Krestuwi wəpele
1 Səza wətəŋga, daga Maŋgəlva dəɓələɗɗa dələv tagay ɓa, tay məs adaw yaŋ na wəpele. Wəpel nan asanək də Maŋgəlva, ndəni Maŋgəlva. 2 Asanək də Maŋgəlva daga wətəŋ nani. 3 Maŋgəlva aɗɗak ko mi pak də wəpel nani. Zəga tay ko taka məɗɗan məza dəndən ɓaɓa. 4 Səzani zeŋgille nawkoh ade, zeŋgille nawkoh nan tay ki sit təki babar sit ɗiiyi. 5 Təki babar tay kasak ara guzliyo, amma guzli dəɓap wəsərətən ɓa. 6 Maŋgəlva aslənək ɗəf məs iya nan na Zaŋ. 7 Adek vi karban təki babar nak sit ɗiiyi, vi ɗii dətafnən gəni. 8 Ndən sən kiyən təki babari ɓa, amma adek kaɗɗa saydawa aka təki babara. 9 Wəpel naka ndəni təki babar an təstəssə adek adəv dəlva, tay kasak azet ɗii pakə. 10 Wəpel nan taya dəv dəlva, Maŋgəlva aɗɗa dələv pak dəni, amma dələv dəsən ɓa. 11 Yaŋ ade aka dələv nani, amma ɗii nan dəŋgluwən ɓa. 12 Amma ɗii meɓɓet aŋgluwənka, atafənka. Yaŋ net apsit sembe də kpaŋgaŋ gən kirtin Maŋgəlva. 13 Dəkpaŋgaŋ də tive na nziya net ɓa, də uweti va ɗii adawaŋ ɓa, amma vi Maŋgəlva apsitik zeŋgille meleketeni. 14 Wəpel nak akpaŋgək ɗəffa məs də gəɓa zəni, asanək awalaŋgəmə. Mulak gakdak nani, ndəni gakdak va Wətən məs taka arah aza Affəni. Dəndəni Maŋgəlva arban mbəlembəle nani də gegesiŋ nan pakə. 15 Zaŋ apelik wənnani, anahək daya daya amna: Ndəni məs nəpel wənnani, nənah na: Wade dərɓagawa, amma waday kiyu də sembe, daga məɓəlli uwəw ɓa tay səkay. 16 Mənam pak mərahək haran nam səzet aryeɗ nani, mərahək zəzay aka zəzaya. 17 Maŋgəlva apsənək ma henziŋ ava Moyis, amma mbəlembəle nani də gegesiŋ nani arbanək də Zezu Krestu. 18 Ɗəf tay dula ɗaah Maŋgəlva ɓa. Amma Wətən məs taka, an dəsan də Affən, ndəni dərban səm Maŋgəlva.
Wərba wənna Zaŋ məgəɗ baptem
19 Aŋki saydawa na Zaŋ dagan Yahudiyenɗe na Zerusalem asliŋgin məs dəlveŋge dit Lewiɗ azani, vi dəssohonən gəni: Nawa kənan di? 20 Dəɓoŋ dawzlan ɓa, arbanək lewlew abet ɗii pakə: Əntə Messiya ɓa. 21 Assohonənka: Ya nawa kənan kan di? Eliyas kənan sa? Zaŋ azlan na: Awwo, Eliyas nan ɓa. Aɓɗaŋ na: Əstə məs kleŋ məs mədawga tay sa? Amna: Awwo vaski ɓa. 22 Apsənən na: Ya nawa kənan kan di? Məmnda gan gən wəsləŋ sit ɗii də sləŋ məni. Ya ka nawa kəda ɗi zuk kandi? 23 Zaŋ azlan na: Əntə an məs kleŋ Ezay apel akani, amna: Vamvəl tayənzla awra tay nah na: Məgəɗsən tive metiŋ sarara sən Ɗəfdaya. 24 Suweleŋgit ɗii məsliŋgit aza Zaŋ neki, Farisiyenɗe meɓɓet tahəŋ. 25 Assohonənka: Ya an Messiya kənan ɓa, walla məs kleŋ Eliyas, walla məs kleŋ maɓɓani ɓa, ya vi mi kədaɗɗa baptem di? 26 Zaŋ azlansitike: Intatə gəɗ sukum baptem də iŋkile, amma ɗəf maɓɓan tay awalaŋkum, kəsənən ɓa. 27 Wade dərɓagawa, amma nəgap nawpel helegeɗ net hensek nan ɓa. 28 Wənnəs pak awalaŋ gəla na Baytaniya agəɗə, dəgar ki məlpa na Zordan, atəki Zaŋ adawgəɗ sit baptem sit ɗiiyi.
Zezuwi botol na Maŋgəlva
29 Yaŋ vit pumpum nani, Zaŋ awlak Zezu dazan azani, amna: Andaki botol na Maŋgəlva naw gəm mambray na dəlva. 30 Ndəni ɗəf məs nədawpel sukum wənnani, nənah na: Ɗəf maɓɓan wade dərɓagawa, amma adayək kiyu də sembe, vi tay daga məɓəlli uwəw ɓa. 31 Nəsəna naway dəl san vaskəŋdi ɓa, amma nədek wəɗɗa baptem viyit Israyelɗe dəsənən gəni. 32 Zaŋ anah əmpa na: Nulak Əmpəs na Maŋgəlva aprikik sə disiŋ va mukuɗuŋgulo, adek əsan akani. 33 Pay nani nəsən ɓa, amma Maŋgəlva məs də slənu wəɗɗa baptem ndəni dənah suwa, apsu na: Akula Əmpəs daw pirke, wasan aka ɗəffa, ndəni naɗɗa baptem də Əmpəs Salala. 34 Zaŋ amna: Nulaka nəgəɗək saydawa akani, ndəni Wətən Maŋgəlva.
Gewleɗ na Zezu en madabəŋ
35 Vit pumpum nani Zaŋ tay ziwe atəki naka dit gewleɗ nan sula neki. 36 Yaŋ awla Zezu dawtoŋgo, amna: Aŋki botol na Maŋgəlva. 37 Gewleɗ na Zaŋ sula nek apprəmənək məs anahə, asbanənək Zezu. 38 Zezu amanək haran dirɓe, tahəŋ wəsbanəni, assohotike: Məkədaw kaya nən di? Apsənən na: Mərbə zəga, aŋga kəsok di? Apsit na: Məde mula. 39 Yaŋ ambataŋ awlanənək aki adawsani. Dəpas tay va ler poɗo anziyaŋgək dəndən. 40 Ɗəf taka səmbet ɗii məzəpprəmən wəpel na Zaŋ, asbanək Zezu, ndəni Andre, məlmən Simoŋ Piyer. 41 Andre aləmək də Simoŋ məlməni dabəŋ apsəna: Mərəhək Krestu. 42 Akak aza Zezu. Zezu awlaka, amna: Əstə Simoŋ wətən Zaŋ abesna iya nok wasan Kefas, va wənah na milɓe.
Zezu ayak Filip də Natan
43 Vit pumpum nani, Zezu aŋgələk əmbat a Galile. Aləmək də Filip apsən na: Asbawa. 44 Filip bo sə Baytisayda ade, sə walaŋ gəla nani, ndəni gəm Andre də Piyer. 45 Filip bo aləmək də Nataniyel, apsən na: Mərəhək an məs Moyis apel akan adəv ɗerewel na ma henziŋ, məs kleŋɗe bo apelinək wənnani, ndəni Zezu wətən Zozef məs na Nazaret. 46 Nataniyel apsən na zəga mogon waɓap wəzzan sə Nazaret sa? Filip amna ade awla. 47 Adan Zezu awla Nataniyel dazan azani, apelik akani, amna aŋki Israyel məs tay də muluvuluvu azan ɓa. 48 Nataniyel assohonəka: Mbarmbar kəsənu di? Zezu azlan sənəka: Nulukuk daga kədawsok amba sukoyo, daga Filip dəɓəl əyuk tagay ɓa. 49 Yaŋ Nataniyel anah sən na: Mərbə zəga istə Wətən Maŋgəlva, istə məlĩ net Israyelɗe. 50 Zezu apsən na! Kətaf na vi nənah na nulukuk amba sukoyo sa? Akula zigeɗ daykiyit zigeɗes də gugiriɗe. 51 Apsən əmpa na: Gesiŋ nədaw nah suko, akulanən disiŋ məkolən, maslayɗe wapeŋgeŋ wapirkeŋ dəka Wətən Ɗəffa.
Wəɓel akana
1 Yaŋ pay sula dərɓaga wənnani wəɓel taya Kana, aka dələv na Galile. Ma Zezu tata daka. 2 Məyani Zezu dit gewleɗ nan adaka. 3 Yaŋ mbazla net wəleŋɗe agrak səzeti, ma Zezu təpsəna: Mbazla net wəleŋɗe agrakək səzeti. 4 Zezu azlanək na: Ɗakə əstə kədawnah su an nədaɗɗa sa? Pay naw dəɓəl wəzzan tagay ɓa. 5 Yaŋ man tənah sit məɗɗaŋ wəza na: An məs anah sukum naɗɗa pak kəɗɗanən gəni. 6 Adak na, təlbiɗe na gərəm tahəŋ sləre, Yahudiyenɗe adawɗiyaŋ naskoɓ tilti va an adasbanəni adəv wəsba neti, təlbiɗe net taka nan pak iŋkile tahəŋ wəmbataŋ adəvən litər səkatə. 7 Zezu apsit məɗɗaŋ wəza na: Məknih təlbiɗeŋ dit iŋkile. 8 Yaŋ Zezu amna: Kakaŋ na məmbaɗ kana, məke sən daya na affən wəɓele. Aɗɗanənək va aɗi sit wənani. 9 Daya nawɓel anetike, arihik akpaŋgaŋgək mbazla net wəleŋɗe. Amma dəsənən na səŋga ade di ɓa, say məɗɗaŋ wəza məs də mbeɗini net asənənka. Ayak zilit waŋ məɓelta, 10 apsən na: Ko naway an ayek ɗiiyi wapsit mbazla an mogon dabəŋ. An ɗii asanənək diiɗa kana, wapsit an məs tay gənɗət diiɗa ɓa. Amma nok kəzaɓanək mbazla an mogon ha kakaŋka. 11 Ndəni sokene an Zezu agəɗ dabəŋ a Kana aka dələv na Galile. Arbanək gakdak nani, gewleɗ nan atafənənka. 12 Dərɓagani, ambatək a Kafarnahum dət mani gəm milmiŋgiɗin dit gewleɗ nani, asoŋgək adak pay suɗike.
Zezu adəv gəla metiŋ naw zuliya
13 Yaŋ wəzləra na Paska net Yahudiyenɗe go'oy, Zezu ambatək a Zerusalem. 14 Arihik məvəllaŋ wasliɗe dit timeŋgiɗi gəm mukuɗuŋgileɗ na maha adəv gəla metiŋ naw zuliya, arihik mədəɗaŋ deleɗ tahəŋ adaka, tahəŋ aka tabəl adaka. 15 Zezu armak helege va ɗoŋgroŋ arɓehetik timeŋgiɗ neti dit wasliɗe net pak sədəv gəla metiŋ naw zuliya. Aslaŋganək tabəl net mədəɗaŋ deleɗ pak atərayaŋka. 16 Apsit məvəllaŋ mukuɗuŋgileɗ na: Məzar sahəŋka kədaw manən gəla na Affu gəla naɗɗa terere ɓa. 17 Gewleɗ nan aɗumonənək an məverin adəv ɗerewel: Wəŋgla na gəla noko, aw Maŋgəlva, tay zləw amakraw va offo. 18 Amma Yahudiyenɗe assohonənka: Sokene awani kədaɗɗa məsən gən na gesiŋ istat də sembe naɗɗa zəga vaska di? 19 Zezu azlan sitik na: Məɓzlu gəla metiŋ na zuliyəŋka, wanə məs wərkan aka pay hoku. 20 Yaŋ Yahudiyenɗe apsənən na: Mərka gəla metiŋ na zuliyəŋ wəsva kaklaw poɗo kiyən sləre mərkani. Yaŋ nok kəmna wakərka aka wəvoŋ hoku? 21 Amma nan aslak zən də gəla metiŋ naw zuliya. 22 Adan Zezu asil sətəki əmta, gewleɗ nan aɗumonənək an məs məverin adəv ɗerewel də wəpel məs anahsiti.
Zezu asənək ko naway
23 Zezu asanək a Zerusalem ha gap pay na zləra na Paska pakə, ɗii diiɗa atafənka vi sokeneɗ məs agəɗə. 24 Amma Zezu dətaf wənnet ɓa, vi asənək wəɗum net pakə. 25 Wəray tay ɗəf dənah sən gən wənnet ɗii ɓa, vi asənək ana mekret pakə.
Zezu də Nikodemus
1 Ɗəf maɓɓan tay aweleŋgit Farisiyenɗe, iya nan na Nikodemus Ɗəfdayayi aweleŋgit Yahudiyenɗe. 2 Adek aza Zezu də dəfɗa, apsən na: Mərbə zəga, məsənka əstə mərbə zəga əstə ɗə an Maŋgəlva aslənə, vi ɗəf tay ko taka naɗɗa sokeneɗ va kədaɗɗetiŋ ɓa, say an Maŋgəlva tay dəni. 3 Zezu azlan sənək na: Gesiŋ nədawnah suko: Ɗəf aɓapna ula məlĩ na Maŋgəlva ɓa, say an awək ma sula'ən. 4 Nikodemus assohonəka: An ɗəf agalək na mbarmbari adawa əmpa di? Waɓap wəmndan adəvət man, kawan ma sula'ən sa? 5 Zezu azlan sənəka: Gesiŋ nədawnah suko: An ɗəf duwə dit iŋkile gəm də Əmpəs ɓa, aɓap na wətoŋ məlĩ na Maŋgəlva ɓa. 6 An muwan də ɗəffa ɗəffi, an muwan də Əmpəsa Əmpəsyi. 7 Kəda gətta kan vi nənah suk na: Aslək kuwə gən ma sula'ən ɓa. 8 Səmnya tay əɓla atəki məs aŋgəl pak istat əpprəm ɓaɓəlmani, amma kaw səŋgən na səŋga ade di ɓa walla aŋga dadandi ɓa. Vaski an muwan də sembe na Əmpəs adawsani. 9 Nikodemus assohonəka: Kawrəhən mbarmbar kandi? 10 Zezu azlan sənəka: Is mərbə zəga net Israyelɗe na kəsən ɓa sa? 11 Gesiŋ nədawnah suko nam mənam tatə pel an məsənə, mənam tatəɗɗa saydawa aka an muwəl də haramə amma də as pak kətafənən na saydawa nan ɓa. 12 Kətafwən vi nədawpel sukum wənnet zigeɗ na duniya ɓa, mbari kədawtafən an nəpel sukumək wənnet zigeɗ na disiŋ di? 13 Ɗəf tay dəmbat ɗaah a disiŋ ɓa bo, say an məs dəde sə disiŋ, ndəni Wətən Ɗəffa. 14 Va Moyis alaw doho na tabəs na meleŋge aka wəlaŋga awra, vaski adawlawən Wətən Ɗəffa. 15 Asna ko naway dətafa nan warah wəkoh nassa ha faɗə. 16 Maŋgəlva aŋgluwək duniya sawɓa. Vini apsən Wətən an taka nani. Ko naway dətaf Wətənəŋka, azə naɓa, amma warah wəkoh an nassa ha faɗə. 17 Maŋgəlva də slən Wətən aka dələv vi kawtaw kita akan ɓa, amma vi duniya dərah gən wəkoh dəndən. 18 Ko naway dətaf Wətən, kita arma na ɓa. Amma ɗəffan dətaf ɓa, kita warma vi dətaf Wətən Maŋgəlva an taka nak ɓa. 19 Awla va kita nan asani: Təki babar adek a duniya, amma ɗii na duniya aŋgluwənək guzli dayki təki babara, vi tahəŋ wəɗɗaŋ zəga məs tay mogon ɓa. 20 Ko naway tayəɗɗa zəga mogon ɓa tay zel təki babara, tay san ara guzliyo, geslne warma vi wəza nan mbrayenəŋ adawgilyan appaka ɓa. 21 Amma ko naway dəsban goŋga, wambat aza təki babara, vi ɗii pak dulanən gəni tay ɓesən Maŋgəlva də wəza nani.
Zezu də Zaŋ məgəɗ baptem
22 Yaŋ, dərɓagani Zezu ambat aka dələv na Zude. Anziyək dənɗaŋ suɗike, agəɗək baptem sit ɗiiyi. 23 Zaŋ bo agəɗ sitik baptem sit ɗiiyi a Aynon, walaŋ gəla nan tay faraɗa də Salim ɓa, vi iŋkile tahəŋ adak diiɗa. Ɗii tahəŋ wəmbataŋ azani, tay gəɗ sit baptem. 24 Dəpasna mərmani Zaŋ a daŋgay tagay ɓa. 25 Ɗii meɓɓet səmbet gewleɗ na Zaŋ atəŋgaŋgək wəbay ma dit Yahudiyenɗe aka wənnasban Maŋgəlva də wənna salalan zit dit zigeɗi. 26 Ambataŋgək aza Zaŋ, apsənən na: Mərbə zəga, istatə ɗumon ɗəf məs dəsan di'is dəgar ki məlpa na Zordan nak sa, məs kəpel səm wənnan nak sa? Nan bo tayɗ ɗa baptem sit ɗiiyi, ɗii diiɗa tahəŋ wəmbataŋ azani. 27 Zaŋ azlanəka: Ɗəf tay nawrəh ko mi ɓa say an Maŋgəlva dəpsəni. 28 Munokum sən kikum munokumtə saydawa nawa, nənah ka: Əntə sən kiyu Messiya ɓa, amma məslənwi nəde gən dabəŋ kini. 29 Məzu ɓelta, ndəni zilta. Amma bayna məzu ɓel tay ziwe amaŋgavata, taypprəm wənna ni. An apprəmək wəlani waneken zəni. Vaski bo wənek naw adaknəh kakaŋka. 30 Say daya nan dəl abe abe, naw nəmil gən dirɓe.
Ɗəf məs dəde sə disiŋ
31 Ɗəf məs dəde sə disiŋ ndəni dayki zəga pakə. Ɗəf məs dəde sə duniya bo ɗəf na duniyayi, wənna duniya adawpele bo. Ɗəf məs dəde sə disiŋ ndəni dayki zəga pakə. 32 An məs awələ, an məs apprəmə, anani adawpele, amma ɗəf tay ko taka dətaf saydawa nan ɓa. 33 Ko naway dətaf saydawa nani asənək Maŋgəlva goŋga adawnaha. 34 Masləŋ na Maŋgəlva tay pel wənna, vi Maŋgəlva aknəhək də Əmpəs nani. 35 Affən aŋgluwək Wətəni, apsənək sembe aka zəga pakə. 36 Ko naway dətaf Wətəni arahək wəkoho. Ko naway dətaf Wətən ɓa, arah na wəkoh ɓa, amma wəda gədəv na Maŋgəlva wasan akani.
