Johani 1

Dama lakabe nthu

1 Mu kutangisa Dama lakabe lili yapo, ngono Dama lakabe lina Ndzimu kakale Dama lakabe lili Ndzimu. 2 Lakabe lina Ndzimu mu kutangisa. 3 Zwithu zose zwakathamiwa ndiye. Kuzhe kukwe akuna tjimwe tjakathamiwa tjisakathamiwa ndiye. 4 Munli kwakabe kuna butjilo, butjilo guli tjedza tje bathu. 5 Tjedza tjopenya mu zhalima, koga zhalima alizotjikunda. 6 Kwakabe kuna mmwe nlume atumwa nge Ndzimu, zina lile kuyi Johani, 7 wakazhila kutendeka ngekwe tjedza itjetjo, kuti bathu bose bagalemoyo ndiye. 8 Iye nge kukwe wakabe asi iye tjedza, koga, wakazha kuwopa butendeki ngekwe tjedza itjetjo. 9 Tjedza tje malebeswa tjinovonekela bathu bose tjakabe tjizha mu shango. 10 Wakabe ali mu shango, koga nenguba Ndzimu wakathama shango ndiye, shango aizonziba. 11 Wakazha ku shango ya kanyi kukwe koga bathu ba kanyi kukwe bakasin'amutjile. 12 Koga ibabo bakan'amutjila, bakagalamoyo mu zina lile, wakabapa fanilo dze kube bana be Ndzimu. 13 Ibaba ate bakazwagwa nge lopa kene kuda kwe nyama, kene nge kuda kwe nthu, koga Ndzimu ndiye wakathama kuti babe bana babe. 14 Dama lakabe nthu, kagala pakati kwedu ana ngoni kwazo ne malebeswa. Takabona gudzo lile, gudzo le Nkololo uyega wa Tate. 15 Johani wakapa butendeki nge kukwe, wakamimila eti, “Ndiye iwoyu wandakaleba nge kukwe nditi, ‘Iye unozha shule kwangu nkulu pandili, ngobe wakabe yapo ndi sathu abe yapo.’ ” 16 Ngobe ana ngoni njinji, wakatihwila ngoni epaphulula. 17 Ndzimu wakatizhisila nlayo ndi Mushe, koga ngoni ne malebeswa takazwipiwa ndi Jesu Kirisiti. 18 Akuna ne nng'ompela wakatongo bona Ndzimu. Koga Nkololo uyega, ugele kubapa na Tate, ndiye wakazibisa Ndzimu bathu.

Thumo ya Johani we N'dubiki

19 Ogu ndigo butendeki gwa Johani gwa akaleba tjibaka tje Bajuta tjabakantumila Bapirisiti ne Balevi banodwa mu Jerusalema kuwombhuzwa kuti n'diyi ani. 20 Johani wakaleba, aazozwilandula; wakaleba eti, “Ate ndili imi Mesiya.” 21 Bakambhuzwa beti, “Ndiwe ani ngono? Ndiwe Elija?” Johani kabashandula kati, “Aa, ate ndili Elija.” Bakambhuzwa kakale bakati, “Ndiwe Nlebesambeli?” Kabadabila kati, “Aa.” 22 Bakati kunli, “Ngono ndiwe ani? Utidabile kuti naswi tinobudza batituma. Ukatini nge kuko?” 23 Johani kadabila nge matama a Isaya nlebesambeli eti, “Ndimi hwi le unodanilila mu tjilambanyika eti, ‘Tambunudzani zila ya She.’ ” 24 Bamwe be Bafarasi, bakabe batumwa 25 baka mbhuzwa beti, “Ha usi Mesiya, usi Elija kene nlebesambeli, ini udubika bathu?” 26 Johani kabadabila kati, “Ndomudubika nge vula, koga pakati kwenyu kumile mmwe wamusingazibe. 27 Ndiye unozha shule kwangu, iye wandisakalizana kusunungula mitjili ye khwebana dzidze.” 28 Oku kwakabe kushingikala mu Bhetani seli kwe gwizi gwe Jorodani, Johani kwaakabe edubikako.

Jesu Pkhwizana ye Ndzimu

29 Tjimuka, Johani kabona Jesu ezha kunli, ngono kati, “Bonani Pkhwizana ye Ndzimu iyo inodusa tjibi tje shango! 30 Oyu ndiye wandakaleba nge kukwe nditi, ‘Kuna nlume unowozha shule kwangu, koga nkulu pandili, ngobe wakabepo kunditangila.’ 31 Imi nge kwangu ndakabe ndisinganzibe, koga ndakazha ndidubika bathu nge vula kuti ndizo azibgwe nge Baiziraela.” 32 Johani kapa butendeki eti, “Ndakabona Meya ideluka se njiba idwa kudzimu, ngono ikagala pezhugwi kukwe. 33 Ndakabe ndisinganzibe, koga iye wakandituma kuwodubika nge vula wakati kundili, ‘Iye waunowobona Meya ideluka igala pezhugwi kukwe, ndiye unowodubika nge Meya yakayengemala.’ 34 Ndakambona ngono apa butendeki kuti ndiye Nkololo we Ndzimu.”

Badiyiwa be kutanga ba Jesu

35 Tjimuka kakale Johani kabe ali mile ne badiyiwa babe babili, 36 ngono kati ebona Jesu epinda kati, “Bonani Pkhwizana ye Ndzimu!” 37 Ibabo badiyiwa babili bakahwa eleba ikoku, ngono bakatobela Jesu. 38 Jesu katjebuka, kababona bakantobela, ngono kababhuzwa kati “Moshakani?” Bakati kunli, “Rabhi” Kodwa kuti N'diyi. “Mogala ngayi?” 39 Kabadabila kati, “Izhani mubone.” Bakayenda bakanobona paakabe egala, ngono bakashwa masikati iyawo wose naye; tjakabe tjingabe tjibaka tje bunna matewuko. 40 Mmwe we babili bakahwa Johani elebeleka bakatobela Jesu ndi Enduru nnung'una wa Simoni Pita. 41 Tje kutanga Enduru wakanoshaka nkulu uwe Simoni ngono kan'dwa kati, “Tawana Mesiya” Kodwiwa kuti Kirisiti. 42 Kayisa Simoni kuna Jesu. Jesu kanlinga kati kunli, “Ndiwe Simoni nkololo wa Johani ngono unowodang'wa Kefasi.” Kefasi ndilo zwalo Pita, kodwiwa shongwe.

Jesu edana Filipo na Natanaele

43 Tjimuka Jesu kayenda ku Galili. Kawana Filipo ngono kati kunli, “Unditobele!” 44 Filipo wakabe edwa ku Bhetisaida, kanyi kwa Enduru na Pita. 45 Filipo kabona Natanaele ngono kambudza kati, “Tambona iye wakalebgwa ndi Mushe mu lukwalo gwe nlayo ne mu hwalo dze balebesambeli. Iye Jesu we Nazareta nkololo wa Josefa.” 46 Natanaele kabhuzwa kati, “Apa kuna tjibuya tjingadwa mu Nazareta kene?” Filipo kadabila eti, “Izha ubone.” 47 Kukati Jesu ebona Natanaele ezha kunli, kati, “Bonani, woyu ndiye N'iziraela wakwako, usingabhuzwiwe.” 48 Natanaele kambhuzwa kati, “Mondiziba tjini?” Jesu kan'dabila eti, “Ndakubona utjikusi kwe mpaya, Filipo asathu kawokudana.” 49 Natanaele kanshandula eti, “N'diyi, mu Nkololo we Ndzimu, mu She nkulu we Iziraela!” 50 Jesu kati kunli, “Unogalamoyo koga, ngobe ndakubudza kuti ndakubona utjikusi kwe mpaya. Utjawobona zwithu zwikulu kupinda izwezwi!” 51 Kabuya kati kunli, “Ndolebesa tjose ndoti kumuli, mowobona kudzimu kuzhuka ne batumwa be Ndzimu betathila pezhugwi kakale bedelukila pasi mu Nkololo we nthu.”

Johani 2

Bukwe mu nzi we Kana

1 Mu zhuba le butatu kwakabe ne nzano we bukwe mu nzi we Kana mu ntuthu we Galili. Mme ba Jesu bakabe bali yapo ku nzano iwoyo. 2 Jesu ne badiyiwa babe bakabe bakokiwabo ku bukwe igogo. 3 Kukati nkumbi we zhambi wapela, mme ba Jesu bakati kuna Jesu, “Bapelegwa nge nkumbi.” 4 Jesu kabashandula eti, “Mme, apa moti nditini kene? Tjibaka tjangu atjithu tjikaswika.” 5 Mmeyabe bakati ku balanda, “Mushinge tjimwe ne tjimwe tjaanowomubudza.” 6 Kwakabe kwakabigwa hali dzili tathatu dze ntapkhwi hwulu hwulu dze nthamo wakabe ushingisisiwa mu kuzwitjenapadza nge mpanga we Bajuta. Imwe ne imwe yakabe ili hwulu kwaingazhadziwa dzilitha dze vula dzili zana ling'ompela (100). 7 Jesu kadwa balanda kati, “Zhadzani hali idzedzi nge vula.” Bakadzizhadza tupu! 8 Ipapo kabadwa kati, “Tjelani vula iyeyi nge nkombe muyise ku n'yendisi we nshingo.” Ndizo bakaiyisa. 9 N'yendisi we nshingo kati elabila vula iyeyo, ikabe yashanduka yabe nkumbi. Kukati se akabe asingazibe kuti nkumbi iwoyu wadwa ngayi, nenguba balanda ibo bakabe beziba kwawakadwa, kadanila nloboli ntome 10 ngono kati kunli, “Kwagala kupiwa bathu nkumbi unozipa kutanga, bakati bang'wa kunjinji bakakowopiwa nkumbi usingazipe shule. Koga iwe wabiga nkumbi unozipa kuswikila ngwenu!” 11 Jesu wakathama itjetji tjilakidzo tje kutanga tje zwilakidzo zwizwe ali ku Kana mu Galili. Nge zila iyeyi kalakidza gudzo lile, ngono badiyiwa babe bakagalamoyo munli. 12 Shule kwa ikoku kadelukila ku Kapenaume, iye na mmeyabe ne banung'una babe ne badiyiwa babe, bakanogala ikoko mazhuba mashomanana.

Jesu unoyenda ku Ng'umba ye Ndzimu

13 Nzano we Bajuta we Kupinda pezhugwi wakabe wabe pejo, ndizo Jesu kayenda ku Jerusalema. 14 Kawana bathu betengesa ng'ombe ne pkhwizi ne ngurukuku mu bhakasa le Ng'umba ye Ndzimu ne bakabe betenganya mari bali gele pa tafuli. 15 Kathama rwabha ye nsungo ngono kabatatila kuzhe kwe bhakasa le Ng'umba ye Ndzimu, kose pkhwizi ne ng'ombe, katebula mari e batenganyi be mari kapitula tafuli dzabo. 16 Kadwa ibabo bakabe betengesa ngurukuku kati, “Dusani zwithu izwezwi ipapa muletje kuthama Ng'umba ya Tate matengeselo!” 17 Badiyiwa babe bakakumbula tjakakwagwa mu hwalo dze Ndzimu kuyi, “Kutukutilila ng'umba yenyu kowondija.” 18 Ipapo Bajuta bakan'dwa bakati, “Nditjipi tjilakidzo tjaungathama kulakidza ndaulo ye kuthama zwithu izwezwi?” 19 Jesu kashandula eti, “Kolomodzani Ng'umba iyeyi ye Ndzimu, ngono ndoyimusa mu mazhuba matatu.” 20 Bajuta ndizo bakati, “Kwakatola makole ali makumi manna ana matathatu kubaka Ng'umba iyeyi, ngono iwe ukati unowoyimusa mu mazhuba matatu kene?” 21 Koga Ng'umba ye Ndzimu yaakabe eleba nge kwayo wakabe edwa mbili uwe. 22 Kukati asinomusiwa mu bafi, badiyiwa babe bakakumbula tjaakaleba, ndizo bakagalamoyo mu hwalo dze Ndzimu ne tjakalebgwa ndi Jesu.

Zibo ya Jesu ngekwe mbumbiko ye nthu

23 Kukati atjimu Jerusalema mu Nzano we Kupinda pezhugwi, banji bakagalamoyo mu zina lile bebona zwilakidzo zwaakabe ethama. 24 Koga Jesu wakabe asingabagalebgwe ngobe wakabe eziba bathu bose. 25 Wakabe asingashake kulebelekegwa nge nthu, ngobe eziba tjimu nkumbulo we nthu.

Johani 3

Jesu na Nikodemo

1 Kwakabe kuna nlume we Nfarasi edang'wa Nikodemo, ali ntungamili we Bajuta. 2 Nikodemo wakazha kuna Jesu busiku kati kunli, “N'diyi, toziba kuti u n'diyi wakadwa ku Ndzimu, ngobe akuna ungathama zwilakidzo zwaunothama ha Ndzimu usimile naye.” 3 Jesu kanshandula eti, “Ndolebesa tjose nditi kukuli, kuzhe kwe kuti nthu azwagwe butshwa, aangabone bushe gwe Ndzimu.” 4 Nikodemo kabhuzwa kati, “Nthu wakwegula ungazwagwa tjini? Apa ungangina gwe bubili mu ntumbu wa mmeyabe kuti azwagwe?” 5 Jesu kanshandula eti, “Ndolebesa tjose nditi kukuli, kuzhe kwe kuti nthu azwagwe nge vula nenge meya, aangangine mu bushe gwe Ndzimu. 6 Tjazwagwa nge nyama i nyama, tjazwagwa nge meya. 7 Usitjename, ngobe ndikudwa nditi wakafanila kuti uzwagwe butshwa. 8 Phepo inohwuhwudzila kwainoda, unohwa nsindo wayo, koga autoziba kwainodwa kene kwainoyenda. Kwakajalobo mu mmwe ne mmwe wazwagwa nge Meya.” 9 Nikodemo kambhuzwa eti, “Kungashingikala tjini ikoku?” 10 Jesu kambhuzwa kati, “Apa u n'diyi mu Iziraela koga autoziba ikoku kene? 11 Ndolebesa tjose nditi kukuli, iswi toleba ngekwe tjatinoziba kakale tobika ngekwe tjatabona, koga amutoamutjila tjatinobika. 12 Apa ha ndakamubudza nge zwithu zwe shango mukasidume, mowoduma tjini ha ndimubudza ngekwe zwe kudzimu wali? 13 Koga akuna wakatongo tathilila kudzimu kuzhe kwa iye wakadeluka edwa kudzimu, iye Nkololo we nthu.” 14 Koga Mushe sekwa akamilidza nyoka mu tjilambanyika ne Nkololo we nthu wakafanila kumilidzigwabo pezhugwi, 15 kuti kene ali ani unogalamoyo munli abe ne butjilo gusingapele. 16 Ngoti Ndzimu wakada shango ino kungapongapo kwawakapa Nkololo wawo uyega kuti kene ali ani unogalamoyo munli asitongofa, koga abe ne butjilo gusingapele. 17 Ngoti Ndzimu auzotuma Nkololo wawo mu shango kuwoyisumikilisa, koga wakantuma kuti shango itjidziwe ndiye. 18 Iye unogalamoyo munli aazosumikilisiwa, koga iye usingagalemoyo wakasumikilisiwa kale, ngobe aazogalamoyo mu zina le Nkololo uyega we Ndzimu. 19 Kusumikilisiwa ndihwoku, tjedza tjakazha mu shango, koga bathu bakada zhalima mu bumo gwe tjedza, ngobe mishingo yabo ili mibi. 20 Mmwe ne mmwe unothama bubi nge unoshima tjedza, kakale aatozha mu tjedza, ngobe mishingo iye ingabhudila patjena. 21 Koga iye unoshinga malebeswa unozha mu tjedza kuti ndizo kuboneke kuti mishingo iye yakashingigwa mu Ndzimu.

Jesu na Johani

22 Shule kwa ikoko, Jesu ne badiyiwa babe bakabhudila mu shango ye Judiya, kwaakapitsha tjibaka nabo edubika bathu. 23 Johani na iyebo wakabe edubika mu Enoni, pejo ne Salima, ngobe kwakabe kuna vula njinji ikoko. Bathu bakabe bezha kunli, ngono bedubikiwa. 24 Johani wakabe asathu kalongwa mu ng'umba ye busungwa mu tjibaka itjetjo. 25 Ipapo kukabe ne kunyanyayidzana pakati kwe badiyiwa ba Johani ne mmwe Njuta ngekwe tjenapadzo. 26 Ngono bakazha kuna Johani bakati, “N'diyi, nlume ihwouje wamakabe munaye seli kwe gwizi gwe Jorodani wamakaleba nge kukwe, wodubikabo ngwenu, ngono mmwe ne mmwe woyenda kunli.” 27 Johani kabashandula eti, “Akuna ungabe ne tjimwe kuzhe kwe tjaapiwa tjidwa kudzimu. 28 Imwi nge kwenyu muna butendeki gwe kuti ndakati, ‘Andite ndili imi Mesiya, koga ndakatumwa kuzha mu shango mbeli kukwe.’ 29 Una nlongo nkwasha, nzwalani we nkwasha unobe ali mile ipapo akahwilila unoshatha kwazo ha ehwa hwi le nkwasha. Ndizo kushatha kwangu kwazhadzisika. 30 Iye wakafanila kudziwa, imi ayisiwa pasi.”

Iye unodwa kudzimu

31 Iye unodwa pezhugwi upezhugwi kwa bose. Iye unodwa mu shango nge we shango unoleba nge zwe shango, koga iye unodwa kudzimu upezhugwi kwabo bose. 32 Unotendeka ngekwe tjaakabona nenge tjaakahwa, koga akuna unoamutjila butendeki gugwe. 33 Iye unoamutjila butendeki gugwe unolakidza kuti Ndzimu ulebeswa. 34 Iye wakatumwa nge Ndzimu unoleba matama e Ndzimu, ngobe Ndzimu unompa Meya nge buzhalo. 35 Tate banoda Nkololo wabo, ndizo bakampa zwithu zose. 36 Iye unogalamoyo mu Nkololo una butjilo gusingapele, koga iye usingahwilile Nkololo aatowobe ne butjilo, koga bushongola gwe Ndzimu gupezhugwi kukwe.

