Ghomala Bible - Gospel of John

Nə́to' Ghɔm vɔk

1 Nə nə to', Ghɔm lə́ bɑ́, Ghɔm lə biŋ bɑ pu Si, Ghɔm lə bɑ Si. 2 Ghɔm lə́ bɑ́ nə to' bɑ́ pu Si. 3 Si lə́ dɑ pɑ Ghɔm nə́ gə guŋ ywə awɛ. Sɔmywə yə Si lə ghə a, e la tə́ cyətə lɑ pɑ yʉ nə gə pɑ́. 4 Vɔk lə́ bɑ́ nə é; vɔk bɔ lə́ biŋ bɑ́ ŋkha' bi pɔmnəŋ. 5 Ŋkha' piŋ ŋkhyɛ' nthʉm jʉ́m, da' gɑ́ jʉ́m lə yu' é pɑ́. 6 Mu' mo lə pɑwə́, bɑ Si nə nthəm e; tso tsyə lə́ bɑ́ Yohane. 7 E lə sɔ' pa' ŋkwinthɛ̌ a, nə ŋkwinthɛ̌ nə ŋkhá', po'o gɑ́ guŋ pɔmnəŋ awɛ cyə m nə e biŋ ŋkha'. 8 E la tə́ bɑ ŋkha' pɑ, da' gɑ e lə bɑ́ ŋkwǐnthɛ bi ŋkha'. 9 Ghɔm lə́ bɑ́ kwa' ŋkha' nyənyɔ. E lə́ nə sɔ' nthʉm dzʉ, bɑ ŋkhyɛ' guŋ pɔmnəŋ awɛ. 10 E lə́ bɑ́ nthʉm dzʉ, Si lɑ́ dɑ pɑ yʉ́ gə dzʉ́, da' gɑ la' dzʉ̌ zhyə é biŋ. 11 E sɔ' kwa' nthʉ̌m gùŋ e, da' gɑ la' pɔ pyə́ lɑ́ e. 12 Tə́ sɔ' bi pɔ pyə wap lə lɑ̌ e a, bi pɔ pyə wap biŋ tso tsyə a, e hɑ gʉ' nə jí pó Si bi pú. 13 Pu tə́ dzə́ pɔ bɔ̌ m nə mcyə pɑ́, kɑ́ m pá' bap nɑ́ nə ŋkhuŋ a lə, kɑ́ m pá' mo nə ŋkhuŋ a lə. Pu dzə́ wap m pa' Si nə ŋkhuŋ a. 14 Ghɔm lə cʉ' mo, biŋ shwə́ cəcɑ̌ pɑ́, pɑ́ piŋ jɔ ghu'tə e; ghu'tə bɔ, ŋkwi Mú Si yə gho' ba nyənyɔ bɑ ǎ lo nə é a ŋkwi bi Si. 15 Yohane ŋkwinthɛ̌ é, bɑ gɔm gɑ: Yə̌ŋ bɑ́ mo yə gɑ̌ gɔm nə é gɑ: Mu' mo gɔ təm jʉ̌m m̀, bɑ e lě da' bɑ dzə̌ m̀, nə pa' ŋ də́ nə pɑwə bɑ é lě da' bɑwə. 16 A shyə m pa' a bɑ ě lonyə nə gho' a, tə pɑ ghə gho' mzhəŋ mzhəŋ. 17 A pɑ gɑ́ Mosɛ, lə hɑ mco', bɑ gho' pu a nyənyɔ sɔ̌' shyə́ m nə Yeso Kristo. 18 Sɔm mó la m jɔ Si; ŋkwi Mu Si yə e bɑ nə Tá a lě gə pɑ zhyə́ e.

Nə ŋkwinthɛ̌ Yohane

19 Yəŋ bɑ nə kwinthɛ̌ yə Yohane lə kwǐ nə cwə yə pɑ Yudea Yerusalɛm lə tə̌m mkamsi pu a pɑ Levi bi e, wap həŋtə́ e gɑ: o bɑ wɑ? 20 E lə ghɔ̌m sɔsɔ̌, gɔm gɑ: ŋ tə́ bɑ́ Kristo pɑ. 21 Wap piŋ həŋtə é gɑ: O bɑ wɑ? O bɑ Elia a? E pa' bi pú gɑ: ŋ tə bɑ é pɑ́. O bɑ gɔm ghɔm Si a? E pa' gɑ gɛ. 22 Wap ghɔm bi e gɑ: O bɑ wɑ? Nə́ ko hɑ piŋ ghɔm bi pɔ pyə wap nthəm wɔk a, kwa' wə gɔm gɑ́ o bɑ wɑ? 23 Yohane ghɔm bi pú gɑ: Gɑ̌ bɑ gi mo yə é shwe ghakgo gɑ: Po sɛtə məjyə cyəpɔ pa' gɔm ghɔm Si Esaya lə́ ghɔm a. 24 A lə nə pɑ́ po'o pɔ pyə pú lə təm wap a pɑ́ pɑ Farisai. 25 Wap lə tə́ŋtə́ Yohane nə gɔ dzə́, bɑ həŋtə́ e gɑ: A pɑ́ gɑ́ o tə́ bɑ Kristo a, kɑ Elia, kɑ gɔm ghɔm Si lə, bɑ o nu' pɔ shyə gɑ kɑ? 26 Yohane pa' bi pu gɑ: Myə̀, gɑ̌ nu' pɔ nthʉm shyə. Mu' mo cəcɑ̌ po bɑ po ka zhyə e; 27 ě jʉ̌m m̀ bɑwə sɔ̌', bɑ ŋ kha ku'nyə nə kyɛ' ŋkhə mthap myə́. 28 A lə shyətə po'o Betanya, nə yə mu' jʉɔ shyə́ Yurdɛŋ, tsʉ' yə Yohane lə́ bɑ́ nə bɑwə nu'pɔ shyə a.

Yeso mu jʉ̀jʉ̀ Si

29 Dzʉ́ lə lɔ̌, Yohane yɔ Yeso e pɑwə sɔ́' m bi e, gɔm gɑ: Yɔ mu jʉ̀jʉ̀ Si yə e nthé mhɔnwə dzʉ a yə̌ŋ. 30 A bɑ́ nə é tə́ ŋ dɑ́ gɔm gɑ: Mu' mo jʉ̌m m̀ bɑwə sɔ̌', bɑ dzə m̀, nə pa' ŋ də nə pɑwə bɑ́ e le da' bɑwə a. 31 Kwa' myə̀, ŋ dá tə bɑwə jyə é pɑ; da' gɑ ŋ də nu' pɔ shyə, bɑ nə nyaptə pa' e gɔ təm cəcɑ̌ pɑ Israɛl a. 32 Yohane lə ŋkwinthɛ̌ gɔm gɑ: Gɑ̌ yɔ Zhwenyə, a fi' fɑ kɛbəŋ pa' səŋgɔp fo a, shwə nə e. 33 Ŋ da tə́ bɑwə jyə e pɑ; da' gɑ́ mo yə e lə təm a gɑ nu' pɔ shyə a lə ghɔm bəm gɑ: Mo yə o yɔ Zhwenyə fi' shwə nə e a, a bɑ mo yə e nu' pɔ nthʉ́m Zhwenyə Dɔlɔ̌ a. 34 Myə̀, gɑ̌ yɔ, biŋ bɑwə biŋ gɑ e bɑ Mú Si.

Mləŋdzə̀ pɑkhʉ̌ Yeso

35 Dzʉ́ lə́ lɔ̌, Yohane kwi' bɑ tsʉ'u bɔ pu a shɑ pɑkhʉ̌ pyə pɑpʉə. 36 E lə tʉ̌ mnyə nə Yeso e pɑwə shyə̌, gɔm gɑ: Yɔ mu jʉ̀jʉ̀ Si yə̌ŋ. 37 Pɑkhʉ̌ pyə pɑpʉə lə yǔ' tsɔ ghɔm, jap jʉm Yeso. 38 Yeso lə fɛ nɑ́ e jɔ gɑ wap yap jʉm e, gɔm bi pu gɑ: Po shəŋ kɑ? Wap pa' gɑ: Rabi a pɑ́ da'tə gɑ Tá; gɔm gɑ: O shwə hɑ́? 39 E ghɔm bi pu gɑ: Po sɔ̌', pǒ gɔ yɔ. Wap lə ghɔ̌ jɔ tsʉ' yə e shwə nə a, biŋ shwə bəŋ e nə tyɛ'dzʉ bɔ; a lə bɑ́ gwɛ a nə batə mnam ghǎm. 40 Andreya, fɑ Simon Pɛtrɔ lə bɑ mu' mo nə pɔ pyə wap lə yu' gi Yohane, jap jʉm Yeso a. 41 E ghɔ, dəŋdzə̀ jɔ kwa' fɑ e Simon gɔm bi e gɑ: Pyə yɔ Mesia, a pɑ da'tə gɑ́ Kristo. 42 E lə́ lɑ é nə gɔ bi Yeso. Yeso lə lé é dəŋdəŋ gɔm gɑ: O bɑ Simon, mú Yohane; pu gɔ pɑ ke o gɑ Kefas, a la'tə gɑ́ Pɛtrɔ. 43 Dzʉ lə lɔ̌, Yeso yap gɑ e gɔ ghɔ Galilea. E lə yɔ Filipo gɔm bi e gɑ: Yap jʉ̌m m̀. 44 A lə nə pɑ po'o Filipo pɑ yə Betsaida, tisuŋ Andreya pu Pɛtrɔ. 45 E lə ghɔ jɔ Natanaɛl gɔm bi e gɑ: Mo yə a bɑ pu və nwə nə é nthʉm mco' Mosɛ ba m nə ŋwa'nyə mghɔ́m ghɔ̀m Si a, pyə yɔ é: A bɑ Yeso Mu Yosɛp, yə Nazarɛt. 46 Natanaɛl pa' bi e gɑ: Bi a pɑ́ sɔmywə pɑpuŋ tə́m Nazarɛt a? Filipo ghɔm bi é gɑ: Sɔ̌', biŋ jɔ́. 47 Yeso lə lé Natanaɛl cwə yə e lə pɑ̌ sɔ' m bəŋ e a gɔm nə e gɑ: Yɔ kwa' yə Israɛl yə nyənyɔ, yə mfʉm tə̌ nə e a yə̌ŋ. 48 Natanaɛl həŋtə e gɑ: O jyə́ a hɑ? Yeso piŋ ba' bi e gɑ: Filipo e nə ké o, ba cwə yə o la' bɑ to thə nthɔmthə́ a bɑ gɑ e jɔ o. 49 Natanaɛl piŋ gɔm bi e gɑ: Rabi, o bɑ Mú Si, o bɑ fo pɑ Israɛl. 50 Yeso pa' bi e gɑ: Pa' gɑ̌ gɔm gɑ gɑ̌ e jɔ o to ta'thə nthɔmthə a ǒ piŋ. O gɔ sɔ' yɔ tsə tsyə a cyə po' a. 51 Biŋ ŋkwi' gɔm gɑ: Kwa' nyənyɔ nyənyɔ gɑ̌ siŋ wɔ gɑ po gɔ sɔ' yɔ kɛbəŋ ghyɛ', a pɑ aŋgəle Si pɑ ŋkwɔ' lə fi' dəm Mú mo.

Yohane 2

La'nwə lɔmdyə́ Kana: dzə mtiŋ

1 A lə nə pɑ̌ nə batə tyɛ'dzʉ yɑtá, pú ghə la'nwə̀ lɔmdyə́ Kana Galilea, má Yeso pɑ́ tsʉ'u. 2 A lə bɑ pu ké ba Yeso pu a pɑkhʉ̌ pyə nə la'nwə bɔ̌. 3 Pá' mlu' lə pɑ jak a, má Yeso ghɔm bi e gɑ: wap ka piŋ gə mlu'. 4 Da' gɑ́ Yeso ghɔm bi e gɑ: Pǔ kɑ́ mɑmjwi? Yɑ cwə̌ jɑ tə́ wuŋ sɔ̌'. 5 Map e lə ghɔm bi mghɛ fa' gɑ: E ghɔm gɑ́ po ghə pɑ gɑ kɑ́ lə, po ghə pɑ́ po'o. 6 A lə́ nə pɑ̌ po'o mkɔ́p pɑ tsʉ'u nthɔk bɑ mkɔ́p mwɔ', mkɔp myə pɑ Yudea lə́ nə sɔk mnwə map a. Bǎ ya kɔp lə́ lə bɑ bi a pɑ́ ywə ko nə mfo' məbʉ̌ə kɑ mfo' mənthá lə. 7 Yeso lə́ ghɔm bi mghɛ fa' gɑ: Po nyəŋ shyə nthʉm mkɔ́p mɔ̌ tə a lo; wap lə nyəŋ shyə nə́ tə a kəm shwə o. 8 Yeso ghɔm bi pu gɑ: Pó tu' cwəlɔ nə gɔ hɑ́ bi tá la'nwə́. Wap lə nə̌ gɔ hɑ bi e; 9 e zhwi'tə shyə bɑ ǎ zhi mlu', la' e zhyə tsʉ' yə a fɑ nə a, nə pa' da' pɔ pyə wap lə tu' a nə lə́ bɑwə jyə́, a pɑ po'o e ghɔm bi tá jwigʉɔ gɑ: 10 Guŋ pɔ awɛ də́ŋdzə hɑ pɑ mlu' pɑpuŋ, pu nwə́ tə bam tə́ e hɑ myə a ka ghyɛ' buŋ a; tə sɔ' m nə o, bɑ ǒ lwɔ' myə pɑpuŋ tə ŋkhəm cwəlɔ! 11 Yəŋ bɑ dzə̀ mtiŋ myə Yeso lə pɑ Kana Galilea gə lə. E lə la'tə ghu'tə e, pɑkhʉ̌ pyə pìŋ biŋ e. 12 A lə cyə̌ cwəlɔ, e tsəŋ gɔ Kapɛrnaum pu a map e, ba mfɑ pyə pu a pɑkhʉ̌ pyə, da' gɑ ŋkho wə shwə pɑ nə pǒ mtyɛ'dzʉ́.

Nə lɔnyə Dyə Si

13 Paska pɑ Yudea lə pɑ̌ sɔ' Yeso pʉɔ gɔ Yerusalɛm. 14 E lə yɔ pɑ tɛmtɔ Dyə Si bɑ wap cwətə́: Pɑ tɛ mna', ba mjʉ̀jʉ̀, ba mzhwə̀ pu a pɑ kwyəpnyə ŋkhap. 15 E lə́ lɑ̌ gwɑ gə nthé, nə jəŋ guŋ yap awɛ Dyə Si, ba mjʉ̀jʉ̀, ba mna'; sa'tə ŋkhap pɑ kwyəpnyə ŋkhap, ŋkwɔk mtɑpe map; 16 biŋ gɔm bi pɑ tɛ mzhwə gɑ: Po té guŋ tsə bǎ awɛ tsɔ'ɔ, po kɑ piŋ dɑ Dyə Ta á gə dyə mtɔ̌. 17 Pɑkhʉ̌ pyə lə kámtə gɑ́ a bɑ pu lě bvə gɑ: Ji dyə o wə shəŋtə jɛ́ a. 18 Da' gɑ́ pɑ Yudea pa' gɑ: O gɔ la'tə wɔk ya nthi mtiŋ msya tə́ gə po'o? 19 Yeso pa' bi pu gɑ: Po sa'tə Dyə Si yəŋ gɑ, a biŋ bʉ' nə mtyɛ'dzʉ mɑnthá. 20 A pɑ po'o pɑ Yudea ghɔm bi e gɑ: Pu lə lɑ gu' shwɔp nthɔk mghap pfʉə tə́ nə ŋkwɑ Dyə Si yə̌ŋ, ǒ piŋ gɔm gɑ́ o gɔ pu' nə mtyɛ'dzʉ mɑnthá lə́? 21 Da' gɑ e lə́ gɔm Dyə Si yə a bɑ nɑ e a. 22 A po'o tə́ cwə yə Yeso lə yǎm nə vʉ̌ a, pɑkhʉ̌ pyə kamtə gɑ́ e lə́ ghɔm po'o, bíŋ ywə yə pu lə və a, biŋ bíŋ ba ghɔm tsyə e lə ghɔm a.

Yeso jyə́ ywə yə a bɑ nə́ mo a

23 Bó'gwyə pɔ lə yɔ mtiŋ msya myə Yeso lə ghə nə cwə yə e lə̌ bɑ́ Yerusalɛm nə cwə ŋwɛnyə Paska a, biŋ tso tsyə. 24 Da' gɑ́ la' Yeso tak nɑ e bi pú, nə pa' a lə bɑ e zhyə wap awɛ. 25 Tə la' e yɑwə́ byap gɑ pu siŋ e sɔm nwə nə nwə mo pɑ́! Nə pa' a lə bɑ e zhyə́ ywə yə a bɑ nə mo a.

Yohane 3

Yeso pu Nikodemo

1 Mu' mo lə bɑ cəcɑ̌ pɑ Farisai tso tsyə pɑ Nikodemo. E lə bɑ́ ŋkham pɑ Yudea. 2 E lə sɔ' mtsʉ́', jɔ Yeso, gɔm bi é gɑ: Rabi, pyə̌ zhyə gɑ o bɑ gɛ zhi'tə yə Si nə nthəm é a, nə pa' bi a pɑ sɔmmo lə té mtiŋ msya myə o gə a, tə a bɑ gɑ́ pǔ Si nə bɑ. 3 Yeso pa' bi é gɑ: Kwa' nyənyɔ nyənyɔ gɑ̌ siŋ o gɑ tə da' nə tsə mo m nə tsə sə́ a, bɑ bi a pɑ sɔmmo lə yɔ Nəfo Si. 4 Nikodemo ghɔm bi e gɑ: Bi a pɑ́ pu tsə mò m gɑ kɑ̀ bɑ ě tsə vò? Bi a pɑ́ e piŋ ŋkho vam map e mu' cʉ́m tə́ pu tsə é a? 5 Yeso ghɔm bi é gɑ: Kwa' nyənyɔ nyənyɔ, gɑ̌ siŋ o gɑ: Sɔmmo yə́ pu ka tsə é m nə́ shyə ba m nə Zhwenyə á, bi a pɑ́ e lə ko nə Nəfo Si. 6 Ywə yə pu tsə é m nə bapnɑ a bɑ pɑ bapnɑ, ywə yə pu piŋ dzə é nə Zhwenyə a bɑ́ zhwenyə. 7 Ka nwə cyə o pa' gɑ gɔm bu gɑ: A shəŋ gɑ pu tsə o m nə tsə sə́ a. 8 Fəfa shʉ' nə́ tsʉ' yə e kuŋ a, o piŋ bɑ ju' gi e, da' gɑ́ la' o zhyə tsʉ' yə a fɑ m nə a, o lə nəŋ jyə tsʉ' yə a gɔ m nə a. A bɑ dəŋdəŋ po'o nə mo yə pu tsə é m nə Zhwenyə a. 9 Nikodemo ghɔm bi e gɑ: A bi a a pɑ́ po'o m gɑ́ kɑ? 10 Yeso pa' bi e gɑ: O bɑ gɛ zhi'tə Israɛl, biŋ bɑ́ bɑ o ka zhyə́ mnwə bɔ a? 11 Kwa' nyənyɔ nyənyɔ gɑ̌ siŋ o gɑ: Pyə̌ gɔm ywə yə pyə̌ zhyə a, pyə̌ ŋkwinthɛ̌ nə ywə yə pyə̌ yɔ a; da' gɑ́ po lə piŋ mkwinthɛ mɔ́k. 12 A bi a gɔmnwə dəmcǎ' bi po, po lə piŋ, bɑ gɔm yə kɛbəŋ bɑ po gɔ piŋ m gɑ́ kɑ? 13 A nə pɑ po'o bɑ sɔmmo la m ŋkwɔ' kɛbəŋ tə ně da' mo yə e lə fi' fɑ kɛbəŋ, Mu mo a. 14 A piŋ bɑ po'o, dəŋdəŋ pa' Mosɛ lə cyə̌ŋ nɔk thə́ ghakgo a, a shəŋ gɑ pu cyəŋ Mu mo thə́. 15 Po'o gɑ́ bǎ ya mo lə yə e piŋ a, e cyə m nə e gə vɔk mama. 16 Nə pa' Si bɑ é kuŋ dzʉ té' o, tə hɑ Mu e, ŋkwi Mu e, po'o gɑ bǎ ya mo lə́ yə e piŋ é a e kɑ pfʉ́, e ghə vɔk mama. 17 Nə pa' Si la tə́ nthəm Mu é nthʉm dzʉ gɑ e sɔ' fyɛ' dzʉ pɑ, e lə nthəm e gɑ dzʉ̌ cyə m nə e bvɔk. 18 Mo yə e piŋ é a, pu tə gɔ fyɛ' e pɑ; mo yə e ka piŋ e a bɑ pu é da' fyɛ' e nə pa' a bɑ e ka piŋ tsó ŋkwi Mu Si. 19 Fyɛ' bɑ́ gɑ: Ŋkha' bɑ ǎ sɔ' nthʉm dzʉ, da' gɑ pɔmnəŋ cwɔ' jʉ̌m nə pa' mfa' map bɑ mfa' bɔkpɔ̌k. 20 Nə pa' mo yə e gə bɔkbɔk nwə a bɔ ŋkha', biŋ bɑ ŋkhə́ŋnyə nə sɔ' nə ŋkha', bɑ bwɔk gɑ pu kɑ yɔ mfa' myə́. 21 Mo yə e gə nwə nyənyɔ a sɔ' nə ŋkha' po'o gɑ pu yɔ mfa' myə́, mfa' myə pu lə́ ghə m nə Si a.

Yeso pu Yohane

22 A lə nə cyətə, Yeso pu a pɑkhʉ̌ pyə ghɔ nthʉm guŋ Yudea; pú a pú lə cwə̌ wə́, e pɑ nu' pɔ shyə. 23 Yohane lə bɑ nə yə́ ghə́ŋ Enoŋ bəŋ Salim tsʉ' yə shyə bɑ ǎ yɔm nə a, bɑwə nu' pɔ shyə. Pɔmnəŋ lə bɑwə sɔ̌' lə e nu' wap shyə. 24 Nə pa' pu lə jɑ́ tə́ wuŋ nyəŋ Yohane dyəcɛ̌. 25 A lə pɑ̌ po'o, nə tɛshwə̀ təm cəcɑ̌ mu' yə Yudea pu a pɑkhʉ̌ Yohane nə nə sɔk mnwə. 26 Wap lə ghɔ jɔ Yohane gɔm bi e gɑ: Rabi, mo yə po e lə bɑ nə mu' jʉɔ Yurdɛŋ, mo yə o lə ŋkwinthɛ̌ nə e a, e yəŋ gɑ ba yʉ yə́ pɑwə nu' pɔ shyə, guŋ pɔ awɛ pɑwə gɔ pɑ́ m bi e. 27 Yohane pa' bi pú gɑ: Pɑ sɔmmo lə ghə sɔmywə tə a cyə dəŋ yə́ Si hɑ bi e a. 28 Kwa' wɔ wə bɑ mkwinthɛ gɑ ŋ də ghɔm gɑ: Ŋ tə bɑ Kristo pɑ. Gɑ̌ bɑ pɑ mo yə pu lə təm e dzə e a. 29 Mo yə mjwǐ bɑ bi a, bɑ́ dhə e; sɔ' m nə so dhə, e pɑ nthiŋnyə ju' ywə yə e ghɔm a, dhə cwə tə gɔmnwə, so e ŋwɛnyə. A po'o tə́ gɑ̌ bɑwə ŋwɛnyə, ŋwɛnyə pɑpuŋ. 30 A shəŋ gɑ e nə wu', a bɑ syaptə syaptə̀.

Mo yə e fɑ m kɛbəŋ a

31 Mo yə́ é fɑ m thə́ kɛbəŋ á, bɑ m̀ dəm guŋ mnwə awɛ. Mo yə́ é bɑ dəmcǎ' á pɑ mo dəmcǎ', bɑ gɔmnwə pɑ pa' pɑ dəmcǎ' á; 32 Mo yə́ e fɑ kɛbəŋ a ŋkwinthɛ̌ nə ywə yə e jɔ́ a, ba nə yə e ju' a. Da' gɑ sɔmmo lə piŋ mkwinthɛ. 33 Mo yə ě piŋ yə nə́ ŋkwinthɛ̌ a, e biŋ gɑ Si bɑ nyənyɔ. 34 Nə pa' mo yə Si nthəm e a gɔm ghɔ̀m Si yə e hɑ Zhwenyə tə dhə̀ bi a. 35 Tá ŋkhuŋ Mú, biŋ bɑ́ bɑ ě nyəŋ guŋ mnwə awɛ pu é. 36 Mo yə́ e piŋ Mú a, bɑ e ghə vɔ̀k mama; mo yə e kəŋnyə̀ nə piŋ Mú a tə́ gɔ la' yɔ vɔ̀k pɑ̀; luŋ Si piŋ bɑ jɛ́ nə é guŋ mcwə awɛ.