Zezu dət guluk na Samariya
1 Yaŋ Farisiyenɗe apprəmən na Zezu tayəɗɗa baptem aket ɗiiyi, tay rəh gewleɗ dayki Zaŋ. 2 Goŋga nan na, Zezu sən kiyən dəgəɗ baptem aka ɗəf ko taka ɓa, amma gewleɗ nan dədaɗɗanəni. 3 Adan Zezu apprəm məs adawpeleŋ, asilik sə Zude amilik aka dələv na Galile. 4 Vi wəmbat adak na say kawtoŋ kla ka dələv na Samariya. 5 Agapək awalaŋ gəla məs adawyaŋ na Sikar, go'oy dəguli an Zakub apsən wətən an Zozef. 6 Vov na iŋkile na Zakub taya daka. Zezu ayək dəwədaw malaka, vini asan ama vov nani. Dəpaska tətaŋ payi. 7 Guluk na Samariya tədek wəmbaɗ iŋkile, Zezu amna: Avay iŋkile vet nəsə. 8 (Gewleɗ nan ambataŋgək awalaŋ gəla vi kalbəh zəga nawzəma). 9 Guluk tapsən Zezu na: Is ɗəf na Zude, kəssoh iŋkile naw saa, avaw in guluk na Samariya sa? Vi wəsler tay aweleŋgit ɗii na Zude dit ɗii na Samariya ɓa. 10 Zezu apsit na: Va kəsənək wəvəl na Maŋgəlva, wakəvayə, va kəsənək naway dəssoh iŋkile naw saa vok di na, wakəssohoni, dəpsuk gən iŋkile an napsuk zeŋgille. 11 Guluk tapsən na Mərbə zəga, zəga naw mbaɗ iŋkile taya vok ɓa, vov bo kpumi diiɗa mbarmbari kədawrah iŋkile vet di? 12 Dəhəm Zakub dəpsəm vov net iŋkileŋki, asaaŋgək iŋkileŋki, ndən dit kirtini dit zigeɗ mamayɗe nani. Asna kədayək ki Zakub də daya sa? 13 Zezu azlan sətəka: Ko naway də sə iŋkile veti meme wadanənne'e. 14 Amma ɗəf dəda saa iŋkile məs nədapsən niŋki meme adanən na ɗaah ɓa. Iŋkile məs nədapsənniŋki, wakpaŋgaŋ heret iŋkile adəvən, waymaŋ zeŋgille an nawsan ha faɗə. 15 Guluk təpsən na: Avay su iŋkile veti, vi meme adaw duwən ɗaah əmpa ɓa, nəkoh gən səka wəmilya wəmbaɗ iŋkileŋki. 16 Zezu apsət na: Dokuya zilko, kəzoŋ gən aŋka. 17 Guluk təmna zilu tay ɓa. Zezu apsət na: Kəpelik goŋga, adan kənah na ziluk tay ɓaŋka. 18 Vi kəgəmək zel sle, an məs kəsok amban kakaŋ bo ziluki ɓa. Kəpelik goŋga. 19 Yaŋ guluk tapsən na: Mərbə zəga, nəpprəməka məs kleŋ kənani. 20 Dəhŋgiɗəm azuliyaŋ sənənək Maŋgəlva aka gərməŋka, amma munokum Yahudiyenɗe munokum tatə nah na Zerusalemmi təki na zuli sən Maŋgəlva. 21 Zezu apsət na: Ɗakə, arma an məs nədawnah suko: Pay nan wade, an məs kədaw zuliyaŋ sənən Maŋgəlva aka gərməŋki ɓa, ko a Zerusalem mi ɓa'a. 22 Munokum Samariyeɗ munokum tatə zuli sən an məs kəsəŋgən ɓa, amma namə mənam Yahudiyenɗe məsənək məs mədawzulisəni, vi wəkoh səzet Yahudiyenɗe ade. 23 -24 Amma pay nan wade, adek kakaŋ səkay, Əmpəs dərban gən goŋga na Maŋgəlva, waɓap wənah sit ɗii dəzuliyaŋ sənən gən Maŋgəlva ko aŋga pakə. Maŋgəlva Əmpəssi, ɗii dəŋglaŋ wəzuliyaŋ sənən na say dəsoŋ gən məwet də Əmpəs an gesiŋ. Zemvit məzu zuliyaŋ eskiŋ Maŋgəlva aŋgələ. 25 Guluk təpsən na: Nəsənka Krestu wade. An adeke, warban zəga pakə. 26 Zezu azlanəka: Əntə nədawpel suk vanəŋka in vatə ndəni. 27 Pay nani gewleɗ amilyoŋko. Agətaŋgək sawɓa adan awlanən dawpel dət gulku. Mi kəŋgəl avan di? Amma ɗəf tay ko taka dəssohot vas ɓa. Vi mi kədawpel dəndət di? Ɗəf tay dəssohon Zezu vas ɓa'a. 28 Guluk təpanək hinzuw nat adaka, təmilik awalaŋ gəla, tənah sitik ɗiiyi, təmna: 29 Məde, mula ɗəf yana məs dənah su an məs nəgəɗ daga far pakə. Kuzuŋ ndəni Messiya. 30 Ɗii agulyoŋguk suwalaŋ gəla, ambataŋgək aza Zezu. 31 Pay nani gewleɗ na Zezu akamanənək dəzəm gəni, apsənən na: Mərbə zəga, azəm way suɗike. 32 Amma azlanək na: Way naw tay məs kəsəŋgən ɓa. 33 Gewleɗ assohonənək ziti: Ɗəf aki sənək way sa? 34 Zezu amna: Way naw ndəni wəɓesən ɗəf məs də slənwa də wəɗɗa an məs aɗi su naɗɗa. 35 Nokum munokum tatə nah na apələk təla poɗo kaw bəli, amma naw əntatə nahsukum, mula guliyeŋge law law ɗa, wəbəl aɓəlka, wəbəl go'oy. 36 Məzu bəl warah iya nani, wəkkalan hay na zeŋgille an nasa faɗə, vi məzəslga də məzu bəla pak wanekenən ziti. 37 Vi wən məkpaŋga anəhək goŋga: Ɗəf waslga, ɗəf maɓɓan wabələ, wən məkpaŋgaŋ goŋga anahə. 38 Nəslən kumək wəbəl aki məs kəɗɗaŋ wəza ɓa, ɗii meɓɓet dəɗɗanəni, nokum tamə watəraŋ wəray də wəza neti. 39 Samariyeɗ nawalaŋ gəla nan diiɗa atafənək Zezu. Vi guluk nak tənah sitik na: Anah suwək an məs nəgəɗ far far pakə. 40 Yaŋ azoŋ aza Zezu, akkamanənək dənzi gən dənɗaŋ. Zezu avoŋguk anet da pay sula. 41 Ɗii diiɗa atafənək Zezu vi wəpel nani. 42 Apsətən guluk nak na: Kakaŋ mətafəka vi kənah səmi kaaka'a ɓa, vi mənam sən kiyim məpprəmək wəpel nani, məsənək kpakə, ndəni nawkoh git ɗii naka dəlva.
Zezu ambəl gənək wətən ɗəfdaya
43 Yaŋ dərɓaga Zezu anzi adak pay sula, apetike ambatək aka dələv na Galile. 44 Zezu sən kiyən anahək na: Məs kleŋ arah na gakdak aka dələv nan ɓa. 45 Amma adan agap aka dələv na Galile, ɗii nadak atafənək mogoni, vi ambatək wəzləra na Paska a Zerusalem, awlanənək məs agəɗ adəv wəzləra nan pakə. 46 Yaŋ Zezu amil awalaŋ gəla a Kana dələv na Galile, atəki akpaŋget iŋkile, akpaŋgaŋ mbazla net wələŋɗe. Ɗəf metiŋ na məlĩ taya daka, wətən tay gbəgba'a, tay məvoŋ gən a Kafarnahum. 47 Adan apprəm Zezu adek səka dələv na Zude, taya ka dələv na Galile, ambatək azani, akkamanəka: Dam matak a Kafarnahum, vi kəmbəl gən su wə gən wətu tay, gu'oy də əmta. 48 Zezu amna: Munokum kətaf wənna ɓa say an kulenənək sokeneɗi. 49 Ɗəf metiŋ apsən na: Mərbə zəga ade daga wətu dəɓəl wəmta tagay ɓa. 50 Zezu apsən na: Amndok eŋgil anok da, wətuk wambələ. Nan bo atafək məs Zezu anahsəni, ambatka. 51 Daga taya ka tive tagay, ɗii nan almaŋgək dəndən, appsənən na: Wətuk ambəlka. 52 Assohotike: Pay mbarmbari agəɗ ɗəɗaah di? Azlanənək na: Nadəvɗaŋga də pay vuroku gamba apani. 53 Yaŋ affən aɗumonək na pay va Zezu anahsən nak na: Wətuk wambələ naki. Yaŋ ndəni dit ɗii naŋgil ananda pak atafənək Zezu. 54 Ndəni sokene an məs Zezu agəɗ ma sula'ən dərɓaga agil sə Zude, ambat a Galile.
Zezu ambəl gənək məs gbəgba' məɗeŋgreŋ
1 Dərɓagani Yahudiyenɗe aɗɗanənək wəzləra na Paska, Zezu bo ambatək a Zerusalem. 2 Adak amaŋgava walaŋ gəla metiŋ məs adawyaŋ na madamba net timeŋgiɗi, pe'e tay məsso'ən, genzekɗe tahəŋ sle kiyən tərwəslə. Iya na pe'e nan də ma net Ibrahiŋkoreɗ na Baytizata. 3 Məs gbəgbaɗe tahəŋ məvoŋgit ambet genzekɗe nek diiɗa: Deŋgerɗe vədelɗe dit məs gbəgbaɗe məɗeŋgreŋɗe. Tahəŋ wəgenin iŋkile daɓlaŋ, 4 vi pay maɓɓani maslay na Ɗəfdaya tay pirken aret iŋkile a pe'e neki, də wəɓleti. Məs gbəgba' məs dətoŋ dabəŋ aret iŋkile net pak dərɓaga wəɓla neti, ambəlka səka gbəgba' nan ko awani di pakə. 5 Adak na ɗəf tay məs gbəgba' dəgəɗ wəsva kaklaw hoku kiyən dədopoɗo. 6 Adan Zezu awla tay ɗuffo, asənək avoŋgək də gbəgba' nani, assohonəka: Mok tayaka wəmbəla sa? 7 Məs gbəgba' azlanəka: Mərbə zəga ɗəf tay natoŋgu aret iŋkile pay adaɓlaŋ ɓa. An əntatə wəgay wəmbata ɗəf maɓɓan toŋ kiyu dabəŋ aret iŋkile. 8 Zezu apsən na: Asili, agəm kukur noko doko. 9 Go'ləŋ ambəlka, agəmək kukur nani, ambatka. Amma pay nani pay naffeti. 10 Vi ni Yahudiyenɗe anah sənən ɗəf məs dəmbəl naka: Dəpaŋ pay naffeti, ma henziŋ nam dəpan suk tive nawslan kukur nok pay naffet ɓa. 11 Azlansitike: Ɗəf məs dəmbəl gu dənah suwa agəm kukur noko, doko. 12 Yaŋ assohonəni: Naway dənah suk na agəm kukur noko, doko di? 13 Amma dəsən na naway dəmbəl gəni di ɓa, vi Zezu azarək səkəti nani ambatka, vi ɗii diiɗa tahəŋ adaka. 14 Dərɓaga aska Zezu arəhək adəv gəla metiŋ naw zuliya, anah sənəka: Yaŋ, kakaŋ kəmbəlka, kədaɗɗa ɗaah mambray əmpa ɓa, vi an dədayki as adazan azok ɓa. 15 Ɗəffəŋ ambatka, anahsitik Yahudiyenɗe. Zezu dəmbəl gəni. 16 Vini Yahudiyenɗe atəŋgən wəkayan Zezu, vi ambəl gən ɗəf nan pay naffete. 17 Amma azlanək na: Affu tay ɗa wəza ha faɗə, naw bo say nəgəɗ gəni. 18 Vi wən aski Yahudiyenɗe akayanən Zezu day vi kawbayən, vi agəɗ wəza pay naffeti kaaka ɓa, amma vi anah əmpa na Maŋgəlvayi Affəni, asla ki zən də Maŋgəlva.
Sembe na Wətən Maŋgəlva
19 Vi aski Zezu anahsiti: Gesiŋ nədawnah sukum, Wətən agəɗ na ko mi sən kiyən ɓa, say an məs awəl ava Affən agəɗi. An məs Affən agəɗ pakə, ndəni Wətən bo adaɗɗa. 20 Vi Affən aŋgluwək Wətən, tay wərbansən an adaɗɗa pakə. Warbet zigeɗ dekiyit es də metiŋ, vi Wətən dəɗɗe gəni. Vini akəgətaŋ akani. 21 Va Affən adawsil git ɗii məmtiti, asugit medereti, vaski bo Wətən adapsit zeŋgille sit ɗii en məs aŋgəl pakə. 22 Affən ataw na kita aka ɗəf ko taka ɓa, amma apsənək sembe sən Wətən nawtaw kita, 23 vi ɗii dəgakdakanən gən Wətən va ada gakdakanən Affən məs dəsləna, ɗəf məs aw gakdakan Wətən ɓa, agakdakan na Affən məs dəslən ɓa. 24 Gesiŋ nədawnah sukum: Ko naway dəpprəm wəpel nawa, dətaf ɗəf də slənwa, warəh wəkoh ha faɗə, kita armana ɓa. Atoŋguk ki wəmta, ha gap atəki wəkoho ha faɗə. 25 Gesiŋ nədawnah sukum: Pay nan wade, agəɗək səkay kana, ha ɗii məmtit wapprəmən wəla Wətən Maŋgəlva, ɗiiyen dəpprəmən pak wasoŋ medereti. 26 Va Affən asan də sembe nasugit medereti, vaski apsən sembe sən Wətən nawsugit medereti. 27 Apsənək sembe sən Wətən dətaw gən kita vi Wətən Ɗəffi. 28 Adawsan wənnagət azokum ɓa, vi pay wade, ɗii mimtit sədəv magamas wapprəmən wəlani, wagilyoŋ sədəv magamas neti. 29 Məɗɗaŋ wəza mogon wasilyoŋ vi kawrəh zeŋgille məs nawsan ha faɗə. Amma məɗɗaŋ mambray wasilyoŋ vi kita.
Məɗɗaŋ saydawa aka Zezu
30 Nəɓap na wəɗɗa ko mi sən kiyu ɓa. Intatə taw kita va Maŋgəlva aɗi suwa. Kita məs nədawtawəŋka, asləka, vi nəkay na wəɗɗa an məs nəŋgəl ɓa, amma an məs də slənu aŋgələ. 31 An nəgəɗək saydawa aka zuwa, saydawa nan asana gesiŋ ɓa. 32 Amma ɗəf tay naɗɗa saydawa akawa, nəsənək məs adaɗɗa akawəŋ gesiŋgi. 33 Kəsliŋginik masləŋɗe aza Zaŋ, saydawa nan gesiŋgi. 34 Maw taya ka saydawa na ɗəf ɓa, amma nəpel sukum wənna Zaŋ na vi dəbaah sukum gən nawkoh gukum. 35 Zaŋ tay va pitirla məsɗani, tay kasaka, kənekenənək zukum də pitirla nan suɗike. 36 Amma əntat də saydawa dayki Zaŋ də daya: Wəzeɗe məs Affu avayiŋki vi nəɗɗe gəni, ndəɗaŋgəŋ dədaɗaŋ saydawa akawa Affən də slənwa. 37 Affu də slənu tayəɗɗa saydawa. Nokum kəpprəmən na ɗaah wəlan ɓa, kulanən na ɓa bo. 38 Kərmanən wəpel nan amokrokum ɓa, vi kətafən an məs aslən ɓa. 39 Munokum tatəŋɗetin ɗerewelɗe, munokum tat də wəɗum nawrəh zeŋgille məs nasa ha faɗ dəndən. Mbarakana ɗerewelɗe net wənnaw adawpeleŋ. 40 Amma kəŋgereŋ wəzoŋ azaw kərəhaŋ gən zeŋgille an nasa ha faɗ ɓa. 41 Nəkay na gakdak səzet ɗii ɓa. 42 Amma nəsən kumko, kəŋgluwən Maŋgəlva ɓa. 43 Nəɗɗak an Affu aɗi su naɗɗa amma kətafwən ɓa. An ɗəf maɓɓan adek də saydawa sən kiyən wakəŋgluwəni. 44 Ko naway tay kay wəŋgla nani, amma kəkayaŋ na wəŋgla na Maŋgəlva ɓa. Ya mbarmbari kəda ɓapən wətafwən di? 45 Kəda ɗumoŋ na wanəwəli kum aba Affuwa ɓa. Moyis məs kəsənaŋgəŋka, ndəni na wəli kum. 46 Va kətafənək Moyis gesiŋ na, kəta wakətafwəni, vi Moyis wənaw averi. 47 Amma adan kətafən an aver ɓa, mbari kəda ɓapən wətafən wəpel naw di?
Zezu azəm gitik ɗii uzine sle
1 Yaŋ dərɓaga aska Zezu ambatək dəgar ki pe'e na Galile, məs adaw yaŋ na pe'e na Tiberiyas. 2 Ɗii diiɗa asbanənka, vi ɗii awlanənək sokeneɗ məs agəɗ də wəmbəl git məs gbəgbaɗe. 3 Zezu apeŋgək aka gərəma, asanək adaka, dit gewleɗ nani. 4 Paska wəzləra net Yahudiyenɗe go'oy. 5 Zezu aslanək harani, awlek ɗii diiɗa dəzoŋ azani. Apsən Filip na: Səŋga mədawrəh way nalbaah napsit ɗiiyiŋ pak di? 6 Anah vas na vi kapprəm an Filip adawzlani, vi asənək an adaɗɗa. 7 Filip azlan sənəka: Ko deleɗ na təbəs səkat sula bo almaŋ na ɓa an məŋgələk ko naway pak dərah gən way suɗike ɓa. 8 Andre, məlmən Simoŋ Piyer, məs nambet gewleɗ nan apsən na: 9 Wiyən maɓɓan tayaŋ dit dupeŋɗe sle gəm kilif sula, amma madawtər sit ɗii diiɗa veŋkiŋ di? 10 Yaŋ Zezu amna: Mənah sit ɗiiyiŋ pak dəsoŋ. Kevile taya dak diiɗa atəki nani. Asoŋko wəŋɗa net wasoŋ uzine sle zel kaaka'ə. 11 Zezu agimik dupeŋɗe neki, asokonək Maŋgəlva, yaŋ awɗakan sit ɗii veti. Vaski agəɗ dit kilfi bo. Ko naway pak arahək va aŋgələ. 12 Yaŋ ndəɗaŋ pak abaŋka, Zezu apsit gewleɗ nan na: Məkelet dambirgiti vi adawrayaŋ ɗar ɓa. 13 Akeletinik dambirgit dupeŋɗe sle məs ɗii azəmaŋ, aknahaŋgək kekelɗe klaw kiyit sula. 14 Ɗii awlanənək sokene məs Zezu agəɗə, aɓɗaŋ na: Ɗəffəŋka ndəni məs kleŋ gesiŋ an məs nazan a duniya. 15 Zezu asənək na go'oŋ wəzoŋ wərmanəni də gagay, kawɗiyən ka məlĩya. Vini ambat aka gərəm əmpa, ndən katər gəni.