Johani 4

Jesu ne nkadzi we Samariya

1 Kwakati She basinoziba kuti Bafarasi bakahwa kuti Jesu unodubika kakale unothama badiyiwa banji kupinda Johani, 2 (nenguba, Jesu nge kukwe akabe asingadubike bathu, badiyiwa babe ndibo bakabe bedubika.) 3 Ndizo Jesu kabhuda mu Judiya kabgwilila ku Galili. 4 Ngono wakabe akafanila pinda akapalama ntuthu we Samariya. 5 Ndizo kangina nge nzi we Samariya unoyi Sikari, pejo ne nnda wakabe wapiwa Josefa ndi tate babe Jakubo. 6 Tshime la Jakubo lakabe lili ipapo, ngono Jesu kati anyadziwa nge gwendo kagala pasi pa hwunde ne tshime. Kwakabe kuli nge tjibaka tje masikati makulu. 7 Ngono kukazha nkadzi we Nsamariya kuwotjela vula, ngono Jesu kan'dwa kati, “Undipebo vula nding'we.” 8 Badiyiwa babe bakabe bayenda kutenga zojiwa ku nzi. 9 Nkadzi iwoyo kanshandula eti, “Ungandikumbila vula tjini wali, iwe uli Njuta, imi ndili nkadzi we Nsamariya kene?” Bajuta abatoshingidzana ne Basamariya. 10 Jesu kanshandula eti, “Ha wabe uziba tjipo tje Ndzimu ne nge kuti ndiani iwoyu unokukumbila vula, unobe wakumbila vula kunli, unobe akupa vula ye butjilo.” 11 Nkadzi kan'dabila eti, “Tate bangu, amuna tjamungatjela nditjo, ngobe tshime ileli lakangina, ngono imwi moiwana ngayi iyeyo vula ye butjilo kene? 12 Apa imwi mu nkulu pana tate bedu Jakubo bakatipa tshime ileli kene, labakang'wa mulili ne bana babo nenge zwithuwo zwabo?” 13 Jesu kadabila eti, “Iye unong'wa vula iyeyi unowobe ne nyota kakale, 14 koga iye unowong'wa vula yandinowompa aatowopapha kabe ne nyota kakale. Ngobe vula yandinowompa, inowobe nsenya munli unowodwilila vula inowompa butjilo gusingapele.” 15 Nkadzi kati kunli, “Tate bangu, mundipe vula iyeyo kuti ndisitjabe ne nyota kakale, kakale ndisitjabuye awotjela vula ngeno.” 16 Jesu kan'dwa kati, “Yenda unodana nlume uwo ubuye naye.” 17 Nkadzi kanshandula eti, “Andina nlume.” Jesu kan'dwa kati, “Unolebesa ha uti auna nlume. 18 Wakabe ne balume bali bashanu, nlume waunaye ngwenu ate ali uwo. Wandibudza malebeswa.” 19 Nkadzi kati kunli, “Tate bangu, ndobona kuti mu nlebesambeli. 20 Botate bedu bakabe benamata Ndzimu pezhugwi kwe dombo ileli, koga imwi Bajuta mukati bugalo gwa takafanila kunamata Ndzimu i Jerusalema.” 21 Jesu kati kunli, “Galamoyo mundili, kowozha tjibaka tje kuti Tate basinamatigwe pezhugwi kwe dombo ileli kene iko ku Jerusalema. 22 Imwi Basamariya monamata tjamusingazibe, koga iswi tonamata tjatinoziba, ngobe jidzo lodwa ku Bajuta. 23 Koga tjibaka tjozha na iko tjaswika kale, tjinowoti banamati be malebeswa bakanamata Tate nge Meya ne nge malebeswa, ngoti ndibo banamati banoshakwa ndi Tate. 24 Ndzimu Meya, ngono ibabo banounamata bakafanila kuunamata nge Meya nenge malebeswa.” 25 Nkadzi kan'dwa kati, “Ndoziba kuti Mesiya, unodang'wa Kirisiti unowozha, ngono ha ezha unowotitjenesela zwithu zose.” 26 Jesu kan'dwa kati, “Imi ndinolebeleka nawe, ndi iye wandili iye” 27 Nge tjibaka itjetjo badiyiwa ba Jesu bakabuya kwabakabe bayenda, bakatjenama bewana elebeleka ne nthu we tjikadzi. Koga akuna wakabhuzwa nkadzi iwoyo kuti, “Unoshakani?” Kene wakabhuzwa Jesu kuti, “Ini ulebeleka ne nkadzi iwoyo?” 28 Ipapo nkadzi kasiya shabana iye ye vula kabgwilila ku nzi ngono kati ku bathu, 29 “Izhani mubone nlume wandibudza tjimwe ne tjimwe tjandakashinga. Apa ungabe ali iye Mesiya kene?” 30 Bathu bakabhuda mu nzi bakayenda kuna Jesu. 31 Nge tjibaka itjetjo badiyiwa babe bakabe benkumbila beti, “N'diyi, ijani tjimwe!” 32 Koga kabadabila eti, “Ndina zojiwa zwandinoja zwamusingazibe.” 33 Badiyiwa bakabhuzwana beti, “Kungabe kuna mmwe wabazhisila zojiwa kene?” 34 Jesu kabadwa kati, “Zojiwa zwangu hwushinga kuda kwe wakandituma nge kupedzisa nshingo uwe. 35 Apa imwi amutoti, ‘Kwasala mwedzi minna kuti kuvung'we mathunde kene?’ Koga imi ati, tongo poselani mesho ku minda, mubone mathunde sekwa akabidwa, atjilinda kuvung'wa! 36 Iye unovuna unoamutjila ndipo, ekubunganyila mathunde mu butjilo gusingapele, kuti ndizo ndzwali ne nvuni bashathe bose. 37 Ndizo malebeswa matama anoti, ‘Mmwe unodzwala, ngono kovuna upoga.’ 38 Ndakamutuma kunovuna pamusakashinga, kuna bakabe bashinga, imwi makavuna mu masimba abo.” 39 Bunji gwe Basamariya mu nzi iwoyo bakagalamoyo muna Jesu, nge butendeki gwe nkadzi iwoyu ngobe wakabe ati, “Wandibudza tjimwe ne tjimwe tjandakashinga.” 40 Ngono kwakati Basamariya bazha kuna Jesu, bakankumbila kuti agale nabo, ngono kagala nabo mazhuba mabili. 41 Bunji gumwe gwe bathu gwakagalamoyo ngekwe matama a Jesu. 42 Bakati ku nkadzi, “Togalamoyo ngwenu, ngono kusi nge kuhwa tjawaleba, koga kuli nge tjatazwihwigwa nge kwedu, totjiziba kuti ndiye tjose Ntjidzi we shango.”

Jesu epodza nkololo we nshingili nkulu

43 Shule kwe mazhuba iyawo mabili kayenda ku Galili, 44 ngobe iye Jesu nge kukwe wakabe aleba eti, “Nlebesambeli aatokudziwa mu shango ya kanyi kwabo.” 45 Kukati eswika mu Galili, bathu baikoko bakan'amutjila, ngobe bakabe bayenda ku Jerusalema ku nzano, ngobe bakabebabona tjimwe ne tjimwe tjaakashinga mu nsi we nzano. 46 Ipapo Jesu kabgwilila ku nzi we Kana mu ntuthu we Galili, kwaakabe atongo shandula vula ikabe nkumbi. Kwakabe kuna nlume ali Gulukota wakabe egwaligwa nge nkololo uwe ali mu Kapenaume. 47 Kati ehwa kuti Jesu wazha ku Galili edwa ku Judiya, kayenda kunli kankumbila kuti azhe kuwopodza nkololo uwe wakabe abe pejo ne lufu. 48 Jesu kati kunli “Kuzhe kwe kuti mubone zwilakidzo ne mishingo ye matjenamiso amungagalemoyo kene?” 49 Gulukota ilelo likadabila liti, “She, izhani mwanangu asathu kafa.” 50 Jesu kati kunli, “Yenda, nkololo uwo unowotjila!” Kagalamoyo matama a Jesu kayenda kanyi. 51 Kati ali mu zila ebgwilila kanyi kashangana ne balanda babe bakambudza kuti nkololo uwe unotjila. 52 Kababhuzwa kuti nkololo uwe wapodziwa nge tjibaka tjipi, ngono bakan'dabila beti, “Luzhazhamo gwakabhuda munli madekwe mu tjibaka tje matewuko e zhuba.” 53 Ipapo tate babe bakakumbula kuti nditjo tjibaka tjaakadwiwa ndi Jesu kati, “Nkololo uwo unowotjila.” Ndizo iye ne be nsha uwe bose bakagalamoyo. 54 Itjetji tjilakidzo tje bubili tjakathamiwa ndi Jesu abuya ku Galili edwa ku Judiya.

Johani 5

Jesu unopodza nthu pa dziba

1 Shule kwa ikoku Jesu kayenda ku Jerusalema ku nzano we Bajuta. 2 Mu nzi we Jerusalema pejo ne nkoba we pkhwizi kuna dziba lakakombeledziwa nge matenga mashanu e mitutshi, mu lulimi gwe Tjihebheru lodang'wa kuyi Bhetizada. 3 -4 Ipapo kwakabe kuna bagwele banjinji balilele, kwakashangana mapofu ne zwilema ne bakalobgwa nge gulukadzi. 5 Mmwe nlume wakabe ali ipapo wakabe ana makole ali makumi matatu ana zhanakadzi egwala. 6 Jesu kati embona alilele ipapo, kaziba kuti wakabe ne tjibaka tjilefu ali mu tjimo itjetjo, ngono kambhuzwa kati, “Apa unoshaka podziwa kene?” 7 Nlume iwoyu wakabe egwala kan'dabila eti, “Tate bangu, andina iye ungandilonga mu dziba ha vula ikodzongeka, ndoti nditjagwisa kungina, atangigwa ne mmwe.” 8 Jesu kati kunli, “Milika utole thobo iyo uyende.” 9 Tjinyolotjo nlume iwoyu kapola, katola thobo iye kayenda. Ikoku kwakashingikala mu nsi we Sabata. 10 Ndizo Bajuta bakati ku nlume iwoyu wapodziwa, “Nasi i Sabata, ate kuli mu nlayo kuti usenge thobo iyo.” 11 Kabashandula eti, “Nlume wandipodza wandidwa kati, ‘Tola thobo iyo uyende.’ ” 12 Bakambhuzwa beti, “Ndiani iwoyo nthu wakudwa eijalo?” 13 Koga kasizibe kuti ndiani, ngobe kwakabe kuna bathu banjinji ipapo, ngono Jesu wakabe ayenda. 14 Shule kwe tjibaka Jesu kan'wana mu Ng'umba ye Ndzimu, ngono kan'dwa kati “Wapodziwa, utjiletjedza kutjinya, kuti usishingikaligwe nge tjinopinda itjetji.” 15 Iwoyu nlume kayenda kanobudza Bajuta kuti wapodziwa ndi Jesu. 16 Ndizo bakatangisa kusala Jesu shule bendziyidza, ngobe wakabe ethama zwithu izwezwi nge nsi we Sabata. 17 Jesu kabadwa kati, “Tate batjashinga na ngwenu kose, ngono namibo ndoshinga.” 18 Ngekwa ikoku Bajuta bakazwimisila tjose kumbulaya, ngobe wakabe atjuluka nlayo we Sabata kakale edana Ndzimu eti Tate, ezwilizanya ne Ndzimu.

Tjibombo tje le Nkololo

19 Jesu kabadabila eti, “Ndolebesa tjose ndoti kumuli, Nkololo aana tjaangashinga nge kukwe, kuzhe kwe tjaabona tjishingwa ndi Tate babe. Tjinoshingiwa ndi Tate ne Nkololo unotjishingabo. 20 Ngobe Tate banoda Nkololo ndizo banonlakidza kose kwabanothama; ngono banowonlakidza mishingo mikulu pana iyeyi, kuti mukaabale. 21 Koga sa Tate bemusa bafi bebapa butjilo, Nkololo unotjidzabo baanoda. 22 Tate abana wabanosumikilisa, koga bakapa Nkololo wabo fanilo dzose dze kusumikilisa, 23 kuti ndizo bose bakudze Nkololo sekwa banokudza Tate. Iye usingakudze Nkololo aatokudza Tate ibo bakantuma. 24 “Ndolebesa tjose ndoti kumuli, iye unohwa dama langu kagalamoyo muna iye wakandituma, unowowana butjilo gusingapele. Aatjowowang'wa nlandu, koga wapinda mu lufu wangina mu butjilo. 25 Ndolebesa tjose ndoti kumuli, tjibaka tjozha, na iko tjatjiswika tje kuti bafi bahwe hwi le Nkololo we Ndzimu, ngono ibabo banowolihwa banowotjila. 26 Se Tate bana masimba ekupa butjilo, bakapa Nkololo kube ne masimba ekupa butjilo na iyebo. 27 Bakampa simba le kusumikilisa, ngobe ali iye Nkololo we nthu. 28 Musitjenamile ikoku, ngobe tjibaka tjozha tje kuti bose bamu zwikumbu bahwe hwi lile, 29 ngono babhude mu zwikumbu zwabo, ibabo bakashinga ndulamo banowomukila mu butjilo, bakashinga mbipo banowomukila kubong'wa nlandu.

Batendeki ngekwa Jesu

30 “Akuna tjandingashinga nge kwangu, ndosumikilisa sekwa ndabudziwa nge Ndzimu, ndizo kusumikilisa kwangu kwakalulwama, ngobe anditoshaka kushinga kuda kwangu, ndoshinga kuda kwa iye wakandituma. 31 “Ha ndizwitendekela nge kwangu, butendeki gwangu ate guli malebeswa. 32 Koga kuna mmwe unotendeka nge kwangu, ngono ndoziba kuti butendeki gugwe nge kwangu malebeswa. 33 Makatuma bathu kuna Johani, ngono katendeka ngekwe malebeswa. 34 Ate kuli kuti ndimilile butendeki gwe bathu nge kwangu koga, ndoleba ikoku kuti mutjidziwe. 35 Johani wakabe ali luvone gunothuta kakale gunopenya, ngono imwi makada kushathila tjedza tjitje kwe tjibaka tjifupi. 36 Ndina butendeki bukulu pana gwa Johani. Mishingo yandakapiwa ndi Tate kuti ndiipeleledze, iyo mishingo iyeyi yandinoshinga, inotendeka nge kwangu kuti Tate bakandituma. 37 Na ibo Tate bakandituma, bakatendeka nge kwangu. Amuthu mukatongo hwa hwi labo kene kuli kubona mbumbiko yabo, 38 kakale makashayila hanya dama labo, ngobe amutogalabgwe muna iye wabakatuma. 39 Mozwidiya hwalo dze Ndzimu makasimisa ngobe mokumbula kuti muna butjilo gusingapele mudzili. Ngono ndidzo dzinotendeka nge kwangu, 40 koga molamba kuzha kundili kuti muwane butjilo. 41 “Anditoamutjila gudzo kudwa mu bathu, 42 koga ndomuziba. Ndoziba kuti amuna ludo gwe Ndzimu mumuli. 43 Ndakazha nge zina la Tate, koga amutondiamutjila; koga ha mmwe ezwizhigwa nge zina lile, iye mowon'amutjila. 44 Mungagalamoyo tjini muda kukudzana, koga musingagwise kuwana kukudziwa kunodwa ku Ndzimu, iwo uwoga kene? 45 Musikumbule kuti ndimi ndinowomutilika nlandu mbeli kwa Tate. Mushe wamakagalabgwe, ndiye unowomutilika nlandu. 46 Ha makabe magalamoyo muna Mushe, mobe mugalamoyo ne mundili, ngobe wakakwala nge kwangu. 47 Koga se musingagalemoyo tjaakakwala, mungagalamoyo tjandinoleba tjini?”

Johani 6

Jesu ejisa bathu bali zwiwulu zwishanu (5000)

1 Kudwa ipapo, Jesu katjulukila seli kwe gungwa gwe Galili linodang'wa kakale gungwa gwe Tibheriyasi. 2 Ngono wakatobegwa nge mbunga nkulu we bathu, ngobe bakabe babona zwilakidzo zwizwe zwe kupodza bagwele. 3 Jesu katatha dombo kagala pasi ne badiyiwa babe. 4 Nzano we Bajuta we Kupinda pezhugwi wakabe wabe pejo. 5 Ngono Jesu wakati emilidza mesho kabona mbunga we bathu uzha kunli, ndizo kadwa Filipo kati, “Towobatengela ngayi tjiwunga kuti baje?” 6 Wakabe ebhuzwa ikoku kulika Filipo, ngobe iye nge kukwe wakabe eziba tjaanowoshinga. 7 Filipo kanshandula eti, “Tjiwunga tje themba ye mari e siliva ali mazana mabili (200) atjingalizane kuti mmwe ne mmwe wabo alabile.” 8 Mmwe we badiyiwa babe unoyi Enduru, nnung'una wa Simoni Pita kati kunli, 9 “Kuna mbisana ipapa una zwiwunga zwe bhali zwitukununu zwishanu ne hwobe tukununu dzili mbili; koga azwingalizane bathu ibaba bose.” 10 Jesu kabadwa kati, “Gadzani bathu pasi.” Kwakabe kuna dishwa njinji ipapo. Ngono balume bali zwiwulu zwili zwishanu bakagala pasi. 11 Jesu katola zwiwunga izwezo, kati aboka kazwikobela bathu ibabo bakabe bali gele pasi. Kapapha kabokela hwobe, ngono bose bakawana kwakabalizana. 12 Kukati baguta bose, kati ku badiyiwa babe, “Kubunganyani mamburumburu asala, kuti kusibe ne tjinotebugwa.” 13 Ipapo bakaakubunganya wose bakazhadza seme dzili gumi lina mbili nge mamburumburu akasala mu zwiwunga zwishanu zwakabe zwajiwa nge bathu. 14 Bathu bakati babona tjilakidzo tjathamwa ndi Jesu bakati, “Malebeswa dumbu, oyu ndiye nlebesambeli wakalingiligwa kuzha mu shango.” 15 Jesu wakati ebona kuti bakazwimisila kunkombeledza kuti abe She nkulu wabo, kabasiya kayenda kakale ku dombo ali yega.

