The New Testament of our Lord and Saviour Jesus Christ
1 ዳዊቴነ አብረሃሜ ቤት ዬሱስ ክርስቶስ + እለንችጉ ህትጉተ። 2 አብረሃም ይሳቀ እሎ። ይሳቅን ያቆቤ እሎ። ያቆብን ይሁደኒ ህዛከሲ እሎ። 3 ይሁድን ትእማሬች ፋሬሴኒ ዛረኒ እሎ። ፋሬስን ሄስሮሜ እሎ። ሄስሮምን ራሜ እሎ። 4 ራምን አምናዳቤ እሎ። አምናዳብን ነኣሶኔ እሎ። ነኣሶንን ሰልሞኔ እሎ። 5 ሰልሞንን ረኣቤች ቦኣዜ እሎ። ቦኣዝን ሩቴች እዮቤዴ እሎ። እዮቤድን እሴዬ እሎ። 6 እሴይን ዎመ ዳዊቴ እሎ። ዳዊትን ኦርዮ ሜንትቾች ሰለሞኔ እሎ። 7 ሰለሞንን ሮብኣሜ እሎ። ሮብኣምን ኣብየ እሎ። ኣብየን አሳፌ እሎ። 8 አሳፍን እዮሳፋጤ እሎ። እዮሳፋጥን ዮራሜ እሎ። ዮራምን ኦዝየ እሎ። 9 ኦዝየን እዮኣታሜ እሎ። እዮኣታምን አካዜ እሎ። አካዝን ህዝቅያሴ እሎ። 10 ህዝቅያስን ምናሴ እሎ። ምናስን አሞጤ እሎ። አሞጥን ዮስየ እሎ። 11 እስራኤል መኑ ባብሎነ ቀፈደንት ኦሮቶ ጃተ ዮስየ እኮንየኒ ህዛከሲ እሎ። 12 ባብሎን ቀፈደንቺች ዘኪን እኮንየን ሰላኤሌ እሎ። ሰላኤልን ዘሩባቤሌ እሎ። 13 ዘሩባቤልን አብዮዴ እሎ። አብዮድን ኤልያቄሜ እሎ። ኤልያቄምን ኣዞሬ እሎ። 14 ኣዞርን ሳዶቄ እሎ። ሳዶቅን አኪሜ እሎ። አኪምን ኤልዮዴ እሎ። 15 ኤልዮድን ኤልኣዛሬ እሎ። ኤልኣዛርን ማታኔ እሎ። ማታንን ያቆቤ እሎ። 16 ያቆብን ዮሴፈ እሎ። ዮሴፍን «ክርስቶሰ» የመመኖ ዬሱሰ እልቶ ማራሜ ምን አነ እኮ። 17 ህከኒ አብረሃሜች ዳዊቴ ኢለንቀጤች ቶነ ሾሎ እለንቸ። አሞ ዳዊቴች ባብሎን ቀፈደንቹ ኢለንቀጤች ቶነ ሾሎ እለንቸ። ህትጉንተ ባብሎን ቀፈደንቺች ክርስቶሱ እለመንቀጤች ቶነ ሾሎ እለንቸ። 18 ዬሱስ ክርስቶስ እለንችጉ ህትጉተ፦ አመስ ማራም ዮሴፊ + ጠዕመንት ዮሀኔን ገልቱዕነን መገን አያን መቄን ሰላዕንት ደገንቶእ። 19 ጠዕመቄሴ ዮሴፍ ሙጩሩ እኮተኔ ማራሜ መን ብሬን ፉሽ ሳልሲሱዕናች ጠሀስ ማጭ አጉሮተ ሰውዬእ። 20 ህካን ሰውያንየን መገን ሰሜ ሶቀማንቹ + ሀቄን ጡደም «ዮሴፈ ዳዊቴ + ቤቶ! ጠዕመቅቶንት ማራም ሰላዕንቶኢ ጡማንቾ አያኒች + እኮሀኒ እሴተ ኤበቂ ዋጅቶት። 21 እሴን ጎንቹ ቤቱ እልታእ። እስን ምናደበ ባጢሊችሰ ፈእሰኖ እኮሀኒ ሱዕመስ ‹ዬሱሰ› ይታንት» ዬስ። 22 ህኩን ሆሩንኩ እኮ ቀርቹ ህራጋንቾን 23 «ባጃምት ሰላዕንት ጎንቹ ቤቱ እልታእ። አሞ ሱዕመንከስ ‹አማኔሌ› ይት ገእታእ» ዬሩ ዊሙንታት። «አማኔሌ» ዩንኩ «መገኑ ኔሳን ሜጡ ዮእ» ። 24 ህከኒ ዮሴፍ ግሰናች በቅዬ ጃተ መገን ሰሜ ሶቀማንቹ አዘጆስገን ማራሜ ኤበቄእ። 25 ጠሁ እኮዳ ማራም ዎነሴ ቤቱ እልተንቀጤች እሴን በርገምምበአ እኬ። ዮሴፍን እለሞ ጪለ «ዬሱሰ» + ይ ገኤእ።
1 ሄሮድሴ + ዎሞመ ዶላን ዬሱሱ ይሁድ ባዶን ቤተሌም ከተማን እለሞ ጃተ ቤዜን ኑር ዎልሳ ቆሩ መኑ አርፉል ዉዲች ዬሩሳሌመ ዋልቶእ። 2 እሶኦንት «አይሁድ + ዎመ እሀኖ ጪሉ እለሞቡ ሀከምባት? ነኦት ቤዜቹስ ጡንድ አርፉል ዉዲች ሰገንዶስተ ዋኔም» ይተን ጠዕምቶእ። 3 ዎሙ ሄሮድስ ህከ ጠሀ መጮጬ ጄቹተ አብሽ ህልቅ ክቼኦ። አሞ ዬሩሳሌም መኑ ሆሩንኩ ክቼኦእ። 4 እስን ቄስ አወንሳኑሃ ሴር ሮስሳኑሃ + ጠጰእኬእ «ክርስቶሱ + እለመኖቡ ሀከምቤቹ» ይ ጠዕሜእ። 5 እሶኦንት «አይሁድ ባዶን ቤተሌም ከተማን እለመኖ። ዳፉንኩስ ህራጋንቹ 6 ‹ቤተሌም ከተመ! አት ይሁድ ባድ አወንሳኒች ሆሪችን ኮታንትበአ። ህከኒ ኬሳች ኢ ምናደብ እስራኤል አሌን ዎሞዕመኖሁ አወንሰኖሁ እለመኖ› ይ ጣፌእ» ይቶእ። 7 ህከኒች ዘኪን ሄሮድስ ህከ ቆረ መነ ማጭ ገእ ቤዜቹስ ጡደንቶ ጃተ ጠዕም ደጎ። 8 እስን እሶኦ «መርቴን ህከን ጪልተኔ አብሴን ቆርምዬ። ደጌንተደ ዋልቴን ኤሳን ኩልቴነንተ። አኒ ሰገዲ መራም» ይ ቤተሌመ ሶኮ። 9 - 10 እሶኦንት ሄሮድሴች መጮት ፉልቶገን አርፉል ዉድ ባዲን ጡዶ ቤዜቹት አወንስተንየንሰ ጡዶ ጃተ አብስ በጅቀንቶእ። ህት ቤዜቹንት ጪሉ ዮ ምን ቦቆን ኡርተንቀጤች አወንስቶሰ። 11 እሶኦንት ህከ ምን ኣጎ ጃተ ጪሉ አማንተስ ማራሜንን በርገም ዮኢ ጡድ ብሬንተስ ጉሉጵት ሰገዶስ። ህከኒች ዘኪን ሳጥነሰ ፈንት ዎርቀ፥ ህጣነሃ ከርቤታ + ፉሽት እርፎስ። 12 ህኩ ቆሩ መኑንኩ ሄሮድሴበ ፈንቀልቱምቦገ መገኑ ሀቄን ኩልየንሰ ዎሎ ዎቄን ባዱሰ ፈንቀልቶእ። 13 እሶኦንት ኦሮቅቶሀኒች ዘኪን መገን ሰሜ ሶቀማንቹ ሀቄን ዮሴፊ ለል «ሄሮድስ ጪለ ሺ ሀሰዮተኔ ጪለሃ አመታ አፍ ግብጥ + ባዱ ሁን። አን ኩለንቀጤች ህከኔ አፉዕል» ዬእ። 14 ዮሴፍን አንከሬን ኬእ ጪለሃ አመታ አፍ ግብጥ ባዱ ኦሮቄእ። 15 ህከኔን ሄሮድስ ሬሀንቀጤች ሄኦ። ህኩን እኮ ቀርቹ ህራጋንቾን «ቤቱኤ ግብጢች ገኤም» ዬ ጠሁ ዊሙንታት እኬ። 16 ሄሮድስ ህኩ መኑ መለጦስሀኒ አብሽ አሙዕረሞ። ቤተሌማኒ ህከን ሄጌጎን ሆራኒ ዮ ለሞ ዎጌነ ለሞ ዎጌች ዎሮዲን ዮ ጎን ኦሱተ ሆረንተ ሼኑንተ አዘጆ። ህተ ጄቹተ ደጎንኩ ቆሩ መኑ ኩልቶስጊኔት እኬ። 17 ህኩስን እኮ ህራጋንቹ ኤርምያስ + 18 «አበት ኦነቲ ያረነቲ ‹ራመ› ዬኖባን መጮጨንቶእ። ራሄል + ኦሶሴተኔ ኦኦእ፤ ኦሱሴ ሬቶተኔ ሰብራተ ግቦእ» ይ ጠሃቄኢ ዊሙንታት እኬ። 19 ሄሮድስ ሬሄሀኒች ዘኪን ግብጥ ባዶን መገን ሰሜ ሶቀማንቹ ዮሴፍበ ሀቄን ዋል 20 «ጪለ ሺ ሀሳ መኑ ሬቶተኔ አት ጪለሃ አመታ አፍ እስራኤል + ባዱ ፈንቀል» ይ ኩሎ። 21 ህተ ጃንተ ዮሴፍ ጪለሃ አመታ አፍኬእ እስራኤል ባዱ ፈንቀሎ። 22 ይሁድ ባዶን አርኬሎስ አናንስ ሄሮድሴ መዕኔን ዎመ እክ ዮገ ዮሴፍ መጮጭ ይሁድ ባዱ መሩ ዋጄእ። መገኑ ዮሴፊ ቴሱ ሀቄን ኩልየንስ ገሊል ባዱ ኦሮቄእ። 23 ህከበንከ ኢሌ ጄቹተ ናዝሬት ከተማን ሄኦ። ህኩን እኮ ህራጋኖን « ‹ናዝሬት መንቹ› የመም ገአመኖ» የመሞ ዊሙንታት።
1 ህተ ጄቹተ ጠመቃንቹ ዮሃንስ + ዋል አይሁድ ባድ ኡለ ኡዱመኣን 2 «ህኩዕኒን፥ ሰሜ ዎሞመት ህንጭቶተኔ ባጢለዕኔ ቢረ ይቴን ፈንቀልዬ» ያን አዋጀዮ እኬ። 3 ህራጋንቹ እስያስ + «መቱ መንቹ ኡለ ኡዱመኣን ‹ቀርች ዎቃ ቅጠንስዬ። አሞ ህገኖበንከ ዙንስዬ› ይ ያሮ» ዬኢ ዮሃንሴተኔሃት እኬ። 4 ዮሃንሴ ኦድሸት ጋሜል ኦርዛች ሁጀተንቴታ እኬ። የመዙስን ሱንቺን ቆዕረኖ እኬ። አሞ እቸስን ዳምቹተኒ ዜራኒ እኬ። 5 ህተ ጄቹተ ዬሩሳሌም ከተሚች፥ ይሁድ ባዲች ሆሪቺ ዮርዳኖስ ለግ ሄጌጎን ዮ ባዲች ሆሪቺ መኑ ዮሃንሴበ ዋልተዮ እኬ። 6 ባጢለሰ ቢረ ይተንየን ዮርዳኖስ ለጋን ዮሃንስ ጠመቀዮሰ + እኬ። 7 ዮሃንስ ሆለሙ ፋሪሰቲ + ሳዱቀቲ + እስበ ጠመቀሚ ዋልተንየን ጡጆ ጄቹተ እሶኦ «ኩ ዎር ኦሱት! መገኑ ሶሀኖ አሙሬች ፈኤኑንተ ኩሎዕኔ አዬት? 8 ከን ባጢሊችዕኔ ፈንቀልቴነንተገ ጡድሰኖ ደናሙረ አስዬ። 9 አሞ አዕኖኦት ‹አብረሃም + አናኔ› ይቴነን ሰውቴኖችዬ። መገኑ ተን ክናቺ አብራሃሜ ኦሱተ አስ ኬእሶተ ደንደኖገ አን ኩላንክዕኔ። 10 ምሳንት ሀቅ ፈጋራን ቅጠንት አፉዕልቴእ። ደናምተ ላሉተ ላሉምቡ ሀቁ ሆሩንኩ ሙረም ጊራን ዎረመኖ። 11 ባጢለዕኔ ቢረ ይቴን ፈንቀልቴንተገ ጡድሲ ዎኢን ጠመቀዮንክዕኔ። እኮዳ ኩ ኤሳች ዘኪን ዋለኖ ጡማንቾ አያኒኒ ጊራኒ ጠመቀኖዕኔ። እስ አብሽ አበኖ እኮተኔ ጫመሲ እዪ አጉጄምየበአ። 12 ህከኒ እሲ ኦዱ ሙጩርሶታ ውጠተ ቡረኢች አነነ አሶታ ማንሹ ዮስ። አነነ አሴሀኒች ዘኪን ሙጩሩስ ውጠተ ጠጰእ ቀቻካን ኣግሰኖ። እኮዳ ቡረአስ ጠእቱምቦ ጊራን ቡሰኖ» ዬእ። 13 ህተ ጄቹተ ዬሱሱ ገሊሊች ዮሃንሴበ ዮርዳኖስ ለገ ጠመቀሚ ዋሎ። 14 እኮዳ ዮሃንስ «አን ኬሳን ጠመቀሙ ሀስሰኖኤ በጋን አት ሀትተ ኢበ ጠመቀሚ ዋልቴንት?» ይ ከሚ ሀሾ። 15 ዬሱሱንኩ «ነኦት መገኑ ሀሰኖረ ሆረንከ ዊንሹ ሀስሰኖተኔ ቴሱ ከንቶቴኤ» ዬሃን ዮሃንስ ጠሃንተስ ኢተሞ። 16 ዬሱሱንኩ ጠመቀም ዎእ ኣዚች ሰርብን ፉሎ። ህከኒች ዘኪን ሰሞ ፈነምየን ጡማንቹ አያኑ ሀንደርቹተ አጉጅ ድር አሌንተስ አፉዕለንየን ጡጆ። 17 ህተ ጃንተ «አን በጅቀማምነ ኢታም ቤቱኤ ከኔት» ይታ ላገት ሰሜች ዋልቶእ።
1 ህከኒች ዘኪን ዬሱሰ ሼጣንቹ + ኬኑንተ ጡማንቹ አያኑ ኡለ ኡዱመአ ኦሮሾስ። 2 ህከኔን ሾላዱመ በርሃ ሾላዱመ አንከርሃ ጦሞሀኒች ዘኪን ዬሱሱ ጎሬኮ። 3 ህተ ጃንተ ሼጣንቹ ዬሱሰ ኬኖተ ዋል «አት መገን ቤቱ እኬንትደ ሀኖ ተ ክነተ እቸተ አስ» ዬእ። 4 ጠሁ እኮዳ ዬሱሱ ፈንቀሽ « ‹መኑ መገን አፌች ፉልታ ላጋን በጋን እቻን ጠሊን ሄአኖበአ› የመም ጣፈሜእ» ዬእ። 5 ህከኒች ዘኪን ሼጣንቹ ዬሱሰ ዬሩሳሌም ከተመ ኦሮሾ። ህከኔን መገን ምን እንት አል ፉሽ ኡርሽ 6 «ጡማንቾ መጣፋን ‹ኬስ ቆረቡንተ መገኑ ሰሜ ሶቀማኑስ አዘዘኖ። ህከኒ ሎከክን ክኖን ቆዕልቱምቦገ አንጋንተሰ ኬእስ አፋሄ› የመም ጣፈሜእ። ህከኒ መገን ቤቱ እኬንትደ ሀኖ ሙግት ኡብ» ዬእ። 7 እኮዳ ዬሱሱ ፈንቀሽ «መጣፋን ‹ቀርቹክ መገኑ ኬንቶት› የመም ጣፈሜእ» ዬእ። 8 ህከኒች ዘኪን ሼጣንቹ ዬሱሰ አብሽ ቄራዕሮ ዱን አል ፉሽ ኡለ አል ዎሞመተ ሆረንታ አብንሳ ጡድሽ 9 «ኤሳ ህርክት ሰገዶንትደ ከ ሆረንከ ኣሳንኬ» ዬእ። 10 ዬሱሱ ፈንቀሽ «አት ሼጣንቹ ኤሳች ቄዕር! ጡማንቾ መጣፋን ‹መገኒ ጠሊ ሰገድ። እሲ ጠሊ አዘዘም› የመም ጣፈሜእ» ዬእ። 11 ህተ ጃንተ ሼጣንቹ ዬሱሰ አጉሮ። አሞ መገን ሰሜ ሶቀማኑንኩ ዋልት ካዕልቶስ። 12 ዬሱሱ ዮሃንስ ኡሱረሞገ መጮጬ ጄቹተ ገሊለ ኦሮቄእ። 13 እኮዳ ናዝሬት ከተመ አጉር ዛብሎንነ ንፍታሌም ባዶን በሃር ሺናን ዮ «ቅፍርናሆመ» ዬኖ ከተማን ሄኢ ኦሮቄእ። 14 ህኩን እኮ ህራጋንቹ እስያስ 15 «በሃር ዉዱ ኦሮሰኖ ዎቄ ዉዲን ዮርዳኖስ ለግ ዉደኢን ለለኖ ዛብሎንነ ንፍታሌም ባድ መኑሁ አይሁደ እኩምቡ ገሊል መኑሁ 16 ህኩ ቱንሶን ሄኣ ምናደቡ አበ ጫከ ጡዶእ። አሞ ሬሆ ሀሌቾ ኣዜን ዮ ኬኒ ጫኩ ፉሎሰ» ዬኢ ዊሙንታት። 17 ህተን ጄቾች አፍ ዬሱሱ «ሰሜ ዎሞመት ህንጭቶተኔ አዕኖኦት ባጢሊችዕኔ ፈንቀልዬ» ያን አዋጁ አፎ። 18 ዬሱሱ «ገሊለ» ዬኖ በሃር ቶቾን መረመን ለምተ ህዛከተ ጡጆ። እሶኦንት «ጴጥሮሴ» + የመመኖ ስሞኔቲ ህዞሃንስ እንድራሴቲ እኬ። ቁርጡሜመተ ዎሻዳረ እኮሀኒ ዎሻዳከሰ በሃራን ኡጅተዮ እኬ። 19 ዬሱሱንኩ «ዋልቴን ኤስ አወንዬ። አን መነ መገንበ ፈንቀሽቴነንተረ አሳንክዕኔ» ዬእ። 20 እሶኦንት ህተ ጃንተ ዎሻዳከሰ አጉርት ዬሱሰ አወንቶእ። 21 ህከምቤቺች ብርተ ለቆገን ዎልተ ለምተ ህዛከተ ዘብዶሴ ኦሱተ ያቆቤኒ + ዮሃንሴኒ + አኒንተሰን ሜጡ እክ ጀልብ ኣዜን ቁርጡሜመ ዎሻደ ጎበንየን ጡጅ ዬሱሱ ገኤሰ። 22 እሶኦንት ህተ ጃንተ አነሳ ጀልበሳ አጉርት ዬሱሰ አወንቶእ። 23 ዬሱሱ ጠጵት ምኔን ሮስሰኒ መገን ዎሞመ ምሽራች ላገተ ኩለኒ ገሊል ባዱ ሆረንከ ዘሀዮ እኬ። ሆለመ አነነ አነነ ሞሲን አፈንቶ መናከተ ፈይሰዮ እኬ። 24 ህኩ ዱዱቡ ሶርይ ባዶን ሆራንን መጮጨሞሀኒ መኑ ሆለመ አነነ አነነ ሞሲን ሀውታ መነ እስበ ዋሽቶእ። ሞሳንስ ሜሬሮን ሀቡሱ አፌ ኬኑ፥ ጮቱ አፌ ኬኑሁ ሺሃከቲ ዮ እኬ። እኮዳ ዬሱሱ ሆረንከሰ ፈይሾ። 25 ገሊሊች፥ «ቶርዱመ ከተመ» ዬኖ ባዲች፥ ዬሩሳሌሚች፥ ይሁዲቺ ዮርዳኖስ ለግ ዉደኢቺ ዋልቶ ሆለሙ ምናደቡ ዬሱሰ አወንቶእ።
1 ዬሱሱ ሆለመ ምናደበ ጡጅ ዱን አል ፉልኬእ ህከኔን አፉዕሌ ጃተ አወናኑስ እስቤቹ ህንጭትየን 2 እሶኦተ ሮስሱ አፎ። 3 ዬሱሱ «መገኖን ድከኣሩ ሰሜ ዎሞመት እሶኦቢተ እኮሀኒ ማሰአንቴሃረ። 4 ክቼኣሩ መገኑ ቃርመተ ኣሰኖሰሀኒ ማሰአንቴሃረ። 5 ማሹ ኬኑ መገኑ ኣሰኖ ተሳ ኣቅታተኔ ማሰአንቴሃረ። 6 መገን ሙጩርመተ ጎሬካሩ ሰገባሩ መገኑ ዱሰኖሰተኔ ማሰአንቴሃረ። 7 ቅሽጥታ ኬኑ መገኑ ቅሽጠኖሰተኔ ማሰአንቴሃረ። 8 ሙጩሩ ዎዘኑ ዮሰ ኬኑ መገኑ ጡዳሀኒ ማሰአንቴሃረ። 9 ሆቃ ኬኑ መገን ኦሱተ የመንታሀኒ ማሰአንቴሃረ። 10 መገኒ አዘዘንቶተኔ ሸረንታሩ ሰሜ ዎሞመት እሶኦቢተ እኮሀኒ ማሰአንቴሃረ። 11 ኢ ዳፊን መኑ ክዕኔኤተ ቦሮሮደ፥ ሸሬዳ ቆጰኒን ሱዕመዕኔ በእሾዳ ማሰአንቴንታረ። 12 ህከኒ ሰማን አበ ዋገ ኣቅቴነንታ እኮሀኒ በጅቀምዬ። ክዕኔኤች ብሬን ዮ ህራጋኑንኩ + ህትጉንተ ሸረንቴእ» ዬእ። 13 ዬሱሱንኩ «አዕኖኦንት ሆራንከ መኒ መጥኔየገ። እኮዳ መጥንት ጤኡ ሆጎደ ሀተኤን ጤኣገ አሴኖሴ? ህት መጥንት ሜጦሪሃ ካዕልቱምቡተኔ ቶሬናን መኑ ሃመኖሴ። 14 አዕኖኦት ኡለ አል መኒ ጫክየገ። ዱን አሌን ዮ ከተሙ ማጠሚ ደንደኖበአ። 15 አዪ ኩራዝ ጫክሽ ምን መኒ ሆሪንከ ጫከኖ መዕኔን አፉሸኖ በጋን ዛሌ ኣዜን አፉሸኖበአ። 16 ህከንገን ክዕኔኤ ጫኩ መን ብሬን ጫኩን። ህከኒ እሶኦት ክዕኔኤ ደናምተ ሁጅተ ጡድ ሰማን ዮ አነዕኔ ገለጥታእ» ዬእ። 17 ዬሱሱ «መገኑ ሙሴ ኣሴ ሴረሃ ህራጋኑ ሮስሶራ ዝሮተ ዋሎሚ አጉዱንከዕኔ። አን እሶኦት ሮስሶኢ ዊንሺ ዋሌም በጋን ዝሪ ዋልምበአ። 18 አን ገርተ ያንክዕኔ፤ ኡለቲ ሰሞሁ ህገንቀጤች ኩ ሴሩ ሆሩንኩ ዊመኖ በጋን ሜጥት እልቹቲ በኣበአ። 19 ህከኒ አዪ አዘዞች ቀሆሀንሲ አዘዘሙምቦዳ መኑ አዘዘሙምቦገ ሮስሾዳ እስ ሰሜ ዎሞማን ሆሪችን ቀሁ እሀኖ። እኮዳ አዘዘመኖሁ ዎሎ ኬኒሃ አዘዘንታገ ሮስሰኖሁ ሰሜ ዎሞማን አበ እሀኖ። 20 ዳፉንኩስ አን ያንክዕኔ፤ አዕኖኦት ሴር ሮስሳኒቺ ፋሪሳቺ አበ መገኒ አዘዘንቴኑምቦደ ሰሜ ዎሞመተ ሆረን ኣጌነንተበአ» ዬእ። 21 ዬሱሱ «ብሬ ዶል መኒ ‹መነ ሽቶት። መነ ሼሀን አሌን ፍርደመኖ› የመሞ መጮቴንተ። 22 እኮዳ አን ያሚ ከኔት፦ ህዜስ አሌን አሙዕረመኖሀኔን ፍርደመኖስ። ህዞስ ቦሮረኖ ያእ ዳናከበ ህንጭያኖ። አሞ ‹ኩ እደዕሉ› ይ መነ ቦሮረኖ ሆረን ጠእቱምቦ ጊረ ፍርደ ኣቀኖ። 23 መገኒ ክትመ + ህንጨኤኖባን ኣስታንትረ ኣስታንት ጃተ ህዞክ ኬሳን ክቼኤሩ ዮገ ቃጎንትደ 24 ኣስታንትረ ህከኔ አጉርት ህዜክበ መርት ሆቀም። ህከኒች ዘኪን ዋልት ኣስታንትረ መገኒ ኣስታንት። 25 ዲኑክ ኦጅየን ፍርድ ምን መሪችክ ብርስት ዲኒንተክ ሆቀም። ህካን አቱምቦደ ዲኑክ ዳኒ ህግሽ ኣሰኖሄ። ዳኑስ ኡሱሮ ምን ኣግሰኖሄ። 26 ገርተ ያንኬ፤ ዮሄ ቤነ ባት ጦፉዕናች ኡሱሮ ምኒች ፉልታንትበአ» ዬእ። 27 ዬሱሱ « ‹ሳኤኖችዬ› የመሞ መጮቴንተ። 28 እኮዳ ቴሱ አን ኩላንክዕኔ፤ ሜንትቹተ ጡጅ ዎዘናንተስ ቁልጤ መንቹ ሳኦሀንገ ዎልሰመኖ። 29 ህከኒ መኬክ እልት ሉስሶሄደ እሴተ ፉሽት ቶርት ከም። ዳፉንኩስ ዊመንትክ መኖመት ጠእቱምቦ ጊራን ቡባሀኒች መትተ እልተ ሆጉ ዎየኖሄ። 30 ህትንተ መኬክ አንገት ሉስሶኬደ ሙርት ኡጅ። ህኩስን ሆረንት መኖመት ጠእቱምቦ ጊራን ኡባሀኒች መኖማችክ መትተ አንገተ ሆጉ ዎየኖሄ» ዬእ። 31 አሞ ዬሱሱ «ምኔመስ ሸረኖ ሆሩንኩ ሸሬ ፉርመ ኣሱንሴ» የመሜእ። 32 እኮዳ ቴሱ አን «ሳኡዕናች ምኔመስ ሸረኖ ሆሩንኩ ሳኣገ አሰኖሴ። ህተ ሸረንቶኢንተ ኤበቀኖ ሆሩንኩ ሳኣንቹ እሀኖ» ያንክዕኔ። 33 አሞ ከኒች ብሬ መኒ «መገኒ ኣጎንት ህድር ላገተ ዊንሽ በጋን ዝርቶት» የመሞገ መጮቴንተ። 34 እኮዳ አን ቴሱ «ሆረን ጤሌዕልቴኖችዬ» ያንክዕኔ። ሰማን ጤሌዕልቴኖችዬ። ዳፉንኩስ ሰሞ መገን ዎሞማ በርጩመ። 35 ኡላን እኮዳ ጤሌዕልቴኖችዬ። ኡለንት መገን ሎከት ፎሎጭታሃበ። አሞ ዬሩሳሌማኒ ጤሌዕልቴኖችዬ። ዬሩሳሌሙንኩ አበ ዎምየ ከተመ። 36 ገጋንተዕኔ ጤሌዕልቴኖችዬ። አዕኖኦት ቦቆዕኔ ሙም ዱጥቹ ገምበለ እንዶ ዎጁ አሲ ደንድቴነንተበአ። 37 ህከኒ እሀኖረ ‹እሀኖ› አሞ እሁምቡረ ‹እሀኖበአ› ዩ ሀስሰኖ። ህከኒች ኤተሪን ዮኢ ሆሩንኩ ሼጣንቺቼት። 38 ዬሱሱንኩ « ‹እልተ ፉሼሀንቢተ እልንተስ ፉሽ። እንቁተ ቢጮ እንቁንተስ ቢጥ› የመሞ መጮቴንተ። 39 እኮዳ ቴሱ ኩላንክዕኔ፤ አዕኖኦት አዬሃ ባደ ፈንቀሽቴኖችዬ። አዪ መኬዕኔ ሞክተ ቀምቤደ ጉረዕኔ ሞክተ ዘህሴን ቀምቡንተ ኣስዬ። 40 ሀኩ መንቹሁ ሸሚዘክ ኣቂ ሀሽ ፍርድ ምን መሴሄደ ኮተክ በርግት ኣስ። 41 አዪ ‹ቶነ ኦንቱ ደቂቀ እሀኖ ቀጠበ መሴኤ› ዬደ አት ሰጀዱመ ደቂቀ እሀኖ ቀጠበ መስስ። 42 ኡጨኖሄሀኒ ኣስ። ህትጉንተ ሌኤጪ ሀሰኖሀኒ ሌኤስስ» ዬእ። 43 ዬሱሱንኩ « ‹ኦሌቹክ ኢት፤ ዲነክ ግብ› የመሞ መጮቴንተ። 44 እኮዳ አን ቴሱ ‹ዲነዕኔ ኢትዬ። ሸርታዕኔሪ መገኑ ኡጭዬ› ያንክዕኔ። 45 ህካንመ አቴንተደ ሰማን ዮ አኒሃዕኔ ኦሱተ እኬነንተ። ዳፉንኩስ እስ ሂላካሃ ጡማካሃ አሪቹተ ፉሸኖ። ህትጉንተ ሙጩራሃ ባጢላማሃ ጤነ ኡጀኖ። 46 ኢተኖዕኔ መነ ጠለ ኢትቴንተደ መ ደቅቴነን? ህካንዕኑ ቀረጣኑንኩ + አስታሃበእንዶ? 47 እለሙዕኔ ጠለ ጡምሴንተደ ዎሎ ኬኒች መ ዎይቴነን? ህካንዕኑ መገኑ አመዕንቱምቡ መኑሁ አስታሃ። 48 ህከኒ ሰማን ዮ አኑዕኔ ጡማንቹ እኮገን አዕኖኦቲ ጡማኑ እክዬ» ዬእ።
1 ዬሱሱንኩ «ደናምተ ሁጅተ ሁጀቴንተገ መኑ ጡጅ ገለጡንተዕኔ መን ብሬን ኣሲች ቆረጵዬ። ህካንመ አቴንተደ ሰሜ አኒችዕኔ መሃ ደቅቴነንተበአ። 2 ህከኒ አት ቡጢ ምጡዋተ ኣስታንት ጄቹተ ሳድጨማኑ መኑ ገለጡንተሰ ጠጵት ምናካን አስታሀንገ ብሬንተክ ጡሩምቡለ ቡስሲሶት። ገርተ ያንክዕኔ፤ እሶኦት ሁጄሰ ቆደ ኣቅቴእ። 3 እኮዳ አት ቡጥቺ ኣስታንት ጄቹተ መኬክ አንገት ኣስታኢ ጉረክ አንገቲ ደጉምቦገ ማጥ ኣስ። 4 ዳፉንኩስ ማጥ ኣስቶንቲ ደገኖ መገኑ ደናሜ ሁጄክ ቆደ ኣሰኖሄ» ዬእ። 5 ዬሱሱንኩ «መገኑ ኡጭቴነንተ ጃተ ሳድጨማንገ እኬኖችዬ። እሶኦንት ጠጵት ምናካኒ ዎቄ ቶቾኒ ኡርት መኑ ጡዱንተሰ መገኑ ኡጩ ኢትታእ። ገርተ ያንክዕኔ፤ እሶኦት ሁጄሰ ቆደ ኣቅቴእ። 6 መገኑ ኡጭታንት ጃተ ምንክ ኣግ ኡሩተ ጡፍ ማጭ ጡደኖ መገንበ ኡጭ። ህኩ ማጭ ጡደኖ አኑክ ሁጄክ ቆደ ኣሰኖሄ። 7 ኡጭቴነንተ ጃተ መገኑ ደጉምቦ መንገ ፈንቀላንስቴነን ጠለ ኡጭቴኖችዬ። ህኩ መኑ ሆለመ ኡጭቶተኔ መገኑ መጮጨኖሳ አት ቄራርስት ኡጭታእ። 8 አዕኖኦት እሶኦገ እኬኖችዬ። ህኩስን ክዕኔኤ አኑ ሀስሰኖዕኔረ ኡጭቴኑዕናችን ብርስ ደገኖ። 9 ህከኒ አዕኖኦት ‹ሰማን ዮንት ኒ አነ! ሙጩሩክ ሱዕሙ አቡን። 10 ዎሞመክ ዋልቱን። ሀሱክ ሰማን እኮገን ኡለ አሌኒ እሁን። 11 በሪ ሀስሳኔ እቸተ ኣስኔ። 12 ነኦት ዎሎ ኬን በእሱ አጉኖምገን ኒ በእሱሃ አጉርኔ። 13 ሂልማች ፈእስኔ በጋን ኬነንቻን ኣግሶትኔ። ዎሞመት፥ መቆሁ አብኑሁ ዶሊ ሆሪንከ ኬሳ እሁን፤ አሚዕን› ይቴን ኡጭዬ። 14 መን በእሱ ‹ፈኡን› ይቴንተደ ሰማን ዮ አኑዕኔ ክዕኔኤ በእሱሃ ‹ፈኡን› ያኖዕኔ። 15 እኮዳ መን በእሱ ‹ፈኡን› ይቴኑምቦደ ሰማን ዮ አኑዕኔ ክዕኔኤ በእሱሃ ‹ፈኡን› ያኖዕኔበአ» ዬእ። 16 ዬሱሱ «ጦንቴነንተ ጃተ ሳድጨማንገ ክቼኤኖችዬ። እሶኦንት ጦንታረ እኮገ መኑ ደጉንተ ሚንሰ ቡላልስታእ። ገርተ ያንክዕኔ፤ እሶኦት ሁጄሰ ቆደ ኣቅቴእ። 17 እኮዳ አት ጦንታንት ጃተ ሚንክ ኣዕልኒ ቡዕርኒ። 18 ህካን አቶንትደ ማጭ ጡደኖ አኒችክ በጋን ዎሉ አዪ ጡደኖበአ። ማጭ ጡደኖ አኑክ ሁጄክ ቆደ ኣሰኖሄ» ዬእ። 19 ዬሱሱ «ሞገኣኑ ቢጭ ኣግ ሞገአኖባን፥ ብሉ እተኖባኒ ቡክ በአኖባኒ ግዘዕኔ ኡለ አሌን ጠጰቴኖችዬ። 20 ጠሁ እኮዳ ብሉ እቱምቦባን፥ ቡክ በኡምቦባኒ ሞገኣኑ ቢጭ ኣግ ሞገኡምቦ መዕኔኒ ሰማን ግዘዕኔ ጠጰእዬ። 21 ህከኒ ግዙክ ዮባን ዎዘኑክ ሄአኖ» ዬእ። 22 ዬሱሱንኩ «እልክ አልክየ ጫከ። እልክ ፈየተ እኮደ አሉክ ሆሩንኩ ጫከኖ። 23 እልንትመ ፈየተ እኩምቦደ አሉክ ሆሩንኩ ቱንሰኖ። ህከኒ ኬሳን ዮ ጫኩ ቱንሴደ ቱንሱስ ሀበንከ ቃረተ እካእ?» ዬእ። 24 አሞ ዬሱሱ «መቱ መንቹ ለሞ ቀርቺ ጠቀሞተ ደንደኖበአ። መቱስ ኢተኖ፤ ዎሉስ ግበኖ። እንዶ መቱስ አብሰኖ፤ ዎሉስ ገደኖ። ህትጉንተ መገኒሃ ግዚሃ ጠቀሚ ደንድቴነንተበአ። 25 ህከኒ አን ኩላንክዕኔ ‹መ እንታም? መ አንጋም? መ ኦደቅናም?› ይቴን ሄቸዕኔተኔ ክቼኤኖችዬ። እቻች ሄቸት አሞ ኦድሻች መኖመት አብታበእንዶ? 26 ሀኖ ሰሜን ቡርታ ጪአተ ጡጅዬ። እሶኦት ውጣበአ፤ ሀጢዳበአ። ቀቾኒ ዎርታበአ። ጠሁ እኮዳ ሰሜ አኑዕኔ እትሰኖሰ። ህካን እኮች አዕኖኦት ጪኣች አብቴነንተበእንዶ? 27 ክዕኔኤች ክቼኢን ሄቸስ ዶላን መቱ በር በርጊ ደንደኖ አዬት? 28 አሞ ሚሃት ኦድሻ ክቼኤነዮንታ? ሀኖ ሀደ ዮ ዘራሩት ሌኣገ ጡጅዬ። ገጊሀንሰ ሁጀታበአ እንዶ ሱቅታበአ። 29 አን ኩላንክዕኔ፤ ሆረን ዎሙ ሰለሞኒ + ህከን ሆራንከ አብኔንተስ ተን ዘራሮች መቴስጋ ኦደቅምበአ። 30 መገኑ ከበር ጡደንት ገኣተ ጊረ ቡባ ህጤ ህትጉተ ኦዲሰኖ እኮች አዕኖኦት አመዕነቱ ኮቼዕኔሩ ክዕኔኤዕኑ አብሽ ኦዲሰኖዕኔ። 31 ህከኒ ‹መ እንታም? መ አንጋም? መ ኦደቅናም?› ይቴን ክቼኤኖችዬ። 32 ህካንዕኑ መገኑ ደጉምቡ መኑሁ ሀሳእ። ክዕኔኤ ህኩ ሆሩንኩ ሀስሰኖዕኔገ ሰሜ አኑዕኔ ደገኖ። 33 አዕኖኦት እኮዳ ብርስቴን መገን ዎሞመታ ሙጩርመሲ ሀሽዬ። ፈኦሩ ሆሩሩንኩ በርገመኖክዕኔ። 34 አሞ ገኣ ይቴን ክቼኤኖችዬ። ገኣ ገኣንት ክቼኣእ። በሪሀንስ በሬስ ክቼቹንኩ እሀኖስ» ዬእ።
1 ዬሱሱንኩ «ፍርደሙምቦዕኔገ ፍርድቴኖችዬ። 2 ዳፉንኩስ አዕኖኦት ፍርድቴንተገንከ ፍርደመኖክዕኔ። ህትጉንተ ኬንቴነንተ ኬነንቾን ኬነመኖክዕኔ። 3 ኪ እሌን ዮ ጌዴለ ጡዱዕናን ሚሃት ኪ ህዜ እሌ ኣዜን ዮ ሀጭቹ ጡዳንቲ? 4 አሞ ኪ እሌን ዮ ጌዴለ ከንቱዕናች ኪ ህዞ ‹ሀኖ እሌንተክ ዮ ሀጭቹ ፉሻንኬ› ዪ ሀትተ ደንድተን? 5 አት ሳድጨማንቹ! ብርስት እሌንተክ ዮ ጌዴለ ፉሽ። ህከኒች ዘኪን ህዜክ እሌን ዮ ሀጭቹ ፉሽቶተ ቆርስት ጡዳንት። 6 ኬሰሞረ ዎሻ ኣስቴኖችዬ። አሞ ሎካንተሰ ሃንቱምቦገ ዎርቀ ቦኬ ብሬን ኡጅቴኖችዬ። እሶኦንት ፈንቀልት ጌንታዕኔ» ዬእ። 7 አሞ ዬሱሱ «ጠዕምዬ ኣቅቴነንተ። ሀሽዬ ደቅቴነንተ። አሞ ጎጨ ቆጭዬ ፈነመኖዕኔ። 8 ህከኒ አዪ ጠዕሜደ ኣቀኖ። አዪ ሀሾደ ደቀኖ። አሞ አዪ ጎጨ ቆጬደ ፈነመኖስ። 9 ክዕኔኤች አዪ ቤቱስ እቸተ ኡጬደ ክኑ ኣሰኖ አዬት? 10 አሞ ማለ ኡጬደ ዎሪቹ ኣሰኖእንዶ? 11 አዕኖኦት ሂላከተ እኬነን ኦሶሀዕኔ ደናሙ ኣሰንቸ ኣሱ ደጌንታች ሰማን ዮ አኑዕኔ ኡጭታ ኬኒ ደናሙረ አብሽ ኣሰኖበእንዶ? 12 ህከኒ መኑ አሱንተዕኔ ሀሴነንተረ ሆረንከ አዕኖኦቲ እሶኦ ህትጉንተ አስዬ። ሴራን የመሞሁ ህራጋኑ ኩልቶኢሁ ህከኔት» ዬእ። 13 ዬሱሱ «ጡቀ ጎጪን ኣግዬ። ዳፉንኩስ በእበ መሰኖ ጎጩ ሀራራ። አሞ ዎቆሲ አባ። ህከኒን መረመኖ መኑ በትናሻ። 14 እኮዳ ሄቸበ መሰኖ ጎጩ ጡቃ። አሞ ዎቆሲ ቃራ። ህካንን ደቀኖ መኑ ቀ» ዬእ። 15 ዬሱሱ «አዕኖኦት ቆጰን ህራጋኒች ቆረጵዬ። እሶኦንት ክዕኔኤበ ሆለተ አጉድ ዋልታእ። እኮዳ ኣዙሰ መቄስ እታ ኦሮገ ዮሃረ። 16 እሶኦንተ ሁጄሰ ላሎን ደጌነንተ። ኡት ሀቂች ዎይን ላሉተ አሞ ጩኢች ኦዴ ላሉተ መጤኖበአ። 17 ህትጉንተ ደናሙ ሀቁ ደናምተ ላሉተ ላለኖ። እኮዳ ፈሩ ሀቁ ፈረተ ላሉተ ላለኖ። 18 ደናሙ ሀቁ ፈረተ ላሉተ ላሊ ህትጉንተ ፈሩ ሀቁ ደናምተ ላሉተ ላሊ ደንደኖበአ። 19 አሞ ደናምተ ላሉተ ላሉምቡ ሀቀ ሆረንከ ሙሬን ጊራን ቡሴኖ። 20 ህከንገን ቆጰን ህራጋኑ ሁጄሰ ላሎን ደጌነንተ» ዬእ። 21 ዬሱሱ «ሰማን ዮ ኢ አን ሀሱ ዊንሸኖሀኒች በጋን ‹ቀርቾ! ቀርቾ!› ያኖኤ ሆሩንኩ ሰሜ ዎሞመተ ኣገኖበአ። 22 ፍርድ በር ሆለሙ መኑ ‹ቀርቾ! ቀርቾ! ሱዕሚንተክ ህራገ ጠሃንምበእንዶ? ሱዕሚንተክ ሀቡሰ ፉሽንምበእንዶ? አሞ ሱዕሚንተክ ሆለመተ ማለሉተ አስንምበእንዶ?› ይታእ። 23 ህተ ጄቹተ ‹አን ሆረን ደጋንክዕኔበአ። ኩ ሾካከት ኤሳች ቄዕርዬ!› ያንሰ» ዬእ። 24 ዬሱሱ «ህከኒ አዪ ተ ኢ ላገተ መጮጭ ቆረበኖ መንቹ ምንስ ክን አሌን መክሽ ቃረገ ምኖ ቆረ መንቹ አጉደኖ። 25 ምንስ አሌን ጤኑንኩ ኡቦ። ዞፉንኩ ዛጆ። አሞ ቦብሩንኩ ጎምቤእ። እኮዳ ምኑስ ክን አሌን ምነሞተኔ ኡብምበአ። 26 እኮዳ ተ ኢ ላገተ መጮጭ ቆረቡምቡ መንቹ ምንስ ሻፍ አሌን ምኖ ቀሉ መንቹ አጉደኖ። 27 ምንስ አሌን ጤኑንኩ ኡቦ። ዞፉንኩ ዛጆ። አሞ ቦብሩንኩ አብሽ ጎምቤሃን ምኑስ ሻፍ አሌን ምነሞተኔ ኡቦ። ኡቡንኩስ አበ እኮ» ይ ሮስሼእ። 28 ዬሱሱ ህካን ሮስሽ ጦፎ ጃተ እስ ሮስሾራን ምናደቡ አብሽ ማለሎ። 29 ዳፉንኩስ እሶኦተ ሮስሾ ገሻንየገ በጋን ሴር ሮስሳንየገበአ።
1 ዬሱሱ ዱኒች ድሬ ጄቹተ ሆለሙ መኑ አወንቶስ። 2 ህተ ጄቹንተ አበሉ + አፌስ መቱ መንቹ ዬሱስበ ዋሎ። እስን ብሬንተስ ጉሉጵ «ቀርቾ! ሀሶንትደ ሙጩርስቶኤተ ደንድታንት» ዬእ። 3 ዬሱሱንኩ አንገስ ብድቀእ ህከ መንቹ አፍኬእ «ሀሳም፤ ሙጩር» ዬእ። ህተ ጃንተ ህኩ አበሉ አጉሮስ። 4 ህከ መንቹ ዬሱሱ «ከ ጠሀ አዬኒ ኩልቶት። ጠሁ እኮዳ ቴሱ መርት ፈይቶንትገ ቄስቺ + ጡድስ። አሞ መኒ ሆሪንከ ነቃሸ እሁንተ ሙስ + አዘጆገን መገኒ ክትመ ህንጨእ» ዬእ። 5 ዬሱሱ ቅፍርናሆም ከተመ ኣጎ ጃተ መቱ ጥቤ መን አዘዛንቹ ዬሱስበ ዋል 6 «ቀርቾ! ሶቀማንቹኤ ሺክ አብሽ ሀወን ምኔ ኦሰኤእ» ዬእ። 7 ዬሱሱንኩ «አን መር ፈይሳንስ» ዬስ። 8 እኮዳ ጥቤ መን አዘዛንቹ «ቀርቾ! አት ኢ ምን ኣጉንተ አን ሀስሼምየ መንቹበአ። ጠሁ እኮዳ ላጋንተክ ጠሊን አዘዞንትደ ሶቀማንቹኤ ፈየኖ። 9 አን ገጉንኩኤ ኤሳች አሊን ዮ ገሻኒ አዘዘማምየ። አሞ ኤሳች ዎሮዲን አን አዘዛንሰሩ ዮኤየ። መቱስ ‹ህከበ መር› ዬምደ መረኖ። ዎሉስን ‹ከበ ዋል› ዬምደ ዋለኖ። ኢ ሶቀማንቹንኩ ‹ካን አስ› ዬምደ አሰኖ» ይ ፈንቀሼእ። 10 ዬሱሱ ህካን መጮጬ ጃተ ማለል አወንቶስ መኒ «ገርተ ያንክዕኔ፤ ህትጎነ አመዕነቱ እስራኤላኒ ደግምበአ። 11 ከ ጠሀ ዘህጭዬ። ሆለሙ መኑ አርፉልነ አራግ ዉዲች ዋልት ሰሜ ዎሞማን አብረሃሜን፥ ይሳቄኒ + ያቆቤኒ + ሜጡ እክ ማዳን አፉዕልታእ። 12 ሰሜ ዎሞመተ ረገኡ ሀስሰኖሰረ ሀደ ቱንሶ ኣዜን ኡጄናንሰ ህከኔ ያረነታ እንቁተ ኢጡሃ እሀኖ» ዬሰ። 13 ዬሱሱ ጥቤ መን አዘዛንቹ «መር፤ አመዕንቶንትገ እሁንኬ» ዬእ። ሶቀማንቹንኩስ ህተ ጃንተ ፈዬእ። 14 ዬሱሱ ጴጥሮሴ ምን ኣገኖደ ጴጥሮሴ በሉት ኢቢን ሞስ ኦሰኦገ ጡጆ። 15 እስን አንገሴ ኡሎ ጃተ ኢቡ አጉሮሴ። እሴን ጦቅት ኮህሶስ። 16 ህከ በሬ ሀወሩንተ ሆለሙ መኑ ሀቡሱ አፎ መነ ዬሱስበ ዋሽቶእ። ዬሱሱ ላጋንተስ ሆለመ ሀቡሰ ፉሼእ። አሞ ሞሳኑ ሆረንከ ፈይሾ። 17 ህካን አሴኢ ህራጋንቾ እስያሴን «እስን ሆንግኔ ኣቄእ፤ ሞሱኔን እዬእ» ዬኢ ዊሙንታት እኬ። 18 ዬሱሱ ሆለሙ መኑ ሄጌጎንተስ ጠጵዬኢ ጡጆ ጃተ «ከን በሃሪች ዉዱ ቶልዬ» ይ አዘጆ። 19 ህከኒች ዘኪን ሴር ሮስሳኒች መቱ ዋል «ሮስሳንቾ! አት መርታንትበ ሆረንከ አወናንኬ» ዬእ። 20 ዬሱሱንኩ «ዌንጌሬሊ ኤሎ ዮሰ። ሰሜ ጪኣንከ ዶዕኑ ዮሰ። እኮዳ መንች ቤቱ + ጎበስ ኣግጨኖቡ ዮስበአ» ዬሰ። 21 ዎሉ አሞ አወናኒችስ መቱ «ቀርቾ! ብርስ መር አነኤ ሞጉንተ ስናበቴኤ» ዬስ። 22 እኮዳ ዬሱሱ «ሬቶረ ሬቶሩንኩ ሞጉን። አት ኤስ አወኔኤ» ዬስ። 23 ህከኒች ዘኪን ዬሱሱ ጀልባን ኣጎ ጃተ አወናኑሲ በርገንት ኣጎእ። 24 ቃሩ ቦብሩ በሃር አሌን ኬእየን ዎእ ዎርጃሙ ጀልበሰ ማጢ እኮ። እኮዳ ዬሱሱ ግሼ እኬ። 25 አወናኑንኩ ዬሱስበ ህንጭት «ቀርቾ! በዕነዮም ፈእስኔ» ይት ግሰናች ኬእሶስ። 26 ዬሱሱንኩ «አዕኖኦት አመዕነቱ ኮቼዕኔሩ! ሚሃት ዋጅቴነዮንታ?» ዬሰ። ህከኒች ዘኪን ዬሱሱ ጦቅኬእ ቦብሩሁ ዎኡሁ አጉርታጊ አዘጅየን አቡ ሰዕምቱ እኮ። 27 መኑንኩ አብስ ማለልት «ቦብሩሁ በሃሩሁ ፈኡዕነ አዘዘመኖሲ ኩን ሀትጎና መንቹ?» ይቶእ። 28 ዬሱሱ ገሊል በሃረ ቶል ጌርጌሶን ባዱ ዋሎ። ህከኔን ሀቡሱ አፌሰ ለሙ መንቹ ሞገመ ኣዚች ፉልት ደቀንቶስ። እሶኦንት አብስ ጌንታረ እኮተኔ ሀኩ መንቹሁ ህከን ዎቄን ህጊ ደንደኖበአ እኬ። 29 ህኩሩንኩ ያርተን «መገን ቤቶ! ኔሳሃ ኬሳሃ መ ሜጦመት ዮኔ? ጄቹት ኢልቱዕነን ሀውሶኔተ ዋልቴንትንዶ?» ይቶእ። 30 እሶኦች ቀሁንከ ቄዕረ ቤቾን ቦኬ + ዜመት ዜአንተዮ እኬ። 31 ሀቡሱንኩ «ፉሽቶንትኔች ህተን ቦኬ ዜማን ኣንጋምገ አስኔ» ይት ኡጭቶእ። 32 ዬሱሱንኩ «መርዬ» ዬሰ። ህከኒ ህከ መኒች ፉልት መርት ቦኬን ኣጎእ። ህት ቦኬ ዜመት ሆረንት ዱን ገቢች ፍሪጠን በሃራን ኣጎእ። 33 ህከኒ ቦኬ ዜማኑ ሁንት ከተመ ኣግ ሆረንከ ጠሀሃ ሀቡሱ አፎ ለሟንከ መንቾን እኮራ መኒ ኩልቶእ። 34 ህከኒች ዘኪን ህከን ከተም መኑ ሆሩንኩ ዬሱሰ ጡዲ መርቶእ። ጡዶስ ጃተ ባዲችሰ ኦሮቀኖገ ኡጭቶስ።
1 ዬሱሱ ጀልባን ኣግ በሃረ ቶል ገግስ ከተመ ፈንቀሎ። 2 ህከበንከ መኑ መቱ ሺኬ መንቹ ሀለቂን እይት ዋልቶእ። ዬሱሱንኩ አመዕነቱሰ ጡጅ «ኢ ቤቶ! ዋጅቶት። ባጢሉክ ፈኡን የመሜእ» ዬእ። 3 ህተ ጃንተ ሴር ሮስሳኒች መ-መቱ እስ-እሶኦንት «ኩ መንቹ መገኑ ቦሮረዮእ» ይት ዎዘናንተሰ ሰውቶእ። 4 እኮዳ ዬሱሱ ሰውተሰ ደግ «አዕኖኦት ሚሃት ዎዘናንተዕኔ ሂለረ ሰውቴነዮንታ? 5 ‹ባጢሉክ ፈኡን የመሜእ› ዩንዶ ‹ጦቅት ኡርት መረም› ዩ ቢለኖ? 6 ጠሁ እኮዳ መንች ቤቱ ኡለ አሌን ባጢለ ፈኡን ዮተ መቆ ዮስገ ደግዬ» ይኬእ ሺሀ መንቹ «ጦቅት መዕነክ እይት ምንክ ኦሮቅ» ዬስ። 7 መንቹንኩስ ጦቅይ ምንስ ኦሮቄእ። 8 ምናደቡንኩ ህካን ጡዶ ጄቹተ ዋጅት ህትጎነ መቆ መኒ ኣሴ መገኑ ገለጥቶእ። 9 ዬሱሱ ህከን ቤቺች ጦቅይ ኦሮቀን «ማቶሴ» ዬኖ ቀረጣንቹ ቀረጠ ኣቀኖ መዕኔን አፉዕሌሀኔን ጡጅኬእ «አወኔኤ» ዬእ። እስን ጦቅይ አወኖስ። 10 ዬሱሱንኩ ማቶሴ ምኔን ማዳን አፉዕሌሀኔን ሆለሙ ቀረጣኑሁ ባጢላመቲ ህከ ቤቹ ዋልት እሲኒ አወናኒንተሲ ሜጡ ማዳን አፉዕልቶእ። 11 ህካን ፋሪሰት + ጡድኬእ አወናኒሀንስ «ሮስሳንቹዕኔ ቀረጣኒኒ ባጢላማኒ ሚሃት እተዮኢ?» ይቶእ። 12 እኮዳ ዬሱሱ ህካን መጮጭ «አኪሙ ሀስሰኖ ሞሳኒሃት በጋን ፈየ መኒሃበአ። 13 መርቴን ‹ክትሚች + አብሽ ማረንቸ ኢታም› የመም ጣፈሞ መ ዩሃንዶ ቆርምቴን ደግዬ። አን ዋሎሚ ባጢላመት ባጢሊችሰ ፈንቀልቱንተ ገኦታት በጋን ሙጩረተ ገኦተ ዋልምበአ» ይ ፈንቀሼሰ። 14 ህተ ጃተ ዮሃንሴ አወናኑ ዬሱስበ ዋልትኬእ «ነኦቲ ፋሪሰቲ ጦመንየን ኪ አወናኑ ጦንቱምቡ ሚሃት?» ይት ጠዕምቶእ። 15 ዬሱሱንኩ «እዜቸኑ እሶኦን ሜጡ ሄአንየን ቦሎቸ ገአሞ ኮሁ ክቼአኖንዶ? ጠሁ እኮዳ እዜቸኑ እሶኦች አነነ እሀኖ ጃት ዋልታእ። ህተ ጃተ ጦንታእ። 16 አዪ ኑባቾ ኦድሻን ሃሮተ ቃፈተ ቃፈኖበአ። ቃፎደ ኦድሸስ ዘረንታእ። ዘረንቹንኩስ ዎናች ባሰ እሀኖ። 17 ህትጉንተ ሃሮ ዎይን + ዳጠ ኑባቾ ጨናን ዎሬኖበአ። ህኩስን ሃሮ ዎይን ዳጠ ኑባቾ ጨናን ዎሬመደ ጨነስ ዘረኖ፤ ዳጡሲ ዱነመኖ። ህከኒ ሃሮ ዎይን ዳጠ ሃሮ ጨናን ዎሬመደ ዳጡሲ ጨኑሲ ቆረበንታእ» ይ ፈንቀሼእ። 18 ዬሱሱ ህካን ጠሃቀንየን መቱ ገሻንቹ ዬሱስበ ዋል ብሬንተስ ሰገጅ «ቤቱኤ ቴመ ሬቴእ። ጠሁ እኮዳ አት ዋልት አንገክ + እሴ አሌን ኡጅቶንትደ ፈይታእ» ዬእ። 19 ዬሱሱ ጦቅይ አወናኒንተስን በርገም ህከ መንቹ አወኖ። 20 እሶኦንት መርተንየንን ቶነ ለሙ ዎጋ ኣዚችሴ ቄጉ ዛዘንየን ሀውተዮ እኬ መትት ሜንትቹት ዬሱስ ሺነ ዋልት ኦድሸስ ሉደ አንጋንተሴ ኡልቶእ። 21 ህካንን አቶኢ ዎዘናንተሴ «ኦድሸስ ሉደ ኡሎምደ ፈያም» ይቴት እኬ። 22 ዬሱሱንኩ ፈንቀል እሴተ ጡጅ «ኢ ቤቶ! ዋጅቶት። አመዕነቱክ ፈይሼሄ» ዬሴ። ህተ ጃንተ እሴ ፈይቶእ። 23 ህከኒች ዘኪን ዬሱሱ ገሻንች ምን ኢሌ ጃተ ኦነ ጡሩምቡለ ቡሰን ምን ኣዜን ኦአዮ መነ ጡጆ። 24 «ሆሩንኩዕኔ ከምቤቺች ፈጄ! ሜሴሌት ግሴ በጋን ሬትምበአ» ዬእ። እኮዳ እሶኦት ኦሰዕልቶስ። 25 መኑ ፉሎሀኒች ዘኪን ዬሱሱ ሜሴሌ ሬሹ ዮበ ኣግ አንገሴ አፎ ጃተ ጦቅቶእ። 26 ጠህስ ዱዱቡ ህከን ባዶን ሆራንን መጮጨሞ። 27 ዬሱሱ ህከምቢች ጦቅይ ኦሮቀንየን ለሙ ቆቁ መኑ አበ ላጋን «ዳዊቴ ቤቶ! ሀእ ቅሽጥኔ» ይተን አወንቶስ። 28 ዬሱሱ ምን ኣጎ ጃተ ህኩሩ ብርስ ህንጭትየን «አን ካን አሲ ደንዳምገ አመዕንቴነንንዶ?» ዬሰ። እሶኦንት « ቀርቾ! አመዕንናም» ይት ፈንቀሽቶእ። 29 ህተ ጃንተ ዬሱሱ እልሰ አንጋንተስ አፍ «አመዕነትዕኔገ እሁንክዕኔ» ዬሰ። 30 እላከንትሰ ፈነንቶእ። ዬሱሱንኩ «አዬኒ ኩልቴኖኮንተ» ይ ቃርስ አዘጆሰ። 31 እኮዳ እሶኦት መርትኬእ ህከን ባዶን ሆራንን ዬሱስ ዱዱቡ ኩልቶእ። 32 ህኩ እላከሰ ፈነንቶ መኑ ፉልት ኦሮቅቶገን ሀቡሱ አፌስ ዱደ መንቹ ዬሱስበ ዋሼመ። 33 ሀቡሱ ፉሎሀኒች ዘኪን ህኩ ዱዱ መንቹ ጠሃቁ አፎ። መኑንኩ «ህትጎነ ጠሀ እስራኤል ባዶን ሆረን ጡንድ ከሰበአ» ይት ማለልቶእ። 34 እኮዳ ፋሪሰት «እስ ሀቡሰ ፉሸኖ ሀቡስ ዎም መቄኔት» ይቶስ። 35 ዬሱሱ ጠጵት ምናን ሮስሰን፥ መገን ዎሞመ ምሽራች ላገተ ኩለኒ ምናደበ ሆንጌቺ ሞሲቺ ሆሪችን ፈይሰኒ ከተመሃ ኦሎሃ ሆረንከ መረን ሮስሰዮ እኬ። 36 እስን ምናደቡ ዜማንቹ ዮበእ ሆለገ እክ ካዕለኖ ሆግ ሀወዮኢ ጡጆ ጃተ ቅሽጤሰ። 37 ህከኒ አወናኒሀንስ «ሀጢዴኖስሩ ሆለማ። እኮዳ ሁጀታኑስ ቀ። 38 ህከኒ ሀጢድስ አኑ ሀጢዲሀንስ ሁጀታኑ ሶሁንተ ኡጭዬ» ዬሰ።
1 ዬሱሱ ቶነ ለሙንከ አወናኑስ እስበ ገእ ሀቡሰ ፉሽቱንታ ሞሲቺ ሆንጌቺ ሆሪችን መነ ፈይሱንታ መቆ ኣሴሰ። 2 ቶነ ለምሰ ሱዕሙንኩ ከኒች ዎሮዲን ጣፈሜእ። እሶኦንት፦ «ጴጥሮሴ» ዬኖ ስሞኔት፥ ህዞሃንስ እንድራሴት፥ ዘብዶሴተ ኦሱ ያቆቤቲ ዮሃንሴቲ፥ 3 አሞ ፍልጶሴት፥ ባርቶሎሞሴት፥ ቶማሴት፥ ቀረጣንቾ ማቶሴት፥ እልፎሴየ ቤቱ ያቆቤት፥ + ታዶሴት፥ 4 ባዱስ ኢተኖ ስሞኔቲ ዬሱሰ ህግሽ ኣሴ አስቆሮንቶ ይሁዳቲ + እኬ። 5 ዬሱሱ ህከ ቶነ ለሙንከ አወናኑ «አይሁደ እሁምቦ መንበ መርቴኖችዬ። አሞ ሰማር ከተመ ኣጌኖችዬ። 6 ህከን ቆደ ሆለገ በኦ እስራኤል ምናደብበ መርቴን 7 ‹ሰሜ ዎሞመት ህንጭቴእ› ይቴነን ኩልዬ። 8 ሞሳኑ ፈይሽዬ። ሬቶ ኬኑ ሬሆች ኬእሽዬ። አበሉ ዮሰ መነ ሙጩርስዬ። ሀቡሰ ፉሽዬ። ጠለ ኣቅቴንታ ጠለንከ ኣስዬ። 9 ዎርቀ፥ ብረሃ ቡሬቹሃ ቆራንተዕኔ አፌኖችዬ። 10 ዎቄሀንክዕኔ ከረጢተ እንዶ ለሙ ቀምቢሰ እንዶ ጫመ እንዶ ብጡ አፌኖችዬ። ዳፉንኩስ ሁጀታንቺ እቸት ሀስሳስ። 11 አዕኖኦት መርቴን ኣጌንተ ከተማን እንዶ ኦሎን ክዕኔኤተ ኣቂ በጅቀመኖ መንቹ ቆርምቴን ደግዬ። ህከ ቤቹ አጉርቴን ኦሮቅቴነንቀጤች ህከን መንችባን ኤጌርዬ። 12 ምን ኣጌነን ምንስ መነ ‹ጡመ› ይዬ። 13 ምንስ መኑ ጡመዕኔ ኣቄደ ጡሙዕኔ እስ አሌን እሁን። እኮዳ ጡመዕኔ ኣቁ ግቦደ ጡሙዕኔ ክዕኔኤንከ ፈንቀሉን። 14 ኣቁምቡዕኔሁ ላገዕኔ መጮጩምቡሁ አዪ ሄኦደ ህከ ምን እንዶ ህከ ከተመ አጉርቴን ፉልቴነንተ ጃተ ሎከዕኔ ቡሁተ ቀምበቅቴን ፉልዬ። 15 አን ገርተ ያንክዕኔ፤ ፍርድ በር ህከን ከተሚች አብሽ ሶዶምነ + ጎሞር ባዲ ቢለኖ» ይ አዘጅ ሶኮ። 16 ዬሱሱንኩ «ህኩዕኒን፥ ፉሽ ሆለገ ኦሮ ሜሬሩ ሶሃንክዕኔ። ህከኒ ዎርገ ቆራከተ ሀንደሬገ ማሻከተ እክዬ። 17 ጠሁ እኮዳ ዳናከበ ህግሴን ኣሴኖክዕኔ። ጠጵትሰ ምኔን ኦሌኖዕኔ። ህከኒ መኒች ቆረጵዬ። 18 ኢ ሱዕምተኔ ባድ ገሻንባ ዎማከ ብርታ መሴኖዕኔ። አዕኖኦንት እሶኦሃ አይሁደ እኩምቦ መኒሃ ነቀሴነንተ። 19 መኑ ፍርድበ ህንጨኤዕኔ ጃተ ጠሃቴነንተሩ ህተ ጃንተ ኣሰመኖዕኔተኔ ‹ሀትተ?› እንዶ ‹መ ጠሃናም?› ይቴን ክቼኤኖችዬ። 20 ዳፉንኩስ ክዕኔኤ ኣዜን እክ ጠሃቀኖ መገንየ አያነ በጋን ጠሃቴነንተሩ አዕኖኦታበአ። 21 መኑ ገግስ ህዞ ሬሆ ህግሽ ኣሰኖ። አኑ ቤቱስ ሬሆ ህግሽ ኣሰኖ። ኦሱንት አናከሳ አማከሳ ግብ ሽታእ። 22 ሆሩንኩ መኑ ኢ ሱዕምተኔ ግበኖዕኔ። እኮዳ ዘካንቹ በሩ ኢለንቀጤች ደንዴኢ ፈአኖ። 23 መቶ ከተሚች ያዬን ሸሬመዕኔደ ዎሉ ከተመ ሁንዬ። አን ገርተ ያንክዕኔ፤ መንች ቤቱ ዋለንቀጤች እስራኤል ከተማከተ ሆረንተ ኢልቴነንተበአ። 24 ሮሰኖ ሮስሰኖስሀኒች አሞ አላንቹ ቀርቺችስ አበኖበአ። 25 ህከኒ ሮሰኖ ሮስሰኖስሀንገ አሞ አላንቹ ቀርችስገ እኮች እሀኖስ። እኮዳ ምንስ አነ ‹ቤልዜቡሌ› + ዬን ገኤማች ምንስ መነ ህከኒች ሂለ ሱዕሚን ገኤኖበእንዶ?» ዬእ። 26 ዬሱሱ «አቼ መነ ዋጅቴኖችዬ። ዳፉንኩስ እፍሰሞ ፈነሙዕነ አሞ ማጠሞ ለሉዕነ ፈአኖበአ። 27 አን ቱንሶን ኩላንክዕኔረ አዕኖኦት ጫካን ኩልዬ። አሞ ሀሻሼነንየን መጮቴንተረ ጦቅቴ መዕኔን ፉልቴን አዋጅዬ። 28 ማለ ሽታረ እኮዳ ፎል ሺ ደንድቱምቡረ ዋጅቴኖችዬ። ጠሁ እኮዳ ማለሃ ፎልሃ ጠእቱምቦ ጊራን ኡጂ ደንደኖ መገኑ ዋጅዬ። 29 ለምት ጣፉሉቅቹት መቴ ሰሙኔን ህረንታሃበእንዶ? እኮዳ ሰሜ አኑዕኔ ዩምቡች እሶኦች ሆረን መትት ጣፉሉቅቹቲ ኡለ ኡብ ሬታበአ። 30 ክዕኔኤቢዕኑ ሙምዕኔ ዱጥቹሁ ፈኡዕናች ዎልሰሜሃ። 31 ህከኒ ዋጅቴኖችዬ። አዕኖኦት ሆለመ ጣፉሉቄኤች አብቴነንተ። 32 መን ብሬን ኢተኔ ነቀሰኖሀኒ ሆሪንከ አንን ሰማን ዮ አንኤ ብሬን ነቀሳንስ። 33 እኮዳ መን ብሬን ካደኖኤ ሆረንከ አንን ሰማን ዮ አንኤ ብሬን ካዳንስ» ዬእ። 34 ዬሱሱ «አን ኡለ አሌን ጡመ ኤቦተ ዋሎሚ አጉዱንከዕኔ። አን ዋሎሚ በገዙ ኤቦታት በጋን ጡመ ኤቦታበአ። 35 ዳፉንኩስ ቤቱ አኒን አሞ ቤቱተ አማንተሴ ቤትቢተ በሎንተሴ በአንሶተ ዋሌም። 36 መኒ ዲኑ ገግስ ምን መነ እሀኖ። 37 ሀኩ መንቹሁ አነሲ አመሲ ኤሳች አብሽ ኢተኖ ኤሳ እሆተ ሀስሰኖበአ። አሞ አዪ ቤቱስ እንዶ ቤቱተ ኤሳች አብሽ ኢተኖ ኤሳ እሆተ ሀስሰኖበአ። 38 አዪ ገግስ መስቀለ + እይ አወኑምቦኤደ ኤሳ እሆተ ሀስሰኖበአ። 39 ፎልስ ፈእጪ ሀሰኖ አዪ በእሰኖ። እኮዳ ፎልስ ኢተኔ በእሰኖ አዪ ፈእጨኖ። 40 ክዕኔኤተ ኣቀኖ አዪ ኤስን ኣቀኖ። ኤስ ኣቀኖ አዪ ኤስ ሶኮሃ ኣቀኖ። 41 ህራጋንቹ ህራጋንቹ እኮተኔ ኣቀኖ ህራጋንች እርፉተ ደቀኖ። ሙጩሩ ሙጩሩ እኮተኔ ኣቀኖ ሙጩር እርፉተ ደቀኖ። 42 ገርተ ያንክዕኔ፤ ኢ አወናንቹ እኮሀኒ ከን ቀቀሃኒች መቲሀንስ መቶ ቡርጩቅ ስገ ዎአሃ ኣሴኢ አዪ እርፉስ ደቁዕነ ፈአኖበአ» ዬእ።
1 ዬሱሱ ቶነ ለሟንከ አወናኒሀንስ አወንታ አዘዙተ ኣስ ጦፎሀኒች ዘኪን ህከቤቹ አጉር ከተማካንተሰ ሮስሶታ ሰበኮታ ኦሮቄእ። 2 ህተ ጄቹተ ጠመቃንቹ ዮሃንስ ኡሱሮ ምኔን ሄአን ክርስቶስ ሁጄተኔ መጮጭ 3 « ‹ዋለኖ› ዬማ አቴትንዶ? ዎሉ ቆረጵኑ?» ይ አወናኑስ ዬሱስበ ሶኮ። 4 ዬሱሱንኩ «መርቴን ጡዴንተራ መጮቴንተራ ዮሃንሴ ኩልዬ። 5 ህኩዕኒን፥ ቆቃከት ጡደዮእ። ሺሃከት ጠብት መረንተዮእ። አበላመት ሙጩርተዮእ። ደንቃከት መጮተዮእ። ሬቶ ኬኑ ሬሆች ኬአዮእ። ቡጢ ምሽራች ላገት ኩለንተዮእ። 6 ኤሳን መለሙምቡ ማሰአሜሃ» ዬእ። 7 ዮሃንሴ አወናኑ ኦሮቅቶገን ዬሱሱ ህከኔ ጠጵዬ ምናደቢ ዮሃንሴተኔ ጠሃቀን «መ ጡዲሃት ኡለ ኡዱመአ ፉልቴንታ? ቦብሩ ሌንቄቅሰኖ ሾምቦቁ ጡዲሃትንዶ? 8 መ ጡዲሃት ፉልቴንታ? ደናምተ ኦድሸተ ኦደቄ መነ ጡዲሃትንዶ? ደናምተ ኦድሸተ ኦደቅታ መኑዕኑ ሄኣኢ ዎማከ ምኔኔት። 9 ህከደ መ ጡዲ ፉልቴን? ህራጋንቹ ጡዲሃትንዶ? ፥ አን ያንክዕኔ፤ ህራጋንቺችን አበኖ ጡዲሃት። 10 ‹ህኩዕኒን፥ ዎቃክ ቅጠንሰኖ ሶቀማንቹኤ ብሬንተክ ሶሃም› የመም እስተኔ ጣፈሞ ከኔት። 11 ገርተ ያንክዕኔ፤ ተን ኡለ አሌን እለሞ መኒች ሆሪችን ጠመቃንቾ ዮሃንሴች አበኖ ዮበአ። ጠሁ እኮዳ ሰሜ ዎሞማን ሆሪችን ቀሁ እሲች አበኖ። 12 ጠመቃንቾ ዮሃንሴ ጄቾች አፍ ከበሬ ኢለንቀጤች ሾኩ መኑ ሰሜ ዎሞመተ መቄን ኣቂ ቃረገ ጎምበቀንተዮእ። 13 ህራጋኑሁ ሴሩሁ ሆሩንኩ ጠመቃንቾ ዮሃንሴ ጄቹት ኢልተንቀጤች ህራጌእ። 14 አቼ ኣቂ ሀሴንተደ ‹ዋለኖ› የመሞ ኤልያስ + ከኔት። 15 መጮታ መጨት ዮሲ መጮጩን። 16 ጠሁ እኮዳ ከ ዶል መነ ሚን አጉዲሳም? እሶኦንት ድኮ መዕኔን አፉዕልት ገአቀንተን 17 ‹ገምባብየ ቡንሶንክዕኔደ አለጵቴንምበአ። አሞ ኦዕኖምደ አዌሴንምበአ› ይተን አለጵታ ኦሱተ አጉዳእ። 18 ዳፉንኩስ ዮሃንስ እቱዕና አጉዕና ዋሎደ ‹ሀቡሱ አፌስ› ዬመ። 19 መንች ቤቱ እተኒ አገኒ ዋሎደ ‹ኩ መንቹ ድምባንቿኒ ቦንጫሟኒ። አሞ ቀረጣሪሃ ባጢላማሃ ጃላ› ዬመ። አቼ ቆርመት ሁጄንተሴ ለልታእ» ዬእ። 20 ዬሱሱ ሆለመተ ማለሉተ አሴ ከተማከተ ባጢሊችሰ ፈንቀሉ ግቦተኔ ዎቀሱ አፎ። 21 «ኣዬ ኮራዜ! ኣዬ ቤተሰይደ! ክዕኔኤ አሰንቶ ማለሉት ጢሮስነ ሲዶን ከተሚ አሰንቴ እክየን ህኩ መኑ ብርስትን ጥጅ ኦድሸተ ኦደቅት ጠበሩ አሌንተሰ ዎዕርት ባጢሊችሰ ፈንቀልቶገ ጡድሳ እኬ። 22 ጠሁ እኮዳ አን ያንክዕኔ፤ ፍርድ በር ክዕኔኤች አብሽ ጢሮስነ ሲዶን ከተም መኒ ቢለኖስ። 23 አት ቅፍርናሆም ከተሙ! ሰማ ኢለንቀጤች ጦቅ ጦቅትንዶ? ስኦላን + ድርታንት። ኬሳን አሰንቶ ማለሉት ሶዶም ከተማን አሰንቴ እኬራን ህኩ ከተሙ ከበሬ ኢለንቀጤች በአኖበአ እኬ። 24 አን ገርተ ያንክዕኔ፤ ፍርድ በር ኬሳች አብሽ ሶዶም ባዲ ቢለኖ» ዬእ። 25 ህተ ጃተ ዬሱሱ «ሰሜነ ኡለ ቀርቹ እኮንት ኢ አነ! ካን ቆራካቺ መሌሳቺ ማጥ ጪላ ለሊሶንትሀኒ ገለጣንኬ። 26 ፥ ኢ አነ! ኪ ደናሙ ሰውቱ ህትጎና። 27 ኢ አኑ ሆረረንከ ኣሴኤ። አኒች ህግየን ቤቱ ደገኖ ሜጡሁ ዮበአ። ህትጉንተ ቤቲቺ ቤቱ ለሊሶስተ ዶዕሬ መንቺቺ ህግየን አነ ደገኖ ዮበአ። 28 አዕኖኦት እይነት ኬዕምትየን ሆጌንተ ኬኑ ሆሩንኩ ኢበ ዋልዬ። አን ፎሎጭሳንክዕኔ። 29 ኢ ሀርቆተ እይዬ። ኤሳችን ሮሽዬ። አን ቢዛኒ ቅሽጣምየኒ። ፎሊሀንክዕኔ ፎሎጩ ደቅቴነንተ። 30 ሀርቆቱኤን ኬዕሙምቧ። እይነኤን ቢላሸተ» ዬእ።
1 ዬሱሱሁ አወናኑሲ ሰንበት + በሬን ውጠ ኣዚን ህገዮ እኬ። አወናኑስ ጎሬኮተኔ ሀማሞች ጠንቅስ ቁስት እቱ አፎእ። 2 ፋሪሰት ህካን ጡዶ ጃተ ዬሱሰ «አወናኑክ ሰንበት በሬን አሱ ሀስሱምቡረ አስታገ ጡድ» ይቶእ። 3 ዬሱሱንኩ ፈንቀሽ «ዳዊቲ እሲን ዮ መኑሁ ጎሬኮ ጃተ ዳዊት አሴረ አነበቤንምበእንዶ? 4 መገን ምን ኣግ ቄሳካች ህግየን እስ እንዶ እሲን በርገንት ዮ መኑ እቱንተ ኣሰንቱምቡሰ መገኒ የመንቶ ዳቡተ እቶእ። 5 አሞ ቄሳከት ሰንበት በሬን መገን ምኔን ሁጀተን ሰንበት ሴረ ዝርቶዳ በእሱ እሁምቦሰገ ሴራን ጣፈሞ አነበቤንምበእንዶ? 6 አን ኩላንክዕኔ፤ መገን ምኒች አበኖ ከኔ ዮእ። 7 ‹አን ክትሚች አብሽ ቅሽጡ ኢታም› ዩ መ ዩሃንዶ ዘህጭቴንተ እክየን በእሱምቦ መን አሌን ፍርድቴነንተበአ እኬ። 8 እኮዳ መንች ቤቱ ሰንበት በሬየ ቀርቹ» ዬእ። 9 ዬሱሱ ህከበ አጉር ጠጵትሰ ምን መሮ። 10 ህከኔን መቱ አንገተ ሺኬ መንቹ ዮ እኬ። እሶኦንት ኦዶስተ ሀስ «ሰንበት በሬን ፈይሱ ሀስሰኗንዶ?» ይት ዬሱሰ ጠዕምቶእ። 11 ዬሱሱንኩ ፈንቀሽ «ክዕኔኤች መትት ሆልቹት ዮሲ ሰንበት በሬን ኤሎን ኡቦደ ኤሌች ፉሹምቡ አዬት? 12 ህካን እኮች መንቹ ሆልቾች አብሽ አበኖበእንዶ? ህከኒ ሰንበት በሬን ደናሙ አሱ ሀስሰኗ» ዬእ። 13 ህከኒች ዘኪን ዬሱሱ አንገተ ሺሀ መንቹ «አንገክ ብድቀእ» ዬእ። መንቹንኩ ብድቀኤ ጃተ ዎሌ አንገገንከ ፈየተ እኮእ። 14 እኮዳ ፋሪሰት ህከምቢች ፉልት ዬሱሰ ሽታገ ኤረንቶእ። 15 ዬሱሱ እሶኦት ኤረንቶገ ደግ ህከን ቤቺች ኮሮት ዬእ። አሞ ሆለሙ መኑንኩ አወንቶስ። እስን ሆረንከሰ ፈይሾ። 16 እሶኦት እስተኔ አዬኒ ጠሃቱምቦገ አዘጆሰ። 17 ህካን ጠሃቄኢ መገኑ ህራጋንቾ እስያሴን 18 «ህኩዕኒን፥ አን ዶዕሬም ሁጀታንቹኤ። እስን አን ኢታምየኒ በጅቀማምየኒ። እስ አሌንን ጡማንቹኤ አያነ ድሪሳም። እስን ጠቤነ ፍርደ መገኑ ደጉምቦ መኒ አዋጀኖ። 19 እስን ኦደመኖበእኒ ያረኖበእኒ። ዎቃን ሆራንን ላገስ መጮጨንታበአ። 20 እስን ቄለኖገ አሰንቀጤች ቢጠሞ ሾምቦቅቹሃ ቢጠኖበአ። እንዶ ውሊልታ ሸሉታ ጠእሰኖበአ። 21 አሞ መገኑ ደጉምቡ መኑ ሱዕማንተስ ተሳ አሰኖ» ዬ ጠሁ ዊሙንታት። 22 ሀቡሱ አፌስ ቆቀነ ዱደ መንቹ ዬሱስበ ዋሼመ። ዬሱሱንኩ መንቹስ ጠሃቀኖጋ ጡደኖጋ አስ ፈይሾ። 23 ህከኒ ሆሩንኩ ምናደቡ ማለልት «ኩን ዳዊቴየ ቤቱንዶቤ?» ይቶእ። 24 እኮዳ ፋሪሰት ህካን መጮቶ ጃተ «ኩ መንቹ ሀቡሰ ፉሸዮኢ ሀቡስ ዎመ ቤልዜቡሌ መቄኔት» ይቶእ። 25 ዬሱሱ እሶኦ ሰውተ ደግ «ለሙበ እክ ኦለንታ ዎሞመት ሆረንት ኡባእ። ህትጉንተ መቱ ከተሙ እንዶ መቱ ምኑ እስ-እሶኦንት አነነ እኮደ ቃርት ሄኢ ደንድታበአ። 26 ሼጣንቹ ሼጣንቹ ፉሸኖ እኮደ ገጊንተስ ኡርጨመዮእ። ህካን እኮች ዎሞመስ ሀትክ ቃርት ሄኢ ደንድታእ? 27 አን ቤልዜቡሌ መቄን ሀቡሰ ፉሻሚ እኮሚች ኦሱዕኔ አዬ መቄን ፉሽታለ? ህከንተኔ ኦሱዕኔ ክዕኔኤ አሌን ፍርዳኑ እካእ። 28 አን ሀቡሰ ፉሻሚ መገን አያኒን እኬደ አቼ መገን ዎሞመት ክዕኔኤበ ዋልቴእ። 29 መቱ መንቹ መቱ ቆጠረ መንቹ ኡሱሩምቦች ምንስ ቢጭ ኣግ ሄቸስ ቦጎተ ሀትክ ደንደኖ? እኮዳ ህከ ቆጠረ መንቹ ኡሱሮሀኒች ዘኪን ሄቸስ ቦጊ ደንደኖ። 30 አዪ ኤሳን ሜጡ እሁምቡ ኤሳን ኡርጨመኖ። አሞ ኤሳን ጠጴጩምቡ ሆሩንኩ ብነአኖ። 31 ህከንተኔ አን ኩላንክዕኔ፤ መኑ አሴ ባጢሉ ሆሩንኩ ቦሮዕረንች ላገቲ አጉረንታእ። እኮዳ ጡማንቾ አያን አሌን ጠሃቄኖ ቦሮር ላገት ሆረን አጉረንታበአ። 32 መንች ቤት አሌን ቦሮር ላገተ ጠሃቀኖሀን በእሱ አጉረመኖ። ጠሁ እኮዳ ጡማንቾ አያን አሌን ቦሮር ላገተ ጠሃቀኖሀን በእሱ ከን ዶላኒ እኮ ዋለኖ ዶላኒ አጉረመኖበአ» ዬእ። 33 ዬሱሱ «ሀቁ ሆሩንኩ ላሎንተስ ደገመኖተኔ ሀቀስ ደንስቴንተደ ላሉሲ ደንታእ። እንዶ ሀቀስ በእሴንተደ ላሉሲ በኣእ። 34 ዎዘናን ዊሞሀኒች አፎ ጠሃቀኖተኔ አዕኖኦት ት ዎር ኦሱት! ሂላከተ እኬነን ሀትኬን በሬደ ጠሃቂ ደንድቴነን? 35 በሬዱ መንቹ በሬደ ጠሀ ማጠቄ ደናሜ መዕኔች ጠሃቀኖ። ሂሉ መንቹ ሂለ ጠሀ ማጠቄ ሂለ መዕኔች ጠሃቀኖ። 36 አን ገርተ ያንክዕኔ፤ ሀኩ መንቹሁ ጠሃቀኖ ሀስሱምቦ ጠሂ ሆሪንከ ፍርድ በር ጠዕመመኖ። 37 ዳፉንኩስ ጠሃቶንት ላጋን ሙጩርታንት። አሞ ጠሃቶንት ላጋንን ፍርደመኖኬ» ዬእ። 38 መ-መቱ ሴር ሮስሳኑሁ ፋሪሰቲ ዬሱሰ «ሮስሳንቾ! አት መላተ ሁጀተንየን ጡዲ ሀንሳም» ይቶእ። 39 እስን ፈንቀሽ «ከን ዶል ሂሉነ ሳኣንቹ መኑ መላተ ጡዲ ሀሰኖ። ጠሁ እኮዳ ህራጋንቾ ዮናሴ + መላች ህግየን ዎልት መላት ኣሰንታስበአ። 40 ዮናስ አበ ቁርጡሜመ ጎደባን ሰሱ በርሃ ሰሱ አንከርሃ ኤጌሮሀንገንከ መንች ቤቱሁ ኡለ ኣዜን ሰሱ በርሃ ሰሱ አንከርሃ ኤጌረኖ። 41 ናናዌ + ከተም መኑ ፍርድ በር ከን ዶል መኒን በርገንት ኬእ እሶኦ አሌን ፍርድታእ። ዳፉንኩስ ናናዌ መኑ ዮናስ ሰበኮ መጮቶ ጃተ ባጢሊችሰ ቢረ ይት ፈንቀልቴእ። ህኩዕኒን፥ ዮናሴች አበኖ ከኔ ዮእ። 42 ሙጌን ባድ ዎመት ሰለሞኔ ቆርመተ መጮቶተ ኡለ ቶቺች ዋልቶተኔ ፍርድ በር ከን ዶል መኒን በርገንት ኬእ እሶኦ አሌን ፍርድታእ። ህኩዕኒን፥ ሰለሞኔች አበኖ ከኔ ዮእ» ዬእ። 43 ዬሱሱ «ሂሉ አያኑ መንቺች ፉሎ ጃተ ፎሎጨኖ መዕንተ ሀሰን ዎኡ ዮበእ መዕኔን ሆራንን ዘሀኖ። እኮዳ ደቀኖበአ። 44 ህከኒ ‹ፉሎም ምንኤ ፈንቀል መራም› ያኖ። እስን ፈንቀል ዋለኖደ ምኑስ ዲክ አባሰም ቅጠምየን ደቀኖ። 45 ህከኒች ዘኪን መር እሲች ሂላከተ ዎሉ ለመለ ሀቡሰ ዋሸኖ። እሶኦንት ህከን መንቾን ኣግ ሄኣእ። ህከንተኔ ህከን መንች ሄቸት ዎናች ዘክስቢት አብስ ሂለተ እካእ። ከን ዶል ሂለ መን አሌኒ ህትጉንተ እሀኖ» ዬእ። 46 ዬሱሱ ምናደቢ ጠሃቀንየን አመሲ ህዛከሲ ደቀንቶተ ሀስ ኡሮ ኡርቴ እኬ። 47 ህከኔ ዮ መኒች መቱ ዬሱሰ «አመኪ ህዛከኪ ደቀሚ ሀስ ሀደ ኡርቴእ» ዬስ። 48 እኮዳ ዬሱሱ ህከን መንቺ ፈንቀሽ «አመኢ ህዛከኢ አዬኤታለ?» ዬእ። 49 ህከኒች ዘኪን አወናንስበ አንገስ ብድቀእ «አመኢ ህዛከኢ ከሮኦታ። 50 ዳፉንኩስ ሰማን ዮ አንኤ ሰውተ ዊንሸኖ ሆሩንኩ ህዞሃንከኤ፥ ህዞታንተኤ፥ አመተንተኤ» ዬእ።
1 ህከ በርንከ ዬሱሱ ምኒች ፉል በሃር ሺናን አፉዕሌእ። 2 ሆለሙ ምናደቡ እስበ ዋል ጠጵዬተኔ ዬሱሱ ጀልባን ኣግ አፉዕሌእ። ምናደቡ ሆሩንኩ በሃር ቶቾን ኡሬ እኬ። 3 ዬሱሱንኩ ሆለመ ጠሀ አጉዲሻን ኩለን «ህኩዕኒን፥ መቱ መንቹ ዜሬተ ውጦተ ፉሎ። 4 ውጠንየንን መ-መቱስ ዎቄ ቶቾን ኡቦ። ህካንን ጪአት ዋልት እት ከንቶእ። 5 ዎሉስ ዜሬቱ ሆለሙ ቡቹ ዮበእባን ክኑ ዮ ኡላን ኡቦ። ሆለሙ ቡቹ ዮበእ ኡለተ እኮተኔ ሰርብን ሙቾ። 6 ጠሁ እኮዳ አሪቹት ፉልቶ ጃተ ቆሮ። ጠጱንኩ ዮስበእተኔ ሞል ፈጆ። 7 ዎሉስ ዜሬቱ ኡት ኣዜን ኡቦ። ኡቱንኩ ሌእ ሙተስ ለንጌእ። 8 ዎሉስ ደናሜ ሙጠ ኡላን ኡብ መቱስ ጥብተ፥ መቱስ ሌሃዱመ፥ መቱስ ሰጀዱመ ላሎ። 9 መጮታ መጨት ዮሲ መጮጩን» ዬእ። 10 አወናኑስ ዬሱስበ ዋልት «መኒ አጉዲሻን ጠሃታንቲ ሚሃት?» ይቶእ። 11 ዬሱሱንኩ ፈንቀሽ «ሰሜ ዎሞመ ቤስቹ ጠሀ ደጉ ኣሰሜዕኔ። ጠሁ እኮዳ ህካን ደጉ እሶኦ ኣሰምምበሰ። 12 ዳፉንኩስ ዮስሀኒ ኣሰመኖስ። አብሽን በተአኖስ። ዮስበእሀኒች ህኩ ዮሲንኩ ኣቀመኖ። 13 አን እሶኦ አጉዲሻን ኩላሚ ጡደንን ጡዱምቡረ፥ መጮተንን መጮቱምቡራ ዘህጭቱምቡራ እኮተኔሃት። 14 ህከኒ ህራጋንቾ እስያሴን ‹መጮጩስመ መጮቴነንተ፤ እኮዳ ዘህጭቴነንተበአ። ጡዱስመ ጡዴነንተ፤ እኮዳ ሆረን ደጌነንተበአ። 15 ዳፉንኩስ እሌንተሰ ጡድ፥ መጫንተሰ መጮቲ ዎዘኒንተሰ ቆርስቲ ኢበ ፈንቀልትየን ፈይሱምቦሰገ ከን መን ዎዘኑ ዱጄእ። መጨሰን ደንቅቴእ። እልሰን ቆቄእ› የመሞ ጠሁ አሌንተሰ ዊመኖ። 16 እኮዳ ክዕኔኤ እልት ጡዳተኔሃ መጨዕኔን መጮታተኔሃ ማሰአንቴንተሃረ። 17 አን ገርተ ያንክዕኔ፤ ከ አዕኖኦት ጡዴነንታ ሆለሙ ህራጋኑሁ ሆለሙ ጡማኑሁ ጡዲ አብስ ቁልጥቴ እኬ። ጠሁ እኮዳ ጡድምበአ። አሞ ከ አዕኖኦት መጮቴነንታ መጮጪ ቁልጥቴ እኬ። እኮዳ መጮትምበአ» ዬእ። 18 ዬሱሱ «አቼ አዕኖኦት ከን ዜሬተ ውጣንች አጉዲሸተ መጮጭዬ። 19 አዪ ሰሜ ዎሞመ ምሽራች ላገተ መጮጭ ዘህጩምቦደ ዎቄ አሌን ኡቦ ዜሬተ አጉደኖ። ሼጣንቹንኩ ዋል ውጠንቶ ላገተ ዎዘኒችስ መጭ ከመኖ። 20 ክናሜ ኡላን ኡቦ ዜሬቱ ላገስ መጮጭ በጅጎን ኣቀኖ መንችተ አጉዲሸ። 21 እኮዳ ጠጱ ዮስበእተኔ ቀሁተ ጄቹተ ጠለ ኤጌረኖ። ህተን ላገ ዳፊንን ሀዉ እንዶ ሸረንቹ ኬኦ ጃተ ሰርብን ኡበኖ። 22 ህኩ ኡት ኣዜን ኡቦ ዜሬቱ ላገተ መጮጨኖ መንችተ አጉዲሸ። እኮዳ ከን ኡለ ሄቸ ጠሀ ሰውዩሁ ቀባጦን ሄለሙሁ መጮጬ ላገተ ለንጌሃን ላሉዕነ ፈአኖ። 23 ደናሜ ኡላን ውጠሞ ዜሬቱ ላገስ መጮጭ ዘህጭ ኣቄ መንችተ አጉዲሸ። ህኩስን መቱስ ጥብተ፥ መቱስ ሌሃዱመ፥ መቱስ ሰጀዱመ ላለኖ» ዬእ። 24 አሞ ዬሱሱ ዎሌ አጉዲሻን «ሰሜ ዎሞመት ሆጎንተስ ደናሙ ዜሬተ ውጮ መንቺን አጉጠንታእ። 25 ጠሁ እኮዳ መኑ ግሾ ጃተ ዲኑስ ዋል አለስ ሜሬሮን አገዳዱ ውጭ ኦሮቄእ። 26 ህከኒ አለሱ ሌእ ኩሩሮ ጃተ አገዳዱሁ ለሌእ። 27 አላኑ ውጠስ አንበ ዋልት ‹ቀርቾ! ሆጎንተክ ደናሙ ዜሬተ ውጥምበእኬንዶ? ህከደ አገዳዱስ ሀኖች ዋሎለ?› ይቶእ። 28 እስን ፈንቀሽ ‹ህካን አሴኢ ዲና› ዬእ። አላኑንኩ ፈንቀሽት ‹ህከደ መንኬዕን አገዳዱስ ቡቅንስ ከሙንተ ሀሰንንዶ?› ይት ጠዕምቶእ። 29 እስን ፈንቀሽ ‹እሀኖበአ! ዳፉንኩስ አገዳዱ ቡቅሴነን አለሱ በርግቴን ቡቅሴኖኮንተ። 30 ህከንተኔ ሀጢድ ጃት ኢልተንቀጤች ለሙንኩ ሜጡ እክ ሌኡን። ሀጢድ ጄቹተ ሀጢዳኒ ብርስቴን አገዳዱስ ቡቅሴን ጊረ ቡቡንተ ፈርሽምዬ። እኮዳ አለሱስ ጠጰቴን ቀቾንተኤ ዎርዬ ያንሰ› ዬእ» ይ ኩሎሰ። 31 ዬሱሱ «ሰሜ ዎሞመት መቱ መንቹ ገቴ ኣዜን ውጮ ሀሚል እልተ አጉደኖ ዜሬትችየገ። 32 እሴን ዜሬት እሌች ሆሪችን ቀሁተ። እኮዳ ሌኦ ጃተ ሀቂች ሆሪችን አብታእ። አበ ሀቀ እክየን ሰሜ ጪአት ዋልት ሀምስ አሌን ዶዕነ ዌጭታእ» ይ ዎልተ አጉዲሸተ ኩሎሰ። 33 ዬሱሱ ቴሱ ዎሌ አጉዲሻን «ሰሜ ዎሞመት መትት ሜንትቹት ሆሩንኩስ ሁፍ ዩንተ ሰሶ ሶሬ ዊመ ቀማን ኤሬርት ሙጥሶ ሺሸ አጉዳእ» ይ ኩሎሰ። 34 ዬሱሱ ህካን ሆረንከ በትናሸ መኒ ጠሃቄእ። አጉዲሸት ዮበኢ መሃ ኩልምበሰ። 35 ህኩስን ህራጋንቾን «አፎኤ አጉዲሻን ፈናም። ኡለት ቆጨንቶሀኒች አፍ ማጠሞ ጠሀ ጠሃቃም» የመሞ ዊሙንታት። 36 ዬሱሱ ምናደበ አጉር ምን ኣጎ ጃተ አወናኑስ እስበ ዋልት «ውጣን በርገም ሌኦ አገዳድ አጉዲሸት መሃንዶ ኩልኔ» ይት ጠዕምቶእ። 37 ዬሱሱንኩ ፈንቀሽ «ደናምተ ውጠተ ውጮሲ መንችየ ቤቱ። 38 ሆጉስ ተን ኡለ አሌየ መነ። ደናሙ ዜሬቱንኩ መገን ዎሞመተ ኦሱ። አገዳዱንኩ ሼጣንችተ ኦሱ። 39 አገዳዱስ ውጮ ዲኑ ሼጣንቿ። ሀጢድስ ጃንት ዶሌየ ጎፉ። ሀጢዳኑንኩ መገን ሰሜሃ ሶቀማኑ። 40 አቼ አገዳዱስ ጠጰኤን ጊረ ቡሴኖሀንገንከ ዶል ጎፎኒ ህትጉንተ እሀኖ። 41 መንች ቤቱ ሰሜ ሶቀማኑስ ሶክየን መኑ ባጢለ ሁጀተኖገ አስቶራ ሂልመተ ሁጀቶራ ዎሞማችስ መጥ ፉሽታእ። 42 ህከረንከ ቃረ ጊራን ኡጅትየን ኦኡሃ እንቁተ ኢጡሃ እሀኖሰ። 43 እኮዳ ሙጩረት አንሰ ዎሞማን አሪቾገ ጫክሳእ። መጮታ መጨት ዮሲ መጮጩን» ዬእ። 44 ዬሱሱ «ሰሜ ዎሞመት መቴ ሆጎ ኣዜን ሞገሞ ግዘ አጉዳእ። መቱ መንቹ ህከ ግዘ ደቄ ጃተ ፈንቀሽ እፍሽ በጅቀመን ኦሮቄሀኒች ዘኪን ዮስረ ሆረንከ ህር ከም ህተ ሆጉተ ህዕሬእ። 45 አሞ ሰሜ ዎሞመት ደናሙ ዎርቀ ህዕሪ ሀሰኖ ዘዘላንቹ አጉዳእ። 46 እስን ህረስ አብስ እትሰ እኬ ዎርቀ ደቅኬእ ምንስ መር ዮስረ ሆረንከ ህር ከም ህከ ደናሙ ዎርቀ ህዕሬእ» ዬእ። 47 አሞ ዬሱሱ «ሰሜ ዎሞመት በሃራን ኡጄናን አነነተ አነነተ ሀገረተ ቁርጡሜመተ ጠጰአኖ ዎሻደ አጉዳእ። 48 ዎሻዱስ ዊሞ ጃተ መኑ ቶቹ ፉሽ ደናሙስ መጭ ኦዳን ዎር ፈረስ ቶሬእ። 49 ዶል ጎፎኒ ህትጉንተ እሀኖ። መገን ሰሜ ሶቀማኑ ዋልት ባጢላመተ ሙጩራች አነነ አስታእ። 50 ባጢላመስ ቃረ ጊራን ቶርትየን ኦኡሃ እንቁተ ኢጡሃ እሀኖሰ» ዬእ። 51 ዬሱሱ አወናኒሀንስ «ካን ሆረንከ ዘህጭቴንንዶ?» ይ ጠዕሜሰደ «» ይቶእ። 52 ዬሱሱንኩ «አቼ ሰሜ ዎሞማ ቅጠሞ ሴር ሮስሳንቹ ማጠቄ መዕኔች ኑባቹራ ሃሮራ ፉሸቀኖ መንችየገ» ዬሰ። 53 ዬሱሱ ህተ አጉዲሸተ ጦፎሀኒች ዘኪን ህከን ቤቺች ኦሮቄእ። 54 ገግስ ባዱ ናዝሬተ ዋል ህከኔን ጠጵትሰ ምኔን ሮስሰዮሰ እኬ። እሶኦንት አብስ ማለልት «ኩ መንቹ ተ ቆርመታ ተ ማለልሲሳ ሁጅታ ሀኖች ኤቤሃን? 55 ኩን አናጤቼየ ቤቱበእንዶ? አመንትስ ‹ማራሜ› ዬኖተበእንዶ? ህዛከንትስ ያቆቤት፥ + ዮሴፋት፥ + ስሞኔቲ ይሁዳቲበእንዶ? + 56 አሞ ሜሴላከት ህዛከንትስ ከኔ ኔሳን በርገንት ሄኣሃረበእንዶ? ህካን እኮች ኩ መንቹ ከ ጠሀ ሆረንከ ሀኖች ደቄእ?» ይቶእ። 57 እሶኦንት ዬሱሰ ግቦእ። ዬሱሱንኩ እሶኦ «ህራጋንቹ ገግስ ባዶኒ ምኔንተሲ አብሴኖስበአ በጋን ዎሌ መዕኔን አብሴኖስ» ዬእ። 58 አመዕነቱ ዮሰበእተኔ ዬሱሱ ህከኔ ሆለመተ ማለሉተ አስምበአ።