Yohane 4

Yeso pu mjwǐ Samaria

1 Cwə yə́ Yeso lə́ yu' gɑ pɑ Farisai yu' pa' pu gɔm gɑ́ pɑkhʉ pyə́ wə jɔ́m gɔ dzə, e piŋ bɑwə nu' pɔ shyə shyə́ Yohane, 2 ba tə pa' a nyənyɔ gɑ́ tə Yeso nə lə́ bɑwə nu' pɔ shyə a pɑ, pɑkhʉ̌ pyə nə lə́ bɑwə nu' pɔ shyə a. 3 E təm Yudea gɔ Galilea. 4 E lə́ bɑ gɔ cyə m Samaria. 5 A lə pɑ po'o e kəm nthʉm mu' tisuŋ Samaria yə pu ŋkhe gɑ Sikar a, bəŋ ca' tsyə Yakop lə hɑ bi mu e Yosɛp a, 6 tsʉ' yə ghʉ̌m shyə Yakop bɑ nə a. Pa' Yeso lə bɑ e ghiŋ tə bwa a, e lə cwə dəm kə̌ŋ ghʉ̌m shyə. A lə bɑ nə khɛ̌ a mɔkcʉ́. 7 Mu' mjwǐ Samaria lə sɔ' m nə tu' shyə; Yeso ghɔm bi e gɑ: Hɑ yɑ shyə nwə́. 8 A lə nə pɑ po'o bɑ pɑkhʉ̌ pyə ghɔ m tisuŋ nə yo ywətsʉ. 9 Da' gɑ mjwǐ bɔ, mjwǐ Samaria bɔ ghɔm bi e gɑ: M gɑ́ kɑ́ lé? Wə yə́ o bɑ́ yə́ Yudea a, lo a shyə, myə̀, mjwǐ Samaria! Pɑ Yudea tə shəŋ gɑ pu a pɑ Samaria tamtə́ nə sɔmywə pɑ́. 10 Yeso pa' bi é gɑ: O lǎ' pe' jyə ywə yə Si hɑ́ a, ba mo yə e gɔm bu gɑ: hɑ yɑ shyə nwə́ a, bɑ wə nə lo é shyə, e hɑ́ shyə́ dzəŋ tsəŋ bu. 11 Mjwǐ bɔ ghɔm bi e gɑ: Cyəpɔ o ka ghə ywə nə nthé shyə, bɑ ghʉ̌m nəŋ shú; tə́ o gɔ lɑ yə bɔ shyə vɔk hɑ? 12 A bɑ ǒ cyə tá yɔk Yakop yə e lə hɑ̌ ghʉ̌m shyə yəŋ bi pyə, yə ba yʉ yə́ lə nwə̌, ba mnɔm pyə́ a? 13 Yeso pa' bi e gɑ: Mo yə ě nwə́ shyə yəŋ a, bɑ ghak e gɔ kwi' khə́. 14 Da' gɑ́ mo yə e gɔ sɔ' nwə́ shyə yə gɑ̌ gɔ hɑ́ bi e a, bɑ ghak e tə gɔ la'tə́ kwi' khə pɑ́; bɑ shyə́ bɔ yə gɑ̌ gɔ hɑ bi e a gɔ sɔ' pʉɔ cʉ' sa' sǐ shyə yə vɔk mama fə nə a. 15 Mjwǐ bɔ ghɔm bi e gɑ: Cyəpɔ hɑ shyə bɔ bəm po'o gɑ ghak a kɑ kwi' ŋkhə, a ŋ khɑ piŋ bɑ sɔ' tsɔ'ɔ nə tu' shyə. 16 Yeso ghɔm bi e gɑ: Ghɔ ŋkhe dhə́ o po e pəmtə́ sɔ' tsɔ'ɔ. 17 Mjwǐ bɔ pa' bi e gɑ: Ŋ kha ghə dhə́. 18 Yeso ghɔm bi e gɑ: Ǒ ghɔm pɑpúŋ gɑ: Ŋ kha ghə dhə́; a bɑ ǒ tsə ghə pɑtɔ, ba bɛ yə o gə e cwəlɔ a lə nəŋ bɑ dhə́ o. Nə yə bǎ, o ghɔm nyənyɔ. 19 Mjwǐ bɔ ghɔm bi e gɑ, Cyəpɔ gɑ̌ yɔ gɑ o bɑ gɔm ghɔm Si. 20 Mtá pɔk lə́ gamtə Si dəm kuŋ gǒ tsɔ'ɔ, pǒ nəŋ biŋ gɔm m gɑ tsʉ' nə́ ghámtə Si bɑ m Yerusalɛm. 21 Yeso ghɔm bi e gɑ: Yu' ywə yə gɑ̌ gɔm a m mɑmjwi; cwə wə sɔ̌', yə po tə́ gɔ piŋ ghamtə Tá m dəm kuŋgǒ kɑ m Yerusalɛm a lə. 22 Pǒ gamtə ywə yə́ po ka zhyə́ ya a; tə́ pyə̌ gamtə ywə yə pyə̌ zhyə a, nə pa' ywə vɔ̀k fɑ m bi pɑ Yudea. 23 Da' gɑ́ cwə wə sɔ̌', bɑ a tsə́ sɔ' cwəlɔ, cwə yə́ pɑ ghamtə pyə nyənyɔ gɔ pɑ ghamtə Tá m nə zhwenyə ba m nə́ nyənyɔ a; nthi pɑ ghamtə pyə Tá shəŋ a bɑ po'o. 24 Si bɑ zhwenyə, a piŋ shyə m po'o tə́ pɔ pyə wap gamtə é a ghɔ pɑ́ ghamtə é m nə zhwenyə ba m nə́ nyənyɔ. 25 Mjwǐ bɔ ghɔm bi e gɑ: Gɑ̌ zhyə gɑ́ ta' Mesia gɔ sɔ' sɔ', mo yə pu ŋkhe e gɑ Kristo a. Cwə yə e gɔ sɔ' sɔ' a, e siŋ wɔk pɑ̀ guŋ mnwə awɛ. 26 Yeso ghɔm bi é gɑ: Gɑ̌ bɑ é, myə̀ yə gɑ̌ bɑwə gɔmnwə bu a. 27 A lə pɑ po'o pɑkhʉ̌ pyə ŋwak. Nwə cyə wap nə yɔ gɑ́ Yeso pu mjwǐ wə gɔmnwə; da' gɑ́ la' sɔmmo ghɔm bi e gɑ: O shəŋ kɑ? Kɑ m gɑ: Nwə kɑ́ o ghɔmnwə bi e? 28 Mjwǐ bɔ lə tak kɔp nə nthu' shyə é tsʉ'u, khʉdʉ́ gɔ tisuŋ gɔm bi pɔmnəŋ gɑ: 29 Po sɔ' tə́ jɔ mu' mbɛ, bɑ ě siŋ a guŋ ywə yə dɑ̌ ghə a awɛ. Tə é tə gɔ pɑ Kristo a lə́? 30 Wap lə təm tisuŋ, gɔ bəŋ é. 31 A lə nə pɑ̌ po'o bɑ pɑkhʉ̌ pyə́ cu' bɑwə nthənyə e gɑ: Rabi tsʉ́ ywə lə. 32 Da' gɑ́ e ghɔm bi pú gɑ: Gɑ̌ gɔ tsʉ́ ywətsʉ yə po ka zhyə yá a! 33 A pɑ́ po'o pɑkhʉ̌ pyə pɑ gɔm cəcɑ̌ pu gɑ: Jyə gɑ́ a gɔ pɑ́ bɑ mu' mo hɑ ywətsʉ bi e lə́? 34 Yeso ghɔm bi pu gɑ: Ywətsʉ́ á bɑ nə ghə ywə yə mo yə é nthəm á shəŋ a, biŋ gə fa' tsyə́ pəmtə̀. 35 Kwa' wɔ tə́ gɔm gɑ: A cʉ' mŋwə́ pfʉ̀ə pú lɑ tsə pé a? Tə́ gɑ̌ ghɔm bi po gɑ: Po pʉ' mnyə mɔ biŋ dé pé; a bɑ cwə nə lɑ tsə́ e da' ŋkhǔ'! 36 Mo yə e dɑ tsə́ pé a bɑ ě da' ŋkwi ŋkhap fa' e, biŋ bɑwə shu'tə potsə́ nə vɔk mama, tə mo yə e dzə tsə́ a, pu mo yə e dɑ a pɑwə bəmtə ŋwɛnyə. 37 A bɑ po'o tə́ ghɔm tsyə a gɔm gɑ: Mu' mo dzə̀ ywə, mu' mo lɑ a, pɑ́ nyənyɔ. 38 Dě nthəm wɔ gɑ́ po ghɔ dɑ tsə́ tsyə po la tə yɔgo' nə a; shɑ́ pɔ lě jɔgo', po ko nə ywə yə wap lə cəŋtə́ jɔgo' nə a. 39 Bo'gwyə pɑ Samaria tisuŋ bɔ lə́ piŋ Yeso, shyə m nə ghɔm mjwǐ yə e lə́ bɑwə biŋ gɑ: E siŋ a guŋ ywə yə dɑ̌ ghə a awɛ. 40 Cwə yə pɑ Samaria lə kəm bəŋ e a, shwyɛ'nyə e gɑ e cwə cəcɑ̌ pú. E lə cwə wə́ tyɛ'dzʉ tsɑpʉ́ə. 41 Pɔ jɔmyɔ̌m piŋ shyə́ m nə ghɔm tsyə́ biŋ é, 42 biŋ bɑ gɔm bi mɑmjwi bɔ gɑ: Pyə tə̌ wə́ shyə pɑ da' nə mghɔm mǔ tə́ biŋ pɑ́; kwa' wɔk yu' ghɔm tsyə́, biŋ bɑwə jyə nyənyɔ gɑ e bɑ Gɛvɔk dzʉ.

Bátə mtiŋ msya mɑbʉə Kana

43 A lə́ cyə̌ mtyɛ'dzʉ́ mɑbʉə, Yeso lu tsʉ'u bɔ, gɔ Galilea. 44 A nə pɑ̌ po'o bɑ kwa' Yeso lě biŋ gɑ pu tə́ gə mku' sɔm gɔm ghɔm Si gǔŋ pú pɑ́. 45 Tə́ ba tə po'o bɑ e lə ŋwak Galilea, pɑ Galilea lɑ e kwa' pɑpuŋ: A lə bɑ ba wap yap lə ghɔ̌ Yerusalɛm nə́ ŋwɛnyə, ŋkho wə́ jɔ guŋ ywə awɛ yə Yeso lə́ ghə a. 46 Yeso lə pɑnyə Kana Galilea tsʉ' yə e lə lɑ shyə gə mlu' nə a. Mu' tadyə msəŋwi fò lə bɑ wə́, mú e pɑ Kapɛrnaum bɑwə gǒ. 47 E lə yu' pa' pu gɔm gɑ Yeso fɑ Yudea sɔ' Galilea a, gɔ jɔ e, biŋ shwyɛ'nyə e gɑ e tsəŋ jɛ́ mu e yə e lə bɑwə npfʉ́ a. 48 Yeso ghɔm bi e gɑ: Po pɑ tə yɔ mtiŋ pu a msya bɑ po tə́ gɔ la' piŋ pɑ! 49 Tadyə msəŋwi ghɔm bi e gɑ: Cyəpɔ, tsəŋ mu a nə pfʉ! 50 Yeso ghɔm bi e gɑ: Ghɔ̌, mú o vɔk. Bɛ bɔ lə́ piŋ ghɔm tsyə Yeso gɔm bi a, cwəlɔ, ntham məjyə̀. 51 E lə pɑ dzəŋ cwəlɔ, mghɛ fa' pyə sɔ' pu a pú yu'tə, wap ghɔm bi e gɑ: Mú o vɔk. 52 E lə həŋtə wap cwə yə é kɑ yɛ a, wap pa' bi e gɑ: Mhwi kɑ nthəm nə e nə ta' nam yó. 53 Tá mú bɔ yɔ gɑ a cwə yə Yeso kɑ ghɔm bi e gɑ: Mu o vɔk a. Tə fɑ po'o e piŋ, ba guŋ tuŋdyə́ e awɛ. 54 Yəŋ bɑ batə mtiŋ msya mɑbʉə myə Yeso lə́ ghə cwə yə e lə́ fɑ Yudea gɔ Galilea a.

Yohane 5

1 Yə bɔ lə nə cyə, a pɑ nə mu' ŋwɛnyə́ pɑ Yudea, Yeso pʉɔ Yerusalɛm. 2 A nə pɑ po'o, mú' tam shyə pɑ Yerusalɛm bəŋ jyədyə̌ jʉ̀jʉ̀, tsǒ tam shyə bɔ pɑ Bezata nə ghɔm Ebraika. Mpə̌ŋ lə bɑ nə mɑnthɔ. 3 Mghɛ ghó kwa' vəŋ e pɑ nuŋtə nthʉm mpəŋ bɔ: Mfʉ́, mkho'tə, pɑ tə ŋaknyə jyə́, bɑ byap gɑ́ shyə nəŋnyə. 4 Nə pa' a lə bɑ shɑ mcwə, aŋgəle Cyəpɔ fi' nthʉm tam shyə bɔ; shyə nəŋnyə, nə pa' dəŋdzə mo yə e lə́ ŋkho nthʉm shyə cwə yə a sə a lə jɛ́, kɑ gho e la' bɑ pɑ́ gɑ kɑlə́. 5 Mu' mo lə bɑ tsʉ'u bɑ ŋkho'tə tə fɑ nə gu' mgham ntha. 6 Yeso lə yɔ e bɑ ě núŋ, biŋ nə yu' gɑ́ e bɑ pɑ po'o tə fɑ tə tyɛ̌', gɔm bi e gɑ: O shəŋ nə yɛ́ a? 7 Ŋkho'tə bɔ ghɔm bi e gɑ: Ŋ kha ghə sɔmmo yə bi a pɑ́ e nyəŋ a shyə cwə yə tam shyə to' nə nəŋnyə a; nə pa' cwə nə ghɔ tə ŋkho bɑ shɑ pɔ tam dzə m̀. 8 Yeso ghɔm bi e gɑ: Lusi ŋkwa ko'tə kodyə o gǐŋ! 9 Mo bɔ lə́ wuŋ jɛ; ŋkwa ko'tə kodyə e, gǐŋ. A lə nə pɑ̌ po'o tyɛ'dzʉ bɔ pɑ tyɛ' sabat. 10 Tə pɑ Yudea wuŋ gɔm bi mo yə pu jɛ́ e a gɑ: Yəŋ gɑ bɑ tyɛ' sabat, mco' kɑ piŋ gɑ o kwa ko'tə kodyə o. 11 Da' gɑ e pa' bi pu gɑ: Mo yə e gə jɛ á, yʉ nə gɔm bəm gɑ: Kwa ko'tə kodyə o gǐŋ. 12 Wap həŋtə e gɑ: Bɛ bɔ yə e gɔm bu gɑ: Kwa ko'tə kodyə o giŋ a bɑ wɑ́? 13 Da' gɑ mo yə Yeso lə yɛ e a la tə bɑwə jyə mo yə bɛ bɔ bɑ e a pɑ, nə pa' Yeso lə́ bɑ ě lu bəŋ vəŋ pɔ pyə wap lə́ bɑ tsʉ'u a. 14 Yeso lə cwə biŋ jɔ mo bɔ Dyə Si, gɔm bi e gɑ: Ǒ yɑ́ bɑ o cəŋtə jɛ: Kɑ piŋ hɔnwə, bwɔk gɑ mu' bɔkbɔk nwə kɑ piŋ ŋkho nə o. 15 Bɛ bɔ lə ghɔ gɔm bi pɑ Yudea gɑ Yeso nə la' jɛ e. 16 Tə fɑ po'o pɑ Yudea to' nə khiŋ Yeso gɑ e ghə po'o tyɛ' Sabat. 17 Da' gɑ Yeso pa' bi pu gɑ: Tǎ a bɑwə fǎ' tə ŋkhəm cwəlɔ; ba myə̀ yɑ̌ piŋ bɑwə fǎ'. 18 Tə fɑ po'o, pɑ Yudea pɑ shəŋ nə zhwə̀ Yeso nə gɔ pɑ m dzə, nə pa' é lá tə́ bɔptə́ pɑ da' mco' Sabat pɑ́; e lə́ biŋ bɑwə ŋkhe Si gɑ tap e dəŋdəŋ, po'o nə da'tə gɑ e bɑ́ pa' Si a.

Gʉ' Mu Si

19 Yeso lə́ lɑ̌ ghɔm gɔm gɑ: Kwa' nyənyɔ nyənyɔ gɑ̌ siŋ wɔ gɑ́ bi a pɑ Mú lə ghə sɔmywə nə yə thə; e gə pɑ́ ywə yə ě yɔ pa' Tá gə a; nə pa' ywə yə Tá gə a, ba Mú gə yə pɑ́ po'o. 20 Nə pa' Tá ŋkhuŋ Mú, biŋ bɑ da'tə é guŋ ywə awɛ yə é gə a; é gɔ sɔ' kwi' la'tə é mfa' myə ǎ kwi' gu' té' a, tə̌ nwə pɑ shyə́ wɔ. 21 Dəŋdəŋ pa' Tá jám mpfə pɔ, gə wap vɔk a, ba Mú gə mo yə e kuŋ a vɔk. 22 Tá tə́ fyɛ' sɔmmo pɑ, nə pa' a bɑ e hɑ guŋ nə fyɛ' awɛ bi Mú; 23 Po'o gɑ guŋ pɔ awɛ hɑ mku' bi Mú dəŋdəŋ pa' wap hɑ mku' bi Tá a. Mo yə e tə hɑ mku' bi Mú a tə hɑ mku' bi Tá yə e nthəm e a pɑ́. 24 Kwa' nyənyɔ nyənyɔ, gɑ̌ wə siŋ wɔ, mo yə ě yu' ghɔm tsɑ̌, biŋ mo yə e nthəm a, vɔk mɑmɑ bɑ bi e; e tə́ gɔ sɔ' sɔ' nə fyɛ' pɑ́, nə pa' a bɑ ě cyə nə vʉ̌ ŋkho nə vɔk. 25 Kwa' nyənyɔ nyənyɔ gɑ̌ wə siŋ wɔ, cwə wə sɔ̌', bɑ é da' sɔ̌', cwə yə mpfə pɔ gɔ yu' gí Mǔ Si a. Pɔ pyə wap nəŋ gɔ la' yu' a pɑ gɔ sɔ' vɔk. 26 Nə pa' dəŋdəŋ pa' Tá bɑ ě ghə vɔk nə e a, a bɑ e hɑ gɑ ba Mu ghə vɔk nə e. 27 Tá bɑ ě hɑ gʉ' nə fyɛ' pɔ bi e, nə pa' e bɑ Mu mo. 28 A mnwə mɔ kə́ cyə wɔ nə pa' cwə wə sɔ̌', yə pɔ pyə wap bɑ m nthʉm mthəsì a gɔ yu' gi e a. 29 A pɔ pyə wap lə́ ghə nwə pɑpuŋ a təm nə yam nə vʉ̌ yə a dɑ mo gɔ nə vɔk a; pɑ ghə bɔkbɔk nwə təm yap nə yam nə vʉ̌ yə a dɑ mo gɔ m nə fyɛ' a. 30 Sɔ' m nə m̀, bi a pɑ ŋ də ghə sɔmywə pɑ nə yɑ thə pɑ́; gɑ fyɛ' m pa' gɑ ju' a; yɑ nə fyɛ' piŋ bɑ nyənyɔ nə pa' ŋ tə́ gə pɑ ywə yə myə̀ nə shəŋ a pɑ; gɑ gə ywə yə mo yə e nthəm a shəŋ a.

Mkwǐnthɛ nə Yeso

31 Ŋ da' bɑ ŋkwinthɛ̌ a pɑ́ myə̀ bɑ pu tə́ gɔ piŋ yɑ nə ŋkwinthɛ̌ pɑ́. 32 Mu' mo nə ŋkwinthɛ̌ a, nəŋ bɑwə jyə gɑ mkwinthɛ myə e ŋkwi nə m̀ a bɑ kwa' pa' a shəŋ a. 33 Po lě nthəm pɔ bəŋ Yohane, e nəŋ ŋkho ŋkwinthɛ̌ nə nyənyɔ. 34 Sɔ' m nə m̀ a tə́ bɑ m gɑ́ gɑ̌ bɑwə byap gɑ mo ŋkwinthɛ̌ a pɑ́; da' gɑ́ gɑ̌ gɔm po'o tə́ po vɔk. 35 Yohane lə́ bɑ́ lambù yə pú su mɔk nə́ a kyɛ́' a: Po lě ŋwɛnyə tsɔ' pɑ nə mu kam cwə nə ŋkha' e. 36 A nə pɑ̌ po'o bɑ gɑ̌ ghə mu' nə ŋkwinthɛ̌, bɑ a cyə yə Yohane; a bɑ́ mfa' myə Ta hɑ́ gɑ́ gə a. Gɑ̌ gə má a piŋ bɑ́ mkwinthɛ gɑ Tá nə nthəm a. 37 Tá yə e nthəm a bɑ e ŋkwinthɛ̌ a. Da' gɑ la' po yu' gi e kɑ nə yɔ ywə yə a da'tə é a lə. 38 Ghɔm tsyə lə piŋ bɑ shwə nə po, nə pa' po tə́ biŋ mo yə e nthəm e a pɑ́. 39 Po nthàk ywə yə pu lě bvə a, bɑ́ ŋkwɛ gɑ po gɔ cyə m nə́ ghə vɔk mama: A nəŋ bɑ po'o, ywə yə pu lə və a pɑ ŋkwinthɛ̌ nə m̀. 40 Po lə nəŋ ŋkhuŋ nə sɔ' bəm, gɛvɔk mama. 41 Ghú'tə a tə fɑ m bi pɔmnəŋ pɑ; 42 ba tə́ po'o, a bɑ gɑ̌ zhyə wɔ. Ŋkhuŋnyə Si tə́ bɑ nə po pɑ́. 43 Gɑ̌ sɔ' m nə́ tsǒ Tá a, po piŋ ŋkhəŋnyə nə lɑ a. Mu' mo sɔ̀' pɑ kwa' nə tsyə́ tso bɑ pǒ gɔ lɑ e. 44 Wɔ pyə pǒ gu'tə nɑ tsɔ́, la' po pɑ shəŋ ghu'tə yə a fɑ m bi Si a, a bi a po piŋ m gɑ́ kɑ? 45 Ka po kwɛ gɑ́ myə̀ nə́ gɔ sɔ' putə́ wɔ bi Tá: Mo yə e gɔ sɔ' putə́ wɔ a bɑ́ Mosɛ yə po jap tʉm tsɔ nə é a. 46 Nə pa' po la' pé e biŋ Mosɛ, bɑ a bɑ po piŋ ba myə̀, nə pa' ywə yə e lə və a, e lə́ bvə pɑ nə m̀. 47 Po pɑ́ tə piŋ ywə yə é lə və a, bɑ po gɔ piŋ ywə yə gɑ̌ gɔm a m gɑ́ kɑ?

Yohane 6

Yeso kim gwɛ a pɔ sha' tɔ

1 Yə bɔ lə nə cyə, Yeso ghɔ nə yə mu' jʉɔ shyə lɑpʉə Galilea yə pu ŋkwi' ŋkhe gɑ shyə lɑpʉə Tiberia a. 2 Mɑ vəŋ pɔ lə́ bɑ jʉm e, nə pa' pɔmnəŋ lə́ bɑ wap yɔ mtiŋ msya myə e lə ghə nə mkho'tə a. 3 A lə pɑ̌ po'o Yeso kwɔ' dəm kuŋ, pu a pɑkhʉ̌ pyə cwə́ dəm o. 4 A lə bɑwə shʉ' pɑ muywə paska yə a bɑ ŋwɛnyə pɑ Yudea a sɔ̌'. 5 A lə pɑ po'o Yeso pu' mnyə myə́, jɔ mɑ vəŋ pɔ wap pɑwə sɔ' m bi e. E ghɔm bi Filipo gɑ: Pɑ gɔ yó msɛ hɑ tə́ wap ghə ywə yə wap gɔ tsʉ a? 6 E gɔm po' nə dəŋtə Filipo, nə pa' e lə́ bɑwə jyə ywə yə e gɔ ghə a. 7 Filipo ghɔm bi e gɑ: Pu yò msɛ̌ pɑ nə bɛ ŋkhap ŋkhəpʉə bɑ a tə gɔ ku' dəŋ yə bǎ ya mo lə́ gɔ kwi muywə po' ě a pɑ. 8 Mu' mukhʉ̌ e yə tso tsyə bɑ Andreya, fɑ Simon Pɛtrɔ ghɔm bi é gɑ: 9 Mu' mú mbɛ si tsɔ'ɔ bɑ e ghə msɛ mta' tɔ ba bapgu dùŋ pʉə; tə́ ǎ ku' kʉ̌ nə dəŋ pɔ pɔŋ gɑ ɑ? 10 Yeso ghɔm gɑ: Po ghə wap cwətə si. Pa' mghě lə bɑ a yɔm tsʉ'u a, wap lə cwətə si; wap lə bɑ gwɛ a pɔ sha' tɔ. 11 A lə pɑ̌ po'o Yeso kwi msɛ̌, go'tə Si, gaptə́ bi pɔ pyə wap lə bɑ si a; biŋ gə pɑ̀ po'o nə bapgu hɑ bǎ yə́ wɑlə́ dəŋ yə ě kuŋ a. 12 Wap lə cəŋtə jwyə, Yeso ghɔm bi pɑkhʉ̌ pyə gɑ: Po laktə́ mbo' myə́ tə̌ sɔmywə kɑ pǐ nə́. 13 Wap lə laktə mbo' myə́ bɔ, a lo nə msap shwɔppʉə mghǎm, mbo' myə́ myə a lə cʉ' a. 14 Pɔ bɔ lə́ nə yɔ mtiŋ msya bɔ myə Yeso gə a gɔm gɑ: Mo yəŋ gɑ bɑ kwa' gɔm ghɔm Si yə nyənyɔ yə e sɔ' nthʉm dzʉ a. 15 Da' gɑ Yeso nə zhyə gɑ́ pu gɔ sɔ' ghəm e nə ghə fo, biŋ kwi' nthəm do e, gɔ m dəm kúŋ.

Yeso ghiŋ dəm shyə lɑpʉə

16 A lə pɑ̌ bwadzʉ̌, pɑkhʉ̌ pyə tsəŋ tə́ ŋkhəm shyə lɑpʉə. 17 Wap lə ko kənu' nə́ nə sa' gɔ Kapɛrnaum nə yə mu' kəŋ shyə. Dzʉ̌ lə wuŋ só, tə́ Yeso ŋkwyatə́ wap. 18 Mu' mɑ fəfa lə bɑwə shʉ̌' tə shyə pɑwə bʉɔnyə. 19 Wap lə́ bɑ wap sɔp shyə tə ŋkhəm nə gwɛ a mstadə shwɔptɔ mghǎm bʉə kɑ mgham ntha lə, jɔ Yeso, e pɑwə giŋ dəm shyə lɑpʉə, bɑwə sɔ' m bə̌ŋ kənu' yap. Wap pwɔk, 20 da' gɑ́ tə́ Yeso ghɔm bi pu gɑ: A bɑ a, ka po pwɔk. 21 Wap lə́ pɑ̌ shəŋ nə kwa e nthʉm kənu', da' gɑ́ nə yɔ bɑ wap kəm kəŋ shyə.

