Fulfulde /1 Ammaa Almasiihu maayi mbattudi meeden yaake en konne'en Allah no. Bana ni Allah wanginiri no o yidiri en. Yoo, lutti nyande woore haa juulde Paska wada. Yeesu anndi saa'i muudum wari haa o acca duniyaaru, o hoota haa Baabiraawo. O yidi yimbe maako nder duniyaaru, o yidi be haa timmoode. Walaa yiide burata nde'e: Goddo hokka yonki muudum ngam soobiraabe muudum. E diga Yeesu Almasiihu, ceedoowo goongaajo, ummitinaado arano nder maaybe fuu, laamiido laaamlaambe duniyaaru boo. Ka nko o yidi en. O rufi yiyam maako ngam haa o rimdina en diga hakkeeji meeden. Allah yidi duniyaaru masin. Ngam maajum o hokki Biddo maako bajjo. Koomoy nuddini Biddo oo, halkataa, ammaa o heban ngeendam nduumiidan. Ndaa no Allah holliri en yiide muufum: O neli en Biddo maako bajjo haa nder duniyaaru ngam en kebra ngeendam bee maako. /2 Fakat, sirri diina men mawdo; Almasihu wangi bee bandu neddo, Ruuhu Allah seedi mo o jaaliido. Malaa'ika'en fuu ngi'i mo. Ummaatooje nani kubar maako. Yimbe duniyaaru nuddini mo, haa asama o hebi teddungal burdungal. Haa fuddam, diga Allah tagaayno duniyaaru tawon, woodi bi'eteedo Wolde. Wolde maajum donno wondi bee Allah, kayre woni Allah. Wolde go laati neddo mardo bandu, o joodi caka meeden, Bee maako Allah wanginiri mboodeenga mum e goongaaku mum fuu. Dum fuu dum laati ngam goondingo ko Jawmiraawo wi'no bee hunduko annaboojo: Paanyo debbo reedan, dayan biddogorko, be ewnoto innde maako Immanuyila, bana wi'ugo: Allah don wondi bee meeden. Min e Baabiraawo min gootum. Yeesu wi'i mo: Filip, duuri mi don wondi bee moofon, nden a anndaa yam? Koomoy yi'i yam, yi'i Baabiraawo. Ngam dume a wi'i: Hollu min Baabiraawo? A nuddinaay mi don nder Baabiraawo, Baabiraawo boo don nder am na? /3 Allah don wondi bee koomoy seedi Yeesu woni Biddo Allah, goddo man boo don wondi bee Allah. Malaa'ikaajo wi'i mo: Ruuhu Ceniido waran dow maada, baawde Allah Bangiido waran dow maada bana dowdi. Ngam maajum biddo mo a tammi danyugo, be ewnoto mo Ceniido e Biddo Allah. En ndanyanaama bingel, en ndokkaama biddo gorko! Laamu wallinaama dow balawal maako. Be ewnan innde maako: Dawroowo kaayeefiijo, Allah cembiddo, Baaba duumiido, Laamdo salaaman. Nde o don wolwa tawon, ndaa ruuldere delkannde wari, suddi be, sawtu iwi haa ruulde man, wi'i: Oo woni Biddo am gidaado, mi don seyoro mo masin. Nanane mo. Nder Almasiihu en don ngi'a Allah e no o wa'i fuu. Nde Yeesu nani be ngurtini mo, o tefi mo, o yami mo: A nuddini Bii-neddo na? O jaabi: Moodibbo, wi'am, moy woni kanko? Ngam haa mi nuddina mo. Yeesu wi'i mo: A don yi'a mo, (Biddo Allah) kanko o don wolwane jonta. /4 Yeesu jaabi be: Onon on iwi haa les, min mi iwi haa dow. Onon on iwi duniyaaru ndu, ammaa min mi laataaki mo duniyaaru mdu. Yeesu jaabi be: Mi don wi'a on bee goonga: Diga Ibrahima danyaaka, mi don. Debbo wi'i mo: Mi anndi Almasiihu tammi warugo. To o wari, o wanginanan min kuuje fuu. Yeesu jaabi mo: Min bolwanando ma woni kanko. Yeesu wi'i be: Min woni tamseere ngeendam. Koomoy wari haa am, meetataa maatugo weelo sam. Koomoy nuddini yam boo, meetataa domdugo sam. Yaake mi don nder duniyaaru, min woni annoora maaru. Yesu tokki wi'ugo: Mi don wi'a on bee goonga: Min woni dammugal waalde baali. Yeesu wi'i mo: Min woni ummitinoowo, geedinoowo maaybe. Koomoy nuddini yam, yeedan, koo to o maayi boo. On don ewno yam moodibbo e Jawmiraawo; dum goonga boo, ngam mi woni non. /5 Nden o umri yimbe njoodo dow hudo. Kanko o hoosi tamseeje jowi e liddi didi go, o tijji dow, o yetti Allah. O yewi tamseeje man, o hokki pukara'en, be ndokka yimbe. Be fuu be nyammi, be kaari. Pukara'en moobti luttudum man, dum heewi cilaaje sappo e didi. Limgal nyaambe tamseeje dillani worbe ujine njowo, rewbe e bikkoy limaaka. Simon jaabi mo: Moodibbo, min kuuwi jemmaare fuu, min kebaay koodume, ammaa nde an wi'i mi wada dum kam, mi sakkinan jubaaji. Be cakkini jubaaji, be nangi liddi duuddi, haa jubaaji mabbe puddi seekugo. Wumbe dido don njoodi kombi laawol, be nani Yeesu don saalo, be puddi wookugo, be mbi'i: Jawmiraawo, bii Daawuda, endu min. Yeesu, yami be: Ko ngiddon mi huuwana on? Be njaabi: Jawmiraawo, haa gite amin ngi'a. Yeesu yurmini be, meemi gite mabbe, law yimbe dido go mbumti, be tokki mo. O yi'i ibbi kombi laawol, o yehi haa maaki, ammaa o tawaay ibbe, sey haakooji tan. Nden o wi'i ibbi: A meetataa rimugo bibbe sam. Law ibbi go yoori. /6