xomɛ nɔ hun i ɖó vǐ e wá gbɛ ɔ́ wú. 22 Mɔ̌ ɖokpó ɔ́, mi lɔmɔ̌ ɖo aluwɛ mɛ din; lo ɔ́, un ná lɛ́ wá mɔ mi, bɔ mi ná mɔ awǎjijɛ, bɔ mɛ ɖěbǔ sɔ́ ná sixú ɖe awǎjijɛ énɛ́ sín ayi mitɔn mɛ ǎ. 23 “Azǎn énɛ́ gbe ɔ́, mi sɔ́ ná kan nǔ ɖěbǔ byɔ́ mì ǎ. Má ɖɔ nǔgbó nú mi: nǔ e mi ná byɔ́ Tɔ́ ɔ́, é ná ná bǐ mi ɖó nyǐkɔ ce mɛ. 24 Amɔ̌, káká wá jɛ din ɔ́, mi ko byɔ́ nǔ ɖěbǔ ɖo nyǐkɔ ce mɛ ǎ; mi byɔ́, bó ná mɔ yí, bónú awǎjijɛ mitɔn ɔ́, nǔ bǐ na vɔ ɖ'é wú.”
Jezu ɖu ɖo gbɛ ɔ́ jí
25 “Lǒ wɛ un dó, bo dó ɖɔ xó énɛ́ lɛ́ɛ bǐ nú mi; lo ɔ́, é ná wá jɛ hweɖénu, bɔ un sɔ́ ná dó lǒ ɖě dó ɖɔ xó nú mi ǎ. Hwenɛ́nu ɔ́, un ná ɖɔ Tɔ́ ɔ́ sín xó nú mi sɔ́ nyi wɛn. 26 Azǎn énɛ́ gbe ɔ́, mi ná nɔ́ ylɔ́ nyǐkɔ ce dó byɔ́ nǔ Tɔ́ ɔ́. Ényí un ná sa vo nú Tɔ́ ɔ́ dó ta mitɔn mɛ ɖɔ wɛ un ɖe ǎ. 27 Đó é ɖésúnɔ yí wǎn nú mi, ɖó mi yí wǎn nú mì, bó ka ɖi nǔ ɖɔ Mawu wɛ sɛ́ mì dó. 28 Un gosín Tɔ́ ɔ́ gɔ́n, bó wá gbɛ mɛ fí; din ɔ́, un ɖo gbɛ ɔ́ mɛ gosín wɛ, bó xwe Tɔ́ ɔ́ gɔ́n.” 29 Ahwanvú tɔn lɛ́ɛ ka ɖɔ n'i ɖɔ: “Din ɔ́, a nɔ ɖɔ xó sɔ́ nyi wɛn, bo sɔ́ nɔ dó lǒ ǎ. 30 Mǐ mɔ din ɖɔ a tunwun nǔ bǐ; é sɔ́ byɔ́ ɖɔ mɛ ɖěbǔ ní kan nǔɖé byɔ́ we ǎ. Énɛ́ ɔ́ wɛ zɔ́n bɔ mǐ ɖi nǔ ɖɔ a gosín Mawu gɔ́n nǔgbó.” 31 Jezu ka ɖɔ nú yě ɖɔ: “Mi ɖi nǔ lo a? 32 Hwenu ɖo nǎ su wɛ; hwe ɔ́ nu jɛ́n ka ko ɖíe, bɔ è nǎ gba mi dó, bɔ mɛ ɖokpó ɖokpó ná yi xwé tɔn gbe, bó ná jó nyɛ ɖokpónɔ dó; amɔ̌, un ɖo nyɛ ɖokpónɔ ǎ, ɖó Tɔ́ ɔ́ ɖo kpɔ́ xá mì. 33 Un ɖɔ nǔ énɛ́ lɛ́ɛ nú mi, bónú mi ná ɖó vivo ɖo nyɛ mɛ. Mi ná mɔ wǔvɛ́ ɖo gbɛ ɔ́ mɛ; lo ɔ́, mi kpan akɔ́n, ɖó un ko ɖu ɖo gbɛ ɔ́ jí.”
Jezu sa vo nú Mawu ɖó ahwanvú tɔn lɛ́ɛ tamɛ
1 Ée Jezu ɖɔ xó énɛ́ lɛ́ɛ ɔ́, é kpɔ́n jǐ, bó ɖɔ: “Daá, hwe ɔ́ nu ɖíe su e; sɔ́ Vǐ towe su, bónú Vǐ towe lɔ ná sɔ́ we su. 2 Đó a nǎ ɛ acɛ ɖo gbɛtɔ́ lɛ́ɛ bǐ jí, bónú é ná ná gbɛ mavɔ mavɔ mɛ e a sɔ́ dó así n'i lɛ́ɛ bǐ sésé. 3 Gbɛ mavɔ mavɔ ɔ́ wɛ nyí ɖɔ yě ní tunwun we, bó tunwun ɖɔ hwi wɛ nyí Mawu nǔgbó ɖokpó e tíin é, bó lɛ́ tunwun Jezu Klísu e a sɛ́ dó gbɛ ɔ́ mɛ é. 4 Un wa azɔ̌ e a zɔ̌n mì ɔ́, un bló yi fó, bó dó sɔ́ we su ɖo ayǐkúngban jí. 5 Daá! Din ɔ́, bo ná mì susu ce e un ko ɖó ɖo gɔ̌n towe, cóbɔ a ɖǒ gbɛ ɔ́ é. 6 “Un ɖe we xlɛ́ mɛ e a sɔ́ dó así nú mì ɖo gbɛ ɔ́ mɛ lɛ́ɛ. Towe wɛ yě ko nyí, bɔ a ka sɔ́ yě dó así nú mì, bɔ yě se tónú nú we. 7 Din ɔ́, yě tunwun ɖɔ nǔ e a nǎ mì ɔ́ bǐ wɛ gosín gɔ̌n towe, 8 ɖó xó e a sɔ́ dó así nú mì lɛ́ɛ ɔ́, un ɖɔ bǐ nú yě, bɔ yě yí bǐ; yě ɖi nǔ ɖɔ hwi gɔ́n wɛ un gosín nǔgbó. 9 “Yě tamɛ sa vo nú we dó wɛ un ɖe. Mɛ e nyí gbɛ ɔ́ tɔn lɛ́ɛ tamɛ sa vo dó wɛ un ɖe ǎ; lo ɔ́, mɛ élɔ́ lɛ́ɛ e a sɔ́ dó así nú mi lɛ́ɛ tamɛ sa vo nú we dó wɛ un ɖe, ɖó towe wɛ yě nyí. 10 Nǔ e nyí ce ɔ́ bǐ wɛ nyí towe; nǔ e ka nyí towe ɔ́ bǐ wɛ nyí ce, bɔ è nɔ kpa susu nú mì ɖo yě mɛ. 11 Un sɔ́ ɖo gbɛ ɔ́ mɛ ǎ, yědɛɛ lɛ́ɛ ka kpo ɖo gbɛ ɔ́ mɛ, bɔ nyɛ ja gɔ̌n towe. Tɔ́ mímɛ́! Kpɔ́n mɛ e a sɔ́ dó así nú mì lɛ́ɛ jí ɖo nyǐkɔ towe mɛ, bónú yě nyí ɖokpó, lě e hwi kpódó nyɛ kpó nyí ɖokpó gbɔn é. 12 Hwenu e un ɖo kpɔ́ xá yě ɔ́, un hɛn yě ɖo acɛ e a nǎ mì é mɛ; un kpɔ́n yě jí, bɔ mɛ ɖokpó bú ɖo yě mɛ zɛ mɛ e ɖó ná bú é wú ǎ, bónú xó e Mawuxówéma ɔ́ ɖɔ ɔ́ ná dó jɛ. 13 Un ko ja gɔ̌n towe; amɔ̌ din e un kpo ɖo gbɛ ɔ́ mɛ ɔ́, un ɖɔ xó énɛ́ lɛ́ɛ nú yě, bónú xomɛhunhun ce ma ɖó blɔ̌ ɔ́ ní nɔ yě mɛ. 14 Un sɔ́ xó towe dó así nú yě, bɔ mɛ e nyí gbɛ ɔ́ tɔn lɛ́ɛ gbɛ́ wǎn nú yě, ɖó yě nyí gbɛ ɔ́ tɔn ǎ, lě e nyɛ lɔmɔ̌ ma nyí gbɛ ɔ́ tɔn ǎ é ɖɔhun. 