The New Testament of our Lord and Saviour Jesus Christ
1 Chitabu cho lukolo lwa Yesu Kilisito, imwana wa Daudi, imwana wa Ibulahimu. 2 Ibulahimu hakamweleka Isaka, Isaka hakamweleka Yakobo, Yakobo hakamweleka Yuda na Wanduguse, 3 Yuda hakamweleka Pelesi na Sela kwa Tamali, Pelesi hakamweleka Esilomu, Esilomu hakamweleka Alamu, 4 Alamu hakamweleka Aminadabu, Aminadabu hakamweleka Nashoni, Nashoni hakamweleka Salimoni, 5 Salimoni hakamweleka Boasi kwa Lahabu, Boasi hakamweleka Obedi kwa Lusi, Obedi hakamweleka Yese, 6 Yese hakamweleka Mundewa Daudi. Daudi hakamweleka Sulemani kwe muke wa Uliya, 7 Sulemani hakamweleka Lehoboamu, Lehoboamu hakamweleka Abiya, Abiya hakamweleka Asa, 8 Asa hakamweleka Yehoshafati, Yehoshafati hakamweleka Yolamu, Yolamu hakamweleka Usiya, 9 Usiya hakamweleka Yosamu, Yosamu hakamweleka Ahasi, Ahasi hakamweleka Hesekia 10 Hesekia kamweleka Manase, Manase kamweleka Amoni, Amoni hakamweleka Yosia, 11 Yosia hakamweleka Yekonia na wanduguse, ugele wo kusanyiligwa Babeli. 12 Kusanyiligwa Babeli kukahele, Yekonia hakamweleka Shelitieli, Shelitieli kamweleka Selubabeli, 13 Selubabeli hakamweleka Abihudi, Abihudi hakamweleka Eliyakimu, Eliyakimu hakamweleka Asoli, 14 Asoli hakamweleka Sadoki, Sadoki hakamweleka Akimu, Akimu hakamweleka Eliudi, 15 Eliudi hakamweleka Eliesa, Eliesa hakamweleka Matani, Matani hakamweleka Yakobo, 16 Yakobo hakamweleka Yusufu, mulume wa Maliamu yamweleke Yesu yekwinangigwa Kilisito. 17 Hambiya, ifyeleko fyose kulawa Ibulahim mpaka Daudi hafyuwa fyeleko ikumi na fine, na kulawa Daudi mpaka kusanyiligwa Babeli fyeleko ikumi na fine; na kulawa kusanyiligwa Babeli mpaka Kilisito hafyuwa fyeleko ikumi na fine. 18 Kwelekigwa kwa Yesu Kilisito hakuwa nhafi; Maliamu ing'ina ugele woyowile katumisigwa na Yusufu, ugele wasinati wakitole, hakoneka kena inda kwa udaha wa Muhe Musunhile. 19 Na Yusufu, kosoko hakowa munhu wechawelu nghendile kumuguma chinyala, hakona yamuleke chinyelenyele. 20 Hambiya, ugele foyendeyodoga aso; langa, malaika we Mundewa hakamwijila musinjosi, yakugamba, “Yusufu gomwana wa Daudi, unghogohe kumulonda Maliamu imukago, kosoko iinda yakwe ni kwa udaha wa Muhe Musunhile. 21 Naye yakwenda yeleke mwana, nagwe komwinanga disina dyakwe Yesu, kosoko imwene noyakwenda yawahonye awanhu wakwe na uwihi wawo.” 22 Ago gose ganheifo, uleke imbuli iya iyalongigwe ne Mundewa kwa njila ye inonga ye mugonesi yagambile, 23 “Langa bikila yakwinula inda, naye yakwenda yeleke mwana. Nawo wakwenda wamwinange disina dyakwe Imanueli” (nong'amba, “Imulungu kahamwedu nase”). 24 Yusufu yakenuke musinhongo hakagolosa nheifiya fina foyalongile imalaika we Mundewa. Hoyomutola. 25 Nghagendile naye ka, mpaka yakweleka imwanagwe; kamwingha disina dyakwe Yesu.
1 Mundewa Yesu foyelekigwa Betelehemu ku iisi ya Uyahudi ugele we Mundewa Helode, langa, mamajusi wa ulwandi lwa kundawilo ye dijuwa, haweja Yelusalemu wakugamba, 2 “Kowa hoki iMundewa wa Wayahudi yelekigwe? Kosoko hachiyona inyelesi yakwe kundawilo yedijuwa, nase chija, uleke chimufugamile.” 3 Kamei Mundewa Helode yakahulike nheifo, hakasinanghala, na wanhu wose wa Yelusalemu hamwedu naye. 4 Hoyokwinanga ifilongosi wose wa makuhani, na watulumi yawosa fina, “Kilisito yakwelekigwa hoki?” 5 Nawo howomugamba, “kuBetelehemu ya Uyahudi; Kosoko nofo itulumigwe ne Mugonesi, 6 ‘Nagwe Betelehemu muisi ya Yuda, mu wakulu wa Yuda, iyakwenda yawadime wanhu wangu Isilaeli.’” 7 Kamei Helode hoyowenanga awaya mamajusi hanghanda, hoyopata ichawelu kulawa fowakongile kuyona inyelesi iya. 8 Hoyowegala Betelehemu, hoyogamba, “Yandamileni injila ino, mkosilise lugano simbuli se mwana yuyo, munghafulusa kumona munitamile uleke nani nilute nikamufugamile.” 9 Nawo wakahulike simbuli, se Mundewa, howolongosa injila, kamei inyelesi iya yowonile kundawilo ye dijuwa hoiwalongolela, hoikwima ahanhu hoyowile imwana. 10 Fowayonile inyelesi iya hawowa na chinyemi chikulu lugano. 11 Howokwingila kugati, howomwona imwana hamwedu na Maliamu ing'ina, howomusegelela, howomufugamila, wakamale kudohola sihasina sawo, howomulafila simhongesi sawo, sahabu, ufumba, na manemane. 12 Nawo wakamale kutamiligwa na Mulungu musinjosi wanghamuwile Helode; howogenda njila ingi. 13 Awaya wakafuluse kuleuka, kamei imalaika we Mulungu hoyomwijila Yusufu musinjosi, hakagamba, “Leuka, umulonde imwana hamwedu ne ing'ina, utijile Misili, wikale uko mpaka nikutamile, kosoko Helode yakuhananga yamulangise imwana uleke yamukome.” 14 Hakenuka, hoyomulonda mwana ne ing'ina nechilo; hoyoluta Misili; 15 hoyokwikala uko mpaka foyafile Helode; uleke yoneke fina chawelu imbuli yalongigwe ne Mundewa kusimbuli salongigwe na wagonesi wagambile, “Kulawa Misili hanimwinanga imwanangu.” 16 Helode yakone kadanhilisigwa na waya mamajusi, hakasuha lugano; hoyotuma wanhu hoyowakoma awana we chigosi wose, awoile ako Betelehemu, ne filunga fyose fikihakane na Betelehemu, kukongela wana we minyaka mili mpaka awasinati wafike minyaka mili, kwandamila fowalongile awaya mamajusi. 17 Hoiliganila imbuli yoyalongile imugonesi Yelemia. 18 “Chililo chihulikika Lama, Laheli yakuwalilila wanagwe, kosoko wahechaka.” 19 Kamei Helode yakafe, noho malaika we Mundewa yamwijila Yusufu musinjosi uko Misili, 20 yakugamba, “Handiko leuka, umulonde imwana ne ing'ina, ulute mpaka kuisi ya Isilaeli; kosoko awahanange ichidoga che imwana wafulusa kufa.” 21 Yaleuka na kumulonda imwana hamwedu ne ing'ina, howoluta mpaka iisi ya Isilaeli. 22 Yakahulike fina Alikelao yakudima ako Uyahudi ahanhu ha Helode iBabakwe, yaluta ulwandi lwa Galilaya, 23 Hakaluta, hakekala mukaya yendeikwinangigwa Nasaleti; Uleke iliganile imbuli yoyalongile imugonesi “Kokwinangwa Munasalayo.”
1 Mumajuwa gago yalawanisa Yohana mubatisaji yakuhubili munyika ya Uyahudi, yakugamba, 2 “Mulambe; Kosoko undewa wa kulanga usegelela.” 3 Kosoko ayo no yalongigwe ne mugonesi Isaya, yakugamba, “Dijwi dye imunhu yakujoja mwibalangu, Igoloseni injila ye Mundewa, Musigolole si njila sakwe!” 4 Naye Yohana imwecho hakafala suke igolosigwe na singa se ngamia, na mukanda wa nghingo, muchuno chakwe; na chakudiya chakwe hachuwa sige na uuki wa kumbago. 5 Weja wamulutila awanhu wose wa Yelusalemu na Uyahudi na si isi sose sisungulute Yolodani; 6 Hakawabatisa mulwanda lwa Yolodani, akuno wakulamba u wihi wawo. 7 Yakone matewa ga Mafalisayo na Masadukayo, wakwijila ubatiso wakwe, yawagamba, “Anyeye muwana wa majoka nani yamujanjaluseni kutija inyono ikwija?” 8 Hambiya, mweleke mamudyo gakonesa kulamba, “Munghakidanhilise mufidoga fyenu fina, china Baba yetu Ibulahimu,” kosoko nikumutamilani fina Mulungu mumawe agano yekudaha kumwinulila Ibulahimu wana. 9 Munghakidanhilise mufidoga fyenu fina, china Baba yetu Ibulahimu; kosoko nikumutamilani fina Mulungu mumawe agano yakudaha kumwinulila Ibulahimu wana. 10 Inhemo ifulusa kwikigwa hamasina ga mabiki; chila ibiki disikweleka mamudyo maswanu, dikung'enyigwa na kugumigwa mumoto. 11 “Chawelu aniye nikuwabatisa na meji kosoko yo kulamba; amba iyakwija kunyuma yangu kena ludole kusuma niye, kahi aniye sikudaha hata kulonda ifilwatu fyakwe; imwene yakwenda yamubatiseni kwa Muhe Musunhile na kwa moto. 12 Imwene diselo dyakwe kenadyo mumikono yakwe, naye yakweda yasunhe ahanhu hakwe; ingano yakwe yakuilunda mukano, makohele yakwenda yagasome no moto uusikusima.” 13 Ugele uwo Yesu hoyokwija kulawa Galilaya mpaka Yolodani kwa Yohana uleke yabatisigwe. 14 Ninga Yohana hoyohananga kumulemesa, yakugamba, “Aniye nikuhananga nibatisigwe na gweye, agweye nagwe ukwija ukwangu?” 15 Mundewa Yesu yamubidula yagamba, “Fumila du hambiya; kosoko ikuhanangigwa kwandamila ichelu yose.” Kamei hoyofumila. 16 Yesu yakamale kubatisigwa yalawa mulwanda; kamei, ulanga weja wagubuka na kumona, Muhe we Mulungu kifana huwa yakuhumuluka mchanhya yakwe; 17 kamei, dijwi kulawa kulanga dikugamba, “Ayuno no Mwanangu, mwendigwa wangu, wonyendesigwe naye.”
1 Kamei Yesu hoyolongosingwa na Muhe hoyomwigala kunyika, uleke yagesigwe ne luhoma 2 Hoyokwikala bila kudiya majuwa makumi mane chilo ne misi, hoyokona njala. 3 Imugesa hoyomwijila hoyomugamba, “Nghonaga gweye no Mwana we Mulungu, gagambe amawe gano gowe mikate.” 4 Ninga hoyomubidula hoyogamba, “Itulumigwa fina imunhu nghakudaha kuwa mumi kosoko yo mukate muhala, ninga kwa chila mbuli ikulawa mumulomo we Mulungu.” 5 Kamei Luhoma hoyomulonda mpaka ikaya isunhile, hoyomwika kuchisusu chisololoke kuchanhya ye dihekalu, 6 hoyomugamba, “Nghonaga gwe no Mwana we Mulungu kilagase hasi; kosoko itulumigwa, Yakwenda yatume malaika wakwe; Wakwenda wakuhokele mumikono yawo; Unghakibulage umugulu wako mwiwe.” 7 Yesu yamugamba, “Kahi itulumigwa, ‘Unghamugese Mundewa Mulungu wako.’” 8 Kamei Luhoma hoyomulonda mpaka kwitunda ditali lugano, hoyomonesa, undewa wose we chilunga, na uswanu wakwe, 9 yamugamba, “Aga gose nikwenda nikwinghe, unghogwa na kunifugamila.” 10 Kamei Yesu hoyomugamba, “Halawe, Shetani!” Kosoko itulumigwa, “Umufugamile Mundewa Mulungu wako, umufugamile imwene muhala!” 11 Kulawa baho Luhoma hoyomuleka; kamei, howokwija malaika kumutogomela. 12 Kamei Yesu yakahulike fina Yohana kohigwa, hakaluta mpaka Galilaya; 13 Hakaleuka Nasaleti, hoyejakwikala Kapelinaumu, ikaya yuwile munhika ye bahali muundewa wa Sabuloni na Nafutali; 14 uleke iliganile imbuli yalongigwe ne Mugonesi; Isaya yagambile, 15 “Iisi ya Sabuloni na iisi ya Nafutali, Injila ye bahali, umwambu wa Yolodani, iGalilaya ya Mataifa, 16 Awanhu waya awekale muchisa wona ujelu mukulu, Nawo wekale muisi ya dinyefu dya difa ujelu uwahulumukila.” 17 Kulawa ugele uwo Yesu hakakonga kuhubili, na kugamba, “Lambeni, kosoko undewa wa kulanga usegelela.” 18 Naye foyendeyogenda munghanda ye bahali ya Galilaya, hakona wandugu weli, Simoni yekwinangwa Petulo ne munduguse Andelea, wakuguma ulwafu lwao mubahali, kosoko hawowa walowaji wa somba. 19 Yawagamba, “Munyandamile, nikuhananga niwagolose muwe walowa wanhu.” 20 Chimwande howoleka sinyafu sawo, howomwandamila. 21 Yogendelela kumwande, yakawona wamonga wandugu weli, Yakobo wa Sebedayo ne munduguse Yohana, wowile mu chiya hamwedu ne Baba yawo Sebedayo, wendewogolosa sinyafu sawo; yawenanga. 22 Chimwande howoleka chiya chawo ne Baba yawo howomwandamila. 23 Naye yendeyosunguluta Galilaya yose, yakufusa mumasinagogi gawo na kuhubili simbuli siswamu so undewa wa kulanga, na kuwahonya wanhu na matamu gose. 24 Simbuli sakwe hosihulikika ako Shamu yose howomwigalila awanhu wose wowile na si nhamu, awowile na sinhamu se hayo hayo ne magayo, wowile na magini, wowile ne chisilisi, na wowile na utamu wa kuholola, hoyowahonya. 25 Matewa ga wanhu wengi howomwandamila kulawa Galilaya, Dekapoli, Yelusalemu na Uyahudi na umwambu wa Yolodani.
1 Naye yakawone matewa, yakwila kwitunda; yakafuluse kwikala hasi, wefusa wakwe howomwijila; 2 Yagubula umulomo wakwe, na kukonga kuwafusa, yakugamba, 3 “Ibeka awakiwa mufidoga, Kosoko undewa wa kulanga wawo! 4 Ibeka wena usungu; Kosoko wakwenda waholesigwe! 5 Ibeka awaholo; Kosoko awene wakwenda wahale iisi! 6 Ibeka wena injala na inghilu ya chelu; Kosoko awene wakwenda wegusigwe! 7 Ibeka awena ubasi; Kosoko awo wakwenda woneligwe ubasi! 8 Ibeka awena mimoyo miswanu; Kosoko awo wakwenda wamone Mulungu! 9 Ibeka awalamusi; Kosoko wakwenda wenangigwe wana we Mulungu! 10 Ibeka awakugaya kwa kugolosa foyakwenda Mulungu; Kosoko undewa wa kulanga wawo! 11 Ibeka anyeye ghona wakwenda wamubeseni na kumugoloselani fibi, na kumulongani, na kumusigani mabuli gehile kwa udasi, kosoko yangu. 12 Sekeleleni na kwanga, kosoko digelo dyenu ikulu kulanga. Kosoko nofowawagolosele fibi awagonesi awawalongolele nyeye.” 13 “Anyeye no umunyu we chilunga; ninga umunyu unghabanika wogumigwa choni ukolele? Usikunoga ka, isigalila kutagigwa kunje na kujatigwa na wanhu. 14 Anyeye no ujelu we chilunga. Ikaya isikudaha kifisa inghowa muchitunda muchanhya. 15 Kahi awanhu wasikwasa itaa na kuigubika, ninga wakuika muchigwaso, ikuwamulikila wose awoile munyumba. 16 Nheifo ujelu wenu umulike kumwande ya wanhu, uleke wone sinhenda senu si swanu, uleke wamutunye iBaba yenu yowile kulanga.” 17 “Munghadoge fina nija nileusa itolati ama awagonesi, ng'o, sijile kuleusa ninga kumemelesa. 18 Kosoko chawelu nikumutamilani, mpaka ulanga ne iisi fileuke, chisikuleuka ng'o chinhu chidodogi chimwedu che tolati mpaka gose gamemelesigwe. 19 Hambiya imunhu yakubesa dilagiso dimwedu du musino si ndodogi, na kuwafusa wanhu wandamile nheifo yakwenda yenangigwe mudodogi mu undewa wa kulanga, ninga imunhu yekusigolosa na kuwafusa wamonga wandamile nheifo, yakwinangigwa mukulu ku undewa wa kulanga. 20 Kosoko nikumutamilani fina uswanu wenu ughaleka kusuma wa watulumi na Mafalisayo, musikudaha kwingila ng'o mu undewa wa kulanga.” 21 “Muhulika wanhu wa katali fowagambigwe fina, ‘Unghakome! Na imunhu yanghakoma yowisiligwe.’ 22 Ninga niye nikugamba chila munhu yakumonela nyono imiyagwe yagila yowisiligwe; na munhu yakuliga imiyagwe, ‘Dibwalata’ yagila yengisigwe mu moto wa majuwa gose. 23 Unghegala isadaka yako hokufugila, kamei unghagelegela fina imunduguso kena mbuli na gweye. 24 Uileke isadaka yako hadifugilo, ulute, ukakifumilise ne munduguso, noho uye ulafe isadaka yako. 25 Kifumilise ne munghondo wako, yanghakwigale kwe mulamusi; ne mulamusi yakwigale ku wasilikali, wakugume kuchifungo. 26 Huwila, nikukutamila, nghukulawa mo mpaka ulihe isendi yo ndumo.” 27 “Muhulika awanhu wakatali fowagambigwe, ‘Unghagolose dihabwa!’ 28 Ninga niye nikugamba, ‘Chila munhu yakumulanga imwanamuke kwa kumusulumila, kafulusa kugona naye muchidoga chakwe. 29 Digiso dyako dyo kulume dinghakwambusa ugolose wihi ding'ole uditage kutali nagwe, kosoko yagila ichilungo chako chimwedu chagilile, uleke umutufi wako wose unghatagigwe kumoto uusikusima. 30 No mukono wako wo kulume unghakuhosa ugolose wihi udumule uutage kutali nagwe, kosoko yagila chilungo chako chimwedu chagilile, uleke umutufi wako wose unghatagigwe jehanamu.’” 31 “Kahi igambigwa, ‘Imunhu yanghamuleka imuke yamwinghe baluwa ya malekeni.’ 32 Ninga niye nikugamba, ‘Chila munhu iyakumuleka imuke, inghowa si kosoko ye dihabwa, yakumugolosa fina yakwingililigwa; ne munhu yakumutola yuya yalekigwe yakuwa kengilila.’” 33 “Kahi muhulika wanhu wa katali fowagambigwe, ‘Unghakilahe kwa udasi ninga umugolosele, Mundewa fina foukilahile.’ 34 Ninga niye nikugamba: Unghakilahe ng'o, kahi kwa ulanga, kosoko no digoda dyo undewa we Mulungu; 35 Kahi kwa iisi, kosoko noho yakwika imigulu yakwe, kahi kwa Yelusalemu, kosoko no kaya ye Mundewa mukulu; 36 Kahi unghakilahile ditwi dyako, kosoko nghukudaha kulugolosa ulujwili lumwedu luwe lujelu ama lutitu. 37 Ninga simbuli senu suwe Heye; heye, si nheifo, si nheifo; sose isikupulutisa sikulawa kwa yuya iyehile.” 38 “Muhulika fina igambigwa, ‘Igiso kwa igiso, na igego kwa igego.’ 39 Ninga niye nikugamba, ‘Munghakikushe ne munhu yehile, ninga imunhu yanghakutowa ifunda yo kulume, mubidusile na ya keli. 40 Ne munhu yakuhananga kukusongesa na kukuhoka inghasu yako, mulekele na dijoho nadyo. 41 Ne munhu yakukudindilisa utali wa chipisi chimwedu, luta naye fipisi fili. 42 Iyakukutasa, mwinghe; iyakuhananga kukopa ukwako, unghamwinghe chigosigosi.’” 43 “Muhulika fina igambigwa, ‘Umwende imiyago, umusule imunghondo wako.’ 44 Ninga niye nikugamba, wendeni awanghondo wenu, muwatasile wakumutendani fibi. 45 Uleke muwe wana we Baba yenu iyowile kulanga; kosoko imwene yakwalisa dijuwa dyakwe kuwehile na waswanu, yakuwatonyesela ifula awaswanu na wehile. 46 Kosoko munghawenda awakumwendani nyeye mopata igeleko dyaki? Aho awaya awakuhokela ikodi togoleni nawo wasikugolosa nheifo? 47 Kahi munghawalamusa awandugusenu du, mugolosa nhenda yaki yongeseke? Aho awanhu wa mataifa wasikuwagolosela fina nheifo! 48 Hambiya anyeye mokuwa muliganile fina Baba yenu yowile kulanga foyaliganile.”
1 “Langisiseni munghagolose uswanu wenu, mumeso ga wanhu, kosoko mulangigwe na awene, kosoko munghagolosa nheifo mukuswela igeleko kwi Baba yenu iyowile kulanga; 2 Hambiya, agweye nghona ukulafa isadaka yako unghakitowele igunda kumwande yako fina wanhu awena chimwefe fowakugolosa mumasinagogi na musinjila, uleke watunyigwe na wanhu. 3 Chawelu, nikumutamilani, wafulusa kuhokela digeleko dyawo. Ninga gweye ghona ukulafa isadaka yako, umukono wako wo kumoso unghamanye umukono wo kulume choukugolosa; 4 isadaka yako yuwe ku chifiso; Baba iyakona ichifiso yakwenda yakumemese.” 5 “Kahi ghona mukutasa, munghowe fina wanhu we chimwefe, kosoko awene wakwenda kutasa wemilenyima mumasinagogi na musinjilamhanda, uleke wonigwe na wanhu. Chawelu, nikumutamilani wafulusa kuhokela digeleko dyawo. 6 Ninga agweye nghona ukutasa, ingila kuchaisi unghafulusa kuhinda dibakwa dyako, utase kumwande ye Babako yowile kuchifiso; ne Babako iyakona kuchifiso kokumemelesa. 7 Nanye munghowa mukutasa, munghabagebage fina wanhu we chilunga; kosoko awene wakona fina wohulikigwa kosoko ye simbuli sawo fo ni nyingi. 8 Ninga anyeye munghowe fina awene, kosoko Baba yenu kamanya gomukuhananga ugele musinati mutase. 9 Nanye taseni nhafi: Baba yetu uwile kulanga: Disina dyako ditunyigwe; Undewa wako wije; 10 Kwenda kwako kugoloseke. Ahano ha chilunga fina ako kulanga. 11 Uchinghe diyelo chakudiya chetu cho kuchigutisa. 12 Uchilekelele uwihi wetu fina seye nase fochikuwalekelela awachigolosele wihi, 13 Na unghachingise mumagesa, ninga uchihonye na uwihi. Kosoko, undewa ni wako, no ludole, ne ditunyo, majuwa gose hano. 14 “Kosoko munghawalekelela wanhu uwihi wawo, ne Baba yenu wa kulanga yakuhananga yamulekeleni na nyeye uwihi wenu. 15 Amba munghaleka kuwalekelela awanhu uwihi wawo, na iBaba yenu nghakwenda yawalekelele uwihi wenu.” 16 “Kahi fomukufunga, munghowe fina wechimwefe wena fihanga fisinanghale, kosoko yokiyonesa ifihanga fyawo, uleke wonigwe na wanhu fina wafunga. Chawelu nikumutamilani, wafulusa kuhokela digeleko dyawo. 17 Ninga agweye nghonaukufunga, ukibake mafuta mwitwi, unawe chihanga; 18 Uleke unghoneke na wanhu fina kufunga, ninga iBabako yowile muchifiso yakwenda yakumemese.” 19 “Mughakiikile sigafu muchilunga, sinondo ne ikanga fikubana, na wahiji wakubena na kuhija; 20 mukiikile sigafu kulanga, kusikubanika chinhu, kwichaka sinondo kahikanga, kahiwahiji wasikubena kahiwasikuhija; 21 kosoko isigafu yako hoyuwile, noho umoyo wako houkuwa.” 22 “Digiso no taa yo mutufi; digiso dyako dinghowa iswanu, mutufi wako wose ukuwa na ujelu. 23 Ninga digiso dyako dinghowa dibanike, umutufi wako wose wokuwa na chisa. Ninga awuya ujelu uwile kugati yako unghowa chisa, chititu tukutuku!” 24 “Kwechaka munhu iyekudaha kutogomela wakulu weli; kosoko yekumusula yuno, na kumwenda ayuno, nhagela yekiyandamila nayu, na kumubesa ayuno. Musikudaha kumutogomela Mulungu no ugoli. 25 Kosoko iyo nikumutamilani, munghakiidase no uumi wenu, modiya choni, kahi mokunywa choni; kahi imitufi yenu, mufale choni. Uumi si mukulu kujumha chakudiya, no mutufi si mukulu kujumha sisuke? 26 Filangeni fidege fya Mulanga, fisikuhanda kahi fisikugola, kahi fichaka kano; ne Baba yenu wa kulanga yekufigutisa. Togoleni! Anyeye si ibeka kujumha ifyene? 27 Yehoki ukwenu imwene kwakiidasa yekudaha kiyongesela utali wakwe hata mukono umwedu? 28 “Nhani mukiidasile sisuke? Gelegeleni amaluwa ga kumigunda, ifene fo ga kukula; gasikugolosa milimo yoyose, kahigasikubota; 29 Nanyeye nikumutamilani, hata Sulemani muditunyo dyakwe dyose nghafasigwe fiswanu kifana dimwedu dyawo. 30 Kamei inghowa Mulungu yekugafasa nhaifo amanyagala ga kumbago agebaho diyelo, na nhosiku gakutagigwa kwikusisi, togoleni! Nghodaha lugano kuwafasa nyeye mwina dihuwi dikefu? 31 “Munghakiidase mukugamba, Chodiya choni? Ama chokunywa choni? Ama chofala choni? 32 Kosoko ago gose awe chilunga wekugahananga; kosoko Baba yenu wa kulanga kamanya fina mukugahananga ago gose. 33 Ninga uhanangeni undewa wakwe, no uliganisi wakwe, nago gose mukwenda mongeseligwe. 34 Ninga munghakiidase na ganhoosiku, kosoko aganhoosiku gakakiidasila agecho. Leka amagayo ge dijuwa gamemelekele mwijuwa dyakwe.”
1 “Munghaliganise, uleke anye nanye munghaliganiswe. 2 Kosoko kukuliganisa akuya komukuliganisa nofo nanye mukwenda muliganisigwe. Nacho ichipimo chomukupimila, nocho mukwenda mupimiligwe. 3 Nhani ukulanga ichibasi chuwile mwigiso dye munduguso, na dibiki duwile mudigiso dyako gomwecho nghukudyona? 4 Kahi komulonga nhani imunduguso, Nileke nileguse ichibasi ichuwile mwigiso dyako; ugele! Mwina dibiki mwigiso dyako go mwecho? 5 Kwina chimwefe gweye! Yenda kuleusa dibiki dyuwile mwigiso idyako go mwenecho noho udahe kona fiswamu kuleusa achiya ichibasi mwigiso dye munduguso. 6 Munghagenghe mabwa ichinhu chisunhile, kahi munghakubitile silulu senu kumwande ye singuluwe, singheje sisijata ne migulu yawo, hosimubidukilani nyeye, na kumulumani.” 7 “Taseni, nanye mokwinghigwa; hanangeni, nanye mokona; gong'ondeni, nanye mokumuliligwa; 8 kosoko chila yekutasa, yakuhokela; naye yekuhananga, yakona; naye yekugong'onda, yekukumuliligwa. 9 Kahi kwina munhu nani ukwenu imwene imwanagwe yanghatasa mukate komwingha diwe? 10 Kahi yanghatasa isomba, komwingha dijoka? 11 Inghowa, anyeye mwihile, mumanya kuwengha awana awenu ifinhu fiswanu; togoleni! Si chawelu iBaba yenu wakulanga, yakwenda yawenghe maswanu awakumutasa? 12 Gose gomukuhananga mugoloseligwe na wanhu, anyeye nanye muwagolosele nheifo; kosoko ayo no tolati na wagonesi.” 13 “Ingileni kwa kugendela umulango umusisili; kosoko umulango mugalamu, ne njila ni ngalamu iikuluta kukwagilila, nawo awekwingila kumulango uwo ni matewa 14 Ninga mulango musisili, na injila ilongoka kuumi, nawo awakuyona wakefu.” 15 “Kilangisiseni na Wagonesi wo udasi, awanhu awakuwejila wafala suke sa ngholo ninga kugati yawo mausi makali. 16 Mowatanga kosoko ye sinhenda sawo. Togoleni! Awanhu wekubawa sabibu mumabiki ge miwa; ama tini mu mibaluti? 17 No nheifo chila dibiki diswanu dikweleka mamudyo maswanu, dibiki dihile dikweleka amamudyo gehile. 18 Dibiki diswanu disikudaha kweleka mamudyo gehile. 19 Chila ibiki idisikweleka mamudyo maswanu dikung'enyigwa na kugumigwa kumoto. 20 Hambiya mowatanga kosoko ye sinhenda sawo.” 21 “Siyo chila munhu yekunigamba Mundewa, Mundewa, iyakudaha kwingila mu undewa wa kulanga; ninga iyakugolosa ifyene foyakwenda Baba yowile kulanga. 22 Matewai wakuhananga weje wanigambe dijuwa diya, Mundewa, Mundewa! Aniye salafile ugonesi kudisina dyako na kugolosa majumo mengi? 23 Kamei nikwenda nije niwagambe, Anyeye siwamanyile ka, Halaweni hano, anyeye mukugolosa gehile!” 24 “Hambiya chila iyakuhulika simbuli sangu, na kusigolosa, yekuliganisigwa ne munhu iyena misungu, yajengile inyumba yakwe mwiwe. 25 Ifula hoitonya, amafaluko hogokwingila mengi, imheho hoitowa, ipumunha inyumba iya, isogwile; kosoko inghindiso yakwe hayuwa mwiwe. 26 “Na chila yakuhulika simbuli sangu yanghagolose, yakuliganisigwa ne munhu imubwalasi, yajengile inyumba yakwe mwisanga; 27 ifula hoitonya, amafaluko hogokwingila, imheho hoipumunha, hoitowa inyumba iya, hoikugwa, inyugwa yakwe hoikuwa nghulu! 28 Kamei, Yesu yakamale simbuli siso, amatewa ga wanhu hogojuma lugano kosoko ya amafuso gakwe; 29 kosoko yendeyofusa kifana munhu yena udaha; siyo fina watulumi wawo.”
1 Naye foyadulike kulawa kwitunda, matewa mengi hogomwandamila. 2 Ulange, hoyokwija imunhu yena ukoma hakamufugamila, na kumugamba, “goMundewa,” unghenda ukudaha kunihonya. 3 Yesu hoyogolola umukono wakwe hakamukwafa, hakagamba, “Nikwenda hona.” Baho ni baho ukoma wakwe houhona. 4 Yesu hoyomugamba, “Ulangisise, unghamutamile munhu, ulute ukakiyonese kwa kuhani, ukalafe digelo fina foyalongile Musa, uwe uhomelesi ukwawo.” 5 Yakengile Kapelinaumu, akida yumonga yamwijila, 6 na kumugongelesa yakugamba, “Mundewa imutumishi wangu kagona ukaya, mutamu wa kuholola, yakutamigwa lugano.” 7 Yesu yagamba, “Nokwija nimuhonye.” 8 Ayuya iakida, yamubidula, yakugamba, “Mundewa, Isinyagile aniye agweye wingile hasi ye ikano yangu; ninga longa mbuli du imutumishi wangu yakwenda yahone. 9 Kosoko ani nani na munhu nuwile hasi ya udaha, nina wasilikali hasi yangu, ninghamugamba ayuno, ‘Luta,’ yekuluta; na ayuno, ‘Wije,’ yekwija, ne mutumwa wangu, ‘Golosa nhafi,’ yekugolosa.” 10 Yesu yakahulike simbuli siso, yajuma, yakuwagamba awaya wendewomwandamila, “Sinati nyone ihuwi ikulu fina dino mu Isilaeli. 11 Chawelu, nikumutamilani, fina wengi wakwenda weje kulawa kundawilo ye dijuwa, wakwenda wekale hamwedu na Ibulahimu, na Isaka na Yakobo mu undewa wa kulanga; 12 amba awana wo undewa wakwenda watagigwe ku chisa cha kunje; ukwene kukuwa chililo na kugwegwejula meno.” 13 Kamei Yesu hoyomugamba ayuya ichilongosi wa wasilikali igana, “Luta, yuwe ukwako fina fouhuwile.” Imutumishi wakwe hoyohona ichigele chichiya. 14 Kamei Yesu foyafikile ukaya kwa Petulo, yamona imukwewe wa Petulo, inghina we muke, kagona mwisasi kena mhungo. 15 Hakamukwafa umukono, imhungo hoimuleuka; hoyokwinuka hoyomutogomela. 16 Ikafike hegulo, wejawamwijila matewa awena simhepo, hoyosilafa kwa kulonga imbuli yakwe, hakawahonya wose awowile watamu, 17 uleke imemelesigwe imbuli yalongigwa ne mugonesi Isaya, yekugamba, “Imwenyecho hakalonda usokesi wetu, Nakulonda matamu getu.” 18 Imwene Yesu foyejayona amatewa ga wanhu gekumusunguluta, yalagisa walute umwambu. 19 Imutulumi yumwedu hoyomulutila, yamugamba, “Mwalimu, Nokwandamila kokose kowukwenda ulute.” 20 Yesu yamugamba, “Mabwasiko gena mapango, fidege fya mulanga fina mafulu, Ninga imwana we munhu kechaka hokugonesa ditwi dyakwe.” 21 Yumwedu wa wefusa wakwe yamugamba, “Mundewa, ninghe luneka nilute nikamusike iBabangu.” 22 Ninga Yesu yamugamba, “Nyandamile, waleke wafile wasike awafile wawo.” 23 Yakengile muchiya, awefusa wakwe wejawamwandamila. 24 Hakuwa musingisiko mukulu mubahali, hata ichiya hochigubikigwa na meji, imwene hakowa yagonile sinhongo. 25 Awefusa wakwe wejawamulutila, na kumwinusa, wakumugamba, “Mundewa, chihonye, chikufa!” 26 Yawagamba, “Nhani mukogoha anyeye we dihuwi dikefu?” Chimwande, yekwinuka na kuyigombela hoyoigombela imheho ne bahali; hoisalama lugano. 27 Awanhu waya wejawajuma wakugamba, “I munhu yuno munhu waki! Imwene imheho ne ibahali fikumuhulika?” 28 Naye foyafikile umwambu kuisi ya Wagelasi, wanhu weli wena simhepo weja wakitang'anyila naye, wakulawa kufilalo, wakali lugano, awanhu wasendewodaha kugenda injila iyo. 29 Langa wejawatula chowe, wakugamba, “China choni na gweye go Mwana we Mulungu? Togola! Kwija kuchisambasa ugele wetu unghali?” 30 Hatali na baho hahowa na itewa dya nguluwe itewa sikudiya. 31 Magini gaya gejagamutesa, gakugamba, “Unghachilafe chileke chilute chikengile mwitewa dye singuluwe.” 32 Hakagamba, “Luteni Hogelawa,” hogekwingila musinguluwe; kamei ditewa dyose hodidulika kwigenge mpaka kubahali, hosikunywa munghabu hosikufa. 33 Awadimi howotija, howoluta ukaya, howokwanjasa simbuli sose, na sawaya wowile na simhepo. 34 Langa ikaya yose hoilawa kwija kumusingila iMundewa Yesu; kamei wakamwone, howomutasa yaleuke muisi yawo.
1 Yakengile muchiya, hoyoloka, umwambu hoyokwingila mukaya iyawo. 2 Langa, howomwigalila imunhu yena utamu wo kuholola, kagona mwisasi, imwene Yesu yakone dihuwi dyawo, hoyomugamba yuya yaholole, “Kiinghe moyo mukulu, mwanangu!” kulekeleligwa uwihi wako. 3 Langa, awamonga wa Watulumi howolonga kufidoga fyawo, “Ayuno yakubesa!” 4 Ninga Yesu hakamanya fowakudoga, hoyogamba, “Nhani mukudoga gehile mufidoga fyenu? 5 Dihufu no dihoki, kugamba, ‘Kulekeleligwa uwihi wako,’ ama kugamba, ‘Inuka ulute?’ 6 Ninga mumanye fina Imwana we Munhu kena udaha muisi wokulekelela uwihi.” Yakumulonga ayuya yaholole inuka, ukitwike disasi dyako, ulute ukaya ukwako! 7 Hoyokwinuka, hoyoluta ukaya ukwakwe. 8 Amatewa gakone nheifo howomemigwa na ditisi, hogamutunya Mulungu, iyawenghile awanhu udaha kifana uwo. 9 Kamei Yesu foyagendage yakulawa uko hakona munhu ahanhu hakulihiligwa ikodi, yakwinangwa Matayo, hoyomugamba, “Nyandamile.” Hoyokwinuka na kumwandamila. 10 Yakengile kugati kudiya chakudiya, langa, wakonghosa kodi itewa na awena uwihi haweja, na kwikala hamwedu na Yesu na wefusa wakwe. 11 Mafalisayo, wakone nheifo, hawawagamba awefusa wakwe, “Nhani imwalimu wenu yakudiya hamwedu na wakonghosa kodi na wena uwihi?” 12 Imwene yakahulike, yawagamba, “Awomi wasikuhananga muganga, ninga awatamu.” 13 Ninga luteni mukakifuse isoko ye simbuli sino: “Nikuhananga ubasi, ninga si igelo. Kosoko sijile nikwinanga awanhu awaswamu, ninga awena uwihi.” 14 Ugele uwo wefusa wa Yohana howomulutila, howogamba, “Nhani aseye na Mafalisayo chikufunga, ninga awefusa wako wasikufunga?” 15 Yesu yawagamba, “Awenangigwe kuhalusi wodaha nhani kulila, ugele imwenye halusi kahamwedu nawo? Ugele uukwija wo kuleusiligwa imwenye halusi; aho noho wakwenda weje wafunge. 16 Hechaka munhu iyakuguma indame ya suke nyisha musuke ing'ono, kosoko aiya indame ikwenda idege isuke iya ilalile, na haya ahadegeke hakwenda hongeseke. 17 Kahi awanhu wasikuguma difai nyisha mufiya filalile; wanghagamba wagume mufiya ifilalile fikwenda fitulike, idifai ikwenda itike, ne ifiya fikwenda fibanike; ninga wakuguma idifai nyisha mufiya ifisha, kamei fyose fisikubanika.” 18 Ugele fo yalongage nawo gago, langa, hoyokwija jumbe yumonga, hoyomufugamila, yekugamba, “Imwanangu we chike kafa hambiya baha; ninga wije, wike imikono yako umwakwe naye yakwenda yowe mumi.” 19 Hoyoleuka Yesu, hoyomwandamila hamwedu na wefusa wakwe. 20 Langa, imwanamuke yejayowa na utamu wa kulawa sakame kwa miyaka ikumi na mili, hoyokwija kunyuma, hoyokwafa dipindo dye suke yakwe, 21 kosoko hakagamba muchidoga chakwe, “Ninghakwafa du dipindo dye isuke yakwe nikuhona.” 22 Yesu hoyobiduka, hoyomona, hoyomugamba, “Kiinghe moyo mukulu, mwanangu we chike! Dihuwi dyako dikuhonya.” Imwanamuke yuya hoyohona kulawa ugele uwo. 23 Yesu yakafike ukaya kwa yuya ijumbe, hakona wanhu wakutowa sifilimbi, na matewa wakuhongesa. 24 Hoyowagamba, “Leukeni! Kosoko ayuno imundele nghafile, kagona du.” Howomuseka lugano. 25 Ninga amatewa fowaleusigwe, hoyokwingila, hoyomukola umukono, ayuya imundele hoyokwimanyima. 26 Simbuli sino hosikwenela iisi iya yose. 27 Yesu foyagendage kulawa uko, wanhu wemudula weja wamwandamila wakwinula majwi, wakugamba, “Uchonele ubasi Mwana wa Daudi!” 28 Naye yakafike ukaya, awaya fidula howomulutila; Yesu hoyowagamba, “Mukuhuwila fina nodaha kugolosa dino?” Howogamba, “Heye, Mundewa!” 29 Hoyowakwafa ameso gawo, hoyogamba, “Ifene fomuhuwile muhokele!” 30 Ameso gawo hogogubuka; Imwene Yesu hoyowasigilila kwa ludole, “Langisiseni, hata munhu yumwedu yanghamanye.” 31 Ninga hawaleuka, howokwenesa simbuli sakwe mu isi iya yose. 32 Ugele awaya fowaleukage, hawamwigalila munhu chibubu iyena imhepo. 33 Imhepo ikalafigwe, ichibubu yalonga, amatewa hogojuma lugano, wakugamba, “Isinati yoneke nheifino mu Isilaeli ugele wowose.” 34 Amba Amafalisayo howogamba, “Kuludole lwe mukulu we simhepo yakulafa simhepo.” 35 Ne mwene Yesu yende yosunguluta mu sikaya ne fikaya fyose, yakufusa mumasinagogi gawo na kuhubili imbuli iswanu yo undewa, na kuhonya sinhamu sose na usokesi wowose uya. 36 Foyawonile amatewa, hakawonela ubasi kosoko hawasoka kifana ngholo sichaka mudimi. 37 Noho yawagambile awefusa wakwe, “Ugolaji mwingi, ninga wagolosaji wakefu. 38 Mutaseni Mundewa wo ugolaji, yegale wagolaji ku ugolaji wakwe.”
1 Yawenanga awefusa wakwe ikumi na weli, hoyowengha udaha wa kulafa simhepo sihile, na kuhonya sinhamu sose na usokesi wowose uya. 2 Na masina ga wefusa ikumi na weli no gano: Wa bosi Simoni yakwinangigwa Petulo, na Andelea imunduguse; Yakobo mwana wa Sebedayo, na Yohana imunduguse; 3 Filipo, na Batolomayo; Tomaso, na Matayo imukonghosa kodi; Yakobo mwana wa Alufayo, na Tadayo; 4 Simoni Mukananayo, na Yuda Isikalioti, ayo noyeja yamusongesa. 5 Awo ikumi na weli Yesu hoyowatuma, hoyowalagisa fina, “Kusinjila sa Mataifa munghalute, kahi injila yoyose ya wowose Wasamalia munghengile. 6 Ibeka mukole injila yokusilutila singholo sagilile se inyumba ya Isilaeli. 7 Mung'enda yenu hubilini, mugambe, Undewa wa kulanga usegelela! 8 Honyeni awatamu, inuleni awofile, wahonyeni awena ukoma, lafeni simhepo, muhokela chaka, lafeni chaka. 9 “Munghalonde sahabu, kahe fesa, kahe shaba mumisipi yenu; 10 kahi umufuko we nhambo, kahi ghasu mbili, kahi filwatu, kahi mhando, kosoko iyakugolosa milimo imwagila yenghigwe ichakudiya chakwe. 11 Ne ikaya yoyose ama chikaya chochose chomukwingila, hanangeni no nani umo imunhu yekudaha kuhuwilika; mwikale ukwakwe mpaka fomukuleuka. 12 Nanye munghengila munyumba muilamuse. 13 Ne inyumba iyo inghagiligwa digoya dyenu diwafikile; ninga honaga isagiligwe digoya dyenu dimuwileni muwecho. 14 Imunhu yanghaleka kumuhokelani kahi kusitegelesa simbuli senu, nghona mukulawa munyumba iyo, ama ikaya iyo, kung'unheni dinghundi duwile mumigulu yenu. 15 “Chawelu, nikumutamilani, ikwenda yuwe ibeka ku iisi ya Sodoma na Gomola kufinyilisa magayo gakwe dijuwa dye kuliganiswa, kusuma ikaya iyo.” 16 “Mulange, aniye nikumutumani, kifana ngholo muchiligati cha mausi, muwe ne misungu kifana majoka, na waholo kifana huwa. 17 Kilangisiseni na awanhu; kosoko wakwenda wawegale kumabalasa, na kumasinagogi gawo, wakwenda wamutoweni; 18 nanye mukwenda mwigaligwe ku maliwali na wandewa kosoko yangu, uwe uhomelesi ukwawo na kumataifa. 19 Ninga baho nghona wakumwigalani, munghadogedoge chomukwenda mulonge, kosoko mukwinghigwa ugele uwo gokulonga. 20 Kosoko siyo nyeye mukulonga, ninga ni Muhe we Baba yenu yakulonga mugati yenu. 21 “Ne imundugu yekumusongesa imunduguse uleke yakomigwe, ne baamunhu imwana, awana wekuwenukila awaweleke, na kuwakoma. 22 Nanye mukwenda musuligwe na wanhu wose kosoko ye disina dyangu, ninga iyakwenda yafinyilise mpaka kundumo noyakwenda yahone. 23 Ninga fowakuwawinga mukaya ayino, mutijile kuyimonga; kosoko, chawelu nikumutamilani, musikumala sikaya sa Isilaeli, mpaka yeje Imwana we Munhu. 24 “Imwifusa ghakumusuma imufusa wakwe, kahi imutumwa nghakumusuma iMundewa wakwe. 25 Yagila imwifusa yowe fina imwalimu wakwe, mutumwa yowe fina imukulu wakwe. Nghonaga wamwinange imwenye nyumba Belisebuli, isikuwa lugano kuwaya awoile munyumba yakwe.” 26 “Munghawogohe, kosoko kwa chaka mbuli ikifisile iyene isikwenda imanyike. 27 Dyonikumutamilani mu chisa, dilongeni mu ujelu; na dyomukuhulika kuchifiso, mudihubili munyumba muchanhya. 28 Munghawogohe awakukoma umutufi, wasikudaha kukoma ne chidoga; ibeka mumogohe ayuya iyakudaha kubana umutufi ne chidoga nacho mu jehanamu. 29 Togoleni ifindebwa fili fisikuguligwa kwe sendi imwedu? Ninga hata chimwedu chisikugwa hasi Baba yenu yaleke kumanya; 30 Ninga nyeye, hata si njwili sa mumatwi genu sitaligwa sose! 31 Munghogohe, ibeka nyeye kusuma findebwa itewa.” 32 “Ninga chila munhu yakwenda yanifumile kumwande ya wanhu, aniye nani nikwenda nimufumile kumwande ye iBabangu yowile kulanga. 33 Ninga imunhu wowose yakwenda yanikane kumwande ya wanhu, ani nani nikwenda nimukane kumwande ye iBabangu yowile kulanga.” 34 “Munghagambe fina nigala igoya muisi; ng'o! Sijile kwigala igoya, ninga ipanga. 35 Kosoko nija kuwatemanula imunhu ne Babakwe, imwana we chike ne ing'ina, imukwemulima ne mukwewe. 36 Awanghondo we munhu no waya wowile munyumba yakwe. 37 Iyakwenda iBabakwe ne ing'ina kusuma niye, nghakunyendesa; kahi iyakwenda imwanagwe we chigosi ama wechike kusuma niye nghakunyendesa. 38 Ninga imunhu inghakulonda umusalaba wakwe na kunyandamila, nghakunyendesa. 39 Iyakuchona chidoga chakwe yakuchagilisa; ninga ayuya iyakwagilisa chidoga chakwe, kosoko yangu yakwenda yachone.” 40 “Iyakuwahokelani nyeye yakunihokela niye, iyakunihokela niye, yakumuhokela ayuya iyanitumile. 41 Iyakumuhokela mugonesi kosoko ni mugonesi, yakwenda yapate digeleko dya mugonesi, naye iyakumuhokela imunhu we chawelu, kosoko ni munhu we chawelu, yakwenda yapate digeleko dye munhu wa chawelu. 42 Ne munhu wowose yakwenda yamunywise yumwedu wa awano awadodogi hata chinghowa chikombe cha meji gemheho, kosoko ni mwifusa, huwila, nikumutamilani, nghakwagililigwa na digeleko dyakwe ng'o.”
1 Kamei Yesu yakamale kuwasigilila awefusa wakwe ikumi na weli, hoyoleuka kuluta kufusa na kuhubili kusikaya sawo. 2 Yohana yakahulike ako kwigelesa sinhenda sa Kilisito, hoyotuma awefusa wakwe, wamuse, 3 “Agweye noyuya yakwija ama chimulangilile yungi?” 4 Yesu yabidula, na kuwagamba, “Luteni mukamutamile Yohana agene gomukuhulika, na gomukona: 5 awemudula wakona, ifiwete wakugenda, awena ukoma wakuhona, ifihuli wakuhulika, awafile wakwinuligwa, na awakiwa wakuhubiliigwa imbuli swanu. 6 Naye ibeka imunhu wowose yuya inghakunyona fina niha.” 7 Kamei awaya wakaleuke, Yesu yakonga kulonga na matewa simbuli sa Yohana, “Hamulawa kuluta kunyika kulanga choni? Chibago chikusingiswa ne imheho? 8 Ninga hamulawa kwijalanga choni? Munhu yafalile suke swamu lugano? Langa awanhu awakufala sisuke siswamu lugano, wowa musinyumba sa wandewa. 9 Ninga nhani mwalawile? Nikona mugonesi? Heye, nikumutamilani imukulu kusuma imugonesi, 10 langa, nikumutuma mutumigwa wangu, ‘Kumwande ye chihanga chako. Iyakwenda yagolose injila yako kumwande yako.’ 11 Chawelu nikumutamilani, nghenati yoneke munhu mu fyeleko fya wanawake imukulu kusuma Yohana Mubatisaji; ninga imudodogi mu undewa wa kulanga no mukulu kusuma imwene. 12 Kulawa ugele wa Yohana Mubatisaji mpaka hambiya undewa wa kulanga ukulondigwa kwa ludole, nawo awena ludole wakuwulonda. 13 Kosoko wagonesi wose na tolati watamila mpaka ugele wa Yohana. 14 Munghahananga kufumila, imwene no Eliya iyakwenda yeje. 15 Iyena singhutwi, yahulike! 16 “Ninga icheleko chino nochiliganisa na choni? Chikifana wana wekwikala kwisoko, wakuwenanga wayao wakugamba, 17 ‘Chiwatowela filimbi ninga musifinile! Chimba nyimbo so usungu kahi musililile!’ 18 Kosoko Yohana hakeja, nghakudiya kahi nghakunywa, wagamba Kena mhepo yuno! 19 iMwana we Munhu keja yakudiya na kunywa, wagamba, ‘Mulafi yuno, na mulefi, wo ugimbi mbwiya yawo awakonghosa kodi na wena uwihi!’ Ne imisungu imanyika fina ina chawelu kumilimo yakwe.” 20 Hokakonga kusigombela sikaya siya sene soyagolose majumo mengi mugati yakwe, kosoko sisalambile. 21 “Usungu wako Kolasini! Usungu wako Betisaida! Kosoko amajumo agagolosigwe ukwenu nhanga gagolosigwe Tilo na Sidoni, howowa wakulamba katali na kufala magunia na kibaka difu. 22 Ninga nikumutamilani ikuwa ibeka Tilo na Sidoni kufinyilisa ditoso dyawo dijuwa dyo kuliganiswa kusuma nyeye! 23 Agwe nagwe Kapelinaumu, togola! Kokwinuligwa mpaka kulanga? Ukwenda udulisigwe mpaka kusimu! Kosoko amajumo agagoloseke ukwako nhanga gagoloseke Sodoma, ikaya iyo nhanga inghali mpaka diyelo. 24 Ninga nikumutamilani, ikwenda yuwe ibeka kwa Sodoma kufinyilisa uliganiso wakwe kusuma nyeye!” 25 Ugele uwo Yesu hakabidula yakugamba, “Nikukulumba, Baba wo ulanga ne iisi, kosoko ye simbuli siso, hakuwafisa wene ubala na wena misungu, na kuwagubulila wana wadodogi. 26 Heye, Baba, kosoko nofoyagile kumwande yako.” 27 Hoyogamba, “Ninghigwa fyose ne Babangu; kahi hechaka iyamumanyile Imwana, ninga Baba; kahi hechaka yamumanyile Baba ninga Mwana, na wowose imwene iMwana woyakwenda kumugubulila. 28 Mwije ukwangu, anye wose, mukwidasigwa na kusumigwa na makanda, aniye nikwenda niwabwihiseni. 29 Faleni umugwato, mukifuse ukwangu; kosoko niye na muholo munhu we digoya dye chidoga, nanye mukwenda muwe na kubwihila mufidoga fyenu. 30 Kosoko ulugwato lwangu lutelemeko, na dikanda dyangu ihufu.”
1 Ugele uwo Yesu yendeyogenda mumigunda dijuwa dye sabato; awefusa wakwe howokona njala, howokonga kukwanyula masamhu, na kudiya. 2 Amafalisayo wakone nheifo, howomugamba, “Langa, awefusa wako wakugolosa chinhu chene si chiswamu kugolosa dijuwa dye sabato!” 3 Hakawagamba, “Musasomile foyagolose Daudi, foyowile ne njala, imwene na wayagwe? 4 Ifyene foyengile munyumba ye Mulungu, na kudiya imikate ilafigwe kwa Mulungu, iyene si fiswanu imwene kudiya kahi awayagwe waya, ninga makuhani wemwene? 5 Kahi musisomile mutolati ifina awatambiki dijuwa dye sabato wakuibana isabato wanghowe na wihi? 6 Ninga nikumutamilani, ahano kabahano imukulu kusuma dihekalu. 7 Ninga nhanga mumanyile isoko ye simbuli sino, Nikuhananga ubasi, siyo igelo. Musowile mukuwagamba wabana awechaka wihi; 8 Kosoko Mwana we Munhu no Mukulu we sabato.” 9 Yaleuke uko, na kwingila mwisinagogi dyawo. 10 Langa, hamuwa na munhu iyena mukono uholole; weja wamusa, wakugamba, “Togola! Yagila kuhonya munhu dijuwa dye sabato?” Uleke wamusongese. 11 Hakawagamba, “No yehoki mugati yenu imwene ingholo yakwe imwedu inghahubugila mwikolongo dijuwa dye sabato, nghakuikola na kuilafa? 12 Togoleni! Imunhu si ibeka kusuma ingholo mikangha mingahi! Ninga ni fiswanu kugolosa amaswamu dijuwa dye sabato.” 13 Kamei yamugamba imunhu yuya, “Golola umukono wako.” Hakagolola, houhona, houkuwa mumi fina uyagwe wa keli. 14 Ninga awaya Mafalisayo, howolawa, howokuwa na mulundo kosoko yakwe, ifene fowakwenda wamukome. 15 Imwene Yesu yakagamanye ago, yaleuka uko; na wanhu itewa howomwandamila; hoyowahonya wose. 16 Hakawalemesa wanghamutamilise kuwanhu. 17 uleke iliganile imbuli yalongigwe ne mugonesi Isaya, yakugamba: 18 “Langa, imutumigwa wangu wonisagule, Mwendigwa wangu, umoyo wangu wendeswa naye. Nikuguma muhe wangu umwakwe, Yakwenda yawatamilise Amataifa uliganiso. 19 Nghakuwa na lukani kahi chowe, kahi imunhu nghakwenda yamuhulike munjila. 20 Ichibwade chitulike nghakuchibena, kahi ichikoloboyi chikulawa umosi nghakuchisima, Mpaka hona yakwigala uliganiso usume. 21 Disina dyakwe Amataifa wakwenda wadihuwile.” 22 Ugele uwo hakegaliligwa munhu yena magini, mudula, kahi chibubu, yamuhonya, kamei yuyuya chibubu yalonga na kona. 23 Matewa gose hagajuma, wakugamba, “Ayuno so mwana wa Daudi?” 24 Mafalisayo wakahulike, hawagamba, “Ayuno nghakulafa simhepo chaka, ninga kwa Belisebuli mukulu we simhepo.” 25 Kamei Yesu yakamanye fowakudoga, yawagamba, “Chila undewa ukigawile uwecho kwa uwecho, ukwenda ubanike; na kwachaka kaya iikitemanula iyenyecho ikudaha kwima. 26 Na Luhoma yanghamulafa Luhoma, yakibanila imwecho kwa imwecho, undewa wakwe wokwima nhani? 27 Nghona aniye nikulafa simhepo kwa Belisebuli, togoleni! Awana wenu wakumulafa kwa yehoki? Kosoko iyo awene nowakwenda wamuliganiseni! 28 Ninga niye ghona nikulafa simhepo kwa Muhe wa Mulungu, undewa wo Mulungu ufulusa kumwijilani. 29 “Ama kodaha nhani imunhu kwingila kunyumba ye munhu yena ludole na kufilonda ifinhu fyakwe, nghonaga nghakongile kumoha ayuya iyena uludole? Noholo yakonge kuhoka inyumba yakwe. 30 Imunhu inghehamwedu naniye kachinyume naniye; ne imunhu inghekukunjagisa hamwedu na niye yakwanjasa. 31 Kosoko iyo nikuwagambani, chila wihi na chila mbuli yo kubesa wakwenda walekeleligwe wanhu, ninga kwa kumbesa Muhe Musunhile wasikulekeleligwa. 32 Naye munhu wowose yakwenda yalonge mbuli muchanhya yo mwana wa Munhu yakwenda yalekeleligwe. Ninga Imunhu wowose yakwenda yalonge mbuli muchanhya ya Muhe Musunhile nghakwenda yalekeleligwe muchilunga chino hambiya na achiya chikwija.” 33 “Digoloseni dibiki dyuwe iswanu, na mamudyo gakwe maswanu; ama digoloseni dibiki dyuwe diha, na mamudyo gakwe geha; kosoko kwa mamudyo gakwe dibiki dikumanyika. 34 Anyeye mu wana wa majoka, modaha nhani kulonga maswanu nghonaga mwihile? Kosoko umulomo we munhu ukulonga agamemile mu moyo wakwe. 35 Munhu muswanu mu sigafu yakwe iswanu, yakulafa maswanu, na munhu yehile musigafu yakwe ihile yakulafa gehile. 36 Hambiya, nikumutamilani, chila mbuli ye chibwalasi yowakulonga wanhu, wakwija wolafa nhaguso yakwe dijuwa dyo kuliganiswa. 37 Kosoko kwa simbuli sako kotaligwa kuwa muswamu, na ku simbuli sako koliganiswa.” 38 Baho awamonga, awatulumi na Mafalisayo howomubidula, wakugamba, “Mwalimu Chikuhananga kona chitangilo ukwako.” 39 Hawabidula na kuwagamba, “Cheleko chihile na chechilanga, chikuhananga chitangilo? Wala chisikwinghigwa chitangilo, ninga ichitangilo che mugonesi Yona. 40 Kosoko fina Yona foyejayowa majuwa madatu misi ne chilo mudida dye nyamungumi, nonheifo foikuwa iMwana we Munhu foyakwenda yowe majuwa madatu imisi ne chilo mu moyo we iisi. 41 Wanhu wa Ninawi wakwija wokwima dijuwa dyo uliganiso na wanhu we cheleko chino, nawo wakwenda wawaliganise fina wabana; kosoko awene hawalamba kwa mahubili ga Yona; na ahano kabaha imukulu kusuma Yona: 42 Imalikia wa kwikulu yakwenda yeme dijuwa dyo uliganiso hamwedu na wanhu we cheleko chino, naye yakwenda yawaliganise fina wabana; kosoko imwene yeja kulawa ulwandi lwe ndumo we chilunga uleke yahulike ubala wa Sulemani; na hano kabahano imukulu kusuma Sulemani.” 43 “Imhepo ihile, foikulawa mwe munhu, ikugendela ahanhu hechaka meji, ikuhananga hanhu hakubwihila, inghaswela. 44 Kamei, ikugamba, ‘Nikuya ukaya ukwangu konilawile,’ nghonaikwija, ikuifika yechaka munhu, ishagiligwa, na ihambigwa. 45 Chimwande ikuluta ikalonda mhepo mufungate isihile kusuma iyene naso sokwingila na kwikala umo; na imunhu yuya inyuma yakwe ya ndumo ikuwa ihile kusuma aiya ya kunghonga. Nofo ikwenda yuwe kucheleko chino chihile.” 46 Ugele woyalongage na matewa, langa, ing'ina na wanduguse hawowa wemile kunje, wakuhananga kulonga naye. 47 Imunhu yumonga yamutamila, “Langa, ing'inako na wanduguso wowa kunje, wakuhananga kulonga nagwe.” 48 Kabidula yekumugamba, “Ayuya yamwigalile imbuli, Ing'inangu nonani, na awandugusangu?” 49 Hakawagololela umukono awefusa wakwe, yakugamba, “Langa, ing'inangu na wandugu sangu!” 50 Kosoko wowose iyakwenda yagolose foyakwenda iBaba yowile kulanga, ayu no mundugu sangu, lumbu dyangu, ne ing'inangu.
1 Dijuwa diya Yesu hoyoleuka ukaya, hoyokwikala hanghingi ye bahali. 2 Howomwijila matewa mengi, hoyokwingila mumunhumbwi, hoyokwikala; agaya matewa gose hogokwima kunghingi ye bahali. 3 Hoyolonga nawo mbuli nyingi kwa mbasi, hoyogamba, “ “Langa, imuhandi yaluta kuhanda. 4 Kamei foyendeyonyaga, simbeyu simonga silagala habehi ne njila; ifidege hofikwija hofisidiya; 5 simonga hosilagala mwikangalawe, ahechaka ulongo mwingi; hosikota chimwande kosoko ulongo usingile hasi; 6 dijuwa dikalike hosilakala; na kosoko sichaka misisi hosinyala. 7 Simonga hosilagala ahena imiwa; imiwa iya hoikula, hoisikanhamisa; 8 Simonga hosilagala hena ulongo muswanu, hosikweleka, imonga, igana, makumi mutandatu, imonga makumi madatu. 9 Iyena singhutwi yahulike!” 10 Howokwija awefusa wakwe howomugamba, “Nhani ukulonga nawo kwa mbasi?” 11 Yabidula, yekugamba, “Anyeye mumotesigwa kufimanya ififiso fyo undewa wa kulanga, ninga awene wasimotesigwe. 12 Kosoko wowose iyena ichinhu, yakwenda yongeseligwe, naye yakwenda yamemesiligwe telele: Ninga ayuya iyechaka chinhu; hata achiya choyenacho yakwenda yahokigwe. 13 Kosoko iyo nikulonga nawo kwa mbasi; kosoko wanghalanga wasikona, na wanghategelesa wasikuhulika, kahi kumanya. 14 Imbuli ye mugonesi Isaya ikuliganiswa ukwawo, iikugamba: ‘Kuhulika mohulika, ninga musimanya; Kulanga molanga, ninga musikona. 15 Kosoko imimoyo ya wanhu wano igaluka misito, Na kusinghutwi sawo wasikuhulika fiswanu, Ameso gawo wafinya; Wangheje wokona kwa meso gawo, Howohulika kwa nghutwi sawo, Howomanya mumiyoyo yawo. Howobiduka honiwahonya.’ 16 Ninga ibeka ameso genu, kosoko gakona, ne singhutwi senu, kosoko sikuhulika. 17 Kosoko chawelu, nikumutamilani, wagonesi wengi na waswanhu hawenda kugona gomukona nyeye, ninga wasagonile, na wasagahulike gomukuhulika nyeye wanghagahulike.” 18 “Hulikiseni imbasi ye muhandi. 19 Chila munhu nghona yakuhulika imbuli ya undewa nghona nghakuimanya, yakwija ayuya iyehile, yakuidondola iihandigwe mumoyo wakwe. Ayo noyahandigwe habehi ne injila. 20 Na yuya iyahandigwe mumakangalawe, no yuya yakuihulika imbuli yakuihokela kwa chinyemi; 21 ninga kusiyakwe kechaka misisi, yakugendelela chipisi chiguhi, inghalawanisa nyidaswa kosoko ye imbuli iyo, chimwande yakuileka. 22 Iyahandigwe hamiwa, no yuya iyakuhulika imbuli; kamei simbuli se chilunga, na udasi wo ugoli we chilunga, fikuikanhamisa imbuli iya; kamei isikweleka. 23 Ayuya yahandigwe haulongo muswanu no yuya yakuhulika iyo imbuli, na kuimanya: Na chawelu yakweleka mamudyo na kulafa igana dimwedu, na makumi mutandatu, na imonga makumi madatu.” 24 Hoyowalafila mbasi ingi, yakugamba, “Undewa wa kulanga uligana na munhu yahandile mbeyu swanu mumugunda wakwe: 25 awanhu wakagone hakeja imunghondo wakwe na kuhanda mabago mugati ye ingano, na kuleuka. 26 Hanyuma, ingano ikakule na kweleka, hogoneka na mabago gengi mugatigati ye ingano. 27 Awatumwa wakwe imwenye kaya howoluta kumutamila, ‘Mundewa, nghwahandile mbeyu swanu mu mugunda wako; galawa hoki amabago?’ 28 Hakowagamba, ‘Imunghondo noyagolose nhaifi!’ Awatumwa hawamugamba, ‘Ukuhananga chikagalunde hamwedu?’” 29 Hakagamba, “Ng'o, Mungheje mung'ola mabago, na kung'ola ingano hamwedu nago. 30 Filekeni fyose fikule fifike ku ugele wokududula; nikaniwatamila awakududula, Kongeni kugalunda amabago, madulu na kugasoma; ingano muyigale kukano yangu.” 31 Hakawalafila mbasi ingi: Yakugamba, “Undewa wa kulanga ukifana ne imhule ye haladali, imunhu yailonda, hoyoihanda mumugunda wakwe; 32 nayo ndodogi kusuma simbeyu sose; amba inghakula ikuwa nghulu kusuma mabiki gose, dikuwa ibiki ikulu fidege fya kulanga fikwija na kujenga mafulu gawo mumanhambi gakwe." 33 Hoyowatamila mbasi ingi: “Undewa wa kulanga ukifana inungo yoyalondile imwanamuke, hoyoiguma mu simhishi ndatu so usage, kamei usage wose housasa.” 34 Ago gose Yesu hoyowatamila amatewa kwa mbasi, ninga bila mbasi nghawatamile mbuli. 35 Uleke iliganile imbuli iyalongwa ne mugonesi, iyagamba, “Nogubula umulomo wangu kwa mbasi; Nikugatambula agakifisile kulawa kunghonga.” 36 Kamei Yesu yakawaleke amatewa, hoyokwingila munyumba; awefusa wakwe howomwijila, wakugamba, “Chibulile imbasi ya mabago ga mumugunda.” 37 Hoyowabidula, hoyowagamba, “Iyakunyaga asiya simbeyu si swanu no Imwana we Munhu; 38 umugunda uya no chilunga; simbeyu siswanu no wana wa undewa; agaya amabago no wana wa yuya yehile; 39 ayuya imunghondo yahandile no Luhoma; kukududula no kuhela kwe chilunga, na waya awakududula no malaika. 40 Kamei; fina mabago fogakulundigwa na kusomigwa mumoto; nofo ikwenda yuwe kukuhela kwe chilunga. 41 Imwana we Munhu yakwija yakutuma malaika wakwe, nawo wakwenda wawakonghole kulawa mu undewa wakwe wose awena uwihi, na wose awakugolosa gehile, 42 na kuwaguma mwililimba dyo umoto; kukwende kuwe chililo na kugwegwejula meno. 43 Noho awanhu awaswamu wakwenda wake fina dijuwa mu undewa we Baba yawo. Yena singhutwi yahulike!” 44 “Kahi undewa wa kulanga ukifana na ugoli ukifisile mumugunda; imunhu yakawone, hoyoufisa; na kwa chinyemi chakwe hoyoluta hoyolafa ifinhu fyakwe fyose hofiguligwa, kamei hoyogula umugunda uya.” 45 “Kahi undewa wa kulanga ukifana munhu mwambasi iyekuhananga lulu swanu. 46 Kamei yakone lulu imwedu ya iliho lugano, hakaluta na kulafa ifinhu fyakwe fyose figuligwe, hoyoigula.” 47 “Kahi undewa wa kulanga ukifana ulwafu lugumigwe mubahali, kamei houkwega sisomba sa matalago gose. 48 Lukameme, howolukwega kunje; howokwikala, howosagula si swanu howosiguma mufiya, isihile howositaga. 49 Nofo ikaikuwa kukuhela kwe chilunga; malaika wakwenda walawanise na kuwabagula awehile na awaswanu, 50 na kuwakubita mwililimba dyo umoto; kukwende kuwe chililo na kugwegwejula meno.” 51 Yesu hoyowosa, “Mugamanya agano gose?” Howomugamba, “Heye.” 52 Hoyogamba, “Ninga kosoko iyo chila mutulumi yena umanyi wa undewa wa kulanga, kakifana imunhu imwenyenyumba iyakulafa mufinhu fyakwe ifingi ifinhu fisha ne figono.” 53 Kamei Yesu yakamale simbasi siso, hoyolawa, 54 Yakafike kuiisi yakwe, hakawafusa mwisinagogi dyawo, howojuma, wakugamba, “Ayuno kapata hoki imisungu ino na amajumo gano? 55 Ayuno si mwana we muselemala? Ing'ina si yuya yekwinangwa Maliamu? Na awandugusakwe si cha Yakobo, na Yusufu, na Simoni, na Yuda? 56 Na walumbuse wose wasibaha ahetu? Hambiya yuno kapata hoki gose gano?” 57 Hawamusula. Yesu hakawagamba, “Imugonesi nghakuswela chogoho, ninga kuisi yakwe imwecho na munyumba yakwe.” 58 Kamei nghagolose majumo mengi makulu uko, kosoko yakuleka kuhuwila kwawo.
1 Ugele uwo iMundewa Helode hoyohulika simbuli se Mundewa Yesu, yawatamila awatumishi wakwe, 2 “Ayo no Yohana Mubatisaji kenuka mudifa, kosoko udaha ukugolosa milimo mugati yakwe.” 3 Kosoko Helode hakowa yamukolile Yohana, hoyomoha, hoyomuguma mwigelesa, kosoko ya Helodia imuke wa Filipo imunduguse. 4 Kosoko Yohana yamugamba, “Fina isinogele agweye kuwa naye.” 5 Naye yakahanange kumukoma, hakawogoha awanhu, kosoko hawamona Yohana fina mugonesi. 6 Dikafike dijuwa dye sikukuu yo kwelekwigwa kwakwe Helode, imwanagwe we chike wa Helodia hoyofina fiswanu kumwande ya wanhu, hoyomwendesa Helode, 7 hakamuhuisa kwa kilaha fina komwingha chochose cho yakuhananga. 8 Kwa kusongesigwa ne ing'ina, yagamba, “Ninghe bahano, mwisahani ditwi dya Yohana Mubatisaji!” 9 iMundewa, hakona usungu lugano, ninga kosoko ye nyilaha yakwe, na kosoko ya waya awowile naye hachakudiya, hakalagisa yenghigwe; 10 hakatuma munhu, howomudumula ditwi Yohana amuya mwigelesa. 11 Ditwi dyakwe hadigaligwa mwibakuli, hoyokwinghigwa imwana yuya we chike; hoyodigala kwe ing'ina. 12 Awefusa wakwe hawaluta, howolonda umutufi uya, howowika, muchilalo; kamei howoluta kumutamila Yesu. 13 Ninga Yesu yakahulike gago, hoyoleuka uko muchiya, hoyoluta hanhu hechaka wanhu, ye imwene chinyele. Amatewa wakahulike, howomwandamila kwa migulu kulawa mukaya sawo. 14 Yesu hoyolawa hoyokona, itewa ikulu dya wanhu, hoyowonela ubasi, hoyowahonya sinhamu sawo. 15 Ikafike hegulo, awefusa wakwe howamulutila, wokugamba, “Ahanhu hano nyika muhala, ne chigele chiloka, uwelage amatewa walute kusikaya wakakigulile fyakudiya.” 16 Yesu hoyowagamba, “Hechaka soko ya kuleuka, Wengheni nyeye chakudiya!” 17 Howomugamba, “Chichaka chinhu hano ila mikate mishano na somba mbili du.” 18 Hoyogamba, “Nigalileni hano.” 19 Hoyowalonga amatewa wekale mumbago: Hoyoilonda aiya imikate mishano na sisomba si mbili, hoyolanga kulanga, hoyoitasila mboto, hoyoibendula imikate iya, hoyowengha awefusa wakwe; awefusa howowengha amatewa. 20 Howodiya wose howokwiguta; howodondola ifibesu fye mikate fisigale, fisege ikumi na fili fimemile. 21 Nawo awadiile hawowa wagosi figulu fishano, kuleka wanawake na wana wadodogi. 22 Chimwande hoyowadindilisa awefusa wakwe wengile muchiya, na kulongola kumwande yakwe kuloka umwambu ugele imwene yakilaga na amatewa. 23 Kamei yakamale kilaga na matewa, hoyokwila kwitunda yemwene, kutasa. Ikafike hegulo, hakowa uko yewaimwene. 24 Ne chiya chiya chifika muchiligati che bahali, chikwidasigwa lugano na meji gakujubajuba, kosoko imheho yende itowa muchiya kwa ludole. 25 Kumalile kucha ninga kukali chilo, Yesu hoyowejila, yakugenda nemigulu mubahali. 26 Awefusa wakwe wakamone yakugenda mubahali, howokogoha, howogamba, “Inyefu! Howotula chowe kosoko ya uwoga.” 27 Chimwande Yesu hoyolonga, hoyowagamba, “Kiingheni moyo; No niye. Munghogohe.” 28 Petulo hoyomubidula, yakugamba, “Mundewa, nghona nogweye, nilonge uleke nije ukwako mumeji muchanhya.” 29 Hoyomugamba, “Wije!” Petulo hoyohumuluka muchiya, hoyogenda kwa migulu mumeji kumulutila Yesu. 30 Ninga yakone imheho hoyokogoha; hoyokonga kudidimila, hoyotula chowe, “Mundewa, nihonye!” 31 Chimwandemwande Yesu hakagolola umukono wakwe, hakamukola, na kumugamba, “Agwe go we dihuwi dikefu! Nhani wowile na manhonge?” 32 Nawo wakengile muchiya, imheho hoiposika. 33 Nawo awowile muchiya howomufugamila howogamba, “Chawelu agweye no umwana we Mulungu!” 34 Wakafuluse kuloka, hawengila mu iisi ya Wagenesaleti. 35 Na awanhu wa hanhu haya wakamutange, howotuma wanhu kuluta ku si iisi sose sisungulute hawamwigalila wose wowile ne sinhamu; 36 nawo hawamutasa fina wakwafe du; dipindo dye isuke yakwe; na wose wakwafile howohona.
1 Baho Mafalisayo na Watulumi kulawa Yelusalemu howomulutila Yesu na kugamba, 2 “Nhani awefusa wako wakubana ijadi? Kosoko wasikunawa imikono nghona wakudiya chakudiya.” 3 Hoyowabidula yakuwagamba, “Nhani anye nanye mukubana imisigililo ye Mulungu kosoko ya ijadi yenu? 4 kosoko Mulungu yagamba, ‘Mogohe iBabako, ne ing'inako, na Iyakuliga iBabakwe, ama ing'ina, yakomigwe chelu.’ 5 Ninga anyeye mukugamba, ‘Iyakwenda yamulonge iBabakwe ama ing'ina, Chochose chiwagile kutasigwa kulawa ukwangu niye ni cha Mulungu. Kechaka soko ya kumogoha iBabakwe.’ 6 Kamei mukuibesa imbuli ye Mulungu kosoko ye ijadi yenu. 7 Anye mwina ichimwefe, ni fiswanu foyalongile mugonesi Isaya kosoko yenu, yekugamba, 8 ‘Awanhu wano wakunyogoha kwa milomo; Ninga imimoyo yawo ya hatali naniye. 9 Nawo wakufuga chaka, Wakufusa amafuso ge misigililo ya Wanhu.’” 10 Hoyowenanga matewa hoyowagamba, 11 “Hulikiseni, mumanye! Siyo ichikwingila kumulomo ichikumuguma imunhu uwafu; nanga ichikumulawa kumulomo nochikumuguma imunhu uwafu.” 12 Noho awefusa wakwe wamulutile wakugamba, “Kumanya fina Mafalisayo fowahulike imbuli iya hawasuha?” 13 Hakabidula, “Chila mbeyu iisihandigwe ne Babangu wa kulanga ikung'oligwa. 14 Walekeni! Awene ni filongosi mudula, wa mudula; na mudula yanghamulongosa imudula miyagwe, wakwenda wahubugile mwikolongo wose foniweli.” 15 Kamei Petulo hakabidula yakugamba, “Chitamile, imbasi iyo.” 16 Yesu hoyowagamba, “Hata nyeye nanye mwikali mwechaka misungu? 17 Munghati mumanye fina chila chikwingila kumulomo chikuloka kunda, na kuluta kutagigwa kucholo? 18 Ninga ifikulawa kumulomo fikulawa kumoyo; nofikumuguma imunhu uwafu. 19 Kosoko kumoyo kukulawa magelegela gehile, kukoma, dihabwa, uhiji, uhomelesi wa udasi, na maligo; 20 ago nanga gekumwingha imunhu uwafu, ninga kukudiya na mikono isinawigwe kusikumwingha imunhu uwafu.” 21 Yesu yakaleuke uko hoyoluta ulwandi lwa Tilo na Sidoni. 22 Langa mwanamuke yumonga Mukananayo we simhaka sa kuya hoyomwijila, hoyokwinula dijwi, na kugamba, “Unyonele ubasi, Mundewa mwana wa Daudi. Mwanangu we chike, kekaliligwa lugano na simhepo.” 23 Kahi Yesu nghamubidule mbuli. Awefusa wakwe howomulutila, howomutasa, wakugamba, “Muleke yaleuke, kosoko yakuchijojela kunyuma yetu.” 24 Hakabidula, yekugamba, “Nhumigwa kusingholo sagilile du, se nyumba ya Isilaeli.” 25 Naye hoyokwija hoyomufugamila hoyogamba, “Mundewa nitase!” 26 Hakabidula yekugamba, “Siyo fiswanu kulonda ichakudiya cha wana na kugakubitila amabwa.” 27 Hoyogamba, “Heye, Mundewa, ninga hata amabwa gakudiya chakudiya che sigafu ichikulagala musimesa se wandewa wawo.” 28 Kamei Yesu hoyobidula yekugamba, “Mayi, dihuwi dyako ikulu.” Na yuwe ukwako fina fo ukuhananga. Imwanagwe we chike hoyohona kulawa ugele uwo. 29 Yesu hakaleuka uko, na kufika ulwandi lwa bahali ya Galilaya; hoyokwila kwitunda, hoyokwikala hasi uko. 30 Hawamulutila matewa wakumwigalila fiwete, fidula, fibubu, filema, na wamonga itewa hawaweka hamigulu yakwe; hoyowahonya; 31 Kamei amatewa howajuma, wakone fibubu wakulonga, filema wakuhona, fiwete wakugenda; na fidula wakona; howomutunya Mulungu wa Isilaeli. 32 Yesu hakawenanga wefusa wakwe hoyogamba, “Nikuwonela ubasi amatewa, kosoko gafika majuwa madatu wekala hamwedu na niye, kahi wechaka chinhu cho kudiya; kuwelaga wafungile sikwenda, wangheje wosilika munjila.” 33 Awefusa wakwe howogamba, “Chopata hoki mikate ahano hanyika, yo kudigutisa ditewa dikulu fina dino?” 34 Yesu hoyowosa, Mwina mikate mingahe? Howogamba, “Mufungate, Na fisomba fikefu.” 35 Hoyowalagisa amatewa wekale hasi; 36 hoyoilonda iya imikate mufungate ne fisomba fiya, hoyolumba, hoyoibendula, hoyowengha awefusa wakwe, awene nawo howowengha amatewa. 37 Howodiya wose, howokwiguta, howodondola ifibendu fisigale fye mikate fisege mufungate, fimemile. 38 Nawo awadiile hawowa wagosi figulu fine, leka wanawake na wana. 39 Hoyowelaga amatewa, hoyokwila mu chiya, hoyoluta ulwandi lwa Magadani.
1 Howomwijila Mafalisayo na Masadukayo, kumugesa, howomuhananga yawonese chitangilo chikulawa kulanga. 2 Hoyobidula, hoyowagamba, “Hona ni hegulo, mukugamba, ‘Kukuwa kuswanu; kosoko ulanga mudunghu.’ 3 Na nhosikusiku, mukugamba, ‘Diyelo kukuwa mheho ya luputa; kosoko ulanga mudunghu, kahi kukudidima.’ Mumanya kutanga ulanga fowuwile; ninga, musikudaha kutanga ifitangilo fya ugele uno. 4 Cheleko chihile cha dihabwa chikuhananga chitangilo? Wala! Chisikwinghigwa chitangilo kusuma chiya cha Yona.” Hoyowaleka, hoyoleuka. 5 Nawo awefusa wakwe howoluta mpaka umwambu, howosimilwa kulonda mikate; 6 Yesu hoyowagamba, “Mukilangisise ne inungo ya Mafalisayo na Masadukayo.” 7 Howokonga kusimulila awecho kwa wecho, wakugamba, “Kosoko chisigale mikate.” 8 Ninga Yesu yakamanye, hoyowagamba, “Nhani mukuwanga nyenye kwa nyenye, anyeye we dihuwi dikefu, kosoko mwichaka mikate? 9 Mukali kumanya? Kahi musikugelegela aiya imikate imishano ku wanhu figulu fishano, homudondola fisege fingahi? 10 Na aiya mikate mufungate, na waya wanhu figulu fine, homudondola fisege fingahe? 11 Yanhani musikumanya fina si kosoko ye mikate nimutamilani? Ninga mukilangisise na inungo ya Mafalisayo na Masadukayo.” 12 Noho wamanyile fina nghalongile wakilangisise ne nungo ya mukate, ninga na mafuso ga Mafalisayo na Masadukayo. 13 Yesu yaluta ulwandi lwa Kaisalia-Filipi, hoyowosa awefusa wakwe yakugamba, “Awanhu wakugamba fina Imwana we Munhu no nani?” 14 Howogamba, “Wamonga wakugamba Yohana Mubatisaji, wamonga Eliya, wamonga Yelemia, nhagela yumwedu wa Wagonesi.” 15 Hoyowagamba, “Anyeye mukugamba niye no nani?” 16 Simoni Petulo hokabidula, “Agweye no Kilisito Imwana we Mulungu imumi.” 17 Yesu hoyobidula, hoyomugamba, “Ibeka gweye Simoni Bal-yona! Kosoko umutufi ne sakame fisikugubulile adino, ninga iBabangu iyowile kulanga.” 18 Nani nikukugamba, “Agweye no Petulo, na muchanhya ya diwe dino nikudijenga dikanisa dyangu; kahi imilango ya kusimu isikudisuma. 19 Nani nikukwingha gweye sifunguo sa undewa wa kulanga, dyodose dyoukuhinda hasi dihindigwe na kulanga, na dyodyose dyo ukukumula hasi hano, dikukumuligwa kulanga.” 20 Kamei hoyowalemesa awefusa wakwe wanghamutamile munhu wowose fina imwene no Kilisito. 21 Kulawa ugele uwo Yesu hakakonga kuwatamila awefusa wakwe na kuwagamba ikuhanangigwa yalute Yelusalemu na kitang'anyila na masambasiko mengi, kulawa kuwasehe na Makuhani, na watulumi na kukomigwa na dijuwa dya kadatu kwinuligwa muchilalo. 22 Petulo hoyomulonda, hoyokonga kumugombela, yakugamba, “Mulungu yalegusile kutali Mundewa! Agano ganghakwijile ng'o.” 23 Hakabiduka, na kumugombela Petulo, “Luta kunyuma yangu Shetani! Kwa chikwakwalisi ukwangu; kosoko nghukudoga aga Mulungu, ninga ge chimunhumunhu.” 24 Ugele uwo Yesu yawatamila awefusa wakwe, “Munhu wowose iyakwenda kunyandamila, yakikane mwecho, yakitwike umusalaba wakwe, yanyandamile. 25 Kosoko imunhu yakuhananga kuhonya chidoga chakwe kosoko yangu; yakuchagilisa, iyakwenda yagilise chidoga chakwe kosoko yangu, yakuchihonya. 26 Imunhu kopata chinhu chaki yanghapata ichilunga chose, ninga yagilise ichidoga chakwe? Kahi munhu yakudaha kulafa choni ahanhu he chidoga chakwe? 27 kosoko Mwana we Munhu yakwija mwitunyo dye Babakwe hamwedu na malaika wakwe; noho yakwenda yamulihe chila munhu kuligana na sinhenda sakwe. 28 Chawelu nikumutamilani, hena wanhu wamonga wemile hano, awene wasikufa ugele wasinati wamone iMwana we Munhu yekwija mu undewa wakwe.”
1 Gakaloke majuwa mutandatu, Yesu hakawalonda Petulo na Yakobo, na Yohana imunduguse, hoyowegala kwitunda kuchanhya wemwene; 2 Hakabiduka ichihanga chakwe, kumwande yawo, ichihanga chakwe hachikonga kwakaika fina dijuwa. 3 Langa hawalawanisa Musa na Eliya, wakusimulila naye. 4 Petulo hakabidula yakumugamba Yesu, “Mundewa, nifiswamu chuwe bahano; unghenda nigolose fibanda fidatu, chimwedu chako gweye, chimonga cha Musa, na chimonga cha Eliya.” 5 Ugele yakulonga go, langa, difunde dijelu dyawagubika, kamei dijwi hodilawa mwifunde diya, dikugamba, “Ayuno no Mwanangu Mwendigwa wangu, wonikwendesigwa naye, mumutegelese imwene!” 6 Ninga awefusa wakwe wakahulike, hawogwa funama, na kogoha lugano. 7 Yesu hakawejila, na kuwakwafa, hoyowagamba, “Inukeni, kahi Munghogohe!” 8 Howokwinula ameso gawo, wosonile munhu ila Yesu yemwene. 9 Ugele foweja wadulikaga kulawa kwitunda, Yesu hoyowalagisa, hoyogamba, “Munghamutamile munhu wowose si mbuli sa gago gomonile mpaka Imwana we Munhu yenuke muchilalo.” 10 Awefusa wakwe howomusa, wakugamba, “Ninga nhani awatulumi wakugamba fina yakulongola Eliya?” 11 Naye hoyobidula, yakuwagamba, “Eliya yakwija, Naye koliganisa gose, 12 ninga nikumutamilani, fina Eliya kafulusa kwija, howoleka kumutanga, ninga howomugolosela gose gowendile kumugolosela. Nheifo Imwana we Munhu naye yakuluta kudumangiswa mumikono yawo.” 13 Noho awaya awefusa wamanyile fina yakulonga nawo simbuli sa Yohana Mubatisaji. 14 Kamei wakadifikile ditewa, munhu yumonga hoyomwijila, hoyomufugamila, yakugamba, 15 “Mundewa, umonele ubasi imwanangu! Kosoko kena chisilisi, na yakwidasigwa lugano, kosoko chila ugele yakugwa mumoto, na chila ugele mumeji. 16 Nimwigala kuwefusa wako, walemeligwa kumuhonya.” 17 Yesu hoyobidula hoyomugamba, “Anyeye cheleko chichaka dihuwi! Ichagilile, nokwikala hamwedu nanye mpaka milaki? Nimufinyiliseni mpaka milaki? Mwigaleni akuno ukwangu.” 18 Yesu hoyoigombela imhepo, nayo hoilawa; imwanike yuya hoyohona kulawa ichigele chicho. 19 Noho awaya awefusa wakwe howomulutila Yesu wemwene kwa chinyele howogamba, “Nhani seye chalemeligwe kuilafa?” 20 Yesu hoyowagamba, “Kosoko yo ukefu we dihuwi dyenu, kosoko chawelu nikumutamilani, Munghowa na ihuwi idodogi kifana mhule ya haladali, modaha kudilonga ditunda dino, ‘Leuka hano ulute akuya,’ nadyo dikwenda dileuke. Kahi kusikuwa na mbuli iyene isikudahika ukwenu!” 21 Ninga ifanile ino isikulawa ila kwa kutasa na kufunga. 22 Nawo fowakitang'anyile Galilaya, Yesu hoyowagamba, “iMwana we Munhu yakagumigwa mumikono ya wanhu, 23 nawo wakumukoma, na dijuwa dya kadatu yakwinuka muchilalo.” Howokuwa na usungu lugano. 24 Kamei fowafikile Kapelinaumu, awaya awende wakonghosa ikodi ya nusu shekeli hawamulutila Petulo, wakugamba, “Togola! iMwalimu wenu yakuliha kodi?” Hakawagamba, “Heye.” 25 Naye yakengile munyumba, “Yesu hakakonga kumusa.” Yakugamba, “Ukona nhani Simoni? Awandewa we chilunga chino wakulonda ikodi au maliho kuwanhu wenhani? Kuwana wawo ama wanhu wengi?” 26 Naye yakagambe, “Kuwanhu wengi.” Yesu yagamba, “Nghona noneifo, basi awana wasikulafa. 27 Chingheje chiwakwakwalisa, luta kubahali, ukagume induwano kamei ulonde isomba iya yowukwenda ukole kunghonga, unghagubula umulomo wakwe kokona shekeli, ilonde iyo ukawenghe, kosoko yako na kosoko yangu.”
1 Ichigele chichiya awefusa wakwe howomulutila Yesu howogamba, “No nani imukulu mu undewa wa kulanga?” 2 Hoyokwinanga imwana yumwedu, hoyomwika mugati yawo, 3 hoyowagamba, “Chawelu nikumutamilani munghaleka kubiduka na kuwa kifana fyana fidodogi, musikudaha kwingila ng'o mu undewa wa kulanga. 4 Hambiya wowose iyakihungusa imwecho fina imwana ayuno, ayo no mukulu mu undewa wa kulanga. 5 Na wowose yekwenda yamuhokele imwana yumwedu kifana yuno kosoko ye disina dyangu, yakunihokela niye.” 6 “Ninga iyakwenda yamwagilise yumwedu wa wadodogi wano awakunihuwila, iwagila yohigwe musingo ulwala na kutubugisigwa muchiligati che bahali. 7 Usungu we chilunga kosoko ya simbuli sokwagilisa! Kosoko gakwenda geje mabuli gakwagilisa; ninga usungu wakwe imunhu yuya iyakwigala simbuli sokwagilisa! 8 Hambiya umukono ama umugulu wako unghakugolosa ugolose wihi, udumule, uutage kutali nagwe! Ibeka kwingila mu undewa wa kulanga kuhungukiligwa mukono ama mugulu, kusuma kuwa na mikono mili na migulu mili, na kutagigwa kumoto wa majuwa gose. 9 Na digiso dyako dinghakugolosa ugolose wihi, ding'ole uditage kutali nagwe, ibeka kwingila ku undewa wa kulanga kwina igiso dimwedu, kusuma kuwa na meso meli na kutagigwa kumoto uusikusima.” 10 “Mulangisise munghamubese yumwedu wa awadodogi wano; kosoko nikumutamilani fina malaika wawo kulanga majuwa gose wakulanga ichihanga che Babangu yowile kulanga. 11 Kosoko Mwana we Munhu keja yochihonya chagilile. 12 Mukona nhani? Imunhu yanghowa na ngholo igana, imwedu inghagilila, togola! Nghakusileka siya makumi ikenda na ikenda, hoyoluta kwitunda, na kuihananga aiya yagilile? 13 Ninga yanghayona, chawelu, nikumutamilani, yakuisekelela aiya lugano kusuma asiya makumi ikenda na ikende isene si sagilile. 14 No nheifo isikwendesa kumwande ye Babangu yowile kulanga fina yumwedu wa awadodogi wano yagilile.” 15 “Ne munduguso yanghakugolosela wihi, luta ukamulolese, agweye ne imwene mwiwene, yanghakuhulika, kumupata imunduguso. 16 Ninga, nghona nghakuhulika, londa hamwedu nagwe munhu yumwedu ama weli uleke kwa milomo ya wahomelesi weli ama wadatu. 17 Yanghaleka kuwahulika awene, ditamile dikanisa; na yanghaleka kudihulikisa dikanisa nadyo, yowe ukwako kifana munhu wa mataifa na mukonghosa kodi.” 18 “Chawelu nikumutamilani: Gogose gomukoha muisi, gakohigwa na kulanga; na gogose gomukugadoholela muisi, gakudoholigwa na kulanga. 19 Kahi nikumutamilani: Weli wenu wanghakifumilisa mbuli yoyose muisi, imbuli yoyose yowakwenda watase, wakwenda wagoloseligwe ne Babangu yowile kulanga. 20 Kosoko howowile weli ama wadatu wakitang'anyile kudisina dyangu, nani nabaho mugati yawo.” 21 Kahi Petulo hoyomulutila hoyomugamba, “Mundewa, mundugusangu yanigolosele uwihi kengahe nimulekele? Mpaka mikangha mufungate?” 22 Yesu hoyomugamba, “Sikukugamba mpaka mikangha mufungate, ninga mufungate mikangha makumi mufungate. 23 Kosoko iyo undewa wa kulanga ukifana na Mundewa yumonga yahananga kutala si mali sakwe na watumwa wakwe. 24 Yakakonge kuigolosa, hoyokwigaliligwa munhu iyakudaigwa talanda figulu ikumi. 25 Naye yakaswele chokuliha, iMundewa hoyogamba yaguligwe, imwene, ne muke, na wanagwe, na finhu fyose foyenafyo, uleke dideni diya dilihigwe. 26 Kamei imutumwa yuya, hakamufugamila yakugamba, ‘Mundewa nyonele ubasi, naniye nikwenda nikulihe fyose figima!’ 27 iMundewa we mutumwa yuya yamonela ubasi, na kumudoholela, na kumulekelela dideni diya. 28 Imutumwa yuya yakalawe yamona yumonga imiyagwe woyendeyomudayi dinali igana du, hakamukola, mwilaka, yakugamba Unilihe dideni dyangu dyonikukudai! 29 Kamei imiyagwe hoyokugwa hamigulu yakwe, hoyomutasa, hoyogamba, ‘Nyonele ubasi, nani nokuliha!’ 30 Ninga nghendile; hoyoluta, hoyomuguma muchifungo, mpaka yalihe dideni diya. 31 Kamei awayagwe wakone agagoloseke, howokalala lugano howoluta kumutamila iMundewa wawo gose gene gagoloseke. 32 Kamei iMundewa wakwe hoyomwinanga, hoyomugamba, ‘Agweye go mutumwa wihile! Nikulekelela di deni diya dyose, fowanitasile. 33 Agwe nagwe isagile kumonela ubasi imiyago, fina niye fonikonele ubasi agweye.’ 34 iMundewa wakwe hoyokona nyono, hoyomwigala kuwakusambasa wanhu, mpaka yalihe dideni diya dyose. 35 Nofo iBaba wa kulanga yakwenda yamugoloseleni anyeye, munghaleka kuwalekelela kwa mimoyo yenu yose chila munhu ne munduguse.”
1 Kamei Yesu yakamale simbuli siso, hoyoleuka Galilaya, hoyekwingila kusimhaka sa Uyahudi, umwambu wa Yolodani. 2 Matewa makulu hogomwandamila, hoyowahonya uko. 3 Baho Amafalisayo howomulutila, howomugesa, howomugamba, “Togola fiswanu imunhu kumuleka imuke kosoko yoyose?” 4 Hoyobidula, hoyowagamba, “Musisomile fina yawombile kunghonga hakomba munhu mugosi na mwanamuke? 5 Hoyogamba, ‘Kosoko iyo imunhu yakumuleka iBabakwe ne ing'ina, yakiyandamile ne muke; na wano aweli wakuwa mutufi umwedu?’ 6 Awano si weli kahi, ninga mutufi umwedu woyahasile Mulungu, imunhu yanghawatemanule.” 7 Howomugamba, “Hayuwa nhani Musa hakalagisa kumwingha ibaluwa ya malekeni, na kumuleka?” 8 Hoyowagamba, “Musa kosoko ya ukugutu we fidoga fyenu, kafumila muwaleke awake senu; ninga kulawa kunghonga isowile nheifo. 9 Aniye nikumugambani anyeye, chila munhu iyakumuleka imuke, ninga kosoko ya dihabwa, hoyotola yungi, yekwingilila; ayuya naye iyekumutola yalekigwe naye kengilila.” 10 Awefusa wakwe howomugamba, “Nghonaga simbuli se munhu ne muke nofosuwile nheifo, isagile kutola.” 11 Ninga imwene hoyowagamba, “Si wose wakudaha kuhokela imbuli ino, ninga awaya awakudahisigwa ne Mulungu. 12 Hena wanhu awekigwe ne Mulungu wowe mhende kulawa muinda ya wang'ina sawo, wabaho watendigwe na wanhu wowe mhende, na wabaho wakitendile mhende kosoko ya undewa wa kulanga. Iyekudaha kuihokela imbuli ino leka yaihokele.” 13 Kamei hoyokwigaliligwa wana wadodogi uleke yawekile mikono yakwe muchanhya yawo na kuwatasila; awefusa wakwe howowagombela. 14 Ninga Yesu hoyogamba, “Walekeni wana wadodogi weje ukwangu; munghawalemese, kosoko awafanile wawo, undewa wa kulanga ni wawo.” 15 Hoyowekila mikono muchanhya yawo, hoyoleuka uko. 16 Langa, imunhu yumonga hakamulutila hoyomugamba, “Mwalimu, nigolose chinhu chaki chiswanu uleke niupate uumi wa majuwa gose?” 17 Hoyomugamba, “Nhani ukunyusa imbuli ya uswanu? Imuswanu yumwedu du. Ninga unghahananga kwingila kuumi, ugakole amalagiso.” 18 Kamugamba, “Agehoki?” Yesu hoyogamba, “Agano, Unghakome, Unghengilile, Unghahije, Unghamuhomelele miyago udasi. 19 Wogohe iBabako ne ing'inako; Mwende imiyago fina fowukiyenda gomwecho.” 20 Imujelelo yuya hoyomugamba, “Ago gose nigakola nihungukiligwa na choni kahi?” 21 Yesu hoyomugamba, “Unghahananga uwe munhu yaliganile ulute ukambase ifinhu fyako fyose figuligwe, uwenghe awakiwa, kamei kokuwa na ugoli kulanga; kamei nyagula unyandamile.” 22 Imujelelo yuya yakahulike imbuli iyo, hoyoleuka na usungu, kosoko hakowa na finhu fingi. 23 Yesu hoyowagamba awefusa wakwe: “Chawelu, nikuwatamilani, ikuwa fikugutu kwe imugoli kwingila ku undewa wa kulanga. 24 Nikumutamilani kahi: Ni fihufu ingamia kwingila muchihengele che sing'ano, kusuma imugoli kwingila ku undewa we Mulungu.” 25 Awefusa wakwe wakahulike, siso howojuma lugano, howogamba, “Ninga nani iyakudaha kuhona?” 26 Yesu hoyowakumhulila ameso, yakugamba, “Kuwanhu adyo disikudahika. Ninga kwe Mulungu gose gakudahika.” 27 Noho Petulo yabidula yakugamba, “Langa aseye chileka fyose chikwandamila, chopata choni?” 28 Yesu hoyowagamba, “Chawelu, nikumutamilani, fina anyeye munyandamile niye, muchilunga ichisha, nghona yakayokwija Imwana we Munhu mu digoda dye ditunyo dyakwe, anye nanye mukwikala mumagoda ikumi na meli, mowaliganisa amakabila ikumi na meli ga Isilaeli. 29 Na chila munhu iyalekile nyumba, ama munduguse wa chigosi, ama wachike, ama iBabakwe, ama ng'ina, ama wana, ama migunda, kosoko ya disina dyangu, yakwenda yahokele mikangha igana, na kuhala undewa wa majuwa gose. 30 Ninga wengi awoile we nghonga; wakuwa we ndumo; na wendumo wakuwa we nghonga.”
1 “Kosoko undewa wa kulanga ukifana na imwenyenyumba, yelawile nhosikusiku kuhananga walimisi wakagolose milimo kumugunda wakwe we misabibu. 2 Naye hoyokifumilisa nawo kuwengha kwa ijuwa dinali imwedu, hoyowegala kumugunda we misabibu. 3 Hoyolawa kahi chigele cha saa tatu, hoyowona wamonga wemile hesoko wechaka milimo; 4 awene nawo hoyowagamba, ‘Luteni nanyeye kumugunda wangu we misabibu, na digelo dyenu nomwinghani. Howoluta.’ 5 Hoyoleuka kahi muchipisi cha saa mutandatu, na saa ikenda, hoyogolosa nheifiya. 6 Ikafike saa ikumi na imwe, hoyoleuka, hoyofika wamonga wemile, hoyowagamba, ‘Nhani nyeye mwimile hano imisi yose bila milimo?’ 7 Howomugamba, ‘Kosoko hachaka munhu yachinghile milimo.’ Hoyowagamba, ‘Luteni nanyeye kumugunda wangu we misabibu.’ 8 “Dikoswe, ayuya imwenye mugunda hoyomulonga imunyamhala wakwe, wenange awalimisi, uwalihe digelo dyawo, ukongele wakunyuma mpaka wa kunghonga.” 9 Wakeje awaya wa saa kumi na imwedu, howohokela chila munhu dinali. 10 Awaya wa kunghonga wakeje hawamanya fina wohokela nyingi kusuma waya; awene nawo howohokela chila munhu dinali. 11 Wakamale kuhokela, howomukalalila imwenye nyumba, 12 wakugamba, “Awano wa kunyuma wagolosa milimo saa imwedu du, nagwe kuwaliganisa na seye chifinyilise misi yose?” 13 “Hakamubidula yumwedu wawo, yamugamba, ‘Mbwiyangu, sikonele hata, sichilagane na niye kwa dinali. 14 Londa iyako uleuke, nikwenda kumwingha yuno wa kunyuma fina gweye. 15 Isinogele niye kugolosa neifyangu fina fonikwenda nimwecho? Ama digiso dyako digaluka diha kosoko yaniye kuwa muswanu?’ 16 No nheifo we ndumo wokuwa wa kunghonga, na wakunghonga wokuwa we ndumo.” 17 Baho Yesu yakowe yekugenda kuluta Yelusalemu, hoyowalonda awaya awefusa wakwe ikumi na weli we imwene; munjila hoyowagamba, 18 “Langisiseni! Chikukwila Yelusalemu, Imwana we Munhu yakwijagumigwa mumikono ya Makuhani na Watulumi, nawo wakwijamuliganisa yakomigwe; 19 Kamei wakumwigala kuwamataifa nawo uleke wamuseigile, kumutowa mikotya, na kumutungika; na dijuwa dya kadatu yakwinuka muchilalo.” 20 Noho ing'ina yawo awana wa Sebedayo yamulutila hamwedu na wanagwe, yakumufugamila, na kumutasa mbuli. 21 Hoyomugamba, “Ukuhananga choni?” Hoyogamba, “Ulagise fina awanangu wano aweli wekale iyumonga umukono wako wo kulume, na iyumonga umukono wako wo kumoso, mu undewa wako.” 22 Yesu hoyobidula, hoyogamba, “Musimanyile dyomukutasa. Togoleni! Mukudaha kunywila ichikombe chonikunywila niye?” Howogamba, “Chikudaha.” 23 Hoyowagamba, “Chawelu mokunywila ichikombe changu; ninga kwikala umukono wangu wo kulume na mukono wangu wo kumoso, nechaka udaha wa kuwengha, ninga wakwinghigwa wekiligwe ne Babangu.” 24 Nawaya ikumi wakahulike howowasuhila awaya awandugu aweli. 25 Ninga Yesu hoyowenanga, hoyowagamba, “Mumanya fina awakulu wa Mataifa wakuwalongosani kwa ludole, na wakulu wawo, wakonesa uludole lwawo ukwawo. 26 Ninga isikuwa nhaifo ukwenu, ninga imunhu wowose yekuhananga kuwa mukulu ukwenu, na yowe mutumwa wenu; 27 imunhu wowose yakuhananga kuwa wa kunghonga ukwenu, na yowe mutumwa wenu; 28 fina imwana we Munhu fonghejile kutogomeligwa ninga kutogoma na kulafa uwumi wakwe uwe iliho dya wengi.” 29 Wakowe wekulawa Yeliko, itewa ikulu hodiwandamila. 30 Langa, mudula weli wekala hanghanda ye njila, nawo wakahulike fina Yesu yekuloka, hawekwinula majwi, wakugamba, “Uchonele ubasi, Uchonele ubasi, Mundewa, go Mwana wa Daudi!” 31 Amatewa howowagombela, wanyamale. Ninga awene howokongesa kwinula majwi, wekugamba, “Uchonele ubasi, Mundewa go Mwana wa Daudi!” 32 Yesu yeja yema, na kuwenanga, yakugamba, “Mukuhananga nimugoloseleni choni?” 33 Hawamugamba, “Mundewa, chikuhananga ameso getu gagubuligwe.” 34 Yesu yawonela ubasi, yawakwafa ameso gawo; baho ni baho howona, na kumwandamila.
1 Kamei wakasegelele Yelusalemu, na kwija Betifage, muditunda dya Miseituni, noho Yesu yawatuma awefusa wakwe weli, yakuwagamba, 2 “Luteni mpaka he chikaya chiya chi hamwande yenu, baho mokona dipunda dyohigwe hamwedu ne mwanagwe: Gadoholeni chimwande munigalile. 3 Na munhu yanghawosa mbuli, gambeni, ‘iMundewa yekugahananga,’ yakwenda yagowise chimwande.” 4 Aga gose galawanisa, uleke iliganile imbuli yalongigwe ne imugonesi yakugamba, 5 “Mutamileni Biti Sayuni, Langa iMundewa wako yakwija ukwako! Muholo, naye kakwila dipunda, Ne mwanagwe we dipunda, ichana che dipunda.” 6 Awaya awefusa wakwe howoleuka, howogolosa fina Yesu foyawatumile: 7 Howomwigalila dipunda ne mwanagwe, howokwika sisuke sawo muchanhya yawo, naye hoyokwikala muchanhya yakwe. 8 Amatewa makulu howotandalisa sisuke sawo mwibalabala, na wamonga howotema mahupi kulawa mumabiki na kugatandalisa mwibalabala. 9 Na amatewa agamulongolele na gamwandamile hogokwinula majwi “Hosana Mwana wa Daudi! Kamotesigwa ayuya iyakwija kudisina dye Mundewa! Hosana kuchanhya kulanga.” 10 Yakengile Yelusalemu, ikaya yose hoisingisika, wanhu wekugamba; Nani yuno? 11 Amatewa howogamba, “Ayuno no yuya imugonesi, Yesu, wa Nasaleti ya Galilaya.” 12 Yesu yengila kugati ye dihekalu dye Mulungu, na kuwawinga wose wende wokwambasa, na wende wogula mwihekalu, na kusibidula si mesa sa wendewobadilisha mapesa, na magoda gawo awende wakwambasa sinjiwa. 13 Hakawagamba, “Itulumigwa, ‘Inyumba yangu ikwinangwa nyumba ya kufugila.’ Amba nyeye muigolosa mhango ya wahiji.” 14 Ne midula, ne fiwete howomulutila umuya mwi hekalu, hakawahonya. 15 Ninga awakulu wa Makuhani na Watulumi, wakone majumo goyagolose, na wana wakwinula majwi gawo mwi hekalu, wakugamba, “Hosana, Mwana wa Daudi!” Hawasuha wakumugamba, 16 “Ukuhulika wanhu fowakulonga?” Yesu hakawagamba, “Heye, musinati musome kwa milomo ya wana wadodogi na wakongha kumemelesa ditunyo?” 17 Yakawaleke, hakalawa kunje ye kaya mpaka Betania, hakagona uko. 18 Ugele wa nhosikusiku foyoyage kwikaya, hakowa na njala. 19 Hakona musada hanghanda ye injila na kuulutila, hoyokona mwachaka chinhu ninga manyagala du. Kamei hoyogamba, “Ungheleke mamudyo. Kahi kulawa diyelo na majuwa gose.” Umusada hounyala baho ni baho. 20 Awefusa wakwe wakone, howokisina, howogamba, “Yanhani umusada unyalile baho ni baho?” 21 iYesu yabidula, na kuwagamba, “Chawelu, nikumutamilani, Munghowa na ihuwi, munghaleka kuwa na manhonge, mukwenda mugolose si didyo du dyo mutini, ninga mu kudaha kudigamba ditunda dino ‘Ng'oka ukatagigwe kubahali,’ ikwenda igoloseke. 22 Na dyo dyose dyomukutasa mumawombi genu, munghahuwila, mukuhokela.” 23 Kamei yakengile mwihekalu awakulu wa Makuhani, na wasehe wa wanhu, howomulutila ugele foyendeyofusa, howogamba, “Kwa udaha waki ukugolosa gano go ukugolosa? Naye nani yakwinghile udaha uwo?” 24 Yesu hoyobidula hoyowagamba, “Aniye nani nikumusani mbuli imwedu, ninga munghabidula, nikwende nimutamileni kwa udaha wani nikugolosa gano. 25 Ubatiso wa Yohana haulawa hoki? Haulawa kulanga ama ku wanhu?” Howokonga kuwa na lukani awecho kwa wecho, wakugamba, “Chinghagamba ulawa kulanga, yakwenda yachigambe, ‘Nhani musamuhuwile?’ 26 Na chinghagamba, ‘Ulawa ku wanhu,’ chikogoha amatewa, kosoko awanhu wose wakumona Yohana fina ni mugonesi.” 27 Howomubidula Yesu howogamba, “Chisimanyile.” Naye hoyowagamba, “Aniye nani sikumutamilani anyeye ni kwa udaha waki nikugolosa gano.” 28 “Ninga, mukonanhani? Munhu yumonga hakowa na wana weli; kamulutila yuya we nghonga, hoyomugamba, ‘Mwanangu diyelo ulute ukagolose milimo kumugunda we misabibu.’ 29 Hoyobidula na kugamba, ‘Nema!’ Ninga hanyuma hoyelamba na kuluta. 30 Hoyomulutila ayuya iwakeli, hoyolonga naye nheifiya, naye hoyobidula hoyogamba, ‘Nikuluta Mundewa,’ ninga hoyoleka kuluta. 31 Togoleni! Mu wano aweli no yehoki yagolose foyakwenda iBabakwe?” Howogamba, “Ayuya we nghonga.” Kamei Yesu, hoyowagamba, “Chawelu, Nikumutamilani, awakonghosa kodi na wedihabwa wakwenda walongole kumwande yenu kukwingila ku undewa we Mulungu. 32 Kosoko Yohana hakeja ukwenu kwa njila ya chawelu, anyeye homuleka kumuhuwila; ninga awakonghosa kodi na wadihabwa howomuhuwila, anye hata fomonile, nheifo musalambile mumuhuwile.” 33 Tegeleseni mbasi ingi, “Hakuwa na munhu imwenye nyumba, iyahandile mugunda wakwe we misabibu, hoyojengela ikigo, hoyokata ikolongo dyo kukamila si sabibu, hoyojenga ilingo, hoyokwika wanhu wo kugolosa milimo, hoyoluta nhambo. 34 Ugele sisabibu sikakonge kuwa habehi na kwifa; hoyowatuma awatumwa kuwaya awakwimilisa mugunda, wahokele umudyo. 35 Awaya awemilisi howowakola awatumwa wakwe, ayuno howomutowa, na yumonga howomukoma, yumonga howomutowa na mawe. 36 Hakatuma kahi watumwa wengi kusuma awaya wa kunghonga, hawawatenda nheifiya. 37 Kundumo hakamutuma imwanagwe ukwawo, yakugamba, ‘Wakwenda wamogohe imwanangu,’ 38 Ninga awemilisi wakamone ayuya imwana hawalonga, awecho kwa wecho, ‘Ayuno no muhasi; handikoni chimukome! Kamei chilonde uhasi wakwe.’ 39 Hawamukola, hawamulafa kunje yo mugunda we misabibu, howomukoma. 40 Nghona yakwija ayuya imwenyemugunda we misabibu kowatenda nhani awemilisi?” 41 Howomugamba, “Yakwenda yawakome fibi awaya awemilisi wehile No umugunda we misabibu yakwenda yawenghe wemilisi wengi, awakwenda wamwinghe si sabibu ku ugele wakwe.” 42 Yesu hakawagamba, “Musinati musome mu matulumo? ‘Diwe dyowalemile awajengaji, Adyo digaluka diwe dikulu dye inghindiso!’ 43 Kosoko iyo nikumutamilani, Undewa wa Mulungu, ukuleusigwa ukwenu, wakwenda wenghigwe ditaifa dingi idikweleka mamudyo gakwe. 44 Naye yakwenda yogwe mudiwe didyo, yakudumuka fiponge ponge; na yuya imwene dikwende dimugwile dikumutiginha tiki tiki.” 45 Awakulu wa Makuhani na Mafalisayo, wakahulike si mbasi sakwe, hawatanga fina yakuwalonga awene. 46 Ninga fowahanangage kumukola, howokogoha amatewa, kosoko awene hawamona fina mugonesi.
1 iYesu hakabidula, hakawatamila kahi kwa mbasi, yakugamba, 2 “Undewa wa kulanga ukifana Mundewa yumonga, yamugolosela imwanagwe halusi. 3 Hoyowatuma awatumwa wakwe wawenange awaya awagonekigwe kwija kuhalusi; nawo howolema kwija, 4 Hoyotuma kahi watumwa wengi, yakugamba, ‘Watamileni awaya awagonekigwe, Langeni, nifulusa kugolosa ifyakudiya fyangu; sing'ombe sangu na finonile fifulusa kuchinjigwa, na fyose fifuluka, mwije kuhalusi.’ 5 Ninga hawona si chinhu, howoleuka, yumonga kaluta kumugunda wakwe: Yumonga kubiyashala yakwe, 6 awasigale howowakola awatumwa wakwe, howowatenda fibi na kuwakoma. 7 Kamei iMundewa yuya hoyosuha; hoyokwigala wasilikali wakwe we inghondo, howowakoma awakomaji waya na kuisoma ikaya yawo. 8 Kamei, hoyowagamba awatumwa wakwe, ‘Ugele we halusi ufika, ninga awaya awagonekigwe wasagiligwe. 9 Handikoni luteni kusinjila mhanda sa mabalabala, na wose womukona wenangeni weje kudikumbo.’ 10 Awatumwa waya hawalawa na kulata kusinjila singhulu, howowalonda wose wowawonile, awehile na waswanu; dikumbo dye halusi hadimema wageni. 11 “Ninga foyengile iMundewa yuya kuwalanga awageni wakwe, hoyokona umuya munhu yumwedu yechaka suke ye halusi. 12 Hakamugamba, ‘Mbwiyangu, kwingila nhani muno nagwe kwechaka suke ya halusi?’ Hoyonyamala twi. 13 iMundewa hoyowagamba awatumwa wakwe, ‘Moheni, imikono ne migulu, mulondeni mukamutage kuchisa cha kunje, no kukwenda kuwe chililo na kugwegwejula meno.’ 14 Kosoko wengi awakwinangigwa, amba wakusaguligwa wakefu.” 15 Noho Mafalisayo howoluta, howogolosa mulundo, uleke wamutege kwa simbuli sakwe. 16 Howotuma ukwakwe awefusa wawo hamwedu na Mahelodi, hawagamba, “Mwalimu, chimanya agweye kwa munhu wa chawelu ne injila ya Mulungu ukuifusa mu chawelu kahi nghukogoha ukulu we munhu wowose, kosoko nghukulanga sifuta sa wanhu. 17 Haya chitamile, Ukona nhani. Ni fiswanu kumwingha Kaisali kodi, ama si fiswanu?” 18 Ninga iYesu hakamanya uwihi wawo, hakagamba, “Nhani mukunigesa anyeye mwine ichimwefe? 19 Nyoneseni ifesa ye kodi!” Howomwigalila dinali. 20 Hakawagamba, “Isanamu ino yani, ne anuwani ino?” 21 Howomugamba, “Ni ya Kaisali.” Hakawagamba, “Basi muliheni Kaisali age Kaisali, ne Mulungu age Mulungu.” 22 Wakahulike, hawajuma; hawamuleka, na kuleuka. 23 Dijuwa didyo, Masadukayo, wanhu wakugamba kwichaka kwinuka awanhu wafile, howomulutila, howomusa, 24 wakugamba, “Mwalimu, Musa yagamba fina, imunhu yanghafa, nghona nghalekile mwana, imunduguse yamutole imwigane yuya yowe muke, kosoko yamwelekele imunduguse cheleko. 25 Hambiya, ukwetu hakuwa wandugu mufungate, iwenghonga hoyotola, hoyokufa, kosoko nghalekile mwana, hoyomulekela imunduguse imuke, 26 Nheifo na wakeli naye, na wakadatu mpaka wose mufungate. 27 Hanyuma ya wose ayuya mwanamuke naye hoyokufa. 28 Dijuwa dye ndumo ye chilunga yakwenda yowe muke wa yehoki? Kosoko wose mufungate hawowa naye.” 29 Yesu hoyobidula, hoyowagamba, “Mwagilila! Kosoko musimanyile matulumo kahi udaha we Mulungu. 30 Kosoko ku ndumo ye chilunga wasikutola kahi wasikutoligwa, ninga wakuwa kifana malaika wa kulanga. 31 Kahi, imbuli ya wafile kwinuka, musisomile imbuli ilongigwe na Mulungu, yakugamba, 32 ‘Aniye na Mulungu wa Ibulahimu, na Mulungu wa Isaka, na Mulungu wa Yakobo.’ Si Mulungu wa wafile, ninga wa womi.” 33 Na matewa wakahulike, howojuma kosoko ya mafuso gakwe. 34 Na Amafalisayo wakahulike fina Yesu kawanyamasa Masadukayo, hawakitanganyila hamwedu. 35 Yumwedu wawo, mulahi, hoyomusa, kwa kumugesa, 36 “Mwalimu, Mu tolati ligasilo dikulu no dihoki?” 37 Hakamugamba, “Umwende Mundewa Mulungu wako kwa umoyo wako wose, na chidoga chako chose, na misungu yako yose. 38 Adino no dilagiso dikulu, kahi no dya kunghonga. 39 Na dya keli dikifana na didino, nadyo no dino: ‘Umwende imiyago fina foukiyenda agweye gomwecho.’ 40 Malagiso gose ga Musa na mafuso ga wagonesi gakwegamila mumalagiso agano ameli.” 41 Amafalisayo wakakitanganyile hamwedu, Yesu hoyowosa, yekuwagamba, 42 “Anyeye mukona nhani muchanhya ya Kilisito? Togoleni ni mwana wani? Howomubidula, wa Daudi.” 43 Yesu hoyowagamba, “Ikudahika nhani fina kwa udaha wa Muhe Daudi yakumwinanga imwene Mundewa? Yekugamba, 44 ‘Mundewa hoyomutamila Mundewa wangu, Ikala ukulume kwangu, mpaka niweke awanghondo wako hasi ye migulu yako.’ 45 Daudi hona yakumwinanga Kilisito iMundewa, yakuwa nhani mwanagwe?” 46 Hachaka munhu kahi yadahile kumubidula. Na kulawa dijuwa didyo hechaka yadahile kumusa iswali.
1 Kamei Yesu hakawagamba amatewa na wefusa wakwe, fina, 2 “Awatulumi na Mafalisayo wekala mwigoda dya Musa, 3 ninga, gose gawakumutamilani mugakole na kugagolosa, ninga kusinhenda sawo munghagolose; kosoko awene wakulonga ninga wasikugolosa. 4 Awene wakoha makanda masito na kuwatwika awanhu mu mayega gawo; awene awecho wasikwenda kugasegesa makanda gaya ne fidole fyawo. 5 Kahi sinhenda sawo sose wakugolosa uleke wonigwe na wanhu, wakufala mikanda mikulu ina simbuli sa Mulungu siandikigwe, wakugalamula amapindo ga makasu gawo. 6 Wakwenda amagoda ga kumwande mumajuwa ge sikukuu na kwikala kumwande mumasinagogi; 7 na kulamusigwa mumagulilo, na kwinangigwa na wanhu, ‘Labi’. 8 Ninga anyeye munghenangigwe ‘Labi’, kosoko iMwalimu wenu yumwedu anye wose mwa ndugu. 9 Munghamwinange munhu ‘Baba’, muchilunga, kosoko mwina Baba yenu yumwedu, iyowile kulanga. 10 Kahi munghenangigwe Filongosi, kosoko ichilongosi wenu yumwedu, imwene no Kilisito. 11 Mukulu wenu yakuwa mutumwa wenu. 12 Na wowose iyakiinula yakudulisigwa, na wowose iyekidulisa, yekukwisigwa.” 13 “Usungu wenu, watulumi na Mafalisayo! Mwine chimwefe! Kosoko mukuwa hindila awanhu undewa wa kulanga, anye muwecho musikwingila, na awaya awakuhananga kwingila musikuwaleka wengile! 14 Usungu wenu watulumi na Mafalisayo, mwine chimwefe! Kosoko mukudiya musinyumba sa wegane na kwa chimwefe mukutasa nhasa nhali; kosoko iyo mukupata uliganiso mukulu lugano. 15 Usungu wenu watulumi na Mafalisayo! Mwine chimwefe! Kosoko mukusunguluta kuisi na kubahali kumugolosa munhu yabiduke na kumwandamilani, kamei nomoyabiduke yakuwa mwana wa jehanumu mikangha mili kusuma anyeye muwecho. 16 “Usungu wenu mufilongosi mudula, anyeye mukugamba, imunhu yekilaha kwa dihekalu, siyo chinhu; ninga iyakilaha kwa sahabu ya kwi hekalu, kakiyoha. 17 Mubwalata nyeye! Kahi mwa mudula inghulu no ihoki, aiya hefugilo, ama adiya dihekalu idikuisunha hefugilo? 18 Kahi anyeye mukugamba imunhu yakilaha kwa mumasabahu si chinhu; ninga yanghakilaha kwa digelo duwile mu masabahu, yakiyoha. 19 Mwafidula nyeye! Kosoko inghulu no ihoki, adiya digelo, ama amafugilo agakusunha digelo? 20 Basi ayuya yakilaha kwa mafugilo, yakilaha kwa iyo na kwa ifinhu fyose fuwile muchanhya yakwe; 21 naye iyakilaha kwa dihekalu, yakilaha kwa didyo, na kwa yuya iyakwikala mugati yakwe; 22 na iyakilaha kwa ulanga, yakilaha kudigoda dyo undewa we Mulungu, na kwa imwene iyakudikalila. 23 “Usungu wenu watulumi na Mafalisayo! Mwine chimwefe! Kosoko mulafa filafywa fya munanaa, bisali na jila, ninga muleka simbuli singhulu se malagiso naso no usindamafu, ubasi, na dihuwi; ago iwagila kugagolosa, ninga gaya gamonga munghagaleke. 24 Filongosi mudula mukuchuja ujuguni mukumesa ingamia! 25 Usungu wenu watulumi na Mafalisayo! Mwine chimwefe! Kosoko mukusunha kunje ye fikombe na mabakuli kugati yakwe fimema uhiji na upujili. 26 Agwe Gomufalisayo chidula! Yenda kusunha, kugati ye chikombe, ne sahani uleke kunje yakwe nako kuwe kuswanu! 27 “Usungu wenu, watulumi na Mafalisayo, mwine chimwefe! Kosoko mukifana filalo fibakigwe swakaya, nafyo kunje fikoneka fiswanu, ninga kugati fimema maguha ga wanhu wafile na uwafu wose. 28 No nheifo anye nanye, kwa kunje mukoneka fina wanhu waswanu, ninga kugati mumema chimwefe na wihi.” 29 “Usungu wenu watulumi na Mafalisayo! Mwine chimwefe! Kosoko mukujengela ifilalo fya wagonesi na kuhamba ifilalo fya wanhu waswamu; 30 mukugamba, ‘Nhanga aseye chowile uko ugele wa waBaba setu, chisowile chikihasa nawo musakame ya wagonesi.’ 31 Mukihomelela muwecho fina anyeye mwa wana wawo awawakomile awagonesi! 32 Chimemeleseni ichipimo cha wababasenu! 33 Anyeye mumajoka, cheleko cha majoka! Moitija nhani iliganiswa kwa jehanumu? 34 Kosoko iyo, mulangisise, aniye nikwigala ukwenu awagonesi na wena imisungu na watulumi; wamonga mukwende muwakome na kuwatungika, na wamonga mukwenda muwatowe mumasinagogi genu, na kuwawinga kulawa kaya mpaka kaya; 35 kwa nheifo ikwija muchanhya yenu isakame yose ya wanhu waswanu iitike mu iisi, kukongela sakame ya Habili, ayuya iwechawelu mpaka isakame ya Sakalia imwanagwe wa Balakia, yomwakomile hagati gati ya ahasunhile na masabahu. 36 Chawelu, nikumutamilani: Simbuli siso sose sikwenda sije muchanhya ye cheleko chino!” 37 “Agwe Yelusalemu, Yelusalemu! Go ukukoma awagonesi, na kuwatowa na mawe awaya awatumigwe ukwako! Ni mikangha mingahi nihananga kukunyatila hamwedu awanago fina inghuku foikukunyagisa hamwedu ifyanagwe hasi ye mabawa gakwe, ninga musendile! 38 Mulangisise, Inyumba yenu ikusimiligwa na kulekigwa. 39 Kosoko nikumutamilani, Musikwenda munyone kahi kulawa hambiya, mpaka fomukwija mugamba, ‘Kamotesigwa iyakwija kwe disina dye Mundewa.’”
1 Yesu hakaleuke, mwihekalu; awefusa wakwe hawamulutila, uleke wamonese amajengo ge dihekalu. 2 Imwene hakawabidula, “Mukugona agano gose? Chawelu, nikumutamilani: Disikusigala ahano diwe muchanhya ye diwe idyene disikumoligwa.” 3 Hata foyeja yekala muditunda dya Miseituni, awefusa wakwe howomwijila kwa chinyele, wakugamba, “Chitamile simbuli sino sikuwa milaki. Ne chitangilo cho kwija kwako chikuwa choni, na indumo ye chilunga?” 4 Yesu yabidula, yakuwagamba, “Mulangisise imunhu yanghawadanhiliseni. 5 Kosoko wengi wakwenda weje kwi disina dyangu, wakugamba ‘Aniye no ni Kilisito!’ Nawo wakwenda wawadanhilise wengi. 6 Mohulika simbuli se singhondo; na fununu se singhondo; mulangisise, munghogohe; kosoko ago gakwenda galawanise; ninga indumo iyecho inghali. 7 Kosoko ditaifa dimwedu dikwinuka na dikitowa na ditaifa dingi; undewa kitowa na undewa; kukwenda kuwe na njala, na disingisi dye iisi kose kose. 8 Ago gose no nghonga ya usungu kifana wakweleka kwa mwanamuke. 9 “Ugele uwo wakwenda wamugumeni mu magayo, nawo womukomani, nanye mukuwa wanhu wasuligwe na wanhu wose kosoko ya disina dyangu. 10 Noho wengi wokuya kunyuma, kisongesa na kisula. 11 Wagonesi wengi wa udasi wakwija walawanisa, na kuwadanhilisa wengi. 12 Kosoko ya kongeseka uwihi, uwendo wa wanhu wengi ukwija uhola. 13 Ninga iyakufinyilisa mpaka kundumo, noyakwenda yahone. 14 Kahi imbuli iswanu ya undewa ikwija ihubiliigwa muchilunga yuwe uhomelesi ku mataifa gose; aho noho iya indumo ikwija.” 15 “Ugele womukamukona Disinhu dihile dya kubana, adiya dyalongigwe ne mugonesi Danyeli, dima ahanhu asunhile (iyakusoma yamanye). 16 Noho wowile Uyahudi watijile kumatunda, 17 na yowile ukano yanghahumuluke kulonda ifinhu fuwile munyumba yakwe, 18 yowile kumugunda yanghoye ukaya kulonda si suke sakwe; 19 Usungu wawo awena siinda na wakonghesa majuwa gago! 20 Mutase uleke kutija kwenu kunghowe ichigele che imheho au dijuwa dye sabato! 21 Kosoko ugele uwo kukwija kukuwa lwidaso lugano, agene gasinati goneke gafanile gago kulawa kunghonga ye chilunga mpaka ugele uno, kahi isikwijaikuwa nheifo kahi. 22 Nhanga amajuwa gago woile gasahunguligwe, nghowile yakuhona munhu wowose yuya; ninga kosoko ya wasaguligwe majuwa ago gohunguligwa. 23 “Ugele uwo imunhu yanghawagamba, ‘Langa Kilisito! Kowa hano’, ama ‘kowa kuya’, munghahuwile. 24 Kosoko gakwenda galawanise Makilisito ga udasi, na wagonesi wa udasi, wogolosa fitangilo fingi na majumo; wawagilise, inghadahika du hata waya awasaguligwe. 25 Langa! Nifulusa kumutamilani gasinati galawanise. 26 Waghamugambani, ‘Langa kowa kunyika!’ Munghaleuke; ‘kowa kumabuha ga kugati!’ Munghahuwile. 27 Kosoko fina ulumwemwe foukoneka kulawa kundawilo ye dijuwa mpaka kukuswila dijuwa, nofo kukwenda kuwe kukwija kwakwe Imwana we Munhu. 28 Hena umufimba noho sikitanganyila si numba.” 29 “Chimwande, kulawa kwidasigwa kwa majuwa gago, dijuwa dikugumigwa chisa, umwesi nawo usikwijalafa ujelu wakwe, na sinyelesi sikwija silagala kulawa kulanga, uludole lwa kulanga losingisika, 30 Noho chikwija chikoneka ichitangilo chakwe iMwana we Munhu kulanga; noho amataifa gose ge chilunga gakwija golila, wekwija wamona iMwana we Munhu yakwija mumafunde ga kulanga na ludole na ditunyo ikulu. 31 Yakwija yowatuma malaika wakwe ne dijwi dikulu dyo lwinango nawo wakwenda wawakonghole awasagulwe kulawa si sandi sose ine, we digunda kulawa ulwandi luno lwe ndumo yo ulanga mpaka ulwandi luya lwe indumo yo ulanga.” 32 “Kwibiki dyo mutini mukifuse imbasi; manhambi gakwe ganghalafa na kusanhula manyagala, mukutanga fina ugele we dibahu wahabehi; 33 anye nanye nhaifo, fomukugona ago gose, mutange fina kahabehi, hamulango. 34 Chawelu, nikuwatamilani, Icheleko chino chisikuloka, mpaka ago gose gamemelesigwe. 35 Ulanga ne chilunga fikuloka; ninga simbuli sangu sisikuloka ng'o.” 36 “Ninga dijuwa diya na ugele uya hechaka iyamanyile, kahimalaika wowile kulanga, kahiiMwana; ninga iBaba yemwene. 37 Kosoko fina mumajuwa ga Nuhu nofo kukuwa kukwija kwakwe iMwana we Munhu. 38 Kosoko fina amajuwa gaya Difaluko foduwile dikali, awanhu fowendawodiya, na kunywa, wakutola na kutoligwa, mpaka dijuwa diya doyengila Nuhu musafina; 39 wasamanyile mpaka Digalika fodejile, hodiwalonda wose, nofo kukwenda kuwe kwakwe iMwana we Munhu. 40 Ugele uwo wanhu weli wokuwa kumugunda; yumonga yakulondigwa, yumonga yekulekigwa; 41 wanawake weli wakuwa wakusaga: Yumonga yakulondigwa, yumonga yakusigala. 42 Mwikale meso; kosoko musimanyile dijuwa dihoki dyo yakayokwija Mundewa wenu. 43 “Ninga mumanye imbuli ino; imwenyenyumba nhanga yamanyile dijuwa dyo yakwija imuhiji, nhanga yekale meso, nghowile yakuleka inyumba yakwe ibenigwe. 44 Kosoko iyo anye nanye, ikaleni meso, kosoko isaa yo musimanyile Mwana we Munhu yakwija.” 45 “No nani imutumwa, yekuhuwiligwa, na yene misungu. Imwene yalekeligwe ne Mundewa wakwe inyumba yakwe, yawenghe wanhu ichakudiya ku ugele wakwe? 46 Ibeka imutumwa yuya imwene, iMundewa wakwe foyakwija yamufike yakugolosa nheifo. 47 Chawelu, kumutamilani, yakwenda yamwike kulangisisa ifinhu fyakwe fyose. 48 Ninga imutumwa yuya yehile yanghagamba mu moyo wakwe, ‘iMundewa yekuchelewa,’ 49 yanghakonga kuwatowa wayagwe na kudiya na kunywa hamwedu na walefi. 50 iMundewa wakwe imutumwa yuya yakayakwija dijuwa dyonghamanyile na isaa yonghamanyile. 51 Yakumudumula mahindi meli, na kumwika hamwedu na wechimwefe, no kokuwa chililo na kugwegwejula meno.”
1 “Noho undewa wa kulanga ukwija uliganiswa na wali ikumi, awalonda sitaa sawo, howolawa kuluta kumuhokela bwana halusi. 2 Washano wawo howokuwa wabwalasi, na washano wena misungu. 3 Awaya awabwalasi howolonda sitaa sawo, howoleka kulonda na mafuta; 4 ninga awaya awene misungu howolonda sitaa sawo na mafuta gasigafu mufiya fyawo. 5 Kamei ibwana halusi yakachelewe kwija, wose howasisila howogona. 6 Ninga muchilo gati, hokuwa na chowe, ‘Handikoni, ibwana halusi keja mumuhokele!’ 7 “Chimwande, hawaleuka, awali waya wose na kugolosa sitaa sawo. 8 Awaya awabwalasi howowalonga awene misungu, ‘Chingheni amafuta genu makefu du, kosoko sitaa setu sikusima.’ 9 Ninga waya wene misungu hawawabidula wakugamba, ‘Kaa, gasikuchenela aseye na nyeye; ibeka mulute kumaduka, mukagule.’ 10 Ugele awaya wakalute kukugula; ibwana halusi keja. Awaya awowile baho howokwingila hamwedu naye kuhalusi, umulango howuhindigwa. 11 “Howokwija awamonga waya, wakugamba, ‘Mundewa, Mundewa! Chikumulile!’ 12 Hakawabidula, yakuwagamba, ‘Chawelu, nikumutamilani, siwamanyileni nyeye.’ 13 Mwikale meso, kosoko musimanyile dijuwa kahi ugele.” 14 “Kosoko ikifana imunhu yakuluta kunhambo, hakawenanga awatumwa wakwe, hakeka isawo yakwe ukwawo. 15 Hakamwingha yumonga talanda shano, yumonga talanda mbili, yumonga talanda imwedu; chila yumwedu kaliganiswa ifene fyo yakudaha, kamei hakaluta. 16 Chimwande ayuya yenghigwe talanda shano, hakaluta kwambasa na si talanda siya, na kupata talanda singi shano. 17 Nheifo ayuya naye we simbili, naye hakapata talanda singi mbili. 18 Ninga ayuya yahokele talanda imwedu, hakaluta na kufukula hasi, na kufisa italanda ye Mundewa wakwe. 19 “Gakaloke majuwa mengi hakeja, iMundewa wa watumwa waya, hakatala ifesa iya hamwedu nawo. 20 Yakeje ayuya yahokele talanda shano, na kwigala talanda singi shano, hakagamba, ‘Mundewa hakwika ukwangu talanda shano, Langa nipata talanda singi shano.’ 21 iMundewa wakwe hakamugamba, ‘Fiswamu, mutumwa muswamu, na wakuhuwilwa! Hakuhuwiligwa kwa makefu, nikwenda nikwike muchanhya ya mengi. Ingila mu chinyemi che Mundewa wako!’ 22 “Hakeja ayuya iyahokela sitalanda mbili, hakagamba, ‘Mundewa, hakwika ukwangu talanda mbili. Langa nipata talanda singi mbili.’ 23 iMundewa wakwe hakamugamba, ‘Fiswamu, mutumwa muswamu na wakuhuwilwa! Hakuhuwiligwa kwa makefu, nikukwika muchanhya ya mengi. Ingila mu chinyemi che Mundewa wako!’ 24 “Kamei hakeja na ayuya iyahokele italanda imwedu, hakagamba, ‘Mundewa, hanimanya agweye kwa munhu mukugutu; ukugola honghuhandile, ukulunda honghwanjase. 25 Kamei hanyogoha, haniluta na kufisa italanda yako musanga. Langa! Aino no iiya iyako.’ 26 “Mundewa wakwe yabidula, yakumugamba, ‘Agwe kwa mutumwa wihile na mudoba! Hakumanya fina nikugola hosihandile, nikulunda, hosanjase; 27 Haikwagila kwikisa isawo yangu ku wakwambasa na kulafa nyongesa, nani fonikwija nipate iyangu ne nyongesa yakwe. 28 Muhokeni italanda iyo, mwingheni ayuya iyenaso ikumi. 29 Kosoko chila iyena chinhu yekwinghigwa, na kongesigwa telele; ninga iyechaka, hata achiya cho yenacho yakuhokigwa. 30 Na imutumwa yuya yehile, mumutage kutali ku chisa cha kunje, no kukuwa chililo na kugwegwejula meno.’” 31 “Nghona yakwija iMwana we Munhu mu ditunyo dyakwe, hamwedu na malaika wasunhile wose, noho yekwikala mwigoda dyakwe dya ditunyo dya undewa wakwe; 32 kumwande yakwe wakwenda wakitang'anyile awanhu wa mataifa gose, naye yakwenda yawabagule fina imudimi foyakubagula singholo na simhene; 33 yakusika singholo umukono wakwe wo kulume na simhene umukono wakwe wo kumoso. 34 Kamei Mundewa yakuwagamba awaya awowile kumukono wakwe wokulume; ‘Wijeni, anyeye mulugutiswe ne Babangu! Muhale undewa womwikiligwe kulawa kukumbigwa kwe chilunga; 35 kosoko hanuwa na njala, homuningha chakudiya, hanuwa na nghilu homunigha meji go kunywa; hanuwa mugeni, hamunihokela. 36 Hanuwa mwasi; hamunifasa, hanuwa mutamu; hamwija munilanga, hanuwa kuchifungo; homunijila.’ 37 “Noho awanhu waswamu, womubidula, ‘Mundewa, milaki fochakonile kwina njala, hochikwingha chakudiya, ama kwina nghilu hochikwingha meji? 38 Kahi milaki fochakonile kwa mugeni, hochikukalibisha, ama kwa mwasi hochikufasa? 39 na kahi milaki chakonile umutamu, kahi kwa muchifungo, hochikwijila?’ 40 iMundewa yakuwabidula yekuwagamba, ‘Chawelu, nikumutamilani, ifyene fyomumugolosele yumwedu wa wano awandugusangu awadodogi, munigolosela niye.’ 41 “Kamei yakuwalonga awaya awowile umukono wakwe wo kumoso, ‘Leukeni ukwangu, muligitiswe, mulute ku umoto wa majuwa gose! Woyafuluse kwikiligwa iLuhoma na malaika wakwe; 42 kosoko hanuwa na njala, musaninghile chakudiya; hanuwa na nghilu; musaninghile meji; 43 hanuwa mugeni; musanihokele, hanuwa mwasi; musanifasile, hanuwa mutamu na muchifungo; musejile kunilanga.’ 44 “Kamei nawo wakubidula, wakugamba, ‘Mundewa milaki, fochakonile agweye kwina njala kahe kwina nghilu, kahe kwa mugeni, kahe kwa mwasi, kahe kwa mutamu, kahe kwa muchifungo, hochileka kukutogomela?’ 45 Yakwenda yawabidule, yekugamba, ‘Chawelu nikuwatamilani, ifyene fo musimugolosele yumwedu wa awa awadodogi, musinigolosele niye.’ 46 Kamei awo nawo wakwenda walute kwingila mu usungu wa majuwa gose; ninga awanhu waswamu wakuluta ku wumi wa majuwa gose.”
1 Yesu yakamale kulonga simbuli siso sose, hoyowagamba awefusa wakwe, 2 “Mumanya fina fogakuloka majuwa meli ikuwa Pasaka, ne Mwana we Munhu yakwenda yasongesigwe na kukomigwa kwa kutungikigwa mwibiki.” 3 Ugele uwo awakulu wa makuhani na wasehe wa wanhu, weja wakitang'anyila mudijumba dye Kuhani Mukulu, iyenangagwa Kayafa; 4 Wagolosa masimulisi hamwedu ifene fowakudaha kumukola Yesu kwa chimwefe na kumukoma. 5 Ninga howogamba, “Unghowe ugele we sikukuu, ungheje ulawanisa mugogolo ku wanhu.” 6 Imwene Yesu hoyokuwa Betania munyumba ya Simoni mukoma, 7 mwanamuke yene chichupa cha mafuta ga malihamu, ga diliho ikulu lugano hakamusegelela na kumwitilila mwitwi dyakwe ugele yekale hachakudiya. 8 Awefusa wakwe wakone nhaifo, howosuha, howogamba, “Hasala yaki ino? 9 Kosoko amafuta gano hagowa gakudaha kuguligwa kwa mapesa mengi howogawiligwa awakiwa.” 10 Yesu yakamanye, hoyowagamba, “Nhani mukumwidasa imwanamuke? Kosoko kanigolosela chinhu chiswanu. 11 Kosoko majuwa gose awakiwa mwinawo hamwedu nanye, ninga niye si hamwedu nanye majuwa gose. 12 Kosoko kwa kunyitilila umutufi wangu amafuta gano, kagolosa nhaifo kosoko ya kutandila amasiko gangu. 13 Chawelu, nimukuwatamilani, chila ahakuhubiliigwa imbuli iswamu muchilunga chose, ichinhu chino choyagolose chotambuligwa, kosoko ya kumugelegela.” 14 Ugele uwo iyumonga wa waya ikumi na weli, disina dyakwe Yuda Isikalioti, hakawalutila awakulu wa makuhani, 15 hakagamba Moningha choni, ninghamulafa ukwenu? Howomuliha fipande makumi madatu fya fesa. 16 Kulawa ugele uwo yende yohananga luneka lwa kumusongesa. 17 Dijuwa dya kukonga dye mikate isigumigwe nungo, awefusa wakwe hawamulutila Mundewa Yesu, na kumugamba, “Ukuhananga chigolose hoki uleke ukadiile iPasaka?” 18 Hakagamba, “Luteni ukaya kwa munhu yumonga, Mukamugambe: ‘Mwalimu yekugamba; ugele wangu wahabehi; ukwako nikuhananga nigolose iPasaka hamwedu na wefusa wangu.’” 19 Awefusa hawagolosa fina Yesu foyawasigilile kamei hawaitandila iPasaka. 20 Ikowe hegulo hakekala hachakudiya hamwedu na waya wefusa wakwe ikumi na weli. 21 Fowendewodiya, hakagamba, “Chawelu nikumutamilani, Yumwedu wenu yakunisongesa.” 22 Hawakona usungu lugano, hawakonga kiyusa yumwe yumwe, “No niye, Mundewa?” 23 Hakabidula yakugamba, “Iyengise umukono wakwe mwibakuli hamwedu na uwangu, noyakwenda yanisongese. 24 Imwana we Munhu yakuluta ifene foyaandikiigwe, ninga usungu wakwe imunhu yuya imwene yekumusongesa imwana wa Munhu! Hayuwa ibeka kwe munhu yuyo yowile nghelekigwe!” 25 Yuda ayuya imwene yekumusongesa, hoyobidula, “Togola no niye, Mundewa? Hoyomugamba Agweye kuilonga.” 26 Ugele fowadiyage, Yesu hakalonda mukate, hakaulugutisa, hakaubendula, hakawengha awefusa wakwe, yakugamba, “Londeni mudiye, auno no mutufi wangu.” 27 Hakalonda ichikombe, hakalumba, na kuwengha, yakugamba, “Munywile mose muchichino. 28 Kosoko aino no sakame yangu ya dilagano iikwitika, kosoko ya wengi kuwaleusila uwihi. 29 Ninga nikumutamilani, sikunywa kahi kulawa hambiya difai aino ikulawa mumisabibu, mpaka fonikanikunywa aiya inyisha hamwedu nanye, mu undewa we Babangu.” 30 Kamei wakamale kwimba lwimbo, hawalawa kunje, hawaluta kwitunda dya Miseituni. 31 Noho Yesu hoyowagamba, “Anye mose motija kosoko yangu ichilo chino cha diyelo,” kosoko iandikigwa, “Nikumutowa imudimi, ditewa dye singholo, dyokiyagala. 32 Ninga, fonikwinuka kulawa mu difa, nowalongolela kuluta Galilaya.” 33 Petulo hakagamba, “Wose wanghatija kosoko yako, aniye sikutija ng'o!” 34 Yesu hakamugamba, “Huwila, nikukutamila agweye, ugele dijogolo disinati dike, ukuwa unikanile, kadatu. 35 Petulo, hoyomugamba, ‘Inghanyagila kufa nagwe, sikukukana ng'o!’ Awefusa wamonga nawo howolonga nheifo.” 36 Yesu hakaluta hamwedu nawo mpaka ahanhu henangagwe Getisemane, hakawagamba awefusa wakwe, “Ikaleni baha, ani nilute kuya nikatase.” 37 Hakamulonda Petulo na awaya awana aweli wa Sebedayo, howokonga kuwa na usungu na kwidasika. 38 Hakagamba, “Nina usungu lugano, kifana kufa. Ikaleni hano, muwe meso hamwedu naniye.” 39 Hakaluta kumwande chidodogi, na kugwa chifunhifunhi, hoyotasa, yakugamba, “Baba, inghadahika, unileusile ichikombe chino cha magayo dino! Ninga si fina fonikuhananga niye, ninga foukuhananga agweye.” 40 Hakawejila awaya awefusa, na kuwefika wagonile; hakamugamba, “Petulo Mulemeligwa kwikala meso na niye hata isaa imwedu? 41 Ikaleni meso, mutase, mungheje mukwingila mumagesa; ichidoga chikufumila, ninga umutufi wechaka ludole.” 42 Hakaluta kahi, keli, yakutasa, yakugamba, “Baba nghonaga isikudahika kunileusila ichikombe chino cha magayo, ninghachunywe, foukwenda gweye nofoyuwe.” 43 Hoyokwija kahi, na kuwona wagonile; kosoko ameso gawo hagowa masito. 44 Hoyowaleka kahi, hoyoluta, kuwomba lwa kadatu, yakulonga simbuli sisiya. 45 Kamei hoyowejila awefusa wakwe, na kuwawagamba, “Munghali mugonile na kubwihila; Langeni, ugele usegelela, Imwana we Munhu yakugumigwa mumikono ya wanhu awena uwihi. 46 Inukeni, chigendeni. Langeni, ayuya iyakunisongesa kasegelela.” 47 Ugele foyalongage, Yuda, yumwedu, wa awaya ikumi na weli hoyokwija, hamwedu na itewa ikulu dya wanhu wena mapanga na mapulo walawa ku wakulu wa Makuhani na awasehe wa wanhu. 48 Na yuya yakumusongesa hakawengha chitangilo, kawagamba, “Wonikwenda nimunonele no yuyo Mukoleni” 49 Chimwandemwande, hoyomulutila Yesu, hoyogamba, “Baho hako Mundewa!” Hoyomunonela. 50 Yesu hoyomugamba, “Mbwiyangu, golosa idikwigale” Howoluta howogolola imikono yawo, howomukola Yesu. 51 Langa yumwedu wawo awaya awowile hamwedu na Yesu, hoyogolola umukono wakwe, hoyokwega dipanga dyakwe, hoyomutema imutumishi we kuhani Mukulu, hoyomudumula inghutwi. 52 Kamei Yesu hoyomugamba, “Yuwisa dipanga dyako baho hodyowile, Kosoko wose wakukola mapanga wakukomigwa na mapanga.” 53 Kahi ukona fina aniye sikudaha kumutasa iBaba, naye yakunigalila hambiya hano matewa ga wasilikali malaika kumi na meli? 54 Amatulumo gomemelesigwa nhani fina agakugamba ikuwa nheifo? 55 Ugele uwo Yesu hoyowagamba matewa fina, “Togoleni, mulawa kifana kumukola muhiji, mwina mapanga na mapulo, kosoko ya kunikola? Majuwa gose hanikala Mwihekalu na kufusa, musanikolile. 56 Ninga agano gose gagaluka nheifino, uleke amatulumo ga wagonesi gamemelesigwe.” Noho awefusa wakwe wose howotija, howomuleka. 57 Nawo awamukolile Yesu hawamwigala kwa Kayafa, Ikuhani Mukulu, kowamemile awatulumi na wasehe. 58 Na Petulo yeja yandamila kwa hatali, mpaka kwi kumbo dye Kuhani Mukulu, hakengila kugati, na kwikala hamwedu na watumwa yone indumo yokuwa nhani. 59 Awakulu wa Makuhani na dibalasa dyose howohananga uhomelesi wo udasi, kosoko ya Yesu, uleke wamukome; 60 howoswela kamei, hawalawanisa wahomelesi wengi wa udasi, kulawabaho howolawanisa weli 61 wakugamba, “Ayuno hakagamba, ‘Yakudaha kudimola dihekalu dya Mulungu, na kudijenga kwa majuwa madatu.’” 62 Kamei Ikuhani Mukulu hoyokwinuka hakamugamba, “Nghukubidula mbuli? Awano wakukuhomelesa choni?” 63 Ninga Yesu hakanyamala. Kuhani Mukulu hoyomugamba, “Nikukwilahisa kwa Mulungu imumi: Chitamile, nghona agweye no Kilisito, Mwana we Mulungu.” 64 Yesu hoyomugamba, “Agwe nanga kuilonga. Ninga nikumutamilani kulawa hambiya mukwenda mumone iMwana we Munhu yekale kumukono wo kulume wo ludole, yakwija mumafunde ga kuulanga.” 65 Ikuhani Mukulu, hoyodega si suke sakwe, yakugamba, “Lubeso. Nhani chikuhananga wahomelesi kahi? Langeni hambiya muhulika ulubeso lwakwe. 66 Mukulamula nhani nyeye?” Howobidula, howogamba, “Imwagila yakomigwe.” 67 Howomutwila amate kuchihanga, howomutowa, wamonga howomutowa makofi, 68 wakugamba, “Agwe Kilisito! Tanga, nani yakutowile?” 69 Petulo hoyokuwa yekale kunje ye dikumbo; mwamuke yumonga hoyomulutila, hoyogamba, “Agwe nagwe hakuwa hamwedu na Yesu wa Galilaya.” 70 Ninga hakakana kumwade ya wose, na kugamba, “Simanyile cho ukulonga.” 71 Kamei yakalawe kunje mpaka habalasa, mwanamuke yungi hoyomona, hoyowatamila awanhu wowile baho, “Imunhu yuno hakowa hamwedu na Yesu Munasaleti.” 72 Hakakana kahi kwa kilaha, “Simumanyile imunhu yuno.” 73 Chikaloke chipisi chidodogi, awaya awowile baho howomwijila Petulo, howomugamba Chawelu agwe nagwe kwa yumwedu wawo, “Kosoko hata inonga yako ikukusongesa.” 74 Hoyokonga kuligita na kilaha yakugamba, “Simumanyile imunhu yuno!” Ugele uwo dijogolo hodikwika. 75 Petulo hakagelegela imbuli yoyalongile Yesu fina, “Ugele dijogolo disinati dike, agweye ukuwa unikanile kadatu.” Hoyolawa kunje, hoyolila kwa usungu lugano.
1 Ikowe nhosikusiku, wakulu wa makuhani wose na wasehe wa wanhu, haweka mulundo kosoko ya Yesu, uleke wamukome; 2 Hawamoha, na kumulonda kumwigala kwa Pilato yowile liwali. 3 Kamei, Yuda ayuya yamusongese, yakone fina kafulusa kuliganiswa, hoyokalala, hoyowowisila awakulu wa makuhani na wasehe wa wanhu fipande fiya fye ifesa, makumi madatu, 4 hoyogamba, “Hanibana, fonaisongese isakame ichaka wihi.” Howagamba, “Ago gena choni ukwetu. Ugalange agweye gomwecho.” 5 Hoyafikubita afiya ifipande fye ifesa kugati ya dihekalu hoyoleuka; hoyoluta, na hoyejakinyonga. 6 Awakulu wawatambiki howofilonda afiya ifipande fye ifesa, howogamba, “Si fiswanu kufika mudisanduku dya filafwa, kosoko ni fesa ya sakame.” 7 Howokifumilisa fina, wagule ilolo dya ulongo we chumbo howe hanhu hakusikila wageni. 8 Kosoko iyo dilolo didyo dikwinangigwa, Ilolo dya sakame mpaka diyelo. 9 Hoimemelesigwa imbuli yalongigwa ne mugonesi Yelemia: Yagamba, “Howofilonda fibemhe makumi madatu fye fesa, diliho dyakwe dyafumiligwe, na wana wa Isilaeli, 10 howofilafa kwa kugulila ilolo dya ulongo we chumbo, fina iMundewa foyanisigilile.” 11 Hoyokwima kumwande ya liwali; liwali hoyomusa, yakugamba, “Agweye no goMundewa wa Wayahudi?” Yesu hoyogamba, “Agwe kuilonga.” 12 Ninga foyaliganiswe na wakulu wa makuhani na wasehe, nghabidule mbuli. 13 Noho Pilato hoyomugamba, “Nghukuhulika amabuli gose gowakukuhomelela?” 14 Hoyoleka kumubidula hata mbuli imwedu, iliwali hoyokisina lugano. 15 Ugele we sikukuu iliwali hakasowela kuwadoholela mufungwa yumwedu wowakuhananga. 16 Baho hahowa na mufungwa yumonga yamanyike lugano majuwa gaya, disina dyakwe Balaba. 17 Wakakitang'anyile, Pilato hakawagamba, “Mukuhananga nimulekele yehoki? Ayuya iBalaba ama iYesu yekwinangigwa Kilisito?” 18 Kosoko hakamanya fina hawamulafa kwa finju. 19 Yakekale mwigoda dyakwe dyo uliganisi, imuke hoyomwigalila, nonga yakugamba fina, “Unghowe na mbuli na yuya imunhu imuswamu; kosoko nidasigwa lugano musinjosi diyelo kosoko yakwe.” 20 Awakulu wa makuhani na wasehe wa wanhu howowagongelesa matewa wamuhanange Balaba, na kumukoma Yesu. 21 Iliwali hoyobidula kahi hoyowagamba, “Mukuhananga niwadoholele yehoki mu awano aweli?” Howogamba, “Balaba!” 22 Pilato hoyowagamba, “Nimugolose nhani Yesu iyekwinangwa Kilisito?” Howobidula wose, “Yasambasigwe!” 23 Hoyogamba, “Nhani, wihi waki woyagolose?” Howokongesa kujoja wakugamba, “Yatungikigwe!” 24 Baho Pilato yakone nghodaha chochose, ninga chiyunguyungu chikongeseka du, hoyolonda meji, hoyonawa mikono kumwande ya matewa, hoyogamba, “Aniye nachaka uwihi kusakame ye munhu yuno imuswamu! Mugalange ago anyeye muwecho.” 25 Wanhu wose howobidula howogamba, “Isakame yakwe yuwe muchanhya yetu na muchanhya ya awana wetu!” 26 Kamei hoyomukumulila Balaba; Yakamale kumutowa Yesu mikotya, yamulafa uleke wakamusambase. 27 Noho wasilikali wa liwali hawomwigala Yesu ku Plitolio, howomumemelela ichitewa chose. 28 Hawamuhambula si suke, howomufasa ikasu indunghu. 29 Hawaluka nghofia ya miwa, howomufasa mwitwi dyakwe, hawamwingha mhando ya digwami mumukono wakwe wo kulume, hawafugama kumwande yakwe, na kumuhowa wakugamba, “Baho hako, Mundewa wa Wayahudi!” 30 Kahi howomutwila mate, hawalonda imhando iya howomutowa towa mwitwi. 31 Wakamale kumogelela, howomuhambula dikasu diya, howomufasa sisuke sakwe, howomulonda kuluta kumusambasa. 32 Wokowe wakulawa hawona munhu wa Kilene, disina dyakwe Simoni; ayuno howomudindilisa yalonde umusalaba wakwe. 33 Wakafike ahanhu hekwinangwa Goligota, (nong'amba, ahanhu hediguha dye ditwi,) 34 howomwingha yonywe difai ihanganisigwe ne sungwi; ninga yakainomole du nghendile kuyunywa. 35 Wakafuluse kumutungika mumusalaba, “Howogawa sisuke sakwe, howositowela kula.” 36 Howokwikala, wakumugojelesa uko. 37 Howokwika hachanhya ye ditwi dyakwe usongesi wawo diandiko dikugamba, “AYUNO NO YESU MUNDEWA WA WAYAHUDI.” 38 Ugele uwo wahiji weli howosambasigwa hamwedu naye, yumonga umukono wakwe wo kulume, na yumonga umukono wakwe wo kumoso 39 Awalokage munjila howomuliga, wakusingisasingisa amatwi gawo, 40 Wakugamba, “Agweye go ukudimola dihekalu na kudijenga kwa majuwa madatu! Kihonye gomwecho; honaga no mwana we Mulungu, humuluka mumusalaba.” 41 No nheifo awaya awakulu wa makuhani fowamogelele hamwedu na watulumi na wasehe, wakugamba, 42 “Hakawahonya wamonga, nghakudaha kihonya imwecho. Aye iMundewa wa Isilaeli; yahumuluke hambiya mumusalaba, nase chomuhuwila. 43 Kamuhuwila Mulungu; na yamuhonye hambiya, nghona yakumuhananga; kosoko hakagamba, ‘Aniye na Mwana we Mulungu.’” 44 Nheifo awaya awahiji nawo awasambasigwe hamwedu naye hawamuliga. 45 Kulawa isaa ya mutandatu mpaka isaa ya ikenda iisi yose hayuwa na chisa. 46 Ikafike isaa ya ikenda nhafi, iYesu yekwinula dijwi dyakwe kwa ludole, yekugamba, “Eloi, Eloi, lama sabakitani?” Nong'agamba, “Mulungu wangu, Mulungu wangu, nhani unilekile?” 47 Na wamonga awowile baho, wakahulike, hawagamba, “Ayuno yakumwinanga Eliya!” 48 Chimwandemwande yumwedu wawo hoyobilima, hoyolonda sifongo hoyoiloweka mu siki, hoyoiguma mu chigwami, hoyomwingha yonywe. 49 Awaya wamonga howogamba, “Leka chilange nghona Eliya kokwija kumuhonya!” 50 Naye Yesu yakenule dijwi kwa ludole, hoyolafa ichidoga chakwe. 51 Langa dipasia dye dihekalu hadidegeka fibemhe fili, kulawa kuchanhya mpaka hasi; iyisi hoisingisika; amawe hogotulika; 52 ifilalo hofigubuka; hoikwinuka mitufi mingi ya wasunhile awagonile mufilalo. 53 Kamei wakafuluse kulawa mufilalo, wakafuluse kwinuka, howokwingila mukaya isunhile, hawokonigwa na wengi. 54 Kamei ayuya iakida, hamwedu na waya wowile hamwedu naye wakumugojelesa Yesu, wokone umusingisiko we iisi na agaya gagoloseke, howokogoha lugano, howogamba, “Chawelu ayuno hakowa Mwana we iMulungu!” 55 Hahowa na wanawake wengi baho wakulanga kwa hatali, awo no weja wamwandamila Yesu kulawa Galilaya, na kumutogomela. 56 Mugati yawo hakowa umo Maliamu Magidalena, na Maliamu ing'ina yawo cha Yakobo na Yusufu na ng'ina yawo awana wa Sebedayo. 57 Ikowe hegulo hoyokwija munhu yumonga mugoli wa Alimataya, disina dyakwe Yusufu, imwene naye hakowa mwifusa wa Yesu; 58 imunhu yuyo hoyomulutila Pilato, hoyoutasa umutufi wa Yesu. Kamei Pilato hoyolagisa yenghigwe. 59 Yusufu, hoyoulonda umutufi, hoyousingilisa ne sanda ye bafuta swanu. 60 Hoyowika muchilalo chakwe chisha, choyasongole mwiwe, hoyofingilisa diwe dikulu hamulango we chilalo, yaleuka. 61 Baho hahowa na Maliamu Magidalena, na Maliamu ayuya wa keli, wekala wekulanga ku chilalo. 62 Dijuwa dya keli, idyoile dye Isabato, wakulu wa makuhani, na Mafalisayo howomwijila Pilato; 63 wakugamba, “Mundewa, chigelegela fina ayuya imusugu, foyowile yakali mumi hakagamba, ‘Ganghaloka majuwa madatu yakwinuka.’ 64 Ulagise ichilalo chimilisigwe fiswanu mpaka dijuwa dya kadatu, wangheje awefusa wakwe womuhija na kuwatamila wanhu, Kenuka kulawa kuwafile; na udasi wa keli ukusuma auya we nghonga.” 65 Pilato hoyowagamba, “Mwina wasilikali, mulute mukemilise ichilalo fiswamu fomukudaha.” 66 Hawaluta, howokwimilisa ichilalo fiswamu, howodiguma diwe diya muhuli na kwika wemilisi.