1 ገሊል ባድ ገሻንቹ ሄሮድስ ዬሱስ ዱዱቡ መጮጬእ። 2 ህከኒ ሄሮድስ አላኒሀንስ «ኩን ጠመቃንቾ ዮሃንሴቤ! ተ ማለሉተ ሁጀተዮኢ ሬሆች ኬኦተኔሃት» ዬሰ። 3 - 4 ዳፉንኩስ ሄሮድስ «ፍልጶሴ» ዬኖ ህዜስ ሜንትቹተ «ሄሮዳደ» ዬኖተ ኣቄተኔ ዮሃንስ «ሄሮዳደ ኣቁ ሀስሰኖሄበአ» ዬሀኒ ሄሮድስ ዮሃንሴ ኡሱርሲሼስ እኬ። 5 አሞ ሾስተን ሀሼ እኬ። ጠሁ እኮዳ መኑ ዮሃንሴ ህራጋንችገ አስ ጡደዮተኔ መነ ዋጄእ። 6 ሄሮድስ እለሞ በር አብሴኖ ጃት ኢልትየን ሄሮዳደ ቤቱት እስነ ኮህስ ብሬን አለጵት ሄሮድሴ በጅቀንስቶስ። 7 ህከንተኔ ሄሮድስ «ሀሳንት ጠሀ ሆረንከ ኣሳንኬ» ይ ላገ ህድሩ ኣጎሴ። 8 እሴን አመሴ ሰዝየንሴ «ጠመቀኖ ዮሃንሴ ቦቁተ ከን ሶሮን ዎርት ኣሴኤ» ይቶእ። 9 ዎሙንኩ ህከን ጠሃን ክቼኦ። እኮዳ ኣጎ ላገስ ህድርተኔሃ ማዳን አፉዕልቶ ኮህስተኔሃ ዮሃንሴ ቦቁት ኣሰንታሴገ አዘጆ። 10 ህከኒ መነ ሶክ ዮሃንሴ ቦቁተ ኡሱሮ ምኔን ሙርሲሾ። 11 ህተ ቦቁንተ ሶሮን ዎሬን ኣሴናንሴ አማሀንሴ መስት ኣስቶእ። 12 ዮሃንሴ አወናኑንኩ ዋልት ሬሸስ ኦሮስ ሞግኬእ መርት ዬሱሲ ኩልቶእ። 13 ዬሱሱ ዮሃንሴ ሬሁተ መጮጬ ጃተ ጀልባን ኣግ ኡለ ኡዱመአ ሜጥንስ ኦሮቄእ። ምናደቡ ህካን መጮት ከተማካችሰ ፉልት ሎካን ዬሱሰ ዘክሶእ። 14 ዬሱሱ ጀልቢች ፉል ሆለመ መነ ጡጆ ጃተ ቅሽጤሰ። ሞሳኑሰን ፈይሾ። 15 እሩ ሀወሬ ጃተ አወናኑስ ዬሱስበ ዋልት «ኩቡ ኡላ ኡዱመአ፤ እሩሁ ሀወሬእ። ህከንተኔ ኩ መኑ ሄጌጎን ዮ ከተማካች መር እቸተ ህዕሩንተ ገፈር» ይቶእ። 16 ዬሱሱንኩ «እሶኦት እታረ አዕኖኦት ኣስዬሰ በጋን እሶኦት መሩ ሀስሰኖሰበአ» ዬሰ። 17 አወናኑንኩ «ኦንቴ ቤጦቺ ለሜ ቁርጡሜማቺ ህግየን ከኔ ሜጡሩ ዮኔበአ» ይት ፈንቀሽቶእ። 18 ዬሱሱንኩ «ኢበ ኤብዬ» ዬእ። 19 ህከኒች ዘኪን መኑ ህጤ አሌን አፉዕሉንተ አዘጆ። ኦንትንተ ቤጦ ጦሮሹሃ ለምንተ ቁርጡሜመታ አፍ ሰማ ጡደን መገኑ ገለጥ ጦሮሹ ቢጭ አወናኒሀንስ ኣሴእ። እሶኦንት መኒ ኣስቶእ። 20 ሆሩንኩ መኑ እች ዱብየን ፈኦ ፉፉሩ አወናኑስ ቶነ ለሜ ደጉዴ ዊመ ኬእሶእ። 21 ህካን እቾ መን ዎሉት ሜንቱሁ ኦሱቲ ዮበኢ ጎኑ ጠሉ ኦንቴ ኩሜ ቀጠ እሀኗ መነ እኬ። 22 ዬሱሱ መነ ህርሲሰን አወናኑስ ጀልባን ኣግ እሱ ብርስት ዎኢች ዉደአ ቶልታገ አሴእ። 23 መነ ህርሲሾች ዘኪን ሜጥን መገኑ ኡጮተ ዱን አል ፉሎ። እሩ ሀወረኖደ ዬሱሱ ሜጥንስን ህከኔ ዮ እኬ። 24 እኮዳ አወናኑስ ኡላች በሃር አሌን ሆለመ ቄዕርት ጀልቢን ኦሮቅቴ እኬ። ቦብሩንኩ እሶኦ ዉዱ ለቅ ቦብርሰዮተኔ ዎእ ዎርጃሙ አብሽ ሀውሰዮሰ እኬ። 25 አንከሬ ቶርዱመ ሳት ቁንጣን ዬሱሱ በሃር አሌን መረመን አወናንበ ዋሎ። 26 አወናኑስ በሃር አሌን መረመንየን ጡዶ ጃተ አብስ ህልቅ «ኩን ሶዟ» ይት ዋጅት ያርቶእ። 27 ዬሱሱ ህተ ጃንተ አወናኑስ «አደጵዬ፤ ዋጅቴኖችዬ፤ አኔት» ይ ጠሃቄሰ። 28 ህተ ጄቹተ ጴጥሮስ «ቀርቾ! ኬስ እኬንትደ በሃር አሊን መረም ኪበ ዋሉንተ አዘዜኤ» ዬእ። 29 ዬሱሱንኩ «ዋል» ዬእ። ጴጥሮስን ጀልብ ኣዚች ፉል በሃር አሊን መረም ዬሱስበ መሮ። 30 ጠሁ እኮዳ ቃረ ቦብረ ጡጆ ጃተ ዋጄእ። አገሚ እኮ ጃተ «ቀርቾ! ፈእሴኤ» ይ ያሮ። 31 ዬሱሱንኩ ደዕል አንገስ ብድቀእ አፍ «ኩ አመዕነቱ ኮቼሄ መንቹ! ሚሃት ለሞዕምቶንቲ?» ዬእ። 32 ለሙንኩሰ ጀልባን ኣጎ ጃተ ቦብሩ ቦብርሱ አጉሮ። 33 ህከንተኔ ጀልባንተስ ዮ እኬ መኑ ሆሩንኩ «ገርንተ አት መገኔየ ቤቱ» ይት ዬሱሲ ሰገዶእ። 34 ዬሱሱሁ አወናኑሲ በሃረ ቶልት «ጌንሴሬጠ» ዬኖ ባዱ ኢልቶእ። 35 ህከን ባዶን ዮ መኑ ዬሱሰ እሁስ ደጎ ጃተ ሄጌጎንተሰ ዮ ባዱ ሆረንከ ሶክየን ሞሳኑ ሆረንከ እስበ ዋሼመ። 36 ህኩ ሞሳኑ ኦድሸስ ሰኑተ ጠለ አፎተ ኡጨቅቶእ። አፎሩ ሆሩንኩ ሞሲችሰ ፈይቶእ።
1 ፋሪሰቲ ሴር ሮስሳኑሁ ዬሩሳሌሚች ዬሱስበ ዋልት 2 «ሚሃት አወናኑክ ኑባብ ዎገ ዝርተዮኢ? ዳፉንኩስ አንገተ ኣዕልቱዕነ እቸተ እተዮእ» ይት ጠዕምቶእ። 3 ዬሱሱ ፈንቀሽ «አዕኖኦት ሚሃመ ዎግዕኔተኔ ይቴን መገን አዘዙተ ዝርቴነዮንታ? 4 ዳፉንኩስ መገኑ ‹አነኪ አመኪ አብስ› አሞ ‹አነሲ አመሲ ቦሮሮ ሬሁን› ይ አዘጄእ። 5 እኮዳ አዕኖኦት ‹መቱ መንቹ አነሲ አመሲ ኤሳች ደቅቴነንተረ አን መገኒ ኣሴም ዬሰደ ህኩ መንቹ አነስ አብሱምቦዳ ሀዉ ዮበአ› ይቴነንተ። 6 ህከንተኔ አዕኖኦት ገግዕኔ ዎጊ ይቴን መገን አዘዙተ ህጌነዮንተ። 7 አዕኖኦት ኩ ሳድጨማኑ! ህራጋንቹ እስያስ ክዕኔኤተኔ 8 ‹ኩ መኑ አፌንተሰ ጠሊን አብሰዮኤ። እኮዳ ዎዘኑሰ ኤሳች ቄዕሬሃ። 9 እሶኦንት መን አዘዙተ መገንሀንገ አስት ሮስሰን ኤሳ ሰገዱሰ ጠለላ› ዪንተስ ገርተ ህራጌእ» ዬእ። 10 ዬሱሱ ምናደበ እስበ ገእ «መጮጭዬኒ ዘህጭዬኒ። 11 መንቹ ቡሽሰኖሩ አፌችስ ፉለኗረ በጋን አፎንተስ ኣገኗረበአ» ዬእ። 12 ህከኒች ዘኪን አወናኑስ እስበ ዋልት «ፋሪሰት ከ ጠሀ መጮቶ ጃተ አሙዕረንቶገ ደጌንትንዶ?» ይት ጠዕምቶእ። 13 ዬሱሱ ፈንቀሽ «ሰማን ዮ አኑኤ ካሱምቡ ሀቁ ሆሩንኩ ቡቀአኖ። 14 እሶኦት አወንሳን ቆቃከተ እኮተኔ አጉርቴን አጉሬሰ። ቆቁ ቆቀ አወንሴደ ለሙንኩሰ ኤሎን ኡባእ» ዬእ። 15 ጴጥሮስ ዬሱሰ «ተን አጉዲሸ ሂረቱተ ኩልኔ» ዬስ። 16 ዬሱሱ ፈንቀሽ «አዕኖኦቲ ቴሶ ኢለንቀጤች ዘህጭቴኑምቧረንዶ? 17 አፎን ኣጎሩ ሆሩንኩ ጎደባን ድር ሹመተ እክ ፉለኖገ ደጌነንተበእንዶ? 18 እኮዳ አፌች ፉለኖሩ ዎዘናን ዮሀኒቼት። መነ ቡሽሰኖንኩ ህከኔት። 19 ዳፉንኩስ ሂሉ ሰውቱ፥ መነ ሹ፥ ሳኡ፥ ሞገኡ፥ ቆጰነ ነቀሱሁ መን ሱዕመ በእሱሁ ህኩ ሆሩንኩ መን ዎዘኒች ፉለኗ። 20 መነ ቡሽሳሩ ህከራት በጋን አንገተ ኣዕሌኑዕነ እቱ ሆረን ቡሽሰኖበአ» ዬእ። 21 ዬሱሱ ህከምቤቺች ኬእ «ጢሮሰሃ ሲዶነሃ» ዬኖ ባዱ መሮ። 22 ህከን ባዶን ሄኣ መትት ከነኣንቹት ሜንትቹት ዬሱስበ ዋልት «ዳዊቴ ቤቶ ቀርቾ! ቤቱኤ ሀቡሱ አፍየንሴ አበ ሀው አሌን ዮእ። ሀእ ቅሽጤኤ» ይት ኡጨቅቶእ። 23 እኮዳ ዬሱሱ ሜጥተ ላገታ ፈንቀሽምበአ። ህከኒ አወናኑስ እስበ ህንጭት «ት ሜንትቹት ኔስ አወንተን ያርተዮተኔ ሀእ ኦሮቅታገ አስሴ» ይት ኡጭቶስ። 24 ዬሱሱንኩ «አን ሶሀሞሚ እስራኤል ምኒች በኦ ሆላ ጠሊሃት» ይ ፈንቀሼእ። 25 እኮዳ ህት ሜንትቹት «ሀእ ቀርቾ ካዕሌኤ» ይት ሎካንተስ ኡቦእ። 26 ዬሱሱ «ኦሶ እቸተ ዎሻ ኬእሴን ቶሩ ሀስሰኖበአ» ዬእ። 27 እሴን «ቀርቾ ህኩን ገርተ። ጠሁ እኮዳ ዎሸንት ቀርበሰ ማዲች ኡቦ ፉፉሩ እታእ» ይቶእ። 28 ህተ ጄቹተ ዬሱሱ «አት አቡ አመዕነቱ ዮሄተ ሜንትቹ። ህከኒ አት ሀሶንትገንከ እሁንኬ» ዬሴ። ህተ ጄቹንተ ቤቱሴ ፈይቶእ። 29 ዬሱሱ ህከን ቤቺች ኬእ ገሊል በሃር ሺኒን ህግ ዱን አል ፉል ህከኔ አፉዕሌእ። 30 ሆለሙ መኑ ድኑ ኬኑ፥ ቆቀተ፥ ሺሃከተ፥ ዱደታ ዎሉ ሞሳኑሃ አፍ ዬሱስበ ዋልት ሎከስባን አፉሽቶእ። እስን ፈይሾሰ። 31 ህከንተኔ ምናደቡ ዱደት ጠሃተንየን፥ ሺኮሩ ፈይትየን፥ ድኑ ኬኑ ጠብት መረንተንየኒ ቆቀት ጡደንየኒ ጡዶ ጄቹተ ማለልት እስራኤል መገኑ ገለጥቶእ። 32 ዬሱሱ አወናኑስ እስበ ገእ «ኩ መኑ ኤሳን በርገንት ሰሱ በር ኤጌርቴእ። እታሩንኩ ሜጡሩ ዮሰበእተኔ ቅሽጣንሰ። ዎቃን ሆጋተኔ ጎሪን ኦሮቅቱንተ ገፈራምበአ» ዬእ። 33 አወናኑስ «ህከደ ከን ሆራንከ መኒ እካ እቸተ ከን ኡለ ኡዱመኣን ሀኖች ኤምባም?» ይቶእ። 34 ዬሱሱ «ሀበንከት ቤጦኦት ዮዕኔ» ይ ጠዕሜሰ። እሶኦንት «ለመልት ቤጦኦቲ ቀሁንት ቀቀሃኑት ቁርጡሜመቲ ዮኔ» ይቶእ። 35 ህከኒች ዘኪን ዬሱሱ ምናደበ ኡለ አፉዕሉንተ አዘጆ። 36 ህተእ ለመልንተ ቤጦኦታ ቁርጡሜመታ አፍ መገኑ ገለጥ ቢጭ አወናኒሀንስ ኣሴሃን አወናኑስ ምናደቢ ኣስቶእ። 37 ሆሩንኩሰ እትየን ፈኦ ፉፉሩ አወናኑስ ለመሌ ደጉዴ ዊመ ኬእሶእ። 38 እቶ መኑ ሜንቱሁ ኦሱቲ ዮበኢ ሾሌ ኩም እኬ። 39 ዬሱሱ መነ ህርሲሾሀኒች ዘኪን ጀልባን ኣግ «መገዳነ» ዬኖ ባዱ ኦሮቄእ።
1 ፋሪሰቲ ሳዱቀቲ ዋልት ዬሱሰ ኬንቶተ «ሀኖ ሰሜች መላተ ጡድስኔ?» ይት ጠዕምቶእ። 2 ዬሱሱ ፈንቀሽ «እሩ ሀወሬ ጃተ ‹ሰሞ ቢሽኬእ። እሩ ብረኖ› ይቴነንተ። 3 አሞ ገስመ ‹ሰሞ ጎም ገምበልኬእ። ከበር ጤኑ ኡበኖ› ይቴነንተ። ሰማ ጡዲንዕኑ አነኖመስ ደጌነዮንተ። ህከደ ሚመ ዶለስ አነነ አቴን ደጌነንተበይ? 4 አመዕነቱ ዮበእ ሂሉ ከን ዶል ሳኣንቹ መኑ መላተ ጡዲ ሀሰኖ። እኮዳ ዮናሴ መላች ህግየን ዎልት መላት ኣሰንታስበአ» ዬሰ። ህከኒች ዘኪን አጉር ኦሮቄሰ። 5 ዬሱስ አወናኑ በሃረ ቶልቶ ጃተ እቸተ አፉ ሆጎገ ደጎእ። 6 ዬሱሱ «ፋሪሰነ ሳዱቀ ሺሺች ቃርቴን ቆረጵዬ» ዬሰ። 7 እሶኦንት «እቸተ አፉ ሆንጎምተኔሃትንዶቤ?» ይት እስ-እሶኦንት ጠሃቶእ። 8 እኮዳ ዬሱሱ ህካን ደግ «ኩ አመዕነቱ ኮቼዕኔ መኑ! እቸተ አፉ ሆግዕኔተኔ ሚሃት አዕን-አዕኖኦት ጠሃቴነዮንታ? 9 ተደ ኢለንቀጤቺ ዘህጭቴኑምቧረንዶ? ኦንትተ ቤጦ ኦንቴ ኩሜ መኑ እችየን ፈኦ ፉፉሩ ሜእተ ደጉድተ ኬእሴንተንዶ ቃጌነንተበእንዶ? 10 ህትጉንተ ለመልተ ቤጦ ሾሌ ኩሜ መኑ እችየን ፈኦ ፉፉሩ ኬእሴንታ ሀበንካንዶ ሰውቴነንተበእንዶ? 11 አን ጠሃቄሚ እቸተኔ እሁ ሆጉስ ሀትተ ደጌነንተበይ? አቼ ፋሪሰነ ሳዱቀ ሮሻች ቆረጵዬ» ዬሰ። 12 አወናኑስን ዬሱሱ «ቆረጵዬ» ዬሳ ፋሪሰነ ሳዱቀ ሮሻቼት በጋን ሺሸ እሁ ሆጉስ ቆርስቶእ። 13 ዬሱሱ «ፍልጶስ ቄሳረ» ዬኖ ባዱ ዋሎ ጃተ አወናኑስ «መኑ መንች ቤቱ አዬት ይተዮ?» ይ ጠዕሜእ። 14 እሶኦንት «መ-መቱሰ ‹ጠመቃንቾ ዮሃንሴት፤› ዎሉሰ ‹ኤልያሴት፤› ዎሉሰ ‹ኤርምያሴት እንዶ ህራጋኒች መቷንስ፤› ይተዮ» ይቶእ። 15 ዬሱሱ «አዕኖኦስ ኤስ አዬት ይቴነዮንተኤ?» ዬሰ። 16 ስሞን ጴጥሮስን «አት ሄአኖ መገኔየ ቤቱ ክርስቶሳት» ዬእ። 17 ዬሱሱንኩ «ዮነ ቤቶ ስሞኔ! አት ማሰአንቴንትየ። ዳፉንኩስ ካን ማሉሁ ቄጉሁ ለሊስምበሄ። እኮዳ ካን ለሊሾሄ ሰማን ዮ ኢሃ አነ። 18 አን ኩላንኬ፤ አት ጴጥሮሴት። ከን ክን አሌን አመዕናን ጠጵት ምን ምናም። ህካንን ሬሁቲ ቄልታበአ። 19 አንን ኬሳ ሰሜ ዎሞመ ቁልፈ ኣሳንኬ። ኡለ አሌን ኡሱርቶንትሩ ሰማኒ ኡሱረሜኢ እሀኖ። አሞ ኡለ አሌን ሂርቶንትሩ ሰማኒ ሂረሜኢ እሀኖ» ዬእ። 20 ህከኒች ዘኪን አወናኑስ እስ ክርስቶሰ እኮገ አዬኒ ኩልቱምቦገ ቃርስ አዘጆሰ። 21 ዬሱሱ ህተን ጄቾች አፍ ዬሩሳሌመ መረኖገ፥ ባድ ኑባቡ፥ ቄስ አወንሳኑሁ ሴር ሮስሳኑሁ ሀውሳስገ፥ ሼኖስጋ ሰክ በር ሬሆች ኬአኖጋ አወናኒሀንስ ጫክሽ ኩሉ አፎ። 22 ህከኒ ጴጥሮስ እሱ ሺነ ኦሮሽ «ቀርቾ! መገኑ ኤቡንከ። ኩን ኬሳን ሆረን እሁንከ» ይ አሙዕሩ አፎ። 23 እኮዳ ዬሱሱ ጴጥሮሴበ ፈንቀልኬእ «ብሬችኤ ፈድ! ኩ ሼጣንቹ! አት መንቢ በጋን መገንቢ ሰውቱምቡተኔ ጉፍቹ እኬንቴኤ» ዬእ። 24 ህከኒች ዘኪን ዬሱሱ አወናኒሀንስ «አዪ ኤስ አወኒ ሀሾደ ገገስ ካዱን። አሞ መስቀለስ እይ ኤስ አወኑን። 25 አዪ ፎልስ ፈእጪ ሀሾደ በእሰኖ። አሞ አዪ ኢተኔ ፎልስ በእሰኖ ደቀኖ። 26 መቱ መንቹ ኡለ አሌን ዮረ ሆረንከ ደቅ ፎልስ በእሾደ መ ካዕለኖስ? እንዶ መቱ መንቹ ፎልስ ቆደ መ ባተኖ? 27 መንች ቤቱ አንስ አብኒን እክ መገን ሰሜ ሶቀማኒን በርገም ዋለኖ። ህተ ጃንተ አኒንከ አኒንከ ሁጄስ ቆደ ኣሰኖ። 28 ገርተ ያንክዕኔ፤ ከኔ ኡርቶሪች መ-መቱ መንች ቤቱ ዎሞማንተስ ዋለንየን ጡዱዕናች ብርስት ሬታበአ» ዬእ።
1 ሌሆ በሬች ዘኪን ዬሱሱ ጴጥሮሴ፥ ያቆቤኒ ያቆቤ ህዞ ዮሃንሴኒ ጠለ አፍ መቶ አበ ዱን አል ፉሎ። 2 ዬሱስ ብፉንኩ ብሬንተሰ ዶረሞ። ሚንስን አሪቾገ ጫክቶእ። ኦድሸስን ዎጅክ ጫክገ ቤሌሌሶእ። 3 ህከኔን ሙሲ ኤልያሲ ዬሱሲን ጠሃተንየን ጡዶእ። 4 ጴጥሮስ ዬሱሰ «ቀርቾ! ከኔ ሄኡ ኔሳ ደናሟ። ሀሶንትደ ኬሳ፥ ሙሴሃ ኤልያሴሃ መ-መቱ ዳሰ ዳንሳም» ዬእ። 5 ጴጥሮስ ህካን ጠሃቀንየን ቤሌሌሰኖ ጎሙ ቴሎሰ። ህከን ጎሚችን «ኢታምነ በጅቀማም ቤቱኤ ከኔት። እሲች መጮጭዬ» ይታ ላገት ዋልቶእ። 6 አወናኑስ ህተ ላገተ መጮቶ ጃተ አብስ ዋጅት ኡለ አሌን ኡቦእ። 7 እኮዳ ዬሱሱ እሶኦበ ዋል አንጋንተስ አፍ «ጦቅዬ፤ ዋጅቴኖችዬ» ዬሰ። 8 እሶኦንት ጦቅት ጡዶ ጃተ ዬሱሲች ጠሊች ህግየን ዎሉ አዬኒ ጡድምበአ። 9 እሶኦት ዱኒች ድርተንየን ዬሱሱ «መንች ቤቱ ሬሆች ኬአንቀጤች ከ ጡዴንተረ አዬሃ ኩልቴኑምቦገ» ይ አዘጆ። 10 አወናኑንኩ ፈንቀሽት «ህከደ ሚሃመ ሴር ሮስሳኑ ‹ብርስ ኤልያስ ዋሉ ሀስሰኖስ› ይተዮኢ?» ይቶእ። 11 አሞ ዬሱሱ «ኤልያስዕኑ ብርስ ዋል ሆረረንከ ቅጠንሰኖ። 12 አን ኩላንክዕኔ፤ ኤልያስ ብሬን ዋሌእ። እኮዳ መኑ እሱ ደግምበአ። ህከኒ እሱ ሀሶገ ሆረንከ አቶእ። አሞ መንች ቤቱሃ እሶኦት ሀውሳእ» ይ ፈንቀሼእ። 13 ህተ ጃንተ አወናኑስ ጠመቃንቾ ዮሃንሴተኔ ጠሃቁስ ቆርስቶእ። 14 እሶኦንት በትናሸ መንበ ዋልቶ ጃተ መቱ መንቹ ዬሱስበ ዋል ብሬንተስ ጉሉጵ 15 «ቀርቾ! ጮቱ አፍ ሆለመተ ጃተ ጊራኒ ዎኣኒ ኡጀን አብሽ ሀውሰዮስተኔ ቤቱኤ ማርስ። 16 አወናንክበ ኤቦምደ እሶኦት ፈይሲ ደንድትምበአ» ዬእ። 17 ዬሱሱንኩ «አዕኖኦት ኩ አመዕንቴኑምቡ ሾኩ ከን ዶል መኑ! ሀኩ በሩ ኢለንቀጤች ክዕኔኤን ሄኣም? ሀኩ በሩ ኢለንቀጤች ክዕኔኤተ ደንዳም? ሀኖ አደባስ ኢበ ዋሽዬ» ዬሰ። 18 ዬሱሱንኩ ሀቡሰ ሻቅየን ህከን አደቤች ፉሎ። አደቦንኩ ህተ ጃንተ ፈዬእ። 19 ህከኒች ዘኪን አወናኑስ ዬሱስበ ቢንን ዋልት «ነኦት ካን ፉሹ ሆንጎሚ ሚሃት?» ይት ጠዕምቶእ። 20 ዬሱሱ «አመዕነቱ ኮቾዕኔተኔሃት። ገርተ ያንክዕኔ፤ ሀሚል እሌ ቀጡ አመዕነቱ ዮዕኔ እክየን ከ ዱነ ‹ከምቢች ጦቅት ከእተ ኦሮቅ› ይቴንተደ ኦሮቀኖ። መቄሰኖክዕኔሩንኩ ሜጡሩ ሄአኖበአ። 21 እኮዳ ህትጎኑሩ መገኑ ኡጪኒ ጦሚኒ እሁምቦች ሆረን ፉለኖበአ» ዬሰ። 22 አወናኑስ ገሊለ ዮሀኔን ዬሱሱ «መንች ቤቱ መን አንጋን ህግሴን ኣሴኖ። 23 እሶኦንት ሽታስ። እኮዳ እስ ሰክ በር ሬሆች ኬአኖ» ዬሰ። ህከኒ እሶኦት አብስ ክቼኦእ። 24 ዬሱሱሁ አወናኑሲ ቅፍርናሆም ከተመ ኢልቶ ጃተ መገን ኬሰሞ ምን ግብረ ጠጰታ መኑ ጴጥሮሴበ ዋልት «ሮስሳንቹዕኔ መገን ኬሰሞ ምኒ ግብረ ባተኖበእንዶ?» ይቶእ። 25 ጴጥሮስን «፥ ባተኖ» ይ ምን ኣጎ ጃተ ዬሱሱ ብርስኬእ «ስሞኔ! ኬሳ መ አጉደዮሄ። ተን ኡለ አል ዎማከት ቀረጠሃ ግብረሃ ኣቅታኢ ኦሶችሳትንዶ ዎሎ መኒቼት?» ይ ጠዕሜእ። 26 ጴጥሮስን «ዎሎ መኒቼት» ዬእ። ዬሱሱ «ህከደ ኦሱት ግዘ ባቲች ፈኤሃረበለ? 27 እኮዳ እሶኦ ጉረተ ኣጉምቦሰገ በሃር አሌን ዎሻደ ኡጅት ዎነ ፉልታ ቁርጡሜመተ አፍ አፎሴ ፈንቶንት ጃተ ባታንት ቀጠ ግዘ ደጋንት። ህካንን መስት ኢነ ኪ ቆደ ግብር» ዬእ።
1 ህተ ጃንተ አወናኑ ዬሱስበ ዋልት «ሰሜ ዎሞማን ሆሪችን አበኖ አዬት?» ይት ጠዕምቶእ። 2 ህከኒ ዬሱሱ መቱ ጪለ ገእ ሜሬሮንተሰ ኡርሽ 3 «አን ገርተ ያንክዕኔ፤ ባጢሊች ፈንቀልቴኑምቦዳ ጪለገ እኬኑምቦዳ ሰሜ ዎሞመተ ሆረን ኣጌነንተበአ። 4 ሰሜ ዎሞማን አቡ ከን ጪልገ ቦቁስ ህርከአኗ። 5 ከን ጪልገ ዮኢ ኢ ሱዕምተኔ ኣቀኖ አዪ ኤስን ኣቀኖ። 6 ኤሳን አመዕንታ ከን ቀቀሃኒች መቱስ ሉስሰኖ መንቹ አበ ዊትመ ጎባንተስ ኡሱሬን ጥለ በሃራን ቶሬመ እክ ዎየኖ» ዬእ። 7 ዬሱሱ «ሉስሰኖሩ ዋለኖተኔ ተን ኡለ አል መኒ ኣዬ! ዳፉንኩስ ሉስሰኖሩ ዋሉዕናች ሆረን ፈአኖበአ። ሉስሰኖስሩ እስ ዳፊን ዋለኖ መንቺ ኣዬ! 8 ህከኒ አንገክ እንዶ ሎከክ ሉስሶሄደ ሙርት ቶር። ዳፉንኩስ ለምት አንገት እንዶ ለምት ሎከት ሄእየንኬ ሆረን ጠእቱምቦ ጊራን ኣጋንትሀኒች ድኑሃ ኮተሃ እክ ዶሊ ሆሪንከ ሄኣ ሄቻን ኣጉ ዎየኖሄ። 9 አሞ እልክ ሉስሶሄደ ፉሽት ኡጅ። ዳፉንኩስ ለሜ እሌን ሄአን ዶሊ ሆሪንከ ጠእቱምቦ ጊራን ኣጋንትሀኒች መትለ እክ ዶሊ ሆሪንከ ሄኣ ሄቻን ኣጉ ዎየኖሄ። 10 ከን ቀቀሃኒች መቱሲ ገዴኑምቦገ ቆረጵዬ። አን ኩላንክዕኔ፤ ሰማን ዮ እሶኦ መገን ሰሜ ሶቀማኑ ሆረንተ ጃተ ሰማን ዮ አንኤ ብሬን ደገንታእ። 11 ዳፉንኩስ መንች ቤቱ ዋሎ በኦ ፈእሶታት» ዬእ። 12 ዬሱሱ «ሀኖ ሰውዬለ። መቶ መንቺ ጥቤ ሆለት ዮስሀኒች መትሴ በኦደ ሆንሳነ ሆንስንተ ዱን አሌን አጉር በኦሲተ ሀሶተ መረኖበእንዶ? 13 ገርተ ያንክዕኔ፤ ሀሽ ደጎ ጃንተ በኡዕነ ፈኦ ሆንሳነ ሆንሴየንተ ሆላች አብሽ በእ ደገንቶ ሆልቾ በጅቀመኖ። 14 ህትጉንተ ሰማን ዮ አኑኤ ከን ቀቀሃኒች መቱሲ በኡንተ ሀሰኖበአ» ዬእ። 15 ዬሱሱ «ህዞክ በእሾሄደ መርት በእሱስ እሶን ጠላን ኩል። እስመ መጮጬሄደ ህዞክ ሂልማች ፈንቀሽቶንት። 16 መጮጩ ግቦሄደ ጠሁ ሆሩንኩ ለሞ እንዶ ሰሶ ነቃሽ ላጋን ዊመኖተኔ መቱ እንዶ ለሙ መንቹ አፍ እስበ መር። 17 እሶኦት ይቶረ መጮጩ ግቦደ አመዕናን ማበሪ ኩል። አመዕናን ማበረሃ መጮጩ ግቦደ መገኑ አመዕኑምቦ መንችጋ ቀረጣንችጋ ዎልስ አጉር። 18 ገርተ ያንክዕኔ፤ ኡለ ኡሱርቴንታ ሰማኒ ኡሱረሜኢ እሀኖ። ኡለ ሂርቴንታ ሰማኒ ሂረሜኢ እሀኖ። 19 አሞ አን በርግ ኩላንክዕኔ፤ ክዕኔኤች ለሙ መንቹ ኡለ መ ጠሃኒ ኢተንት ኡጭቶደ ሰማን ዮ አኑኤ ህከ ጠሀ አሰኖሰ። 20 ዳፉንኩስ ለሙ እንዶ ሰሱ መንቹ ሱዕሚንተኤ ጠጵቶባን አን ሜሬሮንተሰ እሃምተኔሃት» ዬእ። 21 ህከኒች ዘኪን ጴጥሮስ ዬሱስበ ህንጭይ «ቀርቾ! ህዞኤ በእሾኤደ ሜእተ ኮደተ አጉሩስ? ለመልተ ኮደተ አጉሩስንዶ?» ዬእ። 22 ዬሱሱንኩ «ለመላዱምተ ኮደተ ለመሌ በጋን ለመልተ ኮደተ ጠለ ያንኬበአ» ዬስ። 23 ህከኒ ዬሱሱ «ሰሜ ዎሞመት አላኒንተስ ሸለቀሚ ሀሾ ዎመ አጉዳእ። 24 እስን ሸለጉ አፎ ጃተ ዎሎች አሉዲን እኬ ቤኑ ዮስ መንቹ እስበ ዋሼመ። 25 ህኩ አላንቹ ቤነስ ባቱ ሆጎተኔ ገገስ፥ ሜንትቹስ፥ ኦሱሲ ዮስረ ሆረንካ ህሬን ቤነስ ባቴኖገ ቀርቹስ አዘጆ። 26 ህከኒ አላንቹስ ቀርችስ ሎከ አሌን ኡብ ‹ኢ ቀርቾ! ሀእ ቀሁንከ ኤጌሬኤ። ሆረንከስ ባጣም› ይ ኡጨቄእ። 27 ቀርቹስን ቅሽጤስተኔ ገፈሮስ። ቤነስን አጉር አጉሮስ። 28 ጠሁ እኮዳ ህኩ አላንቹ ህከን ቤቺች ፉል ኦሮቀን ጃላካችስ መቶ አላንቺን ቀሁንከ ግዘ እሲች ሌኤጬሀኒን ደቀም ‹ሌኤጭቶንት ግዘ ባቴኤ› ይ ጎበስ ለንግ አፎ። 29 ጃሉስን ሎከስ አሌን ኡብ ‹ሀእ ቀሁንከ ኤጌሬኤ። ባታንኬ› ይ ኡጬእ። 30 እኮዳ ግብ ኬእ ቤነስ ባች ጦፈንቀጤች ኡሱርሲሾስ። 31 ሁጄስ ጃለት ህካን ጡዶ ጃተ አብስ ክቼእ እኮስ ጠሀ ሆረንከ ቀርቺሀንሰ መርት ኩልቶእ። 32 ቀርቹንኩ ህከ አላንቹ ገእሲሽ ‹ኩ ሂሉ አላንቹ! ኡጨቅቶንቴኤደ ህከ ሆረንከ ቤነክ አጉርምበእንዶ? 33 አን ቅሽጤንኬገንከ አቲ ጃሊሀንክ ቅሽጥታንትበእንዶ?› ይ 34 አሙዕረም ቤነስ ሆረንከ ባች ጦፈንቀጤች ኡሱርሲሾስ። 35 ህትጉንተ አዕኖኦቲ ህዜዕኔ በእሱ ጎደቢን አጉርቴኑምቦደ ሰማን ዮ አኑኤ በእሱዕኔ አጉረኖበአ» ዬሰ።
1 ዬሱሱ ህከ ጠሀ ጠሃቅ ጦፎሀኒች ዘኪን ገሊሊች ኬእ ዮርዳኖስ ለግ ዉደኣን ዮ ይሁድ ባዱ መሮ። 2 ሆለሙ ምናደቡ አወኖስ። እስን ህከኔ ፈይሾሰ። 3 ህተ ጃተ ፋሪሰት ዬሱስበ ዋልት ሉስሶስተ «መቱ መንቹ ሜንትቹስ እኮ ጠሂን ሆሪንን ሸሩ ሀስሰኗንዶ?» ይት ጠዕምቶእ። 4 እስን ፈንቀሽ «ቆጫንቹሰ ዎነን ‹ሜንትቹታ ጎንቹሃ አስ ቆጬሰ› የመሞ አነበቤንምበእንዶ? 5 አሞ ‹መንቹ አነሲ አመሲ አጉር ሜንትቾንተስ ሜጡ እሀኖ። ለሙንኩሰ ሜጡ ማለ እካእ› ዬእ። 6 ህከኒ እሶኦት ከኒች ዘኪን ሜጦ ማለ በጋን ለሞበአ። አቼ መገኑ ሜጡ አስ ጣጆ መኑ አነነ አሱንከ» ዬሰ። 7 እሶኦንት «ህከደ ሙስ ሚሃመት መንቹ ሜንትቾሀንስ ፉርመ ኣስ ገፈሩንተ አዘጆ?» ይት ጠዕምቶስ። 8 ዬሱሱ «ሙስዕኑ ሜንቱዕኔ ሸርቴኑንተ አዘጆ ዎዘንዕኔ ዱድማሃት። እኮዳ ኤጅ ህትጉተበአ። 9 አን ያንክዕኔ፤ ሳእ ዳፊን እሁምቦች ሜንትቹስ ሸር ዎልተ ኤበኖ ሆሩንኩ ሳኣንቿ» ዬሰ። 10 አወናኑስ «ጎንችነ ሜንትቾጉ ህትጉተ እኮች ኤበቀሙ መ አሰኖለ?» ይቶስ። 11 ጠሁ እኮዳ ዬሱሱ «ኣሰሞሰሪች ጠሊች ህግየን ከ ጠሀ ሆሩንኩ መኑ ኣቂ ደንዱምቧ። 12 ዳፉንኩስ ሙሬሰኣከተ እክ እለንቴሩ ዮእ። አሞ መኑ መራጭየንሰ ሙሬሰኣከተ እኬሩ ዮእ። ህትጉንተ መገን ዎሞመተኔ ይት ሙሬሰኣከተ እኬሩ ዮእ። ህካን ኣቂ ደንደኖ ዮደ ኣቁን» ዬሰ። 13 ህተ ጃተ ዬሱሱ አሌንተሰ አንገተ ኡጅ መገኑ ኡጩንተሰ ጪለተ እስበ ኤቤመ። አወናኑስን ዋሽቶ መነ አሙዕርቶእ። 14 እኮዳ ዬሱሱ «መገን ዎሞመት ከሮኦገ ዮሪቢተ እኮተኔ አጉሬሰ። ጪላከት ኢበ ዋልቱንተ ከንቴኖችዬ» ይኬእ 15 አንገስ አሌንተሰ ኡጅ ማሰኦሰሀኒች ዘኪን ዎሉበ ኦሮቄእ። 16 መትተ ጃተ መቱ ሀርድቹ ዬሱስበ ዋል «ሮስሳንቾ! ዶሊ ሆሪንከ ጎፉምቡተ ሄቸተ ደቆተ መ በሬደ ጠሀ አሱ?» ዬእ። 17 ዬሱሱንኩ «በሬደ ጠህተኔ ሚ ጠዕምተዮንቴኤ? በሬዱ ሜጦት። ዶሊ ሆሪንከ ጎፉምቡ ሄቸተ ሀሶንትደ አዘዙተ ቆረብ» ዬስ። 18 ህኩ ሀርድቹንኩ «ሀተ አዘዙተ?» ዬስ። ዬሱሱንኩ «ሽቶት፥ ሳኦት፥ ሞገኦት፥ ቆጰነ ነቀሶትኒ 19 አነኪ አመኪ አብስኒ። ኦሌቹክ ገግክገ ኢት» ዬስ። 20 እስን ዬሱሰ «ከረ ሆረንከ ቆረቤምየረ። ፈኤሩ ዎሉሩ ዮንዶ?» ዬእ። 21 ዬሱሱንኩ «ሙጩሩ እሂ ሀሶንትደ መርት ኬእ ዮኬረ ሆረንከ ህርት ቡጢ ኣስ። ሰማን ዱበሉ እካንት። ህትክ ዋልት አወኔኤ» ዬስ። 22 ህኩ ሀርድቹ ህካን መጮጬ ጃተ በትናሹ ዱቡ ዮስተኔ ክቼአን ኦሮቄእ። 23 ዬሱሱ አወናኒሀንስ «ገርተ ያንክዕኔ፤ ዱበላሺ ሰሜ ዎሞመተ ኣጉ አብሽ ኬዕማሻ። 24 ለንኪሃ ያንክዕኔ፤ ዱበላሹ መገን ዎሞመተ ኣገኖሀኒች ጋሜሉ + መርፍ ጠላሊን ህጉ ቢለኖ» ዬሰ። 25 አወናኑስን ህካን መጮቶ ጃተ አብስ ማለልት ኬእ «ህከደ አይ ፈኢ ደንደኖለ?» ይቶእ። 26 ጠሁ እኮዳ ዬሱሱ እሶኦተ ጡደን «ኩን መኒ ደንዴሱምቧ። እኮዳ መገኒ ሆሩሩንኩ ደንዴሰኗ» ዬሰ። 27 ህተ ጃተ ጴጥሮስ ፈንቀሽ «ህኩዕኒን፥ ነኦት ሆረረንከ አጉን አወኔንኬ። ህከኒ ደቅናምሩ መሃን?» ዬእ። 28 ዬሱሱንኩ «ገርተ ያንክዕኔ፤ አዕኖኦት ኤስ አወንቴንተሩ መንች ቤቱ ሃሮ ዶላን አብንስ ዎሞመ በርጩማን አፉዕለኖ ጃተ አዕኖኦቲ ቶነ ለሞ ዎሞመ በርጩማን አፉዕልቴን ቶነ ለሟንከ እስራኤል ቦኮን ፍርድቴነንተ። 29 አሞ ኢ ሱዕምተኔ ምነተ እንዶ ህዛከተ እንዶ አነ እንዶ አመተ እንዶ ሜንትቹተ እንዶ ኦሱተ እንዶ እረስ አጉሮ ሆሩንኩ ጥቤ አፎ ደቀኖ። አሞ ዶሊ ሆሪንከ ጎፉምቡተ ሄቸታ ደቀኖ። 30 ጠሁ እኮዳ ሆለሙ ብራኑ ዘካኑ አሞ ዘካኑ ብራኑ እካእ» ዬእ።
1 ዬሱሱ «ሰሜ ዎሞመት ዎይነስ ሁጀቱንተ ሁጀታኑ ቀጠሮተ ገስመ በቅተ ፉሎ እር አነ አጉዳእ። 2 እስን ሁጀታኒን በሬ መ-መቱ ብረ ባቶሰተ ኢተም ዎይንስ ኣዝ ሶኮሰ። 3 እርስ አኑንኩ ሰሶ ሳት ቁንጣን ፉል ሁጅተ ሆግ ድኮ መዕኔን ኡርቴ ዎሉ ኬኑሃ ጡጆ። 4 እሶኦንከ ‹አዕኖኦቲ ዎይንኤ ኣዝ መርዬ። ሀስሰኖዕኔ ባታንክዕኔ› ዬሃን መርቶእ። 5 አሞ ሌሆ ሳትነ ሆንሶ ሳት ቁንጣኒ ፉል ህትጉንተ አሴእ። 6 አሞ ቶነ መቶ ሳት ቁንጣን ፉል ዎሉ ኬኑሁ ኡርቴረ ደግ ‹ከኔ ኡርቴን ሁጀቴኑዕናች ሚ ሆሴንተ?› ዬሰ። 7 እሶኦንት ‹ቀጠረኖኔ ሆንጌት› ይቶስ። እስን ‹አዕኖኦቲ ዎይንኤ ኣዝ መርዬ› ዬሰ። 8 እሩ ሀወሬ ጃተ እርስ አኑ ምንስ አዘዛንቹ ‹ሁጀታኑ ገእት ዘካንችሀኒች አፍ ዎነ ኬኑ ኢለንቀጤች ሁጀቶ ዋገ ባትሰ› ዬስ። 9 ህተ ጃተ ቶነ መቶ ሳታን ቀጠረንቶሩ ህንጭት አኑንኩ አኑንኩ መ-መቱ ብረ ኣቅቶእ። 10 አሞ ዎነ ቀጠረንቶሩ ዋልቶ ጃተ በትስ ኣቅታኢ አጉጄሰ እኬ። ጠሁ እኮዳ እሶኦቲ አኑንኩ አኑንኩ መ-መቱ ብረ ኣቅቶእ። 11 - 12 እሶኦንት ግዘ ኣቅተን ‹ኩ ዘኮ ቀጠረንቶሩ ሁጀቶኢ ጠል ሜጦ ሳተ። ዊመንከስ በር አሪቾን ቡምበን ሁጀንተን ሆንሶም ኔሳንን ቅጡ ባቴንትሰ› ይት እርስ አን አሌን ጉንጉንቶእ። 13 እርስ አኑንኩ ህከን ሁጀታኒች መቲሀንስ ‹ኢ ጃለ! አን ሜጡራ በእስምበኬ። አት ኤሳን በሬ መቱ ብረ ባቱንተሄ ኢተንትምበእንዶ? 14 ህከኒ ቆደክ አጵት ኦሮቅ። አን ኬሳ ኣሴምገንከ ዘኮ ዋሎ መንቺሃ ኣሶስተ ኢታም። 15 ገግኤረ ሀሾምገ አሶተ ደንዳምበእንዶ? እንዶ አን ቢዘ እኮምተኔ ቂንሽተዕኔንዶ?› ይ ፈንቀሼእ። 16 ህከኒ ዘካኑ ብራኑ አሞ ብራኑንኩ ዘካኑ እካእ» ዬእ። 17 ዬሱሱ ዬሩሳሌም ከተመ መረን ቶነ ለሙንከ አወናኑስ ቢንን እስበ ገእ ዎቃን መረንተንየን 18 «ህኩዕኒን፥ ቴሱ ነኦት ዬሩሳሌመ መነዮም። ህከኔን መንች ቤቱ ቄስ አወንሳንነ ሴር ሮስሳን አንጋን ህግሴን ኣሴናንስ እሶኦት ሬሆ ፍርደ አሌንተስ ፍርድታእ። 19 አሞ እሶኦት አሌቁንተስ፥ ገረፉንተሲ ሰቀልቱንተሲ አይሁደ እኩምቦ መኒ ህግስ ኣስታስ። እኮዳ ሰክ በር ሬሆች ኬአኖ» ዬሰ። 20 ዘብዶሴ ሜንትቹት ኦሱሴ አፍ ዬሱስበ ዋልት ብሬንተስ ጉሉጵት መቱ ጠሀ ኡጨቅቶእ። 21 ዬሱሱንኩ «መ ሀሴንት?» ዬሴ። እሴን «ዎሞማንተክ ተን ለሜየንተ ኦሶችኤ መቱሰ መኬክ ዉዲን መቱሰ ጉረክ ዉዲን አፉዕልታገ አስ» ይቶስ። 22 ጠሁ እኮዳ ዬሱሱ «ኡጭቴነንተረ ደጌነንተበአ። አን አጋም ሀው ጡወ አጊ ደንድቴነንንዶ?» ዬእ። እሶኦንት «፥ ደንድናም» ይቶስ። 23 ዬሱሱንኩ «ሀውኤ ጡወዕኑ አጊ ደንድቴነንተ። እኮዳ ጉራንተኤ መኬንተኤ አፉዕሌኖገ አሳሚ አኔበአ። ህት መዕንት ኣሰንታኢ አኑኤ ቅጠንሴሰሪሃት» ዬእ። 24 ቶርዱሙንኩ አወናኑ ህከ ጠሀ መጮቶ ጃተ ህተን ለሜየንተ ህዛካን አብስ አሙዕረንቶእ። 25 እኮዳ ዬሱሱ ሆረንከሰ እስበ ገእ «አይሁደ እኩምቦ መን ገሻኑ ጠቅታሰጋ አባኑሰን ዳንታሰጋ ደጌነንተ። 26 ክዕኔኤ ሜሬሮን ህትጉተ እሁንከ። እኮዳ አዪ ክዕኔኤች አበ እሂ ሀሰኖ ሄኦደ አላንቹዕኔ እሁን። 27 አሞ አዪ ክዕኔኤ ሜሬሪች ብራንቹ እሂ ሀሰኖ ሄኦደ አላንቹዕኔ እሁን። 28 ህትጉንተ መንች ቤቱ ሁጀቶታ ፎልስ ሆለመ መኒ ዎዝኑተ አስ ኣሶታ ዋሎ በጋን እሲ ሁጀቴኑንተ ዋልምበአ» ዬሰ። 29 ዬሱሱሁ አወናኑሲ እያርኮ ከተሚች ፉልት ኦሮቅተንየን ሆለሙ መኑ አወንቶስ። 30 ዎቄ ቶቾን አፉዕልቴ እኬ ለሙ ቆቁ መንቹ ዬሱሱ ህከኒን ህገኖገ መጮቶ ጃተ ላገሰ ጦቀት «ዳዊቴ ቤቶ! ቅሽጥኔ» ይቶእ። 31 ህኩ አወነኖ መኑንኩ «ሰዕምዬ!» ይ ሻቆሰ። ጠሁ እኮዳ እሶኦት ዎናቺ አብስ «ዳዊቴ ቤቶ ቀርቾ! ሀእ ቅሽጥኔ» ይት ያርቶእ። 32 ዬሱሱንኩ ኡር እስበ ገእ «መ አሱንተክዕኔ ሀሴነን?» ዬሰ። 33 እሶኦንት «ቀርቾ! እልኔ ፈነንቱንተ ሀንሳም» ይቶስ። 34 ዬሱሱንኩ ቅሽጥ እልሰ አንጋን አፎ ጃንተ እልሰ ፈነንትየን አወንቶስ።
1 ዬሱሱሁ አወናኑሲ ዬሩሳሌም ከተመ ኦንጠኮ ጃተ ዘይት ሀቁ ሌአኖ ዱን አሌን ዮ «ቤተፋጌ» ዬኖ ኦሎ ኢልቶእ። ህተ ጃተ ዬሱሱ አወናኒችስ ለሙ 2 «ብሬንተዕኔ ዮ ኦሎ መርዬ። ህከኔን ዎተሪንተሴን ኡሱረንቴ ሀሩቹተ ደጌነንተ። ህከረንከ ሂርቴን ኤብዬ። 3 አዪ መቱረ ዬዕኔደ ‹ቀርቺ ሀስስየኔት› ይዬ። እስን ሰርብን ሶሀኖ» ይ ሶኮ። 4 - 5 ኩን እኮ ህራጋንቾን «ጥዮን + ከተም መኒ ‹ህኩዕኒን፥ ዎሙክ ሀሩቾኒ ሀሩቾ ዎተራኒ ኮዕር ማሽማን ዋለኖ› ይዬሰ» የመም ጠሃቀሞ ዊሙንታት። 6 አወናኑንኩስ መርት ዬሱሱ ዬሰገን አስቶእ። 7 እሶኦንት ሀሩቹተ ዎተሪንተሴን ዋሽት ኦድሸሰ ሀሬ ጉጆን ዎርትየን ዬሱሱ ኮዕሬእ። 8 መኒች በትናሹስ ኦድሸሰ ዎቃን ዌኤሶእ። ዎሉ ኬኑ አሞ ሀቅ ሀማከተ ሙርተን ዎቃን ዌኤሰዮ እኬ። 9 ሆለሙ መኑ ብሬኒ ዘኪኒ ላገሰ ጦቀት «አብኑ ዳዊቴ ቤቲ እሁን። ቀርቾ መገን ሱዕሚን ዋለኖ ማሰአሜሃ። መገኒ አብኑ አሌ ሰማን እሁን» ይቶእ። 10 ዬሱሱንኩ ዬሩሳሌም ከተመ ኣጎ ጃተ «ኩን አዬት?» ያን ከተም መኑ ሆሩንኩ ሌንቄቄእ። 11 ህኩ ሆለሙ መኑንኩ «ኩን ገሊል ባዶን ዮ ናዝሬት ከተሚች ዋሌሃ ህራጋንቾ ዬሱሳት» ይቶእ። 12 ዬሱሱ መገን ኬሰሞ ምን ኣግ ምንስ ኣዜን ህርታራ ህዕርታራ ሸር ፉሼእ። ግዘ ዶርታሪ ጠረጴሰታ ሀንደርተ ህርታ መን በርጩማከታ ጎምብሾ። 13 እስን « ‹ምኑኤ መገኑ ኡጬኗ ምን የመም ገአመኖ› የመም ጣፈሜእ። እኮዳ አዕኖኦት ቦጋን ግምበ አስቴንተ» ዬሰ። 14 ዬሱሱ መገን ኬሰሞ ምኔን ሄአንየንን ቆቃከቲ ሺሃከቲ እስበ ዋልትየን ፈይሾሰ። 15 ጠሁ እኮዳ ቄስ አወንሳኑሁ ሴር ሮስሳኑሁ ዬሱሱ አሴ ማለልሲሳ ጠሃከታ መገን ኬሰሞ ምኔን «ዳዊቴ ቤቲ አብኑ እሁን!» ይተን ጨንጭታ ኦሱታ ጡዶ ጃተ አብስ አሙዕረንቶእ። 16 እሶኦንት «ኩሩ ይታረ መጮተዮንትንዶ?» ይቶስ። ዬሱሱንኩ «፥ ‹ጪላከነ ቀንታሪ አፌች ገለት ቅጠንስቶንት› ይታ ላገተ ሆረን አነበቤንምበእንዶ?» ዬሰ። 17 እስን እሶኦች አነነ እክ ህከን ከተሚች ፉል «ቢታነ» ዬኖ ኦሎ መር ህከኔ ገሎ። 18 ዬሱሱ ለንክ በር ገስመስ ከተመ ፈንቀል መረን ጎሬኮ። 19 እስን ዎቄ ቶቾን ዮ መትተ ኦዴቹተ + አጉደኖ ሀቀ ጡጅ ሀቁችስበ መሮ። እኮዳ ቦንጢችስ ህግየን ሜጥተ ላልቹታ ደግምበአ። ህከ ሀቁቹንከ «አት ለንኪ ሆረን ላልቶት!» ዬስ። ሀቁቹንኩስ ህተ ጃንተ ሞል ፈጆ። 20 አወናኑስን ህካን ጡዶ ጃተ ማለልት ኬእ «ሀትተ ኩ ኦዴቹት አጉደኖ ሀቁ ሜጤን ሞል ፈጆ?» ይቶእ። 21 ዬሱሱንኩ ፈንቀሽ «ገርተ ያንክዕኔ። አመዕነቱ ሄኦክዕኔዳ ሆረን መለንቴኑምቦዳ ከን ሀቁቾን እኮ ጠሀ ጠለ አቴነንተበአ። ጠሁ እኮዳ ከ ዱነ ‹ከምቢች ጦቅት በሃራን ኡብ› ይቴንተ እክየኒ እሀኖ። 22 አመዕነቱ ሄኦዕኔደ ኡጭቴንተ ጠሀ ሆረንከ ኣቅቴነንተ» ዬሰ። 23 ዬሱሱ መገን ኬሰሞ ምን ኣግ ሮስሰዮሀኔን ቄስ አወንሳኑሁ ባድ ኑባቡሁ እስበ ዋልት «ከ ጠሀ አታንቲ መ መቄኔት? አሞ ከስ መቆ ኣሴሄ አዬት?» ይቶእ። 24 ዬሱሱንኩ ፈንቀሽ «መቱረ ጠዕማንክዕኔ። አዕኖኦት ህካን ፈንቀሽቴንተኤደ አኒ ከረ መ መቄን ሁጀተዮምንዶ ኩላንክዕኔ። 25 ዮሃንሴ ጥንቀቱ ሀኖቼት? መገኒቼትንዶ መኒቼት?» ዬእ። እስ-እሶኦንት « ‹መገኒቼት› ይኖምደ ‹ህከደ ሚ ዮሃንሴ አመዕንቴንምበስ?› ያኖኔ። 26 ጠሁ እኮዳ ‹መኒቼት› ይኖምደ መኑ ሆሩንኩ ዮሃንሴ ‹ህራጋንቿ› ይ አመዕኔተኔ መነ ዋጅናም» የቀንቶእ። 27 ህከኒ እሶኦት ዬሱሲ «ደንጋምበአ» ይት ፈንቀሽቶእ። ዬሱሱንኩ «አኒ ከረ መ መቄን ሁጀተዮምንዶ ኩላንክዕኔበአ» ዬሰ። 28 ዬሱሱ «መ አጉደዮክዕኔ? መቶ መንቺ ለምት ኦሱት ዮስ እኬ። እስን መትስበ መር ‹ከበር ዎይን ኣዝ መርት ሁጀት› ዬእ። 29 ቤቱስን ‹መራምበአ› ይ ፈንቀሼእ። እኮዳ ዘኮስ ጋብ ሁጀቲ መሮ። 30 አሞ ለንክ ቤትስባ መር ዎነሀንገን ዬደ ‹ኤኩ ኢ ቀርቾ መራም› ዬእ። እኮዳ መሩዕነን ፈኦ። 31 ከን ለሚችን አኒሀንስ አዘዘሞ ሀከኔት?» ዬእ። እሶኦንት «ዎነስየ» ይቶእ። ዬሱሱንኩ «ገርተ ያንክዕኔ፤ ቀረጣኑሁ ሳኣኑሁ ክዕኔኤች ብርስት መገን ዎሞማን ኣጋእ። 32 ዳፉንኩስ ዮሃንስ ሙጩርመ ዎቃ ጡድሶክዕኔተ ዋሎደ አመዕንቴንምበስ። ጠሁ እኮዳ ቀረጣኑሁ ሳኣኑሁ አመዕንቶስ። አዕኖኦት ዘኮ ህካን ጡዴኒ ቢረ ይቴን አመዕንቴንምበስ» ዬእ። 33 ዬሱሱ «ዎልተ አጉዲሸታ መጮጭዬ። እራንተስ ዎይነ ካሼ መቱ መንቹ ዮ እኬ። እስን ዎይነስ ዘህሽ ኦች ላሉስ ጡንሼኖ መዕንተ እም ቆረባኒ ቆጠ ደጅ አላኒ ቀቤ ኣስ ዎሉ ባዱ ኦሮቄእ። 34 ዎይኑስ ላለኖገ እኮ ጃተ ላሎችስ ኤቡንተ ሶቀማኑስ አላንበ ሶኮ። 35 ህኩ አላኑንኩ ሶቀማኑስ አፍ መቱስ ኦልቶእ፤ አሞ መቱስ ሽቶእ። ዎሉስ ክኒን ቀሶእ። 36 ለንኪሃ እርስ አኑ ዎነሪች በተኣ ሶቀማኑ ሶኮደ ህኩ አላኑንኩ ዎነረ አስቶገን አስቶእ። 37 ህከኒች ዘኪን ‹ቤቱኤዕኑ አብሳእ› ይ ቤቱስ ሶኮ። 38 ጠሁ እኮዳ ህኩ አላኑ ቤቱስ ጡዶ ጃተ ‹ረገአኖ ከኔት። ዋሌ፤ እሱ ሽን እረስ ረገዕናም› የቀንቶእ። 39 እሶኦንት እሱ አፍ ዎይን ኣዚች ኤተሩ ፉሽት ሽቶስ። 40 አቼ እርስ አኑ ዋሎ ጃተ ህከ አላኑ መ አሰኖሰ?» ዬሰ። 41 እሶኦንት «ህከ ሂለ መነ ሂለ ሸነ ሽ ላሉተ ጄቾን ኣስታ ዎሎ አላኒ ኣሰኖ» ይቶስ። 42 ዬሱሱንኩ « ‹ምን ምንታ መኑ ገዶ ክንቹ ምንስ ኡቱቡ እኮ። ህትስን መገንተ ሁጅ። አሞ እሌሀኔን ማለልሲሰኗ› የመም መጣፋን ጣፈሞ አነበቤን ከሰበእንዶ? 43 ህከኒ አን ኩላንክዕኔ፤ መገን ዎሞመት ክዕኔኤች ከመንት ላሉተ ላለኖ ምናደቢ ኣሰንታእ። 44 ህከን ክን አሌን ኡበኖ ቡት-ቡት ያኖ። ህኩ ክኑ አዬ አሌኒ ኡቦደ ጣንሰኖስ» ዬሰ። 45 ቄስ አወንሳኑሁ ፋሪሰቲ ዬሱሱ ጠሃቄ አጉዲሸተ መጮቶ ጃተ እሶኦተኔ ጠሃቄገ ደጎእ። 46 ህከኒ እሶኦት አፎስተ ሀሶእ። ጠሁ እኮዳ መኑ ዬሱሰ ህራጋንችገ ጡደዮስተኔ መነ ዋጅቶእ።
1 ዬሱሱንኩ ለንኪሃ አጉዲሻን 2 «ሰሜ ዎሞመት ቤቲሀንስ ቦሎች ድግሰ ቅጠንሴ ዎመ አጉዳእ። 3 እስን ቦሎቺሀንስ ገአንቶ መንበ ‹ዋሌ› ይቱንተ አላኑስ ሶኮ። ጠሁ እኮዳ ገአንቶ መኑ ዋሉ ግቦእ። 4 ለንኪሃ ህኩ መንቹ ዎሉ አላኑ ‹ህኩዕኒን፥ ድግሰኤ ቅጠንሴም። ቦረኤ ሜሼሉ ግዙኤ ዱለሜእ። ሆሩሩንኩ ቅጠሜእ። ድግስበ ዋልዬ ይቴን ገአንቶሪ ኩልዬ› ይ ሶኮ። 5 እሶኦንት ጠሀስ ገድ መቱስ ሆጎስበ ዎሉስ አሞ ዘዘሎስበ ኦሮቄእ። 6 ፈኦስሩ አሞ አላኑስ አፍ ጀወቶእኒ ሽቶእኒ። 7 ዎሙንኩ አሙዕረም ቤጠበስ ሶክ ህከ ሽቶ መነ ሽሲሾ። ከተመንከሰ ቡሴእ። 8 ህተ ጄቹተ አላኒሀንስ ‹ድግሱስ ቅጠሜእ። እኮዳ ገአንቶሩ ሀስሱምቡረ እኬእ። 9 ህከኒ ዎቃ ፉልቴን ደጌንታ ሆረንከ ድግስበ ገእዬ› ዬሰ። 10 ህኩ አላኑንኩ ጎዳናካን ፉልት ደጎኢ ሆረንከ ሂለሃ ጡመሃ ጠጰትየን ቦሎችስ ምኔን መኑ ዊሞ። 11 ዎሙንኩ ህከ መነ ጡዶተ ምን ኣጎ ጃተ ቦሎች ኦድሸተ ኦደቁምቡ መንቹ ህከኔ ጡጅ 12 ‹ኢ ጃለ! ቦሎች ኦድሸተ ኦደቅቱዕነ ሀትተ ከበ ኣግ?› ዬስ። ህኩ መንቹንኩ ሰዕም ይ አጉሮ። 13 ህከኒች ዘኪን ዎሙ አላኒሀንስ ‹አንገሲ ሎከሲ ኡሱርቴን ሀደ ዮ ቱንሶን ኡጅዬ። ህከኔን ኦነታ እንቁተ ኢጡሃ እሀኖ› ዬእ። 14 ዳፉንኩስ ገአንቶሩ ሆለማ። እኮዳ ዶዕረንቶሩ ቀ» ዬእ። 15 ፋሪሰንት ኦሮቅት ዬሱሰ ጠሃቀኖ ጠሂን ሉስሶተ ኤረንቶእ። 16 እሶኦንት «ሮስሳንቾ! አት ገሬቢ እኮንትገ፥ መገን ዎቃ ገሬን ሮስሳንቲ እኮንትጋ አሞ እልተ ጡድ ጎዕልቱምቡ እኮንትጋ ደንጋም። 17 ሀኖ ኩልኔ፤ መ አጉደዮኬ? ቄሳሬ + ግብረ ባቱ ሀስሰኗንዶ ሀስሱምቧን?» ይቱንተ አወናኑሳ ሄሮድሴ ዉድ መነሃ ሶኮእ። 18 ዬሱሱንኩ ሂልመሰ ደግ «ኩ ሳድጨማኑ! ሚ ኬንቴነዮንተኤ? 19 ሀኖ ግብሪ ባቴኖስ ግዘ ጡድሽዬኤ» ዬሰ። እሶኦንት መቱ ብረ ዋሽት ኣስቶስ። 20 ዬሱሱንኩ «ከን ብር አሌን ጣፈሞሩ ምስሉሲ አዬየን?» ዬሰ። 21 እሶኦንት «ቄሳሬየ» ይቶእ። ዬሱሱንኩ «ህካን እኮች ቄሳሬቢ ቄሳሬንከ መገንቢ መገኒንከ ኣስዬ» ዬሰ። 22 እሶኦንት ህካን መጮቶ ጃተ ማለልት ኬእ አጉርት ኦሮቅቶእ። 23 ህከ በርንከ «ሬሆች ኬኡ ዮበአ» ይታ ሳዱቀት ዬሱስበ ዋልት 24 «ሮስሳንቾ! ሙስ ‹መቱ መንቹ ኦሱተ እሉዕነ ሬሄደ ህዞስ ሜንትቹስ ረገእ ሬሄ ህዜሀንስ ኦሱተ እሉን› ዬእ። 25 ለመልት ህዛከት ኒባን ዮ እኬ። በህሩሰ ሜንትቹተ ኤብ ኦሱተ እሉዕነ ሜንትቹስ ህዜሀንስ ኡጅ ሬሄእ። 26 ህትጉንተ ለንክቢንኩ ሰክቢንኩ ለመልቅቢ ኢለንቀጤች ረገአን ኦሱተ እልቱዕነ ሬቶእ። 27 ሆሪችሰን ዘኪን ሜንትቹሲ ሬቶእ። 28 ሆሩንኩሰ ኤበቅቶሴተኔ ሬሆች ኬኤኖ ጃተ ህከን ለመሊችን ሀከንስ ሜንትቹተ እካእ?» ይት ጠዕምቶስ። 29 ጠሁ እኮዳ ዬሱሱ ፈንቀሽ «መጣፈታ መገን መቆሃ ደጌኑምቡተኔ ሉሴነዮንተ። 30 ዳፉንኩስ ሬሆች ኬኤኖ ጃተ እሶኦት ሰሜ መገን ሶቀማንገ እካ በጋን ኤባበእኒ ቆርሲሰንታበእኒ። 31 - 32 ሬሆች ኬእተኔ እኮደዕኑ መገኑ ክዕኔኤ ‹አን አብረሃሜ፥ ይሳቄነ ያቆቤየ መገኑ› ዬኢ አነበቤንምበእንዶ? እስ ሄኣ ኬንየ መገኑ በጋን ሬቶ ኬንየ መገኑበአ» ዬሰ። 33 መኑንኩ ህካን መጮጬ ጃተ ዬሱሱ ሮስሾራን አብሽ ማለሎ። 34 ዬሱሱ ሳዱቀት ይታረ ሆጋገ አሴሰገ ፋሪሰት መጮቶ ጃተ ሜጡ እክ ዋልቶእ። 35 እሶኦችን መቱ ሴረ ደገኖ መንቹ ኬኖስተ 36 «ሮስሳንቾ! ሴር ኣዜን ዮ አዘዞች ሀትስ አበተን?» ይ ጠዕሜስ። 37 ዬሱሱንኩ ፈንቀሽ «ቀርቹ መገኑክ ዊማንክ ዎዘኒን፥ ዊማንክ ፎሊኒ ዊማንክ ሰውቲኒ ኢት። 38 ቲን ሆሪችን አበተኒ ዎነተ አዘዙኒ። 39 ህታንን አጉዳ ለንክ አዘዙት ‹ኦሌቹክ ገግክገ ኢት› ይታታ። 40 ሴረሃ ህራጋኑ ይቶራ ት ለምንት አዘዙት ሜጡ አስት አፋእ» ዬእ። 41 ፋሪሰት ሜጡ እክ ጠጵቶ ጃተ ዬሱሱ 42 «ዶረሞ ክርስቶስተኔ መ ሰውቴነን? እስ አዬየ ቤቱ?» ይ ጠዕሜሰ። እሶኦንት «ዳዊቴየ ቤቱ» ይቶስ። 43 እስን «ህካን እኮች ዳዊት ጡማንቾ አያኒን እክ ሀትተ ‹ቀርቾ› ይ ገአኖስ? ዳፉንኩስ ዳዊት 44 ‹ቀርቹ መገኑ ኢ ቀርቺ ዲናከክ ሎካችክ ዎሮዲን ኡጀንቀጤች መኬኤ ዉዲን አፉዕል ዬእ› ያን ገኤእ። 45 ዳዊት ‹ቀርቾ› ይ ገኤሲች ሀትክ ቤቱስ እሂ ደንደኖ?» ዬሰ። 46 ህከኒ ሜጥተ ላገታ ፈንቀሺ ደንዴኢ ዮበአ። አሞ ህከን በሬች አፍ አዪ ሜጡራ ጠዕሞስተ እግምበአ።
1 ህከኒች ዘኪን ዬሱሱ በትናሸ መኒሃ አወናኒሀንሲ 2 «ሴር ሮስሳኑሁ ፋሪሰቲ ሙሴ በርጩማን አፉዕልቴእ። 3 ህከንተኔ እሶኦት ሁጀታረ እሁዕናች ኩልታዕኔረ ሆረንከ አስዬኒ ቆረብዬኒ። ዳፉንኩስ እሶኦት ሰበካ ጠሀ ሁጄን ሆስሱምቧረ። 4 እሶኦት እዪ ደንዴኑምቡተ ኬዕማሸተ እይነተ ኡሱርት መን ጌነኖን እዪሳሃረ። እኮዳ ገጉሰ ዙሩዕመሰ ሉዲኒ ኡሊ ሀሱምቧረ። 5 ሁጅሰ ሁጀታኢ መኒ ጡደሚሃት። ዳፉንኩስ መገን ላጋች መ-መቱረ ጣፌን ጎቤመ ክታበ ሀራርስት ሚኔንተሰ ኡሱዕርታእኒ ጌነኖ ኦደቅታ ኦድሸሰ ሹረ ቄራርስታእኒ። 6 ድግስ ምናን አብን መዕኔን አፉዕሉሃ ጠጵት ምናካን ደናሞ በርጩማን አፉዕሉሃ ኢትታእ። 7 አሞ ድኮ መዕኔን ጡምሴኑንተሳ መኑ ‹ሮስሳንቾ!› ያን ገኡንተሳ ኢትታእ። 8 ጠሁ እኮዳ ሜጡ ሮስሳንቹ ጠሉ ዮዕኔተኔሃ አዕኖኦት ሆሩንኩ ህዛከተ እኬንተተኔሃ ‹ሮስሳንቾ› የመንቴን ገአንቴኖችዬ። 9 አሞ ሰማን ዮ አኑዕኔ ሜጡ እኮተኔ አዬኒ ተን ኡለ አሌን ‹ኒ አነ!› ይቴን ገእቴኖችዬ። 10 ህትጉንተ ቀርቹዕኔ ሜጡ ክርስቶሰ እኮተኔ ‹ቀርቾ› የመንቴን ገአንቴኖችዬ። 11 ክዕኔኤ ሜሬሮን ሆሪችን አቡስ ሶቀማንቹዕኔ እሁን። 12 ገገስ አብጨኖ ሆሩንኩ ቢለኖ። አሞ ገገስ ህርከአኖ ሆሩንኩ አበኖ» ዬእ። 13 ዬሱሱ «መኑ ሰሜ ዎሞመተ ኣጉምቦገ ጡፌን ከንቴነንተ ሴር ሮስሳኒሃ ፋሪሳሃ ክዕኔኤ ከን ሳድጨማኒ ኣዬ! አዕኖኦት ገጉዕኔ ኣጌነንተበአ። ኣጊ ሀሳ ኬኑሃ ኣጉምቦገ ከንቴነዮንተ። 14 አዕኖኦት ኩ ሳድጨማኑ ሴር ሮስሳኑሁ ፋሪሰቲ! አጉዲሲ ቄራርስቴን መገኑ ኡጭቴነን ምኔኑሰ ሬሄ ሜንትረ መለጤን ኣቅቴነንተተኔ ክዕኔኤ ኣዬ! ህከኒ ክዕኔኤ አሌን አቡ ፍርዱ እሀኖ። 15 አዕኖኦት ኩ ሳድጨማኑ ሴር ሮስሳኑሁ ፋሪሰቲ! መቱ መንቹ ክዕኔኤ አመዕነቶን ፈንቀሽቴኖተ በሃር አሊኒ ኡለ አሊኒ ዘህቴነንተ። እስን ፈንቀሎ ጃተ ክዕኔኤች ለሙ አፎ ባሰስ ዶሊ ሆሪ ጠእቱምቦ ጊራ ቅጠሜኢ አስቴነንተተኔ ክዕኔኤ ኣዬ! 16 አዕኖኦት ቆቁ አወንሳኑ! ‹መቱ መንቹ መገን ኬሰሞ ምኔን + ጤሌዕሌደ ሀዉ ዮበአ። እኮዳ መገን ኬሰሞ ምኔን ዮ ዎርቃን ጤሌዕሌደ ጤሌሉስ አፈኖስ› ይቴነንተተኔ ክዕኔኤ ኣዬ! 17 አዕኖኦት ኩ ቆቃከቲ ቀላከቲ! ዎርቀስ ኬስቹ አሰኖ መገን ኬሰሞ ምኑንዶ ዎርቁስ አባን? 18 ‹መቱ መንቹ ክትመ ክትሜኖ መዕኔን ጤሌዕሌደ ህከኒ ሀዉ ዮበአ። እኮዳ ክትሜኖስ መዕኔን ክትሚ ህንጨኤመራን ጤሌዕሌደ ጤሌሉስ አፈኖስ› ይቴነንተ። 19 አዕኖኦት ኩ ቆቁ መኑ! ክትመስ ኬስቹ አስታ ክትም መዕንትንዶ ክትሙስ አባን? 20 ህከንተኔ ክትም መዕኔን ጤሌዕሌኢ ክትምስ መዕኔኒ መዕኔንተስ ዮራን ሆራኒ ጤሌዕለዮእ። 21 አሞ መገን ኬሰሞ ምኔን ጤሌዕሌኢ መገን ኬሰሞ ምኔኒ ኣዜንተስ ሄአኖሀኔኒ ጤሌዕለዮእ። 22 ህትጉንተ ሰማን ጤሌዕለኖ መገን ዎሞመ በርጩማኒ ዎሞመስ በርጩማን አፉዕሌሀኔኒ ጤሌዕለዮእ። 23 አዕኖኦት ኩ ሳድጨማኑ ሴር ሮስሳኑሁ ፋሪሰቲ! መንዞች፥ ዎድማሚቺ አነነ አነነ ጠጎቺ ቶርዱሚች መቱ ፉሽቴነን ሴር ኣዜን ዮ አበስ ጠሀ፦ ፍርደ፥ ቅሽጡሃ አመዕነቱሃ አጉርቴንተተኔ ክዕኔኤ ኣዬ! ዎሉስራ አጉርቴኑዕናች ከረ አሱ ሀስሰኖክዕኔ እኬ። 24 አዕኖኦት ቆቁ አወንሳኑ! ቢምብተ መጠሽቴነን ጋሜለ ቁርጨቴነንተ። 25 አዕኖኦት ኩ ሳድጨማኑ ሴር ሮስሳኑሁ ፋሪሰቲ! ቡርጩቅዕኔነ ሰህንዕኔ ኣዜን ቦጊኒ እዲዲኒ ደጌንተረ ዊንሽቴን ኤተርስ ዉዱ ጠለ ሙጩርስቴንተተኔ ክዕኔኤ ኣዬ! 26 አዕኖኦት ኩ ቆቀት ፋሪሰት! ኤተሩስ ሙጩሩንተ ብርስቴን ቡርጩቅቢሃ ሰህንቢሃ ኣዝሰ ሙጩርስዬ። 27 አዕኖኦት ኩ ሳድጨማኑ ሴር ሮስሳኑሁ ፋሪሰቲ! ኣዜንተሰ ሬሄ መን ምቀቲ ቡሹሩ ሆሩንኩ ዊምየን አል ዉዲን ደንት ጡደንታ ኖሪን መክሴመ ሞገተ አጉዴነንተተኔ ክዕኔኤ ኣዬ! 28 ህከንገን አዕኖኦቲ መኒ አሊን ሙጩረተ አጉዴን ጡደንቴነን ኣዜንተዕኔ ሳድጨንቹሁ ሂልመቲ ዊንቴእ። 29 - 30 አዕኖኦት ኩ ሳድጨማኑ ሴር ሮስሳኑሁ ፋሪሰቲ! ህራጋን ሞጉ ግምብቴነኒ ጡማን ሞጉ ሀዉልተስ መክሴነኒ ‹አናከኔ ዶለ ነኦት ዮም እክየን አናከኔ ህራጋን ቄግ ዱንተንየን ነኦት አንገተ በርግናምበአ እኬ› ይቴነንተተኔ ክዕኔኤ ኣዬ! 31 ህከኒን ህራጋኑ ሽቶ መን ኦሱተ እሁዕኔ ገጊንተዕኔን ነቀሴነዮንተ። 32 አዕኖኦንት አናከዕኔ ሁጀቲ አፎ ሂለተ ሁጅተ ዊንሽዬ። 33 አዕኖኦት ኩ ዎሩሁ ዎር ኦሱቲ ዶሊ ሆሪ ጠእቱምቦ ጊረ ፍርዲች ሀትኬን ፈኤነን? 34 ህኩዕኒን፥ አን ህራጋኑ ቆረ መነሃ ሴር ሮስሳኑሃ ክዕኔኤበ ሶሃም። እሶኦችን መ-መቱሰ ሽቴነንተ፤ መ-መቱሰን ሰቀልቴነንተ። አሞ መ-መቱሰ ጠጵትዕኔ ምኔን ኦልቴነንተ። መቶ ከተሚችን ዎሉ ከተመ ሸርቴነንተሰ። 35 ህከንተኔ ጡማንቾ ኣቤሌ + ቄጊች አፍ መገን ኬሰሞ ምንነ ክትመ ክትሜኖ ሳጥን ሜሬሮን ሽቴንተ በራክዮ ቤት ዘካራሴ ቄግ ኢለንቀጤች ኡለ አሌን ዱነሞ ጡማን ቄጊ ሆሪንከ አዕኖኦት ጠዕመንቴነንተ። 36 ገርተ ያንክዕኔ፤ ኩ ጠሁ ሆሩንኩ ከን ዶል መን አሌን ኢለኖ። 37 ዬሩሳሌማ! ዬሩሳሌማ! ህራጋኑ ሽታንቲ! ኪበ ሶሀንቶረንከ ክኒን ቀሳንቲ! አንተቤቹት ጪጮረሴ ጎኖሴ ኣዜን ሀንቀፋሀንገ ጠጰኦዕኔተ ሀሾሚ ሀበንከተ ኮደ? እኮዳ አዕኖኦት ግቤንተ። 38 ህኩዕኒን፥ አቼ ምኑዕኔ ኦነ እክ ዲክ ፈአኖ። 39 ዳፉንኩስ አን ኩላንክዕኔ ‹ቀርች ሱዕሚን ዋለኖ ማሰአሜሃ› ይቴነንታ ኢለንቀጤች ለንኪ ጡዴነንተኤበአ» ዬሰ።
1 ዬሱሱ መገን ኬሰሞ ምኒች ፉል ኦሮቀንየን አወናኑስ መገን ኬሰሞ ምን ግምበ ጡድሶስተ ህንጭቶእ። 2 እኮዳ እስ «ከ ሆረንከ ጡዴነዮንተንዶ? ገርተ ያንክዕኔ፤ ክኑ ክን አሌን እኮገ መቱ ክንቹሁ ከኔ ፈኡዕነ ትገኖ» ዬእ። 3 ዬሱሱ ዘይት ሀቁ ሌአኖ ዱን አል ፉል አፉዕሌሀኔን አወናኑስ ጠሉ እስበ ህንጭት «ኪ ዋልነ ዶል ጎፍ መላት መሃን? አሞ ኩ ሆሩንኩ ጠሁ እሀኖሲ ሀከዳት?» ይት ጠዕምቶስ። 4 ዬሱሱንኩ ፈንቀሽ «አዪ ሉስሱምቦዕኔገ ቆረጵዬ። 5 ዳፉንኩስ ሆለሙ መኑ ‹አን ክርስቶሳት› ይተን ሱዕሚንተኤ ዋልት ሆለመ መነ ሉስሳእ። 6 ኦለሃ ኦል ዱዱቡሃ መጮቴነንተ። ህኩን ሆሩንኩ እሁዕነ ፈኡምቡ እኮተኔ ህልቄኖችዬ። እኮዳ ዶልስ ጎፉ ኢልምበእን። 7 ምናደቡ ምናደቢን ዎሙ ዎሚን በአመኖ። ጎሩሁ ኡለ ሌንቄቁሁ አነነ አነነ መዕኔን እሀኖ። 8 ኩን ሆሩንኩ ባል ኡዕና ዎነስየ። 9 ህተ ጃተ ሀዊ ህግሴን ኣሴኖዕኔ። አሞ ሼኖዕኔ። አዕኖኦት ኢ ሱዕምተኔ ሆራንከ ምናደብባን ግበንቴነንተ። 10 አሞ ሆለሙ መኑ ሉሰመኖ። ህትጉንተ መቱ መቱ ህግሽ ኣሰኖ። መኑ እስ-እሲንን በአመኖ። 11 በትናሹ ቆጰን ህራጋኑ ኬእ ሆለመ መነ ሉስሳእ። 12 ሾክመት በተኦተኔ ሆለመ መን ኢተት ስግታእ። 13 ጠሁ እኮዳ ዘካንቹ ኢለንቀጤ ደንዴኮ ፈአኖ። 14 ምናደቢ ሆሪንከ ነቃሸ እኩንተ ት መገን ዎሞመ ምሽራች ላገት ኡለ አሌን ሆራንን ሰበከንታእ። ህተ ጃተ ዶል ጎፉ ዋለኖ» ዬእ። 15 አነበበኖ መንቹ ካን ዘህጩን። ዬሱሱ «ህራጋንቹ ዳንኤል ጠሃቄገን ሽግገታ ቡሽመት ማሰአንቴ መዕኔን እክየን ጡዴንተ ጃተ 16 ይሁድ ባድ መኑ ዱነ ሁንቱን። 17 ምን አሌን ዮ መንቹ ምኔንተስ ዮረ ኣቂ ድሩንከ። 18 አሞ ሆጎባን ዮ መንቹ ኦድሸስ ኣቆተ ምንስ መሩንከ። 19 ህተ ጄቹተ ቀንስታሪሃ ሰላኒሃ ኣዬ። 20 ሁንቴነንተ ጃት መጦን እንዶ ሰንበት በሬን እሁምቦገ መገኑ ኡጭዬ። 21 ኡለት ቆጨንቶኢች አፍ እክ ከሱምቡ ብርተ ለቂ ሆረን እሁምቡ አቡ ሀዉ ዋለኖ። 22 ህት ሀው ጃት ገቦጥቱምቦ እኬራን መቱ መንቹሁ በራረመኖበአ እኬ። ጠሁ እኮዳ ዶዕረንቶ መንተኔ ህት ጃት ገቦጥታእ። 23 አዪ ‹ክርስቶሱ ከኔ ዮእ› እንዶ ‹ከኤ ዮእ› ዬዕኔደ አመዕንቴኖቼ። 24 ዳፉንኩስ ቆጰን ክርስቶሳከቲ ህራጋኑሁ ኬእ ደንዴቴ እክየንዕኑ ዶዕረንቶ መኑሁ ፈኡዕነ ሉስሶተ አበተ መላታ ማለሉታ ጡድሳተኔሃት። 25 ህኩዕኒን፥ አን ሆረንከስረ ብርስን ኩሌንክዕኔ። 26 ህከኒ ‹ህኩዕኒን፥ ኡዱመኣን ዮእ› ዬመዳ ፉልቴኖችዬ። አሞ ‹ህኩዕኒን፥ ዱመኔት› ዬመዕኔዳ አመዕንቴኖቼ። 27 ዳፉንኩስ በሌሱት በሌሳ ጃተ አርፉሊች አራግ ዉዱ ኢለንቀጤች ለልታሀንገን መንች ቤት ዋሉሁ ህትጉንተ እሀኖ። 28 ሬሹ ኡቦባን ዞብሩ ጠጵያኖ» ዬእ። 29 ዬሱሱ «ህከን ሀዊች ዘኪን አሪቹት ቱንስታእ። አገንቹሁ ጫክሰኖበአ። ቤዜት ሰሜች ኡባእ። ሰሜ መቆንኩ ሌንቄቀኖ። 30 ህተ ጃተ መንች ቤት መላት ሰማን ጡደንታእ። ኡለ አል ምናደቡ ሆሩንኩ አዌሰኖ። መንች ቤቱንኩ መቄኒ አበ አብኒኒ ሰሜ ጎሚን ዋለንየን ጡዳእ። 31 ጡሩምቡሉ አበ ላጋን ቡሰመንየን መገኑ ሰሜ ሶቀማኑስ ሶሀኖ። እሶኦንት ሾሏንከ እር ቶቺች እሲ ዶዕረንቶረ ጠጰታእ» ዬእ። 32 ዬሱሱ «ኦዴቹት አጉዲሸተ እኩንክዕኔ። ሀሙሴ ለተንየኒ ቦንጡሴ ገምበልክየኒ ጡዴንተ ጃተ ሀጉ ኢሌገ ደጌነንተ። 33 ህትጉንተ አዕኖኦት ኩ ጠሁ ሆሩንኩ እክየን ጡዴንተ ጃተ መንች ቤት ዋሉ ኡሩተ ኢሌገ ደግዬ። 34 ገርተ ያንክዕኔ፤ ኩ ሆሩንኩ ዊመንቀጤች ከን ዶል መኑ ህገኖበአ። 35 ሰሞሁ ኡለቲ ህጋእ። ጠሁ እኮዳ ላገኤ ሆረን ህጋበአ» ዬእ። 36 ዬሱሱንኩ «ህከ በርሃ ህከ ሳተሃ አና መገኒች ህግየን ሰሜ ሶቀማኑሃ እኮ ቤቱሃ እኮ አዪ ደጊ ደንደኖበአ። 37 ኖሄ + ዶላን እኮሀንገንከ መንች ቤት ዋሉሁ ህትጉንተ እሀኖ። 38 ህከ ዶለ በእ ዎኢች ብሬን ኖህ መርከባን ኣገኖ በሩ ኢለንቀጤች መኑ እተዮእ፥ አገዮእ፥ ኤበዮእኒ ቆርሲሰዮእኒ እኬ። 39 በእ ዎኡ ዋል ሆረንከሰ አባሽ ኦሮሰንቀጤች ደጉምቦሀንገንከ መንች ቤት ዋሉሁ ህትጉንተ እሀኖ። 40 ለሙ መንቹ ሆገኣ ቤቺች መቱሰ ኦሮሴናን መቱስ ፈአኖ። 41 ለምት ሜንትቹት ዊትማን ዊታ ቤቺች መትሴ ኦሮሴናን መትሴ ፈኣእ። 42 ህከኒ ቀርችዕኔ ዋል በሩ ሀከዳትንዶ ደጌኑምቦተኔ ቆረጵዬ። 43 ጠሁ እኮዳ ካን ደግዬ። መቶ ምን አኑ ሞገኣንቹ አንከሬች ሀከንስ ሳታን ዋለኖንዶ ደጌ እክየን ምንስ ቢጭ ኣጉንተ ሰዕም ያኖበአ እኬ። 44 ህከኒ መንች ቤቱ ሰውቴኑምቦ ሳታን ዋለኖተኔ አዕኖኦቲ ጣጥዬ» ዬእ። 45 ዬሱሱ «አቼ ምንስ አበሮሲ እቸተ ጃን ኣሱንተ ቀርቹስ አበሮስስ አሌን ዳኖንሴስ አመዕነሜ ቆሩ አላንቹ አዬት? 46 ቀርቹስ ዋሎ ጃተ የመሞገ አሰን ደገመኖ አላንቹ ማሰአሜሃ። 47 አን ገርተ ያንክዕኔ፤ ህከ አላንቹ ቀርቹስ ዮስሪ ሆር አሌንን ዳኖንሰኖስ። 48 እኮዳ ሂሉ አላንቹ ‹ቀርቹኤ ደሼእ› ይ ሰውይ 49 ሁጄስ ጃለተ ኦለን ድምባኒን በርገም እቱሃ አጉሃ አፎደ 50 ህከን አላንች ቀርቹ ቆረቡምቦ በሬኒ ሳታኒ ዋል 51 ቃረገ ቅጣጠኖስ። አሞ ሳድጨመኖ መናን ጣጅየንስ ህከኔ ኦኡሃ እንቁተ ኢጡሃ እሀኖስ» ዬእ።
1 ዬሱሱንኩ «ሰሜ ዎሞመት ኩራዘ አፍ እዜቸነ ኣቂ ፉልቶ ቶርዱምተ ባጃመተ አጉዳእ። 2 እሶኦችን ኦንትስ ቀላከተ፤ ኦንትስ ቆራከተ እኬ። 3 ቀላከስ ኩራዘ አፌ እኬ። እኮዳ ጋዙ አፍምበአ። 4 ቆራከስ ኩራዘሳ ዎሌ ኦዳን ጋዙሃ አፌ እኬ። 5 እዜቸኑስ ዋሉ ደሾ ጃተ ሆረንከሰ ግሰነት ቄልትየንሰ ኦሰኦእ። 6 እኮዳ አንከሬ ሜሬሮን ‹ህኩዕኒን፥ እዜቸኑ ዋሌእ። ፉልቴን ኣቅዬ› ዬኖ ጨንጨነት መጮጨንቶእ። 7 ህተ ጃተ ሆረንት ባጃመት ጦቅት ኩራዘሰ አፍሲሶእ። 8 ቀላከንት ቆራከተ ‹ኩራዙኔ ጠኦታት። ሀእ ጋዚችዕኔ ኣስዬኔ› ይት ኡጨቅቶእ። 9 ቆራከንት ፈንቀሽት ‹አይደጎ ክዕኔኤሃ ኔሳሃ እሁምቦደዕኑ? ህካን አጉርቴን ህሬኖ ቤቺች መርቴን ህዕርዬ› ይት ፈንቀሽቶእ። 10 ህት ቀላከት ጋዙ ህዕሪ መርቶ ቀጣን እዜቸኑ ዋሎ። ቅጠንት ኤጌርቶ ባጃመት እዜቸኒንን በርገንት ቦሎች ድግስበ ኣግየን ኡሩት ጡፈንቶእ። 11 ህት ቀላከት ኡሩት ጡፈንቶሀኒች ዘኪን ዋልት ‹ቀርቾ! ቀርቾ! ሀእ ኡሩተ ፈንኔ› ይቶእ። 12 እኮዳ እስ ፈንቀሽ ‹ገርተ ያንክዕኔ፤ አን ደጋንክዕኔበአ› ዬሰ። 13 አቼ በርሲ ሳተሲ ደጌኑምቡተኔ ቆረጵዬ» ዬእ። 14 ዬሱሱ «ሰሜ ዎሞመት ዎሉ ባዱ መረሞተ አላኑስ ገእ ግዘስ ኣሴ መንቹ አጉዳእ። 15 አኒንከ አኒንከ መቄሰ ቀጠ ቤሀን መቲሀንስ ኦንቴ ኩሜ ብረ፥ መቲሀንስ ለሜ ኩሜ ብረ፥ መቲሀንስ መቴ ኩሜ ብረ ኣስ ዎሉ ባዱ መሮ። 16 ኦንቴ ኩሜ ብረ ኣቄ መንቹ መስ ዘዘል ኦንቴ ኩሜ ብረ ቀልሲሾ። 17 ህትጉንተ ለሜ ኩሜ ብረ ኣቄኢሁ ዘዘል ለሜ ኩሜ ብረ ቀልሲሾ። 18 እኮዳ መቴ ኩሜ ብረ ኣቄኢ መስ ኡለተ እም ቀርችስ ግዘ ሞጎ። 19 ሆለመ ጄቾች ዘኪን ህከን አላን ቀርቹ መሮ ቤቺች ዋል አላኒንተስ ግዘስ ሸለቀንቸ አፎ። 20 ኦንቴ ኩሜ ብረ ኣቄ አላንቹ ዎሉ ኦንቴ ኩሜ ብረ አፍ ቀርችስበ ዋል ‹ቀርቾ! ኦንቴ ኩሜ ብረ ኣስቶንቴኤ እኬ። ህኩዕኒን፥ ኦንቴ ኩሜ ብረ ቀልሲሼም› ዬእ። 21 ቀርቹንኩ ፈንቀሽ ‹በሬደገ አቴንት፤ ኩ በሬዱ አመዕነንቴንት አላንቹ! ከን ቀሆ ጠሃን አመዕነንቶንትተኔ አባሪ አሌን ዳኖንሳንኬ። ዋል፤ ቀርችክ በጅጎበ ኣግ› ዬስ። 22 ህትጉንተ ለሜ ኩሜ ብረ ኣቄ አላንቹ ዋል ‹ቀርቾ! ለሜ ኩሜ ብረ ኣስቴንቴኤ። ህኩዕኒን፥ አን ለሜ ኩሜ ብረ ቀልሲሼም› ዬእ። 23 ቀርቹንኩ ‹በሬደ አቴንት። አት ኩ በሬዱ አመዕነንቴንት አላንቹ! ከን ቀሆ ጠሃን አመዕነንቶንትተኔ አባሪ አሌን ዳኖንሳንኬ። ዋል፤ ቀርችክ በጅጎበ ኣግ› ዬስ። 24 መቴ ኩሜ ብረ ኣቄ አላንቹ ዋል ‹ቀርቾ! አት ውጡምቡ መዕኔች ሀጢዳንትነ ብነቱምቡ መዕኔችን ጠጰታንት ጎደበ ቃረ መንቹ እሁክ ደጋም። 25 ህከኒ ዋጅ ግዘክ ኡለ ኣዜን ሞጌም። ኪረ ህከረግ› ዬስ። 26 ቀርቹንኩ ‹አት ኩ ሂሉ ጬመላሹ አላንቹ! አን ውጡምቡ መዕኔች ሀጢዳምጋ ብነኡምቡ መዕኔች ጠጰኣምጋ ደገንንዶ? 27 ህካን እኮች አን ዋል ግዘኤ ቀሎንተስን ኣቁንተ ቀልሲሰኖ መኒ ኣሱ ሀስሰኖኬ እኬ። 28 ህከኒ ኩሜስ ብረ ኣቅቴን ቶርዱሜ ኩሜ ብሩ ዮስ መንቺ ኣስዬ። 29 ዳፉንኩስ ዮስ መንቺ ኣሰመኖስኒ በተአኖስኒ። እኮዳ ዮስበእሀኒች ህኩ ዮሲንኩ ኣቀም ፈደኖ። 30 ህከ ፈቱምቡ አላንቹ ሀደ ዮ ቱንሶን ፉሽቴን ኡጅዬ። ህከኔን ኦኡሃ እንቁተ ኢጡሃ እሀኖ› ዬስ» ዬእ። 31 ዬሱሱ «መንች ቤቱ ሆራንከ መገን ሰሜ ሶቀማኒን አጀበም አብኒንተስ ዋሎ ጃተ አብንስ ዎሞመ በርጩማን አፉዕለኖ። 32 ምናደቡ ሆሩንኩ ብሬንተስ ጠጵያኖ። እስን ዜማንቹ ሆለተ ፌላኢች አነነ አሰኖገንከ መቱ መቲች አነነ አሰኖ። 33 አሞ ሆለተ መኬስ ዉዲን ፌላኡ ጉረ ዉዲን ኡርሰኖ። 34 ህተ ጃንተ ዎሙ መኬስ ዉዲን ዮሪ ‹አዕኖኦት ኢ አኑ ማሰኤዕኔሩ ዋሌ፤ ኡለት ቆጨንቶሀኒች አፍ ቅጠንቶዕኔ ዎሞመተ ረገእዬ። 35 ዳፉንኩስ ጎሬክየን እትሴንተኤ። ሰገብየን አግሴንተኤ። ኮህቹ እክየን ኮህንተ ኣቅቴንተኤ። 36 ከሌሃን ኦዲሴንተኤ። ሞሽየን ጠዕምቴንተኤ። ኡሱረምየን ጡዴንተኤ› ያኖሰ። 37 ህተ ጃተ ጡማኑ ‹ቀርቾ! ጎሬትየን ጡንድ ሀከደ እትንሶንኬ? እንዶ ሰገብየን ጡንድ ሀከደ አግንሶንኬ? 38 አሞ ኮህቹ እክ ዋልትየን ሀከደ ኮህንሶንኬ? ከልትየን ጡንድ ሀከደ ኦዲንሶንኬ? 39 ህትጉንተ ሀከደ ሞስየን እንዶ ኡሱረንትየን ጡንዶንኬ?› ይት ፈንቀሽታስ። 40 ዎሙንኩ ‹ገርተ ያንክዕኔ፤ ተን ህዛካችኤ መቶ ቀሂሀንስ አቴንተሩ ሆሩንኩ ኤሳ አቴንተሀንየገ› ይ ፈንቀሸኖሰ። 41 አሞ ጉረስ ዉዲን ዮሪ ‹አዕኖኦት ጤሌለንቴንተሩ ኤሳች ቄዕርዬ! ሼጣንቺሃ አወናኒሀንሲ ቅጠንቶ ዶሊ ሆሪ ጠእቱምቦ ጊረ ኣዝ መሬ። 42 ዳፉንኩስ ጎሬክየን እትሴንምበኤ። ሰገብየን አግሴንምበኤ። 43 ኮህቹ እክየን ኮህሴንምበኤ። ከልየን ኦዲሴንምበኤ። ሞሽየን እንዶ ኡሱረምየን ጠዕምቴንምበኤ› ያኖሰ። 44 እሶኦንት ፈንቀሽት ‹ቀርቾ! ጎሬትየን ጡንድ እንዶ ሰገብየን እንዶ ኮህቹ እክየን እንዶ ከልትየን እንዶ ሞስየን እንዶ ኡሱረንትየን ሀከደ ጡንድ ካዕልኑዕነ አጉኖንኬ?› ይታስ። 45 ዎሙንኩ ‹ገርተ ያንክዕኔ፤ ከን ቀቀሃኒች መቲሀንስ አስቴኑምቦች ኤሳ አስቴኑምቦሀንየገ› ያኖሰ። 46 ህከንተኔ ባጢላመስ ዶሊ ሆሪንከ ቅጣጠንታበ ኦሮቅታእ። እኮዳ ሙጩረስ ዶሊ ሆሪንከ ሄኣበ ኦሮቅታእ» ዬእ።
1 ዬሱሱንኩ ካን ሆረንከ ሮስሽ ጦፎሀኒች ዘኪን አወናኒሀንስ 2 «ለሞ በሬች ዘኪን ሻሽግ + አያነ አብሴኖገ ደጌነንተ። አሞ መንች ቤቱ ሰቀለሙንተ ህግሴን ኣሴኖ» ዬእ። 3 ህተ ጃንተ ቄስ አወንሳኑሁ ባድ ኑባቡሁ «ቀያፈ» ዬኖ አበ ቄስች ግቤ ኣዜን ጠጵቶእ። 4 እሶኦንት ዬሱሰ ማጥ አፍ ሽቶተ ቶቤኦእ። 5 ጠሁ እኮዳ እሶኦት «መን ሜሬሮን ብተት ኬኡምቦጊ እር አያናን እሁንከ» ይቶእ። 6 አበላሞ ስሞኔ ምኔን «ቢታነ» ዬኖባን ዬሱሱ ዮሀኔን 7 መትት ሜንትቹት ህረሴ አብስ እትሰተ እኬ ሽቱት ዊንቴ «አልባስጥሮሰ» + ዬኖ ክኒች መክሴመ ብልቃጠ አፍ ዬሱስበ ዋልቶእ። እስን ማዳን አፉዕሌሀኔን ቦቆንተስ ሽቱተ ቡርቶእ። 8 እኮዳ አወናኑስ ህካን ጡድ አሙዕረንት «ኩን ሚ ጠለ በአዮሃን? 9 ተ ሽቱተ አበ ግዘ ህሬን ቡጢ ኣሴመ እክየን ጡማ እኬ» ይቶእ። 10 ጠሁ እኮዳ ዬሱሱ ህካን ደግ «ት ሜንትቹት ኤሳ ደናሙረ አስቴኤ። ሚ ሀውሴነዮንተሴ? 11 ዳፉንኩስ ቡጡ ሆረንተ ጃተ ክዕኔኤን በርገንት ሄኣሃረ። ጠሁ እኮዳ አን ክዕኔኤን ሆረንተ ጃተ ሄኣምበአ። 12 እሴ ተ ሽቱተ አሌንተኤ ቡርቶኢ ሞገሙንተ ቅጠንስቶኤታት። 13 ገርተ ያንክዕኔ፤ ት ምሽራች ላገት ኡለ አሌን ሰበከንታባን ሆራንን ት ሜንትቹት አስቶ ጠሁ እሴተ ቃጌኑንተ አሰኖ» ዬእ። 14 ቶነ ለሟንከ አወናኒች መቱ አስቆሮንቶ ይሁድ ቄስ አወንሳንበ መር 15 «አን ዬሱሰ ህግሽ ኣሴንክዕኔደ መ ኣስቴነዕኔ?» ዬእ። እሶኦንት ሰጀዱመ ብረ ኣስቶስ። 16 እስን ህተን ጄቾች አፍ ዬሱሰ ህግሽ ኣሶተ መከተ ጃተ ሀሰዮ እኬ። 17 ጦሮሹ እቴነን አብሴኖ አያን + ዎነስ በር አወናኑስ ዬሱስበ ህንጭት «ሻሽግ ኦዝተ ሀከኔ ቅጠንስኑንተሄ ሀሰን?» ይት ጠዕምቶስ። 18 ዬሱሱንኩ «ከተመ መርቴን ‹ሮስሳንቹ ጄቹኤ ኢልቶተኔ አወናኒንተኤን ሻሽገ እታሚ ኪ ምኔኔት ያዮእ› ይቴን ኩልዬ» ይ መቶ መንችበ ሶኮ። 19 አወናኑስን ዬሱሱ አዘጆሰገን ሻሽገ ቅጠንስቶእ። 20 እሩ ሀወሬ ጃተ ዬሱሱ አወናኒንተስን ማዳን አፉዕሌእ። 21 እተንየንን «ገርተ ያንክዕኔ፤ ክዕኔኤች መቱ ኤስ ህግሽ ኣሰኖ» ዬእ። 22 እሶኦንት አብስ ክቼእ «ቀርቾ! አኔትንዶ?» ይተን ኮዳን ኮዳን ጠዕምቶስ። 23 ዬሱሱንኩ ፈንቀሽ «ቴሱ ኤሳን በርገም አንገስ ሻቴን ኣግሾ ኤስ ህግሽ ኣሰኗ። 24 መንች ቤቱዕኑ እስተኔ ጣፈሞገንከ ሬሀኖ። ጠሁ እኮዳ መንች ቤቱ ህግሽ ኣሰኖ መንቺ እሲ ኣዬ! ህኩ መንቹ እለሙምቦ እክየን ዎየኖስ እኬ» ዬእ። 25 ህግሽ ኣሰኖስ ይሁድን ፈንቀሽ «ሮስሳንቾ! አኔትንዶ?» ዬእ። ዬሱሱንኩ ፈንቀሽ «አትመ ይቶንት» ዬስ። 26 እሶኦንት እተንየንን ዬሱሱ ዳቡተ ጦቀእ ማሰእ ቢጭ አወናኒሀንስ ኣስኬእ «ኩን ኢሃ ማለ። ኣቅቴን እችዬ» ዬሰ። 27 ኩባየ ኬእሽ መገኑ ገለጥ አወናኒሀንስ ኣሴእ። «ሆሩንኩ ከን ኩባይሀኒች አግዬ። 28 ሆለመ መን ባጢሉ አጉረሙንተ ሃሮ ህድሪ + ዱነመኗ ኢሃ ቄግ። 29 አን ኩላንክዕኔ፤ ሃሮ ዎይን ዳጠ አንኤ ዎሞማን ክዕኔኤን በርገም አጋም በሩ ኢለንቀጤች ከን ዎይን ላሎን ሉበሞ ዳጠ አጋምበአ» ዬሰ። 30 ህከኒች ዘኪን መዝሙረ ዘመርት ዱን አል ፉልቶእ። 31 ዱነ ፉልቶ ጃተ ዬሱሱ «ከበሬ አንከር ሆሩንኩዕኔ ኤስ ካዴነንተኤ። ዳፉንኩስ ‹ዜማንቹ ሻም። ዜመንትስ ብንታእ› የመም ጣፈሜእ። 32 ጠሁ እኮዳ ሬሆች ኬኦምሀኒች ዘኪን ክዕኔኤች ብርስ ገሊለ መራም» ዬእ። 33 ጴጥሮስን ፈንቀሽ «ዎሉ ኬኑ ሆሩንኩ ካዶኬዳ አን ሆረን ካዳንኬበአ» ዬእ። 34 ዬሱሱንኩ «ገርተ ያንኬ፤ ከበሬ አንከር አንተቤቹ ዎዱዕናች ኤስ ሰስተ ኮደተ ካዳንቴኤ» ይ ፈንቀሼእ። 35 እኮዳ ጴጥሮስ «ሆረን ኬሳን በርገም ሬሃሚ እኮዳ ኬስ ካዳምበአ» ዬእ። ዎሉ አወናኑሁ ህትጉንተ ይቶእ። 36 ህተ ጃተ ዬሱሱ አወናኒንተስን በርገም «ጌቴሴማኔ» ዬኖበ መሮ። እሶኦንከ «አን ከእተ መር መገኑ ኡጨንቀጤች አዕኖኦት ከኔ ኤጌሬ» ዬሰ። 37 እስን ጴጥሮሴኒ ዘብዶሴ ኦሱተ ለሙንካ አፍ መር አብሽ ክቼአን ኡዕነመዮ እኬ። 38 ህትጉንተ «ፎልቹኤ ሬታኢ ኢለንቀጤች አብስ ክቼኤእ። ከኔ ኤጌርዬ። ኤሳንን ቃርዬ» ዬሰ። 39 እሶኦች ቀሁ ቀጠ ቄዕር መር ሚኔንተስ ኡብ መገኑ ኡጨን «ኢ አነ! ደንዴሾደ ከ ሀው ጡወ ኤሳች ህግስ። ጠሁ እኮዳ አን ዬምገ እሁዕናች አት ይቶንትገ እሁን» ዬእ። 40 እስ አወናንስበ ፈንቀለኖደ ግስ ፈዴሀኔን ጡጅ ጴጥሮሴ «አቼ ኤሳን በርገንቴን ሜጡ ሳተሃ ኤጌሩ ሆጌንንዶ? 41 ኬነንቻን ኣጌኑምቦጊ ቃርቴን መገኑ ኡጭዬ። ዎዘኑዕኑ ቅጠሜሃ። እኮዳ ማሉ ሆግማ» ዬእ። 42 አሞ ዬሱሱ ለንክ ኮደታ ቀሁንከ ፎርጎይ «ኢ አነ! ኩ ሀው ጡዉ አን አጉዕናች ህጉምቡ እኬደ አት ይቶንትገ እሁን» ይ መገኑ ኡጬእ። 43 አሞ እስ ፈንቀል ዋለኖደ እላከሰ ግሰናን ኬዕምትየን ትክምተዮ እኬ። 44 አሞ እሶኦተ አጉር ኦሮቅ ሰክ ኮደታ ዎነገንከ ይ መገኑ ኡጬእ። 45 ህከኒች ዘኪን አወናንስበ ዋል «ቴሱ ግሴንተጋ ፎሎጭቴንተጋ ዮንተንዶ? ህኩዕኒን፥ መንች ቤቱ ባጢላመ አንጋን ህግሴን ኣሴኖ ጃት ኢልቴእ። 46 ኬእዬ ኦሮኑን። ኩዕኒን፥ ህግሽ ኣሰኖኤ ህንጭዬእ» ዬሰ። 47 ዬሱሱ ጠሃቀንየንን ቶነ ለሟንከ አወናኒች መቱ «ይሁደ» ዬኖ ዋሎ። እሲንን በርገንት ቄስ አወንሳኒቺ ባድ ኑባቢቺ ሶሀንቴ ሆለሙ መኑ ብሰሃ ደመታ አፍ ዋልቶእ። 48 ዬሱሰ ህግሽ ኣሰኖ ይሁድን እሲንን በርገንት ዋልቶ መኒ «አዕኖኦት አን ሱንቃሚ እሱ አፍዬ» ይ መላተ ኩሌሰ እኬ። 49 እስን ህተ ጃንተ ዬሱስበ ህንጭይ «ሮስሳንቾ! ጡመ» ይ ሱንቄስ። 50 ዬሱሱንኩ «ኢ ጃለ! ዋልቶንትረ ዊንሸቅ» ዬሃን መኑስ ህንጭት አፎስ። 51 ህተ ጃንተ ዬሱሲን በርገንት ዮሪች መቱስ ብሰ ፉሽ ቄስ አወንሳንች ሶቀማንች መጨተ ሙር ከሞ። 52 ዬሱሱንኩ «ብሰክ ኮባንተስ ፈንቀሽት ኣግስ። ብሰ ጦቀታሩ ሆሩንኩ ብሲን በኣእ። 53 አን ኢ አነ ኡጬምደ ቶነ ለሞ ጎጎቲች በተአኖ መገን ሰሜ ሶቀማን ጎጎተ ሶሂ ደንዱምቡ አጉደዮሄንዶ? 54 ህትተ እኮች ኩን እሀኖገ መጣፋን ጣፈሞ ጠሁ ሀትጉተ እክ ዊሚ ደንደኖ?» ዬእ። 55 ህተ ጃንተ ዬሱሱ ህከኔ ዮ በትናሸ መኒ «ሽፍጥቹ አፌኖሀንገ ብሰሃ ደመታ አፌን አፌኖኤተ ዋልቴንንዶ? በሪን በሪን መገን ኬሰሞ ምኔን አፉዕል ሮስሰንየን አፌንምበአ እኬ። 56 ጠሁ እኮዳ ኩን ሆሩንኩ እኮ ህራጋን መጣፋን የመሞ ጠሁ ዊሙንታት» ዬእ። ህተ ጃንተ አወናኑስ ሆሩንኩ አጉርት ሁንቶእ። 57 ዬሱሰ አፎ መኑ ሴር ሮስሳኑሁ ባድ ኑባቡሁ ጠጵቴበ አበ ቄስቾ ቀያፍበ ኦሮሶእ። 58 እኮዳ ጴጥሮስ አበ ቄስች ግቤ ኣዝ ኢለንቀጤች ቄዕር አወነዮ እኬ። ጠህስ ዘካንቹ ጡዶተ ግቤ ኣዝ ኣግ ዘበኒንን አፉዕሌእ። 59 ቄስ አወንሳኑሁ ያእ + ዳናከቲ ሆሩንኩ ዬሱሰ ሽሲሶተ ቆጰን ነቃሸ ሀሰዮ እኬ። 60 መሃ ሆለመት ቆጰን ነቃሸት ህንጭቶዳ ሬሁተ ፍርድሲሰኖረ ደግምበአ። እኮዳ ዘካንቾን ለሙ መኑ ህንጭት 61 «ኩ መንቹ ‹አን መገን ኬሰሞ ምን ዝር ሰሶ በሬን ምኒ ደንዳም› ዬሃ» ይቶእ። 62 አቡ ቄስቹ ኡርኬእ ዬሱሰ «ኩ መኑ አሌንተክ ነቀሶ ጠሂ ፈንቀሽታንትሩ ሜጡሩ ዮበእንዶ?» ዬስ። 63 ጠሁ እኮዳ ዬሱሱ ሜጡራ ይምበአ። አቡ ቄስቹንኩ ዬሱሰ «ዶዕረንቴንት ክርስቶሰ መገን ቤቱ እኬንትደ ሄቸ መገኑ እሆሄ! ኩልኔ» ዬእ። 64 ዬሱሱንኩ አበ ቄስቺ «አትመ ይቶንት። ጠሁ እኮዳ ከኒች ዘኪን መንች ቤቱ መገን መኬን አፉዕሌሃን ጡዴነንተ። ህትጉንተ ሰሜ ጎሚን ዋለንየን ጡዴነንተ» ዬእ። 65 ህተ ጃተ ቄስ አወንሳንቹ ኦድሸስ ዘዕር «መገኑ ቦሮሬእ። ከኒች ዘኪን መ ነቃሹ ሀስሰኖ? ኩዕኒን መገኑ ቦሮሮገ አዕኖኦንት መጮቴንተ። 66 ቴሱ መ አጉደዮክዕኔ?» ዬእ። እሶኦንት «ሬሁት ሀስሳስ» ይቶእ። 67 ህተ ጃተ ዬሱስ እሌን አንጀ ቱይቶእ። ቱንቱሞንን ዎቀርቶእ። ህትጉንተ ቀምቦን ዎቀርተን 68 «ክርስቶሰ! ሀኖ አይ ዎቀሮሄንዶ ህራግኔ!» ይቶእ። 69 ጴጥሮስ ምኒች ሀደ ግቤ ኣዜን አፉዕሌሀኔን መትት ሁጀታንቹት እስበ ህንጭት «አት ገሊል ዬሱሲንን ዮንትየ እኬበእንዶ?» ይቶእ። 70 እኮዳ እስ «አት ይታንቲ አዬትንዶ ደጋምበአ» ይ ሆርሰ ብሬንን ካጆ። 71 ጴጥሮስን ኤተሩ ፉሎተ ጎችበ ኢሌሀኔን ዎልት ሶቀማንቹት ጡድ ህከኔ ኡሬ መኒ «ኩ መንቹ ናዝሬት ዬሱሲን በርገም ዮሃ» ይቶእ። 72 ጴጥሮስ ለንኪሃ ጤሌዕለን «ከ መንቹ ደጋምበአ» ይ ካጆ። 73 ቀሆ ጄቾች ዘኪን ህከኔ ኡርቶሩ እስበ ህንጭት «ጠሃታንትጉንኩ ለሊሰዮእ። ገርንተ አት እሶኦች መቷንስ» ይቶእ። 74 ጴጥሮስን «አን ከ መንቹ ደጋምበአ» ይ ጤሌዕሉ አፎ። ህተ ጃንተ አንተቤቹ ዎጆ። 75 ጴጥሮስን ዬሱሱ «አንተቤቹ ዎዱዕናች ሰስተ ኮደተ ካዳንቴኤ» ዬ ላገት ቃገንትየንስ ኤተሩ ፉል ሽክይ ኦኦ።