15 Un byɔ́ we ɖɔ hwi ní ɖe yě sín gbɛ ɔ́ mɛ ǎ; lo ɔ́, hwlɛ̌n yě ɖo awǒvi sí. 16 Yě nyí gbɛ ɔ́ tɔn ǎ, lě e nyɛ lɔ ma nyí gbɛ ɔ́ tɔn ǎ é ɖɔhun. 17 Blǒ bónú yě ní nyí towe gbɔn xó towe e nyí nǔgbó ɔ́ gbla mɛ. 18 Un sɛ́ yě dó gbɛ ɔ́ mɛ, lě e a sɛ́ mì dó gbɛ ɔ́ mɛ é ɖɔhun. 19 Un sɔ́ nyɛ ɖésú bǐ jǒ nú we ɖó yě wú, nú yě lɔmɔ̌ ná sixú nyí towe nǔgbó. 20 “Yě kɛ́ɖɛ́ sín tamɛ sa vo dó wɛ un ɖe ǎ; lo ɔ́, mɛ e ná se xó ce lɛ́ɛ ɖo nu yětɔn, bó ná ɖi nǔ nú mì lɛ́ɛ bǐ sín tamɛ sa vo nú we dó wɛ un ɖe; 21 bónú yě bǐ ní nyí ɖokpó, lě e nyɛ kpódó hwi kpó nyí ɖokpó gbɔn é. Daá, a ɖo nyɛ mɛ, bɔ nyí lɔ ɖo hwi lɔ mɛ; yě ní nɔ bǔ ɖo mǐ mɛ, bónú gbɛtɔ́ lɛ́ɛ ná dó tunwun ɖɔ hwi wɛ sɛ́ mì dó nǔgbó. 22 Susu e a ná mì ɔ́, un ná yě lɔmɔ̌, bónú yě ní nyí ɖokpó, lě e hwi kpódó nyɛ kpó nyí ɖokpó gbɔn é. 23 Nyɛ ɖo yě mɛ, bɔ hwɛ ɖo nyɛ mɛ, nú yě ní nɔ bǔ nǔgbó, bónú gbɛtɔ́ lɛ́ɛ ná dó tunwun ɖɔ a sɛ́ mì dó, bó yí wǎn nú yě, lě e a yí wǎn nú mì gbɔn é. 24 “Daá! Un jló ɖɔ fí e un ɖe ɔ́, mɛ e a nǎ mì lɛ́ɛ lɔ ní nɔ fínɛ́ xá mì, bónú yě ní mɔ susu e a nǎ mì ɔ́, ɖó a ko yí wǎn nú mì cóbó wá ɖó gbɛ ɔ́. 25 Daá hwɛjijɔnɔ! Gbɛ ɔ́ ma tunwun we nɛ́! Nyɛ ka tunwun we, bɔ mɛ élɔ́ lɛ́ɛ tunwun ɖɔ hwi wɛ sɛ́ mì dó. 26 Un ɖe we xlɛ́ yě, bó ka ná lɛ́ ɖe we xlɛ́ hú mɔ̌, bónú wǎn yíyí e a ɖǒ nú mì ɔ́ ní nɔ yě mɛ, bónú nyɛ ɖésú ná nɔ yě mɛ.”
È wlǐ Jezu
1 Ée Jezu sa vo énɛ́ ɔ́ nú tɔ́ tɔn gúdo ɔ́, éyɛ́ kpódó ahwanvú tɔn lɛ́ɛ kpó dó asá Sedlɔ́n tɔ ɔ́ jɛ agě ɖě ɔ́ jí. Jikpá ɖé ɖo fínɛ́, bɔ yě byɔ́ mɛ. 2 Judási e ɖo Jezu ná sa wɛ ɔ́ lɔ tunwun fínɛ́, ɖó Jezu kpódó ahwanvú tɔn lɛ́ɛ kpó nɔ ko kplé ɖo fínɛ́ hwɛhwɛ. 3 Énɛ́ ɔ́, Judási kplá sɔ́jahwan lɛ́ɛ kpódó sinsɛnxɔcɔ́tɔ́ e vɔ̌sánú-xwlémawutɔ́gán lɛ́ɛ, kpódó Falizyɛn lɛ́ɛ kpó ná ɛ lɛ́ɛ kpó, bɔ yě yi jikpá ɔ́ mɛ. Yě hɛn zogbɛ́n, bó hɛn zohwín kpódó alǐnnyánú kpó alɔ nu. 4 Jezu ka ko tunwun nǔ e ɖo nǎ gbo e wɛ é bǐ, bó sɛ yi nukɔn yětɔn, bó ɖɔ: “Mɛ̌ ba wɛ mi ka ɖe?” 5 Yě yí gbe n'i ɖɔ: “Jezu Nazalɛ́tinu ɔ́ ba wɛ mǐ ɖe.” É ka ɖɔ nú yě ɖɔ: “Nyɛ ɖíe.” Judási e ɖo sisa ɛ ɖu wɛ ɔ́ lɔ ɖo yě mɛ. 6 Ée Jezu yí gbe nú yě ɖɔ nyɛ wɛ ɔ́, yě bǐ j'agɔ yi gúdo, bó yi jɛ ayǐ. 7 Jezu lɛ́ kanbyɔ́ yě azɔn wegɔ́ ɔ́ ɖɔ: “Mɛ̌ ba wɛ mi ka ɖe?” Bɔ yě lɛ́ yí gbe n'i ɖɔ: “Jezu Nazalɛ́tinu ɔ́ ba wɛ mǐ ɖe.” 8 Jezu ka ɖɔ nú yě ɖɔ: “Un ko ɖɔ nú mi ɖɔ nyɛ wɛ; ényí nyɛ ba wɛ jɛ́n mi ɖe hǔn, mi jǒ mɛ élɔ́ lɛ́ɛ dó, bónú yě ní yi.” 9 É ɖɔ mɔ̌, bónú xó e é ɖésú ko ɖɔ ɖ'ayǐ ɔ́ na dó jɛ; é wɛ nyí ɖɔ: “Mɛ e a nǎ mì lɛ́ɛ ɖěbǔ bú ǎ.” 10 Sinmɔ́ɔ Piyɛ́ɛ ka kplá hwǐ bó sún hwǐ tɔn sín akún mɛ, bó xú vɔ̌sánú-xwlémawutɔ́ ɖaxó ɔ́ sín mɛsɛntɔ́ ɖokpó, bó kpa tó tɔn ɖisíxwé tɔn ɔ́. È nɔ ylɔ́ mɛsɛntɔ́ énɛ́ ɖɔ Malukúsi. 11 Jezu ka ɖɔ nú Piyɛ́ɛ ɖɔ: “Sɔ́ hwǐ towe dó akún. Wǔvɛ́ kɔ́fu e Tɔ́ ɔ́ ɖɔ nyɛ ní nu ɔ́, un ná nu ǎ wɛ a?”