Jesu unoyenda pezhugwi kwe vula

16 Kukati kwabe madekwana, badiyiwa babe bakadelukila ku gungwa, 17 bakangina mu n'goro, bakatjulukila seli kwe gungwa bakalinga ku Kapenaume. Kwakabe busiku Jesu asathu kazha kubali. 18 Vula ye gungwa yakabe ikapha kwainobe matuthu, ngobe kwakabe kuna phepo ina masimba kwazo. 19 Ngono Badiyiwa bakati bayenda thambo ingapa khilomitha shanu kene tathatu bakabona Jesu enangayila pezhugwi kwe vula, ezha tjapejo ne n'goro wabo, ngono bakatja kwazo. 20 Koga Jesu kabadwa kati, “Ndimi, musitje!” 21 Ipapo bakan'amutjila kangina mu n'goro, kukati tjinyolotjo bakaswika pa phili ye gungwa babe mu shango yabakabe beyenda ku ili.

Bathu banoshaka Jesu

22 Tjimuka mbunga wakabe walala seli kwe gungwa wakabona kuti kwakabe kuna n'goro nng'ompela ipapo wakayenda ne badiyiwa, ngono Jesu wakabe asangina mu uli. 23 Ipapo kukaswika mimwe migoro idwa ku Tibheriyasi, ikama tjapejo ne pakabe pejigwa tjiwunga nge bathu, tjadwa pabokegwa ndi She. 24 Ngono mbunga iwoyo wakati wabona kuti Jesu aapo kose ne badiyiwa babe, ukangina mu migoro iyeyo ukayenda ku Kapenaume kunonshaka.

Jesu ndiye tjiwunga tje butjilo

25 Bathu bakati bewana Jesu seli kwe gungwa, bakambhuzwa beti, “N'diyi, makaswika lini ngeno?” 26 Jesu kabadabila eti, “Ndolebesa tjose ndoti kumuli, amutondishakila kuti makabona zwilakidzo, koga mondishaka, ngobe makaja tjiwunga mukaguta. 27 Musishingile zojiwa zwinotjinyika, koga shingilani zojiwa zwinogalila tjose kunoti mu butjilo gusingapele, zwamunowopiwa ne Nkololo we nthu, iye una lutjwayo gwe Ndzimu Tate.” 28 Bakambhuzwa bakati, “Tithameni kuti ndizo tishinge mishingo ye Ndzimu?” 29 Jesu kabashandula eti, “Nshingo we Ndzimu ndihwoyu; kugalamoyo muna iye wakatumwa nge Ndzimu.” 30 Ndizo bakambhuzwa kakale beti, “Nditjipi tjilakidzo tjaunowothama, kuti tibone tikugalemoyo? Ini tjaunowoshinga? 31 Bobatategulu bedu bakaja mana mu tjilambanyika, sekwa kwakakwagwa kuyi ‘Mushe wakabapa tjiwunga tjinodwa kudzimu kuti baje.’ ” 32 Jesu kati kubali, “Ndolebesa tjose ndoti kumuli, Mushe ate iye wakamupa tjiwunga tjinodwa kudzimu, koga Tate ndibo banomupa tjiwunga tjakwako tjinodwa kudzimu. 33 Ngobe tjiwunga tje Ndzimu ndiye unodeluka edwa kudzimu kuwopa bamu shango butjilo.” 34 Bakankumbila bakati, “She, kudwila nasi mutipe tjiwunga itjetji.” 35 Jesu kabadwa kati, “Ndimi tjiwunga tje butjilo, iye unozha kundili aatjowobe ne zhala, na iye unogalamoyo mundili aatjowobe ne nyota. 36 Koga sekwa ndamubudza kuti nenguba makandilinga mundibona, amutogalamoyo. 37 Bose bandinopiwa ndi Tate banowozha kundili, ngono iye unozha kundili anditowontata, 38 Ngobe ndakadeluka ndidwa kudzimu ndisingawoshinga kuda kwangu, koga ndowoshinga kuda kwa iye wakandituma. 39 Oku ndiko kuda kwe wakandituma, kuti kushaye wandilashikila we bathu bose bandakapiwa, koga ndibamuse bose mu zhuba le bupelo. 40 Ngobe kuda kwa Tate ndihwoku, hwuti bose banowobona Nkololo bakagalamoyo munli, bapiwe butjilo gusingapele. Ndizo ndowobamusa mu zhuba le bupelo.” 41 Ipapo Bajuta bakang'ong'ola nge kukwe, ngobe ati, “Ndimi tjiwunga tjakadeluka tjidwa kudzimu.” 42 Ngono bakati, “Apa ate ali Jesu nkololo wa Josefa iwoyu kene, tate babe na mmeyabe batinoziba? Kozha tjini kuti ati ‘Ndakadeluka ndidwa kudzimu?’ ” 43 Jesu kabadabila eti, “Letjani kung'ong'ola. 44 Akuna ungazha kundili asakwebiwa ndi Tate bakandituma, ngono ndowommusa mu zhuba le bupelo. 45 Balebesambeli bakakwala beti, ‘Bose banowodiyiwa nge Ndzimu.’ Mmwe ne mmwe wakahwa Tate kazwidiya mubali unozha kundili. 46 Akuna wakatongo bona Tate kuzhe kwa iye wakadwa ku Ndzimu, ndiye ega wakabona Tate. 47 Ndolebesa tjose ndoti kumuli, iye unogalamoyo una butjilo gusingapele. 48 Ndimi tjiwunga tje butjilo. 49 Bobatategulu benyu bakaja mana mu tjilambanyika, koga bakafa. 50 Koga etji tjiwunga tjinodwa kudzimu, ngono iye unotjija aatowofa. 51 Ndimi tjiwunga tjinotjila tjakadeluka tjidwa kudzimu. Ha nthu eja tjiwunga itjetji unowotjilila tjose. Tjiwunga itjetji tjandinopa i nyama yangu yandinowopila butjilo gwe shango.” 52 Bajuta bakatangisa kunyanyayidzana beti, “Iwoyu nlume ungatipa nyama iye kuti tiije tjini?” 53 Jesu kati kubali, “Ndolebesa tjose ndoti kumuli, kuzhe kwe kuti muje nyama ye Nkololo we nthu, mung'we kose ne malopa awe, amuna butjilo mumuli. 54 Iye unowoja nyama yangu, kang'wa malopa angu, unowowana butjilo gusingapele, kakale ndowommusa mu zhuba le bupelo. 55 Ngobe nyama yangu zojiwa zwakwako ne malopa angu tjing'o tjakwako. 56 Iye unoja nyama yangu, kang'wa malopa angu, unogala mundili, namibo agala munli. 57 Koga sa Tate banotjila bakandituma, ngono ndotjila ndibo, na iyebo unowoja mbili wangu unowotjila ndimi. 58 Etji nditjo tjiwunga tjakadeluka tjidwa kudzimu, atjitonga mana akajiwa ndi bobatategulu benyu ngono bakafa. Koga iye unoja tjiwunga itjetji unowotjilila tjose.” 59 Jesu wakaleba zwithu izwezwi ali mu ng'umba ye mitembezelo mu Kapenaume.

Matama e butjilo gusingapele

60 Bunji gwe badiyiwa babe gukati guhwa ikoku gukati, “Oku hwudiya kwakasima. Ndiani ungakuhwilila?” 61 Jesu kaziba kuti badiyiwa babe banong'ong'ola ngekwa ikoku, ngono kati kubali, “Apa ikoku komukutha kene? 62 Kowotini ngono ha mubona Nkololo we nthu etathila kwaakabe aliko mu kutanga? 63 Meya ndiyo inopa butjilo, nyama aina nshingo. Matama andaleba kumuli anowomuzhisila Meya kakale anowomuzhisila butjilo. 64 Koga bamwe benyu abatogalamoyo.” Jesu wakabe eziba kudwila mu kutangisa, kuti ndiboani basingawogalamoyo ne nge kuti ndiani unowon'wonga. 65 Ngono kapapha kati, “Ndizo ndamubudza kuti akuna ungazha kundili kuzhe kwa Tate banthama kuti apundule.” 66 Shule kwa ikoku, bunji gwe badiyiwa babe bakansiya bakasitjayende naye. 67 Jesu kabhuzwa badiyiwa bali gumi lina babili kati, “Apa namwibo moshaka kuyendabo kene?” 68 Simoni Pita kanshandula eti, “She, apa tingayenda kuna ani kene? Imwi ndimwi muna matama e butjilo gusingapele. 69 Iswi togalamoyo kakale toziba kuti ndimwi N'yengemali Uyega we Ndzimu.” 70 Jesu kashandula eti, “Apa andizomushalula muli gumi lina babili kene? Koga mmwe wenyu Nvanganyi!” 71 Wakabe elebeleka ngekwa Judasi, nkololo wa Simoni Isikariyoti, ngobe Judasi ne akabe ali mmwe we badiyiwa bali gumi lina babili, wakadwapo kan'wonga.

Johani 7

Jesu ne banung'una babe

1 Shule kwa ikoku Jesu kayenda yenda mu Galili, wakabe asingashake kuyenda mu Judiya, ngobe Bajuta baikoko bakabe beshaka kumbulaya. 2 Ngono kwakati Nzano we Bajuta we Mishasha wabe pejo, 3 banung'una ba Jesu bakati kunli, “Bhuda mu bugalo igogu uyende ku Judiya, kuti ndizo badiyiwa babo babone mishingo yaunoshinga. 4 Akuna unosumbika tjaanoshinga ha eshaka kuti azibgwe. Se uthama zwithu izwezwi, thama kuti shango izibe nge kuko.” 5 Banung'una babe bakabe basingagalemoyo munlibo. 6 Jesu kati kubali, “Tjibaka tjakafanila atjithu tjikaswika, kumuli tjibaka tjimwe ne tjimwe tjakalulwama. 7 Shango aingamubenge, koga imi inondibenga, ngobe ndogala nditendeka ngekwe mishingo yayo yakabipa. 8 Imwi yendani ku nzano. Imi anditoyenda ku nzano iwoyu, ngobe tjibaka tjangu atjithu tjikaswika.” 9 Wakati aleba eijalo kagala mu Galili.

Jesu ku Nzano we mishasha

10 Koga kukati banung'una babe bayenda ku nzano iwoyo, Jesu kamilika kayendabo akabgwata. 11 Bajuta bakabe benshaka ku nzano, bebhuzwa beti, “Nlume iwoyo ungayi kene?” 12 Ngono bathu bakanyebezela kwazo nge kukwe. Bamwe beti, “Nlume wakalulwama.” Bamwe beti, “Akuzojalo, unodzimidza bathu.” 13 Koga kwakabe kusina unoleba nge kukwe epubula, ngobe bakabe betja Bajuta. 14 Nzano wakati wabe pakati, Jesu kayenda ku Ng'umba ye Ndzimu kaswika katangisa kudiya. 15 Bajuta bakakaabala ngono bakabhuzwana beti, “Nlume iwoyu wakawana luzibo igogu ngayi asakadiyika?” 16 Jesu kashandula eti, “Zwidiyo zwandinodiya azwitodwa mundili, koga zodwa kuna iye wakandituma. 17 Akuna mmwe unoda kushinga kuda kwe Ndzimu unowotubula kuziba kuti kudiya kwangu kodwa ku Ndzimu kene ndozwilebegwa koga. 18 Iye unozwilebegwa, unozwishakigwa tjilumbi. Koga iye unoshaka gudzo le wakantuma, una malebeswa munli akuna manyepkhwa. 19 Apa Mushe azomupa nlayo kene, koga akuna wenyu unoulondolodza. Apa ini mugwisa kundibulaya kene?” 20 Bathu bakanshandula beti, “Una meya mbi mukuli iwe! Ndiani unogwisa kukubulaya?” 21 Jesu kabashandula eti, “Ndathama nshingo nng'ompela koga, ngono matjenama mose. 22 Mushe wakamulaya ngekwe kuthumbigwa, nenguba Mushe asi iye wakakutangisa, kwakatangisiwa ndi bobatategulu benyu, ngono mothumbila mbisana mu nsi we Sabata. 23 Apa ha muthumbila mbisana nge Sabata kuti ndizo musitjuluke nlayo wa Mushe, ini mundigwadzilamoyo, ngobe ndapodza nthu mbili uwe wose nge nsi we Sabata? 24 Letjedzani kusumikilisa zwithu kuyendidzana nge mbumbiko yazo, musumikilise zwithu nge kusumikilisa kwakalulwama.”

Apa ndiye Mesiya iwoyu kene?

25 Ipapo bamwe bathu be Jerusalema bakati, “Apa iwoyu nlume ate ali iye wabanogwisa kubulaya kene? 26 Bonani! Unolebeleka ali patjena, ngono batungamili abaton'dwa tjimwe! Apa angabe malebeswa kuti banoziba kuti ndiye Mesiya kene? 27 Mesiya ha ezha, akuna unowoziba kwaanodwa. Koga tose toziba kunodwa nlume iwoyu.” 28 Ngono Jesu kati atjadiya mu Ng'umba ye Ndzimu kamilidza hwi kati, “Apa mondiziba wali ne kwandinodwa mokuziba kene? Imi andizozwizhigwa, ngono iye wakandituma una malebeswa. Imwi amutonziba, 29 koga imi ndonziba, ngoti ndidwa kunli, akandituma.” 30 Ipapo bakagwisa kumbhata, koga kukasheta wankuma, ngobe tjibaka tjitje tjakabe tjisathu tjikaswika. 31 Bathu banjinji bakabe bali mu mbunga iwoyo bakagalamoyo ngono bakati, “Apa Mesiya unowoti ezha, kathama zwilakidzo zwinopinda zwa iwoyu nlume kene?”

Balindi banotumwa kunosunga Jesu

32 Bafarasi bakahwa bathu benyebezela zwithu izwezwi ngekwa Jesu, ndizo ibo ne Bapirisiti bakulu bakatuma balindi be Ng'umba ye Ndzimu kunonsunga. 33 Jesu kalebeleka kati, “Ndowobe namwi kwe tjibaka tjifupi, kudwa ipapo ndowobgwilila kuna wakandituma. 34 Mowondishaka, koga amutowondibona, ngobe amungayende kwandinowobe ndiliko.” 35 Bajuta bakabhuzwana beti, “Ndi ngayi kwaanowoyenda kwatisingake tikambona? Kene unowoyenda ku Bajuta ba kanyi kwedu baku Giriki enodiya Bagiriki? 36 Kati towonshaka koga atitowombona, kakale atingayende kwaanowobe aliko. Unodwani kene?”

Hwobana dze vula inopa butjilo

37 Mu zhuba le bupelo ilo zhuba gulu le nzano, Jesu kamilika kalebelekela pezhugwi eti, “Kene ali ani una nyota ngaazhe kundili awong'wa. 38 Iye unogalamoyo mundili sekwa kwakakwagwa mu hwalo dze Ndzimu, kowowunga hwobana dze vula inopa butjilo.” 39 Wakabe elebeleka ngekwe Meya yakayengemala, inowoamutjigwa nge banogalamoyo munli. Mu tjibaka itjetjo Meya yakayengemala yakabe isathu ikapiwa bathu, ngobe Jesu wakabe asathu kakudziwa.

Kuthubukana pakati kwe bathu

40 Bamwe bathu bakati behwa matama iyawa bakati, “Iwoyu nlume Nlebesambeli dumbu!” 41 Bamwe bakati, “Ndiye Mesiya!” Koga bamwe bakati, “Mesiya aatowozha edwa ku Galili! 42 Kwakakwagwa kuti Mesiya unowobe edwa mu ludzi gwa She Dafite, unowozwaligwa mu Bhetelehema nzi wakabe ugala Dafite.” 43 Ndizo kukabe ne kuthubukana mu bathu, benyanyayidzana ngekwa Jesu. 44 Bamwe bakashaka kumbhata, koga kukasheta wambiga luboko.

Kusagalamoyo kwe Bajuta bebatungamili

45 Kukati balindi be Ng'umba ye Ndzimu bebgwilila ku Bapirisiti bakulu ne Bafarasi, bakababhuzwa beti, “Ini musazha naye?” 46 Balindi be Ng'umba ye Ndzimu bakabadabila beti, “Akuna nthu wakatongo lebeleka sa iwoyu nlume!” 47 Bafarasi bakababhuzwa beti, “Apa namwibo matjengedzeka kene? 48 Apa kuna mmwe we babusi kene we Bafarasi wakatongo galamoyo munli? 49 Koga mbunga usingazibe tjimwe ngekwe nlayo, una bhiso.” 50 Mmwe we Bafarasi ibaba wakabe ali Nikodemo, iye wakatongo yenda kuna Jesu. Kadwa bamwe kati, 51 “Apa nlayo wedu unoduma kuti nthu abong'we nlandu asathu kateedziwa kukazibgwa kuti ini ethama tjaanothama kene?” 52 Bakanshandula beti, “Apa nawebo unodwa ku Galili kene? Linga mu hwalo dze Ndzimu, unowobona kuti akuna nlebesambeli ungatongo dwa ku Galili.” 53Ndizo mmwe ne mmwe kabgwilila kanyi kwabo.

Johani 8

Nkadzi wakabe abhakhwa bupombgwe

1 Koga Jesu iye wakayenda ku Dombo le Mitoba. 2 Kwakati ku tjimangwanana mu zhuba linotobela kabgwilila ku Ng'umba ye Ndzimu. Bathu bose bakazha kunli, ndizo kagala pasi katangisa kubadiya. 3 Badiyi be nlayo ne Bafarasi bakazhisa mmwe nkadzi wakabe abhakhwa bupombgwe kuna Jesu, ngono bakammisa pakati kwe bathu, 4 bakadwa Jesu bakati, “N'diyi, nkadzi iwoyu wabhakhwa bupombgwe. 5 Mu Nlayo, Mushe wakatilaya kuti nkadzi wakajali wakafanila kukikithidziwa nge mabgwe kudzina efa. Iwe unoti aying'wi?” 6 Bakabe beleba beijalo beteya Jesu, kuti bawane tjabangambhatila patjili. Koga Jesu kakotama kakwala mu mavu nge tjinyala tjitje. 7 Bakati bedwilila nge kumbhuzwa, kakotamuka kati kubali, “Iye wenyu usina tjibi, ngaabe we kutanga kuposa nkadzi iwoyu nge bgwe.” 8 Kakotama kakale kakwala mu mavu. 9 Bakati behwa matama awe, bose bakayenda, nng'ompela ne nng'ompela, kutangisa ne bahwola. Jesu kasala abe ega ne nkadzi iwoyo ali mile ipapo. 10 Kakotamuka kati ku nkadzi iwoyo, “Bangayi? Akuna wakubona nlandu?” 11 Nkadzi kan'dabila eti, “Akuna, tetshi wangu.” Jesu kati, “Kwakalulwama, nami anditokubona nlandu. Yenda, koga usitjatjinye kakale.”