1 Isabato ikahele, fokwakongile kucha dijuwa dye inghonga ye dijuma, Maliamu Magidalena na Maliamu yuya wa keli, howoluta kwijalanga ichilalo. 2 Langa, hokukuwa musingisiko mukulu we iisi; kosoko imalaika we Mundewa hakadulika kulawa kulanga, hoyokwija, hoyodifingilisa diwe diya hoyodikalila. 3 Ifuta yakwe hayuwa kifana lumwemwe, na sisuke sakwe njelu swe swe swe. 4 Kosoko yo kumogoha, awaya awemilisi hawahihima, na kuwa kifana wanhu wafile. 5 Kamei malaika yakawagamba awaya awanawake, “Munghogohe anyeye; kosoko nimanya mukumuhananga Yesu yasambasigwe.” 6 Kahechaka hano; kosoko kenuka, fina fyoyalongile. Wijeni mulange ahanhu hoyekigwe. 7 Nanye luteni chimwande, mukawatamile awefusa wakwe. Kenuka kulawa kuwanhu wafile; Langeni! Yakuwalongolela kuluta Galilaya; ako noko mukamwona. Handikoni, nifulusa kumutamilani. 8 Hawaleuka chimwande kulawa hechilalo, kwa itisi uwoga ne chinyemi chikulu, howobilima kwijawatamila simbuli siso awefusa wakwe. 9 Langa, Yesu hakakitang'anyila nawo, yakugamba, “Bahoni!” Howomusegelela, howomukola imigulu, howomufugamila. 10 Kamei Yesu hoyowagamba, “Munghogohe; gendeni mukawatamile wandugusangu walute Galilaya, nokowakanyona.” 11 Ugele awaya fowalutage, langa wamonga wa wasilikali howokwingila mukaya, howatamila awakulu wa makuhani gose agagoloseke. 12 Howokitanganyila hamwedu na wasehe, howokifumilisa, howowengha wasilikali fesa nyingi, 13 wakugamba, “Watamileni wanhu fina awefusa wakwe weja nechilo, wamuhija, fochowile chigonile. 14 Imbuli ino inghahulikigwa kwa liwali, aseye, chikwenda chilonge naye, anye nanye chiwaleusila lwidaso.” 15 Kamei howohokela ifesa iya, howogolosa fina fowafundigwe. Na imbuli iyo hoikwenela ku Wayahudi wose mpaka diyelo. 16 Awaya awefusa wakwe ikumi na yumwedu hawaluta Galilaya mpaka ditunda diya Yesu dyoyawasigilile. 17 Nawo wakamwone, howomufugamila, ninga awamonga hawowa na manhonge. 18 Yesu hoyowejila, hoyolonga nawo, hoyowagamba, “Ninghigwa udaha wose wa kulanga na wa muisi. 19 Luteni mukawagolose mataifa gose wowe wefusa: Muwabatise kudisina dya Baba, na Mwana, na Muhe Musunhile, 20 na kuwafusa wagakole gose gonimulagiseni anyeye; langa aniye nikuwa hamwedu nanye majuwa gose, mpaka kundumo ye chilunga.”
1 Inghonga ya Imbuli swanu ya Yesu Kilisito Mwana we Mulungu, 2 fina yofoitulumwe ne mugonesi Isaya: “Langa nikumutuma imutumigwa wangu kumwande yako Iyakwenda yaigolose injila yako. 3 Dijwi dye imunhu yekujoja munyika Igoloseni injila ye Mundewa; Sigoloseni si njila sakwe!” 4 Yohana mubatisaji yasololoka munyika, yakuhubili ubatiso wo Kulamba uwukwigala kuleusiligwa uwihi. 5 Iyisi yose ya Uyahudi wejawamulutila na wanhu wose wa Yelusalemu; na kuwabatisa mulwanda lwa Yolodani, wakulamba uwihi wawo. 6 Yohana hakafala singa se ngamia na mukanda we nghingo muchuno chakwe, chakudiya chakwe sige na uki wa filambo. 7 Yawahubiliya awanhu, yakugamba, “Hanyuma yangu yakwija yena udaha kusuma niye, aniye sagiligwe kufunama na kudohola sisigi se filwatu fyakwe. 8 Aniye nikumubatisani kwa meji, ninga imwene yakwenda yamubatiseni kwa Muhe Musunhile.” 9 Amajuwa gago Yesu yeja kulawa Nasaleti ya Galilaya, hoyabatisigwa na Yohana mu ulwanda lwa Yolodani. 10 Kamei yakalawe kunje ya meji, chimwande yeja yona ulanga ugubuka na Muhe yakudulika muchanhya yakwe kifana huwa; 11 dijwi dyalawa kulanga, “Agweye no mwanangu mwendigwa; nyendesigwa nagweye.” 12 Chimwande Muhe Musunhile kamulongosa kunyika. 13 Naye yowa uko kunyika kwa majuwa makumi mane; yakugesigwa na Luhoma, yowaga na makewe ga kumbago, na malaika wende womutogomela. 14 Hambiya, Yohana yakohigwe, Yesu yeja Galilaya, yakuhubili imbuli swanu ye Mulungu 15 yakugamba, “Ugele wija, undewa we Mulungu usegelela, Mulambe, na kuihuwila imbuli swanu.” 16 Ugele foyagendage munghingi ye bahali ya Galilaya, yamona Simoni ne munduguse Andelea, wakuguma ulwafu lwawo mubahali, kosoko hawowa walowaji wa somba. 17 Yesu yawagamba, “Nyandamileni, nani nowagolosa muwe walowa wanhu.” 18 Kamei chimwande wejawaleka si nyafu sawo na kumwandamila. 19 Hawaluta hamwande habehibehi, hawamona Yakobo wa Sebedayo, na Yohana imunduguse, nawo nheifiya hawowa mu chiya, wakusigolosa si nyafu sawo, 20 Kamei chimwande, yeja yawenanga; howomuleka iBaba yawo Sebedayo mu chiya hamwedu na wanhu we maliho, na kumwandamila. 21 Wejawaluta Kapelinaumu, chimwande dijuwa dye sabato yejayengila mwisinagogi na kufusa. 22 Wejawajuma lugano kosoko ya mafuso gakwe, kosoko yendeyofusa fina munhu yena udaha, kahi si fina watulumi. 23 Kamei chimwande, hamuwa na munhu yena digini dihile umo mwisinagogi dyawo; 24 kamei hakajoja China choni nagweye, “Yesu wa Nasaleti? Togola kwija uchimalagise? Nikumanya gwegwe no Imusunhile we Mulungu.” 25 Ninga Yesu yaigombela yakugamba, “Nyamala na umulawe!” 26 Kamei dyamuguma chisilisi, na kujoja kwa ijwi ikulu na kumulawa. 27 Wose wejawajuma, wakiyusa, wakugamba, “Choni chino? Ifuso isha! Kwa udaha yakulagisa hata magini gehile nago gakumuhulika.” 28 Simbuli sakwe hosikwenela chimwande ku si iisi sose sikusunguluta Galilaya. 29 Kamei chimwande wakalawe mwisinagogi, wejawengila ukaya kwa cha Simoni na Andelea, hamwedu na Yakobo na Yohana. 30 Imukwewe wa Simoni, ing'ina we imuke, hakowa mwisasi, kena mhungo; kamei chimwande wejawamutamila simbuli sakwe. 31 Hoyamusegelela, na kumwinula kwa kumukola umukono, imhungo haimuleka, na kuwatogomela. 32 Hegulo iya dijuwa dikoswe, wejawamwigalila wose awowile na sinhamu na wowile na magini. 33 Awanhu wose we ikaya iya howokwija howomema hamulango. 34 Hakawahonya matewa na matamu ga hayo hayo, na kulafa magini itewa, nghagalekile magini galonge, kosoko hagamumanya. 35 Nhosikusiku, kwikali malisalisa, yejayenuka na kuluta kunhu kwichaka wanhu, uko yowa na mawombi. 36 iSimoni na wayagwe hawamwandamila, 37 na kumona hawamugamba, “Awanhu wose wakukuhananga.” 38 Yawagamba, “Chigendeni kwingi, kufikaya fihamwande, uleke nihubili uko nako kosoko iyo nochileka nejile.” 39 Yaluta kuhubili, iisi yose ya Galilaya mumasinagogi gawo na kulafa magini. 40 Yamwijila munhu yena ukoma, yakumugongelesa kwa kumufugamila, yakugamba, “Unghenda ukudaha kunihonya.” 41 Naye yamonele ubasi, na kugolola umukono wakwe, na kumukwafa, yakugamba, “Nikwenda, uhone.” 42 Kamei chimwande ukoma wamuleuka hakahonyigwa. 43 kamei Yesu yamugamba yalute chimwande 44 na kumugamba, “Langa, unghamutamile munhu mbuli yoyose; nanga ulute ukakiyonese ku watambiki, go mwenyecho ukalafe isadaka foyalagisa iMusa, kosoko ya kuhona kwako; chuwe chitangilo ukwawo.” 45 Ninga, hakalawa na kukonga kuibwambwasa na kuyenesa imbuli iya mpaka isidahike kahi kwa Yesu kwingila mukaya yakoneke na wanhu. Ninga hakasigala kunje ahanhu hasowile na wanhu, hawamulutila kulawa chila ulwandi.
1 Gakaloke majuwa makefu, yoya kahi Kapelinaumu, hawahulika fina kowa ukaya. 2 Wanhu itewa weja welunda hamwedu mpaka hamulango, hokukuwa chaka luneka kosoko yawo; naye yendeyowahubili imbuli yakwe. 3 Haweja wanhu wegale mutamu yaholole, kenuligwa na wanhu wane. 4 Wakalemeligwe kumusegelela kosoko ya matewa, Howaimola ikano, ahaya hoyowile. Wakamale kuitobola hawamuhulumusa mwisasi dyoyagonele ayuya iyaholole. 5 Kamei Yesu yakone dihuwi dyawo, hakamugamba ayuya iyaholole, “Mwanangu kuleusiligwa uwihi wako.” 6 Awamonga wa Watulumi awowile uko, hawekala na kudoga mufidoga fyawo, 7 “Nhani yuno yakulonga nhafi? Yakutofula. No nani yakudaha kuleusa uwihi langa yu mwedu du naye no Mulungu!” 8 Chimwande Yesu, yakamanye muchidoga chakwe fina wakudoga nheifo mufidoga fyawo, yawagamba, “Nhani mukudoga nhafi mufidoga fyenu? 9 Chihufu no chihoki, kumugamba yaholole, ‘Kuleusiligwa uwihi wako,’ ama kugamba, ‘Inuka, kitwike disasi dyako, ulute?’ 10 Ninga mumanye fina Mwana we Munhu kena udaha muchilunga wo kuleusa uwihi.” Kamei yamugamba ayuya yaholole 11 Nikugamba, “Inuka kitwike disasi dyako ulute ukaya ukwako.” 12 Chimwande hakenuka, na kitwika disasi dyakwe na kulawa kumwande yawo wose. Wose wejawajuma na kumutunya Mulungu, wakugamba, “Chisinati chone chinhu fina chino ugele wowose!” 13 Hakaleuka kahi na kuluta kunghingi ye bahali, ditewa dyose hodimusunguluta, hoyowafusa: 14 Foyalokage, yamona Lawi imwana wa Alifayo, kekala hachibanda cho kulihila kodi, hakamugamba, “Nyandamile. Hakenuka na kumwandamila.” 15 Ugele foyekale wakudiya kunyumba yakwe ditewa dye wakonghosa kodi na wena uwihi hawekala hamwedu na Yesu, na wefusa wakwe, kosoko hawowa itewa wamwandamilage. 16 Watulumi na Mafalisayo fowamonile yakudiya hamwedu na wakonghosa kodi na wena uwihi, hawawagamba awefusa wakwe, “Nhani yakudiya hamwedu na wakonghosa kodi na wena uwihi?” 17 Yesu yakahulike hoyowagamba, “Awomi wasikuhananga muganga ninga awatamu. Sijile kwinanga awomi ninga awene wihi.” 18 Awefusa wa Yohana na Wamafalisayo weja wafungaga; kamei, haweja, wakumugamba, “Nhani awefusa wa Yohana na wefusa wa Mafalisayo wakufunga, ninga awefusa awako wasikufunga?” 19 Yesu hakawagamba, “Awowile mu halusi wakudaha kufunga nhani ugele ibwana halusi kahamwedu nawo?” Ichigele chose nghona ibwana halusi ye hamwedu nawo, wasikudaha kufunga. 20 Ninga amajuwa gakwija iBwana halusi yakwija yoleusigwa, dijuwa dyo noho wakawofunga. 21 Hechaka munhu yakusona ndame nyisha mu suke ya katali, yanghasona, achiya ichisha chikuigolosa idegeke aiya isuke ya katali, ahaya ahadegeke hakongeseka kudegeka. 22 Kahe hechaka munhu yakuguma difai nyisha muchibuyu cha katali, yanghaguma aiya idifai nyisha ikwenda ifitule ifibuyu fiya, ninga difai nyisha ikugumigwa mufibuyu fisha. 23 Yakowe yakuloka mumigunda ye ngano dijuwa dye sabato; fowaleukage awefusa wakwe hawakonga kukwanyula masanja ge ingano. 24 Mafalisayo hawamugamba, “Langa, nhani wakugolosa dilemesigwe kugolosa mwijuwa dye Sabato?” 25 Kamei yawagamba, “Musinati musome hohose foyagolose Daudi, foyowile na njala, imwene na wayagwe: 26 ifene foyengile mu nyumba ye Mulungu, ugele we mutambiki mukulu Abiyasali, na kudiya imikate iya yokonesa iyene isikudiigwa na wanhu wowose ninga na watambiki du, na kuwenghawayagwe?” 27 Hoyowagamba, “Isabato haigoloseka kosoko ye munhu; siyo imunhu kosoko ye isabato. 28 Ninga Mwana we Munhu no Mundewa we sabato nheifia.”
1 Yengila kahi mwisinagogi; umo hamuwa munhu yena mukono uholole. 2 Wende womutegela uleke wone nghona yomuhonya dijuwa dye sabato; uleke wamukole chikono. 3 Kamei yamugamba ayuya yena umukono uholole nyagula 4 Hakawagamba, “Ni fiswanu dijuwa dye sabato kugolosa maswanu ama gehile, Kuhonya chidoga ama kukoma?” Ninga hawanyamala. 5 Hakawakumhulila meso kose kose kwa nyono, yena usungu kosoko yo ukugutu we fidoga fyawo. Yakumugamba ayuya imunhu, “Golola umukono wako. Naye hakaugolola, na umukono wakwe houhona.” 6 Amafalisayo hawalawa na chimwande haweka njama hamwedu na Mahelodiya kosoko yakwe uleke wamukome. 7 Yesu yaleuke hamwedu na wefusa wakwe, kuluta kunghingi ye bahali na wanhu itewa kulawa Galilaya weja wamwandamila; kahi kulawa Uyahudi, 8 na Yelusalemu, na Idumaya, na umwambu wa Yolodani, na ulwandi lwa Tilo na Sidoni. Itewa ikulu, wakahulike simbuli sose soyagolose, hawamwijila. 9 Hakawalonga awefusa wakwe fina wamwikile chiya habehi naye, kosoko ya ditewa dya wanhu, wangheje womukanhamisa; 10 Kosoko hakahonya matewa, hata awaya awowile na sinhamu, weja wakisegesaga uleke wamukwafe. 11 Na wena magini gehile chila fowakumona, wakugwa na kujoja, wakugamba, “Agweye no umwana we Mulungu.” 12 Hakawalemesa lugano, wanghamubwambwase kuwanhu. 13 Kahi hakakwila kwitunda na kuwenanga wose woyendile howomwijila.. 14 Kamei yawasagula ikumi na weli, wowe hamwedu naye, uleke yawatume kuhubili. 15 Kahi wowe na udaha wa kulafa magini: 16 Simoni yamwingha disina dya Petulo; 17 Yakobo imwana wa Sebedayo, na Yohana imunduguse wa Yakobo, yoyawengha disina dya Boanege, nong'amba, “Wana we ididimo;” 18 Andilea na Filipo, na Batolomayo, na Matayo, na Tomaso, na Yakobo imwana wa Alufayo na Tadei na Simoni Mukananayo, 19 na Yuda Isikalioti, iyamusongesa. Kamei hakaluta ukaya. 20 Ditewa dya wanhu dyakitang'anyila kahi, hata awene wasapata luneka lwa kudiya. 21 Awanduguse wakahulike simbuli so, hawamulutila uleke wamukole; kosoko hawagamba, “Ditwi dyakwe dijuguma.” 22 Na Watulumi awadulike kulawa Yelusalemu, hawagamba, “Kena Belisebuli, na yakulafa simhepo kwa udaha we mukulu wa magini.” 23 Hakawenanga, na kuwatamila kwa mbasi: “Iluhoma kodaha kumulafa Luhoma? 24 Nghona Undewa unghakitemanula uwecho kwa wecho usikudaha kugendelela. 25 Na inyumba inghakitemanula iyecho kwa iyecho, inyumba yo isikudaha kugendelela. 26 Iluhoma yanghakisuhila imwecho na kigawa nghekudaha kugendelela, ninga indumo yakwe ija. 27 Kwechaka munhu yekudaha kwingila kunyumba ye munhu yena ludole na kulonda ifinhu fyakwe, mpaka yakonge kumoha imunhu wo ludole; noho yakudaha kulonda inyumba yakwe. 28 Chawelu, nikumutamilani, uwihi wose wa awanhu wakudaha kuleusiligwa, na matofulo gose gowekulonga; 29 Ninga imunhu iyakwenda yamutofule Muhe Musunhile yakuwa na wihi wa majuwa gose.” 30 Kosoko wagambile fina Kena magini gehile. 31 Haweja ing'ina ne wanduguse: Wema kunje, walagisa munhu yamwinange. 32 Amatewa hawowa wekale, wamusunguluta, wamugamba, “Langa, ing'inako na wanduguso, wowa kunje wakukuhananga.” 33 Yawabidula, yekugamba, “Imayi na wandugu sangu no chenani?” 34 Yawalanga awaya awekale na kumusunguluta kose kose na kuwagamba, “Langa! Imayi na wandugu sangu! 35 Kosoko imunhu wowose iyakugolosa foyakuhananga iMulungu, ayo no mundugusangu, no lumbu dyangu no ng'inangu.”
1 Yakonga kahi kuwafusa kunghingi ye bahali. Ditewa ikulu lugano dya wanhu, dyamusunguluta, imwene yengile muchiya, na kwikala muchiya ulwandi lwe bahali, ditewa hodikuwa kunje ye bahali, kuisi kwichaka meji. 2 Yawafusa mbuli nyingi kwa mbasi, mumafuso gakwe yawagamba: 3 Hulikiseni! “Imuhandi yaluta kuhanda. 4 Kamei ugele foyahandage imbeyu imonga hoilagalila munghanda ye njila, ifidege hofiidiya. 5 Imonga hailagala hena diwe, hahowa na ulongo mukefu. Chimwande hoikota kosoko ya ulongo mukefu. 6 Kamei dijuwa dikalawe, hailakala, na kosoko ichaka misisi hainyala. 7 Isimonga hosilagala ahena imiwa, imiwa iya yakula na kuikanhamisa, hoileka kweleka mhule. 8 Simonga hosilagala hena ulongo umuswanu hosikweleka, hasota na kukula, na kweleka: Imonga mhule makumi madatu, imonga makumi mutandatu, na mhule imonga igana dimwedu. 9 Yena singhutwi so kuhulika yahulike!” 10 Naye yakowe ye imwene awaya awanhu awamusungulute na waya ikumi na weli, howomusa difuso dye mbasi. 11 Yawagamba, “Anyeye mumotesigwa kumanya imbuli ifisigwe ya undewa we Mulungu, ninga kwa waya wowile kunje gose gakugolosigwa kifana mbasi, 12 uleke hata wanghalanga, walange wanghone, ‘Na wanghahulika, wahulike wanghamanye, Wangheje wobiduka na kulekeleligwa.’” 13 Kahi yawagamba, “Musikuimanya imbasi ino? Simbasi simonga mosimanya nhani? 14 Imuhandi ayo yakuhanda imbuli. 15 Awano no wowile munghanda ye injila ichigele choikuhandigwa imbeyu; awene, wanghahulika imbuli, chimwande yakwija Luhoma na kuileusa aiya imbuli ihandigwe mufidoga fyawo. 16 Nheifo awa nawo nowaya wahandigwe mu mawe, awene wakuhulika iya imbuli. Chimwande waihokela kwa chinyemi. 17 Ninga wachaka misisi mugati yao, wakugendelela chipisi chiguhi. Kughalawanisa migogolo kosoko ya iya imbuli, wakuleka kuhuwila. 18 Na wano nowaya wakuhandigwa mumiwa. Ni wanhu wakuihulika imbuli, 19 na simbuli se chilunga, na udasi we mali, na kukwegigwa na finhu, sikukanhamisa iya imbuli mpaka imbuli iya isikudaha kweleka. 20 Na wano nowaya wahandigwe mu ulongo muswanu, no wanhu wakuihulika imbuli na kuihokela, na kweleka si mhule: Aino makumi madatu, aino makumi mutandatu, na aino igana dimwedu.” 21 Yawagamba, “Itaa ikwija igubikigwe? Si kwikigwa muchigwaso? 22 Kosoko kwechaka mbuli ifisigwe ninga kosoko ije imanyike, kahi kwechaka difisigwe ninga dije dyoneke pwi, pwi, pwi. 23 Imunhu nghona yena nghutwi sa kuhulika yahulike.” 24 Hakawagamba, “Mulangisise go mukuhulika, imhishi iya yo mukupima, noyo mukamupimiligwa na kahi mukongeseligwa. 25 Kosoko yena chinhu yakwenda yenghigwe, na ayuya yechaka chinhu, hata chiya choyenacho yakuhokigwa.” 26 Yagamba, “Undewa we Mulungu ukifana munhu yanyagile imbeyu musanga, 27 yakugona na kwinuka, chilo ne imisi, na imbeyu hoikota na kukula, fonghamanyile. 28 Kosoko iisi ikweleka iyecho, ikukonga dinyagala, kamei chida, kamei disanja dye ingano ikangale mwisanga. 29 Inghakangala, yakwingisa ihengo yakwe kosoko ugele wokududula ufika.” 30 Yagamba, “Chiliganise na choni undewa we Mulungu? Kahi chiugume mu mbasi yaki? 31 Ikifana imbeyu yo umheja, iyene foikuhandigwa mu ulongo ni ndodogi kusuma si mbeyu sose suwile mu chilunga; 32 ninga inghahandigwa, ikukula kusuma amabiki gose, ikuwa na matambi makulu mpaka amadege ga kulanga gakujenga amafulu gawo mwipeho dyakwe.” 33 Kwa mbasi nyingi sifanile ino, hakalonga nawo imbuli fowadahile kuhulika. 34 Ninga bila mbasi nghalongile nawo, kamei yawatamila awefusa wakwe we imwene. 35 Dijuwa diya ikowe hegulo, yawagamba, “Chiloke mpaka umwambu.” 36 Na fowadilekile ditewa dya wanhu kunyuma, hawamulonda imwene hamwedu nawo muchiya nheifiya foyowile. Na Ifiya fimonga, hafyua baho hamwedu naye. 37 Lwalawa luputa lukulu lwa imheho, amawingo hagatowa ichiya, na kukonga kumema meji. 38 Imwene hakowa kunyuma ye ichiya kagona mu muto. Hawamwinusa, wakumugamba, “Mwalimu, nghukona ubasi aseye fochikufa?” 39 Hakenuka, na kuigombela imheho, yakuigamba ibahali, “Nyamala twi!” 40 Hakawagamba, “Nhani mukogoha? Mwichaka ihuwi?” 41 Hawengiligwa na chogoho chikulu, na kukonga kulonga awecho kwa wecho, “Ayuno nani, imwene imheho ne bahali fikumuhulika?”
1 Hawaloka umwambu we bahali, mpaka muiisi ya Wagelasi. 2 Yakahulumuke mu chiya, chimwande, haketang'anyila ne munhu, yalawile kufilalo, yena imhepo ihile; 3 ukalo wakwe hauwa kufilalo; hahowa chaka munhu wowose yadahile kumoha kahi, hata kwa minyolo; 4 kosoko hakohigwa kengi na kengi kwa mhingu ne minyolo na kuidumula aiya iminyolo, na kusitulatula asiya simhingu; kahi hahowa chaka munhu wowose yadahile kumusuma. 5 Na majuwa gose, chilo ne misi hakowaga kufilalo na kumatunda, yakutula chowe na kitema tema na mawe. 6 Yakamone Yesu kwa hatali; yabilima na kumufugamila. 7 Yakujoja kwa dijwi dya muchanya, yekugamba, “Nina choni nagweye, Yesu, Mwana we Mulungu! Yowile kuchanhya? Nikutasa kwedisina dye Mulungu unghanidumangise!” 8 Kosoko hakadigamba digini diya, “Agwe go digini dihile mulawe imunhu yuno!” 9 Hakadyusa, “Disina dyako nani? Hodibidula Disina dyangu nene Legioni kosoko cha itewa!” 10 Hadimugongelesa yanghagegale kutali ne iisi iya. 11 Baho hetunda hahowa itewa dya nguluwe sikudima; 12 Kamei amagini gose hagamugongelesa, gakugamba, “Chigale kusinguluwe uleke chisingile isene.” 13 Naye hoyogengha luneka amagini gehile hogelawa, na kwingila musinguluwe siya. Ditewa dyose dyadulika chimwandemwande kwigenge, na kwingila mubahali, hasuwa figulu fili nhafi; hosikunywa munghabu. 14 Awadimi wew singuluwe hawatija, na kuwatamilisa simbuli so mukaya na kunje ye ikaya. Awanhu hawalawa uleke wone imbuli igoloseke. 15 Hawamulutila Yesu; hawamona yuya yowile na magini, kekala, kafala suke, kena misungu yakwe; naye noyowile na diya ditewa howokogoha. 16 Na waya awonile hawawatamila simbuli sagoloseke kwe munhu yuya wa magini, na simbuli se singuluwe. 17 Kamei wejawakonga kumutasa Yesu yaleuke muisi yawo. 18 Naye foyendeyokwingila muchiya, ayuya yowile na magini hakamutasa fina yowe hamwedu naye. 19 Ninga Yesu nghamufumile. Yamugamba, “Luta ukaya kuwambwiyasako, ukawahubili wa ukwenu kawatamile simbuli singhulu iMundewa soyakugolosele na ifene foyakonele ubasi.” 20 Hakaluta, na kukonga kuhubili mu isi ya Dekapoli simbuli singhulu isene Yesu soyamugolosele, wanhu wose hawakisina. 21 Yesu yakafuluse kuloka kuya umwambu muchiya, hawamwijila itewa ikulu, naye hakowa munghingi ye bahali. 22 Hakeja munhu yumonga mu wakulu wa disinagogi, disina dyakwe Yayilo; yakamone, yamufugamila. 23 Hakamugongelesa lugano, yakugamba, “I mwanangu we chike imudodo mutamu lugano kahabehi na kufa. Nikukutasa wije umwikile umukono wako muchanhya yakwe, uleke yahone, na yowe mumi.” 24 Yaluta hamwedu naye. Itewa ikulu dyeja dyamwandamila wakumufinhafinha. 25 Kamei mwanamuke yumonga yena utamu wa kulawa sakame kwa minyaka ikumi na mili, 26 hakaluta kuwaganga wengi lugano, na kupata magayo mengi. Hakamala imali yakwe yose, ninga kusamutasile hata hadodogi, inyuwa yakwe hoigendelele kwiha kusuma foyowile kunghonga. 27 Yakahulike simbuli sa Yesu, yagenda muchiligati che ditewa kwa kunyuma, na kukwafa isuke yakwe; 28 kosoko hakagamba, “Ninghasikwafa sisuke sakwe du, nikuhona.” 29 Chimwande inhyoko ye sakame yakwe yanyala; naye hakamanya mumutufi wakwe fina kahona utamu wakwe. 30 Kamei Yesu yakamanye fina udaha umulawa umwakwe, chimwande yabiduke mu ditewa, hoyogamba, “Nani yanikwafile?” 31 Awefusa wakwe hawamugamba, “Togola nghukona amatewa fowakukukanhamisa ulwandi lwose; nagwe ukugamba Nani yanikwafile?” 32 Yalanga ulwandi lwose uleke yamone iyagolose didyo. 33 Na yuya imwanamuke yengilwa na chogoho na kuchichima, yakamanye chigoloseke umwakwe, yeja na kumugwila na yakumutamila yose. 34 Yamugamba, “Mundele dihuwi dyako dikuhonya. Ugende mheho, uwe mumi, unghowe na utamu wako kahi.” 35 Ugele foyalongage, haweja wanhu kulawa kwa yuya imukulu wa disinagogi, wakugamba, “Imwanago we chike kafulusa kubanika. Nhani ugendelele kumwidasa imwalimu?” 36 Ninga Yesu yakahulike imbuli iyo ikulongigwa, yamugamba imukulu wa disinagogi, “Unghogohe, huwila du.” 37 Hakawalemesa awanhu wanghamwandamile, ninga Petulo, na Yakobo, na Yohana imunduguse wa Yakobo. 38 Fowengile kugati kwa yuya imukulu wa disinagogi, yona wanhu wengi wakulila, na kuhongesa lugano, 39 yakafuluse kwingila yagamba, “Nhani mukujoja na kulila? Imundele yuno nghafile, ninga kagona du!” 40 Hawamuseka lugano. Yakawalafe kunje wose, hakamulonda iBabakwe ne ing'ina wa yuya imundele, na waya awowile hamwedu na kwingila kugati koyowile imundele yuya. 41 Hakamukola umukono imundele yuya, na kumugamba, “Talita kumi,” no ng'amba, “Mundele nikukugamba Inuka!” 42 Chimwande imundele yuya yemanyima na kugenda, (kosoko hakowa mukulu wa minyaka ikumi na mili.) Chimwande weja wajuma ijumo ikulu. 43 Yawalemesa lugano, wanghatamile munhu imbuli iyo. Yawalonga, wamwinghe chakudiya.
1 Yaleuka uko na kuluta kuiisi ya ukwawo, awefusa wakwe wejawamwandamila. 2 Ikowe sabato, yakonga kufusa mwisinagogi. Matewa wakahulike wejawakisina, hawagamba, “Ayuno kapata hoki agano? Na misungu yaki ino yoyenghigwe yuno? Kahi yakugolosa amajumo gano goyakugolosa kwe mikono yakwe? 3 Ayuno si yuya muselemala imwana wa Maliamu na, mundugu sawo wa cha Yakobo, na Yose, na Yuda na Simoni na walumbuse wasibaha ahetu?” Hawamulema. 4 Yesu yagamba, “Imugonesi yakwinghigwa chogoho chila hanhu ninga kuisi yakwe ka imwecho na kuwanhu wo lukolo lwakwe na inyumba iyakwe.” 5 Nghagolose ijumo dyodyose uko, ninga hakeka imikono yakwe muwatamu wakefu, hakawahonya. 6 Hakajuma kosoko yo kuleka kuhuwila kwawo. Yesu yasunguluta mufikaya fiya na kufusa. 7 Yawenanga awaya ikumi na weli, na kukonga kuwatuma weli weli, na kuwengha udaha muchanhya ya magini gehile. 8 Yawalemesa wanghalonde chinhu chochose cha munjila, ninga mhandodu; kefana mikate, mufuko wa nghingo, mapesa ga mumifuko. 9 Ninga wafale filwatu, kahi wanghalonde nghasu ya sigafu ninga mhando du. 10 Hakawagamba, “Kunyumba yomukwingila mwikale baho mpaka fomukuleuka. 11 Na hanhu hohose wanghaleka kumuhokelani ama kuwategelesa hona mukuleuka uko, mukung'unhe dinghundi dyuwile mumigulu yenu, yuwe chitangilo chokumulemani.” 12 Hawalawa kuhubili fina awanhu walambe. 13 Hawalafa magini mengi, na kuwabaka mafuta wanhu wengi na kuwahonya. 14 Mundewa Helode yakahulike simbuli so, kosoko disina dya Yesu hadimanyika kosekose, awamonga hawagamba, “Yohana Mubatisaji kenuligwa mu wanhu wafile; nochanghone uludole lwakwe lukiyonesa mumilimo yakwe.” 15 Wamonga weja wagamba, “Ayuno Eliya.” Na wamonga hawagamba, “Ayuno ni mugonesi fina yumwedu wa wagonesi wa katali.” 16 Ninga Helode yakahulike, yagamba, “Yohana, wonadumule ditwi, kenuka.” 17 Kosoko Helode imwecho yatuma wanhu, hawamukola Yohana, na kumoha mwigelesa, kosoko ya Helodia, imuke wa Filipo imunduguse, kosoko hakamutola. 18 Kosoko Yohana hakamulonga Helode fina, “Si fiswanu agweye kuwa ne muke we mukuluwo.” 19 Ihelodiya hakowa na finju na Yohana, na hakahananga kumukoma. Ninga nghapatile luneka, 20 kosoko Helode yendeyomwogoha Yohana; hakamanya fina ni munhu we chawelu na musunhile, na hakamwika hanhu haswanu. Foyamuhuwile hakakisina lugano, kahi hakenda kumuhulikisa kwa chinyemi. 21 Ichigele hachifika, ugele Helode yakagolose sikukuu ya dijuwa dyo kwelekigwa kwakwe, yawagolosela madiya, wakulu wa wasilikali ne filongosi, na wanhu awena undewa wa Galilaya. 22 Noho imwanagwe we chike wa Helodia, yengila na kufina, yamwendesa Helode na wose wowile naye hachakudiya chiya. iMundewa yamugamba imundele yuya, “Nitase chochose cho ukuhananga ani nikukwingha.” 23 Yamwilahila, “Chochose choukutasa nikukwingha, hata ulwandi lyo undewa wangu!” 24 Kamei hakaluta na kumusa ing'ina, “Nitase choni?” Naye yamugamba, “Ditwi dya Yohana Mubatisaji.” 25 Kamei yengila chimwandemwande kumwande ye Mundewa, hoyotasa, yakugamba, “Nikuhananga uninghe hambiya hano ditwi dya Yohana Mubatisaji mwisahani.” 26 iMundewa yona usungu lugano, ninga kosoko ye nyilaha yakwe na kosoko ya waya awowile hechakudiya, yasumwa kulema. 27 Chimwande yamutuma musilikali iyowile mu samu na kumugamba yegale ditwi dya Yohana. Kamei yaluta na kumudumula ditwi amuya mwigelesa; 28 Yegala ditwi dyakwe mwisahani na kumwingha imundele yuya, naye imundele hakamwingha ing'ina. 29 Awefusa wakwe wakahulike imbuli iyo haweja na kulonda umutufi wakwe na kumusika. 30 Awefusa hawoya kwa Yesu; na kumutamila agaya gose gowagolose, na kufusa. 31 Kamei hakawagamba, “Mwije anyeye mwikale hanhu haposike mukabwihile hadodo.” Kosoko hahowa na wanhu wengi, wakwija na kuleuka, awene howoswela luneka lwa kudiya. 32 Hawaluta awene muhala muchiya ahanhu howile chaka wanhu. 33 Awanhu hawawona wakuluta, na wengi hawamanya hawaluta uko kwa lumangho kulawa sikaya sose na kuwalongolela. 34 Yakahumuluke muchiya, hoyokona itewa ikulu, akawonela ubasi, kosoko hawowa kifana ngholo sichaka mudimi. Kamei hakakonga kuwafusa mbuli itewa. 35 Chikaloke chipisi chitali cha nemisi, awefusa wakwe hawamulutila wakugamba, “Ahanhu hano nyika muhala, dijuwa nadyo duswa; 36 uwelage awanhu wano, uleke walute kufikaya fya munghanda wakakigulile chakudiya.” 37 Ninga hakawagamba, “Wengheni nyeye chakudiya.” Wamugamba, “Togola chilute chikagule mikate ya dinali magana meli uleke chiwenghe chakudiya?” 38 Yawagamba, “Mwinayo mikate mingahi?” Luteni mukalange. Wakafuluse kumanya weja wagamba, “Mishano na somba mbili.” 39 Yawatuma wawagambe awanhu wekale wose, fitewa tewa, mumbago injolo. 40 Howokwikala kwa misitali ahano igana, ahano makumi mashano. 41 Foyailondile aiya imikate mishano na siya sisomba si mbili, yenula meso kuchanya kulanga, na kuilugutisa na kuibendula imikate iya na kuwengha awefusa wakwe wawagawile wanhu na siya sisomba si mbili hawawagawila wose. 42 Awanhu wose hawadiya na kwiguta. 43 Hawalonda ifibendu fye mikate na sisomba sasigale na kumemesa fisege ikumi na fili. 44 Wadiile imikate yiyo hawowa wagosi figulu fishano. 45 Chimwande yawalonga awefusa wakwe wengile muchiya, wamulongelele kuluta Betisaida, umwambu we bahali, ugele imwene foyakilagage ditewa dya wanhu. 46 Yakamale kilaga na wanhu, hakakwila kwitunda kutasa. 47 Ikafike hegulo ichiya hachuwa muchiligati ye bahali, imwene hakowa yemwene kuiisi, kunje ye bahali. 48 Hokawona awefusa wakwe wakugaya na kuyusigwa muchiya chawo kosoko imheho yendeitowa kwa ludole kulawa kowakuluta. Habehi na kucha, yawejila yakugenda mubahali, na kuhananga kuwaloka, 49 Nawo wakamone yakugenda mumeji ge bahali; hawamanya nhagela ni isoki, hawatula chowe; 50 kosoko wose hawamona hawogoha. Chimwande yalonga nawo, “Sangalaleni noniye, munghogohe.” 51 Yengila muchiya chiya; imheho yanyamala na kisina; howokisina lugano mufidoga fyawo, 52 kosoko wasatangile simbuli se mikate iya, ninga fidoga fyawo hafyuwa fikugutu. 53 Wakafuluse kuloka, hawafika iisi ya Genesaleti, kamei hawemisa ichiya chawo baho. 54 Wakafuluse kulawa mu chiya, chimwande wanhu hawamutanga. 55 Hawabilima lumangho musikaya sose sihabehi na kukonga kuwegala awatamu mumasasi kuluta chila hanhu howahulike fina kauko. 56 Chila koyalutile yengila kufikaya na kusikaya ama kumigunda, haweka watamu mumagulilo, wakumutasa fina wakwafe hata dihepu du dye suke yakwe; na wose wamukwafile howahona.
1 Kamei Amafalisayo na wamonga wa watulumi kulawa Yelusalemu, fowejile ukwakwe. 2 Hawona awamonga wa wefusa wakwe wakudiya ne mikono ichuchile. 3 (Kosoko Amafalisayo na Wayahudi wose wanghaleka kunawa imikono ichiganja chose wasikudiya; wakolelesa amahokelo ga wasehe wawo; 4 Kahi wanghalawa kwigulilo, wanghaleka kusunha imigulu wasikudiya na gauko mengi gowakolile, fina kusunha ifikombe, na madumu, ne fiya fya shaba.) 5 Awaya Mafalisayo na Watulumi howomusa Yesu, “Nhani awefusa wako wasikwandamila amahokelo gawasehe ninga wakudiya ne mikono ichuchile?” 6 Kamei hakawagamba, “Mugonesi Isaya hakalonga fiswanu muchanya yenu! Anyeye mwine chimwefe! Fina foitulumwe: ‘Awanhu wano wakunitunya kwa milomo yawo, Amba fidoga fyawo fya kutali na niye. 7 Nawo wakufuga chaka, na kufusa amafuso ga malagiso ga wanhu!’ 8 Anye mukuleka amalagiso ge Mulungu na kukola amahokelo ga wanhu.” 9 Hakawagamba, “Fiswanu!” mukulema amalagiso ge Mulungu uleke mukole amahokelo genu! 10 Kosoko iMusa hakagamba, “Uwahulike iBabako ne ng'inako, na iyakumuliga iBabakwe ama ing'ina kufa na yafe. 11 Ninga anyeye mukugamba imunhu yanghamugamba iBabakwe ama ing'ina Ni kolibani, (nong'amba nikwika chinhu changu cha kulafa kwa Mulungu, ichikwenda chimutase hechaka mbuli.) 12 Kahi musikutuma hanyuma ya gago kumugolosela mbuli iBabakwe au ing'inakwe. 13 Ako ni kubesa imbuli ya Mulungu kwa mahokelo genu gomukuhokela; kahi mukugolosa mbuli nyingi kifana siso.” 14 Hakawenanga amatewa kahi yekuwagamba, “Mhulikeni mose na kumanya.” 15 Kwechaka chinhu chuwile kunje ye munhu ichikudaha kumugolosa yowe na wihi. Ninga afiya ifikulawa mugati ye munhu, nofikumuguma uwihi. 16 Imunhu ghona kena nghutwi sa kuhulika yahulike. 17 Yakengile kugati kadileka ditewa kunje, awefusa wakwe weja wamusa muchanya ye imbasi iya. 18 Yawagamba, “Hata nyeye mwechaka misungu? Musikumanya fina chila chinhu chuwile kunje ye munhu chinghamwingila, chisikudaha kumwingha uwihi; 19 Kosoko chisikumwingila muchidoga, ninga, munda du, kamei chikulawa kucholo?” (Kwa kulonga nhaifo kafitenda fyakudiya fyose fuwe fiswanu.) 20 Yagamba, “Ichikumulawa imunhu nochikumuguma uwihi. 21 Kosoko mufidoga fya wanhu mukulawa magelegela gehile, dihabwa, 22 uhiji, kukoma, ugoni, kusulumila kwihile, migogolo, udasi, chimwefe, chigiso, maligo, usisi, ubwalasi 23 Agano gose gehile gakulawa kugati, nago gakumuguma imunhu uwihi.” 24 Yakaleuke uko, yaluta umwambu kuisi ya Tilo na Sidoni. Yengila nyumba imonga, yahananga yanghamanye munhu wowose, ninga isadahike kifisa. 25 Ninga, chimwande, mwanamuke, imwene imwanagwe we chike hakowa na igini dihile, yahulika simbuli sakwe, yeja na kumugwila hamigulu yakwe. 26 Naye imwanamuke yuya hakowa Muyunani, dikabila dyakwe Musilofoinike. Yamutasa, yailafe imhepo mwe mwanagwe we chike. 27 Yamugamba, “Waleke awana wende kwiguta, kosoko siyo fiswanu kuchilonda ichakudiya cha wana na kugakubitila mabwa.” 28 Ninga yabidule, yakugamba, “Heye, Mundewa, Ninga hata amabwa gowile hasi ye imesa, gakudiya fowakulagasa awana.” 29 Hakemugamba, “Kosoko ye imbuli iyo, Luta, imhepo imulawa imwanago we chike.” 30 Yaluta ukaya ukwakwe, na kumufika ayuya imundele katambalala mwisasi; na digini diya difulusa kumuleuka. 31 Yaleuka mumihaka ya Tilo, yagenda mugatigati ya Sidoni, na kupulutila mpaka kubahali ya Galilaya, kupulutila Dekapoli. 32 Hawamwigalila munhu nghakuhulika chihuli, kahi nghakulonga, hawamugongelesa yamwikile mikono. 33 Hakamusegesa kunghanda ne ditewa yemwene, na kuguma ifidole fyakwe musinghutwi sakwe na kuguma mate, na kumukwafa mwilimi, 34 ghakalanga kuchanhya, na kugula, na kugamba, “Efata, nong'amba Kumuka!” 35 Chimwande singhutwi sakwe hasigubuka, ichifundo cha dilimi dyakwe, hachilegela na kulonga fiswanu. 36 Hakawalemesa wanghamutamile munhu; ninga foyagendelele kuwasigilila, nofowagendele kubwambwasa simbuli. 37 Howakisina lugano kusuma fowasowele, wakugamba, “Kagolosa finhu fyose fiswanu! Wasikuhulika kawagolosa wahulike, ne fimumu walonge.”
1 Mumajuwa gago, itewa dya wanhu wengi fowakitanganyile. Na hawowa wechaka chakudiya, yawenanga awefusa wakwe, yakuwagamba, 2 “Nikuwonela ubasi amatewa kosoko wekala hamwedu na niye, gafika majuwa madatu, na wechaka chinhu cha kudiya. 3 Ninghawelaga walute kusikwawo, wafungile, wakusilika munjila, na wamonga walawa kutali.” 4 Awefusa wakwe wamusa, wakugamba, “Togola kwina munhu yakudaha kuwegusa mikate awanhu ahano hanyika?” 5 Kawosa, “Mwina mikate mingahi?” Hawagamba, “Mufungate.” 6 Yawalonga wanhu wekale hasi, na kulonda imikate iya mufungate, yamulumba Mulungu, na kwibendula, na kuwengha awefusa wakwe wawagawile wanhu ditewa. 7 Hawowa na fisomba fikefu hakafilungutisa na kuwagamba wawagawile afyo nafyo. 8 Weja wadiya na kwiguta na kudondola ifibedu fye mikate fisigale, fisege mufungate fimemile. 9 Awanhu awadiyile wakufika figulu fine. Hakawelaga. 10 Chimwande hakakwila muchiya, hamwedu na wefusa wakwe, na kuluta ulwandi lwa Dalumanusa. 11 Howalawanisa Mafalisayo, na hawakonga kuwa na lukani naye, wakuhananga kulawa ukwakwe ijumo dikulawa kulanga, wakumugesa. 12 Hakona usungu muchidoga chakwe, “Nhani icheleko chino chikuhananga ijumo? Chawelu nikumutamilani! Chisikwinghigwa chitangilo icheleko chino!” 13 Hakawaleka, na kwingila kahi muchiya, hakaluta mpaka umwambu; 14 Hawasimilwa kulonda mikate, kahi muchiya hawowa chaka ninga mukate umwedu du. 15 Hakawajama, yakugamba, “Muwe meso ne inungo ya Mafalisayo na ya Helode.” 16 Hawowa na lukani wene kwa wene yagamba Chichaka mikate. 17 Yesu hakamanya, hoyowagamba, “Nhani mwina lukani kosoko mwechaka mukate? Musinati mumanye, kahi musikutanga? Togoleni! Fidoga fyenu fisito? 18 Mwina meso musikona. Mwina nghutwi musikuhulika; kahi musikugelegela. 19 Fonabendule haya imikate mishano na kuwengha awaya wanhu figulu fishano hamulonda fisege fingahi fimemile ifibendu?” Wamugamba, “Ikumi na fili.” 20 Na iya mufungate na kuwengha wanhu figulu fine, Hamulonda fisege fingahi fimemile fibesu? Howomugamba, “Mufungate.” 21 Yawagamba, “Musinati mumanye, mukali?” 22 Hawafika Betisaida, wamwigalila munhu nghakona, wamutasa yamukwafe. 23 Hakamukola mukono, hakamusegesa kunje ye chikaya na kumutwila mate kumeso, yamwikila mikono yakwe, yamusa, “Ukona chinhu?” 24 Hakalanga kuchanhya hoyogamba, “Nikona wanhu kifana mabiki gakugenda.” 25 Hakeka kahi mikono yakwe mumeso gakwe, na kulanga lugano; na kuwa mumi, hakona ifinhu fyose fiswanu. 26 Yesu hakamugamba yalute ukaya ukwakwe, na kumugamba, “Unghengile kahe mufijiji fya munjila.” 27 Yesu hakaleuke na wefusa wakwe, na kuluta ku fikaya fya Kaisalia, Filipi, munjila yawosa awefusa wakwe, yakugamba, “Awanhu wakunigamba niye nene nani?” 28 Hawamubidula wakugamba, “Yohana Mubatisaji, wamonga Eliya, wamonga, yumwedu wa wagonesi.” 29 Yawosa: “Anyeye mukugamba niye nene nani?” Petulo hakamubidula, yekumugamba, “Agweye no Kilisito.” 30 Hakawalemesa wanghamutamile munhu wowose simbuli sakwe. 31 Hakakonga kuwafusa fina: Imwagila iMwana we munhu yapate magayo mengi, na kulemigwa na wasehe, na wakulu wa watambiki, na watulumi. Na kukomigwa, na fogakuloka majuwa madatu yakwinuka muchilalo. 32 Yendeyolonga imbuli iyo bila chifiso. iPetulo hakamulonda na kukonga kumugombela. 33 Hakabiduka, yakuwalanga awefusa wakwe na kumugombela Petulo, yakugamba, “Luta kunyuma yangu Luhoma, Kosoko nghukudoga simbuli se Mulungu ninga sa wanhu!” 34 Hakawenanga ditewa hamwedu na wefusa wakwe, hakawagamba, “I munhu wowose iyekuhananga kunyandamila yakileme imwecho na yalonde umusalaba wakwe, yanyandamile.” 35 Kosoko imunhu iyakuhananga kuhonya ichidoga chakwe, yakuchagilisa, imunhu yakwagilisa chidoga chakwe kosoko yangu na kosoko ya imbuli iswanu, ayo yakuchihonya. 36 Kosoko ikwenda imutase nhani imunhu yanghapata ichilunga chose na kwagilisa ichidoga chakwe? 37 Kahe imunhu yalafe choni ahanhu hokulafa ichidoga chakwe. 38 Kosoko chila munhu yakunyonela chinyala, aniye na simbuli sangu mucheleko chino ichisikumuhuwila Mulungu na wihi, iMwana we Munhu yakwija yomonela chinyala imunhu yuyo nghona yakiyokwija mu ditunyo dye Babakwe, hamwedu na malaika wasunhile.
1 Hakawagamba, “Chawelu, nikuwatamilani, mu wanhu wemile hano hena wanhu awene wasikwenda wafe ugele wanghali kuwona undewa we Mulungu ukwija kwa ludole.” 2 Gakaloke majuwa mutandatu, Yesu hakawalonda Petulo, na Yakobo, na Yohana, yawegala kuditunda ditali wemwene, hakahiluka ifuta yakwe, kumwande yao, 3 sisuke sakwe hasikonga kwakaika, njelu swe, kwechaka munhu mu iisi yakudaha kusigolosa suwe njelu nheifo. 4 Kamei hawalawanisila Eliya, hamwedu na Musa, awene wawo wakusimulila na Yesu. 5 Petulo hakabidula, yakumugamba: “Mukulu, ni fiswamu aseye chuwe hano. Chijenge fibanda fidatu, chimwedu chako gweye, chimwedu cha Musa, na chimwedu cha Eliya.” 6 Kosoko, nghamanyile choyakulonga, kosoko hawengiligwa na itisi ikulu. 7 Hadilawanisa ifunde, hadiwagubika, dijwi hadilawa umuya mwifunde, “Ayuno no Mwanangu mwendigwa, mumuhulike imwene.” 8 Ugele uwo wakalange kuno na kuno wasonile munhu hamwedu nawo; ninga Yesu du yemwene. 9 Ugele fowadulikage kulawa kwitunda, hakawalemesa wanghamutamile munhu wowose gowonile, mpaka iMwana we Munhu ugele woyakuwa kafulusa kwinuka kulawa kuwanhu wafile. 10 Hawaikola imbuli iya, wakiyusa awecho kwa wecho, “Akuno kukwinuka kulawa kuwafile no choni?” 11 Hawamusa wakugamba, “Awatulumi wakugamba fina iwagila Eliya yakonge kwija?” 12 Hakawabidula, yawagamba, “Chawelu, Eliya yakulongola kwija, na kugolosa usha finhu fyose, ninga, hamwedu na gago, foyatulumigwe nhani Mwana we Munhu fina yakwende yadumangisigwe madumangiso mengi na kubesigwa? 13 Ninga nikumutamilani, fina Eliya kafulusa kwija, nawo wamugolosela gose gowendile fina foitulumigwe.” 14 Ugele fowejile kuwefusa wamonga hawona itewa ikulu diwasunguluta na watulumi wena lukani nawo. 15 Chimwande ditewa dyose wakamone hawakisina, hawamubilimila, kumulamusa. 16 Hakawosa, “Mwina lukani lwa choni nawano?” 17 Imunhu yumonga kulawa muditewa hakabidula, “Mwalimu nimwigala imwanangu ukwako, kena igini kahi chimumu.” 18 Chila ugele foikumwijila ikumukinya hasi, yakulawa ifulo kumulomo na kugwegwejula meno kahi yakugagamala. Nilonga na wefusa wako wadilafe digini, waduga. 19 Hakabidula yakuwagamba, “Anyeye cheleko chichaka dihuwi! Nikale nanyeye mpaka milaki? Nimulondeni fomuwile mpaka milaki? Mwigaleni ukwangu!” 20 Hawamwigala imujelelo ukwakwe. Kamei digini dikamone hadimuguma chisilisi na kugwa mpaka hasi, hakasambalagata na kulawa ifulo kumulomo. 21 Yesu hakamusa iBabakwe, “Kakongigwa milaki?” Hakagamba, “Kulawa udodo.” 22 Ugele mwingi dimuguma mumoto na mumeji uleke dimukome, ninga unghadaha mbuli yoyose, uchonele ubasi na uchitase! 23 Yesu yamugamba, “Unghadaha! Gose gakudahika ukwakwe yena dihuwi.” 24 Chimwande iBabakwe we mujelelo yuya yenula dijwi, yakugamba, “Nikuhuwila, nitase kusumigwa kuhuwila kwangu!” 25 Yesu yakone ditewa dikubilima dikwija, hakadigombela digini diya dihile, yakugamba, “Agwe go digini, chimumu na chihuli,” nikukugamba, “Mulawe yuno, kahi unghamuwile!” 26 Hakalapa, hadimuguma chisilisi lugano na kulawa. Naye hakowa kifana kafa, hata wengi hawagamba, “Kofa!” 27 Ninga Yesu hakamukola mukono na kumwinula, naye hakemanyima. 28 Yakengile munyumba, awefusa wakwe hawamusa wemwene, “Nhani seye chisadahile kuilafa?” 29 Hoyawagamba, “Digini difanile dino disikulawa kwa njila yoyose iya, ninga kwa mawombi du.” 30 Hawaleuka uko hawalokela mugatigati ya Galilaya. Nghahanange munhu wowose yamanye, 31 kosoko yendeyowafusa awefusa wakwe: Yakuwagamba, “Mwana we Munhu yakuluta kugumigwa mumikono ya wanhu. Nawo wakumukoma, yanghafulusa kukomigwa, ganghaloka majuwa madatu yakwinuka muchilalo.” 32 Ninga wasaimanyile imbuli iyo, hawogoha kumusa. 33 Hawaje Kapelinaumu, yakowe munyumba hakawosa, “Mwende mutowa lukani lwaki munjila?” 34 hawanyamala, kosoko munjila wendewotowa lukani awecho kwa wecho, imukulusi no nani. 35 Hoyokwikala hasi, na kuwenanga awaya ikumi na weli na kuwagamba, “I munhu yakuhananga kulongola yakuwa wa kunyuma kusuma wose, mutogomi wa wose.” 36 Hakalonda chana chidodogi, na kuchika muchiligati chawo. Hakachidinghula, na kukawagamba, 37 “I munhu yanghachihokela chana chimwedu fina chino kwi sina dyangu, kanihokela niye; na imunhu yanghanihokela niye, yakumuhokela, si niye du, ninga ayuya imwene yanitumile.” 38 Yohana kamubidula, yakugamba, “Mwalimu, chimona munhu yakulafa simhepo kwa disina dyako, hachimulemesa kosoko nghakiyandamila naseye.” 39 Yesu hakagamba, “Munghamulemese. Kosoko kwachaka munhu yakudaha kugolosa ijumo kwa disina dyangu kahi ugele uwo na kunilonga mbuli sihile. 40 Kosoko inghowile chinyume chetu ka ulwandi ulwetu. 41 Kosoko wowose iyakumwinghani ichikombe cha meji, kosoko nyeye mwina disina dya Kilisito, chawelu; nikumutamilani, nghakuswela digelo dyakwe.” 42 “Ne munhu yakwenda yamugolose yumwedu wa wadodogi wano awanihuwile yagolose wihi, kagiligwa yohigwe ulwala musingo yakwe na kukubitigwa mubahali. 43 Na umukono wako unghakugolosa ugolose wihi, udumule! Ibeka kwingila kuumi kwina mukono umwedu, kusuma kuwa na mikono yose mili na kuluta Jehanumu. 44 Namo umo sinhende sakwe sisikufa ninga umoto wakwe uusikusima 45 Na umugulu wako unghakugolosa ugolose wihi, udumule! Ibeka kwingila kuumi na kwina mugulu umwedu, kusuma kuwa na migulu mili na kutagigwa kwi jehanumu. 46 Namo sinhende sakwe sisikufa kahiumoto usikusima 47 Na digiso dyako dinghakutenda ugolose wihi, ding'ole uditage! Ibeka kwingila kuundewa wa Mulungu kwina igiso dimwedu, kusuma kuwa na meso meli na kutagigwa kwi jehanumu. 48 Amo umo Sinhende sakwe sisikufa, kahiumoto wakwe usikusima. 49 Kosoko chila munhu kokwikigwa digoya kwa munyu na kusunhigwa kwa moto. 50 “Umunyu muswanu; ninga umunyu unghasusuka, si munyu kahi wogumigwa choni ukolele? Muwe munyu mugati yenu, mukekale kwa digoya muwecho kwa wecho.”
1 Yesu yaleuka uko yaluta ulwandi lwa Uyahudi, yaloka ulwandi lwa Yolodani. Ditewa dya wanhu dyawandamila, kahi fina foyasowela yakonga kuwafusa. 2 Amafalisayo weja wamulutila, wakumusa, “Togola! Ni fiswanu imunhu kumuleka imuke? Wakumugesa.” 3 Naye yawabidula yekugamba, “I Musa hakawalagisa choni?” 4 Hawagamba fina, “Musa hakafumisa fina munhu yawandike kalatasi ya malekeni kumuleka.” 5 Yesu yawagamba, “Kosoko ya ukugutu we fidoga fyenu hakamwinghani dilagiso dino. 6 Ninga kulawa kukumba iisi Mulungu hakagolosa mugosi na mwanamuke. 7 ‘Kosoko iyo imunhu yakumuleka iBabakwe ne ing'ina wakiyandamila ne imuke. 8 Nawo aweli wakuwa mutufi umwedu. Wagaluka si weli kahi, ninga mutufi umwedu.’ 9 Choyahasile Mulungu, imunhu yanghachitemanule.” 10 Wakowe ukaya kahi awefusa wakwe hawomusa muchanhya ye simbuli siso. 11 Hakawagamba, “Chila munhu yakumuleka imuke na kutola mwanamuke yungi, basi yakugolosa ugoni na yuya. 12 Na imwanamuke yanghamuleka imulume na kutoligwa na mugosi yungi, yakugolosa ugoni naye.” 13 Kamei, hawamwigalila awana wadodogi uleke yawakwafe, awefusa wakwe hawawagombela. 14 Yesu yakone nheifo hakona nyono lugano, hakawagamba, “Walekeni awana wadodogi weje ukwangu, munghawalemese, kosoko awana fina wano undewa wa Mulungu ni wao. 15 Chawelu, nikumutamilani, imunhu inghakuhokela undewa wa Mulungu kifana mwana mudodogi, nghakuwingila ng'o.” 16 Hakawadinghula, na kwika mikono yakwe muchanhya yawo na kuwalugutisa. 17 Ugele foyalawage kuluta kunjila, munhu yumonga hakamwijila lumangho, na kumufugamila, yakumusa, “Mwalimu muswamu nigolose nhani uleke niuhokele uwumi wa majuwa gose?” 18 Yesu hakamugamba, “Nhani ukuninanga muswamu?” Kwachaka imunhu muswanu ninga yumwedu du ni Mulungu. 19 Kugamanya amalagiso: “Unghakome; unghagolose dihabwa; unghahije; unghamusigile munhu udasi, Wogohe iBabako ne ng'inako.” 20 Hoyomugamba, “Mwalimu! Aga gose nigakola kulawa udodo wangu.” 21 iYesu yamukumhulila meso, hakamwenda na, kumugamba, “Kuhungukiligwa na mbuli imwedu. Luta ukambase fyose fyowinafyo, uwenghe awakiwa imali yako, nagwe ukuwa na ugoli kulanga; kamei wije unyandamile.” 22 Ninga imwene hakakunyanghala ichihanga chakwe kosoko ye imbuli yo, hakaleuka kwa usungu kosoko hakowa na sawo nyingi. 23 Yesu hoyalanga kose kose, hakawagamba awefusa wakwe, “Foikuwa nghugutu ku wanhu wagoli kukwingila kuundewa we Mulungu!” 24 Awefusa hawakisina kosoko ya simbuli siso isakwe. Yesu hakawabidula kahi, yakugamba: “Mowana, fikugutu lugano kwingila ku undewa wa Mulungu! 25 Fihufu inhembo kwingila muchihengele che singano, kusuma imugoli kwingila mu undewa we Mulungu.” 26 Nawo hawakisina lugano, wakumugamba, “No nani yekudaha kuhona?” 27 Yesu yawakumhulila meso, yagamba, “Ku wanhu isikudahika, ninga kwa Mulungu si nhaifo; kosoko gose gakudahika kwa Mulungu.” 28 Petulo yakonga kumugamba, “Langa, aseye chileka fyose chikwandamila gweye.” 29 Yesu hakagamba, “Chawelu nikumutamilani Hechaka munhu yalekile nyumba, ama wanduguse wagosi, ama walumbu sakwe, ama ng'ina, ama Babakwe, ama wanagwe, ama migunda, kosoko yangu na kosoko ya imbuli swanu. 30 Inghakwinghigwa mikono igana muchigele chino cha hambiya; nyumba, na wandugu wagosi, na wechike, wang'ina munhu, na wana, na migunda hamwedu ne migogolo. Na muchilunga chikwija uwumi wa majuwa gose. 31 Ninga wengi wakunghonga wakuwa wakunyuma, na wakunyuma wakuwa wa wakunghonga.” 32 Nawo hawowa munjila wakukwila kuluta Yelusalemu, na Yesu, hakowa yawalongolele, hawakisina, awaya fowamwandamilage hawogoha. Hakawalonda kahi awaya ikumi na weli hakakonga kuwatamila agakwenda gamupate. 33 Hakagamba, “Langeni chikuluta Yelusalemu, iMwana we munhu yakwenda yagumigwe mumikono ya wakulu wa watambiki na watulumi, nawo wakulamula fina yakomigwe, wakumuguma mu mikono ya wamemb, 34 nawo, wakwenda wamuhowe na kumutwila mate, kumutowa na mikotya, na kumukoma; ganghaloka majuwa madatu yekwinuka muchilalo.” 35 Yakobo na Yohana, awana wa Sebedayo, hawamulutila, wakugamba, “Mwalimu! Chikuhananga uchigolosele dyo dyose dyochikukutasa.” 36 Yawagamba, “Mukuhananga niwagoloseleni choni?” 37 Hawamugamba, “Uchinghe seye kwikala, yumonga kumukono wako wo kulume na yumonga kumukono wako wokumoso muditunyo dyako.” 38 Yesu hakawagamba, “Musimanyile chomukutasa. Mukudaha kunywila ichikombe chonikunywila niye? Kahe kubatisigwa ubatiso wonikubatisigwa niye?” 39 Hawamugamba, “Chikudaha.” Yesu hakawagamba, “Ichikombe chonikunywila niye mukuchunywila, na ubatiso wonikubatisigwa niye mobatiswa. 40 Ninga imbuli yo kwikala ku mukono wangu wo kulume ama wo kumoso, si dyangu kuwenghani, ninga wakwenda wenghigwe awafulusa kwikiligwa.” 41 Awaya ikumi wakahulike hawakonga kuwasuhila Yakobo na Yohana. 42 Yesu hakawenanga, na kuwagamba, “Mumanya fina awaya awakutaligwa kuwa wakulu wa Mataifa, wakutawala kwa ludole, na wakulu wawo wakuwatumagisa. 43 Ninga isikuwa nhaifo ukwenu; 44 ninga imunhu yakuhananga yowe mukulu kwenu, yakuwa munhu mutogomi wenu. 45 Kosoko iMwana we munhu naye nghejile kutogomeligwa; ninga kutogoma na kulafa uumi wakwe udahe kuhonya wengi.” 46 Wakafike Yeliko, yakowe yekuleuka kulawa Yeliko, hamwedu na wefusa wakwe, ditewa ikulu dya wanhu, imwana wa Timayo, Batolomayo, ayuya imutasaji imudula, hakekala hanghanda ye injila. 47 Naye yakahulike fina no Yesu Munasaleti, Hakakonga kutula chowe na kugamba, “Mwana wa Daudi, Yesu, Nyonele ubasi!” 48 Wengi hawamugombela uleke yanyamale. Ninga hakongesa kwinula dijwi, “Mwana wa Daudi nyonele ubasi!” 49 Yesu hakema, yokugamba, “Mwinangeni.” Hawamwinanga ayuya imudula, wakumugamba, “Kiinghe moyo! Inuka, yakukwinanga.” 50 Hakakubita dikasu dyakwe, na kujumha, na kumulutila Yesu. 51 Yesu yamubidula, yamugamba, “Ukuhananga nikugolosele choni?” Ayuya imudula yamugamba, “Mwalimu wangu! Nikuhananga nidahe kona.” 52 Yesu hakamugamba, “Luta, dihuwi dyako dikuhonya.” Chimwande hakona; hakamwandamila Yesu munjila.
1 Ichigele fowasegele habehi na Yelusalemu, Betifage na Betania, habehi ne ditunda dya Miseituni, baho hawatuma weli wa wefusa wakwe 2 hoyawagamba: “Luteni kuchikaya chiya chuwile kumwande yenu. Fomukwingila umo mofika mwana we dipunda, dyohigwe, idyene disinati dikwiligwe na munhu. Didoholeni munigalile. 3 Ne munhu yanghamusani Nhani mukutenda nheifo, gambeni, iMundewa yakudihananga yakwenda yadyuwise lulubaha.” 4 Kamei howoluta, na kudyona dipunda diya didodogi, dyohigwa hamulango, kunje, hawadidohola, 5 awanhu awemile uko weja wawagamba, “Mukugolosa choni kudidohola dipunda didodogi?” 6 Hawawatamila fina Yesu foyawasigilile, nawo howowengha. 7 Hawamwigalila Yesu dipunda diya didodogi, na kutandika sisuke sawo muchanhya yakwe. 8 Wanhu itewa hawatandalike sisuke sawo munjila, na wamonga amatambi gowabenile mumigunda. 9 Na awanhu awalongole na waya awandamile kunyuma howokwinula amajwi, “Hosana! Noyamotesigwe iyakwija kudisina dye Mundewa! 10 Umotesigwa na undewa ukwija we Baba yetu Daudi! Hosana kuchanhya kulanga!” 11 Naye hakengila Yelusalemu mpaka kugati ya dihekalu, yakafuluse kulanga kose kose. Kosoko hayuwa ugele wa hegulo, hakalawa, hakaluta Betania hamwedu nawaya ikumi na weli. 12 Dijuwa dyandamile fowalawile Betania, hakowa na njala. 13 Hakona kwa hatali musada wina manyagala, hoyoluta kosoko, nhegela kokona chinhu muchanhya yakwe. Yakafike bahaya nghonile chinhu ila manyagala; kosoko usowile ugele wo kwifa kwa masada. 14 Hakaugamba nhafi, “Kulawa diyelo na majuwa gose imunhu yanghadiye imudyo ukwako.” Awefusa wakwe hawahulika. 15 Hawafika Yelusalemu, naye foyengile kwihekalu, yakonga kuwawinga awaya awenda wokwambasa na wenda wogula kwihekalu kugati. Hakasibidula si mesa sawaya awende wobadili mapesa, na magoda gawo wambasage si njiwa, 16 ninga nghalekile munhu yalonde chinhu mwihekalu. 17 Hakawafusa, hakagamba: “Togoleni! Isitulumigwe, fina, ‘Inyumba yangu yokwinangigwa nyumba ya kutasila ku mataifa gose.’ Ninga anyeye muyigolosa kifana ipango dya wahiji!” 18 Awakulu wa watambiki na watulumi hawahulika, hawahananga njila ya kumukoma kosoko hawamogoha. Kosoko amatewa gose hawajuma ku mafuso gakwe. 19 Ikafike hegulo hakaleuka mukaya. 20 Nhosikusiku wakowe wakuloka howowona umusada uya unyala kulawa kwisina. 21 iPetulo hakagelegela, hakamugamba, “Labi, langa, dibiki dowaligitise dinyala nya.” 22 Yesu hakabidula, “Muhuwileni Mulungu.” 23 Chawelu nikumutamilani, wowose yakugamba ditunda dino Ng'oka ukakubitigwe kubahali yaleke kuwa na manhonge muchidoga chakwe ninga yahuwile gago goyalongile gogoloseka, gakuwa gakwe. 24 Kosoko iyo nikumutamilani: Gogose gomukutasa huwileni fina mukugahokela. 25 Nanye chila fomukwima na kufuga, lekeleleni hona mwina mbuli yoyose na munhu, uleke iBaba yenu yowile kulanga yawalekelele nanyeye kubana kwenu. 26 Ninga nghonaga nyeye musikulekelela, iBaba yenu yowile kulanga nghakumulekelelani na nyeye kubana kwenu. 27 Kahi haweja Yelusalemu. Kamei foyagendage mwihekalu, howomulutila awakulu wa watambiki na watulumi, na wasehe, 28 wakumugamba, “Kwa udaha waki ukugolosa gano? No nani yakwinghile udaha uwo ugolose gano?” 29 Yesu hakawagamba, “Nikumusani mbuli imwedu, munibidule, kamei nikwenda niwatamileni kwa udaha waki nikugolosa gano. 30 Ubatiso wa Yohana haulawa kulanga ama kuwanhu? Nhamileni.” 31 Howokonga kuwanga awecho kwa wecho wakugamba fina chinghagamba, “Haulawa kulanga,” yakwenda yachigambe, “Nhani musamuhuwile?” 32 Chinghagamba, “Haulawa kuwanhu,” (Hawogoha wanhu, kosoko awanhu wose hawona iYohana fina mugonesi we chawelu.) 33 Hawamubidula Yesu, wakugamba, “Chisimanyile.” Yesu hakawagamba, “Aniye nani sikuwatamilani nyeye ni kwa udaha waki nikugolosa gano.”
1 Hakakonga kulonga nawo kwa mbasi, “Munhu yumonga yahanda mugunda wakwe wa misabibu, hakasungulusila ikigo, na kukata ikolongo dya kukamila, hakajenga ilingo, hoyokwika wemilisi, hoyoluta ku iisi ya kutali. 2 Ugele wakwe ukafike hakatuma imutumwa wakwe kuwaya wakwimilisa umugunda wakwe, yamwigalile si sabibu. 3 Hawamulonda, hawamutowa, hawamutaga kunje, mikono muhala. 4 Hakatuma kahi ukwawo mutumwa yungi, ayu naye hawamubulaga na kumuguma malonda mwitwi na kumugolosela wihi. 5 Hakatuma yungi, ayo hawamukoma; na wamonga wengi hawawatowa, na wamonga kumukoma. 6 Hakowa na yumwedu yasigale, imwanagwe mwendigwa wakwe, ayuno naye hakamutuma ukwawo kundumiliso yakugamba, ‘Wakwenda wamogohe imwanangu,’ 7 Ninga awaya awakwimilisa umugunda, hawakitamila wakugamba, ‘Ayuno no muhasi. Handikoni chimukome, na uhasi ukuwa wetu!’ 8 Hawamukola na kumukoma, na kumutaga kunje yo mugunda we misabibu. 9 “Kamei yatende nhani ayuya iMundewa, imwenyemugunda we misabibu? Yakwija na kuwakoma awemilisi waya, na umugunda uya we misabibu yakwende yeke wemilisi wengi. 10 Diwandiko dino musinati mudisome? ‘Isumbi yalemigwe na wajengaji iyo igalukagaluka no sumbi inghulu ya hagati. 11 Imbuli ino ilawa kwe Mundewa; Nadyo ni ijumo mumeso getu!’” 12 Nawo hawahananga kumukola ninga hawogoha amatewa, kosoko hawamanya fina imbasi iya kawalonga awene. Hawamuleka na kuleuka. 13 Howotuma ukwakwe wamonga wa Mafalisayo na Mahelode, uleke wa mutegele kwa simbuli sakwe. 14 Baho fowamufikile, hawamugamba, “Mwalimu, chimanya fina agweye kwa munhu wa chawelu, kahi nghukogoha ukulu wa munhu, kosoko nghukulanga sifuta sa wanhu, ninga muchawelu ukuifusa injila ye Mulungu. Togola ni fiswanu kuliha kodi kwa Kaisali ama si nheifo? 15 Chimwinghe, chinghamwinghe?” Naye yakamanye ichimwefe chawo, hakawagamba, “Nhani mukunigesa? Nigalileni ifesa niilange.” 16 Hawegala. Kamei hakawagamba, “Isanamu ino lubonoto lunolwani?” Hawamugamba, “Lwa Kaisali,” 17 Yesu hakabidula yekugamba, “Mwingheni Kaisali aga Kaisali, na ge Mulungu mwingheni Mulungu.” Hawamwisina lugano. 18 Kamei amasadukayo, wanhu wakugamba fina kwachaka kwinuka awafile, hawamulutila, na kumusa wekugamba, 19 “Mwalimu, Musa hakachiwandikila, ‘Fina imunduguse we munhu yangafa yanghamuleka imuke kachaka mwana, imunduguse yamulonde imwanamuke yuya uleke yamwelekele imunduguse wana.’ 20 Heja howa na wanhu mufungate we ndugu; imukulu hakatole mwanamuke, na kufa, ngheleke naye. 21 Iwakeli naye hakamulonda, hoyokufa, naye nghalekile mwana. Na wakadatu naye nheifia, 22 hata wose mufungate, wasalekile wana. Kundumo, ayuya imwanamuke naye hoyokufa. 23 Mukwinuka wafile kokuwa muke wa yehoki? Kosoko wose mufungate hawamutola.” 24 Yesu hakabidula, yekugamba, “Togoleni musikwagilila kosoko musimanyile amawandiko kahi udaha we Mulungu? 25 Kosoko awanhu ma wakwinuka kulawa kuwafile, wasikutola kahiwasikutoligwa, ninga wakuwa fina malaika wowile kulanga. 26 Na fina awafile wakwinuligwa: ‘Musisomile muchitabu cha Musa, sula ye chibiki?’ Fina iMulungu foyamutamile yakugamba, ‘Aniye na Mulungu wa Ibulahimu, na Mulungu wa Isaka, na Mulungu wa Yakobo.’ 27 Si Mulungu wa wafile, ninga wa womi, kwa nheifo mukwagilila lugano.” 28 Yumonga wa watulumi hakeja na kuwahulika wakulonga naye. Hakona fina kawabidula fiswamu, hakamusa: “Mumalagiso gose dilagiso dihoki no dikumwande ya gose?” 29 Yesu hakamubidula yekumugamba, “Dye nghonga nodi 'Hulika gweye Isilaeli! iMundewa Mulungu wetu ni Mundewa yumwedu. 30 Nagwe umwende iMundewa Mulungu wako, no umoyo wako wose, ne chidoga chako chose, ne misungu yako yose, no ludole lwako lwose.' 31 Na dyakeli no dino: 'Umwende imiyago fina foukiyenda gomwecho.' Hechaka ilagiso dingi dikulu kusuma gano.” 32 Ayuya imutulumi yamugamba “Chawelu, Mwalimu! Kulonga fiswanu fina iMulungu ni yumwedu, ninga kwachaka yungi, ninga imwene du. 33 Na kumwenda imwene kwa moyo wose, na umanyi wose, na kwa ludole lose; na kumwenda imiyago fina fyo ukiyenda gomwecho. Imbuli nghulu kusuma kumulafila iMulungu nhambiko yokusomigwa na kwingha kose.” 34 Naye Yesu yakone fina kabidula kwa misungu, yamugamba “Agweye ghwihatali na undewa wa Mulungu.” Kulawa baho hachaka munhu wowose yagesile kumusa mbuli kahi. 35 Ugele Yesu foyafusage mwihekalu, hakawagamba, “Awatulumi wakugamba Kilisito ni Mwana wa Daudi? 36 iDaudi imwecho kwa udaha wa Muhe wa Musunhile hakagamba: ‘Mundewa yamugamba iMundewa wangu: Ikala umukono wangu wo kulume, mpaka niweke awanghondo wako, wowe hasi ye migulu yako.’” 37 Daudi imwecho yakugamba, “Mundewa aho kagaluka mwanagwe nhani?” Na ditewa dyose wende womutegelesa kwa chinyemi. 38 Mumafuso gakwe hakawagamba, “Muwe meso na watulumi, awakwenda kugenda wafalile makasu matali na kulamusigwa mumagulilo, 39 na kwikala kumwande mumasinagogi, na magoda ga kumwande mufyakudiya fye si sikukuu. 40 Wakudiya kusinyumba sa wegane, na kwa chimwefe wakuwomba mawombi matali. Awano wakwija wapata iliganiso dikulu dijuwa dye ndumo.” 41 Naye yekale kulanga disanduku dyowakuguma fowakumulafila Mulungu, kalanga amatewa fowaguma amapesa musanduku. Wagoli wengi hawaguma mengi; 42 yeja mwanamuke yumwedu mwigane, mukiwa, yalafa sendi mbili, kifana nusu ya dipesa. 43 Yawenanga awefusa wakwe, yawagamba, “Chawelu nikumutamilani, Ayuno imwanamuke, imwigane imukiwa kaguma nyingi kusuma wose wakuguma musanduku. 44 Kosoko awo wose waguma sigafu; ninga yuno mu ukiwa wakwe, kaguma fyose foyenafyo ne chakudiya chakwe chose nacho.”
1 Ugele foyalawage mwihekalu, yumwedu wa wefusa wakwe, hakamugamba, “Mwalimu Langa, uswanu wa amawe na majengo gano!” 2 Yesu hoyobidula, yamugamba, “Ukugona amajengo gano amakulu? Disikwenda disigale iwe muchanhya ya diwe idyene disikwenda dije dimoligwe.” 3 Yakekale mwitunda dya miseituni, kumwande ye dihekalu, Petulo na Yakobo na Yohana na Andelea hawamusa wemwene. 4 Chitamile simbuli sino sikuwa milaki, nacho ichitangilo ni choni cha ugele wa ago gose kumemelesigwa? 5 Yesu yakonga kuwatamila, “Mulangisise imunhu yanghawadanhilise.” 6 Matewa gokwija mwisina dyangu, wakugamba, “Ani no niye!” nawo wakwenda wawadanhilise wengi 7 Nanye munghahulika simbuli sa inghondo, na minong'ono ye inghondo, munghogohe, ago gakwenda galawanise. Ninga indumo yecho ikali. 8 Kosoko ditaifa dikulewa nghondo na undewa ukulawa nghondo. Kukuwa na dimasingisa dye iyisi ako nako, kukuwa na njala. Ago no nghonga ya usungu fina wo kweleka chali. 9 Nanye mukilangisise muwenyecho. Kosoko wakwenda wamwigaleni kumabalasa. Na kumasinagogi mukutowigwa; nanye mukwende mwigaligwe ku majumbe na wandewa kosoko yangu, kuwa uhomelesi ukwawo. 10 Na imbuli swanu, ikwenda ihubiliigwe ku mataifa gose. 11 Na fowakuwalonda nyeye na kuwasongesa, munghadoge go mukwenda mulonge; ninga dyo dyose dyomukwinghigwa ugele uwo, dilongeni. Kosoko si nyeye mukulonga; ninga ni Muhe Musunhile. 12 Kahi indugu yakumusongesa imunduguse uleke yakomigwe na Baba yakumusongesa imwanagwe. Kahi awana wakuwenukila awaweleke na kuwakoma. 13 Nanye mukwenda musuligwe na wanhu wose kosoko ya disina dyangu. Ninga iyakugendelela mpaka kundumo, ayo noyakuhona. 14 “Munghona ludeso lwima ahanhu ahene lusikuhanangigwa lwima (iyakusoma yamanye).” Noho awowile, “Uyahudi watijile kumatunda. 15 Na imunhu yowile mukano yanghahumuluke, kahi yanghengile kulonda chinhu munyumba yakwe. 16 Naye yowile kumugunda yanghoye ukaya kulonda suke yakwe. 17 Usungu wawo awasokesi, na waya awakonghesa amajuwa gago! 18 Mutase unghowe ugele we inyota! 19 Kosoko amajuwa gago gakuwa na mugogolo, uwo usinati uwe kulawa inghonga ya kumba, foyombile iMulungu mpaka hambiya. Ninga isikuwa nheifo kahi. 20 Mhali iMundewa nghagadumukise amajuwa gago; hasowile hakuhona munhu wowose, ninga kosoko ya wasaguligwe woyawasagule. Kagadumukisa amajuwa go.” 21 Na ugele uwo imunhu yanghawagamba, “Langa, Kilisito!” kowa akuno ama akuya munghahuwile. 22 Kosoko wakwenda wenukile Makilisito ga udasi, na wagonesi wa udasi, wakonesa fitangilo na majumo, uleke wawadanhilise, kulonga chelu hata na wasaguligwe. 23 Ninga anyeye mukilangisise, nifulusa kuwatamila, ugele fisinati filawanise. 24 “Ninga amajuwa gago, unghaloka umugogolo uwo, dijuwa dikutukuwala, umwesi nao usikumulika, 25 sinyelesi sa kulanga solagala, na uludole lwa kuchanhya losingisika.” 26 Baho noho wakiyawomona iMwana we Munhu yakwija mumafunde kwa ludole mwingi na ditunyo. 27 Noho yakayotuma malaika na kuwakonghola awasagulwa wakwe kulawa si sandi sose ine, kulawa ulwandi lwa kundumo lwe yisi mpaka ulwandi lwe ndumo yo ulanga. 28 “Mukifuse difuso dyo musada. Amanhambi gakwe fogakuwa majolo jolo na kukonga kutuguta, mukutanga fina ugele wo kuhanda wahabehi; 29 Nanye nheifiya fomukona simbuli so sikukonga, manyeni fina kahabehi mumilango. 30 Chawelu, nikuwatamileni, Icheleko chino chisikuloka mpaka ago gamemelesigwe. 31 Ulanga na iisi fikuloka, ninga simbuli sangu sisikuloka ng'o.” 32 “Ninga imbuli ya ugele uya, ne chipisi chiya, hachaka yamanyile, hata malaika awowile kulanga, kahii Mwana; ninga Baba. 33 Mulangisise, Muwe meso, kosoko musimanyile ugele wuya wokuwa milaki. 34 Imbasi yakwe ni kifana imunhu yekuluta nhambo, kaileka inyumba yakwe, kawalekela awatumwa wakwe malagiso, na chila munhu no umulimo wakwe, naye kamulagisa imwimilisi wa hamulango yowe meso. 35 Muwe meso, kosoko, musimanyile imwenye nyumba yakwija ugele waki, yokuwa hegulo ama muchilo mugati, ama ugele wo kwika dijogolo, ama nhosikusiku. 36 Yangheje yolawanisa chimwande na kumufikani mugonile. 37 Na dyonikumutamilani nyeye, nikuwatamila wose: Muwe meso!”
1 Gakaloke majuwa meli hadyuwa ijuwa ikulu dye Pasaka, na dijuwa dikulu dye mikate isilungigwe. Awakulu wa watambiki na watulumi hawahananga njila ya kumukola kwa chifiso na kumukoma. 2 Kosoko hawagamba, “Inghowe ugele we sikukuu, ingheje ikuwa nghondo mu wanhu.” 3 Yakowe Betania munyumba ya Simoni mukoma, yakudiya chakudiya, hoyokwija mwanamuke yena chichupa cha mafuta ge mhungile gakwinangigwa nalido ge iliho ikulu. Hakachitula na kumwitilila Yesu mwitwi dyakwe. 4 Hahowa na wanhu awene wasuhile mufidoga fyawo wakugamba, “Nhani kwagilisa mafuta ge diliho nhaifino? 5 Kosoko mafuta ge diliho dino hagowa gakudaha kuguligwa kwa dinali magana madatu ama na musapu, na kugawiligwa awakiwa!” Hawamusuhila lugano imwanamuke yuya. 6 Yesu hakagamba, “Mulekeni! Nhani mukumwidasa? Kanigolosela chinhu chiswanu. 7 Kosoko majuwa gose mwenawo wakiwa hamwedu nanye, na chila fomukwenda mukudaha kuwagolosela maswanu. Ninga niye si hamwedu nanye majuwa gose. 8 Kagolosa foyadahile; kalongola kuubaka umutufi wangu malihamu kosoko ya kusikigwa kwangu. 9 Chawelu, nikumutamilani, chila koikuhubiliigwa imbuli swanu, muchilunga chose na dino doyagolose yuno dyotambuligwa kwa kumugelegela.” 10 Yuda Isikalioti, yumwedu wa waya ikumi na weli, yaluta kuwakulu wa watambiki, uleke yamusongese ukwawo. 11 Nawo wakahulike hawasekelela lugano, na kulagana naye wamwinghe mapesa. Hakahananga luneka lwa kumusongesa. 12 Dijuwa dye nghonga dye mikate isilungigwe, wakachinje ingholo ye iPasaka, awefusa wakwe wamugamba, “No hoki koukuhananga chikugolosele udiile iPasaka?” 13 Hawatuma weli mu wefusa wakwe, yakuwagamba, “Luteni ukaya, mokitang'anyila na mugosi yakitwikile ibiga dya meji. Mwandamileni 14 na hohose hoyakwingila, mumugambe imukaya: Mwalimu yakugamba, ‘Chuwa hoki ichibuha changu ichawageni, nidiye iPasaka umo hamwedu na wefusa wangu?’ 15 Naye imwecho yakwenda yamoneseni chibuha chikulu che golofa, chifulusa kuhambigwa, muchitengele umo.” 16 Awefusa hawaleuka, hawaluta ukaya, hawona kifana fowasigililigwe; na kutenga chakudiya che sikukuu ye Pasaka. 17 Ikafike hegulo, iYesu hakeja hamwedu na waya ikumi na weli. 18 Wakekale hachakudiya wakudiya, Yesu hakagamba, “Chawelu, nikumutamilani yumwedu wenu iyakudiya hamwedu na niye yakunisongesa.” 19 Hawakonga kona usungu, na kulonga yumwe yumwe. Togola no niye? 20 Kawagamba, “Ni yumwedu wa anyeye ikumi na weli, iyakusanhisa hamwedu na niye mwibakuli. 21 Kosoko iMwana wa munhu yakuluta fina foyawandikiligwe; ninga usungu wakwe imunhu yuya iyakumusongesa iMwana wa munhu! Hayuwa ikuwa ibeka kwi munhu yuyo nhanga nghelekwe!” 22 Ugele fowadiyage, yalonda umukate, na kuulugutisa na kuumogola, kawengha, yakugamba, “Londeni mudiye, auno no mutufi wangu.” 23 Yalonda ichikombe, yakamale kulumba; hakawengha; na wose hawonywila. 24 Hakawagamba, “Aino no sakame yangu ya dilagano, iikwitika kosoko ya wengi. 25 Chawelu, nikumutamilani nyeye, Sikunywa kahi cheleko cho musabibu, mpaka dijuwa diya donikanikunywa umusha mu undewa wa Mulungu.” 26 Nawo wakamale kwimba, howolawa kuluta kuditunda dya Miseituni. 27 Yesu yawagamba, “Anye mose monileka ichilo cha diyelo,” Kosoko nofyo iwandikwe, “Nikumutowa imudimi, na singholo sikiyagala. 28 Ninga ninghafulusa kwinuka kulawa muchilalo, nikuwalongolela kuluta Galilaya.” 29 Petulo hakamugamba, “Hata wose wakuleke aniye sikukuleka!” 30 Yesu yamugamba, “Chawelu nikukutamila gweye, ichilo cha diyelo, ugele dijogolo disinati dike keli, ukuwa unikanile kadatu.” 31 Naye yagendelela kulonga, “Hata inghowa kufa hamwedu nagwe, sikwenda nikukane ng'o!” Wose hawalonga nheifo. 32 Kamei haweja kumululu iikwinangigwa Getisemane na kuwagamba awefusa wakwe, “Kaleni hano ugele fonikuwomba.” 33 Hoyamulonda Petulo, na Yohana, na Yakobo hamwedu naye. Yakonga kona usungu muchidoga chakwe na kugaya, 34 hoyowagamba, “Ichidoga changu china usungu mwingi habehi na kufa. Ikaleni hano mwikale meso.” 35 Yakalute kumwande chidodogi, hokogwa funama, yakuwomba, fina inghadahika ichipisi chicho chimuleukile. 36 Hakagamba, “Tate, go Babangu! Gose gakudahika ukwako. Unileusile ichikombe chino, si fina fonikwenda niye, ninga, foukwenda agweye.” 37 Yakwija yakuwafika wagona sinhongo, yamugamba Petulo, “Togola Simoni kugona? Kulemeligwa kwikala meso hata disaa dimwedu?” 38 Ikaleni meso muwombe, munghengile mumagesa. Chidoga chikudaha amba umutufi wachaka ludole. 39 Hakaluta kahi, kuwomba, yakulonga imbuli iya. 40 Hakeja kahi hakawafika wagona; kosoko ameso gawo hagowa masito. Kahi wasamanyile dya kumubidula. 41 Hakeja kahi lwakadatu, hakawagamba, “Mwikali timbula nhongo du na kubwihila? Ifuluka ugele nouuno! Langeni, iMwana we Munhu yakugumigwa mu mikono yawo awena uwihi. 42 Inukeni, chigendeni, langeni ayuya yakunisongesa kasegelela.” 43 Baho ugele yakulonga, Yuda hakeja, yumwedu wa waya ikumi na weli hamwedu naye itewa. Wena mapanga na mapulo, walawa ku wakulu wa watambiki, na watulumi, na wasehe. 44 Ayuya musongesi kawengha chitangilo: Yakugamba, “Wonikamunonela, no mwene. Mukoleni mumulonde kwa kumwimilisa.” 45 Kamei yakeje, chimwande hoyomulutila, hoyagamba, “Mukulu!” hoyomunonela. 46 Hawagolola imikono yawo na kumukola. 47 Yumwedu wawo yowile baho, hakakwega dipanga dyakwe hakamunghenya mutumwa wa mutambiki mukulu na kumudumula inghutwi. 48 Yesu hakabidula yekuwagamba, “Nhafo! Mwija mukola muhiji na mapanga na mapulo kunilonda niye? 49 Chila ijuwa hanuwa hamwedu na nyeye mwihekalu nikufusa, musanikolile. Ninga adino dilawanisa uleke amatulumo gamemelesigwe.” 50 Baho hawamuleka, na kutija wose. 51 Na mwanike yumonga hakamwandamila, kegubika suke ya bafuta. Hawamukola, 52 hakaleka aiya isuke yakwe ye bafuta hakatija mwasi. 53 Hawamulonda Yesu, hawamwigala kwa mutambiki mukulu, hawamumemelela wose, awakulu wa watambiki na wasehe na watulumi. 54 Petulo yamwandamila kwa kutali, mpaka kugati ku dikumbo dye mutambiki mukulu. Yekala hamwedu na wemilisi, yakotela moto. 55 Baho awakulu wa watambiki na dibalasa dyose hawahananga uhomelesi muchanhya ya Yesu uleke wamukome, ninga hawaswela. 56 Kosoko wengi hawahomelesa udasi, ninga hawaswela uhomelesi wawo usaligane. 57 Kamei wamonga hawema na kumuhomelela udasi wakugamba: 58 Aseye hachimuhulika yakugamba, “Aniye nikudimola dihekalu dino dijengigwe kwa mikono, na fogakuloka majuwa madatu nikujenga dingi idisikugolosigwa kwa mikono. 59 Hata nheifo, uhomelesi wawo usaliganile.” 60 Kamei imutambiki Mukulu hakema muchiligati, yokumusa Yesu yakugamba, “Nghukubidula mbuli? Awano wakukuhomelesa choni?” 61 Ninga hakanyamala kahe nghamubidule mbuli. Imutambiki Mukulu yamusa kahi, yekumugamba, “Agweye no Kilisito, Imwana we Yamotesigwe?” 62 Yesu yagamba, “Heye, noniye! Nanye mukamumona iMwana we Munhu, yekale ku mukono wo kulume wo ludole, yakwija mumafunde gakulanga!” 63 iMutambiki mukulu yadega si suke sakwe, yakugamba, “China soko yaki yakuhananga wahomelesi? 64 Muhulika ulubeso lwakwe. Mukona nhani nyeye?” Wose hawalamula fina iwagila yakomigwe: 65 Wamonga, hawakonga kumutwila mate, hawamugubika ichihanga, na kumutowa, na kumugamba, “Haya tanga!” Hata awasilikali nawo hwamuhokela kwa kumutowa makofi. 66 Petulo hakowa kwikumbo; hakamwijila mutogomi we chike we mutambiki mukulu. 67 Hakamona Petulo yakotela moto, hakamukumhulila meso yakumugamba, “Agwe nagwe hakuwa hamwedu na yuya iYesu Munasaleti.” 68 Hokakana na kugamba, “Simanyile kahi sikuhulika so ukulonga gweye, hoyolawa kunje mpaka kwilango.” Dijogolo hodikwika Yakana. Dijogolo hodikwika. 69 Na yuya imutumishi we chike hoyomona kahi, hoyokonga kuwatamila awemile bahaya, “Ayuno yumwedu wawo!” 70 Hoyokana kahi. Chipisi chidodogi kahi awaya awemile bahaya howomugamba Petulo, “Chawelu agweye kwa yumwedu wawo, kosoko kwa Mugalilaya gweye.” 71 Hoyokonga kuligitisa na kilaha, “Simumanyile imunhu yuno yo mukumulonga!” 72 Chimwande dijogolo dyeka keli. Petulo hoyogelegela aiya imbuli iyalongigwe na Yesu, “Ugele dijogolo disinati dike lwakeli ukuwa unikanile kadatu.” Na yakakonge kudoga hoyolila.
1 Chimwande nhosikusiku awakulu wa watambiki hawekala hebalasa hamwedu na wasehe wa watulumi na dibalasa dyose, hawamoha Yesu, hawamulonda, hawamwigala kwa Pilato. 2 Pilato yamusa, “Agweye no gwegwe go, Mundewa wa Wayahudi?” Yabidula yakumugamba, “Agwe kuilonga.” 3 Awakulu wa watambiki wende womuhomelela mbuli nyingi. 4 Pilato kamusa kahi yakugamba, “Nghukubidula? Langa ni mbuli nyingahi sowakukuhomelesa.” 5 Ninga Yesu nghabidule mbuli kahi, Pilato hakakisina! 6 Ugele we sikukuu yakowadoholela mufungwa yumwedu, wowakumutasa. 7 Hahowa na munhu yakwinangigwa Balaba, kohigwa hamwedu na wanhu awagolose finju na kukoma mufinju iyo. 8 Amatewa howokwija hawakonga kutasa yawatendele fina foyasowele, 9 Pilato yawabidula, yakugamba, “Togoleni mukuhanaga niwadoholeleni iMundewa wa Wayahudi?” 10 Kosoko hakamanya fina awakulu wa watambiki hawamulafa kwa chimwefe. 11 Ninga awakulu wa watambiki howowasonghesa amatewa fina ibeka yawadoholele Balaba. 12 Pilato yawabidula kahi yakuwagamba, “Nimutende nhani ayuno yo mukumugamba Mundewa wa Wayahudi?” 13 Hawatula chowe kahi wakugamba, “Mudumangise!” 14 Pilato yawagamba, “Kwina wihi waki woyagolose?” Weja wagendelele kutula chowe, “Musambase!” 15 Pilato yakende kuwendesa matewa, hakewadoholela Balaba; yakafuluse kumujola ne mikotya hakemulafa Yesu yadumangiswe. 16 Awasilikali hawamulonda hawamwigala kwi kumbo dikwinangwa Plaitolia. hawawalonda chitewa chose. 17 Hawamufasa isuke idunghundunghu, hawaluka nghofia ya miwa, hawamufasa mwitwi dyakwe. 18 Hawakonga kumulamusa: “Baho hako Go Mundewa wa Wayahudi!” 19 Hawamutowa ne chigwami mwitwi, hawamutwila mate, hawafugama, wakumufunamila. 20 Wakamale kumuseyigila, hawamuhambula dikasu diya didunghudunghu, hawamufasa sisuke sakwe imwecho. Hawamulafa kunje uleke wamudumangise. 21 Kamei hawamudindilisa imunhu yalokage kulawa kumugunda, Simoni Mukilene, Baba yawo cha Isikanda na Lufo, uleke yaudinghule musalaba wakwe. 22 Hawamwigala ahanhu hakwinangigwa Goligota, nong'amba, Ahanhu he diguha dye ditwi. 23 Hawamwingha difai ihanganisigwe manemane, ninga ghayunywile. 24 Hawamutungika, na kugawa si suke sakwe, hawatowa kula chila munhu yapate choni. 25 Hayuwa chipisi cha saa ya kadatu, hawamutungika mumusalaba. 26 Hahowa na anuwani muchanhya yakwe, “MUNDEWA WA WAYAHUDI.” 27 Hamwedu naye hawatungikigwa wahiji weli, yumonga kumukono wakwe wokulume, na yumonga kumukono wakwe wokumoso. 28 Uleke diwandiko dimemelekele idikugamba, “Yasambaswa hamwedu na wehi.” 29 Wagendage munjila howomuliga, hawafumila kwa kusingisasingisa amatwi gawo wakugamba, “Ahaa! Agweye ukudaha kudimola dihekalu na kudijenga kwa majuwa madatu! 30 Kihonye gomwecho, uhumuluke mumusalaba!” 31 Awakulu wa Watambiki nawo hawamuseyigila awecho kwa wecho, hamwedu na watulumi wakugamba, “Hakahonya wamonga,” nghakudaha kihonya imwecho! 32 Kilisito iMundewa wa Isilaeli na hayahulumuka hambiya mumusalaba uleke chone, chimuhuwile! Awaya nawo awatungikigwe hamwedu naye howomuliga. 33 Ikowe saa ya mutandatu hokukuwa chisa, iisi yose mpaka saa ya dikenda, 34 Ikafike saa ya dikenda, Yesu yekwinula dijwi dyakwe kwa ludole, “Eloi, Eloi, lama sabakitani?” No kugamba, “Mulungu wangu Mulungu wangu nhani unilekile?” 35 Awamonga awemile baho awahulika na kugamba, “Langa, yakumwinanga Eliya!” 36 Yumonga hayabilima lumangho, na kutubwisa didodoki na kudifabika musiki. Hakamwingha yonywe, yakugamba, “Lekeni! Chilange nghonaga Eliya kokwija kumuhulumusa!” 37 Naye Yesu yalafa ijwi ikulu, kamei na kufa. 38 Dipasiya dya hekalu dyadegeka fibemhe fili, kulawa kuchanya mpaka hasi. 39 Yuya iyakida, iyemile baho yakumulanga, yakone kafa kwanjila iyo. Hoyagamba, “Chawelu ayuno hakowa Mwana wa Mulungu!” 40 Hahowa na wanawake wakulanga kwa hatali. Mugati yawo hakowa Maliamu Magidalene, na Maliam ing'ina yawo cha Yakobo imudodo na Yose, na Salome. 41 Awo nowakiyandamile naye ako Galilaya, na kumutogomela. Na wamonga wengi awejile naye mpaka Yelusalemu. 42 Ikowe hegulo, kosoko ni Matandilo, nadyo ijuwa dikulongolela isabato. 43 Hakaluta Yusufu munhu wa Alimataya, munhu mukulu, munhu wa dibalasa dya mahonge. Imwene imwecho yakugojela undewa we Mulungu, yagolosa chigosi, yekwingila kwa Pilato, na kumutasa umutufi wakwe Yesu. 44 Pilato yekisina lugano kosoko fina kafulusa kufa. Hakamwinanga iyakida yuya, na kumusa fina kufa kafulusa katali. 45 Yakafuluse kupata ichawelu kwi Akida yuya, na kumwingha Yusufu umutufi wa Yesu. 46 Naye hakagula sanda ya bafuta, hakamuhulumusa, na kumufasa isanda iya, yamwika muchilalo chisongoligwe mudiwe. Hakafingilisa diwe kumulango we chilalo. 47 Naye Maliamu Magidalene na Maliamu ng'inakwe wa Yose, hawalanga ahaya hoyekigwe.
1 Isabato ikaloke Maliamu Magidalene, na Maliamu ing'ina wa Yakobo, na Salome, hawagula mafuta gena mhungile swanu wakamubake. 2 Kwikali lwisalwisa, dijuwa dye inghonga dye dijuma, hawaluta kuchilalo ugele dijuwa fodyakongage kutonhomoka. 3 Hawakonga kulonga awecho kwa wecho, “Nani yakuchifingilisila diwe diya hamulango we chilalo?” 4 Wakalange na kona diwe diya difulusa kufingilisigwa; nadyo hadyuwa ikulu lugano. 5 Hawengila kuchilalo, na kona mwanike yekale ulwandi lo kulume kafala suke njelu, hawakisina. 6 Yawagamba, “Munghakisine! Mukumuhananga Yesu Munasaleti, iyatungikigwe. Kenuka muchilalo! Kahechaka hano, halangeni howamwikile. 7 Ninga luteni mukawatamile awefusa wakwe, na Petulo: Fina kawalongolela kuluta Galilaya, mukamona uko fina foyamutamileni.” 8 Hawalawa kunje, hawabilima kulawa hachilalo, kosoko wakutetema na kisina. Kahi wasamutamile munhu mbuli kosoko hawogoha. [ 9 Naye yakenuke nhosikusiku dijuwa dye inghonga dye kukonga dye dijuma, hoyokiyonesa kunghonga kwa Maliamu Magidalene, imwene wo yamulafa simhepo mufungate. 10 Aye hoyoluta hoyowatamila awaya awowile hamwedu naye. Nawo wakali hongesa na kulila; 11 Ninga awene fowahulike fina mumi, naye kawona, wasahuwile. 12 Kahi hakakiyonesa na weli wawo na kena futa ingi; nawo wende wagenda wakuluta kumugunda. 13 Awa nawo hawaluta hawawatamila awaya wamonga, awene nawo hawaleka kuhuwila. 14 Hanyuma, hakoneka na waya ikumi na yumwedu fowende wodiya. Hokawagombela kosoko ya kuswela dihuwi kwawo na ukugutu we fidoga fyawo, kosoko wasawahuwile awaya awamwonile foyenuke muchilalo. 15 Hakawagamba, “Luteni kuchilunga chose mukahubili imbuli swanu kwa chila munhu. 16 Iyakuhuwila na kubatisigwa yakuhona; inghakuhuwila yakulamuliligwa. 17 Fitangilo fino fikwende fikiyandamile na awaya awakuhuwila. Kwi sina dyangu wolafa si mhepo; wolonga kwa nonga nyisha; 18 wokola majoka, hata wanghadiya chinhu cha kukoma chisikuwabulaga ng'o; wokwika imikono yawo muwatamu, nawo wakuhona.” 19 Basi Mundewa Yesu yakamale kulonga nawo, hakenuligwa kulanga na kwikala umukono wo kulume we Mulungu 20 Nawo awaya hawalawa hawaluta kuhubili kosekose, iMundewa yakugolosa milimo hamwedu nawo na kumemelesa aiya imbuli kwa fitangilo ifyakiyandamile nayo. Hano.]
1 Kosoko wanhu wengi waguma mikono kwika hamwedu simbuli sigoloseke ukwetu, 2 fina fowachisimulila awaya wowile watogomi we imbuli kulawa kunghonga, 3 nyona fiswanu kwandika kusoko aniye nani nyandamila simbuli sose kwa habehi, sa ugele ulokile, kwandika hamwedu fina fosilawanise Mutunyigwa Teofilo; 4 udahe kumanya chawelu simbuli so utamiligwe. 5 Ugele wo undewa wa Helode, Mundewa wa Uyahudi heja howa na mutambiki yumwedu disina dyakwe Sakalia wo ugele wa Abiya, na imukagwe yowa Elisabeti wo ulukolo lwa Haluni. 6 Na wose foniweli hawowa wachawelu mumeso ge Mulungu, hawekala fiswanu, hawagendelela kuikola misigililo ye Mundewa bila kubana chochose. 7 Nawo weja wowa wechaka mwana, kosoko Elisabeti yowa mugumba hawowa wasehe lugano. 8 Hambiya foyatogomage mumulimo wo utambiki hamwande ye Mulungu, foyowile muugele wakwe, 9 kwa kwandamila sinhenda se chitambiki, ikula haimugwila imwene kwingila mwihekalu dye Mundewa kufunghisa ufumba. 10 Ugele wo kufunghisa amatewa gose ga wanhu hagowa kunje gekutasa. 11 Baho Sakalia hakalawiligwa na Malaika we Mundewa, Kema nyima ulwandi lo kulume lwa Hefugilo dyo kufunghisa. 12 Kamei Sakalia hakedasika na kogoha lugano foyamonile Malaika. 13 Ninga, “Malaika kamutamila Sakalia, ughogohe kusoko kutasa kwako kuhulikigwa na imukago Elisabeti kokweleka mwana we chigosi, nagwe komwinanga disina dyakwe Yohana. 14 Nagwe kokuwa na chinyemi na kubwedelela na matewa wonyemuka ugele wo kwelekwa kwakwe. 15 Kosoko kokuwa mukulu mumeso ge Mundewa, na imwene nghekunghwa difai kahigimbi mukali, naye komemeswa Muhe Musunhile kulawa munda mwe ng'ina. 16 Kawowisa matewa ga wana wa Isilaeli kwe Mundewa Mulungu wawo, 17 na komulongolela Mundewa, kolongosigwa ne Muhe na ludole lwa Eliya. Kubidula imimoyo ya waBabamunhu ku wana, kowagolosa awechaka chogoho wowe na madoga ga uchawelu, kuwatandila awanhu kusoko ye Mundewa.” 18 Sakalia kamusa Malaika yakugamba, “Nomanya nhani? Aniye namusehe ne mukangu mudaha lugano.” 19 Na Malaika kamugamba, “Aniye na Gabilieli, nikwima ahanhu he Mulungu, nhumigwa kulonga na gweye na kukwigalila mbuli swanu fina ino. 20 Langa nghudaha kulonga mpaka dijuwa diya gogekwija gelawanisa agano gonikutamile, kusoko nghusifumile simbuli sangu sikwija silawanisa mu ugele wakwe.” 21 Wanhu wenda wemugojela Sakalia na hawesina kusoko hakekalisa kwi hekalu. 22 Na foyalawile kunje nghadaha kulonga nawo, howemutanga fina kona majumo kugati ye dihekalu; kawengha chitangilo na kugendelela kuwa chimumu. 23 Foyafuluse amajuwa go mulimo wakwe, hakoya ukaya ukwakwe. 24 Kulawa ugele uwo imuke Elisabeti hakeyoha. Hakefisa kugati kwa chigele cha minyesi mishano, yakugamba, 25 “Nhafi no Mundewa foyanigolosele muchigele choyanyonile, kanilegusila chinyala changu mumeso ga wanhu.” 26 Mumwesi wa mutandatu kulawa kwiyoha kwa Elisabeti; Malaika Gabilieli hakatumigwa ne Mulungu mukaya ya Galilaya disina dyakwe Nasaleti. 27 Kwa bikila yatumisigwe na munhu disina dyakwe Yusufu, wa lukolo lwa Daudi, na disina dya bikila yuyo ni Maliamu. 28 Gabilieli kengila munyumba yakwe yakugamba, “Bahoni gowinghigwe dihewa, iMundewa kahamwedu nagwe.” 29 Maliamu foyahulike galongigwe na Malaika, hakedasika lugano, na hakesina na kiyusa umulamuso uno wa aina yaki? 30 Malaika kamugamba, “Unghogohe Maliamu, kusoko kwinghiwa Dihewa na Mulungu. 31 Nagwe kokiyoha na kweleka Mwana we chigosi, na disina dyakwe kokwinangigwa Yesu. 32 Kokuwa Mukulu na kokwinangigwa Mwana wa yowile Kuchanhyasi. iMundewa Mulungu komwingha idigoda dyo undewa we Babakwe Daudi. 33 Naye kodima awanhu wa Yakobo majuwa gose na undewa wakwe ukuwa wichaka ndumo.” 34 Maliamu kamubidula Malaika yakugamba, “Yokuwa nhani mbona simanyile mugosi?” 35 Malaika kamubidula kamugamba, “Muhe Musunhile kokwijila muchanhya yako na ludole wa yowile kuchanhyasi wokugubika kosoko yo imwana yekwelekigwa kokwinangigwa musunhile, Mwana we Mulungu. 36 Kahi langa imunduguso Elisabeti muudala wakwe Kakiyoha mwana wa chigosi, na auno mwesi wa mutandatu ukwakwe ayuya yowile mugumba. 37 Kosoko chila chinhu chikudahika kwe Mulungu.” 38 Maliamu kabidula yakugamba, “Langa niye na mutumwa we Mundewa, leka yuwe ukwangu fina foulongile.” Malaika kamuleka, kaluta. 39 Ichigele chicho Maliamu hoyekinuka hoyeluta kwa chimwande mpaka isi ya fitunda, mukaya ya Yuda. 40 Kengila kugati munyumba ya Sakalia na kumulamusa Elisabeti. 41 Na Elisabeti yakahulike umulamuso wa Maliamu, ichali hachijumha munda mwa Elisabeti kwa chinyemi. Na Elisabeti hoyememeswa Muye Musunhile. 42 Elisabeti hakalonga kwa dijwi ikulu yakugamba, “Agweye kupata mboto kusuma wanawake wose na cheleko chako chipata mboto! 43 Aniye na nani mpaka ingina we Mundewa yeje kunilamusa? 44 Kosoko dijwi dyo mulamuso wako fodyengile munghutwi sangu, ichali chidodogi hachijumha kwa chinyemi mugati ye sinda sangu. 45 Nagwe Ibeka gouhuwile, kosoko gakwenda gomemelesigwe gago galongigwe ne Mundewa.” 46 Maliamu kagamba, “Umoyo wangu ukumutunya Mundewa. 47 Na muhe wangu wonela kosoko ye Mulungu mwihula wanguq 48 Kosoko kamulanga kwa ubasi mutumwa wakwe muholo, na langa kulawa hambiya awanhu wose woninanga mumoti. 49 Imulungu kanigolosela makulu na disina dyakwe disunhile. 50 Usungu wakwe kwa wanhu wakumwogoha kwa cheleko mpaka cheleko. 51 Konesa makulu kwa mukono wakwe; kawachakula awowile weyoni mufidoga fyawo. 52 Kawakinya awakulu kulawa Muundewa wawo na wakiwa kawenula, 53 Kawegutisa awene injala kwa maswanu, na wagoli kawaleka chaka, 54 Kamutasa Isilaeli imutogomi wakwe, kagelegela usungu wakwe, 55 Fina foyawatamila awakulu setu, hakalonga Abulahamu na weleko wakwe majuwa gose. 56 Maliamu yekala chigele cha minyesi midatu, kamei hoyekuya ukaya ukwakwe.” 57 Ichigele cho kidohola kwakwe Elisababeti chafika, yeleka mwana mugosi. 58 Awanhu wowile habehi naye na wanduguse fowahulike fina Mundewa kamonela ubasi, howonyemula hamwedu na Elisabeti. 59 Mwijuwa dya munana howikwija kumufina imwana, howehananga kumwingha disina dye Babakwe Sakalia. 60 Ing'inakwe kabidula kagamba, “Ng'oo! Sinheifo; ayuno kokwinangwa Yohana.” 61 Wamugamba, “Nhani hechaka wowose yakwinangwa disina dyo mulukolo lwako?” 62 Kamei hawamonesa chitangilo iBabakwe kumusa imwanagwe komwinanga nani? 63 Katasa chibao cha kwandika, hoyokwandika fina, “Disina dyakwe Yohana.” Wose howekisina. 64 No baho ni baho du mulomo wakwe hougubuligwa, hamwedu na dilimi dyakwe, hoyokonga kulonga na kumutunya Mulungu. 65 Weja wengilwa na itisi wose awekalage hamwedu nawo, na simbuli siya hosikwenela muchilunga chose che fitunda fya Yudea. 66 Na wose awahulike howegeka mufidoga fyawo wekugamba, “Imwana yuno kokuwa mwana wa nhani? kosoko umukono we Mundewa hawuwa naye.” 67 Na iBabakwe Sakalia hoyomemeswa Muhe Musunhile yekugamba, 68 “Yatunyigwe Mundewa Mulungu wa Isilaeli, kusoko kawejila wanhu wakwe, na kuwahonya. 69 Kachingha ihembe dya uhonya mwelekwa wa Daudi mutogomo wakwe. 70 Fina foyalonga kulawa kunghonga kwa njila ya wagonesi wakwe wasunhile. 71 Uleke chihonyigwe kulawa ku wanghondo wetu. Na kulawa mumikono ya awekuchisuhila. 72 Kuwonela ubasi awaBaba setu, na kudigelegela dilagano dyakwe disunhile. 73 Inyilaha yoyamwilahila iBaba yetu Ibulahimu 74 Chihonyigwe kulawa mumukono wa wanghondo wetu, chitogome chichaka kogoha. 75 Kwa usunhile ne chawelu mumeso gakwe majuwa getu gose. 76 Nagwe gomwana kokwinangwa mugonesi wa iyowile kulanga. Kusoko kulongola kumwande ye Mundewa kumugolosela sinjila sakwe. 77 Kuwatamila awanhu wose fina wahonyigwa, kwa kulekeligwa uwihi wawo. 78 Kwa njila ya ubasi we Mulungu wetu, ujelu fina wo mugingu wochijila kulawa kulanga. 79 Awaya wakwikala muchisa, awagubikigwe na dipeho dye difa, kuchilongosa mu njila ye digoya.” 80 Kamei, imwana hakakula, hoyopata ludole lwe chimuhe, hoyokwikala kunyika mpaka dijuwa dyo kwiyonesa kwakwe ku Isilaeli.
1 Muchigele chicho dilagiso dyalawa kwa Kayisali Agosito ikugamba, “Awanhu wose muchilunga wandikwe masina gawo.” 2 Aino yowa nyandikwa ya bosi yalawanise ugele wo undewa wa Kilenio yowile Mundewa wa Silia. 3 Kosoko yo wanhu wose hawaluta kwandikigwa, chila munhu ukaya ukwawo. 4 Yusufu naye hakakwila kulawa Galilaya, Mukaya ya Nasaleti kaluta Yudea mukaya ya Daudi ikwinangigwa Betelehemu, kosoko imwene ni wa lukolo lwa Daudi. 5 Hakaluta kiandikisha hamwedu na Maliamu mutumisigwa wakwe naye hakeyoha. 6 Ichigele chicho fowowile uko, majuwa gakwe gokidohola geja gafika. 7 Kamei hakedohola nhula hanju naye hakowa mugosi, kamufasa sisuke se mwana, kamugonesa ahanhu hokudiila sing'ombe, kwasoko wasapata luneka musinyumba sa wageni. 8 Na muisi iiya kweja kowa na wadimi wekwikala kwidimo ne isawo yawo hechilo. 9 Malaika we Mundewa hoyowalawila, kema hagati yawo, utunyi we Mundewa houwamulikila, nawo howokwingilwa na itisi ikulu. 10 Malaika kawagamba, “Munghogohe nikumwigalilani mbuli swamu, mbuli ya chinyemi chikulu, awanhu wose wokonela. 11 Kosoko diyelo mukaya ya Daudi kelekigwa muhonyi wenu, no Kilisito Mundewa. 12 Achino no chitangilo chenu, mokona mwana mudodogi kafasigwa suke sa chali, kagoneswa hanhu hakudiila sing'ombe.” 13 Kamei baho itewa dya Malaika kulawa kulanga, howetunya Mulungu na kwimba, 14 “Utunyi ulute kuchanhya kwe Mulungu, na Muchilunga chuwe digoya kwa wanhu woyasagule.” 15 Malaika fowaleuke na kuluta kulanga wadimi wetamila wakugamba, “Hambiya chilute Betelehemu chikone adiya dochitamiligwe ne Mundewa.” 16 Howoluta chimwandemwande, wamufika Maliamu na Yusufu na yuya imwana mudodogi kagona ahakudiila sing'ombe. 17 Howomona imwana na kuwatamila gose gowahulike soko ye imwana. 18 Wose wahulike simbuli salongigwe na wadimi hawesina lugano. 19 Ninga Maliamu hoyogeka na kugadoga gose mumoyo wakwe. 20 Awaya wadimi weja woya, akuno wekumutunya Mulungu, kosoko ya gose gowahulike na kona, ifyene fyowatamiligwe. 21 Majuwa munana gakaloke, na ugele wo kumufina haufika, howomwinanga Yesu disina dyakwe, ifene foyenangwa na Malaika kabla ya kwifunga kwe ing'ina. 22 Ugele wo kuhojoligwa kwawo ukafike, Yusufu ne Maliamu hawamulonda Yesu ne kuluta naye Yelusalemu kumwika kumwande ye Mundewa fina imisigililo ya Musa foyikulonga. 23 (Fina foyandikwe muchitabu che malagiso ge Mundewa, “Mwana nhula hanju we chigosi kokwinangigwa musunhile kwe Mundewa).” 24 Kahi hawaluta kulafa filafwa ifene dilagiso dye Mundewa fodilongile, “Huwa mbili hagela makinda ge njiwa.” 25 Ugele wuwo akuya Yelusalemu hakuwa na munhu wa chelu na yekumogoha Mulungu, disina dyakwe Simioni. Yendeyogojela kwa nghwina uhonya wa Isilaeli. Hakalongosigwa ne Muhe Musunhile. 26 Imuhe Musunhile hakamugubulila fina nghodaha kufa mpaka yamone Kilisito we Mundewa. 27 Kamei yamemesigwe no uMuhe Musunhile yamulongosa kwija kwi hekalu iBaba na ng'ina wa Yesu wamwigala kugati, kosoko wamugolosele ifina fowalagisigwe ne Mundewa; 28 Simioni yamudinghula imwana, hoyomutunya Mulungu yakugamba, 29 “Hambiya Mundewa kumulekela imutumwa wako, Yaleguke digoya ifene diwandiko dyako fodilongile. 30 Kosoko ameso gangu gona uhonya wako. 31 Ninga awanhu wose wowona uhonya wako woutandile mumeso ga wanhu wose. 32 Ujelu wa magubulo kuwamembe, na we ditunyo ku wanhu wako Isilaeli.” 33 iBabakwe ne ing'ina weja wakisina kosoko ya simbuli salongigwe soko ye imwana. 34 Simioni kuwamotesa na kumutamila Maliamu ing'ina fina, “Imwana yu kekigwa kwa kugwa na kwinuka wengi wowile Isilaeli, na chitangilo che wanhu womulema. 35 Nagwe gomwecho idipanga dyokwingila mumoyo wako uleke gagubuligwe madoga ga mimoyo itewa.” 36 Kweja kowa na Mugonesi yumwedu we chike disina dyakwe Ana mwana wa Fanueli wa lukolo lwa Asheli. Hakekala na mugosi minyaka mufunghate kulawa munhole yakwe. 37 Kahi hakasigala mwigane mpaka ugele wuwo foyowile mudala wa miyaka makumi munana na mine, nghekuleuka mihekalu ye Mulungu yekutasa kuleka kudia chigele chose. 38 Ugele wuwo hoyolawanisa, hoyomutunya Mulungu na kulonga simbuli se mwana ku wanhu wose wagojelage uhonya wa Yelusalemu 39 iBabakwe ne ing'ina fowamalile kugolosa gose fina fodyendage dilagiso, hawoya ukwawo Nasaleti mumukoa wa Galilaya. 40 Imwana hoyokula, hoyokongeseka ludole, kamema misungu, na Dihewa dya Mulungu hadyuwa umwakwe. 41 Chila mwaka iBabakwe ne ing'ina wenda weluta Yelusalemu fina fowasowele ugele we sikukuu ya Pasaka. 42 Imwana foyafika miyaka ikumi na mili, howolutanya Yelusalemu fina fowasowele. 43 Fowafulusa isikukuu, isikukuu ye Pasaka wejawakonga inhambo ya kuya ukwawo, amba Iyesu hoyosigala Yelusalemu, na iBabakwe ne ing'ina wasamanyile; 44 Awene wamanya kaumo mwitewa, howogenda mpaka dijuwa duswa, wakonga kumuhananga kuwambwiya sawo na wayawo. 45 Kosoko wasamonile, howokuya Yelusalemu kumuhananga. 46 Dijuwa dya kadatu howomufika mwihekalu kekala hagatigati ya wafusaji yakuwategelesa na kuwosa. 47 Wose wamuhulike hawesina lugano kwasoko ye misungu na mbidula yakwe swamu. 48 iBabakwe ne ing'ina fowamonile hawesina, ing'inakwe kamusa yakugamba, “Gomwana kuchitenda nhani? iBabako na niye chenda chikukongha kwa usungu.” 49 Imwene hakabidula yekugamba, “Nhani mukunihananga? Musamanyile fina inyagila kwikala munyumba ye Babangu?” 50 iBabakwe ne ing'ina wasamanyile simbuli sowatamiligwe. 51 Hoyokuya hamwedu nawo mpaka Nasaleti, hoyogendelela kuwahulika. Ing'ina hoyofundika gose mumoyo wakwe. 52 Na iYesu hoyogendelela kukula kwa misungu na chimo, hoyowendesa wanhu ne Mulungu.
1 Hawuwa mwaka wa kumi na shano wa undewa wakwe Kaisali Tibelio. Pondio Pilato hakowa Mundewa wa Uyahudi, Helode Mundewa mudodo wa Galilaya na imunduguse Filipo hakowa Mundewa mudodo wa mikoa ya Itulea na Tilakoniti; na Lusania Mundewa mudodo wa Abilene, 2 Anasi na Kayafa hawowa Makuhani wakulu. Imbuli ye Mulungu hoimwijila Yohana mwana wa Sakalia uko kunyika. 3 Kamei Yohana hoyeluta mumhelo ya ulwanda wa Yolodani. Hoyohubili ubatiso wo kulamba kosoko yo kulekeleligwa uwihi. 4 Fina foyandikwe muchitabu cha Mugonesi Isaya: “Dijwi dya munhu dihulikika kunyika, ‘Igoloseni injila ye Mundewa; gololeni injila yakwe! 5 Chila ilolo difukiswe, chila itunda na kitongo iduliswe. ahagonjile hagoloke, sinjila sihile sigoloswe na kuwa swamu. 6 Na chila munhu kowona uhonya we Mulungu.’” 7 Wanhu matewa haweja kubatisigwa na Yohana, kawosa yakugamba, “Anyeye cheleko cha majoka nani yawafundile muitije inyono ye Mulungu? 8 Mweleke mamudyo gakonesa fina mulamba, kahi munghakonge kugamba: ‘Chinaye Baba Ibulahimu,’ kosoko nikuwatamila Imulungu yakudaha kumwinulila Ibulahimu wana kulawa mumawe gano. 9 Muchigele chino inhemo ikigwa mumasina ga mabiki, idibiki disikweleka mamudyo maswamu, dikung'enyigwa na kusomigwa.” 10 Awanhu wamusa wakugamba, “Chigolose nhani seye?” 11 Hoyowabidula yakugamba, “Iyena makoti meli na yamwinghe iyechaka; na iyena chakudiya yagolose nhaifo.” 12 Awakonghosa we ikodi nawo howokwija kubatisigwa, howomusa, “Mwalimu chigolose nhani seye?” 13 Kawagamba, “Munghakongose chinhu kujumha fomusigililigwe.” 14 Awasilikali nawo howomusa wekugamba, “Ase nase chigolose nhani? Kawagamba Munghapujile munhu, kahi munghamubalalile munhu, na mwigutiswe na maliho genu.” 15 Awanhu fowowile mukugoja agelawanisa, wose wakudoga mufidoga fyawo isimbuli sa Yohana, nhegela imwene no Kilisito. 16 Yohana kawabidula yekugamba, “Aniye nikubatisa kwa meji, ninga yekwija munhu iyena ludole kujumha niye, kai aniye sagilwe kohola sisigi sa filwatu fyakwe. Ayo kowabatisa kwa Muhe Musunhile na kwa moto. 17 Diselo dyakwe dya mumukono yakwe, naye koshagila uluga lwakwe, na kukunjagisa ngano mukano yakwe, ninga amakohelele kogasoma mumoto usikusima.” 18 Kahi kwa mbuli nyingi hoyowahubilia wanhu mbuli swanu. 19 Ninga iMundewa Helode yagombelwa na Yohana kosoko yamulonda Helodia imuke we munduguse na kumutenda mukagwe, kahi no uwihi wose woyagolose. 20 Kahi Helode yongesa uwihi wakwe kwa kumoha Yohana. 21 Ninga awanhu wose wakamale kubatisigwa, na Yesu yakafuluse kubatisigwa yendeyotasa, ulanga wagubuka, 22 Kamei Muhe Musunhile yadulika muchanhya yakwe kefana njiwa, dijwi dyalawa kulanga, “Agweye no mwanangu mwendigwa wangu nyendesigwe nagwe.” 23 iYesu foyakonga umulimo wa kufusa, yowa fina minyaka makumi madatu nhafia hakamanyika fina mwana wa Yusufu wa Heli, 24 mwana Matati, mwana wa Lawi, mwana wa Meliki, mwana wa Janai, mwana wa Yusufu, 25 mwana wa Matatiya, mwana wa Amosi, mwana wa Nahumu, mwana wa Esili, mwana wa Nagai, 26 mwana wa Maati, mwana wa Matatia, mwana wa Semei, mwana wa Yoseki, mwana wa Joda. 27 Joda hakowa mwana wa Yohanani, mwana wa Lesa, mwana wa Selubabeli, mwana wa Shealitieli, mwana wa Neli, 28 Neli hakowa mwana wa Meliki, mwana wa Adi, mwana wa Kosamu yowile mwana wa Elimodamu, mwana wa Eli. 29 Eli hakowa mwana wa Yoshua, mwana wa Elieseli, mwana wa Yolamu, mwana wa Matati, mwana wa Lawi. 30 Lawi hakowa mwana wa Simoni, mwana wa Yuda, mwana wa Yosefu, mwana wa Yonamu, mwana wa Eliakimu, 31 Eliakimu hakowa mwana Melea, mwana wa Mena, mwana wa Matasa, mwana wa Nasani, mwana wa Daudi, 32 Daudi hakowa mwana wa Yese, mwana wa Obedi, mwana wa Boasi, mwana wa Sala, mwana wa Nashoni, 33 Nashoni yowa mwana wa Aminadabu, mwana wa Adimini, mwana wa Alini, mwana wa Hesiloni, mwana wa Pelesi, mwana wa Yuda. 34 Yuda yowa mwana wa Yakobo, mwana wa Isaka, mwana wa Ibulahimu, mwana wa Tela, mwana wa Naholi, 35 Naholi hakowa mwana wa Selugi, mwana wa Lewu, mwana wa Pelegi, mwana wa Ebeli, mwana wa Shela. 36 Shela hakowa mwana wa Kainani, mwana wa Alifokisadi, mwana wa Shemu, mwana wa Nuhu, mwana wa Lameki, 37 Lameki yowa mwana wa Mesusela, mwana wa Henoki, mwana wa Yaledi, mwana wa Mahalale, mwana wa Kainani, 38 Kainani hakowa mwana wa Enoki, mwana wa Seti, mwana wa Adamu yowile mwana wa Mulungu.
1 Foyamema Muhe Musunhile hoyokuya kulawa Yolodani, kalongoswa na Muhe 2 chigele cha majuwa makumi mane kunyika, yagesigwa na Luhoma. Na majuwa gose ngadiya chinhu, gakahele hakowa na njala 3 Luhoma kalonga naye yakugamba, “Nghona gweye ni Mwana we Mulungu, dilonge idiwe adi dyuwe mukate.” 4 Yesu hakamubidula, “Yandikigwa fina, ‘Munhu nghakuhuwila mukate wimwene.’” 5 Na iluhoma hoyomukwisa kuchanhya na kumunesa undewa wa muchilunga kwa chipisi chiguhi, 6 na kumugamba, “Nokwingha gweye Undewa na Ukulu wakwe ne ditunyo kosoko galafigwa ukwangu, nani nikumwingha wowose ifene fonikwenda. 7 Ninga gweye unghanifugamila, ai yose ikuwa yako.” 8 Na iYesu kamubidula yakugamba, “Yandikigwa Komufugamila, Mundewa Mulungu wako na imwene du komutogomela!” 9 Na iLuhoma hakamulonda mpaka Yelusalemu na hakamwika muchisusu che dihekalu na kumugamba, “Inghowa gweye kwa mwana we Mulungu, lagala hasi kulawa hano. 10 Fina yandikigwa, ‘Kokwingha malaika wakwe wakwimilise, 11 na mumikono yawo wokudinghula ungheje utowa mugulu wako nghwalo mwiwe.’” 12 Na iYesu kamubidula yakugamba, “Ilongigwa unghamugese Mulungu Mundewa wako.” 13 Na iLuhoma yakamale chila igesa, hoyomuleka kwa chipisi. 14 Na iYesu hakowa Galilaya yamemesigwe ne ludole lwa Muhe Musunhile, simbuli sakwe seja senela muchilunga chose cha munghanda ya Galilaya. 15 Hoyofusa mumasinagogi gawo, yatunyigwa na awanhu wose. 16 Na iYesu hoyokwija Nasaleti ahanhu hoyakulila, mwijuwa dye Sabato hakaluta kwisinagogi fina foyasowela. Hakema kosoko. 17 Na bahaya hakenghigwa chitabu cha Mugonesi Isaya. Hoyogubula ichitabu, hoyopata hanhu handikigwe, 18 “Muhe wo Mundewa kamuchanhya yangu, kosoko kanibaka mafuta kuwahubilia awakiwa mbuli swanu. Kanituma kutamila kulekeleligwa kwa amateka, kona kwa waya wasikona, kuwengha kulekeleligwa awaya awakoneligwa, 19 na kutamilisa umwaka we Mundewa ufumiligwe.” 20 Na hakagubika ichitabu, hoyomuwisila imutumishi na hoyokwikala hasi, na awanhu wose wowile mwisinagogi howomung'olela meso. 21 Hoyokonga kulonga nawo, “Diyelo ditulumo dino dimemelesigwa musinghutwi senu.” 22 Na wose hawalonga fiswanu kosoko yakwe na kwisina simbuli swanu silawile mumulomo wakwe; nawo hawagamba, “Ayu si mwana wa Yusufu?” 23 Kawatamila, “Hechaka manhonge fina molonga nonga ayi, ‘Gomuganga kihonye gomweecho, gose gochihulike kugolosa Kapelinaumu, golosa hano naho haisi yako gomweecho.’” 24 Na iYesu hakawagamba, “Chawelu nikumutamilani, hechaka Mugonesi iyekufumiligwa muisi yakwe. 25 Ninga, chawelu nikumutamilani, hakuwa na wegane wengi Muislaeli ugele wa Eliya, ugele ulanga fowohigwa miyaka midatu na miyesi mutandatu bila kutonya fula. Muchigele chicho njala nghulu haingila muisi, 26 na Eliya nghatumigwa kwa yoyose, amba kwa Seleputa, muisi ya Sidoni, kwe mwanamuke yowa mwigane. 27 Na hahowa na awena ukoma matewa Muislaeli ugele we Mugonesi Elisha, na hechaka yoyose yasunhigwa, ila Naamani wa Siliya.” 28 Ninga fowahulike gago, hawadeseka wose wowile mwisinagogi. 29 Nawo howekwinuka na kumulafa kunje ye ikaya, na kumulongosa ditwi kung'enge ye chitunda chajengigwe ikaya yawo, kosoko wamukubite hasi, 30 Ninga imwene kapuluta mugatigati yawo hoyoleuka. 31 iYesu hoyohulumuka Kapelinaumu, kaya yuwile Galilaya. Na yenda yewafusa mwijuwa dye Sabato. 32 Nawo hawesina kosoko ye mafusa gakwe, simbuli sakwe hasuwa na udaha. 33 Na mwisinagogi mowa na munhu yena magini, hoyolila kwa ijwi ikulu, 34 “Koo! China choni na gweye Yesu Munasaleti? Kwija kuchimalagisa? Nikumanya kwa nani gweye, Musunhile we Mulungu.” 35 Yesu kaigombela imhepo yekugamba, “Nyamala na umulawe. Na yakakinyigwe hasi ne imhepo mugatigati ya wanhu, imhepo hoilawa, ninga isimugolose dihile.” 36 Na wose hawesina wakilongelesa wakugamba, “Aino mbuli yaki? Kosoko kwa udaha na ludole yakugombela simhepo sihile naso sikulawa.” 37 Simbuli sakwe seja senela chila hanhu munghandanghanda ye iisi iya. 38 Hakenuka na kuleuka mwisinagogi, hoyokwingila munyumba ya Simoni. Ninga imukwewe Simoni hakowa mutamu, yakoligwa na ipwipwi ikali, na howomutasa kosoko yakwe. 39 Hoyokwima hanghanda yakwe, hoyedigombela dipwipwi, na hodimuleka, na chimwande hoyokwinuka na kuwatogomela. 40 Ninga dijuwa dikoswe, awanhu wose wowile na watamu, howomwigalila awanhu wose awakutamwa sinhamu mbalimbali; naye hoyokwika mikono yakwe muchanhya ya chila mutamu hoyowahonya. 41 Na simhepo naso hasiwalawa matewa, hositowa chowe, “Agweye kwa mwana we Mulungu!” Ninga hoyosigombela na nghasifumise kulonga, kosoko hasimumanya fina no Kilisito. 42 Housiku yakwe dijuwa dikalawe, hoyoleuka na kuluta ahanhu hachinyele. Awanhu howomuhananga na kwija ukwakwe, howokwenda kumulemesa kuleuka ukwawo. 43 Ninga hayowagamba, “Inyagila kuhubili imbuli swanu ya undewa we Mulungu musikaya singi kahi, kosoko iyo hanitumigwa.” 44 Na yenda yefusa mumasinagogi ga Yudea.
1 Ugele awanhu wakelunde na kumumemelela kutegelesa imbuli ye Mulungu, hakowa yemile munghanda ya dilamba dya Genesaleti. 2 Na hakona minhumbwi mili habehi na dilamba, ninga awalowa somba hawalawa muminhumbwi na wenda wesunha sinyafu sawo. 3 Hakakwila mumunhumbwi umwedu no wakwe Simoni, hakamutasa yawile mumeji kidogo kulawa kunghingi. Na hakekala na kuwafusa wanhu kulawa mumunhumbwi. 4 Yakafuluse kulonga, hoyomugamba Simoni, “Guma kuchiligati, na ulafe sinyafu sako ulowe somba.” 5 Simoni hoyobidula, “Mundewa chigolosa kasi yo kusokesa chilo chose chinghapate chinhu. Ninga kwa imbuli yako nohulumusa sinyafu.” 6 Ninga wakahulumuse sinyafu, hawapata somba nyingi lugano, sinyafu sawo hosikonga kudumuka. 7 Hawawenanga awayawo wowile mumunhumbwi wa keli weje kuwatasa. Haweja na kumemesa minhumbwi yose mili, ninga haikonga kusama. 8 Ninga Simoni Petulo yakone nhaifo, hakogwa mumigulu ya Yesu yakugamba, “Leuka ukwangu go Mundewa, kosoko aniye na munhu wa wihi.” 9 Kosoko hakesina imwene hamwedu na waya wowile naye kosoko ya uwingi we sisomba sowapatile; 10 na baho kahi weja wowa Yakobo na Yohana, wana wa Sebedayo, wowile wayagwe wa Simoni Petulo. Na iYesu hoyomutamila Simoni, “Unghogohe kulawa hambiya kokuwa mulowa wanhu.” 11 Nawo fowafuluse kwigala minhumbwi yawo kunghingi, howoleka fyose na kumwandamila. 12 Ugele foyowile mukaya imonga, baho keja munhu iyena ukoma, na foyamonile Yesu yogwa funama kededela yakugamba, “Mundewa nghona ukuhananga ukudaha kunihonya.” 13 Naye yagolola umukono wakwe hoyomukwafa yakugamba, “Nikuhanga, hona baho ni baho ukoma houhona.” 14 Na hakamulemesa yanghamutamila munhu, ninga, “Luta gomweecho ukeyonese kwa mutambiki, na ukalafe digelo fina foyalongile Musa uwe uhomelesi ukwawo.” 15 Ninga simbuli so seja senela lugano kola hanhu na matewa mengi hawetang'anyila kutegelesa na kuhonyigwa sinhamu sawo. 16 Imwene hoyoleuka hoyoluta kunyika kutasa. 17 Mwijuwa dimonga dya majuwa gago, foyendeyefusa, heja howa na Mafalisayo na walimu we malagiso wekale naye, awo nowejile kulawa chila kaya ya Galilaya, na Yudea na kulawa Yelusalemu, na uludole lwe iMundewa hauwa naye kuhonya. 18 Langa, wanhu hawegala munhu yaholole mwisasi, wahananga wamwingise kugati na kumwika kumwande ya Yesu. 19 Ninga fowonile hechaka njila ya kumwingisa kosoko ya matewa, howokwila munyumba muchanhya howotobola na kumwingisa na disasi dyakwe kupulutila mukano mpaka kugati kumwande ya Yesu. 20 Yakone dihuwi dyawo hakagamba, “Mwanangu uwihi wako ulekeleligwa.” 21 Na Watulumi na Mafalisayo howakonga kiyusa, wakugamba, “Ayuno nani yakulonga lubeso? Nani yakudaha kulekelela uwihi ninga Mulungu yemwene!” 22 Ninga Yesu hakatanga amahweso gawo hakawagamba, “Nhani mukihwesa mumimoyo yenu?” 23 Imhufu no ihoki? Kugamba, “Kulekeleligwa uwihi wako ama kugamba leuka ulute?” 24 Ninga uleke mumanye fina mwana we munhu kena udaha muchilunga wa kulekelela uwihi. Hakalonga ne munhu yaholole, Nikukugamba, “Inuka winule disasi dyako ulute ukaya.” 25 Baho ni baho kenuka kumwande yawo, na hakalonda achiya choyagonele, na kuluta ukaya akuno yakumutunya Mulungu. 26 Na itisi ikulu hadiwengila wose, na hawamutunya Mulungu na hawamema lutwitwi wakugamba, “Diyelo chona mbuli ya ijumo.” 27 Hoyoleuka na kumona mukonghosa kodi yakwinangigwa Lawi, kekala ahanhu ho kulihila kodi, hoyomugamba, “Nyandamile.” 28 Na hoyoleka fyose, na kumwandamila. 29 Na Lawi hoyomugolosela chakudiya chikulu ukaya ukwakwe, na heja howa na mulundo mukulu wa wakonghosa kodi na wamonga wekale mumesa na wene. 30 Amafalisayo na Watulumi wawo hawawakalalilaga awefusa wakwe wakugamba, “Nhani mukudiya na kunywa hamwedu na wakonghosa kodi na wena uwihi?” 31 Yesu hoyowagamba, “Awomi wasikumuhananga Muganga, ninga awaya iwatamu.” 32 Sijile kuwenanga awaswanu ninga awena uwihi wadahe kulamba. 33 Na hawamugamba, “Awefusa wa Yohana wakufunga mikangha mingi na wakutasa, nheifo awefusa wa Mafalisayo, ninga awako wakudiya na kunywa.” 34 Na iYesu hakawagamba, “Mukudaha kuwagolosa awageni we halusi wohe ugele imwenye halusi kahamwedu nawo? 35 Amajuwa gokwija, hona imwenye halusi yekuleusigwa ukwawo, noho wakwenda wafunge mumajuwa gago.” 36 Kawatamila mbasi yakugamba, “Hechaka munhu iyekudega ndame ya suke nyisha na kuguma musuke ing'ono, yanghagolosa nhaifo, yakudega inyisha, na indame kulawa inyisha fisikiyagila na ing'ono. 37 Kahi hechaka munhu yakuguma difai nyisha mufiliba filalile, yanghagamba yagume idifai nyisha, yotula ifiliba na difai yokitika na ifiliba fyobanika. 38 Ninga idifai nyisha ikuhanangigwa igumigwe mufiliba fisha. 39 Kosoko hechaka munhu yakunywa difai yakatali hoyosulumila difai nyisha, kosoko yakugamba, ‘Chakatali kiswanu.’”
1 Mwijuwa dye Sabato Yesu foyendayogenda mumigunda ye ngano, awefusa wakwe wadudula masamhu, wafigisa mumikono yawo wa kudiya. 2 Ninga awamonga wa Mafalisayo wagamba, “Nhani mukugolosa chinhu chene chilemesigwe mwijuwa dye Sabato?” 3 Yesu hoyobidula, “Musisomile adiya dyo yagolose Daudi foyowile na njala, imwene hamwedu na waya awowile naye. 4 Foyengile munyuma ye Mulungu hoyolonda imikate ya konesa na kudiya, yene si fiswamu kudiigwa na wowose ninga Makuhani, kahi hoyowengha awaya woyowile nawo.” 5 Hoyowagamba, “Imwana we munhu no Mundewa we Sabato.” 6 Mwijuwa dingi dye Sabato, foyendae kwingila Mwisinagogi na kufusa, heja howa na munhu yaholole umukono wakwe wo kulume. 7 Na Watulumi na Mafalisayo weja wamunyembela, kona fina komuhonya mwijuwa dye Sabato, kosoko wapate mbuli ya kumusongesa. 8 Ninga hoyotanga madoga gawo, hakamugamba ayuya iyena umukono uholole, “Wije wime hano.” Hakenuka na kwima haya. 9 Na Yesu hakawagamba, “Nikuwosani togoleni! Ikuhanangigwa dijuwa dye Sabato kugolosa maswamu ama gehile? Kuhonya ugima ama kuubana?” 10 Hakawakongholela meso wose, na kumugamba ayuya imunhu, “Golola umukono wako. Hakagolosa nheifiya na umukono wakwe hauhona.” 11 Ninga weja wamemwa na nyono na kiyusa wene kwa wene wamugolose nhani Yesu. 12 Mumajuwa gago hakakwila kufitunda kutasa; hakatasa kwe Mulungu chilo chose. 13 Hosiku yakwe hakawenanga wefusa wakwe, na kuwasagula ikumi na weli kulawa mwiwefusa wawo, hakawenanga watumigwa; 14 Simoni, yamwinanga disina dya keli Petulo, na Andelea imunduguse, na Yakobo na Yohana, na Filipo na Batolomayo, 15 na Matayo, na Tomasi na Yakobo imwana wa Alufayo, na Simoni yenangigwe Selote, 16 Na Yuda mwana wa Yakobo, na Yuda Isikalioti yabiduke kuwa musongesi. 17 Hoyohulumuka nawo na kwima hanhu hatindimale, hamwedu na itewa dya wefusa wakwe na matewa ga wanhu walawile Yudea yose na Yelusalemu na mhwani ya Tilo na Sidoni, awejile kumutegelesa na kuhonyigwa sinhamu sawo, 18 na wose wedasigwagwe na simhepo sihile weja wahonyigwa. 19 Na amatewa wose hawahananga kumukwafa, kosoko uludole wenda umulawa kuwahonya wose. 20 Yesu hakenula meso gakwe hoyowalanga awefusa wakwe na kugamba, “Ibeka nyeye muwakiwa; kosoko undewa wa Mulungu ni wenu! 21 Ibeka nyeye mufungile hambiya; kosoko mokigutisigwa! Ibeka nyeye gomukulila hambiya; kosoko moseka! 22 Ibeka nyeye awanhu wanghawasula, kahi wanghawabagula, na kuwaliga na kuwabanila disina dyenu fina mbuli ihile kosoko ye Mwana we Munhu! 23 Sekeleleni dijuwa diya na kujumhajumha kosoko digelo dyenu ikulu kulanga, kosoko awaBaba sawo weja wawagolosa nhaifo awagonesi. 24 Ninga usungu wenu anyeye muwagoli; kosoko mufulusa kupata imhoso yenu! 25 Usungu wenu gomwigute hambiya; kosoko mokona njala! Usungu wenu anyeye gomukuseka hambiya; kosoko molombola na kulila! 26 Usungu wenu awanhu wose wanghawatogola; kosoko awaBaba sawo hawawagolosela nhaifo awagonesi wa udasi.” 27 “Ninga nikumutamilani anyeye mukunitegelesa, wendeni wanghondo wenu, muwagolosele maswamu awaya wakumusulani, 28 muwamotese awaya wakuwaligita, mutase kosoko ya waya wakuwabesa. 29 Kwa yuya yakukutowa munjeje mubidulile na ya keli, na yuya iyakulonda dikoti dyako unghamulemese inghasu nhaifiya. 30 Mwinghe chila munhu iyakukutasa, na iyakupokola finhu fyako unghahanange yakuwisile. 31 Na fina fomukuhananga wanhu wawagolosele anyeye, muwagolosele nhaifo. 32 “Nghona mukuwenda awaya awakuwenda nyeye, mukonesa uswamu waki? Kosoko hata awena uwihi wakugolosa nhaifo. 33 Na nghona mukuwagolosela uswamu awaya wakuwagolosela maswamu, mukupata igelo dyaki? Kosoko hata awena uwihi wakugolosa nhaifo. 34 Na nghona mukuwakopesha awaya wene womumanyile fina mohokela, mukugolosa uswamu waki? Hata awena uwihi wakuwakopesha awena uwihi kuhokela kahi. 35 Ninga wendeni awanghondo wenu, goloseleni fiswamu, kopesheni bila kugojela chochose kulawa ukwawo, na digelo dyenu dyokuwa ikulu na mokuwa wana wa ye kuchanhyasi, kosoko imwene muswanu kwa awasikumulumba na awakiyenda wenyecho. 36 Muwe na ubasi, ninga fina iBaba yenu foyena ubasi.” 37 Munghalamule; nanye musilamuligwa, munghatofule; nanye musitofuligwa, mulekelele; nanye molekeleligwa. 38 Wengheni; nanye mokwinghigwa chipimo chiswamu cha kumema na kukandisa na kusingisigwa hata kwitika chokwikigwa muchifa chenu. Kosoko ichipimo chomukulafa no chicho chomukupimiligwa. 39 Kahi hoyowatamila mbasi, “Togoleni! Imudula kodaha kumulongosa Mudula? Wasihubugila wose mwikolongo? 40 Imwifusa nghakumusuma imwalimu wakwe, ninga kila munhu yanghafusigwa fiswanu yakuwa fina imwalimu wakwe. 41 Nhani ukuchona ichibasi chuwile mwigiso dye munduguso, ninga nghukutanga dibiki dyuwile mwigiso dyako gomwecho? 42 Ama kodahaje kumugamba imunduguso, sekulu, leka nileuse ichibasi chuwile mwigiso dyako, nagwe gomwenecho nghukudyona dibiki duwile mwigiso dyako? Agwe wechimwefe! Konga kuleusa dibiki mwigiso dyako, baho kokona fiswamu kuleusa ichibasi chuwile mwigiso dye imunduguso.” 43 “Kosoko hechaka ibiki iswamu dikweleka mamudyo gehile, kahi kwichaka ibiki dihile dikweleka mamudyo maswamu. 44 Kosoko chila ibiki dikumanyika kwa mamudyo gakwe, kosoko amasada sigakubawigwa mumiwa, kahi sisabibu sisikubawigwa kulawa mumisega. 45 Imunhu muswamu kulawa musigafu ya umoyo wakwe yakulafa maswamu, na imunhu yehile kulawa musigafu ya uwihi wakwe yakulafa gehile; kosoko kulawa gaya agemile mumoyo wakwe umulomo wakwe ukulonga.” 46 “Nhani mukuninanga, ‘Mundewa,’ Mundewa, na musikugolosa agaya gonikumutamilani? 47 Chila munhu yekwija ukwangu na kuhulika simbuli sangu na kusigolosa nomutamilani foyakuliganiswa: 48 Yakuliganiswa na munhu yakujenga nyumba, iyakukata mpaka kusi, na kwika inghindiso mwiwe. Amafaluko gangheja, ameji gakutowa munyumba na gasikudaha kuisingisa kosoko ijengigwa fiswanu. 49 Ninga ayuya yakuhulika na kuleka kusigolosa kakifana munhu yakujenga nyumba mwisanga bila nghindiso, ameji gakuitowa na kuibena, na baho ni baho ikugwa, na inyugwa yakwe ikuwa nghulu.”
1 Foyafuluse kuwatamila gaya goyendage wanhu wahulike, hakengila Kapelinaumu. 2 Ninga Chilongosi wa wasilikali igana hakowa na mutumwa yowile mwendigwa wakwe, hakowa mutamu habehi na kufa. 3 Foyahulike simbuli sa Yesu, hakawatamila wasehe we Chiyahudi kumutasa yeje na kumuhonya imutogomi. 4 Nawo fowejile kwa Yesu howokidedela wakugamba, “Yendesigwa umugolosele dino. 5 Kosoko yakuwenda wanhu wetu na kachijengela disinagogi dyetu.” 6 Na Yesu hakaluta nawo. Foyowile habehi ne inyumba, “Ichilongosi wa wasilikali igana hakatuma wambwiya ukwakwe wakugamba Mundewa unghakiidase, kosoko aniye sagiligwe agweye wingile hasi he ikano yangu, 7 kosoko iyo hanikiyona sagiligwe nimwenecho kwija ukwako. Ninga longa mbuli du na imutumwa wangu yakuhananga yahone. 8 Kosoko ani nani na munhu mukulu nina wasilikali hasi yangu, na nighamulonga yumwedu, ‘Luta na yakuluta,’ na kwa yumonga, ‘Nyagula na yakwija,’ na kwa mutumwa wangu, ‘Golosa dino na yakugolosa.’” 9 Foyahulike nhaifo, Yesu hoyekisina lugano kosoko yakwe, hoyobiduka na kuwatamila matewa wamwandamilage, “Nikumutamilani hata Muisilaeli singhati nyone ihuwi fina dino.” 10 Na waya watumigwe fowowile ukaya, hawamufika imutumwa yuya mumi togi. 11 Chigele chiguhi hakaluta mukaya imonga ikwinangigwa Naini, hamwedu na wefusa wakwe na itewa ikulu hadikilongosa naye. 12 Foyeja yasegelela mumulango umukulu we ikaya iya, langa munhu yafile yenda yelafigwa kunje, ni mwana ye imwene we ing'inakwe yowile mwigane, na itewa ikulu kulawa kukaya iya hawowa naye. 13 Na iMundewa yakamone, hoyomonela ubasi hakamugamba, “Unghalile.” 14 Hoyokwija na kudikwafa dijenesa na waya wadipikile howokwima, hoyogamba, “Gomujelelo nikulonga na gweye, inuka.” 15 Na yuya yofile hoyekwinuka na kukonga kulonga, Yesu hoyomwingha ing'ina we imujelelo. 16 Itisi hadiwengila wose, na hawamutunya Mulungu wakugamba, “Mugonesi mukulu kalawanisa mugati yetu na Mulungu kawejila wanhu wakwe.” 17 Imbuli ayo hoyikwenela muisi yose ya Uyahudi na muisi sose sa munghanda yakwe. 18 Awefusa wa Yohana hawamutamila gose gano. 19 Yohana hakawenanga wefusa wakwe weli, hakawatuma kwa Mundewa wamuse, “Agweye no yuya iyekwija hegu chimugoje yungi?” 20 Kamei awanhu waya fowejile ukwakwe hawagamba, “Yohana Mubatisaji kachituma ukwako yakugamba, ‘Agweye noyuya yakwija hegu chimugoje yungi?’” 21 Muugele uya hoyowahonya wanhu matewa na sinhamu sawo, na sinhato sawo, na magini gehile, na wengi wowile wasikona hakawowisila kona kwawo. 22 Yesu hakagamba, “Luteni mukamutamile Yohana agene gomukona na kuhulika: Mudula wakona, fiwete wakugenda, wakoma wakusunhigwa, na fihuli wakuhulika, wafile wakwinuligwa, awakiwa wahubiligwa mbuli swamu. 23 Ibeka imunhu iyechaka manhonge kosoko yangu.” 24 Awatumigwe na Yohana wakaleuke, hakakonga kulonga na amatewa muchanhya ya Yohana. “Hamulawa kuluta kunyika kulanga choni?” Chibwade chikusingiswa ne imheho? 25 Ninga hamuluta kulanga choni? Munhu yafasigwe suke swamu? Langa, awaya wakufala sisuke se ditunyo na kwikala kwa kubwedelela wowa musinyumba sa undewa. 26 Ninga hamuluta kwija langa choni? Mugonesi? Heye! Nikumutamilani mukulu kusuma mugonesi. 27 Ayo yoyaandikiligwa gano, langa nikumwigala mutumigwa wangu kumwande yako yakugolosele injila. 28 Nikumutamilani mu wanhu wose welekigwe na wanawake hechaka mukulu kusuma Yohana, hata nheifo ayuya imudodogi mu undewa wa Mulungu ni mukulu kujumha Yohana. 29 (Fowahulike gago awanhu wose na wakonghosa kodi hawamufumila Mulungu, na kutunya kubatisigwa ubatiso wa Yohana; 30 Ninga Mafalisayo na walamusi we malagiso weja walema inyenda ye Mulungu ukwawo, kosoko wasabatisigwe na Yohana.) 31 “Nowaliganisa na choni awanhu wa cheleko chino? Nawo wakifana choni? 32 Wakifana wana awekale kwigulilo na kiinanga, ‘Hachiwatowela filimbi, nanye musafinile! Chiwembila nyimbo sa usungu, nanye musililile!’ 33 Kosoko Yohana Mubatisaji keja nghakudiya mukate na kunywa difai, hamugamba, ‘Kena magini!’ 34 Mwana we munhu keja yakudiya na kunywa, na mukugamba Langeni muhongho yuno na mulefi! Mbwiya yawo wakonghosa kodi na wena uwihi! 35 Ninga imisungu ikufumiligwa na wanagwe wose.” 36 Mufalisayo yumonga hoyomugoneka kudiya hamwedu naye, hoyoluta kunyumba ye Mufalisayo, na kwikala hamesa. 37 Kahi imwanamuke we ikaya iya iyeja yowa na uwihi, foyahulike fina hakekala mumesa munyumba ye Mufalisayo, hoyokwigala chichupa cha mafuta ge imhungile. 38 Kamei foyemile hanyuma yakwe hamigulu ya Yesu, hakalila, hakakonga kumutwinhesela imigulu yakwe na masosi, na kuihamusa na sinjwili sa muditwi dyakwe, na kuinonela migulu yakwe na kuibaka agaya mafuta ge mhungile swanu. 39 Hambiya Imufalisayo yuya yamugoneke yakone nhaifo, yalonga mumoyo wakwe, “Imunhu ayu mhali ni Mugonesi hakowa yakutanga fina imwanamuke yuno no nani kahi kanhani! Ayuya yakumukwafa, fina ni munhu wa uwihi.” 40 Kamei iYesu kamubidula kamugamba, “Simoni, nina chinhu cha kulonga na gweye.” Naye hoyomubidula, “Chinhu chaki Mwalimu?” 41 Yesu hakawagamba, “Mukopeshaji wa mapesa yumwedu yeja yowa na wanghokwa wakwe weli, yumwedu yakopa magana mashano, na wakeli makumi mashano. 42 Fowadugile kuliha hoyowalekelela wose. Hambiya yehoki yemwendesa yuya imukopeshaji?” 43 Simoni kamugamba, “Nikudoga fina ayuya yalekeleligwe inghokwa inghulu.” Hoyomugamba, “Kulamula fiswamnu.” 44 Baho hakamubidukila imwanamuke, yakumugamba, “Simoni ukumona imwanamuke yono? Ningila munyumba yako, nghuninghile meji ga kunawa migulu yangu, ninga yuno kanidonhesa migulu yangu na masosi na kuihamusa na sinjwili sakwe. 45 Nghuninonele, ninga ayuno kulawa fonengile nghalekile kuninonela migulu yangu. 46 Nghunibakile mafuta ditwi dyangu, ninga imwene kanibaka migulu yangu na mafuta ge mhungile swanu. 47 Kosoko iyo nikumutamilani, kalekeleligwa uwihi wakwe wowile mwingi, kosoko hakenda lugano, ninga iyakulekeleligwa chidodogi yakwenda chidodogi.” 48 Hoyomugamba, “Uwihi wako ulekeleligwa.” 49 Kahi awaya wowile naye hamesa hawakonga kihwesa, “Ayuno no nani yakulekelela hata uwihi?” 50 Na hakamugamba imwanamuke, “Dihuwi dyako dikuhonya. Genda mheho.”