È kplá Jezu hɛn yi Hanna gɔ́n
12 Énɛ́ gúdo ɔ́, sɔ́jahwan lɛ́ɛ kpódó mɛ e ɖo yě nu ɔ́ kpó, kpódó sinsɛnxɔcɔ́tɔ́ Jwifu lɛ́ɛ tɔn kpó wlí Jezu, bó blá ɛ. 13 Yě tó kplá ɛ hɛn yi Hanna gɔ́n hwɛ̌. Hanna énɛ́ wɛ nyí asitɔ́ nú Kayífu e ɖo vɔ̌sánú-xwlémawutɔ́ ɖaxó nyí wɛ xwe énɛ́ xwe é. 14 Kayífu énɛ́ wɛ ko kplɔ́n nǔ Jwifugán lɛ́ɛ ɖ'ayǐ ɖɔ jí: “Mɛ ɖokpó kú dó to ɔ́ bǐ tamɛ ɔ́, é nyɔ́ hú to ɔ́ bǐ ní kú.”
Piyɛ́ɛ gbɛ́ ɖɔ émí kún tunwun Jezu ó
15 Sinmɔ́ɔ Piyɛ́ɛ kpódó ahwanvú ɖěvo kpó xwedó Jezu. Ahwanvú énɛ́ ɔ́, vɔ̌sánú-xwlémawutɔ́ ɖaxó ɔ́ tunwun i; énɛ́ wútu wɛ éyɛ́ xwedó Jezu byɔ́ xwé ɔ́ gbe. 16 Piyɛ́ɛ ka cí hɔntogbó jí; énɛ́ ɔ́, ahwanvú e vɔ̌sánú-xwlémawutɔ́ ɖaxó ɔ́ tunwun ɔ́ lɛ́ kɔ bó wá ɖɔ xó nú nyɔ̌nu hɔnjínɔtɔ́ ɔ́, bó kplá Piyɛ́ɛ byɔ́ xwé gbe. 17 Nyɔ̌nu hɔnjínɔtɔ́ ɔ́ ka kanbyɔ́ Piyɛ́ɛ ɖɔ: “Hwi lɔmɔ̌ ma ɖo nya énɛ́ sín ahwanvú lɛ́ɛ mɛ ǎ cé?” Bɔ Piyɛ́ɛ gbɛ́ n'i, bó ɖɔ: “Éeǒ, nyɛ ɖo yě mɛ ǎ.” 18 Mɛsɛntɔ́ lɛ́ɛ kpódó sinsɛnxɔcɔ́tɔ́ lɛ́ɛ kpó flɔ́ akán, bó ɖo te lɛ́ lɛ̌ dó, bó ɖo xúxú wɛ, ɖó avivɔ gbɛ́. Piyɛ́ɛ lɔ ɖo te ɖo yě mɛ, bó ɖo myɔ xú wɛ.
Vɔ̌sánú-xwlémawutɔ́ ɖaxó ɔ́ kan xó byɔ́ Jezu
19 Vɔ̌sánú-xwlémawutɔ́ ɖaxó ɔ́ kan nǔ byɔ́ Jezu dó ahwanvú tɔn lɛ́ɛ wú, bó lɛ́ kan nǔ byɔ́ ɛ dó nǔ e é nɔ kplɔ́n mɛ ɔ́ wú. 20 Bɔ Jezu ka yí gbe n'i ɖɔ: “Agbawungba wɛ un ɖɔ xó nú mɛ lɛ́ɛ bǐ ɖe. Tɛgbɛ wɛ un ka nɔ ɖo nǔ kplɔ́n mɛ lɛ́ɛ wɛ ɖo kplɔ́ngbasá lɛ́ɛ, kpódó sinsɛnxɔ mɛ kpó, fí e Jwifu lɛ́ɛ bǐ nɔ kplé ɖe é. Un ɖɔ nǔ ɖěbǔ ɖo nǔglɔ́ ǎ. 21 Aniwú wɛ a ka ɖo nǔ kanbyɔ́ mì wɛ? Kan nǔ e un ɖɔ ɔ́ byɔ́ mɛ e un ɖɔ xó ná lɛ́ɛ, ɖó yědɛɛ lɛ́ɛ tunwun nǔ e un kplɔ́n yě lɛ́ɛ.” 22 Ée Jezu ɖɔ mɔ̌ ɔ́, sinsɛnxɔcɔ́tɔ́ ɖokpó ɖo fínɛ́, bó xo tó mɛ n'i, bó ɖɔ: “Mɔ̌ wɛ a nǎ yí gbe nú vɔ̌sánú-xwlémawutɔ́ ɖaxó ɔ́ gbɔn a?” 23 Jezu ka yí gbe n'i ɖɔ: “Ényí nǔ wɛ un ɖɔ nyi do hǔn, ɖe nǔ e un ɖɔ nyi do ɔ́ xlɛ́; é ka nyí xó ganjí wɛ un ɖɔ ɔ́, étɛ́wú a ka xo tó mɛ nú mì?” 24 Jezu ɖo blǎblá mɔ̌, bɔ Hanna nyi i sɛ́ dó Kayífu vɔ̌sánú-xwlémawutɔ́ ɖaxó ɔ́ gɔ́n.
Piyɛ́ɛ lɛ́ gbɛ́ ɖɔ émí kún tunwun Jezu ó
25 Sinmɔ́ɔ Piyɛ́ɛ ɖo te, bó ɖo myɔ xú wɛ ɖo fínɛ́, bɔ yě kanbyɔ́ ɛ ɖɔ: “Hwi lɔmɔ̌ má ɖo ahwanvú nya énɛ́ tɔn mɛ ǎ cé?” É ka gbɛ́, bó ɖɔ: “Éeǒ, nyɛ ɖo yě mɛ ɖě ǎ!” 26 Vɔ̌sánú-xwlémawutɔ́ ɖaxó ɔ́ sín mɛsɛntɔ́ e Piyɛ́ɛ kpa tó ná ɔ́ sín mɛ ɖokpó kanbyɔ́ Piyɛ́ɛ ɖɔ jí: “Un ma mɔ hwi kpó nya énɛ́ kpó ɖo jikpá ɔ́ mɛ a?” 27 Piyɛ́ɛ ka lɛ́ gbɛ́, bɔ tlóló ɔ́, kokló kɔ́ así.
