Kuti wen
1 Wen duka so nɛ̀ ku̧u̧naŋ-a mɛ, a̧ duka so kpɔk in Sɔ̧, ɓɛɛ Wen'i nɛ́ Sɔ̧. 2 A̧ duka so in Sɔ̧ nɛ̀ ku̧u̧naŋ-a mɛ. 3 Sɔ̧ dee mɔ lɛŋ nɛ̀ ɗoŋ-aa; ŋma mɔ nɛ̀ Sɔ̧ dea nɛ̀ bo nɛ̀ ɗoŋ-aa na, bo na. 4 Duka-kpasa a̧a̧ so tɛ-a, ɓɛɛ duka-kpasa'i so nɛ́ sa̧a̧mɔ wen o bíí. 5 Nɛ́ mɔ'ɔ nɛ̀ sa̧a̧mɔ‘i nyɛka ti tum, ɓɛɛ tum zii wen kɔ̧-a̧ na. 6 Ɓɛɛ Sɔ̧ tom ŋma bíí, nin wi’ɛi nɛ́ Jean. 7 A̧ nɛ́ wi-sedaako nɛ̀ tɛ̀ɛ́ wen sa̧a̧mɔ ha̧ o bíí lɛŋ mɛ kɔ̧ ɗɔaa ha̧ Sɔ̧ wen zu a̧. 8 A̧ nɛ̀ kiitɛ-a bó nɛ́ sa̧a̧mɔ na, ɓɛɛ a̧ tɛ de nɛ́ sedaako wen sa̧a̧mɔ. 9 Wen'i duka so nɛ́ kpasa sa̧a̧mɔ nɛ̀ tɛ̀ɛ́ zaŋnu mɛ nyɛk zu o bíí lɛŋ. 10 A̧ duka so zaŋnu; Sɔ̧ dee nù nɛ̀ ɗoŋ-aa, ɓɛɛ o bíí zaŋnu iŋ a̧ na. 11 A̧ tɛ̀ɛ́ tɛ o mgbák bíí kɔ̧-a̧, ɓɛɛ o bíí kɔ̧-a̧‘i kpɛk a̧ na. 12 Ɓɛɛ o wi nɛ̀ kpɛka a̧ in nɛ̀ kɔ̧ɔ̧ ɗɔaa há̧ a̧, a̧ ha̧a̧ ŋgai ha̧ o wi nɔ‘i mɛ ya nɛ́ o bem ko Sɔ̧. 13 Bó nɛ́ tɛ yuwar kóó bem ko bíí, kóó tɛ ŋgai mɛ kiitɛ-wi, kóó tɛ mɔ nɛ̀ bíí kɔ̧a̧ na; ɓɛɛ nɛ́ tɛ mɔ nɛ̀ Sɔ̧ kɔ̧a̧. 14 Wen dee tɛ̀ nɛ̀ bíí, ɓɛɛ tɛ́ɛ̀ duk mgbara yɛ. Ɛɛ zɔka gasamɔ kɔ̧-a̧, ɓɛɛ gasamɔ‘i nɛ́ Dáà a̧ ha̧a̧ ha̧ a̧; a̧ nɛ́ kpɔk Bem kɔ̧-a̧ nɛ̀ duk nɛ́ wi-de-mɔ nɛ̀ ta-tɛ in wi-tɔ̧-kpasawen ɓɔnsɛnɛ. 15 Ɓɛɛ Jean de sedaako wen wi’ɛi tɔ̧ nɛnɛ‘e: «Zɔ́k wi n'am tɔ̧ɔ̧ so'e tɛ tɛ ɗoŋ am’ɛ; a̧ gana'm wen a̧ duka so nɛti ha̧‘m.» 16 Ɛ́ɛ́ lɛŋ nyɛma sɛnɛ nɛ̀ ɗoŋ dɔka deemɔ nɛ̀ ta-tɛ kɔ̧-a̧ h’ɛ́ɛ́ ɗoŋ ŋmaa hegɔ yaknɛ. 17 Wen hee mɔ'ɔ nɛ̀ Sɔ̧ ha̧a̧ heembea h’ɛ́ɛ́ nɛ̀ ɗoŋ Moisɛ ga, hegɔ ɛɛ kpaa deemɔ nɛ̀ ta-tɛ in kpasawen mbɛt nɛ̀ ɗoŋ Jesu Krist. 18 Ŋma bíí nɛ̀ zɔka Sɔ̧ bo na, kànà nɛ́ kpɔk bem kɔ̧-a̧ nɛ̀ duk kpɔk in a̧ á̧ usa a̧ h’ɛ́ɛ́ ɓɛɛ.
Sedaako ko Jean
19 Sedaako nɛ̀ Jean dea ŋgimbi nɛ̀ o Juif mɛ Jerusalɛm toma nɛ̀ wi-ɗafi-sɔ̧ in o be Levi nɛnɛ tɛ a̧, mɛ ak a̧‘e ndé: «Mɛ́ nɛ́ o?» wó, nɛ́ mɔ'ɔ. 20 Jean tɔ̧a̧, a̧ hu̧si na: «Kɔ‘m, mi bó nɛ́ Mɛsii na.» 21 Ɓɛɛ wa ak a̧: «Mɛ́ nɛ́ o bɔɔ o? Mɛ́ nɛ́ Elii?» Ɓɛɛ a̧ kifi nú: «Weyaa, mi bó nɛ́ Elii na.» Ɓɛɛ wa ak a̧ woyo: «Mɛ́ nɛ́ wi-tɔ̧-wen oi nú Sɔ̧?» Ɓɛɛ a̧ kifi nú woyo: «Weyaa.» 22 Ɓɛɛ wa tɔ̧ ha̧ a̧: «Mɛ́ nɛ́ ge bíí ge k’ɛ̀ɛ̀ si ɗoŋ mɛ kifi nú ha̧ o wi nɛ toma yɛ tɛnɛ ge? Mɛ́ nɛ̀ tɛ̀-mɛ́, mɛ́ tɔ̧́ bɔɔ‘e mɛ́ nɛ́ o?» 23 Jean tɔ̧a̧: «Kɔ‘m, mi nɛ́ ‹bíí nɛ̀ hiɗi nɛ́ mɔ ŋga-gbárà mɛ‘e: Ɛ̀nɛ̀ ɗáfí yuwar ko Gasa Wan nɛ̀ yɔka-a!› » (Hee mɔ'ɔ nɛ̀ wi-tɔ̧-wen oi nú Sɔ̧, Esaii tɔ̧ɔ̧ so ga.) 24 O wi nɛ̀ wa toma so'i duka nɛ́ o Fariziɛn, 25 ɓɛɛ wa ak Jean siti woyo: «Mɛ́ bó nɛ́ Krist na, mɛ́ bó nɛ́ Elii na, mɛ́ bó nɛ́ Wi-tɔ̧-wen oi nú Sɔ̧ na mbɛt, ɓɛɛ sa mɛ zui bɔɔ o bíí wen ge?» 26 Jean kifa nú ha̧ wa: «Kɔ‘m, mi zui o bíí nɛ yì. Ɓɛɛ ŋma bíí a̧a̧ mgbara'nɛ́ n’ɛnɛ iŋ na; 27 wi’ɛi nɛ́ wi nɛ̀ tɛ́ ɗoŋ am, ɓɛɛ mi nyɛm mɛ bur nyak ndárà naŋ-a na.» 28 Mɔ‘i dea sɛn Betanii, kur Jurdɛn, fara nɛ̀ Jean duka so zui nɛ̀ o bíí sɛnɛ.
Jesu, Be-sami ko Sɔ̧
29 Nɛ̀ mɔ sa̧a̧, Jean zɔka Jesu tɛ tɛa-a pii tɛ-wi, ɓɛɛ tɔ̧: «Ɛ̀nɛ̀ zɔ́k Be-sami ko Sɔ̧ nɛ̀ ba ɗaŋmɔ ko bíí yinɛ. 30 Mɛ̀ nɛ́ wi n'am tɔ̧ɔ̧ so wen kɔ̧-a̧ h’ɛ́nɛ́‘e ndé: ‹Wi nɛ̀ tɛ́ tɛ̀ nɛ̀ ɗoŋ‘i, gana'm, wen a̧ duka so nɛti ha̧‘m.› 31 Mi nɛ̀ tɛ‘m, mi iŋ so a̧ na; ɓɛɛ mɛ̀ nɛ́ wen ha̧ o be Israɛl mɛ iŋ a̧, a̧‘m tɛ̀ɛ́ nɛnɛ mɛ zui o bíí nɛ̀ yì.» 32 Ɓɛɛ Jean de sedaako tɔ̧ nɛnɛ‘e: «Mi zɔka Sa̧a̧ Ɔmi tɛ zira-a nɛ̀ yiwese hee gbaku̧i̧ ga duk zu a̧. 33 Mi iŋ so kɔ‘m a̧ nɛti na, ɓɛɛ wi nɛ̀ toma'm mɛ zui bíí nɛ̀ yì tɔ̧ɔ̧ ha̧‘m'e ndé: ‹Wi nɛ̀ mɛ tɛ zɔk Sa̧a̧ Ɔmi zira duk zu a̧, nɛ́ wi’ɛi a̧ zui bíí nɛ̀ Sa̧a̧ Ɔmi.› 34 Mi zɔka mɔ‘i ɓɛɛ s'am de sedaako'e, wi’ɛi nɛ́ Bem ko Sɔ̧.»
O kuti ŋgaiwi ko Jesu
35 Nɛ̀ mɔ sa̧a̧, Jean duka kpɔk fara'i woyo in o ŋma ŋgaiwi kɔ‘i yiitoo; 36 a̧ mbaɗa Jesu fara ɓira-a yak hi̧i̧, ɓɛɛ a̧ tɔ̧: «Ɛ̀nɛ̀ zɔ́k Be-sami ko Sɔ̧!» 37 O ŋgaiwi kɔ̧-a̧ yiitoo'i zia wen'i, ɓɛɛ nɛ́ ɗoŋ Jesu. 38 Jesu zika tɛ, zɔk wa fara tɛa-a ɗoŋ a̧, ɓɛɛ ak wa: «Ɛnɛ kii nɛ́ ge?» Wa kifa nú ha̧ a̧: «Wan-usi-mɔ, ɛ́nɛ́ ɔ bɔɔ de?» 39 Jesu tɔ̧ɔ̧ ha̧ wa: «Ɛ̀nɛ̀ tɛ́, ɛ̀nɛ̀ zɔ̀k.» Wa nɛ̀ɛ̀ zɔk fara n'aa duk sɛnɛ, ɓɛɛ wa ya in a̧ wese'i. (Ŋgimbi'i duka nɛ́ tɔ̧ŋɔ̧nyɔŋɔ̧ wese.) 40 Andre nya Simɔŋ-Pierre nɛ́ ɓii wi nɛ̀ zia wen ko Jean, ká nɛ́ ɗoŋ Jesu. 41 Andre nɛ̀ɛ̀ kpa nya kɔ‘i Simɔŋ nɛti, ɓɛɛ tɔ̧ ha̧ a̧: «Ɛ́ɛ́ kpaa Mɛsii.» (Mɛ̀ nɛ́ wen nɛ̀ tɔ̧: «Krist».) 42 Ɓɛɛ Andre mgbɔ Simɔŋ sitɛ Jesu. Jesu mbaɗa Simɔŋ, ɓɛɛ tɔ̧: «Mɛ́ nɛ́ Simɔŋ bem ko Jean; wi tɛ sa mɛ‘e Sefas. (Mɛ̀ nɛ́ wen nɛ tɔ̧‘e ‹Ta›).»
Jesu saa Filip in Natanaɛl
43 Nɛ̀ mɔ sa̧a̧, Jesu kɔ̧ɔ̧ mɛ nɛ si Galilee mɛ; nɛ́ mɔ'ɔ n'aa kpaa Filip, ɓɛɛ tɔ̧ ha̧ a̧: «Mɛ̀ tɛ́ ɗoŋ-am!» 44 Filip nɛ́ bíí Bɛtsaida, ye ko Andre in Pierre. 45 Filip nɛ̀ɛ̀ kpa Natanaɛl, ɓɛɛ tɔ̧ ha̧ a̧: «Ɛ́ɛ́ kpaa wi nɛ̀ wa yɔra so wen kɔ̧-a̧ zaŋ kalata heembea ko Moisɛ in zaŋ kalata ko o wi-tɔ̧-wen oi nú Sɔ̧. Wi’ɛi nɛ́ Jesu, bem ko Jozɛf, a̧ nɛ́ be Nazarɛt.» 46 Ɓɛɛ Natanaɛl kifi nú ha̧ Filip: «Ŋma demɔ tɛ̀ɛ́ tɛ̀ so nɛ̀ Nazarɛt nde?» Ɓɛɛ Filip tɔ̧: «Mɛ̀ tɛ́ mɛ̀ zɔ̀k.» 47 Jesu zɔka Natanaɛl fara tɛa-a pii tɛ, ɓɛɛ tɔ̧: «Wi’ɛ nɛ́ kpasa be Israɛl, nɛ̀ ɔramɔ bo tɛ-a na.» 48 Natanaɛl aka Jesu: «Ɛ́nɛ́ iŋa'm sɛn de?» Ɓɛɛ Jesu tɔ̧: «Mi zɔka mɛ ɗɔɔ te-mbɔra nɛti sɛka Filip bé tɛ̀ɛ́ sa mɛ.» 49 Natanaɛl kifa nú ha̧ a̧: «Wan-usi-mɔ, ɛ́nɛ́ nɛ́ Bem ko Sɔ̧, ɛ́nɛ́ nɛ́ wannu Israɛl!» 50 Jesu kifa nú: «Mɛ kɔ̧ɔ̧ ɗɔaa ha̧‘m wen n'am tɔ̧ɔ̧ ha̧ mɛ‘e, mi zɔka mɛ ɗɔɔ te-mbɔra. Ɓɛɛ mɛ tɛ zɔk o mbe gasamɔ nɛ̀ tɛ gan i̧i̧ woyo! 51 Nɛ́ kpasawen a̧‘m tɔ̧ h’ɛ́nɛ́, yiwese tɛ hú̧í̧, ɓɛɛ ɛ́nɛ́ tɛ zɔk o betom ko Sɔ̧ fara daŋa-a in zira-a zu Bem ko bíí.»
Gbaŋa-báá-kóò sɛn Kana
1 Zɛ taar ɗoŋ mɔ‘i, wa dee gbaŋa-báá-kóò sɛn Kana, nú Galilee, ɓɛɛ nàà ko Jesu a̧a̧ so hi̧i̧. 2 Wa saa so Jesu in o ŋgaiwi kɔ‘i nɛnɛ tɛ gbaŋa'i mbɛt. 3 Hee mɔ'ɔ nɛ̀ dɔ̧ɔ̧ kaɗa ga, nàà ko Jesu tɔ̧ɔ̧ ha̧ a̧: «Wa bó nɛ̀ dɔ̧ɔ̧ ɓɔna.» 4 Ɓɛɛ Jesu kifi nú ha̧ nàà kɔ‘i: «Kóò'ɛ, mɛ kɔ̧ɔ̧ nɛ́ ge in am ge? Ŋgimbi kɔ‘m tɛ hɔ hɔ̧ɔ̧ na.» 5 Ɓɛɛ nàà kɔ̧-a̧ tɔ̧ ha̧ o wi-de-tom: «Kóó ge mɔ ge n'aa tɛ tɔ̧ h’ɛ́nɛ́ ge, ɛ̀nɛ̀ dé.» 6 Gasa kpáná-ta mɔɔrɔ-ɗoŋ-kpɔk a̧a̧ so sɛn hi̧i̧ wen ɗafa war-tɛ ko o Juif. Kpáná-ta kpɔk ba nɛ́ yì daaro yiitoo kóó taar sɛka duna. 7 Jesu tɔ̧ɔ̧ ha̧ o wi-de-tom: «Ɛ̀nɛ̀ ɗú yì dún o kpáná nɔ'ɔ.» Ɓɛɛ wa ɗu yì dun o kpáná nɔ‘i hɔ nú-a yɛtɛtɛ yɛtɛtɛ. 8 Ɓɛɛ Jesu tɔ̧ ha̧ wa: «Kaɗa, ɛ̀nɛ̀ ɗú nɛnɛ ha̧ wan-kɛ̧-nyɔŋmɔ.» Ɓɛɛ wa ɗu nɛnɛ ha̧ a̧. 9 Wi’ɛi wee yì nɛ̀ kifa dɔ̧ɔ̧‘i, ɓɛɛ a̧ iŋ fara nɛ̀ dɔ̧ɔ̧‘i tɛ̀ɛ́ nɛnɛ na; (kànà nɛ́ o wi-de-tom nɛ̀ ɗuu so yì‘i a̧ iŋa mɔ nɛ̀ dea,) ɓɛɛ a̧ tɔ̧ ha̧ wan-kóò: 10 «Wi ha̧ so nɛ́ de dɔ̧ɔ̧ nɛti ha̧ o bíí kà ye tɛ-wa kaɗi, sɛka'i ha̧a̧ walaŋ nɛ̀ ɗoŋ, nɛ́ mɔ'ɔ n’ɛnɛ e k’ɛ́nɛ́ de dɔ̧ɔ̧ hɔ kinii’ɛ!» 11 Kuti mɔɔ-usi-mɔ nɛ̀ Jesu dea nɛ́ mɔ‘i. A̧ dee mɔ‘i sɛn Kana nú Galilee, usi nɛ̀ gasamɔ kɔ̧-a̧, ɓɛɛ o ŋgaiwi kɔ̧-a̧ kɔ̧ ɗɔaa ha̧ a̧. 12 Ɗoŋ mɔ‘i, a̧ zira si Kafarnaum in nàà kɔ̧-a̧ in o nya-a̧ ká bá nɛ̀ o ŋgaiwi kɔ̧-a̧, ɓɛɛ wa ɔ hi̧i̧ zɛ tikiɗi.
Jesu ndaka o wi-ɗɔr-mɔ kɔ̧́ Tua ko Sɔ̧ gbonɛ
13 Gbaŋa Paska ko o Juif hɛɗa, ɓɛɛ Jesu daŋ si Jerusalɛm mɛ. 14 Nɛ́ mɔ'ɔ n'aa kpaa o wi-ɗɔr-ndai, o wi-ɗɔr-sami, o wi-ɗɔr-pola in o wi-kpai-sede nɛ̀ duk ká̧ taŋe kɔ-wa, kɔ̧́ Tua ko Sɔ̧. 15 A̧ ɓaɓa gba̧a̧-pɛr de nɛ̀ nyasi, ndak nɛ̀ wa lɛŋ gbonɛ kɔ̧́ Tua ko Sɔ̧ gú nɛ̀ o sami in o ndai kɔ-wa, ɓɛɛ a̧ kifi taŋe kɔ-wa gu nù. A̧ pɛsa kɔya-sede ko wi-kpai-sede, 16 ɓɛɛ a̧ tɔ̧ ha̧ o wi-ɗɔr-pola: «Ɛ̀nɛ̀ káí o mɔɔ nɔ'ɔ lɛŋ yinɛ sɛn hɛ̧ɛ̧; k’ɛ́nɛ́ de tua ko Dáà kɔ‘m nɛ̀ tua-lumɔ na!» 17 Ɓɛɛ tɛ o ŋgaiwi kɔ̧-a̧ mbaŋ ɗoŋ ŋma mɔ nɛ̀ yɔra so'e: «Wɔ tua k’ɛ́nɛ́ gbɛ‘m lɛk-lɛk!» 18 Ɓɛɛ o Juif ak a̧: «Ŋma mɔ n’ɛnɛ tɛ usi h’ɛ́ɛ́ mɛ iŋ‘e ndé, ɛnɛ a̧a̧ nɛ̀ ŋgai mɛ de pɛrti mɔ hegɔ nɛ́ ge?» 19 Jesu kifa nú ha̧ wa: «Ɛ̀nɛ̀ gbín tua’ɛ yinɛ; zaŋ zɛ taar mi tɛ ba e ŋgɔn woyo.» 20 O Juif kifa nú ha̧ a̧: «Déé tua’ɛ baa nɛ́ pɛ ɓu-naar-zua-mɔɔrɔ-ɗoŋ-kpɔk, ɓɛɛ mɛ tɔ̧ kɔ-mɛ‘e, wi tɛ ba e ŋgɔn zaŋ zɛ taar?» 21 Ɓɛɛ tua nɛ̀ Jesu tɔ̧ wen zu-a'i nɛ́ kiitɛ-a. 22 Ŋgimbi nɛ̀ Jesu kpasa tɛ fio, tɛ o ŋgaiwi kɔ̧-a̧ mbaŋa ɗoŋ wen n'aa tɔ̧ɔ̧ so'i, ɓɛɛ wa kɔ̧ɔ̧ ɗɔɔ mɔ nɛ̀ yɔra so, in wen n'aa tɔ̧ɔ̧ so mbɛt.
Jesu iŋa taamɔ ko o bíí lɛŋ
23 Ŋgimbi nɛ̀ Jesu duka Jerusalɛm tɛ ŋgimbi gbaŋa Paska, o dɔka bíí nɛ̀ zɔka o mɔɔ-usi-mɔ n'aa duka so de kɔ̧ɔ̧ ɗɔaa ha̧ a̧. 24 Ɓɛɛ Jesu bɔŋ mɔ kɔ-wa na, wen a̧ iŋa wa lɛŋ. 25 A̧ beka ak ŋma bíí mɛ we ɗoŋ duka-a ko ŋma bíí ha̧ a̧ na, wen ŋma mɔ ko bíí nɛ̀ yɔɔ a̧ bo na.
Jesu in Nikodɛm
1 Ŋma bíí a̧a̧ so mgbara o Fariziɛn, nin-a nɛ́ Nikodɛm, ŋma gasawi ko o Juif. 2 A̧ tɛ̀ɛ́ tɛ Jesu mɛ zɛ, ɓɛɛ ak a̧: «Wan-usi-mɔ, ɛ́ɛ́ iŋa'e nɛ́ Sɔ̧'ɔ̧ toma'nɛ́ tɛnɛ mɛ usi mɔ h’ɛ́ɛ́, wen kà Sɔ̧ duk in bíí na, wi’ɛi nyɛm mɛ de mɔɔ-usi-mɔ hee mɔ'ɔ n’ɛnɛ de’ɛ ga na.» 3 Ɓɛɛ Jesu kifi nú ha̧ a̧: «Nɛ́ kpasawen a̧‘m tɔ̧ ha̧ mɛ, kà bíí kó nɛ̀ mbe-a na, wi’ɛi nyɛm mɛ zɔk Wan ko Sɔ̧ na.» 4 Ɓɛɛ Nikodɛm tɔ̧ ha̧ a̧: «Wi tɛ ko sɔkawi nɛ̀ sɔka kaɗi nɛ̀ mbe-a hee ge? A̧ tɛ ye kɔ̧́ zaŋ nàà kɔ̧-a̧ ha'i mɛ ko a̧ woyo nde?» 5 Jesu kifa nú ha̧ a̧: «Nɛ́ kpasawen a̧‘m tɔ̧ ha̧ mɛ: kà wa ko bíí nɛ̀ yì in nɛ̀ Sa̧a̧ Ɔmi na, wi’ɛi beka ye tɛ Wan ko Sɔ̧ na. 6 Bíí nɛ̀‘i ko nɛ̀ war koa-a ko bíí, kànà nɛ́ mur-tɛ, ɓɛɛ bíí nɛ̀‘i ko nɛ̀ war ko Sa̧a̧ Ɔmi nɛ́ ɔmi. 7 Ká ɗɛɗɛ-mɛ gɔn tɛ wen n'am tɔ̧a̧‘e: ‹Wa tɛ ko kànà ɛ́nɛ́ nɛ̀ mbe-a sɛ́,› wó‘i na. 8 Búk yu dam fara lɛŋ; mɛ́ zii gítí-a zii, ɓɛɛ mɛ́ iŋ fara n'aa tɛ nɛnɛ, kóó fara n'aa yu si sɛnɛ na mbɛt. Nɛ́ kale kpɔk mɔ wen kóó o ndé nɛ̀‘i ko nɛ̀ war ko Sa̧a̧ Ɔmi.» 9 Nikodɛm aka mɔ: «Mɔ‘i nyɛma mɛ de dea-a hee ge?» 10 Ɓɛɛ Jesu kifi nú ha̧ a̧: «Mɛ́ nɛ́ wan-usi-mɔ sɛn Israɛl, ɓɛɛ mɛ iŋ mgbara mɔ‘i na? 11 Nɛ́ kpasawen a̧‘m tɔ̧ ha̧ mɛ, ɛ́ɛ́ tɔ̧ nɛ́ wen mɔ n’ɛɛ iŋa, de nɛ̀ sedaako mɔ n’ɛ̀ɛ́ zɔka, ɓɛɛ ɛ́nɛ́ kpɛk sedaako k’ɛɛ na. 12 Mɔ mɛ zaŋnu n'am tɔ̧ wen-aa h’ɛ́nɛ́, ɓɛɛ k’ɛ́nɛ́ kpɛk na’ɛ, kà bó nɛ̀ mɔ mɛ yiwese? 13 Ŋma bíí daŋ si yiwese na, kànà nɛ́ Bem ko bíí nɛ̀ zira nɛ̀ yiwese mɛ tɛnɛ'ɛ ɓɛɛ! 14 «Hee mɔ'ɔ nɛ̀ Moisɛ baa so te, ɓɛɛ ga̧i̧ gɔk-ndɛrɛ sɛnɛ ba e ŋgɔn sɛn ŋga-gbárà ga, mɔ‘i tɛ de kànà hegɔ in Bem ko bíí mbɛt, 15 wen ha̧ kóó o ndé nɛ̀ kɔ̧ɔ̧ ɗɔaa ha̧ a̧ mɛ kpa duka-kpasa kpoo nɛ kpoo. 16 Wen Sɔ̧ kɔ̧ɔ̧ o bíí zaŋnu nyɛmna, ɓɛɛ ha̧ kpɔk Bem kɔ‘i, wen ha̧ kóó o ndé nɛ̀ kɔ̧ɔ̧ ɗɔaa ha̧ a̧, wi’ɛi beka fe na, ɓɛɛ wi’ɛi tɛ kpa duka-kpasa kpoo nɛ kpoo. 17 Wen bó nɛ́ Sɔ̧ toma Bem kɔ‘i tɛnɛ zaŋnu mɛ gɔn kita zu bíí na, ɓɛɛ mɛ̀ nɛ́ wen ha̧ o bíí mɛ kpasi wen zu a̧. 18 «Wi nɛ̀ kɔ̧ɔ̧ ɗɔaa ha̧ a̧, kita tik a̧ na, ɓɛɛ wi nɛ̀ kɔ̧ ɗɔaa ha̧ a̧ na, kita tika a̧ kaɗi wen n'aa kɔ̧ ɗɔaa ha̧ kpɔk Bem ko Sɔ̧ na. 19 Yoŋgo kita'i nɛ́ mɔ'ɔ: sa̧a̧mɔ hɔɔ zaŋnu, ɓɛɛ o bíí kɔ̧ɔ̧ nɛ́ tum gan sa̧a̧mɔ, wen tom kɔ-wa nɛ́ ɗaŋ tom. 20 Wen kóó o ndé nɛ̀ de ɗaŋmɔ sɛn nɛ́ sa̧a̧mɔ; kíì nɛa-a tɛ sa̧a̧mɔ de nɛ́ a̧ wen ká ndaa tom kɔ̧-a̧ tɛ̀ɛ́ gbo zan. 21 Ɓɛɛ wí nɛ̀ dé mɔ tɛ́ kpasawen tɛ́ tɛ̀ɛ̀ pii tɛ sa̧a̧mɔ, wen ha'i mɛ zɔk nɛ̀ sa̧a̧-a̧‘e, deemɔ kɔ̧-a̧, a̧ de tɛ yuu kíí Sɔ̧.»
Sɔŋkur sedaako ko Jean Zui-bíí
22 Ɗoŋ mɔ‘i, Jesu yaka in o ŋgaiwi kɔ‘i si nú Judee; ɓɛɛ a̧ duk hi̧i̧ in wa zui nɛ̀ o bíí. 23 Jean mbɛt duka zui o bíí sɛn Ainɔŋ, nɛ̀ duk nyɛi̧ nɛ̀ Salim na, wen yì a̧a̧ so hi̧i̧ nɛ̀ dɔka-a, ɓɛɛ o bíí nɛ́ tɛ a̧, ha̧ a̧ mɛ zui wa. 24 Ŋgimbi'i, ká wa tɛ pi̧ so Jean zɔɓɔ hɔ̧ɔ̧ na. 25 Ŋma wese, ɓɛɛ ŋma Juif kpɛr in o ŋgaiwi ko Jean wen zu yuwar ɗafa-war-tɛ. 26 Nɛ́ mɔ'ɔ nɛ̀ wa nɛ̀ɛ̀ kpa Jean, ɓɛɛ wa tɔ̧ ha̧ a̧: «Wan-usi-mɔ, wi n’ɛ̀nɛ́ yaa so in ŋmaa kur Jurdɛn mɛ‘i, ɓɛɛ k’ɛ́nɛ́ de sedaako wen a̧'ɛ, zui nɛ́ o bíí kinii, ɓɛɛ o bíí gbin lɛŋ si ɗoŋ-aa!» 27 Jean kifa nú hee mɔ'ɔ ga: «Ŋma bíí nyɛm mɛ de ŋma mɔ gan zu mɔ n'aa kpaa nɛ̀ yiwese na. 28 Ɛ́nɛ́ nɛ̀ tɛ‘nɛ́, nɛ́ o wi-sedaako-wen n'am tɔ̧ɔ̧ so'e: ‹Mí bó nɛ́ Krist na, ɓɛɛ mí nɛ́ wi nɛ̀ wa toma yak ti ha̧ a̧.› 29 Wi nɛ̀ ba kóò nɛ́ wan-kóò; ɓɛɛ sɛm ko wan-kóò nɛ̀ duk katɛ a̧ zíí nɛ̀ tiger-a'i duk nɛ̀ desee. Desee n'am kpa kinii'i nɛ́ pɛrti mɔ hegɔ, ɓɛɛ desee kɔ‘m'i nɛ́ kpasa desee. 30 Nɛ́ a̧ a̧ tɛ gasi gasa-a, ɓɛɛ war kɔ‘m, mi duka si ɗɔɔ.»
Wi nɛ̀ tɛ́ nɛ̀ yiwese
31 Wi nɛ̀ tɛ́ nɛ̀ yiwese duk zu mɔ lɛŋ; wi-zaŋnu kànà nɛ́ bíí zaŋnu nɛ̀ tɔ̧ kɔ‘i wen hee bíí zaŋnu ga. Wi nɛ̀ tɛ́ nɛ̀ yiwese 32 de nɛ́ sedaako mɔ n'aa zɔka in mɔ n'aa zia, ɓɛɛ ŋma bíí kpɛk sedaako kɔ̧-a̧ na. 33 Bíí nɛ̀ kpɛka sedaako kɔ̧-a̧, iŋa'e Sɔ̧ nɛ́ wi-tɔ̧-kpasawen. 34 Wi nɛ̀ Sɔ̧ toma tɔ̧́ nɛ́ wen ko Sɔ̧, wen Sɔ̧ duna a̧ nɛ̀ Sa̧a̧ Ɔmi. 35 Dáà kɔ̧ɔ̧ Bem, ɓɛɛ e mɔ lɛŋ er-a. 36 Wi nɛ̀ kɔ̧ɔ̧ ɗɔaa ha̧ Bem kpaa duka-kpasa kpoo nɛ kpoo, ɓɛɛ wi nɛ̀ kɔ̧ ɗɔaa ha̧ Bem na beka kpa duka-kpasa'i na; ɓɛɛ nyimsea ko Sɔ̧ a̧a̧ zu a̧.