Yeso bɑ́ msɛ vɔk

22 A lə́ pɑ yə mu' jʉm dzʉ̌, pɔ pyə wap lə cʉ̌' nə yə mu' jʉɔ a, yɔ gɑ kənu' lə bɑ tsʉ'u pɑ yɑmu', bɑ Yeso kě tə yap jʉm pɑkhʉ̌ pyə nthʉm yap kənu', nə pa' wap lə́ bɑ wap ghɔ pɑ̀ dǒ pú a. 23 A piŋ bɑ po'o bɑ shɑ mkənu' fɑ Tiberia ŋwak bəŋ tsʉ' yə pɔmnəŋ lə pfɑ̌ msɛ, bɑ Cyəpɔ gho'tə Si nə a. 24 Pɔmnəŋ lə nə́ yɔ gɑ Yeso pu a pɑkhʉ̌ pyə tə yɑ̌ tsʉ'u pɑ̀, biŋ ŋkho nthʉm mkənu' gɔ Kapɛrnaum nə cəŋ Yeso. 25 Cwə yə wap lə yɔ e nə yə mu' jʉɔ shyə lɑpʉə a, gɔm bi e gɑ: Rabi o sɔ' cwə kɑ? 26 Yeso pa' bi pu gɑ: Kwa' nyənyɔ nyənyɔ, po tə shəŋ a m pa' po jɔ mtiŋ msya a pɑ̀, po shəŋ a m pa' po npfɑ́ msɛ tə jwyə a. 27 A shəŋ gɑ̀ po fǎ' tə́ m nə ghə yəŋ ywətsʉ yə a bɔptə a pɑ̀; po fa' m nə ghə ywətsʉ yə a shwə nə vɔk mama a, ywətsʉ yə Mú mo gɔ sɔ' hɑ bi po a, nə pa' a bɑ yʉ tə Ta yə e bɑ Si a bɑ e yap mtiŋ myə́ nə e. 28 Wap ghɔm bi e gɑ: Pyə gɔ ghə gɑ́ kɑ tə́ fa' nə mfa' Si? 29 Yeso pa' bi pu gɑ: fa' Si bɑ nə piŋ mo yə e nthəm e a. 30 Wap pa' yap bi e gɑ: Kwa' wə gɔ ghə mǎ mtiŋ msya tə́ pyə yɔ nə biŋ o? Fa' tsʉ̌ bɑ tsa a? 31 Mtá pɔk lə pɑ̌ ghakgo npfɑ mana pa' bɑ pu və gɑ: E lə hɑ ywətsʉ bi pu, a pɑ́ msɛ̌ myə a fi' fɑ kɛbəŋ a. 32 Da' gɑ́ Yeso ghɔm bi pú gɑ: Kwa' nyənyɔ nyənyɔ, gɑ̌ siŋ wɔ, Mosɛ lě tə hɑ msɛ myə a fɑ kɛbəŋ a bi po; nə pa' Tá a nə hɑ kwa' msɛ nyənyɔ myə a fɑ kɛbəŋ a. 33 Nə pa' msɛ̌ Si, bɑ mo yə é fi' fɑ kɛbəŋ biŋ bɑ hɑ vɔk bi dzʉ̌ a. 34 Wap lə ghɔm bi e gɑ: A pɑ po'o m Cyəpɔ o pɑ hɑ msɛ bɔ bi pyə guŋ mcwə awɛ. 35 Yeso ghɔm bi pu gɑ: Myə̀ nə bɑ́ msɛ vɔk; mo yə e sɔ' bəm a bɑ jikǔ' tə gɔ kwi' yɛ e pɑ; mo yə e piŋ a, bɑ ji shyə tə gɔ la' kwi' yɛ e pɑ́. 36 Tə́ a bɑ gɑ̌ siŋ wɔ yá: Pǒ yɔ, ba tə́ po'o po lə piŋ. 37 Guŋ pɔ awɛ pyə Tá hɑ wap bəm a gɔ sɔ' sɔ' bəm, a mo yə ě nəŋ sɔ' bəm a, ŋ də wa' e pɑ́. 38 Nə pa' ŋ da tə́ fi' fɑ kɛbəŋ nə ghə ywə yə gɑ̌ shəŋ a pɑ́, ŋ də fi m nə ghə ywə yə mo yə e nthəm a shəŋ a. 39 Ywə yə mo yə e nthəm a shəŋ a nəŋ bɑ gɑ́ ŋ khɑ ghə sɔmmo nə pɔ pyə e hɑ wap bəm a pi, gɑ̌ gɔ sɔ' yám wap nə jʉɔjʉ̀m tyɛ'dzʉ́. 40 Ywə yə Tá a shəŋ a bɑ gɑ mo yə ě yɔ Mú biŋ e a, vɔk mama pɑ́ bi e; a sɔ' jám e nə jʉɔjʉ̀m tyɛ'dzʉ́. 41 Tə́ fɑ pa' Yeso lə ghɔm gɑ: Gɑ̌ bɑ msɛ myə a fi' fɑ kɛbəŋ a, pɑ Yudea lə to' nə pɑ́ gɔmtə nə é. 42 Biŋ bɑ gɔm gɑ: E tə́ bɑ Yeso mú Yosɛp a lə́? Pɑ̀ ka zhyə tap e pu map e a? Tə bi a pɑ e ghɔm cwəlɔ gɑ: Gɑ̌ fi' fɑ m kɛbəŋ m gɑ kɑ? 43 Yeso lə́ piŋ dɑ ghɔm gɔm bi pu gɑ: Ka po kwi' gɔmtə cəcɑ̌ po. 44 Bi a pɑ sɔmmo lə sɔ' bəm tə́ a bɑ́ gɑ Tá yə e nthəm a, nə fəŋtə́ e nə sɔ', a nəŋ sɔ' jám e nə́ jʉɔjʉ̀m tyɛ'dzʉ́. 45 A bɑ nthʉm ŋwa'nyə pɑ ghɔm ghɔm Si bɑ pú lě bvə gɑ: Si gɔ sɔ' zhi'tə wap awɛ. Bǎ wɑlə́ yə ě yu' ywə yə a fɑ bi Tá á, bíŋ ŋkwi ywə yə e ji'tə a, mo bɔ sɔ' bəm. 46 Nə pa' sɔmmo la m jɔ Tá tə ně da' mo yə e fɑ m nə Si a. Mo bɔ bɑ ě yɔ Tá. 47 Gɑ̌ siŋ wɔ kwa' nyənyɔ nyənyɔ gɑ mo yə ě piŋ á a, vɔk màmà bɑ bi e. 48 Gɑ̌ bɑ́ msɛ vɔk. 49 Mtá pɔ lə pfɑ mǎnà ghakgo, wap lě pfʉtə́. 50 Pa' msɛ myə a fi' fɑ kɛbəŋ nə bɑ a, mo yə e gɔ la' pfɑ a tə gɔ la' pfʉ pɑ́. 51 Gɑ̌ bɑ́ msɛ vɔk myə a fi' fɑ kɛbəŋ a. Mo yə ě pfɑ msɛ bɔ a gɔ la' vɔk pɑ́ màmà. Msɛ̌ bɔ myə gɑ gɔ hɑ a, a piŋ bɑ́ bap nɑ́ a, yə pú hɑ gɑ́ dzʉ̌ nə gɛvɔk a. 52 A lə́ pɑ̌ po'o pɑ Yudea to' nə́ tɛshwə cəcɑ̌ pu tə thə́ gɑ: Bi a pɑ mo bǎ hɑ bap nɑ́ e bi pɑ gɑ́ pɑ pfɑ́ m gɑ́ kɑ? 53 Yeso ghɔm bi pu gɑ: Kwa' nyənyɔ nyənyɔ gɑ̌ siŋ wɔ gɑ́ po pɑ tə́ pfɑ́ bapnɑ Mú, biŋ bɑ tə nwə mcyə myə́ bɑ po tə́ gɔ ghə vɔk nə po pɑ. 54 Mo yə ě pfɑ bapnɑ a biŋ nwə mcyə mə̌ a bɑ ě ghə vɔk màmà, a biŋ sɔ' jám e nə jʉɔjʉ̀m tyɛ'dzʉ. 55 Nə pa' bapnɑ a bɑ kwa' ywətsʉ nyənyɔ mcyə mə̌ a piŋ bɑ kwa' ywə nwənwə̌ yə nyənyɔ. 56 Mo yə ě pfɑ bapnɑ a, biŋ nwə mcyə mə̌ a shwə́ nə m̀, bɑ shwə́ nə e. 57 Dəŋdəŋ pa' Tá yə e shwə nthʉɔ a nthəm a, ŋ biŋ bɑ bvɔk m nə Tá, a dəŋdəŋ po'o tə́ mo yə e gɔ sɔ' pfɑ bapnɑ a gɔ sɔ' vɔk m nə m̀. 58 Pa' msɛ myə a fi' fɑ kɛbəŋ a nə bɑ a: A tə bɑ pa' myə mtá pɔ lə pfɑ̌ biŋ pfʉtə a pɑ́. Nə pa' mo yə ě pfɑ́ msɛ mɔ gɑ á gɔ sɔ' vɔk màmà. 59 Mɔ̌ bɑ́ mnwə myə Yeso lə́ ji'tə nthʉm sinagogə Kapɛrnaum a.

Ghɔm vɔ̀k

60 Pɑkhʉ̌ pyə tə jɔm lə́ nə yu' ghɔm tsyə, ntho' nə ghɔm gɑ: Ghɔm tsɔ gɑ tʉɔ! Pɑ̀ wɑ̌ piŋ ŋkwi' ju' e? 61 Da' gɑ Yeso zhyə nthʉm tʉm e gɑ́ pɑkhʉ̌ pyə lə́ bɑwə gɔmtə nwə nə ghɔm bɔ, gɔm bi pu gɑ: Jyə gɑ́ ǎ cʉ' pɑ ywə fa'tə̀ bi po lə́? 62 Tə́ po piŋ jɔ Mú mo kwɔ́' tsʉ' yə e lə́ da' bɑ́ nə a o? 63 Zhwenyə nə gə́ mo vɔk, bapnɑ tə́ ŋkwitə́ pɑ. Mghɔm myə gɑ̌ gɔm bi po a bɑ zhwenyə pú vɔk. 64 Da' gɑ shɑ pɔ bɑ cəcɑ̌ po wap lə pɑwə biŋ. Yeso lə́ bɑwə jyə́ pɔ pyə wap la tə́ bɑwə biŋ a pɑ ba mo yə e lə́ bɑ gɔ la' hɑ e tə fɑ tə̀ tyɛ' nə to'. 65 E lə kwi' gɔm gɑ: A bɑ ywə yə a gə tə́ gɔm bi po gɑ: Sɔmmo ka ku' nə sɔ' bəm tə a bɑ́ gɑ Tá nə hɑ bi e a. 66 Tə fɑ cwə o bɔ, bo'gwyə pɔ nə pɑkhʉ̌ pyə́ təm, pu a pu lə kwi' bəmtə́ gǐŋ. 67 A pɑ́ po'o tə Yeso ghɔm bi pɔ shwɔppʉə mgham gɑ: Ba wɔ yɔ, po ka sɛ yɔ nə ghɔ a? 68 Da' gɑ Simon Pɛtrɔ ghɔm bi e gɑ: Cyəpɔ pyə gɔ ghɔ m bi wɑ? Mghɔm vɔk mama bɑ́ bu. 69 A piŋ bɑ́ bɑ pyə̌ piŋ, bɑ pyə̌ piŋ jyə́ gɑ́ o bɑ Mo Dɔlɔ̌ fɑ m bi Si. 70 Yeso pa' bi pu gɑ: Tə myə nə lə́ shwɔ' wɔ, wɔ shwɔppʉə mgham a lə? Da' gɑ́ mu' mo nə́ po bɑ Sata. 71 E lə́ gɔm po'o bɑ gɔm Yuda mu Simon yə Iskariɔt; nə pa' yʉ yə e bɑ mu' nə pɔ shwɔppʉə mgham a nə lə bɑ gɔ la' hɑ e.

Yohane 7

Nə́ cyətə ghə piŋnthʉm mfɑ́ Yeso

1 A lə pɑ̌ po'o Yeso pɑ́ ŋkəká pɑ́ Galilea; la' e piŋ biŋ nə ghɔ Yudea tsʉ' yə pɑ Yudea lə bɑwə shəŋ nə zhwə e nə a. 2 A lə́ nə pɑ̌ po'o tyɛ' ŋwɛnyə pɑ Yudea nə lɑ tsə pé pɑwə sɔ̌'. 3 Mfɑ pyə ghɔm bi e gɑ: Bi a pɑ́ o lə cwə́ pɑ́ tsɔ'ɔ, ghɔ Yudea, po'o tə́ pɑkhʉ̌ pǔ yɔ yap mfa' mǔ. 4 Mo tə́ bɑ shəŋ gɑ pu piŋ e gə ywə dʉmnyətʉmnyə pɑ́. Pa' o wə fa' yəŋ nthi mfǎ' a ghə gɑ dzʉ̌ zhyə o. 5 A lə́ nə pɑ̌ po'o la' ba kwa' mfɑ pyə pɑwə biŋ e pɑ́. 6 Yeso ghɔm bi pu gɑ: Yɑ cwə ka wuŋ ŋkhu'; sɔ' m nə wɔ, yɔ cwə bɑ bǎ cwə kələ́ bɑ pɑ́ pɑpuŋ. 7 Bi a pɑ́ dzʉ̌ lə pɔ wɔ pɑ; tə́ sɔ' m nə́ m̀, dzʉ̌ bɔ a nə pa' gɑ̌ ŋkwinthɛ̌ gɑ mfa' dzʉ pɔk. 8 Po pʉɔ gɔ nə ŋwɛnyə bǎ, tə́ sɔ' m nə́ m̀ bɑ yɑ cwə ka wuŋ bəmtə. 9 Yeso lə ghɔm po'o gúŋ Galilea. 10 Da' gɑ mfɑ pyə lə cwə̌ tə gɔ m̀ nə ŋwɛnyə, e tam yə́ məjyə̀, da' gɑ la' e ghə tə́ mo yɔ é, guŋ bɑ dʉmnyətʉmnyə.

Yeso zhi'tə ywə Dyə Si

11 A lə́ pɑ̌ cwə ŋwɛnyə, pɑ Yudea pɑ shəŋ Yeso, bɑ gɔm gɑ: Bɛ bɔ̌ hɑ́? 12 A lə́ bɑ cəcɑ̌ pɔmnəŋ, pu pɑwə nthɛshwə nə e te' o; shɑ́ pɔ pɑwə gɔm gɑ: E bɑ mo pɑpuŋ da' gɑ́ pyə shɑ pɔ pɑ gɔm gɑ: Gɛ̌ e bɑwə fʉtə́ pɔmnəŋ. 13 Tə ba tə po'o sɔmmo la tə́ bɑwə gɔm sɔsɔ̌ pɑ́, bɑ bwɔk pɑ Yudea. 14 Ŋwɛnyə lə́ nə ko cəcɑ̌, Yeso pʉɔ gɔ Dyə Si ntho' nə zhi'tə pɔmnəŋ. 15 Nwə cyə pɑ Yudea, wap pɑ gɔm gɑ: E nə zhyə ŋwa'nyə m po'o gə la, yʉ yə e la m ji'tə ŋwa'nyə a? 16 Yeso pa' bi pu gɑ: Ywə yə gɑ̌ ji'tə á a tə́ fɑ m bəm pɑ; a fɑ m bi mo yə e nthəm ǎ. 17 Mo pɑ gɔ ghə ywə yə́ Si shəŋ a, bɑ e gɔ zhyə bi a ywə yə gɑ̌ ji'tə a fɑ m bi Si a, kɑ bi a gɑ gɔm pɑ́ nə yɑ thə á lə. 18 Mo yə e gɔmnwə pɑ́ nə yə thə a shəŋ nə ghu'tə pɑ nɑ é; da' mo yɑ́ yə e shəŋ nə ghú'tə mo yə e nthəm e á nə bɑ nyənyɔ, cwanwə tə́ biŋ bɑ nə e pɑ́. 19 Tə́ Mosɛ nə lə́ hɑ mcò' bi po a lə? Sɔmmo nə́ po lə nəŋ bɑwə giŋ nə mcò'; nwə kɑ po pɑwə shəŋ nə zhwə á? 20 Pɔmnəŋ pa' bi e gɑ: Zhwenyə cwəpuŋ nə o! Wɑ̌ bɑwə shəŋ nə zhwə o? 21 Yeso piŋ dɑ ghɔm gɔm bi pu gɑ: Gɑ̌ fa' da' ta' fa' yɑmu', a pɑwə sya guŋ yɔ̀ awɛ. 22 Mosɛ bɑ e lě hɑ nə vó mo bi po, ba tə pa' a tə́ fɑ bi Mosɛ a pɑ, a fɑ m bi mtá pɔk pɑ̀, po nəŋ bɑ bvo mo tyɛ' sabat. 23 A bi a pɑ gɑ́ bi a pɑ́ pu vó mo tyɛ' sabat tə pɔptə mcò' Mosɛ, bɑ nwə kɑ̀ po yɛluŋ nə m̀ gɑ̀ gɑ̌ yɛ̀ mo nə tyɛ' Sabat? 24 Po tak nə pɑ fyɛ' mo m nə pa' po nə jɔ yɔ sə e a nə́ŋ, bɑ fyɛ' mo m nə́ dəŋdəŋ. 25 Pɑ Yerusalɛm lə́ bɑwə gɔm gɑ: Yɑ́ tə́ bɑ mo yə wap bɑwə shəŋ nə zhwə e á pɑ́ lə́? 26 Ě yəŋ bɑwə gɔmnwə pɑ tə tʉmnyə, sɔmmo lə nəŋ gɔmnwə bi é. Pɑ́tyɛ' bɑ pɑ sa' guŋ pɔk pɑ zhyə cwəlɔ gɑ e bɑ Kristo a? 27 Da' gɑ̀ a bɑwə sɔ' m nə mo yəŋ bɑ pɑ̌ zhyə tsʉ' yə e fɑ m nə a. Tə́ sɔ' m nə́ Kristo, cwə yə e gɔ la' sɔ' a, sɔmmo lə zhyə tsʉ' yə e fɑ m nə a. 28 A lə pɑ̌ po'o, Yeso pá' e lə bɑ Dyə Si bɑwə ji'tə pɔmnəŋ á, ghɔm tə thə́ gɑ: Po bɑ pǒ zhyə a! Bɑ pǒ zhyə tsʉ' yə gɑ̌ fɑ m̀ nə a! A nəŋ bɑ po'o bɑ ŋ tə sɔ' pɑ nə yɑ thə́ pɑ́: Mo yə e nthəm a bɑ nyənyɔ, yʉ́ yə a bɑ po ka zhyə e a. 29 Tə́ a bɑ gɑ̌ zhyə e, nə pa' gɑ̌ fɑ m bəŋ é, yʉ nə nəŋ nthəm a. 30 Wap lə pɑ̌ shəŋ nə ghəm e, da' gɑ́ la' sɔmmo ku' nə yap pǔ nə e, nə pa' yə cwə̀ lə́ jɑ tə wuŋ ŋkhǔ'. 31 Bo'gwyə pɔ lə piŋ e cəcɑ̌ pɔmnəŋ, biŋ bɑ gɔm gɑ: Kristo gɔ la' sɔ' ghə mtiŋ msya tə a cyə myə mo yəŋ gɑ́ gə á? 32 Guŋ ywə awɛ yə pɔmnəŋ lə́ bɑwə shamtə́ nə Yeso a lə tǎm mtəŋ pɑ Farisai: Wap pu a mkamsi gwyəgwyə təm msə̌ŋwi gɑ wap ghɔ gəm e. 33 Yeso ghɔm gɑ: gɑ̌ jɑ́ pɑ́ cəcɑ̌ po nə muywə cwə tə́ piŋ ghɔ bəŋ mo yə e nthəm a. 34 A gɔ pɑ cwə o bɔ po cəŋ a, po lə yɔ a pɑ́; nə pa' tsʉ' yə gɑ̌ gɔ pɑ̀ nə a, bi a pɑ́ po lə sɔ' tsʉ' u. 35 Pɑ Yudea lə to' nə pɑ gɔm gɑ: E gɔ ghɔ hɑ tə́ bi a pɑ́ pɑ lə piŋ ŋkhu' nə yɔ e? E gɔ ghɔ kwyatə pɔ pyə wap bɑ wap sɛ cəcɑ̌ pɑ́ Grikia ǎ? E gɔ zhi'tə pɑ Grikia a. 36 Tə́ ghɔm tsɔ tsyə e gɔm gɑ̀: Po gɔ cəŋ a po lə yɔ a, tsʉ' yə gɑ̌ nə a bi a pɑ po lə́ sɔ' nə a, po'o da'tə gɑ́ kɑ̀?

Mnwə jʉɔjʉ̀m tyɛ' ŋwɛnyə

37 A lə pɑ̀ nə jʉɔjʉ̀m tyɛ' ŋwɛnyə yə a bɑ̀ tyɛ'dzʉ gwyə a, Yeso tiŋnyə thə́ ntho' bɑ gɔm tə́ thə́ gɑ: A pɑ gɑ̀ ghǎk mo khə́, e sɔ' bəm po'o gɑ mo yə e piŋ á, e nwə́ shyə. 38 Dəŋdəŋ pa' ywə yə pu lə və a gɔm a, mta'mta' shyə dzəŋtsə̌ŋ nthəm nə e dzə́ŋ. 39 E lə́ gɔm po' gɔm Zhwenyə yə pɔ pyə wap piŋ e a lə bɑ gɔ kwi a, nə pa' Zhwenyə lə́ jɑ tə wuŋ bɑwə, bɑ pu ka wuŋ gu'tə Yeso. 40 Shɑ̀ pɔ cəcɑ̌ vəŋ pɔ pyə wap lə yu' mghɔm myə a, lə́ pɑ̌ gɔm gɑ: Kwa' nyənyɔ yəŋ bɑ gɔm ghɔm Si. 41 Shɑ pɔ pɑ́ gɔm gɑ: E bɑ́ Kristo. Da' gɑ shɑ pɔ piŋ bɑ gɔm yap m gɑ: Bi a pɑ Kristo təm m Galilea a? 42 Ywə yə pu lə və a tə́ gɔm gɑ́ e gɔ sɔ' pɑ mo nə ŋkhənyə David, piŋ təm m Bɛtəlehɛm, muywə tisuŋ nə guŋ yə David lə́ nthəm m nə́ a lə́? 43 A lə pɑ po'o pɔmnəŋ ghap ghəŋ pʉə nə́ é. 44 Shɑ pɔ nə́ pu pɑ shəŋ nə ghəm e, da' gɑ́ la' sɔmmo yap pu nə e. 45 Pɑ msəŋwi lə sɔ' jɔ mtadyə mkamsi pu a pɑ Farisai; wap həŋtə msə̌ŋwi gɑ: Nwə kɑ́ bɑ po ka ghəm e? 46 Msəŋwi pa' gɑ: Sɔmmo la m gɔmnwə pá' bɛ yəŋ gɑ̀ a. 47 Pɑ Farisai ghɔm bi pu gɑ: Pɑ́tyɛ' ba e fʉ̀ bɑ wɔ yɔ a? 48 A ghɔ cəcɑ̌ mghətso ba m cəcɑ̌ pɑ Farisai, bǎ ta' mo piŋ é a? 49 Da' vəŋ pɑ tə zhyə́ mco' pɔ gɑ! Mghɛ dò. 50 Da' gɑ mu' mo nə pɑ Farisai, Nikodemo yə e lə ghɔ jɔ́ Yeso a ghɔm gɑ: 51 Bi a pɑ̀ mco' mɔk pɑ nyəŋ shɛ́ thə́ mo tə́ yu' e biŋ jyə ywə yə ě ghə a? 52 Wap pa' bi e gɑ: Pɑ́tyɛ' bɑ bǎ wə yǔ zhi yə Galilea? Cə́ŋ, o gɔ yɔ gɑ̀ sɔm gɔm ghɔm Si tə́ nthəm Galilea pɑ. 53 Bǎ ya mo á nə pú lə ghɔ m la' e.

Yohane 8

Mjwi gə̀ ghap

1 Yeso lə pɑnyə kúŋ mthə́ Olivə. 2 Dzʉ̌ lə nə́ lɔ, e pɑnyə Dyə Si, a piŋ bɑ́ pa' pɔmnəŋ lə́ bɑwə sɔ' bi e a, e cwə́si, ntho' nə zhi'tə ywə́. 3 Pɑ zhyə́ mcò' pu a pɑ Farisai lə lɑ̌ mu' mjwǐ bɑ pu ghəm é nə ghap sɔ̌' jap e tǔŋ pɔ pyə́ wap lə́ bɑ wap cu'tə tsʉ'u a. 4 Gɔm gɑ: Ta pu yɔ mjwǐ yəŋ e pɑwə gə ghap. 5 A bɑ́ nthʉm mcò' bɑ Mosɛ lě bvə gɑ́ pu lɑ mwɔ' nthamtə nthi pɑjwǐ bǎ. Kwa' wə ghɔm yǔ gɑ́ kɑ? 6 Wap lə́ gɔm po'o, a pɑ́ yo' bɑ wap tʉ' nə e tə́ nə pútə e. Da' gɑ́ Yeso lə pɔnyə si, bɑ dɑ nthə́ pu e nə ŋkhʉə ŋkhɛ nə cǎ'. 7 Pa' wap lə́ pɑ həŋtə é nwə nə gɔ pɑ́ m dzə a, e lə pʉ' nɑ e gɔm bi pu gɑ: Mo yə ě cəcɑ̌ po bɑ e la m hɔnwə a, ma' dəŋdzə gwɔ' nə e. 8 E lə piŋ kwi' bɔnyə si, biŋ bɑ ŋkhʉə ŋkhɛ nə cǎ'. 9 Wap lə́ cwə̌ tə ju' mghɔm, gɔ pɑ yɑmu' yɑmu' tə́ ntho' fɑ nə mghətso, tə́ Yeso cʉ' dǒ e. Mjwǐ bɔ lə bɑ́ pɑ́ tùŋ. 10 Yeso lə pʉ' nɑ e gɔm bi e gɑ: Mɑmjwi, wap m hɑ́? Sɔmmo ka nyəŋ shɛ thə o a? 11 E pa' gɑ: Sɔmmo m Cyəpɔ; Yeso piŋ gɔm bi e gɑ: Ba myə̀ yɑ̌ ŋ kha nyəŋ shɛ thə o. Ghɔ, tə́ fɑ cwəlɔ, kɑ piŋ hɔnwə.