1 Kulawa baho hoyoleuka kugendela mumakaya ne fijiji, yekuhubili na kwigala mbuli swanu ya undewa we Mulungu. Na waya ikumi na weli hawowa hamwedu naye. 2 Kahi wanawake wamonga awahonyigwe kwa kulafigwa simhepo na sinhamu. Maliamu yanangigwe Magidalena, yalafigwe simhepo mufungate, 3 na Yoane imuke wa Chusa mutumwa wa Helode, na Susana, na wamonga wengi wawatogomele kwa isawo yawo. 4 Amatewa wakeje hamwedu na wanhu kulawa kaya kwa kaya, hakalonga kwa mbasi. 5 “I muhandi hakaleuka kuhanda imbeyu, kamei foyahandage, simonga hasilagala munjila, na wagendanjila hawasijata, na fidege hofisidiya. 6 Na simonga hosilagala mwikangalawe, na fosakulile, hasinyala kosoko hasiswela ujolo. 7 Na simonga hasilagala mumiwa, na imiwa haikulanaso na kusikanhamisa. 8 Na kamei simonga hasilagala muulongo muswamu na kukula na kweleka kocho! Iyena singhutwi sa kuhulika na yahulike.” 9 Kamei wefusa wakwe wakamuse difuso dye imbasi, 10 hakawagamba, “Anyeye mwinghigwa udaha wa kumanya ififiso fye undewa we Mulungu, ninga kwa wamonga ukutamiligwa kwa mbasi, kosoko wanghalanga wanghone na wanghahulika wanghamanye.” 11 “Difuso dye imbasi nodi: Imbeyu no imbuli ye Mulungu. 12 Awaya we habehi ne injila no waya waihulike imbuli, ninga Iluhoma yakwija na kuilonda imbuli kulawa mumimoyo yawo, kosoko wangheje wehuwila na kuhona. 13 Awaya wowile mwikangalawe no waya wene fowakuhulika imbuli, wakuihokela kwa chinyemi, ninga wano wechaka misisi, wakuhuwila kwa chigele chiguhi na ugele wa magesa wakugwa. 14 Asiya salagale mumiwa, no waya wakuihulika imbuli, ninga fowakugendelela wakukanhamisigwa na ugoli we chilunga, na mamudyo gawo gasikukangala. 15 Na kwa siya silagale muulongo muswamu, awo no waya waihulike imbuli, na kuikola mumimoyo yawo miswamu na kweleka mamudyo kwa ufinyilisi wawo.” 16 “Hechaka munhu yekwasa taa na kuigubika ama kuigubika na idebe, ninga yakuika muchigwaso, kosoko awekwingila wadahe kona ujelu wakwe. 17 Hechaka mbuli ifisigwe uleke ikakiyonese, kahi chinhu che chifiso chisimanyika na koneka hajelu. 18 Mulangisise gomukuhulika, kosoko iyenacho kokwinghigwa, na iyechaka hata chiya choyekudoga kenacho kohokigwa.” 19 Kahi ing'inakwe Yesu ne wanduguse howomwijila, ninga wasafikile ukwakwe kosoko ye ditewa. 20 Hakatamiligwa, “Ing'inako ne wanduguso wema kunje, wakuhananga kukona.” 21 Hoyowabidula, “Ing'inangu na wandugu sangu no waya awakuhulika mbuli ye Mulungu na kuigolosa.” 22 Ijuwa dimonga Yesu na wefusa wakwe hawakwila mumunhumbwi, hakawagamba, “Lekeni chiloke umwambu ye dilamba.” Howoleuka. 23 Na ifene fowalutage Yesu hakakoligwa na nhongo na kugona. Na imheho yo luputa hoitowa mwilamba, ameji hagakonga kumema mumunhumbwi, na hawowa habehi kudidimila. 24 Hawaluta na kumwinusa wakugamba, “Mundewa, Mundewa! Chikufa!” Kamei hakenuka na kuigombela imheho na mawingo gajojage, hofinyamala na kuposika posi. 25 Hoyowagamba, “Dihuwi dyenu dyuwahi?” Hawogoha, na kisina wekulonga chila munhu na miyagwe, ninga yuno munhu waki? Iyakugombela hata imheho na meji, nafyo fikumuhulika! 26 Kahi howofika muisi ya Wagelasi yuwile umwambu wa Galilaya. 27 Foyajatile hasi kulawa mumumhumbwi, hakatang'anyila na munhu kulawa kwikaya yowile na mhepo, kwa chigele chitali nghafalile suke, nghekalage munyumba ninga mufilalo. 28 Foyamonile Yesu, hakatula chowe na kugwa kumwande yakwe, na kutowa lwangi, “Choni choukuhananga unigolose, Yesu Mwana we Mulungu iyekuchanhyasi? Nikukutasa unghanisambase.” 29 Kosoko Yesu yasidindilisa si mhepo kumulawa imunhu yuya. Ugele mwingi hasimukola, hakemilisigwa, na kohigwa kwa minyolo na simhingu, ninga hakedumula minyolo ne simhingu na kulongoswa na magini. 30 “Ninga Yesu hayamusa Disina dyako nani?” Hoyogamba, “Itewa,” kosoko mhepo itewa hasimwingila. 31 Kahi hasikinenela yanghasilafe na kuluta kwikolongo. 32 Baho heja howa na itewa dya nguluwe dikudima muluduli, simhepo hasikinenela yasileke singile musinguluwe. Hoyofumila. 33 Simhepo hosilawa kwe imunhu na kwingila kusinguluwe, kamei ditewa hodikulumhuka kuluduli lwe inghingi ye dilamba na kunywa munghabu. 34 Awadimi wakone dyalawanise, hawatija, na kutamilisa mwikaya na mufijiji. 35 Awanhu watamiligwe hawaleuka kulanga dyalawanise, na kwija kwa Yesu, howomufika ayuya yalafigwe simhepo yekale mumigulu ya Yesu, kafala suke na mahala gakwe maswamu, na howokogoha. 36 Awaya wonile hawawatamila foyowile ayuya yakoligwe ne simhepo na fene foyahonyigwe. 37 Na wanhu wose wa si isi sa munghanda ya Genesaleti hawamutasa yaleuke ukwawo kosoko hawengiligwa na itisi ikulu, baho hakengile mumunhumbwi na kuya. 38 Imunhu yalafigwe simhepo hakakinenela fina yamwandamile Yesu, ninga Yesu nghamufumise ila kamugamba, 39 “Yuya ukaya ukwako, ukatamilise fina Imulungu foyakugolosele.” Hoyoluta na kwanjasa mwikaya dyose fina foyagoloseligwe na Yesu. 40 Ninga iYesu yakoye, awanhu wose hawamuhokela kosoko wose wenda womugojela. 41 Baho hakeja munhu disina dyakwe Yailo, yowile mukulu we disinagogi, hoyofugama hamigulu ya Yesu, hoyomutasa kwija ukaya ukwakwe, 42 kosoko hakowa na mwanagwe yemwene we chike, yena minyaka ikumi na mili nhafi, naye hakowa mutamusi. Foyaluta awanhu hawelunda kumusunguluta. 43 Na imwanamuke yowile na utamu wo kulawa sakame kwa minyaka ikumi na mili na hechaka munhu yadahile kumuhonya. 44 Hoyokwija kulawa kunyuma ya Yesu na kukwafa dihepu dye isuke yakwe, na baho ni baho inhamu yakwe hoihona. 45 Yesu hoyogamba, “Nani yanikwafile?” Wose fowakanile Petulo hakagamba, “Mundewa, amatewa wakusunguluta na kukuumbilila.” 46 Ninga Yesu hoyogamba, “Yumonga kanikwafa, kosoko nyona fina ludole lunilawa.” 47 Na imwanamuke yakone fina nghodaha kifisa hakeja yakutetema na kugwa kumwande yakwe na kumutamila mumeso ga wanhu wose ichilekile yomukwafa na ifyene fyoyahonile baho ni baho. 48 Yesu hoyomugamba, “Mudala dihuwi dyako dikuhonya, genda mhepo.” 49 Foyalongage gago, munhu kulawa kwe mukulu we disinagogi keja na kugamba, “Imundele wako kafulusa kufa, unghamwidase Mwalimu.” 50 Ninga Yesu foyahulike gago hakamubidula, “Unghogohe, huwila du, naye kokuwa muswamu.” 51 Foyafika ukaya nghamufumile munhu wowose kwingila naye kugati, ninga Petulo na Yohana na Yakobo na iBabakwe ne ing'ina we imwana. 52 Na wose wendewolila na kuhongesa, ninga hoyogamba, “Munghalile; kosoko nghafile ila kagona.” 53 Howomuseka, kosoko hawamanya fina kofa. 54 Ninga hakamukola na umukono wakwe, na kumwinanga yakugamba, “Gomwana inuka.” 55 Umuhe wakwe howumuwila, na kwimanyima chimwande, Yesu hakalagisa yenghigwe chakudiya. 56 iBabakwe ne ing'ina hawakisina lugano; ninga hakawalemesa wanghamutamile munhu wowose agalawanise.
1 Yesu hakawenanga awefusa ikumi na weli na kuwengha ludole na udaha muchanhya ya simhepo na kuhonya sinhamu. 2 Hakawatuma awefusa kuhubili undewa we Mulungu na kuhonya. 3 Hakawagamba, “Munghalonde chochose kosoko ya inhambo yenu, si mhando kahimukoba kahimukate kahidipesa,” na munghowe na makasu meli. 4 Munyumba yoyose yomukwingila, mwikale baho, na kulawa baho mugendelele ne inhambo. 5 Na ikaya yoyose yene ina wanhu wasikuwahokela, fomukuleuka mukaya iyo kunghunheni amanghundi gowile mumigulu yenu chuwe chitangilo ukwawo. 6 Howoleuka na kugendela mufijiji, wakutamilisa mbuli swamu na kuhonya chila hanhu howagendile. 7 Kahi iMundewa Helode hakahulika gose gagoloseke, hakedasika kosoko hailongigwa na wamonga fina, “Yohana kenuligwa kulawa mudifa.” 8 na wamonga, “Eliya hakeyonesa, na wamonga yumwedu wa Wagonesi wakatali kenuka.” 9 Helode hoyagamba, “I Yohana hanimudumula ditwi, ninga ayuno nani yene ifinhu fya itisi?” Hoyohananga kumona. 10 Munyuya yawo awatumigwa hawamutamila gowagolose. Yesu hoyowalonda awefusa ikumi na weli na kuluta kukaya yenangigwe Betisaida. 11 Amatewa wakahulike howomwandamila, hoyowahokela na kulonga nawo simbuli sa undewa we Mulungu, na kuwahonya awaya wendage kuhonyigwa. 12 Ninga dijuwa hadikonga kuswa, na waya ikumi na weli howokwija na kulonga naye, “Uwelage amatewa walute kufijiji na sikaya sa munghanda, wakagone na kupata chakudiya kosoko ayi nyika isikwikaligwa na wanhu.” 13 Hawagamba, “Wengheni nyeye chakudiya.” Howogamba, “Chichaka chinhu kujumha ino mikate mishano na somba mbili, nghona chisilutile na kugula chakudiya kosoko ye ditewa dino!” 14 Kosoko hahowa na wanhu fina figulu fishano nhafi. Hoyowatamila awefusa wakwe, “Wagambeni wanhu wekale hasi mufilundolundo fya wanhu makumi mashano nhafi.” 15 Awefusa hawagolosa nhaifo, awanhu wose hawekwikala hasi. 16 Hakailonda aiya imikate mishano na siya sisomba simbili, hakenula meso kuchanhya kulanga, na kulumba. Hakaibendula aiya imikate na sisomba na kuwengha awefusa wawagawile wanhu. 17 Na wanhu wose hawadiya na kwiguta. Na kudondola ifyasigale, fisege ikumi na fili fya fibendu. 18 Ugele foyejayowa yakutasa ye imwene, awefusa wakwe hawowa hamwedu naye, hakawosa, “Awanhu wakunigamba niye nene nani?” 19 Hawamubidula, “Yohana Mubatisaji, wamonga Eliya, Wamonga Yumwedu wa Wagonesi.” 20 Hakamosa yakugamba, “Anyeye nanye mukugamba niye nene nani?” Petulo hakamubidula yakugamba, “Agweye no Kilisito we Mulungu.” 21 Hakawalemesa wanghamutamile munhu wowose imbuli iyo; 22 yakugamba, “Imwagila Mwana we Munhu kitang'anyila na magayo mengi na kulemigwa ne wasehe na wakulu wa watambiki na Watulumi na kukomigwa, na mwijuwa dya kadatu kwinuka.” 23 Kamei hoyowatamila wose Nghona munhu wowose yakuhananga kunyandamila, yakileme imwenyecho na kulonda umusalaba wakwe chila ijuwa na kunyandamila. 24 Kosoko wowose yakuhananga kuhonya uumi wakwe yakuwagilisa, na ulomo yakuhananga kwagilisa uumi wakwe kosoko yangu, kouhonya. 25 Kosoko imunhu kopata chambusi chaki yanghapata ichilunga chose na kiyagilisa imwenecho? 26 Kosoko chila yakunyonela chinyala aniye na imbuli yangu, imwana we imunhu naye komonela chinyala ugele wayakwija mwitunyo dyakwe, mwitunyo dye Babakwe na dya Malaika Wasunhile. 27 Ninga chawelu nikumutamilani, wabaha wamonga wemile hano awene wasidyona difa mpaka wawone undewa we Mulungu. 28 Gakaloke majuwa munana, kufulusa kulonga gago, hoyowalonda Petulo na Yohana na Yakobo hamwedu naye na kuluta kwitunda kutasa. 29 Ugele woyatasage inyoneka ye chihanga chakwe haibiduka na sisuke sakwe hosikwakaika swee! 30 Langa wanhu weli wendewolonga naye, hawowa awagonesi Musa na Eliya. 31 Woneka mwitunyo ikulu na kulonga soko ye difa dyakwe dikuhananga dilawanise Yelusalemu. 32 Petulo na wayagwe wowile naye hawowa na nhongo, ninga howokwinuka na kona ditunyo dyakwe na wanhu weli wemile hamwedu naye. 33 Na wanhu waya fowamulekage Yesu, Petulo hoyomugamba Yesu, Mundewa, ni fiswamu fina cha hano, leka chigolose fibanda fidatu, chimwedu chako, chimwedu cha Musa, chimwedu cha Eliya. Nghamanyile choyalongage. 34 Foyalongage nhaifo, ifunde hodikwija na kuwagubika, nawo hawogoha fowengile mwifunde. 35 Na dijwi hadilawa mwifunde dikugamba, “Ayuno no mwanangu wonimusagule; mutegeleseni!” 36 Na dijwi diya dikahulikike, Yesu hoyokoneka yemwene. Nawo howonyamala na wasamutamile yoyose gowonile mumajuwa gago. 37 Mwijuwa dya keli, fowadulike kulawa kwitunda, itewa ikulu hodikitang'anyila naye. 38 Langa munhu kulawa mwitewa yenula dijwi yakugamba, “Mwalimu nikukutasa umulange imwanangu, kosoko no yuyuno yumwedu. 39 Langa imhepo imukinya, na baho ni baho hoyotowa chowe, dimuguma chisilisi mpaka kalawa ifulo, na disikumulekela chimwande. 40 Haniwatasa wefusa wako wadilafe, ninga hawaduga.” 41 Yesu hoyobidula, “Anye icheleko kichaka dihuwi, chagilile nokikala na nyeye, na kuwafinyilisa mpaka milaki? Mwigale imwanago ahano.” 42 Kamai foyendeyokwija dipepo hodimukinya na kumuguma chisilisi. Ninga iYesu hoyodigombela dipepo dihile na kumuhonya imujelelo na kumwingha keli iBabakwe. 43 Na wose howokisina kosoko ya udaha ukulu we Mulungu. Ninga wose fowesinage soko ya kila chinhu choyagolose, hoyolonga na wefusa wakwe, 44 “Lekeni simbuli sino singile musinghutwi senu, kosoko imwana we munhu kolafigwa kumikono ya wanhu.” 45 Ninga wasaimanyile inonga iyo, na hoifisigwa ukwawo, wanghaitange, nawo wende wokogoha kumusa Yesu soko ye inonga iyo. 46 Na howokwingila mumawango mugati yawo, nani imukulu kusuma wose? 47 Ninga iYesu foyatanga amadoga ge mimoyo yawo, hoyolonda mwana mudodogi na kumwika habehi naye, 48 na hoyowagamba, “Wowose yakumuhokela imwana yuno kwisina dyangu, yakunihokela niye, na wowose yakunihokela niye, yakumuhokela ayuya yanitumile, kosoko ayuya imudodogi mugati yenu wose ayo no mukulu.” 49 Yohana hakabidula, “Mundewa hachona munhu yakuwinga magini kwa disina dyako, na hachimulemesa kosoko nghakiyandamila na seye.” 50 Ninga Yesu hoyomugamba, “Munghamulemese, kosoko inghowile chinyume chetu kaulwandi lwetu.” 51 Amajuwa gakasegelele kwe imwene kwinuligwa kulawa muchilunga, hoyohananga kuluta Yelusalemu. 52 Na hoyotuma watumigwa kumulongolela, awo hawaluta na kwingila muchijiji cha Wasamalia kosoko wamugolosele hanhu. 53 Ninga awakaya wasamuhokela kosoko hakalongosa injila kuluta Yelusalemu. 54 Kamei awefusa wakwe Yakobo na Yohana fowonile imbuli iyo hawagamba, “Mundewa ukuhananga chilagise moto kulawa kulanga uwalakase?” 55 Ninga iYesu hakabiduka na kuwagombela. 56 Kamei hakawagombela na kugamba, “Musimanyile mwina chidoga chaki chihile kosoko imwana we Munhu nghejile kukoma uumi wa wanhu ninga kuwahonya. Kamei hawaluta mukaya ingi.” 57 Ninga fowendowogenda munjila, munhu yumwedu hoyomugamba, “Nokwandamila hohose howukuluta.” 58 Na iYesu hoyomugamba, “Amabwasiko gena makolongo na fidege fya mulanga fina mafulu, ninga imwana we munhu kechaka hanhu hokugona.” 59 Kwa yumonga kagamba, “Nyandamile,” ninga imwene kagamba, “Mundewa leka nghonge kumusika iBabangu.” 60 Ninga Yesu hoyomugamba, “Waleke wofile wawasike wayawo wofile; amba gweye leuka ukatamilise undewa we Mulungu.” 61 Yumonga kamugamba, “Mundewa nokwandamila, ninga leka nghonge kuwelaga awanhu wa ukaya ukwangu.” 62 Yesu hoyomugamba, “Munhu iyagumile umukono wakwe kulima, kayi yekulanga kunyuma, nghagiligwe kuundewa we Mulungu.”
1 Kulawa baho iMundewa hoyosagula makumi Mufungate na weli, na kuwegala wamulongolele weli weli musikaya na hanhu hoyendoyohananga kuluta. 2 Hakawagamba, “Uludyo kumugunda mwingi, ninga awagolaji wakefu; mutase iMundewa wa uludyo yegale awagolaji mumugunda wakwe. 3 Sanghanyeni, mulangisise nikumutumani nyeye fina ngholo mugati ya mausi. 4 Munghalonde mufuko kahi mukoba, kahifilwatu, na munjila munghamulamuse munhu. 5 Munyumba yoyose yo mukwingila kunghonga gambeni dihewa dyuwe hamwedu ne inyumba ayino! 6 Inghowa mwana wa uswamu kabaho, dihewa dyenu dyokwikala hamwedu naye, ninga nghona kechaka, dihewa dyenu dyomuwilani. 7 Musigale munyumba imwedu, mudiye na kunywa fowakumwinghani, kosoko imutogomi kagiligwa maliho gakwe; munghasungulute kulawa inyumba imwedu kuluta ingi. 8 “Mukaya yoyose yomukwingila na wanghawahokela, diyeni fikwikigwa kumwande yenu. 9 Honyeni watamu wawo na kuwagamba, ‘Undewa we Mulungu wija habehi yenu.’ 10 Ninga mukaya yoyose yomukwingila wanghaleka kuwahokela, mulute musinjila sawo na kugamba, 11 ‘Hata dinghundi dye ikaya yenu idinamatile mumigulu yetu chikudikunghuna chuwe chitangilo ukwenu; ninga manyeni fina undewa we Mulungu usegelela.’ 12 Nikumutamilani yokuwa fihufu ku Sodoma kufinyilisa mwijuwa diya kujumha ikaya iya.” 13 “Usungu wako Kolasini! Usungu wako Betisaida! Kosoko mhali majumo ago agagoloseke ukwenu, gagoloseke Tilo na Sidoni, hawowa wekulamba katali, no kufala suke sa magunia na kwikala mudifu. 14 Ninga yokuwa fihufu kufinyilisa diliganiso, kosoko ya Tilo na Sidoni kusuma nyeye. 15 Na gweye Kapelinaumu, togola! Kokwisigwa mpaka kulanga? Koduliswa mpaka kusimu. 16 Iyakuwahulika nyeye, yakunihulika niye, na yuya yakuwalema nyeye, yakunilema niye, na iyakunilema niye, yakumulema ayuya yanitumile.” 17 Awaya makumi mufungate na weli howokuya kwa chinyemi, wakugamba, “Mundewa, hata simhepo sikuchogoha seye ku disina dyako.” 18 Hoyowagamba, “Hanimona Shetani yakulagala fina lumwemwe kulawa kulanga. 19 Langeni, niwengha udaha wa kujata majoka na fisuswe, ne udaha wose muchanhya ye imunghondo, na hechaka chinhu chidaha kuwabulaga. 20 Hata nheifo munghasekelele kosoko simhepo sikuwogoha, ninga musekelele kosoko amasina genu gawandikigwa kulanga.” 21 Ugele uwo Yesu hakonela mwi Muhe Musunhile, hoyosekelela na kugamba, “Nikukulumba, Baba, Mundewa we iisi na Ulanga, kosoko simbuli sino kuwafisa awena misungu na umanyi na kuwagubulila wana wadodogi. Heye Baba, kosoko nofowendile.” 22 Kawatamila wanhu yakugamba, “Ninghigwa finhu fyose na Babangu, kahi hechaka yamumanyile Mwana ila Baba, kahi hechaka yamumanyile Baba ila Mwana, na wowose imwana yoyakuhananga kumugubulila.” 23 Kahi hakawabidukila awefusa wakwe na kulonga nawo kwa chinyele, “Ibeka ameso agekona gomukona nyeye! 24 Kosoko nikumutamilani nhafi, wagonesi na Wandewa wengi hawasulumila kona gomukona nyeye, wanghagone na kugahulika.” 25 Langa! Mulamusi yumwedu hoyokwima kumugesa, yakugamba, “Mwalimu, nigolose nhani niuhale uumi wa majuwa gose?” 26 Hakamugamba, “Iwandikigwa choni mwilagiso? Ukusoma nhani?” 27 Kamei hakamubidula, “Umwende iMundewa Mulungu wako kwa umoyo wako wose, na ichidoga chako chose, na uludole lwako lwose, na imisungu yako yose, na iyehabehi nagwe fina gomwenecho.” 28 Naye kamugamba, “Kubidula fiswamu, Golosa nhaifo, nagwe kokuwa mumi majuwa gose.” 29 Ninga imwene hakahananga kiyonesa muswamu, hakamusa Yesu, “Na iyehabehi na niye noyehoki?” 30 Yesu hakamubidula, “Munhu yumwedu yeja yadulikaga kulawa Yelusalemu kuluta Yeliko, hoyokoligwa na wahiji hawamuhambula na kumutowa, na kumuleka habehi na kufa. 31 Ninga kwa bahati, Kuhani yumwedu yendoyedulika kupulutila injila iiya, na foyamonile hoyogenda kunghanda. 32 Kahi ne Mulawi nheifiya, foyafikile baho na kumona hoyogenda kunghanda. 33 Ninga Musamalia yumwedu munghenda yakwe, yafika baho hoyowile, na foyamonile, hakamonela ubasi, 34 hakamulutila, kamubaka mafuta na miti na kumoha filonda fyakwe, kahi hoyomukwisa mwipunda dyakwe na kumwigala kunyumba ya wageni, na hoyomulagula. 35 Na dijuwa dya keli yalafa dinali mbili na kumwingha imwenye nyumba yakugamba, ‘Mulangisise yuno, na chochose chowukwenda ulafe kusuma ino, nokuwisila nghona nikuya.’ 36 “Togola! Yehoki mudatu wawo, yeyonese fina kahabehi na yuya yatowigwe na wahiji?” 37 Hoyogamba, “Ayuya yamonele ubasi.” Na Yesu hoyomugamba, “Luta nagwe ukagolose nhaifo.” 38 Ninga Yesu na wefusa wakwe, fowowile munhambo, Yesu hoyokwingila muchikaya chimonga, na imwanamuke disina dyakwe Malita hoyomuhokela munyumba yakwe. 39 Malita hakowa na mufunakwe yenangagwe Maliamu, imwene yekala mumigulu ya Yesu na kutegelesa amafuso gakwe. 40 Ninga Malita hakedasika na utogomi mwingi, hoyomulutila na kumugamba, “Mundewa, ukona fiswanu fonikidasika niimwene, imufunangu kanileka nikutogoma niimwene? Mugambe ninga yanitase.” 41 iMundewa hoyomubidula, “Agwe Malita, ukugaya na kiidasika na finhu fingi, 42 chinhu chimwedu chikuhanangigwa. Imaliamu kasagula chinhu ichiswamu, nacho chisileusigwa ukwakwe.”
1 Yesu yeja yowa hanhu hamonga yakutasa, foyamalile kutasa yumwedu wa wefusa wakwe hoyomugamba, “Mundewa, chifuse kutasa fina Yohana foyawafusile awefusa wakwe.” 2 Hakawagamba, “Nghona mukutasa gambeni: Baba, Disisina dyako ditunyigwe; Undewa wako wije. 3 Uchinghe chila ijuwa chakudiya chetu, 4 na uchilekelele uwihi wetu, kosoko seye nase chikuwalekelela awachigolosele uwihi. Na unghachigume mumagesa.” 5 Kamei hakawagamba, “No nani ukwenu yena mbwiyakwe yomulutila muchilo gati na kulonga naye, mbwiyangu ninghe mikate midatu, 6 ‘Kosoko nijiligwa na mbwiyangu yekulawa nhambo, nani nichaka chinhu cha kumwingha yadiye,’ 7 naye komubidula kulawa kugati, ‘Unghanidase, dibanhi difulusa kuhindigwa, aniye ne wanangu chifulusa kugona, sidaha kwinuka na kukwingha chochose.’ 8 Nikumutamilani, hata nghona nghekwinuka na kumwingha chochose kosoko ni mbwiyakwe, ninga kosoko yakugendelela kumutasa kokwinuka na kumwingha chochose choyakuhananga. 9 “Nikumutamilani, Taseni, mokwingigwa, hanangeni; mopata, gong'ondeni; nanye mokumuliligwa. 10 Kosoko chila yakutasa yakuhokela, na kwa yuya yakugong'onda yakukumuliligwa. 11 Hena Baba yehoki ukwenu imwanagwe yanghamutasa somba komwingha ijoka? 12 Ama yanghatasa ditagi komwingha chisuswe? 13 Nghona nyeye gomwina uwihi mumanya kuwengha awana wenu finhu fiswamu, iBaba yenu wa kulanga kamanya mikangha mingahi kuwengha Muye Musunhile awaya awekumutasa!” 14 Baho yendoyolafa imhepo yowile imutendile imunhu chimumu, imhepo foyalawile ichimumu hoyolonga, na awanhu howokisina lugano. 15 Ninga wamonga hawagamba, “Yekulafa simhepo kwa udaha wa Belisebuli, imukulu wa simhepo.” 16 Baho awamonga wakumugesa wakuhananga chitangilo kulawa kulanga. 17 Ninga imwene yamanya amadoga gawo, hoyowatamila yakugamba, “Chila undewa ukigawa uwecho kwa uwecho usikwima na nhaifo ulukolo kwa ulukolo. 18 Nghona Shetani yakigawa imwenecho, undewa wakwe wokwima nhani? Kosoko mukugamba nikulafa simhepo kwa ludole lwa Belisebuli. 19 Kahi nghona nikulafa simhepo kwa ludole lwa Belisebuli, togoleni awana wenu wakulafa kwa ludole lwani? Kosoko yo, awene nowowoliganisa. 20 Ninga inghowa kwe ludole lwa Mulungu, nikulafa simhepo, ninga mutange fina undewa we Mulungu ufulusa kuwejila. 21 Ugele munhu yena uludola yakiyohile ifilama fyakwe na kwimilisa ikaya yakwe, ifinhu fyakwe fikala digoya. 22 Ninga imunhu iyena ludole kusuma imwene yanghamulutila na kumutowa, yakumuhoka ifilama fyakwe foyahuwile na kufigawa ku wayagwe. 23 Wowose nghowile na niye nghehamwedu nami; na wowose nghakukunjagisa na niye yakwanjasa.” 24 “Imhepo ihile foikumulawa munhu, ikugenda muluwala kuhananga hanhu hakubwihila, na inghaleka kona ahanhu hokwikala, ikugamba Nokuya kukaya yangu, akuya konilawile. 25 Na inghoya ikuifika ikaya yakwe ishagiligwe na kuhambigwa fiswanu. 26 Baho yakuluta na kwigala simhepo singi mufungate sihile kusuma iyene, na sikwingila na kwikala umo, na imunhu yuya nyuwa yakwe ya kundumo ikuwa iha kujumha ya nghonga.” 27 Foyalongage nhaifo, mwanamuke yumonga mwitewa yatowa ikenje na kugamba, “Ibeka imwanamuke yakweleke, na matombo gowonghile.” 28 Imwene hakagamba, “Heye, ninga ibeka awekuihulika imbuli ye Mulungu na kuikola.” 29 Na amatewa fowongesekage, hoyokonga kugamba, “Icheleko chino ni cheleko cha wihi, chikuhananga chitangilo, ninga hechaka chitangilo chochikwinghigwa ninga achiya cha Yona. 30 Kosoko fina Yona foyowile chitangilo kwe wanhu wa Ninawi, nhaifo nofoyekuwa imwana we munhu kucheleko chino. 31 Malikiya wa kwekulu kokwinuka mwijuwa dya kuliganisigwa hamwedu na wanhu we cheleko chino na kuwaliganisa, kosoko imwene yeja kulawa ulwandi lwe ndumo ye chilunga, uleke yahulike ubala wa Sulemani, na hano hena munhu mukulu kusuma Sulemani. 32 Awanhu wa Ninawi wokwinuka mwijuwa dya kuliganiswa hamwedu na cheleko chino na kuchiliganisa, kosoko awene hawalamba kwa mahubili ga Yona, langa ahano hena mukulu kusuma Yona.” 33 “Hechaka munhu iyakwasa taa na kuifisa ama kuigubika ne isege, ninga yakuika muchigwaso, kosoko awekwingila wone ujelu wakwe. 34 Digiso dyako no taa yo umutufi wako, digiso dyako dinghowa dikona, umutufi wose winawo ujelu, ninga nghona disikona umutufi wako wina chisa. 35 Ninga langisisa ujelu uwile umwako ungheje ukuwa chisa. 36 Ninga inghowa umutufi wako wose umema ujelu, hechaka hanhu hena chisa, wokuwa na ujelu muhala, fina itaa foikumulika na ujelu wakwe.” 37 Ugele wuwo woyalongage, Mufalisayo yumwedu hakamugoneka kudiya naye ukwakwe, hakaluta na kwikala hamesa. 38 Imufalisayo hakesina kumona kakonga kudiya chakudiya cha nhegulo nghenati yanawe. 39 Kamei iMundewa hakamugamba, “Hambiya anyeye Mafalisayo mukusunha kunje ye fikombe na sisahani, ninga kugati mumema upujilaji na wihi. 40 Anye mubwalate! Iyombile fya kunje soyombile fya kugati? 41 Ninga lafeni ku wakiwa fyose fuwile kugati na kila chinhu chokuwa chiswanu ukwenu. 42 “Usungu ukwenu Mafalisayo! Kosoko mukutosa wanhu saka hata musunga na munafu na mabago gengi, na kuno mukuleka ichawelu na uwendo we Mulungu; agano hayagila mugakole kahi munghaleke agamonga. 43 Usungu wenu Mafalisayo! Kosoko mukwenda amadoga ga kumwande Mumasinagogi na kulamusigwa mumagulilo. 44 Usungu wenu! Kosoko mukifana filalo ifisikoneka, na awanhu wakugenda muchanhya yawo bila ya kutanga. 45 Yumwedu wa walimu wa shelia hoyomubidula, Mwalimu kwa kulonga nhafi kuchiliga na seye nheifiya.” 46 Hoyogamba, “Usungu wenu nanye muwalamusi we isheliya! Kosoko mukuwengha wanhu misigo misito, nanye muweecho musikukwafa ga makanda na chimwedu che fidole fyenu. 47 Usungu wenu! Kosoko mukushagila fiswanu mifilalo fya wagonesi wakomigwe ne waBaba senu. 48 Mukuhomelela na kuifumila imilimo ya wasehe wenu; Kosoko hawawakoma, nanye mukujengela ifilalo fyawo. 49 Na kosoko ubala we Mulungu ukugamba, ‘Nowatumila Wagonesi na watumigwa, awamonga wowakoma na kuwasambasa,’ 50 na sakame ye Wagonesi itike kulawa kunghonga ye chilunga, yohanangigwa kucheleko chino. 51 Kulawa isakame ya Habili mpaka isakame ya Sakalia, iyakomigwe hagati ye hanhu hasunhile na hakulafila filafwa. Heye nikumutamilani yohanangigwa mucheleko chino!” 52 “Usungu wenu! Wanhu we malagiso, kosoko muleusa chikumulilo ye misungu; anye muweecho musingile na muwalemesa awaya wendowekwingila!” 53 Foyaleukage kulawa haya, Watulumi na Mafalisayo hawakonga kumwidasa na kumwanda yalonge mbuli nyingi, 54 Kumugojela wamukole muchinhu choyedaha kulonga.
1 Muchigele chicho, wanhu matewa kwa matewa hawakilunda hamwedu mpaka wendewokijata, hakakonga kulonga ne wefusa wakwe kunghonga, “Muwe meso na inungo ya Mafalisayo, nayo no chimwefe. 2 Hechaka chigubikwe chisigubuligwa, kahi chifisigwe ichene chisikamanyika. 3 Chochose chomulongile muchisa, chohulikika kuujelu, na chomulongile chinyele kuchumba kugati chotamiliswa munyumba muchanhya.” 4 “Nikumutamilani wambwiya sangu, munghogohe awaya wakukoma umutufi, kulawa baho wechaka dyowokudaha kugolosa. 5 Ninga nomutamilani nonani wokumwogoha: Mumogohe ayuya, yanghafulusa kukoma, kena udaha wa kuguma munhu kujehanamu, heye! Nikumutamilani mogoheni! 6 Togoleni ifindewa fishano fisikuguligwa kwa sendi mbili? Na hechaka chimwedu chikusimiligwa kumwande ye Mulungu. 7 Nhani, hata sinjwili sa matwi genu sitaligwa sose. Munghogohe anyeye mukwendigwa lugano kusuma findebwa fingi.” 8 “Na nikumutamilani wowose yekunifumila kumwande ya wanhu, imwana we munhu nheifiya komufumila kumwande ya Malaika we Mulungu. 9 Amba yuya yekunilema kumwande ya wanhu, kolemigwa kumwande ya Malaika we Mulungu. 10 Na chila munhu iyekumutofula Mwana we Munhu ngholekeleligwa, amba iyekumutofula Muhe Musunhile nghelekeleligwa. 11 Na wanghawegala anyeye kumwande ya masinagogi na wandewa na wena udaha munghowe na manhonge ifene fomubidula, hegu fomulonga; 12 Kosoko Muhe Musunhile kowafusa nyeye muchigele chicho agawagile kulonga.” 13 Munhu yumwedu mwitewa diya hoyomugamba, “Mwalimu mutamile mundugu sangu yanigawile ichipe changu.” 14 Ninga hakamugamba, “Gomunhu gwe! Nani yanigolose niye kuwa mulamusi hegu mugawaji wenu?” 15 Na hakawatamila, “Muhulikise na muwe meso na usulumisi; kosoko uwumi wa munhu usuwile muwingi we finhu foyenafyo.” 16 Hakawatamila mbasi yakugamba, “Umugunda wa Munhu yumwedu mugoli haweleka lugano. 17 Hakadoga mumoyo wakwe, ‘Nogolosa nhani kosoko hechaka hanhu hokwika uludyo wangu.’ 18 Hakagamba, ‘Nogolosa chino: Nosimola sikano sangu, na kujenga singi nghulu lugano, na umo nokwika uludyo lwangu na ifinhu fyangu fyose. 19 Nani nogoga ne chidoga changu nikugamba agwe gochidoga changu kwina finhu fingi foukiikile sigafu kwa miyaka mingi, bwihila, udiye, unywe, ubwede!’ 20 Ninga Imulungu hakamugamba, ‘Agwe kubwalata! Ichilo achi cha diyelo wekuhananga ichidoga chako; na ifinhu foukiikile fokuwa fyani?’ 21 Nofoyowile munhu yakilundila ugoli kosoko yakwe, ninga si mugoli kwe Mulungu.” 22 Yesu hakawatamila wefusa wakwe, “Kosoko iyo nikumutamilani munghakiidase kosoko yo uumi wenu, modiya choni, hegu kosoko yo umutufi mofala choni? 23 Kosoko uumi ni muswamu kusuma chakudiya, na umutufi ni muswamu kujumha kwifasa. 24 Langeni amahowe gasikuhanda kahi kugola, gechaka chilindo kahi kano, na hata nheifo Mulungu yekugegutisa. Anyeye ibeka mikangha mingahi kusuma amadege! 25 No nani ukwenu kosoko ye chogoho kodaha kongesa majuwa ku wumi wakwe? 26 Ninga nghona musikudaha kugolosa chinhu chidodogi finacho, nhani mukiidasa kosoko ya gamonga? 27 “Langeni ga amaluwa, fogekukula; gasikugolosa milimo hegu kubota; hata nhaifo nikumutamilani, hata Sulemani muditunyo dyakwe dyose nghafasigwe fina dimwedu dya gano. 28 Ninga nghona Imulungu yakudifasa dinyagala dibaho diyelo mumugunda na hosiku dikukubitigwa mumoto, mikangha mingahi kuwafasa anyeye, anye mowanhu we dihuwi dikefu! 29 Na munghahanange chomudiya choni kahi chomukunywa choni, kahi munghowe na manhonge. 30 Kosoko amataifa gose ge chiluga gakuhananga ifinhu afi; na iBaba yenu kamanya fina mukufihananga. 31 Ahanhu hakwe, muhanange undewa wakwe, na finhu fyose fyokuwa fyenu nheifiya.” 32 “Munghogohe, itewa didodogi, kosoko iBaba yenu kona fiswanu kuwengha undewa. 33 Yambaseni fyose fyomwinafyo, muwatase awakiwa; kigoloseleni mikoba isikulala, na isigafu ya kulanga isikuhunguka, ahanhu muhiji nghakusegelela na hechaka nondo ikudiya. 34 Kosoko hena isigafu yako, baho noho ukuwa umoyo wako.” 35 “Mukiyohe kwa dyodyose dilawanisa, na sitaa senu suwe sikwaka, 36 na muwe fina wanhu awakumugojela Mundewa wawo kwija ukaya kulawa kuhalusi, soko wodaha kumukumulila chimwande foyakwija na kugong'onda. 37 Ibeka ku watumwa waya awene wakufikigwa meso iMundewa wawo foyakwija; huwileni nikumutamilani, kokiyoha, kowaleka wekale hamesa na kuwengha chakudiya. 38 Kahi yangheja habehi chilogati ama habehi na kucha na kuwafika nhaifo ibeka awatumwa wo! 39 Ninga mutange nhafi, woile imwenye nyumba yamanyile ugele woyakwija muhiji, hakowa yekuwa meso na nghowile yakuleka inyumba yakwe imoligwe. 40 Nanye nheifiya muwe meso, kosoko imwana we munhu yakwija muchigele chomusimanyile.” 41 “Petulo hakagamba Mundewa, ukuchitamila aseye du imbasi ayi hegu ukuwatamila wose?” 42 Na iMundewa hakagamba, “No nani imutogomi musindamafu na iyena misungu, imwene Mundewa wakwe komwika muchanhya ya watogomi wakwe wose, yawenghe ifuka yawo kwa ugele wakwe? 43 Ibeka imutogomi yuya, imwene iMundewa wakwe yangheja kumufika yakugolosa nhaifo. 44 Chawelu nikumutamilani, komwika muchanhya ye isawo yakwe yose. 45 Ninga imutogomi yuya mumoyo wakwe yanghagamba, ‘iMundewa wangu yekwikalisa kwija,’ na yanghakonga kuwatowa awatogomi we chike ne wechigosi, na kudiya na kunywa na kulewa, 46 iMundewa we imutumwa yuya kokwija mwijuwa dyonghamugonele, na chigele chonghamanyile, kumutosa na kumwika hamwedu na wasikuhuwila. 47 Na imutogomi ayuya yamanyile inyenda ye Mundewa wakwe, ninga nghekale meso hegu kugolosa fina foikuhananga inyenda yakwe, kotoigwa lugano. 48 Ninga ayuya inghamanyile, yanghagolosa wihi yagiligwa kujoligwa, kojoligwa hadodogi. Kahi chila yenghigwe fingi, fyohanangwa fingi kulawa ukwakwe; naye yenghigwe fingi na wanhu wohananga fingi lugano.” 49 “Nija kwasa moto muchilunga, nani hanyendaga uwe ufulusa kwaka. 50 Ninawo ubatiso unyagile kubatiswa, langa fonikugaya mpaka umemeleke. 51 Mukudoga fina nija niwengha idigoya muchilunga? Ka! Nikumutamilani, ninga matemanuko. 52 Kosoko kulawa hambiya munyumba imwedu mokuwa wanhu washano wakitemanule, wadatu kwa weli, na weli kwa wadatu. 53 Wokitemanhula iBaba munhu ne imwanagwe, na imwana ne iBabakwe; ing'ina ne imwanagwe we chike, na imwana we chike ne ing'ina; ng'ina fyala ne muke mwana, kahi muke mwana ne ingina fyala.” 54 Kahi hakawatamila amatewa, “Fomukona ifunde dikwinuka kuchanhya mukulonga hamwedu fina ifula ikwija; na ikulawanisa nhaifo. 55 Na fomukona imheho yo kulume ikupumhuna, mukugamba, ‘Kokuwa na ifuke ikali, na nofoikuwa.’ 56 Anye we chimwefe! Mumanya kutanga ichihanga che isi na ulanga; ninga nhani musikudaha kutanga ugele wa hambiya?” 57 “Kahi nhani musikulamula muwecho amaswanu? 58 Nghona ukuluta ne musongesi wako kwe mulamusi, golosa ludole kifumilisa naye munjila, yangheje yekwigala mumikono ya musilikali na imusilikali yakugume muchifungo. 59 Nikukutamila nghukulawa mo mpaka ulihe isendi ye ndumo.”
1 Hahowa na wamonga wowile baho muchigele chicho, awamutamile imbuli ya Wagalilaya awakomigwe na Pilato ne sakame yawo kuhasigwa na iya ye filafwa fyawo. 2 Na hoyowabidula, “Mukudoga fina Awagalilaya awo hawowa na uwihi mwingi kusuma Awagalilaya wose, kosoko hawapatigwa nago gehile? 3 Nikumutamilani, si nheifo; ninga munghaleka kulamba anye mose nheifiya mukwangilila. 4 Mukugelegela awaya ikumi na munana awakomigwe kosoko hawogwiligwa na umunala akuya Siloamu, mukudoga fina waya hawowa wehile kusuma wose wekalage Yelusalemu? 5 Nikumutamilani, wasowile nheifo, ninga munghaleka kulamba anye mose mukwagilila.” 6 Yesu hoyowatamila kwa mbasi: “Munhu yumonga hakowa na musada uhandigwe mumugunda wakwe; hoyokwija kuhananga mamudyo mumusada na nghagapatile. 7 Hakalonga ne imwimilisi wo umugunda, ‘Langa, miyaka ino midatu nija kuhananga mamudyo mumusada awu, na sipatile chinhu, ung'enye; nhani ukongha chaka isanga?’ 8 Hakamubidula, ‘Dileke dikule Mundewa, umwaka uno nawo; mpaka nidifukisile na kudigumila mboleya. 9 Na ungheleka mamudyo umwaka ukwija ni fiswamu, ninga nghona si nheifo, ukudaha kung'enya.’” 10 Kahi Yesu yendeyofusa Mwisinagogi dimwedu mwijuwa dye Sabato. 11 Na baho hahowa na mwanamuke yowile mutamu kwa miyaka ikumi na munana kosoko ya kwingiligwa na mhepo ihile, hakatendigwa kagongomana na nghadahage kigolola imwecho. 12 Na Yesu foyamonile, hoyomwinanga na kumugamba, “Mudala, kuhonyigwa utamu wako.” 13 Hakamwikila mikono muchanhya yakwe, na baho ni baho hoyogoloka, na kumutunya Mulungu. 14 Ninga imukulu we disinagogi kadeseka kosoko Yesu kamuhonya munhu mwijuwa dye Sabato, hakawatamila wanhu, “Hena majuwa mutandatu aganogele kugolosa milimo, mwija muhonyigwe majuwa gago, na siyo mwijuwa dye Sabato.” 15 Kahi iMundewa yamubidula, “Agwe wechimwefe! Chila munhu mwijuwa dye Sabato nghekudohola inghambaku yakwe hegu dipunda dyakwe kulawa mwidewa na kuigala kulwanda? 16 Na isimwagile imwanamuke ayuno, biti Ibulahimu yowile yohigwe ne chifungo che Shetani kwa miyaka ikumi na munana, yoholigwe kulawa muchifungo mwijuwa dye Sabato?” 17 Foyalongile nheifo, awanghondo wakwe hawengila chinyala, na wanhu wose weja wonela kosoko ye matunyo gose gagoloseke ne imwene. 18 Kahi hakagamba, “Undewa wa kulanga ukifana choni? Nouliganisa na choni? 19 Ukifana mbeyu yo umheja yoyalondile munhu na kuihanda mumugunda wakwe, hayota na kukula na kuwa ibiki ikulu, na fidege hofigolosa mafulu mumanhambi gakwe.” 20 Kahi keli hakagamba, “Nouliganisa na choni undewa wa Mulungu? 21 Ukifana nungo yalondigwe ne mwanamuke na kuiguma mu simhishi ndatu sa usage, mpaka usage wose usasa.” 22 Hakagendelela ne inhambo yakwe kuluta Yelusalemu na munjila hakalokela musikaya na fijiji, na kufusa umo. 23 Na munhu yumwedu hakamusa, “Mundewa, awakuhonyigwa wokuwa wakefu?” Hoyowagamba, 24 “Mugangamale kwinjila ko umulongo umusisili; kosoko wengi nikumutamilani wohananga kwingila wanghadahe. 25 Ugele wokwija imwenye nyumba kokwinuka na kuhinda umulango; mokonga kwima kunje na kugong'onda hamulango, mukugamba, ‘Mundewa, chikumhulile!’ Kowabidula, ‘Simumanyile komukulawa.’ 26 Kahi mokonga kugamba, ‘Hachidiya na kunywa hamwedu na gweye, na hakafusa mukaya setu!’ 27 Ninga kogamba, ‘Nikumutamilani, simanyile komukulawa; leukeni, anye mose muwagolosaji wa wihi!’ 28 “Baho molila na kugwegwejula meno, fomukamona Ibulahimu na Isaka na Yakobo na wagonesi wose mu Undewa we Mulungu nanye muwecho kutagigwa kunje. 29 Na wanhu wokwija kulawa kundawilo ye dijuwa na kuuswilo, na kulawa kutwe na kwikulu, na kwikala muchakudiya mu undewa we Mulungu. 30 Langa! Wamonga wakundumo wokuwa kunghonga, na wamonga wakunghonga wokuwa wa indumo.” 31 Muchigele chicho Mafalisayo wamonga weja, na kulonga naye, Leuka hano kosoko Helode yakuhananga yakukome. 32 Hakawagamba, “Gendeni kamutamileni ayuya dibwasiko: Langa, nikulafa mhepo na kugolosa uhonyaji diyelo na nhousiku na mwijuwa dya kadatu nikufulusa milimo yangu. 33 Hata nheifo, inyagila kuluta munjila yangu diyelo na nhosiku na chisindo, kosoko isikudahika Mugonesi yakomigwe kunghanda ya Yelusalemu. 34 Agwe Yelusalemu, Yelusalemu, goukukoma wagonesi na kuwatowa na mawe awaya awatumigwe ukwako! Mikangha mingahi hanihananga kuwakunjagisa kifana inghuku foikukunyagisa ifyali fyakwe hasi ye mabawa gakwe, kahi musifumile! 35 Langa inyumba yenu ilekigwa. Nikumutamilani, musinyona mpaka mulonge, Ibeka ayuya iyakwija mwisina dye Mundewa!”
1 Musabato imwedu Yesu foyaluta kudiya munyumba ya chilongosi yowile Mufalisayo, wenda wemunyembela. 2 Langa! Hawowa na Munhu kumwande yakwe yowile na utamu wa kufimba mutufi, 3 na Yesu hakalonga na walamusi na Mafalisayo yakugamba, “Ni fiswanu kuhonya mwijuwa dye Sabato hegu si fiswam?” 4 Ninga, awene weja wanyamala, kamei hoyomulonda na kumuhonya, na kumuleka yalute. 5 Hakawagamba, “No nani ukwenu yena dipunda hegu dikambaku idilagale mwikolongo, inghekudilafa chimwande mwijuwa dye Sabato?” 6 Howonyamala twi. 7 Kahi hakawatamila mbasi awaya wagonekigwe, foyonile fina fowasagule magoda ga kumwande hakawagamba, 8 “Unghagonekigwa na munhu kuhalusi, unghekale a hanhu ha kumwande, ingheje ikuwa kagonekigwa munhu mukulu kusuma gweye, 9 na yuya yawagoneke wose kokwija na kukugamba, ‘Mwinghe luneka munhu ayu,’ baho kokonga kwa chinyala kwikala mwigoda dya hasi. 10 Ninga, unghagonekigwa, luta na kwikala mumagoda ga kunyuma, kahi imukaya wako yangeja kodaha kugamba, ‘Mbwiyangu, nyagula kuno kumwande, no houkuwa na itunyo kumwande ya wose awekale hamesa hamwedu na gweye. 11 Kosoko wowose yakiinula kodulisigwa na yakidulisa kokwisigwa.’” 12 Kahi hakamutamila ayuya yumugoneke, “Unghatogoma chakudiya cha nhemisi ama cha ijuwa ikulu, unghagoneke wambwiya sako, ama wanduguso ama wanhu wa lukolo lwako hegu awagoli we habehi nagwe, wangheje nawo wekugoneka na kuhokela maliho gako. 13 Ninga foukugolosa sikukuu wagoneke awakiwa, awesikidaha, awechete na womudula; 14 yokuwa ibeka ukwako kosoko awo wasikudaha kukuliha. Kolihigwa ugele wa kwinuligwa awaya awachawelu.” 15 Yumwedu wa waya wowekalanye mumesa foyahulike gago, hakamugamba, “Ibeka imunhu iyakiyodiya chakudiya kuundewa we Mulungu!” 16 Ninga Yesu hakamugamba, “Munhu yumonga hakagolosa sikukuu nghulu, na kugoneka wanhu matewa. 17 Ugele we chakudiya ukasegelele, hakatuma mutogomi wakwe kuwatamila awaya awagonekigwe, mwije kosoko fyose fifuluka! 18 Ninga wose wakonga kikojela kwa moyo umwedu. Iwabosi kamugamba, ‘Nigula mugunda, na nikuhanangigwa nilute na kuwona; nghulambila dedede unilekelele.’ 19 Yumonga kagamba, ‘Nigula makambaku ikumi ga ng'ombe, nikwija gagesa, nikukutasa dedede nilekelele.’ 20 Na yumonga kagamba, ‘Nimutola Mwanamuke na kosoko iyo sidaha kwija.’ 21 Imutumwa yuya hoyokwija na kumutamila iMundewa wakwe. Kahi imwenye nyumba kwa nyono hakamutamila imutumwa wakwe, ‘Leuka chimwande ulute kunjila inghulu na kufijila fya kumbago fye ikaya, na uwengise awakiwa, awesikudaha, awechete na wasikona.’ 22 Imutumwa hakagamba, ‘Mundewa, ago goulagise gafulusa kugoloseka na kunghali na luneka.’ 23 iMundewa hakamutamila imutumwa wakwe, ‘Leuka ulute kusinjila singhulu na mumihaka uwadindilise wanhu kwingila kugati soko inyumba yangu imeme. 24 Kosoko nikukutamila, hechaka yumwedu wa awaya wagonekigwe iyodiya ichakudiya chonikugolose.’” 25 Baho amatewa makulu ga wanhu gendogamwandamila, hakabiduka na kuwagamba, 26 “Nghona munhu wowose yakwija ukwangu na nghakumusula iBabakwe, ing'inakwe na imuke na wanagwe, na wanduguse we chigosi ne walumbuse, heye! Na hata uumi wakwe imwecho, nghedaha kuwa mwifusa wangu. 27 Munhu wowose ingholonda umusalaba wakwe na kunyandamila, nghodaha kuwa mwifusa wangu. 28 Kosoko no nani ukwenu, yanghahananga kujenga munala, nghakwikala kunghonga na kutala digelo, nghona yenafyo fya kudaha kumala umunala. 29 Nghona nheifo, foyakumala inghindiso, na nghekudaha kuimala, wose wakona wokonga kumutowa, 30 wakugamba, ‘Imunhu ayu hakakonga kujenga, kalemeligwa kumalagisa!’ 31 “Kahi kwina Mundewa waki, yanghahananga kitowa nghondo, inghakwikala hasi kunghonga na kudoga fina kodaha na wanhu ifigulu ikumi kwitang'anyila na yuya yakwija kitowa na wanhu figulu makumi meli? 32 Yanghona fina nghodaha, imiyagwe yekali kutali, yakumutuma munhu na kutasa kilamula. 33 No nheifo, wowose ukwenu nghakulekelela foyenafyo, nghakudaha kuwa mwifusa wangu.” 34 “Munyu ni muswanu, amba unghasusuka wogumigwa choni unogelekele? 35 Usidaha kuwa muswanu kuuisi ama kwikusisi; wanhu wakuutaga. Iyena singhutwi sa kuhulika yahulike.”
1 Ijuwa dimonga awakong'osa kodi na wena uwihi wose weja wamwijila na kumutegelesa. 2 Mafalisayo na Watulumi wang'ung'ulika wakugamba, “Imunhu ayu yakuwahokela awena uwihi kahi yakudiya nawo!” 3 Yesu hoyowatamila imbasi ayi: 4 “Munhu waki ukwenu yena singholo igana, yanghagililigwa na imwedu, nghakuleka asiya makumi ikenda na ikenda munyika na kuluta kuihananga iyagilile, mpaka yayone? 5 Na yanghayona, yakuipika mumayega kwa chinyemi. 6 Na foyekuya ukaya, yakuwenanga hamwedu awambwiya sakwe na wehabehi naye yakugamba, ‘Muwe na chinyemi hamwedu na niye kosoko niyona ingholo yangu yagilile!’ 7 No nheifo nikumutamilani, kokuwa na chinyemi chikulu kulanga kosoko yo kulamba kwa yumwedu yena uwihi kujumha makumi ikenda na ikenda awakoneka fina wechaka nghwina ya kulamba.” 8 “Mwanamuke waki yena shilingi ikumi, yanghagilisa imwedu, nghakwasa taa na kushagila inyumba na kuhananga digoya mpaka yayone? 9 Na yanghayona yakwinanga wambwiya sakwe na wehabehi naye, yakugamba, ‘Bwedeleleni hamwedu na niye, kosoko niyona ishilingi yonyagilise. 10 No nheifo nikumutamilani, kwina chinyemi kumwande ye Malaika we Mulungu kosoko ye munhu yumwedu yakulamba.’” 11 Hakagamba, “Hahowa na munhu yowile na wana weli. 12 Na imudodogi hakamugamba, ‘iBabakwe, Baba ninghe ichipe changu ichinyagile, hakawagawila awanagwe aweli ichipe chakwe.’ 13 Majuwa mengi gasilokile, imwana mudodogi hakausa isawo yakwe yose na kuleuka ukaya na kuluta kuisi ya kutali, na uko hakadiya isawo yakwe ku mikalile ihile. 14 Foyafuluse kudiya fose foyowile nafyo, njala nghulu hoikwingila muisi iya, hoyokonga kuhananga. 15 Noho yaluta na kutasa Mulimo kwe mukaya yumwedu we isi iya, iyamwigale kumugunda wakwe kulisha singuluwe. 16 Naye yasulumila kudiya imhumba yadiyagwe na singubi na hechaka munhu yamwinghile chinhu. 17 Ninga foyagelegele hakagamba, ‘Nhafo watogomi wengahe we iBabangu iwakudiya na kusigasa, ninga niye nikufa ne injala ahano! 18 Noleuka na kuluta kwe iBabangu na kumugamba, Baba nimugolosela wihi Mulungu na gweye. 19 Sagile kahi kwinangigwa mwanago, nilonde kifana yumwedu wa watogomi wako.’ 20 Hakaleuka na kwija kwe iBabakwe, ninga foyowile yekali kutali, iBabakwe yamona na kumonela ubasi, hakamubilimila kamukunyatila na kumunonela. 21 “Ne imwana hakamugamba, ‘Baba, nigolosa uwihi kwe Mulungu na ukwako; sagigwe kahi kwinangigwa mwanago.’ 22 Ninga iBabakwe hakawagamba iwatumwa, ‘Leteni chimwande isuke iswamu, mumufase, kahi mufaseni nyamwidole mumukono wakwe na filwatu mumigulu yakwe; 23 leteni indama iginile na muichinje, lekeni chidiye na kubwedelela. 24 Kosoko ayuno imwanangu hakofa, naye mumi kahi; hakagilila naye koneka.’ Na howokonga kubwedelela. 25 “Ugele uwo imwanagwe imukulu hakowa kumugunda; na foyafikile habehi ne hakaya, hakahulika majwi ga ng'oma na miseigo. 26 Hakamwinanga yumwedu wa watumwa na kumusa, ‘Ichikugendelela choni?’ 27 Hakamugamba, ‘Imunduguso keja, ne iBabako kamuchinjila ndama inonile, kosoko kamupata mumi na muswamu.’ 28 “Ninga imwana mukulu hakasuha na kulema kwingila; iBabakwe hakaluta na kumugongelesa, 29 ninga imwana mukulu hakamubidula iBabakwe, ‘Langa minyaka ayi mingi nikala kukutogomela milimo, na sinhati nileke kugolosa agaya gounilagise; kahi nghwinati uninghe hata chipene, soko nyonele ne wambwiya sangu. 30 Ninga, ayuno imwanago foyejile, yadiile isawo yako hamwedu na we dihabwa, kumuchinjila ndama inonile!’ 31 “iBabakwe hakamugamba, ‘Mwanangu, ugele wose kwahamwedu na niye, na fyose fyoninafyo ni fyako. 32 Hayagila kunyemuka na konela, kosoko ayu imunduguso hakowa yafile, hambiya mumi, hakagilila, kahi koneka.’”
1 Kahi hakalonga na wefusa, “Hahowa na munhu mugoli yowile na mwimilisi, usongesi hawija ukwakwe fina, imunhu ayu yendeyoboshola ifinhu fyakwe. 2 Hakamwinanga na kumutamila, ‘Choni chino chonikuhulika muchanhya yako?’ Lafa inhala yako yo kuhokela na kulafa, kosoko nghukudaha kahi kuwa kalani. 3 Ayuya ikalani hakadoga, ‘Notea nhani, kosoko iMundewa wangu yakunihoka ukalani? Uludole lo kulima nichaka, na nikona chinyala kutasa. 4 Hambiya, nimanya dyonigolosa, uleke wanhu wanihokele ukwawo fonikulafigwa mu ukalani.’ 5 “Baho, hakawenanga awasinghokwa we Mundewa wakwe chila yumwedu, hoyamutamila ayuya we nghonga, ‘Ukupigiligwa choni ne Mundewa wangu?’ 6 Hakagamba, ‘Mafuta mapipa igana.’ Hakagamba, ‘Londa ikalatasi ye dideni, ikala chimwande na utulume makumi mashano.’ 7 Kahi hakalonga ne yumonga, ‘Nagwe ukupigiligwa choni?’ Hakagamba, ‘Makanda igana ge ngano.’ Hakamugamba, ‘Londa ikalatasi ye dideni tuluma makumi munana.’ 8 “iMundewa hakamutunya ikalani inghahuwilika kosoko ya ubala wakwe, kosoko awana we chilunga chino wena misungu mucheleko chawo kusuma awana wo ujelu. 9 Yesu hakagamba Nani nikuwatamila kigoloseleni mbwiya kosoko ye ugoli wihile, kosoko foikwija ihela wodaha kuwahokela muwikalo wa majuwa gose. 10 Imuchawelu muchidodogi lugano ni muchawelu kahi mudikulu; na yuya imupujili muchidodogi lugano ni mupujili kahi mudikulu. 11 Ninga nghona musuwile wachawelu mu ugoli uwihile, no nani yewengha ugoli we chawelu? 12 Na nghona musuwile wachawelu mufinhu fya wanhu wengi, no nani yewengha afiya ifyenu? 13 “Hechaka mutogomi yedaha kuwatogomela wandewa weli; kosoko ama komusula yumwedu na kumwenda yumonga, ama komwandamila yumwedu na kumubesa yumonga. Musikudaha kumutogomela Mulungu na ugoli.” 14 Amafalisayo wowile wendaji wa sendi, hawahulika ago gose, na weja wamubesa. 15 Ninga hakawagamba, “Anye nomukiyonesa kumwande ya wanhu, amba Imulungu kamanya imimoyo yenu, kosoko ikwinuligwa mugati ya wanhu ni lubeso kwe Mulungu. 16 “Itolati ne wagonesi hafyuwa baho mpaka ugele wa Yohana; kulawa ugele wuwo mbuli swamu yo undewa wa Mulungu ikuhubiliigwa, na chila munhu yakuwingila kwa ludole. 17 Ninga ni fihufu ku ulanga ne iisi kwagilila, kusuma ichipisi chidodogi che itolati kuhunguka 18 Chila munhu yakumuleka imuke na kutola yungi yakugolosa ugoni, na iyekutola imuke yalekigwe ne imulume wakwe yakugolosa ugoni.” 19 “Hahowa na munhu mugoli, yafalage suke sa ibei inghulu na kudiya fina sikukuu chila ijuwa. 20 Na hamulango wakwe ayuya imugoli yendeyetambalisigwa munhu mukiwa disina dyakwe Lasalo, yena filonda fingi, 21 yenda yehosa injala yakwe na simhonamhona salagalage kulawa mumesa ye mugoli; kahi amabwa hageja na kumunamha ifilonda fyakwe. 22 Imukiwa hakafa, malaika hawamwinula mpaka muchifa cha Ibulahimu. Imugoli naye hakafa na kusikigwa, 23 imugoli foyowa ukusimu, foyowile mumagayo hoyokwinula meso gakwe na kumona Ibulahimu kwa kutali na Lasalo muchifa chakwe. 24 “Hoyokwinanga kwa dijwi ikulu, ‘Baba Ibulahimu unyonele ubasi, umwigale Lasalo kuchanghisa ichidole chakwe mumeji na kuhosa dilimi dyangu, kusoko nikugaya mwililimba dino.’ 25 “Ninga, Ibulahimu hakamugamba, ‘Mwanangu gelegela fina munyikala yako kuchilunga hakuhokela finhu fiswanu, na iLasalo nheifiya hakahokela finhu fihile; ninga hambiya imwene kowa hano yakuhosigwa, na gweye kwa mumagayo. 26 Na hamwedu na gago gose, hagati yetu aseye na nyeye hena ikolongo ikulu, kosoko awaya wakwenda kuloka kulawa hano kwija ukwenu wanghadahe, na hechaka yeloka kulawa ko kwija ukwetu.’ 27 “Iyowile mugoli hakagamba, ‘Ninga nikukutasa Baba, umwigale kunyumba ye Babangu, 28 kosoko nina wandugu sangu washano, naye yawatamile wanghagolose fyene fyonigolose, wangheje nawo wokwija ahanhu hano ha magayo.’ 29 “Ninga Ibulahimu hakagamba, ‘Wenawo Musa na Wagonesi, wawahulike awene.’ 30 Imwene hakagamba, ‘Hata Baba Ibulahimu, amba yanghawalutila yumonga kulawa kwe wafile, wolamba.’ 31 Hakamugamba, ‘Nghona wasiwahulike Musa ne wagonesi, kahi hechaka yewahuisa hata yanghenuka kulawa kwe wafile.’”
1 Yesu hakawatamila awefusa wakwe, “Amagesa ku uwihi chawelu gokwija, ninga usungu wakwe iyakugagolosa geje! 2 Haimwagila imunhu yuya nhanga yohigwe diwe dyo kusagila musingo yakwe na kugumigwa mubahali, kusuma kumwagilisa yumwedu wa wano wadodogi ku uwihi. 3 Kilangisiseni, Nghona imunduguso kagolosa wihi mugombele, na yanghalamba mulekelele. 4 Na iyakugolosela uwihi mikangha mufungate kwa ijuwa na kuya ukwako mikangha mufungate, na kugamba Nilamba, mulekelele.” 5 Awefusa hawamutamila iMundewa, “Chongesele dihuwi.” 6 Na iMundewa kagamba, “Nhanga mowile na ihuwi ikefu fina imhule ye umheja, hamuwa mukudaha kuutamila umukuyu, ‘Uno ng'oka, ukahandwe mubahali,’ nawo hauwa ukufumila.” 7 “No nani ukwenu yena imutogomi yekulima ama kudima ngholo, yakumugamba foyekuya kumugunda, ‘Wija chimwande, ikala udiye chakudiya?’ 8 Togola! Nghemugamba, ‘Nyambikile chakudiya, ukiyohe unitogomele, mpaka nidiye na kunywa; noho nagwe udiye na kunywa.’ 9 Togola, komugamba kwimage imutumwa yuya kosoko kagolosa goyalagisigwe? 10 No nheifo na nyeye fomukufulusa kugolosa gose gomulagiswe, gambeni, ‘Aseye cha watogomi wechaka chambusi; chigolosa du yowile milimo yetu.’” 11 Foyejayowa munjila kuluta Yelusalemu, yeja yapulutila Samalia na Galilaya. 12 Na foyengilage muchijiji hakatang'anyila na wakoma ikumi, wemile hatali, 13 hawenula majwi gawo na kugamba, “Yesu, Mundewa, uchonele ubasi.” 14 Foyawonile yawagamba, “Mulute mukayonese kwa watambiki.” Na fowalutage hawahona. 15 Kahi yumwedu wawo yakone fina kahona, hakoya kunyuma, yakumutunya Mulungu kwa dijwi ikulu, 16 na hakakubita hamigulu ya Yesu, na kumwingha ilumbo. Naye hakowa Musamalia. 17 Ninga Yesu hakagamba, “Siwahonyile ikumi? Awaya ikenda wowahe? 18 Nghoneke yungi yowile na kumutunya Mulungu ninga imugeni ayu?” 19 Hoyomugamba, “Inuka ulute, dihuwi dyako dikuhonya.” 20 Foyosigwe na Mafalisayo, “Undewa we Mulungu ukwija milaki?” hakawabidula, “Undewa we Mulungu usikwija ne fitangilo fikiyonesa. 21 Na hechaka munhu yegamba, ‘Langa auno hano,’ ama, ‘Auya.’ Kosoko langa, undewa wa Mulungu uwa mugati yenu.” 22 Na kawatamila wefusa wakwe, “Majuwa gokwija, ugele womukamusulumila kona ijuwa dimwedu dye mwana we munhu, na musidyona.” 23 Nawo wowatamila, “Langa kuya, ama langa kuno, munghalute,” kahi munghawandamile. 24 Kosoko fina ulumwemwe foukumulika na kwasa ulanga kulawa ulwandi umwedu mpaka umonga, no nheifo Imwana we Munhu foyekuwa mwijuwa didyo. 25 Ninga, kunghonga ikuhanangigwa yapate magayo mengi na kulemigwa ne wanhu wo ugele uwo. 26 Fina foyowile mumajuwa ga Nuhu, no foikwija ikuwa mumajuwa ge Mwana we munhu 27 Wanhu wendawodiya, wendawokunywa, wendawetola, wendawetoligwa mpaka dijuwa diya Nuhu dyoyengila musafina, na mafaluko hogekwija na kuwakoma wose. 28 Kahi fina foyowa mumajuwa ga Lutu, wendawodiya, wendawekunywa, wendawogula na kwambasa finhu, wendawohanda, wendawojenga, 29 ninga mwijuwa diya Lutu foyaleuke kulawa Sodoma homutonya moto kulawa kulanga na kuwalakasa wose. 30 No nheifo foikwija ikuwa mwijuwa diya iMwana we munhu foyekwija yekiyonesa. 31 “Mwijuwa didyo, iyowile munyumba muchanhya ne finhu fyakwe kugati yanghahulumuke na kufilonda; na nheifiya, yowile kumugunda yanghoye kunyuma. 32 Gelegeleni dyalawanise kwe muke wa Lutu. 33 Wowose yakuhananga kuchihonya ichidoga chakwe yakuchagilisa; na yoyose yakuchagilisa chidoga chakwe yakuchihonya. 34 Nikumutamilani, muchilo chiya hokuwa na wanhu weli wagonile mwisasi, dimwedu, yumwedu kalondigwa na yumwedu kolekigwa. 35 Wanawake weli wokuwa wakusaga hamwedu; yumwedu kolondigwa na yumonga kolekigwa. 36 Wanhu weli wokuwa kumugunda; yumwedu kolondigwa na yumonga kolekigwa.” 37 Baho howomwusa, Hoki Mundewa? Hakagamba, “Howuwile umufimba noho sikitang'anyila sinumba.”
1 Hakawatamila mbasi kuwafusa fina iwagila kumutasa Mulungu majuwa gose na wanghasoke. 2 Hakagamba, “Mukaya imonga hahowa na mulamusi yowile nghakumogoha Mulungu kahi kutunya wanhu.” 3 Kahi hahowa na mwanamuke mwigane mukaya iyo yamwijilage bila kusoka na kumugamba, “Nigolose muchawelu kumwande ye munghondo wangu.” 4 Kwa chipisi hakalema; ninga hanyuma hakalonga mumoyo wakwe, “Hata nghona sikumogoha Mulungu ama kogoha wanhu, 5 ninga kosoko yuno mwanamuke mwigane yakunidasa, nomugolosela foyakuhanga ama konisokesa kwa kwija kwakwe chila ugele.” 6 iMundewa kagamba, “Hulikeni foyakulonga ayuya imulamusi yechaka chawelu. 7 Ne Mulungu nonghamba inghowalongela awaya wayasagule, awakulila ukwakwe chilo ne misi? Togoleni! Kokwikalisa kuwategelesa? 8 Nikumutamilani kowateteya chimwande. Hata nheifo ugele wo yakwija iMwana we munhu muchilunga kodyona dihuwi?” 9 Kahi hakawatamila mbasi ino, kwa wamonga awekiyona fina hawowa wachawelu na kubesa wayawo. 10 Wanhu weli hawakwila kwihekalu kutasa, yumwedu Mufalisayo na yumonga mukonghosa kodi. 11 iMufalisayo hakema na kutasa chiyomoyo, go Mulungu, nikukulumba kosoko aniye si kifane wanhu wamonga, wahokali, wabani, wa dihabwa, ama kifana ayu imukonghosa kodi. 12 Nikufunga majuwa meli kwa majuwa mufungate, nikulafa saka ya imwedu kwa chila ikumi kwa fyose fyonikupata. 13 Ninga imukonghosa kodi, yemile kutali, nghendile hata kulanga kuchanhya, ninga haketowa muchifa chakwe, yakugamba, “Mulungu, unyonele ubasi aniye nimugolosaji wo wihi. 14 Nikumutamilani, imunhu ayu hakoya ukaya ukwakwe yataliligwe muchawelu kusuma yumonga; kosoko chila iyakiinula yakudulisigwa ninga chila iyekidulisa yakwinuligwa.” 15 Awanhu hawamwigalila Yesu hata awana uleke yawamotese, na awefusa wakone hawalemesa. 16 Ninga Yesu hakawenanga ukwakwe yakugamba, “Walekeni awana weje ukwangu, munghawalemese, kosoko undewa we Mulungu ni wawo. 17 Chawelu, nikumutamilani, wowose nghakuuhokela undewa wa Mulungu fina mwana mudodogi nghekwingila mu undewa uwo.” 18 Na mukulu yumonga wa Chiyahudi hakamusa Yesu, Mwalimu muswamu, nigolose choni uleke niuhokele uwumi wa majuwa gose? 19 Yesu hakamugamba, “Nhani ukuninanga muswamu? Hechaka munhu muswamu ninga Mulungu yemwene.” 20 Kugamanya amalagiso: “Unghagolose dihabwa; unghakome; unghadanhe, wogohe iBabako ne ing'inako.” 21 Hakagamba, “Aga gose nigakola kulawa udodo wangu.” 22 Yesu yakahulike nheifo, hakamugamba, “Kuhungukiligwa chinhu chimwedu. Yambasa fyose fyowinafyo na ufigawe kwe wakiwa, nagwe kokuwa na sigafu kulanga, kamei wije unyandamile.” 23 Ninga, foyahulike gago, hakowa na usungu, kosoko hakowa mugoli lugano. 24 Yesu foyamonile foyasuhile hakatamila Foikuwa nghugutu ku wagoli kwingila kuundewa wa Mulungu! 25 Kosoko ni fihufu kwe ingamiya kwingila mwihengele dye sing'ano kusuma imugoli kwingila mu undewa we Mulungu. 26 Awaya wahulike hawagamba, “Ninga no nani yedaha kuhona?” 27 Ninga hakagamba, “Ichisikudahika ku wanhu, kwe Mulungu chikudahika.” 28 Petulo hakamugamba, “Langa aseye chileka fyose na kumwandamila.” 29 Hakawagamba, “Chawelu, nikumutamilani, hechaka munhu yalekile nyumba, ama muke, ama wanduguse we chigosi, ama iBabakwe ne ing'ina, ama wanagwe, kosoko yo undewa wa Mulungu, 30 inghehokela mikangha mingi hambiya, na muchilunga chikwija, uumi wa majuwa gose.” 31 Foyawalondile awaya ikumi na weli, hakawagamba, “Langa chikukwila kuluta Yelusalemu, na chila chinhu chandikigwe soko ye Mwana we munhu ne wagonesi chomemelesigwa. 32 Kosoko kogumigwa mumikono ya wanhu wa Mumataifa, kokogeleligwa na kogoloseligwa kwa chinyala na kutwiligwa mate; 33 womutowa mikotya na kumukoma, na mwijuwa dya kadatu kekwinuka.” 34 Amba imene wasatangile dyodyose dya gago, inonga yo, haifisigwa ukwawo, na wasatangile chalongigwe. 35 Foyafikile habehi na Yeliko, imunhu inghakona hakekalaga hanghanda ye injila na kutasa; 36 Foyahulika ditewa dyalogage, hakawosa wowile habehi naye, “Kwina choni?” 37 Hawamugamba, “Yesu wa Nasaleti yakuloka.” 38 Hakatula chowe, “Yesu, Mwana wa Daudi, unyonele ubasi.” 39 Na waya wowile kumwande yakwe hawamulemesa, wakumugamba yanyamale; ninga imwene hakongesa kujoja, “Mwana wa Daudi, unyonele ubasi!” 40 Yesu hakema, na kulagisa yegaliligwe imunhu yuya; 41 na foyejile habehi, hoyomusa, “Ukuhananga nikugolosele choni?” Hakagamba, “Mundewa, nikuhananga unigubule ameso gangu.” 42 Yesu hakamugamba, “Ameso gako gagubuke, wone! Dihuwi dyako dikuhonya.” 43 Baho ni baho ameso gakwe hogegubuka na hakamwandamila, yamutunya Mulungu na wanhu wose wakone gago howomutunya Mulungu.
1 Yesu hakengila Yeliko na hakapulutila mukaya iyo. 2 Na hahowa na munhu disina dyakwe Sakayo; hakowa mukulu wa wakonghosa kodi, na munhu mugoli. 3 Hakagesa kumona Yesu ni munhu wa namuna yaki, ninga nghadahile kosoko ye ditewa dya wanhu naye hakowa munhu muguhi. 4 Ninga, hakabilima kumwande na kukwila mumukuyu kumona, kosoko hayuwa yapulutile baho. 5 Na Yesu yakafike ahanhu haya, hakalanga kuchanhya na kumugamba, “Sakayo, hulumuka hasi chimwande, kosoko na mugeni wako diyelo.” 6 Sakayo hakahulumuka hasi chimwande, na kumuhokela kwa chinyemi. 7 Awanhu fowonile nheifo, hawang'ung'ulika, Kaluta kuwa mugeni wa munhu yena uwihi. 8 iSakayo hakema na kumutamila Mundewa, Lnga, Mundewa inusu ye Sawo yangu nikuwengha iwakiwa, na nghona nimudanhilise munhu chinhu chochose, nikumuwisila(nikumuliha) mikangha mine. 9 Yesu hakagamba, “Diyelo uhonya wingila munyumba ayi, kosoko ayu naye ni mwana wa Ibulahimu. 10 Kosoko Mwana we Munhu keja kuhananga na kuwokowa ichagilile.” 11 Fina fowahulikage simbuli siso, hakagendelela kuwatamila mbasi, kosoko hakowa habehi na Yelusalemu, na kosoko wenda wofumila fina undewa we Mulungu wokiyonesa chimwande. 12 Kosoko yo hakagamba, “Munhu wa lukolo lwa undewa hakaluta ku isi ya kutali kuhokela uludole lwo undewa yanghafulusa kuhokela kuya. 13 Hakenanga watumwa wakwe ikumi hoyowegha maliho ga minyesi midatu chila munhu na kuwagamba, ‘Goloseni uchulusi ne isendi yo mpaka nomanikwija.’ 14 Ninga, iwanhu we isi iya wasamwendile, na hawatuma wajumbe kunyuma yakwe, wakugamba, ‘Chisikwenda imunhu ayu yachidime.’ 15 “Foyagolosigwe Mundewa hoyokuya na kulagisa awatogomi woyawenghile sisendi wenangigwe na kuluta ukwakwe uleke yadahe kumanya chowapatile. 16 Iwanghonga keja hameso gakwe yakugamba, ‘Mundewa ifesa yako yeleka mikangha ikumi.’ 17 Hakamugamba, ‘Nitunya lugano, agwe kwa mutogomi muswanmu! Kosoko hakuwa musindamafu muchinhu chidodogi, kokuwa na udaha wa kudima kaya ikumi!’ 18 Na wa keli keja yakugamba, ‘Mundewa, ifesa yako yeleka mikangha mishano.’ 19 Naye hakamugamba, ‘Agwe nagwe kodima kaya shano.’ 20 “Kahi yumonga hakeja yakugamba, ‘Mundewa, aino no fesa yako, haniyoha na kuifisa fiswanu mumusipi. 21 Hanyogoha kosoko gweye kwa munhu mukugutu, agweye kwa kifana munhu yakulonda ifinhu si fyakwe, na kugola honghuhandile.’ 22 iMundewa hakagamba, ‘Nikukuliganisa kosoko ye simbuli sako gomwecho agwe gomutogomi wihile! Hakumanya fina na munhu mukugutu, nikulonda finhu si fyangu, na nikugola fosihandile. 23 Ninga nhani nghwaikile kubengi, na kunyija yangu hanuwa nikuihokela ne chambusi yakwe?’ 24 Hakawatamila awaya watogomi wakwe, ‘Londeni ipesa kulawa ukwakwe na mwingheni ayuya iyenaso ikumi.’ 25 Nawo hawamugamba, ‘Mundewa, kenaso ikumi tayali!’ 26 Nikumutamilani, fina chila yena chinhu kokongeseligwa, ninga iyechaka chinhu hata choyenacho kohokigwa. 27 Ninga, kosoko ya wao wanghondo wangu, wasikuhananga niwadime, wegaleni hano na kuwachinja mumeso gangu!” 28 Na foyafuluse kulonga nheifo, hakagendelela kumwande, munhambo yakwe kuluta Yelusalemu. 29 Foyafikile habehi na Betifage na Betania, hatunda dyenangigwagwe Itunda dya Olifeti, hakatuma wefusa wakwe weli 30 yakugamba, “Gendeni kuchijiji chihamwande yenu, baho mukwingila kwenu modyona ipunda dyohigwe, disinati ditumiigwe na munhu, didoholeni na kudigala hano. 31 Nghona munhu wowose yangawosa, ‘Nhani mukudidohola? Mugambeni Mundewa yekudihananga.’” 32 Ninga, awaya watumigwe hawaluta na kona fina foyawatamile. 33 Fowadidoholage dipunda imwenyecho hakawagamba, “Nhani mukudohola dipunda?” 34 Hawagamba, “Mundewa yakudihananga.” 35 Hawadigala kwa Yesu, na hawatandika sisuke sawo mwipunda na kumukwisa Yesu muchanhya yakwe. 36 Na foyagendelelage ne inhambo, na wanhu hawatandika sisuke sawo munjila. 37 Yakafike habehi na Yelusalemu, muluduli lwa ditunda dya miseituni, ditewa dyose dye wefusa wakwe hawakonga konela na kumutunya Mulungu kwa dijwi ikulu kosoko ya makulu gowonile yakugolosa, 38 wakugamba, “Yamotesigwe, imukulu iyakwija mwisina dye iMundewa! Dihewa kulanga na ditunyo kuchanhyasi kulanga!” 39 Na Amafalisayo wowile mwitewa diya howomugamba, “Mwalimu, wagombele awefusa wako!” 40 Hakawabidula, Nikumutamilani, awano nhanga wanyamale, amawe gano hagowa gakutowa chowe. 41 Foyafikile habehi na kuyona ikaya, hakaililila, 42 na hakagamba, “Hayuwa ikuwa ibeka nhanga nagwe wamanyile imbuli ya dihewa! Amba hambiya ifisigwa mumeso gako. 43 Kosoko ugele ukwija ukwako, we wanghondo wako wokwikila ikigo, wokusunguluta na kukwingilila kulawa sisandi sose. 44 Wokubana lugano agweye ne wanago hamwedu, na wasileka diwe muchanhya ye diwe ukwako kosoko nghwamanyile ugele wo kwija kwe Mulungu.” 45 Na Yesu hakengila kwihekalu na kukonga kuwawinga awaya awambasage, 46 na hakawagamba, “Itulumigwa, Nyumba yangu yokuwa hanhu ha nhasa, ‘Ninga muigolosa fina mhango ya wahiji.’” 47 Naye yendeyofusa chila ijuwa mwihekalu. Makohani wakulu, watulumi na wakulu wa wanhu filongosi hawahananga kumukoma, 48 ninga wasonile njila ya kugolosa, kosoko wanhu wose wasendage hata mbuli yakwe imwedu iwaloke.
1 Ijuwa dimonga Yesu foyafusage wanhu mwihekalu na kuhubili mbuli swamu, awatambiki wakulu, watulumi na wasehe haweja 2 na hawamugamba, “Chitamile kwa udaha uhoki ukugolosa gano, ama no nani yakwinghile udaha uno?” 3 Hakawabidula, “Ani nani nikuwosa mbuli; haya nhamileni, 4 ubatiso wa Yohana haulawa kulanga ama kuwanhu?” 5 Ninga awene hawalonga iwecho kwa wecho wakugamba, “Ghona chinghagamba, haulawa kulanga, kochigamba, nhani musamuhuwile? 6 Ninga chinghagamba, haulawa kuwanhu, awanhu wose wochikubitila mawe na kuchikoma, kosoko wose wamanya mumimoyo yawo fina Yohana hakowa mugonesi.” 7 Hawabidula fina wasimanyile haulawa hoki. 8 Na Yesu hakawagamba, “Ani nani sikuwatamila fina kwa udaha wa nani nikugolosa gano.” 9 Hakakonga kuwatamila wanhu imbasi ayi, “Imunhu hakahanda mugunda wakwe wa misabibu na hakaweka wemilisi na hakaluta kuisi kwa chisele chitali. 10 Ugele wo kugola, hakegala watogomi ku wemilisi soko yawenghe digelo dyo ugolaji idimwagile, ninga awemilisi hawamutowa na kumuwisa yechaka chinhu. 11 Hakamutuma mutumwa yungi; imwene naye hawamutowa na kumugolosela fihile, na kumuwisa yechaka chinhu. 12 Na hakamwigala kahi wa kadatu; ayuno hawamubulaga na kumuwinga. 13 Kahi ayuya imwenye mugunda hakagamba, ‘Notea nhani?’ Nomwigala imwanangu mwendigwa wangu; nhagela womwogoha. 14 “Ninga awaya awemilisi wo mugunda wakamone, hawekitamila wakugamba, ‘Ayuno no muhasi; lekeni chimukome ne ichipe chino chuwe chetu.’ 15 Hawamulafa kunje yo mugunda we misabibu na kumukoma. “Choni choyawagolosela imwenye mugunda awaya awemilisi? 16 Kokwija na kuwakoma awaya awemilisi, na kuwengha wengi umugunda we misabibu.” Fowahulike imbuli ayo, hawagamba, “Mulungu uchilekelele.” 17 Ninga Yesu hakawakumhulila meso na kugamba, “Mukudigamba nhani ditulumo dino: ‘Isumbi yowalemile wajengaji igaluka no sumbi ya hagati.’ 18 Imunhu wowose yakugwiligwaa ne isumbi iyo ikumubulaga, ninga inghogwa mwe munhu wowose ikumutiginha.” 19 Awatulumi na watambikii wakulu hawahananga kumukola muchigele chichiya, ninga hawawogola iwanhu; hawahananga kugolosa nheifo kosoko hawatanga fina hakatowa imbasi ayi kosoko yawo. 20 Hawahananga luneka lwa kumukola, howotuma wasakulaji, wegolose fina wanhu wachawelu uleke wamutegele kwa simbuli sakwe na kosoko yo wamukole na kumwigala kuwasilikali. 21 Hawamusa, Mwalimu, chimanya finan ukulonga na kufusa kwa chawelu, na nghukuwalanga wanhu kufihanga, ninga ukufusa chawelu injila ye Mulungu amalagiso. 22 Ni fiswanu kumwingha Kaisali kodi ama si fiswanu? 23 Ninga hakatanga ichimwefe chawo, na hakawagamba, 24 “Nyoneseni isendi, yacholigwe muno nani? Amatulumo gamutaja nani?” Hawagamba, “Kaisali.” 25 Hakawagamba, “Ninga ifinhu fya Kaisali mwingheni Kaisali, na ifinhu fye Mulungu mwingheni Mulungu.” 26 Wasadahile kumukola kwa simbuli soyalongile hamwande ya wanhu; hawanyamala twi na hawakisina imbidula yakwe. 27 Baho haweja ukwakwe Masadukayo, awaya wakugamba fina kwechaka kwinuka awafile, hawamusa, 28 Mwalimu, Musa hakachandikila fina imunduguse we munhu yatolile yanghafa bila mwana, imunduguse yamuhale imwanamuke na yamwelekele imunduguse wana. 29 Kweja kowa na wanhu mufungate we nyumba imwedu; wa nghonga hakatola muke na hakatagika bila cheleko. 30 Kahi wa keli hakamuhala ayuya mwanamuke na kutagika, 31 na wakadatu hakamuhala, na nheifiya wose mufungate hawatagika bila kuleka mwana. 32 Kundumo ayuya imwanamuke naye hakatagika. 33 Togola! Mwijuwa dya kwinuka wafile yakuwa muke wani? Kosoko hakatoligwa na wose mufungate. 34 Yesu hakawagamba, “Awana we chigele chino, wakutola na kutoligwa; 35 ninga awaya awagiligwe kuhokela ugele ukwija na kukwinuka kwa wafile wasikutola kahikutoligwa. 36 Kosoko wasikufa keli, wakifana Malaika na ni wana we Mulungu, kosoko wenuligwa kulawa kudifa. 37 Ninga fina awafile wekwinuligwa, hata Musa hakonesa fiswanu mu sula ya ichihulo chikwaka hoyamwinange Mundewa ni Mulungu wa Ibulahimu na Mulungu wa Isaka na Mulungu wa Yakobo. 38 Kahi imwene si Mulungu wa wafile, ninga wa womi, kosoko wose wakwikala naye.” 39 Na Watulumi wamonga hawagamba, “Mwalimu kulonga fiswamu.” 40 Nawo wasagesile keli kumusa mbuli ingi. 41 Ninga hakawagamba, “Ikudahika nhani wagambe fina Kilisito ni mwana wa Daudi? 42 Kosoko Daudi imwenecho yakulonga muchitabu che Isabuli, Mundewa kalonga ne Mundewa wangu: ‘Ikala ukulume kwangu 43 mpaka niwagolose wanghondo wako fina chibao cha kulwatila migulu yako.’ 44 iDaudi kamwinanga Masiya; ninga kokuwa nhani mwanagwe?” 45 Awanhu wose fowategelesage, Yesu hakawatamila wefusa wakwe; 46 Muwe meso na watulumi, awakwenda kugenda wafalile makasu matali na kulamusigwa mumasoko na kwikala mumagoda ga kumwande Mumasinagogina mufyakudiya fye si kukuu. 47 Wakudiya kunyumba se wegane, na kwa chimwefe wakutasa nhasa nhali. Awano wehokela itoso ikulu mwijuwa dyo uliganiso.
1 Yesu hakenula meso na kona awagoli fowakuguma filafwa fyawo mwisanduku dyo kulafila, 2 na hakamona mwigane yumwedu yakuguma mwisanduku sendi mbili. 3 Hakawagamba, “Chawelu nikumutamilani, imwigane ayu mukiwa kalafa kujumha wose. 4 Kosoko awa wose walafa sadaka isigafu ye isao yawo, ninga ayu mu ukiwa wakwe kalafa fyose foyenafyo hata chiya choyahuwile.” 5 Na wamonga fowejawasimulilaga isoko ye dihekalu ifene fodihambigwe na mawe maswamu na finhu fiswamu fowalafile wanhu kumwingha Mulungu, hakagamba, 6 “Amba kosoko ye finhu fino fomukona amajuwa gokwija disilekigwa diwe muchanhya ye diwe ambadyo disimoligwa.” 7 Hawamusa, “Mwalimu, agano gokuwa milaki, na chitangilo chokuwa choni ugele wa gano gehabehi kwija?” 8 Hakawagamba, “Kilangisiseni mungheje mudanhilisigwa, kosoko wengi wokwija kwa disina dyangu, wakugamba, ‘Aniye no mwene, Ugele usegelela!’ Munghawandamile. 9 Na munghahulika imbuli ye inghondo na chiyunguyungu, munghogohe; kosoko ago gakuhananga galawanise kunghonga, amba indumo isikwija chimwande.” 10 Kahi hakawagamba, “Wanhu we isi ayi wokitowa na wanhu we isi aiya, na undewa wokitowa na uundewa. 11 Kokuwa na musingisiko mukulu, na hanhu hengi hokuwa na njala na matamu, na kokuwa na chogoho kikulu na fitangilo fingi. 12 Ninga ugele ago gose gasinati galawanise wowakola na kuwasambasa, wowegala kumasinagogi na kuchifungo, na wowegala kumwande ya wandewa na Majumbe, kosoko ye disina dyangu. 13 Achino chokuwa chigele ukwenu cha kutamilisa dihuwi dyenu. 14 Mumadoga genu muwe na mbuli ayi munghadoge ugele usinati wije mobidula nhani, 15 kosoko aniye nomweghani misungu, hechaka munghondo yedaha kuwasuma ama kuwahilula. 16 Waweleke, wandugu senu, wewahabehi nanye na wambwiya senu wowasongesa na wamonga wenu wokomigwa; 17 Mosuligwa na wanhu wose kosoko ye disina dyangu. 18 Musikwagilisa hata ulujwili lumwedu lwa matwi genu. 19 Kwa kugugumila kwenu mouhokela uumi we chawelu.” 20 “Ninga munghona ikaya ya Yelusalemu ikusungulutigwa na wasilikali, baho mutange fina ugele wo kutikimisa ikaya usegelela. 21 Baho lekeni awowile Uyahudi watijile kumatunda, na awowile mukaya waleuke, na awowile kumigunda wanghengile mukaya, 22 kosoko amajuwa gago ni ge Mulungu kuwatosa awanhu wakwe, kamemelesa gose agatulumigwe. 23 Usungu wawo awanawake wakiyohe na wakonghesa mumajuwa gago! Kosoko mokuwa na magayo makulu muisi na nyono muchanhya ye wanhu. 24 Wakomigwa kwa ukali we dipanga, na wogolosigwa mateka ku mataifa gose, na Yelusalemu yolwatigwa na wamataifa mpaka ugele wawo umemelekele.” 25 “Fitangilo fokoneka mwijuwa, mumwesi na musinyelesi, na muchilunga mokuwa na magayo kosoko ya ichowe che bahali ne inghundali ya mawimbi gakwe. 26 Wanhu wosimia kwa chogoho, fina fowakugoja agekwija muchilunga, kosoko ifinhu fyo kulanga fyosingisika. 27 Baho wakiyawomona imwana we Munhu yakwija mumafunde kwa ludole na itunyo ikulu. 28 Na baho simbuli so singhakonga kulawanisa, sangalaleni na kwinula matwi genu, kosoko uhonya wenu ufulusa kwija.” 29 Na hakawatamila kwa mbasi: “Langeni umutini na mabiki gose; 30 chimwande fogakukonga kutuguta mukona muweecho na kumanya fina ichilangasi chahabehi. 31 No nheifo munghona simbuli aso sikulawanisa, mumanye undewa we Mulungu wa habehi: 32 Cawelu, nikumutamilani, icheleko chino chisiloka mpaka gose gagoloseke. 33 Ulanga ne iisi foloka, amba si mbuli sangu sisikuloka ng'o. 34 Ninga kilangisiseni, imimoyo yenu ingheje isumigwa na anasa na unywaji na magayo ga ugima uno, na dijuwa diya hodiwajila kwa kusinhukisa fina umutego foukugwisa. 35 kosoko yowejila wose wakwikala muchilunga chose. 36 Ninga muwe meso na mutase majuwa gose, soko muwe na ludole lwa kuhona na ago gose gelawanisa, na kwima kumwande ye Mwana wa Munhu.” 37 Chila ijuwa yendeyofusa mwihekalu, nina hechilo yendeyoluta kwitunda dye miseituni na kwikala uko. 38 Na nhousikusiku wanhu wengi hawamwijila mwihekalu na kumutegelesa.
1 Kahi dijuwa dikulu dye imikate isigumigwe nungo dyenangwa Pasaka hadyuwa habehi. 2 Na awatambiki wakulu ne watulumi weja wahanangaga njila ya kumukoma; ninga wenda wewogoha awanhu. 3 Ishetani hakamwingila Yuda yenangigwagwe Isikalioti, yowile yumwedu wa waya ikumi na weli; 4 Hakaluta na kusimulila na awakulu wa watambiki na filongosi we dihekalu fina foyemulafa ukwawo. 5 Hawonela lugano na hawalagana fina womuliha mapesa. 6 Yuda hakafumila, na hakahananga luneka lwa kumusongesa ukwawo, ugele amatewa gehechaka. 7 Kahi hosikwija dijuwa dye imikate isigumigwe nungo, adyo no dijuwa dyo kuchinja ingholo ye Pasaka. 8 Yesu hakawatuma Petulo na Yohana yakugamba: Luteni na kuigolosa iPasaka kosoko yetu chidiye. 9 Hawamugamba, “Hoki houkuhananga chikugolosele?” 10 Hakawagamba, “Langa, fomukwingila mukaya motangana na munhu mugosi yetwike ibiga dya meji, mwandamileni na mwingile munyumba yoyekwingila; 11 mutamileni imwenye nyumba, ‘Mwalimu yakusa chuwa hoki ichibuha che wageni, honidiya iPasaka hamwedu na wefusa wangu?’ 12 Naye komonesani chibuha chikulu che golofa chihambigwe, muchitengele umo.” 13 Hawaluta na kona fina foyawasigilile nawo hawailenga iPasaka. 14 Na ugele ukafike hoyokwikala mumesa hamwedu ne watumigwa wakwe. 15 Hakawagamba, “Nyenda lugano kudiya iPasaka ino hamwedu na nyeye akuno sinati nigaye. 16 Kosoko nikumutamilani, siidiya keli iPasaka mpaka imemelesigwe mu undewa we Mulungu.” 17 Hakalonda chikombe, na foyamulumbile Imulungu hakagamba, “Londeni chino na munywe hamweu; 18 Kosoko nikumutamilani kulawa diyelo sikunywa keli difai mpaka undewa we Mulungu foukwija.” 19 Hakalonda umukate, na yakalumbe hakaubendula na kuwengha, yakugamba, “Awuno no umutufi wangu ukulafigwa kosoko yenu. Goloseni dino kwa kunigelegela niye.” 20 Hakagolosa nheifiya na kuchikombe, fowafuluse kudiya ichakudiya che hegulo hakagamba, “Chikombe chino ni ilagano disha mu sakame yangu iikwitika kosoko yenu. 21 Ninga, langeni ayuya yenisongesa kahamwedu na niye mumesa! 22 Kosoko imwana we Munhu yakufa fina foiandikigwe, ninga usungu wakwe imunhu yuya yemusongesa!” 23 Hawakonga kiyusa awecho kwa wecho, ni nani mugati yawo yegolosa dino. 24 Hahowa na lukani mugati yawo, fina no nani iyekutaligwa kuwa mukulu kujumha wose. 25 Yesu hakawagamba, “Awandewa wa Mataifa wakuwadima wanhu kwa ludole, na waya wena udaha muchanhya yawo wekwinangigwa Watasi wa wanhu. 26 Ninga inghowe nhaifo ukwenu; amba imukulusi ukwenu yowe fina mudodogisi, na ichilongosi yowe yakuwatogomela. 27 Kosoko imukulu no yehoki, ayuya yakwikala mumesa, ama ayuya yakutenga chakudiya? So yuya yakwikala mumesa? Ninga aniye na mugati yenu fina yumwedu yakutogoma. 28 Anyeye nomugendelele kuwa hamwedu na niye mumagesa gangu; 29 fina iBabangu foyaninghile niye undewa, no nheifo nikuwenghani nyeye. 30 Mudahe kudiya na kunywa mumesa yangu mu undewa wangu, na kwikala mwigoda dyo undewa na kuwaliganisa amakabila ikumi na meli ga Isilaeli.” 31 Simoni, Simoni, tegelesa Shetani hakakuhananga uleke yadahe kukusunga fina ngano. 32 Ninga nitasa kosoko yako idihuwi dyako dinghahunguke; nagwe foukwija unyuwila keli wagume ludole awanduguso. 33 Petulo hakagamba, “Mundewa, aniye nifumila kuluta na gweye kwigelesa na hata kukomigwa.” 34 Hakagamba, “Nikukutamila Petulo, dijogolo disikwika diyelo, mpaka gweye ukuwa unikanile mikangha midatu fina nghunimanyile.” 35 Hakawagamba, “Togoleni, baho fonawegale bila mufuko ama mukoba ama filwatu, hamuhungukiligwa na choni?” Hawagamba, “Chisahungukiligwe na chinhu.” 36 Yesu kawagamba, “Amba hambiya, leka imunhu yena mufuko yaulonde, na yena umukoba nheifiya. Ninga imunhu nghona yechaka ipanga yause dikasu dyakwe yagule dimwedu. 37 Iwandikigwa fina hakataligwa hamwedu na wena uwihi Amatulumo gano mpaka gamemelesigwe ukwangu; kosoko iwandikigwe muchanhya yangu ina umemeleso wakwe.” 38 Nawo hawagamba, “Mundewa, Langa hano hena mapanga meli;” Hakagamba, “Fiswamu.” 39 Hakaleuka, na kuluta kwitunda dye miseituni fina foyasowele, na wefusa wakwe hawamwandamila. 40 Na yakafike uko hakawagamba, “Taseni, mungheje mukwingila mumagesa.” 41 Na imwene hohonitemanula nawo chipisi cha kukubita diwe, hakafugama na kutasa. 42 Baba, unghahananga unileusile ichikombe achi, hata nhaifo, si nyenda yangu, amba iyako igoloseke. 43 Na baho imalaika hakoneka ukwakwe kulawa kulanga na kumwingha ludole. 44 Na foyowile mu usungu mukulu hakatisa lugano; na difuke dyakwe digaluka fina matwene ga sakame gakulagala hasi. 45 Na foyafuluse kutasa, hakeja kuwefusa wakwe na hakawona fina wagona kosoko yo usungu, 46 na hakawagamba, “Nhani mukugona? Inukeni mutase mungheje mukwingila mumagesa.” 47 Na foyalongage nhaifo, hodikwija itewa dya wanhu dikulongosigwa na munhu yenangigwagwe Yuda, yumwedu wa wefusa ikumi na weli. Hakamusegelela Yesu uleke yamunonele. 48 Ninga Yesu hakamugamba, “Yuda ukumosongesa Mwana we Munhu kwa kumunonela?” 49 Na wowile habehi naye fowonile gakuhananga galawanise, hawagamba, “Mundewa, chiwateme na mapanga?” 50 Na yumwedu wawo hakamutowa imutumwa Kuhani mukulu na kumudumula inghutwi yakwe yo kulume. 51 Ninga Yesu hakagamba, “Lekeni, munghagolose keli!” Hakamukwafa inghutwi yakwe na kumuhonya. 52 Kahi Yesu hakalonga na wakulu wa watambiki na filongosi we dihekalu na wasehe, awejile kumukola, “Mwija na mapanga na mapulo fina kukola muhiji? 53 Fonyowile hamwedu na nyeye majuwa gose mwihekalu musanikolile. Ninga auno no ugele wenu, na ugele wa ludole lwa chisa.” 54 Baho hawamukola na kumulongosa kumwigala kunyumba ye Kohani mukulu. Petulo hakamwandamila kwa kutali. 55 Na fowasile moto hagati ye dikumbo, hawakala hasi na kotela, Petulo hakekala hamwedu nawo. 56 Imutumishi yumonga we chike yakamone Petulo kekala mu ujelu na kumulanga fiswanu, hakagamba, “Imunhu ayu naye hakowa naye.” 57 Ninga hakakana, yakugamba, “Gomwanamuke, simumanyile.” 58 Hanyuma chidogo munhu yungi yamona na kumugamba, “Agwe nagwe kwa yumwedu wa wawo.” Ninga Petulo hakagamba, “Gomunhu gwe, si yumwedu wawo.” 59 Na chikaloke chigele cha isaa dimwedu kahi munhu yungi hakalonga kwa mukaso, yakugamba, “Chawelu imunhu ayu naye hakowa naye; kosoko ni Mugalilaya.” 60 Ninga Petulo hakagamba, “Go munhu, simumanyile choukulonga.” Na baho ni baho foyowile yekali longa dijogolo hadika. 61 Na iMundewa hakabiduka na kumulanga Petulo. Na Petulo hakagelegela imbuli ye Mundewa fina foyamutamile, “Dijogolo disinati dike diyelo, ukunilema mikangha midatu.” 62 Hakalawa kunje na kulila lugano. 63 Na awanhu wamwilisage Yesu hawamwogelela na kkumutowa; 64 na hawamugubika chitambala muchihanga na kumusa, “Tanga no nani yakutowile?” 65 Hawalonga mbuli nyingi ukwakwe na kumuliga. 66 Kukoche, wasehe wa wanhu, watambiki wakulu na watulumi, hawatang'anyila na hawamulongosa kwi balasa dyawo, na hawagamba, 67 “Nghona gweye no Kilisito chitamile.” Ninga hakawagamba, “Ninghamutamilani, musihuwila; 68 na ninghawosa, musinibidula. 69 Ninga kulawa hambiya na kugendelela, Imwana we Munhu yakwikala kumukono wo kulume lwa uludole lwe Mulungu.” 70 Na wose hawagamba, “Ninga gweye kwa Mwana we Mulungu?” Naye hakawagamba, “Anye muilonga, fina na mwana we Mulungu.” 71 Nawo hawagamba, “China nghwina kahi ya uhomelesi ungi? Chihulika chiwecho kulawa mumulomo wakwe.”
1 Kahi ditewa dyose hodikwinuka na kumwigala Yesu kwa Pilato. 2 Hawakonga kumusongesela wakugamba, “Chimona imunhu ayu yakukubuganisa ditaifa dyetu na kuwalemesa wanhu kuliha kodi kwa Kaisali na kugamba imwene no Mundewa Kilisito.” 3 Pilato hakamusa, “Agweye no Mundewa wa Wayahudi?” Na hakamubidula, “Agwe kuilonga.” 4 Ne Pilato hakalonga na Makohani wakulu na matewa, “Sonile uwihi we munhu yuno.” 5 Ninga awene wadindilisa wakugamba, “Yakuwasongesa wanhu kwa kufusa ku Yudea yose, kulawa Galilaya mpaka kuno.” 6 Pilato yakahulike gago, hakosa nghona Yesu ni Mugalilaya. 7 Foyamanyile fina kowa mu undewa wa Helode, hakamwigala kwa Helode, yowile Yelusalemu muchigele chicho. 8 Foyamonile Yesu iHelode hakonele lugano kosoko hakahanangaga kumona, kosoko hakahulika mbuli nyingi muchanhya yakwe, na hakahuwila kona majumo gamonga gekugolosigwa ne mwene. 9 Naye Helode hakamusa mbuli nyingi; ninga Yesu nghamubidula. 10 Amakohani wakulu na watulumi hawalawa kumwande na kulafa uhomelesi wawo kwa ludole. 11 Na Helode ne wasilikali wakwe hawamugolosela kwa chinyala na kumogelela, kahi hawamufasa ikasu iswamu lugano, hakamuwisa kwa Pilato. 12 Helode na Pilato hawowa mbuya kulawa dijuwa diya, kosoko weseyendage ugele adino disinati dilawanise. 13 Kahi Pilato hakenanga hamwedu Amakohani wakulu na filongosi wa wanhu, 14 na hakawagamba, “Mumwigala ukwangu imunhu ayu fina kabuganisa wanhu, nani langa nilamula simbuli sakwe mumeso genu, kahi sonile dyodyose dihile muuhomelesi wenu wose ukwakwe; 15 nheifiya Helode naye kosoko kamuwisa ukwetu. Langa! Nghagolose chochose chimwagilile yakomigwe; 16 kosoko yo nomutowa na kumudohola.” 17 Pilato hakahanangigwa yawadoholele munhu yumwedu mwijuwa dikulu. 18 Ninga awanhu wose howojoja hamwedu, Chileusile imunhu ayu na uchidoholele Balaba. 19 Munhu yagumigwe kugati kosoko ye finju yalawanise mwikaya, na kwa ukomaji. 20 Pilato hakahananga kumohola Yesu, hakalonga nawo keli; 21 ninga hawatowa chowe Yasambasigwe, musambase! 22 Kahi lwakadatu hoyolonga nawo, “Nhani, kagolosa choni chihile? Sonile umwakwe mbuli yoyose ihile imwagile kufa; kosoko yiyo nomujola na kumudohola.” 23 Ninga hawakonya kuhananga kwa majwi makulu fina yasambasigwe. Na majwi gawo hagasuma. 24 Pilato yalamula fina ingwina yawo igoloseka. 25 Hakamoholela imunhu yagumigwe kugati kosoko ye ulefi na ukomaji, wowamuhanange, ninga iYesu hakamulafa yakomigwe fina fowendile. 26 Fene fowamulongose kulawa kwa Pilato, hawamukola munhu disina dyakwe Simoni wa Kilene yalawage kumugunda, na kumutwika umusalaba yaupike kunyuma ya Yesu. 27 Na baho hadimwandamila itewa ikulu dya wanhu, hamwedu na wanawake walilage na kuhongesa. 28 Ninga Yesu yayabidukila na kuwagamba, “Muwanawake wa Yelusalemu, munghanililile niye ninga mukililile muweecho na mulile kosoko ye iwana wenu. 29 Kosoko langeni! Amajuwa gekwija nawo wekwija welonga, Ibeka awechaka cheleko, na sinda siseleke, na matombo gasonghese! 30 Nawo wakonga kulonga na matunda, Chugwileni na fitongo Chigubikeni. 31 Nghona wagolose dino mwibiki dideke yokuwa nhani mwibiki dinyalile?” 32 Kahi hawawalonda wanhu weli wowile wabanaji, hawawalongosa wawakome hamwedu na Yesu. 33 Na fowejile ahanhu hekinangigwa Iguha dya ditwi, baho howomusambasa na waya wabanaji, yumwedu kulume na yumonga kumoso kwakwe. 34 Na Yesu hakagamba, “Baba uwonele ubasi kosoko wasimanyile chowakugolosa. Na hawegawila sisuke sakwe kwa kutowa kula.” 35 Na wanhu hawema baho na kulanga, ninga, ifilongosi hawamujowa wakugamba, “Hakahonya wamonga; lekeni yakihonye imwenecho, nghona imwene no mubakigwa we Mulungu yasaguligwe!” 36 Wasilikali nawo hawamogelela, haweja na kumwingha siki, 37 wakugamba, “Nghona gweye uMundewa wa Wayahudi kihonye gomwecho!” 38 Muchanhya yo musalaba hahowa na matulumo AYUNO NO MUNDEWA WA WAYAHUDI. 39 Yumwedu wa waya wabani watungikigwe hakamuliga yakugamba, “Agweye so Kilisito? Kihonye gomwecho na seye.” 40 Ninga iyumonga hakamugombela yakugamba, “Nghukumogoha Imulungu, nagwe kuwa munamulwa iyo? 41 Naseye ichagila, kosoko chikuhokela amaliho ge sinhenda setu, amba imunhu ayu nghagolose dyodyose dihile.” 42 Na hakagamba, “Yesu unigelegele no maa ukwingila muundewa wako.” 43 Na Yesu hakamugamba, “Chawelu, nikukutamila, diyelo ukuwa na niye kulanga.” 44 Hachuwa chigele cha saa mutandatu, hakuwa na chisa muisi yose mpaka saa ikenda; 45 dijuwa fyodyadugile kwalika; na dipasia dye dihekalu dyadegeka fipande fili. 46 Baho Yesu hakalila kwa ijwi ikulu yakugamba, “Baba mumikono yako nikwika ichidoga changu! Na foyalongile nhaifo hakatajika.” 47 Ayuya imukulu wa wasilikali yakone galwanise, hakamutunya Mulungu na kugamba, “Chawelu, imunhu ayu hakowa muswamu.” 48 Na amatewa wose watang'anyile kosoko yo kona imbuli ayo yo usungu, fowonile chagoloseke, hawoya ukaya wakwitowatowa mumhambaga. 49 Wengi wamumanyile, na awanawake wamwandamile kulawa Galilaya hawema hatali na kona fiswamu imbuli ayo. 50 Hahowa na munhu disina dyakwe Yusufu kulawa mukaya ye Chiyahudi ya Alimataya. Hakowa yumwedu wa wasehe we dibalasa, munhu muswanu na muchawelu, 51 imwene nghefumilise ne weyagwe soko ya diya dyowalamule na kugolosa, na yendeyongojela undewa we Mulungu. 52 Imunhu ayu hakaluta kwa Pilato na kuutasa umutufi wa Yesu. 53 Hoyouhumulusa na kuwoha musanda na kuwika muchilalo chowile mwiwe, nacho chisinghati chisikigwe munhu. 54 Hadyuwa ijuwa dya maandaliwo, ne sabato hayuwa habehi na kukonga. 55 Awanawake walawile Galilaya hamwedu naye hawamwandamila Yusufu na kuchona ichilalo na fowamusikile; 56 kahi howokuya, na hawagolosa mafuta ge mhungileu. Mwijuwa dye sabato hawabwihila fina foyalagisigwe.
1 Ninga dijuwa dye inghonga ye dijuma, hawaluta kuchilalo, na kulonda amafuta ge imhungile swamu gowagolose. 2 Hawona idewe dyo kuhindila difingilisigwa kulawa muchilalo. 3 Ninga fowengile kugati, wasawonile umutufi wa Yesu. 4 Fowedasikage kosoko ye imbuli ayo, langa! Wanhu weli wema habehi nawo wena suke njelu swee; 5 na fowowile na chogoho na kukinya ameso gawo hasi, awanhu waya hawawagamba, “Nhani mukumulangisa imumi kuwanhu wafile? 6 Kahechaka hano, ninga kenuka. Gelegeleni fina foyawatamile foyowile yekali Galilaya, 7 fina, Imwana we munhu, kolafigwa mumikono ye wanhu wena uwihi, nawo womusambasa, na mwijuwa dya kadatu kokwinuka.” 8 Baho hawagelegela simbuli sakwe, 9 na wakoye kulawa kuchilalo, hawawatamila gose go awaya ikumi na yumwedu na wose wasigale. 10 Awanawake wo, hawowa Maliamu Magidalene na Yoane na Maliamu ing'ina wa Yakobo na wanawake wamonga wowowile nawo, hawawatamila awatumigwa; 11 ninga simbuli asi hasoneka ni sa ubwalasi ukwawo na wasasihuwile. 12 Ninga Petulo hakenuka na kubilima ku chilalo, hakenama na kulanga kugati hakona isanda iimwene, na hakoya ukaya yakwisina kwa soko ya dilawanise. 13 Mwijuwa didyo weli wa wefusawakwe wenda weluta muchijiji chikwinangigwa Emau, utali wa isaa dimwedu nhafi kwa migulu kulawa Yelusalemu, 14 na wenda wesimulila awecho soko ye simbuli sose silawanise. 15 Fowasimulilage na kuwanga hamwedu, Yesu imwecho hakawejila na kwilongosa nawo. 16 Ninga ameso gawo hagahindigwa wanghamutange. 17 Hakawagamba, “Mbuli saki sino somukugenda mulonga?” Hawema, wakunyahala ifihanga fyawo. 18 Yumwedu wawo yekinangigwa Kileopa, hoyomubidula, “Agweye kwa mugeni we mwene ku Yelusalemu nghumanyile imbuli ilawanise kuya mumajuwa gano?” 19 Kawagamba, “Mbuli yaki?” Hawamugamba, “Imbuli ikumuhusu Yesu wa Nasaleti, yowile mugonesi yena udaha mu go yakulonga na kugolosa kumwande ye Mulungu na wanhu, 20 na ifyene wakulu wa Makuhani na wakulu wetu fowamulafile yahokele indamulwa ye difa, kahi yasambasigwe. 21 Ninga hachihuwila fina imwene hakowa yakuwakombola Isilaeli. Heye, na kuleka gago gose, diyelo ni ijuwa dija kadatu kulawa gano galawanise. 22 Hamwedu na gago, awanawake wamonga wamwandamilage fina seye, wachitinhusa; hawaluta kuchilalo nhousikusiku. 23 Na wasawonile umutufi wakwe, na woya wakugamba fina hawalawiligwa na malaika, wawatamile fina ni mumi. 24 Awamonga wowile na seye hawaluta kuchilalo na kona fina awanawake fowalongile, ninga imwene wasamonile.” 25 Hakawagamba, “Anye mu wanhu muwabwalasi! Na wakugutu wa kuhuwila gose galongigwe na wagonesi? 26 Togoleni, isamwagile imubakigwa, yapate magayo gano na kwingila ku undewa wakwe?” 27 Yakonga kulawa Musa na wagonesi wose, kawagubulila mumatulumo masunhile simbuli sose simwagile imwene. 28 Kahi hawachisegelela ichijiji chowalutage. Imwene hakakigolosa fina yakuhananga kugendelela kumwande; 29 ninga hawamulemesa wakugamba, “Ikala na seye, kosoko dijuwa diswa.” Baho hakaluta na kwikala nawo. 30 Foyowile muchakudiya hamwedu nawo, hakalonda umukate kuumotesa, na kaubendula na kuwengha. 31 Na ameso gawo hagagubuka na hawamutanga; naye hakaleuka mumeso gawo. 32 Hawakiyusa, Imimoyo yetu isakile mugati yetu foyalongage na seye munjila, foyachigubulilage amatulumo masunhile? 33 Kamei hawenuka muchigele chichiya na kuya Yelusalemu; na hawawafika awaya ikumi na weli wetang'anyile hamwedu na waya wose wowile nawo, 34 wagambile, iMundewa kenuka chawelu na keyonesa kwa Simoni! 35 Baho, awatumigwa aweli hawawatamila galawanise munjila na fyene fowamutangile mu kuubendula umukate. 36 Fowalongage gago, Yesu imwecho hakema mugati yawo na kuwagamba, “Digoya dyuwe ukwenu.” 37 Ninga hawatinhuka na kwingilwa na manhonge, na hawamanya fina wona isoki. 38 Na hakawagamba, “Nhani mukiidasika, na nhani mukiyusa mumimoyo yenu? 39 Langeni imikono ne migulu yangu, fina no niye nimwenecho, nyalabaseni munilange, kosoko umusikule wechaka nyama na maguha fina fomukona ninafo.” 40 Na yakalonge gago, hakawonesa imikono ne imigulu. 41 Na fowowile wenghali kuhuwila kosoko ye inyemo na kukisina, hakawagamba, “Mwina chochose hano chakudiya?” 42 Hawamwingha chibendu cha somba ibanikigwe, 43 na hakakilonda na kudiya mumeso gawo. 44 Kahi hakawagamba, “Asi no simbuli sonalongile na nyeye, fonowile nikali na nyeye, fina chila chinhu chitulumigwe muchanhya yangu mutolati ya Musa na wagonesi na Musabuli ikuhanangigwa chimemelekele.” 45 Noho yawagubulila imisungu yawo wadahe kugatanga amatulumo, 46 hakawagamba, “Nofo itulumigwe fina iKilisito kogaligwa, na mwijuwa dya kadatu kokwinuka kulawa kuwanhu wafile, 47 na fina kulamba na kulekeleligwa uwihi fikuhanangigwa fihubiliigwe mudisina dyakwe kuMataifa gose kukongela Yelusalemu. 48 Anyeye mwa wahomelesi wa simbuli asi. 49 Langeni, nomwigalilani ayuya iBaba woyalongile; ninga mwikale mukaya mpaka mufasigwe uludole kulawa kuchanhya.” 50 Kahi hakawalongosa kuluta mpaka Betania, hakenula mikono yakwe na kuwamotesa. 51 Foyeja yowa mukuwamotesa, hoyokwitemanula nawo na hakenuligwa kulanga kuchanhya. 52 Awene hawamufugamila na hawoya Yelusalemu kwa chinyemi chikulu, 53 Hawekala chigele chose mwihekalu wakumutunya Mulungu.
1 Uko kunghonga hakuwa na Mbuli, naye Mbuli hakowa ne Mulungu. 2 Imwene kunghonga hakowa na Mulungu; 3 ifinhu fyose hafigoloseka kwa njila ya imwene, na kuswela imwene kwichaka chochose chene chagolosigwe chowile chikugoloseka. 4 Mugati yakwe no mowile na uwumi; na uwumi uya hawuwa ujelu wa wanhu. 5 Ujelu ukumulika muchisa, na ichisa chisikudaha kuwusima. 6 Kweja kowa munhu yatumigwe kulawa kwe Mulungu, disina dyakwe Yohana. 7 Hakeja kosoko yo uhomelesi, kuuhomelela ujelu, uleke wose wahuwile kwa njila yakwe. 8 Imwene nghowile ujelu uya, ninga hakeja yauhomelele ujelu. 9 Ujelu we chawelu uwukumulikila chila munhu wokwija muchilunga. 10 Hakowa muchilunga, ne chilunga hachigolosigwa kwa njila yakwe, ninga ichilunga chisamumanyile. 11 Hakeja kukaya yakwe imwenyecho, ninga awanhu wakwe wasamuhokele. 12 Ninga ku wose awamuhokele, awahuwile disina dyakwe hakawengha udaha wogoloseke wana we Mulungu. 13 Awelekigwe, si kwa sakame hegu kwenda kwa munhu kwa chimutufi, ninga kwa Mulungu. 14 Imbuli hoikuwa mutufi, hoyokwikala muchilagati yetu, kamema dihewa ne chawelu; chidilanga ditunyo dyakwe, ditunyo fina dye imwana yemwene kulawa kwe Baba. 15 Yohana hakowa na uhomelesi muchanhya yakwe, na kujoja, “Ayuno no yuyuya wonagambile fina, ‘Iyakwenda yeje kunyuma yangu, imukulu kusuma niye, kosoko hakowa kumwande yangu.’” 16 Kulawa mukumema kwake ase wose chohokela dihewa muchanhya ya dihewa. 17 Kosoko dilagiso hadija kwe njila ya Musa; dihewa ne chawelu fija kwa njila ya Yesu Kilisito. 18 Hechaka yamonile Mulungu, ugele wowose uya; iMwana muhala, yowile mu chifa cha Baba, noyamugolose yamanyigwe. 19 Na uno no uhomelesi wa Yohana, ugele Wayahudi fowatumile awatambiki na Walawi kulawa Yelusalemu wamuse, “Agweye no nani?” 20 Hakafumila kahi ngalemile, ninga hakalonga fina, “Aniye siyo no ni Kilisito.” 21 Howomusa, “Aho gwegwe nani gweye? Aho gwe no Eliya? Hoyobidula Siniye ka. Agweye no yuya imugonesi? Hoyobidula, ka.” 22 Hawamusa, “Aho gwegwe nani? Chitamile uleke chiwabidule awaya awachitumile ukugambaki muchanhya yako?” 23 Hakagamba, “Aniye no dijwi dye iyakujoja munyika: Igololeni injila ye Mundewa, fina foyalongile imugonesi Isaya.” 24 Wawo awatumigwe hawalawa kumafalisayo. 25 Hawamusa, “Aho nhani ukubatisa, nghonaga nghu Kilisito, kahi nghu Eliya, nghwi mugonesi?” 26 Yohana hakawabidula, “Nikubatisa na meji; muchiligati chenu kema imwene anyeye musimumanyile. 27 Ayuya iyakwija kunyuma yangu, aniye sikudaha kudohola isigi ye chilwatu chakwe.” 28 Agano hagogoloseka Betania umwambu wa Yolodani, hoyabatisilage Yohana. 29 Dijuwa dya keli yakwe hakamona Yesu yakwija ukwakwe; hakagamba, “Langeni iMwana Ngholo we Mulungu, iyakulewusa uwihi we chilunga! 30 Ayuno noyonalongile nikugamba, ‘Kunyuma yangu yakwija munhu imwene yowile kumwande yangu, kosoko hakuwa uko ugele aniye sinati nyuwe.’ 31 Aniye nimwenyecho samumanyile, ninga kosoko yiyo hanija nikubatisa kwa meji, uleke yoneke ku Waisilaeli.” 32 Na Yohana hakahomela, “Hanyona Muhe yakuhulumuka kulawa kulanga kifana huwa, hoyosigala umwakwe. 33 Aniye nimwecho samumanyile; ninga ayuya iyanitumile kubatisa kwa meji kanigamba, ‘Ayo yo ukona Muhe yakudulika muchanhya yakwe na kusigala u mwakwe no yakubatisa kwa Muye Musunhile.’ 34 Aniye nyona kahi nikuhomelela fina ayuno no Mwana we Mulungu.” 35 Dijuwa dyandamile Yohana hakema na weli wa wefusa wakwe; 36 Kamulanga iYesu foyagendage hoyogamba, “Langeni iMwana Ngholo we Mulungu!” 37 Awefusa aweli wamuhulika yakulonga nheifo, hawamwandamila iYesu. 38 Yesu kabiduka, kawona wakumwandamila, kawagamba, “Mukuhananga choni?” Homugamba, “Labi”(nong'amba Mwalimu) “Ukwikala hoki?” 39 Hakawagamba, “Mwije mulange Howoluta hawona hoyekalage,” howokwikala naye dijuwa dyo kosoko hayuwa kifana saa kumi ya hegulo. 40 Yumwedu wa wefusa waya weli awamuhulike Yohana yakulonga hakowa hawamwandamila, hakowa Andelea imunduguse wa Simoni Petulo. 41 Andelea hakakonga kumona imukuluwe Simoni, kamugamba, “Chimona Masiya” (nong'amba Kilisito) 42 Hakamwigala kwa Yesu, Yesu hakamulanga, hakagamba, “Agweye no Simoni mwana wa Yohana? Ukwende winangigwe Kefa” (nong'amba Petulo) 43 Dijuwa dyandamile Yesu hakasagula kuluta Galilaya. Hoyomona Filipo hoyomugamba, “Nyandamile.” 44 Hambiya Filipo hakalawa Betania ikaya ya cha Andelea na Petulo. 45 Filipo hoyomona Nataneli, hoyomugamba, “Chimona imwene yatulumigwe na Musa simbuli sakwe muchitabu na mumalagiso kahi iyatulumigwe na wagonesi Yesu wa Nasaleti iMwana wa Yusufu.” 46 Natanaeli hoyomugamba, “Chodaha kulawa chinhu chochose chiswanu Nasaleti?” Filipo hoyamugamba, “Wije ulange.” 47 Yesu kamona Nataneli yakwija ukwakwe kamugamba, “Langa, iMuislaeli tubwi, mugati yakwe mwichaka kidanhilisa!” 48 Nataneli kagamba, “Kunimanya nhani?” Yesu kamubidula, “Ugele Filipo nghenati yakwinange fowekale hasi yo musada, hanikona.” 49 Nataneli kamubidula, “Labi agweye kwa Mwana we Mulungu! Agweye no Mundewa wa Waislaeli.” 50 iYesu kamubidula kagamba, “Kosoko nikugambile, hanikona wikale hasi yo musada, ukuhuwila? Ukwenda wone majuma makulu kusuma gano.” 51 Kamugamba, “Chawelu nikukutamila, ukwenda wone ulanga ugubuka na malaika we Mulungu wakukwila na kuhumuluka muchanhya ye Mwana we munhu.”
1 Dijuwa dya kadatu hakuwa halusi Kana ya Galilaya, na ing'ina wa Yesu hakowa uko; 2 Yesu naye hakagonekigwa na wefusa wakwe, kuhalusi. 3 Idifai ikahele, ing'ina wa Yesu hoyomugamba, “Wechaka difai.” 4 Yesu hoyogamba, “Go mwanamuke china choni aniye na gweye? Ichigele changu chisinati chije.” 5 Ing'ina hakawagamba awatogomi, “Goloseni chochose choyakutamilani.” 6 Baho hahowa mabiga mutandatu ga mawe, kosoko ya ijadi ya Wayahudi yo kunawa na kisunha, chila ibiga dikwingila madebe mane mpaka mtandatu nhafi. 7 Yesu hakawagamba, “Memeseni amabiga meji. Wamemesa topu.” 8 Kawagamba, “Negeni gamonga mumwigalile imukulu we halusi.” Kameyi howolonda. 9 Imukulu we halusi yakanomole ameji agagaluke difai, nghamanyile fina ilawahi (ninga awatogomi awanegile ameji gaya hawamanya), imukulu we halusi hakamwinanga imutolaji 10 hakamugamba, “Chila munhu yakulafa difai swanu kunghonga, kamei awanhu wanghowa wonywile lugano, yakulafa difai ihile, ninga agweye kwika difai swanu mpaka hambiya.” 11 Achino, no chitangilo che inghonga, iYesu choyagolose mu Kana ya Galilaya, hoyokonesa ditunyo dyakwe; awefusa wakwe howomuhuwila. 12 Ago gakahele, yadulika Kapelinaumu, ne ing'ina na wanduguse na wefusa wakwe; howokwikala uko kwa majuwa makefu. 13 iPasaka ya Wayahudi hayuwa habehi, Yesu hoyokwila mupaka Yelusalemu. 14 Mwihekalu hakona wanhu wakwambasa nghambaku sa sing'ombe, ngholo, na sinjiwa, na wakwasakanya mapesa wowile mumilimo yawo. 15 Kagolosa chiboko cha sigi, hakawalafa wose, hamwedu na singholo na sing'ombe, kunje ye dihekalu, hoyokwitila amapesa ga waya awende wokwasakanya, na kubidula di mesa sawo. 16 Hakawagamba waya awambasage si njiwa, Galeuseni gano ahano, musikudaha kuigolosa inyumba ye Babangu kuwa igulilo. 17 Awefusa wakwe howogelegela fina itulumigwa, Uwendo we nyumba yako wombulaga. 18 Awayahudi howomugamba; Chitangilo chaki cho ukuchonesa kwa kugolosa nhafi? 19 Yesu hakawabidula, Moleni Dihekalu dino, aniye kwa majuwa madatu nikudinula. 20 Wayahudi wagamba, “Dihekalu dino dijengigwa kwa minyaka makumi mane na mutandatu, agwe ukudaha kudinula kwa majuwa madatu?” 21 Ninga imwene hakalonga dihekalu dyo umutufi wakwe. 22 Kosoko iyo yakenuke muchilalo, awefusa wakwe hawagelegela fina foyalongile; hawagahuwila matulumo na imbuli yoyalongile Yesu. 23 Ugele foyowile Yelusalemu mwijuwa dikulu dye Pasaka matewa hagahuwila mwisina dyakwe wakone ifitangilo foyagolose, 24 ninga imwene nghakihuwilisa ukwawo; kosoko imwene hakawamanya wose, 25 kosoko hakawamanya wanhu wose nghahanange munhu wowose kuhomelela simbuli sa munhu; kosoko imwene imwecho hakamanya isuwile mugati ye munhu.
1 Hambiya, heja howa na munhu yumonga wa Mafalisayo, yakwinangwa Nikodemo, mukulu wa Wayahudi. 2 Munhu yuno yamwijila Yesu nechilo na kugamba, “Labi, chimanya gweye fina kwa mwalimu na kulawa kwa Mulungu, kosoko hechaka munhu yakudaha kugolosa fitangilo fina fino foukugoloa gweye, inghowa iMulungu nghehamwedu naye.” 3 Yesu hoyomubidula, “Chawelu chawelu nikukutamila, imunhu yanghaleka kwelekwa kwa usha, nghodaha kuwona undewa we Mulungu.” 4 Nikodemo yamugamba, “I munhu yakudaha kwelekigwa nhani yanghowa musehe? Yakudaha kwingila kahi munda mwe ing'ina na kwelekigwa?” 5 Yesu hakamubidula, “Chawelu, chawelu nikumutamilani imunhu yanghaleka kwelekigwa kwa meji na Muhe, ghodaha kwingila ku undewa we Mulungu. 6 Achiya chelekigwe kwa mutufi ni mutufi, na chiya chelekigwe kwa Muhe ni muhe. 7 Unghakisine kosoko nikugambile fina, yagila kwelekigwa kwa usha. 8 Imheho ikutowa foikwenda iyecho, mukuhulika dibumo dyakwe, ninga musikumanya ikulawa hoki kahi ikuluta hoki; nheifo nofoyuwile ku chila muunhu yelekigwe kwa Muhe.” 9 Nikodemo hakamugamba, “Yodahika nhani kuwa nheifo?” 10 Yesu yabidula yakugamba, “Agweye kwa mwalimu wa Isilaeli na simbuli sino nghusimanyile. 11 Chawelu, chawelu nikukutamila fina, chikulonga adiya dyo chimanyile, na kukuhomelela kugaya gochonile, ninga nyeye musikuhokela uhomelesi wetu. 12 Nghonaga nimutamileni simbuli sa muisi nanye musikuhuwila, mohuwila nhani ninghamutamilani simbuli si kulanga. 13 Kwechaka munhu wowose yakwilile kulanga ninga ayuya do yadululike kulawa kulanga iMwana wa Munhu. 14 “Kahi fina iMusa foyenula dijoka diya munyika, nheifo iMwana we Munhu kokwinuligwa. 15 Uleke chila munhu iyakumuhuwila yowe na uwumi wa majuwa gose. 16 Mulungu kachenda ichilunga lugano, hoyomulafa iMwanagwe iyumwedu du uleke chila munhu iyakumuhuwila yang'hagilile ninga yowe na uwumi wa majuwa gose. 17 Kosoko Mulungu nghamwigale iMwanagwe amuno muchilunga, uleke yachilamule ichilunga, ninga ichilunga chihonyigwe ne imwene. 18 Iyakumuhuwila imwene nghakuliganisigwa; inghakumuhuwila imwene kafulusa kuliganisigwa, kosoko nghadihuwile disina dye iMwana yumwedu we Mulungu. 19 “Auno no ulamusi, fina ujelu wija muchilunga awanhu howokwenda ichisa kusuma ujelu, kosoko sinhenda sawo hasuwa sihile. 20 Kosoko chila munhu yakugolosa gehile yakuudesekela ujelu, kahi nghakwija ku ujelu sinhenda sakwe singhonigwe. 21 Ninga ayuya iyakugolosa ichawelu yakwija kuujelu, uleke yoneke hajelu fina kagolosa kwa Mulungu.” 22 Kulawa baho Yesu na wefusa wakwe hawaluta kuisi ya Uyahudi, hakasinda uko hamwedu nawo na kubatisa. 23 Yohana naye yendeyobatisa, ako Ayinoni, habehi na Salimu kosoko uko hakuwa na meji mengi, awanhu wendewomulutila na kubatisigwa. 24 Kosoko Yohana hakowa nghenati yagumigwe kuchifungo. 25 Howolawanisa nyikusha mugati ya wefusa wa Yohana na Muyahudi yumonga kosoko ya usunhaji. 26 Howomulutila Yohana na kumugamba, “Labi ayuya yowile nagwe umwambu wa Yolodani, wowahomelele, kabahano, yakubatisa, na wose wakumulutila imwene.” 27 Yohana hakabidula, “I munhu ng'hakudaha kuwa na chinhu chochose ichene chonghenghigwe kulawa kulanga. 28 Anye muwecho mukudaha kuhamelela, fina hanigamba, ‘Aniye siyo no Kilisito, ninga nigaligwa nimulongolele!’ 29 Iyenaye mutoligwa, no mutolaji. Imbwi yakwe we mutolaji, iyakwima na kumutegelesa, yakusekelela lugano foyakuhulika dijwi dye mutolaji. Kosoko iyo ichinyemi changu hambiya chimemelesigwa. 30 Imwene yongeseke ninga aniye nihunguke.” 31 “Imwene iyekwija kulawa kulanga ni mukulu kusuma wose. Ayuya wa hachilunga ni munhu wa hachilunga na yakulonga simbuli sa hachilunga, ayuya yakulawa kuchanhya, kamuchanhya ya gose. 32 Yakuhomelela agaya goyonile na kugamelela na kugahulika, ninga hechaka iyakuhokela uhomelesi wakwe. 33 Iyakuhokela uhomelesi wakwe yakufumilisa fina Mulungu ni chawelu. 34 Kosoko iyatumigwe na Mulungu yakulonga simbuli sa Mulungu; kosoko Mulungu ng'hakulafa Muhe kwa chiliganiso; 35 iBaba yakumwenda iMwana, naye kamulekela finhu fyose mumikono yakwe. 36 Iyakumuhuwila iMwana kena uwumi wa majuwa gose; inghekwandamila simbuli sakwe nghakwenda yawone uwumi, ninga inyono ye Mulungu ikumwikalila.”
1 Hambiya iMundewa yakamanye fina Mafalisayo hawahulika fina Yesu yakugolosa wefusa wengi na kuwabatisa kusuma Yohana. (ninga 2 Yesu mwecho nghabatise nanga awefusa wakwe.) 3 Hakaleuka Samalia hoyoluta kahi Galilaya. 4 Haimwagila yalokele Samalia. 5 Hakafika ku kaya imonga ya Samalia ikwinangwa Sikali, habehibehi no mugunda Yakobo wo yamwingha imwanagwe Yusufu. 6 Chisima cha Yakobo hachuwa baho, Yesu kosoko hakasoka ne inhambo hakekala hasi baho hachisima. Hachuwa chigele cha saa ya mutandatu nhafi. 7 Hakeja mwanamuke Musamalia kunega meji, Yesu hoyomugamba, “Ninghe meji nunywe.” 8 Kosoko awefusa wakwe hawaluta ku ikaya kugula chakudiya. 9 Imwanamuke Musamalia yamugamba, “Yanhani agweye go Muyahudi, utase ameji ukwangu, ni mwanamuke we Chisamalia? Kosoko Wayahudi wasikuhanga na Wasamalia.” 10 Yesu hakamubidula, Nhanga umanyile ichinghwa che Mulungu no nani iyakukugamba, “Ninghe meji nunywe, hakuwa ukumutasa, imwene hakowa yakukwingha ameji ga uwumi.” 11 Imwanamuke hoyomugamba, “Mukulu, kwechaka chinhu cha kunegela, ne chisima ni chitali, ukupatahi ago ameji ga uwumi? 12 Agweye kwa mukulu kusuma iBaba yetu Yakobo, iyachighile ichima chino, na imwene imwecho hakonywa meji ge chisima chino, na wanagwe, na sawo sakwe?” 13 Yesu yamugamba Chila munhu yakunywa ameji gano yakwenda yone nghilu kahi, 14 ninga chila munhu iyakunywa ameji gonikumwingha nghakwenda yone nghilu ka! Ameji gaya gonikumwingha gakuwa kugati yakwe nhyoko ya meji gakubwiluka ku wumi wa majuwa gose. 15 Imwanamuke yamugamba, “Mukulu, ninghe niye ameji gano, uleke ninghone nghilu, kahi kwija hano kunega meji.” 16 Yesu hoyomugamba, “Luta kamwinange imulumako, mwije hano.” 17 Imwanamuke hakabidula nechaka mugosi, Yesu kamugamba, “kulonga ichawelu fougambile, Nechaka mugosi; 18 Kosoko hakuwa na wagosi washano, na ayuno yowinaye hambiya, si mulumako; aho nanga kulonga ichawelu.” 19 Imwanamuke yamugamba, “Mukulu nikona agweye kwa mugonesi. 20 Awababa setu wafungaga mwitunda adino; amba nyeye mukugamba Yelusalemu no kunhu kokufugila.” 21 Mundewa Yesu yamugamba, “Go mwanamuke unihuwile niye, ichigele chikwija ichene awakufuga wasikufugila mwitunda dino kahi si Yelusalemu, mukwende mumufuge iBaba. 22 Anyeye mukufuga cho musimanyile, aseye chikufuga cho chimanyile, kosoko uhonya ukulawa kuWayahudi. 23 Ninga ichigele chikwija, na hambiya chabahano, awakumufuga Mulungu chawelu wakumufuga iBaba mu muhe na chawelu, awo iBaba nowoyakuhananga wamufuge. 24 Mulungu ni Muhe, nawo awakumufuga inogela wamufuge kwa Muhe na kwa chawelu.” 25 Ayuya imwanamuke hakamugamba, “Nimanya fina Imasiya yakwija; (iyakwinangwa Kilisito); ma yakwija, yakayochones simbuli sose.” 26 Yesu kamugamba, “Aniye nikulonga nagwe no nene.” 27 Chimwande awefusa wakwe howokwija. Hawakisina kosoko yendeyosimulila ne mwanamuke, ninga hechaka yamusile Ukuhananga choni? Nhani ukulonga naye? 28 Kamei imwanamuke hakaleka dibiga dyakwe, hakaluta kwikaya, yawagamba awanhu, 29 Mwije, mulange munhu yanitamile ifinhu fyose fonigolose. Ayuno yakudaha kuwa no Kilisito? 30 Hawalawa kunje ye kaya na wende womwijila imwene. 31 Ugele uwo awefusa wakwe wakuhananga yadiye, wakugamba, “Labi udiye!” 32 Ninga kawagamba, “Nina chakudiya ichene anyeye msichimanyile.” 33 Kameyi awefusa wakiyusa wecho kwa wecho, Hena yumonga yamwigalile chakudiya? 34 Yesu kawagamba, “I chakudiya changu ni kugolosa ifyene foyakwenda ayuya yanitumile, na kumalagisa ikasi yakwe. 35 Mwina ulosi, ukugamba Ikali minyesi mine ukuwa ugele wokugola, ninga nikumutamilani, langisiseni imigunda; simhule sikangala ugele wokugola ufika! 36 iyekugola yakuhokela digelo dyakwe, yakulunda figoligwe fiya ku uwumi wa majuwa gose; kwa neifo imunhu yahandile na yuya yakugola wakusekelela wose. 37 Inonga ino ni chawelu, ‘Munhu yumwedu yakuhanda, munhu yumonga yakugola.’ 38 Hanimutumani kugola afiya ifyene fomusagolosele milimo; wamonga hawagolosa, anye mwingila mu milimo yawo.” 39 Matewa ga Wasamalia mukaya iya wamuhuwila Yesu kosoko imwanamuke hakagamba, “Mwije mulange imunhu yanitamile ifinhu fyose fonigolose.” 40 Kamei Awasamalia wakeje ukwakwe, howomutasa yekale nawo; hoyokwikala uko majuwa meli. 41 Na wengi lugano hawamwihuwila kosoko ya imbuli yakwe, 42 hakamugamba imwanamuke, Sikosoko ya simbuli sako du ilekile chihuwila, kosoko aseye chiwecho chimuhulika, na chimanya fina ayuno chawelu nao Mwihula we chilunga. 43 Yakamale kwikala majuwa meli hoyoluta Galilaya. 44 Kosoko Yesu mwecho hakalonga fina imugonesi nghakupata itunyo muisi yakwe imwecho. 45 Nheifo yakeje Galilaya, awanhu wa Galilaya, howomuhokela, kosoko wonile gose agene goyagolose Yelusalemu ugele we dijuwa dikulu kosoko awene nawo hawaluta kusikukuu. 46 Kahi Yesu hoyoluta ku Kana ya Galilaya, koyagaluse meji kuwa difai. Baho Kapelanaumu hahowa mukulu yumonga wa Selekali, imwene hakowa na mwanagwe mutamu. 47 Hakahulike fina Yesu keja kulawa Uyahudi hata Galilaya, hoyaluta na kumutasa walutanye yakamuhonye mwanagwe, kosoko hakowa mutamu lugano, habehi na kufa. 48 Yesu kosoko iyo hoyomugamba, “Munghaleka kona fitangilo na majumo muisi kuhuwila.” 49 Imukulu yuya hoyogamba, “Mundewa wije imwanangu nghenati yafe.” 50 Yesu hakamugamba, “Luta imwanago yakuhona!” Imunhu yuya hoyohuwila imbuli yoyalongile Yesu ukwake hoyaluta. 51 Foyalutage, imutogomi wakwe hakakitanganyila na kumutamila fina imwanagwe kahona. 52 Hakosa ichigele choyakongile kuwa mumi, howomugamba, “Digulo chigele cha saa mufungate, imhungo imuleuka.” 53 iBabamunhu hoyogelegela fina ichigele chiya no chigele Yesu choyagambile, Imwanago yakuhona. Imwene imwecho hoyohuwila, we inyumba yakwe yose. 54 Achino hachuwa chitangilo chakeli choyagolose Yesu yakoye kulawa Uyahudi na kuya Galilaya.
1 Hanyuma yakwe kweja kowa ihuwa ikulu dye Wayahudi. Yesu hakakwila Yelusalemu. 2 Uko Yelusalemu habehi na dilango dya Singholo hahowa ne ilamba dikwinangwa munonga ye Chiyebulaniya Betisasa, dina deha shano. 3 Mugati ya siso sideha mwina awesikidaha, mudula, fiwete na watamu wokuholola, wakugojela ameji gatibuke; 4 (kosoko imalaika we Mundewa yendeyohumuluka ugele umonga na kwingila mwilamba, na kugatibula ameji; iyekukonga kwingila mwilamba, ameji ghonagatibuke yakuhona utamu wakwe wowose woyowile nawo.) 5 Munhu yumonga hakowa baho, yowile mutamu kwa minyaka makumi madatu na munane. 6 Yesu yakamone na kukumanya hakowa na utamu na kugona bahaya kwa ugele mwingi hoyomugamba, “Ukuhananga kuhonywa?” 7 Imunhu mutamu yuya hoyomubidula, Mukulu; nachaka munhu wa kuniguma mwilamba ameji fogakutibuligwa, ghona nikugesa kuluta munhu yungi yakulongola kwilamba kumwande yangu. 8 Yesu hoyomugamba, “Inuka, kitwike disasi dyako, na ugende.” 9 Chimwande imunhu yuya hakonywa, hoyolonda disasi dyakwe na kugenda. Dijuwa didyo hadyuwa ijuwa dye sabato, 10 awakulu wa Wayahudi howomulonga imunhu yahonyigwe, Diyelo ni sabato sifiswamu agweye kwinula disasi dyako. 11 Ninga hoyobidula, munhu iyanihonyile kanigamba, “Inula disasi dyako, ulute!” 12 Howomusa, Imunhu yakugambile ukitwike disasi dyako ulute nani? 13 Hambiya imunhu yuya yahonyigwe nghamumanyile Yesu, kosoko Yesu hakaleuka anhu baya, kosoko hahowa itewa dya wanhu ahanhu baho. 14 Hanyuma yakwe Yesu hoyomufika kwihekalu hoyomugamba, “Hulika, kwa mumi mambiya; unghagolose wihi kahi; dinghakwijile dihile lugano kusuma dino.” 15 Imunhu yuya hoyoluta kuwatamila aWayahudi fina Yesu noyonihonyile. 16 Aino nochileka Awayahudi wamwidasage Yesu, kosoko yagolose didyodijuwa dye sabato. 17 Yesu hoyowabidula, iBabangu yakugolosa milimo ugele wose, aniye nani inyagila nigolose. 18 Aino haiwagolosa Wayahudi wagendelele kuhananga kumukoma, si kosoko yo kubana isabato du, kahi na kumwinanga Mulungu fina Babakwe, yakigolosa fina kaligana ne Mulungu. 19 Yesu hakawagamba nikumutamilani ichawelu; iMwana nghakudaha kugolosa chochose yemwene; yakugolosa agaya do goyakona iBabakwe yakugolosa. Goyakugolosa iBaamunhu, iMwana naye nogoyakugolosa. 20 Kosoko iBaba yakumwenda iMwana na yakumonesa gose agene goyakugolosa imwene, yakumonesa na milimo mikulu kusuma aino, nanye mose mukwenda mukisine. 21 Fina iBaba foyakuwenula wafile na kuwengha uwumi, no nheifo iMwana naye yakuwengha uwumi awaya woyakwenda kuwengha. 22 Kahi iBaba nghakulamula munhu wowose, kamwingha iMwana udaha wose wo kulamul. 23 Wose wamogohe iMwana, fina fowakumogoha iBabamunhu. Wowose inghakumogoha iMwana nghakumogoha Baba iyamwigale. 24 Nikumutamilani ichawelu; imunhu wowose iyakuhulika simbuli sangu na kumuhuwila yanitumile kena uwumi wa majuwa gose; nghakwingila kukulamuligwa, ninga kaloka kulawa kudifa na kwingila kuuwumi. 25 Chawelu, chawelu, nikumutamilani, ichigele chikwija, na hambiya chabaha, ugele uwene awafile wakuhulika dijwi dye iMwana we Mulungu na awaya awakuhulika wakwenda wenuke mudifa. 26 Kosoko fina iBaba foyena uwumi mugati yakwe no nheifo kamwingha iMwana naye kuwa na uwumi mugati yakwe, 27 na kamwingha udaha wokogolosa ulamusi, kosoko ni Mwana we munhu. 28 Munghakisine kosoko yadino, ichigele chikwija awene wose wowile mufilalo wakawohulika dijwi dyakwe 29 na kulawa kunje, awagolose maswanu kukwinukila mu uwumi, awagolose gehile kukwinukila mukulamulwa. 30 Sikudaha kugolosa chinhu chochose kwa udaha wangu nimwecho; fonikuhulika, nofonikulamula; na ulamusi wangu uliganila, kosoko sikuhananga kugolosa fonikwenda niye, ninga kwenda kwakwe iyanitumile. 31 Hona nikihomelela nimwenecho uhomelesi wangu si wachawelu; 32 kwina yungi iyakuhomelela muchanhya yangu na nimanya fina uhomelesi wakwe woyakuhomelela muchanhya yangi ni wachawelu. 33 Hamutuma wanhu kwa Yohana, na hoyolafa uhomelesi kuchawelu. 34 Si kosoko niye nikuhokela uhomelesi ukulawa kuwanhu; ninga nikulonga sino uleke mohone. 35 Hakowa taa ikwaka na kumulika, nanye hamudaha kusekelela kwa chipisi chiguhi mu ujelu wakwe. 36 Ninga uhomelesi wo ninawo ni mukulu kusuma awuya wa Yohana; kosoko imilimo iBaba yoyagambile niigose na kumale, imilimo iyino yonikugolosa, ikunihomela fina iBaba kanituma. 37 Ne Baba imwecho yanitumile kalafa uhomelesi muchanhya yangu. Dijwi dyakwe musinati mudihulike, ifuta yakwe musinati muyone; 38 na mwachaka imbuli yakwe ikwikala kugati yenu, kosoko mudikumuhuwila ayuya iyagaligwe ne mwene. 39 Mukugahena hena matulumo kosoko mukudoga fina mugati yakwe mwina uwumi wa majuwa gose, nogo agene ga kuhomelela; 40 ninga mukulema kwija ukwangu uleke muwe na uwumi. 41 Aniye sikuhokela ditunyo kulawa kuwanhu. 42 Ninga nimanya anyeye mwechaka uwendo wao kumwenda Mulungu mufidoga fyenu. 43 Aniye nija mwisina dye iBabangu; anyeye musikuhihokela, ninga, yumonga yangheja kwa disina dyakwe imwecho, mukwenda mumuhokele. 44 Mohuwila nhani anyeye mukihokelesa ditunyo muwecho kwa wecho, ninga musikuhananga ditunyo dikulawa kwe Mulungu? 45 Munghagambe fina nikwenda niwasongese kwa Baba, iMusa noyakuwasongesa, imwene womumwikile dihuwi dyenu. 46 Nanga mwamuhuwile Musa hamuwa mukunihuwila na niye kosoko hakatuluma muchanya yangu. 47 Ninga ghonanga musikuhuwila goyatulume, mohuwila nhani sonikulonga?
1 Hanyuma yakwe Yesu hakaloka umwambu we bahali ya Galilaya no ya Tibelia. 2 Itewa ikulu dya wanhu howomwandamila, kosoko hawona amajumo gakwe gokuhonya watamu. 3 Yesu hoyokwila kwitunda, hoyokwikala hasi hamwedu na wefusa wakwe. 4 Na ugele we juwa dikulu dye Pasaka haduwa habehi. 5 Yesu hakenula meso hakalanga ako nako, hakona itewa dya wanhu wakumwijila, hakamusa Filipo, Chikudaha kugula hoki chadiya chakuwegusa awanhu wose wano? 6 Hakalonga neifo kumugesa Filipo; ichawelu iyecho imwecho hakamanya choyakwenda yagolose. 7 Filipo hakamubidula, Uleke chila munhu yapate chidodogi du ikunangigwa chuwe na mikate ya mapesa dinali magana meli nhafi. 8 Yumwedu wa wefusa wakwe, Andulea, munduguse wa Simon Petulo hoyogamba, 9 “Hena mwana bahano yene mikate mishano ye shaili na fisomba fili. Ninga chawelu fisikudaha kwigusa awanhu wose wano.” 10 Yesu hoyowagamba, “Walongeni awanhu wekale hasi. Hanhu baho hahowa na mbago nyingi.” Kosoko iyo awanhu wose howokwikala hasi, hawowa wanhu wafikile figulu fishano awagosi. 11 Yesu hoyoilonda imikate, hoyomulumba Mulungu, howogawiligwa wanhu awekale baho. Hakalumba kosoko ya sisomba, na wose howokwiguta. 12 Awanhu wose wakegute, hakawagamba awefusa wakwe Dondoleni ifibendu fyose ifisigale, chinghagilele hata chimwedu. 13 Hawamemesafikonghola fyose, howomemesa fisege ikumi na fili kulawa kumikate iya mishano ye shaili iyadiyigwe na wanhu. 14 Wakone dijumo dino doyagolose Yesu, awanhu weja wagamba howogamba Chawelu ayuno no Mugonesi yagambigwe yakwija muchilunga. 15 Yesu yakamanye fina wanhu wendewohananga weje wamukole uleke wamugolose kuwa Mundewa kwa ludole; hoyoleuka hoyoluta kwitunda kahi yemwene. 16 Ikowe hegulo, awefusa wakwe hawadulika kubahali, 17 howokwingila mu ngalawa hawakonga kuloka ibahali kuluta Kapelanaumu. Hachuwa chisa chingile, na Yesu hakowa nghenati yeje kuwa hamwedu nawo. 18 Ameji hogokonga kutunhumuka kosoko imheho nghulu yapumunhage. 19 Awefusa wakwe hawakwega makasia utali wa maili ine au shano nafi howomona Yesu kukugenda mumeji, yakusegelela ingalawa, howokogoha. 20 Yesu hoyowagamba, “Munghogohe, no niye!” 21 Kameyi kwa chinyemi howomwingisa mungalawa, na baho ingalawa hoifika muisi bahaya howalutage. 22 Dijuwa dya keli yakwe amatewa ulwandi lwa keli lwe bahali hawamanya fina kwina ngalawa imwedu du ulwandi lowowowile. Hawamanya fina Yesu nghengile mungalawa iya hamwedu na wefusa wakwe, ninga hawaleuka awene du wenumwene. 23 Minhumbwi imonga, kulawa Tibelia, haija mhwani habehi na bahaya ahene awanhu hawadiya imikate yongeseke yakamale kulumba Mundewa Yesu. 24 Amatewa wawakone Yesu kahechaka, hamwedu na wefusa wakwe, howokwingila musingalawa, howoluta Kapelinaumu, wakumuhananga. 25 Awanhu wakamone Yesu ulwandi lwa keli lwa bahali, hawamugamba, “Mwalimu kwija milaki kuno?” 26 Yesu hoyowabidula yakugamba, “Nikumutamilani ichawelu; mukunihananga kosoko hamudia mikate muwecho fomwahanange, homukwiguta, sikosoko hamona amajumo gangu. 27 Munghakiidase ne chakudiya ichene chikubanika; ninga mchigolosele milimo ichakudiya cha ugele wose ku uwumi wa majuwa gose. Achino no chakudiya ichene imwana we Munhu yakumwinghani, kosoko Mulungu, iBaba, kaguma chitangilo chakwe cha kumufumila.” 28 Kosoko iyo wejawamusa, “Chitende choni noho chigolose imilimo ye Mulungu yoyakuhananga chigolose?” 29 Yesu yawabidula, iMulungu choyakuchanga mugolose ni kumuhuwila ayuya yatumigwe ne mwene. 30 Yesu kawagamba, “Nikuwafamilani chawelu. iMusa choyamwinghileni usowile mukate kulawa kulanga; iBabangu noyakumwinghani umukate we chawelu kulawa kulanga. 31 Awagono wetu hawadiya mana munyika, fina amatulumo fogakulonga, Hakawengha mukate kulawa kulanga wadiye.” 32 Yesu kawagamba, “Nikuwatamilani chawelu, iMusa choyamwinghileni usowile mukate kulawa kulanga; iBabangu no yakumwinghani umukate we chawelu kulawa kulanga. 33 Kosoko umukate, iMulungu woyakulafa ni yuya yakudulika hasi kulawa kulanga na kuchigalila ichilunga uwumi.” 34 Hawamutasa, “Mukulu, Chinghe aseye umukate wuwuno majuwa gose.” 35 Yesu hoyowagamba, “Aniye no ni mukate wa uwumi; iyakwija ukwangu ifi nghakona njala; iyakunihuwila niye ifinghakona nghilu. 36 Ninga nimutamilani fina munyona nanyi musikuhuwila. 37 Wose woyakuningha iBaba wakwija ukwangu sikumutaga kunje ng'oo, 38 kosoko nidulika muyisi kulawa kulanga, si kugolosa fina fonikwenda niye, ninga kwenda kwakwe ayuya iyanitumile; 39 na kuno nokwenda kwake ayuya yanitumile, ninghamwagilise wowose mu waya woyaninghile, ninga nimwinule (muchilalu) dijuwa dye indumo. 40 Akuno no kwenda kwake iBabangu, fina chila munhu iyakumona iMwana na kumuhuwila yowe na uwumi wa majuwa gose; nani nikwenda nimwinule dijuwa dye indumo.” 41 Awayahudi hawakonga kumung'ung'unikila, kosoko yagambile, Aniye no ni mukate ulawile kulanga. 42 Howogamba, “Ayuno si Yesu, mwana wa Yusufu, iBabakwe ne ing'ina si chiwamanya. Yakudaha nhani kugamba, ‘Hambiya nihulumuka kulawa kulanga?’” 43 Yesu yawagamba Muleke kung'ung'ulika nyenye kwa nyenye. 44 Hechaka munhu yekudaha kwija ukwangu honaga nghakwegigwe ne Baba yanitumile niye; nani nikanimwinula mudijuwa dye ndumo. 45 Itulumigwa muchitabu cha wagonesi Na wose wakawawafusigwa ne Mulungu! Chila munhu yafusigwe na kuhulika kulawa kwa Baba yakwija ukwangu. 46 Kwechaka munhu wowose yamonile Baba, ninga ayuya yalawile kwa Mulungu, noyamonile Baba. 47 Chawelu, chawelu, nikuwatamilani, iyakuhuwila kwna uwumi wa majuwa gose. 48 Aniye no ni mukate wa uwumi. 49 Awababa senu hawadiya imana munyika, howokufa. 50 Auno no mukate ukudulika kulawa kulanga, uleke imunhu yandiye yanghafe. 51 Aniye no ni mukate wo uwumi, mudulike kulawa kulanga, wowose iyakudiya mukate uno, nghakufa ng'oo; na mukate wonikulafa kosoko yo uwumi we chilunga ni umutufi wangu. 52 Awayahudi, baho, wejawakonga kuwanga awenyecho, wakugamba, “I munhu yuno kodaha nhani kuchingha aseye umutufi wakwe chidiye?” 53 Kamei Yesu hoyowagamba, “Chawelu, chawelu nikuwatamila, Munghalekadiya umutufi we Mwana we munhu na kunywa isakame yakwe mwachaka uwumi kugati yenu. 54 Ayuya imwene yakudiya umutufi wangu na kunywa isakame yangu kena uwumi wa majuwa gose. Nani nikwija nimwinula dijuwa dye ndumo. 55 Kosoko umutufi wangu ni chakudiya cha chawelu, na isakame ni chinywaji chachawelu. 56 Iyakudiya umutufi wangu na kunywa sakame yangu yakwikala umwangu ani nani umwakwe. 57 Fina iBaba imumi foyanitumile niye, nani na mumi kosoko ya Baba. No neifo ayuya yakunidiya niya yakuwa mumi kosoko ya niye. 58 Awuno no mukate wadulike kulawa kulanga, siyo fina yowadiyile waBaba senu hawakufa, ayuya yakudiya mukate uno yakwikala majuwa gose.” 59 Hakalonga sino yowile mwisinagogi, ugele foyafundishage Kapelanaumu. 60 Wengi wa wefusa wakwe, wakahulike nheifo, howogamba, “Aino mbuli nghugutu nani yakwenda yaihulike?” 61 Ninga Yesu yakamanye fina awefusa wakwe wakuing'ong'olekela inonga iyo, yawagamba, “Musuha kosoko ya ino?” 62 Togoleni yokuwa nhani munghamona Mwana we munhu yakukwila koyowile ugele nghenati yeje? 63 iMunye noyakwingha uwumi, umutufu wechaka chinhu; simbuli sonilongile nanyi ni muhe kahi ni wumi. 64 Ninga wamonga wenu wasikuhuwila. Kosoko Yesu hakamanya kulawa kunghonga awaya awene wasahuwile, chenani awakwenda wamusongese. 65 Hoyowagamba, “Kosoko ino no chileka namutamileni kwechaka yakwija ukwangu nanga ayuya yekwihigwa udaha wokwija ne Babangu.” 66 Kulawa baho wengi wa wefusa wakwe howokuya kunyuma wasamwandamile kahi. 67 Yesu hoyowalonga awaya awefusa wakwe ikumi na weli, “Anye nanye molewuka?” 68 Simoni Petulo hakamubidula, “Mukulu, chilute kwani? Agweye kwina simbuli sa uwumi wa majuwa gose; 69 na chihuwila, na chifulusa kumanya, fina agweye no u Imusunhile yumwedu we Mulungu.” 70 Yesu hakawabidula, “Sawasaguleni ikumi na weli, na yumwedu wenu ni luhoma?” 71 Hakalonga muchanhya ya Yuda imwana wa Simoni Isikalioti, kosoko, imwene yumwedu wa waya ikumi na weli, noyowile wo kumusongesa.