Va Zezu adaw aket iŋkile a pe'e
16 Yaŋ ɗii ameŋgle gurom, gewleɗ na Zezu apirkeŋke ama busgum na pe'e. 17 Atoŋgoŋgək adəv bəlay kambat a Kafarnahum. Yaŋ dəfəɗ atiri, Zezu dəde azet tagay ɓa. 18 Iŋkile aɓlaŋgək sawɓa, vi səmnya tayəɓla də sembe. 19 Yaŋ aɓlanən bəlay gap kilometər sle walla slire, awlanənək Zezu tay zar aza bəlay, tay daw aket iŋkile də təlni, geslne armeke. 20 Amma Zezu apsit na: Kədaw geslne'eŋ ɓa, əntə. 21 Aŋglaŋ wəslanən adəv bəlay, amma go ləŋ bəlay aziwik aka dəlva fuŋ atəki məs aŋglaŋ wəmbata.
Ɗii akayanənək Zezu
22 Vit pumpum nani ɗiiyen dəpaŋ dərɓe aɗumonənək na bəlay maɓɓan taya dak ɓa, say taka kaaka'ə, asəŋgənək bo na Zezu dətoŋ adəvən dit gewleɗ nan ɓa, gewleɗ ketirgit dətoŋgoŋ, dəmbataŋ. 23 Amma bəlayɗe meɓɓet azoŋguk sə Tiberiyas, azoŋguk atəki məs Ɗəfdaya apsit dupeŋɗe neki, dərɓaga agəɗsən soko sən Maŋgəlva, viyit dupeŋɗe. 24 Adan ɗii awlanən Zezu taya dak ɓa, ko gewleɗ nan zlaŋ tahəŋ adak ɓa, atoŋgoŋguk adəv bəlayɗe neki, ambataŋgək a Kafarnahum wədaw kayani.
Zezuwi way napsən wəkoh sən ɗəffa
25 Arəhənək Zezu dəgar ki pe'e, assohonənka: Ɗəfdaya dewe kəde aŋ di? 26 Zezu azlan sitik na: Gesiŋ nədawnah sukum: Kədaw kayawənna vi kəzəmaŋ wayi, kəbaŋgi. Amma kəsənən na sokene mi nəgəɗ di ɓa. 27 Kədawgayaŋ vi way məs naŋgənaŋ ɓa, amma məgay vi way nawsan ha faɗə, napsukum wəkoh ha faɗə. Way məs Wətən Ɗəf adapsukum, va an məs də sembe məs arah səza Maŋgəlva Affəni. 28 Yaŋ ɗii assohonən na: Mbarmbari mədaɗɗa wəza məs Maŋgəlva aŋgələŋ di? 29 Zezu azlansitike: Məpprəm wəza an Maŋgəlva aŋgəl avokum: Mətaf ɗəf məs aslənə. 30 Assohonənka: Sokene awani kədarban səm vi mətaf ku gən di? Wəza awani kədaɗɗa di? 31 Dəhiŋgiɗkum azəmənək manu a muya, va məverin: Apsitik way məs dəde sə disiŋ. 32 Zezu azlansitike: Gesiŋ nədawnah sukum: Moyis dəpsukum way məs dəde sə disiŋ ɓa, amma Affu dəpsukum way məs dəde sə disiŋ. 33 Way məs Maŋgəlva adapsukuməŋka, məs dəprik sə disiŋgi, ndəni napsən zeŋgille sən dunuya. 34 Yaŋ apsənən na: Mərbə zəga apsum way nan ha faɗ kana. 35 Zezu apsit na: Əntə dupeŋ na zeŋgille. Ko naway dəde azawa, may adana ɗaah ɓa. Ko naway dətafwa meme adanəna ɗaah ɓa. 36 Amma Intatə nahsukum: Kuluwənka də as pak kətafwən ɓa. 37 An məs Affu avay pakə, wade azawa. Ko naway dəde zaw bo nəɓoŋsəna kpak ɓa. 38 Nəprik sə disiŋ vi kaɗɗa an məs nəŋgəl ɓa, amma kaɗɗa əŋgla na ɗəffan də slənwa. 39 Apprəm an məs də slənu aŋgələ: Nədawzan ko taka səmbet ɗiiyen məs avay ɓa, amma wanəsilgit səkəti əmta pakə, an pay nagrak dələv agapka. 40 Apprəm an məs Affu aŋgələ: Ko naway dula Wətən Ɗəffa dətafa, warah zeŋgille ha faɗə, wanəsil gən səkəti əmta pay wəgrak dəlva. 41 Yahudiyenɗe aɗɗaŋgək wərwər aka Zezu vi anah na: Əntə dupeŋ məs dəde sə disiŋ. 42 Aɓɗaŋ na: Zezuwi ɓa sa? Wətən Zozeffi ɓa sa? Məsənək affən dət mani. Mbarmbari adaw nəhna sə disiŋ apriki di? 43 Zezu apsit na: Məppan wərwər awalaŋ zukum. 44 Ɗəf tay naɓap wəzzan azaw ɓa, say an Affu məs də slənu dəkiya. Ko naway dəde azawa, wanəsil gən səkəti əmta pay wəgrak dəlva. 45 Məs kleŋɗe aver nənka, ndəɗaŋ pakə, Maŋgəlva arbansitike. Ko naway dəpprəm ma Maŋgəlva, atafək wərba nani, wade azawa. 46 Amma as bo tay va wənah na, ɗəf awlak Maŋgəlva ɓa, say məs dəde səza Maŋgəlva, ndən katər gən dula Maŋgəlva. 47 Gesiŋ nədawnah sukum: Ko naway dətafə, warah zeŋgille ha faɗə. 48 Əntə dupeŋ napsən zeŋgille ha faɗə. 49 Dəhiŋgiɗkum azəmaŋgək manu a muya, də as pak amtaŋka. 50 Amma ko naway dəzəm dupeŋ məs dəde sə disiŋ, amtə na kpak ɓa. 51 Əntə dupeŋ madarani, məs dəprik sə disiŋ. An ɗəf azəməka, wasan madaran ha faɗə. Dupeŋ məs nədapsukuməŋka gəɓa zuwi. Wanəpsən vi duniya dəsan gən madaran. 52 Wəpelis asil gənək wəbay ma aweleŋgit Yahudiyenɗe: Mbarmbari ɗəffəŋ adawɓap wəpsəm gəɓa zən di? 53 Zezu azlansitike: Gesiŋ nədawnah sukum: An ɗəf dəzəm gəɓa zə Wətən Ɗəf ɓa, an də sə mbel nan ɓa, wəkoh taya zokum ɓa. 54 Ɗəf məs dəzəm gəɓa zuwa, məs də sə mbel nawa, arahək zeŋgille ha faɗə, wanəsil gən pay wəgrak dəlva. 55 Gəɓa zuwi zəga nawzəm an təstəssə, mbel nawəŋ zigeɗ naw saa an təstəssə. 56 Ko naway dəzəm gəɓa zuwa, də sə mbel zuwa wasap də ina, naw bo wanəsap dəndən. 57 Affən məs dəpsən wəsso madaran ndəni də slənwa, vi ni nəsaw madarawa. Vi vaski ko naway dəzəm gəɓa zuwa wasan madaran viwa. 58 Aski way məs dəprik sə disiŋ. Dəgil va way məs dəhiŋgiɗkum azəmaŋ, yaŋ amtaŋ əmpaŋ ɓa. Ko naway dəzəm wayəŋka, wasan madaran ha faɗə. 59 Zezu apel wənnəska, daga adawsan adəv gəla nawpel wənnet Yahudiyenɗe a Kafarnahumyi.
Wəpel napsən zeŋgille sən ɗəf ha faɗə
60 Səza apprəmən wəpel na Zezu vaska, ɗii suweleŋgit gewleɗ na Zezu diiɗa aɓɗaŋ na: Wənnəs tuwãhi. Naway naɓap wətafən di? 61 Zezu asənək na tahəŋ sekeseke aka wən nani, apsit na: Mi dəzlaɓan maɗulokum van di? 62 Mbari kan an kulanənək Wətən Ɗəf tay peŋ atəki məs asan far di? 63 Əmpəs na Maŋgəlva wapsən zeŋgille, gəɓa zə ɗəffa aɓap na ko mi diɓa. Wəpel məs nəpel sukuməŋka, ndəni Əmpəs də zeŋgille. 64 Amma ɗii meɓɓet tahəŋ awalaŋkum, tahəŋ də wətaf ɓa. (Vi daga wətəŋ nani Zezu asənək na mədəŋgaŋ nawtafnən di, asənək ɗəf nawzəm kini.) 65 Anahək əmpa: Vi vaski Intatə nahsukum, ɗəf aɓap na wəzzan azaw ɓa say an Affən apsənək tive. 66 Daga dəpaski məzəsbanən diiɗa amilyoŋ dasbani. 67 Yaŋ Zezu assohet gewleɗ nan klaw kiyit sula: Nokum bo mokum aka wəmbat sa? 68 Simoŋ Piyer azlan sənəka: Ɗəfdaya aŋga mədadam di? Wəpel məs napsən zeŋgille ha faɗə sə moki adaw gilyeni. 69 Kakaŋ mətafəka, məsənkuko, əstə Salala məs dəde səza Maŋgəlva. 70 Zezu apsit na: Əntə nəwelkum klaw kikum sula ɓa sa? Amma taka suwalaŋkum Ibilisayi. 71 Apel vas na aka Zudas wətən Simoŋ Iskariyotti. Vi ko Zudas asan aweleŋgit gewleɗ klaw kiyit sula zlaŋ, wazəm kini.
Məlmiŋgiɗin Zezu dətafnən ɓa
1 Yaŋ dərɓagani, Zezu abalək aka dələv na Galile, dəŋgəl wəmbat aka dələv na Zude ɓa, vi Yahudiyenɗe tahəŋ wəkayanən kawbayən. 2 Adan wəzləra net Yahudiyenɗe məs adawyaŋ na wəzləra net gizlirkeɗe go'oy. 3 Məlmiŋgiɗin Zezu apsənən na: Asil sahəŋka, dok aka dələv na Zude, vi gewleɗ nok dulanən gən wəzeɗe noko. 4 Ɗəf aɗamana zən an aŋgələk ɗii dəsənən gən ɓa. Adan istatəɗɗa zev wəzeɗe vaŋkəŋ na, say aɗɗa keret ɗii pakə. 5 Ko milmiŋgiɗin bo, dətafənən ɓa. 6 Zezu apsit na: Pay məs də slə su dəde su tagay ɓa. Azokum na pay awani di pak asləka. 7 Duniya agəɗ na here nokum ɓa, amma wagəɗ here nawa, vi əntat wərban wəzeɗe nan mogetiŋ ɓa. 8 Nokum məduwaŋ a wəzləra vani, naw maw tayaka wəmbat ɓa, vi pay an məs də slə su dəde tagay ɓa. 9 Yaŋ anahsiti, nan asanək aka dələv na Galile, dəmbat ɓa.
Zezu a wəzləra net gizlirkeɗe
10 Adan milmiŋgiɗ Zezu ambataŋ wəzləra, Zezu bo ambatək adaka. Amma dərban zən azet ɗii ɓa. Aɗamanək zəni. 11 Yahudiyenɗe akayanənək aweleŋgit ɗii na wəzləra, assohoŋko: Aŋgay aŋ nak asan di? 12 Ɗii apelinək wənnan awalaŋ zit də wəseske'e. Ɗii meɓɓet aɓɗaŋ na: Ɗəf mogoni. Ɗii meɓɓet tam aɓɗaŋ na: Awwo, ɗii adaw zeti. 13 Amma ɗəf tay dəpel wənnan appaka ɓa, vi geslne armek viyit ɗii gugiriɗ net Yahudiyenɗe. 14 Yaŋ aka pəɗak na wəzləra atoŋgu, Zezu atoŋguk adəv gəla metiŋ naw zuliya, atəŋgək wəpel sit ɗiiyi. 15 Yahudiyenɗe agətaŋka, aɓɗaŋ na: Mbari ɗəffəŋ asən zəga vaŋ di, də yagan zəga ɓaŋ di? 16 Zezu azlansitike: Məs an nədawpel pak dəde səzaw ɓa, amma səza Maŋgəlva məs də slənu ade. 17 Ko naway dəŋglu wəɗɗa an məs Maŋgəlva aŋgələ, wasənna wəpel nawəŋ səza Maŋgəlva ade sa, walla də sembe naw nədawpele. 18 Ko naway dəpel wən sən kini, gakdak adawkaysən zəni. Amma ko naway də kay gakdak sən ɗəf məs də sləna, ɗəf təstəssi, mambray taya makran ɓa. 19 Moyis dəpsukum ma henziŋ ɓa sa? Amma ɗəf ko taka tay dədarma wənnan ɓa. Vi mi kədawkayaŋ tive nawbayu di? 20 Ɗii azlan sənənka: Dərwa kənani: Naway də koyok nawbay di? 21 Zezu azlansitike: Nəgəɗək wəza taka kaaka'ə, munokum pak kəgətaŋka. 22 Moyis aɗi sukumək wənna wəskəl wiyən pay dədopoɗo səza muwani təstəs nan bo Moyis dətəŋ ɓa, amma dəhiŋgiɗkum məs dabəŋ dətəŋ gəni. Vini munokum tatə wəskilin kirtukum ko pay naffete. 23 Munokum tatə wəskəlnən ɗəf pay naffete vi kədamzlahaŋki ma henziŋ na Moyis ɓa. An wakəskələn ɗəf pay naffet na mədəray gədufkum adawda akaw vi nəmbəl gən ɗəf pay naffet di? 24 Məppan wətaw kita aka məs kulaŋ də horokum. Amma mətaw kita də goŋga.
Zezuwi Krestu
25 Yaŋ ɗii meɓɓet sə Zerusalem aɓɗaŋ na: Ndəni məs adawkayanən naw bay nak ɓa sa? 26 Yaŋ tay pel appaka, ɗəf tay nawgəɗ sən zəga ɓa. Ya ɗii gugiriɗ nam asəŋgənək na ndəni Krestu sa? 27 Amma an Krestu adeke, ɗəf tay nawsən təki adazan ɓa, amma ɗəffaŋka, məsənək təki ade. 28 Pay nani Zezu tay pel sit ɗii adəv gəla metiŋ naw zuliya, aslanək wəlan dayadaya, amna: Kəsən wənək sa, kəsənənək təki nəde sa? Nəde sən kiyu ɓa, amma ɗəf an məs də slənwəŋka təstəssi. Ndəni məs kəsənən ɓa. 29 Naw nəsənəka, vi səzan nəde, ndən də slənwa. 30 Yaŋ akayanən karmani, amma ɗəf tay dəɓlan ɓa vi pay nan dəɓəl wəgap tagay ɓa. 31 Ɗii diiɗa səmbet məs dətafəni, aɓɗaŋ na: An Messiya adek na wagəɗ sokeneɗ dayki ɗəffəŋ sa?
Asliŋginik məgaŋ gəla metiŋ naw zuliya akarma Zezu
32 Adan Farisiyenɗe apprəmən məs ɗii adawpeleŋ aka Zezu də wəseske'e, aslereŋgək dit dayeɗe net məs dəlveŋge asləŋginik məgaŋ gəla metiŋ naw zuliya vi dərmanən gəni. 33 Zezu Amna: Wanəsaw də munokum suɗike, asna wanəmil aza ɗəf də slənwa. 34 Wakəkayawəni, kərəwənna ɓa, vi kəɓapən na wəmbat atəki nəsaw ɓa. 35 Yahudiyenɗe assohonənək ziti: Aŋga adawmbat məɓapna wərəhən ɓaŋ di? Wambat azet Yahudiyenɗe məs dətərayaŋ aweleŋgit Grekɗe vi karban sit wən sa? 36 Amna: Wakəkayawəni. Amma kərəwənna ɓa, vi kəɓapaŋ na wəgap atəki nəsaw ɓa. Ya mbari aŋgəl wənah də wənnəs di?
Məlpeŋge net iŋkile na zeŋgille
37 Pay wəgrak wəzləra, ndəni payan tekteki. Pay nani Zezu asilke, aziwik awaləŋgit ɗiiyi. Apelik də wəlan daya daya, amna: Ko naway məs meme adawdaŋ dəde zawa, wasə, 38 va wənah na ko naway dətafwa. Məlpeŋge net iŋkile na zeŋgille waymaŋ amakrani va ɗerewel anahə. 39 Zezu apel wən məkpaŋgaska aka Əmpəs məs ɗii dətafaŋ adawrəhaŋ. Pay nani dəɓəl wərəhaŋ Əmpəs tagay ɓa. Vi Zezu dəɓəl wətoŋ adəv gakdak na Maŋgəlva tagay ɓa.
Ɗii agohoŋguk aka wənna Zezu
40 Adan ɗii suweleŋgit ɗii məkkelit apprəmən wəpeliska, aɓɗaŋ na: Gesiŋ, ɗəffəŋ məs kleŋgyi. 41 Ɗii meɓɓet aɓɗaŋ na: Ndəni Messiya. Ɗii meɓɓet əmpa aɓɗaŋ na: Messiya ade na sə Galile ɓa. 42 Ɗerewel amna Messiya səza ma əlfa na Davit adawsani, wade sə Betelihem, walaŋ gəla metiŋ məs Davit asani. 43 Ɗii agohoŋguk aka wənna Zezu. 44 Ɗii meɓɓet suweleŋgit aŋglaŋ wərmanənni, amma ɗəf tay dərəŋ gən ɓa.
Ɗii gugiriɗ net Yahudiyenɗe dətafnən Zezu ɓa
45 Yaŋ məgaŋ gəla metiŋ na zuli nek amilyoŋ azet, dayaɗe net məs dəlveŋge dit Farisiyenɗe, assohotini: Vi mi kəkinən ɓa di? 46 Azlanənka: Ɗəf tay naw ɓap wəpel va na ɗəf ndak kpak ɓa. 47 Farisiyenɗe assohotinke: Nokum bo kəŋglaŋ wəsban wərak nan sa? 48 Ɗəf tay səmbet ɗii gugiriɗ namə, walla suweleŋgit Farisiyenɗe məs dətaf sa? 49 Say ɗii ɗiɗerɗe dətafəni, vi dəsənən ma henziŋ ɓa, məray gitiŋ. 50 Nikodemus məs naweleŋgit Farisiyenɗe nadaka, an məs dəmbat təl taka aza Zezu, nan apsit na: 51 Ma henziŋ dəpan tive nawtaw kita aka ɗəf məza wəssohon ɓaɓa, məsən an agəɗ ɓa. 52 Azlan sənənka: Nok bo ɗəf na Galile kənan sa? Aŋɗan ɗerewel ɗa, wa kərah məs kleŋ ko taka dəde sə Galile ɓa. 53Yas ko naway ambatək eŋgil anan da.