È kplá Jezu yi tokpɔngán Pilátu nukɔn
28 Yě kplá Jezu sín Kayífu xwé, bó kplá ɛ hɛn yi tokpɔngán Hlɔ̌manu lɛ́ɛ tɔn sín hɔnmɛ zǎnzǎn tɛɛn. Lo ɔ́, Jwifu lɛ́ɛ byɔ́ hɔn ɔ́ mɛ ǎ, ɖó yě táá wá ɖu su, bónú xwe ɖuɖu ná gló yě. 29 Énɛ́ wú wɛ Pilátu gbɔ bo tɔ́n, bó wá mɔ yě, bó kanbyɔ́ yě ɖɔ: “Hwɛ tɛ́ dó nya élɔ́ wɛ mi ka ɖe?” 30 Yě yí gbe n'i ɖɔ: “É ma ko nyí nǔnyanyawatɔ́ ǎ ɔ́, mǐ ná kplá ɛ wá nú we ǎ.” 31 Énɛ́ ɔ́, Pilátu ɖɔ nú yě ɖɔ: “Mi ɖésúnɔ mi bo kplá ɛ, bó ɖɔ hwɛ xá ɛ lě e sɛ́n mitɔn jló gbɔn é.” Jwifugán lɛ́ɛ ka yí gbe n'i ɖɔ jí: “Mǐ ɖó acɛ e hu mɛ é ǎ.” 32 Nǔ cí mɔ̌, bónú xó e Jezu ɖésú ko ɖɔ ɖ'ayǐ dó kú alɔkpa e é ná kú é wú ɔ́ ná dó jɛ. 33 Pilátu ka lɛ́ kɔ yi hɔn ɔ́ mɛ, bó ylɔ́ Jezu, bó kanbyɔ́ ɛ ɖɔ: “Hwi wɛ nyí Jwifu lɛ́ɛ sín axɔ́sú ɔ́ a?” 34 Jezu ka yí gbe n'i ɖɔ: “Xó énɛ́ e a kanbyɔ́ mì ɔ́, hwi ɖésúnɔ sín xomɛ wɛ é tɔ́n sín a, abǐ mɛ ɖěvo wɛ ɖɔ xó ce nú we?” 35 Pilátu ka yí gbe n'i ɖɔ: “Nyɛ ɔ́, Jwifu wɛ un nyí a? To towe mɛ nu lɛ́ɛ kpódó vɔ̌sánú-xwlémawutɔ́gán lɛ́ɛ kpó wɛ kplá we wá nú mì. Étɛ́ a ka wa?” 36 Jezu ka yí gbe n'i ɖɔ: “Axɔ́súɖuɖu ce nyí gbɛ mɛ fí tɔn ǎ; ényí gbɛ mɛ fí tɔn wɛ é ko nyí ɔ́, ahwanvú ce lɛ́ɛ ná ko fun ahwan, nú è ma jó mì nú Jwifugán lɛ́ɛ ó; axɔ́súɖuɖu ce ka nyí gbɛ mɛ fí tɔn ǎ.” 37 Pilátu lɛ́ kanbyɔ́ ɛ ɖɔ: “Hǔn axɔ́sú wɛ a nyí nɛ́ hǔn?” Bɔ Jezu yí gbe n'i ɖɔ: “Hwi wɛ ɖɔ un nyí axɔ́sú. È ji mì, bɔ un wá gbɛ ɔ́ mɛ, bó ná ɖe kúnnu nú nǔgbó ɔ́. Mɛ e nɔ xwedó nǔgbó ɔ́ bǐ wɛ nɔ ɖótó xó ce.” 38 Pilátu kanbyɔ́ ɛ ɖɔ: “Ani ka nyí nǔgbó ɔ́?”
È ɖǒ kúhwɛ nú Jezu
Ée Pilátu kan mɔ̌ byɔ́ Jezu ɔ́, é lɛ́ tɔ́n, bó yi ɖɔ nú Jwifu e gbɛ́ wǎn nú Jezu lɛ́ɛ ɖɔ: “Un mɔ nǔ e wú un ná ɖó hwɛ nú nya élɔ́ é ɖě ǎ. 39 Lo ɔ́, walɔ mitɔn wɛ é ko nyí, bɔ un nɔ jó gantɔ́ ɖokpó nú mi Dǐndínwáyixwe ɔ́ hwenu. Mi jló nú má jó Jwifu lɛ́ɛ xɔ́sú ɔ́ nú mi a?” 40 Yě bǐ ka sú xó, bó ɖɔ jí: “Gbeɖé, é wɛ a nǎ jǒ nú mǐ ǎ, Balabási wɛ a nǎ jó nú mǐ!” Ajotɔ́ axánsúnxó ɖokpó wɛ ka nyí Balabási ɔ́.
1 Hwenɛ́nu ɔ́, Pilátu ná gbe ɖɔ è ní kplá Jezu bó zé lanbá dó xo e ná; 2 bɔ sɔ́ja lɛ́ɛ sɔ́ wun dó lɔn axɔ́súgbákún ɖokpó, bó sɔ́ xwe n'i, bó lɛ́ sɔ́ awu ɖaxó vɔvɔ cɛ́cɛ́ ɖé dó n'i. 3 Yě nɔ sɛ yi nukɔn tɔn, bó nɔ ɖɔ: “Mǐ kan xwé byɔ́, Jwifu lɛ́ɛ xɔ́sú.” Bó nɔ́ xo tó mɛ n'i. 4 Pilátu lɛ́ tɔ́n wá kɔ́xo, bó ɖɔ nú yě ɖɔ: “Mi ɖótó; un ná yi kplá nya mitɔn wá nú mi, bónú mi ná dó tunwun ɖɔ un kún mɔ nǔ e wú un ná ɖó hwɛ n'i é ɖě ó.” 5 Énɛ́ ɔ́, Jezu tɔ́n, bó ɖo awu vɔvɔ ɖaxó ɔ́ mɛ, bɔ axɔ́súgbákún ɔ́ ɖo ta n'i. Pilátu ɖɔ nú yě ɖɔ: “Nya ɔ́ ɖíe.” 6 Ée vɔ̌sánú-xwlémawutɔ́gán lɛ́ɛ kpódó sinsɛnxɔcɔ́tɔ́ lɛ́ɛ kpó mɔ ɛ lě ɔ́, yě sú xó, bó ɖɔ: “Ká ɛ nyi aklúzu jí! Ká ɛ nyi aklúzu jí!” Pilátu ka ɖɔ nú yě ɖɔ: “Mi kplá ɛ, bó yi ká ɛ nyi aklúzu jí mi ɖésúnɔ, ɖó nyɛ mɔ nǔ e wú un ná ɖó hwɛ n'i ɔ́ ɖě ǎ.” 7 Jwifu lɛ́ɛ ka yí gbe n'i ɖɔ: “Mǐ ɖó sɛ́n, bɔ sɛ́n énɛ́ byɔ́ ɖɔ è ní hu i; ɖó é ɖɔ émí nyí Mawu ví.” 8 Ée Pilátu se mɔ̌ ɔ́, xɛsi lɛ́ ɖi i d'é jí, 9 bɔ é lɛ́ kplá Jezu byɔ́ hɔn ɔ́ mɛ, bó kanbyɔ́ ɛ ɖɔ: “Fítɛ́ a ka gosín?” Jezu ka kɛ nu ǎ, 10 bɔ Pilátu ɖɔ n'i ɖɔ: “Nyɛ wɛ a tin dó a? A tunwun ɖɔ un ɖó acɛ bó ná ɖe we nyi te, bó lɛ́ ɖó acɛ bó ná ká we nyi aklúzu jí ǎ cé?” 11 Jezu ka yí gbe n'i ɖɔ: “Ényí Mawu ma ná gbe tɔn we ǎ ɔ́, a sixú ɖó acɛ ɖěbǔ ɖo jǐ ce ǎ; énɛ́ ɔ́ wú wɛ mɛ e jó mì ɔ́ hu hwɛ hú we.” 12 Bɛ́ sín hwenɛ́nu ɔ́, Pilátu jɛ lě e é ná wa gbɔn, bó ná ɖe Jezu nyi te ɔ́ ba jí. Jwifu lɛ́ɛ ka jɛ xó sú jí, bó ɖɔ: “Ényí a ɖe nya énɛ́ nyi te hǔn, a nyǐ Dadá Hlɔ̌ma tɔn sín xɔ́ntɔn ǎ; ɖó mɛ e sɔ́ éɖée axɔ́sú ɔ́, gǔ wɛ é fɔ́n dó Dadá Hlɔ̌ma tɔn jí.” 13 Ée Pilátu se mɔ̌ ɔ́, é ɖe Jezu tɔ́n, lobo wá jínjɔ́n hwɛɖɔzinkpo ɔ́ jí, ɖo tɛn e mɛ è tɛ́ awǐnnya ɖagbe ɖagbe lɛ́ɛ kɔn nyi, bɔ è nɔ ylɔ́ ɖɔ “Gabata” ɖo Ebléegbe mɛ é. 14 Dǐndínwáyixwe kpo sɔ, bɔ yě ko ɖo xwe ɔ́ nú sɔ́ ɖ'ayǐ wɛ, xwe gan wěwe mɛ ɔ́, Pilátu ɖɔ nú Jwifu lɛ́ɛ ɖɔ: “Axɔ́sú mitɔn ɖíe.” 15 Jwifu lɛ́ɛ ka sú xó, bó ɖɔ: “È hu i! È hu i! È ká ɛ nyi aklúzu jí.” Pilátu ka kanbyɔ́ yě ɖɔ: “Má ká axɔ́sú mitɔn nyi aklúzu jí wɛ a?” Vɔ̌sánú-xwlémawutɔ́gán lɛ́ɛ yí gbe n'i ɖɔ: “Mǐ sɔ́ ɖó axɔ́sú ɖěvo zɛ Dadá Hlɔ̌ma tɔn wú ǎ.” 16 Bɔ Pilátu jó Jezu nú yě, bónú yě ná yi ká ɛ nyi aklúzu jí.