Yeso bɑ́ ŋkha' nthʉm dzʉ́

12 Yeso lə́ kwi' gɔm ghɔm bi pú gɑ: Gɑ̌ bɑ́ ŋkha' nthʉm dzʉ, mo yə ě yap jʉ̌m m̀ a tə́ gɔ sɔ' ghiŋ nthʉm jʉ́m pɑ́; e gɔ ghə ŋkha' yə a dɑ mo gɔ nə vɔk a. 13 Pɑ Farisai ghɔm bi e gɑ: Wə nə bɑ ŋkwinthɛ̌ thə́ nɑ o; bi a pɑ́ pu lə piŋ yu nə́ ŋkwinthɛ̌. 14 Yeso pa' bi pu gɑ: A nyənyɔ gɑ́ myə̀ nə bɑwə ŋkwinthɛ̌ nə nɑ a, da' gɑ pu gɔ piŋ yɑ nə ŋkwinthɛ̌ nə pa' a bɑ gɑ̌ zhyə́ tsʉ' yə gɑ̌ fɑ m nə á, biŋ bɑ gɔ m nə a; tə́ sɔ' m nə po, a bɑ po ka zhyə́ tsʉ' yə gɑ̌ fɑ a, po lə nəŋ jyə́ tsʉ' yə gɑ̌ gɔ a. 15 Pǒ fyɛ' yɔ pɑ pa' monəŋthə́ a; tə́ sɔ' m nə m̀ ŋ tə fyɛ' sɔmmo pɑ. 16 Bi a nəŋ bɑ gɔ fyɛ' mo bɑ yɑ nə fyɛ' gɔ pɑ pa' nyənyɔ shəŋ a, nə pa' ŋ tə bɑ do m̀ pɑ, ba mo yə e nthəm a bɑ́ si. 17 A bɑ́ nthʉm mcò' mɔ bɑ pu və gɑ pu biŋ mkwinthɛ pɔ pɑpʉə. 18 Gɑ̌ ŋkwinthɛ̌ nə thə nɑ a, ba Tá a yə e nthəm a piŋ ba ŋkwinthɛ̌ a yə́. 19 Wap ghɔm bi e gɑ: Tɔ ɔ bɔ hɑ? Yeso pa' gɑ: Pǒ bɑ po ka zhyə a, po lə nəŋ jyə Tá a. Po la' pé' jyə a, bɑ po zhyə ba Tá a. 20 E lə gɔm mɔ mghɔm po'o nə tsʉ' yə pu ŋkhe gɑ́ Nthɛ a; da' gɑ bɑ ji'tə pɔmnəŋ m Dyə Si. Sɔm mò lə nəŋ sho' pu nə e nə pa' yə cwə lə jɑ tə wuŋ sɔ̌'. Pa' Yeso gɔ ghɔ a, ba nə fyɛ' shɛ 21 Yeso lə kwi' gɔm bi pu gɑ: Gɑ̌ gɔ ghɔ, po gɔ sɔ' cəŋ a bà cə̌ŋ, da' gɑ́ nəŋ pfʉ́ pɑ́ nə mhɔnwə mɔ. Tsʉ' yə gɑ̌ gɔ m nə a bi a pɑ́ po lə ghɔ nə́. 22 A lə pɑ̌ po'o pɑ Yudea to' nə pɑ gɔm cəcɑ̌ pu gɑ: Bi a pɑ e pɑwə ŋkwɛnyə nə zhwə nɑ e a? Nə pa' e du m si nə ghɔm gɑ: Tsʉ' yə́ gɑ̌ gɔ nə a, pɑ po lə ghɔ nə́. 23 Yeso pa' bi pu gɑ: Pǒ bɑ pɑ dəmcǎ', myə, gɑ̌ bɑ mo kɛbəŋ. Po bɑ pɑ nthʉm yəŋ dzʉ̌, ŋ də́ pɑ mo yəŋ dzʉ̌ pɑ́. 24 A ywə yə a gə tə́ gɔm gɑ́ po gɔ sɔ' pfʉ́ pɑ́ pu a mhɔnwə mɔ a. Nə pa' po pɑ tə́ pǐŋ gɑ́ gɑ̌ bɑ, bɑ po gɔ pfʉ́ nə mhɔ mɔ. 25 Wap ghɔm bi e gɑ: O bɑ́ wɑ́? Yeso pa' bi pu gɑ: Gɑ̌ bɑ́ ywə yə́ ŋ də́ siŋ wɔ tə́ fɑ nə to' a. 26 Sɔ' m nə ywə yə ǎ wə́ dé wɔ a, nwə gɔmghɔm yɔm, ba fyɛ' piŋ jɔ́m; tə́ mo yə e nthəm a bɑ nyənyɔ, ywə yə gɑ siŋ dzʉ́ á, a nəŋ bɑ ywə yə gɑ̌ ju' bi a. 27 Wap la tə́ yu' gɑ́ e lə́ gɔm po'o bɑ gɔm Tá pɑ́. 28 Yeso ghɔm bi pú gɑ: Cwə yə po gɔ sɔ' cyəŋ Mú mo thə́ a, po zhyə gɑ́ gɑ̌ bɑ, ba m gɑ́ ŋ tə́ gə sɔmywə nə yɑ thə́ pɑ́. Gɑ̌ gɔm ywə yə Ta ji'tə a. 29 Pyə mo yə é nthəm a nə bəmtə bɑ: A bɑ é kɑ tak a dó m̀ pɑ, nə pa' gɑ̌ gə pɑ ywə yə a buŋ e a, guŋ mcwə awɛ. 30 E lə́ pɑ̌ gɔm po'o pɔ jɔmyɔm piŋ e.

Gwya Abraham yə nyənyɔ

31 Yeso ghɔm bi pɑ Yudea pyə wap lə piŋ e a gɑ: A pɑ́ gɑ́ pǒ wuŋ nə ghɔm tsɑ̌, bɑ po bɑ́ pɑkhʉ̌ pɑ̌ nyənyɔ, 32 bɑ pǒ gɔ zhyə nyənyɔ, a nyənyɔ ghə po lə pɑ̀ mkwɔ pɑ́. 33 Wap pa' bi e gɑ: Pyə bɑ gwya Abraham. Bɑ sɔmmo lǎ m dɑ́ wɔk gə mkwɔ pɑ́: Tə́ o gɔm gɑ pyə tə gɔ piŋ pɑ́ mkwɔ pɑ́ m gɑ́ kɑ̀? 34 Yeso pa' bi pu gɑ: Kwa' nyənyɔ nyənyɔ, mo yə é hɔnwə̀ a bɑ ŋkwɔ mhɔ. 35 Ŋkwɔ tə́ guŋ dyə pɑ́; tə mú dyə̌ guŋ pɑ dyə. 36 A bɑ po'o tə́ bi a Mú nə te wɔ́ nə ŋkwɔ, bɑ po tə́ gɔ piŋ pɑ mkwɔ pɑ́. 37 Pó bɑ gwya Abraham, bɑ gɑ̌ zhyə; da' gɑ pa' ghɔm tsɑ̌ tə́ bɑwə ŋkho thə́ po a pɑ́, po bɑwə shəŋ nə zhwə a. 38 Ywə yə gɑ̌ gɔm a, a bɑ ywə yə gɑ jɔ bəŋ Tá a lə; tə sɔ' m nə po, po pɑ̀ gə ywə yə po jú' bəŋ tá yɔ a. 39 Wap pa' gɑ: Tá yɔk bɑ Abraham. Yeso ghɔm bi pu gɑ: Po pɑ pǒ Abraham, po fá' mfa' Abraham. 40 Po bɑwə shəŋ cwəlɔ nə zhwə a, myə̀ yə gɑ siŋ wɔ nyənyɔ yə gɑ ju' bəŋ Si a; Abraham la tə ghə po'o. 41 Po bɑwə fá' mfa' ta yɔ. Wap ghɔm bi Yeso gɑ: Pyə tə́ bɑ pó pyə́ pu dzə wap m pě a pɑ́! Pyə̌ bɑ pyə ghə da' ta' tá yɑmu', e pɑ́ Si. 42 Yeso ghɔm bi pu gɑ: Si lǎ' bɑ́ pé'e bɑ́ tá yɔ, bɑ po kuŋ a, nə pa' gɑ̌ nthəm m nə Si tə́ sɔ̌'; ŋ tə sɔ' m nə yɑ thə́ pɑ́. Yʉ́ nə nthəm a. 43 Pǒ shyətə́ zhyə́ ghɔm tsɑ̌ nə kɑ? Nə pa' po ka ku' nə yu' ywə yə gɑ̌ gɔm a. 44 Tá yɔ bɑ́ Sata, po piŋ bɑ shəŋ pɑ nə ghə ywə yə tá yɔ shəŋ a. Tə́ fɑ pɑ́ nə to' e pɑ́ shəŋ pɑ nə zhwə mo; e lě tə́ ku' nə wuŋ nthʉm nyənyɔ pɑ́, nə pa' nyənyɔ tə́ bɑ nə́ é pɑ. Cwə yə e bɑ gɔm mcwanwə á, e té pɑ nə pa' e nə bɑ á, nə pa' e bɑ shwanwə, biŋ bɑ tá mcwanwə. 45 Tə́ sɔ' m nə m̀, po tə́ biŋ a pɑ́ nə pa' gɑ gɔm nyənyɔ a. 46 Bi a pɑ wɑ̌ nə po la'tə mhɔ mə̌ a? A bi a bɑwə gɔm nyənyɔ, bɑ kɑ́ gə tə́ la' po piŋ a? 47 Mo yə e bɑ m nə Si a ju' ghɔm Si; a biŋ shyə́ m nə pá' po tə́ bɑ m nə Si a pɑ́ tə́ po lə yu' a. 48 Pɑ Yudea pa' bi e gɑ: Pyə̌ hɔ nə ghɔm gɑ́ o bɑ yə Samaria, biŋ bɑ́ bɑ ǒ ghə zhwenyə cwəpuŋ a? 49 Yeso pa' bi pu gɑ: Gɛ̌, ŋ tə́ bɑ gɑ̌ ghə zhwenyə cwəpuŋ pɑ; gɑ̌ bɑwə hɑ mku' bi Tá a, da' gɑ po pɑwə nɔm a nɔ̀m! 50 Ŋ tə́ shəŋ nə ghu'tə nɑ a pɑ: Mo yə e fa' nə a bɑ si, biŋ bɑ fyɛ̌'. 51 Kwa' nyənyɔ nyənyɔ gɑ̌ siŋ wɔ gɑ mo yə ě tɔm ghɔm tsɑ̌ a bɑ e tə gɔ la' yɔ vʉ́ pɑ. 52 Pɑ Yudea ghɔm bi e gɑ: Pyə zhyə cwəlɔ gɑ́ zhwenyə cwəpuŋ bɑ nə o. Abraham bɑ e lě npfʉ́, ba mghɔm ghɔm Si piŋ pfʉ́tə́ yap, o nə́ŋ biŋ dù m sǐ nə ghɔm gɑ́ mo yə ě tɔm ghɔm tsʉ̌ a, bɑ e tə gɔ la' yɔ vʉ pɑ. 53 A bɑ ǒ cyə tá yɔ́k Abraham yə e lə́ pfʉ a? Bɑ ba mghɔm ghɔm Si lě nəŋ pfʉtə́. O ŋkhe gɑ́ o bɑ wɑ́? 54 Yeso pa' bi pu gɑ: ŋ dǎ' pe' e bɑ́ gu'tə nɑ a pɑ myə̀ bɑ yɑ ghu'tə tə bɑ sɔmywə pɑ. Tá a nə gu'tə a, yʉ́ yə po biŋ gɑ́ e bɑ Si yɔ a. 55 A bɑ po kɑ zhyə é, tə́ bɑ gɑ̌ zhyə é. Ŋ dǎ' pe' gɔm gɑ́ ŋ kha zhyə é, bɑ gɑ̌ bɑ́ shwanwə pɑ́ pa' wɔ a; tə́ a bɑ gɑ̌ zhyə́ é, bɑ nthɔm ghɔm tsyə. 56 Abraham, tá yɔ lə ŋwɛnyə te'o nthʉm mɔktə nə́ yɔ Tyɛ'dzʉ a: E lě jɔ, shəŋtə ŋwɛnyə. 57 A pɑ́ po'o pɑ Yudea ghɔm bi e gɑ: O ka ghə bǎ gu'dzʉ mgham nthɔ, bɑwə gɔm gɑ o yɔ Abraham! 58 Yeso pa' bi pu gɑ: kwa' nyənyɔ nyənyɔ, gɑ̌ siŋ wɔ gɑ́ Abraham lə́ nə pɑwə bɑ ŋ dé da' bɑwə. 59 A lə pɑ̌ po'o wap pé mwɔ' bɑ gɔ nə ma' e, da' gɑ Yeso tʉmnyə nthəm Dyə Si.

Yohane 9

Yeso yɛ̀ mu' fʉ̀

1 Yeso lə́ nə́ cyə jɔ́ mu' mbɛ, e pɑ́ fʉ̀ tə́ fɑ́ nə tyɛ' nə tsə é. 2 Pɑkhʉ̌ pyə həŋtə é gɑ: Rabi wɑ lə́ hɔnwə tə́ bɛ yəŋ pɑ́ fʉ̀? A lə́ bɑ pɑ yʉ kɑ pɑ tsə́ é? 3 Yeso pa' bi pú gɑ: Kɑ yʉ kɑ pɑ tsə́ e lə, sɔmmo ka hɔnwə. A bɑ́ po'o m gɑ pu yɔ mfà' Si nə e! 4 Pɑ fa' mfà' mo yə e nthəm á cwə yə dzʉ̌ yɑ̌ wə a; nə pa' mtsʉ̌' wə sɔ̌', cwə yə sɔmmo tə́ fa' a pɑ́. 5 Ŋ shwə nthʉm dzʉ́ pɑ dəŋ gɑ kɑlə, bɑ gɑ̌ bɑ ŋkha' nthʉm dzʉ́. 6 Yeso lə cwə tə́ gɔm po'o, nthətə́ mti si nə gə mtwətwɔp jáp nə mnyə́ fʉ̀, 7 biŋ gɔm bi e gɑ: Ghɔ sɔk nɑ o nthʉm tam shyə Siloe, a la'tə gɑ́ gɛ̀ nthə̌m. Fʉ̀ lə́ ghɔ̌ tsʉ'u, sɔk nɑ e, biŋ nə pɑnyə, bɑwə jɔ tsʉ'. 8 Pɑ giŋnyə tsʉ'u ba pɔ pyə wap lə́ bɑ jɔ é guŋ mcwə awɛ a, nə pa' e lə́ bɑ dǒ ywə a, pɑ́ gɔm gɑ: Yəŋ tə́ mo yə e kɑ́ bɑ ě cwə si tsɔ'ɔ bɑ do ywə a pɑ̀ lə́? 9 Shɑ́ pɔ pɑ́ gɔm gɑ: A bɑ e. Pyə shɑ́ pɔ pɑ́ gɔm yap gɑ: Gɛ̌, a mu' mo hwə́ é hwə́. Tə́ fʉ̀ bɔ ghɔm gɑ: A bɑ́ kwa' myə̀. 10 Wap ghɔm bi e gɑ: Tə́ mnyə mǔ gyɛ' m gɑ́ kɑ̀? 11 E ghɔm bi pu gɑ: Bɛ yə pu ŋkhe e gɑ Yeso a ghə mtwətwɔp, nə shi'nyə mnyə mə̌, biŋ gɔm bəm gɑ: Ghɔ Siloe sɔk nɑ o. A pɑ́ po'o ŋ gɔ tsʉ'u, sɔk nɑ a, nəŋ jɔtsʉ'. 12 Wap ghɔm bi e gɑ: Mo bɔ hɑ? E pa' bi pu gɑ: Ŋ khɑ zhyə sɔmywə nə́. 13 Pu lə́ lɑ̌ fʉ̀ bɔ nə gɔ ywə́ pɑ Farisai. 14 A lə́ nə pɑ̌ po'o bɑ Yeso lə́ nthaknyə mtwətwɔp nə gyɛ' mnyə bɛ bɔ po'o tyɛ' Sabat. 15 Pɑ Farisai lə́ həŋtə é yap pa' a lə́ cyə tə́ e yɔ tsʉ' a. E pa' bi pú gɑ: E yap mtwətwɔp nə mnyə mə̌, sɔk nɑ a, jɔ tsʉ'. 16 Shɑ pɔ cəcɑ̌ pɑ Farisai lə́ ghɔm gɑ: Mo bǎ tə́ mo Si pɑ́, nə pa' e tə̌ wə jyə Sabat pɑ̀. Da' gɑ̀ pyə shɑ pɔ pɑ gɔm gɑ: Bi a pɑ́ gɛ mhɔ lɑ gʉ' nə gə́ yəŋ nthi mtiŋ msya hɑ? A lə pɑ̌ po'o ŋkhyɛ'nyə ko cəcɑ̌ pu. 17 Wap piŋ ŋkwi' gɔm bi fʉ̀ bɔ gɑ: Kwa' wə ghɔm yǔ gɑ kɑ́ nə mo yə e gyɛ' mnyə mu a?

E pa' bi pu gɑ: E gɔm ghɔm Si.

18 Pɑ Yudea la tə piŋ gɑ bɛ bɔ lə bɑ fʉ̀ tə́ biŋ jɔ tsʉ', tə́ ŋkhəm cwə yə wap lə ké pɑ tsə e a. 19 Wap lə həŋtə pɑ tsə e gɑ: Bɛ yə̌ŋ bɑ mú yɔ yə po gɔm gɑ̀ po lə nə tsə é e pɑ́ fʉ̀ a lə́? Tə é jɔ tsʉ' cwəlɔ m gɑ́ kɑ? 20 Wap pa' bi pɑ Yudea gɑ: Pyə̌ zhyə́ nyənyɔ gɑ e shəŋtə bɑ́ mu yɔk, bɑ pyə lə nə tsə́ é e pɑ fʉ̀. 21 Tə́ sɔ' m cwəlɔ pa' e wə jɔ tsʉ' a, pyə ka zhyə sɔmywə nə́. Sɔ' m nə mo yə e gyɛ' mnyə myə́ a, bɑ pyə ka zhyə e. Po həŋtə e, e bɑ pɑ́ gətso. Kwa' yʉ siŋ wɔ nwə̀ nə. 22 Pɑ tsə é lə́ gɔm po'o nə pa' wap lə bɑwə bwɔk pɑ Yudea. Nə pa' pɑ Yudea lə́ bɑ wap tsə́ yap gɑ́ bǎ wɑlə́ yə e piŋ gɑ́ Yeso bɑ Kristo a bɑ wap gɔ té é dyə Sinagogə. 23 A ywə yə a lə gə tə́ pɑ tsə́ é ghɔm gɑ́ po həŋtə é, e bɑ gətso a. 24 Pɑ Farisai lə́ piŋ ŋkwi' ŋkhe mo bɔ̌ yə e lə́ bɑ fʉ̀ a, gɔm bi e gɑ: Ghú'tə́ Si! Wɔk, pyə̌ zhyə gɑ mo bǎ bɑ́ hɔnwə. 25 E pa' bi pu gɑ: Ŋ kha zhyə bi a e bɑ́ hɔnwə a, gɑ̌ zhyə da' gɑ́ ŋ khɑ́ bɑ́ fʉ̀, nəŋ bɑ cwəlɔ bɑwə jɔ tsʉ'. 26 Wap ghɔm bi e gɑ: E gə nə o m gɑ́ kɑ? E gyɛ' mnyə mǔ m gɑ́ kɑ? 27 E pa' bi pú gɑ: Gɑ̌ é da' siŋ wɔ, da' gɑ́ la' po yu'! Nwə kɑ̀ po piŋ bɑwə shəŋ nə piŋ ŋkwi' ju' mu' cʉm é? Pɑ́tyɛ' ba wɔ yɔ pɑwə shəŋ nə zhi pɑkhʉ pyə́ a? 28 Pɑ Farisai lə tó' nə yəmtə é bɑ gɔm gɑ: O bɑ mukhʉ é! Wɔk, pyə bɑ pɑkhʉ̌ Mosɛ. 29 Pyə zhyə́ gɑ Si bɑ e lé gɔmnwə bi Mosɛ, tə́ sɔ' m nə mo yəŋ gɑ, bɑ pyə ka zhyə́ tsʉ' yə e fɑ m nə a. 30 Mbɛ bɔ pa' bi pu gɑ: Msya nwə bɑ́ gɑ po ka zhyə́ e, bɑ é nəŋ gyɛ' mnyə mə̌! 31 Pɑ zhyə gɑ́ Si tə́ ju' gi mghɛ mhɔ pɑ, da' gɑ bɑ ju' mcwyɛ'nyə mo yə e dɑ mku' biŋ e biŋ bɑ gə ywə e shəŋ a. 32 Pú la m ju' pá' pu gɔm gɑ́ mo ghyɛ' mnyə mo bɑ pu lə nə tsə́ é e pɑ fʉ̀ a pɑ́. 33 Bɛ yəŋ la' pe' e lɑ pɑ m nə́ Si pɑ, bɑ e ka ghə sɔmywə. 34 Pɑ Farisai lə pa' bi e gɑ: Wə yə o bɑ gɛ mhɔ tə́ fɑ tyɛ' nə tsə o a, o gɔ la'tə kɑ? Wap lə ghɔm po'o nthé é ma' pé. 35 Yeso lə́ nə yu' gɑ wap zhəŋ é, sɔ' jɔ é gɔm bi é gɑ: O piŋ Mu mo a? 36 Mo bɔ pa' bi Yeso gɑ: Mu mo bɔ bɑ̀ wɑ Cyəpɔ tə́ biŋ e? 37 Yeso ghɔm bi e gɑ: A bɑ ǒ yɔ e. A bɑ mo yə e bɑwə gɔmnwə bu a. 38 Mo bɔ ghɔm gɑ: Gɑ̌ piŋ m Cyəpɔ, e lə́ ghɔm po'o biŋ ŋkham mkwi'tə dzə é. 39 Yeso piŋ gɔm bi e gɑ: Ŋ də́ sɔ' m nthʉm dzʉ́ nə fyɛ', po'o gɑ́ mfʉ̀ yɔ tsʉ', a pɑ yɔ tsʉ' zhi mfʉ̀. 40 Pɑ Farisai pyə pu a pu lə bɑ a, lə́ nə yu' mghɔm bɔ gɔm bi Yeso gɑ: Pɑ́ tyɛ' ba wɔk yɔk bɑ pɑ mfʉ̀ a? 41 Yeso ghɔm bi pu gɑ: Po la' pe' bɑ mfʉ̀ bɑ mhɔ tə̌ nə po pɑ̀. Da' gɑ́ po bɑwə cwəlɔ gɔm gɑ pyə wə jɔ tsʉ' a cyə m po'o, mhɔ mɔ́ wuŋ nə po.

Yohane 10

Ghɔ̀m tə tútə byap dzə́

1 Kwa' nyənyɔ nyənyɔ gɑ̌ siŋ wɔ gɑ mo yə e nthak jyə̀ ka dzə́ nəŋ ja' m nə mu' ghəŋ pé tə́ ŋkho ka dzə a, mo bɔ bɑ́ shuŋ biŋ bɑ́ samshwə. 2 Tə́ mo yə e shyə m jyədyə̌ tə́ ŋkho ka a, mo bɔ bɑ́ byap dzə. 3 Mo yə é dé jyədyə̌ a, gyɛ' jyədyə̌ bi e. Mjʉ̀jʉ̀ jyə́ gi e; mjʉ̀jʉ̀ pyə wap bɑ tsyə a, e ŋkhe bǎ ya lə pɑ mtsǒ, biŋ dɑ wap nthəm pé. 4 E shwə tə́ nthe wap awɛ, bɑ dzə̀, wap yap jʉm e, nə pa' a bɑ wap zhyə gi é. 5 Bi a pɑ́ wap lə yap jʉm gʉɔ pɑ̀; wap gɔ khʉ é khʉ, nə pa' wap tə jyə gi mghʉɔ pɑ. 6 Yeso lə́ ghɔ̌m tsɔ ghɔ̀m tə tútə̀ bi pú, da' gɑ́ la' wap yu' kwa' ywə yə e lə́ bɑwə gɔm a. 7 Yeso piŋ ŋkwi' gɔm gɑ: Kwa' nyənyɔ nyənyɔ gɑ̌ siŋ wɔ gɑ́ gɑ̌ bɑ́ jyədyə̌ mjʉ̀jʉ̀. 8 Guŋ pɔ awɛ pyə wap lə sɔ' m dzə̌ m̀ a bɑ mcúŋ, biŋ bɑ msamshwə, da' gɑ́ mjʉ̀jʉ̀ lě tə́ yu' gi yap pɑ̀. 9 Gɑ̌ bɑ́ jyədyə̌, mo yə e cyə m nə m̀ a, bɑ e gɔ sɔ' vɔk, e gɔ pɑ̀ kə́ká, yɔ ywətsʉ. 10 Shwǔŋ sɔ' yə pɑ̀ nə zhʉ̀, nə zhwə, kɑ nə ghə a pi lə; tə́ gɑ̌ sɔ' po'o gɑ́ pɔmnəŋ ghə vɔ̀k, biŋ shəŋtə gə a yɔm. 11 Gɑ̌ bɑ́ byap dzə́ pɑpúŋ: Byap dzə́ pɑpùŋ hɑ vɔk e nə thə́ jʉ̀jʉ̀ tsyə́. 12 Mo yə e fa' yə pɑ́ ŋkhap e, la' e pɑ kwa' byap dzə, la' mjʉ̀jʉ̀ pɑ́ tsyə a, shwə tə́ jɔ bvʉ́ gǒ, gwa' mjʉ̀jʉ̀, ŋkhʉ; bvʉ́ gǒ lɑ́ tsʉ' sɛtə mjʉ̀jʉ̀. 13 A bɑ gɑ́ e fa' yə pɑ ŋkhǎp, bɑ mjʉ̀jʉ̀ ka ghə də̀ŋ bi e. 14 Gɑ̌ bɑ byap dzə pɑpuŋ. Gɑ̌ bɑ gɑ̌ zhyə́ jʉ̀jʉ̀ tsɑ̌, jʉ̀jʉ̀ tsɑ̌ piŋ jyə́ a, 15 dəŋdəŋ pa' Tá a bɑ ě zhyə́ a, biŋ jyə́ Tá a á, biŋ bɑ́ hɑ vɔ̀k á nə mjʉ̀jʉ̀. 16 Gɑ̌ bɑ gɑ̌ ghə shɑ́ mjʉ̀jʉ̀ pyə wap tə́ wuŋ bɑ nthʉm ka dzə yəŋ a pɑ̀, ba pyə bɔ yap, bɑ́ gɔ cya wap yap; wap gɔ sɔ' yu' gi a, á ka dzə piŋ bɑ pɑ yɑmu', ba byap dzə piŋ bɑ pɑ yɑmu'. 17 Tá ŋkhuŋ a nə pa' gɑ̌ hɑ vɔk a tə́ biŋ ŋkwi. 18 Tə́ sɔmmo nə́ ŋkwi bəm pɑ̀, pɑ́ myə̀ nə hɑ. Gɑ̌ bɑ gɑ̌ ghə tʉ̀ɔ nə nthak, biŋ gə tʉɔ nə biŋ ŋkwi: A pɑ́ mco' myə gɑ ŋkwi bi Tá a lə. 19 Mghɔm mɔ gɑ lə piŋ ŋkwi' gaptə pɑ Yudea. 20 Bo'gwyə pɔ pɑ̀ gɔm gɑ: Zhwenyə cwəpuŋ bɑ̀ nə e, zhyənwə e tə yɑ̌wə pɑ́, nwə kɑ́ po pɑ̀wə jú' ywə yə e gɔm a. 21 Da' gɑ̀ shɑ́ pɔ pɑ́ gɔm yap m gɑ: Ghɔm tsɔ tə́ ghɔm mo yə zhwenyə cwəpuŋ nə e a pɑ̀; zhwenyə cwəpuŋ tə́ gyɛ' mnyə mo pɑ̀.