Guluk məgəɗ mana'a
1 Amma Zezu ambatək aka gərəm na hereme. 2 Də mompum pum amilik adəv gəla metiŋ naw zuliya, ɗii azoŋguk azani. Atəŋgək wəpelsiti. 3 Yaŋ məsənaŋ zəga na ma henziŋ dit Farisiyenɗe akiyaŋ sənənək guluk məs armaŋ daɗɗa mana'a. Aziw gətənək abet ɗii pakə, 4 Apsənən Zezu na: Mərbə zəga, gulukəŋ daɗɗa mana'a mərəmta. 5 Moyis aɗi səmək wənnan adəv ma henziŋ məskət gən guluk zemvit vakəs dit kuneŋge. Ya nok mbar kənah di? 6 Anahəŋ vas na vi kaw rakani, dərəhaŋ gən tive na wəliyən akani. Amma Zezu aɓeke, averik afuŋ dəppərəm vani. 7 Yaŋ asbanən də wəssohoni, Zezu asilke, apsit na: Ɗəf səmbokum məs dəgəɗ ɗaah mambray ɓa dəskət dabəŋ də gərma. 8 Yaŋ aɓe əmpa, averik afuŋ dəppərəm vani. 9 Adan apprəmən wənəska, ambataŋgək taka taka pakə, ɗii gugiriɗ dədoŋ dabəŋ. Say Zezu dəpəl katər gəni, gəm ndət ziwe abani. 10 Yaŋ Zezu aslan kini assohu: Ngahəŋ ɗii nek di ɗakə? Ɗəf tay dəslbuk də kita ɓa sa? 11 Guluk təzlanəka: Ɗəf tay dəslbu də kita ko taka ɓa mərbə zəga. Zezu amna: Naw bo, nətaw na kita akok ɓa. Doko, amma kədaɗɗa ɗaah mambray ɓa.
Zezuwi təki babara
12 Zezu apel sitik ɗii əmpa, amna: Əntə təki babar na duniya. Ko naway dəsbawa warah təki babar vi zeŋgilleni, ambat na ara guzli ɓa. 13 Farisiyenɗe apsənən na: Istatəɗɗa saydawa aka zuko, an məs kəpel tay də sləman ɓa. 14 Zezu azlansitike: Ko əntatəɗɗa saydawa aka zuwa, saydawa naw goŋgayi, vi nəsənək təki nəde, nəsənək təki məs nədawmbata. 15 Nokum munokum tatəɗɗaŋ kita də kuket net ɗiiyi, naw na nətaw na kita aka ko naway ɓa. 16 Ko an nətawək kita aka ɗəf bo kita nan goŋgayi, vi nətaw na katərgu ɓa, amma Affu məs də slənu tay də ina. 17 Məverni adəv ma henziŋ nokum: An ɗii sula aɗɗaŋgək saydawa taka, saydawa nan gesiŋgi. 18 Intatəɗɗa saydawa aka zuwa, Affu məs də slənu tayəɗɗa saydawa akawa. 19 Assohonənka: Aŋgay Affuk van asan di? Zezu azlansitike: Kəsən wən ɓa kəsənən na Affu ɓa'a. Va kəsən wənka, wakəsənən Affa'a. 20 Zezu apel wənnəs na pay adawpel sit ɗii adəv gəla metiŋ naw zuliyi, atəki akoti net ɗeleɗ məs adapsənən Maŋgəlva asəni. Ɗəf tay dətak ɓa, vi pay nan dəɓəl wəzzan tagay ɓa.
Kəɓapəna wəmbataŋ atəki nədadaw ɓa
21 Yaŋ Zezu anah əmpa: Wanəmbatə, wakəkayawənni, amma wakəmtaŋ adəv mambray nokum. Kəɓapaŋ na wəgap atəki nədadaw ɓa. 22 Yahudiyenɗe assohonənək ziti: Wambat wəbay zən sa? Vi amna: Kəɓapaŋ na wəgap atəki nədadaw ɓa. 23 Zezu azlansitike: Nokum sə fuŋ kəzoŋ, naw sə disiŋ nəde. Nokum sə duniya kəzoŋ, amma naw ɗəf na duniya nan ɓa. 24 Vini nənah sukum: Wakəmtaŋ adəv mambray nokum. Ya an kətafwən na əntə nəsaw ina ɓana wakəmtaŋ adəv mambray nokum. 25 Assohonənka: Nawa kənan di? Zezu apsit na: Intatə nahsukum daga wətəŋ nani. 26 Gesiŋ, wən tay diiɗa nawnah sukum, məs nawtaw kita akokum. Amma ɗəf məs də slənu də goŋgayi adawnaha, əntatərban sən duniya an məs nəpprəm səman kaaka'ə. 27 Dəpprəmanən na wənna Affən adawpel siti ɓa. 28 Yaŋ Zezu apsit na: An kətələnək Wətən Ɗəffa, wakəsəŋgən na əntə məs nəsaw ina, wakəsəŋgən na nəgəɗ na ko mi də an məs nəɗisən kiyu ɓa, amma an məs Affu arbə suwa anan nədawpele. 29 Ɗəf məs də slənu tay də ina, appaw na katərgu ɓa, vi pay pak əntatəɗɗa an məs aŋgələ. 30 Adan Zezu apel vaska ɗii diiɗa atafənənka.
Ɗii məmeti dit balemɗe
31 Yaŋ Zezu apsit Yahudiyenɗe məs dətafnən na: An munokum tatəsban an nədawnah sukum asna wakəkpaŋgaŋ gewleɗ naw gesiŋ. 32 Wakəsəŋgən goŋga, goŋga tam wamokum səka balam nokum. 33 Azlan sənənka: Nam kirtin Abraham mənani məsam ɗaah balemɗe na ɗəf ɓa. Mbari kənah səm gən na. Wakəkpaŋgaŋ məza balemɗe ɓa di? 34 Zezu apsit na: Gesiŋ nədawnah sukum. Məgəɗ mambray pak balam na mambrayi. 35 Balam asana wətən affən gəla ɓa, amma wətəni wasan adəv gəla nan ha faɗə. 36 An Wətən amokuməka, asna məmokumi gesiŋ. 37 Nəsənka munokumtə kirtin Abraham. Amma munokumtatə kayawən kawbaywa. Vi kətafən wəpel naw ɓa. 38 An məs Affu arbə su nədawpele, amma nokum munokum tatəɗɗa an məs affukum dənah sukum ɓa. 39 Apsənən na Abraham mi affəmə. Zezu apsit na: Va kirtin Abraham kənanaŋ gesiŋ, wakəɗɗanən wəza an məs agəɗə. 40 Naw əntatəka wəpel sukum goŋga an məs nəpprəm səmma Maŋgəlva. Də as pak munokum tatə kayawən kawbaywa. Aski məs Abraham dəgəɗ ɗaah ɓa. 41 Munokum tatəɗɗanən wəza na affukum. Azlan sənənka: Nam sulomɗe mənan ɓa, nam Affəm tay taka, ndəni Maŋgəlva. 42 Zezu azlansitike: Va Maŋgəlvayi Affukum gesiŋ na, wakəŋgluwəni, vi səza Maŋgəlva nəde, nədek azokum, nəde də an nəɗi sən kiyu ɓa, amma ndən də slənwa. 43 Vi mi kapprəmanən məs nədawnah sukum ɓa di? Vi wəpak sləmokum ambra wəpel naw tuwãhyi azokum. 44 Ibilisayi affukum, mokum aka wəɗɗa an məs affukum aŋgələ. Ndəni məbay gəbaya daga wətəŋ nani, dənah ɗaah goŋga ɓa, goŋga taya makran ɓa. An munokum tatə peleŋ hĩnyaw, zəga nan kəgəmaŋ, vi məwə hĩnyawi vi affən hĩnyawyi. 45 Amma naw əntatə pel goŋga, vi ni kaŋglaŋ wənnaw ɓaŋka. 46 Naway səmbokum məs naɗɗa saydawa akaw vi nəgəɗ mbrayen di? Amma ya an goŋga nədawnaha, vi mi kawtafwən ɓa di? 47 Ɗəf na Maŋgəlva wapprəm wəpel na Maŋgəlva. Amma nokum ɗii na Maŋgəlva kənanaŋ ɓa, vi kapprəmən wəpel nan ɓa.
Zezu də Abraham
48 Yahudiyenɗe anah sənən Zezu na: Goŋga mənah ɓa sa? Mə Samariya kənani, mitemuk kənani. 49 Zezu azlansitike: Mitemu nan ɓa. Amma Affu nəda gakdakani, nokum bo munokum tatəzelewəni. 50 Nəkay na gakdak sən kiyu ɓa. Ɗəf tay taka məs dədawkay su gakdaka, ndəni mətaw kita. 51 Gesiŋ nədawnah sukum: Ko naway dəsban wəpel nawa, amtə na ɓa. 52 Yahudiyenɗe apsənən na: Kakaŋ məsənək kana mitemuk kənani. Abraham amtəka, məs kleŋɗe bo amtaŋka, nok kənah gən na: Məs dəsban wənnaw na amtə na ɓana, 53 Abraham dəhəməŋ amtəka, azok na kədayək kiyən də gakdak sa? Məs kleŋɗe bo amtaŋka, nok kan ka nawa kədawla zuk di? 54 Zezu azlanka: An nəgakdakanək zuwa gakdak naw tay də sləman ɓa. Ɗəf na gakdakaw tay Affuwa, məs kənahaŋ na Maŋgəlva nokumi. 55 Amma kəsənən ɓa, naw nəsənka. An nənahək na nəsən ɓa, nəŋgələ kpaŋ məs hinyaw va munokum. Amma nəsənka, əntat wəsban wənnani. 56 Abraham dəhəkum zən anekək nawla pay nazaawa, awlaka anekenək zəni. 57 Yahudiyenɗe apsənən na: Kəɓəl wəgap wəsva kaklaw sle tagay ɓa, yaŋ kəmna kulak Abraham? 58 Zezu azlansitike: Gesiŋ nədawnah sukum: Daga məwani Abraham ɓa, əntatə. 59 Yaŋ andenin kuneŋge vi kaskani. Amma Zezu aɗamanək zəni, agilik sədəv gəla metiŋ naw zuliya.
Zezu ambəl gənək ɗəf məwan daŋgar
1 Adan Zezu atoŋ kəla təki maɓɓani, awlak ɗəf muwan daŋgar. 2 Gewleɗ nan assohonənka: Mərbə zəga, vi mi muwa ɗəffəŋ daŋgar di? Vi mambray nan sa? Walla vi mambray net migilni? 3 Zezu azlanəka: Vi mambray nani ɓa, vi mambray net migilni ɓa bo, məwan daŋgar ɓa. Agəɗ vasna vi sembe na Maŋgəlva dərbə gən azani. 4 Adan kapayi tagay, say məɗɗa səm wəzeɗe na ɗəf də slənwa. Dəfəɗ go'oy, pay nan ɗəf tay dədawɓap wəɗɗa wəza ɓa. 5 Pay nəsaw a duniya, əntə təki babar nani. 6 Dərɓaga Zezu apel wənnəska. Atəfək mefɗe afuŋgu alɓanək dələv dənɗaŋ suɗike, akipik aka hara daŋgar naka, amna: 7 Dokkuɗa a pe'e məs adawyaŋ na Silowama. Va wənah məs məyan na masləŋ. Daŋgar ambatək adaka, aɗak harani, amilke, tayula. 8 Adan megeŋgiɗin dit ɗii məzulanən daŋgla zəga aba tive, aɓɗaŋ na: Ɗəffəŋki dədawsan aba tive wəŋgla zəga nak ɓa sa? 9 Ɗii meɓɓet aɓɗaŋ na: Ndəni. Ɗii meɓɓet aɓɗaŋ na: Awwo, ndəni ɓa, amma ɗəffi dəgil va ndəni. Amma ndən sən kiyən amna: Əntə. 10 Assohonənka: Mbarmbari horok akol di? 11 Azlansitike: Ɗəf məs adawyaŋ na Zezu dəlaɓ dələv suɗike akip arawa, anah su na: Dokkuɗa a pe'e na Silowama. Nəmbat adaka, nəɗaka, haraw akolko. 12 Assohonənka: Aŋgay ɗəf nan asan di? Azlansitike: Nəsən ɓa.
Farisiyenɗe assohonənək daŋgar
13 Akanənək daŋgar nak azet Farisiyenɗe. 14 Vi pay məs Zezu allaɓ dələv akip ara daŋgar, haran akolu, dəpas pay naffeti. 15 Vini, Farisiyenɗe assohonən daŋgar: Mbarmbari agəɗ di, kədawla kakaŋ di? Azlansitike, dələv akip suɗike arawa, nəɗa, haraw akolu. 16 Ɗii meɓɓet səret Farisiyenɗe aɓɗaŋ na: Məgəɗ zəga vaska dəde səza Maŋgəlva ɓa, vi dərma wənna pay naffet ɓa. Amma ɗii meɓɓet aɓɗaŋ na: Mbarmbari ɗəf adawɓap wəɗɗa zemvit sokeneɗ ves va məs mambrayi di? Agayaŋgək awalaŋ ziti. 17 Farisiyenɗe assohonənək daŋgar əmpa: Kəmna akol sukuk horoko, nok mbar kənah akan kandi? Amna: Ɗəf van məs kleŋgiyi. 18 Amma ɗii gugiriɗ net Yahudiyenɗe dəŋgereŋ wətaf wənna daŋgar na, daŋgaryi laŋka haran akoluk kakaŋ ɓa. Ayeninik migilni. 19 Assohotinke: Ɗəffəŋ wətukumi sa? ya mbari adawla kakaŋ di? 20 Migilin azlanənka: Məsənka wətəmi, məwan daŋgari bo. 21 Amma məsən va haran akol ɓa, məsən ɗəffan dəkolsən ɓa'a. Məssohoni, nan bo metiŋgini, wazlansən kiyən. 22 Migilin anəhaŋ vas na vi tahəŋ wəgeslne'eŋ, sit ɗii gugiriɗ net Yahudiyenɗe. Vi ɗii gugiriɗ net Yahudiyenɗe aslereŋgək na, an ɗəf asənək na Zezuwi Messiya wagil gənən sədəv gəla nawpel wənneti. 23 Vini migilin anahaŋ na: Metiŋgini wazlansən kini. 24 Farisiyenɗe ayanənək daŋgar ma sula'ən, apsənən na Maŋgəlva tayəpprəm suko anah goŋga. Nam məsənək ɗəffəŋka məs mambrayi. 25 Azlanəka: Naw na, wanəsən ɓa an məs mambrayi walla tay də mambray ɓa. Amma an məs nəsən harana: Daŋgar nan laŋka, kakaŋ əntatə ula. 26 Assohonənka: Mi agəɗ suk di? Mbarmbari akol suk horok di? 27 Azlanəka: Nənah sukuməka daga farə, amma kəpprəmən maw ɓa. Vi mi kəŋglaŋ wəpprəmən əmpa'a di? Walla nokum bo mokum aka wəkpaŋ gewleɗ nan sa? 28 Aranənənka: Aɓɗaŋ na: Əstə gawla nani, nam gewleɗ na Moyis mənani. 29 Məsənək na Maŋgəlva apel sənək Moyis amma nan na məsən təki ade ɓa. 30 Azlansitike: Aye, sokene. Kəsəŋgən təki ade ɓa, ya yas akol suwək harawa. 31 Məsənəka Maŋgəlva azlansəna məs mambray ɓa, amma tay zlansit məzu gakdakənəni, məzəsbanən wəŋgla nani. 32 Daga wətəŋ na duniya, ɗəf tay dəpprəm ɗaah na ɗəf akoluk hara ɗəf məwan daŋgar ɓa. 33 Va ɗəffəŋ səza Maŋgəlva ade ɓa aɓap na wəɗɗa zəga ko suɗike ɓa. 34 Apsənən na: Istatə adəv mambray daga muwoko, mokaka wərban səm zəga sa? Agil gənənək sədəv gəla nawpel wənnet Yahudiyenɗe.
Daŋgar na makra ɗəffa
35 Adan Zezu apprəm na agil gənənka, a akayanəka, assohonəka: Kətafək Wətən Ɗəf sa? 36 Azlanəka: Mərbə zəga, anah suwa naway di? Vi nətaf gəni. 37 Zezu apsən na: Istatə ulani, ndən dədawpel suk kakaŋka. 38 Amna: Ɗəfdaya, nətafəka. Akdukuk takpran aba Zezu. 39 Yaŋ Zezu amna: Nəde a duniyaŋ na vi kaɗɗa kitayi, vi deŋgerɗe dulaŋ gəni, məs heret bo dətippeŋ gəni. 40 Yaŋ Farisiyenɗe məs na maŋgavan apprəmən vaska, assohonənka: Nam bo deŋgerɗe mənan sa? 41 Zezu apsit na: Va deŋgerɗe kənanaŋ ɓa, asna munokum tat də mambray ɓa. Amma munokum tatə nahaŋ na: Mənam tatə ula. Vini mambray nokum tay.
Wən məkpaŋga na məzutaɗa dit timeŋgiɗi
1 Yaŋ Zezu apelək wən məkpaŋga, amna: Gesiŋ nədawnah sukum: Ko naway dətoŋ agazlaŋ net timeŋgiɗ məza kla madamba ɓa, amma atoŋguk dəmba zlava atoŋguk agazlaŋ, ndəni mahala, məvoŋ tiveyi. 2 Amma məs dətoŋ kla madamba, ndəni məzutaɗa net timeŋgiɗi. 3 Məzutaɗa wakol sit madamba, timeŋgiɗ bo wapprəmən wəlani. Waye timeŋgiɗ nan pak də iya neti, vi kawket amawtaɗa. 4 An agil gitik pak appaka, watoŋ abeti, timeŋgiɗ bo wasbanəni vi asəŋgənək wəlani. 5 Amma asbanən na ɗəf məs də sənən ɓaɓa, wageslne'eŋ sənəni, vi dəsənən wəlan ɓa. 6 Zezu apel sitik wən məkpaŋgaska, amma dəpprəmən na aka mi apel sit di ɓa.
