Igede /1 Ma, Oheh Oluhyeh ayidang ti chi ohaha olala otuka nyamwu ole ko la e-ega nyahi wuuh eheh le. Saji uka ole kahi juwa jijih e-epwu nya ihobiri ohoho nyahi wee le, Oheh Oluhyeh duh Krayist erwu wari kaka gbuh wonu nyahi iwuh. Uka oowa, o hih lala uturwu ookpokpoh ka enu uturwu nya Ang Oririh Ochipwurwu nya ala-Juuh ka pwu ejih le. Uka owe, Jisos ayidang ti je yekee, uka nya awa ole koowa nyi ka kpa rwu bwuh epwu nya odeheh ole, tiri ekpe ka ega nya Oheh Oluhyeh Adidowa nyi juwa jwuh chwee lume le. Angile ki rih anginyi nyamwu e-epwu nya odeheh ole le, i hoo lume. O la ahaha oowa e-ega nyaa gbeeh jwuh ka obaba. Ka onahi bala okpunyih nya Jisos Krayist ongole ko rih ibeenuh ochila o-hwuh okiletu ha nya Oheh Oluhyeh bala o-rih Onyi nya ogbanye ogbanye i-ilahi nya Oheh Oluhyeh ha angi gbugbuh ile wuuh ki wulejih bwuh la igwuh juwa hihi mimi, bala o-rih adirahwu ogbahi nya alidirihwu ilodeheh ole wuuh a juwa tanu inyinyi me. Ahi ayidang ha Jisos Krayist oowa lume. Inyi a duh ko kpa iwo nyamwu hwuuhi wuuh cherih cherih bwuh epwu nya ihobiri ihoho nyahi wuuh le. aji, alodeheh ole ha Oheh Oluhyeh lume gbeeh ko duh Onyewe olookpokpoh nyamwu wari kaka gbuh wonu nyaa jwuh, saji ka ong mi ong ole ko mi loo le, a ka ta ayirejih kaka. Ma, ko ka la ahihi omimi-ka. Ongolahi me ilomwu jem ugbeeneh. O bimh yekee, A ham lume okporih kporih gbeh oyih mi oyih le. Saji nya oowa le, ubwo onahi nyam, m kpa gbileng ba ilom le. /2 Umume okpibaa na erwu onyiila nya onginyi nya Oheh Oluhyeh oririh, ole kahi mi la jaabwo ka Oheh Oluhyeh bwuh choo eheh mejeehi, a jwuh iwee odada kpongh kpongh ka. Olegbejwuh nya erwu onyiila oowa jwuh abwuma nya onginyi eheh luka ko chi ilomwu eheh. Olegwuh Igogo chi okwurwu kwurwu nyamwu eheh mejeehi ahi anginyi eheh. Alegwuh erwu nya Oheh Oluhyeh kpa ehi nya ilaa ye ebi-ebi nyamwu. Anginyi nyamwu kpa erwu onyiila nyamwu kaka yah pye ka epwojah mi epwojah wuuh. Alepwojah la dati dati mi la enyi nyamwu odeheh ole. Oheh Oluhyeh kpoo rwu ka epwooheh lahi lahi. Jisos we bih o yekee, Filip, o rih ole kam hwee tanu, ang amale kaka le, o rih a mila je ongole kam rih leka piyoo daale? Ong mi ong ole ko yem le, aale, ongoowa ye Oheh Oluhyeh Adida le. Eeh le, i-iye a ti duh ka mimi juwa yekee, Me ongole ka Oheh Oluhyeh Adida rih jeehi me, ti ti? Filip, o rih ahwu ayidang a mi yekee, am nyi juwa e-epwu nya Oheh Oluhyeh Adida, Oheh Oluhyeh Adida ayidang nyi titi jam e-epwu nyam am inyinyi ka? Bwuh omwu-omwu odada, Ela ole ko juwa hihi le, o juwa eneh-eneh le. Uka oowa, Ela oowa juwa ta Oheh Oluhyeh ayidang. Ela oowa a rih Oheh Oluhyeh le. Ela o-hwuh ohihi nya Oheh Oluhyeh ha anginyi eheh oowa wari kaka rih onginyi eheh luka ole ki moo wari we epwu nya odeheh ole. O kwu am e-epwu nya odeheh ole tahi. Uka oowa, ahi angile kahi juwa too le, ahi kpa ehi nyahi ye ebi-ebi nya ogboh otuka nyamwu. Ogboh otuka oowa a rih ang o-jwuh ejee yekee, owa ayidang kpangga nyaa rih Onyewe olookpokpoh nya Oheh Oluhyeh Adida lele. Ahi ye jaabwo ka ahyeerwerwa bala ela nya ilehi mi epwu nyamwu pweepwee uka oowa inyinyi. /3 Ong mi ong ole ko yah da odeheh yekee, Jisos nyaa rih Onyewe nya Oheh Oluhyeh inyilehi le, aale, Oheh Oluhyeh juwa hihi e-epwu nya ongoowa le. Aale, ongoowa ayidang titi juwa hihi e-epwu nya Oheh Oluhyeh inyinyi le. Saji, e-epwu nya Krayist ole ki mama wari we odeheh ole lala onginyi eheh, umume olala bala ang mi ang nya ohihi nya Oheh Oluhyeh ayidang wuuh a jih chi onu jira lele. I ma onyi hahi, i ti hwuh onyi ga hahi inyinyi. Ongiri o-kpa gbeh anginyi ka jih ugburwubwo nyamwu. I ka wurwu enyi nyamwu Ebi-ebi, Ongo mela je, Oheh Oluhyeh Agwugwu, Adida