1 እሩ ሶጆ ጃተ ቄስ አወንሳኑሁ ባድ ኑባቡሁ ሆሩንኩ ዬሱሰ ሽሲሶተ ቶቤኦእ። 2 ህከኒች ዘኪን ዬሱሰ ኡሱርት መስት ሮሜ ባድ ገሻንቾ ጵላጦሴ ህግስ ኣስቶስ። 3 ህተ ጃተ ዬሱሰ ህግሽ ኣሴ ይሁድ ዬሱስ አሌን ሬሆ ፍርደ ፍርዴመገ ጡጆ ጃተ አብሽ ጋብ ሰጀዱመንከ ብረ ቄስ አወንሳኒሃ ባድ ኑባቢሃ ፈንቀሽ ዋሽ 4 «ጡማንቹ መንቹ ሬሆ ህግሽ ኣሲንተኤ አን በእሼም» ዬእ። እኮዳ እሶኦት «ኔስ ም ሀውሾኔ። አትን ጦጵ» ይቶእ። 5 ይሁድን ሰጀዱመንከ ብረ መገን ኬሰሞ ምኔን ኡጅ ፉል ኦሮቅ ለንገቅ ሬሄእ። 6 እኮዳ ቄስ አወንሳኑ ግዘስ ኬእስ «ኩ ግዙ ቄግ ግዘ እኮተኔ መገን ኬሰሞ ምን ግዛን በርጉ ሀስሰኖበአ» ይቶእ። 7 ህከኒ ኤረንት አይሁደ እሁምቡ መነ ሞጊ ፉግቺች ኡለተ ህርቶእ። 8 ህከንተኔ ህት ኡለት ከበሬ ኢለንቀጤ «ቄግ ኡለተ» የመንት ገአንተዮእ። 9 ህኩስን ህራጋንቾ ኤርምያሴን «እስራኤል ኦሶች መ-መቱ ‹ከንከ ግዘ ፉሸኖ› ይት ገመቶ ዋገ ሰጀዱመ ብረ ኣቄን 10 ቀርቹ አዘጆኤገንከ ፉግቺች ኡለተ ህሬመ» የመም ጠሃቀሞ ጠሁ ዊሞ። 11 ህተ ጃተ ዬሱሱ ገሻንቾ ጵላጦሴ ብርተ ህንጭዬእ። ገሻንቹንኩ «አት አይሁዴየ ዎመንዶ?» ይ ጠዕሜእ። ዬሱሱንኩ «አት ይቶንትየገንከ» ይ ፈንቀሼእ። 12 ጠሁ እኮዳ ቄስ አወንሳኑሁ ባድ ኑባቡሁ ኦዶስ ጃተ ሜጥተ ላገታ ፈንቀሽምበአ። 13 ህከኒች ዘኪን ጵላጦስ «ኩ መኑ ከንከ ኦዳሄ ጠሀ መጮተዮንትበእንዶ?» ዬስ። 14 ዬሱሱ እኮዳ ገሻንቹ አብሽ ማለለኖ ኢለንቀጤች ሜጥተ ላገታ ፈንቀሽምበአ። 15 ሻሽግ አያን ጄቹተ መኑ ዶዕሬ መቱ መንቹ ኡሱሮች ሂር ሮሸት ገሻንቾ ጵላጦሴ ዮስ እኬ። 16 ህተ ጃተ «ባርባኔ» ዬኖ ሾክማንተስ ለሌ ፈንግቹ ኡሱሮ ምኔን ዮ እኬ። 17 መኑ ጠጵዬ ጃንተ ጵላጦስ «አዬ ሂሩንተክዕኔ ሀሴነን? ባርባኔንዶ ‹ክርስቶሰ› የመሞ ዬሱሰ?» ይ ጠዕሜሰ። 18 ጵላጦስ ህካን ዬኢ ዬሱሰ ቂንሻን ህግስ ኣስቶስገ ደገኖተኔሃት እኬ። 19 እስን ፍርድ በርጩማን አፉዕሌሀኔን ሜንትቹስ «ከን ጡማንቾ መንች አሌን ሜጡራ አቶኮንት። አን እስተኔ አንከዕሩ ሀቄንተኤ ሀወን ገሌም» ይት ሶኮእ። 20 ህተ ጃተ ቄስ አወንሳኑሁ ባድ ኑባቡሁ መኑ ጵላጦሴ ባርባን ሂረሙንተ ዬሱሱ ሰቀለሙንተ ኡጭታገ አስቶእ። 21 ገሻንቹንኩ ለንኪሃ «ከን ለሟንከ መንቺች ሀከስ ሂሩንተክዕኔ ሀሴነን?» ይ ጠዕሜሰ። እሶኦንት «ባርባኔ ሂርኔ» ይቶእ። 22 እስን « ‹ክርስቶሰ› የመሞ ዬሱሰ ሀተኡለ?» ዬሰ። ሆሩንኩሰ «ሰቀለሙን» ይቶእ። 23 ገሻንቹንኩ «ሚ? እስ አሴ ሂሉ ጠሁ መሃን?» ዬእ። እሶኦንት «ሰቀለሙን» ይተን ጨንጨነተ በትሶእ። 24 ጵላጦስን ኩ ጠሁ ብተተ ኬእሲች ህግየን ካዕሉምቡ እኮገ ጡጆ ጃተ ሆራንከ መን ብሬን ዎአ ኣቅ አንገስ ኣዕለን «አን ከን መንች ቄጊች ሙጩሯ። አዕኖኦት ጦጵዬ» ዬእ። 25 ሆሩንኩ መኑ ፈንቀሽት «ቄጉስ ኒነ ኦሶኔ አሌን እሁን» ይቶእ። 26 ህተ ጃተ ባርባኔ ሂሮሰ። እኮዳ ዬሱሰ ኦልሲሽ ሰቀለሙንተ ህግሽ ኣሴእ። 27 ቤጠቦንኩ ዬሱሰ ጵላጦሴ ግቤ ኣዝ ኦሮሶእ። አሞ ቤጠባ ሆረንከ ዬሱስባን ጠጰቶእ። 28 ኦድሸስ ቃርት ከንት ቢሸተ ኦድሸተ ኦዲሶስ። 29 ኡት ዘዉደ + መክስ ቦቆንተስ ዎርት መኬስ አንጋን ሾምቦቅቹ አፍሲሶሀኒች ዘኪን ብሬንተስ ጉሉጵተን «አይሁድ ዎመ አንገተ¡» ይተን አሌቀዮስ እኬ። 30 አሌንተስ አንጀ ቱይተን አንጋችስ ሾምቦቅቹ ኣቅት ቦቁስ ዎቀርቶእ። 31 አሌቆስሀኒች ዘኪን ቢሸተ ኦድሸተ ፉሽት ገግስ ኦድሸተ ኦዲስ ሰቀሊ ኦሮሶስ። 32 ከተሚች ፉልተን «ስሞኔ» ዬኖ ቃሬን ባድ መንቺን ደቀንት ዬሱስ መስቀለ እዩንተ ግድሶስ። 33 እሶኦንት «ጎልጎተ» ዬኖ መዕንተ ኢልቶእ። «ጎልጎተ» ዩንኩ «ቦቆ ቆሙ» ዩሀ። 34 ህከኔን ደምብቺን ኤሬረሜ ዎይን ዳጠ አጉንተ ዬሱሲ ኣስቶእ። እኮዳ እስ ጉብ ጡጅ አጉ ግቦ። 35 ዬሱሰ ሰቀልቶሀኒች ዘኪን ኦድሻንተስ ሳመ ኡጅት ቤቀንቶእ። 36 እሶኦንት ህከኔ አፉዕልት ቆረበዮስ እኬ። 37 «ኩን አይሁዴየ ዎመ ዬሱሳት» ዬኖ ኦዶስ ጠሀ ጣፍ ቦቆስባን አፉሽቴ እኬ። 38 ዬሱሲን በርገንት ለሙ ፈንግቹ መቱ መኬ ዉዲን መቱ ጉረ ዉዲን ሰቀለንቴ እኬ። 39 ሺኒንተስ ህጋ መኑንኩ ገድ ቦቁሰ ሌንቄቅሰን 40 «አት ኩ መገን ኬሰሞ ምን ዝርት ሰክ በር ፈንቀሽት ምንታንቲ ሀኖ ገገክ ፈእስ። መገን ቤቱ እኬንትደ ሀኖ መስቀሊች ድር» ይተን ገላጨዮስ እኬ። 41 አሞ ቄስ አወንሳኑ፥ ሴር ሮስሳኑሁ ባድ ኑባቡሁ ገላጨን 42 «ዎሉ ኬኑ ፈእሾ። እኮዳ ገገስ ፈእሲ ደንድምበአ። እስራኤል ዎመ እኮች ሀኖ መስቀሊች ድሩን። ነኦቲ አመዕንናንስ። 43 ‹አን መገኔየ ቤቱ፤ ኤሳ መገኑ ዮኤ› ይ አመዕኔሃ። ህከኒ መገኑ እሱ ኢቴስደ ሀኖ ቴሱ ፈእሱንስ» ይቶእ። 44 አሞ እሲን በርገንት ሰቀለንቶ ፈንጋከቲ ህትጉንተ ይተን ቦሮርተዮስ እኬ። 45 ሌሆ ሳቲች አፍ ሆንሱ ሳተ ኢለንቀጤች እሩ ቱንሴእ። 46 ሆንሶ ሳት ቁንጣን ዬሱሱ አበ ላጋን «ኤሎሄ! ኤሎሄ! ለማ ሰበቅታኒ?» ይ ያሮ። ህትተ ዩንኩ «ኢ መገኖ! ኢ መገኖ! ሚ አጉርቴኤ?» ዩሀ። 47 ህከኔ ኡርቶሪች መ-መቱ መኑ ህካን መጮጭት «ኩ መንቹ ኤልያሴ ገአዮእ» ይቶእ። 48 እሶኦችን መቱስ ደዕል ደጉጅ ሺሸረ ሀላምገ ዮራን ጬፍ ሾምቦቅቺን አፌስበ አጉንተ ህንጨኤእ። 49 እኮዳ ዎሉሰ «ኤጌር ሀኖ ኤልያስ ዋል ፈእሰኖስገ ጡንዳም» ይቶእ። 50 ዬሱሱ ለንኪሃ አበ ላጋን ያር ፎልስ ህግሽ ኣሴእ። 51 መገን ኬሰሞ ምኔን ሰቀሌመ መጋረጁ አሊች ኡለተ ኢለንቀጤች ለሙበ እክ ዘረሞ። ኡለንት ሌንቄቅቶእ። ክነንት ጦጥ ዘረንቶእ። 52 ህትጉንተ ሞገት ፈነንትየን ብሬ ሬቶ ጡማኒች ሆለሙሰ ሬሆች ኬኦእ። 53 እሶኦንት ሞጊች ፉልት ዬሱሱ ሬሆች ኬኦሀኒች ዘኪን ጡማንቹ ከተመ ኣግ ሆለመ መኒ ጡደንቶእ። 54 ጥቤ መን አዘዛንቹሁ እሲን በርገንት ዬሱሰ ቆረበዮ እኬ መኑሁ ኡለ ሌንቄቁሃ እኮ ጠሀ ሆረንካ ጡዶ ጃተ አብስ ዋጅት «አደ ገርንተ ኩን መገኔየ ቤቱ እኬ» ይቶእ። 55 ህከኔን ሆለሙ ሜንቱ ቄዕረ ኡርት ጡደዮ እኬ። እሶኦንት ገሊሊች አፍ ዬሱሲ ካዕልተን አወንተዮሃረ እኬ። 56 ህከን ሜንቲንን መግደል ከተም ማራም፥ ያቆቤነ + ዮሴፌ አመት ማራሚ ዘብዶሴ ኦሶ አመቲ ዮ እኬ። 57 እሩ ሀወሬ ጃተ አርማትይ ከተም «ዮሴፈ» + ዬኖ መቱ ዱበላሹ መንቹ ህከበ ዋሎ። እስን ዬሱሴየ አወናንቹ እኬ። 58 ህኩ መንቹንኩ ዬሱስ ሬሸ ኣሱንተስ ጵላጦሴ ኡጬሃን ኣሴኑንተስ አዘጆ። 59 ዮሴፍ ዬሱስ ሬሸ ኣቅ ሙጩሮ ፉት ኦድሻን ከፈን 60 ገጊሀንስ ክኒች ጨበር መክጬ ሞግ + ኣዜን ዬሱስ ሬሸ አፉሽ ሞግስ አፎን አበ ክኑ ኦንኮሎዕልሽ ጡፎሀኒች ዘኪን ኦሮቄእ። 61 ህከኔን መግደል ከተም ማራሚ ዎልት ማራሚ ሞግ ብሬን አፉዕልቴ እኬ። 62 ለንክስ በር ሰንበት በሬ ገስመ ቄስ አወንሳኑሁ ፋሪሰቲ ጵላጦሴ ብሬን ጠጵት 63 «ቀርቾ! ህኩ ሉስሳንቹ ሬሁዕናች ብሬ ‹ሰሶ በሬች ዘኪን ኬኣም› ዬ ጠሁ ቃገሜኔ። 64 ህከንተኔ ዬሱስ አወናኑ መርት ሞገኡምቦገነ ‹ሬሆች ኬኤእ› ይት መኒ ኩልቱምቦገ ሞጉስ ሰክ በሩ ኢለንቀጤች ቆረበመኖገ አዘዝ። ህካን እሁምቦች ዎነስ ሉስሲች ዘክስ ሉስሱ ባሰ እሀኖ» ይቶእ። 65 ጵላጦስን «ቤጠባ ኣቅቴን መርቴን ሀሴንተ ዎቄን ቆረብሲጭዬ» ዬሰ። 66 ህከኒ እሶኦት ሞግበ መርት ሞግ አፎን ዮ ክኖን ማተበ ዎቀርት ቤጠቤን ቆረብሲሶእ።
1 ሰንበቱ ህጎሀኒች ዘኪን ሄዜትስ ዎነ በሩ ሶዘንየን መግደል ከተም ማራሚ ዎልት ማራሚ ሞጉስ ጡዲ መርቶእ። 2 ህተ ጃንተ አቡ ኡለ ሌንቄቁ እኮ። ቀርች ሰሜ ሶቀማንቹ ሰሜች ድር ሞጉ እፍሴመ ክኑ ኦንኮሎዕልሽ ከም አሌንተስ አፉዕሌእ። 3 መገን ሰሜ ሶቀማንችስ ቆጩ በሌሶገ ዮሃ እኬ። ኦድሸስን በረድገ ዎጁተ እኬ። 4 ቆረባኑንኩ መገን ሰሜ ሶቀማንቹ ዋጅት ሁጦእ። ሬሄ መንገ እኮእ። 5 ጠሁ እኮዳ መገን ሰሜ ሶቀማንቹ ሜንቲ «አዕኖኦት ሰቀለሞ ዬሱሰ ሀሴነንተገ ደጋምተኔ ዋጅቴኖችዬ። 6 እስ ዎና ዬገንከ ሬሆች ኬኤእ። ከኔ ዮበአ። ሞገሞ መዕንተ ዋልቴን ጡጅዬ። 7 አቼ ሰርብቴን መርቴን አወናኒሀንስ ‹ዬሱሱ ሬሆች ኬኤእ። ህኩዕኒን፥ ክዕኔኤች ብርስ ገሊለ መረኖ። ህከኔን እሱ ጡዴነንተ› ይቴን ኩልዬሰ። ህኩዕኒን፥ ኩሎንክዕኔ» ዬሰ። 8 ህከኒች ዘኪን እሶኦንት ዋጂኒ አበ በጅጎኒ አወናኒሀንስ ኩልቶተ ሞግቢች ደጉደን ሰርብት ኦሮቅቶእ። 9 ደንጎን ዬሱሱ እሶኦን ደቀም «ጡመ» ዬሰ። እሶኦንት እስበ ህንጭት ሎካንተስ ኡብ ሰገዶእ። 10 ህተ ጄቹተ ዬሱሱ «ዋጅቴኖችዬ፤ መርቴን ህዛከኤ ገሊለ ህጋገ ኩልዬ። ኤስን ህከኔ ጡዳእ» ዬሰ። 11 ሜንቱንኩ መርተንየን ህኩዕኒን፥ ቤጠቤች መ-መቱ ከተመ መርት እኮ ጠሀ ሆረንከ ቄስ አወንሳኒ ኩልቶእ። 12 ቄስ አወንሳኑንኩ ባድ ኑባቢን ጠጵት ኤረንት ቤጠቤ ሆለመ ግዘ ኣስት 13 «መኒ ‹ነኦት ግንሴምሀኔን አንከሬን አወናኑስ ዋልት ሞገእ ኦሮሴእ› ይቴን ኩልዬ። 14 ከ ጠሀንከመ ገሻንቹ መጮጬደ ክዕኔኤ አሌን ሀዉ ዋሉምቦገ ነኦት ጠሀስ መክንስ ኩናንስ» ይቶእ። 15 ህከንተኔ ቤጠቦ ግዘስ ኣቅት ይቶሰገ አቶእ። ህኩ ጠሁ ከበሬ ኢለንቀጤች አይሁድ ሜሬሮን ጠሃቀመዮእ። 16 ቶነ መቱንኩ አወናኑስ ዬሱሱ መርቱንተ አዘጆሰ ገሊል ባዶን ዮ ዱንበ መርቶእ። 17 እሶኦንት ጡዶስ ጄቹተ ሰገዶስ። እኮዳ መ-መቱሰ መለንቶእ። 18 ዬሱሱንኩ እሶኦበ ህንጭይ «መቆ ሆሩንኩ ሰማኒ ኡለኒ ኤሳ ኣሰሜኤ። 19 አቼ ምናደብበ ሆርበንከ መርቴን አን ሱዕሚን፥ ቤት ሱዕሚኒ ጡማንቾ አያን ሱዕሚኒ ጠመቄነን አወናኑኤ አስዬ። 20 አዘጆንክዕኔረ ሆረንከ ቆረባገ ሮስሽዬሰ። አንን ዶል ጎፉ ኢለንቀጤች ሆረንተ ጃተ ክዕኔኤኔት» ዬሰ።
1 መገን ቤት ዬሱስ ክርስቶስተኔ ምሽራች ላገት ኬኦጉ ህትጉተ። 2 ህራጋንቹ እስያስ «መገኑ ‹አን ሶቀማንቹኤ ዎቃክ ቅጠንሱንተ ብሬንተክ ሶሃም› ዬእ። 3 መቱ መንቹ ኡለ ኡዱመኣን ‹ቀርች ዎቃ ቅጠንስዬ። እስ ህገኖበንከ ዙንስዬ› ያን ያረኖ» ይ ጣፌእ። 4 ህከኒ ጠመቃንቹ ዮሃንስ «ባጢሊሀዕኔ አጉሩ ደቅቴኖተ ባጢሊችዕኔ ፈንቀልቴን ጠመቀምዬ» ያን አዋጀን ኡለ ኡዱመአ ዋሎ። 5 ይሁድ ባዶኒ ዬሩሳሌም ከተማኒ ሄኣ መኑ ሆሩንኩ ዋልት ባጢለሰ ቢረ ይተንየን ዮርዳኖስ ለጋን ጠመቀዮሰ እኬ። 6 አሞ ዮሃንስ ጋሜል ኦርዛች ደደንቴ ኦድሸተ ኦደቅ የመዙስን ሱንቺን ቆዕረኖ እኬ። እስን ዳምቹታ ዜረሃ እተኖ እኬ። 7 እስን «አን ፎግይ ጫመስ ኡሱረኖ ፈትለሃ ሂሮተ ሀስሱምቡ ኤሳች አበኖ ኤሳች ዘኪን ዋለኖ። 8 አሞ አን ዎኢን ጠመቄንክዕኔ። ጠሁ እኮዳ እስ ጡማንቾ አያኒን ጠመቀኖክዕኔ» ይ አዋጄእ። 9 ህተ ጃተ ዬሱሱ ገሊል ባዶን ዮ ናዝሬት ከተሚች ዋልየን ዮሃንስ ዮርዳኖስ ለጋን ጠመቆስ። 10 ዬሱሱ ዎእ ኣዚች ፉሎገን ሰሞ ፈነመንየኒ ጡማንቹ አያኑ ሀንደርቾገ አሌንተስ ድረንየኒ ጡጆ። 11 አሞ «ኢታንኬ ቤቱኤ አቴት። አን ኬሳን በጅቀማም» ይታ ላገት ሰሜች ዋልቶእ። 12 ህተ ጃንተ ጡማንቹ አያኑ ዬሱሰ ኡለ ኡዱመአ መረኖገ አሴስ። 13 ህከን ኡዱመኣንን ሼጣንቹ ዬሱሰ ሉስሶተ አጰመንየን ሾላዱመ በር ሀደ ሞቺን በርገም ኤጌሮ። ሰሜ ሶቀማኑንኩ ካዕልቶስ። 14 ዮሃንስ ኡሱረሞሀኒች ዘኪን ዬሱሱ መገን ምሽራች ላገተ አዋጀን ገሊለ ዋሎ። 15 እስን «ጃት ኢልቴእ። መገን ዎሞመት ህንጭቶተኔ ባጢሊችዕኔ ፈንቀልቴን ምሽራች ላጋን አመዕንዬ» ያዮ እኬ። 16 ዬሱሱንኩ «ገሊለ» ዬኖ በሃር ሺኒን ህገን ስሞኒ ህዞስ እንድራሲ ቁርጡሜመተ ዎሻዳረ እኮተኔ ዎሻደ በሃር ኣዝ ለቅ ኡጅተንየን ጡጆሰ። 17 እሶኦንተ ዬሱሱ «አወንዬኤ። አን ክዕኔኤተ መነ መገንበ ፈንቀሽቴነንተረ አሳንክዕኔ» ዬሰ። 18 ህተ ጃንተ ዎሻደሰ አጉርት አወንቶስ። 19 ዬሱሱ ህከምቢች ቀሁንከ ህጎገን ዘብዶሴ ኦሱት ለምንት ህዛከት ያቆቢ ዮሃንሲ ጀልብሰ አሌን አፉዕልት ዎሻደ መክሰንየን ጡጆ። 20 እስን ህተ ጃንተ ገኤሰ። እሶኦንት አነሰ ዘብዶሴኒ አኒሀንሰ ሁጀተዮ መነሃ ጀልብ ኣዜን አጉርት አወንቶስ። 21 ዬሱሱ አወናኒንተስን «ቅፍርናሆመ» ዬኖ ከተመ ዋል ሰንበት በሬን ጠጵት ምን ኣግ ሮስሾ። 22 ዬሱሱ ሴር ሮስሳንገ እሁዕናች አቡ መሌሱ ዮ መንችገ ሮስሰዮገ ህከኔ ዮ መኑ ጡድ ሮሻንተስ አብስ ማለልቶእ። 23 - 24 ጠጵትሰ ምኔንን ሂሉ አያኑ አፌስ መንቹ ዮ እኬ። እስን «ናዝሬት ዬሱሰ! ኔሳኒ ኬሳኒ መ ሜጦመት ዮኔ? አት ኔስ በእሲ ዋልቴንትንዶ? አት አዬትንዶ አን ደጋንኬ። አት መገንየ ጡማንቹ» ያን አበ ላጋን ያሮ። 25 ጠሁ እኮዳ ዬሱሱ «ሰዕምይ! አት ከን መንቺች ፉል!» ይ ሻቆስ። 26 ህኩ ሂሉ አያኑ ህከ መንቹ ያርሲሰን መቱ ቀጠ ፍት-ፍተእ አጉር ፉሎ። 27 ህከኔ ዮ መኑ ሆሩንኩ «ኩ ጠሁ ሀትጉተን? ሂለ አያነ መቄን አዘዘንየን አዘዘመዮስ። ቲን ሃሮታ ሮሸ» የቀንተን ማለልት መቱ-መቱሰ ጠዕምቶእ። 28 ህተ ጃንተ ዱዱቡስ ገሊል ባዶን ሆራንን መጮጨሞ። 29 ህከኒች ዘኪን ዬሱሱ ያቆቤኒ ዮሃንሴኒ በርገም ጠጵት ምኒች ፉል እንድራሴነ ስሞኔ ምን ኦሮቄእ። 30 ህከኔን ስሞኔ በሉት አብስ ሞስ ኦሰኤ እኬ። እሴተኔንከ ዬሱሲ ኩሌመ። 31 ዬሱሱንኩ እሴበ ህንጭይ አንገሴ አፍ ኬእሽየን ሞሲችሴ ፈይቶእ። እሴን እሶኦተ ኮህሶእ። 32 ህከ በር ሀወሩተ አሪቹት ኣጎ ጃተ መኑ ሞሳኑሃ ሀቡሱ አፎ መነሃ ሆረንከ ዬሱስበ ዋሸዮ እኬ። 33 ከተምስ መኑ ሆሩንኩ ህከን ምን ኡሮን ጠጵዬእ። 34 ዬሱሱንኩ ሆለመ መነ አነነ አነነ ሞሲች ፈይሾ፤ ሆለመ ሀቡሰንከ ፉሼእ። ሀቡሱንኩ ዬሱሱ አዬትንዶ ደጎተኔ ዬሱሱ ጠሃታበ ከሜሰ እኬ። 35 ዬሱሱ ሶዚ እኬሀኔን ኬእ መኑ ዮበእ መዕንተ መር ህከኔ መገኑ ኡጬእ። 36 ጠሁ እኮዳ ስሞኒ እሲን በርገንት ዮሩ ዬሱሰ ሀሶተ ፉልቶእ። 37 እሶኦንት ደጎስ ጃተ «መኑ ሆሩንኩ ኬስ ሀሰዮሄ» ይቶእ። 38 ዬሱሱንኩ «ዎናንከ ዋሎሚ ምሽራች ላገተ አዋጆተ እኮተኔ ኦንጠኔ ዮ ከተማካኒ ሰበኮተ ኬእዬ መኖ» ዬሰ። 39 ህከንተኔ ጠጵትሰ ምናን መገን ላገተ ኩለኒ ሀቡሰ ፉሸኒ ገሊል ባዶን ዮ ሆረንተ መዕንተ መሮ። 40 አበሉ አፌስ መቱ መንቹ ዬሱስበ ዋል ሎከስባን ጉሉጵ «ሀሶንትደ ሙጩርስቶኤተ ደንድታንት» ያን ኡጨቄእ። 41 ዬሱሱንኩ አብሽ ቅሽጥ አንገስ ብድቀእ እሱ አፍ «ሀሳም ሙጩር» ዬእ። 42 ህተ ጃንተ ህኩ አበሉ አጉሮስ። 43 - 44 ዬሱሱንኩ ህከ መንቹ «ከ ጠሀ አዬኒ ኩልቱምቦገ ቆረጵ። ጠሁ እኮዳ ቄስችበ መርት አልክ ጡድስ። ዳፉንኩስ አት ሙጩርት ፈይቶንትገ መኑ ደጉንተ ሙስ አዘጆገን መገኒ ክትመ ህንጨእ» ይ ቃርስ አዘጅ ህርሲሾስ። 45 ጠሁ እኮዳ ህኩ መንቹ ህከምቢች ፉል ህከን ጠህተኔ ሆራንከ መኒ ኩሉ አፎ። ህከን ዳፊን ዬሱሱ ከተመ ሀራርስ ኣጉ ሆጎተኔ ከተሚች ኤተሮ መኑ ዮበእባን ሄአዮ እኬ። ህከኒ መኑ እስ ዮበ መዕኔች ሆራችን መረዮ እኬ።
1 ቀሆ ጄቾች ዘኪን ዬሱሱ ቅፍርናሆም ከተመ ፈንቀል ዋሎ። ህከኔን «ዬሱሱ ምኔ ዮ» ዬኖ ዱዱቡ መጮጨሞ። 2 ህተ ጃንተ ሆለሙ መኑ ዬሱሱ ዮ ምን ኡሩት ጡቅታኢ ኢለንቀጤች ጠጵዬእ። ህከኔን ዬሱሱ መገን ላገተ ኩለዮሰ እኬ። 3 ህከበንከ መቱ ሺኬ መንቹ ሾሉ መኑ እይት ዋሽቶእ። 4 ጠሁ እኮዳ መኑ አብሽ በተኦተኔ ህከ ሺኮ መንቹ ዬሱስበ ህንጨታ መዕንተ ሆግ ዬሱሱ ዮ ዉዲን ብድቅ ዬ ምን እንተ ዝርት ሞሳንቹስ መዕናንተስን ድሪሶእ። 5 ዬሱሱንኩ አመዕነቱሰ ጡጅ ሺኮስ መንቹ «ኢ ቤቶ! ባጢሉክ አጉረሜእ» ዬስ። 6 - 7 እኮዳ ሴር ሮስሳኒች መ-መቱ ህከኔ አፉዕልት ዮ እኬ። እሶኦንት ዎዘናንተሰ «ኩ መንቹ ሚሃት ህትጎነተ ቦሮዕረንች ላገተ መገን አሌን ጠሃቀዮኢ? መገኒች ጠሊች በጋን ባጢለ አጉሮተ ደንደኖ አዬት?» ይት ሰውቶእ። 8 ህተ ጃንተ ዬሱሱ ሰውተሰ ሰርብን ዎዘናንተስ ደግ «ሚሃት ዎዘናንተዕኔ ካን ሰውቴነዮንታ? 9 ሺኮ መንቺ ‹ባጢሉክ አጉረሜእ› ዪቺ ‹ጦቅት ኦሰኦንትረ እይት ኦሮቅ› ዪቺ ሀኩስ ቢለኖ? 10 ጠሁ እኮዳ መንች ቤቱ ኡለ አሌን ባጢለ አጉሮተ መቆ ዮሲ እሁስ ደግዬ» ይ ሺኮ መንቹ 11 «ጦቅት መዕነክ እይት ምንክ ኦሮቅ» ዬእ። 12 ሺኮንኩ ህተ ጃንተ ጦቅይ መዕነስ እይ ሆራንከ መን ብሬን ፉሎ። ህከንተኔንከ መኑ ሆሩንኩ አብሽ ማለል «ህትጎነ ጠሀ ሆረን ጡንድምበአ» ያን መገኑ ገለጤእ። 13 ዬሱሱንኩ ለንኪሃ በሃር ሺነ መሮ። ሆለሙ መኑ እስበ ጠጵት መርትየን ሮስሾሰ። 14 ህከኒንን ህገን እልፎሴ ቤቱ ሌው + አፉዕል ቀረጠንየን ጡጅ «አወኔኤ» ዬስ። እስን ጦቅይ አወኖስ። 15 ህተ ጃንተ ዬሱሰ አወኖ መኒች ሆለሙስ ቀረጣኗኒ ባጢላመተኒ። ህኩሩንኩ ዬሱሲኒ አወናኒንተሲ ሜጡ እክ ሌዌ ምኔን እቸተ እተዮ እኬ። 16 ፋሪሰ ዉዲች ሴር ሮስሳኑ ዬሱሱ ቀረጣኒኒ ባጢላማኒ በርገም እተንየን ጡድ «ባጢላማኒ ቀረጣኒኒ እተዮኢ ሚሃት?» ይት አወናኑስ ጠዕምቶእ። 17 ዬሱሱንኩ ህካን መጮጭ «አኪሙ ሀስሰኖ ሞሳኒሃት በጋን ፈየ መኒሃበአ። አን ዋሎሚ ጡማኑ ገኦተ እሁዕናች ባጢላመተ ገኦታት» ዬሰ። 18 ጠመቃንቾ ዮሃንሴ አወናኑሁ ፋሪሰቲ ጦንተዮ እኬ። ህከንተኔ መኑ ዬሱስበ ዋልት «ጠመቃንቾ ዮሃንሴነ ፋሪሰ አወናኑ ጦንተዮእ። ጠሁ እኮዳ ኪ አወናኑ ሚሃት ጦንቱምቡ?» ይት ጠዕምቶእ። 19 ህተ ጃንተ ዬሱሱ «እዜቸኑ እሶኦን ሜጡ ሄአንየን ቦሎቸ ገአንቶ ኮሁ ጦንታንዶ? እዜቸኑ እሶኦን በርገም ሄአንየን እሶኦት ጦንታበአ። 20 ጠሁ እኮዳ እዜቸኑ እሶኦች አነነ እሀኖ በሩ ዋለኖ። እሶኦንት ህተ ጃተ ጦንታእ። 21 አሞ ጎፌ ሱሳን ሃሮተ ቃፈተ ቃፈኖ ዮበአ። ጠሁ እኮዳ ህከስ አሴደ ህት ሃሮት ቃፈት ጎፎስ ሱሰ ዘርታእ። ህት ዘረንቶስ መዕንንት ዎናች አበተ እካእ። 22 ህትጉንተ አዪ ሃሮ ዎይን ዳጠ ኑባቾ ጨናን ዎረኖበአ። ህካን አሴደ ዳጡስ ጨነስ ጠንቅሰኖ። አሞ ዳጡሲ ዱነመኖ፤ ጨኑሲ ዘረመኖ። ጠሁ እኮዳ ሃሮ ዎይን ዳጠ ሃሮ ጨናን ዎሩ ሀስሰኖ» ዬእ። 23 ሰንበት በሬን ዬሱሱ ውጠ ኣዚን ህገንየን አወናኑስ ሶእ ሀማሞች ጠንቅሱ አፎእ። 24 ህተ ጃንተ ፋሪሰት ዬሱሰ «ከ ጡድ! አወናኑክ ሰንበት በሬን አሱ ሀስሱምቡረ አስተዮእ» ይቶእ። 25 - 26 ዬሱሱንኩ « ‹አብያታሬ› ዬኖ መንቹ አበ ቄስቹ እክ ዮ ጃተ ዳዊቲ ዳዊቴን በርገንት ዮ መኑሁ ጎሬክ ሀውቶ ጃተ ዳዊት መገን ኬሰሞ ምን ኣግ ቄሲች በጋን ዎሉ መኑ እቱ ሀስሱምቡተ መገኒ የመንቶ ዳቡተ እቾጋ እሲን በርገንት ዮ መኒ ኣሴጋ አነበቤንምበእንዶ? 27 አሞ ሰንበት በሩ መኒ ቆጨሜ በጋን መኑ ሰንበት በሬ ቆጨምምበአ። 28 ህከንተኔ መንች ቤቱ ሰንበት በሬሃ ቀርቿ» ዬእ።
1 ለንኪሃ ዬሱሱ ጠጵት ምን ኣጎ። ህከኔን መቱ አንገተ ሺኬ መንቹ ዮ እኬ። 2 ጠሁ እኮዳ ዬሱሰ ኦዶተ ሀሳ መኑ «ሀኖ ሰንበት በሬን ፈይሰኖስገ ጡንዳም» ይት ቆረበዮ እኬ። 3 ዬሱሱንኩ ህከ አንገተ ሺኮ መንቹ «ዋል! ከኔ ሜሬሮ ኡር» ዬስ። 4 ህከኒች ዘኪን ዬሱሱ «ሰንበት በሬን ደናሙረ አሷንዶ ሂለረ አሷን ሀስሰኖ? እንዶ ፎል ፈእሷንዶ ፎል በእሷን ሀስሰኖ?» ዬሰ። ጠሁ እኮዳ እሶኦት ሰዕምት አጉርቶእ። 5 ዬሱሱንኩ ዎዘንሰ ዱድመተኔ ክቼእ ሺናንተስ ዮ መነ አሙሬን ጡጅ ህከ ሺኮ መንቹ «አንገክ ብድቀእ!» ዬስ። እስን ብድቀኤገንከ አንገስ ፈይቶእ። 6 ህተ ጃንተ ፋሪሰት ሰርብት ጠጵት ምኒች ፉልት ዬሱሰ ሀተት አፍ ሺ ደንድታንዶ ሄሮድሴ ሀጊን ኤረንቶእ። 7 - 8 ዬሱሱ አወናኒንተስ ገሊል በሃር ዉዱ ለቅ ኦሮቄእ። ዬሱሱ አሰኖ ማለሉተ መጮቶ ጃተ ሆለሙ መኑ አወንቶስ። እሶኦንት ገሊል ባዲች፥ ይሁድ ባዲች፥ ኤዶም ባዲቺ፥ ዮርዳኖስ ዉደኣን ዮ ባዲቺ ህትጉንተ ዬሩሳሌም ከተሚች፥ ጢሮስ ከተሚቺ ሲዶን ከተሚቺ ዋልቴሃረ እኬ። 9 ህከምባንን መኑ በተኦተኔ ዬሱሱ ጎምበንሴኑምቦስገ አወናኑስ ጀልበ ቅጠንስታስገ ኩሎሰ። 10 ዬሱሱ ከኒች ብሬ ሆለመ መነ ሞሲችሰ ፈይሼ እኬ። ህከንተኔ ህከኔ ዮ መኒች ሞሲን ሀውታሩ ሆሩንኩ ኢልት አፎስተ ጢጰንተዮ እኬ። 11 ሂሉ አያኑ አፎሰ መኑንኩ ጡዶስ ጃተ ብሬንተስ ፎግት ሰገደን «አት መገንየ ቤቱ» ይተን ያርተዮ እኬ። 12 ጠሁ እኮዳ ዬሱሱ እስ አዬትንዶ ኩልቱምቦገ ቃርስ አዘጆሰ። 13 ዬሱሱ ዱን አል ፉሎ ጃተ እስ ኢቴሰረ እስበ ገኤእ። እሶኦንት እስበ ዋልቶእ። 14 - 15 ዬሱሱንኩ እሲን በርገንት ሄኡንተ፥ ምሽራች ላገተ አዋጅቱንተ ሶሆታ ሀቡሰ ፉሽታ መቆ ኣሶታ ቶነ ለሙንከ ዶዕሬሰ። 16 እሶኦንት፦ «ጴጥሮሴ» ይ ሱዕመ ፉሼስ ስሞኔት፥ 17 «ቦአኔርጌሴ» እንዶ «በንቆ ኦሶ» ይ ገኤሰ ዘብዶሴተ ኦሱ ያቆቤቲ ዮሃንሴቲ፥ 18 አሞ እንድራሴት፥ ፍልጶሴት፥ ባርቶሎሞሴት፥ ማቶሴት፥ ቶማሴት፥ እልፎሴየ ቤቱ ያቆቤት፥ ታዶሴት፥ ባዱስ ኢተኖ ስሞኔቲ 19 ዬሱሰ ህግሽ ኣሰኖ አስቆሮንቶ ይሁዳቲ እኬ። 20 ዬሱሱ ምን ኦሮቄሃን ሆለሙ መኑ ለንኪሃ ጠጵት ዋልቶእ። ህከንተኔ ዬሱሱሁ አወናኑሲ እቸተ እታ ጃት ዮሰበአ እኬ። 21 እኮዳ «ዬሱሱ መቻሬእ» ዬነንየን እለሙስ መጮት እሱ አፎተ ዋልቶእ። 22 ዬሩሳሌሚች መርቶ ሴር ሮስሳኑ «እሱ ቤልዜቡሉ አፌስ። እስ ሀቡሰ ፉሸኖንኩ ህከን ሀቡስ ዎም መቄኔት» ይተዮ እኬ። 23 ዬሱሱንኩ እሶኦተ እስበ ገእ አጉዲሻን «ሼጣንቹ ሀተእ ሼጣንቹ ፉሾተ ደንደኖ? 24 መቴ ዎሞመ ኣዜን ዮ ምናደቡ እስ-እሲን በአመኖ እኮች ህት ዎሞመት ሀትክ ቃርት ኡሪ ደንድታእ? 25 ህትጉንተ መቶ ምኔን ሄኣ መኑ በአንቶደ ሀትክ ቃርት ሄኢ ደንድታእ? 26 አሞ ሼጣንቹ ገጊንተስ በአመኖ እኮች በአኖ በጋን ቃር ሄኢ ደንደኖበአ። 27 ህትጉንተ መቶ ቆጠረ መንች ምን ኣግ ቦገኖሀኒች ብርስ ህከ ቆጠረ መንቹ ኡሱሩምቦደ ምንስ ቦጎተ ደንደኖ ዮበአ። ጠሁ እኮዳ ህከ ቆጠረ መንቹ ኡሱሮች ዘኪን ምንስ ቦጎተ ደንደኖ። 28 ገርተ ያንክዕኔ፤ መን ኦሱት ሁጀታ ባጢሉሁ ጠሃታ ቦሮዕረንች ላገት ሆረንቲ ፈኡን የመመኖሰ። 29 ጠሁ እኮዳ ጡማንቾ አያን አሌን ቦሮር ላገተ ጠሃታ መኑ ሆሩንኩ ዶሊ ሆሪንከ በእሳኑ እካ በጋን ባጢሉሰ ሆረን ፈኡን የመመኖበአ» ዬሰ። 30 ዬሱሱ ህካን ጠሃቄኢ «ሂሉ አያኑ አፌስ» ይቶስቢሃት እኬ። 31 ዬሱስ አመቲ ህዛከሲ ዋልት ሀዳን ኡርት እስበ መነ ሶክ ገእሲሶእ። 32 ዬሱስ ሺናን በትናሹ መኑ አፉዕሌ እኬ። እሶኦንት «ህኩዕኒን፥ አመኪ ህዛከኪ ሀደ ኡርት ኬስ ሀሰዮኬ» ይት ኩልቶስ። 33 እስን «አመኤ ህዛከኤ አዬኤታን?» ይ ፈንቀሼእ። 34 ዬሱሱንኩ ሺናንተስ አፉዕልቶሪበ ጡደን «አመኤ ህዛከኤ ከሮኦታ። 35 መገኑ ሀሰኖ ጠሀ ዊንሸኖ ሆሩንኩ አመተዕኔ፥ ህዞሃዕኔ ህዞታዕኔ» ዬሰ።
1 ዬሱሱ ለንኪሃ በሃር ቶቾን ሮስሱ አፎ። ሆለሙ መኑንኩ እስባን ጠጵዬሀን እስ በሃር አሌን ዮ ጀልባን አፉዕሌእ። አሞ መኑ ሆሩንኩ በሃር ቶቾን ዮ እኬ። 2 ህከኔን እስ አጉዲሻን ሆለመረ ሮስሾሰ። ሮስሰንን፥ 3 «መጮጭዬ፤ መቱ ሆገኣንቹ ዜሬተ አፍ ውጦተ ፉሎ። 4 ውጠንየንን ዜሬቲች መ-መቱ ዎቄ ቶቾን ኡቦ። ህከ ኡቦንከ ጪአት ዋልት እቶእ። 5 አሞ ዎሉስ ዜሬቱ ሆለሙ ቡቹ ዮበእባን ክን አሌን ኡብ ሰርብን ሙቾ። ዳፉንኩስ መዕኔንተስ ሆለሙ ቡቹ ዮበአ እኬ። 6 ህኩስን አሩ ፉል ቡሴ ጃተ ቆሮ። አሞ እሲንከ ጠጱ ዮበእተኔ ሞል ፈጆ። 7 ዎሉስ ዜሬቱ ኡት ኣዜን ኡቦ። ኡቱንኩ ሌእ ለንግ አፎስተኔ ላሉተ ላሉዕነ ፈኦ። 8 አሞ ዎሉስ ዜሬቱ ደናሜ ኡላን ኡብ ሙቾ። ሙቾንኩ ሌእ ላሉተ ላሎ። ህኩስን መቱስ ሰጀዱመ ዎሉስ ሌሃዱመ ፈኦሲ ጥብተ ላሎ። 9 ካን መጮታ መጨት ዮሲ አዪ ቃርስ መጮጩን» ዬሰ። 10 ዬሱሱ ሜጥንስን ዮ ጃተ ሺናንተስ ዮ መኑሁ ቶነ ለሙንኩ አወናኑሲ አጉዲሸስ ሂረቶተኔ ጠዕምቶስ። 11 እስን «ክዕኔኤ መገን ዎሞመ ቤስቹ ጠሀ ደጌኑንተ ኣሰሜዕኔ። ጠሁ እኮዳ ዎሉ መኑ ሆረረንከ አጉዲሻን መጮታእ። 12 ህከኒ እሶኦት መገንበ ፈንቀልትየን መገኑ ባጢለሰ ፈኡን ዩምቦገ እሶኦት ጡደንን ጡዶስረ ደጋበአ። አሞ መጮተንን ዘህስ ኣቅታበአ» ዬሰ። 13 ዬሱሱንኩ «ክዕኔኤ ት አጉዲሸት ኣግምበዕኔንዶ? ህከደ ዎልተ አጉዲሸተ ሆረንተ ሀትጉተ ቆርሲ ደንድቴነን? 14 ውጣንቹንኩ መገን ላገተ ኩለኖሀንየገ። 15 ህኩ ዎቄ ቶቾን ኡቦ ዜሬቱ ጡድሰኖ ላገስ መጮታሃ መነ። እሶኦንት መጮቶገን ሼጣንቹ ዋል ዎዘኒችሰ መጮቶ መገን ላገተ መጭ ከመኖ። 16 አሞ ህኩ ክናሜ ኡላን ኡቦ ዜሬቱ መገን ላገት ኩለንታ ጃተ በጅጎን ሰርብት ኣቅታ መነ አጉደኖ። 17 ጠሁ እኮዳ እሶኦት ጄቾሃንሴት በጋን ጠጱ ዮሰበእተኔ ቃርት ኡርታበአ። ህተን ላገ ዳፊን መቱ ሀዉ እንዶ ሸረንቹ ዋሎደ ሰርብትን ቆዕልት ኡባእ። 18 - 19 አሞ ዎሉስ ኬኑ ኡት ኣዜን ኡቦ ዜሬትየገ። እሶኦንት ላገስ መጮታሃ መነ። ጠሁ እኮዳ ከን ኡለ ሄቸ ጠሀ ሰውዩ፥ ቀባጡተ ኢቱሁ ዎሉ ሆለመረ ቁልጡሁ ዎዘንሰ ኣዝ ኣግ ህተ መገን ላገተ ለንጌሃን ላልቱዕነ ፈኣእ። 20 ጠሁ እኮዳ ደናሜ ኡላን ውጠሞ ዜሬቱ ጡድሰኖ መገን ላገተ መጮት ኣቅታሃ መነ። ህኩ መኑንኩ መቱስ ሰጀዱመ መቱስ ሌሃዱመ ዎሉስ ጥብተ ላለኖ» ዬእ። 21 ለንኪሃ ዬሱሱ ፈንቀሽ «መኑ ኩራዝ ጫክሽ ለሊሰኖባን ሰቀሉ አጉር ዛሌ ኣዜን እንዶ አንሸረ አፉሸኖንዶ? 22 ህትጉንተ ምሁ ማጠሞሩ ለሉዕናቺ እፍሰሞሩ ፈነሙዕናቺ ፈአኖበአ። 23 መጮታ መጨት ዮሲ ዮደ መጮጩን» ዬእ። 24 ዬሱሱንኩ «መጮቴነንተራን ሆራንን ቆረጵዬ። አዕኖኦት ዎሎ መኒ ኬንቴንተራንን ኬነመኖክዕኔኒ አብሽን በርገመኖክዕኔኒ። 25 ዳፉንኩስ ዮስሀኒ በርገመኖስ። ዮስበእሀኒች ህኩ ዮሲሁ ኣቀመኖ» ዬእ። 26 ህከኒች ዘኪን ዬሱሱ «መገን ዎሞመት ውጠተ ውጢ ፉሎ መንቹ አጉዳእ። 27 ህኩ ውጮ መንቹንኩ አንከር ኦሰአኖ። ሶጆ ጃንተ ኦሶች ኬአኖ። ህኩ ውጠሞ ዜሬቱንኩ ሀትጉተ እሀኖንዶ ደጉዕናች ሙተኖኒ ሌአኖኒ። 28 ኡለንት ገጉንኩሴ ህከ ሙተ ሌእሳእ። ህከኒች ዘኪን ቦንጠ ኤበኖገ አስታእ። ህከን ቦንጢች ዘኪን ላሉተ ላልታእ። 29 ውጠንትስ ኢልቶ ጃተ ጄቹስ ውጠተ ሀጢዴኖተ እኮተኔ መንቹስ ባጨስተ ቅጠንስ ሀጢደኖ» ዬሰ። 30 ዬሱሱንኩ «መገን ዎሞመተ ሚን ቅጠንስናም? አሞ መ አጉዲሻን ሂን ኩናም? 31 መገን ዎሞመት ሀሚል እልተ አጉደኖ ሀቅ ላሉተ አጉዳእ። እሴን ውጠንታ ጃተ ኡለ አሌን ዮ ዜሬቲች ሆሪችን አብስ ቀሁተ። 32 ጠሁ እኮዳ ህት ዜሬትቹንት ውጠንቶሀኒች ዘኪን ሌእ ገቴ ካሴኖሪች ሆሪችን አበተ እካእ። ቄራዕሩ ሀመንከ ሌእሳእ። ህከንተኔ ሰሜ ጪአት ዶዕነ ዌጭት እሴ አሌን ሄኣእ» ዬሰ። 33 ዬሱሱ ላገስ ሆለመ አጉዲሻን እሶኦት ዘህጪ ደንድታጊን ሮስሾሰ። 34 እስን አጉዲሸት ዮበኢ ሜጡራ ጠሃቅምበሰ። ጠሁ እኮዳ እስ አወናኒን ጠሊን እኮ ጃተ ሆረረንከ ሂር ኩሎሰ። 35 ህከ በርንከ እሩ ሀወሬ ጃተ ዬሱሱ አወናኑስ «ከን በሃሪች ካጵ ዉዱ ቶኖ» ዬሰ። 36 እሶኦንት ህከኔ ዮ መነ አጉርት ዬሱሱ ዮ ጀልባን ኣግ ኦሮቶእ። ህተ ጃንተ ዎልት ጀልባከት እሶኦን በርገንት ዮ እኬ። 37 ደንጎን አንጉሉሎ ቦብሩ ዎእ አሌን ኬኦ። ዎእ ዎርጃሙንኩ ጀልበ ከእታ ከበሃ አሰን ዎቀረንየን ዎኡ ጀልብ ኣዜን ዊሚ እኮ። 38 ህተ ጃንተ ዬሱሱ ጀልብ ኣዜን ዘክ ዉዲን ቦርከእ ግሼ እኬ። አወናኑስን እሱ ግሰናች በቀት «ሮስሳንቾ! ነኦት በዕነንየን ሀትተ ሰዕምቴንት?» ይቶእ። 39 እስን በቅይ ቦብረስ አዘጆ። በሃረስን «ሰዕምይ!» ዬእ። ቦብሩንኩ አጉሮ። አቡ ሰዕምቱንኩ እኮ። 40 ዬሱሱንኩ አወናኒሀንስ «ሚሃት ዋጅቴነዮንታ? ቴሱ አመዕነቱ ዮዕኔበንዶ?» ዬሰ። 41 እሶኦንት አብስ ዋጅት መቱ-መቲሃንሰ «አንጉሉሎ ቦብሩሁ በሃሩሁ አዘዘመዮሲ ኩን ሀትጎና መንቹ?» ይቶእ።
1 ዬሱሱሁ አወናኑሲ አበ ዎአ ቶልት «ጌርጌሶነ» ዬኖ ባዱ ኢልቶእ። 2 ዬሱሱ ጀልብ ኣዚች ፉሎገን ሀቡሱ አፍየንስ ሞገት ዮባን ሄአዮ መንቹ ህከምቢች ፉል ደቀሞ። 3 ህኩ መንቹንኩ ሞገመ ኣዜን ሄአኖ እኬ። ህተ ጃተ ሀኩ መንቹሁ እሱ ሰንሰለቲኒ ኡሱሪ ደንደኖበአ እኬ። 4 ሆለመተ ጃተ መኑ ሰንሰለቲኒ ብረቲኒ ኡሱርታ ጃተ እስ ህከ ሆረንከ ጠንቅሺ ቢጪ ከመኖ እኬ። ህከኒ አዪ እሱ አፍ ኤጌዲ ደንደኖበአ። 5 አሞ እስን ሆረንተ ጃተ አንከርሃ በራሃ ሞጉሁ ዱኑሁ ዮበ ዘሀን አልስ ክኒን ሀከተን መዜሽ ያረኖ እኬ። 6 እስን ዬሱሰ ቄዕረ ጡጆ ጃተ ደጉደን ዋል ብሬንተስ ሰገጆ። 7 አሞ አበ ላጋን ያረን «አት ሆሪችን አበ መገን ቤቶ ዬሱሰ! ኤሳኒ ኬሳኒ መ ሜጦመት ዮኔ? አን ኬሳች መገኖን መገኔም በእሶቴኤ» ዬእ። 8 ህትጉንተ ዬኢ ዬሱሱ «አት ሂሉ አያኑ ከን መንቺች ፉል!» ይ አዘጆቢሃት እኬ። 9 ዬሱሱንኩ «ሱዕሙክ አዬት?» ይ ጠዕሜእ። እስን «ነኦት ሆለመ እንኮምተኔ ሱዕሙእ ጎጎታ» ይ ፈንቀሼእ። 10 እስን ህከን ባዲች ፉሽ ሸሩምቦሰገ ዬሱሰ ቃርስ ኡጬእ። 11 ህከምባንን ዱን ገባን ዜአንተዮ ቦኬ ዜመት ዮ እኬ። 12 ህኩ ሂሉ አያኑ «ሀእ ህከን ቦኬ ዜማን ኣንጋምገ አስኔ» ይት ዬሱሰ ኡጭቶእ። 13 ህከንተኔ ዬሱሱ «መርቴን ኣግዬ» ዬሰ። ህኩ ሂሉ አያኑ ህከን መንቺች ፉል ቦኬ ዜማን ኣጎ። ህከኒች ዘኪን ለምተ ኩምተ እካ ቦኬ ዜመት ዱን ገቢች አብስ ፍሪጠን በሃራን ኣግ አገንቶእ። 14 ህከን ቦኬ ዜማኑንኩ ሁንት ከተማኒ ህከን ባዶኒ ሄአኖ መኒ ጠሀስ ኩልቶእ። መኑንኩ እኮ ጠሀ ጡዶተ ዋልቶእ። 15 እሶኦንት ዬሱስበ ዋልት «ጎጎተ» የመመኖ ሂሉ አያኑ አፎስ መንቹ ፈይ ኦድሸስ ኦደቅ አፉዕሌሃን ጡድ ሆሩንኩ ዋጅቶእ። 16 ዬሱሱ ሂለ አያነ ህከን መንቺች ፉሸንየኒ ሂሉ አያኑንኩ ቦኬን ኣገንየኒ ዎና ህከምባን ሄእ ጡዶሩ እኮ ጠሀ መኒ ኩልቶእ። 17 ህከንተኔንከ ህከን ባድ መኑ ዬሱሱ ባዲችሰ ፉል ኦሮቀኖገ ኡጭቶእ። 18 ዬሱሱ ጀልብ ኣዝ ኣገንየን ህኩ ሀቡሱ አፍየንስ ፈዬ መንቹ ዬሱሰ «አን ኬሳንን በርገም ኦሮቃም» ይ ኡጬእ። 19 ጠሁ እኮዳ ዬሱሱ «ኤሳን መርታንትበአ። ምንክ መርት ቀርቹ ሀበንከ አበ ጠሀ አሴሄንዶ አሞ ሀትጉተ አስ ፈይሾሄንዶ ምንክ መኒሃ እለሚሃንኪ ኩል» ዬስ። 20 ህኩ መንቹንኩ ዬሱሱ ሀትጎነ አበ ጠሀ አሴስንዶ «ቶርዱመ ከተመ» ዬኖ ባዶን አዋጁ አፎ። አሞ ጠሀስ መጮቶ መኑ ሆሩንኩ ማለልቶእ። 21 ዬሱሱንኩ ጀልባን ኣግ ዉደአ ቶሎገን ሆለሙ መኑ እስ ሺናን ጠጵዬእ። ህተ ጃንተ ዬሱሱ በሃር ሺናን ዮ እኬ። 22 ጠጵት ምን ገሻኒች መቱ «ያእሮሴ» ዬኖ ዋል ዬሱሰ ጡጆ ጃተ ሎካንተስ ኡብ 23 «ኢ ጪለት ሬሂ ሆጌእ። ሀእ አት ዋልት እሴ ሬቱምቦገ አሌንተሴ አንገክ ኡጅት ፈይስሴ» ይ ዬሱሰ ቃርስ ኡጬእ። 24 ዬሱሱንኩ እሲንን በርገም መረዮ እኬ። ህተ ጃንተ ሆለሙ መኑ ዬሱሰ አወነን ከኒኒ ከኢኒ ጎምበዮስ እኬ። 25 ህከን መን ሜሬሮን ቶነ ለሞ ዎጌች አፍ ኣዚችሴ ቄጉ ዛዘንየን ሀውተዮ ሜንትቹት ዮ እኬ። 26 እሴን ዘቡ ኣሰኖ መንበ ሆለመተ ጃተ ፈንቀላንተን ግዘሴ ሆረንከ ጦጵቴ እኬ። ጠሁ እኮዳ አብሽ ባሾሴ በጋን ሜጡራ ካዕልምበሴ እኬ። 27 - 28 እሴን መኑ ዬሱስተኔ ጠሃቀኖ ዱዱቡ መጮቶ ጃተ ዎዘናንተሴ «አን እስ ኦድሸ ሉደ ኡሎንደ ፈያም» ይት ሰውቶተኔ መን ሜሬሪን ዋልት ኤተር ዉዲን ዬሱስ ኦድሸ ሉደ ኡልቶእ። 29 ህተ ጃንተ ቄጉ ዛዙ አጉሮ። እሴን ሞሲችሴ ፈይቶገ መኖማንተሴ ደቅቶእ። 30 ዬሱሱንኩ መቆ እሲች ፉሎገ ገጊንተስን ደግ ደዕልን ኤተሩ ፈንቀል «አዬት ኦድሸኤ ኡሎ?» ይ ጠዕሜእ። 31 አወናኑስን «አት ከንኩ መኑ ጎምበንየንኬ ጡደን ሀትተ ‹አዬት ኡሎኤ› ይተን?» ይቶስ። 32 ጠሁ እኮዳ ዬሱሱ ህካን አሴኢ አዬትንዶ ደጎተ ሰዕምይ ሄጌጉስ ጡጆ። 33 ህት ሜንትቹት እኮሴ ጠሀ ደጎተኔ ዋጅት ሁጠን ብሬንተስ ጉሉጵት እኮ ሆረንተ ገርተ ኩልቶእ። 34 ዬሱሱንኩ እሴተ «ኢ ቤቶ አመዕነቱክ ፈይሼኬ። ጡመ መር። ሞሲችኪ ፈይ» ዬሴ። 35 ዬሱሱንኩ ህካን ጠሃቀንየንን ያእሮሴ ምኒች መኑ ዋልት «ቤቱክ ሬቴእ። ቴሱ ሮስሳንቹ ሚ ሆግሰዮንትስ?» ይቶስ። 36 ጠሁ እኮዳ ዬሱሱ እሶኦት ይታ ጠሀ አጉር ያእሮሴ «ዋጅቶት፤ አመዕኑመ አመዕን» ዬስ። 37 አሞ ዬሱሱ ጴጥሮሴች፥ ያቆቤቺ ያቆብ ህዜች ዮሃንሴቺ በጋን አዪ አወኑንተስ ሀስምበአ። 38 ዬሱሱንኩ ያእሮሴ ምን ኢሌ ጃተ ህከን ምኔን መኑ ያረን «ኣዬ!» ያን ኦአዮኢ ጡጆ። 39 ዬሱሱንኩ ምን ኣግ «ሚ ያርቴነዮንተኒ ኦኤነዮንተኒ? ጪለት ግሴ በጋን ሬትምበአ» ዬሰ። 40 እሶኦንት እሶን አብስ ኦሰዕልቶእ። ጠሁ እኮዳ እሶኦተ ሀደተ ፉሽ ጪለ አመተ፥ አነሃ እሲንን በርገንት ዮራ አፍ ጪለት ዮበ ኣጎ። 41 ዬሱሱንኩ ህተን ጪለ አንገተ አፍ «ጣሊተ ኩሚ» ዬሴ። ህኩስን «አት ቀሁት ጪለት ጦቅይ» ዩሀ። 42 ጪለንትስ ቶነ ለሞ ዎጌታ ጪለ እኬ። ህከንተኔ እሴን ህተ ጃንተ ጦቅት መረንቶእ። ህከኔ ዮ መኑ ህከ ጠሀ ጡጆገን አብሽ ማለሎ። 43 ህተ ጃንተ ዬሱሱ ህከ ጠሀ አዬኒ ኩልቱምቦገ አዘጅ ኬእ «ጪላሀንስ እታረ ኣስዬ» ዬሰ።
1 ዬሱሱ ህከምቤቺች ፉል ገግስ ባዱ አወናኒንተስን በርገም ዋሎ። 2 - 3 ህከኔን ዬሱሱ ሰንበት በሬን ጠጵት ምኔን ሮስሱ አፎ። እስ ሮስሰኖገ መጮቶ በትናሹ መኑ አብስ ማለልት እስ-እሶኦንት «ኩ መንቹ ከ ሆረረንከ ሀኖች ደቄእ? ት ቆርመት እሲ ሀኖች ኣሰንቶስ? አሞ ት አበት ማለሉት አንጋንተስ ሁጀተንተዮኢ ሀትጎኔት? እስ ማራሜየ ቤቱ አናጤቿበንዶ? ያቆቤ፥ ዮሲ፥ ይሁዲሃ ስሞኔሃ ህዞሃበንዶ? አሞ ሜሴላከት ህዛከንትስ ከኔ ኒባን ዮሃረበንዶ?» የቀንት ዬሱሰ ግቦእ። 4 ህተ ጃተ ዬሱሱ እሶኦ «ህራጋንቹ ሆራንከ ባዶን አብሴኖስ። ጠሁ እኮዳ ገግስ ባድ መኑ፥ እለሙሲ ገግስ ምን መኑሁ ገደኖስ» ዬእ። 5 - 6 ህከኔን ዮ ቀሆ ሞሳን አሌን አንገተ ኡጅ ፈይሾሀኒች በጋን መ ማለሉታ ሁጀቲ ደንድምበአ። እኮዳ መናንተስ አመዕነቱ ዮበእተኔ ማለሎ። ዬሱሱ ህከን ሄጌጎን ዮ ኦላካን ዘሀን መኒ ሮስሾ። 7 እስን ቶነ ለሙንከ አወናኑስ እስበ ገእ ለ-ለሙ አስ ሂለ አያነ ፉሽታ መቆ ኣስ ሶኮሰ። 8 እስን እሶኦ «ዎቃ መረንቴነን ብጢችዕኔ በጋን እቸተ፥ ቆራንተዕኔ ግዘሃ ከረጢተሃ አፌኖችዬ። 9 ጫመዕኔ ዎዕርዬ። ጠሁ እኮዳ ለሙ ቀምቢሰ ኦደቅቴኖችዬ» ይ አዘጆሰ። 10 አሞ እስ «አዕኖኦት መርቴነንተ መዕኔን መቱ ምን ኣጌንተደ ህተ መዕንተ አጉርቴን ዋልቴነንቀጤች ህከኔን አፉዕልዬ። 11 መርቴንተ መዕኔን ሀከኔኒ ‹ኤመን ጡመ ዋልቴን› ዬን ኣቁሃ መጮጩሃ ግቤመዕኔደ አዕኖኦት ሎከዕኔ ቡሁተ ህከኔ ቀምበቅቴን አጉርቴን ዋልዬ። ህት ቡሁንት እሶኦ ነቃሸ እካእ» ይ ኩሎሰ። 12 እሶኦንት መርት መኑ ባጢሊችሰ ፈንቀልታገ ሰበኮእ። 13 አሞ እሶኦንት ሆለመ ሀቡሰ ፉሽቶእ። ሞሳን አሌንን ዘይተ ቡርተን ሆለመ ሞሳኑ ፈይሶእ። 14 ዬሱስ ሱዕሙ ሆራባንን ደገሞተኔ ዎሙ ሄሮድስ + እስተኔ መጮጬእ። አሞ መ-መቱ መኑ «ጠመቃንቹ ዮሃንስ ሬሆች ኬኤእ። ህከንተኔሃት ተ ማለሉተ አሰኖ መቆ ደቄኢ» ይተዮ እኬ። 15 ዎሉ መኑ «ኤልያሴት» ይተዮ እኬ። አሞ ፈኦስ መኑ «ከኒች ብሬ ዶል ህራጋኒች መትስገ ዮሃ ህራጋንቹ» ይተዮ እኬ። 16 ጠሁ እኮዳ ሄሮድስ ህካን ሆረንከ መጮጭ «አን ጎበስ ሙርሲሾም ጠመቃንቹ ዮሃንስ ሬሆች ኬኤእ» ዬእ። 17 - 18 ሄሮድስ ህዜስ ፍልጶሴ ሜንትቹተ ኣቄተኔ ዮሃንስ «ህትጉተ አሱክ ጡማበአ» ይ ጠሃቄተኔ ሄሮድስ ሶክ አፍሲሽ ዮሃንሴ ኡሱርሲሼ እኬ። 19 ህከንተኔ ሄሮዳድ ዮሃንሴ ባደ አፍ ሽሲሶተ ሀሰዮ እኬ። ጠሁ እኮዳ ሽሲሲ ደንድትምበአ። 20 ዳፉንኩስ ዮሃንስ ጡማንቹሃ ሙጩሩ መንቹሃ እሁስ ሄሮድስ ደገኖተኔ ዋጀኖስኒ ቆረበኖስኒ እኬ። አሞ እስን ዮሃንስ ጠሃቀኖረ መጮጬ ጃተ ባበኖ እኬ። ጠሁ እኮዳ በጅጎን መጮጨኖስ እኬ። 21 ሄሮድስን እለሞ በር አብሲ ባድስ ገሻኑ፥ በገዝ ጋጠናከታ ገሊል አበ አበ መነ ሆረንካ ድግሰ ድግሽ ገኤእ። ህኩ በሩ ሄሮዳድ ዮሃንሴ ሽሲሶተ መከ በር እኮሴ። 22 - 23 ህከ በርንከ ሄሮዳደ ቤቱት መኑ ጠጵዬ ምን ኣግ ሸለተ አለጵት ዎመ ሄሮድሴኒ ኮሀሲ በጅቀንስቶእ። ህከንተኔ ዎሙ ህተ ሜሴሌተ «አት ሀሶንትረ ሆረንከ ጠዕሜኤ፤ ኣሳንኬ። ሆረን ዎሞመኤ በከን እኮዳ አት ይቶንትረ መሃ ኣሳንኬ» ያን ጤሌዕሌእ። 24 እሴን አመሴበ መርት «መ ኣሴኤ ዩ?» ይት አመሴ ጠዕምቶደ « ‹ጠመቃንቾ ዮሃንሴ ቦቁተ ኣሴኤ› ይ» ይቶሴ። 25 ሜሴሌንት ሰርብት ዎምበ ኣግ «ጠመቃንቾ ዮሃንሴ ቦቁተ ሶሮን ዎሬናን ቴሱ ኣቆተ ሀሳም» ይቶእ። 26 ዎሙ ህከን ጠሃን አብሽ ክቼኦ። እሁን በጋን ጤሌዕሌተኔሃ እሲንን በርገንት ዮ ኮህተኔሃ ጠዕምቶ ጠሀ ከሞተ ደንድምበአ። 27 ህከኒ ህተ ጃንተ ዎሙ ቤጠቤችስ መቱ ዮሃንሴ ቦቁተ ሙር ኤበኖጊ ኡሱሮ ምን ሶኮ። ቤጠቤቹንኩ ኡሱሮ ምን መር ዮሃንሴ ቦቁተ ሙሮ። 28 ሙር ዋሼ ቦቁንተ ሜሴሌሃንስ ሶሮን ዎር ኣሴሴ። ሜሴሌንት መስት አማሃንሴ ኣስቶእ። 29 ዮሃንሴ አወናኑንኩ ህካን መጮት ኡሱሮ ምን ዋልት ሬሸስ ኦሮስ ሞጎእ። 30 ዬሱሱ ሶኮሩንኩ ሶሀንቶቤቺች ፈንቀልት ሮስሶራ አስቶራ ሆረንከ እሲ ኩልቶእ። 31 ዬሱሱንኩ እሶኦተ «መኑ ዮበእበ ሜጥን ኦሮቅን ቀሁ ቀጠ ፎሎጭኖ» ዬሰ። ህትጉንተ ዬኢ እስበ መረኖሁ ዋለኖሁ በተእየን እቸተ እታ ጃታ ሆጎተኔሃት እኬ። 32 ህከንተኔ እሶኦት ጠሉ ጀልባን ኣግ መኑ ዮበእ መዕንተ ኦሮቶእ። 33 ጠሁ እኮዳ ኦሮተንየን ሆለሙ መኑ ጡድ እሶኦተ እኮገ ደግ ከተሚች ሆሪችን ሰርብት ፉልት ሎካን ብርስት መዕንስ ኢልቶእ። 34 ህከምባን ዬሱሱ ጀልቢች ድረን ሆለመ መነ ጡጆ። መኑንኩስ ዜማንቹ ዮበእ ሆለገ እሀንየን ጡጅ አብሽ ቅሽጤሰ። ህከኔን ሆለመ ጠሀ ሮስሶተ አፎ። 35 ህከምባንን እሩ ሀወሩተ እኮተኔ አወናኑስ እስበ ዋልት «ዮም መዕንት ኡላ ኡዱመአ፤ እሩሁ ሀወረዮእ። 36 ህከኒ ከን ሄጌጎን ዮ ባዱሃ ከተመሃ መርት እቸተ ህዕርቱንተ ከ መነ ህርሲስ» ይቶእ። 37 ጠሁ እኮዳ ዬሱሱ እሶኦተ «ኩ መኑ እታረ አዕኖኦት ኣስዬሰ» ዬእ። እሶኦንት «ህከደ ለሜ ጥቤ ብሪን እቸተ ህን እቱንተ ኣስኑሰንዶ?» ይቶስ። 38 ዬሱሱንኩ ፈንቀሽ «ሀኖ ሜእት ቤጡ ዮዕኔንዶ መርቴን ጡጅዬ» ዬሰ። እሶኦንት መርት ጡድ «ኦንትት ቤጡ ለምት ቁርጡሜመቲ ዮኔ» ይቶእ። 39 ዬሱሱንኩ አወናኑስ መነ ህጤ አሌን መዕኔን መዕኔን አፉሽታገ አዘጆሰ። 40 ህከኒ መኑስ መ-መቴ መዕኔን ጥብተ ጥብተ አሞ መ-መቴ መዕኔን ኦ-ኦንታዱመ እክ አፉዕሌእ። 41 ዬሱሱንኩ ኦንትንተ ቤጦኒ ለምንተ ቁርጡሜመታ አፍ ሰማ ለቅ ጡጅ መገኑ ገለጤእ። ህከኒች ዘኪን ቢጭ መኒ ኣስቱንተ አወናኒሀንስ ኣሴእ። ህትጉንተ ለምንተ ቁርጡሜመታ መኒ ሆሪንከ ቤኮ። 42 መኑ ሆሩንኩ እች ዱቦ። 43 አወናኑንኩ መን ብሬች ፈኦ ፉፉሩሃ ቁርጡሜማች ፈኦራ ቶነ ለሜ ደጉዴ ዊመ ኬእሶእ። 44 እቸንተ እቾ መኒች ጎንስ ዎሉት ኦንቴ ኩም እኬ። 45 ህተ ጃንተ ዬሱሱ መነ ህርሲሰን አወናኑስ ጀልባን ኣግ ዉደአ «ቤተሰይደ» ዬኖ ቤቹ እሲች ብርስት ኦሮታገ አዘጆሰ። 46 እስ መነ ህርሲሾሀኒች ዘኪን መገኑ ኡጮተ ዱን አል ፉሎ። 47 እሩ ሀወሬ ጃተ ጀልቡ በሃር አሌን ዮ እኬ። ጠሁ እኮዳ ዬሱሱ ሜጥንስን ኡለ አሌን ዮ እኬ። 48 ብሬንተሰ አንጉሉሎ ቦብሩ ኬእ ጀልበሰ ብርተ ለቅ መረሙ ከምየን ሀውተዮሀኔን ዬሱሱ ጡጆሰ። እስን አንከሬ ቶርዱመ ሳት ቁንጣን በሃር ዎእ አሌን መረመን እሶኦበ ዋል አጉር ህጊ ሀሾ። 49 ጠሁ እኮዳ እሶኦት እስ በሃር ዎእ አሌን መረመንየን ጡድ ሶዙ አጉጅየንሰ ያርቶእ። 50 ሆሩንኩ ጡዶስ ጃተ ህልቆእ። ህተ ጃንተ ዬሱሱ «አደጵዬ አኔት፤ ዋጅቴኖችዬ» ይ ጠሃቄሰ። 51 እስን ጀልብ ኣዝ እሶኦበ ኣጎ ጃተ ቦብሩ አጉሮ። አወናኑስን ህከን ጠሃን አብስ ማለልቶእ። 52 እሶኦት ህካን ማለልቶኢ ዎነ አሴ ኦንቴ ቤጦ ጠሀ ዘህስ ኣቂ ዎዘኑሰ ዱጆተኔሃት እኬ። 53 በሃሪች ቶልት «ጌንሴሬጠ» ዬኖ ባዱ ኢልቶእ። ጀልበንከ ዎእ አሊች ኡለ ሺነ ህንጨት ኡሱርቶእ። 54 እሶኦት ጀልቢች ፉልቶገን ዬሱሰ እኮገ መኑ ደጎ። 55 ህከኒ መኑ ህከን ሄጌጎን ዮ ኦሎ ሆረንከ ደጉደን መርት ዬሱሱ ዮ ዬመበ ሞሳኑ ሀለቂን እይት ኤበዮ እኬ። 56 ዬሱሱ መሮ መዕንተ ሆረንከ ኦሎ፥ ከተመሃ ባዱሃ ሞሳኑ ሆረንከ ድኮ መዕኔን ዬሱስ ብርተ ህንጨተን ኦድሸስ ሉደ ኡልቱንተ ኡጭተዮ እኬ። አሞ ኡልቶሩ ሆሩንኩ ፈይተዮ እኬ።
1 መቱ በር ፋሪሰቲ ዬሩሳሌሚች ዋልቶ ሴር ሮስሳኑሁ ዬሱስባን ጠጵቶእ። 2 እሶኦንት ዬሱስ አወናኑ ሙጩርስት ኣዕልቱምቦ አንጋን እተንየን ጡዶእ። 3 ፋሪሰቲ አይሁድ-መኑሁ ሆሩንኩ ኑባብ ዎገ ቆረቦተ አንገሰ ኣዕልቱዕናች እቸተ እታበአ እኬ። 4 ህትጉንተ ድኮች ፈንቀልት ዋልታ ጃተ ኣዕልቱዕነ እቸተ እታበአ። አሞ ኩባያከተ፥ ቦሰታ ቡሬቺች ዌዜመ ሰህነታ ኣንሽታእ። ህትጎነተ ሆለመተ ሮሸታ አብሳእ። 5 ህከንተኔ ፋሪሰቲ ሴር ሮስሳኑሁ ዬሱሰ «ሚሃት አወናኑክ ኑባብ ዎገ ቆረቡ ግብ አንገሰ ኣዕልቱዕነ እተዮኢ?» ይት ጠዕምቶእ። 6 ጠሁ እኮዳ ዬሱሱ እሶኦ ፈንቀሽ «ክዕኔኤ ከ ሳድጨማኒ ‹ኩ መኑ ጠል አረቤን አብሰዮኤ በጋን እሶኦ ዎዘኑ ኤሳች ቄዕሬሃ። 7 ዳፉንኩስ መን አዘዙተ መገንሀንገ አስት ሮስሰን ኤሳ ጠለንከ ሰገደዮእ› የመም ጣፈሞገን ህራጋንቹ እስያስ ዬኢ ገርተ። 8 አዕኖኦት መገን አዘዙተ አጉርቴን መን ዎገ ቃርስቴን አፌንተ» ዬሰ። 9 አሞ ዬሱሱ እሶኦ «አዕኖኦት ክዕኔኤ ዎገ ቆረቤኖተ መገን አዘዙተ አብሴን ገዴንተ። 10 ሙስን ‹አነኪ አመኪ አብስ። አሞ አዪ አነስ እንዶ አመስ ቦሮሮ ሬሁን› ዬእ። 11 - 12 ጠሁ እኮዳ አዕኖኦት መቱ መንቹ አነስ እንዶ አመስ ‹ኤሳች ደቅቴነንተረ መገኒ ኣሴም› ዮተ ደንደኖ ይቴነን አኒሃንሲ አማሃንሲ ሜጡራ አሰኖበ ከንቴነዮንተ። 13 ህትጎነ ዎቄን ገጉዕኔ ሮስሴንተ ዎገ ቆረቢ ይቴን መገን ላገተ ዊንሽቴኑዕነ ፈኤነዮንተ። አሞ አዕኖኦት አስቴነዮንተ ከንገንከ ዮ ሆለሙ ጠሁ ዮእ» ዬሰ። 14 ለንኪሃ ዬሱሱ መነ እስበ ገእ «አዕኖኦት ሆሩንኩዕኔ አን ኩላንክዕኔ ጠሀ ዘህሴን ኣቅዬ። 15 መነ ቡሽሰኖ መኒች ፉለኗ ጠሀ በጋን ሀዳች መን ኣዝ ኣገኖሩ መነ ቡሽሰኖበአ። 16 መጮታ መጨት ዮኢ አዪ መጮጩን» ዬእ። 17 ዬሱሱ መነ አጉር ምን ኣጎ ጃተ አወናኑስ እስ ሮስሾ አጉዲሸተኔ ጠዕምቶስ። 18 ዬሱሱ እሶኦ «አዕኖኦቲ ካን ዘህሴን ኣቅቴንምበእንዶ? ሀዳች መን ጎደባን ኣገኖሩ መነ ቡሽሱምቦገ ደጌነንተበእንዶ? 19 ዳፉንኩስ አፌን ጎደባን ኣግ ሹመተ እክ ፉለኖ በጋን ዎዘንበ መረኖበአ» ዬሰ። ዬሱሱ ህትጉተ ዩስ እቸት ሆረንት ሙጩሩተ ዩሃንስ። 20 ለንኪሃ ዬሱሱ «መነ ቡሽሰኖሩ መን ኣዚች ፉለኗረ። 21 ህኩስን ሂሉ ሰውቱ፥ ሞጉት፥ መነ ሹ፥ ሳኡ፥ 22 ዋንጉ፥ እዲዱ፥ ሂልመት፥ መለጡ፥ አዘዘሙ ሆጉ፥ ቂንሸት፥ መን ሱዕመ በእሱ፥ ቦልጡሁ ጬምቲ 23 ት ሆረንት ሂልመት ዎዘኒች ፉልታሃረ። ህኩሩንኩ መነ ቡሽሳሃረ» ዬእ። 24 ዬሱሱ ህከምቢች ኬእ ጢሮስነ ሲዶን ባዱ ኦሮቄእ። ህከኔን መቱ ምን ኣግ ህከኔ ሄኡስ አዪ መጮጩምቦገ ሀሾ። ጠሁ እኮዳ ማጠሞተ ደንድምበአ። 25 ሂሉ አያኑ አፍየን ሞሴ ቤቱት ዮሴ ሜንትቹት ዬሱስ ዱዱቡ መጮት እስበ ዋልት ሎካንተስ ኡቦእ። 26 ሜንትቹንትስ ሲሮ ባዶን ፊንቄ ዉዲች እለንቴታ ግሪክቹ እኬ። እሴን ቤቶችሴ ሀቡሰ ፉሹንተ ኡጭቶስ። 27 ጠሁ እኮዳ ዬሱሱ ህተን ሜንትቾ «ጪለ እቸተ ዎሻ ኣሱ ሀስሰኖበአ። ብርስት ጪለት እት ዱቡ ሀስሰኖ» ዬሴ። 28 ህት ሜንትቹንት ፈንቀሽት «ቀርቾ ህኩን ገሬየንተ። ጠሁ እኮዳ ዎሸንት ጪለት እቶ ሌማቲች ኡቦ ፉፉሩ እታእ» ይቶስ። 29 ህከንተኔ ዬሱሱ እሴ «ህትጉተ ዪንተክ ቤቶችክ ሀቡሱ ፉሌእ። ቴሱ ምንክ ኦሮቅ» ዬሴ። 30 እሴን ምንሴ ፈንቀልት ኦሮቶ ጃተ ቤቶችሴ ሀቡሱ ፉልየን መዕነ አሌን ኦሰእየን ጡዶእ። 31 ዬሱሱ ጢሮስ ባዲች ፉል ሲዶን ዉዲን «ቶርዱመ ከተመ» ዬኖ ባዲን ህግ ገሊል በሃርበ ዋሎ። 32 ህከኔን መኑ መቱ ደንቄነ ቱቼ መንቹ ዬሱስበ ኤቦእ። እሶኦንት ዬሱሰ ህከን መንች አሌን አንገተ ኡጀኖገ ጠዕምቶእ። 33 ዬሱሱንኩ መንቹስ መኒች አነነ አስ ሜጡ እሱ ኦሮሽ ዙሩዕመስ ህከን መንች መጨ ኣዜን ኣግሾ። አሞ ዬሱሱ አንጀ ቱይ ህከን መንች አረብተ አንጋንተስ አፎ። 34 ዬሱሱንኩ ሰማ ብዝ ጡጅ ዎዘኒች ኬእሽ ክቼእ «ኡሁ!» ይ ህከ መንቹ «ኤፍተ» ዬእ። ህትጉተ ዩንኩ «ሂረም» ዩሀ። 35 ህተ ጃንተ መጨስ ፈነንቶእ። አሞ አረብስ ሂረንትየን ጠበእ ጠሃቄእ። 36 ዬሱሱንኩ መኑ ህከ ጠሀ አዬኒ ጠሃቱምቦገ ቃርስ አዘጆሰ። ጠሁ እኮዳ ኩልቱምቦገ አዘጆሰ ቀጠንከ ሆለመ መኒ አዋጅቶእ። 37 እሶኦንት አብስ ማለልት «ሆረንከ ጠሀ ደናሞገ አሴእ። ደንቃከት መጮታጋ ዱደንት ጠሃታጋ አሴእ» ይቶእ።
1 መትተ ጃተ ሆለሙ መኑ ጠጵዬእ። ህከን መኒንከ እታ እቸት ዮሰበአ እኬ። ህከንተኔ ዬሱሱ አወናኑስ እስበ ገእ 2 «ኩ መኑ ኤሳን በርገንት ሰሱ በር ኤጌርቴእ። እሶኦንከ እታ እቸት ዮሰበእተኔ አን አብሽ ቅሽጣንሰ። 3 ህትጉተ ጎሬቶገን ምንሰ ኦሮታገ አሴንሰደ ዎቃን አብስ ሆጋእ። አሞ እሶኦችን መ-መቱሰ ቄዕረ ባዲች ዋልቴሃረ» ዬሰ። 4 አወናኑስ ፈንቀሽት «ህከደ ከን ኡዱመኣን ከንካ መኒ እካ እቸተ አይ ኣሲ ደንደኖ?» ይቶስ። 5 ዬሱሱ አወናኒሀንስ ፈንቀሽ «ሜእት ቤጡ ዮዕኔ?» ይ ጠዕሜእ። እሶኦንት ፈንቀሽት «ለመልት ቤጡ ዮኔ» ይቶእ። 6 ህተ ጃንተ ዬሱሱ መነ ኡለ አሌን አፉዕለኖገ አዘጆ። ለመልንተ ጦሮሽ ቤጦ አፍ መገኑ ገለጥ ቢጠንስ መኒ ቤኩንተ አወናኒሀንስ ኣሴእ። እሶኦንት መኒ ቤኮእ። 7 አሞ ቀሁንት ቁርጡሜመት ዮሰ እኬ። እሴስን ኬእሽ አፍ መገኑ ገለጥ አወናኒሀንስ መኒ ቤኩንተ ኣሴእ። 8 መኑንኩ እች ዱብየን ፈኦሲ አወናኑስ ለመሌ ደጉዴ ዊመ ፉፉሩ ኬእሶእ። 9 ህተ እቸተ እቾ መን ዎሉንት ሾሌ ኩም እኬ። 10 ህከ መነንከ ህርሲሾሀኒች ዘኪን ዬሱሱ አወናኒንተስን ሜጡ እክ ጀልባን ኣግ «ደልማኑተ» ዬኖ ባዱ ኦሮቄእ። 11 ፋሪሰት ዬሱስበ ዋልት ሉስሶስተ «ሰሜች መላተ ጡድስኔ» ይተን ኦደሙ አፎእ። 12 ህተ ጃተ ዬሱሱ ዎዘኒችስ ኬእሽ ክቼእ «ኡሁ!» ይ «ከን ዶል መኑ መላተ ሚ ሀሰዮእ? ገርተ ያንክዕኔ፤ ሜጥት መላቲ ኣሰንታሰበአ» ዬሰ። 13 እሶኦንተ አጉር ጀልባን ለንኪሃ ኣግ ካጵ ዉደአ ቶሎ። 14 አወናኑስን እካሰ ቀጠተ እቸተ አፉ ሀብ ሜጥተ ቤጦ ጠለ አፍ ጀልብ ኣዜን ዮ እኬ። 15 ዬሱሱንኩ እሶኦተ «ፋሪሰነ ሄሮድሴ ሺሺች ቃርቴን ቆረጵዬ» ዬሰ። 16 ህተ ጃተ እስ-እሶኦንት «ህትጉተ ዩስ እቸተ አንፉዕነ ዋኖምተኔ እሀኖ» የቀንቶእ። 17 ዬሱሱንኩ ህከ ሰውተሰ ደግ « ‹እቸት ዮኔበእተኔሃት› ይቴን ሚ ሰውቴነዮንተ? ቴሶ ኢለንቀጤች ሜጡራ ደጌኑምቧረንዶ? እንዶ ኣጉምቦዕኔየረንዶ? አሞ ዎዘኑዕኔን ቴሶ ኢለንቀጤች ዱጆገን ዮእንዶ? 18 እልት ሄአንየንክዕኔን ጡዴነንተበእንዶ? አሞ መጨት ሄአንየንክዕኔን መጮቴነንተበእንዶ? ሀትተ ሆረን ቃገመኖዕኔበእንዶ? 19 አን ኦንቴ ኩሜ መኒ ኦንትተ ቤጦ ቢጭ ኣሴምሀኒች ፈኦ ፉፉሩ መን ብሬች ሜእተ ደጉድተ ኬእሴን?» ዬሰ። እሶኦንት «ቶነ ለሜ ደጉዴ ዊመ» ይቶእ። 20 አሞ ዬሱሱ «ለመልንተ ቤጦ ሾሌ ኩሜ መኒ ቢጭ ኣሴምሀኒችዕኑለ? ቢጠሞስ ፉፉሩ ሜእተ ደጉድተ ኬእሴን?» ዬሰ። እሶኦንት «ለመሌ ደጉዴ ዊመ» ይቶእ። 21 ህከኒ ዬሱሱ ፈንቀሽ እሶኦተ «ህከደ ተደ ኢለንቀጤች ቆርስቴንምበእንዶ?» ዬሰ። 22 «ቤተሰይደ» ዬኖበንከ ዋልቶ ጃተ መኑ መቱ ቆቀ መንቹ ዬሱስበ ኤብ አንጋን አፉንተስ ኡጭቶእ። 23 እስን ቆቀ መንቹ አንገስ አፍ አወንሰን ኦሌች ቶቹ ፉሼእ። ህከን መንችስ እሌን አንጀ ቱይ እልስ አንጋን አፍ «መ-መቱረ ጡደዮንትንዶ?» ይ ጠዕሜስ። 24 ህኩ ቆቁንኩ ብዝ ጡጅ «መነ ጡደዮም። ጠሁ እኮዳ ህኩሩንኩስ ሀቁ መረመኖ አጉደዮእ» ዬእ። 25 ለንኪሃ ዬሱሱ ህከን መንች እልተ አንጋን አፎ። ህተ ጃንተ መንቹስ ቃርስ ጡጆ። አሞ ፈይ ሆረረንከ ጠበእ ጡዱ አፎ። 26 ህከኒች ዘኪን ህከ መንቹ ዬሱሱ ምንስ ኦሮቀኖገ ህርሲሰን «ከ ኦሎሃ ኣጎት። አዬኒ ከ ጠሀ ኩልቶት» ዬስ። 27 ዬሱሱሁ አወናኑሲ «ፍልጶስ ቄሳረ» ዬኖ ባዶን ዮ ኦሎ መርተዮ እኬ። ዎቄ አሌን ሄአንየንን ዬሱሱ አወናኑስ «መኑ ኤስ አዬት ያዮእ?» ይ ጠዕሜእ። 28 አወናኑስን ፈንቀሽት «መ-መቱ ‹ጠመቃንቾ ዮሃንሴት› ይተዮእ። ዎሉስ ‹ህራጋንቾ ኤልያሴት› ይተዮእ። አሞ ዎሉስ መኑ ‹ህራጋኒች መቷንስ› ይተዮኬ» ይቶስ። 29 ዬሱሱ ፈንቀሽ «አዕኖኦስ ኤስ አዬት ይቴነዮንተ?» ይ ጠዕሜሰ። ጴጥሮስን «አት ክርስቶሳት» ዬስ። 30 ህተ ጃተ ዬሱሱ እሶኦተ «አዕኖኦት ኢተኔ አዬኒ ጠሃቴኖችዬ» ይ ቃርስ አዘጆሰ። 31 ዬሱሱ አወናኑስ «መንች ቤቱ ሆለመ ሀዉ ሀስሰኖስ። ባድ ኑባቡ፥ ቄሳከ አወንሳኑሁ ሴር ሮስሳኑሁ ግብ ሽታስ። ጠሁ እኮዳ እስ ሬሆች ሰክ በሬን ኬአኖ» ያን ሮስሱ አፎ። 32 ዬሱሱ ህከ ጠሀ ሞሽ ኩሎሰ። ህተ ጃተ ጴጥሮስ ዬሱሰ ሺነ ለቅ አሙዕሩ አፎ። 33 ጠሁ እኮዳ ዬሱሱ ኤተሩ ፈንቀል አወናኑስ ጡደን ጴጥሮሴ «አት ሼጣንቹ ኤሳች ቄዕር! አት መንቢ በጋን መገንቢ ደጋንትበአ» ያን አሙዕሬእ። 34 ህከኒች ዘኪን ዬሱሱ በትናሸ መነ አወናኒንተስን በርግ እስበ ገእ «ኤስ አወኒ ሀሰኖ ዮደ ገገስ ካጅ መስቀልቹስ እይ አወኑዕኔ። 35 ፎልስ ፈእሲ ሀሰኖ ሆሩንኩ ፎልስ በእሰኖ። ኢተኔሃ ምሽራች ላገተኔሃ ፎልስ ህግሽ ኣሰኖ ፎልስ ፈእጨኖ። 36 ሀኩ መንቹሁ ተን ኡለ አሌን ዮረ ሆረንከ ደቄዳ ፎሉስ በኦደ መ አሰኖስ? 37 አሞ መንቹ ፎልስ ቆደ መ ባቲ ደንደኖ? 38 ሳኣንቾነ ባጢላሞ ከን ዶል መን ብሬን ኤሳኒ ኢ ላጋኒ ሳለኖ መንቹ መንች ቤቱ አንስ አብኒን ጡማኖ መገን ሰሜ ሶቀማኒን በርገም ዋለኖ በር እሶን ሳለኖ» ዬሰ።