Pɑ Yudea kwi' ŋkhəŋnyə́ Yeso

22 Pú lə pɑ̌ ŋkhap ŋʉm, bɑ Yerusalɛm bɑwə ŋwɛnyə nə ŋkhamtə́ pa' pu lə cwɔ' Dyə Si a. 23 Yeso lə bɑ Dyə Si, bɑwə giŋtə nthʉm pəŋ Salomoŋ. 24 Pɑ Yudea lə́ tsam e nyəŋ tùŋ gɔm bi e gɑ: O gɔ kyə wɔk thə́ po'o tə kəm sǒ? O pɑ Kristo, o siŋ wɔk sɔsɔ̌! 25 Yeso pa' bi pu gɑ: Gɑ̌ siŋ wɔ, la' po piŋ. Mfa' myə gɑ̌ gə nə tsǒ Tá a a bɑwə ŋkwinthɛ̌ a; 26 da' gɑ́ po ka piŋ a, nə pa' po tə bɑ nə́ mjʉ̀jʉ̀ tsɑ̌ pɑ́. 27 Mjʉ̀jʉ̀ tsɑ̌ ju' gi a, biŋ bɑ jyə wap. Wap pɑ̀ jap jʉ̌m m̀. 28 Biŋ bɑ hɑ vɔk mama bi pú; wap tə́ gɔ la' pfʉ pɑ́, a sɔmmo lə nəŋ ŋkwi wap nə bu mə̌. 29 Tá a yə e hɑ wap bəm a bɑ e ghu' shyə guŋ ywə awɛ, a piŋ bɑ bi a pɑ́ sɔmmo lə kwi ywə pu e. 30 Pyə Tá a bɑ pɑ́ yɑmu'. 31 Pɑ Yudea lə pǐŋ ŋkwi' bé mwɔ' nə tamtə́ é. 32 Da' gɑ́ Yeso piŋ gɔm gɑ: Gɑ̌ ghə po yɔ vəŋ mfa' pɑpuŋ myə a fɑ bi Tá a. Pǒ gɔ lɑ mwɔ' tamtə́ a nə ma nə mfa' bɔ? 33 Pɑ Yudea pa' bi e gɑ: Pyə tə́ dɑ mwɔ' nthamtə́ o nə fa' pɑpuŋ pɑ́. Pyə dɑ mwɔ' nthamtə́ o nə́ nə yəmtə Si; nə pá' wə yə o bɑ pɑ̀ monəŋ a, o bɑwə dɑ nɑ o gə́ Si. 34 Yeso pa' bi pu gɑ: A tə́ bɑ pú lě bvə nə mco' mɔ gɑ: Gɑ̌ ghɔm gɑ: Po bɑ msi a? 35 Mco' ŋkhe pɔ pyə Si lə́ shyə m nə́ pu gɔmnwə a gɑ msǐ. A nəŋ bɑ po'o bi a pɑ sɔmmo lə kwyəpnyə ywə yə pu lě bvə a. 36 Po gɔm bi mo yə Si jwɔ' é biŋ nthəm é nthʉm dzʉ́ a gɑ: O yəmtə Si, nə pa' gɑ̌ piŋ gɑ́ gɑ̌ bɑ Mú Si a. 37 A pɑ gɑ́ ŋ tə̌ wə fa' mfà' Tá a pɑ́, po pɑ ŋkhəŋnyə a kəŋnyə́. 38 Da' gɑ́ a pɑ gɑ́ gɑ̌ wə fa' mfà' bɔ, bɑ̀ po pɑ́ tə piŋ a piŋ, po piŋ mfa' bɔ; a cyə m po'o tə po zhyə́, biŋ shəŋtə jyə́ gɑ́ Tá bɑ bəm dəŋdəŋ pa' gɑ̌ bɑ bi Tá a. 39 A lə pɑ̌ po'o, wap kwi' shəŋ nə ghəm é, da' gɑ e təm nə bu map. 40 Bɑnyə nə yə mu' jʉɔ Yurdɛŋ, tsʉ' yə Yohane lə to' nə nu' pɔ shyə nə a, bɑ shwə tsʉ'u. 41 Pɔ tə jɔm pɑ sɔ' bi e, biŋ bɑ gɔm gɑ: A nyənyɔ gɑ Yohane la tə́ té sɔm mtiŋ msya, da' gɑ́ guŋ ywə awɛ yə e lə ghɔm nə bɛ yəŋ á lə́ bɑ nyənyɔ. 42 Wap lə piŋ bɑ vəŋ é nə piŋ é.

Yohane 11

Yeso yám mu' mo nə vʉ̌

1 Mu' mbɛ lə bɑ́wə, bɑ gɛ gho; mo bɔ lə bɑ Lazaro, yə Betanya, la' pɑ Maria pu fɑ e Marta. 2 Pu gɔm Maria yə é lə́ lɑ mwɑ damnyəlamnyə nə jwɔ' Cyəpɔ, biŋ dɑ nə̀ŋ thə́ e nə shi' mkwə myə́ a. Fɑ e Lazaro nə lə́ bɑwə gǒ. 3 Mfɑ pyə́ pyə pɑ jwǐ lə́ təm gɑ́ pu ghɔ gɔm bi Yeso gɑ: Cyəpɔ, mo yə o ŋkhuŋ e a wə gǒ. 4 Yeso lə cwə́ tə ju' po'o gɔm gɑ: Gho bǎ tə gɔ miŋ m nə vʉ̌ pɑ́, pu gɔ cyə m nə́ yɔ ghu'tə̀ Si: A gɔ cyə m nə́ tə pu ghu'tə Mu Si. 5 A lə nə pɑ̌ po'o Yeso pɑ́ ŋkhuŋ Marta pu fɑ e yə mjwǐ ba Lazaro. 6 Tə́ ba tə pa' e lə zhyə̌ gɑ Lazaro wə go a, e lə pǐŋ shwə tsʉ' yə e lə́ bɑ nə a tyɛ'dzʉ tsɑ pʉ̌ə. 7 Tə́ biŋ gɔm bi pɑkhʉ̌ pyə gɑ: Pɑ̀ pɑnyə Yudea. 8 Pɑkhʉ̌ pyə lə ghɔm bi e gɑ: Rabi, a ka sak pa' pɑ Yudea kɑ bɑwə shəŋ nə lɑ mwɔ' nthamtə o a; o biŋ shəŋ nə pɑnyə wə́ lə́? 9 Yeso pa' bi pu gɑ: Ta' tyɛ'dzʉ tə́ bɑ ǎ ghə mnàm shwɔppʉə mgham a lə? Mo pɑ́ giŋ dɔdzʉ̌ bɑ e tə́ gɔ cwɔ' kwə e pɑ, nə pa' e bɑwə jɔ ŋkha' yəŋ dzʉ̌. 10 Da' gɑ́ mo pɑ giŋ mtsʉ' bɑ e gɔ cwɔ' kwə e nə́ pa' ŋkha' tə bɑ nə e pɑ. 11 Yeso lə́ ghɔ́m mghɔm mɔ biŋ gɔm gɑ: So yɔk pɑ̀ Lazaro ti, da' gɑ́ gɑ̌ gɔ ghɔ yàm e. 12 Pɑkhʉ̌ pyə ghɔm bi e gɑ: Cyəpɔ e pɑwə di bɑ e gɔ sɔ' vɔk. 13 Yeso lə gɔm po'o bɑ gɔm vʉ́ Lazaro tə wap kwɛ yap gɑ́ e gɔm pɑ́ lwɔ̌k. 14 Yeso ghɔm bi pu sɔsɔ̌ gɑ: Lazaro pfʉ́, 15 tə ŋ bɑwə ŋwɛnyə nə po nə pa' ŋ kě tə pɑ tsʉ'u a, po'o gɑ a ghə po piŋ. Da' gɑ́ pɑ́ ghɔ bəŋ e. 16 A lə pɑ̌ po'o, Tomasi, mo yə́ pu ŋkhe e gɑ́ Didimə a ghɔm bi pyə shɑ pɑkhʉ̌ gɑ: Pɑ ghɔ ba yɔk pɑ̀, po'o gɑ́ pɑ̀ a pú pəmtə́ pfʉ́. 17 Yeso lə nə ŋwak, jɔ Lazaro m nthʉ̌m sì, bɑ ě cwə́ sí tyɛ' pfʉə. 18 Nə pa' nthə́ Betanya bɑ̀ kilo pʉə mkam nə Yerusalɛm. 19 Pɑ Yudea tə́ jɔ̀m lə́ bɑ wap sɔ' ywə Marta pu Maria nə zhwyətə wap nə vʉ̌ fɑ́ yap. 20 Marta lə nə yu' gɑ Yeso wə sɔ̌' gɔ məjyə jɔ e; da' gɑ Maria pɑ pɑ́ dyə bɑ ě cwəsi. 21 Marta lə ghɔm bi Yeso gɑ: Cyəpɔ, o kɑ pé' e bɑ tsɔ'ɔ bɑ fɑ a kě tə pfʉ́. 22 Tə́ ba cwəlɔ gɑ̌ zhyə́ gɑ́ bǎ kɑ lə́ yə o gɔ ló bi Si a, Si gɔ hɑ bu. 23 Yeso ghɔm bi e gɑ: Fɑ o gɔ yam. 24 Marta pa' bi e gɑ: Gɑ̌ zhyə́ gɑ́ e gɔ sɔ' yam nə tyɛ' nə yam nə vʉ̌ nə jʉɔjʉ̀m tyɛ'dzʉ. 25 Yeso ghɔm bi é gɑ: Gɑ̌ bɑ nə yam nə vʉ̌, biŋ bɑ vɔk: Mo yə e piŋ a, é pfʉ́ ba pfʉ̀pfʉ̌ bɑ e gɔ vɔk; 26 a mo yə e nəŋ bvɔk biŋ biŋ a lə nəŋ da' pfʉ́. Ǒ piŋ po' a? 27 Marta pa' bi é gɑ: É m Cyəpɔ, gɑ̌ piŋ gɑ o bɑ Kristo, gɑ̌ piŋ gɑ o bɑ Mu Si Mo yə e sɔ' nthʉm dzʉ́ a. 28 E lə ghɔm po'o dú gɔ ŋkhe fɑ e Maria shamtə́ bi e gɑ: Tá tsi' e bɑwə ŋkhe o. 29 Maria lə nə yǔ' gúŋ dusi gɔ bəŋ e. 30 A lə́ nə pɑ̌ po'o Yeso yɑ́ tə wuŋ ŋkho nthʉm la' bɔ; e lə jɑ́ pɑ tsʉ' yə pú Marta lə yu'tə nə a. 31 Pɑ Yudea lə bɑ dyə, bɑwə jwyətə Maria. Wap lə́ nə yɔ pá' e gúŋ dusi nthəm a jap jʉ̀m é, bɑwə ŋkwɛ gɑ e gɔ m thəsì nə lɔ̀. 32 Maria lə ŋwak tsʉ' yə Yeso lə́ bɑ nə a, shwə tə jɔ e, bvʉ nə mkwə myə́ gɔm bi e gɑ: Cyəpɔ, o kɑ pe' bɑ tsɔ'ɔ bɑ fɑ à kě tə̀ pfʉ́. 33 Yeso lə́ nə yo pa' Maria pu a pɑ Yudea pyə wap lə́ bɑ jʉ̀m e a wə dɔ́ a, tʉm tsyə sə́ŋ, lam tsyə sɔ. 34 E ghɔm gɑ: Pǒ yap é hɑ? Wap pa' bi e gɑ: Cyəpɔ, sɔ' jɔ́. 35 A pɑ́ po'o Yeso lɔ̀. 36 Pɑ Yudea lə bɑ́ gɔm gɑ: Po yɔ́ pa' e kɑ ŋkhuŋ e. 37 Da' gɑ shɑ̀ pɔ cəcɑ̌ pu ghɔm gɑ: Mo yə e lə ghyɛ' mnyə fʉ̀ a, e kě tə kú' nə kɔ̀ gɑ Lazaro kɑ pfʉ. 38 A pɑ po'o tʉm Yeso kwi' səŋ, e ghɔ thəsì; thəsì bɔ lə́ bɑ túŋ ghú gwɔ̀', bɑ pu lɑ mú' gwɔ' nə pfɔptə shwə é. 39 Yeso ghɔm gɑ: Po cʉ́ɔ gwɔ' yə̌ŋ. Marta, fɑ npfə́ ghɔm bi e gɑ: Cyəpɔ, e gɔ tsə́ pɑwə lam, nə pa' a cwəlɔ tyɛ' pfʉə. 40 Tə́ Yeso ghɔm bi e gɑ: Ŋ khě tə ghɔm bu gɑ́ o piŋ, bɑ o gɔ yɔ ghu'tə Si lə́? 41 Pu lə́ cʉ̌ɔ gwɔ'. Yeso piŋ bʉ' mnyə myə́ gɔm gɑ: Ta gɑ̌ gho'tə ó nə pa' ǒ yu' a lə. 42 Gɑ̌ zhyə́ gɑ o ji ju' a guŋ mcwə awɛ, da' gɑ́ gɑ̌ gɔm po'o shyə m nə vəŋ pɔ̀ pɔ̌ pyə wap bə́ŋ m̀ a, po'o gɑ wap piŋ gɑ́ a bɑ ǒ təm a! 43 E lə́ ghɔm po'o shwé tə thə́ gɑ: Lazaro, tə́m! 44 Mo yə e lə́ bɑ ě pfʉ́ a tə̌m, bɑ pu kwɑ́ mkwə̀ myə́ pu a bu myə́, biŋ dɑ dzə́ sam sə́ e. Yeso ghɔm bi pɔmnəŋ gɑ: Po kyɛ' e, nthak e nəŋ e ghɔ.

Pú tɛnwə̀ nə́ Yeso

45 Bo'gwyə pɑ Yudea pyə wap lə sɔ' bəŋ Maria biŋ jɔ ywə yə Yeso lə ghə a lə piŋ é. 46 Da' gɑ́ pyəshɑ́ ghɔ jɔ́ pɑ Farisai siŋ wap ywə yə Yeso gə a. 47 Mkamsi gwyəgwyə pu a pɑ Farisai lə ko cu'tə gɔm gɑ: Pɑ̌ gə kɑ? Bɛ yə̌ŋ wə gə mtiŋ msya yɔ̌m. 48 Pɑ̀ tak é nəŋ e nə gɔ dzə̀ po'o bɑ guŋ pɔ awɛ gɔ piŋ e, pɑ Roma ko nə́, sɔ' sa'tə tsʉ' dɔlɔ̌ yɔk pɑ̀ ba guŋ yɔk pɑ̀. 49 Mu' mo cəcɑ̌ pú, Kaifa yə e lə́ bɑ tádyə mkamsi gǔ' bɔ a ghɔm gɑ: Po tə wə jú' sɔmywə pɑ́. 50 Po lə piŋ bɑwə sɛ ba m gɑ́ dzə bi po gɑ́ ta' mo pfʉ́ nə thə́ pɔmnəŋ, po'o gɑ́ gùŋ kɑ simnyə̀ awɛ a? 51 Mghɔm bɔ myə e lə ghɔm a lá tə́ bɑ myə́ pɑ́. Da' gɑ́ pa' e lə bɑ tadyə mkamsi gǔ' bɔ a, e lə gɔm pɑ ghɔm Si gɑ a lə́ bɑwə shəŋ gɑ́ Yeso pfʉ́ nə thə́ guŋ, 52 ba tə da' nə thə́ guŋ pɑ, ba m nə nə́ shu'tə́ po Si pyə wap bɑ wap sɛ dzʉ́ dzʉ̌ a nthʉm nthamtə. 53 A tyɛ'dzʉ bɔ tə́ wap lə́ nyə̌ŋ gɑ wap gɔ zhwə é. 54 Tə fɑ po' Yeso nə yə ghə́ŋ lə na' nə́ŋtə nə pɑ ŋkhəka cəcɑ̌ pɑ Yudea sɔsɔ̌; e lə təm gɔ m̀ ghə̌ŋ ghakgo, m nthʉ̌m tisuŋ Efraim pu a pɑkhʉ pyə́ pɑ́ shwə́ wə́. 55 A lə́ nə pɑ̌ po'o Paska pɑ Yudea pɑwə sɔ̌'. Bo'gwyə pɔ lə wuŋ yə mu' jʉ̀m dzʉ̌ fɑ go bʉɔ gɔ Yerusalɛm nə nə lɔnyə nɑ tsap. 56 Wap lə bɑwə shəŋ Yeso, biŋ bɑ Dyə Si tsʉ' yə wap lə bɑ nə a bɑ gɔm cəcɑ̌ pú gɑ: Pǒ sɛ gɑ kɑ̀? E tə́ gɔ sɔ' nə Paska pɑ̀. 57 A lə́ bɑ mkamsi gwyəgwyə ba pɑ Farisai hɑ mco' gɑ: Bǎ wɑlə́ yə ě zhyə́ tsʉ' yə e nə́ a la'tə́, pu ghɔ gəm é.

Yohane 12

Maria zhwɔ' mkwə Yeso

1 A lə́ pɑ jak tyɛ'dzʉ nthɔ̌k tə́ a pɑ tyɛ' Paska, Yeso ŋwak Betanya, tsʉ' yə Lazaro yə e lə yam é nə vʉ̌ a lə́ bɑ nə a. 2 Pu ghə ŋwɛnyə nə thə́ e: Marta pɑ́ gap ywətsʉ, Lazaro pɑ cəcɑ̌ mghʉɔ. 3 Maria lɑ dúŋ mwɑ damnyəlamnyə, mwɑ tʉɔdə̀ŋ, nə jwɔ' mkwə Yeso, dɑ nəŋ thə́ e nə shi'. Zhwyə mwɑ bɔ ló Dyə̌. 4 A pɑ po'o, Yuda Iskariɔt, mu' mo nə́ pɑkhʉ̌ pyə́, mo yə e lə bɑ gɔ la' hɑ́ e á ghɔm gɑ: 5 Nwə kɑ̀ bɑ pú ka fiŋ mwɑ damnyəlamnyə mə́ nə́ bɛ ŋkhap ŋkhətá, hɑ bi mpə̌ŋ? 6 E la tə́ gɔm po'o bɑ nwə mpə́ŋ nə nthəŋ e pɑ́. E lə́ gɔm po'o nə pa' e lə́ bɑ shúŋ, pétə́ pɑ m̀ bi é. E pɑ́ jʉ ywə́ yə pu lə́ nyəŋ nthʉm o a. 7 A pɑ́ po'o Yeso ghɔm gɑ: tak e nə́ŋ; ywə yə e gə a bɑ nə́ nə nthəŋ a. 8 Po a mpə̌ŋ nə gɔ pɑ pɑ́ guŋ mcwə awɛ; tə́ sɔ' m nə m̀, pɑ́ lə ghɔ pɑ́ pɑ́ guŋ mcwə awɛ. 9 A lə́ nə pɑ̌ po'o bɑ kwa' vəŋ pɑ Yudea yu' gɑ Yeso tsʉ'u, sɔ̌', po'o tə da' nə Yeso pɑ, sɔ' ba nə yɔ Lazaro yə́ e lə́ yǎm é nə vʉ̌ a. 10 Mkamsi gwyəgwyə nyəŋ gɑ wap gɔ zhwə ba Lazaro yə́, 11 nə pa' a lə bɑwə shyə́ pɑ nə e tə pɑ Yudea tə jɔm pɑwə nthəm nə pú, biŋ bíŋ Yeso.

Yeso kó Yerusalɛm

12 Dzʉ̌ lə́ lɔ̌, vəŋ pɔ pyə́ wap lə sɔ' nə ŋwɛnyə á yu' gɑ́ Yeso wə́ sɔ' m Yerusalɛm; 13 wap lə lɑ̌ mcɛ́ yɛ bɛ nə nthəm tisuŋ gɑ pu a pu yu'tə, wap lə bɑwə jwɔp gɑ: Hozana, byanyə pɑ́ bi mo yə ě wə sɔ' a, shyə m nə́ tsǒ Cyəpɔ, fo pɑ Israɛl. 14 Yeso lə́ yɔ mu jakasi, shwə́ dəm e, dəŋdəŋ pa' a ba pu lě bvə gɑ: 15 Kɑ́ pwɔk, gò Sion: Yɔ fo o yəŋ bɑwə sɔ̌', bɑ ě kwɔ' dəm mu jakasi. 16 Pɑkhʉ̌ pyə́ lə ləŋdzə la' wap yu' kwa' ywə yə ǎ wə shyətə a, da' gɑ́ pu lə cwə̌ tə gu'tə Yeso, wap kamtə́ gɑ́ a lə́ bɑ́ pu lě bvə nə e po'o, a pɑ ywə bɔ tə́ pu lə́ bɑwə gə nə e. 17 A lə́ bɑ po'o, vəŋ pɔ pyə́ pu a pu lə́ bɑ́ cwə yə́ é lə́ kě Lazaro nthʉm sì, jám é nə vʉ̌ a pɑwə ŋkwinthɛ̌ e. 18 Nə pa' a lə́ shyə m pa' wap lə yǔ' gɑ e ghə mtiŋ msya bɔ a, tə́ wap ghɔ gɑ́ pu a pu yu'tə. 19 A lə́ pɑ̌ po'o pɑ Farisai pɑ́ gɔm cəcɑ̌ pu gɑ: Po yɔ, po ka ku' nə ghə sɔmywə: Ǎ yɑ́ gùŋ pɔ̀ awɛ pɑwə jap jʉ̀m e.

Ghu'tə pu bɛnyəpɛnyə

20 Shɑ́ pɑ Grikia lə́ bɑ wap pʉ̀ɔ yap Yerusalɛm nə ŋwɛnyə paska nə́ nə ghamtə̀ Si. 21 Wap lə ghɔm bi Filipo yə e bɑ yə́ Betsaida m Galilea á gɔm gɑ: Cyəpɔ, pyə wə́ shəŋ nə yɔ Yeso. 22 Filipo lə́ ghɔ gɔm bi Andreya, pu e pəmtə gɔm bi Yeso. 23 Yeso pa' bi pu gɑ: Cwə yə pu gɔ ghu'tə mú mo a ku'. 24 Kwa' nyənyɔ nyənyɔ, gɑ̌ siŋ wɔ gɑ́ tɔ̌m msɛ́ ko si bɑ tə́ pfʉ, bɑ a gɔ pɑ́ pɑ do e; da' gɑ a pfʉ bɑ a gɔ ghə nthɔm tə́ a yɔm. 25 Mo yə ě kuŋ vɔk e a, gɔ pi vɔk e bɔ, tə́ mo yə e ka kuŋ vɔk é bɔ nthʉm yəŋ dzʉ̌ a, gɔ sɔ' lwɔ' vɔk e bɔ nə vɔk mama. 26 Mo pɑ gɔ fá' bəm, e yap jʉ̌m m̀, nə pa' tsʉ' yə gɑ̌ gɔ pɑ́ nə a, gɛfa' a gɔ pɑ́ tsʉ'u. Mo fa' bəm bɑ Ta a gɔ sɔ' ghə mku' myə́. 27 Cwəlɔ lam tsɑ̌ wə sɔ́; gɑ̌ gɔ piŋ ghɔm gɑ́ kɑ̀? Ta vɔk a cwəlɔ̀ lə? Da' gɑ ŋ də́ sɔ' pɑ kwa' nə cwə dzʉ yə̌ŋ. 28 Ta ghu'tə tso tsǔ. A lə pɑ̌ po'o gi mò fɑ kɛbəŋ gɔm gɑ: Gɑ̌ ghu'tə tsá, biŋ gɔ kwi' pɑ ghu'tə tsá. 29 Vəŋ pɔ pyə wap lə̌ tsʉ'u a lə nə yǔ' gɔm gɑ́: a m̀ hɛbəŋ; pyə́ shɑ pɔ pɑ gɔm yap m gɑ aŋgəle nə́ gɔmnwə bi e. 30 Yeso piŋ dɑ́ ghɔm gɔm gɑ: Gi yəŋ tə́ gi po' m bəm pɑ̀; a gi m bi po. 31 Cwəlɔ pu gɔ fyɛ' yəŋ dzʉ̌; cwəlɔ pu gɔ zhəŋ fò yəŋ dzʉ̌ cya e pé. 32 Tə́ sɔ' m nə m̀, cwə yə pu gɔ sɔ' ka' á thə́ á, gɑ gɔ fəŋ guŋ pɔ awɛ wap sɔ' bəŋ m̀. 33 Yeso lə shyə m nə́ mghɔm mɔ gɑ bɑ da'tə nthi vʉ̌ tsyə e lə bɑ gɔ pfʉ́ tsa a. 34 Pɔmnəŋ lə pa' bi e gɑ: Pyə lə yu' nə mcò' gɑ́ Kristo gɔ la' cwə pɑ mama. Tə a biŋ shyə́ m gɑ̀ kɑ o ghɔm gɑ́ pu gɔ ká' Mú mo thə́? Mú mo bɔ bɑ́ wɑ? 35 Yeso pa' bi pu gɑ: Ŋkha' jɑ̀ cəcɑ̌ po nə muywə cwə dzʉ̌. Po ghiŋ nə cwə yə ŋkha' yɑ̌ bi po a, po'o gɑ dzʉ̌ jʉ̌m kɑ́ lɑ wɔ, nə pa' mo yə e giŋ nthʉm jʉ̀m a tə́ jyə́ tsʉ' yə e gɔ m nə a pɑ. 36 Cwə yə́ ŋkha' yɑ̌ bi po a, po piŋ ŋkha' po' gɑ po zhi pó ŋkha'. Yeso lə́ ghɔm bi pú po'o, fɑ cəcɑ̌ pú nthəm gɔ dʉmnyə.