Zezuwi məzutaɗa mogoni
7 Zezu aməsək wənaha: Gesiŋ nədawnah sukum: Əntə madamba na gazlaŋ net timeŋgiɗi. 8 Ɗii məs dəzoŋ dabəŋ kiyu pak məheleŋɗeŋgeŋ məvoŋgoŋ tiveŋ, amma timeŋgiɗ dəpprəmən wəlet ɓa. 9 Əntə madamba, ko naway dətoŋ də ina wakohu. Warah wətoŋ də wəgilya, warah wəzəma. 10 Məhala nan wəzzan na say kawhala, kawbay zəga kawray gəni. Naw nəde na vi ɗii dərəhaŋ gən zeŋgille məs nawrəh zit dəndən. 11 Əntə məzutaɗa mogoni. Məzutaɗa mogoni tayəpsən zeŋgillen sit timeŋgiɗ nani. 12 Amma məzutaɗ vi arya, timeŋgiɗ nanəŋ ɓa, məzutaɗa mogoni ɓa. An awlak kəra muya tayə zani, wanzani, wapet timeŋgiɗi. Asna kəra muya wazla a aketi watray giti. 13 Wanzani vi məzutaɗa nawrəh aryayi kaaka'ə, məssan dit timeŋgiɗ ɗaah di. 14 -15 Əntə məzutaɗa mogoni, nəsinik timeŋgiɗ nawa, timeŋgiɗ naw bo asənwənka. Va Affən asənwa, vaski bo nəsəna. Nəpsənək zeŋgillew vi timeŋgiɗ nawa. 16 Timeŋgiɗ naw tahəŋ meɓɓeti, tahəŋ ara ngaɓa aŋ ɓa. Say nəkiyi gən enet əmpa, wapprəmən wəllawa, wakpaŋgaŋ ngaɓa taka, məzutaɗa taka. 17 Affu aŋgələuwəka, vi nəpsənək zeŋgillewa vi kaw məssa wərahən meleketen əmpa. 18 Ɗəf tay naw ɓap wəgəm zeŋgillew ɓa, əntə nədapsən də əŋgla nawa. Intat də sembe napsəni, əntat də sembe nawsil gən meleketeni. Aski an Affu aɗi su wənnan naɗɗa. 19 Vi wənnəski Yahudiyenɗe agayaŋ awalaŋ ziti. 20 Ɗii diiɗa suweleŋgit aɓɗaŋ na: Mitemni, dərway, vi mi kədapprəmən man di? 21 Ɗii meɓɓet aɓɗaŋ na: Ɗəf mitemin apel na vaŋ ɓa. Witem wa ɓap kawkol heret deŋgerɗe sa?
Yahudiyenɗe dətafən Zezu ɓa
22 Yaŋ pay nani pay naɗɗa salala aza gəla metiŋ a Zerusalemmi, mawalayi. 23 Zezu abalək adəv gəla metiŋ naw zuliya amba genzek na Salmoŋ. 24 Yahudiyenɗe akaraŋgək kini, apsənən na: Dewɗe kədaw boton səm gəkgrəŋ nam aka wən nok di? An əstə Messiya na anah səm təstəs kpak ɗa. 25 Zezu azlansitike: Nənah sukumək daga farə, amma kətafwən ɓa. Wəzeɗe məs nəgəɗ də sembe na Affuwa, tayəɗɗaŋ saydawa akawa. 26 Amma kətafaŋ ɓa, vi munokum tat aret timeŋgiɗ naw ɓa. 27 Timeŋgiɗ naw tahəŋ wəpprəmən wəlawa, nəsinike tahəŋ wəsbawəni. 28 Intatəpsit zeŋgille məs nasa faɗə, amtaŋ na ɓa. Ɗəf tay nawtefit səvaw ɓa. 29 Affən məs dipsiwe adayək ki zəga pak də daya, ɗəf tay naw mohit səva Affən ɓa. 30 Ina gəm Affən taka mənanni. 31 Yaŋ Yahudiyenɗe andenin kuneŋge əmpa vi kaskani. 32 Amma Zezu apsit na: Nəgəɗək wəzeɗe moget diiɗa abokum də sembe na Affuwa. Wəza awani kan səmbet kəŋglaŋ wəskuwən akan kan di? 33 Yahudiyenɗe azlanənka: Məŋgəl wəskuk vi wəzeɗe moget ɓa, amma vi kəpel mbrayen aka Maŋgəlva. Is ɗəffa, amma yaŋ kədaɗɗa zuk na va Maŋgəlva kənani. 34 Zezu azlansitike: Məverni adəv ma henziŋ nokum: Maŋgəlva amna: Munokum maŋgəlveɗi. 35 Məsənka an məverin kawzar gəni ɓa. Maŋgəlva ayek ɗii məpprəmaŋ wəpel nani maŋgəlveɗi. 36 Amma nawa, Maŋgəlva awelwəka, aslənwək a duniya. Mambray kədaw nahaŋ na əntatə pel mbrayen aka Maŋgəlva di, vi nənah na Wətən Maŋgəlva nani sa? 37 Ya an məs nədaɗɗaŋ wəzeɗe na Affuwəŋ ɓa, asna kədawtafwən ɓa. 38 Amma an wəzeɗe na Affuwəŋ, gesiŋ, ko kətafwən anaw ɓa, mətaf wəzeɗe naw van dayday kana, vi kəsəŋgən gən na Affu taya dəffuwa, naw van bo əntat adəv Affəni! 39 Yaŋ akayaŋ tive narman əmpa, amma akohuk səveti. 40 Zezu ambatək dəgar ki məlpa na Zordan əmpa, atəki məs Zaŋ agəɗ baptem, asanək adaka. 41 Ɗii diiɗa azoŋguk azani. Aɓɗaŋ na: Zaŋ dəgəɗ sokene ko taka ɓa, amma an apel aka ɗəffəŋ pak goŋgayi. 42 Ɗii nadak diiɗa atafənka.
Wəmta na Lazar
1 Ɗəf maɓɓan tay iya nan na Lazar gbəgba'yi. Ɗəf na Baytaniyayi, walaŋ gəla məs Mari dət Marta milmiŋgiɗin məgiliŋgit asoŋ. 2 Mari ndətə məs təman tursan aka təl Ɗəfdaya, təɗɗan də muhur kita. Lazar məlmətti gbəba'a. 3 Məlmiŋgiɗin məguliŋgit sula nek asləŋgaŋgək ɗəf aza Zezu, dənah sən gən na Ɗəfdaya baynok tay gbəgba'a. 4 Adan Zezu apprəm labara nani, amna: Gbəgba na Lazar abay na ɓa, amma warban sembe na Maŋgəlva, də wərban gakdak na Wətən Maŋgəlva. 5 Zezu aŋglutək Marta dət Mari gəm Lazar. 6 Adan apprəm na Lazar gbəgba'yi anziyək pay sula əmpa atəki məs asani. 7 Yaŋ Zezu apsit gewleɗ nan na: Məmil səm aka dələv na Zude. 8 Yaŋ gewleɗ nan azlan sənən na: Mərbə zəga məvoŋgi səza Yahudiyenɗe adaw koyokun naskuk də kuneŋge ɓa, yaŋ kədaŋgla wəmilya adaka? 9 Zezu azlanka: Ler tay klaw kiyən sula adəv wəsɓəta ɓa sa? An dəf tay wədaw kapaya, aŋgbay na ɓa, vi tayula təki babar na duniya. 10 Amma an ɗəf tay wədaw dəfɗa, waŋ gbayə vi təki babar taya zan ɓa. 11 Zezu apel sit wənəska yaŋ aməs wənah na: Baynam Lazar aleŋke, amma wanəmbat wəfɗaahanni. 12 Gewleɗ azlanənək na: Ɗəfdaya an wəleŋgi na wafɗaahə. 13 Zezu aŋgəl wənah sit kəta na Lazar amtaka, amma azet gewleɗ na aka wənnet sin adawpel gesiŋ. 14 Zezu anah sitik kotak kana: Lazar amtəka. 15 Amma vi wən nokum əntatə neken zuwa vi əntat adak ɓa, vi kətaf wən gəni. Asna, mədamsa zani. 16 Tomas məs adawyaŋ na meseŋge apsit gewleɗ meɓɓet na: Nam van mədaməs adaka, məmtə gən də mərbə zəgaŋka.
Zezuwi wəsilya sətəki əmta da zeŋgille
17 Adan Zezu agap a Baytaniya, arəhək Lazar məndəkni, agəɗək pay poɗo adəv magamasə. 18 Baytaniya go'oy də Zerusalem, va kilometər hoku. 19 Yahudiyenɗe azoŋguk diiɗa azat Marta dət Mari vi kaw ɓət git aka wənna məlmit dəmtəŋka. 20 Adan Marta təpprəm na Zezu adeke, təmbatək wələmsəni amma Mari təsatək eŋgili. 21 Marta təpsən Zezu na: Ɗəfdaya va istataŋ na kəta məlmu wamtə kəta ɓa. 22 Amma nəsənəkana, ko kakaŋka, Maŋgəlva wapsuk məs kəssohon pakə. 23 Zezu apsət na: Məlmuk wasili kawsan madarani. 24 Marta təzlanəka: Nəsənka wasili, kawsan madarani pay wəsilya net ɗii mimtiti, pay wəgrak dəlva. 25 Zezu apsət na: Əntə wəsilya səka əmta, nawsil git ɗii məs dəmtaŋ dəsoŋ gən madereti. Ko naway dətafwa wasan madarani, ko an amtəka. 26 Ko naway məs madarani dətafwa amtə na ɓa. Kətafək sa? 27 Marta təzlanəka: Haa'aw nətafəka əstə Messiya, Wətən Maŋgəlva, məs dəde a duniya.
Sin agilyoŋgək ara Zezu
28 Dərɓaga wənnəska, Marta təmilik azat məlməta Mari, tənah sətək Məɗama: Mərbə zəga adeke, tay yuko. 29 Adan Mari təpprəma təsilik go'u təmbatək aza Zezu. 30 Zezu dətoŋ awalaŋ gəla tagay ɓa, taya təki məs Marta təlləm dəndən naka. 31 Yahudiyenɗe məs dəsoŋ eŋgil dət Mari vi kaw ɓət gəta awlətənək təsilik go'u, təgilik də kakara, asbatənka. Azet na amagamas tədadat vi kawhəm adaka. 32 Mari tədek atəki məs Zezu asani, tulaka, təskək morkoyo amba təlni, təpsən na: Ɗəfdaya, va istat aŋ na, məlmu amtə na kəta ɓa. 33 Zezu awlətək tatəhəma, Yahudiyenɗe məs dəzoŋ dəndət pak tahəŋ wəhəmaŋ. Asiripik zəni. 34 Assohotike: Aŋga kəndəkən di? Azlan sənənka: Ɗəfdaya, ade awla. 35 Zezu ahəmək dit sinni. 36 Yahudiyenɗe aɓɗaŋ na: Mula va aŋgluta. 37 Amma ɗii meɓɓet aɓɗaŋ na: Ndəni məs dəkol heret deŋgerɗe nak ɓa sa, aɓap na wəkoh gən Lazar səma əmta ɓa sa?
Məsil gəni Lazar sətəki əmta
38 Zezu aməsək wəsirip əmpa, ambatək amagamasə. Bətəŋ na milɓeyi magamas vani. 39 Zezu amna: Məkol gərma. Marta akən məlməni təmna: Ɗəfdaya kakaŋkəs na wafoku, agəɗək pay poɗo adəv magamasə. 40 Zezu apsət na: Nənah suk ɓa sa an kətafək na, akula gakdak na Maŋgəlva ɓa sa? 41 Akolənək gərəm naka. Zezu aslanək haran a disiŋ, amna: Affuwa, nəgəɗ sukuk soko vi kəpprəmək mawa. 42 Nəsənka istat əpprəm maw pay pakə, amma nənah vas na vi ɗii məs dəkaraŋ kiwiŋki vi dətafaŋ gən na is kəslənwa. 43 Adan apel wənəska, anahək də wəlan daya daya: Lazar agili. 44 Gəbay agilginik vani də tələn tay mətwəɗən də gabaga, haran pak mətərən də lukutu. Zezu apsit ɗii na: Məpparsəni, məppan dəllə.
Kuket narma Zezu
45 Yahudiyenɗe diiɗa məs dəzoŋ azat Mari awlanən məs Zezu agəɗə, atafənka. 46 Amma ɗii meɓɓet səmbet ambataŋgək azet Farisiyenɗe, anahsitinik an məs Zezu agəɗ pakə. 47 Farisiyenɗe dit dayeɗe net məs dəlveŋge aslerinik meti, aɓɗaŋ na: Mbar mədaɗɗa di? Vi ɗəffəŋ tayəɗɗa sokeneɗ diiɗa. 48 An məppanək tayəɗɗan vaska, ɗii pak watəfəni. Asna Romeɗe məs də sembe watoŋgoŋ wənnani, waray gənən gəla metiŋ naw zuliya dit ɗii nan pak warayaŋ. 49 Ɗəf taka səmbeti məs iya nan na Kayafas, ndəni daya net məs dəlveŋge də wəsva nani, apsit na: Nokum kapprəmaŋ wən ko suɗike ɓa. 50 Kaw sənən na ɗəɗaah ɗəf taka dəmtə viyit ɗii pakə, ki ɗii pak wəzaŋ ɓa sa? 51 Ɗəfəs dəpel wənəs də wəsən nan ɓa. Amma ndəni, daya net məs dəlveŋge də wəsva nani, agəɗək kleŋ: Zezu wamtə viyit ɗii net Yahudiyenɗe pakə. 52 Viyit ɗii netiŋki kaaka' ɓa, amma vi kaw sepet kirtin Maŋgəlva məs dətərayaŋ aka dələv pakə. 53 Daga pay dəpaski ɗii gugiriɗ net Yahudiyenɗe aslereŋ aka kuket nawbay Zezu. 54 Vi vaski Zezu dəbbal ɗaah aweleŋgit Yahudiyenɗe appaka ɓa. Ambatək atəki amaŋgava muya, na walaŋ gəla məs adawyaŋ na: Efrayim, adakki anzi dit gewleɗ nani. 55 Wəzləra net Yahudiyenɗe məs adawyaŋ na wəzləra na Paska go'oy, ɗii na aka dələv temtem anzoŋguk a Zerusalem daga wəzləra dəbɓəl ɓa, vi kaw salalan ziti dəsoŋ gən məza də mambray ɓa. 56 Akayanənək Zezu pay nan adəv gəla metiŋ naw zuliya, assohonənək ziti: Mbar kəda ɗumonən di, wade awəzləra van sa? Wala ade na ɓa sa? 57 Ɗii gugiriɗ net məs dəlveŋge dit Farisiyenɗe aɗinenek wenani, an ɗef asənək ateki mes Zezu asani, say dənah sit gəni dərmanen gəni.
Mari temanək tursan aka tel Zezu
1 Dəpas apələk pay slire naɗɗa wəzləra na Paska. Zezu ambatək a Baytaniya awalaŋ gəla na Lazar məs Zezu asil gən sətəki əmta. 2 Aɗɗaŋ sənənək zəga nawzəm adaka, daga Zezu adawzəm də Lazar may dit ɗii məyet meɓɓeti, Marta tatəpsit waya. 3 Yaŋ Mari təgəm tursan an tuwãh diiɗa də dədak litər, məslahan də gaŋgəlya an mogoni: Təmanək aka təl Zezu, yaŋ təɗɗan də muhur kita. Gədəv gəla pak aknahək də məŋgənən. 4 Zuda Iskariyot, məs naweleŋgit gewleɗ na Zezu, an məs nawzəm kiyən amna: 5 Vi mi məvəlni tursannəŋ deleɗ na təbəs səkat hoku kapsit məs saheŋɗe ɓa di? 6 Dənah vi ula saha aket məs saheŋɗe ɓa, amma vi məhalayi. Ndəni mərəm deleɗi, tayəhal deleɗ məs məzeɓet avani. 7 Amma Zezu amna: Kədaɓlatən ɓa təɗɗak dabəŋ an məs adaɗɗaŋ daw ndəkwəni. 8 Məs saheŋɗe wasoŋ də munokum ha faɗə, amma naw nəsaw na də munokum ha faɗ ɓa.
Kuket nawbay Lazar
9 Yahudiyenɗe diiɗa apprəmənək na Zezu taya Baytaniya. Ambataŋgək adaka, vi Zezuwi kaka ɓa, amma ambataŋ vi kawla Lazar məs Zezu asil gən sətəki əmta. 10 Dayaɗe net məs dəlveŋge akayaŋgək tive vi kawbay Lazar tamə. 11 Vi wənani Yahudiyenɗe diiɗa apetinik dayaɗe net məs dəlveŋge, atafənək Zezu.
Zezu atoŋguk a Zerusalem
12 Vit pumpum nani, ngaɓa net ɗii dədazoŋ wəzləra na Paska nak apprəmənən na Zezu wade a Zerusalem. 13 Akzlohunək kiva wəlaŋga na dubunozi, adoŋguk wələmsəni, tahəŋ wənahaŋ də wəlet daya daya: Gakdak aza Maŋgəlva. Maŋgəlva dəɗɗa zəzay nan aka ɗəf məzəzan zan də iya na Ɗəfdaya! Maŋgəlva dəɗɗa zəzay nan aka məlĩ net Israyelɗe. 14 Zezu arahək koro apaŋgək akani, va ɗerewel anahə: 15 Geslne daduk ɓa walaŋ gəla metiŋ na Siyona. Awla məlĩ nok tayə zani, tay ka'a aka bəlata na koro. 16 Pay nani gewleɗ nan dəsənən gaban tagay ɓa. Amma adan Zezu atoŋ adəv gakdak na Maŋgəlva, aɗumonənək wənnadəv ɗerewel annah akani, goŋga nan arbanək zən də wəzeɗe neti. 17 Pay Zezu aya Lazar, agil gən sədəv magamasə, asil gən səkəti əmta, ɗii diiɗa tahəŋ adaka. Net bo anahsitinik ɗii meɓɓeti məs awlaŋgə. 18 Vini ngaɓa net ɗii diiɗa azoŋ wəlmaŋ sənən Zezu, vi apprəmənək wənna sokene məs agəɗə. 19 Yaŋ Farisiyenɗe, anahaŋ awalaŋ zit na: An məs agəɗ pak dətər wəray ɓa, yaŋ ɗii pak atəŋgaŋ wəsbanəni.
Grekɗe meɓɓet akayanənək Zezu
20 Grekɗe meɓɓet tahəŋ aweleŋgit ɗii dədazoŋ a Zerusalem vi kawzuli sən Maŋgəlva pay nawzləra, 21 azoŋguk aza Filip ɗəf nawalaŋ gəla na Baytisayda dələv na Galile, apsənən na: Ɗəffa abaah səmə, mammaka ula Zezu. 22 Filip ambatka, anah sənək Andre yaŋ sulegit pak anah sənən Zezu. 23 Zezu azlan sitik na: Pay agapək kakaŋka, ka gakdak na Wətən Ɗəf darban gən zəni. 24 Gesiŋ nədawnah sukum: An zemve na alkamari məslgani ɓa, an dəmtə ɓa wasan katər gəni. Amma an amtəka, asna waɗi aran diiɗa. 25 Ko naway dəŋglu zeŋgilleni wazani. Amma ko naway dəzel zeŋgillen a duniyaŋka wakoh gən zeŋgillen ha faɗə. 26 Ko naway dəŋgəl wəgəɗ su wəza say dəsbawa, vi məza gəɗ su wəza, də san gən atəki məs nəsaw tamə. Ko naway dəgəɗ su wəza. Affu wa gakdakni.