1 ህከኒች ዘኪን ዬሱሱ «ገርተ ያንክዕኔ፤ ቴሱ ከኔ ኡርቶ መን ሜሬሪች መ-መቱ መገን ዎሞመት አብኒን ዋልተንየን ጡደንቀጤች ሬቱምቡሩ ዮእ» ዬሰ። 2 ሌሆ በሬች ዘኪን ዬሱሱ ጴጥሮሴ፥ ያቆቤኒ ዮሃንሴኒ ጠለ አፍ አበ ዱን አል ፉሎ። ህከኔን ዬሱስ ብፉ ብሬንተሰ ዶረሞ። 3 ዬሱስ ኦድሸት ኡለ አሌን ሀኩ ኦድሸ ኣንሻንቹሁ ዎጀኡምቡ ቀጠ ዎጅክ ቤሌሌሶእ። 4 ህተ ጃተ ኤልያሲ ሙሲ ዋልት ዬሱሲን በርገንት ሃሳውተንየን ሰሱንኩ አወናኑ ጡዶሰ። 5 ጴጥሮስ ዬሱሰ «ሮስሳንቾ! ኔሳ ከኔ ሄኡ አብሽ ደናሟ። ህከኒ ከኔ ሰሱ ዳሰ መቱ ኬሳ፥ መቱ ሙሴ፥ መቱ ኤልያሴ ዳንሱን» ዬእ። 6 ህተ ጃተ ሰሱንኩ አወናኑ አብስ ባቦተኔ ጴጥሮስ መ ጠሃቀዮእንዶ ገጉስን ደግምበአ እኬ። 7 ጎሙንኩ ዋል ቴልየንሰ ጎም ኣዚን «አን ኢታም ቤቱኤ ከኔት። እሲች መጮጭዬ» ይታ ላገት ዋልቶእ። 8 ህተ ጃንተ ሰሱንኩ አወናኑ ሄጌጉሰ ጡዳደ እሶኦን በርገም ዬሱሲች በጋን አዪ ዮበአ እኬ። 9 ዱን አሊች ድርተንየን ዬሱሱ «መንች ቤቱ ሬሆች ኬአንቀጤች ከ ጡዴንተ ጠሀ አዬኒ ኩልቴኖችዬ» ይ አዘጆሰ። 10 እሶኦንት ጠሀስ ኣዜንተሰ አፍ «ኩ ‹ሬሆች ኬኡ ዩ› መ ዩሃን?» የቀንቶእ። 11 እሶኦንት ዬሱሰ «ሴር ሮስሳኑ ‹ኤልያስ መንች ቤቲች ብርስ ዋሉ ሀስሰኖስ› ይታኢ ሚሃት?» ይት ጠዕምቶስ። 12 እስን «ህኩን ገርተ። ኤልያስዕኑ ብርስን ዋል ሆረንከ ቅጠንሰኖ። ጠሁ እኮዳ መንች ቤቱ በትናሸ ሀወ ኣቀኖጋ ገደመኖጋ ጣፈሞሲ መ እሀኖለ? 13 ጠሁ እኮዳ አን ኩላንክዕኔ፤ ኤልያስ ብርስን ዋሌእ። እስተኔንከ መጣፋን ጣፈም ዮገን መኑ ሀሶገ አስቴስ» ዬሰ። 14 ዬሱሱሁ እሲን በርገንት ዮሩ ፈንቀልት ዋልቶ ጃተ ሆለሙ መኑ ፈኦ አወናንባን ጠጵዬኢ ጡዶእ። ህከኔን ሴር ሮስሳኑ ዬሱስ አወናኒን ኦደንተዮ እኬ። 15 መኑ ሆሩንኩ ዬሱሰ ጡዶ ጃንተ አብስ ማለልቶእ። አሞ እስበ ደጉደን መርት ጡምሶስ። 16 ዬሱሱንኩ «ማን ኦደንቴነዮንተ?» ይ ጠዕሜሰ። 17 ህከን በትናሸ መኒች መቱ መንቹ ፈንቀሽ «ሮስሳንቾ! ዱድሰኖ ሂሉ አያኑ አፍየን ሞሼ ኢ ቤቱ ኪ ቤቹ ኤቤም። 18 ህኩ ሞሱንኩ ኬኦስ ጃተ ኡጀኖስ። አሞ አፌን ሁምብ ኤበን እንቁስ ኢጠኖ። መኖመንትስ ሀቀ እክ በጀጅታእ። ህከኒ ህከ ሂለ አያነ ፉሽቱንተ አወናኑክ ጠዕሜም እኬ። ጠሁ እኮዳ እሶኦት ህካን ፉሽቶተ ደንድትምበአ» ዬእ። 19 ህተ ጃንተ ዬሱሱ «አዕኖኦት አመዕነቱ ዮዕኔበእ ከን ዶል መኑ! ሀኩ በሩ ኢለንቀጤች ክዕኔኤን ሄኣም? አሞ ሀኩ በሩ ኢለንቀጤች ደንዳንክዕኔ? ሀኖ አደባስ ኢበ ዋሽዬ» ዬሰ። 20 እሶኦንት አደባስ እስበ ዋሽቶእ። ህኩ ሂሉ አያኑንኩ ዬሱሰ ጡጆ ጃተ አደባስ ኡለ ኡጅ ፍት-ፍተኤስ። አደቦንኩ ኡለ ኡብ ብርቂቀን አፌን ሁምብ ኤበዮ እኬ። 21 ዬሱሱ ህከን አደቤ አነ «ከ አደባ ኩ ሞሱ አፎስሀኒች ሀበንከተ ጃተ እኬእ?» ይ ጠዕሜእ። እስን «ጪልነቲችን አፌት። 22 ሂሉ አያኑ ሾስተ ሆለመተ ጃተ ጊራኒ ዎኣኒ ኡጀኖስ። ሀእ ደንድታንትደ ቅሽጥኔኒ ካዕልኔኒ» ዬእ። 23 ዬሱሱንኩ « ‹ደንድታንትደ› ይተዮንትንዶ? አመዕነኖሀኒ ሆሩሩንኩ ደንዴሰኖስ» ዬስ። 24 ህተ ጃንተ አደቤስ አኑ ዬሱሰ «አመዕኑስዕኑ አመዕናም። ጠሁ እኮዳ አመዕኑ ሆጉኤ ኤሳች ፈደኖገ ካዕሌኤ» ያን ያሮ። 25 ዬሱሱንኩ መኑ ደጉጠመን ዋለኖገ ጡጅ ህከ ሂለ አያነ «አት ዱድሶንትነ ደንቅሶንት ሂሉ አያኑ ከን አደቤች ፉልት ለንኪ እስበ ፈንቀልት ዋልቱምቦገ አዘዛንኬ!» ይ ሻቆ። 26 ህኩ ሂሉ አያኑንኩ አበ ላጋን ያር አደባስ መቱ ቀጠ አብሽ ብርቂቅሽ ፉሎ። ህተ ጃተ አደቦስ ደሜተኔ መኑ «ሬሄእ» ይት ሰውቶእ። 27 ጠሁ እኮዳ ዬሱሱ አደቤ አንገተ አፍ ኬእሽየን ኡሬእ። 28 ዬሱሱ ምን ኣጎ ጃተ አወናኑስ «ነኦት ከ ሂለ አያነ ፉሽኖተ ሚ ደንድንምበይ?» ይት እሱ ቢንን ጠዕምቶስ። 29 ዬሱሱንኩ እሶኦ «ህትጎኑሩ መገኑ ኡጪኒ ጦሚኒ እሁምቦደ ዎሎሪን ሚኒ ፉለኖበአ» ዬሰ። 30 - 31 ዬሱሱሁ አወናኑሲ ህከ ቤቹ አጉርት ገሊል ባዲን ኦሮቶእ። ዬሱሱ አወናኑስ ሮስሰዮተኔ አዪ ደጉንተስ ሀስምበአ እኬ። እስን አወናኒሀንስ «መንች ቤቱ መኒ ህግስ ኣስታስ፤ እሶኦንት ሽታስ። ጠሁ እኮዳ ሬሆች ሰክ በር ኬአኖ» ያን ሮስሾሰ። 32 አወናኒሀንስ ጠሁስ ኣግምበሰ። እኮዳ ፈንቀሽት ጠዕሚ ዋጅቴ እኬ። 33 ዬሱሱሁ አወናኑሲ ቅፍርናሆም ከተመ ዋልቶእ። ዬሱሱንኩ ምን ኣጎሀኒች ዘኪን አወናኑስ «ዎቃን ጠሃቴንተ ጠሁ መሃን?» ይ ጠዕሜሰ። 34 ጠሁ እኮዳ እሶኦት ዎቃን «ሆሪችን አቡ አዬት?» የቀንቶተኔ ሰዕምት አጉርቶእ። 35 እስን አፉዕሌሀኒች ዘኪን ቶነ ለሙንከ አወናኑ እስበ ገእ «ዎነቢ እሂ ሀሰኖ ሆሩንኩ ሆሪንከ ሶቀማንቹሃ ሆሪችን ቀሁሃ እሁ ሀስሰኖስ» ዬሰ። 36 መቱ ቀሁ ጪለ ኤብ ሜሬሮንተሰ ኡርሾ። ህከ ጪለንከ ሀንቀፍ አፍ 37 «ከን ጪልገ ዮኢ ሱዕሚንተኤ ኣቀኖ ኤሲ ኣቄሃ። ኤስ ኣቀኖ ሆሩንኩ ኤስ ጠለ እሁዕናች ኤስ ሶኮሃ በርግ ኣቀኖ» ዬሰ። 38 ዮሃንስን ዬሱሰ «ሮስሳንቾ! መቱ መንቹ ሱዕሚንተክ ሀቡሰ ፉሸንየን ጡንድ ኔሳን ሜጡ እክ አወኑምቡ እኮተኔ ‹ህካን አቶት› ይን ከሞም» ዬእ። 39 ጠሁ እኮዳ ዬሱሱ «ሱዕሚንተኤ ማለሉተ አሰን ኢ አሌን ሂልመተ ጠሃቀኖ ዮበእተኔ አጉሬስ ከንቴኖችዬ። 40 ዳፉንኩስ ኔሳን ኡርጨሙምቡ ሆሩንኩ ኒሃ። 41 ገርተ ያንክዕኔ፤ ክርስቶስረ እኬንተተኔ መቶ ቡርጩቅ ዎአ አጌኑንተ ኣሰኖዕኔ አዪ ቆደስ ደቀኖ» ዬሰ። 42 ዬሱሱ «ኤሳን አመዕንታ ከን ቀቀሃኒች መቱስ ሉስሰኖ መንቹ አበ ዊትም ክኑ ጎባንተስ ኡሱዕር በሃራን ኡቦደ ዎየኖስ። 43 ህከንተኔ አንገክ ሉስሳሄ እኮደ ሙርት ኡጅ። ዳፉንኩስ ለምት አንገት ሄኤየንኬ ጋነማን ዶሊ ሆሪንከ ጠእቱምቡ ጊራን ኣጊች ሜጤ አንጋን ሄኤን ሄቸተ ደቁ ዎየኖ። 44 ህከን ቤቾን እሶኦተ እተኖ ኡጩ ሬሀኖበአ። አሞ ጊረንትስ ሆረን ጠእታበአ። 45 አሞ ሎከክ ሉስሳሄ እኮደ ሙርት ኡጅ። ለምት ሎከት ሄኤየንኬ ጋነማን ዶሊ ሆሪንከ ጠእቱምቡ ጊራን ቶረንታንትሀኒች ድኑ እክ ሄቸተ ደቅቶንትደ ዎየኖሄ። 46 ህከን ቤቾን እሶኦተ እተኖ ኡጩ ሆረን ሬሀኖበአ። ጊረንትስ ሆረን ጠእታበአ። 47 አሞ እልክ ሉስሳሄ እኮደ ፉሽት ኡጅ። ዳፉንኩስ ለምት እልት ሄአንየን ዶሊ ሆሪንከ ጠእቱምቦ ጊራን ቶረንታንትሀኒች መትለ እክ መገን ዎሞማን ሄኡ ዎየኖሄ። 48 ህከን ቤቾን እሶኦተ እተኖ ኡጩ ሆረን ሬሀኖበአ። አሞ ጊረንትስ ሆረን ጠእታበአ። 49 ክትሙ መጥኔን ሙጩረኖገን መኑ ሆሩንኩ ጊራን ሙጩረኖ። 50 መጥንት ደናምተ። ጠሁ እኮዳ መጥኖመሴ ጤዕነ ሆጎኢች ሀተቴን ጤኣገ አስቴነን? ክዕኔኤኒ መጥኔ ጤዕኑ ሄኡንክዕኔ። አዕን-አዕኖኦንት ኢተምዬ» ዬሰ።
1 ዬሱሱ ህከምቢች ኬእ ይሁድ ባዲን ህግ ዮርዳኖስ ለግ ዉደአ ኦሮቄእ። ሆለሙ መኑንኩ ለንኪሃ እስባን ጠጵትየን ኤጄ ሮሸስገንከ ሮስሾሰ። 2 መ-መቱ ፋሪሰት ዬሱሰ ሉስሶተ ሀስ ዋልት «መቱ መንቹ ሜንትቹስ ሸሩ ሀስሰኖንዶ?» ይት ጠዕምቶስ። 3 ዬሱሱንኩ ፈንቀሽ «ሙስ ከንተኔ መ አዘጄክዕኔ?» ዬሰ። 4 እሶኦንት «ሙስዕኑ ‹እሴ ፉርመ ኣስት ሸር› ይ አዘጄእ» ይቶእ። 5 እኮዳ ዬሱሱ እሶኦ ፈንቀሽ «ሙስዕኑ ተ አዘዙተ ጣፎ ክዕኔኤ ዎዘን ዱድመተኔሃት። 6 ጠሁ እኮዳ መገኑ ዎና ቆጬ ጃተ ጎንቹሃ ሜንትቹታ አስ ቆጬእ። 7 ህከንተኔ መንቹ አነሲ አመሲ አጉር ምኔማንተስ ሜጡ እሀኖ። 8 አሞ ለሙንኩ ሜጡ ማለ እካእ። ህከኒች ዘኪን እሶኦት ሜጦ ማለ በጋን ለሞበአ። 9 ህከኒ መገኑ ሜጡ አስ ጣጆ መኑ አነነ አሱንከ» ዬእ። 10 እሶኦንት ምን ፈንቀልት ዋልቶ ጃተ አወናኑስ ህከን ጠህተኔ ዬሱሰ ጠዕምቶእ። 11 እስን «ምኔመስ ሸር ዎልተ ኤበኖ ሆሩንኩ ሳኣንቿ። 12 ህትጉንተ ምኔኒችሴ ፉልት ዎሎን ገልታኢት ሳኣንቹተ» ዬእ። 13 መ-መቱ መኑ ጪለሰ አሌን አንገተ ኡጁንተ ዬሱስበ ኤቦእ። ጠሁ እኮዳ አወናኑስ ህከ መነ አሙዕረንቶእ። 14 ዬሱሱንኩ ህካን ጡጆ ጃተ አወናኑስ አሙዕረም «መገን ዎሞመት ከሮኦገ ዮሪቢተ እኮተኔ ጪላከት ኢበ ዋልቱን ከንቴኖችዬ» ዬሰ። 15 ዬሱሱ «ገርተ ያንክዕኔ፤ መገን ዎሞመተ ጪለገ እክ ኣቁምቡ መገን ዎሞመ ኣዜን ሄኢ ሆረን ደንደኖበአ» ዬእ። 16 ህከኒች ዘኪን ጪለተ ሀንቀፍ አንገስ አሌንተሰ ኡጅ ማሰኦ። 17 ዬሱሱ ህከምቢች ኬእ ዎሉበ ለቅ መረመንየን መቱ መንቹ ዬሱስበ ደጉደን ዋል ብሬንተስ ጉሉጵ «ቢዘ ሮስሳንቾ! ዶሊ ሆሪንከ ሄኣ ሄቸተ ደቆተ መ አሱ ሀስሰኖኤ?» ይ ጠዕሜእ። 18 ዬሱሱንኩ ፈንቀሽ «ሚ ‹ቢዘ› ይተዮንቴኤ። ሜጦ መገኒች በጋን አዪ ቢዛበአ። 19 አዘዙት ‹ሽቶት፥ ሳኦት፥ ሞገኦት፥ ቆጰነ ነቀሶት፥ መለጦትኒ፥ አነኪ፥ አመኪ አብስኒ› ይታገ ደጋንት» ዬስ። 20 ህኩ መንቹንኩ «ሮስሳንቾ! ከረ ሆረንከ አን ኦሶመኒችኤን አፍ ቆረቤሜየረ» ዬእ። 21 ዬሱሱንኩ ህከ መንቹ ጡጅ እሱ ኢት «ሜጡ ጠሁ ጠሉ ኮቼኬ። ህኩስን መርት ዮኬረ ሆረንከ ህርት ግዘስ ቡጢ ኣስ። አት ሰማን ጠጵይ አፉዕሌ ዱቡ ደቅታንት። ህከኒች ዘኪን ዋልት ኤስ አወን» ዬእ። 22 መንቹስ ህካን መጮጬ ጃተ ሆለሙ ዱቡ ዮስተኔ እልተ ገምበልክ ክቼእ ኦሮቄእ። 23 ህተ ጃተ ዬሱሱ አወናንስበ ለቅ ጡጅ «ዱበላካ መገን ዎሞመተ ኣጉ ሀበንከ ቃረ እሀኖ?» ዬእ። 24 አወናኑንኩ ጠሃንተስ ማለልቶእ። ጠሁ እኮዳ ዬሱሱ ለንኪሃ ፈንቀሽ «ኢ ኦሶ! መገን ዎሞመተ ኣጉ ሀበንከ ቃራን? 25 ህከኒ ዱበሉ መገን ዎሞመተ ኣገኖሀኒች ጋሜሉ መርፍ ጠላሊን ህጉ ቢላሻ» ዬእ። 26 ህከን ጠሃን አወናኑስ አብስ ማለልት እስ-እሶኦንት «ህካን እኮች አይ ፈኢ ደንደኖ?» የቀንቶእ። 27 ዬሱሱንኩ እሶኦ ዉዱ ለቅ ጡጅ «መኒ ደንዴሀሙምቡሩ መገኒ ደንዴሀመኖ። ዳፉንኩስ መገኒ ሆሩሩንኩ ደንዴሀመኖስ» ዬሰ። 28 ጴጥሮስን «ነኦት ሆረረንከ አጉን አወኔንኬ» ዬእ። 29 ዬሱሱ ፈንቀሽ «ገርተ ያንክዕኔ፤ ኢተኔሃ ምሽራች ላገተኔሃ ይ ምንስ፥ ህዛከስ፥ አመስ፥ አነስ፥ ኦሱሲ እረሲ አጉረኖ 30 ከን ዶላኒ ምነተ፥ ህዛከተ፥ አማከተ፥ ኦሱታ እረሃ አመዕነትተኔ ሀወንን ጥቤ አፎ ደቀኖ። አሞ ዋለኖ ዶላኒ ዶሊ ሆሪንከ ጎፉምቡ ሄቸተ ደቀኖ። 31 ጠሁ እኮዳ ሆለሙ ብራኑ ዘካኑ አሞ ዘካኑ ብራኑ እካእ» ዬሰ። 32 ዬሱሱሁ አወናኑሲ ዬሩሳሌመ መሰኖ ዎቄ አሌን ሄአንየን ዬሱሱ እሶኦ ብሬን መረመዮ እኬ። አወናኑንኩስ ማለልቶእ። አሞ ኤተሪንተሰ አወንተዮሩንኩ ዋጅቶእ። እስ ቶነ ለሙንከ አወናኑስ ለንኪሃ ሺነ ለቅ ኢለኖስ ሀውተኔ ኩሎሰ። 33 ዬሱሱንኩ እሶኦ «ህኩዕኒን፥ ቴሱ ዬሩሳሌመ መነዮም። መንች ቤቱ ቄሳከ አወንሳኒሃ ሴር ሮስሳኒሃ ህግሴን ኣሴኖስ። እሶኦንት እሶን ሬሆ ፍርደ ፍርድት አይሁደ እኩምቦ መኒ ህግስ ኣስታእ። 34 አይሁደ እኩምቡ መኑንኩ ዎቀቃስ፥ አንጀንከ ቱ ይታ፥ ኦልታስኒ ሽታስኒ። ጠሁ እኮዳ እስ ሰክ በር ሬሆች ኬአኖ» ዬሰ። 35 ዘብዶሴ ኦሱት ያቆቢ ዮሃንሲ ዬሱስበ ህንጭት «ሮስሳንቾ! ኡጭናንኬረ ሆረንከ አስቱንተኔ ሀንሳም» ይቶእ። 36 እስን «መ አሱንተዕኔ ሀሴነን?» ዬሰ። 37 እሶኦንት «አብንክ ዎሞማን መቱኔ መኬን፥ መቱኔ ጉረ ዉዲን አፉዕልናምገ አስኔ» ይቶእ። 38 ጠሁ እኮዳ ዬሱሱ እሶኦተ «ኡጭቴነንተረ ደጌነንተበአ። አን አጋም ሀው ጡወ አጊ ደንድቴነንንዶ? አሞ አን ጠመቀማም ጠመቀንቸ ጠመቀሚ ደንድቴነንንዶ?» ዬሰ። 39 እሶኦንት ፈንቀሽት «፤ ደንድናም» ይቶእ። አሞ ዬሱሱ ፈንቀሽ «አን አጋም ሀው ጡወዕኑ አጊ ደንድቴነንተ። አሞ አን ጠመቀማም ጠመቀንቸንከ ጠመቀንቴነንተ። 40 እኮዳ ኢ መኬኒ ጉራኒ አፉዕሌኖገ አሳሚ አኔበአ። ጠሁ እኮዳ ህት መዕንት ቅጠንቶሰ ኬኒ ኣሰንታታ» ዬእ። 41 ፈኦ ቶርዱሙንኩ ህካን መጮቶ ጃተ ያቆቤኒ ዮሃንሴኒ አሙዕረንቶእ። 42 ህተ ጃንተ ዬሱሱ እሶኦተ ሆረንከሰ እስበ ገእ «አይሁደ እኩምቦ መን ቀርበት ገሻኑሰ የመንት ገአንታጋ አወንሳኑሰን እሶኦ አሌን መቆ ዮሰጋ ደጌነንተ። 43 ጠሁ እኮዳ ክዕኔኤባን ህትተ እሁ ሀስሰኖበአ። ክዕኔኤ ሜሬሮን አበ እሂ ሀሰኖ ዮደ ክዕኔኤ ሶቀማንቹ እሁ ሀስሰኖስ። 44 ህትጉንተ ክዕኔኤ ሜሬሮን ብራንቹ እሂ ሀሰኖ ሆሪንከዕኔ አግሹ እሁን። 45 ሆረን መንች ቤቱ ሁጀቶታ ፎልስ ሆለመ መኒ ዎዝኑተ አስ ኣሲሃ ዋሌ በጋን እሲ ሁጀቴኑንተ ዋልምበአ» ዬሰ። 46 ህከኒች ዘኪን እያርኮ ከተመ ዋልቶእ። ዬሱሱ አወናኒንተሲ ሆለመ መኒኒ በርገም እያርኮ ከተሚች ፉለንየን ጤሞሴ ቤቱ «ባርጤሞሴ» ዬኖ ቆቁ ዎቄ ቶቾን አፉዕል ኡጨቀዮ እኬ። 47 ህከኒን ህገኖ ናዝሬት ዬሱሰ እሁስ መጮጬ ጃተ «ዳዊቴ ቤቶ ዬሱሰ! ሀእ ቅሽጤኤ» ያን ያሩ አፎ። 48 ዬሱሰ አወንተዮ መኑ «ሰዕምይ!» ይት አሙዕርቶስ። ጠሁ እኮዳ እስ «ዳዊቴ ቤቶ! ሀእ ቅሽጤኤ» ያን ዎናችስ አብሽ ያሮ። 49 ዬሱሱ ኡር «ገእዬ» ዬእ። እሶኦንት ቆቀ መንቹ «አቼ ቃርት ጦቅይ፤ ዬሱሱ ገአዮሄ» ይት ገእቶስ። 50 እስን ኦደቄ ባልቱተ ኡጅ ጦጵይ ጦቅይ ዬሱስበ ዋሎ። 51 ዬሱሱንኩ «መ አሱንተሄ ሀሰን?» ይ ጠዕሜስ። ህኩ ቆቁንኩ «ሮስሳንቾ! ሀእ ጡዳምገ አሴኤ» ዬእ። 52 ዬሱሱንኩ «አቼ መር። አመዕነቱክ ፈይሼኬ» ዬእ። ህተ ጃንተ እልስ ፈነንትየን ጡጅ ዬሱሰ ዎቃን አወኖ።
1 ዬሱሱሁ አወናኑሲ ዬሩሳሌመ ህንጭቶ ጃተ ቤተፋጌነ ቢታን ከተም ዉዲን ዘይት ሀቁ ሌአኖ ዱንበ ኢልቶእ። ህከምቢችን ዬሱሱ አወናኒችስ ለሙ 2 «ብሬንተዕኔ ዮ ኦሎ መሬ። ህከበ ኢልቴንተገን አዪ ሆረን ኮዕሩምቡ ሀሩች ዎተሩ ኡሱረሜኢ ደጌነንተ። ህከስን ሂርቴን ዋሽዬ። 3 አይ ደጎ ሀኩ መንቹሁ ‹ካን ሚ አቴነዮንተ?› ዬዕኔደ ‹ቀርቹ ሀሾተኔሃት። እስን ሰርብ ከበ ፈንቀሽ ሶሀኖክዕኔ› ይዬ» ይ ሶኮሰ። 4 እሶኦንት መርት ዎተሩስ ዎቄ ቶቾን ውተራን ኡሱረሜኢ ደግ ሂርቶእ። 5 ህተ ጃንተ ህከኔ ኡርቶ መኒች መ-መቱ «ከ ዎተረ ሂርቴነዮንታ ሚሃት?» ይት ጠዕምቶእ። 6 እሶኦንት ዬሱሱ እሶኦ ዬገን ይት ፈንቀሽቶእ። ህኩ መኑንኩ «መስዬለ» ይቶእ። 7 አወናኑንኩ ዎተረ ዬሱስበ ዋሽት ኦድሸሰ ዎተር አሌን ዎርትየን ዬሱሱ ኮዕሬእ። 8 ሆለሙ መኑንኩ ኦድሸሰ ዎቃን ዌኤሰዮ እኬ። ዎሉሰን ሀቅ ቦንጠ ሙርተን ኡጅተዮ እኬ። 9 ብሬ ዉዲን መረንታሩ ኤተሪንተስ አወንተዮስሩ «መገኒ አብኑ እሁን፤ ቀርቾ መገን ሱዕሚን ዋለኖ ማሰአሜሃ። 10 ዋልታ አናኔ ዳዊቴ ዎሞመት ማሰአንቱን። መገኒ አብኑ አሌ ሰማን እሁን» ይተን አበ ላጋን ገለጥተዮ እኬ። 11 ዬሱሱንኩ ዬሩሳሌመ ኢሌ ጃተ መገን ምን ኣጎ። እስን ህከኔ ዮረ ሆረንከ ጡጆ። ጠሁ እኮዳ እሩ ሀወሬተኔ ቶነ ለሟንከ አወናኒንተስን ቢታን ከተመ ኦሮቄእ። 12 ለንክ በር ቢታን ከተሚች ዋልተንየን ዬሱሱ ጎሬኮ። 13 እስን ቦንጣሙ ኦዴቹተ አጉደኖ ሀቁቹ ቄዕረ ጡጅ «አይ ደጎ ላሉት ሄኣስደ» ይ ሀቅስበ መሮ። ጠሁ እኮዳ ህከን ሀቁችበ ህንጭዬ ጃተ ሀቁቹስ ላለኖ ጄቹተ እሁምቦተኔ ቦንጢች በጋን ላሉት ዮበአ እኬ። 14 ህከኒ ዬሱሱ ሀቁቹስ «ከኒች ዘኪን አዪ ኬሳች ላሉተ እቱንከ» ዬእ። ህካን አወናኑስ መጮቶእ። 15 እሶኦንት ዬሩሳሌመ ኢልቶ ጃተ ዬሱሱ መገን ኬሰሞ ምን ኣግ ምንስ ኣዜን ህርታራ ህዕርታራ ሸሩ አፎ። ብረ ዶርታ መን ጠረጴሰታ ሀንደርተ ህርታ መን በርጩመታ ጎምብሾ። 16 ዬሱሱ አዪ መገን ኬሰሞ ምን ኣዚን መሃ እይ ህጉምቦገ አዘጆ። 17 አሞ ዬሱሱ እሶኦ « ‹ምኑኤ ምናደቡ ሆሩንኩ መገኑ ኡጨኗ ምን› የመም ጣፈምምበእንዶ? እኮዳ አዕኖኦት ቦጋን ግምበ አቴንተ» ይ ሮስሾሰ። 18 ቄስ አወንሳኑሁ ሴር ሮስሳኑሁ ህካን ያንየን መጮቶ ጃተ እሱ ሽታ ዎቃ ሀሶእ። እኮዳ እስ ሮስሾረ መኑ ሆሩንኩ ማለለንየን ጡዶተኔ ዋጅቶስ። 19 ዬሱሱሁ አወናኑሲ እሩ ሀወሬ ጃተ ከተሚች ኤተሩ ፉልቶእ። 20 እሶኦንት ለንክ በሬ ገስመ ዎቄን ህገን ኦዴቹተ አጉደኖ ሀቁ ጠጲች ሉደ ኢለንቀጤች ሞሌገ ጡዶእ። 21 ጴጥሮስን ጠሀስ ቃግ ዬሱሰ «ሮስሳንቾ! ከረግ፤ አት ጤሌልቶንት ሀቁቹ ሞሌእ» ዬእ። 22 ዬሱሱንኩ እሶኦ «መገኖን አመዕንዬ። 23 ገርንተ ሀኩ መንቹሁ ዎዘናንተስ መለሙዕነ ዬሩ ሆሩንኩ እሀኖገ አመዕን ከ ዱነ ‹ከምቢች ኬእ በሃራን ኡብ› ዬዳ እሀኖስ። 24 ህከኒ አን ኩላንክዕኔ፤ አዕኖኦት መገኑ ኡጭቴንተሩ ሆሩ���ኩ ክዕኔኤ ኣሰመኖዕኔገ አመዕንቴንተደ ክዕኔኤቢ እሀኖ። 25 አዕኖኦት መገኑ ኡጪ ኬኤንተ ጃተ ሆረንተ አዬ አሌኒ አፌንተ ባዱ ዮደ አጉርዬ። ህከኒ ሰማን ዮ አኑዕኔ ባጢለዕኔ አጉረኖ። 26 ጠሁ እኮዳ አዕኖኦት መን በእሱ አጉርቴኑምቦደ ሰማን ዮ አኑዕኔ ክዕኔኤ ባጢለሃ አጉረኖበአ» ዬሰ። 27 ዬሱሱሁ አወናኑሲ ለንኪሃ ዬሩሳሌመ መርቶእ። ህከኔን ዬሱሱ መገን ኬሰሞ ምን ኣዜን መረመንየን ቄስ አወንሳኑ፥ ሴር ሮስሳኑሁ ባድ ኑባቡሁ እስበ ዋልት 28 «ከረ አስታንቲ መ መቄኔት? እንዶ ከረ አስታንት መቆ ኣሴሄ አዬት?» ይት ጠዕምቶእ። 29 ዬሱሱንኩ እሶኦ ፈንቀሽ «አን መቱረ ጠዕማንክዕኔ። አዕኖኦት አን ጠዕሜምረ ፈንቀሽቴንተደ መ መቄን ከ ጠሀ ሁጀተዮምንዶ ኩላንክዕኔ። 30 ሀኖ ኩልዬኤ፤ ዮሃንስ ጠመቆ ጥንቀቱ መገኒቼትንዶ መኒቼት?» ዬእ። 31 ህተ ጃተ እስ-እሶኦንት «መ ይኑ» ይት ኦደንት « ‹መገኒቼት› ይኖንደ ‹ህከደ ሚ ዮሃንሴ አመዕንቴንምበስ?› ያኖ። 32 ‹መኒቼት› ይኑንዶ?» ይቶእ። ህካን ይቱምቦገ መኑ ሆሩንኩ ዮሃንሴ «ህራጋንቿ» ያኖተኔ ምናደበ ዋጅቶእ። 33 ህከንተኔ እሶኦት ዬሱሲ «ነኦት ደንጋምበአ» ይት ፈንቀሽቶእ። ዬሱሱንኩ እሶኦ «አኒ ከረ መ መቄን አሰዮምንዶ ኩላንክዕኔበአ» ዬእ።
1 አሞ ዬሱሱ እሶኦ አጉዲሻን «መትተ ጃተ መቱ መንቹ ዎይነ ካሾ። ህካንን ዘህሽ ኦች ላሉስ ጡንሼኖ ኤሎ እም ዎይን ቆረባንቺ መዕነተ ደጅ ቅጠንሴእ። ህከኒች ዘኪን ህኩ መንቹ ዎይነስ አላኒ ቀቤ ኣስ ቄዕረ ባዱ ኦሮቄእ። 2 ዎይኑስ ላለኖገ እኮ ጃተ አላንቹስ መር ላሎች ኤቡንተ አላንስበ ሶኮ። 3 እሶኦንት ህከ ሶሀሞ አላንቹ አፍ ኦልት ሜጡራ ከንት ሸርቶእ። 4 ለንኪሃ ዎይን አኑ ዎሉ አላንቹ ሶኮ። አላኑንኩ ህከ አላንቹ ቦቁተ ዘርት መዜስ ቢልስ ሸርቶእ። 5 አሞ ዎይንስ አኑ ዎሉስ ሶኮደ ህከሲ ሽቶእ። ህትጉንተ ሆለመ መነ ሶኮደ መ-መቱሰ ኦልቶእ፤ መ-መቱሰ ሽቶእ። 6 ቴሱ መንቺሀንስ ፈኦ ኢተኖ ቤቱስ ሶ ጠለ እኬ። ህከኒ ‹ቤቱኤዕኑ አብሳእ› ይ ሰውይ ዘካንቾን ቤቱስ ሶኮ። 7 ጠሁ እኮዳ ህኩ አላኑ እስ-እሶኦንት ‹ከረጌ፤ እረ ረገአኖ ከኔት። ህከኒ ዋሌ እሱ ሽኖ። ነኦት እረስ ረገዕናም› የቀንቶእ። 8 እሶኦንት እሱ አፍ ሽት ዎይን ሆጎ ኣዚች ኤተሩ ለቅ ቶርቶእ። 9 ህከኒ ህኩ ዎይን አኑ መ አሰኖ? ዋል ህከ አላኑ ሽ ዎይነስ ዎሎ መኒ ኣሰኖ። 10 መጣፋን ‹ምን ምንታሩ ገዶ ክኑ ምንስ ኡቱቡ እኮ። 11 ህቲንን መገንተ ሁጅ። ህት ሁጅንት እሌሃኔ ማለልሲሳታ› የመም ጣፈሞ አነበቤንምበእንዶ?» ዬእ። 12 ቄስ አወንሳኑ፥ ሴር ሮስሳኑሁ ባድ ኑባቡሁ አጉዲሻን ጠሃቄኢ እሶኦ እኮገ ደግ እሱ አፊ ሀሶእ። ጠሁ እኮዳ መነ ዋጅቶተኔ አጉርት ኦሮቶእ። 13 ጠሃቀኖ ጠሂን ሉስሶስተ ፋሪሰነ ሄሮድሴ ሀጊች መነ ዬሱስበ ሶኮእ። 14 እሶኦንት እስበ ዋልት «ሮስሳንቾ! መን እልተ ጡዱዕናች ገርተ መገን ዎቃ ሮስሳንትየ። አት ገሬቢሃ አዬሃ ጎዕልቱምቡሃ እሁክ ደንጋም። ቄሳሬ ግብረ ባቱ ሀስሰኗንዶ ሀስሱምቧን? 15 ባንቱንዶ ባንቱንከ?» ይቶእ። ዬሱሱንኩ እሶኦ ሾክመተ ደግ «ሚ ኬንቴኖኤተ ሀሴነዮንተ? ሀኖ ብረስ ኤቤ፤ ጡዳም» ዬእ። 16 እሶኦንት መቱ ብረ ኤቦእ። እስን እሶኦተ «ከን ብር አሌን ዮ ምስሉሁ ጣፈሞ ሱዕሙሁ አዬየን?» ዬሰ። እሶኦንት «ቄሳሬየ» ይቶእ። 17 ዬሱሱንኩ «ህከደ ቄሳሬቢ ቄሳሬንከ አሞ መገንቢ መገኒንከ ኣስዬ» ዬሰ። እሶኦንት ዬሱሳን ማለልቶእ። 18 «ሬሄ መኑ ሬሆች ኬአኖበአ» ይታ ሳዱቀት ዬሱስበ ዋልት 19 «ሮስሳንቾ! ሙስ ‹መቱ መንቹ ኦሱተ እሉዕናች ሬሄደ ህከን ሬሄ መንች ህዞ ሬሄሀን ምኔመተ ረገእ ህከን ሬሄ መንቺ ኦሱተ እሉን› ይ ጣፌኔ። 20 መትተ ጃተ ለመልት ህዛከት ዮ እኬ። እሶኦችን በህሩስ ሜንትቹተ ኤብ እሉዕናች ሬሄእ። 21 አሞ ለንክቢሁ ህተ ሜንትቹተ ረገእ እሉዕናችን ሬሄእ። ሰክቢሁ ህትጉንተ እኮ። 22 ህትጎነ ዎቄን ለመሉንኩ ህተ ሜንትቹተ ረገእ እልቱዕነን ሬቶእ። ዘካንቾንተስ ሜንትቹሲ ሬቶእ። 23 ህከኒ ለመሉንኩ ህዛከት ኮዳን ኮዳን ረገኦተኔ ሬቶሩ ሬሆች ኬኣ በር ህት ሜንትቹት አዬቢተ እካእ?» ይት ጠዕምቶእ። 24 ዬሱሱንኩ እሶኦ ፈንቀሽ «አዕኖኦት ህትጉተ ሉሴነዮንታ ጡማንቹተ መጣፈታ መገን መቆሃ ደጉ ሆጊንተዕኔበእንዶ? 25 ህኩ ሬቶሩ ሬሆች ኬኣ ጃተ መገን ሰሜ ሶቀማንገ እካ በጋን ኤባበእኒ ኤበቀንታበእኒ። 26 ጠሁ እኮዳ ሬቶሪ ኬእተኔ መገኑ ቡበዮ ሀቅ ዱብ ኣዜን ሙሴ ‹አን አብረሃሜነ ይሳቄነ ያቆቤየ መገኑ› ያኖ ጡማንቾ መጣፊች አነበቤንምበእንዶ? 27 ህከኒ መገኑ ፎላሞ መንየ መገኑ በጋን ሬቶ መንየ መገኑበአ። ጠሁ እኮዳ አዕኖኦት አብሴን ሉሴንተ» ዬእ። 28 ህከኔ ሴር ሮስሳኒች መቱ ኦደንታኢ መጮጨዮ እኬ። እስን ዬሱሱ ህከን መኒ ደናሞገ ፈንቀሼገ ጡጅ ዬሱስበ ህንጭይ «አዘዞች ሆራችን ሀትስ አበተን?» ይ ጠዕሜእ። 29 ዬሱሱ እሲ ፈንቀሽ «ሆራችን አበት አዘዙት ‹እስራኤል ምናደበ! መጮጭዬ፤ ቀርቹ መገኑኔ ሜጦ መገኑ። 30 አትን ቀርቹ መገኑክ ዊማንክ ዎዘኒን፥ ዊማንክ ፎሊን፥ ዊማንክ ሰውቲኒ ዊማንክ መቄኒ ኢት› ይታታ። 31 አሞ ካንን አጉዳ ለንክ አዘዙት ‹ኦሌቹክ ገግክገ ኢት› ይታታ። ተን ለሜችን አብታ ዎልት አዘዙት ዮበአ» ይ ፈንቀሼእ። 32 ህኩ ሴር ሮስሳንቹንኩ «ሮስሳንቾ! ደናሟ ‹መገኑ ሜጦት። እሲች በጋን ዎሉ መገኑ ዮበአ› ይት ጠሃቶንቲ ገርተ። 33 ህከኒ መኑ ዊማንስ ዎዘኒን፥ ዊማንስ ሰውቲኒ ዊማንስ መቄኒ መገኑ ኢቱ ሀስሰኖስ። ህትጉንተ ኦሌቹስ ገግስገ ኢቱ ሀስሰኖስ። ቡሴኖ ክትመሃ ዎሉ ክትመሃ ሆረንከ መገኒ ኣሲች ተ ለምንተ አዘዙተ ቆረቡ አበኖ» ዬእ። 34 ዬሱሱንኩ ህኩ ሴር ሮስሳንቹ መሌሲን ፈንቀሼገ ጡጅ «አት መገን ዎሞማች ቄዕርቴንትየበአ» ዬስ። ህከኒች ዘኪን ዬሱሰ ጠዕሞተ እጌኢ ዮበአ። 35 ዬሱሱ መገን ምን ኣዜን ሮስሰን «ሴር ሮስሳኑ ‹ፈእሳንቹ ክርስቶሱ ዳዊቴየ ቤቱ› ዪ ደንድቶኢ ሚኔት? 36 ዳዊት ገጉንኩስ ክርስቶስተኔ ጡማንቹ አያኑ አወንሴሃንስ ‹መገኑ ኢ ቀርቺ ‹አን ዲናከክ ሎካችክ ዎሮዲን ኡጀንቀጤች መኬኤ ዉዲን አፉዕል› ዬእ› ያኖ። 37 ዳዊት ገጉንኩስ ‹ቀርቾ› ይ ገኤኢች ክርስቶሱ ሀትክ ዳዊቴ ቤቱ እሀኖ?» ይ ጠሃቄእ። ህከኔን ዬሱሱ ያኖረ ሆለሙ መኑ በጅጎን መጮተዮ እኬ። 38 ዬሱሱ ሮስሰን እሶኦ «ሴር ሮስሳኒች ቆረጵዬ። እሶኦት ቄራዕሩተ ኦድሸተ ኦደቅት መረንተን ድኮ ኣዜን አብኒን ጡምሴኑንተ ኢትታእ። 39 እሶኦንት ጠጵት ምናን አብን በርጩማን አፉዕሉሃ ድግሰ ድግሴመባን አብን መዕኔን አፉዕሉሃ ሀሳእ። 40 አጉዲስ ቄራርስት መገኑ ኡጭተን ምኔኑ ሬሄ ሜንቱ መለጥ እታእ። ህከኒ እሶኦ አሌን አቡ ፍርዱ እሀኖ» ዬእ። 41 አሞ ዬሱሱ መገን ምኔን ምጡዋት ግዘ ዎሬኖ ሳጥን ብሬን አፉዕል መኑ ግዘ ኡጀኖገ ጡደዮ እኬ። ህከኔን በትናሹ ዱበሉ መኑ ሆለመ ግዘ ኡጅተዮ እኬ። 42 ህተ ጃተ መትት ምኔኑሴ ሬሄ ቡጥቹት ሜንትቹት ዋልት ለምተ ሰሙንተ እሀኖ ቡሬች ግዘ ኣስቶእ። 43 ዬሱሱንኩ አወናኑስ እስበ ገእ «ገርተ ያንክዕኔ፤ ከን ሳጥን ኣዜን ግዘ ዎርቶ መኒች ሆሪችን ት ምኔኑሴ ሬሄ ቡጥቹት ሜንትቹት አበ ኣስቴእ። 44 ዳፉንኩስ ዎሉ ሆሩንኩ ኣስቶኢ ዮሰ ዱቢች ፈኦስየ። ጠሁ እኮዳ ት ቡጥቹት ሜጡራ ፈእጭቱዕናች ዮሴ ሄቸተ ሆረንተ ኣስቴእ» ዬሰ።
1 ዬሱሱ መገን ምኒች ፉለንየን አወናኒችስ መቱ «ሮስሳንቾ! ተ ማለልሲሳ መገን ምን ክነታ ማለልሲሳ ግምብ ምነታ ጡድ» ዬእ። 2 ዬሱሱንኩ «ተ አበተ ምነተ ጡደዮንትንዶ? ት ክነንት ቶሮሸንቱዕነ መቱ ክኑ መቶ ክን አሌን ግምበሞገ ፈአኖበአ» ይ ፈንቀሼእ። 3 ዬሱሱ መገን ምኒች ብሬ ዉዲን ዘይት ሀቁ ሌአኖ ዱን አሌን አፉዕል ዮሀኔን ጴጥሮስ፥ ያቆብ፥ ዮሃንሲ እንድራሲ ሜጥንሰን ዬሱስበ መርት 4 «ኩን እሀኖ ሀከዳት? አሞ ኩ ጠሁ ሆሩንኩ እሂ እኮ ጃተ መላስ መሃንዶ ኩልኔ?» ይት ጠዕምቶስ። 5 ዬሱሱ እሶኦ «አዪ ሉስሱምቦዕኔገ ቆረጵዬ። 6 ሆለሙ መኑ ‹አን ክርስቶሳት› ይተን ኢ ሱዕሚን ዋልት ሆለመ መነ ሉስሳእ። 7 አዕኖኦት ኦል ዱዱቡሃ ኦለሃ መጮቴንተ ጃተ ህልቄኖችዬ። ህኩን እሁዕነ ፈአኖበአ። ጠሁ እኮዳ ህቲን ዘካንቹተ ጃበአ። 8 ህከንተኔ ምናደቡ ምናደብ አሌን፥ ዎሙ ዎም አሌን ኬአኖ። ህትጉንተ አነነ አነነ መዕኔን ኡለ ሌንቄቁሁ ጎሩሁ እሀኖ። እኮዳ ህኩን ባል ሙዳ ዎነስየ። 9 መኑ አፍ ዳናካ ኣሰኖዕኔ። አሞ ጠጵት ምኔን ኦልታዕኔ። ህከኒ አዕኖኦት ገገዕኔ ቆረጵዬ። ኢ ሱዕምተኔ ነቃሸ እኬኖተ ገሻንነ ዎመ ብሬን ኡርቴነንተ። 10 እኮዳ ብርስት ምሽራች ላገት ምናደቢ ሆሪንከ አዋጀሙ ሀስሰኖ። 11 መኑ አፍ ዳናከበ ህንጨአኖዕኔ ጃተ ‹መ ይናም› እንዶ ‹መ ጠሃናም› ይቴን ክቼኤኖችዬ። እኮዳ ህተ ጃተ ኣሰንታዕኔ ላገተ ጠሃቅዬ። ዳፉንኩስ ጠሃቀኖ ጡማንቾ አያነ በጋን አዕኖኦታበአ። 12 ህተ ጃተ ህዞ ህዞስ፥ አኑ ቤቱስ ሼኑንተ ህግስ ኣታእ። አሞ ኦሱት አናከ አሌን ኬእ ሽሲሳእ። 13 ኢ ሱዕምተኔ ሆሩንኩ መኑ ግበኖዕኔ። ጠሁ እኮዳ ዘካንቹ ኢለንቀጤች እየቀኖ ፈአኖ። 14 ሽግገታ ቡሽመት ኡሩ ሀስሱምቡተንሴ መዕኔን ኡርቴኢ ጡዴነንተ። ህተ ጃተ ህካን አነበበኖ ዘህጩን። ህከንተኔ ይሁድ ባዶን ዮ መኑ ዱነ ሁንት ፉሸቅቱን። 15 ምን አሌን ዮ መንቹ ድሩንከ፤ እንዶ መሃ ኣቆተ ምንስ ኣጉንከ። 16 አሞ ሆጎባን ዮኢ ኦድሸስ ኣቆተ ዘኩ ፈንቀል መሩንከ። 17 ህተ ጃተ ሰላኒሃ ቀንስታ ሜንቲሃ ኣዬ። 18 ህኩ ሆሩንኩ መጦን እሁምቦጊ መገኑ ኡጭዬ። 19 ህተ ጃተ መገኑ ቆጨንቸ ቆጬሀኒች አፍ ከበሬ ኢለንቀጤች እሁምቡ ሀዉ እሀኖ። አሞ ህትጎኑ ሀዉ ብርተ ለቂ እሀኖበአ። 20 መገኑ ህተ በራከተ ገቦትሱምቦ እክየን መኑ ሆሩንኩ ፈአኖበአ እኬ። ጠሁ እኮዳ እስ ዶዕሬ መንተኔ በርስ ገቦትሰኖ። 21 ህተ ጃተ አዪ ‹ፈእሳንቹ ክርስቶሱ ኩዕኒን ከኔ ዮእ› እንዶ ‹ህኩጲን ከኤ ዮእ› ዬዕኔደ አመዕንቴኖችዬ። 22 ቆጰን ህራጋኑሁ ቆጰን ክርስቶሰቲ ኬኣእ። እሶኦንት ደንዴሾሰደ መገኑ ዶዕሬ መነሃ ሉስሶተ መላታ ማለሉታ አታእ። 23 እኮዳ ኩ ጠሁ እሀኖሀኒች ብርተ ሆረረንከ ኩሎንክዕኔተኔ ቆረጵዬ። 24 ህተን ጄቾ ሀዊች ዘኪን አሪቹት ቱንስታእ። አሞ አገንቹንኩ ጫክሰኖበአ። 25 ቤዜት ሰሜች ኡባእ። አሞ ሰሜ መቆንኩ ሌንቄቀኖ። 26 ህከኒች ዘኪን እሶኦት መንች ቤቱ አበ መቄኒ አብኒኒ ጎም ኣዚን ዋለንየን ጡዳእ። 27 ህከኒች ዘኪን እስ ሰሜ ሶቀማኑስ ሶክ ሰሜች ዎሮዲን ኡለ ቶቺች ቶቹ ኢለንቀጤች መገኑ ዶዕሬ መነ ጠጰአኖ። 28 ኦዴቹተ አጉደኖ ሀቅ አጉዲሸት ሮስሱንክዕኔ። ሀሙስ ቦንጠ ኤብ ሌቾ ጃተ ሀጉ ኢሌገ ደጌነንተ። 29 ህትጉንተ አዕኖኦት ህኩ ሆሩንኩ ጠሁ እሀንየን ጡዴንተ ጃተ መንች ቤቱ ዋሊ አብሽ ኦንጠኮገ ደጌነንተ። 30 ገርተ ያንክዕኔ፤ ከን ዶል መኑ ኩ ጠሁ እሁዕናች ብርስ ህገኖበአ። 31 ሰሞሁ ኡለቲ ህጋእ። ጠሁ እኮዳ ላገኤ ሆረን ህጋበአ። 32 ህከ በርሃ ህተ ጃታ አነ መገኒች ጠሊች በጋን አዪ ደጊ ደንደኖበአ። አሞ ሆረን መገን ሰሜ ሶቀማኑሁ መገን ቤቱሁ ደጋበአ። 33 አዕኖኦት ጄቹስ ሀከደ እካእንዶ ደጌኑምቦተኔ ቃርቴን ቆረጵዬ። 34 ህኩስን መቱ ዎቃ መረመኖ መንቹ አጉደኖ። እስን ምንስ አጉር መረመን አላኒሀንስ እስገ እክ ሁጀታገ አኒንከ አኒንከ ሁጅተ ኣሴእ። አሞ ዘበንቹስ ‹ቃርስት ቆረብ› ይ አዘጆ። 35 ህከንተኔ ምንስ አኑ ሀከ ጃተ ምንስ ዋለኖንዶ ደጌኑምቦተኔ ቃርቴን ቆረጵዬ። ዳፉንኩስ እስ ሀወሩተ እንዶ አንከሬ በቅተ እንዶ አንተቤኡ ዎደንየን እንዶ ገስመ ዋለኖንዶ ደጌነንተበአ። 36 ህከኒ ደንጎ ግሴናን ኢሉምቦዕኔገ ቆረጵዬ። 37 አን ክዕኔኤ ዬሚ አሞ ሆሪንከ ያም፤ ቆረጵዬ» ይ ሮስሼእ።
1 ሻሽገሃ ጦሮሹ እቴነን አብሴኖ አያነሃ አብሲ ለሙ በሩ ፈኤ እኬ። ቄስ አወንሳኑሁ ሴር ሮስሳኑሁ ዬሱሰ ማጥ አፍ ሽቶስተ እሶኦ መከኖ ዎቃ ሀሰዮ እኬ። 2 ጠሁ እኮዳ እሶኦንት «ከን አያን ጄቾን አንፉንከ። ዳፉንኩስ መን ሜሬሮን ብተት ኬኦኮእ» ይቶእ። 3 አበሉ አፌስ «ስሞኔ» ዬኖ መንች ምኔን ቢታን ከተማን ዬሱሱ ማዳን አፉዕሌ እኬ። ህተ ጃተ መትት ሜንትቹት «አልባስጥሮሰ» ዬኖ ክኒች መክሴመ ብልቃጣን «ናርዶሰ» + ዬኖ ሽቱት ዊንቴኢ አፍ ዋልቶእ። ሽቶስ ህረንት አብስ እትሰተ እኬ። እሴን ብልቃጥስ እፍቹ ቢጥ ሽቱስ ዬሱስ ቦቆን ቡርቶእ። 4 ህከኔን ዮ መኒች መ-መቱሰ አሙሬን «ት ሽቱት ጠለ በኣኢ ሚሃት? 5 ተ ሽቱተ ሰሴ ጥቤ ብሪች አበ ህሬን ግዘስ ቡጢ ኣሴመ እክ ጡማበንዶ?» ይተን ሜንትቹተ በጨቶሴ። 6 ጠሁ እኮዳ ዬሱሱ «እሴተ ሚ ሀውሴነዮንተሴ? አጉሬሴ! እሴ ኤሳ ደናሙ ጠሀ አስቴእ። 7 ቡጡ ሆረንተ ጃተ ክዕኔኤን ሄኣኢ እኮተኔ ሀሴንተ ጃተ ካዕልቴኖሰተ ደንድቴነንተ። ጠሁ እኮዳ አን ክዕኔኤን ከኔ ሆረንተ ጃተ ሄኣምበአ። 8 እሴ አስቶተ ደንድቶኢ አቴእ። አን ሞገሙዕናች ብርስት አሌንተኤ ሽቱተ ቡርቴኤ። 9 ገርተ ያንክዕኔ፤ ኡለ አሌን ምሽራች ላገት ሰበከንታባን ሆራባንን እሴ አስቶሩ እሴተ ቃግሲ ኩለመኖሴ» ዬሰ። 10 ህከኒች ዘኪን ቶነ ለሟንከ አወናኒች መቱ አስቆሮንቶ ይሁድ ዬሱሰ ህግሽ ኣሶተ ቄስ አወንሳንበ መሮ። 11 እሶኦንት ህካን መጮቶ ጃተ በጅቀንት እሲ ግዘ ኣስቶስተ ተሳ አቶስ። እስን ህተን ጄቾች አፍ ዬሱሰ ህግሽ ኣሶሰተ መክታ ጃተ ሀሰዮ እኬ። 12 ሻሽግ ሆልቹ ዱለመኖ ጦሮሹ እቴነን አብሴኖ አያን ዎነ በሬን አወናኑስ ዬሱስበ ዋልት «ሻሽገ እቱንተ ሀከበ መን ቅጠንስኖሄተ ሀሰን?» ይት ጠዕምቶእ። 13 እስን አወናኒችስ ለሙ «ከተመ መርቴን ዎእ ቦሱ እዬ መንቺን ደቀንቴነንተ። ህከ መንቹንከ አወንቴን 14 እስ ኣገኖ ምን መርቴን ምንስ አነ ‹ሮስሳንቹ ‹አወናኒንተኤን ሻሽገ እታም ኮህ ምኑ ሀከኔኔት?› ያዮ› ይዬ። 15 እስን አበ ሀራረ ፎቅ ምኔን ሀስሰኖዕኔሩ ሆሩንኩ ቅጠሜኢ ጡድሰኖዕኔ። ህከኔን ቅጠንስዬኔ» ዬሰ። 16 አወናኑስን ህከምቢች ፉልት ከተመ መርቶእ። እሶኦንከ ዬሱሱ ዬገንከ ሆሩሩንኩ እኮ። ህከኒ እሶኦት ሻሽግ ኦዝተ ህከኔ ቅጠንስቶእ። 17 እሩ ሀወሬ ጃተ ዬሱሱ ቶነ ለሟንከ አወናኒንተስን በርገም ዋሎ። 18 ህከኔን ሆሩንኩ ማዳን አፉዕልት እተንየን ዬሱሱ «ገርተ ያንክዕኔ፤ ክዕኔኤች መቱ ኤሳን ከኔ ቴሱ ኦዝተ እተኖ ኤስ ህግሽ ኣሰኖ» ዬሰ። 19 እሶኦንት ህተ ጃተ አብስ ክቼእ ኮዳን ኮዳን ዬሱሰ «አኔትንዶ?» ይተን ጠዕምቶእ። 20 ዬሱሱንኩ ፈንቀሽ «ህካን አሰኖ ቶነ ለሚችዕኔን መቶንስ። እስን ኤሳንን ሜጦ ማዳን አንገተ ኣግሰኗ። 21 መንች ቤቱዕኑ እስተኔ ጣፈሞገን ሬሁዕነ ፈአኖበአ። ጠሁ እኮዳ መንች ቤቱ ህግሽ ኣሰኖ መንቺ ኣዬ! ህኩ መንቹ ዎነን እለሙምቦ እክ ዎየኖስ እኬ» ዬእ። 22 እሶኦንት እተንየንን ዬሱሱ ጦሮሹ ኬእሽ መገኑ ገለጥ ቢጭ አወናኒሀንስ «ዬ፤ ኩን ማላዕኔ» ይ ኣሴሰ። 23 አሞ ኩባየ ኬእሽ መገኑ ገለጥ አወናኒሀንስ ኣሴእ። ሆሩንኩ ህከን ኩባይሀኒች አጎእ። 24 አሞ ዬሱሱ እሶኦ «ኩን ሆለመ መንተኔ ሃሮ ህድሪ ዱነመኗ ቄግየዕን። 25 ገርተ ያንክዕኔ፤ መገን ዎሞማን ሃሮ ዎይነ አጋም በሩ ኢለንቀጤች ከን ዎይን ላሎች ጡንሸሞ ለንኪ አጋምበአ» ዬሰ። 26 ህከኒች ዘኪን መዝሙረ ዘመርት ዘይት ሀቁ ሌአኖ ዱነ ፉልቶእ። 27 ዬሱሱ አወናኒሀንስ « ‹ዜማንቹስ ሻም። ሆለንትስ ብንታእ› የመም ጣፈሞተኔ ሆሩንኩዕኔ ኤስ አጉርቴን ሁንቴነንተ። 28 ጠሁ እኮዳ ሬሆች ኬኦሚች ዘኪን ገሊለ ክዕኔኤች ብርስ ህጋም» ዬሰ። 29 ህተ ጃተ ጴጥሮስ ፈንቀሽ «ዎሉ መኑ ሆሩንኩ ካዶኬዳ አን ሆረን ካዳንኬበአ» ዬእ። 30 ዬሱሱንኩ ጴጥሮሴ ፈንቀሽ «ገርተ ያንኬ፤ ከበሬ አንከር አንተቤቹ ለሜ ዎደኖሀኒች ብርስት ሰስተ ኮደተ ካዳንቴኤ» ዬስ። 31 ጠሁ እኮዳ ጴጥሮስ «ኬሳን በርገም ሬሃሚ እኮዳ ካዳንኬበአ» ያን ቃርስ ጠሃቄእ። አሞ ሆሩንኩ ፈኦ አወናኑሁ ህትጉንተ ይቶእ። 32 ህከኒች ዘኪን «ጌቴሴማኔ» ዬኖ መዕንተ ኦሮቶእ። ህከኔን ዬሱሱ አወናኑስ «አን መገኑ ኡጨንቀጤች ከኔ አፉዕልዬ» ዬሰ። 33 እስን ጴጥሮሴ፥ ያቆቤኒ ዮሃንሴኒ አወንስ ሺነ ለቆ። ህከኔን እስ አብሽ ክቼኡሃ ኡዕነሙሃ አፎ። 34 እሶኦንከ «ፎልቹኤ ሬታኢ ኢለንቀጤች አብስ ክቼኤእ። አዕኖኦት ቃርቴን ቆረቤነን ከኔ ኤጌርዬኤ» ዬሰ። 35 እሶኦችን ቀሁንከ ፎርጎይ ኡለ አሌን ጎምብሰም ኡብ ደንዴሰኖ እኮደ ህት ሀው ጃት እሲች ህጋገ መገኑ ኡጬእ። 36 እስን «ኢ አነ! ሆሩሩንኩ ደንዴሰኖሄ። ከ ሀወኤን ኤሳች ቄርስ። ጠሁ እኮዳ አን ዬምገ እሁዕነ አት ይቶንትገ እሁን» ይ መገኑ ኡጬእ። 37 ህከኒች ዘኪን ሰሷንከ አወናንበ ዋለኖደ እሶኦት ግሴ እኬ። ህከኒ ጴጥሮሴ «ስሞኔ! ግሴንትንዶ? ሆረን ሜጡ ሳተሃ በቅት ቆረቦተ ደንድታንትበእንዶ?» ዬስ። 38 አሞ «ኬነንቻን ኣጌኑምቦገ ኡጭቴነን ቃርቴን ቆረቤ። ዎዘኑ ቅጠሜሃ፤ ጠሁ እኮዳ ማሉ ሆንጋንቿ» ዬእ። 39 ለንኪሃ መር ዎነገንከ ያን ኡጬእ። 40 ህከኒች ዘኪን አወናንስበ ፈንቀል ዋለኖደ እልሰ ግሰነት ኬዕምት አፎቢ ግሰዮ እኬ። ጠዕመኖሰረንከ ጠበት ፈንቀሹ ደንድትምበአ እኬ። 41 ሰኪሃ እሶኦበ ፈንቀል ዋል «ቴሱ ግሴንተገኒ ፎሎጭቴንተገኒ ዮንተንዶ? አቼ እሀኖ፤ ጄቹንት ኢልቴእ። መንች ቤቱ ባጢላመ አንጋን ህግሰም ኣሰመኖ። 42 ቴሱ ጦቅዬ፤ ኦሮኖ። ኤስ ህግሽ ኣሰኖ ህንጭዬእ» ዬእ። 43 ዬሱሱ ህከኔ ህካን ጠሃቀንየንን ቶነ ለሟንከ አወናኒችስ መቱ «ይሁደ» ዬኖ ዋሎ። እሲንን በርገንት ደመታ ብሰታ አፌ ሆለሙ መኑ ዮ እኬ። እሶኦንት ቄስ አወንሳኒች፥ ሴር ሮስሳኒቺ ባድ ኑባቢቺ ሶሀንቴሃረ እኬ። 44 ህግሽ ኣሰኖስ ይሁድን እሶኦ «አዕኖኦት አን ሱንቃሚ እሱ ቃርስቴን አፌን ኦሮሽዬ» ያን መላተ ኩሌሰ እኬ። 45 ህተ ጃተ ይሁድ ሰርብን ዋል ዬሱስበ ህንጭይ «ሮስሳንቾ!» ይ ሱንቄእ። 46 ህከኒች ዘኪን ህኩ መኑ ዬሱሰ አፎእ። 47 ሺናንተስ ኡርቶሪች መቱ ብሰ ኮብ ኣዚች ፉሽ አበ ቄስች ሶቀማንች መጨተ ሙሮ። 48 ህተ ጃተ ዬሱሱ «ብሰታ ደመታ አፌን ዋልቴንታ ኤስ ሽፍጥችገ አፊሃትንዶ? 49 ሆረንከ በር መገን ምን ኣዜን ሮስሰን ክዕኔኤን በርገም ሆሰንየን አፌንምበኤ እኬ። ጠሁ እኮዳ ኩን እኮ መጣፋን የመሞ ዊሙንታት» ዬሰ። 50 አወናኑስ ሆሩንኩ እሱ አጉርት ሁንቶእ። 51 ጠሁ እኮዳ ነጠለ ኦደቄ መቱ ዎደልቹ አወነዮስ እኬ። እሱንከ ህኩ መኑ አፎስ። 52 እኮዳ እስ ነጠለስ እሶኦ አንጋን አጉር ከልን ሁኖ። 53 አሞ ዬሱሰ አበ ቄስችበ ኦሮሶእ። ህከኔን ቄስ አወንሳኑ፥ ባድ ኑባቡሁ ሴር ሮስሳኑሁ ሆሩንኩ ጠጵቴ እኬ። 54 ጴጥሮስን ዬሱሰ ቄስ አወንሳንች ግቤ ኣዝ ኢለንቀጤች ቄዕረ አወነዮ እኬ። ህከኔን እስ ዘበኒን በርገም ጊረተ ኢብጨዮ እኬ። 55 ቄስ አወንሳኑሁ ያእ ዳናከቲ ዬሱሰ ሽሲሶተ ነቃሸ ሀሰዮ እኬ። ጠሁ እኮዳ ሜጡራ ደግምበአ። 56 ዳፉንኩስ ሆለሙ ቆጰን ነቃሸት ሆለመረ አሌንተስ ነቀሰዮ እኬ። እኮዳ ላገሰ ሜጡ እክምበአ። 57 - 58 መ-መቱ መኑንኩ ጦቅት « ‹አን ከ መን አንጋን ምነሞ መገን ምን ዝር ዎሉ መን አንጋን ምነሙምቡ ሰሶ በሬ ኣዜን ምናም› ያንየን መጮኔም» ይተን ቆጰነንከ ዬሱስ አሌን ነቀሶእ። 59 ህትጉተ ይቶዳ ነቃሹሰ ዬ ላገት ሜጡ እክምበአ። 60 አቡ ቄስቹንኩ ሜሬሮንተሰ ኡር ዬሱሰ «ፈንቀሽታንትሩ ዮሄበንዶ? ኩ መኑ ኪ አሌን ነቀሰኖሩ መሃን?» ይ ጠዕሜእ። 61 ጠሁ እኮዳ ዬሱሱ ሜጡራ ፈንቀሹዕነ ሰዕምይ አጉሮ። አቡ ቄስቹንኩ ዬሱሲ ፈንቀሽ «ማሰአሞ መገን ቤቱ ፈእሳንቹ ክርስቶሱ አቴትንዶ?» ይ ጠዕሜእ። 62 ዬሱሱንኩ «አኔት። መንች ቤቱ ሆረንከ ደንደኖ መገን መኬን አፉዕሌሃኒ ሰሜ ጎሚን ዋለንየኒ ጡዴነንተ» ዬእ። 63 አቡ ቄስቹንኩ ነደጂን ኦድሸስ ዘር «ዎሉ ነቃሹ ሚ ሀስሰኖኔ? 64 አዕኖኦት እስ ቦሮዕረንች ላገተ መገን አሌን ጠሃቀንየን መጮቴንተ። ህከኒ ክዕኔኤ ኩ ጠሁ መ አጉደዮዕኔ?» ዬእ። ህተ ጃተ እሶኦት ሆሩንኩ ሜጤ ላጋን «ሬሁ ሀስሰኖስ» ይት ፍርድቶእ። 65 መ-መቱ መኑንኩ አንጀ አሌንተስ ቱ ዩ አፎእ። እልንተስ ኦድሻን ቤስት ኡሱርት ቀምቦን ዎቀርተን «ሀኖ ደግ፤ አዬት ዎቀሮሄ?» ይተዮስ እኬ። አሞ ዘበኑንኩ ኦልተን ኦሮሶስ። 66 ጴጥሮስን ቄስ አወንሳንች ምኒች ዎሮዲን ግቤ ኣዜን ዮሀኔን ቄስ አወንሳንች ሁጀታኒች መትት ዋልቶእ። 67 እሴን ጴጥሮስ ጊረተ ኢብጨዮባን ቀስ አፍ ጡድ እሱ «አት ናዝሬት ዬሱሲን በርገንት ዮንትየበንዶ?» ይቶስ። 68 ጠሁ እኮዳ ጴጥሮስ «አን ደጋምበአ። አት ይታንት ጠሁንኩ ኣግምበኤ» ይ ካጆ። ህካን ይ ኡሩተ ፉሎገን አንተቤቹ ዎጆ። 69 ህት ሁጀታንቹንት ጴጥሮሴ ጡድ ህከኔ ኡሬ መኒ «ኩን እሶኦች መቷንስ» ይቶእ። 70 ጠሁ እኮዳ እስ ቴሱ ካጆ። አሞ ቀሁንከ ቀጠ ኤጌርት ህከኔ ኡርቶ መኑ «አት ገሊል መንቹ እኮንትቢ ገርንተ አት እሶኦች መቷንስ» ይቶእ። 71 ጠሁ እኮዳ እስ «ከ አዕኖኦት ይቴነንተ መንቹ ደጋምበአ» ያን ጤሌዕሉ አፎ። 72 ህተ ጃንተ አንተቤቹ ለንኪሃ ዎጆ። ጴጥሮስን «አንተቤቹ ለሜ ዎዱዕናች አት ኤስ ሰስተ ኮደተ ካዳንት» ዬ ዬሱስ ጠሀ ሰውይ ሽክይ ኦኦ።
1 እሩ ሶጆገን ቄስ አወንሳኑ፥ ባድ ኑባቡ፥ ሴር ሮስሳኑሁ ያእ ዳናከቲ ሆሩንኩ ደቀንት ኤረንቶእ። ህከኒች ዘኪን ዬሱሰ ኡሱርት ኦሮስ ገሻንቾ ጵላጦሴ ህግስ ኣስቶእ። 2 ጵላጦስን ዬሱሰ «አት አይሁዴየ ዎመንዶ?» ይ ጠዕሜእ። ዬሱሱንኩ ፈንቀሽ «አት ይቶንትየገንከ» ዬእ። 3 አሞ ቄስ አወንሳኑ ዬሱሰ ሆለመ ጠሂን ኦደዮስ እኬ። 4 ህከንተኔ ጵላጦስ ዬሱሰ «ሜኦ ጠሂን ኦዴነዮመሄንዶ ከ ጡድ፤ ከን መኒ ሜጡራ ፈንቀሽታንትበእንዶ?» ይ ቴሱ ጠዕሜእ። 5 ጠሁ እኮዳ ጵላጦስ አብሽ ማለለኖ ቀጠ ዬሱሱ ሜጡራ ፈንቀሹዕነ ሰዕምይ አጉሮ። 6 ጵላጦስ ዎጋን ዎጋን ሻሽግ አያን በር ሂረሙንተ መኑ ሀሾ ኡሱረሞ መኒች መቱ መንቹ ገፈረኖ እኬ። 7 ህተ ጃተ ሂልማን መነ ሽት ኡሱረንቶ መን ሜሬሮን «ባርባኔ» ዬኖ መንቹ ዮ እኬ። 8 መኑንኩ ጵላጦሴበ ዋልት ሮስሾ ሮሸገ አሱንተሰ ጠዕምቶእ። 9 እስን «አይሁድ ዎመ ገፈሩንተዕኔ ሀሴነንንዶ?» ይ ጠዕሜሰ። 10 ህካን ዬኢ ቄስ አወንሳኑ ዬሱሰ ህግስ እሲ ኣስቶኢ ቂንሻን እኮገ ደጎተኔሃት እኬ። 11 ጠሁ እኮዳ ቄስ አወንሳኑ «ባርባን ሂረሙኔ በጋን ዬሱሱ ሂረሙንከ» ይት መኑ ጵላጦሴ ጠዕምታገ መነ ኤረንስቶእ። 12 ጵላጦስን ቴሱ ፈንቀሽ «ህከደ ከ አዕኖኦት ‹አይሁድ ዎመ› ይቴነንታ መ አሱ?» ይ ጠዕሜእ። 13 እሶኦንት «ሰቀል!» ይተን ላገሰ ጦቀት ጨንጭቶእ። 14 ጵላጦስን «ሚሃት? እስ አሴ ሂሉ ጠሁ መሃን?» ዬሰ። ጠሁ እኮዳ እሶኦት «ሰቀል!» ይተን ዎናች አብስ ጨንጭቶእ። 15 ጵላጦስን መነ በጅቀንሶተ ይ ባርባኔ ሂር ገፈሮሰ። ህከኒች ዘኪን ዬሱሰ ኦልሲሽ ሰቀልቱንተ ህግሽ ኣሴእ። 16 ቤጠቦንኩ ዬሱሰ ገሻንች ግቤ ኣዜን ዮ «ፍረቶሮመ» ዬኖ መዕንተ ኦሮሶስ። አሞ ዎሉ ቤጠባ ሆረንከ ገእቶእ። 17 ቢሸተ ኦድሸተ ዬሱሲ ኦዲስ ኡት ዘዉደ መክስ ቦቆንተስ ዎርቶእ። 18 ህተቶሀኒች ዘኪን «አይሁድ ዎመ አንገተ¡» ይተን ጡምሰዮስ እኬ። 19 እሶኦንት ሾምቦቂን ቦቁስ ዎቀርተን አንጀ አሌንተስ ቱ ይተዮ እኬ። አሞ እሶኦንት ዎቀቆተ ብሬንተስ ጉሉጵት ሰገደዮስ እኬ። 20 እሶኦንት እሱ ዎቀቆሀኒች ዘኪን ህተ ቢሸተ ኦድሸተ ፉሽት ገግስ ኦድሸንተ ኦዲስ ሰቀልቶስተ ኦሮሶእ። 21 መርተንየንን አለክሰንዴሬነ ሩፎሴ አኑ ቃሬን ባድ «ስሞኔ» ዬኖ መንቹ ገጠሪች ከተመ ኣገንየን ደግ ዬሱስ መስቀለ እዩንተ ግድሶስ። 22 እሶኦንት ዬሱሰ «ጎልጎተ» የመንት ገአንታ መዕንተ ኦሮሶስ። «ጎልጎተ» ዩንኩ «ቦቆ ቆሙ» ዩሀ። 23 እሶኦት ዬሱሲ «ከርቤተ» ዬኖ ዘቢን ኤሬረሜ ዎይን ዳጠ አጉንተ ኣስቶስ። ጠሁ እኮዳ እስ አግምበአ። 24 ህከኒች ዘኪን እሱ ሰቀልቶእ። አሞ ሀኩስ አዬ ኢለኖንዶ ደጎተ ኦድሸስ ሳመ ኡጅት ቤቀንቶእ። 25 እሶኦንት ዬሱሰ ሰቀልቶ ጃት ገስሜ ሰሶ ሳተ እኬ። 26 አሞ በእሱስ ኩለኖ «አይሁድ ዎመ» ያኖሩ ጣፈሜ እኬ። 27 እሶኦንት ዬሱሲን በርግት ለሙ ፈንግቹ መቱ መኬን፥ መቱ ጉራን ሰቀልቶእ። 28 ህትጎንን መጣፋን «ሂለ መኒን ዎልሰሞ» የመንት ጣፈንቶ ላገት ዊንቶእ። 29 እስ ሺኒን ህገዮ መኑንኩ እሱ ገድ ቦቁሰ ሌንቄቅሰን «ጡጄስ! ኩ መገን ምን ዝርት ሰሶ በሬን ምንታንቲ 30 ሀኖ ቴሱ መስቀሊች ድርት ገገክ ፈእስ!» ይተዮ እኬ። 31 ህትጉንተ ቄስ አወንሳኑሁ፥ ሴር ሮስሳኑሁ መቱ-መቲን «እስ ዎሉ መነ ፈእሼእ። እኮዳ ገገስ ፈእሶተ ደንድምበአ። 32 እስ ፈእሳንቹ ክርስቶሰ እስራኤል ዎመ እኬደ ሀኖ ቴሱ ከን መስቀሊች ድሩን። ነኦንት ጡንድ አመዕንናም» ይተን ዎቀቀዮ እኬ። አሞ እሲን ሰቀለንቶሩ ህትጉንተ ይተን ቦሮርተዮስ እኬ። 33 ህከ በር ሌሆ ሳቲች ሆንሱ ሳተ ኢለንቀጤች ኡለ አሌን ሆራባንን ቱንሱተ እኮ። 34 ሆንሱ ሳተ እኮ ጃተ ዬሱሱ «ኤሎሄ! ኤሎሄ! ለማ ሰበቅታኒ» ይ አበ ላጋን ያሮ። ህኩስን «ኢ መገኖ! ኢ መገኖ! ሚ አጉርቴኤ» ዩሀ። 35 ህከኔ ኡርት ዮ መኒች መ-መቱ መጮት «ኤልያሴ ገአዮእ» ይቶእ። 36 እሶኦችን መቱ ደጉደን መር ሺሸ ዎይነ ሀላሙ አጉደኖራን ጬፍ ሾምቦቅች ሉዳን ዎር ዬሱሲ ኣስ «ሀኖ ኤጌሬ፤ ኤልያስ ዋል ድሪሰኖስገ ጡንዳም» ዬእ። 37 ጠሁ እኮዳ ዬሱሱ አበ ላጋን ያር ሬሄእ። 38 ህተ ጃተ መገን ምን መጋረጁ አሊች ዎሩተ ኢለንቀጤች ለሙበ እክ ዘረሞ። 39 ዬሱሱ ሰቀለሞ መስቀል ብሬን ኡሬ መቱ ጥቤ መን አዘዛንቹ ዬሱሱ እክ ሬሄገ ጡጅ «ገርንተ ኩን መገንየ ቤቱ እኬ» ዬእ። 40 ቄዕረ ኡርት ጡደዮ መ-መቱ ሜንቱ ህከኔ ዮ እኬ። እሶኦ ሜሬሮን መግደል ከተም ማራም፥ ማዕነ ያቆቤነ ዮስ አመት ማራሚ ሰሎሚ ዮ እኬ። 41 እሶኦንት ዬሱሱ ገሊለ ዮ ጃተ አወንተዮስየራ ካዕልተዮስየራ እኬ። ህትጉንተ ዬሱሲን በርገንት ዬሩሳሌመ ዋልቴ ሆለሙ ሜንቱ ዮ እኬ። 42 በሩስ ሰንበቲ ቅጠሜኖ በር እኮተኔ ሀወሮ ቡደ 43 ያእ ዳናካች መቱ አብሽ ደገሜ አርማት ከተም ዮሴፍ መገን ዎሞመተ ተሴን ቆረጰዮኢ ጵላጦሴበ መር ዋጁዕናች ዬሱስ ሬሸ ኣሱንተስ ጠዕሜእ። 44 ጠሁ እኮዳ ጵላጦስ «ሀትተ ሰርብ ሬሄእ?» ይ ማለል ጥቤ መን አወንሳንቹ ገእ «ገርንተ ሬሄሀኒች ደለሼእንዶ?» ይ ጠዕሜእ። 45 እስን ዬሱሱ ሬሄገ ጥቤ መን አዘዛንቺች መጮጬሀኒች ዘኪን ሬሸስ ዮሴፍ ኦሮጨኖገ አሴእ። 46 ዮሴፍን ሃሮተ ከፈን ኦድሸተ ህር ዬሱስ ሬሸ መስቀል አሊች ድሪሽ ፉት ኦድሻን ከፈኖ። ህከኒች ዘኪን አበ ክኒች ቦንቆቅገ አሴን ጨበሬን መክሴመ ሞጎን ዎሮ። አሞ አበ ክኑ ኦንኮሎዕልሽ ሞግስ ጎጨ ጡፎ። 47 መግደል ከተም ማራሚ ዮስ አመት ማራሚ ዬሱስ ሬሸ ሀከኔ አፉሼመንዶ ጡደዮ እኬ።
1 ሰንበት በሩ ህጎች ዘኪን መግደል ከተም ማራም፥ ያቆቤ አመት ማራሚ ሰሎሚ ዬሱስ ሬሻን ሽቱተ ቡርቶተ ህርቶእ። 2 አበ በሬ ገስመ በቅተ አሪቹት ፉልተንየን ሞግበ መርቶእ። 3 እስ-እሶኦንት «አይ ሞግ ጎጪች ክኑ ኦንኮሎዕልሽ ፈነኖኔ?» የቀንተዮ እኬ። 4 ህካን ይቶ ዳፉ ክኑስ አብሽ መቃሙ እኮተኔሃት እኬ። እሶኦንት ህትተ ይተንን ሞግበ ዳጵት ጡዳደ ክኑስ ሞግ ጎጪች መቱ ዉዱ ለቅ ኦንኮሎዕሌሃን ጡዶእ። 5 አሞ ሞግ ኣዝ ኣጎ ጃተ ዎጁተ ኦድሸተ ኦደቄ ዎደልቹ መኬ ዉዲን አፉዕሌኢ ጡድ ህልቅ ማለልቶእ። 6 ጠሁ እኮዳ እስ እሶኦ «ህልቄኖቼ። አዕኖኦት ሀሴነዮንታ ሰቀለሞ ናዝሬት ዬሱሰ እኮገ አን ደጋም። እስ ሬሆች ኬኤእ፤ ከኔ ዮበአ። ከረጌለ፤ እሱ አፉሼመ መዕንንተ ጡጅዬ። 7 ቴሱ መርቴን አወናኒሀንሲ ጴጥሮሴሃ ‹ከኒች ብሬ እስ ዬዕኔገን ክዕኔኤች ብርስ ገሊለ መረኖ። ህከኔን ጡዴነንተስ› ይቴን ኩልዬ» ዬሰ። 8 ህኩ ሜንቱንኩ ዋጅት ሁጠን ሞግቤቺች ፉልት ሁንቶእ። እሶኦንት አብስ ዋጅቶተኔ ሜጡ ጠሀሃ አዬኒ ጠሃትምበአ እኬ። 9 ዬሱሱ አበ በር ገስመ በቅተ ሬሆች ኬኦሀኒች ዘኪን ዎና ለመለ ሀቡሰ ፉሼሴ መግደል ከተም ማራሜን ብርስ ደቀሞ። 10 - 11 እሴን ኤጅ እሲን በርገንት ዮሪበ መርት እሶኦት ክቼአኒ ኦአኒ ዮሀኔን «ዬሱሱ ሬሆች ኬኤእ፤ እስን ፎሊን ዮእ። አንን እሌንተኤ ጡጄም» ይት ኩልቶሰ። ጠሁ እኮዳ እሶኦት ጠሀስ አመዕንትምበአ። 12 ህከኒች ዘኪን ዬሱሱ ከተሚች ገጠረ መርተዮ ለሞ አወናኒ ዎሎ ሀገሪን ጡደሞ። 13 እሶኦንት ፈንቀልት መርት ፈኦ አወናኒ ኩልቶእ። ጠሁ እኮዳ እሶኦት አመዕንትምበአ። 14 ህከኒች ዘኪን ቶነ መቱንኩ አወናኑ እቸተ እተንየን ዬሱሱ ጡደሞሰ። እስን «ዬሱሱ ሬሆች ኬእ ፎሊን ዮእ። ነኦንት ጡንዴም» ይቶሪ ጠሀ ዎዘኑሰ ዱጅየን አመዕኑ ሆጎተኔ ዎቀሾሰ። 15 ዬሱሱንኩ «ሆረንከ ባዱ መርዬ። መኒ ሆሪንከ ምሽራች ላገተ አዋጅዬ። 16 አመዕኔኢሁ ጠመቀሞሁ ፈአኖ። እኮዳ አመዕኑምቦሀን አሌን ፍርደመኖስ። 17 አመዕንቶሪ ሆሪንከ ተ መላተ አታ መቆ ሄአኖሰ። ኢ ሱዕሚን ሀቡሰ ፉሽታእ። አሞ ኤጅ ደጉምቦ ሃሮ አፌን ጠሃታእ። 18 ዎረ አፎደ እንዶ ሻኖ ዘቡ አጎዳ ጌነኖሰበአ። እሶኦንት ሞሳኑ አንጋንተሰ አፎደ ሞሳኑ ሞሲችሰ ፈይታእ» ዬእ። 19 ህካን ቀርቹ ዬሱሱ ጠሃቅ ጦፎሀኒች ዘኪን መገኑ ሰማ ኦሮሽየንስ መገን መኬ ዉዲን አፉዕሌእ። 20 አወናኑንኩስ ሆረበንከ መርተን ምሽራች ላገተ አዋጅቶእ። ቀርቹንኩ እሶኦን ሜጡ ሁጀተዮ እኬ። መላተ አስታ መቆ ኣሲን ሮስሳ ጠሁ ገርተ እኮገ ሁጄን ጡድሰዮ እኬ።
1 አብስ አብቴንት ቴፍሎሴ! ኒ ሜሬሮን እኮ ጠህተኔ በትናሹ መኑ ማኡስ ከኒች ብሬን ጣፌእ። 2 ህካንን ኔሳ ኢልሶሩ ዎናችን አፍ እሌንተሰ ጡዶነ ላጋሀንስ አዋጃኑ እኮሃ መነ። 3 - 4 ህትጉንተ አን አሞ አት ሮሶንት ላገት ገርተ እኮገ ደጉንተ ይኬእ ሆረረንከ ዎናችን አፍ ቃርስ ቆርሜምሀኒች ዘኪን ጠሀስ መደዲን ኬሳ ጣፉ ደናሙ እክ ጡደሞኤ። 5 ይሁድ ባድ ዎመ ሄሮድሴ ዶላን «ኣብየ» ዬኖ መንች ዉድቢ «ዘካራሴ» ዬኖ ቄስቹ ዮ እኬ። እሲንከ ኣሮኔ ዜርቢት «ኤልሳቤጤ» ዬኖ ምኔመት ዮስ እኬ። 6 አሞ ለሙንኩሰ ቀርች አዘዙታ ሴረሃ ሆረንከ ቡሽመት ዮበኢ ቆረበን መገን ብሬን ጡማኗ ኬኑ እኬ። 7 ኤልሳቤጥን አልጬነተ እኮተኔ ኦሱት ዮሰበእየረ እኬ። አሞ ለሙንኩሰ ኑባጵቴሃረ እኬ። 8 ዘካራሴ ዉድ ሁጄ ተሩ ኢሌሃን መገን ብሬን ቄሶማን ሁጀተዮሀኔን 9 ቄሶመ ዎግጊንን መገን ምን ኣግ ህጣነ ውሊሹንተ ሳሙ ኢሌስ። 10 ህከ ህጣነ ውሊሸኖ ጃንተ መኑ ሆሩንኩ ሀደ ኡርኬእ መገኑ ኡጨዮ እኬ። 11 አሞ ህከኔን መገን ሰሜ ሶቀማንቹ ህጣነ ውሊሼኖ ጠረጴስ መኬ ዉዲን ኡርኬእ ዘካራሴ ጡደሞ። 12 ዘካራስን መገን ሰሜ ሶቀማንቹ ጡጆ ጃተ ህልቆ፤ አብሽን ዋጄእ። 13 ጠሁ እኮዳ መገን ሰሜ ሶቀማንቹ «ዘካራሴ! ኡሰቱክ መጮጨንቶተኔ ዋጅቶት። ምንክ አመት ኤልሳቤጥን ጎንቹ ቤቱ እልታኬ፤ ሱዕመስን ‹ዮሃንሴ› ይት ገእታንት። 14 ኬሳንከ አበት በጅጉት እካሄ። ጪሉስ እለሞሀኒንከ ሆለሙ መኑ በጅቀመኖ። 15 ዳፉንኩስ እስ መገን ብሬን አበ እሀኖ። አሞ ዎይን ዳጠሃ ድምብሰኖ አገሃ ሆረን አገኖበአ። ህትጉንተ አመስ ጎደባን ሄኦገንከ ጡማንቾ አያኒን ዊሜኢ እሀኖ። 16 እስን እስራኤል ኦሶች በትናሸስ ቀርቾ መገንሰበ ፈንቀሸኖ። 17 አሞ ቅጠንቶ መነ ቀርቺ ቅጠንሶተ፥ አናከ ዎዘነ ኦሶሀኔን ፈንቀሾታ አዘዘንቱምቡረ ጡማን ቆርማን ፈንቀሾታ ኤልያሴ አያኒኒ መቄኒ ቀርች ብሬን መረመኖ» ዬስ። 18 ዘካራስን ህከ መገን ሰሜ ሶቀማንቹ «አን ኑባቿ፤ ምንኤ አመንት ኑባቹተ፤ ኩ ጠሁ ገርተ እኮገ ሀተእ ደጋም?» ይ ጠዕሜእ። 19 መገን ሰሜ ሶቀማንቹንኩ ፈንቀሽ «አን መገን ብሬን ኡራም ገቡሬሌት። ከ ምሽራቸንከ ኩሎሄተ ሶሀም ዋሌም እኬ። 20 እኮዳ ጄቾንተስ እካ ላገኤ አመዕንቱምቡተኔ ኩ ጠሁ እሀኖ በሩ ኢለንቀጤች ዱዳንት፤ ጠሃቁንከ ደንድታንትበአ» ዬስ። 21 ህተ ጃንተ መኑ ዘካራሴ ቆረበዮ እኬ። እስን መገን ምኔን ደሾተኔ ማለልቶእ። 22 ዘካራስን መገን ምኒች ፉሎ ጃተ መኒን ጠሃቆተ ደንድምበአ። ህከኒ መገን ምኔን መቱሩ ጡደሞስገ ደጎእ። ዳፉንኩስ አንጋን ቀቀሰን ኩለዮሰ እኬ። እስን ዱደ እክ ኤጌሮ። 23 ሁጀተኖ ጃንት ጎፍየን ምንስ ኦሮቄእ። 24 - 25 ህተን በራካችን ዘኪን ምኔመስ ኤልሳቤጥ ሰላዕንቶእ። እሴን «ገደሙኤ መን ሜሬሪች ከሞተ መገኑ አጉሪንተስ ኤስ ጡጅኬእ ከ ደናሙ ጠሀ አሴኤ» ይት ኦንቱ አገነ መኒች ማጠንቶእ። 26 ኤልሳቤጥ ሰላዕንቶ ሌህቅ አገናን መገን ሰሜ ሶቀማንቹ ገቡሬል ገሊል ባዶን ዮ «ናዝሬተ» ዬኖ ከተማን ሄኣ መቴ ባጃሜበ መገንቢች ሶሀሞ። 27 እሴን ዳዊቴ ዜሪች እኬ «ዮሴፈ» ዬኖ መንቺ ጠዕመንቴታ እኬ። ባጃሜስ ሱዕሙ «ማራሜ» ዬኖተ እኬ። 28 ህኩ መገን ሰሜ ሶቀማንቹንኩ እሴበ ዋልኬእ «አብስ ኢተንቴንቲት፤ ጡሙ ኬሳ እሁን። መገኑ ኬሳን በርገም ዮእ። አትን ሜንቲች ሆሪችን ማሰአንቴንትተ» ዬሴ። 29 ጠሁ እኮዳ እሴ ህከ መገን ሰሜ ሶቀማንቹ ጡዶ ጃተ ጠሃቄ ጠሂች ኬኦ አብስ ህልቅኬእ «ኩን ሀትጎና ጡምሱለ?» ይት ሰውቶእ። 30 ህኩ መገን ሰሜ ሶቀማንቹንኩ እሴተ «ማራሜ! መገኑ አብሽ ኢቴኬተኔ ዋጅቶት። 31 ህኩዕኒን፥ አት ሰላዕንታንት፤ ጎንቹ ቤቱንከ እልታንት። ሱዕመስን ‹ዬሱሰ› ይት ገእታንት። 32 እስን አበ እሀኖ፤ ሆሪችን አበ መገን ቤቱንከ የመመኖ። አሞ ቀርቹ መገኑ አንስ ዳዊቴ ዎሞመ በርጩመ ኣሰኖስ። 33 ያቆቤ ኦሶ አሌንን ዶሊ ሆሪንከ ዎሞዕመኖ። ዎሞማሀንስ ዘካንቹ ዮበአ» ዬሴ። 34 ማራምን ህከ መገን ሰሜ ሶቀማንቹ «ባጃምተ እኮምተኔ ኩ ጠሁ ሀትጉተ እሂ ደንደኖ» ይቶስ። 35 መገን ሰሜ ሶቀማንቹ ፈንቀሽ «ጡማንቹ አያኑ አሌንተክ ዋለኖ፤ ሆሪችን አበ መገን መቆንኩ አሌንተክ እሀኖ። ህከኒ ኬሳች እለመኖ ጡማንቹ ጪሉ ‹መገን ቤቱ› የመም ገአመኖ። 36 አሞ ህኩዕኒን፥ እለንቹክ ኤልሳቤጥን ኑባንተሴ ጎንቹ ቤቱ ሰላዕንቴእ። እሴንከ ‹አልጬነተ› የመንተን ሄእ ሰላዕንቶሀኒች ኩን ሌህቄየ አገነ። 37 ዳፉንኩስ መገኑ ቄለኖሩ ሜጡሩ ዮበአ» ዬሴ። 38 ማራምን «ህኩዕኒን፥ አን መገንተ አግሹ። ኤሳንከ አት ይቶንትገ እሁዕኔ» ይቶእ። መገን ሰሜ ሶቀማንቹንኩ እሴች አነነ እክ ኦሮቄእ። 39 ህተን በራካንን ማራም ዱናሞ ባዶን ዮ ይሁድ ከተመ ሰርብት ኬእ መርቶእ። 40 እሴን ዘካራሴ ምን ኣግ ኤልሳቤጤ ጡምሶእ። 41 ኤልሳቤጥ ማራም ጡምሶ ላገተ መጮቶ ጃተ ጎደባንተሴ ዮ ጪሉ አለጴእ። አሞ ኤልሳቤጥ ጡማንቾ አያኒን ዊንት 42 ላገሴን ጦቀትኬእ «አት ሜንቲች ሆሪችን ማሰአንቴንትተ። ጎደብክ ላሉቲ ማሰአንቴታ። 43 አሞ ኢ ቀርች አመት ኢበ ዋሉ ኤሳ ሀትጎና አባ አብን? 44 ዳፉንኩስ ህኩዕኒን፥ ጡምሶንት ላገት መጨኤበ ዋልቶ ጃተ ጎደባንተኤ ዮ ጪሉ በጅጎን አለጴእ። 45 አሞ ቀርቹ ኩሎሴ ጠሁ ዊመኖ እኮገ አመዕንቶኢት እሴ ማሰአንቴታ» ይቶእ። 46 ማራም «ፎልቹኤ መገኑ አብሳእ። 47 አሞ ዎዘኑኤን ፈእሳንቿዕኔ መገኖን በጅቀመኖ። 48 ዳፉንኩስ መገኑ አግሾስ ጬመንቸ ጡጄእ። አሞ ከበሬች አፍ ሆራንከ ዶል መኑ ‹ማሰአንቴታ› ያኖኤ። 49 ህትጉንተ ቃሩ መገኑ አበ ጠሀ ኤሳ አሴኤ። ሱዕሙስን ጡማንቿ። 50 አሞ እሱ ዋጅታ መኒ ኦሶች ኦሶ ኦሱተ ኢለንቀጤች ማረኖሰ። 51 አንጋንተስን ቃረተ ሁጅተ ሁጀቼእ። ቦልጥታ መነንከ ዎዘንሰ ሰውቲንን ብነኤእ። 52 አሞ አባኑተ አብንሰ በርጩሚች ድሪሼእ። ጠሁ እኮዳ ህርክቶረ ጦቅ ጦቅ አሴሰ። 53 አሞ ጎሬኮረ ደናሞ ጠሂን ዱሴሰ። እኮዳ ቀባጣመተ ጠለ አንጋን ኦሮታገ አሴሰ። 54 - 55 ህትጉንተ መገኑ አናካሀኔ ጠሃቄገንከ አብረሃሜሃ ዜሪሀንሲ ዶሊ ሆሪንከ አጉሩስ ቃግኬእ አግሹስ እስራኤለ ካዕሌእ» ይቶእ። 56 ማራምን ኤልሳቤጤባን ሰሶ አገን ቀጠ አፉዕልቶሀኒች ዘኪን ምንሴ ፈንቀልት ኦሮቶእ። 57 ኤልሳቤጤንከ እልታ ጃት ኢልትየንሴ ጎንቹ ቤቱ እልቶእ። 58 ህከኒ ኦሎሴ እለሙሴ ሆሩንኩ መገኑ አብሽ ቅሽጤሴገ መጮት እሴንን በርገንት በጅቀንቶእ። 59 እሶኦንት ሄዜትቅ በር ጪለስ ኑጉሲ + ዋልትኬእ አንስ ሱዕሚን «ዘካራሴ» ይት ገእቶተ ሀሶእ። 60 ጠሁ እኮዳ አመስ «ህትጉተበአ፤ ‹ዮሃንሴ› የመሜት ገአመኖ» ይቶእ። 61 ህከኒ እሶኦት «ኪ ዜሪች ከን ሱዕሚን ገአሜኢ ዮበአ» ይቶሴ። 62 ህከኒች ዘኪን እሶኦት ጪሉስ አዬ የመም ገአሙንተ ሀሰኖንዶ ደጎተ አነስ መላን ጠዕምቶእ። 63 ዘካራስን ጣፌኖረ ኣሴኑንተስ ጠዕምኬእ «ሱዕሙስ ዮሃንሴት» ይ ጣፎ። ህከን ጠሃንን ሆሩንኩሰ ማለልቶእ። 64 ህተ ጃንተ ዘካራሴ አፎ ፈነምየኒ አረብስ ሂረንትየኒ መገኑ ገለጠን ጠሃቁ አፎ። 65 ህከኒ ኦሌስ መኑ ሆሩንኩ ዋጄእ። አሞ ህኩ ጠሁ ሆሩንኩ ዱናሞ ይሁድ ባዶን ሆራንን ዱዱበሞ። 66 ህከ ጠሀ መጮጬ መኑ ሆሩንኩ «ኩ ጪሉ ሀትጎነ እሆታት?» ያን ጠሀስ ጎደባንተስ አፎ። ዳፉንኩስ መገን መቆ እሲን በርገም ዮተኔሃት እኬ። 67 ጪልስ አኑ ዘካራስን ጡማንቹ አያኑ ዊምየንስ 68 «ምናደበስ ጡጆሀኒሃ ፈእሾሀኒሃ እስራኤል ቀርቹ መገኑ ገለጠሙን። 69 - 70 አሞ ዎዶ ዶለ ዮ እኬ ጡማኖ ህራጋን አፎን ጠሃቄገንከ ሶቀማንቿንስ ዳዊቴ ምኔን አበ ፈእሳንቹ ኬእሼኔ። 71 ህካን አሴኢንኩ ነኦት ዲናካችኔ ግባኔ መን አንጋቺ ፈዕኑንታት። 72 - 75 ህትጉንተ ዲናከኔ አንጋች ፈእሶኔታ ሄዕናም ዶላን ሆራንን ብሬንተስ ዋጁ ዮበኢ ጡሚኒ ሙጩርማኒ እሲ ሁጀቲ ደንድኑንታ አናከኔ ሉሰተ አጉሮተ አናኔ አብረሃሜ ኣሴ ተሳሃ ኣጎ ጡማንቹ ላገ ህድሩሃ ዊንሸኖገ ሰውዬት። 76 አሞ ኮ ኢ ጪለ! አት ዎቃከስ ቅጠንስቶተ ቀርች ብሬን መርታንትተኔ ‹ሆሪችን አበ መገን ህራጋንቹ› የመንታንት። 77 አሞ ባጢልሰ አጉሩ ደቅታ ፈእ ቆርመተ እስ መኒ ኣስታንት። 78 ህኩንን እሆተ ደንዴኢ መገንኔ አጉሪኔቲ ቅሽጢኔቲ። ህከኒ ፈእ አሪቹት ሰሜች ፉልቶኔታት። 79 እሴን ቱንሶኒ ሬሆ ሀሌቾ ኣዜኒ ዮ መኒ ሆሪንከ ጫክሳእ። ህኩ ጫኩንኩ ሎከኔ ጡም ዎቄበ አወንሰኖ» ይ ህራጎ። 80 ህኩ ጪሉንኩ ሌእ መሌሲን ቃረ እኮ። አሞ እስራኤል መኒ ለለኖ በሩ ኢለንቀጤች ኡለ ኡዱመኣን ሄኦ።
1 ህተ ጃንተ ቄሳር አጉስጦስ ባዶንተስ ሆራንን ዮ መኑ ሆሩንኩ ጣፈሙንተ አዘጆ። 2 ህኩ ዎነ ኮደ ጣፋንቹ እኮ ጃተ «ቆርኔዎሴ» ዬኖ መንቹ ሶርይ ባዱ ገሸዮ እኬ። 3 ህከኒ መኑ ሆሩንኩ ጣፈሞተ አኑንኩ አኑንኩ ገግስ ገግስ ከተመ መረዮ እኬ። 4 - 5 አሞ ዮሴፍ ዳዊቴ ቦክነ ዜርቢ እኮተኔ እስ ጠዕመቄሴነ ሰላዕንቴ እኬ ማራሜንን በርገም ገሊለ ዮ ናዝሬቲች ኬእ ይሁድ ባዶን ዮ «ቤተሌመ» ዬኖ ዳዊቴ ከተመ ጣፈሞተ መሮ። 6 ለሙንኩሰ ህከኔ ሄኦገን ማራም እልታ ጃት ኢልቶእ። 7 እሴን ዎነሴ ቤቱ እልቶእ። ኮሁ ገለኖ ምኔንን መዕንት ዮበእተኔ ኦድሻን ጣጥኬእ ለሉ ህጥተ እተኖ ዎንግሮን ኦሲሶእ። 8 ህከን ባዶንን ሆለሰ ቆረበን አንከር ሀደ ገልታ ዜማኑ ዮ እኬ። 9 እሶኦንከ መገን ሰሜ ሶቀማንቹ ጡደሞሰ። አሞ መገን አብኑ ሄጌጎንተሰ ጫኬእ። እሶኦንት አብስ ዋጅቶእ። 10 ጠሁ እኮዳ ህኩ መገን ሰሜ ሶቀማንቹ እሶኦ «መኒ ሆሪንከ አበተ በጅጉተ እሀኖ ምሽራቸ አፍ ክዕኔኤበ ዋሎምተኔ ዋጅቴኖችዬ። 11 ዳፉንኩስ ከበር ዳዊቴ ከተማን ፈእሳንቹ ቀርቹ ክርስቶሱ እለሜክዕኔ። 12 ጪለስን ለሉ ህጥተ እተኖ ዎንግሮን ኦድሻን ጣጤን ኦሲሴማ ደጌነንተ። ህኩንን መላተ እሀኖዕኔ» ዬሰ። 13 ደንጎን በትናሹ መገን ሰሜ ሶቀማን ጎጎቱ ህከን መገን ሰሜ ሶቀማንቺንን በርገንት ጡደንቶእ። እሶኦንት መገኑ ገለጥተን 14 «አብኑ አሌ ሰማን መገኒ እሁን። መገኑ ኢተኖሰ መኒ ሆሪንከ ኡለ አሌን ጡሙ እሁን» ይተዮ እኬ። 15 ህኩ መገን ሰሜ ሶቀማኑንኩ እሶኦች አነነ እክ ሰማ ፉልቶ ጃተ እስ-እሶኦንት «አቼ ኬእዬ፤ ቤተሌመ መንኬእ ከ እኮ ጠሀ መገኑ ደግሲሾኔ ጡንዶ» የቀንቶእ። 16 እሶኦንት ሰርብት መርት ማራሜ፥ ዮሴፈኒ ለሉ ህጥተ እተኖ ዎንግሮን ኦሰኤ ጪለሃ ደጎእ። 17 አሞ ጪለስ ጡዶ ጃተ ህከን ጪልተኔ ኩለሞሰረ ዱዱቦእ። 18 ህካን መጮቶሩንኩ ዜማኑ ኩልቶሰ ጠሃን ማለልቶእ። 19 ጠሁ እኮዳ ማራም ህከ ጠሀ ሆረንከ ጎደባንተሴ አፍ ሰውተዮ እኬ። 20 ዜማኑንኩ ኩለሞሰገንከ እክየን መጮቶነ ጡዶ ጠሂ ሆሪንከ መገኑ አብሰኒ ገለጥተኒ ፈንቀልት ኦሮቶእ። 21 ሄዜትቅ በር ጪለስ ኑጉሴኖ ጃተ ሱዕመስ «ዬሱሰ» ዬን ገኤመ። ህኩንን አመስ ጎደባን አፉዕሉዕናች ብርንተ መገን ሰሜ ሶቀማንቹ ፉሼስየ ሱዕመ እኬ። 22 - 23 ሙሴ ሴራን የመሞገንከ እሶኦት ሙጩርታ ጃት ጎፍየን መገን ሴራን «ዎነ እለመኖ ጎንቹ ቤቱ ሆሩንኩ መገኒ አነነ እሁን» የመም ጣፈሞገን ጪለስ መገን ብርተ ህንጨኢ ዬሩሳሌመ መስቶእ። 24 አሞ መርቶኢ መገን ሴራን «ሀንደሬ ለሙ ጪጮረ ህንጨኡን» የመሞገንከ ክትመ ህንጨኢሃት እኬ። 25 ህተ ጃንተ ዬሩሳሌም ከተማን «ስሞኔ» ዬኖ ገገስ መገኒ ኣሴ ጡማንቹ መንቹ ዮ እኬ። እስን እስራኤል ቃርሳንቹ ቆረበዮሃ እኬ። ጡማንቹ አያኑንኩ እስ አሌን ዮሃ እኬ። 26 እሲንከ መገኑ ዶዕሬ ክርስቶሰ ጡዱዕናች ብርስ ሬሁምቦገ ጡማንቹ አያኑ ኩሌስ እኬ። 27 ስሞንን ጡማንቹ አያኑ ሰወእሲሽየንስ መገን ምን መሮ። ዮሴፊ ማራሚ ጪለ ዬሱሲ ሴራን ሮሰሞገ አስቶስተ መገን ምን አፍ ኣጎእ። 28 ህተ ጃንተ ስሞን ጪለ ሀንቀፍ መገኑ ገለጠን 29 «ቀርቾ! አቼ አግሹክ ጠሃቶንት ላገክጊንን ጡሚን ስናበቴኤ። 30 - 31 ዳፉንኩስ ሆራንከ መን ብሬን ቅጠንስቶንት ፈእሱክ እልኤ ጡዴእ። 32 እስን መገኑ አመዕኑምቦ መኒ ዎቃክ ጡድሰኗ ጫከ። አሞ ምናደቢሀንክ እስራኤሊ አብንየ» ዬእ። 33 አኑሲ አመሲ ጪልስተኔ የመሞ ጠሃን ማለልቶእ። 34 - 35 ስሞንን እሶኦተ ማሰኦሰ። አሞ ጪልስ አመተ ማራሜ «ኩ ጪሉ ሆለመ መን ዎዘን ሰውቱ ደገሙንተ እስራኤል ኣዜን ዮ በትናሸ መኒ ኡቢ፥ ኬኢሃ አሞ ኡርጨንታ በትናሸ መኒ መላተ እሆታ ዶዕረሜሃ። ኪ ፎልንከ ክቼቹ ጎራዴገ ሙረኖ» ዬሴ። 36 ህትጉንተ አሶሬ ዜርቢት ፋኑኤሌ ቤቱት «ሃነ» ዬኖ ህራጋንቹት ዮ እኬ። እሴን ገልቶሀኒች ዘኪን ምኔኒንተሴ በርገንት ለመለ ዎጋ ሄኤታ እኬ። አሞ አብስ ኑባጵቴታ እኬ። 37 እሴን ምኔኑ ዮበኢተ እክ ሄዜታነ ሾሉ ዎጋ ሄኤታ እኬ። እሴን አንከርሃ በራሃ መገን ምኒች ሆረን አነነ እኩዕናች ጦንተኒ መገኑ ኡጭተኒ መገኒ ሁጀተን ሄአዮ እኬ። 38 ህተ ጃንተ እሴ ዋልትኬእ መገኑ ገለጥተን ዬሩሳሌም ፈእሳንቹ ተሴን ቆረባ መኒ ሆሪንከ እስተኔ ኩልቶእ። 39 ዮሴፊ ማራሚ ሆረረንከ መገን ሴራን የመሞገ አስቶሀኒች ዘኪን ገሊለ ዮ ከተመሰ ናዝሬተ ፈንቀልት ኦሮቶእ። 40 ጪሉንኩ ሌእ ቃሮ። አሞ መሌሲን ዊሜኢ እኮ። ህትጉንተ መገን ኢተት አሌንተስ ዮ እኬ። 41 አኑሲ አመሲ ዎጋን ዎጋን ሻሽግ አያኒ ዬሩሳሌም ከተመ መርታ እኬ። 42 ዬሱሲንከ ቶነ ለሙ ዎጋ እኮስ ጃተ ኤጅ ሮሰሞገንከ አያነ አብሲ ዬሩሳሌመ ፉልቶእ። 43 በሩስ ጎፎሀኒች ዘኪን እሶኦት ምን ፈንቀልተንየን ጪሉ ዬሱሱ ዬሩሳሌመ ፈኤ እኬ። ህካንን አኑሲ አመሲ ደግምበአ። 44 እሶኦንት ሎከሰ መኒን በርገም ዮኢ አጉጅየንሰ መቶ በሬ ዎቃ መረንተን ሆሶእ። ህከኒች ዘኪን እለምሰነ ደጋ መንባን ሀሶስ። 45 ሀስ ሆጎ ጃንተ እሱ ሀሰን ዬሩሳሌመ ፈንቀልት መርቶእ። 46 እስን ሮስሳ መን ሜሬሮን አፉዕል መጮጨንየንሳ መ-መቱረ ጠዕመንየንሳ ሰሶ በሬች ዘኪን መገን ኬሰሞ ምኔን ደጎስ። 47 መጮቶስ መኑ ሆሩንኩ መሌሶንተሲ ፈንቀሸኖጋኒ ማለልቶእ። 48 ዮሴፊ ማራሚ ጡዶስ ጃተ አብስ ማለልቶእ። አመስን «ኢ ቤቶ! ሚሃት ህትተ አስቶንትኔ? ህኩዕኒን፥ አኑኪ አኒ አብንስ ቁልን ሀንሰዮንኬ እኬ» ይቶስ። 49 እስን «ሚ ሀሴዕኔ? አንኤ ምኔን እሁ ሀስሰኖኤገ ደጌንምበእንዶ?» ዬሰ። 50 እሶኦንት ጠሃቄሰ ጠሀ ቆርስትምበአ። 51 ህከኒች ዘኪን እሶኦንን ድር ናዝሬተ ዋሎ። እሶኦንከ አዘዘመዮሰ እኬ። አመስን ህከ ጠሀ ሆረንከ ጎደባንተሴ አፈዮ እኬ። 52 ዬሱሱንኩ መገንነ መን ብሬን ኢተሜኢ እክኬእ መሌሲኒ ኡርሻኒ ሌአን መረዮ እኬ።