Jesu in okoo Samarii
1 O Fariziɛn zia nyɛrɛ tɔ̧a̧-a̧ nɛ̀ o bíí tɔ̧‘e o bíí nɛɛ ɗoŋ Jesu nɛ̀ dɔka-a gan Jean, ɓɛɛ nɛ́ mɔ'ɔ n'aa zui nɛ̀ wa mɛ ya o ŋgaiwi kɔ̧-a̧. 2 (Ɓɛɛ kpasawen, Jesu zui kɔ‘i o bíí na, nɛ́ o ŋgaiwi kɔ̧-a̧ a̧ zui zuia wa ɛ̧́.) 3 Ŋgimbi nɛ̀ nyɛrɛmɔ‘i aa zer Jesu, a̧ kura e Judee duk, ɓɛɛ si ɗoŋ Galilee mɛ. 4 Tɛ sii ɗoŋ‘i, a̧ tɛ ɓir kànà nɛ̀ nú Samarii. 5 Nɛ́ mɔ'ɔ n'aa hɔɔ ŋma gasa ye sɛn nú Samarii, nin ye'i nɛ́ Sikar, nɛ̀ duk nyɛi̧ nɛ̀ ŋmaa in nù nɛ̀ Jakob ha̧a̧ so ha̧ bem kɔ‘i Jozɛf na. 6 Gɔna-yì ko Jakob a̧a̧ so fara'i. Jesu mbɔia tɛ nɔ̀, ɓɛɛ duk nù sɛn ká̧ yì‘i; ŋgimbi'i wese hɛɗa zu wi kaɗi. 7 Nɛ́ mɔ'ɔ nɛ̀ ŋma ko Samarii tɛɛ mɛ ɗu yì; ɓɛɛ Jesu tɔ̧ ha̧ a̧: «Mɛ̀ há̧ yì ha̧‘m nɔ.» 8 (Wen o ŋgaiwi ko Jesu nɛ̀ɛ̀ so saaye mɛ hi̧fi nyɔŋmɔ.) 9 Ko Samarii tɔ̧ɔ̧ ha̧ Jesu: «Mɛ́ nɛ́ Juif, mí nɛ́ ko Samarii, mɛ́ tɛ́ kɔfi yì er-am hee ge?» (Wen o Juif kɔ̧ wen ko o be Samarii na.) 10 Jesu kifa nú ha̧ a̧: «Kà mɛ iŋ so ha̧a̧mɔ ko Sɔ̧, in wi nɛ̀ tɔ̧ wen ha̧ mɛ‘e: mɛ̀ há̧ yì ha'i nɔ wó‘i, nɛ́ mɛ́'ɛ tɛ̀ɛ́ ak so mɔ, ɓɛɛ a̧ ha̧a̧ gbafor-yì ha̧ mɛ.» 11 Kóò‘i tɔ̧ɔ̧ ha̧ a̧: «Nyaa, ŋma mɔɔ-ɗu-yì bo er'nɛ́ na, ɓɛɛ gɔna-yì ɔ ɗuka mbɛt, ɛ́nɛ́ tɛ kpa yí-gbafor'i déè? 12 Ɛ́nɛ́ ta k’ɛnɛ, ɛ́nɛ́ nɛ̀ tɛ‘nɛ́, ɛ́nɛ́ gana zɔmdáa k’ɛɛ Jakob nɛ̀ nɔɔ yì'ɛ nɛ̀ tɛ-wi mbɛt in o bem kɔ‘i ká bá nɛ̀ o mɔ-dai kɔ‘i, ɓɛɛ ká ha̧ yì'ɛ h’ɛ́ɛ́'ɛ nde?» 13 Jesu kifa nú ha̧ a̧: «Wi nɛ̀ nɔ yì'ɛ, wɔ-yì tɛ gbɛ a̧ woyo, 14 ɓɛɛ wi nɛ̀ tɛ nɔ yì n'am tɛ ha̧ ha̧ a̧‘i, wɔ-yì beka gbɛ wi’ɛi ɓɔna. Yì‘i tɛ kifi nɛ́ gbafor-yì nɛ̀ tɛ fok mɛ de ha̧ a̧ mɛ duk kpasa kpoo nɛ kpoo.» 15 Kóò‘i tɔ̧ɔ̧ ha̧ Jesu: «Nyaa, ɛ̀nɛ̀ há̧ yì‘i ha̧‘m nɔ wen ká wɔ-yì tɛ́ɛ̀ gbɛ‘m, ɓɛɛ ká‘m tɛ́ɛ̀ pii ɗoŋ mɛ ɗu yì'ɛ woyo.» 16 Ɓɛɛ Jesu tɔ̧ ha̧ a̧: «Mɛ̀ nɛ́ɛ̀ sa wíì kɔ-mɛ, ɓɛɛ ɛ̀nɛ̀ píí ɗoŋ in ŋmaa.» 17 Kóò‘i kifa nú: «Mí bó kɔ‘m nɛ̀ wíì na.» 18 Ɓɛɛ Jesu tɔ̧: «Nɛ̀ mbetɛ, wen'i nɛ̀ mɛ tɔ̧a̧‘i nɛ́ kpasawen, mɛ́ bó nɛ̀ wíì na; wen mɛ gbia wíì mɔɔrɔ kaɗi, ɓɛɛ wan nɛ̀ mɛ duk in a̧ kinii'i, bó nɛ́ wíì kɔ-mɛ na; wen nɛ̀ mɛ́ tɔ̧a̧‘i nɛ́ kpasawen.» 19 Kóò‘i tɔ̧ɔ̧ ha̧ a̧: «Nyaa, mi zɔka ɛ́nɛ́ nɛ́ wi-tɔ̧-wen oi nú Sɔ̧. 20 O zɔmdáa k’ɛɛ yaa so gasi nɛ̀ Sɔ̧ zu kaya’ɛ, ɓɛɛ k’ɛ́nɛ́ o Juif, ɛnɛ‘e ndé, ɓaa fara-gasi Sɔ̧ nɛ́ Jerusalɛm ɓɛɛ.» 21 Ɓɛɛ Jesu tɔ̧ ha̧ a̧: «Kóò'ɛ, mɛ̀ kɔ̧́ ɗɔɔ wen kɔ‘m; ŋma ŋgimbi tɛ hɔ n’ɛnɛ beka gasi Dáà sɛn zu kaya’ɛ, kóó sɛn Jerusalɛm ɓɔna. 22 K’ɛ́nɛ́, ɛ́nɛ́ gasi nɛ́ mɔ n’ɛnɛ iŋ na, ɓɛɛ k’ɛ́ɛ́, ɛ́ɛ́ gasi nɛ́ mɔ n’ɛɛ iŋa, wen yuwar-kpasa-a tɛ́ nɛ̀ tɛ̀ o Juif. 23 Ŋgimbi tɛ hɔ, ɓɛɛ ŋgimbi'i nɛ́ mɔ'ɔ n’ɛɛ ya sɛnɛ kinii'i, nɛ̀ o kpasa wi-gasi Dáà tɛ gas'aa nɛ̀ ŋgai ko Sa̧a̧ Ɔmi in nɛ̀ kpasawen, ɓɛɛ mɛ̀ nɛ́ pɛrti o wi-gasi-sɔ̧ hegɔ‘i, a̧ Dáà kii. 24 Sɔ̧ nɛ́ Ɔmi; mɛ̀ nɛ́ hegɔ o wi nɛ̀ gas'aa, tɛ gasi kànà a̧ nɛ̀ ŋgai ko Sa̧a̧ Ɔmi in nɛ̀ kpasawen.» 25 Kóò‘i tɔ̧ɔ̧ ha̧ a̧: «Mi iŋa'e Mɛsii (nɛ̀ wa sa'e Krist), tɛ́ tɛ̀, ɓɛɛ ŋgimbi n'aa tɛ́ tɛ̀, nɛ́ a̧ a̧ tɛ́ tɔ̧ mɔ lɛŋ h’ɛ́ɛ́.» 26 Jesu tɔ̧ɔ̧ ha̧ a̧: «Wi’ɛi, nɛ́ mí n'am tɔ̧ wen in mɛ'ɛ.» 27 O ŋgaiwi ko Jesu pia ɗoŋ nyɛm nɛ̀ ŋgimbi'i; ɗɛɗɛ-wa gɔna tɛ zɔka Jesu fara tɔ̧ɔ̧ wen in okoo. Ɓɛɛ ŋma bíí mɛ ak a̧‘e: «Nɛ́ ge a̧ a̧ kɔ̧a̧ in kóò‘i ge?» kóó «Nɛ́ ge wen ge a̧ a̧ tɔ̧ in kóò‘i ge?» bo na. 28 Ɓɛɛ kóò‘i e kpáná-ɗu-yì kɔ‘i ɓɔn hi̧i̧, ɓɛɛ ma yì si saaye mɛ tɔ̧ ha̧ o bíí‘e: 29 «Ɛ̀nɛ̀ tɛ́ɛ̀ zɔk ŋma wiwii nɛ̀ tɔ̧ɔ̧ mɔ n'am dee so lɛŋ ha̧‘m. Wi’ɛi bó nɛ́ Mɛsii na nde?» 30 Wa gboo saaye, ɓɛɛ nɛ́ sitɛ Jesu. 31 Tɛ́ ŋgimbi'i, o ŋgaiwi kɔ̧-a̧ aia nú ha̧ a̧: «Wan-usi-mɔ, ɛ̀nɛ̀ nyɔ́ŋ mɔ sɛ wa!» 32 Ɓɛɛ Jesu tɔ̧ ha̧ wa: «Mi a̧a̧ nɛ̀ ŋma nyɔŋmɔ n’ɛnɛ iŋ na.» 33 Ɓɛɛ o ŋgaiwi kɔ̧-a̧ ak o ŋmaa: «Ŋma bíí baa nyɔŋmɔ baa tɛnɛ ha̧ a̧ nde?» 34 Jesu tɔ̧ɔ̧ ha̧ wa: «Nyɔŋmɔ kɔ‘m, mɛ̀ nɛ́ ha̧‘m mɛ de mɔ nɛ̀ Wan nɛ̀ toma'm tɛnɛ kɔ̧a̧, in ha̧‘m mɛ kaɗi tom n'aa ha̧a̧ ha̧‘m mɛ de. 35 Bó nɛ́ ɛ́nɛ́ tɔ̧‘e: ‹Oi kii-zɛ ɓɔna naar ɓɛɛ wi mɔi̧a nyɔnɔ na?› Ɓɛɛ mi tɔ̧ h’ɛ́nɛ́: ɛ̀nɛ̀ zɔ́k o fɔ nɛ̀ nyɔnɔ sɔka sɛnɛ mɛ mɔi̧ kaɗi’ɛ. 36 Wi-mɔi̧-nyɔnɔ kpaa mɔɔ-oi-tom kɔ‘i kaɗi, ɓɛɛ a̧ mɔi̧ nɛ́ waya-mɔ wen duka-kpasa kpoo nɛ kpoo; hegɔ‘i, ɓɛɛ wi-pɛ-kpar-mɔ in wi-mɔi̧-nyɔnɔ ya nɛ̀ desee in ŋmaa. 37 Mɛ̀ nɛ́ wen hegɔ tɛ mɔ‘i, tua-wen’ɛ nɛ́ kpasawen nɛ̀ tɔ̧‘e: ‹Ŋma bíí pɛ kɔ‘i nɛ́ kpar-mɔ, ɓɛɛ ɓii-aa mɔi̧a kɔ‘i nɛ́ mɔi̧a-a.› 38 Mi toma'nɛ́ mɛ mɔi̧ nyɔnɔ n’ɛnɛ zɔk bɔnɛ tom-aa na; nɛ́ o ŋma bíí a̧ zɔka bɔnɛ-a ɓɛɛ k’ɛ́nɛ́, ɛ́nɛ́ kpá nɛ́ mɔɔ-oi-tɔm kɔ-wa.» 39 O bíí Samarii nɛ̀ dɔka-a tɛ ye'i kɔ̧ɔ̧ ɗɔaa ha̧ Jesu wen zu wen nɛ̀ koo'i tɔ̧a̧‘e ndé: «A̧ tɔ̧ɔ̧ mɔ n'am dee so lɛŋ ha̧‘m.» 40 Wen hegɔ, o bíí Samarii nɛ̀ɛ̀ tɛ a̧, ɓɛɛ wa ai nú ha̧ a̧ mɛ duk in wa; hegɔ a̧ ɔɔ in wa zɛ yiitoo. 41 O mbe bíí nɛ̀ dɔka-a kɔ̧ɔ̧ ɗɔaa ha̧ Jesu wen zu wen n'aa tɔ̧a̧; 42 ɓɛɛ nɛ́ mɔ'ɔ nɛ̀ wa tɔ̧ɔ̧ ha̧ kóò‘i: «Bó nɛ́ ɛ́ɛ́ kɔ̧ɔ̧ ɗɔaa ha̧ a̧ wen zu wen kɔ-mɛ ɓɛɛ na; ɛ́ɛ́ zia wen kɔ̧-a̧ nɛ̀ tɛ-ɛɛ, ɓɛɛ ɛ́ɛ́ iŋ nɛ̀ mbetɛ‘e, a̧ nɛ́ Wan-kpasi o bíí nù lɛŋ.»
Jesu sii ɗoŋ si Galilee mɛ
43 Zɛ yiitoo ɗoŋ mɔ‘i, Jesu kura yak si nú Galilee mɛ. 44 Wen Jesu nɛ̀ tɛ-wi baa tɔ̧ so'e: «O bíí yu o wi-tɔ̧-wen oi nú Sɔ̧ tɛ mgbák nù kɔ-wa na.» 45 Ŋgimbi n'aa hɔɔ Galilee o bíí nù‘i kpɛka a̧ nɛ̀ de-a nyɛmna, wen wa mbɛt nɛ̀ɛ̀ so gbaŋa Paska nɛ̀ dee so Jerusalɛm, ɓɛɛ wa zɔk mɔ n'aa dee so lɛŋ ŋgimbi'i.
Jesu kpasa bem ko ŋma gasawi
46 Jesu sii ɗoŋ saaye Kana sɛn nú Galilee, fara n'aa bàá kpai so yì nɛ̀ dɔ̧ɔ̧. Ŋma gasawi ko wannu duka so hi̧i̧, nɛ̀ bem kɔ̧-a̧ ɔ so nɛ́ zɛɛ sɛn Kafarnaum mɛ. 47 Ŋgimbi n'aa zia'e Jesu kura Judee tɛ pii Galilee wó, a̧ nɛɛ mɛ ai nú ha̧ Jesu mɛ nɛ̀ɛ́ kpasi bem kɔ̧-a̧ nɛ̀ hɛɗa fio kaɗi. 48 Jesu tɔ̧ɔ̧ ha̧ a̧: «K’ɛ̀nɛ̀ zɔ́k o mɔɔ-usi-mɔ in o mɔɔ-gɔn-ɗɛɗɛ na, ɛ́nɛ́ beka kɔ̧ ɗɔaa na.» 49 Gasawi'i kifa nú ha̧ a̧: «Gasa Wan, ɛ̀nɛ̀ nɛ́ bee, wen ká bem kɔ‘m tɛɛ fe.» 50 Ɓɛɛ Jesu tɔ̧ ha̧ a̧: «Mɛ̀ sí ɗoŋ, bem kɔ-mɛ kpasa kaɗi.» Wi’ɛi kɔ̧ɔ̧ ɗɔɔ wen nɛ̀ Jesu tɔ̧a̧, ɓɛɛ si ɗoŋ, 51 ɓɛɛ a̧ kpa ŋmaa in o wi-de-tom kɔ̧-a̧ nɛ̀ nɛ́ ɗoŋ-aa, ɓɛɛ wa tɔ̧ ha̧ a̧: «Bem k’ɛ́nɛ́ kpasa.» 52 A̧ aka wa: «Bem’ɛi kpaa daama tɛ ge ŋgimbi ge?» Wa kifa nú ha̧ a̧: «Zɛɛ‘i kaɗa tɛ-a mɛ mboyɛɛ tɛ gira wese.» 53 Ɓɛɛ dáa-wan-bem iŋa'e mɛ̀ nɛ́ tɛ́ kale ŋgimbi'i a̧ Jesu tɔ̧ɔ̧ nɛnɛ ha̧ a̧‘e: «Bem kɔ̧-a̧ kpasa kaɗi'i,» ɓɛɛ a̧ in o bíí kɔ̧-a̧ lɛŋ kɔ̧ ɗɔaa ha̧ Jesu. 54 Ɛ̧ɛ̧ hɛ̧ɛ̧ nɛ́ yiitoo mɔɔ-usi-mɔ nɛ̀ Jesu dee tɛ pia-ɗoŋ kɔ̧-a̧ nɛ̀ Judee pii Galilee.
Jesu kpasa ŋma wi-kum
1 Ɗoŋ mɔ‘i, ɓɛɛ Jesu daŋ si Jerusalɛm tɛ ŋma gbaŋa ko o Juif. 2 Ŋma gɔna-yì nɛ̀‘i sa nɛ̀ nú hébreu'e Bezata duka so ká̧ nú garo ko o Sami sɛn Jerusalɛm, fara'i a̧a̧ so nɛ̀ nú-zala mɔɔrɔ. 3 Ɓɛɛ nɛ́ sɛn ti o zala nɔ‘i a̧ o gii wi-zɛɛ, o wi-boma-yí, o wi-kum in o kara-wi duka so ɔ nù sɛnɛ pɛm nɛ̀ foomɔ ko yì. 4 Wen betom ko Sɔ̧ duka so mɛ zir ɗɔɔ yì‘i tɛ ŋma ŋgimbi, mɛ fo yì. Ɗoŋ nɛ̀ yì foo mɔ kaɗi, ɓɛɛ kuti wi-zɛɛ nɛ̀ tɛ tik ɗɔɔ-aa, tɛ kpasi tɛ zɛɛ kɔ‘i, kóó nɛ́ ge zɛɛ ge. 5 Ŋma wi-kum nɛ̀ ɔɔ so zɛɛ pɛ ɓu-taar-zua-mɔɔrɔ-ɗoŋ-taar duka so hi̧i̧ mbɛt. 6 Jesu zɔka a̧ fara ɔɔ nù, ɓɛɛ a̧ iŋ‘e wi’ɛi duka nɛ̀ oi zɛɛ tɛ dɔka zɛ kaɗi, ɓɛɛ Jesu ak a̧: «Mɛ kɔ̧ɔ̧ mɛ kpasi?» 7 Wi’ɛi kifa nú: «Nyaa, ŋgimbi nɛ̀ yì fo mɔ, mi kpa bíí mɛ ba'm pi̧ ɗɔɔ-aa na; ka'm biti hai kɔ‘m nɛnɛ, ɓɛɛ ŋma bíí zira tik ɗɔɔ-aa ti ha̧‘m kaɗi.» 8 Ɓɛɛ Jesu tɔ̧ ha̧ a̧: «Mɛ̀ kúr, mɛ̀ bá mɔɔ-ɔ-nɛnɛ kɔ-mɛ, mɛ̀ nɛ́ nɔ̀.» 9 Soɓee wi’ɛi kura ba mɔɔ-ɔ-nɛnɛ kɔ‘i, ɓɛɛ nɛ́ nɔ̀. Wese'i duka nɛ́ wese-ɔm-tɛ. 10 Ɓɛɛ nɛ́ mɔ'ɔ nɛ̀ o Juif tɔ̧ɔ̧ ha̧ wi nɛ̀ kpasa'i: «Sɔsɔɔ'ɛ nɛ́ wese-ɔm-tɛ. Heembea k’ɛɛ e ha̧ mɛ mɛ tui mɔɔ-ɔ-nɛnɛ kɔ-mɛ yar nɛnɛ na.» 11 Ɓɛɛ sa a̧ kifi nú ha̧ wa: «Wi nɛ̀ kpasa'm'i tɔ̧ɔ̧ ha̧‘m'e, a̧‘m bá mɔɔ-ɔ-nɛnɛ kɔ‘m a̧‘m nɛ́ nɔ̀.» 12 Ɓɛɛ wa ak a̧: «Wi nɛ̀ tɔ̧ɔ̧ ha̧ mɛ‘e, mɛ̀ bá mɔɔ-ɔ-nɛnɛ kɔ-mɛ, mɛ̀ nɛ́ nɔ̀‘i, nɛ́ o?» 13 Ɓɛɛ wi’ɛi iŋ wi nɛ̀ kpasa a̧ na, wen Jesu gboo mgbara giiwi nɛ̀ yaa so fara'i yak kɔ‘i kaɗi. 14 Nɛ̀ ɗoŋ, Jesu kpaa wi’ɛi kɔ̧́ Tua ko Sɔ̧, ɓɛɛ tɔ̧ ha̧ a̧: «Mɛ́ kpasa kaɗi, ká mɛ de ɗaŋmɔ ɓɔna, wen ká ŋma ŋgamɔ tɛɛ kpa mɛ woyo gan kuti-a.» 15 Ɓɛɛ nɛ́ mɔ'ɔ nɛ̀ wi’ɛi nɛɛ tɔ̧ ha̧ o Juif'e, nɛ́ Jesu a̧ kpasa wi. 16 Nɛ́ tɛ ŋgimbi'i a̧ o Juif kia wen in Jesu wen n'aa dee pɛrti mɔ‘i wese-ɔm-tɛ. 17 Ɓɛɛ Jesu kifi nú ha̧ wa: «Dáà kɔ‘m de nɛ tom hɔ kinii, ɓɛɛ sa'm de tom mbɛt.» 18 Zu wen'i, o Juif kia nɛ̀ ŋgaya-a mɛ gbɛ Jesu, bó nɛ́ wen gbina heembea wese-ɔm-tɛ ɓɛɛ na, ɓɛɛ mɛ̀ nɛ́ wen a̧ wee zu nɛ̀ Sɔ̧, tɛ tɔ̧a̧-a̧‘e ndé, Sɔ̧ nɛ́ mgbák Dáà kɔ‘i.
Ŋgai ko Bem ko Sɔ̧
19 Jesu tɔ̧ɔ̧ siti woyo: «Nɛ́ kpasawen a̧‘m tɔ̧ h’ɛ́nɛ́; Bem nyɛm mɛ de mɔ nɛ̀ zu-wi na. Kànà nɛ́ mɔ n'aa zɔk tɛ̀ Dáà a̧ a̧ de; mɔ nɛ̀ Dáà de, a̧ Bem de mbɛt. 20 Wen Dáà kɔ̧ɔ̧ Bem, ɓɛɛ sa a̧ usi mɔ lɛŋ n'aa de ha̧ Bem. A̧ tɛ usi mbe gasa tom ha̧ Bem gan kuti-a, ɓɛɛ ɗɛɗɛ‘nɛ́ tɛ gɔn. 21 Hee mɔ'ɔ nɛ̀ Dáà kpasi nɛ́ o bíí tɛ fio, ɓɛɛ dee ha̧ wa mɛ duk kpasa ga, mɛ̀ nɛ́ hegɔ a̧ Bem kpasi nɛ̀ o wi n'aa kɔ̧a̧ mbɛt. 22 Wen Dáà gɔn kita zu ŋma bíí na, ɓɛɛ a̧ ee gɔna-kita lɛŋ er Bem, 23 ha̧ o bíí lɛŋ mɛ gasi Bem hee mɔ'ɔ nɛ̀ wa gasi nɛ̀ Dáà ga. Wi nɛ̀ gasi Bem na, gasi Dáà nɛ̀ toma a̧ tɛnɛ na mbɛt. 24 «Nɛ́ kpasawen a̧‘m tɔ̧ h’ɛ́nɛ́; wi nɛ̀ zii wen kɔ‘m, nɛ̀ kɔ̧ɔ̧ ɗɔaa ha̧ wi nɛ̀ toma'm tɛnɛ‘i kpaa duka-kpasa kpoo nɛ kpoo, ɓɛɛ kita beka tik a̧ na, a̧ gboo tɛ́ fio mɛ duk kpasa. 25 Nɛ́ kpasawen a̧‘m tɔ̧ h’ɛ́nɛ́; ŋgimbi tɛ hɔ, ɓɛɛ ŋgimbi'i nɛ́ mɔ'ɔ n’ɛɛ ya sɛnɛ kinii’ɛ, nɛ̀ o bíí nɛ̀ fea tɛ zii ger Bem ko Sɔ̧, ɓɛɛ o wi nɛ̀ zia tiger-a tɛ kpasi. 26 Hee mɔ'ɔ nɛ̀ Dáà a̧a̧ nɛ̀ ŋgai mɛ de ha̧ bíí mɛ duk kpasa ga, hegɔ, a̧ ha̧a̧ ŋgai ha̧ Bem mɛ de ha̧ bíí mɛ duk kpasa mbɛt, 27 ɓɛɛ a̧ ha̧ ŋgai gɔna-kita ha̧ Bem, wen a̧ nɛ́ Bem ko bíí. 28 Ká mɔ'ɔ lɛŋ gɔn ɗɛɗɛ‘nɛ́ na, wen ŋgimbi tɛ hɔ nɛ̀ o bíí lɛŋ nɛ̀ a̧a̧ kɔ̧́ fio tɛ zii tiger-a, 29 ɓɛɛ wa tɛ kur kɔ̧́ fio mɛ gbo. O wi nɛ̀ dee so demɔ, tɛ kur mɛ duk kpasa; ɓɛɛ o wi nɛ̀ dee so ɗaŋmɔ, tɛ kur wen kita.»
Mɔɔ-sedaako nɛ̀ usi ŋgai ko Jesu
30 «Mí nyɛm mɛ de mɔ nɛ zu'm na. Mí gɔn kita nyɛm nɛ̀ ɗoŋ mɔ n'am zii nú Dáà, ɓɛɛ mi gɔn kita nɛ̀ yuwar-a, wen bó nɛ́ mi kii mɛ de mɔ n'am kɔ̧a̧ na, ɓɛɛ mi kii mɛ de nɛ́ mɔ nɛ̀ Wan nɛ̀ toma'm tɛnɛ kɔ̧a̧. 31 Kà‘m de sedaako zu'm nɛ̀ tɛ‘m, ɓɛɛ sedaako'i bó nɛ́ kpasa mɔ na. 32 Mɛ̀ nɛ́ ŋma bíí a̧ de sedaako wen am, ɓɛɛ mi iŋa'e mɔ n'aa tɔ̧ wen am'i nɛ́ kpasawen. 33 Ɛ́nɛ́ toma so bíí nɛnɛ tɛ Jean, ɓɛɛ a̧ de sedaako wen kpasawen. 34 Bó nɛ́ ŋma bíí a̧ tɛ de sedaako wen am sɛ na, ɓɛɛ wen n'am tɔ̧‘i mɛ̀ nɛ́ wen h’ɛ́nɛ́ mɛ kpasi. 35 Jean duka so hee lamba nɛ̀‘i e wee sɛnɛ nɛ̀ nyɛk ga, ɓɛɛ nɛ́ mɔ'ɔ n’ɛnɛ kpaa desee mɛ ya benaŋ zaŋ sa̧a̧mɔ kɔ̧-a̧. 36 Ɓɛɛ sedaako kɔ‘m gana ko Jean nyɛmna; sedaako'i nɛ́ o tom nɛ̀ Dáà ha̧a̧ ha̧‘m mɛ de. Mí dé nɛ́ dea-a, ɓɛɛ nɛ́ o tom nɔ‘i a̧ de sedaako wen am'e, nɛ́ Dáà a̧ toma'm tɛnɛ. 37 Ɓɛɛ Dáà nɛ̀ toma'm tɛnɛ, de nɛ́ sedaako wen am. Ɛ́nɛ́ tɛ zii tiger-a na, ɛ́nɛ́ tɛ zɔk a̧ na mbɛt, 38 ɓɛɛ wen kɔ̧-a̧ bo kɔ̧́ see'nɛ́ na, wen ɛnɛ kɔ̧ ɗɔaa ha̧ wi n'aa toma tɛnɛ na. 39 Ɛ́nɛ́ tɔr nɛ́ Yɔramɔ kii nɛ̀ mɔ zaŋ-aa, wen taamɔ k’ɛ́nɛ́‘e ɛ́nɛ́ tɛ kpa duka-kpasa kpoo nɛ kpoo wen-aa, ɓɛɛ mɛ̀ nɛ́ Yɔramɔ‘i a̧ de sedaako wen am; 40 zu-a'i, ɛ́nɛ́ kɔ̧ mɛ́ tɛ tɛ‘m h’ɛ́nɛ́ mɛ kpa duka-kpasa kpoo nɛ kpoo na! 41 «Mí kii kɔ‘m war zɔnamɔ ko bíí na. 42 Mí iŋa'nɛ́: ɛ́nɛ́ bó nɛ̀ kɔ̧ɔ̧mɔ wen Sɔ̧ na. 43 Mí tɛ̀ɛ́ nɛ̀ nin Dáà kɔ‘m, ɓɛɛ ɛ́nɛ́ kpɛk am na. Kà ŋma bíí tɛ so nɛ̀ zu wi, ɓɛɛ ɛ́nɛ́ tɛ̀ɛ́ kpɛk a̧. 44 Ɛ́nɛ́ kii k’ɛ́nɛ́ nɛ́ zɔnamɔ ko ŋmaa, ɛ́nɛ́ kii zɔnamɔ nɛ̀ tɛ́ nɛ̀ tɛ Sɔ̧ kpɔk ɓɛɛ na; tɛ mɔ‘i, ɛ́nɛ́ tɛ́ kɔ̧ ɗɔaa hee ge? 45 K’ɛ́nɛ́ ta'e nɛ́ mi'i tɛ wuli'nɛ ha̧ Dáà na; nɛ́ Moisɛ n’ɛnɛ e nɛ̀ ta’ɛ a̧ tɛ wuli'nɛ ɛ̧. 46 Wen k’ɛ̀nɛ̀ kɔ̧́ so ɗɔaa ha̧ Moisɛ, ɓɛɛ ɛ́nɛ́ tɛ̀ɛ́ kɔ̧ so ɗɔaa ha̧‘m mbɛt, wen yɔramɔ kɔ̧-a̧ tɔ̧ nɛ wen zu'm. 47 Ɓɛɛ k’ɛ̀nɛ̀ kɔ̧́ ɗɔɔ mɔ n'aa yɔra na, ɛ́nɛ́ tɛ kɔ̧ ɗɔɔ wen kɔ‘m hee ge?»
Jesu ha̧a̧ nyɔŋmɔ ha̧ bíí booro-mɔɔrɔ
1 Ɗoŋ mɔ‘i, ɓɛɛ Jesu ku tɔp Galilee si kur mɛ (nin tɔp'i nɛ́ Tiberiad). 2 O gba giiwi nɛɛ ɗoŋ a̧ wen wa zɔka o mɔɔ-usi-mɔ n'aa de kpasi nɛ̀ o wi-zɛɛ. 3 Jesu daŋa zu kaya in o ŋgaiwi kɔ‘i, ɓɛɛ wa ya nù. 4 Ŋgimbi'i ká gbaŋa Paska nɛ̀ duk nɛ́ gbaŋa ko o Juif hɛɗa kaɗi. 5 Jesu baa yí nɛ̀ ŋgɔn, ɓɛɛ zɔk gba giiwi nɛ̀ tɛ́ pii tɛ̀, ɓɛɛ a̧ tɔ̧ ha̧ Filip: «Ɛɛ tɛ kpa brɛt déè mɛ hi̧fi ha̧ o wi nɔ'ɔ mɛ nyɔŋ ge?» 6 (Jesu tɔ̧ɔ̧ wen'i bá nɛ̀ wen kɔ̧́ zaŋ Filip, wen a̧ iŋa so kɔ̧-a̧ mɔ n'aa tɛ de kaɗi.) 7 Ɓɛɛ Filip kifi nú ha̧ a̧: «Kóó ɛ̀ɛ̀ hi̧fi brɛt tɛ kɔya sede gɔmŋmaa-yiitoo, beka nyɛm ha̧ o bíí mɛ kpa be ɓira-a tikiɗi dam wa na.» 8 Ŋma ŋgaiwi kɔ̧-a̧, Andre nya Simɔŋ-Pierre, tɔ̧ɔ̧ ha̧ a̧: 9 «Ŋma bem a̧a̧ hɛ̧ɛ̧ nɛ̀ a̧a̧ nɛ̀ brɛt bé-fón mɔɔrɔ in zoro yiitoo, ɓɛɛ mɔ‘i tɛ nyɛm so o gba giiwi nɔ'ɔ?» 10 Nɛ́ mɔ'ɔ nɛ̀ Jesu tɔ̧ɔ̧ ha̧ o ŋgaiwi kɔ‘i: «Ɛ̀nɛ̀ tɔ̧́ ha̧ wa mɛ ya nù.» (De mbɔɗi zɔ̧ a̧a̧ so fara'i nɛ̀ dɔka-a.) Wa yaa nù ɓɛɛ dɔka o wiwii lɛŋ duka hee booro-mɔɔrɔ ga. 11 Jesu baa brɛt, de osoko ha̧ Sɔ̧, ɓɛɛ kɛ̧ ha̧ o bíí; a̧ kɛ̧ɛ̧ zoro ha̧ wa hegɔ mbɛt. Bíí lɛŋ kpaa mɔ nyɛm see. 12 O bíí nyɔŋa mɔ zaŋ sur kaɗi, ɓɛɛ Jesu tɔ̧ ha̧ o ŋgaiwi kɔ‘i: «Ɛ̀nɛ̀ ndɛ́m oi nyɔŋmɔ nɛ̀ ɓɔna lɛŋ, k’ɛ́nɛ́ e ŋma mɔ tikiɗi dúk ha̧ mɛ yɔ na.» 13 Wa ndɛma oi brɛt-fón mɔɔrɔ nɛ̀ o bíí nyɔŋa so'i, ɓɛɛ dun gɛsɛ ɓu-zua-yiitoo. 14 O bíí zɔka mɔɔ-usi-mɔ nɛ̀ Jesu dea'i kaɗi, ɓɛɛ tɔ̧: «Nɛ̀ mbetɛ, wi’ɛ nɛ́ Wi-tɔ̧-wen oi nú Sɔ̧ nɛ̀ tɛ̀ɛ́ tɛ so zaŋnu.» 15 Jesu iŋa'e wa kɔ̧ɔ̧ mɛ tɛ̀ɛ́ ba wi nɛ̀ ŋgai mɛ de wan ha'i wó, ɓɛɛ a̧ yu kɔ̧-a̧ mɔ yak si zu kaya mɛ.
Jesu nɛɛ nɔ̀ zu tɔp
16 Mɛ ga̧a̧mɔ o ŋgaiwi ko Jesu zira si ká̧ tɔp, 17 ɓɛɛ wa daŋ ŋma kombon mɛ ku tɔp si Kafarnaum mɛ. Tɛ́ ŋgimbi'i ká tum baa nù kaɗi, ɓɛɛ Jesu tɛ kpa wa hɔ̧ɔ̧ na. 18 Búk yuu nɛ̀ ŋgaya-a, ɓɛɛ yì pɛŋi nyɛmna. 19 Wa baa kombon hɔ si see yì hee kilomɛtrɛ mɔɔrɔ kóó mɔɔrɔ-ɗoŋ-kpɔk ga, ɓɛɛ wa zɔk Jesu tɛ̀ tɛa-a nɛ̀ zu yì pii tɛ wa. Kíì dee wa, 20 ɓɛɛ Jesu tɔ̧ ha̧ wa: «Nɛ́ mí, k’ɛ́nɛ́ de kíì na.» 21 Wa kɔ̧ɔ̧ so ha̧ a̧ mɛ ye kombon in wa, ɓɛɛ ká kombon hɔɔ so kɔ‘i nú ŋgere sɛn fara nɛ̀ wa nɛ́‘i kaɗi.