Jesu ndiye tjedza tje shango

12 Jesu kalebeleka ne Bafarasi kakale kati, “Ndimi tjedza tje shango, iye unonditobela unowobe ne tjedza tjinopa butjilo, ndizo aatjowoyenda mulima.” 13 Bafarasi bakati kunli, “Unozwitendekela nge kuko, ngono matama awo aana malebeswa.” 14 Jesu kabashandula eti, “Nenguba ndizwitendekela nge kwangu, butendeki gwangu malebeswa, ngobe ndoziba kwandakadwa ne nge kwandinoyenda. Imwi amutoziba kwandakadwa kene kwandinoyenda. 15 Imwi mosumikilisa nge mpanga we bathu, koga imi andina wandinosumikilisa. 16 Ha ndabe ndisumikilisa, kusumikilisa kwangu kobe kuli kwe malebeswa, ngobe anditosumikilisa ndili ndoga, koga ndina Tate ibo bakandituma. 17 Kwakakwagwa mu nlayo wenyu kuti, ha butendeki gwe bathu babili gudumana, tjabanoleba malebeswa. 18 Ndozwitendekela, mmilili wangu mmwe ndi Tate, ibo bakandituma.” 19 Bakambhuzwa bakati, “Tate babo bangayi?” Kabadabila eti, “Amutoziba kuti ndimi ani, ndizo na Tate amutobaziba. Ha mabe mundiziba, na Tate mobe mubaziba.” 20 Jesu wakaleba kose ikoku ediya ali mu Ng'umba ye Ndzimu pejo ne mabiganyilo e zwipo zwadusigwa Ndzimu. Akuna wakambhata, ngobe tjibaka tjitje tjakabe tjisathu tjikaswika.

Amungayende kwandinoyenda

21 Jesu kapapha kati kubali, “Ndoyenda, mowondishaka, ngono mowofila mu zwibi zwenyu. Kwandinoyenda amungazhe ko.” 22 Ndizo Bajuta bakati, “Unoshaka kuzwibulaya kani? Se eti, ‘Kwandinoyenda, amungazhe ko?’ ” 23 Jesu kabadwa kati, “Imwi mube shango ino ipasi, imi ndodwa ku shango ipezhugwi. Imwi modwa mu shango ino, koga imi anditodwa muili. 24 Ndamudwa ati mowofila mu zwibi zwenyu, ngelebeswa mowofila mu zwibi zwenyu, ha musingagalemoyo kuti ‘Ndi iye wandili iye!’ ” 25 Bakambhuzwa beti, “Ndiwe ani?” Jesu kabadabila eti, “Nditjandakamubudza mukutangisa. 26 Ndina zwinjinji zwandinowoleba nge kwenyu ne zwinjinji zwandinowomusumikilisila. Koga iye wakandituma, una malebeswa, ngono ndobudza shango tjandahwa ndiye.” 27 Abazohwisisa kuti wakabe elebeleka nabo ngekwa Tate. 28 Ndizo Jesu kati kubali, “Mowoti mamilidzila Nkololo we nthu pezhugwi, ipapo mukaziba kuti ‘Ndi iye wandili iye.’ Mowoziba kuti andina tjandinoshinga nge kwangu, koga ndoleba tjandinobe ndilayiwa ndi Tate kuti nditjilebe. 29 Iye wakandituma unami, aazondisiya ndoga, ngobe ndoshinga tjinonshathisa misi yose.” 30 Wakati elebeleka sa ikoko bathu banjinji bakagalamoyo munli.

Lebeswa lowomusunungula

31 Ndizo Jesu kati ku Bajuta bakabe bagalamoyo munli, “Ha mulondolodza matama angu, mu badiyiwa bangu bakwako, 32 mowoziba malebeswa, ngono malebeswa anowomusunungula.” 33 Bakanshandula beti, “Iswi ti zwizekugwana zwa Abhurahama, kakale atithu tikatongobe balanda. Unodwani ha uti, ‘Mowosunungugwa?’ ” 34 Jesu kati kubali, “Ndolebesa tjose ndoti kumuli, mmwe ne mmwe unotjinya nlanda we tjibi. 35 Nlanda aatogalila tjose mu nzi usi wa kanyi kwabo, koga nkololo unogalila tjose. 36 Ndizo Nkololo ha emusunungula mowosununguka kwakwako. 37 Ndoziba kuti mu zwizekugwana zwa Abhurahama, koga mogwisa ku ndibulaya, ngobe amutoamutjila matama angu. 38 Ndoleba ngekwe tjandakalakidziwa ndi Tate, koga moshinga tjamakahwa ndi tate benyu.” 39 Bakan'dabila beti, “Tate bedu ndi Abhurahama.” Jesu kabashandula eti, “Ha mabe muli bana ba Abhurahama mobe mushinga zwakashingwa ndi Abhurahama. 40 Koga makazwimisila kundibulaya, imi ndakamubudza malebeswa andakahwa nge Ndzimu. Abhurahama aazothama zwithu zwakajalo! 41 Imwi moshinga mishingo ya tate benyu.” Bakan'dabila beti, “Ndzimu nge kwawo ndi Tate bedu, atizozwagwa mu bupombgwe.” 42 Jesu kabadabila eti, ha Ndzimu wabe uli tate benyu, mobe mundida, ngobe ndakadwa ku Ndzimu ngono ndi pano. Andizozwizhigwa nge kuda kwangu, ndakatumwa nge Ndzimu. 43 Ini musingahwisise tjandinoleba? Hwuti amungamilane nge kuhwa dama langu. 44 Mu bana ba tate benyu, ibo Nvanganyi, ngono moshaka thama kuda kwa tate benyu. Bakabe bali mbulayi kudwa mu kutangisa, kakale abana tjimwe nge malebeswa, ngobe kusina malebeswa mubali. Ha benyepa banobe belebeleka lulimi gwe mbumbiko yabo, ngobe bannyepi kakale ndibo tate be manyepkhwa. 45 Koga ngoti ndoleba malebeswa, amutondigalamoyo. 46 Ndiupi wenyu ungatendeka tjibi tjangu? Ha ndileba malebeswa, ini ngono musingandigalemoyo? 47 Iye unobe ali we Ndzimu unohwilila matama e Ndzimu. Tjinoyita kuti musihwe hwuti amute muli be Ndzimu.

Jesu na Abhurahama

48 Bajuta bakan'dabila beti, “Apa atitolebesa kene, ha titi, u Nsamariya kakale una meya mbi?” 49 Jesu kabashandula eti, “Andina meya mbi, koga ndokudza Tate, ngono imwi mondilengudza. 50 Anditozwishakila gudzo ngono uyapo unolishaka, iye ndiye nsumikilisi. 51 Ndolebesa tjose ndoti kumuli, iye unolondolodza dama langu aatowofa.” 52 Bakati kunli, “Ngwenu tina malebeswa ekuti una meya mbi. Abhurahama wakafa ne balebesambeli bakafa, koga iwe ukati, ‘Iye unolondolodza dama langu aatowofa.’ 53 Apa u nkulu pana tate bedu Abhurahama kene? Bakafa ne balebesambeli bakafabo. Unozwidwa uti ndiwe ani kene?” 54 Jesu kabadabila eti, “Ha ndizwikudza, kuzwikudza kwangu akutodwa tjimwe. Koga ndokudziwa ndi Tate ibo bamunoti Ndzimu wenyu. 55 Imwi amutobaziba, koga imi ndobaziba. Ha ndingati anditobaziba, ndowobe ndili nnyepi samwi. Koga ndobaziba, kakale ndolondolodza dama labo. 56 Tate benyu Abhurahama bakashathila kuzha kwangu mu shango, bakabona nsi we kuzha kwangu ngono bakashatha.” 57 Bajuta bakati kunli, “Iwe usathu ukabe ne makole ali makumi mashanu unoti wakabona Abhurahama kene?” 58 Jesu kabashandula eti, “Ndolebesa tjose ndoti kumuli, Abhurahama wakati asathu kazwagwa, ndakabe ndilipo Ndi iye wandili iye.” 59 Wakati eijalo, bakanunga mabgwe beti bamphobole ndiwo, koga kabgwata ngono kabhuda mu Ng'umba ye Ndzimu kayenda.

Johani 9

Jesu unopodza nlume wakazwagwa ali bhofu

1 Jesu kati atjayenda, kabona nlume wakazwagwa ali bhofu. 2 Badiyiwa babe bakambhuzwa beti, “N'diyi, i jinyo laani lakathama kuti nlume iwoyu azwagwe ali bhofu? Apa i jinyo lile kene le bazwadzi babe?” 3 Jesu kabashandula eti, “Akuna wabo wakatjinya, nlume iwoyu kene bazwadzi babe, koga kwakashingikala kuti simba le Ndzimu libong'we lishinga mu kupodziwa kukwe. 4 Ha kutji masikati, takafanila shinga nshingo we wakandituma, busiku gwaswika gusina ungashinga. 5 Ha imi nditji yapo mu shango, ndimi tjedza tje shango.” 6 Kati alebeleka ajalo, kathwila mate pasi kavanga dope ndiwo kalibhoma mu mesho e nlume iwoyo, 7 kan'dwa kati, “Yenda unongula mu dziba le Siloame.” Zina ileli lodwa “Tumwa” kene “Tumigwa.” Ndizo nlume iwoyo kayenda, kanongula, ngono kabuya ebona. 8 Bakabakidzana naye ne bathu bakabe bambona kutanga etjila ngokumbila bakabhuzwana beti, “Apa ate ali iye nlume iwouje unosobe ali gele ekumbila kene?” 9 Bamwe bakati, “Ndiye.” Koga bamwe bakati, “Aa, ate iye; unofanana koga naye.” Koga nlume iwoyu nge kukwe kabadwa kati, “Ndimi.” 10 Bakambhuzwa beti, “Ngono ini tjakupofunula?” 11 Kadabila eti, “Nlume unoyi Jesu wavanga dope, kalibhoma mu mesho angu, kandidwa kati ndiyende ndinongula ku Siloame. Ngono ayenda, angula abe ndibona.” 12 Bakambhuzwa beti, “Iye ungayi?” Kabadabila eti, “Anditoziba kwaayako.”

Bafarasi banoshakisisa ngekwe podziwa kwe bhofu

13 Ipapo bakayisa nlume wakabe abe ali bhofu ku Bafarasi. 14 Ngono kwakabe kuli nge nsi we Sabata, Jesu paakavanga dope kampofunula. 15 Ndizo Bafarasi bakambhuzwabo kuti kwakashingikala tjini kuti abe ebona. Ngono kabadwa kati, “Wandibhoma dope mu mesho, kudwa ipapo angula, ngono ngwenu ndobona.” 16 Bamwe be Bafarasi bakati, “Nlume wathama ikoku aatodwa ku Ndzimu, ngobe aatolondolodza nsi we Sabata.” Koga bamwe bakati, “Apa ntjinyi ungathama zwilakidzo zwakajali kene?” Kukabe ne kuthubukana nge mikumbulo pakati kwabo. 17 Ngono bakabhuzwa nlume iwoyo kakale beti, “Ukati wakupofunula, ngono iwe unotini nge kukwe?” Nlume iwoyo kabadabila eti, “Imi ndoti nlebesambeli.” 18 Bajuta bakabe basingadume kuti wakabe ali bhofu ngono ngwenu wobona, bakadzina bakadana bazwadzi babe, 19 bakababhuzwa beti, “Apa ndiye nkololo wenyu iwoyu wamunoti wakazwagwa ali bhofu kene? Ngono ngwenu wobona tjini?” 20 Bazwadzi babe bakabadabila beti, “Toziba kuti nkololo wedu iwoyu nenge kuti wakazwagwa ali bhofu, 21 koga atitoziba kuti ndiani wampofunula. Buzwani iye, wakula, ungazwidabiligwa!” 22 Bazwadzi babe bakaleba matama iyawa nge kutja Bajuta, ngobe Bajuta bakabe badumana kale kuti iye unoleba kuti Jesu ndiye Mesiya, unowotatiwa mu ng'umba ye mitembezelo. 23 Ndizo bazwadzi babe bakati, “Wakula, mumbhuzwe.” 24 Bakadana nlume iwoyo wakabe ali bhofu gwe bubili bakati kunli, “Tuna mbeli kwe Ndzimu kuti unoleba malebeswa. Iswi toziba kuti nlume iwoyu wakupofunula ntjinyi.” 25 Nlume iwoyo kashandula eti, “Kuti ntjinyi kene ate ali ntjinyi anditoziba, tjing'ompela tjandinoziba hwuti, ndakabe ndili bhofu, koga ngwenu ndobona.” 26 Bakambhuzwa beti, “Wakuthamani? Wakupofunula tjini?” 27 Kabashandula eti, “Ndamubudza kale, koga mukasihwilile. Ini mushaka kuti ndipaphe, moshaka kube badiyiwa babebo kene?” 28 Ipapo bakantuka beti, “Ndiwe n'diyiwa uwe! Iswi ti badiyiwa ba Mushe! 29 Toziba kuti Ndzimu wakalebeleka na Mushe, koga ha ali iwoyu nlume, atitoziba nenge kwaanodwa!” 30 Kabadabila eti, “Ikoku kotjenamisa kwazo! Ngobe amutoziba kwaanodwa, koga wandipofunula! 31 Toziba kuti Ndzimu autohwilila batjinyi, unohwilila banounamata beshinga kuda kwawo. 32 Kudwa mu kutangisa kwe shango akuna wakatongo hwa kuyi nthu wapofunula nthu wakazwagwa ali bhofu. 33 Iwoyu nlume ha abe asingadwe ku Ndzimu, unobe asingapundule tjimwe.” 34 Bakan'dabila beti, “Apa iwe wakazwaligwa mu tjibi ukabuya ukakulila mutjili, unogwisa kudiya iswi kene?” Ngono bakantata mu ng'umba ye mitembezelo.

Bupofu gwe meya

35 Jesu kahwa kuti batata nlume iwoyo, ngono kati an'wana kambhuzwa kati, “Apa unogalamoyo mu Nkololo we nthu kene?” 36 Nlume kan'dabila eti, “Tate bangu, mundibudze kuti ndiupi, kuti ndigalemoyo munli!” 37 Jesu kati kunli, “Wambona kale, ndiye iwoyu unolebeleka nawe sangwenu.” 38 Nlume iwoyo kati, “She, ndogalamoyo,” kanamata Jesu. 39 Jesu kati, “Ndakazha mu shango ino kuwosumikilisa, kuti ndizo mapofu abone, banobona bapofupale.” 40 Bamwe Bafarasi bakabe bali pejo naye bakahwa matama iyawa ngono bakambhuzwa beti, “Ukatini? Apa naswibo ti mapofu kene?” 41 Jesu kabadabila eti, “Ha mabe muli mapofu, mobe musina nlandu, koga se muti mobona, kodwa kuti mutjina nlandu.”

Johani 10

Tjifaniso tje nlisi

1 Jesu kalebeleka kati, “Ndolebesa tjose ndoti kumuli, iye usingangine mu danga le pkhwizi nge pa nkoba, engina ngothukila, i mbava kakale ntoleli, 2 koga unongina nge nkoba ndiye nlisi we pkhwizi. 3 Nlindi we pa nkoba unonzhulila, pkhwizi dzohwa hwi lile. Ngono unodana pkhwizi dzinobe dzili dzidze nge mazina adzo edzitungamilila kuzhe. 4 Ha adzidusa, unodzitungamila, ngono dzikantobela, ngobe dziziba hwi lile. 5 Adzingatobele mwezi, dzowontizha, ngobe dzisingazibe hwi lile.” 6 Jesu wakababudza tjifano itjetji, koga bakasihwisise tjaanodwa.

Jesu ndiye nlisi wakalulwama

7 Jesu kapapha kati, “Ndolebesa tjose ndoti kumuli, Imi ndimi nkoba unongina nge pkhwizi. 8 Bose bamwe bakazha mbeli kwangu i mbava ne batoleli ngono pkhwizi adzizobahwilila. 9 Ndimi nkoba. Iye unongina ndimi unowotjidziwa, unowongina kabhuda kawana mafulo. 10 Mbava inozha kuwokwiba ne kuwobulaya ne kuwolobesa. Imi ndakazha kuti babe ne butjilo, kakale babe nago nge buzhalo. 11 “Ndimi nlisi wakalulwama. Nlisi wakalulwama wakazwimisila kufila pkhwizi dzidze. 12 Nthu unolisila kulipiwa, ate ali nlisi, kakale ate ali mweni we pkhwizi, unoti ebona phele izha, katizha kasiya pkhwizi, ngono phele ikabhata pkhwizi ikadzipaladza. 13 Unotizha, ngobe ali mbhatshi koga, asina hanya ne pkhwizi. 14 Ndimi nlisi wakalulwama, ndoziba pkhwizi dzangu, na idzo dzondizibabo, 15 koga sa Tate bendiziba nami ndibaziba sekwa banondiziba. Ndakazwimisila kufila pkhwizi dzangu. 16 Ndina dzimwe pkhwizi dzangu dzisi dze danga ileli. Ngono ndakafanila ndidzizhisebo, ngono dzowohwa hwi langu, ndizo kowobe ne danga ling'ompela lina nlisi nng'ompela. 17 “Ngekwa ikoku, tate banondida, ngobe ndawopila butjilo gwangu kuti ndizo ndiguamutjile kakale. 18 Akuna unonditolela butjilo gwangu. Ndimi ndakazwimisila kuti ndife. Ndina simba le kugukoba kakale ndina simba le kuguamutjila kakale. Etji nditjo tjandakadwiwa ndi Tate.” 19 Kukabe ne kuthubukana kakale pakati kwe Bajuta ngekwe matama iyawa. 20 Bunji gwabo guti, “Una meya mbi! Unopenga! Mohwilililani tjaanoleba?” 21 Bamwe beti, “Nthu una meya mbi aangalebe matama akajali. Apa meya mbi ungapofunula mapofu tjini kene?”