1 Hanyuma yakwe Yesu hoyuluta ako nako Mufalilaya, nghadahile kugendagenda ako nako mu Uyahudi, kosoko Wayahudi wendewohananga kumukoma. 2 Hambiya, isikukuu ya Wayahudi ye Fibanda hayuwa habehi. 3 Awanduguse howomugamba, “Leuka hano ulute Uyahudi, uleke awefusa wako wone imilimo yo ukugolosa.” 4 Hechaka munhu yakugolosa kwa chifiso hona yakuhananga yamanyike kwa wose. Hona ukugolosa simbuli sino kiyonese kuchilunga. 5 Kahi na awanduguse nawo wasamuhuwile. 6 Yesu hoyowagamba, “Ichigele changu chisinati chifike, ugele uwenu wabaha majuwa gose. 7 Ichilunga chisikudaha kuwasula nyeye, ninga chikunisula niye kosoko nichihomelela kuwa sinhenda sakwe sa wihi. 8 Luteni nyeye kusikukuu, aniye sikuluta kusikukuu, kosoko ugele wangu wokuluta usinati umemelekele.” 9 Yakalonge nheifo, hoyosigala Galilaya. 10 Awanduguse wakafuluse kuluta kusikukuu, kame naye hoyoluta, ninga si kwa konigwa na wanhu nanga kwa chinyele. 11 Awayahudi wende womuhananga hasikukuu, wakugamba, “Kowahi?” 12 Hakuwa na mang'ung'uliko mengi muwanhu kosoko yakwe ugele wamonga wakugamba, “Ni munhu muswamu,” wamonga wakugamba, “Hata, yakwagilisa wanhu.” 13 Ninga kosoko yo kuwogoha Wayahudi hechaka munhu yadahile kulonga achawelu muchanhya yakwe nonga kufumbafumba. 14 Mugatigati ya majuwa ge sikukuu Yesu hoyokwingila mudihekalu na kufusa. 15 Awayahudi howokisina, wakugamba, “Yanhani, imunhu yuno kena umanyi, naye nghapatile mafuso?” 16 Yesu hoyawabidula, amafuso gangu si gangu niye, ninga gakwe iyanitumile; 17 inghowa inyenda ye munhu ni kugolosa inyenda yakwe, yakwenda yamanye fina mafuso gano gakulawa kwa Mulungu hegu nikulonga kwa udaha wangu nimwecho. 18 Iyakulanga mu udaha wakwe imwecho yakuhananga kutunyigwa imwene, ninga ayuya iyakuhananga ditunyo dya yuya yamutumile, mugati yakwe mwechaka udasi. 19 iMusa nghamwinghileni Malagiso? Hata nheifo hechaka yakugakola. Nhani mukuhananga kunikoma? 20 Awanhu hawamubidula, Kwina ipepo! Nani yakuhananga kuukoma? 21 Yesu hayawabidula Nigolosa nhenda imwedu, mose mukisina kosoko ya iyo. 22 Musa hakamwing'hani dikumbi(si kugamba dilawa kwa Musa ninga kulawa kuwa Baba senu) nanyi mukwigala munhu kikumbi dijuwa dye sabato. 23 Hona dijuwa dye sabato imunhu yakwigaligwa kikumbi, uleke dilagiso dya Musa dinghabenigwe, musuha na niye kosoko yo mumuhonya munhu umutufi wakwe wose kuwa mumi mudijuwa dye sabato? 24 Munghalamule kugaya gomukulanga na meso, ninga mulamule kwa kuliganisa ha kwa chawelu. 25 Wanhu wamonga wa Yelusalemu wejawagamba, “Ayuno so imunhu wowakuhanga kukoma? 26 Ayuno hano, yakulonga chila munhu yakutuhulika, na wasikulonga dyodyose ukwakwe, ikudaha kuwa fina awakulu wamanya chawelu fina yuno no Kilisito? 27 Ninga ichimanya ayuno koyalawile; ninga; iKilisito ma yakwija yakoneka kwechaka munhu yakiyomanya woyalawile.” 28 Kwa nheifo Yesu hayalonga, ugele foyendeyofundisha mudihekalu, Aniye munimanya, na mumanya konikulawa? Aniye sijile kwa kusagula kwangu nimwecho; iyanitumile ni wachawelu, naye musimumanyile. 29 Aniye nimumanya, kosoko nilawa ukwake, na noyanitumile. 30 Hawahananga kumukola, ninga hachaka munhu yagolole mikono yakwe kumukola; kosoko ichigele chakwe hachuwa chisinati chifike. 31 Ninga wengi wa wanhu howomwihuwila, howogamba, “Hona Kilisito yakayokoneka, kogolosa majumo mengi kusuma goyagolose imunhu yuno?” 32 Mafalisayo wakahulike amatewa gakulongalonga muchanhya yakwe, awatambiki wakulu na Mafalisayo, howotuma wasilikali wamukole, 33 Yesu, baho yagamba, “Nikwenda nuwe nayi chipisi chitali chidodogi, kameyi nikuluta kwa yuya iyatumile; 34 monihananga ninga musinyona, honuwile musikudaha kwija.” 35 Imunhu yuno yakula hoki uko kochisikudaha kumona? Yakuhananga yalute kumugawanyiko wa Wayunani mugatigati ya Wayunani na kuwafusa Wayunani? 36 Kena mana yaki ma yakugamba, “Monihananga ninga musinyona, na, Honyuwile niye musikudaha kwija?” 37 Dijuwa diya dye indumiliso dye isikukuu, dijuwa dikulu, iYesu hakema na kutula chowe yakugamba, “Imunhu yanghona nghilu yeje ukwangu 38 Iyakunihuwila aniye fina amatulumo fogakulonga, sisanda sa meji ga uwumi sikwende sidulike kulawa mumoyo wakwe.” 39 Hambiya hakalonga sino muchanhya ya Muhe, imwene awaya awakumuhuwila wakuhokela; kosoko Muhe hakowa nghenati yalafigwa kwa fiya Yesu hakowa nghenati yatunyigwe. 40 Wakahulike simbuli siso, wanhu wamonga wakugamba, “Ayuno chawelu no mugonesi.” 41 Wamonga wagamba, “Ayuno no Kilisito!” Ninga wamonga wakugamba, “iKilisito yakulawa Galilaya?” 42 Togoleni matulumo gasigambile fina fina iKilisito yakulawa mulukolo lwa Daudi, na kulawa Betelehemu, ikaya oyowile Daudi? 43 Kosoko iyo hokukuwa na mutemanuko mugati ya wanhu muchanhya yakwe. 44 Wamonga hawahananga kumukola ninga hechaka yagolole mikono yakwe yamukole. 45 Awasilikali howokuya kuwakulu wa makuhani na Mafalisayo awawagambile, Nhani musijile naye? 46 Awasilikali howobidula, Nghenati yalonge munhu fina yuno foyakulonga. 47 Mafalisayo howawabidula, Anye nanye mwagilila nheifia? 48 Kwina wowose mu filongosi na Mafalisayo yakumuhuwila? 49 Ninga ditewa dino dya wanhu awasimanyile amalagiso, waligitigwa. 50 Nikodemo, iyamulutile ugele ulokile, yowile yumwedu wawo, hoyowagamba, 51 “Togoleni, dilagiso dyetu, dikuchituma chimulamule munhu ugele chisinati chimuhulike na kifusa goni goyakugosa?” 52 Wejawabidula, “Agwe nagwe kulawa Galilaya? Hananga ulange mumatulumo ukwenda wowe fina mwichaka mugonesi yakwenda yalawe Galilaya.” 53 Chila munhu hakaluta ukaya ukwakwe.
1 Ninga Yesu hoyoluta kwitunda dya Miseituni. 2 Kukoche nhosikusiku hoyokwija kahi kudihekalu; wanhu wose hawamwijila hakakonga kuwafusa. 3 Awatulumi na Mafalisayo hawekwigala mwanamuke yafikililigwe muchitendo cha ugoni, hawamwika muchiligati. 4 Hawamugamba, “Mwalimu, imwanamuke yuno kakoligwa ugoni.” 5 Mumalagiso Musa kachigamba munhu wa fina yuno yatowigwe mawe, ukugambaki agweye muchanhya yakwe? 6 Hawalonga imbuli yo kumugesa, uleke wapate mbuli ya kumusongesela, Yesu hakafunama hakandika hasi ne chidole. 7 Fowagendelele kumusa maswali, hakenuka na kuwagamba, “Mugati yenu, ayuya yechaka wihi no yakonge kumukubitila diwe.” 8 Hakafunama kahi na kwandika hasi. 9 Ninga wakahulike, hawaleuka, yumweyumwe, kukongela imukulu kusuma wose, Yesu hoyosigala yemwene nayuya imwanamuke yemile kumwande yakwe. 10 Yesu yenula meso yamugamba, “Mwanamuke, wahoki, hachaka yakulamule?” 11 Hakagamba, “Hachaka mukulu.” Na Yesu yagamba, “Ani nani sikukulamula; luta, na unghagolose wihi kahi.” 12 Yesu hakalonga nawo kahi yakugamba Aniye no no ujelu we chilunga, wowose yanyandamila yakuwa na ujelu wo uwumi na nghakwenda yagende muchisa kahi. 13 Mafalisayo yamugamba, “Hambiya ukihomelela gomwecho; go ukulonga si chawelu.” 14 Hata, Yesu hoyobidula, Aniye nikihomelela nimwecho, uhomelesi wangu ni wa chawelu, kosoko nimanya konilawile na nimanya konikuluta ninga anyeye musimanyile kunilawile kahi konikuluta. 15 Mukulamula kwa kwandamila umutufi, aniye sikulamula munhu wowose. 16 Aniye ninghalamula, ulamusi wangu ni wachawelu, kosoko siniye nimwene nikulamula, ninga aniye na yuya yanitumile. 17 Mu malagiso genu itulumigwa, uhomelesi wa wanhu weli ni chawelu; 18 Aniye nikihomelela nimwecho, na iBaba yanitumile yakunihomelela. 19 Kameyi hawamugamba, “Aniye musinimanyile na Baba musimumanyile, nanga mwanimanyile niye, hamuwa mukumumanya ne Baba naye.” 20 Simbuli sino hakasilonge yowile mu chumba cho wakwika ifilafywa mudihekalu, ugele foyendeyofusa, hechaka munhu yamukolile, kosoko ugele wakwe hauwa ukali. 21 Kahi Yesu hoyowagamba, “Nikuleuka; monihananga, ninga mukufa mu uwihi wenu. Musikudaha kwija konikuluta niye.” 22 Kameyi Wayahudi hoyogamba Togoleni kokikoma, kosoko yakugamba, “Konikuluta musikudaha kwija?” 23 Hoyowagamba, “Anyeye mulawa hasi, aniyenilawa kuchanhya, anye ni we chilunga chino, aniye si chilunga chino. 24 Nimutamilani fina mukufa mu uwihi wenu, kosoko mukufa mu uwihi wenu munghaleka kuhuwila fina aniye no yeye.” 25 Howomugamba, “Agwe no nani?” Yesu hoyowagamba, “Nheifia fonimutamileni kulawa kunghonga.” 26 Nina mengi ga kulonga muchanhya yenu na mengi gakulamula, ninga ayuya yanitumile no wachawelu, na nikutamila kuchilunga asiya sonihulike ukwakwe. 27 Wasamanyile fina yakulonga nawo muchanhya ya Baba. 28 Baho Yesu yagamba, “Fomukwija mumwinula Mwana we munhu, noho mukamutanga fina noniye, na kahi sikugolosa mbuli yoyose kwa kwenda kwangu aniye nimwecho ninga ifene iBaba foyakufusa nofonikulonga. 29 Na imwene yanitumile kahamwedu nani; nghanilekile nimwene, kosoko majuwa gose nikugolosa agakumwendesa.” 30 Foyalongile nheifo wengi hawamuhuwila. 31 Kameyi Yesu hoyowalonga awaya Awayahudi awamuhuila, Munghekala mumbuli yangu, mukuwa wefusa wangu chelu, 32 mukwenda muimanye ichawelu nayo ikumwikani kuwa walekeligwe. 33 Hawamubidula, Aseye cha cheleko cha Ibulahimu, chisinati chuwe watumwa kwa munhu wowose. Ukagamba, “Nhani gweye fina mukwende mukuwa walekeleligwe?” 34 Yesu yawagamba, “Chawelu, chawelu, nikumutamilani chila munhu yakugolosa uwihi ni mutumwa wa wihi. 35 Mutumwa nghakwikala munyumba majuwa gose; imwana yakwikala majuwa gose. 36 Kwa nheifo imwana yanghakulekelela, ukuwa kulekeleligwa chawelu. 37 Nimanye fina anyeye mwa cheleko cha Ibulahimu; ninga mukuhananga kunikoma, kosoko simbuli sonikulonga sachaka luneka mugati yenu. 38 Nikulonga fonyonile kwa Baba, anye nanye mukugolosa fina fomuhulike kwi Baba yenu.” 39 Howomubidula, Ibulahimu no Baba yetu. Yesu hoyowagamba, “Nanga mu wana wa Ibulahimu, hamuwa mukugolosa foyagolose Ibulahimu, 40 ninga niwatamileni ichawelu chonihulike kwa Baba, achino sochonghagolose Ibulahimu. 41 Anye mukugolosa foyagose iBaba yenu.” Howomugamba, “Aseye chiselekigwa kwa ihabwa; china Baba yumwedu, naye ni Mulungu.” 42 Yesu yawagamba, “Mulungu nanga ni Baba yenu, hamuwa mukunyenda niye, kosoko nilawa uko na kwija kuno kulawa kwa Mulungu; sijile kwa kwenda kwangu nimwecho, ninga hakanituma. 43 Nhani musikumanya sonikulonga? Kosoko musikudaha kutegelesa na kuhokela imbuli yangu. 44 Anyeye ni we Baba yenu luhoma, na kwenda kwenu ni kugolosa fina foyakwenda imwene. Hakowa mukomaji kulwa kung'honga, kachaka chawelu, kosoko umwakwe mwachaka chawelu. Mayakudanha yakulonga fina foyowile imwene imwecho, kosoko imwene mudasi na Baba wa udasi. 45 Ninga, aniye kosoko nikulonga ichawelu, musikunihuwila. 46 No nani muchiligati yenu yekudaha konesa fina ni wihi? Hona nikulonga ichawelu nhani musikunihuwila? 47 Ayuya imwene wa Mulungu yakuhulika simbuli sa Mulungu; isoko ikuleka anyeye musikuhulika ni kosoko anyeye musi wa Mulungu.” 48 Wayahudi howomubidula, Togola chisikulonga sawa ma chigumba fina agweye kwa Musamalia kahi kwina mhepo? 49 Yesu hoyowabidula, Nachaka mhepo; nikumogoha Baba anyeye musikunyogoha niye. 50 Aniye sikuhananga itunyo dyangu nimwecho, kwina yumwedu iyakudihananga, noyakuwa imulamusi. 51 Chawelu, chawelu, nikuwatamilani, imunhu yanghaikola imbuli yangu, nghakwenda yone difa. 52 Kameyi Awayahudi howomugamba, “Hambiya chimanya fina kwina ipepo. Ibulahimu kafa, na wagonesi, nagwe ukugamba Imunhu yanghaikola imbuli yangu, ngahakwenda yanomole difa. 53 Agweye kwa mukulu kusuma iBaba yetu Ibulahimu, iyafa? Na wagonesi wafile! Ukugamba gweye fina no nani?” 54 Yesu yabidula, Ninghakifuna nimwecho kitunya kwangu, kwechaka dyodyose; iBabangu noyakunitunya, womukugamba fina Mulungu wenu. 55 Ninga musimumanyile; aniye nimumanya. Nanganigambile, simumanyile, hanuwa nikuwa mudasi fina nyeye; ninga niye nimumanya na niikola imbuli yakwe. 56 iBaba yenu Ibulahimu hakasekelela kosoko yokudyona dijuwa dyangu; hakadyona hoyosekelela. 57 Awayahudi hawamugamba, “Nghwinati ufike minyaka makumi mashano, kumona Ibulahimu?” 58 Yesu yawagamba, “Chawelu, chawelu, nikuwatamilani, ugele Ibulahimu nghenatiyowe, ani noniye.” 59 Hawadondola mawe mamukubitile; ninga Yesu hoyokifisa, hoyolawa kunje ye dihekalu.
1 Foyagendage, hoyomona munhu mudula kulawa kwelekigwa kwakwe. 2 Awefusa wakwe howomusa, Mwalimu, yatendile uwihi nani, imunhu yuno hegu awamweleke, ilekile yakwelekigwa mudula? 3 Yesu yawabidula, Si kosoko imunhu yuno kagola wihi, kahi si awamweleke, ninga imilimo ya Mulungu na udaha wa Mulungu woneke umwakwe. 4 Ichagila chigolosa imilimo yakwe iyanitumile, ugele kukali misi; ichilo chikwija, ugole uwene hachaka yakudaha kugolosa milimo. 5 Ugele uno wonuwile muchilunga, aniye no ujelu we chilunga. 6 Yakalonge nheifo hakotwa mate hasi, hakagolosa itope dya mate na kumubaka imunhu yuya mumeso na ditope, 7 na kumugamba, “Luta kanawe mwibwawa dya Siloamu” (nong'amba yatumigwe). Hakaluta, hakanawa hakoya yakona. 8 Awanhu wa habahi behi, na waya awamonage yakutasa, hawagamba, “Ayuno so munhu yakalage haya na kutasa?” 9 Wamonga hawagamba, “No yeye.” Wamonga hawagamba, “Hata, ninga kakifana ne imwene.” Yawagamba, “No niye.” 10 Hawamusa, “Ameso gako gakumukakumuka nhani?” 11 Yawabidula, “Imunhu yakugambigwa Yesu kagolosa itope na kunibaka mumeso na kunigamba, ‘Luta Siloamu na ukanawe.’ Ninga imunhu yuno, honiluta, honinawa honikonga kona.” 12 Howomugamba, “Kahoki Hoyogamba Ani simanyile.” 13 Howomwigala Kumafalisayo imunhu yowile mudula. 14 Hadyuwa ijuwa dya Sabato Yesu doyagolose ditope na kumugubula meso gakwe. 15 Mafalisayo howomusa kahi ifyene foyadahile kona. Yawagamba, “Kaguma itope mumeso gangu, kamei honinawa, na nikona.” 16 Wamonga wa Mafalisayo hawagamba, “I munhu yuno nghalawile kwa Mulungu, kosoko nghakolile Isabato.” Ninga wamonga hawagamba, “Ikudahika nhani imunhu yakugolosa wihi yagolose ijumo fina dino?” Hokuwa mutemanuko mugati yawo. 17 Baho Amafalisayo hawamusa kahi imunhu yuya, “Ukugambaki kosoko kakuhonya udula?” Ni mugonesi. 18 Awayahudi wasafumile kuwa hakowa chipofu na kuwa hakadaha kona, mpaka fowawenanga awamweleke yuya yowile mudula hambiya yakona, 19 na kuwosa, Ayuno ni mwana wenu, womukugamba hakelekigwa mudula? Yanhani kuwa yakona hambiya? 20 Awaya wamweleke hawagamba, “Chimanya seye, ayuno ni mwana wetu na fina hakelekigwa chipofu, 21 ninga foyakona hambiya hata seye chisimanyile, no nani yamugubule meso. Mudeni mwecho; imwene ni mukulu mugima, kokilongela imwecho.” 22 Awamweleke wajawalonga nheifo kosoko wejawawogoha Wayahudi, kosoko Wayahudi hawakifumilisa fina munhu yanghamufimila fina Kilisito yekuleusigwa mudisinagogi. 23 Kosoko iyo awaya wemeleke hawagamba, “Imwene ni mukulu mugima musene mwecho.” 24 Hawamwinanga kahi lwakeli ayuya imunhu yahonyigwe upofu, hawamugamba, “Mwinghe Mulungu ditunyo; ase chimanya imunhu yuno kena wihi.” 25 Hakabidula, “Hona yena wihi, ani simanyile, chinhu chimwedu chonimanyile, aniye hanuwa chipofu ninga hambiya nikona.” 26 Hawamugamba, “Hakakutendela nhani Hakagubula nhani ameso gako?” 27 Hoyowabidula, “Nifulusa kuwatamilani, musendile kutegelesa, Nhani mukuhananga kuhulika kahi? Anye nanyi mukuhananga kuwa wefusa wakwe?” 28 Howomuliga wakugamba, “Agwe no umwifusa wakwe, aseye cha wefusa wa Musa. 29 Chimany fina Mulungu kalonga na Musa, ninga yuno chisimanyile kayalawile!” 30 Imunhu hakabidula, “Nhani, Adino ni ijumo! Anyesi musimanyile koyalawile naye kanigubula meso gangu. 31 Chimanya fina Mulungu nghekuwahulika awena uwihi ninga imunhu iyakumwenda na kumufuga Mulungu na kugolosa foyakwenda Mulungu, Mulungu yakumuhuwila. 32 Hata nheifo kulawa ichilunga fochanga ilihulikigwa fina munhu wowose kagubula ameso ge munhu yelekigwe chipofu. 33 Hona imunhu yuno nghalawile kwa Mulungu, nghowile yakudaha chochose.” 34 Howomubidula, “Agwe kwelekigwa muwihi muhala, ukudaha kuchifusa seye?” Howomulafa kunje. 35 Yesu yakahulike fina wamulafa kunje, na yakamone yagamba, “Togola ukumuhuwila Mwana we munhu?” 36 Yabidula, “Naye no nani, Mukulu, uleke nimuhuwile?” 37 Yesu yamugamba, “Kumona, noniye nikulonga nagwe.” 38 Hoyogamba, “Mundewa nikuhuwila, hoyomufuga.” 39 Yesu yagamba, “Kosoko ya kulamula hija kuchilungu chino awaya awasikona wone na awa awakona wowe fipofu.” 40 Wamonga wa Mafalisayo wowile habehi hawamuhulika howomugamba, “Ase nase chafidula?” 41 Yesu hakawagamba, “Nanga mowile mudula musowile mukuwa na wihi;” ninga hambiya mukugamba, “Chikona uwihi wenu ukwikala.”
1 Chawelu, chawelu, nikuwatamilani, imunhu inghakulokela kumulango kukwingila mwidewa dye singholo, ninga yakukwilila kwingi, imunhu yo muhiji kahi muhokaji 2 Ninga ayuya iyakwingilila kumulango no mudimi we singholo. 3 Ayo mwimilisi yakumukumulila umulango; singholo sikuhulika dijwi dyakwe, na yekusinanga singholo sakwe kwa masina na yekusilafa na kusilongosa kunje. 4 Yanghafulusa kusilafa kunje sose isakwe, yakusilongolela, na singholo sikumwandamila, kosoko sidimanya dijwi dyakwe. 5 Imugeni sisikumwandamila, kahi sikumutija, kosoko sisimanyile amajwi ga wageni. 6 Yesu hakalonga imbasi ino, ninga wasatangile choyalongage nawo. 7 Yesu kahi hakawagamba, “Chawelu, chawelu, nikuwatamilani, aniye no nimulango we singholo. 8 Wose awanilongolele ni wahiji na wahokaji, ninga singholo sisawahulikise. 9 Aniye no ni mulango; wowose iyakwila kulokela ukwangu, yakwenda yahone, yakwingila na kulawa na kupata madimilo. 10 Imuhiji yakwija kuhija na kukoma na kubana; aniye nija uleke wowe na uwumi na wowe nawo telele. 11 “Aniye no nimudimi muswanu. Mudimi muswanu yakulafa uwumi wakwe kosoko ya singholo. 12 Munhu yakudimu kosoko yo maliho, siyo mudimi, singholo si sakwe, yakona diwusi dikwija, yakusileka singholo yakudija, diwusi dikusikola na kusagalisa. 13 Yakutija kosoko ni munhu wa iliho na kechaka usungu ne singholo. 14 Aniye no nimudimu muswanu, nisimanya singholo sangu naso sinimanya, 15 fina Baba foyanimanyile naniye, fonimumanyile Baba; na nikulafa uwuni wangu kosoko ya singholo. 16 Ninga nina ngholo singi, aso si sa ditewa dino; aso naso inyagila nisigale, naso sohulika dijwi dyangu. Kosoko yiyo kukuwa na itewa dimwedu, na mudimi yumwedu. 17 “Kosoko iyo iBaba yakunyenda niye, kosoko nikulafa uwumi wangu, uleke ni ulonde kahi. 18 Hachaka munhu yekudaha kunihoka, ninga nina udaha wa kuulafa, na kuulonda hahi; dilagiso dino nidihokela kulawa kwa Baba.” 19 Hagalawanisa matemanuko mugati ya Wayahudi kosoko ya simbuli siso. 20 Matewa hawagamba, “Kena igini, na kena chilalu; waki womukumutegelesa.” 21 Wamonga hawagamba, “Asino siyo nonga sa munhu yena digini, digini dikudaha kugubula meso gemudula?” 22 Hayuwa ijuwa nikulu dya kukumula ako Yelusalemu; 23 ichigele che inyota, na Yesu yendeyogenda Mwihekalu, mwikumbo dya Sulemani. 24 Awayahudi hawamusunguluta na kumugamba, “Kogendelela kuchidasa mpaka milaki? Nghonaga agweye no ni Kilisito chitamile unghachifisefise.” 25 Yesu hakawabidula, “Nimutamilani ninga musikuhuwila. Imilimo yonikugolosa mu disina dya Baba, ayo no ikunihomelela; 26 ninga musikuhuwila, kosoko nyeye musuwile musingholo sangu. 27 Singholo sangu sikuhulika dijwi dyangu, na nisimanya, isene naso sinimanya; 28 nani nikusingha uwumi wa majuwa gose; na sisikudaha kwagilila, na kwechaka munhu yakudaha kunihoka kulawa mumukono wangu. 29 iBabangu iyaninghile siso ni mukulu kusuma wose, na hachaka yakudaha kumuhoka, kulawa mumikono yakwe. 30 Aniye na Baba ni chinhu chimwedu.” 31 Awayahudi hawadondola mawe kahi uleke wamutowele nago. 32 Yesu hoyowabidula, “Nimonesani milimo mingi miswanu kulawa kwa Baba; kosoko ya ihoki mu yiyo yomukunitowela mawe?” 33 Awayahudi hawamubidula wakugamba, “Si kosoko ye milimo miswanu ikuleka chikutowa na mawe, ninga kosoko yo kutofula kosoko agweye, go wi munhu ukitenda fina kwa Mulungu.” 34 Yesu yawabidula, “Isitulumigwe mu malagiso genu, Hanigamba, ‘Anye mwa milungu?’ 35 Ghonaga yawenange milungu awaya awejiligwe ne imbuli ya Mulungu na matulumo gasukudaha kubenigwa, 36 Mukumugamba, ‘Ayuya imwene iBaba kamusagula na kumulafa na kumutuma kuchilunga. Agweye ukutofula kosoko nigambile Aniye no ni Mwana we Mulungu?’ 37 Nghonaga niye sikugolosa imilimo ya Baba, munghanihuwile; 38 Ninga hona nikuigolosa, inghowa musikunihuwila niye, ihuwileni imilimo iyecho, uleke mutange na kumanya fina, iBaba kamugati yangu na niye nuwa mugati ya Baba.” 39 Kahi howogesa kumukola, ninga hoyochulupuka kulawa mumikono yawo. 40 Hakaleuka kahi yaluta umwambu wa Yolodani ahanhu ahene Yohana Mubatisaji hakakongela kubatisa, hoyokuwa baho. 41 Wengi hawamwijila; hawagamba, “Yohana chawelu nghagolose ijumo dyodyose, ninga chila mbuli yoyalongile muchanhya ye munhu yuno ayuwa ya chawelu.” 42 Na wengi howomuhuwila.
1 Hambiya munhu yumonga yowa mutamu, Lasalo wa Betania, ikaya Maliamu ne dada yakwe Malita. 2 Ayuno no Maliamu yeja yamubaka iMundewa mafuta maswanu na kumuhamusa migulu yakwe na sinjwili sakwe, awene mukulu wawo Lasalo yowile mutamu. 3 Na kosoko iyo awalumbuse howokwigala mbuli, wakugamba, “Mundewa, ayuya wo ukumwenda mutamu.” 4 Ninga Yesu yakahulike hakagamba, “Utamu uno si wakufa; ninga ni kwa ditunyo dye Mulungu, uleke Mwana we Mulungu yatunyigwe kosoko ya uwo.” 5 Hambiya, Yesu hakamwenda Malita na idada yakwe na Lasalo. 6 Foyahulike fina hakowa mutamu, yejayekala majuwa meli ahanu bahaya hoyowile. 7 Hanyuma yakwe kawagamba awefusa wakwe, “Chigendeni Uyahudi kahi.” 8 Awefusa wakwe hawagamba, “Labi.” Wayahudi wendewohananga wakutowe na mawe luluno, ukuluta uko kahi? 9 Yesu hakabidula, “Sisaa sa nhemisi si kumi na mbili? Na imunhu yanghagenda nemisi ghakukobadika, kosoko yakuwona ujelu we yisi ino. 10 Ninga munhu wowose honayakugenda muchisa yakukobadika, kosoko ujelu umwakwe mwachaka.” 11 Yalonga nheifo, kameyi hakawagamba, “Imbwiyayetu Lasalo kagona, nikuluta nikamwinuse musinhongo.” 12 Awefusa wakwe howomugamba, “Mundewa, honayagonile nhongo kokwinuka.” 13 Ninga Yesu hakalonga muchanhya yo kufa kwakwe, awene hawamanya yakulonga kugona kwa kibwihisa du musinhongo. 14 Kamei Yesu hoyowatamila chawelu, “Lasalo kafa, 15 kosoko yenu nikonela fina sowile baho, uleke muchuwile. Ninga chigendeni ukwakwe.” 16 Tomasi iyakwinangwa ipasa, kagamba kuwefusa wayagwe, “Chigendeni naseye uleke chikafe hamwedu naye.” 17 Ugele foyafikile Yesu, Lasalo hakowe yasikigwe muchilalo majuwa mane. 18 Betania hayuwa habehi na Yelusalemu, utali wa maili mbili, 19 na Wayahudi wengi haweja kwa Malita na Maliamu kuwahongesa kosoko ye difa dye mundugu sawo. 20 Malita yakahulike fina Yesu yakwija, hoyolawa kwija muhokela, ugele Maliamu hakasigala mu nyumba. 21 Malita hakamugamba Yesu, “Mundewa nanga wowile baha, mundugusangu nghowile yakufa. 22 Ninga hata hambiya nimanya chochose choumutasa Mulungu, Mulungu yakukwingha.” 23 Yesu yamugamba, “I mundugusa yakwenda yenuke kahi.” 24 Malita hakamugamba, “Nimanya yakwenda yenuke dijuwa dyo kwina awanhu wose dyo indumo ye chilunga.” 25 Yesu hakamugamba, “Aniye nokwinuka wafile kahi no ni uwumi, iyakunihuwila niye yanghafa kokuwa na uwumi; 26 na imumi iyakunihuwila aniye nghakufa ng'oo. Ukuhuwila gonikulonga.” 27 Hakamugamba, “Heye, Mundewa, nikukuhuwila fina agweye no Kilisito, Mwana we Mulungu, iyakwija kuchilunga.” 28 Yakamale kulonga siso hoyemwinanga Maliamu chinyenele, “Mwalimu kabahano kahi yakukwinanga.” 29 Yakahulike nheifo hakenuka chimwandemwande hakemulutila. 30 Yesu hakowa nghenati yengile mukaya yawo, hakowa yenghali bahaya Malita hoyamufikile. 31 Awayahudi waya wowile hamwedu naye kugati, wakumuhongesa wakone Maliamu kenuka chimwandemwande, na kulawa kunje hawamwandamila, wagamba nhagela yakuluta kuchilalo yikalile ukuya. 32 Maliamu yakeje hoyowile Yesu yakamwone hakogwa hamigulu yakwe, yakumugamba, “Mundewa, nanga wowile baha mundugu sangu nghowile yakufa.” 33 Yesu yakamone yakulila na Wayahuhi wajile naye nawo wakulila, hakona usungu muchidoga chakwe na kwidasika; 34 Hakawagamba, “Mumwika hoki?” Hawamugamba, “Mundewa wije ulange.” 35 Yesu hakakonga kulila. 36 Awayahudi hawagamba, “Langeni, foyamwendile!” 37 Ninga awamonga hawagamba, “Ayuno yagubule ameso ge mudula kalemeligwa kumugolosa yuno yanghafe?” 38 Noho Yesu, hoyokuwa na usungu lugano kahi, hoyofika kuchilalo; hachuwa cha mhango, hachigubikigwa na diwe. 39 Yesu hoyogamba, “Dileuseni diwe,” Malita ilumbudye wa yuya yafile, hoyumugamba, “Mundewa kwa ugele uno kwina ibofu, kosoko kafa majuwa mane galokile.” 40 Yesu hoyomugamba, “Sikugambile fina unghahuwila kokona ditunyo dye Mulungu?” 41 Kamei howoleusa diwe, Yesu hoyokwinula meso gakwe kuchanhya hoyogamba, “Baba nikukulumba kusoko ukunihulika. 42 Hanimanya fina agweye ukunihulika majuwa gose, ninga nilonga sino kosoko ya wanhu wano awemile hano, uleke wahuwile fina agweye no unitumile.” 43 Yakamale kulonga nheifo, hakalonga kwa ijwi dikulu, “Lasalo lawa kunje!” 44 Imunhu yafile hakenuka imikono yakwe ne migulu yakwe yohigwe sisanda chihaga chakwe chigubikigwa na sisanda, Yesu hoyowagamba, “Mudoholeni mulekeni yalute.” 45 Kosoko yiyo wengi wa Wayahudi awejile hamwedu na Maliamu na wonile doyagolose, hawamuhuwila; 46 Ninga wamonga howoluta ku Mafalisayo, na kuwatamila foyagolose Yesu, 47 Baho makuhani wakulu na Mafalisayo hawakikonghola na kitang'anyila, hawagamba, “Chochikugolosa choni? Yakugolosa majumo mengi! 48 Chinghamuleka yagendelele nheifino, chila munhu yakwenda yamuhuwile, na Walumi wakwenda weje kuchibanila ahanhu hetu hasunhile na ditaifa dyetu!” 49 Ninga yumwedu wawo Kayafa yowile kuhani mukulu umwaka uya, hoyowagamba, “Anye musimanyile chochose; 50 musimanyile fina inogela kosoko yenu munhu yumwedu yafe kosoko ya wanhu, uleke ditaifa dyose dinghagilile.” 51 Nghalongile didyo kosoko ya misungu yakwe imwecho, ninga kosoko yowile mutambiki mukulu umwaka uya hakonesigwa na Mulungu fina Yesu yafe kosoko ya ditaifa, 52 na si kosoko ya ditaifa du lakini kuwakonghola hamwedu awana wa Mulungu awenele ako nako. 53 Kukongela dijuwa didyo wendewohananga njila ya kumukoma. 54 Kosoko iyo Yesu nghadahile kugenda yakonigwa na wanhu mugati ya Wayahudi, ninga hoyoluta kulawa iyisi iyo mpaka kubehi behi na kunyika, ku ikaya ikwinangwa Efulaimu; na hakekala uko hamwedu na wefusa wakwe. 55 Idijuwa dikulu dya Wayahudi dye Pasaka hadyuwa habehi, na wengi hawakwila Yelusalemu kulawa kufilunga wasunhe fidoga fyawo ugele dijuwa dye Pasaka disinati difike. 56 Wenda womuhananga Yesu na wakiyusa awecho kwa wecho ugele wemile mudihekalu, “Mukona nhani? Nghokwija ku sikukuu?” 57 Hambiya, amekuhani wakulu na Mafalisayo hawalafa malagiso hona munhu wowose yamanyile koyowile, yawatamile wamanye, uleke wamukole.
1 Fogasigale majuwa mutandatu kufika dijuwa dya Pasaka, Yesu hoyokwija Betania, ahowile Lasalo, imwene yenuligwe na Yesu kulawa mu difa. 2 Baho hawamugolosela chakudiya; Malita yendeyotogoma, na Lasalo hakuwa yumwedu wawo awekale hamesa hamwedu naye. 3 Maliamu hoyolonda chichupa cha mafuta ge mhungile swanu hakamubaka mumigulu ya Yesu na hamusa imigulu yakwe kwa sinjwili sakwe, na inyumba hoimema mhungile swanu ya mafuta. 4 Ninga, Yuda Isikalioti yumwedu wa wefusa wakwe ayuya yowile wo kumusongesa, hoyogamba, 5 “Nhani amafuta gano gasambasigwe kwa dinali magana madatu na kuwegha awakiwa?” 6 Hakalonga nhaifo, sikosoko hakowa na ubasi na wakiwa, ninga kosoko hakowa muhiji, kosoko noyowile ne chisanduku cha mapesayendeyolonda amapesa gagumagwe umo. 7 Yesu yagamba, “Mulekeni, yageke kosoko ya dijuwa dya masiko gangu. 8 Awakiwa mwenawo majuwa gose hamwedu nanye, ninga aniye musihamwedu nani majuwa gose.” 9 Ditewa dikulu dya Wayahudi wakamanye fina kabaho, howoluta uko, si kosoko ya Yesu du ninga wendewahanana kumona na Lasalo, yenulinuligwe na Yesu kulawa mudifa. 10 Kosoko awatambiki wakulu hawahananga njila ya kumukoma Lasalo, 11 kosoko matewa ga Wayahudi wendewoleuka ukwawo na kumulutila Yesu na kumuhuwila. 12 Dijuwa dya keli itewa ikulu dya wanhu awejile kusikukuu hawahulika fina Yesu yakwija Yelusalemu. 13 Howobena matambi ge mitende howoluta kumuhokela wakujoja, “Hosana! Kamotesigwa ayuya iyakwija mudisina dye Mundewa wa Isilaeli!” 14 Na Yesu iMundewa hoyolangisa dipunda didodogi, na kwikala muchanhya yakwe; fina foitulumwe, 15 “Unghogohe biti Sayuni; Langa; iMundewa yakwija kekala mwi mwana we dipunda.” 16 Awefusa wakwe wasatangile chino kunghonga; ninga Yesu yakatunyigwe, Kamei howogelegela fina haitulumigwa nheifo kosoko yakwe, fina imemelesigwa ukwakwe. 17 Ditewa dyowile hamwedu naye ugele foyamwinange Lasalo kulawa kuchilalo na kumwinula kulawa kuwafile howolafa uhomelesi. 18 Chileka amatewa galutile kumuhokela ni kosoko hawahulika fina hakagolosa ichitangilo chicho. 19 Amafalisayo howokigamba awecho kwa wecho, “Mukona fina anyeye musikudaha dyodyose; langeni, ichilunga chikumwandamila.” 20 Mu wanhu walutile Yelusalemu kufuga ugele wa sikukuu hawowa Wayunani. 21 Awene wawo howomulutila Filipo yalawile Betisaida ya Galilaya, wagamba, “Mukulu aseye chikuhanga kumwona Yesu.” 22 Filipo kejamutamila Andelea; Andelea na Filipo wejamutamila Yesu, 23 Yesu kawabidula kagamba, “Ugele ufika we Mwana we Munhu kutunyigwa. 24 Chawelu, chawelu nikumutamilani imhule ye ngano inghaleka kulagala hasi musanga na kufa, ikusigala imwene, ninga inghafa ikweleka singi nyingi. 25 Iyakwenda uwumi wakwe yakuwagilisa, na yuya iyekulema uwumi wakwe muchilunga chino yakuupata ku uwumi wa majuwa gose, 26 munhu wowose yanghanitogomela, imwagila yanyandamile; na honuwile niye, baho noho yakwenda yowe imutogomi wangu, imunhu yanghanitogemela, iBabangu yakwenda yalumbe kosoko yakwe.” 27 “Hambiya ichidoga changu chikwidasika nani nigambeki? ‘Baba, unihonye ne chipisi chino?’ Hata, ni kosoko iino nija kuchipisi chino. 28 Baba, uditunye disina dyako. Baho hodikwija dijwi kulawa kulanga, Niditunya, na nikwenda niditunye kahi.” 29 Matewa awemile baho hawahulika howogamba fina ididima. Wamonga howogamba, “Malaika kalonga naye.” 30 Yesu yabidula, “Dijwi dino dija kosoko yenu, si kosoko yangu. 31 Hambiya no chigele cho kulamuligwa ichilunga chino, hambiya imukulu we chilunga chino yakutagigwa kunje; 32 na niye ninghafulusa kwinuligwa muchanhya kulawa hasi, nikuwakwega wanhu wose ukwangu.” 33 Hakalonga sino konesa ni ifa dyaki dyoyakufa. 34 Amatewa weja wamubidula kugamba, “Chihulika mumalagiso fina Kilisito yakwikala majuwa gose. Kodaha nhani kugamba Mwana we munhu yakwenda yenuligwe kuchanhya? Ayo Mwana we munhu no nani?” 35 Yesu hoyowagamba, “Ujelu wa hamwedu nanye kwa chipisi chitali chidodogi. Mugende ugele mwenawo ujelu, ichisa chingheje chiwasumani, iyakugenda muchisa nghamanyile hoki koyakuluta. 36 Ugele mwenawo ujelu, huwileni mu ujelu, uleke muwe wana wa ujelu.” Baho Yesu yakalonge nheifo, hakaleuka hakakifisa kulawa ukwawo. 37 Hamwedu na majuwa gose goyagolose kumwande ya meso gawo, ninga wasamuhuwile; 38 hayuwa uleke imbuli yalongigwe ne mugonesi Isaya imemelesigwe: “Mundewa, nani yahuwile imbuli yetu na kwa chinani ugubuligwa umukono we Mundewa?” 39 Kosoko iyo wasadahile kuhuwila kosoko Isaya hakalonga kahi, 40 “Kawatula ameso gawo na kaigolosa imiyoyo yawo kuwa mikugutu, uleke wanghone kwa meso gawo na kona kwa miyoyo yawo, na kunibidukila niwahonye.” 41 Isaya hakalonga siso kosoko hanona ditunyo dyakwe hoyolonga kosoko yakwe. 42 Hata nheifo, wengi wa wakulu howomwihuwila, ninga kosoko ya kuwogoha Mafalisayo, wasadahile kulonga chimesomeso, uleke wanhalafigwe mumasinagogi. 43 Kosoko hawenda ditunyo dya wanhu kusuma ditunyo dye Mulungu. 44 Yesu yenula dijwi yekugamba, “Wowose yakunihuwila niya, nghakunihuwila niye du, ninga ayuya iyanitumile. 45 Na yakunyona niye yakumona na yuya yanitumile. 46 Nija kuwa ujelu we chilunga, uleke ayuya iyakunihuwila yanghasigale muchisa. 47 Hona kwina wowose yakuhulika simbuli sangu, na nghakusikola, aniye sikumuliganisa; kosoko sijile kuliganisa ichilunga ninga kuchihonya ichulunga. 48 Imwene iyakunilema niye na nghakuhokela simbuli sangu, kena mulamusi, simbuli sonilongile no sikasimuliganisa mudijuwa dye indumo. 49 Kosoko niye silongile kwa udaha wangu nimwecho; Baba iyanitumile kanigha dilagiso, nilonge choni na nisimulile choni. 50 Na nimanya fina dilagiso dyakwe ni uwumi wa majuwa gose. Kosoko iyo chonikulonga, nikulonga ifyene Baba foyanitumile.”
1 Hambiya dijuwa dikulu dye Pasaka fodowile disinati difike Yesu hakamanya fina ichigele chokuleuka muchilunga na kuluta kwe Baba chifika. Hakawenda awakwe wowile muchilunga, hakawenda mpaka ndumo. 2 Ichigele chokudiya, Ishetani yakowe kaguma muchidoga cha Yuda Isikalioti, mwana wa Simoni, kumusongesa. 3 Yesu yakamanye fina Baba kamwingha ifinhu fyose mumikono yakwe, na fina kalawa kwe Mulungu, 4 hoyokwinuka hoyekale, hakeka sisuke sakwe hanghanda, hoyokiyoha na chitambala. 5 Kameyi hoyogida ameji mwibakuli, hakakonga kusunha imigulu ya wefusa wakwe, na kuwahamusa ne chitambala chakwe choyakiyohile muchuno. 6 Hakeja kwa Simon Petulo, iPetulo hoyomugamba, “Mundewa agweye ukunisunha migulu?” 7 Yesu hakamubidula, “Chonikugolosa nghukudaha kumanya hambiya, ninga hanyuma ukaumanya.” 8 Petulo hoyomugamba, “Agweye ukwija uninashe migulu yangu nghukunasha ng'oo.” Yesu hoyomubidula, “Ninghaleka kukunasha nghumuhangi naniye.” 9 Simoni Petulo hoyomugamba, “Mundewa si imigulu yangu du ninga ne mikono yangu ne ditwi dyangu.” 10 Yesu hoyomugamba, “Iyafuluse kiyoga kechaka soko ya kiyoga kahi nanga kunawa migulu ninga musafi umutufi wose; nanye mwa wasafi, ninga si nyeye mose.” 11 Kosoko hakamanya no nani yakwende yamusongese; nochileka yagambile, “Anye mose musi safi.” 12 Yakafuluse kusunha migulu yawo, na kulonda si suke sakwe, na kwikala haukalo wakwe, hoyowagamba, “Mumanya chonigolose ukwenu? 13 Mukuninanga, ‘Mwalimu’ na ‘Mundewa,’ na mukulonga chelu, nofo nuwile. 14 Honaga aniye ni Mundewa ne Mwalimu wenu, niwanashani migulu yenu, anye nanye imwagilani kinasha migulu nyeye kwa nyeye. 15 Kosoko nifulusa kumonesani nanye mugolose fonimoneseni. 16 Chawelu lugano, nikumutamilani imutumwa si mukulu kusuma iMundewa wakwe, kahi ayuya yatumigwe si mukulu kusuma iyamutumile. 17 Hona munghamanya, ifinhu fino, ibeka ukwenu hona mukufigolosa. 18 “Sikulonga kosoko yanyeye mose; niwamanya woniwasaguleni; uleke simbuli sa Mulungu simemelesigwe, ‘Ayuya yadiyile umukate wangu kanyinulila ichisinyagilo chakwe.’ 19 Nikumutamilani ino hambiya, ugele isinati ilawanise, uleke hona ikulawanisa, muhuwile fina aniye no nene. 20 Chawelu, chawelu, nikumutamilani, iyakumuhokela wowose wonikumutuma yakunihokela niye; naye yakunihokela niya yakuhokela iyanitumile niye.” 21 Yesu yakalonge nheifo, hoyokuwa na lwidaso muchidoga chakwe hoyohomelela, “Chawelu, chawelu nikuwatamilani, yumwedu wenu yakwenda yanisongese.” 22 Awefusa wakwe howokilanga, wasatangile chawelu fina yakulonga nani. 23 Mwifusa wakwe yumwedu, yendigwe na Yesu, hakegemila muchifa cha Yesu. 24 Baho Simon Petulo hoyomukonyesa, na kugamba, “Chitamile no yehoki imwene woyakulonga.” 25 Iyegamile muchifa cha Yesu hoyomugamba, “Mundewa, no yehoki?” 26 Yesu hoyobidula, “No yuya yonikwenda nimwinghe ichibendu cho mukate chonichanise mwibakuli.” Kamei yakachanise ichibendu chiya, hoyomwingha Yuda, mwana wa Simon Isikalioti. 27 Yakalonde ichibendu chiya, Shetani hoyomwingila, Yesu hoyomugamba, “Dyo ukuhanga kugolosa, golosa chimwande.” 28 Hamesa hachaka yatangile nhani yalongile nheifo ukwakwe. 29 Wamonga hawana nhagela kosoko Yuda noyowile ne chisanduku cha mapesa, Yesu yendeyomutuma, Kagule fyene fyochikuhananga kosoko ye sikukuu ino; Nhagela chinhu cha kuwengha wakiwa. 30 Kwa nheifo yakahokele ichibendu chiya, chimwande hoyolawa kunje; hachuwa chilo. 31 Yakaleuka, Yesu hoyogamba, “Hambiya Mwana we Mulungu yakutunyigwa, na mugati yakwe Mulungu yakutunyigwa. 32 Mulungu yanghatunyigwa u mwakwe, Mulungu naye yakwenda ya mutunye umwakwe imwecho, na kumutunya chimwande. 33 Wana wadodogi, kwa chipisi chiguhi na hamwedu nanye. Mwonihananga; fina fonalongile kuwayahudi nikulonga ukwenu nako, Konikuluta misikudaha kunyandamila. 34 Dilagiso disha nikumwinghani, mukiyende, fina fonimwendileni niye anye nanye mukiyende nheifo. 35 Munghakiyenda awanhu wose womanya fina anyeye mwa wefusa wangu.” 36 Simoni Petulo hoyomugamba, “Mundewa, ukwijahe?” Yesu hoyomubidula, “Konikuluta nghukudaha kunyandamila hambiya; ninga ukudaha kunyandamila hanyuma.” 37 Petulo hoyomugamba, “Nhani nileke kukwandamila hambiya? Nikuulafa uumi wangu kosoko yako.” 38 Yesu hoyomubidula, “Kolafa uumi wako kosoko yangu? Chawelu chawelu, nikukutamila, ugele dijogolo disinati dike, ukuwa unikanile kadatu.”
1 “Mughadasike mufidoga fyenu; muhuwileni Mulungu, nihuwileni na niye. 2 Munyumba ya Baba mwina fibuha fingi; nanga si nheifo hanuwa nikumutamilani fina nikamwikilani ukalo? 3 Ninghaluta na kumwikilani ukalo, nokwija niwalondeni chilutanye ukwangu, uleke honuwile niye anye nanye muwe baho. 4 Na muimanya injila yonikulutila.” 5 Tomasi hoyomugamba, “Mundewa chisimanyile koukuluta choimanya nhani injila?” 6 Yesu hoyomugamba, “Aniye no ni njila, ne chawelu no uwumi; kwachaka munhu yakwija kwa Baba inghakulokela ukwangu. 7 Nanga unimanyile niye hakuwa u kumumanya ne Babangu nheifiya; hambiya mumumanya na mufulusa kumona.” 8 Filipo hoyomugamba, “Mundewa, chonese iBaba noyochikuhananga du chokwiguta.” 9 Yesu hoyomugamba, “Nikala nagwe majuwa gose gano, ninga agwe hunimanyile Filipo? Iyanyonile niye kamona ne Baba; ukudaha nhani kugamba, chonese Baba 10 Nghukuhuwila fina aniye na mugati ya Baba na Baba kamugati yangu? Simbuli sonikulonga ukwenu sikulonga kwa udaha wangu; ninga iBaba yowile mugati yakugolosa milimo yakwe. 11 Huwileni, aniye na mugati ya Baba na Baba kamugati iyangu; hona si nheifo munihuwile kosoko ye milimo iyeecho. 12 Huwileni, huwileni nikumutamilani, imunhu iyakunihuwila imilimo yonikugolosa, niye yakwenda yagolose kahi yakudaha kugolosa mikulu kusuma ino, kosoko nikuluta kwa Baba. 13 Chochose chomukutasa kwe disina dyangu, nigolose, uleke iBaba yatunywigwe mu iMwana; 14 Munghatasa chinhu chochose mu disina dyangu nikwenda nigolose.” 15 “Mughanyenda, mukukola malagiso gangu. 16 Na nikumutasa Baba, yakwenda yamwigheni mutasi yungi, yekale nanyi majuwa gose. 17 No Muhe we chawelu, imwene ichilunga chino chisikudaha kumuhokela; anye mukumumanya, kosoko yakwikala hamwedu nanye na yakuwa kugati yenu. 18 Sikumulekani mwi wemwene; mukumwijilani. 19 Ninga chipisi chiguhi ichilunga chisikwenda chinyone kahi, ninga anyeye mukweda munyone; kosoko niye ni mumi, anye nanye mukuwa womi. 20 Dijuwa dyo, mukamumanya fina aniye nuwa mugati ya Baba ne Baba na nyeye muwa mugati yangu, na niye muwa mugati yangu, na niye mugati yenu. 21 Iyena malagiso gangu na kugagolosa, aye no yakunyenda, na iyakunyenda yakwenda yendigwe ne Babangu nami nikwenda nimwende na kigubula ukwakwe.” 22 Yuda, (si Isikalioti) hoyomugamba, “Mundewa yanhani fina ukuhananga kigubula ukwetu ninga si kuchilunga?” 23 Yesu hoyomubidula, na kumugamba, “Awakunyenda wakukola imbuli yangu, na iBaba yakwenda yawende, nase chikwija ukwakwo na kugolosa ukalo wetu umwawo. 24 Ayuya imwene inghakunyenda nghakukola simbuli sangu, na imbuli yomukuhulika si yangu ninga ni ya Baba iyanitumile. 25 Simbuli sino nilonga nanye, ugele nikali hamwedu nanyi. 26 Ninga, Imutasi, Muhe Musunhile iyekwenda yegaligwe na Baba ku disina dyangu, yakwenda yawafuse finhu fyose, na kuwagelegesa gose goniwafusile. 27 “Digoya nikumulekelani; digoya dyangu nikumwinghani; sifina ichilunga fochikulafa; aniye nikumwinghani fidoga fyenu finghedasike, kahi finghogohe. 28 Hamunihulika nikumugambani, ‘Nikuleuka, ninga nikwenda nimwijileni!’ Hona mukunyenda, nanga mukunyenda hamuwa mukusekelela, kosoko iBaba ni mukulu kusuma niye. 29 Na hambiya nimutamilani ugele unghali kufika, uleke maukufika muhuwile. 30 “Sikulonga mbuli nyingi kahi nanyeye, kosoko imukulu we chilunga chino yakwija. Kachaka udaha wowose ukwangu; 31 ninga nikugolosa fina iBaba foyanilagise, uleke ichilunga chimanye fina nikumwenda iBaba. Inukeni, chigendeni kuya.”
1 “Aniye no ni musabibu wa chawelu, na iBabangu no mulimi. 2 Chila inhambi idisikweleka, yakudileusa, na chila inhambi idikweleka mamudyo yakudihungulila uleke digendelele kweleka lugano. 3 Anyeye mufulusa kwela kosoko ye imbuli yonilongile ukwenu. 4 Ikaleni mugati iyangu, na niye mugani yenu. Fina dinhambi fodisikudaha kweleka diimwene, ikuhanangigwa dikale mumusabibu, anye nanye nheifo musikudaha kweleka munghaleka kwikala u mwangu. 5 “Aniye no ni musabibu, anyeye no mumanhambi. Iyakwikala mugati yangu, na niye mugati yakwe, no yuyo iyakweleka mamudyo mengi, kosoko munghaniswela musikudaha kugolosa chochose. 6 Imunhu nghona ngakwikala umwangu, yakutagigwa kunje kifana itambi na kunyala; na matambi gakulundigwa, na kukubititigwa mumoto na kusomigwa. 7 Munghekala umwangu, na simbuli sangu singhekala mugati yenu, taseni chochose chomukuhananga, na mukwenda mugoloseligwe. 8 Kwa nheifo iBaba yakutunyigwa, kosoko mukweleka mamudyo mengi, mukiyonesa chawelu fina mwa wefusa wangu. 9 Fina iBaba foyanyendile ani, nani nofonimwendileni; mugendelele kwikala mu wendo wangu. 10 Munghagakola amalagiso gangu, mwukwenda mugendelele kwikala mu wendo wangu, fina niye fonikolile amalagiso ga Baba na kwikala mu wendo wakwe. 11 “Simbuli sino nisilonga ukwenu uleke ichinyemi changu chuwe ukwenu, uleke ichinyemi chenu chimemelekele. 12 Adino no dilagiso dyangu, mukiyende fina aniye fonimwendileni anyeye. 13 Kwechaka wendo mukulu kusuma uno, we imunhu kulafa uwumi wakwe kosoko ya wambwiya sakwe. 14 Anyeye mwawambwiya sangu honaga mukugolosa fonimulagiseni. 15 Sikuwenanga kahi imutogomi kosoko imutogomi nghamanyile imukulu wakwe yakugolosa choni, ninga nimwinangani nyeye wambwiya sangu, kosoko gose gokunihulike kulawa kwa Baba niwatamilani. 16 Sinyeye mwanisagule, ninga aniye nonawasaguleni na kuwegala mulute mukeleke mamudyo na mamudyo genu gagendelele, uleke chochose chomukumutasa iBaba mudisina dyangu yamwingheni. 17 Dilagiso dyangu nodino, mukiyende.” 18 “Ichilunga chinghamusulani, mugelegele fina hachikonga kunisula niye. 19 Munghowa wanhu we chilunga, ichilunga chikumwendani kosoko mwawanhu wakwe. Ninga hanimusagulani kulawa muchilunga chino, anye mu si wanhu we chilunga; nochileka ichilunga chikuwasula. 20 Mugelegele, imbuli yonamutamileni, ‘Imutumishi si mukulu kusuma imukulu wakwe, nghonaga niye hawanisambase, womusambasani na nyeye, nghona waikolile imbuli yangu,’ wakola iyenu nayo. 21 Ninga wowagolosela gose gano kosoko yangu, kosoko wasimumanyile ayuya iyanitumile. 22 Nanga sejile nakulonga nawo, hawowa wakuwa chaka wihi; ninga hambiya wechaka chinhu cha kuwalongela, kosoko yo uwihi wawo. 23 Ayuya iyakunisula niye yakumusula na Baba neifia. 24 Nhanga gagolose muchiligati yawo imilimo yene hechaka wowose yakudaha kugolosa, wasowile wakuwa na wihi, ninga hambiya wona na wanisula niye hamwedu na Baba. 25 Kukumemelesa imbuli itulumigwe mwilagiso dyawo, ‘Wanisula chaka.’ 26 “Ninga, nghona Imulolesi yakwija, wonikwenda nimwigale kulawa kwa Baba, Muhe we chawelu, iyakulawa kwa Baba, yakwenda yowe muhomelesi wangu; 27 anye nanye mwa wahomelesi, kosoko hamuwa hamwedu na niye kulawa kunghonga.”
1 “Nimutamilani sose sino uleke munghaleke dihuwi dyenu. 2 Wakumuwingani mumasinagogi chawelu, ichigele chikwija ichene wowose yuya yakumukomani yakona fina yakumutogomela Mulungu itunyo. 3 Na wakwenda wagolose nheifo kosoko wasimumanyile iBaba na niye nheifia. 4 Ninga nilonga sino ukwenu, ugele nomoo ukwija mugelegele fina hanimutamutamilani.” “Salongile simbuli sino kulawa kunghonga kosoko hanyuwa hamwedu nanye. 5 Ninga hambiya nikuluta ukwakwe iyanitumile; hechaka munhu yekunyusa, ukwijahe? 6 Ninga kosoko nilongile simbuli sino ukwenu, usungu umema mufidoga fyenu. 7 No nheifo, nikumutamilani ichawelu: Ni fiswanu kwa ulwandi ulwenu fina nikuleuka, kosoko ninghaleka kuleuka, Imulolesi nghakwija ukwenu; ninga ninghaluta nikwenda nimwigale. 8 Ugele woyekwija, yakuchonesa ichilunga muchanhya ya uwihi, ichawelu, na kuliganiswa. 9 Muchanhya ya uwihi kosoko wasanihuwile; 10 muchanhya ya chawelu kosoko nikuluta kwa Baba, na musikwenda munyone kahi; 11 muchanhya yo kuliganiswa kosoko, imukulu we chilunga chino kaliganiswa. 12 “Nina finhu fingi fya kulonga ukwenu, ninga musikudaha kufihokela hambiya. 13 Nghona iMuhe we chawelu yakwija, yakayomulongosani kuchawelu chose; nghakwenda yalonga kwa udaha wakwe imwecho, ninga sose soyakuhulika nosoyakulonga, na yakumutamilani ifinhu fikwija ugele fisinati fije. 14 Kanitunya niye, kosoko yakulonga ifyangu na kumutamilani nyeye. 15 Fose foyenafyo iBaba ni fyangu, kosoko iyo nigamba yakulonda ifyangu, na kumutamilani anyeye.” 16 “Chipisi chidodogi musinyona, kahi chipisi chidodogi, monyona.” 17 Wefusa wakwe wamonga hawakiyusa, “Choni chichi cho yakulonga ukwetu, ‘Chipisi chiguhi, monyona; na kosoko nikuluta kwa Baba?’ 18 Hawagamba, ‘Yakulonga choni foyakugamba, chipisi chiguhi?’ Chisikumanya choyakulonga.” 19 Yesu hakamanya fina wakwenda wamuse; yawagamba, “Achino nochomukiyusa, fina chonikulonga choni ma nigamba chipisi chiguhi musinyona na kahi chipisi chiguhi monyona? 20 Chawelu chawelu nikumutamilani, molila na kuhongesa, ninga ichilunga chosekelela; mokuwa na usungu, ninga usungu wenu wobiduka kuwa chinyemi, 21 Imwanamuke nghonaga yakweleka, kena usungu, kosoko ichigele chakwe chifika, ninga yanghamala kweleka ichali, nghakugelegela kahi usungu uya kosoko ye chinyemi fina ichali chelekigwa muchilunga. 22 Kosoko mwina usungu hambiya, ninga namonani hanyuma na fidoga fyenu fokuwa na chinyemi, hachaka yakudaha kuleusa ichinyemi chenu. 23 Dijuwa didyo musikuwa na soko ya kusa chinhu ukwangu. Chawelu chawelu nikumutamilani munghamutasa Baba chinhu chochose mwisina dyangu komwinghani. 24 Mupaka hambiya musitasile chinhu chochose mudisina dyangu; taseni, mohokela, ichinyemi chenu chimeme.” 25 “Nilonga sino ukwenu kwa mbasi; Ichipisi chikwija, ugele uwene sikulonga nanye kwa mbasi kahi, ninga kumutamilani chimesomeso muchanhya ya Baba. 26 Dijuwa dyo mukamutasa mudisina dyangu na sikugamba fina nikanimutasilani kwa Baba; 27 kosoko iBaba imwecho yekumwendani, kosoko nyeye munyenda niye na muhuwila fina nija kulawa kwa Baba. 28 Hanija kulawa kwa Baba, na nija kuchilunga; kahi, nikuchileka ichilunga; na kuluta kwa Baba.” 29 Awefusa wakwe hawagamba, “Haa, hambiya ukulonga chimeso meso si kwa mbasi. 30 Hambiya chimanya fina kumanya finhu fyose, kwechaka soko ya munhu wowose kukusa, kwa nheifino chikuhuwila fina hakulawa kwe Mulungu.” 31 Yesu yawabidula, “Hambiya nohomukuhuwila? 32 Ichipisi chikwija, chawelu, chija, ugele womukwenda mukiyagale, chila munhu ukaya ukwakwe, na monileka niye nimwene; ninga, si imwene; kosoko iBaba kahamwedu nani. 33 Nilonga sino ukwenu, uleke umwangu muwe na digoya. Muchilunga mwina magayo; ninga musangalale aniye nichisuma ichilunga.”
1 Yesu yakamale kulonga simbuli siso, hoyokwinula ameso gakwe kulanga na kugamba, “Baba, ugele ufika umutunye iMwanago uleke iMwana naye yakutunye gweye, 2 kosoko gweye ukumwingha udaha muchanhya ya wose wene mutufi, yawenghe uwumi wa majuwa gose awaya wo umwinghile. 3 Na uno no uwumi wa majuwa gose, fina wakumanye gweye go Mulungu yumwedu we chawelu ne Yesu Kilisito imwene wo umutumile. 4 Nikutunya muchilunga, nikamale umulimo wa wanitumile nigolose; 5 hambiya Baba, unitunye kumwande yako na ditunyo dyonowile nadyo hamwande yako na didunyo dyonowile hamwedu nagweye ugele ichilunga chisinati chumbigwe. 6 “Nidigolosa disina dyako dimanyigwe wowaninghile kulawa kuchilunga. Hawowa wako, houningha niye. Wagolosa fina imbuli yako foikulonga, 7 na hambiya wamanya fina chila chinhu chowaninghile chikulawa ukwako. 8 Niwengha imbuli iya yowaninghile niye, na waihokela; wamanya chawelu nilawa ukwako, na wakuhuwila fina hakunituma. 9 “Nikuwatasila; sikuchitasila ichilunga ninga awaya awene wouninghile, kosoko ni wako; 10 awangu wose wako, na awako wangu, na nikutunyigwa mugati yawo. 11 Na hambiya si umuno kahi muchilunga, ninga awene wamuno muchilunga, aniye nikwija ukwako. Baba musunhile, uwakole mudisina dyako, dyouninghile uleke wowe na umwedu, kifana seye fochimwedu. 12 Fonowile hamwedu du nawo, haniwakola mudisina dyako dyo waninghile, niwemilila hachaka yagilile hata yumwedu nanga imwana wo kwagilila, uleke matulumo gamemelesigwe. 13 Ninga hambiya nikwija ukwako; na simbuli sino nikusilonga muchilunga, uleke ichinyemi changu chimemelesigwe mugati yako. 14 “Niwengha imbuli yako; ichilunga chiwasula kosoko awene si we chilunga, fina niye fo si we chilunga. 15 Sikutasa fina uwaleuse muchilunga, ninga uwemilile na yuya iyehile. 16 Awene si wechilunga fina niye fo si wechilunga. 17 Uwasunhe ne chawelu, imbuli yako no chawelu. 18 Fina agweye fowanitumile muchilunga, ani nani nheifiya niwatuma muchilunga. 19 Na kosoko yawo nikilafa nimwecho, uleke nawo wowe wakilafile muchawelu. 20 “Sikuwatasila awano du, ninga na awakwenda wahuwile kosoko ye imbuli yawo, 21 uleke wowe na umwedu, fina agweye, Baba, fowuwile mugati yangu, na niye mugati yako, awene nawo wowe mugati iyetu, uleke ichilunga chihuwile fina agweye nounitumile. 22 Ditunyo dyouninghile niwengha awene, uleke wowe na umwedu fina aseye fochina umwedu: 23 Aniye mugati yawo na agweye mugati yangu, uleke wakangale muumwedu, uleke ichilunga chimanye fina agweye kunituma na kuwenda ifyene fyo ukunyenda niye. 24 “Baba! Nikwenda, awaya awene wo uninghile, wowe hamwedu nani baho honyuwile, wadyone ditunyo dyangu dyo uninghile kwa uwendo wako ukwangu ugele ichilunga chisinati chumbigwe. 25 Baba ni wachawelu, ichilunga chisikumanyile, ninga aniye nikumanya; na wano wamanya fina hakunituma. 26 Niwatamila disina dyako, na nikwenda nigendelele kuwatamila, uleke uwendo uwene wo ukunyenda nawo uwe mugati yawo, na niye nuwe mugati yawo.”
1 Yesu yakamale kulonga simbuli siso hakaleuka na kuloka ichikolongo cha Keduloni, uko hakuwa na busitani, Yesu na wefusa wakwe howokwingila mubusitani. 2 Hambiya, Yuda ayuya yamusongese, hakahamanya ahanhu haya; kosoko Yesu hakasowela kuluta baho na wefusa wakwe. 3 Kamei Yuda hakalonda chitewa cha wasilikali, na watogomi kulawa ku makuhani wakulu, na Mafalisayo howowalutila wena na mwenje na mamuli na filama. 4 Yesu, yakamanye gose agowile kumwande yakwe, yekilafanisa kumwande ya wose, na kuwagamba, “Mukumulangisa nani? 5 “Hawamubidula Yesu wa Nasaleti.” Yesu hawagamba, “No niye, Yuda, iyamusongese, hakema hamwedu nawo.” 6 Yakawagambe, “No niye hawoya chisengelenyuma na kugwa hasi.” 7 Kahi hakawosa, “Mukumuhananga nani? ”Hakagamba, “Yesu wa Nasaleti.” 8 Yesu hakawagamba, “Nimutamilani fina no niye,” hambiya, “Nghona mukunihananga niye, awanhu wano walekeni walute.” 9 Aino hayuwa kumemelesa imbuli yoyalongile, “Mu waya wowaninghile, simwagilise hata yumwedu.” 10 Baho Simon Petulo, yowile na dipanga, hakadikwega na kumudumula inghutwi yo kulume imutogomi we mutambiki mukulu. Yenangwa Maluku. 11 Yesu hakamugamba Petulo, “Yuwisa dipanga dyako muyala yakwe; nileke kunywe ichikombe iBaba choyanyinghile?” 12 Baho awasilikali we Chilumi na wakulu wa Wayahudi hawamukola Yesu, na kumoha. 13 Kunghonga hawamwigala kwa Anasi; kosoko hakowa mukwewe wa Kayafa, yowile kuhani mukulu umwaka uya. 14 Hayuwa Kayafa imwene yejayalonga kuwayahudi fina inogela munhu yumwedu yafe kosoko ya wanhu. 15 Simoni Petulo hakamwandamila Yesu, na mwifusa yumonga. Kosoko imwifusa yuya yamanyike ne kuhani mukulu hakengila kwi balasa dye kuhani mukulu hamwedu na Yesu, 16 ugele wuwo Petulo hakema hanje hamulango, kwa nheifo imwifusa yuya yamanyike na kuhani mukulu, hakaluta kunje na kulonga ne mundele yuya yakwimilisa umulango, hakamukola Petulo yengile. 17 Imundele yuya yakwimilisa mulango yamugamba Petulo, “Agwe nagwe nghwi yumwedu wawo wa wefusa we munhu yuno?” Hoyogamba, “Ka nghana.” 18 Hambiya, awatumishi na wakulu hawagolosa moto wa makala, kosoko hakuwa na mheho, na hawema wakotela umoto; iPetulo hamwedu nawo, yemile naye yakotela umoto. 19 Mutambiki mukulu hoyomusa Yesu muchanhya ya wefusa wakwe na mafuso gakwe. 20 Yesu, hoyomubidula, “Nilonga ne chilunga chimesomeso, majuwa gose nifusa mumasinagogi na mudihekalu, hawakitang'anyila Wayahudi wose; Silongile chochose kwa chifiso. 21 Nhani ukunyusa niye? Wose awano, awanihulike, hanilonga nawo choni; wamanya hanilonga choni.” 22 Yakalonga nheifo, imutogomi yumonga yemile habehi naye hoyomutowa Yesu kofi na mukono wakwe, yakugamba, “Afo nofoukumubidula kuhani mukulu?” 23 Yesu, hoyomugamba, “Hona nilongile fibi, homelela imbuli ihile; ninga hona nilongile fiswanu, choni cho ukunitowela?” 24 Anasi, baho hoyomutuma yohigwe kwa Kayafa kuhani mukulu. 25 Baho Petulo hakowa yemile yokotela moto. Hawamugamba, “Agweye nagwe nghwi yumwedu wa wefusa wakwe? Hakekana, yagamba Ka nghana!” 26 Yumonga wa watogomi wa kuhani mukulu munduguse wa yuya imunhu yadumuligwe inghutwi na Petulo, hakamusa, “Si hanikona kubusitani hamwedu naye?” 27 Petulo kahi hakakana, chimwande dijogolo hodikwika. 28 Hawamwigala Yesu kulawa kunyumba ya Kayafa mpaka ku Plaitolia. Hayuwa nhosikusiku. Awene awecho howoleka kwingila ku Plaitolia, uleke wanghachafuke, ninga wadahe kudiya Pasaka. 29 Pilato hakalawa kunje kowowile, na kuwagamba, “Mwina mbuli yoni yomukumusongesa imunhu yuno?” 30 Hawamubidula, “Nhanga imunhu yuno yechaka gehile goyagolose, chisowile chikumwigala ukwako.” 31 Pilato hakawagamba, “Mulondeni nyeye muwecho na mumulamule kwa malagiso genu.” Awayahudi hawamugamba, “Siyo nheifo, aseye chichaka udaha ilagiso wa kumukoma munhu.” 32 Aino hayuwa kumemelesa imbuli yoyalongile Yesu konesa yakwenda yafe kwa ifa dyaki. 33 Pilato hakengila ku Plaitolia hakamwinanga Yesu kahi, yamugamba, “Agweye no go Mundewa wa Wayahudi?” 34 Yesu yamubidula, “Simbuli sino ukulonga du agweye go mwecho, ama kwina wamonga wakutamile muchanhya ya niye?” 35 Pilato yabidula, “Ani na Muyahudi? Ditaifa dyako gomwecho na makuhani wakulu nowakwigale ukwangu; kugolosa choni?” 36 Yesu hakabidula, “Undewa wangu si wechilunga chino; nanga undewa wangu wowile we chilunga chino, awatumishi wangu howowa wakunilewelesa na Wayahudi kunihonya ne mikono ya Wayahudi, ninga undewa wangu si wa chilunga chino.” 37 Pilato hakamugamba, “Nong'amba gweye kwa Mundewa?” Yesu yabidula, “Kuilonga aniye na Mundewa.”Kosoko iyo hanyelekigwa na kosoko iyo hanija kuchilunga, kuhomelela iichawelu. “Chila munhu we ichawelu yakuhulikisa dijwi dyangu.” 38 Pilato yamugamba, “I chawelu no choni?” Yakalonge nheifo, hoyoluta kunje ku Wayahudi kahi, na kuwagamba, “Sikona wihi mwi munhu yuno. 39 Ninga musowela fina ugele we Pasaka nimudoholeleni munhu nyumwedu; Togoleni mokwenda mumudoholeni iMundewa wa Wayahudi?” 40 Hawenula majwi gawo, kahi, Siyo yuno, ninga Balaba, Hambiya Balaba hakowa muhiji yakuhija kwa ludole.
1 Kamei Pilato hakamulonda Yesu na kumujola fiboko. 2 Wasilikali hawaluka nghofiya ya miwa, na kumufasa mwiti, hawamufasa nghasu dunghudunghu; 3 na kumwijila, wakugamba, “Bahoni, Mundewa wa Wayahudi! Na kumutowa ne makofi.” 4 Pilato yalawa kunje kahi, na kugamba, “Langeni nikumwigala kunje ukwenu, uleke mumanye fina sonile dyodyose dihile mwi munhu yuno.” 5 Kameyi Yesu hakalawa kunje, yafalile ikofiya ye miwa, na dijoho didunghudunghu. Pilato yawagamba, “Mulangeni imunhu.” 6 Awatambiki na watogomi wakamone, hawajoja wakugamba musambaseni, musambaseni mumusalaba! Pilato yawagamba, “Mulondeni anyeye muwecho mukamusambase mumusalaba, kosoko sikona chochose choyabanile.” 7 Wayahudi hawamugamba, “Aseye china dilagiso, na kwa dilagiso didyo kanogela kufa, kosoko kakigolosa kuwa mwana we Mulungu.” 8 Pilato yakahulike simbuli siso hakagendelela kuwa na itisi lugano; 9 hakengila kahi ku Plaitolia na kumugamba Yesu, “Kulawa hoki gweye?” Ninga Yesu nghamubidule. 10 Kamei Pilato hoyomugamba, “Nghukulonga naniye? Nghukumanya fina nina udaha wa kukulekela na nina udaha kukusambasa?” 11 Yesu yamubidula, Nghowile ukudaha kuwa na udaha muchanhya yangu niye honaga nghwinghigwe kulawa kuchanhya, kosoko iyo ayuya iyanigale niye ukwako kena uwihi mukulu. 12 Mu dino Pilato hoyohananga kumulekela, ninga Wayahudi hawajoja, Unghamulekela imunhu yuno agweye nghwi imbuya na Kaisali; chila munhu yakigolosa Mundewa, yakuwa chinyume na Kaisali. 13 Pilato yakahulike simbuli siso, hakamulafa Yesu kunje, hoyokwikala mudigoda dya ulamusi, ahanhu hakwinangigwa Sakafu ya mawe, Chiebulaniya Gabata. 14 Haduwa dijuwa dya kutandila ge Pasaka; hayuwa kifana saa ya mutandatu nhafi. Hoyowagamba Wayahudi Langeni Mundewa wenu! 15 Hawajoja, Muleuse, muleuse, musambase! Pilato hakawagamba, “Nimutungike mumusalaba iMundewa wenu?” Watambiki wakulu howobidula, “Chechaka Mundewa ninga Kaisali.” 16 Kameyi hoyomulafa ukwawo yatungikigwe mumusalaba. 17 Baho howomulonda Yesu, hoyolawa kunje, yenule umusalaba wakwe imwecho, ku ahanhu hakwinangigwa iguha dya itwi, ahakugambigwa Goligota Chiebulaniya. 18 Baho hawamutundika hamwedu naye wamonga weli, yumwedu chila ulwandi na Yesu hagatigati yawo. 19 Pilato kahi hakandika diwandiko na kudika mumusalaba; dikugamba Yesu wa Nasaleti Mundewa wa Wayahudi. 20 Wengi wa Wayahudi howosoma diwandiko didyo, kosoko ahanhu hoyatungikigwe Yesu hahowe habehi ne ikaya; na hadiwandikwa mu Chiebulaniya, Chilatini, na Chiyunani. 21 Awakulu wawatambiki wa Wayahudi hamugamba Pilato, Unghawandike, Mundewa wa Wayahudi, nanga imunhu yuno kagamba Aniye no ni Mundewa wa Wayahudi. 22 Pilato hakabidula, Goniwandike niwandika. 23 Wasilikali wakamale kumusambasa hawalonda sisuke sakwe howosigawa filungo fine, chimwedu kwa chila musilikali; na dijoho dyakwe. Ninga, dijoho didyo haduwa chaka mushono, ninga dilukigwa kulawa kuchanhya mpaka hasi; 24 Howokigamba, “Chighadidege, ninga chiditowele kula, dyuwe dyani.” Hayuwa nheifo uleke Mawandiko gamemelesigwe, “Hawagawa sisuke sangu mugati yawo, na isuke yangu howoyitowela kula.” 25 Afo nofowagolose wasilikali. Ninga habehi na musalaba hawema ing'ina wa Yesu, ne lumbudye we ing'ina wa Yesu, na Maliamu Magidalena. 26 Yesu yakamone ing'ina, ne mwifusa yuya woyamwendage, kema habehi naye, hoyomugamba ing'ina, Mudala, mulange imwanago. 27 Kamei hoyomulonga ayuya imwifusa, Mulange ing'inako! Kulawa isaa iya imwifusa yuya hoyomulonda ukaya ukwakwe. 28 Hanyuma yakwe Yesu yakamanye fina gose hambiya gahela, hoyolonga (kumemelesa matulumo), “Nikona nghilu.” 29 Dibakuli dimemile siki haduwa baho; howolonda sifongo howoyifabika, mudibali dina siki howoyisomeka mulusito howomwikila kumulomo. 30 Kameyi Yesu yakaihokele isiki yiya, hoyogamba, “Ihela!” Hoyofunama ditwi dyake hoyolafa ichidoga chakwe. 31 Kosoko dyowile ijuwa dya kiyandaa, uleke imitufi inghasigale mumusalaba dijuwa dye sabato (kosoko isabato haduwa ijuwa ikulu lugano), Wayahudi howomufasa Pilato imigulu yawo ibenigwe, na waleusigwe. 32 Wasilikali howokwija, homubena migulu wa kunghonga na yumonga yatungikigwe mumusalaba hamwedu naye; 33 ninga wakeje kwa Yesu hawona fina kafulusa kufa wasabanile migulu yakwe. 34 Ninga yumwedu wa wasilikali hoyomudoma halubafu na mugoha, na chimwande hoilawa sakame na meji. 35 Ayuya iyonile kahomelela, uhomelesi wakwe ni wa chawelu uleke anye nanye muhuwile. 36 Kosoko, simbuli sino sigoloseka uleke mawandiko gamemelesigwe, Kahi diguha dyakwe disikubenigwa. 37 Na kahi diwandiko dimonga dikugamba, “Wakawomulanga imwene wowamudomile.” 38 Gakahele gano Yusufu Alimataya yowile mwifusa wa Yesu, kwa chifiso, kosoko yakogoha Wayahudi hakamutasa Pilato yawulonde umutufi wakwe, Pilato hakafumila. Kwa nheifo hakakwija na kuulonda na kuuleusa umutufi wa Yesu. 39 Nikodemo naye, ayuya yejile kwa Yesu nechilo, hoyokwija kegala muhanganiso wa manemane na wudi kifana latili igana dimwedu nhafi. 40 Howoulonda umutufi wa Yesu, na kumoa musanda ye suke nyelu ya bafuta na manukato fina Wayahudi fowasowele mumasiko gawo. 41 Ahanhu haya hoyatungikigwe mumusalaba hahowa na busitani, na mubusitani iyo chilalo chisha chisinati chikigwe mutufi wa munhu wowose 42 Kosoko ya dijuwa dya Wayahudi dya kiyandaa na kosoko ichilalo chiya chowile habehi, howomusika Yesu umo.
1 Dijuwa dye inghonga dye dijuma, Maliamu Magidalena yekilawa kuluta chilalo, ugele kukali malisalisa, hoyokona fina diwe difingilisigwa kulawa muchilalo. 2 Hakabilima na kuluta kwa Simoni Petulo, mwifusa yuya yumonga, yendigwe na Yesu, yawagamba, “Wamuleusa Mundewa muchilalo na chisimanyile wamwika hoki.” 3 Baho Petulo hoyolawa hamwedu na yuya mwifusa yumonga, howoluta kuchilalo. 4 Wabilima wose weli, ninga imwifusa yumonga hoyomujumha Petulo hoyokonga kufika kuchilalo; 5 hoyofunamana kusungilila kugati, hoyokona sisuke se bafuta sowile ukuya kugati, ninga nghengile kugati. 6 Kameyi Simoni Petulo keja yakumwandamila, hoyokwingila kuchilalo, hoyokona sisuke siya se bafuta suwile baho hasi, 7 ne chitambala chohigwe kwitwi nacho chabaho, fisunhile hamwedu na sisuke ichene cheimwene chikunjigwa. 8 Noho ayuya imwifusa yumonga, yakongile kufika hachilalo, naye hoyokwingila, hoyokona na kuhuwila; 9 kosoko hawowa wasinhati wamanye amawandiko, fina imwagila yenuke kulawa kuwafile. 10 Kameyi nowefusa wakwe howoleuka howoluta kusikaya sawo. 11 Maliamu hakema hanje ye chilalo yekulila, foyalilage yafunamana kulanga hasi ye chilalo; 12 Hoyokona Malaika weli wena suke njelu; wekala howekigwe umutufi wa Yesu, yumonga ulwandi lwa kumatwi, yumonga ulwandi lwa kumigulu. 13 Hawamugamba, “Gomwanamuke nhani ukulila?” Naye hakawagamba; Kosoko wamuleusa Mundewa wangu, simanyile wamwika hoki. 14 Yakalonge nheifo, yabiduka na kumona Yesu yemile, ninga nghamanyile fina ni Yesu. 15 Yesu yamugamba, “Gomwanamuke ukulilila choni? Ukumuhananga nani?” Hakamanya nhagela nomwimilisi wa busitani, yamugamba, “Mukulu, honaga umuleuse nitamile koumwikile, nikudaha kumulonda na kumuleusa.” 16 Yesu hoyomugamba, “Maliamu!” Hakabiduka na kumugamba kwa Chiebulaniya “Laboni!” nong'amba, “Mwalimu.” 17 Yesu hoyomugamba, “Unghanikole, kosoko sinati nikwile kwa Babangu; ninga luta kawatamile wandugu sangu uwagambe nhafi, nikukwila kwe Babangu, na Baba yenu, kwe Mulungu wangu na Mulungu wenu.” 18 Maliamu Magidalena hoyoluta na kuwatamila awefusa Nimona Mundewa, na kuwatamila fina kalonga simbuli ukwakwe. 19 Chigele cha hegulo dijuwa didiya, dijuwa dye inghonga dye dijuma, imilango yose ihindigwe ahanhu howowile awefusa wakwe, kosoko ya kogoha Wayahudi, Yesu hakeja na kwima muchiligati yawo na kugamba, “Digaya dyuwe ukwenu.” 20 Yakamale kulonga nhaifo, na kuwonesa imikono yakwe na lubafu lwakwe. Kameyi awefusa howosekelela wakamone Mundewa. 21 Yesu hoyowagamba kahi, Digoya dyuwe hamwedu nanye. Fina Baba foyenitumile niye, aniye nani nikumutumani nyeye. 22 Yakamale kulonga nheifo, hakawakehela, na kugamba, “Hokeleni Muhe Musunhile. 23 Munghawalekelela wanhu uwihi wawo, wakuwa walekeleligwe.” 24 Hambiya, Tomaso wa awaya ikumi na weli, iyakwinangwa Ipasa, hakowa hechaka Yesu foyejile. 25 Kameyi awayagwe howomutamila, Chimona Mundewa, Ninga mwene hoyogamba, “Ninghaleka kona mumiko yakwe singhofu se misumali, na kukwafa ne fidole fyangu isinghofu se misumi, na kwalabata no mukono wangu ulubafu lwakwe, sikwenda nihuwile ng'oo.” 26 Gakaloke majuwa munane, awefusa wakwe hawowa kahi munyuma, Tomasi naye hakowa hamwedu nawo. Milango hayuwa ihindigwe, ninga Yesu hakeja na kwima muchiligati yawo, hoyogamba, “Digoya dyuwe hamwedu nanye.” 27 Hoyomugamba Tomaso, Guma ichidole chako hano, ulange imikono yangu; na golola umukono wako, walabate ulubafu lwangu, unghowe munhu yechaka dihuwi, ninga iyakuhuwila. 28 Tomasi hakabidula, Mundewa wangu na Mulungu wangu! 29 Yesu hakamugamba, “Kuhuwila kosoko kunyona niye? Ibeka awaya awasonile ninga wakuhuwila.” 30 Yesu hakagolosa majumo mengi kumwande ya wefusa wakwe, agene gasuwile muchitabu chino; 31 ninga agano gawandikwa uleke muhuwile fina iYesu no Kilisito, iMwana we Mulungu, fina kwa kuhuwila muwe na uwumi wa majuwa gose umwakwe.
1 Gakaloke majuwa makefu hakakiyonesa kahi kuwefusa wakwe habahali ya Tibelia; hoyokiyonesa nhafi. 2 Simoni Petulo, Tomasi yekwinangigwa Ipasa, Natanaeli wa Kana ya Galilaya, awana wa Sebedayo, na wamonga wadatu wa wefusa wakwe hawowa hamwedu. 3 Simoni Petulo yawagamba, “Aniye nikuluta kulowa somba.” Hawamugamba, “Chikulutanya,” hawengila mungalawa; ninga ichilo chicho wasapatile somba ng'oo. 4 Fokwakongile kucha, Yesu hakema munghingi, awefusa wasatangile fina hakowa Yesu. 5 Yesu yawagamba, “Mowana mwina somba sosose? ” Hawamubidula, hawagamba, “Ka!” 6 Hoyowagamba, “Kubiteni ulwafu ulwandi lwa kulume lwe ngalawa mukwenda musipate.” Baho howoukubita, kameyi lo hawasumigwa kuukwega, kosoko ya uwingi wa sisomba. 7 Imwifusa yuya iyendigwe na Yesu yamugamba Petulo, No Mundewa! Petulo yakahulike fina no Mundewa, hakafala sisuke sakwe, kosoko hakowa yasihambule ugele yakugolosa milimo, hakajumha kumeji. 8 Ninga awefusa wamonga howokwija ne ngalawa, wakukwega ulwafu lumemile sisomba, kosoko hasowile hatali kulawa kunghingi kifana nghanyo imwedu kulawa kunghingi. 9 Wakalawe kunje ya meji, howokona moto wa makala baho, muchanhya yakwe mwina somba, na mukate, 10 Yesu hoyowagamba, “Leleni sisomba simonga somulowile lulu baha.” 11 Kosoko iyo Simoni Petulo hoyoluta kungalawa na kulukwega ulwafu kunghingi lumemile sisomba singhulu igana dimwedu makumi mashano na ndatu; kahi uwingi wose ninga ulwafu lusadegeke. 12 Yesu yawagamba, “Mwije mudiye chisinhuka nguluule.” Hechaka kahi mwifusa wowose yagesile kumusa No nani gweye? Hawamanya no Mundewa. 13 Yesu yeja na kulonda umukate hoyowengha, na sisomba naso nheifiya. 14 Auno hauwa ugele wa kadatu wa Yesu kiyonesa kuwefusa wakwe yakafuluse kwinuka kulawa kuwafile. 15 Wakamale kudiya chakudiya cha nhosikusiku, Yesu hoyomugamba Simoni Petulo, “Simoni mwana wa Yohana, agwe ukunyenda kusuma wano?” Hoyomugamba, “Heye, Mundewa, kumanya fina nikukwenda.” Yesu hoyomugamba, “Ufinghe chakudiya ifikolo fyangu.” 16 Lwakeli kahi hoyomulonga, “Simoni mwana wa Yohana, ukunyenda?” Hoyogamba, “Heye, Mundewa, kumanya fina nikukwenda.” Yesu hoyomugamba, “Dima singholo sangu.” 17 Hoyomulonga kahi lwakadatu, “Simoni, mwana wa Yohana, ukunyenda?” Petulo hakona usungu kosoko yalongile naye lwakadatu, “Ukunyenda?” Na hoyomugamba, “Mundewa, kumanya fina nikukwenda!” Yesu homugamba, “Usinghe singholo sangu chakudiya. 18 Chawelu, chawelu, nikukutamilani fowowile mujelelo, wende ukiyoha gomwecho na kuluta koukuhananga; ninga foukuwa musehe, ukwenda ugolole imikono yako na munhu yungi kohutasa na kulongosa uhunhu ko nghukwenda kuluta.” 19 (Hakalonga nheifo konesa ni kwa difa dya nhani doyakayomutunyila Mulungu.) Sikahele siso hoyomugamba, “Nyandamile!” 20 Petulo hoyobidula hoyomona imwifusa yumonga yakuwandamila, ayuya iyendigwe na Yesu, iyegamile muchifa chakwe ugele we chakudiya na yagambile, Mundewa no nani yakukusongesa? 21 Petulo yakamone hoyomulonga Yesu Mundewa yanhani imunhu yuno naye? 22 Yesu yamugamba, “Nghona nikwenda yekale mpaka ugele wonikuya inachoni ukwako? Nyandamile!” 23 Inonga hayenela kuwandugu fina imwifusa yuno nghakufa, ninga Yesu nghalongile nheifo ukwakwe fina nghakufa, ninga, Honaga nikwenda ayuno yakale mpaka nuye ina choni ukwako? 24 Ayono no mwifusa yakuhomelela simbuli sino; na chimanya fina uhomelesi wakwe ni chawelu. Kumalagisa 25 Ninga kwina mbuli nyingi soyagolose Yesu, kusigwa sose sandikigwe, hata Ichilunga chose sichowile chikudaha kwika ifitabu fyose fitulumwe.
1 Ichitabu achiya che inghonga hanichiandika Teofilo simbuli sose soyagolose na kufusa Yesu kulawa kunghonga ye milimo yakwe 2 hata dijuwa diya dyoyenuligwe kuluta kulanga. Ugele nghenati yenuligwe kuluta kulanga hakawalekela misigililo kwa njila ya Muhe Musunhile, awaya awatumigwa wakwe woyawasagule. 3 Ukwawo hakakionesa imwenyecho yemumi foyamalile amagayo gakwe kwa uhomelesi mwingi, hoyokiyonesa ukwawo kwa majuwa makumi mane na kulonga simbuli se undewa wa kulanga. 4 Fowowile hamwedu hakawalagisa nhafi: Munghaleuke Yelusalemu ninga mugojele achiya choyawahuwise iBaba “ichene, choyalongile”, chomuhulike kulawa ukwangu; 5 Kosoko Yohana hakabatisa kwa meji, ninga nyeye fogakuloka majuwa makefu, anyeye mukubatisigwa kwa Muhe Musunhile. 6 Awefusa, wakakitanganyile na Yesu howomusa, “Togola Mundewa ugele uno noho ukuuwisa undewa ku Isilaeli?” 7 Hakawagamba simulimo wenu kumanya, ugele hegu chipisi chikigwe na Baba kwa udaha wakwe imwenyecho, 8 Ninga mohokela ludole foyakumwijilani Muhe Musunhile muchanhya yenu nanye mokuwa wahomelesi wangu ahano Yelusalemu, Muyahudi yose na Samaliya mpaka kundumo ye chilunga. 9 Yakamale kulonga nheifo, fowagendelelage kulanga hakenuligwa kuluta kulanga na difunde hodimulonda mumeso gawo 10 Na foyakwilage kulanga hawakumhula meso gawo kulanga chimwande wanhu weli wafalile suke njelu howokwima habehi nawo 11 howogamba, “Anye Muwagalilaya, nhani mwimile ho mukulanga kuchanhya? Yesu yuno, iyalondigwe kulawa ukwenu kuluta kulanga, yakayokwija nheifo fomumonile yakuluta kulanga.” 12 Kamei hawoya Yelusalemu kulawa kwitunda dye miseituni idihabehi na Yelusalemu chitambo cha nghanyo igana nhafi; 13 wakengile mwikaya hawaluta kuchibuha cha kuchanya, mowekalage Petulo, Yohana, Yakobo, Andelea, Filipo na Tomaso Batolomayo na Matayo, Yakobo imwana wa Alifayo, Simoni Selote na Yuda imwana wa Yakobo. 14 Wose wano hawagendelela hamwedu kutasa, hamwedu na wanawake, na Maliamu ing'ina wa Yesu, na wanduguse. 15 Mumajuwa gago, Petulo hoyokwima muchiligati ya awandugu (wose hamwedu hawafika wanhu igana dimwedu na makumi meli), hoyogamba, 16 “Wandugu sangu ditulumo hayagila dimemelisigwe, idilongigwe ne Muhe Musunhile, kwa simbuli sa Daudi, hakalonga muchanhya ya Yuda iyawalongose awaya awejile kumukola Yesu; 17 Yuda hakowa yumwedu wetu, kosoko hakasaguligwa yowe hamwedu nase mu mulimo wetu.” 18 (Hambiya imunhu yuno hakagula umugunda na mapesa gaya goyapatile kulawa munhenda yakwe ihile, hoyokugwa hasi, na kutulika utumbu wakwe wose houlawa kunje. 19 Chila munhu mu Yelusalemu hoyohulika imbuli kwa nonga yakwe howowinanga umugunda uya Hakelidama no ng'amba, “Mugunda wa Sakame.”) 20 “Iwandikigwa mu chitabu cha Sabuli: ‘Uwikalo wakwe usigale mahame; Munhu wowose yanghekale umo.’ Kahi iwandikigwa, ‘Munhu yungi yalonde ahanhu hakwe haugolosaji.’ 21 Kamei yumwedu wa wanhu awendewochandamila muugele wose iMundewa Yesu woyendeyokwingila na kulawa mugati yetu, 22 kukogela muubatiso wa Yohana mpaka mwijuwa dyoyalondigwe kulawa ukwetu kuluta kuchanhya yumwedu wa wanhu wawo yowe hamwedu na seye, muhomelesi wo kwinuka kwakwe.” 23 Baho howotambula masina ga wanhu weli wa kunghonga Yusufu iyakwinangwa Balisaba disina dyakwe dya keli Yusto, na Matiya. 24 Kamei, hawatasa, wakugamba, “Mundewa, gowumanyile imimoyo ya wanhu wose, chonese no yehoki woumusagule mu wano aweli, 25 uleke yalonde ahanhu ho umulimo na utumigwa hoyaleke Yuda na kuluta kunhu kwakwe imwenyecho.” 26 Howotowa kula; ikula na kumugwila Matiya naye hoyokongesigwa kulafigwa hamwedu na awaya ikumi na imwedu.
1 Dijuwa dye Pendekosite fodiyifikile, wose hawowa wakilundile hanhu hamwedu. 2 Kamei chimwande hoihulikika kifana mheho ya ludole kulawa kulanga na kumemela munyumba yose yowowekale 3 Kamei hagoneka kumeso gawo malilimba go moto gakigawile, na kumwikalila chila munhu. 4 Wose howomemesigwa Muhe Musunhile, howokonga kulonga kwa nonga ingi, ifyene iMuhe foyawenghile udaha wokulonga. 5 Kamei hahowa na Wayahudi wakwikala Yelusalemu wanhu wena chogoho kwe Mulungu kulawa chila itaifa hasi ya ulanga. 6 Dijwi didyo fodyahulikwe matewa howokitang'anyila, howokwingila itisi, kosoko chila munhu hakawahulika wakulonga mu nonga yakwe imwecho. 7 Howokisina na kujuma wakugamba, “Awa wose wochikuhulika wakulonga nheifino si Wagalilaya? 8 Ya nhani, hambiya, chila yumwedu wetu yakuwahulika wakulonga kunonga yakwe imwecho? 9 Wamonga wetu ni Wapalitiya, Wamedi na Waelamu; wamonga wakaya wa Mesopotamiya, Uyahudi, Kapadokia, Pondo na Asiya, 10 Filigiya na Pamufiliya, Misili na ulwandi lwa Libiya habehi na Kilene; Wamonga wetu ni wageni kulawa Loma. 11 Wayahudi na wanhu wabidukile idini ye Chiyahudi na wamonga walawa Kilete na Alabiya ase chose chikuwahulika wakulonga ku nonga setu chiwecho mbuli ghulu sa Mulungu.” 12 Wose howokisina na kogoha, ukuno wakiyusa, “Ayi nayo yoni?” 13 Ninga awamonga hawogelela wakugamba, “Awanhu wano wonywa difai nyisha.” 14 Ninga Petulo hoyokwima hamwedu na waya ikumi na yumwedu, hoyokwinula dijwi dyakwe hoyokonga kulonga: “Wandugu sangu Wayahudi, na nyeye mose mukwikala hano Yelusalemu; munitegelese fonikulonga simbuli sangu. 15 Awanhu wano wasilewile, fina fomukudoga, kosoko digaluka isaa dya kadatu du dye dijuwa; 16 ichawelu ni kugamba imbuli ino no iya yoyalongile imugonesi Yoeli: 17 ‘Mumajuwa go kundumo, yakulonga iMundewa, nikuwetilila awanhu wose Muhe wangu. Awana wenu we chigosi na we chike wakwenda walafe ugonesi, na wajelelo wenu wokona magubulo na wasehe wenu walota njosi. 18 Heye, na awatogomi wana we chigosi na we chike nokuwetilila Muhe wangu majuwa gago nawo wakwenda walafe ugonesi. 19 Nogolosa majumo kwichanhya mulanga na chitangilo hasi muchilunga, Kukuwa na sakame, moto na mosi musito; 20 dijuwa dyokugumigwa chisa, umwesi ukuwa mudunghu kifana sakame, ugele disinati difike, adiya dijuwa dikulu dye ditunyo dye Mundewa. 21 Baho, wowose iyakwinanga kwe disina dye Mundewa, yakuhonyigwa.’ 22 “Anye Waislaeli mutegelese simbuli sino! Yesu wa Nasaleti, imunhu imwene udaha wakwe we chilungu hawoneka ukwenu kwa njila ya majumo, gokwisina na ifitangilo foyagolose Mulungu mugati yenu kwa njila yakwe fina fomumanyile. 23 Imunhu yuno hakalafigwa kwandamila iMulungu imwecho foyadumula mbuli kulawakatali, na kwa kumanya kwakwe, kuwa Yesu kogumigwa kumikono yenu nanye homumuguma mumiko ya wanhu wihile howomutungika na kumukoma 24 imwene, Mulungu kamwinula kulawa mudifa, hoyoudohola, usungu we difa, isadahile yakoligwe nawo. 25 Kosoko iDaudi yakutambula simbuli soko ye imwene, Hanimona iMundewa kumwande yangu majuwa gose, kosoko kowa ulwandi iwo mukono wangu wo kulume ninghasingisike. 26 Kosoko iyo umoyo wangu houkwendeswa dilimi dyangu hodisekelela; kamei umutufu wangu haukwikala mudihuwi. 27 Kosoko nghukuchileka ichidoga changu kusimu, nghukumulafa imusunhile wako yone kukubanika. 28 Kunyonesa injila ya uwumi kuwakwako hamwedu naniye kanimemesa chinyemi. 29 “Wandugu sangu nikumutamilani muchawelu ku iBaba yetu Daudi. Yejayafa, hoyosikigwa, na ichilalo chakwe chabahano ahetu mpaka diyelo nhafi. 30 Ninga kosoko Daudi yowile mugonesi, hakamanya kuwa Mulungu hakimulahila fina yakwenda yumwedu we cheleko chakwe kuwa Mundewa ahanhu hakwe. 31 Daudi hakona katali Mulungu cho yakwenda yagolose kosoko iyo hoyolonga muchanhya ya kwinuka mwichilalo kwa Kilisito, ugele foyagambile: Nghalekigwe kusimu, umutufi wakwe usadodile. 32 Mulungu hakamwinula muchilalo yuyo Yesu ase chose cha wahomelesi we imbuli yo. 33 Yesu yakafuluse kwinuligwa na kwikigwa na Mulungu ulwandi lwakwe lwo kulume, hoyohokela kulawa kwa Baba ayuya Muhe Musunhile, imwene woyachihuwise, kachitilila yuyo Muhe, acho nocho mukona hambiya na kuhulika. 34 Kosoko Daudi mwecho, ghakwilile mpaka kulanga; ninga imwene hakagamba: ‘Mundewa hakamulonga Mundewa, Ikala ulwandi lwo kulume kwangu 35 mpaka niwagolose awanghondo wako wowe hasi ya migulu yako.’ 36 Wanhu wose wa nyumba ya Isilaeli inogela wamanye kwa chawelu ayo Yesu womwamutungike, no yuyo, Mulungu woyamugolose fina Mundewa na Kilisito.” 37 Wakahulike simbuli siso howotamigwa mumoyo yawo, howomusa Petulo na waya awatumigwa wamonga, “Aho chitende nhani wandugu setu?” 38 Petulo hoyobidula, “Mulambe na chila munhu yumwe yumwe yabatisigwe mu disina dya Yesu Kilisito, uleke muleusiligwe uwihi wenu na kuhokela ichinghwa che Muhe Musunhile. 39 Kosoko dihuwiso dino hadyuwa kosoko yenu na kosoko ya wana wenu kosoko ya wose wowile kutali na kosoko ya chila munhu imwene Mundewa Mulungu wetu yakumwinanga ukwakwe.” 40 Na kwa mbuli nyingi du Petulo hoyolonga kwa ludole na kuwasongesa wanhu yakugamba, “Mukihonye ne cheleko chino cha uwihi.” 41 Wengi howosifumila simbuli sakwe, howobatisigwa. Awanhu wafikile figulu fidatu howokongeseka muchitewa chiya dijuwa dyo. 42 Awa wose howogendelela kifusa kulawa kuwatumigwa, kwikala hamwedu chindugu, kumega mukate na kutasa. 43 Chila munhu hakengiligwa itisi, kosoko ya fitangilo na majumo mengi gagoloseke na watumigwa. 44 Na wose wahuwile hawowa hamwedu na kuwa ne finhu fyose muhangi. 45 Howokwambasa isimali sawo ne finu fyawo kamei howogawa ifesa kwandamila chila munhu foyakuhanga. 46 Na chila ijuwa hawagendelela kitang'anyila mwihekalu kwa moyo umwedu na mega umukate musinyumba sawo, wakudiya chakudiya chawo kwa chinyemi na kwa moyo mujelu, 47 howomutogola Mulungu, howokwendigwa na wanhu wose. Chila ijuwa iMundewa hoyokongesa dikanisa kwa waya awendile kuhonyigwa.
1 Dijuwa dimonga wugele we saa ya dikenda ya nhemisi, Petulo na Yohana wendewoluta kwihekalu, ichigele cho kufuga. 2 Ugele wuwo awanhu hawamwinula munhu imwene nghenati yagende kulawa kwelekigwa kwakwe. Awanhu wawo wendewomwinula na kumwika hamulango ukwinangigwa, “Mulango Muswanu,” uleke yatase chokwinghwa na awaya awakwingila kwihekalu. 3 Yakawone Petulo na Yohana wakowe wakwingila mwihekalu, hoyowatasa wamwinghe chinhu chochose chiya. 4 Howomukumhulila meso, kamei, Petulo hoyogamba, “Chilange seye!” 5 Kamei hoyowalanga yakuhuwila kuhokela chinhu kulawa ukwawo. 6 Ninga Petulo hoyomugamba, “Nachaka mapesa hegu sahabu, ninga nikukwingha choninacho: Mwisina dya Yesu wa Nasaleti nikukugamba winuke na kugenda!” 7 Kamei hoyomukola umukono wokulume hoyomutasa kwinuka. Chimwande imugulu yakwe na simwegele sakwe hosikuwa na ludole; 8 hoyojumha, na kwima kwa mimigulu yakwe, hoyokonga kugenda yakusunguluta. Kamei hoyokwingila mwihekalu hamwedu nawo, yakugenda na kujumha na kumutunya Mulungu. 9 Awanhu baho howomwona yakugenda na kumutunya Mulungu, 10 wakamutange fina no yuya imutasaji yekalage ha Mulango Muswanu, wose howokisina lugano ku chinhu chigoloseke ukwakwe. 11 Ugele foyendeyowandamila Petulo na Yohana, wanhu wose howokikonghola howobilima kudikumbo idikwinangwa Dikumbo dya Sulemani. Wakisina lugano. 12 Kamei Petulo yakone nheifo hoyowabidula awanhu waya, Anyeye Waislael, nhani mukuching'olela meso aseye, kifana aseye chimugolosa ayuno yagende kwa udaha wetu seye? 13 Mulungu wa Ibulahimu na wa Isaka na wa Yakobo, wa waBaba setu, kumutunya imutumishi wakwe Yesu imwene anyeye hamumutungika na kumukana kumwande ya Pilato, ugele foyalafile ulamusi wakwe fina yadoholeligwe. 14 Ninga anyeye homumukana ayuya Imusunhile, ayuya Imuswamu; homuhananga mwinghigwe imukomaji; 15 Homumukoma ayuya imukulu wa uwumi, imwene yenuligwe na Mulungu kulawa mu wafile; na seye na chiwahomelesi wakwe 16 ku disina dyakwe, kwa kudihuwila disina dyakwe, dimugolosa imunhu ayuno wo mukumona womumumanyile, na kwa dihuwi didyo duwile umwakwe imwene, dimwingha ayuno uwumi umemelekele kumwande ya meso genu anyeye mose. 17 Ninga hambiya wandugusangu, nimanya fina hamugolosa nheifo kosoko musamanyile fina na wakulu wenu fowatendile. 18 Ninga agaya iMulungu goyalongile kulawa katali kwa milomo ya wagonesi wakwe wose, fina Kilisito yakwija yadumangisigwa kagamemelesa naifo. 19 Hambiya, mulambe na kumubiduchila Mulungu, uleke uwihi wenu uleusigwe, wije ugele wo kuhola mufidoga, 20 kulawa kwa Mundewa, yekumutuma Kilisito Yesu womwikiligwe kulawa katali; 21 imwene hayagila kuhokeligwa kulanga na kuwa uko mpaka ifinhu fyose fogolosigwe usha fina foyalongile Mulungu kwi milomo ya wagonesi wakwe kulawa katali. 22 Kosoko Musa hakagamba Mundewa iMulungu wenu yakumwigalilani mugonesi, fina foyanigale niye, naye yakuwa yumwedu wa wanhu awenu muwecho: Iwagila mwandamile chila choyakulonga mugolose. 23 Imunhu wowose inghakumuhulikisa foyakulonga yakubaguligwa na wanhu wa Mulungu na kubanigwa. 24 Awagonesi wose, kukongela Samweli na waya wamwandamile hawalonga simbuli sino isene sikugoloseka majuwa gano. 25 Amahuwiso kwa njila ya wagonesi ni kosoko yenu, na mukuhangila dilagano iMulungu dyoyagolose na wakuku senu, fina foyamutamila Ibulahimu. Kunjila ye cheleko chako, ifyeleko fyose fye chilunga fyomotesigwa. 26 iMulungu kamwinula kulawa mudifa imutogomi wakwe, mbuli swanu kosoko yenu, kunghonga, hoyomutuma yamwigalile imboto kwa kumugolosa chila yumwedu wenu yabiduke kulawa kuwihi
1 Petulo na Yohana fowalongage na wanhu, watambiki ne chilongosi we dihekalu na Masadukayo hawawejila, 2 wadeseke kosoko wendewowafusa wanhu na kuhubili fina mu Yesu awafile wakwija wokwinuligwa kulawa mu difa. 3 Howowakola, howowaguma mwigelesa mpaka nhosiku yakwe nhosikusiku, kosoko hauwa ugele wa hegulo. 4 Ninga wengi mu waya awahulike iyo imbuli howohuwila; mu wawo wahuwile wakudaha kuwa figulu fishano. 5 Nhosiku yakwe, wakulu na wasehe na watulumi howokitang'anyila Yelusalemu, 6 hamwedu na Mutambiki Mukulu Anasi na Kayafa, na Yohana na Isikanda, na wose wose waya awene howawa wo lukolo lwa kuhani Mukulu. 7 Kamei hawaweka hagati yawo, na kuwosahowowosa Kwa ludole lwaki ama kwa isina dyake mugolosa dino? 8 Kamei Petulo yakameme Muhe Musunhile, hoyowagamba Anyeye Filongosi na wasehe wa wanhu: 9 Hona chikusigwa diyelo mu ichitendo ichiswamu choyagoloseligwe ayuya ichiwete yahonyigwe na kuwa mumi, 10 imanyike ukwenu nyeye wose, na kwa wanhu wose wa Isilaelii, fina imunhu yuno kama kumwande yenu diyelo, mumi, telele, kwa udaha wa disina dya Yesu wa Nasaleti imwene anyeye hamumutungika, ninga Mulungu kamwinula kulawa mudifa. 11 Ayuno no yakulongigwa na Matulumo Masunhile fina Isumbi yomulemile nyeye mukujenga, hambiya igaluka sumbi nghulu ye nghindiso. 12 Kwachaka uhonya kwa yeyose yuya, kosoko kwachaka isina dyodyose hasi ya ulanga, dyowenghigwe awanhu dikuchagila kuhonyigwa nadyo aseye. 13 Wakone ing'inyo ya Petulo na Yohana na kumanya fina hawowa wanhu wachaka chisomo, howomanya fina hawowa na Yesu. 14 Ninga wakamwone yuya imunhu yahonyigwe kema hamwedu nawo howoswela mbuli ya kulonga 15 baho, howowagamba walawe kunje ya ibalasa, awene howosigala kugati wakusimulila kwa Chifiso. 16 Howokiyusa Chitende nhani na awanhu wano? Kosoko ijumo ikulu digolosigwa kwa njila yawo na dimanyikana na wanhu wose wa Yelusalemu, chisikudaha kuikana imbuli ino. 17 Ninga uleke imbuli ino inghagendelele kwenela kuwanhu, chiwagambe wanghalonge na munhu wowose kudisina dya Yesu. 18 Howowenanga kahi kugati howowelagisa wanghalonge kahi kahiwanghafuse wanhu kwa disina dya Yesu. 19 Ninga Petulo na Yohana howowabidula, Mulamule anyeye muwecho, hona ni fiswamu kumwande ya Mulungu kuwahulikisa anyeye kusuma Mulungu. 20 Kosoko chisikudaha kuleka kulonga simbuli so chonile na kuhulika. 21 Kamei wakawagume chogoho na kuwagombela, howowalekelela. Howolemeligwa kuwatenda chinhu kosoko awanhu wose wendewomutunya Mulungu kosoko ya didyo dya goloseke. 22 Imunhu yuyo yagoloseligwe dijumo didyo dyokuhonyigwa hakowa mukulu mugima yena minyaka kujumha makumi mane. 23 Chimwande, fowalekeligwe, Petulo na Yohana howokuya kuwayawo, howowatamila agaya gowalongigwe na watambiki wakulu na wasehe. 24 Wakahulike simbuli so, Howomwinulila Mulungu majwi gawo kwa moyo umwedu, wakugamba, “Mundewa Mukulu, agweye no Mulungu wumbile ulanga ne iisi, ne bahali na fyose fuwile umo; 25 nagwe hakulonga kwa mulomo we mutogomi wako Baba yetu Daudi, kwa udaha wa Muhe Musunhile: ‘Nhani awamembe wakugolosa ukali Na makabila gakudoga hechaka chinhu? 26 Na wandewa we chilunga wakiika fiswanu, uleke wamuleme Mundewa na Masiha wakwe.’ 27 “Kosoko chawelu nofyo Helode, Pontio Pilato, na wanhu wa Isilaeli na wanhu wa wamembe fowakitang'anyile bahano mukaya iino, kumulema imutogomi wako musunhile Yesu, imwene wowamugumile mafuta, 28 uleke wagolose gose agene umukono wako na kwenda kwako kulawa hatali hakuhananga gagoloseke. 29 Hambiya, Mundewa ulange kogohesa kwawo, uwenghe awatumwa wako kuilonga imbuli yako kwa ludole; 30 golola umukono wako kuhonya, fitangilo na majumo gagoloseke ku disina dya Mutumishi wako musunhile Yesu.” 31 Wakamale kumutasa Mulungu, ahanhu haya howakitang'anyile hohosingisika wose howomemesigwa na Muhe Musunhile, howolonga imbuli ya Mulungu kwa ludole. 32 Na awanhu awahuwile hawowa na moyo umwedu na chidoga chimwedu; hachaka munhu wowose yagambile fina ichinhu chochose cho yenacho ni mali yakwe imwecho; ninga hawowa ne finhu fyose muhangi; 33 awatumigwa howolafa uhomelesi wa kwinuka kwakwe Yesu kulafa mudifa kwa ludole lukulu, na dihewa ikulu hadyuwa hamwedu nawo wose. 34 Kusowile na munhu mugati yawo yowile kachaka chinhu choyakuhanga, kosoko awanhu wose wowile na fiwanja ama nyumba wawafyambasa, howokwigala diyombe dye finhu fiya fyo fyaguligwe, 35 howofika hamigulu ya watumigwa; chila munhu hoyogawiligwa fina foyakuhanga. 36 Na Yusufu iyenangigwe na watumigwa Balinaba (nong'amba: Mwana wa usindamafu, “Mulawi, nghonga yakwe ni munhu wa kupono”). 37 Hokowa na mugunda houguligwa, hoyokwigala ifesa yose, hoyoika hamigulu ya watumigwa.
1 Ninga munhu yumonga hamwedu ne muke Safila howousa umugunda. 2 Hoyofisa isehemu ye fesa ilawile mumugunda kwa chifiso, imuke naye hakamanya, hayokwika sehemu ndodogi na kwiigala hamigulu ya watumigwa. 3 Petulo hogamba, “Anania nhani Ishetani yamemese umoyo wako, kumutamila udasi Muhe Musunhile? Na kufisa isehemu ya imali ilawile mumugunda? 4 Fowowile ukwako usowile wako? Na chikamale kuguligwa imali yakwe isowile mu udaha wako? Hayuwa yuwa nhani noho wike imbuli iino muchidoga chako? Nghumudanhilise munhu, ninga Mulungu.” 5 Anania yakahulike simbuli sino hoyokugwa hasi, hoyokufa. Chogoho chikulu hochiwapata awanhu wose awahulike simbuli sino. 6 Awanike howoleuka, howomuguma mu sisanda howeja musika. 7 Chipisi cha saa ndatu hanyuma yakwe, imuke naye hoyokwingila, na hamanyile dyodyose muchanhya ya simbuli silokile. 8 Petulo hoyomubidula yakumugamba, “Nitamile, hamuusa umugunda kwa diliho didyo?” Hoyogamba, “Heye, kwa diliho didyo.” 9 Hayuwa nhani mulagane kumugesa Muhe Musunhile we Mundewa? Langa, imugulu yawo wamusikile imugosi wako yuwa hamulango, nawo wakwenda wakulonde agwe nagwe. 10 Chimwande hoyokugwa hamigulu yakwe hoyokufa. Awaya awanike howokwingila howomufika yafile, howomulafa kunje, howomusika hamwedu na mulume. 11 Chogoho chikulu hochiwengila, dikanisa dyose na wanhu wose awahulike simbuli siya. 12 Kwa mikono ya Watumigwa hogogoloseka mengi ga majumo na kisina muchiligati cha wanhu. Awahuwile hawekala hamwedu mwikumbo dya Sulemani. 13 Hechaka munhu yungi wowose imwene inghahuwile yadahile kihasa nawo, ninga awaya du awawatunyage. 14 Kamei awamuhuwile iMundewa wagosi kwa wanawake hawongeseka lugano. 15 Kamei hawawenula awatamu hata awoile musikaya, kamei na kuwagonesa musinghingo na mumikeka, uleke dinyefu dya Petulo diwogwile awamonga ichigele foyalokage. 16 Na wanhu wa sikaya sa munghanda ya Yelusalemu howokikonghola, wakwigala watamu, na wendewokwidasigwa na simhepo sihile na wose howohonyigwa. 17 Kamei Imutambiki mukulu na wose wowile hamwedu naye, (awo no wamasehebu ga Mafalisayo), wamema wifu. 18 Howowakola watumigwa howowaguma imwigelesa. 19 Ninga imusungula we Mundewa hoyokumula umulango wa digelesa nechilo, hoyowalafa, hoyogamba, 20 “Luteni mukeme mwi hakalu na kuwatamila awanhu si mbuli sa uumi uno.” 21 Nawo wakahulike howoluta nhosikusiku kwihekalu, howokonga kufusa. Hoyokwija Ikuhani Mukulu na waya wowile hamwedu naye, howowakusanya awanhu wa dibalasa, na wasehe wose wa Isilaeli, howotuma wanhu kwigelesa wakawalonde. 22 Ninga awatogomi waya fowafikile wasawonile kwigelesa, howokuya howowatamila, 23 wakugamba Digelesa chifika dihindigwe fiswanu, na awemilisi wema kumwande ye milango, ninga chikakumule chisonile munhu kugati! 24 Kamei ichilongosi we dihekalu na wakulu wa watambiki wakahulike nheifo, howokwila manhonge kosoko yawo, imbuli ino yokuwa nhani. 25 Munhu yumonga hoyokwija hoyowatamila fina, awanhu waya womwawekile kwigelesa wowa kwihekalu, wemanyima wekufundisha wanhu. 26 Noho yuya ichilongosi we dihekalu hoyoluta hamwedu na watogomi waya, howowegala, ninga si kwa ludole, kosoko hawogoha wanhu wangheje wowatowa na mawe. 27 Wakawegale, howoweka mudibalasa. Ikuhani Mukulu hoyowosa, 28 yakugamba, “Togoleni, chisawagambile kwa udaha kuwa munghafuse kusisina dino?” Nanye langeni mumemesa Yelusalemu na mafuso genu, na mukuhananga kuigala isakame ye munhu yuya muchanhya yetu. 29 Petulo na watumigwa howobidula wakugamba, “Ichagila kumuhulikisa Mulungu kusuma wanhu. 30 Imulungu wa WaBabaset hakamwinula Yesu kulawa muchilalo, imwene anyeye hamumukoma kwa kumutungika mwibiki. 31 Imunhu yuno iMulungu kamwinula kumukono wakwe wo kulume yowe Chilongosi na Muhonya yawenghe wa Isilaeli dilumbo dya chawelu na kulekeligwa uwihi. 32 Na seye cha wahomelesi wa simbuli siso, hamwedu na Muhe Musunhile imwene Imulungu yakuwengha awanhu wose awakumuhulika.” 33 Awene wakahulike howokwafigwa mufidoga fyawo; howogola njama yakuwakoma. 34 Ninga munhu yomonga, Falisayo, Gamalieli, mwalimu wa tolati, yakogohigwa na wanhu wose, hoyokwima mwibalasa, na kulagisa watumigwa wekale hanghanda kwa chipisi chiguhi, 35 hoyowagamba, “Anye wagosi wa Isilaelii, muchilangisise fomukuwatendela awanhu wano. 36 Kosoko ugele wawo fowowile usinati ufike hakalawanisa Teuda, hokigamba imwene munhu mukulu, wanhu wafikile magana mane howomwandamila. Naye hakachinjigwa na wose awamuhuwile howokwaganika howokuwa si chinhu. 37 Hanyuma yakwe hoyolawanisa Yuda wa Mugalilaya, ugele uya wokutala wanhu, hoyowakwega wanhu wengi howomwandamila, naye hoyokwagilila na wose wamwandamile howokwaganika. 38 “Hambiya, nikumugambani nhafi, Mukinege na wanhu wano, walekeni; kosoko imbuli iino no mulimo uno hona ulawile kuwanhu, ukwenda ubanike uwecho, 39 ninga hona ulawile kwa Mulungu musikudaha kuubana; mungheje mukoneka fina mukulewa na Mulungu. 40 Howofumila simbuli sakwe; kamei wakawenange awatumigwa, howowatowa, howowalemesa, wanghalonge ku disina dya Yesu; kamei howowaleka ku disina dya Yesu; kamei howowaleka walute. 41 Nawo hawaleuka mwibalasa diya, na chinyemi, kosoko watalikwa, kugumigwa chinyala, kosoko ya disina didyo. 42 Na chila ijuwa, mwihekalu na musinyumba sawo, wasalekile kufundisha na kuhubili si mbuli si swanu sa Yesu kuwa ni Kilisito.”
1 Hambiya mumajuwa gago, chigele awefusa fowendewakongeseka, hakulawanisa kung'ung'ulika mugati ya waya wakulonga Chiyunani na waya wakulonga Chiebulaniya. Awaya wakulonga Chiyunani howonghunghulika fina awegane wao wendewosimiligwa ugele wokugawiligwa amahitaji gawo ga chila ijuwa. 2 Kosoko iyo, awaya awatumigwa ikumi na weli howokwinanga mulundo wa wanhu wose awahuwile howogamba, “Si fiswanu aseye chileke kuhubili imbuli ya Mulungu, uleke chishugulikie kugawa amahitaji. 3 Kosoko iyo, wandugu setu, saguleni wanhu mufungate, awakoneka wanhu waswanu, wamemile Muhe na misungu, uleke chiwenghe u mulimo uwo. 4 Ninga, aseye, chuwe no mulimo wa mataso na kuhubili imbuli ya Mulungu.” 5 Imbuli ino hoiwendesa ditewa dyose, kamei howowasagula Sitefano, munhu yena ihuwi ikulu na yamemesigwe na Muhe Musunhile, Filipo, Polokoni, Nikanola, Timona, Palimena na Nikolao wa Andiyokiya imwene yabidukile idini ye Chiyahudi kunghonga. 6 Howoweka kumwande ye watumigwa, nawo howowatasila na kuwechila mikono. 7 Imbuli ya Mulungu hoigendelela kongeseka na matewa ga wanhu awahuwile ako Yelusalemu hoikongeseka lugano, na matewa makulu ga watambiki howohuwila. 8 Kamei hoyomwingha Sitefano yamemile ihewa ikulu na ludole, hoyomwigha udaha mwingi; hoyodaha kugolosa fitangilo na majumo mugati ya wanhu. 9 Ninga wanhu wamonga awoile we disinagogi dya walekeleligwe fina fodyenangwa, wakilene, Walekisandaliya, na wamonga kulawa Kilikiya na Asiya, hawema na kuwanga na Sitefano. 10 Ninga wasadahile kumusuma kosoko ye misungu yakwe na Muhe yamulongose kukulanga. 11 Kosoko iyo howowafupa wanhu Awagambile chimuhulika imunhu yuno yakulonga mbuli sa kumuliga Musa na Mulungu. 12 Howowasongesa awanhu na wasehe na watulumi, howomulutila, howomukola, howomwigala kwibalasa. 13 Howokwinula wahomelesi wa udasi wagambile, Munhu yuno ghakuleka kulonga simbuli si kubesa ahanhu hano hasunhile na malagiso ga Musa. 14 Kosoko chimuhulika yakugamba ayo iYesu wa Nasaleti yakwenda yahabane lugano ahanhu ahano na kugaleusa ijadi yetu yochinghigwe kulawa kwa Musa 15 Wose wowile mumulundo uya we dibalasa howomukumhulila amaso Sitefano, howokona ichihanga chakwe kifana chihanga cha malaika.
1 Kamei imutambiki mukulu hoyomusa, Togola simbuli sino ni chawelu? 2 Naye Sitefano hoyogamba, “Wandugu sangu na waBaba sangu munitegelese! Mulungu hakailawanisa kwi Baba yetu Abulahamu foyowile kuya Mesopotamiya ugele ghenati yakekale Halani. 3 iMulungu hoyomugamba, ‘Leuka muisi yako, waleke awanhu wo lukolo lwako, ulute ku isi yonikwenda nikonese.’ 4 Kosoko iyo Abulahamu hoyosama iisi ya kalidayo, hoyejakwikala Halani. iBabakwe yakafe. Mulungu hoyomuleusa kahi Halani hoyokwija na kwikala mu isi ino yomukwikala hambiya. 5 iMulungu nghamwinghile hata uhasi we iisi ino hata nghanyo imwedu uwe mali yakwe; hata nheifo, hoyomuhuwisa fina yakwenda yamwinghe iisi ino yuwe yakwe ne cheleko chakwe, hata fina ugele uwo hakowa chaka mwana. 6 Mulungu hakalonga nhafi: ‘Icheleko chako wakwigaligwa ku isi ukutawaligwa na wanhu wengi, na uko wakagolosigwa watumwa, na kugoloseligwa fihile, kwa minyaka magana mane. 7 Ninga niye nikuhananga nidiliganise ditaifa didyo dikuwagolosani watumwa. Kamei nikwenda niwaleuse mu isi iyo uleke weje wanifuge ahanhu ahano.’ 8 Hanyuma iMulungu hoyogolosa dilagano dye dikumbi kwa nheifo Ibulahimu hakowa Baba wa wa Isaka na kufinigwa mwijuwa dye munane na Isaka naye yagaluka Babakwe wa Yakobo na Yakobo Baba wa wakuku ikumi na weli. 9 “Awaya awakulu wetu howomonela finju Yusufu, howomusambasa, hoyoguligwa kuutumwa Misili Ninga iMulungu hoyokuwa hamwedu naye, 10 hoyomuhonya mumagayo gakwe gose. Mulungu hoyomwingha ihewa na misungu kumwande ya Falao, iMundewa wa Misili, iFalao hoyomwika kuwa mukulu wa iisi ne inyumba ye chindewa. 11 “Baho hakulawanisa njala nghulu mu isi yose ya Misili na Kanaani, hoikwigala magayo makulu lugano. Awababu setu howolemeligwa kupata chakudiya chochose, 12 Ninga iYakobo yakahulike fina ako Misili kwina chakudiya, hoyowatuma wanangwe, awaBaba setu weje uko Misili ichipango cha kunghonga. 13 Inhambo yawo iyakeli Yusufu hoyokiyonesa kuwanduguse na Falao hoyowamanya awanduguse wa Yusufu. 14 Kamei Yusufu hakawatuma na kumwinanga Baba yawo Yakobo na wandugu sakwe wose wamwijile, hawowa kifana magana mufungate na na shano wose. 15 Kamei Yakobo hakadulika Misili. Imwene imwenyecho hakafila ukuya hamwedu na waBaba setu, 16 kamei imitufi yawo hoikwigaligwa mpaka Shekemu, hosikigwa mu chilalo cha Abulahamu choyagulile kuwa kwi kabila dya Hamoli kwa chayasi fulani cha mapesa. 17 “Ugele wo kumemelesa dihuwi dya Abulahamu, ukowe habehi ditewa dya wanhu waya akuya Misili hadyongeseka na kuwa ikulu lugano. 18 Hanyuma yakwe, hoyotawala Mundewa yumonga imwene nghamumanyile Yusufu, ako Misili. 19 Hoyodigolosela ditaifa dyetu Lwidaso, hoyowatendela wababu setu fihile, kwa kuwagamba wawatage awana wawo we chigosi uleke wafe. 20 “Musa hoyokwelekigwa ugele uwo. Hokowa mwana muswanu lugano. Hoyoleleligwa ukaya kwa chipango kwa minyesi midatu, 21 yakalafigwe kunje, imwana we chike wa Falao hoyomulonda, hoyomulela kifana mwanagwe. 22 Musa hoyofusigwa finhu fyose na misungu yose ya Wamisili, hoyokuwa munhu wa itunyo na chogoho kwa sinhenda na simbuli. 23 “Yakowe munhu wa minyaka makumi mane, hoyolamula kwijawalanga awanduguse Awaislaeli. 24 Uko hokomona yumwedu wawo yakutendeligwa fihile, hoyoluta kumuhonya, na kwa kuliha chisasi hoyomukoma ayuya iMumisili. 25 (Hakamanya nhagela Waislaeli wayagwe womanya fina iMulungu kumutumiya imwene kuwakombola, ninga wasatangile nheifo.) 26 “Nhosiku yakwe howona Waislaeli weli wakitowa, hoyogesa kuwapatanisha yakugamba, ‘Yoloko anye mwa ndugu, nhani mukulemana muwecho kwa wecho?’ 27 Ayuya yamufowage miyagwe hoyomukundugisa Musa kughanda, yakugamba: Nani yakwikile gweye kuwa chilongosi na mulamusi wetu? 28 ‘Togola ukuhanga unikome fina fowamukomile iMumisili digulo?’ 29 Yakahulike nheifo iMusa hoyotija, hoyeja kwikala ku isi ya Midiani na uko hoyopata wana weli. 30 “Minyaka makumi mane iyilokile, imalaika we Mundewa hakamwijila Musa muchisinghu chendechikwaka moto akuya kunyika habehi na ditunda dya Sinai. 31 iMusa hoyokisina lugano kukona kona ichinhu fina chino, hoyosegela habehi uleke yalange fiswanu; ninga hoyohulika dijwi dye Mundewa. 32 ‘Aniye no ni Mulungu wa waBaba sako; Mulungu wa Abulahamu, Isaka na Yakobo.’ Musa hoyotetema kwa chogoho kahinghagendelele kulanga kahi. 33 “iMundewa hoyomugamba: ‘Hambula ifilwatu fyako kosoko ahano howimile ni hanhu hasunhile. 34 Niyona agehile gowakugoloseligwa awanhu wangu akuya Misili. Nihulika ichilolo chawo, nani nija niwahonye. Kosoko iyo wije hano nikulagise ulute Misili.’ 35 Ayuno iMusa no yuya awanhu wa Isilaelii wowamulemile fowagambile: ‘Nani yakwikile gweye uwe chilongosi wetu na mulamusi wetu?’ Kwa soko ya yuya imalaika yamulawanisile muchihulo chendechikwaka moto, iMulungu hakumutuma iMusa yuyo yowe chilongosi mwihula kwa njila ya yuya malaika yamulawanisile muchisinghu chendechikwaka moto.. 36 No yawalongose awa awanhu walawe Misili kwa kugolosa mengi ga majumo na gakisina mu isi ya Misili mu bahali ya Shamu na munyika kwa chipango cha minyaka makumi mane. 37 “iMusa noyagambile awanhu wa Isilaelii, ‘iMulungu yakwenda yamusagulileni mugonesi fina niye kulawa mugatigati ya wandugu senu mwecho.’ 38 Ugele awanhu wa Isilaelii fowakitanganyile akuya kunyika, iMusa noyowile uko hamwedu nawo. Hokowa uko hamwedu na waBaba setu na yuya imalaika isalongile naye akuya kwitunda dya Sinai; noyenghigwe asiya simbuli sikwigala uumi yachinghe seyee 39 “Ninga imwene no yuyo awakuku setu yowalemile kumuhulikisa; howomukundugisa kunghanda, howohananga kuya Misili. 40 Howomugamba Haluni: ‘Chigolose milungu ikudaha kuchilongosa munjila, kosoko chisimale chimupatile iMusa iyachilongose kulawa Misili.’ 41 Baho noho wakigolosele isanamu ye indama, wakuitambichila na kugolosa chinyemi, ichinhu chowagolose kwa mikono yawo awecho. 42 Ninga iMulungu hoyoleuka mugati yawo, hoyowaleka wafuge sinyelesi sa kulanga, fina foiandikigwe mu chitabu che mugonesi: ‘Anye wanhu wa Isilaelii! Siniye womwanichinjile sinyama na kunitambichila kwa chipisi cha minyaka makumi mane akuya kunyika. 43 Anyeye hamwinula dihema dya Moleki ne inyelesi ye mulungu wenu Lefani; sisanamu sowagolose nosoukufuga; kosoko iyo nikukwigala kukutagigwa kutali kusuma Babeli.’ 44 “AwaBaba setu hawowa na diya dihema dya homelele akuya kunyika fina Mulungu foyawalongose chigele Mulungu foyamusigilile Musa yadigolose, kifana foyonesigwe ne Mulungu. 45 Kamei awaBabasetu howokihokela awecho kwa wecho mpaka ugele wa Yoshua, foyailondile iisi iya ya wamembe waya wawingigwe ne Mulungu kumwande yawo. Hodikwikala baho mpaka ugele wa Daudi. 46 Daudi hakendigwa na Mulungu kusuma wayagwe wose, hoyomutasa Mulungu luneka lwa kumujengela nyumba imwene iMulungu wa Yakobo. 47 Ninga Sulemani noyamujengele Mulungu nyumba. 48 “Hata nheifo, iMulungu Mukulu nghakwikala musinyumba sijengigwe na wanhu; fina foyakulonga imogonesi. 49 iMundewa yakugamba: ‘Ulanga no digoda dyangu dya ditunyo, na chilunga no digoda dyangu dya kwichila migulu. Ni nyumba inhani yomukudaha kunijengela? Na hoki honikudaha kubwihila? 50 Ifinhu fono fyose aniye nonifigolose, aho si nheifo?’ 51 “Anyeye mwichaka chihuliko! Singhutwi si fidoga fyenu sifana awanhu wasimumanyile Mulungu, anyeye mukifana na awaBabasenu. Majuwa gose mukusilema simbuli sa Muhe Musunhile. 52 Togoleni, kwina mugonesi wowose imwene awaBabasenu wasamudumangise? Hawawakoma awaya awatumigwe ne Mulungu weje watamile kwija kwakwe ayuya imunhu we chawelu. Hambiya anyeye homumusongesa, homumukoma. 53 Anyeye hamuhokela adiya dilagiso degaligwe ukwenu ne Malaika, ninga musagolose fodikulonga!” 54 Awaya wasehe we dibalasa wakahulike nheifo, howosuha lugano, howogwegwejula meno kwa nyono. 55 Ninga Sitefano yakameme Muhe Musunhile, hoyokwinula ameso gakwe kulanga, hoyokona ditunyo dye Mulungu na Yesu kekala ulwandi lwo kulume lwa Mulungu. 56 Hoyogamba Langeni! Nikona ulanga ugubuka ne iMwana we Munhu kema ulwandi lwo kulume lwa Mulungu. 57 Baho, awanhu wose awowile mwi Balasa, howotula chowe na kwingisa fidole fyawo kusinghutwi kusihinda. Kamei howomujumhila wose hamwedu, 58 howomulafa kunje ye ikaya, howomutowa na mawe. Awaya wahomelesi howokwika si amako gawo kwimilisigwa na mujelelo yakwinanga Sauli. 59 Howogendelela kumutowa Sitefano na mawe, ugele imwene yakuwomba: Mundewa Yesu chihokele chidoga changu! 60 Hoyotowa mafindi hasi, hoyokwinula dijwi dyake: Mundewa ungawatalilile wihi muchanhya yawo. Yakamale kulonga nheifo, hoyokufa.
1 Na Sauli hakendesigwa na kukomigwa kwakwe Sitefano. Dijuwa didyo hokulawanisa lwidaso lukulu lugano kwikanisa diya Yelusalemu. Awahuwile wose ninga awaya awatumigwa du, howokiyagala kusiisi sa Uyahudi na Samalia. 2 Awanhu awakumogoha Mulungu howomusika Sitefano na kumugolosela mohongesi makulu. 3 Ugele uwo, Sauli hoyogesa kudibana dikanisa. Hoyoluta kwa chila nyumba, hoyowalafa kunje awahuwile, wagosi kwa wanawake, hoyowaguma kwi gelesa. 4 Awaya awahuwile awakiyagale, howoluta kose kose wakuhubili imbuli iya. 5 iFilipo hakadulika mukaya ya Samalia na kumuhubili Kilisito ku wakaya wa baho. 6 Awanhu howokihasa kwa chinyemi kuutegelesa simbuli sa Filipo na kona majumo gaya goyagolose. 7 Kosoko simhepo sihile isawekalile wanhu wengi, hosilawa sikutula chowe chikulu; kahi na wanhu wengi wowile na utamu wa kuholola vilungo fyawo no filema howohonyigwa. 8 Hokukuwa na chinyemi mukaya iya. 9 Baho, hahowa na munhu yumonga yakwinangwa Simoni, imwenye yagolose uhayi wakwe mukaya iyo ku majuwa galokile, na kuwatenda wanhu wa Samalia wakisine lugano, yakiyona imwene ni munhu mukulu. 10 Awanhu wose wakulu na wadodo, hawamutegelesa wakugamba, “Munhu yuno ni udaha uya mukulu we Mulungu.” 11 Hawakwegigwa lugano ne imwene kosoko hawakisina uhayi wakwe kwa majuwa mengi. 12 Ninga wakahuwile inonga ya Filipo mchanhya ya Imbuli iswanu yo undewa we Mulungu na disina dya Yesu Kilisito, howobatisigwa wanawake na wagosi. 13 Hata Simoni imwenyecho hoyohuwila; yakamale kubatisigwa hoyokiyandamila na Filipo, hoyokisina amajumo gagolosagwe na Filipo. 14 Awaya watumigwa wowile Yelusalemu wakahulike fina awakaya wa Samalia waihokela imbuli ya Mulungu, howowatuma ukwawo Petulo na Yohana. 15 Wakafike howowawombela awahuwile uleke wahokele Muhe Musunhile; 16 kosoko ugele uwo Muhe Musunhile hakowa nghenati yamwingile hata yumwedu wao muchiligati yao; ninga hawowa wabatisigwe du mudisina dye Mundewa Yesu. 17 Petulo na Yohana howowechila mikono awaya wahuwile, awo howohokela Muhe Musunhile. 18 Baho Simoni yakone fina kwa kwikiligwa mikono na watumigwa wanhu wakuhokela Muhe Musunhile. Kosoko iyo hoyoweng'a Petulo na Yohana mapesa, 19 yakugamba Ningheni na niye udaha uwo uleke wowose wonikumwichila mikono yahokele Muhe Musunhile. 20 Ninga Petulo hoyomubidula, Wagilile kutali na mapesa gako kosoko kumanya simboto sa Mulungu sikuguligwa kwa mapesa! 21 Kwachaka mugawo wowose, kahi ifungu dyodyose mumulimo uno kosoko umoyo usiliganile kumwande ya meso ge Mulungu. 22 Kwa nheifo, ulambe uwihi wako uno na umutase Mundewa naye yakudaha kukonela ubasi amawaso fina gago. 23 Nikukona kumama wifu mukali na kohigwa na uwihi! 24 Simoni hoyobidula, Dedede, nitasileni kwe Mundewa dinghanipata dyodyose mugago gomulongile. 25 Petulo na Yohana wakamale kulafa uhomelesi wao na kutamula imbuli ya Mundewa, howokuya Yelusalemu. Ugele fowoyage hawahubili imbuli swamu mu fikaya fingi fya Wasamalia. 26 Malaika we Mundewa hoyomugamba Filipo, Winuke, ulute kwikulu kwandamila injila ikulawa Yelusalemu kuluta Gasa, (Injila iyo ikugendela munyika) 27 Kamei, hakenuka na kuluta. Ugele wuwo hokuwa na Mwesiyopiya yumwedu, yemhende, munhu yuyo hakowa munyamhala mukulu we sawo ye Kendake, iMundewa we chike we Chiyesiyopiya hakowa munhambo kulawa Yelusalemu kukufuga. 28 Kamei yendeyokuya ukaya hokowa yakwilile umukokoteni ukukwegigwa, munhambo yakwe yendeyosoma chitabu che Mugonesi Isaya. 29 Baho Muhe Musunhile hoyomugamba Filipo, Luta habehi ne mukokoteni uya ukukwegigwa, ukiyandamile nawo 30 Filipo hoyobilimila habehi na digali didyo, hoyomuhulika ayo imunhu yakusoma muchitabu cha Isaya. Baho Filipo hoyomusa, Togola, ukutanga ago go ukosoma? 31 Imunhu yuyo hoyobidula, Nodaha kutanga nhani bila munhu kunilongosa? Baho hoyomwinanga Filipo yakwile mwigali dyakwe, yekale naye. 32 Hambiya, difungu dya matulumo masunhile dyoyasomage hadyuwa dino: Hakowa kifana ngholo ikwigaligwa kuchinjigwa; fina ichana che ingholo fochikunyamala posi ugele chikugetigwa, nghagubule mulomo wakwe. 33 Hakagumigwa chinyala na koneligwa. Hachaka yakudaha kulonga muchanhya ye cheleko chakwe, kosoko uumi wakwe ulewusigwa muchilunga. Imwene naye nghalafile dijwi dyakwe hata chidodogi. 34 Ayo Mwisiyopiya hoyomugamba Filipo, Nitamile, iMugonesi yuno yalonga kosoko yani? Yakulonga kosoko yakwe imwecho ama kosoko ya munhu yungi? 35 Kamei, Filipo hoyokongela baho mu matulumo Masunhile, hoyomutamila simbuli si swanu muchanhya ya Yesu. 36 Fowowile wakugendelela ne inhambo, howofika ahanhu hena meji, kamei imukulu yuya hoyogamba, “Ahanhu hano hena meji mengi: Togola, kwina chochose ichikudaha kunemesa nighabatisigwe?” 37 [Filipo hoyogamba, “Honaga ukuhuwila kwa moyo wako wose ukudaha kubatiswa.” Imwene hoyobidula, “Heye, nikuhuwila fina Yesu Kilisito ni Mwana wa Mulungu.]” 38 Kamei Imukulu yuya hoyolagisa mukokoteni uya wime; awene wose aweli howohumuluka, ayuya imukulu na Filipo hoyomubatisa. 39 Wakalawe mumeji Muhe we Mundewa hoyomutenda Filipo yaleuke bila koneka na yuya Muwesiyopiya nghamonile kahi; ninga hoyogendelela na nhambo yakwe yamemile chinyemi lugano. 40 Filipo hotangila kowa Asoto, hoyogenda musikaya sose yakuhubili Imbuli swanu hata foyafikile Kaisalia.
1 Ninga ichigele chicho iSauli hakagendelela kongesa itisi ikulu kwa kuwakoma awamuhuwile Mundewa, hoyoluta kwa mutambiki mukulu, 2 hoyotasa yanghigwe baluwa sa kumanyigwa ku masinagogi ge Chiyahudi gowile Damesiki, uleke yanghafika uko wagosi ama wanawake awakwandamila injila ye Mundewa yawakole na kukwila nawo Yelusalemu. 3 Ninga foyowile munjila, habehi na kufika Damesiki, chimwande ujelu kulawa kulanga howumumulike kosekose. 4 Hoyokugwa hasi na kuhulika dijwi dikumugamba Sauli; Sauli! Nhani ukunyidasa? 5 Imwene naye Sauli hoyokusa Agwe no nani, Mundewa? Dijwi diya hodibidula, Aniye no Yesu imwene agweye ukunyidasa! 6 Ninga hambiya Inuka, wingile mukaya, na uko ukwende utamiligwe dyokugolosa. 7 Awaya awanhu awende woluta hamwedu na Sauli howokwima bahaya, howowa chaka dya kulonga; howohulika dijwi diya ninga wasonile munhu. 8 Sauli hoyokwinuka, yakagubule ameso gakwe nghadahile kona chochose; kwa nheifo awanhu waya howomulongosa kwa kumukola mukono mpaka kukaya ya Damesiki. 9 Sauli hoyokwikala majuwa madatu bila kona, na ugele uwo nghadiile kahi kunywa chochose. 10 Kamei, uko Damesiki hakuwa mwifusa yumwedu yakwinangwa, “Anania. iMundewa hoyumugamba mumagubulo, Anania.” Hoyokwidika, “Nuwa hano Mundewa.” 11 Naye Mundewa hoyomugamba, “Kiyohe ulute kwibalabala dikwinangwa digoloke, kwinyumba ya Yuda ukamuhanange munhu yumonga kulawa Talso yakwinangwa Sauli. Hambiya yakutasa, 12 na mumagubulo, kona munhu yakwinangwa Anania yakwingila kugati na mwichila mikono uleke yadahe kona.” 13 Ninga Anania hoyobidula, “Mundewa, nihulika simbuli sa munhu yuyo kulawa kwa wanhu wengi, nihulika agihile mene goyawagolosele wanhu wako ako Yelusalemu. 14 Na keja hano yena udaha kulawa kwa watambiki wakulu kuwakola awanhu wose awakuwomba kudisina dyako.” 15 Ninga iMundewa hoyomugamba, “Luta du, kosoko nimusagula yowe chiya changu, yadingase disina dyangu ku mataifa na wandewa wao na kwa wanhu wa Isilaelii. 16 Aniye nimwecho nikuhanga nimonese mengi goyakwenda yedasigwe kosoko ya disina dyangu.” 17 Kamei, Anania hoyoluta, hoyokwingila munyumba iyo. Kamei hoyokwika mikono yakwe muchanya ya Sauli, hoyogamba, “Mundugusangu Sauli, Mundewa, iYesu imwecho yakiyonese ukwako fowowile munjila kwija hano kanituma uleke udahe kona kahi, na kumemesigwa Muhe Musunhile.” 18 Chimwande finhu kifana makangha hofilagala kuulawa kumeso ga Sauli, hoyodaha kona kahi. Hoyokwima hoyobatisigwa; 19 yakamale kudiya, si ngufu sakwe hosimuwila. Sauli hoyokwikala majuwa makefu hamwedu na wefusa uko Damesiki. 20 Chimwande hoyokonga kuhubili Mumasinagogi fina, “Yesu ni Mwana wa Mulungu.” 21 Wanhu wose wamuhulike howokisina lugano, wakugamba, “Munhu yuno so yuyuya yawakomile waya wawombage ku disina dino akuya Yelusalemu? Hakeja hano uleke yawakole awanhu wawo na kuwegala kuwatambiki?” 22 Sauli hoyogendelela kupata ludole na kuwagolosa wafumile aWayahudi wekalage Damesiki kwa kuhomela fina Yesu no Kilisito. 23 Majuwa mengi gakaloke, Wayahudi howokikonghola hamwedu na kugolosa njila ya kumukoma Sauli, 24 ninga Sauli hoyohulika imbuli iyo. chilo ne misi hawemilisa hemulango wo kwingilila mukaya uleke wamukome. 25 Ninga ugele wa nechilo awefusa wakwe howomulonda, howomuhulumusa mudisege dikulu kulokela muluneka lowile mulukasi. 26 Sauli yakafike Yelusalemu hoyogesa kihasa na wefusa. Ninga wose hawamogoha, na wasahuile fina naye kagaluka mwifusa. 27 Baho Balinaba hoyokwija hoyomulonda Sauli na kumwigala ku Watumigwa na kuwatamila ifyene foyamonile Mundewa munjila na fye ne foyasimulile naye. Hoyowatamila Suli foyahubili bila woga akuya Damesiki. 28 Kamei Sauli hoyokwikala hamwedu nawo, hoyoigendela Yelusalemu yose yakuhubili imbuli ye Mundewa bila kogoha. 29 Kamei hakalongaga na kuwanga chinyume na Wahelenisiti ninga wendewahananga kumukoma. 30 Awaya awandugu wakamanya imbuli iyo, howogolosa njila ya kumulonda Sauli, howomwigala Kaiselia, howomuleka yule Talso. 31 Kamei dikanisa muisi yose ya Uyahudi na Galilaya na na Samalia, hodijengeka na kukula na kugendelela kumogoha Mundewa na kulongosigwa na Musunhile. 32 Petulo foyendeyoluta chila hanhu, hoyofika nheifo ku wanhu wa Mulungu awendewokwikala Luda. 33 Uko hoyomufika munhu yumonga yakwinangwa Enea, imwene yuya kagona mwisasi kwa miyaka ikumi na munana kwa utamu wa kuholola. 34 Petulo hoyumugamba, “Yesu Kilisito yakuhonya. Inuka utandike disasi dyako. Enea hoyokwinuka chimwande. 35 Awakaya wose wa Luda na Saloni howomwona Enea, nawo wose howomubiduchila Mundewa.” 36 Hakuwa na mufusigwa yumonga mukaya ya Yopa yakwinangwa Tabisa (kwa Chiyunani ni Dolika, nong'amba Chipala). Imwanamuke yuno yendeyogolosa maswanu na kuwatasa wakiwa wengi ugele wose. 37 Ugele uwo hayuwa fina hakatamigwa, hoyokufa. Awanhu howousunha umutufi wakwe, howomutambalisa muchumba cha kuchanhya. 38 Yopa si hatali sana na Luda, kwa nheifo awefusa wakahulike fina Petulo kuwa Luda, howotuma wanhu weli ukwakwe na imbuli, Wije ukwetu chimwande lugano foikudahika. 39 Kamei Petulo hoyokilongosa nawo. Yakafike howomwigala kuchumba cha kuchanhya kwigolofa, uko wanawake wegane wengi howomusunguluta Petulo wakulila na kumonesa makoti na sisuke soyendeyogolosa ugele foyowile mumi. 40 Petulo hoyowalafa wose kunje, hoyofugama, hoyowomba. Hanyuma hoyomubiduchila ayuya yafile, hoyogamba Tabisa inuka! Naye hoyogubuka meso na yakamwone Petulo, hoyokwikala. 41 Petulo hoyomutasa kwimanyima, kamei hoyowenanga awaya awanhu wa Mulungu na waya wegane, hoyomuleka mumikono yao, ugele ni mumi. 42 Imbuli iyo yagoloseke baho, hoikwenela chila hanhu uko Yopa na wanhu wengi howomuhuila Mundewa. 43 Petulo hoyokwikala majuwa mengi uko Yopa, hoyokwikala na munhu yumonga mugolosaji wa nghingo yakwinangwa Simoni.
1 Uko Kaisalia hakuwaga na munhu yumonga yakwinangwa Kolinelio Mukulu wa chikosi chimonga chikwinangwa, “Chikosi cha Italia.” 2 Hakowa munhu muswamu; imwene hamwedu na wa munyumba yakwe wose wendewomogoha Mulungu. Yendeyogolosa mengi kuwatasa awakiwa we Chiyahudi na yende yomuwomba Mulungu ugele wose. 3 Hayuwa kifana saa kenda nhafi ya nemisi, hoyokona chimesomeso, kagubuliligwa, malaika wa Mulungu hoyokwingila kugati hoyomugamba, “Kolinelio!” 4 Kolinelio hoyomukumhulila meso yuyo malaika kwa chogoho, hoyomugamba, “Kwina choni Mundewa?” Ayo imalaika hoyomugamba, “Amawombi hamwedu na kulafa kwako kuwatasa wakiwa kufika kuchanhya kuwa ngelegesi kwe Mulungu. 5 Hambiya, watume wanhu Yopa wakamwinange munhu yumonga yakwinangwa Simon, disina dimonga Petulo. 6 Kowa munyumba ya Simon mugolosaji wa singhingo, nyumba yakwe yuwile habehi ne bahali.” 7 Kamei malaika yalongile siso hakafulusa kuleuka na kuluta, Kolinelio hoyowenanga awatogomi weli wa munyumba yakwe na yumwedu wa wasilikali wakwe yendeyomogoha Mulungu, 8 hoyowatamila gose galawanise, hoyowatuma Yopa. 9 Nhosiku yakwe dijuwa dya keli, awanhu wawo wadatu wakali munhambo, ninga behi na kufika Yopa, Petulo hoyokwila kwipala dye inyumba kuchanhya, ku saa mutandatu ya nemisi uleke yawombe. 10 Hakona njala, hoyokwenda kupata chakudiya; ugele ichakudiya fochendechigolosigwa, hoyapatigwa na nhongo sito, hoyokona diono chimesomeso. 11 Hakona ulanga ugubuligwa na chinhu kifana isuke ikulu ikudulisigwa dikoligwa musimhembe sakwe sose ine. 12 Kugati yakwe kwina fiyumbe fyose: Si nyama se migulu mine, sinyama sikutambala hasi, ne fidege fya mulanga. 13 Hoyohulika dijwi dikumugamba: Petulo, Inuka uchinje sinyama sino udiye! 14 Petulo hoyobidula, Hata, Mundewa; aniye sinati nidiye chinhu chochose ichene chikusemunigwa ama chihile. 15 Dijwi diya hodihulikika kahi dikugamba, “Unghafigambe fichafu ifinhu ifyene Mulungu foyasunhile.” 16 Imbuli ino hoyigoloseka kadatu, kamei adiya disuke hodikwinuligwa kulanga. 17 Petulo foyendeyokisina isoko ye digubulo didyo dyoyonile, awaya awanhu watumigwe na Kolinelio, wakaitange inyumba ya Simoni, howofika hamulango, 18 howokwinanga kwa ijwi: Togoleni, hena mugeni bahano yakwinangigwa Simoni Petulo? 19 Petulo hakowa nghenati yamanye magubulo gano, na baho Muhe hoyomugamba, “Tegelesa! Hena wanhu wadatu hano, wakukuhanga. 20 Dulika chimwande na unghowe na manhonge kiyandamila nawo, kosoko aniye noniwatumile.” 21 Kamei, Petulo hoyodulika hasi, hoyowagamba awanhu wawo, Aniye nowomukuhanga. Nhani mwijile? 22 Awene howomubidula, Imukulu we chikosi cha wasilikali, Kolinelio; munhu muswanu, yakumogoha Mulungu na yakutunyigwa na Wayahudi wose, kachituma. Hakagambigwa na malaika Musunhile yakwinange ukaya ukwake uleke yategelese chochose chiwinacho cho kulonga. 23 Petulo hoyowakalibisha kugati, hoyowengha hanhu haguna ichilo chia. Nhosiku yakwe, Petulo hoyokonga inhambo hamwedu nawo, na wamonga wa wandugu wa Yopa howokiyandamila naye. 24 Dijuwa dya keli yakwe, howofika Kaisalia, na uko Kolinelio yendeyowagojela hamwedu na wandugu na wambuya, awene woyagoneke. 25 Petulo yakowe yakwingila Kolinelio, hoyolawa kunje kumuhokela, hoyofugama kumwande yakwe na funamana hasi. 26 Ninga Petulo hoyomwinula, hoyomugamba, “Inuka kosoko aniye na munhu du.” 27 Petulo hoyogendelela kusimulila na Kolinelio ugele wakwingila kunyumba koyafikile wanhu wengi wakikonghola. 28 Petulo hoyowagamba, “Anye muwecho mumanya fina Muyahudi wowose yakulemesigwa na malagiso ge dini yakwe yanghakihase na wanhu wa wamembe gengi. Ninga Mulungu kanyonesa nileke kumwona munhu wowose kuwa yakusemunigwa ama muchafu. 29 Kosoko iyo, fomuninange nija, bila kulema. Hambiya, nimusani, Nhani muninange?” 30 Kolinelio hoyogamba, “Majuwa madatu galokile ichigele kifana chino, saa ya dikenda ya nemisi, nendeniwomba kuchumba changu. Chimwande munhu yafalile suke sikwakaika kema kumwande yangu, 31 hoyogamba, ‘Kolinelio! Amawombi gako na kulafa kwako na kuwatasa kwako wakiwa fihokeligwa na Mulungu. 32 Mutume munhu Yopa yakamwinange munhu yumonga yakwinangwa Simoni, disina dimonga Petulo; kowa kunyumba ya Simoni mgolosaji wa singhingo behi na bahali.’ 33 Kosoko iyo hanikutumila wanhu baho ni baho nagwe kutenda fiswanu kwija. Hambiya, aseye cha hamwande ya Mulungu, kuhulikisa chochose ichene Mulungu kakulagisa ulonge.” 34 Baho Petulo hoyokonga kulonga; Hambiya nimanya chawelu Mulungu kechaka ubagusi. 35 Munhu wa ditaifa dyodyose yakumogoha Mulungu na kugolosa simbuli se chawelu, Mulungu yakuhokeligwa naye. 36 Aino no imbuli Mulungu yo yawegalile wanhu wa Isilaelii, yakutamila Imbuli swanu iikwigala digoya kwa njila ya Yesu Kilisito imwene no Mundewa wa wose. 37 Anye mumanya imbuli iya yagoloseke mu isi yose ya Uyahudi kukongela woyahubili Yohana. 38 Mumanya Yesu wa Nasaleti ifyene Mulungu foyamusagule kwa kumwitilila Muhe Musunhile na ludole. Mulungu hakowa hamwedu naye; holuta ako nako na kugolosa maswanu na wose awoneligwe na Luhoma. 39 Aseye cha wahomelesi wa simbuli sose soyagolose mu isi ya Uyahudi na Yelusalemu. Howomukoma kwa kumutungika mumusalaba. 40 Ninga Mulungu hoyomwinula dijuwa dya kadatu, hoyomugolosa yonigwe, 41 si kuwanhu wose, ninga kwa waya awene awasaguligwe wowe wahomelesi wakwe, no seye chanywile na kudiya hamwedu naye yamale kwinuka kulawa kuwafile. 42 Kachituma chihubili imbuli swanu ku wanhu wose na kuhomela fina imwene noyasaguligwe na Mulungu yowe mulamusi wa womi na wafile. 43 Wagonesi wose hawalonga simbuli sakwe fina chila munhu yakumuhuwila yakuleusiligwa uwihi wakwe kudisina dyakwe. 44 Ugele Petulo hoyowile yakalilonga simbuli siso, Muhe Musunhile hoyowahumuluchila wose wategelesage imbuli iyo. 45 Awaya Awayahudi wahuwile awejile na Petulo kulawa Yopa howokisina kuhona Mulungu hakawetilila ichipawa che Muhe Musunhile wanhu wa wamataifa gengi nheifiya. 46 Kosoko hawawahulika wakulonga kwa nonga sa hayo hayo wakumutunya Mulungu. Baho Petulo hoyogamba, 47 “Awanhu wano wahokela Muhe Musunhile fina seye chiwecho fochihokele. Togoleni kwina wowose yakudaha kulemesa awanhu wano wanghabatisigwe kwa meji?” 48 Kamei, Hoyogamba wabatisigwe kwa disina dya Yesu Kilisito. Baho howomutasa yekale nawo kwa majuwa makefu.
1 Hambiya awatumigwa na wandugu akuya Uyahudi howohulika fina awamembe nawo waihokela imbuli ya Mulungu. 2 Kamei, Petulo yakalute Yelusalemu, awaya Awayahudi wahuwile awendage awanhu wamataifa gamonga wagaligwe kwikumbi, howomugamba kabana, wakugamba, 3 “Agweye kwijakwikala na walajoni mpaka kudiya nawo.” 4 Baho Petulo hoyowatamila chila chinhu, simbuli siya sagoloseke kulawa kunghonga: 5 Dijuwa dimonga nendeniwomba mukaya ya Yopa, honikona iono; honikona chinhu kifana isuke ikulu dikudulisigwa hasi kulawa kulanga dikoligwa mu simhembe sakwe ine, hodikwikigwa hanghanda yangu. 6 Honisungilila kugati kwa fiswanu honikiona umo si nyama se migulu mine, sinyama sa kumbago, sinyama sikuhambala na fidege fya kulanga. 7 Baho honihulika dijwi dikunigamba Petulo, inuka, uchinje, udiye. 8 Ninga aniye honigamba; Hata, Mundewa! Kosoko chochose chikusemunigwa na chihile chisinati chingile mumulomo wangu. 9 Dijwi diya hodihulikika kahi kulawa kulanga: Unghafigambe fikusemunigwa ifinhu fisunhigwe na Mulungu. 10 Imbuli hogoloseka kadatu, kamei fyose hofikuwisigwa kuchanhya kulanga. 11 Chimwande wanhu wadatu awene watumigwe ukwangu, howofika kunyumba yonyendenikwila. 12 Muhe hoyonigamba nikuyandamile nawo nilekekuwa na manhonge. Awo no awandugu mutandatu howakiyandamila nani kuluta Kaisalia, na uko hochikwingila munyumba ya Kolinelio. 13 Imwene hoyochitamila ifyene fyoyamonile malaika yemile kunyumba yakwe yakumugamba, “Mutume Munhu Yopa yakamwinange munhu yumonga yakwinangwa Simoni kwa disina dimonga Petulo. 14 Imwene hokutamila simbuli isene agweye na wayago wose mukwende muhonyigwe.” 15 Kamei, nikakonge du kulonga, Muhe Musunhile hoyowawadulichila fina foyachidulikile aseye kunghonga. 16 Baho honigelegela simbuli siya iMundewa soyalongile: Yohana hakabatisa kwa meji, ninga anyeye mukubatisigwa kwa Muhe Musunhile. 17 Hambiya, honaga Mulungu yawenghile wanhu wa wamembe gamonga ichipawa chichiya choyachinghile seye fochamuhuwile Mundewa Yesu Kilisito, togola aniye no nani mpaka nidahe kumupinga Mulungu? 18 Wakahulike simbuli siso howoleka lukani, howomutunya Mulungu wakugamba, “Mulungu kawengha wanhu wa wamembe gamonga luneka lwo kulamba na kuwa na uumi!” 19 Kosoko ya magayo galwanise ugele foyakomigwe Sitefano, wahuwile howokiyagala. Wamonga howoluta mpaka Foinike, Kupulo, na Andiyokiya wakuhubili imbuli iya kuwayahudi du. 20 Ninga wamonga wa wahule kulawa Kupulo na Kulene, howoluta Andiyokiya, howotamila simbuli siso kuwanhu wa wamembe gengi wakuhubili aiya imbuli swanu ye Mundewa Yesu. 21 Mundewa hoyowatasi na itewa ikulu dya wanhu hodihuwila na kumubiduchila Mundewa. 22 Simbuli siso hosihulikigwa akuya kwi kanisa dya Yelusalemu. Kosoko iyo howomutuma Balinaba yalute Andiyokiya. 23 Yakafike uko na kona Mulungu foyawamotese awanhu waya, hoyokonela na kuwaguma moyo wose wagendelele kuwa wanhu wa dihuwi kwi Mundewa. 24 Balinaba hakowa munhu muswamu na yamemile Muhe Musunhile na digoya. Itewa ikulu dya wanhu howokwegigwa kwi Mundewa. 25 Kamei Balinaba, hoyoluta Talso kumuhananga Sauli. 26 Yakamwone hoyokwija naye Andiyokiya. Nawo wose weli howokwikala na dikanisa diya kwa mwaka wose mugima, wakufusa itewa ikulu dya wanhu. Ako Andiyokiya noko kunghonga, awefusa kwinangigwa Wakilisito. 27 Ugele uwo wagonesi wengi howokwija Andiyokiya kulawa Yelusalemu. 28 Yumwedu wawo iyakwinangwa Agabo hoyokwima kwa udaha wa Muhe Musunhile, hoyolonga gakwende kalawanise fina kukwende kuwa na njala nghulu mu isi yose. 29 Awahuwile howokifumilisa chila yumwedu, kwa udaha wakwe yegale chochose uleke wawatase awandugu waye wekalage Uyahudi. 30 Kamei, howogolosa nheifo na kwigala kuwasehe wedikanisa umusada wawo kwa mikono ya Balinaba
1 Ugele uwo Mundewa Helode hakakonga kuwedasa wanhu we dikanisa. 2 Hoyomukoma kwa ipanga Yakobo, munduguse wa Yohana. 3 Yakone Wayahudi wendesigwa na chitendo chakwe chicho, hoyogendelela, hoyomukola na Petulo. (Ayo haigoloseka ugele we sikukuu ye mikate isigumigwe nungo.) 4 Yakakoligwe, hoyokwikigwa, kulangiligwa na wasilikali fitewa fine fya wasilikali wanewane. Helode hakahananga kumulafa kumwande ya wanhu honaimalile kuloka ikikukuu ye Pasaka. 5 Petulo fowile kwigelesa, dikanisa dyende dimuwombela kwa Mulungu kwa moyo. 6 Nechilo dijuwa dya longolele dijuwa Helode yahanangage yamulafe Petulo kunje kumwande ya wanhu wose, Petulo hohowa yagonile hagati ya wasilikali weli. Hakowa yohigwe minyolo mili, na wemilisi wendewokwimilisa dilango dya digelesa. 7 Chimwande malaika we Mundewa hoyokwima habehi naye, no ujelu houmulika ichumba ichiya chose che digelesa. Malaika hoyomukwafa hambafu hoyomwinusa hoyogamba, “Inuka chimwande!” Baho ni baho iminyolo yamohile mikono hoidumuka na kulagala hasi. 8 Malaika hoyomugamba, “Fala umukanda wako, fala filwatu fyako.” Hoyotenda nheifo. Kamei Malaika yuya hoyomugamba, “Fala dikoti dyako, unyandamile.” 9 Petulo hoyomwandamila kunje, ninga nghamanyile fina ago gagolosigwe ne malaika hagowa ga chawelu, hakawa yalota nyosi. 10 Howoloka ichituwo cha nghonga cha wimilisi na cha keli, hanyuma howofika kumulango we chuma wokwingilila mukaya. Umulango houkumuka uwecho du, awene howolawa kunje. Howokuwa wakugenda mwibalabala dimonga chimwande, ayuya Malaika hoyomuleka Petulo yamwene. 11 Ako noho Petulo yatangile choni chigoloseke, hoyogamba, “Hambiya nimanya chawelu fina Mundewa katuma Malaika wakwe na kunihonya mumikono ya Helode na simbuli sose awana wa Isilaelii sowende wa gojela.” 12 Yakatange nheifo hoyula kunyumba ya Maliyamu ing'ina wa Yohana iyakwinangwa Mlk o, umo wanhu wengi hawakikonghola wakuwomba. 13 Petulo hoyotowa hodi kumulango wa kunje, na mutumishi yumonga we chike yakwinangwa Loda, hoyoluta hamulango kwidika. 14 Ayo imwana we chike hoyotanga dijwi dya Petulo hosekelela lugano, ahanhu hokukumula auya umulango hoyobilima kugati na kuwatambila Petulo kema kunje hamulango. 15 Howomugamba ayuya imwana we chike, “Kwina chilalu!” Ninga imwene hoyokasana kuwa ni chawelu nofoyuwile. Nawo howomugamba, “Ayo ni Malaika wakwe.” 16 Ugele uwo Petulo yakugendelela kutowa hodi. Hanyuma yakwe howokumula u mulango, howomwona, howokisina. 17 Kamei hakawapungila umukono wanyamale, hoyowatamila ifene Mundewa foyamulafile mwigelesa. Kamei hoyowagamba wagale imbuli kwa Yakobo na ku awandugu wamonga. Kamei hoyoleuka hoyoluta hanhu hengi. 18 Ikafike nhousikusiku hahowa na lutemanuko mugati ya awasilikali kosoko ye imbuli yagoloseke ya Petulo. 19 Ichigele Helode foyamukonghile na kuleka kumona, hakawosilisa awasilikali na kulagisa wakomigwe. Kamei hakadulika kulawa Yudea mpaka Kaisaliya na kwikala uko. 20 Helode hakasuha sana na watu wa Tilo na Sidoni. Ninga wene howomwigalila wanhu. Awene wawo howomupata kunghonga, Blasito yowe ulwandi ulwawo, Blasito hakowa mumyamhala mukulu munyumba ye Mundewa. Kamei howomulutila Helode, howomutasa kuwa na igya kosoko ye iisi yawo haihula iisi ye Mundewa ku chakudiya. 21 Dijuwa dimwedu dyasaguligwe, Helode hoyofala si suke sakwe sechindewa hoyokwikala mwigoda dyakwe dye chindewa hoyolonga na wanhu. 22 Wanhu waya howotula chowe cha chinyemi howogamba, “Adino ni ijwi dyo Mulungu si dya Munhu!” 23 Baho ni baho Malaika we Mendewa hoyomukinya Helode hasi. 24 Imbuli ya Mulungu hoigendelela na kukula. 25 Balinaba na Paulo wakamale kugolosa umulimo wawo, howolewuka kahi Yelusalemu howomulonda na Yohana iyakwindigwa kahi Mlk o.