Zezu apelək wənna əmta nani
27 Zezu amna: Kakaŋ na makraw atapawəka. Mi nədawnah di? Nənahsən Affu dəkohgu gən səma wəzəm saha an nadəv pay aŋkəŋ sa? Amma gesiŋ nəde na vi nəzəm gən saha adəv pay aŋki. 28 Affuwa aɗɗa ko mi vi gakdak na iya noko. Yaŋ wəpel ade sə disiŋ, amna: Nəgakdakanəka, wanəgakdakan əmpa bo. 29 Ɗiiyen nadak apprəmənək wəpel nani, aɓɗaŋ na: As buni. Ɗii meɓɓet aɓɗaŋ na: Maslay dədawpelsəni. 30 Amma Zezu apsit na: Wəpelis dəde viyu ɓa, amma vi kum ade. 31 Kakaŋki də pay aŋki Maŋgəlva adawtaw kita aka duniya. Kakaŋ na karɓəhni məlĩ na duniyaŋka. 32 Naw an nəpeŋgək a disiŋ na, wanətiɗ ɗii naw pak azawa. 33 Də wəpeliski arban zev əmta məs adamta. 34 Ɗii apsənən na: Məpprəmək adəv ɗerewel na ma henziŋ namə, vasna Messiya wasan ha faɗə. Ya mbari kədawnah na kaw slani Wətən Ɗəf a disiŋ di? Naway Wətən Ɗəf van di? 35 Zezu azlansitike: Təki babar tay də munokum pay suɗike kaka tagay. Mədaw ara təki babar pay məs kəsoŋ də təki babarəŋka, vi guzli adawɗamokum ɓa, vi məzu daw ara guzli asəna təki adadan ɓa. 36 Vi vaski mətaf təki babar pay kərəhənni, vi kəsoŋ gən ɗii na təki babara.
Yahudiyenɗe dətafən Zezu ɓa
Dərɓaga Zezu apel wənnəska, ambatka aɗɗamək səma hereti. 37 Ko vi Zezu agəɗ sokeneɗ keret pakə dətafən Zezu ɓa. 38 Vi kleŋ na Ezay dəsan gən gesiŋ, amna: Ɗəfdaya naway dətaf wəpel nam di? Aza naway Ɗəfdaya arban sembe nan di? 39 Dəɓapaŋ wətəfən ɓa, vi Ezay anahək əmpa na: 40 Maŋgəlva atipik hereti, aynanənək makreti, vi heret adawla ɓa, makret bo adapprəman ɓa, adaw milyoŋ azan ɓa, vi adawmbəl git ɓa. 41 Ezay amna: Vaski va awla gakdak na Zezu, akan apeli. 42 Ko aweleŋgit Yahudiyenɗe bo ɗii diiɗa atafənək Zezu. Amma dərbanən zit ɓa, vi geslne net Yahudiyenɗe, vi ada rohən met sədəv gəla na zuli net Yahudiyenɗe ɓa. 43 Aŋgluwinik ɗiiyi dayki wəŋgla na Maŋgəlva.
Wəpel na Zezu wataw kita
44 Yaŋ Zezu anah də wəlan dayadaya: Ko naway dətafuwa, anaw ataf kaaka ɓa, amma ana ɗəf məs də slənu atafe'e. 45 Ko naway duluwa awlak ɗəf məs də slənwa. 46 Nədek a duniya, əntə təki babar na duniya, vi ɗəf məs dətafu pak adawsan ara guzli ɓa. 47 An ɗəf apprəmək wəpel nawa, ya dəsban ɓa, əntə nawtaw kita akan ɓa, vi nawkoh gən duniya nəde, vi kawtaw kita kani ɓa. 48 Ko naway dəɓoŋ akawa, dəŋglu wənnaw ɓa, an məs nawtaw kita akan tay. Wən məs nədawpeliŋka, ndəni nawtaw kita akan pay wəgrak dəlva. 49 Vi nəpel də sembe naw ɓa, amma də sembe na Affən məs də slənwa, ndəni dəda ɗisu məs nədawpele də an məs nədarba. 50 Nəsənək məs aɗi suwa waki sukum zeŋgille məs nawsan ha faɗə. Tay məs nədapelsən kiyu ɓa, say an məs Affən aɗisu nawpel kaaka'ə.
Zezu askoɓək tilit gewleɗ nani
1 Apələk wəsɓəta taka naɗɗa wəzləra na Paska. Zezu asənək pay nan agapək napan duniya, kamndan aza Affən. Aŋgluwik ɗii nan na duniya aŋgluwik ha pay nagrak nani. 2 Zezu dit gewleɗ nan tahəŋ wəzəmaŋ moskoya, Ibilisa aɗɗak wəɗum nan amakra Zuda, wətən Simoŋ Iskariyot, vi kawzəm ki Zezu. 3 Zezu asənka, daga səza Maŋgəlva ade, wamil aza Maŋgəlva əmpa, Maŋgəlva apsənək sembe aka zəga pakə. 4 Asilik sətəki wəzəm waya, agbukuk lukut nani, aynanək zana. 5 Yaŋ amet iŋkile adəv tasa, atəŋgək wəskoɓ tilit gewleɗ nani, akəlɓitik iŋkile dəzana məs aynə naka. 6 Adek aza Simoŋ Piyer. Piyer apsən na Ɗəfdaya wakəskoɓ təlu sa? 7 Zezu azlansən na: Kəsəna an məs nədaɗaŋ tagay kakaŋ ɓa. Amma akəsən abeŋ suɗike. 8 Piyer apsən na: Awwo kəskoɓ na təlu ɓa. Zezu apsəna: An nəskoɓ tuluk ɓa na, haran nok taya zaw əmpa ɓa. 9 Piyer apsən na: Ɗəfdaya, asna kədaskoɓ təlu kaaka ɓa, amma askoɓ vaw də kiyu pakə. 10 Zezu apsən na: An ɗəf aslayka, wəray tay naslay əmpa ɓa. Say tələn kaaka adoskoɓo, vi zən salalayi. Salala kənanaŋ, amma pak kənanaŋ vas ɓa. 11 Zezu asənək ɗəf məs nawzəm kini, vi ni anah na: Pak kənanaŋ salala ɓa. 12 Səɓa Zezu agrak wəskoɓ tilti, aguluk lukut nan əmpa, asanək atəki nawzəma, apsit na kəpprəmanənək məs nəgəɗ sukuməŋ sa? 13 Munokum tatə yəwənna mərbə zəga may Ɗəfdaya, Vaski gesiŋ bo, vi vas nan gesiŋ. 14 Vi vaski, an mərbə zəga nani, wala Ɗəfdaya, wanəskoɓ təlkum sa, an vaski na aslək kəskoɓən gən təl zukum. 15 Nəɗɗa vas na wərban sukumi, vi kəɗɗanən gən vaska va nəɗɗa sukum. 16 Gesiŋ nədawnah sukum: Məgəɗ wəza aday na ki daya nan də daya ɓa, masləŋ bo aday na ki məzu sləŋ gən də daya ɓa. 17 Kəkaŋ kəsənənka, wakpaŋ zəzay azokum an munokum tatəɗɗanən vaska. 18 Nəpel akokum pak ɓa, nəsinik ɗiiyen nəweli. Amma aslək an ɗerewel apel dəsaŋ gən gesiŋ: Məs dəzəm way də ina ndən dəɓoŋ akawa. 19 Nənah sukumək daga kakaŋka, daga wənnan dəɓəl wəɗɗa ɓa. Vi an agəɗka kəsənən gən na əntə nəsaw ina. 20 Gesiŋ nədawnah sukum: Ko naway dətaf masləŋ nawa, atafwəkana. Ko naway dətafwa, atafək ɗəf məs də slənwa.
Zezu arbanək Zuda məs dədawzəm kini
21 Səɓa Zezu apel wənnəska, makran assanka, amna: Gesiŋ nədawnah sukum, ɗəf taka səmbokum wazəm kiwa. 22 Gewleɗ nan awlanənək ziti, dəsənən na aka nawa adawpele di ɓa. 23 Gawla məs Zezu aŋgəl taya maŋgava Zezu. 24 Piyer Simoŋ amirzi'ik də haran dəssohon gən Zezu aka naway apel di. 25 Gawla nan assohonək Zezu də wəseske'e, naway di Ɗəfdaya. 26 Zezu azlanəka: Wanəgul vawa wanərɗa waya sədəv hiluwe, ɗəf məs nədapsəni ndəni. Yaŋ Zezu arɗa way sədəv hiluwe ayopuko aret teɓi apsənək Zudas wətən Simoŋ Iskariyot. 27 Yaŋ Zudas ataf way mərɗan naka, Satan aguluk a makrani. Zezu apsən na: An məs kəŋgəl wəɗɗa aɗɗa gu'u. 28 Ɗəf tay səmbet ko taka dəpprəm vi mi Zezu anahsən vas di ɓa. 29 Vi Zudassi mərəm deleɗi, ɗii diiɗa azet na Zezu adaŋgla wənahsən na dokəlbaah zəga dənɗaŋ an məs naɗɗa wəzləra dəndən walla anah na apsit zəga maɓɓan sit məs saheŋɗe. 30 Yaŋ Zuda ataf way naka agilik gu ləŋgə. Dəfɗi.
Wəɗi wən məs naɗɗa meleketeni
31 Dərɓaga wəgilya na Zuda, Zezu amna: Kakaŋ na gakdak na Wətən Ɗəf arbanək zəni, gakdak na Maŋgəlva bo arbanək zən dəni. 32 An gakdak na Maŋgəlva arbanək zən adəv Wətəni, Maŋgəlva bo warban gakdak məs Wətən arah sən kini. Vaski adaɗɗani. 33 Kirtuwa əntat də munokum pay suɗike kaaka tagay. Dərɓagani wakəkayawəni, amma əntatə nahsukum kakaŋ na məs nənah sit Yahudiyenɗe na: Kəɓapaŋ na wəmbat a təki məs nədadaw ɓa. 34 Yaŋ nəɗi sukumək məs kədaɗɗaŋ meleketeni: Məŋglu zukum. Say məŋglu zukum va nəŋgulukum. 35 An munokum tatə wəŋgluwən zukum asna ɗii wasən kumən na gewleɗ naw kənanaŋ.
Zezu də Piyer
36 Simoŋ Piyer assohonək Zezu: Ɗəfdaya aŋga kədadok di? Zezu azlan sənəka: Kəɓap na wəmbat atəki məs nədadaw kakaŋ ɓa, amma abe aŋ na wakəsbawa. 37 Piyer apsən na: Vi mi nəsbok na kakaŋ ɓa di? Nəzaɓanək zuwa vi kapsən zeŋgillewa, kamta viko. 38 Zezu apsən na: Kəzaɓanək zuk napsən zeŋgillok viyu gesiŋ sa? Gesiŋ nədawnah suko: Ha gəmnda adawhəm paa man taka wakənah təl hoku kəsənu ɓa.
Zezuwi tive nambat aza Maŋgəlva
1 Zezu apsit gewleɗ nan na, mokrokum adazlaɓ ɓa. Mətaf Maŋgəlva, mətafuwa. 2 Gəleɗe tahəŋ diiɗa eŋgil ana Affu da, wanəmbatə, wanəzaɓan sukum təkiya. Va gesiŋgi ɓana nənah sukum na vas ɓa. 3 An nəzaɓan sukumək təkiya, wanəmil azokum, wanəkukum atəki nawa, vi təki məs nədadawa adak kədosoŋ. 4 Kəsənənək tive nawmbat atəki məs nədadawa. 5 Tomas apsən na: Ɗəfdaya məsən təki kədodok ɓa, mbari mədawsən tive nan di? 6 Zezu azlansən na: Əntə tive an də goŋga də zeŋgille. Ɗəf tay nawrəh wəmbat aza Affu də tive maɓɓan ɓa say də ina. 7 An kəsən wənka, wakəsənən Affuwa. Daga kakaŋka kəsənənka, kulanənka. 8 Filip apsən na: Ɗəfdaya, arban səm Affən wasan mək azamə. 9 Zezu apsən na: Filip nənziyək də munokum diiɗa, yaŋ kəmna kəsənu ɓa? Ko naway duluwa, awlak Affuwa. Vi mi kənah na arban səm Affuko di? 10 Kətaf na əntatə adəv Affuwa, Affu bo taya dəvwa ɓa sa? Wəpel məs nədawpel sukum pakəŋ, səmawi ɓa. Affu məs ana dəvwa, ndəni dədaɗɗa wəza nani. 11 Mətaf an məs nədawnah sukum pakə: Affu taya dəvwa, naw bo əntata dəvən. An kətafən wəpel naw ɓa, mətaf vi wəzeɗeŋ kan day day ɗa. 12 Gesiŋ nədawnah sukum: Ko naway dətaf wəzeɗe məs nəgəɗə, wagəɗ wəza metiŋgin dayki aska, vi əntatə mbat aza Affən. 13 Ko mi kəssohoŋ də iya nawa, wanəɗa, vi Wətən dərban gən gakdak na Affən. 14 An kəssohowənək ko mi də iya nawa, wanəɗa.
Zezu amna wanəslən Əmpəs Salala
15 Zezu aməsək wənaha: An kəŋgluwənka, wakərmanən wən məs nəɗiyə. 16 Wanəkaman Affu waslən sukum məzəbaah temme, ndəni Əmpəs Salala, vi wasan də munokum ha faɗə. 17 Duniya aɓap na wərahən ɓa, vi aɓap na ulan ɓa, aɓap na wəsənən ɓa bo. Amma nokum wakəsənəni, vi wasan də munokum, wasan amokrokum. 18 Nəpokum na katər gukum va mətuɗeŋge ɓa, amma wanəmil azokum. 19 Abe aŋ suɗike, duniya awlu na ɓa, amma nokum wakuluwənni. Vi əntatə saw madarawa, vi ni nokum bo wakəsoŋ madorokum. 20 An pay nan adeke, wakəsənən na ina də Affu taka mənani, nokum bo taka kənanaŋ də ina. 21 Ko naway dərma an məs nəɗi naɗɗa, aɓe sənəka, ndəni dəŋgluwa. Affən waŋglu ɗəffan dəŋgəluwa, naw bo wanəŋgluwa, wanərban zu azani. 22 Ɗəf maɓɓan tay Zuda, mbək sa Zuda Iskariyot, apsən Zezu na: Ɗəfdaya, mbari kədarban zuk azamdi, amma kərbana zuk aza duniya ɓa di? 23 Zezu azlan sənəka: Ko naway dəŋgəluwa, aɓe sənək wəpel nawa, Affu waŋgluwa. Affuwa ina, waməde waməsam dəndən. 24 Ko naway dəŋgəlu ɓa aɓe səna wəpel naw ɓa. An məs adapprəm səmawa, dəde sə makraw ɓa, amma səza Affu məs də slənwa. 25 Intatə nahsukum adan əntat də munokum tagay. 26 Ɗəf məs na baah sukum, ndəni Əmpəs Salala məs Affu adawslən sukum də iya nawa, nan warban sukum zəga pakə, waɗumon sukum an məs nəpel sukum pakə. 27 Intatə pokum də zamə, əntatə pan sukum zam nawa. An məs nədapsukum, tay va an duniya adapsən ɓa. Makrokum adazlab ɓa, kədaw geslne'eŋ ɓa. 28 Kəpprəmənək nənah sukum na wanəmbatə, amma wanəmil azokum. An kəŋgəluwənka məneken zukum vi əntatə mbat aza Affən, vi Affən day kiyu də metiŋ. 29 Nənah sukumək wənnan səkay kakaŋka daga dəɓəl wəɗɗa ɓa, vi kətafən gəni an agəɗka. 30 Nəsbana wəpel də munokum diiɗa əmpa ɓa, vi məlĩ na duniya tayə zani. Tay də sembe akaw ko suɗike ɓa. 31 Amma vi duniya dəsən gən na nəŋgluwək Affən, vini nədaɗɗa an Affən aɗi su naɗɗa. Məsili, mədamə.
Wən məkpaŋga na wəlaŋga na mbazla
1 Zezu anahək əmpa: Əntə wəlaŋga məmpan na mbazla an də goŋga, Affuwi affən guliyo. 2 Kivaw an məs awa ɓa, kaw bəlni. Amma ki vaw məzuwa, kaw zaɓani dəsan gən mogon dayki laŋka, də wə gən kirtin akani. 3 Munokumtə məs məzoɓokum vi wənna wəbaah an məs nərban sukum. 4 Məsoŋ adəv wəsler də ina, asna naw bo wanəsaw adəv wəsler də munokum. Kiva wəlaŋga na mbazla awə na kirtin ɓa say an asapək də wəlaŋga na mbazla. Vaski nokum bo, kətəraŋ na wəray ɓa, say an kəsapaŋgək də ina. 5 Əntə wəlaŋga na mbazla, munokumtə ki vani. Ko naway dəsler də ina naw bo wənəsler dəndən, nan watər wəraya. Amma an kəslereŋ də in ɓa, kəɓapaŋ na wəɗɗa zəga ko gaban taka ɓa. 6 Ɗəf məs dəsler də'in ɓa kasgani appaka va ki van məbələn, waŋkələ. Kivan an məkleketiŋ atəraŋ na wəray ɓa, kawlotti kawndol ti aka offo, wazlaŋ. 7 An kəsuwaŋgək də wəsler də ina, wəpel naw bo wasan də munokum, asna an kəssohoŋgək an məs kaŋglaŋ pakə, wakərəhaŋ. 8 An kətəraŋgək wəray diiɗa asna gewleɗ naw kənanaŋ gesiŋ. Vaski gakdak na Affu adarban zəni. 9 Nəŋglukumək va Affu aŋgəluwa. Məsoŋ adəv əŋgla nawa. 10 An munokum tatə ɓe'eŋ sənən wən an nədaw ɗiyəŋka, wakəsoŋ adəv əŋgla nawa, va naw nəɓesən dawka na Affuwa nəsawək adəv əŋgla nani. 11 Nənah sukum na vi wənek naw dəsan gən a mokrokum, wənek nokum tamə dəknah gəni. 12 Aŋki wən an naw nəɗiyə, məŋglu zukum va nəŋgulukum. 13 Wəŋgla aday na ki aŋ ɓa: Ɗəf kapsən zeŋgillen viyit bayneŋgiɗin. 14 Bayneŋgiɗu kənanaŋ an kəɗɗanənək va dawka an nəɗi sukum. 15 Nəyukum na məɗɗəŋ wəza nawa ɓa, vi məgəɗ wəza asən na an məs daya nan adaɗɗa ɓa. Wanəyukum na beyneŋgiɗwa, vi nərban sukumək an məs nəpprəm səza Affu pakə. 16 Yaŋ na munokum kəwelwən ɓa, amma in nəwel kum. Nənah sukumək də kakara kədoŋ gəni. Kətəraŋ gən wəraya, wətər wəray nokum bo dəsan gən ha faɗə Affən wapsukum ko mi kəssohoŋ də iya nawa. 17 Məŋglu zukum, ndəni kpak nəɗi sukum.
Duniya azelik Zezu dit ɗii nani
18 An duniya azel kuməka, məsəna anaw atəŋ wəzel dabəŋ. 19 Va ɗii na duniya kənanaŋ na, asna waŋglukum vi ɗii nan kənanaŋ. Amma nəyukuməka, məgil sədəv wənna duniya. Nokum ɗii na duniya kənanaŋ ɓa, vini duniya adawzel kum. 20 Məɗumon an məs nənah sukum: Məgəɗ wəza aday na ki daya nan də daya ɓa. Va azel wənni wazelkumənni. Va dəɓe'eŋ sənən wəpel naw ɓa, a ɓe'eŋ na sən wəpel nokum ɓa'a. 21 Waɗɗaŋ sukumən vas pak vi wənnawa. Vi dəsənən ɗəf də slənu ɓa. 22 Va nəde ɓa tahəŋ də mambray ɓa, va nəpel sit ɓa, tahəŋ də mambray kəta ɓa. Amma kakaŋ na va awsəna asana vi mambray net ɓa. 23 Ko naway dəzelwa ana Affu azeli. 24 Va nəgəɗ wəza məs ɗəf dəɓap wəɗɗan ɗaah ɓaɓa, kəta mambray net awəl na ɓa. Amma kakaŋ na awlanənək wəza nawa, də as pak azel wənka, ina də Affuwa. 25 Agəɗ vas na vi an məverin adəv ɗerewel na ma henziŋ dəsan gən gesiŋ: Azel wənka məza nəgəɗ zəga ɓa. 26 Məzə baah sukum wade Əmpəs an də goŋgayi məs dəde səza Affən. Wanəslən azokum an nəmbatək aza Affuwa, wagəɗ saydawa akawa. 27 Nokum bo wakəɗɗaŋ saydawa akawa, vi kəsuwaŋgək də ina daga wətəŋ nani.