Kulambiwa kwa Jesu

22 Kwakabe kuli mu mbaba, ngono kukabe kuli mu nzano we tjikumbuludzo tje kuyengemadziwa kwe Ng'umba ye Ndzimu mu Jerusalema. 23 Jesu wakabe eyenda yenda mu ntutshi unodang'wa Denga la Solomoni mu bhakasa le Ng'umba ye Ndzimu. 24 Bajuta bakankubunganila bakambhuzwa beti, “Unowotilindisa kungapani usathu ukatibudza malebeswa? Ha uli iwe Mesiya, utibudze kube patjena.” 25 Jesu kabashandula eti, “Ndakamubudza ntolo, koga amutoduma. Mishingo yandinoshinga nge zina la Tate inolakidza nge kwangu, 26 koga amutoduma, ngobe ate muli pkhwizi dzangu. 27 Pkhwizi dzangu dzohwa hwi langu, ndodziziba na idzo dzonditobela. 28 Ndodzipa butjilo gusingapele, ngono adzingalobe. Akuna ungadzidzamula mu maboko angu. 29 Tate bakandipa idzo ba nkulu pana bose, ngono akuna ungadzamula tjimwe mu maboko a Tate. 30 Imi na Tate ti banng'ompela.” 31 Bajuta bakanunga mabgwe kakale beti bankikithidze. 32 Koga Jesu kabadwa kati, “Ndakashinga mishingo minjinji mibuya inodwa kuna Tate muli yapo, ndiupi wayo wamunoshaka kundikikithidzila iwo?” 33 Bajuta bakanshandula beti, “Atitokukikithidzilila mishingo mibuya, koga tokukikithidzilila kutuka Ndzimu! Unozwithama Ndzimu koga uli nthu!” 34 Jesu kabashandula eti, “Kwakakwagwa mu nlayo wenyu kuyi Ndzimu wakati, ‘Mu midzimu.’ 35 Toziba kuti tjinolebgwa nge Hwalo dze Ndzimu malebeswa nge kusingapele, Ndzimu wakabadana midzimu, 36 ngono motini nge kwa iye wakayengemadziwa ndi Tate bakantuma mu shango kene? Ini munditendeka nge tjinyala muti ndotuka Ndzimu andati ndi Nkololo we Ndzimu? 37 Ha ndisingashinge mishingo ya Tate musigalemoyo mundili. 38 Koga ha ndishinga tjinodiwa ndi Tate, nenguba musingagalemoyo mundili, bukulu galanimoyo zwiyito zwangu, ndizo muzibe kuti Tate bamundili, nami ndimuna Tate.” 39 Bakagwisa kumbhata kakale, koga kapudzumuka mu maboko abo. 40 Kabgwilila seli kwe gwizi gwe Jorodani pakabe Johani e dubikila bathu kutanga, kaswika kagala ikoko. 41 Bathu banjinji bakazha kunli. Bakati, “Johani aazotongobe ethama zwilakidzo, koga tjimwe ne tjimwe tjaakaleba ngekwe nlume iwoyu tjakabe tjili malebeswa.” 42 Banji bakagalamoyo munli ipapo.

Johani 11

Lufu gwa Lazaro

1 Mu nzi unoyi Bhetani, kanyi kwa Mariya ne nkulu uwe, Mata kwakabe kuna nlume unoyi Lazaro egwala kwazo. 2 Mariya iwoyo ndiye wakazhodza She nge mafuta anonuhwa zwinozipa, kabukusha makumbo a She nge mavudzi awe, ndiye wakabe egwaligwa nge hazwadzi iye Lazaro. 3 Hazwadzi dza Lazaro dzakatumila dama kuna Jesu dziti, “She, nzwalani wenyu wamunoda kwazo unogwala.” 4 Jesu kati ehwa kuiyago, kati, “Igogu bugwele ate gunowombulaya, ikoku kwashingikala kuti ndizo Ndzimu ukudziwe, ndiko kunowoyita kuti Nkololo we Ndzimu akudziwe.” 5 Jesu nenguba akabe eda Mata ne nnung'una uwe ne hazwadzi yabo Lazaro, 6 wakati ehwa ngekwe bugwele gwa Lazaro kagala mazhuba mabili asathu kamilika kwaakabe aliko. 7 Shule kadwa badiyiwa babe kati, “Ngatibgwilileni ku Judiya.” 8 Badiyiwa babe bakan'dwa bakati, “N'diyi, ate ntolo Bajuta begwisa kumukikithidza nge mabgwe, ngono mutjashaka bgwilila kubali kene?” 9 Jesu kati, “Apa zhuba alina awara dzili gumi lina mbili dze masikati kene? Ndizo, kene ali ani unoyenda kuli masikati aatokuthiwa, ngobe unobona tjedza tje shango iyeyi. 10 Koga ha iyenda busiku unokuthiwa, ngobe aana tjedza.” 11 Wakati asinoleba matama iyawa kapapha kati, “Nzwalani wedu Lazaro wayizela, koga ndowoyenda ndonommusa.” 12 Badiyiwa bakanshandula beti, “She, ha ali lele unowomuka.” 13 Jesu wakabe elebeleka ngekwe lufu gwa Lazaro, koga ibo bakazwidwa beti unodwa hwope koga. 14 Ndizo Jesu kabatjenesela eti, “Lazaro wafa, 15 koga nge kwenyu ndoboka kuti abe atjinyika ndisipo, kuti ndizo mugalemoyo. Ngatiyendeni kunli.” 16 Tomasi unodang'wa Bili kati ku bamwe badiyiwa, “Ngatiyendenibo tinofa naye!”

Jesu ndiye kumuka ne kutjila

17 Jesu kati eswika, kawana Lazaro ana mazhuba manna akabiganyiwa. 18 Nzi we Bhetani wakabe uli thambo ipasi kwe khilomitha thatu kudwa mu Jerusalema. 19 Bajuta banjinji bakabe bazha kuwomila kuna Mata na Mariya ngekwe hazwadzi yabo. 20 Mata kati ehwa kuyi Jesu unozha, kabhuda kunonshanganidza, koga Mariya kasala mu ng'umba. 21 Mata kaswika kati kuna Jesu, “She, ha makabe muli pano, hazwadzi yangu inobe isakafa! 22 Koga ndoziba kuti nangwenu kose Ndzimu unowomupa tjimwe ne tjimwe tjamunokumbila.” 23 Jesu kan'dwa kati, “Hazwadzi iyo inowomuka.” 24 Mata kan'dabila eti, “Ndoziba kuti unowomuka mu kumusiwa kwe bathu mu nsi we bupelo.” 25 Jesu kati kunli, “Ndimi kumuka ne kutjila. Kene ali ani unogalamoyo mundili unowotjila nenguba afa, 26 kene ali ani unotjila ngono egalamoyo mundili aatowofa. Apa unogalamoyo muna ikoku kene?” 27 Mata kan'dabila eti, “She, ndogalamoyo kuti ndimwi Mesiya, Nkololo we Ndzimu, iye wakabe akalingiligwa kuzha mu shango.”

Jesu unolila

28 Mata wakati aleba matama iyawa, kabgwilila ku nzi kaswika kadanila nnung'una uwe Mariya ntome, kan'dwa kati, “N'diyi wazha, ngono unokudana.” 29 Mariya kati ehwa kuyiyago, kamilika tjinyolotjo kayenda kunli. 30 Jesu wakabe asathu kaswika mu nzi, koga wakabe atji ikweno kwaakashanganidzigwako ndi Mata. 31 Bathu bakabe bana Mariya mu ng'umba bennyaladza, bakati bebona emilika elibilidza bakantobela bekumbula kuti unoyenda kunolilila ku ikumbu tja Lazaro. 32 Mariya kati eswika pana Jesu kawila pa makumbo awe kati, “She, ha makabe muli pano, hazwadzi yangu inobe isakafa!” 33 Jesu kati ebona Mariya elila ne bathu bakabe banaye belilabo, kahwa zogwadza mu moyo ngono kadziyidzika kwazo. 34 Kababhuzwa kati, “Makambiganya ngayi?” Bakan'dwa bakati, “She Izhani mubone!” 35 Jesu kalila. 36 Ipapo bathu bakati, “Bonani kuti wakabe en'da kungapani!” 37 Ngono bamwe babo bakati, “Apa iye wakapofunula bhofu, unobe asakathama kuti nlume iwoyu asife kene?”

Kumusiwa kwa Lazaro

38 Jesu mu kuhwa zogwadza kukulu kayenda ku ikumbu tjakabe tjili guwu lakazhaligwa nge shongwe. 39 Kabadwa kati, “Dusani shongwe iyeyi.” Mata, hazwadzi ye nfi, kan'dabila eti, “Kowobe konuhwa zwakabipa She. Una mazhuba manna akabiganyiwa!” 40 Jesu kambhuzwa kati, “Apa andizokudwa ati unowobona gudzo le Ndzimu ha ugalamoyo kene?” 41 Bakadusa shongwe. Jesu kalinga pezhugwi kati, “Tate, ndomuboka ngoti mandihwa. 42 Ndoziba kuti mondihwa misi yose, koga ndoleba ikoku ngekwe bathu ibaba bapano, kuti ndizo bagalemoyo kuti ndimwi makandituma.” 43 Kati aleba ikoku, kamilidza hwi kadana eti, “Lazaro, bhuda!” 44 Lazaro kabhuda, maboko ne makumbo awe, akapombiwa nge jila nenge buso gugwe gwakakwididziwa nge jila. Jesu kabadwa kati, “Mumpombonole matyila munletje ayende.”

Bajuta banolangana ngekwa Jesu

45 Koga ipapo bunji gwe Bajuta bakabe bawomila kuna Mariya bakabona tjakathamiwa ndi Jesu ngono bakagalamoyo munli. 46 Koga bamwe babo bakayenda ku Bafarasi bakanobabudza tjathamiwa ndi Jesu. 47 Ndizo Bafarasi ne Bapirisiti bakulu bakadana nshangano we Makulukota e Bajuta, bakati, “Towothamani? Bonani zwilakidzo zwinjinji zwinothamiwa nge nlume iwoyu. 48 Ha angaletjiwa kadwilila sa ikoku, bathu bose banowogalamoyo munli, ngono batungamili be Baroma bangatinginilila bakakolomola Ng'umba ye Ndzimu bakalobesa nenge itjaba tjedu.” 49 Mmwe wabo wakabe edang'wa Kaifasi, wakabe ali iye Ntungamili we Bapirisiti mu gole ilelo kabadwa kati, “Amutozibisisa tjinoshingikala. 50 Apa amutoziba kuti koyita kumuli kuti nthu ali nng'ompela afile itjaba pana kuti kulobe itjaba tjose kene?” 51 Wakabe asingazwiyite, ngobe akabe ali iye Ntungamili we Bapirisiti mu gole ilelo wakabe elebesambeli kuti Jesu unowofila itjaba tje Bajuta, 52 kusi itjaba itjetjo koga, koga ne kukubunganya bana be Ndzimu bakapalala kuti babe bang'ompela. 53 Ndizo kudwa tjose mu zhuba ilelo bakalangana kuti Jesu ungabulawa tjini. 54 Kudwa ipapo Jesu wakabe woyenda asi patjena pakati kwe Bajuta, kabhuda kayenda ku bugalo gupejo ne tjilambanyika, ku nzi wakabe udang'wa kuyi Efuraimu, kagalako ne badiyiwa babe. 55 Nzano we Kupinda pezhugwi wakabe wabe pejo, ngono bathu banjinji bakayenda ku Jerusalema bedwa kuzhe kwe nzi nkulu kunozwitjenesa, nzano usathu ukaswika. 56 Bathu ibabo bakabe beshaka Jesu, ngono bakati bekubungana mu Ng'umba ye Ndzimu, bakabhuzwana beti, “Moalakana tjini? Unowozha ku nzano kene tjini?” 57 Ngono Bapirisiti bakulu ne Bafarasi bakabalaya kuti, ha kuna unoziba kwaayako alebe, kuti ndizo banombhata.

Johani 12

Mariya unozhodza Jesu mafuta

1 Kwakati Nzano we Kupinda pezhugwi wasaligwa nge mazhuba matathatu, Jesu kamilika kayenda ku nzi we Bhetani kanyi kwa Lazaro waakamusa mu lufu. 2 Wakaswika kathamigwa zojiwa kazwipakuligwa ndi Mata. Lazaro wakabe ali mmwe we bathu bakabe bali gele beja na Jesu. 3 Mariya katola itenyana tje mafuta akathamwa nge nti unodang'wa kuyi nadi e ntengo upezhugwi kwazo, kaadila mu makumbo a Jesu kambukusha nge mavudzi awe. Ng'umba yose ikanuhwa nnuhwo we mafuta iyawo. 4 Mmwe we badiyiwa ba Jesu, unoyi Judasi Isikariyoti wakawobe iye unowo wonga Jesu kati, 5 “Ini mafuta iyawa asatengesiwa mazana matatu (300) e mari e siliva kuti kupiwe bashayi.” 6 Wakabe asina hanya ne bashayi, ikoku wakabe e kulebesiwa nge bubava, ngobe akabe ali iye ntjengeti we hwomo ye mari, akawolobela kuzwitopolela muili. 7 Jesu kabadwa kati, “Munletje ashinge tjaangatubula kubinganyidzila zhuba le kubiganyiwa kwangu. 8 Bashayi munabo misi yose. Koga imi amutowobe nami misi yose.” 9 Bathu banjinji bakahwa kuti Jesu uyapo mu nzi we Bhetani, ngono bakayendako beyendila kunobona Lazaro wakabe amusiwa mu lufu ndi Jesu. 10 Bapirisiti bakulu bakalangana kubulaya Jesu kose na Lazaro, 11 ngobe Bajuta banjinji bakabe bahwa ngekwa Lazaro ngono bakagalamoyo nge kukwe muna Jesu.

Jesu unoshanganidziwa ku Jerusalema nge kushatha

12 Mu zhuba linotobela ilelo mbunga nkulu we bathu bakabe bazha ku Nzano we Kupinda pezhugwi ukahwa kuti Jesu waswika ku Jerusalema. 13 Bakatola thabi dze nlala bakayenda kunonshanganidza, bemimila beti, “Hosana! Wakakombolegwa iye unozha nge zina la She! She nkulu we Iziraela!” 14 Jesu kawana donkana katjitatha, sekwa kwakakwagwa kuyi, 15 “Usitje, iwe nkololokadzi we Ziyoni! Woyu She nkulu uwo waswika akatatha donkana.” 16 Kutanga badiyiwa babe bakabe basingahwisise zwithu izwezwi, koga kwakati Jesu akudziwa, bakakumbula zwakakwagwa nge kukwe nenge kuti bakanthamila zwithu izwezwi. 17 Bathu bakabe bana Jesu edana Lazaro kuti abhude mu ikumbu emmusa mu bafi, bakaandamisa tjakashingikala. 18 Ndizo mbunga we bathu wakanshanganidza, ngobe bakabe bahwa ngekwe tjilakidzo itjetji. 19 Ngono Bafarasi bakalebesana bakati, “Apa mobona kuti akuna tjamungatubula kene? Bonani, shango yose yantobela!” Bamwe Bagiriki banoshaka kubona Jesu 20 Muna ibabo bakabe beyenda ku Jerusalema kunonamata Ndzimu mu tjibaka tje nzano kwakabe kuna bamwe Bagiriki. 21 Bakayenda kuna Filipo wakabe edwa ku Bhetisaida mu Galili bakati kunli, “Toshaka kubona Jesu.” 22 Filipo kayenda kanobudza Enduru, ngono Enduru na Filipo bakanobudza Jesu. 23 Jesu kabashandula eti, “Tjibaka tjatjiswika tje kuti Nkololo we nthu alumbidziwe. 24 Ndolebesa tjose ndoti kumuli, shanga ye thunde, ha isawila mu mavu ikafa, inogala ili ing'ompela koga; koga ha ifa, inozwala zwizwalo zwinjinji. 25 Iye unoda butjilo gugwe mu shango ino gowonlashikila, koga iye usingade butjilo gugwe mu shango ino, unowotjila nge kusingapele. 26 Iye unoshaka kundishingila ngaanditobele, kuti nlanda wangu abe nami kwandiyako. Ngono Ndzimu, Tate banowokudza mmwe ne mmwe unondishingila.”

Jesu unoleba ngekwe lufu gugwe

27 Jesu kati, “Meya yangu inodziyidzika, apa ndowotini? Nditi, ‘Tate, mundiangulile mu tjibaka itjetji?’ Aa, ndakazhila kuti ndiswike mu tjibaka itjetji tje kudziyila. 28 Tate, kudzani zina lenyu!” Ipapo kukahwika hwi lidwa kudzimu liti, “Ndalikudza, ngono ndowolikudza kakale.” 29 Mbunga wakabe uli mile ipapo ukahwa hwi ileli, ngono bamwe bakati ladadamula se vula, koga bamwe bakati, “Ntumwa we kudzimu walebeleka naye!” 30 Jesu kati kubali, “Ileli hwi lazhila imwi alizozhila imi. 31 Ngwenu tjabe tjibaka tje kuti shango ino isumikilisiwe. Mbusi we shango ino unowotenyengugwa. 32 Koga imi, ndowoti ndamilidzigwa pezhugwi ndidwa mu shango ino, ndowowebela bathu bose kundili.” 33 Wakaleba matama iyawa kuli kulakidza ngekwe lufu gwaanowofa. 34 Mbunga ukan'dabila uti, “Nlayo wedu unotibudza kuti Mesiya unowotjilila tjose. Ungati Nkololo we nthu wakafanila milidzigwa pezhugwi tjini? Nkololo we nthu iwoyo ndiyani?” 35 Jesu kabashandula eti, “Tjedza tjowobe mumuli kwe tjibaka tjifupi. Yendani kutjabona, kuti musimiligwe nge zhuba, ngobe iye unoyenda mu zhalima aatobona kwaanoyenda. 36 Galanimoyo mu tjedza mutjinatjo, kuti mube bathu be tjedza.” Jesu wakati apedza kuleba matama iyawa kayenda kanobgwata.