O bíí-nɛ̀-ɗoŋ Jesu
22 Nɛ̀ mɔ sa̧a̧, o giiwi nɛ̀ ɓɔna nɛ̀ kur tɔp iŋa'e ndé, Jesu daŋ kombon'i in o ŋgaiwi kɔ‘i na, wen kombon kpɔk nɛ̀ duka so nɛ́ mɔ‘i nɛ̀ o ŋgaiwi kɔ̧-a̧ baa'i. 23 Ɓɛɛ o ŋma kombon tɛɛ so nɛ̀ Tiberiad duk ká̧ fara nɛ̀ wa nyɔŋa so brɛt sɛnɛ ɓɛɛ ká Jesu de nɛ osoko ha̧ Sɔ̧ zu brɛt'i. 24 Ŋgimbi nɛ̀ giiwi zɔka'e Jesu in o ŋgaiwi kɔ‘i bo hi̧i̧ na, wa daŋa o ŋma geɗek kombon, ɓɛɛ wa yak si Kafarnaum mɛ kii a̧.
Jesu nɛ́ brɛt-duka-kpasa
25 Wa kpaa Jesu sɛn kur yì, ɓɛɛ wa ak a̧: «Wan-usi-mɔ, ɛ́nɛ́ hɔɔ bɔɔ hɛ̧ɛ̧ mɛ gese ge?» 26 Jesu kifa nú ha̧ wa: «Nɛ́ kpasawen a̧‘m tɔ̧ h’ɛ́nɛ́; bó nɛ́ ɛ́nɛ́ kii am wen mɔɔ-usi-mɔ n’ɛnɛ zɔka na, ɓɛɛ ɛnɛ kii am wen nyɔŋmɔ n’ɛnɛ nyɔŋa zaŋ‘nɛ́ sur. 27 K’ɛ́nɛ́ de tom wen nyɔŋmɔ nɛ̀ ɗaŋ ɗaŋ na, ɓɛɛ ɛ̀nɛ̀ dé tom wen nyɔŋmɔ nɛ̀ duk hegɔ yaknɛ in nɛ̀ ha̧ duka-kpasa kpoo nɛ kpoo; mɛ̀ nɛ́ wan nɛ̀ Bem ko bíí tɛ ha̧ h’ɛ́nɛ́‘i, wen nɛ́ a̧ a̧ Dáà nɛ̀ dúk nɛ́ Sɔ̧ ee tumbal kɔ‘i tɛ-a.» 28 Wa aka a̧: «Mɔ n’ɛɛ tɛ de h’ɛ́ɛ́ mɛ de nɛ̀ o tom ko Sɔ̧ nɛ́ ge?» 29 Jesu kifa nú ha̧ wa: «Déé tom ko Sɔ̧ nɛ́ kɔ̧ɔ̧ ɗɔaa ha̧ wi n'aa toma tɛnɛ.» 30 Ɓɛɛ wa tɔ̧ ha̧ a̧: «Nɛ́ ge mɔɔ-usi-mɔ ge a̧ mɛ tɛ de h’ɛ́ɛ́ mɛ zɔk sɛk’ɛɛ kɔ̧ɔ̧ ɗɔaa ha̧ mɛ ge? Tom kɔ-mɛ nɛ́ ge tom ge? 31 O zɔmdáa k’ɛɛ nyɔŋa so man ŋga-gbárà mɛ hee mɔ'ɔ nɛ̀ yɔra so ga: ‹A̧ ha̧a̧ brɛt nɛ̀ tɛ̀ɛ́ nɛ̀ yiwese ha̧ wa mɛ nyɔŋ.› » 32 Ɓɛɛ Jesu tɔ̧ ha̧ wa: «Nɛ́ kpasawen a̧‘m tɔ̧ h’ɛ́nɛ́; bó nɛ́ Moisɛ a̧ ha̧a̧ brɛt mɛ yiwese h’ɛ́nɛ́ na, ɓɛɛ nɛ́ Dáà kɔ‘m a̧ ha̧ kpasa brɛt mɛ yiwese h’ɛ́nɛ́; 33 wen brɛt ko Sɔ̧, nɛ́ brɛt nɛ̀ zir nɛ̀ yiwese, ɓɛɛ nɛ̀ de ha̧ o bíí zaŋnu mɛ duk kpasa.» 34 Wa tɔ̧ɔ̧ ha̧ a̧: «Nyaa, ɛ̀nɛ̀ há̧ nɛ́ i̧i̧ brɛt'i h’ɛ́ɛ́ ɓɔnsɛnɛ.» 35 Jesu tɔ̧ɔ̧ ha̧ wa: «Mí nɛ́ brɛt duka-kpasa; wi nɛ̀ tɛ́ tɛ‘m, wɔ beka gbɛ a̧ na; wi nɛ̀ kɔ̧ɔ̧ ɗɔaa ha̧‘m, wɔ-yí beka gbɛ a̧ na. 36 Mi bàá tɔ̧ so h’ɛ́nɛ́: ɛ́nɛ́ zɔka'm, nɛ́ mɔ'ɔ n’ɛ̀nɛ̀ kɔ̧ ɗɔaa ha̧‘m na mbɛt. 37 Bíí lɛŋ nɛ̀ Dáà ha̧ ha̧‘m tɛ́ tɛ̀ tɛ‘m, ɓɛɛ wi nɛ̀ tɛ́ tɛ‘m, mi beka bɛ̧ a̧ na, 38 wen bó nɛ́ mi zira nɛ̀ yiwese mɛ de mɔ n'am kɔ̧a̧ na, ɓɛɛ ha̧‘m mɛ de mɔ nɛ̀ wan nɛ toma'm tɛnɛ kɔ̧a̧. 39 Ɓɛɛ mɔ nɛ̀ wan nɛ toma'm tɛnɛ kɔ̧a̧ nɛ́ mɔ'ɔ: wen ká‘m tɛ̀ɛ́ de ha̧ ŋma bíí kpɔk mgbara o wi n'aa ha̧a̧ ha̧‘m mɛ yɔ, ɓɛɛ ha̧‘m mɛ kpasi nɛ̀ wa tɛ fio sɔŋkur wese. 40 Mɔ nɛ̀ Dáà kɔ‘m kɔ̧a̧ nɛ́ mɔ'ɔ: wen ha̧ kóó o ndé nɛ̀ zɔk Bem in nɛ̀ kɔ̧ɔ̧ ɗɔaa ha̧ a̧ mɛ duk kpasa kpoo nɛ kpoo, ɓɛɛ kɔ‘m, mi tɛ kpas'a tɛ fio sɔŋkur wese.» 41 Nɛ́ mɔ'ɔ nɛ̀ o Juif ku̧i̧a mɔ zu a̧ zu wen n'aa tɔ̧ɔ̧‘e: «Wi nɛ́ brɛt nɛ̀ zira nɛ̀ yiwese» wó‘i. 42 Wa tɔ̧a̧: «Wi’ɛ, bó nɛ́ Jesu bem ko Jozɛf na? Bó nɛ́ ɛ́ɛ́ iŋa dáà in nàà kɔ̧-a̧ na? A̧ tɛ tɔ̧‘e, wi zira nɛ̀ yiwese héé ge?» 43 Jesu tɔ̧ɔ̧ ha̧ wa: «K’ɛ́nɛ́ ku̧i̧ mɔ mgbara ŋmaa géè na. 44 Ŋma bíí nɛ̀ nyɛma mɛ tɛ tɛ‘m, kà bó nɛ́ Dáà a̧ fo a̧ pii tɛ‘m na, bo na, ɓɛɛ kɔ‘m mi tɛ kpas'a sɔŋkur wese. 45 Wen yɔra so zaŋ kalata ko o wi-tɔ̧-wen oi nú Sɔ̧‘e: ‹Sɔ̧ tɛ usi mɔ ha̧ o bíí lɛŋ.› Ɓɛɛ kóó o ndé nɛ̀ zii usamɔ ko Dáà, ɓɛɛ nɛ̀ kpɛk mbɛt tɛ́ tɛ̀ tɛ‘m. 46 Ŋma bíí tɛ zɔk Dáà na, kànà nɛ́ wi nɛ̀ tɛ̀ɛ́ nɛ̀ tɛ́ Sɔ̧ a̧ zɔka Dáà ɓɛɛ. 47 «Nɛ́ kpasawen a̧‘m tɔ̧ h’ɛ́nɛ́; wi nɛ̀ kɔ̧ ɗɔaa ha̧‘m kpaa duka-kpasa kpoo nɛ kpoo. 48 Mí nɛ́ brɛt nɛ̀ de ha̧ bíí mɛ duk kpasa. 49 O zɔmdáa k’ɛ́nɛ́ nyɔŋa so man sɛn ŋga-gbárà mɛ, ɓɛɛ wa fea. 50 Ɓɛɛ nɛ̀ ko brɛt nɛ̀ zira nɛ̀ yiwese'i, bíí nɛ̀ tɛ nyɔŋ beka fe na. 51 Mi nɛ́ brɛt nɛ̀ duk kpasa nɛ̀ zira nɛ̀ yiwese. Wi nɛ̀ nyɔŋ brɛt'i tɛ duk kpasa kpoo nɛ kpoo. Brɛt n'am tɛ ha̧‘i nɛ́ mur-tɛ‘m nɛ̀‘i ha̧a̧ wen kpasa-a ko o bíí nù lɛŋ.» 52 Ɓɛɛ o Juif ku̧ naŋ zaŋa wen nɛ̀ ŋgai in o ŋmaa, tɔ̧ nɛnɛ‘e: «Héé ge wi’ɛ nyɛma mɛ ha̧ murtɛ-wi h’ɛ́ɛ́ mɛ nyɔŋ ge?» 53 Ɓɛɛ Jesu tɔ̧ ha̧ wa: «Nɛ́ kpasawen a̧‘m tɔ̧ h’ɛ́nɛ́, k’ɛ̀nɛ̀ nyɔŋ mur-tɛ Bem ko bíí na, in k’ɛ̀nɛ̀ nɔ tɔk-tɛ-a na mbɛt, duka-kpasa beka duk in'nɛ̀ɛ̀ na. 54 Wi nɛ̀ nyɔŋ mur-tɛ‘m in nɛ̀ nɔ tɔk-tɛ‘m mbɛt kpaa duka-kpasa kpoo nɛ kpoo, ɓɛɛ mi tɛ kpas'a tɛ fio sɔŋkur wese. 55 Wen mur-tɛ‘m nɛ́ kpasa nyɔŋmɔ in tɔk-tɛ‘m nɛ́ kpasa mɔɔ-nɔ. 56 Wi nɛ̀ nyɔŋ mur-tɛ‘m, nɛ̀ nɔ tɔk-tɛ‘m duk sɛn tɛ‘m, ɓɛɛ mi duk tɛ wi’ɛi mbɛt. 57 Hee mɔ'ɔ nɛ̀ Dáà nɛ̀ toma'm tɛnɛ duk kpasa, ɓɛɛ mi duk kpasa nɛ̀ ɗoŋ Dáà ga, hegɔ mbɛt, wi nɛ̀ nyɔŋ mur-tɛ‘m tɛ duk kpasa nɛ̀ ɗoŋ-am. 58 Brɛt nɛ̀ zira nɛ̀ yiwese duk nɛtɛ in wan nɛ̀ o zɔmdáa k’ɛ́nɛ́ nyɔŋa so, wen wa fea; ɓɛɛ wi nɛ̀ nyɔŋ brɛt’ɛ tɛ duk kpasa kpoo nɛ kpoo.» 59 O mɔɔ nɔ‘i nɛ́ usamɔ ko Jesu kɔ̧́ tua-mɔi̧a-a sɛn Kafarnaum.
Wen duka-a kpasa kpoo nɛ kpoo
60 Ɗoŋ nɛ̀ wa zia wen'i kaɗi, o ŋma ŋgaiwi kɔ̧-a̧ nɛ̀ dɔka-a tɔ̧a̧: «Wen’ɛ ŋgaia; nɛ́ o'o tɛ zii so wen'i ɓɔ o?» 61 Jesu iŋa'e o ŋgaiwi kɔ‘i ku̧i̧ nɛ́ mɔ zu mɔ n'aa tɔ̧a̧, ɓɛɛ tɔ̧ ha̧ wa: «Wen’ɛ sakali nɛ́ ɛ́nɛ́ nde? 62 Kà bo so h’ɛ́nɛ́ mɛ zɔk Bem ko bíí tɛ daŋa-a si fara n'aa duka so sɛnɛ nɛti, ɓɛɛ ɛ́nɛ́ tɛ̀ɛ́ de hee ge? 63 Nɛ́ Sa̧a̧ Ɔmi a̧ de ha̧ bíí mɛ duk kpasa, mur-tɛ-wi de ŋma mɔ na. O wen n'am tɔ̧ɔ̧ h’ɛ́nɛ́‘i, nɛ́ ɔmi in duka-kpasa. 64 Ɓɛɛ o ŋma bíí a̧a̧ mgbara'nɛ́ nɛ̀ kɔ̧ ɗɔaa ha̧‘m na.» (Wen nɛ̀ ku̧u̧naŋ-a mɛ Jesu iŋa kɔ‘i o wi nɛ̀ beka kɔ̧ ɗɔaa na in wi nɛ̀ tɛ e ɗɔra tɛ-a.) 65 A̧ tɔ̧ɔ̧ woyo: «Mɛ̀ nɛ́ wen mɔ‘i a̧‘m tɔ̧ɔ̧ nɛnɛ h’ɛ́nɛ́‘e ndé, ŋma bíí nɛ̀ nyɛma mɛ tɛ tɛ‘m, kà bó nɛ́ Dáà a̧ fo a̧ pii tɛ‘m na, bo na.» 66 Ɓɛɛ nɛ́ tɛ́ ŋgimbi'i a̧ o ŋma ŋgaiwi kɔ̧-a̧ nɛ̀ dɔka-a daka nɛ̀ zu si ɗoŋ, ɓɛɛ wa bɛ̧ baa yuwar in a̧. 67 Ɓɛɛ Jesu ak o ŋgaiwi kɔ‘i ɓu-zua-yiitoo: «Ɓɛɛ k’ɛ́nɛ́, ɛ́nɛ́ yak k’ɛ́nɛ́ na?» 68 Simɔŋ-Pierre kifa nú ha̧ a̧: «Gasa Wan, ɛ́ɛ́ tɛ́ nɛ̀ bɔɔ sitɛ o? Nɛ́ ɛ́nɛ́'ɛ a̧a̧ nɛ̀ o wen nɛ̀ de ha'i mɛ kpa duka-kpasa kpoo nɛ kpoo. 69 K’ɛ́ɛ́, ɛ́ɛ́ kɔ̧ɔ̧ ɗɔaa ɓɛɛ ɛ́ɛ́ iŋa'e ɛ́nɛ́ nɛ́ Sa̧a̧ Wi ko Sɔ̧.» 70 Ɓɛɛ Jesu tɔ̧: «Mɛ̀ nɛ́ mi'i hoka'nɛ́ ɓu-zua-yiitoo. Ɓɛɛ ŋma bíí kpɔk mgbara'nɛ́, nɛ́ ŋma satan.» 71 A̧ tɔ̧ɔ̧ wen'i zu Judas, bem ko Simɔŋ Iskariot; wen mɛ̀ nɛ́ a̧‘i a̧ tɛ́ e ɗɔra tɛ Jesu, a̧ nɛ́ ŋma kpɔk mgbara o ŋgaiwi ko Jesu ɓu-zua-yiitoo'i.
O nya ko Jesu kɔ̧ ɗɔaa ha̧ a̧ na
1 Ɗoŋ mɔ‘i, Jesu yara ɓɔn nú Galilee; a̧ kɔ̧ mɛ yar si nú Judee na wen o Juif kii nɛ́ war mɛ gbɛ a̧. 2 Ɓɛɛ gbaŋa ko o Juif nɛ‘i sa'e gbaŋa Tua-laa hɛɗa so kaɗi mbɛt. 3 O nya kɔ̧-a̧ tɔ̧ɔ̧ ha̧ a̧: «K’ɛ́nɛ́ duk ɓɔn hɛ̧ɛ̧ na, ɛ̀nɛ̀ yák si Judee ha̧ o ŋgaiwi k’ɛ́nɛ́ mɛ zɔk gasa tom n’ɛnɛ de. 4 Wi nɛ̀ kɔ̧ɔ̧ ha̧ o bíí mɛ iŋ a̧, de mɔ nɛ̀ hu̧sa̧-a̧ na. Hee mɔ'ɔ n’ɛnɛ dé nɛ́ gasa tom ga, ɛ̀nɛ̀ dé ɓɔn gbaayí o bíí lɛŋ ha̧ wa zɔk.» 5 (Kóó nɛ́ o nya a̧ mbɛt kɔ̧ ɗɔaa ha̧ a̧ na.) 6 Ɓɛɛ Jesu tɔ̧ ha̧ wa: «Ŋgimbi kɔ‘m tɛ hɔ hɔ̧ɔ̧ na; ɓɛɛ k’ɛ́nɛ́, ɛ́nɛ́ a̧a̧ nɛ̀ de ŋgimbi ɓɔnsɛnɛ. 7 O bíí zaŋnu’ɛ nyɛm mɛ sɛn'nɛ́ na, ɓɛɛ war kɔ‘m, wa tɛ sɛn am wen mi de nɛ́ sedaako'e, tom kɔ-wa de na. 8 K’ɛ́nɛ́, ɛ̀nɛ̀ gár gbaŋa'i; kɔ‘m, mí beka nɛ́ na, wen ŋgimbi kɔ‘m tɛ hɔ hɔ̧ɔ̧ na.» 9 Ɗoŋ n'aa tɔ̧ɔ̧ hegɔ kaɗi, a̧ duka ɓɔn Galilee. 10 Ɓɛɛ ŋgimbi nɛ̀ o nya a̧ gara kɔ‘i gbaŋa yak kaɗi, a̧ mbɛt, kura nɛ́ ɗoŋ wa nɛ̀ hu̧sa̧-a̧, bíí zɔk a̧ na. 11 Tɛ́ ŋgimbi gbaŋa'i, o Juif kia a̧ ak nɛ̀ mɔ‘e: «A̧ a̧a̧ bɔɔ de?» 12 O giiwi nɛ̀ mɔi̧a tɔ̧ɔ̧ wen tɛ-a dam fara lɛŋ. O ŋma tɔ̧a̧: «A̧ nɛ́ wi-de-demɔ.» O ŋma tɔ̧ɔ̧ kɔ‘i: «A̧ ɔr nɛ́ bíí.» 13 Ɓɛɛ ŋma bíí mɛ tɔ̧ wen kɔ̧-a̧ nɛ̀ ŋgɔn bo na, wen wa de nɛ́ kii o Juif. 14 Wa dee gbaŋa ɗoŋ-aa nyɛi̧ kaɗi, ɓɛɛ Jesu ye kɔ̧́ Tua ko Sɔ̧, duk usi nɛ̀ mɔ. 15 Ɗɛɗɛ o Juif gɔna, ɓɛɛ wa tɔ̧: «Wi’ɛ dee hee ge iŋ nɛ̀ mɔ hegɔ nɛ̀ bó nɛ́ a̧ yamba so nɛ́ mɔ na’ɛ ge?» 16 Jesu kifa nú ha̧ wa: «Mɔ n'am usi tɛ́ nɛ̀ tɛ‘m na, ɓɛɛ tɛ́ nɛ̀ tɛ́ Wan nɛ̀ toma'm tɛnɛ. 17 Kà ŋma bíí a̧ kɔ̧ɔ̧ mɛ́ de mɔ nɛ̀ Sɔ̧ kɔ̧a̧, wi’ɛi tɛ iŋ‘e usamɔ‘i tɛ̀ɛ́ nɛ̀ tɛ́ Sɔ̧, kóó mi tɔ̧ nɛ́ wen kɔ‘m nɛ̀ zu'm. 18 Wi nɛ̀ tɔ̧ wen mɔ nɛ̀ zɔk nɛ́ a̧ nɛ̀ tɛ-a, kii nɛ́ gasamɔ kɔ‘i, ɓɛɛ wi nɛ̀ kii gasamɔ wen wi nɛ̀ toma a̧, nɛ́ wi-tɔ̧-kpasawen, ɔrmɔ bo tɛ-a na. 19 Bó nɛ́ Moisɛ ha̧a̧ so heembea h’ɛ́nɛ́ na? Ɓɛɛ ŋma bíí kpɔk mgbara'nɛ́ nɛ̀ de mɔ nyɛm nɛ̀ ɗoŋ heembea'i bo na! Ɛ́nɛ́ kɔ̧ɔ̧ mɛ gbɛ‘m wen ge?» 20 Giiwi kifa nú: «Ɗaŋ-sɔ̧ a̧a̧ tɛ-mɛ. Mɛ́ zɔka nɛ́ o'o kɔ̧ɔ̧ mɛ gbɛ mɛ o?» 21 Jesu baa wen ɓɛɛ tɔ̧ ha̧ wa woyo: «Nɛ́ mɔ kpɔk a̧‘m dea, ɓɛɛ nɛ́ mɔ'ɔ nɛ̀ ɗɛɗɛ‘nɛ́ lɛŋ gɔna’ɛ! 22 Moisɛ ha̧a̧ heembea gɔna-bɔr h’ɛ́nɛ́ (ɓɛɛ bó nɛ́ Moisɛ a̧ ku̧u̧ naŋ-a na, mɔ‘i tɛ̀ɛ́ nɛ̀ tɛ̀ o zɔmdáa mɛ tɛnɛ), ɓɛɛ ɛ́nɛ́ gɔn bɔr wese-ɔm-tɛ mbɛt. 23 Hegɔ mbɛt, gɔna-bɔr n’ɛnɛ gɔn wese-ɔm-tɛ'ɛ, ɛ́nɛ́ tá k’ɛ́nɛ́‘e mɔ‘i bó nɛ́ gbina-heembea ko Moisɛ na, ɓɛɛ wen ge s’ɛnɛ kpa ɗaŋsee zu'm wen n'am kpasa kiitɛ bíí nɛ̀ oi-aa lɛŋ wese-ɔm-tɛ ge? 24 Ɛ̀nɛ̀ káɗí gɔna kita tɛ mɔ n’ɛnɛ zɔk nɛ̀ zan'i, ɓɛɛ ɛ̀nɛ̀ gɔ́n kita nɛ̀ yuwar-a.»
Jesu nɛ́ Mɛsii
25 O ŋma bíí Jerusalɛm tɔ̧a̧: «Bó nɛ́ wi nɛ̀ wa kii mɛ gbɛ'ɛ nɛ́ mɔ'ɔ na? 26 Ɛ̀nɛ̀ zɔ́k a̧ n'aa tɔ̧ wen e yí wa nɛnɛ, ɓɛɛ ŋma bíí hu̧i̧ nú tɔ̧ wen in a̧ na! Mɔ'ɔ, o gasawi k’ɛɛ iŋa nɛ̀ mbetɛ‘e, wi’ɛ nɛ́ Mɛsii nde? 27 Ŋgimbi nɛ̀ Mɛsii bé tɛ̀ɛ́ tɛ, ŋma bíí beka iŋ fara n'aa tɛ nɛnɛ na, ɓɛɛ war ko wi’ɛ, ɛ́ɛ́ iŋa fara n'aa tɛ nɛnɛ.» 28 Jesu duka usi nɛ̀ mɔ kɔ̧́ Tua ko Sɔ̧ ɓɛɛ tɔ̧: «Ɛ́nɛ́ iŋa'm ɓɛɛ n’ɛnɛ iŋ fara n'am tɛ nɛnɛ mbɛt. Ɓɛɛ bó nɛ́ mí tɛ̀ɛ́ nɛ̀ zu'm na. Wi nɛ̀ toma'm tɛnɛ‘i nɛ́ wi-tɔ̧-kpasawen; k’ɛ́nɛ́, ɛ́nɛ́ iŋ a̧ na. 29 Kɔ‘m, mi iŋa a̧ wen mi tɛ̀ɛ́ nɛ̀ tɛ a̧, ɓɛɛ nɛ́ a̧ á̧ toma'm tɛnɛ.» 30 Wa kia mɛ ba a̧, ɓɛɛ ŋma bíí fo a̧ nɛ̀ er na wen ŋgimbi kɔ̧-a̧ tɛ́ hɔ hɔ̧ɔ̧ na. 31 O bíí nɛ̀ dɔka-a mgbara o giiwi kɔ̧ɔ̧ ɗɔaa ha̧ a̧ ɓɛɛ tɔ̧: «Mɔ‘i, Mɛsii bé tɛ̀ɛ́ tɛ, ɓɛɛ a̧ tɛ́ de mɔɔ-usi-mɔ gan ko wi’ɛ nɛ̀ de’ɛ?»
Wa toma o wi-biro mɛ nɛ̀ɛ́ ba Jesu
32 O Fariziɛn zia mɔ lɛŋ nɛ̀ o giiwi fu̧i̧ ha̧ o ŋmaa nɛnɛ wen zu a̧, ɓɛɛ wa in o gasa wan-ɗafi-sɔ̧, tom o wi-biro mɛ nɛ̀ɛ́ ba a̧. 33 Nɛ́ mɔ'ɔ nɛ̀ Jesu tɔ̧ɔ̧ ha̧ wa: «Mí biti in'nɛ̀ɛ́ ŋgimbi tikiɗi, ɓɛɛ mi sii ɗoŋ tɛ wi nɛ̀ toma'm tɛnɛ. 34 Ɛ́nɛ́ tɛ kii am takaɗi, ɛ́nɛ́ beka kpa'm na; fara n'am tɛ duk'i, ɛ́nɛ́ nyɛm mɛ hɔ sɛnɛ na.» 35 Ɓɛɛ o Juif tɔ̧ sitɛ o ŋmaa: «A̧ tɛ yak si déè s’ɛ́ɛ́ beka kpa a̧ na'i ge? A̧ tɛ yak si ɗoŋ o Juif nɛ̀ yambala si mgbara o Grɛk mɛ usi mɔ ha̧ o Grɛk nde? 36 Wen n'aa tɔ̧‘e: ‹Ɛ́nɛ́ tɛ kii am takaɗi, ɛ́nɛ́ beka kpa'm na; ɓɛɛ fara n'am tɛ duk'i, ɛ́nɛ́ nyɛm mɛ hɔ sɛnɛ na› wó'ɛ, gba̧a̧ wen'i bɔɔ hee ge?» 37 Sɔŋkur wese gbaŋa duka nɛ́ gasa wese. Wese'i Jesu kura yɔr ŋgɔn ɓɛɛ tɔ̧ wen nɛ̀ hee-ger'e: «Wi nɛ̀ wɔ-yí gbɛ a̧ a̧ tɛ́ tɛ‘m, a̧ nɔ́. 38 Hee mɔ'ɔ nɛ̀ Yɔramɔ tɔ̧ɔ̧ ga: ‹Wi nɛ̀ kɔ̧ ɗɔaa ha̧‘m, gbafor-yì duka-kpasa tɛ fok nɛ̀ kɔ̧́ see-aa gbonɛ.› » 39 (Jesu tɔ̧ɔ̧ wen'i zu Sa̧a̧ Ɔmi nɛ̀ o bíí nɛ̀ kɔ̧ ɗɔaa ha̧ a̧ tɛ kpa. Wen tɛ ŋgimbi'i Sa̧a̧ Ɔmi tɛ hɔ hɔ̧ɔ̧ na, wen Jesu tɛ ye tɛ gasamɔ kɔ‘i hɔ̧ɔ̧ na.)
Zaŋa wen ko o bíí
40 O ŋma bíí poo giiwi nɛ̀ zia wen'i tɔ̧a̧: «A̧ nɛ́ Wi-tɔ̧-wen oi nú Sɔ̧ nɛ mbetɛ!» 41 O ŋma tɔ̧ɔ̧ kɔ‘i: «Wi’ɛ nɛ́ Mɛsii!» Ɓɛɛ o ŋma woyo tɔ̧ɔ̧ kɔ‘i: «Krist tɛ̀ɛ́ tɛ̀ so nɛ̀ Galilee nde? 42 Bo nɛ́ Yɔramɔ tɔ̧ɔ̧‘e: ‹Mɛsii tɛ duk nɛ́ bezaŋ David nɛ̀ wa tɛ ko sɛn Bɛtlɛhɛm be geɗek ye ko David na nde?› » 43 Ɓɛɛ giiwi kɛ̧ tɛ̀ nɛ̀ ŋmaa wen zu a̧. 44 O ŋma mgbara wa kɔ̧ɔ̧ mɛ ba a̧, ɓɛɛ ŋma bíí fo a̧ nɛ̀ er na. 45 O wi-biro sii ɗoŋ tɛ o gasa wan-ɗafi-sɔ̧ in tɛ o Fariziɛn, nɛ̀ aka wa: «Ɛ́nɛ́ ba bɔɔ a̧ na wen ge?» 46 O wi-biro kifa nú ha̧ wa: «Ŋma bíí tɛ tɔ̧ wen hee wi’ɛi ga na!» 47 O Fariziɛn kifa nú ha̧ wa: «Oo, mɔ‘i ɔra'nɛ mbɛt? 48 Ŋma bíí kpɔk, kóó mgbara o dita-bíí, kóó mgbara o Fariziɛn, nɛ̀ kɔ̧ɔ̧ ɗɔaa ha̧ a̧ so sɛnɛ? 49 Giiwi nɔ'ɔ nɛ̀ iŋ kɔ‘i heembea na’ɛ, fom baa wa kaɗi.» 50 Ŋma bíí mgbara o Fariziɛn nɛ̀‘i sa'e Nikodɛm nɛ̀ nɛ̀ɛ̀ so tɛ Jesu nɛti tɔ̧a̧: 51 «Heembea k’ɛɛ tɔ̧a̧‘e, bíí tɛ ɓa yoŋgo wen kɔ‘i, kà‘i iŋa mɔ n'aa dea, sɛka'i gɔna kita zu a̧.» 52 Wa kifa nú ha̧ Nikodɛm: «Mɛ́ nɛ́ be Galilee mbɛt. Mɛ̀ tɔ́r mɔ nɛ̀ a̧a̧ zaŋ kalata, ɓɛɛ mɛ́ tɛ́ iŋ‘e ŋma wi-tɔ̧-wen oi nú Sɔ̧ beka gbo nɛ̀ Galilee na.» 53 Ɓɛɛ kóó o ndé kur nɛ́ kura-a, si ɗoŋ tɛ̀ kɔ‘i.
Ŋma okoo nɛ̀ wa kpaa fara de dàlà
1 Nɛ́ mɔ'ɔ nɛ Jesu kura ɓɛɛ yak si zu Kaya Te-nɔ̧́ mɛ. 2 Mɛ tutuyɛ sut a̧ pia ɗoŋ pii kɔ̧́ Tua ko Sɔ̧, ɓɛɛ hee mɔ'ɔ nɛ̀ o bíí lɛŋ gara sitɛ a̧ ga, a̧ hira duk nù usi nɛ̀ mɔ ha̧ wa. 3 Nɛ́ mɔ'ɔ nɛ̀ o wi-usi-heembea in o Fariziɛn mgbɔɔ ŋma okoo nɛ̀ wa kpaa fara de dàlà nɛnɛ tɛ Jesu, wa ee a see-a ti o bíí, ɓɛɛ wa tɔ̧: 4 «Wan-usi-mɔ, ɛ́ɛ́ baa kóò'ɛ tɛ dee dàlà. 5 Moisɛ yɔra zaŋ heembea h’ɛ́ɛ́‘e ndé, wi yó o pɛrti okoo nɔ'ɔ nɛ̀ ta gbɛ yinɛ. Ɓɛɛ k’ɛ́nɛ́, ɛ́nɛ́ tɔ̧ bɔɔ hee ge?» 6 Wa tɔ̧ wen'i mɛ ba wen kɔ̧́ zaŋ-aa, ha̧ wa mɛ pi̧ wen zu a̧. Ɓɛɛ Jesu zum zu, yɔr mɔ nɛ̀ bekete-er mbɔɗɔnu. 7 Hee mɔ'ɔ nɛ̀ wa ak nɛ́ mɔ in a̧ siti siti ga, a̧ baa zu nɛ̀ ŋgɔn, ɓɛɛ tɔ̧ ha̧ wa: «Ŋma bíí mgbara'nɛ́ nɛ̀ de kɔ‘i ɗaŋmɔ na ndó-ndó-ndó, a̧ pí̧ kuti ta yó a̧.» 8 Ɓɛɛ a̧ zum zu-a yɔr mɔ mbɔɗɔnu woyo. 9 Wa zia wen'i hegɔ, ɓɛɛ wa dak zu-wa, ku̧u̧naŋ-a nɛ̀ tɛ o sɔkawi hegɔɔ yak nɛnɛ; ɓɛɛ e nɛ́ Jesu ɛ̀nɛ̀ in kóò‘i. Hee mɔ'ɔ nɛ̀ kóò‘i ɓɔna duka-a see-a ga, 10 Jesu baa zu nɛ̀ ŋgɔn woyo, ɓɛɛ ak a̧: «Kóò'ɛ, o wi nɔ'ɔ a̧a̧ bɔɔ de? Ŋma bíí gɔn kita zu mɛ na?» 11 A̧ kifa nú ha̧ Jesu: «Íì, ŋma bíí gɔn kita zu'm na, Wan-usi-mɔ!» Jesu tɔ̧ɔ̧ ha̧ a̧: «Mi mbɛt, mi gɔn kita zu mɛ na. Mɛ̀ yák mɔ kɔ-mɛ, ɓɛɛ ká mɛ́ de ɗaŋmɔ ɓɔna.»