1 Kwi kanisa dya Andiyokiya hakuwa na wanhu wamonga wagonesi na walimu; mugati yawo hakowa Balinaba, Simoni yakwinagwa hanyuma Mutitu (Nigel) Lukio wa Kilene, Manaeni imwene yaleligwe hamwedu na Mundewa Helode, na Sauli. 2 Wawagolosage kumufugila Mulungu na kufunga Muhe Musunhile hoyowagamba, “Nisagulileni Balinaba na Sauli kosoko yo mulimo woniwenangile.” 3 Kamei, wakamale kuwomba na kufunga, howowechila mikono howowaleka walute. 4 Kamei, Balinaba na Sauli wakafuluse kutumigwa na Muhe Musunhile, howadulika mpaka Seleukia, kulawa uko howokwila meli mpaka ku chisiwa cha Kuplo. 5 Wakafike Salami howohubili imbuli ya Mulungu mumasinagogi ge Chiyahudi. Yohana hakowa mutasi wasi wawo. 6 Howogenda kulawa ulwandi lumwedu lwe chisiwa mpaka Pafo, ulwandi lwa keli, na uko howomufika muhai yumonga Muyahudi yekwinangwa Bali Yesu, imwene yendeyokitenda fina mugonesi 7 Ayuno hakowa hamwedu na Seligio Paulo, no mukulu wa chicho ichisiwa, hokowa munhu yena umanyi lugano. Seligio Paulo hoyowenanga Balinaba na Sauli uleke yaihulike imbuli ya Mulungu. 8 Ninga ayo imuhayi Elima (foyendeyokwinangwa kunonga ye Chiyunani), hoyogesa kuwabesa uleke yamutende yuya imukulu we chisiwa yanghahuwile na kubiduchila dihuwi dye chiKilisito. 9 Baho, Sauli imwene yenangigwe kahi Paulo, yakameme Muhe Musunhile, hoyomukumhulila ameso gakwe imuhayi, 10 hoyogamba, “Agweye kwa mudasi lugano, kwechaka chawelu! Agweye kwa mwana wa luhoma! Agwe kwa mughondo wa chila chinhu chiya che chawelu; nghukuleka hata chimwedu kwaganisa si njila se Mundewa isigoloke. 11 Hambiya, umukono we Mundewa ukuwa muchanhya yako; ukuwa chipofu na nghukudaha kona ujelu we dijuwa kwa chigele.” Chimwande chila chinhu hochikuwa kifana ifunde na chisa ukwakwe, hoyokonga kugenda kuno na kuno yakuhananga munhu yamukole mukono yamulongose. 12 Ayuya imukulu we chiwa yakone nheifo, hoyobiduka, hoyohuwila; hoyokisina lugano amafuso goyahulike muchanhya ye Mundewa. 13 Kulawa Pafo, Paulo na wayagwe howokwila meli mpaka Pelga ya Pamfulia; ninga Yohana hoyowaleka hoyokuya Yelusalemu. 14 Ninga awene howogendelela ne inhambo kuwa Pelga mpaka mukaya ya Andiyokiya Pisidia. Dijuwa dye Sabato howokwingila mwi sinagogi howokwikala. 15 Gamale kusomigwa amasomo mu chitabu cha malagiso ga Musa ne chitabu cha Wagonesi, awakulu wa disinagogi howogelegela ne nonga ino, Wandugu hona mwina mbuli ya kuwatamila wanhu uleke muwagume moyo, longeni 16 Kamei Paulo hoyokwima, hoyowonesa kwa mukono, hoyokonga kulonga Anye wanhu wa Isilaelii na wamonga wose mukumogoha Mulungu tegeleseni! 17 Mulungu wa wanhu wano wa Isilaelii hakawasagula waBabasetu; hoyowagolosa wowe itaifa ikulu ugele fowowile kuya kuutumwa Misili. Mulungu hoyowaleusa uko kwa udaha wakwe mukulu. 18 Hoyowafinyilisa kwa minyaka makumi mane munyika. 19 Hoyowamala mataifa mafungate we isi ya Kanaani, hoyowengha awo awanhu wakwe isi iya yuwe yawo. 20 Hoyiloka minyaka magana mane na makumi mashano. Kamei hoyowengha walamusi kuwalongosa mpaka ugele we mugonesi Samweli. 21 Baho, howokwenda kuwa na Mundewa, Mulungu hoyowegha Sauli, mwana wa Kisha wa dikabila dya Benyamini, yowe Mundewa wawo kwa chigele cha minyaka makumi mane. 22 Hanyuma hoyomuleusa Sauli, Mulungu hoyomusagula Daudi kuwa Mundewa wawo. Mulungu hak kumufumila kwake hoyogamba: Nimona mwana wa Yese; ni munhu imwene moyo wangu wendesigwa naye, ni munhu yakwenda yagolosa agaya gose gonikwenda kugolosa. 23 Kwandamila ulukolo lwakwe munhu yuyu, Mulungu, fina foyalongile, kawegalila wana wa Isilaelii muhonya, no Yesu. 24 Ugele nghenati yeje Yesu, Yohana hakamulongolela yakuwahubilia wanhu wose wa Isilaelii fina ikuhanangigwa walambe na kubatisigwa. 25 Yohana foyamalagisage imbuli yakwe hakawagamba wanhu, Mukudoga aniye no nani? Aniye ni yuya yomukulangilila. Imwene yakwija hanyuma yangu na aniye sinogelwe hata kudohola sisigi se filwatu fyakwe. 26 Wandugu sangu, anyeye mu wana wo lukolo lwa Abulahamu, na wamonga wose mo mukumogoha Mulungu! Imbuli ino yo uhonya igaligwa ukwetu. 27 Kosoko awakaya wa Yelusalemu hamwedu na wakulu wawo wasamumanyile imwene kuwa Muhonya, kahiwasatangile simbuli sa wasungula sikusomigwa chila Sabato. Hata neifo hawagolosa simbuli sa wasungula simemeligwe kwa Yesu yakomigwe. 28 Ninga wasonile mbuli yoyose yoyabanile iikumutenda yakomigwe, fowamulongile Pilato yamuliganise yakomigwe. 29 Kamei wakafuluse kumemelesa gose agawandigwe kosoko ye mwene, howomuhulumusa kulawa mumusalaba howomwika muchilalo. 30 Ninga Mulungu hoyomwinula kulawa kuwafile. 31 Naye kwa majuwa mengi, hoyokiyonesa kuwa wakiyandamile naye kulawa Galilaya mpaka Yelusalemu. Awo no wahomelesi wakwe hambiya ku wanhu wa Isilaelii. 32 Naseye chija hano kumwigalilani imbuli swanu; imbuli iya Mulungu yoyawahuwise awaBabasetu. 33 Kamemelesa ukwetu seye chi wajukulu wawo kwa mwinula Yesu kulawa ku wafile fina foyiwandikwe Musabuli ya keli. Agweye kwa mwanangu, Aniye diyelo nigaluka Babako! 34 Na kukumwinula kulawa kuwafile, yanghadahe kahi kuya uko na kudoda. Mulungu hakagamba nhafi: Nikukwingha simboto sisunhile se chawelu sonamuhuwise Daudi. 35 Heye, nna musisehemu simonga se Sabuli yakugamba: Nghukumuleka isusunhile wako yadode 36 Daudi mwecho hakamemelesa foyakwenda Mulungu mu ugele wakwe; kamei hoyokufa hosikigwa habehibehi na wasehe wakwe, na uwili wakwe houdoda. 37 Ninga yuya yanuligwe na Mulungu kulawa kuwafile nghadodile. 38 Kwa nheifo, mumanye, wandugu sangu, fina kwe injila ye munhu yuno imbuli yo kulekeleligwa uwihi ikuhubihiigwa ukwenu; 39 na fina chila munhu yakumwihuwila Yesu yakulekeleligwa uwihi wose; chinhu ichene chisikudahika kwa malagiso. 40 Muchilangisise, mungheje mufikiligwa nagaya gowalongile awagonesi: 41 Tegeleseni anyeye mu wolubeso, jumeni mwagilile! Kosoko nikugolosa milimo aniye mumajuwa genu, ni chinhu ichene musikudaha kuhuwila hata munhu yanghamutamilani! 42 Paulo na Balinaba wokowe wakulawa mwisinagogi awaya awanhu howowagoneka weje kahi isabato ikwandamila, walonge wongesele simbuli siso. 43 Umulango wo ukahele, Wayahudi wengi na wanhu wa wamembe gamonga awabidukile idini ye Chiyahudi howowandamilla Paulo na Balinaba. Awo watumigwa howolonga nawo howagamba wagendele kwikala wakuhuwila dihewa dye Mulungu. 44 Isabato yandamile, kalibu ikaya yose hoyokwija kuhulikisa imbuli ye Mundewa. 45 Ninga Awayahudi wakone didyo ditewa dya wanhu, howomema wifu, howopinga goyalongage Paulo na kumuliga. 46 Hata nheifo Paulo na Balinaba howolonga kwa chigosi bila kogoha, wakugamba: Hayuwa fiswanu imbuli ya Mulungu imufikileni anye we kunghonga; ninga kosoko muilema na kiyona msagiligwe uwumi wa majuwa gose, aseye chikumulekani na kuwalutila awanhu wa mataifa gengi. 47 Kosoko Mundewa hakachilagisa nhafi: Nikwika gweye uwe ujelu ku wanhu wa wamembe, uleke nwegalile wanhu uhonya kose kuchilunga. 48 Awanhu wa wamembe gamonga wakahulike imbuli iyo huwosekelela, howowutunya ulongi wa Mulunguna waya awene wasaguligwe kupata uwumi wa majuwa gose, howohuwila. 49 Imbuli ya Mulungu hoikwenela kose kose mu isi iya. 50 Ninga Wayahudi howowasongesa awanawake wakulu wene fyeyo wa mataifa gengi na awene wende womogoha Mulungu na wagosi we kaya iyo. Howokonga kuwedasa Paulo na Balinaba, howowawinga kulawa mu sehemu yawo. 51 Kamei, watumigwa howokung'unha diluli mumigulu yawo, kuwa ushahidi ukwawo, kamei howoluta Ikonia. 52 Ninga awaya wahuwile howomema chinyemi na Muhe Musunhile.
1 Ako Ikonia simbuli hasuwa fina fosowile kuya Andiyokiya; Paulo na Balinaba howoluta kwi sinagogi dya Wayahudi howolonga kwa udaha mpaka Wayahudi wengi na Wayunani howohuwila. 2 Ninga aWayahudi wamonga awalemile kuhuwila howosongesa na kuguma nyono mu mimoyo ya wanhu wa mataifa wamonga uleke wawaleme awandugu wawo. 3 Paulo na Balinaba hogendelela kwikala uko kwa udaha muchanhya ye Mundewa, naye Mundewa hoyowililila ulongi wo walongile muchanhya ye dihewa dyakwe, kwa wadahisa kugolosa ga majumo na gokisina. 4 Awanhu we kaya iyo howokitemanula: Wamonga howokifumilisa na Wayahudi, na wamonga howokuwa ulwandi lwa watumigwa. 5 Kundumo yakwe, wamonga wa wanhu wa mataifa gamonga na Wayahudi wakihasa na wakulu wawo, howolamula kuwatendela fihile awo watumigwa na kuwatowa na mawe. 6 Watumigwa wakatange imbuli iyo, howotijila Lisitila na Delibe, sikaya sa Likaonia, na sisehemu sa mubehi behi. 7 Hogendelela kuhubili imbuli iswanu uko. 8 Hakuwa munhu yumonga uko Lisitila, imwene yowile chiwete kulawa kwelekigwa kwake hakowa nghenati yagende ng'oo. 9 Imunhu yuyo yendeyomutegelesa Paulo foyendeyohubili. Paulo hoyomulanga ludole yokone fina hakowa na ihuwi dya kudaha kuhona, 10 hoyolonga kwa dijwi dya muchanhya, Ima nyima kwa migulu yako! Ayuno munhu imwene imigulu yakwe hailemaa, hoyokwinuka chimwande hoyokonga kugenda. 11 Chigele itewa dya wanhu wakone choyagolose Paulo, howokonga kujoja mu nonga ye Chilukaonia, Milungu ichijila mu sifuta sa wanhu. 12 Balinaba hoyokwinangwa Seu, na Paulo, kwa fiya imwene noyalongage, hoyokwinangwa Helme. 13 Na imutambiki wa dihekalu dya Seu dyowile kunje ye kaya hoyokwigala nghambaku na mahwanya ga maluwa hamwedu yo mulango mukulu we kaya, imwene hamwedu na ditewa dya wanhu hoyohananga kuwatambichila watumigwa. 14 Balinaba na Paulo wakamanye imbuli iyo, howodega si suke sawo na kudibilimila ditewa dya wanhu wakugamba dijwi ikulu: 15 “Wandugusetu nhani mukutenda nheifo? Ase nase cha wanhu fina nyeye. Na chabahano kuwahubili imbuli iswanu, musileke asino si sanamu muhala, mukamubidukile Mulungu imumi, Mulungu yowumbile ulanga ne iisi, ibahali na fyose fuwile umo. 16 Katali Mulungu hakaleka chila itaifa ditende fyo dikwenda. 17 Hata nheifo nghalekile kiyonesa kusimbuli si swanu soyakuwagolosela: Yakuwatonyesela ifula kulawa mulanga, kugola kwa ugele wakwe na chakudiya na kuimemesa miyoyo yenu na chinyemi.” 18 Hata walongile nheifo isowile fihufu kuwalemesa waleke kuwatambichila. 19 Ninga Wayahudi wamonga howokwija kulawa Andiyokiya na Ikonia, howowatenda wanhu wakihase nawo howomutowa mawe Paulo na kumubulumula mpaka kunje ye kaya howogamba kafulusa kufa. 20 Ninga wahuwile wakakikonghole na kumusunguluta, hoyokwinuka, hoyokuya ukaya. Nhosiku yakwe imwene na Balinaba howoluta Delbe. 21 Paulo na Balinaba wakamale kuhubili imbuli swanu ako Delibe na kupata wahuwile wengi, howokiyoha nhambo ya kuluta Andiyokiya kwa kugendela Lisitila na Ikonia. 22 Howowakangasa wahuwile wa sikaya siso na kuwaguma moyo wowe wakangale mu dihuwi, Howowagamba, ichangila chose seye chigendele mu masambasiko mengi, uleke chingile mu undewa we Mulungu. 23 Howosagula wasehe kwa chila ikanisa kosoko ya wahuwile, kamei kwa kuwomba na kufunga howoweka hasi ya wimilili we Mundewa imwene wowamuhuwile. 24 Wakalokele mu isi ya Pisidia, howofika Pamfulia. 25 Wakamale kuhubili imbuli iyo ako Penga, howoluta Atalia. 26 Kulawa uko hawasafili kwa meli howokuya Andiyokiya ahene kunghonga hawekigwa mu kwimilisi we dihewa dye Mulungu kosoko ye milimo, hambiya hawowa waimemelese. 27 Wakafike ako Andiyokiya howogolosa mulundo wa dikanisa ahanhu baho, howowatamila simbuli soyagolose Mulungu hamwedu nawo, na fyene foyawakumulile wanhu wa wamembe gamonga umulango wo kwingila mu dihuwi. 28 Howokwikala na waya wahuwile chipisi chitali hamwedu nawo.
1 Kamei wanhu wamonga hawafika Andiyokiya kulawa Uyahudi howokonga kuwafusa waya wandugu wakugamba, “Hona musigaligwe kwikumbi kwandamilo amahokelo na malagiso ga Musa musikudaha kuhonyigwa ng'oo.” 2 Imbuli ino hoikwiga kuwanga kukulu na Balinaba na Paulo wakalonge nao, howokifumilisa fina Paulo na Balinaba hamwedu na wahuwile wengi wa dikanisa dya Andiyokiya wakawona awaya watumigwa na wasehe muchanhya ye imbuli iyo. 3 Kamei dikanisa, hodiwelaga nawo wokowe wakulokela Foinike na Samalia howowatamila wanhu ifyene awamembe gamonga fowawamubidukile Mulungu. Simbuli siso hosiwendesa sana wandugu wawo wose. 4 Wakafike Yelusalemu howokalibishigwa na dikanisa, watumigwa na wasehe; nawo howowatamila gose goyagolose Mulungu hamwedu nawo. 5 Ninga wahuwile wamonga wowile we chitewa cha Mafalisayo, howokwima wakugamba, ikwendigwa wanhu wa wamembe gengi wegaligwe kwikumbi na kufusigwa kwandamila malagiso ga Musa. 6 Kamei, watumigwa na wasehe howogolosa mulundo wi waimwene uleke wailange imbuli iyo. 7 Wakamale masimulisi matali, Petulo hoyokwima, hoyogamba, “Wandugu sangu, mumanya fina kukonga Mulungu hakanisagula niye mugati yenu uleke awanhu wa wamembe wahulike imbuli Iswanu na kuhuwila kosoko ya mahubili gangu. 8 Naye Mulungu yamanyile miyoyo ya wanhu hoyokonesa fina kawafumila nawo kwa kuwengha Muhe Musunhile fina foyachinghile seye. 9 Nghagolose ubagusi wowose ukwetu na ukwawo, hakaisunha miyoyo kwa dihuwi. 10 Hambiya, nhani, kumugesa Mulungu kwa kuwatwika awo wahuwile musigo wene hata wababu setu, kahi aseye chilemeligwa kuwinula? 11 Inghowe nheifo, ninga, chikuhuwila fina aseye fina awene nawo, chikuhonyigwa kwa njila ya dihewa dye Mundewa Yesu.” 12 Chitewa chose hochinyamala twi, chikuwategelesa Balinaba na Paulo wakutamila majumo na kisina kwagohesigwe na Mulungu kwa mikono yawo mugati ya wanhu wa wamembe gengi. 13 Wakamale kulonga Yakobo hoyokonga kulonga: Wandugu sangu, nitegeleseni! 14 Simoni kachitamila fyene Mulungu kunghonga foyawagolosele wanhu wa wamembe gengi, hoyawasagula wamonga wawo wowe wanhu wakwe. 15 Imbuli ino iligana lugano na simbuli sa wagonesi fina mawandiko masunhile fogakulonga: 16 Hanyuma ya simbuli sino kukuya, nikwenda nijenge kahi aiya inyumba ya Daudi yuwile; Nikugolosa mahame gakwe na kuijenga kahi. 17 Ako awanhu wamonga wose, wanhu wa mataifa gose woniwenange wowe wangu womuhamanga Mundewa. 18 Nofo yakulonga Mundewa, iyagolosa imbuli ino dimanyike kulawa katali. 19 Kosoko iyo ulamusi wangu nowuno: Chinghawedase wanhu wa wamembe awakumubiduchila Mulungu. 20 Chiwawandikile baluwa wanghadiye fyakudiya vigumigwe wihi kwa kulafigwa kuwa filafwa ku sisanamu se milungu; waleke dihabwa, wanghadiye nyama yoyose iinyongigwe na wanghonywe sakame. 21 Kosoko simbuli sa Musa sendesihubiliwa mu chila isinagoti kwa kaya na kusomigwa mu masinagogi gose chila ijuwa dya sabato. 22 Watumigwa, wasehe na dikanisa dyose walamula kuwasagula wanhu wamonga mugati yawo na kuwatuma Andiyokiya hamwedu na Paulo na Balinaba. Kamei, howousagula Yuda iyakwinagwa kahi Balinaba, na Sila, wose wamanyikana lugano mugati ya wandugu. 23 Howowengha baluwa ino: Aseye watumigwa na wasehe wandugu senu chikuwalamusani anyeye wandugu wa wamembe gengi muwile ako Andiyokiya, Silia na Kilikia. 24 Chihulika fina wanhu wamonga kulawa kuno ukwetu wamidasani kwa simbuli sawo, wayiguma mimoyo yenu chiyangayanga. Ninga wagolosa bila kutumigwa na seye. 25 Chilamula hamwedu, chisagula wanhu wakefu na kuwatuma ukwenu hamwedu na wendigwa Balinaba na Paulo, 26 awene walafile uumi wawo kosoko ye disina dye Mundewa wetu Yesu Kilisito. 27 Kosoko iyo chikumutuma Yuda na Sila ukwenu, awano wakwenda wawatamileni awenyecho agano gochiwandike. 28 Muhe Musunhile naseye chikifumilisa chinghamutwikeni musigo kusuma agano gawagile mugamanye. 29 Munghadiye fyakudiya filafigwe kusisanamu; na kunywa sakame, munghadiye nyama inyongigwe; na muleke dihabwa. Mokuwa mugolose fiswanu munghaleka kugolosa simbuli so. Chikuwalamusani. 30 Wakamale chilagigwa awo awatumigwe, howoluta ulwandi lwa Andiyokiya, kowenange mulundo wa wahuwile, howowengha ibaluwa iyo. 31 Wakaisoma iyo ibaluwa, simbuli sakwe hosiwaguma moyo, howokonela lugano. 32 Yuda na Sila awene wowile wagonesi, howosimulila na wandungu wawo kwakuwaguma moyo na kuwasindamika kwa ugele mutali. 33 Wakamale kwikala uko kwa chigele chiguhi, wandugu wa Andiyokiya howowelaga, wakuwahangingila dihewa, kamei howokuya kuway awawatumile. 34 Ninga Sila hakalamula kusigala. 35 Paulo na Balinaba howosigala uko Andiyokiya kwa ugele muguhi, howofusa na kuhubili imbuli ye Mundewa hamwedu na wanhu wamonga. 36 Gakaloke majuwa mengi, Paulo hoyomugamba Balinaba, Chuye chikawagendele awaya wandugu mu chila kaya kochahubili imbuli ye Mundewa chikakiyonele fowakugendelela. 37 Balinaba hoyohananga wamulonde na Yohana yakwinangwa Mlk o, 38 Ninga Paulo nghendile kumulonda Mlk o, imwene yawalekile akuya Pamfulia na Kulimu kihasa nawo mumilimo yawo. 39 Hoholawanisa muwango mukali mugati yawo, kwa nheifo howokitamanuka. Balinaba hoyomulonda Maluko, howokwila meli kuluta Kuplo. 40 Naye Paulo hoyomusagula Sila, awandugu wa baho wakamale kuweka mu udimi wa dihewa dya Mulungu, hoyoleuka. 41 Mu nhambo iyo hoyolokela Silia na Kilikia yakugemisa makanisa.
1 Paulo hoyofika Delbe na Lisitila, koyekalage Mkilisito yomonga yakwinaningwa Timoseyo. Ing'ina imwene yawile muKilisito nheifia, hakowa Muyahudi; ninga iBabakwe hakowa Muyunani. 2 Timoseo hakowa na itunyo ikulu ku mugati ya wandugu wa Lisitila na Ikonia. 3 Paulo hakahananga Timoseyo yakiyandamile naye munhamo, kosoko iyo hoyomwigala kwikumbi. Hakagosa nheifo kosoko ya Wayahudi wose awekale ulwandi wa ukuya hawamanya fina iBabakwe hakowa Muyunani. 4 Ugele fowende wogenda musikaya siya hawawengha wanhu agaya malagiso galafigwe na watumigwa na wasehe akuya Yelusalemu howowagamba wagakole. 5 Nheifo, agaya makanisa ahogokongeseka mudihuwi, na ihesabu ya wawahuile hoikongeseka chila ijuwa. 6 Howogenda ulwandi lwa Fulugia na Galatiya, Muhe Musunhile hakawalemes kuhubili imbuli iyo mu si isi sa Asia. 7 Wakafike kusimhaka sa Musia, howogesa kwingila ku si isi sa Bisinia, ninga Muhe wa Yesu hoyowalemesa. 8 Kamei, howolokela Musia howoluta mpaka Tulowa. 9 Ichilo chicho, Paulo hoyokona diono, hoyokona munhu yumonga wa Mekedonia kema baho yakumutasa Loka wije Makedonia uchitase. 10 Chimwande Paulo yakone diono didyo, hochikitayalisha kuluta Makedoni bila kusululuka, chihuwila fina Mulungu kachinanga chiwegalile imbuli swanu. 11 Kulawa Tulowa hochikwila meli mpaka Samatilake, nosiku yakwe hochiguma nanga Neapoli. 12 Kulawa uko, hochiluta Filipi, kaya ya Wilaya ya kunghonga ya Makedonia, yene nheifia ni utawala wa Chilumi. Hochikwikala mukaya iyo majuwa makefu. 13 Dijuwa dye Sabato hochilawa kunje ye kaya hochiluta kunghingi ye lwanda, hachigamba nhegela hanhu ha kufugila. Hochikwikala, hochilonga na wanawake wakitang'anyila baho. 14 Mugati ya waya wachitegelesage hokowa baho mwanamuke yumonga yakumogoha Mulungu yakwinangwa Ludia, mukaya wa Tiatila yendeyogolosa uchulusi wa suke sa bafuta sa langi ya ndunghundunghu. Mulungu hoyougubula umoyo wakwe hoyogahokela agaya Paulo goyalongange. 15 Yakabatiswe mudala yuyu hamwedu ne nyumba yakwe, hoyochigoneka yakugamba, “Hona chawelu munyonile fina niye nikumuhuwila Mundewa, kalibuni ukaya ukwangu.” Hoyochidindilisa chilute. 16 Dijuwa dimonga fochalutage ahanhu ho kufugila, mundele yumonga yowile na dipepo dya kulagula hakatang'anyila nase. Mundele yowapatila wagoli wakwe fesa nyingi kwa kulagula kwakwe. 17 Kamei, yendeyomwandamila Paulo na seye, yakujoja na kugamba, “Awanhu ni watogomi we Mulungu Mukulu. Wakuwatamilani injila ya uhonyo.” 18 Hoyogolosa nheifo kwa majuwa mengi, dijuwa dimonga Paulo hakasuha, hoyomubiduchila nakugamba dipepo, Nikukugamba kwa disina dya Yesu Kilisito, mulawe yuno 1 Chiwande dipepo diya hodilawa. 19 Awagoli wa yuya mundele wakone fina dihuwi dyawo dyokupata sawo dihela, howowakola Paulo na Sila, howowabulumula mpaka kuwanhu, kumwande ya wakulu. 20 Howowasongesa kuwalamusi wakugamba, “Wanhu wano Wayahudi wakwigala fujo mukaya yetu. 21 Wakufusa mahokelo agene aseye chi wanhu we Chilumi chikulemesigwa kusihokela kahikusandamila.” 22 Ditewa dya wanhu hodikihasa nawo howowatowa. Awaya watambiki howowadegela cha Paulo si suke sawo, howogamba watowigwe fiboko. 23 Wakamale kutowigwa lugano, howokwingisigwa kugati, na musilikali wa digelesa hoyotumigwa yaweke hasi ya uwimilisi mukali. 24 Kosoko ya malagiso gago, ayo musilikali howeka kuchumba cha kugati kuchaisi, che digelesa no kuyoha migulu yawo kusingoso. 25 Ninga muchilo mugati Paulo na Sila wende wowomba na kwimba nyimbo sa kumutunya Mulungu. 26 Chimwande, hukulawanisa itetemeko dye isi ikulu, dyasingise imisingi ya digelesa. Chimwande milango yose hoikumuka ne minyolo yawohile awafungwa waya hoikilekela. 27 Musilikali wedigelesa foyenuke yakona imilango yose yamwasi, hoyogamba nhagela awafungwa wose hawowa watijile, kosoko iyo hoyosomola dipanga dyakwe na kuhananga kikoma. 28 Ninga, Paulo hoyokwinanga kwa dijwi ikulu, Unghakikome gomwecho kosoko aseye chose chabahano. 29 Yakamale kumwinanga munhu yegale taa aye msilikali hoyobilimila kugati, hoyokugwa hasi ha migulu ya Paulo na Sila akuno yakutetema kwa chogoho. 30 Kamei hoyowalongosa kunje, hoyowosa, Wakulu nitende nhani noho nihone? 31 Awene howomubidula, Muhuwile Mundewa Yesu nagwe ukuhonyigwa na inyumba yako yose. 32 Kamei, howomuhubilia imbuli ye Mundewa imwene hamwedu ne inyumba yakwe. 33 Ayuya Msilikali hoyowalonda ugele uuya we chilo, hoyowasunha malonda gawo, kamei imwene ne inyumba yakwe howobatisigwa baho ni baho. 34 Hanyuma hoyowalonda Paulo na Sila kunyumba yakwe, hoyowengha chakudiya. Imwene ne inyumba yakwe yose howogolosa shelehe kosoko hambiya hawowa wamuhuwile Mulungu. 35 Nosiku yakwe nosikusiku Mahakimu howowatuma awakulu wa wasilikali awene wakugamba, “Walekeni awanhu waya.” 36 Ayuya musilikali wa digelesa hoyomutamila Paulo; Mahakimu watuma mbuli fina mudoholeligwe. Hambiya mukudaha kulawa na kuleuka kwa digoya. 37 Ninga Paulo hoyomubidula, Hawachitowa fiboko kumwande ya wanhu ugele seye cha wanhu wa selekali ya Chilumi. Kahi hawachiguma kugati hambiya wakuhananga wachilafe kwa chinyele. Hata chidodogi! Ikuwagila weje awene awecho bahano weje wachidoholele. 38 Awaya awakulu wa wasilikali howowatamila amahakimu imbuli iyo, nawo wakahulike fina Paulo na Sila ni wanhu wa Chilumi howokogoha. 39 Kwa nheifo huwoluta kutasa musamaha na wakamale kuwalafa kugati howowatasa waleuke mukaya iya. 40 Paulo na Sila howolawa mwigelesa, howoluta kunyumba ya Lidiya, uko howokiyona na wandugu awahuwile na wakafuluse kuwaguma moyo howoleuka.
1 Kwa kulokela Amufipoli na Apolonia, Paulo na Sila howoluta mpaka Sesalonike kowile na disinagogi dya Wayahudi 2 Paulo hoyokihasa nawo fina foyasowele, howolonga nawo sabato ndatu, yakutambula mawandiko gasunhile. 3 Hoyotamila fina haimwagila Masiya kusambasigwa na kwinuligwa kulawa kuwafile. Hoyowagamba, “Yesu imwene wo nikumuhubili ukwenu no Masiya.” 4 Wamonga wawo howofumila, howokihasa na Paulo na Sila. Nheifo, itewa ikulu dya Wayunani wamogohe Mulungu hamwedu na wanawake wengi wakulu wene fyeyo howokihasa nawo. 5 Ninga aWayahudi howokona wifu; howowaliha wanhu wehile sokoni, howogolosa chitewa na kwigala fujo ikaya yose. Howoingilila nyumba ya Yasoni, wakuhuwila kuwapata umo Paulo na Sila uleke wawalafe kuwanhu. 6 Ninga wasawapatile kosoko iyo howowabulumula Yasoni na wandugu wamonga mpaka kuwakulu we ikaya, wakujoja, Awanhu wano wendewobana ichilunga chose na hambiya wowa hano mukaya. 7 Yasoni kawakalibisha ukaya ukwakwe wose wakugolosa chinyume cha dilagiso dya Kaisali wakugamba Hati kwina Mundewa yungi yakwinangigwa Yesu 8 Kwa simbuli sisi howowaguma chiyangayanga awakulu we ikaya na ditewa dya wanhu. 9 Howowatenda Yasoni na wayagwe walafe amana, kamei howowalekela. 10 Nechilo awandugu howowadindilisa Paulo na Aila walute Beleya. Chimwande wakafike uko, howoluta kwi sinagogi dya Wayahudi. 11 Awanhu wa uko hawowa wategelesaji waswamu kusuma waya wa Tesaloniki. Howoihokela imbuli iya kwa kwenda mufidoga, howokuwa wakulangisa mawandiko masunhile chila ijuwa, uleke wamanye fina agaya gowakulonga Paulo na Sila ni chawelu. 12 Wengi wawo howohuwila kahi wanawake we Chiyunani wakulu wene fyeyo na wagosi nawo. 13 Ninga, Wayahudi wa Tesaloniki wakang'amuwe fina Paulo yendeyohubili imbuli ya Mulungu ako Belea, howoluta ako, howokonga kwigala fujo na kuwasongesa matewa ga wanhu. 14 Awaya awandugu howomusindikis achimwande mhwani; ninga Sila na Timoseyo howosigala Beleya. 15 Awaya awandugu awamusindikise Paulo howoluta naye mpaka Asene. Hanyuma, howokuya ne misigililo kuwa kwa Paulo fina Sila na Timoseyo wamwandamile chimwande foikudahika. 16 Paulo foyawagojage Sila na Timoseo ako Asene, moyo wakwe houchukisigwa yakone ikaya iyo na sanamu sa milungu. 17 Awanga na Wayahudi na wanhu wamonga wendewomogoha Mulungu mumasinagogi; na chila ijuwa yende yowanga nawo sokoni hamwedu na wose waya awakisololose. 18 Wamonga awandamilage falisafa ya Epikuwo na Sitoiki howowanga naye. Wamonga howogamba, “Yakuhananga kulonga choni ayuno chilongelonge? Kosoko Paulo yendeyohubili muchanya ya Yesu na kwinuligwa kulawa mudifa, wamonga howogamba Ikonela fina yakuhubili muchanya ya milungu ya chigeni.” 19 Kwa nheifo howomulonda Paulo, howomwigala Aleopago, howogamba Chikuhananga uchitamile imbuli ino nyisha yowende ulonga. 20 Finhu fimonga fochihulike na singhutwi setu fikoneka kifan figeni ukwetu. Chikuhananga chimanye simbuli sina maloloso gaki. 21 Awakaya wa Asene na wamonga wakalage uko wendewolonda ugele wose kwa kitamila na kutegelesa mbuli nyisha nyisha. 22 Kamei Paulo hoyokwima mugatigati ya Aleopago, hoyogamba Wakaya wa Asene! Nikona fina anyeye kwa fyu fyuse, ni wanhu wa dini lugano. 23 Kosoko mukugendagenda kwangu nilanga si sinamu sa sinhambiko senu nifika masabahu iwandikigwe kwa Mulungu inghamanyike Hambiya, ayo yomukutambichila bila kumumanya, ukwenu. 24 Mulungu yombile iisi na fyose fyuwile umo ni Mundewa wa Ulanga na iisi. Imwene nghakwikala musinyumba sijengigwe na wanhu. 25 Kahi ghakutogomeligwa kwa mikono ya wanhu, kifana yakuhananga chochose chiya, kosoko imwene noyakuwengha wanhu uumi, yakuwadahisa kukeha na kuwengha chila chinhu. 26 Kulawa kwa munhu yumwedu, komba mataifa gose na kugadahisa kwikala muisi yose. Yalamula na kupanga katali lugano milaki na hoki mataifa gago gekale. 27 Hakagolosa nheifo uleke amataifa gago gamuhanange, hata fina kwa kwalabata kwalabata, uleke wamufikile. Hata nheifo Mulungu nghe hatali nase; 28 fina foyalongile munhu yumonga Mugati yakwe aseye chikala womi. Fina yumonga wenu yakutunga mashaili, foyalongile, kosoko Ase chose cha cheleko chakwe 29 Honanga seye chi wana wa Mulungu isichagile kugamba Mulungu kakifana sahabu ama fesa ama iwe, finhu fisongoligwe kwa ufundi we mwanadamu. 30 Ugele uya wa ubwalasi Mulungu hakakitenda kifana nghakugona; ninga hambiya yakuwalagisa wanhu wose wa chila hanhu walambe. 31 Kosoko kekala ijuwa doyakayowaliganisa wanhu we chilunga chose kwa chawelu, kwa imunhu yuya woyamusagule; naye kawengha wanhu wose dihuwi dye imbuli iyo kwa kumwinula kuwa kuwafile. 32 Baho, wakahulike muchanhya ya wanhu kuinuligwa kulawa kuwafile, wamonga howokwigala utani; wamonga howogamba, “Chokuhulika ku imbuli iyo.” 33 Kamei nheifi, Paulo hoyoleuka hoyowaleka. 34 Wamonga howokiyandamila naye, howohuwila mu wawo, hakowa umo Dionesio, Mwaleopago, na mwanamuke yumonga disina dyakwe Damali, na wanhu wengi hamwedu nawawo.
1 Ago gakahole, Paulo hoyoleuka Asene, hoyoluta Kolindo. 2 Ako Kolindo hoyomufika Muyahudi yumonga yekwinangwa Akula hamwedu na muke yekwinangwa Plisila, hawo wowile kulawa Stalia majuwa gago kosoko Kaisali Kilaudio hokowa yagambile Wayahudi wose waleuke Loma. Paulo hakaluta kuwona, 3 na kosoko awene wowile mafundi wakusoma mahema fina imwene. 4 Chila Sabato hakalongaga nawo mwisinagogi, na kugesa kuwakwega Wayahudi na Wayunani. 5 Wakeje Sila na Timoseyo kulawa Mekodoniya, Paulo hoyohananga kutumia ugele wakwe wose kuhubili, hoyowatamila chawelu fina Yesu no Masiya. 6 Wakakonge kuwanga naye na kukonga kumuliga, hoyolonda dikoti dyakwe hoyokonga kudikung'unha kumwande yawo yakugamba, “Munghagilila ni kosoko yenu muwecho; aniye nechaka uwihi wowose muchanhya ye imbuli ino. Kulawa hambiya nikuwalutila wanhu wa mataifa gengi.” 7 Kamei, hoyoleuka aho hoyuluta kwikala na munhu yumonga yakumogoha Mulungu yekwinangigwa Tito Yusito. Inyumba ya Tito hayuwa habehi na disinagogi diya. 8 Ninga, Kilisipo imukulu we disinagogi, hoyomwihuwila Mundewa imwene na wanhu wakwe wose. 9 Dijuwa dimonga nechilo Mundewa hoyomugamba Paulo mumagubulo, Unghogohe, gendelela kuhubili du bila kufa moyo, 10 kosoko niye nahamwedu nagwe. Hachaka munhu yakwenda yagese kukutowa kahikukubulage kosoko hano mukaya hena wanhu wengi wuwile ulwandi ulwangu. 11 Kamei, Paulo hoyokwikala uko yakufusa imbuli ya Mulungu mugati yawo kwa mwaka umwedu na nusu. 12 Ninga Galiyo yakowe mukulu wa Wilaya ya Akaya, Wayahudi howokihasa hamwedu howomukola Paulo kwa ludole na kumwigala kumahakama. 13 Howogamba, “Chimusongese munhu yuno, kosoko yakusongesa wanhu wamufuge Mulungu kwa namuna ikupingana na malagiso.” 14 Ugele Paulo nghenati yakonge kulonga, Galiyo hoyowatamila Wayahudi, Hulikiseni anye Wayahudi Hona imbuli ino chawelu yowile muchanhya ya ubanaji ama uwihi hanuwa tayali kuwahulikisani. 15 Ninga wonaga ni kuwanga du muchanhya ya masina na malagiso genu mulamule anyeye muwecho. Aniye sikuhananga kuwa mulamusi wa simbuli sino! 16 Hoyowawinga kulawa kumahakama. 17 Nawo wose howomukola Sositene yowile chilongosi we disinagogi howomutowa baho hamahakama. Ninga Galiyo nghonile imbuli iyo kuwa chinhu, hata chidodogi. 18 Paulo hogendelela kwichila ako Kolindo na wandugu waya kwa majuwa mengi. Hanyuma, hoyochilaga, hoyakwila meli kuluta Silia hamwedu na Plisila na Akula. Ako Kenkileya, hoyogeta sinjwili sakwe kosoko ye chilaho yoyekile. 19 Howofika Efeso na baho Paulo hoyowaleka Pilisila na Akila, hoyoluta kwi sinagogi, howanga na Wayahudi. 20 Howomutasa yekale nawo ugele mutali lugano, lakini nghendile. 21 Nanga, foyaleukage, hoyogamba, “Mulungu yanghenda hokwija ukwenu kahi.” Hoyoleuka Efeso kwa meli. 22 Meli hoiguma nanga, Kaisalia naye Paulo huyoluta Yelusalemu kudilamusa dikanisa, hanyuma hoyoluta Andiyokiya. 23 Hoyokwikala uko ugele muguhi kamei hoyogendelela na inhambo ya kwa kulokela ulwandi lwa Galatiya na Fulugiya yakuma moyo awefusa wose. 24 Muyahudi yumonga iyakwinangwa Apolo, yelekeligwe Alekisandilia, hoyofika Efeso. Hakowa munhu yena udaha wa kulonga na yena umanyi mwingi wa maandiko Gasunhile. 25 Hakowa yafusigwe injila iyo ya Mundewa, na hoyokuwa na motomoto, hoyosimulila muchanhya ya simbuli sa Yesu. Hoyofusa kwa chawelu hata ingawa yapatile ubatiso wa Yohana du. 26 Plisila na Akila wakamuhulike yakulonga kwa chawelu kugati ya disinagogi, howomulonda ukwawo howomufusa iyo injila ya Mulungu fiswanu lugano. 27 Apolo yakalamule kuluta Akaya, awaya wandugu howomuguma moyo kwa kuwawandichila awefusa wa Akaya wamuhokele. Yakafike uko hoyodaha kwa udaha wa dihewa dya Mulungu, kuwatasa lugano awaya awandugu awahuwile; 28 kosoko hakagendelela kwa udaha wakwe kuwasuma Wayahudi kumwande ya wanhu fina chawelu kwa Mawandiko Masunhile fina Yesu ni Masiya.
1 Ugele Apolo foyowile Kolindo, Paulo yakaloke si isi sa kuchanhya, hoyofika Efeso na uko hoyowafika wefusa wengi. 2 Hoyokusa, Togoleni, fomwahuwile hamuhokela Muhe Musunhile? Ng'o, hata kuhulika fina kwina Muhe Musunhile chisinati chihulike. 3 Naye hoyogamba, “Hambiya hamupata ubatiso wa namuna yaki? Howobidula Ubatiso wa Yohana.” 4 Naye Paulo hoyogamba, “Ubatiso wa Yohana hauwa wakonesa fina wanhu walambe. Yohana hakawagamba wanhu wamuhuwile ayuya imwene yakwija kunyuma yakwe, nong'amba Yesu.” 5 Wakahulike gago, howobatisigwa kwa disina dye Mundewa Yesu. 6 Kamei, Paulo hoyowekila mikono, Muhe Musunhile hoyowahumulukila, howokonga kulonga kwa nonga sa hayo hayo na kulafa ugonesi. 7 Wose hamwedu hawafika wanhu ikumi na weli. 8 Kwa ugele wa minyesi midatu Paulo yendeyoluta ku disinagoti hoyokuwa na ugele wa kulonga hamwedu nawo na kuwakwega muchanhya ya utawala wa Mulungu. 9 Ninga wamonga howokuwa wafudutu, howolema kuhuwila, howokonga kulonga fibi muchanhya ye injila ye Mundewa. Baho Paulo hoyokileka nawo, hoyowalonda hanghanda awaya awefusa wakwe, howosimulila nawo chila ijuwa munijuma dya masomo dya Tulano. 10 Hoyogendelela kugolosa nheifo kwa minyaka mili, wose wakwila Asia, Wayahudi na wanhu wa Mataifa gengi howodaha kuhulika imbuli ye Mundewa. 11 Mulungu hoyogolosa majumo ga kisina kwa mukono wa Paulo. 12 Wanhu wendewolonda ifitambala na sisuke simonga isene se milimo soyatumiye Paulo, howosigala kuwatamu, nawo howohonywa sinamu sawo; na waya wowile na simhepo sihile, howolawigwa na simhepo siso. 13 Wayahudi wengi wende wolafa simhepo sihile, howaluta ako nako wakugosa kuditumia disina dye Mundewa Yesu ku waya wengiligwa na si mhepo sihile. Wendewogamba Nikulonga kwa disina dya Yesu imwene woyahubili Paulo. 14 Wana mufungate wa Sekewe, kuhani Mukulu wa Chiyahudi, hawa mu wawo wagolosage nheifo. 15 Ninga dipepo dihile hodiwabidula, Nimumanya Yesu, nimumanya naye Paulo, ninga anye mwa cha nani? 16 Kamei ayuya munhu yowile na dipepo hoyowafumhila kwa ching'undi, hoyowashinda uludole. Na wawo awana wa Sikewe howotija kulawa munyumba iya wemwasi na wena malonda. 17 Kila munhu ako Efeso, Muyahudi na asiye Muyahudi, hoyohulika muchanhya ye ichituko chicho. Wose howokwingiligwa na itiso, howoditunya disina dya disina dya Bwana Yesu. 18 Wahuwile wengi howokisololosa kumwande ya wanhu na kulamba sinhenda sowatendile. 19 Wamonga howowa wakutumikia simbuli sa uhayi uko kunghonga, howokonghola ifitabu fyawo, howofisoma kumwande ya wanhu wose. Howoliganisa ibei ye fitabu fifyo, howokona ikudaha kuwa figulu fishano. 20 Kwa nheifo, imbuli ye Mundewa hoikongeseka na kuwa udaha lugano. 21 Simbuliso, sikahele, Paulo hoyolamula kuluta Yelusalemu kwa kulokela Makedonia na Akaya. Hoyogamba, “Ninghamala kufika uko kunyagila nifike na Lumi nheifiya.” 22 Kwa nheifo hoyowatuma weli wa watasi wakwe, Timoseyo na Elasito, wamulongolele kuluta Makedoniya naye hoyosigala kwa chipisi chidodogi ako Asiya. 23 Ugele wuwo noho kwalawanise mugogolo mukulu ago Efeso kosoko ya iyo injila ye Mundewa. 24 Hakuwa na munhu yakugolosa fesa, disina dyakwe Demetelio, hakowa na milimo ya kugolosa sanamu sa nyumba ya Mulungu wa chike yakwinangwa Alitemi. Umulimo uwo wende umwigalila Demetilio na wanhu wakwe we milimo faida nghulu. 25 Demetilio hoyowakonghola awo awakugosa milimo u kwakwe, hamweu na wamonga wowile ne milimo fina iyo, hoyowagamba, “Wakaya mumanya fina isawo yetu ikulawa mu uchulusi uno. 26 Hambiya, mukudaha kuhulika na kona anyeye muwecho simbuli soyakugolosa Paulo, si hano du Efeso ninga na kose Asia Imwene kawashawishi na kuwabidula wanhu wafumile fina milungu iya iigolosigwe na wanhu si milungu hata chidodogi. 27 Kwa nheifo kuna hatali ibiyashala yetu ikwende yuwe na isina dihile. Si nheifo du ila imbuli yo ikudaha kuigolosa imyumba ya Alitemi kuwa si chinhu cha itunyo. Kundumo yakwe ayo imwene ditunyo dyakwe dyenela mu Asia ne chilunga chose chikumutambichila dikuhela.” 28 Wakahulike gago, howokola nyono, howokonga kujoja: Mukulu ni Alitemi wa Efeso! 29 Ikaya yose hoimema mugogolo. Howomulonda Gayo na Alistaliko mukaya wa Makedonia, awowile wasafili wayagwe na Paulo, howotija nawo mpaka kunyuma ye miseigo. 30 Paulo imwecho hoyohananga kiingisa muditewa diya, ninga awaya awahuwile howomulemesa. 31 Wamonga wa wakulu Asia, awowile wambuya sakwe howotuma wanhu ukwakwe wamutase fina yanghakiingise kuchiwanja che miseigo. 32 Ugele uwo chila munhu yendeyolonga sakwe, ayu yakulonga nhafi, ayu yakulonga nhafi, umulunfo uya houfulugika, hata wanhu wengi wasamanyile hata isoko yo kitang'anjila kwawo. 33 Kosoko Awayahudi hawamutenda Alekisanda yachilafanise, wamonga wa wanhu mumulundo uya hawamanya no mwene. Kamei Alekisanda hoyowenulila mukono uleke yakitetee kumwande ya wanhu waya awengi. 34 Ninga wakatange fina imwene ni Muyahudi, wose kwa hamwedu howojoja, “Mukulu ni Alitemi wa Efeso!” Howogendelela kujoja nheifo kwa masaa meli. 35 Hanyuma yakwe kalani we ikaya hoyowanyamasa, hoyowagamba, “Wakaya wa Efeso,” chila munhu kamanya fina ikaya ino ya Efeso ni mwimilise we nyumba ya mulungu Alitemi na mwimilisi wa iya isanamu yalagale kulawa kulanga. 36 Hachaka yakudaha kukana simbuli sino. Kosoko iyo, mutulie. Munghagolose chochose kwa chimwandemwande. 37 Muwenanga awanhu wano ahano wasitofule inyumba ya mulungu kahikumuliga mulungu wetu we chike. 38 Honaga Demetilio na awanhu wakugolosa milimo ukwakwe wena mashitaka gawo ku wanhu wano, sabaho si mahakama na wakulu we iisi; wakishitake uko. 39 Hona mwina mbuli singi sigaleni ku fikalo fye halali. 40 Kosoko chikudaha kushitakigwa kosoko ya mugogolo uno wa diyelo, uwene usina sababu, mu mbuli ino chisikudaha kulonga mbuli ikwigutisa 41 Yakamale kulonga siso hoyofunga mulundo.
1 Umugogolo uya wa Efeso ukatuliye, Paulo hoyowenanga hamwedu awaya wahuwile, hoyowaguma moyo. Kamei hoyowelaga, hoyotamba kuluta Makedonia. 2 Hoyolokela mu lwandi lwa isi siya yakuwaguma moyo kwa mbuli nyingi. Hanyuma hoyofika Uyunani. 3 Koyekale kwa minyesi midatu. Foyendeyokitayalisha kuluta Silia, hoyomabya fina Wayahudi wende womupangila mbuli ihile; kosoko iyo hoyokuya kwakulokela Makedonia. 4 Sopatilo mwana wa Pilo kulawa Beleya, hoyokiyandamila naye, na Alistaliko na Sekundo kulawa Sesalonike, Gayo kulawa Delbe, Timoseyo, Tukiko na Tulofomo wa isi ya Asia. 5 Awo howolongola na kuchigojela ukuya Tulowa. 6 Aseye, dikahele dijuwa dye dikukuu ye mikate isigumigwe nungo, nochipanda meli kulawa Filipi gakaloke majuwa madatu hachiwawafichila akuya Tulowa. Ako hochikwikala chipisi cha ijuma dimwedu. 7 Mwijuwa dye nghonga dye dijuma, hochikitang'anyila kukumega mukate. Kosoko Paulo yendeyohananga yaleuke nhosiku yakwe, hoyolonga na wanhu, hoyogendelela kusimulila mpaka muchilo mugati. 8 Muchumba mochowile, mwigolofa, hamuwa na taa nyingi sikwaka. 9 Mwanike yumonga yekwinangwa Eutiko hekekala hedilisha ugele Paulo foyagendelelelage kulonga, Eutiko hoyokonga kusisila chidochido hanyuma sonhongo hosimukola, hoyukugwa hasi kulawa mwi golofa dya kadatu. Howomudondola kafulusa kufa. 10 Ninga Paulo hoyohulumuka hasi, hoyofunamana, hoyomusungulusila imikono yakwe ayuya imwanike yafile, hoyogamba, “Munghowe na manhonghe kosoko kwina uwumi ukali kugati yakwe.” 11 Kamei, hoyokwila kahi kugolofa, hoyomega mukate, hoyodiya. Hoyogendelela kuhubili kwa muda mutali mpaka nhosikusiku, kamei hoyoleuka. 12 Awaya wanhu howomulonda mwanike yuya ukaya ni mumi kabisa, howopata falaja nghulu. 13 Aseye hochikwila meli, hochilongola kuluta Aso, kochamanyile chomulonda Paulo. Nofyo yapangile, kosoko hakahona kufika uko kwa kulokela kuisi kwa migulu. 14 Kamei, hoyochifika uko Aso, hochimukwisa mumeli, hochiluta Mitilene. 15 Hochileuka ne meli kulawa uko, dijuwa dya keli yakwe hochifika Kio. Dijuwa dya keli yakwe hochikwima Samo, na nhosiku yakwe hochifika Mileto. 16 Paulo hakahananga kugendelela ne inhambo kwa meli bila kulokela Efeso, uleke yanghachelewe ako Asia. Hakuwa na chimwande cha kufika Yelusalemu ku sikukuu ye Pendekosite inghadahika. 17 Kulawa Mileto Paulo hoyotuma mbuli kuwasehe wa Efeso wakitang'anyila naye. 18 Wakafike ukwakwe hoyowagamba, “Mumanya fina nitumiye ugele wose hamwedu naye kulawa dijuwa diya dye kunghonga dyo nengile Asia. 19 Mumanya fyene fyonimutogomele Mulungu kwa unyekefu wose, kwa masosi ne makugutu ganipatile kulawa mu mipango na si hila sa Wayahudi. 20 Mumanya fina sogohe hata chidodogi kuwahubilia kumwande ya wanhu wose na musinyuma senu na kuwafusa chochose ichene chikudaha kuwataseni. 21 Niwasugula wose Wayahudi, nheifo na wanhu wa wamembe gengi, wamubidukile Mulungu na kumuhuwila Mundewa wetu Yesu. 22 “Hambiya, hulikiseni! Aniye kosoko nikumuhulika Muhe, nikuluta Yelusalemu bila kumanya aganipata uko. 23 Chonimanyile du nifina Muhe Musunile yakunitamila chawelu mu chila kaya fina fifungo na magayo fikunigojela. 24 Ninga, sikona fina uwumi wangu ni chinhu lugano ukwangu muladi nimemelese kutumigwa kwangu na kumala umulimo uya woyaninghile Mundewa niugolose, wokuhubili imbuli swanu ye dihewa dya Mulungu. 25 “Nendenigenda ako nako muchiligati yenu nikuhubili utawala wa Mulungu. Hambiya, ninga, hachaka hata yumwedu wenu yakwenda yanyone kahi. 26 Kwa nheifo diyelo dino nikumutamilani chawelu chawelu, fina inghowa yumwedu wenu yanghagilila, aniye sina wihi wowose kusakame ye munhu yuyo. 27 Kosoko sogohe hata chidodogi kuwatangasila Mulungu foyalongile. 28 “Muchilangilile muwecho; mudidime ditewa diya idyene Muhe Musunhile hamwikani anyeye mudimise. Didimeni dikanisa dya Mulungu adyene dyoyakipatile kwa sakame ye Mwanagwe. 29 Nimanya fiswanu lugano fina aniye fonikuleuka, mausi makali gamwingilani na wachaka ubasi kuditewa didyo. 30 Hata kulawa mugati yenu wakwenda walawanise wanhu awene wakwenda walonge mbuli sa udasi na maganisa wanhu na kuwagolosa wawandamile awene du. 31 Kosoko iyo, muwe meso, mukugelegela kwa minyaka midatu, chilo nemisi, sisokile kumufusani chila yumwedu wenu. 32 “Hambiya nikumulekani mu mikono ya Mulungu ne imbuli ye dihewa dyakwe. Kenawo udaha wokuwajenga nyeye na kuwadahisa musipate asiya simboto soyawekile wanhu wakwe. 33 Aniye sitamani fesa, kahisahabu, kahisuke sa munhu. 34 Anye muwecho mumanye fina imikono yangu ino itumika ku mahitaji gangu na gawaya wowile hamwedu na niye. 35 Kwa njila sose niwonesani fina kwa kugolosa imilimo nheifino yawagila kuwasa wechaka ludole, na kugelegela simbuli se Mundewa Yesu imwecho: ‘Ibeka kulafa, kwina chinyemi kusuma kuhokela!’” 36 Yakamale kulong nheifo, Paulo hoyofugama hamwedu nawo wose, hoyowomba. 37 Wose wendewolila: Howomusungulusila mikono yawo howomwilaga kwa kumunonela howomukumbatila. 38 Imbuli yawenghile usungu lugano hayuwa yoyalongile fina wasikwenda wamone kahi. Kamei, howomusindikisa mpaka kumeli.
1 Chikamale kilaga nawo, hochikwila meli hochiluta bila kwingila hamonga mpaka kosi; Nhosiku yakwe hochifika Lodo na kulawa uko hochiluta Patala. 2 Uko hochifika meli ikuluta Foinike, nheifo hochikwila, hochisafili. 3 Chakafike ahanhu ahene chikudaha kuyona Kuplo, hochogendela ulwandi lwakwe lwa kwekulu hochiluta Silia. Hochiguma nanga mukaya ya Tilo ahene imeli iya hayuwa ihulumisigwe misigo yakwe. 4 Hochikitang'anyila na wahuwile uko, hochikwikala hamwedu nawo kwa ijuma dimwedu. Awahuwile wawo wakulonga kwa udaha wa Muhe, howomugamba Paulo unghalute Yelusalemu. 5 Ninga, ugele wetu ukahele hochileuka, chose hamwedu na wanawake na wana wawo, howochisindikisa mpaka kunje ye ikaya. Chikafike mhwani chose hochifugama chochiwomba. 6 Kamei, hochichilaga; aseye hochikwila meli; awene nawo howokuya ukwawo. 7 Aseye hochigendelela ne nhambo yetu kulawa Tilo hochifika Tolemai, ahene hochawalamuse awandugu setu, hochikwikala nawo ijuwa dimwedu. 8 Nhosiku yakwe hochileuka hochiluta Kaisalia. Ako Kaisalia hochiluta ukaya kwa muhubili Filipo. Aye hakowa yumwedu wa waya mufungate wasaguligwe Yelusalemu. 9 Hakowa na wana wadatu, we chike, awene wowowile ne chinghwa che ugonesi. 10 Chikekale uko majuwa mengi, mugonesi yumonga yekwinangwa Agabo, hoyofika kulawa Uyahudi. 11 Hoyochijila hoyolonda mukanda ya Paulo hoyokiyoha mumikono na mumigulu, hoyogamba, “Muhe Musunhile yakugamba nhafi: ‘Awayahudi kuya Yelusalemu wakamoha fina nheifino imunhu mwenye mukanda uno na kumulaguma mumikono ya wanhu wamembe!’” 12 Chikahulike nheifo aseye na waya wamonga wowile baho hochimukongelesa Paulo yanghalute Yelusalemu. 13 Ninga imwene hoyobidula, Mukuhanga kutenda nhani? Natayali si kugumigwa kugati du akuya Yelusalemu, ninga hata kufa kosoko ye Mundewa Yesu. 14 Chikalemeligwe kumukongelesa hochinyamala na kugamba du, Foyakwenda Mulungu figoloseke. 15 Chikekale bahaya kwa ugele muguhi, hochikoha misigo yetu hochigendelela ne nhambo kuluta Yelusalemu. 16 Wamonga mugati ya waya wefusa wa Kaisalia hochilutanya, howochigala kunyumba ya Mnasoni mukaya wa Kupulo na hakowa mwifusa kwa majuwa mengi. 17 Chikafike Yelusalemu, wandugu wahuwile hawachihokela fiswanu lugano. 18 Nosiku yakwe Paulo hachilutanya kumulamusa Yakobo, na wasehe wose wa dikanisa hawowa uko nheifia. 19 Yakamale kulamusa Paulo hoyowatamila chikamilifu simbuli Mulungu so soyagolose muchiligati ya wamembe kwa njila ya utumishi wakwe. 20 Wakahulike gago howomutunya Mulungu. Kamei, howomutamila Paulo ukudaha kona fina hambiya kwina figulu fingi fya Wayahudi awene hambiya wahuwile na wose wawo wakola fiswanu malagiso ga Musa. 21 Wahulika simbuli sako fina ukuwafusa Wayahudi wakwikala na wamembe gengi fina wanghawegale kwikumbi wana wawo kahiwanghandamile mila sa Wayahudi. 22 Hambiya, yokuwa nhani? Hachaka chifiso wakuhulika fina kufulusa kufika hano. 23 Hambiya, ugolose fochikukutamila. Chenawo hano wanhu wane awene wekile chilaho. 24 Kihase nawo mu nhambiko yo kitakasa, ukalihe na diyombe dikuhanangigwa, kamei wagetigwe si njwili sawo. Kwa nheifo wanhu wose wakwenda wamanye fina simbuli siya sowatamiligwe muchanhya yako sachaka musingi wowose, na fina agweye gomwecho ukuishi na kwandamila shelia na malagiso ga Musa. 25 Ku awa awanhu wa wamembe gengi awejile awahuwile, chifulusa kuwegalila baluwa chikuwatamila simbuli sochilamule: Wanghadiye chochose chitambikiligwe milungu ya udasi, wanghanywe sakame, wanghadiye nyama ya inyama inyongigwe na waleke dihabwa. 26 Kamei, nhosiku yakwe Paulo hoyowalonda waya wanhu hoyogolosa nhambiko hamwedu nawo, kamei hoyokwingila kwi Hekalu hoyolonga muchanya yo kumala majuwa go kitakasa na sabihu ikuhanangigwa ilafigwe kwa chila yumwedu wawo. 27 Ugele amajuwa go mufungate gokowe habehi kuhela, Wayahudi walawile ku isi ya Asia hawamwona Paulo mwihekalu. Howosongesa nyono muditewa dyose dya wanhu, howomukola, 28 howojoja Wakaya wa Isilaeli, taseni, taseni! Ayuno noyuya munhu yakufusa wanhu chila hanhu simbuli sikupinga wanhu wa Isilaelii, sikupinga malagiso ga Musa na ahanhu hano hasunhile. Hata hambiya kawengisa wanhu wa wamembe gengi Mwihekalu na kahaguma uchafu ahanhu hano hasunhile. 29 Isoko yakulonga nheifo ni kosoko hawamona Tulofimo mukaya wa Efeso hamwedu na Paulo mukaya, howogambe nhegela Paulo hakamwigisa mwihekalu. 30 Ikaya yose hoyikwenela mugogolo, wanhu howokwija kulawa chila ulwandi lwe ikaya, howomukola Paulo, howomubulumula howomulafa kunje ye dihekalu, baho ni baho imilango ya Dihekalu hoyihindigwa. 31 Howowa tayali kumukoma, ninga simbuli so hosimufichila imukulu wa dijeshi we Loma fina Yelusalemu yose imema mugogolo. 32 Chimwande imukulu wa jeshi hoyowalonda wasilikali na cholongosi wa wasilikali igana, hoyodifikila diya ditewa dya wanhu. Nawo wakone ukulu wa dijeshi na wasilikali, howoleka kumutowa Paulo. 33 Imukulu wa dijeshi hoyomulutila Paulo na kumukola na kulagisa yohigwe minyolo mili. Kamei hoyokusa, Ni munhu waki yuno, na katenda choni? 34 Wamonga mwitewa diya wende walabwata chinhu chino na wamonga chinhu chingi. Kosoko ye mugogolo uwo, hoyodaha kumanya ichotoko checho. Nheifo hoyowatuma wanhu wakwe wamwigale Paulo kugati ye ngome. 35 Paulo yakafike mungasi, wasilikali haiwagela kumwinula kosoko yo umugogolo wa wanhu. 36 Kosoko itewa ikulu dya wendewokwandamila wakujoja Mukomeni, yakaleuke! 37 Ugele fowendewomwingisa mungome, Paulo hoyomutasa imukulu wa dijeshi yakugamba, “Nikudaha kukutamila chinhu? Ayuya imukulu wa dijeshi hoyomusa Kudaha Chiyunani? 38 Agweye si yuya Mumisi imwene majusi hano hakegala kasi na kuwalongosa wakomaji figulu fine mpaka kunyika? 39 Paulo hoyobidula, Aniye na Muyahudi; nelekeligwa Talso ku isi ya Kilikia, anie na laia wa kaya ikuheshimiwa. Dede, nileke nilonge na wanhu. 40 Ayuya imukulu wa dijeshi hoyomuleka yalonge, kwa nheifo Paulo hoyokwima mu ngasi, hoyowenulila mikono awaya awanhu wakanyamale posi, hoyokonga kulonga nawo kwa Chiebulaniya.
1 “Wandugusangu na waBabasangu, munitegelese fonikilongela kumwande yenu.” 2 Wakahulike yakulonga nawo kwa Chiebulaniya hawagendelela kunyamala posi kusuma kunghonga. Kamei hakawagamba; 3 Aniye na Muyahudi, nyelekigwa Talso akuya Kilikiya, ninga nikulila mukaya iyino na kufusigwa ne Mufusa Gamaliyeli honifusigwa na kumanya lugano amalagiso ga waBabasetu, na chilafa lugano kwe Mulungu fina nyeye mose diyelo. 4 Honiwedasa kahi kuwakoma awaya awandamilage Injila ino, na kuwoha na kuwegala kumagelesa wagosi na wanawake. 5 Ifene fowakuhomelela makuhani na dibalasa dyose dya wasehe. Kulawa ukwawo honikwinghigwa ibaluwa kuwandugu waya honiluta mpaka Damesiki kuwalonda awaya awowile uko mpaka Yelusalemu wohigwe, uleke waliganiswe. 6 “Honikonga inhambo yangu, nikasegele habehi na Damesiki, saa ya mutandatu nehemisi, honikona ujelu mukulu lugano kulawa kulanga unisunguluta kosekose. 7 Honikugwa hasi, honihulika ijwi dikugamba, ‘Sauli, Sauli, nhani ukunyidasa? ’ 8 Honibidula, ‘Gwegwe nani Mundewa?’ Hoyonigamba, ‘Aniye no ni Yesu wa Nasaleti, woukwidasa.’ 9 Hambiya awaya awowile hamwedu naniye, hawawona ujelu du ninga dijwi diya wasadihulike dya yuya yalongage naniye. 10 Hoyogamba, ‘Nitende nhani Mundewa?’ iMundewa hoyonigamba, ‘Inuka ulute Damesiki na uko ukweda utamiligwe gose agekigwe kosoko yako ugagolose.’ 11 Nikowe sikudaha kona kosoko ya ukali wa ujelu uya wonyonile, honilongosigwa kwa kukoligwa mukono na waya awowile hamwedu naniye hochikwingila Damesiki. 12 Uko hakuwa na munhu yakwinangigwa Ananiya, munhu yakumogoha Mulungu, yakwandamila malagiso getu, imwene yuyo hakowa munhu muswanu hakendigwa naWayahudi wose awekale uko, 13 hoyonijila hoyokwima habehi na niye, hoyonigamba, ‘Mundugusangu Sauli, hokela kona kwako na disaa didyo ameso gangu hogogubuka honikona.’ 14 “Hoyogamba, ‘I Mulungu wa waBaba setu kakusagula agweye umanye inyenda yakwe, kumwona imutogomi wakwe yaliganile na kumuhulika imwene imwenecho yakulonga kwa mulomo wakwe; 15 kosoko ukuwa muhomelesi wakwe kuwanhu wose muchanhya ya gowonile na go uhulike. 16 Hambiya ukugoja choni? Inuka ubatisigwe, usunhwe uwihi wako kwa kwinanga disina dyakwe.’” 17 “Nikoye Yelusalemu ugele nikutasa mwihekalu, hanyona majumo, honimona yakulonga naniye, 18 Golosa chimwande uleuke Yelusalemu, kosoko wasikwenda wakuhulike uhomelesi wako muchanhya yangu. 19 Kamei hanigamba, ‘Mundewa, awene awenecho wamanya fina chila isinagogi haniwoha na kuwaguma mwigelesa awaya awakuhuwile, 20 na ugele isakame ya Sitefano imuhomelesi wako foyalafigwe, ani nayi hanyuwa nyimile baho, nikufumila, inghomigwa yakwe, na kulekeligwa sisuke sa waya wamukomage.’ 21 “Hoyonigamba, ‘Leuka; kosoko nikukwigala kutali ku wamembe.’” 22 Kulawa kunghonga mpaka imbuli ino hawamutegelesa; kamei howekwinula amajwi gawo na kugamba, “Muleuse muchilunga! Kosoko nghagile kuwa mumi!” 23 Hawagendelele kujoja na kwinula sisuke na kutimula diluli muchanhya, 24 imukulu wa wasilikali wose hakalagisa wamukole Paulo wamwigale kwikigo kugati na kumujola mikotya uleke wamanye isoko iikuleka awanhu wakumujojoweka nheifo. 25 Ninga hawamoha ne mikowa ye singhingo, Paulo hoyolonga na mukulu we chitewa cha wasilikali igana dimwedu iyemila habehi naye, “Togola ikudahika kumujola imunhu iMulumi ugele nghenati yaliganiswe?” 26 Ugele ayuya imukulu we ichitewa cha wasilikali wose, hoyomugamba, “Mukuhananga mugolose choni? Kosoko imunhu yuno ni Mulumi.” 27 Kosoko iyo imukulu wa wasilikali wose, hakeja na kumusa, “Nitamile agwe kwa Mulumi?” Hakagamba, “Heye.” 28 Imukulu wa wasilikali wose hakabidula, “Aniye nigula Ulumi kwa mapesa mengi.” Paulo hakagamba, “Aniye nyelekigwa Mulumi,” 29 Kosoko iyo awaya awanhu awahanangage wamusilise hawatimuka wose chimwandemwande; ayuya imukulu wa wasilikali wose naye hakogoha, kosoko hakatanga fina iPaulo hakowa Mulumi naye fina hakamoha. 30 Ninga ikowe nhosikusiku uleke yamanye ichalekile Wayahudi wamusongesa, hakamudohola, na kulagisa makuhani wakulu na dibalasa dyose wakitanganyile, hoyomwigala Paulo, hoyomwika kumwande yawo.
1 Paulo hoyowang'olela meso awaya awadibalasa, kamei hoyokonga kulonga, “Mpaka diyelo nafi nigendelela kwikala na moyo muswamu kumwande ye Mulungu.” 2 Baho iMutambiki mukulu Anania hoyowalonga awaya awemile habehi na Paulo wamutowe kofi mumulomo. 3 Kamei Paulo hoyomugamba, “Mulungu imwecho yakwenda yakutowe kofi agweye goufanile lukasi lubakigwe swakaya! Ukudahani kwikala baho uniliganise chishelia na gweye gomwecho ubana ishelia kwa kugamba nifowigwe?” 4 Awanhu awemile baho howomugamba Paulo, “Ukumuliga iMutambiki mukulu wa Mulungu?” 5 Paulo hoyobidula, “Wandugu sangu samanyile fina imwene ni kuhani mukulu. Kosoko amawandiko gagamba nhafi: ‘Unghalonge fihile muchanhya ye mutawala wa wanhu wako.’” 6 Ninga ugele uwo Paulo yakamanye fina wamonga wa wanhu wadibalasa diya ni Masadukayo na wamonga ni Mafalisayo. Kamei, hoyokwinula dijwi kumwande ya Dibalasa, “Wandugu sangu aniye na Mufalisayo. Aniye nigaliku balasa dya ulamusi, kosoko nikuhuwila fina awanhu wakawokwinuka.” 7 Yakalonge nheifo, howokonga kuwanga lugano Mafalisayo na Masadukayo, umukutano houkitemanuka matewa meli. 8 Isoko iyecho hayuwa aino, Masadukayo wakugamba kwichaka kwinuka wanhu wafile, kwichaka malaika, na kwichaka Muhe, ninga Mafalisayo wakuhuwila gose madatu. 9 Ichowe hochikongeseka wamonga wa walimu we shelia we chitewa cha Mafalisayo howokwima na kulafa malalamiko gawo kwa ludole. “Chisikona chochose chihile mwi munhu yuno; ikudahika nhagela Muhe au malaika kalonga naye?” 10 Kuwanga hokukuwa kwingi mpaka imukulu wa wasilikali we nghondo hoyokogoha fina wakudaha kumudega fihindihindi. Kosoko iyo hoyowatuma wasilikali wakwe wengile muchiligati cha ditewa diya, wamulafe Paulo na kumuwisa kugati ya digelesa. 11 Ichilo chandamile Mundewa hakema habehi na Paulo, hoyomugamba, “Kiinghe moyo! Kosoko fina founihomelela ahano Yelusalemu, ukwenda utende nheifo ukaya ya Lumi.” 12 Kukoche Wayahudi howogolosa chikalo cha chinyele. Howochilaha: Chisikudiya kahikunywa mpaka ma chimalile kumukoma Paulo. 13 Wanhu wafike makumi mane wakifumilise injama yo kugolosa nheifo. 14 Kamei howoluta kuwatambiki wakulu na wasehe, howogamba, “Aseye chichilaha fina chisikuwonja chochose kumilomo yetu mpaka baho ma chimalile kumukoma Paulo. 15 Hambiya, anyeye na Dibalasa mutume mbuli kwi mukulu wa dijeshi,” yamwigale Paulo ukwenu mukitende kifana mukuhananga kumanya simbuli sakwe chikamilifu ku imwene. “Chatayali kumukoma ugele yakali nghenati yafike habehi.” 16 Ninga imwana we munduguse wa Paulo hoyohulika simbuli umupango uwo; kwa nheifo hoyokwingila kwigelesa, hoyomutamila Paulo injama iyo. 17 Paulo hoyomwinanga yumwedu wa wasilikali hoyomugamba, “Mulonde mwanike yuno mwigale kwi mukulu wa dijeshi, kena mbuli yakumutamila.” 18 Musilikali homugala imwanike yuya hoyomulongosa mpaka kwi mukulu wa majeshi, hoyogamba, “Ayuya imufungwa Paulo kanyinanga hoyonitasa nimulete imwanike yuno ukwako kosoko kena mbuli ya kukutamila.” 19 Imukulu wa dijeshi homukola mukono imwanike yuya hoyoluta naye hanghanda, hoyomusa, Kwina choni chokunitamila? 20 Imwene hoyogamba, “Awayahudi wakifumilisa wakutase umwigale Paulo ku Dibalasa dikuhananga dipate simbuli sakwe fiswanu. 21 Ninga agweye unghafumile kosoko kwina wanhu wengi kusuma makumi mane wakiyohile kumukola kwa ludole. Wachilaha fina wasikudiya chinhu ama kunywa chinhu mpaka wowe wamalile kumukoma. Hambiya wakiyoha wagojela du ulamusi wako.” 22 Imukulu wa dijeshi hoyomuleka yalute hoyomusugula fina yanghamutamile munhu wowose fina kamwigalila imbuli iyo. 23 Baho, imukulu we dijeshi hoyowenanga wasilikali weli hoyowagamba, “Weke tayali wasilikali magana meli, na wakukwila si nyumbu makumi mufungate, na wasilikali magana meli we migoha, walute Kaisalia; muwe tayali kuleuka, ugele isaa tatu inghati ifike diyelo neichilo. 24 Ikeni nyumbu nghefu kosoko ya Paulo; mumwigale digoya kwa Felisi, imukulu we iyisi.” 25 Kamei hakawandika baluwa ku mbuli ino: 26 Aniye Kilaudio Lusia nikukuwandichila agweye mukulu Felisi: Mukulu we iisi Nikulamusa! 27 Wayahudi hawamukola munhu yuno na hawowa habehi na kukoma nanga satamiligwe fina ni mukaya wa Chilumi, kwa nheifo honiluta na wasilikali na honimuhonya. 28 Nikahanange kumanya imbuli ilekile womushitaki gawo muchanhya yakwe, honimwigala kwi Balasa dyawo dikulu. 29 Honikona fina mashitaka agecho hagowa ga kuwanga muchanhya ya finhu fingi fye sheliya yawo, kwa nheifo sonile fina kagolosa chochose chiya ichagile yakomigwe ama yohigwe mwigelesa. 30 Nikatamiligwe fina Wayahudi hawagolosa njila ya kumukoma, honilamula kumwigala ukwako. Honiwagamba awashitaki wakwe wagale mashitaka gawo kumwande yako. 31 Kamei awo awasilikali howomulonda Paulo fina fowalagisigwe. Howomwigalaichilo chicho mpaka Andipatili. 32 Nhosiku yakwe wasilikali we migulu howokuya kunghambi, howowaleka awaya awasilikali awakukwila si nyumbu wagendelele ne inhambo hamwedu na Paulo. 33 Wakafika Kaisalia howomwingha yuya imukulu we iisi ibaluwa iya na kumwika Paulo mu udaha wakwe. 34 Felisi yakamale kuisoma ibaluwa iya, hoyowosa Paulo kalawa iisi yaki. Yakatamiligwe fina kalawa iisi ya Kilikia, 35 hoyogamba, “Notegelesa imbuli yako ma wafulusekwija awashitaki wako.” Kamei hoyolagisa Paulo yekigwe wimilisi mwikumbo dya Helode.
1 Gakaloke majuwa mashano, iMutambiki mukulu Anania hoyokwija Kaisalia hamwedu na wasehe wakefu na wakili yumwedu wa shelia iyakwinangwa Telitulo. Howomulutila ayuya imukulu we iisi howomutamila amashitaka gawo muchanhya ya Paulo. 2 Paulo hoyokwinangigwa na Telitulo, hoyokumula mashitaka nhafi: Mukulu Felisi, ulongosi wako muswanu ugolosa mabadiliko agawagile mwitaifa dyetu chila hanu chihokela dino kwa moyo wa ilumbo. 3 Chila hanu na chila ugele chikuhokela dino kwa moyo wa ilumbo. 4 Ninga chinghagilise umuda wako kahi, chikukutasa ku uswanu wako, utegelese ulongi wetu. 5 Chitanga fina imunhu yuno niwakogoha lugano. Imwene yukukonga migogolo muchiligati ya Wayahudi chila hanhu, muchilunga chose kasi ni chilongosi we chitewa cha Wanasaleti. 6 Kahi hakagesi kuchafula dihekalu, nase hochimukola, 7 “Ninga Lisiya Ichilongosi hoyeja na kumuleusa mumikono yetu kwa ludole.” 8 Kwa kumusamusa agweye gomwecho ukwenda wone pwii simbuli sino sose isene sochikumushitaka. 9 Nawo Wayahudi howofumila fina chawelu foyalongile yuya amashitaka gago. 10 Kamei imukulu we iisi hoyomonesa Paulo kuwa yakudaha kulonga. Naye Paulo hoyogamba, “Nikonela kitetea kumwande yako, fina kosoko nimanya fina mulimo wa mulamusi wa ditaifa dino kwa minyaka mingi. 11 Ukudaha kuhananga ukweli fina gasilokile majuwa ikumi na meli du galokile fonalutile kufuga Yelusalemu. 12 Wayahudi wasinifikile nikuwanga na munhu wowose. Wasanifikile nikusongesa wanhu mwihekalu, ama mumasunagogi gawo, ama ahanhu hengi hohose mukaya iyo. 13 Hata wasikudaha kuhomelela amashitaka gowalafile muchanhya yangu. 14 “Ninga chino nochonikufumila kumwande yako: Aniye nikufuga Mulungu ku Njila yo wagumba ya usushi. Nikufuga Mulungu wa waBaba setu, nikuhuwila chila chinhu chiwandikigwe mu fitabu fye sheliya na fya wagonesi. 15 Aniye nikumuhuwila Mulungu imwene, awa nawo wakumuhokela, fina kwina kwinuligwa kwa wanhu wafile, awaswamu na wehile. 16 Kosoko iyo nikitahidi kuwa na moyo muswanu kwa Mulungu na kuwanhu. 17 “Nikekale kutali chipisi cha minyaka mikefu, honikuya Yelusalemu na kwigalila ditaifa dyangu sadaka na filafya. 18 Fonagolosage nheifo noho wanifikile mwihekalu nigolose difugilo dyo kitakasa. Kusowile na itewa dya wanhu kahimugogolo. 19 Ninga hakuwa Wayahudi kulawa iisi ya Asia; awo no yowile fiswanu wowe bahano kumwande yako na kulafa mashitaka gawo hona wena chochose chokulonga ku niye. 20 Ama waleke wano walonge dikosa dyowonile ukwangu fonyemile kumwande ya Dibalasa dyawo dikulu, 21 ninga simbuli sino sonalongile fonyemile kumwande yawo: ‘Mukuniliganisa diyelo dino kosoko yo kolelesa fina awafile wakawokwinuligwa.’” 22 Baho, Felisi imwecho hakaimanya oyo Injila iswanu, hoyokwimisa dishauli dyo. Hoyowagamba, “Nikanilafa ulamusi wangu muchanhya ye dishauli dino ugele Lusia mukulu wa dijeshi foyakwija hano.” 23 Kamei hoyomulonga ayuya chilongosi wa wasilikali we inghondo yamwike Paulo kugati, ninga yowe na uhulu chiyasi, na wambuya sakwe wanghalemesigwe kumwingha fyoyakuhitaji. 24 Gakaloke majuwa makefu, Felisi hoyofika hamwedu ne muke Dlusila, yowile Muyahudi. Holagisa Paulo yegaligwe, hoyomutegelesa yakulonga muchanhya ya kumuhuwila Yesu Kilisito. 25 Ninga Paulo foyakongile kulonga muchanhya ya kuliganila, kuwa na chiyasi, muchanhya ya uligaswe ukwija, Felisi hoyokogoha hoyogamba, “Kwa hambiya ukudaha kuluta; nokwinanga kahi ninghapata luneka.” 26 Ugele uwo yendeyohuwila fina Paulo komwingha fesa. Kosoko iyo hakagendelela kumwinanga na kusimulila naye chila ugele. 27 Ikaloke minyaka mili, Palikio Festo hoyolonda ahanhu ha Felisi, hoyokuwa mukulu we iisi. Kosoko hakenda kuwendesa Wayahudi, Felisi hoyomuleka Paulo mwigelesa.
1 Dijuwa dya kadatu yakafike Kaisali, Festo hoyoleuka kuluta Yelusalemu. 2 Watambiki wakulu na filongosi wa Wayahudi hawalonga naye muchanhya ya mashitaka gondeyoshitakiigwa Paulo. Howomutasa kwa dede, Festo 3 yawagolosele uswanu kwa kumwigala Paulo Yelusalemu. Howadiya njama wamukome hona yowile munjila. 4 Ninga Festo hoyobidula, Paulo yakusigala kuya Kaisalia mwigelesa ani nani nikwenda nilute uko majuwa si mengi. 5 Walekeni filongosi wenu walute uko hamwedu naniye wakafe mashitaka gawo hona yagolose dyodyose dihile. 6 Festo yakamale kwikala nawo, majuwa gafikile munana ama ikumi nhafi, kamei hoyoyokuya Kaisalia. Nhosiku yakwe hoyoluta kwi balasa hoyolagisa Paulo yegaligwe kugati. 7 Ugele Paulo yakeje, Wayahudi awalawile Yelusalemu howokonga kulafa mashitaka mengi, masito agene gowasadahile konesa fina ni chawelu. 8 Kukitetea Paulo hoyogamba: Aniye sigolose ikosa dyodyose muchanhya ye sheliya ye Chiyahudi, ama dihekalu, ama muchanhya ya Kaisali. 9 Festo hoyohananga kuwendesa Wayahudi, kwa nheifo hoyomusa Paulo Togola! Kokwenda kuluta Yelusalemu uleke ukahukumiigwe uko kumwande yangu muchanhya ya mashitaka gano? 10 Paulo hoyobidula, Nima hamwande ya mahakama ga Kaisali, na bahano no hanogele ninghigwe hukumu. Fina foumanyile fiswanu, siwagolosele Wayahudi uwihi wowose. 11 Ninga, hona nyoneke na ikosa dyodyose dinogele kufa, sikutasa kulekeleligwa kutendeligwa nheifo. Ninga hona kwichaka chawelu mu mashitaka, kwichaka yakudaha kuniguma mumiko yawo. Nikukanha lufaa kwa Kaisali! 12 Baho, Festo yakamale kusimulila na washauli wakwe, hoyomugamba Paulo, Kukanha lufaa kwa Kaisali, haya ukuluta kwa Kaisali. 13 Majuwa makefu hanyuma Mundewa Aglipa na Belinike howofika Kaisalia, uleke walafe heshima sawo kwa Festo. 14 Howokuwa uko majuwa makefu, naye Festo hoyomutamila Mundewa simbuli sa Paulo. Henamunhu yumonga hano imwene Felisi hakamuleka mwigelesa. 15 Nikalute Yelusalemu, watambiki wakulu na asehe wa Wayahudi howomushitaki na kunitasa nimuhukumu. 16 Ninga niye honiwabidula fina si jadi ya Walumi kumulafa munhu yenghigwe asabu ugele iyekushitakigwa nghenati yakitang'anyile na awashiliki wakwe chimeso meso na kwinghigwa luneka lwa kitekea muchanhya ya gago mashitaka. 17 Wakafike baho sachelewe, ninga honigolosa chikao kumahakama, nhosiku yakwe honilagisa imunhu yuyo yegaligwe. 18 Awashitaki howokwima lakini wasalafile mashika gehile fina fonendenidoga. 19 Ninga du howowa na lukani lwa mbili, si dini yawo na sa munhu yakwinangigwa Yesu yafile, ninga Paulo yakukolelesa fina ni mumi. 20 Nilemeligwa kumanya dyo kugolosa mu imbuli iyo. Kamei honimusa Paulo hona yakwenda kuluta kama hakama akuya Yelusalemu kosoko ya mashitaka gago. 21 Ninga Paulo hoyokanha lufa, hoyotasa yalekigwe mwigelesa mpaka ulamuso we imbuli iyo ulafigwe na Kaisali. Kosoko iyo hanidaha kumuleka mwigelesa mpaka ma nikudaha kumwigala kwa Kaisali. 22 Aglipa hoyomugamba Festo, Nokwenda kumuhulika imunhu yuyo aniye nimwecho. Festo hoyomugamba, “Komuhulika nhosiku.” 23 Kwa nheifo, nhosiku yakwe Aglipa na Belinike howokwija kwa chinyemi ku dikumbo dye mikutano wakilose na wakulu wa majeshi na filongosi we kaya. Festo hoyolagisa Paulo yegaligwe kugati. 24 Kamei hoyogamba, “Mundewa Aglipa na mose muwile hano hamwedu nase! Hano hamwande yenu hena munhu yuno, imwene aWayahudi wose wowile hano na kuya Yelusalemu, wakujoja fina nghawagilwa kuwa mumi kahi. 25 Ninga niye sonile fina kagolosa chochose chihile ichene chikumutenda yagiligwe kukomigwa; ninga kosoko imwecho hakakanha lufaa kwa Kaisali, nilamula kumwigala. 26 Ninga ku ulwandi ulwangu nichaka chinhu ichene chonikudaha kumuwandichila Kaisali muchanhya yakwe. Nochileka nimwigale hano kumwande yenu, na gano ukwako gweye, Mundewa Aglipa! Uleke munghamala kumusa Musa nipate mbuli ya kuwandika. 27 Kosoko ikuwa mbuli ya chibwalasi kwigala mufungwa, akuno hechaka amakosa gakwe goyagolose.”
1 Kamei Aglipa hoyomugamba Paulo, “Ukudaha kitetea.” Baho Paulo hoyogolola mukono wakwe hoyokitetea nhafi: 2 “Mundewa Aglipa, nikiyona nijaliwa diyelo kitetea kumwande yako muchanhya ya mashitaka gose agene Wayahudi walonga muchanhya yangu. 3 Chawelu kosoko gweye kumanya simila sa Wayahudi na migagolo yawo, nikukutasa unitegelese kwa ufumilifu. 4 “Awayahudi wamanya amaisha gangu gose kulawa udodo wangu fyene fonikale kulawa kunghonga ne ditaifa dyangu ako Yelusalemu. 5 Wanimanya kwa ugele mutali, na wakudaha kuhomelela, wanghenda fina kulawa kunghonga hanikala kifana munhu yumwedu wa waya awakolile lugano idini yetu, chitewa cha Mafalisayo. 6 Na hambiya nima hano nilamuligwe kosoko nikuhuwila dihuwi Mulungu dyoyawahuwise waBaba setu. 7 Diwi dyo nodidiya dikuhuwiligwa na makabila kumi na meli kupata fowakumufuga Mulungu chilo ne misi. Ku dihuwi dino nikushitakigwa na Wayahudi! 8 Mundewa, Nhani nyeye mukona isikudahika kwi Mulungu kwinula wanhu wafile? 9 Chawelu aniye nimwecho hanihuwila fina inyagila kugolosa mbuli nyingi kulema disina dya Yesu wa Nasaleti. 10 “Simbuli so, noso nagolose ako Yelusalemu, aniye nimwecho ugele wonenghigwe udaha kulawa ku watambiki wakulu, haniwaguma mwigelesa wengi wa wanhu wa Mulungu. Fowalamuligwe kukomigwa, aniye hanitowa kula ya kufumila. 11 Mikongho mingi haniwatenda wotowigwe mumasinagogi gose, honiwalonga kwa ludole wadikane dihuwilo dyawo. Inyono yangu ukwawo hoikuwa ghulu mpaka nende niwasaka sikaya sa kutali.” 12 “Kwe njila iyo honiluta Dameski ugele umoja, nina udaha na malagiso kulawa ku watambiki wakulu. 13 Mukulu, ugele fonowile munjila saa mutandatu ya nemisi, hanyona ujelu mukulu kusuma we dijuwa, ukwaka kulawa kulanga, hounisunguluta niye hamwedu na wachowanye munhambo. 14 Chose hochikugwa hasi, nani honihulika ijwi dikulonga nani kwa Chiebulaniya, ‘Sauli, Sauli! Nhani kunibulaga? Ukibulaga chaka kifana kutowa mundome ichuma chisongoke.’” 15 Honigamba, “Gwegwe nani Mundewa?” Naye Mundewa hoyobidula, “Aniye no Yesu imwene agweye ukubulaga. 16 Si chinhu, inuka hambiya, imanyima. Nikisololosa ukwako kosoko ino nikwike uwe mutumishi wangu kuhomelela ifyene fyo unyonile niye na simbuli sonikwenda nikiyonese ukwako. 17 Nikukuhonya kulawa ku wa Isilaelii na wanhu wa wamembe gamonga wonikwenda nikutume ukwawo. 18 Ukuwagubula meso gawo na kuwadahisa walawe muchisa na kwingila mu ujelu; walawe mu utawala wa Shetani, wamubidukile Mulungu kwa kumuhuwila kwawo, walekeleligwe uwihi na kulonda ahanhu hawo mugati ya waya awene wagaluke fina wanhu wa Mulungu.” 19 “Nheifo, Mundewa Aglipa, sibesile diwono didyo dya kulanga. 20 Ninga hanikonga kuhubili kunghonga ako Dameski, hanyuma ku waya wanhu wa Yelusalemu na wanhu wose wa Uyahudi na wa wamembe gamonga. Niwasonghesa wamubidukile Mulungu na konesa kwa sinhenda fina wabadilisha imiyoyo yawo. 21 Kosoko iyo Wayahudi hawanikola nuwile Mwihekalu, howohananga kunikoma. 22 Ninga Mulungu hoyonitasa; na kwa neifo mpaka diyelo nima chigosi nikuhomelela ku wose, ku wakulu na kuwadodo. Gonikulonga nogaya kuwagonesi na Musa wagamba gakagolawanisa: 23 Fina Kilisito yakusambasigwa na kokuwa wanghonga kwinuka kulawa kuwafile, uleke yafamile fina ujelu wa uhonya ukuwamulikia awanhu wose hambiya, Wayahudi na nheifiya wanhu wa wamembe gamonga.” 24 Paulo yakafike baho mukitetea kwakwe Festo hoyolonga kwa kwinula dijwi, “Paulo! Kwina chilalu! 25 Ninga Paulo nichaka chilalu Mukulu Festo, honikulonga ni chawelu muhala. 26 Agweye Mundewa kusimanya simbuli sino, kosoko iyo nikudaha kulonga nichaka chogoho kumwande yako. Nichaka manhonge fina aga gose gagoloseka gamanyika ukwako kosoko imbuli ino isigoloseke kwa chifiso. 27 Mundewa Aglipa, Togola ukuhuwila wagonesi? Nimanya fina ukuhuwila.” 28 Aglipa hoyomubidula Paulo, “Chidodogi du ukwenda unitende muKilisito?” 29 Paulo hoyobidula, Nikumutasa Mulungu, fina kwa chapangu chiguhi ama chitali, si gweye du ninga wose awakunihulika diyelo wowe fina niye fonuwile, ninga bila ino iminyolo. 30 Baho iMundewa mukulu we iisi, na Belinike, na waya wose wamonga wowile hamwedu nawo howokwinuka. 31 Wakaleuke howokiyusa wecho kwa wecho, Munhu yuno hakowa yadaha kulekeligwa howile ghakanhile lufaa kwa Kaisali. 32 Aglipa hakamugamba Fesito, “Imunhu yuno hakowa yakulekeleligwa woile ghatasile kuluta kwe Mundewa.”
1 Wakafuluse kulamula fina chilute mpaka Italia, howomwika Paulo hamwedu na wafungwa wamonga ku wimilisi wa akida we chikosi chikwinangwa Chikosi cha Kaisali. 2 Hochikwila meli ya Adilamito iyende iluta na kulokela musibandali sa mu iisi ya Asia, hochikonga lugendo. Alistaliko mukaya wa Makedonia, kulawa Sesaloniki hakowa hamwedu nase. 3 Nhosiku yakwe hochikwima kubandali ya Sidoni. Yuliyo hoyomutendela Paulo fiswamu kwa kumuleka yamone wambwiya sakwe na kupata ifinhu foyakuhananga. 4 Kulawa uko hochigendelela ne nhambo, ninga kosoko imheho yendeitowa kwa ludole kulawa kumwande yetu, hochilokela ulwandi lwe chisiwa cha Kupulo ukwene kusowile na mheho nyingi. 5 Hanyuma hochiloka ibahali ya Kilikia na Pamfulia, hochikwima Mula, ikaya ya Lukia. 6 Baho, ichilongosi wa wasilikali igana yuyo hoyofika meli imonga ya Alekisandilia iyendeluta Italia, kwa nheifo hoyochikiwisa kugati. 7 Kwa chipisi cha majuwa mengi hachigenda digaluga, na kwa fikugutu hochifika habehi na Nido. Na kosoko imheho isachinghile luneka hochiluta kumwande bila kubiduka, hochigenda ulwandi lwa Klete habehi na Salimone ukusowile na mheho nyingi. 8 Hochigenda kunghanda yakwe digaluga, hochifika hanhu hakwinangwa Bandali Swanu, habehi ne kaya ya Lasea. 9 Chipisi chitali hachuwa chilokile, hata dijuwa dyo kufunga hadyuwa dilokile. Hambiya hayuwa hatali lugano kugenda na meli. Kamei, Paulo hoyowasugula: 10 Wakulu, nikona fina inhambo ino ikuwa na mugogolo, kwagilila finhu fingi, si imisigo du yuwile mu meli, hata na kwa mwumi wetu. 11 Ninga ayuya ichilongosi wa waslikali igana hakahulikila simbuli sa ayuya iyakugendesa imeli na imwenye meli kusuma soyalongile Paulo. 12 Kosoko ibandali iyo isowile hanhu haswanu kwikala ugele we imheho ye inyota, uwengi huwosagula kugendelela ne inhambo kwa kubahatisha fina wakudaha kufika Foinike, bandali ya Kleti, hasi ya kuuswilo we dijuwa na kuchanhya ya kuuswile we dijuwa; na uko hawowa wakudaha kwikala uko ugele we inyota. 13 Kamei imheho ya kusini ikakonge kuputa fiswanu, howodoga fina wapata dowahanange, kosoko iyo howoleuka howoigenesa imeli habehi sana na mwani ya Klete. 14 Ninga, chisalokile chipisi chitati, imheho inghali ikwinangwa Mheho ya kasikasi haikonga kuputa kulanga kuchisiwa. 15 Imheho hoitowa imeli iya, na kosoko chisendechidaha kuisuma hochiileka ikwelegetigwe na iyo imheho. 16 Chisiwa chimonga chikwinangwa Kauda, hochichikinga chidodogi imheho iyo; na chikole kusini kwakwe hochisuma, hata nheifo kwa fikugutu kuhonya u munhumbwi uya wa imeli. 17 Awaya anamaji howowukweka umunhumbwi kugati, kamei howoisungulusila imeli lusigi na kuyoha kwa ludole. Awogoha fina wakudaha kwangamila kuchilo che bahali ku mwani ya Libiya. Kosoko iyo hawadulisa matanga na kuileka imeli ibulumuligwe ne imheho. 18 Umusukosuko hougendelela kuputa, na nhosiku yakwe howokonga kukubita kunje imisigo ya mumeli. 19 Dijuwa dya kadatu howokonga kuguma mumeji ifinhu fye imeli kwe mikono yawo awecho. 20 Kwa majuwa mengi chisadahile kona dijuwa ama sinyelesi; umusingisiko hugendela kuputa lugano. Hata dihuwi dyo kuhona hodichihelela. 21 Chikafuluse kwikala majuwa mengi bila kudiya chakudiya, Paulo hoyokwima mugati yawo hoyogamba, “Wakulu nanga yowile fiswamu nanga mwanitegelese na kuleka kugenda kulawa Klete. He mwatendile nheifo chosowile chikwingila mugogolo uno na si hasala sino sose. 22 Hambiya nikumutasani muwe na moyo, kwichaka hata yumwedu wenu yakwenda yagilise uumi wakwe; imeli du noikwende yagilile. 23 Kosoko digulo nechilo choikwinuchila diyelo, malaika we Mulungu imwene aniye na munhu wakwe, kahi nowo nikufuga, kanijila, 24 hoyonigamba, ‘Paulo, unghogohe, Inogela wine kumwande ya Kaisali, naye Mulungu kwa uswamu wakwe kakutendela maswanu kwa kukuhonya agweye na wose womuwaniye munhambo wanghagilile.’ 25 Nheifo, mowanhu nye, kiingheni moyo! Kosoko nikumuhuwila Mulungu fina ikwende yuwe sawa fina fonitamiligwe. 26 Ninga hata nheifo chikwenda chikatagigwe muchiwa chingi.” 27 Ichilo cha dijuwa dya ikumi na ine, chendechikwigaligwa kuno na kuno mu bahali ya Adilia. Habehi na muchilo mugati, wanamaji howokona fina chuwa habehi na iisi. 28 Kwa nheifo howohananga chilinde che bahali uleke walagase ulusigi lohigwe chinhu chisito, howopata chilindi cha meta makumi mane, hanyuma howopima kahi howopata meta igana dimwedu na makumi madatu. 29 Kosoko ya kogoha kukwama kumawe, howodulisa nanga ine kunyuma ye imeli; howotasa usiku uche chimwande. 30 Wanamaji howohanga kutija na hawafulusa kudulisa auya umunhumbwi kumeji, wakitenda fina wakahulumusa si nanga kumwande ye meli. 31 Ninga Paulo hoyomulonga yuya akida wa dijeshi na wasilikali wakwe, Awano awanamaji wanghaleka kusigala amuno mu meli musikuhona. 32 Baho awasilikali waya howosidumula sisigi sakolelese au umunhumbwi, howouleka ulondigwe na meji. 33 Kukwende kuche, Paulo hoyowatasa wose wadiye chakudiya: Kwa majuwa ikumi na ine hambiya, hamuwa mumanhonge na musighati mudiye chinhu chochose. 34 Hambiya, nikumutasani mudiye chakudiya kosoko muchananga ikuhanangika mudiye uleke mudahe kugendelela kuwa womi. Kosoko hata lujwili lumwedu lwa matwi genu usikwagilila. 35 Yakamale kulonga nheifo hoyolonda mukate, hoyulumba kwa Mulungu, kumwande yawo wose hoyoubendula hoyokonga kudiya. 36 Baho wose howosindamala, howodiya chakudiya awecho. 37 Chose hamwedu hachuwa wanhu magana meli na makumi mufungate na mutandatu, mu meli. 38 Wose wakamale kudiya na kwiguta, howohungula usito mu meli kwa kutanga ingano mubahali. 39 Kukoche, wanamaji wasadahile kuitanga iisi iya ninga howokona hanhu hamonga hena mhwani na disanga, howolamula kuluta ne imeli uko mhwani inghahadahika. 40 Kwa nheifo hawosidumula si nanga na kusileka kubahali sisigi isohile ikukani, kamei howokwinula itanga dimwedu kumwande kukola imheho, howoluta imhwani. 41 Ninga howofika hanhu ahene mikondo mili ye bahali ikitang'anyila, ulwandi lwa kunyuma hoibenduka dibasibasi kusoko ya uludole lwa mawimbi. 42 Wasilikali howohananga kuwakoma awafungwa wose kwa kogoha fina wakudaha kogela mpaka mhwani na kutija. 43 Ninga kosoko yuya akida wa dijeshi hakahananga kumuhonya Paulo, hakawalemesa wanghatende nheifo. Hoyolagisa fina kunghonga awaya awakudaha kogela wajumhe kulawa mu meli na kogela mpaka mhwani, 44 na wamonga wendamile wakikolele mufibao au mufipande fye imeli ineneke. Nofo aseye chose chafikile mhwani.
1 Chikafuluse kufika kuisi hochimanya fina ichisiwa chiya chikwinangigwa Melita. 2 Wakaya wa baho howa waswanu sana ukwetu. Ifula yendeikonga kutonya na hakuwa na mheho, kosoko iyo howokwasa moto, howochikalibisha. 3 Paulo hoyodondola chisigo chidodogi cha figodi, ugele foyasigumange mumoto. Baho kosoko ya dijoto dya umoto hodilawa ijoka mufigodi hodikisinga mumukono wakwe hodinyalilila. 4 Awakaya wa baho wakone ichiyumbe chiya chikuning'inha mumukono wakwe, howokitamila kwa wecho, Chawelu imunhu yuno kakoma munhu hata kona yahonile kufila mubahali, ihaki isimulekile yowe mumi. 5 Ninga Paulo hodikung'unhila mumoto ichiyumbe chiya, na imwene nghabulagigwe hata chidodogi. 6 Awa wanhu wendewolangilila fina kofimba ama kokugwa hasi na kufa. Wakagojele kwa chipisi chitali bila kona Paulo yapatigwa na chinhu chochose ichene si cha kawaida, howobidula mafikili gawo muchanhya yakwe, howogamba fina ni mulungu. 7 Habehi na ahanhu baho hahowa na migunda ya Publio, imukulu we chisiwa chiya. Publio hoyochikalibisha chimbuya, hochikuwa wageni wakwe kwa majuwa madatu. 8 Hoyikuwa fina iBabakwe wa Publio hakowa mutamu wa mhungo na kahala, kagona mwisasi. Paulo hoyoluta kumwona na yakamale kuwomba, na yakamwikile mikono yakwe muchanhya yakwe hoyonona. 9 Kulawa dino kugoloseka, watamu wose muchisiwa howokwija howohonyigwa. 10 Howochingha finghwa fya hayo hayo, na ugele wochaleukage howochigumila mumeli ifinhu fyose fochendechihanga. 11 Ikaloke minyesi mitatu, hochileuka na meli yowile baho kosoko ye imheho mu chisiwa, meli ya Alekisandilia iikwinangwa, Wandugu mapasa (Milungu Mapasa) 12 Hochifika ikaya ya Silakusa, hochikwikala baho majuwa madatu. 13 Kulawa uko hachileuka hochisunguluta na kufika Legio. Dikaloke ijuwa dimwedu, imheho hoikonga kuputa kulawa kusini, kamei gakaloke majuwa meli hochifika bandali ya Potioli. 14 Uko hachifika wandugu wakefu awe wahanange chikale nawo kwa ijuma dimwedu. Nheifi nofo ehafikile Lumi. 15 Awandugu wa Lumi fowahulike simbuli setu, howokwija kuchihokela kwe soko dya Apio na Mikahawa midatu. Paulo yakawone hoyomulumba Mulungu, na hoyopata moyo. 16 Chikafike Lumi, Paulo hakalekeligwa yekale yemwene na musilikali yumwedu wa kumwimilisa. 17 Gakaloke majuwa madatu, Paulo hoyowenanga filongosi wose we Chiyahudi wa hanhu baho, wakakikonghole, Paulo hoyowagamba, “Wandugu sangu, aniye sagolose chochose chihile, kahikulema sijadi sa wasehe wetu, hamikoligwa akuya Yelusalemu na kugumigwa mumikono ya Walumi. 18 Wakanyusenyuse na kona fina nichaka wihi wowose, howohananga wanilekele. 19 Ninga Wayahudi wamonga howolema imbuli yo hoinigolosa nihanange lufaa kwa Kaisali, ninga niye sowile na mbuli yoyose ya kuwashitaki awaditaifa dyangu. 20 Kosoko iyo nihananga kiyona nanye na kusimulila nanye, kosoko nyohigwa iminyolo ku dihuwilo didyo dya Waislaeli.” 21 Nowo howomugamba fina, “Chisihokele baluwa sosose kulawa Uyahudi muchanhya yako, na kwichaka ndugu yeyose yejile hano yachitamile mbuli yoyose ihile ulwandi ulwako. 22 Ninga chikona inogela chihulike kulawa ukwako gomwecho foukona agweye; kosoko cho chimanyile muchanhya ye chitewa chino ni fina chila hanhu chikulongigwa fibi.” 23 Wakakifumilise dijuwa dyo kitang'anyila naye, howokwija hoyekalage wanhu wengi lugano. Hoyoyowatamila imbuli iyo kulawa nhosikusiku mpaka hegulo, yakuhomelela ku undewa wa Mulungu kuwonesa fina chawelu simbuli sa Yesu kulawa mu sheliya ya Musa na amanabii. 24 Wamonga wawo howofumila ku siya soyalongile, ugele uwo wamonga wasahuwile. 25 Howoleka kifumilisa wecho kwa wecho, howoleuka ugele Paulo yakagambe: “Muhe Musunhile hakowa sawa foyalongile kuwa Baba senu kwa njila ye mugonesi Isaya: 26 ‘Luta ku wanhu wano, ukagambe, chaweli mukamuhulika ninga musikutanga ng'oo; 27 kosoko imisungu ya wanhu wano ibwalata, wahindi singhutwi sawo, wafinya meso gawo. Hona si nheifo, wowa wakona kwa meso gawo, hawahulike kwa singhutwi sawo, na kutanga kwe misungu yawo, na kunibiduchila, yakulonga Mundewa, nani nuwanikuwa honya.’” 28 Paulo hoyomalagisa kwa kugamba, “Mumanye fina uhonya uwo wa Mulungu. 29 wigaligwa kuwawamembe wakwende wahulike!” 30 Paulo hoyokwikala minyaka mili munyumba yakwe imwecho yendeyolihila kodi, yendeyowakalibisha wose wamwijilage. 31 Yakuhubili undewa wa Mulungu na kufusa muchanhya ya Mundewa Yesu Kilisito kwa udaha hechaka kulemesigwa.
1 Paulo, imutogomi wa Yesu Kilisito, kenangigwa kuwa Mutumigwa, yasaguligwe kosoko ye imbuli swanu ye Mulungu, 2 iyalaganisigwe ne Mulungu kulawa katali kupulutila awagonesi wakwe mumatulumo gasunhile, 3 imbuli swanu ni kosoko ya mwanagwe yalawile mulukolo lwa Daudi kwa chimutufi 4 na kutambusigwa kuwa Mwana we Mulungu hamwedu na ludole kosoko ya Muhe wo Usunhile kwa kwinuligwa kwakwe kulawa mudifa, Yesu Kilisito Mundewa wetu, 5 kulokela imwene chihokela dihewa, na utumigwa wo kwigala habehi ichihuliko che dihuwi mugati ya wose Amataifa kosoko ye disina dyakwe, 6 hamwedu na nyeye muwecho mwinangwe muwe wa Yesu Kilisito, 7 kuwose wendigwa ne Mulungu woile Loma wenangwe kuwa wasunhile: 8 Kunghonga, nikumulumba Mulungu wangu kulokela Yesu Kilisito kosoko yenu mose, kosoko ye dihuwi dyenu idikuhubiliigwa muchilunga chose. 9 kosoko iMulungu no muhomesi wangu, wonikumutogomela hamwedu ne muhe kwa kutamila imbuli swanu ye Mwanagwe, bila kuleka nigendelela kuwagelegela kwa kuwatasilani majuwa gose munhasa yangu, 10 nikutasa fina Mulungu yanghenda nidahe kwija ukwenu. 11 Kosoko nikusulumila niwoneni uleke niwengheni finghwa fye chimuhe na kuwagumani ludole, 12 uleke chuwe wakangasi wasindamafu kwa dihuwi dya chila munhu na miyagwe kosekose ukwenu na ukwangu. 13 Nikuhananga mumanye wandugu sangu fina mikangha mingi hanihananga kwija ukwenu (ninga hanilemesigwa) uleke nidahe kugola ugolaji ukwenu na nheifiya kifana kuwamembe wasigale. 14 Nikudaiigwa kuhubili Imbuli swanu kuwanhu wose Awayunani na Awasigendelele kuwene misungu na awabwalasi: 15 kosoko ya iyo nikuhananga kuhubili Imbuli swanu hata ukwenu nyeye muwile Loma. 16 Kosoko sikuyonela chinyala Imbuli swanu; ni ludole lwa Mulungu kwa uhonya wa chila munhu yene dihuwi, kwa Muyahudi kunghonga na kahi kwa Muyunani. 17 Kosoko kwa iyo ichawelu ye Mulungu igubuligwa kugendela dihuwi kwa dihuwi fina foitulumigwe kugamba; “Imuchawelu kokwikala kwa kulokela dihuwi” 18 Kosoko inyono ye Mulungu yonesigwa kulawa kulanga kuwanhu wose awasikwenda Mulungu na wihi wa awakukanhamisa ichawelu. 19 Kosoko iikudaha kumanyika muchanhya ye Mulungu ni chalinse ukwawo, kosoko iMulungu kayonesa ukwawo. 20 Kulawa kukumbigwa kwe chilunga inyuwa yakwe ye ludole yo kuleka koneka na udaha wa majuwa gose waumanya na kuona kulokela finhu fyumbigwe. Nong'amba wechaka chibalalilo. 21 Kosoko hawamumanya Mulungu, ninga wasimwinghile chogoho kifana Mulungu ama kumulumba, ninga hawagilila mudasi mumadoga gawo kamei misungu yawo hoigumigwa chisa 22 Wakidai wena misungu wagaluka, wabwalasi; 23 na kubidula ditunyo dye Mulungu idichaka ubani kuwa futa ye chimunhu iikubanika, na fidege na fikewe hamwedu na ifikutambala. 24 Kosoko ya iyo Mulungu kawengha mukusulumila mumimoyo yawo uwihi kuleka kiyogoha mumitufi yawo awecho 25 kosoko wabidula ichawelu ye Mulungu kuudasi na kufuga fyumbigwe na kufifugamila na kuleka Iyombile, imutunyigwa wa majuwa gose! Hano. 26 Kosoko ya iyo Mulungu kawengha usulumisi wichaka chogoho. Wanawake wao nawo wabidula sinhenda kulawa fosumbigwe kuluta kusisumbigwe, 27 nheifiya awagosi nawo, hawaleka sinhenda ifene foyumbigwe kuwa nawake sawo na kikola usulumisi wecho kwa wecho. Hata wagosi wagolosa mbuli sa chinyala na wagosi wayawo na kuhokela itoso dya nhenda sawo sihile. 28 Na kosoko wasonile fiswanu kumumanya Mulungu, Mulungu hakawaleka wandamile madoga gawo gehile agasiku hanangigwa wagolose. 29 Hawamema na chila ilalago dya wihi, ulwafu, usulumisi, chigiso, wamemile finju, ukomaji, unghondo, udanhilisaji, kubalalila, na walongaji we mbuli sa wamonga, 30 wakusigila wayawo, awasikumwenda Mulungu, wetogosi, weyoni, lubeso, wanhu wakudoga gehile, na awasikuhulika awaweleke, 31 wabwalasi, wechaka dihuwi, wakomaji wa mimoyo ya wanhu, wechaka ubasi na munhu. 32 Hata inghowa wamanyile ulamusi we Mulungu, fina awaya wakugolosa gago wagiligwa kufe, ninga siyo du wakugagolosa du kahi wakubwedelela wamonga nomowakugagolosa.
1 Hambiya kwichaka chibalalilo, kwawowose, nomo ukuliganisa wamonga; kosoko kwa kuwaliganisa wamonga ukilamula gomwecho, kosoko agweye gomulamulaji nagwe ukugolosa wihi uuya. 2 “Chimanya fina ulamusi we Mulungu kwa wayawakugolosa gago ni wachawelu”. 3 Ukudoga, gweye fina nomoukulamula awakugolosa gago kamei nagweye ukugagolosa nghukwija udaha kuitija inyono ye ulamusi we Mulungu? 4 Ama ukubesa uugoli we uwendo na ufinyilisi wakwe. Nghumanyile fina wendo we Mulungu wabaho kukulongosa gweye kukulamba? 5 Ninga kosoko youkugutu na kuleka kufinyilisa kwa umoyo wako ukiikila nyono muchanhya yako mwijuwa dye inyono ugele uliganiso we chawelu we Mulungu foukwija ukoneka 6 Kosoko Mulungu komuliha chila munhu fina foyaliganile: 7 Kuwanya awakufinyilisa mukugolosa maswanu wahananga kumutunya Mulungu na kumogoha na kowengha uumi wa majuwa gose; 8 na kuwamonga awakwandamila njila sao wenyecho na wasikwenda kuihulika ichawelu ninga uwihi, inyono ye Mulungu yofungha ukwawo. 9 Kokuwa na magayo na kutamigwa kwa chila iyakugolosa uwihi, kukongela kwa Muyahudi na kwe Muyunani, 10 ninga ditunyo na chogoho hamwedu na dihewa dyuwe kwa chila munhu iyakugolosa uswanu, kwa Muyahudi kunghonga kamei ne Muyunani naye. 11 Kosoko Mulungu kechaka kwendelela. 12 Kosoko awaya wose wagolose wihi bila dilagiso wakwagilila nheifiya bila dilagiso na wose wagolose wihi mudilagiso wolamuligwe ne dilagiso. 13 Kosoko siyo wakuhulika dilagiso nowene nhenda swanu hamwande ye Mulungu, ninga awagolosaji we dilagiso nowakwija wataliligwa nhenda swanu. 14 Nghona awamembe, awechaka dilagiso wakumanya chowakuhanagigwa wagolose, awano, awechaka dilagiso, wagaluka ilagiso awecho. 15 Wakonesa fina ichikuhanangigwa ne dilagiso chiyandikigwa mumimoyo yao, na madoga gawo gakuwahomelesa na kuwasongesa ama kuwabalalila 16 mwijuwa dye uliganiso fina imbuli yangu swanu foilongile, Mulungu kulokela Yesu Kilisito, yakwija yaliganisa amadoga gose agakifisile. 17 Ninga nghonaga ukiinanga Muyahudi na ukuhuwila dilagiso ukiyona kosoko ya Mulungu 18 na mumanya iMulungu choyakuhananga na kufumilisa ichiswanusi kosoko mulolesigwa mwilagiso, 19 na nghona umanyile fina kwamulongosaji wa wamudula na fina agweye no ujelu kwawaya woile muchisa, 20 ni mulolesaji wa wabwalasi na mufusaji wa wana wadodogi mumalagiso uwine umanyi we chawelu mugati yako, 21 agweye, goukufusa awamonga nghudaha kifusa gomwecho? Ukuhubili uhiji sambi gomwecho kahi ukuhija? 22 Agweye ukulemesa dihabwa, gomwecho ukugolosa ihabwa? Agweye ukudesekela fisikimunhu ukuhija mumahekalu? 23 Agweye ukitunyila mwilagiso, kahi ukumubesa Mulungu kwa kubena malagiso gakwe? 24 Kosoko, fina foitulumigwe, “Disina dye Mulungu dikutofuligwa mugati ya Wamembe kosoko yenu.” 25 Dikumbi dikuwa na chambusi nghona mukukola dilagiso amba nghona mukubana dilagiso mugaluka fina wanhu wasifinigwe. 26 Kosoko iyo, nghona munhu inghafinigwe yakukola malagiso kuleka kufunigwa kwakwe kusikugaluka kufinigwa? 27 Kamei na waya wasifinigwe chimutufi, ninga wakukola dilagiso wowalamula nyeye mwina umulundo wa matulumo na dikumbi, ninga mukubana dilagiso. 28 Kosoko iMuyahudi we chawelu nghakiyonesa kwa kunje, ama dikumbi dya chawelu siyo chinhu cha kunje ama cha chimutufi. 29 iMuyahudi wa chawelu no yuya iMuyahudi kwa kugati, na dikumbi dye chawelu dyuwa mumoyo, ayi ni mbuli ya chimuhe na siyo mawandiko du. Uleke munhu yahokele ditunyo siyo kulawa kuwanhu, ninga kwe Mulungu.
1 Kahi, iMuyahudi kena choni chongeseke ama ichambusi che dikumbi no chihoki? 2 Telele, chila hanhu. Kosoko kunghonga, Awayahudi hawenghigwa imbuli ye Mulungu. 3 Nhani ghona wamonga wasowile wanhu wakuhuwilika togoleni nonghamba kuleke kuhuwilika kwawo no kuleka kuhuwilika kwe Mulungu? 4 Gwe putu! Lekeni Mulungu yagendelele kuwa muchawelu hata nomowamonga wakuwa wadasi fina foitulumigwe, “Uleke utaliligwe chawelu musimbuli sako, na ukasume mwijuwa dyo uliganiso.” 5 Ninga inghowa wihi wetu unghagoloseka konesa ichawelu ye Mulungu, chigambeki kogamba Mulungu ni mwihi yakwigala nyono muchanhya yetu? (Nikulonga chimutufi.) 6 Gwe putu! Aho mbiya kodaha nhani Mulungu kuchiliganisa ichilunga? 7 Ninga inghowa kulokela udasi wangu ichawelu ye Mulungu yohigwa mwitunyo dyakwe, nhani nigendelele kuliganiswa kuwa mwihi? 8 Na nhani chinghalonge (kifana wamonga fowakuchisigila kwa kulonga gaya gochikulonga). “Chigolose gehile uleke maswanu geje?” Sigafu ye uliganiso wao ikuwagojela! 9 Chigambeki? Aseye Chiwayahudi chawaswanusi? Gwe putu! Kosoko nifulusa kuwalamula wose Awayahudi na Wayunani fina wowa hasi ya ludole lwe wihi; 10 fina foitulumigwe, kugamba, “Hechaka muchawelu, hechaka hata yumwedu 11 hechaka yamanyile, hechaka yakumuhananga Mulungu. 12 Wose wagilila, wose wagolosa wihi, hechaka hata yumwedu yakugolosa uswanu, hechaka hata yumwedu.” 13 “Malaka gawo ni makabuli gagubuligwe wakutumiya malimi gawo kudanhilisa.” “Usungu mukali wa majoka wuwa mumilomo yawo.” 14 “Milomo yawo imema kuligitisa na usungu lugano.” 15 “Migulu yawo ikubilima lumangho kwitila sakama; 16 Ubani na magayo gowa musinjila sawo, 17 na njila ye digoya wasiimanyile.” 18 “Wechaka chogoho cha Mulungu kumwande ya meso gawo.” 19 Hambiya chimanya fina chochose ichikulongigwa ne dilagiso, dikuwalonga waya wowile hasi ye dilagiso, uleke chila mulomo unyamale, na chilunga chose chilamuligwe ne Mulungu. 20 Kosoko “Hechaka munhu yene mutufi yakudaha kutaliligwa chawelu kwa kona” nhenda sa dilagiso, kosoko kulokela dilagiso no kwija kumanya kwe wihi. 21 Ninga hambiya, ichawelu ye Mulungu ifulusa konesigwa kahi kunje ye dilagiso, hata inghowa dilagiso ne wagonesi fikuhomelela imbuli ayi, 22 uchawelu we Mulungu kugendela dihuwi mwa Yesu Kilisito kwa wose wakuhuwila, kosoko kwachaka kubagula. 23 Kosoko awanhu wose wagolosa wihi na kuhungukiligwa ne ditunyo dye Mulungu; 24 wakutaliligwa chawelu chaka kwa njila ya dihewa, kulokela uhonya wuwile mugati ya Kilisito Yesu; 25 yalafigwe ne Mulungu kuwa maliho kwa sakama yakwe kwa waya wene dihuwi ukwakwe. Ayino hayuwa kosoko yo konesa uchawelu we Mulungu, kosoko muufinyilisi wakwe we chilungu nghaulangile uwihi wa katali; 26 hayuwa kuhomelela kwa chigele chino kuwa imwene imwecho ni muchawelu na yamutalile chawelu yuya iyakumuhuwila Yesu. 27 Kahi inyiyona yetu ikulawahi? Yahechaka. Kwa dilagiso dihoki? Kwa milimo ihoki? Ninga putu! Ninga kwa dilagiso dyuwile mwihuwi. 28 Kosoko chimanya fina munhu yakutaliligwa nhenda swanu ninga kwa ihuwi ninga siyo kwa kukola malagiso. 29 Ama iMulungu ni wa Wayahudi muhala? Si Mulungu wa Wamembe nheifiya? Heye na Wamembe nheifiya, 30 kosoko Mulungu ni yumwedu naye kawagolosa wechawelu wafinigwe kwa dihuwi dyawo, na wasifinigwe nawo kulokela dihuwi dyawo, 31 nong'amba chikubesa dilagiso kwa dihuwi dino? Putu! Ahanhu hakwe chikudimilila dilagiso.
1 Chilonge choni, kosoko ya Ibulahim iBaba yetu kwa chimutufi? 2 Kosoko inghowa Ibulahimu hakataliligwa nhenda swanu kwa njila ya milimo, kena chinhu cha kitunyila, ninga si hamwande ye Mulungu. 3 Kosoko matulumo gakugambaki? “Ibulahimu hakamuhuwila Mulungu, na haitaligwa kwe mwene fina Muchawelu.” 4 Hambiya kwa yuya yakutogoma mulimo, maliho siyo gakutaligwa kifana chinghwa, ninga kifana chinhu chimwagile. 5 Na kwa yuya inghakutogoma yakumuhuwila imwene iyakutalila wanhu awasimulungu, dihuwi dijo ditaligwa kifana uchawelu. 6 Nheifo Daudi yakulonga kwa kumotesa awaya wataliligwe chawelu ne Mulungu bila kugolosela milimo: 7 “Wamotesigwa wose awalekeleligwe wihi wao, na wihi wawo ugubikigwa. 8 Kamotesigwa munhu imwene Mundewa nghemutalila uwihi wakwe” 9 Togoleni mboto sino silongikwa ni kwa waya du wafinigwe ama na kwa wasifinigwe? Chikugamba, “Kwa Ibulahimu dihuwi dyakwe haditaligwa kuwa chawelu.” 10 Hakataliligwa finhani? Hayuwa foyowa yenghati yafinigwe? Hayowile ugele yafinigwe, ninga foyowile yekali. 11 Hakahokela chitangilo cha kufinigwa, mutojo wa ichawelu woyowile nawo kwa njila ya ihuwi chigele foyowa yekali kufinigwa. Hayuwa kumugolosa yowe Baba wa wose awakuhuwila hata ugele wasinati wafinigwe, ninga wena ichawelu yowataliligwe, 12 no nheifo yowe Baba wa waya wafinigwe, si kwa kufinigwa du ninga wandamile mbasi ye dihuwi adiya dyoyowile nadyo Baba yetu Ibulahimu chigele yenati yafinigwe. 13 Kwa dihuwiso dyoyakwija yahala, ichilunga hachilawile kwa Ibulahimu ama kwa lukolo lwakwe kwakulokela dilagiso, ninga kwa kulokela ichawelu ye dihuwi. 14 Kosoko inghowa awaya we dilagiso nowahasi, dihuwi digaluga dyachaka na dihuwiso nheifiya. 15 Kosoko dilagiso dikwigala nyono, ninga ahanhu hechaka ilagiso, basi hechaka ubanike. 16 Kosoko ya iyo dilagiso dima mwihuwi, uleke dihuwi dikale mwihewa na kuwa na nghinyo mulukolo wakwe wose, siyo du kwawakukola dilagiso, ninga kwa waya wakuhanga mwihuwi dya Ibulahimu (kosoko imwene ni Baba wa seye chose, 17 fina foitulumigwe, “Nikugolosa gweye uwe Baba wa mataifa mengi”) hamwande ye Mulungu imwene woyamuhuwile, iyakwinanga finhu ifisiuko na kufitenda fyuwe uko. 18 Yakuhuwila agasikuhuwilika, uleke yowe Baba wa mataifa mengi, “Kosoko yagaya galongigwe, no nheifo lukolo lwako usikwija utalika.” 19 Nghahunguke mwihuwi ugele foyadogage muchanhya ye mutufi wakwe, fowowile ufulusa kufa, (foyowa na minyaka kifana igana dimwedu) ne umusilatungulu we sinda se muke Sala. 20 Ghowile na manhonge muchanya ye dihuwiso dye Mulungu, ninga hakakula kwa ludole mwihuwi dyakwe na kumutunya Mulungu, 21 na kuhuwila fina Mulungu kogolosa gose goyamuhuwise. 22 Kamei “Hayitaligwa ukwakwe kuwa chawelu.” 23 Hambiya simbuli, “Haitaligwa ukwakwe,” haitulumigwe fina sikosoko yakwe muhala, 24 ninga naseye nase. Yotaliligwa na ukwetu naseye chikumuhuwila imwene yamwinule Yesu Mundewa wetu kulawa muchilalo, 25 iyalafigwe kufa kosoko ya wihi wetu na kwinuligwa kosoko ya kutaliligwa chawelu.
1 Hambiya, kosoko chitaliligwa chawelu kwa njila ya ihuwi, china digoya hamwedu ne Mulungu kulokela Mundewa wetu Yesu Kilisito, 2 kulawa muimwene chipata mboto mwiiyo chikwima; na chikitunyila dihuwi dyetu dyo kuhangila ditunyo dye Mulungu. 3 Na sididyo muhala, ninga kahi chikitunyila magayo, chimanya fina magayo gakwigala ufinyilisi, 4 na ufinyilisi ukwigala kupimigwa, na kupimigwa kukwigala ihuwi, 5 na dihuwi hadikudaha kumuleka munhu, kosoko wendo lwe Mulungu witiligwa mumimoyo yetu kwa njila ya Muhe Musunhile wochinghigwe. 6 Kosoko chigele fochahungukiligwe, muchigele chiswanu chikafike Kilisito hakofa kosoko ya wanhu awasimumanyile Mulungu. 7 Kosoko ni fikugutu munhu yafe kosoko ya muchawelu, ninga kosoko ya munhu muswanu yakudaha kufa. 8 Ninga Mulungu yakuchonesa wendo wakwe hata chigele fochowile wehi Kilisito hakofa kosoko yetu. 9 Ichikulu lugano hambiya, ni kutaliligwa chawelu kwa sakame yakwe, na chihonyigwa kulokela imwene ne inyono ye Mulungu. 10 Kosoko inghowa fochowile wanghondo hachilamuliligwa ne Mulungu kulokela difa dye Mwanagwe, nheifo chawelu lugano, kulamuliligwa, na kuhonyigwa kwa wumi wakwe. 11 Si nheifo du, ninga chikitunyila Mulungu kulokela Mundewa wetu Yesu Kilisito, muimwene hambiya chihokela ulamulo. 12 No nheifo, kifana wihi fowingile muchilunga kwa njila ya munhu yumwedu, na difa nadyo hadija kwanjila ya wihi, kamei difa hodikwenela kwa wose kosoko wose wagolosa wihi, 13 wihi hawuwa muchilunga hata chigele dilagiso disinati dije, ninga wihi usikutaligwa inghowa hechaka ilagiso. 14 Ninga difa hadyuwa uko kulawa Adamu mpaka Musa, na hadiwalongosa hata awasigolose wihi ufina wa Adamu umufano wa yuya yakwenda yeje. 15 Ninga ichighwa sichifanile wihi uya. Kosoko inghowa matewa wafa kosoko ya kubana kwa munhu yumwedu, nheifo chawelu dihewa dya munhu yumwedu Yesu Kilisito dyongeseka kosoko ya matewa. 16 Na ichinghwa chisikifanile wihi uya we munhu yumwedu. Kosoko uliganiso ukwandamila dikosa dye munhu yumwedu na kwigala uliganiso, ninga ichingwa ichene chikwandamila makosa mengi chikwigala kutaliligwa chawelu. 17 Kosoko inghowa kwa kubana kwa munhu yumwedu, difa dyenela kosoko ya yuya munhu yumwedu, yokuwa lugano kwawaya wakuhokela dihewa dimemile na chiya ichingwa che chawelu wohala uumi kwayuya munhu yumwedu, Yesu Kilisito. 18 Kahi fina uwihi wa munhu yumwedu fowigale difa kuwanhu wose, no nheifo igolosa ya uchawelu wa munhu yumwedu ikwigala uwumi na kulekeleligwa kuwanhu wose. 19 Kosoko ya kuleka kuwa na chogoho kwe munhu yumwedu wengi hawagolosa wihi, nheifiya kosoko ya chogoho cha munhu yumwedu wengi wokuwa wachawelu. 20 Ninga dilagiso hadingila, hamwedu nadyo ubani hawongeseka, ninga wihi fowongeseke dihewa dye Mulungu hadyongeseka lugano, 21 uleke kifana, wihi foukulongosa mudifa, nheifo dihewa nadyo dilongose mukutaliligwa chawelu, kwingila kuwumi wa majuwa gose kulokela Yesu Kilisito Mundewa wetu.
1 Togoleni chigambeki? Chigendelele muwihi uleke dihewa dyongeseke? 2 Gwe putu! Yokuwa nhani aseye chufile muwihi kahi chuwe womi muwihi? 3 Hamumanyile fina chose chibatisigwe mugati ya Kilisito Yesu hachibatisigwa mudifa dyakwe? 4 Kwanheifo hachisikigwa hamwedu naye kwa njila ya ubatiso mudifa, uleke kifana Kilisito foyenuke kulawa mudifa kwa itunyo dye Baba, ase nase chigende muusha we uwumi. 5 Hambiya halika chihanga naye mudifa kifana idyakwe, chohanga naye kahi mukwinuka kwakwe. 6 Chimanya fina unhu wetu wa katali usambasigwa hamwedu naye, uleke umutufi we wihi ubanigwe, uleke chinghowe watumwa wa wihi keli. 7 Kosoko imwene iyafile kalekeleligwa kutali ne wihi. 8 Ninga inghowa chufa hamwedu na Kilisito chikuhuwila chokwikala hamwedu naye. 9 Chimanya fina Kilisito, foyafulusa kwinuligwa mudifa, nghakufa keli; difa dichaka ludole muchanya yakwe keli. 10 Kosoko difa dyoyafile hakaufila wihi lumwedu du, ninga uumi woyowile nawo kenawo kosoko ye Mulungu. 11 Kosko iyo nanye dogeni muwecho kuwa wafile muwihi womi muKilisito Yesu. 12 Kwanheifo, munghaleke wihi ulongose mitufi yenu iikubanika na kuhulikisa sulumisi sakwe. 13 Munghagendelele kahi kulafa filungo fyenu fyuwe fiya fya kugolosa wihi, ninga kilafeni muwecho kwe Mulungu kifana wanhu walawile kudifa kwija kuwumi, na kulafa filungo fyenu kwe Mulungu fyuwe fiya fye ichawelu. 14 Kosoko iyo wihi wokuwa wichaka ulongosi mugati yenu, kosoko hamuwile hasi ye dilagiso ninga mudihewa. 15 Togoleni! Nong'amba chigolose wihi kosoko hachuwile hasi ye dilagiso, ninga hasi ye dihewa? Gwe putu! 16 Hamumanyile fina kwayuya wowose womukilafa ukwakwe kifana watumwa wakogoha, mugaluka watumwa ukwakwe wo mukogoha, hegu yuwe wihi ukulongosa kudifa ama chogoho ichikulongosa kuuchawelu? 17 Ninga yalumbigwe Mulungu kosoko anyeye, mowile watumwa wo wihi, mugaluka wanhu wakuhulika kulawa kufidoga kugati, amafuso ge umanyi uya womwekigwe hasi yakwe, 18 na mulekeleligwa kutali kulawa kuwihi, mugaluka mbiya watumwa we chawelu. 19 Nikulonga chimunhumunhu kosoko ye inyuwa yenu ye chimutufi. Kifana fomwakilafile filungo fyenu kuwa watumwa wa kugolosa mbuli so wihi mukulu na mukulusi, nheifo lafeni filungo fyenu fyuwe watumwa we kugolosa ichawelu kwa usunhile. 20 Kosoko fomowile watumwa wa wihi hamuwa kutali ne ichawelu. 21 Hamupata chotoko chaki majuwa gaya kwa kugolosa mbuli sa chinyala? Indumo ya mbuli aso ni difa. 22 Ninga hambiya mulekeleligwa kulawa wihi na kugolosigwa watumwa we Mulungu, chotoko cho mukupata ni usunhile. Na indumo yakwe uwumi wa majuwa gose. 23 Kosoko digelo dyo wihi ni difa, ninga ichinghwa che Mulungu ni uwumi wa majuwa gose mugati ya Kilisito Yesu Mundewa wetu.
1 Hamumanyile, wandugu sangu, kosoko nikulonga na waya awamanyile dilagiso, fina togoleni dilagiso dikumoha munhu nomo yemumi? 2 Ni kifana mwanamuke yatoligwe foyohigwe ne dilagiso kwe mulume nomo ye mumi; ninga mulume yanghafa yakuwa kalekeleligwa ne dilagiso muchanhya ye mulume. 3 No nheifo kokwinangwa kena ihabwa inghowa yakwikala na mulume yungi chigele mulume kabaho mumi. Ninga inghowa mulume yeja yafa, basi kalekeligwa ne dilagiso, na halika kotoligwa na mugosi yungi hakudaha yenangwe kena ihabwa. 4 No nheifo, wambuya sangu, hamufa mudilagiso kulokela mutufi wa Kilisito, uleke muwe kwa yungi ambaye no imwene yenuligwe mudifa uleke cheleke mamudyo kwe Mulungu. 5 Fochowa munhenda se chimutufi, musulumisi we wihi, ukulemana ne dilagiso hachitogoma milimo na kweleka mamudyo ga difa. 6 Ninga hambiya chilafigwa kulawa mudilagiso, mudifa idyachikolile muutumwa, uleke chitogome muusha na siyo munyuwa ya katali ye diwandiko, ninga mumikalile misha ye Muhe. 7 Hambiya chigambeki kahi? Togoleni idilagiso digaluka wihi? Du hata! Ninga woile si dilagiso sowile nikuumanya wihi, hata sowile nikumanya dilagiso dikugamba, “unghasulumile chinhu che miyago.” 8 Ninga wihi haupata luneka kwa diya dilagiso, na kweleka mugati yangu chila usulumisi wihile. Kosoko wihi muhala bila dilagiso ufa. 9 Hanuwa mumi fonowile nachaka dilagiso, ninga dikeje adiya dilagiso wihi winuka keli 10 kamei honikufa, kamei idilagiso dyonahuwile fina dyokwigala uwumi digaluka ifa ukwangu. 11 Kosoko wihi kwa kupata luneka mudilagiso, haunidanhilisa na kulokela didyo hounikoma. 12 Kosoko tolati isunhika kahi ne dilagiso ni isunhi na dyachawelu kahi iswanu. 13 Togoleni nong'amba idiswanu kahi digaluka ifa ukwangu? Gwe putu? Hawuwa wihi, wendeunikoma mugati yangu kulokela gaya maswanu, uleke wihi woneke fina ni wihi, na fina kulokela dilagiso uwe wihi wihise lugano. 14 Kosoko chimanya fina dilagiso ni kosoko ya kugati ye muhe; ninga aniye nuwa mumutufi, niguligwe muutumwa we wihi. 15 Sikimanya chonikugolosa nimwecho. Kosoko agaya gonikuhananga nigolosa sikugolosa, ninga nikugolosa agaya gonisikuhananga. 16 Hambiya inghowa nikugolosa agaya gonisikwenda, nikudifumila dilagiso fina ni swanu. 17 Ninga chawelu siniye nikwenda kugolosa gano, ninga uwihi uya wuwile mugati yangu. 18 Kosko nimanya fina mwichaka uswanu wowose ukwikala mugati yangu, uwile mumutufi wangu. Kugolosa diswanu dyonikuhananga, ninga sikudaha kudigolosa. 19 Kosoko sikugolosa diswanu dyonikuhananga, ninga dihile dyonisikwenda kugolosa. 20 Hambiya halika nikugolosa idyosikwenda, basi siniye muchidoga changu nikugolosa, ninga uwihi uya wuwile mugati yangu. 21 Hambiya nyona fina nomo nikuhanaga nigolose dilagiso, kwina dihile dikunijila. 22 Kosoko nikudibwedelela dilagiso dye Mulungu mugati yangu, 23 ninga nikona mufilungo fyangu ilagiso dingi dikitowa ne chidoga changu, na kunigolosa niye mutumwa kwilagiso dye wihi adiya dikwikala mugati ye filungo fyangu. 24 Usungu wangu mukiwa nikufilaki niye! Nani yakwenda yanihonye kulawa mumutufi awu we difa? 25 Nikumulumba Mulungu kulokela Yesu Kilisito Mundewa wetu! Hambiya inghowa nonheifo basi niye mumisungu yangu nikuditogomela dilagiso dye Mulungu, ninga mumutufi nigaluka namutumwa wa ilagiso dya wihi.
1 Hambiya hechaka uliganiso kwa waya woile mugati ya Kilisito Yesu. 2 Kosoko dilagiso dye Muhe we uwumi wuwile mugati ya Kilisito Yesu unika hatali ne dilagiso dye wihi ne difa. 3 Kosoko Mulungu kagolosa gahunguligwe ne dilagiso kosoko ye umutufi we chimunhu kwa njila ya kumwigala Mwanagwe imwecho kwa futa ya uunhu une wihi uleke yauleuse wihi na kuuliganisa chimutufi. 4 Uleke agakuhanangigwa mwilagiso gamemelekele mugati yetu seye, chikugenda si kwa mutufi, ninga kwa Muhe na kwika fidoga fyetu musimbuli se chimuhe. 5 Kosko awaya wakwandamila mitufi weka fidoga fyawo musimbuli se chimutufi, ninga awaya wakwandamila mutufi weka fidoga fyawo Mumuhe. 6 Kosoko chidoga che mutufi ni difa, ninga chidoga cha Muhe ni wumi na digoya. 7 Kosoko iyo, ichidoga chikwandamila mutufi ni chinghondo kwe Mulungu, kosoko hachikudaha kufumila dilagiso dye Mulungu na chisikwija chifumila. 8 Na wose awakwandamila mitufi wasikudaha kumwedesa Mulungu. 9 Ninga inghowa Muhe we Mulungu yakwikala mugati yenu, basi nyeye musikwandamila mutufi, ninga Muhe. Munhu wowose yechaka Muhe wa Kilisito ayo siyo wakwe.. 10 Ninga inghowa Kilisito kowa mugati yenu, basi mutufi wufa kosoko ye wihi, na Muhe wa mumi kosoko ye ichawelu. 11 Inghowa Muhe wakwe imwene iyamwinule Yesu Kilisito muchilalo ukwikala mugati yenu, imwene iyamwinule Yesu Kilisito kulawa muchilalo komwinghani wumi mumitufi yenu yuwile mukufa kwa kulokela Muhe wakwe iyakwikala mugati yenu. 12 Hambiya wandugu sangu, chikudaigwa, siyo chimutufi, ninga chikale chimutufi, 13 kosoko inghowa ukugenda kwa kwandamila mutufi, mukuhananga kufa; ninga inghowa mukwandamila Muhe na kukoma nhenda sihile se chimutufi, mokuwa womi. 14 Kosoko wose wakulongosigwa ne Muhe we Mulungu awo no wana we Mulungu. 15 Kosoko musihokele muhe wa chitumwa na manhonge, ninga muhe wa kugoloswa wana. Nomo chikulila “Aba! Nong'amba Baba!” 16 Muhe imwecho yakuhomelela hamwedu ne fidoga fyetu, fina aseye cha wana we Mulungu, 17 na inghowa cha wana kahi cha wahasi, wahasi we Mulungu hamwedu na Kilisito, inghowa chikusambasika ni uleke chije chitunyigwe hamwedu na imwene. 18 Nikona fina magayo ge chigele chino gasifanile ne ditunyo dyonikwija nipata chigele cho kugubuligwa kwakwe ukwetu. 19 Kosoko fyumbe fyose fikugojela kwa nghwina lugano ulugubulo lwe wana we Mulungu; 20 Kosoko fiyumbe fyose hafikiigwa hasi ye uliganiso, siyo fofikwenda ifyecho, ninga foyakwenda imwene iyafikile hasi, mwihuwi. 21 Kosoko fyumbe ifyecho nafyo fyolekeleligwa kulawa muutumwa wo kudoda, uleke fipate indekelelwa ye ditunyo dya wana we Mulungu. 22 Chimanya fina fyumbe fyose fikugula usungu hamwedu mpaka hambiya; 23 ninga siyo du fiyumbe, ninga hata seye chiwecho, ichine mamudyo gaya ge nghonga ge Muhe, chikugula na kugojela kugoloswa kwetu, uhonya we mitufi yetu. 24 Kosoko kwa ihuwilo hachihonyigwa. Hambiya ihuwiso idikoneka si ihuwiso kahi, kosoko nani yakugendelele kuhuwila ichinhu chifuluse kwija? 25 Ninga inghowa chikuhuwila ichinhu ichisikoneka, basi chikuchigojela kwa ufinyilisi. 26 No nheifo na Muhe naye yakuchitasa mukuhungukiligwa kwetu; kosoko chisidahile kutasa ifene fo ikuhanangigwa, ninga Muhe imwecho yakuchitasila mbuli nghugutu na hata kwa kulila. 27 Na Imulungu iyakulanga mimoyo, kamanya ichidoga che Muhe kuwatasila wasunhile kwa kwandamila ifene foyakwenda Mulungu. 28 Chimanya fina musimbuli sose, Mulungu yakutogoma milimo hamwedu na maswanu na waya awakumwenda, awenangigwe kwa nyenda yakwe. 29 Kosoko awaya yawamanyile kulawa katali, hakawasagula, wowe futa kifana ye Mwanagwe, uleke yowe Nghulahanju mugati ya wandugu wengi. 30 Kahi awaya woyawasagule kulawa katali hakawenanga; na waya woyenange hakawatalila chawelu; na waya woyewatalile chawelu kahi hakawatunya. 31 Togoleni chigambeki musimbuli sino? iMulungu yanghowa ulwandi lwetu, nani yokuwa muchanhya yetu? 32 Imwene inghamulekelele Mwanagwe, ninga hakamulafa kosoko yetu, togoleni nghochinga chila chochikuhanaga? 33 Nani yakwenda yawalahe awasaguligwe ne Mulungu? iMulungu no ya watalilile chawelu. 34 Nani yakwenda yawaliganise? Si Yesu Kilisito yafile, heye, imwene yenuligwe muchilalo, yowile mukono we kulume we Mulungu, iyakuchitasila 35 Nani yakwenda yachibagule seye no wendo wa Kilisito? Wokuwa ukuguguti, ama tabu, hegu magayo, ama njala, au sakasa, ukomikomi, hegu ipanga? 36 Fina foitulumigwe kugamba, “Kosoko yako chikukomigwa chilo na misi; chikoneka kifana ngholo sa kuchinjigwa.” 37 Gwe putu, musimbuli sose sino aseye cha wasumi kahi kuloka awasumi kwa kulokela imwene iyachendile. 38 Kosoko hambiya nimanya fina sidifa, hegu wumi, ama malaika, kahi si mukulu wa isi, ifihambiya hegi ifikwija, hechaka udaha, 39 agekuchanhya kahi agehasi, ama chochose chumbigwe ichikudaha kunibagula ne wendo we Mulungu mu Kilisisto Yesu Mundewa wetu.
1 Nikulonga ichawelu mugati ya Kilisito, na ninga sikudanha; chidoga changu chikunihomelela ne Muhe Musunhile. 2 Nina usungu lugano na magayo agasikuhela mumoyo wangu. 3 Kosoko nikutasa hata niye nimwecho nidahe kusamisigwa na kutagigwa kutali na Kilisito kosoko ya wandugu sangu, wandugu we chimutufi. 4 Awano ni Waisilaeli, awagoloswe kuwa wana na wanhu we ditunyo ne dilagano, na kwinghigwa dilagiso, na kumufuga Mulungu, na mahuwiso gakwe; 5 awene no wene waBaba, na kulawa muwene kwa kwandamila mutufi nomo yalawile masihi iyejile muchanhya ya wose, iyakutunyigwa majuwa gose. Hano. 6 Siyo kugamba fina imbuli ye Mulungu idugikana. Kosoko si Waisilaeli wose ni walawile muisilaeli 7 na kahi siwose ni wana wa chawelu wa Ibulahimu; ninga, “Kwa kulokela Isaka wana wako wokwinangigwa.” 8 Ayino sikugamba fina wose wana we chimutufi ni wana we Mulungu, ninga awana we dihuwiso wakutaligwa fina ni wana wa welekwa. 9 Kosoko nhafi nofodikulonga dihuwiso kugamba, “Muchigele chikifane chino nokuya na Sala kokuwa na mwana.” 10 Ninga si nheifo du; chinhu chikifane chicho hachigoloseka kwa Lebeka, ugele foyowile na inda ye wanagwe kwe mugosi wakwe yumwedu, iBaba yetu Isaka. 11 Hata fowowile wekali kwelekigwa, na kugolosa mbuli yoyose swanu au ihile ( uleke nyenda ya Mulungu yo kusagula igendelele, 12 siyo kwa nhenda, ninga kwa lwinango lwakwe) mwanamuke yuya hakatamiligwa fina, “Mukulu komutogomela mudodo.” 13 Fina foitulumwe, “Nimwenda Yakobo ninga Esau nimudesekela.” 14 Togoleni hambiya chogambaki? Mulungu kena kwendelela? Du hata! 15 Kosoko hakamugamba Musa, “Nomonela ubasi ayuya wonikumonela ubasi, kahi nomonela usungu ayuya wonikumonela usungu.” 16 Hambiya siyo du kwa chimunhumunhu kahi kwa kwenda kwa munhu, ninga kwe Mulungu iyakonesa ubasi. 17 Kosoko matulumo gagamba kwa Falao, “Hanikwinula gweye kwasoko ya konesa udaha wangu ukwako, uleke disina dyangu ditagusigwe muchilunga chose.” 18 Hakamonesa ubasi wakwe kwa yuya woyasagule imwecho, na kuiguma ukugutu mimoyo ya waya woyasagule. 19 Wamonga wonigamba, “halika no nheifo nhani ho yekali yakulonga muchanhya ya wihi wa wanhu? Nonani yodaha kulemesa nyenda yakwe?” 20 Ninga agweye kwanani ukudaha kuwanga ne Mulungu? Togoleni Mumbi kodaha kuwanga ne ichumbo? Chumbo chigambe, “Nhani gweye unyumbile kifana nhafi?” 21 Ama imumbi nong'amba kechaka udaha muulongo, siyakuliganisa du awuno niugolosele chinhu achi na wuno nogolosele chiya cha itunyo? 22 Chogolosa choni inghowa Mulungu yanghamua konesa inyono yakwe ne udaha wakwe, kwa ufinyilisi mukulu hakakilondela na fiya fiya foyagolose fifuluse kubanigwa; 23 na yokuwa nhani ighowa kagolosa nheifo uleke yonese ugoli we ditunyo dyakwe kufiya fyoyonele ubasi, foyagolose kulawa katali fyuwe na itunyo; 24 hata seye si hakachinanga, siyo kwa Wayahudi du, ninga hata na Wamembe? 25 Hata nheifo yakugamba muchitabu cha Hosea, “Awaya wasowile wanhu wangu nowenanga wanhu wangu, na inghendigwe nomwinanga mwendigwa.” 26 “Kamei yokuwa ahanhu wenagwe, ‘Siyo wanhu wangu,’ wokwinangigwa wana we Mulungu ye mumi.” 27 Hata Isaya yakulila soko ya waisilaeli, “Chinghatala waisilaeli ni matewa kifana isanga ye bahali, ninga wakefu wakwija wahonyigwa, 28 kosoko Mundewa kogolosa fina foyalongile imbuli yakwe na kuimalagisa chimwande kwa chawelu.” 29 Na kifana Isaya foyagonese, “Inghowa Mundewa we inghondo woile nghachilekele cheleko hachisomigwa moto kifana Sodoma na kugolosigwa kifana Gomola.” 30 Togoleni hambiya chigambeki? Awamembe wanhu wasimanyile chawelu, waipata ichawelu kwa kulokela dihuwi; 31 ninga awaisilaeli wamanyile ichawelu, yuwile mudilagiso, wasumigwa kudimemelesa dilagiso diya. 32 Nhani? Ni kosoko hawandamile dilagiso diya kwa njila ya ihuwi, ninga kwa nhenda sawo. Watowa nghwalo mwiwe dya munghanda, 33 fina foitulumwe, “Langeni nikwika diwe Musayuni, iwe dikutowesa wanhu nghwalo, ikangalawe dikuwagolosa wogwe, kahi wowose yakumuhuwila imwene nghegumigwa chinyala.”
1 Wandugu sangu, kwenda kwe umoyo wangu ne inhasa kwe Mulungu ni kosoko yenu mudahe kuhonyigwa. 2 Kosoko nikudaha kuwahomelela fina, wena ludole kwe Mulungu, ninga wasigumigwe ujelu. 3 Kosoko inghowa hawaimanyile ichawelu ikulawa kwe Mulungu, na kuhananga kukongha chawelu yawo awecho, wamwichaka muchawelu ye Mulungu. 4 Kosoko Kilisito no ndumo ye dilagiso, uleke chila yakuhuwila yataliligwe chawelu. 5 Musa hakatuluma muchanhya ye ichawelu ikulawa mwilagiso, kugamba, “Munhu iyakugolosa didyo kokwikala na kugenda mudidyo.” 6 Ninga ichawelu iya ikulawa mwihuwi ikugamba, “Unghagambe kumoyo wako nani yokwila kulanga?” (uleke, yamwigale Kilisito hasi) 7 ama, “Nani yodulika mpaka hasihasisi?” (uleke yamukwise Kilisito kuchanhya kulawa kwa wafile). 8 Ninga igambigwaki? “Imbuli yahabehi nagwe, mumilomo yako na mumoyo wako.” (nong'amba, imbuli aiya ye dihuwi yochikutagusa); 9 Kosoko unghalamba kwa mulomo wako fina Yesu ni Mundewa na kuhuwila kugati yo moyo wako fina Mulungu hakamwinula kulawa muchilalo, kohonyigwa. 10 Kosoko kwa moyo munhu yakuhuwila na kupata ichawelu, na kwa mulomo yakulamba na kuhonyigwa. 11 Matulumo gakugamba nhafi, “Hechaka yamuhuwile kamei yagumigwa chinyala.” 12 Kosoko hechaka Muyahudi hegu Muyunani imwene ni Mundewa wa wose, yakuwengha wose wakumwinanga kwa undewa. 13 Kosoko, “Chila yakwinanga mwisina dye Mundewa kohonyigwa.” 14 Ninga womwinanga nhani munhu awasimuhuwile? Kahi womuhuwila finhani munhu wasimuhulike? Hata nheifo womuhulika nhani bila munhu kuwahubiliya? 15 Kahi wohubili nhani bila kwigaligwa? Fina foitulumigwe, “Ni miswanu lugano migulu yawo waya awakwigala imbuli swanu!” 16 Ninga si wose waihulikise imbuli swanu; kosoko mugonesi Isaya yakugamba, “Mundewa nani yahuwile simbuli setu?” 17 Hambiya nong'amba, dihuwi dikwija kwa njila ya kuhulika, na kuhulika kukwigaligwa ne imbuli ya Kilisito. 18 Ninga nikusa togoleni hawahulike? Du wahulika; kosoko, “Majwi gawo gahulikika muchilunga chose, na mbuli sawo kundumo ye chilunga.” 19 Keli kahi nikusa, waisilaeli wasimanyile? Kunghonga Musa hakagamba, “Nowaguma finju awanhu awasiditaifa; hamwedu na ditaifa dibwalate nowaguma nyono.” 20 Kamei Isaya yakulonga kwa nghinyo kugamba, “Nyonekana kuwanhu awasendewanikongha; nikionesa kwa wanhu wasinusile.” 21 Ninga kwa waisilaeli yakugamba, “Misi na chilo haniwanyooshela mikono yangu wanhu wasikuhulika na wechaka chihuliko.”
1 Hambiya, nikusa, togoleni Mulungu hakawalema wanhu wakwe? Gwe putu! Aniye du nimwecho namuisilaeli, mwana wa lukolo lwa Ibulahimu, nilawa mwikabila dya Benyamini. 2 Mulungu nghawalemile wanhu wakwe woyawamanyile kulawa katali. Nghumanyile matulumo fogakulonga muchanhya ya Eliya, ifene foyawasongese awaisilaeli hamwende ye Mulungu? Yakugamba, 3 “Mundewa wawakoma awagonesi wako, wamola ahanhu ho kufugila; nisigala niye niwaiyeka, nawo wanikongha wanikome.” 4 Ninga Mulungu hakamubidula nhani? “Niikikila fugasi ya wanhu figulu mutandatu awasikumufugamila Baali.” 5 Hambiya no nheifo kwa chigele chino cha hambiya, kwina wanhu wasigala, wasaguligwa kwa mboto. 6 Ninga inghowa kwa mboto, basi ichaka haja ya kutogomela milimo, hegu mboto ileke kuwa mboto. 7 Yanhani hambiya? Awaisilaeli wasumwa kupata chiya chowendewakonha. Ninga awaya wasaguligwe hawachipata, ninga wasigale hawowa wakugutu, 8 fina foitulumwe kugamba, “Mulungu hakawengha muhe wa ukugutu, wena meso ninga wasikona na nghutwi ninga wasikuhulika, mpaka diyelo.” 9 Kahi Daudi yakugamba, “Chakudiya chawo na chuwe italuma na mutego, hanhu ho kutowa nghwalo na maliho ukwawo; 10 meso gawo gowe lwisa uleke wanghone, ne migongo yawo igonje chigele chose.” 11 Hambiya nikusa, togoleni watowa nghwalo na kugwa? Gwe putu! Ninga kulokela kutowa nghwalo kwawo uhonya hauwijila wamembe, uleke kuwengha finju awaisislaeli. 12 Hambiya halika kutowa nghwalo kwawo, kwigala ugoli kuchilunga, basi na kusumwa kwawo kwigala ugoli Kuwamembe, hambiya siikuwa lugano kuumemi wawo! 13 Ninga nikulonga na nyeye Muwamembe. Foinimutumigwa wa Wamembe, nikutunya umulimo wangu 14 uleke niwagume finju Awayahudi wayangu, nhegele nohonya wamonga. 15 Kosoko inghowa kulema kwawo kwigala kulewanisa kwe chilunga, ninga kuhokeligwa kwawo yokuwa yoni halika siyo umi wawo chigele cho kufa! 16 Inghowa mamudyo ga kulafigwa kunghonga ni masunhile, nheifo ne mugunda wose ugaluka muswanu, kosoko inghowa idisina dye dibiki disunhika basi ne manhambi nago gasunhika. 17 Ninga inghowa manhambi gamonga hagadumuligwa, kamei agweye go museituni wa kumbago kuhandigwa mugati yawo, basi kugaluka muhangi nagwe ukuhanga umemi lwe ugoli we dibiki, 18 unghakitunyile mumanhambi. Kosoko unghakitunya, gelegela fina siyo no gweye ukudahisa idisina dye dibiki, ninga idisina idyecho no dikukudahisa gweye. 19 Nhegela kogamba, “Manhambi hagadumuligwa uleke nikigwe niye.” 20 Ayo ni chawelu. Kuwa hagadumuligwa kosoko ya kuleka kuhuwila kwawo, ninga gweye ukwima kosoko ye dihuwi du. Hambiya unghowe mwiyoni, ninga ukilangisise. 21 Kosoko inghowa Mulungu nghagalekile manhambi agecho ge dibiki, nhegela hakwanga yakuleke nagweye. 22 Uutange uswanu ne ufinyilisi we Mulungu: Ufinyilisi kuwanya wogwile, ninga uswanu we Mulungu ukwenu, ukuwagolosa nyeye mugendelele muuswanu wakwe; sinheifo nhegela anye nanye nhanga du mudumuligwe. 23 Hambiya hata awamonga muisilaeli, woile wahuwile nhanga wengisigwe, kosoko Mulungu kena ludole lwa kuwengisa keli. 24 Kosoko inghowa kudumuligwa kulawa hanhu howoile katali hene museituni wa kumbago na kwingisigwa kwingi kusikwawo, ninga kumuseituni umuswanu, siikuwa lugano kwawaya awemuseituni wawo wa katali kwingisigwa ukwawo. 25 Hambiya mungheje mukigamba mwina misungu kusuma fomuwile wandugu sangu, nikuhananga mumanye ichifiso chino fina ukugutu uwejila wanhu wa Isilaeli, mpaka Awamembe wowe wengi awakwingila. 26 Kwanheifo awaisilaeli wose wohonyigwa; fina foitulumigwe, “Mwihula kokwija kulawa Sayuni kobana isimbuli sihile kulawa kwa Yakobo; 27 na adino dyokuwa ilagano dyangu hamwedu nawo nomonikuwaleusila wihi wawo.” 28 Kosoko ye imbuli swanu wagaluka wanghondo we Mulungu, kosoko yenu; ninga kwa kusaguligwa wagaluka wendigwa kosoko ya waBaba sawo. 29 Kosoko fighwa ne lwinango lwe Mulungu lwichaka chibidubidu. 30 kifana katali fomowile mwichaka chihuliko kwe Mulungu, ninga hambiya muhokela ubasi kosoko ya kuwachaka chihuliko kwawo, 31 Hambiya wagaluka wasikwenda kuhulika, uleke kwa ubasi wonesigwe ukwenu nawo wauhokele. 32 Kosoko Mulungu kawomba wanhu wowe nheifo uleke yonese ubasi wakwe kwa wose. 33 Kusi ye ugoli no ubala ne misungu yakwe Mulungu! Isiikudaha kusakuligwa, nani yodaha kuumanya uliganiso lwakwe ne sinjila sakwe! 34 “Kosoko nonani yachimanyile ichidoga che Mundewa, ama nani yakudaha kuwa mulolesi wakwe?” 35 “Hegu nani yekudaha kumwingha ichinghwa yamuwisile?” 36 Kosoko kulawa muimwene na kulokela imwene finhu fyose fyumbigwa. Ditunyo dina imwene majuwa gose. Hano.