Kusagalamoyo kwe bathu

37 Nenguba akathama zwilakidzo bakanlinga, abazogalamoyo munli, 38 kuti ndizo matama e nlebesambeli Isaya asiwile pasi, Isaya wakabe ati, “She, ndiani wagalamoyo matama edu kene? Ndiani wakazumbunuligwa simba la She?” 39 Ndizo abazotubula kugalamoyo, ngobe Isaya wakabe aleba kakale eti, 40 “Ndzimu wakapofupadza mesho abo, ukakukutadza mimoyo yabo, kuti ndizo basibone nge mesho abo, kakale basihwisise nge mikumbulo yabo, kuti ndizo basishanduke kuti ndibapodze.” 41 Isaya wakaleba matama iyawa, ngobe wakabe ebona kudziwa kwa Jesu, ngono kalebeleka nge kukwe. 42 Nenguba kwakajalo batungamili banji be Bajuta naibobo bakagalamoyo munli, koga bakasidusile mazwiwo abo patjena, ngobe Bafarasi bangabatata mu ng'umba ye mitembezelo, 43 ngobe bakabe beda kukudziwa nge bathu pana kuti bakudziwe nge Ndzimu.

Kusumikilisiwa nge matama a Jesu

44 Jesu kalebelekela pezhugwi eti, “Iye unogalamoyo mundili aatogalamoyo mundili koga, koga unogalamoyo ne muna iye wakandituma. 45 Iye unobona imi unobona na iye wakandituma. 46 Ndakazha mu shango kuwobe tjedza tje shango kuti mmwe ne mmwe unogalamoyo mundili asitjagale mu zhalima. 47 Iye unohwa matama angu koga kasialondolodze, anditowonsumikilisa. Ngobe andizozha kusumikilisa shango, koga ndakazhila kuwoitjidza. 48 Iye unondilamba, asingadume tjandinoleba una Nsumikilisi. Matama andaleba ndiwo anowobe nsumikilisi uwe mu zhuba le bupelo. 49 Oku malebeswa, ngobe andizozwilebegwa, koga Tate bakandituma ndibo bakandilaya kuti ndilebeni nditjileba tjini. 50 Ndoziba kuti nlayo wabo unozhisa butjilo gusingapele. Ndizo tjandinoleba, ndoleba koga sekwa Tate bakandibudza.”

Johani 13

Jesu unongudza makumbo e badiyiwa babe

1 Kwakabe kuwomuka kuli Nzano we Kupinda pezhugwi. Jesu wakabe eziba kuti tjabe tjibaka tje kuti asiye shango ino ayende kuna Tate. Wakabe eda bose bakabe bali babe mu shango ino, kabada kunoti ne ku bupelo. 2 Jesu ne badiyiwa babe bakati bali pa tjilayilo, Nvanganyi kabe alonga kale meya muna Judasi Isikariyoti nkololo wa Simoni dzekuti awonge Jesu. 3 Jesu se akabe eziba kuti Tate bakalonga zwithu zose mu maboko awe nenge kuti wakadwa ku Ndzimu kakale unowobgwilila ku Ndzimu, 4 kamilika pa zojiwa, kaambula hazu iye, katola tauli kazwipomba nditjo mu thunji. 5 Shule, kadila vula mu ndilo katangisa kungudza badiyiwa babe makumbo ebabukusha nge tauli tjaakabe akazwipombedza nditjo. 6 Kati ezha pana Simoni Pita, Pita kati kunli, “She apa mondingudza makumbo kene?” 7 Jesu kan'dabila eti, “Autoziba tjandinothama, koga unowohwisisa shule.” 8 Pita kati, “Aa, amungandingudze makumbo kene kukabe kwakatini.” Jesu kan'dwa kati, “Ha ndisakungudza auna gobe nami.” 9 Ngono Simoni Pita kanshandula eti, “She, musindingudze makumbo woga, mundingudze kose maboko ne nsholo!” 10 Jesu kanshandula kati, “Nthu wangula mbili akutosheteka kuti angudziwe kakale kuzhe kwe makumbo awe koga, ngobe mbili uwe mbuyanana. Imwi mu babuyanana koga kusi mmwe ne mmwe wenyu.” 11 Wakabe eleba eijalo, ngobe eziba unowon'wonga, ndizo kati, “Ha muzotjenepala mose.” 12 Wakati apedza kubangudza makumbo, kaambala hazu iye kabgwilila ku bugalo gugwe. Kababhuzwa kati, “Apa moziba tjandakamuyitila kene? 13 Mondidana ‘N'diyi’ mukandidana ‘She’ mulebesa, ngobe nditjo tjandili itjo. 14 Ngwenu ha imi, She wenyu kakale ndili N'diyi wenyu ndamungudza makumbo, namwibo makafanila kungudzana makumbo. 15 Ndamulakidza, kuti ndizo namwibo muyite sekwa ndamuyitila. 16 Ndolebesa tjose ndoti kumuli, nlanda ate ali nkulu pana tetshi uwe ne ntumwa ate ali nkulu pana wakantuma. 17 Ha muziba zwithu izwezwi kakale muzwishinga, makakombolegwa. 18 “Anditodwa imwi mose, ngobe ndoziba bandakashalula. Kwakafanila kuti matama e Hwalo dze Ndzimu asiwile pasi, anoti, ‘Iye wandinoja naye wandishandukila.’ 19 Ndomubudza ngwenu, kusathu kukashingikala, kuti ha kushingikala, mugalemoyo kuti ‘Ndi iye wandili iye.’ 20 Ndolebesa tjose ndoti kumuli, iye unoamutjila wandatuma, unoamutjila imi, na iye unondiamutjila unoamutjila wakandituma.”

Jesu unoleba kuti unowowongiwa

21 Kukati Jesu aleba ikoku, kadziyidzika mu meya, ndizo kati, “Ndolebesa tjose ndoti kumuli, mmwe wenyu unowondiwonga.” 22 Badiyiwa babe bakalingana basingazibe kuti unodwa upi mubali. 23 Mmwe wabo, iye wakabe ediwa ndi Jesu, wakabe ali gele pejo naye. 24 Simoni Pita kang'wanga kan'dwa kati, “Bhuzwa Jesu kuti unodwa ani.” 25 Kabhuzwa Jesu akanayila pa ifuba tjitje kati, “She, ndiani?” 26 Jesu kanshandula eti, “Ndi iwoyu wandinowopa bhemu le tjiwunga ndaliseba mu sopo.” Ndizo wakati aseba bhemu le tjiwunga kalipa Judasi nkololo wa Simoni Isikariyoti. 27 Kukati Judasi atola bhemu le tjiwunga, Satani kangina munli. Jesu kati kunli, “Thama ulibilidza tjaunoshaka thama.” 28 Bose bakabe bali ipapo bakasihwisise kuti ini Jesu edwa Judasi eijalo. 29 Ngobe Judasi wakabe akabhata hwomo ye mari, bamwe bakaalakana, kuti Jesu unon'dwa eti, “Katenge zwatinowosheta ku nzano,” kene kuti ape bashayi tjimwe.

Jesu unopa nlayo ntshwa

30 Ndizo Judasi kati aamutjila bhemu le tjiwunga, kabhuda tjinyolotjo; ngono kwakabe kuli busiku. 31 Kati abhuda, Jesu kati, “Ngwenu Nkololo we Nthu wakudziwa ne Ndzimu wakudziwa ngekwe Nkololo uwe. 32 Ndzimu ha wakudziwa nge kukwe, Ndzimu unowonkudza muuli ngono unowonkudza tjinyolotjo. 33 Bana bangu, anditowobe namwi tjibaka tjilefu. Mowondishaka, koga sekwa ndakabudza Bajuta ndomubudzabo ngwenu nditi, ‘Kwandinoyenda, amungayendeko.’ 34 Ndomupa nlayo ntshwa nditi, ‘Mudane. Koga sekwa ndakamuda, namwibo mudane.’ 35 Bathu bose banowoziba kuti mu badiyiwa bangu ha mudana.”

Jesu unoleba kuti Pita unowonzwilandula

36 Simoni Pita kambhuzwa kati, “She, moyenda ngayi?” Jesu kan'dabila eti, “Kwandinoyenda aunganditobele ngwenu; koga shule kwe tjibaka unowonditobela.” 37 Pita kambhuzwa kakale kati, “She, ini ndisingake amotobela ngwenu? Ndakazwimisila kumufila.” 38 Ipapo Jesu, kanshandula eti, “Apa unowondifila dumbu kene? Gukurume lowoti lisathu likalila, unowobe wandizwilandula katatu!”

Johani 14

Zila inoyenda kuna Tate

1 Jesu kati kubali, “Mimoyo yenyu ngaisidziyidzike. Galanimoyo mu Ndzimu, mugalemoyo ne mundili. 2 Mu nzi wa Tate kuna ng'umba njinji. Ha kwabe kusakajalo, apa ndobe ndakamudwa ati, ndonomululwamisila bugalo kene! 3 Ngono ha ndayenda kunomululwamisila bugalo, ndowobuya ndiwomutola kuti ndizo mube nami kwandiyako. 4 Moziba zila ye kwandinoyenda.” 5 Tomasi kati kunli, “She, atitoziba kwamunoyenda. Tingaziba zila ye kwamunoyenda tjini?” 6 Jesu kabashandula eti, “Ndimi zila ne malebeswa ne butjilo. Akuna unozha kuna Tate asapinda nami. 7 Ha mabe mundiziba mobe makaziba kose na Tate. Kudwa ngwenu mobaziba kakale mababona.” 8 Filipo kati, “She, mutilakidze Tate ngono ikoko kowobe kwakatilizana.” 9 Jesu kanshandula eti, “Autondiziba kene Filipo, ndakabe namwi tjibaka tjilefu kungapa? Iye wandibona wabona Tate. Ini uti, ‘Mutilakidze Tate?’ 10 Apa autogalamoyo kuti ndi muna Tate na Tate bamundili kene? Matama andinomubudza anditoazwilebegwa. Tate banogala mundili ndibo banoshinga nshingo wabo. 11 Galanimoyo muna tjandinoleba anditi ndi muna Tate na Tate bamundili; koga ha mukong'wa, ngono galanimoyo ngekwa iyo mishingo. 12 Ndolebesa tjose ndoti kumuli, iye unogalamoyo mundili unowothamabo mishingo yandinothama, dumbu ndingati unowothama mishingo mikulu pana iyeyi, ngobe ndoyenda kuna Tate. 13 Kose kwamunokumbila nge zina langu ndowokuthama, kuti ndizo gudzo la Tate libong'we mu Nkololo. 14 Ha mukumbila tjimwe ne tjimwe nge zina langu, ndowotjithama.

Kugadziwabgwe kwe Meya yakayengemala

15 “Ha mundida mowolondolodza milayo yangu. 16 Ndowokumbila tate, ngono banowomupa mmwe Mbhatshi unowobe namwi nge kusingapele, 17 iyo Meya inolakidza malebeswa e Ndzimu. Shango aitowoiamutjila se mbhatshi wayo, ngobe aitoibona kakale aitowoiziba. Koga imwi moiziba, ngobe inogala namwi kakale imumuli. 18 “Anditowomusiya muli siyang'wa; ndowobuya kumuli. 19 Shule kwe tjibaka tjifupi, bathu be shango ino abatjowondibona, koga imwi mowondibona. Nge kuti ndotjila, mowotjilabo. 20 Mu zhuba ilelo mowobona kuti imi ndi muna Tate, ngono imwi mu mundili nami ndi mumuli. 21 “Iye unoziba kakale elondolodza milayo yangu, ndiye unondida. Unondida unowodiwa ndi Tate, namibo ndowon'da kakale ndowonzwilakidza.” 22 Ipapo Judasi, kusi Judasi Isikariyoti kati, “She, ini mushaka zwilakidza kutili musingazwilakidze ku bathu bose be shango?” 23 Jesu kan'dabila eti, “Iye unondida unowolondolodza zwidiyo zwangu. Tate banowon'da, ndizo towozha kunli tikagala naye. 24 Iye usingandide aatowolondolodza zwidiyo zwangu. Zwidiyo izwezwi zwamunohwa ate zwangu, nge zwa Tate, ibo bakandituma. 25 “Kose ikoku ndakakuleba nditji namwi. 26 Koga Mbhatshi, Meya yakayengemala, unowotumwa ndi Tate nge zina langu, unowomudiya zwithu zose, kamukumbuludza tjimwe ne tjimwe tjandakamubudza. 27 “Ndomusiyila kunyalala, ndomupa kunyalala kwangu. Anditomupa iko sekwa kunopa shango. Mimoyo yenyu ngaisidziyidzike kakale musitje. 28 Makahwa nditi, ‘Ndoyenda ngono ndowobuya kumuli.’ Ha mabe mundida mobe mashatha, ngobe ndoyenda kuna Tate. Ngobe ibo bakulu pandili. 29 Ndamubudza ngwenu kusina tjathu tjikashingikala, kuti ndizo ha kushingikala mugalemoyo. 30 Anditjowolebeleka namwi tjibaka tjilefu, ngobe mbusi we shango ino unozha. Aana simba mundili, 31 koga shango yakafanila ziba kuti ndoda Tate kakale, ndizo ndothama tjandalayiwa ndibo. “Buyani tiyende.”

Johani 15

Jesu ndiye nzhambi wakwako

1 “Imi ndi nzhambi wakwako, Tate ndibo ntjengeti wawo. 2 Banothubula lutabi gumwe ne gumwe gumundili gusingazwale, koga lutabi gumwe ne gumwe gunozwala mitjelo banogusunulila kuti guzwale mitjelo minjinji. 3 Imwi makayitiwa babuyanana kale nge dama landakamudiya. 4 Galani mundili, namibo ndowogala mumuli. Akuna lutabi gungazwala mitjelo gusi muna mayi, gwakafanila be mu nzhambi. Namwibo amungazwale mitjelo kuzhe kwe mugala mundili. 5 “Ndimi nzhambi ngono imwi mu thabi. Iye unogala mundili namibo ndigala munli, unowoyita mitjelo minjinji, ngobe kuzhe kwangu akuna tjamungashinga. 6 Iye usingagale mundili, unowolashiwa se lutabi gwathubugwa, gukaswaba gukawoma. Thabi dzakajalo dzokubunganyiwa dzikaposegwa mu moto dzikatshwa. 7 Ha mugala mundili ne matama angu egala mumuli, kumbilani tjamushaka ngono mowotjithamigwa. 8 Tate banokudziwa ndi ikoku, kuti muyite mitjelo minjinji muli badiyiwa bangu. 9 Ndomuda koga sekwa ndinodiwa ndi Tate. Galani mu ludo gwangu. 10 Ha mulondolodza milayo yangu, mowogala mu ludo gwangu koga sekwa ndakalondolodza milayo ya Tate ndikagala mu ludo gwabo. 11 “Ndomubudza ikoku kuti ndizo shatho yangu ibe mumuli kuyita kuti mushathe nge buzhalo. 12 Nlayo wangu hwuti, mudane sekwa ndakamuda. 13 Akuna nthu una ludo lukulu pana igogu, gwe kuti nthu nng'ompela afile bazwalani babe. 14 Mu bazwalani bangu ha muthama tjandinoti muthame. 15 Anditjamudana balanda, ngobe nlanda aatoziba tjinoshingwa ndi tetshi uwe. Ndomudana bazwalani, ngobe ndakamuzibisa kose kwandakahwa ndi Tate. 16 Amuzondishalula, koga ndimi ndakamushalula amupa nshingo kuti muyende munozwala mitjelo inowogalila tjose. Tate banowomupa kose kwamunokumbila nge zina langu. 17 Nlayo wangu ndihwoyu, mudane.

Lubengo gwe shango

18 “Ha shango imubenga, zibani kuti yakabenga imi kutanga. 19 Ha mabe muli be shango, shango yabe yomuda se bayo. Se musi be shango ino, koga ndakamushalula amudusa mu shango, shango inomubenga. 20 Alakanani matama andakamubudza nditi, ‘Akuna nlanda nkulu pana tetshi uwe.’ Ha bakandidziyidza banowomudziyidzabo. Ha bakalondolodza zwidiyo zwangu, banowolondolodzabo zwidiyo zwenyu. 21 Banowomubhata nge zila iyeyi ngobe mu batobeli bangu, ngobe abatoziba iye wakandituma. 22 Ha ndabe ndisakazha ndikalebeleka nabo, banobe basina jinyo; koga ngwenu abana tjabangadzeta nditjo mu jinyo labo. 23 Iye unondibenga unobenga Tatebo. 24 Ha ndabe ndisakathama mishingo isina wakatongo ithama pakati kwabo, banobe basina jinyo; koga bakabona ngono bakabenga tose imi na Tate. 25 Ikoku kwakashingikala kuti kuwililane ne dama lakakwagwa mu nlayo wabo, linoti, ‘Bakandibengela suli.’ 26 “Mbhatshi unowoti ezha, iye wandinowotuma kumuli edwa kuna Tate, Meya inolakidza malebeswa e Ndzimu, inodwa kuna Tate inowotendeka nge kwangu. 27 Namwibo mu batendeki, ngobe makagala nami kudwa mu kutangisa.

Johani 16

1 “Ndamubudza kose ikoku kuti musilashike. 2 Banowomutata mu ng'umba dze mitembezelo. Nge malebeswa tjibaka tjozha tje kuti mmwe ne mmwe unomubulaya unowokumbula kuti nge kuthama eijalo, ndiko ha eshingila Ndzimu. 3 Banowothama mishingo yakajalo, ngobe abazoziba Tate kene imi. 4 Ndamubudza ikoko kuti ndizo tjibaka tjiti tjizha muzibe kuti ndakamubudza kutjikale.