Nə kəŋnyə nə piŋ Yeso

37 Ba tə́ pa' Yeso lə́ ghə mtiŋ msya cəcɑ̌ pu tə' a, wap la tə piŋ é; 38 po'o tə́ ghɔm tsyə́ gɔm ghɔm Si Esaya lə́ ghɔm a pəmtə gɑ: Cyəpɔ, wɑ̌ piŋ nwə yə pu lə yu' pa' pú gɔm a? Si bɑ e lě da'tə gʉ' e bi wɑ? 39 Kwa' yʉ Esaya lə ghɔm ywə yə a lə́ gə tə́ bi a pɑ́ wap lə piŋ a, gɑ: 40 Si bɑ ě ma' fʉ̀ mnyə pú, biŋ gə tʉm tsap sɔk, po'o gɑ́ wap kɑ lɑ mnyə map jɔ, tʉm tsap kɑ yu' sɔmywə, wap kɑ nə̌ŋ bʉɔ tʉm tsap, gə gɑ jɛ́ wap! 41 Esaya lə́ gɔm po'o nə pa' a lə́ bɑ́ bɑ e yɔ nə ghu' Yeso, bɑ gɔm po'o nə. 42 Ba tə po'o, ba m cəcɑ̌ pɑ cya, bo'gwyə pɔ lə bɑ wap piŋ e; da' gɑ a cyə m nə pa' wap lə́ bɑwə bwɔk gɑ́ pɑ Farisai kɑ té wap sinagogə a, wap lə piŋ e sɔsɔ̌. 43 Nə pa' wap lə bɑwə ŋkhuŋ ghu'tə yə a fɑ m bi pɔmnəŋ a shyə́ yə a fɑ bi Si a. 44 A nə́ pɑ̌ po'o bɑ Yeso lə ghɔm gɑ: Mo yə e piŋ á, bɑ́ e tə́ biŋ pɑ myə̀ pɑ̀, bɑ e biŋ mo yə e nthəm a, 45 ba mo yə́ e yɔ a, bɑ́ e yɔ mo yə e nthəm a. 46 Myə̀ yə gɑ̌ bɑ ŋkha' a, gɑ̌ sɔ' nthʉm dzʉ́ po'o gɑ mo yə e piŋ a kɑ́ cwə̌ nthʉm jʉ́m. 47 A pɑ́ gɑ́ mo yu' mghɔm mə̌, la' e kyəp, bɑ tə́ myə̀ nə gɔ fyɛ' e pɑ́: Nə pa' da tə́ sɔ' m nə fyɛ' dzʉ̌ pɑ́, ŋ də sɔ' m nə vɔk dzʉ̌. 48 Mo yə́ e wa' a, la' e kwi mghɔm mə̌ a, bɑ e ghə gɛ fyɛ' e: Mghɔm myə gɑ gɔm a gɔ sɔ' fyɛ' e nə jʉɔjʉ̀m tyɛ'dzʉ. 49 Ŋ da tə́ gɔmnwə m nə yɑ thə́ pɑ́; Tá yə e nthəm a nə bvə ywə yə gɑ̌ gɔ ghɔm a. 50 Bɑ gɑ̌ nəŋ jyə́ gɑ́ mco' myə́ bɑ́ vɔk mama. Ywə yə gɑ̌ gɔm a, gɑ̌ gɔm pa' Tá ghɔm bəm a.

Yohane 13

Yeso sɔk mkwə pɑkhʉ̌ pyə

1 Ŋwɛnyə Paska lə nə ku' Yeso zhyə gɑ yə cwə wə bɑ ǎ ku', cwə yə e gɔ təm nə yəŋ dzʉ̌ ghɔ bəŋ Ta a, yʉ́ yə e lə́ bɑ e kuŋ pɔ pyə́ pyə wap bɑ nthʉm dzʉ a, e piŋ ŋkhuŋ wap tə́ miŋ. 2 Pu a pu lə́ nə pɑ tsʉ̌ ywə, bɑ Sata tsə́ nyəŋ mkwɛnyə nə hɑ Yeso bi mghɛ bó pyə nthʉm tʉm Yuda Iskariɔt mu Simon. 3 Yeso zhyə́ gɑ Tá nyəŋ guŋ ywə awɛ tuŋ pú e; jyə́ gɑ e nthəm nə Si, biŋ bɑ gɔ m bi yʉ Si, 4 dusi dəm tɑpe, nthɔk dzə e jap si, shəŋ mu' kamdzə vʉ' e. 5 Biŋ nyəŋ shyə nthʉm kɛ́, ntho' nə́ nə sɔk mkwə pɑkhʉ̌ pyə́, biŋ bɑ dɑ kamdzə yə a vʉ' e a nə shi'. 6 E lə́ kəm nə Simon Pɛtrɔ, e ghɔm bi e gɑ: Wə Cyəpɔ sɔk mkwə mə̌ lə? 7 Yeso pa' bi e gɑ: Ywə yə gɑ̌ wə gə a, bi a pɑ o lə zhyə́ cwəlɔ, da' gɑ́ o gɔ sɔ' yu' m jʉ̀m. 8 Pɛtrɔ ghɔm gɑ: Tə o sɔk mkwə mə lə́! Gɛ̌, gɛ̌! Yeso ghɔm bi e gɑ: Bɑ tə sɔk o bɑ pu tə́ yɑ̌ nə sɔmywə pɑ́. 9 Simon Pɛtrɔ ghɔm bi e gɑ: A pɑ́ pa' m Cyəpɔ, o kə́ sɔk da' mkwə mə̌, o sɔk ba bú mə̌ ba thə́ a. 10 Yeso ghɔm bi e gɑ: Mo yə a bɑ e sɔk nɑ e a tə́ biŋ shəŋ gɑ́ pu sɔk e pɑ́, nə pa' a bɑ ě lɔ: Sɔ' m nə wɔ, a bɑ pǒ lɔ da' gɑ tə guŋ yɔ awɛ pɑ́. 11 Yeso lə́ bɑwə jyə́ mo yə́ e lə́ bɑwə gɔ hɑ e a; a cyə m po'o tə́ e ghɔm gɑ: Tə́ guŋ yɔ awɛ pɑ. 12 Yeso lə́ miŋ nə sɔk mkwə máp, ŋkwa dzə e, biŋ shwə dəm tɑpe, gɔm bi pu gɑ: Pǒ yu' ywə yə gɑ̌ gə nə po a lə́? 13 Pǒ ŋkhe a gɑ Tá, ba m gɑ́ Cyəpɔ, bɑ̀ po ka hɔ, nə pa' gɑ̌ bɑ e. 14 Bi a pɑ gɑ myə̀ Cyəpɔ, bíŋ bɑ́ Tá, gɑ̌ sɔk mkwə mɔ, bɑ pǒ gɔ pɑ́ sɔk mkwə mɔ cəcɑ̌ po, 15 nə pa' a fo' yə gɑ hɑ́ bi po a: Ywə yə gɑ gə bi po a, po ghə po'o bi pyəshɑ pɔ. 16 Kwa' nyənyɔ nyənyɔ, gɑ̌ siŋ wɔ gɑ gɛfa' tə́ bɑ ě cyə tá fa' e pɑ́, kɑ mo yə pu nthəm e nə cyə mo yə é nthəm e a lə. 17 Po zhyə po'o, bɑ pǒ bɑ mpuŋtsé, bi a pǒ ghiŋ po'o a. 18 Ŋ tə gɔm nə guŋ yɔ awɛ pɑ́; gɑ̌ bɑ gɑ̌ zhyə́ pɔ pyə́ gɑ shwɔ' wap a. Da' gɑ́ ywə yə pu lə və a, a pəmtə́ gɑ: Mo yə pyə é lə́ pəmtə́ dzʉ̌ ywə a lě fɛ jʉm a. 19 Gɑ̌ siŋ wɔ cwəlɔ po'o tə́ nwə tə́m, po'o gɑ a cwə tə́ nthəm po piŋ gɑ́ Gɑ̌ bɑ. 20 Kwa' nyənyɔ nyənyɔ gɑ̌ ghɔm bi po gɑ nə lɑ mo yə gɑ̌ gɔ sɔ' təm é a bɑ nə lɑ kwa' myə̀. Nə nəŋ dɑ́ a pɑ nə lɑ Mo yə e nthəm a lə́.

Pa' Yuda gɔ tɛ́ mnɛ nə Yeso

21 Yeso lə́ ghɔm po'o, lam tsyə sɔ, e piŋ gɔm sɔsɔ̌ gɑ: Kwa' nyənyɔ nyənyɔ mu' mo nə po gɔ hɑ a. 22 Pɑkhʉ̌ pyə cʉnyə́, bɑ́ həŋtə́ cəcɑ̌ pú mo yə e gɔm é a. 23 Mu' mukhʉ̌ yə Yeso lə́ ŋkhuŋ e a lə bɑ bəŋ e. 24 Simon Pɛtrɔ nwɔ'tsə bi gɑ: Tsɑtə e gɑ e gɔm wɑ́lə? 25 Mukhʉ̌ bɔ lə pɔ̌ nɑ e nə́ kəkɔp Yeso, gɔm bi e gɑ: Cyəpɔ, a bɑ wɑ́? 26 Yeso pa' gɑ: A mo yə́ gɑ gɔ co' bo'ywə hɑ bi a. E lə ghɔm po'o sho' bo' ywə hɑ bi Yuda Iskariɔt, mu Simon. 27 Tə́ fɑ cwə yə Yeso lə hɑ̌ bo'ywə bɔ bi Yuda á, Sata ko nə e. Yeso ghɔm bi e gɑ: Ywə yə o gɔ ghə a, lo'nyə gə̌. 28 Sɔmmo nə pɔ pyə wap lə bɑ tsʉ'u a la tə yu' ywə yə a gə tə́ Yeso ghɔm po'o a pɑ́. 29 Pa' Yuda lə́ gwim peté a, shɑ pɔ lə́ kwɛ m gɑ Yeso gɔm bi e gɑ́ e yó ywə yə a gɔ kwitə nə ŋwɛnyə, kɑ m gɑ e hɑ ywə bi mpə̌ŋ lə. 30 Da' gɑ sɔ' m nə Yuda, e lə cwə tə ŋkwi bó' ywə bɔ, guŋ nthəm: A lə́ bɑ mtsʉ'.

Mco' sə́

31 Yuda lə́ cwə tə́ nthəm, Yeso ghɔm gɑ: Pu e da' gu'tə Mu mo a piŋ bɑ́ bɑ pu lě shyə m nə e gu'tə Si. 32 Si gɔ ghu'tə e cyə pɑ m nə yʉ Si. Ǎ cʉ' muywə Si ghu'tə e. 33 Pǒ mkəcɔk po pɑ̌, jɑ̌ cəcɑ̌ po pɑ́ nə muywə cwədzʉ̌. Pó gɔ sɔ' cəŋ a; dəŋdəŋ pa' ŋ də ghɔm bi pɑ Yudea gɑ: Tsʉ' yə gɑ gɔ m nə a, bi a pɑ́ po lə sɔ' tsʉ'u a, ba m bi po yɔ gɑ̌ wə gɔm po'o cwəlɔ. 34 Gǎ wə hɑ ta' mco' sə bi po: Po kuŋnyə wɔ wɔ. Dəŋdəŋ pa' dɑ kuŋ wɔ a, po pɑ ŋkhuŋnyə wɔ wɔ. 35 A pɑ gɑ̀ po ghə ŋkhuŋnyə cəcɑ̌ po, bɑ guŋ yap awɛ gɔ zhyə́ gɑ́ po bɑ pɑkhʉ̌ pɑ̌.

Yeso ghɔ̀m gɑ Pɛtrɔ gɔ kəŋnyə e

36 Simon Pɛtrɔ ghɔm gɑ: Cyəpɔ o gɔ m hɑ́? Yeso pa' bi e gɑ tsʉ' yə gɑ̌ gɔ m nə a, bi a pɑ́ o lə yap jʉ̀m m̀ cwəlɔ, da' gɑ o gɔ lá' yap jʉ̀m m̀. 37 Pɛtrɔ ghɔm gɑ: Cyəpɔ, nwə kɑ́ tə́ bi a pɑ ŋ də yap jʉm o cwəlɔ? Gɑ̌ gɔ sɔ' wa' vɔk a nə o. 38 Yeso pa' bi e gɑ: Wa' vɔk o nə m̀! Kwa' nyənyɔ nyənyɔ gɑ̌ siŋ o gɑ: O gɔ kəŋnyə a mcʉm ntha tə́ ko' túŋ.

Yohane 14

Yeso bɑ məjyə nə gɔ́ bəŋ Tá

1 A lam tsɔ kɑ sɔ; po piŋ Si, po piŋ ba myə̀ yɑ̌. 2 Mtsʉ' bɑ dyə Tá a tə́ jɔ́m; ka po'o a bɑ gɑ̌ ghɔm bi po gɑ́ gɑ̌ gɔ ghɔ nyaptə tsʉ' bi po yə po gɔ sɔ' pɑ́ nə á lə? 3 Cwə yə gɑ̌ gɔ ghɔ tə nyaptə tsʉ' bi po a, a biŋ sɔ' dɑ wɔ pɑ ghɔ̌, po'o gɑ́ tsʉ' yə gɑ̌ nə a, ba wɔ yɔ sɔ' bɑ́ tsʉ'u. 4 Sɔ' m nə tsʉ' yə gɑ̌ gɔ m nə́ a, a bɑ po zhyə məjyə. 5 Tomasi ghɔm bi e gɑ: Cyəpɔ, pyə bɑ pyə ka zhyə́ bǎ tsʉ yə o gɔ m nə a, tə̀ pyə gɔ zhyə́ məjyə m gɑ́ kɑ? 6 Yeso ghɔm bi e gɑ: Gɑ̌ bɑ məjyə, bíŋ bɑ́ nyənyɔ, bíŋ bɑ vɔk. Sɔmmo tə́ gɔ bi Tá tə cyə pɑ m nə m̀ pɑ. 7 Po la' pé'e jyə́ a, bɑ po zhyə ba Tá a. Tə fɑ cwəlɔ pǒ bɑ pǒ zhyə e, biŋ bɑ́ bɑ pǒ yɔ e. 8 Filipo ghɔm bi e gɑ: Cyəpɔ, la'tə wɔk Tá, a ku' bi pyə. 9 Yeso ghɔm bi e gɑ: Myə, gɑ̌ bɑ́ cəcɑ̌ po tə fɑ tə tyɛ̌', ba tə po'o wə Filipo o lə piŋ jyə a lə? Mo yɔ a, bɑ ě yɔ Tá: Nwə kɑ o ghɔm gɑ: La'tə wɔk Tá a? 10 O tə́ biŋ gɑ́ gɑ̌ bɑ nə́ Tá, Ta piŋ bɑ nə m̀ a? Mghɔm myə gɑ̌ gɔm bi po a, ŋ tə gɔm nə́ yɑ thə́ pɑ́. Tá yə e bɑ nə m̀ a nə fá' mfà' myə́. 11 Po piŋ gɑ́ gɑ̌ bɑ nə Tá, Tá pɑ nə m̀; bi a pɑ pɑ́ gɑ́ po tə gɔ piŋ ghɔm tsɑ̌ pɑ́, po piŋ shyə m nə mfa' myə́ mɔ gɑ. 12 Kwa' nyənyɔ nyənyɔ, gɑ̌ siŋ wɔ gɑ́ mo yə ě piŋ a bɑ ba yʉ́ gɔ fa' mfá' myə gɑ̌ fa' a. E gɔ fa' a cyə ba m po'o, nə pa' gɑ̌ gɔ m bi Tá. 13 Gúŋ ywə awɛ yə po gɔ lɑ tsó tsɑ̌ lo a, bɑ gɑ̌ gɔ ghə, po'o gɑ a cyə m nə Mú pu ghu'tə Tà. 14 Po lo ywə bəm m nə tso tsɑ̌ bɑ gɑ̌ gɔ ghə po'o.

Yeso ka'nyə Zhwenyə

15 Po kuŋ a bɑ po gɔ kaktʉɔ nə ghiŋ nə́ mco' mə̌; 16 a shwyɛ'nyə Tá, e hɑ mu' Parakle yə pu a pu gɔ pɑ́ guŋ mcwə awɛ a bi po. 17 Yú nə bɑ Zhwenyə nyənyɔ, mo yə dzʉ̌ bɑ e ka ku' nə kwi e a, nə pa' dzʉ̌ tə́ jɔ e pɑ́, e lə nəŋ jyə́ e. Po bɑ pǒ zhyə e nə pa' e shwə bəŋ po, biŋ bɑ nə po. 18 Ŋ tə gɔ tak wɔ pa' pǒmcyə a pɑ́, gɑ̌ wə sɔ' m bi po. 19 Ǎ cʉ' muywə dzʉ̌ lə piŋ jɔ a; tə́ po gɔ pɑ yɔ a, bɑ pɑ wə́, ba wɔ yɔ pɑ́ pɑ wə́. 20 A gɔ sɔ' pɑ́ tyɛ'dzʉ́ bɔ, po zhyə gɑ́ gɑ̌ bɑ nə Tá a, po pɑ nə m̀, bɑ nə po. 21 Mo yə ě tɔm mco' mə̌, biŋ bɑ giŋ nə a, mo bɔ ŋkhuŋ a: Mo yə ě nəŋ ŋkhuŋ a, bɑ Tá a gɔ kuŋ e, ba myə̀ yɑ̌ piŋ ŋkhuŋ e, Ta piŋ gə e zhyə a. 22 Yuda yə e tə bɑ yə Iskariɔt a pɑ́ ghɔm bi e gɑ: Cyəpɔ kɑ gə o ghɔ ghə pyə zhyə o, tə́ o lə ghə dzʉ̌ zhyə o? 23 Yeso pa' bi e gɑ: Mo kùŋ á, bɑ e gɔ zhyə̀ ghɔm tsɑ̌, a Tá a kuŋ é; A pyə sɔ̌' bi e, gə tsʉ' shwə yɔk ywə e. 24 Mo yə e tə́ ŋkhuŋ a a pɑ́ tə jyə̀ ghɔm tsɑ̌ pɑ́. A nəŋ nə́ pɑ̌ po'o, ghɔm bɔ tsyə po jú' a lə pɑ́ ghɔm tsɑ̌, a bɑ́ tsyə Tá a yə e nthəm a. 25 Dě siŋ wɔ mnwə bǎ nə cwə yə ŋ də bɑ́ bəŋ po a. 26 Tə́ Parakle, Zhwenyə Dɔlɔ̌ yə Tá gɔ təm bi po cyə m nə́ tso tsɑ̌ a gɔ sɔ' zhi'tə wɔ guŋ mnwə awɛ, piŋ ghə po kamtə myə də ghɔm a awɛ. 27 Gɑ wə nthak hwitə bi po; gɑ̌ hɑ hwitə a bi po. Ŋ tə hɑ m nthi pa' dzʉ̌ hɑ a pɑ́. Lam tsɔ kɑ kwi' sɔ, po kɑ kwi' bwɔk. 28 Po yu' nwə bɔ, gɑ ghɔm bi po gɑ: Gɑ̌ gɔ ghɔ, piŋ sɔ' bi po. Po la' pe' e bɑ ŋkhuŋ a bɑ po gɔ ŋwɛnyə pa' gɑ gɔ m bi Tá a, nə pa' Tá bɑ é cyə a. 29 Gɑ̌ gɔm bi po cwəlɔ tə́ nwə bɔ cwə́ sɔ̌', po'o gɑ a cwə́ tə sɔ́' po piŋ. 30 Tə́ fɑ cwəlɔ, pɑ̀ tə gɔ kwi' pəmtə cɔm nwə pɑ, nə pá' fo yəŋ dzʉ̌ wə sɔ̌'. A nyənyɔ gɑ e ka ghə sɔm gʉ' nə m̀; 31 Tə́ e bɑwə sɔ' po'o tə́ dzʉ̌ zhyə gɑ gɑ̌ ŋkhuŋ Tá a, biŋ bɑ gə bǎ kɑ lə pɑ pa' Tá jap a. Po lusi, pɑ fɑ tsɔ̌' gɔ̌!

Yohane 15

Yeso bɑ thə́ mlù' nyənyɔ

1 Gɑ̌ bɑ thə́ mlù' nyənyɔ, Tá a pɑ mo yə é dé thə́ bɔ a. 2 Bǎ ya pú thə́ lə́ yə a la nə m̀, tə́ la' á pɑ jam nthɔm a, e nthé é; tə́ yə pǔ thə yə a jam nthɔm a, é pɑ só tə́ a cəŋtə́ jam. 3 Ghɔm tsyə gɑ gɔm a bɑ a e da' só wɔ. 4 Po cwə nə m̀ pá' gɑ̌ shwə nə po a! Dəŋdəŋ pa' pǔ thə pɑ tə la nə to thə ba a tə́ gɔ yam nthɔm do e a pɑ̀, a bɑ dəŋdəŋ po'o nə po bi a pɑ gɑ po ka cwə nə m̀. 5 Gɑ̌ bɑ thə́ mlù', po pɑ́ bǔ thə́. Mo yə ě cwə nə m̀ biŋ shwə nə e a, mo bɔ gɔ yam nthɔm jɔmyɔ̌m, nə pa' po cyə tə́ pɑ̌ nə m̀ bɑ po tə́ gɔ ku' nə ghə sɔmywə pɑ́. 6 Mo pɑ tə́ cwə nə m̀ bɑ pú gɔ ma' e pé pa' bǔ mthə́ a, e yə́m, pú lak ma' mɔk, é khə́. 7 Po cwə nə m̀, ghɔm tsɑ̌ piŋ shwə nə po, bɑ po gɔ ló ywə yə po wə shəŋ a, a sɔ' bi po. 8 Ywə yə a gu'tə Tá a bɑ gɑ́ po yam nthɔm a yɔ́m, biŋ bɑ pɑkhʉ̌ pɑ̌. 9 Dəŋdəŋ pa' Ta nə̀ ŋkhuŋ á, a dəŋdəŋ po' tə́ gɑ̌ ŋkhuŋ wɔ: Po cwə nthʉm kuŋnyə a. 10 Po zhyə̀ mco' mə̌, bɑ po gɔ cwə nthʉm kuŋnyə a, dəŋdəŋ pa' gɑ̌ jyə́ mco' Tá a shwə nthʉm kuŋnyə e a. 11 Gɑ̌ siŋ wɔ mnwə bɔ awɛ po'o gɑ́ yɑ̀ nə ŋwɛnyə pɑ́ yɔ, a yɔ nə ŋwɛnyə pɑ́ yɑ̀. 12 Mco' mə̌ bɑ gɑ: Po pɑ́ ŋkhuŋnyə wɔ wɔ pa' ŋ də ŋkhuŋ wɔ a. 13 Bi a pɑ sɔmmo lə́ ghə kuŋnyə tə́ shyə́ mo yə e hɑ vɔk e nə thə́ pɔ pyə é ŋkhuŋ wap a. 14 Po ghə̀ ywə yə́ gɑ̌ gɔm bi po a bɑ po bɑ mso pɑ̌. 15 Bi a pɑ́ dɑ́ piŋ ŋkhe wɔ gɑ mghɛ fa', nə pa' gɛfa' tə́ jyə́ ywə yə́ tap e gə a pɑ; gɑ̌ ŋkhe wɔ gɑ́ mso pɑ̌ nə pa' guŋ ywə awɛ yə gɑ jú' bəŋ Tá ǎ gɑ̌ ghə po zhyə́ yá. 16 Tə wɔ nə lə́ shwɔ' a pɑ́, myə̀ nə lə́ shwɔ' wɔ, biŋ jap wɔ gɑ po ghɔ jam nthɔm, a nthɔm mɔ pɑ pɑ́wə tə bi a po lò pɑ́ kɑ́ lɑ́ bi Tá shyə m nə́ tso tsɑ̌ bɑ e gɔ hɑ bi po. 17 Ywə yə gɑ̌ gɔm bi po a bɑ́ gɑ́ po kuŋnyə wɔ wɔ.

Bò dzʉ̌

18 A pɑ gɑ̀ dzʉ̌ pɔ wɔ́, po zhyə́ gɑ e lə́ də́ŋdzə bɔ a. 19 Po lə́ pe' bɑ́ pɔ̀ dzʉ́, bɑ dzʉ̌ ŋkhuŋ ywə yə a bɑ́ yə́ a; da' gɑ po tə́ bɑ́ pɔ̀ dzʉ́ pɑ́: Myə̀ nə lə́ nthé wɔ nə dzʉ̌, a ywə yə a gə tə́ dzʉ̌ pɔ wɔ a. 20 Po kamtə ghɔm tsyə ŋ də ghɔm bi po a gɑ: Gɛfa' tə́ bɑ ě cyə tá fà' pɑ̀; a pɑ́ gɑ́ wap lě shwɔ' mkwə mə̌, bɑ wap gɔ cwɔ' ba mɔ mkwə; a pɑ̀ gɑ́ wap lé ghɔm tsɑ̌ cwəpuŋ, bɑ wap gɔ le ba tsɔ ghɔm cwəpuŋ. 21 Wap gɔ ghə guŋ yá awɛ nə po po'o cyə́ m nə́ tso tsɑ̌, nə pa' a bɑ wap ka zhyə mo yə e nthəm a. 22 Ŋ də́ pe' bɑ́ tə sɔ', ŋ də pe' bɑ́ tə ghɔmnwə bi pú, bɑ mhɔ tə́ bɑ́ nə pu pɑ́; tə cwəlɔ pɑ́ pu lə́ lɑ mhɔ map shwyɛ' wap pɑ́. 23 Mo yə e bɔ ǎ, bɔ ba Tá ǎ. 24 Ŋ də́ pe' bɑ́ tə́ fa' mfa' mɔ gɑ́ myə sɔmmo lɑ̌ m fa' á cəcɑ̌ pu, bɑ mhɔ tə́ bɑ́ nə pú pɑ́; da' gɑ cwəlɔ yə wap yɔ a á, wap jɑwə́ bɔ wɔk pɔ, wɔk pyə̀ Tá ǎ; 25 po'o gɑ ghɔm tsyə a bɑ pu lé bvə nthʉm mco' a pəmtə́ gɑ: Wap bɔ a pɑ́ něné. 26 Cwə yə Parakle yə gɑ̌ gɔ təm é bi po e fɑ bəŋ Tá a gɔ sɔ' sɔ' a, a Zhwenyə nyənyɔ yə a fɑ nə Tá, e gɔ sɔ' pɑ́ ŋkwinthɛ̌ a. 27 A ba wɔ yɔ pɑ́ ŋkwinthɛ̌ a, nə pa' pɑ̀ nə́ bəmtə́ bɑ́ tə fɑ nə to'.

Yohane 16

1 Gɑ̌ gɔm guŋ mnwə bǎ awɛ po'o gɑ po kɑ̀ vʉ̀ nə mləŋtə̀. 2 Pú gɔ sɔ' pɑ́ té wɔ msinagogə. Cwə nəŋ bɑwə sɔ̌' yə mo yə e gɔ zhwə wɔ́ a gɔ pɑ kwɛ m̀ gɑ e pa' a bɑwə nuŋpwɔ' bi Si a. 3 Wap gɔ sɔ' pɑ ghətə po'o nə pa' a bɑ wap ka zhyə́ Tá, wap lə́ nəŋ jyə ba myə̀. 4 Tə́ gɑ̌ siŋ wɔ po'o gɑ cwə bɔ cwə tə sɔ̌', po kamtə gɑ́ ŋ dě siŋ wɔ.