Ogboyih mi Oyih, Onyadirahwu nya Okpunyih. Olegwuh erwu owe we bih oo yekee, Meri, woh me! Olegwuh Igogo nya Oheh Oluhyeh ka wari kaka hwu tang, ongiri nya Oheh Oluhyeh Agwugwu ti ka chi kwurwung inyinyi! Saji nya oowa le, i ka wurwu onyi nyang oowa Onyi Oligogo. I ka wurwoo, Onyi nya Oheh Oluhyeh ayidang inyinyi. Uka ka Pita juwa kpa ela oowa yah wee le, egbamwu nya ahigbooh otuka tuka ohe a chi kwurwaa iwa wuuh u-uwa lele. Uka oowa, omih ohe juwa yah ela bwuh epwu nya egbamwu oowa da odeheh yekee, Ongole a rih Onyewe olikeje nyam ole ko ham lume le. Ela mi ela nyamwu wuuh ham lume kaka kpoyeh. Le anu anginyi eheh, anu-u woh omih nyamwu me. Elewe rih o-ho jira nya ela ole ka Ongolahi Oheh Oluhyeh yah bwuh onu nya olomwu nyamwu onyogoh yekee, Anu woh me, onyi onjwoh iyang ole ko je oleng enenehe leka, ka jenyi. O ka ma onyi oleng. I ka wurwu enyi nya onyi oowa, Imanuel, ole ka etuh nya Imanuel rih Oheh Oluhyeh jam e-epwariri nyahi. /4 Jisos we bih oo yekee, Am kpakpakpa a rih owulejih bwuh la igwuh ayidang bala ohihi le! Ong mi ong ko mi lam le, o ririh ko gbugbuh kpa, o ka mimi wulejih bwuh la igwuh, juwa la ohihi okila. Anu ayidang kaa wurwum Ayibahi iticha bala Ongolahi. Ole kanu kaa wurwu inyi le, anu je yah, saji inyi, m rih inyilehi le. Jisos we bih aa yekee, Anu ayidang rih alejih. Ma, am le, m ti bwuh uhyeh-ogba hirejih. Anu rih alodeheh ole. Ma, am ayidang le, m ti rih alodeheh ole tanu kpongh kpongh ka. Saji ole kaam ayidang jam odeheh ole wee le, am kpakpakpa a rih otinikah o-hwuh ahigbooh nya ohihi nya Oheh Oluhyeh ha alodeheh lele. Jisos we bih aa yekee, Am kpakpakpa a rih ikaa nya ohihi oowa lele. Ong mi ong ole ko wari we ega nyam le, aale, imih a ka nwoo kpa enenehe kaka. Ong mi ong ole ko ti kpa okiletu ookpokpoh mi lam le, aale, imih-enyih a ti ka nwoo kpa enenehe kaka inyinyi. Jisos we bih aa yekee, Nya ilehi ilehi, m binuh yekee, eneh ki ka ma Ebraham le, am ayidang juwa le. Inyi, Jisos a mimi bih aa yekee, Am kpakpakpa a rih onu ugbeyi o-bwuh ka ubeh nya ikpilo nya Oheh Oluhyeh le. /5 Uka oowa, Jisos bih alirwuh nya anginyi iwe wuuh yekee, Anu nyi hwuhwu beebee u-uhyeh nya ame iwe me. Oowa le, o hwuh abe nya ikaa irwu iwe bala iyenyih imiiyeh iiwa le, o hwuh ehi nyamwu hwaa riri ka epwooheh le, o jih Oheh Oluhyeh obeh e-epwu nya abwo oriri le, o gwuh ikaa iiwa eneh le, o goh aa ha angijugbeyi nyamwu lele. Inyi, angijugbeyi nyamwu iwe a titi yeh kpa keleh kila alirwuh nya anginyi iwe wuuh lele. Uka ka alirwuh nya angiiwa wuuh rih ang oririh oowa wuh epwu le, angijugbeyi nya Jisos a goh apwu nya ikaa bala iyenyih ihihih iiwa mi edoh iwoh kwurwu imiiyeh lele. Irwuh ojwujwuh nya aleng igbahi ilepwu nya alirwuh nya anginyi iiwa la anginyi angi uno iwoh kwurwu imiiyeh da anginyi angi ohwuh iwoh chiririh. Ma, i ti wa anyang bala anyi anjwoh ichicheh jwuh laa kpongh kpongh ka. Sayimon we bih oo yekee, Ayibahi eeh! Ino, ahi ye akama nya ilehi ilehi loduh-oduh gbeeh ka ahi pye le, ahi wuh ingingihye kpongh kpongh ka. Ma, bwuh la ela oyayah olonu nyang, m ka da ugbowu oowa jaabwo ka yah le! Inyi, uka ki keleh kaka da ugbowu nyaa u-uwa inyilehi le, i wuh irwuh nya iyenyih mi ugbowu nyaa kpong kpong lala o-rih-ekee, ugbowu nyaa iiwa nyaa ka gwuh eneh hih awule lele. Oowa le, aliduh imiiyeh ihye ile ki hwuhwu u-ugbeyi oowa a woh ojah yekee, Jisos nyi juwa chipwurwu kam le, i juwa yah ela la omih ogbooh yekee, Ayibahi, ahwu onyi nya Devidi, chwuchwuuh yehi ahyeerwerwa chee me! Inyi le, aliduh iwe a la Jisos ahyeerwerwa lume le, o keleh kaka yubwo nyamwu gwuh aa egbahi nyaa lele. Oowa le, i je juwa yoyi i-ijata ijata le, i juwa ba Jisos je lele. /6