Nshingo we Meya yakayengemala

“Andizomubudza ikoku mu kutangisa, ngobe ndakabe ndi namwi. 5 Ngwenu ndoyenda kuna iye wakandituma, ngono akuna iye wenyu unondibhuzwa eti, ‘Moyenda ngayi?’ 6 Ngekuti ndamubudza zwithu izwezwi mazhala buyendasi. 7 Koga ndolebesa tjose nditi kumuli, kuyenda kwangu kowobe ne mbuzilo mumuli. Ha ndisayenda, Mbhatshi atowozha kumuli, koga ha ndiyenda, ndowontumila kumuli. 8 Ha ezha, unowolakidza shango kuti yagala ihwila ntome ngekwe tjibi ne ndulamo nenge kusumikilisa; 9 ngekwe tjibi, ngekuti bathu abatogalamoyo mundili, 10 ne ngekwe ndulamo, ngekuti ndoyenda kuna Tate, ngono amutjawondibona, 11 ngekwe kusumikilisa, ngekuti mbusi we shango ino wakasumikilisiwa kale. 12 “Nditjina zwithu zwinjinji zwanditjawomubudza, koga amungatubule kuzwihwilila. 13 Kowoti Meya ye lebeswa izha, inowomutungamila mu malebeswa wose. Aitowozwilebelekegwa, koga inowomubudza tjainobe ihwa kakale inowomubudza nenge zwitjawozha. 14 Inowondikudza, ngobe inowotola tjandinoipa ikamuzibisa itjo. 15 Kose kwa Tate nge kwangu, ndizo nditi Meya inowotola tjandinoipa ikamuzibisa itjo.

Gwadziwa kowobe shatho

16 “Mu tjibaka tjifupi amutowondibona kakale. Ngono shule kwe tjibaka tjifupi mowondibona kakale.” 17 Bamwe be badiyiwa babe bakabhuzwana beti, “Unodwani ha eti, ‘Mu tjibaka tjifupi amutowondibona, koga shule kwe tjibaka tjifupi mowondibona kakale,’ ne kuti, ‘Ndoyenda kuna Tate?’ ” 18 Bakadwilila bakati, “Apa unodwani ha eti, ‘Tjibaka tjifupi?’ Atitohwisisa tjaanoleba.” 19 Jesu kabona kuti banoshaka ku mbhuzwa ngekwa ikoku ngono kati kubali, “Apa mobhuzwana kene kuti ndabe ndidwani ha nditi, ‘Shule kwe tjibaka tjifupi amutowondibona, koga mu tjibaka tjifupi mowondibona kakale kene?’ 20 Ndolebesa tjose ndoti kumuli, mowolila mukamimila koga shango iyo inowobe yakashatha. Mowobe mu buyendasi, koga buyendasi gwenyu gowoshanduka gukabe kushatha. 21 Nkadzi ha etshibama unobe mu zwibhayo, ngobe tjibaka tjitje tjazha, koga ha mwana uwe atjizwagwa unokangang'wa gwadziwa kukwe, ngobe mwana wazwagwa mu shango. 22 Namwibo ngwenu mogwadziwa, koga ndowomubona kakale, ngono mowoshatha mu mimoyo yenyu. Kushatha kwamusingake mukakutolegwa nge nthu. 23 “Mu zhuba ilelo amutowondikumbila tjimwe. Ndolebesa tjose ndoti kumuli, Tate banowomupa tjimwe ne tjimwe tjamunokumbila nge zina langu. 24 Kuswikila ngwenu amuna tjamakakumbila nge zina langu, kumbilani ngono mowopiwa, kuti ndizo mushathe nge buzhalo.

Kukunda shango

25 “Nenguba ndabe ndilebeleka ndipesa, tjibaka tjowozha tjandinowolebeleka ngekwa Tate ndisingapese. 26 Mu zhuba ilelo mowokumbila kubali nge zina langu. Anditoti ndowomukumbilila kuna Tate. 27 Tate banomuda, ngobe makandida mukagalamoyo kuti ndakadwa ku Ndzimu. 28 Ndakadwa kuna Tate, azha mu shango, ngono ndosiya shango, kakale ndobgwilila kuna Tate.” 29 Ipapo badiyiwa ba Jesu bakati, “Ngwenu molebeleka mutjenesa, amutjapesa. 30 Ngwenu tobona kuti moziba zwithu zose kakale akutjasheteka kuti kube kutjina unomubhuzwa. Oku kotithama kuti tigalemoyo kuti makadwa ku Ndzimu.” 31 Jesu kati, “Apa ngwenu mogalamoyo kene? 32 Tjibaka tjozha, nge malebeswa tjibaka tjazha tjamunowopalalana mmwe ne mmwe kayenda kanyi kukwe. Mowondisiya ndili ndoga. Koga ndowobe ndisi ndoga, ngobe Tate banami. 33 Ndamubudza zwithu izwezwi kuti ndizo muwane kunyalala mundili. Ngono mu shango ino mowogwadzisiwa. Koga simanimoyo. Ndakakunda shango!”

Johani 17

Jesu unozwitembezelela

1 Jesu kati aleba ikoku, kalinga pezhugwi ngono katembezela eti, “Tate, tjibaka tjazha. Kudzani Nkololo wenyu, kuti Nkololo na iye amukudze, 2 ngobe makampa simba pezhugwi kwe bathu bose kuti ndizo ape butjilo gusingapele kuna ibabo bose bamakampa. 3 Ogu ndigo butjilo gusingapele, kuti bazibe kuti ndimwi moga Ndzimu we malebeswa, bazibe na Jesu Kirisiti iye wamakatuma. 4 Ndakamukudza mu shango nge kuwidza nshingo wamakandipa. 5 Ngono ngwenu Tate, mundikudzeni kwamuyako nge kudziwa kwandakabe ndinako nditji namwi shango isathu ikabumbiwa.

Jesu unotembezelela Badiyiwa babe

6 “Ndakazibisa zina lenyu kuna ibabo bamakandipa mu shango ino. Bakabe bali benyu, makandipa ibo. Bakalondolodza dama lenyu. 7 Ngwenu banoziba kuti kose kwamakandipa kodwa kumuli; 8 ngobe ndakabapa matama amakandipa, ngono bakaamutjila. Bakaziba tjose, kuti ndakadwa kumuli, kakale banogalamoyo kuti makandituma. 9 “Ndobatembezelela; anditotembezelela shango, ndotembezelela ibabo bamakandipa, ngobe nge benyu. 10 Bose bandinabo nge benyu, na ibo bose bamunabo nge bangu, ngono ndakakudziwa nge kwabo. 11 Anditjowogala mu shango ino, koga ibo batjasala muili, imi ndozha kumuli Tate bakayengemala, mubavikile nge zina lenyu, ilo zina lamakandipa, kuti ndizo babe bang'ompela saswi tili bang'ompela. 12 Ndakati nditji nabo, ababakilila nge zina ileli lamakandipa. Ndakabatjengeta ngono, akuna wakalashika kuzhe kwa iye wakabe akalingisanyiwa ne kuti alobe, kuti ndizo matama e hwalo dze Ndzimu asiwile pasi. 13 Ngono ngwenu ndozha kumuli, koga ndoleba zwithu izwezwi nditjimu shango kuti ndizo babe ne kushatha kwangu mubali nge buzhalo. 14 Ndakabapa dama lenyu ngono shango ino ikababenga, ngobe ate bali be shango ino, sami ndisi we shango ino. 15 Anditokumbila kuti mubaduse mu shango, koga ndokumbila kuti mubavikile muna Mbi. 16 Ate bali be shango ino sami ndisi we shango ino. 17 Mubayengemadze mu malebeswa, dama lenyu li malebeswa. 18 Sekwa makandituma mu shango, nami ndakabatumabo mu shango. 19 Ndozwiyengemadza nge kwabo kuti ndizo na ibobo bayengemadziwe mu malebeswa. 20 “Anditotembezelela ibaba koga, ndotembezelelabo na ibabo banowogalamoyo mundili nge dama labo. 21 Ndotembezela kuti bose babe bang'ompela. Samwi Tate, muli mundili, nami ndili mumuli, dzene na ibobo bangabe mutili, kuti ndizo shango igalemoyo kuti makandituma. 22 Ndakabapa gudzo ilo lamakandipa, kuti ndizo babe bang'ompela, saswi tili bang'ompela, 23 imi ndili mubali namwi muli mundili, kuti ndizo babe bang'ompela nge buzhalo ne shango izibe kuti makandituma, ngono mobada koga sekwa munondida. 24 “Tate! Makandipa ibo, ngono ndoshaka kuti babe nami kwandiyako, kuti babone gudzo langu, ilo gudzo lamakandipa, ngobe makandida shango ino isathu ikabumbiwa. 25 Tate bakalulwama, nenguba shango isingamuzibe, koga imi ndomuziba, na ibaba banoziba kuti makandituma. 26 Ndakabazibisa zina lenyu, ngono ndowodwilila ndithama kuti lizibgwe, kuti ndizo ludo gwamunondida ndigo gube mubali ne nge kuti nami ndibe mubali.”

Johani 18

Kusungwa kwa Jesu

1 Jesu kati apedza tembezela, kayenda ne badiyiwa babe kanotjuluka nkuku we Kidironi. Kwakabe kuna nnda seli kwawo, Jesu ne badiyiwa babe bakangina mu nnda iwoyu. 2 Ngono Judasi, iye wakawonga Jesu, wakabe euziba, ngobe Jesu wakabe egala eshangana ne badiyiwa babe kuuli. 3 Ndizo Judasi kayenda ku nnda iwoyo akatungamila babhayani ne balindi be Ng'umba ye Ndzimu banodwa ku Bapirisiti bakulu ne Bafarasi bakasenga mathumo ne mavone. 4 Jesu se akabe eziba tjimwe ne tjimwe tjakabe tjowonshingikalila, kapindila mbeli kwe badiyiwa babe ngono kabhuzwa babhayani kati, “Ndiani wamunoshaka?” 5 Bakan'dabila beti, “Toshaka Jesu we Nazareta.” Jesu kabadwa kati, “Ndimi.” Judasi n'wongi, wakabe anabo. 6 Ngono kukati Jesu eti, “Ndimi” bakasedza nge kushule bakawila pasi. 7 Jesu kababhuzwa kakale kati, “Ndiani wamunoshaka?” Bakati “Jesu we Nazareta.” 8 Jesu kati, “Ndamubudza kale kuti ndimi. Ha mushaka imi, letjani balume ibaba bayende.” 9 Wakaleba ikoku kuti matama aakabe atongo leba kutanga asiwile pasi, anoti; “Tate, andizolashikigwa nenguba ali nng'ompela we bamakandipa.” 10 Simoni Pita wakabe ana bukanu, kagushomola katema nlanda we Ntungamili we Bapirisiti kanthubula zebe ye luji. Zina la iwoyo nlanda lakabe liyi Maliko. 11 Ipapo Jesu kati kuna Pita, “Bgwiliza bukanu gugo mu khata. Apa unoalakana kuti anditowong'wa mu bhepe le kudziyidziwa landakapiwa ndi Tate kene?”

Jesu mbeli kwa Anasi

12 Ipapo babhayani be Baroma ne Nkulu wabo ne balindi be Ng'umba ye Ndzimu bakabhata Jesu, bakansunga. 13 Kutanga bakansa kuna Anasi, nkalabgwa wa Kaifasi, iye wakabe ali Ntungamili we Bapirisiti gole ilelo. 14 Kaifasi ndiye wakabe atongo kumbuludza Bajuta kuti koyita kuti nthu nng'ompela afe pana kuti kufe bathu bose.

Pita unozwilandula Jesu

15 Simoni Pita ne mmwe n'diyiwa bakatobela Jesu. Iwoyo mmwe n'diyiwa kaswika kanginabo tje mukati kwe nsha we Ntungamili we Bapirisiti, ngobe iye wakabe ezibgwa nge Ntungamili we Bapirisiti. 16 Pita iye kasala kuzhe tje pa nkoba. Ipapo iwoyo n'diyiwa wakabe ezibgwa nge Ntungamili we Bapirisiti kabhuda kanolebeleka ne nlandakadzi unolinda pa nkoba, ngono kangina na Pita mukati. 17 Mmwanadi iwoyu kadwa Pita kati, “Apa ate uli mmwe we badiyiwa ba iwoyu nlume kene?” Pita kan'dabila eti, “Ate ndili mmwe wabo.” 18 Kwakabe kupota, ngono balanda ne balindi bakabe bedziya moto, ngono Pita wakabe anabo edziyabo moto.

Ntungamili we Bapirisiti unobhuzwa Jesu

19 Ntungamili we Bapirisiti akabhuzwa Jesu ngekwe badiyiwa babe ne nge kudiya kukwe. 20 Jesu kan'dabila eti, “Ndagala ndilebeleka ne bathu patjena, ndakadiya mu ng'umba dze mitembezelo ne mu Ng'umba ye Ndzimu, kunokubungana Bajuta bose. Andina tjandakaleba muzwikohwa. 21 Ini ngono mundibhuzwa? Bhuzwani bathu bakandihwa. Mubabhuzwe tjandakababudza, banoziba tjandakaleba.” 22 Jesu kati eleba eijalo mmwe we balindi bakabe bali ipapo kanloba mu lushaya kati, “Unodabila Ntungamili we Bapirisiti tjini kene!” 23 Jesu kanshandula eti, “Ha ndaleba tjimwe tjakabipa, undilakidze itjo. Koga ha ndilebesa muna tjandaleba, unondilobelani?” 24 Ipapo Anasi kapitshila Jesu akasungwa kuna Kaifasi Ntungamili we Bapirisiti.

Pita unozwilandula Jesu kakale

25 Simoni Pita kati atjimile ipapo edziya moto, bamwe bakambhuzwa bakati, “Apa ate uli mmwe we badiyiwa babe kene?” Pita kazwilandula kati, “Ate ndili mmwe wabo.” 26 Mmwe we balanda be Ntungamili we Bapirisiti, wakabe ali gamu le nlume wakabe athubugwa zebe ndi Pita, kabhuzwa kati, “Apa andizokubona unaye mu nnda kene?” 27 Kakale Pita kalandula eti, “Aa, ndodwa!” Tjinyolotjo gukurume likalila.

Jesu unosumikilisiwa mbeli kwa Pilato

28 Kwakati ku tjimangwanana bakadusa Jesu mu ng'umba ya Kaifasi bakan'yisa ku ng'umba hwulu ye nlauli we Nroma. Ngono Bajuta bakasingine mu ng'umba ye nlauli, ngobe bakabe beshaka kuti batubule kuja zojiwa zwe Nzano we Kupinda pezhugwi bakatjenapala, nge mpanga we Tjijuta. 29 Ndizo Pilato kabhuda kayenda kubali kababhuzwa kati, “Mukati nlandu uwe ini?” 30 Bakan'dabila beti, “Tobe tisanlonga mu maboko enyu, ha abe asina bubi gwaathama.” 31 Pilato kabadwa kati, “Muntole munonsumikilisa nge nlayo wenyu.” Bakan'dabila beti, “Iswi atina fanilo ye kubulaya nthu.” 32 Oku kwakashingikala kuti ndizo kuzhadzisike matama a Jesu aakaleba ngekwe lufu gugwe. 33 Pilato kabgwilila mu ng'umba kadana Jesu. Kambhuzwa kati, “Apa u She nkulu we Bajuta kene?” 34 Jesu kambhuzwabo kati, “Apa bhuzo iyeyi inodwa mukuli kene bamwe bakubudza nge kwangu?” 35 Pilato kan'dabila eti, “Imi ate ndili Njuta. Walongwa mu maboko angu nge bathu ba kanyi kuko ne Bapirisiti babo bakulu. Watjinyani?” 36 Jesu kati, “Bushe gwangu ate guli gwe shango ino, ha bushe gwangu gwabe guli gwe shango ino, balanda bangu banobe bagwa kudzibila Bajuta kundisunga. Aa, bushe gwangu ate guli gwaipapano!” 37 Ndizo Pilato kati kunli, “Ndizo u she nkulu kene?” Jesu kan'dabila eti, “Ndiwe unoti ndi she nkulu. Imi ndakazwagwa azha mu shango ino, ndizhila kuwotendeka ngekwe malebeswa. Iye umu malebeswa unondihwilila.” 38 Pilato kabhuzwa kati, “Malebeswa ini?”

Lufu gwa Jesu

Pilato kati ajalo kabhudila kuzhe kakale ku Bajuta kabadwa kati, “Anditobona tjamunonsekesela. 39 Koga nge kuyendidzana nge mpanga wenyu, ndagala ndimusunungulila nsungwa nng'ompela mu nsi we Nzano we Kupinda pezhugwi. Moshaka kuti ndimusunungulile She nkulu we Bajuta kene?” 40 Bakan'dabila bemimila beti, “Kusi iwoyu nlume! Koga toshaka Bharabhasi!” Bharabhasi wakabe ali tjigebeng'a.