Jesu nɛ́ sa̧a̧mɔ zaŋnu
12 Jesu tɔ̧ɔ̧ ha̧ wa woyo: «Mí nɛ́ sa̧a̧mɔ zaŋnu; wi nɛ̀ nɛ́ ɗoŋ am, a̧ beka nɛ́ nɔ̀ ti tum na, a̧ tɛ nɛ̀ nɔ̀ tɛ sa̧a̧mɔ wan mɛ duka-kpasa.» 13 O Fariziɛn tɔ̧ɔ̧ ha̧ a̧: «Mɛ́ dé nɛ́ sedaako zu mɛ nɛ̀ tɛ-mɛ, ɓɛɛ sedaako kɔ-mɛ bó nɛ́ mɔ ha'i mɛ kpɛk na.» 14 Jesu kifa nú ha̧ wa: «Nɛ̀ mbetɛ, mí dé nɛ́ sedaako zu'm nɛ̀ tɛ‘m, ɓɛɛ sedaako kɔ‘m nɛ́ kpasawen, wen mi iŋa fara n'am tɛ nɛnɛ in fara n'am nɛ́ si sɛnɛ mbɛt. Ɓɛɛ k’ɛ́nɛ́, ɛ́nɛ́ iŋ fara n'am tɛ̀ɛ́ nɛnɛ in fara n'am nɛ́ si sɛnɛ na. 15 K’ɛ́nɛ́, ɛ́nɛ́ gɔn kita nɛ̀ yuwar-gɔna-kita ko bíí, ɓɛɛ kɔ‘m, mi gɔn kita zu ŋma bíí na. 16 Ɓɛɛ kà‘m gɔn kita, mi gɔn nyɛm nɛ̀ ɗoŋ kpasawen, wen mi bo ɛ̀n'am na; wan nɛ̀ toma'm tɛnɛ a̧a̧ in am mbɛt. 17 Bó nɛ́ yɔra zaŋ kalata k’ɛ́nɛ́‘e, kà o bíí yiitoo de kale kpɔk sedaako zu ŋma mɔ, ɓɛɛ sedaako ko o wi nɔ‘i nyɛma ha'i mɛ kpɛk na nde? 18 Mí dé nɛ́ sedaako zu'm nɛ̀ tɛ‘m, ɓɛɛ Dáà nɛ̀ toma'm tɛnɛ de nɛ́ sedaako wen am mbɛt.» 19 Wa aka a̧: «Dáà kɔ-mɛ‘i, a̧ a̧a̧ de?» Jesu kifa nú: «Ɛ́nɛ́ iŋ am na, ɛ́nɛ́ iŋ Dáà kɔ‘m na; k’ɛ̀nɛ̀ íŋ so'm, ɛ́nɛ́ tɛ̀ɛ́ iŋ Dáà kɔ‘m mbɛt.» 20 Jesu tɔ̧ɔ̧ wen'i ŋgimbi n'aa duka usi nɛ̀ mɔ kɔ̧́ Tua ko Sɔ̧ ká̧ kuɓa-mbɔi, ɓɛɛ ŋma bíí mɛ fo a̧ nɛ̀ er bo na, wen ŋgimbi kɔ̧-a̧ tɛ hɔ hɔ̧ɔ̧ na. Ɛ́nɛ́ nyɛm mɛ nɛ̀ fara n'am nɛ‘i na 21 Jesu tɔ̧ɔ̧ ha̧ wa woyo: «Mi tɛ yak, ɛ́nɛ́ tɛ kii am, ɓɛɛ ɛ́nɛ́ tɛ fe tɛ ɗaŋmɔ k’ɛ́nɛ́. Wen ɛ́nɛ́ nyɛm mɛ nɛ̀ hɔ fara n'am nɛ́ sɛnɛ‘i na.» 22 O Juif tɔ̧ɔ̧ sitɛ ŋmaa: «A̧ tɔ̧‘e: ‹Fara n'am nɛ‘i, ɛ́nɛ́ nyɛm mɛ hɔ sɛnɛ na’ɛ,› a̧ tɛ gbɛ nɛ́ tɛ-a nde?» 23 Jesu kifa nú ha̧ wa: «Ɛ́nɛ́ nɛ́ o wi mɛ ɗɔɔ hɛ̧ɛ̧, ɓɛɛ kɔ‘m mi nɛ́ wi mɛ́ ŋgɔn mɛ; ɛ́nɛ́ nɛ́ o bíí zaŋnu’ɛ, ɓɛɛ kɔ‘m, mí bó nɛ́ bíí zaŋnu’ɛ na. 24 Mɛ̀ nɛ́ mɔ‘i a̧‘m tɔ̧ɔ̧ nɛnɛ h’ɛ́nɛ́‘e ndé, ɛ́nɛ́ tɛ fe tɛ ɗaŋmɔ k’ɛ́nɛ́. K’ɛ̀nɛ̀ nɛ́ kɔ̧ɔ̧ ɗɔaa'e mi nɛ́ mɔ‘i na, ɛ́nɛ́ tɛ fe tɛ ɗaŋmɔ k’ɛ́nɛ́.» 25 Ɓɛɛ wa tɔ̧ ha̧ a̧: «Mɛ́ nɛ́ o?» Jesu kifa nú ha̧ wa: «Nú‘m bɛr tɛ tɔ̧ɔ̧ mɔ‘i h’ɛ́nɛ́ nɛ̀ ku̧u̧naŋ-a mɛ tɛnɛ na. 26 Mɔ a̧a̧ zu'nɛ́ nɛ̀ dɔka-a n'am tɛ̀ɛ́ tɔ̧ so wen sɛnɛ, gɔn nɛ̀ kita zu a̧ mbɛt. Ɓɛɛ wan nɛ̀ toma'm tɛnɛ nɛ́ wi-tɔ̧-kpasawen. Mɔ n'am zia nú a̧, nɛ́ mɔ‘i a̧‘m tɔ̧ ha̧ o bíí zaŋnu.» 27 Ɓɛɛ wa iŋ‘e a̧ tɔ̧ nɛ́ wen ko Dáà ha̧ wa na. 28 Jesu tɔ̧ɔ̧ ha̧ wa: «Ŋgimbi n’ɛnɛ tɛ ba Bem ko bíí e ŋgɔn kaɗi ɓɛɛ sɛk’ɛ́nɛ́ iŋa'e, mí nɛ́ mɔ‘i. Mi tɔ̧ wen nɛ̀ zu'm na, ɓɛɛ mi tɔ̧ nɛ́ mɔ nɛ̀ Dáà usa ha̧‘m. 29 Wi nɛ̀ toma'm tɛnɛ e'm ɛ̀n'am na; a̧ duk kpɔk in am, wen mi de nɛ́ mɔ n'aa kɔ̧a̧ ɓɔnsɛnɛ.» 30 A̧ ɓɔna tɛ tɔ̧ɔ̧ wen'i, ɓɛɛ o bíí nɛ̀ dɔka-a kɔ̧ ɗɔaa ha̧ a̧.
Jesu in Abraham
31 Ɓɛɛ Jesu tɔ̧ ha̧ o Juif nɛ̀ kɔ̧ɔ̧ ɗɔaa ha̧ a̧: «Kà see'nɛ́ nɛ́ duka tɛ wen kɔ‘m nɛ̀ mbetɛ, ɓɛɛ ɛ́nɛ́ tɛ ya o kpasa ŋgaiwi kɔ‘m; 32 ɛ́nɛ́ tɛ iŋ kpasawen, ɓɛɛ kpasawen tɛ de h’ɛ́nɛ́ mɛ́ kpa zu.» 33 Wa kifa nú ha̧ Jesu: «Ɛ́ɛ́ nɛ́ o bezaŋ Abraham, ɛ́ɛ́ dúk bara ko ŋma bíí nɛti na. Ɓɛɛ mɛ tɔ̧‘e, ɛ́ɛ́ tɛ́ kpa zu wó'ɛ, hee ge?» 34 Jesu kifa nú ha̧ wa: «Nɛ́ kpasawen a̧‘m tɔ̧ h’ɛ́nɛ́, wi nɛ̀ de ɗaŋmɔ nɛ́ bara ko ɗaŋmɔ. 35 Bara duk tɛ̀ ko dáa-bara kɔ‘i ɓɔnsɛnɛ na, ɓɛɛ nɛ́ bem a̧ duk tɛ̀ ko dáà kɔ‘i ɓɔnsɛnɛ. 36 Hegɔ, ká Bem nɛ́ gboo'nɛ́ tɛ bara yinɛ, ɓɛɛ ɛ́nɛ́ tɛ kpa zu nɛ̀ mbetɛ. 37 Mi iŋa nɛ̀ mbetɛ, ɛ́nɛ́ nɛ́ o bezaŋ Abraham, ɓɛɛ ɛ́nɛ́ kɔ̧ɔ̧ mɛ gbɛ‘m wen wen kɔ‘m ye kɔ̧́ see'nɛ́ na. 38 Kɔ‘m, mi tɔ̧ nɛ́ mɔ n'am zɔka tɛ Dáà kɔ‘m; ɓɛɛ k’ɛ́nɛ́, ɛ́nɛ́ de nɛ́ mɔ n’ɛnɛ zia tɛ dáà k’ɛ́nɛ́.» 39 Wa kifa nú ha̧ Jesu: «Dáà k’ɛɛ nɛ́ Abraham.» Jesu tɔ̧ɔ̧ ha̧ wa: «K’ɛ̀nɛ̀ nɛ́ bòò nɛ́ o bezaŋ Abraham, ɓɛɛ ɛ̀nɛ̀ dé nɛ́ tom ko Abraham. 40 Kpasawen n'am zia nú Sɔ̧ n'am tɔ̧ɔ̧ h’ɛ́nɛ́, bó nɛ́ mɔ'ɔ n’ɛnɛ kii mɛ gbɛ‘m’ɛ na? Abraham de kɔ‘i hegɔ na! 41 K’ɛ́nɛ́, ɛ́nɛ́ baa nɛ́ tom ko dáà k’ɛ́nɛ́.» Wa tɔ̧ɔ̧ ha̧ a̧: «Ɛ́ɛ́ bó nɛ́ o be-dàlà na. Dáà k’ɛɛ nɛ́ Sɔ̧ kpɔk ɓɛɛ.» 42 Jesu kifa nú ha̧ wa: «Kà Sɔ̧ bó so nɛ́ Dáà k’ɛ́nɛ́, ɓɛɛ ɛ́nɛ́ tɛ̀ɛ́ kɔ̧ so'm, wen mi gboo nɛ̀ tɛ́ Sɔ̧ tɛ nɛnɛ. Bo nɛ́ mi'i tɛ̀ɛ́ nɛ̀ zu'm na, nɛ́ a̧ á̧ toma'm tɛnɛ. 43 Ɛ́nɛ́ zii gba̧a̧ wen kɔ‘m na wen ge? Wen ɛ́nɛ́ nyɛm mɛ zii wen kɔ‘m na. 44 Dáà k’ɛ́nɛ́ nɛ́ wan-ɗaŋmɔ, ɓɛɛ ɛ́nɛ́ kɔ̧ɔ̧ mɛ de nɛ́ mɔ nɛ̀ dáà k’ɛ́nɛ́ kɔ̧a̧. Nɛ̀ ku̧u̧naŋ-a mɛ tɛnɛ a̧ nɛ́ wi-gbɛ-zu, hegɔ a̧ nyɛm so mɛ duk tɛ kpasawen na, wen kpasawen bo tɛ-a na. Ta-oi-mɔ kɔ̧-a̧ nɛ́ ndela, wen a̧ nɛ́ wi-ndela, a̧ nɛ́ dáà ko ndela. 45 Ɓɛɛ kɔ‘m, ɛ́nɛ́ kɔ̧ ɗɔaa ha̧‘m na, wen n'am tɔ̧ nɛ́ kpasawen. 46 Ŋma bíí mgbara'nɛ́ nɛ tɛ usi ɗaŋmɔ kɔ‘m ha̧‘m nɛ́ o? Ɓɛɛ ka'm tɔ̧ kpasawen h’ɛ́nɛ́, ɛ́nɛ́ kpɛk na wen ge? 47 Wi nɛ̀ duk nɛ́ ko Sɔ̧ zii nɛ́ wen ko Sɔ̧; ɓɛɛ mɛ̀ nɛ́ wen ɛ́nɛ́ bó nɛ́ o bíí ko Sɔ̧ na s’ɛ́nɛ́ zii wen kɔ‘m na.» 48 O Juif kifa nú ha̧ a̧: «Bó nɛ́ kpasawen ɛ̀ɛ̀ tɔ̧‘e, dùk kɔ-mɛ nɛ́ be Samarii, ɓɛɛ ɗaŋ-sɔ̧ a̧a̧ tɛ-mɛ'ɛ na?» 49 Ɓɛɛ Jesu kifi nú: «Weyaa, ɗaŋ-sɔ̧ bo tɛ‘m na; mi gasi nɛ́ Dáà kɔ‘m, ɓɛɛ k’ɛ́nɛ́, ɛ́nɛ́ fɛ̧ŋ nɛ‘m. 50 Mi kii ŋma gasamɔ kɔ‘m nɛ̀ zu'm na. Wi kia-a ha̧‘m a̧a̧ sɛnɛ kpɔk ɓɛɛ; nɛ́ wi’ɛi a̧ tɛ gɔn kita. 51 Nɛ́ kpasawen a̧‘m tɔ̧ h’ɛ́nɛ́; wi nɛ̀ zii wen nú‘m beka fe ɓɔna.» 52 O Juif tɔ̧ɔ̧ ha̧ a̧: «Mgbák iŋa-a h’ɛ́ɛ́ mɛ iŋ‘e ɗaŋ-sɔ̧ a̧a̧ tɛ-mɛ‘i nɛ́ mɔ'ɔ kinii'i. Abraham fea, nɛ́ mɔ'ɔ nɛ̀ o wi-tɔ̧-wen oi nú Sɔ̧ mbɛt fea, ɓɛɛ mɛ‘e ndé, kà ŋma bíí a̧ zia wen nú-mɛ, wi’ɛi beka fe ɓɔna. 53 Mɛ́ ta kɔ-mɛ‘e mɛ́ nɛ́ o? Mɛ́ gana dáà k’ɛ́ɛ́ Abraham nɛ̀ fea’ɛ? Bó nɛ́ o wi-tɔ̧-wen oi nú Sɔ̧ fee mbɛt na?» 54 Jesu kifa nú ha̧ wa: «Kà‘m kii so gasamɔ nɛ̀ zu'm, ɓɛɛ gasamɔ‘i tɛ̀ɛ́ duk nɛ́ geemɔ, ɓɛɛ nɛ́ Dáà kɔ‘m, n’ɛnɛ tɔ̧‘e nɛ́ Sɔ̧ k’ɛ́nɛ́ wó‘i, a̧ e'm tɛ gasamɔ. 55 K’ɛ́nɛ́, ɛ́nɛ́ iŋ a̧ na, ɓɛɛ kɔ‘m, mi iŋa a̧; kà‘m tɔ̧‘e mi iŋ a̧ na, ɓɛɛ mi kifa nɛ́ wi-ndela hee ɛ́nɛ́ ga. Mi iŋa a̧, ɓɛɛ mi zii nɛ́ wen nú a̧. 56 Dáà k’ɛ́nɛ́ Abraham taa'e wi tɛ zɔk wese kɔ‘m, ɓɛɛ tortɛ ba a̧; nɛ́ mɔ'ɔ n'aa zɔka wese'i, ɓɛɛ a̧ de nyɛŋɛ.» 57 O Juif tɔ̧ɔ̧ ha̧ a̧: «Pɛ mɛ tɛ de ɓu-mɔɔrɔ hɔ̧ɔ̧ na, ɓɛɛ mɛ‘e ndé mɛ́ zɔka Abraham?» 58 Jesu kifa nú ha̧ wa: «Nɛ́ kpasawen a̧‘m tɔ̧ h’ɛ́nɛ́; nɛti ha̧ wa mɛ ko Abraham, mi a̧a̧ sɛnɛ.» 59 Ɓɛɛ nɛ́ mɔ'ɔ nɛ̀ wa kaia ta mɛ yo nɛ̀ Jesu, ɓɛɛ a̧ yɔ er-wa ɓɛlɛm kɔ̧́ Tua ko Sɔ̧ gbo yak.
Jesu hu̧i̧a̧ yí ŋma wi-boma-yí
1 Jesu ɓir kɔ‘i ɓir yak, ɓɛɛ a̧ zɔk ŋma bíí nɛ̀ wa kòó nɛ̀ boma-yí. 2 Nɛ́ mɔ'ɔ nɛ̀ o ŋgaiwi ko Jesu aka a̧: «Wan-usi-mɔ, nɛ́ o'o dee ɗaŋmɔ sa wa ko nɛ̀ wi’ɛ nɛ̀ boma-yí'ɛ o; nɛ́ wi’ɛ náà, kóó nɛ́ o wi nɛ̀ kòó a̧ nde?» 3 Jesu kifa nú ha̧ wa: «Bó nɛ́ wi’ɛ na, bó nɛ́ o wi nɛ̀ kòó a̧ na mbɛt, ɓɛɛ wa kòó a̧ nɛ̀ boma-yí ha̧ o bíí mɛ́ zɔk tom nɛ̀ Sɔ̧ tɛ de tɛ-a. 4 Hee mɔ'ɔ nɛ̀ wese biti kaŋ ga, ɛɛ tɛ de o tom ko wi nɛ̀ toma'm tɛnɛ; zɛ a̧ de tɛnɛ‘i, ɓɛɛ wi beka nyɛm mɛ de tom sɛnɛ na. 5 Ŋgimbi n'am biti zaŋnu’ɛ, mi nɛ́ sa̧a̧mɔ zaŋnu.» 6 Ɗoŋ wen'i, Jesu aa sap nù, de ɓɔtɛ nɛ̀ sap'i, ɓɛɛ sɔ̧ yí wi-boma-yí‘i. 7 A̧ tɔ̧ɔ̧ ha̧ a̧: «Mɛ̀ nɛ́ɛ̀ táí yí-mɛ́ sɛn ɗɔɔ gɔna-yí Siloe.» (Siloe nɛ́ wen nɛ̀ tɔ̧: «Betom».) Wi-boma-yí‘i yaka nɛ́ɛ̀ táí yí, ɓɛɛ tɛ pia-ɗoŋ yí-a zɔk nɛ́ mɔ. 8 Wi’ɛi duka so nɛ́ wi-kɔfi-mɔ, ɓɛɛ o bíí nɛ̀ ɔ katɛ a̧ in o wan nɛ̀ zɔka so a̧ fara kɔfa mɔ, tɔ̧: «Wi nɛ̀ duk so nù kɔfi nɛ̀ mɔ'ɛ bo a̧a̧ na?» 9 O ŋma bíí tɔ̧a̧: «Nɛ́ a̧.» O ŋma tɔ̧ɔ̧ kɔ‘i: «Weyaa, nɛ́ ŋma bíí a̧ hɔɔ ŋmaa in a̧ ɛ̧.» Ɓɛɛ wi-boma-yí‘i tɔ̧: «Mɛ̀ nɛ́ mí nɛ̀ mbetɛ.» 10 Ɓɛɛ wa ak a̧: «Nɛ́ ge'e dee ha̧ yí-mɛ́ mɛ hu̧i̧ ge?» 11 A̧ kifa nú: «Wi nɛ̀ wa sa nin-a'e Jesu dee ɓɔtɛ sɔ̧ yí‘m, ɓɛɛ tɔ̧ ha̧‘m: ‹Mɛ̀ nɛ́ɛ̀ táí yí-mɛ́ ɗɔɔ Siloe.› Mi nɛ̀ɛ̀ tai yí‘m, ɓɛɛ yí‘m hu̧i̧.» 12 Wa aka a̧: «Wi’ɛi a̧a̧ dee?» A̧ kifa nú ha̧ wa: «Mi iŋ na.»
O Fariziɛn aka wi nɛ̀ yí hu̧i̧a̧‘i
13 Ɓɛɛ wa mgbɔ wi nɛ̀ duka so nɛ̀ boma-yí‘i sitɛ o Fariziɛn mɛ. 14 Duka so nɛ́ wese-ɔm-tɛ a̧ Jesu dee so nɛ̀ ɓɔtɛ ha̧ yí wi’ɛi mɛ hu̧i̧ nɛnɛ‘i. 15 O Fariziɛn aka a̧ mbɛt wen mɔ nɛ̀ dee ha̧ a̧ mɛ zɔk nɛ̀ mɔ‘i. A̧ tɔ̧ɔ̧ ha̧ wa: «A̧ sɔ̧ɔ̧ nɛ́ ɓɔtɛ yí‘m, mi tai yí‘m, nɛ́ mɔ'ɔ n'am zɔk nɛ mɔ.» 16 O ŋma bíí mgbara o Fariziɛn tɔ̧a̧: «Wi’ɛ tɛ́ nɛ̀ tɛ́ Sɔ̧ na, wen a̧ kasi heembea wese-ɔm-tɛ na.» O ŋma tɛ̀ɛ̀ tɔ̧ kɔ‘i: «Ɗaŋwi tɛ kpa ŋgai mɛ de nɛ̀ pɛrti mɔɔ-usi-mɔ hegɔ'ɛ hee ge?» Ɓɛɛ taamɔ ko o Fariziɛn ye ŋmaa tɛ wen'i na. 17 Ɓɛɛ wa ak wi-boma-yí‘i woyo: «Kɔ-mɛ, taamɔ kɔ-mɛ zu wi nɛ̀ hu̧i̧a̧ yí-mɛ'ɛ nɛ́ ge?» A̧ kifa nú: «Wi’ɛi nɛ́ ŋma wi-tɔ̧-wen oi nú Sɔ̧.» 18 Ɓɛɛ hee mɔ'ɔ nɛ̀ wa tɛ sa o dáà in nàà ko wi-boma-yí‘i tɛnɛ hɔ̧ɔ̧ na ga, o Juif kɔ̧ mɛ kɔ̧ ɗɔaa'e, wi’ɛi duka so nɛ̀ boma-yí nɛti sɛka a̧ zɔk mɔ na. 19 Ɓɛɛ wa ak o dáà in nàà kɔ̧-a̧: «Nɛ̀ mbetɛ, wi’ɛ nɛ́ bem k’ɛ́nɛ́ n’ɛnɛ tɔ̧‘e ɛ́nɛ́ kòó a̧ nɛ̀ boma-yí'ɛ nde? Nɛ́ ge'e dee n'aa zɔk mɔ kinii’ɛ ge?» 20 O dáà in nàà kɔ̧-a̧ kifa nú ha̧ wa: «Ɛ́ɛ́ iŋa a̧ nɛ́ bem k’ɛɛ, n’ɛɛ kòó nɛ̀ boma-yí. 21 Mɔ nɛ̀ dee n'aa zɔk nɛ̀ mɔ kinii'i, ɛ́ɛ́ iŋ k’ɛɛ na; nɛ́ o'o hu̧i̧a̧ yí-a o ndé, ɛ́ɛ́ iŋ k’ɛɛ na mbɛt. A̧ gasa kaɗi; a̧ nyɛma mɛ kifi nú h’ɛ́nɛ́ nɛ̀ tɛ-a, ɛ̀nɛ̀ ák nɛ́ a̧ ɛ̧.» 22 O dáà in nàà kɔ̧-a̧ tɔ̧ɔ̧ hegɔ wen wa yu nɛ́ o Juif; wen o Juif ee so nú in o ŋmaa'e wi nɛ̀ tɛ kpɛk'e Jesu nɛ́ Mɛsii, beka ye kɔ̧́ tua-mɔi̧a-a ɓɔna. 23 Mɛ̀ nɛ́ hegɔ sa o dáà in nàà kɔ̧-a̧ tɔ̧‘e: «A̧ gasa kaɗi, ɛ̀nɛ̀ ák nɛ́ a̧ nɛ̀ tɛ-a.» 24 Nɛ́ mɔ'ɔ nɛ̀ o Fariziɛn saa wi nɛ̀ duka so nɛ̀ boma-yí‘i woyo, ɓɛɛ tɔ̧ ha̧ a̧: «Mɛ̀ gásí Sɔ̧! K’ɛ́ɛ́, ɛ́ɛ́ iŋa'e wi’ɛi nɛ́ ɗaŋwi.» 25 A̧ kifa nú ha̧ wa: «Kóó wi’ɛi nɛ́ ɗaŋwi ndé, mi iŋ na; ɓɛɛ mɔ kpɔk n'am iŋa nɛ́ mɔ'ɔ: Nɛti mi duka so nɛ̀ boma-yí, ɓɛɛ kinii mi zɔk nɛ́ mɔ.» 26 Ɓɛɛ wa ak a̧: «A̧ dee nɛ́ ge ha̧ mɛ ge? A̧ hu̧i̧a̧ yí-mɛ́ hee ge?» 27 A̧ kifa nú ha̧ wa: «Mi tɔ̧ɔ̧ h’ɛ́nɛ́ kaɗi, ɓɛɛ ɛ́nɛ́ kɔ̧ mɛ zii na. Wen ge ɛ́nɛ́ ak am tɛ kpɔk wen'i woyo ge? Ɛ́nɛ́ kɔ̧ɔ̧ mɛ duk ŋgaiwi kɔ̧-a̧ mbɛt nde?» 28 O Fariziɛn da̧a̧ a̧, ɓɛɛ wa tɔ̧: «Mɛ́ nɛ́ ŋgaiwi kɔ̧-a̧ ɛ̧; k’ɛ́ɛ́, ɛ́ɛ́ nɛ́ ŋgaiwi ko Moisɛ. 29 Ɛ́ɛ́ iŋa'e Sɔ̧ tɔ̧ɔ̧ wen ha̧ Moisɛ; ɓɛɛ ko wi’ɛ, ɛ́ɛ́ iŋ fara n'aa tɛ́ nɛnɛ na.» 30 Wi-boma-yí‘i kifa nú ha̧ wa: «Mɔ nɛ̀ gɔn ɗɛɗ‘am'i nɛ́ mɔ'ɔ: Ɛ́nɛ́‘e ɛ́nɛ́ iŋ fara n'aa tɛ nɛnɛ na; zu-a'i nɛ́ a̧ a̧ hu̧i̧a̧ yí‘m! 31 Ɛ́ɛ́ iŋa'e Sɔ̧ zii kɔfamɔ ko o ɗaŋwi na, ɓɛɛ a̧ zii nɛ́ kɔfamɔ ko wi nɛ̀ yu a̧, de nɛ̀ mɔ n'aa kɔ̧a̧. 32 Ɛ́ɛ́ tɛ́ zii nɛti'e ŋma bíí hu̧i̧a̧ yí wi nɛ̀ wa kòó nɛ̀ boma-yí hɔ̧ɔ̧ na. 33 Kà wi’ɛ tɛ́ so nɛ̀ tɛ́ Sɔ̧ na, ŋma mɔ n'aa nyɛma mɛ de bo na.» 34 Wa kifa nú ha̧ a̧: «Ɗaŋ mɛ́ nɛ̀ wa kòó nɛ̀ oi ɗaŋmɔ, mɛ iŋa nɛ́ ŋma ge mɛ usi h’ɛ́ɛ́ ge?» Ɓɛɛ wa ndak a̧ gbonɛ. 35 Jesu zia'e wa ndaka wi-boma-yí‘i gbonɛ; nɛ́ mɔ'ɔ n'aa nɛ̀ɛ̀ kpa a̧ ɓɛɛ tɔ̧: «Mɛ́ kɔ̧ɔ̧ ɗɔaa ha̧ Bem ko bíí nde?» 36 A̧ aka Jesu: «Gasa Wan, wi’ɛi nɛ́ o ha̧‘m kɔ̧ ɗɔaa ha̧ a̧ o?» 37 Jesu tɔ̧ɔ̧ ha̧ a̧: «Mɛ́ zɔka a̧ kaɗi. Wi’ɛi nɛ́ mɔ'ɔ nɛ̀ tɔ̧ wen in mɛ'ɛ.» 38 Ɓɛɛ a̧ tɔ̧: «Gasa Wan, mi kɔ̧ɔ̧ ɗɔaa,» ɓɛɛ a̧ gbɛ zugur nù ti a̧. 39 Jesu tɔ̧a̧: «Mi tɛ̀ɛ́ zaŋnu’ɛ mɛ gɔn kita wen ha̧ o wi-boma-yí mɛ zɔk mɔ, in ha̧ o wi nɛ̀ zɔk mɔ mɛ kifi o wi-boma-yí.» 40 O Fariziɛn nɛ̀ yaa so hi̧i̧ in a̧ zia wen'i, ɓɛɛ ak a̧: «Mɔ'ɔ ɛ́ɛ́ mbɛt, ɛ́ɛ́ nɛ́ o wi-boma-yí nde?» 41 Jesu kifa nú ha̧ wa: «Ɛ́nɛ́ bó so nɛ́ o wi-boma-yí gáà, ɛ́nɛ́ beka bo so nɛ̀ ɗaŋmɔ na; ɓɛɛ hee mɔ'ɔ n’ɛnɛ tɔ̧‘e wí zɔk nɛ́ mɔ ga, ɗaŋmɔ k’ɛ́nɛ́ biti zu'nɛ́.»
De wi-dai-sami
1 «Nɛ́ kpasawen a̧‘m tɔ̧ h’ɛ́nɛ́; wi nɛ̀ ye nɛ̀ nú ɓoramɔ sitɛ o sami na, ɓɛɛ nɛ̀ daŋ nɛ́ ɓoramɔ ye nɛnɛ nɛ̀ ŋma fara nɛtɛ, wi’ɛi nɛ́ wi-zuzu, a̧ nɛ́ kpɔ̧i̧-gba̧a̧-nin mbɛt. 2 Ɓɛɛ wi nɛ̀ ye nɛ̀ nú ɓoramɔ nɛ́ wi-dai-sami. 3 Wi-pɛm-ɓoramɔ hu̧i̧ nú ɓoramɔ ha̧ wi-dai-sami ɓɛɛ o sami zia tiger wi-dai-wa. A̧ sa o sami kɔ̧-a̧ kpɔk kpɔk nɛ̀ nin, ɓɛɛ a̧ mgbɔɔ wa gbonɛ. 4 Ɗoŋ n'aa kaia wa gbonɛ lɛŋ kaɗi, a̧ duka ti, ɓɛɛ wa gbara nɛ́ ɗoŋ-aa, wen wa iŋa tiger-a. 5 Wa beka nɛ́ ɗoŋ gɔni-bíí na; zu-a'i, wa tɛ yu nɛ́ a̧ ɛ̧, wen wa iŋ tiger gɔni-bíí na.» 6 Jesu tɔ̧ɔ̧ lizaŋ‘i ha̧ o Fariziɛn, ɓɛɛ wa iŋ mgbara mɔ n'aa kɔ̧ɔ̧ mɛ tɔ̧‘i na. 7 Nɛ́ mɔ'ɔ nɛ̀ Jesu tɔ̧ɔ̧ ha̧ wa woyo: «Nɛ́ kpasawen a̧‘m tɔ̧ h’ɛ́nɛ́; mi nɛ́ nú ɓoramɔ ko o sami. 8 O wi nɛ̀ hɔɔ nɛti ha̧‘m lɛŋ nɛ́ o wi-zuzu, in o kpɔ̧i̧-gba̧a̧-nin mbɛt; o sami iŋ tiger-wa na. 9 Mi nɛ́ nú tua, wi nɛ̀ ye nɛ̀ tɛ‘m, tɛ kpasi; a̧ tɛ ye, ɓɛɛ a̧ gboo pii ɗoŋ mbɛt, ɓɛɛ nyɔŋmɔ beka ɓan a̧ na. 10 Wi-zuzu tɛ kɔ‘i mɛ zu̧ mɔ, gbɛ nɛ̀ mɔ, ɗaŋ nɛ̀ mɔ yinɛ, ɓɛɛ kɔ‘m, mi tɛ̀ɛ̀ ha̧ o bíí mɛ kpa duka-kpasa, ɓɛɛ ha̧ duka-kpasa kɔ-wa'i, mɛ nyɛm sɛnɛ war kpɔk. 11 «Mi nɛ́ de wi-dai-sami; de wi-dai-sami tɛ fe wen zu o sami kɔ‘i. 12 Wi nɛ̀ de tom-daia-sami wen sede, nɛ̀ bó nɛ́ kpasa wi-dai-sami na, in nɛ̀ sami bó nɛ́ kɔ̧-a̧ na, zɔk gbóò fara tɛa-a, ɓɛɛ ee o sami duk, yu kɔ‘i mɔ yak; gbóò gbɛɛ o ŋma sami, ɓɛɛ pɛsi o oi-aa sót-sót. 13 Wen wi’ɛi de kɔ‘i nɛ́ tom-sede, ɓɛɛ wen kɔ̧-a̧ bó nɛ̀ o sami na. 14 Mi nɛ́ de wi-dai-sami; mi iŋa o sami kɔ‘m, ɓɛɛ o sami kɔ‘m iŋa'm, 15 hee mɔ'ɔ nɛ̀ Dáà iŋa nɛ‘m, ɓɛɛ ká‘m iŋ Dáà mbɛt’ɛ ga. Mi tɛ fe wen zu o sami kɔ‘m. 16 Mi a̧a̧ nɛ̀ o sami nɛ̀ bo mgbara o ɛ̧ɛ̧ kɔ̧̀ ɓoramɔ'ɛ na; o i̧i̧ nɔ‘i mbɛt tɛ zii tiger-am, ɓɛɛ mi tɛ mɔi̧ kànà wa tɛnɛ a zu o ɛ̧ɛ̧ nɔ'ɔ, ha̧ dùk-sami mɛ duk kpɔk, wi-dai-wa kpɔk mbɛt. 17 «Dáà kɔ̧a̧‘m, wen n'am kɔ̧ɔ̧ ɗɔaa mɛ fe, ha̧‘m mɛ kpasi nɛ̀ ɗoŋ. 18 Bó nɛ́ doole a'i de nɛ̀‘m na, ɓɛɛ nɛ́ mi a̧‘m kɔ̧ɔ̧ nɛ̀ ta-tɛ‘m, wen mi a̧a̧ nɛ̀ ŋgai mɛ fe, ɓɛɛ mi a̧a̧ nɛ̀ ŋgai mɛ kpasi mbɛt. Mɔ nɛ̀ Dáà kɔ‘m tɔ̧ɔ̧ ha̧‘m mɛ de nɛ́ mɔ‘i.» 19 Wen'i dee ha̧ o Juif mɛ kpɛr in o ŋmaa woyo. 20 O dɔka bíí mgbara wa tɔ̧ɔ̧‘e: «Ɗaŋ-sɔ̧ a̧a̧ tɛ-a, wen kɔ̧-a̧ ɔ lem-le-lem géè, wi-zii-wen kɔ̧-a̧ bo a̧a̧ na.» 21 O ŋma tɛ̀ɛ̀ tɔ̧ kɔ‘i: «Wi nɛ̀ ɗaŋ-sɔ̧ a̧a̧ tɛ-a tɔ̧ wen hegɔ na. Ɗaŋ-sɔ̧ nyɛma so mɛ de ha̧ wi-boma-yí mɛ zɔk mɔ?»