Mfa' Zhwenyə

Ŋ dě tə siŋ wɔ́ tə fɑ cwə nə́ to', nə pa' pɑ lə bəmtə bɑ́. 5 Tə́ cwəlɔ gɑ̌ gɔ m̀ bə̌ŋ mo yə e lə təm a á, la' sɔmmo yɔ nəŋ həŋtə a gɑ́: O gɔ m hɑ? 6 Cwəlɔ yə gɑ̌ siŋ wɔ a, nə zhwíŋ lo nthʉm tʉm po. 7 Tə́ a bɑ́ po'o bɑ gɑ̌ siŋ wɔ nwə nyənyɔ; dzə̀ bɑ bi po bɑ gɑ ŋ gɔ̌, nə pa' bɑ́ tə ghɔ bɑ Parakle tə́ gɔ sɔ' bi po pɑ́; tə́ da gɔ̌ bɑ gɑ gɔ təm e bi po. 8 Sɔ' m nə e, nə yə nə sɔ', e gɔ ghə dzʉ̌ zhyə́ mhɔ, jyə́ nwə dəŋdəŋ ba nə fyɛ': 9 Nə mhɔnwə. Wap tə́ biŋ a pɑ; 10 nə nwə dəŋdəŋ nə pa' gɑ̌ gɔ̀ m bəŋ Tá, po lə ghɔ piŋ pɑ́ yɔ a. 11 Nə nə́ fyɛ' nə pa' a bɑ pu tsə fyɛ' mu fo yəŋ dzʉ̌. 12 Shɑ mnwə yɑ̌ si myə gɑ̌ gɔ siŋ wɔ a, da' gɑ cwəlɔ po ka wuŋ ŋkhu' nə yu'; 13 cwə yə́ Zhwenyə nwə nyənyɔ gɔ sɔ' sɔ' bi po a, e ghə po zhyə guŋ nwə nyənyɔ awɛ, nə pa' e tə́ gɔ sɔ' pɑ́ ghɔmnwə pɑ́ nə yə́ thə́ pɑ. E gɔ sɔ' pɑ́ ghɔmnwə yə e yu' a, pɑ siŋ wɔ guŋ ywə awɛ yə a gɔ sɔ' a. 14 E gɔ sɔ' ghu'tə a nə pa' e gɔ sɔ' pɑ́ kwi ywə yə á bɑ bəm a tə́ siŋ wɔ. 15 Guŋ tsə́ tsyə Tá a bɑ é ghə a bɑ pɑ bəm; á shyə m po'o tə́ bɑ gɔm gɑ́ e gɔ sɔ' ghə po zhyə ywə yə é ŋkwi bəm a.

Nə zhwiŋ gɔ sɔ' cʉ' ŋwɛ́nyə

16 A cʉ' muywə́ po lə piŋ jɔ a, biŋ shʉ' muywə po piŋ jɔ a. 17 Shɑ pɑkhʉ̌ pyə lə bɑ gɔm cəcɑ̌ pú gɑ: E shəŋ nə ghɔm bí pɑ̀ gɑ́ kɑ tə́ gɔm gɑ: A cʉ' muywə po lə piŋ jɔ a, biŋ shʉ' múywə po yɔ a? Kɑ nə ghɔm gɑ́: Gɑ gɔ m bi Tá á? 18 Wap lə bɑwə gɔm gɑ: Muywə bɔ da'tə gɑ kɑ̀? Pyə tə̌ wə ju' ywə yə é bɑwə shəŋ nə ghɔm a pɑ́. 19 Yeso lə́ zhyə́ gɑ́ wap wə́ shəŋ nə həŋtə e nwə, gɔm bi pu gɑ: Po wə shəŋ cəcɑ̌ po nə zhyə ywə yə́ ghɔm tsɑ̌ gɑ́: A cʉ' muywə po lə piŋ jɔ a, biŋ shʉ' muywə po piŋ jɔ a da'tə a. 20 Kwa' nyənyɔ nyənyɔ gɑ̌ siŋ wɔ gɑ́ po gɔ pɑ zhwíŋ piŋ pɑ lɔ̀, a dzʉ̌ pɑ ŋwɛnyə; po gɔ sɔ' pɑ zhwiŋ, da' gɑ zhwìŋ yɔ gɔ sɔ' pʉɔ cʉ' ŋwɛnyə̀. 21 Cwə yə mjwǐ bɑ dzə́ a, jwiŋ nə pa' yə cwə bɑ ǎ ku'; da' gɑ́ e shwə tə́ dzə́ mú, e lə piŋ ŋkhamtə́ ghəghʉɔ e, e ŋwɛnyə ŋwɛnyə nə pa' e tsə mo a. 22 A bɑ po'o tə́ pǒ cwəlɔ̀ bɑwə jwiŋ; da' gɑ gɑ̌ gɔ sɔ' piŋ yɔ wɔ m sə, tʉm tsɔ ŋwɛnyə, ŋwɛnyə yə bi a pɑ́ sɔmmo lə kwi bi po a. 23 A po'o tə́ a gɔ sɔ' pɑ́ nə tyɛ'dzʉ́ bɔ, po lə piŋ həŋtə a sɔmywə. Kwa' nyənyɔ nyənyɔ gɑ̌ siŋ wɔ gɑ̀ po ló bǎ kɑ̀ lə bi Tá a m nə tso tsɑ̌ bɑ e gɔ hɑ bi po. 24 Tə́ ŋkhəm cwəlɔ po ka lo sɔmywə bi Ta a m nə tso tsɑ̌: Po ló, pu gɔ hɑ bi po tə́ ŋwɛnyə yɔ pɑ tə dzə.

Nə lo' shyə dzʉ́

25 Gɑ̌ lɑ pɑ̀ mghɔm tə tútə nə siŋ wɔ guŋ mnwə bɔ awɛ, da' gɑ́ cwə wə sɔ̌' yə ŋ tə́ gɔ piŋ ghɔmnwə bi po m nə nthi bɔ a pɑ́, yə gɑ̌ gɔ siŋ wɔ nwə nə́ Tá sɔsɔ̌ a. 26 A gɔ sɔ' pɑ nə tyɛ'dzʉ́ bɔ po ló ywə bi Tá nə tsó tsɑ̌, da' gɑ ŋ tə́ gɔm bi po gɑ́ gɑ̌ gɔ sɔ' cwyɛ'nyə Tá nə po pɑ́, 27 nə pa' kwa' yʉ Tá ŋkhuŋ wɔ, shyə́ m nə pa' a bɑ pǒ kuŋ a, biŋ bíŋ gɑ́ gɑ̌ nthəm m̀ nə́ Si. 28 Gɑ̌ nthəm m nə́ Tá sɔ' nthʉm dzʉ́, biŋ bɑwə cwəlɔ nthəm nthʉm dzʉ́ gɔ m bi Tá. 29 Pɑkhʉ̌ pyə́ ghɔm bi e gɑ: Cwəlɔ ǒ wə gɔmnwə sɔsɔ̌, o lə piŋ bɑwə gɔm ghɔm tə tútə́ pɑ; 30 Cwəlɔ pyə̌ zhyə́ gɑ́ o bɑ o zhyə́ guŋ ywə awɛ, pyə̌ zhyə gɑ́ o tə́ yɑ̌ wə byap ga pu həŋtə́ o sɔmywə pɑ́. A ywə́ yə a gə tə́ pyə piŋ gɑ́ o nthəm m nə Si a. 31 Yeso pa' bi pú gɑ: Pǒ piŋ cwəlɔ a? 32 Po yɔ́, cwə̌ wə́ sɔ̌', cwə bɔ tsə pɑ̀ yə̌ŋ, yə́ po gɔ sɛtə, bǎ yà mo lə́ ghɔ nə yə məjyə, po tak á do m̀ a. Da' gɑ ŋ tə́ bɑ́ dǒ m̀ pɑ. Pyə́ Tá nə bɑ. 33 Gɑ̌ siŋ wɔ nwə bɔ po'o gɑ́ po cyə m nə m̀ gə hwitə̀. Nthʉm yəŋ dzʉ̌ po bɑwə jɔ ghəghʉɔ. Tə́ po kaktʉɔ, gɑ̌ bɑ gɑ̌ ló' shyə́ dzʉ́.

Yohane 17

Mcwyɛ'nyə Yeso

1 Yeso lə́ nə mìŋ nə ghɔm po'o, bʉ' mnyə myə́ kɛbəŋ gɔm gɑ: Tǎ, cwə̌ ku', ghu'tə́ Mú u tə́ Mú u ghu'tə o. 2 Tə́ a piŋ shyə m nə gʉ' yə o hɑ bi e nə́ guŋ monəŋ awɛ a, e hɑ vɔk mama bi guŋ pɔ awɛ pyə o hɑ wap bi e a. 3 Vɔk mama bɔ pɑ́ gɑ́ wap zhyə́ o, wə da' Si nyənyɔ, biŋ jyə́ mo yə́ o nthəm e a, Yeso Kristo. 4 Gɑ̌ ghu'tə o dəmcǎ', gɑ̌ miŋ fa' tsyə o lə́ hɑ̌ gɑ́ gə a. 5 Cwəlɔ, m Ta, ghu'tə a bəŋ o, nə mtiŋ ghu'tə yə a lə bɑ gɑ̌ ghə bəŋ o tə́ dzʉ̌ la' bɑwə a. 6 Gɑ̌ ghə pɔ pyə o lə hɑ wap bəm nthʉm dzʉ a zhyə tso tsʉ̌. Wap lə́ bɑ́ bu, o hɑ́ wap bəm, wap lě giŋ nə pa' ghɔm tsǔ gɔm a. 7 Wap bɑ wap zhyə́ cwəlɔ gɑ́ guŋ ywə awɛ yə́ o hɑ bəm a fɑ́ pɑ́ bu. 8 Wap zhyə́ gɑ́ mghɔm myə gɑ̌ gɔm bi pú a bɑ mghɔm myə o hɑ bəm a. Wap kwi mghɔm bɔ; wap zhyə́ nyənyɔ gɑ́ gɑ̌ nthəm nə o nə́ŋ biŋ bíŋ gɑ́ wə nə nthəm a. 9 Gɑ̌ shwyɛ'nyə o nə pú, ŋ tə́ shwyɛ'nyə o m nə dzʉ̌ pɑ́; gɑ̌ shwyɛ'nyə o nə pɔ pyə́ o hɑ́ wap bəm a: Wap bɑ́ bu, 10 a piŋ bɑ guŋ ywə yə ǎ bəm a pɑ́ bu, guŋ ywə yə a bu a pɑ bəm, a po'o tə́ pu lə́ gu'tə a shyə m nə́ pú. 11 Tə fɑ cwəlɔ ŋ tə́ jɑ nthʉm dzʉ́ pɑ́; tə́ wap shwə pɑ nthʉm dzʉ́; tə́ sɔ' m nə́ m̀ gɑ̌ bɑwə sɔ' m bu. Ta dɔlɔ̌, pyap wap shyə́ m nə́ tso tsǔ tsyə o lə́ hɑ̌ bəm a, po'o gɑ wap pɑ yɑmu' pa' wɔk pú bɑ́ yɑmu' a. 12 Cwə yə pyə a pú lə́ bəmtə́ bɑ a, ŋ bɑ́ byap wap shyə m nə́ tsò tsǔ tsyə o lə́ hɑ bəm a: Ŋ dě pfɔ́ptə wap tə́ la' sɔ́m mo yap pi tə́ ně da' mú bi pǐ, po' gɑ ywə yə pu lə və a pəmtə̀. 13 Cwəlɔ gɑ̌ wə sɔ' m bəŋ o, tə́ ba tə́ po'o, nthʉm yəŋ dzʉ̌, jɑ́wə siŋ wap mnwə mɔ̌ po'o gɑ wap ghə ŋwɛnyə a, guŋ ŋwɛnyə awɛ nə pú. 14 Ŋ dě hɑ ghɔm tsʉ̌ bi pú, dzʉ̌ piŋ bɔ wap nə pá' wap tə́ bɑ pɑ dzʉ́ pɑ́, dəŋdəŋ pa' ŋ tə́ bɑ́ yə dzʉ́ a pɑ́. 15 Ŋ tə́ dó bu gɑ́ o té wap nthʉm dzʉ́ pɑ. Gɑ̌ dó bu gɑ́ o pfɔptə wap nə Cwəpuŋ. 16 Wap tə́ bɑ pɑ dzʉ́ pɑ́, dəŋdəŋ pa' ŋ tə́ bɑ yə dzʉ́ a pɑ́. 17 Lɑ́ nyənyɔ dɔnyə wap: Ghɔm tsǔ bɑ́ nyənyɔ. 18 Dəŋdəŋ pa' o nthəm a nthʉ́m dzʉ́ a, gɑ̌ tə́m wap nthʉm dzʉ́. 19 Gɑ̌ guŋ bɑ yɑ̌ pɑ nə pú, po'o gɑ ba wap yap wuŋ bɑ́ pɑ nə nyənyɔ. 20 Ŋ tə́ shwyɛ'nyə o da' nə pu pɑ́, gɑ̌ shwyɛ'nyə bɑ m nə pɔ pyə á gɔ cyə m nə ghɔm tsap wap piŋ á a; 21 gɑ́ guŋ yap awɛ pɑ́ yɑmu' pa' wə Tá o bɑ bəm biŋ bɑ́ bu á, gɑ́ ba wap yap pɑ́ nə pu tə́ dzʉ̌ piŋ gɑ́ wə̀ nə́ nthəm a. 22 Gɑ̌ bɑ gɑ hɑ ghu'tə yə o lə́ hɑ bəm a bi pú, po'o gɑ́ wap pɑ yɑmu' pa' pu bɑ́ yɑmu' a. 23 A bɑ bi pú pa' o bɑ́ bəm a, po'o gɑ wap pɑ́ kwa' nə ŋkwishwə pɑpuŋ tə́ a cyə m po'o a dzʉ̌ zhyə gɑ́ wə nə́ nthəm a, ba gɑ́ a bɑ ǒ kuŋ wap dəŋdəŋ pa' o ŋkhuŋ a lə. 24 Ta, gɑ̌ shəŋ gɑ́ tsʉ' yə gɑ̌ nə́ a, pɔ pyə o hɑ wap bəm a, pyə a pú pəmtə́ bɑ́ tsʉ'u, po'o gɑ́ wap yɔ ghu'tə yə́ o hɑ bəm a, nə pa' o le ŋkhuŋ a tə́ dá' nyaptə dzʉ́. 25 Tá dəŋdəŋ, a bɑ dzʉ̌ ka zhyə́ o, gɑ̌ bɑ gɑ̌ zhyə o, ba pɔ pɔ zhyə́ gɑ o təm a. 26 Gɑ̌ ghə̀ wap zhyə́ tsó tsǔ, biŋ bɑ gɔ kwi' ghə wap zhyə po'o gɑ́ ŋkhuŋnyə yə o nə ŋkhuŋ a pɑ̀ bi pú ba myə̀ piŋ bá bi pú.

Yohane 18

Nə ghəm Yeso

1 Yeso lə́ ghɔ̌m po'o, gɔ̌ pu a pɑkhʉ̌ pyə́ nə yəmu' jʉɔ cwɛ mcɑ Kedroŋ; mu' kà lə bɑ tsʉ'u yə e lə ko nə pu a pɑkhʉ̌ pyə́ a. 2 A lə́ nə pɑ bɑ Yuda, yə e lə bɑ gɔ hɑ Yeso a zhyə́ tsʉ'u bɔ. Nə pa' Yeso pu a pɑkhʉ pyə lə́ bɑ wap lə cu'tə tsʉ'u mcʉm jɔmyɔ̌m. 3 E lə tiŋnyə thə́dzə̀, msəŋwi pu a pɑ pyap pɑ́ jʉ̀m e, bɑ mkamsi gwyəgwyə pu a pɑ Farisai nə́ nthəm wap. Wap lə kǒ kà, bɑ wap wim mcu' khá' pu a mlǎmbù, ba tsə shù. 4 Pa' Yeso lə́ bɑ ě zhyə́ ywə yə́ a wə gɔ sɔ' nə́ é a, e lə fʉ'tə nɑ́ e gɔ bəŋ pú, gɔm bi pú gɑ: Pǒ shəŋ wɑ̀? 5 Wap pa' bi e gɑ: Yeso yə́ Nazarɛt. E ghɔm bi pú gɑ gɑ̌ bɑ́ é. A lə́ nə pɑ̌ po'o Yuda yə e lə bɑ gɔ hɑ Yeso a pɑ cəcɑ̌ pu. 6 Yeso lə́ cwə tə́ gɔm bi pu gɑ́ gɑ̌ bɑ́ e, wap fʉ' jʉ̀mjʉ̀m bvʉtə́ si. 7 Yeso lə kwi' həŋtə́ wap m sə gɑ: Pǒ shəŋ wɑ? Wap pa' gɑ: Yeso yə́ Nazarɛt. 8 Yeso pa' bi pú gɑ: Gɑ̌ siŋ wɔ gɑ́ gɑ̌ bɑ e. A pɑ gɑ́ po shəŋ pɑ́ myə̀, po tak pɔ pɔ gɑ wap ghɔ. 9 A lə pɑ̌ po'o, ghɔm tsyə Yeso lə ghɔm gɑ: Ŋ kha pi sɔmmo nə́ pɔ pyə o lə hɑ̌ wap bəm á, a pəmtə. 10 A lə pɑ̌ po'o Simon Pɛtrɔ yə a lə bɑ ě tyəp nyə a té nyə bvɔ nə nɔk gɛ fá' ŋkhamsi gwyə́, ja' təŋ ě yə tʉɔ; tsǒ gɛ fà' bɔ lə́ bɑ Malkos. 11 Yeso ghɔm bi Pɛtrɔ gɑ: Nyəŋ piŋ nyə́ o bvɔ! Ŋ tə́ gɔ nwə́ nthu' yə Tá hɑ bəm a pɑ a? 12 Msə̌ŋwi pu a tadyə yap ba pɑ pyap pɑ Yudea lə ghəm Yeso cwəlɔ ŋkwɑ e.

Yeso dzə̌ Ana pu Kaifa, Pɛtrɔ kəŋnyə Yeso

13 Wap lə́ ləŋdzə dɑ é gɔ dzə̌ Hana. Hana lə́ bɑ́ tá jwi Kaifa yə e lə́ bɑ́ ŋkhamsi gwyə gu' bɔ a. 14 Kaifa bɔ nə lə gɔm bi pɑ Yudea gɑ́ dzə gɑ́ ta' mò pfʉ̀ nə thə́ pɔmnəŋ. 15 Simon Pɛtrɔ pu mu' mukhʉ̌ lə yap jʉ̌m Yeso. Pa' a lə́ bɑ́ bɑ ŋkhamsi gwyə zhyə́ e a, pu Yeso lə pəmtə ŋkho shwədyə̌ e. 16 Pɛtrɔ wuŋ dzʉ́, bə́ŋ jyədyə̌; mukhʉ̌ yə a lə bɑ ŋkhamsi gwyə zhyə́ e a lə tə̌m, jɔ gò yə́ e lə́ bɑwə byap jyədyə̌ a, gɔm é ghə Pɛtrɔ ko dyə. 17 Múgò gɛ fà' yə e lə́ bɑwə byap jyədyə̌ a lə ghɔm bi Pɛtrɔ gɑ: Ba wə yǔ tə́ bɑ̀ múkhʉ̌ bɛ yəŋ á? Pɛtrɔ pa' gɑ: A tə a pɑ́. 18 Mghɛ fà' pu a pɑ́ pyap tsʉ' lə bɑ wap sumɔ́k bɑ̀ bəŋ o bɑwə jwɔk, nə pá' fɔk lə́ bɑwə ŋkhú. Bà Pɛtrɔ lə bɑ yə́ tsʉ'u bɑwə jwɔk mɔk. 19 Ŋkhamsi gwyə lə to' nə́ tə́ŋtə Yeso nwə̀ nə pɑkhʉ̌ pyə ba nə ywə yə e ji'tə wap a. 20 Yeso pa' bi e gɑ: Ŋ də gɔmnwə bi guŋ pɔ awɛ pɑ́ sɔsɔ̌, ŋ də ji'tə ywə guŋ mcwə awɛ dyə́ sinagogə ba m Dyə Si, tsʉ' yə guŋ pɑ Yudea awɛ lə shu'tə nə a, la' gɔm sɔmywə m càm. 21 Nwə̀ kɑ́ o həŋtə pɑ́ myə̀ nwə̀ nə ywə yə ŋ də ghɔm a? Ywə yə́ ŋ də ghɔm a, həŋtə bi pɔ pyə wap lə́ yu' a. Wap zhyə ywə yə ŋ də ghɔm a kwa' pɑpúŋ. 22 Yeso lə cwə̌ tə́ gɔm po'o, mu' səŋwì gɛ pyap yə e lə bɑ tsʉ'u a cwɔ pǔ təŋ é gɔm gɑ: A pa' o gɔmnwə bi ŋkhamsi gwyə a lə́? 23 Yeso pa' bi é gɑ: A pɑ́ gɑ́ gɑ̌ ghɔm a pɔk, o la'tə a yə ǎ pɔk nə́ a; nəŋ bɑ́ gɑ́ gɑ̌ ghɔm a puŋ, bɑ o nəŋ shwɔ a gɑ́ kɑ̀? 24 A lə́ pɑ̌ po'o pu kwɑ̀ Yeso, Hana cya é bi Kaifa, ŋkhamsi gwyə. 25 A lə́ nə pɑ̌ po'o Pɛtrɔ pɑwə jwɔk pɑ́ mɔ̌k. Pú ghɔm bi e gɑ: Ba wə yǔ tə́ bɑ mu' mukhʉ̌ é a lə́? Pɛtrɔ pa' gɑ: Ŋ tə́ bɑ e pɑ́. 26 Mu' mo nə mghɛ fa' ŋkhamsi gwyə, fɑ́ mo yə Pɛtrɔ lə́ yá' təŋ e a lə ghɔm bi Pɛtrɔ gɑ: Ŋ khě tə́ yɔ wɔ pò é nthʉm kà lə̀? 27 Pɛtrɔ lə̀ pǐŋ ŋkwi' ŋkhəŋnyə é m nə́ kəŋnyə sə́, a wuŋ bɑ pɑ̀ cwə o bɔ, ko' túŋ.

Yeso dzə̌ Pilato

28 A lə́ nə́ pɑ̌ po'o bɑ pu lɑ Yeso fɑ wə Kaifa gɔ m wə gɔpna'. A lə́ bɑ mɑfɔkdzʉ̌. Pɔ pyə wap lə lɑ e nə gɔ a lə ko la' wap ko wə gɔpna', bɑ bwɔk pa' wap gɔ viŋ nɑ tsap tə ghɔ tsʉ́ paska a. 29 Pilato lə tə̌m dzʉ́ jɔ wap, gɔm bi pú gɑ: Pǒ butə bɛ yəŋ nə kɑ? 30 Wap pa' gɑ: Mo yəŋ la' pe' bɑ́ bɑ e ka ghə nwə bɔkpɔ̌k bɑ pɑ́ pyə hɑ é bu a? 31 Pilato ghɔm bi pú gɑ: Pɑ́ kwa' wɔ nə lɑ e gɔ fyɛ' e nə mco' mɔ. A tə́ bɑ́ bɑ pu piŋ gɑ̀ bi a pɑ́ pyə ghə mo pfʉ́ pɑ́. 32 A lə́ bɑ̀ po' tə́ ghɔm tsyə́ Yeso lə́ ghɔm nə́ nthi vʉ̌ yə e lə bɑ̀ gɔ la' pfʉ́ a pəmtə̀. 33 Pilato lə́ pɑ̌nyə́ ŋkhó wə e, ŋkhe Yeso, gɔm bi gɑ: O bɑ fò pɑ Yudea? 34 Yeso pa' bi e gɑ: Pɑ́ kwa' wə̀ nə gɔm kɑ shɑ́ pɔ nə gɔm bu nə m̀? 35 Pilato pa' bi e gɑ: Gɑ̌ bɑ yə Yudea a? Guŋ o pu a mkamsi gwyə hɑ́ o bəm! A bɑ o ghə la? 36 Yeso pa' gɑ: Nəfo tsɑ̌ tə́ bɑ nə yəŋ dzʉ̌ pɑ́. Nəfo tsɑ̌ la' bɑ́ nə yəŋ dzʉ̌ bɑ pɑ pyap a lo'shù gɑ pu kɑ hɑ̌ a bi pɑ Yudea. Da' gɑ́ cwəlɔ Nəfo tsɑ̌ tə̌ nə yəŋ dzʉ̌ pɑ. 37 A pɑ́ po'o Pilato ghɔm bi é gɑ: O bɑ fo a? Yeso pa' bi é gɑ: Wə nə gɔm gɑ́ gɑ̌ bɑ̀ fo. Pu lə dzə́ a, sɔ' nthʉm yəŋ dzʉ̌ pɑ ŋkwinthɛ̌ nyənyɔ. Mo yə e bɑ nə nyənyɔ a ju' gi a. 38 Pilato ghɔm bi e gɑ: Nyənyɔ bɑ́ kɑ? E lə ghɔm po'o gɔ dzʉ́ jɔ pɑ Yudea gɔm bi pu gɑ: Sɔ' m nə m̀ ŋ khɑ yɔ́ sɔmywə yə po butə é nə a. 39 Da' gɑ́ pa' a bɑ́ mà gɑ a pɑ nə paska a ŋthak ta' mo nəŋ bi po a, pǒ kùŋ gɑ ŋthak fo pɑ Yudea nəŋ bi po a? 40 Wap lə to' nə cwe gɑ: Tə́ mo bǎ pɑ, tak pɑ́ Barabas. A lə nə pɑ̌ po'o Barabas pɑ̀ Samshwə.