Johani 19

1 Ipapo Pilato katola Jesu kati ngaalobgwe. 2 Babhayani bakaluka tjiala tje mihwa bakaambadza itjo mu nsholo, bakaambadza hazu ye mbala nshaba wakabondelela; 3 ngono bakayenda kunli bakati, “Dumilani, She nkulu we Bajuta,” bakampkhwaula mu lushaya. 4 Pilato kabhudila kuzhe kakale kati ku Bajuta, “Bonani, ndon'dusila kuzhe kumuli kumuzibisa kuti imi anditobona tjimwe tjandingantilika nlandu nditjo.” 5 Ndizo Jesu kabhudila kuzhe, akaambala tjiala tje mihwa ne hazu ye bushaba gwakabondelela. Pilato kati kubali, “Woyu nthu wenyu!” 6 Bapirisiti bakulu ne balindi be Ng'umba ye Ndzimu bakati bembona, bakamimila beti, “Mumbambule! Mumbambule!” Pilato kati kubali, “Muntole imwi mumbambule. Imi anditobona tjimwe tjandingantilika nlandu nditjo.” 7 Mbunga we Bajuta ukanshandula uti, “Iswi tina nlayo unoti wakafanila kuti afe, ngobe kati Nkololo we Ndzimu.” 8 Pilato kati ehwa ikoku katja kwazo, 9 kabgwilila mu ng'umba ye nlauli kabhuzwa Jesu kati, “Unodwa ngayi?” Koga Jesu kasindabile. 10 Pilato kati kunli, “Apa autoda kulebeleka nami kene? Autoziba kuti ndina simba le kukusunugula kose ne simba le kukubambula kene?” 11 Jesu kashandula eti, “Iwe ungabe usina simba mundili, apa wabe usakalipiwa lidwa kudzimu. Ndizo iye wandizhisa kukuli una tjibi tjikulu kupindisa.” 12 Pilato kati ehwa ikoku, kagwisa kuwana zila yaangasunungula Jesu ndiyo. Koga Bajuta bakamimila beti “Ha unsungunula, unowobe usi nzwalani wa Kaisara! Mmwe ne mmwe unozwithama she nkulu, unonyanyayidza Kaisara!” 13 Pilato kati ehwa matama iyawa, kadusila Jesu kuzhe, kagala mu tjigalo tje nsumikilisi mu bugalo gunodang'wa kuyi, “Budzilo gwe Mabgwe.” Mu Tjihebheru goyi “Gabhata.” 14 Kwakabe kuli masikati makulu kululwamisigwa Nzano we Kupinda pezhugwi. Pilato kati ku Bajuta, “Woyu She nkulu wenyu!” 15 Bakamimila beti, “Kutjena naye, kutjena naye mumbambule!” Pilato kababhuzwa eti, “Apa moshaka kuti ndibambule she nkulu wenyu kene?” Bapirisiti bakulu bakan'dabila beti, “Atina mmwe she nkulu kuzhe kwa Kaisara!” 16 Ndizo Pilato kabapa Jesu kuti anobambugwa.

Jesu unobambugwa

Bakatola Jesu bakayenda naye. 17 Wakabhuda akasenga tjileyanyo tjitje, kayenda kanoti ku bugalo gunoyi “Ipepe tje Nsholo.” Mu Tjihebheru godang'wa “Gologota.” 18 Ndiko kwabakanombambulilako ne bamwe balume babili, mmwe ku luboko gwe luji, mmwe kuna gwe lumeshwe, Jesu iye ali pakati kwabo. 19 Pilato kakwala zibiso kainamatidza mu tjileyanyo tja Jesu. Matama ayo akabe ebalika sa oku, “JESU WE NAZARETA, SHE NKULU WE BAJUTA.” 20 Bathu banjinji bakaibala, ngobe pathu ipapo pakabambuligwa Jesu pakabe pali pejo ne nzi nkulu. Zibiso iyeyi yakabe yakakwagwa nge lulimi gwe Tjihebheru ne gwe Tjilatini ne gwe Tjigiriki. 21 Bapirisiti bakulu ne Bajuta bakati kuna Pilato, “Usikwale uti ‘SHE NKULU WE BAJUTA’ kwala uti, ‘Iwoyu nlume kati, Imi ndi she nkulu we Bajuta.’ ” 22 Pilato wakabadabila eti, “Tjandakwala ndakwala.” 23 Babhayani bakati babambula Jesu, bakatola zwiambalo zwizwe bakazwikobana nge bunna gwabo, mmwe ne mmwe wabo katola tjing'ompela. Bakatola ne hempe iye, yakabe ili jila ling'ompela lakalukiwa lisina nthumo. 24 Bakalangana beti, “Tisiipalule, ngatikandileni tibone kuti inowobe ya ani.” Ikoku kwakashingikala kuti matama e Hwalo dze Ndzimu asiwile pasi anoti, “Bakakobana zwiambalo zwangu hempe yangu bakailobela hakata.” Izwezwi ndizo zwakathamwa nge babhayani. 25 Mme ba Jesu bakabe bali mile pejo ne tjileyanyo tjitje bana mannini babe Mariya, nkadzi wa Kileopasi, na Mariya we Magadala. 26 Jesu kabona mmeyabe ne n'diyiwa waakabe eda bali mile ipapo, ngono kati kuna mmeyabe, “Nkadzi nkulu, nkololo wenyu hwoyo.” 27 Kati ku n'diyiwa iwoyu, “Abo mmeyabo.” Kudwila mu tjibaka itjetjo n'diyiwa iwoyo katola Mariya kanogala naye ku nzi uwe.

Lufu gwa Jesu

28 Jesu kaziba kuti ngwenu kose kwawila, koga kuti matama e Hwalo dze Ndzimu asiwile pasi kati, “Ndina nyota.” 29 Kwakabe kuna ndilo izhele nkumbi unobaba, ngono bakadubika lungudze muuli, bakagupomba mu lushanga gwe nti unoyi hosapu, bakayisa ku nlomo uwe. 30 Jesu kang'wa ngono kalebeleka kati, “Kwapela!” Kakotamisa nsholo uwe ngono meya ikathubukana nge nyama.

Lubadu gwa Jesu gobhayiwa

31 Bajuta bakakumbila Pilato kuti makumbo e balume babambugwa avung'we ne mibili yabo idelusiwe mu zwileyanyo. Bakakumbila beijalo, ngobe kwakabe kuli zhuba le kuzwilulwamisa, basingashake kuti mibili iyeyi ibe ili mu zwileyanyo mu nsi we Sabata. 32 Ndizo babhayani bakayenda bakanovuna makumbo e nlume we kutanga kudwapo bakavuna e mmwe wakabe abambugwabo na Jesu. 33 Bakati bezha pana Jesu, bakabona kuti wafa kale, ngono bakasivune makumbo awe. 34 Mmwe we babhayani, kabhaya Jesu nge thumo mu lubadu, ngono kukatebuka malopa ne vula. 35 Nlume wakabona ikoku kushingikala wakapa butendeki nge kwako, kuti namwibo mugalemoyo. Butendeki gugwe malebeswa, na iye unoziba kuti unoleba malebeswa. 36 Oku kwakashingikala kuti matama e Hwalo dze Ndzimu asiwile pasi, anoti, “Akuna fupa lile linowovung'wa.” 37 Gumwe lukwalo goti, “Banowolinga kunli iye wabakabhaya.”

Mbiganyo ya Jesu

38 Shule kwa ikoku, Josefa we Arimateya, kayenda kanokumbila Pilato kuti ampe itumbu tja Jesu. Josefa wakabe ali n'diyiwa wa Jesu wakabe asingazwilakidze, ngobe akabe etja Bajuta. Pilato kan'dumila kuti atole itumbu tja Jesu, ngono kayenda kanotjitola. 39 Nikodemo, iye wakatongo yenda kunobona Jesu busiku, kayenda na Josefa akasenga mafuta e motsha unodang'wa kuyi mira unolizana kilogiramu dzili makumi matatu ana thatu, wakashanganyiwa ne gonde. 40 Bakatola itumbu tja Jesu bakatjipetela nge jila betjizhodza mafuta e motsha kuyendidzana nge mpanga we Bajuta we kubiganya. 41 Kwakabe kuna nnda ipapo pakabambuligwa Jesu, ngono muuli kwakabe kuna ikumbu tjitshwa tjisakatongo biganyiwa nthu. 42 Sekwa kabe kuwomuka kuli Sabata, kakale ikumbu na itjo tjili pejo, bakambiganya mutjili.

Johani 20

Kumuka kwa Jesu mu bafi

1 Kukati mu zhuba lekutanga le tshipi, Mariya we Magadala kabindukila ku ikumbu tja Jesu, kwakabe kutji zhalima, ngono kawana shongwe yakadusiwa pa nkoba. 2 Kalabuka kayenda kuna Simoni Pita ne mmwe n'diyiwa wakabe ediwa ndi Jesu, kabadwa kati, “Badusa She mu ikumbu, atitoziba kwabanombiga!” 3 Pita na iwoyo mmwe n'diyiwa bakayendabo ku ikumbu tja Jesu. 4 Bakalabuka, koga iwoyo mmwe n'diyiwa kasiya Pita kanontangila ku ikumbu. 5 Kakotama kashozhela ngono kabona matyila woga, koga kasingine. 6 Simoni Pita kawoswika shule kukwe, ngono iye kangina mu ikumbu. Kabona matyila akabe akapetela nfi ali ipapo, 7 ne tukwi yakabe yakapombedziwa mu nsholo wa Jesu isi pathu pang'ompela ne matyila akabe akapetela nfi. Yakabe itjakapetiwa ili poga. 8 Iwoyo mmwe n'diyiwa, wakabe aswika pa ikumbu kutanga, kanginabo mukati, kabona ngono kaduma. 9 Bakabe basathu bakahwisisa tjinolebgwa nge Hwalo dze Ndzimu dziti, wakafanila kumuka mu bafi. 10 Badiyiwa bakabgwilila kanyi.

Jesu unobong'wa ndi Mariya

11 Koga Mariya kama kuzhe kwe ikumbu kalila. Kati elila, kakotama kashozhela mu ikumbu, 12 kabona batumwa be kudzimu babili bakaambala zwiambalo zwitjena, bali gele pakabe pakaladzikwa itumbu tja Jesu, mmwe ali ku misholo mmwe ali ku makumbo. 13 Bakambhuzwa beti, “Nkadzi, unolilani kene?” Kabadabila kati, “Batola She wangu, anditoziba kwabambigako!” 14 Wakati adwa paleba eijalo katendebuka ngono kabona Jesu ali mile ipapo, koga kasizibe kuti ndi Jesu. 15 Jesu kambhuzwa kati, “Nkadzi, unolilani? Unoshaka ani?” Mariya kazwidwa kati pamwe ntjengeti we nnda, ngono kati kunli, “Tate bangu, ha muli imwi mantola, mundibudze kwamambiga kuti ndiyende ndinontola.” 16 Jesu kati, “Mariya!” Ipapo Mariya katendebuka kati nge Tjihebheru, “Rabhoni!” Ikoku kodwa kuti “N'diyi.” 17 Jesu kan'dwa kati, “Usindibhate, ngobe andithu atathila kuna Tate. Koga yenda ku zwikamu zwangu uzwibudze kuti ndotathila kuna Tate, ibo Tate benyu kakale bali Ndzimu wangu ne Ndzimu wenyu.” 18 Mariya we Magadala kayenda kanobudza badiyiwa kuti wabona She, ndizo kababikila tjaadwiwa ndi She.

Jesu unobong'wa nge badiyiwa babe

19 Kukati madekwana e zhuba lekutanga le tshipi, badiyiwa bakakubungana bakazwizhalilila mu ng'umba, ngobe bakabe betja Bajuta. Jesu kazha kama pakati kwabo kati kubali, “Kunyalala ngakube namwi.” 20 Kati ajalo, kabalakidza zwiazha zwizwe ne lubadu gugwe. Badiyiwa babe bakashatha kwazo ipapo bebona She. 21 Jesu kapapha kati kubali, “Kunyalala ngakube namwi. Koga sekwa Tate bakandituma, nami ndomutumabo.” 22 Kati aleba eijalo kafemela mubali kati, “Amutjilani Meya yakayengemala. 23 Ha muzwiibhatigwa bathu matjinyo abo, anozwiibhatigwa, koga ha musingabazwiibhatigwe iwo, aatozwiibhatigwa.”

Jesu na Tomasi

24 Mmwe we badiyiwa bali gumi lina babili unoyi Tomasi unodang'wa Bili, wakabe asipo ipapo Jesu eswika. 25 Bamwe badiyiwa bakambudza beti, “Tabona She!” Tomasi kabashandula eti, “Kudzina ndibona mabanga e zwipikiri mu zwiazha zwizwe ne kulonga tjinyala tjangu mu mabanga e zwipikiri nenge kulonga tjiazha tjangu mu lubadu gugwe, andingadume.” 26 Shule kwe tshipi ing'ompela, badiyiwa bakashangana kakale mu ng'umba na Tomasi ali yapobo. Nenguba mikoba yakabe yakazhaligwa, Jesu wakazha kama pakati kwabo kati kubali, “Kunyalala ngakube namwi.” 27 Ipapo kati kuna Tomasi, “Longa tjinyala tjitjo apapa, ulinge zwiazha zwangu, ubuye ulonge tjiazha tjitjo mu lubadu gwangu. Letja kududumwa ugalemoyo!” 28 Tomasi kanshandula eti, “She wangu! Ndzimu wangu!” 29 Jesu kati kunli, “Unogalamoyo, ngobe wandibona. Bakakombolegwa ibo banoti basabona ngono bakagalamoyo.”

Tjinolebgwa nge lukwalo igogu

30 Jesu wakashinga zwimwe zwilakidzo zwinjinji mbeli kwe badiyiwa babe zwisakakwagwa mu lukwalo igogu. 31 Koga izwezwi zwakakwaligwa kuti mugalemoyo kuti Jesu ndiye Mesiya, Nkololo we Ndzimu ne nge kuti nge kugalamoyo mube ne butjilo nge zina lile.

Johani 21

Jesu unobong'wa nge badiyiwa bali tendeka

1 Shule kwa ikoku, Jesu kazwilakidza ku badiyiwa babe kakale pa gungwa gwe Tibheriyasi. Wakazwilakidza sa hwoku: 2 Kwakabe kuli, Simoni Pita wakabe ana Tomasi unodang'wa Bili na Natanaele unodwa ku nzi we Kana mu ntuthu we Galili ne bakololo ba Zebhedi ne bamwe badiyiwa ba Jesu babili; bose bakabe bali yapo. 3 Simoni Pita kabadwa kati, “Ndonobhata hwobe.” Bakan'dabila beti, “Naswi toyendabo nawe.” Bakamilika bakayenda bali mu n'goro, ngono bakashaya tjababhata busiku igogo. 4 Kukati mangwanana, Jesu kama pa phili, koga badiyiwa bakasizibe kuti ndiye. 5 Kababhuzwa kati, “Bana, apa muna hwobe kene?” Bakan'dabila beti, “Aa, atina.” 6 Kabadwa kati, “Poselani gwanga tjeku luji gwe n'goro, mowobhata dzimwe.” Bakaposela gwanga ngono bakakong'wa kugukwebela mu n'goro, ngobe babhata hwobe njinji. 7 N'diyiwa wakabe ediwa ndi Jesu kati kuna Pita, “Ndi She!” Simoni Pita kati ehwa kuti ndi She kazwipomba nge hazu iye, ngobe wakabe ambula zwiambalo zwizwe, kabe etjulukila mu vula. 8 Badiyiwa bamwe bakantobela ku phili bali mu n'goro, bekweba gwanga guli zhele hwobe. Bakabe basi kule kwazo ne phili, kwakabe kungabe zana le mitha. 9 Bakati beswika pa phili, bakabona moto ipapo, kwakagotjiwa hwobe ne tjiwunga muuli. 10 Jesu kati kubali, “Zhisani dzimwe hwobe dzamabhata ngwenu.” 11 Simoni Pita kangina mu n'goro kakwebela gwanga mu phili guli zhele hwobe hwulu. Dzose dzakabe dzili zana lina makumi mashanu ana thatu (153). Nenguba dzakabe dzili bunjinji kungapo, adzizopalula gwanga. 12 Jesu kati kubali, “Izhani muje!” Akuna wabo wakabe nge tjilopa kumbhuzwa kuti, “Ndiwe ani?” ngobe bakabe baziba kuti ndi She. 13 Jesu kazha katola tjiwunga, kabapa itjo, kabapa ne hwobe. 14 Oku kwakabe kuli gwe butatu Jesu ezwilakidza ku badiyiwa babe shule kwe kumusiwa kukwe mu bafi.

Jesu na Pita

15 Kukati bapedza kuja, Jesu kati kuna Simoni Pita, “Simoni nkololo wa Johani, apa unondida kupinda ibaba kene?” Pita kan'dabila eti, “Ee, She, moziba kuti ndomuda.” Jesu kati kunli, “Fudza pkhwizana dzangu.” 16 Jesu kati gwe bubili kuna Simoni, “Simoni, Nkololo wa Johani, apa unondida kene?” Simoni kadabila eti, “Ee, She, moziba kuti ndomuda.” Jesu kati kunli “Lisa pkhwizi dzangu.” 17 Jesu kati gwe butatu, “Simoni nkololo wa Johani, apa unondida kene?” Pita kahwa zogwadza, ngobe Jesu embhuzwa gwe butatu eti, “Apa unondida kene?” Kanshandula eti, “She, moziba tjimwe ne tjimwe. Moziba kuti ndomuda!” Jesu kan'dwa kati, “Fudza pkhwizi dzangu. 18 Ndolebesa tjose nditi, wakati uli ntjetjana wakabe uzwiambadza ukamilika ukayenda kumwe ne kumwe kwaunoda, koga ha wakwegula, unowotambunudza maboko awo ukaambadziwa nge mmwe kabuya kakuyisa kwausingade.” 19 Jesu wakaleba matama iyawa elakidza kuti Pita unowofa lufu gwakatini kukudza Ndzimu. Ipapo Jesu kan'dwa kati, “Unditobele!”

Jesu ne n'diyiwa unodika

20 Pita katjebuka shule, ngono kabona n'diyiwa wakabe ediwa ndi Jesu akabatobela; n'diyiwa iwoyo ndiye wakabe akanayila Jesu pa tjilayilo ekowombhuzwa eti, “She, ndiani unowomuwonga kene?” 21 Pita kati embona, kabhuzwa Jesu eti, “She, oyu iye kee?” 22 Jesu kan'dabila eti, “Ha ndida kuti atjile kudzina ndibuya, uneni nako? Unditobele!” 23 Kudwa ipapo kukaandama makwayi mu badiyiwa ekuti n'diyiwa iwoyo aatowofa. Koga Jesu wakabe asati, “Aatowofa.” Wakabe ati, “Ha ndida kuti atjile kudzina ndibuya, uneni nako?” 24 N'diyiwa iwoyo ndiye unotendeka ngekwe zwithu izwezwi kakale ndiye wakazwikwala, ngono toziba kuti butendeki gugwe gu malebeswa.

Bhelelo

25 Kuna zwithu zwimwebo zwinjinji zwakashingiwa ndi Jesu. Ha tjimwe ne tjimwe tjazo tjakabe tjakwagwa, ndoduma kuti shango yose yabe isingawotubula kuwanila magalo hwalo dzazwakakwagwa mudzili.