Jesu Bem ko Sɔ̧
22 Wa de nɛ́ gbaŋa Tua ko Sɔ̧ sɛn Jerusalɛm, ŋgimbi'i duka so nɛ́ bɛɛ. 23 Jesu duka yar nɛ̀ ɗɔɔ zala ko Salomɔŋ nɛ̀ kɔ̧́ Tua ko Sɔ̧. 24 Nɛ́ mɔ'ɔ nɛ̀ o Juif mɔi̧a zik a̧ e see-a ɓɛɛ tɔ̧: «Mɛ̀ tɔ̧́ wan wen ha̧ see yɛ ga̧ na nde? Kà mɛ nɛ́ bòò nɛ́ Mɛsii nɛ̀ mbetɛ, nɛ̀ mɛ̀ tɔ̧́ h’ɛ́ɛ́ bóóŋ!» 25 Ɓɛɛ Jesu kifi nú ha̧ wa: «Mi tɔ̧ɔ̧ so h’ɛ́nɛ́ kaɗi, ɓɛɛ ɛ́nɛ́ kɔ̧ ɗɔaa na. O tom n'am de nɛ̀ nin Dáà kɔ‘m de nɛ́ sedaako wen am, 26 ɓɛɛ ɛ́nɛ́ kɔ̧ ɗɔaa ha̧‘m na, wen ɛ́nɛ́ bó nɛ́ o sami kɔ‘m na. 27 O sami kɔ‘m zii nɛ́ tiger-am; mi iŋa wa, ɓɛɛ wa ndak nɛ́ ɗoŋ-am. 28 Kɔ‘m, mi ha̧ nɛ́ duka-kpasa kpoo nɛ kpoo ha̧ wa; wa beka fe ɓɔna ndó-ndó-ndó, ɓɛɛ ŋma wi-ɓar-wa er-am yinɛ bo na. 29 Dáà kɔ‘m nɛ̀ ha̧a̧ wa ha̧‘m gana mɔ lɛŋ, ɓɛɛ ŋma bíí nɛ̀ nyɛma mɛ ɓar mɔ yinɛ kɔ̧̀ er Dáà bo na. 30 Mi in Dáà, ɛ́ɛ́ kpɔk.» 31 O Juif kaia ta woyo mɛ yo nɛ̀ a̧. 32 Ɓɛɛ Jesu tɔ̧ ha̧ wa: «Ɛ́nɛ́ zɔka dɔka de tom nɛ̀ tɛ́ nɛ̀ tɛ̀ Dáà n'am dee nɛ̀ gbaayí‘nɛ́, ɓɛɛ sɛn mgbara o tom nɔ‘i, nɛ́ ge-aa ge ɛ́nɛ́ kɔ̧ɔ̧ mɛ yo'm wen-aa ge?» 33 O Juif kifa nú ha̧ a̧: «Bó nɛ́ ɛ́ɛ́ kɔ̧ɔ̧ mɛ yo mɛ wen zu ŋma de tom na; ɓɛɛ mɛ̀ nɛ́ wen nɛ̀ mɛ ɗaŋ nɛ́ nin Sɔ̧. Mɛ́ nɛ́ bíí sɔɔ géè, ɓɛɛ mɛ‘e wi nɛ́ Sɔ̧.» 34 Jesu kifa nú ha̧ wa: «Bó nɛ́ wa yɔra zaŋ kalata heembea k’ɛ́nɛ́‘e: ‹Mi'e, ɛ́nɛ́ nɛ́ o sɔ̧,› na nde? 35 Kalata heembea sa o wi nɛ̀ Sɔ̧ tɔ̧ wen kɔ‘i ha̧ wa'e o sɔ̧, ɓɛɛ wi nyɛm mɛ kpai mɔ nɛ̀ Yɔramɔ tɔ̧a̧ na. 36 Ɛ́nɛ́ tɔ̧ bɔɔ ha̧‘m, wi nɛ̀ Dáà hoka tom tɛnɛ zaŋnu'e, mi ɗaŋ nɛ́ nin Sɔ̧ wen n'am tɔ̧‘e mi nɛ́ Bem ko Sɔ̧ wó'ɛ, wen ge? 37 Tom n'am de'i nɛ́ bòò nɛ́ tom ko Dáà kɔ‘m na, ɓɛɛ k’ɛ́nɛ́ kɔ̧ ɗɔaa ha̧‘m na. 38 Kà nɛ́ bòò nɛ́ tom ko Dáà a̧‘m de'i, kóó ɛ̀nɛ̀ kɔ̧ ɗɔaa ha̧‘m na, n’ɛ̀nɛ̀ kɔ̧́ ɗɔɔ o tom nɔ‘i, ɓɛɛ ɛ̀nɛ̀ íŋ nɛ̀ sa̧a̧-a̧‘e, Dáà duk tɛ‘m, ɓɛɛ mi duk tɛ Dáà.» 39 Wa kia mɛ ba a̧ woyo, ɓɛɛ a̧ gbo er-wa yak. 40 Jesu sii ɗoŋ woyo si kur Jurdɛn, fara nɛ̀ Jean duka so sɛnɛ zui nɛ̀ o bíí, ɓɛɛ a̧ duk ɓɔn hi̧i̧. 41 O bíí nɛ̀ dɔka-a nɛ̀ɛ̀ tɛ-a, ɓɛɛ wa tɔ̧: «Nɛ́ mbetɛ, Jean de ŋma mɔɔ-usi-mɔ kpɔk na; ɓɛɛ mɔ lɛŋ n'aa tɔ̧ɔ̧ zu wi’ɛ nɛ́ kpasawen.» 42 Ɓɛɛ o bíí nɛ̀ dɔka-a kɔ̧ ɗɔaa ha̧ Jesu fara'i.
Fio ko Lazar
1 Ŋma bíí duka so ɔ nɛ́ zɛɛ, nin wi’ɛi nɛ́ Lazar, be Betanii, ye ko Marii in nya-a̧ Marthe. 2 (Nɛ́ kale kpɔk Marii'i a̧ tɛna so nɔ̧́-nyama a zu naŋ Gasa Wan ɓɛɛ nyiŋ nɛ̀ mui̧-zu. Lazar nɛ̀ ɔ zɛɛ‘i nɛ́ bu̧i̧-nya-a̧.) 3 Ɓɛɛ o boko-bem nɔ‘i tom nɛnɛ ha̧ Jesu'e ndé: «Gasa Wan, gasa sɛm k’ɛ́nɛ́ ɔ nɛ́ zɛɛ.» 4 Jesu zia wen'i ɓɛɛ tɔ̧: «Zɛɛ‘i bó nɛ́ zɛɛ-fio na. Nɛ́ tɛ́ mɔ‘i a'i tɛ zɔk nɛ̀ gasamɔ ko Sɔ̧, in nɛ́ tɛ́ mɔ‘i mbɛt a'i tɛ zɔk nɛ̀ gasamɔ ko Bem ko Sɔ̧.» 5 Jesu kɔ̧ɔ̧ so Marthe in boko-nya-a̧ ká bá nɛ̀ Lazar batɛ. 6 A̧ zia'e Lazar ɔ nɛ́ zɛɛ wó, ɓɛɛ a̧ mbosi zɛ yiitoo woyo sɛn fara n'aa duk sɛnɛ‘i. 7 Ɗoŋ ŋgimbi'i ɓɛɛ a̧ tɔ̧ ha̧ o ŋgaiwi kɔ̧-a̧: «Ɛ̀ɛ̀ sí ɗoŋ Judee.» 8 O ŋgaiwi kɔ̧-a̧ kifa nú ha̧ a̧: «Wan-usi-mɔ, o Juif tɛ̀ɛ́ yò‘nɛ́ nɛ̀ ta gbɛ ɓan na hɛ̧ɛ̧, ɓɛɛ ɛ́nɛ́ kɔ̧ɔ̧ mɛ́ si ɗoŋ hi̧i̧ woyo?» 9 Jesu kifa nú ha̧ wa: «Bó nɛ́ wese kpɔk a̧a̧ nɛ̀ ŋgimbi ɓu-zua-yiitoo na nde? Wi nɛ̀ yar mɛ wese kɔ̧ naŋ na, wen a̧ zɔk nɛ́ sa̧a̧mɔ zaŋnu’ɛ, 10 ɓɛɛ wi nɛ̀ yar mɛ zɛ, tɛ́ kɔ̧ naŋ, wen sa̧a̧mɔ bo tɛ-a na.» 11 Ɗoŋ wen'i, ɓɛɛ a̧ tɔ̧ woyo: «Wiyɛ k’ɛɛ Lazar ɔ nɛ́ yá, mi tɛ nɛ̀ɛ́ tun a̧.» 12 O ŋgaiwi kɔ̧-a̧ tɔ̧a̧: «Gasa Wan, kà bó nɛ́ yá a̧ a̧ ɔ, a̧ tɛ kpasi.» 13 Jesu tɔ̧ɔ̧ nɛ́ wen fio ko Lazar, ɓɛɛ o ŋgaiwi kɔ̧-a̧ tɔ̧ kɔ‘i'e a̧ tɔ̧ nɛ́ wen ɔɔ yá géè. 14 Nɛ́ mɔ'ɔ nɛ̀ Jesu tɔ̧ɔ̧ ha̧ wa nɛ̀ sa̧a̧-a̧‘e: «Lazar fea, 15 ɓɛɛ boa-a kɔ‘m hi̧i̧ na'i ha̧ nɛ́ desee ha̧‘m wen'nɛ́, kà bé de k’ɛ́nɛ́ kɔ̧ɔ̧ ɗɔaa ha̧‘m. Kaɗa, ɛ̀ɛ̀ yák sitɛ a̧ mɛ.» 16 Ɓɛɛ Tomas nɛ̀ wa sa'e Be-dan tɔ̧ ha̧ oi o dɔka ŋgaiwi: «Ɛ̀ɛ̀ nɛ́ in a̧; kà bó nɛ́ fio, ɓɛɛ k’ɛ́ɛ́ fee in a̧ mbɛt.» 17 Jesu hɔɔ Betanii, ká wa guna Lazar dee zɛ naar kaɗi. 18 Nyɛi̧a mgbara Betanii in Jerusalɛm tɛ duk hee kilomɛtrɛ taar ga, ɓɛɛ 19 o Juif nɛ̀ɛ̀ so nɛ̀ dɔka-a mɛ duk in Marthe in Marii oi fio bu̧i-nya-wa. 20 Marthe zia'e Jesu a̧ tɛ‘i wó, ɓɛɛ kur we ti a̧, ɓɛɛ Marii duk kɔ‘i ɓɔn sɛn kɔ̧́ tua mɛ. 21 Marthe tɔ̧ɔ̧ ha̧ Jesu: «Gasa Wan, ɛ́nɛ́'ɛ bo so hɛ̧ɛ̧ gáà, bó nɛ́ bu̧i-nya'm tɛ̀ɛ́ fe na. 22 Ɓɛɛ kóó kinii mbɛt, mi iŋa'e mɔ lɛŋ n’ɛnɛ tɛ kɔfi er Sɔ̧, Sɔ̧ tɛ ha̧ h’ɛ́nɛ́.» 23 Jesu tɔ̧ɔ̧ ha̧ a̧: «Bu̧i-nya-mɛ tɛ kpasi.» 24 Marthe kifa nú: «Mi iŋa'e a̧ tɛ kpasi sɔŋkur wese, ŋgimbi nɛ̀ o wi nɛ̀ fea tɛ kur tɛ fio.» 25 Jesu tɔ̧ɔ̧ ha̧ wa: «Mí nɛ́ kura-ŋgɔn, in duka-kpasa. Wi nɛ̀ kɔ̧ ɗɔaa ha̧‘m, kóó a̧ fee so, a̧ tɛ duk kpasa, 26 ɓɛɛ kóó o ndé nɛ̀ duk kpasa, nɛ̀ kɔ̧ ɗɔaa ha̧‘m, beka fe ɓɔna. Mɛ́ kɔ̧ɔ̧ ɗɔɔ wen'i nde?» 27 Marthe kifa nú: «Íì, Gasa Wan, mi kɔ̧ɔ̧ ɗɔaa'e ɛ́nɛ́ nɛ́ Mɛsii, Bem ko Sɔ̧ nɛ̀ tɛ́ tɛ̀ zaŋnu.»
Jesu hi̧a̧ kɔ̧a̧
28 Ɗoŋ wen'i Marthe nɛ̀ɛ̀ sa nya-a̧ Marii ɓɛɛ fu̧i̧ wen ha̧ a̧: «Wan-usi-mɔ hɔa; a̧ sa nɛ́ mɛ.» 29 Marii zia wen'i ɓɛɛ kur nɛ̀ haya-a nɛ́ tɛ̀ Jesu. 30 Ŋgimbi'i, Jesu tɛ ye saaye hɔ̧ɔ̧ na; a̧ ɓɔna sɛn fara nɛ̀ Marthe kpaa a̧ sɛnɛ. 31 O Juif nɛ̀ nɛ̀ɛ̀ so mɛ duk in Marii oi fio zɔka'e a̧ kura nɛ̀ haya-a gbo, ɓɛɛ wa nɛ́ ɗoŋ-aa, wen wa ta kɔ-wa'e, a̧ nɛ́ mɛ hi̧i̧ kɔ̧a̧ zu pɛsi-fio mɛ. 32 Marii hɔɔ fara nɛ̀ Jesu duk sɛnɛ‘i; n'aa bé zɔk a̧, ɓɛɛ a̧ hɔ̧fi̧ tik nù ká̧ naŋ-a, ɓɛɛ tɔ̧ ha̧ a̧: «Gasa Wan, ɛ́nɛ́'ɛ bó so hɛ̧ɛ̧ gáà, ɓɛɛ bó nɛ́ bu̧i-nya'm tɛ̀ɛ́ fe na!» 33 Jesu kpaa ɗaŋsee ɓɛɛ sakali mbɛt, ŋgimbi n'aa zɔka Marii in o Juif nɛ̀ tɛ̀ɛ̀ in a̧ fara hi̧i̧ kɔ̧a̧, 34 ɓɛɛ Jesu ak wa: «Ɛ́nɛ́ guna a̧ sɛn déè?» Ɓɛɛ wa tɔ̧ ha̧ a̧: «Gasa Wan, ɛ̀nɛ̀ tɛ́, ɛ̀nɛ̀ zɔ̀k.» 35 Ɓɛɛ Jesu hi̧i̧ kɔ̧a̧. 36 Ɓɛɛ o Juif tɔ̧: «Wi’ɛ kɔ̧ɔ̧ a̧ batɛ.» 37 O ŋma bíí mgbara wa tɔ̧a̧: «Wi’ɛ nɛ̀ hu̧i̧a̧ so yí wi-boma-yí'ɛ nyɛm so mɛ dor fio ká gbɛ Lazar na nde?» 38 See Jesu ɗaŋa woyo, ɓɛɛ a̧ nɛ́ si zu pɛsi mɛ. Pɛsi'i nɛ́ ŋma di̧i̧ nɛ̀ wa kpee nú-a nɛ̀ ta. 39 Jesu tɔ̧a̧: «Ɛ̀nɛ̀ kín ta’ɛ yinɛ!» Marthe, boko-nya wan-fio tɔ̧ɔ̧ ha̧ Jesu: «Gasa Wan, fio nɛ̀ dee zɛ naar kaɗi’ɛ, pɛr-aa nuna kaɗi.» 40 Jesu tɔ̧a̧: «Bó nɛ́ mi tɔ̧ɔ̧ so ha̧ mɛ‘e, kà mɛ nɛ́ kɔ̧ɔ̧ ɗɔaa ha̧‘m, ɓɛɛ mɛ́ tɛ́ zɔk gasamɔ ko Sɔ̧ na nde?» 41 Ɗoŋ nɛ̀ wa kina ta yinɛ kaɗi, Jesu ɓera yí zɔk mɔ si yiwese, ɓɛɛ tɔ̧: «Dáà, mi de osoko h’ɛ́nɛ́ wen n’ɛnɛ zia kɔfamɔ kɔ‘m. 42 Nɛ̀ mbetɛ, mi iŋa'e, ɛ́nɛ́ zii kɔfamɔ kɔ‘m zii ɓɔnsɛnɛ; ɓɛɛ mi tɔ̧ wen’ɛ wen o wi nɔ'ɔ nɛ̀ ya zik am’ɛ, wen ha̧ wa mɛ kɔ̧ ɗɔaa'e nɛ́ ɛ́nɛ́'ɛ toma'm tɛnɛ.» 43 Ɗoŋ wen'i, ɓɛɛ a̧ hiɗi mɔ nɛ̀ ŋgaya-a, tɔ̧ nɛnɛ‘e: «Lazar, mɛ̀ gbó!» 44 Ɓɛɛ wi nɛ̀ fee so'i gbo nɛ̀ oi hɛra naŋ in er nɛ̀ wa hɛra so nɛ̀ laa, ɓɛɛ ndɔmbɔ nɛ̀ wa hɛra nɛ̀ yí-a duka ɓɔn oi-aa. Ɓɛɛ Jesu tɔ̧ ha̧ o bíí: «Ɛ̀nɛ̀ búr a̧, ha̧ a̧ yák mɔ kɔ̧-a̧.»
Wa ee ɗɔra tɛ Jesu
45 O Juif nɛ̀ dɔka-a nɛ̀ nɛ̀ɛ̀ mɛ duk in Marii zɔka mɔ nɛ̀ Jesu dea, ɓɛɛ wa kɔ̧ ɗɔaa ha̧ a̧. 46 Ɓɛɛ o ŋma nɛ́ kɔ‘i tɛ o Fariziɛn mɛ we ɗoŋ mɔ nɛ̀ Jesu dea'i ha̧ wa. 47 Nɛ́ mɔ'ɔ nɛ̀ o gasa wan-ɗafi-sɔ̧ in o Fariziɛn saa gasa gɔna-kita, ɓɛɛ tɔ̧: «Ɛ́ɛ́ tɛ́ de héé ge? Wi’ɛ nɛ́ mɔ'ɔ nɛ̀ de nɛ́ mɔɔ-usi-mɔ nɛ̀ dɔka-a nɛnɛ'ɛ; 48 k’ɛ̀ɛ̀ é a̧ hegɔ siti, o bíí lɛŋ tɛ kɔ̧ ɗɔaa ha̧ a̧, ɓɛɛ o bíí Rɔm tɛ pi̧ nú tɛ wen'i, ɓɛɛ yaia Sa̧a̧-fara in tugun bíí k’ɛɛ yinɛ!» 49 Ŋma bíí mgbara wa, nin-a nɛ́ Kaif, nɛ̀ duka nɛ́ gasa wan-ɗafi-sɔ̧ tɛ pɛ‘i, tɔ̧ɔ̧ ha̧ wa: «Ɛ́nɛ́ zii mgbara mɔ na. 50 Ɛ́nɛ́ iŋ‘e ndé, dee so gan wen'nɛ́, ha̧ bíí kpɔk mɛ fe gɔn nɛ̀ zu dukbíí, wen ká tugun bíí tɛ́ɛ̀ kum lɛŋ nɛ̀ oi-aa na nde?» 51 (Bó nɛ́ Kaif tɔ̧ɔ̧ wen'i nɛ̀ zu-wi na; mɛ̀ nɛ́ wen a̧ nɛ́ gasa wan-ɗafi-sɔ̧ tɛ pɛ‘i, sa a̧ tɔ̧ wen oi nú Sɔ̧‘e Jesu tɛ fe kànà gɔn nɛ̀ zu tugun be Juif, 52 bó nɛ́ tugun be Juif ɛ̀nɛ̀ ɓɛɛ na, ɓɛɛ mɛ̀ nɛ́ ha̧ Jesu mɛ mɔi̧ o bem ko Sɔ̧ nɛ̀ pɛsa so mbɛt mɛ duk kpɔk.) 53 Nɛ́ kale wese'i a̧ wa ee nɛ̀ nú in o ŋmaa mɛ gbɛ Jesu. 54 Ɗoŋ-aa'i, Jesu kɔ̧ yara-a nɛ̀ gbaayí o Juif ɓɔna, ɓɛɛ a̧ kur yak si ŋma fara nɛ̀‘i sa'e Efraim nɛ̀ nyɛi̧ nɛ̀ ŋga-gbárà na; ɓɛɛ a̧ duk hi̧i̧ in o ŋgaiwi kɔ̧-a̧. 55 Ŋgimbi gbaŋa Paska ko o Juif hɛɗa so kaɗi, ɓɛɛ o bíí nɛ̀ dɔka-a daŋ nɛ̀ tɛ o be ye si Jerusalɛm wen ɗafa war-tɛ-wa. 56 Wa kia Jesu, ak nɛ̀ o ŋmaa kɔ̧́ Tua ko Sɔ̧ nɛ̀ wa yaa sɛnɛ‘i'e: «Ɛ́nɛ́ ta bɔɔ k’ɛ́nɛ́ hee ge? A̧ tɛ́ tɛ gbaŋa’ɛ náà, kóó a̧ beka tɛ na nde?» 57 O gasa wan-ɗafi-sɔ̧ in o Fariziɛn tɔ̧ɔ̧ so ha̧ o bíí‘e, kà ŋma bíí nɛ́ iŋa fara n'aa duk sɛnɛ, nɛ̀ wi’ɛi a̧ úsí oi-aa ha'i mɛ ba a̧.
Tɛna nɔ̧́-nyama a naŋ Jesu
1 Oi zɛ mɔɔrɔ-ɗoŋ-kpɔk ɓɛɛ gbaŋa Paska dee, ɓɛɛ Jesu hɔ sɛn Betanii, ye ko Lazar n'aa bàá kpasi so tɛ fio. 2 Wa gii nyɔŋmɔ ha̧ Jesu. Marthe duka kɛ̧ nɛ̀ nyɔŋmɔ, ɓɛɛ Lazar duk kɔ‘i mgbara o bíí nɛ̀ wa saa mɛ nyɔŋ mɔ‘i. 3 Marii baa gba de nɔ̧́-nyama nɛ̀ gɛnɛ-a ɔ ŋgaya nyɛmna, tɛn a naŋ Jesu, ɓɛɛ nyiŋ nɛ̀ mui̧-zu-wi; ɓɛɛ pɛ̀r nɔ̧́-nyama'i ba kɔ̧́ tua kpi̧i̧i̧. 4 Judas Iskariot, ŋma ŋgaiwi ko Jesu nɛ̀ tɛ e ɗɔra tɛ-a'i, tɔ̧a̧: 5 «Wen ge sa'i ɗɔr so nɔ̧́-nyama’ɛ tɛ kɔya-sede gɔmŋmaa-taar mɛ gbak nɛ̀ o wisan na ge?» 6 Bó nɛ́ Judas taa nɛ́ bɔnɛ ko o wisan tɔ̧ nɛ̀ wen'i na, ɓɛɛ mɛ̀ nɛ́ wen a̧ nɛ́ wi-zuzu nɛ̀ ŋgoɓo sede duk duka-a er-a, ɓɛɛ ɓan na a̧ ɓɔŋa mɔ sɛnɛ kaɗi. 7 Ɓɛɛ Jesu tɔ̧: «Mɛ̀ é a̧ sɛ́ɛ́m, é há̧ a̧ mɛ́ kàsì oi nɔ̧́-nyama’ɛ wen wèsé nɛ̀ wa tɛ gun nɛ‘m. 8 Ko o wisan, wa tɛ duk in'nɛ̀ɛ̀ ɓɔnsɛnɛ; ɓɛɛ kɔ‘m, mi beka duk in'nɛ̀ɛ̀ ɓɔnsɛnɛ na.» 9 Gba gíí o Juif zia'e Jesu hɔɔ hi̧i̧, ɓɛɛ wa nɛ́ tɛ a̧, bó nɛ́ wen zɔka Jesu ɓɛɛ na, ɓɛɛ mɛ̀ nɛ́ wen zɔka Lazar n'aa kpasa so tɛ fio. 10 Nɛ́ mɔ'ɔ nɛ̀ o gasa wan-ɗafi-sɔ̧ baa keta, ɓɛɛ e zu-a mɛ gbɛ Lazar mbɛt, 11 wen mɛ̀ nɛ́ wen zu Lazar nɛ́ mɔ'ɔ nɛ̀ o dɔka Juif ee nɛ̀ wa duk ɓɛɛ kɔ̧ ɗɔaa ha̧ Jesu.
Jesu yee Jerusalɛm hee wannu ga
12 Nɛ̀ mɔ sa̧a̧, o giiwi nɛ̀ gara so gbaŋa zia'e Jesu a̧ nɛ́ si Jerusalɛm'i, 13 ɓɛɛ wa gɔn wa̧a̧ ndɛŋgɛ, we nɛ̀ ti a̧ sumburi nɛ̀ a̧‘e: «Oee! Toka-de-yoŋgo a̧ duk zu wi nɛ̀ tɛ‘i nɛ̀ nin Gasa Wan!» 14 Jesu kpaa be tuifuu ɓɛɛ daŋ duk zu a̧, hee mɔ'ɔ nɛ̀ Yɔramɔ tɔ̧ɔ̧ so ga: 15 «Boko-be Siɔŋ, ká mɛ́ de kíì na, mɛ̀ zɔ́k wannu kɔ-mɛ a̧ tɛ‘i; a̧ daŋa nɛ́ zu be-tuifuu.» 16 Tɛ́ ŋgimbi'i, o ŋgaiwi kɔ̧-a̧ iŋ mgbara mɔ‘i na hɔ ŋgimbi nɛ̀ Jesu yee tɛ gasamɔ kɔ‘i kaɗi, sɛka tɛ-wa bé tɛ̀ɛ́ mbaŋ‘e, mɔ‘i bàá yɔr so zu a̧, ɓɛɛ nɛ́ mɔ‘i a̧ wa dee ha̧ a̧‘i. 17 O wi nɛ̀ duka so oi sáá Lazar nɛ̀ Jesu saa gbonɛ nɛ̀ kɔ̧́ pɛsi-fio kpasi nɛ̀ a̧ tɛ fio'i, dee sedaako mɔ‘i wen a̧ mbɛt. 18 Nɛ́ mɔ‘i a̧ dee ha̧ giiwi mɛ́ nɛ̀ɛ́ we ti a̧ wen wa zia nyɛrɛ mɔɔ-usi-mɔ n'aa dea'i. 19 Ɓɛɛ o Fariziɛn tɔ̧ ha̧ o ŋmaa: «Gba̧a̧ mɔ n’ɛɛ de’ɛ bo ɓɔna; zɔ́k o bíí nɛ́ mɔ'ɔ nɛ̀ gbin sitɛ a̧ lɛŋ'ɛ.»
O ŋma Grɛk kii nɛ́ Jesu
20 O ŋma Grɛk nɛ̀ɛ̀ so mɛ gasi Sɔ̧ tɛ ŋgimbi gbaŋa'i mbɛt. 21 Wa nɛɛ tɔ̧ ha̧ Filip be Bɛtsaida nú Galilee'e ndé: «Nyaa, ɛ́ɛ́ kɔ̧ɔ̧ mɛ́ zɔk Jesu.» 22 Filip nɛ̀ɛ̀ tɔ̧ kɔ‘i ha̧ Andre, ɓɛɛ wa kai ŋmaa nɛ́ɛ̀ tɔ̧ ha̧ Jesu. 23 Jesu kifa nú ha̧ wa hee mɔ'ɔ ga: «Ŋgimbi ha̧ Bem ko bíí mɛ ye tɛ gasamɔ kɔ‘i hɔɔ kaɗi. 24 Nɛ́ kpasawen a̧‘m tɔ̧ h’ɛ́nɛ́; kpar alkamaari nɛ̀‘i gun, ká fe na, a̧ tɛ ɓɔn ɛ̀nɛ́-a; ɓɛɛ ká a̧ nɛ́ fea, a̧ tɛ wai nɛ̀ dɔka-a. 25 Wi nɛ̀ kɔ̧ɔ̧ duka-kpasa tɛ fe; ɓɛɛ wi nɛ̀ e kɔ‘i see tɛ duka-kpasa zaŋnu’ɛ na, tɛ kpa duka-kpasa kpoo nɛ kpoo. 26 Kà ŋma bíí nɛ́ kɔ̧ɔ̧ mɛ de tom ha̧‘m, a̧ a̧ tɛ́ ɗoŋ am, ɓɛɛ fara n'am duk sɛnɛ‘i, wi-de-tom kɔ‘m tɛ duk sɛnɛ mbɛt. Kà ŋma bíí de tom ha̧‘m, Dáà kɔ‘m tɛ zɔn a̧.»
Jesu tɔ̧ɔ̧ wen fio kɔ‘i
27 «Kinii, see-am dita, ɓɛɛ a̧‘m tɔ̧ bɔɔ hee ge? A̧‘m tɔ̧‘e: ‹Dáà, ɛ̀nɛ̀ kpás'am tɛ ŋgimbi’ɛ› nde? Weyaa, mɛ̀ nɛ́ wen zu ŋgimbi’ɛ a̧‘m tɛ̀ɛ́ wen-aa. 28 Dáà, ɛ̀nɛ̀ dé ha̧ nin'nɛ́ mɛ ye zaŋ gasamɔ!» Ɓɛɛ nɛ́ mɔ'ɔ nɛ̀ wa zia ŋma tiger nɛ̀ yiwese mɛ, nɛ̀ tɔ̧a̧: «Mi baa de ha̧ nin-am mɛ́ ye zaŋ gasamɔ, ɓɛɛ mi tɛ de ha̧ a̧ mɛ́ ye zaŋ gasamɔ gan kuti-a.» 29 O giiwi nɛ̀ yaa so hi̧i̧, zia mɔ‘i ɓɛɛ tɔ̧: «Nɛ́ dika-kórò!» O ŋma tɔ̧ɔ̧: «Nɛ́ ŋma betom ko Sɔ̧ a̧ tɔ̧ wen ha̧ a̧.» 30 Jesu tɔ̧a̧: «Tiger n’ɛnɛ zia'i bó nɛ́ wen zu'm na, ɓɛɛ mɛ̀ nɛ́ wen ɛ́nɛ́. 31 Kinii nɛ́ ŋgimbi gɔna-kita zaŋnu’ɛ; Sɔ̧ tɛ ndak wan nɛ̀ kpaa ŋgai zaŋnu’ɛ yinɛ kinii. 32 Ɓɛɛ ŋgimbi nɛ̀ wa be tɛ̀ɛ́ ba'm e ŋgɔn, mi tɛ dak o bíí lɛŋ pii tɛ‘m.» 33 (A̧ tɔ̧ɔ̧ wen'i usi nɛ̀ yuwar fio n'aa tɛ fe.) 34 Giiwi kifa nú ha̧ Jesu: «Ɛɛ tɔra sɛn zaŋ kalata heembea'e ndé: ‹Mɛsii tɛ duk ɓɔnsɛnɛ;› ɓɛɛ s’ɛnɛ tɔ̧ bɔɔ‘e, wa tɛ ba Bem ko bíí e ŋgɔn wó'ɛ hee ge? Bem ko bíí‘i bɔɔ nɛ́ o?» 35 Jesu tɔ̧ɔ̧ ha̧ wa: «Sa̧a̧mɔ ɓɔna duka-a mgbara'nɛ́ benaŋ tikiɗi; ɛ̀nɛ̀ yár ŋgimbi n’ɛnɛ a̧a̧ nɛ̀ sa̧a̧mɔ, ká tum tɛɛ tik zu'nɛ́; wen wi nɛ̀ yar ti tum, iŋ fara n'aa nɛ́ si sɛnɛ na. 36 Ŋgimbi nɛ̀ sa̧a̧mɔ biti in'nɛ̀ɛ́, ɛ̀nɛ̀ kɔ̧́ ɗɔaa ha̧ a̧, h’ɛ́nɛ́ mɛ kifi duk nɛ́ o bem ko sa̧a̧mɔ.»
O Juif kɔ̧ ɗɔaa ha̧ Jesu na
Jesu tɔ̧ɔ̧ wen'i kaɗi, ɓɛɛ dak zu nɛ́ɛ̀ duk nɛ̀ hu̧sa̧-a̧. 37 Zu o mɔɔ-usi-mɔ n'aa dee yí-wa nɛ̀ dɔka-a mbɛt'i, wa kɔ̧ ɗɔaa ha̧ a̧ na. 38 Hegɔ wen ko wi-tɔ̧-wen oi nú Sɔ̧ Esaii, hɔɔ gba̧a̧; a̧ tɔ̧ɔ̧ so'e: «Gasa Wan, nɛ́ o'o kɔ̧ɔ̧ so ɗɔɔ wen n’ɛɛ tɔ̧ɔ̧ so'i o? Nɛ́ o a̧ Gasa Wan usa so ŋgai kɔ‘i ha̧ a̧ o?» 39 Kale kpɔk Esaii'i tɔ̧ɔ̧ gba̧a̧ mɔ nɛ̀ wa nyɛm so mɛ kɔ̧ nɛ̀ ɗɔaa na'i: 40 «A̧ boma yí-wa, ká wa tɛɛ zɔk mɔ; a̧ dee ha̧ see-wa mɛ ŋgai, ká wa tɛɛ zii mgbara mɔ, ká wa tɛɛ kpa mbe ta, ɓɛɛ ká‘m tɛɛ kpasi wa.» 41 Tɛ́ mɔ‘i Esaii tɔ̧ wen hegɔ, wen n'aa zɔka gasamɔ kɔ̧-a̧, ɓɛɛ sa a̧ tɔ̧ wen-aa. 42 Kóó hegɔ mbɛt, o ŋma mgbara o gasawi nɛ̀ dɔka-a kɔ̧ɔ̧ ɗɔaa ha̧ Jesu, ɓɛɛ wa kɔ̧ mɛ ba ger-wa nɛ̀ ŋgɔn na, ká o Fariziɛn tɛɛ ndak wa yinɛ kɔ̧́ tua-mɔi̧a-a, 43 wen wa kɔ̧ɔ̧ nɛ́ zɔnamɔ nɛ̀ tɛ́ nɛ̀ tɛ̀ bíí gan wan nɛ̀ tɛ́ nɛ̀ tɛ́ Sɔ̧.