1 Nənah sukum vas na vi kədapanən wətaf an kətaf wənni. 2 Wagil gukumən sədəv gəla nawpel wənnet Yahudiyenɗe. Asna pay nan wade, an ɗəf abayək ɗəf səmbokum wawlanən na va adaɗɗaŋ wəza na Maŋgəlva. 3 Waɗɗanən vaska vi dəsənən Affu ɓa, dəsən wən ɓa'a bo. 4 Yaŋ nənah sukumko. An pay nan adeke, wakəɗumonən an məs nənah sukum.
Wəza nə Əmpəs Salala
Zezu asbanək wəpel əmpa: Nənah sukum daga wətəŋ nan ɓa, vi əntat də munokum. 5 Kakaŋ əntatə mbat aza ɗəf an də slənwa, amma ɗəf tay ko taka səmbokum dəssoh na: Aŋga kədodok di sa? 6 Amma kakaŋ makrokum azlaka, vini nənah sukum vaska. 7 Amma gesiŋ nədawnah sukum: Mogoni azokum an nəmbatka, an nəmbat ɓa məza baah nak ade na azokum ɓa. Amma an nəmbatka, wanəsləna wade azokum. 8 Nani, an adeke, warbansən duniya tayə zaŋ dəwəɗum neti aka wənna mambray aka wənna goŋga də kita na Maŋgəlva. 9 Tahəŋ wəzaŋ aka wənna mambraya, vi də tafwən ɓa. 10 Tahəŋ wəzlaɓaŋ aka wənna goŋga, vi nədadaw aza Affuwa, kuluwənna ɗaah ɓa. 11 Tahəŋ wəzlaɓaŋ aka wənna kita vi məlĩ na duniya mətawi kita akan səkay. 12 Zigeɗ diiɗa dəpaŋ suwən naw nah sukum, amma wadayki wəpprəm nokum tagay. 13 Amma an Əmpəs Salala adeke, warban sukum wəpprəm an də goŋga pakə. Apel na aka sembe nan ɓa, amma wanah an məs apprəmə, də an məs dədazan pakə. 14 Wanah sukum an məs apprəm səmawa. Vaski adarban gakdak nawa. 15 Zəga na Affu pak nawi. Vini nənah na: Əmpəs wanah sukum an məs apprəm səmawa.
Wəsahan zə ɗəf wakpaŋ wənneken zə ɗəffa
16 Zezu apsit na: Abe suɗike kuluwənna ɓa, dərɓagan suɗike əmpa wakuluwəni. 17 Gewleɗ assohonənək ziti: Va wənah mbari kan vaskəs di? Abe suɗike kuluwənna ɓa, dərɓagan suɗike əmpa wakuluwəni. Yaŋ kəmpa na: Wanəmbat aza Affən, mbari di? 18 Mbarmbari adaŋgla wənah də abe suɗike di? Məsəna an məs adaŋgla wənah ɓa. 19 Zezu asənəka aŋglaŋgək wəssohoni, apsit na: Mənziyayi səza nənah sukum tagay ɓa: Abe suɗike kuluwənna ɓa, dərɓagan suɗike akuluwən əmpa. Aka wənnani kədassohonən zukum sa? 20 Gesiŋ nədawnah sukum: Wakəhəmmaŋ wakənzlaŋ vamvəlla, amma duniya waneken zəni. Wakəsahanən zukum amma wəssahan zukuməs wakpaŋ wənneken zukum. 21 An guluk dədaway gu'otə aza uwa, watəssahan zəta vi pay nawzəm saha nat agapka. Amma an tuwəka, watəsgət ki bonoy nani vi wənneken zəta, vi tuwək ɗəf a duniya. 22 Vaski nokum tamə bo wakəssahanən zukum kakaŋka, amma wanulukum əmpa. Asna makrokum wasan neki, ha ɗəf tay nawɓap wəmoh nenek nan ɓa. 23 An pay nan adeke, kəssohoŋ wənna ko mi ɓa. Gesiŋ nədawnah sukum: Ko mi kəssohoŋ ava Affu də iya naw pak wapsukum. 24 Ha gap dəpaŋka kəssohoŋ ko mi də iya naw ɓa. Məŋgələ, wakərəhaŋ an məs kəŋglaŋ, vi wənneken zukum deknah gəni.
Zezuwi dədayki duniya
25 Zezu asbanək wəpel əmpa: Wənnəs pak də wən məkpaŋga nənah sukum. Pay maɓɓan wade asna nəpel sukum na ɗaah də wən məkpaŋga ɓa, amma wanənah sukum wənna Affən kotakə. 26 An pay nan adeke, wakəkamanən Affən də iya nawa. Nənah sukum na, wa nəkaman Affu vikum ɓa. 27 Affən aŋglukumko, vi kəŋgluwənka kətafwənək na səza Affu nəde. 28 Səza Affən nəde, nədek a duniya. Kakaŋ əntatə pan duniya wa nəmndaw aza Affuwa. 29 Gewleɗ nan aɓɗaŋ na: Awla, kakaŋ na istatə pel kotakə məza də wən məkpaŋa ɓa. 30 Kakaŋ məsənəka kəsənək zəga pakə. Daga ɗəf dəɓəl wəssohok ɓa, kəsənək an aŋgəl wəssoho. Vini mətafəka səza Maŋgəlva kəde. 31 Zezu apsit na: Kakaŋ kətafaŋgək sa? 32 Pay nan wade, ko kakaŋ bo agəɗək səkay, munokum pak wakətərayaŋ, ko naway pak eŋgil annanda, wakəppawən katərguwa. Amma nəsaw makatərgu gesiŋ ɓa, vi Affu tay də ina. 33 Nənah sukum pak vasna vi kərəhaŋ gən wəsuwa zam də ina də wəsler də ina. Wakəsaŋ bonoy a duniya, amma məsok mokrokum, nədayək ki duniya.
Zezu azuliyək viyit gewleɗ nani
1 Yaŋ adan Zezu agrak wənnəs pakə. Aslanək haran a disiŋ, amna: Aw Əbba, pay naw agapka. Arban gakdak na Wətuko, vi Wətən bo dərban gən gakdak noko. 2 Kəpsənək sembe aket ɗii pakə, vi dəpsiti gən zeŋgille nasuwa ha faɗ sit ɗii məs kəpsənəŋki. 3 Aŋki zeŋgille məza agrak ɓa, asənkunko istə Maŋgəlva taka təstəssə, asənənək Zezu Krestuwi masləŋ noko. 4 Nərbanək gakdak nok adəv dəlva, nəgrakanək wəza məs kəvayə. 5 Kakaŋ kana. Əbba, avay gakdak aboko, gadak məs naw məsvan nəsaw dəndən də isi, daga məɓəli wəɗɗa dəlva fuŋ ɓa. 6 Nərbokuk azet ɗii məs kəgil git sədəv duniya vi kepsiwe. Nokuŋgə, kipsiwike, asbanənək wəpel noko. 7 Kakaŋ asənənək ko mi kəvay səzok ade. 8 Nərban sitik halabara məs kəvayəŋka, atafənka. Asənənək gesiŋ səzok nəde, atafənək na əstə kəslənwa. 9 Intatə komoko viti. Nəkomok na vi duniya ɓa, amma əntatə komok viyit ɗii məs kəvayə, vi ɗii nokkuŋ. 10 Zəga naw pak noki, zəga nok pak tamə nawi, gakdak naw tayərbanzən azeti. 11 Nəsaw na a duniya ɓa, amma neti tahəŋ wəsoŋ a duniya. Kakaŋ əntat wəmbat azoko. Aw Affən salala, kərban suwək sembe na iya noko, age də sembe nani, vi dəsoŋ gən taka, va in də isi məsam takaŋka. 12 Daga nədaw saw dənɗaŋ, nəgek də sembe na iya noko sembe məs kərbə suwiŋki. Ɗəf tay dəzə suweleŋgit ko taka ɓa, say an məs dəzan zəni vi ɗerewel an məverin dəsan gən gesiŋ. 13 Kakaŋka əntatə mbat azoko, əntatə pelin pak daga əntatə a duniya tagay, vi wənnek naw dəkna gən amekreti. 14 Nərban sitik halabara noko. Duniya azelike, vi ɗii na duniyaŋ ɓa, va naw bo ɗəf na duniya nan ɓa. 15 Nəkomok na vi kəgil giti gən sə duniyayi ɓa, amma vi kəkoh giti gən səva ɗəf mbrayenəŋka. 16 Tahəŋ va ɗii na duniya ɓa, va ina əntat va ɗəf na duniya ɓa. 17 Wəpel noki goŋga. Yaŋ azeɓetik ka ɗii noko də goŋga naka. 18 Intatə slinit a duniya va kəslənu a duniya. 19 Wanəpan zeŋgillewa viti vi dəsoŋ gən ɗii nok gesiŋ. 20 Nəkomok na viyit kaka ɓa, amma əntatə komok viyit ɗii məs naw tafwən aka wənnarba net pakə. 21 Intatə komoko vi ndəɗaŋ pak dəsoŋ gən taka. Aw Affuwa, dəsoŋ gən məslerit də mənamə, va nok kəsler də ina, naw bo nəsler də isi. Dəsoŋ gən taka, vi duniya dətaf gən na əstə kəslənwa. 22 Nəpsitik gakdak məs kəvayəŋka, vi dəsoŋ gən taka, va isi də ina məsam taka. 23 Intatəɗɗa wəza amekreti, nok tamə istatəɗɗa wəza a makrawa, vi vaski adasoŋ taka gesiŋ. Ndəni duniya adawsənən na, is kəslənwa, kəŋgluwik va kəŋgluwa. 24 Aw Affuwa kipsiwik ɗiiyiŋki. Nəŋgəl dəsoŋ gən də in atəki nəsawa, vi dulanən gən gakdak nawa. Kəpsu gakdak nan na vi kəŋgəluwək daga məɓəlli wəɗɗa duniya ɓa. 25 Aw Affuwa, məs təstəssə, duniya dəsunuk ɓa, amma naw nəsənkuko, net tamə asənənək na əstə kəslənwa. 26 Nərbokuk siti, wanəsban wərboksiti, vi wəŋgla məs kəŋgəluwəŋ dəknah gən amekreti, naw bo nəknah gən amekreti.
Va armanən Zezu
1 Adan Zezu agrak wəzuliyəŋka, ambatək dit gewleɗ nan dəgar kiyit məlpaŋ na Kederon, wəleŋɗe tahəŋ məmpet adaka, Zezu atoŋguk adak dit gewleɗ nani. 2 Zuda məs nawzəm kiyənəŋ asənək gəla təki nani, vi Zezu dit gewleɗ nan asərəkaŋgək wəmbat adaka. 3 Zuda ambatək adivit wəleŋɗe veti dit sozeɗi dit məgaŋ gəla metiŋ naw zuliya. Ɗii gugiriɗ net məs dəlveŋge dit Farisiyenɗe dəslinini, tahəŋ də zəga naw gaya dit pitirileɗi də offo mətalən. 4 Zezu asənək məs naw rəhən pakə. Vini alləm dənɗəŋ, assohotike: Nawa kədawkayanən di? 5 Azlanənka Zezu na Nazaret mədawkayani. Zezu apsit na: Inyakəŋkə. Zuda məs dəzəm kiyən tay dənɗaŋ adak ziwe. 6 Yaŋ Zezu amna: Əntə, adereŋgək dirɓe, asbəraŋgək afuŋgu. 7 Zezu assohotik əmpa: Naway kədawkayanən di? Azlanənka: Zezu məs na Nazaret. 8 Zezu amna: Nənah sukumuko, inyakəŋkə. An anaw kədakayawənna, məpet ɗiiyeŋ də mbataŋ. 9 Agəɗ vasna vi wən məs məpelin dəsan gən gesiŋ: Aw Affən nəzan ko ɗəf taka suweleŋgit ɗii məs kəvayaŋ ɓa. 10 Simoŋ Piyer tay də kafahi, aptuwəka, abələk gawla na daya net məs dəlveŋge, abələk sləman dəka van də zəŋ. Iya na gawla nan na Malkus. 11 Amma Zezu apsən Piyer na: Agul kafahi nok agəlani. Azok na nəsət na huloŋ na bonoy məs Affu avaykəŋ ɓa sa?
Məkani Zezu aba Annas
12 Yaŋ sozeɗ də daya neti, gəm Yahudiyenɗe məzugaŋ dərmanən Zezu, aɓrukunko. 13 Dabəŋ nani akanənək aba Annas, ndəni dəhən Kayafas, daya net məs dəlveŋge də wəsva nani. 14 Kayafas vani anahsitik Yahudiyenɗe na: Ɗəɗaah ɗəf taka dəmtə viyit ɗii pakə.
Piyer azelik Zezu
15 Simoŋ Piyer də gawla maɓɓani asbanənək Zezu. Gawla van daya net məs dəlveŋge asənəka, vini arah wətoŋ annanda pay mətoŋ gən Zezu eŋgil annanda. 16 Amma Piyer tay ziwe appaka, ama meŋgle. Yaŋ gawla məs daya net məs dəlveŋge asən nak apsət guluk məzuga memeŋle na, atoŋ gən Piyer eŋgili. 17 Guluk nak təpsən Piyer na: Nok gawla na ɗəffəŋ kənan ɓa sa? Azlanəka: Awwo. 18 Gewleɗ dit məzugan armanənək offo, tahəŋ wəluwəni, vi səmnya tay. Piyer aziwik dənɗaŋ, tayə lu offo.
Daya net məs dəlveŋge assohonək Zezu
19 Yaŋ daya net məs dəlveŋge assohon Zezu aka wənnet gewleɗ nani də wənna wərba nan məs adarbə sit ɗiiyi. 20 Zezu azlan sənəka: Intatə pel keret ɗii pakə. Intatə wərban wən adəv gəla metiŋ naw zuliya daga adəv gəla nawpel wənnet Yahudiyenɗe məs adakalaŋ adəvən pakə, nəpel wən məɗama ko suɗike ɓa. 21 Vi mi kədassohu di? Assohet ɗii məs dədapprəmən an məs nədawpele, net asənənka. 22 Adan Zezu apel wənnəska, ɗəf taka səmbet məzugaŋ argaka, amna: Vas kədawzlansən daya net məs dəlveŋge sa? 23 Zezu azlan sənək na: An məs nənah na an gesiŋgi ɓa na, arban ɗa. Amma an gesiŋ nənahə ya vi mi kərgudi? 24 Amma Annas aslənək muɓrukun ana Kayafas da daya net məs dəlveŋge.
Piyer anahəkna də sən Zezu ɓa
25 Pay nani Simoŋ Piyer taya dak ziwe, tayə lu offo. Ɗii nadak assohonənka: Nok ɗəf nambet gewleɗ na ɗəffəŋ kənan ɓa sa? Amma azelenik wənnani, amna: Awwo vaski ɓa. 26 Ɗəf səmbet gewleɗ na daya net məs dəlveŋge, məlmən ɗəf məs Piyer abəl sləman naka apsən na: Nuluk adivit wəleŋɗe dəndən ɓa sa? 27 Amma yaŋ Piyer azelen wənnan əmpa. Dəpas ki gəmnda ahəmə.
Zezu aba Pilatu
28 Vit pumpum nan də mompumo pumu agəmənək Zezu səŋgil ana Kayafas da, akanənək eŋgil ana ngomna net Romeɗ da. Yahudiyenɗe dətoŋgoŋ eŋgil adak ɓa, vi adasoŋ də mambray ɓa, ka arəhaŋ na wəzəm way na Paska ɓa. 29 Vini ngomna, Pilatu asili, ade azeti, Assohotike: Aka mi kəwəliyən ɗəffəŋ di? 30 Azlanənka: Va ɗəf mbrayeni ɓana məkina zok ɓa. 31 Pilatu apsit na: Məgəmma mətaw kita akan va ma henziŋ nokum. Yahudiyenɗe azlanənək na: Dəpsəm tive nawtaw kita namta aka ɗəf ɓa. 32 Agəɗ vas na vi an Zezu anah dəsan gən goŋga, darban wəmta nani. 33 Pilatu atoŋguk eŋgil annanda əmpa, ayak Zezu, assohonəka: Əstə məlĩ net Yahudiyenɗe sa? 34 Zezu azlanəka: Əstə kənahsən kiyuk sa, walla ɗii dənahaŋ sukuni? 35 Pilatu azlanəka: Yahudiyen nan sa? Əlfiŋgiɗuk dit dayaɗe net məs dəlveŋge dəwəlikun azawa. Mi kəgəɗ di? 36 Zezu azlanəka: Məlĩ naw dəde səka dələv ɓa. Va məlĩ naw səka dəlva fuŋgi, kəta gewleɗ naw wazoŋ wətaf wənni, səvet Yahudiyenɗe. Amma məlĩ naw dəde səka dələv ɓa. 37 Pilatu assohonəka: Amma də as pak məlĩ kanan sa? Zezu azlanəka: Vaski məlĩ nani. Məwəwi nəde adəv dəlvəŋka, vi kaɗɗa saydawa an də goŋga. Ko naway dəŋgəl goŋga, wapprəm an məs nədawpele. 38 Pilatu assohonəka: Mi goŋga di?
Mətawi kita namta aka Zezu
Yaŋ Pilatu agil azet Yahudiyenɗe əmpa, apsit na: Nərah wən gala naw taw kita aka ɗəfəŋ ɓa. 39 Amma va an məs kəsərəkaŋ də wəzləra na Paska pak wanəpel sukum ɗəf na daŋgay taka an məs kəŋglaŋ. Akəŋglaŋ nəppan sukumən gən məlĩ net Yahudiyenɗe sa? 40 Amma anzlaŋgək vamvəlla, aɓɗaŋ na: Awwo anan kədapa ɓa, mamaka kəppan səmə gən Barabbas. Barabbas van məvoŋ tiveyi.