1 ቄሳር ጥባሮስ ዎሞዕሜ ቶነ ኦንትቅ ዎጋን ጴንጤንቹ ጵላጦስ ይሁድ ባድየ ገሻንቹ እኬ። አሞ ሄሮድስ ገሊል ባዱ፥ ሄሮድሴ ህዞ ፍልጶስ «እጡርያሰሃ ጥራኮንዶሰሃ» ዬኖ ባዱ፥ ሊሳኖስ አሞ «አብላኖሰ» ዬኖ ባዱ ገሽታሃረ እኬ። 2 ህትጉንተ ሃና ቀያፊ አበተ ቄሳከ + እኬ። ህተ ጃተ መገን ላገት ዘካራሴ ቤትበ ዮሃንሴበ ኡለ ኡዱመኣን ዋልቶእ። 3 - 6 ህከኒ ህራጋንቾ እስያሴ መጣፍ ላጋን «መቶ መንች ላገት ኡለ ኡዱመኣን ‹ቀርች ዎቃ ቅጠንስዬ። እስ ህገኖበንከ ዙንስዬ። እመት ሆረንት ዊንቱን። ዱኑ ሆሩንኩ ቆተት ሆረንቲ ህርክቱን። ሾኬቡንኩ ዙሙን። ገርቀንጣሙ ዎቆንኩ ቅጠሙን። ማለ ኦደቄ ሆሩንኩ መገን ፈእሱ ጡደኖ› ይት ያርቶእ» የመም ጣፈሞገንከ ዮሃንስ «ባጢሉዕኔ አጉረሙንተ ቢረ ይቴን ጠመቀምዬ» ያን አዋጀን ዮርዳኖስ ለግ ሄጌጎን ዮ ባዱ ሆረንከ መሮ። 7 ህከንተኔ ጠመቁንተሰ ዋልቶ ሆለመ መነ ዮሃንስ «አዕኖኦት ኩ ዎር ዜሩ! ዋልታ አሙሬች ሁንቴኑንተ አይ ኩሎዕኔ? 8 አቼ ቢረ ይቴንተገ ጡድሳ ሁጅተ ሁጀችዬ በጋን ‹ነኦት አብረሃሜተ ኦሱ› የቀሙ አፌኖችዬ። ዳፉንኩስ መገኑ ተን ክናቺ አብረሃሜ ኦሱተ አስ ኬእሶተ ደንደኖገ ኩላንክዕኔ። 9 ቴሱ ምሳንት ሀቅ ፈጋራን አፉዕልቴእ። ህከንተኔ ደናምተ ላሉተ ላሉምቡ ሀቁ ሆሩንኩ ሙረም ጊራን ዎረመኖ» ዬእ። 10 ህኩ መኑንኩ ዮሃንሴ «ህከደ መ አስኑ?» ይ ጠዕሜእ። 11 እስን «ለምት ኦድሸት ዮሲ ዮስበእሀኒን ቤቀሙን። አሞ እቸት ዮሲ ዮስበእሀኒን ቤቀሙን» ይ ፈንቀሼሰ። 12 ህትጉንተ ቀረጣኑ ጠመቀንቶተ ዋልትኬእ «ሮስሳንቾ! ነኦስ መ አስኑ?» ይቶደ 13 «አዘዘንቴንተሀኒች አብሴን ኣቅቴኖችዬ» ዬሰ። 14 አሞ ቤጠቦ «ነኦስ መ አስኑ?» ይት ጠዕምቶደ «አዬቺ መቄን ኣቅቴኖችዬ። አዬኒ ቆጰኒን ኦዴኖችዬ። ደሞሱዕኔ እሁንክዕኔ» ዬሰ። 15 መኑ ተሴን ቆረበዮተኔ ሆሩንኩ መኑ ዎዘናንተሰ ዮሃንሴ «ኩን ክርስቶሳትንዶቤ?» ይት ሰውተዮ እኬ። 16 ዮሃንስን «አንዕኑ ዎኢን ጠመቃንክዕኔ። ጠሁ እኮዳ አን ጫመስ ኡሱሬኖሃ ሂሮተ ደንዱምቡ ኤሳች አበኖ ዋለዮእ። እስን ጡማንቾ አያኒኒ ጊራኒ ጠመቀኖክዕኔ። 17 አሞ ኦዱ ሙጩርሶታ አለሱ ጎተራንተስ ዎሮታ ማንሹ አንጋንተስ ዮእ። ጠሁ እኮዳ ቡረአስ ጠእቱምቦ ጊራን ዎረኖ» ዬሰ። 18 ህትጉንተ ሆለመ ዎሌ ሰዘናን ምሽራች ላገተ መኒ ሰበከዮ እኬ። 19 ጠሁ እኮዳ ገሻንቹ ሄሮድስ ህዜስ ፍልጶሴ ምን አመተ ሄሮዳደ ኣቄተኔሃ ዎሎ አሴ ሂላሪ ሆሪንካ ዮሃንስ አሙዕሬስ። 20 ህኩሲ ኮቼእ ይኬእ ሄሮድስ ዮሃንሴ ኡሱሮ ምን ኣግሼ እኬ። 21 መኑ ሆሩንኩ ጠመቀሞ ጃተ ዬሱሱሁ ጠመቀሜ እኬ። እስን መገኑ ኡጨንየንን ሰሞ ፈነምየን 22 ጡማንቹ አያኑ ሀንደርቾ አጉዲሻን አሌንተስ ድሬእ። አሞ «ኢታንኬ ቤቱኤ አቴት። ኬሳን በጅቀማም» ይታ ላገት ሰሜች ዋልቶእ። 23 ዬሱሱ ሮስሱ አፎ ጃተ ሰጀዱመ ዎጋ እኬስ እኬ። መኑንኩ እሱ «ዮሴፌየ ቤቱ» ይ ሰውያዮ እኬ። ዮሴፍ ኤልየ ቤቱ። 24 ኤል ማታቴየ ቤቱ። ማታት ሌዌየ ቤቱ። ሌው ምልኬየ ቤቱ። ምልክ ዮና ቤቱ። ዮነ ዮሴፌየ ቤቱ። 25 ዮሴፍ ማታት ቤቱ። ማታትዩ አሞጤየ ቤቱ። አሞጥ ናሆሜየ ቤቱ። ናሆም ኤስሌየ ቤቱ። ኤስል ናጌየ ቤቱ። 26 ናግ ማቴየ ቤቱ። ማት ማታት ቤቱ። ማታትዩ ሴሜኔየ ቤቱ። ሴሜን ዮሴፌየ ቤቱ። ዮሴፍ ዮዴየ ቤቱ። 27 ዮድ ዮናኔየ ቤቱ። ዮናን ሬሴየ ቤቱ። ሬስ ዘሩባቤሌየ ቤቱ። ዘሩባቤል ሰላቴሌየ ቤቱ። ሰላቴል ኔሬየ ቤቱ። 28 ኔር ምልኬየ ቤቱ። ምልክ ሃዴየ ቤቱ። ሃድ ቆሳሜየ ቤቱ። ቆሳም ኤልመዳሜየ ቤቱ። ኤልመዳም ኤሬየ ቤቱ። 29 ኤር እያሷ ቤቱ። እያሱ ኤልኤዜሬየ ቤቱ። ኤልኤዜር ዮራሜየ ቤቱ። ዮራም ማታቴየ ቤቱ። ማታት ሌዌየ ቤቱ። 30 ሌው ስሞኔየ ቤቱ። ስሞን ይሁዴየ ቤቱ። ይሁድ ዮሴፌየ ቤቱ። ዮሴፍ ዮናሜየ ቤቱ። ዮናም ኤልያቄሜየ ቤቱ። 31 ኤልያቄም ሜሌየ ቤቱ። ሜል ሜና ቤቱ። ሜነ ማጣቴየ ቤቱ። ማጣት ናታኔየ ቤቱ። ናታን ዳዊቴየ ቤቱ። 32 ዳዊት እሴየ ቤቱ። እሴይ እዮቤዴየ ቤቱ። እዮቤድ ቦኣዜየ ቤቱ። ቦኣዝ ሳላ ቤቱ። ሳለ ነኣሶኔየ ቤቱ። 33 ነኣሶን አምናዳቤየ ቤቱ። አምናዳብ አድሚኔየ ቤቱ። አድሚን አሪኔየ ቤቱ። አሪን ሄስሮሜየ ቤቱ። ሄስሮም ፋሬሴየ ቤቱ። ፋሬስ ይሁዴየ ቤቱ። 34 ይሁድ ያቆቤየ ቤቱ። ያቆብ ይሳቄየ ቤቱ። ይሳቅ አብረሃሜየ ቤቱ። አብረሃም ታራ ቤቱ። ታረ ናሆሬየ ቤቱ። 35 ናሆር ሴሩሄየ ቤቱ። ሴሩህ ራጋ ቤቱ። ራገ ፋሌቄየ ቤቱ። ፋሌቅ ኤቤሬየ ቤቱ። ኤቤር ሳላ ቤቱ። 36 ሳለ ቃይናሜየ ቤቱ። ቃይናም አርፋክሰዴየ ቤቱ። አርፋክሰድ ሴሜየ ቤቱ። ሴም ኖሄየ ቤቱ። ኖህ ላሜሄየ ቤቱ። 37 ላሜህ ማቱሳሌየ ቤቱ። ማቱሳል ሄኖኬየ ቤቱ። ሄኖክ ያሬዴየ ቤቱ። ያሬድ መላልኤሌየ ቤቱ። መላልኤል ቃይናሜየ ቤቱ። 38 ቃይናም ሄኖሴየ ቤቱ። ሄኖስ ሴቴየ ቤቱ። ሴት አዳሜየ ቤቱ። አዳም መገንየ ቤቱ እኬ።
1 - 2 ዬሱሱ ጡማንቹ አያኑ ዊምየንስ ዮርዳኖስ ለጊች ፈንቀል ዋሎ። ህከኒች ዘኪን ጡማንቹ አያኑ ዬሱሰ ኡለ ኡዱመአ መረኖገ አሴስ። ህከኔን ሾላዱመ በር ዳቡሎስ ኬኖስ። ህተን በራካንን ሜጡራ እቱ ሆጎተኔ በራከስ ጎፎ ጃተ ጎሬኮ። 3 ህተ ጃተ ዳቡሎስ ዬሱሰ «ሀኖ መገን ቤቱ እኬንትደ ኩ ክኑ ዳቡተ እሁንተ አዘዝ» ዬእ። 4 ጠሁ እኮዳ ዬሱሱ « ‹መኑ እቻን ጠሊን ሄአኖበአ› የመም ጣፈሜእ» ይ ፈንቀሼስ። 5 - 6 ህከኒች ዘኪን ዳቡሎስ ዬሱሰ ዱን አል ፉሽኬእ ኡለ አል ዎሞመተ ሆረንተ ቀሆ ቀጣንን ጡድሽ አጉር «ከ ገሽ መቆሃ አብንሳ ሆረንከ ኣሳንኬ። ዳፉንኩስ ኩን ሆሩንኩ ኤሳ ኣሰሜኢ እኮተኔ አን ኢቴምሀኒ አዬሃ ኣሶተ ደንዳም። 7 ህከኒ አት ኤሳ ሰገዶንትደ ኩ ሆሩንኩ ኪቢ እሀኖ» ዬስ። 8 ዬሱሱንኩ « ‹ቀርቿንክ መገኒ ሰገድ፤ እሲ ጠሊ አዘዘም› የመም ጣፈሜእ» ይ ፈንቀሼስ። 9 - 11 አሞ ዳቡሎስ ዬሱሰ ዬሩሳሌመ መስ መገን ኬሰሞ ምን እንት አሌን ኡርሽኬእ « ‹ኬስ ቆረቡንተ መገኑ ሰሜ ሶቀማኑስ አዘዘኖ። አሞ ሎከክ ክኖን ቆዕልቱምቦገ አንጋንተሰ ኬእስ አፋሄ› የመም ጣፈሞተኔ መገን ቤቱ እኬንትደ ሀኖ ከን አሊች ሙግት ኡብ» ዬስ። 12 ዬሱሱንኩ « ‹ቀርቹ መገኑክ ኬንቶት› የመም ጣፈሜእ» ይ ፈንቀሼስ። 13 ዳቡሎስን ሆራንከ ዉዲን ኬን ኬኦሀኒች ዘኪን ጄቾሀንስ አነነ እኮ። 14 ህከኒች ዘኪን ዬሱሱ ጡማንቾ አያን መቄን ገሊለ ፈንቀሎ። እስ ዱዱቡንኩ ህከን ሄጌጎን ዮ ባዶን ሆራንን መጮጨሞ። 15 እስን ጠጵት ምኔን ሮስሰንየን መኑ ሆሩንኩ አብሰዮስ እኬ። 16 ዬሱሱ ሌኦ ባዱ ናዝሬተ ዋልኬእ ኤጅ ሮስሾገንከ ሰንበት በር ጠጵት ምን ኣግ አነበቦተ ጦቅይ ኡሬእ። 17 - 19 ህተ ጃንተ ህራጋንቾ እስያሴ መጣፈ ኣሴመስ። ህከ መጣፈንከ ፈኖ ጃተ «ምሽራች ላገተ ቡጢ ሰበኩንተ ዶዕሬኤተኔ መገን አያኑ ኢ አሌኔት። ኡሱረንቶሩ ሂረንታገ፥ ቆቆ መኑ ጡዳገ አዋጁንተ፥ ጪመንቶረ ዎማንማን ፉሹንታ መገኑ ምናደበስ ፈእሰኖ ጄቹት ኢልቶገ አዋጁንታ ሶኬኤ» የመም ጣፈሜበ ደጎ። 20 እስን መጣፈስ ጡፍ ሁጀታንቺ ኣስኬእ አፉዕሌእ። ጠጵትስ ምኔን ዮ መኑ ሆሩንኩ ቀስ አፍ ጡደዮስ እኬ። 21 እስን «ከበር ት መጣፍ ላገት አዕኖኦት መጮቴነንየን ዊንቴእ» ዬሰ። 22 ሆሩንኩ መኑ እስተኔ ደናሙረ ጠሃተዮ እኬ። አሞ አፌችስ ፉልታ ደናሜ ላጋን ማለልት «ኩን ዮሴፌየ ቤቱበእንዶ?» ይቶእ። 23 ዬሱሱንኩ « ‹አኪንቾ! ሀኖ ገገክ ፈይስ› ይታ ተ አጉዲሸተ መልሲሰኖሩ ዮበኢ ኤሳ ይቴነንተገ ደጋም። አሞ ‹ቅፍርናሆም ከተማን አስቶንቲ ነኦንት መጮኖሚ ከኔ ገግክ ባዶኒ አስ› ይቴነንተኤ» ዬሰ። 24 ህትጉንተ «ገርተ ያንክዕኔ፤ ሀኩ ህራጋንቹሁ ገግስ ባዶን አበኖበአ። 25 ገርስ ኩላንክዕኔ፤ ኤልያሴ ዶለ ሰሱ ዎጋሃ ሌሁ አገነሃ ጤነ ኡቡ ሆግየን ባዶን ሆራንን ጎሩ ኣጎ ጃተ እስራኤል ባዶን ምኔኑሰ ሬሄ ሆለሙ ሜንቱ ዮ እኬ። 26 ጠሁ እኮዳ ኤልያስ ‹ሲዶነ› ዬኖ ባዶን ዮ ‹ሰረጲተ› ዬኖባን ሄኣ ምኔኑሴ ሬሄ ሜጤ ሜንትቾች ህግየን ዎሌሰበ ሜጤባ ሶሀምምበአ። 27 ህትጉንተ ህራጋንቾ ኤልሳኤ + ዶለ እስራኤል ባዶን አበሉ አፌ ሆለሙ መኑ ዮ እኬ። ጠሁ እኮዳ ‹ሶርየ› ዬኖ ባድ ‹ንእማኔ› ዬኖ መንቺች ህግየን ዎሉሰ ኬኑ ፈይትምበአ» ዬሰ። 28 ህከን ጠጵት ምኔን ዮ መኑ ሆሩንኩ ህካን መጮቶ ጃተ አብስ አሙዕረንቶእ። 29 ህከኒ ሆሩንኩሰ ጦቅት ከተሚች ኤተሩ ፉሽቶስሀኒች ዘኪን ሙገት ኡጅቶስተ ከተሙሰ ምነሜ እኬ ዱን ጋንገ ኦሮሶስ። 30 ጠሁ እኮዳ እስ ሜሬሪንተሰ ህግ ኦሮቅ ፈጆ። 31 ዬሱሱንኩ ገሊለ ዮ ቅፍርናሆም ከተመ ድሬእ። ህከኔን ሰንበት በሬን ሮስሰዮሰ እኬ። 32 ጠሁስን መሌሲን እኮተኔ እስ ሮስሰኖራን ማለልቶእ። 33 ህከን ጠጵት ምኔንን ሂሉ አያኑ አፌስ መንቹ ዮ እኬ። እስን አበ ላጋን 34 «ናዝሬት ዬሱሰ! ኔሳኒ ኬሳኒ መ ሜጦመት ዮኔ? በእሶኔተ ዋልቴንትንዶ? አት አዬትንዶ ደጌንኬ። አት መገኔየ ጡማንቹ» ይ ያሮ። 35 ጠሁ እኮዳ ዬሱሱ «ሰዕምት እሲች ፉል!» ያን ሻቆ። ህከኒ ሂሉ አያኑ መንቹስ መን ሜሬሮን ኡጅ ጌኑዕናችስን አጉር ፉሎ። 36 እሶኦንት ሆሩንኩሰ ማለልት መቱ-መቲሀንሰ «ኩ ጠሁ መሃን? መቄኒ ዳኖማኒ ሂለ አያነ አዘዘንየን እሶኦንት ፉልተዮእ» የቀንቶእ። 37 ዬሱስ ዱዱቡንኩ ህከን ሄጌጎን ዮ ባዶኒ መዕኔኒ ሆራንን መጮጨሞ። 38 ዬሱሱ ጠጵት ምኒች ፉል ስሞኔ ምን ኣጎ። ህከኔን ስሞኔ በሉት ቃረ ኢቢን ሞሴ እኬ። እሶኦንት እሴተ ፈይሱንተ ኡጭቶስ። 39 እስን እሴበ ህንጭይ ኡርኬእ ህኩ ኢቡ አጉሩንተ አዘጅየን አጉሮሴ። ህተ ጃንተ ጦቅት እሶኦተ ኮህሶእ። 40 አሪቹት ኣጎ ጃተ መኑ አነነ አነነ ሞሲን ሞሴረ ሆረንከ ዬሱስበ ዋሽቶእ። እስን ሆራንተሰን አናን አናንን አንገስ ኡጅኬእ ፈይሾሰ። 41 አሞ ሀቡሱንኩ ሆለመ መኒች «አት መገንየ ቤቱ» ያን ያረን ፉሎ። ጠሁ እኮዳ ዬሱሱ ሻቆሰ። አሞ ሀቡሱ እስ ክርስቶሰ እኮገ ደጎተኔ ጠሃታበ ከሜሰ። 42 እሩ ሶጆ ጃተ ዬሱሱ ህከምቢች ኬእ መኑ ዮበእበ ኦሮቄእ። ጠሁ እኮዳ መኑ እሱ ሀሰን ዋልትኬእ እሶኦተ አጉር ኦሮቁምቦገ አስቶስተ ሀሶእ። 43 እስን «ዎሌ ከተማካሃ መገን ዎሞመ ምሽራች ላገተ ሰበኩ ሀስሰኖኤ። ዳፉንኩስ አን ሶሀሞሚ ተን ሁጄሃት» ዬሰ። 44 ህከኒ ይሁድ ባድ ጠጵት ምናን ሰበከዮ እኬ።
1 መቱ በር ዬሱሱ «ጌንሴሬጠ» ዬኖ በሃር ቶቾን ኡሬሀኔን ሆለሙ መኑ እስበ ህንጭት መገን ላገተ መጮቶተ ጎምበቀንተንየን 2 ዬሱሱ በሃር ቶቾን ኡርቴ ለሙ ጀልበ ጡጆ። ጠሁ እኮዳ ቁርጡሜመተ ዎሻዳሩ ጀልባካችስ ፉልት ዎሻደሰ ኣንሽተዮ እኬ። 3 ዬሱሱንኩ ህተን ጀልባካች መቶንተስ ስሞኔስሀኔን ኣግኬእ በሃር ኣዝ ቀሁንከ ሽቀኡንተ ስሞኔ ጠዕሜእ። ህከን ጀልባንን አፉዕልኬእ መነ ሮስሾ። 4 ዬሱሱ ጠሃቅ ጦፎ ጃተ ስሞኔ «ጥለተ መዕንተ ለቅኬእ ቁርጡሜመተ አፌኖተ ዎሻደዕኔ ኡጅዬ» ዬስ። 5 ስሞንን «ቀርቾ! ዊመንከስ አንከር አጰመን ገንኬእ ሜጡራ አንፍምበአ። ጠሁ እኮዳ አት ይቶንትተኔ ዎሻደስ ኡጃም» ዬስ። 6 ዬገንከ አስቶ ጃተ አብስ በትናሸተ ቁርጡሜመተ አፍየን ዎሻዱሰ ጠንቁ አፎ። 7 እሶኦንት ዎሌ ጀልባካን ዮ ጃላከሰ ዋልት ካዕልቱንተሰ ቀቀሶእ። ጃላከሰን ዋልት ለሟንከ ጀልባን ቁርጡሜመተ ዊንሽትየን ጀልባከስ ዎኣን አገሚ እኮእ። 8 ስሞን ጴጥሮስን ህካን ጡጆ ጃተ ዬሱስ ጉሉቤ አሌን ኡብኬእ «ቀርቾ! አን ባጢላሙ መንቹ እኮምተኔ ኢቢች ፈድ» ዬእ። 9 ህካን ዬኢንኩ አፎ ቁርጡሜመተኔ እሲ እሲን በርገንት ዮሩ አብስ ማለልቶተኔሃት እኬ። 10 ህትጉንተ ስሞኔ ጃላከት ዘብዶሴ ኦሱት ያቆቢ ዮሃንሲ ማለልቶእ። ጠሁ እኮዳ ዬሱሱ ስሞኔ «ዋጅቶት፤ ከኒች ዘኪን መነ መገንበ ፈንቀሽታንቲ እካንት» ዬስ። 11 እሶኦንት ጀልባከሰ ኡለበ ለቆሀኒች ዘኪን ሆረረንከ አጉርት አወንቶስ። 12 ዬሱሱ መቶ ከተማን ዮሀኔን አበሉ አፌስ መቱ መንቹ ዋል ዬሱሰ ጡጆ ጃተ ብሬንተስ ኡብኬእ «ቀርቾ! ሀሶንትደ ሙጩርስቶኤተ ደንድታንት» ይ ኡጬስ። 13 ዬሱሱንኩ አንገስ ብድቀእ «ሀሳም፤ ሙጩር» ይ አፎስ። ህተ ጃንተ ህኩ አበሉ አጉሮስ። 14 አሞ ዬሱሱ መንቹስ «ከ ጠሀ አዬሃ ኩልቶት። ጠሁ እኮዳ መርት ገገክ ቄስቺ ጡድስኬእ መኒ ነቃሸ እሁንተ ሙስ አዘጆገንከ ሙጩርቶንትሀኒ ክትመ ህንጨእ» ይ አዘጆስ። 15 ጠሁ እኮዳ ዬሱስ ዱዱቡ ዎናቺ አበ መጮጨሞ። አሞ አብሽ በትናሹ መኑ እሲች መጮጮታ ሞሲችስ ፈዮታ ጠጵያዮ እኬ። 16 እሁን በጋን እስ ኡለ ኡዱመአ መረን መገኑ ኡጨኖ እኬ። 17 በሬች መቱ በር ዬሱሱ ሮስሰንየን ገሊልነ ይሁድ ባዶን ዮ ኦሌች ሆሪቺ ዬሩሳሌም ከተሚቺ ዋልቴ ፋሪሰቲ ሴር ሮስሳኑሁ ሺናንተስ አፉዕልቴ እኬ። ዬሱሲንከ ሞሳኑ ፈይሰኖ መገን መቆ ዮስ እኬ። 18 ህተ ጃተ መኑ መቱ ሺሀ መንቹ መዕናን እይት ዋሽቶእ። እሱንከ ምን ኣግስ ዬሱስ ብሬን አፉሽታ ዎቃ ሀሰዮ እኬ። 19 ጠሁ እኮዳ መን በትኔች ኬኦ ምን ኣግሳስ ዎቃ ሆጎእ። ህከኒ ብድቅዬ ምን አል አፍ ፉልትኬእ ጡበ ቡቅስ ሺሀስ መንቹ መዕናንተስን ዬሱስ ብሬን ሜሬሮ ድሪሶእ። 20 ዬሱሱንኩ መንስ አመዕነቱ ጡጅኬእ «መንቾ! ባጢሉክ አጉረሜኬ» ዬስ። 21 ህከኒ ሴር ሮስሳኑሁ ፋሪሰቲ «ኩ መገን አሌን ቦሮዕረንች ላገተ ጠሃቀኖ መ እኬሃን? መገኒች ጠሊች ህግየን ባጢለ አጉሪ ደንደኖ አዬት?» ይት ሰውዩ አፎእ። 22 ዬሱሱንኩ ሰውተሰ ደግኬእ «ካን ዎዘናንተዕኔ ሚ ሰውቴነዮንተ? 23 ‹ባጢሉክ አጉረሜእ› ዪቺ ‹ጦቅት መረም› ዪቺ ሀከስ ዩ ቢለኖ? 24 ጠሁ እኮዳ መንች ቤቲ ኡለ አሌን ባጢለ አጉረኖ መቆ ዮስገ ደጌነንተ» ይ ፈንቀሽ ሺኮስ መንቹንከ «አን ኬስ ያም፤ ጦቅት መዕነክ እይት ምንክ ኦሮቅ» ዬእ። 25 ህተ ጃንተ ብሬንተሰን ጦቅኬእ ኦሰኦ መዕነተ እይ መገኑ ገለጠን ምንስ ኦሮቄእ። 26 ህከኒ ሆረንከ መነ ማለልሲሽየንሰ መገኑ ገለጥተን «ከበር ማለልሲሰኖ ጠሀ ጡንዶም» ይት አብስ ዋጅቶእ። 27 ህከኒች ዘኪን ዬሱሱ ህከምቢች ፉል «ሌዌ» ዬኖ ቀረጣንቹ ቀረጠ ኣቄኖባን አፉዕሌኢ ጡጅኬእ «አወኔኤ» ዬስ። 28 እስን ሆረረንከ አጉር ጦቅይ አወኖስ። 29 ሌውን ዬሱሲ ምኔንተስ አበ ድግሰ አሴሃን በትናሹ ቀረጣኑሁ ዎሉ ኬኑሁ እሶኦንን በርገንት ማዳን አፉዕልቴ እኬ። 30 ህከኒ ፋሪሰቲ ሴር ሮስሳኑሳ ዬሱስ አወናኖን «ቀረጣኒኒ ባጢላማኒ እቴነዮንታሁ አጌነዮንታሁ ሚሃት?» ይት ጉንጉንቶእ። 31 ዬሱሱንኩ «አኪሙ ሀስሰኖ ሞሳኒሃት በጋን ፈየ መኒሃበአ። 32 አኒ ዋሎሚ ጡማኑ ገኦተ እሁዕናች ባጢላመት ባጢለሰ ቢረ ይቱንተ ገኦታት» ይ ፈንቀሼሰ። 33 ህከኒች ዘኪን እሶኦት ዬሱሰ «ዮሃንሴ አወናኑሁ ፋሪሰ አወናኑሁ ሆረንተ ጃተ ጦንተዮእኒ መገኑ ኡጭተዮእኒ። ጠሁ እኮዳ ኪ አወናኑ እታኢሁ አጋኢሁ ሚሃት?» ይት ጠዕምቶስ። 34 ዬሱሱንኩ «እዜቸኑ እሶኦን በርገም ሄአንየን ቦሎቸ ገአንቶ ኮሀ ጦንሲሲ ደንድቴነንንዶ? 35 ጠሁ እኮዳ እዜቸነ እሶኦች አነነ አሴን ኦሮሴኖ በሩ ዋለኖ። ህተ ጃተ ጦንታእ» ዬሰ። 36 አሞ ዬሱሱ መትተ አጉዲሸተ «አዪ ሃሮ ኦድሻች ቃፈተ ዘር ኑባቾ ኦድሻን ቃፈኖበአ። ህከስ አሴዳ ሃሮስመ ዘረኖ በጋን ህት ሃሬ ቃፈት ኑባቾን ቅጠንታበአ። 37 ህትጉንተ አዪ ሃሮ ዎይን ዳጠ ኑባቾ ዎይን ጨናካን ዎረኖበአ። ህከስመ አሴደ ሃሮ ዎይን ዳጡ ጨናከስ ጠንቅሽ ዱነመኖ፤ ጨናከሲ በኣእ። 38 ህከኒ ሃሮ ዎይን ዳጡ ሃሮ ጨናካን ዎረሙ ሀስሰኖ። 39 ህትጉንተ አዪ ‹ኤጌሮ ዎያ› ያኖተኔ ኤጌሮ ዎይን ዳጠ አጎሀኒች ዘኪን ሃሮ ሀሰኖበአ» ይ ኩሎሰ።
1 ዬሱሱ ሰንበት በሬን ውጠ ኣዚን ህገዮሀኔን አወናኑስ ሀማሙተ ጠንቅስ አንጋንተሰ ቁስተን እተዮ እኬ። 2 ህከኒ ፋሪሳች መ-መቱ «ሰንበት በሬን አሲ ሀስሱምቡረ አዕኖኦት ሚ አስቴነዮንተ?» ይቶእ። 3 - 4 ጠሁ እኮዳ ዬሱሱ «ዳዊቲ እሲን በርገንት ዮሩ ጎሬኮ ጃተ አሴረ ህኩስን መገን ኬሰሞ ምን ኣግኬእ ቄሳካች ጠሊች ህግየን አዪ እቲ ሀስሱምቡተ መገኒ የመንቶ ዳቡተ ኣቅኬእ እቾጋ፥ እሲን በርገንት ዮሪ ኣሴጋ አነበቤንምበእንዶ?» ይ ፈንቀሼሰ። 5 አሞ እስን «መንች ቤቱ ሰንበት በርየ ቀርቹ» ዬሰ። 6 ዎሎ ሰንበት በሬን ዬሱሱ ጠጵት ምን ኣግኬእ ሮስሰዮ እኬ። ህከኔን መኬስ አንገተ ሺኬ መንቹ ዮ እኬ። 7 ሴር ሮስሳኑሁ ፋሪሰቲ ዬሱሰ ኦዳረ ደጎተ ይትኬእ ሰንበት በሬን ፈይሰኖንዶ ጡዶተ ቆረበዮ እኬ። 8 ጠሁ እኮዳ ዬሱሱ ሰውተሰ ደግኬእ አንገተ ሺኮስ መንቹ «ጦቅት ዋልት ከኔ ኡር» ዬሀን ጦቅይ ህከኔ ኡሬእ። 9 ዬሱሱንኩ «ሀኖ ጠዕማንክዕኔ፤ ሰንበት በር ደናሙረንዶ ሂለረ አሷን ሀስሰኖ? አሞ ፎል ፈእሷንዶ በእሷን?» ዬሰ። 10 እስን ሆረንከሰ ዘህ ጡጅኬእ ሺሀስ መንቹ «አንገክ ብድቀእ» ዬእ። እስን ብድቀኤ ጃተ አንገስ ፈይቶእ። 11 ጠሁ እኮዳ እሶኦት አብስ አሙዕረንት «ከ ዬሱሰ መ አስኑ?» ይት እስ-እሶኦንት ሃሳውቶእ። 12 ህተን በራካን ዬሱሱ መገኑ ኡጮተ ዱን አል ፉልኬእ ዊመንከ አንከር መገኑ ኡጨን ገሎ። 13 ሶጆ ጃንተ አወናኑስ እስበ ገእኬእ እሶኦች ቶነ ለሙስ ዶዕር «ሶቀማኑ» ይ ገኤሰ። 14 እሶኦንት «ጴጥሮሴ» ይ ገኤ ስሞኔት፥ ስሞኔየ ህዞ እንድራሴት፥ ያቆቤት፥ ዮሃንሴት፥ ፍልጶሴት፥ ባርቶሎሞሴት፥ 15 ማቶሴት፥ ቶማሴት፥ እልፎሴየ ቤቱ ያቆቤት፥ ባዱስ ኢተኖ ስሞኔት፥ 16 ያቆቤየ + ቤቱ ይሁዳቲ + ዬሱሰ ህግሽ ኣሴ አስቆሮንቶ ይሁዳቲ እኬ። 17 ዬሱሱንኩ እሶኦንን በርገም ዱን አሊች ድርኬእ በትናሸ አወናኒንተሲ አብሽ በትናሸ መኒኒ በርገም ህርክቴ መዕኔን ኡሬእ። ህኩ መኑንኩ እሲች መጮቶታ ሞሲችሰ ፈይቶታ ይሁድ ባዲች ሆሪች፥ ዬሩሳሌም ከተሚቺ በሃር ሺናን ዮ ጢሮስነ ሲዶን ከተሚቺ ዋልቴሃረ እኬ። 18 ሂሉ አያኑ አፍየንሰ ሀውተዮ እኬሩንኩ ፈይቶእ። 19 ዬሱሲችን መቆ ፉለን ሆረንከሰ ፈይሰዮተኔ ሆሩንኩ መኑ እሱ ኡልቶተ ሀሰዮ እኬ። 20 ዬሱሱ እልስ ጦቀእ አወናኑስ ጡደን «መገን ዎሞመት ክዕኔኤቢተ እኮተኔ አዕኖኦት ቡጡ ማሰአንቴንታረ። 21 አሞ ዱቤነንተተኔ አዕኖኦት ቴሱ ጎሬኬንተሩ ማሰአንቴንታረ። ህትጉንተ ኦሰዕልቴነንተተኔ አዕኖኦት ቴሱ ኦኤነንተሩ ማሰአንቴንታረ። 22 መንች ቤትተኔ መኑ ግቦዕኔ ጃተ፥ ያዬዕኔ ጃተ፥ ቦሮሮዕኔ ጃታ ሱዕመዕኔ ሂላከገ በእሾ ጃታ ማሰአንቴንታረ። 23 ዋጉዕኔ ሰማን አበ እኮተኔ ህተ ጃተ በጅቀምዬኒ በጅጎን ጦጵይዬኒ። ዳፉንኩስ አናከሰን ህራጋኑ ህትጉተ አስቴሃረ። 24 ጠሁ እኮዳ ክዕኔኤ ዱበላካ ሀሴንተረ ሆረንከ ደቅቴንተተኔ ኣዬ። 25 አሞ ጎሬኬነንተተኔ ቴሱ ዱቤንተ ኬኒ ኣዬ። ህትጉንተ ክቼኤነንተተኔሃ ኦኤነንተተኔሃ ክዕኔኤ ቴሱ ኦሰዕልቴነንተሪ ኣዬ። 26 መኑ ሆሩንኩ ክዕኔኤተኔ ደናሙረ ጠሃቄደ ክዕኔኤ ኣዬ። ዳፉንኩስ አናከሰን ቆጰን ህራጋኒ ህትጉተ አስቴሃረ» ዬእ። 27 ዬሱሱ «አን ክዕኔኤ መጮቴነንተኤሪ ያንክዕኔ። ዲናከዕኔ ኢትዬ። ግባክዕኔሪ ደናሙረ አስዬ። 28 አሞ ጤሌልታዕኔረ ማሰእዬ። በእሶዕኔሪ መገኑ ኡጭዬ። 29 ሞክክ ቀምበኖሀኒ ለንክስ ዉዱሃ ኣስ። ጋብክ ኣቀኖሀኒ ቀምቢሰኪ ከንቶት። 30 ህትጉንተ ኡጨቀኖሄሀኒ ሆሪንከ ኣስ። አሞ ኪረ መሃ ኣቄ መንቺች ፈንቀሹንተኬ ጠዕምቶት። 31 መኑ ክዕኔኤ አሱንተ ሀሴነንተረ አዕኖኦቲ ህትጉንተ መኒ አስዬ። 32 ኢትታዕኔረ ጠለ ኢትቴንተደዕኑ መ አሰኖዕኔ? ዳፉንኩስ ባጢላመቲ ኢትታሰረ ኢትታእ። 33 አሞ ደናሙ አስታዕኔሪ ጠሊ ደናሙ አስቴንተደ መ አሰኖዕኔ? ዳፉንኩስ ህካንዕኑ ባጢላመቲ አስታእ። 34 አሞ ፈንቀሽቴን ኣቅቴነንተገ ተሳ አስቴነንተሪ ሌኤሴንተደ መ አሰኖዕኔ? ሌኤሶ ቀጠ ፈንቀሽት ኣቂዕኑ ባጢላመቲ ባጢላማ ሌኤሳእ። 35 ጠሁ እኮዳ ገለጥቱምቡሪሃ ገገሰ ኢትታሪሃ መገኑ ቢዘ እኮተኔ አዕኖኦቲ ዲናከዕኔ ኢትዬ። ደናሙረ አስዬ። ሜጡራ ፈንቀሽቴን ኣቂ ተሳ አስቴኑዕነ ሌኤሽዬ። ህከኒ ዋጉዕኔ አበ እሀኖኒ ሆሪችን አበ መገኒ ኦሱተ እኬነንተኒ። 36 አሞ ሰሜ አኑዕኔ አጉረኖ እኮገንከ አዕኖኦቲ አጉርቴነንተረ እክዬ» ዬእ። 37 ዬሱሱ «ፍርድቴኖችዬ፤ ፍርደመኖክዕኔበአ። አሞ መነ ‹በኤነንተ› ይቴኖችዬ፤ በኤነንተበአ። ‹አጉኔም› ይዬ፤ አጉረመኖክዕኔ። 38 ኣስዬ፤ ኣሰመኖክዕኔ። ደናሞ ኬናንቾን ጢቤን ሌንቄቅሴን ኬኔናን ትርፍ ዛዘዮኢ ሀንቀፍሲሴኖዕኔ። ዳፉንኩስ ኬንቴንተ ኬናንቾንን ኬነመኖክዕኔ» ዬእ። 39 አሞ ዬሱሱ አጉዲሻን «ቆቁ መንቹ ቆቀ መንቹ አወንሲ ደንደኖንዶ? ህከስ አሴደ ለሙንኩ ኤሎን ኡባበእንዶ? 40 ህትጉንተ ሮሳንቹ ሮስሳንቺችስ አባበአ። ጠሁ እኮዳ አዪ ደናሞገ ሮሾደ ሮስሳንችስገ እሀኖ። 41 ሚ ገግክ እሌን ዮ ጌዴለ ጡዱዕናች ህዜክ እሌን ዮ ሀጭቹ ጡደዮንት? 42 አት ገጉክን እሌንተክ ዮ ጌዴለንከ ጡዱምቡ ህዜሀንክ ‹ኢ ህዞ! እሌንተክ ዮ ሀጭቹ ፉሻም› ይቶተ ሀትክ ደንድተን? ኩ ሳድጨማንቹ! ብርስት ገግክ እሌች ጌዴለ ፉሽ። ህከኒች ዘኪን ህዜክ እሌች ሀጭቹ ፉሽቶተ ጠበት ጡዲ ደንድታንት» ዬሰ። 43 ዬሱሱ «ደናሙ ሀቁ ፈረተ ላሉተ እንዶ ፈሩ ሀቁ ደናምተ ላሉተ ሆረን ላለኖበአ። 44 ህከኒ ሀቁ ሆሩንኩ ገግስ ላሎን ለለኖ። ኦዴቾ ላሉተ ኡቲች መጢ እንዶ ዎይን ላሉተ አቱል ዱቢች መጢ ደንዴኖበአ። 45 መኑ ዎዘናንተስ ዊም ፈኦሀኒች አፌንተስ ጠሃቀኖተኔ ጡሙ መንቹ ደናሟንስ ዎዘኒች ደናሙረ ፉሸኖ። ህትጉንተ ሂሉ መንቹ ሂላንስ ዎዘኒች ፈረረ ፉሸኖ» ዬሰ። 46 ዬሱሱ «አን ኩላንክዕኔረዕኑ አስቴነንተበአ። ህከደ ሚሃመ ‹ቀርቾ! ቀርቾ!› ይቴን ገእቴነንተኤ? 47 ኢበ ዋልኬእ ላገኤ መጮጭ ሁጀተኖ አዪ መ አጉደኖንዶ ጡድሳንክዕኔ። 48 ህኩ መንቹ ምን ምኖተ ጥልሽ እምኬእ ክን አሌን ሾኮ መንቹ አጉደኖ። ዞፉ ዋልኬእ ህከ ምን ጎምቤእ። እኮዳ ክን አሌን ምነሞተኔ ሌንቄቅሶስተ ደንድምበአ። 49 አሞ ላገኤ መጮጭ ሁጀቱምቡ መንቹ ሾሁት + ዮበእ ኡለ አሌን ምን ምኖ መንቹ አጉደኖ። ህከ ምንንከ ዞፉ ጎምብየን ህተ ጃንተ ኡቦ። ህከን ምን ኡቡንኩ ሂለ እኮ» ይ ኩሎሰ።
1 ዬሱሱ መኑ መጮጨንየን ጠሃቅ ጦፎሀኒች ዘኪን ቅፍርናሆም ከተመ ኣጎ። 2 ህከኔን መቱ ጥቤ መን አዘዛንቹ ዮ እኬ። እስን አብሽ ኢተኖ ሶቀማንቹስ ሞሽ ሬሂ ሆጌ እኬ። 3 ዬሱስተኔ መጮጬ ጃተ ሶቀማንቹስ ፈይሲ ዋሉንተ አይሁድ ኑባቡ ኡጭቱንተ ዬሱስበ ሶኮ። 4 እሶኦንት ዬሱስበ ዋልቶ ጃተ «ከ ጠሀ አስቱንተስ ሀስሰኗ መንቹ። 5 ዳፉንኩስ ኩ መንቹ ኒ ምናደበ ኢተኗ። አሞ ጠጵት ምን ምኔንየ» ይተን ቃርስት ኡጭቶስ። 6 ህከኒ ዬሱሱ እሶኦንን በርገም መሮ። ጠሁ እኮዳ ምንስበ ሆባሼሀኔን ጥቤ መን አዘዛንቹ ጃላከስ «ቀርቾ! አት ኢ ምን ኣጉንተ አን ሀስሱምቡ መንቹ እኮምተኔ ኢበ ዋሊ ኦርበኦት። 7 ህከኒሃንት ኪበ ዋሊ ዋጄሚ። ጠሁ እኮዳ ላጋን ጠላን ጠሃቶንትደ ሶቀማንቹኤ ፈየኖ። 8 አን አሞ ዎሎ ኬኒች ዎሮን ዮሚ እሀንየን ኤሳች ዎሮን ቤጠቦ ዮኤየ መንቹ። ህከሮኦችን መቱስ ‹መር› ዬምደ መረኖ። አሞ ዎሉስ ‹ዋል› ዬምደ ዋለኖ። ህትጉንተ ሶቀማንቹኤ ‹ካን አስ› ዬምደ አሰኖ» ይ ዬሱስበ ሶኮ። 9 ዬሱሱ ህካን መጮጬ ጃተ እሶን አብሽ ማለልኬእ አወነዮስ እኬ በትናሸ መንበ ፈንቀል «አን ኩላንክዕኔ፤ እስራኤላኒ ህትጎነ አመዕነቱ ሆረን ደግምበአ» ዬሰ። 10 ህኩ ሶሀንቶሩንኩ ምን ፈንቀልቶ ጃተ ሶቀማንቹስ ፈዬኢ ጡዶእ። 11 ዬሱሱ ሆሽ ገሉዕነን አወናኒንተሲ በትናሸ መኒኒ በርገም «ነይነ» ዬኖ ከተመ መሮ። 12 ከተመስ ኣጌኖበ ህንጭዬሀኔን ከተሚችስ መንች ሬሸ እዬን ፉሌነዮመ እኬ። እስን አማሀንስ ሜጦ ቤቱ እኬ። አሞ አመስ ምኔኑሴ ሬሄታ ሜንትቹ እኬ። ህከን ከተሚችን በትናሹ መኑ እሴን በርገም ዮ እኬ። 13 ቀርቹንኩ ጡጆሴ ጃተ ቅሽጥኬእ «ኦኦት» ዬሴ። 14 ዬሱሱ ህንጭኬእ ሀለቀ ኡልየን እይቶ መኑ ኡርቶእ። እስን «ሀርድቾ! አን ኬስ ያም፤ ጦቅይ!» ዬእ። 15 ህተ ጃንተ ህኩ ሬሄ መንቹ ጦቅይ አፉዕል ሃሳዉ አፎ። ዬሱሱንኩ ህከ መንቹ አማሀንስ ኣሴእ። 16 ህከኒ ሆረንከሰ ዋጅሲሽየንሰ «ቃሩ ህራጋንቹ ሜሬሮንተኔ ኬኤእ» አሞ «መገኑ መነስ ፈእሲ ዋሌእ» ይተን መገኑ አብሶእ። 17 ህኩ እስ ዱዱቡንኩ ይሁድ ባዶን ሆራኒ ህከን ሄጌጎን ዮ ባዶን ሆራኒ መጮጨሞ። 18 ዮሃንሴ አወናኑ ህከ ጠሀ ሆረንከ ኩልቶስ። 19 ህከኒ ዮሃንስ አወናኒችስ ለሙ እስበ ገእኬእ «ዋለኖ የመሞ አቴትንዶ ዎሉ ቆረምቡ?» ይ ቀርችበ ሶኮሰ። 20 እሶኦንት ዬሱስበ ዋልቶ ጃተ «ጠመቃንቹ ዮሃንስ ‹ዋለኖ የመሞ አቴትንዶ ዎሉ ቆረምቡ?› ይ ኪበ ሶኬኔ» ይቶእ። 21 ህከን ሳታንን ዬሱሱ ሆለመ መነ ጥዳቺ ሞሲቺ ፈይሾ። ህትጉንተ ሂለ አያነሃ ፉሼእ፤ በትናሸተ ቆቃከታ ጡዳገ አሴእ። 22 እስን ሶሀንቶረ «መርቴን ዮሃንሴ ጡዴንተራ መጮቴንተራ ህኩስን ‹ቆቃከት ጡደዮእ። ሺኮሩ መረንተዮእ። አበላመት ሙጩርተዮእ። ደንቃከት መጮተዮእ። ሬቶሩ ሬሆች ኬአዮእ። ቡጢ ምሽራች ላገት ኩለንተዮሰ። 23 ህከኒ ኤሳን መለሙምቡ ማሰአሜሃ› ይቴን ኩልዬ» ይ ፈንቀሼሰ። 24 ዮሃንሴ ሶቀማኑ ኦሮቶ ጃተ ዬሱሱ ህከን በትናሸ መኒ ዮሃንሴተኔ ጠሃቁ አፎ። እስን «መ ጡዲሃት ኡለ ኡዱመአ መርቴንታ? ቦብሩ ሌንቄቅሰኖ ሾምቦቅቹ ጡዲሃትንዶ? 25 ህከደ መ ጡዲ ፉልቴን? ደናምተ ኦድሸተ ኦደቄ መንቹንዶ? እራምተ ኦድሸተ ኦደቅት ሄለንታሩ ሄኣኢ ዎማከ ምኔኔት። 26 ህከደ መመ ጡዲ መርቴንተ? ህራጋንቹ ጡዲሃትንዶ? ፤ አን ኩላንክዕኔ። ህራጋንቺቺ አበኖ ጡዲሃት። 27 ‹ህኩዕኒን፥ ብሬንተክ ዎቃክ ቅጠንሰኖ ሶቀማንቹኤ ሶሃም› የመም እስተኔ ጣፈሞ ኩን እሶት። 28 አን ኩላንክዕኔ፤ ሜንቲች እለንቶሪ ሜሬሮን ዮሃንሴች አበኖ ሆረን ዮበአ። ጠሁ እኮዳ መገን ዎሞማን ሆሪችን ቀሁ እኮ እሲች አበኖ» ዬእ። 29 ሆሩንኩ መኑሁ ቀረጣኑሁ ህካን መጮቶ ጃተ ዮሃንስ ጠመቄሰረ እኮተኔ መገን ዎቆ ገርተ እኮገ ደጎእ። 30 ጠሁ እኮዳ ፋሪሰቲ መገን ሴረ ደጋሩ ዮሃንሴን ጠመቀሙ ሆጊንተሰ ገጊሀንሰ መገን ሁጅተ ግቦእ። 31 አሞ ዬሱሱ «አቼ ከን ዶል መነ ሚን አጉጠንሳም? እሶኦስ መሃን አጉዳኢ? 32 ኩ መኑ ድኮ አፉዕልት ‹ገምባብየ ቡንሶንክዕኔ፤ አዕኖኦንት አለጵቴንምበአ። አሞ ኦእሲንሶምደ ኦኡ ግቤንተ› የቀንተን መቱ-መቲንተሰ ገአቀንታ ኦሱተ አጉደኖ። 33 ዳፉንኩስ ጠመቃንቹ ዮሃንስ እቸተ እቱዕናቺ ዎይን ዳጠ አጉዕናቺ ዋሎደ ‹ሀቡሱ ዮስ› ይቴንተ። 34 አሞ መንች ቤቱ እተኒ አገኒ ዋሎደ ‹ቦንጫሟ፥ ድምባንቿኒ ቀረጣንነ ባጢላማ ጃለኒ› ይቴንተ። 35 ጠሁ እኮዳ መገን ቆርመት ገርተ እኮጉ ለለኖ ቆረ መንባን ጠላኔት» ዬሰ። 36 ፋሪሳች መቱ መንቹ ዬሱሱ እሲን በርገም እቱንተ ጠዕምየን ህከን ፋሪስች ምን ኣግኬእ ማዳን አፉዕሌእ። 37 ህከን ከተማንን ዮ መትት ባጢላምት ሜንትቹት ዬሱሱ ፋሪስች ምኔን ማዳን አፉዕሌገ ደጎ ጃተ ሽቱት ዊንቴ «አልባስጥሮሰ» ዬኖ ክኒች መክሴመ ብልቃጠ አፍ ዋልቶእ። 38 እሴን ጉጅስ ዉዲን ሎከስባን ኡርት ኦአንኬእ እንጂጄንተሴ ሎከስ ሙጥሱ አፎእ። ሙሚንተሴ ሎከስ ሺንሽቶእ፥ ሎከስን ሱንቅቶእኒ ሎካንተስን ሽቱተ ቡርቶእኒ። 39 ህተ ጃንተ ዬሱሰ ገኤ ፋሪስቹ ህካን ጡጅኬእ «ኩ መንቹ ህራጋንቹ እኬ እክየን ት አፋስ ሜንትቹት ባጢላምተ እኮተኔ እሴ አዬትንዶ አሞ ሀትጎነተ ሜንትቹንዶ ደገኖ እኬ» ይ ዎዘናንተስ ሰውዬእ። 40 ዬሱሱ «ስሞኔ! ኩላንኬሩ ዮእ» ዬስ። እስን «ሮስሳንቾ! መሃን?» ይ ፈንቀሼእ። 41 ዬሱሱ «መቶ መንቺች ግዘ ሌኤጭቴ ለሙ መንቹ ዮ እኬ። ህኩሩንኩ መቱስ ኦንቴ ጥቤ ብረ አሞ ለንክስቢ ኦንታዱመ ብረ ሌኤጭቴሃረ እኬ። 42 እሶኦንት ባቱ ሆጎ ጃተ ሌኤሾስ መንቹ ለምሰ ቤነንከ አጉር አጉሮ። አቼ ለሚችሰን ህከ መንቹ አብሽ ኢተኖ ሀከኔት?» ዬእ። 43 ስሞንን «በትናሹ ቤኑስ አጉረሞሲ አጉደዮኤ» ይ ፈንቀሼእ። ዬሱሱንኩ «ገርተ ፍርድቴንት» ዬስ። 44 ህከኒች ዘኪን ዬሱሱ ህተን ሜንትቾ ዉዱ ፈንቀል ስሞኔ «ተ ሜንትቹተ ጡደዮንትንዶ? አን ምንክ ኣጎም ጃተ አት ሎካሀዕኒ ዎአ ኣስትምበአ። ጠሁ እኮዳ እሴ እንጂጄንተሴ ሎከኤ ሙጥሰን ሙሚንተሴ ሺንሽቴእ። 45 አሞ አት ሱንቅትምበኤ። ጠሁ እኮዳ እሴ ምንክ ኣጎሚች ከበ ሎከኤ ሰዕምት ሱንቅተዮእ። 46 ህትጉንተ አት ቦቆንተኤ ቡዕሬኖ ዘይተ ቡርትምበአ። ጠሁ እኮዳ እሴ ሎካንተኤ ሽቱተ ቡርቴእ። 47 ህከንተኔ ኩላንኬ፤ አብስ ኢትቶተኔ በትናሹሴ ባጢሉ አጉረሜሴ። ጠሁ እኮዳ ቀሁ አጉረሞሲ ቀሁንከ ኢተኖ» ዬስ። 48 ዬሱሱ ህተን ሜንትቾ «ባጢሉክ አጉረሜእ» ዬእ። 49 ህከኒ እሲንን በርገንት ማዳን አፉዕልቶሩ «ኩ ባጢለሃ አጉሪ ደንደኖ አዬት?» የቀሙ አፎእ። 50 ጠሁ እኮዳ ዬሱሱ ህተ ሜንትቹተ «አመዕነቱክ ፈይሼኬ፤ ጡሚን ኦሮቅ» ዬሴ።
1 ህከኒች ዘኪን ዬሱሱ መገን ዎሞመ ምሽራቸ አዋጀኒ ሰበከኒ ከተማካኒ ኦላካኒ ህገዮ እኬ። ቶነ ለሙንኩ አወናኑሲ እሲን በርገንት ዮ እኬ። 2 አሞ ሂሉ አያኑ ፉሌነ ሞሲች ፈይቴ መ-መቱ ሜንቱ አወንተዮስ እኬ። እሶኦንት ለመሉ ሀቡሱ ፉሎሴ መግደል ማራሜት፥ 3 ሄሮድሴ ምን አዘዘኖ «ኩዘ» ዬኖ መንችተ ምኔመ ዮሃናት፥ «ሶስነ» ዬኖተኒ ዎሎ በትናሸ ኬኑኒ እኬ። ህኩሩንኩ ዮሰሪን ካዕልተዮስየረ እኬ። 4 በትናሹ መኑ ከተሚች ሆሪችን ዋል ጠጵዬ ጃተ ዬሱሱ 5 «መቱ ውጣንቹ ዜሬተስ ውጦተ ፉሎ። ውጠንየንን መ-መቱ ዎቄ ቶቾን ኡብ ሎካን ሃመሞ። አሞ ሰሜ ጪአንት እት ከንቶስ። 6 ዎሉስ ክን አሌን ኡብ ሙቾ። እኮዳ መዕኔንተስ ሙጥመት ዮበእተኔ ሞል ፈጆ። 7 አሞ መ-መቱስ ኡት ኣዜን ኡቦ። ኡቱንኩ በርገም ሌእኬእ ለንግ አፎስ። 8 ህትጉንተ መ-መቱ ደናሜ ኡላን ኡብ ሙቾ። ሌኦ ጃንተ ጥቤ አፎ ላሎ» ይ አጉዲሻን ጠሃቄእ። ህካንን ጠሃቅኬእ ላገስ ጦቀእ «መጮታ መጨት ዮሲ አዪ ቃርስ መጮጩን» ዬእ። 9 አወናኑስ ዬሱሰ «ተን አጉዲሸ ሂረቱት መሃን?» ይት ጠዕምቶደ 10 «ክዕኔኤ መገን ዎሞመ ቤስቹ ጠሀ ደጌኑንተ ኣሰሜክዕኔ። እኮዳ ዎሎ መኒ ጡደንን ጡዱምቦጋ መጮተንን ቆርስቱምቦጋ ኩለመኖሳ አጉዲሻኔት» ዬእ። 11 ዬሱሱ «አጉዲሸስ ሂረቱት ተኔት፦ ዜሬቱ መገንተ ላገ። 12 አሞ ዎቄ ቶቾን ኡቦ ዜሬቱ ጡድሰኖ መገን ላገተ መጮጬሃ መነ። ጠሁ እኮዳ አመዕንት ፈኡምቦገ ዳቡሎስ ዋል መጮቶ መገን ላገተ ዎዘኒችሰ ኦሮሽ ከመኖ። 13 ክን አል ዜሬቱ ጡድሰኖ መገን ላገተ መጮቶ ጃተ በጅጎን ኣቅታሃረ። እኮዳ እሶኦት አመዕንቶኢ ጄቾሀንሴት። ጠጱንኩ ዮሰበእተኔ ሀው ጃተ ካዳእ። 14 አሞ ኡት ኣዜን ኡቦ ዜሬቱ ጡድሰኖ መገን ላገተ መጮታሃ መነ። እኮዳ ሄአንየን ሄአንየን ተን ኡለ ሄቸ ጠሀ ሰውዩ፥ ቀባጡቲ ሄሉሁ ለንግየንሰ ላልቱዕነን ቆሽ በኣእ። 15 ህትጉንተ ደናሜ ኡላን ኡቦ ዜሬቱ ጡድሰኖ ደናሞነ ጠቤነ ዎዘኒን መገን ላገተ መጮት ቃርስት ቆረባሃ መነ። እሶኦንት እየቂን ላሉተ ላልታእ» ዬእ። 16 ዬሱሱ «አዪ ኩራዝ ጫክሾሀኒች ዘኪን ኦዳን እፍሰኖ እንዶ አንሸረ አፉሸኖ ዮበአ። ጠሁ እኮዳ ምን ኣገኖ ሆሩንኩ ጫከ ጡዱንተ ኩራዝ ሰቀሌኖሀኔን አፉሸኖ። 17 ዳፉንኩስ ደጵይ ደገሙዕናቺ ማጠምኬእ ጫክ ለሉዕናቺ ፈአኖሩ ምሁ ዮበአ። 18 ህከኒ ሀትጉተ መጮቴነንተንዶ ቆረጵዬ። ዳፉንኩስ ዮስሀኒ በርገም ኣሰመኖስ። እኮዳ ዮስበእሀኒች ህኩ ዮሲ አጉደኖሲሁ ኣቀመኖ» ዬእ። 19 ህከኒች ዘኪን ዬሱስ አመቲ ህዛከሲ እስበ ዋልቶእ። እኮዳ መን በትኔች ኬኦ እሱ ኢሊ ደንድትምበአ። 20 ህከኒ «አመኪ ህዛከኪ ደቀንቶሄተ ሀስኬእ ኡሮ ኡርቴእ» ዬን ኩሌመስ። 21 ጠሁ እኮዳ እስ «መገን ላገተ መጮት አዘዘንታሩ ሆሩንኩ አመተዕኒ ህዛከተዕኒ» ዬሰ። 22 መቱ በር ዬሱሱ አወናኒንተስን በርገም ጀልብ ኣዝ ኣግኬእ «ከን በሃሪች ካጵ ዉዱ ቶኖ» ዬሀንሰ መሪ ኬኦእ። 23 መርተንየንን እስ ግሾ። አንጉሉሎ ቦብሩ ህከን በሃር አሌን ኬእየን ዎኡ ጀልባን ኣግ ዊሚ እኮተኔ አብስ ሀውተዮ እኬ። 24 እሶኦንት እስበ መርት «ቀርቾ! ቀርቾ! በዕነዮም» ይተን ኬእሶስ። እስን በቅኬእ አንጉሉሎ ቦብረሃ ዎእ ዎርጃሙሃ አሙዕርየን አጉርት አጉርቶእ። አቡ ሰዕምቱንኩ እኮ። 25 ዬሱሱንኩ «አመዕነቱዕኔ ሀከኔ ዮእ» ዬሰ። እሶኦንት ዋጅቲ ማለልቲ መቱ-መቲሀንሰ «ኩ ቦብረሃ ዎአሃ አዘዘዮኢ አሞ እሶኦንት አዘዘንተዮሲ ሀትጎና መንቹ?» የቀንቶእ። 26 ህከኒች ዘኪን ገሊል ዉደኢን ዮ «ጌርጌሶነ» ዬኖ ባዱ ኢልቶእ። 27 ዬሱሱ ጀልቢች ኡለተ ድሬገንከ ሀቡሱ አፌስ መንቹ ከተሚች ፉልኬእ ህከኔ ደቀሞ። እስን ሆለመ ጄቾች አፍ ኦድሸተ ኦደቁ አጉሬሃ እኬ። አሞ ምኔ እሁዕናች ሞገባን ሄአኗ እኬ። 28 ህኩንን ዬሱሰ ጡጆ ጃተ ብሬንተስ ያር ኡብ አበ ላጋን «ሆሪችን አበ መገን ቤቶ ዬሱሰ! ኤሳኒ ኬሳኒ መ ሜጦመት ዮኔ? ሀእ ቡቸክ እቾም ሀውሶቴኤ» ዬእ። 29 ህካን ዬኢንኩ ህኩ ሂሉ አያኑ ህከን መንቺች ፉሉንተ ዬሱሱ አዘጆተኔሃት እኬ። ዳፉንኩስ በትናሸተ ጄቹተ አፌሲ እኮተኔ ሰንሰለቲኒ ብረቲኒ ኡሱረም ቆረበመኗ እኬ። ጠሁ እኮዳ ህተ ኡሱሩተ ቢጪ ጠንቅሺ ሀቡሱ አወንስየንስ ኡለ ኡዱመአ መረኖ እኬ። 30 ህከኒች ዘኪን ዬሱሱ «ሱዕሙክ አዬት?» ይ ጠዕሜስ። ሆለሙ ሀቡሱ አፌሲ እኮተኔንከ «ጎጎታ» ይ ፈንቀሼስ። 31 ህኩ ሀቡሱንኩ ጥለ በሌን ኣጉንተ አዘዙምቦሰገ ኡጭቶስ። 32 ህከኔን ዱን ገባን በትናሸት ቦኬ ዜመት ዜአንተዮ እኬ። ህኩ ሀቡሱንኩ «ህተን ቦኬን ኣንጋምገ አስኔ» ይት ዬሱሰ ኡጭቶእ። ህከኒ እስ ኣጋገ አሴሰ። 33 ህከኒች ዘኪን ሀቡሱ መንቺችስ ፉል ቦኬን ኣግየን ቦኬስ ዜመት አብስ ፍሪጠን ጋንጊች ሙግት ድርት በሃራን ኣግ አገንቶእ። 34 ዜማኑ ህከ እኮ ጠሀ ጡዶ ጃተ ሁንት ኦሮትኬእ ከተማኒ ገጠራኒ ጠሀስ ዱዱቦእ። 35 ህከኒ መኑ ህከ እኮ ጠሀ ጡዶተ ዬሱስበ ዋልቶእ። ህኩ ሀቡሱ ፉሎ መንቹ ዎዘኑስ ፈንቀልየን ኦድሸተ ኦደቅ ዬሱስ ሎከባን አፉዕሌኢ ጡዶ ጃተ ዋጅቶእ። 36 አሞ ጠሁስ እሀንየን ጡዶሩንኩ ህኩ ሀቡሱ አፌስ እኬ መንቹ ሀትጉተ ፈዬእንዶ ኩልቶሰ። 37 ህከኒች ዘኪን ህከን «ጌርጌሶነ» ዬኖ ባድ ሄጌጎን ዮ ባድ መኑ ሆሩንኩ አብስ ዋጅቶተኔ ዬሱሰ እሶኦቢች ኦሮቁንተ ኡጭቶእ። ህከኒ ዬሱሱ ጀልባን ኣግ ዋሎ ዘኩንከ ፈንቀሎ። 38 ህኩ ሀቡሱ ፉሎ መንቹ እሲን በርገም ሄኦተ ዬሱሰ ኡጬእ። እኮዳ ዬሱሱ 39 «ምንክ ፈንቀልት ኦሮት መገኑ ሀበንከረ አሴሄንዶ መኒ ኩል» ይ ስናበቾስ። ህከኒ መንቹስ ዬሱሱ ሀበንከረ አሴስንዶ ከተምስ ኣዜን ሆራንን አዋጀን ኦሮቄእ። 40 ዬሱሱ ፈንቀል ዋሎ ጃተ በትናሹ መኑ ቆረበዮስተኔ በጅጎን ኣቅቶስ። 41 ህከበንከ ጠጵት ምን ገሸኖ «ያእሮሴ» ዬኖ መቱ መንቹ ዋል ዬሱስ ሎካን ኡብኬእ ምንስ መሩንተ ኡጬስ። 42 ዳፉንኩስ ቶነ ለሙ ዎጋ እኬሴ ሜጥንት ቤቱት ዮሲት ሬሂ ሆግየኔት እኬ። ዬሱሱንኩ መረንየን መኑ ከኢኒ ከኒኒ ረብ አፌስ እኬ። 43 ቶነ ለሙ ዎጋ ዱደ ኣዚችሴ ቄጉ ዛዘንየን ሀውተዮ መትት ሜንትቹት ዮ እኬ። እሴን ዮሴረ ሆረንከ ዘቡ ኣሰኖ መኒ ኣስት ጦፎዳ አዪ ፈይሶሴተ ደንድምበአ እኬ። 44 ህቲንን ዘክስ ዉዲን ዋልትኬእ ኦድሸስ ሉደ ኡልቶእ። ህተ ጃንተ ቄጉሴ ዛዙ አጉሮ። 45 ዬሱሱንኩ «አዬት ኡሎኤ?» ዬእ። ሆሩንኩ መኑ «ኡንምበኬ» ዬ ጃተ ጴጥሮሲ እሲን በርገንት ዮሩ «ቀርቾ! ከንኩ በትናሹ መኑ ዘህ ረበዮኬገ ጡደንኬእ ‹አዬት ኡሎኤ?› ይተንንዶ?» ይቶእ። 46 ጠሁ እኮዳ ዬሱሱ «መቆ ኤሳች ፉሎገ ደጎምተኔ መቱ መንቹ ኡሌኤ» ዬእ። 47 ህት ሜንትቹንት ማጠሚ ደንዱ ሆጎገ ደጎ ጃተ ሁጠን ዋልት ብሬንተስ ኡብኬእ ሆራንከ መን ብሬን ሚ ኡልቶስንዶ አሞ ህተ ጃንተ ሀትጉተ ፈይቶእንዶ ኩልቶእ። 48 ዬሱሱንኩ «ኢ ቤቶ! አመዕነቱክ ፈይሼሄ። ጡሚን ኦሮቅ» ዬሴ። 49 ዬሱሱ ህካን ጠሃቀንየንን መቱ መንቹ ጠጵት ምን ገሻንች ምኒች ዋልኬእ «ቤቱክ ሬቴእ። ህከኒ ሮስሳንቹ ጠለንከ ኦርበእሶት» ዬእ። 50 ጠሁ እኮዳ ዬሱሱ ህካን መጮጭኬእ «ዋጅቶት፤ አመዕኑመ አመዕን። እሴ ፈይታእ» ይ ፈንቀሼስ። 51 እስን ምን ኢሌ ጃተ ጴጥሮሴች፥ ዮሃንሴች፥ ያቆቤች፥ ጪለስ አኒቺ አማቺ ህግየን አዪ እሲን በርገም ኣገኖበ ከሞ። 52 ሆሩንኩ መኑ «ኣዬ! ኣዬ!» ይተን ኦአዮሴ እኬ። ጠሁ እኮዳ ዬሱሱ «ኦኤኖችዬ! እሴ ግሴ በጋን ሬትምበአ» ዬሰ። 53 እሶኦንት ሆሩንኩሰ ሬቶገ ደጎተኔ ኦሰዕልቶስ። 54 ጠሁ እኮዳ ጪለስ አንገተ አፍኬእ «ቴ ጪለ! ጦቅይ!» ይ ገኤሴ። 55 እሴን ፎሉሴ ፈንቀልየን ሰርብትን ጦቅት ኡርቶእ። ዬሱሱንኩ «እታረ ኣስዬሴ» ዬእ። 56 ህከኒ እልቶሴሩ ማለልቶእ። ጠሁ እኮዳ ህከ እኮ ጠሀ አዬሃ ኩልቱምቦገ ዬሱሱ አዘጆሰ።
1 ዬሱሱ ቶነ ለሙንከ አወናኑስ ሜጦማንን ገእኬእ ሀቡሰ ሆረንከ ፉሽቱንታ ሞሳኑ ፈይሱንታ መቆሃ ደንዴቁሃ ኣሴሰ። 2 ህተእ መገን ዎሞመተኔ ሰበኩንታ ሞሳኑ ፈይሱንታ ሶኮሰ። 3 አሞ «ብጡሃ እኮ ከረጢተሃ እኮ እቸታ እኮ ግዘሃ እኮ ለሙ ቀምቢሰሃ እኮ ዎቄሀዕኔ ሜጡራ አፌኖችዬ። 4 ህትጉንተ ሀከ ምንሃ ኣጌንተደ ህከን ከተሚች ፉልቴን ኦሮቅቴነንቀጤች ህከን ምኔንን አፉዕልዬ። 5 ‹ኤመን ጡመ ዋልቴን› ዬን ኣቄኑምቡዕኔቢች ህከ ከተመ አጉርቴን ፉልቴነንተ ጃተ እሶኦ ነቃሸ እሁንተ ሎካችዕኔ ቡሁተ ቀምበቅዬ» ዬሰ። 6 ህከኒ እሶኦት ህከምቢች ፉልት ምሽራች ላገተ ሰበከኒ መዕኔን ሆራንን ሞሳኑ ፈይሰኒ ሆራንከ ኦሌን ህገዮ እኬ። 7 ገሊል ባድ ገሻንቹ ሄሮድስ ህከ ሁጀተሞረ ሆረንከ መጮጭየን መሉ በኦስ። ህትጉተ እኮንኩ መ-መቱ መኑ «ጠመቃንቹ ዮሃንስ ሬሆች ኬኤእ» 8 ህትጉንተ መ-መቱ «ኤልያስ ዋሌእ» አሞ ዎሉ ኬኑ «ኤጄ ህራጋኒች መቱ ኬኤእ» ያዮተኔሃት እኬ። 9 ሄሮድስን «ዮሃንሴዕኑ ጎበስ ሙርሲሼም። ጠሁ እኮዳ እስተኔ ህትጎነረ መጮጨዮሚ ኩን አዬት?» ዬእ። ጡዶስተን ሀሰዮ እኬ። 10 ሶቀማኑንኩ መርቶቢች ፈንቀልትኬእ አስቶረ ሆረንከ ዬሱሲ ኩልቶእ። እስን «ቤተሰይደ» ዬኖ ከተም ሺናን ዮ ኡለ ኡዱመአ እሶኦተ አፍ ሜጥንስን ኦሮቄእ። 11 ጠሁ እኮዳ ሆለሙ መኑ ህካን መጮጬ ጃተ አወኖስ። እስን መነስ ኣቅኬእ መገን ዎሞመተኔ ኩሎሰ። አሞ ሞሲች ፈዩ ሀስሰኖሰረንከ ፈይሾሰ። 12 እሩ ሀወሪ እኮ ጃተ ቶነ ለሙንኩ አወናኑ ዬሱስበ ዋልት «ት ዮም መዕንት ኡለ ኡዱመአ እኮተኔ ከን ሄጌጎን ዮ ከተማከታ ባዱሃ መርት ገልቱንታ እታረ ደቅቱንታ መነ ስናበት» ይቶስ። 13 ጠሁ እኮዳ ዬሱሱ «እታረ አዕኖኦት ኣስዬሰ» ዬሰደ «ኔሳ ጠል ኦንቴ ቤጡኒ ለሜ ቁርጡሜመኒ ዮኔ። ህከኒ መንኬእ እቸተ ህኑምቡች ከን ሆራንከ መኒ እሀኖበአ» ይቶስ። 14 ዳፉንኩስ መኑስ ኦንትተ ኩምተ እሀኗ ቀጠ እኬ። እስን አወናኒሀንስ «ኦ-ኦንታዱመ እካ ቀጡ ሜ-ሜጤ መዕኔን አፉዕልታገ አስዬ» ዬሰ። 15 እሶኦንት እስ ዬገንከ አስት ሆሩንኩ መኑ አፉዕለኖገ አስቶእ። 16 ኦንትንተ ቤጦኒ ለምንተ ቁርጡሜመታ አፍኬእ ሰማ ለቅ ጡደን መገኑ ገለጥ ቢጭኬእ መኒ ቤኩንተ አወናኒሀንስ ኣሴእ። 17 ሆሩንኩ እች ዱቦ። እሶኦች ፈኦ ፉፉሩንከ አወናኑ ቶነ ለምተ ደጉድተ ኬእሶእ። 18 መቱ በር ዬሱሱ ሜጥን መገኑ ኡጨዮሀኔን አወናኑስ እሲን በርገንት ዮ እኬ። እስን «መኑ ኤስ አዬት ያዮኤ?» ዬሰ። 19 እሶኦንት ፈንቀሽት «መ-መቱ ‹ጠመቃንቾ ዮሃንሴት› አሞ ዎሉስ ‹ኤልያሴት› ህትጉንተ ‹ኤጄ ህራጋኒች መቱ ኬኤእ› ይተዮኬ» ይቶስ። 20 እስን «አዕኖኦስ ኤስ አዬት ይቴነዮንተኤ?» ዬሰደ ጴጥሮስ ፈንቀሽ «መገኑ ዶዕሬሄየ ክርስቶሳት» ዬእ። 21 - 22 ዬሱሱንኩ «መንች ቤቱ በትናሸ ሀወ ኣቆተ፥ ኑባቢን፥ ቄስ አወንሳኒኒ ሴር ሮስሳኒኒ ግበሞተ፥ ሬሆታ ሰክ በር ሬሆች ኬኦታ ሀስሰኖስተኔ ከ ጠሀ አዬሃ ኩልቴኖኮንተ» ይ ቃርስ አዘጆሰ። 23 ዬሱሱ ሆሪንከ «አዪ ኤስ አወኒ ሀሾደ ገገስ ካጅ በሪን በሪን መስቀለስ እይ አወኑዕኔ። 24 ዳፉንኩስ ፎልስ ፈእሲ ሀሰኖ ሆሩንኩ ፎልስ በእሰኖ። ጠሁ እኮዳ ኢተኔ ፎልስ በእሰኖ ሆሩንኩ ፎልስ ፈእጨኖ። 25 መቱ መንቹ ተን ኡለ አል ዱቡ ሆረንከ ደቅኬእ ፎልስ በእሾደ እንዶ ጌኖደ መ አሰኖስ? 26 ህትጉንተ አዪ ኤሳኒ ኢ ላጋኒ ሳሎደ መንች ቤቱ ገግስ አብኒን፥ አንስ አብኒኒ ጡማኖ መገን ሰሜ ሶቀማን አብኒኒ ዋለኖ ጃተ እሶን ሳለኖ። 27 ጠሁ እኮዳ ገርስ ኩላንክዕኔ፤ ከኔ ኡርቶሪች መ-መቱ መገን ዎሞመተ ጡዱዕናች ብርስት ሬቱምቡሩ ዮእ» ዬሰ። 28 ዬሱሱ ህካን ዬሀኒች ሄዜቶ በሬ ቀጢች ዘኪን ጴጥሮሴ፥ ዮሃንሴኒ ያቆቤኒ አፍ መገኑ ኡጮተ መቶ ዱን አል ፉሎ። 29 መገኑ ኡጨንየንን እሌስ ዉዱ ዶረሞ፤ አሞ ኦድሸስን ዎጅክ ቤሌሌሶእ። 30 ደንጎን ለሙ መንቹ ዋልት እሲን ሃሳውተዮ እኬ። እሶኦንት ሙሴቲ ኤልያሴቲ እኬ። 31 አብኒን ጡደንትኬእ ጠሃተዮ እኬ ጠሁንኩ ዬሱሱ ዬሩሳሌም ከተማን መገን ሰውተ ሬሆንተስ ዊንሸኖ ዎቄተኔሃት እኬ። 32 ጠሁ እኮዳ ጴጥሮሴኒ እሲን በርገንት ዮራ ግሰነት ቄልቴሰ እኬ። እሶኦንት በቅቶ ጃተ ዬሱስ አብንሃ እሲን በርገንት ኡርቶ ለሙንከ መንቹሃ ጡዶእ። 33 ለሙንኩ መንቹ ዬሱሲች አነነ እከንየንን ጴጥሮስ ዬሱሰ «ሮስሳንቾ! ከኔ ሄኡ ኔሳ ደናሙ እኮተኔ ሰሱ ዳሰ መቱ ኬሳ፥ መቱ ሙሴ፥ መቱ ኤልያሴ ዳንሱን» ዬእ። ጠሁ እኮዳ ያኖስሩ መሃንዶ ገጉስን ደግምበአ እኬ። 34 ጴጥሮስ ህካን ያንየንን ጎሙ ዋል ቴሎሰ። ጎምስ ኣዝ ኣገንን ዋጅቶእ። 35 አሞ ህከን ጎም ኣዚች «ዶዕሬም ቤቱኤ ከኔት። እሲች መጮጭዬ» ይታ ላገት ዋልቶእ። 36 ህት ላገንት ጠሃቀንቶሀኒች ዘኪን ዬሱሱ ሜጥንስን እክ ለሌእ። አሞ እሶኦት ጡዶ ጠሂች ሜጡራ ህተን በራካን አዬሃ ኩልቱዕናች ሰዕምት አጉርቶእ። 37 ለንክስ በር እሶኦት ዱኒች ድርቶ ጃተ በትናሹ መኑ ዬሱሲን ደቀንቶእ። 38 ህከን መኒችን መቱ «ሮስሳንቾ! እስ ኤሳ ሜጡ ጪለ ጠለ እኮተኔ ቤቱኤ ጡዱንተ ኡጨቃንኬ። 39 እሱንከ ሂሉ አያኑ አፍኬእ ደንጎን ያርሲሰኖስ። አሞ ሁምብ አፌን ኤብሲሽ ፍት-ፍተአኖስ። ህትጉንተ ቡት-ቡተእኬእ ሀዊን ገፈረኖስ። 40 ህከ ሂለ አያነ ፉሽቱንተ አወናኑክ ኡጬም እኬ። እኮዳ እሶኦት ደንድትምበአ» ይ ያሮ። 41 ዬሱሱንኩ «ኩ ሾኩነ አመዕነቱ ዮዕኔበእ ከን ዶል መኑ ሀወንኩ በሩ ኢለንቀጤች ክዕኔኤን በርገም ሄኣም? አሞ ሀኩ በሩ ኢለንቀጤች ደንዳንክዕኔ? ቤቱክ ከበ ዋሽ» ዬእ። 42 አደቦስ ዋለንየንን ህኩ ሂሉ አያኑ ኡጅ ፍት-ፍተኤስ። ጠሁ እኮዳ ዬሱሱ ህከ ሂለ አያነ ሻቅ አደባስ ፈይሽኬእ አደቤስ አኒ ኣሴእ። 43 ህከኒ መኑ ሆሩንኩ መገን አበ መቆን ማለሎ። ጠሁ እኮዳ ሆሩንኩሰ ዬሱሱ አሴራን ሆራንን ማለልተንየንን እስ አወናኒሀንስ 44 «መንች ቤቱ መን አንጋን ህግሰም ኣሰመኖተኔ ተ ላገተ ቆርስቴን መጮጭዬ» ዬሰ። 45 ጠሁ እኮዳ ጠሁስ ኣጉምቦሰገ ደጵዬሰተኔ ህከ ጠሀ ቆርስትምበአ እኬ። አሞ ህከን ጠህተኔንከ ጠዕምቶስተ ዋጅቶእ። 46 አወናን ሜሬሮን «ኔሳች አይኔ አብናም?» ይታ ኦደት ኬኦእ። 47 ጠሁ እኮዳ ዬሱሱ ዎዘንሰ ሰውተ ደግኬእ መቱ ጪለ ዋሽ ሺናንተስ ኡርሽኬእ 48 «ከ ጪለ ሱዕሚንተኤ ኣቀኖ ሆሩንኩ ኤስ ኣቀኖ። አሞ ኤስ ኣቀኖ ሆሩንኩ ኤስ ሶኮሃ ኣቀኖ። ዳፉንኩስ ሜሬሮንተዕኔ ሆሪችን ቀሁስ እስ አባንስ» ዬሰ። 49 ዮሃንስ «ቀርቾ! መቱ መንቹ ሱዕሚንተክ ሀቡሰ ፉሸንየን ጡንዶም። እኮዳ እስ ኔሳን በርገም አወኑምቡሄ እኮተኔ ከሞንስ» ዬእ። 50 ጠሁ እኮዳ ዬሱሱ «ኡርጨሙምቡዕኔ ሆሩንኩ ክዕኔኤቢ እኮተኔ ከንቴኖችዬስ» ዬስ። 51 ዬሱሱ ሰማ ፉለኖ ጃት ሆባሴሀኔን ዬሩሳሌመ መሮተ ሙዕር ኬኦ። 52 ብሬንተስን ህግ መርታ ሶቀማኑ ሶክየን እሶኦት ሆረረንከ እሲ ቅጠንስቶተ «ሰማረ» ዬኖ ባዶን ዮ መቱ ኦሎ መርቶእ። 53 ጠሁ እኮዳ ህከን ኦሌ መኑ ዬሱሱ ህከኒን ህግ ዬሩሳሌመ መረኖገ ደጎተኔ ኣቅቶስተ ሀስምበአ። 54 አወናኑስ ያቆቢ ዮሃንሲ ህካን ጡዶ ጃተ «ቀርቾ! ሰሜች ጊረት ዋልት ቡስቱንተሰ አዘንዙንተ ኢትተንንዶ?» ይቶስ። 55 እስን ዘኩ ፈንቀልኬእ «አዕኖኦት ሀትጎነ አያኒቼትንዶ ደጌነንተበአ። 56 መንች ቤቱ መን ፎል ፈእሲ በጋን በእሲ ዋልምበአ» ይ አሙዕሬሰ። ህከኒች ዘኪን ዎሉ ኦሎ ኦሮቶእ። 57 ዬሱሱሁ አወናኑሲ ዎቃን መረንተንየን መቱ መንቹ ዬሱሰ «መርታንትበ ሆረንከ አወናንኬ» ዬደ 58 ዬሱሱ «ዌንጌሬሊ ኤሎ ዮሰ። አሞ ሰሜ ጪኣ ዶዕኑ ዮሰ። ጠሁ እኮዳ መንች ቤቲ ጎበስ ኣግጨኖ መዕንቲ ዮስበአ» ዬስ። 59 ዬሱሱ ዎሉ መንቹ «አወኔኤ» ዬእ። ጠሁ እኮዳ መንቹስ «ቀርቾ! ብርስ መርኬእ አነኤ ሞቁንተ ስናበቴኤ» ዬደ 60 ዬሱሱ «ሬቶሩንኩ ሬሸሰ ሞጉንተ አጉር። ጠሁ እኮዳ አት መርት መገን ዎሞመተኔ አዋጅ» ዬስ። 61 አሞ ዎሉ መንቹ «ቀርቾ! አን አወናንኬ። ጠሁ እኮዳ ብርስ ምንኤ መነ ‹ጡመ ሄእዬ› ዩንተ ስናበቴኤ» ዬእ። 62 ዬሱሱንኩ «ሆገኦተ ከድ ዎንቹተ አንጋንተሰ አፍ ዘኩ ፈንቀልት ጡዳሩ ሆሩንኩ መገን ዎሞማ ሀስሱምቧረ» ዬስ።
1 ህከኒች ዘኪን ቀርቹ ዬሱሱ ለመላዱመ ዎሉ አወናኑ ዶዕርኬእ እስ መሮተ ሰውዬ ከተመሃ መዕንታ ሆረንከ ለ-ለሙ አስ ብሬንተስ ሶኮሰ። 2 እስን «ሀጢዴኖስሩ በትናሻ። እኮዳ ሁጀታኑስ ቀ። ህከኒ ሀጢድስ አኑ ሀጢዲሀንስ ሁጀታኑ ሶሁንተ ኡጭዬ። 3 አቼ መርዬ፤ ህኩዕኒን፥ አን ሆለገ ፉሽ ኦሮ ሜሬሩ ሶሀዮንክዕኔ። 4 ቦርሰ እንዶ ከረጢተ እንዶ ጫመ አፌኖችዬ። አሞ አዬኒ ዎቃን ጡምጨንቴነን ጄቹተ በእሴኖችዬ። 5 ሀከ ምንሃ ኣጌንተደ ብርስቴን ‹ጡሙ ከን ምኒ እሁን› ይዬ። 6 ህከኔን ጡም መንቹ ዮደ ጡሙዕኔ እስ አሌን ፎሎጨኖ። እኮዳ ዮበእደ ጡሙዕኔ ክዕኔኤበንከ ፈንቀለኖ። 7 ሁጀተኖሀኒ ደሞሱ ሀስሰኖስተኔ ኣጌንተ ምኔን ኣስቶዕኔረ እቴነኒ አጌነኒ ኤጌርዬ በጋን ምኒች ምን ዘህቴኖችዬ። 8 አሞ ኣጌንተ ከተማን ሆራንን ኣቄመዕኔደ ኣሴመዕኔረ እችዬ። 9 ህከን ከተማን ዮ ሞሳኑ ፈይሽዬ። አሞ ‹መገን ዎሞመት ክዕኔኤበ ህንጭቴእ› ይዬሰ። 10 - 11 ሀከ ከተመሃ ኣጌንተ ጃተ መኑ ኣቁምቦዕኔደ ከተምስ ጎዳናን ፉልቴን ‹ህኩዕኒን፥ ጡር እሁንተዕኔ ሎካንተኔ ዮ ከተምዕኔ ቡሁተ ግግሽነዮንክዕኔ። እኮዳ መገን ዎሞመት ክዕኔኤበ ህንጭቶገ ካን ደግዬ› ይዬ። 12 አን ኩላንክዕኔ፤ ፍርድ በር ህከን ከተሚች አበ ሶዶም ከተሚ ቢለኖ» ዬሰ። 13 ዬሱሱ «ኣዬ አቴ ኮራዜ! ኣዬ አቴ ቤተሰይደ! ክዕኔኤባን አሰንቶ ማለሉት ጢሮስነ ሲዶን ከተማን አሰንቴ እክየን እሶኦት ጥጅ ኦድሸተ ኦደቅት ጠበሮን አፉዕልት ሆለመ ጄቾች ብሬን ባጢለሰ ቢረ ይታ እኬ። 14 ጠሁ እኮዳ ፍርድ በር ክዕኔኤች አበ ጢሮስነ ሲዶን ከተሚ ቢለኖ። 15 አሞ ቴ ቅፍርናሆም ከተንቾ! ሰማ ኢለንቀጤች ጦቅ ጦቅትንዶ? ስኦላን ድርታንት» ዬእ። 16 አሞ አወናኒሀንስ «ክዕኔኤተ መጮጨኖ ኤስን መጮጨኗ። አሞ ክዕኔኤተ ግበኖ ኤስን ግበኗ። ህትጉንተ ኤስ ግበኖ ኤስ ሶኮንከ ግበኗ» ዬእ። 17 ለመላዱሙንኩ አወናኑ ሶሀንቶቢች በጅጎን ፈንቀልት «ቀርቾ! ሱዕሚንተክ ሀቡሱሁ አዘዘሜኔ!» ይቶእ። 18 ዬሱሱንኩ «ሼጣንቹ በንቆገ ሰሜች ኡበንየን ጡጆም። 19 ህኩዕኒን፥ አን ዎረሃ ‹ግንጠ› ዬኖ መርዛሙ ቆጨንቸሃ ሃንቴነንተነ ዲን መቆ ሆረንከ ኤጌዲ ደንድቴነንተ መቆ ኣሳንክዕኔ። ጌነኖዕኔሩንኩ ሜጡሩ ዮበአ። 20 ጠሁ እኮዳ ሱዕሙዕኔ ሰማን ጣፈሞተኔ በጅግዬ በጋን ሀቡሱ አዘዘሞክዕኔተኔ በጅጌኖችዬ» ዬሰ። 21 ህተ ጃንተ ዬሱሱ ጡማንቾ አያኒን በጅቀም «ሰሜነ ኡለ ቀርቹ እኮንት ኢ አነ! ከ ጠሀ ቆራካቺ መሌሳካቺ ማጥኬእ ጪላካ ደግሲሶንትተኔ ገለጣንኬ። ፥ ኢ አነ! ዳፉንኩስ ኪ ደናሙ ሰውቱ ህትጎና። 22 ሆሩሩንኩ አኒችኤ ኣሰሜኤ። ቤቱ አዬትንዶ አኒች ህግየን አዪ ደገኖበአ። ህትጉንተ አኑ አዬትንዶ ቤቲቺ ቤቱ ለሊሶስተ ��ዕሬ መንቺቺ ህግየን አዪ ደገኖበአ» ዬእ። 23 ህከኒች ዘኪን አወናንስበ ፈንቀልኬእ እሶኦ ጠሊ «አዕኖኦት ጡዴንተረ ጡዳ እልት ማሰአንቴታ። 24 አን ኩላንክዕኔ፤ ዳፉንኩስ ሆለሙ ህራጋኑሁ ዎማከቲ አዕኖኦት ጡዴንተረ ጡዶተ ቁልጥቴ እኬ፤ እኮዳ ጡድምበአ። ህትጉንተ አዕኖኦት መጮቴንተረ መጮቶተ ቁልጥቴ እኬ፤ እኮዳ መጮትምበአ» ዬሰ። 25 መገን ሴረ ደገኖ መቱ መንቹ ጦቅይ ኡርኬእ ዬሱሰ ኬኖተ «ሮስሳንቾ! ዶሊ ሆሪንከ ጎፉምቡተ ሄቸተ ደቆተ መ አሱ?» ዬእ። 26 ዬሱሱንኩ «ሴራን ጣፈሞ መሃን? አሞ ህከስ ሀትጉተ አነበበዮንት?» ዬስ። 27 ህኩ መንቹንኩ ፈንቀሽኬእ « ‹ቀርቹ መገኑክ ዊማንክ ዎዘኒን፥ ዊማንክ ፎሊን፥ ዊማንክ መቄኒ ዊማንክ ሰውቲኒ ኢት። አሞ ኦሌቹክ ገግክገ ኢት› ያኖ» ዬእ። 28 ዬሱሱንኩ «ገርተ ፈንቀሽቴንት። ካን አስ። ዶሊ ሆሪንከ ሄኣንት» ዬስ። 29 ህኩ መገን ሴረ ደገኖ መንቹንኩ ገገስ ሙጩሩ አሶተ ሀሽኬእ ዬሱሰ «ኦሌቹኤ አዬት?» ይ ጠዕሜእ። 30 ዬሱሱንኩ ፈንቀሽ «መቱ መንቹ ዬሩሳሌም ከተሚች እያርኮ ከተመ መረዮ እኬ። እሱንከ ቦጋኑ አፍ ኦድሸስ ቃርት ኦልቶስሀኒች ዘኪን ሂለስ ፎል ኡጅት አጉርት ኦሮቶእ። 31 ህትጉተ እኬሀኔን ህከን ዎቄን መቱ ቄስቹ ህገዮ እኬ። እስን ህከ ኦለሞ መንቹ ጡጆ ጃተ ሺኒን ህግ ኦሮቄእ። 32 ህትጉንተ መቱ ሌውቹ ህተ መዕንተ ዋሎ ጃተ ህከ መንቹ ጡጅኬእ ሺኒን ህግ ኦሮቄእ። 33 ጠሁ እኮዳ መቱ ሰማር ባድ መንቹ ህከን ዉዲን ህገን ህኩ መንቹ ዮበ ዋሎ። እስን ጡጆስ ጃተ ቅሽጥኬእ 34 እስበ ህንጭይ ዘይተሃ ዎይን ዳጠሃ መዛንተስ ዎር መዘስ ኡሱሮ። ህተእኬእ ገግስ ገማሞን ኮርሲሽ ኮሁ ገለኖበ ኦሮሽኬእ ሞስሾስ። 35 እስን ለንክ በሬ ገስመ ኮህ ምን አኒ ለሙ ብረ ፉሽ ኣስኬእ ‹ከ መንቹ ደናሞገ ሞስስ። ከኒች አበ ግዘ ፉሽቶንትደ ፈንቀል ዋሎም ጃተ ባታንኬ› ዬእ። 36 አቼ ህከን ሰሷንከ መንቺች ቦጋኑ ኦልትየን ኡቦ መንቺ ኦሌቹ እሁስ ጡድሾ ሀከስ አጉደዮሄ?» ዬእ። 37 መገን ሴረ ደገኖ መንቹንኩ «ቅሽጥ ካዕሌስየ» ዬእ። ዬሱሱንኩ «አቲ መርት ህትጉንተ አስ» ዬስ። 38 ዬሱሱ አወናኒንተስን ዎቃ መረመን መቱ ኦሎ ኣጎ። ህከኔን «ማርተ» ዬኖ መትት ሜንትቹት ምኔንተሴ ኣቅቶስ። 39 እሴንከ «ማራሜ» ዬኖ ህዞት ዮሴ እኬ። ህቲንን ዬሱስ ሎከባን አፉዕልት ሮስሰኖረ መጮተዮ እኬ። 40 ጠሁ እኮዳ ማርተ ሁጅት በተእየንሴ መቴዕምቶተኔ ዬሱስበ መርት «ቀርቾ! ህዞኤ ሜጥዕንን ሁጀቱንተ አጉርቶኤጉ ክቼእሰኖሄበእንዶ? አቼ ካዕልቱንተኤ ኩልሴ» ይቶእ። 41 ጠሁ እኮዳ ዬሱሱ ፈንቀሽ «ማርታ! ማርታ! አት ሆለመ ጠህተኔ ሀውተዮንትኒ ኡዕነንተዮንትኒ። 42 እኮዳ ሀስሰኖሲ ሜጦ ጠሀ ጠለ። ህከኒ ማራም አዪ እሴች ኣቂ ደንዱምቡረ ዎየኖሲ ዶዕርቴእ» ዬእ።
1 መቱ በር ዬሱሱ መቴ መዕኔን መገኑ ኡጨዮ እኬ። መገኑ ኡጭ ኬኦ ጃንተ አወናኒችስ መቱ «ቀርቾ! ዮሃንስ አወናኑስ መገኑ ኡጬኖገ ሮስሾገንከ አቲ መገኑ ኡጬኖገ ሮስስኔ» ዬስ። 2 ዬሱሱንኩ «መገኑ ኡጭቴነንተ ጃተ ‹[ሰማን ሄኣንት] ኒ አነ! ሱዕሙክ ማሰአሙን። ዎሞመክ ዋልቱን። [ሀሱክ ሰማን እኮገንከ ኡለኒ እሁን።] 3 በሬ እካኔ እቸተ በሪን በሪን ኣስኔ። 4 ነኦት ገጉኔ በእሾኔ መነ አጉናምገንከ በእሱኔ አጉርኔ። [ሂልማች ቆረብኔ በጋን] ኬነንቻን ኣግሶትኔ› ይዬ» ዬእ። 5 እስን አወናኑስ «ክዕኔኤች አዪ ጃሉ ዮሲ አንከሬ በቅታን ጃልስበ መር ‹ኢ ጃለ! ሰሱ እንጄረ ሌኤሴኤ። 6 ዳፉንኩስ መቱ ጃሉኤ መረንቻች ኢበ ዋሌእ። እሲንከ ኣሳምሩ ሜጡሩ ዮኤበአ› ዬደ 7 ምኒን ዮሲ ‹ሆግሶቴኤ! ቴሱ ኡሩት ቀረቀረንቴእ። ኦሱኤን ኤሳን በርገንት መዕነ አሌን ኦሰኤእ። ህከኒ ጦቅኬእ ሜጡራ ኣሶሄተ ደንዳምበአ› ይ ፈንቀሸኖንዶ? 8 አን ኩላንክዕኔ፤ ጃለስ እኮተኔ ኣሲ ጦቅዩምቦዳ ዎሩዋቾተኔ ጦቅይ ሀሾረ ሆረንከ ኣሰኖስ። 9 ህከኒ ኩላንክዕኔ፤ ኡጭዬ፤ ኣሰመኖክዕኔ። ሀሽዬ ደቅቴነንተ። ጎጨንከ ቆጭዬ፤ ፈነመኖክዕኔ። 10 ዳፉንኩስ አዪ ኡጬኢ ኣቀኖ። ሀሾንኩ ደቀኖ። ህትጉንተ ጎጨ ቆጨኖሀኒ ፈነመኖስ። 11 ክዕኔኤች ቤቱዕኔ ዳቡተ ኡጨቄዕኔደ ክኑ ኣሰኖ አኑ አዬት? ህትጉንተ ‹ቁርጡሜመተ ኣሴኤ› ይ ኡጨቄደ ዎሪቹ ኣስቴነንስንዶ? 12 አሞ ቁጰተ ኡጨቄደ ‹ግንጠ› ዬኖ መርዛሙ ቆጨንቸ ኣስቴነንስንዶ? 13 አቼ አዕኖኦት ሂላከንት ኦሶሀዕኔ ደናሙረ ኣሱ ደጌንታች ሰማን ሄአኖ አኑዕኔዕኑ ኡጭታሪ ጡማንቹ አያነ ህከኒች አበ ኣሰኖበእንዶ?» ዬሰ። 14 መቱ በር ዬሱሱ መቶ መንቺች ዱደ ሀቡሰ ፉሸዮ እኬ። ህኩ ሀቡሱንኩ ፉሎ ጃተ መንቹስ ጠሃቁ አፎ። መኑንኩ ህከን ጠሃን አብሽ ማለሎ። 15 ጠሁ እኮዳ ህከን መኒች መ-መቱ «እስ ሀቡሰ ፉሸኖ ሀቡስ ዎመ እኮ ቤልዜቡሌ መቄኔት» ይቶእ። 16 አሞ ዎሉስ መኑ ኬንቶስተ ሰሜች መላተ ጡድሱንተሰ ሀሶእ። 17 ጠሁ እኮዳ ዬሱሱ ሰውተሰ ደግኬእ «መቴ ዎሞመ ኣዜን ዮ መኑ ለሙበ እክ በአሞደ ህት ዎሞመት በኣእ። አሞ መቶ ምን መኑ አነነ እክ እስ-እሲንን በአሞደ ኡበኖ። 18 ህትጉንተ አዕኖኦት ኤስ ‹እስ ሀቡሰ ፉሸኖ ቤልዜቡሌ መቄኔት› ይቴነዮንተኤተኔ ሼጣንች ዎሞመት እስ-እሲንን በአንታኢ እኮደ ሀትክ ቃርት ኡሪ ደንድታ? 19 አን ሀቡሰ ፉሻሚ ቤልዜቡሌ መቄን እኮች ኦሱዕኔ አዬ ሱዕሚን ፉሽታለ? ህከንተኔ ኦሱዕኔ ክዕኔኤ አሌን ፍርድታረ እካእ። 20 ጠሁ እኮዳ አን ሀቡሰ ፉሻሚ መገን መቄን እኬደ መገን ዎሞመት ክዕኔኤበ ኢልቶገ ደግዬ። 21 አሞ መቱ ቆጠሩ መንቹ ኦል ኦዳተ ሆረንተ አፍ ምንስ ቆረጴደ ዮስሩ ኡለመኖበአ። 22 ጠሁ እኮዳ እሲች ቆጠረኖ ዋል ኦለም ቄሎስደ ዎና አመዕኔ እኬ ኦል ኦዳተ ኣቅ ከምኬእ ቦጎረ መኒሀንስ ቤሀኖ። 23 ኤሳን በርገም ዮበኢ ሆሩንኩ ኤሳን ኡርጨመኖ። ህትጉንተ ኤሳን ሜጡ ጠጰኡምቡ ሆሩንኩ ብነአኖ» ዬሰ። 24 ህከኒች ዘኪን ዬሱሱ «ሂሉ አያኑ መኒች ፉል ኦሮቄ ጃተ ፎሎጨኖበ ሀሰን ዎኡ ዮበእባን ሆራንን ዘሀኖ። ፎሎጨኖበንከ ሆጎ ጃተ ‹ዎና ፉሎም ምን ፈንቀል መራም› ያኖ። 25 ህከኒ ፈንቀል ዋለኖደ ምኑስ አባሰም ቅጠሜኢ ደገኖ። 26 ህከኒች ዘኪን መርኬእ እሲችስ ባሰ ሂላከተ ለመለ ዎሉ ሀቡሰ ዋሸኖ። እሶኦንት ኣግ ህከኔ ሄኣእ። ህከን መንች ዘካንቹ ዎናችስ ባሰ ሂለ እሀኖ» ዬእ። 27 ዬሱሱ ህካን ጠሃቀንየንን በትናሸ መን ሜሬሪች መትት ሜንትቹት ላገሴ ጦቀት ዬሱሰ «ኬስ እዬ ጎደቡሁ አት ቀንቶንት ኡኑኑሁ ማሰአንቴሃረ» ይቶስ። 28 ጠሁ እኮዳ እስ «ማሰአንቶሩዕኑ መገን ላገተ መጮት ቆረባሃረ» ዬእ። 29 በትናሹ መኑ ጠጵዬ ጃተ ዬሱሱ «ከ ዶል መኑ አብሽ ሂላ፤ መላተ ጡዶተ ሀሰዮእ። እኮዳ ዮናሴ መላች ህግየን ዎልት መላት ሆረን ኣሰንታስበአ። 30 ዳፉንኩስ ዮናስ ናናዌ ከተም መኒ መላተ እኮገንከ መንች ቤቱሁ ከን ዶል መኒ መላተ እሀኖ። 31 ሙጌን ዉድ ባድ ዎመት ‹ሳበ› ዬኖት ሰለሞኔ ቆርመተ መጮቶተ ኡለ ቶቺች ዋልቶተኔ ፍርድ በር ከን ዶል መኒን በርገንት ኬእኬእ እሶኦ አሌን ፍርድታእ። ህኩዕኒን፥ ሰለሞኔች አበኖ ከኔ ዮእ። 32 ህትጉንተ ናናዌ ከተም መኑ ዮናስ ሰበክየንሰ ባጢለሰ ቢረ ይቶተኔ ፍርድ በር ከን ዶል መኒን በርገንት ኬእኬእ እሶኦ አሌን ፍርድታእ። ህኩዕኒን፥ ዮናሴች አበኖ ከኔ ዮእ» ዬእ። 33 ዬሱሱንኩ «አዪ ኩራዝ ጫክሽኬእ ምን ኣገኖ መኑ ጫከ ጡዲ ደንደኖባን ኩራዝ ሰቀሌኖሀኔን አፉሸኖ በጋን ማጭ እንዶ ቁነ እፍሽ አፉሸኖ ዮበአ። 34 ህትጉንተ እልክ አልክየ ጫከ። እልክ ፈየተ እኮ ጃተ አሉክ ሆሩንኩ ጫከኖ። አሞ እልክ ፈየተ እኩምቡ ጃተ አሉክ ሆሩንኩ ቱንሰኖ። 35 ህከንተኔ ኬሳን ዮ ጫኩ ቱንሱምቦገ ቆረጵ። 36 አሉክ ሜጡቡ ቱንሱዕናች ጫከ ጠለ እኮደ ኩራዝ ጫኩ አብሽ ጫክሰኖሄ ቀጠ አሉክ ሆሩንኩ ጫከኖ» ዬእ። 37 ዬሱሱ ህካን ጠሃቀንየንን መቱ ፋሪስቹ ምኔንተስ ሆሹ እቱንተ ኡጬስ። ህከኒ ዬሱሱ ምን ኣግ ማዳን አፉዕሌእ። 38 ዬሱሱ ሆሹ እተኖሀኒች ብርስ አንገስ ኣዕሉ ሆጎገ ህኩ ፋሪስቹ ጡጆ ጃተ አብሽ ማለሎ። 39 ህከኒ ቀርቹ ዬሱሱ ህከ ፋሪስቹ «አዕኖኦት ፋሪሰት! ኩባይነ ሰህን ኤተሩስ ሙጩርስቴነንተ። እኮዳ ኣዜንተዕኔ መቄሱሁ ሂልመቲ ዊንቴእ። 40 ኩ ቀላከት! ኤተር ዉዱ ቆጬኢ ኣዝስ ዉዱ ቆጭምበእንዶ? 41 ህከኒ ኣዜ ዮሲ ቡጢ ምጡዋተ አስቴን ኣስዬ። ሆሩሩንኩ ሙጩሩ እሀኖክዕኔ። 42 ጠሁ እኮዳ አዕኖኦት ፋሪሰት መንዞች፥ ጠለቾቺ አነነ አነነ ገቴ ጠጎቺ አስራተ ፉሽቴነን ገሬ ፍርደሃ መገኑ ኢቱሃ ገዴንተተኔ ክዕኔኤ ኣዬ! እኮዳ ዎሉረሲ አጉርቴኑዕናች ከ ጠሀ አሱ ሀስሰኖዕኔ እኬ። 43 አሞ ጠጵት ምናካን አብን በርጩማን አፉዕሉሃ ድኩት ዮባን ጡምሴኑንተዕኔ ኢትቴነንተተኔሃ ክዕኔኤ ፋሪሳ ኣዬ! 44 መኑ ደጉዕናች አሊንተሰ መረመኖ ለልቱምቡ ሞገተ አጉዴነንተተኔ ክዕኔኤ ኣዬ!» ዬሰ። 45 መገን ሴረ ደጋሪች መቱ ፈንቀሽ «ሮስሳንቾ! ካን ዩክ አሞ ኔስ ቦሮሯንክበለ!» ዬስ። 46 ዬሱሱንኩ ፈንቀሽኬእ «እዪ ኬዕማሸተ እይነተ መናን እዪሴን እይነስ አዕኖኦት ገጉዕኔ መቴየንስ ዙሩዕምቾንተዕኔ ኡልቴኑምቡተኔ ክዕኔኤ መገን ሴረ ደጋኒ ኣዬ! 47 አሞ አናከዕኔ ሽቶ ህራጋን ሞጉ መክሴነንተተኔ ክዕኔኤ ኣዬ! 48 ህከኒ አዕኖኦት ነቃሻከተኒ አናከዕኔ ሂለ ሁጄን ኢተንቴንታረኒ። ዳፉንኩስ አናከዕኔ ሽቴሰ፤ አዕኖኦቲ ሞጉሰ መክሴነዮንተ። 49 ህከንተኔ መገን ቆርመት ‹አን እሶኦበ ህራጋኑሃ ሶቀማኑሃ ሶሃም። እሶኦችን መ-መቱሰ ሽታእኒ ሸርታእኒ› ይቴእ። 50 - 51 ህኩን እሀኖንኩ ኡለት ቆጨንቶሀኒች አፍ ዱነሞ ሆራንከ ህራጋን ቄጊ ህኩስን ኣቤሌ ቄጊች አፍ ክትመ ክትሜኖ ሳጥንነ መገን ኬሰሞ ምን ሜሬሮን ሬሄ ዘካራሴ ቄግ ኢለንቀጤች ከን ዶል መኑ ጠዕመመኖተኔሃት። ፥ አን ያንክዕኔ፤ ህከን ቄጊ ከን ዶል መኑ ጠዕመመኖ። 52 አሞ ቆርመ ቁልፈ ኣቅቴንተተኔ ክዕኔኤ መገን ሴረ ደጋኒ ኣዬ! ህትኬን አዕኖኦት ገጉዕኔ ኣጌንምበአ። አሞ ኣገኖ መነሃ ከንቴንተ» ዬእ። 53 - 54 ዬሱሱ ህከምቢች ኦሮቀንየንን ሴር ሮስሳኑሁ ፋሪሰቲ መትት ሉሰት አፌችስ ፉልትየን አፎስተ ሀስኬእ አብስ ኡርጨሙሃ ሆለመ ጠህተኔ ጠሃቁንተ ሱርቁንሱሃ አፎእ።