È ká Jezu nyi aklúzu jí
Yě kplá Jezu ɖidó. 17 Jezu ɖíɖá aklúzu tɔn, bó tɔ́n sín toxo ɔ́ mɛ; é ɖidó fí ɖé, bɔ è nɔ ylɔ́ fí ɔ́ ɖɔ “takágo”, bɔ Eblée lɛ́ɛ nɔ́ ylɔ́ fí énɛ́ ɖɔ Gɔlugɔta. 18 Fínɛ́ wɛ yě ká Jezu nyi aklúzu jí ɖe; è lɛ̌ ká mɛ we ɖěvo ɖó aklúzu jí; mɛ ɖokpó ɖo ɖisí tɔn xwé, mɛ wegɔ́ ɔ́ ɖo amyɔ tɔn xwé, bɔ Jezu ɖo tɛ́ntin mɛ. 19 Pilátu wlán xógbe élɔ́, bó sɔ́ ɖó aklúzu ɔ́ jí aga ɖɔ: “Jezu Nazalɛ́ti tɔn, Jwifu lɛ́ɛ xɔ́sú.” 20 Jwifu gěgé mɔ nǔ e è wlǎn énɛ́ ɔ́ xa, ɖó tɛn e mɛ è ká Jezu nyi ɔ́ lín dó toxo ɔ́ ǎ. Xógbe énɛ́ ɔ́, è wlǎn dó Ebléegbe mɛ, bó wlán dó Latɛ́ɛngbe mɛ, bó lɛ́ wlán dó Glɛ̌sigbe mɛ. 21 Jwifu lɛ́ɛ sín vɔ̌sánú-xwlémawutɔ́gán lɛ́ɛ wá yi ɖɔ nú Pilátu ɖɔ: “Jwifu lɛ́ɛ xɔ́sú wɛ a ɖǒ ná wlán ǎ; nǔ e a ɖǒ ná wlán ɔ́ ɖíe: ‘Nya élɔ́ ɖɔ émí wɛ nyí Jwifu lɛ́ɛ xɔ́sú.’ ” 22 Pilátu ka yí gbe nú yě ɖɔ: “Nǔ e un ko wlán ɔ́, un wlán wɛ.” 23 Ée sɔ́ja lɛ́ɛ ká Jezu nyi aklúzu jí vɔ ɔ́, yě bɛ́ awu tɔn lɛ́ɛ, bó má ɖó donu ɛnɛ, bɔ mɛ ɖokpó ɖokpó sɔ́ étɔn. Yě lɛ́ sɔ́ awu tɔn ɖaxó e má ɖó titɔkpa ɖěbǔ ǎ, bó nyí avɔ ɖokpó sín jǐ káká wá do é. 24 Sɔ́ja lɛ́ɛ ɖɔ ɖo yěɖée tɛ́ntin ɖɔ: “Mǐ ná vún awu élɔ́ ǎ. Mi nú mǐ ná nyi akɔ dó, bó ná tunwun mɛ e tɔn é ná nyí é.” Nǔ nyí mɔ̌, bónú nǔ e Mawuxówéma ɔ́ ɖɔ ɔ́ ná dó jɛ. É wɛ nyí ɖɔ: “Yě má awu ce lɛ́ɛ, bó nyi akɔ dó awu ce ɖaxó ɔ́.” Nǔ e sɔ́ja lɛ́ɛ wa ɔ́ nɛ́. 25 Jezu sín nɔ, kpódó nɔ tɔn nɔví nyɔ̌nu Mali e nyí Klopási sín asi ɔ́ kpó, kpódó Mali Magidalanu ɔ́ kpó ɖo te, ɖo aklúzu Jezu tɔn ɔ́ kpá. 26 Ée Jezu mɔ nɔ tɔn, bó ka mɔ ahwanvú tɔn e é yí wǎn ná ɔ́ ɖo te ɖo akpá tɔn ɔ́, é ɖɔ nú nɔ tɔn ɖɔ: “Nǎna, vǐ towe nɛ́!” 27 Bó ka lɛ́ ɖɔ nú ahwanvú ɔ́ ɖɔ: “Nɔ towe nɛ́!” Sín gbe énɛ́ gbe ɔ́, ahwanvú ɔ́ kplá Jezu sín nɔ dó xwé tɔn gbe.
Jezu kú
28 Énɛ́ gúdo ɔ́, ée Jezu tunwun ɖɔ nǔ lɛ́ɛ bǐ fó lo ɔ́, é ɖɔ: “Kɔ xú mì!” Bónú nǔ e è wlǎn dó Mawuxówéma ɔ́ mɛ ɔ́ ná dó jɛ. 29 Zɛ̌n ɖé ka ɖo fínɛ́, bɔ vɛ̌ɛn sinvɛ́sinvɛ́ gɔ́, sɔ́ja lɛ́ɛ ka nylɔ́ xumɛtekan d'é mɛ, bó sɔ́ slɔ́ izɔ́pukpo nu, bó dlɛ́n ɖó nu n'i. 30 Ée Jezu nu vɛ̌ɛn sinvɛ́sinvɛ́ ɔ́, é ɖɔ: “Nǔ bǐ fó!” Bó dó kɔ do, bó bɔnu.
È sɔ́ hwǎn adaja mɛ nú Jezu
31 Gbe énɛ́ gbe ɔ́, gbɔjɛzán Jwifu lɛ́ɛ tɔn kpo sɔ, bó jɛ dó Dǐndínwáyixwe gbe. Jwifugán lɛ́ɛ ka jló nú mɛ e è ká lɛ́ɛ ní nɔ aklúzu jí azǎn énɛ́ gbe ǎ, ɖó azǎn ɖaxó ɖé wɛ nyí azǎn énɛ́ ɔ́. Yě yi byɔ́ gbe Pilátu ɖɔ é ní gba afɔxú nú mɛ e è ká lɛ́ɛ, bó ɖe yě síin. 32 Pilátu ná gbe yě, bɔ sɔ́ja lɛ́ɛ yi gba afɔxú nú mɛ we e è ká nyi aklúzu jí xá Jezu lɛ́ɛ; yě gba afɔxú nú mɛ nukɔn tɔn ɔ́, bó gba nú mɛ wegɔ́ ɔ́. 33 Ée yě wá jɛ Jezu jí ɔ́, yě mɔ ɖɔ é ko kú, bɔ yě sɔ́ xaji bó gba afɔxú n'i ǎ. 34 Lo ɔ́, sɔ́ja ɖokpó sɔ́ hwǎn adaja mɛ n'i, bɔ tlóló ɔ́, hun kpódó sin kpó lúlú kɔn nyi ayǐ. 35 Mɛ e nɔ tɛn tɔn mɛ, bó mɔ é wɛ ɖe kúnnu ná, bɔ kúnnuɖiɖe tɔn ka nyí nǔgbó. Éyɛ́ tunwun ɖɔ nǔgbó wɛ émí ɖɔ, bónú mi lɔmɔ̌ ná ɖi nǔ. 36 Nǔ énɛ́ lɛ́ɛ bǐ jɛ, bónú nǔ e è ko wlán ɖ'ayǐ ɖo Mawuxówéma ɔ́ mɛ ɔ́ ná dó jɛ; é wɛ nyí ɖɔ: “È nǎ gba xú tɔn ɖokpó géé lě ǎ.” 37 È ka lɛ́ wlán dó akpá ɖěvo xwé ɖo Mawuxówéma ɔ́ mɛ ɖɔ: “Yě ná mɔ mɛ e yě sɔ́ hwǎn é.”
