Isoko /1 Reko onana Oghene oro ru uyoyou rie gba ke omai keme okeno ma gbe jo erahaizi, Kristi o te whu ke omai. Whao no Eha-Iwe-Onyavre o ri te he, yo Yesu o rie no oke rie u te no no o re ti ro no akpo na no kpobo Ose na epano o you ero obo rie nero evao akpo na, o te you ai te umuo. Je no obo Jesu Kristi, o se iseri uzeme na, ono oro otuye iwhuowhu, gbe ono oro osu ivie akpo na. Je ro ke oye no o you omai, ono o ro aze obo rie ru omai emuye no izieraha mai. Keme Oghene o you akpo na hro, o je reho Omovo rie ke, re kohwo kohwo no o rowo rie o gbe vre he reko o re wo uzuazo ebede bede. ONOWO na o te reho oma via ke ae evao ugbo: Me reho uyoyou ebede bede me ro you owhe, fikiere me te ruere abo ho oruozewo me ke owhe. Ohwo ovo o wo uyoyou no o ro vi ona ha, re ohwo o siobono uzuazo rie fiho oto fiki ezo rie. /2 Ma be ta no, oware udidi egago mai na o re ruaro gaga: A jo eva uwo fere iee via, jejo eva Ezi dhese iei veve, otu iko-idhiwu a rue rie, o jo udevie erewho ta usiuwoma, akpo o rowo rie, a te reho ie kpo ehru eva oruaro. Filip o te ta kee no, Olori, dhese Ose na ke omai, re umu omai ero. Jesu o te ta ee no, Filip, me avo owhai a gbe ro krekri; wha te rie ome he? O no o rue ome o rue Ose na; keve who je ta no, Dhese Ose na ke omai? Wha rowo no me ro eva Ose na gbe Ose na o ro eva Ose na gbe Ose na o ro eva me? Eme no me ta ke owhai o ro no udu obo me he; reko Ose na no o ro eva me ru iruo rie. Whao enana kpobi e via, re eme no Onowo o ta evao unu oruearo na o gba, a no: Gaviezo, omote no o rie ozae he o ti diho, o ve ti ye omozae, a re ti se ode rie Imanuel (oto eme na, Oghene avo omai a ro). Eme na o ro eva emuho, Eme na avo Oghene a gbe jo, Eme na Oghene. Eme na o te zihe ruo ohwo, o te ze ria udevie mai, ma rue oruaro rie, oruaro woho omo ovo no Ose na o ye, aruoriwo avo uzeme e vo rie eva. /3 Kohwo kohwo no o re te rowo via no Jesu Omo Oghene, Oghene o ro eva rie ria, oye oje ro eva Oghene. Keme a ye omozae ke omai, mai a ro omo na ke re isuesu e jo obo rie; a veti se ei, Okiroro Ogbunu, Oghene Ologbo, Ose Ebede bede, Ovie Udhedhe. Uko na o te ta kee no, Ezi Eri na o re ti bru owhe tha, ogaga Oride na o re te reho uwoho ruru owhe; fiki ere, omo no a re ti ye na, a re ti sei Oreri, Omo Oghene. Keme na eva oma Kristi Oghene o je gbunu, eva rie na a je ru owhai gba kiete. Epano o be ro ta na, koyeho egho olala jo o te ruru ai, koyeho uru jo u te no evao egho na ze, ano, Onana ho Omo oyoyou me, ono o were ome hro; wha yo eme rie. Wha re ta kpahe ie ono Ose oro mu o je vie ze eva akpo na, nno Who ta eme-agho, fiki epano me ta no, Me Omo Oghene? Oterono me gbe bi ru iruo Ose me he wha rowo ome he. /4 O te ta ke ae no, Oto wha no ze, ehru me no ze, whai e ro akpo nana, me ro oro akpo onana ha. Jesu o te ta ke e no, Me ho ekparomatha gbe uzuazo: o no o rowo ome mako o whu no, o re te zo. Wha bi se ome owuhre gbe Olori; wha rie se, keme ere me ro. No me gbero eva akpo na, me ho elo roke akpo na. Jesu o te ta ke ae no, Me ho ebredi uzuazo; o no o bru ome ze ohowo u re kpei hi, o no o rowo ome uru-ame u re kpei hi. Jesu o te ta ke ae no, Uzeme, uzeme, me ta ke owhai, no Abraham o te jo ho, yo ome ro. Fikiere Jesu o te je ta ke ae no, Uzeme, uzeme, me ta ke owhai, me ho unuethe igode. Aye na o te ta ke e no, Me rie no, Mesaya o be tha (o no a re se Kristi); no o ze ino, o re ti dhese eware kpobi ke omai. Jesu o te ta ke e no, Me no o be ta eme ke owhe na, me ho o he. /5 No o rue ure ojo eva akoto edhere na, no o ja rie rue oware ovo ho, reko ebe ovo; o te ta kee no, No inene vre who gbe mo ubi bede he. Ure ojo na o te nwani lo. Saimon o te yo no, Baba, ma rue uye okioke, ma tolo oware ovo ho! Reko epa eme ra, me re fi iriri na ho. No a ru onana no, a te kua iyei buobu eva rie; iriri rai e te je bere. O te ta ke otu obuobu na re a keria ehru ebe na; O te reho ikulu isoi gbe imiyei ive na, no o ri ehru no o te le, o te bere ikulu na, o te reho ke ilele na, ilele a te ro ke otu obuobu na. Ai kpobi a re eva e te vo ae: a te tolo ibro no ikioko na, esa ikpegbive evoe. Eno ere na ite ezae idu isoi re eyae gbe emo ete jarie. Koyeho, ituaro ive e keria akoto edhere, no a yo no Jesu o be nyavre, a te bo no, Omo Devidi, ohro mai o re owhe. Ohro o te re Jesu, o te ro abo te aro rai, a te nwane rue ude, a je lele iei. No Jesu o je ze eva uwou Pita, o te rue oniaye rie o kieze obe mo okpomaho; O te ro obo te obo rie, okpomaho rie o te kpo, o te kparoma, o je gba odibo kee. /6