Yohane 19

1 A lə́ pɑ̌ po' Pilato lɑ Yeso bɑnyə, gə pu lɑ shɔm shwɔ e. 2 Msəŋwi lə sǔ co' thə́ e, bɑ wap lɑ júŋ nə bá', ŋkwa sʉəsʉə pɛ dzə́ fɔk nə e. 3 Wap lə́ bɑwə gɔ bəŋ e lə́ bɑ gɔm gɑ: Ca'tə, m fo pɑ Yudea! Biŋ bɑ shwɔ mshɔm nə e. 4 Pilato lə pǐŋ ŋkwi' nthəm dzʉ́ gɔm bi pɑ Yudea gɑ: Po yɔ, gɑ̌ lɑ e nthəm dzʉ́ dzə po. Po zhyə gɑ́ ŋ kha yɔ sɔmywə yə pu butə e nə a. 5 Yeso lə́ nə tə̌m dzʉ́ cwəlɔ, bɑ pu su co' júŋ thə́ e biŋ ŋkwa pɛ dzə́ nə e. Pilato ghɔm bi pu gɑ: Mbɛ yəŋ. 6 Da' gɑ́ mkamsi gwyə pu a pɔ pap lə́ cwə̌ tə jɔ e, guŋ bɑ shwe gɑ: Kwe e bɛnyəpɛnyə! Kwe e bɛnyəpɛnyə! Pilato ghɔm bi pu gɑ: Pɑ kwa' wɔ ŋkwe e thə bɛnyəpɛnyə nə pa' myə̀, ŋ kha yɔ sɔmywə yə bi a pɑ́ pú putə e nə a. 7 Pɑ Yudea pa' bi e gɑ: Pyə bɑ pyə ghə mu' tɑ̀' mcò', a pɑ gɔ cyə m nə́ mcó' bɔ pu zhwə e, nə pa' a bɑ ě ke nɑ e gɑ Mú Si. 8 Pilato lə cwə̌ tə ju' ghɔm tsɔ, bwɔk nə gɔ dzə. 9 E lə pɑnyə dyə e, gɔm bi Yeso gɑ: Kwa' wə nthəm hɑ? Da' gɑ́ Yeso lə ghɔm sɔm nwə bi e. 10 A pɑ po'o Pilato ghɔm bi e gɑ: O ŋkhəŋnyə pa' nə ghɔmnwə bəm. O ka zhyə gɑ́ gɑ̌ bɑ gɑ̌ ghə tʉɔ nə gə pu tak o nəŋ kɑ nə ghə pu kwe o bɛnyəpɛnyə a? 11 Da' gɑ Yeso pa' bi e gɑ: O kě tə ku' nə ghə sɔm tʉɔ nə m̀ tə a bɑ gɑ kɛbəŋ nə hɑ bu; a shyə m po'o tə́ mo yə e hɑ a bu a pɑ́ bɑ e kwà kwa' mɑ mhɔnwə myə ǎ cyə a! 12 Tə́ fɑ po'o, Pilato pɑ shəŋ nə tak e nəŋ, da' gɑ́ pɑ Yudea to' nə pɑ́ shwe biŋ bɑ gɔm bi Pilato gɑ́: O tak e nəŋ bɑ o tə̌ wə giŋ pa' so Kasa a pɑ́! Nə pa' mo ghɔm gɑ e fo bɑ e gɛ bo Kasa. 13 Pilato lə cwə̌ tə́ ju' po'o dɑ Yeso nthəm jap e dəm kwɔ' shɛ́, tsʉ' yə pu ŋkhe gɑ́ Litostrotos, a pɑ nə Ebraika bɑ gɑ Gabata. 14 A lə́ bɑ tyɛ' nyaptə̀ mnɑ́ nə Paska, gwɛ́ a nə mɔkcʉ́. Pilato ghɔm bi pɑ Yudea gɑ: Yɔ́ fo yɔ̌ yə̌ŋ. 15 Da' gɑ wap to' nə pɑ shwe gɑ: E pfʉ́! E pfʉ́! Kwe e bɛnyəpɛnyə! Pilato piŋ gɔm gɑ: Gɑ̌ gɔ kwé fo yɔ bɛnyəpɛnyə lə́? Mkamsi gwyəgwyə pa' bi e gɑ: Pyə ka ghə mu' fo tə ně Kasa. 16 A lə pɑ̌ po'o e hɑ Yeso bi pú gɑ pú kwé e bɛnyəpɛnyə. Wap fɔm e cwəlɔ.

Pu kwe Yeso bɛnyəpɛnyə e pfʉ́

17 Yeso lə kwa bɛnyəpɛnyə e pɑ́ kwa' yʉ́ nə nthəm gɔ tsʉ' yə pu ŋkhe gɑ́ tsʉ' kwé thə mó a, a pɑ nə Ebraika bɑ gɑ Gɔlgota a. 18 Pu lə́ kwe é nə bɛnyəpɛnyə tsʉ'u bɔ, biŋ ŋkwe ba shɑ pɔ pɑpʉə; Yeso pɑ cəcɑ̌ pú. 19 Pilato lə́ ba e və mu' ŋwa'nyə gə pu yap thə bɛnyəpɛnyə; a lə bɑ̀ pu və nə́ gɑ́: Yeso yə Nazarɛt, fo pɑ Yudea. 20 Bo'gwyə pɑ Yudea lə kě ŋwa'nyə bɔ, nə pá' tsʉ' yə pu lə kwe Yeso nə a lə́ bɑ bəŋ tisuŋ. Ŋwa'nyə piŋ bɑ́ bɑ pu və nə́ ghɔm Ebraika ba nə ghɔm Roma, ba nə Grikia. 21 Mkamsi gwyə pɑ Yudea ghɔm bi Pilato gɑ: Pu ka bɑ́ gɔ və gɑ́ fo pɑ Yudea pɑ̀. Pu kɑ̀ bɑ̀ gɔ və m gɑ: Mo yə̌ŋ bɑ e ghɔm gɑ e bɑ́ fo pɑ Yudea. 22 Pilato pa' bi pu gɑ: Ywə yə gɑ̌ və a, gɑ é da' bvə́! 23 Msəŋwi lə mǐŋ nə kwe Yeso nə bɛnyəpɛnyə, dɑ dzə́ tsyə́ nə gap jyə́ pfʉə, tá' jyə̀ pɑ́ bi tà' mo. A cʉ' sʉəsʉə dzə é yə a lə bɑ pu pá' la' pu ya' sɔmtsʉ' nə tə fɑ thə́ a. 24 Msə̌ŋwi lə ghɔm cəcɑ̌ pu gɑ: Ka pɑ khitə, pɑ tam nthuŋ nə jɔ mo yə ě tsʉ a: A pɑ̀ po'o ywə yə pu lə və a pəmtə gɑ́: Wap ghaptə dzə tsɑ̌, dɑ sʉəsʉə dzə a ntham nthuŋ. Yəŋ bɑ ywə yə msəŋwi lə ghə a. 25 A lə bɑ bəŋ bɛnyəpɛnyə Yeso map e pɑ tsʉ'u bɑ ě tiŋnyə ba Maria fɑ map e, jwi Clopas ba Maria yə Makdala. 26 Yeso lə nə́ yɔ̌ map e ba mukhʉ e yə e lə ŋkhuŋ e a bəŋ e gɔm bi map e gɑ: Mɑmjwi yɔ mú o yə̌ŋ. 27 Biŋ gɔm bi mukhʉ e gɑ: Yo mɔ yə̌ŋ. Tə́ fɑ cwə o bɔ mukhʉ e lɑ e dyə e. 28 A lə pɑ po'o, Yeso zhyə gɑ guŋ ywə awɛ mi, po'o gɑ ywə yə pu lə və a pəmtə́ tə́ ŋkhəm cwiŋ, gɔm gɑ: Ghak a wə ŋkhə. 29 Mu' ghʉɔ lə bɑ tsʉ'u bɑ pu nyəŋ mcyə́ nə tə a ló. Pu lə sǔ cu' ywə nə mcyə́ bɔ, nthə́ŋ nə́ thə́ kam ywə yə pu ŋkhe gɑ izopə a, nya bəŋ shwə e. 30 Yeso lə cwə̌ tə́ nwə mcyə, gɔm gɑ: Guŋ ywə awɛ mì; biŋ shiŋ thə e, hɑ zhwenyə.

Mcyə ba shyə

31 Pa' a lə́ bɑ tyɛ' nə nyaptə nɑ a, pɑ Yudea lə pɑ bwɔk gɑ pfə mo kɑ cwə̌ nə bɛnyəpɛnyə nə cwə sabat nə pa' tyɛ' sabat bɔ lə bɑ m dəŋ, wap ghɔ jɔ Pilato gɔm gɑ e ghə pu po'tə mkwə map, gə pu cʉɔ wap. 32 Msə̌ŋwi lə sɔ' cwəlɔ bo'tə mkwə dəŋdzə ba batə mo yə pu lə kwe wap pu a pu a. 33 Wap lə nə kəm nə Yeso jɔ gɑ́ ě da' pfʉ́; a pɑ́ po'o la' wap po'tə mkwə myə́. 34 Da' gɑ́ mu' ta' səŋwi lə lɑ kuŋ swɔp be é, mcyə ba shyə wuŋ nthəm. 35 Mo yə e lə yɔ a ŋkwinthɛ̌ nə ywə yə e lə yɔ a, kwǐnthɛ e piŋ bɑ nyənyɔ, ba po'o mo bɔ jyə gɑ e gɔm ywə yə ǎ pɑ nyənyɔ a, po'o gɑ́ ba wɔ yɔ piŋ. 36 Guŋ ywə bɔ awɛ nthəm po'o tə ywə yə pu lə və a a pəmtə; bɑ pu lě bvə gɑ: Pu tə́ gɔ la' po' sɔm kwé ě pɑ́. 37 Ba mu' tsʉ' ŋwa'nyə ŋkwi' bɑ́ gɔm gɑ: Wap gɔ sɔ' yɔ mo yə wap swɔp e a.

Nə nyəŋ Yeso sì

38 Mnwə bɔ lə cyə̌, Yosɛp yə Arimatea, yə e lə bɑ mukhʉ Yeso, da' gɑ́ bɑ dʉmnyətʉmnyə, bɑ bwɔk pɑ Yudea, lo bi Pilato gɑ́ e piŋ gɑ e cʉɔ pfə́ Yeso. Pilato piŋ, Yosɛp sɔ' shʉɔ pfə Yeso. 39 Ba Nikodemo yə e lə́ ghɔ jɔ Yeso mtsʉ́' a lə sɔ' yə; nə sɔ' gwim mu' ŋi'nyə mwɑ mira pu aloɛs gwɛ a nə kilo shwɔpta mgham tha. 40 Wap lə́ lɑ pfə Yeso cwəlɔ gɔ dɑ mbak dzə dzʉm pu a mwɑ damnyəlamnyə pa' a bɑ nə ma pɑ Yudea nə lə nthəŋ mo a. 41 A lə bɑ́ nə́ tsʉ' yə pu lə kwe Yeso nə bɛnyəpɛnyə nə a, kà pɑ tsʉ'u, mu' thəsì pɑ nthʉm kà bɔ tə pu guŋ nyəŋ sɔmmo nə́. 42 A lə cyə m pa' pɑ Yudea lə bɑwə nyaptə nɑ tsap a, ba pa' ghʉ̌m bɔ lə bɑ̀ pɑ́ tsʉ' u a pu nyəŋ Yeso nthʉ́m o.

Yohane 20

Pɑkhʉ̌ Yeso ghɔ̀ thəsì

1 A lə pɑ̌ nə dəŋdzə̀ tyɛ'dzʉ́ nə gap dzʉ́, kwa' mɑ́ mpʉmdzʉ̀, tə tsʉ́' yɑwə sonyə, Maria yə Makdala ghɔ thəsì, jɔ bɑ̀ pú cʉɔ gwɔ' nə thəsì. 2 E khʉdʉ̌ ŋkwyatə́ Simon Pɛtrɔ pu yəmu' mukhʉ̌ yə́ Yeso lə ŋkhuŋ e a gɔm bi pu gɑ: Pú té Cyəpɔ thəsì, la' pyə zhyə tsʉ' yə pú yap é nə a. 3 A lə́ pɑ̌ po' Pɛtrɔ pu yəmu' mukhʉ̌ tə́m gɔ thəsì. 4 Pa' wap pɑpʉə lə bɑwə́ bəmtə́ khʉdʉ a, yəmu' mo lə ŋkhʉdʉ̌ shyə Pɛtrɔ dəŋdzə ŋwak thəsì, 5 bɔnyə, jɔ mbak dzə́ bɑ pu yap tsʉ'u. Da' gɑ́ e lə ko nthʉm sì. 6 Simon Pɛtrɔ yə e lə bɑ jʉ̀m e a, lə ŋwak yə thəsì ŋkho nthʉm sì, jɔ mbak dzə bɑ pu yap. 7 Ba dzə yə pu lə nə hwyə thə e a, bɑ pu ka yap bəŋ mbak dzə, bɑ pu tsʉmtə jap pɑ nə yə́ tsʉ'. 8 A lə pɑ̌ po'o tə́ yəmu mukhʉ̌ yə e lə ləŋdzə ŋwak a piŋ ŋkho yə́ nthʉm sì; jɔ́ biŋ bíŋ. 9 A lə nə pɑ̌ po'o bɑ wap ka wuŋ ju' ywə yə a bɑ pu lé bvə gɑ́ Yeso gɔ la' yam nə vʉ̌ a. 10 A pɑ́ po'o pɑkhʉ̌ pɑnyə mla' map.

Maria yə Makdala yɔ Cyəpɔ

11 Maria lə́ bɑ ě wuŋ bəŋ thəsì m dzʉ̌ bɑwə dɔ̌. E lə pɑ̌ dɔ, bɔnyə bɑ de thəsì 12 biŋ jɔ pɑ aŋgəle pɑpʉə, bɑ wap kwa dzə fə́fə́, shwə tsʉ' yə pu lə yap pfə Yeso nə a, mu' pɑ nə thə́ e, yə mu' pɑ nə mkwə myə́. 13 Wap lə ghɔ̌m bi e gɑ: Mɑmjwi o dɔ kɑ? E pa' bi pu gɑ: Wáp bɑ wáp té Cyəpɔ à, la' jyə́ tsʉ' yə wap yap e nə a. 14 E lə pɑ gɔm po'o, fɛ nɑ e jɔ Yeso bɑ ě tiŋnyə tsʉ'u, da' gɑ̀ e la tə bɑwə jyə gɑ e Yeso pɑ̀. 15 Yeso ghɔm bi e gɑ: Mɑmjwi, o dɔ kɑ? O shəŋ wɑ? Pa' e lə́ bɑwə ŋkwɛ gɑ pɑ byap kà nə lə́ bɑwə gɔm a, e lə pǎ' bi e gɑ: Cyəpɔ a pɑ́ bɑ wə nə nthé é, o siŋ a tsʉ' yə́ o jap e nə a gɔ dɑ e. 16 Yeso ghɔm bi e gɑ: Maria. E wuŋ fɛ nɑ e gɔm bi e nə ghɔm Ebraika gɑ: Rabuni, a pɑ́ da'tə gɑ: Tá gɛ zhi'tə. 17 Yeso ghɔm bi e gɑ: Kɑ̀ kyəp á! Nə pa' ŋ kha wuŋ ŋkwɔ' bəŋ Tá ǎ. Sɔ' m nə wə, ghɔ jɔ mfɑ pɑ̌ gɔm bi pú gɑ gɑ̌ kwɔ' m bə̌ŋ Tá ǎ yə e bɑ Tá yɔ a, bəŋ Si a yə e bɑ Si yɔ a. 18 Maria yə Makdala lə sɔ' cwəlɔ siŋ pɑkhʉ̌ gɑ: Gɑ̌ yɔ Cyəpɔ, e ghɔm bəm po'o.

Pɑkhʉ̌ yɔ Cyəpɔ

19 A lə pɑ̌ pɑ́ bwadzʉ̌ bɔ yə a lə bɑ́ dəŋdzə̀ tyɛ'dzʉ nə gap dzʉ́ a, jyədyə̌ nə pa' yə pɑkhʉ̌ Yeso lə bɑ́ nthʉ́m o a pɑ́ bɑ pu yo', bɑ bwɔk pɑ Yudea. Yeso lə ŋwak cəcɑ̌ pú gɔm bi pú gɑ: Hwitə̀ pɑ́ bi po. 20 E lə́ nə ghɔm bɑ́ da'tə wap bú myə́ ba be é. Pɑkhʉ̌ lə nə yɔ Cyəpɔ ŋwɛnyə̀ ló nə́ pú. 21 Yeso piŋ gɔm bi pu m sə́ gɑ: Hwitə̀ pɑ́ bi po. Dəŋdəŋ pa' Tá nthəm a, ba myə̀ yɑ̌ gɑ̌ təm wɔ. 22 E lə ghɔm po'o fɔk zhwenyə e nə́ pu biŋ gɔm bi pu gɑ: Po kwi Zhwenyə Dɔlɔ̌. 23 Pɔ pyə pǒ lɑ mhɔ map shwyɛ' wap a bɑ pu gɔ lɑ mhɔ map cwyɛ' wap. Pɔ pyə́ pǒ sɛ́ mhɔ map a, bɑ pú gɔ sɔ' sɛ mhɔ map.

Yeso pu Tomasi

24 A lə́ nə pɑ̌ po'o Tomasi, mu' mo nə pɔ shwɔppʉə mghǎm, mo yə pú ŋkhe e gɑ Didimə a lə pɑ́ pu a pú nə cwə yə Yeso lə́ ŋwak a. 25 Pyə shɑ́ pɑkhʉ̌ lə ghɔm bi e gɑ: Pyə̌ yɔ Cyəpɔ. E pa' bi pu gɑ: Ŋ bɑ́ tə yɔ mfa mtʉɔ nə bú myə́, bɑ́ tə twɔk nthə́ pu a nə tsʉ' mtʉɔ, biŋ bɑ́ tə́ twɔk pú a nə be é, bɑ ŋ tə́ gɔ piŋ pɑ́. 26 A lə pɑ́ po'o, a nə cyə tyɛ'dzʉ hɔ̌m, pɑkhʉ̌ kwi' shu'tə dyə, pu a Tomasi nə pɑ́ dyə́, Yeso lə ŋwǎk, nə ŋwak bɑ pu yo' guŋ mjyədyə̌ awɛ. E lə tiŋnyə cəcɑ̌ pú, gɔm bi pu gɑ: Hwitə́ pɑ́ bi po. 27 Biŋ gɔm bi Tomasi gɑ: Lɑ nthə pu o nə sɔ' tsɔ'ɔ biŋ dé bu mə̌ tə́ jɔ; lɑ pú o nə sɔ' nyəŋ bě m̀; tak nə zhʉ'nyə nə́ŋ, ji mbɛ gɛ piŋnthʉm. 28 Tomasi pa' bi e gɑ: Cyəpɔ a biŋ bɑ́ Si a. 29 Yeso ghɔm bi e gɑ: A cyə m pa' o jɔ a á o piŋ: Mpùŋtse bɑ́ pɔ pyə wap piŋ tə yɔ a.

Ywə yə yəŋ ŋwa'nyə byap bi pɑ a

30 Yeso lə piŋ gə shɑ mtiŋ msya dzə̌ pɑkhʉ̌ pyə, myə a bɑ pú ka və́ nthʉm ŋwa'nyə yəŋ a. 31 Mɔ myə pú lə və a, pú lə́ bvə po'o gɑ po nə biŋ gɑ Yeso bɑ Kristo, Mu Si, cwə yə́ po piŋ po'o a, pó cyə m nə tso tsyə gə́ vɔk.

Yohane 21

Yeso la'tə nɑ e kə́ŋ mʉ'nyə

1 Mnwə́ bɔ lə cyə̌, Yeso kwi' da'tə nɑ e bi pɑkhʉ̌ pyə́ kə́ŋ shyə́ lɑpʉə Tiberia. Pá' a lə́ nə shyə́ a bɑ gɑ́: 2 Simon Pɛtrɔ ba Tomasi yə́ pú ŋkhe e gɑ Didimə ba Natanaɛl mú e Kana m Galilea pu a pǒ Zebede ba shɑ́ pɑkhʉ̌ pɑpʉə lə tǎmtə sí. 3 Simon Pɛtrɔ ghɔm bi pú gɑ: Gɑ gɔ m nə ghəm bapgu. Wap ghɔm bi e gɑ: Pɑ̀ gɔ pəmtə́ ghɔ. Wap lə təm cwəlɔ, ŋkho kənu', da' gɑ wap la tə́ ghəm sɔmywə mtsʉ́' bɔ. 4 A lə pɑ̌ fɔkdzʉ̌, Yeso sɔ' nthiŋnyə kəŋ shyə, da' gɑ la' pɑkhʉ̌ pyə pɑwə jyə gɑ a yʉ́ Yeso. 5 E ghɔm bi pú gɑ: Pɑkhʉ, pó ka ghə múywə bapgu a? Wap pa' bi e gɑ: gɛ̌. 6 E ghɔm bi pu gɑ: Po ma' nthənthɔm yɔ m nə́ ghə̌ŋ tʉɔ nə kənu' tə́ jɔ! Wap lə́ mǎ', gəm bapgu tə la' wap piŋ fəŋ nthənthɔm yap jyə nə́ nə nthəm shyə pɑ̀. 7 Mukhʉ̌ yə Yeso lə ŋkhuŋ é a ghɔm bi Pɛtrɔ gɑ: A bɑ́ Cyəpɔ! Pɛtrɔ lə cwətə ju' gɑ a Cyəpɔ, pa' dzə la tə́ bɑ nə e a pɑ, e wuŋ jwe tap e, ja' bvʉ́ shyə. 8 Pyə shɑ pɑkhʉ̌ lə lɑ̌ kənu' sɔ' kəŋ shyə, bɑwə fəŋ nthənthɔm bɑ bapgu lo nə́, nə pa' wap la tə́ bɑ́ gʉə sʉəsʉə nə kə̌ŋ shyə pɑ́, wap lə bɑ̀ gwɛ a nə meta ŋkhə. 9 Wap cwə̌ tə́ fi' si kəŋ shyə cwəlɔ, jɔ mɔ́k bɑ pu sù, jap bapgu ba pu' msɛ nə́. 10 Yeso ghɔm bi pu gɑ: Po lɑ bapgu yə po gəm cwəlɔ a nə sɔ̌'. 11 Simon Pɛtrɔ lə ko nthʉm kənu' cwəlɔ, fi' nthənthɔm, mmʉəmmʉ́ə bapgu duŋ shwɔptá m potɔ mŋkhə pɑ́ bɑ ǎ lo nthʉm o; tə́ ba tə pa' bapgu lə bɑ́ nthʉm o dəŋ po'o a, nthənthɔm lə hʉə pɑ̀. 12 Yeso ghɔm bi pu gɑ: Pó sɔ' dzʉ́ywə; la' sɔm mukhʉ̌ ghə kaktʉɔ nə həŋtə́ é gɑ: O bɑ́ wɑ? Da' gɑ wap lə bɑwə shəŋtə jyə́ gɑ e lə́ bɑ Cyəpɔ. 13 A lə pɑ̌ po'o Yeso sɔ'; bé msɛ́ hɑ bi pú; biŋ ŋkwi' hɑ ba bapgu bi pú. 14 A lə́ bɑ́ po'o bɑ́ batə mcʉ̌m mnthá pa' Yeso da'tə nɑ e bi pɑkhʉ́ pyə a, tə fɑ pa' e lə yǎm nə vʉ̌ a.

Yeso hɑ fa' bi Pɛtrɔ

15 Nə tsʉ́ ywə lə nə mì, Yeso ghɔm bi Simon Pɛtrɔ gɑ: Simon mú Yohane tə́ o ŋkhùŋ a tə shyə́ pɔ pɔŋ gɑ́ lə? E pa' bi e gɑ: Əŋ m Cyəpɔ, o bɑ ǒ zhyə́ gɑ́ gɑ̌ ŋkhùŋ o. Yeso piŋ gɔm bi e gɑ: Khim pó jʉ̀jʉ̀ pɑ̌. 16 Yeso lə kwi' gɔm bi e batə mcʉ̌m bʉ́ə gɑ: Simon mú Yohane tə́ o ŋkhúŋ a lə́? E pa' bi e gɑ: Əŋ m Cyəpɔ, ǒ bɑ ǒ zhyə gɑ́ gɑ̌ ŋkhùŋ o. Yeso ghɔm bi e gɑ: Pɑ́ gɛ pyap jʉ̀jʉ̀ tsɑ̌. 17 E lə kwi' gɔm bi e batə mcʉ̌m nthá gɑ Simon mú Yohane tə́ o ŋkhùŋ a lə́? Simon lə́ yɛ̌lúŋ pa' e həŋtə e batə mcʉ̌m nthá gɑ o ŋkhùŋ a lə́? Biŋ gɔm bi e gɑ: Cyəpɔ, wə yə́ ó bɑ ǒ zhyə́ guŋ ywə awɛ a, ǒ zhyə́ pɑpuŋ gɑ́ gɑ̌ ŋkhùŋ o. Yeso piŋ gɔm bi e gɑ: Khim jʉ̀jʉ̀ tsɑ̌. 18 Kwa' nyənyɔ nyənyɔ gɑ̌ ghɔm bu, cwə yə́ o lə́ bɑ mú səm a, o pɑ́ jwé tap o, bɑ gɔ tsʉ' yə o kuŋ a; cwə yə o gɔ sɔ' vo a, o pɑ ŋkhá' bú mǔ, mu' mo nə zhwe tap o, bɑ dɑ o gɔ tsʉ' yə o ka kuŋ a. 19 Yeso lə́ gɔm po'o bɑ nə da'tə nthi vʉ̌ yə Pɛtrɔ lə bɑ gɔ sɔ' nə ghu'tə Si a; e lə ghɔ́m ghɔm bɔ biŋ ŋkwi' gɔm bi Pɛtrɔ gɑ: Yap jʉ̌m m̀.

Mukhʉ̌ ŋkhuŋnyə Yeso

20 Pɛtrɔ lə fɛ̌ nɑ́ e jɔ mukhʉ̌ yə́ Yeso lə ŋkhuŋ e a jʉm e. Mo yə e lə pɔ nɑ e nə kəkɔp e cwə yə́ wap lə́ bɑwə dzʉ́ywə a gɔm bi e gɑ́: Cyəpɔ mo yə e bɑwə gɔ hɑ o bɑ wɑ? 21 Pɛtrɔ lə yɔ e, gɔm bi Yeso gɑ: Sɔ' m nə e, e gɔ sɔ' pɑ m gɑ́ kɑ? 22 Yeso pa' bi e gɑ́: Ŋ ŋkhuŋ gɑ e pɑ́ pɑwə tə̌ ŋ da' sɔ̌', bɑ a gɔ ghə la m wə̀? Sɔ' m nə wə, yap jʉ̌m m̀. 23 A lə́ fɑ nə́ ghɔm tsɔ gɑ tə pu pɑ gɔm cəcɑ̌ mfɑ mfɑ́ gɑ mukhʉ̌ bɔ tə́ gɔ la' pfʉ́ pɑ́. Tə a pɑ́ nyənyɔ gɑ Yeso la tə ghɔm bi e gɑ́ e tə́ gɔ la' pfʉ́ pɑ́; da' gɑ́ e lə shəŋtə gɔm m gɑ́: Ŋ da ŋkhuŋ gɑ e pɑ́ pɑwə tə̌ ŋ da' sɔ̌' bɑ a gɔ ghə la m wə̀? 24 Mukhʉ̌ bɔ nə ŋkwinthɛ̌ nə mɔ mnwə, biŋ bvə má; bɑ pyə̌ nəŋ jyə́ gɑ mkwinthɛ myə́ bɑ pa' nyənyɔ shəŋ a. 25 Yeso lə́ ghə̌ shɑ mnwə tə ǎ yɔ́m: tə bi a pɑ́ pu lə pé'e bɑ gɔ və pɑ yɑmu' yɑmu' bɑ guŋ dzʉ̌ awɛ gɔ kɔk nə pa' bi a ŋwa'nyə yə pu gɔ və nə á gɔ ko nə a.