Wen ko Jesu tɛ gɔn kita zu o bíí
44 Ɓɛɛ nɛ́ mɔ'ɔ nɛ̀ Jesu tɔ̧ɔ̧ wen nɛ̀ hee-ger'e: «Wi nɛ̀ kɔ̧ ɗɔaa ha̧‘m, bó nɛ́ mi a̧ a̧ kɔ̧ ɗɔaa ha̧ a̧ na, ɓɛɛ nɛ́ wi nɛ̀ toma'm tɛnɛ a̧ a̧ kɔ̧ɔ̧ ɗɔaa ha̧ a̧. 45 Ɓɛɛ wi nɛ̀ zɔka'm, zɔka wi nɛ̀ toma'm tɛnɛ‘i kaɗi. 46 Mi nɛ́ sa̧a̧mɔ nɛ̀ tɛ̀ɛ́ zaŋnu; mi tɛa wen ká o ndé nɛ̀ kɔ̧ ɗɔaa ha̧‘m tɛɛ ɓɔn ti tum. 47 Kà ŋma bíí zii wen kɔ‘m, ɓɛɛ kà a̧ kasi na, bó nɛ́ mi'i tɛ gɔn kita zu a̧ na, wen bó nɛ́ mi tɛ̀ɛ̀ mɛ gɔn kita zaŋnu’ɛ na, ɓɛɛ mi tɛ̀ɛ̀ mɛ kpasi nɛ́ o bíí nù. 48 Wi-gɔn-kita zu wi nɛ̀ bɛ̧‘m, nɛ̀ kɔ̧ ɗɔɔ wen kɔ‘m na mbɛt'i a̧a̧ sɛnɛ; nɛ́ wen n'am tɔ̧a̧ a̧ tɛ gɔn kita zu a̧ sɔŋkur wese. 49 Wen bó nɛ́ mi tɔ̧ wen nɛ̀ zu'm na, ɓɛɛ nɛ́ Dáà nɛ̀ toma'm tɛnɛ a̧ usa mɔ n'am tɛ tɔ̧ in mɔ n'am tɛ usi. 50 Ɓɛɛ mi iŋa'e, heembea kɔ̧-a̧‘i mɛ̀ nɛ́ duka-kpasa kpoo nɛ kpoo. Wen n'am tɔ̧‘i, mi tɔ̧ nyɛm nɛ̀ ɗoŋ mɔ nɛ̀ Dáà tɔ̧ɔ̧ ha̧‘m.»
Jesu fɔra naŋ o ŋgaiwi kɔ‘i
1 Nɛti ha̧ gbaŋa Paska, Jesu iŋa'e ŋgimbi kɔ‘i hɔɔ kaɗi, ŋgimbi kura-a zaŋnu’ɛ mɛ si ɗoŋ tɛ̀ Dáà mɛ. Hee mɔ'ɔ n'aa kɔ̧ɔ̧ so o bíí kɔ̧-a̧ zaŋnu’ɛ ga, a̧ kɔ̧ɔ̧ kànà wa hɔ sɔŋkur-aa. 2 Ŋgimbi nyɔŋmɔ, ɓɛɛ ká Wan-ɗaŋmɔ ee so taamɔ kɔ̧́ see Judas Iskariot bem ko Simɔŋ mɛ e ɗɔra tɛ Jesu kaɗi. 3 Jesu iŋa'e, Dáà kɔ‘i ee mɔ lɛŋ er-wi, ɓɛɛ hee mɔ'ɔ n'aa gboo nɛ̀ tɛ́ Sɔ̧ ga, a̧ tɛ si kànà ɗoŋ tɛ́ Sɔ̧ mbɛt. 4 Nɛ́ mɔ'ɔ n'aa kura ká̧ nyɔŋmɔ, kpɔ̧i̧ gasa laa tɛ-a ba e nù, ɓɛɛ ba mɔɔ-tur-tɛ yuɓuri nɛ̀ guntir. 5 A̧ tɛna yì a kɔ̧ tasi, ku̧ naŋ fɔra naŋ o ŋgaiwi kɔ̧-a̧, ɓɛɛ tur nɛ̀ mɔɔ-tur-tɛ n'aa yuɓura nɛ̀ guntir-a'i. 6 Jesu hɔɔ tɛ Simɔŋ Pierre, ɓɛɛ Simɔŋ Pierre tɔ̧ ha̧ a̧: «Gasa Wan, ɛ́nɛ́ tɛ fɔr naŋ-am hee ge?» 7 Jesu kifa nú ha̧ a̧: «Mɔ n'am de'i, mɛ beka iŋ mgbara-a kinii na, ɓɛɛ mɛ́ tɛ́ iŋ nɛ̀ ɗoŋ.» 8 Pierre tɔ̧ɔ̧ ha̧ Jesu: «Bo hegɔ na, ɛ́nɛ́ beka fɔr naŋ-am na ndó-ndó-ndó!» Jesu kifa nú ha̧ a̧: «Kà‘m fɔr naŋ-mɛ na, mɛ́ beka kpa mɔ in am na.» 9 Ɓɛɛ Simɔŋ Pierre tɔ̧ ha̧ a̧: «Gasa Wan, kà nɛ́ bòò hegɔ, bó nɛ́ naŋ-am ɓɛɛ na, ɛ̀nɛ̀ fɔ́r er-am in zu'm mbɛt!» 10 Jesu tɔ̧ɔ̧ ha̧ a̧: «Wi nɛ̀ zui yi, beka fɔr tɛ̀ ɓɔna, wen tɛ-a lɛŋ sa̧a̧ kaɗi. War k’ɛ́nɛ́, tɛ‘nɛ́ sa̧a̧ kaɗi, ɓɛɛ bó nɛ́ ɛ́nɛ́ lɛŋ na.» 11 Wen Jesu iŋa wi nɛ̀ tɛ e ɗɔra tɛ-a; mɛ̀ nɛ́ hegɔ sa a̧ tɔ̧‘e: «Bó nɛ́ ɛ́nɛ́ lɛŋ a̧ tɛ‘nɛ́ sa̧a̧ na.» 12 Ɗoŋ n'aa fɔra naŋ-wa kaɗi, a̧ pi̧i̧ laa kɔ̧-a̧ tɛ-a, duk nù ká̧ nyɔŋmɔ, ɓɛɛ tɔ̧ ha̧ wa: «Ɛ́nɛ́ iŋa mgbara mɔ n'am dee hɛnɛ‘i? 13 Saa'm n’ɛnɛ sa'e ‹Wan-usi-mɔ›, kóó ‹Gasa Wan'i›, ɛ́nɛ́ sa nɛ̀ yuwar-a; mi nɛ́ mɔ‘i. 14 Mi Gasa Wan in Wan-usi-mɔ k’ɛ́nɛ́, mi fɔra naŋ‘nɛ́, h’ɛ́nɛ́ mbɛt, mɛ fɔr naŋ ŋmaa in o ŋmaa. 15 Mi usa nɛ́ ɗoŋ mɔ h’ɛ́nɛ́, wen h’ɛ́nɛ́ mɛ de mɔ hee mɔ'ɔ n'am dee h’ɛ́nɛ́ ga mbɛt. 16 Nɛ́ kpasawen a̧‘m tɔ̧ h’ɛ́nɛ́; wi-de-tom gan wan-tom kɔ‘i na, betom gan wi nɛ̀ toma a̧ na mbɛt. 17 Hee ɛnɛ iŋa mɔ‘i kaɗi ga, k’ɛ̀nɛ̀ de hegɔ, ɓɛɛ ɛ́nɛ́ tɛ ya nɛ̀ desee. 18 «Bó nɛ́ mi tɔ̧ wen’ɛ h’ɛ́nɛ́ lɛŋ na; wen mi iŋa o wi n'am hoka, ha̧ mɔ nɛ̀ Yɔramɔ tɔ̧a̧‘e: ‹Wi nɛ̀ nyɔŋa mɔ kpɔk in am, ŋmaa'm nɛ̀ dukui naŋ‘i› mɛ hɔɔ gba̧a̧. 19 Mi mbaŋ nɛ́ gɔni tɛ‘nɛ́ kinii ŋgaɓo, kà mɔ‘i nɛ́ hɔa, ɓɛɛ k’ɛ́nɛ́ kɔ̧ɔ̧ ɗɔaa'e, mi nɛ́ mɔ‘i. 20 Nɛ́ kpasawen a̧‘m tɔ̧ h’ɛ́nɛ́; wi nɛ̀ kpɛk wi n'am toma, kpɛk nɛ‘m, ɓɛɛ wi nɛ̀ kpɛk am, kpɛk nɛ́ wi nɛ̀ toma'm tɛnɛ mbɛt.»
Jesu tɔ̧a̧‘e Judas tɛ e ɗɔra tɛ-wi
21 See Jesu ɗaŋa ɗoŋ wen'i, ɓɛɛ tɔ̧: «Nɛ́ kpasawen a̧‘m tɔ̧ h’ɛ́nɛ́; ŋma bíí mgbara'nɛ́'ɛ tɛ e ɗɔra tɛ‘m.» 22 O ŋgaiwi zɔka yí ŋmaa dam, wen wa iŋ wi nɛ̀ Jesu tɔ̧ wen'i zu a̧ na. 23 Sɛn ká̧ nyɔŋmɔ‘i, ŋgaiwi wan nɛ̀ Jesu kɔ̧ɔ̧ nyɛmna duka mgbák katɛ a̧. 24 Simɔŋ Pierre nyɔŋa yí ha̧ ŋgaiwi'i mɛ ak Jesu'e, wi n'aa tɔ̧ nɛnɛ‘i nɛ o? 25 Ŋgaiwi'i oŋga si yí-ŋguɗi Jesu, ɓɛɛ ak a̧: «Gasa Wan, wi’ɛi nɛ́ o?» 26 Jesu kifa nú: «Wi n'am tɛ gbin brɛt duɓi nɛ̀ yí-kpoo ha̧ a̧‘i, nɛ́ wi’ɛi a̧ tɛ e ɗɔra tɛ‘m.» Ɓɛɛ Jesu duɓi yí-kpoo nɛ̀ brɛt, nyɛi̧ ha̧ Judas Iskariot, bem ko Simɔŋ. 27 Há̧á̧ brɛt nɛ̀ Jesu ha̧a̧ ha̧ Judas hegɔ, ɓɛɛ Wan-ɗaŋmɔ ye kɔ̧́ see-aa. Ɓɛɛ Jesu tɔ̧ ha̧ a̧: «Mɔ nɛ̀ mɛ ta mɛ de'i, mɛ̀ dé bee!» 28 Ɓɛɛ ŋma bíí mgbara wa lɛŋ kóó kpɔk nɛ̀ yaa ká̧ nyɔŋmɔ‘i zii mgbara mɔ nɛ̀ Jesu tɔ̧ɔ̧ ha̧ Judas na. 29 Hee mɔ'ɔ nɛ̀ ŋgoɓo sede duk er Judas ga, o ŋma bíí taa kɔ‘i'e, Jesu tɔ̧ɔ̧ ha̧ a̧ mɛ nɛ̀ɛ́ hi̧fi nyɔŋmɔ gbaŋa, kóó Jesu tɔ̧ɔ̧ ha̧ a̧ mɛ ha̧ ŋma mɔ ha̧ o wisan. 30 Judas baa brɛt'i, ɓɛɛ gbo zan, ká zɛ dee so kaɗi.
Mbe heembea
31 Ɗoŋ nɛ̀ Judas gboo kaɗi, Jesu tɔ̧a̧: «Kinii Bem ko bíí yee tɛ gasamɔ kaɗi, ɓɛɛ wi zɔk nɛ́ gasamɔ ko Sɔ̧ wen zu a̧. 32 Hee mɔ'ɔ nɛ̀‘i zɔk nɛ̀ gasamɔ ko Sɔ̧ sɛn tɛ Bem ga, Sɔ̧ tɛ de ha'i mɛ zɔk gasamɔ ko Bem sɛn tɛ Sɔ̧ nɛ̀ tɛ-wi; ɓɛɛ mɔ‘i tɛ de kinii. 33 O bem kɔ‘m, duka-a kɔ‘m in'nɛ̀ɛ̀ kinii, ɗoŋ-aa beka nyɛi̧ ɓɔna. Ɛ́nɛ́ tɛ́ kii am; nɛ́ kale wen n'am tɔ̧ɔ̧ so ha̧ o Juif'i nɛ́ mɔ'ɔ n'am tɔ̧ h’ɛ́nɛ́ kinii’ɛ: fara n'am nɛ́ sɛnɛ‘i, ɛ́nɛ́ nyɛm mɛ hɔ sɛnɛ na. 34 Mi ha̧ nɛ mbe heembea h’ɛ́nɛ́: ɛ̀nɛ̀ kɔ̧́ ŋmaa in o ŋmaa. Hee mɔ'ɔ n'am kɔ̧ɔ̧ nɛ ɛ́nɛ́ ga, ɛ́nɛ́ mbɛt, ɛ̀nɛ̀ kɔ̧ ŋmaa in o ŋmaa. 35 K’ɛ̀nɛ̀ nɛ́ kɔ̧ɔ̧ ŋmaa, ɓɛɛ o bíí lɛŋ tɛ iŋ‘e, ɛ́nɛ́ nɛ́ o ŋgaiwi kɔ‘m.»
Jesu tɔ̧a̧‘e Pierre tɛ kafi wi
36 Ɓɛɛ Simɔŋ Pierre ak a̧: «Gasa Wan, ɛ́nɛ́ nɛ́ bɔɔ si déè?» Jesu kifa nú ha̧ a̧: «Kinii mɛ nyɛm mɛ nɛ̀ ɗoŋ-am si fara n'am nɛ́ sɛnɛ‘i na, ɓɛɛ mɛ tɛ ndak pata'm nɛ̀ ɗoŋ.» 37 Pierre tɔ̧ɔ̧ ha̧ a̧: «Mi nyɛm mɛ nɛ̀ ɗoŋ‘nɛ́ kinii na bɔɔ wen ge? Mi tɛ kpɛk ha̧‘m mɛ fe wen zu'nɛ́.» 38 Jesu kifa nú: «Mɛ tɛ kpɛk mɛ fe wen zu'm nde? Nɛ́ kpasawen a̧‘m tɔ̧ ha̧ mɛ; mɛ tɛ kaf'am war taar sɛka gata-kɔra hee mɔ.»
Jesu nɛ́ yuwar sitɛ Dáà
1 «Ká see'nɛ́ ɗaŋ na! Ɛ̀nɛ̀ kɔ̧́ ɗɔaa há̧ Sɔ̧, ɓɛɛ ɛ̀nɛ̀ kɔ̧́ ɗɔaa ha̧‘m mbɛt. 2 Fara-duk ɔ dɔka kɔ̧́ tua ko Dáà kɔ‘m; kà bó só hegɔ na, bó nɛ́ mi tɛ̀ɛ́ tɔ̧ so'e mi tɛ nɛ mɛ ɗafi fara h’ɛ́nɛ́ na. 3 Ɓɛɛ ɗoŋ n'am ɗafa fara h’ɛ́nɛ́ kaɗi, mi tɛ pii ɗoŋ mɛ kai'nɛ́, wen h’ɛ́nɛ́ mɛ duk fara n'am tɛ duk sɛnɛ‘i. 4 Ɛ́nɛ́ iŋa yuwar mɛ nɛ̀ si fara n'am nɛ́ sɛnɛ‘i mbɛt.» 5 Tomas tɔ̧ɔ̧ ha̧ a̧: «Gasa Wan, ɛ́ɛ́ iŋ fara n’ɛnɛ nɛ́ sɛnɛ‘i na; ɛ́ɛ́ tɛ iŋ yuwar hee ge?» 6 Jesu tɔ̧ɔ̧ ha̧ a̧: «Mi nɛ́ yuwar, mi nɛ́ kpasawen, mi nɛ́ duka-kpasa. Bíí yak sitɛ Dáà nɛ tɛ‘m ɓɛɛ. 7 K’ɛ̀nɛ̀ iŋ so'm gáà, ɛ̀nɛ̀ tɛ̀ɛ́ iŋ Dáà kɔ‘m mbɛt. Kinii, ɛ́nɛ́ iŋa a̧, ɓɛɛ ɛ́nɛ́ zɔka a̧ kaɗi mbɛt.» 8 Filip tɔ̧ɔ̧ ha̧ a̧: «Gasa Wan, ɛ̀nɛ̀ úsí Dáà h’ɛ́ɛ́, ɓɛɛ i̧i̧ nyɛma.» 9 Jesu kifa nú ha̧ a̧: «Filip! Mi duka in'nɛ̀ɛ́ ɓeemɛ, ɓɛɛ mɛ́ tɛ iŋ am hɔ̧ɔ̧ na? Wi nɛ̀ zɔka'm, zɔka Dáà kaɗi. Ɓɛɛ mɛ tɔ̧ bɔɔ‘e, a̧‘m úsí Dáà ha'i wó'ɛ, wen ge? 10 Mɛ́ kɔ̧́ ɗɔaa'e mi duk tɛ Dáà, ɓɛɛ Dáà duk tɛ‘m na nde? O wen n'am tɔ̧ h’ɛ́nɛ́‘i, mi tɔ̧ nɛ̀ zu'm na; nɛ́ Dáà nɛ̀ duk tɛ‘m'i a̧ de o tom kɔ‘i. 11 Ɛ̀nɛ̀ kɔ̧́ ɗɔɔ wen kɔ‘m! Mi duk tɛ Dáà, ɓɛɛ Dáà duk tɛ‘m mbɛt. Ɓɛɛ k’ɛ̀nɛ̀ kɔ̧́ ɗɔɔ wen kɔ‘m na, ɛ̀nɛ̀ kɔ̧́ kànà ɗɔaa wen zu o tom nɔ‘i. 12 Nɛ́ kpasawen a̧‘m tɔ̧ h’ɛ́nɛ́, wi nɛ̀ kɔ̧ ɗɔaa ha̧‘m tɛ de o tom n'am de’ɛ, ɓɛɛ wi’ɛi tɛ de o gasa tom gan mbɛt, wen mí nɛ́ tɛ̀ Dáà. 13 Ɓɛɛ mɔ lɛŋ n’ɛnɛ tɛ ak nɛ̀ nin-am, mi tɛ de wen ha'i mɛ zɔk gasamɔ ko Dáà wen zu Bem. 14 K’ɛ̀nɛ̀ nɛ́ aka ŋma mɔ nɛ̀ nin-am, mi tɛ de ha'i mɛ zɔk gasamɔ ko Dáà.
Ha̧a̧nú wen Sa̧a̧ Ɔmi
15 «K’ɛ̀nɛ̀ nɛ́ kɔ̧a̧‘m, ɛ́nɛ́ tɛ kasi o heembea kɔ‘m. 16 Mi tɛ kɔfi Dáà, ɓɛɛ a̧ tɛ tom ŋma wi-ye-ɗoŋ‘nɛ́ nɛ̀ tɛ duk in'nɛ̀ɛ̀ ɓɔnsɛnɛ. 17 A̧ nɛ́ Sa̧a̧ Ɔmi nɛ̀ tɛ usi kpasawen, nɛ̀ o bíí zaŋnu nyɛm mɛ kpa na, wen wa zɔk a̧ na, ɓɛɛ wa iŋ a̧ na mbɛt. K’ɛ́nɛ́, ɛ́nɛ́ iŋa a̧, wen a̧ duk in'nɛ̀ɛ́, ɓɛɛ a̧ duk tɛ‘nɛ́. 18 «Mi beka e h’ɛ́nɛ́ mɛ ya be-oi na; mi tɛ pii ɗoŋ tɛ‘nɛ́. 19 Dekpaa tikiɗi, ɓɛɛ o bíí zaŋnu beka zɔk am ɓɔna. Ɓɛɛ k’ɛ́nɛ́, ɛ́nɛ́ tɛ zɔk am, n'am tɛ duk kpasa, ɓɛɛ ɛ́nɛ́ tɛ duk kpasa mbɛt. 20 Wese'i, ɛ́nɛ́ tɛ iŋ‘e, mi duk tɛ Dáà kɔ‘m, ɛ́nɛ́ duk tɛ‘m, ɓɛɛ mi duk tɛ‘nɛ́ mbɛt. 21 «Wi nɛ̀ kasi o heembea kɔ‘m, mbo nɛ̀ zu sɛnɛ mbɛt, nɛ́ wi nɛ̀ kɔ̧a̧‘m; ɓɛɛ wi nɛ̀ kɔ̧a̧‘m, Dáà kɔ‘m tɛ kɔ̧ a̧, mi tɛ kɔ̧ a̧ mbɛt, ɓɛɛ mi tɛ usi tɛ‘m ha̧ a̧.» 22 Judɛ (bó nɛ́ Judas Iskariot na) tɔ̧ɔ̧ ha̧ a̧: «Gasa Wan, hee ge ɛ̀nɛ̀ tɛ usi tɛ‘nɛ́ h’ɛ́ɛ́, ɓɛɛ bó nɛ́ ha̧ o bíí zaŋnu na ge?» 23 Jesu kifa nú ha̧ a̧: «Kà ŋma bíí nɛ́ kɔ̧a̧‘m, a̧ tɛ kasi wen kɔ‘m; Dáà kɔ‘m tɛ kɔ̧ a̧; ɛ́ɛ́ tɛ́ tɛ̀ tɛ́ a̧, ɓɛɛ ɛ́ɛ́ tɛ ɗafi fara-duk k’ɛɛ tɛ a̧. 24 Wi nɛ̀ kɔ̧‘m na, kasi wen kɔ‘m na, ɓɛɛ wen n'am tɔ̧ n’ɛnɛ zii’ɛ bó nɛ́ tɛ́ nɛ̀ tɛ‘m na, ɓɛɛ tɛ́ nɛ̀ tɛ̀ Dáà nɛ̀ toma'm tɛnɛ. 25 «Mi tɔ̧ wen’ɛ h’ɛ́nɛ́ ŋgimbi n'am biti duk in'nɛ̀ɛ́. 26 Ɓɛɛ wi-ye-ɗoŋ‘nɛ́, Sa̧a̧ Ɔmi nɛ̀ Dáà tɛ tom tɛnɛ nɛ̀ nin-am, tɛ usi mɔ lɛŋ h’ɛ́nɛ́; a̧ tɛ mbaŋ tɛ‘nɛ́ zu mɔ lɛŋ n'am tɔ̧ɔ̧ h’ɛ́nɛ́. 27 «Mi ee ga̧a̧mɔ zu'nɛ́, mi ha̧a̧ ga̧a̧mɔ kɔ‘m h’ɛ́nɛ́; mi ha̧ ga̧a̧mɔ‘i h’ɛ́nɛ́, ɓɛɛ bó nɛ́ hee mɔ'ɔ nɛ̀ o bíí zaŋnu ha̧ nɛ̀ mɔ ha̧ o ŋmaa’ɛ ga na. K’ɛ́nɛ́ kpa ɗaŋsee na, ɓɛɛ ká kíì dé‘nɛ́ na mbɛt. 28 Ɛ́nɛ́ zia wen n'am tɔ̧ɔ̧ h’ɛ́nɛ́‘e mi yaka, ɓɛɛ mi tɛ pii ɗoŋ pii tɛ‘nɛ́ woyo. K’ɛ̀nɛ̀ nɛ́ kɔ̧a̧‘m, n’ɛ̀nɛ̀ yá nɛ̀ desee zu naŋanɔ kɔ‘m sitɛ Dáà‘i, wen Dáà gasa gan am. 29 Mɛ̀ nɛ́ hegɔ mi mbaŋ nɛ́ tɛ‘nɛ́ kinii; kà ŋgimbi nɛ̀ mɔ‘i bé tɛ̀ɛ́ hɔ, ɓɛɛ k’ɛ́nɛ́ kɔ̧ɔ̧ ɗɔaa. 30 Mi beka tɔ̧ wen nɛ̀ dɔka-a in'nɛ̀ɛ́ ɓɔna, wen be-wan zaŋnu’ɛ a̧ tɛ‘i, ɓɛɛ mɔ kpɔk, a̧ bó nɛ̀ ŋgai zu'm na. 31 Ɓɛɛ a̧ tɛ wen ha̧ o bíí zaŋnu mɛ iŋ‘e mi kɔ̧ɔ̧ Dáà kɔ‘m, ɓɛɛ mi de nɛ́ mɔ nyɛm ɗoŋ mɔ nɛ̀ Dáà usa ha̧‘m. Ɛ̀nɛ̀ kúr, ɛ̀ɛ̀ yák hɛ̧ɛ̧.»
Jesu nɛ́ kpasa nyak-dɔ̧ɔ̧
1 «Mi nɛ́ kpasa nyak-dɔ̧ɔ̧, ɓɛɛ Dáà kɔ‘m nɛ́ wi-ɗafi-gun-aa. 2 Gbaa-er-nyak-dɔ̧ɔ̧ lɛŋ nɛ̀ duk tɛ‘m, nɛ̀ wai na, Dáà kɔ‘m tɛ gɔm yinɛ, ɓɛɛ a̧ tɛ ɗafi o gbaa-er-nyak-dɔ̧ɔ̧ lɛŋ nɛ̀ wai wen ha̧ wa mɛ wai nɛ̀ dɔka-a gan kuti-a. 3 Ɓɛɛ k’ɛ́nɛ́, wen n'am tɔ̧ɔ̧ h’ɛ́nɛ́‘i ɗafa'nɛ́ kaɗi. 4 Ɛ̀nɛ̀ dúk tɛ‘m hee mɔ'ɔ n'am duk tɛ‘nɛ́ ga. Gbaa-er-nyak-dɔ̧ɔ̧ nyɛm mɛ duk ɛ̀nɛ̀-wi wai nɛnɛ na. Hegɔ ɛ́nɛ́ mbɛt, k’ɛ̀nɛ̀ duk tɛ‘m na, ɛ́nɛ́ beka wai na. 5 «Mi nɛ́ nyak-dɔ̧ɔ̧, ɓɛɛ ɛ́nɛ́ nɛ́ o gbaa-er-a. Wi nɛ̀ duk tɛ‘m, n'am duk tɛ a̧ mbɛt, wi’ɛi tɛ wai nɛ̀ dɔka-a; wen kà‘m bo na, ŋma mɔ n’ɛnɛ tɛ de bo na. 6 Kà ŋma bíí duk tɛ‘m na, wa tɛ ba a̧ pi̧ zan ha̧ a̧ mɛ kor, hee gbaa-er-nyak-dɔ̧ɔ̧ nɛ̀‘i ba pi̧ taŋ, kà kor, ɓɛɛ wi aa tɛ wee bíí wee kór-kór’ɛ ga. 7 K’ɛ̀nɛ̀ duk tɛ‘m, ɓɛɛ kà wen kɔ‘m duk tɛ‘nɛ́ mbɛt, ɛ́nɛ́ tɛ ak mɔ n’ɛnɛ kɔ̧a̧, ɓɛɛ ɛ́nɛ́ kpaa. 8 Mɔ n’ɛnɛ tɛ de ha̧ o bíí mɛ zɔn Dáà kɔ‘m, nɛ́ waia-a h’ɛ́nɛ́ mɛ wai nɛ̀ dɔka-a, ɓɛɛ h’ɛ́nɛ́ mɛ ya o ŋgaiwi kɔ‘m. 9 Mi kɔ̧ɔ̧‘nɛ́ hee mɔ'ɔ nɛ̀ Dáà kɔ̧ɔ̧ nɛ‘m ga. Ɛ̀nɛ̀ dúk zaŋ kɔ̧ɔ̧mɔ kɔ‘m. 10 K’ɛ̀nɛ̀ kasi o heembea kɔ‘m, ɛ́nɛ́ tɛ duk zaŋ kɔ̧ɔ̧mɔ hee mɔ'ɔ n'am kasa nɛ̀ heembea ko Dáà kɔ‘m duk nɛnɛ zaŋ kɔ̧ɔ̧mɔ kɔ̧-a̧'ɛ ga. 11 «Mi tɔ̧ɔ̧ wen’ɛ h’ɛ́nɛ́, wen ha̧ desee kɔ‘m mɛ duk tɛ‘nɛ́, ɓɛɛ ha̧ desee k’ɛ́nɛ́ mɛ duk nɛ́ kpasa desee. 12 Heembea kɔ‘m nɛ́ mɔ'ɔ: Ɛ̀nɛ̀ kɔ̧́ ŋmaa in o ŋmaa hee mɔ'ɔ n'am kɔ̧ɔ̧ nɛ̀ ɛ́nɛ́ ga. 13 Gasa kɔ̧ɔ̧mɔ nɛ̀ gana há̧á̧ tɛ-wi mɛ fe gɔn nɛ̀ zu o sɛm kɔ‘i bo na. 14 K’ɛ̀nɛ̀ nɛ́ dee mɔ n'am tɔ̧ɔ̧ h’ɛ́nɛ́'ɛ, ɓɛɛ ɛ́nɛ́ nɛ́ o sɛm kɔ‘m. 15 Mi beka sa'nɛ́‘e o wi-de-tom ɓɔna, wen wi-de-tom iŋ mɔ nɛ̀ wan-tom kɔ‘i de na; ɓɛɛ mi tɛ sa'nɛ́‘e, o sɛm, wen mɔ n'am zia sɛn tɛ Dáà kɔ‘m, mi dee h’ɛ́nɛ́ mɛ iŋ lɛŋ. 16 Bó nɛ́ ɛ́nɛ́'ɛ hoka'm na; nɛ́ mi'i hoka'nɛ́, ɓɛɛ mi e tom er'nɛ́ h’ɛ́nɛ́ mɛ nɛ̀ɛ́ wai, ɓɛɛ ha̧ waya-mɔ‘i mɛ duk ɓɔnsɛnɛ; hegɔ mɔ lɛŋ n’ɛnɛ tɛ ak er Dáà nɛ̀ nin-am, a̧ tɛ ha̧ h’ɛ́nɛ́. 17 Ɓɛɛ mɔ n'am tɔ̧ h’ɛ́nɛ́ mɛ de, mɛ̀ nɛ́ wen h’ɛ́nɛ́ mɛ kɔ̧ ŋmaa in o ŋmaa.»
Sɛnmɔ ko o bíí zaŋnu
18 «Kà o bíí zaŋnu sɛn'nɛ́, ɓɛɛ ɛ̀nɛ̀ íŋ‘e, wa sɛna so'm nɛti h’ɛ́nɛ́. 19 K’ɛ̀nɛ̀ bo so nɛ́ o bíí zaŋnu gáà, o bíí zaŋnu tɛ̀ɛ́ kɔ̧‘nɛ́ wen ɛ́nɛ́ nɛ́ o bíí kɔ-wa, ɓɛɛ ɛ́nɛ́ bo nɛ́ o bíí zaŋnu na, wen mi hoka'nɛ́ mgbara wa yinɛ; nɛ́ mɔ‘i sa wa sɛn'nɛ́. 20 Tɛ‘nɛ́'ɛ mbáŋ ɗoŋ wen n'am tɔ̧ɔ̧ so h’ɛ́nɛ́‘e, wi-de-tom gan wan-tom kɔ‘i na. Kà wa nɛ́ usa so bɔnɛ ha̧‘m, wa tɛ usi bɔnɛ h’ɛ́nɛ́ mbɛt; kà wa nɛ́ kasa so wen kɔ‘m, wa tɛ kasi wen k’ɛ́nɛ́ mbɛt. 21 Wa tɛ de o mɔɔ nɔ‘i lɛŋ in'nɛ̀ɛ́ wen zu nin-am, wen wa iŋ wi nɛ̀ toma'm tɛnɛ na. 22 Kà‘m tɛ so in kà‘m usi so mɔ ha̧ wa na, ɗaŋmɔ kɔ-wa beka bo so zu wa na; ɓɛɛ kinii, wa bó nɛ̀ ŋma nú-wen mɛ tɔ̧ zu ɗaŋmɔ kɔ-wa na. 23 Wi nɛ̀ sɛn am, sɛn nɛ́ Dáà kɔ‘m mbɛt. 24 Kà‘m de so tom nɛ̀ ŋma bíí tɛ de mgbara wa nɛti na, ɗaŋmɔ kɔ-wa beka bo so zu wa na; ɓɛɛ kinii, wa zɔka tom n'am dea, ɓɛɛ wa sɛn am gú nɛ̀ Dáà kɔ‘m mbɛt. 25 Mɔ‘i dee hegɔ ha̧ wen nɛ̀ yɔra zaŋ kalata heembea kɔ-wa mɛ hɔ gba̧a̧: ‹Wa sɛna'm sɔɔ géè!› 26 «Mi tɛ tom wi-ye-ɗoŋ‘nɛ́ nɛ̀ tɛ̀ Dáà mɛ tɛnɛ h’ɛ́nɛ́; a̧ nɛ́ Sa̧a̧ Ɔmi nɛ̀ tɛ usi kpasawen, ɓɛɛ a̧ tɛ́ nɛ̀ tɛ̀ Dáà. Ŋgimbi n'aa bé tɛ̀ɛ́ tɛ, a̧ tɛ́ de sedaako wen zu'm. 27 Ɛ́nɛ́ mbɛt, tɛ́ de sedaako wen zu'm, wen ɛ́nɛ́ duka in am nɛ̀ ku̧u̧naŋ-a mɛ tɛnɛ.»