1 ህተ ጃተ በትናሸ ኩሜ መኑ ጠጵኬእ በትኔች ኬኦ እስ-እስን ሃዕመመዮሀኔን ዬሱሱ ብርስ አወናኒሀንስ «ፋሪሰ ሺሻች ቆረጵዬ። ህኩስን ሳድጨንቻንሰ። 2 ጠሁ እኮዳ እፍሰም ፈነሙዕናቺ ማጠም ደገሙዕናቺ ፈአኖሩ ሜጡሩ ዮበአ። 3 ህከኒ ቱንሶን ጠሃቴነንተሩ ሆሩንኩ ጫካን መጮጨመኖ። ህትጉንተ ጡፈሜ ምኔን ሀሻሽቴን መጨ ጠሃቴንታንኩ ምን አሌን አዋጀመኖ» ዬእ። 4 ዬሱሱ «ክዕኔኤ ኢ ጃላካ ያንክዕኔ፤ ማለ ሽታረ ህከኒች ዘኪን ህከኒች አበ ሜጡራ አሲ ደንድቱምቡረ ዋጅቴኖችዬ። 5 ጠሁ እኮዳ አዬ ዋጁ ሀስሰኖዕኔንዶ ቃርስ ኩላንክዕኔ። ሼሀኒች ዘኪን ዶሊ ሆሪንከ ጠእቱምቦ ጊራን ኡጀኖ መቆ ዮ መገኑ ዋጅዬ። ፤ አን ያንክዕኔ፤ እሱ ዋጅዬ። 6 ኦንትት ጣፉሉቅቹት መቱ ሳንትበ ህረንተዮበእንዶ? ሆረ እሶኦቺ መትሴ መገን ብሬን ሀበንታበአ። 7 ክዕኔኤቢንኩ ሆረን ቦቆዕኔ ሙሙሁ ፈኡዕናች ሆሩንኩ ዎልሰሜሃ። ህከኒ አዕኖኦት ሆለመ ጣፉሉቄኤቺ አብቴነንተተኔ ዋጅቴኖችዬ» ዬእ። 8 ዬሱሱ «አን ኩላንክዕኔ፤ መን ብሬን ነቀሰኖኤሀኒ ሆሪንከ መንች ቤቱሁ መገን ሰሜ ሶቀማን ብሬን ነቀሰኖስ። 9 ህትጉንተ መን ብሬን ካደኖኤ ሆሩንኩ መገን ሰሜ ሶቀማን ብሬን ካደመኖ። 10 አሞ መንች ቤቱ ቦሮረኖሀንቢ ሆርቢንኩ ባጢሉስ አጉረመኖ። ጠሁ እኮዳ ጡማንቹ አያነ ቦሮረኖሀን ባጢሉ ሆረን አጉረመኖበአ። 11 መኑንኩ ጠጵት ምናከበ፥ ገሻን ብርታ ዳናከ ብርታ ፍርዲ ዋሽታዕኔ ጃተ ‹ሀትጉተ እንዶ መ ፈንቀሽናም?› እንዶ ‹መ ይናም?› ይቴን ክቼኤኖችዬ። 12 ዳፉንኩስ ዩ ሀስሰኖዕኔረ ህተ ጃንተ ጡማንቹ አያኑ ኩለኖዕኔ» ዬእ። 13 ህከን በትናሸ መን ሜሬሪች መቱ መንቹ «ሮስሳንቾ! አንኔ ሀገረ ኤሳ ቤሁንተ ህዜሃዕኔ ኩል» ዬስ። 14 ጠሁ እኮዳ ዬሱሱ «መንቾ! ክዕኔኤ አሌን ዳነሃ ሀገረ ቤሃንቹሃ አሴኤ አዬት?» ዬስ። 15 እስን ሆራንከ መኒ «መን ሄቸት ቀባጦስ በትኔን እኩምቡተኔ ቁልጢች ሆሪችን ቃርቴን ቆረጵዬ» ዬሰ። 16 ዬሱሱንኩ መኒ «መቶ ቀባጣሞ መንች ኡለት አብስ በትናሸተ ውጠተ ላልቶስ። 17 ህኩ መንቹንኩ ዎዘናንተስ ‹ውጠኤ ጠጰኣም መዕንት ዮበእተኔ መ አሴምደ ዎየኖ?› ይ ሰውዬእ። 18 እስን ‹አሳሚ ከኔት፤ ጎተራከኤ ሆረንተ ዝርኬእ ሀራራከተ ጎተረተ ደዳም። ህተእኬእ ውጠኤ ሆረንታ ቀባጡኤ ህከኔ ጠጰኣም። 19 አንን ፎልቹኤ ‹ኢ ፎሌ! በትናሸ ዶሊ እካሄ ቀጠት ቀባጡት ዮኬ። ህከኒ አት ፎሎጭ! እት! አግ! በጅቀም!› ያም› ዬእ። 20 ጠሁ እኮዳ መገኑ ‹ኩ ቀሉ! ከበሬ አንከር ፎልቹክ ኬሳች ኦሮሴኖ። ኩ ቅጠንሰቅቶንትሩ ሆሩንኩ አዬቢ እሀኖለ?› ዬስ። 21 ገጊሀንስ ቀባጡተ ጠጰአን መገንባን ቀባጣሙ እሁምቡ ሆሩንኩ ህትጎና» ይ መትተ አጉዲሸተ ኩሎሰ። 22 ዬሱሱ አወናኒሀንስ «አን ያንክዕኔ፤ ፎሊሀዕኔ እቴነንተሪሃ አሌንተዕኔ ኦደቅቴነንተሪሃ ክቼኤኖችዬ። 23 ዳፉንኩስ እቻች ፎሉ፥ ኦድሻችን መኖመት አብታእ። 24 ሀኖ ዋዎረ ጡጅዬለ። ውጣበአ፤ ሀጢዳበእን። አሞ ጠጰታ ምኑ እንዶ ጎተሩ ዮሰበአ። እሁን በጋን እታረ መገኑ ኣሰኖሰ። አሞ አዕኖኦት ጪኣች አብሴን አባከተበእንዶ? 25 አሞ ክዕኔኤች ክቼእኬእ ሄቸስ ዶላን መቱ በር በርጊ ደንደኖ አዬት? 26 ህከደ ከ ቀሁ ጠሀንከ አሲ ደንድቴኑምቡረ እኬንታች ዎሎሪሀንስ ሚመ ክቼኤነዮንተ? 27 አሞ ዘራሩት ሀትጉተ ሌኣእንዶ ጡጅዬ። እሶኦንት ሁጄን ሆጋበእኒ ሱቅታበእኒ። እኮዳ ዎሉ ፈእየን ሰለሞኒ ህከን ሆራንከ አብኔንተስ ህተን ዘራሮች መቴስገ ኦደቅምበአ። 28 ጠሁ እኮዳ መገኑ ከበር ጡደንትየን ገኣተ ጊረ ኡጄኖ ሀደ ህጥንተ ህወንከ ኦዲሰኖ እኮች ኩ አመዕነቱ ኮቼዕኔ መኑ! ክዕኔኤተዕኑ ሀበንከ ኦዲሰኖ እኬ? 29 ህከኒ ‹መ እንታም? መ አንጋም?› ይቴነን ሰውቲን ክቼኤኖችዬ። 30 ህከረንከ ኡለ አሌን ዮ ምናደቡ ሆሩንኩ ሀሳእ። እኮዳ ክዕኔኤ ህኩሩ ሀስሰኖዕኔገ ሰሜ አኑዕኔ ደገኖ። 31 አዕኖኦት ህከን ቆደ መገን ዎሞመተ ሀሽዬ፤ ሀስሰኖዕኔሩ ሆሩንኩ ኣሰመኖዕኔ። 32 አት ቀሆ ዜመ! ሰሜ አኑዕኔ ዎሞመተ ኣሶዕኔተ ኢቴተኔ ዋጅቴኖችዬ። 33 ህከኒ ዮዕኔረ ህርቴን ቡጢ ምጡዋተ ኣስዬ። ኑባጵቱምቡ ከረጢተተ ቅጠንሰቅቴን ጎፉምቡ ግዘ ኣዜንተስ ዎርቴን ሞገኣኑ ኢሉምቦባኒ ብሉ እቱምቦባኒ ሰማን አፉሸቅዬ። 34 ዳፉንኩስ ግዙዕኔ ዮባን ህከኔ ዎዘኑዕኔ ሄአኖ» ዬእ። 35 ዬሱሱ «የመዙዕኔ ቆዕርቴን ጫከዕኔን ጫክሴንተረ እክዬ። 36 አሞ ቀርቹሰ ዋልኬእ ጎጨ ቆጬ ጃንተ ፈንቶስተ ቦሎችቢች ምን ዋለንቀጤች ቃርት ቆረባ ካዕላኑ አጉጅዬ። 37 ቀርቹሰን ዋሎ ጃተ ቃርት ቆረበንየን ደገኖሰ ሶቀማኑ ማሰአንቴሃረ። ገርተ ያንክዕኔ፤ እስን የመዙስ ቆዕርኬእ ማዳን አፉሽ አደለን እትሰኖሰ። 38 አይደጎ ቀርቹሰ ለንክ በቅታን እንዶ ሰክ በቅታን ዋሎ ጃታ ቃርት ቆረበንየን ደገኖ ሶቀማኑ ማሰአንቴሃረ። 39 ጠሁ እኮዳ ካን ደግዬ፤ መቶ ምን አኑ ሞገኣንቹ ሀከ ሳተ ዋለኖንዶ ደጌ እክየን ምኑስ እመሙንተ ሰዕምያኖበአ እኬ። 40 ህትጉንተ መንች ቤቱ ሰውቴኑምቦ ሳታን ዋለኖተኔ አዕኖኦቲ ቅጠንቴን ቆረብዬ» ዬሰ። 41 ጴጥሮስን «ቀርቾ! ተ አጉዲሸተ ኩልተዮንቲ ኔሳ ጠሊሃትንዶ ሆሪሃንት?» ዬእ። 42 ዬሱሱንኩ ፈንቀሽ «ህከደ እታረ ጄቾን ኣሱንተሰ ቀርቹ ምንስ መን አሌን ዳኖንሰኖ አመዕነሜ ዎዘናሙ አዘዛንቹ አዬት? 43 ቀርቹስ ዋልኬእ የመሞገ አሰንየን ደገኖስ ህኩ ካዕላንቹ ማሰአሜሃ። 44 ገርተ ያንክዕኔ፤ ቀርቹስ ህከ ካዕላንቹ ዮስራን ሆራራንን ዳኖንሰኖስ። 45 ጠሁ እኮዳ ህኩ ካዕላንቹ ዎዘናንተስ ‹ቀርቹኤ ዋሉዕናች ደሰኖ› ይኬእ ጎንነ ሜንት ሶቀማኑ ኦለን እቱ፥ አጉሃ ድምቡሃ አፎደ 46 ህከን ካዕላንች ቀርቹ ‹ዋለኖ› ይ ቆረቡምቦ በሬኒ ደጉምቦ ሳታኒ ደንጎን ዋልኬእ አብሽ ቀጠአኖስኒ አመዕነንቱምቦ መኒን በርገኖስኒ። 47 ቀርችስ ሰውተ ደገን ቅጠሙምቡነ ቀርቹስ ሀሾገ ሁጀቱምቡ ካዕላንቹ ቃረገ ገረፈመኖ። 48 እኮዳ ቀርችስ ሰውተ ደጉዕናች ገረፍሲሰኖረ አሰኖ ካዕላንች ገረፈሙ ቢላሻ። ዳፉንኩስ በትናሹሩ ኣሰሞ መንቺች በትናሸንከ ሀሴኖ። ህትጉንተ በትናሸተ ሀደረተ ኣሴመ መንቺችን በትሴንን ኣቂ ሀሴኖ» ዬእ። 49 ዬሱሱ «አን ኡለ አሌን ጊረተ አፍሲሲ ዋሌም። ህከኒ ሰርብት አጵቴ እክየን ሀበንከ ኢታም እኬ። 50 ጠሁ እኮዳ መቱ ጠመቀማም ጥንቀቱ ዮኤ። ህኩንን እሀንቀጤች ፎሎጩ ዮኤበአ። 51 አን ኡላ ጡመ ኣሶተ ዋሎሚ አጉደዮክዕኔንዶ? ህትጉተበአ። ገርስ ኩላንክዕኔ፤ ጡም ቆደ አነኖመተ ኤቦታት ዋሎሚ። 52 ከበሬች አፍ መቶ ምኔን ኦንቱ መኑ ሄኣሪች ሰሱስ ለም አሌን አሞ ለሙስ ሰስ አሌን ኬእ በአንታእ። 53 ህትጉንተ አኑ ቤትስ አሌን፥ ቤቱንኩ አንስ አሌን፥ አመት ቤቶሴ አሌን፥ ቤቱንት አመሴ አሌን፥ በሉት ቤትሴ ምን አመ አሌን፥ ቤት ምን አመንት በሎሴ አሌን ኬእኬእ አነነ እካእ» ዬእ። 54 ዬሱሱ መኒ «ጎሙ አራግ ዉዲን ኬአንየን ጡዴንተ ጃተ ሜጤን ‹ጤኑ ኡቦታት› ይቴነንተ። ይቴንተገንከ እሀኖ። 55 አሞ ሙጌን ዉዲን ቦብርሰንየን ጡዴንተ ጃተ ‹ቃሩ ኢቡ እሆታት› ይቴነንተ። ህኩሲ ይቴንተገን እሀኖ። 56 አዕኖኦት ኩ ሳድጨማኑ! ሰሜነ ኡለ ጠሀ ጡዴንኬኤን አነነ አቴን ደጌነንተ። እኮዳ ሚሃመ ከ ዶለ አነነ አቴን ደጌኑምቡ?» ዬሰ። 57 ዬሱሱ «አዕኖኦት ገጊሀዕኔ ገርተ እኮ ጠሀ ፍርድቴኑምቡ ሚሃት? 58 ዲኒንተክ በርገንት ዳንበ መርታንት ጃተ ዎቃንን ሆቀሚ አጰም። ህኩ ዮበእደ ዲኑክ ዳንበ ኦሮሽየን ዳኑ ቤጠቤቺ ህግሽ ኣሰኖሄ። አሞ ቤጣቤቹስ ኡሱሮ ምን ኣግሰኖኬ። 59 ገርተ ያንኬ፤ ሰሙንቲ ፈኡዕነ ባቱዕናች ህከምቢች ሆረን ፉልታንትበአ» ዬእ።
1 ህተ ጃተ መኑ ዋልት «ገሊል ባድ መኑ ክትመ ክትንተንየን ጵላጦስ ሽኬእ ቄግሰ ክትማንተሰን ኤሬሬእ» ይት ዬሱሲ ኩልቶእ። 2 ዬሱሱንኩ ፈንቀሽ «ኩ ገሊል ባድ መኑ ህትጎኑ በኡ ኢሌሰተኔ ገሊል ባዶን ዮ ዎሎ መኒች ሆሪችን አብስ ባጢላመተ አጉደዮክዕኔንዶ? 3 አን ኩላንክዕኔ፤ ህትጉተበአ። ጠሁ እኮዳ ቢረ ይቴኑምቦደ አዕኖኦቲ ሆሩንኩዕኔ ህትጉንተ በኤነንተ። 4 አሞ ‹ሰልሆመ› ዬኖባን ግምቡ አሌንተሰ ኡብ ሼ ቶነ ሄዜቱንኩ መንቹ ዬሩሳሌማን ሄኣ ዎሎ መኒች ሆሪችን አብስ ባጢላመተ አጉደዮክዕኔንዶ? 5 አን ኩላንክዕኔ፤ ህትጉተበአ። ጠሁ እኮዳ ቢረ ይቴኑምቦደ አዕኖኦቲ ሆሩንኩዕኔ ህትጉንተ በኤነንተ» ዬሰ። 6 ዬሱሱ «መቶ መንቺ ዎይንስ ሀቅ ኣዜን ካሰሜ መቱ ኦዴቹተ አጉደኖ ሀቁ ዮስ እኬ። እስን ላሉተ ሀሽ ሀቁችስበ ዋልኬእ ሜጡራ ሆጎ። 7 ህከኒ እስን ዎይን ጡደ ሁጀታንቺ ‹ህኩዕኒን፥ ከ ሰሱንከ ዎጋ ከን ሀቁቺች ላሉተ ሀሽ ዋልኬእ ሜጡራ ደግምበአ። ሙርት ኡጅ! ሚ ኡለተ በእሰኖ?› ዬስ። 8 ሁጀታንቹንኩ ‹ቀርቾ! ፈጋረስ ዘህሽ ቀሰንቀጤቺ ሸዕለ ኡጀንስቀጤቺ ከ ዎጋ ጠለ አጉርስ። 9 ዋለኖ ዎጌንከመ ላሎደ አብሽ ደናሟ። ጠሁ እኮዳ ላሉምቦደ ሙርት ኡጅቶተ ደንድታንት› ይ ፈንቀሼስ» ይኬእ ተ አጉዲሸተ ኩሎሰ። 10 ዬሱሱ ሰንበት በሬን ጠጵት ምናች መቶን ሮስሰዮ እኬ። 11 ህከኔን ሆግሰኖ ሂሉ አያኑ አፍየንሴ ቶነ ሄዜቱ ዎጋ ቁቴ መትት ሜንትቹት ዮ እኬ። እሴን ጠብት ኡሪ ሆረን ደንድቱምቡተ እኬ። 12 ዬሱሱንኩ ጡጆሴ ጃተ እስበ ገእኬእ «ሜንትቾ! ሆግሰኖኬ ሞሲች ሂረንቴንት» ይኬእ 13 አንገስ አሌንተሴ ኡጄእ። ህተ ጃንተ ጠብት ኡርትኬእ መገኑ ገለጥቶእ። 14 ጠሁ እኮዳ ዬሱሱ ሰንበት በሬን ፈይሾተኔ ህከን ጠጵት ምን ገሻንቹ አሙዕረም መኒሀንስ «ሄዜቶን ሁጅተ ሁጀቱ ሀስሰኖ ሌሁ በሩ ዮእ። ህከኒ ህተን በራካን ዋልቴነን ፈይዬ በጋን ሰንበት በሬን ደንዴሰኖበአ» ዬሰ። 15 ህከኒች ዘኪን ዬሱሱ ፈንቀሽ «ኩ ሳድጨማኑ! ክዕኔኤች አኑንኩ አኑንኩ ሰንበት በሬን ቦረስ ቆዕሊች እንዶ ሀሩቹስ ጎሊች ሂር ዎአ አግሲ መሰዮበእንዶ? 16 ት ሜንትቹት ሼጣንቹ ቶነ ሄዜቱ ዎጋ ኡሱርየንሴ ሄኤታ አብረሃሜተ ቤቱ። ህቲን ሰንበት በሬን ኡሱሮችሴ ሂረሙ ሀስሰኖሴበእንዶ?» ዬስ። 17 ዬሱሱ ህካን ጠሃቀንየንን እሲን ኡርጨንታ መኑ ሆሩንኩ ሳልቶእ። አሞ መኑ ሆሩንኩ ዬሱሱ አሴ ማለልሲሰኖ ጠሃን ሆራንን አብሽ በጅቀሞ። 18 ህከኒች ዘኪን ዬሱሱ «መገን ዎሞመት መ አጉዳ? አሞ አን ሚን አጉጠንሳንሴ? 19 መገን ዎሞመት መቱ መንቹ ገቴንተስ ውጮ ሀሚል እልተ አጉዳ ሀቅ ላልቹተ አጉዳእ። እሴን ሌእ ሀቅ ቀጠተ እካእ። ሰሜ ጪአንት ሀማንተሴ ዶዕነ ደጥታእ» ዬእ። 20 ለንኪሃ ዬሱሱ «መገን ዎሞመተ ሚን አጉጠንሳም? 21 መገን ዎሞመት መትት ሜንትቹት ሰሶ ሶሬ ቀሙ ሆሩንኩ ሁፍዩንተ ቀማንተስ ቁስቶ ሺሸ አጉዳእ» ዬእ። 22 ዬሱሱ ዬሩሳሌመ መረን ከተማካኒ ኦላካን ሆራኒ ሮስሰን ህገዮ እኬ። 23 - 24 ህተ ጃተ መቱ መንቹ «ቀርቾ! ፈኣሩ ቀ መነንዶ?» ይ ጠዕሜስ። ዬሱሱንኩ «ጡቀ ጎጪን ኣጌኖተ አጰምዬ። ዳፉንኩስ ሆለሙ መኑ ህከን ጎጪን ኣጊ ሀሰን ደንድቱምቦገ ኩላንክዕኔ። 25 ምንስ አኑ ጦቅይ ኡሩተ ጡፍ ከሞሀኒች ዘኪን አዕኖኦት ሀዳን ኡርቴን ጎጨ ቆጭቴነን ‹ቀርቾ! ፈንኔ!› ዩ አፌነንተ። እስን ፈንቀሽ ‹ሀኖች ዋልቴንታረንዶ ደጋንክዕኔበአ› ያኖዕኔ። 26 ህተ ጃንተ አዕኖኦት ‹ብሬንተክ እንቴምኒ አንጌምኒ። አሞ ጎዳናካንተኔን ሮስሴንት› ዩ አፌነንተ። 27 ጠሁ እኮዳ እስ ‹አን ያንክዕኔ፤ ሀኖች ዋልቴንታረንዶ ደጋንክዕኔበአ። አዕኖኦት ሂልመተ ሁጀቴነንተሩ ሆሩንኩ ኢቢች ፈጅዬ› ያኖዕኔ። 28 አዕኖኦንት አብረሃሜን፥ ይሳቀን፥ ያቆቤኒ ሆረንከ ህራጋኑሃ መገን ዎሞማን ጡዴን አዕኖኦንት ሀደ ፈኤንተገ ደጌንተ ጃተ ህከኔ ኦኤነንተኒ እንቁተ ኢጤነንተኒ። 29 አሞ መኑ አርፉል፥ አራግ፥ ብዜንነ ሙጌን ዉዲች ዋልት መገን ዎሞማን ማዳን አፉዕልታእ። 30 ህኩዕኒን፥ ዘካኒች ብሬረ እካሩ ህትጉንተ ብሬሪች ዘካኑ እካሩ ዮእ» ዬሰ። 31 ህተ ጃንተ ፋሪሳች መ-መቱ መኑ ዋልት ዬሱሰ «ሄሮድስ ሾሄተ ሀሰዮሄተኔ ከምቢች ፉልት ኦሮቅ» ይቶስ። 32 እስን «ህከን ዌንጌሬልቺ መርቴን ‹ከበሪ ገኣታ ሀቡሰ ፉሻም፤ ሞሳኑንከ ፈይሳም። ሰክ በርንከ ሁጅኤ ጦፋም› ያዮ ይቴን ኩልዬስ። 33 ጠሁ እኮዳ ህራጋንቹ ዬሩሳሌሚች ኤተሮ ሬሁ ሀስሱምቡስተኔ ከበር፥ ገኣታ ገአቶሺ ዬሩሳሌመ መሮተ ዎቄ አሌን ሄኡ ሀስሰኖኤ። 34 ዬሩሳሌመ! ህራጋኑሃ ሽታንቲ! ኪበ ሶሀንቶራ ክኒን ቀሳንቲ! አንተቤቹት ጪጮረሴ ጎኖንተሴ ጠጰታሀንገንከ አን ኦሱክ ጠጰኦተ ሀሾሚ ሜኤ ኮደ? ጠሁ እኮዳ አዕኖኦት ኢትቴንምበአ። 35 ህከኒ ምኑዕኔ ኦነኖ። አን ያንክዕኔ ‹ቀርች ሱዕሚን ዋለኖ ማሰአሜሃ› ይቴነንታ ኢለንቀጤች ከኒች ዘኪን ጡዴነንተኤበአ» ዬሰ።
1 መቶ ሰንበት በሬን ዬሱሱ ፋሪሰ አወንሳኒች መትስ ምኔን ሆሹ እቶተ ኣጌ እኬ። እሶኦንት መ አሰኖንዶ ጡዶተ ቆረበዮ እኬ። 2 ህከኔን አሉስ ደርሼ መቱ መንቹ ብሬንተስ ዮ እኬ። 3 ዬሱሱንኩ መገን ሴረ ደጋራ ፋሪሰታ «ሰንበት በሬን ፈይሱ ሀስሰኗንዶ ሀስሱምቧን?» ይ ጠዕሜእ። 4 ጠሁ እኮዳ እሶኦት ሰዕምት አጉርቶእ። ህከኒች ዘኪን ዬሱሱ ህከ ሞሳንቹ አፍ ፈይሽኬእ ስናበቾስ። 5 እስን «ክዕኔኤች ቤቱስ እንዶ ቦሩስ ሰንበት በሬን ኤሎን ኡቦደ ህተ ጃንተ ኤሌች ፉሹምቡ አዬት?» ዬሰ። 6 እሶኦንት ከን ጠሂ ሜጡራ ፈንቀሽቶስተ ደንድትምበአ። 7 ገአንቶ መኑንኩ አብን መዕንተ ዶዕርተንየን ጡጅኬእ ዬሱሱ 8 «አዪ ቦሎቸ ገኤሄደ አብን መዕኔን አፉዕልቶት። ዳፉንኩስ አይደጌ ኬሳች አበኖ መንቹ ገአሜኢ እሀኖ። 9 ለሙንከዕኔ ገኤ መንቹ ኪበ ዋል ‹ተ መዕንተ ከን መንቺ ኣስ› ያኖኬ። ህተ ጃንተ ሳልትኬእ ቀሆ መዕኔን አፉዕልታንት። 10 ጠሁ እኮዳ ቦሎቸ ገአንቶንት ጃተ ቀሆ መዕኔን አፉዕል። ገኤኬ መንቹንኩ ኪበ ዋልኬእ ‹ኢ ጃለ! ጦቅታ መዕኔን አፉዕል› ያኖኬ። ህተ ጃተ ኬሳንን ማዳን አፉዕሌ መን ብሬን አብን ደቅታንት። 11 ዳፉንኩስ ገገስ ጦቅ ጦቅ አሰኖ ሆሩንኩ ህርክ ያኖ። እኮዳ ገገስ ህርከአኖ አበኖ» ይ መትተ አጉዲሸተ ኩሎሰ። 12 አሞ ዬሱሱ እሱ ገኤ መንቹ «ሆሹ እንዶ ኦዝተ ቅጠንስቶንት ጃተ አይደጎ እሶኦቲ ኬስ ፈንቀሽት ገእትኬእ ቤነክ ባቱምቦገ ጃለክ እንዶ ህዛከክ እንዶ እለሙክ እንዶ ዱበሉ ኦሌክ መነ ገእቶት። 13 ጠሁ እኮዳ ድግሰ ድግሶንት ጃተ ቡጠ፥ አንገታ ሎከታ ሙረመ፥ ሺሀሃ ቆቀሃ ገእ። 14 ህካን አስቶንትደ ባቶሄተ ደንድቱምቡተኔ ማሰአንቴንቲ እካንት። አሞ ጡማኑ ሬሆች ኬኣ ጃተ መገኑ ባተኖኬ» ዬስ። 15 ዬሱሲን በርገንት ማዳን አፉዕልቶሪች መቱ ህካን መጮጬ ጃተ «መገን ዎሞማን እቸተ እተኖ ማሰአሜሃ» ዬስ። 16 ጠሁ እኮዳ ዬሱሱ ፈንቀሽ «መትተ ጃተ መቱ መንቹ በትናሸተ ኦዝተ ቅጠንስ ሆለመ መነ ገኤእ። 17 ኦዜስ ሳቱ ኢሌ ጃተ ‹ቴሱ ሆሩሩንኩ ቅጠሞተኔ ዋልዬ› ዩንተ ሶቀማንቹስ ገአንቶ መንበ ሶኮ። 18 ጠሁ እኮዳ ገአንቶሩ ሆሩንኩ አኑንኩ አኑንኩ ገጃጁ አፎእ። መቱስ ‹ኡለተ ህዕሬምተኔ መር ጡዱ ሀስሰኖኤ። ህከኒ ሀእ አጉሬኤ› ዬስ። 19 አሞ ዎሉስ ‹ኦንቱ ከዱ ቦረተ ህዕሬምተኔ ሆገእ ጡዶተ መረዮም። ህከኒ ሀእ አጉሬኤ› ዬእ። 20 ህትጉንተ ዎሉስ ‹ሜንትቹተ ኤበቄምተኔ ዋሎተ ደንዳምበአ› ዬእ። 21 ህኩ ሶቀማንቹንኩ ዋልኬእ ህካን ሆረንከ ቀርቺሀንስ ኩሎ። ህተ ጃተ ምንስ አኑ አሙሬን አግሺሀንስ ‹ሰርብት ከተም ጎዳናካኒ ጡቀ ዎቃካኒ ፉልት ቡጠ፥ አንገታ ሎከታ ሙረንቶረ፥ ቆቃከታ ሺሃከታ ዋሽት ኣግስ› ዬስ። 22 ሶቀማንቹንኩ ‹ቀርቾ! አዘዞንቴኤገን አሴም። እኮዳ ቴሱ መዕንት ዮእ› ዬእ። 23 ቀርቹንኩ ሶቀማንቺሀንስ ‹ገጠረ መስታ ጎዳናካኒ ጡቀ ዎቃካኒ ፉልት ምኑኤ ዊሙንተ መነ ዋለኖገ አስ። 24 ዳፉንኩስ አን ያንክዕኔ፤ ህከን ገአንቶ መኒች ሜጡሁ ኦዜችኤ አፎኒ አፈኖበአ› ዬእ» ዬሰ። 25 ሆለሙ መኑ ዬሱሲን በርገም መረመዮ እኬ። እስን መን ዉዱ ፈንቀል 26 «ኢበ ዋለኖ አዪ ሄኦደ አነስ፥ አመስ፥ ሜንትቹስ፥ ኦሱሲ ህዛከሲ ዎሉ ፈእየን ገግስ ሄቸቲ ፈኡዕነ ለጉምቦደ አወናንቹኤ እሆተ ደንደኖበአ። 27 አሞ አዪ መስቀለስ እይ አወኑምቡኤ አወናንቹኤ እሆተ ደንደኖበአ። 28 ክዕኔኤች ግምብ ምን ምኖተ ሀሰኖ መንቹ ዎና አፉዕልኬእ ጦፍሲሰኖ ቀጡ ግዙ ዮስንዶ ሸለጉምቡ አዬት? 29 ህኩ ዮበእደ ሾሁተ ኡጅኬእ ጦፍ ምኒ ደንዱ ሆጎደ ጡጆ ሆሩንኩ 30 ‹ኩ መንቹ ምኖተ አፍ ጦፉ ሆጌእ› ያን ገላጩ አፈኖ። 31 አሞ ቶርዱሜ ኩሜ ቤጠቤት ዮስ ዎሙ ለሞዱሜ ኩሜ ቤጠባ አፍ ዋለኖ ዎሚን ኦለሞተ ደንደኖንዶ? ኦለሚ መረኖስሀኒች ብርስ ዎና አፉዕልኬእ ኤረመኖበእንዶ? 32 ህኩ ዮበኢች ኩጵስ ቄዕረ ዎቃን ሄኦገን ሶቀማኑ ሶክ ኢተሞተ ኡጨቀኖ። 33 ህትጉንተ ዮስረ ሆረንከ አጉሩምቡ ክዕኔኤች አዪ አወናንቹኤ እሂ ደንደኖበአ» ዬሰ። 34 ቴሱ ዬሱሱ «መጥንት ደናምተ። ጠሁ እኮዳ መጥንት ጤኡምቦደ ጤዕነሴ ሚን ፈንቀሺ ደንዴኖ? 35 ህትጎነት መጥንት ኡላሃ እኮ ሸዕል ቱቢ ካዕልቱምቡተ እኮተኔ ፉሼን ኡጄኖሴ። አቼ መጮታ መጨት ዮሲ አዪ ቃርስ መጮጩን» ዬሰ።
1 መትተ ጃተ ቀረጣኑሁ ባጢላመቲ ሆሩንኩ ዬሱሲች መጮቶተ ህንጭተዮ እኬ። 2 ጠሁ እኮዳ ፋሪሰቲ ሴር ሮስሳኑሁ «ኩ መንቹ ባጢላመተ ኣቅኬእ እሶኦንን በርገም እተዮእ» ይት ጉንጉንቶእ። 3 - 4 ህከኒ ዬሱሱ እሶኦ «ክዕኔኤች ጥቤ ሆለት ዮሲ ህተን ሆላች መትስ በኦደ ሆንሳነ ሆንስስ ሆለተ ኡለ ኡዱመኣን ኡጅኬእ ህተ በኦስ መትተ ሆልቹተ ደገንቀጤች ሀሲ መሩምቡ አዬት? 5 ደጎሴ ጃተ በጅቀም ጌነኖንተስ እይ ዋለኖ። 6 ምንስ ኢሌ ጃንተ ጃላከሲ ኦሌስ መነሃ ሜጦማን ገእኬእ ‹በኦ ሆልቹኤ ደቄምተኔ ኤሳንን በርገንቴን በጅቀምዬ› ያኖሰ። 7 አን ኩላንክዕኔ፤ ህከንገንከ ባጢለ ቢረ ዩ ሀስሱምቡሰ ሆንሳነ ሆንሶ ጡማኒች አበ ባጢለስ ቢረ ያኖ ሜጦ ባጢላሚ ሰማን አበት በጅጉት እካእ። 8 ህትጉንተ ቶርዱሙ ታሙኑ ዮሴሀኒች መቱስ ታሙኑ በኦሴደ ኩራዝ ጫክስ ምንሴ አባስ ደገንቀጤች ቃርስት ሀሱምቡት ሜንትቹት ሀተኔት? 9 ደጎ ጃንተ ጃላከሴ ኦሌሴ መነሃ ሜጦማን ገእት ‹በኦኤ ታሙነ ደቄምተኔ ኤሳንን በርገንቴን በጅቀምዬ› ይታሰ። 10 አን ኩላንክዕኔ፤ ህከንገንከ ባጢለስ ቢረ ያኖ ሜጦ ባጢላሚ መገን ሰሜ ሶቀማን ብሬን በጅጉት እካእ» ይ ተ አጉዲሸተ ኩሎሰ። 11 ቴሱ ዬሱሱ «መቶ መንቺ ለምት ኦሱት ዮስ እኬ። 12 ህከሮኦችን ማዕኑስ አነስ ‹ኢ አነ! ዮኬሪች ኢለኖኤ ቆደ ኣሴኤ› ዬእ። አኑሰን ዮስረ ለሚንከሰ ቤኮ። 13 ቀሆ በሬች ዘኪን ህኩ ማዕኑ ቤቱ ዮስረ ሆረንከ ጠጰእ አፍ ቄዕረ ባዱ ኦሮቄእ። ህከኔን ግዘስ ሆረንከ ካዕሉምቦራን ብነእ በእሾ። 14 ዮስረ ሆረንከ ጦፎሀኒች ዘኪን ህከን ባዶን ቃሩ ጎሩ ኣግየን ህከ አደባ ሀዉ አፎ። 15 ህከኒ ህከን ባድ መኒች መቶን ድከኦ። መንቹስን ቦክስ ዜኤኖበ ዜኡንተ ሶኮስ። 16 ህኩ አደቦንኩ ቦክት እታ ኮንፈ እቶተ ቁልጠዮ እኬ። እኮዳ ሜጡራ ኣሰኖሲ ዮስበአ። 17 ዘካንቾንተስ ዎዘኑስ ፈንቀልየን ‹አንኤ ምኔን ቀጠረንት ሁጀታ ሁጀታኑ ሆሩንኩ እንጄረ እት ዱብየን ፈአዮእ። እኮዳ አን ከኔ ጎሪን ሬሀዮም። 18 ህከኒ ከምቢች ኬእ አንኤበ መርኬእ ‹ኢ አነ! መገንነ ኪ ብሬን በእሼም። 19 ከኒች ዘኪን ቤቱክ የመም ገአሙ ሀስሰኖኤበአ። ህከኒ ቀጠረንት ሁጀታ አሽከሪችክ መትስገ አሴኤ› ያንስ› ይ ሰውዬእ። 20 ህከምቢችን ኬእ አንስበ ዋሎ። እስን ቄዕረ ሄኦገን አኑስ ጡጅ ክቼእኬእ ደጉደን መር ጎበስ ሀንቀፍ ሱንቄስ። 21 ቤቱስን ‹ኢ አነ! መገንነ ኪ ብሬን በእሼም። ከኒች ዘኪን ቤቱክ የመም ገአሙ ሀስሰኖኤበአ› ዬስ። 22 ጠሁ እኮዳ አኑስ አሽከረስ ገእ ‹ሰርብቴን ደናምተ ኦድሸተ ኤቤን ኦዲሼስ። አሞ አንገስ ዙሩዕማን ቁብቹተ ሎካንተስን ጫመ ዎርዬስ። 23 ህትጉንተ ሜሼለ ሰንገ ኤቤን ዱልዬ። ነኦንት እንቶኒ በጅቀሞኒ። 24 ዳፉንኩስ ኩ ቤቱኤ ሬሄሃ እኬ፤ ህኩዕኒን፥ ቴሱ ፎላሙ እኬእ። አሞ በኤሃ እኬ፤ ቴሱ ደገሜእ› ዬሀንሰ በጅቀሙ አፎእ። 25 «ህተ ጃንተ በህሩስ ቤቱ ሆጎባን ዮ እኬ። ፈንቀል ዋለንን ምንበ ህንጭዬ ጃተ ጠርቤነ ሸለ ላገተ መጮጬእ። 26 እስን አሽከሪች መቱስ ገእ ‹ኩን መሃን?› ይ ጠዕሜእ። 27 ህኩ አሽከርቹንኩ ‹ህዞክ ዋሌእ። ቤቱስ ጡሚኒ ፈይማኒ ደቄተኔ አኑክ ሜሼለ ሰንገ ዱሌስ› ዬስ። 28 ጠሁ እኮዳ በህሩ ቤቱ አሙዕረም ምን ኣጉ ግቦ። አኑስን ምኒች ፉል ኣጉንተ ኡጬስ። 29 እስን አኒሀንስ ፈንቀሽ ‹ህኩዕኒን፥ ከንከ ዶለ አግሽገ ጠቀሜንኬ፤ አዘዞችክን ፉል ከሰበአ። ህከኒ ጃላካንተኤ በርገም በጅቀሙንተ ሜጡ ቡትቹሃ ኣስትምበኤ። 30 ጠሁ እኮዳ ኩ ቤቱክ ግዘክ ሳኣኒን በርገም በእሽኬእ ዋልየን ሜሼለ ሰንገ ዱልቶንትስ› ዬእ። 31 አኑንኩ ‹ኢ ቤቶ! አት ሆረንተ ጃተ ኤሳን ሜጡ ዮንት። ኤሳ ዮሩ ሆሩንኩ ኪሃ። 32 ጠሁ እኮዳ ኩ ህዞክ ሬሄ እኬ፤ ቴሱ ፎላሙ እኬእ። አሞ በኤ እኬ፤ ቴሱ ደገሜእ። ህከኒ አብንስ በጅቀሙ ሀስሰኖኔ› ዬስ» ዬእ።
1 ዬሱሱ አወናኒሀንስ «መትተ ጃተ መቱ ቀባጣሙ መንቹ ዮ እኬ። እሲንከ ምንስ አዘዘኖ መቱ መንቹ ዮስ እኬ። ህከን ቀባጣሞ መንቺ ‹ምንክ አዘዛንቹ ዮኬረ ብነአዮ› ዬን ኩሌመስ። 2 ህኩ ቀባጣሙ መንቹንኩ ምንስ አዘዛንቹ ገእሲሽኬእ ‹ኩ ኪተኔ መጮጨዮም ጠሁ መሃን? ከኒች ዘኪን ምንኤ አዘዚ ደንድቱምቡተኔ ቆረብሲሾንኬረ አስቶንትገ ጣፍ ኣሴኤ› ዬስ። 3 ህኩ አዘዛንቹንኩ ዎዘናንተስ ‹ቴሱ ቀርቹኤ አዘዝኤ ሁጄች ሸሮኤታት፤ ህከኒ መ አሱ? ሆገእ ደንዳምበአ። ኡጭ እቱ ሳልሲሰኖኤ። 4 አቼ አዘዝኤ ሁጄች ሸረሞም ጃተ መኑ ምኔንተስ ኣቁንተኤ አሳምረ ደጌም› ዬእ። 5 ህከኒ ቀርችስ ቤን መነ ሆረንከ ኮዳን ኮዳን ገእኬእ ዎነስ መንቹ ‹ኢ ቀርቺ ባታንት ሀበንኩ ቤኑ ዮኬ?› ዬስ። 6 መንቹስ ‹ጥቤ ቦስ ዘይት ቤኑ ዮኤ› ዬእ። አዘዛንቹንኩ ‹ቤኑክ ጣፈሞ ዎረቀቱ ኩዕኒን። ሰርብት አፉዕልትኬእ ኦንታዱመ ቦሱ ይት ጣፍ› ዬስ። 7 ህከኒች ዘኪን ለንክስ መንቹ ‹ሀበንኩ ቤኑ ዮኬ› ዬስ። መንቹስ ‹ጥቤ ደዉል አለስ ቤኑ ዮኤ› ዬእ። አዘዛንቹንኩ ‹ቤኑክ ጣፈሞ ዎረቀቱ ኩዕኒን። ሄዜታዱመ ደዉለ ይት ጣፍ› ዬስ። 8 ቀርቹስን ህኩ አመዕነሙምቡ አዘዛንቹ ቆርማን አሴሀኒ ማለሎ። ዳፉንኩስ ተን ኡለ መኑ እስ-እሶኦንት አሰቀንታራን መገን መኒች አበ ቆራከተ። 9 አን ኩላንክዕኔ፤ ተን ኡለ ቀባጡዕኔ ጎፎ ጃተ ህነቲንከ ሄኣ ምናንተሰ ኣቅቱንተዕኔ ተን ኡለ ቀባጦን ገጊሀዕኔ ጃላከተ መክጭዬ። 10 አብሽ ቀሆ ጠሃን አመዕነሞ አበ ጠሃኒ አመዕነሜሃ። ጠሁ እኮዳ አብሽ ቀሆ ጠሃን አመዕነሙምቡ መንቹ አበ ጠሃኒ አመዕነመኖበአ። 11 አቼ ተን ኡለ ቀባጦን አመዕነንቴንተረ እኬኑምቡች ገሬ ቀባጡተ አይ ሀደረተ ኣሰኖዕኔ? 12 አሞ ዎሎ መን ቀባጦን አመዕነንቴንተረ እኬኑምቡች ገጊሀዕኔ እካ ቀባጡተ አይ ኣሰኖዕኔ? 13 ለሞ ቀርቺ ጠቀሞተ ደንደኖ አግሹ ዮበአ። ህከኒ መቱስ ግብ ዎሉስ ኢተኖ፤ እንዶ መቱስ አብሽ ዎሉስ ገደኖ። ህትጉንተ መገኒሃ ግዚሃ ጠቀሚ ደንድቴነንተበአ» ዬእ። 14 ግዘ ኢትታ ፋሪሰት ዬሱሱ ጠሃቄረ ሆረንከ መጮት ገላጮስ። 15 ጠሁ እኮዳ ዬሱሱ «አዕኖኦት መን ብሬን ገገዕኔ ሙጩረተ አሰቅቴነንታረ። እኮዳ መገኑ ዎዘነዕኔ ደገኖ። ዳፉንኩስ መንባን አበ አጉጅ ጡደመኖሩ መገንባን ገደሜሃ» ዬእ። 16 ዬሱሱ «መገን ሴሩሁ ህራጋኑሁ ይቶሩ ጠመቃንቾ ዮሃንሴ ጄቹት ኢልተንቀጤች ዮ እኬ። ህተን ጄቾች አፍ አሞ መገን ዎሞመ ምሽራች ላገት በርገንት ሰበከንተዮእ። መኑ አኑንኩ አኑንኩ ህተን ዎሞማን መቄን ኣጎተ አጰመዮእ። 17 ጠሁ እኮዳ መገን ሴሪች መትት እልቹቲ በኣሀኒች ሰሞሁ ኡለቲ ህጉ ቢለኖ። 18 ምኔመስ ሸርኬእ ዎልስ ኤበኖ ሆሩንኩ ሳአዮእ። አሞ ምኔኒችሴ ፉልቶ ሜንትቹተ ኤበኖ ሆሩንኩ ሳአዮእ» ዬእ። 19 ዬሱሱ «ዳመተ ኦድሸታ ደናምተ ተልቢች ሁጀተንቴ ኦድሸታ ኦደቀኖ መቱ ቀባጣሙ መንቹ ዮ እኬ። እስን በሬን በሬን መኬሀንስ ሄለም በጅጎን ሄአኗ እኬ። 20 አሞ አሉስ መዘተ ጠለ እኬ ‹አልኣዛሬ› ዬኖ መቱ ቡጥቹ መንቹ ህከን ቀባጣሞ መንች ጎችባን ኦሰኤ እኬ። 21 ህኩ ቡጥቹንኩ ቀባጣሟንስ መንች ማዲች ኡበኖ ፉፉሩ እቶተ ቁልጠኖ እኬ። ባሰንከስ ዎሸት ዋልተን መዘስ አራባ እኬ። 22 ህኩ ቡጥቹ መንቹ ሬሄሃን መገን ሰሜ ሶቀማኑ አብረሃሜ ሺነ ኦሮሶስ። ህትጉንተ ቀባጣሙስ መንቹሁ ሬህ ሞገሞ። 23 ህኩ ቀባጣሙ መንቹ ዶሊ ሆሪንከ ጠእቱምቦ ጊራን ሀወንኬእ እልስ ጦቀእ አብረሃሜኒ አብረሃሜ ሺናን ዮ አልኣዛሬኒ ቄዕረ ጡጆ። 24 እስን ‹ኢ አነ አብረሃሜ! ሀእ ኤሳ ቅሽጤኤ። አን ከኔ ጊረ ለበን ኣዜን ሀወዮምተኔ ዙሩዕምቾስ ሉደ ዎኣን ጬፍ አረብኤ ግድሱንተ አልኣዛሬ ሶሄኤ› ይ ገኤእ። 25 ጠሁ እኮዳ አብረሃም ‹ኢ ቤቶ! ፎሌ ዮንት ጃተ ሄለንቶንትጋ ህትጉንተ አልኣዛር ሀዌጋ ሰውይ። ህከኒ እስ ቴሱ ከኔ በጅቀመንየን አት ሀውተዮንት። 26 አሞ ህከኒች ሆሪችን አሉዲን ከምቢች ክዕኔኤበ ህጊ ሀሳሩ ደንድቱምቦጋ ክዕኔኤቢች አዪ ኒበ ቶሉምቦጋ ኒነ ክዕኔኤ ሜሬሮን አበት በልት ዮእ› ዬስ። 27 ህኩ ቀባጣሙ መንቹንኩ ‹ኢ አነ! ህከደ አልኣዛሬ አንኤ ምን ሶኩንተ ኡጨቃንኬ። 28 ዳፉንኩስ ህከኔ ኦንትት ህዛከት ዮኤ። ህኩሩንኩ ተ ሀው መዕንተ ዋልቱምቦገ እስ መርኬእ ቃርስ ኩሉንሰ› ዬእ። 29 ጠሁ እኮዳ አብረሃም ‹እሶኦ ሙሲ ህራጋኑሁ ጣፎሩ ዮሰ። ህከረ መጮጭቱን› ዬደ 30 ህኩ ቀባጣሙ መንቹ ፈንቀሽ ‹ኢ አነ አብረሃሜ! ህትጉተበአ። ሬቶ መኒች መቱ ኬእ መሮደ ባጢለሰ ቢረ ይታእ› ዬእ። 31 አብረሃምን ‹ሙሲ ህራጋኑሁ ጣፎሩ ያኖ መጮጭቱምቡረ እኮኢች ሬቶ መኒች መቱ ኬኦዳ አመዕንታበአ› ዬስ» ዬእ።
1 ዬሱሱ አወናኒሀንስ «መነ ቆል ሉስሰኖሩ ዋሉዕናች ሆረን ፈአኖበአ። ጠሁ እኮዳ ህከ ቆለኖስረ ኤበኖ መንቺ ኣዬ! 2 ሀኩ መንቹሁ ተን ቀቀሃኖ ጪላች መቱስ ሉስሰኖሀኒች ዊትም ክኑ ጎባንተስ ኡሱሬን በሃራን ኡጄመስ እክየን ዎየኖስ እኬ። 3 ህከኒ ገጊሀዕኔ ቆረጵዬ። ህዞክ በእሾሄደ አሙዕርስ። እስመ ጋብ ፈንቀሎደ ፈኡን ይስ። 4 መቶ በሬ ኣዜን ለመልተ ኮደተ በእሾሄዳ ለመልንተ ኮደተ ‹ጋብ ፈንቀሌም› ያን ኪበ ዋሎደ ፈኡን ዩ ሀስሰኖሄ» ዬእ። 5 ሶቀማኑ ቀርቹ ዬሱሰ «ሀእ አመዕነቱ በርግኔ» ይቶስ። 6 ቀርቹንኩ ፈንቀሽ «ጣፍ እሌ ቀጡ አመዕነቱ ዮዕኔ እክየን ተ ኦዴቹተ ‹ከምቢች ጦቆለንት በሃር ኣዜን ካሰም› ይቴንተዳ አዘዘንታዕኔ እኬ። 7 አሞ ሆገአኖ እንዶ ሆለተ ዜአኖ ሶቀማንቹ ዮሲ ሶቀማንቹስ ሆጎቢች ፈንቀሎ ጃተ ‹ሰርብት አፉዕልት እት› ያኖ ክዕኔኤች አዬት? 8 ህካን ያኖ ቆደ ‹አቼ ኦዝኤ ቅጠንስት እተንቀጤቺ አገንቀጤቺ የመዙክ ቆዕርት እትሴኤ። ህከኒች ዘኪን አት እታንትኒ አጋንትኒ› ያኖስየበእንዶ? 9 አሞ እስ አዘጆረ አሴሀኒ ህከ አግሹ ገለጠኖስንዶ? 10 ህትጉንተ አዕኖኦቲ አዘዘንቴንተረ ሆረንከ አስቴንተ ጃተ ‹ነኦት ተምት ዮኔበእተ አግዘ። አሱ ሀስሰኖኔረ ጠለ አስኔም› ይዬ» ዬሰ። 11 ዬሱሱ ዬሩሳሌም ከተመ መረን ሰማርነ + ገሊል ሜሬሪን ህገዮ እኬ። 12 መቱ ኦሎ ኣጎ ጃተ አበሉ አፌሰ ቶርዱሙ መኑ ቄዕረ ኡርቴሪን ደቀሞ። 13 እሶኦንት ላገሰ ጦቀት «ቀርቾ ዬሱሰ! ሀእ ቅሽጥኔ» ይቶእ። 14 ዬሱሱንኩ እሶኦተ ጡጅኬእ «መርዬ አልዕኔ ቄሳካ ጡድሽዬ» ዬሰ። እሶኦንት መርተንን አበልች ሙጩርቶእ። 15 እሶኦችን መቱስ ፈዬገ ደጎ ጃተ አበ ላጋን መገኑ ገለጠን ፈንቀል ዋሎ። 16 እስን ሚኔንተስ ህርክይ ዬሱስ ሎካን ኡብ ገለጤስ። መንቹንኩስ ሰማር ባድየ እኬ። 17 ዬሱሱንኩ «ፈይቶሩ ቶርዱማንት እኬበእንዶ? ሆንሱስ ሀትኬእ? 18 ከን ዎሎ ባድ መንቺች ህግየን መገኑ ገለጢ ፈንቀል ዋሌኢ ዮእንዶ?» ይኬእ 19 ህከ መንቹ «አመዕነቱክ ፈይሼኬ። ጦቅት ኦሮቅ» ዬስ። 20 ፋሪሰት ዬሱሰ «መገን ዎሞመት ሀከደ ዋልታ?» ይት ጠዕምቶደ «መገን ዎሞመት ዋልታኢ መኑ ቆረበኖጊኔበአ። 21 አሞ ‹ህትዕኒን ከኔ ዮእ› እንዶ ‹ከኤ ዮእ› ዬኖሴበአ። ዳፉንኩስ መገን ዎሞመት ዮኢ ክዕኔኤ ሜሬሮኔት» ዬሰ። 22 ህከኒች ዘኪን ዬሱሱ አወናኒሀንስ «መንች ቤት በራካች መቱሲ ጡዲ ቁልጥቴነንተ ጃት ዋልታእ። እኮዳ ጡዴነንተበአ። 23 አሞ መኑ ‹ኩዕኒን ከኔ ዮእ› እንዶ ‹ህኩጲን ከኤ ዮእ› ያኖዕኔ። ጠሁ እኮዳ እሶኦተ አወንቴን መርቴኖችዬ። 24 ዳፉንኩስ ሰማን በንቁት ቤሌሌስ መቶ ቶቺች መቱ ቶቹ ኢለንቀጤች ጫክሳሀንገንከ መንች ቤቱ ዋለኖ በር ህትጉንተ እሀኖ። 25 ጠሁ እኮዳ ህከኒች ብርስ መንች ቤቱ ሆለመ ሀወ ኣቆታ ከን ዶል መኒን ግበሞታ ሀስሰኖስ። 26 አሞ ኖሄ ዶለ እኮገንከ መንች ቤት ዶለሃ ህትጉንተ እሀኖ። 27 ህኩስን ኖህ መርከባን ኣገኖ በሩ ኢለንቀጤች መኑ እተዮ፥ አገዮ፥ ኤበቀዮእኒ ቆርሲሰመዮእኒ እኬ። በእ ዎኡንኩ ዋል ሆረንከሰ በእሽ ከሞ። 28 ህትጉንተ ሎጤ ዶልገንከ እሀኖ። ህተ ጃታ መኑ እተዮ፥ አገዮ፥ ህዕረዮ፥ ህረዮ፥ ካሰዮእኒ ምነዮእኒ እኬ። 29 እኮዳ ሎጥ ሶዶም ከተሚች ፉሎ በር ጊረቲ ዲኙሁ + ሰሜች ኡብ ሆረንከሰ በእሽ ከሞ። 30 መንች ቤቱ ጡደመኖ በርሃ ህትጉንተ እሀኖ። 31 ህከ በርንከ ምን አሌን ዮ መንቹ ምኔንተስ ዮ ኦዳተ ኣቆተ ድሩንከ። ህትጉንተ ሆጎባን ዮኢንኩ ዘኩ ለቅ ፈንቀሉንከ። 32 አሞ ሎጤ + ምኔመተ ሰውዬ። 33 ፎልስ ፈእጪ ሀሰኖ ሆሩንኩ ፎልስ በእሰኖ። አሞ ፎልስ በእሰኖ ሆሩንኩ ፎልስ ፈእጨኖ። 34 አን ኩላንክዕኔ፤ ህከ አንከር ለሙ መንቹ ሜጤ መዕናን ኦሰኣእ። ህከሮኦችን መቱስ ኦሮሴናን መቱስ ፈአኖ። 35 አሞ ለምት ሜንትቹት ሜጦማንን ዊታእ። ህከሮኦችን መትሴ ኦሮሴናን መትሴ ፈኣእ። [ 36 ህትጉንተ ለሙ መንቹ ሜጤ መዕኔን ሆገኣእ። ህከሮኦችን መቱስ ኦሮሴናን መቱስ ፈአኖ።]» ዬእ። 37 ህከኒ አወናኑስ ዬሱሰ «ቀርቾ! ኦሮሴኖሲ ሀኑተለ?» ይት ጠዕምቶስ። እስን «ሬሹ ዮባን ህከኔ ዞብሩ ጠጵያኖ» ዬሰ።
1 ህከኒች ዘኪን ዬሱሱ አወናኑስ ሆጉዕናች ሆረንተ ጃተ መገኑ ኡጩ ሀስሰኖሰገ ሮስሶሰተ መትተ አጉዲሸተ ኩሎሰ። 2 እስን «መቶ ከተማን መገኑሃ ዋጁምቡ መነሃ ሳሉምቡ መቱ ዳኑ ዮ እኬ። 3 ህከን ከተማንን መትት ምኔኑሴ ሬሄ ሜንትቹት ዮ እኬ። እሴን ህከን ዳንበ ዋልተን ‹ዲኒንተኤ ኦደሞም ጠሀ ፍርዴኤ› ይተዮስ እኬ። 4 እስን በትናሸተ ጄቹተ ፍርዱ ግቦሴ። ጠሁ እኮዳ ዘኮ ዎዘናንተስ ‹መሃ መገኑ ዋጁምቦዳ መነንከ ሳሉምቦዳ 5 ት ምኔኑሴ ሬሄ ሜንትቹት ሀውሰዮኤተኔ ፍርዳንሴ። ህኩ ዮበእደ ሆረንተ ጃተ ዋልተን ሆግሶኮኤ› ይ ሰውዬእ» ዬሰ። 6 ቀርቹ ዬሱሱንኩ «ህኩ ሂሉ ዳኑ ዬረ መጮጭዬለ። 7 ህከደ መገኑ አንከርሃ በራሃ እስበ ያርታ ዶዕረንቶ መኒሀንስ ፍርደኖሰበእንዶ? አሞ ፍርዱዕናችሰ በትናሸተ ጄቹተ ኤጌረኖንዶ? 8 አን ኩላንክዕኔ፤ ሰርብን ፍርደኖሰ። ጠሁ እኮዳ መንች ቤቱ ዋለኖ ጃተ ኡለ አሌን አመዕነቱ ደገኖንዶ?» ዬእ። 9 ዬሱሱ «ነኦት ጡማኗ» ይተን ገጋንተሰ ድከኣነ ዎሉ መነ ገዳ መኒ ተ አጉዲሸተ ኩሎሰ። 10 ህኩስን «ለሙ መንቹ መገኑ ኡጭቶተ መገን ምን መርቶእ። ህከሮኦችን መቱስ ፋሪስቿ። አሞ ለንክስቢ ቀረጣንቿ እኬ። 11 ፋሪስቹስ ኡርኬእ ዎዘናንተስ ‹መገኖ! ዎሎ ሆራንከ መንገ ህኩስን መቄሳ መንገ፥ ሾከ መንገ፥ ሳኣንጋ ባሰንከስ ከን ቀረጣንችገ እሁምቡተኔ ገለጣንኬ። 12 አንን ሄዜቶን ለምተ ኮደተ ጦመዮም። አሞ ደቃምሪች ሆሪችን ቶርዱሚች መቱ አስራተ ፉሸዮም› ዬእ። 13 ጠሁ እኮዳ ቀረጣንቹስ ቄዕረ ኡርኬእ እልስ ጦቀእ ሰማ ጡዶታ እግምበአ እኬ። እኮዳ ሃሙስ ዎቀዕረን ‹መገኖ! ኤስ ባጢላሙ ማሬኤ!› ያዮ እኬ። 14 አን ኩላንክዕኔ፤ ፋሪስቺች አበ ቀረጣንቹ ሙጩር ምንስ ፈንቀሎ። ዳፉንኩስ ገገስ ጦቅ ጦቅ አሰኖ ሆሩንኩ ህርክ ያኖ። እኮዳ ገገስ ህርከአኖ አበኖ» ዬሰ። 15 መኑ ጪላካንተሰ ዬሱሱ አንገስ ኡጁንተ እስበ ኤቦእ። ዬሱስ አወናኑንኩ ህካን ጡዶ ጃተ ህከ መነ አሙዕርቶእ። 16 ጠሁ እኮዳ ዬሱሱ ጪለተ ገእ «መገን ዎሞመት ከሮኦገ ዮሪቢተ እኮተኔ ጪለት ኢበ ዋልቱን፤ ከንቴኖቼሰ። 17 ገርተ ያንክዕኔ፤ መገን ዎሞመተ ጪልገ እክ ኣቁምቡ አዪ መገን ዎሞማን ሆረን ኣገኖበአ» ዬእ። 18 መቱ ገሻንቹ ዬሱሰ «ቢዘ ሮስሳንቾ! ዶሊ ሆሪንከ ጎፉምቡተ ሄቸተ ደቆተ መ አሱ?» ይ ጠዕሜእ። 19 ዬሱሱንኩ «ሚ ‹ቢዘ› ይት ገእተዮንቴኤ? መገኒች ጠሊች ህግየን ቢዙ አዪ ዮበአ። 20 አሞ አዘዙተ ሆረንተ ደጋንት። አዘዙስን ‹ሳኦት፤ ሽቶት፤ ሞገኦት፤ ቆጰነ ነቀሶቲ አነኪ አመኪ አብስኒ› ይታታ» ዬስ። 21 መንቹስን «ከ ሆረንከዕኑ ኦሶመኒችኤን አፍ ቆረቤም» ዬእ። 22 ዬሱሱንኩ ህካን መጮጬ ጃተ «ሜጡ ጠሁ ፈኤሄ። ህኩስን ዮሄረ ሆረንከ ህርት ቡጢ ቤህ። ሰማን ጠጵዬሀን ደቅታንት። ህትክኬእ ዋልት አወኔኤ» ዬስ። 23 ጠሁ እኮዳ መንቹስ አብሽ ቀባጣሙ እኮተኔ ህካን መጮጬ ጃተ አብሽ ክቼኦ። 24 ዬሱሱንኩ ህኩ መንቹ አብሽ ክቼኦገ ጡጅኬእ «ቀባጡት ዮሰሪ መገን ዎሞመተ ኣጉ ሀበንከ ኬዕማሻ! 25 ህትጉንተ ቀባጣሙ መንቹ መገን ዎሞመተ ኣገኖሀኒች ጋሜሉ መርፍ ጠላሊን ህጉ ቢለኖ» ዬእ። 26 ህካን መጮጭቶ መኑ «ህከደ አይ ፈኢ ደንደኖለ?» ይቶእ። 27 ጠሁ እኮዳ ዬሱሱ «መንባን ደንዴሱምቡ ጠሁ መገንባን ደንዴሰኗ» ዬእ። 28 ጴጥሮስን «ህኩዕኒን፥ ነኦት ሆረረንከ አጉን አወነዮንኬ» ዬስ። 29 ዬሱሱንኩ «ገርተ ያንክዕኔ፤ መገን ዎሞመተኔ ምንስ እንዶ ምኔመስ እንዶ ህዛከስ እንዶ እልቶስረ እንዶ ኦሱስ አጉርኬእ 30 ከን ዶላኒ በትናሸ አፎ ኣቁምቡ አሞ ዋለኖ ዶላኒ ዶሊ ሆሪንከ ጎፉምቡተ ሄቸተ ደቁምቡ መንቹ ዮበአ» ዬሰ። 31 ዬሱሱ ቶነ ለሙንከ አወናኑስ ሺነ ለቅኬእ «ህኩዕኒን፥ ቴሱ ነኦት ዬሩሳሌም ከተመ ፉነዮም። አሞ መንች ቤትተኔንከ ህራጋኑ ጣፎ ጠሁ ሆሩንኩ ዊመኖ። 32 እሱንከ አይሁደ እኩምቦ መኒ ህግሴን ኣሴናንስ ገላጬኖስ፥ ቦሮሬኖስኒ አንጀ አሌንተስ ቱ ዬኖስኒ። 33 ገረፎስሀኒች ዘኪንን ሽታስ። ጠሁ እኮዳ እስ ሰክ በር ሬሆች ኬአኖ» ዬሰ። 34 እኮዳ አወናኑስ ህከን ጠሂች ሜጡራ ቆርስትምበአ። አሞ ጠሃቄስ ጠሁንኩ ደጵዬሰተኔ ጠሃቀሞስ ጠሀ አፍምበአ። 35 ዬሱሱ እያርኮ ከተመ ህንጭዬ ጃተ መቱ ቆቁ መንቹ ኡጨቀን ዎቄ አፎን አፉዕሌ እኬ። 36 በትናሹ መኑንኩ ሺኒንተስ ህገንየን መጮጭኬእ «ኩን መሃን?» ይ ጠዕሜእ። 37 መኑንኩ «ናዝሬት ዬሱሱ ከኒን ህገዮእ» ይት ኩልቶስ። 38 ህኩ ቆቁንኩ «ዳዊቴ ቤቶ ዬሱሰ! ሀእ ቅሽጤኤ» ያን ያሮ። 39 ብሬን መረንተዮ መኑንኩ «ሰዕምይ!» ይት አሙዕርቶስ። እኮዳ ህኩ ቆቁ «ዳዊቴ ቤቶ! ሀእ ቅሽጤኤ!» ያን አብሽ ያሮ። 40 ዬሱሱንኩ ኡርኬእ እስበ ዋሼኑንተስ አዘጆ። ህኩ ቆቁንኩ እስበ ህንጭዬ ጃተ 41 ዬሱሱ «መ አሱንተሄ ሀሰን?» ይ ጠዕሜስ። እስን «ቀርቾ! ጡዱ ሀሳም» ዬእ። 42 ዬሱሱንኩ «ጡድ! አመዕነቱክ ፈይሼኬ» ዬስ። 43 ህኩ ቆቁ ህተ ጃንተ ጡጆ። እስን መገኑ ገለጠን ዬሱሰ አወኖ። አሞ መኑ ሆሩንኩ ህካን ጡጆ ጃተ መገኑ ገለጤእ።
1 ዬሱሱ እያርኮ ከተመ ኣግ ህከኒን ህገዮ እኬ። 2 ህከኔን «ዘኮሴ» ዬኖ መንቹ ዮ እኬ። እስን ቀረጣንየ አወንሳንቹኒ ቀባጣሟ መንቹኒ እኬ። 3 ህኩ መንቹንኩ ዬሱሱ ሀከኔትንዶ ጡዶተ ሀሰዮ እኬ። ጠሁ እኮዳ ገበንቹ እኮተኔ መን በትኔች ኬኦ ጡዶተ ደንድምበአ። 4 ዬሱሱ ህከን ዎቄን ህገኖተኔ ዘኮስ ብሬን ደጉጅ ህግኬእ ዬሱሰ ጡዶተ መቴ ኦዴቾን ፉሎ። 5 ዬሱሱንኩ ህተ መዕንተ ኢሌ ጃተ ሰንጋግ ጡጅኬእ «ዘኮሴ! ከበር ኪ ምኔን ሆሱ ሀስሰኖኤተኔ ሰርብት ድር» ዬስ። 6 ህከኒ ዘኮስ ሰርብን ድርኬእ በጅጎን ኣቄስ። 7 መኑንኩ ህካን ጡዶ ጃተ «ባጢላሞ መንች ምን ኮህነቲ ኣጌእ» ይት ሆሩንኩሰ ጉንጉንቶእ። 8 እኮዳ ዘኮስ ኡርኬእ ዬሱሲ «ቀርቾ! ዮኤሪች ሆሪችን በከንስ ቡጢ ኣሳም። አሞ አዬቺ ሀምበላች መሃ ኣቄምሩ ሄኦደ ሾሉ አፎ አስ ፈንቀሽ ኣሳም» ዬእ። 9 ዬሱሱንኩ «ኩ መንቹሁ አብረሃሜ ቤቱ እኮተኔ ከበር ፈኡ ከን ምኒ እኬእ። 10 ዳፉንኩስ መንች ቤቱ በኦ ሀሶታ ፈእሶታ ዋሌእ» ዬስ። 11 መኑ ህከ ጠሀ መጮጨንየንን ዬሱሱ መትተ አጉዲሸተ በርግ ኩሎ። ዳፉንኩስ እስ ዬሩሳሌመ ኢሎተ ህንጭዬተኔሃቲ መገን ዎሞመት ሰርብትን ጡደንታኢ አጉጆሰተኔሃቲ እኬ። 12 ህከንተኔ ዬሱሱ «መቱ አቡ መንቹ ዎሞመተ አጵ ፈንቀሎተ ቄዕረ ባዱ መሮ። 13 ህከኒ አግዛችስ ቶርዱመ ገእኬእ አኒንከ አኒንከ ጥቤ ጥቤ ብረ ኣስ ‹ፈንቀል ዋለንቀጤች ከኒን ዘዘልዬ› ዬሰ። 14 ጠሁ እኮዳ ባድስ መኑ እሱ ግብኬእ ‹ኩ መንቹ ኒ አሌን ዎሞዕሙንተ ሀንሳምበአ› ይት ዘኮንተስ ሶቀማኑ ሶኮእ። 15 ህኩ መንቹንኩ ዎሞመተ አጵ ፈንቀሎ ጃተ ህኩ ግዘ ኣሴሰ አላኑ ዘዘልት ሀበንከ ቀልሲሴእንዶ ደጎተ እስበ ገኤኑንተሰ አዘጆ። 16 ዎነስ አላንቹ መንችስ ብርተ ዋልኬእ ‹ቀርቾ! ጥቤክ ብሩ ቶርዱሜ ጥቤ ብረ ቀሌእ› ዬስ። 17 ቀርቹስን ‹ደናሞገ አስቴንት፤ አት በሬዱ አላንቹ አብሽ ቀሆ ጠሃን አመዕነንቴንቲ እኮንትተኔ ቶርዱመ ከተሚ ዳነ እህ› ዬስ። 18 አሞ ለንክስቢ ዋልኬእ ‹ቀርቾ! ጥቤክ ብሩ ኦንቴ ጥቤ ብረ ቀሌእ› ዬስ። 19 ቀርቹስን ‹አቲ ኦንቶ ከተሚ ዳነ እህ› ዬስ። 20 ህትጉንተ ዎሉሲ ዋልኬእ ‹ቀርቾ! ሱሲን ጣጭ ማጮም ጥቤክ ብሩ ኩዕኒን። 21 ዳፉንኩስ አት አፉሽቱምቡንከ ኣቅታንትነ ውጡምቡንከ ጠጰታንት ጎደበ ቃረ መንቹ እኮንትገ ደግኬእ ዋጄንኬተኔሃት› ዬስ። 22 ቀርቹስን ‹ኩ ሂሉ አላንቹ! ገግክ አፌች ፉሎ ጠሂንን ፍርዳንኬ። አን አፉሹምቡንከ ኣቃምነ ውጡምቡንከ ጠጰኣም ጎደበ ቃረ መንቹ እኮምገ ደጌንት፤ 23 ህከደ ሚሃመ ግዘኤ ባንካን አፉሽትምበኢ? አንን ዋልኬእ ቀሎንተስን ኣቃም እኬ› ዬስ። 24 ህከኒች ዘኪን ቀርቹ ህከኔ ኡርቶ መነ ‹ጥቤስ ብረ ኣቅቴን ቶርዱሜ ጥቤ ብሩ ዮስሀኒ ኣስዬ› ዬሰ። 25 እሶኦንት ‹ቀርቾ! እሲ ቶርዱሜ ጥቤ ብሩ ዮሲዕኑ?› ይቶስ። 26 ቀርቹንኩ ‹አን ኩላንክዕኔ፤ ዮስሀኒ ሆሪንከ በርገም ኣሰመኖስ። እኮዳ ዮስበእሀኒች ህኩ ዮሲሁ ኣቀመኖስ። 27 ጠሁ እኮዳ ህከ አን ዎመሰ እሁንተ ኢትቱምቡ ዲናከኤ ከበ ዋሽቴን ብሬንተኤ ጎረጬሰ› ዬሰ» ዬእ። 28 ዬሱሱ ህካን ዬሀኒች ዘኪን ዬሩሳሌመ መረን ብርተ ለቅ መረመዮ እኬ። 29 - 30 እስን «ዘይት ሀቁ ሌአኖ ዱነ» የመመኖባን ዮ «ቤተፋግታ ቢታነሃ» ዬኖበ ህንጭዬ ጃተ አወናኒችስ ለሙ «ብሬንተዕኔ ዮ ኦሎ መሬ። ህከበንከ ኢልቴንተ ጃተ አዪ ሆረን ኮዕሩምቡ ሀሩቾ ዎተረ ኡሱረሜኢ ደጌነንተ። ህካንን ሂርቴን ከበ ዋሽዬ። 31 አዪ ‹ሚ ሂርቴነዮንተ?› ይ ጠዕሜዕኔደ ‹ቀርቹ ሀሾቢሃት› ይዬ» ይ ሶኮ። 32 ሶሀንቶሩንኩ መርቶ ጃተ ሆሩሩንኩ ዬሱሱ ኩሎሰገን እክየን ደጎእ። 33 እሶኦንት ዎተረ ሂርተንየን ዎተርስ አናከት «ዎተረ ሚ ሂርቴነዮንተ?» ይቶሰ። 34 እሶኦንት «ቀርቹ ሀሾቢሃት» ይት ፈንቀሽቶእ። 35 ህከኒች ዘኪን ዎተረስ ዬሱስበ ዋሽት ኦድሸሰ ዎተር አሌን ዎርትኬእ ዬሱሰ ኮርሲሶእ። 36 ዬሱሱ ኮዕር መረመንየን መኑ እሱ አብሶተ ኦድሸሰ ዎቃን ዌኤሰዮ እኬ። 37 ዬሱሱ ዘይት ሀቁ ሌአኖ ዱኒን ድሪሰኖ ዎቄን ዬሩሳሌመ ኢሎተ ህንጭዬ ጃተ አወነዮስ እኬ ሆለሙ መኑ ከኒች ብሬ ጡዶ ማለልሲሰኖሪ ሆሪንከ በጅቀንት አበ ላጋን መገኑ ገለጡ አፎእ። 38 እሶኦንት «መገን ሱዕሚን ዋለኖ ዎሙ ማሰአሜሃ። ጡሙ ሰማን አብኑንኩ መገኒ እሁን» ይተዮ እኬ። 39 እኮዳ ህከን ምናደብ ሜሬሮን ዮ ፋሪሳች መ-መቱ «ሮስሳንቾ! አወናኑክ ሰዕምቱንተ አሙዕር» ይቶእ። 40 ዬሱሱንኩ «አን ኩላንክዕኔ፤ እሶኦት ሰዕምቶዳ ት ክነት ያርታእ» ይ ፈንቀሼእ። 41 - 42 ዬሱሱንኩ ዬሩሳሌም ከተመ ህንጭይ ጡጆ ጃተ «ጡመ ኣሰኖ ጠሀ ከበሪ ደጌንት እክየን ጡማ እኬ። ጠሁ እኮዳ ቴሱ እሌችክ ቴዕሌእ። 43 ዲናከክ ሆራንከ ዉዲን ካበ ካብ ክብትኬእ ከኒኒ ከኢኒ ሀውሳሄ ጃት ዋልታእ። 44 አሞ መገኑ ፈእሶሄተ ዋሎ ጃተ ደጉ ሆጎንትተኔ ዲናከክ ኬሲ ኣዜንተክ ዮ መነሃ ኡለ በርግት ምችጋእ። ህትጉንተ ኣዜንተክ ሜጡ ክንቹሁ መዕኔንተስ ፈኡዕናች ቶንቶሽታእ» ይ ኦኦ። 45 ህከኒች ዘኪን ዬሱሱ መገን ኬሰሞ ምን ኣግኬእ ዘዘልታ መነ ሀደተ ፉሹ አፎ። 46 አሞ እሶኦ « ‹ምኑኤ መገኑ ኡጬኗ ምን› የመም ጣፈሜእ። እኮዳ አዕኖኦት ቦጋን ግምበ አስቴንተ» ዬእ። 47 እስን ሆረንከ በር መገን ኬሰሞ ምኔን ሮስሰዮ እኬ። ቄስ አወንሳኑ፥ ሴር ሮስሳኑሁ ምናደብ አወንሳኑሁ ዬሱሰ ሽቶተ ሀሰዮ እኬ። 48 ጠሁ እኮዳ መኑ ሆሩንኩ እስ ጠሃቀኖረ ቃርስ መጮጨዮተኔ እሶኦት ሜጡራ አስቶተ ደንድትምበአ።
1 - 2 መቱ በር ዬሱሱ መገን ኬሰሞ ምኔን መነ ሮስሰንየኒ ምሽራች ላገተ ኩለንየኒ ቄስ አወንሳኑሁ ሴር ሮስሳኑሁ ባድ ኑባቢን በርገንት ዋልት «ሀኖ ኩልኔ፤ ከረ አስታንቲ መ መቄኔት? እንዶ ከረ አስታንት መቆ ኣሴሄ አዬት?» ይት ጠዕምቶስ። 3 - 4 ዬሱሱንኩ «አን አሞ መቱረ ጠዕማንክዕኔ። ሀኖ ቴሱ ኩልዬኤ። ዮሃንስ ጠመቀኖ መቆ ደቄኢ መገኒቼትንዶ መኒቼት?» ዬእ። 5 ህተ ጃተ እስ-እሶኦንት « ‹መገኒቼት› ይኖምደ ‹ህከደ ሚ ዮሃንሴ አመዕንቴንምበስ?› ያኖ። 6 አሞ ‹መኒቼት› ይኖምደ መኑ ሆሩንኩ ዮሃንስ ህራጋንቹ እኮገ አመዕኔተኔ ክኒን ቀሰኖኔ» ይት ጠሃቶእ። 7 ህከኒ እሶኦት «ሀኖቼትንዶ ደንጋምበአ» ይት ፈንቀሽቶእ። 8 ዬሱሱንኩ እሶኦ «አኒ ከረ አዬ መቄን አሰዮምንዶ ኩላንክዕኔበአ» ዬእ። 9 ህከኒች ዘኪን ዬሱሱ መኒ «መቱ መንቹ ዎይን ጡደ ካሾ። ዎይነስ አላኒ ቀቤ ኣስኬእ ዎሉ ባዱ ኦሮቅ ሆለመተ ጃተ ኤጌሮ። 10 እስን ዎይኑ ላለኖ ጃት ኢልትየን ዎይን ላሎች እሲ ኢለኖ ቆደ ኣስቱንተ አግሹስ አላንስበ ሶኮ። ጠሁ እኮዳ አላኑስ ህከ ሶሀሞ አግሹ ኦልት ሜጡራ ከንት ሸርቶእ። 11 ለንኪሃ ዎሉ ሶቀማንቹ ሶኮ። አሞ እሶኦንት እሱ ኦልቲ ቢልሲ ሜጡራ ከንት ሸርቶእ። 12 አሞ ሰክቢሃ ሶኮደ እሱንከ ኦልት መዜስ ኤተሩ ኦሮስ ኡጅቶእ። 13 ህከኒች ዘኪን ዎይንስ አኑ ‹መ አሱ? ኢታም ቤቱኤ ሶሃም። አይደጎ እሱ አብሳኢ እሀኖ› ዬእ። 14 ጠሁ እኮዳ አላኑ እሱ ጡዶ ጃተ መቱ መቲሀንሰ ‹ረገአኖ ከኔት። እረስ ነኦት ኣቅኖተ እሱ ሽኑን› የቀንቶእ። 15 እሶኦንት እሱ ዎይን ኣዚች ኤተሩ ኦሮስ ሽቶእ። አቼ ዎይንስ አኑ ህከ አላኑ መ አሰኖ? 16 እርስ አኑ ዋል ህከ አላኑ ሽኬእ ዎይነስ ዎሎ መኒ ኣሰኖ» ይ ተ አጉዲሸተ ኩሎ። እሶኦንት ህካን መጮቶ ጃተ «ህካንዕኑ መገኑ ኤቡንከ» ይቶእ። 17 ጠሁ እኮዳ ዬሱሱ እሶኦበ ጡጅ «ህከደ ‹ምን ምንታ መኑ ገዶ ክኑ ምንስ ኡቱቡ እሀኖ› የመም ጣፈሞ መ ጡድሰኖ? 18 ህከን ክኖን ኡበኖ አዪ ቡት-ቡትያኖ። ጠሁ እኮዳ ህኩ ክኑ አዬ አሌኒ ኡቦደ ጣንሰኖስ» ዬእ። 19 ሴር ሮስሳኑሁ ቄስ አወንሳኑሁ ዬሱሱ ህተን አጉዲሻን እሶኦተ ሀባር ጠሃቄገ ደጎተኔ ህተ ጃንተ አፎስተ ሀሶእ። ጠሁ እኮዳ መነ ዋጅቶእ። 20 አሞ ገሽ መቆሁ ዳኖመቲ ዮ ገሻንቺ ህግስ ኣስቶስተ መክታ ጃተ ሀሰዮ እኬ። ህከኒ ጡመ መነ አጉደን ጠዕምተን ጠሂንተስ ጋጅታ መነ ሶኮእ። 21 እሶኦንት ዬሱሰ «ሮስሳንቾ! ገርተ ጠሃታንትገ፥ ገርተ ሮስሳንትጋ መን እልተ ጡድኬእ ጎዕልቱዕነ ገርንተ መገን ዎቃ ሮስሳንትጋ ደንጋም። 22 ቄሳሬ ግብረ ባቱ ሀስሰኗንዶ ሀስሱምቧን?» ይት ጠዕምቶእ። 23 - 24 ጠሁ እኮዳ ዬሱሱ ሾክመሰ ደግኬእ «መቱ ብረ ጡድሼኤ። ከን ብር አሌን ዮ ምስሉሁ ሱዕሙሁ አዬየን?» ዬሰ። እሶኦንት «ቄሳሬየ» ይቶእ። 25 እስን «ህከደ ቄሳሬቢ ቄሳሬንከ አሞ መገንቢ መገኒንከ ኣስዬ» ዬሰ። 26 ህከኒ እሶኦት እስ ጠሃቄ ጠሂን መን ብሬን ጋጅቶስተ ደንድትምበአ። እኮዳ እስ ፈንቀሼራን ማለልት ሰዕምት አጉርቶእ። 27 ህከኒች ዘኪን «ሬሄ መኑ ሬሆች ኬአኖበአ» ይታ «ሳዱቀተ» ዬኖ መኒች መ-መቱ ዬሱስበ ዋልት 28 «ሮስሳንቾ! ሙስ ‹መቱ መንቹ ሜንትቹተ ኤብ ኦሱተ እሉዕናች ሬሄደ መንችስ ህዞ ሬሄሀን ሜንትቹተ ረገእ ህዜሀንስ ኦሱተ እሉን› ይ ሴረ ጣፌኔ። 29 መቱ ዶለ ለመልት ህዛከት ዮ እኬ። እሶኦችን በህሩ ሜንትቹተ ኤብ ኦሱተ እሉዕናችን ሬሄእ። 30 - 31 አሞ ለንክቢንኩ ሰክቢንኩ ረገኦሴ። ህትጎንን ለመሉንኩ ረገእ ኦሱተ እልቱዕናችን ሬቶእ። 32 ሆሪችሰን ዘኪን ህት ሜንትቹቲ ሬቶእ። 33 ህከኒ ለመሉንኩ ኤበቅቶሴተኔ ሬቶሩ ሬሆች ኬኣ ጃተ ህት ሜንትቹት ሀከንሰቢተ እካእ?» ይት ጠዕምቶስ። 34 ዬሱሱንኩ እሶኦ «ተን ኡላን ሄኣ መኑ ኤበቅታእኒ ቆርሲሰንታእኒ። 35 ጠሁ እኮዳ ሬሆች ኬኢ፥ ዋለኖ ዶላን ሄኢሃ ሀስሳሩ ኤበቅታበእኒ ቆርሲሰንታበእኒ። 36 እሶኦት ሰሜ መገን ሶቀማንገ እኮተኔ ለንኪ ሬታበአ። አሞ እሶኦት ሬሆች ኬኦተኔ መገንተ ኦሱ። 37 አሞ ሙስ ቡበኖ ዱብተኔ ጣፎሀኔን መገኑ ‹አብረሃሜ መገኖ! ይሳቅ መገኖ! ያቆቤ መገኖ!› ይ ገኢን ሬቶሩ ኬኣገ ጡድሼእ። 38 ህከኒ መገኑ ፎላሞ መንየ መገኑ በጋን ሬሄ መንየ መገኑበአ። ዳፉንኩስ እሲ ሆሩንኩ ፎሊን ሄአኖተኔሃት» ይ ፈንቀሼእ። 39 አሞ ሴር ሮስሳኒችን መ-መቱ ፈንቀሽት «ሮስሳንቾ! ደናሞገ ጠሃቴንት» ይቶእ። 40 ህከኒች ዘኪን እሶኦት ዬሱሰ መ ጠሀሃ ጠዕሚ እግትምበአ። 41 ጠሁ እኮዳ ዬሱሱ «እሶኦት ‹ክርስቶሱ ዳዊቴየ ቤቱ› ዪ ደንድቶኢ ሀትጎኔት? 42 - 43 ህከኒ ዳዊት ገጉንኩስ መዝሙር መጣፋን ‹መገኑ ኢ ቀርቺ ‹አን ዲናከክ ሎካን ሃንታንትገ አሰንቀጤች መኬእ ዉዲን አፉዕል› ዬእ› ያኖ። 44 ዳዊት ‹ቀርቾ› ይ ገኤሲች ክርስቶሱ ሀትክ ቤቱስ እሀኖ?» ዬሰ። 45 - 46 አሞ ሆሩንኩ መኑ መጮጨንየን ዬሱሱ አወናኒሀንስ «ቄራዕሩተ ኦድሸተ ኦደቅት መረሙ፥ ድኩት ዮባን አብኒን ጡምሴኑንተሰ፥ ጠጵት ምኔን አባኖ በርጩማን አፉዕሉሃ ድግሰ ድግሴመባን አብን መዕንታ ኢትታ ሴር ሮስሳኒች ቆረጵዬ። 47 አጉዲሲ ቄራርስት መገኑ ኡጭተን ምኔኑሰ ሬሄ ሜንቱ መለጥ እታእ። ህከኒ እሶኦ አሌን አቡ ፍርዱ እሀኖ» ዬእ።
1 ዬሱሱ ምጡዋት ግዘ ዎሬኖ ሳጥናን ዱበላከት ምጡዋተሰ ዎርተንየን እልስ ጦቀእ ጡደዮ እኬ። 2 ህትጉንተ ምኔኑሴ ሬሄ አብስ ቡጥቹት ሜንትቹት ለምተ ሰሙንተ እሀኖ ቡሬች ግዘ ሳጥናን ዎርተንየን ጡጆ። 3 እስን «ገርተ ኩላንክዕኔ፤ ት ምኔኑሴ ሬሄ ቡጥቹት ሜንትቹት ሆሪችሰን አበ ኣስቴእ። 4 ዳፉንኩስ እሶኦት ሆሩንኩሰ ኣስቶኢ ዮሰ ዱቢች ፈኦስየ። ጠሁ እኮዳ እሴ ቡጥማንተሴን ዮሴረ ሆረንከ ኣስቴእ» ዬእ። 5 መ-መቱ መኑ መገን ምኑ ደናሜ ክናኒ መገኒ ኣሰሞሪኒ መክኬእ ጩሉአሰኖ እኮገ ሃሳውተዮ እኬ። 6 ዬሱሱንኩ «ኩ ጡዴነንተሩ መቱ ክኑሁ መቶ ክን አሌን እኮገ ከኔ ፈኡዕነ ቶሮሸመኖ በሩ ዋለኖ» ዬእ። 7 ህከኒች ዘኪን እሶኦት «ሮስሳንቾ! ኩ ጠሁ እሀኖ ሀከዳት? አሞ ኩ ጠሁ እሂ እኮ ጃተ መላስ መሃን?» ይት ጠዕምቶስ። 8 ዬሱሱንኩ «አዪ ሉስሱምቦዕኔገ ቆረጵዬ። ዳፉንኩስ ሆለሙ መኑ ‹አን ክርስቶሳት› ይተኒ ‹ጃት ኢልቴእ› ይተኒ ሱዕሚንተኤ ዋልታእ። እኮዳ እሶኦተ አወንቴኖችዬ። 9 አሞ ኦለሃ ደምበቀሃ መጮቴንተ ጃተ ህልቄኖችዬ። ዳፉንኩስ ህኩን ብርስ እሁ ሀስሰኖስ። ጠሁ እኮዳ ዘካንቹት ጃት ደዕልት ኢልታበአ» ዬእ። 10 ህከኒች ዘኪን ዬሱሱ እሶኦ «ምናደቡ ምናደብ አሌን፥ ዎሙ ዎም አሌን ኬአኖ። 11 ህትጉንተ አቡ ኡለ ሌንቄቁ፥ አነነ አነነ መዕኔን ጎሩሁ ቦበኑሁ እሀኖ። አሞ ዋጅሲሰኖሩ አበት መላቲ ሰሜች ፉልታእ። 12 ጠሁ እኮዳ መኑ ህከን ጠሂች ሆሪችን ብርስት ክዕኔኤተ አፋእኒ ሸርታእኒ። አሞ ጠጵት ምኒሃ ኡሱሮ ምኒሃ ህግስ ኣስታዕኔ። ህትጉንተ ሱዕምኤተኔ ዎማከነ ገሻን ብርተ ዋሽታዕኔ። 13 ህት ጃንት አዕኖኦት ኤሳ ነቀሴኑንተ መከተ ጃተ እካዕኔ። 14 ብርስቴንን ‹መ ይን ፈንቀሽናም› ይቴን ጠሂሀንስ ዎዘናንተዕኔ ክቼኤኖችዬ። 15 ዳፉንኩስ አን ዲናካችዕኔ አዪ ኡርጨሞተ እንዶ ጎምበቀሞተ ደንዱምቡተ ላገታ ቆርመታ ኣሳንክዕኔ። 16 ሆረን እልቶዕኔሩ፥ ህዛከዕኔ፥ እለሙዕኔ ጃለዕኔ ፈኡዕነ ህግስ ኣስታዕኔ። አሞ እሶኦት ክዕኔኤች መ-መቱዕኔ ሽታእ። 17 ህትጉንተ ሱዕምኤተኔ ሆራንከ መንባን ግበንቴንተረ እኬነንተ። 18 ጠሁ እኮዳ ቦቆዕኔ ሙሚች መትት ዱጥቹቲ በኣበአ። 19 ህከኒ እየቂንተዕኔ ፎልዕኔ ፈእጭቴነንተ» ዬእ። 20 ዬሱሱ «ዬሩሳሌሙ ቤጠቤን ክበምየን ጡዴንተ ጃተ በኡስ ኢሌገ ደግዬ። 21 ህተ ጃተ ይሁድ ባዶን ዮ መኑ ዱን አል ሁኑን። አሞ ከተምስ ኣዜን ዮሩ ህከምቢች ፉልቱን። ህትጉንተ ከተሚችስ ኤተሮ ባዶ ዮሩ ከተምስ ኣዝ ኣጉንከ። 22 ዳፉንኩስ ጣፈሞሩ ሆሩንኩ ዊሙንተ ቲን ባደ ፉልተ ጄቹ። 23 ህተን ጃን ሰላኒሃ ቀንስታ ሜንቲሃ ኣዬ! ዳፉንኩስ አቡ ሀዉ ኡለ አሌን እሀኖ። አሞ መገን አሙርት ከን መን አሌን ዋልታእ። 24 እሶኦችን መ-መቱ ብሲን ሬታእ። አሞ ዎሉስ ቀፈደንት ባዱ ሆረንከ ኦሮታእ። ህትጉንተ አይሁደ እኩምቡ መኑ ጄቹሰ ኢልተንቀጤች ዬሩሳሌመ ከዳእ» ዬእ። 25 ዬሱሱንኩ «አሪቾን፥ አገንቾኒ ቤዜኒ መላት እካእ። አሞ ኡለ አሌን ዮ ምናደቡ በሃርነ ዎእ ዎርጃም ዋጅሲሳ ላጋች ኬኦ ዋጅት ኡዕነንታእ። 26 ሰሜ መቆ ሌንቄቀኖተኔ መኑ ዋጂኒ ኡለ አሌን ዋለኖረ ቆረቢኒ ሉቁጭታእ። 27 ህተ ጃንተ እሶኦት መንች ቤቱ መቄኒ አበ አብኒኒ ጎም ኣዚን ዋለንየን ጡዳእ። 28 አቼ ኩ ጠሁ ሆሩንኩ እሂ አፎ ጃተ ፈኡዕኔ ህንጭዬተኔ ቦቁዕኔ ጦቀቴን አል ለቄን ጡጅዬ» ዬእ። 29 ህከኒች ዘኪን ዬሱሱ መትተ አጉዲሸተ እሶኦ «ኦዴቹታ ዎሉ ሆረንከ ሀቀሃ ቆርስቴን ጡጅዬ። 30 ህት ሀቃከት ቦሌኮገ ጡዴንተ ጃንተ ሀጉ ኢሌገ ገጉዕኔን ደጌነንተ። 31 ህትጉንተ ኩ ሆሩንኩ ጠሁ እሀንየን ጡዴንተ ጃተ መገን ዎሞመት ኢልቶገ ደግዬ። 32 ገርተ ያንክዕኔ፤ ኩ ሆሩንኩ ጠሁ እሀንቀጤች ከን ዶል መኑ ህገኖበአ። 33 ሰሞሁ ኡለቲ ህጋእ። ጠሁ እኮዳ ላገእ ሆረን ህጋበአ። 34 ጠሁ እኮዳ ጄቹታ ግዘሃ አጉዱምቦራን ሆስሲን፥ ድምቢኒ ተን ኡለ አል ሄቻ ክቼኢኒ ዎዘኑዕኔ ሆጉምቦጋ ህኩ በሩ ደንጎን ዎሻድገ አፎተ አሌንተዕኔ ዋሉምቦጋ ገገዕኔ ቆረጵዬ። 35 ዳፉንኩስ ህኩ በሩ ኡለ አሌን ሆራንን ሄአኖ መነ አፎተ ዋለኖ። 36 ህከኒ ከን ዋለኖ ጠሂች ሆሪችን ፈኤነንተ መቆ ደቂሃ መንች ቤት ብሬን ኡሪ ደንድቴኖታ መገኑ ኡጭቴነን ሆረንተ ጃተ ቃርዬ» ይ ኩሎ። 37 ዬሱሱንኩ መገን ምኔን ሆረንከ በር ሮስሰን አንከር አንከር ዘይት ሀቁ ሌአኖ ዱነ ፉለን ገለዮ እኬ። 38 አሞ መኑ ሆሩንኩ መገን ኬሰሞ ምኔን እሲች መጮጮተ ገ-ገስመ በቅተ እስበ ዋለዮ እኬ።