È ɖi Jezu
38 Énɛ́ ɔ́ gúdo ɔ́, nya ɖé tíin, bɔ è nɔ ylɔ́ ɛ ɖɔ Jozɛ́fu; Alimatéenu wɛ; é lɔmɔ̌ ɖo Jezu sín ahwanvú lɛ́ɛ mɛ. É ka nɔ jló ná ɖe xlɛ́ ɖɔ émí ɖo Jezu sín ahwanvú lɛ́ɛ mɛ ǎ; ɖó é nɔ ɖo xɛsi ɖi nú Jwifugán lɛ́ɛ wɛ. Nya énɛ́ yi mɔ Pilátu, bó byɔ́ ɛ Jezu sín cyɔ, bɔ Pilátu ná ɛ gbe, bɔ é yi zé cyɔ ɔ́. 39 Nikodɛ́mu e zɔn zǎn gbe ɖokpó, bó yi mɔ Jezu ɔ́ lɔmɔ̌ wá Jezu sín cyɔ kɔn. Nikodɛ́mu xo mǐla kpódó alowɛ́si kpó kplé, bó hɛn, bɔ é ná yi kilóo gban mɔ̌. 40 Yě ɖíɖá Jezu sín cyɔ, bo lɛ́ akwɛ́núvɔ ɖé dó e, bo sá mǐla kpódó alowɛ́si kpó e è xokplé ɔ́ n'i, lě e Jwifu lɛ́ɛ nɔ bló gbɔn nú cyɔ cóbó nɔ ɖi é. 41 Jikpá ɖé ka ɖo fí e è ká Jezu nyi aklúzu jí ɖe é, bɔ yɔdo yɔ̌yɔ́ ɖokpó ɖ'é mɛ, bɔ è ko ɖi mɛ ɖěbǔ d'é mɛ kpɔ́n gbeɖé ǎ. 42 Fínɛ́ wɛ yě ɖi Jezu dó, ɖó yɔdo ɔ́ lín dó fínɛ́ ǎ, bɔ Jwifu lɛ́ɛ ka ko ɖo gbɔjɛzán ɔ́ nú sɔ́ wɛ.
È fɔ́n Jezu sín kú
1 Aklúnɔzán gbe zǎnzǎn hwenu e zǐnflú kpo ɖo te ɔ́, Mali Magidalanu ɔ́ yi Jezu sín yɔdo kɔn, bó mɔ ɖɔ è ɖe awǐnnya e ɖo Jezu sín yɔdo nu ɔ́ síin. 2 Énɛ́ ɔ́, é kán wezun yi mɔ Piyɛ́ɛ, kpódó ahwanvú ɖě ɔ́ e Jezu yí wǎn ná é kpó, bó ɖɔ nú yě ɖɔ: “Yě ɖe Aklúnɔ sín yɔdo tɔn mɛ, bɔ mǐ tunwun fí e è sɔ́ ɛ yi ɔ́ ǎ.” 3 Bɔ Piyɛ́ɛ kpódó ahwanvú ɖě ɔ́ kpó tɔ́n, bó ɖidó yɔdo ɔ́ kɔn. 4 Yě mɛ we lɛ́ɛ bǐ wɛ bɛ́ wezun; ahwanvú ɖě ɔ́ ka zɛ Piyɛ́ɛ wú, bó yi yɔdo ɔ́ kɔn jɛ nukɔn. 5 É fɛ, bó kpɔ́n yɔdo ɔ́ mɛ, bó mɔ avɔ e è lɛ̌ dó e lɛ́ɛ ɖo fínɛ́; é ka byɔ́ mɛ ǎ. 6 Sinmɔ́ɔ Piyɛ́ɛ wá wá gbɔn gǔdo, bó byɔ́ yɔdo ɔ́ mɛ, bó mɔ avɔ e è lɛ̌ dó e lɛ́ɛ ɖo fínɛ́; 7 é lɛ́ mɔ avɔ e è bǔ dó ta nú Jezu ɔ́; é ka ɖo ɖě lɛ́ɛ mɛ ǎ; é ɖo mlǎmlá ɖo vo. 8 Énɛ́ ɔ́ gúdo ɔ́, ahwanvú ɖě ɔ́ e jɛ nukɔn nú Piyɛ́ɛ wá yɔdo ɔ́ kɔn ɔ́ lɔmɔ̌ byɔ́ mɛ; é mɔ bó ɖi nǔ. 9 Nǔ e ɖɔ wɛ Mawuxówéma ɔ́ ɖe bó ɖɔ Jezu ná fɔ́n sín kú ɔ́, yě ko mɔ nǔ jɛ mɛ ǎ; 10 bɔ ahwanvú we énɛ́ lɛ́ɛ lɛ́ kɔ yi xwé yětɔn lɛ́ɛ gbe.
Jezu tɔ́n dó Mali Magidalanu ɔ́ jí
11 Mali ɖo te ɖo yɔdo ɔ́ kɔn, bó ɖo avǐ ya wɛ, bɔ hwenu e é ɖo avǐ ya wɛ ɔ́, é fɛ, bó kpɔ́n yɔdo ɔ́ mɛ sɛ́ dó. 12 É mɔ wɛnsagun Mawu tɔn we ɖo fí e è sɔ́ Jezu sín cyɔ ɖó ɔ́, bɔ yě dǒ nǔ wěwé; mɛ ɖokpó jínjɔ́n afɔligbé, bɔ mɛ ɖokpó jínjɔ́n taligbé; 13 bɔ yě kanbyɔ́ ɛ ɖɔ: “Nyɔ̌nu! Étɛ́ sín avǐ ya wɛ a ka ɖe?” É ka yí gbe nú yě ɖɔ: “Yě ɖe Aklúnɔ ce síin, bɔ un tunwun fí e è sɔ́ ɛ ɖó ɔ́ ǎ.” 14 Ée é ɖɔ mɔ̌ ɔ́, é lílɛ́, bó mɔ Jezu ɖo te; é ka tunwun ɖɔ é wɛ ǎ. 15 Jezu ka ɖɔ n'i ɖɔ: “Nyɔ̌nu! Étɛ́ sín avǐ ya wɛ a ka ɖe? Mɛ̌ ba wɛ a ɖe?” Mali ka vɛdó ɖɔ jikpájíkpɔ́ntɔ́ ɔ́ wɛ sín, bó ɖɔ n'i ɖɔ: “Mɛɖaxó! Ényí hwi wɛ sɔ́ ɛ sín fí hǔn, ɖɔ fí e a sɔ́ ɛ ɖó ɔ́ nú mì, nú má yi sɔ́ ɛ.” 16 Bɔ Jezu ylɔ́ ɛ bó ɖɔ: “Mali!” Bɔ é lílɛ́, bó ylɔ́ ɛ dó Ebléegbe mɛ ɖɔ: “Hlabúni”; (tínmɛ tɔn wɛ nyí Mɛ̌si.) 17 Jezu ɖɔ n'i ɖɔ: “Ma hɛn mì ɖó te ó, ɖó un ko yi Tɔ́ ɔ́ gɔ́n ɖo sɛ́xwé ǎ; lo ɔ́, yi ɖɔ nú nɔví ce lɛ́ɛ ɖɔ un xwe Tɔ́ ce e nyí Tɔ́ mi lɔ tɔn é gɔ́n; un xwe Mawu ce e nyí Mawu mi lɔ tɔn é gɔ́n.” 18 Bɔ Mali Magidalanu ɔ́ yi ɖɔ nú ahwanvú Jezu tɔn lɛ́ɛ ɖɔ: “Un mɔ Aklúnɔ!” Bó dó wɛn e Jezu dó e ɔ́ yě.