1 «Mi tɔ̧ɔ̧ wen’ɛ lɛŋ h’ɛ́nɛ́ nɛti wen k’ɛ́nɛ́ tɛɛ sakali. 2 Ŋgimbi tɛ hɔ nɛ̀ wa tɛ ndak'nɛ́ gbonɛ kɔ̧́ tua-mɔi̧a-a; bó nɛ́ i̧i̧ ɓɛɛ na, wa tɛ gbɛ‘nɛ́ mbɛt, ɓɛɛ wa taa'e mɔ nɛ̀‘i de'i nɛ́ ɗafa-sɔ̧. 3 Wa tɛ de mɔ hegɔ wen wa iŋ Dáà na, ɓɛɛ wa iŋ am na mbɛt. 4 Mi tɔ̧ɔ̧ mɔ‘i h’ɛ́nɛ́, kà ŋgimbi-a nɛ́ hɔa, ɓɛɛ ká tɛ‘nɛ́ mbaŋa ɗoŋ-aa'e, mi bàá tɔ̧ so wen'i ha'i kaɗi.
Tom ko Sa̧a̧ Ɔmi
5 «Mi tɔ̧ so wen-aa h’ɛ́nɛ́ nɛ̀ ku̧u̧naŋ-a mɛ na, wen mi biti so in'nɛ̀ɛ́. Ɓɛɛ kinii, mi si ɗoŋ tɛ wi nɛ̀ toma'm tɛnɛ, ɓɛɛ ŋma bíí mgbara'nɛ́ mɛ ak am'e: ‹Ɛ́nɛ́ nɛ́ déè nde?› bo na. 6 Ɛ́nɛ́ duk nɛ dita-see wen n'am tɔ̧ɔ̧ mɔ‘i h’ɛ́nɛ́! 7 Ɓɛɛ nɛ́ kpasawen a̧‘m tɔ̧ h’ɛ́nɛ́, yaka-a kɔ‘m tɛ duk nɛ́ mɔ nɛ̀ tɛ gbak'nɛ́, wen kà‘m yak na, wi-ye-ɗoŋ‘nɛ́ beka tɛ na, ɓɛɛ kà‘m nɛ́ yaka, mi tɛ tom a̧ tɛnɛ h’ɛ́nɛ́. 8 Ɓɛɛ ŋgimbi n'aa tɛ tɛ, a̧ tɛ usi yɔɔ-kaya ko o bíí zaŋnu ha̧ wa zu mɔ ko ɗaŋmɔ, deemɔ nɛ̀ yuwar-a in kita. 9 Tɛ́ mɔ ko ɗaŋmɔ, a̧ tɛ usi'e wa kɔ̧ ɗɔaa ha̧‘m na. 10 Tɛ́ mɔ ko deemɔ nɛ̀ yuwar-a, a̧ tɛ usi'e mi nɛ́ tɛ̀ Dáà, ɓɛɛ ɛ́nɛ́ beka zɔk am ɓɔna. 11 Tɛ́ mɔ ko kita mbɛt, a̧ tɛ usi'e kita baa be-wan zaŋnu’ɛ kaɗi. 12 «Mi a̧a̧ nɛ̀ dɔka mɔ woyo mɛ tɔ̧ h’ɛ́nɛ́; ɓɛɛ kinii tui-a tɛ gan'nɛ́. 13 Ŋgimbi nɛ̀ Sa̧a̧ Ɔmi, wi-usi-kpasawen tɛ hɔ, a̧ tɛ mgbɔ‘nɛ́ ye nɛ̀ tɛ́ kpasawen lɛŋ. A̧ beka tɔ̧ wen nɛ̀ zu-a na; a̧ tɛ tɔ̧ nɛ́ mɔ n'aa tɛ zii, ɓɛɛ a̧ tɛ tɔ̧ mɔ lɛŋ nɛ̀ tɛ hɔ h’ɛ́nɛ́ mbɛt. 14 A̧ tɛ gas'am, wen a̧ tɛ kpa mɔ tɛ mɔ nɛ̀ duk nɛ́ kɔ‘m, ɓɛɛ a̧ wee ɗoŋ-aa h’ɛ́nɛ́. 15 Mɔ ko Dáà kɔ‘m lɛŋ nɛ́ kɔ‘m; mɛ̀ nɛ́ wen mɔ‘i a̧‘m tɔ̧a̧‘e, a̧ tɛ we nɛ́ ɗoŋ mɔ n'aa kpa tɛ‘m h’ɛ́nɛ́.
Jesu tɛ pii ɗoŋ
16 «Dekpaa tikiɗi, ɛ́nɛ́ beka zɔk am ɓɔna, ɓɛɛ nɛ̀ ɗoŋ tikiɗi woyo, ɛ́nɛ́ tɛ zɔk am.» 17 Ɓɛɛ o ŋma ŋgaiwi kɔ̧-a̧ tɔ̧ sitɛ o ŋmaa: «Nɛ́ ge wen ge n'aa tɔ̧‘e: ‹Dekpaa tikiɗi, ɛ́nɛ́ beka zɔk am ɓɔna, ɓɛɛ nɛ̀ ɗoŋ tikiɗi woyo, ɛ́nɛ́ tɛ zɔk am,› in n'aa tɔ̧‘e: ‹Mi tɛ́ nɛ̀ sitɛ Dáà,› wo’ɛ ge? » 18 Ɓɛɛ wa tɔ̧: «Dekpaa tikiɗi'i bɔɔ nɛ́ ge, ɛ́ɛ́ iŋ k’ɛɛ gba̧a̧ wen n'aa tɔ̧'ɛ na.» 19 Jesu iŋa'e wa kɔ̧ɔ̧ mɛ ak wi, ɓɛɛ tɔ̧ ha̧ wa: «Ɛ́nɛ́ ak ŋmaa zu wen n'am tɔ̧ h’ɛ́nɛ́‘e: ‹Dekpaa tikiɗi, ɛ́nɛ́ beka zɔk am ɓɔna, ɓɛɛ nɛ̀ ɗoŋ tikiɗi woyo, ɛ́nɛ́ tɛ zɔk am’ɛ,› nde? 20 Nɛ́ kpasawen a̧‘m tɔ̧ h’ɛ́nɛ́; ɛ́nɛ́ tɛ hi̧i̧ kɔ̧a̧, ai nɛ̀ nú, ɓɛɛ o bíí zaŋnu tɛ duk kɔ‘i nɛ́ desee; ɛ́nɛ́ tɛ ya nɛ̀ ɗaŋsee, ɓɛɛ ɗaŋsee k’ɛ́nɛ́ tɛ kpai nɛ̀ desee. 21 Ŋgimbi nɛ̀ okoo ko bem, a̧ duk nɛ̀ ɗaŋsee wen ŋgimbi bɔnɛ hɔɔ kaɗi, ɓɛɛ ɗoŋ n'aa koo bem kaɗi, a̧ iŋ oi nyima zaŋ ɓɔna; a̧ duk nɛ̀ desee nyɛmna wen n'aa koo mbe bíí pi̧ zaŋnu. 22 Ɛ́nɛ́ mbɛt, kinii ɛ́nɛ́ ya nɛ̀ ɗaŋsee; ŋgimbi n'am tɛ pii ɗoŋ, ɛ́nɛ́ tɛ kpa desee, ɓɛɛ ŋma bíí nɛ̀ tɛ ba desee'i tɛ‘nɛ́ yinɛ bo na. 23 «Ɓɛɛ tɛ ŋgimbi'i, ɛ́nɛ́ beka ak am nɛ̀ ŋma mɔ ɓɔna. Nɛ́ kpasawen a̧‘m tɔ̧ h’ɛ́nɛ́; k’ɛ̀nɛ̀ ak ŋma mɔ er Dáà kɔ‘m nɛ̀ nin-am, a̧ tɛ ha̧ h’ɛ́nɛ́. 24 Hɔ kinii, ɛ́nɛ́ tɛ ak ŋma mɔ nɛ̀ nin-am hɔ̧ɔ̧ na. Ɛ̀nɛ̀ ák, ɓɛɛ ɛ́nɛ́ tɛ kpa, hegɔ ɓɛɛ ɛ́nɛ́ tɛ kpa kpasa desee.
Jesu gana zu mɔɔ-zaŋnu
25 «Mi tɔ̧ mɔ‘i h’ɛ́nɛ́ lɛŋ nɛ̀ lizaŋ, ɓɛɛ ŋgimbi tɛ hɔ n'am beka tɔ̧ wen h’ɛ́nɛ́ nɛ̀ lizaŋ ɓɔna; mi tɛ tɔ̧ wen mɔ ko Dáà h’ɛ́nɛ́ nɛ̀ sa̧a̧-a̧. 26 Ŋgimbi'i, ɛ́nɛ́ tɛ ak mɔ er Dáà nɛ̀ nin-am, ɓɛɛ bó nɛ́ mi tɔ̧ h’ɛ́nɛ́‘e nɛ́ mi'i tɛ kɔfi kɔfa mɔ er Dáà oi nú‘nɛ́ na, 27 wen Dáà kɔ̧ɔ̧‘nɛ́ wen n’ɛnɛ kɔ̧a̧‘m, ɓɛɛ k’ɛ́nɛ́ kɔ̧ ɗɔaa'e, mi gboo nɛ̀ tɛ́ Sɔ̧. 28 Mi gboo nɛ̀ tɛ̀ Dáà tɛ́ nɛnɛ pii zaŋnu, ɓɛɛ kinii, mi tɛ́ kur zaŋnu mɛ si ɗoŋ tɛ Dáà mɛ.» 29 O ŋgaiwi kɔ̧-a̧ tɔ̧a̧: «Kinii, ɛ̀nɛ̀ tɔ̧́ wen h’ɛ́ɛ́ nɛ̀ sa̧a̧-a̧, nɛ̀ bó nɛ́ lizaŋ ɓɔna. 30 Kinii ɛ́ɛ́ zɔka ɛ́nɛ́ iŋa mɔ lɛŋ; ŋma mɔ nɛ̀ bíí tɛ ak'nɛ́ zu-a ɓɛɛ ká gbaka'nɛ́ bo na. Nɛ́ hegɔ s’ɛ́ɛ́ kɔ̧ ɗɔaa'e ɛ́nɛ́ tɛ̀ɛ́ nɛ̀ tɛ́ Sɔ̧.» 31 Jesu kifa nú ha̧ wa: «Ɛ́nɛ́ kɔ̧ɔ̧ ɗɔaa kinii nde? 32 Ŋgimbi a̧ tɛ‘i, ɓɛɛ ŋgimbi'i nɛ́ mɔ‘i nɛ̀ hɔɔ kaɗi’ɛ, n’ɛnɛ tɛ pɛsi kpɔk kpɔk e'm ɛ̀n'am, ɓɛɛ mi bo ɛ̀n'am na, Dáà a̧a̧ in am. 33 Mi tɔ̧ɔ̧ mɔ‘i h’ɛ́nɛ́, wen h’ɛ́nɛ́ mɛ kpa ga̧a̧mɔ tɛ duka-a tɛ‘m. Ɛ́nɛ́ tɛ zɔk bɔnɛ sɛn zaŋnu, ɓɛɛ ɛ̀nɛ̀ nɔ́ ŋgiɗi! Mi gana zu mɔɔ-zaŋnu.»
Kɔfa-sɔ̧ ko Jesu
1 Ɗoŋ tɔ̧ɔ̧ wen'i Jesu ɓera yí si yiwese, ɓɛɛ tɔ̧: «Dáà, ŋgimbi hɔɔ kaɗi, ɛ̀nɛ̀ dé ha'i mɛ zɔk gasamɔ ko Bem k’ɛ́nɛ́, wen ha̧ Bem k’ɛ́nɛ́ mɛ de ha'i mɛ zɔk gasamɔ k’ɛ́nɛ́, 2 in wen ha̧ a̧ mɛ ha̧ duka-kpasa kpoo nɛ kpoo ha̧ o bíí n’ɛnɛ ha̧a̧ ha̧ a̧ lɛŋ, nyɛm nɛ̀ ɗoŋ ŋgai n’ɛnɛ ha̧a̧ ha̧ a̧ zu o bíí lɛŋ. 3 Ɓɛɛ duka-kpasa kpoo nɛ kpoo mɛ̀ nɛ́ wen ha̧ wa mɛ iŋ‘nɛ́, kpasa Sɔ̧ kpɔk, in Jesu Krist, wi n’ɛnɛ toma tɛnɛ. 4 Mi dee ha'i mɛ zɔk gasamɔ k’ɛ́nɛ́ zaŋnu’ɛ; tom n’ɛ́nɛ́ usa ha̧‘m mɛ́ de'i, mi dee kaɗi. 5 Ɓɛɛ kinii, Dáà, ɛ̀nɛ̀ dé ha̧‘m mɛ duk tɛ gasamɔ katɛ‘nɛ́, gasamɔ n'am duka so sɛnɛ katɛ‘nɛ́ nɛti sɛka'i bé tɛ̀ɛ́ dè nù. 6 «Mi usa nin'nɛ́ ha̧ o bíí n’ɛnɛ ha̧a̧ ha̧‘m mgbara o bíí zaŋnu’ɛ; wa duka so nɛ́ k’ɛ́nɛ́, ɓɛɛ ɛ́nɛ́ ha̧ wa ha̧‘m, nɛ́ mɔ'ɔ nɛ̀ wa kasa wen k’ɛ́nɛ́. 7 Kinii, wa iŋa'e mɔ lɛŋ n’ɛnɛ ha̧a̧ ha̧‘m tɛ̀ɛ́ nɛ̀ tɛ‘nɛ́; 8 wa iŋa'e wen n'am tɔ̧ɔ̧ ha̧ wa nɛ́ wen n’ɛnɛ tɔ̧ɔ̧ ha̧‘m. Wa kpɛka, ɓɛɛ wa iŋ nɛ̀ mbetɛ‘e mi gboo nɛ̀ tɛ‘nɛ́, ɓɛɛ wa kɔ̧ ɗɔaa'e nɛ́ ɛ́nɛ́'ɛ toma'm tɛnɛ. 9 «Mi kɔfi'nɛ́ wen zu wa; bó nɛ́ mi kɔfi'nɛ́ wen zu o bíí zaŋnu na, ɓɛɛ mi kɔfi'nɛ́ wen zu o bíí n’ɛnɛ ha̧a̧ ha̧‘m, wen wa nɛ́ k’ɛ́nɛ́. 10 Wen mɔ kɔ‘m lɛŋ nɛ́ k’ɛ́nɛ́, hee mɔ'ɔ nɛ̀ mɔ k’ɛ́nɛ́ lɛŋ nɛ́ kɔ‘m ga, ɓɛɛ nɛ́ tɛ-wa a'i zɔk nɛ̀ gasamɔ kɔ‘m. 11 Mi bo zaŋnu siti ɓɔna, ɓɛɛ kɔ-wa, wa biti zaŋnu. Mi nɛ́ kɔ‘m sitɛ‘nɛ́, Dáà Sa̧a̧ Wi; ɛ̀nɛ̀ zɔ́k wa nɛ̀ de-a nɛ̀ nin'nɛ́ n’ɛnɛ ha̧a̧ ha̧‘m, wen ha̧ wa mɛ́ duk kpɔk hee ɛ́ɛ́ duk kpɔk ga. 12 Ŋgimbi n'am duka so nɛnɛ in wa, mi zɔka wa nɛ̀ de-a nɛ̀ nin'nɛ́ n’ɛnɛ ha̧a̧ ha̧‘m; mi duu wee zɔk nɛ̀ wa, ɓɛɛ ŋma bíí mgbara wa yɔ kpɔk na, kànà nɛ́ wi nɛ tɛ̀ɛ́ yɔ so'i a̧ yɔɔ ɓɛɛ, wen ha̧ Yɔramɔ mɛ hɔ gba̧a̧. 13 Kinii mi si ɗoŋ tɛ‘nɛ́, ɓɛɛ s'am tɔ̧ wen'i ɓɔn zaŋnu’ɛ wen ha̧ wa mɛ kpa kpasa desee kɔ‘m. 14 Mi usa wen k’ɛ́nɛ́ ha̧ wa, ɓɛɛ o bíí zaŋnu sɛna wa wen wa bó nɛ́ o bíí zaŋnu na, hee mɔ'ɔ nɛ‘m bó nɛ́ bíí zaŋnu mbɛt na ga. 15 Bó nɛ́ mi kɔfi'nɛ́ mɛ kai wa yinɛ zaŋnu na, ɓɛɛ h’ɛ́nɛ́ mɛ́ pɛm wa yu nɛ̀ Wan-ɗaŋmɔ. 16 Wa bó nɛ́ o bíí zaŋnu na, hee mɔ'ɔ nɛ‘m bó nɛ́ bíí zaŋnu na’ɛ ga. 17 Ɛ̀nɛ̀ dé ha̧ kpasawen mɛ́ de ha̧ wa mɛ́ duk nɛ́ bíí k’ɛ́nɛ́: wen k’ɛ́nɛ́ nɛ́ kpasawen. 18 Hee ɛ́nɛ́ toma'm tɛnɛ zaŋnu ga, mi tom wa nɛnɛ zaŋnu mbɛt. 19 Ɓɛɛ mi ha̧a̧ tɛ‘m wen zu wa, wen ha̧ kpasawen mɛ de wa nɛ̀ bíí k’ɛ́nɛ́ mbɛt. 20 «Bó nɛ́ mi kɔfi'nɛ́ wen zu wa ɓɛɛ na; mi kɔfi'nɛ́ wen zu o bíí nɛ̀ tɛ kɔ̧ ɗɔaa ha̧‘m wen zu usamɔ kɔ-wa, 21 wen ha̧ wa lɛŋ mɛ́ duk kpɔk, hee mɔ'ɔ nɛ̀ ɛ́nɛ́, Dáà, duk tɛ‘m, ɓɛɛ mi duk tɛ‘nɛ́'ɛ ga, ha̧ wa mɛ duk tɛ yɛ mbɛt, wen ha̧ o bíí zaŋnu mɛ iŋ‘e, nɛ́ ɛ́nɛ́'ɛ toma'm tɛnɛ nɛ̀ mbetɛ. 22 Gasamɔ n’ɛnɛ ha̧a̧ ha̧‘m, mi ha̧a̧ ha̧ wa, wen ha̧ wa mɛ́ duk kpɔk hee ɛ́ɛ́ ga. 23 Mi tɛ duk tɛ-wa, hee mɔ'ɔ n’ɛnɛ duk nɛnɛ tɛ‘m’ɛ ga, wen ha̧ wa mɛ duk kpɔk nɛ̀ mbetɛ; hegɔ, ɓɛɛ o bíí zaŋnu tɛ iŋ‘e nɛ́ ɛ́nɛ́'ɛ toma'm tɛnɛ, ɓɛɛ ɛ́nɛ́ kɔ̧ɔ̧ wa hee mɔ'ɔ n’ɛnɛ kɔ̧ɔ̧ nɛ‘m’ɛ ga. 24 «Dáà, mi kɔ̧ɔ̧ ha̧ o bíí n’ɛnɛ ha̧a̧ ha̧‘m mɛ duk in am sɛn fara n'am duk sɛnɛ, wen ha̧ wa mɛ zɔk gasamɔ n’ɛnɛ ha̧a̧ ha̧‘m, wen ɛ́nɛ́ kɔ̧a̧‘m nɛ̀ ku̧u̧naŋ-a sɛka nù biti de. 25 Dáà wi-de-mɔ nɛ̀ yuwar-a, o bíí zaŋnu iŋ‘nɛ́ na, ɓɛɛ kɔ‘m, mi iŋa'nɛ́; o wi nɔ'ɔ mbɛt iŋa'e nɛ́ ɛ́nɛ́'ɛ toma'm tɛnɛ. 26 Mi dee ha̧ wa mɛ́ iŋ nin'nɛ́, ɓɛɛ mi tɛ de ha̧ wa mɛ́ iŋ siti mbɛt, wen ha̧ kɔ̧ɔ̧mɔ n’ɛnɛ kɔ̧ɔ̧ nɛ‘m'i mɛ́ duk tɛ-wa in ha̧‘m mɛ́ duk tɛ-wa mbɛt.»
Wa baa Jesu
1 Jesu tɔ̧ɔ̧ wen'i kaɗi, ɓɛɛ yak in o ŋgaiwi kɔ‘i si kur Sɛdrɔŋ mɛ. Ŋma fɔ a̧a̧ so hi̧i̧, ɓɛɛ Jesu ye kpɛɛfɔ‘i in o ŋgaiwi kɔ‘i. 2 Judas, wi-e-ɗɔra tɛ Jesu iŋa fara'i nɛ̀ de-a, wen ɓɔnsɛnɛ Jesu duka so mɔi̧ in o ŋgaiwi kɔ‘i sɛn hi̧i̧. 3 Ɓɛɛ nɛ́ mɔ'ɔ nɛ̀ Judas kaia o gíí wi-biro in o dogari nɛ̀ o gasa wan-ɗafi-sɔ̧ in o Fariziɛn toma, ɓɛɛ mgbɔ wa nɛ̀ wèé-kan in lamba ká bá nɛ̀ o boi-biro si kpɛɛfɔ‘i. 4 Jesu iŋa mɔ lɛŋ nɛ̀ tɛ hɔ zu wi; nɛ́ mɔ'ɔ n'aa nɛ̀ɛ̀ siti, ɓɛɛ tɔ̧ ha̧ wa: «Ɛ́nɛ́ kíí nɛ́ o?» 5 Wa kifa nú ha̧ a̧: «Ɛ́ɛ́ kíí nɛ́ Jesu be Nazarɛt.» Ɓɛɛ Jesu tɔ̧ ha̧ wa: «Mí nɛ́ mɔ'ɔ.» Ŋgimbi'i, Judas, wi-e-ɗɔra tɛ-a a̧a̧ so mgbara wa mbɛt. 6 Tɔ̧a̧-a̧ nɛ̀ Jesu tɔ̧ɔ̧ ha̧ wa: «Mí nɛ́ mɔ'ɔ,» wó, wa pɛɛ si ɗoŋ, ɓɛɛ wa yo nù gbéyéŋ. 7 Jesu aka wa woyo: «Ɛ́nɛ́ kíí nɛ́ o?» Wa tɔ̧a̧: «Ɛ́ɛ́ kíí nɛ́ Jesu be Nazarɛt.» 8 Ɓɛɛ Jesu kifi nú ha̧ wa: «Bó nɛ́ mi tɔ̧ɔ̧ h’ɛ́nɛ́‘e, mí nɛ́ mɔ'ɔ na? Hegɔ, kà bó nɛ́ mi ɛ̀nɛ̀ kii, ɓɛɛ ɛ̀nɛ̀ é o wi nɔ'ɔ ha̧ wa yak kɔ-wa.» 9 Hegɔ, wen nɛ Jesu tɔ̧ɔ̧ so'e: «Bíí kpɔk mgbara o bíí n’ɛnɛ ha̧a̧ ha̧‘m yɔ na,» wó‘i, hɔɔ gba̧a̧. 10 Simɔŋ Pierre nɛ̀ a̧a̧ so nɛ̀ gba-paa, daka, ɓɛɛ gɔm nɛ̀ wi-de-tom ko gasa wan-ɗafi-sɔ̧, ɓɛɛ mɛ̧ zer-aa mɛ wiiko pi̧ nù. Nin wi’ɛi nɛ́ Malkus. 11 Ɓɛɛ Jesu tɔ̧ ha̧ Pierre: «Mɛ̀ zú gba-paa kɔ-mɛ kɔ̧́ koɓo-a. Mɛ́ ta kɔ-mɛ‘e mi beka nɔ́ be-ɗele-bɔnɛ nɛ̀ Dáà ha̧a̧ ha̧‘m'i na?»
Jesu a̧a̧ sɛn ti Kaif in Ha̧n
12 O wi-biro in gasawi kɔ‘i ká bá nɛ̀ o dogari ko o Juif baa Jesu, ɓɛɛ wa hɛr a̧. 13 Wa mgbɔɔ a̧ nɛnɛ ti Ha̧n nɛti; Ha̧n nɛ́ for Kaif nɛ̀ duka gasa wan-ɗafi-sɔ̧ tɛ pɛ‘i. 14 Nɛ́ Kaif'i a̧ tɔ̧ɔ̧ so ha̧ o Juif'e ndé: «Dèè so gan ha̧ bíí kpɔk mɛ fe wen gɔna zu dukbíí.»
Pierre kafa Jesu
15 Simɔŋ Pierre in ŋma ŋgaiwi nɛ̀ɛ̀ so ɗoŋ Jesu. Hee mɔ'ɔ nɛ̀ gasa wan-ɗafi-sɔ̧ iŋa ti ŋgaiwi'i nɛti ga, ŋgaiwi yee si kɔ̧́ tua ko gasa wan-ɗafi-sɔ̧ kpɔk in Jesu. 16 Ɓɛɛ Pierre duk kɔ‘i ká̧ nú tua nɛ̀ zan. Ɓii ŋgaiwi nɛ̀ gasa wan-ɗafi-sɔ̧ iŋa'i gboo zan, ɓɛɛ tɔ̧ wen in ko-pɛm-nú tua, ɓɛɛ a̧ e ha̧ Pierre mɛ ye mɔ. 17 Ɓɛɛ boko-be-pɛm nú tua tɔ̧ ha̧ Pierre: «Bó nɛ́ mɛ́ mbɛt, nɛ́ ŋma ŋgaiwi ko wi’ɛ na?» Ɓɛɛ Pierre kifi: «Bó nɛ́ mí na.» 18 O wi-de-tom in o dogari yee so wee ɔ nɛnɛ wen gɛ̧ɛ̧ de so nɛ́ mɔ; Pierre mbɛt nɛ̀ɛ̀ yor fara'i ɔ nɛ̀ wee in wa.
Gasa wan-ɗafi-sɔ̧ aka Jesu
19 Ɓɛɛ gasa wan-ɗafi-sɔ̧ ku̧ naŋ aka Jesu zu o ŋgaiwi in zu usamɔ kɔ̧-a̧. 20 Jesu kifa nú ha̧ a̧: «Mi tɔ̧ɔ̧ wen nɛ̀ gbaayí o bíí lɛŋ. Mi usa mɔ ɓɔnsɛnɛ kɔ̧̀ o tua-mɔi̧a-a, in kɔ̧́ Tua ko Sɔ̧ fara nɛ̀ o Juif mɔi̧ ŋmaa sɛnɛ, ɓɛɛ mi tɔ̧ ŋma wen nɛ̀ hu̧sa̧-a̧ na. 21 Wen ge sa mɛ ak nɛ‘m ge? Mɔ n'am tɔ̧a̧‘i, mɛ̀ ák nɛ́ o wi-zia-a ɛ̧, wen wa iŋa mɔ n'am tɔ̧a̧ nɛ̀ de-a.» 22 Ŋma dogari nɛ̀ yora so hi̧i̧, mbɛra yí Jesu tɛ wen'i ɓɛɛ tɔ̧: «Nɛ́ hegɔ a̧ mɛ tɛ̀ɛ́ kifi nɛ̀ nú ha̧ gasa wan-ɗafi-sɔ̧?» 23 Jesu kifa nú ha̧ a̧: «Kà‘m nɛ́ tɔ̧ɔ̧ ɗaŋ wen, ɓɛɛ mɛ̀ tɔ̧̀. Ɓɛɛ kà‘m nɛ́ tɔ̧ɔ̧ wen nɛ̀ de-a, mɛ́ mbɛr yí‘m wen ge?» 24 Ɓɛɛ Ha̧n tom Jesu nɛ̀ oi hɛra-a sitɛ gasa wan-ɗafi-sɔ̧, Kaif.
Pierre kafa Jesu woyo
25 Tɛ́ ŋgimbi'i, Simɔŋ Pierre duka so hi̧i̧ ɔ nɛ̀ wee. Ɓɛɛ wa tɔ̧ ha̧ a̧: «Bó nɛ́ mɛ́ mbɛt nɛ́ ŋma ŋgaiwi ko wi’ɛ na?» Pierre kafa ɓɛɛ tɔ̧: «Bó nɛ́ mí na.» 26 Ŋma wi-de-tom ko gasa wan-ɗafi-sɔ̧, nàm ko wi nɛ̀ Pierre ɓira so zer-aa, tɔ̧a̧: «Bó nɛ́ mí zɔka mɛ in a̧ kpɛɛfɔ mɛ‘i na?» 27 Pierre kafa woyo, ɓɛɛ tɛ́ kale ŋgimbi'i, gata-kɔra hèé mɔ.
Jesu a̧a̧ ti Pilat
28 Mɔ gɔna kaɗi, ɓɛɛ wa mgbɔ Jesu nɛ̀ tɛ̀ ko Kaif nɛnɛ si tɛ̀ ko Pilat mɛ; wa kɔ̧ yee tua'i na, wen ká war-tɛ-wa tɛɛ ɗaŋ, kà bé dè ká wa nyɔŋa gbaŋa Paska. 29 Nɛ́ mɔ'ɔ nɛ̀ Pilat gboo kpa wa zan ɓɛɛ tɔ̧: «Ɛ̀nɛ̀ tɔ̧́ gba̧a̧ mɔ n’ɛnɛ wuli nɛ̀ wi’ɛ, ɛ̀ɛ̀ zìì.» 30 Wa kifa nú ha̧ a̧: «Kà wi’ɛ de so ŋma ɗaŋmɔ na, bék’ɛ̀ɛ̀ ba so a̧ tɛnɛ h’ɛ́nɛ́ na.» 31 Pilat tɔ̧ɔ̧ ha̧ wa: «Ɛ́nɛ́ nɛ̀ tɛ‘nɛ́, ɛ̀nɛ̀ bá a̧, ɓɛɛ ɛ̀nɛ̀ gɔ́n kita zu a̧ nyɛm nɛ̀ ɗoŋ heembea k’ɛ́nɛ́.» O Juif kifa nú ha̧ Pilat: «Ɛ́ɛ́ bó nɛ̀ ŋgai mɛ gbɛ bíí na.» 32 Mɔ‘i dee hegɔ wen ha̧ wen nɛ̀ Jesu tɔ̧ɔ̧ so zu fio n'aa tɛ̀ɛ́ fe, mɛ hɔ gba̧a̧. 33 Pilat yee kɔ̧́ tua kɔ‘i, sa Jesu, ɓɛɛ tɔ̧: «Mɛ́ nɛ́ wannu ko o Juif?» 34 Jesu kifa nú: «Nɛ́ mɛ́'ɛ tɔ̧ wen'i nɛ̀ tɛ-mɛ náà, kóó nɛ́ o ŋma bíí a̧ tɔ̧ɔ̧ wen kɔ‘m ha̧ mɛ nde?» 35 Pilat kifa nú ha̧ a̧: «Mɛ́ zɔka mi nɛ́ Juif in mɛɛ? Nɛ́ mgbák tugun bíí kɔ-mɛ in o gasa wan-ɗafi-sɔ̧ a̧ baa mɛ tɛnɛ ha̧‘m; ɓɛɛ mɛ́ dee nɛ́ ge mɔ ge?» Jesu kifa nú: «Wan kɔ‘m bó nɛ́ wan zaŋnu’ɛ na. 36 Kà wan kɔ‘m a̧ bó só nɛ́ wan mɛ zaŋnu’ɛ, ɓɛɛ o dogari kɔ‘m tɛɛ ye biro zu'm, wen ká wa tɛɛ e'm er o Juif. Mɔ kpɔk, wan kɔ‘m bó nɛ́ wan mɛ zaŋnu’ɛ na.» 37 Pilat aka a̧: «Hegɔ mɛ́ nɛ́ wannu?» Jesu kifa nú ha̧ a̧: «Nɛ́ mɛ́'ɛ tɔ̧a̧‘e mí nɛ́ wannu. Mi tɛa, ɓɛɛ wa ko'm zaŋnu’ɛ mɛ de sedaako wen kpasawen; kóó o ndé nɛ̀ duk tɛ kpasawen zii nɛ́ wen kɔ‘m.» 38 Pilat aka a̧: «Kpasawen nɛ́ ge?» Tɛ́ wen'i, Pilat gboo kpa o Juif zan woyo, ɓɛɛ tɔ̧ ha̧ wa: «War kɔ‘m, mi kpa ŋma yoŋgo nɛ̀ nyɛma ha̧ kita mɛ tik wi’ɛ na. 39 Ɓɛɛ ta-oi-mɔ k’ɛ́nɛ́, mɛ̀ nɛ́ ha̧‘m mɛ gbo ŋma wi-zɔɓɔ h’ɛ́nɛ́ tɛ gbaŋa Paska. Ɛ́nɛ́ kɔ̧ɔ̧ a̧‘m gbó nɛ́ wannu ko o Juif h’ɛ́nɛ́ nde?» 40 Ɓɛɛ wa ku̧ naŋ hiɗa mɔ: «Bó nɛ́ a̧ ɛ́ɛ́ kɔ̧ɔ̧ na, ɛ̀nɛ̀ gbó nɛ́ Barabas ɛ̧!» Barabas duka so nɛ́ kpɔ̧i̧-gba̧a̧-nin.