1 ጦሮሹ እቴነን አብሴኖ አያኑ ህንጭዬ እኬ። 2 ህተ ጃተ ቄስ አወንሳኑሁ ሴር ሮስሳኑሁ መነ ዋጅቶተኔ ዬሱሰ ሀተት ሽታእንዶ ዎቃ ሀሰዮ እኬ። 3 ህከኒች ዘኪን ቶነ ለሟንከ አወናኒች መቶን «አስቆሮንቶ» ዬኖ ይሁዳን ሼጣንቹ ኣጎ። 4 እስን መር ቄስ አወንሳኒኒ መገን ምን ቆረባሪ አዘዛኒኒ ዬሱሰ እሶኦ ህግሽ ኣሰኖ ዎቃ ኤረሞ። 5 እሶኦንት በጅቀንት ግዘ ኣስቶስተ ኢተንቶእ። 6 ህከኒ እስን ጠሃንተስ ኢተምኬእ መኑ ዮበእባን ዬሱሰ እሶኦ ህግሽ ኣሶተ መከተ ጃተ ሀሰዮ እኬ። 7 ህከኒች ዘኪን ሻሽግ ሆልቹ ዱለመኖ ጦሮሹ እቴነን አብሴኖ አያን በሩ ኢሌእ። 8 ህከኒ ዬሱሱ ጴጥሮሴኒ ዮሃንሴኒ «መርቴን ሻሽገ እንቱንተ ቅጠንስዬኔ» ይ ሶኮ። 9 እሶኦንት «ህከስ ሀከኔ ቅጠንስኑንተ ሀሰን?» ይቶስ። 10 እስን «ከተመ ኣጌንተ ጃተ ዎእ ቦሱ እዬ መንቺን ደቀንቴነንተ። እስ ኣገኖ ምንንከ አወንቴን መርቴን 11 ምንስ አኒ ‹ሮስሳንቹ ‹አወናኒንተኤን ሻሽገ እታም ኮህ ምኑ ሀከኔኔት?› ያዮኬ› ይቴን ጠዕምዬ። 12 እስን ሀስሰኖሩ ሆሩንኩ ቅጠሜ ፎቅ ምን ጡድሰኖዕኔ። ህከኔ ቅጠንስዬ» ዬሰ። 13 እሶኦንት መርት ሆሩሩንኩ ዬሱሱ ኩሎሰገንከ እክየን ደግኬእ ህከኔ ሻሽገ ቅጠንስቶእ። 14 ኦዜ ጃት ኢልትየን ዬሱሱ ሶቀማኒንተስን በርገም ማዳን አፉዕሌእ። 15 እስን እሶኦ «ሀዋምሀኒች ብርስ ከ ሻሽገ ክዕኔኤን በርገም እቶተ አብሽ ቁልጠዮም እኬ። 16 ዳፉንኩስ መገን ዎሞማን ሻሽግ ሂረቱት ጫክት ለልተንቀጤች አን ሻሽገ ሆረን እቱምቦገ ኩላንክዕኔ» ዬሰ። 17 አሞ ዬሱሱ ኩባየ ኬእሽ አፍ መገኑ ገለጥኬእ «ከኔን ዮኢ ኣቅቴን ቤቀምዬ። 18 አንን ቴሶች አፍ መገን ዎሞመት ዋልተንቀጤች ዎይን ላሎች ጡንሼማ አጉምቦገ ኩላንክዕኔ» ዬእ። 19 ህከኒች ዘኪን ዬሱሱ ዳቡተ ኬእሽ አፍ መገኑ ገለጤእ። ህታንን ቢጭ እሶኦ ኣስኬእ «ኩን ክዕኔኤ ኣሰሜሃ ማላዕኔ። ካንን ኤስ ቃጌኖተ አስዬ» ዬእ። 20 ህትጉንተ ኦዜች ዘኪን ኩባየ ኬእሽ አፍ «ኩ ኩባይቢ ክዕኔኤተኔ ዱነመኖ ቄጊንተኤ እሀኗ ሃሮሃ ህድሩ። 21 ጠሁ እኮዳ ከረጌ፤ ኤስ ህግሽ ኣሰኖሀን አንገት ኤሳንን ሜጦ ማድ አሌን ዮእ። 22 መንች ቤቱዕኑ እስተኔ የመም ገሎገንከ ሬሀኖ። እኮዳ እሱ ህግሽ ኣሰኖ መንቺ ኣዬ!» ዬእ። 23 ህከኒ እስ-እሶኦንት «ካን አሰኖ ኒ ሜሬሪች አዬት?» የቀንተን ጠዕመቀሙ አፎእ። 24 አሞ አወናኑ «ኒ ሜሬሮን ሆሪችን አቡ አዬት?» ይተን ብተተ ፉሽቶእ። 25 ህከኒ ዬሱሱ እሶኦ «አይሁደ እኩምቦ መን ዎማከት መንሰ አሌን ቀርቦመሰ ጡድሳእ። አሞ ጠቅታሰሩንኩ ‹ደናሙ ጠሀ አስታሃረ› የመንት ገአንታእ። 26 እኮዳ አዕኖኦት ህትጉተ እኬኖችዬ። ህከን ቆደ ክዕኔኤ ሜሬሮን አበ እኮ መንቹ ማዕንገ እሁን። አሞ አወንሳንቹ እኮ መንቹ አሽከርችገ እሁን። 27 ማዳን አፉዕል እተኖንዶ አደላንቹ አባን? አቡስ ማዳን አፉዕሌሃበእንዶ? ጠሁ እኮዳ አን ሜሬሮንተዕኔ አደላንችየገ። 28 አሞ አዕኖኦት ኤሳን በርገንቴን ሀዋንተኤ ሆረንተ ጃተ ሄኤንታረ። 29 - 30 ህከኒ ኢ አኑ ኤሳ ዎሞመተ ኣሴኤገንከ አኒ ዎሞማንተኤ ኢ ማዲች እቴኑንተ፥ አጌኑንታ ቶነ ለሟንከ እስራኤል ቦኮን ፍርዲ ዎሞመ በርጩማን አፉዕልቴኑንታ ዎሞመተ ኣሳንክዕኔ» ዬሰ። 31 ዬሱሱንኩ «ስሞኔ! ስሞኔ! ሼጣንቹ አለስገ ነጠፎዕኔተ ቃርስ ሀሾ። 32 እኮዳ አን አመዕነቱክ በኡምቦገ ኬሳ መገኑ ኡጬም። ህከኒ አት ቢረ ይት ፈንቀልቶንት ጃተ ህዛከክ ቃርስ» ዬእ። 33 እስን ዬሱሰ «ቀርቾ! ኬሳንን በርገም ኡሱረሚሃ ሬሂሃ ቅጠሜምየ» ዬእ። 34 ዬሱሱንኩ «ጴጥሮሴ! አን ኩላንኬ፤ ከበር አንተቤቹ ዎደንቀጤች ‹ደጋንስበአ› ይት ሰስተ ኮደተ ካዳንቴኤ» ዬእ። 35 ህከኒች ዘኪን ዬሱሱ አወናኑስ «ከረጢቱ፥ ጨኑሁ ጫሙሁ ዮበኢ ሶኮንክዕኔ ጃተ ኮቼዕኔሩ ዮእንዶ?» ዬሰ። እሶኦንት «ሜጡሩ ኮትምበአ» ይቶእ። 36 እስን «እኮዳ ቴሱ ከረጢቱሁ ጨኑሁ ዮሲ አጱን። ህትጉንተ ብሱ ዮስበኢ ኦድሸስ ህርኬእ መቱ ብሰ ህዕሩን። 37 ህከኒ ‹ሾካካን ዎልሰሞ› የመም ጣፈሞ ኢ አሌን ዊሙ ሀስሰኖስገ ኩላንክዕኔ። ዳፉንኩስ ኢተኔ ጣፈሞ ጠሁ ሆሩንኩ ዊመኖተኔሃት» ዬእ። 38 አሞ አወናኑስ «ቀርቾ ከረግ፤ ለሙ ብሱ ከኔ ዮእ» ይቶእ። እስን «እሀኖ» ዬሰ። 39 ዬሱሱ ከተሚች ፉል ኤጅ ሮሾገንከ ዘይት ሀቁ ሌአኖ ዱነ መሮ። አሞ አወናኑስ እሱ አወንቶእ። 40 እስን መዕንስ ኢሌ ጃተ እሶኦ «ኬነንቻን ኣጌኑምቦገ መገኑ ኡጭዬ» ዬሰ። 41 - 42 ህከኒች ዘኪን ክኑ ቶሬኖ ቀጠበ እሶኦች ቄዕር ጉሉጵኬእ «ኢ አነ! አት ሀሶንትደ ከ ሀው ጡወ ኤሳች ከም። ጠሁ እኮዳ አን ሀሳምገ እሁዕነ አት ሀሳንትገ እሁን» ይ መገኑ ኡጬእ። 43 - 44 ዬሱሱንኩ አብሽ ሀወን ቃርስ መገኑ ኡጬእ። ሁንኩስን ቄግገ እክ ኡለ ዛዘዮ እኬ። ህተ ጃተ መገን ሰሜ ሶቀማንቹ ሰሜች ዋል እሱ ቃርሰን ህከኔ እሲ ጡደሞ። 45 አሞ መገኑ ኡጨኖቢች ኬእ አወናንስበ ዋሎ ጃተ አብስ ክቼኦተኔ ግሰንየን ኢሌእ። 46 እስን እሶኦ «ሚ ግሴነዮንተ? ኬነንቻን ኣጌኑምቦገ ጦቅቴን መገኑ ኡጭዬ» ዬሰ። 47 ዬሱሱ ጠሃቀዮሀኔን ቶነ ለሟንከ አወናኒች መቱ «ይሁደ» ዬኖ መንቹ አወንሰንየን ሆለሙ መኑ ህከበ ዋሎ። ይሁድን ሱንቆስተ ዬሱስበ ህንጭዬእ። 48 ጠሁ እኮዳ ዬሱሱ «ይሁደ! መንች ቤቱ ሱንቂን ህግስ ኣስተንንዶ?» ዬስ። 49 እስ አወናኑንኩ እሀኖ ጠሀ ጡዶ ጃተ «ቀርቾ! ብሲን ዎቀኑንሰንዶ?» ይቶእ። 50 አሞ እሶኦችን መቱሰ ቄስ አወንሳንች ሶቀማንቹ ዎቀር መኬ መጨተ ሙሮ። 51 ጠሁ እኮዳ ዬሱሱ «ኩን ሀስሰኖበአ» ይኬእ መንችስ መጨተ አፍ ፈይሾስ። 52 ህከኒች ዘኪን ዬሱሱ ህከ አፎስተ ዋልቶ ቄስ አወንሳኑ፥ መገን ኬሰሞ ምን ቆረባሪ አዘዛኑሃ ኑባቡሃ «ሽፍጥቹ አፌኖሀንገ ብሰሃ ደመሃ አፌን ዋልቴንንዶ? 53 አን መገን ምኔን ሆረንከ በር ክዕኔኤንን በርገም ሄኦም ጃተ አፌንምበኤ እኬ። ጠሁ እኮዳ ት ጄቹት ክዕኔኤታኒ ቱንሶ አሌን መቆ ዮስሀንተኒ» ዬሰ። 54 ህከኒች ዘኪን ህኩ መኑ ዬሱሰ አፍ ቄስ አወንሳንች ምን አወንስት ዋሽቶእ። ጴጥሮስን ቄዕርኬእ አወነዮ እኬ። 55 አሞ እሶኦንት ግቤ ሜሬሮን ጊረተ ቡስት ሜጡ እክ አፉዕልቶ ጃተ ጴጥሮስ ዋል ሜሬሮንተሰ አፉዕሌእ። 56 እስን ጫክ ዉዲን አፉዕሌሀኔን መትት አሽከርቹት ቀስ አፍ ጡድኬእ «ኩ መንቹ ዬሱሲን በርገም ዮሃ እኬ» ይቶእ። 57 ጠሁ እኮዳ ጴጥሮስ «ቴ ሜንትቾ! አን እሱ ደጋምበአ» ይ ካጆ። 58 አሞ ቀሁንከ ኤጌርየን መቱ መንቹ እሱ ጡጅኬእ «አቲ እሶኦች መቷንስ» ዬእ። ጠሁ እኮዳ ጴጥሮስ «መንቾ አኔበአ!» ዬእ። 59 አሞ መቶ ሳት ቀጠ ኤጌሮሀኒች ዘኪን ዎሉ መንቹ «ኩ መንቹ ገሊል ባድቢ እኮተኔ ገርንተ እሲንን በርገም ዮሃ እኬ» ይ ቃርስ ጠሃቄእ። 60 ጠሁ እኮዳ ጴጥሮስ «መንቾ! አት ይታንቲ አን ደጋምበአ» ዬእ። ህተ ጃንተ እስ ጠሃቀንየንን አንተቤቹ ዎጆ። 61 ዬሱሱንኩ ዘኩ ፈንቀል ጴጥሮሴ ጡጆ። ጴጥሮስን «ከበር አንተቤቹ ዎደንቀጤች ሰስተ ኮደተ ካዳንቴኤ» ዬስገንከ ቀርች ላገተ ቃጎ። 62 ህከኒ ሀደተ ፉል ሽክ ይ ኦኦ። 63 ህተ ጃተ ዬሱሰ አፎ መኑ ገላጨዮስኒ ኦልተዮስኒ እኬ። 64 አሞ እልስ ኡሱርትኬእ ዎቀርተን «ዎቀሮሄ መንቹ አዬት? ሀኖ ደግ» ይተን ጠዕምተዮስ እኬ። 65 ቴሱ እሶኦት ዎልተ ሆለመተ ላገታ ጠሃተን ቦሮርተዮስ እኬ። 66 እሩ ሶጆ ጃተ ባድ ኑባቡ፥ ቄስ አወንሳኑሁ ሴር ሮስሳኑሁ ጠጵት ዬሱሰ ያእሰበ ኦሮሶእ። 67 እሶኦንት «ክርስቶሰ እኬንትደ ኩልኔ» ይቶእ። ጠሁ እኮዳ እስ «ኩሎንክዕኔደ አመዕንቴነንተበአ። 68 አሞ ጠዕሜንክዕኔደ ፈንቀሽቴነንተበአ። 69 ጠሁ እኮዳ ቴሶች አፍ መንች ቤቱ መቆ ዮ መገን መኬ አንገ ዉዲን አፉዕለኖ» ዬሰ። 70 እሶኦንት ሆሩንኩ «ህከደ አት መገንየ ቤቱንዶ?» ይቶእ። እስን «ኤስ እኮምገ አዕኖኦንት ይቴንተ» ዬሰ። 71 ህከኒ እሶኦት «ነኦት ገጉንኩኔ ገግስ አፌች መጮኖምተኔ መ ዎሉ ነቃሸ ሀንሳም» ይቶእ።
1 ህከኒች ዘኪን ህኩ ያኦ መኑ ሆሩንኩ ሜጡ እክ ጦቅት ዬሱሰ ጵላጦሴ ብርተ ዋሽቶእ። 2 እሶኦንት «ኩ መንቹ ምናደበኔ ሉስሰንየን፥ ቄሳሬ ግብረ ባንቱምቦገ ከመንየኒ ‹አን ዎማ ክርስቶሳት› ያንየኒ ደንጌም» ይተን ኦዱ አፎስ። 3 ጵላጦስን «አት አይሁድ-መንየ ዎመንዶ?» ይ ጠዕሜስ። ዬሱሱንኩ «አት ይቶንትየገንከ» ይ ፈንቀሼስ። 4 ህከኒች ዘኪን ጵላጦስ ቄስ አወንሳኒሃ ህከን በትናሸ መኒሃ «ከን መንቾን ሜጡ በእሱሃ ደግምበአ» ዬእ። 5 ጠሁ እኮዳ እሶኦት «ገሊሊች አፍ ከበ ኢለንቀጤች ይሁድ ባዶን ሆራንን ሮስሰን መነ ፈገርሲሰዮእ» ይተን ቃርስት ጠሃቶእ። 6 ጵላጦስን «ገሊለ» ይተንየን መጮጬ ጃተ «ገሊል ባድየ መንቹንዶ?» ይ ጠዕሜእ። 7 እስን ዬሱሱ ሄሮድስ ገሸኖ ባድቢ እኮገ ደጎ ጃተ ዬሱሰ ሄሮድሴበ ሶኮ። ሄሮድስ ህተ ጃተ ዬሩሳሌመ ዮ እኬ። 8 ሄሮድስን ዬሱሰ ጡጆ ጃተ አብሽ በጅቀሞ። ዳፉንኩስ እስተኔ ሆለመረ መጮጭ ጡዶስተ በትናሸተ ጃተ ቁልጠዮ እኬ። ህትጉንተ ማለሉተ ሁጀተንየን ጡዶተ ተሳ አሰዮ እኬ። 9 ህከኒ ሄሮድስ ዬሱሰ ሆለመረ ጠዕሜእ። ጠሁ እኮዳ ዬሱሱ ሜጡራ ፈንቀሽምበአ። 10 አሞ ቄስ አወንሳኑሁ ሴር ሮስሳኑሁ ህከኔ ኡርት ቃርስት ኦደዮስ እኬ። 11 ህትጉንተ ሄሮድስ ቤጠቤንተስን በርገም ገጆስኒ ገላጮስኒ። ህከኒች ዘኪን አብስ ደናምተ ኦድሸተ ኦዲሽ ጵላጦሴበ ፈንቀሽ ሶኮ። 12 ህከ በር ጵላጦሲ ሄሮድሲ እስ-እሶኦንት ጃላከተ እኮእ። ህከኒች ብሬ እስ-እሶኦንት በአንታሃረ እኬ። 13 ህከኒች ዘኪን ጵላጦስ ቄስ አወንሳኑ፥ ገሻኑሃ መነሃ ገእኬእ 14 «ከ መንቹ ‹መነ ሉስሰዮእ› ይቴን ኢበ ኤቤንተ። አንን ብሬንተዕኔ እሱ ቆርሜምሀኒች ዘኪን አዕኖኦት ኦዴንተስራን ሆራንን ከን መንች አሌን ሜጡ በእሱሃ ደግምበአ። 15 ሄሮድሲ ሜጥተ ሉሰታ ደጉሆጎተኔ ኒበ ፈንቀሽ ሶኬስ። ህከረጌ ሬሆበ ኢልሰኖስ ጠሀ ሜጡራ አስምበአ። 16 ህከኒ አን እሱ ገረፍ ገፈራም» ዬሰ። [ 17 ሻሽግ አያናን ጵላጦስ ኡሱረንቶሪች መቱ መንቹ መኒ ሂር ገፈሩ ግዳንስ እኬ።] 18 ጠሁ እኮዳ እሶኦት ሆሩንኩሰ ሜጡ እክ «ከ መንቹ ከም! ባርባኔ ሂርኔ!» ይተን ጨንጭቶእ። 19 ባርባንን ከተም ኣዜን ደምበቀ ፉሼተኔሃ መነ ሼተኔሃ ኡሱሮ ምኔን ኡሱረሜሃ መንቹ እኬ። 20 ጵላጦስን ዬሱሰ ሂር ገፈሮተ ሀሽኬእ ለንኪሃ መኒ ጠሃቄእ። 21 ጠሁ እኮዳ እሶኦት «እሱ ሰቀል! እሱ ሰቀል!» ይተን ጨንጭቶእ። 22 ሰክ ኮደታ ጵላጦስ «ሚ? መ በእሼእ? አን ሬሆበ ኢልሰኖስ በእሱ ደግምበአ። ህከኒ እሱ ገረፍ ሂር ገፈራም» ዬሰ። 23 ጠሁ እኮዳ እሶኦት ሰቀለሙንተ አበ ላጋን ቃርስት ጠዕምቶእ። ላገሰን በተእ ቄልቶእ። 24 ህከኒ እሶኦት ጠዕምቶ ጠሁ እሁንተ ጵላጦስ ፍርዴእ። 25 እስን እሶኦት ጠዕምቶገንከ ህከ ደምበቀ ፉሺኒ መነ ሺኒ ኡሱሮ ምኔን ኡሱረሜ እኬ መንቹ ሂር ገፈሮ። ጠሁ እኮዳ ዬሱሰ ሀሶገ አስቱንተ ህግሽ ኣሴሰ። 26 ህከኒች ዘኪን እሶኦት ዬሱሰ ኦሮሰንየን ገጠሪች ከተመ ዋለዮ «ስሞኔ» ዬኖ ቃሬን ባድ መንቹ አፍ መስቀልቹ እዪስ ዬሱሰ አወነኖገ አስቶእ። 27 አሞ አብሽ በትናሹ መኑሁ «ኣዬ! ኣዬ!» ይተን ኦአዮስ ሜንቱሁ ዬሱሰ አወንተዮ እኬ። 28 ጠሁ እኮዳ ዬሱሱ እሶኦ ዉዱ ፈንቀል «ዬሩሳሌም ሜንቶ! ኤሳ ኦኤኖችዬ። እኮዳ ክዕኔኤ ገጊሃ ኦሶሀንክዕኔ ኦእዬ። 29 ዳፉንኩስ ‹አልጬናከት፥ እሉምቡ ጎደቡሁ ቀንስቱምቡት ኡኑነቲ ማሰአንቴሃረ› ዬኖ ጃት ህኩዕኒን ዋልተዮእ። 30 ህተ ጃተ መኑ ዱናከተ ‹አሌንተኔ ኡብዬ!› አሞ ቆታከተ ‹ማጭዬኔ› ዩ አፋእ። 31 እሶኦት ሙጠ ሀቃን ካን አስቶኢች ሞለስ ሀትተ አታእ?» ዬእ። 32 ህትጉንተ ዎንጀለ ሁጀቴ ዎሉ ለሙ መንቹ ዬሱሲንን በርግት ሽቶተ ኦሮሶእ። 33 እሶኦንት «ቦቆ ቆሙ» ዬኖ መዕንተ ኢልቶ ጃተ ህከኔ ዬሱሰ ሰቀልቶእ። ህትጉንተ ዎንጀለ ሁጀቶረ መቱስ መኬስ ዉዲን ለንክስቢ ጉረስ ዉዲን ሰቀልቶእ። 34 ዬሱሱንኩ «ኢ አነ! እሶኦት አስታረ ደጉምቡተኔ አጉርሰ» ዬእ። እሶኦንት ኦድሸስ ሳመ ኡጅት ቤቀንቶእ። 35 አሞ መኑ ኡርኬእ ጡደዮ እኬ። ጠሁ እኮዳ ገሻኑ «ዎሉ ኬኑ ፈእሼእ። መገኑ ዶዕሬ ክርስቶሰ እኬደ ሀኖ ገገስ ፈእሱን!» ይተን ገላጨዮስ እኬ። 36 - 37 አሞ ቤጠቦ እስበ ህንጭት ሺሸ ዎይነ ኣስትኬእ «አት አይሁድ ዎመ እኬንትደ ገገክ ፈእስ!» ይተን ገላጨዮስ እኬ። 38 ህትጉንተ «ኩን አይሁድ-መንየ ዎመ» ዬን ጣፌማ ቦቆስባን ዮ እኬ። 39 ሂለረ አስት ሰቀለንቶሪች መቱ «አት ክርስቶሳበእንዶ? ሀኖ ገገኪ ኔሲ ፈእስ» ያን ቦሮሮ። 40 ጠሁ እኮዳ ለንክስቢ «አቲ እስ ሬሆ ፍርድ ኣዜን ዮሀንገንከ ሬሆ ፍርድ ኣዜን ሄአኒ መገኑ ዋጅታንትበእንዶ? 41 ነኦትዕኑ ሁጄሀኔ ሀስሰኖ ዋገ ኣቅነዮምተኔ ኒቢ ገሬየ ፍርደ። እኮዳ ኩ መንቹ ሜጥተ ሉሰታ ሁጀትምበአ» ይ አሙዕሬስ። 42 አሞ «ዬሱሰ! ዎሞማንተክ ዋልቶንት ጃተ ቃጌኤ» ዬእ። 43 ዬሱሱንኩ «ገርተ ያንኬ፤ ከበር ኤሳንን በርገንት ገነታን + እካንት» ዬስ። 44 - 45 ሌሆ ሳት ቀጠ እኬሀኔን አሪቹት ቱንስትየን ኡለ አሌን ሆራንን ሆንሱ ሳተ ኢለንቀጤች ቱንሱት እኮእ። ህተ ጃተ መገን ኬሰሞ ምን መጋረጁ ለሙበ እክ ዘረሞ። 46 ዬሱሱንኩ አበ ላጋን ያር «ኢ አነ! ፎልኤ አንጋንተክ ኣሳም!» ዬእ። ህካንን ይኬእ ሬሄእ። 47 ጥቤ መን አዘዛንቹንኩ እኮ ጠሀ ጡጆ ጃተ «ገርንተ ኩ መንቹ ጡማንቿ እኬ» ይ መገኑ አብሾ። 48 ህካንን ጡዶተ ጠጵቶ መኑ ሆሩንኩ እኮ ጠሀ ጡዶ ጃተ ሃሙሰ ዎቀዕርተን ምንሰ ፈንቀልቶእ። 49 እኮዳ ዬሱሲን መሌጨንታ መኑ ሆሩንኩ ገሊሊች እሱ አወንተዮ እኬ ሜንቱሁ ቄዕረ ኡርትኬእ ህከ ጠሀ ጡደዮ እኬ። 50 «አርማትየ» ዬኖ አይሁድ ከተማን ሄአኖ «ዮሴፈ» ዬኖ መቱ መንቹ ዮ እኬ። እስን ጡማንቿኒ ጡማኒ እኬ። አሞ እስን ያእ ዳናካች መቷንስ እኬ። 51 እኮዳ ኤራንተሳ ሁጄንተሳ ኢተምምበአ እኬ። አሞ መገን ዎሞመተ ተሴን ቆረበዮሃ መንቹ እኬ። 52 ህኩ መንቹንኩ ጵላጦሴበ መርኬእ ዬሱስ ሬሸ ኣሱንተስ ጠዕሜእ። 53 ህከኒች ዘኪን ሬሸ ድሪሽ ፉት ኦድሻን ከፈኖ። ህተእኬእ አዪ ሞገሙምቦ ክኑ ጨበሬን መክሴመ ሞጎን ሞጎ። 54 ህኩንን ሰንበት በሩ ኣጊ እኮተኔ ቅጠሜኖ ሀርብ በሬተ ሀወሩ እኬ። 55 ገሊሊች ዬሱሲን በርገንት ዋልቴ ሜንቱ አወንትኬእ ሞጉሲ ሬሸስ አፉሼመጋ ጡዶእ። 56 እሶኦንት ምንሰ ፈንቀልትኬእ አንጀነታ ሽቱታ ቅጠንስቶእ። ሰንበት በርንከ አዘዞጊንን ፎሎጭቶእ።
1 ህኩ ሜንቱ አበ በሬ ገስመ በቅተ ቅጠንስቶ ሽቱተ አፍ ሞግበ + መርቶእ። 2 እሶኦንት ክኑ ሞግ አፌች ኦንኮሎዕሌኢ ጡዶእ። 3 ጠሁ እኮዳ ሞግስ ኣዝ ኣጎ ጃተ ቀርቾ ዬሱስ ሬሸ ደግምበአ። 4 እሶኦንት ህከን ጠህተኔ አብስ ማለልተንየንን ቤሌሌሳ ኦድሸተ ኦደቅቴ ለሙ መንቹ ደንጎን ሺናንተሰ ኡርቶእ። 5 ሜንቱንኩ አብስ ዋጅት ህርክት ኡለተ ጡደንየንን ለሙንኩ መንቹ «ፎላሙ ሬቶሪ ሜሬሮን ሚ ሀሴነዮንተ? 6 - 7 እስ ኬኤ በጋን ከኔ ዮበአ። ገሊለ ዮ ጃተ ‹መንች ቤቱ ባጢላሞ መን አንጋን ህግሰም ኣሰሙ፥ ሰቀለሙሁ ሰክ በር ሬሆች ኬኡሁ ሀስሰኖስ› ይ ኩሎዕኔገ ሰውዬ» ይቶሰ። 8 - 9 ሜንቱንኩ ዬሱስ ጠሀ ቃግኬእ ሞግቢች ፈንቀልት ህከ ጠሀ ሆረንከ ቶነ መቷንከ አወናኒሃ ፈኦሪ ሆሪንካ ኩልቶእ። 10 ህከ ጠሀ ሶቀማኒ ኩልቶሩ መግደል ከተም ማራሜት፥ ዮሃናት፥ ያቆቤተ አመ ማራሜቲ እሶኦንን በርገንት ዮ ዎሎ ሜንቱኒ እኬ። 11 ጠሁ እኮዳ ሜንቱ ጠሃቶ ጠሁ አጁቱተ አጉጆሰተኔ ሶቀማኑ አመዕንትምበሰ። 12 ጴጥሮስን ጦቅኬእ ሞግበ ደጉጆ። ህከኔን ህርክኬእ ከፈኔመ ፉት ኦድሸት ጠሉ ዮኢ ጡጅኬእ እኮስ ጠሃን ማለለን ምን ፈንቀሎ። 13 ህከ በርንከ ዬሱስ አወናኒች ለሙ «ኤማዉሰ» ዬኖ ኦሎ መርተዮ እኬ። ህኩቡንኩ ዬሩሳሌሚች ለሞ ሳት ዎቄሃ ቀጠ እኬ። 14 አሞ እስ-እሶኦንት ህከ እኮ ሆራንከ ጠህተኔ ሃሳውተዮ እኬ። 15 ጥሸት ሃሳውተንየንን ዬሱሱ ገጉንኩስ ህንጭይ እሶኦን በርገም መረመዮ እኬ። 16 ጠሁ እኮዳ እሱ ደጉምቦገ እልሰ አፈንቴ እኬ። 17 እስን «መረንቴነንኬእ አዕን-አዕኖኦንት ሃሳውቴነንተ ኩ ጠሁ መሃን?» ዬሰ። እሶኦንት ክቼእ ሰዕምት ኡርቶእ። 18 ህከኒች ዘኪን እሶኦች መቱሰ «ቀላዮጰ» ዬኖሲ «ከን ሰናን ህከኔ እኮ ጠሀ ደጉምቡ ዬሩሳሌም ከተማን አት ጠሉ ኮህቿንዶ?» ይ ፈንቀሼስ። 19 ዬሱሱንኩ «መ ጠሀ?» ዬሰ። እሶኦንት «ሁጄኒ ጠሂኒ መገንነ ሆራንከ መን ብሬን ቆጠረ ህራጋንቹ እኮ ናዝሬትቾ ዬሱስተኔሃት። 20 ቄስ አወንሳኑሁ ገሻኑኔ ሬሆ ፍርዲ ህግስ ኣስቶስሀኒች ዘኪን ሰቀልቶስ። 21 እኮዳ ነኦት ‹እስራኤለ ፈእሰኖ እሶት› ይን ተሳ አስኔም እኬ። አሞ ህከን ሆራንከ ጠህ አሌንን ኩ ጠሁ እኮች ከበር ሰኬየ በር። 22 - 23 ዎሉ አሞ ኒ ሜሬሪች በቅተ ፉልት ሞግበ መርቴ መ-መቱ ሜንቱ ማለልሲሶኔ። እሶኦንት ሬሸስ ደጊ ደንድትምበአ። አሞ ‹እስ ፎላሙ እኬእ› ይታ መገን ሰሜ ሶቀማኑ ጡንዶም ይተን ፈንቀልት ዋልቶእ። 24 ህትጉንተ ኔሳን በርገንት ዮሪች መ-መቱ መኑ ሞግበ መርት ህኩ ሜንቱ ይቶገንከ እክየን ደጎእ። እኮዳ እሱ ጡድምበአ» ይቶስ። 25 ዬሱሱንኩ «ኩ ቀላከት፤ ህራጋኑ ጠሃቶ ጠሀ ሆረንከ ዎዘኑዕኔ ደዕል አመዕኑምቡሩ። 26 ክርስቶሱ ከ ሀወ ሆረንከ ኣቆታ አብኔንተስ ኣጎታ ሀስሰኖስየበእንዶ?» ዬሰ። 27 አሞ ሙሴቺ ሆራንከ ህራጋኒቺ አፍ መጣፋን ሆራንን እስተኔ ጣፈሞረ ሆረንከ ሂር ኩሎሰ። 28 ህከኒች ዘኪን እሶኦት መርታ ኦሎ ሆባስየን እስ ቄዕረበ መረኖሀንገ እኮ። 29 እሶኦንት «እሩ አንከዕሬእ። አሪቹቲ ኣጊ እኮተኔ ኔሳንን ገል» ይት ቃርስት ኡጭቶስ። ህከኒ እሶኦንን ገሎተ ኣጎ። 30 እስን እሶኦን በርገም ማዳን አፉዕሌ ጃተ ዳቡተ ኣቅኬእ ማሰእ ቢጭኬእ እሶኦ ኣሴእ። 31 እሶኦ እልንት ፈነንትየን እሱ ደጎእ። እስን ብሬችሰ ውልይ ፈጆ። 32 እሶኦንት መቱ-መቲሀንሰ «ዎቃን ኔሳን ጠሃቀን መጣፈተ ሂር ኩሎኔ ጃተ ዎዘኑኔ በጅጎን ፊቅ ፊቅ ያዮ እኬበእንዶ?» የቀንቶእ። 33 - 34 ህከ ሳተንከ ጦቅት ዬሩሳሌመ ፈንቀልት ዋልትኬእ ቶነ መቱንኩ አወናኑ ዎሎ ኬኒንን ጠጵት «ቀርቹ ገርንተ ሬሆች ኬኤእ። ስሞኔንከ ጡደሜእ» የቀንተንየን ደጎእ። 35 ለሙንኩሰ አሞ ዎቃን እኮ ጠሀሃ ዳቡተ ቢጮ ጃተ እሱ ደጎስጋ ኩልቶሰ። 36 ህካን ጠሃተንየንን ዬሱሱ ገጉንኩስ ሜሬሮንተሰ ኡርኬእ «ጡሙ ክዕኔኤ እሁን» ዬሰ። 37 ጠሁ እኮዳ እሶኦት አያነ ጡዳኢ አጉጅየንሰ ህልቆእኒ ዋጅቶእኒ። 38 እስን «ሚ ህልቄነዮንተ? አሞ ሚ ዎዘናንተዕኔ መልቴነዮንተ? 39 ኤስ ገገእ እኮምገ አንገኤ ሎከኤ ጡጅዬ። አሞ ጡዴነንተኤገንከ ኤሳ ዮ ማሉሁ ምቀቲ አያኒ ዮስበእተኔ ኤስ አፌን ጡጅዬ» ዬሰ። 40 ህካንን ይኬእ አንገሲ ሎከሲ ጡድሾሰ። 41 እሶኦንት በጅጎች ኬኦ አመዕኑ ሆግ ማለልተንየንን «ከኔ እቴኖሩ ዮዕኔንዶ?» ዬሰ። 42 እሶኦንት ሬኤ ቁርጡሜማች ቀሁንካ መለብ ቆሎሉሃ ኣስቶስ። 43 እስን ኣቅኬእ ብሬንተሰ እቾ። 44 ህከኒች ዘኪን ዬሱሱ «ክዕኔኤን በርገም ዮም ጃተ ‹ሙሴ ሴራኒ ህራጋንነ መዝሙር መጣፋኒ ኢተኔ ጣፈሞሩ ሆሩንኩ ዊሙ ሀስሰኖ› ይ ኩሎንክዕኔ ላገት ተኔት» ዬሰ። 45 ህተ ጃንተ መጣፈተ ዘህጪ ደንድታጊ ዎዘነሰ ፈኖ። 46 - 47 አሞ « ‹ክርስቶሱ ሀወ ኣቀኖ። ሰክ በርንከ ሬሆች ኬአኖ። አሞ ቢረ ዩሁ ባጢል አጉረሙሁ ዬሩሳሌሚች አፍ ሆራንከ ምናደብ ሜሬሮን እስ ሱዕሚን ኩለመኖ› የመም ጣፈሜእ። 48 አዕኖኦንት ከን ሆራንከ ጠሂ ነቃሻከተ። 49 አንን አኑ ኣሴ ተሳ ሶሃንክዕኔ። ጠሁ እኮዳ አሊች መቆ ኣሰመኖዕኔ ኢለንቀጤች ዬሩሳሌም ከተማን ኤጌርዬ» ዬሰ። 50 ህከኒች ዘኪን ዬሱሱ እሶኦተ «ቢታነ» ዬኖ ቤች ሺነ ከተሚች ኤተሩ አወንስ ኦሮሽኬእ አንገስ ጦቀእ ማሰኦሰ። 51 ማሰአንን እሶኦች አነነ እክየን መገኑ ሰማ ኦሮሾስ። 52 እሶኦንት እሲ ሰገድኬእ አበ በጅጎን ዬሩሳሌም ከተመ ፈንቀልትኬእ 53 መገን ምኔን ሆረንተ ጃተ መገኑ ገለጥተን ሄኦእ።
1 ቆጨንቺች ብሬ ላገት ዮ እኬ። ላገንት መገንባን ዮ እኬ። ህት ላገንት መገኗ። 2 እስን ዎናችን አፍ መገንባን ዮ እኬ። 3 ሆሩሩንኩ ህተን ላጋን ቆጨሞ። ቆጨሞሪች እስ ዮበኢ ሜጡሩ ቆጨምምበአ። 4 እሶን ሄቸት ዮ እኬ። ህት ሄቸንት መን ኦሶ ጫከ እኮእ። 5 ጫኩንኩ ቱንሶን ጫከኖ፤ ቱንሱንት ቄልትምበስ። 6 መቱ «ዮሃንሴ» ዬኖ መንቹ ዮ እኬ። እስን መገኑ ሶኬስየ ሶቀማንቹ። 7 መኑ ሆሩንኩ ዮሃንስ ጫክተኔ ነቀሾሀኔን አመዕኑንተ ጫክተኔ ነቀሶተ ዋሎ። 8 እስ ጫክተኔ ነቀሶተ ዋሌ በጋን ገጉስ ጫካበአ። 9 ህኩ ገሬ ጫኩ ተ ኡለ አል ዋል መኒ ሆሪንከ ጫከ ጫክሰኗ እኬ። 10 እስን ተን ኡለ አሌን ዮ እኬ። ት ኡለንት እስ ዉዲን ቆጨንቴኢተ እኮዳ ኡለ አሌን ዮ መኑ እሱ ደግምበአ። 11 እስን ገግስ ባዱ ዋሎ። ጠሁ እኮዳ ገግስ መኑ ኣቅትምበስ እኬ። 12 ጠሁ እኮዳ ኣቅቶስራ ሱዕማንተስ አመዕንቶራ መገን ኦሱተ እካገ አሴሰ። 13 እሶኦንት መገኒች እለንቴ በጋን ቄጊች እንዶ መን ሮሸጊን እንዶ መኑ እለመኖጊን እለንትምበአ። 14 ላገንት መንቹ እኮእ። እስን ጡምማኒ ገሬኒ ዊም ኔሳን ሄኦ። ሜጡ ቤቱ አንስባን ዮስ አብንገ ዮ አብንስ ጡድሾኔ። 15 ዮሃንስን « ‹ኤሳች ዘኪን ዋለኖ ኤሳች አባ። ዳፉንኩስ እስ ኤሳች ብሬ ዮሃ› ይ ኩሎንክዕኔ ከኔት» ይ እስተኔ ነቀሾ። 16 ነኦት ሆሩንኩኔ እስ ኣሰንች ዊምማች ኣሰንች አሌን ኣሰንቸ ኣቅኔም። 17 መገን ሴሩ ሙሴ ዉዲን ኣሰሞ። እኮዳ ኣሰንቹሁ ገርቲ ዬሱስ ክርስቶስ ዉዲን ኣሰንቶእ። 18 መገኑ ጡጄ መንቹ አዪ ዮበአ። እኮዳ እስባን ዮ ሜጡስ ቤቱ እስ መሌስሾ። 19 አይሁድ አወንሳኑ ዬሩሳሌሚች ቄሳከታ ሌው-መነሃ ዮሃንሴበ ሶክ «አት አዬት?» ይት ጠዕምሲሶስ ጃተ 20 ዮሃንስ «አን ዶዕረሞ ክርስቶሳትበአ» ይ ነቀሾ በጋን ካድምበአ። 21 እሶኦንት «ህከደ አት አዬት? ኤልያሴትንዶ?» ይት ጠዕምቶስ። እስን «አን ኤልያሴበአ» ዬሰ። ቴሱ እሶኦት «ዋለኖ ዬመ ህራጋንቹ አቴትንዶ?» ይቶስ። እስን «አን እሶበአ» ዬሰ። 22 እሶኦንት «አት አዬት? ሶኮኔ መኒ ኩኑንተ ገግክተኔ መ ይተን?» ይቶስ። 23 እስን «ህራጋንቹ እስያስ ዬገን አን ‹መገን ዎቃ ዙንስዬ› ያን ኡለ ኡዱመኣን ያረኖ መንችተ ላገ» ዬእ። 24 ህኩ መኑንኩ ፋሪሰ ዉዲች ሶሀንቴሃረ እኬ። 25 እሶኦንት «አት ዶዕረሞ ክርስቶሰ እንዶ ኤልያሴ እንዶ ‹ዋለኖ› የመሞ ህራጋንቹ እኩምቡች ሚ ጠመቀዮንት?» ይት ጠዕምቶስ። 26 ዮሃንስ ፈንቀሽ «አን ዎኢን ጠመቃንክዕኔ። ጠሁ እኮዳ አዕኖኦት ደጌኑምቡ ሜሬሮንተዕኔ ዮእ። 27 እስ ኤሳች ዘኪን ዋለኗ። ዎሉስ ፈእየን አን እስ ሎከስ ጫመ ኡሱረኖ ፈትለሃ ሂሪ አጉዳምበአ» ዬእ። 28 ኩ ሆሩንኩ ጠሁ እኮ ዮሃንስ መነ ጠመቀኖ ዮርዳኖስ ለጊች አርፉል ዉዲን ዮ «ቢታነ» ዬኖ ከተማኔት እኬ። 29 ለንክ በር ዮሃንስ ዬሱሱ እስበ ዋለንየን ጡጅ «ሆራንከ መኒች ባጢለ ከመኖ መገን ሆልቹ + ህኩዕኒን። 30 ‹ኤሳች አበኖ መንቹ ኤሳች ዘኪን ዋለኖ። ዳፉንኩስ እስ ኤሳች ብሬን ዮሃ› ዬሚ ከኔት። 31 አን ገጉኤን እሱ ደጋንስበአ እኬ። ጠሁ እኮዳ እስራኤል መኑ እሱ ደጉንተ አን ዎኢን ጠመቀን ዋሎም» ዬእ። 32 ለንኪሃ ዮሃንስ «ጡማንቹ አያኑ ሀንደርቾ አጉዲሻን ሰሜች ድር ዬሱስ አሌን አፉዕለንየን ጡጆም። 33 አሞ አን ገጉንኩኤ ደጋንስበአ እኬ። ጠሁ እኮዳ አን ዎኢን ጠመቁንተ ሶኮኤ ‹ጡማንቹ አያኑ ድረንየኒ አሌንተስ አፉዕለንየኒ ጡዳንቲ ጡማንቾ አያኒንን ጠመቀኖ እሶት› ይ ኩሎኤ። 34 አንን ህካን ጡጄም። ህከኒ እስ መገን ቤቱ እሁስ ነቀሼም» ይ ነቀሾ። 35 አሞ ለንክ በር ዮሃንስ አወናኒችስ ለሚንተስ በርገም ህከኔ ኡሬ እኬ። 36 ዮሃንስን ዬሱሱ ህከኒን ህገንየን ጡጅ «መገን ሆልቹ ህኩዕኒን» ዬእ። 37 ዮሃንስ ህካን ያንየን መጮጭት ለሙንኩ አወናኑ ዬሱሰ አወንቶእ። 38 ዬሱሱንኩ አወንተንየንስ ፈንቀል ጡጅ «መ ሀሴነዮንተ?» ዬሰ። እሶኦንት «ረቢ! ሀከኔ ሄአዮንት?» ይት ጠዕምቶእ። ህትጉተ ዩንኩ «ሮስሳንቾ! ሀከኔ ሄአዮንት?» ዩሀ። 39 እስን «ዋልቴን ሄኣምበ ጡጅዬ» ዬሰ። እሶኦንት ዋልት ሄአኖበ ጡዶእ። ህከ በር እሲን በርገንት ሆሶእ። ህት ጄቹንት በሬ ቶርዱመ ሳትየ ቁንጠ እኬ። 40 ህኩ ዮሃንሴ ጠሀ መጮት አወንቶሪች መቱስ «ስሞኔ» የመመኖ ጴጥሮሴየ ህዞ እንድራሴት እኬ። 41 እስን ብርስን ህዜንተስ ስሞኔን ደቀም «መገኑ ዶዕሬሲ ደንጌም» ዬስ። «መገኑ ዶዕሬሲ» ዩንኩ «ክርስቶሰ» ዩሀ እኬ። 42 እንድራስን ስሞኔ ዬሱስበ አፍ ዋሎ። ዬሱሱንኩ እሱ ጡጅ «አት ዮሃንሴየ ቤቱ ስሞኔት፤ አትን ‹ኬፈ› የመንታንት» ዬእ። «ኬፈ» ዩንኩ «ጴጥሮሴ» ዩሀ። 43 ለንክ በር ዬሱሱ ገሊለ መሮተ ሀሾ። እስን ፍልጶሴን ደቀም «አወኔኤ» ዬስ። 44 ፍልጶስን እንድራሲ ጴጥሮሲ ሄኣ «ቤተሰይደ» ዬኖ ከተምየ መንቹ እኬ። 45 ፍልጶስ ናትናኤሌን ደቀም «ሙስ ሴራን አሞ ህራጋኑሁ እስተኔ ጣፎ ዮሴፌ ቤቱ ናዝሬት ዬሱሰ ደንጌም» ዬስ። 46 ናትናኤልን «ናዝሬት ከተማን ደናሙሩ ደገመኖንዶ?» ዬእ። ፍልጶስን «ዋልት ጡድ» ዬስ። 47 ዬሱሱንኩ ናትናኤል እስበ ዋለንየን ጡጅ «ቆጰኑ ዮስበእ ገሬ እስራኤል መንቹ ከረጌ» ዬእ። 48 ናትናኤልን ዬሱሰ «ሀትጉተ ደገዕኔ?» ዬስ። ዬሱሱ ፈንቀሽ «ፍልጶስ ገኡዕናንኬ ብሬን ኦዴቾ ፈጋራን ዮንት ጃንተ ደጌንኬ» ዬስ። 49 ህተ ጄቹተ ናትናኤል ፈንቀሽ «ሮስሳንቾ! አት መገንየ ቤቱ፤ አሞ አት እስራኤልየ ዎመ» ዬስ። 50 አሞ ዬሱሱ «ኦዴቾ ፈጋራን ጡጄንኬ ዬምተኔ አመዕንቴኤንዶ? ከኒች አበንከ ጡዳንት። 51 ገርተ ያንክዕኔ፤ ሰሞ ፈነመንየን፥ መገን ሰሜ ሶቀማኑ መንች ቤትበ ዋልተንየኒ ኦሮተንየኒ ጡዴነንተ» ዬእ።
1 ሰክስ በር ገሊል ቃናን ቦሎቹ ዮ እኬ። ህከኔን ዬሱስ አመት ማራም ዮ እኬ። 2 አሞ ዬሱሱ እስ አወናኒንን ህከ ቦሎቸ ገአሜ እኬ። 3 ዎይን ዳጡንኩ ህከን ቦሎች ምኔን ጎፎ ጃተ ዬሱሲ አመስ «ዎይን ዳጡ ጎፌሰ» ይቶስ። 4 ዬሱሱንኩ «ቴ መንቾ! ም ሀውሰዕኔ? ጄቹኤ ኢልትምበአ» ዬሴ። 5 ህተ ጄቹተ አመስ ህከኔ ዮ ሁጀታኒ «እስ ያኖዕኔረ አስዬ» ይቶእ። 6 ህከምባንን አይሁድ-መኑ ዎግሰጊን ሙጩርቶተ ኣዕልታ ዎአ ዎሬኖ ሌህት ክን ዛለት ዮ እኬ። እሶኦንት ሜ-ሜጥስ ለ-ለሞ እንዶ ሰ-ሰሶ ቦስ ቀጠ አፋሃረ እኬ። 7 ዬሱሱንኩ ህከኔ ሁጀታረ «ተን ሌሄንተ ዛላን ዎአ ዊንሽዬ» ዬሰ። እሶኦንት ዛላን አፎሰ ኢለንቀጤች ዎአ ዊንሽቶእ። 8 ህከኒች ዘኪን ዬሱሱ «ከኒች እንኪልቴን ከን ድግስ አደላንቺ ኣስዬ» ዬሰ። እሶኦንት መስት ኣስቶእ። 9 ህኩ መንቹንኩ ዎይን ዳጠ እክ ዶረሞ ዎአ ጉብ ጡጆ ጃተ ሀኖች ዋሌሃንዶ ደግምበአ። ጠሁ እኮዳ ዎአስ እንኪልት ዛላን ዎርቶ ሁጀታኑ ሀኖቼትንዶ ደጌ እኬ። ህከኒ ህኩ አደላንቹ እዜቸነ ገእ 10 «መኑ ሆሩንኩ ብርስ ደናሙ ዎይን ዳጠ ኣሰኖ። አሞ መኑስ ድንቤኢች ዘኪን ቡሸስ ኣሰኖ። ጠሁ እኮዳ አት ተደ ኢለንቀጤች ደናሙስ ዎይን ዳጠ ማጤንት» ዬስ። 11 ዬሱሱ ተ ዎነስ ማለሉተ ገሊል ባዶን ዮ «ቃነ» ዬኖባን ሁጀቾ። ህተእ ዬሱሱ አብንስ ለሊሾ። አሞ አወናኑስን እሶን አመዕንቶእ። 12 ህከኒች ዘኪን ዬሱሱ አማንተስ፥ ህዛካንተሲ አወናኒንተሲ በርገም «ቅፍርናሆመ» ዬኖ ከተመ ድር ህከኔ ቀሁ በር ኤጌሮ። 13 ሻሽግ አያነ አብሴኖ በሩ ኢሌተኔ ዬሱሱ ዬሩሳሌመ መሮ። 14 መገን ኬሰሞ ምኔን ምናደቡ ጠጵያኖባን ቦተተ፥ ሆለታ ሀንደርታ ህርተዮ መነሃ አሞ አፉዕልት ግዘ ዶርተዮራ ደጎ። 15 ህተ ጃተ ጦርቄተ ደጅ ሆለተ፥ ቦተታ ሆረንከ መነሃ መገን ኬሰሞ ምኒች ሸር ፉሼእ። ግዘ ዶርታሪ ግዘንከ ብነእ ጠረጴሰሰ ጎምብሾ። 16 ሀንደርተ ህርታረንከ «ከረ ከምቢች ከምዬ። አንኤ ምን ዘዘሎ ምን አቴኖችዬ» ዬሰ። 17 አወናኑንኩስ «ምንክ ኢተት ጊረገ ቡስቶኤ» የመም ጣፈሞ ቃጎእ። 18 ህከኒ አይሁድ አወንሳኑ «አት ካን አስታንት መቆ ዮሄገ ደንጉንተ መ መላተ ጡድሰኔ?» ይት ጠዕምቶስ። 19 ዬሱሱንኩ ፈንቀሽ «ከ መገን ኬሰሞ ምን ዝርዬ። አን ሰክ በር ፈንቀሽ ምናም» ዬእ። 20 እሶኦንት ፈንቀሽት «ኩ መገን ኬሰሞ ምኑ ሾላነ ሌሆ ዎጌ ኣዜን ምነም ጎፌእ። አት ህካን ሰሶ በሬ ኣዜን ምንተንንዶ?» ይቶስ። 21 ጠሁ እኮዳ ዬሱሱ «መገን ኬሰሞ ምን» ዬኢ ገግስ መኖመተኔሃት እኬ። 22 ህከኒ ዬሱሱ ሬሆች ኬኦች ዘኪን አወናኑስ ከ ጠሀ ቃግ ጡማንቾ መጣፋን ጣፈሞሃ ዬሱሱ ጠሃቄኢሃ አመዕንቶእ። 23 ዬሱሱ ሻሽግ አያን ጄቾን ዬሩሳሌመ አሴ ማለሎተኔ ሆለሙ መኑ እስ ሱዕማን አመዕንቶእ። 24 ጠሁ እኮዳ ዬሱሱ ሆረንከ መነ ደገኖተኔ ጎደበ ኣስምበሰ እኬ። 25 እስን መን ዎዘናን ዮረ ሆረንከ ደገኖ እኮተኔ መንተኔ አዪ እሲ ኩሉ ሀስሰኖስበአ እኬ።
1 «ንቆድሞሴ» ዬኖ መቱ መንቹ ዮ እኬ። እስን ፋሪሰ ዉዲች አይሁድ-መንየ ገሻንቹ እኬ። 2 ህኩ መንቹንኩ ዬሱስበ አንከሬን ዋል «ሮስሳንቾ! መገኑ እሲን በርገም ዮ መንቺች ህግየን አት ሁጀታንት ማለሉተ አሶተ ደንደኖ አዪ ዮበአ። ህከኒ አት መገንቢች ዋልቴንት ሮስሳንቹ እኮንትገ ደንጋም» ዬእ። 3 ዬሱሱ ፈንቀሽ «ገርተ ያንኬ፤ መኑ ለንኪ እለሙምቦደ መገን ዎሞመተ ጡዶተ ደንደኖበአ» ዬስ። 4 ንቆድሞስን «መኑ ኑባጴኢች ዘኪን ሀትክ እለሚ ደንደኖ? ለንኪ አመስ ጎደበ ፈንቀል ኣግ እለሚ ደንደኖንዶ?» ይ ጠዕሜእ። 5 አሞ ዬሱሱ ፈንቀሽ «ገርተ ያንኬ፤ መኑ ዎኢቺ ጡማንቾ አያኒቺ እለሙምቦች መገን ዎሞመተ ኣጊ ደንደኖበአ። 6 ማሊች እለሞ ማልየንከ፤ ጡማንቾ አያኒች እለሞ ጡማንቾ አያንየንከ። 7 ‹ለንኪ እለሙ ሀስሰኖዕኔ› ዬምሀኔን ማለልቶት። 8 ቦብሩ ሀሾ ዉዱ ለቅ ቦብርሰኖ። አትን ላገስ መጮታንት በጋን ሀኖች ዋለዮንዶ ሀኑተ መረዮንዶ ደጋንትበአ። ጡማንቾ አያኒች እለሞሁ ህትጎንት» ዬእ። 9 ንቆድሞስን ፈንቀሽ «ኩን ሀትክ እሂ ደንደኖ?» ዬእ። 10 ዬሱሱንኩ ንቆድሞሴ «አት እስራኤል ሮስሳንቹ እክ ካን ደጋንትበእንዶ? 11 ገርተ ያንኬ፤ ደንጋሚ ጠሃናም፤ አሞ ጡንዶሚሃ ነቀንሳም። ጠሁ እኮዳ ነቀንሶንስረ ኣቅቴነንተበአ። 12 አን ተን ኡለ አል ጠሀ ኩሎምደን አመዕንቴኑምቡሩ ሰሜ ጠሀ ኩሎምደ ሀትጉተ አመዕንቴነን? 13 ሰሜች ድሬሀኒች ህኩስን መንች ቤቲች ህግየን ሰማ ፉሌኢ አዪ ዮበአ። 14 ሙስ ኡለ ኡዱመኣን ዎሪቹ ሰቀሎገንከ ህትጉንተ መንች ቤቱሁ ሰቀለሙ ሀስሰኖስ። 15 ህኩስን እሶን አመዕነኖ ሆሩንኩ ዶሊ ሆሪንከ ሄኣ ሄቸተ ደቁንታት። 16 ቤቶንተስ አመዕነኖሀኒ ሆሪንከ ዶሊ ሆሪንከ ሄኣ ሄቸት ሄኡንተስ በጋን በኡምቦገ መገኑ ሜጡስ ቤቱ ኣሰኖ ኢለንቀጤች ተን ኡለ አል መነ ጠለንከ ኢቴእ። 17 መገኑ ቤቱስ ተን ኡለ አል ሶኮ ተን ኡለ አል መኑ እስ ዉዲን ፈኡንታት በጋን ፍርዶታበአ። 18 እሶን አመዕነኖሀኔን ፍርደመኖስበአ። ጠሁ እኮዳ እሶን አመዕኑምቦሀኔን መገን ሜጦ ቤቶን አመዕኑምቦተኔ ፍርደም ፈጄስ። 19 ፍርዱንኩስ ከኔት። ጫኩ ተ ኡለ አል ዋሎ። ጠሁ እኮዳ መኑ ሁጅስ ሂለተ እኮተኔ ጫኪች አበ ቱንሱተ ዶዕሬእ። 20 ሂለተ አሰኖ ሆሩንኩ ጫከ ግበኖ። ሂለት ሁጅስ ለልቱምቦገ ጫክበ ዋለኖበአ። 21 ጠሁ እኮዳ እስ አሴ ደናምት ሁጅት መገኒች እኬኢተ እኮገ ደጌኑንተ ገሬ ጠሀ አሰኖ ሆሩንኩ ጫክበ ዋለኖ» ዬእ። 22 ህከኒች ዘኪን ዬሱሱ አወናኒንተስን በርገም ይሁድ ባዱ መሮ። ህከኔን ጠመቀን እሶኦን በርገም ቀሁ በር ኤጌሮ። 23 ህተ ጄቹተ ዮሃንስ ሆለሙ ዎኡ ዮ «ሳሌመ» ዬኖ ቤች ሺናን «ሄኖነ» ዬኖ መዕኔን ጠመቀዮ እኬ። ህተ መዕንተ መኑ ዋለን ጠመቀመዮ እኬ። 24 ዮሃንስ ህተ ጄቹተ ኡሱሮ ምን ኣጉዕናን ዮ እኬ። 25 ዮሃንሴ አወናንነ መቶ አይሁድ-መንች ሜሬሮን ዎግሰጊን ሙጩርተኔ ኦደት ፉልቶእ። 26 ዮሃንሴበ አወናኑስ ህንጭት «ሮስሳንቾ! ዮርዳኖስ ለግ ዉደኣን ኬሳን በርገም ዮእኬሁ አት እስተኔ ነቀሶንቲ ጠመቀዮእ። አሞ መኑ ሆሩንኩ እስበ ኦሮቀዮእ» ይት ኩልቶስ። 27 ዮሃንስን «መገኒች ኣሰሙምቦች ሀኩ መንቹሁ ሜጡራ ኣቆተ ደንደኖበአ። 28 ‹አን እሲች ብሬን ሶሀሜም በጋን አን ክርስቶሳበአ› ይ ኩሎንክዕኔጊ አዕኖኦት ገጉዕኔን ነቃሸተዕኔ። 29 እዜቹት ዮሲ ጠሉ እዜቸና። ጠሁ እኮዳ እዜቸን ጃሉ እዜቸን ሺናን ኡር ላገስ መጮጨን በጅቀመኖ። ህትጉንተ አን ቴሱ ዊመተ በጅጉተ ደቄም። 30 አን እሲች ኮተን እስን ኤሳች አበን መሩ ሀስሰኖ» ዬእ። 31 አሊች ዋለኖ እስ ሆሪችን አባ። ተን ኡላች እሀኖ ኡላንከ፤ ተን ኡለ አል ጠሀ ጠሃቀኖ። ሰሜች ዋለኖ እስ ሆሪችን አባ። 32 እስ ጡጆሃ መጮጬኢሃ ነቀሰኖ። ጠሁ እኮዳ እስ ነቀሾረ አዪ ኣቀኖበአ። 33 ዬሱሱ ነቀሾረ ኣቄኢ መገኑ ገርተ እኮገ ቆርሰቅ ኣቄሃ። 34 ዳፉንኩስ መገኑ ሶኮሲ መገን ላገተ ጠሃቀኖተኔ ጡማንቹስ አያነ ፈፍሽ ኣሰኖስ። 35 አኑ ቤቱስ ኢተኖተኔ ሆረረንከ አንጋንተስ ኣሴእ። 36 መገን ቤቶን አመዕነኖ ዶሊ ሆሪንከ ሄኣ ሄቸተ ደቀኖ። ቤቶን አመዕኑምቦሀን አሌን መገን አሙርት ድርታስ በጋን ዶሊ ሆሪንከ ሄኣ ሄቸተ ደቀኖበአ።
1 - 3 ህተ ጄቹተ ዬሱስ አወናኑ ዮሃንሴ አወናኒች በተኦጋ ሆለመ መነ ዬሱሱ ጠመቀዮጋ ፋሪሰት መጮቶገ ዬሱሱ ደጎ ጃተ ይሁድ ባዱ አጉር ለንኪሃ ገሊል ባዱ መሮ። ጠሁ እኮዳ ዬሱስ አወናኑ ጠመቀዮ በጋን ዬሱሱ ገጉስ ጠመቅምበአ። 4 ህከበንከ መረን ሰማር ባዲን ህጉ ሀስሰኖስ እኬ። 5 ህከኒ ያቆብ ቤቲሀንስ ዮሴፌ + ኣሴ ኡለ ሺናን ሰማር ባዶን ዮ «ሲካረ» ዬኖ ከተመ ኢሌእ። 6 ህከኔን ያቆቤ ዎእ ኤሎ ዮ እኬ። ዬሱሱ ዎቃ መረም ሆጎተኔ ህከን ኤሌ ሺናን አፉዕሌእ። ጄቹስን ሌሆ ሳትየ ቁንጠ እኬ። 7 ህተ ጄቹተ መትት ሰማር ባድ ሜንትቹት ዎአ እንኪልቶተ ዋልቶእ። ዬሱሱንኩ ህተ ሜንትቹተ «ዎኢች አግሴኤ» ዬሴ። 8 አወናኑስን እቸተ ህርቶተ ከተመ መርቴ እኬ። 9 ህት ሜንትቹንት ፈንቀሽት «አት አይሁድቹ እክ ኤስ ሰማር ባድቢተ ሀትተ ‹ዎኢች አግሴኤ?› ይት ጠዕምተን» ይቶስ። ህትተ ይቶኢንኩ አይሁድ-መኑ ሰማር መኒን ኢተሙምቡ እኮተኔሃት። 10 ዬሱሱንኩ «መገን ኣሰንቸሃ ‹ዎአ ኣሴኤ› ያኖሄሃ አዬትንዶ ደጌንት እክየን አት እሱ ኡጭታንት እኬ። እስን አሞ ሄቸ ዎአ ኣሰኖሄ እኬ» ዬሴ። 11 ሜንትቹንት ፈንቀሽት «ቀርቾ! ኬሳ እንኪልታንትሩንኩ ዮሄበአ። አሞ ኤሎንኩ አብሽ ጥላ። ከ ሄቸ ዎአ ሀኖች ኤበን? 12 ገርንተ አት ከ ዎእ ኤሎ ኣሴኔ አናኔ ያቆቤች አብተንንዶ? እስ፥ ኦሱሲ ግዙሲ ከን ኤሌ ዎኢች አጌእ» ይቶእ። 13 አሞ ዬሱሱ «ከን ዎኢች አገኖ ሆሩንኩ ለንኪሃ ሰገበኖ። 14 ጠሁ እኮዳ አን ኣሳም ዎኢች አገኖ ሆረን ሰገበኖበአ። ዳፉንኩስ አን ኣሳም ዎኡ እስ ኣዜን ዶሊ ሆሪንከ ሄኣ ሄቸተ ኣሲ ቡቃ ዎእ ቡዕሌቹተ እሀኖ» ዬሴ። 15 ሜንትቹንት «ቀርቾ! ከኒች ዘኪን ሰገሱምቦኤጋ አሞ ከበንከ ዎአ እንኪሊ ዋሉምቦጋ ህከ ዎአ ኣሴኤ» ይቶእ። 16 ዬሱሱንኩ ሜንትቹተ «መር፤ ምኔነክ አፍ ከበ ዋል» ዬሴ። 17 እሴን «ምኔኑ ዮኤበአ» ይቶእ። እስን « ‹ምኔኑ ዮኤበአ› ይቶንቲ ገርተ። 18 ጠሁ እኮዳ ኦንቱ ጎንቹ ዮኬ እኬ። አሞ ቴሱ ኬሳን ዮኢ ምኔናንክበአ። ህከኒ ገርስ ጠሃቴንት» ዬሴ። 19 ሜንትቹንት «ቀርቾ! አት ህራጋንቹ እኮንትገ ቴመ ደጎም። 20 አናከኔ ከን ዱናን ሰገዶእ። ጠሁ እኮዳ አዕኖኦት አይሁድ-መኑ ‹መኑ መገኒ ሰገዱ ሀስሰኖቡ ዬሩሳሌመኔት› ይቴነንተ» ይቶእ። 21 አሞ ዬሱሱ «ቴ ሜንትቾ! አና መገኒ ሰገዴነንታ ከን ዱን አሌን እንዶ ዬሩሳሌመ እኩምቡት ጄቹት ዋልታገ አመዕኔኤ። 22 አዕኖኦት ሰማር ባድ መኑ ደጌኑምቦሪ ሰገዴነንተ። ጠሁ እኮዳ ነኦት ፈኡ ዋለኖ አይሁዲች እኮተኔ ደንጋም መገኒ ሰገንዳም። 23 አሞ ገሬን ሰገዳሩ አነ መገኒ ዊማ ሰውቲኒ ገሬኒ ሰገዳ ጄቹት ዋልታእ። ጄቹንትስ ተኔት። አኑ መገኑንኩ ሀሰኖ ህትጉተ ሰገዳስየረ። 24 መገኑ ገርየ አያነ። ገሬን ሰገዳስሩንኩ ዊመ ሰውቲን ሰገዱ ሀስሰኖ» ዬእ። 25 ሜንትቹንት « ‹ክርስቶሰ› የመመኖ ዶዕረሞ ዋለኖገ ደጋም። እስ ዋሎ ጃተ ሆረረንከ ሂር ኩለኖኔ» ይቶእ። 26 ዬሱሱ «ቴሱ ጠሃቃንኬ አን እሶንት» ዬሴ። 27 ህተ ጄቹተ አወናኑስ መርቶቢች ዋልቶእ። እሶኦንት ዬሱሱ ሜንትቾን ሃሳወንየን ጡድ አብስ ማለልቶእ። ጠሁ እኮዳ «መ ሀሴንት? እንዶ እሴን ሚ ሃሳውተዮንት?» ይ ጠዕሜሲ አዪ ዮበአ። 28 ህተ ጃንተ ሜንትቹት ዎእ ቦሱ ህከኔ አጉርት ከተመ መርት መኒ 29 «ዋሌ፤ አን አሴም ጠሀ ሆረንከ ኩሎኤ መንቹ ጡጅዬ። አይደጎ እስ መገኑ ዶዕሬስ ክርስቶሳትንዶ?» ይት ኩልቶእ። 30 መኑንኩ ከተሚች ፉል እስበ መረዮ እኬ። 31 ህተ ጄቹንተ አወናኑስ «ሮስሳንቾ! እቸተ እት» ይት ኡጭቶስ። 32 ጠሁ እኮዳ ዬሱሱ እሶኦ «አዕኖኦት ደጌኑምቡት አን እታም እቸት ዮኤ» ዬሰ። 33 አወናኑንኩስ እስ-እሶኦንት «መኑ እቸተ ኤቤስንዶ?» የቀንቶእ። 34 ዬሱሱንኩ ፈንቀሽ «ኢ እቸት ሶኮኤሀን ሰውተ ዊንሿኒ ሁጅስ ጦፍ ሁጀቷኒ። 35 አዕኖኦት ‹ሀጢድ ጄቹት ኢልቶተ ሾሉ አገኑ ፈኤእ› ይቴነዮንተበእንዶ? እኮዳ አን ‹እልዕኔ ጦቀቴን ውጠት ቦልኮገ ጡጅዬ› ያንክዕኔ። 36 ሀጢደኖ ሁጄስ ቆደ ኣቀኖ፤ ዶሊ ሆሪንከ ሄኣ ሄቸ ላሉንተ ጠጰአኖ። ህከኒ ውጠኖሁ ሀጢደኖሁ ሜጦማን በጅቀንታእ። 37 ‹መቱ ውጠኖ፤ ዎሉስ ሀጢደኖ› የመሞ ህትጎን ገርተ እሀኖ። 38 አንን አዕኖኦት ኦርበኤኑምቡረ ሀጢዴኑንተ ሶሃንክዕኔ። ዎሉ ኬኑ ህተን ሁጄን ኦርበኤእ። ጠሁ እኮዳ አዕኖኦት እሶኦት ኦርበኦሀኔን ሄለንቴንተ» ዬሰ። 39 ህት ሜንትቹንት «አሴም ጠሀ ሆረንከ ኩሌኤ» ይት ነቀሶ ጠሀ መጮቶ ህከን ከተማን ሄኣ በትናሹ ሰማር ባድ መኑ እሶን አመዕንቶእ። 40 ህኩ መኑንኩ ዬሱስበ ዋልቶ ጃተ እሶኦባን አፉዕሉንተ ኡጭቶስ። እስን ለሙ በር እሶኦባን ኤጌሮ። 41 እስ ጠሃቄ ጠህተኔ ዎሉ ሆለሙ መኑሁ አመዕንቶእ። 42 እሶኦንት ሜንትቹተ «ነኦት ቴሱ እሱ አመዕንናሚ አት ኩልቶንትኔተኔ እሁዕናን ነኦት ገጉንኩኔ እሲች መጮኖምተኔሃቲ እስ ገርንተ ተን ኡለ አሌን ሄአኖ መን ፈእሳንቹ እኮገ ደንጎምተኔሃቲ» ይቶእ። 43 ዬሱሱ ሰማር ባዶን ለሙ በር ኤጌሮች ዘኪን ገሊለ ኦሮቄእ። 44 ዬሱሱ «ህራጋንቹ ገግስ ባዶን አብሴኖስበአ» ይ ጠሃቄ እኬ። 45 ጠሁ እኮዳ እስ ገሊለ ዋሎ ጃተ መኑ በሬደገ ኣቄስ። ዳፉንኩስ እሶኦት ሻሽግ አያነ አብሶተ ዬሩሳሌመ መርቶ ጃተ እስ ህከኔ አሴ ጠሀ ሆረንከ ጡዴ እኬ። 46 ህከኒች ዘኪን ዬሱሱ ዎአ ዎይን ዳጠ አስ ዶሮ ገሊል ባዶን ዮ «ቃነ» ዬኖበ ለንኪሃ መሮ። ህተ ጄቹተ ቅፍርናሆመ ቤቱስ ሞሼ መቱ ዎም ምን ገሻንቹ ዮ እኬ። 47 እስን ዬሱሱ ይሁድ ባዲች ገሊለ ዋሎገ መጮጭ ዬሱስበ መሮ። ሬሀኖ ቀጠ ሞሾ ቤቱስ ቅፍርናሆመ መር ፈይሱንተስ ዬሱሰ ኡጨቄእ። 48 ዬሱሱ «አዕኖኦት መላታ ማለሉታ ጡዴኑምቦች አመዕንቴነንተበአ» ዬስ። 49 ህኩ ገሻንቹንኩ «ቀርቾ! ቤቱኤ ሬሁዕናች ኤሳንን ደዕልት ኬእ» ዬእ። 50 ዬሱሱንኩ «ምንክ ኦሮቅ፤ ቤቱክ ፈየኖ» ዬስ። መንቹንኩስ ዬሱሱ ዬኢ አመዕን ምንስ ኦሮቄእ። 51 እስን ምንስ ኦሮቀን ዎቃን ሄኦገን ሁጀታኑስ ደቀንት «ቤቱክ ፈዬእ» ይቶእ። 52 መንቹንኩ ቤቱስ ፈዬ ጄቹተ ጠዕሜሰ። እሶኦንት «ኢቡ አጉሮሲ ቤሬ ለመለ ሳታኔት» ይቶእ። 53 አደቤ አኑንኩ ዬሱሱ «ቤቱክ ፈየኖ» ዬ ሳታን እኮገ ደጎ። ህከኒ ህኩ መንቹሁ ምንስ መኑሁ ዬሱሳን አመዕንቶእ። 54 ት ማለሉት ዬሱሱ ይሁድ ባዲች ገሊል ባዱ ዋሎ ጃተ አሴ ለንክተ ማለሉ።
1 ህከኒች ዘኪን አይሁድ አያነ አብሴኖ ጄቹት ኢልቶተኔ ዬሱሱ ዬሩሳሌመ መሮ። 2 ዬሩሳሌመ ሆለ ጎች ሺናን እብር-መን ላጋን «ቤተሰይደ» ዬኖባን ጠበሉ ዮ እኬ። ህከኔን መረሜኖ ኦንቱ ጎቹ ዮ እኬ። 3 ህከምባንን ሆለሙ ሞሳኑ፥ ቆቀት፥ ድናከቲ ሺኮሩ ህጌኖ ዎቃካን ኦሰኤ እኬ። 4 መ-መትተ ጃተ ቀርች ሰሜ ሶቀማንቹ ድር ህከ ዎአ ሌንቄቅሰኖ እኬ። ህኩን ሌንቄቄኢች ዘኪን ብርስ ህከን ዎእ ኣዝ ኣጎ መንቹ ዮስ ሞሲች ፈየኖ እኬ። 5 ህከኔን ሰጀነ ሄዜቶ ዎጌ ሞሳንቹ ዮ እኬ። 6 ዬሱሱንኩ ህኩ መንቹ ህከኔ ኦሰኤኢ ጡጅ ሆለመ ዶሊች አፍ ሞሼኢ እሁስ ደግ «ፈይቶተ ሀሰንንዶ?» ይ ጠዕሜስ። 7 ህኩ ሞሳንቹንኩ «ቀርቾ! ዎኡስ ሌንቄቄ ጃተ ኤስ መስ ህከን ዎኣን ኣግሰኖኤ መኑ ዮኤበአ። አን መሪ ኬአንየንን ዎሉ መኑ ኤስ ብርስ ኣገኖ» ዬእ። 8 ዬሱሱንኩ «ጦቅት ኦሰኦንትረ እይት ኦሮቅ!» ዬስ። 9 ህኩ መንቹ ህተ ጃንተ ፈይ ኦሰኦስረ እይ ኦሮቄእ። ህኩንን እኮ ሰንበት በሬኔት እኬ። 10 ህከኒ አይሁድ አወንሳኑ ህከ ሞሲች ፈዬ መንቺን ደቀንት «ከበር ሰንበተ እኮተኔ ኦሰኦንትረ እዩ ሀስሱምቧበእንዶ?» ይቶስ። 11 ጠሁ እኮዳ እስ «ኤስ ፈይሾ መንቹ ‹ኦሰኦንትረ እይት ኦሮቅ› ዬኤ» ይ ፈንቀሼሰ። 12 እሶኦንት « ‹ኦሰኦንትረ እይት ኦሮቅ› ዬሄ መንቹ አዬት?» ይት ጠዕምቶስ። 13 ህከምባን መኑ በተኦተኔሃ ዬሱሱ ህከምቢች ዎሉበ ኦሮቄተኔሃ ህኩ መንቹ ፈይሾሲ አዬትንዶ ደግምበአ እኬ። 14 ህከኒች ዘኪን ዬሱሱ ህከን መንቺን መገን ኬሰሞ ምኔን ደቀም «ቴሱ ፈይቴንት፤ ከኒች ባሱሩ አፉምቦሄገ ከኒች ዘኪን ባጢለ ሁጀቶት» ዬስ። 15 ህኩ መንቹንኩ ፈይሾሲ ዬሱሰ እኮገ መር አይሁድ አወንሳኒ ኩሎ። 16 ህትጎነ ጠሀ ሰንበት በሬን አሴተኔ አይሁድ አወንሳኑ ዬሱሰ ሂልማን ዘክሰዮስ እኬ። 17 ጠሁ እኮዳ ዬሱሱ «አኑኤ ቴሶ ኢለንቀጤች ሁጀተዮእ። አሞ አኒ ሁጀተዮም» ይ ፈንቀሼሰ። 18 ዬሱስ ህትጉተ ዩ አይሁድ አወንሳኒ እሱ ሺ ሀሳገ አሴእ። ዳፉንኩስ እስ ሰንበተ ዝሩ ጠለ እሁዕናች «መገኑ አናዕኔ» ዪንተስ ገገስ መገኒን ቅጠንሴተኔሃት እኬ። 19 ዬሱሱንኩ ፈንቀሽ «ገርተ ያንክዕኔ፤ አኑ ሁጀተንየን ጡጆ ሁጀቲች ህግየን ቤቱ ገጊንተስ ሜጡራ ሁጀተኖበአ። አኑ ሁጀተኖ ቤቱሁ ሁጀተኖ። 20 ዳፉንኩስ አኑ ቤቱስ ኢተኖ፤ አሞ ሁጀተኖረ ሆረንከ እሲ ጡድሰኖ። አዕኖኦንት ማለልቴኑንተ ከኒች ባሰስ ጡድሰኖስ። 21 አኑ መገኑ ሬሆች ኬእሽ ሄቸተ ኣሰኖሰገን ቤቱሁ ህትጉንተ ኣሲ ሀሾ መኒ ሄቸተ ኣሰኖሰ። 22 አኑ መገኑ አዬ አሌኒ ፍርደኖበአ። ጠሁ እኮዳ ፍርዲ ደንደኖ መቆ ቤቲ ኣሴእ። 23 ካንን አሴኢ መኑ ሆሩንኩ አነ መገኑ አብሰኖገን ቤቱሃ አብሱንታት። ቤቱ አብሱምቡ ሶኮ አነሃ አብሱምቧ። 24 ገርተ ያንክዕኔ፤ ላገኤ መጮጨኖሀኒሃ ሶኮኤ አመዕነኖሀኒሃ ዶሊ ሆሪንከ ሄኣ ሄቸት ዮስ። እስ ሬሆች ሄቻን ህጌሃ በጋን ፍርደመኖስበአ። 25 ገርተ ያንክዕኔ፤ ሬቶሩ መገን ቤት ላገተ መጮታ ጄቹት ዋልታእ፤ ጃንትስ ቴሶት። መጮታሩ ሆሩንኩ ፎሊን ሄኣእ። 26 ዳፉንኩስ አኑ መገኑ ሄቸ ቡዕሌቹተ እኮገንከ ቤቱሃ ሄቸ ቡዕሌቹተ እሀኖገ አሴእ። 27 አሞ መንች ቤቱ እኮተኔ ፍርደ ፍርዱንተ አኑ መገኑ ዊመ መቆ ኣሴስ። 28 ከኔን ማለልቴኖችዬ። ሞግ ኣዜን ዮሩ እስ ላገተ መጮጭት ሞጊች ፉልታ ጄቹት ዋልታእ። 29 ደናምተ ሁጅተ ሁጀቶሩ ሬሆች ኬእ ፎሊን ሄኣእ። ጠሁ እኮዳ ሂልመተ አስቶሩ ሬሆች ኬእየን አሌንተሰ ፍርደመኖ» ዬሰ። 30 አሞ ዬሱሱ «አን ገግኤ መቄን ሜጡራ አሶተ ደንዳምበአ። ጠሁ እኮዳ አኒችኤ መጮጬሚ ፍርዳም። ሶኮኤሀን ሰውተ በጋን ገግኤ ሰውተ ዊንሹምቡተኔ ፍርዱኤ ጠቤና። 31 አን ኢ ገግተኔ ነቀሾምደ ጠሁኤ ገርተ እሁስ ለለኖበአ። 32 ጠሁ እኮዳ ኢተኔ ነቀሰኖ ዎሉ ዮእ። እስን ኢተኔ ነቀሰኖ ጠሁ ገርተ እኮገ ደጋም። 33 አዕኖኦት ዮሃንሴበ መነ ሶኬንተ እኬ። እስን ገሬተኔ ኩሌክዕኔ። 34 አን ህትጉተ ዩንኩኤ አዕኖኦት ፈኤኑንታት በጋን ኤሳ መን ነቃሹ ሀስሽየዕኔበአ። 35 ዮሃንስ ቡበኖነ ጫክሰኖ ጫክየገ። አዕኖኦት ቀሆ ዶሊ እስ ጫካን በጅቀንቴንተ። 36 ጠሁ እኮዳ ኤሳ ዮሃንስ ነቀሾሪች አበኖ ነቃሹ ዮኤ። ህትስን ጦፍ ሁጀቱንተ አኑኤ ኣሴኤተ ሁጅ። ህት አን ሁጀታም ሁጅንት አኑኤ ኤስ ሶኮገ ጡድሳታ ሁጅ። 37 ኤስ ሶኮ አኑኤ ገጉስ ኢተኔ ነቀሼእ። እኮዳ አዕኖኦት ላገሲ መጮቴንምበአ፤ አሞ እልሲ ጡዴንምበአ። 38 እስ ሶኮሀኔን አመዕንቴኑምቡተኔ እስ ላገት ክዕኔኤን ዮበአ። 39 አዕኖኦት ዶሊ ሆሪንከ ሄኣ ሄቸተ ጡማንቾ መጣፋች ደቅቴነንታ አጉጅየንክዕኔ እሶኦተ ቆርምቴነዮንተ። ህኩሩሲ ኢተኔ ነቀሳሃረ። 40 እኮዳ አዕኖኦት ሄቸተ ደቅቴኖተ ኢበ ዋሉ ግቤንተ። 41 አን መኑ አብሱንተኤ ሀሳምበአ። 42 እኮዳ ክዕኔኤ ዎዘናን መገን ኢተት ዮበእገ ደጋም። 43 አን አንኤ ሱዕሚን ዋሎምደ ኣቅቴንምበኤ። ጠሁ እኮዳ ዎሉስ ገግስ ሱዕሚን ዋሎደ ኣቅቴነንተ። 44 አዕኖኦት መቱ-መቱዕኔ አብሴነንተሩ ሜጦ መገኒች አብን ሀሴኑምቡሩ ሀትኬን ኤሳን አመዕኒ ደንድቴነን? 45 አን ኢ አን ብሬን ኦዳንክዕኔ አጉዱንከክዕኔ። ኦደኖዕኔ አዕኖኦት ተሳ አስቴነንተ ሙሴት። 46 አዕኖኦት ሙሴ አመዕንቴንተ እክየን ኤስን አመዕንቴነንተ እኬ። ዳፉንኩስ እስ ኢተኔ ጣፌእ። 47 እስ ጣፎረ አመዕንቴኑምቦች ኢ ላጋን ሀትጉተ አመዕኒ ደንድቴነን?» ዬሰ።
1 ህከኒች ዘኪን ዬሱሱ «ጥብራዶሰ እንዶ ገሊለ» የመመኖ በሃር ዉደአ ቶሎ። 2 ዬሱሱ ሞሳኑ ፈይሾ ማለሉተ ጡዶ ሆለሙ መኑ አወንቶስ። 3 ዬሱሱ ዱን አል ፉል አወናኒንተስ በርገም አፉዕሌእ። 4 ሻሽግ አያኑንኩ ኢሌ እኬ። 5 ህተ ጄቹተ ዬሱሱ ሆለሙ መኑ እስበ ዋለዮኢ እልስ ጦቀእ ጡጅ ፍልጶሴ «ከን ሆራንከ መኒ እተኖ እቸተ ሀኖች ህሪ ደንድናም?» ዬእ። 6 ዬሱሱ ህትጉተ ዬኢ ፍልጶስ ያኖረ ጡዶታት በጋን እስ አሱ ሀስሰኖስረ ገጉንኩስ ደገኖ እኬ። 7 ፍልጶስን «አኒንከ አኒንከ ቀክቹ ቀክቹ ኢልሲ ለሜ ጥቤ ብር እቸቲ እካበአ» ዬእ። 8 አወናኒች መቱ ስሞን ጴጥሮሴ ህዞ እንድራስ 9 «ከኔ ሶእ ጦሮሽ ኦንትተ ቤጡታ ለምተ ቁርጡሜመታ አፌ መቱ አደቦ ዮእ። ጠሁ እኮዳ ኩን ከን ሆራንከ መኒ ሀትክ እሀኖ?» ዬእ። 10 ዬሱሱንኩ «መነስ አፉሽዬ» ዬሰ። ህከምባንን ሆለመት ህጥት ዮ እኬ። ኦንትተ ኩምተ እሀኖ ቀጡ ጎኑ ህከኔ አፉዕሌእ። 11 ህከኒች ዘኪን እቸተ አፍ መገኑ ገለጥ ጦሮሹ አወናኒሀንስ ኣሴእ። አወናኑንኩ አፉዕልቶ መኒ ኣስቶእ። ህትጉንተ ቁርጡሜመታ ሆሩንኩሰ ሀስሰኖሰ ቀጠ ኣቅቶእ። 12 ሆሩንኩ እች ዱቦች ዘኪን ዬሱሱ አወናኑስ «ሜጡሩ ፈኡዕናች ፈኦ ፉፉሩ መጤን ጠጰእዬ» ዬሰ። 13 እሶኦንት ኦንቴ ሶእ ቤጦች መኑ እች ዱብየን ፈኦ ፉፉሩ ቶነ ለሜ ደጉዴ ዊመ ኬእሶእ። 14 መኑንኩ ዬሱሱ አሴ ማለሉተ ጡዶ ጃተ «ገርንተ ኩን ኡለ አል ዋለኗ ህራጋንቹ» ይቶእ። 15 እኮዳ ህኩ መኑ እስ ኢቱዕናች መቄን አፍ ዎሞንስቶስተ ሰውቶገ ደግ ዬሱሱ ሜጥንስን ዱን አል ለቅ እሶኦች ፎርጎ ዬእ። 16 እሩ ሀወሬ ጃተ አወናኑስ ገሊል በሃርበ ድርቶእ። 17 እሶኦንት ጀልባን ኣግ ቅፍርናሆመ መርቶተ ኬኦእ። ህት ጄቹንት እሩ ቱንሴታ ጄቹ እኬ። አሞ ዬሱሱሁ እሶኦበ ዋልምበአ እኬ። 18 ቦብሩ አብሽ ቦብርሰዮተኔ በሃሩ ቃረገ ሌንቄቀዮ እኬ። 19 አወናኑንኩ መቱ ሳተ መረንሰኖ ቀጠ በሃር አሌን ጀልቢን መረንቶኢች ዘኪን ዬሱሱ በሃር አሌን መረመን ህከን ጀልብበ ህንጭያንየን ጡድ ዋጅቶእ። 20 ጠሁ እኮዳ ዬሱሱ «አኔት፤ ዋጅቴኖችዬ» ዬሰ። 21 እሶኦንት በጅጎን ጀልብ ኣዝ ኣግሶስ። ጀልቡንኩ እሶኦት መርታበ ደዕልን ኢልሾሰ። 22 ለንክ በር በሃር ዉደኣን ፈኦ መኑ በሃር አሌን ሜጡ ጀልቡ ጠሉ ፈኦገ ጡዴ እኬ። አሞ አወናኑስ ሜጥን ኦሮቶጋ ዬሱሱ እሶኦን በርገም ጀልባን ኣጉዕነ ፈኦጋ ደጌ እኬ። 23 ጠሁ እኮዳ ዎልት ጀልባከት ጥብራዶስ ከተሚች ኬእ ዬሱሱ መገኑ ገለጤነ ምናደቡ እቸተ እቾ መዕኔ ሺነ ዋልቶእ። 24 ህኩ መኑንኩ ዬሱሱ እንዶ እስ አወናኑ ህከኔ ዮበእገ ጡዶ ጃተ ህተን ጀልባካን ኣግ ዬሱሰ ሀሶተ ቅፍርናሆመ መርቶእ። 25 በሃር ዉደኣን ደጎስ ጃተ «ሮስሳንቾ! ሀከደ ከበ ኢልት?» ይቶእ። 26 ዬሱሱንኩ ፈንቀሽ «ገርተ ያንክዕኔ፤ አዕኖኦት ኤስ ሀሴነዮንታ እቸተ እትሾንክዕኔተኔሃቲ ዱቤንተተኔሃቲ በጋን አን ጡድሾንክዕኔ ማለሎተኔሃበአ። 27 መንች ቤቱ ኣሰኖዕኔ ዶሊ ሆሪንከ ሄኣ ሄቸ እቻ ሁጀችዬ በጋን በኣ እቻ ሁጀቴኖችዬ። ህኩስን አኑ መገኑ ቤቲሀንስ ኣሴ ገሬተ መላ» ዬሰ። 28 ህኩ መኑንኩ «መገን ሁጅተ ሁጀንቶተ መ አስኑለ?» ይቶስ። 29 ዬሱሱ ፈንቀሽ «መገን ሁጅትዕኑ መገኑ ሶኮሀኔን አመዕንቴኑንታት» ዬእ። 30 እሶኦንት ፈንቀሽት «ነኦት ጡንድ ኬሳን አመዕንኑንተ መ ማለሉተ አስተን? አሞ መ ሁጀተን? 31 ‹እቱንተ ሰሜች እቸተ ኣሴሰ› የመም ጣፈሞገ አበናከኔ ኡለ ኡዱመኣን ‹ማነ› + ዬኖ እቸተ እቴእ» ይቶስ። 32 ዬሱሱ «ገርተ ያንክዕኔ፤ ሰሜች እቸተ ኣሴዕኔ ሙሴበአ። ጠሁ እኮዳ ገሬ እቸተ ሰሜች ኣሰኖዕኔ ኢሃ አነ። 33 ዳፉንኩስ መገኑ ኣሰኖ እቸት ሰሜች ድርታታኒ መኒ ሆሪንከ ሄቸተ ኣስታታኒ» ዬሰ። 34 እሶኦንት «ቀርቾ! ተ እቸተ ሆረንተ ጄቹተ ኣስኔ» ይቶስ። 35 ዬሱሱንኩ ፈንቀሽ «ሄቸ እቸት አኔት። ኢበ ዋለኖ ሆረን ጎሬሀኖበአ። ኤሳን አመዕነኖንኩ ሆረን ሰገበኖበአ። 36 ጠሁ እኮዳ ‹አዕኖኦት ኤስ ጡዴን አመዕንቴንምበኤ› ዬንክዕኔ። 37 አኑእ ኣሰኖኤ ሆሩንኩ ኢበ ዋለኖ፤ አንን ኢበ ዋለኖ ሆረንከ ሀደተ ለቅ ሸራምበአ። 38 አን ሰሜች ድሬሚ ሶኮኤሀን ሀሱ ዊንሾታት በጋን ገግኤ ሀሱ ዊንሾታበአ። 39 ሶኮኤሀን ሀሱ ኣሴኤ መኒች ሜጡሃ በእሱዕናች ዘካንቾ በሬን ሬሆች ኬእሱንታት። 40 አንኤ ሀሱ ቤቱስ ጡጅ እሶን አመዕነኖ ሆሩንኩ ዶሊ ሆሪንከ ሄኣ ሄቸተ ደቁንታት። አንን ዘካንቾ በሬን ሬሆች ኬእሳንስ» ዬእ። 41 ዬሱሱ «ሰሜች ድርቶ እቸት አኔት» ዬተኔ አይሁድ-መኑ እስ አሌን ጉንጉንቶእ። 42 እሶኦንት «ኩን ነኦት አነሲ አመሲ ደንጋምየ ዮሴፌየ ቤቱ ዬሱሳትበእንዶ? እስ ሀትተ ‹አን ሰሜች ድሬምየ› ያኖ?» ይቶእ። 43 ዬሱሱንኩ ፈንቀሽ «አዕን-አዕኖኦንት ጉንጉንቴኖችዬ። 44 ኤስ ሶኮ ኢ አኑ ኢበ ለቅ ዋሼሀኒች ህግየን አዪ ኢበ ዋሊ ደንደኖበአ። አንን ዘካንቾ በሬን ሬሆች ኬእሳንስ። 45 ህራጋን መጣፋን ‹ሆሩንኩ መገኒች ሮሴረ እካእ› የመም ጣፈሜእ። ህከኒ መገኒች መጮጬኢሁ ሮሾሁ ሆሩንኩ ኢበ ዋለኖ። 46 ጠሁ እኮዳ መገኑ ጡጄኢ አዪ ዮበአ። መገንቢች ዋሎ እስ ጠሉ ጡጄሃ። 47 ገርተ ያንክዕኔ፤ ኤሳን አመዕነኖሀኒ ዶሊ ሆሪንከ ሄኣ ሄቸት ሄኣስ። 48 ሄቸ እቸት አኔት። 49 አናከዕኔ ኡለ ኡዱመኣን ‹ማነ› ዬኖ እቸተ እቶእ፤ እሶኦንት ሬቶእ። 50 ሰሜች ድርቶ እቸት ተኔት። እሴች እተኖ ሆረን ሬሀኖበአ። 51 ህት ሰሜች ድርቶ ሄቸ እቸት አኔት። መኑ ህተን እቻች እቾደ ዶሊ ሆሪንከ ሄአኖ። አንን ኡለ አሌን ዮ መኑ ዶሊ ሆሪንከ ሄኡንተ ኣሳም እቸት ገግኤየ ማለ» ዬእ። 52 ህተ ጄቹተ አይሁድ-መኑ «ኩ መንቹ ማለስ እንቱንተ ኣሶተ ሀትተ ደንደኖ?» የቀንተን እስ-እሶኦንት ኦደንቶእ። 53 ዬሱሱንኩ «ገርተ ያንክዕኔ፤ መንች ቤት ማለ እቴኑምቡቺ ቄግስ አጌኑምቡቺ ክዕኔኤ ሄቸት ዮዕኔበአ። 54 ኢ ማለ እተኖሀኒሃ ቄግኤ አገኖሀኒሃ ዶሊ ሆሪንከ ሄኣ ሄቸት ዮስ። አንን ዘካንቾ በሬን ሬሆች ኬእሳንስ። 55 ዳፉንኩስ ማሉኤ ገሬተ እቸ፤ አሞ ቄጉኤን ገሬየ አገ። 56 ማለኤ እተኖሁ ቄግኤ አገኖሁ ኤሳን ሄአኖ። አንን እሶን ሄኣም። 57 ሄአኖ አኑኤ ሶኮኤተኔ አን እስ ዉዲን ሄኣሚ እኮምገን ህትጉንተ ማለኤ እተኖ ሆሩንኩ ኢ ዉዲን ሄአኖ። 58 ሰሜች ድርቶ እቸት ተኔት። ህትስን አናከዕኔ እቶ እቸገ ዮበእተ። ዳፉንኩስ ህተ እቸተ እቶሩ ሬቴእ፤ ተ እቸተ እታሩ ዶሊ ሆሪንከ ሄኣእ» ዬሰ። 59 ዬሱሱ ካን ዬኢ ቅፍርናሆመ ዮ ጠጵት ምኔን ሮስሰኔት። 60 አወናኒችስ በትናሹሰ ህካን መጮጭቶ ጃተ «ኩ ጠሁ አብሽ ኬዕማሻ፤ ካን አዪ ኣቂ ደንደኖበአ» ይቶስ። 61 ጠሁ እኮዳ ዬሱሱ አወናኑስ ከን ጠህተኔ ጉንጉንቶገ መሌሲንተስ ደግ «ኩን ሉስሰኖክዕኔንዶ? 62 መንች ቤቱ ዎነ ዮበ ፈንቀል ፉለንየን ጡዴንተደ መ ይቴኖታት? 63 ሄቸተ ኣሰኖ ጡማንቿ አያነ። ጠሁ እኮዳ ማሉ ሜጡራ ካዕለኖበአ። አን ክዕኔኤ ጠሃቄም ላገት ገሬየ አያነኒ + ሄቸተኒ። 64 ጠሁ እኮዳ ክዕኔኤ ሜሬሪች አመዕንቱምቡሩ ዮእ» ዬሰ። ዬሱሱ ካን ዬኢ ዎናችን አፍ አመዕንቱምቡሩ አዬኤታንዶኒ ህግሽ ኣሰኖሲንኩ አዬትንዶኒ ደገኖተኔሃት እኬ። 65 አሞ ዬሱሱ « ‹አኑኤ ዋለኖገ አሴስሀኒች ህግየን ዎሉ ኢበ ዋሎተ ደንደኖበአ› ዬሚ ከኒሃት» ዬሰ። 66 ህከንተኔ አወናኒችስ ሆለሙ ፈንቀልት ኦሮቶእ። ህከኒች ዘኪን ዬሱሰ አወኑ አጉርቶእ። 67 ህከኒ ዬሱሱ ቶነ ለሙንከ አወናኑስ «አዕኖኦቲ ኦሮቂ ሀሴነንንዶ?» ዬሰ። 68 ስሞን ጴጥሮስን ፈንቀሽ «ቀርቾ! ነኦት አዬበ ኦሮናም። ኬሳ ዶሊ ሆሪንከ ሄኣ ሄቸ ላገት ዮኬ። 69 ነኦት አት መገን ጡማንቹ ቤቱ እኮንትገ አመዕንኔምኒ ደንጌምኒ» ዬእ። 70 አሞ ዬሱሱ «አን ክዕኔኤተ ቶነ ለሙንከ ዶዕርምበእንዶ? ክዕኔኤች መቱ ሼጣንቿ» ዬሰ። 71 ካንን ዬኢ ስሞኔ ቤቲ አስቆሮንቶ ይሁድተኔሃት እኬ። ዳፉንኩስ ይሁድ መሃ ቶነ ለሟንከ አወናኒች መቱ እኮዳ ዬሱሰ ህግሽ ኣሰኖ እሱ እኮተኔሃት እኬ።
1 ህከኒች ዘኪን ዬሱሱ ገሊል ባዶን መረመዮ እኬ። ዳፉንኩስ አይሁድ አወንሳኑ ሽቶስተ ሀሶተኔ ይሁድ ባዶን መረሞተ ሀስምበአ። 2 ህተ ጄቹተ አይሁድ ዳስ አያኑ + ሆባሼ እኬ። 3 ህከኒ ህዛከስ «አወናኑክ አት ሁጀታንት ሁጅተ ጡዱንተ ከምቢች ኬእ ይሁድ ባዱ መር። 4 ዳፉንኩስ ለሊ ሀሰኖ መንቹ ሁጅስ ማጭ አሶተ ሀሰኖበአ። አትን ከረ ሆረንከ አስተን ገገክ መኒ ሆሪንከ ለሊሱ ሀስሰኖሄ» ይቶእ። 5 ህካን ይቶኢ ዎሉ ፈእየን ህዛከስ ገጉንኩሳ አመዕንቱምቡስተኔሃት እኬ። 6 ህከኒ ዬሱሱ «ኢ ጄቹት ኢልትምበአ። ጠሁ እኮዳ ክዕኔኤ ሆረንት ጃት መካ። 7 ተን ኡለ አል መኑ ክዕኔኤተ ግቢ ደንደኖበአ። ጠሁ እኮዳ ኤስ ግበኖ። ዳፉንኩስ አን ሁጅስ ሂለተ እኮገ ኩላምተኔሃት። 8 አዕኖኦት ህከ አያነ አብሴኖበ መርዬ። እኮዳ ኢ ጄቹት ቴመ ኢልቱዕነ ዮተኔ አን ህከበ መሪ ደንዳምበአ» ዬእ። 9 ዬሱሱ ህካን ይ ገሊለ ፈኦ። 10 ጠሁ እኮዳ ህዛከስ ህከ አያነ አብሴኖበ መርቶሀኒች ዘኪን እሲ ህከበ ማጠም መሮ። 11 ህከኔን አይሁድ አወንሳኑ «እስ ሀከኔ ዮ?» ይተን ሀሰዮስ እኬ። 12 አይሁድ ምናደቡንኩ ህከኔ እስተኔ ሀሻሸቀመን መ-መቱሰ «እስ በሬዳ መንቹ» ይተንየን አሞ ዎሉሰ «ህትጉተበአ፤ እስ መነ ሉስሰኗ መንቹ» ይተዮስ እኬ። 13 ጠሁ እኮዳ አወንሳኑሰ ዋጅቶተኔ አይ መንቹሁ እስተኔ ሀራርስ ጠሃቅምበአ። 14 ህከ አያነ አብሴኖ ጄቹት ጎፊ በከን እኬሀኔን ዬሱሱ መገን ኬሰሞ ምን መር ሮስሾ። 15 ህከኔን አይሁድ አወንሳኑ «ኩ መንቹ ሮሱዕናች ከ ሆረረንከ ሀትጉተ ደጊ ደንዴእ?» ይተን ማለልተዮ እኬ። 16 ህከኒ ዬሱሱ ፈንቀሽ «አን ሮስሳም ሮሸት ኤሳች እሁዕነ ኤስ ሶኮሀኒቼት። 17 መገን ሀሱ አሲ ሀሰኖ ሄኦደ ት ሮሸት መገኒች ዋልቴኢ እሁስ እንዶ አን ገጊችኤ ጠሃቀዮሚ እሁስ አነነ አስ ደገኖ። 18 ገጊችስ ጠሃቀኖ ገጊሀንስ አብን ሀሰኖ። ጠሁ እኮዳ ሶኮስሀን አብን ሀሰኖ ገርየ መንቹ፤ ቆጰኑንኩ እሶን ዮበእየ። 19 ሙስ ሴረ ኣስምበክዕኔንዶ? እኮዳ ክዕኔኤች ሜጡዕኔ ሴረ ቆረቤኑምቧረ። ሚመ ሽቴኖኤተ ሀሴነዮንተ?» ዬሰ። 20 ምናደቡንኩ ፈንቀሽ «ኬስ ሀቡሱ አፌሄ። አይ ኬስ ሺ ሀሼሄ?» ይቶእ። 21 አሞ ዬሱሱ «አን መቱ ጠሀ አሴም፤ አዕኖኦት ሆሩንኩ ህከኔን ማለልቴንተ። 22 ሙስ ኑጉሰ ዎገ ኣሴዕኔ። ህኩስን አናካቼት በጋን ሙሴቼበአ። አዕኖኦት ሰንበት በሬን ኦሱተ ኑጉስቴነዮንተ። 23 አቼ ሙሴ ሴሩ ዝረሙምቦገ መኑ ሰንበት በሬን ኑጉሰመኖ እኮች አን ሰንበት በሬን መንቹ ዊመንተስ መኖመተ ፈይሾምተኔ ኤሳን ሚ አሙዕረንቴነዮንተ? 24 ጠቤነ ፍርደ ፍርድዬ በጋን መን እልተ ጡዴን ፍርድቴኖችዬ» ዬሰ። 25 ዬሩሳሌም ከተማን ዮ መኒች መ-መቱ መኑ «ኩን ሽቶተ ሀሳሃ መንቹበእንዶ? 26 ህኩዕኒን እስ ሀራርስ ጠሃቀዮእ፤ እሶኦንት ሜጡራ ይትምበስ። ገሻኑ ኩ መንቹ ዶዕረሞ ክርስቶሰ እኮገ ገርንተ ደጌትንዶ ሰዕምቴኢ? 27 ጠሁ እኮዳ ኩ መንቹ ዋሎበ ነኦት ደንጋም። ዶዕረሞ ክርስቶሱ ዋለኖ ጃተ እስ ሀኖች ዋሎንዶ አዪ ደገኖበአ» ይቶእ። 28 ህከኒ ዬሱሱ መገን ኬሰሞ ምኔን ሮስሰን ላገስ ጦቀእ «አን ሀኖቼትንዶ ኤስ ደጌነንተ። ጠሁ እኮዳ አን ገግኤ መቄን ዋልምበአ። ኤስ ሶኮንኩ ገሬየ፤ አዕኖኦንት ደጌነንተስበአ። 29 አን እስቢች ዋሎምተኔሃ እስን ኤስ ሶኮኤተኔሃ አን እሱ ደጋም» ዬእ። 30 ህከንተኔ እሶኦት አፎስተ ሀሶእ። እኮዳ ጄቹስ ኢልቱምቦተኔ አዪ አፍምበስ። 31 እኮዳ ምናደቢች በትናሹስ እሶን አመዕንት «ዶዕረሞ ክርስቶሱ ዋሎደ ኩ መንቹ ሁጀቾ ማለልሲሳ መላች አበ ሁጀተኖንዶ?» ይቶእ። 32 ፋሪሰት ምናደቡ ዬሱስተኔ ሀሻሸቀመን ጠሃቀንየን መጮቶእ። ህከንተኔ ቄስ አወንሳኑሁ ፋሪሰቲ ዬሱሰ አፍሲሶተ ዘበነ ሶኮእ። 33 ዬሱሱንኩ «አን ክዕኔኤን በርገም ቀሁተ ጄቹተ ኤጌራም። ህከኒች ዘኪን ሶኮኤሀንበ ኦሮቃም። 34 አዕኖኦት ኤስ ሀሴነንተ፤ እኮዳ ደጌነንተኤበአ። አን ዮምበንከ አዕኖኦት ዋሊ ደንድቴነንተበአ» ዬእ። 35 ህከንተኔንከ አይሁድ-መኑ «ነኦት ደንጉምቦስገ ኩ መንቹ ሀከበ መሮታት? አይደጎ ግሪክ መን ሜሬሮን ብንት ገልቶ አይሁድ-መንበ መር ግሪክ መነ ሮስሶታትንዶ? 36 አሞ ‹ኤስ ሀሴነንተኤ እኮዳ ደጌነንተኤበአ። አን ዮምበንከ ዋልቴኖተ ደንዴኬነንተበአ› ዩስ መ ዩሃንስ?» የቀንቶእ። 37 ህከ አያነ አብሴን ጦፌኖ ዘካንቾ አባንስ በሬን ዬሱሱ ኡር ላገስ ጦቀእ «ዎአ ሰገቦ ዮደ ኢበ ዋል አጉን። 38 ኤሳን አመዕነኖሀኒች ጡማንቾ መጣፋን ያኖገን ሄቸ ዎእ ቡዕሌት ኣዚችስ ቡቃእ» ዬእ። 39 ህትጉተ ይ ጠሃቄኢንኩ እሶን አመዕንቶሩ ኣቅታ ጡማንቾ አያንተኔሃት እኬ። ዳፉንኩስ ዬሱሲ አብንስ ጃት ኢልቱዕነ ዮተኔ ጡማንቹ አያኑ ኣሰምምበአ እኬ። 40 ምናደቢች መ-መቱ ህከ ጠሀ መጮቶ ጃተ « ‹ዋለኖ› የመሞ ህራጋንቹ ገርንተ ከኔት» ይቶእ። 41 አሞ ዎሉሰ «ኩን ዶዕረሞ ክርስቶሳት» ይቶእ። ጠሁ እኮዳ መ-መቱሰ «ዶዕረሞ ክርስቶሱ ገሊሊች ዋለኖንዶ? 42 ዶዕረሞ ክርስቶሱ ዳዊቴ ዜሪች እለመኖጋ ዳዊት እለሞ ቤተሌም ከተሚች ዋለኖጋ ጡማንቾ መጣፋን ጣፈሜበእንዶ?» ይቶእ። 43 ህከንተኔ ምናደብ ሜሬሮን እስ አሌን አነኖመት እኮእ። 44 እሶኦችን መ-መቱ እሱ አፎተ ሀሴ እኬ። እኮዳ አዪ አፍምበስ። 45 ህከኒች ዘኪን ዘበኑ ቄስ አወንሳንባ ፋሪሰባ ፈንቀልት መርቶእ። እሶኦንት «እሱ ሚ ዋሽቴንምበይ?» ይቶእ። 46 ዘበኑንኩ «ህከን መንችገ አዪ ጠሃቅምበአ» ይት ፈንቀሽቶእ። 47 ጠሁ እኮዳ ፋሪሰት «ክዕኔኤታ ሉስሾክዕኔንዶ? 48 አወንሳኒች እንዶ ፋሪሳች እሶን አመዕኔኢ ዮገ ደጌንተንዶ? 49 ጠሁ እኮዳ ኩ ሴረ ደጉምቡ ምናደቡ ጤሌለሜሃ» ይቶእ። 50 - 51 ህከን መኒችን መቱስ ከኒች ብሬ ዬሱስበ መሬ እኬ «ንቆድሞሴ» ዬኖ ፋሪስቹ «ሴርኔጊን መቶ መንች ጠሀ መጮጬኑዕናቺ መ አሴእንዶ ደጌኑዕናቺ ፍርዱ ኣሰመኖንዶ?» ዬሰ። 52 እሶኦንት «አትሲ ገሊል ባዲቼትንዶ? ህራጋንቹ ገሊል ባዶን ኬኦተ ደንዱምቦገ ቆርምት ጡድ» ይቶስ። 53 እሶኦንት አኑንኩ አኑንኩ አጉርት ምንሰ ኦሮቶእ።