Jezu tɔ́n dó ahwanvú tɔn lɛ́ɛ jí
19 Gbe énɛ́ gbe aklúnɔzán gbe gbadanu ɔ́, Jezu sín ahwanvú lɛ́ɛ yi sú hɔn dó ta; ɖó yě ɖo xɛsi ɖi nú Jwifugán lɛ́ɛ wɛ, bɔ Jezu wá nɔ te, ɖo tɛ́ntin yětɔn, bó ɖɔ nú yě ɖɔ: “Fífá ní nɔ kpɔ́ xá mi!” 20 Ée é ɖɔ mɔ̌ nú yě gúdo ɔ́, é xlɛ́ alɔ tɔn lɛ́ɛ kpódó adaja tɔn kpó yě. Ée yě mɔ Aklúnɔ yětɔn ɔ́, xomɛ hun yě tlala. 21 Jezu lɛ́ vɔ́ ɖɔ nú yě ɖɔ: “Fífá ní nɔ kpɔ́ xá mi. Lě e Tɔ́ ɔ́ sɛ́ mì dó ɔ́, nyi lɔ sɛ́ mi dó.” 22 Ée é ɖɔ mɔ̌ ɔ́, é fún funfún dó yě jí, bó ɖɔ nú yě ɖɔ: “Mi yí Yɛsinsɛn. 23 Mi sɔ́ hwɛ kɛ mɛɖé ɔ́, é ná gosín kɔ n'i; mi ma ka sɔ́ hwɛ kɛ mɛɖé ǎ ɔ́, é ná nɔ kɔ n'i.”
Tɔmáa ɖi nǔ ɖɔ Jezu fɔ́n sín kú ǎ
24 Mɛ e nyí Tɔmáa ɖo ahwanvú Jezu tɔn wěwe lɛ́ɛ mɛ bɔ è nɔ lɛ́ ylɔ́ ɛ ɖɔ hǒxo ɔ́ ɖo kpɔ́ xá yě hwenu e Jezu wá ɔ́ ǎ. 25 Ahwanvú ɖě lɛ́ɛ wá ɖɔ n'i ɖɔ: “Mǐ mɔ Aklúnɔ!” Tɔmáa ka yí gbe nú yě ɖɔ: “Ényí un ma mɔ hǔnjɛ́nkpa e ɖo alɔ tɔn mɛ lɛ́ɛ, bó sɔ́ alɔví ce d'é mɛ, bó mɔ hwǎnkpa e ɖo adaja tɔn mɛ ɔ́, bó zé alɔ ce dó adaja tɔn mɛ ǎ ɔ́, un ná ɖi ǎ.” 26 Azǎn tɔn tántɔngɔ́ ɔ́ gbe ɔ́, ahwanvú Jezu tɔn lɛ́ɛ ko lɛ́ sú hɔn dó ta, ɖo fí ɖokpó ɔ́, bɔ Tɔmáa ɖo yě mɛ gbe énɛ́ gbe. Hɔn ɔ́ ɖo súsú có Jezu wá nɔ te ɖo tɛ́ntin yětɔn, bó ɖɔ: “Fífá ní nɔ kpɔ́ xá mi.” 27 É ka ɖɔ nú Tɔmáa ɖɔ: “Dlɛ̌n alɔví towe ɖó fí, bó kpɔ́n alɔ ce lɛ́ɛ. Dlɛ̌n alɔ towe, bó sɔ́ dó adaja ce mɛ; gɔn nǔ xokpɔ́n, bó ɖi nǔ.” 28 Tɔmáa yí gbe n'i ɖɔ: “Aklúnɔ ce, Mawu ce!” 29 Jezu ka ɖɔ n'i ɖɔ: “É ma nyí ée a mɔ mì ɔ́ wútu wɛ a ɖi nǔ nú mì a? Nǔ nyɔ́ nú mɛ e ma mɔ ǎ, bó ka ɖi nǔ lɛ́ɛ.”
Nǔ e wú è wlǎn wěma élɔ́ é
30 Jezu jlɛ́ nǔ gěgé ɖěvo lɛ́ɛ ɖo ahwanvú tɔn lɛ́ɛ nukɔn; è ka wlán yě dó wěma élɔ́ mɛ ǎ. 31 Amɔ̌, è wlǎn élɔ́ lɛ́ɛ, bónú mi ná ɖi nǔ ɖɔ Jezu wɛ nyí Klísu Mawu ví ɔ́, bónú mi ɖi nǔ ɔ́, mi ná mɔ gbɛ gbɔn jǐ tɔn.
Jezu sɔ́ éɖée xlɛ́ ahwanvú tɔn tɛ́nwe
1 Énɛ́ ɔ́ gúdo ɔ́, Jezu lɛ́ sɔ́ éɖée xlɛ́ ahwanvú tɔn lɛ́ɛ ɖo Tibɛliadi tɔ tó. Lě e é ka sɔ́ éɖée xlɛ́ yě gbɔn é ɖíe: 2 Sinmɔ́ɔ Piyɛ́ɛ, Tɔmáa e è nɔ ylɔ́ ɖɔ hǒxo ɔ́, Natanayɛ́li e gosín Kana Galilée yíkúngban jí é, Zebeɖée ví súnnu we lɛ́ɛ, kpódó ahwanvú Jezu tɔn we ɖěvo lɛ́ɛ kpó ɖo kpɔ́. 3 Sinmɔ́ɔ Piyɛ́ɛ ɖɔ nú yě ɖɔ: “Un ná yi tɔ jǐ, bó ná yi nyi ɖɔ;” bɔ mɛ ɖě lɛ́ɛ ɖɔ n'i ɖɔ: “Mǐ lɔmɔ̌ ná xwedó we yi.” Bɔ yě yi byɔ́ tɔjíhún mɛ, bó sɛ yi tɔ ɔ́ jí; yě ká wlí nǔ ɖěbǔ zǎn énɛ́ mɛ ǎ. 4 Ée ayǐ ɖo kinkɛn wɛ ɔ́, Jezu wá nɔ te ɖo tɔ ɔ́ tó, ahwanvú tɔn lɛ́ɛ ka tunwun ɖɔ é wɛ ǎ. 5 Jezu ɖɔ nú yě ɖɔ: “Vǐ ce lɛ́ɛ mi; mi mɔ nǔɖé wlí a?” Yě ká yí gbe n'i ɖɔ: “Éeǒ! Mǐ mɔ nǔ ɖěbǔ wlí ǎ.” 6 É ka ɖɔ nú yě ɖɔ: “Mi bo nyi ɖɔ ɔ́ dó ɖisíxwé nú tɔjíhún ɔ́, énɛ́ ɔ́ mi ná mɔ hweví wlí.” Yě ká nyi ɖɔ ɔ́ dó ɖisíxwé nǔgbó, bɔ ɖɔ ɔ́ wlí hweví gěgé, káká bɔ yě sɔ́ sixú dɔn tɔ́n ǎ. 7 Énɛ́ ɔ́, ahwanvú e Jezu yí wǎn ná ɔ́ ɖɔ nú Piyɛ́ɛ ɖɔ: “Aklúnɔ wɛ!” Ée Sinmɔ́ɔ Piyɛ́ɛ se ɖɔ Aklúnɔ wɛ ɔ́, é sɔ́ awu tɔn sin dó alin, bó lɔ́n jɛ tɔ ɔ́ mɛ, ɖó é ko ɖe awu ɖ'ayǐ. 8 Ahwanvú ɖě lɛ́ɛ ka zɔn tɔjíhún ɔ́ mɛ wá, bó dɔn ɖɔ ɔ́, bɔ hweví gɔ́. Fí e yě ɖe dó agě ɔ́ jí ɔ́ sɔ́ lín ǎ; é ná yi mɛ̌tlu kanwe ko (100 ) mɔ̌. 9 Ée yě jɛ te ɔ́, yě mɔ myɔkán, bɔ è ɖo hweví hi ɖ'é jí wɛ; yě lɛ́ mɔ wɔ̌xúxú ɖo fínɛ́. 10 Jezu ɖɔ nú yě ɖɔ: “Mi fɔ hweví e mi wlí din lɛ́ɛ ɖě wǎ.” 11 Ée Jezu ɖɔ mɔ̌ ɔ́, Sinmɔ́ɔ Piyɛ́ɛ yi byɔ́ tɔjíhún ɔ́ mɛ, bó dɔn ɖɔ ɔ́ tɔ́n, bɔ hweví kloklo kantɔn gban-nukún-atɔn (153 ) ɖo ɖɔ ɔ́ mɛ, có ɖɔ ɔ́ vún ǎ. 12 Jezu ɖɔ nú yě ɖɔ: “Mi wá ɖu nǔ.” Ahwanvú lɛ́ɛ ɖokpó ka glá, bó kan mɛ e é nyí ɔ́ byɔ́ ɛ ǎ ɖó yě bǐ mɔ nǔ jɛ wú ɖɔ Aklúnɔ wɛ. 13 Jezu ka sɛ yá yě, bó sɔ́ wɔ̌xúxú ɔ́ nú yě, bó lɛ́ sɔ́ hweví ɔ́ lɔ nú yě. 14 Sín hwenu e Jezu fɔ́n sín kú ɔ́, azɔn atɔngɔ́ ɔ́ nɛ́ é ɖo éɖée sɔ́ xlɛ́ ahwanvú tɔn lɛ́ɛ wɛ nɛ́.