1 Ɓɛɛ Pilat tɔ̧ ha̧ o wi-biro mɛ ba Jesu nɛ́ɛ̀ gusi. 2 Nɛ́ mɔ'ɔ nɛ̀ o wi-biro kara tɛnmɔ gu zu-a; ɓɛɛ wa pi̧ gasa gbɛ̧ laa tɛ-a. 3 Wa ɗɔŋa sitɛ a̧, ɓɛɛ tɔ̧: «Ɛ̀nɛ̀ wór mɔ, wannu ko o Juif!» Ɓɛɛ wa ye tɛ mbɛra a̧. 4 Pilat gboo woyo tɔ̧ ha̧ o Juif: «A̧i̧yoo! Mi tɛ mgbɔ a̧ gbonɛ h’ɛ́nɛ́ mɛ iŋ‘e, mi kpa ŋma yoŋgo nɛ̀ nyɛma mɛ de ha̧ kita mɛ tik a̧ na.» 5 Nɛ́ mɔ'ɔ nɛ̀ Jesu gboo pii tɛ wa nɛ̀ oi tɛnmɔ zu in gbɛ̧ laa. Ɓɛɛ Pilat tɔ̧ ha̧ wa: «Zɔ́k, wi’ɛ nɛ́ mɔ'ɔ!» 6 Zɔka Jesu nɛ o gasa wan-ɗafi-sɔ̧ in o bíí kɔ-wa zɔka hegɔ, ɓɛɛ wa gai mɔ: «Ɛ̀nɛ̀ mgbóí a̧ zu te-diŋa! Ɛ̀nɛ̀ mgbóí a̧ zu te-diŋa!» Pilat tɔ̧ɔ̧ ha̧ wa: «Ɛ́nɛ́ nɛ̀ tɛ‘nɛ́, ɛ̀nɛ̀ bá a̧, ɓɛɛ ɛ̀nɛ̀ mgbóí a̧ zu te-diŋa. Kɔ‘m, mi kpa ŋma yoŋgo nɛ̀ nyɛma mɛ de ha̧ kita mɛ tik a̧ na.» 7 O Juif kifa nú ha̧ a̧: «Ɛ́ɛ́ a̧a̧ nɛ̀ ŋma heembea k’ɛɛ, ɓɛɛ heembea'i usa'e a̧ tɛ fe kànà wen n'aa tɔ̧a̧‘e a̧ nɛ́ Bem ko Sɔ̧.» 8 Ŋgimbi nɛ̀ Pilat zia wen'i, kíì dee a̧ gan kuti-a. 9 A̧ yee tua woyo, ɓɛɛ a̧ ak Jesu: «Mɛ́ tɛ́ nɛ̀ de?» Jesu kifi ŋma nú ha̧ a̧ na. 10 Ɓɛɛ Pilat tɔ̧ ha̧ a̧: «Nɛ́ mi a̧ mɛ bɛ̧ kifa nú ha̧ a̧'ɛ? Mɛ́ iŋ‘e mi a̧a̧ nɛ̀ ŋgai mɛ gbo mɛ yinɛ, kóó mɛ mgboi mɛ zu te-diŋa mbɛt na nde?» 11 Jesu kifa nú ha̧ a̧: «Kà Sɔ̧ ha̧ so ŋgai ha̧ mɛ nɛ̀ ŋgɔn mɛ na, ɓɛɛ bó nɛ́ mɛ́ tɛ̀ɛ́ kpa ŋma ŋgai zu'm na; mɛ̀ nɛ́ hegɔ, nɛ́ wi nɛ̀ ea'm er-mɛ‘i a̧ dee gasa ɗaŋmɔ ɛ̧.» 12 Tɛ́ ŋgimbi'i, Pilat ku̧u̧ naŋ kia war mɛ gbo Jesu pi̧ nù, ɓɛɛ o Juif ye tɛ gaiamɔ tɔ̧ nɛnɛ‘e: «Kà mɛ̀ gbo a̧ pi̧ nù, ɓɛɛ mɛ bó nɛ́ sɛm ko Sezar na, wen kóó o ndé nɛ̀ tɔ̧‘e wi nɛ́ wannu bá nɛ́ zù wé nɛ̀ Sezar.» 13 Zia wen'i nɛ̀ Pilat zia hegɔ, a̧ mgbɔɔ Jesu si zan, ɓɛɛ duk nù fara-gɔn-kita kɔ̧-a̧ nɛ̀ wa mboo nɛ̀ ta (nɛ̀‘i sa nɛ̀ nú hébreu'e «Gabata»). 14 Wese'i duka nɛ́ wese-ɗafi-mɔ wen gbaŋa Paska, ká wese hɛɗa see-zu kaɗi. Pilat tɔ̧ɔ̧ ha̧ o Juif: «Zɔ́k, wannu k’ɛ́nɛ́ nɛ́ mɔ'ɔ.» 15 Ɓɛɛ wa tɔ̧: «A̧ a̧ fé fee! A̧ a̧ fé fee ɛ̧! Ɛ̀nɛ̀ mgbóí a̧ zu te-diŋa!» Pilat aka wa: «A̧‘m mgboi wannu k’ɛ́nɛ́ zu te-diŋa nde?» O gasa wan-ɗafi-sɔ̧ kifa nú: «Ɛ́ɛ́ bó nɛ̀ ŋma wannu gan zu Sezar na!» 16 Ɓɛɛ Pilat e Jesu er-wa ha̧ wa mɛ mgboi a̧ zu te-diŋa. Ɓɛɛ wa ba Jesu.
Wa mgboia Jesu zu te-diŋa
17 Hegɔ ɓɛɛ wa ba Jesu. Nɛ́ mɔ'ɔ nɛ̀ Jesu tuia te-diŋa kɔ‘i nɛ̀ saaye yak si fara nɛ̀‘i sa'e: «Fara Koŋgoi-zu» (nɛ̀ nú hébreu nɛ́ «Gɔlgɔta»), 18 ɓɛɛ wa mgboi a̧ zu te-diŋa in o ŋma bíí yiitoo, kpɔk nɛ̀ war wii-er-a, ɓii-aa nɛ̀ war gale, e Jesu see-a. 19 Ɓɛɛ Pilat yɔr mɔ e zu te-diŋa nɛ̀ tɔ̧a̧‘e: «Jesu be Nazarɛt, wannu ko o Juif.» 20 O Juif nɛ̀ dɔka-a tɔra yɔramɔ‘i, wen fara nɛ̀ wa mgboia Jesu zu te-diŋa sɛnɛ‘i nyɛi̧ nɛ̀ ye na. Wa yɔra mɔ‘i nɛ̀ nú hébreu, in nú latin ká bá nɛ̀ nú grɛk. 21 O gasa wan-ɗafi-sɔ̧ ko o Juif tɔ̧ɔ̧ ha̧ Pilat: «Bó nɛ́ ɛ́nɛ́ tɛ̀ɛ́ yɔr'e: ‹Wannu ko o Juif na,› ɓɛɛ ɛ́nɛ́ tɛ̀ɛ́ yɔr so'e: ‹Wi’ɛ tɔ̧a̧‘e: wi nɛ́ wannu ko o Juif.› » 22 Pilat kifa nú: «Mɔ n'am yɔra, mi yɔra kaɗi.»
Wa kɛ̧ɛ̧ laa ko Jesu
23 Ɗoŋ nɛ̀ o wi-biro mgboia Jesu zu te-diŋa kaɗi, wa kaia o laa kɔ̧-a̧ kɛ̧ tɛ fara naar, ha̧ ha̧ o ŋmaa; ɓɛɛ nɛ̀ war ko be laa-pi̧-nɛ̀-ɗɔɔ, i̧i̧ ɓɔna wen bó nɛ́ wa fura fur na. Kɔ̧́ laa'i kpɔk, ɓɛɛ wa toka so tok nɛ̀ ger-a mɛ pii ɗɔɔ. 24 Nɛ́ mɔ'ɔ nɛ̀ wa tɔ̧ɔ̧ sitɛ o ŋmaa: «K’ɛ́ɛ́ a̧k be laa’ɛ na, ɛ̀ɛ̀ bí nɛ̀ mbaɗi; wi nɛ̀ nyɔŋa, gbɛa.» Hegɔ mɔ nɛ̀ Yɔramɔ tɔ̧a̧ so'e: «Wa kɛ̧ɛ̧ laa kɔ‘m nɛ̀ ŋmaa, wa bìì be laa kɔ‘m nɛ̀ mbaɗi,» hɔɔ gba̧a̧. Mɔ nɛ̀ o wi-biro dee nɛ́ mɔ‘i.
Jesu in nàà kɔ‘i
25 Nàà ko Jesu yora ká̧ te-diŋa ko Jesu in nya-wi, seka Marii kóò ko Kleopas, ká bá nɛ̀ Marii Magdala. 26 Jesu zɔka nàà kɔ‘i in ŋgaiwi n'aa kɔ̧ɔ̧ nyɛmna nɛ̀ yor katɛ a̧, ɓɛɛ a̧ tɔ̧ ha̧ nàà kɔ̧-a̧: «Kóò'ɛ, zɔ́k bem kɔ-mɛ hɛ̧ɛ̧.» 27 Ɓɛɛ a̧ tɔ̧ ha̧ ŋgaiwi'i: «Mɛ̀ zɔ́k nàà kɔ-mɛ hɛ̧ɛ̧.» Nɛ́ tɛ ŋgimbi'i a̧ ŋgaiwi'i mgbɔɔ nɛ̀ nàà ko Jesu si tɛ̀ kɔ‘i.
Fio ko Jesu
28 Nɛ̀ Jesu iŋa'e mɔ lɛŋ kaɗa kaɗi, a̧ tɔ̧a̧: «Wɔ-yì gbɛ‘m gbɛɛ,» wen ha̧ mɔ nɛ̀ yɔra so mɛ hɔ gba̧a̧ lɛŋ. 29 Ŋma kpánà duka so hi̧i̧ nɛ̀ duna nɛ̀ kpa̧i̧a̧-dɔ̧ɔ̧. Wa pi̧i̧ saala ɗɔɔ-aa sɔk nú bé tè, ɓɛɛ wa nyɛi̧ e nú Jesu. 30 Nɛ̀ Jesu nɔɔ kpa̧i̧a̧ dɔ̧ɔ̧ kaɗi, a̧ tɔ̧a̧: «Mɔ lɛŋ kaɗa kaɗi.» A̧ zuma zu-a, ɓɛɛ a̧ fe. 31 Wese'i duka nɛ́ ŋgimbi ɗafa mɔ wen gbaŋa Paska. Nɛ́ mɔ'ɔ nɛ̀ o Juif tɔ̧ɔ̧ ha̧ Pilat mɛ gbin ku o wi nɛ̀ wa hɛra zu te-diŋa mɛ kai wɔ̀r-wà yínɛ́, wen ká tɛɛ ɓɔn zu te-diŋa wese-ɔm-tɛ, wen wese-ɔm-tɛ‘i tɛ̀ɛ́ duk nɛ́ gasa wese nyɛmna. O wi-biro toka ká̧ ɔm Jesu 32 Hegɔ, o wi-biro nɛ̀ɛ̀ gbin ku o wi nɔ‘i yiitoo nɛ̀ wa hɛra zu te-diŋa in Jesu'i. 33 Kà wa tɛ hɔ tɛ Jesu, wa zɔka a̧ fee kaɗi, ɓɛɛ wa gbin ku-a na; 34 ɓɛɛ ŋma wi-biro tok ɔm-a nɛ̀ labo, ɓɛɛ tɔk in yì gbo a nù. 35 Mɛ̀ nɛ́ wi nɛ̀ zɔka mɔ‘i a̧ dee sedaako-a, ɓɛɛ sedaako kɔ̧-a̧‘i nɛ́ kpasa sedaako; wi’ɛi iŋa'e wen n'aa tɔ̧‘i nɛ́ kpasawen, wen h’ɛ́nɛ́ mbɛt mɛ́ kɔ̧ ɗɔaa. 36 Mɔ‘i dee ha̧ Yɔramɔ nɛ̀ tɔ̧ɔ̧ so'e: «Wa gbin gba̧a̧-tɛ‘m na,» mɛ hɔ gba̧a̧. 37 Ŋma Yɔramɔ tɔ̧ɔ̧ mbɛt'e: «Wa tɛ zɔk wi nɛ̀ wa toka so nɛ̀ gbaayí-wa.»
Guna Jesu
38 Ɗoŋ mɔ‘i, Jozɛf be Arimatee, nɛ̀ duka so nɛ́ ŋma ŋgaiwi ko Jesu nɛ̀ ti fui, wen a̧ dee so kíì o Juif, nɛ̀ɛ̀ ak Pilat mɛ ba wɔr Jesu. Pilat ha̧a̧ war ha̧ a̧, ɓɛɛ a̧ nɛ́ɛ̀ ba wɔr Jesu. 39 Nikodɛm nɛ̀ nɛ̀ɛ̀ so tɛ Jesu mɛ zɛ nɛ̀ɛ̀ mbɛt. A̧ baa nɔ̧́-nyama zaŋ nɛ̀ ŋmaa in fuu-nyama, dita-a dee hee kilo ɓu-taar ga. 40 Wa baa wɔr Jesu, ɓɛɛ wa ye a̧ nɛ̀ laa, wa aa fuu-nyama tɛ-a mbɛt hee mɔ'ɔ nɛ̀ o Juif de ɓɔnsɛnɛ tɛ guna fio kɔ-wa ga. 41 Ŋma fɔ duka so ká̧ fara nɛ̀ wa mgboia Jesu zu te-diŋa sɛnɛ‘i, ɓɛɛ ŋma kɔ̧́ fio nɛ̀‘i tɛ gun bíí sɛnɛ nɛti na duka so hi̧i̧ mbɛt. 42 Hee mɔ'ɔ nɛ̀ o Juif a̧a̧ tɛ ɗafa mɔ wen gbaŋa kɔ‘i ga, wa guna Jesu ɓɔn hi̧i̧, wen kɔ̧́ fio nyɛi̧ nɛ̀ fara'i na.
Jesu gboo kɔ̧́ fio
1 Wese alat mɛ tutuyɛ sut, ká mɔ tɛ gɔn hɔ̧ɔ̧ na, Marii Magdala nɛ̀ɛ̀ si zu pɛsi mɛ, ɓɛɛ zɔk'e wa kina ta yinɛ nú pɛsi-fio. 2 A̧ maa yì si ɗoŋ nɛ́ɛ̀ kpa Simɔŋ Pierre in ɓii ŋgaiwi nɛ̀ Jesu kɔ̧ɔ̧ nyɛmna, ɓɛɛ tɔ̧ ha̧ wa: «Wa baa Gasa Wan kɔ̧́ pɛsi yinɛ, ɓɛɛ ɛ́ɛ́ iŋ fara nɛ̀ wa ee a̧ sɛnɛ na.» 3 Pierre kura in ɓii ŋgaiwi'i yak si nú pɛsi-fio mɛ. 4 Wa maa yì in ŋmaa nɛnɛ, ɓɛɛ ɓii ŋgaiwi ma yì gan Pierre, ɓɛɛ hɔ nú pɛsi ti ha̧ a̧. 5 A̧ oŋga si ɗɔɔ, ɓɛɛ a̧ zɔk o laa-kar-fio nɛ̀‘i mɔi̧a a hi̧i̧; ɓɛɛ a̧ ye si kɔ̧́ pɛsi-fio mɛ na. 6 Simɔŋ Pierre hɔɔ kɔ‘i nɛ̀ ɗoŋ, ɓɛɛ gɔm ye kɔ̧́ pɛsi; a̧ zɔka o laa-kar-fio nɛ̀‘i mɔi̧a a hi̧i̧, 7 ɓɛɛ zɔ̧-laa nɛ̀ wa kara so nɛ̀ zu Jesu bo in o laa-kar-fio na; zɔ̧-laa'i duka kɔ‘i nɛ̀ oi kara-a ŋma fara nɛtɛ. 8 Ɓii ŋgaiwi nɛ̀ hɔɔ so ti'i yee kɔ̧́ pɛsi mbɛt, a̧ zɔka mɔ‘i, ɓɛɛ a̧ kɔ̧ ɗɔaa. 9 (Wen hɔ tɛ ŋgimbi'i, o ŋgaiwi ko Jesu tɛ iŋ mgbara Yɔramɔ nɛ̀ tɔ̧a̧‘e, Jesu tɛ kur tɛ fio, na.) 10 Ɓɛɛ o ngaiwi nɔ‘i kai ŋmaa si ɗoŋ tɛ̀ kɔ‘i.
Marii Magdala zɔka Jesu
11 Marii duka so kɔ‘i zan ká̧ nú pɛsi-fio mɛ, hí̧í̧ nɛ̀ kɔ̧a̧; nɛ́ mɔ'ɔ n'aa oŋga zɔk mɔ si kɔ̧́ pɛsi-fio mɛ, 12 ɓɛɛ a̧ zɔk o betom mɛ yiwese yiitoo nɛ̀ pi̧i̧ bu laa, nɛ̀ ya nù fara nɛ wa ee so Jesu sɛnɛ; ŋma kpɔk duka nɛ̀ war zu-a, ɓɛɛ ɓii wi duk kɔ‘i nɛ̀ war naŋ-a. 13 Wa tɔ̧ɔ̧ ha̧ a̧: «Kóò'ɛ, mɛ hi̧i̧ kɔ̧a̧ wen ge?» A̧ kifa nú ha̧ wa. «Nɛ́ Gasa Wan kɔ‘m a̧ wa baa yinɛ, ɓɛɛ mi iŋ fara nɛ̀ wa ea a̧ sɛnɛ na.» 14 A̧ biti tɔ̧ɔ̧ wen, kà a̧ tɛ zik tɛ, Jesu nɛ́ mɔ'ɔ nɛ̀ yor’ɛ, ɓɛɛ a̧ iŋ so'e nɛ́ Jesu na. 15 Jesu aka a̧: «Kóò'ɛ, mɛ́ hi̧i̧ kɔ̧a̧ wen ge? Mɛ́ kii nɛ́ o?» Marii ta kɔ‘i'e wi’ɛi nɛ́ wan-pɛm-fɔ, ɓɛɛ tɔ̧ ha̧ a̧: «Nyaa, kà nɛ́ bòò nɛ́ ɛ́nɛ́'ɛ baa a̧ yinɛ, ɓɛɛ n’ɛ̀nɛ̀ úsí fara n’ɛnɛ ea a̧ sɛnɛ, ha̧‘m nɛ́ɛ̀ ba a̧.» 16 Ɓɛɛ Jesu sa a̧: «Marii!» Marii zika tɛ, ɓɛɛ kɔ̧ sara: «Rabuni!» (mɛ̀ nɛ́ wen nɛ̀ tɔ̧ nɛ̀ nú hébreu'e «Wan-usi-mɔ».) 17 Jesu tɔ̧ɔ̧ ha̧ a̧: «Ká mɛ́ fó tɛ̀‘m ná, wen mi tɛ daŋ sitɛ Dáà kɔ‘m hɔ̧ɔ̧ na. War kɔ-mɛ, mɛ̀ nɛ́ɛ̀ kpá o nya'm, ɓɛɛ mɛ̀ tɔ̧́ ha̧ wa'e, mi tɛ daŋ sitɛ Dáà kɔ‘m nɛ̀ duk nɛ́ Dáà k’ɛ́nɛ́, sitɛ Sɔ̧ kɔ‘m nɛ̀ duk nɛ́ Sɔ̧ k’ɛ́nɛ́.» 18 Ɓɛɛ Marii Magdala nɛ́ɛ̀ we ɗoŋ wen'i ha̧ o ŋgaiwi'e wi zɔka Gasa Wan, ɓɛɛ wen n'aa tɔ̧ɔ̧ ha'i nɛ́ mɔ‘i.
O ŋgaiwi ko Jesu zɔka a̧
19 Mɛ́ ga̧a̧mɔ wese alat'i, o ŋgaiwi kɔ̧-a̧ mɔi̧a so ŋmaa kɔ̧́ ŋma tua, ɓɛɛ man nú tua e zu wa wen kíì o Juif. Jesu yee tua yor mgbara wa; ɓɛɛ tɔ̧: «Ga̧a̧mɔ a̧ dúk in'nɛ̀ɛ́!» 20 Ŋgimbi n'aa tɔ̧ nɛ̀ wen'i, a̧ usa kɔ̧̀ er-a in ká̧ ɔm-a ha̧ wa. O ŋgaiwi zɔka Gasa Wan, ɓɛɛ wa kpa desee nyɛmna. 21 A̧ tɔ̧ɔ̧ ha̧ wa woyo: «Ga̧a̧mɔ a̧ dúk in'nɛ̀ɛ́! Hee mɔ'ɔ nɛ̀ Dáà toma'm ga, mi tom ɛnɛ mbɛt.» 22 Ɗoŋ n'aa tɔ̧ɔ̧ wen'i kaɗi, a̧ ɔma si zu wa, ɓɛɛ tɔ̧: «Ɛ̀nɛ̀ kpá Sa̧a̧ Ɔmi. 23 O wi n’ɛnɛ tɛ́ e ɗaŋmɔ kɔ-wa ha̧ wa, ɗaŋmɔ‘i tɛ yu zu wa, ɓɛɛ o wi n’ɛnɛ e ɗaŋmɔ ha̧ wa na, ɗaŋmɔ tɛ́ ɓɔn zu wa.» 24 Ɓɛɛ Tomas (nɛ̀‘i sa'e Be-dan), ŋma kpɔk mgbara o ŋgaiwi ɓu-zua-yiitoo, bo so kɔ‘i in wa ŋgimbi nɛ̀ Jesu tɛ̀ɛ́ nɛnɛ‘i na. 25 Oi ŋgaiwi ko Jesu tɔ̧ɔ̧ ha̧ a̧: «Ɛ́ɛ́ zɔka Gasa Wan.» Tomas kifa nú ha̧ wa: «Kà‘m zɔk oi da̧i̧ pɔndi kɔ̧̀ er-a na, ɓɛɛ kà‘m tam oi da̧i̧ pɔndi kɔ̧̀ er-a nɛ̀ bekete-er-am na, in kà‘m tam ká̧ ɔm-a nɛ̀ er-am na, mi beka kɔ̧ ɗɔaa na.» 26 Dee zɛ mɔɔrɔ-ɗoŋ-taar ɗoŋ mɔ‘i, ɓɛɛ o ŋgaiwi ko Jesu mɔi̧ ŋmaa kɔ̧́ tua'i woyo, ɓɛɛ ká Tomas a̧a̧ so mgbara wa. Wa mana nú tua e zu wa, ɓɛɛ Jesu tɛ́ɛ̀ yor mgbara wa, ɓɛɛ tɔ̧: «Ga̧a̧mɔ a̧ dúk in'nɛ̀ɛ́!» 27 Nɛ́ mɔ'ɔ n'aa tɔ̧ɔ̧ ha̧ Tomas: «Mɛ̀ nyɛ́í̧ bekete-er-mɛ, ɓɛɛ mɛ̀ zɔ́k er-am; mɛ̀ nyɛ́í̧ er-mɛ, ɓɛɛ mɛ̀ tám ká̧ ɔm-am; mɛ̀ káɗí sii káfɛ́, ɓɛɛ mɛ̀ kɔ̧́ ɗɔaa ha̧ Sɔ̧.» 28 Tomas kifa nú ha̧ a̧: «Ɛ́nɛ́ nɛ́ Gasa Wan kɔ‘m in Sɔ̧ kɔ‘m!» 29 Jesu tɔ̧ɔ̧ ha̧ a̧: «Mɛ̀ nɛ́ wen nɛ̀ mɛ zɔka'm sa mɛ kɔ̧ ɗɔaa; ɓɛɛ o wi nɛ̀ zɔk am na, kɔ̧ nɛ̀ ɗɔaa, ya nɛ̀ desee.»
Sɔŋkur wen
30 Jesu dee o ŋma dɔka mɔɔ-usi-mɔ nɛ̀ yí o ŋgaiwi kɔ‘i nɛ̀ yɔr zaŋ kalata’ɛ na. 31 Ɓɛɛ o wen nɔ'ɔ yɔra, wen h’ɛ́nɛ́ mɛ́ kɔ̧ ɗɔaa'e Jesu nɛ́ Mɛsii, Bem ko Sɔ̧, ɓɛɛ tɛ kɔ̧ɔ̧ ɗɔaa ha̧ a̧, ɛ́nɛ́ tɛ duk kpasa wen zu nin-a.
Zɔka Jesu sɛn ká̧ tɔp Tiberiad
1 Ɗoŋ mɔ‘i, o ŋgaiwi ko Jesu zɔka a̧ woyo sɛn ká̧ tɔp Tiberiad hee mɔ'ɔ ga: 2 Simɔŋ Pierre, in Tomas (nɛ wa sa'e Be-dan), ká bá nɛ̀ Natanaɛl (be Kana, nú Galilee), o bem ko Zebedee in o ŋma ŋgaiwi ko Jesu yiitoo mɔi̧a so ya kpɔk fara in o ŋmaa. 3 Simɔŋ Pierre tɔ̧ɔ̧ ha̧ wa: «Mí kɔ̧ɔ̧ mɛ́ nɛ̀ɛ́ pi̧ yɔk.» Wa kifa nú ha̧ a̧: «Ɛ́ɛ́ tɛ́ nɛ in mɛɛ.» Nɛ́ mɔ'ɔ nɛ̀ wa gboo yak, ye kombon pi̧ nɛ̀ yɔk nɛ̀ zɛ nɛnɛ, ɓɛɛ wa ba ŋma mɔ na. 4 Mɛ́ gɔna mɔ, Jesu tɛ̀ɛ̀ yor ká̧ ŋgere tɔp, ɓɛɛ o ŋgaiwi kɔ̧-a̧ iŋ‘e mɛ̀ nɛ́ a̧ na. 5 Ɓɛɛ Jesu ak wa: «O bem nɔ'ɔ, ɛ́nɛ́ ba be zoro na?» Wa kifa nú ha̧ a̧: «Íì, ɛ́ɛ́ ba na.» 6 A̧ tɔ̧ɔ̧ ha̧ wa: «Ɛ̀nɛ̀ pí̧ yɔk nɛ̀ ká̧ kombon nɛ̀ war wii-er'nɛ́, ɓɛɛ ɛ́nɛ́ tɛ́ bà zoro.» Wa pi̧i̧ yɔk hee mɔ'ɔ n'aa tɔ̧ɔ̧ ga; ɓɛɛ wa ba zoro dun yɔk, nyɛm ha̧ wa mɛ dak pi̧ zan na. 7 Ŋgaiwi nɛ̀ Jesu kɔ̧ɔ̧ nyɛmna tɔ̧ɔ̧ ha̧ Pierre: «Wi’ɛ nɛ́ Gasa Wan!» Zia-a nɛ̀ Simɔŋ Pierre zia'e nɛ́ Gasa Wan wó, a̧ gaɓa tɛ-a nɛ̀ laa wen a̧ duka so nɛ̀ géé tɛ, ɓɛɛ gɔm zu ɗɔɔ yì. 8 O oi ŋgaiwi nɛ̀ɛ̀ kɔ‘i nɛ̀ kombon, gbur nɛ̀ yɔk nɛ̀ duna nɛ̀ zoro daŋnɛ si zan mɛ. Fara-pi̧-yɔk'i nyɛi̧ nɛ̀ nú-ŋgéré na, duka hee naŋ gɔmŋmaa ga. 9 Nɛ̀ wa zira si mbɔɗɔnu, wa kpaa zoro in brɛt nɛ̀ duk zu kɛ̧i̧-wee. 10 Ɓɛɛ Jesu tɔ̧ ha̧ wa: «Ɛ̀nɛ̀ káí o ŋma zoro n’ɛnɛ baa kinii'i tɛnɛ.» 11 Simɔŋ Pierre daŋa kombon, ɓɛɛ dak yɔk nɛ̀ duna nɛ̀ o zɔm gasa zoro pi̧ zan. O zoro nɔ‘i lɛŋ nɛ́ gɔmŋmaa-nɛ-ɓu-mɔɔrɔ-zua-taar, ɓɛɛ yɔk a̧k na mbɛt. 12 Jesu tɔ̧ɔ̧ ha̧ wa: «Ɛ̀nɛ̀ tɛ́ɛ̀ nyɔ́ŋ mɔ.» Ɓɛɛ ŋma ŋgaiwi mɛ́ ak a̧‘e: «A̧ nɛ́ o ndé,» wó, bo na, wen wa iŋa nɛ̀ de-a'e mɛ̀ nɛ́ Gasa Wan. 13 Jesu ɗɔŋa siti, ba brɛt ha̧ ha̧ wa, ɓɛɛ ba zoro ha̧ ha̧ wa mbɛt. 14 War taar usa-tɛ ko Jesu ha̧ o ŋgaiwi kɔ‘i ɗoŋ n'aa kura nɛ ŋgɔn tɛ fio nɛ́ mɔ‘i.
Jesu in Pierre
15 Ɗoŋ nyɔŋmɔ, Jesu aka Simɔŋ Pierre: «Simɔŋ, bem ko Jean, mɛ́ kɔ̧a̧‘m gan o wi nɔ'ɔ nde?» Simɔŋ kifa nú ha̧ a̧: «Íì, Gasa Wan, ɛ́nɛ́ iŋa mi kɔ̧ɔ̧‘nɛ́.» Ɓɛɛ Jesu tɔ̧ ha̧ a̧: «Mɛ̀ dáí o be-sami kɔ‘m.» 16 Jesu aka a̧ woyo: «Simɔŋ, bem ko Jean, mɛ́ kɔ̧a̧‘m nde?» A̧ kifa nú ha̧ a̧: «Íì, Gasa Wan, ɛ́nɛ́ iŋa'e mi kɔ̧ɔ̧‘nɛ́.» Jesu tɔ̧ɔ̧ ha̧ a̧: «Mɛ̀ dáí o sami kɔ‘m.» 17 War taar-a, Jesu aka a̧: «Simɔŋ, bem ko Jean, mɛ́ kɔ̧a̧‘m nde?» See Pierre ɗaŋa tɛ kpɔk akamɔ n'aa aka war taar'e: «Mɛ́ kɔ̧a̧‘m ndé‘i?» ɓɛɛ Pierre tɔ̧ ha̧ a̧: «Gasa Wan, ɛ́nɛ́ iŋa mɔ lɛŋ, ɛ́nɛ́ iŋa'e mi kɔ̧ɔ̧‘nɛ́!» Jesu tɔ̧ɔ̧ ha̧ a̧: «Mɛ̀ dáí o sami kɔ‘m. 18 Nɛ́ kpasawen a̧‘m tɔ̧ ha̧ mɛ; ŋgimbi nɛ̀ mɛ́ duka so nɛ̀ ŋgaiwi, nɛ́ mɛ́'ɛ hɛr so kanda kɔ-mɛ nɛ̀ tɛ-mɛ, ɓɛɛ mɛ́ nɛ̀ɛ́ fara lɛŋ nɛ̀ mɛ́ kɔ̧a̧; ɓɛɛ ŋgimbi nɛ̀ mɛ bé tɛ̀ɛ́ sɔk kaɗi, mɛ́ tɛ kai er-mɛ nɛ̀ ŋgɔn ha̧ ŋma bíí mɛ́ hɛr kanda ha̧ mɛ́, ɓɛɛ wi’ɛi mgbɔɔ mɛ́ si fara nɛ̀ mɛ kɔ̧ na.» 19 (Jesu tɔ̧ɔ̧ wen'i mɛ́ usi yuwar fea-a nɛ̀ Pierre tɛ fe, ha̧ Sɔ̧ mɛ kpa zɔnamɔ.) Ɓɛɛ a̧ tɔ̧ ha̧ Pierre: «Mɛ̀ tɛ́ ɗoŋ-am!» Jesu in ŋgaiwi n'aa kɔ̧ɔ̧ nyɛmna 20 Pierre zika tɛ, ɓɛɛ zɔk ŋgaiwi nɛ̀ Jesu kɔ̧ɔ̧ nyɛmna fara nɛ́ɛ́ ɗoŋ wa (nɛ́ wi’ɛi a̧ oŋga so si yí-ŋguɗi Jesu ŋgimbi nyɔŋmɔ-kɛndao, ɓɛɛ ká a̧ ak Jesu'e: «Gasa Wan, nɛ́ o'o tɛ e ɗɔra tɛ‘nɛ́ o?» wó'ɛ.) 21 Pierre zɔka a̧, ɓɛɛ ak Jesu: «Gasa Wan, ɓɛɛ ko wi’ɛ, nɛ́ ge a̧ tɛ hɔ zu a̧ ge?» 22 Jesu kifa nú ha̧ Pierre: «Kà‘m nɛ́ kɔ̧ɔ̧ ha̧ a̧ mɛ duk hɔ ŋgimbi n'am tɛ pii ɗoŋ, wen kɔ-mɛ so sɛnɛ? Kɔ-mɛ, mɛ̀ tɛ́ kɔ-mɛ nɛ́ ɗoŋ-am ɓɛɛ.» 23 Ɓɛɛ nɛ́ zu wen'i a̧ nyɛrɛmɔ‘i pɛsa nɛnɛ yaknɛ mgbara o nya-wi'e, ŋgaiwi'i beka fe kɔ‘i na. Ɓɛɛ bó nɛ́ Jesu tɔ̧ɔ̧ ha̧ Pierre'e: «Wi’ɛi beka fe na,» na. A̧ tɔ̧ɔ̧ kɔ̧-a̧‘e ndé: «Kà‘m nɛ́ kɔ̧ɔ̧ ha̧ a̧ mɛ́ duk hɔ ŋgimbi n'am tɛ pii ɗoŋ, wen kɔ-mɛ so sɛnɛ nde,» ɛ̧.
Sɔŋkur wen
24 Mɛ̀ nɛ́ ŋgaiwi'i a̧ de sedaako mɔɔ nɔ‘i yɔr nɛnɛ, ɓɛɛ ɛ́ɛ́ iŋa'e sedaako kɔ̧-a̧ duk nɛ́ kpasawen. 25 Jesu dee o ŋma mɔ nɛ̀ dɔka-a mbɛt. Kà‘i yɔr so o mɔɔ nɔ‘i yɔr kpɔk kpɔk lɛŋ gáà, mi taa bó nɛ́ wi tɛ̀ɛ́ kpa so fara zaŋnu’ɛ mɛ a o kalata-wen nɔ‘i sɛnɛ na.