1 Hambiya nikuwatasani wandugu sangu, kwa ubasi wa Mulungu, lafeni mitufi yenu yuwe kifana nhambiko imumi isunhile, kahi ikuhokeligwa kwe Mulungu, ayo no ifuga yenu ye chimuhe. 2 Munghandamile mbuli se chilunga chino, ninga muwe washa mufidonga fyenu mudahe kutanga go yakwenda Mulungu, kahi goni amaswanu na gamemelekele. 3 Na kosoko ya mboto yo ninghigwe ne Mulungu, nikumuhananga chila munhu ukwenu yanghakiyone imwene munhu mukulu lugano kusuma foyakuhanangigwa yowe, ninga yakiyone musindamafu na yalamule ifene foikuhanagigwa mudihuwi dyoyenghigwe ne Mulungu. 4 Kosoko mumutufi umwedu china filungo fingi na filungo fyose fisikutogoma mulimo umwedu, 5 nheifo ase nase cha wengi ninga cha mutufi umwedu mugati ya Kilisito, chila munhu na miyagwe. 6 Chine ifinghwa fisiligane, kosoko ye imboto yakwe yo yachinghile chitogomele; inghowa ugonesi basi chiugolose kwa dihuwi dyetu 7 Inghowa kutogoma, chitogome na iyakufusa na yafuse, 8 iyakujama na yajame, iyakulafa na yalafe kwa undewa. Iyakutasa na yagolose yanghasoke; iyakonela wanhu ubasi na yagolose kwa chinyemi. 9 Wendo umeme, desekeleni wihi, koleni lugano amaswanu; 10 wendo lwe chindugu uwe mugati ya chila munhu na miyagwe, kiyoneseni chogoho nyenye kwa nyenye. 11 Munghowe wadoba, ninga muwe na ludole mumimuhe yenu kumutogomela Mulungu. 12 Bwedeleleni mwihuwi, muwe wafinyilisi mumagayo, wanhu wa mataso. 13 Lafeni finhu fyenu muwatase awasunhile, yuweni wandewa kuwageni. 14 Wamoteseni awaya wakuwasambasafibi; wamoteseni munghawaligitise. 15 Bwedeleleni na waya awakubwedelela, lileni na waya awakulila. 16 Mwikale kwa kifumilisa munhu na miyagwe, munghadoge makulu, ninga goloseni na amadodogi nago, yuweni waholo kahi munghakiyone fina mwina ubala kusuma wayenu. 17 Munghakilihe wihi kwa wihi, ninga amaswanu kumwande ya wanhu wose. 18 Inghadahika, kuulwandi lwenu, kaleni digoya na wanhu wose. 19 Wandugu, munghakilihe wihi nyenye kwa nyenye, ninga lekeni inyono ye Mulungu imwecho ilamule, kosoko itulumwa fina “Maliho ga wihi kwa wihi ni gangu nimwecho noliha, yakulonga Mundewa.” 20 Sinheifo du, “Ninga hata inghowa wanghondo wako wena njala wenghe chakudiya; wena nghilu wenghe meji, kosoko kwa kugolosa nheifo ukuwagumila moto wa makala mumatwi gawo.” 21 Munghasumwe ne wihi, ninga usumeni wihi kwa uswanu.
1 Chila munhu yawahulike awene ludole, kosoko hechaka ludole uusilawile kwe Mulungu; hata uya wibaho ulawa kwe Mulungu. 2 Hambiya munhu wowose yakulemana ne ludole uwo yakulemana ne Mulungu iyawikile, nawo wakulemana na uwo wohokela uliganiso. 3 Kosoko awakulongosa hawakutowa wanhu kosoko ya nhenda swanu, ninga sihile. Ukuhananga uwe munhu yechaka chogoho ne wasilikali? Golosa maswanu na kohokela ditunyo dyakwe; 4 Kosoko imwene ni mutogomi we Mulungu ukwako kosoko ya maswanu. Ninga inghowa ukugolosa gehile gowogoha, kosoko uludole wusikulonda dipanga bila mbuli ihile! Kosoko ni mutogomi we Mulungu yakumuliha chila imugolosa wihi. 5 Hambiya ukuhanangigwa uhulikise, siyo du kosoko ya kogoha, ninga kwa chidoga. 6 Kosoko ya iyo mukuliha kodi, kosoko awene ludole ni watogomi wa Mulungu wakiidasa musimbuli sino. 7 Liheni gose agakuhanangigwa na wene, munhu wa kodi mwingheni kodi yakwe, munhu wa ushulu mwingheni ushulu wakwe, munhu wa chogoho mwingheni chogoho. 8 Munghadaiigwe chinhu na munhu wowose ninga, kiyendeni nyenye kwa nyenye, kosoko iyakumwende miyagwe kamemelesa dilagiso. 9 Kosoko dilagiso digamba, “Unghagolose dihabwa, unghakome, unghahije; unghasulumile”; na malagiso goose gohigwa mwimbuli imwedu nayo ni “Mwende miyago fona foikiyenda gomwecho.” 10 Wendo lusikumugolosela munhu mbuli ihile, hambiya nong'amba wendo no umemesi we dilagiso. 11 Chinghaleka gago, ninga manyeni ichigele, fina ugele wo kugona hambiya uhela inukeni musinhongo. Kosoko uhonya uchisegelela hambiya kusuma fochowile chikali kuhuwila; 12 chilo chigendelela lugano, misi yahabehi. Chileke simbuli se chisa na kufala filama fye ujelu; 13 chigendeni kwa uswanu kifana wanhu wa hemisi, siyo kwa ukobo na ulefi wa gimbi, siyo kwa mbuli sihile na dihabwa, na kugomba na finju. 14 Ninga, mufaleni Mundewa Yesu Kilisito, na muunghaulange mutufi na kwaka kwa usulumisi wakwe wihile.
1 Wahokeleni waya wahungukiligwe mwihuwi, ninga munghalemane na madonga gawo. 2 Wamonga wakuhuwile kudiya chila chinhu, chigele wamonga wakwenda mboga muhala. 3 Awakudiya wanghawabese awasikudiya, naye inghakudiya yanghamubese inghadiile, kosoko Mulungu kamuhokela. 4 Agweye nonani ukwenda kumuliganisa mutogomi wa miyago? KweMundewa wakwe imwecho yakwima au yakugwa. Ninga kokwinuligwa kosoko Mundewa yakudaha kumwinula. 5 Wamonga wakuliganisa fina, dijuwa dimonga iswanu lugano kusuma dimonga, chigele wamonga wakuliganisa majuwa gose fina galigana. Chila munhu na yatange mumisungu yakwe imwecho. 6 Awaya wakukola majuwa, wakugakola na kugatunya kosoko ye Mundewa, na waya wakudiya wakudiya mwitunyo dye Mundewa, kosoko wakumwingha ilumbo Mulungu, na yuya inghakudiya nghadiile mwitunyo dye Mundewa, naye yakumulumba Mulungu. 7 Kosoko hechaka munhu mugati yetu iyakwikala kosoko yakwe imwecho, kahi hachikufa kosoko yetu chiwecho,. 8 Inghowa chikwikala chikwikala kosoko ye Mundewa, na inghowa chikufa chikufa kosoko ye Mundewa; basi hambiya, yuwe chufa ama chikwikala, aseye chawanhu wakwe Mundewa. 9 Kosoko Kilisito hakofa na kwinuka yekale keli, uleke yowe Mundewa wa fyose fyufile na ifyumi. 10 Nhani umuliganise imunduguso? Ama nhani gweye umubese munduguso? Kosoko chose chikwija chikwima hamwende ye uliganiso we Mulungu. 11 Kosoko itulumigwa, “Fina fonikwikala yakulonga Mundewa, chila ifindi dyofugama hamwande yangu, na chila ilimi dyotunya kulamba Mulungu.” 12 Basi hambiya, chila yumwedu wetu kolafa nhala yakwe kwe Mulungu. 13 Hambiya chileke kiliganisa chiwecho, ninga ibeka mulamule fina munhu yanghamukwakwalise miyagwe na kumukinya hegu kumuhindila njila. 14 Nimanya kahi, nitanga MwiMundewa Yesu fina hechaka chinhu chelekigwe chinyamafu, ninga chigaluka chinyamafu kosoko munhu kadoga fina ni chinyamafu, na chawelu ukwakwe munhu yo ni chinyamafu. 15 Inghowa mundugu sako yakubulagigwa ne fyakudiya fyoukudiya, kugaluka hukugenda muuwendo. Unghaleke fyakudiya fyoukudiya fimudese miyago, kosoko Kilisito hakofa kosoko ya yuyo naye. 16 Uswanu wako unghalongigwe kuwa wihi. 17 Kosoko undewa we Mulungu siyo kudiya na kunywa, ninga ichawelu ne digoya, kamei ne chinyemi mwiMuhe Musunhile. 18 Kosoko iyakumutogomela Kilisito mugago, ayo kahokeligwa ne Mulungu na kufumiligwa na wanhu. 19 Chandamile mbuli sa digoya, uswanu na mbuli sikujenga. 20 Unghaibane milimo ye Mulungu kosoko ya chakudiya. Chawelu fyose ni fiswanu, ninga fiha kwa yuya iyakuwakwakwalisa wayagwe kosoko ya fyakudiya fyakwe. 21 Yokuwa ibeka uleke kudiya, inghowa kudiya kwako kukuwakwakwalisa na kuwagolosa wayago wogwe. 22 Dihuwi diya dyowinadyo, uwe nadyo mumoyo wako gomwecho hamwande ye Mulungu. Ibeka awaya awechaka soko ya kiliganisa kosoko ya gaya gowakufumila. 23 Ninga waya wene manhonge waliganisigwa nomowakudiya, kosoko wasikugolosa kwa ihuwi. Na chila idisikulawa mwihuwi ni wihi.
1 Hambiya chikuhanangigwa seye chine ludole, chikilonde na waya wechaka ludole, na siyo kiendesa chiwecho du. 2 Chila yumwedu wetu yamwendese miyagwe uleke chijenge undugu. 3 Kosoko hata Kilisito nghakiyendese imwecho muhala, ninga fina foitulumwe, “Maligo gawo gowakuligile gweye haganugwila niye.” 4 Kosoko gose gatulumigwe chigele chilokile, hakatulumigwa kuchilolesa seye, uleke kwa ufinyilisi na kuguma moyo kwa njila ya matulumo chidahe kuwa na ihuwilo. 5 Mulungu we ufinyilisi na mugumi we moyo yawengheni kwikala muuhamwendu munhu na miyagwe, kifana Kilisito Yesu, 6 uleke kwa hamwedu na ijwi dimwedu mudahe kumutunya Mulungu na Baba we Mundewa wetu Yesu Kilisito. 7 Kihokeleni nyenye kwa nyenye, kifana Kilisito foyawahokeleni nyeye mwitunyo dye Mulungu. 8 Kosoko nikumutamilani fina Kilisito kagaluka mutogomi we dilagano dyo kufinigwa kosoko ye chawelu ye Mulungu uleke yadahe konesa mahuwiso galafigwe ne waBaba. 9 Kahi uleke Awamembe wadahe kumutunya Mulungu kwa ubasi wakwe. Fina foitulumigwe, “Kwanheifo nokulumba mugati ya Wamembe, na kwimba matunyo ge disina dyako.” 10 Kahi yakugamba, “Bwedeleleni, nyenye Muwamembe, hamwedu na wanhu wakwe;” 11 na kahi, “Mutunyeni Mundewa, anye mose Muwamembe, na wanhu wose wamutunye;” 12 Na kahi Isaya yakugamba, “Mulukolo lwa Yese kolawa munhu yokwinula na kulongosa Wamembe; umwakwe Wamembe wohuwila.” 13 Mulungu we dihuwi yawengheni mose chinyemi, ne digoya mukuhuwila, uleke mwikale mwihuwi kwa ludole lwa Muhe Musunhile. 14 Aniye nimwecho nifumiliswa muchanhya yenu nyenye wandugu sangu fina nyenye nanye mumema uswanu, na ubala wose, na fina mudaha kilolesa munhu na miyagwe. 15 Hata nheifo mbuli simonga niwawandikila kwa ludole lugano uleke kuwagelegesa, soko ye dihuwi diya dyoninghigwe ne Mulungu 16 kuwa mutogomi wa Kilisito Yesu Kuwamembe muutambiki nimugolosele milimo imbuli swanu ye Mulungu, uleke filafwa fya Wamembe fidahe kuhokeligwa, kwa kutambikiligwa na Muhe Musunhile. 17 Mu Kilisito Yesu, nina soko ya kitunyila milimo yangu kwe Mulungu. 18 Kosoko sikugesa kulonga mbuli ingi, ninga ayiya du yoyamalagise Kilisito, uleke Wamembe wafumile na kuhulika kwa mbuli ama kwa nhenda. 19 Kwa ludole lwa fitangilo na majumo, kulokela ludole lwe Muhe Musunhile, igaluka kulawa Yelusalemu mpaka Ililiko, nihubili lugano mbuli swanu ya Kilisito. 20 Kwanheifo nikiyoha lugano kuihubili mbuli swanu, ninga ninghaihubili hanhu Kilisito yafuluse kuhubiliigwa, uleke ninghajenge muchanhya ya nghindiso ya munhu yungi; 21 ninga fina foitulumigwe, “Awaya wasihubiliigwe mbuli sakwe wokona, na waya awasihulike womanya.” 22 Nochileka nikulemesigwa chila fonikuhananga kwija ukwenu. 23 Ninga hambiya nichaka hanhu kahi mumikowa ino, kwa chipisi chitali hambiya nikuhananga kwija ukwenu 24 nomonikuluta Hisipaniya. Kosoko nikuhuwila fina nowonani munhambo yangu na kwigaligwa na nyenye, hanuwa na chinyemi lugano kuwa hamwedu na nyenye kwa chipisi chiguhi. 25 Kwa hambiya, nikuluta Yelusalemu, nikawatogomele awasunhile; 26 Kosoko iwendesa wanhu wa Makedoniya na Akaya kuhanga finhu fyawo na wakiwa hamwedu na wasunhile ako Yelusalemu. 27 Hawendesigwa kugolosa dino, na chawelu wapata ideni nawo; Kosoko inghowa Wamembe weja wahangila simboto sawo se chimuhe, ikuhanangigwa wawatogomele na gechimutufi nago. 28 Hambiya fonikumala mulimo uno, na kuwengha gose na kuhokela achiya chilafigwe, nolokela ukwenu, kuluta Hisipaniya. 29 Nani nimanya fina ningheja ukwenu nokwija na umemelesi wose we simboto sa Kilisito. 30 Nikuwatasani, wandugu sangu kulokela Mundewa wetu Yesu Kilisito na wendo we Muhe, muhange na niye lugano kunitasila hamwande ye Mulungu kosoko yangu. 31 uleke nidahe kuhonyigwa na wanhu wehile ako Yudea, na kahi umulimo wangu woninawo ako Yelusalemu uhokeligwe na wasunhile, 32 uleke kwa nyenda ya Mulungu nidahe kwija ukwenu kwa chinyemi na kuwasangalasani mwitewa dyenu. 33 Mulungu we digoya yowe hamwendu nanye mose. Hano.
1 Nikumutunya ukwenu, lumbudyetu Foibe, imutogomi we dikanisa dyuwile Kenkileya, 2 uleke mudahe kumuhokela mwiMundewa fina foikuhanangikwa kuwasunhile, na kumutasa mugose goyahananga ukwenu, kosoko kagaluka mutasi mukulu kwa wengi, na ukwangu lugano. 3 Mulamuseni Pilisika na Akila, watogomi hamwedu na niye muKilisito Yesu, 4 na kilafa hata kukoma ugima wawo kosoko yangu, nikuwalumba lugano, ninga hamwedu na makanisa gose ga Wamembe. 5 Dilamuse ne dikanisa dyuwile munyumba yawo. Mulamuse mwendigwa wangu Epayineto, iyowile munhu we nghonga kumuhuwila Kilisito ako Asiya. 6 Mulamuseni na Maliamu, iyakidasile lugano mugati yenu. 7 Mulamuseni kahi na Aduloniko na Juliya, awano hawowa na niye kuchifungo, ni wanhu wamanyike lugano mugati ya watumigwa, nawo hawanilongolela kuwa mugati ya Kilisito. 8 Mulamuse lugano, Ampuliato, mwendigwa wangu MwiMundewa. 9 Mulamuse Ulubano, mutogomi miyetu muKilisito, na mwendigwa wangu Sitakisi. 10 Mulamuse Apele, imunhu yahomeleligwe muKilisito. Walamuse wanhu wa mukaya ya Alisitobulo. 11 Walamuse wandugu sangu cha Helodioni. Kamei lamusa na woile mwiMundewa, wanhu wa mukaya ya Nalisisi. 12 Walamuse watogomi wose mwiMundewa, cha Tulufena, na Tulofosa. Mulamuse na mwendigwa wangu Pesisi, munhu yakilafile lugano kosoko ye Mundewa. 13 Mulamuseni Lufu, musagulwa we Mundewa; kamei lamusa ne nghinakwe, nghinangu na niye. 14 Kamei mulamuse na Asikilito, Filegoni, Helime, Patiloba, Hemasi, na wandugu woile hamwedu naye. 15 Nilamusile Filologo na Yuliya, Neleya, ne dada yakwe, na Olipa, na wasunhile wose woile hamwedu nawo. 16 Kilamuseni nyenye kwa nyenye kwa kinonela kusunhile. Makanisa gose ga Kilisito gakuwalamusani. 17 Nikuwatasani wandugu sangu, walangisiseni lugano awaya wakwigala mbuli sa finju na kukwakwalisa, na kulema mafuso gomuhokele; kinegeni nawo. 18 Kosoko wanhu kifana wo wasikumutogomela Mundewa wetu Kilisito hata, ninga kwenda kudiya, na wakulonga nonga sisimulile na sa udasi uleke kuyagilisa mimoyo ya wanhu waswanu. 19 Kulawa chigele fochimanyike ichihuliko chenu kuwanhu wose, uleke nidahe kubwedelela muchanhya yenu, nikuhananga muwe wabala mumaswanu na muuleme wihi. 20 Mulungu we digoya komukinya Shetani chimwande hasi ye migulu yenu. Dihewa dye Mundewa wetu Yesu Kilisito dyuwe hamwedu nanye. 21 Timoseyo, imutogomi miyangu yakuwalamusani; na Lukio, Yasoni na Sosipita, awandugu sangu, 22 Aniye Telitio, iniwandike baluwa yino, nikumulamusani mwisina dye MwiMundewa. 23 Gayo, imukaya wetu, na kwe dikanisa dyose yakumulamusani. Elasito Imwikaji wa mapesa ge kaya yakulamusa, na Kwato naye yakulamusa. 24 Dihewa dye Mundewa wetu Yesu Kilisito dyuwe nanye mose. Hano. 25 Hambiya Mulungu iyakudaha kuwagumani ludole, kwa imbuli iya swanu yonahubili ya Yesu Kilisito, kwa ugubulo we chifiso chekigwe kulawa katali 26 ninga hambiya chigubuligwa, na kulokela matulumo go ugonesi chigoloswa chimanyike Kuwamembe, kosoko ye dilagiso dya majuwa gose dye Mulungu, kwigala habehi ichihuliko che dihuwi 27 kwe Mulungu yena ubala yemwene, kulokela Yesu Kilisito ditunyo dina imwene majuwa gose. Hano.
1 Paulo kunangigwa na uwendo we Mulungu kuwa Mutumigwa wa Mubakigwa Yesu, na imundugu setu sositene, 2 Ku wanhu we Mulungu wowile Kolinto, ku waya wasunhigwe mu Mubakigwa Yesu, wenangigwe kuwa wasunhile hamwedu na wose waya wowile chila hanhu howekitang'anyila kumutasa Mundewa Yesu Kilisito: Yekuchilanga aseye na wene. 3 Ibeka ukwenu na dihewa kulawa kwe Mulungu Baba iwetu na iMundewa wetu Yesu Kilisito. 4 Nikumwingha Mulungu malumbo chila ugele kosoko yenu, kosoko ya Ibeka ye Mulungu yoyawenghile kwe njila ya Mubakigwa Yesu. 5 Kosoko ku chila chinhu hamumotesigwa ukwakwe, mu nonga yose na ubala wose; 6 Imbuli ya Yesu ika misisi yakwe bila kusingisika munyikala yenu. 7 Kahi musikosole ibeka yoyose ikulawa kwe Muhe Musunhile fina fomukugojela kukugubuligwa kwa Mundewa wetu Yesu Kilisito. 8 Imwene kowaguma ludole mwijuwa dyoyekuja. 9 Mulungu yakuhuwilika imwene kawenanga muwe hamwedu ne imwanagwe. Yesu Kilisito Mundewa wetu. 10 Dededeni wandugu sangu nikumutasani mwisina dya Mundewa wetu Yesu Kilisito, mwifumilise kwa gaya gomukulonga na kunghowe na matemanuko mugati yenu, ninga wandugu sangu. 11 Kosoko wanhu kulawa munyumba ya Kiloe wanhamila fina kwina lukani mugati yenu wandugu sangu. 12 Ninga nikulonga nhafi, chila munhu wa ukwenu yakugamba, “Aniye na wa Paulo,” ama “Aniye na wa Apolo” ama “Aniye na wa Kefa” ama “Aniye na wa Kilisito.” 13 iKilisito kakigawa? iPaulo hakofa mumusalaba kosoko yenu? Ama hamubatisigwa kudisina dya Paulo? 14 Nikumulumba Mulungu kosoko sibatise yoyose ila Kilisipo na Gayo. 15 Munhu yangheje yegamba fina hakabatisigwe kwe disina dyangu. ( 16 Kahi haniwabatisa wanhu wa munyumba ya Sitefano, muchanhy ya wawo sikutanga nghona Babatise yungi). 17 Kosoko Kilisito nghanitumile soko nibatise ninga kuhubili mbuli swamu, kahi si kwa ubala wa nonga, umusalaba wa Kilisito ungheje uleusiligwa uludole lwakwe. 18 Kosoko imbuli yo umusalaba kwa wekwagilila ni ubwalasi, amba ukwetu chikuhonyigwa na ludole lwa Mulungu. 19 Yandikigwa, Nombana ubala wawo awena ubala, na mahala gawo awena mahala nogalema 20 Iyena ubala kowahe? Kowahe iMutulumi? Kowahe imulukani we chigele chino? Langa! iMulungu nghaugolose ubala we chilunga chino kuwa ubwalasi? 21 Kosoko mu ubala we Mulungu, hayuwa fikugutu kuwanhu kumumanya imwene kwa kuhuwila ubala wawo awecho. Haimwendesa Mulungu kuwahonya wanhu wahuwile kupulutila auya ukoneka fina ni ubwalasi wo chikuhubili. 22 Wayahudi wakuhananga majumo na Wayunani wakuhananga ubala, 23 amba seye chikumuhubili Kilisito yasambasigwe; kwa Wayahudi ni chikwakwaliso, na kwa Wayunani ni ubwalasi; 24 amba kwa waya wekwinangigwa Wayahudi kwa Wayunani, Kilisito ni lwe Mulungu na ubala we Mulungu. 25 Ichikoneka fina ubwalasi we Mulungu china ubala kusuma wanhu, na uhololi we Mulungu wina ludole kusuma wanhu. 26 Mulange hamuwa wanhu wa namuna yaki ugele wo mwenangigwe, si wengi wowile na ubala kwe fipimo fye chimunhumunhu, si wengi wowile na ludole, kahiwelekigwe mulukolo lwe chindewa. 27 Ninga Mulungu hakasagula ifinhu fikoneka fya chibwalasi muchilunga, kuwaguma chinyala awena ubala, na hakasagula ifinhu fikoneka fyechaka ludole kuwanhu kuwaguma chinyala awanhu wena ludole. 28 Kahi Mulungu hakafisagula ifinhu fibwalasike muchilunga, Langa! Ifinhu fihechaka, soko afileuse afiya fikoneka. 29 Imunhu yoyose yena mutufi yangheje yekiyona kumwande ye Mulungu. 30 Mulungu kenda ugima wetu uwe hamwedu na Kilisito Yesu, na kupulutila Yesu hachingha ubala wakwe. Imulungu kachisunha, na kwa njila ya Kilisito chigaluka wanhu wakwe wasaguligwe na kachileusa wihi. 31 Fina foitulumigwe Iyakiyona, yakiyone muchanhya ye Mundewa
1 Ninga wandugu sangu fonejile ukwenu, sejile niwahubili ichifiso chawelu che Mulungu kwa inonga swamu kahikwa ubala. 2 Kahi hanihananga ninghamanye mbuli yoyose ukwenu amba Yesu Kilisito naye kasambasigwa. 3 Fonejile ukwenu hanyuwa nichaka ludole na hanyijiligwa na chogoho, 4 amafuso ne imbuli fisalafigwe kwa ubala amba kwa konesa uludole lwa Muhe we Mulungu. 5 Ninga si ubala we chimunhumunhu ulekile nyeye mumuhuwila Kilisito, amba uludole lwe Mulungu. 6 Kahi hena ubala wochikulonga mugati ya waya wakangala, amba lo ubala we chilunga achi, ama wa waya wakuchidima ichilunga, awena indumo; 7 amba chikulonga ubala we Mulungu muchifiso, auya ubala ufisigwe, aiya imilungu yoyalamule kulawa kunghonga kosoko ye ditinyo dyetu, 8 hechaka Mundewa wa ugele uno yaumanyile, kosoko mhali waumanyile wasowile wakumusambasa iMundewa we ditunyo. 9 Ninga fina foitulumigwe; Simbuli sisoneke na meso, ama kuhulika, ama umoyo wa munhu usisidogile, simbuli sekigwe ne Mulungu kwa waya awakumwenda. 10 Imulungu kachigubulila seye kwe Muhe. Kosoko iMuhe yakusakula chila chinhu hata amafumbo ge Mulungu. 11 No nani muwanhu iyakumanya amadoga ga wanhu nghona si uunhu uwile umwakwe? No nheifo hechaka iyakugamanya togi amadoga ge Mulungu ila Muhe we Mulungu. 12 Kahi chisihokele iMuhe we chilunga amba iMuhe iyakulawa kwe Mulungu, kosoko chimanya kutanga fyose fyochinghigwe ne iMulungu. 13 Kahi chikulonga kwa simbuli sisifudigwe kwa umanyi wa munhu ninga sifusigwe ne Muhe, chikusitapita simbuli sa kumoyo kwa mbuli sa kumoyo. 14 Imunhu we kawayida nghakuhokela simhongesi se Muhe we Mulungu, kosoko ni sa chibwalasi ukwakwe, ne nghakudaha kusimanya kosoko sikoneka chiloho. 15 Imunhu muswan yakulamula finhu fyose, ninga imwene nghakulamulwa na yoyose. 16 Kosoko no yehoki yagamanyile amadoga ge Mundewa mpaka yamulolese? Amba seye chinago madoga ga Kilisito.
1 Kahi aniye wandugu sangu silongile na nyeye fina wanhu we chiloho, ninga fina wanhu we chilunga, fina wana wadodogi mumaisha ge chiloho. 2 Hanimwinghani mele munywe na siyo chakudiya chikugutu kosoko musadahile kumesa na hata hambiya munghati mudahe. 3 Kosoko nyeye munghali wanhu we chilunga. Nghona munghali wanhu wa finju na magomvi gekali mugati yenu ifinhu afyo fikonesa fina nyeye munghali wanhu we chiduniya, mukwikala fina wanhu we chilunga. 4 Yumwedu wenu yanghagamba, “Aniye ne mwifusa wa Paulo,” na yumonga, “Aniye na mwifusa wa Apolo” Musikugolosa fina wanhu we chilunga? 5 Apolo no nani? Na Paulo no nani? Aseye cha watumigwa du we Mulungu, Chiwegalileni dihuwi fina iMulungu foyachigawile chila yumwedu wetu. 6 Hanihanda simbeyu, iApolo hakadonhesa na meji, ninga iMulungu noyasitendile sikule. 7 Iyahandile si chinhu ama iyadonhese si chinhu ila iMulungu iyasitendie sikula. 8 Iyahandile imbeyu, na ayuya yaidonhese wose waliganila. Ne Mulungu komwingha mhongesi chila munhu kosoko ye imilimo yakwe. 9 Kosoko aseyecha watogomi we milimo hamwedu ne Mulungu, anyeye ni mugunda we Mulungu. Kahi anyeye ni nyumba ya Mulungu. 10 Kosoko ya udaha we Mulungu woninghigwe nidaha fina mujengaji mumanyi mkatila sumbi ya hagati, na munhu yungi yakujenga muchanhya yakwe. Leka chila munhu yowe mulangisisi fina foyakujenga muchanhy yakwe. 11 Hechaka munhu yakudaha kwika sumbi ingi kusuma aiya ikigwe, nonghamba Yesu Kilisito. 12 Mukwika sumbi ya hagati wamonga wakwika mabiki gakangale, na wamonga gasikangale; awamonga wojengela sahabu ama shaba ama mawe maswanu mumusingi; na wamonga wojengela mbawo ama manyagala ama mabelege. 13 Uswanu we milimo ya chila munhu wokoneka na kiyonesa mwijuwa dya Kilisito, kosoko mwijuwa didyo umoto wokonesa milimo ya chila munhu, umoto wogesa na konesa uswanu wa chila mulimo. 14 Nghona chiya chijengigwe mumusingi chikufinyilisa umoto uwo, imujengaji kohokela maliho. 15 Ninga imilimo yako inghalakala, koyagilisa; amba agweye gomwenecho kohonyigwa kifana munhu yakwegigwe kulawa mumoto. 16 Musimanyile fina nyeye mwa dihekalu dye Mulungu kahi Muhe we Mulungu yakwikala ukwenu? 17 Mulungu komubana chila munhu iyakubana dihekalu dye Mulungu. Kosoko dihekalu dye Mulungu ni disunhile, ne dihekalu dyo nonyeye. 18 Munghakidanhilise. Nghona yumwedu mugati yenu yakudoga fina ni mubala muugele uno, leka yowe mubwalasi uleke yapate ubala we chawelu. 19 Kosoko ichikoneka ni ubala muchilunga ni ubwalasi mumeso ge Mulungu. Kosoko itulumigwa, Yakuwagwesa awena ubala mu mahala gawo; 20 kahi Mundewa kamanya fina amadoga ga wanhu wena ubala gasikufaya. 21 Langa! Munhu yanghakiyone kosoko ya wanhu. Kosoko chila chinhu ni chenu. 22 Inghowa Paulo ama Petili ama Apolo ama ichilunga ama ugima ama difa ama ugele uno ama ugele ukwija, fyose ni fyako: 23 na nyeye mwa Wakilisito na Kilisito ni wa Mulungu.
1 Munhu yachone seye fina cha watogomi wa Kilisito na wemilisi wa ififiso fye Mulungu. 2 Ichikuhanangigwa ku wemilisi ni kuwa wanhu wakufumilika. 3 Ninga ukwangu niye sichinhu kulamuligwa na nyeye ama na ibalasa dya wanhu, kahisikilamula nimwenecho. 4 Sikutanga chochose chibanike ukwangu, ninga kosoko iyo sikutaliligwa haki, amba iMundewa noyakulilamula. 5 Amba nyeye munghalamule mbuli ugele usinati wije, mpaka yeje iMundewa, imwene kogamulika gafisigwe muchisa, na kogubula uwendo wa umoyo. Na chila munhu kohokela igeleko yakwe kwe Mulungu. 6 Nitumia agano gose ukwangu na kwa Apolo kosoko ye fayida yenu wandugu sangu, mukifuse kulawa ukwetu fina munghalute kusuma agaya agatulumigwe, kahi mugati yenu munghowe na yumonga yakiyona na kubesa wayagwe. 7 Kosoko no nani yakuwabagula niye; kwina choni chomwinacho chonghuhokele? Ninga nghona uhokele nhani ukiyona kifana nghuhokele? 8 Mufulusa kwiguta, kahi mwawagoli, mulongosa bila seye, mhali mwadimile soko nase chidime hamwedu na nyeye. 9 Nikudoga fina iMulungu kachilafa aseye chiwatumigwa kundumo, kifana wanhu walamuligwe kufa kumwande ya wanhu kosoko chigaluka museigo muchilunga cha Malaika na wanhu. 10 Ase cha wabwalasi kosoko ya Kilisito, ninga anyeye mwina mahala mu Kilisito. Aseye chasina ludole, anyeye mwina ludole! Aseye chibwalasika ninga nyeye mwinuligwa. 11 Mpaka diyelo china njala na nghilu; chisakasa, chikutowigwa na chikusamasama; 12 na chikutogoma milimo kwa mikono yetu chiwecho. Chinghaligigwa chikumotesa, chinghasambasigwa chikufinyilisa. 13 Kahi chinghaligigwa chikubidula fiswamu, chigaluka ikusisi dye chilunga, aseye cha makombo ge iisi muchigele achi. 14 Sikuwandikila gano soko ya kuwaguma chinyala, amba ni soko ya kuwafunda fina wanangu wendigwa wangu. 15 Hata nghona mwina wasindikisi (walimu) matewa mu Kilisito Yesu, mwichaka waBaba wengi. Kosoko nigaluka Baba yenu mu Kilisito Yesu kupulutila mbuli swanu. 16 Ninga nikumutasani mwandamile inhenda yangu. 17 Kosoko iyo nikumutuma Timoteo imwanangu mwendigwa na muhuwilika mu Kilisito Yesu, kuwagelegwesa amalagiso gonifusile gowile mu Kilisito Yesu fina fonikufusa chila hanhu mumakanisa. 18 Awamonga wetogola kosoko wamanya fina sikwija ukwenu. 19 Mulungu yanghenda nokwija kuwatemelela chimwande, nani nolangisa siyo inonga yawo du aweyoni amba na uludole lwawo. 20 Kosoko undewa we Mulungu usuwile munonga ila muugolosaji. 21 Mukuhananga nhani? Nije ukwenu na mukotya ama nije na wendo na loho ya uholo?
1 Awanhu wanitamila fina kwina ihabwa ukwenu ambadyo disikudaha koneka hata kuwamembe; yumwedu wenu yakugenda ne muke mudodo we Babakwe. 2 Mukudahaje kwiyona? Hayuwa muhongese! Muleke ayo yagolose didyo yalegusigwe ukwenu. 3 Na niye hata nghona nihechaka chimutufi nikifana nabaho kwa madoga, na nifulusa kumulamula; 4 mwisina dye Mundewa wetu Yesu kwe Munhu yabanile umwiko awo. Ugele womukwitang'anyila, na hamwedu nanyeye kwa madoga, hamwedu ne ludole lwa Mundewa Yesu. 5 Mumulafe imunhu ayo kwe luhoma kosoko yo kutenyangigwa umutufi wakwe, ne ichidoga chakwe chihonyigwe mwijuwa dyo kwija Mundewa. 6 Inyiyona yenu siyo swanu! Musikumanya fina nungo ndodogi ikusasisa sage mwingi? 7 Mwihojojole mukatage inungo ya katali soko muwe igonge disha disilungigwe fina fomukuhanangigwa muwe, kosoko Kilisito ipasa yetu kufulusa kulafigwa. 8 Lekeni ninga chigolose sikukuu siyo kwe nungo ya katali, inungo ya gehile ninga kwe imikate isilungigwe ye usunhile na chawelu. 9 Haniwandikila mubaluwa yangu munghakihanangise ne wanhu we dihabwe; 10 Ichawelu nochi, sowile na mana ya wanhu wose we dihabwa, we ifuhi; awahiji, ama wekufuga ifisiki munhu wowile muchilunga, kosoko kuwenega wo hayuwa musame muchilunga. 11 Chonyandike nochi, munghakihanangise na munhu yoyose yamanyikane ni dihabwa, ama we ifuhi, ama yakufuga fisiki munhu, chamaligo, mulefi ama muhiji. Munhu wa namuna yo hata kukudiya munghadiye naye. 12 Kahi si kasi yangu niye kulamula awanhu wowile kunje ye dikanisa. Awo Mulungu kowalamula. Ninga nyeye musikwendeka muwalamula awowile na nyeye? 13 Fina foitulumigwe mu maandiko: Muleguseni imunhu yehile mugati yenu.
1 Nghona yumwedu wenu yena nonga ne muKilisito miyagwe, nhani yalute kuwanhu we chilunga na kuleka kuluta kuwanhu we Mulungu soko walamule? 2 Musikumanya fina awanhu we Mulungu wolamula ichilunga? Na nghona ichilunga chikulamulwa nanyeye nhani mudikudaha kulamula fibuli fidodogi? 3 Musikumanya fina chowalamula Malaika? Bila kutala finhu fidodogi fya chila ijuwa. 4 Ninga munghowa na fibuli fidodogi, nhani mukuwenanga kulaha awanhu wasimanyike ne dikanisa? 5 Chinyala ukwenu! Nong'amba hechaka munhu ukwenu yena ubala wo kulamula mugati ya Wakilisito. 6 Ninga, muKilisito yakumusongesa miyagwe kwibalasa, na yakulamuligwa ne wanhu wasikuhuwila. 7 Chawelu kosoko mwina nonga mugati yenu ikonesa fina musumwa kwikala fina foikwendeka ku Wakilisito. Hayuwa fiswanu ukwenu kuleka wanhu wa wapujile. Na hayuwa fiswanu ukwenu kuleka wanhu walonde ifinhu fyenu. 8 Ninga anyeye muwecho mukupujila na kulonda ifinhu fya wanhu, hata fya Wakilisito wayenu. 9 Musamanyile fina awabanaji wasiuhala undewa wa Mulungu? Munghadanhilisigwe; awanhu we dihabwa, awakufuga si sanamu, awekusulumila walume weyawo na kugenda nawo 10 wahiji, wakobo, walefi, waligaji, ama wahokaji wasiuhala undewa we Mulungu. 11 Na muwamonga hamuwa nheifo. Ninga musunhigwa, mugaluka wanhu we Mulungu, mulekeleligwa mwisina dye Mundewa Yesu Kilisito na mumuhe we Mulungu wetu wochikumutogomela. 12 Munhu yakudaha kugamba, “Ifinhu fyose nechaka mwiko nafyo. Heye! Amba si finhu fyose ni fiswanu ukwako. Finhu fyose fichaka mwiko ukwangu nichaka chonisilile,” ninga aniye sikulongoswa na chochose. 13 Ukudaha kugamba, “Ichakudiya ni kosoko yo kunda na kunda kosoko ye chakudiya.” Ninga Imulungu kofibana fyose. Umutufi we munhu si kosoko ye dihabwa ninga kosoko ye Mundewa; ne Mundewa ni kosoko yo umutufi. 14 Ninga Imulungu yamwinule iMundewa, kochinula na seye kwa ludole lwakwe. 15 Musikumanya fina imitufi yenu ni filungo fya umutufi wa Kilisito? Afo nilonde ichilungo cha Kilisito na kuchigolosa chuwe kilungo che iwe dihabwa? Sikudaha! 16 Mumanye fina iyakugenda ne wadihabwa yakuwa mutufi umwedu naye, kosoko fina foitulumwe Aweli wakuwa mutufi umwedu. 17 Amba iyakihanangise ne Mundewa yakuwa hamwedu naye chiloho. 18 Mukitemanule na dihabwa. Uwihi wose awanhu wowakugolosa ni kunje ye imitufi yawo, amba iwadihabwa yakugolosa wihi mumutufi wakwe imwenecho. 19 Musimanyile fina imitufi yenu ni dihekalu dya Muhe Musunhile mugati yenu, womwinghigwe ne Mulungu? Kahi anyeye si sawo yenu muweecho, 20 hamuguligwa kwa beyi nghulu, kosoko yo tumiyeni mitufi yenu kumutunya Imulungu.
1 Hambiya kosoko ye simbuli somwandike ni fiswanu ngohona munhu nghakutola. 2 Ninga kosoko yo usulumisi we dihabwa chila mugosi yowe na muke wakwe mwenecho na chila mwanamuke yowe na mugosi wakwe. 3 Imugosi yagolose fina foikuhanangigwa kwe imuke ne imuke yagolose fina foikuhanangigwa kwe imugosi wakwe 4 Imwanamuke kechaka udaha muchanhya yo umutufi wakwe ninga imwanamuke wakwe kenawo. 5 Munghaleke kwikala hamwedu labuda muwe mwifumilisa kugolosa nhaifo kwa chipisi chidodogi kosoko yo kutasa. Kahi mukiyuwile chimwande kosoko iluhoma yangheje yewagesa kosoko musikudaha kugendelela kuleka kwikala hamwedu. 6 Gonikumutamilani hambiya ni maloleso na siyo malagiso. 7 Hanyendaga wanhu wose wowe fina niye fonuwile. Ninga chila munhu kene chipawa chakwe kulawa kwe mulungu, ayuno chipawa achi na ayuya achiya. 8 Hambiya, nikuwalolesa awagosi wasinati watole na awanawake iwegane fina ni fiswanu kugendelela kuwa fina niye. 9 Hata nheifo nghona munhu nghakudaha kufinyilisa na yalote, kosoko ni ihufu kutola kusuma kuwa no usulumisi we dihabwa. 10 Ku watolile na kutoligwa ninadyo ilagiso, siyo dyangu ninga dye iMundewa, imuke yanghakileka na imugosi wakwe; 11 ninga yanghakileka naye uleke yekale mwigane ama yakifumilese ne mugosi wakwe na imugosi yanghamuleke imuke wakwe. 12 Ku wasigale nikugamba (Aniye nimwenecho siyo Mundewa:) Nghona mugosi muKilisito yena muke inghakuhuwila na yakufumila kwikala naye, yanghamuleke. 13 Na nghona mwanamuke muKilisito yena mugosi inghakuhuwila na yakufumila kugendelela kwikala naye yanghamuleke. 14 Kosoko imugosi nghakuhuwila yakuhokeligwa kwe Mulungu kupulutila imukagwe, na imwanamuke nghakuhuwila yakuhokeligwa kwe Mulungu kupulutila imugosi wakwe. Nghona isowile nheifo awana wawo hawowa wakuwa wana wa wanhu wasimanyile Mulungu we chawelu, ninga fina foyuwile wafumilika kwe Mulungu. 15 Ninga nghona yuya nghakuhuwila yakuhananga kumuleka imiyagwe imuKilisito na yamuleke. Mu mbuli yo imuKilisito we chike ama we chilume kena udaha wa kulamula. Kosoko Mulungu kawenanga mwikale kwa dihewa. 16 Agwe go muke muKilisito kumanya nhani fina nghukudaha kumuhonya imugosi wako? Nagwe go mugosi muKilisito kumanya nhani fina nghukudaha kumuhonya imwanamuke wako? 17 Chile yumwedu yagendelele kwikala fina iMundewa Yesu foyamwinghile na fina fowenangwe ne Mulungu. Adino no dilagiso dyangu ku makanisa gose. 18 Wamonga wenu hawowa wafinigwe ugele wowenangigwe ne Mulungu wanghakane fina wafinigwa. Na nghona nghwafinigwe ugele wowenangigwe unghafinigwe. 19 Kosoko kufinigwa ama kuleka kufinigwa si chinhu, ichinhu che mana ni kukola amalagiso ge Mulungu. 20 Chila munhu yasigale fina foyowile ugele woyenangigwe. 21 Hakuna mutumwa ugele wowenangigwe? Unghatonge. Ninga unghadaha kupata luneka lwa kulekeleligwa lutumiye. 22 Kosoko imwene yenangigwe ne Mundewa fina mutumwa kadoholeligwa ne Mundewa. Kahi nheifiya ayuya yowile hulu ugele wo yenangigwe na Kilisito kagaluka mutumwa wakwe. 23 Hamuguligwa kwa bei, kahi munghowe watumwa wa wanhu. 24 Wakilisito wayangu chila munhu yasigale ne Mulungu fina foyowile ugele wo Iwinago. 25 Kosoko ye imbuli ya kutola na kuleka kutoligwa nechaka ilagiso kulawa kwe Mulungu amba nikulafa maloleso gangu, aniye nikuhuwila kwa ubasi we Mundewa. 26 Nikudoga nhafi, kosoko ye lwidaso lwa hambiya ni fiswanu kwe imunhu kuwa fina foyali. 27 Togola! Nghona utolile unghahanange kuwa mwigane. Kwichaka mwanamuke unghahanange kutola. 28 Ninga unghatola nghukugolosa wihi, na mwanamuke nghatoligwe yanghatoligwa nghakugolosa wihi ka! Kahi awo awekitola wapatigwa na lwidaso lwe chilunga achi, amba niyehanyendaga ago ganghawapate nyeye. 29 Chonikulonga nochino wambwiya sangu; ichigele chisigale siyo chitali; kulawa hambiya na kugendelela lekeni awaya watolile wowe kifana wasitolile. 30 na wayo wakulongesa kifana wasikulonges, na waya wakubweda fina wasikubwedelela, na waya wakugula fina ifinhu fyo siyo fyawo. 31 nawo wen imilimo ne chilunga achi wowe kifana wechaka milimo nacho lugano kosoko ichilunga achi chikuloka. 32 Aniye hanyendaga munghowe na manhonge. Imunhu nghatolile yakiidasika ne imbuli ye Mulungu, fina foyemwendesa Mulungu. 33 Ninga imunhu yatolile yakiidasika na finhu fye chilunga fina foyemwendesa imuke, 34 Kahi kagawanyika. Imwanamuke nghatoligwe ama bikila yakiidasika ne simbuli se Mundewa, yakuwaje musunhile mumutufi ne chimuhe, ninga imwanamuke yatoligwe yakidasika ne mbuli se chilunga, kosoko yakuhananga yamwendese imugosi wakwe. 35 Nikuwatamileni agano kosoko ye fayida yenu na siyo kwa kuwekilani mugwato. Ninga nikuhananga nyeye mugolose fiswanu na digoya, mumutogomele Mulungu bila kulemesigwa kwa njila yoyose. 36 Nghona munhu yakona nghakugolosa fiswanu kumwande ye mutumisigwa wakwe yanghaleka kumutola na usulumisi wina ludolesi, yagolose fina foyakuhananga yamutole, hechaka uwihi. 37 Amba imugosi yanghalamula imwenecho mumoyo wakwe kuleka kumutola, na nghona yakudaha kuudima usulumisi na kufulusa kulamula kugendelela kumwika fina bikila yakugolosa fiswanusi yanghaleka kumutola ayo ibikila. 38 Iyakutola yakugolosa fiswanu, na iyakuleka kutola yakugolosa fiswanusi. 39 Imwanamuke yatoligwe kohigwa ne mugosi wakwe ugele wose woyakuwa mumi. Ninga imulume yanghofa (yanghatajika) yakudaha kutoligwa na munhu yoyose muladi yowe Mukulisito. 40 Ninga fonikona niye hayuwa ikuwa ibeka lugano mhali yasigale foyowile. Ago ni maloleso gangu, na nikudoga fina aniye nani ninaye Muhe we Mulungu.
1 Hambiya kosoko ye fyakudiya fye sinhambiko, chimanya fina wose china umanyi, umanyi ukuwagolosa wanhu wakiyone ninga uwendo ukukangala. 2 Nhona yumwedu yakudoga fina kamanya chinhu, chawelu nghamanyile fina foikuhanangigwa. 3 Ninga imunhu iyakumwenda Mulungu kamanyigwa ne imwene. 4 Kahi hambiya nikuhananga nilonge soko ye ifyakudiya filafigwe kufisiki munhu, chimanya fina ikisiki munhu kikwima ahanhu he chinhu chihechaka; chimanya fina Mulungu ni yumwedu du. 5 Hata inghowa kwina finhu fikinangigwa filungu muchilunga ama kulanga, na hata inghowa kwina Filungu na Findewa, 6 hata nheifo ukwetu aseye kwina Mulungu yumwedu, Ibana yombile fyose na uumi wetu ukumuhuwila mwene. Kahi hena Mundewa yumwedu Yesu Kilisito, kwa njila yake finhu fyose hafyumbigwa, na seye kwa njila yakwe chikwikala. 7 Ninga si chila munhu kena umanyi uno. Wanhu wamonga wasowela sisanamu, wanhu ambawo mpaka ugele awu fowakudiya ifyakudiya wakufyona kifana fyakudiya fitambikiligwe sisanamu. Na kosoko fidoga fyawo fisaifu wakugumigwa uwihi. 8 Ichakudiya kisikudaha kuchigala habehi ne Mulungu. Chinghaleka kudiya chisikuhangukiligwa na chinhu, chinghadiya chisikongeseligwa chinhu. 9 Amba lo mukilangisisa udaha wenu unghawagolose awena dihuwi ikefu wakwakwalike. 10 Kosoko munhu wowose yanghakona gweye munhu wo umanyi ukudiya fyakudiya fyo mwihekalu dye sisanamu, togola! Yanghowa na chidoga chisaifu nghegumigwa moyo kudiya fyakudiya fitambikiligwe sisanamu? 11 Kosoko yako ayu munhu musaifu yakwagilila, imundugu muKiilisito iKilisito hakofa kosoko yakwe. 12 Munghawagolosela wandugu senu nhaifo na kufibulaga ifidoga fyawo fisaifu, mokuwa mugolosa mbuli ihile kwa Kilisito. 13 Kosoko yo, inghowa chakudiya kikumugolosa mundugu sangu miyangu yagwe, sidiya keli nyama ningheje nimugolosa mundugu sangu yengile mu wihi:
1 Aniye sohigwe, aniye namutumigwa, nimonile Yesu Mundewa wetu, nanyeye ni chotoko che milimo yangu kosoko ye Mundewa. 2 Hata inghowa kuwamonga aniye si mutumigwa amba ukwenu aniye namutumigwa. Anyeye no uhomelesi wa utumigwa wangu kosoko ya nyeye kuwa hamwedu ne Mundewa. 3 Auno no utetesi wangu kwa waya awakunilangisisa. 4 Afo, chichaka haki yo kudiya na kunywa? 5 Chisikufumisigwa kulonda mwanamuke muKilisito musinhambo setu fina fowakugolosa awatumigwa wamonga wanduguse we Mundewa, na Petili nheifiya? 6 Ama no niye du na Balinaba chikuhanangigwa kwikimilisa? 7 Hena musilikali yakulihila utumishi wakwe kwijeshi? Nani yakuhanda mugunda wa misabibu bila kudiya mamudyo gakwe? Nani yakudima bila kunywa mele musaeo yakwe? 8 Afo nikulonga simbuli asi chimunhumunhu du? Togola! Amalagiso gasikulonga nhaifo? 9 Kosoko itulumwa mumalagiso ga Musa Uleke kudyoha dikambaku kumulomo ugele wo dikukutasa kutowa uhemba Hambiya nonghamba Imulungu yakiidasikisa ne dikambaku? 10 Togola! Nghachidogage seye foyalongage nheifo? Chawelu agano hagatulumigwa kosoko yetu, kosoko ayuya iyakulima na yuya iyekugola, wose foni weli wena haki yo kupata ichipisi che masao. 11 Nghona seye chihandile mbeyu ye chiloho mugati yenu, togoleni ni chihufu chinghabawa ukwenu ifayida ye chidunia? 12 Nghona wamonga wena ihaki yo kugojelesa go kulawa ukwenu, afo seye chichaka haki kusuma wo? Awene ninga seye chisigolose ichelu yo, ahanhu hakwe chigendelela kufinyilisa kosoko chinghakiikile chikwakwaliso chochose imbuli swanu ya Kilisito. 13 Nonghamba musimanyile fina awakugolosa milimo mwihekalu wakudiya mwihakalu? Kahi awakulafa ifilafwa hefugilo wakwinghigwa ulwandi lwe ichilafwa? 14 Nheifiya iMundewa kalagisa fina awakuhubili imbuli swanu wakikimilise awecho kulawa umulimo uwo. 15 Amba niye situmiye hata imwedu si haki so, ukwangu niye inyendesa kufa kusuma kumugolosa yumwedu yone fina nikiyona chaka. 16 Nghona nikuihubili mbuli swamu adyo siyo dya kunigolosa nikiyone, awo ni mulimo wangu woninghigwe, ikuwa ihile ukwangu ninghaleka kuihubili. 17 Kosoko mhali nausagule umulimo awu kwa nyenda yangu, hanyuwa nikugojela maliho; ninga kosoko nikuigolosa fina mulimo wangu, ayo ina mana fina ni mulimo woninghigwe niugolose. 18 Nikulihigwa choni? Maliho gangu ni chipisi cha kuihubili mbuli swamu bwete, bila kutasa haki sikwendekana kwa kuihubili. 19 Hata nghona niye si mutumwa wa munhu wowose, hanikigolosa mutumwa wa chila munhu soko nimuhaningile Kilisito wanhu matewa foikudahika. 20 Ku Wayahudi hanyuwa fina Muyahudi kosoko niwagwise Wayahudi; hata inghowa niye sikukoligwa na maloleso gawo, hanikigolosa fina nikukoligwa nago kosoko niwapata awene wowile musheliya. 21 Na kwa waya ambawo si Wayahudi nikala fina awene bila kukola a malagiso ge Chiyahudi kosoko niwapate wawo wa si Wayahusi. Siyo fina niye sikogoha malagiso ge Mulungu kosoko aniye nikoligwa ne malagiso ga Kilisito. 22 Ku wanhu we dihuwi ikefu hanikigolosa nhaifo kosoko niwapate awo we dihuwi ikefu. Hanikigolosa chila chinhu kwa wose kosoko nidahe kuwahonya awamonga wawo kwa chila njila. 23 Nikugolosa aga gose kosoko ye imbuli swamu nidahe kuhanga mu mboto yakwe. 24 Chawelu mumanya fina mukwisuma lumangho wose wakubilima, amba yumwedu yakuhokela mhongesi. Mukuhanangigwa mubilime kuihokela. 25 Wabilimaji wakiingha mafuso na nisamu nghali, wakugolosa nheifo wapate digelo ni kubanika, amba seye chikugolosa nheifo chipate digelo dya majuwa gose, (didikubanika). 26 Sikubilima chaka, nofonikitowa siyo fina mwitowaji iyakutowa ihewa. 27 Nikuwingha mutufi wangu mafuso makugutu na kuuguma munisamu iyeecho, aniye nimwenecho ningheje nilemigwa ninghafulusa kuwahubiliya wayangu.
1 Wandugu sangu nikuhananga mumanye finhu awakulu setu wose hawowa muulangisisi we difunde diya na fina wose hawaloka fiswanu mu bahali indunghu. 2 Na wose hawabatisigwa mu hihango na Musa mwifunde diya na mubahali iya. 3 Na wose hawadiya chakudiya chichiya che chiloho. 4 Kahi hawonywa ichingwela chichiya che chiloho, kosoko howonywa kulawa mwibambalawe dye chiloho diwandamile, na dibambalawe dyo hadyuwa Yesu imwenecho. 5 Hamwedu na gago gose matewa mugati yawo wasamwendese Mulungu na amaiti gawo hagatagigwa munyika. 6 Hambiya simbuli so ni maloleso ukwetu kosoko chinghasulumile kugolosa wihi. 7 Munghowe wafuga sisanamu fina wamonga fowowile, fina fitulumigwe, Awanhu hawekala kudiya na kunywa na hawema na kunyemuka. 8 Chinghakigume mwihabwa fina awamonga fowagolose na wanhu figulu makumi meli na ndatu hawofa ijuwa dimwedu. 9 Kahi chinghamugume Mundewa mumagesa fina awamonga mugati yawo fowamugesile na kosoko yo hakakomigwa (lumigwa) na majoka. 10 Kahi munghang'ung'ulike fina awamonga fowang'ung'ulike na kosoko yo hawabanangiswa ne mubanangisi. 11 Ninga simbuli aso siwapatile ni chitangilo kuwanhu wo na hasitulumigwa kuchilolesa aseye achikwikala muugele uwile habehi ne ndumo. 12 Kosoko yo iyakiyona fina kagangamala yelangisise yanghagwe. 13 Amagesa gomufuluse kupata ni ga kawaida kuwanhu. Mulungu ni muhuwiliki, naye nghefumisa nyeye mugesigwe kusuma uludole wenu, amba hamwedu na magesa imwene komwinghani ludole lwa kufinyilisa na njila ya kulawa umo digoya. 14 Kosoko yo Wakilisito wendigwa wangu tijeni imbuli yo kufuga fisiki munhu. 15 Nikulonga na nyeye fina wanhu wena ubala, mulamule muweecho gonikulonga. 16 Fochikumulumba Mulungu kwe chikombe achiya chi imboto, afo chisikuhanga isakame ya Kilisito? Na fochikubendula umukate, fochikuudiya afo chisikuhanga mu mutufi wa Kilisito. 17 Kosoko umukate wo ni umwedu, aseye hata inghowa chi itewa cha mutufi umwedu kosoko wose chikuhanga umukate uwo. 18 Mulange sinhenda sa Chiyahudi, awaya wakudiya ifilafwa wasikuwa hamwedu ne masabahu? 19 Nikugamba nhafi, ifyakudiya fitambikiligwe sisanamu si chinhu, kahi isanamu si chinhu. 20 Hata! Chinikulonga nochi, ichikulafigwa mumasabahu ga chipagani chikulafigwa kumashetani, nani sikuhananga nyeye muwe na uhangi na mashetani. 21 Musikudaha kunywila ichikombe che Mundewa ne chikombe che luhoma. Musikudaha kunywa mumeso ye Mundewa na mumeso ya luhoma. 22 Chikudoga fina china ludole lwa kumusuma iMundewa kuwa na finju? 23 Ifinhu fyose fisikulemesigwa, ninga si finhu fyose fikufaya. Ifinhu fyose fisikulemesigwa, ninga si finhu fyose fikujenga. 24 Munhu yanghalangise uwendo wakwe imwenecho, ninga uwendo wa miyagwe. 25 Mudiye chochose chikuguligwa mumabucha bila kusagisa kosoko ye fidoga fyenu. 26 Kosoko Ichilunga chose ni che Mundewa, na finhu fyose fiumo. 27 Nghona yumwedu wa waya wasikuhuwila kawagoneka nyeye kuchakudiya cha hegulo, na mufumila, diyeni fyose fikigwe kumwande yenu bila kusagisa, kosoko ye fidoga fyenu. 28 Ninga yumonga yanghagamba, “Ichakudiya achi chitumika kunhambiko, kosoko ye imunhu ayo yawatamileni na kosoko ye fidoga fyenu munghadiye.” 29 Nikulonga kosoko ye chidoga che imunhu yawatamile na siyo ifidoga fyenu. Kosoko nhani uhulu wangu ulamuligwe na chidoga che imunhu yungi? 30 Nghona nikushiliki kwa malumbo; nhani munhu yanilaumu kosoko ye chakudiya chonikulafa malumbo? 31 Kahi nghona mukudiya ama mukunywa, ama chochose chomukugolosa, goloseni fyose kuditunyo dye Mulungu. 32 Munghabane ku Wayahudi ama Wayunani ama kwikanisa dye Mulungu. 33 Fina fonagesile kuwendesa awanhu wose mu finhu fyose, silangise uwendo wangu nimwecho ninga wa wose kosoko wahonyigwe.
1 Nyandamileni niye fina fonikumwandamila Kilisito. 2 Nikumutunyani anyeye kosoko mukunigelegela mu chila chinhu na kukolelela gamahokelo fina fonegegale ukwenu. 3 Ninga nikuhananga nyeye mumanye fina ditwi dya chila munhu ni Kilisito, ditwi dya mwanamuke ni mugosi wakwe, na ditwi dya Kilisito ni Mulungu. 4 Munhu wowose yakutasa ama kuhubili Imbuli swamu akuno nghagubike iditwi dyakwe yakwigala chinyala kwe mugosi wakwe. Ni kifana itwi dyakwe digetigwa. 5 Kahe mwanamuke wowose yakutasa ama kuhubili Imbuli swamu akuno nghagubike iditwi dyakwe yakwigala chinyala kwe mugosi wakwe. Ni kifana itwi dyakwe digetigwa. 6 Ninga imwanamuke yanghaleka kugubika ditwi dyakwe yakuhanangigwa yagete sinjwili sakwe, ama inghowa ni chinyala kwe mwanamuke kugetigwa, uleke yagubike ditwi dyakwe. 7 Kosoko imugosi nghakuhanangigwa kugubika ditwi dyakwe, kosoko imwene no mufano ne ditunyo dye Mulungu; amba imwanamuke ni ditunyo dye mugosi; 8 kosoko imugosi nghambigwe kulawa kwa mwanamuke, ninga mwanamuke kombigwa kulawa kwe mugosi. 9 Wala imugosi nghombigwe kosoko ye mwanamuke, ninga mwanamuke kosoko ye mugosi. 10 Kosoko yo imwanamuke yakuhanangigwa yegubike iditwi dyakwe kosoko ya malaika. 11 Hata nheifo, mwe Mundewa imwanamuke nghakikamila imwenecho kahiimugosi nghakikamila imwenecho. 12 Kosoko fina imwanamuke foyombigwe kulawa kwe mugosi, kahi imugosi hambiya yekwelekigwa ne mwanamuke. Na finhu fyose fikulawa kwe Mulungu. 13 Lamuleni muweecho ni fiswanu kwe imwanamuke kutasa kwe Mulungu na itwi dyakwe bila kugubikigwa? 14 Hata amaumbile agecho gakumufusani fina kwe mugosi kuwa na njwili nghulu ni chinyala ukwakwe, 15 ninga imwanamuke yanghowa na njwili nghulu ni heshima ukwakwe. Kosoko kenghigwa si njwili simugubike. 16 Ninga munhu wowose yanghahananga kwigala lukani kosoko ye imbuli ayi, nikugamba, kahi aseye ama makanisa ge Mulungu gena ijadi ingi yo kufuga. 17 Ninga mumaloleso gekwandamila sikumutogolani, kosoko nomoo mukitang'anyila hamwedu si kosoko ya uswanu ninga uwihi. 18 Kunghonga nikuhulika fina kwina matemanuko ukwenu ugele womukwitang'anyila kuguga, na niye nikuhuwila chidodogi. 19 Kosoko ikuhangigwa kuwe na matemanuko mugati yenu kosoko awaya iwachawelu mugati yenu watangike. 20 Na fomukutang'ana, chomukudiya siyo chakudiya che Mundewa. 21 Kosoko fomukudiya chila munhu yakubilimila kudiya ichakudiya chakwe, kahi wamonga wekuwa na njala, na wamonga wekuwa walewa. 22 Togoleni! Mwichaka nyumba so kudiila na kunywila? Ama mukudibwalasa dikanisa dye Mulungu na kuwaguma chinyala awechaka chinhu? Nilonge nhani? Niwatogole? Kosoko isikuwatogola putu! 23 Kosoko hanihokela kulawa kwe Mundewa agaya gonegale ukwenu nheifiya, fina iMundewa Yesu muchilo choyasongesigwe hakalonda mukate, 24 na foyalafile malumbo hakaubendula, na kugamba, “Auno no umutufi wangu ulafigwe kosoko yenu. Goloseni nheifino kwa kunigelegela.” 25 Nheifiya kahi yakafulusa kudiya, hakalonda chikombe yakugamba, “Ichikombe achi ni ilagano disha musakame yangu. Chila ugele womukunywila, goloseni nhaifo kwa kunigelegela.” 26 Kosoko chila fomukudiya umukate awu na kunywila ichikombe achi, mukutagusa idifa dye Mundewa mpaka foyakuya. 27 Kosoko yo wowose yakudiya umukate kuchunywila ichikombe bila kunogeligwa yakuwa kabana kwa kutofula umutufi ne sakame ye Mundewa. 28 Uleke chila munhu yakipime imwenecho noho leka yadiye umukate na kunywila ichikombe. 29 Kosoko munhu wowose yakudiya umukate na kunywila ichikombe bila kunogeligwa kudiya umutufi na kunywila ichikombe yakiligita imwenecho. 30 Nochonghone matewa mugati yenu wasoka na kodoka, na wamonga wofa. 31 Ninga inghowa chikilamule chiweecho kunghonga, chisowile chikulamulwa ne Mulungu. 32 Ninga ugele wo chikulamulwa ne Mundewa, chikufusigwa kosoko chinghadahe kuligitiswa hamwedu ne chilunga. 33 Kosoko yo Wakilisito wayangu, mungheja kudiya hamwedu mukigojele munhu na miyagwe. 34 Munhu wowose yena njalasi yadiye ukaya kunghonga, ungheje ukwija hamwedu kosoko yo kuligitiswa. Amba kosoko ye simbuli simonga nomwinghani maloleso ugele wonikwija ukwenu.
1 Hambiya kosoko ye mamudyo ge Muhe Musunhile, Wakilisito wayangu nikuhananga mumanye ichawelu chawo. 2 Mumanya fomowile wapagani hamwaganisigwa ne sisanamu sichaka ugima, hata nheifo yoneka fina mulongosigwa. 3 Kahi nikuhananga mumanye fina hechaka munhu yakulonga kwa Muhe Musunhile yakudaha kulonga, Yesu yaligitwe, na hechaka munhu yakugamba, “Yesu ni Mundewa,” nghona nghakulongoswa na Muhe Musunhile. 4 Hambiya, kwina mamudyo ga namuna nyingi amba iMuhe ni yumwedu; 5 na kwina namuna nyingi sa kutogoma ninga iMundewa ni yuyuya yumwedu. 6 Na kwina namuna nyingi sa milimo ninga iMulungu ni yumwedu yakudahisa sose mu chila munhu. 7 Chila munhu yakwinghigwa ujelu wa Muhe kosoko yo uswanu wa wanhu wose. 8 Yumwedu yakwinghigwa kupulutila Muhe ulongaji wa ubala, na kwa yungi ulongaji wa umanyi foyakuhananga iMuhe yumwedu. 9 Yumwedu na Muhe yuyuya yakulafa udaha dihuwi dya chawelu na kwa yumonga udaha wa kuhonya. 10 Yakumwingha yumwedu udaha wa kugolosa majumo, yumonga udaha wo kutagusa mbuli ya Mulungu, yumonga udaha wa kubagula na kutanga amamudyo gekulawa kwe Muhe na gasikulawa kwe Muhe. Yakumwingha yumwedu udaha we inonga ye chimembe, na kwa yumonga udaha wa kutagusa silongigwe. 11 Aga gose gekwinghigwa ne Muhe yumwedu; yakumugawila chila munhu fina foyakuhananga. 12 Kosoko fina umutufi foni umwedu na wina filungo fingi, ne ifilungo fyose fyo umwili hata nghona ni fingi ni mutufi umwedu, no nheifo foyuwile kwa Kilisito. 13 Kosoko kwa Muhe yumwedu wose hachibatisigwa mu mutufi umwedu, chuwe Wayahudi ama Wayunani, watumwa ama walekeleligwe, na wose hachigoloseka chung'we mu Muhe yumwedu. 14 Kosoko umutufi usigolosigwe na chilungo chimwedu, ninga filungo fingi. 15 Umugulu unghagamba, “Kosoko niye si mukono, aniye si wa mutufi, togola wogaluka si wa mutufi?” 16 Na inghutwi inghagamba, “Kosoko ni si igiso, aniye si wamutufi,” togola dyogaluka si dya mutufi? 17 Woile umutufi wose uwe igiso, kukuhulika hakuwa kukuwa hoki? Na woile umutufi wose uwe nghutwi hakuwa kukuwa hoki kukunusa? 18 Ninga ichawelu chochino, Imulungu kafiliganisa ifilungo fyo umutufi, chila chimwedu fina foyasagule. 19 Mhali umutufi wose wowile chilungo chimwedu, umutufi hawuwa ukuwa hoki? 20 Ichawelu nochino, kwna filungo fingi amba umutufi ni umwedu. 21 Digiso disidaha kuugamba umukono, Sikukuhananga! Kahi iditwi ku migulu, Sikukuhananga! 22 Na kuchibidu, afiya ifilungo fikoneka fisoka no fikuhanangigwa lugano; 23 ne filungo afiya fyo umutufi fochikudoga fina itunyo ikefu chikufingha itunyo ikulu, 24 ambadyo ifilungo fyetu ifikoneka fiswanu fisikuhananga. Ninga iMulungu kauumbagisa umutufi, na kuchingha ditunyo ichilungo chibesigwe. 25 Kosoko kunghowe na utemanuko mumutufi amba ifilungo fyose fidahe kwikala kosoko ya uswanu wa chila chimwedu. 26 Inghowa chilungo chimwedu chikubulagika, ifilungo fiyagwe fyose fikubulagika, ichilungo chimwedu chinghatunyigwa ifilungo fiyagwe fyose fikonela hamwedu nacho. 27 Hambiya mwamutufi wa Kilisito na chila yumwedu ni chilungo che umutufi. 28 Na Imulungu kasagula Mudikanisa kunghonga watumigwa, lwakeli wagonesi, lwa kadatu wafusaji, kahi watogomi wa majumo, kahi wahonyaji, wamonga watasaji, walongosaji, na walongaji wa siluga se chigeni. 29 Siyo chila munhu ni Mutumigwa, ama Mugonesi ama mufusaji. Siyo chila munhy yakugolosa majumo, 30 siyo wose ni wahonyaji, na siyo wose wakulonga kwa nonga ye chigeni, na siyo wose wakutagula isilongigwe. 31 Ninga muwe na nyenda ya kuhananga finhu fiswanusi. Nani nomonesani injila iswanu kujumha sose.
1 Hata ninghalonga kwe sinonga sa wanhu na samalaika, nghona nichaka uwendo, nigaluka fina dijwi dya idebe dichaka chinhu ama kengele. 2 Kahi hata ninghowa na udaha wa ugonesi, na kumanya amajumo gose, kahi ninghowa na dihuwi dyose hata dya kudaha kugasanya amatongo, amba nghona nichaka uwendo aniye si chinhu. 3 Hata ninghalafa fyose fyoninafyo, na kulafa umutufi wangu usomigwe moto (ulakasigwe) nghona nichaka wendo, ayo isikunitasa chinhu. 4 Uwendo ukufinyilisa, muswamu, uwendo wichaka finju ama usikwiyona; 5 usikuhananga makulu ama chiyunguyungu; uwendo usikuhananga faida yakwe, usikudeseka ama kutala agehile; 6 usikubwedelela ku gehile amba ukubwedelela kwa ge chawelu. 7 Uwendo ukuchigolosa seye chifinyilise gose, kahi chisikuleka kuhuwila, (uwendo ufinyilisa gose na ukuhuwila gose.) 8 Uwendo wichaka ndumo, fina udaha wo kutagusa imbuli ye Mulungu ijuwa dimwedu ukulawa, no udaha wo kutagusa nonga se chigeni wopuluta, hata umanyi nawo wopuluta. 9 Kosoko umanyi wetu usimemeleke na inhagusa yetu ye imbuli ya Mulungu isimemelekele; 10 Ninga ugele woikwija imemelekele, isimemelekele ikuleuka. 11 Fonowile mwanike hanilonga fina mwanike, hanidoga fina mwanike, kahi fonigaluke mukulu nileka sinhenda se chiwanawana. 12 Kosoko hambiya chikona fina inyefu muchilole, ninga hanyuma chokona meso kwa meso. Hambiya nimanya chidodogi, amba hanyuma nomumanya fina foyali, kahi fina niye fonimanyike wose ukwakwe. 13 Ninga dihuwi, inghojela, uwendo; gakusigala: Amba idikulusi ni uwendo.
1 Mukuhanangigwa kukonga kulangisa uwendo na mamudyo ge chiloho hasa udaha wo kutagusa Imbuli swamu ye Mulungu; 2 Kosoko imunhu yakulonga kwe nonga ye chigeni ghakulonga na wanhu, ninga ne Mulungu; kosoko hechaka munhu yakumuhulika, yakutumiya udaha we Muhe kulonga mafiso ge chawelu. 3 Kwa ulwandi umonga, ayuya yakuitagusa Imbuli ye Mulungu yakulonga na wanhu kosoko ya kuwajenga, kuwahosa na kuwaguma moyo. 4 Iyakulonga kwe inonga ye chigeni yakwilolesa imwenecho, amba iyakutagusa Imbuli ye Mulungu yakulolesa dikanisa. 5 Hambiya aniye nyenda anyeye wose mulonge kwe inonga ye chigeni, kahi nyendesa anyeye muhubili Imbuli kulawa kwe Mulungu. Ayuya yakuhubili ni wa mana lugano kusuma ayuya yakulonga kwe nonga ye chigeni, labuda howe na mutapita, kosoko dikanisa didahe kuloleswa. 6 Hambiya, Wakilisito wayangu ningheja ukwenu akuno nikulonga kwe nonga ye chigeni, nowongesela choni? Labuda niwegalile nyeye magubulo ama umanyi, ama Imbuli kulawa kwe Mulungu ama mafuso. 7 Nofo yuwile kufyombo fichaka ugima kifana filimbi ama chinanda, fighaleka kutowigwa hayohayo imutegelesaji komanyaje ichikutowigwa? 8 Umwano unghatowigwa fibi, nani yakiandaa kosoko ye nghondo? 9 Anyeye nheifiya nghona dilimi dyenu disikulonga mbuli sikumanyika, nani yemanya gomukulonga? Kosoko mokuwa mukulonga chaka. 10 Muchilunga mwina luga (nonga) nyingi na hechaka yoyose ichaka mana, 11 ninga nghona simanyile imana ye inonga, nikuwa mugeni wa iyakulonga na imulongaji mugeni ukwangu. 12 Nheifiya nanyeye, kosoko mwina ngwina ya kupata amamudyo ge Muhe, mukonye kugolosa fiswanu mukujenga dikanisa. 13 Kosoko yo iyakulonga kwe inonga ye chigeni, yakuhanangigwa yatase, kosoko yo udaha wa kutapita. 14 Kosoko ninghatasa munonga ye chigeni, u Muhe wangu ukutasa amba amahala gangu gasikuhokela chochose. 15 Nghona no nheifo nigolose choni? Nosali (notasa) kwa Muhe, kahi kwa mahala gangu, nokwimba kwa muhe, kahi nokwimba kwa mahala gangu nheifiya. 16 Nghona ukulafa malumbo kwe Mulungu ne Muhe wimwene, imunhu yechaka udaha wo kutapita kokwidikilaje Hano mumalumbo gako ukati nghamanyile choukulonga? 17 Kosoko ukudaha kulafa malumbo fiswanu, amba imunhu yumonga nghakuloleswa. 18 Nikumulumba Mulungu kosoko nikulonga kwa nonga ye chigeni kujumha nyeye mose. 19 Hata nheifo, munyitanghanyila ye chiKilisito nodaha kulonga mbuli shano kwa mahala gangu, kosoko niwalolese wamonga kujumha mbuli figulu ikumi mu nonga ye chigeni. 20 Wakilisito wayangu, munghowe wanike mumadoga genu, muwe wana ku uwihi, amba mumadoga mukule. 21 Itulumigwa mumalagiso: Kwa njila ya wanhu wakulonga nonga ngeni na kwa njila milomo ye wageni nolonga na wanhu awa, na hata nhaifo wasinihulika niye, yakulonga iMundewa. 22 Nafo inonga ye chigeni ni chitangilo siyo kosoko ye wakuhuwila ninga kosoko ya wakuhuwila, amba ichipaji cho kuhubili Imbuli ye Mulungu siyo kosoko ya wasikuhuwila ninga kosoko ya wakuhuwila. 23 Kahi ditewa dyose dya Wakilisito wanghatang'ana na wose kukonga kulonga kwa nonga ye chigeni, na wanhu wa kunje ama wasihuwila, wanghengila, wasigamba anyeye mwina magini? 24 Amba wose wanghowa wakuhubili mbuli ye Mulungu na munhu nghakuhuwila ama munhu wa kunje yanghengila, yakwilamula imweecho kwa uwihi wakwe, ifinhu fyose foyakuhulika fomulamula. 25 Ifinhu fifisigwe mumoyo wakwe fogubuligwa, naye kofunama na kumufugamila Mulungu yakugamba Chawelu Imulungu kahamwedu na nyeye. 26 Choni kahi Wakilisito wayangu? Munghakitanghanyila hamwedu, yumwedu yakwimba, yumwedu yakufusa, yumwedu kena chinhu cha kugubula kulawa kwe Mulungu, yumwedu yakulonga mbuli ye Mulungu kwe inonga iye chigeni, na yumonga yakudaha kulagusa agekulongigwa. Mugolose gose kosoko ya kudijenga dikanisa. 27 Nghona munhu yakulonga kwe inonga ya chigeni, walonge weli ama wadatu du, kahi yumwedumwedu, na yumonga yatapite agakulongigwa. 28 Ninga inghowa hechaka munhu wa kutapita, iyakulonga kwe inonga ye chigeni uleke yanyamale mumukutano, yalonge na chidoga chakwe ne Mulungu. 29 Ne wagonesi walonge weli ama wadatu, na uleke awaKilisito wamonga walamule. 30 Nghona mbuli ye Mulungu imwijila munhu yungi yekale habehi, uleke we nghonga yanyamale. 31 Kosoko wose mukudaha kuhubili mbuli ye Mulungu, yumwedu yumwedu, uleke wose wadaha kifusa na wose wahuwisigwe, 32 na imulongaji yakuhubili mbuli ye Mulungu yakuhanangigwa yadime udaha wakwe. 33 Kosoko iMulungu si Mulungu wa lwidaso, ninga dihewa. Fina foyuwile mumakanisa gose ga wasunhile. 34 Awanawake wanyamale munyitanghanyila, kosoko wasifumisigwe kulonga, ninga wakuhanangigwa wowe filongosi fina dilagiso fodikulonga. 35 Nghona wena chinhu chowakulanga kumanya, wawuse walume sawo ukaya, kosoko ni chinyala kwe mwanamuke kulonga munyitanghanyila. 36 Imbuli ye Mulungu ilawa ukwenu? Ama iwejila anyeye mwiwene? 37 Nghona munhu wowose yakudoga fina ni mugonesi ama munhu we chiloho, yakuhanangigwa yafumile mumadoga gakwe fina aino gonikwandika ni ilagiso kulawa kwe Mundewa. 38 Nghona munhu wose wose nghakudimanya dilagiso dino, naye nghakumanyika. 39 Kahi Wakilisito wayangu mukuhanangigwa muwe na nghwina ya kuhubili Imbuli ye Mulungu, na munghawalemese awakulonga kwe nonga ye chigeni. 40 Chila chinhu chikuhanangigwa chigolosigwe digoya na fiswanu.
1 Hambiya, nikuhananga nimugelegeseni Wakilisito wayangu aiya imbuli swanu yoniwahubilieni, aiya yomuhokele nayo noimise dihuwi dyenu. 2 Kosoko yakwe mukuhonyigwa munghaikolelela ngwingwingwi na inghowa musahuwile chaka. 3 Kosoko haniilafa ukwenu fina chinhu cha samani nghulu lugano, fina niye foniihokele, fina Kilisito hakofa kosoko ye wihi wetu fina foitulumigwe mumafulumo; 4 fina hakasikigwa, fina hakenuligwa mwijuwa dya kadatu kamemelesa gamatulumo; 5 na fina hakoneka na Petili, kahi ku waya ikumi na weli. 6 Kahi hakalawanisa (hakakiyonesa) ku Wakilisito kujumha magana mashano mu chigele chimwedu, amatewa mugati yawo wekali womi, ninga wamonga wagona (wofa) 7 Kahi hakakiyonesa kwa Yakobo, kahi ku watumigwa wose. 8 Kundumo ya wose hakeyonesa ukwangu na niye fina mwana yelekigwe si kwa chigele chakwe. 9 Kosoko aniye namudodogi kuwatumigwa wose, sinogeligwe kwinangigwa mutumigwa, kosoko hanidisambasa dikanisa dye Mulungu. 10 Ninga kosoko ye dihewa dye Mulungu nigaluka fina fonili, na dihewa dyakwe ukwangu disowile dya chaka. Kuchibidu chakwe nigolosa milimo mikulu kusuma wose, hata inghowa siyo niye ila dihewa dye Mulungu dyuwile mugati yangu. 11 Inghowa gonihubili aniye ama awatumigwa wamonga gowahubili, aino no mbuli yo chikugendelela kuhubili, nayo no yomuhuwile. 12 Hambiya inghowa ikuhubiliigwa fina Kilisito kenuligwa kulwa awafile, nhani wamonga mugati yenu wakugamba kwichaka kwinuligwa awafile? 13 Ninga nghona kwichaka kwinuligwa awafile, ikiyonesa fina Kilisito nghenuligwe; 14 inghowa Kilisito nghenuligwe, amahubili getu ni ga chaka, na dihuwi dyenu ni dya chaka. 15 Hamwedu na gago, aseye choneka fina chidanha kumuhusu Mulungu, kosoko hachilonga fina Imulungu hakamwinula Yesu, ambaye nghamwinule nghona awafile wasikwinuligwa. 16 Kosoko nghona awafile wasikwinuligwa, ninga iYesu naye nghenuligwe. 17 Inghowa Kilisito nghenuligwe, dihuwi dyenu ni dya chaka, na mukali mu wihi wenu. 18 Kahi awaya nawo wofile mu Kilisito wagilila. 19 Nghona kukuhuwila kwetu mu Kilisito ni kosoko ye nyikala ya hambiya du, aseye ni wanhu wakoneligwa ubasi kujumha wanhu wose muchilunga. 20 Ninga chawelu Kilisito kenuligwa kulawa awafile, chotoko chawo awafile. 21 Kosoko fina idifa fodikigaligwe muchilunga na munhu yumwedu, nheifiya kukwinuligwa kulawa kuwofile kwigaligwa na munhu yungi. 22 Kosoko fina awanhu fowakufa kupulutila Adamu, nheifiya mu Kilisito wanhu wose wogaluka womi. 23 Ninga chila munhu kwa mupango wakwe kokwinuligwa: Kilisito di mudyo dye nghonga; kahi mujija yakwe awaya wasunhile we Mulungu. 24 Kahi ikwija indumo ye chilunga, ugele woyamukabisi iMulungu Babakwe, yanghamala kubana chila undewa, na chila ukulu na chila ludole. 25 Kosoko Kilisito yakuhanangigwa yadime mpaka foyakuweka wanghondo wakwe kusi ye fisinyagilo. 26 Imunghondo we ndumo yakubanigwa ni difa. 27 Amatulumo gakugamba, “Mulungu keka ifinhu fyose hasi ye migulu yakwe.” Ninga nghona ikulonga, “Ifinhu fyose fikigwa hasi ye migulu yakwe.” Ni chalinse fina iMulungu ngheumo kosoko imwene noyafikile ifinhu fyose hasi ya Kilisito. 28 Ugele ifinhu fyose fofikwija fikikigwa mwidimo fye Kilisito, kahi imwana naye imweecho yakwiika mwidimo dye Mulungu yekile ifinhu fyose hasi yakwe, na Imulungu kofidima fyose. 29 Hambiya, awanhu wakumaanisha choni nomoo wakubatisigwa ahanhu ha awafile? Nghona awafile wasikwinuligwa ng'o! Nhani awanhu wakubatisigwa ahanhu hawo? 30 Nhani nyuwile muhatali chila ugele? 31 Wakililito wayangu, nikudikabili difa chila ijuwa! Inyiyona yoninayo ukwenu, munyikala yetu hamwedu na Kilisito Yesu Mundewa wetu, ikunigolosa niye nhyanjase imbuli ayi. 32 Nikupata choni? Nghona kwa nonga ye chimunhumunhu nikitowa na makewe akuya Efeso? Nghona awafile wasikwinuligwa, Leka chunywe na kudiya kosoko housiku chikufa; fina foikulongigwa. 33 Munghadanhilisigwe. Umbwiya wihileukubana itabiya. 34 Muye mumahala genu amaswanu, na munghagolose uwihi kahi. Kosoko wamonga wenu wasimumanyile Mulungu. Wakuhanangigwa wone chinyala. 35 Ninga, mutufi wo kwinuka munhu yumwedu yakudaha kufa, Awofile wakwinuligwa nhani? Wakuwa na mitufi ya namuna yaki? 36 Anye muwabwalasi! Munghahanda mbeyu isikota mpaka kunghonga yufe. 37 Na choukuhanda ni mbeyu du ikudaha kuwa ya hemba ama mbeyu ingi, na siyo mumeya wose ukota hanyuma. 38 Ninga iMulungu yakwingha imbeyu mutufi fina foyakuhananga, yakwingha chila mbegu mutufi wakwe. 39 Kosoko siyo nyama yose ya sawa, ninga kwina nyama ya wanhu, imonga ya malimu, imonga ya madege, na imonga ya somba. 40 Kwina mitufi ya kulanga na mitufi ya chiduniya, uswanu we mitufi ya kulanga na mitufi ye chiduniya usikifane. 41 Kwinauswanu we dijuwa na umonga wo umwesi, na umonga uswanu we sinyelesi, kahi sinyelesi naso sisikifane kwa uswanu. 42 Nofoyuwile munyinuka ya wofile, ichikusikigwa ni chakubanika, amba ichikwinuligwa chisikubanika. 43 Umutufi foukusikigwa ukuwa mu hali ye chavu (chinyala,) ukwinuligwa muditunyo. Ukusikigwa usokile na kwinuligwa mu ludole. 44 Foukusikigwa ni mutufi wa kumbigwa, foukwinuligwa ni mutufi wa chiloho. Kosoko kwina mutufi wa nyumbigwa, kwina mutufi we chiloho nheifiya. 45 Itulumigwa Imunhu we nghonga Adamu kagalula munhu mumi; Adamu we ndumo kagaluka Muhe yakuwengha wanhu ugima. 46 Ninga ichikulongola siyo mutufi wa chiloho, amba umutufi wo kumbigwa hanyuma we chiloho. 47 Imunhu we nghonga hakalawa muisi, munhu we dinghundi, imunhu wa keli ni kulawa kulanga. 48 Fina foyali imunhu wa ulongo, nofowowile awanhu wa ulongo, na foyowile imunhu wa kulanga, nofowowile awanhu wa kulanga. 49 Na fina fochiihalile ifuta ya imunhu wa ulongo, nheifiya chohala ifuta yakwe imunhu wa kulanga. 50 Chonikulonga nochi Wakilisito wayangu, inyama ne isakame fisikudaha kuhala undewa we Mulungu, ama ichikubanika kihale ichisikubanika. 51 Langa, nikumugubulilani chifiso, aseye wose chisikufa, amba wose chohiluka, 52 ninga ugele italumbeta (digunda) dodikwija dilapa (dilila) gafula wose chikwija chibiduka fina inghonghonya ya meso. Kosoko idigunda fodikulila iMulungu kowenula awafile na wasikufa keli, na seye chohiluka. 53 Kosoko ihali yo kubanika ikuhanangigwa ifale ihali isikubanika, na ihali yo kufa ikuhanangigwa ifale ihali isikufa. 54 Ugele ihali yo kubanika foikufala ihali isikubanika, na yo kufa foikufala ihali isikufa, kahi amatulumo gakuwa chawelu: Difa dyangamila na ushindi umemelekela! 55 Go difa usumi wako uwa koki? Go difa isumu yako yuwa hoki? 56 Isumu ye difa ni uwihi, na uludole lwa uwihi ni malagiso. 57 Ninga, chikumulumba Mulungu, iyakuchingha usumi kupulutila iMundewa wetu Yesu Kilisito! 58 Kosoko yo Wakilisito wendigwa wangu, mwime nghwingwingwi na munghasingisike, mugendelele kukonya mu mulimo we Mundewa, mumanye fina mwe Mundewa, imilimo yenu siyo ya chaka.
1 Hambiya nikuhananga kulonga kosoko yo umuchango we Wakilisito weyetu fina fonigalanise amakanisa ga Galilaya. 2 Chila dijuwa dye inghonga dye dijuma, chila munhu yeke chochose, (senti,) hanghanda mu mhata yakwe na kuchika, kosoko kunghowe na ngwina yo kukonghosa ugele wonikwija. 3 Na ugele wonikwija ukwenu, nowengha baluwa ya maloleso awaya womusagule na kuwatuma kwigala simhongesi senu. 4 Inghonekana fina ni fiswanu nani kuluta nheifiya, wonisindikisa. 5 Nokwija ukwenu inghafulusa kupulutila Makedoniya, kosoko nikuhananga kupulutila Makedoniya. 6 Na nhagela nokwikala nanyeye ama hata kuwa nanyeye ugele we chipupwe, kosoko munitase munhamo yangu kokose konikuluta. 7 Kosoko sikwenda kupuluta ukwenu nyimanyima, nikuhuwila fina nokwikala na nyeye kwa chipisi chitali, iMundewa yanghanifumisa. 8 Ninga nokwikala Efeso mpaka mwijuwa dye Pendekosite. 9 Hena luneka lwakugolosa milimo mikulu na ya mana, hata nghona hena wanhu we chinyume changu. 10 Timoseyo yangheja ukwenu, mulangisise hanghowe na chochose cha kogoha, kosoko yakumutogomela Mundewa fina aniye fonikumutogomela Mundewa. 11 Kosoko yo munhu wowose yanghamubese, musapuseni yogendelele fiswanu ne inhamno yakwe, na yoye ukwangu kosoko aniye nikumugojela yoye hamwedu na Wakilisito weyetu. 12 Hambiya kosoko ye mundugu setu Apolo, nimugongelesa lugano yeje hamwedu ne wandugu wamonga, ninga nghendile kwija hambiya amba kokwija yanghapata luneka. 13 Muwe meso, mwime ngwingwingwi mu dihuwi dyenu, muwe fitung'ati na wena ludole. 14 Chila dyomukugolosa mudigolose kwa uwendo. 15 Hambiya, Wakilisito wayangu mwimanya ikaya ya Sitefana, noyowile amamudyo ge nghonga ku Achaiya, na wakilafa kuwatogomela awanhu we Mulungu. 16 Nikumugongelesani, muwandamile ulongosi wa wanhu fina wo na ulongosi we chila munhu yakutogoma mulimo wa kutumikiya hamwedu nawo. 17 Nikonela kosoko yo kwija kwa Sitefana, na Fotunatusi na Akaiko, kosoko wajasilisa uluneka wowile baha kwa kuwa mwahechaka 18 kosoko wahosa chidoga changu ne ichenu. Wanhu fina wo wakuhangigwa kutegelesigwa. 19 Makanisa gose ge mukowa wa Asiya gekumulamusani; Akwila na Pilisika, hamwedu ne wanhu wose we Mulungu awowile musikaya sawo wakuwalamusa lugano mwe Mundewa. 20 Awakilisito wayenu wose wakuwalamusa. Nanye ilamuseni kwa wendo we Mulungu. 21 Aniye Paulo nyandika sisalamu sino kwa mukono wangu. 22 Nghona wowose nghakumwenda Mulungu, lekeni yaligitwe! Mundewa wetu, nyagula! 23 Dihewa dye Mundewa Yesu dyuwe nanye. 24 Uwendo wangu uwe nanyeye wose mu Kilisito Yesu. Hano.
1 Paulo Mutumigwa wa Kilisito Yesu kwa nyenda ya Mulungu na Timoseyo imundugu setu, ku dikanisa dye Mulungu dyuwile Kolinto, hamwedu ne wanhu wose we Mulungu wowile Akaya. 2 Dihewa dyuwe ukwenu na digoya kulawa kwe Mulungu iBaba yetu ne iMundewa Yesu Kilisito. 3 Yatunyigwe Imulungu ne iBaba we Mundewa wetu Yesu Kilisito; iBaba wo ubasi ne dihoso dyose, 4 imwene yakuchihosa mumagayo getu gose, kosokona seye chidahe kuwahosa awowilemwigayo dyodyose, na dihoso idyene dyochinghigwe ne Mulungu. 5 Kosoko fina amagayo ga Kilisito fogekongeseka; no nhaifo chikuhosigwa lugano ne imwene. 6 Ugele chinghapata magayo, ni kosoko yo kuhosigwa kwenu na uhonya wenu, na chinghahosigwa ni kosoko ye dihoso dyenu dyomupatile ugele womugendelele kufinyilisa amagayo agene gochigayile nago. 7 Dihuwi dyetu ukwenu disikusingisika; kosoko chimanya fina fomuhamwedu mumagayo, mokuwa kahi hamwedu mudihoso dyetu. 8 Kosoko chikuhananga anyeye wandugu setu munghamanye amagayo gochipatile akuya Asiya; amakanda gowile umwetu hagowa masitosi na hasowile na njila ya kugugumila. 9 Hachuwa fina wanhu wafuluse kulamuligwa wafe; ninga aiya hayuwa kuchigolosa seye chinghakihuwile chiwecho amba chimuhuwile Mulungu iyakwinula awafile; 10 imwene hakachihonya kulawa muhatali inghulu ye difa, na kuchihonya, mwi mwene chika dihuwi dyetu fina kochihonya keli. 11 Anye nanye mukuhanangigwa muchitase kwe inhasa yenu; kahi matewa wolafa malumbo kosoko yetu ne dihewa Imulungu dyoyolafa ukwetu kubidula inhasa nyingi. 12 Hambiya aseye chikiyona kosoko yo uhomelesi we madoga getu maswanu fina chikala fiswanu muchilunga, kahi lugano ukwenu anyeye, hamwedu na uholo na uchawelu wochinghigwe siyo na ubala wo muchilunga ninga dihewa dye Mulungu. 13 Kosoko chisikuwandikila chochose ninga chomukudaha kusoma na kumanya, nikuhuwila fina momanya fiswanu, 14 hata inghowa hambiya mukumanya chidodogi, nikuhuwila fina kumwande momanya, na modaha kiyona kosoko yetu na seye kosoko yetu na seye kosoko yenu mwijuwa dye Mundewa. 15 Kosoko hanyuwa na ihuwi adi, hanihananga kwija ukwenu kunghonga, kosoko mudahe kumotesigwa mikangha mili. 16 Hanihananga kwija ukwenu munduta yangu Makedoniya kahi muugele wo kuya kwangu, nanye hamuwa mukuningha mhamba kosoko ye inhambo yangu ya Uyahudi. 17 Togoleni fonahanange kugolosa nhaifo hanyuwa munhu wa chibidubidu Mukudoga fina fonahanange nhaifo hanyuwa munhu we chilunga, yakudaha kugamba heye na hata ugele umwedu 18 Fina Imulungu fonimuchawelu, simbuli setu ukwenu sisowile heye na ka. 19 Kosoko imwana we Mulungu, Yesu Kilisito, wochamuhubili ukwenu hamwedu na Silivani na Timoseyo, nghowile heye na ka amba umwakwe chila ugele ni heye. 20 Kosoko amalagano gose ge Mulungu, gagalukaheye nochonghone chikugamba Hano kupulutila imwene kosoko Imulungu yatunyigwe 21 Ninga ni Mulungu imwenecho yakuchiguma ludole mu Kilisito, na noyakuchika hayo. 22 Keka ulubonoto lwakwe ukwetu na kuchingha umuhe wakwe mufidoga fyetu fina samana 23 Nikumwinanga Mulungu, no muhomelesi wangu, imwene kaumanya umoyo wangu, hanilema kwija Kolinto kosoko ninghawabulagise. 24 Chikumutamilani chomukuhanangigwa muhuwile, cha watogomi wayenu munyemo yenu anye mwima ngwingwingwi mwihuwi dyenu
1 Kosoko hanilamula mumadoga gangu kuleka kwija ukwenu keli kuwaguma usungu. 2 kosoko nghona ninghawaguma usungu, nani yowile uko wo kunigolosa nyonele, ninga awawaya woniwabulage. 3 Nochonghone nikwandika ibaluwa ayi, ugele wonikwija ninghadahe kupata lwidasokulawa kwa waya wagiligwe kunigolosa ninyemuke, kosoko hanyuwa na nghinyo ukwenu mose, fina inyemo yangu hayuwa nyemo yenu mose. 4 Ugele wonawandikile kunghonga hanyuwa na magayo na usungu mumoyo, na masosi mengi, isowile kosoko ya kuwaguma usungu, amba kosoko ya kuwalolesa fina nikuwenda. 5 Nghona hena munhu yamugumile usungu miyagwe, nghanigumile niye usungu ninga kawaguma usungu anyeye mose na sikuhananga kuwa mukalisi. 6 Iditoso dyoyafuluse kupata kulawa ku matewa mugati yenu imutosha. 7 Iisigale ibeka mumulekelele na kumuhosa, chakachaka kopata usungu na kosuhuka ichidoga. 8 Kosoko yo nikumutasani mumonese fina mukumwenda. 9 Hanyandika ibaluwa iya kosoko nidahe kumugesani na kumanya nghona muwaholo mu chila chinhu. 10 Chila munhu womukumulekelela nani nikumulekelela, kosoko nghona nikulekelela, nghona chawelu ninacho cho kulekelela, nikulekelela kosoko yenu ya Kilisito, 11 chinghamwinghe iShetani luneka lwa kuchidanhilisa, kosoko chimanya fiswanu ukochelesi wakwe. Gamahweso ga Pauli akuya Tulowa 12 Ugele wonejile Tulowa kuhubuli mbuli swanu ya Kilisito, umulango haukumhuligwa umwangu mwe Mundewa. 13 Ninga hanikidasika lugano kosoko samwagane kuya imundugu setu Tito. Nochonghone nawelage wose na kuluta Makedoniya. 14 Ninga malumbo kwe Mulungu, iyakuchilongosa majuwa gose ku nhambo yo usumi wa Kilisito, na kupulutila ukwetu yakwenesa uchawelu wa Kilisito fina mhungile swanuchila hanhu. 15 Kosoko aseye cha kifana mhungile swanu ya Kilisito mugati ya waya wekwagilila, 16 kwa waya awakwagilila imhungile yo ni difa na kwa waya wakuhonyigwa imhungile yo ni ugima. Ninga ni nani yakwidaha kwiguma mu mulimo wa namuna yo 17 Kosoko aseye chisikifane wambasaji we imbuli ye Mulungu, ninga fina wanhu we chawelu, fina wanhu watumigwe ne Mulungu, kumwande ye Mulungu chikulonga mu. Kilisito
1 Afo chikukonga kahi kitogola? Ama chikuhananga fina awanhu wamonga sibaluwa sa kiyonesa ukwenu ama kulawa ukwenu? 2 Anyeye muweecho mwa baluwa yetu yakiyonesa yandikigwe mumimoyo yenu imanyike na wanhu wose 3 na mukiyonesa fina mwa baluwa kulawa kwa Kilisito igaligwe na seye, iyandikigwe siyo na wino ninga na Muhe we Mulungu inghakufa, na siyo mufipande fya mawe amba mufipande fya mimoyo ya wanhu. 4 chikudaha kulonga nhafo kosoko ye ing'inyo yo chinayo kwe Mulungu kupulutila Kilisito. 5 Siyo fina china udaha chiweecho wa kugolosa chochose, ninga udaha wetu ukulawa kwe Mulungu 6 iyachinghile udaha wo kuwa watumigwa we dilagano dishasiyo mbuli sandikigwe amba simbuli se chimuhe, kosoko simbuli sandikwe sikigala difa, ninga se chimuhe sikulafa ugima. 7 Hambiya nghona indekeligwa ye difa, itulumigwe mu fipande fya mawe ija ne ditunyo ikulu namuna ayo awanhu wa Isilaeli wasikumukumhulila meso kosoko yo kwakaika kwakwe, hata inghowa ditunyo dyakwedyowile dya chipisi chiguhi, 8 kahi imilimo ye Muhe we Mulungu yokuwa na itunyo ikulu kusuma dye malagiso? Aino si chawelu? 9 Kosoko ghona kowile na itunyo mu kulekeleligwa kwe indamulwa; kukulekeleligwa kwa uchawelu kukuhanangigwa kuwa na itunyo kusuma didyo. 10 Chawelu mu nonga ayi achiya chowile na itunyo chigaluka chichaka itunyo ka! Kosoko ye ditunyo dichipulute. 11 Kosoko nghona kowile na itunyo kwa chiya chikale chidodogi, kokuwa na itunyo ikulusi kwa chiya ichikwikala majuwa gose. 12 Kosoko china ihuwi dinhaifo, nochonghonechikulonga bila kogoha, 13 aseye chisikugolosa fina Musa, yegubike mutandilo muchihanga chakwe kosoko awanhu Isilaeli wanghadahe kona indumo ye ditunyo 14 Ninga ifidoga fyawo hafigolosigwa fikugutu, mpaka diyelo ugele wo wakusoma dilagano dye katali, umutandilo uuya usigubuligwe kosoko ni kupulutila Kilisito du ukuleusigwa. 15 Heye mpaka diyelo ihanhu hohose ichitabu cha Musa hochikusomigwa imimoyo yawo ikuwa igubikigwa. 16 Amba imunhu yanghamubidukila iMundewa umutandilo ukuleusigwa. 17 Hambiya iMundewa no Muhe na ihena umuhe we Mundewa, hena kulekeleligwa. 18 Niinga aseye wose, china ifihanga fisigubikigwe awanhu wamonga wakudaha kona kupulutila aseye, iditunyo dye Mulungu, chikubiduligwa chikifane imwene na ditunyo dyetu dikuwa ikulusi, aino ikulawa kwe Muhe we Mundewa.
1 Ninga iMulungu kwa ubasi wakwe kachingha umulimo awu, na kosoko yo chisikusuhuka chidoga. 2 Aseye kwa ulwandi lwetu chilema simbuli sose se chinyala ne chifiso, chilema kudanha ama kwaganisa imbuli ye Mulungu, ninga kwa konesa chalinse uchawelu chodaha kwitogola chiweechokwa chila udaha wo kutagusa kumwande ye Mulungu. 3 Hata inghowa imbuli yetu swamu ifisigwe, ifisigwa du kwa waya iwagilile. 4 Awene wasikuhuwila kosoko iMulungu we chilunga achi kagaguma chisa amahala gawo wanghadahe kona chalinse ujelu we Imbuli swanu ye ditunyo dya Kilisito, iyakifane Mulungu. 5 Kosoko chisikuhubili chiweecho ninga Yesu Kilisito fina Mundewa wa wanhu wose, hamwedu na seye fina watumwa wenu kosoko ya Kilisito 6 Kosoko ni Mulungu yagambile, “Ujelu wake muchisa.” Imwene no yakuleka mimoyo yetu ikwaka na kuchingha ujelu wa umanyi we ditunyo dye Mulungu ukwakaika muchihanga cha Kilisito. 7 Ning chinawo ugoli awu mufiya fya ulongo, konesa fina udaha ukulu uwa kws Mulungu. 8 Chikubulagika ugele umonga, ninga chisikukanhamiswa, ugele umonga chikuwa na manhonge amba chisikusuhula chidoga; 9 Chikusambasika, ninga chisikulekigwa chiimwene, chikutowigwa ninga chisikubulagika. 10 Chila fonikugenda nikukomigwa chimutufi fina Yesu foyakomigwe, kosoko yo ugima wa Yesu udahe nawo kiyonesa mumitufi yetu. 11 Kosoko aseye chiwomi majuwa gose chikulafigwa chufe kosoko ya Yesu, kosoko ugima wa Yesu nawo ukiyonese mumitufi yetu iikufa. 12 Nonghamba, idifa dikugolosa milimo mugati yetu, amba mugati yenu mwina uumi milimo. 13 Kosoko china muhe yumwedu we dihuwi fina foitulumigwe, “Hanihuwila, na kosoko yo hanilonga,” na seye chikuhuwila na kosoko yo chikulonga, 14 chimanya ayuya yamwinule Mundewa Yesu kochinula seye nase kosoko cha hamwedu na Yesu na kochika kumwande yakwe hamwedu na nyeye. 15 Aga gose ni kosoko yo uwendowenu, kosoko fina dihewa fodikongeseka kuwanhu matewa kwa matewa, amalumbo nago gongeseke ku ditunyo dye Mulungu. 16 Kosoko yo chisikusuhuka chidoga, na hata inghowa mitufi ye chimunhumunhu ikubanika, imitufi yetu ye chimuhe ikubiduligwa chila ijuwa. 17 Kosoko amagayo gochikupata ni madodogi kahi ge chipisi chiguhi, ninga gochingha itunyo dikujumha maliganiso gose. 18 Kosoko chisikulanga kufinhu ifikoneka ninga kufinhu fisikoneka, kosoko ifinhu ifikoneka ni fya kuloka amba ifinhu fisikoneka ni fya majuwa gose.
1 Kosoko chimanya fina imitufi yetu ahano hachilunga ni kifana nyumba sa munyasi. Na inghofa, Mulungu kochingha nyumba ahanhu hakwe, iisigolosigwe na wanhu, amba igolosigwe ne Mulungu imwenecho na yokwikala majuwa gose. 2 Hambiya munamuna ayi chikugula akuno chikulangilila kwa nghwina kufasigwa inyikala yetu yuwile kulanga. 3 Chikuhanangigwa kufasigwa nhaifo kosoko chinghadahe koneka mwasi 4 Imitufi yetu ye chimunhumunhu iisikwikala majuwa gose. Chikulila kosoko ye magayo goikuhanangigwa ipate. Siyo chawelu fina chikuhananga chufe, ninga chikuhananga Mulungu yachibidule na kuchingha mutufimusha uukwikala majuwa gose. Nonghamba chikuhananga imitufi yetu ye chimunhumunhu ibiduligwe na kuwa umwedu uusikufa. 5 Iyachigolosele imbiduka ayi ni Mulungu iyachinghile iMuhe fina samana yetu. 6 China ng'inyo majuwa gose, na chimanya fina ugele wochikwikala mumutufi awu, chuwa kutali ne Mundewa, 7 kosoko chikwikala kwe dihuwi na siyo kwa kona. 8 China ng'inyo nghulu, na chikwendesigwa chiusame umutufi na kusamila kwe Mundewa. 9 Ninga kujumha chinhu chochose chiya, chikuhananga chimwendese imwene yuwe ch ikwikala ahano muchilunga ama uko. 10 Kosoko wose chikuhanangigwa choneke kwigoda dye ulamusi dya Kilisito, soko ya chila munhu yadahe kuhokela maswamu ama gehile gakumwendesa kosoko ye sinhenda sakwe mumutufi. 11 Ninga chimanya kumwogoha Mundewa, chikuwakwega wamonga, Mulungu kachimanya manyisi na nikuhuwila finamumimoyo yenu munimanya nheifiya. 12 Chisikitogola chiweecho ukwenu keli amba chotoko cha kitogola kosoko yetu, kosoko mudahe kuwabidula awaya wakiyona iweecho kosoko ye inyuwa yawo ya kunje kujumha fowali mumimoyo yawo. 13 Kosoko nghona choneka fina wabwalasi, ni kosoko ye Mulungu, na nghona china mahala ni kosoko yenu. 14 Uwendo wa Kilisito ukuchilongosa, na kosoko chimanya fina yumwedu kafa kosoko ya wanhu wose, nonghamba wose wakushiliki idifa dyakwe. 15 Hakofa kosoko ya wose, kahi awaya iwomi wanghekale kahi kosoko yawo, ninga kosoko ye imwene du yafile na kwinuligwa kosoko yawo. 16 Kulawa hambiya na kugendelela chisikumona munhu wowose kahi kwa inyona ye chimutufi, hata inghowa ugele umonga chamonile Kilisito nhaifo chisikumona nhaifo kahi. 17 Kosoko yo nghona yumonga yowile mu Kilisito, ni chumbigwe kasha, gakatali gapuluta langa! Amasha geja. 18 Aga gose gagoloseka ne Mulungu, imwene kupulutila Kilisito kachibidula seye kulawa wanghondo na kuwa wambwiya sakwe na kuchingha umulimo wa kuwagolosa awamonga nawo wowe wambwiya sakwe. 19 Nonghamba iMulungu hakawagolosa awanhu wose kupulutila Kilisito wambwiya sakwe; Mulungu nghatalile uwihi wawo, na kuchingha imbuli iikuchitamila yakuwagolosa nhani awamwiya sakwe. 20 Ninga seye cha watumigwa wa Kilisito.ne Mulungu imwenecho yakuchitumiya seye kumwidedelani anyeye, chikumutasani ahanhu ha Kilisito mwifumilise ne Mulungu. 21 Kilisito nghowile na wihi, ninga kosoko yetu Mulungu kamugolosa yahange uwihi wetu, na kosoko yo chidahe hamwedu naye kuhanga uchawelu we Mulungu.
1 Mumilimo yetu hamwedu ne Mulungu chikumwidedelani munghafumile kudyagilisa chaka dihewa dye Mulungu. 2 Kosoko hakagamba, “Muchigele chikufumilika haniwahulikisa, na kuwatasa mudijuwa dya uhonya.” Langa! Ugele ufumilike nowu, awu no ugele wo uhonya. 3 Chisikwika chikwakwaliso chochose munjila ya munhu wowose, kosoko idowa dyodyose dinghoneke mumilimo yetu. 4 ninga fina watumigwa we Mulungu chikitogola chiweecho kwa chila chinhu: Kwa kufinyilisa mu magayo gose. 5 Chitowigwa, chohigwa chihomigwa, chigolosa mulimo ya kusokesa, chisigonile na chisidiile 6 kwa usunhile we chidoga, umanyi, kufinyilisa na uchawelu, hamwedu na mamudyo ge Muhe Musunhile na uwendo we chawelu. 7 munonga ye chawelu na udaha kulawa kwe Mulungu, na uchawelu fina filama fyetu, fyo ulwandi wo kulume no kumoso 8 mu chogoho na kubesigwa ugele umonga wanhu wakuchitunya ugele umonga wakuchibesa. Wanhu wakuchilamula fina cha wadasi, ninga ugele wose chikulonga chawelu, 9 fina wanhu wasimanyike, hata nhaifo chimanyika fiswanu fina wanhu wakufa, langa cha wagima gimasi, wachisambasa amba lo wasichikomile; 10 fina wanhu wa usungu, amba chikubwedelelamajuwa gose, fina wakiwa amba chikugolosa wanhu matewa wagoli, fina wanhu wechaka chinhu amba china chila chinhu. 11 Chisiwafisile chochose mu wanhu Wakolinto chikumwendani kwa mimoyo yetu yose 12 Silo seye chisigubule mimoyo yetu ukwenu amba no nyeye musigubule mimoyo yenu ukwetu. 13 Na ahanhu hakwe, nikulonga na nyeye fina wana wadodogi, “Monese ukwetu uwendo fina uya wo chinawo ukwenu.” 14 Munghakihanangise na wasikuhuwila. Kosoko hena uhangi waki mugati ya uchawelu na uwihi? Ama chilo na misi fodaha kuwa hamwedu? 15 iKilisitone Luhoma fokifumilisa nhani? Ama imunhu inghakuhuwila kokuwa na choni cha hamwedu na iyakuhuwila? 16 Dihekalu dye Mulungu dina uhamwedu waki ne Milungu yo udasi? Kosoko aseye cha dihekalu dye Mulungu imumi, “Fina iMulungu foyagambile nokwikala na kuwa hamwedu nawo, na nokuwa Mulungu wawo na wene wokuwa wanhu wangu. 17 Kosoko yo muleguke ukwawo na mukitemanule nawo, yakulonga iMundewa, na munghakwafe chochose china uwihi, baho nomuhokelani; 18 na nokuwa Baba ukwenu na mokuwa wanangu we chigosi ne wachike, yakulonga iMundewa Mulungu.”
1 Kosoko chinaso siyahadi asi wendigwa wangu, lekeni chikisunhe chiweecho na chila uwihi we chimutufi ne chiloho na kuugolosa usunhile umemelekele na kwikala kwa kumogoha Mulungu. 2 Mukumhule imimoyo yenu ukwetu, chisimubanile munhu chinhu chochose, chisimubulage munhu wowose, chisimubanile munhu wowose chisimudanhilise munhu wowose. 3 Sikulonga nhafo kuwalamula nyeye kwa wihi, kosoko hanilonga kunghonga fina muwa mumimoyo yetu, chisitemanuligwa chuwe chufa ama womi. 4 Nina ng'inyo nghulu ukwenu, nikiyona kosoko yenu, mumagayo getu chihokela ihoso ikulu na ninyemuka lugano. 5 Hata fochafuluse kufika Makedoniya, chisapatile luneka lwa kubwihila, hachikidasika na gose, magomvi kuwamonga na ikeng'enha mufidoga fyetu. 6 Ninga iMulungu iyakuwahosa wasuhuke chidoga hakachihosa kwa kwija kwakwe Tito, 7 na siyo du kwa kwija kwakwe Tito, ninga kahi kosoko ye umoyo wowumwinghile anyeye, fina foyachitamile fomukuhananga kunyona, fomwina usungu, fomukuhananga kunimilisa kosoko yo nina nyemo lugano. 8 Kosoko hata inghowa ibaluwa iya yonyandike iwabulaga mufidoga aniye sikukalala (hata inghowa nakalale) kosoko nikona fina ibaluwa iwaguma usungu anyeye, hata inghowa kwa chipisi chiguhi. 9 Ninga hambiya nikubwedelela siyo kosoko hamudeseka ninga kosoko indeseka yenu iwagolosa mulambe, kosoko mukihulika usungu we chilungulungu, na soko yo musagilile kosoko yetu. 10 Kosoko usungu we Mulungu ukweleka kulamba kukulongosa kuuhonya, na kwichaka soko yo kujuta, amba usungu we chimunhumunhu ukweleka difa. 11 Hambiya mukudaha kona isoko yo kona usungu fina foyakuhananga Mulungu, langeni fomukiyonela ubasi, mukutinhuka na kogoha, mwikala hega kona ichawelu ikugoloseka, anyeye kwa chila njila mukiyonesa fina mwichaka dyomubanile. 12 Kosoko yo hata inghowa nyandike ukwenu, isowile kosoko ye imunhu yagolose uwihi kahikosoko ye imunhu yagoloseligwe uwihi ninga kosoko ikiyonese chalinse fina fomowile ne inghonya ukwetu kumwande ye Mulungu. 13 Nochonghone seye chagumigwe moyo lugano. Na kuleka ingumigwa yetu moyo chiweecho chikubwedelela lugano munyonela ya Tito, kosoko ichidoga chakwe chisindamala. 14 Aniye hanikiyona lugano kosoko yenu na sagumigwe chinyala, ninga fina chila chinhu chochawatamile fochowile chawelu, nonhaifo inyiyona yetu kwa Tito foni chawelu muhala. 15 Tito yakumwendani lugano anyeye mose, fina foyakugelegela ichogoho chenu mose, fomwamuhokele kwa chogoho na kuchichima. 16 Nikubwedelela kosoko nina ng'inyo iyecho ukwenu.
1 Chikuhananga mumanye Wakilisito weyetu, idihewa dye Mulungu dyonesigwe na makanisa ga Makedoniya, 2 hawagesigwa na magayo makulu, munyemuko yawo na ukiwa mukulu, hawowa wandewa kupulutisa. 3 kosoko hawalafa lugano fina fowadahile, hata kujumha fowadahile. Kwa kwenda kwawo aweecho. 4 Hawakidedela lugano wenghigwe luneka lwo kuwatasa awanhu we Mulungu. 5 Chisadogile fina wodaha kulafa nhaifo, hawakilafa aweecho kwa iMundewana seyekwa uwendo we Mulungu. 6 kosoko yo hachimutasa Tito fina fou yaukongesa umulimo awu, yakuhanangigwa yaumalagise umulimo awu we dihewa. 7 Mwina ugoli wa chila chinhu, mu dihuwi, udaha wo kulinga, umanyi, inghonya yose yakugolosa amaswanu, na uwendo wenu ukwetu kosoko mudihewa adi mudahe kupulutisa nheifiya. 8 Sikulongo dino fina ilagiso, ninga nikulonga du kuwonesa fina awamonga fowena inghanya yo kutasa, nidahe kumanya fina uwendo wenu foni wa chawehu. 9 Kosoko mumanya dihewa dye Mundewa wetu Yesu Kilisito, mugoli fina foyowile, kosoko yenu hakegolosa mukiwa, kosoko yawagolose wagoli kwa ukiwa wakwe. 10 Kosoko ye imbuli ayi nikuwenghan Maloleso: Ni fiswanu kwa nyeye hambiya kumalagisa chomukingile umwaka wa ulokile, hamukonga siyo kugolosa du amba chomusulumile. 11 Ninga hambiya mumalagise umulimo awo, na fina fomowile na ngwina mghulu yo kutasa, kahi konyeni nhaifo kuimalagisa kwa chiya chomwinacho. 12 Nghona chawelu mukuhananga klafa, iMulungu kohokela chila chomukudaha kulafa, nghakuhananga kujumha chomwinacho. 13 Nichaka mana fina awamonga wahungusiligwe na nyeye mukanhamisigwe, 14 niya ayo ni kosoko yo usawa, kosoko nyeye mwinafo fingi mugele awu ni fiswanu kuwatasa awaya wakuhananga. Kahi wanghowa nafyo fingi nanye muichaka, womutasani. Munamuna ayi wose mukuwa sawa. 15 Fina foitulumigwe “Iyakunjagise fingi nghowile nafyo kujumha foyahanange, na yakunjagise chidodogi nghahungukiligwe” 16 Malumbo kwe Mulungu yawagumile nghwina imwedu yo kutasa kosoko yenu mumoyo wa Tito. 17 Kosoko siyo du kafumila achiya chochimutasile kugolosa, ninga hakowa na ngwina lugano ya kutasa na kwa nyenda yakwe hakalamula kwija ukwenu. 18 Hamwedu naye chikumwigala imundugu setu iyasoweleke mumakanisa gose kosoko yo kuhubili mbuli swamu, 19 na siyo iyo du, amba kasaguligwa na makanisa kwilongosa na seye mumilomo ayi ye dihewa yochikugolosa, kosoko ye ditunyo dye Mundewa na konesa inyenda yetu swamu. 20 Chikuhananga kinega munhu wowose yangheje yechilaumu kosoko ye wimilisi wi isao ai. 21 Kosoko iniya yetu ikugolosa achiya ichiswamu siyo kwa Mulungu du, amba kwa wanhu nheifiya. 22 Na hamwedu na wanhu awo weli, chikumwigala imundugu setu wochimugesile mikangha itewa na kumona fina ugele wose ni munhu yena ngwina yo kutasa, ninga hambiya kena ngwina kusuma ugele wowose kosoko kena ng'inyo nghulu ukwenu. 23 Na kosoko ya Tito ni miyangu, mutogomi miyangu, chikugolosa milimo kosoko yenu, na kosoko ye wandugu wamonga awejile hamwedu naye, awo ni watumigwa we Makanisa, ditunyo dya Kilisito. 24 Ninga woneseni umemeleki wo uwendo wenu, na makanisa gose gone chawelu fina inyiyona yangu iikwenu siyo ya chaka.
1 Hechaka soko yo kwandika ukwenu kosoko ye filafwa ku Wakilisito wa Yelusalemu. 2 Kosoko nimanya fo mwina moyo wo kutasa, na hanikiyona kosoko yo ku wanhu wa Makedoniya, sikugamba Akaya hayuwa tayali kulawa mwaka ulokile ne unghwina yenu iwasonga matewa. 3 Ninga nikuwatuma awaKilisito weyetu kosoko inyitogola yetu kosoko inghowa ya chaka munonga ayi, kosoko muwe tayali, fina fonilongile mokuwa; 4 Ingheje ikuwa wanhu wa Makedoniya fowokawokwija na seye wafike musiwalafaji, chokuwa na chinyala chinhani, kuleka kulonga ichinyala chenu kosoko yo kuwa na ng'inyo. 5 Kosoko yo nyona fiswanu kuwatasa awaKilisito weyetu wachilongolele ukwenu, wadahe kwika tayali ifilafwa fyenu fomugambile molafa, nayo yonese fina chaweli ni mhongesi ilafigwe kwenda kahi siyo kwa kudindilisigwa. 6 Chonikulonga nochi; “Iyakuhanda chidodogi yakugola chidodogi na iyakuhanda chingi yakugola chingi”. 7 Chila muhu ikuhanangigwa yagolose fina foyalamule mumoyo wakwe, siyo kwa usungu ama kwa kudindilisigwa, kosoko iMulungu yakumwinda yakulafa kwa konela. 8 Na iMulungu yakudaha kuwingha nyeye chila mboto kwa wingi, kosoko mudase kuwa na chila chinhu chimemelekele majuwa gose, na mudahe kuwatasa wose wakuhananga. 9 Fina foitulumigwe, “Imwene yakulafa ku wakiwa, uchawelu wakwe ukwikala majuwa gose”. 10 Na iMulungu iyakulafa mbeyu kwe Muhandi ne chakudiya ku wanhu, kolafa nheifiya na kongesa kukugola kwenu kosoko muwatase awaya wakuhananga. 11 Momotesigwa kwa chila chinhu, kosoko wanhu wadahe kumulumba Mungu kwe simhongesi sowohokela kulawa ukwetu. 12 Kosoko fomukulafa utogomi awu musikulafa du kukuhananga kwa wanhu we Mulungu wa Yelusalemu, amba nheifiya haigolosa wanhu matewa wamulumbe Mulungu. 13 Na kosoko yo ulomelesi awu, momutunya Mulungu kwa kuihuwila mbuli swamu yaKilisito kahi kosoko yo undewa wo mukuwengha wanhu wa Yelusalemu na wanhu wamonga. 14 Kosoko yo kwa uwendo mukulu wowatasila nyeye kosoko ye dihewa dipulutise iMulungu dyoyonese ukwenu. 15 Chikumulumba Mulungu kosoko ye mhongesi yakwe iisikutagusika.
1 Aniye Paulo nimwenyecho hanyoneka, munhu wa ubasi na musindamafu wa Kilisito, hambiya aniye inimuholo ninghowa hamwedu na nyeye, namukali ninghowa kutali nanye. 2 Nikumutasani munghanigolose kuwa mukali ugele wonikuwa hamwedu na nyeye, hamwedu na nginyo fina fonitalile kwa kuwonesa awaya wadogage chikugolosa fina wanhu we chilunga. 3 Hata inghowa chikwikala muchilunga, ninga chisikitowa fina wanhu we chilunga. 4 Kosoko ifilama fochikutumiya siyo fya chimunhumunhu, ninga fina udaha we Mulungu uukubana singome(amakiga) sose 5 na kung'ola chila chikwakwaliso che kiyona ichikigwe kuilema umanyi we Mulungu, chikuteka chila madoga gaduha kumogoha Kilisito. 6 Munghafulusa kuwa mumemelekela muchogoho, aseye cha tayali kubana chila namuna ya kuleka kuwa na chogoho. 7 Mulange kuchuwile kumwande yenu. Nghona munhu wowose yena ng'inyo fina ni munhu wa Kilisito, imunhu ayo yakuhanangigwa yagelegele fina aseye nase cha Wakilisito fina imwene foyali. 8 Hata inghowa nipulutise mukiyona kwangu kosoko yo udaha uya woyachinghile iMundewa siyo wa kudimola dihuwi dyenu ninga kudijenga, sigumigwa chinyala kosoko yakwe. 9 Sikuhananga mone fina nikuwengha chogoho nyeye, kwe sibaluwa sangu. 10 Kosoko wakugamba, “Sibaluwa sa Paulo ni nghali na sina mbuli nsito, ninga imwecho yanghowa hamwedu na seye ni munhu muholo, na hata ugele woyakulonga simbuli sakwe kifana si chinhu.” 11 Leka munhu yo yamanye fina chochikulonga musibaluwa no gochigolosa ugele wochikuwa hamwedu na nyeye. 12 Kwa fyofyose chisikudaha kwiika ama kwiliganisa na waja wakitunya aweecho; Awanhu wakwigolosa wene kuwa chipimo cha kwipimila, na wanhu wakwiliganisa aweecho kwa eweecho ni wabwalasi. 13 Ninga chisikiyona na kupulutisa, amba kukiyona ko kosigala mumihaka ye imilimo yochinghigwe na Mulungu, aino ni hamwedu na imilimo yetu ukwenu. 14 Kosoko chisikujumha imihaka yochekiligwa ugele wochejile ukwenu; hachuwa we nghonga kwija ukwenu, chikumegalila imbuli swanu ya Kilisito. 15 Chisikiyona na kupulutisa kosoko ye milimo ya wanhu wengi, ninga dihuwi dyetu nodi, fina dihuwi dyenu fodikongeseka, imilimo yetu ukwenu yokongeseka lugano, 16 Baho chodaha kuhubili imbuli swanu muisi sa kutali na nyeye, na chisikiyona kosoko ye imilimo ifuluse kugolosigwa ni wanhu wengi. 17 Leka iyakiyona yakiyone kosoko ye Mundewa Kilisito. 18 Kosoko iyakuhoniligwa si si munhu iyakitunya imwenecho, amba imunhu yakutunyigwa ne Mulungu.
1 Nikona monifinyilisa chidodogi muubwalasi wangu. Dededeni munifinyilise! 2 Nikumonelani finju amba ni finju ya Mulungu, kosoko nimutumisani nyeye kwa Kilisito na nikumonani nyeye fina mwanamuke nghamanyile mugosi kwe mugosi wakwe yumwedu. 3 Ninga nikogoha fina dijoka fodimudanhilise Hawa kwa usugu wakwe, amadoga genu gobanigwa na kutowangisigwa na kuleka kuhuwilika kwenu kwa chawelu kwa Kilisito. 4 Kosoko yumwedu yangheja na kumuhubili Yesu yungi kusuma ayuya wochimuhubili, ama nghona muhokele muhe yungi kusuma yuya womuhokele, ama nghona muhokele mbuli swanu ingi kusuma aiya yomuhokele, ayo ifulusa kutosha kwiika hasi yakwe. 5 Sikudoga fina niye namudodogi kusuma awo watumigwa wo udasi. 6 Hata inghowa nikugugumila munonga, siyo muumanyi, kw njila yoyose chigagolosa gano chalinse ukwenu mufinhu fyose. 7 Togoleni! Hanigolosa wihi kwa kiidulisa nimwenecho kosoko anyeye mwinuligwe, kosoko hanihubili mbuli swanu ye Mulungu bila maliho. 8 Ugele wonagolo sage milimo ukwenu, nenda nilihigwa na makanisa gengi, chigambe nenda niwahijila kosoko ya kuwatasa nyenye. 9 Na ugele wongowile na nyenye na nakuhananga, samwighile musigo wowote kosoko ihananga yangu hailafingwa na wandugu wa Kilisito kulawa Makedonia. Hanikinegi nanokinega kuwa musigo kwa munhu wowote. 10 Fina uchawelu wa Kilisito fouwile mugati yangu, inyiyona yangu isinyamasisigwa mumukowa wa Akaya. 11 Na nhani? Kosoko sikumwendani? Imuhungu kamanya fina nikumwendani! 12 Na nogendelela kugolosa fina fonikugolosa, kosoko nighawenghe luneka awaya wakuhananga luneka lwa kiyona fina wakugolosa Milimo fina seye. 13 Kosoko awo ni watumigwa wo udasi, wotogomi we milimo wadasi, Wakiigolosa iweecho fina watumigwa wa Kilisito. 14 Na siyo ijimo kosoko hata Ihuhoma Yakiigolosa imwenecho fina malaika wo ujelu. 15 Kosoko yo siyo chinhu chigeni nghona awatumwa wakwe nawo wakiigolosa awecho fina watumwa wa uchawehu. Indumo yawo yoliganila ne iigolosa yawo. 16 Nifuhusa kuilonga, munhu wowose yanghadoge fina na mubwalasi, ninga hata mwonghadoga nhaifo, munihokele fina na mubwalasi, na kosoko yo aniya nani nikiyone chidodogi. 17 (Ichonikulonga sikulonga kwa udaha we Mundewa ninga fina mubwalasi, mung'inyo ino yenyitologa; 18 Kosoko wanhu matewa wakiyana kosoko ye finhu fye chilunga, aniye nani nokiyona.) 19 Kosoko mukuwafinyilisa kwa chinyemi iwabwalasi, anyeye mukiyona muwecho fina wanhu wa mahala. 20 Kosoko mukufinyilisa munhu yakuwongha, oma yakuwakanhamisa, ama yakuwabesa, ama yakuwatowa muchihanga. 21 Kwa chinyala nikugamba hachuwa ku finhu afo! Ninga nghonaga munhu wowose yakugesa kiyona kosoko ye chinhu chochose, nikulonga fina mubwalasi, na niye nikiyona. 22 Togoleni, awene ni Waibulania? Aniye nani nheifiya.Awene ni Waislaeli? Aniye nani nheifya. Awene ni welekwa wa Ibulahimu? Aniye nani nheifiya. 23 Awene ni watumigwa wa Kilisito? Aniye nikumutogomela Kilisito fiswanusi fina muchilahu aniye nitogoma milimo mikulusi nikala kwigelesa mikangha mingisi, nitowigwa mikangha mingisi na hanuwa habehi na kufa mikangha mingi. 24 Mikagha mishano hanitowigwa ne iya Mikotya makumi madatu na ikenda. 25 Mikangha midatu awaloma lawanitowa ne Mikotya, hanitowigwa na mawa kamwedu, mikangha midatu lanyuwa muhinhumbwi, Ugele wayabenekage mubahali. Kmwedu hanikala mumeji ijia dimwedu chilonemisi. 26 Musinhambo sangu sa chila ugele hangu wa muhatali ya mafahuko ya meji, mu hahatali ya wahiji, hatali hatali kulawa ku wamembwe, hatali mumakaya, hatali ya wandugu wo udasi. 27 Hanigolosa milimo mikugutu na kusoka, hamonga hanigona meso; hanyuwa na njala na nghilu, hanyuwa na mayeyo kosoko yo kuleka kuwa na suke simemelekele. 28 Na kuleka gago gose chila ijuwa nina manhonge kosoko ye makanisa gase. 29 Ugele yumwedu yechaka ludole nani nikihulika fina nechaka (yakulogosigwa) mu uwihi, nikumemigwa na usugu. 30 Nghona ninghanga kiyona, nokiyana kosoko ye finhu fikonesa fina nechaka ludole. 31 Imulungu ne Baba we Mundewa Yesu imwene yamotesigwe magiwa gose kamanya fina sikudanha. 32 Aa kuya Damasiki, imukulu wo mukowa yowile lasi ye Mundewa Aletasi hakeka wanhu kwimilisa ikaya kosoko wanikole. 33 Ninga hanihumulusigwa muchisage kupululila mwihengele dyowile mwikigo na kumuhija.
1 Nikuhanangigwa nikiyone, hechaka chinhu chonikwambulila kosoko yo, ninga nogendelela kusinjosi ne magubulo kulawa kwe Mundewa. 2 Nimumanya munhu yumwendu Mukilisto minyaka ikumi na mine yenuligwe kulanga, sikutanga nghona imunhu yo yowile ne mutufi wakwe ugele uwo, amba iMulungu chewelu kamaya. 3 Na nimanya fina imunhu ayu hakenuligwa kulanga, sikutanga ghona imunhu yo yowile ne mutufi wakwe egele uno, Mulungu kamanya. 4 na kuhulika finhu fe chifiso ifene fisikudaha kulongeka. 5 Mu hanhu he imunhu ayu, nokiyona, ninga sikiyona kosoko yangu, kulewa kiyona mukuleka kuwa na ludole. 6 Kosoko mhali nikuhananga kiyona sowile nikuwa mubwalasi hata chidodogi, kosoko hanyuwa nikulonga chawehu mahala ninga nikulema kugendelela kiyona, kosoko munhu wowose yangheje yedoga kusuma gaya goyakona na kuhulika kulawa ukwangu. 7 Na kunileusa kulawa kukiyona na kupulutisa kosoko ye simbuli asi singhulm se magubulo, kaninghigwa imuwa mumutufi wangu, mutumigwa wa huhoma, yakunitowa yakunileusa kulawa kunyiyonaya kupulutisa. 8 Hanikutasa Mundewa mikangha midatu kosoko ichinhu achi chinilawe; 9 ninga hakanigamba, “Imboto yangu ikutosha, kosoko uludole lwangu lukumemelekela mukuleka kuwa na ludole.” Nokuwa na nyemo nakiyona kosoko yo kuleka kwangu kuwa na ludole kosoko uludole lwa Kilisito lwikale muchanhya yangu. 10 Kosoko ya Kilisito nikwendesigwa na kuleka kuwa na ludole, maligo magayo; kosoko fonikuwa nichaka lodole no fonikuwa na ludole. 11 Ninga fina mubwalasi amba nyeye nomunidindilise kuwa nheifo, anye nomowile wanhu wokunitunya, kosoko hata inghowa aniye si chinhu simudodogi ng'o kuwawo “watumigwa wenu” 12 Ifitangilo fya Mutumigwa we chawelu hanigoloseka ukwenu kwa kufinyilisa, kwa majumo makulu. 13 Kosoko musahungukiligwe chinhu kusuma amakanisa gamonga, ila aniye nimwenyecho siwatwikile misigo, munilekelele kosoko haniwagoloselani fibi. 14 Langa hambiya lwa kadatu nifulusa kwija ukwenu. Na sikua musigo kosoko sikukongha fomuwile nafyo, ninga anyeye muwecho, kosoko awana wasikuhananga kuwekila aweweleke sigafu, ninga awaweleke nowakuhanangigwa wawekile sigafu. 15 Nokuwa na nyemo kutumiya fyose fyoninafyo kosoko yenu. Nghona nikuwenda nyeye lugano anyeye monyenda chidodogi. 16 Ninga mokifumilisa fina sowile musigo ukwenu amba yumwedu yakudaha kulonga kosoko Paulo ni musugu kawakochelesa! 17 Togoleni haniwongha kupulutila mutumigwa wowose wonimwigale ukwenu? 18 Hnimwinanga Tito na kumutuma, na hanimwigala imundu setu hamwedu naye Tito hakawongha nyeye? Sichigose na kulongoswa na chidoga chimwedu, chisigendile hamwedu. 19 Kowage mukudoga ugele wose mpaka hambiya, chendaga chikimilise chiwecho kumwande yenu, chikulonga chawelu kumwande ye Mulungu mu Kilisito, na gose gochikugolosa wendigwa wangu ni kosoko ya kuwajenga. 20 Kosoko nikogoha fina nikudaha kwija na kuwafika nyeye munyuwa yosikonela na kosoko yo mukudaha kunyona fina fomusikuhananga, kukudaha kuwa na kulemana, finju, nyono, nyiendesa, udasi, kulonga uwihi wa wanhu, kwanjasa udasi kuwanhu, na kuleka kuwa na dihewa mugati yenu. 21 Nikogoha kowage ugele wonikwija iMulungu kodaha kunigolosa nuwe na chinyala kumwande yenu, nani nohongesa kosoko ya wanhu wagolose wihi ugele ulokile na wasilambile kosoko yo wihi wawo.
1 Aluno ni lwa kadatu nikwija ukwenu. Chila mbuli ikulahigwa kwa uhomelesi lwa wanhu weli ama wadatu fina amatulumo fogakulonga. 2 Haniwajama awaya awagolose wihi ugele ulokile na wose wamonga nikuwajama hambiya ugele wonihechaka, fina fonagolose ugele wonowile bah one nija yangu ya keli, ugele wonikwija sikuwa na ubasi. 3 Kosoko mukuhananga mokiyonela muwecho fina Kilisito yakulonga kupulutila niye. Ukwenu Kilisito nghakuswela ludole ninga uludole lwakwe ukugolosa milimo mugati yenu. 4 Kosoko awanhu hawamukoma kwa kumutungika mumusalaba kosoko yo kuleka kuwa na ludole, ninga hambiya yakwikala kwe ludole lwe Mulungu. Kosoko nichaka ludole kwi mwene, amba ukenu nogendelela kuwa hamwedu naye kwa udaha we Mulungu. 5 Mukilangisise muwecho nghona mukwikala mwihuwi. Musikona fina Yesu Kilisito yakwikala mugati yenu? Nghona si nheifo basi nyeye muduga. 6 Nikuhuwila fina momanya fina sichidugile. 7 Chikumutasa Mulungu munghadahe kugolosa wihi, siyo kosoko choneka fina chifulusa kusuma, ninga mugolose maswanu hata inghowa aseye chikoneka fina chisumwa. 8 Kosoko chisikudaha kugolosa chochose kukana ichawelu, udaha wochinawo ni kugendelesa ichawelu. 9 Chikonela ugele wochichaka ludole anyeye mwina ludole. Chochikuwatasila mugaluke wanhu wamemelekele. 10 Nikwandika ibaluwa ino ugele ninghali kutali, kosoko ugele wonikwija ninghadindilisigwe kuwa mukali ukwenu kwa kutumiya auya udaha woninghigwe na Mundewa kosoko ya kujenga na sio kumola. 11 Hambiya lekeni nimalagise ibaluwa yangu kwa kumulagani. Goloseni sinjila senu, muhulikise amaloleso gangu, mukifumilise munhu ne miyagwe, ne iMulungu wo wendo ne digoya kukuwa hamwedu na nyeye. 12 Mukilamuse chila munhu e miyagwe kwa nyilamusa ye chiKilisito. Awanhu wose we Mulungu kuno wakuwalamusani. 13 Dihewa dye Mundewa Yesu Kilisito ne wendo we Mulungu na uhamwendu we Muhe Musunhile uwe hamwedu na nyeye mose.
1 Paulo Mutumigwa siyo na wanhu kahi kulawa kwa mwanadamu, ninga iYesu Kilisito imwecho ne Mulungu Baba, yamwinule kulawa muchilalo. 2 Awakilisito wose woile hano hamwedu na niye chikuwegalilani mulamuso kumakanisa gose gowile ako Galatiya: 3 Mulungu iBaba yetu na Mundewa wetu Yesu Kilisito na yamwingheni mboto yakwe ne idigoya, 4 uleke yachilekelele kulawa muchigele achi cho wihi. Kilisito hakakilafa imwenyecho kosoko yo wihi wetu, fina foyendile Mulungu iBaba yetu; 5 Ditunyo dina imwene chigele chose! Hano. 6 Aniye nikujuma! Nhani nheifo mukumuleka chimwande mwande iyamwinangileni mumboto ya Kilisito kamei mukubidukila Injila ingi. 7 Na ninga siyo fina kwina mbuli swanu ingi, ninga nikulonga nhafi kosoko kuna wanhu wakumwidasani na kuibidula Imbuli swanu ya Kilisito. 8 Ninga inghowa noseye ama Malaika kulawa kulanga yangheja yawahubili Imbuli swanu ingi ikulemana na aiya yochihubili aseye ukwenu, basi yaligitwe! 9 Fina fochilongile, na nikulonga lwakeli: Munhu yoyose iyakuwahubiliani Imbuli ikulemana na aiya yomuhokele na yaligitisigwe! 10 Aniye nikiyendesa kuwanhu ama kwe Mulungu? Ama nikituma kuwendesa awanhu? Kusigwa ninghali kwenda kuwendesa wanhu sinowile nikuwa mutogomi wa Kilisito. 11 Hambiya gojeni niwatamileni wandugu sangu fina imbuli aiya yonawahubili siyalawile kwa munhu. 12 Kahi siipatile kwa munhu wowose, kahi safuswa na munhu wowose ninga kwa kugubuliligwa na Yesu Kilisito. 13 Togoleni simuhulika niye fonowile imikalile yangu mudini ye Chiyahudi, fina fonidisambase dikanisa dye Mulungu bila ubasi na kugesa kudibana. 14 Aniye haniwalongolela wengi we disika dyangu kukola mafuso ge dini ya Chiyahudi, na kupiligala kukola mahokelo ga wasehe wetu. 15 Ninga iMulungu kwa imboto yakwe hakanisagula na kuninanga nimutumikie hata fonowa nikali kwelekwa. Yenda kunigubulila 16 imwanagwe, uleke nimuhubili kuwanhu wa mataifa wasimumanyile Mulungu, na simutasile munhu wowose ama kumusa fina nikonge nhani, 17 sakwila hata Yelusalemu kuwatumigwa wanilongolele kuwosa. Ila haniluta ningila mpaka Alabiya kunghonga, kamei kahi honikuya mpaka Damesiki. 18 Kamei foyaloka minyaka midatu hanikwila kahi mpaka Yelusalemu hanijamona Kefa ukuya, honikala ihakwe majua ikumi na mashano. 19 Sawonile hachikiyonile na awatumigwa wamonga ninga Yakobo du munduguse na Mundewa. 20 Aga gonikumwandikilani Mulungu kamanya fina sikuwandika udasi! 21 Kulawa baho haniluta kusitalafa sa iisi ya Silia na Chilikia. 22 Na ichigele cho samanyike kaa! Mumakanisa ga Wakilisito wa kuya Yudea. 23 Awanhu waya imbuli yowamanyile awene ni fina: Munhu yuya yendeyoliga na kuchitesa fibi kaumo naye yakuhubili dihuwi didino dyoyendayaliga! 24 Kamei hawamutunya Mulungu kosoko yangu.
1 Basi foyaloka minyaka ikumi na mine hanikwila kuluta Yelusalemu na Balinaba, kamei chalutanya na Tito. 2 Kuluta kwangu ni kosoko ya magubulo ge Mulungu. (Chuwile mu njama haniwatamila Filongosi) fina fonihubili Imbuli swanu muwanhu wa mataifa wamumanyile Mulungu. Hanigolosa nhaifo uleke milimo yangu ingheje ikuwa chaka. 3 Ninga hata imiyangu Tito iMuyunani, hadindiligwe kufinigwa, 4 ninga kosoko hakuwa na maKilisito ga udasi gendage gahananga gafinigwe. Mamunhu go hagakiingisa chinyemela, na kuhananga uhulu wetu wo chikilungise na wochuwile nawo mugati mwa Kilisito Yesu. Uleke wachingise muutumwa, 5 aseye hachilema lemilemi uleke ichawelu ye Mbuli swanu igendelele kusigala na nyenye. 6 Ninga wanhu wawo wakugambigwa Filongosi halika ni Filongosi ama hata, filongosi aniye ukwangu kaa; kosoko iMulungu hakulamula kwa kulanga futa. Wanhu wano hawowile na dyodyose dya kunongesela, 7 ninga chinyume chakwe fowona kwinghwigwa ne Mulungu mulimo wo kuhubili Mbuli swanu kuwamataifa kifana Petulo foyeng'igwe ikasi yo kuwahubiliya Wayahudi Mbuli swanu. 8 Kwa ludole lwa Mulungu nigoloswa Mutumi yatumigwe kuwamataifa, kifana Petulo foyagoloswa Mutumi kuwayahudi. 9 Wakone fina dihewa dyoninghigwe, Yakobo, Petulo na Yohana awowile mikiki hawafumi fina aniye ne Balinaba chilute ku wamataifa awene walute kuwanhu wafinigwe. 10 Ila nonga imwendu du yowachisigilile fina chiwagelegele awakiwa, mbuli iyo ayo hanuwa ludole nayo lugano. 11 Ila Petulo foyeja Andiyokiya, hanimugombela bila chifiso kosoko hakowe kena wihi. 12 Kosoko chigele wasinati hawanghati weje wanhu kulawa kwa Yakobo, yondeyodiya hamwedu na wanhu wamataifa. Kamei foyawonile wanhu waya wafika, hakakitenda kifana hadiyage nawo kosoko yendeyowogoha waya wafinigwe. 13 Nawo Awayahudi wamonga hawagolosa nheifiya mpaka Balanaba naye hakanegigwa na chimwefe chawo. 14 Aniye nikawone fina wasikugenda munjila inogile ye chawelu ye mbuli swanu, honimugombela iPetulo hamwande ya wanhu wose fina, Inghowa gweye go Muyahudi ukwandamila sijadi sa wamataifa; wanhu wasimanyile Mulungu kahi si Wayahudi. Nhani ukudindilisa wamataifa wandamile sa Wayahudi? 15 Aseye chiwecho Chiwayahudi kwa kwelekigwa kahi si wamataifa awena uwihi. 16 Kahi wamanyile fina imunhu nghekulaliligwanhenda sa chawelu kosoko yasinhenda sa malogiso ninga kosoko ya dihuwi mu Yesu Kilisito, hata na seye chihuwila mu Kilisito uleke chiteliligwe ichawelu kwa dihuwi mu Yesu, ninga si kwa sinhenda sa Malagiso, kosoko kwa sinhenda sa malagiso hechaka munhu wowose yakudaha kutaliligwa fina kena nhenda sa chewelu. 17 Hambiya inghowaga aseye chiwecho kwa kukonga kutaliligwa haki kwa njila ya Kilisito, hachoneka fina china wihi. Inghowa nonheifo togoleni nong'amba iKilisito yakutasa kwenesa uwihi? Chawelu ng'o! 18 Kosoko inghowa nikujenga gagaya kahi gonimonile, togoleni isikonesa finanimwecho nomubanaji. 19 Kosoko aniye kwa njila ya malagiso iyecho ganikoma, ila hambiya namumi kosoko ye Mulungu. 20 Nisambasigwa hamwedu na Kilisito kahi siniye ni mumi ninga Kilisito no mumi mugati yangu. Na uumi wo ninawo hambiya mumutufi, ninawo mwihuwi dye mwana we Mulungu, imwene yanyendile na kulafa chidoga chakwe kosoko yangu. 21 Sikwenda kuilema imboto ye Mulungu. Kosoko inghowa munhu yakutaliligwa nhenda sa chawelu kwa njila ya malagiso, basi Kilisito hakafa chaka!
1 Nhafo nyeye Muwagalatiya muwabwalasi! Nani yamulogileni inghowaga imanyika kumwande ya meso genu fina Yesu Kilisito katungikwa? 2 Nimuseni mbuli ayi imwedu: Hamuhokela Muhe kwa nhenda sa malagiso, hegu kwe kuhulika na kuihuwila? 3 Mwabwalasi lugano! Mukakonge na Muhe; hambiya mukuhananga Mulungu; ninga hambiya mukuhananga kwa chimutufi kumala? 4 Ninga gose gomugolose mutenda chaka? Chawelu chaka chakasi! 5 Je nong'amba iMulungu yamwinghileni Muhe na kugolosa majumo umwenu ago gose agakugoloseka kosoko ya nhenda sa malagiso ama kosoko hamuhulika Mbuli swamu na kuihuwila? 6 Hambia Ibulahimu hakamuhuwila Mulungu, na kutaliligwa fina muchawelu. 7 Nanye mumanye fina awanhu we dihuwi no wana wa Ibulahimu. 8 Matulumo gakone kumwande fina iMulungu yakwenda yawatalile ichawelu awamataifa kwa dihuwi, kahubili imbuli swamu kwa Ibulahimu yakugamba, “Umwako gweye amataifa gose gamotesigwa.” 9 Kwa nheifo awanhu we dihuwi wakumotesigwa hamwedu na Ibulahimu iyowile ne dihuwi. 10 Kosoko awaya awakwegamila lugano mumalagiso, awo wakwikala mumaligito makulu. Kosoko imbuli ye Mulungu ikugamba, “Munhu wowose nghakwandamila sose situlumigwe muchitabu che malagiso, basi kowa mwiligito ikulu!” 11 Hambiya imanyike lugano fina kwichaka munhu yakupata haki kwe Mulungu, kosoko yakwandamila malagiso kosoko matulumo gakugamba nhafi: No yuya du yene Dihuwi mwi Mulungu mumi. 12 Ninga amalagiso gasikwima mudihuwi. Iyakugagolosa yakwenda yowe mumi mugago. 13 Ninga kwa kugoloseka kuwa iligito iKilisito kachilegusa seye kulawa mwiligito, ligito dikwigaligwa ne malagiso; kosoko matulumo gagamba fina, Kaligitisigwa ne Mulungu imunhu yatungikigwe mwibiki. 14 Kilisito kagolosa gano gose uleke simboto se Mulungu soyalagane na Ibulahimu wasipate nawo awamataifa kwa njila ya Kilisito Yesu, uleke kwa njila ya kumuhuwila chihokele Muhe kwa ihuwi dye Mulungu. 15 Wandugu sangu, chinghalondela mbasi ye chimunhu munhu kifana wanhu weli nomowa kulagana mbuli na kikulumisa, hechaka yungi kahi yoibidulisa fingi. 16 Hambiya no nheifo kugamba dilagano dyagoloswa kwa Ibulahimu na lukolo lwakwe. Aino isigambigwe fina Milukolo ya wengi, ila igambigwa: Kulokela mulukolo lumwedu lwa Kilisito. 17 Chonikulonga hano nochi; Mulungu hakeka ilagano na Ibulahimu na kudigelegela. Dilagiso dyalafwa minyaka magana mane na makumi madatu ilokile isikudaha kubena Dilagano diya na kulegusa dilagano dye Mulungu. 18 Kosoko inghowa uhasi we Mulungu ukuhuwila ilagiso, basi ichaka haja ya ahadi. Ihuwi ninga iMulungu kamwingha ino Ibulahimu kwa njila ya dilagano. 19 Nhani mbiya yuwe ilagiso? Ni kosoko dilagiso hadija uleke konesa nhenda sihile mpaka lukolo lwa Ibulahimu, lukolo lwe dilagano wije. Dilagiso hadija kwa mikono ya malaika, ne munhu yengilile kifana mulamusi. 20 Ninga Imulamusi nghodaha kuwa yumwedu amba Imulungu ni yumwedu. 21 Aho, nong'amba dilagiso dikulemana ne siyahadi se Mulungu? Gwe hata! Kosoko woile dilagiso hadija uleke munhu yapate uumi, kahi ichawelu nayo hayuwa kwa njila ya dilagiso. 22 Ninga matulumo gagamba fina ichilunga chose chitawaligwa na ludole lwa sambi, na kosoko ya iyo basi uhasi wa ahidiigwe ukupatikana kwa njila ya ihuwilo, dikupatikana mwa Yesu Kilisito kwa waya wakuhuwila 23 Ninga chigele Dihuwi fodowa dikali kwija, aseye chose hachuwa muchifungo mpaka Dihuwi dino fodigubuligwe. 24 Nonghomba dilagiso hadichilongosagaa mpaka chigele Yesu foyeja, uleke chuwe we chawelu kwe Mulungu kulokela dihuwi. 25 Hambiya ugele we dihuwi no uno, ninga dilagiso dichaka chinhu ukwetu keli. 26 Kosoko muKilisito Yesu anyeye mose mwa wana we Mulungu kulokela dihuwi. 27 Ifene amatewa mugati yenu fowabatisigwa mu Kilisito wamufale Kilisito.. 28 Aho lo hechaka Muyahudi kahiMuyunani, mutumwa ama si mutumwa, hechaka mugosi kahimwanamuke, kosoko mana anyeye mose mwa hamwedu mu Kilisito Yesu. 29 Inghowa nyeye mwa wanhu wa Kilisito mumanye fina mwawana wa Ibulahimu, kahi mwawahasi kuligana ne dilagano.
1 Nikugamba nhafi Imuhasi muugele woyekuwa mudodogi, kefana mutumwa, hamwedu nokuwa no Mundewa wa fyose. 2 Ninga yakuwa kowa hasi ya wanhu wakumulela na kumulangilila mpaka chigele iBabakwe foyakwija yamulekela ukulu. 3 Nheifo aseye nase fochowa chinghati chikule, hachuwa watumwa, we simbuli se chilunga achi. 4 Ninga chigele ichecho chikeje Mulungu hakamutuma mwanagwe. Imwene yelekwe na Mwanamuke, hakelekwa mwidilagiso dye Chiyahudi, 5 soko yawaleguse waya woile mwidilagiso, ili seye chinangwe wana wa Mulungu. 6 Na kosoko nyeye mwa wana wakwe, Mulungu hakamutuma Muhe we Mwanagwe kufidoga fyetu iyakulila Aba! Agwe Baba. 7 Hambiya kulokela Imulungu musikugendelela kuwa watumwa ning wana, na nghona ni wana kahi wahasi.. 8 Katali fomowile munghati mumumanye Mulungu we chawelu, hamugendelelaga kufuga ifyumbigwe ifisowile Mulungu. 9 Ninga hambiya mumumanya Mulungu we chawelu, ama chigambe fina Mulungu mbiya kamumanyani nyeye, nhani mukuwila keli mafuso gasokile, mukuhananga muwe watumwa wani? 10 Mukukolelesa mbuli sa majuwa, minyesi, figele na minyaka. 11 Aniye to nikogoha seka ije yuwe nghiidasa chaka chakasi kosoko yenu. 12 Wandugusangu nikutasa lugano muwe kifana fonuwile niye. Kosoko niye nani nikifana nyeye ninga du musinigolosele dyodyose dihile. 13 Mumanya fina haniwahubili Imbuli swanu ichigele che inghonga, kosoko hanuwa na mutamu. 14 Hamwedu ihali yangu hayuwa Magesa ukwenu, musanibesile kahi kuniliga, ninga hamunihokela fina Malaika we Mulungu kifana Kilisito Yesu. 15 Fina hamuwa na chinyemi chikulu, mpaka hanidoga fina woile ikudahika kukumhula meso genu muninghe niye. 16 Togoleni nong'amba nigaluka mughondo wenu kosoko yo kuwatamilani ichawelu? 17 Awo wayenu wakonesa kifana wanogelelwa na nyeye, kumbeke wakuwahindilani kunje, uleke nyeye muwendese awene lugano. 18 Chawelu ni mbuli swanu kuwedasikila wamonga musimbuli si swanu siyo ugele wonibaho hamwedu nanye. 19 Mowangu wadodogi! Nikumonelani ubasi kifana imwanamuke nomaa yakukolwa no usungu wo kweleka, nani nikumonelani usungu mpaka Kilisito yombike mugati yenu. 20 Nikudoga nhanga nowile na nyeye lulu bahano, uleke nibidule dijwi dyangu kosoko nikona manhonge kosoko yenu. 21 Nikuhananga munitamile nyeye mukwenda kwikala mudilagiso: Musihulike fina dilagiso fodikulonga? 22 Fina Ibulahimu hakowa na wana weli, yumonga ni mwana we mwanamuke we chitumwa, kamei yumonga mwanamuke siwechitumwa. 23 Ayuno mwanagwe we chitumwa hakelekwa munjila ye chimutufi kifana wanhu wose, ninga yuno yumonga hayuwa kwa njila ya ihuwiso dye Mulungu imwecho. 24 Mbuli sino simanyika kifana mbasi: Kosoko wanawake wano weli wakonesa agaya malagano meli. Ayuya yene wana welekwe muutumwa, no Hajili, na ayuno yakonesa adiya dilagano dyagoloswa he tunda dya Sinai. 25 Hajili yuno yemile mwilagano dya mwitunda dya Sinai duwile ako Uwalabuni ni kifana mufano wa konesa dikaya dya Yelusalemu, kosoko dina wanagwe watumwa mpaka hambiya. 26 Ninga iYelusalemu ya kulanga siyo ye chitumwa, nayo iyo no ng'ina yetu seye. 27 Kosoko Itulumigwa nhafi: Sekelela gweye Musilatungulu go hukweleka! Inula dijwi dyako ujoje, agweye go winghati wone usungu wo kweleka! Kosoko wanagwe wa yuya yalekigwe ye mwene, wengisi kusuma yuya yene mugosi. 28 Hambiya wandugusangu, aseye nase cha wanagwe we Mulugu kwe chihuwi, fina Isaka foyowa. 29 Ninga kifana chigele chiya ayuya yelekigwe muutumwa foyamwidasage yuya yelekwa kwa njila ya muhe; noyuwile yuwile mpaka hambiya. 30 Ninga itulumwa nhani mwilago? Si ikugamba, “Muwingeni mwanamuke we chitumwa ne mwanagwe, kosoko imwana we chitumwa gwe hata nghodaha kuhala hamwedu ne mwana wa hakaya.” 31 Nhafo no chileka nikugamba aseye siyo cha wana wa mutumwa ila wana wa yuyo mwanamuke we hakaya.
1 Indekelelwa yochinayo chinghigwa na Kilisito Hambiya mwime ngwingwi mwinghowe hasi keli yo utumwa. 2 Tegeleseni! Aniye Paulo niwatamileni, Munhu yanghafinigwa yangheje yamanya fina Kilisito yakumutasa chinhu. 3 Kahi nikumujama chila munhu fina; yanghahananga kufinigwa yakuhanangwa yakole ne Itolati yose foikulonga. 4 Mubagulwa na Kilisito nyeye mukukola malagiso uleke noho mumwedese Mulungu. Ninga muwa kunje ne imboto ye Mulungu. 5 Ninga seye kwa Muhe chikugojela nhenda se chawelu ye Mulungu kwa njila ya dihuwi. 6 Kosoko kwa Kilisito kufinigwa na kuleka kufinigwa gose go gasikumutasa munhu chinhu chochose, ila kuwa na dihuwi dikugolosa mulimo kwa njila ya wendo. 7 Mwendemubilima fiswanu! Hambiya kahi nani yawagoloseni munghaifumile ichawelu? Iyamubilimiseni fibi nhafo nani? 8 Dilagiso dino sidikulawa kwa yuya iyamwinangileni. 9 “Unghaguma nungo hata inghowa ndodogi ikusasisa usage wose.” 10 Nikihulika nituna mwe Mundewa, nong'amba musilonda madoga gengi kusuma agangu, na wowose iyowedasa nyeye momwingha maliho gakwe hata yanghowa nani. 11 Ninga kwa ulwandi ulwangu halika nogendelela kuhubili fina kufinigwa ikuhanangigwa, nhani mbiya ho kudumangiswa? Woile fina no nheifo yuwile, basi kuhubili kwangu imbuli yo musalaba wa Kilisito kusowile kukuwa na lwidaso. 12 Ninga ibeka wawo wakumugumani manhonge walute wakafile kutali na nyeye. 13 Kosoko nyeye wandugu sangu hamwinangigwa mulekeleleligwe. Ninga mughasigolosele ndekelelwa yenu fibi kosoko mulekelelwa. Lekeni mukitase chila munhu na miyagwe. 14 Kosoko Malagiso gose muchitabu gamemelekela mwimbuli yiyo imwedu nayo: “Mwende miyago kifana foukiyenda gomwecho.” 15 Ninga munghowa kifana makewe, kiluma na kinghwakila, langisiseni mungheje mukimala. 16 Chonikulonga niye nochi, fina: Lekeni Muhe no umulongoseni mumikalile yenu, ninga hata nheifo simukwiguta usulumisi we mutufi. 17 Kosoko agaya agakwendigwa no umutufi, no gesikwendigwa na Muhe. Na agakwendigwa no Muhe no gasikwendigwa no mutufi. Awano weli Wanghondo, na ayino ikonesa fina musikudaha kugolosa muwecho gaya go mukwenda kugolosa. 18 Ninga inghowa mukulongosigwa na Muhe, aho nanga musuwile mumalagiso. 19 Na gose gakugolosigwa ne mutufi gamanyika du, mbona gamonga noga: Dihabwa, uwihi, nhenda sihile; 20 mafugo ge chikindikindi, uhayi, unghondo, kugomba, kiyonela gele, nyono, ukobo, kulemana, udasi; 21 chimesomeso, kunywa gimbi, ulefi, na goose gamonga kifana gago. Ayo lo nikumutamilani nghana fina: Wanhu wakugolosa ago, awo wasikwingila kulanga kwe Mulungu ng'o. 22 Ninga Dimudyo dye uMuhe we Mulungu nodi: Uwendo, ichinyemi, digoya, ufinyilisi, uunhu uswanu, kitasa, uchawelu, 23 uholosi, kechaka makulu. Musimbuli so, hechaka sheliya. 24 Na awaya woile mugati ya Kilisito wasabwalisa mutufi na madoga gakwe gehile. 25 Halika chikwikala na Muhe; basi na chigende na Muhe. 26 Chinghakitunye chiwecho chaka na chaka, na kiyanda sese kwa sese.