1 Yaŋ Pilatu aɗi wənan dəkanən gən Zezu, dərganən gəni. 2 Sozeɗ aturoɗoŋguk gedirge va mətər kiya, aɗəppənək aka Zezu, aklakaŋ sənənək zəga va lukut peppreŋge. 3 Azaraŋgək azani, aɓɗaŋ na: Usɗoko məlĩ net Yahudiyenɗe. Averenek atapaslayən. 4 Pilatu agilik əmpa, apel sitik ɗiiyi amna: Naw wanəgil gən sukum, vi kəsənən gən na nərah wən gala nawtaw kita akan ɓa. 5 Yaŋ Zezu agili, mətər kiya na gedirge taya kani, zəga va lukut nak peppreŋ naka taya zan kəlakka. Pilatu apsit na: Ndən yaŋka. 6 Amma adan məs dəlveŋge dit məzu gaŋ awlanəni, anzlaŋgək vamvəlla, aɓɗaŋ na: Məlawa aka wəlaŋga məzliwrihe. Məlawa. Pilatu apsit na: Məgəmma, məlawa, naw vi nərah wən məs gala nawtaw kita akan ɓa. 7 Yahudiyenɗe aɓɗaŋ na: Mənam tat də ma henziŋ. Va an ma henziŋ nan aɗi na, say dəmtə gəni, vi aɗiyək zən za Wətən Maŋgəlva. 8 Adan Pilatu apprəm wənəska, geslne aməsək wərmani. 9 Atoŋguk eŋgil əmpa, assohonək Zezu: Səŋga kəde di? Amma Zezu dəzlansən ɓa. 10 Pilatu anah sənək əmpa na: Kəzlan su na ɓa sa? Kəsəna əntat də sembe nappoko, də sembe na lawuk aka wəlaŋga məzliwrihe ɓa sa? 11 Zezu azlan sənəka: Istat də sembe akaw ko suɗike ɓa, say an Maŋgəlva dəpsuko. Vi vaski ɗəffan dəkiyu aboko mambray nan day kiko. 12 Daga də Paska Pilatu akay kuket napan Zezu. Amma Yahudiyenɗe anzlaŋgək vamvəlla, aɓɗaŋ na: An kəppanəka, asna kəsok na bayna məlĩ na Roma ɓa. Ko naway dəɗi zən va məlĩya, məzu zel na məlĩ na Romayi. 13 Adan Pilatu apprəm wənnəska, agil gənək Zezu əmpa, asanək aka mazaŋga na kita, atəki məs adawyaŋ də ma Ibrahiŋkore na Gabbata, va wənah na məkəɗən dit kuneŋge. 14 Pay nani, ndəni dabəŋ ki wəzləra na Paska, gap pay ziwi. Pilatu apsit Yahudiyenɗe na: Məlĩ nokum yaŋka. 15 Anzlaŋgək vamvəlla, aɓɗaŋ na: Dəmtə, dəmtə, məlaw aka wəlaŋga məzliwrihe. Pilatu apsit na: Ya asna nəlaw gən məlĩ nokum kan sa? Dayaɗe net məs dəlveŋge azlanənka: Məlĩ nam tay maɓɓan ɓa say məlĩ na Roma. 16 Yaŋ Pilatu apsit Zezu dəlawən gən aka wəlaŋga məzliwrihe.
Məlawni Zezu aka wəlaŋga məzliwrihe
Yaŋ sozeɗ agəmən Zezu. 17 Zezu agilik ama poho na walaŋ gəla metiŋ, tay slan wəlaŋga məzliwrihe nani, ha gap atəki məs adawyaŋ də ma Ibrahiŋkore na Golgota, va wənah na bəbər kiya. 18 Adakki sozeɗ alawən Zezu aka wəlaŋga məzliwrihe. Pay nani alawaŋgək ɗii sula aza Zezu, taka aka van dəzəŋ, taka aka van zlaɓay, Zezu adak kətiya. 19 Pilatu arbanək wənna kita na Zezu də verni, aɗisitik wənnan də dəkpa'ən gən wənnan aka wəlaŋga məzliwrihe. An məs aver na: Zezu na Nazaret, məlĩ net Yahudiyenɗe. 20 Yahudiyenɗe diiɗa aŋɗanənək məs məverin vi kəti nan tay faraɗa də walaŋ gəla ɓa. Wərba nan də ma Ibrahiŋkore məverin gəm də ma Girek gəm də ma Roma. 21 Amma dayaɗe net məs dəlveŋge apsənən Pilatu na: Kədawverin na: Məlĩ net Yahudiyenɗe ɓa, amma aver na: Ndən dənah na məlĩ net Yahudiyenɗe nani. 22 Pilatu azlan sitike: An məs nəveri kaɓlani ɓa, wasan vaska. 23 Adan sozeɗ agrakən wəlaw Zezu aka wəlaŋga məzliwrihe, agəmənək lukut nani, awɗakanənək gəlan poɗo, ko soze pak dərah gən haran nani. Agəmənək lukut nan məza wərma azan ɓa, məs məhon vaska daga sə disiŋ ha afuŋ. 24 Yaŋ apeleŋ awalaŋ ziti: Mədawngaran ɓa, məska səm saasa akani mula gən ɗəffan dədawrəhən. Agəɗ vas na vi an məverin dəsan gən gesiŋ amna: Awɗakanənək lukut naw aweleŋti. Askaŋgək saasa aka lukut nawa. Aski məs sozeɗ aɗɗaŋ. 25 Ma Zezu təziwik amaŋgava məzliwrihe nani, dət mamsawani, gəm Mari guluk na Kolopas, gəm Mari sə Makdalla. 26 Adan Zezu awlət mani, gəm gawla an məs aŋgələ tay ziwe, apsət man na: Gulku wətuk yaska. 27 Yaŋ apsən gawla nak na: Mok yakəskə. Daga dəpas ləŋ gawla nan agəmət eŋgil ananda.
Wəmta na Zezu
28 Dərɓaga Zezu asəna, zəga pak agrakək kakaŋka, yaŋ apel vi kagrak an məs ɗerewel anahə: Meme tahəŋ wəduwəni. 29 Hinzu taya dak məknahən dit moɗokrayɗe ɓaɓlekɗe. Yaŋ sozeɗ ayopən gizlete aret moɗokrayɗe neki yaŋ asləkən ama ngava, atələn ama Zezu. 30 Adan Zezu aneti amna: Zəga pak agraka. Yaŋ aɓegən kini amtə.
Məmpani Zezu aka təkzləmən
31 Pay nan dabəŋki pay naffeti, Yahudiyenɗe dəŋglaŋ gəbay nan dəsan gən aka məzliwrihe ha gap pay naffet ɓa, vi pay an təstəssi, naw gakdakani. Assohonənək Pilatu kanzlu tilit ɗii məkpati, dəzlərəɓin gini. 32 Yaŋ sozeɗ azoŋ, anzluwənək təl an dabəŋ, gəm ma sula'ən ɗii məs məkpa'it də Zezu pay taka. 33 Yaŋ azoŋ aza Zezu awlanen na amtəka dərəhaŋ va naŋzlu tələn ɓa. 34 Amma yaŋ ɗəf taka səmbet sozeɗ aska aka təkzləmən də tulho, gu ləŋ yaŋ mbel dit iŋkile agulyoŋ. 35 Ɗəf məs dəpel wənnani awlak wənnani, an məs anahə goŋgayi. Asənək məs adawnaha goŋgayi, vi nokum bo kətafən gəni. 36 Yaŋ as agəɗ vasna vi an məverin dəsan gən gesiŋ: Dənzlaŋ sleŋsleŋ nan ko taka ɓa. 37 Yaŋ atəki maɓɓan bo amna: Wawlanən ɗəffan məmpani.
Va andəkən Zezu
38 Dərɓaga aska, Zozef məs sə Arimatiya, gawla na Zezu məɗama vi geslne sit Yahudiyenɗe, assohonək gəbay na Zezu. Pilatu apsənək tive nani, yaŋ ade, agəm gəbay na Zezu. 39 Yaŋ Nikodemus məs dəde aza Zezu dabəŋ dəfəɗ nak ade. Yaŋ aki tursan məslahan də gaŋgilya gəm wəleŋɗe məs məŋginit mogoni gap kilo kaklaw hoku. 40 Sula git pak agəmənək gəbay na Zezu, atərənək də boɗoko gəm tursan va Yahudiyenɗe asərəkaŋ wəndək ɗəffa. 41 Akəti məkpa Zezu vanəŋka guli taya daka, adəv guli nani magamas taya dak meleketeni, məndəki ɗaah ɗəf adəvən ɓa. 42 Adak məndək Zezu vi Yahudiyenɗe tahəŋ wəzaɓanən ziti vi pay naffete gəm vi magamas van go'oy.
Magaməs mekeleŋgi
1 Yaŋ pay damasə, də mompumo pum, daga dəɓəl wəɗɗa pasyak ɓa, Mari sə Magədalla təmbatək amagamasə. Tulak gərəm məslaŋgan sə magamasə. 2 Tənzatəka, təmbatək aza Simoŋ Piyer gəm aza gawla məs Zezu aŋgələ. Təpsit na: Agəmənək Ɗəfdaya sədəv magamasə, məsən təki məɗiyən ɓa. 3 Piyer gəm gawla məs Ɗəfdaya aŋgələ, ambataŋgək amagəmasə. 4 Ndəɗaŋ sula git pak anzoŋko, amma gawla aŋkəŋ adayək ki Piyer də wənzuwa, agapək amagamasə dabəŋ ki Piyer. 5 Aɓe'ək amagamsə, awlak boɗoko də gabaga adaka, ɓosso, amma dətoŋ adak ɓa. 6 Yaŋ Piyer agapə, atoŋ adəv magamasə, awlak boɗoko də gabaga adak ɓosso. 7 Gabaga məs mətər ki Zezu dəndən dəsap də gabaga maɓɓan ɓa, amma tay məktəmən sekke atəki maɓɓani. 8 Yaŋ gawla məs dənzan dəgap dabəŋ amagamas nak bo atoŋko. Awlaka atafəka. 9 Ha gap pay nan pak dəpprəmanən məs ɗerewel anah ɓa. Vi ɗerewel anahək na Zezu wasil səkəti əmta. 10 Yaŋ gewleɗ sula nek ambataŋ.
Zezu arbanək zən azat Mari na Makdala
11 Yaŋ Mari təziw appaka gu'o də magamasə, tatə həmma. Təɓe'ək adəv magamasə. 12 Tulek maslayɗe sula, aguloŋguk lukutɗe beberɗe tahəŋ tuŋtuŋ atəki məvoŋ gən gəbay na Zezu naka. Taka kəla za kini, taka kəla za təlni. 13 Assohotənka: Gulku vimi kədawhəm di? Təzlan sitike: Agəmənək Ɗəfdaya nawa, nəsən təki aɗiyən ɓa. 14 Daga adaw apel nən wənnəska, təkpaŋganək harat dərɓe, tulak Zezu tay ziwe, amma təsənna Zezuwi ɓa. 15 Zezu assohotəka: Ɗakə, vi mi kədawhəm di? Naway kədaw kayan di? Azat Mari na affən guliyi. Təpsən na: An is kəgəm na, anah su təki kəka, nəmbat gən wəgəmən. 16 Zezu apsət na: Mari, Mari təkpaŋgək azani, təpsən də ma Ibrahiŋkore na: Rabbuni. Va wənah na mərbə zəga. 17 Zezu apsət na: Kədawrəŋgu ɓa, amma doku nah sit milmiŋgiɗu na, əntatə vi nəɓəl wəpeŋ aza Affu ɓa, Affukumi ya'a, aza Maŋgəlva nawa, Maŋgəlva nokumi ya'a. 18 Yaŋ Mari na Magdala təmbatka. Təpsit gewleɗ na: Nulak Ɗəfdaya, yaŋ tənah sit an məs Zezu anah səta.
Zezu arbanək zən azet gewleɗ nani
19 Yaŋ pay Alat nani, adan dəfəɗ agəɗə, gewleɗ akkalaŋgək adəv gəla. Ampanənək metive, vi geslne sit Yahudiyenɗe. Zezu adeke, aziwik awaleŋgti, apsit na: Wasan sukum zam. 20 Dərɓagani anah sit wənnəska, arban sitik vani də təkzləmən. Adan gewleɗ, awlanən Ɗəfdaya, mekret annekək diiɗa. 21 Zezu anah sitik əmpa: Zam wasan azokum. Va Affən aslənwa, naw bo wanaslənkum. 22 Yaŋ affu aketi amna: Mətaf Əmpəs Salala. 23 Ɗiiyen məs kəviyan sitin mambray neti warəhaŋ wəviyan mambray neti, ɗiiyen məs kəviyanən mambray net ɓa, arəhaŋ na wəviyan mambray net ɓa.
Tomas də Zezu
24 Adan Zezu ade azet gewleɗ nani, ɗəf taka səmbeti, ndəni Tomas məs adawyaŋ na meseŋge tay dənɗaŋ ɓa. 25 Apsənən na: Mulak Ɗəfdaya. Amma yaŋ Tomas azlansiti: An nula gəlet huweɗ net penteɗe naza vanəŋ ɓa, an nətaman də məttəl ɗəf ɓa, an nugul vaw ara huwa naka təkzləmən ɓa, nətaf na wənnan ɓa. 26 Lumu taka dərɓagani, gewleɗ akkalaŋgək adəv gəla əmpa. Tomas tay dənɗaŋ. Metive məmpani, amma Zezu adeke, azuwik aweleŋti, amna: Zam wasan azokum. 27 Yaŋ apsən Tomas na: Agul məttal ɗəf aŋkana. Awla huwa, aki voko, agul aka təkzləmuwa, apan wəbay ma atafə. 28 Tomas azlan sənəka: Ɗəfdaya nawa, Maŋgəlva nawa. 29 Zezu apsən na: Kakaŋ na vi kuluwa ndəni kətafu sa? Zəzay azet məs duluwənən ɓa, amma atafwənka.
Wən məs məver ɗerewel vini
30 Zezu agəɗək sokeneɗ meɓɓet diiɗa ama heret gewleɗ nani məvertiŋ adəv ɗereweləŋ ɓa. 31 Amma an məverit adəv ɗerewel nani, məverit vi də tafən gən na Zezu wi Messiya Wətən Maŋgəlva, vi kərəhaŋ gən zeŋgille də wətaf nani.
Zezu arbanək zən azet gewleɗ nan buhul
1 Dərɓagani Zezu arbanək zən azet gewleɗ nan a pe'e na Tiberiyas. Awla va arban zən azet kana. 2 Simoŋ Piyer də Tomas məs adawyaŋ na meseŋge gəm Nataniyel məs nawalaŋ gəla na Kana dələv na Galile gəm kirtin Zebede dit gewleɗ na Zezu meɓɓet sula, asapaŋka. 3 Simoŋ Piyer apsit na: Wanəmbat wərma kilfi. Aɓɗaŋ na nam bo waməmbat də isi. Ambataŋka, aguloŋguk adəv bəlay. Amma dəfəɗ nan pak dərəhaŋ kilif ɓa. 4 Yaŋ təki biŋ biŋ ni, Zezu arbanək zən ama busgum, amma: Gewleɗ dəsənən na ndəni ɓa. 5 Yaŋ Zezu assoheti: Gewleɗi kərəhaŋgək kilif vet sa? Azlan sənənka: Awwo, ko kəlfaŋkə. 6 Apsit na məsgan zəva aka təkzləm bəlay dəka va dəzəŋ, wakərəhaŋ. Asganənək zəva, armaŋgək kilif diiɗa sawɓa ha dəɓapaŋ wəsgan zəva adəv bəlay ɓa. 7 Gawla məs Zezu aŋgəl apsən Simoŋ Piyer na: Ɗəfdayayi. Adan Simoŋ Piyer apprəm vaska, aguluk lukut nani, vi agbukuk laŋka, azlahək aret iŋkile. 8 Gewleɗ meɓɓet azoŋguk adəv belay, tahəŋ wəkdəhən zəva məs dəknah dit kilfneki, faraɗaŋ də ma busgum ɓa, tay va metər səkate. 9 Yaŋ agulyoŋ appaka, yaŋ awlanən offo dit kilif akani gəm dupeŋɗe. 10 Zezu apsit na: Məki kilif suɗike siret məs kərəmaŋ kakaŋkiŋki. 11 Simoŋ Piyer atoŋguk adəv bəlay, agil gənək zəva kilif gugiriɗ gugiriɗ diiɗa wəŋɗa net səkat də kaklaw sle kiyit hoku. Ko də diiɗa net pak zəva dəŋgar ɓa. 12 Zezu apsit na: Məde məzəm waya. Ɗəf tay ko taka səmbet gewleɗ nan dəɓap wəssohon na: Nawa kənan di ɓa? Vi asənənək na Ɗəfdayayi. 13 Zezu azarək azeti, agimik dupeŋɗe, apsitike dit kilif neki apsitike. 14 Aŋki wərban zən azet gewleɗ nan ma hoko'ən dərɓaga asil səkəti əmta.
Zezu də Piyer
15 Dərɓaga azəmaŋ, Zezu apsən Simoŋ Piyer na: Simoŋ wətən Zaŋ, kəŋgəluwək dayki eŋ sa? Azlanəka: Ɗəfdaya kəsənəka nəŋglukuko. Zezu apsən na say ateɗ kirtit timeŋgiɗ nawa. 16 Yaŋ apelsən ma sula'ən, apsən na: Simoŋ wətən Zaŋ, kəŋgəluwək sa? Azlanəka: Kəsənəka nəŋglukuko. Zezu apsən na: Kula siw gən timeŋgiɗ nawa. 17 Apel sənək mo hoko'ən əmpa, apsən na: Simoŋ wətən Zaŋ, kəŋgəluwək sa? Zə Piyer asiripke, vi Zezu assohon ma hoko'ən na: Kəŋgəluwək sa? Azlan sənək na: Ɗəfdaya kəsənək ko mi pakə, kəsənək bo nəŋglukuko. Zezu apsən na: Say ateɗ timeŋgiɗ nawa. 18 Gesiŋ nedawnah suko: Daga kəsok wəman zuko is sən kiko istat winan dadakko, istatə mbat atəki kəŋgəl pakə. Amma an kəgalka, ɗəf dəda winan suk dadakko, də wərma voko wakuk atəki məs kəŋgəl ɓa. 19 Wən aski Zezu aŋgəl karban zev əmta an Piyer adamta vi na gakdakan Maŋgəlva. Yaŋ Zezu apsən na asbawa.
Zezu də gawla məs aŋgələ
20 Piyer akpaŋganək harani, awlak gawla məs Zezu aŋgəl tayəzan dərɓe, ndəni dəsan amaŋgava Zezu daga asan atəki wəzəma, anah nak na assohoni naka: Naway nawzəm kiyən di? 21 Yaŋ Piyer awla, apsən Zezu na: Ɗəfdaya mbari na ɗəffaŋ di? 22 Zezu azlan sənəka: An nəŋgələk dəsan gən məza əmta ɓa ha pay nədaw milyo na, mi nok di? Nok na asbawa. 23 Wənan atrayək akawaleŋgit ɗii dətafaŋ, aɓɗaŋ na: Gawla nan amtə na ɓa. Amma Zezu denahsən Piyer na gawlaŋ amatə na ɓaɓa. Amma apsən na: An nəŋgələk dəsan gən adamta ɓa ha pay nədaw milyo na mi nok di? 24 Gawlaŋka ndəni dəgəɗ saydawa aka halabaraŋka, averike, məsənka məs aver bo gesiŋgi. 25 Zezu agəɗək wəzeɗe meɓɓet diiɗa. Va məverti taka taka pak na, duniya aɓapəna wərma ɗerewel nan ɓa.