Jezu kpódó Piyɛ́ɛ kpó
15 Ée yě ɖu nǔ ɔ́, Jezu ɖɔ nú Sinmɔ́ɔ Piyɛ́ɛ ɖɔ: “Sinmɔ́ɔ Jǎan ví! A yǐ wǎn nú mì hú lě e mɛ élɔ́ lɛ́ɛ yí wǎn nú mì gbɔn é a?” Bɔ Piyɛ́ɛ yí gbe n'i ɖɔ: “Ɛɛn Aklúnɔ; a tunwun ɖɔ un yí wǎn nú we.” Bɔ Jezu ɖɔ n'i ɖɔ: “Nǎ nǔɖuɖu lɛ̌ngbɔ́ví ce lɛ́ɛ!” 16 Jezu lɛ́ kanbyɔ́ ɛ azɔn wegɔ́ ɔ́ ɖɔ: “Sinmɔ́ɔ Jǎan ví, a yǐ wǎn nú mì ganjí a?” Bɔ Piyɛ́ɛ lɛ́ yí gbe n'i ɖɔ: “Ɛɛn Aklúnɔ, a tunwun ɖɔ un yí wǎn nú we.” Bɔ Jezu lɛ́ ɖɔ n'i ɖɔ: “Kpé nukún dó lɛ̌ngbɔ́ ce lɛ́ɛ wú.” 17 Jezu lɛ́ kanbyɔ́ ɛ azɔn atɔngɔ́ ɔ́ ɖɔ: “Sinmɔ́ɔ Jǎan ví, a yǐ wǎn nú mì a?” Ée Piyɛ́ɛ mɔ ɖɔ Jezu kanbyɔ́ émí azɔn atɔngɔ́ ɔ́ ɖɔ é yí wǎn nú émí a jí ɔ́, wǔ kú i, bɔ é gbɔ bó yí gbe n'i ɖɔ: “Aklúnɔ, a tunwun nǔ bǐ; a tunwun ɖɔ un yí wǎn nú we.” Jezu ka ɖɔ n'i ɖɔ: “Nǎ nǔɖuɖu lɛ̌ngbɔ́ ce lɛ́ɛ. 18 Má ɖɔ nǔgbó nú we, hwenu e a ɖo dɔ̌nkpɛ mɛ ɔ́, hwi ɖésú wɛ nɔ sin gǒjíblánú towe, bó nɔ́ yi fí e jló we ɔ́ bǐ; amɔ̌, hwenu e a nǎ wá kpo nyɔ̌ɖaxó ɔ́, a nǎ dlɛ́n alɔ towe lɛ́ɛ, bɔ mɛ ɖěvo ná sin gǒjíblánú nú we, bó ná dɔn we gbɔn fí e a ma jló ǎ é.” 19 Kú alɔkpa e Piyɛ́ɛ ná kú, bó ná dó ná susu Mawu ɔ́ xlɛ́ ɛ wɛ Jezu ɖe, bó dó ɖɔ mɔ̌ n'i; énɛ́ ɔ́ gúdo ɔ́, é ɖɔ n'i ɖɔ: “Xwedó mì.”
Jezu kpódó ahwanvú tɔn e é yí wǎn ná ɔ́ kpó
20 Piyɛ́ɛ ka lɛ́ kɔ kpɔ́n gúdo, bó mɔ ahwanvú e Jezu yí wǎn ná ɔ́ jǎwe ɖo gǔdo yětɔn; ahwanvú énɛ́ wɛ sɛkpɔ́ Jezu hwenu e yě ɖo nǔ ɖu wɛ é, bó kanbyɔ́ ɛ ɖɔ: “Aklúnɔ, mɛ̌ ka ɖo nǎ sa we ɖu wɛ.” 21 Ée Piyɛ́ɛ mɔ ahwanvú énɛ́ ɔ́, é kanbyɔ́ Jezu ɖɔ: “Aklúnɔ, mɛ élɔ́ ka lo? Étɛ́ ka ná jɛ dó éyɛ́ jí?” 22 Jezu ka yí gbe n'i ɖɔ: “Ényí un jló ɖɔ éyɛ́ ní nɔ ayǐ káká bónú ma lɛ́ kɔ wá ɔ́, ani wɛ kan we ɖ'é mɛ? Hwɛ ɔ́, xwedó mì.” 23 Xó énɛ́ gba kpé mɛ e ɖi nǔ nú Jezu lɛ́ɛ mɛ, bɔ yě ɖɔ ahwanvú énɛ́ kun ɖo nǎ kú wɛ ó; Jezu ka ɖɔ é kún ná kú ó ǎ; lo ɔ́, é ɖɔ n'i ɖɔ: “Ényí un jló ɖɔ é ní nɔ ayǐ káká bónú ma lɛ́ kɔ wá ɔ́, ani wɛ kan we ɖ'é mɛ?” 24 Ahwanvú énɛ́ wɛ ɖo kúnnu ɖe nú nǔ élɔ́ lɛ́ɛ bǐ wɛ; é wɛ wlán nǔ élɔ́ lɛ́ɛ, bɔ mǐ tunwun ɖɔ xó nǔgbó wɛ é ɖɔ.
Tasúná
25 Jezu lɛ́ wa nǔ gěgé ɖěvo lɛ́ɛ, bɔ ényí è gbɛ̌ d'é wú bó ná wlán ɖě bɔdó ɖě wú ɔ́, un ɖiɖɔ wěma tɔn ná sukpɔ́ káká bɔ gbɛ ɔ́ bǐ ná sixú hɛn ǎ.