1 Wandugu sangu imiyenu wowose yanghagolosa wihi, nyeye mwichaka wihi mujameni miyenu na kumuwisa kwa moyo muswanu. Ninga kilangisiseni nanye muwenyecho mungheje mukugwila umo. 2 Kitaseni nyenye kwa nyenye, kosoko kwa njila ya kugolosa nhafo no kwandamila dilagiso dya Kilisito. 3 Munhu imwiyoni nomoo yakiyona imwenyecho ni chinhu kumbe siyo chinhu, yakidanhilisa imwecho. 4 Ninga chila munhu na yaisungilile imilimo yakwe imwecho. Kamei noho yowe na nonga ya kiyona nayo imwenyecho kuchidoga chakwe siyo kwe miyagwe. 5 Kosoko chila munhu yakwija yakwinula dikanda dyakwe imwecho. 6 Ninga iMufusigwa yakifusile mbuli swanu nayamutamile ne iMufusa wakwe. 7 Munghakidanhilise, Mulungu hakubesigwa. Kosoko chochose munhu cho ya kuhanda nocho yakwija yagola. 8 Iyakuhanda kwa kwandamila mbuli so mutufi wakwe, basi yakwija yagola difa kulawa umo mumutufi wakwe; lakini yuya yahandile kwa Muhe, yakwija yagola umo muMuhe uumi wa majuwa gose. 9 Ninga chinghasoke kugolosa maswanu; kosoko chikwija chigola kwa chigele chakwe, halika chokuwa hachilekile. 10 Hambiya nheifino nomaa chine luneka, basi chigendelele kugolosa maswanu kuwanhu wose ninga saidi lugano chiwagolosele wayetu wochuwanye mwikanisa. 11 Langeni ukulu lwa ulutulumo wo nitulume mubaluwa yangu ukwenu kwa mukono wangu ni mwecho! 12 Awaya wakwenda kiyonesa mitufi yawo fina wakugolosa nhenda swanu, nowene wakumulasimishani nyeye mufinigwe. Awakugolosa du nheifo uleke wanghadesigwe kosoko ya musalaba wa Kilisito. 13 Ninga du hata awecho wawo awakwenda kufinigwa, malagiso wasikuyakola, ila wakwanga nyeye nomufinigwe uleke wakitunyile umwenu fina langa lo! Wakukola malagiso fiswanu. 14 Ninga Aniye to, hata sikitunyila chinhu chochose ila musalaba wa Mundewa wetu Yesu Kilisito, kosoko kwa kulokela uwo ichilunga chisabwalisigwa ukwangu, na aniye nani nisabwalisigwa muchilunga. 15 Kosoko kufinigwa na kuleka kufinigwa gose sawa du; chikuhanangigwa usha wo moyo. 16 Na kwa wose wakuhanga wandamile gago, nikugamba kwimageni, ninga wagende digoya na ubasi we Mulungu ugende nawo ne wanhu we Mulungu Isilaeli! 17 Nikumalagisa kwa Kugamba: Kukongela hambiya nhafi munhu yanghanidase, fina nikulonda lubonoto lwa Yesu mumutufi wangu. 18 Wandugu sangu dihewa du ye Mundewa wetu Yesu Kilisito na dyuwe hamwedu ne mimoyo yenu. Hano.
1 Paulo mutumigwa wa Kilisito Yesu kwa nyenda ya Mulungu, ku wasunhile awene wakuhuwilika mu Kilisito Yesu: 2 Dihewa dyuwe ukwenu na idigoya kulawa Mulungu Baba yetu ne Mundewa wetu Yesu Kilisito. 3 Yatunyigwe Mulungu Baba we Mundewa wetu Yesu Kilisito imwene iyachimotese seye muKilisito hamwedu ne simboto sose se chimuhe kulanga, 4 hata foyachisagule chigele Ichilunga fochowa chisinati chumbigwe uleke chuwe wasunhile wechaka ilema ukwakwe. 5 Hakachisagula chuwe wanagwe kulokela Yesu Kilisito, kosoko ye nyenda yakwe. 6 Kuditunyo dyakwe dye nhogolwa dye dihewa fina hakachilekelela kulokela mwimwendigwa. 7 Umwakwe china uhonya kwanjila ya sakame yakwe, na kulekeleligwa wihi wetu ifene ugoli we dihewa dyakwe fowuwile. 8 Imwene hoyaching'ha ago mumemelesi, 9 kosoko hoyomanyika ukwetu kwa ubala na ujelu wose uwichaka chifiso kosoko no nheifo yendile mumakusudi gakwe goyakusudie fina galokele mwa Kilisito. 10 No nyenda yakwe fina ichigele fochimemelekela yafigale ifyumbigwe fyose umwakwe ifinhu fuwile kulanga na muchilunga. 11 Umwakwe ifinhu fyose fifuluka kugolosigwa kifana foyendile. 12 Aseye chi wanghonga mwihuwi dya Kilisito chasaguligwa na kwikigwa chikale chimutunye mwitunyo dyakwe. 13 Kulokela muimwene anye nanye hamuhulika imbuli ye chawelu, aiya mbuli swanu imwigalileni Uhonya wenu, kahi homuhuwila ninga homutoigwa lubonoto we dilagano dye Muhe musunhile, 14 iyo no dihuwiso dyo uhasi wetu, mpaka kuuhonya we wanhu wakwe Mulungu kunhogolwa ye ditunyo dyakwe. 15 Kosoko yo ninga hanihulika dihuwi dyenu mu Mundewa Yesu na wendo wenu kuwasunhile wose we Mulungu, 16 Sikuleka kulafa malumbo kosoko yenu na kuwagelegelani mumataso gangu, 17 fina Mulungu we Mundewa wetu Yesu Kilisito iBaba we ditunyo yawengheni Muhe we ubala na magubulo mumanyi wose uwile umwakwe. 18 Meso ga mimoyo yenu gowe majelu mudahe kumanya dihuwi dyomwinangiligwe na ifene ukulu wo ugoli wakwe fouwile mwitunyo dyo uhasi kuwasunhile wakwe. 19 ne ifene ukulu we udaha uusikudaha kupimika fouwile ukwetu seye chimuhuwile na kosoko ye milimo mikulu ine udaha yoyakutogoma. 20 Iyene iyo noijile imalagikila mwa Kilisito chigele foyamulafa muchilalo na kumugolosa yekale mumukono wakwe wa kulume kulanga. 21 Kuchanhasi ya undewa wose na udaha na ludole na ulongosi na kuchanhya ya chila isina idinangigwe siyo du muugele uno ninga na muchigele chikwija; 22 Naye keka finhu fyose hasi ye migulu yakwe, na kamugolosa imwene Kilisito kuwa no Ditwi dye finhu fyose kosoko ye dikanisa 23 no mutufi wakwe, umemelekele muimwene iyakumemelesa ifinhu fyose.
1 Hamuwa wanhu wafile kosoko ya sisambi senu. 2 hamwandamilaga mbuli sihile se chilunga achino, na kumwandamila Mundewa wo ludole we ulanga, muhe uya uukutogoma mlimo mpaka hambiya muwana wasikwenda kuhulika. 3 Na aseye chose hachuwa nheifo chigele cha kunyuma hachandamila nhenda sihile se mitufi yetu na gose madoga gehile na kugagolosa, hachuwa wana woile muihukumu ye nyono kifana awamonga. 4 Ninga iMulungu yamemile ubasi yene uwendo mukulu woyachendile seye, 5 hata chigele fochowa wanhu wasimumi kosoko ya makosa getu, imwene hakachigolosa womi kulokela Kilisito (ninga kwa mboto ye Mulungu muhonyigwa) 6 na hakachinula muchilalo hamwedu naye na kuchika ne imwene kulanga muKilisito Yesu. 7 Fina ichigele chikwija yadahe konesa umemi we simboto sakwe isisikupimika muswanu wakwe ukwetu seye mu Kilisito Yesu, 8 kosoko muhonyigwa kwa mboto ya Mulungu kwa njila ya kuhuwila, ninga siyo kosoko ye sinhenda senu, ninga ni kwa chingwa cha Mulungu du 9 sikosoko ya milimo yoyose ninga munhu wowose yangheje yakitunya. 10 Kosoko seye no mulimo wakwe hachumbigwa mu Kilisito Yesu kosoko yo mulimo muswanu utandiligwe ne Mulungu kulawa kunghonga uleke chigende umo. 11 Hambiya mugelegele fina anyeye muugele uya hamuwa wamembe kwa chimutufi, mukwinangigwa wasifinigwe na waya wafinigwe, ikumbi dya mutufi dikugolosigwa na mikono, 12 ninga gelegeleni fina chigele chiya nyeye hamubaguligwa na Kilisito hamutemanhulwa kulawa mwisilaeli kahi wagenii mwi malagano ge dihuwiso, hamuwa mwichaka ihuwi kahi Mulungu muchilunga. 13 Ninga hambiya kulokela Kilisito Yesu anyeye mowile kutali ne Mulungu mugaligwa habehi kulokela sakame ya Kilisito. 14 Kosoko imwene no idigoya yetu, iyachigolose seye chuwe yumwedu, na kubena ulukasi woile hagatigati uchibagule. 15 Hoyalegusa ulukasii kwa mutufi wakwe no sisheliya malagiso na kugolosa muimwenyecho munhu musha yumwedu badala ya wanhu weli hoyegala idigoya lugano, 16 na yadahe kuchilamula chiweli kwe Mulungu kwanjila ya mutufi umwedu ahaya ho musalaba na kulegusa fikwakwaliso. 17 Hoyeja na kuhubili idigoya ukwenu nyeye mowile kutali kamei na waya woile habehi. 18 Kosoko kulokela imwene chose chipata luneka lwa kumufikila Baba kwa Muhe yumwedu. 19 Hambiya nyeye siyo mwa wageni keli, ninga siyo wagendanjila ninga mwa wakaya hamwedu na wasunhile wanhu wa hakaya he Mulungu, 20 mujengigwa mu munghindiso ya Watulumi na Wagonesi, iKilisito no sumbi ya hagatigati, 21 muimwene yuyo mujengo wose ukikolela hamwedu na kukula mpaka duwe ihekalu disunhile mwi Mundewa; 22 Muimwene umo anye nanye mukujengigwa uleke muwe kaya ya Mulungu kwa njila ya Muhe.
1 Kosoko ya iyo Aniye, Paulo, mohigwa kosoko ya Kilisito Yesu na kosoko yenu nyeye wamembe. 2 Dihuwi dyangu ni fina muhulika utogomi we mboto ye Mulungu wonenghigwe niye kosoko yenu. 3 Ifene foyanigubulile ichifiso na kugolosa imanyike na niye imbuli yakwe, kifana foniyandike chidodogi. 4 Nomo mukusoma aino motanga ifene fonimanyile ichifiso chakwe Kilisito, 5 ichifiso cho chisimanyike ne wana we wanhu we chigele chilokile kifana foigubuligwe hambiya muchigele achi ku watumigwa wakwe na wagonesi wasunhile kwa njila ya Muhe. 6 Ayo no ikuleka awamembe nawo niwahasi hamwedu na seye wakuhala hamwedu mu mutufi umwedu na wakuhangila na seye idihuwiso dyakwe dyuwile mwa Kilisito Yesu kulokela Mbuli swanu 7 Kosoko ya iyo Imbuli swanu aniye hanigoloswa mutogomi kwa chinghwa che imboto yakwe Mulungu cho neng'hingwa kosoko yo ludole lwe mulimo wakwe. 8 Aniye no ni mudodo kusuma imudodogi mu wasunhile, haning'igwa mboto ino uleke niwahubili wamataifa utajili wakwe Kilisito umemile, 9 na kuwagolosa wanhu wose wone na kumanya inyenda ye ichifiso chakifisile minyaka mingi ilokile mwe Mulungu yombile finhu fyose; 10 no kugamba fina kulokela dikanisa ubala we Mulungu hambiya umanyike na undewa wose na udaha muchilunga cha kulanga. 11 Adino haduwa soko ya minyaka na minyaka dyoyapangile mu Kilisito Yesu Mundewa wetu, 12 muimwene umo chichaka woga kahi chikihuwisa ku njila ya ihuwi dyetu umwakwe. 13 Ninga hambiya nikuwatasani munhofe mimoyo kosoko nikiidasa kosoko yenu na kwa itunyo dyenu. 14 Kosoko ya iyo nikufugama hamwande ya Baba, 15 Yuyo imwene ifinhu fyose kulanga na hasi fikutambuligwa, 16 uleke kugendela ugoli wakwe we ditunyo yakudaha kumwingha nyeye mudahe kuwa na ludole lwe ditunyo hamwedu na udaha kugendela Muhe wakwe mugati yenu, 17 na fina Kilisito yekale mumimoyo yenu kwa njila ya dihuwi; na ninga muwe na misisi na kugimbisigwa muwendo, 18 muwe na ludole lwa kutanga hamwedu na wasunhile amagalamu, matali, masisilii na gengile, 19 na mumanye uwendo wa Kilisito ambawo ni umanyi ulokile umanyike wose, ninga mumeme telele umemelesi wose we Mulungu. 20 Hambiya muimwene yene udaha ukugolosa mulimo mugati yetu kena ludole lwa kugolosa mengi kusuma gaya gochikutasa ama kugadoga, 21 ditunyo duwe kuimwene mwikanisa na mwa Kilisito Yesu kufyeleko fyose, minyaka na minyaka. Hano.
1 Aniye hambiya nimohigwa kosoko ye Mundewa, nikuwatasani mwikale mikalile kifana ya wanhu wenangigwe mulwinango womwinangwe, 2 hamwedu na uholo na ubasi, na ufinyilisi aku mukilondela chila munhu na miyagwe muuwendo, 3 hanangeni kukolelesa uumwedu we Muhe mohigwa nawo ne idigoya. 4 Kwina mutufi umwedu na Muhe nawo umwedu, kifana fomwinangigwe chila munhu mwihuwi dimwedu dye lwinango lwenu, 5 Mundewa yumwedu, dihuwi dimwedu, ubatiso umwedu, 6 Mulungu yumwedu naye no Baba wa wose yowile kuchanhya ya wose na muwowose. 7 Ninga mboto hachinghigwa chose kulokela chipimo cha ichingwa cha Kilisito. 8 Hambiya igambigwa, Foyapululuke kulanga hakalonda mateka kahi kalafa chinghwa kuwanhu. 9 (kugamba hakakwila togoleni ina maana yaki halika sikugamba imwene naye hakadulika hasi hasisi ye chilunga? 10 imwene yadulike no mwene kahi yapululuke kuchanya kutali lugano kuloka ulanga wose, uleke yamemese finhu fyose.) 11 Ne mwene hakalafa wamonga wowe watumi, wamonga wagonesi, wamonga wainjilisti, wamonga wadimi na wamonga wafusa, 12 uleke kuwatandila wasunhile wowe tayali kutogoma mulimo, wo kujenga mutufi wa Kilisito 13 mpaka chose fochikuhokela umwedu we dihuwi na umanyi we Mwana we Mulungu na kukula kuunhu we chipimo che disika dye umememelesi wa Kilisito; 14 uleke fina ching'agendelele kuwa fyana fikulondigwa londigwa ne mawingo ga mafuso gatungigwe na wanhu, muufundi wawo wo udasi. 15 Wakuleka kulonga gaya ge chawelu muuwendo, aseye chikule umwakwe imwene Kilisito ambaye no ditwi, 16 kosoko muimwene umutufi wose ukiyoha hamwedu na kikolela chila chilungo chakwe, chikutogoma mulimo wakwe noho umutufi ukule digoya na kijenga uwecho muuwendo. 17 Ninga nikulonga na kuhomelesa muMundewa fina anyeye kulawa hambiya munghekale mikalile kifana ya wamembe fowakwikala muubwalasi we mahala gawo gehile; 18 kosoko wakugumigwa lwisa mukutanga kwawo na waleusigwa na uumi we Mulungu kosoko yo ubwalasi uwile mugati yawo kamei na ukugutu we mimoyo yawo; 19 wofa mangete kahi wakiguma musimbuli so uwihi wo usulumisi uleke wagolose chila aina ya nhenda ihile, 20 ninga nyeye hamukifusile kwa Kilisito gago! 21 Nikuhuwila muhulika foifusigwe kuhusu imwene na ichawelu iya yuwile mwa Yesu. 22 Tageni nhenda senu sa katali isihile sikubanika sikwandamila umelo ukwenda mbuli sa udasi, 23 na goloseleni wanhu washa mufidoga fye sihakili senu. 24 Na faleni unhu usha wumbigwe kwa futa ye Mulungu muhaki ye chawelu na usunhi. 25 Kulawa hambiya nhafi lekeni udasi kamei chila munhu yalonge ichawelu ne miyagwe, kosoko cha filungo chila chilungo chikuhuwila miyagwe. 26 Ninga munghadeseka langisiseni mungheje mugolosa sambi; dijuwa ding'hoswe mwikali ne inyono, 27 mung'hamwinghe luhoma luneka. 28 Imuhiji hambiya yang'ahije keli, ibeka yalime na kutogoma milimo kwa mikono yakwe ulekeyowe na cha kuweng'ha wamonga awakuhananga. 29 Mbuli sihile sing'alawe mumilomo yenu, ninga siswanu na asiya sikudaha kuwatasa awakuhananga ili siweng'he mboto awakuhulika. 30 Ninga munghamudese Muhe Musunhile we Mulungu, ambaye muimwene umo hamutoigwa lubonoto, mpaka dijuwa diya dya uhonyi. 31 Usungu wose, nyono, kudeseka, chowe na maligo galeguke ukwenu, ne chila aina yo wihi, 32 yuweni na ubasi chila munhu na miyagwe na mimoyo ya kilekelela nyenye kwa nyenye kifana Mulungu kulokela Kilisito foyawalekeleleni nyeye.
1 Hambiya muwe wanhu wakugolosa fina Mulungu foyakugolosa kifana wana wendigwa. 2 Kamei gendeni muuwendo ifina Kilisito foyachendile seye hoyokilafa imwecho kufa kosoko yetu hakowa chilafwa che mhungile na kuwa nhambiko kwe Mulungu. 3 Ninga idihabwa na gose gehile mung'hagese hata kugataja ago gasikwendigwa kuwanhu we Mulungu. 4 Kunghowe chinyala, maligo, malumo, kahi ufumbi kosoko gasikuhanangigwa ukwenu, hanyuma yakwe du muwe wanhu wa kulumba. 5 Langisiseni lugano fina umo mugati yenu mwichaka muchilanga kahimunhu mwihi, ama yoyose musulumisi (mufugamila we sisanamu) yene uhasi muundewa we Kilisito na we Mulungu ayo lo kwichaka chakasi. 6 Munhu yang'awadanhilise kwa mbuli sakwe sibwalate. Mana nikumutamilani ni kosoko ya iino inyono ye Mulungu ikuwejila wana awasikuhulika. 7 Kahi munghakihase nawo, 8 kosoko chigele chiya hamuwa mulwisa ninga hambiya muwa muujelu we Mundewa; gendeni kifana wana we ujelu. 9 (kosoko dimudyo dye ujelu dikoneka nadyo ni; uswanu, haki ne chawelu) 10 mugese Kukonha agaya gakumwedesa Mundewa. 11 Ninga munghakihase na nhenda sihile se dichisa ambaso hasikweleka, ninga gagubuleni, 12 kosoko agakugoloseka ukwawo muchifiso ni chinyala hata kugalonga; 13 ninga gose gagubuligwe gakoneka munje muujelu, kosoko chila chikoneka chichoo no ujelu. 14 Ninga igambigwa, Handiko winuke gweye ugonile, winuke mudifa na Kilisito kokwingha ujelu. 15 Kilangisiseni fomukugenda siyo kifana wanhu wabwalasi ninga wabala 16 Togomeleni ugele fiswanu kosoko ichigele chino ni cha wihi. 17 Ninga munghowe wabwalasi bali tangeni agaya Mundewa goyakwenda. 18 Munghalewe gimbi na difai, kosoko umo mugati yakwe mwina wihi; ila memesigweni Muhe, 19 Kitamiliseni munhu na miyagwe aku mukwimba sabuli ne sinyimbo se tensi sa lohoni, aku mukwimba na kubwedelela Mundewa mufidoga fyenu fyose, 20 chila ijuwa na kwa chila chinhu lumbeni mudisina dye Mundewa watu Yesu Kilisito kwe Mulungu Baba. 21 Munghakibese munhuna miyagwe kosoko ya kumogoha Kilisito. 22 Anyeye muwanawake wahulikisiseni wagosi wenu kifana kumuhulika Mundewa, 23 kosoko mugosi no ditwi dye mwanamuke kifana Kilisito fo ye ditwi dye dikanisa mutufi na imwene no Mwihula. 24 kifana dikanisa fodikumuhulika Kilisito basi wanawake nawo wawahulike wagosi wawo kwa chila chinhu. 25 Anyeye wagosi wendeni wafele wenu, fina Kilisito foyajendile dikanisa mpaka yakilafa kosoko yakwe 26 uleke yakilafe kosoko yakwe na kudisunha kwa meji mwimbuli yakwe, 27 uleke yalafe ikanisa iswanu dichaka wihi kahi ilema dya wihi wowose ili duwe isunhile dichaka dyodyose dihile. 28 Awagosi wawende wanawake wawo kifana fowakuyenda imitufi yawo, imunhu yakumwenda imuke yakiyenda imwecho, 29 kosoko kwichaka munhu iyakuudesekela mutufi wakwe imwecho bali yakuwingha ndiya na kuutunduliya kifana Kilisito naye foyakudigolosela dikanisa. 30 kosoko seye cha filungo fya mutufi wakwe. 31 kosoko ya iyo mugosi yakuleka iBabakwe ne ing'ina na kiyandamila ne muke, nawo weli wakuwa mutufi umwedu. 32 Isili ino nghulu aniye to nikulonga du ikuhusu Kilisito na dikanisa; 33 Ninga chila munhu yamwende imuke fina foyakiyenda imwecho na imufele yanghaleke kumogoha imulume.
1 Muwana wahulikeni awaweleke mwi Mundewa, kosoko nhafo no fiswanu. 2 Wengheni chogoho awaBaba senu na awang'ina senu. (adino no dilagiso dye nghonga dine dilagano), 3 fina yokuwa mbuli inogile ukwenu, kamei mokwikala chigele chitali muchilunga, 4 Anye nanye waBaba munhu munghawande wana wenu, hadi wapate nyono, ninga waleleni mumafuso maswanu na maloleso ge Mundewa. 5 Anye muwatumwa wahulikeni awandewa wenu we chilunga kwa kogoha na kuchichima kwa chidoga chose fina fomukumugolosela Kilisito; 6 munghagolose du kosoko wawoneni na meso, na nyendesa ya meso du, ninga goloseni kifana watogomi wa Kilisito, awakugolosa kifa na Mulungu foyakwenda kulawa kumimoyo. 7 Goloseni milimo yenu kwa chinyemi, kifana mukumugolosela Mundewa ninga wanhu, 8 manyeni fina dyodyose diswanu dikugolosigwa na yoyose mutumwa ama simutumwa Mundewa yakwija yalafa maliho gakwe. 9 Anye nanye muwandewa wagoloseleni nheifo, lekeni kuweng'ha itisi manyeni fina anye nanye mwina Mundewa wenu kulanga ambaye no mukulu wawo nawo, na mugati yakwe mwichaka kubagula. 10 Kwa kumalagisa, nikugamba, imeni ngwingwi mwi Mundewa na kwa udaha we ludole lwakwe mukulu. 11 Faleni filama fyose fye Mulungu, noho mudahe kwima kitowa ne simhando sa Luhoma, 12 kosoko Inyisuma yetu seye siyo Nyisuma ye mitufi na sakame ninga ni udaha no ludole lwa wakulu we ichisa muchilunga achi, Ninga ni nghondo ya mhepo na wihi muchilunga cha muchanhya. 13 Hambiya londeni filama fyose fye Mulungu, uleke muwe na ludaha mwijuwa dya magesa, na fomukumala nheifo kwima imeni ngwi. 14 Hambiya mukwima nako imeni akuno mukifasa mukanda we ichawelu muchuno na kufala ngulo ye chuma ye chawelu muchifa, 15 na migulu yenu yuwe tayali kosoko ya mbuli swanu ye idigoya; 16 hamwedu na gago, londeni ne ngula ye dihuwi uleke sime umoto we misale ya luhoma. 17 Kamei londeni nghofiya ya wokofu ne dipanga dye Muye, nadyo no mbuli ye Mulungu. 18 Taseni chila ugele mu Muhe, kwa mataso gose na nhala. Muwe meso na munghofe mimoyo watasileni hata awamonga awanhu we Mulungu. 19 Ninga na niye nitasileni uleke Mulungu yaning'e mulomo uwechaka chogoho, mulomo wo kulonga chifiso che imbuli swanu imbuli yakwe. 20 Fina aniye nigaluka na munyamhala kosoko ye Imbuli swanu, ninga hambiya namuchifungo taseni uleke nilekeligwe nilonge imbuli yakwe fina fonikuhanangigwa nilonge mulamuso wo kumalagisa. 21 Hambiya manyeni fina fonuwile na fonikugolosa, fina iTikiko mundugusetu mwendigwa na mutogomi yahuwilike mwe Mundewa imwene yeja yawatamila chila chinhu. 22 Nimwigala ukwenu kosoko ya iyo du, ili mwije mumanye ifene fochuwile kamei yawagumeni moyo mufidoga fyenu. 23 Idigoya yuwe na nyeye wandugu, na uwendo, hamwedu ne dihuwi kulawa kwe Mulungu Baba na Mundewa wetu Yesu Kilisito. 24 Mboto yuwe na nyeye mose mukumwenda Mundewa Yesu Kilisito na kwa wendo usikufa.
1 Aniye Paulo na Timoseyo, watogomi wa Kilisito Yesu, Kuwasunhile wose mugati ya Kilisito Yesu awowile Filipi, hamwedu na maasikofu na mashemasi: 2 Dihewa dyuwe hamwedu nanye ne digoya dikulawa kwe Mulungu iBaba yetu ne Mundewa wetu Yesu Kilisito. 3 Nikumulumba iMulungu wangu chila fonikumugelegelani; 4 majuwa gose fonikumutasilani anyeye mose na kulonga sisala sangu kwa chinyemi, 5 nikulumba kosoko ya ulugota lwenu mung'endelesa imbuli swanu kulawa dijuwa dya bosi mpaka hambiya. 6 Na dyonihuwile fina chawelu nodino, iyakongese umulimo umuswamu mumimoyo yenu kowigala ku ndumiliso hata mwijuwa dya Yesu Kilisito. 7 Nhafo nofo nikwendigwa nimudogeni anyeye mose, kosoko muwa mumoyo wangu, kosoko chose chihangila imboto ino, iyokohigwa kwangu na umulimo wo kuimilisa na kuimilila imbuli ye Mulungu. 8 Kosoko iMulungu no muhomelesi wangu, ifene fonikumonelani nghwina anyeye mose muwendo wakwe Kilisito Yesu. 9 Diwombi dyangu nodino, uwendo wenu wongesekele kahi lugano, muumanyi ne misungu yose, 10 uleke mugafumile amaswanu lugano, kahi muwe na fidoga fiswanu mwijuwa dya Kilisito, 11 mumemesigwe mamudyo ge chelu, agekwija kwa njila ya Yesu Kilisito, kwa kutogolwa na kutunyigwa kwe Mulungu. 12 Nikuhananga anyeye wandugusangu mumanye fina gose aganipatile ganipata chawelu kosoko ya kuigendelesa mbuli swanu, 13 hata awasilikali na wamonga matewa wamanya fina inyohigwa yangu ni kosoko ya Kilisito; 14 na wengi wa wandugusangu wasindamikwa mugati ye Mundewa kosoko ye nyohigwa yangu na kugendelela kuwa wakangasi mu imbuli ye Mulungu wechaka chogoho. 15 Awamonga wekumuhubili Kilisito kwa chimwefe na nyisuma, ninga awamonga kwa fidoga fiswamu. 16 Awakeli wekumuhubili kwa wendo, wamanyile fina nyikigwa kosoko niimilile injili; 17 awenghonga wekumuhubili Kilisito kwa chimwefe, ng'o si kwa mimoyo mijelu, wamanyile fina wokongesa amagayo ge nyohigwa yangu. 18 Kahi choni? Amba kwa sinjila sose, yuwe kwa kiigilisa ama ye chawelu, Kilisito yakuhubiligwa; naniye nina chinyemi. 19 Heye, nobwedelela. Kosoko nimanya fina kwa njila ya mawombi genu ne utasi wa Muhe wa Yesu Kilisito agano gogaluka kulekeleligwa nyihulwa yangu, 20 ifene fonigojele na kuhuwila lugano fina sidaha kupata chinyala ng'o, amba kwa usindamiki mukulu fina majuwa gose Kilisito yakutunyigwa mumutufi wangu, inghowa kwa uwumi kahi kwa difa. 21 Kosoko ukwangu aniye kuwa mumi ni Kilisito, na kufa ni nyongesa. 22 Inghowa kuwa mumi chimutufi, ago no mamudyo go umulimo ukwangu. Nikali mumanhonge dyonikwendigwa nisagule sikutanga. 23 Nikanhamiswa hagati ya mabuli meli. Nikusulumila kuleuka nghekale na Kilisito, ayo no iswanu lugano. 24 Ninga kusigala chimutufi kukuhanangigwa lugano kosoko ya nyeye. 25 Nihuwile nheifo, nimanya fina nosigala na kugendelela nanyeye mose, ya magendelelo genu ne chinyemi mwihuwi, 26 uleke mudahe kongeseka kuwa ne itunyo mugati ya Kilisito Yesu, kosoko ye nyija yangu ukwenu kahi. 27 Ninga sinhenda senu suwe kifana Imbuli swanu ya Kilisito foikulagisa, uleke ningheja na kumonani anyeye, kahi nghona sijile, nihulike sinhenda senu, fina mwima ngwingwingwi mu Muhe yumwedu, na chidoga chimwedu kosoko ye dihuwi dye imbuli swanu, 28 munghogohe mbuli yoyose ya wanghondo wenu. Achino no chitangilo cha hajelu cho kwagilila kwawo, ninga uhonyi wenu uwukulawa kwe Mulungu. 29 Kosoko mwinghigwa anyeye kosoko ya Kilisito si kumuhuwila du, ninga na kudumangiswa kosoko yakwe, 30 mwingisigwa munghondo iya yomuyonile ukwangu, na hambiya mukuhulika fina ninayo.
1 Hambiya inghowa kwina sindamiko yoyose mugati ya Kilisito, ganghowa baho mahoso gogose ga wendo, unghowa baho lugota wowose we Muhe, nghona kwina ndekelela yoyose no ubasi, 2 memeleseni inyemo yangu, mudahe kuwa na chidoga chimwedu, wendo umwedu, moyo umwedu, mudoge hamwedu. 3 Munghagolose mbuli yoyose kwa kisuma ama kwa kiyona, ninga kwa uholo chila munhu yamone imiyagwe muswamu kusuma imwenecho. 4 Chila munhu yanghalongose simbuli sakwe, ninga yalongose simbuli sawayagwe. 5 Yuweni na chidoga chicho mugati yenu, ichuwile mugati ya Kilisito Yesu, 6 yuyo, iyowile kulawa kunghonga futa ya Mulungu nghonile inyuwa muliganyo ne Mulungu chinhu cha kikolelela nacho, 7 amba hakegolosa kechaka kulu, kuwa kefana mutumwa, kwelekwa kefana wanhu wose. 8 Kahe foyoneke kena futa ya munhu, hakakidulisa na kuwa muholo hata mwifa, mwifa dyo musalaba. 9 Hambiya iMulungu hakamukwisa lugano, na kumulugutisa disina dyakwe kusuma masina gose, 10 noho kwa disina dya Yesu chila ifindi difugame, dya ifinhu fyose fya kulanga na fye yisi na ifyuwile hasi ye yisi, 11 na chila ilimi digambe nhafi Yesu Kilisito no Mundewa kwa ukulu we Mulungu Baba. 12 Hambiya, wendigwa wangu, fina amajuwa gose fomugendelele kuwa na moyo wa chogoho, siyo ichigele chonyowile nanyeye du, amba hambiya lugano ichigele chosuwile nanye, togomeni kwa kogoha na kutetema kosoko yo uhonya wenu; 13 kosoko iMulungu noyekutogoma mulimo mugati yenu, kwenda kwenu na kutogoma kwenu, muumemelesi we nyenda yakwe. 14 Goloseni chila mbuli bila ya nghalasi ama nyiyusa, 15 mudahe kuwa wana we Mulungu mwichaka ilema, kahi udasi, mwichaka chinhu chochose chikumusigani mu cheleko chino cho ufudutu, ichagilile, chomukoneka anyeye mukwakaika muchilunga, 16 mukolelele imbuli yo uumi, nidahe kuwa na soko ya kitunya mwijuwa dya Kilisito, nhafi sabilime chaka ama sakiidasa chaka. 17 Hata ninghalafigwa uumi wangu kefana sadaka kosoko ye dihuwi dyenu kwe Mulungu, nokuwa na nyemo lugano, kahe nosangalala hamwedu nanye mu nyemo yiyo. 18 Anyeye nanye nheifo bwedeleleni kahe bwedeleleni hamwedu naniye. 19 Mundewa Yesu yanghenda, nikuhuwila kumutuma Timoseyo ukwenu chimwande, nidahe kugumigwa moyo nani ne simbuli se inyuwa yenu. 20 Kosoko nechaka munhu yungi ye hamwedu nani kefana imwene, iyodaha kumulangililani kwa moyo. 21 Kosoko awanhu wengi wekwenda simbuli sawo siyo sa Kilisito Yesu. 22 Anyeye mose mumumanya Timoseyo ne nyituma yakwe kefana mwana na Babakwe mumulimo we Injili. 23 Hambiya nikuhuwila kumutuma yuyo chimwande fonikanimanya agakanipata; 24 nani nimuhuwila Mundewa fina nokwija nimwenecho chimwande kahe. 25 Amba hanidoga yendesa kumutuma ukwenu Epafulodito, mundugusangu kahe mutogomi nani kahe chitung'ati miyangu, kahe mutumigwa wenu na mutogomi we finhu fonikwenda, 26 kosoko hakowa na nghwina nanye mose lugano, kuwa na usungu nanye lugano, kwasoko hamuhulika hakowa mutamu. 27 Chawelu hakowa mutamu, habehi na kufa. Ninga iMulungu hakamonela ubasi, kahe siyo ukwenu du amba no ukwangu nani, uleke ninghowe na sungu muchanhya yo usungu. 28 Hambiya nghitahidi lugano kumutuma, uleke munghamona kahi mumwayemwaye nani mhungulilwe usungu wangu. 29 Ninga muhokeleni imwene mugati ye Mundewa kwa nyemo yose; kahe muwe na chogoho na wanhu kefana imwene, 30 kosoko hakowa habehi kufa na kwangamisa uwumi wakwe kosoko yo mulimo wa Kilisito, uleke yamalagise agahunguke mu mulimo wenu ukwangu.
1 Kumalagisa, wandugusangu, bwedeleleni mwi Mundewa. Kuwawandikilani simbuli sisiya sonawandikile sikusoka kosoko sowatasa nyeye. 2 Kinegeni ne awanhu wefane mabwa, kinegeni na wekugolosa uwihi, kinegeni na wanhu awekitema mumitufi yawo. 3 Kosoko aseye chawalami we chawelu, ichikumufuga Mulungu mu muye, ne ditunyo dya Kilisito Yesu, na wanhu wesikihuwisila simbuli se chimutufi. 4 Ninga aniye nani nikudaha kihuwisila simbuli se chimutufi. Nghona hena munhu yakudoga yakudaha kihuwisila simbuli se chimutufi aniye ninaso itewa: 5 nafinigwa dijuwa dya munana, na munhu wa ditaifa dya Isilaeli, wa dikabila dya Benyamini, Muebulaniya nyelekwe na Waebulaniya; munghola itolati aniye na Ifalisayo, 6 kunyituma nadidumangisage dikanisa, muchawelu ye itolati hanyuwa namunjelu. Ninga amabuli gose gonyonage gena faida ukwangu, hanigawala hasala kosoko ya Kilisito. 7 Ninga amabuli gose gonyonage gena faida ukwangu, hanigawala hasala kosoko ya Kilisito. 8 Chawelu nikugatala amabuli gose kefana hasala kosoko yo uswamu wichaka muliganyo wo kumumanya Kilisito Yesu Mundewa wangu. Kosoko yakwe mhata hasala ya mabuli gose, nikugatala kefana chinhu chilemigwe uleke nimupate Kilisito 9 na koneka mwe imwene, nechaka chawelu yangu nimwenyecho, iikupatigwa kwa kwandamila sheliya, ninga iikupatigwa kwa kumuhuwila Kilisito, ichawelu iikulawa kwe Mulungu iihuwile dihuwi; 10 uleke nimumanye imwene na uludole wo kwinuka kwakwe muchilalo, na ulugota wa magayo gakwe, na kuliganiswa ne difa yakwe, 11 uleke inghadahika nani nije ninuligwe kulawa kwa wofile. 12 Sidaha kugamba ngaluka nisuma ama ngaluka memelekela; amba nikudoha uleke nidigolose dyuwe dyangu, kwasoko iKilisito Yesu kanigolosa nuwe wakwe. 13 Wandugusangu, sidaha kugamba ngaluka nidikola; amba imbuli imwedu yonikulonga noyino, kugasimilwa gose agowile kunyuma na kuchunyunhila ku agowile kumwande yangu, 14 nikudoha uleke nidipate digeleko idiswamu lugano dyo ulwinango mukulu we Mulungu mugati ya Kilisito Yesu. 15 Lekeni aseye chose chiwakangasi chidoge nheifo; hata munghadoga gengi mu mbuli yoyose, Mulungu kowagubulilani didyo nadyo. 16 Ninga chigendelele kuwa muchawelu yenele yochinayo. 17 Wandugusangu, munyandamile aniye, na kuwalanga awanhu awekwandamila umufano wochiwenghileni. 18 Kosoko awengi, wa awenele nigendelele kumutamilani kahe hambiya nikumutamilalani kwa masosi, wakwila kefana wanghondo wo musalaba wa Kilisito. 19 Indumo yawo ni kubanigwa, mulungu wawo ni sinda, kahi wekitunya mu chinyala chawo, awekudoga amabuli ge chilunga. 20 Ninga ukaya wetu aseye wuwa kulanga, kahi kulawa uko chikumugojela iMwihula, iMundewa Yesu Kilisito, 21 iyakayeubidula umutufi wetu uwichaka ludole, udahe kuliganila no mutufi wakwe we ditunyo, kwa udaha uwukumudahisa kufigolosa ifinhu fyose fyuwe hasi yakwe.
1 Hambiya, wandugusangu, wonikumwendani na kumonelani ngwina, inyemo yangu ne nghofiya yangu, gendeleleni kwima ngwingwingwimwe Mundewa wendigwa wangu. 2 Nikumutasa Ewudiya na Sindike wowe na chidoga chimwedu mwe Mundewa. 3 Kahe nikukutasa agwe nagwe, mwituma we chawelu, uwatase awanawake wano, kosoko hawagolosaga hamwedu naniye umulimo we mbuli swanu hamwedu na Kilemendi na awamonga wochagolosanyage umulimo, awandikwe masina gawo mu chitabu cho uwumi. 4 Bwedeleleni mwi Mundewa majuwa gose; kahi nikugamba, bwedeleleni. 5 Awanhu wose waumanye uholo wenu. iMundewa kamala keja. 6 Munghakiidase kwa mbuli yoyose, ninga kwa chila chinhu kwa kutasa na kufuga hamwedu ne dilumbo lekeni ifinhu fomukwenda fimanyike ne Mulungu. 7 Ne digoya dye Mulungu, idilokile umanyi wose, didime imimoyo yenu ne misungu yenu mu Kilisito Yesu. 8 Kumalagisa, wandugusangu, simbuli sose se chawelu, simbuli sose se chogoho, simbuli sose sichaka koneligwa, simbuli sose selile, simbuli sose so uyendo, simbuli sose se ditunyo diswamu, inghowa kwina chinhu chochose cha kutunya, dogeni simbuli senele siso. 9 Simbuli somukifusile na kuhokela na kuhulika na kona ukwangu, sigoloseni; ne iMulungu we toyoyo kokuwa hamwedu nanye. 10 Nina chinyemi mwe Mundewa lugano kosoko hambiya monesa ifyene fomowile hamwedu nani; hamuwa hamwedu nani chawelu, ninga hamuswela luneka. 11 Sikulonga gano kosoko nechaka chinhu nihungukiligwa; kosoko nghifusa kumemeswa na hali yoyose yoninayo. 12 Nimanya kuwa na finhu fikefu kahe nimanya kuwa na fingi; mu hali yoyose nikifusa isili yo kwiguta na kona njala, kuwanafyo na kuwa chaka. 13 Nina udaha wa kusuma simbuli sose mugati ye mwene iyekuniguma uludole. 14 Amba hamugolosa fiswamu, kwa kuwa hamwedu nani mumagayo gangu. 15 Kahe anyeye mo Wafilipi mowenyecho mumanya fina mu nghonga ye Injili, fonaleguke Makedoniya, hasowile na ikanisa dingi idyowile hamwedu nani mu ndafa na kuhokela ninga anyeye mwiwene; 16 kosoko hata kuya Sesalonike hamunigalila finhu fya kunisapusa siyo kamwedu amba majuwa itewa. 17 Munghagambe nikusulumila ifinhu fomwanyingile du; amba nikusulumila amamudyo ge nyongeseka yenu. 18 Ninafyo finhu fingi, na kongesekela; nimemelekela, mhokela kwa mukono wa Epafulodito ifinhu afiya ifilawile ukwenu, mhungile ya mafuta, sadaka yendeke, iikumwendesa Mulungu. 19 Ne Mulungu wangu yawamemeleseni chila chomukwenda ifyenele ugoli wakwe fouwile, mu ditunyo dhya Kilisito Yesu. 20 Kwe Mulungu wetu na Baba ditunyo dyuwe ukwakwe amajuwa gose. Hano. 21 Munamusile chila musunhile mugati ya Kilisito Yesu. Awandugusangu awowile na niye wekumulamusani. 22 Awasunhile wose wekumulamusani, awaya awowile mu nyumba ya Kaisali. 23 Dihewa dye Mundewa Yesu Kilisito dyuwe hamwedu ne fidoga fyenu.
1 Aniye Paulo mutumigwa wa Kilisito Yesu kwa wendo we Mulungu, na Timoseyo imundugusetu, 2 Kuwandugusangu awasunhile muchawelu ya Kilisito awowile Kolosai; Dihewa dyuwe nanye, ne idigoya dye Baba yetu Mulungu. 3 Chikumulumba Mulungu, iBabakwe we Mundewa wetu Yesu Kilisito amajuwa gose ichigele chochikuwatasila, 4 kosoko hachihulika dihuwi dyenu kwa Kilisito Yesu na uwendo womwinawo kuwasunhile wose, 5 kosoko ye dihuwi dyomwikiligwe kulanga. Mwihuwi didyo, hamuhulika katali simbuli sakwe se ichawelu ye Imbuli Swamu 6 iyafikile ukwenu, kifana foyowile muyisi yose, ikweleka mamudyo na kukula, kifana foyikukula ukwenu nako, kulawa dijuwa dyomwahulike na kumanya dihewa dye Mulungu muchawelu, 7 kifana fomwafusigwe na Epafula imwendigwa na mutumigwa miyetu. Kagaluka mutumigwa wa kuhuwilwa wa Kilisito ahanhu hetu 8 naye hakachitamila uwendo wenu ukwetu mu Muhe. 9 Kosoko yiyo, kukongela dijuwa dyochawahulike, chisilekile kumutasilani, kumutasa iMulungu yamumemeseni umanyi we isinhenda sakwe, no ubala womukwinghigwa ne Muhe wakwe. 10 Mugendelele kwikala ifene iMundewa foyakwenda na kugolosa gose agekumwendesa. Inyikala yenu yeleke mamudyo ge milimo yenu imiswamu kugendelela mu umanyi we Mulungu. 11 Mudahiswe no udahi wose, wo uludole wo ukulu wakwe, noho mudahe kufinyilisa na gose, hamwedu ne chinyemi; 12 mwingheni ilumbo iBaba iyachinghile kuhokela uhasi wa wasunhile mu ujelu. 13 Imwene hakachihonya muludole we chisa, na kuchisanyisila mu undewa we Mwanagwe mwendigwa; 14 iyekuchingha uhonya wo kulekeleligwa uwihi. 15 Imwene no futa ye Mulungu inghekoneka, mwelekwa we bosi we fyumbigwe fyose. 16 Kugendela imwene ifinhu fyose fyumbigwa, ifyuwile kulanga na ifyuwile muisi, ifikoneka na ifisikoneka; fyuwe fya magoda go undewa kahi magoda ga udaha, kahi ga ludole na udaha. Ifinhu fyose fyumbigwa kwa injila ye imwene kosoko ya imwene. 17 Naye yejayowa ugele ifinhu fyose na ifinhu fyose finghali fyuwe, na umwakwe ifinhu fyose fikikolelesa hamwedu. 18 Imwene no ditwi dyo umutufi, dikanisa; kahe imwene no nghonga, no mwelekwa we bosi wa awafile, imwene no chilongosi wa fyose. 19 Kosoko mugati yakwe hayendesa umemelesi wose we Mulungu wikale; 20 na kugendela imwene ifinhu fyose filamulwe foyafulusa kugolosa ihoso ne isakame yo musalaba wakwe; ifinhu fyose ifyuwile muisi na ifyuwile kulanga. 21 Anyeye, umowile aho bosi mulekigwa, kahe wanghondo mufidoga fyenu, kwe sinhenda senu sihile, 22 hambiha kamulamulani mumutufi wakwe, na kwa difa dyakwe, uleke yamwigaleni hamwande yakwe, wasunhile, mwichaka wihi, 23 mwikale mu dihuwi, mwikigwe muchanhya ye nghindiso, munghafumile kusingisigwa na kuleka dihuwi dye imbuli swamu iyahubiliigwe kwe ifyumbigwe fyose ifyuwile mu yisi; iyene aniye Paulo hanigaluka mutumigwa wakwe. 24 Hambiya nina chinyemi mu magayo goninago kosoko yenu; kahe nikugamemelesa mumutufi wangu amagayo agahunguke mumutufi wa Kilisito, kosoko yo umutufi wakwe, dikanisa, 25 dyonigaluke mutumigwa wo mulimo we Mulungu fina foninghigwe, kosoko yenu; umulimo wo kugolosa imbuli ye Mulungu inghamanyike. 26 Imbuli aiya iyafisigwe kulawa katali fyotoke ifyeleko fyose, hambiya igubuligwa ku wasunhile wose. 27 Mulungu iyendile kuwatamila ifene fouwile ugoli we ditunyo dye imbuli aino kuwamembe, uwo no Yesu mugati yetu dihuwilo dye ditunyo. 28 Yuyo nochikuwatamilisa imbuli yakwe, chikumujama chila munhu, na kumufusa chila munhu, mu umanyi wose uleke chimwigale chila munhu yamemelekele kwa Kilisito. 29 Nani nikiidasa kwa ludole lose kwe imbuli iyo, kwa udaha uukulawa ukwakwe uwuwile mugati yangu.
1 Kosoko nikuhananga anyeye mumanye ukulu we nyituma yangu kosoko yenu, na kosoko ya awoile Laodikiya, hamwedu na awanhu wose awasinimanyile; 2 uleke wahongesigwe mufidoga fyao, wakuhanganisigwa na uwendo, wakapate ugoli wose wa kumanya kwa chawelu, wamanye imbuli ifisigwe ye Mulungu na Kilisito imwenyecho, 3 iyina mugati yakwe ugoli wose wa ubala hamwedu no umanyi uwikigwe. 4 Nikumutamilani imbuli aino, imumhu yangheje yamudanhilisani kwa mbuli sa kukochelesa. 5 Hata ninghowa nahechaka chimutufi, mumanye fina nahamwendu nanye chimuhe, kwa nyemo kosoko ya kona ifene fomwimile chawelu mwihuwi dya Kilisito. 6 Hambiya fina fomumuhokele Kilisito Yesu, iMundewa, gendeleleni kwikala naye nhaifo; 7 mukijimbila na kujengwa naye; mugolosigwa ngwingwingwi mwihuwi, ifene fomufusigwe; na kugendelela mwi lumbo. 8 Langisiseni imunhu yanghawagolose kifana mwa watumwa kwa umanyi wakwe na udasi uwichaka chinhu, ifene awanhu we iyisi fowahokele, ifene amafuso age iyisi agakatali fogowile, nago ng'o si ga Kilisito. 9 Kosoko mugati yakwe mwina umemelesi wose we Mulungu, ifene fouwile mumutufi. 10 Nanye mumemelekela mugati yakwe imwene no ditwi dyo ukulu wose na undewa. 11 Mugati yakwe mufinigwa ku dikumbi disigolosigwe kwe imikono, kwa kuuhambula umutufi we inyama, kwa dikumbi digoloseke kwa njila ya Kilisito. 12 Kahe hamusikigwa hamwedu naye, mu ubatiso; na kwinuka hamwedu naye kwa kuhuwila uludole we Mulungu iyamwinule mudifa. 13 Nanye fomofile muwihi kuleka kufinigwa mumitufi yenu, hakawagolosa mwawomi hamwedu naye foyamalile kuchilekelela uwihi wetu wose; 14 foyamalile kuilegusa diwandiko dyoa uwihi wetu idyawandikwe kuchisongesa hoyailegusa inghowe baho kahi haibamandiligwa mumusalaba. 15 Foyamalile kuhambula ukulu na undewa na kusigubula kwa ludole, hakabwedelela naso mumusalaba uwo. 16 Hambiya imunhu yanghawaliganise nyeye mufyakudiya kahi ifinhu fyo kunywa, kahi kosoko ye sikukuu kahi kulawa ko umwesi kahi kosoko ye sabato. 17 Isimbuli aso hasuwa inyefu dya isimbuli isikwija; amba umutufi no Kilisito. 18 Imunhu yanghawahokeni digelo dyenu, kwa kinenela kwa kwenda kwake imwecho na kufuga malaika, kwa kigamba kwa magubulo gakwe na kiyona chaka kwa umanyi wakwe we chimunhu munhu; 19 kahe iyalekile kikolela ngwingwi mwitwi dyo umutufi. Kulawa imwene umutufi wose ukukula na kukoleleswa hamwedu ne ifilungo ne isinghwali, ukukula kwa udaha wa Mulungu. 20 Nghona mwafile hamwedu na Kilisito kulawa kumafuso agakatali agechilunga, nhani mukwikala kifana mwawanya muchilunga? Nhani mukugendelela kulongosigwa na malagiso, 21 Munghakole, munghawonje, munghakwafe 22 ifinhu afyo fyose fikubanika ugele wofikutumiigwa; na kugendelela kwandamila malagiso na mafuso ga awanhu? 23 Asino sikonesa kifana sina misungu, mumafugo gomukigolosele mowenyecho, na kufuga na kuudima umutufi kwa ukali; ninga gechaka ludole lwa kuwalemesa usulumisi wo mutufi.
1 Hambiya halika mwinuka muchilalo hamwedu na Kilisito, galangiseni agowile kuchanhya, koyowile Kilisito, kekala ku mukono wo kulume we Mulungu. 2 Dogeni agoile kuchanhya, siyo age muchilunga. 3 Kosoko hamufa, na uumi wenu ufisigwa hamwedu na Kilisito mwi Mulungu. 4 Ugele Kilisito foyawija yakoneke yuyo uwumi wetu, noho nanye mukwija mukoneka hamwedu naye mwitunyo dyakwe. 5 Kosoko yiyo, ikomeni chila mbuli iyihile ye chilunga iyuwile umwenu: Dihabwa, uwafu, kusulumila, magelegesi gehile, usulumisi wihile, na kufuga ifisikimunhu. 6 Kosoko ya gago inyono ye Mulungu ikwija. 7 Mugaga anyeye nanye hamugendela katali, fomowage mugago. 8 Amba hambiya gekeni kutali nanye ago gose: Inyono, fihi, uwihi, amaligo na amaligo mumilomo yenu. 9 Munghakidanhilise, kosoko mufulusa kuhambula uunhu wenu wa katali hamwedu ne sinhenda sakwe; 10 na kuufala uunhu musha, uukugolosigwa musha noho upate umanyi kifana imwenyecho iyawombile. 11 Aho hechaka Muyunani kahi Muyahudi, kufinigwa kahi kuleka kufinigwa, mugeni kahi mumataifa, mutumwa kahi isimutumwa, amba iKilisito no gose, na mugati ya gose. 12 Hambiya, kosoko mugaluka wanhu musaguligwe ne Mulungu, wasunhile umukwendigwa, faleni moyo wa ubasi, uswamu, unenenghesi, chogoho, uholo, na ufinyilisi, 13 mukitase na kilekelela, imunhu yanghowa kena mbuli ne miyagwe yamulekelele fina iMundewa foyawalekelele anyeye nanye mukilekelele nheifo. 14 Kahe, muchanhya yago gose kiyoheni uwendo no chifungo cha umemelesi. 15 Na digoya dya Kilisito dilamule mufidoga fyenu; nodyo mwenangiligwe, mumutufi umwedu, kahe muwe wanhu wa ilumbo. 16 Imbuli ya Kilisito ikale kwa umemelesi mugati yene, mukifuse na kijama chila munhu na miyagwe mu ubala wose, na kwimba sabuli na nyimbo, na nyimbo se Chimuhe; akuno mukumwimbila Mulungu kwe ilumbo dyose mufidoga fyenu. 17 Na chila chomukugolosa, kwa mbuli au kwa nhenda, goloseni gose mwisina dye Mundewa Yesu, akuno mukumulumba Mulungu Baba kugendela imwene. 18 Anyeye muwanawake muwahulike awalume senu, ifene foyagilwe mwi Mundewa. 19 Anyeye muwagosi, wendeni awake senu munghowe na ukali nawo. 20 Anyeye muwana wahulikeni awaBaba senu na awang'ina senu musimbuli sose; kosoko imbuli ayo ikumwendesa Mundewa. 21 Nanye muwaBabamunhu, munghawande awana wenu wangheje wafifihala mufidoga fyawo. 22 Anyeye muwatumwa muwahulike awakulu wenu we chilunga, musimbuli sose, siyo kiyonesa mumeso, kefana awekikomba kuwanhu, ninga kwa moyo muswanu akuno mukumogoha Mundewa. 23 Chila dyo mukugalosa goloseni kwa moyo, fina kwi Mundewa kahe si kwa wanhu, 24 mumanye nhafi mohokela kwe Mundewa uhasi kifana igelo dyenu; mukumutogomela Mundewa Kilisito. 25 Kosoko iyekupujila kohokela maliho go uwihi wakwe, kahe hechaka koneligwa.
1 Anyeye Muwakulu, wagoloseleni awatumwa wenu mu digoya na kuwengha foiwagile kwinghigwa, kosoko mumanye nanye fina mwina Mundewa kulanga. 2 Mugendelele lugano kutasa, na kuwa meso mu nhasa hamwedu na kulumba; 3 kahe muchitasile naseye, noho iMulungu yachikumulile mulango we imbuli yakwe, chilonge imbuli iyifisigwe ya Kilisito ilekile aniye nikohigwa, 4 noho nilonge, fonikwendigwa nilonge. 5 Muwe wabala na wose awowile kunje, na kugolosela digoya ichigele chomwinghigwe. 6 Isinonga senu suwe na ihewa amajuwa gose, sikolele munyu, mudahe kumanya foyagile kumubidula chila munhu. 7 iTikiko komutamilani simbuli sangu sose; imwene mwendigwa wangu kahe mutogomi yahuwilwe miyetu mu milimo ye Mundewa. 8 Nimutuma imwene ukwenu kosoko mumanye ifene fochuwile, kahi yawagumeni moyo, 9 kahe hamwedu na Onesimo, imundugusangu yahuwilwe, iyowile hamwedu nanye. Wowatamilani chila chinhu ichigoloseke ahano. 10 Alistaliko, iyohigwe hamwedu naniye, yakumulamusani; na Maluko imwihwawe wa Balinaba iyamwinghileni amalagiso yangheja ukwenu muhokeleni, 11 na Yesu iyekwinangigwa Yusito. Awo ni wanhu wafinigwe mugati ya watogomi wayangu kosoko yo undewa we Mulungu kahe wagendelela kunhasa lugano. 12 Epafula imwinya ukwenu, imutumigwa wa Kilisito Yesu, yekumulamusani, na kugolosa ludole majuwa gose kosoko yenu munhasa yakwe, uleke mwime ngwingwingwi na kugendelela chawelu kumwendesa Mulungu. 13 Kosoko nikumutamilani fina kagolosa kwa ludole kosoko yenu na kwa waya Laodikiya, na awoile Hielapoli. 14 Luka, imuganga mwendigwa, na Dema wekumulamusani. 15 Walamuseni awandugesetu awowile Laodikiya, na Nimufa, na dikanisa idyuwile munyumba yakwe. 16 Ibaluwa ino fomukufulusa kuyisoma, wengheni awayenu wa dikanisa dya Laodikiya waisome nawo; na ibaluwa iya yonawandikile awa Laodikiya wamwingheni nanye muisome. 17 Mugambeni Alikipo, Yakonye kuwugolosa umulimo woyenghigwe ne Mundewa. 18 Aniye Paulo, nyandika umulamuso uno kwa mukono wangu. Ngelegeleni muminyolo yangu. Dihewa dyuwe hamwedu nanye.
1 Paulo, Siliwano na Timoteyo Kudikanisa dya Wasesalonike dye Mulungu Baba ne Mundewa Yesu Kilisito: Mboto ne dihewa dyuwe na nyeye. 2 Chikumulumba Mulungu majuwa gose kosoko ya nyeye mose, ninga hachikuleka kuwatajani nomo chikutasa. 3 Ninga chikugelegela dihuwi ne milimo yenu ye uwendo kamei na kufinyilisa kwenu ne dihuwilo dyenu mwiMundewa wetu Yesu Kilisito. 4 Kosoko chimanya wandugu setu wendigwa we Mulungu fina Mulungu yawasagula nyeye. 5 Kosoko imbuli yetu swanu haimwijilani nyeye si kwa nonga muhala ninga kwa ludole na Muhe Musunhile hamwedu na umanyi mukulu, kahi mumanya hachuwa wanhu wa aina yaki ukwenu, 6 nanye hamuwa wandamisi wetu na wandamilaji wa Mundewa kosoko ye imbuli iya yomuhokele kwa lwidaso mukulu, ninga kwa chinyemi chigumigwe na Muhe Musunhile; 7 Kamei homukuwa mufano muswanu ku Wakilisito wose woile Makedoniya na Akaya. 8 Ninga siyo kugamba imbuli ye Mulungu ikuhulikika ako ukwenu Makedoniya na Akaya du muhala ninga dihuwi dyenu mwi Mulungu dimanyike kose uleke seye chuwe chichaka dyokulonga 9 Kosoko awene awecho wakusimulila muchanhya yetu ifene fomwachihokele kamei fomwamubidukile Mulungu na kuleka kufuga fisikimunhu na kumutogomela Mulungu ye mumi ne wechawelu, 10 na kumugojela imwanagwe yakulawa kulanga imwene woyamulafile kulawa muchilalo, naye yuyo no Yesu iyakuchihonya seye na inyono inghulu ikwija.
1 Kosoko nyeye muwecho wandugu setu mumanya kwingila kwetu ukwenu fina kusowile chaka 2 ninga kwa kudumangisigwa na kugoloseligwa gehile kifana ako Filipi ni kosoko ye Mulungu du no ilekile chihubili imbuli swanu kwa njila ya magayo makulu. 3 Kosoko majamo getu gasilawile kwa makosa ama kwa wihi, na finju ihile, 4 ninga ni kosoko chipata luhusa kwe Mulungu na kuhuwilika ne inonga ye imbuli swanu hata nheifo chikulonga siyo kwa kwendesa wanhu ninga kwa kumwendesa Mulungu iyakugesa mimoyo yetu. 5 Fina fomumanyile ne Mulungu muhomelesi wetu hachejile kwa nonga sa kiyona ama ga uchoyo; 6 togoleni nong'amba hachija kiyonesa na kukongha kutogoligwa na wanhu, nikuwatamilani ninga si ukwenu kahi kuwamonga, 7 uleke chuwe watumigwa wa Kilisito. Na ninga hachuwa waholo mugati yenu kifana mwanamuke foyakulela chali chakwe imwecho. 8 Kwanheifo ase nase chikuwalelani nyeye na kuhangila siyo imbuli swanu du ye Mulungu ninga na fidoga fyetu nafyo, kosoko mugaluka wandugu lugano ukwetu. 9 Kosoko mukugelegela magayo getu na difuke wandugu setu hachitogoma milimo chilo na misi uleke chinghamutwike munhu wowose ikanda mugati yenu nomochikutamilisa imbuli swanu ye Mulungu. 10 Anyeye mwawahomelesi hamwedu ne Mulungu inyuwa yochowile nayo mugati yenu ya uswanu na moyo mujelu wichaka nonga ihile munghenda yetu ukwenu Wakilisito. 11 Fina fomumanyile hachimujama chila munhu mugati yenu kifana Baba yakulonga na wanagwe, 12 Hachiwagumo nghinyo na kuwatasani mwikale mikalile ikumwendesa Mulungu iyawenangileni muundewa wakwe imwecho we ditunyo. 13 Ase nase majuwa gose chikumulumba Mulungu kosoko yaiyo kosoko kulawa fomwaihokele imbuli ye Mulungu yomuhulike kulawa ukwetu hamuihokela siyo kifana mbuli ya munhu ninga ye ichawelu ye Mulungu iikutogoma milimo mugati yenu. 14 Hambiya nyeye wandugu sangu liganeni na muwe kifana makainisa ge Mulungu muKilisito Yesu gowile Yudea, kosoko nanye hamutabika mumagayo gagaya kuwanhu we ditaifa dyenu muwecho fina fowagoloswe wamonga na Wayahudi 15 fina fowamukomile Mundewa Yesu hamwedu na wagonesi, na kuchitaga seye kunje; hawamudesa Mulungu na kumulema chila munhu 16 kwa njila ya kuchihindila seye chinghawahubiliye wamembe uhonyi uleke wagolose nhenda sawo so wihi majuwa gose. Ninga inyono ye Mulungu iwejila kundumo. 17 Ninga kwa seye wandugu setu hata inghowa hachikiyonile kwa chipisi ni kwa chimutufi ninga kwa fidoga hachihananga lugano kuwonani meso kwa meso. 18 Kosoko hachihananga kwija ukwenu lumwedu hadodo Aniye Paulo kwija ninga Shetani hakachihindila njila. 19 Kosoko ihuwi dyetu, chiyemi chetu na nghofiya yetu ya undewa yoni halika sinyeye kumwande ye Mundewa wetu Yesu chigele cho kwija kwakwe 20 Kosoko nyeye no ditunyo dyetu na chinyemi chetu!
1 Kamei hambiya fochasumwa kugojela lugano hachona ni fiswanu chilekigwe ako Asene. 2 Kamei hachimutuma Timoseyo, mundugu setu mutogomi milimo miyetu kwe Mulungu mukuhubili imbuli swanu ya Kilisito uleke yawagume ludole mwihuwi dyenu na kuwagumani moyo. 3 Na fina munhu wowose yanghaganiswe na magayo gano kosoko nyey muwecho mumanya fina agano nogo chinangiligwe. 4 Kosoko fochowile hamwedu na nyeye, hachiwatamilani kumwande fina chotabika na kugaya kifana fomonile. 5 Ayo noilekile nimutuma Timoseyo kosoko ya kusumwa kugojela uleke kumanya dihuwi dyenu; Hanuwa na itisi fina nhegela mugesa kwagesani na mulimo wetu ugaluka wachaka chakasi ukwenu. 6 Ninga hambiya Timoseyo koya kulawa uko ukwenu na kuchitamilani mbuli swanu muchanhya ye dihuwi dyenu na wendo wenu. Kachitamila fina mukuchigelegela chila ijuwa na kuhananga kuchona kifana seye fochikwanga kumonani nyeye. 7 Hambiya wandugu setu chigumigwa ludole lugano kulawa mumagayo na gose gochilokele kosoko ye dihuwi dyenu. 8 Kosoko hambiya chikwikala halika nyeye mokwima ngwingwi MwiMundewa 9 Chomulumba Mulungu ilumbo dyaki ikulu halika nyeye mukwima gwi kosoko ye chinyemi chochinacho kwe Mulungu wetu. 10 Chilo na misi chikutasa kwa ludole fina chodaha kiyona meso kwa meso na kongesela gaya gahunghuke mwihuwi dyenu. 11 Hambiya Mulungu Baba yetu imwecho na Mundewa wetu Yesu Kilisito yachilongose njila ya ukwenu. 12 Mundewa yawongese na kuwamemelesa uwendo wakwe nyenye kwa nyenye na kwa wose, kifana seye fochimemile wendo ukwenu. 13 yaigolose mimoyo yenu ime ngwi muusunhi uleke muwe wanhu wechaka wihi kumwande ye Mulungu na Baba chigele cho kwija Mundewa wetu Yesu hamwedu na wasunhile wakwe wose.
1 Hambiya ichisigale wandugu sangu chikuwatasani dedede mwisina dye Mundewa Yesu kifana fomukifusile kulawa ukwetu fina mukonye kwikala imikalile iyo ikumubwedesa Mulungu. 2 Kosoko mumanya amasigilisi go chamwinghileni kulawa kwe Mundewa Yesu. 3 Nago nogo yakwenda iMulungu fina nyeye musunhingwe mulekane na dihabwa; 4 Fina chila munhu mugati yenu yamanye kwikala no Mutufi wakwe muusunhi na fiswanu. 5 Inghowe kwa usulumisi wihile kifana wanhu wasimumanyile Mulungu. 6 Hanghowe na munhu yamugolosele miyagwe wihi kosoko Mulungu noyakuliha wihi kwa wihi fina fochiwatamileni kunyuma na kuwajamani lugano. 7 Kosoko Mulungu hachinangile muuwihi ninga muusunhi. 8 Hambaya nong'amba imunhu iyakuuilema imbuli yakuwa nghalemile mbuli ya munhu ninga ya Mulungu yakumwinghani Muhe wakwe Musunhile. 9 Hambiya muchanhya ya uwendo chila munhu na miyagwe ichaka haja munhu yawaandikile, kosoko nyeye muwecho mufusigwa ne Mulungu kiyenda nyenye kwa nyenye; 10 kosoko mukugolosa kuwandugu wose woile Makedoniya ninga chikuwatasa mugendelele kwa ludole. 11 Kahi mukitulise na kugolosa milimo yenu kwa mikono yenu muwecho kifana fochiwalagise, 12 uleke muwe wanhu waswanu kuwanhu woile kunje na uleke munghamwegamile munhu wowose. 13 Ninga wandugu sangu hachikwenda munghamanye chochose muchanya ya wanhu wafile uleke munghowe na lutwitwi kifana wanhu wechaka ihuwi. 14 Kosoko inghowa chikuhuwila fina Yesu hakofa na hakenuka muchilalo basi kulokela iyo na waya wafile mwa Yesu Mulungu yakwija yawalafa muchilalo. 15 Hambiya chikuwatamilani gano kwa mbuli ya Mundewa, fina aseye chiwomi na awakusigala mpaka chigele cho kwija Mundewa chawelu hachikwija chiwalongolela waya wafile. 16 Kosoko Mundewa imwenyecho na lwinango hamwedu na malaika wakwe mukulu ne dijwi dye digunda dye Mulungu fodulika kulawa kulanga, kamei wafile muKilisito nowakukonga kwinuligwa. 17 Kamei aseye chiwomi, chisigale chodakigwa muchanhya mumafunde na chokuwa ne Mundewa minyaka na minyaka. 18 Kigumeni nghinyo nyenye kwa nyenye kwa mbuli sino.
1 Hambiya wendigwa wangu kwa mbuli ya fipisi na figele ichaka haja niwaandikile, 2 kosoko nyeye muwecho mumanya fiswanu fina dijuwa dye Mundewa dikwija kifana muhiji nhechilo. 3 Nomowakugamba, “kwina digoya na kusalama,” wihi noho ukuwejila kwa kusinhukisa kifa mwanamuke nomo yakwijiligwa na usungu wo kwelekwa na kwichaka kinega! 4 Ninga nyeye, wendigwa hamuwile mwichisa, mpaka dijuwa diya diwejile kifana muhiji bila kumanya; 5 Kosoko nyeye mose mwa wana wa ujelu na wana wa nhemisi aseye siyo wana wa nhechilo ama wa ichisa. 6 Hambiya chinghagone kifana wamonga fowakugona, ninga chuwe meso na kulanga. 7 Kosoko awakugona wakugona nhechilo na awakulewa wakulewa nhechilo. 8 Ninga kulawa chuwe muujelu, basi chuwe meso, na kufala ngulo ye chuma ye dihuwi na wendo, na kofiya ye dihuwi dye uhonyi ukulawa mwe Mundewa wetu Yesu Kilisito, 9 kosoko Mulungu hachikile kwa nyono ninga chipate uhonyi mwiMundewa wetu Yesu Kilisito, 10 iyafile kosoko yetu, uleke inghowa chameso ama chigona chuwe womi hamwedu naye. 11 Kahi kiingheni moyo nyenye kwa nyenye na kijenga kifana fomukugolosa. 12 Ninga wandugu chikuhananga muwamanye waya wakugaya kosoko yenu na kuwemilani mwiMundewa na kuwajamani. 13 Wagoloseleni fiswanu muuwendo, kosoko ya milimo yawo. Muwe na dihewa mugati yenu muwenyecho. 14 Na chikuwatasani wandugu, wajameni awekale fibi, wagumeni moyo wofile fidoga, wataseni wasokile, muwe wafinyilisi na gose. 15 Hanghowe mugati yenu na munhu yakumuliha miyagwe dihile kwa dihile, ninga majuwa gose konheni kigolosela maswanu munhu na miyagwe na wose. 16 Muwe na chinyemi majuwa gose. 17 Taseni bila kuleka. 18 Lumbeni kwa chila mbuli; kosoko nhafo nofoyakwenda Mulungu mwa Kilisito Yesu ukwenu. 19 Munghamulemese Muhe. 20 Munghaubese ugonesi we Mulungu. 21 Ninga geseni chila chinhu koleni amaswanu; 22 kaleni kutali na chila dihile. 23 Mulungu we digoya imwecho yawasunhe lugano fidoga na mimoyo yenu na mitufi muwe waswanu chigele cho kwija kwakwe Mundewa wetu Yesu Kilisito. 24 Iyawenangileni yakuhuwilika na kogolosa gano. 25 Wandugu chitasileni. 26 Walamuseni wose wandugu kwa mulamuso usunhile. 27 Nikuwalagisa kwa ludole fina wandungu wose wasomeligwe ibaluwa ino. 28 Mboto ya Mundewa wetu Yesu Kilisito yuwe hamwedu nanye.
1 Paulo, Siliwano na Timoseyo, Kudikanisa dyuwile Sesalonike mwi Mulungu Baba ne Mundewa wetu Yesu Kilisito: 2 Mboto yuwe ukwenu ne idigoya kulawa kwe Mulungu Baba ne Mundewa wetu Yesu Kilisito. 3 Chikulumba Mulungu majuwa gose kosoko yenu, wandugu setu kosoko dihuwi dyenu dikukula lugano na fina wendo we chila munhu ne miyagwe ukugendelela. 4 Hambiya aseye chiwecho chikiyona kosoko yenu mumakanisa ge Mulungu kosko yo ludole lwo mwinawo na dihuwi mumagesa na magayo gose gomukulokela. 5 Ago gose gakonesa fina ulamulaji we Mulungu wa chawelu uleke mutaliligwe fina mukwingila muundewa we Mulungu uwo womukwidasika nawo. 6 Muchawelu yakwe Mulungu kowaliha magayo awaya awakumugolosani nyeye mugaye, 7 na kuwaliha nyeye mukwidasika chinyemi hamwedu na seye, nomo yakwijayagubuligwa Mundewa Yesu kulawa kulanga na malaika wakwe wene uludole 8 ne dililimba dye umoto kuwatosa awaya wamulemile Mulungu na awaya awasikwenda kuhulika imbuli swanu ye Mundewa wetu Yesu. 9 Nawo wakwija wagaya muuliganiso wa magayo ge minyaka na minyaka, kubaguliwa mumeso ge Mundewa na muditunyo dyakwe dikulu, 10 mudijuwa didyo dyoyakwija yatunyigwa na wasunhile wakwe na majumo ge dijuwa didyo muwanhu wakwe wamuhuwile kosoko uhomelesi wetu ukwenu hauhuwilika. 11 Hambiya chikutasa majuwa gose kosoko yenu uleke Mulungu wetu yawataleni fina mukufaha mu lwinango lwakwe yawamemeleseni chila chiswanu ne umulimo we dihuwi, 12 uleke disina dye Mundewa wetu Yesu Kilisito ditunyigwe.
1 Hambiya imbuli yo kwija kwakwe Mundewa wetu Yesu Kilisito na kitang'anyila kwetu ne mwene 2 chikuwatasani wandugu setu ingawagumeni lutwitwi mumadoga genu ama kuwenghani itisi ninga dya muhe ama mbuli kahi baluwa kulawa ukwetu konesa kifana dijuwa dye Mundewa difulisa kwija. 3 Na ninga munhu wowose yanghawadanhilise mudyodyose; kosoko dijuwa diya disikwija mpaka yalawanise imwihi iyalugutisigwe kumoto, imwana wo ubani 4 iyakulema na kiinula imwenyecho muchanhya mwa chila chikwinangwa mulungu ama ichikufugamiligwa, uleke yekale mwigoda dye dihekalu dye Mulungu, na kigamba imwene noMulungu imwecho. 5 Musikugelegela fina haniwatamilani simbuli sino kunyuma yakwe fonowile na nyeye? 6 Na hambiya mumanya ichikulemesa yanghalawanise, kolawanisa nomo chigele chwakwe chifikile. 7 Kosoko wihi hambiya ufulusa kukonga milimo yakwe, ninga mpaka iyakulemesa nomoyalegusigwe. 8 Na nomo imwihi yakulawanisa yuyo yekwija yabanigwa ne Mundewa Yesu kwa muye kulawa mumulomo wakwe na kumubulaga fibi kwa ugubulo wo kwija kwakwe. 9 Inija yakwe imwihi yo ni kifana nija ya Shetani mutogomi milimo na majumo makulu na fitangilo fyo udasi 10 na chila wihi kuwanhu waya awakwagilila, kosoko hawalema kuhonyigwa. 11 Kosoko iyo iMulungu yakuwatumila ludole lwa lwa wihi kuwalongosa kuhuwila go udasi, 12 Uleke waliganiswe wose awasihuwile ichawelu ninga hawandamila gehile. 13 Ninga chikumulumba Mulungu majuwa gose kosoko yenu nyeye wandugu setu wendigwa ne Mundewa kosoko Mulungu hakawasagulani nyeye muwe mamudyo ge nghonga muuhonyi kulokela kusunhigwa na Muhe na kuhuwila ichawelu. 14 Kosoko iyo hakawenangani kulokela mahubili ge imbuli swanu uleke mupate ditunyo dye Mundewa wetu Yesu Kilisito. 15 Hambiya wandugu setu imeni ngwingwingwi na kukolelesa mafuso gomukifusile ukwetu gowe ga mbuli mulomo ama baluwa. 16 Na Mundewa wetu Yesu imwenyecho ne Mulungu iBaba yachendile na kulokela mboto yakwe kachingha umi uholile na ihuwi iswanu, 17 yaigume ludole mimoyo yenu na kihuwisa muchila mulimo muswanu na mbuli.
1 Wandugu sangu nikumalagisa kwa kugamba taseni kosoko yetu uleke imbuli ye Mundewa igendelele lugano mugati yenu, 2 kamei nase chinghogwile mumikono ya wanhu wehile kosoko siyo wose wene dihuwi. 3 Ninga Mulungu muchawelu kowenghani ludole na kuwadimani na wihi. 4 Ninga china ihuwi mwiMundewa fina mukugolosa na mogolosa gochimusigilileni, 5 kahi Mundewa kowalongosa mimoyo yenu kuuwendo we Mulungu na muunyima ya Kilisito. 6 Hambiya chikuwalagisani wendigwa wetu mudisina dye Mundewa wetu Yesu Kilisito fina mulafeni mugati yenu imundugu wowose imudoba kosoko siyo malagiso kulawa ukwetu hata. 7 Kosoko anyeye muwecho mumanya fomukuhanangikwa kulondela ukwetu aseye fochowile na nyeye sichowile wadoba hata. 8 Sichidiile ndiya ya munhu na kuleka kuliha, ninga kwa ifuke misi ne chilo hachitogoma milimo uleke chinghamukache munhu wowose ikanda. 9 Ninga siyo kosoko sichagiligwe kuduya ila ni kosoko chuwe mbasi ya kwandamila wamonga. 10 Kahi hata fochowile na nyeye hachilagisa fina munhu wowose inghakutogoma mulimo indiya nayo yanghadiye. 11 Kosoko chikuhulika ukwenu wamonga wasikwenda kutogoma milimo ninga wadiyage ichikutogomigwa na wayawo muhala. 12 Hambiya wanhu kifana wo chikuwatasa na kuwalagisa mwisina dye Mundewa Yesu Kilisito watogome milimo kwa ludole uleke wapate chakudiya. 13 Wandugu munghasoke kugolosa maswanu. 14 Halika munhu yakulema kukola gatulumwe mubaluwa ino basi mughahangane naye uleke yapuwe. 15 Munghawone kifana wanghondo ninga wajameni kifana wandugu. 16 Hambiya Mundewa we dihewa yawengheni ihewa chigele chose na mugose. Mundewa yowe nanye mose. 17 Aniye Paulo, nikuwandika baluwa ino kwa mukono wangu nimwecho.Awuno no muwandiko wangu muchila baluwa yangu; nofonikoniandika. 18 Imboto ye Mundewa wetu Yesu Kilisito yuwe nanye mose.
1 Paulo, mutumigwa wa Kilisito Yesu ku dilagiso dye Mulungu Mwihula wetu na wa Kilisito dihuwi dyetu, 2 Ku Timoseyo gomwanangu we chawelu mwi huwi: Dihewa, ubasi ne digoya kulawa kwe Mulungu iBaba na Kilisito Yesu iMundewa wetu fyuwe nagwe. 3 Ifene fonakulagise gweye usigale Efeso ichigele chonalutage Makedoniya, uleke uwalemese awanhu wamonga wanghafuse mafuso gengi, 4 kahi wanghakiingise musisimo isichaka chinhu kahi musimbuli sinhali sa wagono isikwigala ulukani kusuma amafuso ge chimulungu mwi huwi; 5 ninga isoko ye dilagiso dyetu ni uwendo uwukulawa mu moyo mujelu ne chidoga chiswanu ne dihuwi idichaka chimwefe. 6 Awanhu wamonga kwa kuswela gano wabidukila simbuli sibwalate. 7 Wenda inyuwa wafusaji wa malagiso, akuno wasimanyile chowekulonga kahi simbuli sowekudindilisa. 8 Hambiya chifulusa kumanya fina dilagiso dikugaluka iswanu kwe munhu iyekuditogomela munjila ye chawelu, 9 yanghaimanya imbuli ino, fina dilagiso sidikiligwe awachawelu ninga awabanaji kahi awechaka chogoho, kosoko ya awechaka Mulungu kahi we sisambi, kosoko ya awechaka usunhile kahi awehi, kosoko ya wakomaji wa waBaba sawo na wakomaji wa wanghina sawo, kosoko ya wakomaji, 10 kahi awedihabwa, kahi awekuduwa na wanhu munjila ye cholo chikulu, awahijaji wa wanhu, kahi awadasi, kahi awekilaha kwa udasi, kahi na mbuli yoyose iisikifumilisa na na mafuso go uwumi, 11 ifene foilongingwe mu Mbuli Iswanu ye ditunyo ye Mulungu we imboto yonyikiligwe. 12 Nikumulumba Kilisito Yesu Mundewa wetu, iyanigumile ludole, kosoko hakanyona namuchawelu hakanisagula mumulimo wakwe. 13 Hamwedu katali hanimutofulaga na kumudumangisa na kumudesa imwene; ninga hanihokela ubasi kosoko hangolosaga gago kwa kuleka kumanya na kuswela dihuwi, 14 kahi dihewa dye Mundewa wetu hadyongeseka lugano ukwangu hamwedu na dihuwi na uwendo ifyuwile mu Kilisito Yesu. 15 Ni mbuli ya chawelu kahi yagila kuhuwiligwa lugano, ing'amba Kilisito Yesu yeja muchilunga kuwehula awena sisambi. Aniye no we nghonga wa awena sisambi; 16 ninga hanipata ubasi kosoko ino, uleke mu niye we inghonga, Yesu Kilisito yonese umemelesi wo ufinyilisi wakwe, uwe ifuso ku wose awakawomuhuwila imwene kosoko yo uwumi wa majuwa gose. 17 Kwe Mundewa wa majuwa gose, inghekufa, inghekoneka, iMulungu ye iwene, chogoho na ditunyo fyuwe naye majuwa gose. Hano. 18 Dilagiso dino nikukwingha gweye, Timoseyo, gomwangu, ifene simbuli sa wagonesi fosalongile mchanha yako, uleke musiso uilewe inghondo iya fiswamu, 19 uwe na dihuwi na chidoga chiswamu. Kwa kuleka ichidoga chiswamu, awanhu wamonga wogwa na kwagilisa dihuwi, 20 mugati yawo waumo cha Himenayo na Isikanda, wonimulekele Shetani uleke yawafuse wanghamutofule Mulungu.
1 Iyilongolele sose, nikuhananga inhasa, kutasa, utasaji na malumbo figoloseke kosoko ya wanhu wose, 2 kosoko ya wandewa na wose awena udaha, uleke chikale mikalile ye toyoyo ye chimulungu ne migendele miswanu 3 Imbuli ni swanu, kahi ifumilwa ne Mulungu Mwihula wetu, 4 iyekuhananga awanhu wose wehuligwe kahi wamanye ichawelu. 5 Kosoko kwina Mulungu yumwedu, kahi kwina mulamusi yumwedu hagati ya Mulungu na wanhu, imunhu Kilisito Yesu, 6 iyakilafile imwenyecho yowe mwihula wa wose, uhomelesi uwejile kwa ichigele chakwe. 7 Kosoko ino hanisaguligwa nyuwe muhubili kahi mutumigwa (Nikulonga chawelu, Aniye sikudanha), na mwalimu wa Wamembe mwihuwi ne chawelu. 8 Nikuhananga awagosi watase chila hanhu, wenule imikono misunhile chaka nyono hegu kugomba. 9 Nheigo kahi awanawake wakihambe suke sa usindamafu, hamwedu na chogoho kahi moyo wichaka makulu, si kwa kushuka njili hegu kwa sahabu na mawe gakwakaika hegu kwa suke sa maliho makulu, 10 ninga kwa sinhenda siswanu, ifene foiwagile awanawake awekumufuga Mulungu. 11 Imwanamuke yefuse muusindamafu na kwa chogoho chose. 12 Sikumwingha mwanamuke luneka lwa kufusa hegu kuwalongosa wagosi; yekuhanangigwa yanyamale twi. 13 Kosoko Adamu noyakonga kumbigwa, kamei Hawa; 14 kahi Adamu siyadanhiliswa, ninga imwanamuke noyadanhiliswa na kugwila muwihi. 15 Ninga imwanamuke kodaha kwihuligwa kugendela icheleko chakwe, yanghagendelela mwihuwi na uwendo na usunhile hamwedu na usindamafu.
1 Ilongwa chawelu: Imunhu iyekuhananga yowe asikofu, yekwenda mulimo muswanu. 2 Ninga yagila asikofu yowe munhu inghekutofuligwa, mulume wa muke yumwedu, musindamafu kahi kena mahala, munhu wa digoya, munhu wa chise, iyadahile kufusa, 3 si mulewaji wo ugimbi, si mutowaji wa wanhu, ninga muholo, si mubuni kahi yanghowe mwenda mapesa. 4 Yowe iyekwimila inyumba yakwe fiswanu, iyamanyile kuwajama awanagwe wowe wasindamafu na chogoho mumikalile yose; 5 kosoko imunhu inghamanyile kwimila inyumba yakwe digoya, kodaha nhani kulongosa dikanisa dye Mulungu? 6 Kahi yanghowe munhu yamuhokele Yesu majuwa makefu, yangheje yakiyona na kugwila muuliganiso wa Shetani; 7 kahi yagila yowe yakuhomelelwa masanu na wanhu wose awowile kunje, uleke yanghogwile mumatofulo na mumuheto wa Shetani. 8 Nheifo kahi, yagila awatogomi wowe wasindamafu, si wa malimi meli, si walewaji wo ugimbi, siwasulumilaji wa mapesa; 9 wakolelese isili ye dihuwi ne chidoga chiswanu. 10 Kahi yagila wamule kugesigwa; kamei wanghoneka wanjelu wagolose umulimo wo utogomi. 11 Awake sawo nawo, wowe wasindamafu, si wasigilaji, wanhu we digoya, wahuwiligwe musimbuli sose. 12 Imutogomi yowe mulume wa muke yumwedu, kahi iyekwimila awanagwe digoya mukaya yakwe. 13 Kosoko awekugolosa digoya umulimo wo utogomi wekupata itunyo iswanu awenyecho kahi wechaka woga mwihuwi idyuwile mu Kilisito Yesu. 14 Nikukwandikila sino mhuwile kwija ukwako chimwande, 15 ninga ninghasulukuka, udahe kumanya ifene foiwanogele awanhu kuwa munyumba ye Mulungu, nadyo no dikanisa dye Mulungu imumi, isumbi ne inghindiso ye chawelu. 16 Hechaka manhonge, isili ye ifuga igaluka nghulu: Hakoneswa mumutufi, na kumanyika mu Muhe, hakonigwa na wamalaika hakahubiliigwa muwamembe hakahuwiligwa muchilunga na kwinuligwa kuchanhya mwitunyo.
1 Hambiya iMuhe yakulonga bila chifiso nhafi ifigele fye indumo awamonga wokitemanula ne dihuwi na kuhulikisa imimuhe yo udasi na mafuso ga magini, 2 kwa udasi wa wanhu awekulonga udasi, akuno ifidoga fyawo fikwaka moto, 3 wakuwalemesa awanhu wanghakitole na kuwagamba wenege ne fyakudiya ifyumbigwe ne Mulungu fihokeligwe kwe ilumbo, na wose awena dihuwi kahi awamanyile ichawelu. 4 Kosoko chila chinhu chumbigwe ne Mulungu chigaluka chiswanu, kahi hechaka ichilemigwa chinghahokeligwa kwe ilumbo; 5 kosoko chihojojolwa ne imbulu ye Mulungu na kutasa. 6 Unghawengha amafuso gano awandugu, kokuwa mutogomi muswamu wa Kilisito Yesu, akuno ukugendelela musimbuli se dihuwi na mumafuso maswanu gowandamile. 7 Unghandamile sisimo se chibwalasi sa katali isichaka ulungu. Kifuse gomwenyecho imikalile ye chimulungu; 8 kosoko inghowa inyifusa amafuso ge chimutufi inoga, ninga inyifusa amafuso ge chimulungu inoga lugano musimbuli sose, kosoko ina ilagano dyo uwumi wa hambiya na uya we chigele chikwija. 9 Inonga ino ya chawelu kahi yagila kufumiligwa. 10 Kosoko mpaka kundumiliso ino chikiidasa na kupiligala, kosoko china ihuwi mwi Mulungu imumi, Mwihula wa wanhu wose, lugano awahuwile. 11 Lagisa kahi fusa simbuli sino. 12 Imunhu wowose yanghaubese ujelelo wako, ninga uwe chinhu cha kifusila kuwahuwile mu nonga na mumigendele na muwendo na mwihuwi na mumikalile miswanu. 13 Mpaka fonikwihja, piligala mu soma na kujama na kufusa. 14 unghaleke kuchitogomela ichise che Mulungu chuwile mugati yako, choninghigwe kwa ugonesi na kwa kwikiligwa mikono na wasehe. 15 Wandamila gano, wikale mugago, uleke wanhu wose wone ifene foukugendelela. 16 Kituse ne chidoga chako, na mafuso gako; gakolelese kosoko kwa kugolosa nheifo kodaha kihonya agweye gomwenyecho na wekukuhulikisa.
1 Unghamugombele imusehe, ninga mulolese kefana Babako; wagolosele awajelelo kefana wanduguso, 2 awadala kifana wang'inasako, awanawake wadodo kifana welumbuso muuya wose. 3 Uwe na chogoho ku wanawake wegane, awegane chawelu chawelu. 4 Imwanamuke mwigane yanghowa na wana ama wajukulu, leka wende kifusa simbuli se ifuga ukaya ukwawo kamei kamei wawagolosele digoya awaBaba sawo na wang'ina sawo; kosoko imbuli yo ifumiligwa ne Mulungu. 5 Ninga imwene imwigane chawelu chawelu, kalekigwa yemwene, yuyo keka dihuwi dyakwe mwi Mulungu, naye kogendelela mu kutasa na inhasa chilo ne misi; 6 ninga imwanamuke inghodaha kisisa imwenyecho kafulusa kufa hata yanghowa yekali mumi. 7 Uwenghe amalagiso gano, uleke wanghowe na ilema. 8 Imunhu wowose inghekuwatasa awanhu wo ukwakwe, nong'amba awanhu we inyumba yakwe kafulusa kulema dihuwi dyakwe kahi kagaluka mwihi kusuma imunhu inghahuwile. 9 Imwigane yanghawandikigwe mpaka yafike minyaka makumi mutandatu, naye hakowa muke wa mulume yumwedu; 10 naye yowe kahomelelwa sinhenda siswanu, yanghowa kakusa wanagwe fiswanu, iyawagolosele ihewa wageni, yanghowa kawanasha wasunhile migulu, yanghowa kawatasa awekudumangiswa, kahi iyakilafile kugolosa sinhenda siswanu. 11 Ninga lema kuwawandika awegane wa disika didido; kosoko wanghakolwa no usulumisi we chimutufi fonghekwenda Kilisito wohanga kutoligwa, 12 nawo wagila uliganiso kosoko wabena ichipingo chawo cha bosi. 13 Kahi hamwedu nag ago, wakifusa kuwa wadoba, kwa kusunguluta nyumba kwa nyumba, kahi si udoba du, ninga wagaluka wahehaji kahi wasakusaku, wakulonga simbuli isisiwagile kulonga. 14 Hambiya nikuhananga awegane we disika didodo watoligwe, walele wana, walongose sinyumba sawo, uleke wanghamwinghe imunghondo luneka lwa kuchitofula seye. 15 Kosoko awamonga wafulus kubiduka na kumwandamila Shetani. 16 Inghowa hena mwanamuke dikanisa dinghowe na musigo, uleke diwatase wamonga, awegane chawelu chawelu. 17 Awasehe awekulongosa fiswanu yagila wenghigwe maliho keli, nawo no waya awekutogoma umulimo wo kuhubili na kufusa. 18 Kosoko diwandiko dikugamba “Unghayowe mulomo ing'ombe youkutogomela umilimo wo kutowa uhemba mu chuga inghadiye simhule”, kahi “imutogomi yagila yahokele maliho gakwe.” 19 Unghafumile usongesi ku imusehe, ninga imbuli iyo ihomelelwe na wahomelesi weli hegu wadatu. 20 Awaya awekugendelela mu sambi, uwagombele mumeso ga wose, uleke wamonga wogohe. 21 Nikukulagisa mumeso ge Mulungu na Kilisito Yesu na wamalaika wasagulwe, ugolose gano bila kuliganisa chimwande hegu kwa konela. 22 Unghamwikile munhu mikono chimwande, kahi unghakigume musisambi wa wanu wamonga; ikala mikalile ye uuya. 23 Unghonywe meji muhala, ninga gimbi chidodogi kosoko ya sinda sako, ne sinhamu isikukwidasa chila chigele. 24 Sisambi sa wanhu wamonga sa hajelu, silongola ku uliganiso, ninga sisambi sa wamonga sikuwandamila ichigele chikwija. 25 Nheifo kahi sinhenda siswanu sa hajelu; kahi asiya isikoneka sisidaha kifisa.
1 Wose wowile hasi yo utumwa wawenghe chogoho awakulu wawo, uleke disina dye Mulungu dinghatofuligwe na mafuso getu. 2 Awaya awena wakulu awahuwile wanghawabese kosoko wagaluka ndugu; yagila wawatogomele muuswanu lugano wose, kosoko wose awekupata nyongesa kosoko yo mulima wawo wagaluka ndugu kahi wendigwa. Fusa kahi jama simbuli sino. 3 Imunhu wowose yanghafusa mafuso gengi kahi nghekufumila amafuso ge chawelu ge Mundewa wetu Yesu Kilisito, hegu mafuso ge ifuga yetu, 4 kamema nyiyona kahi nghamanyile mbuli yoyose; ninga muchilalu wa kudoga simbuli so kuwanga, isina mugati yakwe gele, lefi, usongesi, ubalalilaji, 5 na kugomba na wanhu wabanike mahala gawo, awaswelile ichawelu, awekudoga fina imikalile ye chimulungu ni luneka lwa kupatila ugoli. 6 Imikalile ye chimulungu ina ugoli mukulu kwa kumugolosa imunhu yegusigwe ne ifinhu foyenafyo; 7 kosoko sicheja na chinhu muchilunga kahi sichidaha kuleuka na chinhu kulawa muchilunga; 8 ninga chinghowa na chakudiya na suke chodaha kwigusigwa ne finhu fifyo. 9 Ninga wose awekwenda kuwa wagoli wakugwila mumagesa, na kugwila mumutego na usulumisi we chibwalasi kahi uukukoma, uukuwatubugisa awanhu mu uwagilisi na ubani. 10 Kosoko kwenda mapesa no musisi wo wihi wose; awanhu wamonga kwa kwenda lugano mapesa, waleka dihuwi dyawo na kihoma mumimoyo yawo kwa usungu mwingi lugano. 11 Ninga agweye, munhu wa Mulungu kinege na mabuli gano kongha ichawelu, mikalile ya chimulungu, dihuwi, uwendo, kugojela na upolo. 12 Lewa imilewo miswanu ye dihuwi; kolelesa uwumi wa maiwa gose wowenangiligwe ichigele fowalambile hamwande ya wahomelesi wengi. 13 Hamwande ye Mulungu iyekufingha ifinhu fyose uwumi, na hamwande ya Kilisito Yesu iyaihomelele na kuifumila ichawelu hamwande ya Pondiyo Pilato, 14 nikukulagisa ukolelese dilagiso dino bila ya ibando hegu ilema mpaka koneka kwakwe kwe Mundewa wetu Yesu Kilisito; 15 Kahi adino dikadikoneka bila ya chifiso muchigele chifumiligwe, ne imwene iyalugutisigwe kahi iyena ludole yemwene, Mundewa wa wandewa kahi Mukulu wa wakulu. 16 Yuyo ye imwene inghekufa, kahi iyekwikala muujelu uusikudaha kusegelelwa, inghenati yonigwe na munhu wowose hegu iyedaha kumona. Imwene yenghigwe chogoho na udaha majuwa gose. Hano. 17 Awagoli muchilunga chino, wagambe waleke kiyona, hegu wangheke ugoli uwichaka ichawelu, ninga wamuhuwile Mulungu iyekuchingha ifinhu fyose fingi uleke chifidiye kwa kubwedelela. 18 Wagolosele maswanu, uleke wowe wagoli wa kugolosa sinhenda siswanu, undewa na chise, 19 akuno wakiikile sigafu yuwe nghindiso swanu kosoko ye chigele ichikwija, uleke wapate uwumi we chawelu. 20 Agweye Timoseyo, kolelesa simbuli sose sowinghigwe. Kinege ne simbuli isichaka ulungu isichaka chuinhu na inyisuma ya misungu iikwinangigwa yo udasi, 21 kwa kuihomelela iyo awamonga waswela dihuwi. Dihewa dyuwe hamwedu nanye.
1 iPaulo, mutumigwa wa Kilisito Yesu kwa wendo we Mulungu, kosoko yo uumi uwuwile mugati ya Kilisito Yesu, 2 kwa Tinoseyo, imwanangu mwendigwa; Imboto, ubasi, na imheho kulawa kwe Mulungu Baba na Kilisito Yesu iMundewa wetu fyuwe hamwedu nagwe. 3 Nikumulumba Mulungu yonikumufuga kwa chidoga chelile, ifene fowagolosaga cha Baba, ichigele chose chonikukugelegela munhasa yangu. 4 Ifene fonikugelegela amasosi gako, nina ngwina lugano nechilo na nemisi ya kukona gweye, uleke memelesigwe ne chinyemi. 5 Nikugelegeswa na dihuwi dyako idichaka chimwefe, dihuwi idyowaga mwe imamako Loisi ne inghinako Eunike na ichigele chino nimanya fina dyuwa umwako. 6 Hambiha nikukugelegesa usonghelese ichipawa che Mulungu ichuwile mugati yako kwa kwikiligwa mikono yangu; 7 kosoko iMulungu nghachingha moyo we ikeng'enha ninga moyo wa ludole na wendo na ufinyilisi. 8 Hambiha unghawonele chinyala uhomelesi we Mundewa wetu, kahi unghanyonele niye chinyala nimufungwa wakwe, ninga ufinyilie agehile hamwedu nani kosoko ye Injili muludole we Mulungu, 9 iyachihonya seye na kuchinanga seye mu lwinango umusunhile, siyo kosoko ya sinhenda setu, amba kwasoko yo uwendo wakwe ne simboto soyachingha seye mugati ya Kilisito Yesu minyaka itewe iilongole. 10 na hambiya igubuligwa kwa kwija kwakwe Mundewa wetu Kilisito Yesu, iyasumile difa na kwigala umi na kubanika kuwa jelu kwa njila ya injili. 11 Kosoko ye injili nasagulwa nyuwe muhubili kahe mufusaji, 12 kahe hambiya nikudumangila fina fonyuwile. Ninga sikona chinyala, kosoko nimumanya yonimuhuwile, na nimanya fina kena ludole lwa kwikilisa ichinhu chonikiligwa mpaka Dijuwa diya. 13 kolelesa umufano we simbuli so uumi souhulike ukwangu, mwihuwi na uwendo uwuwile mugati ya Kilisito Yesu; 14 kolelesa imbuli ye chawelu yowinghigwe gweye ne Muye Musunhile iyowile mugati yetu. 15 Ifene foumanyile fina awanhu wose awowile Asiya, wafulusa kunileka, mugati yawo no cha Figelo na Helimogene. 16 iMundewa yawonele ubasi wose awowile munyumba ya Onesifolo, kosoko hakanisangalasaga figele fingi, na kuleka konela chinyala iminyolo yangu, 17 ninga foyafikile ahano Lumi hakanikongha kwa ludole hoyonyona. 18 Mundewa yamonele ubasi Mwijuwa diya, na agweye kumanya fiswanu ifene foyanihokele kwa mengi ako Efeso.
1 Hambiya gweye, mwanangu, wime chewelu mumboto iyuwile mugati ya Kilisito. 2 Na simbuli siya souhulike ukwangu hamwande ya mashahidi itewa uwenghe awanhu awahuilwe awodaha kuwafusa wamonga nawo. 3 Uwe mumagayo hamwedu nani kefana chitung'ati yahuwilwe na Kilisito Yesu. 4 Hechaka chitung'ati iyekitowa munghondo iyokiguma mu milimo ye chilunga, yadahe kumwendesa imukulu wakwe iyamwingise mumulimo. 5 Hata imunhu iyekisuma mumiseigo nghodaha kwinghingwa mhongesi yanghaleka kisuma muchawelu ifene foikwendigwa. 6 Yagila imulimi iyekituma mumulimo yowe wa nghonga kuhokela dikanda dya mamudyo agalawile mumugunda. 7 Kolelesa lugano gonikutamile, kosoko iMundewa kokwingha udaha wa kumanya chila chinhu. 8 Mugelegele Yesu Kilisito, iyenuke kulawa kwa wofile, iwo lukolo lwa Daudi, ifene foikulonga Injili yangu, 9 nani mu Injili iyo ndumangiswa mpaka kohigwa kefana ngolosa wihi. Ninga imbuli ye Mulungu isikudaha kohigwa. 10 Kosoko iyo nikufinyilisa simbuli sose, kosoko ya wanu wasagulwe, uleke nawo wapate uhonya uwuwile mugati ya Kilisito 11 Ni mbuli ya kuhuwiligwa: Inghowa chufa hamwedu naye, chokwikala hamwedu naye; 12 inghowa chofinyilisa, chokuwa wandewa hamwedu naye; chinghamulema imwene, naye kodaha kuchilema seye; 13 chinghaleka kuwa na ihuwi, imwene yakusigala wa kuhuwiligwa, kosoko ngodaha kilema imwenyecho. 14 Uwagelegese simbuli sino, na kuwajama hamwande ye Mundewa wanghowe na nyisuma ye simbuli isichaka chinhu chochose, amba sikuwagilisa awekusihulikisa. 15 Upiligale lugano ukiyonese fina kufumiligwa ne Mulungu, mtogomi we milimo iyechaka chinyala, iyakolelese imbuli ye chawelu ye Mulungu. 16 Kinege na mabuli agechaka dini, kosoko gakuwegala awanhu kutali ne Mulungu, 17 na dibuli dyokwenela kefana ilonda ndugu. Mugati yawo no cha Hinenayo na Fileto, 18 awaiswelile ichawelu, wekugamba nhafi indumo ifulusa kuloka. Howabidula dihuwi dya wamonga. 19 Amba umusingi we Mulungu uukangale ufulusa kwima, wina muhuli uno: iMundewa kawamanya wose awakwe na chila iyekutambula disina dya Mundewa yauleke uwihi. 20 Mugati ye inyumba inghulu siyo du mwina finhu fye sahabu na fesa amba mwina fya mabiki na fya ulongo; ifimonga fina heshima na ifimonga fichaka. 21 Hambiya inghowa imunhu kakikwema kwa kinega nawo, kokuwa chiya cha kwinghigwa heshima, ichisunhigwe, ichimwagile Mundewa, chigoloswa kwa chila mulimo muswamu. 22 Ninga utije usulumisi wo ujelelo na uikonghe ichawelu, dihuwi, uwendo, na itoyoyo hamwedu na wose awekwinanga iMundewa kwa chidogo chelile. 23 Ugaleme amaswali go ubwalasi agechaka mahala; umanyile fina gakwigala ulefi. 24 Na kwa uholo awekisuma naye. Mulungu kodah Imutogomi we Mundewa yakwendigwa yanghowe mulefi amba muholo kwa chila yumwedu, iyekudaha kufusa, mufinyilisi, 25 iyekudaha kuwajama kwa uholo awekisuma naye. Mulungu kodaha kuwatasa walambe na kuimanya ichawelu, 26 wadahe kinega no muheto wa luhoma, uwuwakolile, wagolose sinyenda sakwe.
1 Ninga umanye imbuli ino, nhafi amajuwa ge indumo kokuwa na figele fya kogohesa. 2 Kosoko awanhu wokuwa wakiyenda awenyecho, wakwenda mapesa, wakwenda kitunya, wakiyona, waligaji, wasikuwahulika awaBaba sawo na awang'ina sawo, wechaka ilumbo, wehi, 3 wasikuwenda awanhu wo ukwawo, wasikwenda kulamulwa, wasongesi, wechaka ufinyilisi, wakali, wasikwenda uswamu, 4 wahomelesi wo udasi, wafumbi, wekiyona, awekwenda amabuli gehile kuliko Mulungu, 5 wekigamba wamuhokela Mulungu amba awekukana uludole wakwe. Kinege na wanhu wo. 6 Kwasoko mugati yawo waumo wanhu awekwingila musinyumba sa wanhu na kuwalonda wanawake awechaka ludole, awena amakanda go uwihi wakoligwe no usulumisi wa mataho itewa, 7 awekituma kuhulikisa kwa chila munhu amba awesidaha kugafikila mahala ge chawelu. 8 Kefana Yanne na Yamble awamulemage Musa, awano nawo wakuilema ichawelu, wanhu wajugume matwi na awalemigwe na simbuli se dihuwi; 9 Ninga siwodaha kutowa nghanyo; kwasoko ubwalasi wawo wokonigwa na wanhu wose, kefana fowowile awuya wa wanhu weli. Mafuso ge ndumiliso 10 Ninga agweye kufulusa kona amafuso gangu, dihuwi dyangu, ufinyilisi wangu, uwendo wangu, umwimo wangu, 11 amagayo gangu, indumangiswa yangu, agamhatile Lisitila, amba hanifinyilisa kwa chila igayo; kahe mugago gose iMundewa hakamhonya. 12 Chawelu wose awekwenda kwikala ifene Kilisito Yesu foyekwenda wondumangiswa, 13 ninga awehi na wadasi wogendelela na kongeseka kuwa wehi, kudanha na kudanhiliswa. 14 Ninga gweye, ugendelele ne simbuli siya soufusigwe na kuhuiswa, kosoko kumanya kwifusa kwa che nani 15 na kulawa udodo wako kugamanya amawandiko masunhile, agodaha kukwingha mahala go kupata uumi kwa dihuwi idyuwile mugati ya Kilisito Yesu. 16 Amawandiko gose gena Muhe wa Mulungu kahe gena udaha wa kufusa, kugombela, kujama, kufusa mu chawelu, 17 uleke imunhu we Mulungu yamemelekele, yadahe kugolosa chila mulimo muswamu.
1 Nikukulagisa hamwande ye Mulungu na ya Kilisito Yesu iMulamusi wa wanhu awomi na wafile, na kwa kugubuligwa kwakwe no uumi wakwe: 2 tamilisa imbuli, wiyohe chigele chiswamu ne chihile, jama, gombela, na kulolesa kwa ufinyilisi wose na kufusa. 3 Kosoko chokwija chigele awanhu wakaalema mafuso go uumi, ninga kwa kwandamila sinyenda sawo awenyecho wodaha kupata wafusaji awekuwendesa, 4 nawo wokinega wanghahulike simbuli se chawelu na kubidukila sisimo so udasi. 5 Amba gweye, wiyohe majuwa gose, finyilisa mumagayo, togoma umulimo wo uinjilisti, togoma umulimo wako. 6 Kosoko aniye nyuwa muchigele cho kulafigwa nyuwe nhambiko; ichigele cha difa dyangu chisegelela. 7 Nilewa inghondo fiswamu, inhambo niimala, dihuwi nidimilisa; 8 kulawa baho nyikilwa mhongesi yo kusuma kwangu, yonikanikwinghigwa ne Mundewa, imulamusi we chawelu mwijuwa diya, kahe siyo niye muhala amba na wose awendile kwija ukwakwe. 9 Witahidi kwija ukwangu chimwandemwande. 10 Kosoko Dema kwa kwenda ichulunga chino hakandeka na kuluta Tesalonike; Kilesike kaluta Galatiya, Tito kaluta ku Dulumatiya. 11 Luka du noyowile naniye. Mulonde Maluko kamei mwijanye; kosoko yakunhasa lugano mumulimo. 12 Tikiko hanimwigala Efeso. 13 Ichigele chowukwija, wigale inghasu yangu yonalekile kwa Kalupo ku Tolowa, kahe wigale ifitabu fiya fye singhingo. 14 Alekisanda ayuya imulugulusaji we finhu fye shaba hakonesa winhi mwingi ukwangu; Mundewa komuliha ifene uwihi wakwe fowuwile. 15 Kinege naye, kosoko hakasilema lugano simbuli setu. 16 Munyinenela yangu ya bosi hechaka hata munhu yumwedu iyemile ulwandi lwangu; wose hawandeka niye. Nikutasa wanghawaliligwe itoso kwasoko yiyo! 17 Amba iMundewa hakema ulwandi lwangu na kunyingha ludole lwa kuitamilisa imbuli yose, uleke awamataifa nawo waihulike. Nani hanihuligwa mumulomo we simba. 18 iMundewa konihonya kulawa mu wihi wowose na kunhasa niufikile undewa wakwe wa kulanga. Ditunyo dyuwe ne mwene majuwa gose. 19 Walamuse cha Pilisika na Akila, hamwedu no ulukolo lwa Onesifolo. 20 Elasito yasigala Kolinto; Tulofimo hanimuleka mutamu ku Mileto. 21 Usunguse kwija ichigele che imheho chinati chikonge. Eubulo, Pude, Lino na Kilawudiya wose wakukulamusa. 22 iMundewa yowe hamwedu ne chidoga chako. Imboto yuwe nanye.
1 Paulo, mutogomi we Mulungu kahi mutumigwa wa Yesu Kilisito, kugendelesa dihuwi dya wasagulwe ne Mulungu no umanyi wawo we ichawelu iikufumila imikalile ye chimulungu, 2 mwihuwi dyo uwumi wa majuwa gose, uwene Mulungu, inghekudaha kudanha, hakaulaganisa minyaka mingi ilokile, 3 kahi muchigele chakwe haugubuligwa mumbuli yakwe kwa njila ya mahubili gonyenghigwe kwe dilagiso dye Mulungu iMwihula wetu. 4 Kwa Tito, gomwanangu we chawelu mwihuwi dyochihangile: Dihewa ne digoya kulawa kwe Mulungu iBaba na Kilisito Yesu iMwihula wetu fyuwe nagwe. 5 Nochanghone nakulekile ku Kilete, uleke ugolose digoya agasigale, na kuwasagula wasehe mu chila ikaya ifene fonakulagise, 6 nghona hena munhu munjelu, mulume wa muke yumwedu, kahi awanagwe wena ihuwi kahi wasikusongeswa na mbuli yoyose yo uwihi hegu kuleka kuwa na chogoho. 7 Kosoko iasikofu, kagaluka munyamhala we Mulungu, yagila yowe munhu inghekusongeswa na mbuli yoyose; yanghowe munhu iyakiyona, yanghowe munyono, yanghowe mulewaji wo ugimbi hegu mulefi hegu iyekilundila finhu itewa kosoko yakwe, 8 ninga yowe mundewa, iyekwenda uswanu, iyekiimila imwenyecho; 9 yekuhanangigwa yakolelese imbuli ye chawelu foifusigwe, uleke yadahe kulafa mafuso ge ichawelu, kahi kuwajama wose awekugalema. 10 Kosoko kwina wanhu wengi awechaka chogoho, wena mbuli sichaka chinhu, kahi wadasi, lugano awo ulwandi lwa wafinigwe; 11 wekuhanangigwa wanyamasigwe, kosoko wekuwabana awanhu we sikaya sose kwa mafuso gawo uleke wapate chinhu, amafuso gowasikwendigwa wafuse. 12 Yumwedu wawo, imugonese wawo yagamba “Awakilete wowaga wadasi majuwa gose malimu gehile, wadoba kahi wadiisaji” 13 Uhomelesi uno ni chawelu. Kosoko yo wagombele kwa ukali, uleke wadahe kuwa womi mwihuwi, 14 waleke kusitegelesa sisimo se Chiyahudi hegu amalagiso ga wanhu awekuilema ichawelu. 15 Ifinhu fyose fikugaluka fyela kuwanhu awelile, ninga kuwehi na awasikuhuwila hechaka chinhu chochose ichelile; amahala ne misungu yawo fibanika. 16 Wakigamba wamumanya Mulungu, ninga wakumulema kwa sinhenda sawo; wena ludeso, wechaka chihuliko, wasagile kwa nhenda yoyose iswanu.
1 Ninga gweye, fusa amafuso go uwumi. 2 Uwalagise awasehe wanghowe na makulu, ninga wowe wasindamafu, wowe na mahala, womi mwihuwi na muuwendo na mungojela. 3 Uwalagise kahi awadala wowe wasindamafu, wanghowe wasigilaji, hegu wonywaji wo ugimbi lugano; ninga awekufusa iswanu, 4 kahi na kuwafusa awanawake awadodogi wawende awalume sawo na wana, 5 wowe na chihuliko, usunhile, kutogoma milimo musinyumba sawo, waswamu, wowe na chihuliko kuwalume sawo, uleke imbuli ye mulungu inghatofuligwe. 6 Nheifo kahi, walolese awajelelo wakituse awecho. 7 Kiyonese gomwenyecho musimbuli sose chinhu cha kifusila sinhenda siswanu, kahi mumafuso gako yonesa uchawelu na usito, 8 na simbuli so uwumi isisidaha kutofuligwa uleke imunhu iyedaha kulema yengile chinyala, kwa kuswela mbuli ihile ya kulonga muchanhya yetu. 9 walagise awatumwa wowe na chogoho kuwakulu wawo, na kuwendesa musimbuli sose; wanghowe wabidulaji, 10 wanghowe wahiji, ninga wonese uchawelu wose, wagahambe amafuso fe Mwihula wetu Mulungu musimbuli sose. 11 Kosoko dihewa dya Mulungu digubuligwa uleke awanhu wose wehulwe, 12 nadyo dikuchifusa kuulema uwihi na usulumisi we chilunga, chidahe kwikala fiswanu, na mikalile yo kumogoha Mulungu muchilunga chino, 13 akuno nikudigojela dihuwidyetu idilugutisigwe, na magubulo ge ditunyo dye Mulungu wetu imukulu ne Mwihula Yesu Kilisito, 14 iyakilafa imwenyecho kosoko yetu kuchihula seye kulawa mu wihi wose na kisunhila imwenyecho wanhu wakwe awekupiligala musinhenda siswanu. 15 Longa simbuli sino; jama na kugombela kwa ludole. Munhu wowose yanghakubese.
1 Uwagelegese awanhu kinenenghesa kuwandewa na wena udaha, kuwa na chogoho, kuwa tayali kwa chila mulimo muswanu, 2 waleke kumulonga munu wowose, wakinege ne ing'omba, wowe waholo na konesa chogoho ku wanhu wose. 3 Kosoko ase nase katali hachuwaga chaka mahala, chichaka chogoho, chagiliswe, watumwa wo usulumisi wa mbuli nyingi, chikale mu wihi ne finju, chisuligwe na wanhu, nase chikisulile munhu na miyagwe; 4 ninga ichigele uswanu wakwe na uwendo wakwe Mulungu iMwihula wetu fowoneke, 5 hakachihonya seye, si kwa sinhenda setu, so uchawelu sochigolose, ninga kwa ubasi wakwe, kwa kusunhwa kwa kwelekigwa keli na kugoloswa usha ne Muhe Musunhile; 6 iyachitilile kwa ugoli wose kugendela Yesu Kilisito iMwihula wetu, 7 chidahe kutaliligwa ichawelu kwa dihewa dyakwe uleke chuwe wahasi mwihuwi dyo uwumi wa majuwa gose. 8 Ni nonga ya chawelu. Nikukuhananga gweye ulonge simbulisino kwa ludole uleke wose awamuhuwile Mulungu, wagendelele kusigala musinhenda siswanu; simbuli sino ni swanu kahi sina faida kuwanhu. 9 Ninga kinege ne sinonga se chibwalasi, sinonga sinhali sa wagono, ing'omba na iwanga kosoko ya malagiso, kosoko gechaka faida kahi gechaka chinhu. 10 Imunhu mudasi, yanghadaha kujamigwa ichigele cha bosi na cha keli, muleke, 11 umanye fina imunhu yefane yo kagilila kahi yakugolosa sambi; kafulusa kiliganisa imwenyecho. 12 Ichigele chonikanimutuma Alitema ukwako hegu Tikiko, piligala kwija ukwangu kuno Nikapoli, kosoko nilamula kwikala kuno ichigele che imheho. 13 Piligala kuwatasa Sena imulamusi na Apolo munhambo yawo; langisisa wanghahungukilwe na chinhu. 14 Leka awanhu wetu wefuse kusigala musinhenda siswanu, wadahe kuwatasa awechaka ichawelu, wanghaleke kulela mamudyo maswanu. 15 Awanhu wose awehamwedu nani wakukulamusa. Walamuse wose awekuchenda seye mwihuwi. Dihewa dyuwe hamwedu nanye mose.
1 Aniye Paulo, inyohigwe kosoko ya Kilisito Yesu, na Timoseyo imundugusetu. Chikukwandikila agweye Filemoni mwendigwa wetu, mwituma milimo miyetu, 2 na Afiya ilumbudyetu na Alikipo musilikali miyetu hamwedu ne dikanisa idikitang'anyila munyumba yako. 3 Dihewa dyuwe nanye, ne digoya idikulawa kwe Mulungu na kwe Mundewa Yesu Kilisito. 4 Nikumulumba lugano iMulungu wangu amajuwa gose, fonikuwagelegela munhasai yangu; 5 Ifene fonikuhulika isimbuli so uwendo wako, ne dihuwi dowinadyo mwe Mundewa Yesu na wasunhile wose. 6 Kahi nikutasa fina uumwedu wochinawo mwihui dyako dyongesele udaha wo kumanya maswanu gose muumi wetu mundugusangu mugati ya Kilisito. 7 Uwendo wako unyingha chinyemi lugano na kuhoswa! Kulawa muuwendo wako, fidoga fya wasunhile, fisangalaswa lugano kosoko yako. 8 Kosoko iyo nichaka chogoho mugati ya Yesu, kukulagisa ichikuhanangigwa ugolose, 9 ninga kosoko ya uwendo nikwenda kukutasa, (aniye Paulo nimusehe na hambiya mufungwa kosoko ya Kilisito Yesu). 10 Nikukutasa kosoko ye imwanangu Onesimo yonimweleke mwihuwi mugati ye inyohigwa yangu. 11 Iyowage katali munhu chaka ukwako mumilimo yakwe, amba hambiya kagaluka munhu munhusi ukwako na ukwangu. 12 Nikumuwisa ukwako kwa moyo wangu wose. 13 Hanyuwa nikwenda nisigale naye uleke yanhogomele ahanhu hako ugele nyuwile muchifungo kosoko ye mbuli swanu, 14 aniye sendile kugolosa mbuli yoyose yonghwendile agweye, kosoko yo uswamu wako unghowe fonghukwenda agweye, ninga foulamule gweye kwa kwenda kwako. 15 Nhagela nochileka yakulekile kwa chigele, uleke uwe naye kwa amajuwa gose, 16 hambiya, nghefane mutumwa du, amba imutumwa iyohigwe chawelu chawelusi mundugusangu mwendigwa ukwangu kosekose ukwako agweye chimutufi na kwe Mundewa. 17 Hambiya nghona ukunyona aniye chahamwedu nagwe, muhokele ayuno fina fowowile ukunihokela aniye. 18 Nghona yakugolosele mbuli yoyose ihile, kahi nghona ukumudai chilunhu chochose noliha niye. 19 Aniye Paulo nyandika, kwa mukono wangu nimwenyecho aniye noliha. (Sikulonga mbuli yoyose yonikukudai hata gweye gomwenyecho). 20 Heye mundugusangu nikuhananga nyongesa mwe Mundewa, kahi kusangalasa umoyo wangu mu Kilisito. 21 Kosoko mhuwila ichihuliko chako nochileka nikuwandikile nimanyile nhafi kogolosa kusuma agene gonilongile. 22 Ugele uwo munyikile ugono, kosoko nikuhuwila fina munhasa yenu modaha kunyona. 23 Epafula iyohigwe hamwedu naniye mu Kilisito Yesu, yekukulamusa; 24 hamwedu na Maluko, Alisitako, Dema, na Luka, awekugolosa imilimo hamwedi naniye. 25 Dihewa dye Mundewa Yesu Kilisito, dyuwe hamwedu ne ifidoga fyenu.
1 Katali iMulungu hakalonga na wababa setu kugendela wagonesi mikangha mingi na kwa njila se hayo hayo; 2 ninga majuwa gano kalonga nase kugendela iMwana, yoyamusagule yowe muhasi we finhu fyose, kahi kugendela imwene iMulungu kachumba ichilunga. 3 Imwene yakonesa ditunyo dye Mulungu kahi kena lubonoto lwe nyuwa yakwe, yakolelese ichilunga chose kwa ludole lwe mbuli yakwe. Foyagolose dihojojolo kosoko yo wihi, hakekala mumukono wo Ukulu uko kuchanhyasi, 4 Kagaluka mukulu muchanhya ya malaika kosoko disina dyoyapatile iswanu lugano kusuma agawo. 5 Kosoko kwina malaika yuhoki ugele wowose iyadaha kwinangigwa ne Mulungu, “Agweye kwa mwanangu, 2 diyelo nghweleka”? Ama kahi, “Aniye nokuwa Babakwe, 2 naye kokuwa ukwangu mwanangu.” 6 Na kahi, ugele foyekumwigala inhula hanju muchilunga, yekugamba, “Leka awamalaika we Mulungu wose wamufuge imwene.” 7 Na ku malaika yekugamba, “Iyekugolosa awamalaika wakwe wowe mheho, na watogomi wakwe malilimba ga moto.” 8 Ninga kwi mwana yekugamba, “Undewa wako, Go Mulungu, ni wa majuwa gose na ugele wose, nagwe ukudima digoya majuwa gose muundewa wako. 9 Agwe ukwenda ichawelu na kudesekela uwihi; 2 hambiya Mulungu, iMulungu wako kakubaka mafuta ga chinyemi kusuma awayago.” 10 Kahi, “Agweye, Mundewa nowejawomba iyisi kunghonga na ulanga ni mulimo we mikono yako; 11 nafyo fyobanika, ninga agweye kosigala; fyose fyodaha kulala kifana suke, 12 kofisinga kifana suke na fyo fyobiduka, nafyo fyobiduka. Ninga agweye kosigala fina fouwile, na iminyaka yako ichaka ndumo” 13 Ninga kwina malaika yuhoki yoyadaya kumugamba chigele chochose, “Ikala ulwandi lwo mukono wangu wo kulume, mpaka niweke awanghondo wako chigoda cha kwegamikila migulu”? 14 Nhafo awo si mimuhe watumigwe kutogoma, kosoko ya wanhu awakwija wahokela uhonya?
1 Hambiya chikuhanangigwa chikolelese lugano simbuli sose sochihulike, uleke chingheje chisiswela. 2 Kosoko inghowa imbuli iyalongigwe na malaika hayuwa ya chawelu na chila kubana hegu kuleka kuwa na chihuliko, hakuhokela maliho galiganile, 3 aseye nase chodaha kinega nhani chinghaulema uhonya uno umukulu? Haulongigwa kunghonga na Mundewa, na kuhomelelwa na wose ukwetu na wose awamuhulike imwende, 4 ugele iMulungu naye yakuwuhomelela kwa fitangilo na majumo na majumo gehayohayo na kwe chinghwa cho Muhe Musunhile ichikwinghigwa ifene imwenyecho foyekwenda. 5 Kosoko iMulungu nghachilekile ichilunga ichikwija chochikulionga chilongoswe na malaika. 6 Fina foihomeleligwe ahamonga, “Imunhu no nani hata umugelegele, hegu imwana we munhu, hata umulangilile imwene? 7 Kumugolosa mudodogi kusuma malaika kwa chipisi, kumufasa inghofiya ye ditunyo na chogoho, 8 kwika ifinhu fyose hasi ye migulu yakwe.” Hambiya munyika ifunhu fyose hasi yakwe, nghasigase chinhu isichuwile hasi yakwe. Fina foyuwile, chisinati chone chila chinhu chuwe hasi yakwe. 9 Ninga chikumona Yesu, imwene kwa chigele chiguhi hakagolosigwa mudodogi kusuma malaika yafasigwe ditunyo na chogoho kosoko ya magayo ge difa, uleke kwe dihewa dye Mulungu yadahe kunomola difa kosoko ya chila mumunhu. 10 Kosoko haimwagila imwene, imwenele na kugendela imwene ifinhu fyose fyabahano, munyigala wana itewa ku ditunyo, yamugolose chilongosi wo uwumi wao yaliganile kugendela magayo. 11 Kosoko iyakuhojojola na wose awakuhojojoligwa wena chotoko chimwedu. Nochanghone wena iYesu ighakona chinyala kuwenanga awene wanduguse 12 yakugamba “Notagusa disina dyako kuwandugu sangu muchiligati ye dikanisa nomutunya imwene.” 13 Na kahi, “Nomuhuwila imwene.” Na kahi, “Aniye nabahano na wana woninghigwe ne Mulungu.” 14 Hambiya kosoko wana wahangila mumutufi ne sakame, Yesu naye yowa nheifo uleke jugendela difa yadahe kumubana imwene yene udaha we difa, naye no luhoma, 15 na kuwehula awo wose woile mwibalangulu dya wose watumwa kosoko ye ditisi dye difa. 16 Kosoko ni chawelu fina Yesu nghejile kuwatasa malaika ninga icheleko cha Ibulahimu. 17 Hambiya haimwagila kuligana na wanduguse musimbuli sose uleke yadahe kuwa mutambiki mukulu yena ubasi akahi muchawelu mufuga ye Mulungu, yadahe kuwa iliho kwa wihi wa wanhu. 18 Kosoko imwene naye yahokela magayo na kugesigwa, kena udaha wa kuwatasa wose awekugesigwa.
1 Hambiya wandugu sangu wasunhile mukuhangila mulwinango lwa kulanga mugelegeleni Yesu imutumigwa na mutambi mukulu wo kulamba kwetu. 2 Yeja yowa muchawelu kwe Mulungu yamusagule imwene kifana Musa foyowile muchawelu munyumba ye Mulungu. 3 Kahi Yesu yataliligwa muchawelu iyena ditunyo lugano kusuma Musa ifene imujengaji we inyumba foyena ditunyo lugano kusuma inyumba iyecho. 4 ( Kosoko chila nyumba ijengigwa na munhu yumonga, ninga imujengaji we finhu fyose ni Mulungu.) 5 Hambiya Imusa yeja yowa muchawelu munyumba yose ye Mulungu yefane mutogomi yowe muhomelesi we simbuli isikasilongigwa ichigele chikwija. 6 Ninga iKilisito yeja yowa muchawelu muchahya ye nyumba ye Mulungu kifana mwana, kahi aseye no sinyumba sakwe chinghakolelesa lugano ighinyo yetu na inyitogolela dihuwi dyetu 7 Hambiya fina Imuhe Musunhile foyakulonga, “Diyelo, munghahulika dijwi dyakwe, 8 munghaigolose imimoyo yenu yuwe mikugutu fina ichigele che ufuti fina dijuwa dyo kugesigwa kunyika, 9 ako konagesigwe na wababa senu na kona imilimo yangu, 10 kwa minyaka makumi mane. hambiya hanidesigwa ne cheleko chiya, na kugamba, ‘Majuwa gose ni wanhu wagilile mumimoyo yawo, wasisimanyile sinjila sangu.’ 11 Fina fonikilahile munyono yangu, ‘Wasidaha kwingila muubwihilo wangu.’” 12 Wandugu sangu langisiseni, nghanghowe na yumwedu wenu imwihi yena umoyo uwichaka dihuwi uukulongosa kugwila kutali ne Mulungu imumi. 13 Ninga mukilolese munhu na miyagwe chila ijuwa, inangwa, “Diyelo,” uleke nghanghowe na yumwedu wenu yowe mukugutu kosoko ya kudanhiliswa na wihi. 14 Kosoko chihangila muKilisito chinghagendelesa kukolelela inghinyo yetu ye nghonga mpaka kundumo. 15 Kosoko hailongigwa, “Diyelo munghahulika dijwi dyakwe munghaigolose mimoyo yenu yuwe mikugutu kifana chigele cho ufuti.” 16 No chenani wahulike na kugendelela kuwa wafuti? Nhafo siwowile awaya wose awaleuke Misili ugele wo ulongosi wa Musa? 17 Kahi no chenani awamudesile kwa minyaka makumi mane? Siwaya wose awagolose wihi, awene mitufi yawo hayugwa mwibalangu? 18 Kahi no chenani welahile fina wanghengile mubwihilo wakwe ninga si waya awowile wafuti? 19 Hambiya chikona fina wasadahile kwingila kosoko ya kuleka kuhuwila kwawo.
1 Hambiya kosoko dihuwilo dyo kwingila muchinyemi chakwe dinghali baho, chogohe uleke yanghowe yumwedu wenu yaliganiswe kosoko ya kusuma kudifikila. 2 Kosoko imbuli iswanu haija ukwetu fina ukwawo, ninga imbuli yahubiliigwe ukwawo iswatasile, kosoko isahangile ne dihuwi dya wategelesage. 3 Kosoko aseye chihuwile chikwingila muubwihilo wakwe, kifana Mulungu foyalongile “Fina fonakilahile munyono yangu, Wasidaha kwingila mubwihilo wangu,” hata inghowa imilimo yakwe haihela ugele wo kwikigwa inghindiso ye chilunga. 4 Kosoko ahamonga kalonga simbuli se dijuwa dye mufungate, “Ne Mulungu hakabwihila dijuwa dyo mufungate kulawa kugolosa milimo yakwe yose.” 5 Na kahi ahanhu hano hakagamba, “Wasidaha kwingila mubwihilo wangu.” 6 Kosoko hambiya isigala kuwamonga kwingila umo, na wose awene kunghonga, hawahokela imbuli swanu ninga hawasumwa kwingila kosoko ya ufuti wawo, 7 kahi keka ijuwa dimonga, “diyelo” yakugamba kulokela Daudi minyaka mingi ilokile, musimbuli isamule kuwandikigwa, “Diyelo munghahulika dijwi dyakwe, munghaigolose imimoyo yenu yuwe mikugutu.” 8 Kosoko inghowa Yoshua hakamwinghani hanhu ha kubwihila iMulungu nghodaha kutambula hamwande dijuwa dingi. 9 Hambiya kahi ahaya isigala sabato dijuwa dyo kubwihila kwe Mwana we Mulungu! 10 Kosoko wowose iyakwingila muubwihilo we Mulungu yakubwihila munhogoma milimo yakwe fina Mulungu foyabwihile munhogoma yakwe. 11 Lekeni hambiya chipiligale chingile kuubwihilo uya, uleke hanghowe na yumwedu wetu yogwe kosoko yo ufuti uno. 12 Kosoko imbuli ye Mulungu nyumi, kahi ikutogoma milimo, nghali kusuma isunja, kahi ikuhoma mpaka ikutemanhula chidoga ne umuhe ne ifilungo fya umutufi ne umusopo, kumanya amadoga ne inyenda ye umoyo. 13 Kahi hamwande yakwe hechaka ichumbigwe chikifisile ninga fyoose fyahajelu na kugubuligwa mumeso gagwe imwene yena simbuli setu. 14 Kosoko hambiya china Imutambiki Mukulu iyengile kulanga, Yesu Imwana we Mulungu, chigendelele kukolelesa dihuwilo dyetu. 15 Kosoko chichaka Mutambiki Mukulu iyekuhanga nase musokesi wetu, ninga imwene naye hakahesigwa musinyuwa sose fina seye bila kugolosa wihi. 16 Chisegelele kwa nghinyo hegoda dye undewa dye dihewa, uleke chidahe kuhokela ubasi na dihewa dyo kuchitasa ugele wo chikuhananga.
1 Kosoko chila Mutambiki Mukulu yasaguligwe kulawa muwanhu, kekigwa yeme ahanhu ha wanhu yawatogomele musimbuli se Mulungu, kulafa filafwa na sinhambiko kosoko yo wihi. 2 Yekudaha kuwalondela kwa uholo awasimanyile na wokwagilila, kosoko imwene naye kowa musokesi. 3 Kosoko ino imwagila naye yalafe nhambiko kosoko yo wihi wakwe na wihi wa wanhu wamonga. 4 Na hechaka munhu yekiingha ditunyo dyo Utambiki Mukulu ninga ayuya iyenangigwe ne Mulungu, fina foyowile Haluni. 5 No nheifo kahi iKilisito naye nghakiinule imwenyecho kuwa Mutambiki Mukulu, ninga hakasaguligwa ne Mulungu yagambile, “Agwe no Mwanangu, diyelo nikweleka,” 6 fina foyakulonga ahanhu hamonga, “Agweye no mutambiki wa majuwa gose, anhanhu ho utambiki ha Melikisedeki.” 7 Mumajuwa gakwe goyekalage muchilunga, Yesu hakatasaga lugano na kutasilisa, kwa ijwi ikulu na masosi kwe Mulungu yena udaha wo kumuhonya kulawa mudifa, na hakahulikigwa kosoko ye chogoho che Mulungu ichowile umwakwe. 8 Hamwedu na gago hakowa Mwana, iyakifusile kuhulika kugendela amagayo goyapatile 9 naye foyakangasigwe hakagaluka chotoko cha uhonya wa majuwa gose kuwose awekumuhulika, 10 kahi imwene kasaguligwa ne Mulungu kuwa mutambiki mukulu ahanhu ha Melikisedeki. 11 Muchanhya yakwe china mbuli nyingi sa kulonga, ninga nghugutu kusilonga, kosoko anyeye hamukwenda kuhulika. 12 Kosoko hamwedu na gago muwagila muwe wafusaji mukuhananga munhu yun gi yawafuseni amafuso ge inghonga ge Mulungu. Mukuhananga mele siyo chakudiya chikugutu; 13 Kosoko chila munhu iyakwikala kwa ndiya ya mele nghamanyile imbuli ye chawelu, kosoko ni mwana na. 14 Ninga chakudiya chigugutu ni cha wakulu wagima, kosoko wose awene imisungu wakudaha kusagula diswanu na dihile.
1 Hambiya chileke amafuso ge nghonga agechikilisito na chandamile agakangale, chingheke nhindiso kahi: Kwa kulamba kulawa mumilimo yufile ninga chike dihuwi kwe Mulungu, 2 malagiso ge mbuli sa ubatiso na kwikiligwa mikono na kwinuka wafile na uliganiso wa majuwa gose. 3 Agano chogolosa Mulungu yenghenda. 4 Kosoko isikudahika kulamba kahi kwa wanhu awalekile dihuwi wowile muujelu na kunomola ichinghwa che Mulugu na kuwa na lugota na Muhe Musunhile, 5 na kufulusa kunomola uswanu we mbuli ye Mulungu na uludole we chigele chikwija, 6 na kuleka dihuwi isikudahika kuwowisa walambe kahi, kosoko wakumusambasa Imwana we Mulungu keli mufidoga fyawo na kumutofula kwa hajelu. 7 Kosoko isanga inyunyile ifula, itonyelwa chila ugele na kotesa mamudyo maswanu kwa yuya yakulima na kuhokela simboto kulawa kwe Mulungu. 8 Ninga inghotesa miwa na magugu, yokuwa chaka chambusi na kuwa habehi na kuhugutiswa; na kusomigwa kumoto. 9 Hata inghowa chikulonga nheifo, wendigwa wangu musimbuli senu chihuwila simbuli siswanu lugano so uhonya. 10 Kosoko Mulungu siyo mukugutu hata yaleke kona imilimo yenu na wendo womonese kosoko ye disina dyakwe, kuwatogomela awasunhile fina fomukugolosa hata hambiya. 11 Chikuhananga chila yumwedu wenu yonese upiligale uwo kwa kumanya umemelesi we dihuwi mpaka kundumiliso, 12 uleke munghowe wadoba, ninga awekuwandamila wose awena kulokela dihuwi na ufinyilisi wakuhala isilaganiswe. 13 Kosoko ichigele iMulungu foyamulaganise Ibulahimu, na kosoko nghowile hata na munhu yumwedu mukulu wa kilahila, hakelahila muimwecho, 14 yekugamba, “Chawelu nokumotesa gweye na kukongesa.” 15 Kamei Ibulahimu yakamale kufinyilisa, hakahokela choyalaganiswe. 16 Kosoko awanhu wakilaha kwa yuya imukulu kusuma awene, na nyilaha ukwawo no kumala simbuli sose. 17 No nheifo, Mulungu naye yakwenda konesa lugano awahasi we dihuwilo ifene amadoga gakwe fogechaka chibidubidu hakongesa mudihuwiso kilaha, 18 uleke kwa finhu fili ifisikudaha kubiduka mufifyo Mulungu nghodaha kulonga udasi, uleke aseye chibilimile chuwe na ludole lukangale kudikola dihuwi dikigwe hamwande yetu. 19 Chinadyo dihuwi dino, dye chawelu na dimile nghwi kifana chigingi che fidoga, ne dihuwi idikwingila mugati ye dipasiya, 20 Umo nomoyengile Yesu kosoko yetu, imwene noyachilongolele hakagaluka mutambiki mukulu wa majuwa gose kifana Melikisedeki.
1 Kosoko ayuno, “No Melikisedeki Mundewa wa Salemu, imutambiki we, Mulungu Iyekuchanhyasi, hakakitanyila na Ibulahimu foyendeyakuya kulawa kuwatowa wandewa na kumotesa,” 2 na kwe imwene yuyo Ibulahimu hakalafa, “Imwedu ye ikumi ya chila chinhu choyowile nacho,” itapita ye Disina dyakwe bosi ni, “Mundewa we chawelu,” keli ni mundewa wa Salemu, “Imwene ni mundewa we digoya.” 3 Munhu yo kechaka baba, ninga ng'ina, kechaka welekwa, hegu nghonga ama ndumo mulwikala lwakwe, ninga kaliganisigwa ne Mwana we Mulungu, imwene ni kuhani mwajuwa gose. 4 Langeni fonimukulu! Ibulahimu baba yetu hakamwingha imwedu ya kumi ye ifinhu ifilawile kunghonga. 5 Na wose awecheleko cha Lawi awakuhokela umulimo wo utambiki wene lusigililo mwilagiso fina walonde imwedu ya kumi kulawa kuwanhu wawo, kosoko nawo ni welekwa wa Ibulahimu. 6 Ninga munhu yuno siyo wa lukolo lwawo, hakahokela imwedu ya kumi kwa Ibulahimu na kumumotesa imwene yene dihuwiso. 7 Kahi imanyika fina imudodogi yakumotesigwa ne mukulu. 8 Na hata wanhu ambawo wakudaha kufa wakuhokela imwedu ya ikumi, ninga kwa Melikisedeki imwdu ya kumi haihokeligwa na kuhomeleligwa ne imwene imumi inghakudaha kufa. 9 Munhu yakudaha kugamba fina, Lawi imwenyecho, iyakuhokela imwedu ya kumi, hakaliha kugendela Ibulahimu, 10 kosoko hakowa mufyuno fye Babakwe ugele Melikisedeki foyakitang'anyile naye. 11 Hambiya inghowa ukangasi haupatagwa kwa njila ya utambiki we Chilawi, (kosoko hasi yakwe awanhu hawahokela malagiso), hahowa na soko yaki kahi ya mutambiki yungi yeme ahanhu ha Melikisedeki, kusuma hata yumwedu iyatambuligwe ahanhu ha Haluni? 12 Kosoko halika utambiki ukudaha kubiduka, yagila amalagiso nago gabiduke. 13 Kosoko umwene yalongigwe mugago hakowa muhangi wo ulukolo lwingi, ulwene hechaka hata yumwedu mulukolo lwalwo iyetuma mulimo wo utambiki hefugilo. 14 Kosoko imanyika chalinje fina iMundewa wetu yalawa mucheleko cha Yuda, mulukolo ulwene Musa nghalonga mbuli yoyose muchanhya yakwe musimbuli sa watambiki. 15 Adino digaluka dya chalinje lugano, ichigele mutambiki yungi yakwima kefana Melikisedeki, 16 iyagaluke mutambiki siyo kwa kwandamila inyenda ya malagiso ge chimutufi, ninga kwa ludole lwa uumi uusikubanika. 17 Kwasoko kahomelelwa fina “Agweye kwa mutambiki wa majuwa gose, ahanhu ha Melikisedeki.” 18 Kwa ulwandi lumonga dilagiso idilongole dikigwa hanghanda kosoko yo usokesi wakwe na kuleka kuwa na chakutogomelwa. 19 (Kosoko dilagiso sidyamemelese chochose); kwa ulwandi lumonga, dihuwilo diswanu hadinghiswa, uleke mugago chidahe kumusegelela Mulungu. 20 Kahi sidyowile nheifo bila ya kilaha. 21 Wose kunghonga awowile watambiki hawalonda mulimo uwo bila ya kilaha, ninga ayuno kenghigwa kwa kilaha, “Imundewa kakilaha kahi nghodaha kubidula chidoga chakwe, ‘Agweye no mutambiki wa majuwa gose.’” 22 kwa nheifo Yesu kagaluka mwimilisi we dilagano diswanu. 23 Lugano, awatambiki we nghonga hawowa wengi, kosoko hawakindisigwa ne difa wanghagendelele mumulimo; 24 ninga imwene kenawo utambiki wakwe uwichaka ndumo, kosoko ukugendelela majuwa gose. 25 Nochanghone ugele wose kena udaha wa kuwahonya wose awakumusegelela Mulungu kwa kulokela imwene, kosoko muchigele chakwe chose choyakwikala yakuwatasila. 26 Kosoko hayagila chuwe na mutambiki mukulu kifana yuyo, imusunhile yechaka ilema dyodyose, inghachafuke, iyakinega na uwihi, na yenuligwe kulanga. 27 hafanile, kifana awatambiki wamonga wakulu; kechaka haja kulafa nhambiko chila ijuwa, kunghonga kosoko yo wihi wakwe imwenyecho, keli kahi na kosoko yo uwihi wa wanhu wose; aga hakagagolosa malumwedu du kwa wanhu wose ichigele foyakilafile imweneyecho. 28 Kosoko dilagiso dikuweka wanhu wose awechaka ludole kuwa watambiki wakulu, ninga inonga ye nyilaha, iyejile kunyuma ye dilagiso haimusagula Mwana iyamemelekele majuwa gose.
1 Hambiya imbuli inghulu musose sochikulonga no ino: China mutambiki mukulu iyefane yuyo yekale mumukono wo kulume we digoda dye Undewa Mukulu ako kulanga, 2 imutogomi ahanhu hasunhile he dihema dye chawelu, idyekigwe siyo ne munhu, ninga Mundewa. 3 Kosoko chila mutambiki mukulu kasaguligwa uleke yalafe filafwa na nhambiko; kosoko ikuhanangigwa imutambiki naye yowe na chinhu cha kulafa. 4 Hambiya kusigwa yowile wamuchilunga nghowile yakuwa mutambiki hata chidodogi, kosoko hena watambiki awakulafa filafwa ifene dilagiso fodikulagisa. 5 Wakutogoma mulimo hanhu ha sunhile kifana futa na inyefu dya finhu fya kulanga; kifana Musa foyowile habehi kugolosa dihema, hakajamigwa kugambigwa, “Langa ukagolose finhu fyose kifana fowonesigwe akuya kwitunda.” 6 Ninga Yesu kapata mulimo muswanu lugano, na muchanhya ya iyo, imwene kakifana mulamusi we dilagano diswanu, kosoko dija kulokela mahuwiso maswanu. 7 Kosoko woile diya dye nghonga dyowile hadihunguke, kusowile kukuwa na soko ya kukongha dingi dya keli. 8 Mulungu hakona wihi kuwamonga nochinghone yakugamba, “Chawelu majuwa gakwija, yakulonga Mundewa, chigele chonikwija nikwiga ilagano isha ne nyumba ya Isilaeli na hamwedu na nyumba ya Yuda; 9 hadikuwa kifana dilagano diya dyonekile ne wababa sawo, mwijuwa dyonawalafage kwa mukono na kuwalongosa kuluta iisi ya Misili; kosoko hawagendelele mwilagano dyangu, na kwa nheifo naniye haniwadesekela, yakulonga Mundewa. 10 Adino no dilagano dyonikwenda nigolose hamwedu ne nyumba ye Isilaeli ganghaloka majuwa gago, yakulonga Mundewa, nikwenda nike malagiso gangu mumisungu yawo, na nowandika mumimoyo yawo, nani nokuwa Mulungu wawo, nawo wokuwa wanhu wangu. 11 Na wasikuwa wanhu wa kifusa munhu na miyagwe ama kwa kigamba, ‘Goloko mumanye Mulungu,’ kosoko wose wonimanya, kulawa mudodogi hata imukulu. 12 Kosoko nowonela ubasi kwa nhenda sawo sihile, na sikwijanigelegela wihi kahi.” 13 Munonga ye dilagano, lagano isha, nong'amba Mulungu kagolosa dye nghonga dyuwe disakala na ichinhu chisakale chahabehi na kwagilila.
1 Hambiya hata dilagano dye inghonga hadyuwa na nhenda sa kufuga na ahasunhile hakwe he chilunga. 2 Kosoko dihema hadigoloswa, idyakunje, idyekigwe chigwaso che itaa na imesa na imikate yo Konesa; hekwinangigwa Hanhu Hasunhile. 3 Kunyuma ye dipasiya dya keli hadima dihema dikwinangigwa Ahasunhile ha Hahasunhile, 4 dina chiya cho kufunghisila ubani chigoloswe kwa sahabu na disanduku dye dilagano digubikwe musisandi sose kwa shaba, umowile na dikopo dya sahabu idyowile na imana iya na imhando ya Haluni iyatugute ne fibawo fiya fye dilagano; 5 muchanhya ya disanduku hamuwa na makelubi ge ditunyo gakuguma inyefu mwigoda dyo ubasi. Ninga musimbuli sino chichaka luneka lwa kulonga kwa utali. 6 Ifinhu afyo finghafulusa kugoloswa, awatambiki wakugendelela kwingila mwihema didyo dye inghonga kutogoma imilimo yo kufuga; 7 ninga mwihema didyo dya keli dikwingiligwa ne mutambiki mukulu muhala, mukangha umwedu chila mwaka; kahi si bila sakame, yoyekuhanangigwa yalafe kosoko yakwe na kosoko ye sisambi sa kuleka kumanya sa wanhu awo. 8 Mu dino iMuhe Musunhile yakonesa fina injila yo kwingila ahanhu hasunhile hayuwa inhati ikumuligwe, kosoko dihema dya kunje hadyuwa dikali dimile 9 (idyowile chitangilo che chigele chino). Mugoloswa nheifi; filafwa ne sinhambiko ifisikudaha kumugolosa imunhu, iyekufuga yowe na misungu ikangale, 10 kosoko fikutogomela muhala ifyakudiya ne ifinhu fyo kungwa na uhojojolo we hayo hayo na malagiso ge chimutufi agekigwe mpaka ichigele chino. 11 Ninga ichigele Kilisito foyejile imutambiki mukulu we finhu fiswanu ifijile, kahi kugendela dihema dikulu, kahi idikangale lugano (idisigolosigwe kwe mikono, no ngamba, si dye cheleko chino) 12 hakengila kamwedu kosoko ya wose Ahanhu Hasunhile, yalondile isakame siyo yesimhene na sindama, ninga isakame yakwe imwenyecho na kuwa ne indekelela ya majuwa gose. 13 Kosoko inghowa isakame ye simhene na makambaku na difu dye sindama se singombe dyowetililigwe awanhu awena uwihi dikusunha na kukwema umutufi, 14 silugano isakame ya Kilisito, imwene kugendela iMuhe wa majuwa gose hakelafa imwenyecho kuwa chilafwa chichaka wihi, kuwasunha amadoga genu na sinhenda senu sufile mudahe kumufuga Mulungu wenu imumi. 15 Kosoko ino Kilisito noyekugolosa dilagano disha uleke wose awenangwe wadahe kuhokela uhasi uwuhuwisigwe wa majawa, kosoko ye difa digoloseke kuwaleusila uwihi wawo awowile hasi ye dilagano dhe nghonga. 16 Kosoko yagila ahena dilagano dyo uhasi, howe na ifa dya imunhu iyadigolose. 17 Kosoko dilagano dyo uhasi dina ludole ichigele imunhu foyekufa, amba foyekuwa yekali mumi dikuwa chaka ludole. 18 Ninga hata dilagano diya dya katali sidyakongesigwe bila ya sakame. 19 Kosoko chila ilagiso fodyalongigwe na Musa kuwanhu wose ifene foilongigwe mumalagiso, hakailonda isakame ya sindama na yesimhene na kuhanganisa mumeji na kuinyaga muchitabu cha malagiso na awanhu kwa sufi na kwa mahamba ge dibiki dikwinangigwa hisopo, 20 yekugamba, Ayino no sakame ye dilagano dye Mulungu dyoyamulagiseni. 21 Kahi nheifiya hakainyaka isakame yakwe mu fyose dihema na ifiya fyo kufugila. 22 Chawelu, hasi ya malagiso chila chinhu chikusunhigwa kwa sakame, na bila ya sakame kwachaka kulekeleligwa kwa wihi. 23 Ninga hayagila simbuli sose isasigale kulanga sisunhwe kwa kwandamila sinhenda sino, ninga simbuli isenyecho sa kulanga sisunhigwa kwa nhambiko siswanu kusuma sino. 24 Kosoko Kilisito nghengile ahanhu hasunhile ahagolosigwe ne mikono hefane chawelu ninga kulanga ukwenyecho, hambiya koneka hamwedu ne Mulungu kosoko yetu. 25 Kahi siyo yelafe kwa kuwila kuwila, imutambiki mukulu foyekwingilaga Ahanhu Hasunhile, chila mwaka kwe sakame siyo iyakwe; 26 Kusigwa no nheifo, hayuwa ikumwagila kusambasigwa mikangha mingi kulawa kwikigwa kwe isinghindisi se chilunga. Ama hambiya kamwedu du kwa umemelesi we figele, kagubuligwa, yauleuse uwihi wa wanhu kwe nhambiko yakwe imwenyecho. 27 Kahi kefana awanhu fowekiligwe kufa mukangha umwedu na fowekufa uliganiso, 28 no nheifo, Kilisito naye yakafuluse kulafigwa kamwedu kulonda uwihi wa wengi, kokwija mukangha wa keli, siyo kutogomela uwihi ninga kuwahonya wose awena inghilu ya kumugojela.
1 Kosoko dilagiso dina ninga inyefu dye finhu fiswanu ifikwija kahi si futa ye finhju ifyenyecho, isidaha kuwa, kwa sinhambiko senheifo isikugendelela kulafigwa munyaka kwa munyaka, kuwagolosa wamemelekele wose awekusegelela habehi. 2 Kusigwe si nheifo, sisowile sikulekigwa kulafigwa? Kusigwa awekufuga hawasunhwa kamwedu, wasowile wakugendelela kuwana madoga go wihi. 3 Ninga musinhambiko sino mwina ngelegelsi yo wihi munyaka kwa munyaka. 4 Kosoko isikudahika isakame ya makambaku ne simhene ilewuse uwihi. 5 Kosoko iyo ichigele iKilisito foyejile muchilunga, hakagamba, “Sinhambiko ne filafwa nghafyendile, ninga umutufi utandiligwa niye; 6 mufilafwa fyo kusoma mumoto na sinhambiko so wihi nghendesigwe naso. 7 kamei hakagamba, ‘Langa, nija kugolosa, sinyenda se Mulungu,’ ifene fosandikiligwe niye muchitabu cha dilagiso.” 8 Foyagambile hachanhya, “Nghasendile hegu konela sinhambiko ne ifilafwa na sinhambiko so kusoma mumoto na sinhambiko so uwihi” (asino sikulafigwa ifene dilagisoa fodikulonga), 9 kamei hakongesa “Langa, nija kugolosa sinyenda sako.”Yakulewusa isenghonga uleke yakongese isakeli. 10 na kwa nyenda iyo chisunhigwa kugendela ichilafwa cho umutufi wa Yesu Kilisito kamwedu kosoko ya wose. 11 Na chila mutambiki yakwina chila ijuwa mufuga yakwe, yakulafa kwa kuwila kuwila inhambiko ifane iyo, iyisidaha kulewusa uwihi. 12 Ninga ichigele Kilisito foyalafile nhambiko imwedu kosoko yo uwihi ye figele fyose, hakekala mumukono wo kulume we Mulungu, 13 kamei kugojela mpaka yaweke awanghondo wakwe chigoda cho kwegamikila imigulu yakwe. 14 Kosoko kwa nhambiko imwedu hakawagolosa wasunhile we figele fyose wamemelekele. 15 Kahi Muhe Musunhile yakuhomelela ukwetu; kwa kugamba, 16 Adino no dilagano dyonikanigolosa nawo ganghaloka majuwa gose, iMundewa yakugamba: Noguma amalagiso gangu mumimoyo yawo na kuwandika mumisungu yawo, 17 kamei yakongesa, “Sikanigelegela uwihi wawo na sinhenda sawo kahi.” 18 Ahena indekelelwa ya gano, hechaka kulafa chilafwa kosoko yo wihi. 19 Hambiya, wandugusangu, kosoko china nginyo yo kwingila ahasunhile kwa isakame ya Yesu, 20 kwa usha na injila inyumi yoyagubule kosoko yetu kugendela dipasiya, idyene, kugendela umutufi wakwe, 21 na kosoko china mutambiki mukulu muchanhya ye nyumba ye Mulungu, 22 chisegelele habehi na mimoho ye chawelu mwihuwiso dimemelekele dye dihuwi, china mimoyo inyunyisiligwe na kusunhwa kulawa mu madoga go wihi na imitufi yetu haisunhigwa kwa meji amaswanu. 23 Chikolelese ngwingwingwi kulamba kwe dihuwi dyetu bila ya kuleka, kosoko iyalaganise ni muchawelu; 24 na chikilangilile aseye kwa seye na kiguma moyo mu wendo no mulimo muswamu; 25 kahi chinghaleke kutanganyila hamwedu, ifene awamonga fowasowele, ninga kiguma moyo munhu na miyagwe, na gose lugano ifene fomukona Dijuwa disegela habehi. 26 Kosoko chinghagolosa wihi chigilagila chifuluse kuhokela umanyi we chawelu, hachaka nhambiko kahi yo wihi, 27 ninga kwina uliganiso wo kogohesa na ukali wo moto uwufuluse kwikiga kosoko ya wose awekulema. 28 Imunhu iyabanile dilagiso dya Musa yakufa bila ya ubasi kwa uhomelesi wa wanhu weli hegu wadatu. 29 Si uliganiso wilihile lugano wo mukudoga uwumwagile imunhu iyamubesile imwana we Mulungu, na kuitofula isakame ye dilagano iyamusunhile, na kumutofula Muhe we dihewa? 30 Kosoko chimumanya imwene iyagambile, Kuwisila ni kwangu, no kuwisila. Na kahi, iMundewa kowaliganisa awanhu wakwe. 31 Ni chinhu cha kogohesa kugwila mumikono ye Mulungu imumi. 32 Ninga gelegeleni amajuwa ga katali, fyomwamulikiligwe, hamufinyilisa inyisuma inghulu na magayo, 33 ichigele chimonga hamutofuligwa hajelu namagayo na ichigele chimonga chomwahasigwe na waya awagoloseligwe gago. 34 Kosoko hamuwonela ubasi awohigwe, kahi hamubwedelela kuhokigwa simali senu, mumanyile mufidoga fyenu fina mwina mali iswanu lugano kahi iyikwikala majuwa gose. 35 Hambiya munghatage inginyo yenu, iyina iliho ikulu. 36 Kosoko mukuhanangigwa mufinyilise, uleke mugolose inyenda ye Mulungu na kuhokela chomulaganisigwe. 37 Kosoko chisigala chipisi chidodogi lugano, imwene iyakwija yakwija kahi ngakusululuka; 38 ninga imuchawelu wangu kokwikala kwa ihuwi, kahi yanghoya kunyuma ichidoga changu sichikwendesigwa ne imwene. 39 Ninga sichifane awo awakuya kunyuma na kubanigwa, ninga wa wose awena dihuwi na kuhonya ifidoga fyawo.
1 Hambiya dihuwi ni kuwa na chawelu ye finhu ifikuhuwiligwa, ni inyuwa na dihuwi dya simbuli isisikoneka. 2 kosoko kwa didyo awanhu wa katali hawafumiligwa ne Mulungu. 3 Kwa dihuwi chimanya fina ichilunga hachumbigwa kwa mbuli ye Mulungu uleke hata ifinhu fikoneka hafigolosigwa kulawa mufinhu ifisikoneka. 4 Kwa dihuwi Habili hakamulafila Mulungu nhambiko iswanu lugano kusuma Kaini, iyamugolose yataliligwe uchawelu, iMulungu yakuhomelela kwa kufumila ifilafwa fyakwe; hakafa, ninga kugendela dihuwi dyakwe yenghali longa. 5 Kwa dihuwi Henoko yenuligwa kuchanhya uleke yanghone difa; na nghoneke, kosoka Mulungu hakamulonda. Hambiye ugele woyowile yenhati yalondigwe hakahomelelwa fina hakamwendesa Mulungu. 6 Kahi bila ya dihuwi isikudahika kumwendesa imwene. Kosoko wowose iyakumusegelela Mulungu yagila yahuwile fina kabaho na fina yakuwengha mageleko wose awekumuhananga imwene. 7 Kwa dihuwi Nuhu, yakafuluse kujamigwa ne Mulungu muchanhya ye simbuli isisinhati soneke hakamutegelesa Mulungu na kugolosa ngalawa kosoko ya kuwahonya awanhu we inyumba yakwe; kwa dino hakaliganisa ichilunga muhasi wo uchawelu uwukwija kwa dihuwi. 8 Kwa dihuwi Ibulahimu hakafumila foyenangigwe kuluta ahanhu hoyowile yakuhokela uhasi; na hakaleuka, nghamanyile koyekwija. 9 Kwa dihuwi hakekala muisi iya ye dihuwiso, kefana mugeni, yekale mumahema hamwedu na Isaka na Yakobo, wahasi hamwedu naye we dihuwiso difane didyo. 10 Kosoko hakalangaga kumwande ku kaya iyina singindiso, imujengaji na Mugolosaji wakwe ni Mulungu. 11 Kwa dihuwi Sala imwenyecho hakahokela ludole lwo usokesi, hamwedu hakaloka ichigele che cheleko hakamuhuwila imwene muchawelu iyahuwise. 12 Hambiya kugendela munhu yumwedu, na imwene hakowa munhu muswanu ninga yefane yafile, hachelekwa cheleko chingi kifana nyelesi sa kulanga kahi nghukudaha kutala kifanadisanga idyuwile mungingi ye bahali. 13 Awano wose hawafa mwihuwi wasinhati wahokele ichalaganiswe, ninga wafuluse kuchona na kubwedelela kwa kutali, na kumanya fina hawowa wageni na wagendaji muchilunga. 14 Kosoko awanhu awekulonga simbuli sifane siso wakonesa chalinje fina wakukongha iisi yawo yo kwikala. 15 Kusigwe hawadogaga kosoko ye iisi yiyo yowaleuke, hawowa wakuwa na luneka lwa kuya. 16 Ninga ifene foyuwile, wakuhananga iswanu, iyakulanga. Nochanghone Mulungu nghakona chinyala kwinangigwa Mulungu wawo, kosoko kawatandila kaya. 17 Kwa ihuwi Ibulahimu foyagesigwe, hakamulafa Isaka yowe nhambiko na imwene iyahokele amahuwiso hakafumila kumulafa imwanagwe yumwedu, 18 imwene hailongigwa, Kugendela Isaka icheleko chako chokwinangigwa. 19 Hakadogaga fina Mulungu yakudaha kuwenula wanhu hata kulawa kuwafile; kamei kulonga kwa konesa, hakamupata imwene kunyuma. 20 Kwa dihuwi Isaka yalafa umoti wa majuwa gekwija kwa Yakobo na Esau. 21 Kwa dihuwi Yakobo, ugele wo kufa, hakamumotesa chila mwana wa Yusufu, kwa kufuga yegame ditwi mumhando yakwe. 22 Kwa dihuwi Yusufu, kundumiliso yo uwumi wakwe yatambula simbuli so kuleuka kwawo wana wa Isilaeli, na kulagisa muchanhya ya masiko gakwe. 23 Kwa dihuwi Musa, ichigele cho kwelekwa kwakwe hakafisigwa minyesi midatu ne babakwae ne ingina, kosoko hawona imwana hakowa muswanu lugano; kahi wasogohe dilakiso dye mundewa. 24 Kwa dihuwi Musa, foyakulile, hakalema kwinangigwa mwanagwe we mwana we chike wa Falao, 25 hakona ibeka yapate magayo hamwedu na wanhu we Mulungu kusuma kibwedesa muwihi kwa chipisi chidodogi. 26 Hakatala fina kutofuligwa kwakwe kosoko ya Kilisito, ni ugoli mukulu kusuma ugoli we iisi ya Misili kosoko hakalangaga ku imhongesi. 27 Kwa dihuwi hakalewuka Misili, bila ya kogoha inyono ye mundewa; kosoko hakafinyilisa na kumulanga imwene inghekoneka. 28 Kwa dihuwi haika iPasaka na kunyunyisa isakame, ileke imubanaji wa wana we nhula hanju yanghawakwafe. 29 Kwa dihuwi awanhu hawaloka ibahali ya Shamu, kifana muisi inyalile; Amba Awamisili fowagesile kulonga hawonywa munghabu wose. 30 Kwa dihuwi singhasi sa Yeliko hasugwa fosasungulitigwa majuwa mufungate. 31 Kwa dihuwi Lahabu we chilanga nghabanigwa hamwedu na waya awechaka chihuliko; kosoko hawanihokela kwa digoya awaya awasakulage. 32 Nani nongechoni kahi? Kosoko ye ichigele idikudahika kwigala simbuli sa Gidioni na Balaka na Samusoni na Yefuta na Daudi na Samwili na sa wagonesi 33 awene kugendela dihuwi hawasuma siisi isowage na wandewa, hawowa wachawelu, hawapasa ichahuwisigwe, hawagubika imilomo ye sisimba. 34 Hasima umoto na kwihuligwa mumakali ga mapanga. Hawagumigwa ludole kusuma usoka, hawowa fitungati munghondo, hawawinga amakingili ga wageni wowakitowage nawo. 35 Awanawake hawahokela wanhu wawo wafile wenuke mudifa awamonga hawasambasigwa wakulema kudoholeligwa, uleke wenuligwe fiswanu. 36 Awamonga hawagaya kwa kubesigwa na kutoigwa, kahi hata kwigaligwa kuchifungo. 37 Hwatoigwa mawe mpaka kufa, hawadumuligwa kwa misumeno hawakomigwa kwa ipanga hata kusanguligwa kifana ngholo na mhene foikusanguligwa inghingo yakwe, wagaya na kudumangila, na kona usungu, 38 wanhu ambawo chilunga chisagiligwe kuwa nawo. Hawasunguluta munyika na mumatunda, na mumapango na mashimo. 39 Ninga mugagano gose, wasidahile kuhokela dihuwiso dyowahuwisigwe, 40 kosoko Mulungu hakalongola kuchikila chinhu chiswanu lugano, uleke chose na wene chimemelekele hamwedu.
1 Hambiya, kosoko chisungulutigwa na ifunde ikulu dya wahomelesi, chike hanghanda chila ikanda isito, na idikuchikindisa chimwande, kahi chibilime munyisuma iya ikigwe hamwande yetu. 2 Chimulangisise lugano Yesu, wochichimwikile duhuwi dyetun kulawa ngonga na ku ndumiliso, imwene hakaufinyilisa umusalaba kosoko ye chinyemi ichikigwe kumwande yakwe na kubesa ichinyala, naye kekala mukono wa kulume wa digoda dye ditunyo dye Mulungu. 3 Mudogeni imwene iyafinyilise amakugutu gefane ga wakugolosa uwihi mufidoga fyawo, mungheje musoka na kusimia mumimoyo yenu. 4 Muupiligasi wenu kosoko yo wihi simukitowile hata kwitila sakame. 5 Kahi musimilwa amajamo gaya agekulanga nanye kifana wana. 6 Kasoko iMundewa yakujama ayuya woyakumwenda kahi yakumujola chila mwana iyekufumila, 7 Finyiliseni amakugutu kosoko ya kulolesigwa. Mulungu yakumugoloselani anyeye kifana wana; kosoko kwina mwana yuhoki inghekulolesigwa ne Babakwe? 8 Hambiya inghowa simukujamika, mu mbuli yowekuhangila awana wose, mugaluka mwawana mbago, kahi si wana wa kaya 9 Kongesela, china wababa we chilunga wo kuchijama seye, kahi chikuwengha chogoho. Nhafo sichidaha kuwa na chogoho kwe Baba we mimuhe no wumi. 10 Kosoko hawachijama seye kwa chigele chiguhi ifene foyawendesage awene, ninga hakachijama seye kosoko yo uswanu wetu uleke chihangile mu usunhile wakwe. 11 Kosoko chila ijamo ku chigele chakwe dikutama kahi si iswanu, ninge ku chigele chikwija dikuwegalila, mamudyo ge digoha go uchawelu ku wose awafusigwe nadyo. 12 Hambiya gololeni imikono iilehele kahi gagumeni ludole amafindi agaholole, 13 kahi koloseni njila sigoloke se migulu yenu, uleke ichinhu che chiwete chinghagiliswe, ninga ibeka chihonywe. 14 Piligaleni kuwa na digoya na chila Munhu, na wuwo usunhuile, uwene hechaka munhu iyakoyemona Mundewa yanghauswela uwo. 15 Langisiseni hanghowe na munhu wowose iyodaha kuswela dihewa dye Mulungu; uleke disina dyo usungu dingheje dituguta na kuwedasa, na wanhu wengi wagumigwe wihi kosoko ya didyo. 16 Hanghowe na munhu we chilanga kahi inghemufuga Mulungu yefane Esau, iyambase uhasi wakwe wa bosi kosoko yo ludyo lumwedu. 17 Kosoko mumanya fina kuchigele cha hamwande foyendage kuhala kumotesigwa, hakalemigwa kosongo nghapatile chigele kahi cha kulamba. 18 Kosoko simwejile kuchinhu ichikudaha kukwafigwa, umoto ukwaka, na chisa chititu na chifula fumbi, 19 na mulilo wa digunda, na ijwi idyene awaya wahulike hawatasa wanghatamiligwe mbuli ingi kahi; 20 Kosoko wasadahile kufinyilisa dilagiso dyalafigwe, “Kosoko hata dikewe dinghakwafa ditongo didyo dyotowigwa kwa mawe mpaka dufe. 21 Chawelu, ago hagonigwa gakogohesa hata iMusa hakagamba kuchichima na kogoha.” 22 Ninga nyeye mudifikila ditunda dya Sayuni na dikaya dye Mulungu imumi na Yelusalemu ya kulanga na itewa dya wamalaika wasikutalika, 23 na kumulundo mukulu wa welekwa we nghonga awandikigwe kulanga na kwe mulamusi Mulungu wa wose, na mimuhe ya wanhu wachawelu awakangale, 24 na kwa Yesu mulongesi we dilagano disha na kwe sekame inyunyisigwe iyikulonga maswamu kusuma isakame ya Habili. 25 Langisiseni munghamuleme iyekulonga. Kosoko inghowa wasakinegile ugele wowamulemile imwene iyawajamage muchilunga, lugano sichikudaha kwihuligwa aseye chinghakinega na imwene iyekuchijama kulawa kulanga. 26 Dijwi dyake kahi hadisingisa ichilunga mu ugele uwuya; ninga hambiya kalaganisa, “Kamwedu kahi nosingisa siyo ichilunga du ninga na ulanga.” 27 Inonga ino, “Kamwedu kahi,” ikonesa kuluwusigwa achiya ichisingisigwe, ichene, ichumbigwe uleke fina achiya ichisidaha kusingisigwa chisigale. 28 Hambiya kosoko chikuhokela undewa uwusikudaha kusingisigwa, lekeni chilafe ilumbo, dyochikumwingha Mulungu, ifuga ifumiligwe ye ditunyo na chogoho; 29 kosoko iMulungu wetu ni moto uwukutakamisa.
1 Uwendo we chindugu ugendelele. 2 Munghaleke kuwahokela wageni, kosoko kwa nheifo awamonga hawawaheka wamalaika bila kumanya. 3 Wagelegeleni awayo wohigwe kifana mohigwa nawo, na awekupunjigwa kifana anyeye nanye muwa mumutufi. 4 Inyitola inghigwe chogoho na wanhu wose na ugono uwe muswanu, kosoko iMulungu kowaligania awechilanga na awedihabwa. 5 Munghende mapesa mmemeswe ne finhu fomwinafo; kosoko imwenyecho kagamba, “Sidaha kukuhungukila hegu kukuleka.” 6 Hata chikudaha kulonga kwa ng'inyo “Mundewa no mutasi wangu, sikudaha kogoha; imunhu konitendaki?” 7 Wagelegeleni ifilongosi wenu, awaya wamutamileni imbuli ye Mulungu ukwenu; dogeni imigendele ye mikalile yawo, kahi yandamile dihuwi dyawo. 8 Yesu Kilisito no mwene yuyuya digulo na diyelo na wa majuwa gose. 9 Munghagiliswe na mafuso gengi fe chigeni, kosoko yendesa umoyo ugumigwe ludole na dihewa si kwa fyakudiya ifyene awaya wafyandamile fisiwatasile. 10 China ifugilo idyene wose awekutogomela dihema diya wasikuhanangigwa wadiye. 11 Kosose mifimba ye sinyama siya isakame yawo igaligwa ahamu hasunhile na mutambiki mukulu kefana nhambiko kosoko yo wihi sisomigwa kunje ye nghambi. 12 Hambiya Yesu naye hakasambasika kunje ye dilango uleke yawasunhe wanhu kokola sakame yakwe imwenyecho. 13 Nase chilawe chimulutile imwene kunje ye ngambi, chilondile matofulo gakwe. 14 Kosoko hana chichaka kaya iikwikala majuwa gose ninga chikuikongha ikaya iya iikwija. 15 Kwa kugendela imwene chimulafile Mulungu nhambiko ya ditunyo, nayo ni dimudyo dye milomo iikutambula disina dyakwe. 16 Ninga munghaleke kugolosa maswanu nakutamila agaya gomwinago, kosoko nhambiko ifane ino ikumwendesa Mulungu. 17 Wahulikeni awakuwalongosa kahi wengheni chogoho, kosoko awo wakudima ifidoga fyenu, kifana wanhu awakwijawalafa inhala, uleke wagolose nhefo kwa chinyemi ninga si kwa usungu, kosoko isowile ikumwagilani nyeye. 18 Chitasileni; chimanya fina china fidoga fiswanu, chikuhananga kuwa na migendele miswanu kusimbuli sose. 19 Nikumutani lugano, kugolosa gano uleke nyuwisigwe ukwenu chumwande. 20 Hambiya iMulungu we digoya imwinule Mundewa Yesu kulawa kuchilalo, imudimi mukule we sungholo, na we sakame ye dilagano dya majuwa gose, 21 yamugoloseni nyeye muwe mmemelekeka muchila nhenda swanu, mudahe kugolosa sinyenda sakwe iyikugolosa mulimo mugati yenu iyikwendesa hamwande yakwe kugendela Yesu Kilisito, ditunyo dyuwe kwe mwene majuwa gose. Hano. 22 Nikumutasani wandugusangu, mufumile imbuli ino ina maloleso kosoko nimuwandikilani kwa uguhi. 23 Manyeni fina imundugusetu Timoseyo kalekeleligwa, imwene yangheja chimwande chokiyona nanye hamwedu ne mwene. 24 Walamuseni wose ifilongosi wose na wasunhile wose. Iwaye awenya Italiya wakumulamusani. 25 Dihewa dyuwe na nyeye mose.
1 Yakobo mutogomi we Mulungu na we Mundewa Yesu Kilisito, kumakabila kumi na mbili gowile kuutawanyiko. Chikumulamusani. 2 Wandugu sangu inghowa mukugwila mumagesa ge hayohayo taleni kuwa chinyemi, 3 kosoko mumanya fina mugeswa ye dihuwi dyenu mukweleka ufinyilisi; 4 na kufinyilisa kwenu kwigale mabidulo makulu, uleke mukangale na kwenela, munghahungukiligwe na chinhu. 5 Inghowa yumwedu wenu kahunghukiligwa ubala, yamutase Mulungu, iyakuwengha wose kwa undewa ninga hakugombela na mokwinghigwa. 6 Ninga utase kwa kuhuwila, bila manhonge kosoko yene manhonge ni kifana mawingo mubahali, gakwigaligwa ne mheho; 7 munhu iyene milomo mili na kudogadoga muchila njila sakwe, 8 yanghamanye kohokela chinhu kulawa kwe Mundewa 9 Lekeni imundugu muholo yakitunye mukukwisigwa kwakwe, 10 na imugoli mundulisigwa yakwe kosoko awagoli wakwija wakwagilila kifana iula dya kumbago. 11 Kosoko dijuwa dikulawanisa dikusoma na kunyalisa na maula gakulagala, na uswanu ukwagilila. Nofoyuwile kwe imugoli; muchiligati che mbuli nyingi se mikalile yakwija yanyala. 12 Ibeka munhu yuya iyakufinyilisa magesa. Kosoko yangafulusa kwima kohokela nghofiya ya itunyo dye uumi Mulungu dyoyawahuwisile waya wakumwenda. 13 Munhu nomayakugesigwa yanghagambe 'nikugesigwa ne Mulungu kosoko Mulungu nghakugesigwa na wihi, kahi imwene nghakugesa munhu. 14 Ninga munhu yakugesigwa ne usulumisi wakwe imwecho, aku yakukwigigwa na kudanhilisigwa nago. 15 Kamei, auya usulumisi unghesha kukola inda. Ukweleka wihi, na uya wihi unghafulusa kukula ukweleka difa. 16 Munghadanhilisigwe wandugu sangu 17 Chila kulafa kwa undewa, hamwedu na chilafwa chimemelekele kukulawa kuchanhya, kudulika kulawa kwe Baba we ujelu we ulanga, kwe imwene kwichaka kubidukabiduka kahi chinyefu cha kubidukabiduka. 18 Muumemelesi wakwe foyendile imwenyecho hakacheleka kwa mbuli ya chawelu, uleke chuwe mamudyo gakwe ge nghonga mufyumbigwa fyakwe. 19 Mumanye aino, wendigwa wangu: Chila munhu na yowe muhufu kutegelesa, muholo kulonga, muholo kudeseka, 20 kosoko inyono yenu isikutasa ichawelu ye Mulungu. 21 Hambiya lekeni gose gehile na wihi wose na muhokele kwa uholo imbuli iya ihandigwe mugati yenu iine uludole wo kuhonya fidoga fyenu. 22 Ninga yuweni wagolosaji we simbuli ninga siyo wategelesaji muhala wakidanhilisa awecho. 23 Kosoko munhu yanghowa mutegelesaji du we imbuli ninga simutogomaji kakifana waya wakilanga ne fiyoo muchihanga 24 Kosoko wakilanga awecho howaluta na kisimilwa fowowile, 25 Ninga awaya wakulanga mwilagiso dimemelekele, dilagiso dye indekelelwa, na kwikala umo, na kuwa simutegelesaji yakusimilwa ninga iyakugolosa mulimo ayo kamotesigwa mungolosa yakwe. 26 Inghowa munhu yakiona munhu wa dini, ninga nghakulemesa dilimi dyakwe ninga yakidanhilisa kumoyo wakwe, dini yakwe munhu yo yachakachakasi. 27 Idini iswanu iichaka dilema hamwende ye Mulungu Baba no iyino: Kuwalangilila yatima na wegane mungaya yao na kinega na wihi we chilunga.
1 Wandugu sangu, mwinadyo dihuwi dye chawelu dye ditunyo dyetu dye Mundewa Yesu Kilisito kwa Kiendelela? Koleni dihuwi dye ditunyo dye Mundewa wetu Yesu Kilisito bila kiendelela. 2 Kosoko yanghengila munhu mwitewa dyenu yene sipete se sahabu na kafala fiswanu, kamei yengile yungi yachuchile, 3 na unghamulanga du yafalile fiswanu na kugamba, “Agweye wikale mwigoda,” kamei yuya mukiwa umugambe, “Keme kuya” au “Ikala hamigulu yangu.” 4 Togoleni baho hamonelele muchiligati yenu muwecho na kuwa walamusi wa madoga gehile? 5 Tegeleseni, wendigwa wangu, Mulungu sikawasagula awakiwa we chilunga kuwa wagoli mwihuwi na wahasi we undewa woyawahuwise awakumwenda? 6 Ninga anyeye mukuwabesa wakiwa. Ninga sowawo wagoli wakuwonelani nyeye? Sowene awakuwagumani mumajela? 7 Siwawo wakuliga disina diswanu dyomwinangiligwe? 8 Mukugolosa fiswanu chawelu munghadimemelesa dilagiso dyo undewa fina maandiko fogakulonga, “Mwende miyago kifana gomwecho.” 9 Kosoko halika ukonelela, ukugolosa wihi na ukuhomelesigwa ne dilagiso fina kwa mwihi. 10 Kosoko wowose yakukola malagiso gose ninga yaduke ilagiso dimwedu basi kaduka gose. 11 Kosoko munhu nomoyakugamba, “Unghagolose dihabwa,” kahi yakugamba, “Kukoma mwiko.” Hambiya halika nghukugolosa dihabwa ninga ukukoma, basi kugaluka mubanaji we dilagiso. 12 Longeni na kugagolosa kifana wanhu wamanyile wakwijawaliganisigwa ne dilagiso dye ndekelelwa. 13 Kosoko Uliganiso ukuwa wichaka ubasi kwe munhu yechaka ubasi, ninga ubasi wokitunya muchanya ye uliganiso 14 Ina uswanu waki, wandugu sangu inghowa kwinadyo ihuwi ninga kwichaka sinhenda? Dihuwi muhala dyodaha kukuhonya? 15 Inghowa lumbudyo ama mundugu sako kamwasi kechaka na ndiya, 16 kamei yumwedu wenu yamugambe luta, “Genda mheho, kotele moto ukaya na kadiye wigute,” bila kumwingha chakudiya na goyakuhananga, togola baho kugolosa choni? 17 Ihuwi muhala disikutasa chinhu, dufa. 18 Ninga yanghagamba, “Agweye kwina dihuwi aniye miyago nina nhenda.” Nyonese dihuwi dyako idichaka sinhenda, kamei aniye nani kwa nhenda sangu nokonesa dihuwi dyangu. 19 Ukuhuwila fina Mulungu yumwedu; ukugolosa fiswanu. Ninga hata magini gakuhuwila nheifo ninga na kuchichima. 20 Ukuhananga umanye, agweye gomunhu kumanya fina dihuwi dichaka sinhenda ni musilatungulu? 21 Somwene Ibulahimu kukuyetu yataliligwe ichawelu foyamulafa mwanagwe Isaka yowe sadaka hokufugila? 22 Ukona fina dihuwi dyatogoma mulimo hamwedu na nhenda sakwe na dihuwi hadija kumalagisa mulimo. 23 Ninga matulumo gakumemelekela gagambile, “Ibulahimu hakamuhuwila Mulungu na hakataliligwa chawelu,” na hakenangigwa mbuyakwe we Mulungu. 24 Ukona fina munhu yakutaliligwa chawelu kwa nhenda ninga siyo kwa dihuwi muhala. 25 Nonheifo, hukona Ilahabu yuya we dahabwa foyataliligwe nhenda swanu kwa kuwahokela wageni na kuwegala kwa njila ingi? 26 Ni kifana mutufi wichaka muhe ukuwa ufa, nheifo ihuwi dichaka nhenda dufa.
1 Wandugusangu, munghowe wafusa wengi, kosoko mumanya fina aseye ichikufusa choiganiswa na uliganiso mukulu lugano. 2 Kosoko chose chikugolosa matoso mengi, na inghowa hechaka munhu yakulosa matoso munonga yakwe, ayo ni munhu yaliganile, iyekudaha kisisa umutufi wakwe. 3 Inghowa chikoha imilomo ye sifalasi, uleke sichogohe, chikudima imitufi yawo yose. 4 Langeni simelikebu naso; hata inghowa ni nghulu lugano na sikukundugisigwa na imheho inghali, sikulongosigwa na sitelingi ndodogi lugano kokose koyekwenda idelefa. 5 Nheifo kahi dilimi ni chilungo chidodogi lugano, nadyo dikitogola kwa matogolo makulu. 6 Kahi dilimi ni moto. Dilimi dikigwa muchilunga cho uwihi, mufilungo fyetu, nadyo nodikuguma umutufi wose wihi, ukwasa moto chimilila we vilungo fyetu nadyo dikwasigwa moto na jehanamu 7 Kosoko chila itaho dya ikewe, na dya fidege, na dya ifikutambala, na dye finhu fyuwile mubahali, fikufugika, nafyo fyohigwa na wanhu 8 Ninga hechaka iyodaha kufunga dilimi ni wili uwusikubwihila, wina sumu iikukoma. 9 Kwa didyo chikumutunya Mundewa na Baba, and kwa didyo chikuwaligitisa awanhu awombigwe kifana Mulungu. 10 Umulomo umwedu ukumotesa na kuligitisa. Wandugusangu isagile kugolosa nheifo. 11 Nhafo, inhoko kulawa muchosanda chimwedu yodaha kulafa meji gemulile na ageusungu? 12 Umutini wodaha kulela seituni wandugusangu, hegu umusabibi kulela tini? Nonhaifo inhoko isidaha kulafa meji ga munyu na meji gemulile. 13 No nani iyena mahala na misungu mugati yenu? Na yonese imilimo yakwe kwa sinhenda sakwe siswanu, mu uholo wa mahala. 14 Ninaga munghowa na finju uwina usungu na ulefi mumimoyo yenu, munghakiyone, kahi munghalonge udasi muchanhya ye chawelu. 15 Ubala wo si uya uwukudulika kulawa kuchanhya, ninga we chilunga, we sinhenda se chimunhu, na Luhoma. 16 Kosoko ahena ifinju na ulefi no hena matemanuko, na chila nhenda ihile. 17 Ninga ubala uwukulawa kuchanhya, bosi ni swanu, kahi ni wa digoya, wa uholo, tayali kutegelesa simhuli sa wanhu, wina ubasi na mamudyo maswanu, wichaka, finju, wichaka unafiki. 18 Na dimudyo dyo uchawelu dikuhandigwa mu digoya na waya awekugolosa digoya.
1 Inghondo ikwigaligwa na choni, choni chikwigala kitowa mugati yenu? Singhamba usulumisi wenu muwecho wuwile mufilungo fye mitufi yenu? 2 Mukusulumila ninga musikupata gomukuhananga, hambiya mukoma na kusulumila kwa fibi, ninga musikupata hata mukitowa na kwika nghodo. Hamukupata kosoko musikutasa. 3 Mukutasa ninga musikupata kosoko mukutasa fibi, uleke mutumie musinhenda sso usulumiso wihile. 4 Anyeye mufiyumbe fisikuhuwilika! Musimanyile fina kikola mbuya ne chilunga ni kuwa munghondo ne Mulungu? Kosoko iyo wowose yakuhanaga kuwa mwimbuya ne chilunga yakigolosa imwecho kuwa munghondo we Mulungu. 5 au mumanya matulumo gakulonga chaka gagambile; Yuyo yakona finju muchanya ye muhe iyagolose kwikala mugati yetu? 6 Ninga yakulafa dihewa dingi; kwahiyo ikugamba Mulungu yakuwapinga awakiinula ninga yakuwengha dihewa awaholo. 7 Muhulikeni Mulungu. Mlemeni luhoma naye kuwatijani. 8 Msegeleleni Mulungu naye kowasegelela nyeye. Sunheni mikono yenu, anyeye mwine wihi, safisheni mimoyo yenu, anyeye wanhu we milomo mili. 9 Hongeseni na kulila. Chiseko chenu chuwe kuhongesa chinyemi chenu chuwe chililo. 10 Muwe waholo hamwende ye Mundewa naye kowenulani. 11 Munghakilonge fibi nyenye kwa nyenye. Kosoko imwene yakulonga gehile muchanya ye munduguse, yakudilonga dilagiso na yakuliganisa dilagiso. Ninga inghowa ukudiliganisa dilagiso basi gweye simugolosaji we dilagiso ninga mulamusi. 12 Kwina mulafaji we dilagiso yumwedu du kahi nomuliganisi imwene iyakudaha kuhonya na kubana. Ninga kwanani ukumulamula imiyago? 13 Wijeni hambiya anyeye mukugamba, Diyelo ama nhosiku choluta akuya na kukaya iya na kugolosa nhafi na nhafi na kugolosa biyashala; 14 ugele uwo musimanyile iyo inghousiku. Mikalile yenu ni choni, kosoko nyeye mwa maluwa gakubota kwa chipisi na kunyala. 15 Mukinhangagigwa mugambe Mundewa yanghenda chogolosa nhafi na kuluta nhafi 16 Kifana fomukitunya kitunya. Kitunya kose kwa namna ino kwiha. 17 Kosoko wowose yamanyile amaswanu ninga yakuduga kugagolosa, ukwakwe munhu yo ni sambi.
1 Tegeleseni nyeye muwagoli, lileni na kuhongesa kosoko ya magayo agakwanga gawejileni. 2 Ugoli wenu udoda kamei suke senu siidigwa na matele. 3 sahabu yenu ne ifesa ikola kutu na ikutu yakwe yokwija kuwadiyani ne mitufi yenu kifana moto. Mukiikila ugoli wenu mwijuwa dye ndumo. 4 Langeni mushahala wa awakulima wakugola migunda yenu, gomukiikile, ne chililo che wagolaji chimufikila Mundewa we inghondo. 5 Hamwikala muchilunga kwa mikalile ya anasa; munonesa mimoyo yenu muchanhya ye dijuwa dye kuchinjigwa. 6 Mulamula na kukoma we sinhenda siswanu, ninga nghawatendile chinhu. 7 Finyiliseni wandugu sangu mpaka kwija kwe Mundewa. Langeni kifana mukulima foyakugojela kugola kwa mafuno gakwe ge chilunga, mpaka gapate ifula ya nghonga ne ya ndumo. 8 Anye nanye muwe na ufinyilisi nheifo. Mwime mumimoyo yenu, kosoko dijuwa dyokwija Mundewa dyahabehi. 9 Munghakinghunghulikile nyenye kwa nyenye wandugu, uleke mungheje mulamuligwa; langeni, Imulamusi kema mumilango. 10 Uwe kifana nonga ya kwandamila ye magayo na ufinyilisi mukulu wa wagonesi wagonese mwisina dye Mundewa. 11 Langeni chikuwenanga ibeka awaya awafinyilisi. Hamuhulika ufinyilisi wakwe Ayubu, na hamona idikusudi dye Mulungu, ifene foniwahuluma na ubasi. 12 Ninga muchanhya ya gose wandugu sangu munghakilahe, kwa ulanga kahi kwa isi ama kilaha kwa namna yoyse iya, ninga heye yenu yowe heye na hata nayo yuwe hata, uleke mungheje mukugwila muulamusi. 13 Kwina munhu wowose yakwidasika mugati yenu? Na yatase. Kasangalala? Na yembe sinyimbo sa kutunya. 14 Mugati yenu mwina munhu mutamu? Na yawenange wasehe we dikanisa, wamutasile, wamubake na mafuta mwisina dye Mundewa; 15 na akuya kutasa kwa ihuwi komuhonya mutamu yuya, na hata inghowa hakagolosa wihi kolekeleligwa. 16 Hambiya lambeni wihi chila munhu kwe miyagwe, na kitasila nyenye kwa nyenye, uleke muhonyigwe. Kosoko mataso gemuchawelu gakwigala mabidulo makulu. 17 Eliya hakowa munhu fina seye, ninga hakatasa ifula inghatonye, na kwa minyaka midatu na minyesi mutandatu isilafile hata ditwenhe. 18 Kamei hakatasa lwa keli hoitonya na chilunga hochikweleka. 19 Wandugu sangu munhu wowose mugati yenu yanghagilila kutali kulawa kuchawelu kamei yumwedu wenu yamuwise, 20 manyeni fina ayuya yamuwise imwihi yuya kulawa musambi kohonya chidoga chakwe ne difa na sambi sakwe nyingi sogubikigwa.
1 iPetulo mutumigwa wa Yesu Kilisito kuwanhu wasaguligwe, wekale hayohayo musiisi so ugeni ako Ponto, Galatiya, Kapadokiya, na Asiya na Bisiniya, 2 awasaguligwe na kumanyigwa na Mulungu Baba na kusunhigwa na Muhe uleke wamuhulike Yesu Kilisito na kutwekeseligwa sakame yakwe: Mboto ne dihewa dimemelekele nanye. 3 Yatunyigwe Mulungu Baba we Mundewa wetu Yesu Kilisito! Iyacheleke lwa keli kwa kuchonela ubasi lugano uleke chuwe na ihuwi dine uumi wo kulawa kwakwe Yesu Kilisito muchilalo, 4 Chipate na ubasi uusikubanika wichaka wihi uusikunyala uwikigwe kulanga kosoko yenu. 5 Anyeye mukidimigwa kwa ludole lwe Mulungu kulokela mwihuwi, uleke mupate uhonyi ufuluse kugubuligwa muchigele che ndumo 6 Mokuwa na chinyemi lugano chigele chicho, ingawa hambiya kwa chipisi chidodogi soko ni lasima muwe mwichaka chinyemi kosoko ya magesa ge hayohayo. 7 Kosoko kugesigwa kwa dihuwi dyenu kwina maliho makulu kusuma sahabu ikwagilila ingawa ikugesigwa kwa moto, uleke konekane fina kwina ilumbo na itunyo na chogoho mukugubuligwa kwakwe Yesu Kilisito. 8 Ninga mukumwenda ingawa musimonile, hambiya mumuhuwila na kubweda kwa chinyemi chikulu chine lutunyo, 9 fina fomuhokele uhonyi we fidoga fyenu kulokela dihuwi dyenu. 10 Awagonesi awagonese imboto yenu hawaikongha na kuyusilisa na kuihananga imbuli yo kwihuligwa; 11 Wamanye no chigele chihoki choneswe ne Muhe we Kilisito mugati yawo, kugonesa magayo goyakwija yapata Kilisito ne ditunyo dyokwandamila. 12 Howagubulilwa fina sikosoko ya milimo yawo awecho, ninga kosoko ya nyeye mumbuli sino sikuhubiliigwa hambiya kulokela waya wawegalile imbuli swanu kwa Muhe Musunhile yalawile kulanga (mbuli sikwendigwa kulangigwa hata na Wasungula)! 13 Hambiya kiyoheni mumisungu yenu mufulise na kwika dihuwi dyenu mudihewa dyo mukwija mukwinangigwa ugele Yesu Kilisito foyakwija yagubuligwa. 14 Kahi kifana wana mukuhulika munghakiliganise na umelo wenu wakatali na ubwalasi. 15 Ninga kifana iyawenangeni fonimusunhi nanye yuweni wasunhile, mumikalile yose. 16 Kosoko itulumigwa kugamba “Mokuwa wasunhile kosoko niye namusunhile”. 17 Halika mukumwinanga Baba yuyo iyakulamula wanhu bila konelela basi gendeni kwa chogoho muchigele chenu kifana si wakaya. 18 Manyeni fina hamwihuligwa musinhenda sihile sa wababa senu si kwa finhu fikubanika kifana fesa na sahabu, 19 ninga kulokela sakame ya iliho ikulu ya Kilisito, kifana ye mwana we ngholo iyechaka chilema kahi ikofu, 20 imwene hakamanyika kulawa kunghali kumbigwa nghindisi se chilunga, kahi hakagubuligwa kundumo kosoko yenu nyeye. 21 Kulokela imwene mukihuwisa mwi Mulungu iyamwinuleni kulawa muchilalo na kumwinagha itunyo, uleke dihuwi dyenu ne nyihuwisa yenu fuwe mwi Mulungu. 22 Hambiya musunhigwa fidoga fyenu kwa njila ya kuhulika kwenu ichawelu kwa wendo mujelu we chindugu, kiyendeni nyenye kwa nyenye kwa moyo mujelu. 23 Kokoso mwelekwa lwa keli si mbeyu ikubanika ninga iisikubanika hata kwa kulokela mbuli nyumi imile mwi Mulungu. 24 Kosoko, “Mutufi wose ukifana manyasi na dituyo dyakwe dyose dikifana iluwa dya inyagala, manyagala gakubota maluwa kamei gakulagala. 25 Ninga imbuli ye Mundewa ikwima minyaka na minyaka.” Na imbuli yo noiya ihubiliigwe ukwenu.
1 Ninga tageni kutali wihi wose na hila, chimwefe, gele, na kisongesela, na maligo gose. 2 Kahi kifana wana wadodogi melemeleni mele amaswanu ge chimuhe, kosoko kulokela gago mokulila uhonyi wenu. 3 Kosoko chinomola uswanu we Mundewa. 4 Mulutileni imwene idiwe dimumi dilemigwe na wanhu, ninga kwe Mulungu disaguligwa kahi dya iliho ikulu. 5 Nanye kifana mawe ge mumi mujengigwa muwe nyumba ya Muhe ukuhani usunhile, mulafe sadaka sa Muhe sikwendigwa ne Mulungu kulokela Yesu Kilisito. 6 Kosoko itulumwa mumaandiko kugamba, “Langa nikwika Sayuni diwe dya munghanda disaguligwe dye diliho dikulu na chila iyakumuhuwila nghakupata chinyala.” 7 Ukwenu nyeye muhuwile kagaluka wa iliho ikulu ninga kwa wasikuhuwila, “Idiwe diya diya dilemigwe na wajensi digaluka iwe ikulu dya munghanda,” 8 Na kahi mawandiko gamonga nago gagamba: “Mudiwe umo wotowa nghwal, iwe dya ikangalawe” idikuwakinya kosoko wasendile kuhulika imbuli yowahanagwe kugolosa. 9 Ninga nyeye musaguligwa, lukolo lwe Undewa we chikuhani, ditaifa disunhile, mwa wanhu we Mulungu uleke mutamilise nhenda singhulu isakwe imwene yawenangileni kulawa mulwisa kwija kumwanga wakwe mukulu. 10 Ktali hamuwa siyo wanhu ninga hambiya wanhu we Mulungu, hamuwa mwichaka ubasi ninga hambiya muhokela ubasi. 11 Wandugu sangu nikuwatasani nyeye muwageni na wagendaji mwikale kutali ne sinhenda so umelo wo mutufi isikulemana na chidoga. 12 Muwe na igendele miswanu mugati ya wamembe uleke inghowa wakulonga gehile muchanhya yenu, fowakona sinhenda senu siswanu wamutunye Mulungu mwijuwa dyo kwija kwakwe Mundewa. 13 Hulikiseni wene ludole ne wasilikal; ikosoko ye Mundewa. 14 Ama awakutawala kosoko watumigwa ne Mulungu kuwatosa igelo awakugolosa nhenda sihile, na wawatunye wakugolosa maswanu. 15 Kosoko nofoyakwenda iMulungu fina kwa kugolosa maswanu mudahe kuulegusa uwihi na ubwalasi wa wanhu. 16 Ikaleni mundekeleligwa kifana wanhu walekeleligwe, ninga munghagolose wihi kosoko muwa mundekeleligwa, ninga kifana watumigwa we Mulungu. 17 Wahulikeni wanhu wose na wendeni wayenu wo mwinawo mwi kanisa, mogoheni Mulungu, hulikiseni wakulu, yandamileni magayo ga Kilisito 18 Anyeye watumwa wahulikiseni wakulu wenu kwa chogoho chose siyo du kwa waya waholo na waswanu ninga hata waya awakali. 19 Kosoko ni fiswanu munhu kufinyilisa magayo kosoko ye Mulungu nomo ukugaya wichaka dikosa. 20 Kosoko kwina iliho dyaki nomo ukufinyilisa magayo kosoko ya nhenda sako sihile? Ninga halika ukufinyilisa magayo kosoko ye Mulungu basi Mulungu imwecho kokumotesa. 21 Umo nomo mwinangiligwe kosoko Kilisito imwecho hakalokela umo mumagayo kosoko yenu, kawalekelani mbasi mwandamile. 22 “Ghagolose sambi kahi wihi usoneke mumulomo wakwe.” 23 Foyaligigwe nghowise iligo, foyasambasigwe nghatowile munhu. Ninga hakamuhuwila Mulungu imulamusi yechaka konelela. 24 Imwene imwecho hakenula sisambi setu mumutufi wakwe mumusalaba, uleke chufe musisambi na chuwe womi munhenda swanu. Kwa kutoigwa kwakwe anye muhona. 25 Kosoko hamuwa kifana ngholo sagilile, ninga hambiya muya kwe mudimi na mulangisisi we fidoga fyenu.
1 Anye nanye muwanawake wahulikeni wagosi wenu uleke halika wauko awasikwandamila imbuli wayandamile kwa kulanga nhenda swanu sa wanawake wawo, 2 nomoo wakona uswanu na chogoho mumikalile yenu. 3 Kahi kihamba kwenu kunghowe kunje yo mutufi kwa njwili sa sahabu na kufala fiswanu, 4 ninga uswanu wo kihamba kwenu uwe kulawa kusi ye fidoga fye mimoyo imiswanu ikwendesa hamwande ye Mulungu. 5 Nhafi nofo yowile kuwanawake awasunhile wene dihuwi kwe Mulungu wakihambage awecho na kuwahulika wagosi wawo, 6 kifana Sala foyamuhulika mugosi wakwe Ibulahimu na kumwinanga mundewa. Na hambiya nyeye mugaluka wanagwe munghagolosa maswanu bila itisi dyodyose. 7 Nheifo anye nanye muwagosi ikaleni fiswanu na wanawake senu na kumwingha mwanamuke chogoho kifana chinhu chichaka ludole kifana wahasi we imboto yo uumi, uleke kutasa kwenu kunghakindisigwe. 8 Kwa kumalagisa mose muwe na lugota wa chimuhe, ubasi, wendo munhu na miyagwe, moyo muswanu na uholo. 9 Munghakigolosele gehile kwa gehile ninga badala ya wihi kigoloseleni maswanu na kimotesa kosoko nogomwinangiligwe kumboto. 10 Kosoko iyakwenda uumi na kuwa na majuwa maswanu yakinege dilimi dyakwe dinghalonge gehile na milomo yakwe inghalonge wihi, 11 yabiduke kuuleka uwihi na kugolosa uswanu; yakonghe dihewa na kudyandamila. 12 Kosoko meso ge Mundewa gowa kuwena sinhenda siswanu na nghutwi sakwe sigubuka kutegelesa mataso gawo, ninga chihanga che Mundewa chuwa kwa waya wakugolosa wihi. 13 Nonani yakwanga yawabulage halika mukugolosa maswanu? 14 Ninga hata munghowa mukugaya kwa kugolosa maswanu momotesigwa, munghogohe gowakogoha. 15 Ninga mumimoyo yenu mwingheni Kilisito chogoho kifana Mundewa, majuwa gose yuweni meso mudahe kumutamila chila munhu dihuwi dyomwinadyo, kahi goloseni kwa uswanu na ujelu. 16 Yuweni wanhu waswanu na wakuhuwilika uleke nomowakumulongani fibi fowakona nhenda senu swanu sa Kilisito wapate chinyala. 17 Kosoko ni fiswanu kutabika soko ya maswanu mana ayo noyo yakwenda Mulungu kuliko kutabika kwa kugolosa wihi. 18 Soko Kilisito naye hakofa lumwedu du soko ya sambi, iyechaka wihi kosoko ya wene wihi uleke yachigale kwe Mulung, hakofa chimutufi ninga mumi chimuhe. 19 Hoyoluta kuhubiliya fidoga fuwile muchifungo. 20 Fidoga fifyo ifisendile kumuhulika Mulungu muchigele foyawagojele kulamba mumajuwa ga Nowa, kulawa kujengigwa disafina dingiligwe na wanhu wakefu, nawo ni munana muhala, awahonyigwe kulokela meji. 21 Aino ni mbasi ya ubatiso ukuwahonyani nyeye majuwa gano, siyo kulegusa wihi wa mutufi du, ninga uswanu we fidoga kulokela kulawa kwa Yesu Kilisito muchilalo, 22 iyalutile kulanga na kowa mukono wo kumoso we Mulungu hamwedu na malaika, uludole na udaha wose ukumuhulika imwene.
1 Hambiya kosoko Kilisito hakagaya mumutufi nanye kiyoheni muwecho mwidoga didyo, kosoko iyakugaya kalekana na sambi, 2 kosoko kulawa hambiya munghekale kahi munghenda se umelo se chimutufi ninga fina foyakwenda Mulungu. 3 chigele chomwikale munhenda senu sihile se chilunga sidumila hambiya, kosoko hamugenda muwihi, umelo wihi, ulefi, ukobo na kufuga masikimunhu. 4 Wakujuma kosoko wakona anyeye musikwandamila mbuli sawo sihile na kosoko iyo wakuwaligani. 5 Ninga wakwija walafa nghala ya chila mbuli kwe imwene Imulamusi we fyose fimumi na fufile. 6 Kosoko iyo nochileka imbuli swanu ihubiligwe mpaka kuwofile, uleke waliganiswe chimutufi kifana wanhu fowakuliganisigwa uleke wowe womi chimuhe kifana Mulungu fonimumi. 7 Ninga indumo ye chila mbuli yahabehi, basi mwikale meso na fiswanu na mumawombi genu muwecho. 8 Kwa kongesa mwikale muwendo kiyendeni nyeye kwa nyenye, kosoko uwendo ukugubika masambi mengi. 9 Kihokeleni musikaya senu nyenye kwa nyenye bila kukalala. 10 Yuweni wanhu waswanu mukitogomele chila munhu na miyagwe fina finafoyahokele chipawa kwe Mulungu. 11 Iyakulonga yalonge kifana yakulonga mbuli ya Mulungu, na iyakutogoma yatogome kwa ludole lwo yenghigwe ne Mulungu, uleke Mulungu yatunyigwe mugose kulokela Yesu Kilisito. Mwiimwene mwina itunyo na udaha wa majuwa gose. Hano. 12 Wandugu sangu munghone ijumo magayo gowile mugati yenu gakuwapata kuwagesani, kifana chinhu chisha. 13 Ninga sekeleleni kosoko mukuhangila magayo goyapata Kilisito uleke mwije muwe na chinyemi na kubwedelela mwitunyo dyo kugubuligwa kwakwe. 14 Inghowa mukuligigwa soko ye disina dya Kilisito, mwina ibeka, kosoko iMuhe we ditunyo imwene we Mulungu yakwikala muchanhya yenu. Ukwawo wene keha, ninga ukwenu, kena itunyo. 15 Ninga munghaleke munhu wa ukwenu yagaye kifana kakoma munhu, ama muhiji, au yagolose mbuli ihile, hegu kifana munhu yendeyogolosa mbuli sa wamonga. 16 Ninga inghowa yakutabika kosoko ni muKilisito basi yanghone chinyala, mutunye Mulungu kosoko nokwinula disina dyakwe uko. 17 Kosoko chigele chifika cho uliganiso we Mulungu kukongela munyumba yakwe, hambiya halika ukukongela ukwetu togoleni yokuwa nhani kuwanhu awasikwenda kuhulika imbuli swanu ye Mulungu? 18 Na, “Imuchawelu yanghahonyigwa kwa tabu togola yokuwanhani kwa yuya inghamumanyile Mulungu ne yene sisambi?” 19 Kosoko iyo basi waya awakugaya kusoko ye Mulungu wamwikile Mumbi imuchawelu dihuwi, nomowakugolosa maswanu.
1 Hambiya fina niye nani fonimusehe na muhomelesi wa magayo ga Kilisito, nheifiya kwa kuhangila ditunyo digubuligwe, nikuwatasa dedede wasehe woile ukwenu 2 kudima singholo se Mulungu suwile ukwenu, siyo kwa kudindilisigwa ninga kifana Mulungu foyakwenda mugolose 3 munghowe fitunghati kwa waya womukuwadima, ninga muwe ifuso kusingholo so mukudima 4 na mudimi mukulu foyakwijayasololekela mokwija mufasigwa nghofiya ye ditunyo iisikunyala. 5 Nheifo anye nanye muwajelelo mugahokele malamusi ga filongosi, mose kiyoheni uholosi uleke mukitase munhu na miyagwe, “Kosoko Mulungu yakulemana na awekiyona ninga yakuwengha mboto awaholo.” 6 Yugwileni hasi yo mukono mukulu we Mulungu uleke yawenuleni muchigele chakwe. 7 Mutwikeni imwene manghonge genu gose kosoko noyakuwalangilila. 8 Gendeni fiswanu na kuwa meso kosoko imulhi wenu luhoma kakifana simba yakugendagenda kumukongha munhu yamumese. 9 Mlemeni, imeni ngwi mwihuwi dyenu kosoko mumanye fina magayo gakumemelekela kuwandugu senu woile muchilunga. 10 Na fomukumala kutabika kwa chigele chidodogi Mulungu we imboto yose iyamwinangeni kuditunyo dyakwe dya minyaka na minyaka duwile muKilisito, yuyo imwecho kowoisilani, kowatasani, kowagumani ludole na kuwemisani. 11 Kwe imwene kwina ludole minyaka na minyaka. Hano Mulamuso wo kumalagisa 12 Kulokela Silowano wonikudoga fina ni munhu muchawelu, niwandika baluwa ino ndodogi kuwagumani ludole na kulonga fina ayino no mboto ye chawelu ye Mulungu imeni ngwi mu iyo. 13 Dikanisa duwile hano Babeli dikuwalamusani na mwanangu Maluko. 14 Kilamuseni munu na miyagwe kwa mulamuso wa wendo. Dihewa dyuwe nanye mose muwile mugati ya Kilisito.
1 Simoni Petulo imutumwa na Mutumigwa wa Yesu Kilisito, kuwose wena dihuwi fina idyetu duwile muchawelu ye Mulungu wetu ne Mundewa wetu Yesu Kilisito: 2 Imboto ne dihewa dyongeseke ukwenu muumanyi we Mulungu ne we Mundewa wetu Yesu. 3 Uludole lwe ulungu lwakwe uwetu uchingha finhu fyose muumi, na mwe chimulungu kulokela umanyi wakwe yachinangile mwitunyo dyakwe imwecho na uswanu wose. 4 Kwakuchingha iliho ikulu na ihuwiso ikulu, fina kulokela gano chidahe kinega uwihi wuwile muchilunga kosoko ya usulumisi, uleke muwe wahangi we iyasili ye chilungu. 5 Kosoko iyo goloseni chigosi kwima mwihuwi kwa nyikala swanu na nyikala swanu muumanyi, 6 na muumanyi hamwedu ne chiasi, ne chiasi hamwedu na ufinyilisi, na muufinyilisi umo ulungu, 7 na muulungu umo uwendo we chindugu, na uwendo we chindugu hamwedu na uwendo. 8 Kosoko finhu fino finghowa ukwenu na kumema, fikuwagolosa munghowe wadoba na awasikweleka mamudyo go umanyi we Mundewa wetu Yesu Kilisito. 9 Kosoko wowose iyakuhungukiligwa finhu fino ni mudula hakudaha kona finhu fuwile kutali kahi kasimilwa kusunhigwa kwa wihi wakwe uya wa katali. 10 Hambiya wandugu sangu, konyeni kumanya lwinango lwenu na kusaguligwa kwenu kosoko munghagolosa nheifo musikudaha kutoa nghwalo.. 11 Kosoko kwa njila yiyo, mokwinghigwa luneka lwa kwingila muundewa we Mundewa wetu, Mwihula Yesu Kilisito. 12 Hambiya nowagelegesa simbuli asi, hata inghowa mufulusa kusimanya na kwenesigwa ne ichawelu ijile ukwenu. 13 Nani nikona fiswanu, muchigele nuwile mumutufi uno kuwagelegesa, 14 kulawa fonamanya fina kufa kwangu kumala kwija kifana Mundewa wetu Yesu Kilisito foyanyonese fiswanu. 15 Na nogolosa chila ludole uleke kukuleguka kwangu anyeye mudahe kugelegela mambo gano. 16 Kosoko sichandamile mbasi situngigwe kwa ubala ugele fowumanyike ukwenu uludole na kwija kwe Mundewa wetu Yesu Kilisito, ninga chigaluka wahomeleswi wonile kwa meso ukulu wakwe. 17 Kosoko hakahokela chogoho na itunyo kulawa kwe Mulungu Baba chigele dijwi kulawa mwitunyo dikulu fodyalonga kugamba, “Ayuno no Mwanangu, Mwendigwa wangu wonyendesigwe naye lugano.” 18 Aseye chiwecho hachidihulika dijwi dijo kulawa kulanga, ugele wochowile naye mwitunda disunhile. 19 Hambiya china mbuli ye ugonesi uwecho ukangale. Kahi yokuwa fiswanu inghowa motega sighutwi mudidino kifana taa ikwaka mwichisa, mpaka dijuwa dilawe, na inyelesi ya kumugingu kumulika mumimoyo yenu. 20 Bosi ya gose mumanye dino, fina kwichaka ugonesi wa Mawandiko ulawile muutapita wa munhu imwenyecho, 21 kosoko hechaka ugonesi wowose winjile kwa nyenda ya munhu, ninga wanhu hawalonga kwa kulongoswa na Muhe Musunhile kulawa kwe Mulungu.
1 Ninga walimu wo udasi hawalawanisa mugati ya wanhu, kifana ukwenu fokukwanga nako kuwe na walimu wa udasi, awakwigisa kwa ubala madoga gakubana. Wakumulema mpaka Mundewa yawagulile na kiigalila awecho kwangamila kwa habehi. 2 Na matewa wokwandamila njila ya wihi, na kosoko ya walimu wano wo udasi injila ye chawelu yoligigwa. 3 Na mumelo wawo uwo wopata chinhu ukwenu kwa mbuli sa udasi. Uliganiso wawo ufuluka kulongigwa kulawa katali, siyo ya chaka na kwangamila kwawo hakukuleka. 4 Hambiya inghowa Mulungu hawalekile amalaika waya wagolose wihi, ninga hakawaguma kumoto na kuwoha muchifungo kusi ye dichisa mpaka uliganiso wije; 5 na inghowa hachilekile ichilunga chiya cha katali, hakamuhonya Nuhu, imuchawelu, hamwedu na wamonga mufungate chigele choyegale mafaluko muchilunga che wihi; 6 na kwa kubidula sikaya sa Sodoma na Gomola kuwa ifu hakawaliganisa uleke yuwe mbasi kuwanhu awesimumanyile Mulungu, 7 hakamuhonya Lutu, imuchawelu yendekwidasigwa ne wihi na awakubana. 8 ( kosoko ayuya imuchawelu yekale nawo ijuwa mpaka ijuwa hakakiidasa muuchawelu wakwe muchidoga kosoko ya nhenda sawo fina hakona na kuhulika), 9 kahi Mundewa kamanya kuwahonya wanhu wakwe kulawa mumagesa, na kuweka wechaka Mulungu mumagayo mpaka dijuwa dye uliganiso 10 lugano awaya wakwandamila usulumisi ne wihi wo umutufi na kubesa udaha. Wanhu wene ludole na kwenda, wasikogoha kuliga imutunyigwa 11 ninga malaika, wakulu na udaha na ludole, hawakuwasongesela kuliganiso we Mundewa. 12 Wanhu wano wakifana manyama ga kumbago gechaka, misungu gelekwa na kukoligwa na kukomigwa. Wakuliga gowasimanyile, na wakwija wakwagilila kifana makewe ga kumbago, 13 kugaya kokuwa kwawo kosoko ya kugolosa gehile. Wakutala kulewa kwawo nhemisi ni chinhu chiswanu. Wagaluka matonhe na wihi, na chinyala mufyakudiya fyenu fyo uwendo nomowakudiya nanyeye. 14 wena meso gamemile chilanga, wasikuleka kugolosa wihi. Wakwagilisa fidoga ifichaka ludole. Wene mimoyo ifusigwe ukobo. Wana waligitisigwe! 15 Waleka injila igoloke na wagilila, wakwandamila njila ya Balaamu mwana wa Basoli, yendile maliho ge wihi, 16 ninga hakagombeligwa kosoko ya nhenda sakwe sihile, dipunda isidikudaha kulonga hadilonga kwa ijwi dye chimunhu na kulemesa ugonesi uya. 17 Awano ni nhyoko sichaka meji na mafunde gakwandamila mheho; wene wekiligwa dichisa ikulu. 18 Kosoko wakulonga nonga ghulu so kitapa, kwa usulumisi we chimutufi na wihi, wakuwadanhilisa wanhu wakongile kuwatija waya wakugenda mudasi. 19 Wakuwahuwisa undekelelwa, ninga awene awecho ni watumwa wa wihi; kosoko wanhu ni watumwa kwa yuya yakuwagendesa. 20 Kosoko inghowa, fowakumala kinega na wihi we chilunga kulokela umanyi we Mundewa wetu Yesu Kilisito, kamei wakoligwe keli na kusumwa basi inyuwa yawo ya ndumo ikuwa iha kusuma ye nghonga. 21 Kosoko hayuwa fiswanu ukwawo woile wasiimanyile njila ye chawelu kusuma kuimanya kamei kuleka dilagiso disunhile dijile ukwawo. 22 Ikuwa ni kifana imbasi ye chawelu ikugamba, “Dibwa dyuwila madeka gakwe,” na, “Nguluwe ikiyogile yuya kahi mumatope.”
1 Aino hambiya, no baluwa ya keli yonimwandikilileni wendigwa, na musose simbili nikwinusa misungu yenu kwa kuwagelegesa; 2 uleke mugelegele sinonga salongigwe na wagonesi wasunhile ne dilagiso dye Mundewa na dye Mwihula kulokela watumigwa wenu. 3 Iyilongelele sose mukuhanangigwa mumanyi nhafi, ku majuwa gwe ndumo wokwija wanhu wo lubeso no lubeso lwawo awekuwandamila usulumisi wawo awecho 4 na kugamba “dyuwahe dihuwiso dyo kwija kwakwe? Kosoko kukongela awaBaba setu wakagone, ifinhufyose figendelela nheifo fofyowile kulawa kunghonga yo kumba.” 5 Wakufinya meso gawo wanghone inonga ino fina kwa mbulu ya Mulungu ulanga hawuwa uko kulawa katali ne chilungu hachumbigwa kulawa mumeji, 6 ku gago ichilunga che chigele chiya hachagilila kwa meji. 7 Ninga kwa mbuli yiyo, ulanga ne chilunga cha hambiya chikigwa sigafu kwa moto, fikigwe mpaka dijuwa dyo uliganiso na kubanigwa kwa wanhu wasimumanyile Mulungu. 8 Ninga wendingwa munghaibese imbulu yino, kososo kwe Mundewa dijuwa dimwedu dikifana minyaka chigulu chimwedu, kahi minyaka chigulu chimwedu ikifana ijuwa dimwedu. 9 iMundewa nghakusululuka kwigala dihuwiso dyakwe, fina wamonga fowakudoka kusululuka, ninga yakuwagojelani kosoko nghakwenda munhu wowose yagilile ninga wose walambe. 10 Ninga dijuwa dye Mundewa dikwija fina muhiji, kamei ulanga woloka kwa sindo nghulu na finhu fyose folakasigwa kwa moto, na iisi na fyose fimemile umo fokwagilila. 11 Hambiya kosoko finhu fino fyose fikwija fibanigwa kwa nheifo, anyeye mukuhanangigwa muwe wanhu wa migendele ya usunhile na ya chimulungu, 12 mukugojela na kutegelesela inija ye dijuwa diya dye Mulungu, kosoko ulanga ukwija umoligwa na kosomigwa kahi finhu fikulakasigwa. 13 Ninga, kosoko ya dihuwiso dyakwe chikugojela ulanga musha na chilunga chisha, hanhu hokwikala wanhu wene nhenda swanu. 14 Hambiya wendigwa wangu kosoko mukugojela mbuli siso, konyeni monekane ne imwene fina muwa mudiigoya, mwichaka wihi; 15 na utaleni ufinyilisi we Mundewa wetu kuwa ni uhonya. Kamei kahi mundugu setu Paulo hakawandikilani kwa ubala woyenghigwe, 16 yakulonga sisino simbuli musibaluwa sakwe sose. Mwina mbuli simonga nghugutu kusimanya, mbuli so wanhu wechaka awasisomile na awasimile fiswanu wakwagilila awecho, fina fowakugolosa kumatulumo gamonga. 17 Hambiya nyeye, wendigwa, kulawa fomwajanjalusigwa langisiseni munghalondigwe ne ubani na kwagilisa kwima kwenu. 18 Ninga kulileni mwihewa na umanyi we Mundewa wetu ne Muhonya Yesu Kilisito. Ukwakwe kuwe itunyo hambiya na majuwa gose. Hano.
1 Chikumutamilani anyeye aiya yowile kulawa kunghonga, yochihuluke, yochonile na meso getu, yochilangile na kuikwafa kwe mikono yetu, muchanhya ya imbuli yo uwumi 2 uwumi auno hawonesigwa, na chiwona kahi chiuhomelela, na chikumutamilani ukwenu uwumi wa majuwa gose, uwowile na iBaba ninga hawonesigwa chimesomeso ukwetu 3 Chikumutamilani anyeye wochihulike na kona uleke nanye muwe na umwedu na seye; na umwedu wetu ni hamwedu na Baba na hamwedu na Imwanagwe Yesu Kilisito. 4 Chiwandika simbuli sino uleke ichinyemi chetu chimemelekele. 5 Ayino no mbuli yochihulike kulawa ukwakwe na kutamilisa ukwenu fina iMulungu ni ujelu na umwakwe mwachaka chisa chochose. 6 Chinghagamba china umwedu naye ugele chikugenda muchisa chikudanha kahi chisikugolosa ichawelu; 7 ninga chinghagenda mu ujelu fina imwene foyowile mu ujeleu, china umwedu chila yumwedu na miyagwe, kahi isakame ya Yesu iMwanagwe ikuchisunha kulawa mu uwihi wose. 8 Chinghagamba chichaka wihi, chikidanhilisa chiwecho, na ichawelu isuwile umwetu. 9 Chinghalamba uwihi wetu, imwene ni wakuhuwilika na chawelu yakwenda yachinenele uwihi wetu na kusunha na kubana kwetu kose. 10 Chinghagamba chisigolose wihi, chikumugolosa imwene fina mudasi, na imbuli yakwe umwetu yamwichaka.
1 Wanangu wadodogi, nikumwandikilani sino uleke munghagolose uwihi; imunhu wosose yanghagolosa wihi chenaye iyakuchitasila kwa Baba, Yesu Kilisito imuchawelu; 2 imwene no nhambiko yo uwihi wetu, si uwihi uwetu du muhala ninga kosoko ye wihi we chilunga chose. 3 Kwa njila ino chikuwa fina chawelu chimumanya, nghona chikolile amalagiso gakwe. 4 Ayuya iyekugamba, “Nimumanya,” ninga nghekogoha amalagiso gakwe, ni mudasi, kahi mwi mumhu yefane yo kechaka ichawelu, 5 ninga iyekogoha imbuli yakwe, chawelu mwi munhu yuno uwendo we Mungu umemelekela. Kwa nheifo chikumanya chawelu fina chuwa umwakwe. 6 Ayuya iyakugamba yakwikala umwakwe inogela yaligane lugano fina imwene foyowile iYesu. 7 Wendigwa, sikumwandikilani ilagiso disha, ninga ilagiso dya katali no imbuli yomwahulike. 8 Kahi nikumwandikilani ilagiso disha, dye chawelu umwakwe na umwenu, kosoko ichisa chikuleuka na ujelu we chawelu ukonga kumulika. 9 Ayuya iyakugamba fina kowa mu ujelu akuno yakumusuhila imunduguse yekali muchisa. 10 Ayuya iyakumwenda imunduguse yakwikala mu ujelu na kwachaka soko yoyose yakumukwakalisa. 11 Ninga yuya yakumusula imunduguse kowa muchisa na yakugenda muchisa, na nghamanyile koyakuluta kosoko ichisa chimutula meso. 12 Nikumwandikilani anyeye, wana wadodogi, kosoko uwihi wenu ulekeleligwa kosoko yakwe. 13 Nikumwandikilani anyeye, cha baba, kosoko mumumanya imwene yowile kulawa kung'onga. Nikumwandikilani anyeye, wajelelo, kosoko mumusuma ayuya yehile. Nikumwandikilani anyeye, wana wadodogi kosoko mumumanya iBaba. 14 Nikumwandikilani anyeye, cha baba, kosoko mumumanya imwene wa kulawa kunghonga. Nimwandikilani anyeye, wajelelo, kosoko mwina ludole, na imbuli ye Mulungu yuwa mugati yenu, na mumusuma iyehile. 15 Munghachende ichilunga hegu ifinhu fya muchilunga. Imunhu wowose iyakwenda ichilunga, uwendo wa Baba usimugati yakwe. 16 Kosoko gose gowile muchilunga, kukusulumila kwa umutufi na kusulumila kwa meso na kiyona kwo mutufi, si fya Baba ninga ni fye chilunga. 17 Ne chilunga chikuloka, na usulumisi wakwe; ninga ayuya iyakugolosa foyakwenda iMulungu yekwikala majuwa gose. 18 Mowana, Awuno no ugele we indumo; fina fomuhulike fina imunghondo wa Kilisito yakwija, hambiya wanghondo wa Kilisito wengi wafulusa kwija, kosoko iyo chimanya no ugele we indumo wahabehi kwija. 19 Hawaleuka wachileka seye, kosoko wasowile wayetu, kosoko nhanga wowile wayetu hawowa wakugendelela hamwedu nase, ninga hawaleuka uleke imanyike fina si wose wowile hamwedu nase. 20 Ninga anyeye mubakigwa mafuta ne Musunhile, nanye mose mumanya. 21 Nikumwandikilani, si kosoko musimanyile ichawelu, ninga muimanyile, na kumanya fina kwechaka udasi ukulawa muchawelu. 22 No nani imudasi ninga ayuya iyakukana fina Yesu si Kilisito? Ayuya no Munghondo wa Kilisito, imunhu iyekumukana iBaba na iMwana. 23 Wowose iyekumukana iBaba nghenaye iMwana. Iyakumufumila iMwana kenaye iBaba naye. 24 Aiya yomwahulike kulawa kunghonga ikale mugati yenu. Nghona yomuhulike kulawa kunghonga ikala mugati yenu, mokwikala mwi Mwana na mwi Baba 25 Ayino no mbuli yoyachilalaganise aseye Uwumi wa majuwa gose. 26 Nikumwandikilani sino kosoko ya waya wakuhananga kumudanhilisani. 27 Ninga kwa nyeye, amafuta gaya gomubakigwe kulawa ukwakwe gekala kugati yenu, kahi mwechaka soko ya munhu wowose kumufusani. Kosoko amafuta gaya gakuwafusa finhu fyose, kahi ni chawelu, ninga si udasi, fina fogamufusileni, ikaleni kugati yakwe. 28 Na hambiya mowana wadodogi, ikaleni mugati yakwe, uleke nghona yakwija yolawanisa chuwe na ng'inyo na si kumutija kosoko ya chinyala cho kwija kwakwe. 29 Nghona mumanyile fina imwene ni muchawelu mukumanya fina chila iyakugolosa maswanu kelekigwa naye.
1 Langeni, uwendo wochinghigwe na Baba, kachigolosa chinangigwe wana wa Mulungu, na nofo chuwile. Ichanghone ichilunga chisikuchimanya seye sichamumanyile imwene. 2 Wendigwa, chawana wa Mulungu hambiya; isikumanyika fochikwendigwa chuwe, ninga chimanya foyakasololoka chikachikuwa fina imwene, kosoko chikachimona foyowile. 3 Na wose awena dihuwi dino umwakwe wakisunha awenyecho, fina imwene fonimusunhile. 4 Chila munhu yakugolosa wihi yakubana amalagiso ge Mulungu; uwihi ni kuleka kwandamila amalagiso. 5 Mumanya fina hakeja uleke yaleuse uwihi, na umwakwe mwichaka wihi. 6 Hechaka wowose iyakwikala umwakwe yakugolosa wihi; kwichaka munhu iyakugolosa uwihi iyamonile hegu kumumanya. 7 Wana wadodogi, imunhu yanghamudanhiliseni. Imunhu iyakugolosa uswanu ni muswanu, fina imwene fonimuswamu. 8 Iyekugolosa uwihi ni mwana wa Luhoma, kosoko iLuhoma kagolosaga wihi kulawa kunghonga. iMwana we Mulungu hakeja kosoko iino, kubana imilimo ya Luhoma. 9 Hechaka iyelekigwe ne Mulungu yakugolosa wihi; kosoko inyuwa ye Mulungu yuwa uwakwe, kahi nghadaha kugolosa wihi kosoko kelekigwa na Mulungu. 10 Kwa nheifo ikudaha koneka, awana we Mulungu no wehoki na wana wa Luhoma no wehoki. Inghekugolosa maswanu si wa Mulungu, na yuya inghakumwenda imunduguse. 11 Kosoko ayino no mbuli yomwahulike kulawa kunghonga, fina chikiyende, 12 chinghowe fina Kaini iyowile wa yuya yehile iyakomile imunduguse. Hakamukoma kosoki yaki? Kosoko sinhenda sakwe imwenyecho hasuwa sihile, ninga se munduguse hasuwa swanu. 13 Wandugusangu munghajume, fina ichilunga chikumulemani. 14 Chimanya fina aseye chiloka kulawa mudifa na kwingila mu uwumi, kosoko chikuwenda awandugu. Ayuya iyechaka wendo kowa mudifa 15 Chila munhu inghakwenda munduguse ni mukomaji, na mumanya fina kwechaka imukomaji, yena uwumi wa majuwa gose umwakwe. 16 Kwa njila ino chimanya uwendo, kosoko hakalafa uwumi wakwe kosoko yetu; ichagula ase nase chilafe uwumi wetu kosoko ya wandugu. 17 Ninga imunhu wowose yangowa na finhu fyose fye chilunga chino na yakumona imunduguse kechaka chinhu, yanghagolosa ichidoga chakwe chuwe chikugutu yaleke kumwingha, uwendo we Mulungu ukwikala nhani umwakwe? 18 Wana wadodogi, chinghende kwa kulonga kwa mulomo du, ninaga kwa nhenda na kwa chawelu. 19 Kwa njila iyo chomanya fina aseye cha wachawelu, na kuwa chaka manhonge mufidoga fyetu kumwande yakwe 20 ugele wowose ifidoga fyetu nghona fikuchonesa wihi, kosoko iMulungu ni mukulu kusuma ifidoga fyetu na kumanya chila chinhu. 21 Wendigwa, nghona ifidoga fyetu fichikuchonesa china wihi, chikuwa chaka chinyala hamwande ye Mulungu; 22 na chikuhokela kulawa ukwakwe chochose chochikutasa, kosoko chikwandamila malagiso gakwe na kugolosa ifyene foyakwenda. 23 Na dino no dilagiso dyakwe, chidihuwile disina dye Mwanagwe Yesu Kilisito, na chikiyende fina foyachilagise. 24 Wose awakwandamila malagiso gakwe, wakwikala mugati yakwe, na imwene naye mugati yawo. Kwa njila iyo chimanya fina yakwikala mugati yetu, kwa njila ya Muhe woyachinghile.
1 Wendigwa, munghamuhuwile chila muhe, ninga igeseni imimuhe, kona nghona ni ya Mulungu; kosoko wagonesi wengi wo udasi wenela muchilunga. 2 Kwa njila ino mumanya Umuhe we Mulungu: Chila muhe uukufumila fina Yesu Kilisito keja mumutufi ni Muhe we Mulungu, 3 na chila muhe uukulema kufumila Yesu si wa Mulungu. Ayuno no Muhe iyakumulema Kilisito, womwahulike fina yakayokwija, na hambiya kafulusa kuwa muchilunga. 4 Wana wadodogi, anyeye mwa wa Mulungu, na muwasuma, kosoko ayuya iyowile kugati yenu ni mukulu kusuma yuya iyowile muchilunga. 5 Awene ni wanhu wa chilunga kosoko iyo sowakulonga ni sa chilunga na ichilunga chikuwategelesa. 6 Aseye cha wa Mulungu, wowose yamumanyile Mulungu yakuchitegelesa, ayuya isi wa Mulungu nghakuchitegelesa. Kwa njila iyo chikumanya muhe wa chawelu na muhe wo udasi. 7 Wendigwa, chikiyende; kosoko uwendo ni wa Mulungu. 8 Ayuya iyakwenda nhamumanyile Mulungu; kosoko Mulungu ni wendo. 9 Mu dino uwendo wa Mulungu wikigwa chalinje ukwetu, iMulungu kamwigala iMwanagwe we iwene, uleke chuwe womi mwi mwene. 10 Mu wendo uno, si fina hachimwenda Mulungu, ninga hakachenda seye na kumutuma iMwanagwe yowe no nhambiko yo uwihi wetu. 11 Wendigwa, iMulungu nghona yachendile nheifo; ase nase ikuchagila chikiyende. 12 Kwichaka munhu yamonile Mulungu; chinghakiyenda, iMulungu yakwikala kugati yetu na uwendo wakwe ukumemelekela umwetu. 13 Kwa njila ino chikumanya fina chikwikala kugati yakwe na imwene kugati yetu, kosoko kachingha umuhe wakwe imwecho. 14 Na chona kahi chikuhomelela fina iBaba kamwigala iMwanagwe kuwa muhonya we chilunga. 15 Wowose yakufumila fina iYesu ni Mwana wa Mulungu, iMulungu yakwikala mugati yakwe, na imwene mugati ya Mulungu. 16 Hambiya chimanya na kuhuwila uwendo woyenawo iMulungu ukwetu. Mulungu ni wendo, na yuya iyakwikala mu wendo yakwikala mwi Mulungu na iMulungu yakwikala mugati yakwe. 17 Mu dino uwendo wa Mulungu ukumemelesigwa ukwetu, uleke chuwe na usindamafu dijuwa dya ulamusi, kosoko fina foyowile nofochuwile aseye muchilunga. 18 Mu uwendo mwechaka woga, ninga uwendo umemelekele ukutanga kunje uwoga. Kosoko uwoga wina kuliganiswa, na wowose iyakogoha nghakangale mu wendo. 19 Chikwenda kosoko imwene hakakonga kuchenda seye. 20 Imunhu yanghagamba, “Nikumwenda Mulungu,” akuno yakumusula imunduguse imwene woyakumona, nghodaha kumwenda Mulungu wonghenati yamone. 21 Na dilagiso dino chenadyo kulawa ukwakwe, ayuya yekumwenda Mulungu yamwende ne munduguse naye.
1 Chila munhu iyakuhuwila fina Yesu no Kilisito ni mwana we Mulungu, na chila munhu iyakumwenda imweleka mwana, yakumwenda na imwana. 2 Kwa njila iyo chikumanya fina chikwenda wana we Mulungu, nghona chikumwenda Mulungu na kwandamila malagiso gakwe. 3 Kosoko auno no uwendo we Mulungu, nhafi chikwandamila amalagiso gakwe. Na malagiso si makugutu. 4 Kosoko chila yelekigwe ne Mulungu yakusuma ichilunga; na kuno nokusuma ichilunga, dihuwi dyetu. 5 No nani iyakusuma ichilunga ninga ayuya iyakuhuwila fina iYesu no Mwana wa Mulungu? 6 Ayuno no yuya iyejile kwa meji na kwa sakame, Yesu Kilisito si kwa meji muhala ninga ni kwa meji na kwa sakame. 7 Na Muhe no muhomelesi, kosoko Muhe no chawelu. 8 Kwina wahomelesi wadatu, u Muhe, ameji na kwa sakame; na wano wadatu wakifumilisa. 9 Nghona chikuhokela uhomelesi wa wanhu, uhomelesi we Mulungu ni Mukulu kusuma wose; auno no uhomelesi wa Mulungu woyahomelele muchanhya ye Mwanagwe. 10 Ayuya iyakuhuwila mwi mwana wa Mulungu kenawo uhomelesi uno umwakwe. Ayuya inghakumuhuwila Mulungu, kamugolosa Mulungu fina Mudasi kosoko nghauhuwile uhomelesi we Mulungu muchanhya ye Mwanagwe. 11 Na uno no uhomelesi, fina Mulungu kachingha uwumi wa majuwa gose, na uwumu uno wuwa mwi Mwanagwe. 12 Ayuya iyenaye iMwana kenawo uwumi; ayuya iyechaka iMwana we Mulungu kechaka uwumi. 13 Nikumwandililani sino anyeye mukuhuwila mudisina dye Mwana we Mulungu fina mwina wumi wa Majuwa gose, 14 Ayino no ng'inyo yochinayo umwakwe, fina chinghatasa chinhu chochose ifene foyakwenda imwene yakuchihulika. 15 Chinghamanya fina yakuchihulika mu gogose gochikumutasa, chimanya fina chihokela agaya gochimutasile. 16 Imunhu yanghamona imunduguse yakugolosa wihi iisikumwigala kudifa, kotasa, na Mulungu komwingha wumi kwa waya wakugolosa uwihi si we difa. Kwina wihi wa ifa; sikugamba fina imunhu yakudaha kutasa kosoko yo wihi wo. 17 Sinhenda sihile sose ni wihi, ninga kwina wihi uwene si wa ifa. 18 Chimanya fina chila munhu yelekigwe na Mulungu nghakugolosa wihi, ayuya yelekigwe na Mulungu yakumutasa, na yuya wo wihi nghakudaha kumukwafa. 19 Chimanya fina aseye cha wa Mulungu, na chilunga chose chuwa mu udaha wa yuya yehile. 20 Na chimanya fina iMwana we Mulungu keja na kachingha misungu, kumumanya ayuya we chawelu, iMwanagwe Yesu Kilisito. Imwene no Mulungu we chawelu na uwumi wa majuwa gose. 21 Wana wadodogi, munghandamile imilungu yo udasi.
1 Kulawa kwe musehe kwi Mudala na wanagwe wonikwenda lugano. Siyo andiye du ni mwene, ninga wose awaimanyile ichawelu wakumwendani, 2 kosoko ya ichawelu ikwikala umwetu nayo yokuwa hamwedu nase majuwa gose. 3 iMulungu Baba na Yesu Kilisito, iMwana wa Baba, yachinghe dihewa, ubasi na digoya, mu chawelu na uwendo. 4 Nikusekelela lugano kona fina awanago wamonga wakwikala mu chawelu, fina iBaba foyalagise. 5 Kosoko iyo nikukutasa gweye Mudala mwendigwa; chose chikiyende. Adino si ilagiso isha dyonikukwandikila ukwako; no dilagiso dyochowile nadyo kulawa kunghonga, chikiyende. 6 Uwendo uno wonikulonga ni chikale mukwandamila amalagiso ge Mulungu. Amalagiso ageno gomwahulike kulawa kunghonga ni fina mose mwikale mu uwendo. 7 Awadasi wengi wenela iisi yose, awanhu awasikufumila fina Yesu keja kwa mutufi wa chimunhu munhu wa nheifo ni mudasi na munghondo wa Kilisito. 8 Muwe meso, uleke munghagilise dyomugolosele milimo, ninga muhokele digelo dyenu dimemelekele. 9 Munhu wowose inghakwikala na mafuso ga Kilisito, ninga yakulokanisa, kechaka Mulungu. Wowose yuya yakwikala na mafuso gakwe kenawo wose iBaba na iMwana 10 Munhu wowose yanghakwijila inghekwigala amafuso gano, munghamuhokele musinyumba senu, kahi munghamulamuse; 11 kosoko munhu wowose yakumulamusa yakuwa miyagwe musinhenda sakwe sihile. 12 Ninago mengi ga kumwandikilani, nikona si fiswanu kumwandikilani kwa kalatasi na wino, ninga nikona nokwija nimwenyecho kumonani na kulonga nanye chimesomeso, uleke ichinyemi chetu chimemelesigwe. 13 Awana we lumbudyo musagulwa wakuwalamusani.
1 Kulawa kwe Musehe kwa mwendigwa Gayo, wonikwenda muchawelu 2 Mwendigwa, nikutasa Mulungu yakumotese kwa chila chinhu na uwe chaka matamu gogose; nimanya fina muchidoga chako mwina uswanu. 3 Kosoko hanisekelela lugano awandugu wamonga fowejile na kuhomelela ichawelu ya uwumi wako, fina chawelu foukwandamila ichawelu. 4 Kwechaka chinyemi chikulu fina chino, kukuhulika fina awanangu wakwandamila ichawelu. 5 Mwendigwa, ni mbuli ya ilumbo inhenda youkugolosa kuwatogomela awandugu, lugano, awageni, 6 awakuhomelela uwendo wako kwikanisa. Kogolosa fiswanu unghawatasa wagendelele munhambo yawo yo kumutogomela Mulungu. 7 Kosoko waleuka kukonga inhambo kahi wasihokele chochose kulawa kuwanhu awasikumuhuwila Mulungu. 8 Kwa nheifo ichagila kuwatasa fina wawo, uleke chuwe wayawo mumulimo we chawelu. 9 Niwandika chinhu chimonga kwi kanisa, ninga iDiyotelefe, iyekuhananga kwikusa kuwa chilongosi nghakufumila udaha wangu na ulongosi wangu, 10 Nghona nikwija nikwenda nike chalinje gose agene goyagolose na simbuli sihile soyagolose muchanhya yangu. Hamwedu na gago gose yakuwalemesa awaya awakwenda kuwahokela, na kuwawinga waleuke mwikanisa. 11 Mwendigwa, unghandamile gehile ninga wandamile amaswanu. Ayuya iyakugolosa maswanu ni wa Mulungu, iyakugolosa gehile nghamonile Mulungu. 12 Demeteliyo kena uhomelesi kulawa kwa chila munhu, na kulawa muchawelu iyenyecho, nikumuhomelela imwene kehi, na mumanya fina uhomelesi wangu wachawelu. 13 Hanuwa na mengi ga Kumwandikilani nyeye, ninga nikona fina ibeka ninghawandike na kalamu na wino; 14 Nikuhuwila kumonani chimwande, kahi chosimulila chimesomeso. 15 Digoya dyuwe nanye. Awambuya wakumulamusani. Walamuseni awambuya, chila yumwedu wenu.
1 Yuda mutogomi wa Yesu Kilisito na munduguse wa Yakobo, kwa wose wenangwe wendigwa mwi Mulungu iBaba na kudimigwa mu Yesu Kilisito. 2 Ubasi, dihewa na wendo wongeseke ukwenu. 3 Wendigwa fonahanangage lugano kuwaandikila imbuli ya uhonyi hanyona ihanangigwa niwaandikile kosoko ya dihuwi dilafigwe kuwasunhile wose. 4 Kosoko kwina wanhu wengisigwe kwa chifiso, wanhu waandikilwe uliganiso uno kulawa katali. Wanhu wasimumanyile iMulungu awakubidula imboto yuwe wihi na kumulema imwene mukulu Mundewa wetu Yesu Kilisito. 5 Hambiya nikuhananga nimugelegeseni hata inghowa hamufulusa kutamiligwa, fina ayuya iyawahonyile wanhu kulawa Muiisi ya Misili hakawakoma awaya awasamuhuwile. 6 Kahi malaika nawo awasakolile ahanhu hawo, ninga awalekile ukalo wawo wekigwa ne mwene muchifungo cha majuwa gose kuchisa na kuliganiswa mwijuwa dikulu. 7 No nheifo Sodoma na Gomola na makaya gasungulute fowagolosage gehile ge dihabwa kwandamila mutufi na kubidula uwunhu wawo nawo wekigwa muuliganiso lukulu we umoto wa majuwa gose. 8 Awano nawo nheifiya musinjosi sawo wakubana imitufi yawo, wakulema kulongosigwa na kuliga uswanu wakwe. 9 Ninga ichigele malaika mukulu Mikaeli fowakisumage na Luhoma wakuwanga kosoko yo umutufi wa Musa, nghendile kumusongesa kwa wihi ninga hakamugamba, “Mundewa na yakugombele!” 10 Ninga wanhu wano wakuliga finhu fofose fowasimanyile na kwa finhu fifo fowamanyile kwa misungu kifana makala ga kumbago gechaka misungu. 11 Usungu wawo! Kosoko wakugenda munjila ya Kaini, na kileusa awecho uleke wapate chinhu na kwagilila musinhenda sihile wihi wa Balamu uleke wapate na kwagilila munhenda sa kola. 12 Wanhu wano makala musisikukuu senu so uwendo nomo wakudiya nanyeye wechaka chogoho, wene wakifana wadimi awakidima awecho ni mafunde gechaka fula gakupululusigwa ne mheho, mabiki gechaka mamudyo, gofa mikangha mili na ninga gangholigwa kabisa; 13 Mawingo ga bahali gasikulongoseka, gakulafa chinyala chawo agecho kifana mafulo, nyelesi sikugendagenda sikiligwe dichisa kuwa nofugasi yawo. 14 No wawa walongigwe muugonesi wa Henoko we cheleko cha mutandatu kulawa Adamu yakugamba, “Langa Mundewa yakwija na figulu ikumi yakwe ye Musunhile wakwe, 15 uleke yagolose uliganiso kuwanhu wose, na kuwajama wose awasikumuhulika Mulungu kosoko ya nhenda sawo sikwagilisa na kosoko ya gose gehile ga awasikumuhulika Mulungu walongile muchanhya yakwe.” 16 Wanhu wano wakulonga mbuli chinyele na kukalala mbuli wakugenda kwa usulumisi wawo, Wakiyenda muluneka wawo. Majamo na Mafuso 17 Ninga nyeye, wendigwa wangu, mugelegele lugano agaya gomutamiligwe na watumigwa we Mundewa wetu Yesu Kilisito; 18 Kosoko hawawatamilani fina kumajuwa ge ndumo kwija kulawanisa wanhu wene kifana wano awakubesa na kwandamila usulumisi wawo wo kwagilisa 19 Wanhu wo wakwigala lutemanuko kahi ni wanhu we chilunga chino awechaka Muhe. 20 Ninga nyeye wendigwa wangu, kijengeni mwihuwi dyenu disunhile na kutasa mwi Muhe Musunhile. 21 Kaleni muwendo we Mulungu nomo mukugojela ubasi we Mundewa wetu Yesu Kilisito, na kupata uumi wa majuwa gose. 22 Woneleni ubasi awena manhonge; 23 Wahonyeni wamonga kwa kulafa mumoto na wamonga woneleni ubasi kwa kogoha na kudesekela hata isuke ichuchile mumutufi. 24 Imwene yakudaha kuwadima munghogwe na kuwemisani mwichaka wihi kumwande ye ditunyo dyakwe kwa chinyemi, 25 kwe Mulungu muhala iMwihula wetu kulokela Yesu Kilisito Mundewa wetu, Ditunyo dina imwene udaha, na uludole chigele chose hambiya na minyaka na minyaka. Hano.
1 Ugubulo waYesu Kilisito wo yenghigwe ne Mulungu konesa watogomi wakwe akakuhanangigwe gowe uko chimwande; hakagagolosa goneka kwa kumutuma malaika wakwe kwe mutumigwa wakwe Yohana, 2 imwene yahomelele imbuli ye Mulungu na kuuhomelesi wa Yesu Kilisito, na kwawaya wose woyonile. 3 Ibeka imunhu yuya iyakusoma simbuli so ugonesi wuno, kahi ibeka awakuhulika, na kukola agakuwandikigwa umo. Kosoko ugele wa habehi. 4 Yohana kumakanisa mufungate agowile ako Asia: Dihewa ukwenu ne digoya kulawa ukwakwe iyebaho, iyowile baho na iyekwija kahi kulawa kumimuhe mufungate wowile kumwande ye digoda dyakwe dye undewa, 5 na kulawa kwa Yesu Kilisito imuhomelesi we chawelu, imwelekigwa we inghonga wa wafile na mutawala wa wandewa wose we iisi. Ukwakwe imwene iyachendile na kuchilekelela na kuchisunha wihi wetu kwa sakame yakwe, 6 na kuchigolosa chuwe wandewa na makuhani watogomi we Mulungu wakwe na Baba, ukwakwe dyuwe itunyo na udaha majuwa gose. Hano. 7 Langa! Yakwija na mafunde; chila igiso dikwija dimona, hata awaya awamudomile; na makabila gose ge chilunga gokwijagalila kosoko yakwe kosoko nofoikwija ikuwa. Hano. 8 “Aniye no Alufa na Omega,” yakulonga Mundewa Mulungu, iyeuko na iyekwija, Iyene udaha wose. 9 Aniye Yohana, Mundugu senu iyekuhangila magayo muKilisito hamwedu nanye muundewa na ufinyilisi, hanuwa muchisiwa chikwinangwa Patimo kosoko ya imbuli ye Mulungu na uhomelesi wa Yesu. 10 Hanuwa mumuhe mwijuwa dye Mundewa, na hanihulika ijwi ikulu kunyuma yangu dikifana ijwi dya igunda 11 dikugamba, “Andika muchitabu goukona kamei ugegale kumakanisa mufungate kuile Efeso, Similina, Peligamu, Tilatila, Salidi, Filedefiya, na Laodikiya.” 12 Kamei honibiduka kulanga dijwi dilongile na niye, nikabiduke honikona figwaso fya kwikila taa mufungate fya sahabu, 13 na muchiligati che figwaso yumonga kifana mwana wa munhu kafala ikasu ijelu na mukowa wa sahabu kusunguluta muchifa chakwe; 14 Ditwi na sinjwili sakwe hasuwa njelu swee kifana pamba, na meso gakwe gakwakaika kifana ililimba dya moto 15 imigulu yakwe kifana shaba isunhugwe mumoto swanu lugano na dijwi dyakwe kifana ibumo dya meji mengi; 16 kakola nyelesi mufungate mumukono wakwe wo kulume, kumulomo wakwe kukulawa ipanga ikali dikutem kosekose, na ichihanga chakwe kifana dijuwa idikwakaika kwa singufu sakwe sose. 17 Nikamone honikugwa hamigulu yakwe kifana nufa. Ninga hoyonikola no mukono wakwe wo kulume, yakugamba, “Unghogohe; Aniye no we nghonga na we ndumiliso, 18 na ni mumu. Hanyufa, na langa, Namumi sakalakale, na nenaso sifunguo se Difa na se Kusimu. 19 Hambiya yandika gowonile, agebahano, na agakwenda galawanise hanyuma. 20 Agechifiso mu sinyelesi mufungate gowonile mumukono wangu wo kulume, na ifigwaso mufungate fye sitaa se sahabu, sinyelesi mufungate ni malaika na makanisa gaya mufungate na ifigwaso fiya mufungate ni makanisa gaya mufungate.”
1 “Kwimalaika wa Efeso wandika: Asino no simbuli sa yuya iyakolile sinyelesi mufungate mumukono wakwe wo kulume iyakugendagenda muchiligati che figwaso mufungate fye sitaa se sahabu: 2 Nimanya imilimo yako, kupiligala kwako na kufinyilisa kwako, na ninga nghukudaha kugendelela na wanhu wehile, ninga kuwagesa awaya wakiinanga watumigwa, ninga sichawelu na kuwatanga fina wadasi. 3 Kahi nimanya fina kwamufinyilisi kosoko ye disina dyangu na nghusokile. 4 Ninga nina nonga muchanhya yako gweye, kuleka wendo wowowile nawo kunghonga. 5 Gelegela ichikugwise, lamba na ugolose imilimo iya yowagolosage kunghonga, nghona sinheifo, nikukwijila na kuleusa ichigwaso che taa yako ahanhu hakwe unghaleka kulamba. 6 Achino chiswanu chowinacho ni fina nghukwenda imilimo ya Wanikolai, yene aniye nani sikuyenda. 7 Ayuya yene singhutwi yahulike, Imuhe foyakulonga kumakanisa. Kwayuya yakusuma nikumwingha kudiya kulawa mwibiki dyo uumi dyuwile kulanga kuswanu kwe Mulungu.” 8 “Na kwe malaika we dikanisa dyuwile Similina wandika: Asino ni nonga sakwe ye we bosi na we ndumo, iyafile na yenuke: 9 Nimanya amagayo gako na ukiwa wako, ninga kwa mugoli. Na nimanya amateto gawo waya wakigamba wene Wayahudi ninga siyo, ninga ni isinagogi dya Shetani. 10 Unghogohe amagayo agakukwijila chimwande, langa diluhoma dikwenda dimugumeni wamonga wenu mwigelesa na kwa majuwa ikumi mukuwa mumagayo, muwe wanhu we dihuwi mpaka kufa, nani nomwinghani ikofiya ye chindewa ye wumi, ya usumi wenhu. 11 Ayuya yena singhutwi yahulike iMuhe choyakulonga kumakanisa, ayuya yakusuma nghakwenda yabulagigwe ne difa dya keli.” 12 “Na kwamalaika we dikanisa dyuwile ako Peligamo wandika: Asino no simbuli sakwe imwene yene dipanga dikali dikutema akuno na kuno. 13 Nimanya houkwikala hedigoda dya Shetani. Nagwe kukolelela disina dyangu nghukanile dihuwi dyako ukwangu hata ugele wa Antipasi muhomelesi wangu, imuhuwilika wangu, yakomigwe mugati yenu, ahanhu hoyakwikala Shetani. 14 Ninga nina finhu fikefu fya kulonga muchanhya yako: Kwina wanhu baho awakolile mafuso ga Balaamu, iyamufusile Balaki kwigala chikwakwaliso kumwande ya waisilaeli, uleke wadiye fyakudiya filafigwe nhambiko kumasikimunhu, na kugolosa dihabwa. 15 Agwe nagwe kwinawo wamonga awakolile mafuuso ga wanikolao 16 Hambiya ulambe, amba unghaleka kulamba nikukwijila chimwande na kulewa nghondo nawo ne dipanga dye mulomo wangu. 17 Yene singhutwi yahulike Muhe foyakulonga nonga ino kumakanisa. Kwayuya iyakusuma nikumwingha imana ifisigwe, na nomwingha iwe ijelu, na isina disha diwandikigwe mudiwe na hechaka yadimanyile ninga imwene iyakudihokela.” 18 “Ku malaika we dikanisa dyuwile ako Siwatila wandika: Asino no simbuli se Mwana we Mulungu, iyena meso kifana ililimba dya moto, yena migulu kifana shaba isunhigwe, ikwakaika. 19 Nimanya imilimo yako ne migendelele yako na kufinyilisa kwako na fina milimo yako ye nyuma isuma iya ilongole.” 20 Ninga nina nonga muchanhya yako: “Ukugendelela kifinyilisa ne mwanamuke Yesebeli, iyekiinanga mugonesi iyakufusa na kuwagilisa watogomi wangu uleke wagolose dihabwa na kudiya fyakudiya fye nhambiko kufisikimunhu. 21 Hanimwingha chipisi uleke nghegela kolamba, ninga hoyolema kulamba dihabwa dyakwe. 22 Langa, nikwenda nimutage mwisasi, na wose awakugolosa dihabwa hamwedu naye nowaguma magayo makulu lugano, inghowa wasikulamba sinhenda sakwe. 23 Na nikwenda niwatowe na kuwakoma awanangwe. Na makanisa gose gomanya fina aniye noniimanyile imisungu kahi nonikumulika mbuli se mimoyo ya wanhu, na kumuliha chila munhu foifane milimo yakwe.” 24 Ninga kwa nyenye musigale ako Siwatila, anyeye musikolile amafuso gago, musikifusile wamonga gowakugamba, “Nni mafuso ga kugati lugano ga Shetani,” ukwenu nyeye nikugamba sikumwikilani musigo wingi. 25 mukolelese chomwinacho hata ugele fonikwija. 26 Ayuya yakusuma na yakolile milimo yangu, mpaka kukumalagisa, nikwenda nimwinghi udaha muchanhya ya mataifa; 27 kulongosa kwa mhando ya chuma, fina sinyungu sa ulongo fosikutulika. 28 Fina niye fonihokele udaha kulawa kwa Baba. Ayuya yakusuma nomwingha Inyelesi ya nhousikusiku. 29 Ayuya yena singhutwi yahulike iMuhe foyakulonga kumakanisa.
1 “Na kwa malaika we dikanisa dya Salidi wandika: Imbuli ya yuya yena imimuhe mufungate ye Mulungu ne sinyelesi mufungate, nimanya imilimo yako kwina isina dya uwumi, ninga gweye kufa. 2 Inuka kulafa mudifa, guma ludole mumilimo ihabehi kufa, kosoko sonile fina imilimo yako imemelekela hameso ge Mulungu wangu. 3 Gelegela sowahulike na sowahokele sikole na ulambe, unghaleka kwinuka nikukwijila kifana muhiji, na nghukwenda umanye chigele chinikwija. 4 Ninga kwinawo wanhu wakefu ako Salidi, awasichuchise sisuke sawo na wagenda hamwedu na niye, wafala suse sinjelu, kosoko wagiligwa. 5 Ayuya yakusuma yakwenda yafasigwe suke njelu, na sikuleusa disina dyakwe muchitabu cho uwumi, nikwenda nihomelele disina dyakwe kwa Baba na malaika wakwe. 6 Ayuya yena singhutwi yahulike iMuhe choyakulonga.” 7 “Na kwa malaika we dikanisa dyuwile ako Filedefiya wandika: Simbuli se Imusunhile iyena ifunguwo ya Daudi yekukumula na hechaka yakudaha kuhinda, na yakuhinda kahi hechaka yakudaha kukumula. 8 Nimanya imilimo yako, langa nikwingha mulango ukumuligwe, na hechaka munhu yakudaha kuhinda, nimanya fina kwina ludole ludodogi, hata nheifo kukola imbuli yangu na nghukanile disina dyangu. 9 Langa nikwenda niwagolose awaya we disinagogi dya Shetani awakigamba fina Wayahudi, kumbe si chawelu ninga wekudanha, langa nikwenda niwegale na wafugame hamigulu yako, na wakifuse fina nikukwenda gweye. 10 Kosoko kuikola imbuli yangu kwa kufinyilisa, ani nani nikwenda nikukolelese ugele wa magayo agakwija muisi, kuwagesa awaya awekale muchilunga. 11 Nikwija chimwande, chikolelese chowinacho uleke munhu wowose yangheje yalonde inghofiya yako ye chindewa yo kusuma. 12 Ayuya yekusuma, nikumugolosa sumbi mdihekalu dye Mulungu wangu, nghakulawa, kahi nghakulawa umo ugele wose na niwandika umwakwe disina dye Mulungu wangu na dye ikaya ye Mulungu, Yelusalemu Nyisha, ikulawa kuchanhya kwe Mulungu wangu na disina dyangu disha nimwecho. 13 Ayuya yena singhutwi na yahulike ifene Muhe foyakulonga kumakanisa.” 14 “Na kwa malaika we dikanisa dyuwile ako Laodikiya wandika: Simbuli sa Hano, imuchawelu na muhomelesi iyakuhuwilika, inghonga ye kumba kwe Mulungu. 15 Nimanya imilimo yako, nghwi mheho, kahi nghwi moto, ibeka hegu we mheho ama wi moto. 16 Hambiya kosoko, kwa lufufunghonde, nghwi mheho kahi nghwi moto nikwenda nikudeke kulawa kumulomo wangu. 17 Kosoko ukugamba aniye na mugoli, nichaka chinhu chonikuhananga; nghumanyile fina kwichaka chochose, kwa munhu wakoneligwa ubasi kwa mukiwa, kahi kwa mudula n akwa mwasi. 18 Ani nikukusugula ugule ukwangu, shabu isunhigwe ne moto uleke uwe mugoli na ufale suke njelu na kukuleusila chinyala chokuwa mwasi kwako koneka na kukubaka miti mumeso gako udahe kona. 19 Awaya wonikuwenda nikuwagombela na kuwatosa kosoko iyo upiligale na kulamba. 20 Langa nikwima hamulango na kugong'onda, imunhu wowose yakuhulika dijwi dyangu na kukumula umulango nikwingila ukwakwe na kudiya hamwedu naye imwene naye hamwedu na niye 21 Ayuya yakusuma, nikwikala naye mwigoda dyangu dya undewa, fina aniye fonasumile na kwikala hamwedu ne Baba mwigoda dyakwe dya undewa. 22 Ayuya yena singhutwi so kuhulika na yahulike iMuhe choyakulong kumakanisa.”
1 Sikaloke sino hanilanga, kumbe umulango wa kulanga hougubuka, idijwi dye nghonga dyonahulike dikulonga na niye dikifana igunda, dikugamba, “Wije kuno nikwenda nikonese agakwenda galawanise kulawa agano” 2 Chimwande hanuwa Mumuhe, kumbe kulanga kwikigwa igoda dye chindewa, na yumonga yekale umo. 3 Ayuya yekale umo koneka kifana alimasi, na diwe didunghu diswanu, na digoda dye undewa disungulutigwa na diwuta dye ifula difanile diwe dya alimasi dikwakaika. 4 Kusunguluta digoda dye undewa kwina magoda ge undewa makumi meli na mane na wekale mumagoda gago wasehe makumi meli na wane, wafasigwa makasu majelu na nghofiya sa chindewa sa sahabu mumatwi gawo. 5 Kulawa kwigoda dye undewa kwina fimuli fya ujelu na majwi na dibumo ikulu na kumwande ye digoda dye chindewa kwina fimuli mufungate fikumulikamulika moto imumuhe mufungate ye Mulungu, 6 kahi kumwande ye digoda dye undewa kwina chinhu chifanile bahali ya chikombe cha chiyoo, hameso ikoneka kifana meji gagandile na kusunguluta digoda dyo undewa chila ulwandi kwina fiyumbe fyumi fina meso kumwande na kunyuma: 7 chiyumbe che nghonga chakifana simba, ichiyumbe cha keli ichumi chakifana nghambaku ya ng'ombe, ichuyumbe cha kadatu china chihanga cha munhu ne chiyumbe cha kane chikifana numba ikupululuka. 8 Na ifyumbe fiya fine chila chimwedu china mabawa mutandatu fimema meso kunje na kugati na fisikuleka kwimba misi na chilo, kugamba, “Musunhile, musunhile, musunhile, ni Mundewa Mulungu wetu yena udaha wose, yowile baho, iyebaho na yekwija.” 9 Na chila ugele ifyumbe ifyumi fiya fikulafa ditunyo na chogoho kugamba, kwimange kwa ayuya yekale mwigoda dya undewa iyakwikala majuwa gose, 10 awaya wasehe makumi meli na wane wakugwa kumwande yakwe ayuya yekale mwigoda na kumufuga ayuya iyakwikala majuwa gose, aku wakutaga singhofiya sawo kumwande ye digoda dyo undewa na kwimba, 11 “Kwagiligwa gweye Mundewa na Mulungu wetu, kuhokela ditunyo na ukulu na udaha, kosoko gweye no wumbile ifinhu fyose na kwa kwenda kwako fyabaho na hafyumbigwa.”
1 Hanyona mumukono wa kulume wa yuya yekale mwigoda dye chindewa chitabu chiwandikigwe kunje na kugati nacho chohigwa na fikanhamiso mufungate; 2 Na honimona malaika mukulu yakulonga kwa ijwi ikulu kugamba, “Nona yagile kuchigubula ichitabu na kubena fikanhamiso fyakwe?” 3 Nhoneke hata yumwedu kulanga na hasi ye siisi yadahile kuchigubula ichitabu ama kuchilanga. 4 Honililila lugano kosoko nghoneke munhu wowose yawagilwe kuchigubula ama kuchilanga. 5 Yumonga wa wasehe hoyonigamba, “Unghalile Simba we dikabila dya Yuda Ulukolo lwa Daudi kasuma kosoko iyo yakudaha kuchigubula ichitabu na kufibena ifikanhamiso fyakwe.” 6 Hagati ye digoda dye undewa na fiya ifiyumbe fyumi mugati ya wasehe, honikona Mwana ngholo yemile kifana kachinjigwa kena mahembe mufungate na meso mufungate, isene so no mimuhe mufungate ye Mulungu itumigwe muchilunga chose. 7 Hakaluta na kuchilonda achiya ichitabu kulawa mumukono wo kulume wa yuya yekale mwigoda dye undewa. 8 Yakafuluse kuchilonda ichitabu ifiyumbe ifine na waya wasehe makumi na wane howomugwila yuya Mwana ngholo, chila yumwedu kakola ibwalimbwa na mabakuli ge sahabu gamemila ufumba na kutasa kwa wasunhile. 9 Wakwimba lwimbo lusha wakugamba: “Kwagiligwa agweye kulonda ichitabu na kubena ifikanhamiso fyakwe, kosoko agweye hakuchinjigwa na kwa sakame yako kuwagula wanhu wowe wa Mulungu, wanhu kulawa chila ikabila, nonga na mataifa gose; 10 na kuwagolosa wowe wandewa na makuhani wakutogoma kwe Mulungu wetu, na wakwenda watawale muchilunga.” 11 Kamei honilanga na kuhulika ijwi dya malaika matewa wakusunguluta digoda dye undewa na fiya fiyumbe ifyumi na wasehe; wasikudaha kutalika, figulu na figulu, 12 wakwimba kwa ijwi dya muchanhya lugano, “Kagiligwa Imwana ngholo iyachinjigwe kuhokela udaha na ugoli na ubala na kusuma chogoho na itunyo na mboto!” 13 Hanihulika chila chiyumbe kulanga na hasi ye iisi hata kubahali kose uko fikugamba, “Kwayuyo yekale mwigoda dye chindewa na kwe Mwana ngholo yuwe mboto na chogoho na itunyo na ludole majuwa gose hano!” 14 Kamei ifiyumbe fiya fine hofigamba, “Hano!” Kamei na wasehe wakugwa hasi na kufuga.
1 Kamei honikona Mwana ngholo yakukubula chimwedu che fikanhamiso mufungate, na kuhulika yumwedu wa fiyumbe ifine yakwinanga kwa ijwi ikulu ijwi kifa dya ibumo, “Wije!” 2 Na honikona langa falasi njelu, na iyasikwilile kena uta na kofiya ye chindewa yoyenghigwe hoyoluta kuchilunga na kosoko ya kusuma kwakwe na kusuma kahi. 3 Kahi foyagubule chikanhamiso cha keli hanimuhulika ichuyumbe ichumi cha keli, chikugamba, “Wije!” 4 Hoikwija falasi ingi ndunghu gu, iyakwilile hakenghigwa udaha wa kuleusa idigoya muchilunga, uleke awanhu wakikome chila munhu na miyagwe, hakenghigwa ipanga ikulu. 5 Yakakumule ichikanhamiso cha kadatu, hanihulika chiyumbe cha kadatu chikwinanga kwa ijwi ikulu, “Wije!” Hanilanga na kona Falasi ingi nhitu imunhu yakwilile hakowa na misani ya kupimila mumikono yakwe. 6 Kahi hanihulika chinhu kifana ijwi mugati ye fiyumbe fyumi ifine, ikugamba, “Chibaba chimwedu che usage we ngano kwa dinali na fibaba fidatu fye usage we shaili kwa dinali, ninga wanghabane mafuta ne difayi.” 7 Yakakumule ichikanhamiso cha kadatu, hanihulika dijwi dye chiyumbe china wumi cha kane chikugamba, “Wije!” 8 Honikona langa, ifalasi ina langi ya difu, ayuya yakwilile, yakwinangwa ifa na kusimu kukumwandamila hoyokwinghigwa udaha mulobo imwedu ye chilunga, kukoma kwa ipanga na njala na kwa matamu na kwa makala ge muchilunga,. 9 Yakakumule, ichikanhamiso cha shano, honikona hasi ye hefugilo fidoga fyawo wanhu wakomigwe kosoko ye imbuli ye Mulungu na uhomelesi wawo wowalongile, 10 howojoja kwa ijwi ikulu, “Agwe go Mundewa Mukulu musunhile na we chawelu, mpaka milaki ukuchiliganisa na kuwaliha chisasi che sakame yetu muchanhya ya wekale muchilunga?” 11 Kamei chila yumwedu hakenghigwa nghasu njelu na kugambigwa wagojele chidodogi, mpaka ifike inhala ya wayawo watumigwa fina wene, yuwe imemelekela, awene awakwenda wakomigwe fina awene fowakomigwe. 12 Yakakumule ichikanhamiso cha mutandatu, hanilanga na kona, isingisi ikulu na dijuwa hodikuwa ititu kifana iguniya, umwesi wose houkuwa kifana sakame. 13 Na sinyelesi sa kulanga hosilagala hasi fina umukuyu foukulagasa singhuyu sisikangale maukusingisigwa na uluputa lwa imheho ikupumunha ugele we inyota. 14 Ulanga haukikunja kifana kalatasi, na chila itunda na chisiwa hafileusigwa ahanhu hawo. 15 Kamei awandewa we chilunga awanhu wakulu na wakulu we selikali na wagoli na wena ludole na chila munhu mutumwa na isimutumwa, wakifisa mumapango na mumawe ga matunda 16 wakugamba amatunda na mawe, “Chugwileni ma muchifise kumwande ye chihanga chakwe ayuya yekale mwigoda dya undewa na inyono ye Mwana ngholo; 17 kosoko dijuwa dikulu dye inyono yawo difika nani yakwenda yadahe kwima hamwande yakwe?”
1 Ichinhu chandamile chonyonile hachuwa malaika wane wemile kulwandi sose ine se chilunga, waikolelese imheho inghapumunhe muchilunga na mubahali na mumabiki. 2 Honikona malaika yungi kulawa kulwandi we dijuwa kena chikanhamiso che Mulungu imumi. Hoyokwinanga kwa ijwi ikulu kumalaika awaya wane awenghigwe udaha wo kubana iisi ne bahali, 3 wakugamba, “Munghabane iisi hegu ibahali hegu mabiki, mpaka niwagume ifitangilo fye fikanhamiso awatumigwa we Mulungu mufihanga fyawo.” 4 Honihulika ihesabu yawo waya wagumigwe ifitangilo fye fikanhamiso, figulu makumi mane na wane kulawa chila ikabila dya wana wa Isilaeli: 5 Kulawa mwikabila dya Yuda wagumigwe chitangilo wanhu figulu ikumi na fili, mwikabila dya Leubeni figulu ikumi na fili, kulawa mwikabila dya Gadi figulu ikumi na fili, 6 kulawa mwikabila dya Asheli figulu ikumi na fili, dikabila dya Nafutali figulu ikumi na fili, dikabila dya manase figulu kumi na fili, 7 kulawa mwikabila dya Simionifigulu ikumi na fili. Mwikabila dya Lawi figulu ikumi na fili. Mwikabila dya Isakali figulu ikumi na fili, 8 kulawa mwikabila dya Sabuloni figulu ikumi na fili, kulawa mwikabila dya Yusufu figulu ikumi na fili na mwikabila dya Benyamini figulu ikumi na fili wagumigwe chitangilo 9 Chikaloke chino hanilanga ditewa dya wanhu awasikudaha kutalika fonu wengi, kulawa chila itaifa na makabila gose na kumwande ya digoda dya undewa na kumwande ye Mwana ngholo, wafasigwa nghasu njelu swee na matambi ge mitende mumikono yawo. 10 Kujoja kwa ijwi ikulu kugamba, “Uhonya uwa kwe Mulungu wetu yekale mwigoda dya undewa we kwe Mwana ngholo!” 11 Kamei malaika wose howokwima kusunguluta digoda dye undewa na wasehe ne fiyumbe fyose, howokugwa chifunhifunhi na kumufuga Mulungu, 12 wakwimba kugamba, “Hano! Imboto na ditunyo na ubala na malumbo na chogoho na uludole na udaha uwe ukwako Mulungu wetu wa majuwa gose! Hano.” 13 Kamei yumwedu wa wasehe hoyolonga na niye yakugamba, “Awano chenani woukona wafalile makasu majelu kahi walawa hoki?” 14 Honimugamba, “Mukulu kumanya gweye.” Kamei hoyonigamba, “Awano nowaya walawile mumagayo makulu lugano, wafuwa singhasu sawo na kusigolosa suwe njelu musakame ye Mwana we ngholo. 15 Kosoko iyo wowe kumwande ye digoda dyo undewa dye Mulungu, na wakumutogomela chilo ne imisi mwi hekalu dyakwe na yuyo yekale mwigoda dya undewa yakuwagubika na nyuwa yakwe baho. 16 Wasikuwa na njala kahi nghilu, dijuwa disikwenda diwasome, hegu kuwalakasa; 17 kosoko Mwana we ngholo yakuwa muchiligati ye digoda dyo undewa na kuwa mudimi wawo, naye kowalongosa kusinhyoko sa meji ga uwumi na Mulungu yakwenda yawahamuse chila isosi mumeso gawo.”
1 Ugele Mwana ngholo yakagubule ichikanhamiso che mufungate, kulanga hakunyamala posi kwa chigele cha nusu saa. 2 Kamei honikona malaika mufungate awakwima kumwande ye Mulungu, howokwinghigwa magunda mufungate. 3 Malaika yumonga kena chiya cho kusomela ubani cha sahabu na kwima hefugilo, hakenghigwa ubani mwingi yalafe hamwedu na mataso ge wasunhile wose, hamwande ye difugilo diya dye sahabu dyuwile hamwande ye digoda dyo undewa. 4 Kamei umosi wo ubani uya houkwila hamwedu na mataso ga wasunhile mpaka hamwande ye Mulungu kulawa mumukono wa yuya malaika. 5 Kahi malaika hakalonda ichiya cho kusomela ubani na hoyochimemesa, kamei moto kulawa hefugilo na kuukubita kuchilunga, hukukuwa na kudidima, chowe, imwemwe kupulika na disingisi dye chilunga 6 Kamei malaika mufungate awile na magunda mufungate howokonga kuyatowa magunda gawo. 7 Imalaika we nghonga hoyotowa digunda dyakwe kame haitonya fula ya mawe na moto ihasile ne sakame, hoitonya muchilunga kamei isehemu inghulu ye chilunga hailakala, na ulwandi lwa mabiki gago hogatikitila, ne nyasi yose ikwani hoyilakala fibi. 8 Imalaika wa keli hakatowa naye digunda dyakwe kamei hachilawanisa chinhu, kifana itunda ikulu dikwaka moto, hodikubitigwa kubahali. 9 hayuwa sakame mubahali kalibu fiyumbe fyose ifyumi mubahali hofikufa na simeli sose hasibanika. 10 Imalaika wa kadatu hakatowa naye digunda dyakwe, kamei, dinyelesi ikulu hadalagala kulawa kulanga dikwaka kifana imuli, hadilagala kalibu musisanda sose ne sinhyoko sa meji. 11 Disina dye dinyelesi diya ni Sungwi. Ameji kalibu gose hogagaluka sungwi na wengi howokufa kosoko ya meji gago kosoko hagowa ga usungu lugano. 12 Imalaika wa kane hakatowa naye digunda dyakwe, isehemu yose ye dijuwa haibanigwa ne mwesi wose ne sinyelesi, kamei fyose hofititihala, na imisi hoikuwa chilo. 13 Kamei hanilanga na kuhulika inumba dikulapa kwa ijwi ikulu ugele fodyapululukage mulanga dikugamba, “Usungu, usungu, usungu lugano kwa waya wekale muchilunga nemamagunda gamonga agehabehi kutoigwa nawaya malaika wadatu awasigale!”
1 Kamei malaika wa shano hakatowa naye digunda dyakwe, hanyona nyelesi ikulagala kulawa kulanga mpaka hasi, kamei hoikwinghigwa ifunguwo ikukumula dikolongo dya kusimu; 2 yakadikumule dikolongo diya, hakulawa mosi ukifane mosi wa ililimba dya moto kamei idijuwa ne ujelu we iisi hofititihala kosoko ya umosi. 3 Kamei kulawa muumosi uwo hakulawa sige muchilunga, sige siya hasinghigwa ludole kifana chisuswe. 4 Hosigambigwa singhabane imbago hegu chinhu chochose, ama mabiki ninga awanhu waya wechaka ichitangilo che chikanhamiso che Mulungu mufihanga fyawo. 5 Hasigambigwa siwasambase kwa chigele cha minyesi mishano, ninga singahwakome, usungu wakwe hawuwa kifana usungu wa munhu yalumigwe ne chisuswe. 6 Na ugele wa majuwa gago gose wohananga difa ninga wasikudipata, wosulumila wafe ninga difa dikwenda diwatije. 7 Na koneka kwawo sige siya sakifana falasi sikuluta kunghondo, mumatwi gawo sifala finhu kifana kofiya sa undewa sa sahabu, ifihanga fyawo fya kifana wanhu. 8 ubahila wawo wakifana njwili sa wanawake na meno gawo kifana ga simba; 9 hawowa na misani ikifane ngulo ya chuma mufiya fyawo, na ichowe che mabawa gawo hachuwa kifana chowe cha matuka mengi agekukwegigwa na falasi sikubilimila kunghondo. 10 Sina mikila kifana fisuswe, na ikuluma kahi ina uludole lwa kuwagaisa wanhu kwa minyesi mishano wowe mumikila yawo. 11 Wenaye mundewa wawo imalaika we dikolongo dye kusimu; disina dyakwe kwa Chiyebulaniya yakwinagwa Abadoni na Chiyunani yakwinangwa Apoliyoni. 12 Usungu we nghonga uloka, langa sikaili sungu mbili sikwija. 13 Kamei imalaika we mutandatu hoyotowa naye digunda dyakwe, hanihulika ijwi ikulu kulawa msimhembe ine se difugilo dye sahabu dyuwile hamwande ye Mulungu, 14 dikugamba, imalaika we mutandatu iyowile ne digunda, “Walekele amalaika wane wohigwe kulwanda uya mukulu lwa Fulati.” 15 Kamei malaika waya wane howalekeligwa, awafuluse kwikigwa kosoko ye chipisi, dijuwa, na mwesi, na mwaka, wakome cheleko kalibu chose cha wanhu. 16 Ihesabu ya awasilikali wakwilile sifalasi hayuwa; miliyoni magana meli, honihulika ihesabu yawo. 17 Nhafi nofonyonile sifalasi munyona yangu: Awapandile wafala mufifa fyawo ngulo se chuma sina langi ndunghu kifana moto, fikifane mawe ga ugoli mwingi, na matwi ge sifalasi siso gakifana matwi ga simba, na mumilomo yawo kukulawa moto na mosi kifana wa chibiliti. 18 Kwa magayo gano madatu sehemu nghulu ya wanhu haikomigwa, kwa umoto na umosi na chibiliti fikulawa kumilomo ye sifalasi siso. 19 Kosoko uludole lwe sifalasi luwa mumilomo yawo na mumikila yawo, imikila yawo ikifana majoka gena matwi na kwa matwi gawo gago gakubulaga. 20 Awanhu wasigale awasikomigwe ne mafa gago nowaya wasalambile imilimo yawo ye mikono yawo kahi kufuga simhepo ne milungu ye sahabu ne pesa na shaba na mawe na mabiki, iyene isikona hegu kuhulika, ama kugenda; 21 wasalambile, kukoma kwawo, ninga hata uhayi wawo na dihabwa dyawo na uhiji wawo.
1 Kahi hanyona malaika yungi wa ludole yakwija kulawa kulanga kafala difunde; ne diwuta dye ifula muchanhya ye ditwi dyakwe, na ichihanga chakwe hachuwa kifana ijuwa ne imigulu yakwe kifana sumbi sa moto. 2 Na mumukono wakwe hakowa na chitabu chidodogi, na hakajata umugulu wakwe wo kulume mubahali na umugulu wakwe wo kumoso muulongo kunje ye bahali, 3 hoyokwinanga kwa ijwi ikulu kifana disimba dikubuluma, yakenange imibumo mufungate hoihulikika. 4 kamei ikahulikike iya mibumo mufungate, nendenihananga niwandike, kamei hanihulika kahi ijwi kulwa kulanga dikugamba, “Kanhamisa ifikanhamiso fyako, isimbuli silongigwe ne mibumo unghawandike.” 5 Na imalaika yuya wonyonile yajatile mugulu umonga mubahali umonga muulongo kunje ye bahali, hakenula umukono wakwe wo kulume kulanga 6 na kilaha kwa yuya imumi wa majuwa gose yombile ulanga na fyose fyuwile muchilungana mubahali na fyose kahi fuwile umo, yakugamba, “Kunghowe na kusululuka, 7 ninga ugele wa majuwa go kutoigwa digunda na malaika mufungate, ichifiso che Mulungu chomemelekela, fina foyalongile kuwagonesi wakwe.” 8 Kahi ijwi, hanidihulika kulawa kulanga, dikunigamba, keli, gamba, “Luta londa ichitabu chigubuligwe mumukono we Malaika yuya yemile mugulu umonga mubahali na umonga kunje ye bahali.” 9 Kamei hanimulutila imalaika na kumugamba yaninghe chitabu chiya; naye hoyonigamba, “Chilonde na uchidiye, chokuwa chausungu kunda, ninga chamulile kifana uki mumulomo wako.” 10 Kamei honilonda kulawa mumukono we malaika ichitabu chiya, na kuchidiya, chawelu hachuwa chamulile hamulomo kifana uki, ninga nikamale kudiya kunda hakuwa kwausungu kifana sungwi. 11 Kamei hawanigamba, “Hambiya ukonge kugonesa lwa keli, muchanhya ye wanhu matewa na mataifa, ne sinonga kahi na wandewa.”
1 Kamei honikwinghigwa chibiki cha kupimila chikifana mhando, honigambigwa, “Wije na upime dihekalu dye Mulungu ne difugilo na wose awakufuga umo, 2 ninga unghapime dikumbo kunje ye dihekalu kosoko dyo dinghigwa awamataifa wakwenda waijate ikaya isunhile kwa minyesi makumi na mane na meli. 3 Nikwenda niwenghe wahomelesi weli udaha wo kutamila, chigele cha minyaka chigulu chimwedu magana meli naminyesi mutandatu wafalile maguniya.” 4 Agano no mabiki meli ge miseituni na figwaso fili fye sitaa fimile kumwande ye Mundewa we isi. 5 Na munhu wowose yanghenda kuwabulaga, moto kulawa mumilomo yawo ukuwalakasa awanghondo wawo; na wowose iyewakoma nhafo nofoyakwenda yatendigwe. 6 Wena udaha kuhinda ulanga, ifula inghatonye, uleke kunghowe na fula nomowakugonesa, kahi wena udaha muchanhya ya meji, kugabidula gowe sakame, na kuibulaga dunia na matamu fina fowakwenda. 7 Fowakumala uhomelesi wawo, dikala dkwenda dije kulawa kwikolongo dya kusimu na kulewa nghondo na kuwasuma na hata kuwakoma, 8 na mitufi yawo ikutagigwa munje mudikaya diya dikulu idifane Sodoma na Misili kwa chimuhe, ahanhu Mundewa wawo hoyasambasigwe. 9 Kwa chigele cha majuwa madatu na nusu, wandugu we wawo wafile, na makabila na chila nonga na mataifa wolanga mifimba yawo na kulema kuwasika; 10 na wakaya we chilunga wobwedelela kosoko yawo kwa chinyemi na kiingha fipengwa kosoko awaya wagonesi wawagaisa wanhu we chilunga. 11 Ninga gakaloke majuwa madatu, muhe wa Mulungu wija uwengila, na howokwima kwa migulu yawo, wanhu wawonile hawakolwa na itisi lugano. 12 Kamei hawahulika ijwi ikulu kulawa kulanga dikugamba, “Kwileni kuno!” Howokwila kulanga mwifunde chigele cho awanghondo wawo wakuwalanga. 13 Muchigele chicho hakuwa na isingisi dya chilunga, iisi na wasigale howokogoha na kumwingha itunyo Mulungu wa kulanga. 14 Usungu wa keli uloka. Usungu wa kadatu ukwija chimwande. 15 Kamei malaika wa mufungate katowa naye digunda dyakwe, hakuwa na ijwi ikulu kulanga, dikugamba, “Undewa we chilunga ungaluka ndewa wa Mundewa wetu ne Masihi wakwe, naye kulongosa minyaka kwa minyaka.” 16 Kamei wasehe waya makumi meli na wane awakwima hegoda dye undewa hamwande ye Mulungu wogwa wose hasi na kumufuga Mulungu, 17 wakwimba nhafi, “Chikukwingha malumbo, Mundewa Mulungu Mukulu, uwowile uko kahi ukwija kosoko kuulonda udaha wako mukulu kahi hakukonga kudima. 18 Amataifa hagadeseka, ninga nyono yako ija, na chigele cha kuwaliganisa wafile, kwa kuwaliha awatogomi wako na wagonesi na wasunhile na wose wendewogoha disina dyako, wose wakulu kwa wadodogi, na kuwabulaga waya awabulage ichilunga.” 19 Kamei dihekalu dye Mulungu kulanga hodikumuka kumu! Kamei disafina dye dilagano dyakwe hadyoneka mugati ye dihekalu; kahi hakuwa na fimuli fikumulika, na majwi kudidima, ne dimasingisa, na fula nghulu ya mawe.
1 Kahi chitangilo chikulu hachoneka, langa mwanamuke yafalile idijuwa na umwesi hasi ye migulu yakwe na mwitwi dyakwe nghofiya ina nyelesi ikumi na na mbili, 2 hakowa na inda na kosoko ya usungu umukali wo kidohola hakalila lugano. 3 Na chitangilo chingi hochikoneka kulanga, langa hakuwa na ijoka ikulu idunghu dina matwi mufungate na mahembe ikumi gena kofiya sa chindewa mufungate mwitwi dyakwe, 4 umukila wakwe houkwelegeta kalibu sinyelesi sose sa kulanga na kusilagasa hasi, na dijoka diya hadima habehi ne mwanamuke yuya yowile habehi na kweleka uleke dichimese ichali. 5 Mwanamuke yuya hakakidohola mwana wa chigosi, imwene iyakwenda yadime na kulongosa amataifa gose ne mhando ye chuma, kamei imwanagwe yuya hoyokwinuligwa mpaka kulanga kudigoda dye Mulungu. 6 Mwanamuke hakatijila kunyika kuwile na hanhu hekigwe ne Mulungu, nghakwinghigwa chakudiya kwa majuwa chigulu chimwedu na magana meli na makumi mutandatu. 7 Hambiya, inghondo haikonga kulanga, Mikaeli na malaika wakwe, wakulewa ne dijoka, nadyo dijoka nadyo na malaika sakwe hodilewa nawo nghondo. Ninga dijoka na wayagwe howotoigwa lugano, 8 kahi hawasumwa, na hakuwa kwichaka luneka kwa wene kahi kwikala kulanga. 9 Idijoka diya dikulu haditagigwa hasi, dijoka dya katali, dikwinagwa Luhoma na Shetani, imudasi we chilunga chose, hoyotagwa hasi kuchilunga, na malaika sakwe hamwedu naye. 10 Kamei hanihulika ijwi ikulu kulanga, dikugamba, “Hambiya uhonya ne ludole fija ne undewa we Mulungu wetu na udaha we Masihi wakwe, kosoko imusongesi we wandugu setu katagigwa hasi, iyendeyawasongesa misi na chilo hamwande ye Mulungu wetu. 11 Ninga howomusuma kwa sakame ye Mwanangholo na kwa mbuli ya uhomelesi wawo, kosoko hawendile nyikala yawo mpaka kufa. 12 Bwedeleleni hambiya, anyeye ulanga na waya wakwikala umo! Ninga usungu kwichilunga ne mubahali, kosoko luhoma katagigwa ukwenu kena nyono ikufungha, kosoko kamanya fina ugele wakwe mukefu!” 13 Hambiya ugele dijoka dikamanye fina ditagigwa hasi ye chilunga, hodikonga kumwidasa mwanamuke yuya yeleke imwana we chigosi. 14 Ninga mwanamuke yuya hakenghigwa mabawa meli ge dinumba dikulu uleke yapululuke kulawa hedijoka mpaka kunyika ku a hanhu hoyekiligwe yekale na kwinghigwa chakudiya kwa minyaka midatu na minyesi mutandatu. 15 Kamei dijoka hodilafa kulawa mumulomo wakwe meji kunyuma ye mwanamuke yuya, meji gaya hagowa kifana lwanda uleke gamukome kwa kunywa munghabu. 16 Ninga iisi hoikwija na kumutasa imwanamuke iisi hagubula mulomo wakwe na kuyonywa ameji gose dijoka godyalafile kumulomo wakwe. 17 Dijoka hadisuha ne mwanamuke yuya hadiluta na kulewa nghondo ne wanagwe kuwaya awakukola amalagiso ge Mulungu na kuhomelela muchanhya ya Yesu. 18 Kamei dijoka hodikwima munghingi, kusanga ye bahali.
1 Kamei hanyona ikala dyenuke kulawa mubahali dine mahembe ikumi na matwi mufungate, chila ihembe dina kofiya ya chindewa na isina dya kutofula muchanhya yakwe. 2 Na dikala diya dyonyonile dikifana duma, migulu yakwe kifana migulu ya idubu, na dilomo dyakwe dikifana ilomo dya simba, kamei idijoka hodidingha dikala diya udaha ana nghofiya yakwe ye chidewa na ludole mukulu. 3 Ditwi dyakwe dimonga dyoneka kifana dina ilonda ikulu dya kukoma, ninga dilonda dyakwe diya hadihona, na ichilunga chose hochidyandamila dikala diya kwa majumo. 4 Hawadifugamila dijoka diya, kosoko hadingigwa udaha wakwe kulawa kwe dikala, howodifuga dikala wakugamba, “Nonani yafanile gweye go dikala kahi nani yakudaha kitowa na gweye?” 5 Dikala hodikwinghigwa mulomo na kubwata mbuli sa kitogola na kutofula, hadilekeligwa konesa udaha wakwe kwa minyesi makumi mane na mili. 6 Hadigubula mulomo wakwe na kulonga matofulo kwe Mulungu, nqa kutofula disina dyakwe na wikalo wakwe na waya wakwikala kulanga. 7 Hodikwinghigwa udaha kulewa nghondo na wasunhile kahi hodiwasuma, kahi hadinghigwa udaha kuchila ikabila, chila wanhu, na chila nonga na chila itaifa, 8 na wose woile muchilunga wakwija wadifuga, chila munhu imwene disina dyakwe disiwandikigwe muchitabu che Mwana ngholo iyachinjigwe. 9 Munhu wowose yena singhutwi yahulike. 10 Munhu wowose yanghalondigwa kuwa mutumwa yakuluta kuutumwa; unghakoma kwa ipanga nagwe kuwagila ukomigwe kwa ipanga. Alono no lwinango lwo kufinyilisa ne dihuwi dya wasunhile. 11 Kahi hanyona ikala dingi dyasololoka muchilunga; haduwa na mhembe mbili sakifana mhembe sa ngholo na dilonga kifana ijoka. 12 Dikugolosa udaha wose wa diya dikala dye nghonga kumwande yakwe, na kuwagolosa we chilunga chose wafuge kwi kala diya dye nghonga, dyahonile dilonda dyakwe dyo kufa. 13 Dikugolosa majumo hata kwigala umoto kulawa kulanga kwija kuisi kumwande ya meso ga wanhu. 14 Na majumo gaya godyagolosage kumwande ye dikala, dikudanhilisa awekwikala muchilunga, diwalonga wagolosa sisanamu sa diya dikala dyowile na dilonda dyo kukoma dyabulagigwe ne dipanga ninga dikali dyumi, 15 hodikwinghigwa udaha kuguma muhe kudisanamu diya dye dikala mpaka kudaha kulonga na kuwagolosa waya awakulema kufuga wachijigwe. 16 Na kuwagolosa wanhu wose wadodogi na wakulu, awagoli na wakiwa awaya awatumwa na awasiwetumwa kugumigwa chitangilo mumukono wo kulume ama muchihanga, 17 uleke munhu wowose yanghadahe kugula hegu kwambasa, ninga ayuya du yene ichitangilo chicho che dikala diya ama ihesabu ye disina dyakwe. 18 Ayino ikuhananga ubala: Ayuya yena misungu yamanye ihesabu ye dikala, kosoko ni hesabu ya chimunhumunhu. Ihesabu yakwe ni magana mutandatu na makumi mutandatu na mutandatu.
1 Kamei hanilanga, na hahowa na Mwanangholo, yemile Mwitunda dya Sayuni! Hamwedu ne mwene wema wanhu figulu igana dimwedu na makumi mane na ine awowile ne disina dyakwe kamei ne disina dye Babakwe diwandikigwe mufihanga fyawo. 2 Hanihulika ijwi kulawa kulanga kifana ijwi dya meji mengi, na kifana ijwi ikulu dikudidima, dijwi diya dyonahulike hadyuwa kifana wanhu wakutowa fibwalimbwa fyawo, 3 wakwimba lwimbo lusha kumwande ye fiyumbe fine ifyumi na kumwande ya wasehe. Kwichaka munhu wowose yadahile kifusa kwimba ulwimbo uya ninga awaya du figulu igana dimwedu na makumi mane na wane awene awahonyigwe kulawa kuyisi. 4 Nowaya awasikibanile ne wihi we dihabwa, kosoko ni mabikila; awano no wamwandamile Mwanangholo kokose koyalutile. Wahonyigwa kulawa muwanhu wowe kifana mamudyo ge nghonga kwe Mulungu na kwe Mwanangholo, 5 na usoneka udasi wowose mumilomo yawo; wanhu wechaka ilema. 6 Kahi hanyona malaika yakupululuka muchiligati cho ulanga, kena mbuli swanu ye majuwa gose yakuhubili kuwaya awomi woile muchilunga kwa chila itaifa na ikabila, nonga na chila wanhu. 7 Yakulonga kwa ijwi ikulu lugano kugamba, “Mogoheni Mulungu kahi mwingheni itunyo, kosoko ugele we uliganiso wakwe wija; kahi mufugeni imwene yombile isi ne ulanga, bahali ne nhyoko sa meji.” 8 Kame malaika yungi wa keli, hakandamila, yakugamba, “Kugwa, kugwa, agweye Babeli go mukulu mugima! Iyawagolose mataifa wonywe difayi ye nyono ye dihabwa dyakwe.” 9 Kamei malaika yungi wa kadatu, hakawandamila, yakujoja kwa ijwi ikulu lugano yakugamba, “Imunhu wowose yakudaha kudifuga, dikala ne isanamu yakwe na kuhokela ichitangilo muchihanga chakwe ama mumukono wakwe, 10 naye yakwenda yonywe idifayi ya inyono ye Mulungu na yakwenda yalakasigwe na umoto we chibiliti kumwande ye malaika wasunhile na kumwande ya Mwanangholo. 11 Na umosi wo kulakala kwawo ukuluta kulanga minyaka na minyaka, na wasikubwihila misi na chilo wawo wafugile dikala na isanamu yakwe, na chila munhu iyakuhokela ichitangilo che disina dyakwe.” 12 Aluno ni lwinango lwa kufinyilisa, kosoko ya wasunhile awaya awakolile amalagiso ge Mulungu na dihuwi dya Yesu. 13 Honihulika kahi ijwi kulawa kulanga dikugamba, “Wandika dino fina. Ibeka awafile, awakufila mwihuwi dye Mundewa kulawa hambiya,” Heye yakulonga Imuhe, “Wabwihile kulawa mutabu yawo, kosoko nhenda sawo siligana nawo.” 14 Kamei hanyona, langa hahowa na ifunde ijelu, na yekale mwifunde didyo munhu yafane Mwana wa Munhu, kena nghofiya ya sahabu mwitwi dyakwe, na sengo nghali lugano mumukono wakwe! 15 Malaika yungi hakalawa kulawa kwihekalu, yakumwinanga yuya yekale mwifunde dijelu kwa ijwi ikulu lugano yakugamba, “Konga kusenga ne isengo yako ugole, kosoko ichigele cho kugola chifika, na kosoko indiya yokugola muisi ifulusa kukangala.” 16 Kamei ayuya yekale mwifunde, hoyoikubita isengo yakwe muchilunga, na fyechilunga hofigoligwa. 17 Kamei malika yungi hakalawanisa kulawa mwihekalu dya kulanga, naye hakakola sengo nghali lugano. 18 Kamei malaika yungi kahi hakalawanisa kulawa hefugilo, hakowa malaika yena udaha mukulu muchanhya ye moto, hoyomwinanga kwa ijwi ikulu ayuy yowile ne sengo inghali, “Guma isengo yako kudumula imisabibu yuwile mumigunda ye misabibu muisi kosoko sisabibu sifulusa kwifa.” 19 Baho iamalaika hoyotema ne sengo yakwe kulunda sisabibu sose muchilunga na kusiguma ahanhu hagolosigwe kukamila sisabibu ne inyono ye Mulungu; 20 na hokukamila sisabibu hahowa kunje ye ikaya, na isakame kulawa ahanhu haya hokukamila hoikwitika kifana lwanda lukulu lwa meji na kwingila hasi yendeifika musingo, kamei utali wakwe kifana maili magana meli.
1 Kamei hanyona chitangilo chingi kulanga, chikulu na cha ijumo, malaika mufungate na magayo mufungate ge kumalagisa, kosoko ya wawo inyono ye Mulungu imemelekela. 2 Na hanyona chinhu kifana bahali ifanile chiyoo chihangile na umoto, na awaya wadisumile dikala diya ne sanamu yakwe ne hesabu ye disina dyakwe, hawema munghingi ye bahali ye chiyoo wena fibwalimbwa fye Mulungu mumikono yawo. 3 Wakwimba lwimbo lwa Musa, mutogomi we Mulungu, na kwimba lwimbo lwe Mwanangholo kugamba: “Singhenda sako nghulu na sa majumo, Mundewa Mulungu Mukulu! Sinjila sako siliganila na sa chawelu, Mundewa wa mataifa! 4 Mundewa, nonani inghakwenda yogohe na kuditunya disina dyako? Kosoko agweye muhala no musunhile. Mataifa gose gokwija na kufuga hamwande yako, kosoko uliganiso wako ugubuligwa.” 5 Gakaloke gano hanilanga kahi na kona, dihekalu dye dihema dye uhomelesi dikumuligwa kulanga, 6 kulawa umo mwihekalu hawa malaika mufungate wena fililo mufungate wena suke sifanile bafuta sikwakaika na mufifa fyawo wafala mikanda ya sahabu. 7 Na yumwendu we fiyumbe ifyumi hakawengha malaika mufungate mabakuli ga sahabu gamemile inyono ye Mulungu ye kwikala majuwa gose, 8 na dihekalu hadimemesigwa mosi kulawa mwitunyo dye Mulungu na kulawa muludole lwakwe, na hechaka munhu yadahile kwingila kwihekalu kugati mpaka fililo mufungate fuya fya malaika mufungate fihele.
1 Kamei hanihulika ijwi ikulu kulawa kwihekalu dikuwagamba amalaika mufungate, “Luteni muketile kuchilunga amabakuli mufungate ge inyono ye Mulungu.” 2 Imalaika we nghonga hakaluta na kwitila dibakuli dyakwe muchilunga, awanhu hawapata malonda gehile awaya wose woile ne chitangilo che dikala ne wafugile isanamu yakwe. 3 Imalaika wa keli hoyokwitila dibakuli dyakwe mubahali, bahali hayuwa kifana sakame ye munhu yafile, na chila chowile umo hochikufa. 4 Imalaika wa kadatu haketila dibakuli dyakwe musisanda na musinhyoko, kamei hoikuwa sakame lugano. 5 Na hanihulika malaika we chililo cha meji yakugamba, “Agweye gouliganile mukuliganisa kwako, Agweyo musunhile, Agwe gowi baho, na wowile baho, kosoko kusiliganisa simbuli sino; 6 kosoko hawetila sakame ya wasunhile na wagonesi, na gweye kuwengha isakame kunywa. Nonheifo iwawagile!” 7 Kamei hanihulika dihekalu dikubidula kugamba, “Heye, Agweye Mundewa Mulungu, Mukulu mudaha wa fyose, uliganisi wako ni wachawelu na uliganila!” 8 Imalaika wa kane haketila dibakuli dyakwe mwijuwa, hodikuwa na ukali lugano hodisoma wanhu kwa moto, 9 wanhu howolakala lugano ne dililimba dyo moto, ninga hawaliga disina dye Mulungu, iyene udaha mumalilo gano na hawalambile hegu kumwingha itunyo 10 Imalaika wa shano haketila dibakuli dyakwe muchanhya ye digoda dye undewa we dikala diya, na muundewa wakwe wose homubanika lugano na kwingila chisa; wanhu hawaluma malimi gawo kwa usungu mukulu, 11 na kumuliga Mulungu wa kulanga kosoko yo usungu wawo na malonda gawo, ninga wasalambile singhenda sawo. 12 Imalaika wa mutandatu, haketila dibakuli dyakwe mulwanda uya mukulu lwa Efulata, na meji gakwe hoganyala, uleke kugolosa njila sa sa kuloka wandewa kulawa kundawilo ye dijuwa. 13 Kamei hanyona mhepo ndatu sihile kifana mabula sikulawa kumulomo we dijoka ne kumulomo we dikala na kumulomo we mugonesi yuya wo udasi. 14 Asino no simhepo isikutogoma fitangilo, fikuluta kuwandewa we chilunga chose, kuwagala hamwedu kwa nyitowa nghondo mwijuwa diya dikulu dye nghondo ye Mulungu Mukulu. 15 “Langa, nikwija kifana imuhiji nomayakwija hechilo! Ibeka ayuya yakwikala meso na yafalile suse, yanghoneke fina kechaka suke yanghapate chinyala.” 16 Howalunda hamwedu hanhu hakwinangwa munonga ya Chiyebulaniya Halimagedoni. 17 Imalaika we mufungate haketila dibakuli dyakwe mumheho muchanhya, kamei dijwi ikulu hodilawa kulawa kwihekalu, kwigoda dyo undewa dikugamba, “Ifuluka!” 18 Hakuwa na lumwemwe lukumulika, ujelu, kudidima na disingisi ikulu lugano. 19 Dikaya dikulu hoditemanhuligwa sandi ndatu na sikaya sa mataifa hosikugwa na Mulungu hakagelegela dikaya dikulu dya Babeli, kudigolosa dunywe na kumalagisa ichikombe che inyono ye Mulungu. 20 Chila chisiwa hachitija kutali, na hahowa hechaka cha itunda dyodyose dyasigale; 21 na ifula nghulu ya mawe ga usito wa kilo makumi mashano hogowalagalila wanhu kulawa kulanga, mpaka wanhu hawamuliga Mulungu kosoko ya digayo dye ifula ya mawe, adino haduwa igayo dya kogoha lugano.
1 Kamei yumwedu wa malaika waya yowile ne mabakuli mufungate hoyokwija na kunigamba, “Wije nikwenda nikonese uliganiso we mwanamuke we dihabwa dikulu iyekale mumeji mengi, 2 imwene hata awandewa we isi wagenda naye, na ugimbi wakwe wo kugenda na wagose wekale muisi walewa kosoko ya iyo.” 3 Kamei hakanilonda kwa muhe, mpaka kunyika, na uko honikona mwanamuke gowa hamwedu ne ikewe dimonga idunghu dimemile masina go kutofula, dikala diya haduwa na matwi mufungate, na mhembe ikumi. 4 Mwanamuke hakafala isuke dya usulunge na idunghudunghu, dihambigwe na fihambo fya sahabu na mawe ga maliho makulu, na lulu kamei mumukono wakwe kakola chikombe cha sahabu chimememile maligo na masinhu gehile na uwafu wose we dihabwa dyakwe, 5 na muchihanga chakwe mwanamuke yuya hamwandikigwa isina dya chifiso, dikugamba, “Babeli mukulu, ing'inamunhu mukulu we dihabwa na gehile gose ge chilunga.” 6 Hanyona fina mwanamuke yuya hakalewa na sakame ya wasunhile, ne sakama ya wahomelesi wa Yesu. 7 Ninga malaika yuya hoyonigamba, “Nhani ukujumha? Nokutamila ichifiso che mwanamuke yuno, ne dikala diya idine matwi mufungate ne simhembe ikumi. 8 Adiya dikala dyowonile haduwaga uko, ninga hambiya dyakwichaka, ndyo dikwenda kukwila kulawa kwikolongo dya kusimu na kuluta kukwangamila. Na awanhu wa muchilunga awene masina gawo gasiwandikwe muchitabu cho uwumi kulawa mukumbigwa chilunga, wojumha ugele fowakwija wakona dikala, kosoko haduwa uko na hambiya dyakwichaka, kahi dokwija.” 9 Mbuli ino ikuhananga misungu na ubala mukulu! Amatwi gaya mufungate gowonile ni matunda mufungate goyekale mwanamuke yuya; kahi hena wandewa mufungate, 10 muwawo washano wafa, yumwedu yekali mumi, na wamonga wekali kwija; na foyakwija kokwikala chipisi chiguhi du. 11 Na kwa diya dikala idyowile uko kame hambiya dyakwichaka ni dya munane mugati ya waya mufungate, nadyo dikuluta kukwagilia. 12 “Na simhembe ikumi sowonile, ni wandewa ikumi awekali kuhokela undewa wawo, ninga wohokela na kuwa wandewa kwa disaa dimwedu muhala, hamwedu na diya dikala. 13 Awano wa hamwedu, nawo wakudingha diya dikala ludole na udaha, 14 wakwenda wagolose nghondo ne Mwanangholo, ne Mwanangholo yakwenda yawasume, kosoko imwene ni Mundewa wa wandewa wose na Mukulu wa wakulu wose, na waya woile ne mwene wakwinangwa wasaguligwe na awakuhuwilika.” 15 Na hoyonigamba, “Ameji gaya gowonile, ahanhu haya howonile yekale imwanamuke yuya we dihabwa, ni wanhu na matewa na mataifa na nonga. 16 Na simhembe siya ikumi sowonile, awene na dikala womudesekela; womugolosa mukiwa na wakwenda wamuleke yemwene, kahi ye mwasi wodiya inyama yakwe na kumusoma mumoto. 17 Kosoko Mulungu kaguma gano mumimoyo yawo, kumemelesa agaya goyahanange kugolosa, kwa kifumilisa hamwedu na kudingha dikala diya undewa wawo, mpka mbuli se Mulungu simemelekele. 18 Imwanamuke wowumonile, ni dikaya diya dikulu dikulongosigwa na wandewa we chilunga.”
1 Gakaloke gag, hanyona malaika yungi yakulawa kulanga kena udaha lugano, ichilunga hochikwakaika kosoko ye ditunyo dyakwe. 2 Hakenanga kwa ijwi ikulu lugano kugamba, “Dyugwa, dyugwa dya, dikaya dikulu dya Babeli! digaluka lwikalo lwa simhepo, njila ya kugenda chila mamuhe gehile, njila ya kugendela chila idege dihile, njila ya kugenda chila ikewe dihile. 3 Kosoko amataifa gose galewesigwa idifayi yakwe we dihabwa na wandewa we chilunga wagendile naye, na wachulusi we chilunga wagaluka wagoli kosoko ye inyikala yakwe ye kibwedesa.” 4 Kahi hanihulika ijwi dingi kulawa kulanga dikugamba, “Laweni kunje yakwe, wanhu wangu, uleke munghahangile wihi wakwe, hegu kuwa na umwedu naye mufililo fyakwe; 5 kosoko uwihi wakwe ulundigwa chilundo chifikile kulanga, na Mulungu kagelegela uwihi wakwe wose. 6 Muliheni nheifiya fina foyamuliheni nyenye, kahi muliheni mikangha mili ifanile sinhenda sakwe; mumuhasile mikangha mili muchikombe choyahasile. 7 Ifene foyakitogole imwecho na kugolosa dihabwa mwinghe ichipimo chiliganile na kona usungu na kulila, kosoko ku moyo wakwe yakugamba, ‘Aniye namundewa fina malikiya; aniye si na mwigane hata, kahi sikwija nikona chililo.’ 8 Hambiya malilo gakwe gomwijila ijuwa dimwedu utamu, ndilo ne njala naye kosomigwa mumoto; kosoko imukulu ni Mundewa Mulungu iyakwija yamulamula.” 9 Na awandewa we chilunga, wagolose dihabwa na kwikala mubwedelela hamwedu anye, wolila na kuhongesa lugano muchinhya yakwe nomowakwija wakona umosi wo kulakala kwakwe; 10 wokwima kutali kosoko ya usungu na magayo ge mwanamuke yuyo, nawo wogamba, “Usungu, usungu agweye go dikaya dikulu dyoludole dya Babeli, ni chipisi cha disaa dimwedu ulamusi ukwija.” 11 Na wachulusi we chilunga wakulila kosoko yakwe, kosoko hechaka munhu kahi yakukugula ifinhu fyakwe, 12 ikanda dye sahabu, fesa ne mawe ge maliho makulu, suke sa bafuta, samawi, halili na suke ndunghu, na chila fiswanu na finhu figolosigwe na simbali sa simhembe, finhu fya diyombe dikulu, fya mabiki, shaba, chuma, na masambalawe, 13 mudalasini, filungo, ubani, manemane, wudi, difayi, mafuta, usage wa ngano, ng'ombe na ngholo, falasi na mikokoteni, na watumwa, nong'amba ifidoga fya wanhu. 14 “Isigafu sahuwiligwe ne moyo wako siluta kutali na gweye, na ugoli wose ne ditunyo dyako fifulusa kuleuka ukwako, hafikuya keli!” 15 Awachulusi wawo wapatile finhu fyo ugoli kosoko ye imwene wokawakwima kutali kosoko yo kogoha amagayo gakwe wakulila na kuhongesa wakujoja wakugamba, 16 “Usungu, usungu, ikaya iya inghulu, ifasigwe suke swanu, sowile ne udunghudunghu, ihambigwe ne sahabu, hamwedu ne masambaluwe gakwakaika! 17 Kosoko kwa chipisi chiguhi ugoli wose uya wagilila!” Na awena simeli, na wose wakugenda mumeji na awachulusi wakwe wose wokwima kutali 18 ma kulila kwa usungu fowakona umosi ukumusoma, “Hena kaya yaki ifanile ikaya ino inghulu?” 19 Howokitilila diluli mumatwi gawo, fowakulila na kuhongesa, na kugamba, Usungu mukulu, usungu mukulu ikaya iya inghulu, umo nomowanhu wose wapatile ugoli kwa ugoli wakwe! Kosoko kwa chipisi chimwedu kahi chiguhi fyose fyagilila. 20 Bwedelela gweye Go ulanga kosoko yakwe, anyenye muwasunhile na muwatumigwa na wagonesi! 21 Kamei malaika yumonga we ludole kenula iwe difanile iwe dya lwala lukulu na kudikubita mubahali na kugamba, “Nheifo nofonikwenda nikukubite agweye go dikaya dikulu dya Babeli na nghukwija ukoneka keli; 22 kamei ijwi dye wakutowa ifibwalimbwa ne figoma, awekutowa sifuluti na magunda gasikwenda gahulikike kahi ukwako; 23 ujelu we itaa usikwenda woneke ukwako kahi, ninga dijwi dya bwana halusi au bibi halusi disikwenda dihulikike ukwako; awachulusi wako na wowile wakulu we chilunga na wanhu wose hawadanhilisigwa na uganga wako.” 24 Umwakwe umo hayoneka sakame ya wagonesi na ya wasunhile na wose wakomigwe muchilunga.
1 Gakaloke gano, honihulika chinhu, chowile kifana ijwi, matewa ga wanhu kulanga wakugamba, “Haleluya! uhonya na ditunyo na udaha wina Mulungu wetu, 2 kosoko uliganisi wakwe ni wa chawelu na uliganila, kumuliganisa iwe dihabwa dikulu, iyabanile iisi yose ne dihabwa dyakwe, na kumulamula imwene kuligana ne isakame ya watumigwa wakwe.” 3 Kahi hawajija wakugamba, “Haleluya! Umosi kulawa umwakwe ukufililika majuwa gose.” 4 Na wasehe makumi meli na ine na ifyumbigwe fine ifyumi hawogwa hasi kumufuga Mulungu, yekale mwigoda dye undewa wakugamba, “Hano. Haleluya!” 5 Na kulawa kudigoda dyo undewa hodihulikika dijwi dikugamba, “Yatunyigwe Mulungu wetu, anye moose muwatogomi wakwe, anye mukumogoha, wadodo na wakulu.” 6 Kamei hanihulika chinhu chowile kifana chowe cha itewa ikulu, kifana ijwi dya meji mengi, na kifana ijwi na madidimo ga ludole, gakugamba, “Haleluya! Kosoko iMundewa wetu Mulungu Imukulu no yakudima. 7 Haya chisekelele na kumwinula na kumwingha ditunyo, kosoko utole we Mwana we nholo ufika, na ibibi halusi wakwe kafulusa kitandila 8 hoyokwinghigwa kufala suke swanu sa bafuta njelu sikwakaika kahi swanu” kosoko sisuke siswanu se bafuta no sinhenda siswanu sa wasunhile. 9 Kamei imalaika hoyonigamba, “Wandika dino: Wamoteswe no waya awegonekwe kuchakudiya che halusi cha Mwana ngholo.” Hakanigamba, “Asino ni mbuli sa chawelu se Mulungu.” 10 Kamei hanugwa hamigulu kumufuga, ninga hakanigamba, “Unghagolose nheifo aniye namutogomi miyago hamwedu nagwe, na wanduguso wose awena uhomelesi wa Yesu mufuge iMulungu! Kosoko uhomelesi wa Yesu ni muhe wa ugonesi.” 11 Kamei hanyona ulanga ugubuke na langa falasi njelu na yuya iyakwilile muchanhya yakwe, yakwinangwa Muhuwiliki na Wachawelu, na kwa chawelu na uliganiso na yakulewa nghondo. 12 Ameso gakwe kakifana ililimba dya moto na mwitwi dyakwe mwina kofiya nyingi sa chindewa na kena isina diwandikwe, idyene hechaka yakudaha kudimanya ninga imwene imwenyecho du. 13 Kafasigwa isuke dilowekigwe musakame na disina dyoyakwinangwa ni Imbuli ya Mulungu. 14 Na matewa ga wasilikali wa kulanga wafalile suke sa bafuta njelu na swanu, wakumwandamila woile musifalasi sinjelu. 15 Mulomo wakwe ukulawa ipanga ikali dyokusuma mataifa, na yakwenda yawatawale kwa mhando ya chuma, yakwenda yawakome muchiya cha kukamila difayi che inyono ye Mulungu yo udaha wose. 16 Mwikasu dyakwe na mwihaja dyakwe kena isina diwandikwe, “Mundewa wa wandewa Mukulu wa wakulu.” 17 Kahi hanyona malaika yemile mwijuwa, hoyokwinanga kwa ijwi ikulu kumadege goose agekupululuka mugatigati yo ulanga, “Mwije mukilunde kosoko ye chakudiya che Mulungu, 18 kudiya sinyama sa wandewa na se fitung'ati nyama sa wanhu wo ludole, nyama se sifalasi na waya awakukwila sifalasi na sinyama sa wanhu wose awetumwa na awasiwetumwa, wakulu na wadodo.” 19 Honikona dikala na wandewa wa muchilunga, na wasilikali wawo, wakikonghola uleke wakitowe nghondo na yuya yekale mufalasi na ditewa dya wasilikali wakwe. 20 Na dikala hodikoligwa hamwedu nadyo ayuya imugonesi wa udasi, imwene kumwande yakwe hakagolosa majumo goyawadanhilise awaya woile ne chitangilo, cha dikala diya na waya awafugile isanamu yakwe. Awano aweli howokundugisigwa awomi mwibwawa dyo umoto ukwaka ne chibiliti. 21 Awasigale howochinjigwa ne dipanga dya yuya yekale mufalasi, dipanga dikulawa kumulomo wakwe na madege gose hogokwiguta inyama yakwe.
1 Kame hanyona malaika yakudulika kulawa kulanga, yakolile mumukono wakwe ifunguo ye dikolongo idichaka ndumo na dinyolo dikulu. 2 Hakadisuma diya dijoka dya katali idikwinangwa, yehile na Shetani, hakadifunga na kudiguma mwikolongo kwa minyaka figulu fidatu, 3 hakadihinda na kudihiliwa muchanhya yakwe uleke dinhagendelele kuwadanhilisa awamataifa keli, mpaka iminyaka chigulu chimwedu iloke. Inghaloka dikudoholeligwa kwa chigele chidodogi. 4 Kamei hanyona magoda ga undewa na wekale umo no waya aweli wenghigwe mulimo wo ulamusi, kahi haniwona waya wadumuligwe amatwi gawo kosoko yo uhomelesi wawo muchanhya ya Yesu na kuimbuli ye Mulungu, na awene wo wasadifugile dikala diya ne isanamu yakwe kahi wasagumigwe ichitangilo chakwe muchihanga chawo hegu mumikono yawo. Howokwinuka kulawa mudifa, na kutawala hamwedu na Kilisito minyaka chigulu chimwedu. 5 Awamonga awafile hawenuke kulawa mudifa mpaka minyaka chigulu chimwedu ikahele, akuno no kwinuka kwa wafile kwe nghonga. 6 Kamoteswa na Musunhile ayuya yowile hamwedu na waya mu kwinuka kwa wafile kwe nghonga kosoko ukwawo difa dya keli dichaka udaha, ninga wakuwa makuhani we Mulungu na wa Kilisito, na wakweda watawale hamwedu naye kwa minyaka chigulu chimwedu. 7 Ne minyaka chigulu chimwedu inghahela, Shetani yakudoholigwa kulawa kukohigwa kwakwe 8 na yakwenda yalawe kugadanhilisa mataifa agowile kusisandi ine che chilunga. Gogi, na Magogi, uleke kuwahinda hamwedu walewe nghondo; hawowa matewa kifana disanga dye bahali. 9 Hawagenda chilunga chose na kusunguluta inghambi ya wasunhile ne ikaya ye Mulungu yoyakwenda, ninga umoto houkwija kulawa kulanga na kuwalakasa. 10 Na iluhoma iyawadanhilise hoyogumigwa mudibwawa dyo umoto ne chibiliti, ukowile ne dikala duya ne mugonesi wa udasi, nawo wakwenda wagaye no usungu chilo ne misi majuwa gose. 11 Hanyona igoda dye chindewa ijelu na yuya yekale umo, ichilunga na ulanga hofitija na hafyoneke kahi hohose haya. 12 Na hanyona awafile wakulu na wadodo kumwande ye digoda dyo undewa na fitabu figubuligwe. Kahi na chitabu chingi hochigubuligwa ichene no chitabu cho uwumi. Na wafile hawalamuligwa kwandamila foiwandikwe mufitabu kwa gaya gowagolose. 13 Ibahali hoiwalafa wafile woile umo, difa na kusimu hofiwalafa wafile woile uko, na wose howolamuligwa kwa gaya gowagolose. 14 Kamei Difa na Kusimu hofikugumigwa kudibwawa dye umoto adino no difa dya keli, dibwawa dyo umoto; 15 na nghona disina dya munhu disoneke muchitabu cho wumi hakagumigwa kumoto.
1 Kamei hanyona ulanga musha na chilunga chisha; kosoko ulanga we ngonga na chilunga che inghonga hachileuka na hakuwa chaka bahali. 2 Honikona ikaya isunhile Yelusalemu nyisha ikudulika kulawa kulanga kwe Mulungu, ikigwa kifana bibi halusi yahambigwe kosoko ye mulume. 3 Honihulika ijwi ikulu kulawa kudogoda dye undewa dikugamba, “Langeni ulwikasi lwe Mulungu ni hamwedu na wanhu, yekwikala nawo wakuwa wanhu wakwe, na iMulungu imwecho yakuwa hamwedu nawo; 4 yakwenda yahamuse masosi mumeso gawo, na difa dikuwa hechaka, kahi chililo na kuhongesa na usungu wowose, kosoko agekatali gafulusa kuloka.” 5 Na yuya yekale mwigoda dyo undewa hoyogamba, “Langa nikugolosa finhu fyose fisha.” Kahi hoyogamba, “Wandika ino simbuli sino sakuhuwilika kahi sa chawelu.” 6 Kamei hakanigamba, “Ifulusa kugoloseka! Aniye noni Alufa na Omega, we nghonga ne we indumo. Iyena inghilu nikumwingha ameji gekulawa munhyoko ya meji ga uwumi chaka. 7 Iyekusuma yakupata uhasi uno aniye nikuwa Mulungu wakwe naye yakuwa mwanangu. 8 Ninga kwa waya awawoga, na wechaka dihuwi, awasinhenda sihile fina wakukoma wanhu, na we dihabwa na wahayi, awakufuga sisanamu na wadasi woose ahanhu hawo hakuwa kudibwawa dikwaka moto na chibiliti idyene no difa dya keli.” 9 Kamei hoyokwija yumwedu we malaika yowile ne mabakuli mufungate ga magayo ge ndumo, hoyolonga na niye yakuganba, “Wije nokonesa ibib halusi imuke we Mwanangholo.” 10 Na kwa chimuhe hoyonilonda na kunigala kwitunda itali, na kunyonesa ikaya isunhile Yelusalemu ikudulika kulawa kwe Mulungu, 11 ina ditunyo dye Mulungu, inyakaika yakwe ni kifana iwe dya iyombe ikulu lugano kahi dikoneka kifana chilole. 12 Hayuwa isungulutigwe na lukasi, lukulu na milango ikumi na meli, na mumilango malaika ikumi na weli na mumilango iyo hamuwa na masina ga makabila ga wana wa Isilaeli ikumi na meli gawandikwa mumilango. 13 Kwindawilo ye dijuwa milango midatu na ulwandi lwe kasikasini milango midatu na ulwandi lwe kwikulu milango midatu na kutwe milango midatu. 14 Na ulukasi we ikaya hawuwa na misingi ikumi na mine na mumisingi masina makmi na meli ge wefusa we Mwanangholo. 15 Naye yalongage na niye hakowa na chibiki cha sahabu cha kupimila ikaya ulukasi lwakwe. 16 Ikaya iya ni mhembe ine utali wakwe na ugalamu wakwe uligana, hoyoipima ikaya ne chibiki chakwe, ukulu wakwe hayuwa kilometai kifana figulu fili na magana mane. 17 Kahi hoyopima ulukasi wakwe, hoyopima kilometa makumi mutandatu kuchipimo cha wanhu no ng'amba cha malaika. 18 Ulukasi ujengigwa na mawe madungu ga diyombe dikulu, ikaya yose hayuwa ya sahabu swanu kifana chilole. 19 Umusingi we lukasi we ikaya iya hauhambigwa na chila mawe ge diyombe dikulu, dye inghonga hadyuwa iwe idunghu kahi dya keli dya safilo na dya kadatu kalikedoni dya kane samaladi, 20 na dya shano salidoniki, dya mutandatu kaneliani, dya mufungate kilisolito, dya munana ni belulo, dya ikenda topasi, dya ikumi kulusopulaso na dye dikumi na imwedu jasindo, dya ikumi na keli amasesito. 21 Na imilango ikumi na mbili hayuwa lulu ikumi na mbili, chila mulango umwedu ugolosigwa kwa lulu imwedu, na chila ibalabala hadyuwa sahabu swanu, ikoneka kifana chilole. 22 Sonile ihekalu mukaya iyo, kosoko dihekalu dyakwe ni Mulungu imwecho we udaha wose ne Mwanangholo. 23 Ikaya yo isikuhananga ijuwa hegu mwesi kwalika umo, kosoko ditunyo dye Mulungu no ujelu wakwe no itaa yakwe ne Mwana we ngholo. 24 Amataifa gakwanga gagende muujelu na wandewa we chilunga wakwigala ditunyo umo. 25 Na imilango yakwe isikuhindigwa ne misi na uko kukuwa kwechaka chilo. 26 Wanhu wakwenda wegale umo ditunyo na chogoho cha mataifa. 27 Ninga kwachaka chinhu chochose chihile ichikudaha kwingila umo, hegu munhu wowose yakulonga udasi ninga awaya du awawandikigwe muchitabu cha Mwanangholo cha uwumi.
1 Kamei hoyanyonesa ulwanda wa meji ga uwumi lukwakaika kifana chilole, gakudulika kulawa kudigoda dya undewa wa Mulungu na dya Mwanagholo. 2 Ulwanda lukugenda mugatigati ye kaya. Kahi munghanda ya ulwanda kosekose, dibiki dya uwumi, na mamudyo gakwe ga milijo ikumi na meli gakweleka mamudyo chila mwesi, na amanyagala ge dibiki gakuhonya amataifa. 3 Kusikuwa na chochose chiligitigwa, ninga kukuwa na digoda dya undewa wa Mulungu na dye Mwanangholo na gawaumo, na awatumigwa wakwe womufuga. 4 Wakwenda wachone ichihanga chakwe na disina dyakwe dyokuwa diwandikigwe mufihanaga fyawo. 5 Kusikuwa na chilo, wasikuhanga ujelu wa taa hegu dijuwa kosoko Mulungu wawo no ujelu nawo wakwenda watawale ugele wose. 6 Hoyonigamba, “Simbuli sino ni sa kuhuwilika na sa chawelu. Na Imukulu, iMulungu we mimuhe ya wagonesi katuma amalaika sakwe konesa awatumigwa wakwe agakwenda galawanise muchigele chidodogi. 7 Na langa nikwija chimwande, kamoteswa ayuya iyakolile simbuli sa ugonesi we chitabu chino.” 8 Aniye, Yohana inahulike na kona simbuli sino, honikugwa hamigulu ya malaika yuya iyanyonese ifinhu afi. 9 Ninga hakanigamba, “Unghagolose nheifo! Aniye namutumigwa miyago fina gweye na wanduguso awagonesi na waya wakolile simbuli se chitabu chino, mufuge Mulungu!” 10 Hoyonigamba, “Simbuli sino so ugonesi unghasigume chikanhamso kosoko ugele wa habei. 11 Ayuya yakugolosa wihi yagendelele kuwa muswanu, na imusunhile yowe musunhile.” 12 “Langa na habehi kwija, nikwija na maliho gangu kumuliha chila munhu fina foyagolose. 13 Aniye no Alufa na Omega we ghonga ne we ndumo we kukongela na kumalagisila.” 14 Wamotesigwa awaya wakufuwa sisuke saww uleke wowe na luneka wa kulutila dibiki dyo uwumi na kudaha kwingila dikaya kulokela milango yakwe. 15 Kunje kwina mabwa na wahayi na wedihabwa, na awakukoma wanhu, awaya wakufuga sisanamu na chila munhu iyakwenda udasi na kudanha. 16 “Aniye Yesu nimutuma malaika wangu ukwako na uhomelesi uno kumakanisa, Aniye nonimusisi wo lukolo lwa Daudi inyelesi ikwakaika iyenhousikusiku.” 17 Imuhe ne bibi halusi yakugamba, “Wije.” Na yuya iyekuhulika na yagamba, “Wije.” Na yuya yene inghilu yeje. Iyakwenda yalonde meji go uwumi chaka. 18 Nikumujama chila munhu iyakuhulika simbuli sa ugonesi wa chitabu chino, munhu wowose yanghongesela, simbuli so ugonesi we chitabu chino, Mulungu naye yakwenda yamongesele amagayo gawandikigwe muchitabu chino. 19 Na imunhu wowose yanghahungula simbuli se chitabu chino so ugonesi iMulungu yakumuleusile umugawo wakwe mudibiki dya uwumi na mukaya isunhile, iwandikigwe muchitabu chino. 20 Iyekuhomelesa kusimbuli sino yakugamba, “Chawelu nikwija chimwande.” Hano. Wije Mundewa Yesu! 21 Dihewa dye Mundewa wetu Yesu dyuwe na wasunhile wose. Hano.