1 ህከኒች ዘኪን ዬሱሱ ዘይት ሀቁ ሌአኖ ዱነ መሮ። 2 ለንክ በሬ ገስመ መገን ኬሰሞ ምን ፈንቀል ዋሎ። ምናደቡ ሆሩንኩ እስበ ዋል ጠጵዬሀን እስ አፉዕል ሮስሱ አፎ። 3 ሴር ሮስሳኑሁ ፋሪሰቲ ሳአንየን አፌመ መትተ ሜንትቹተ አፍ ዋሽት ሜሬሮንተሰ ኡርሶእ። 4 እሶኦንት ዬሱሰ «ሮስሳንቾ! ት ሜንትቹት ሳአን አፈንቴታ። 5 ህትጎነ ጠሀ አስታ ሜንቱ ክኒን ቀሴን ሼኖገ ሙስ ሴራን አዘጄኔ። አትስዕኑለ እሴተኔ መ ይተን?» ይቶእ። 6 እሶኦት ህትጉተ ይቶኢ እሱ ኦዳ ጠሀ ደግ ኬንቶስተ ሀሴት እኬ። ጠሁ እኮዳ ዬሱሱ ህርክይ ዙሩዕማንተስ ኡለ አሌን ጣፉ አፎ። 7 ፈንቀላንስት ጠዕምቶስ ጃተ ህርክዬቢች ጦቅይ «ክዕኔኤ ሜሬሪች ባጢሉ ዮስበእ መንቹ ብርስ ክኒን ቀሱን» ዬእ። 8 ህከኒች ዘኪን ለንኪሃ ህርክይ ኡለ አሌን ጣፉ አፎ። 9 እሶኦንት ህካን መጮቶ ጃተ ኑባቢች አፍ ሀርድተ ኢለንቀጤች መቲን መቲን ህከምቢች ፉልት ኦሮቶእ። ህከኒ ዬሱሱ ብሬንተስ ኡርቴእኬ ሜንትቾንን ሜጥንስን ፈኦ። 10 ህከኒች ዘኪን ዬሱሱ ጦቅይ ጡጅ «ቴ ሜንትቾ! ኦዶሄ መኑ ሀከኔ ዮ? አሌንተክ ፍርዴኢ ሜጡሁ ዮበእንዶ?» ዬሴ። 11 እሴን «ቀርቾ! ሜጡሁ ዮበአ» ይቶእ። ዬሱሱንኩ ፈንቀሽ «አኒ ፍርዳንኬበአ። መር ኦሮቅ። ለንኪ ባጢለ ሁጀቶት» ዬሴ። 12 ለንኪሃ ዬሱሱ «አን ተን ኡለ አልየ ጫከ። ኤስ አወነኖ ሆሩንኩ ሄቸ ጫከ ደቀኖ በጋን ቱንሶን መረመኖበአ» ይ ጠሃቄሰ። 13 ፋሪሰንት «አት ገግክተኔ ነቀሰዮንት፤ ነቀሶንትሩንኩ ገርተበአ» ይቶእ። 14 ዬሱሱንኩ «መሃ አን ኢ ገጊ ነቀሾምዳ አን ሀኖች ዋሌምንዶ አሞ ሀኑተ መራምንዶ ደጋምተኔ ነቀሱኤ ገርተ። ጠሁ እኮዳ አዕኖኦት አን ሀኖች ዋሎምንዶ አሞ ሀኑተ መራምንዶ ደጌነንተበአ። 15 አዕኖኦት ማል ሰውቲን ፍርድቴነንተ። ጠሁ እኮዳ አን አዬ አሌኒ ፍርዳምበአ። 16 ፍርዴምዳ ፍርዱኤ ገርተ። ዳፉንኩስ ፍርድናሚ አኔቲ ኤስ ሶኳኒ በጋን አኔት ሜጡበአ። 17 ለሙ መንቹ ነቀሾች ጠሁስ ገርተ እሀኖገ ሴራንተዕኔ ጣፈሜእ። 18 ህከኒ አን ገግኤተኔ ነቀሳም። አሞ ኤስ ሶኮ ኢ አኑሁ ኢተኔ ነቀሰኖ» ይ ፈንቀሼእ። 19 እሶኦንት «አኑክ ሀከኔ ዮእ?» ይት ጠዕምቶእ። ዬሱሱንኩ «ኤሲ አነኤ ደጌነንተበአ። ኤስ ደጌንተ እክየን አነኤ ደጌነንተ እኬ» ይ ፈንቀሼእ። 20 ዬሱሱ ህካን ጠሃቄኢ መገን ኬሰሞ ምኔን ግዘ ዎሬኖ ሳጥን ሺናን አፉዕል ሮስሰኔት እኬ። እኮዳ ጄቹስ ኢልቱዕናች ዮተኔ አዪ አፍምበስ። 21 ለንኪሃ ዬሱሱ «አን ኦሮቃም፤ አዕኖኦንት ኤስ ሀሴነንተ። ጠሁ እኮዳ ባጢሊንተዕኔን ሬቴነንተ በጋን አን መራምበ መሪ ደንድቴነንተበአ» ዬሰ። 22 አይሁድ አወንሳኑንኩ «እስ ‹አን መራምበ አዕኖኦት ዋልቴኖተ ደንድቴነንተበአ› ዩስ ገገስ ሾታትንዶ?» የቀንቶእ። 23 አሞ ዬሱሱ «አዕኖኦት ዎሮች ተን ኡላቼት። እኮዳ አን አሊቼት በጋን ተን ኡላቼበአ። 24 አን ክዕኔኤተ ‹ባጢሊንተዕኔን ሬቴነንተ› ዬሚ ህከኒሃት። ዳፉንኩስ አን አዬትንዶ ደጌን አመዕንቴኑምቡች ባጢሊንተዕኔን ሬቴነንተ» ዬሰ። 25 እሶኦንት «አት አዬት?» ይቶስ። ዬሱሱንኩ «አን ዎናችን አፍ ኩሎንክዕኔየ። 26 አን ክዕኔኤተኔ ያምሩ ፍርዳምሩ ሆለሙሩ ዮኤ። እኮዳ ሶኮኤ ገሬቢ እኮተኔ አን ተን ኡለ አል መኒ እሲች መጮጬሚ ጠለ ጠሃቃም» ዬሰ። 27 እኮዳ እሶኦት እስ አና መገንተኔ ጠሃቄሰገ ቆርስትምበአ እኬ። 28 ህከኒ ዬሱሱ «መንች ቤቱ ሰቀልቴንተ ጃተ አን አዬትንዶ ደጌነንተ። ህትጉንተ አኑኤ ሮስሾኤ ጠለ ጠሃቄምገ በጋን ገግኤ መቄን ሜጡራ አሱምቦገ ደጌነንተ። 29 ኤስ ሶኮ ኤሳኔት። አን ሆረንተ ጃተ አሳምሩ እሱ በጅግሰኖ እኮተኔ ኤስ ሜጥን አጉርምበኤ» ዬሰ። 30 ዬሱሱ ህካን ጠሃቄ ጃተ ሆለሙ መኑ እሶን አመዕንቶእ። 31 ዬሱሱ ህከን አመዕንቶ አይሁድ-መኒ «አዕኖኦት ላገኤገ ሄኤንተደ ገርንተ አወናኗዕን። 32 አዕኖኦንት ገርተ ደጌነንተ። ገርንት ዎማንማን ፉሽታዕኔ» ዬሰ። 33 ጠሁ እኮዳ እሶኦት «ነኦት አብረሃሜየ ፍካነ፤ ተደ ኢለንቀጤች አዬሃ አግዞመተ ጠቀምምበአ። ህከደ አት ‹ዎማንማን ፉልቴነንተ› ይታንትኔ ሚሃት?» ይት ጠዕምቶእ። 34 ዬሱሱንኩ «ገርተ ያንክዕኔ፤ ባጢለ አሰኖ ሆሩንኩ ባጢልየ አግሹ። 35 አግሹ ቀርችስ ምኔን ዶሊ ሆሪንከ ሄአኖበአ። እኮዳ ቤቱ ዶሊ ሆሪንከ ምኔ ሄአኖ። 36 ህከኒ ቤቱ ዎማንማን ፉሼዕኔች ገርንተ ዎማንማን ፉልቴነንተ። 37 አዕኖኦት አብረሃሜ ፍካነ እኬንተገ ደጋም። ጠሁ እኮዳ ኢ ላገተ ኣቅቴኑምቦተኔ ኤስ ሽቴኖተ ሀሴነዮንተ። 38 አን አንኤባን ጡጆምረ ጠሃቃም። አዕኖኦቲ አኒችዕኔ መጮቴንተረ አስቴነንተ» ዬእ። 39 እሶኦንት «አኑኔ አብረሃሜት» ይቶእ። አሞ ዬሱሱ «አብረሃሜ ኦሱተ እኬንተ እክየን አብረሃም አሴረንከ አስቴነንተ እኬ። 40 ጠሁ እኮዳ አዕኖኦት መገኒች መጮጬም ገርተ ኩሎንክዕኔደ ቴሱ ሽቴኖኤተ ሀሴነዮንተ። አብረሃም ህትጉተ አስምበአ። 41 አቼ አዕኖኦት አንዕኔገን አስቴነዮንተ» ዬሰ። እሶኦንት «ነኦት ሀጥቻከተበአ። ሜጡ አኑ ዮኔ፤ እስን መገኗ» ይቶስ። 42 አሞ ዬሱሱ «መገኑ አነዕኔ እኬ እክየን ኤስ ኢትቴነንተ እኬ። ዳፉንኩስ አን መገንቢች ዋሌም። ኤስ እስ ሶኬኤ በጋን አን ገጊንተኤ ዋልምበአ። 43 ሚሃት ጠሀኤ ቆርስቴኑምቡ? ላገኤ ኣቂ ሀሴኑምቦተኔሃበእንዶ? 44 አዕኖኦት ሼጣንችተ ኦሱ፤ አንዕኔ ሰውተ አስቴኖተ ኢትቴነንተ። እስ ዎዶችን አፍ መነ ሻኗ። ገርንት እሶን ዮበእተኔ ገሬን ኡርምበአ። እስ ቆጰናንቹሃ ቆጰን አነሃ እኮተኔ ቆጰነ ጠሃቀኖ ገጊችሴት። 45 ጠሁ እኮዳ ገርተ ጠሃቃምተኔ አመዕንቴነንተኤበአ። 46 ክዕኔኤ ሜሬሪች ኤስ ‹አት ባጢላሟ› ይ ዎቀሰኖኤ አዬት? አን ገርተ ጠሃቃሚ እኮች ሚ አመዕንቴነንተኤበይ? 47 መገንቢ እኮ መገን ላገተ መጮጨኖ። አዕኖኦት መገንረ እኬኑምቦተኔ መገን ላገተ መጮቴነንተበአ» ዬሰ። 48 አይሁድ-መኑ ፈንቀሽት «ነኦት ‹አት ሰማርቿ፤ አሞ ሀቡሱሁ አፌሄ› ዪንተኔ ሜጡራ ሉንስምበበእንዶ?» ይቶስ። 49 ህከኒ ዬሱሱ «ኤስ ሀቡሱ አፍምበአ። ጠሁ እኮዳ አን አነኤ አብሰዮም፤ አዕኖኦት አሞ ቢልሴነዮንተኤ። 50 እኮዳ አን ገግኤ አብን ሀሳምበአ። ኢ አብን ሀሰኖሁ ፍርደኖሁ ዎሉ ዮእ። 51 ገርተ ያንክዕኔ፤ ላገእ ቆረበኖ ዶሊ ሆሪንከ ሬሀኖበአ» ይ ፈንቀሼሰ። 52 አይሁድ-መኑ «ሀቡሱ አፎሄገ ቴመ ደንጎም። አብረሃሚ ህራጋኑሁ ሬቴእ። እኮዳ አት ‹ላገኤ ቆረባሩ ሆረን ሬታበአ› ይተዮንት። 53 ገርንተ አት አናኔ አብረሃሜች አብተንንዶ? አብረሃሚ ህራጋኑሁ ሬቴእ። ህከደ አት ገገክ አዬት የቅቶታለ?» ይቶስ። 54 አሞ ዬሱሱ ፈንቀሽ «አን ገገኤ አብጬምደ ሜጡራ ካዕለኖበአ። ኤስ አብሰኖ አዕኖኦት ‹መገኗኔ› ይቴነንተ አናዕኔ። 55 ጠሁ እኮዳ አዕኖኦት እሱ ደጌንምበአ፤ አን ደጋንስ። አን ‹እሱ ደጋምበአ› ዬምደ ክዕኔኤገን ቆጰናንቹ እሃም። እኮዳ አን እሱ ደጋም፤ ላገሲ ቆረባም። 56 አንዕኔ አብረሃሜ ቁልጡ አን ዋላም በር ጡጅ በጅቀሞታት እኬ። እስን ህካን ጡጅ በጅቀሞ» ዬሰ። 57 ህተ ጄቹተ አይሁድ-መኑ «አት እለንቶንቲች ኦንታዱመ ዎጋ እሁምቡሄ ‹አብረሃሜ ጡጄም› ይተን?» ይቶስ። 58 አሞ ዬሱሱ «ገርተ ያንክዕኔ፤ አብረሃም እለሙዕናች ብሬን አን ዮምየ» ይ ፈንቀሼሰ። 59 ህከንተኔ አይሁድ-መኑ ዬሱሰ ቀሶተ ክኑ ኬእሶእ። ጠሁ እኮዳ ዬሱሱ እሶኦች ውልይ መገን ኬሰሞ ምኒች ፉል ኦሮቄእ።
1 መቱ በር ዬሱሱ ዎቃን መረመን ቆቀ እክ እለሜ መንቹ ጡጆ። 2 ህከኔን አወናኑ ዬሱሰ «ሮስሳንቾ! ኩ መንቹ ቆቀ እክ እለሞ አዬ ባጢል ዳፊኔት? ገጉስ አሴ ባጢሊኔትንዶ አኑሲ አመሲ አስቶ ባጢሊኔት?» ይት ጠዕምቶስ። 3 ዬሱሱንኩ ፈንቀሽ «ኩ መንቹ ቆቆ ገጉስ አሴ እንዶ አኑሲ አመሲ አስቶ ባጢሊኔበአ። ጠሁ እኮዳ መገን ሁጅት እስ አሌን ለልቱንታት። 4 በሩ ዮ ቀጣን ሶኮኤሀን ሁጅተ ሁጀቱ ሀስሰኖኔ። ዳፉንኩስ አዪ ሁጀቲ ደንዱምቡ አንከሩ ዋለኖ። 5 አን ተን ኡለ አሌን ዮም ቀጣን ተን ኡለ አል መኒ ጫካ» ዬእ። 6 ህካንን ጠሃቄኢች ዘኪን ዬሱሱ አንጀ ኡለ ቱይ ቡሁተ ሙጥሽ ኦርጨስ ህከን ቆቀ መንች እሌን ቡር 7 «መርት ሰልሆም ዎኣን ኣዕል» ዬስ። «ሰልሆመ» ዩንኩ «ሶሀሞ» ዩሀ። ህከኒ መንቹስ መር ኣዕል ፈይ ጡደን ፈንቀል ዋሎ። 8 ኦሌስ መኑሁ ከኒች ብሬ አፉዕል ኡጨንየን ጡዶ መኑሁ «ኩን አፉዕል ኡጨቀኗ መንቹ እኬበእንዶ?» ይቶእ። 9 መ-መቱ መኑ «፥ እሶት» ይቶእ። ዎሉስ አሞ «እሱ አጉደዮ በጋን እሶበአ» ይቶእ። ጠሁ እኮዳ ህኩ መንቹ «፥ አኔት» ዬእ። 10 መኑንኩ «እልክ ሀትክ ፈነንቶእ?» ዬስ። 11 እስን « ‹ዬሱሰ› ዬኖ መንቹ ኦርጨ ሙጥሽ እሌንተኤ ቡር ‹ሰልሆም ዎኣን መርት ኣዕል› ዬኤ። አንን ህከበ መር ኣዕል ፈዬም» ይ ፈንቀሼእ። 12 እሶኦንት «መንቹስ ሀከኔ ዮ?» ይቶስ። እስን «አን ደግምበአ» ይ ፈንቀሼእ። 13 እሶኦንት ህከ ቆቀ እክ እለሞ መንቹ ፋሪሰበ መስቶእ። 14 ዬሱሱ ኦርጨ ሙጥሽ መንች እልተ ፈይሾ በሩ ሰንበትየ በር እኬ። 15 ፋሪሰት ህከ መንቹ «ሀትክ ጡዲ ደንድት?» ይት ጠዕምቶስ። እስን «እሌንተእ ኦርጨ ቡርየን ኣዕል ፈዬም» ዬሰ። 16 ህተ ጄቹተ ፋሪሳች መ-መቱ «ኩ መንቹ ሰንበተ አብሱምቡተኔ መገንየ መንቹበአ» ይቶእ። እኮዳ ዎሉስ መኑ «ባጢላሙ መንቹ ህትጎነተ ማለልሲሳ መላተ ሀትተ ሁጀቲ ደንደኖ?» ይቶእ። ህከን ዳፊን ሜሬሮንተሰ አነኖመት እኮእ። 17 ህከኒ ህከ ቆቀ መንቹ «ኩ መንቹ እልክ ፈይሾች አት እስተኔ መ ይተን?» ይት ለንኪሃ ጠዕምቶስ። እስን «ህራጋንቿ» ዬሰ። 18 አይሁድ አወንሳኑ ህኩ መንቹ ኤጅ ቆቀ እክ ቴሱ እልስ ፈይት ፈነንቶገ አነሲ አመሲ ገእት ጠዕምተንቀጤች አመዕንትምበአ እኬ። 19 ህከኒ እሶኦት « ‹ቆቁ እለሜእ› ይቴነንተ ቤቱዕኔ ከኔትንዶ? ቴሱስ ሀትኬት ጡዲ ደንዴኢ?» ይት አነሲ አመሲ ጠዕምቶእ። 20 አኑሲ አመሲ «ኩ መንቹ ቤቱኔ እሁሲ ቆቁ እለሙሲ ደንጋም። 21 ጠሁ እኮዳ ቴሱ ሀትክ ጡደዮንዶ አሞ አይ እልስ ፈይሾንዶ ደንግምበአ። እስ አንጀ ቁርጨኤ መንቹ እኮተኔ ገገስን ጠዕምዬ፤ እስ ገግስተኔ ኩዕሊ ደንደኖ» ይቶእ። 22 እሶኦት ህትጉተ ይቶኢ አይሁድ አወንሳኑ ዋጅቶተኔሃት እኬ። ዳፉንኩስ ዬሱሱ «ዶዕረሞ ክርስቶሳት» ይ ነቀሰኖ ሄኦደ ጠጵትሰ ምኒች ፉሽቶተ ከኒች ብሬን አይሁድ አወንሳኑ ኢተንቶተኔሃት እኬ። 23 ህከንተኔሃት እልቶስሩ «እስ አንጀ ቁርጨኤኢ እኮተኔ እሱንከ ጠዕምዬ» ይቶኢ። 24 ህከን ዳፊ ህከ ቆቀ እክ እለሞ መንቹ ለንኪሃ ገእት «አት መገኒ አብን ኣስ። ኩ መንቹ ባጢላሙ እኮገ ነኦት ደንጋም» ይቶእ። 25 እስን «ባጢላሙ እሁስ ሆጉስ ደጋምበአ። አን ዎና ቆቀ እኮምጋ ቴሱ ጡደዮምጋ ህካን ጠለ ደጋም» ይ ፈንቀሼእ። 26 እሶኦንት «እስ መ አሴኬ? አሞ እልክ ሀተእኔት ፈይሾ?» ይቶስ። 27 እስን ፈንቀሽ «አን ዎነን ኩሌንክዕኔ እኬ። እኮዳ አዕኖኦት መጮጪ ሀሴንምበአ። ቴሱስ ሚ መጮጪ ሀሴነዮንተ? አዕኖኦቲ እስ አወናኑ እሂ ሀሴነዮንተንዶ?» ዬሰ። 28 እሶኦንት እሱ ቦሮርተን «እስ አወናንቹ አቴት። እኮዳ ነኦት ሙሴየ አወናኑ። 29 መገኑ ሙሴ ጠሃቄገ ነኦት ደንጋም። ጠሁ እኮዳ ኩ መንቹ ሀኖቼትንዶ ደንጋምበአ» ይቶስ። 30 ህኩ መንቹ እሶኦ «ኩ መንቹ ሀኖቼትንዶ አዕኖኦት ደጉ ሆጉዕኔ አብሽ ማለልሲሰኗ! ጠሁ እኮዳ እልኤ ፈይሾ እሶት። 31 መገኑ ባጢላመት ይታ ጠሀ መጮጩምቦገ ደንጋም። ጠሁ እኮዳ መገኑ ዋጀኖሁ እስ ሀሱ አሰኖሁ ሄኦደ ህኩን ያኖ ጠሀ መገኑ መጮጨኖ። 32 ‹ቆቀ እክ እለሞ መንች እልተ ፈይሼኢ ዮእ› ዬነንየን ኡለት ቆጨንቶኢች ከበሬ ኢለንቀጤች መጮጨም ከሰበአ። 33 ኩ መንቹ መገኒች እሁምቦ እክየን ሜጡራ አሲ ደንደኖበአ እኬ» ይ ፈንቀሼሰ። 34 እሶኦንት «አት ሆሮመን ባጢሊን እለንቴንቲ! ኔስ ሮስሶኔታትንዶ?» ይት ጠጵትሰ ምኒች ፉሽቶስ። 35 ህከ መንቹ አይሁድ-መኑ ጠጵት ምኒች ፉሽቶስገ ዬሱሱ መጮጬእ። ህከን መንቺን ደቀምኬእ ዬሱሱ «መንች ቤቶን አመዕንተንንዶ?» ዬስ። 36 እስን ፈንቀሽ «ቀርቾ! አን እሶን አመዕኖተ እስስ አዬለ?» ዬእ። 37 ዬሱሱንኩ «አት እሱ ከኒች ብሬን ጡዴንት። አሞ ቴሱ ኬሳን ጠሃቀኖንኩ እሶት» ዬስ። 38 እስን «ቀርቾ! አመዕናም» ይ ሰገጆስ። 39 ዬሱሱንኩ «ጡዱምቡሩ ጡዱንታ ጡዳሩ ቆቁንታ አን ፍርዲ ተ ኡለ አል ዋሌም» ዬእ። 40 ህተ ጃተ ዬሱስ ሺናን ዮ ፋሪሰት ህካን መጮት «ነኦቲ ቆቃከተንዶ?» ይቶስ። 41 ዬሱሱ እሶኦ «ቆቃከተ እኬንተ እክየን ባጢለ እሀኖዕኔበ እኬ። ጠሁ እኮዳ ቴሱ ጡንደዮም ይቴነንተተኔ ባጢለ እሀኖክዕኔ» ዬሰ።
1 ዬሱሱ «ገርተ ያንክዕኔ፤ ሆለ ኦሮዱ ጎጪን እሁዕነ ዎሎ ዉዲን ኣገኖ መንቹ ሞገኣንቿኒ ቦጋንቿኒ። 2 ጠሁ እኮዳ ጎጪን ኣገኖ ሆላሀንስ ዜማንቿ። 3 እሲ ጎጨ ቆረባንቹ ኡሩተ ፈነኖስ። ሆለንት ላገስ መጮታእ። እስን ገግስ ሆለተ ሱዕሚንተሰን ገአን አወንስ ሀደተ ፉሸኖሰ። 4 ገግስረ ሆረንከ ገእ ፉሼኢች ዘኪን ብሬንተሰ መረመን አወንሰኖሰ። ሆለንትስ ላገስ ደጋተኔ አወንታስ። 5 ጠሁ እኮዳ ዎሊችስ ሁንታ በጋን አወንታስበአ። ዳፉንኩስ ዎል ላገተ ደጉምቦተኔሃት» ዬእ። 6 ዬሱሱ ህተ አጉዲሸተ ኩሎሰ። ጠሁ እኮዳ እሶኦት ኩሎሰሩ መሃንዶ ደግምበአ። 7 ህከንተኔ ዬሱሱ ለንኪሃ «ገርተ ያንክዕኔ፤ አን ሆላ ኣጋታ ኡሩ። 8 ኤሳች ብርስት ዋልቶሩ ሆሩንኩ ሞገኣኗኒ ቦጋኗኒ። ጠሁ እኮዳ ሆለት መጮትምበሰ። 9 አን ኣጌኖ ኡሩተ እኮምተኔ ኢ ዉዲን ኣገኖ ሆሩንኩ ፈአኖ። ኣገኖኒ ፉለኖኒ፤ አሞ ዜአመኖ መዕንተ ደቀኖ። 10 ሞገኣንቹ ሞገኦተ፥ ሾታ በእሶታ ጠሊ ዋለኖ። እኮዳ አን ዋሎሚ ሄቸተ በትሽ ኣሶታት። 11 በሬዱ ዜማንቹ አኔት። በሬዱ ዜማንቹ ሆለስተኔ ፎልስ ህግሽ ኣሰኖ። 12 ጠሁ እኮዳ ሆለት ገግስቢተ እኩዕናች ባቴናንስ ዜአኖ ዜማንቹ ኦሩት ዋልተንየን ጡጆ ጃተ ሆለተ አጉር ሁነኖ። ኦሩንት በቅ ኣቅታእ። 13 ህኩ ዜማንቹ ሁነኖ ግዘ ባቴናንስ ዜአኖ እኮተኔሃቲ ሆላሀንስ ቅሽጡምቦተኔሃቲ። 14 - 15 በሬዱ ዜማንቹ አኔት። አኑ መገኑ ደገኖኤሀንገን አንን አነ መገኑ ደጋምሀንገንከ ህትጉንተ ሆለኤ ደጋም። ሆለንትኤ ኤስ ደጋእ። አንን እሶኦተኔ ፎልኤ ህግሽ ኣሳም። 16 ተን ዜመ ኣዜን ዮበእ ዎልት ሆለት ዮኤ፤ እሶኦንተ ዋሹ ሀስሰኖኤ። ላገኤ መጮታእ። አሞ ሜጥተ ዜመተ እክየን ዜማንቹሳ ሜጡ እሀኖ። 17 ህከኒ አኑ መገኑ ኤስ ኢተኖ። ዳፉንኩስ አን ፈንቀሽ ኣቂ ፎልኤ ህግሽ ኣሳምተኔሃት። 18 ፎልቹኤ አን ገግኤ ኢታን ህግሽ ኣሳም በጋን ኤሳች ከም ኣቀኖ አዪ ዮበአ። ፎልኤ ህግሽ ኣሲሃ ፈንቀሽ ኣቂሃ መቆ ዮኤ። ተ አዘዙተ ኣቄሚ አኒችኤት» ዬእ። 19 ህከን ጠሂች ኬኦ አይሁድ ሜሬሮን ለንኪሃ አነኖመት እኮእ። 20 እሶኦችን በትናሹሰ «እሱ ሀቡሱ አፌእ። እስን መቻሬእ። እስ ጠሃቀኖረ ሚ መጮቴነዮንተ» ይቶእ። 21 አሞ ዎሉስ መኑ «ኩ ጠሁ ሀቡሱ አፎ መንች አፌች ፉለኖበአ። ሀቡሱ ቆቃ መንች እልተ ፈይሰኖንዶ?» ይቶእ። 22 ዬሩሳሌመ መገን ኬሰሞ ምን ሙጩርስ አያነ + አብሴኖ ጄቹት ኢልቴ እኬ። ህኩስን መጦሃ እኬ። 23 ዬሱሱንኩ መገን ኬሰሞ ምኔን «ሰለሞን መረመኖ ዎቃ» የመመኖባን መረመዮ እኬ። 24 ህተ ጄቹተ አይሁድ-መኑ ዬሱሰ ክብት ኡርት «ሀኩ በሩ ኢለንቀጤች መለማምገ አስተኔ? አት ዶዕረሞ ክርስቶሰ እኬንትደ ጫክስ ኩልኔ» ይቶስ። 25 ዬሱሱ «አን ከኒች ብሬን ኩሌንክዕኔ። እኮዳ አዕኖኦት አመዕንቴነንተበአ። አንኤ ሱዕሚን ሁጀታም ሁጅት ኢተኔ ነቀሳእ። 26 ጠሁ እኮዳ አዕኖኦት ሆለኤ እኬኑምቦተኔ አመዕንቴነንተበአ። 27 ሆለኤ ላገኤ ደጋእ፤ አንን እሶኦተ ደጋም። እሶኦንት አወንታኤ። 28 አን እሶኦ ዶሊ ሆሪንከ ሄኣ ሄቸተ ኣሳንሰ። ህከኒ እሶኦት ሆረን በኣበአ። አሞ ኢ አንጋችን አዪ መቄሽ ኦሮሰኖበአ። 29 እሶኦተ ኤሳ ኣሴ ኢ አኑ ሆሪችን አባ። አና መገን አንጋች እሶኦተ መቄሽ ኦሮሲ ደንደኖ አዪ ዮበአ። 30 አኒ አኑ መገኑሁ ሜጦት» ዬሰ። 31 ህተ ጄቹተ አይሁድ-መኑ ለንኪሃ ዬሱሰ ቀሶተ ክኑ ኬእሶእ። 32 እኮዳ ዬሱሱ ፈንቀሽ «አን ሆለመተ ደናምተ ሁጅተ አኒችኤ ጡድሼንክዕኔ። አዕኖኦት ኤስ ቀሴነንታ ህከሮኦች ሀተኔሃንሴት?» ዬሰ። 33 እሶኦት «ነኦት ቀንሳንኬ መገን አሌን ቦሮር ላገተ ጠሃቶንትተኔሃት በጋን ደናሜ ሁጄሃንኬበአ። ህትጉንተ አት መንቹ እከን ገገክ መገኑ አሰቅቶንትተኔሃት» ይት ፈንቀሽቶእ። 34 ዬሱሱ «ሴራንተዕኔ ‹አን ክዕኔኤተ መገነተ ዬንክዕኔ› ያኖ ጣፈሜበእንዶ? 35 መገን ላገት ህጉምቡተ እኮኢቺ ህከ መገን ላገት ዋልቶሰረ ‹መገነተ› ይ ገኤሳቺ 36 ህከደ አኑ መገኑ ዶዕሬኤሃ ተ ኡለ አል ሶኮኤሃ ‹አን መገንየ ቤቱ› ዬምተኔ ‹መገን አሌን ቦሮር ላገተ ጠሃቴንት› ይቴነዕኔንዶ? 37 አን አንኤ ሁጅተ ሁጀቱምቦች አመዕንቴኖቼኤ። 38 አን አንኤ ሁጅተ ሁጀታሚ እኮች ኤሳን አመዕንቴኑምቦዳ ሁጄንተኤ አመዕንዬ። ህትጎንን አኑ መገኑ ኤሳን ዮጋ አን አና መገኖን ዮምጋ ደጌነንተኒ ቆርስቴነንተኒ» ዬሰ። 39 እሶኦንት ህተ ጄቹተ አፎስተ ሀሶእ። እኮዳ እስ አንጋችሰ ፉሸቅ ኦሮቄእ። 40 ዬሱሱ ለንኪሃ ዮርዳኖስ ለገ ቶል ዮሃንስ ዎነ ጠመቀዮ እኬ መዕንተ ዋሎ፤ ህከኔን ኤጌሮ። 41 ሆለሙ መኑ እስበ ዋል «ዮሃንስ መ ማለሉታ አስምበአ። ጠሁ እኮዳ ዮሃንስ ከን መንችተኔ ጠሃቄ ጠሁ ሆሩንኩ ገርተ» ይቶእ። 42 ህከምባንን ሆለሙ መኑ ዬሱሳን አመዕኔእ።
1 መቱ በር «ቢታነ» ዬኖባን ሄአኖ «አልኣዛሬ» ዬኖ መንቹ ሞሼ እኬ። ቢታኑ ማራሚ ህዞሴ ማርታ ሄኣሃ ኦሎ። 2 ህት ማራም ዬሱስ ሎካን ሽቱተ ቡርት ሙሚንተሴ ሺንሽቶታ። ህኩ ሞሾ አልኣዛርን ህዞሃንሴ እኬ። 3 ህት ለምንት ህዛከት ዬሱስበ «ቀርቾ! ጃሉክ ሞሼእ» ይት ሶኮእ። 4 ዬሱሱንኩ ህካን መጮጬ ጃተ «ኩ ሞሱ ሹምቧ ሞሱ። ጠሁ እኮዳ መገን አብኑ ጡደሙንተ መገን ቤቱንኩ ከን ሞስ ዳፊን አቡንተ እኬሃ» ዬእ። 5 ዬሱሱንኩ ማርተ፥ ማራሜኒ ህዞሰ አልኣዛሬኒ ኢተኖ እኬ። 6 እኮዳ አልኣዛር ሞሾገ መጮጬ ጃተ ዮ መዕኔን ለሙ በር ኤጌሮ። 7 ህከኒች ዘኪን አወናኒሀንስ «ለንኪሃ ይሁድ ባዱ መኖ» ዬሰ። 8 አወናኑስ «ሮስሳንቾ! አይሁድ አወንሳኑ ቀሆ በሬች ብሬ ኬስ ክኒን ቀሲ ሀሰዮሄ እኬ። ቴሱ ህከበንከ ፈንቀልት መርተንንዶ?» ይቶስ። 9 ዬሱሱ ፈንቀሽ «ሶዝሜች አሪቹት ኣጋ ጄቹተ ኢለንቀጤች ቶነ ለሞ ሳተበእንዶ? በራን መረመኖ ተን ኡለ አል ጫኩ ዮተኔ ቆዕለኖበአ። 10 ጠሁ እኮዳ አንከሬን መረመኖ ጫኩ ዮስበእተኔ ቆዕለኖ» ዬእ። 11 ዬሱሱ ህካን ጠሃቄኢች ዘኪን «ጃሉኔ አልኣዛር ግሼእ። እኮዳ ግሰናች ኬእሶስተ መራም» ዬሰ። 12 አወናኑስ «ቀርቾ! ግሼደዕኑ ዎየኖስ» ይቶስ። 13 ዬሱሱ ህካን ጠሃቄኢ አልኣዛሬ ሬሆተኔሃት እኬ። ጠሁ እኮዳ ግሰነተኔ ጠሃቄኢ አጉጆሰ። 14 ህከንተኔ ዬሱሱ እሶኦ ጫክሽ «አልኣዛር ሬሄእ። 15 አዕኖኦት አመዕንቴኑንተ አን ህከኔ ሄኡ ሆጉእ ክዕኔኤተኔ በጅግሼኤ። እኮዳ ቴሱ ነኦት እስበ መኖ» ዬሰ። 16 ህተ ጄቹተ «ቀፈ» ዬን ገኤኖ ቶማስ አወናኒ «ነኦቲ እሲንን ሬኖተ መኖ» ዬሰ። 17 ዬሱሱ ህከበ ኢለኖደን አልኣዛር ሞገሞች ሾሉ በር እኬስ እኬ። 18 ቢታኑ ዬሩሳሌም ከተሚች ሳት በከን መረንሰኗ ቀጠ እኬ። 19 ማርታ ማራሚ ህዞሰ ሬሄተኔ ክቼኡምቦገ ሆለሙ አይሁድ-መኑ በካርቶተ እሶኦበ ዋልቴ እኬ። 20 ማርተ ዬሱሱ ዋሎገ መጮቶ ጃተ ኣቅቶስተ መርቶእ። እኮዳ ማራም ምኔ ፈኤ እኬ። 21 ማርተ ዬሱሰ «ቀርቾ! አት ከኔ ዮንት እክየን ህዞኤ ሬሀኖበአ እኬ። 22 ጠሁ እኮዳ ቴሱ አት ጠዕምቶንት ጠሀ ሆረንከ መገኑ ኣሰኖሄገ ደጋም» ይቶእ። 23 ዬሱሱንኩ «ህዞክ ሬሆች ኬአኖ» ዬሴ። 24 ማርተን «ዘካንቾ በሬን ሬሆች ኬኤኖ ጃተ ኬአኖገ ደጋም» ይቶስ። 25 ዬሱሱንኩ «ሬሆች ኬኡሁ ሄቸቲ አኔት። ኤሳን አመዕነኖ ሬሄዳ ፎሊን ሄአኖ። 26 ኤሳን ሄአኖሁ አመዕነኖኤሁ ሆሩንኩ ሆረን ሬሀኖበአ። ህካን አመዕንተንንዶ?» ዬሴ። 27 ማርተን «፥ ቀርቾ! አት ኡለ አል ዋለኖ የመሞ ክርስቶሰ መገን ቤቱ እሁክ አመዕናም» ይቶስ። 28 ማርተን ህካን ጠሃቶሀኒች ዘኪን «ማራሜ» የመንታ ህዞሴበ መርት «ሮስሳንቹ ዋሌእ፤ እስን ኬስ ገአዮእ» ይት ማጥ ኩልቶሴ። 29 እሴን ህካን መጮቶ ጃተ ደዕልት ጦቅት እስበ መርቶእ። 30 ዬሱሱ ህከ ኦሎ ኣጉዕነን ማርታን ደቀሞ መዕኔንን ዮ እኬ። 31 ማራሜ ምኔን እሴንን በርገንት በካርተዮ እኬ አይሁድ-መኑ ማራም ደዕልት ጦቅት ፉልተንየን ጡዶ ጃተ አልኣዛሬ ሞግበ መርት ኦኣኢ አጉጅየንሰ እሴተ አወንቶእ። 32 ማራምን ዬሱሱ ዮበ ኢልት ዬሱሰ ጡዶ ጃተ ሎካንተስ ኡብ «ቀርቾ! አት ከኔ ዮንት እክየን ህዞእ ሬሀኖበ እኬ» ይቶስ። 33 እሴ እሴን በርገንት ዋልቶ አይሁድ-መኑሁ ኦአንየን ዬሱሱ ጡጅ አብሽ ክቼእየን ጎደቡስ ሌንቄቄእ። 34 እስን «ሀከኔኔት ሞጌንተሲ?» ዬእ። እሶኦንት «ቀርቾ! ዋልት ጡድ» ይቶስ። 35 ዬሱሱንኩ እንጂጅተ ፉሽ ኦኦ። 36 ህከኒ አይሁድ-መኑ «ሀበንከ ኢተኖስንዶ ጡጄለ» የቀንቶእ። 37 ጠሁ እኮዳ እሶኦች መ-መቱ «ኩን ቆቀ መን እልተ ፈኖ ከ መንቹ ሬሁምቦገ አሶተ ደንደኖበአ እኬንዶ?» ይቶእ። 38 ዬሱሱ ዎዘናንተስ ለንኪሃ አብሽ ክቼአን ሞግበ መሮ። ሬሸስ አፉሼመቡንኩ ክኒን እፍሰሜሃ ቦንቆቁ እኬ። 39 አሞ ዬሱሱ «ክኑስ ኬእሽዬ» ዬእ። ሬሄ መንች ህዞት ማርተ «ቀርቾ! ሬሄኢች ሾሉ በር እኮተኔ ተደ ቦበኖ» ይቶስ። 40 ዬሱሱንኩ « ‹አመዕንቶንትደ መገን አብን ጡዳንት› ይምበኬንዶ?» ዬሴ። 41 መኑ ህከ ክኑ ኬእሾ። ህከኒች ዘኪን ዬሱሱ ሰማ ለቅ ጡደን «ኢ አና! መጮቶንቴኤተኔ ገለጣንኬ። 42 ሆረንተ ጄቹተ መጮታንቴኤገ ደጋም። ጠሁ እኮዳ ካን ዬሚ ከኔ ኡርቶ መኑ አት ኤስ ሶኮንትገ አመዕንቱንተ ይኔት» ዬእ። 43 ዬሱሱ ህካን ጠሃቄኢች ዘኪን «አልኣዛሬ! ዋል! ፉል!» ይ ላገስ ጦቀእ ሹሮ። 44 ሬሄ እኬ መንቹንኩ ከፈኒን ጣጠሞገን ሞግ ኣዚች ፉሎ። ዬሱሱ «ሂርቴን አጉርዬ፤ መረሙን» ዬሰ። 45 ማራሜባን በካሪ ዋልቶ አይሁድ-መኒች ሆለሙሰ ዬሱሱ አሴረ ጡድ እሶን አመዕንቶእ። 46 ጠሁ እኮዳ እሶኦች መ-መቱሰ ፋሪሰበ መርት ዬሱሱ አሴረ ኩልቶእ። 47 ህከኒ ቄስ አወንሳኑሁ ፋሪሰቲ ያእ ኑባቡ ገእት ጠጰት «ኩ መንቹ ሆለመተ ማለልሲሳ መላተ አሰዮተኔ መ አስኖምደ ጡማን? 48 ህትንተ አጉን አጉኖምደ መኑ ሆሩንኩ እሶን አመዕነኖ። ሮሜ + ባድ መኑንኩ ዋልት መገንኔ ምንሃ ምናደበኔ ሆረንካ በእሳእ» ይቶእ። 49 ጠሁ እኮዳ እሶኦች መቱ ህከ ዶለ አበ ቄስቹ እኮ «ቀያፈ» ዬኖ «አዕኖኦት ሜጡራ ደጌነንተበአ። 50 ምናደቡ ሆሩንኩ በአኖሀኒች መቱ መንቹ ምናደብተኔ ሬሄደ ክዕኔኤ ዎየኖ እኮገ ቆርስቴነንተበእንዶ?» ዬእ። 51 እስን ህካን ጠሃቄኢ ገግስ ሰውቲቼበአ። እኮዳ ህተ ጄቹተ እስ አበ ቄስቹ እኮተኔ ዬሱሱ ምናደብተኔ ሬሁ ሀስሰኖስገ ህራገ ጠሃቄእ። 52 ጠሁ እኮዳ እስ ሬሀኖ አይሁድ ምናደቢ ጠሊ እሁዕናች ብንቶ መገን ኦሱተ ሜጦማን ጠጰኦታት እኬ። 53 ህከኒ እሶኦት ህከን በሬች አፍ ዬሱሰ ሽታገ ኤረንቶእ። 54 ህከኒች ዘኪን ዬሱሱ አይሁድ-መን ሜሬሮን ሀራርስ መረምምበአ። ጠሁ እኮዳ ህከምቢች ፉል ኡለ ኡዱመእ ሺናን ዮ «ኤፍሬመ» ዬኖ ከተመ ኦሮቄእ። ህከኔ አወናኒንተስን አፉዕሌእ። 55 አይሁድ ሻሽግ አያኑ ሆባሼ እኬ። ሆለሙሰ ሻሽግ አያኑ ኢለኖሀኒች ብርስት ገገሰ ሙጩርቶተ ዮቤቺች ሆሪችን ዬሩሳሌም ከተመ መርቶእ። 56 እሶኦንት መገን ምን ኣዜን ኡርት ዬሱሰ ሀሰን «እስ ከ አያነ አብሴኖበ ሆረን ዋለኖበእንዶ? መ ሰውቴነን?» የቀንተን እስ-እሶኦንት ጠሃተዮ እኬ። 57 አሞ ቄስ አወንሳኑሁ ፋሪሰቲ ዬሱሰ አፎተ እስ ዮበ ደገኖ መንቹ ሄኦደ እሶኦ ባዕያቱንተ መነ ሆረንከ አዘዜ እኬ።
1 ሻሽግ አያነ አብሲ ሌሁ በሩ ፈኤሀኔን ዬሱሱ ቢታነ መሮ። ህኩ ቢታኑ ዬሱሱ ሬሆች ኬእሾስ አልኣዛር ሄአኗበ እኬ። 2 እሶኦት ህከኔን እሲ ኦዝተ ቅጠንስትየን ማርተ ህንጨተዮ እኬ። አልኣዛርን ዬሱሲን በርገንት ማዳን አፉዕልቶሪች መቷንስ እኬ። 3 ህተ ጄቹተ ማራም ህረስ አብስ እትሰተ ሙጩሩተ «ናርዶሰ» ዬኖ ሀቂች መክቴ መቶ ብልቃጥ ሽቱተ ኤቦእ። ህካንን ዬሱስ ሎካን ቡርት ሙሚንተሴ ሺንሽቶእ። ህተን ሽቶ አንጀነንት ምን ኣዝ ዊንቶእ። 4 ጠሁ እኮዳ አወናኒችስ መቱ ዬሱሰ ህግሽ ኣሰኖ አስቆሮንቶ ይሁድ 5 «ተ ሽቱተ ሰሴ ጥቤ ብረ ህሬን ግዘስ ሚ ቡጢ ኣሴኖበይ?» ዬእ። 6 እስ ህካን ጠሃቄኢ ቡጢ ክቼእ እሁዕናች ሞገኣንቹ እኮተኔሃት እኬ። አሞ ግዝ ከረጢተ አፈኖ እኮተኔ ህከን ከረጢታን ዎረመኖ ግዚች ኣቁ ሮሼሃ እኬ። 7 ዬሱሱ «ሞገማም በሬ ቅጠንሲ ቆረበዮተኔ አጉርዬሴ። 8 ቡጡ ሆረንተ ጃተ ክዕኔኤን በርገንት ሄኣእ። ጠሁ እኮዳ አን ሆረንተ ጃተ ክዕኔኤን ሄኣምበአ» ዬእ። 9 ህተ ጃተ ሆለሙ አይሁድ-መኑ ዬሱሱ ቢታነ ዮገ ደግ ህከበ ዋልቶእ። እሶኦት ህከበ ዋልቶኢ ዬሱሰ ጠለ ጡዶተ እሁዕናች ዬሱሱ ሬሆች ኬእሾ አልኣዛሬኒ ጡዶታት እኬ። 10 ቄስ አወንሳኑንኩ አልኣዛሬ ሽቶተ ኤረንቶእ። 11 ዳፉንኩስ ሆለሙ አይሁድ-መኑ ሰውተሰ ዶርተን አልኣዛሬ ዳፊን ዬሱሳን አመዕንተዮተኔሃት እኬ። 12 ህከኒች ዘኪን ሻሽግ አያነ አብሲ ዋልቶ ሆለሙ መኑ ዬሱሱ ዬሩሳሌመ ዋለኖገ መጮቶእ። 13 ህከንተኔ እሶኦት ዬሱሰ ኣቅቶተ ዘምባት ቦንጠ አፍ ላገሰ ጦቀት «መገኒ አብኑ እሁን። ቀርቾ መገን ሱዕሚን ዋለኖ እስራኤል ዎሙ ማሰአሜሃ» ይቶእ። 14 - 15 መጣፋን «አት ጥዮን ከተንቾ! ዋጅቶት፤ ህኩዕኒን ዎሙክ ሀሩች ዎተራን ኮዕር ዋለኖ» የመም ጣፈሞገንከ ዬሱሱ ሀሩች ዎተረ ደግ ኮዕሬእ። 16 ህኩ ጠሁ ዎና አወናኒሀንስ ኣግምበአ እኬ። ጠሁ እኮዳ ዬሱሱ አብኒን ሰማ ፉሎሀኒች ዘኪን ኩ ጠሁ እስተኔ ጣፈሞጋ ጠሀስን እሲ አሴመጋ ቃጎእ። 17 ዬሱሱ አልኣዛሬ ሞጊች ገእ ሬሆች ኬእሰንየን ዬሱሲን በርገንት ዮ መኑ ሆሩንኩ እሲ ነቀሶእ። 18 ህኩ በትናሹ መኑ ዬሱሰ ኣቆተ ፉሎ እስ ህተ ማለልሲሳ መላተ አሴገ መጮጬተኔሃት እኬ። 19 ህተ ጃተ ፋሪሰት «ከረጌ፤ ምናደቡ ሆሩንኩ እሱ አወነዮእ። ነኦንት ሜጡራ አሲ ደንድናምበአ» የቀንቶእ። 20 ህከን ሻሽግ አያን ጄቾን ሰገዶተ ዬሩሳሌመ ዋሎ መን ሜሬሮን መ-መቱ ግሪክ መኑ ዮ እኬ። 21 እሶኦንት ገሊል ባዶን ዮ «ቤተሰይደ» ዬኖ ከተሚች ዋሎ ፍልጶሴበ መርት «ቀርቾ! ነኦት ዬሱሰ ጡንዶተ ሀንሳም» ይቶእ። 22 ፍልጶስን መር እንድራሴ ኩሎ። እንድራሲ ፍልጶሲ መርት ዬሱሲ ኩልቶእ። 23 ዬሱሱ ፈንቀሽ «መንች ቤቱ አበኖ ጄቹት ኢልቴእ። 24 ገርተ ያንክዕኔ፤ አለስ መትት እልት ኡለ ኡብ ሸንቱምቦች ሜጥን ፈኣእ። እኮዳ ሸንቶደ ሆለመተ ላሉተ ላልታእ። 25 ፎልስ ኢተኖ ፎልስ በእሰኖ። ጠሁ እኮዳ ተን ኡለ አሌን ፎልስ ግበኖ ዶሊ ሆሪንከ ጎፉምቦ ሄቻ ቆረጰኖ። 26 ኤሳ ሁጀቲ ሀሰኖ ዮደ አወኑዕኔ። አን ዮምባን ሶቀማንቹኤ ህከኔ ሄአኖ። ኤሳ ሶቀመኖንከ አኑኤ አብሰኖስ» ዬእ። 27 አሞ ዬሱሱ «ፎሉኤ ሀዌእ፤ ቴሱ መ ዩለ? ‹ኢ አነ! ተን ጄቾች በራሬኤ› ዩንዶ? እኮዳ ህትጉተ ዩምቦገ አን ዋሎሚ ተን ሀው ጄቾሃት። 28 ኢ አና! ሱዕመክ አብስ» ዬእ። ሰሜችን «ሱዕመኤ አብሼም። አሞ ቴሱ አብሳም» ይታ ላገት ዋልቶእ። 29 ህከኔ ኡሬ መኑ ህካን መጮጬ ጃተ «ኩን ጉገነተ» ዬእ። ዎሉስ መኑ «መገን ሰሜ ሶቀማንቹ ጠሃቀዮስ» ይቶእ። 30 ዬሱሱ ፈንቀሽ «ት ላገት ክዕኔኤተኔ ዋልቴ በጋን ኢተኔሃበአ። 31 ተን ኡለ አሌን ፍርዱ እሀኖ ቴሶት። አሞ ተን ኡለ አል ገሻንቹ ሀደ ፉል ኡበኖ ጃት ተኔት። 32 አንን ኡለ አሊች ጦቅ ጦቅ ዬም ጃተ ሆረንከ መነ ኢ ዉዱ ለቃም» ዬእ። 33 ዬሱሱ ህትጉተ ዩስ ሀትጉተ እክ ሬሀኖንዶ ጡድሶታት እኬ። 34 አሞ ምናደቡ ፈንቀሽት «መገን ላጋች መጮኖሚ ‹ዶዕረሞ ክርስቶሱ ዶሊ ሆሪንከ ሄአኖ› ያኗ እኬ። አት ሀትተ ‹መንች ቤቱ ኡላች ጦቅ ጦቅ ዩ ሀስሰኖስ› ይተዮንት? ኩ መንች ቤቱስ አዬለ?» ይቶስ። 35 ዬሱሱንኩ «ቀሆ ጄቾ ጫኩ ክዕኔኤን በርገም ሄአኖ። ቱንሱት አፉምቦዕኔገ ጫኩ ዮዕኔ ቀጣን መረሜ። ቱንሶን መረመኖ ሀኑተ መረዮንዶ ደገኖበአ። 36 ጫክ ኦሱተ እኬኖተ ጫኩ ዮ ቀጣን ጫካን አመዕንዬ» ዬሰ። ዬሱሱ ህካን ዬኢች ዘኪን እሶኦች አነነ እክ ማጠሞ። 37 ዬሱሱ መሃ ማለልሲሳ መላተ ብሬንተሰ አሴዳ አይሁድ-መኑ እሶን አመዕንትምበአ። 38 ህኩስን ህራጋንቹ እስያስ «ቀርቾ! ኩኖምስረ አይ አመዕኔኔ? አሞ መገንስ መቆ አዬ ለሌእ?» ይ ጠሃቄ ላገት ዊንቱንታት እኬ። 39 ህከኒ አመዕኒ ደንድትምበአ። ዳፉንኩስ ህራጋንቹ እስያስ ለንኪሃ 40 «እሌንተሰ ጡዱምቦገ፥ ዎዘናንተሰን ቆርስቱምቦጋ ኢበ ፈንቀልትየን አን ፈይሱምቦጋ እልሰ ቆቅሼእ። አሞ ዎዘነሰን ዱድሼእ» ዬሀኒሃት። 41 እስያስ ካን ዬ ዳፉ ዬሱስ አብን ጡጆተኔሃቲ ዬሱስተኔ ጠሃቄሀኒሃቲ። 42 እኮዳ አይሁድ አወንሳኒች በትናሹ ዬሱሳን አመዕንቴ እኬ። ጠሁ እኮዳ ጠጵትሰ ምኒች ፉሽቱምቦሰጊ ፋሪሰተ ዋጅቶተኔ አመዕኑሰ ለሊስምበአ እኬ። 43 ዳፉንኩስ እሶኦት መገኑ አብሰኖ አብኒች መኑ አብሰኖ አብን ኢትቶተኔሃት እኬ። 44 አሞ ዬሱሱ ላገስ ጦቀስ «ኤሳን አመዕነኖ ኤሳን ጠላን እሁዕነ ኤስ ሶኮሀኔኒ አመዕኔሃ። 45 ኤስ ጡደኖ ኤስ ሶኮሃ ጡደኖ። 46 ኤሳን አመዕነኖ ሆሩንኩ ቱንሶን ሄኡምቦገ አን ጫክገ እክ ተ ኡለ አል ዋሌም። 47 ላገኤ መጮጭ ቆረቡምቡሀን አሌን አን ፍርዳምበአ። ዳፉንኩስ አን ዋሎሚ ተን ኡለ አል መነ ፈእሶታት በጋን ፍርዶታበአ። 48 ኤስ ግበኖሃ ላገእን ኣቁምቡሃ ፍርደኖ ዮእ። አን ጠሃቄም ላገት ገጉንኩሴ ዘካንቾ በሬን ፍርድታስ። 49 ዳፉንኩስ አን ገግኤ መቄን ጠሃቅምበአ። አን ያሚሃ ጠሃቃሚሃ አዘጆኤ ኤስ ሶኳ አና መገኑ። 50 እስ አዘዙንት ዶሊ ሆሪንከ ሄኣ ሄቸተ እኮገ ደጋም። ህከኒ አን ጠሃቃሚ አኑኤ ኩሎኤየ» ዬእ።
1 ዬሱሱንኩ ሻሽግ አያኑ ኢሌሀኔን ተን ኡለ አሊች አና መገንበ ኦሮቀኖ ጄቹት ኢልቶገ ደጎ። እስን ተን ኡለ አሌን ዮ ገግስ መነ ሆረንተ ጄቹተ ኢቴሰረ ዘካንቹ ኢለንቀጤንከ ኢቴሰ። 2 ዬሱሱሁ አወናኑሲ ኦዝተ እተዮ እኬ። ስሞኔ ቤቶን አስቆሮንቶ ይሁዳን ዬሱሰ ህግሽ ኣሰኖ ሰውተ ሼጣንቹ ዎዘናንተስ ኣግሼ እኬ። 3 አኑ መገኑ ሆረረንከ አንጋንተስ ኣሴስገ፥ መገንቢች ዋሎጋ አሞ መገንበንከ ፈንቀል ኦሮቀኖጋ ዬሱሱ ደገኖ እኬ። 4 ህከኒ ማዲች ኬእ ኦድሸስ አፉሽ ፎጠ ኣቅ የመዞንተስ ጣጮ። 5 ህከኒች ዘኪን ኣዕሌኖ ኦዳን ዎኢች ዎር አወናንስ ሎከተ ኣንሸን የመዞንተስ ጣጮ ፎጢን ሞሹ አፎ። 6 ዬሱሱንኩ ስሞን ጴጥሮሴበ ኢሌ ጃተ ስሞን ጴጥሮስ «ቀርቾ! አት ኢ ሎከተ ኣንሽተንንዶ?» ዬእ። 7 ዬሱሱ ፈንቀሽ «አን ቴሱ አሳምረ አት ደጋንትበአ። ጠሁ እኮዳ ዘኮ ቆርስታንት» ዬስ። 8 ስሞን ጴጥሮስን «አት ኢ ሎከተ ሆረን ኣንሽታንትበአ» ዬእ። ዬሱሱንኩ ፈንቀሽ «አን ሎከክ ኣንሹምቦደ ኤሳን ሜጦመት ዮሄበአ» ዬስ። 9 ስሞን ጴጥሮስን ፈንቀሽ «ቀርቾ! ህትጉተ እኮች ሎከኤ ጠለ እሁዕናች አንገኤ ቦቁኤ በርግት ኣንሼኤ» ዬእ። 10 ዬሱሱንኩ «አልስ ኣዕሌኢ ሆሮመንትስ ሙጩሩ እኮተኔ ሎከስ ኣዕሊች ህግየን ዎሉሩ ሀስሰኖስበአ። አዕኖኦት ሙጩረተ። ጠሁ እኮዳ ሆሩዕኔ ሙጩረተበአ» ዬስ። 11 ዬሱሱ «አዕኖኦት ሆሩዕኔ ሙጩረተበአ» ዬኢ ህግሽ ኣሰኖሲ አዬትንዶ ደገኖተኔሃት እኬ። 12 ዬሱሱ ሎከሰ ኣንሽ ጦፎች ዘኪን ኦድሸስ ኦደቅ መዕኔንተስ አፉዕል «አን ክዕኔኤ ሁጀቾምረ ደጌንተንዶ? 13 አዕኖኦት ኤስ ‹ሮስሳንቾኒ ቀርቾኒ› ይቴነንተኤ። አን ህትጉንተ እኮምተኔ ህትተ ዩዕኔ ደናሟ። 14 አቼ አን ክዕኔኤ ቀርቹሃ ሮስሳንቹሃ እሀን ሎከዕኔ ኣንሼሚች አዕኖኦቲ መቱ መትዕኔ ሎከተ ኣንሸቀሙ ሀስሰኖክዕኔ። 15 አን ክዕኔኤ አሴምገ አዕኖኦንት አስቴኑንተ አጉዲሸተ ኣሴንክዕኔ። 16 ገርተ ያንክዕኔ፤ አግሹ ቀርቺችስ ህትጉንተ ሶቀማንቹ ሶኮስሀኒች አበኖበአ። 17 ከ ጠሀ ደጌንተዳ ሁጀቴንተዳ ማሰአንቴንታረ። 18 አን ካን ዬሚ ሆሪሃዕኔበአ። አን ዶዕሬም መነ አንን ደጋም። ጠሁ እኮዳ መጣፋን ‹እቸኤ እቾ ኤሳ ዲነ እኮ› የመሞ ዊሙንታት። 19 አን ቴሱ ኩ ጠሁ እሁዕናች ብርስ ኩለዮንክዕኔ። ኩ ጠሁ እኮ ጃተ አዕኖኦት ህኩን ኤስ እኮምገ ደጌኑንታት። 20 ገርተ ያንክዕኔ፤ አን ሶሃሚ ሀካኒ ኣቀኖ ኤስ ኣቀኖ። አሞ ኤስ ኣቀኖ ኤስ ሶኮሃ ኣቀኖ» ዬሰ። 21 ዬሱሱ ህካን ዬኢች ዘኪን ዎዘንስ ኣዜን ክቼእ «ገርተ ያንክዕኔ፤ ክዕኔኤች መቱ ኤስ ህግሽ ኣሰኖኤ» ይ ጠሃቄእ። 22 አወናኑንኩ እስ ከ ጠሀ አዬተኔ ጠሃቄእንዶ ደጉ ሆጎተኔ እስ-እሶኦንት ጡደቀንቶእ። 23 አወናኒች ዬሱሱ ኢተኖሲ ዬሱስ ሺነ ህንጭይ አፉዕሌ እኬ። 24 ህከኒ ስሞን ጴጥሮስ እሱ ቀቀሽ «አዬተኔ ጠሃቀዮንዶ ጠዕም» ዬስ። 25 ህከንተኔ እስን ዬሱስበ ህንጭይ «ቀርቾ! እስስ አዬትለ?» ዬእ። 26 ዬሱሱንኩ «ከ እንጄረ ዎጤን ቀሽ ቆጢሳምየ» ዬእ። ህከኒ እንጄረ ዎጤን ቀሽ ስሞኔ ቤቲ አስቆሮንቶ ይሁዲ ቆጢሾ። 27 ይሁድን ህካን ቆጤኢች ዘኪን ዎዘናንተስ ሼጣንቹ ኣጎ። ዬሱሱንኩ «አስታንትረ ደዕልት አስ» ዬስ። 28 ህከኔ ማዳን አፉዕሌ መኒች አዪ ህካን ሚ ዬስንዶ ደግምበአ። 29 ይሁድ ግዝ ከረጢተ አፈኖ እኮተኔ አወናኒች መ-መቱ ዬሱሱ ይሁደ «ሻሽግ አያነ አብሴኖ ጄቾ ሀስሰኖረ ህር» እንዶ «ቡጢ መቱረ ኣስ» ዬሲ አጉጄሰ እኬ። 30 ይሁድን ቆጤኢች ዘኪን ደዕልን ፉል ኦሮቄእ። ህት ጄቹንት አንከርየ እኬ። 31 ይሁድ ህከምቢች ፉል ኦሮቄ ጃተ ዬሱሱ «ቴሱ መንች ቤቱ አቤእ። መገኑንኩ እሲን አበኖ። 32 አሞ መገኑ እሲን አቤኢች መገኑ ገጊንተስ አብሰኖስ። አሞ ደዕልን አብሰኖስ። 33 ኢ ኦሶ! ክዕኔኤን በርገም ሆለመተ ጄቹተ ኤጌራምበአ። አዕኖኦንት ሀሴነንተኤ። አይሁድ-መኒ ‹አን መራምበ አዕኖኦት ዋሊ ደንድቴነንተበአ› ዬንሰገንከ ቴሱ ክዕኔኤሃ ህትጉንተ ያም። 34 አዕን-አዕኖኦት ኢተንቴኑንተ ሃሮተ አዘዙተ ኣሳንክዕኔ። አን ክዕኔኤተ ኢቴምገንከ አዕን-አዕኖኦቲ ኢተምዬ። 35 አዕን-አዕኖኦት ኢተንቴንተደ አወናኑኤ እኬንተገ መኑ ሆሩንኩ ህከኒን ደገኖ» ዬእ። 36 ስሞን ጴጥሮስ ዬሱሰ «ቀርቾ! ሀኑተ መርተን?» ዬእ። ዬሱሱንኩ «አን መራምበ ቴሱ አወንቶኤተ ደንድታንትበአ። እኮዳ ዘኮ አወንታንቴኤ» ይ ፈንቀሼስ። 37 ጴጥሮስን ፈንቀሽ «ቀርቾ! ሚ ቴሱ አወኖሄተ ደንዳምበይ? አን ሆረን ኪተኔ ፎልኤ ህግሽ ኣሳም» ዬእ። 38 ዬሱሱንኩ «አት ፎልክ ኢተኔ ህግስ ኣስተንንዶ? ገርተ ያንኬ፤ አንተቤቹ ዎደንቀጤች ሰስተ ኮደተ ካዳንቴኤ» ዬስ።
1 ዬሱሱ «ዎዘኑዕኔ ህልቁንከ፤ መገኖን አመዕንዬ። አሞ ኤሳኒ አመዕንዬ። 2 አንኤ ምኔን ሆለመት መዕንት ዮእ። ህካን እሁምቦ እክየን ‹መዕንተ ቅጠንሶዕኔተ መራም› ያምበአ እኬ። 3 አን መር መዕንተ ቅጠንሴንክዕኔ ጃተ ፈንቀል ዋል አን ዮምባን አዕኖኦቲ ሄኤኑንተ ኢበ ኦሮሳንክዕኔ። 4 አን መራም ዎቃ ደጌነንተ» ዬሰ። 5 ቶማስን ዬሱሰ «ቀርቾ! አት መርታንትበንከ ደንጉምቡ ሀትንክ ዎቃስ ደጊ ደንድናም?» ዬእ። 6 ዬሱሱ ፈንቀሽ «አን ዎቃሃ፥ ገርተኒ ሄቸተኒ። ኢ ዉዲን እሁምቦች አዪ አነ መገንበ መሪ ደንደኖበአ። 7 ኤስ ደጌንተ እክየን አነኤ ደጌነንተ እኬ። እኮዳ ከ ዘኩ ደጌነንተስ፤ አሞ ጡዴንተስኒ» ዬስ። 8 ፍልጶስን «ቀርቾ! አነ መገኑ ጡድስኔ። ህኩን እሀኖኔ» ዬስ። 9 ዬሱሱንኩ «ፍልጶሴ! አን ከንከ ዶለ ክዕኔኤን በርገም ሄአንየን ኤስ ደጋንቴኤበእንዶ? ኤስ ጡጆ አነ መገኑ ጡጄሃ። ህከደ አት ሀትተ ‹አነ መገኑ ጡድስኔ› ይተን? 10 አን አነ መገኖን ዮምገ አሞ አኑ መገኑንኩ ኤሳን ዮገ አመዕንታንትበእንዶ? አን ክዕኔኤ ጠሃቃም ላገት ገግኤ መቄኔበአ። ጠሁ እኮዳ ኤሳን ሄአኖ አኑ መገኑ ሁጅስ ሁጀተኖ። 11 አን አነ መገኖን ዮምገ አሞ አኑ መገኑ ኤሳን ዮገ አመዕንዬ። ህኩን ዮበእደ ሁጄኤተኔ አመዕንዬኤ። 12 ገርተ ያንክዕኔ፤ ኤሳን አመዕነኖ አን ሁጀታም ሁጅተ ሁጀተኖ። አሞ አን አነ መገንበ መራምተኔ ሆረን ከኒቺ አበ ሁጀተኖ። 13 አኑ መገኑ ቤቲንተስ አቡንተ ሱዕሚንተኤ ጠዕምቴነንተ ጠሀ ሆረንከ አሳም። 14 መ ጠሀሃ ሱዕሚንተኤ ጠዕምቴንተደ አን አሳም» ዬእ። 15 ዬሱሱ «ኢትቴንተኤደ አዘዙኤ ቆረቤነንተ። 16 አኑ መገኑ ዶሊ ሆሪንከ ክዕኔኤን በርገም ሄአኖ ዎሉ ቃርሳንቹ ኣሱንተክዕኔ አን እሱ ኡጫም። 17 እስን ተን ኡለ አል መኑ ጡዱምቦስተኔሃ ደጉምቦስተኔሃ ኣቆስተ ደንዱምቧ ገሬየ አያነ። እኮዳ እስ ክዕኔኤን በርገም ሄአኖተኔሃ ኣዜንተዕኔ እሀኖተኔሃ አዕኖኦት ደጌነንተስ። 18 ህዬሳከገ ሜጥን አጉራንክዕኔበአ፤ ክዕኔኤበ ፈንቀል ዋላም። 19 ጄቾች ዘኪን ተን ኡለ አል መኑ ሆረን ጡደኖኤበአ። እኮዳ አዕኖኦት ጡዴነንተኤ። አን ሄኣምተኔ አዕኖኦቲ ሄኤነንተ። 20 አን አኒንተኤ አዕኖኦንት ኤሳን አሞ አን ክዕኔኤን ዮምገ ህከ በር ደጌነንተ። 21 አዘዙኤ እስባን ዮኢሁ አዘዙኤን ቆረበኖሁ ኤስ ኢተኖ እሶት። ኤስ ኢተኖንከ አኑኤ ኢተኖስ። አሞ አንን ኢታንስኒ ገገኤ እሲ ለሊሳምኒ» ዬእ። 22 አስቆሮንቶ ይሁደ እሁዕነ ዎሉ ይሁድ ዬሱሰ «ቀርቾ! ገገክ ተን ኡለ አል መኒ እሁዕነ ኔሳ ለሊሳንቲ ሀትጉተን?» ዬእ። 23 ዬሱሱ ፈንቀሽ «ኤስ ኢተኖ ላገኤ ቆረበኖ። አኑኤን ኢተኖስ። ነኦንት እስበ ዋን እሲን በርገም ሄዕናም። 24 ኤስ ኢቱምቡ ላገኤ ቆረበኖበአ። ት መጮቴነንተ ላገንት ኤስ ሶኮ አንኤተ በጋን ኢታበአ። 25 አን ቴሱ ክዕኔኤን በርገም ሄአንን ከ ጠሀ ኩላንክዕኔ። 26 እኮዳ አኑኤ ኢ ሱዕሚን ሶሀኖ ቃርሳንቹ ጡማንቹ አያኑ ሆረንከረ ሮስሰኖዕኔ እሶት። አሞ አን ኩሎንክዕኔ ጠሀ ሆረንከ ቃጌነንተገ አሰኖክዕኔ። 27 ጡመኤ ክዕኔኤባን አጉራም፤ አን ጡመኤ ኣሳንክዕኔ። አን ኣሳንክዕኔ ጡሙ ተን ኡለ አል መኑ ኣሰኖ ጡምየገበአ። ዎዘኑዕኔን ክቼኡንከኒ ዋጁንከኒ። 28 አን ‹ኦሮቃም፤ ፈንቀልን ክዕኔኤበ ዋላም› ዬሚ መጮቴንተ። ኢትቴንተኤ እክየን አነ መገንበ መሪሃዕን በጅቀንቴነንተ እኬ። ዳፉንኩስ አኑ መገኑ ኤሳች አባ። 29 ኩን እኮ ጄቹተ አመዕንቴኑንተ ቴሱ ብርስን ጠሁስ እሁዕናች ኩሌንክዕኔ። 30 ከኒች ዘኪን ክዕኔኤን ሆለመ ጠሃቃምበአ። ዳፉንኩስ ተን ኡለ አል ገሻንቹ ዋለኖ። እኮዳ ኢ አሌን እሲ ሜጡ መቆሁ ዮስበአ። 31 ጠሁ እኮዳ አን አነ መገኑ ኢታምገ ተን ኡለ አሌን ዮ መኑ ደጉንተ ኢ አኑ አዘጆኤገ ሆረንከ አሳም። ኬእዬ ከምቢች ኦሮኖ» ዬሰ።
1 ዬሱሱ «ገሬ ዎይን ጡድች አመት አኔት፤ ካሳንቹንኩስ አናዕኔ። 2 ላሉተ ላሉምቡ ኢ አሌን ዮ ሀመ ሆረንከ አኑኤ ሙር ከመኖ። ህከ ላሉተ ላለኖሲ አብሽ ላሉንተ ጠር መክሰኖ። 3 አዕኖኦት አን ኩሎንክዕኔ ላገ ዳፊን ሙጩርቴንታረ። 4 አዕኖኦት ኤሳን ሄእዬ፤ አኒ ክዕኔኤን ሄኣም። ሀሙ ዎይን አመ አሌን ሄኡምቦደ ገጉስ ጠሉ ላሉተ ላሊ ደንዱምቡ እኮገን አዕኖኦቲ ኤሳን ሄኤኑምቦደ ላሉተ ላልቴኖተ ደንድቴነንተበአ። 5 አን ዎይን አመተ፤ አዕኖኦት ሀማከተ። አን እሶን እስን ኤሳን ዮኢ ሆለመተ ላሉተ ላለኖ እሶት። ዳፉንኩስ አን ዮምበኢ ሜጡራ አሲ ደንድቴነንተበአ። 6 ኤሳን ሄኡምቡ መንቹ ሀምገ ሀደተ ቶረም ሞለኖ። ህካንን ጠጰኤን ጊረ ዎሬን ቡሴኖ። 7 አዕኖኦት ኤሳን ሄኤንተደ ኢ ላገንት ክዕኔኤን ሄኦደ ሀሴንተ ጠሀ ሆረንከ ጠዕምዬ፤ ኣሰመኖክዕኔ። 8 አዕኖኦት ሆለመተ ላሉተ ላልቴንተደ አኑኤ አበኖ። ህትጎንን አዕኖኦት ኢ አወናኑ እኬንተገ ለሊሴነንተ። 9 አኑ መገኑ ኢቴኤገን አኒ ክዕኔኤተ ኢቴንክዕኔ፤ ኢተኤ ኣዜን ሄእዬ። 10 አን አንኤ አዘዙተ ቆረብ ኢተስ ኣዜን ሄኦምገን አዕኖኦቲ አዘዙኤ ቆረቤንተደ ኢተኤ ኣዜን ሄኤነንተ። 11 ካን ኩሎንክዕኔ በጅጉኤ ክዕኔኤን እኩንታቲ፥ ክዕኔኤ በጅጉንት ዊንቱንታቲ። 12 ኢ አዘዙት አን ኢቴንክዕኔገን አዕኖኦቲ መቱ መቱዕኔ ኢትቴኑንታት። 13 መንቹ ፎልስ ጃላካሃንስ ህግሽ ኣሲች አብታ ኢተት ዮበአ። 14 አዕኖኦት አን አዘዛንክዕኔረ አስቴንተደ ኢታ ጃላከ። 15 ቀርቹ አሰኖረ አግሹ ደጉምቦተኔ አን ከ ዘኩ ክዕኔኤተ ‹አግዘተዕኔ› ያምበአ። ጠሁ እኮዳ አኒችኤ መጮጬሚ ሆረንከ ለሊሾንክዕኔተኔ ‹ጃላከተዕን› ዬንክዕኔ። 16 አን ዶዕሬንክዕኔ በጋን አዕኖኦት ዶዕርቴንምበኤ። መርቴን ሆለመተ ላሉተ ላልቴኑንተ ላሉዕኔን ሄኣኢተ እኩንተ ዶዕሬንክዕኔ። ህከኒ አዕኖኦት ሱዕሚንተኤ ጠዕምቴነንተረ መሃ አኑኤ ኣሰኖዕኔ። 17 አን አዘዛንክዕኔ አዘዙት አዕን-አዕኖኦንት ኢተንቴኑንታት» ዬእ። 18 ዬሱሱ «ተን ኡለ አል መኑ ግቦዕኔደ ክዕኔኤች ብሬ ኤስ ግቦገ ደግዬ። 19 አዕኖኦት ተን ኡለ አል መኒች እኬንተ እክየን ተን ኡለ አል መኑ ገግስ መንገ አስ ኢተኖ እኬ። ጠሁ እኮዳ አዕኖኦት ተን ኡለ አል መኒች እኬኑምቦተኔሃ አን ተን ኡለ አል መኒች አነነ አስ ዶዕሬንክዕኔተኔሃ ተን ኡለ አል መኑ ግበኖክዕኔ። 20 አን ክዕኔኤ ‹አግሹ ቀርቺች አበኖበአ› ይ ኩሎንክዕኔ ላገተ ቃግዬ። ኤስ ሸርቶኢች ክዕኔኤታ ሸርታእ። ኢ ላገተ ቆረቤ እክየን ክዕኔኤ ላገታ ቆረባ እኬ። 21 እኮዳ ኤስ ሶኮ ደጉምቦተኔ ኢ ዳፊን ከ ሆረንከ አስታክዕኔ። 22 አን ዋል ኩሉምቦሰ እክየን ባጢለ እሀኖሰበአ እኬ። ጠሁ እኮዳ ቴሱ ባጢሊሀንሰ ገጃጅታሩ ዮበአ። 23 ኤስ ግበኖ አነኤ ግበኖ። 24 አዪ አሱምቡተ ሁጅተ አን እሶኦ ሜሬሮን አሱምቦ እኬራን ባጢለ እሀኖሰበአ እኬ። ጠሁ እኮዳ ቴሱ ከ ሆረረንከ ጡድ ኤሲ ኢ አነሃ ግቤእ። 25 ኩን እኮ እሶኦ ሴራን ‹ጠለንከ ግቦኤ› የመም ጣፈሞ ዊሙንታት። 26 ጠሁ እኮዳ አነ መገንቢች ዋለኖነ አንን አንኤቢች ሶሃንክዕኔ ቃርሳንቹ ገሬ አያኑ ዋሎደ እስ ኢተኔ ነቀሰኖ። 27 አሞ አዕኖኦቲ ዎናችን አፌን ኤሳን በርገንቴን ዮንተተኔ ነቀሴነንተ» ዬሰ።
1 ዬሱሱ «አን ካን ሆረንከ ኩሎንክዕኔ አመዕነቲችዕኔ ኡቤኖኮንተ ይኔት። 2 ጠጵት ምናች ፉሽት ሸርታክዕኔ። ገርንተ ክዕኔኤተ ሻኖ ሆሩንኩ መገኒ ሁጀተኖ አጉደኖስ ጄቹት ዋልታእ። 3 እሶኦት ህካን አስታኢ ኤሲ አነ መገኑሃ ደጉምቦተኔሃት። 4 ጠሁ እኮዳ አን ካን ክዕኔኤ ኩሎንክዕኔ ጄቹስ ኢልቶ ጃተ ከን ጠህተኔ መ ዬንክዕኔንዶ ቃጌኑንታት። ካን ከኒች ብሬ ኩሉዕነ አጉሮሚ አን ክዕኔኤን በርገም ዮምተኔሃት» ዬሰ። 5 ዬሱሱ «ጠሁ እኮዳ ቴሱ ሶኮኤሀንበ ኦሮቃም። እኮዳመት ክዕኔኤች አዪ ‹ሀኑተ መርተን?› ይ ጠዕምምበኤ። 6 እኮዳ አን ካን ኩሎንክዕኔተኔ ዎዘናንተዕኔ ክቼቹ ዊሜእ። 7 እሁን በጋን አን ገርተ ያንክዕኔ፤ ኢ ኦሮቁ ክዕኔኤ ካዕለኖክዕኔ። ዳፉንኩስ አን ኦሮቁምቦደ ቃርሳንቹ ክዕኔኤበ ዋለኖበአ። እኮዳ አን ኦሮቄምደ እሱ ክዕኔኤበ ሶሃም። 8 እስ ዋሎ ጃተ ባጢልተኔ፥ ሙጩርመተኔሃ ፍርድተኔሃ ተን ኡለ አሌን ዮ መኑ ደጋገ አሰኖ። 9 ባጢልተኔ ኩለኖሰሩ ኤሳን አመዕኑ ግቦተኔሃት። 10 ሙጩርመተኔ ኩለኖ አነ መገንበ ኦሮቃምተኔሃቲ ለንኪ ጡዴኑምቦኤተኔሃቲ። 11 አሞ ፍርድተኔ ኩለኖ ተን ኡለ አል ገሻንች አሌን ፍርደሞተኔሃት። 12 ቴሱ ኩላንክዕኔ ሆለሙ ጠሁ ዮኤ። እኮዳ ቴሱ እየቅቴን ደንድቴነንተበአ። 13 ገሬ አያኑ ዋሎ ጃተ ገሬበ ሆረንከ አወንሰኖክዕኔ። ዳፉንኩስ እስ ጠሃቀኖ መጮጬሃረ በጋን ገጊችስ ሜጡራ ጠሃቀኖበአ። እስን ከ ዘኩ ዋለኖ ጠሀ ኩለኖክዕኔ። 14 እስ ኤሳች ኣቅ ኩለኖዕኔተኔ ኤስ አብሰኖ። 15 ኢ አንቢ እኮ ሆሩንኩ ኢሃ። ‹ኤሳች ኣቅ ኩለኖክዕኔ› ዬሚ ከኒሃት። 16 ቀሆ ጄቾ ጡዴነንተኤበአ። አሞ ቀሆ ጄቾች ዘኪን ጡዴነንተኤ» ዬሰ። 17 አወናኒችስ መ-መቱ «ኩ ‹ቀሆ ጄቾ ጡዴነንተኤበአ› አሞ ‹ቀሆ ጄቾች ዘኪን ጡዴነንተኤ፤ አነ መገንበንከ ኦሮቃም› ያኖኔሩ መ ዩሃንስ?» የቀንቶእ። 18 አሞ «ኩ ‹ቀሆ ጄቾች ዘኪን› ያኖ ጠሁ መሃን? መ ዩሃንስንዶ ደንግምበአ» ይቶእ። 19 ዬሱሱ እሶኦት ጠዕምቶስተ ሀሶገ ደግ «አዕን-አዕኖኦንት ‹ቀሆ ጄቾ ጡዴነንተኤበአ› አሞ ‹ቀሆ ጄቾች ዘኪን ጡዴነንተኤ› ዬምሀኒሃትንዶ ጠዕመቀንቴነዮንታ? 20 አን ገርተ ያንክዕኔ፤ አዕኖኦት ኦኤነንተኒ አዌሴነንተኒ። ጠሁ እኮዳ ተን ኡለ አል መኑ በጅቀንታእ። አዕኖኦት ክቼኤነንተ። እኮዳ ክዕኔኤ ክቼቹ በጅጎን ዶረመኖ። 21 ሜንትቹት እልታ ጄቹት ኢልቶ ጃተ ባልተን ክቼኣእ። እልት ኬኦኢች ዘኪን ተን ኡለ አሌን ጪሉ እለሞ በጅጎን ዎነ ሀወ ሀባእ። 22 ህትጉንተ አዕኖኦት ቴሱ ክቼኤንተ። ጠሁ እኮዳ አን ለንኪ ጡዳንክዕኔ፤ ክዕኔኤ ዎዘኑንኩ በጅቀመኖ፤ በጅጉዕኔን ክዕኔኤች ከመኖ ዮበአ። 23 ህከ በር አዕኖኦት ኤሳች ሜጡራ ኡጭቴነንተበአ። ገርተ ያንክዕኔ፤ አነ መገኑ ሱዕሚንተኤ ኡጭቴንተደ ሆረረንከ ኣሰኖክዕኔ። 24 ከበሬ ኢለንቀጤች ሱዕሚንተኤ ሜጡራ ኡጭቴንምበአ። በጅጉዕኔን ዊመተ እኩንተ ኡጭዬ፤ ደቅቴነንተ። 25 ተደ ኢለንቀጤች አጉዲሻን ኩለዮንክዕኔ። ከ ዘኩ አጉዲሻን ኩሉምቡት ጄቹት ዋልታእ። ጠሁ እኮዳ አነ መገንተኔ ሆረረንከ ጫክሽ ኩላንክዕኔ። 26 ህከ በር አዕኖኦት አነ መገኑ ሱዕሚንተኤ ኡጭቴነንተ በጋን አን ‹ክዕኔኤ ቆደ ኡጫም› ያምበአ። 27 ዳፉንኩስ አኑ መገኑ ገጉንኩስ ኢተኖክዕኔተኔሃት። አኑ መገኑንኩ ኢተኖዕኔ ኤስ ኢትቴንተኤተኔሃቲ አን መገንቢች ዋሎምገ አመዕንቴንተተኔሃቲ። 28 አን አነ መገንቢች ተ ኡለ አል ዋሌም። አሞ ተ ኡለተ አጉር መገንበ ኦሮቃም» ዬሰ። 29 አወናኑስ «ቴሱ አጉዲሻን እሁዕነ ጫክስ ጠሃተዮንት። 30 አት ሆረንከ ደጋንትጋ አዪ ጠዕሙ ሀስሱምቦሄጋ ቴመ ደንጎም። ህከኒ አት መገንቢች ዋልቶንትገ አመዕንናም» ይቶስ። 31 ዬሱሱ ፈንቀሽ «ቴሱ አመዕንቴንተንዶ? 32 ህኩዕኒን፥ አኑንኩ አኑንኩ ኤስ ሜጥን አጉርቴን ምንዕኔ ምንዕኔ ብንቴን ኦሮቅቴነንተ ጃት ዋልተዮእ። ጄቹንትስ ቴሱ ኢልቴእ። ጠሁ እኮዳ አኑ መገኑ ኤሳን ዮተኔ አን ሜጥዕኔበአ። 33 ካን ክዕኔኤ ኩለዮሚ ኤሳን ሄኤነንየን ጡሙ እሁንተዕኔ ይኔት። ተን ኡለ አሌን ሄኤነንየን ሀዉ ዮዕኔ። ጠሁ እኮዳ ዋጅቴኖችዬ፤ አን ተን ኡለ አል ጠሀ ሆረንከ ቄሌም» ዬሰ።
1 ዬሱሱ ህካን ጠሃቅኬእ ሰማ ለቅ ጡደን «ኢ አና! ጄቹት ኢልቴእ። ቤቱክ አብሱንተሄ አት እሱ አብስ። 2 ዳፉንኩስ አት ኣስቶንትስ መኒ ሆሪንከ ዶሊ ሆሪንከ ሄኣ ሄቸተ ኣሱንተ ሆራንከ መን አሌን መቆ ኣስቶንትስተኔሃት። 3 አት ጠሉ ገሬየ መገኑ። ዶሊ ሆሪንከ ሄኣ ሄቸንት ኬሲ አት ሶኮንት ዬሱስ ክርስቶሰሃ ደ። 4 አን ሁጀቱንተ ኣስቶንቴኤ ሁጅተ ጦፍ ሁጀቲን ኡለ አሌን አብሼንኬ። 5 አነ መገኖ! ቆጨንቺች ብሬ ኪባን ዮኤ አብኒን ቴሱ ብሬንተክ አብሴኤ። 6 ተን ኡለ አሊች ዶዕርት ኣስቶንቴኤ መኒ ሱዕመክ ለሊሼም። እሶኦንት ኪሃረ እኬ። አት እሶኦተ ኤሳ ኣስቶንት። እሶኦንት ላገክ ቆረቤእ። 7 አት ኤሳ ኣቶንቴኤሩ ሆሩሩንኩ ኬሳች እኮገ እሶኦት ቴሱ ደጌእ። 8 አት ኣስቶንቴኤ ላገተ ኣሴንሰ፤ እሶኦንት ኣቅቴእ። አን ኪቢች ዋሉኤን ገርንተ ደጌእ። አት ኤስ ሶኮንትገን አመዕንቴእ። 9 አን ኡጫሚ እሶኦተኔሃት። ኩ ኣስቶንቴኤ መኑ ኪረ እኮተኔ እሶኦ ኡጫም። ጠሁ እኮዳ ተን ኡለ አል መኒ ኡጫምበአ። 10 ኢረ እኮ መኑ ሆሩንኩ ኪሃረ። አሞ ኪረ እኮ መኑ ሆሩንኩ ኢሃረ፤ አንን እሶኦን አቤም። 11 አን ከኒች ዘኪን ተን ኡለ አሌን ሄኣምበአ። እኮዳ እሶኦት ዮኢ ተን ኡለ አሌኔት። አን ኪበ ዋሎታት። ጡማንቾ ኢ አና! ኒገንከ ሜጡ እኩንተ ኣስቶንቴኤረ ሱዕሚንተክ ቆረብሰ። 12 አን እሶኦን በርገም ዮም ጃተ አት ኣስቶንቴኤ ሱዕሚንተክ ቆረቤም፤ ጡሚን ቆረቤንሰ። ህከኒ ጣፈንቶ ህራግ ላገት ዊንቱንተ ከን በእ መንቺች ህግየን እሶኦች አዪ በእምበአ። 13 እኮዳ አን ቴሱ ኪበ ዋሎታት። አን ተን ኡለ አሌን ሄአን ካን ጠሃቄሚ በጅጉኤ ዎዘናንተሰ ዊንቱንታት። 14 አን ላገክ ኣሴንሰ። አን ተን ኡለ አሊች እሁምቦሀንገን እሶኦቲ ተን ኡለ አሊች እኩምቦተኔ ተን ኡለ አል መኑ ግቤሰ። 15 ሂላሪች ቆረቡንተሰ በጋን ተን ኡለ አሊች ዎሉበ ኦሮሱንተሰ ኡጫንኬበአ። 16 አን ተን ኡለ አሊች እሁምቦሀንገን እሶኦቲ ተን ኡለ አሊቼበአ። 17 ገሬን ሙጩርስሰ፤ ላገክን ገርተ። 18 አት ኤስ ተ ኡለ አል ሶኮንቴኤገንከ አኒ እሶኦተ ተ ኡለ አል ሶኬንሰ። 19 እሶኦት ገሬን ሙጩረተ እኩንተ አን ገገኤ እሶኦተኔ ሙጩርሳም። 20 አን ከሮኦ ጠሊ እሁዕናች እሶኦ ላገተ መጮት ኤሳን አመዕንታሪሃ ኡጫም። 21 ኡጫሚንኩ ሆሩንኩሰ ሜጡ እኩንታት። ህትጉንተ አነ መገኖ! አት ኤሳን አንን ኬሳን ዮምገንከ እሶኦቲ ኔሳን ሄኡንታት። ህከኒንን አት ሶኮንቴኤገ ተን ኡለ አል መኑ አመዕነኖ። 22 ነኦት ሜጡ እንኮምገን እሶኦቲ ሜጡ እኩንተ ኤሳ ኣስቶንት አብን ኣሴንሰ። 23 አን እሶኦን አት ኤሳን ዮንትገንከ እሶኦት ጦፍ ሜጡ እክየን ኡለ አል መኑ አት ኤስ ሶኮንትጋ ኢትቶንቴኤ ቀጠንከ እሶኦታ ኢትቶንትጋ ደጋእ። 24 አነ መገኖ! ቆጨንቺች ብሬ ኢትቶንቴኤተኔ ኣስቶንቴኤ አብን ጡዲ ኩ አት ኣስቶንቴኤሩ አን ዮምባን ኤሳን በርገንት ሄኡንተ ኢታም። 25 ጡማንቾ አነ መገኖ! ተን ኡለ መኑ ደግምበሄ። ጠሁ እኮዳ አን ደጋንኬ። ኩሩንኩ አት ሶኮንቴኤገ ደጌእ። 26 አት ኤስ ኢትቶንት ኢተት እሶኦን ሄኡንታ አንን እሶኦን እሁንታ እሶኦት ሱዕመክ ደጋገ አሴም። ከ ዘኩሃ ደጋገ አሳም» ይ መገኑ ኡጬእ።
1 ዬሱሱ ካን ዬኢች ዘኪን አወናኒንተስን በርገም «ቄድሮነ» ዬኖ ለግ ዉደአ ኦሮቄእ። ህከኔን ካሴመ ሀቅ ኣዝ አወናኒንተስን በርገም ኣጎ። 2 ዬሱሱሁ አወናኑሲ ህተን መዕኔን ሆለመተ ጃተ ጣጭታተኔ ህግሽ ኣሰኖስ ይሁድ ህተ መዕንተ ደገኖ እኬ። 3 ህከኒ ይሁድ በትናሸ ቤጠባሃ ቄስ አወንሳኒቺ ፋሪሳቺ ሶሀንቶ ዘበነሃ አወንስ ህተ መዕንተ ዋሎ። እሶኦንት መርባተ፥ ፋኖሰሃ ኦል ኦዳታ አፍ ዋልቶእ። 4 ዬሱሱንኩ ኢለኖስ ጠሀ ሆረንከ ደግ እሶኦበ ፉል «አዬ ሀሴነዮንተ?» ዬሰ። 5 እሶኦንት «ናዝሬት ዬሱሰ ሀንሰዮም» ይት ፈንቀሽቶስ። እስን «አኔት» ዬሰ። ዬሱሰ ህግሽ ኣሴ ይሁዲ እሶኦን በርገም ኡሬ እኬ። 6 ዬሱሱ «አኔት» ዬሰ ጃተ ኤተርሴነ ገገብ ኡለ ኡቦእ። 7 ለንኪሃ ዬሱሱ «አዬ ሀሴነዮንተ?» ዬሰ። እሶኦንት «ናዝሬት ዬሱሰ ሀንሰዮም» ይቶስ። 8 እስን ፈንቀሽ « ‹አኔት› ይ ኩሌንክዕኔ። ሀሴነንተሲ ኤስ እኮሚች ኩሩ ኦሮቱን» ዬሰ። 9 ህኩንን እኮ ዬሱሱ «አት ኣስቶንቴኤሪች ሜጡሃ በእስምበአ» ዬ ላገት ዊንቱንታት። 10 ስሞን ጴጥሮስን ብሰ አፌ እኬ። እስን ብሰስ ፉሽ አበ ቄስች ሶቀማንች መኬ መጨተ ሙር ከሞ። ህከን ሶቀማንች ሱዕሙንኩ «ማልኮሴ» ዬኗ እኬ። 11 ዬሱሱ ጴጥሮሴ «ብሰክ ኮባንተስ ዎር። አኑ መገኑ ኣሴኤ ሀወ ኣቁ ሀስሰኖኤበእንዶ?» ዬስ። 12 ህከኒች ዘኪን ቤጠቦ፥ ቤጠቤ አዘዛኑሁ አይሁድ-መን ዘበኑሁ ዬሱሰ አፍ ኡሱርቶእ። 13 እሶኦንት ብርስት ሃነበ መስቶስ። ሃነ ህከ ዶለ አበ ቄስቹ እክ ዮ ቀያፌየ በሉ እኬ። 14 ቀያፍን «መቱ መንቹ ምናደብተኔ ሬሄደ በሬዳ» ይ አይሁድ-መነ ሰጄሃ መንቹ እኬ። 15 ስሞን ጴጥሮሲ መቱ ዎሉ አወናንቹሁ ዬሱሰ አወንቶእ። ህኩ ዎሉ አወናንቹ አቡ ቄስቹ ደገኖስየ እኬ። ህከኒ እስ ዬሱሲንን በርገም አበ ቄስች ግቤ ኣዝ ኣጎ። 16 ጠሁ እኮዳ ጴጥሮስ ጎችባን ኤተር ዉዲን ኡሬ እኬ። ህኩ አቡ ቄስቹ ደገኖስ አወናንቹ ፈንቀል ፉል ጎቹ ቆረበዮ ሜሴሌን ኩል ጴጥሮሴ ኣዝ ኣግሾ። 17 ህት ጎቹ ቆረባ ሜሴሌት ጴጥሮሴ «አት ከን መንች አወናኒች መቷንስበእንዶ?» ይቶስ። እኮዳ እስ «አን አወናንቿንስበአ» ዬእ። 18 ጄቹስ ግደዮኢ እኮተኔ ሶቀማኑሁ ዘበኑሁ ግጥሎ ጊረተ ቡስት ኡርት ኢብጭተዮ እኬ። ጴጥሮስን እሶኦንን በርገም ኡር ኢብጨዮ እኬ። 19 አቡ ቄስቹንኩ ዬሱሰ አወናንስተኔሃ ሮስሰኖ ጠህተኔሃ ጠዕሜስ። 20 ዬሱሱ «አን ሆራንከ መን ብሬን ጠሃቄም። አይሁድ-መኑ ሆሩንኩ ጠጵታባን ጠጵትሰ ምኔኒ መገን ኬሰሞ ምኔኒ ሮስሼም። አን ማጭ ጠሃቄምሩ ሜጡሩ ዮበአ። 21 ኤስ ሚ ጠዕምተን? አን ጠሃቀንየንሰ መጮቶረ ጠዕም። አን ጠሃቄምረ እሶኦት ደጋእ» ይ ፈንቀሼስ። 22 ዬሱሱ ህካን ጠሃቄ ጄቹተ ህከኔ ኡርቶ ዘበኒች መቱ «አበ ቄስቺ ፈንቀሽታንትጉ ህትጉተንዶ?» ይ ዬሱሰ ቀምቦን ዎቀሮ። 23 ዬሱሱ ፈንቀሽ «ሂለተ ላገተ ጠሃቄምደ ሂለተ ላገተ ጠሃቄምገ ነቀስ። እኮዳ በሬደ ጠሃቄምደ ሚ ዎቀርተዕኔ?» ዬእ። 24 ህከኒች ዘኪን ሃነ ዬሱሰ ኡሱረሞገን አበ ቄስቾ ቀያፍበ ሶኮ። 25 ህከኔን ስሞን ጴጥሮስ ኡር ጊረተ ኢብጨዮ እኬ። ህከኔ ዮ መኑንኩ ጴጥሮሴ «አት ህከን መንች አወናኒች መቷንስበእንዶ?» ይቶስ። እስን «አን አወናንቿንስበአ» ይ ካጆ። 26 ጴጥሮስ መጨስ ሙሮ መንች እለንቹ አበ ቄስች አላኒች መቱ «ህከን ሀቅ ኣዜን እሲንን ዮንቲ ጡድምበኬንዶ?» ዬስ። 27 ጴጥሮስን ለንኪሃ ካጆ። ህተ ጄቹንተ አንተቤቹ ዎጆ። 28 ህከኒች ዘኪን ዬሱሰ ቀያፍ ምኒች ገሻንች ግብተ ኦሮሶእ። ጄቹንትስ ገስማ በቅተ እኬ። አይሁድ-መኑ ሻሽግ ሆልቹ እታተኔ ሃሻረንቱምቦገ ይት ገሻንች ግቤ ኣዝ ኣግምበአ። 29 ህከኒ ጵላጦስ እሶኦበ ፉል «ከ መንቹ ኦዴንታ መ ጠሂኔት?» ይ ጠዕሜሰ። 30 እሶኦንት «ኩ መንቹ ሂለተ አሱምቦ እክየን ኬሳ ህግንስ ኣስናምበአ እኬ» ይት ፈንቀሽቶእ። 31 ጵላጦስን «አዕኖኦት ኦሮሴን ሴርዕኔገ ፍርድዬ» ዬሰ። እሶኦንት «ኔሳ መነ ሺ ደንድናም ዳኖመት ኣሰንትምበኔ» ይቶስ። 32 ኩን እኮ ዬሱሱ ሀትጎነተ ሬሁተ ሬሀኖንዶ ጠሃቄ ላገት ዊንቱንታት እኬ። 33 ጵላጦስን ፈንቀል ግቤስ ኣዝ ኣግ ዬሱሰ ገእ «አት አይሁድ-መንየ ዎመንዶ?» ይ ጠዕሜስ። 34 ዬሱሱንኩ «አት ካን ይታንቲ ገጊችኬትንዶ ዎሉ መኑ ኢተኔ ኩልየንኬት?» ይ ጠዕሜእ። 35 ጵላጦስ ፈንቀሽ «አን አይሁድቿንዶ? ኬስ ኤሳ ህግስ ኣስቶሩ ዜራንኪ ቄስየ አወንሳኑኒ። አት መሃን አስቴንቲ?» ይ ጠዕሜእ። 36 ዬሱሱ «ኢ ዎሞመት ተን ኡለ አሊቼበአ። ዎሞመኤ ተን ኡለ አሊች እኬ እክየን አይሁድ አንጋን ኣጉምቦገ አላኑኤ ኦለንታ እኬ። እኮዳ ዎሞመኤ ተን ኡለ አሊቼበአ» ይ ፈንቀሼእ። 37 ጵላጦስን «ህከደ አት ዎማንዶ?» ዬእ። ዬሱሱ «ዎመ እኮምገ አት ይቶንቴኤ። አን እለሞሚሁ ተ ኡለ አል ዋሎሚሁ ገሬተኔ ነቀሶታት። ገሬች እኮ ሆሩንኩ ላገኤ መጮጨኖ» ይ ፈንቀሼእ። 38 ጵላጦስን «ገርት መሃን?» ዬስ። ህካን ዬሀኒች ዘኪን ጵላጦስ አይሁድ-መንበ ለንኪሃ ፉል «አን ከን መንቾን ሜጡ በእሱሃ ደግምበአ። 39 ጠሁ እኮዳ ሻሽግ አያን ጄቹተ ኡሱረሞ መኒች መቱ ሂራንክዕኔ ሮሸት ዮኢ እኮተኔ አይሁድ ዎመ ሂሩንተ ሀሴነንንዶ?» ዬሰ። 40 እኮዳ እሶኦት «ባርባኔ ሂር በጋን እሱ ሂርቶት!» ይተን አበ ላጋን ጨንጭቶእ። ባርባንን ፈንግቿ እኬ።
1 ህከኒች ዘኪን ጵላጦስ ዬሱሰ ኦሮሽ ኦልሲሾ። 2 ቤጠቦንኩ ኡት ዘዉደ መክስ ዬሱስ ቦቆ አሌን ዎርቶእ። አሞ ቢሸተ ኦድሸተ ኦዲሶስ። 3 እሶኦንት ሺነስ ህንጭተን «አይሁድ ዎመ አንገተ¡» ይተን ቀምቦን ዎቀርተዮስ እኬ። 4 ጵላጦስን ሀደተ ፉል «ህኩዕኒን፥ አን ከን መንቾን ሜጥተ ሉሰታ ደጉ ሆጎምገ ደጌኑንተ እሱ ሀደተ ፉሻንክዕኔ» ዬሰ። 5 ህከኒ ዬሱሱ ኡት ዘዉደ ቦቆንተስ ዎዕር ቢሸተ ኦድሸተ ኦደቅ ፉሎ። ጵላጦስን «መንቹስ ህኩዕኒን» ዬእ። 6 ቄስ አወንሳኑሁ አይሁድ መን ዘበኑሁ ዬሱሰ ጡዶ ጃተ «ሰቀል! ሰቀል!» ይተን አበ ላጋን ጨንጭቶእ። ጵላጦስን «አዕኖኦት ገጉዕኔ መስቴን ሰቀልዬ። ዳፉንኩስ አን እስ አሌን ሜጡ በእሱሃ ደግምበአ» ዬሰ። 7 አይሁድ-መኑንኩ እሲ ፈንቀሽት «ኔሳ ሴሩ ዮኔ። ኩ መንቹ ገገስ መገን ቤቱ አሴተኔ ህከን ሴርጊን ሬሁ ሀስሰኖስ» ይቶስ። 8 ጵላጦስ ህከ ጠሀ መጮጬ ጃተ አብሽ ዋጄእ። 9 እስን ግቤ ኣዝ ፈንቀል ኣግ ዬሱሰ «አት ሀከን ቤችየ መንቹ?» ይ ጠዕሜእ። ጠሁ እኮዳ ዬሱሱ ሜጡራ ፈንቀሽምበአ። 10 ህከኒ ጵላጦስ «ሜጡራ ጠሃታንቴኤበእንዶ? ኬስ ሂር ገፈሮታ ሰቀሎታ መቆ ዮኤገ ደጋንትበእንዶ?» ዬስ። 11 ዬሱሱ ፈንቀሽ «መገንቢች መቆ ኣሰሙምቦሄ እክየን አት ኤስ ሜጡራ አሲ ደንድታንትበአ። ህከኒ ኤስ ኬሳ ህግሽ ኣሴሀን ባጢሉ አበኖ» ዬስ። 12 ጵላጦስ ዬሱሱ ህካን ጠሃቀንየን መጮጬ ጃተ ሂር ገፈሮስተ ሀሾ። እኮዳ አይሁድ-መኑ «ከ መንቹ ገፈርቶንትደ አት ቄሳሬየ ጃለበአ። ዳፉንኩስ ገገስ ዎመ አሰቀኖ ሆሩንኩ ቄሳሬየ ዲነ!» ይተን ጨንጭቶእ። 13 ጵላጦስን ህካን መጮጬ ጃተ ዬሱሰ ሀደተ ፉሽ «ብድቅዬ ክኑ» የመንታ መዕኔን ፍርድ በርጩማን አፉዕሌእ። ህት መዕንት እብር-መን ላጋን «ገበተ» የመንታታ። 14 ህኩ በሩንኩ ሻሽግ አያኒ ቅጠሜኗ በር እኬ። ጄቹስ ሌሆ ሳትየ ቁንጠ እኬ። ጵላጦስን አይሁድ-መኒ «ዎሙዕኔ ኩዕኒን» ዬሰ። 15 ጠሁ እኮዳ እሶኦት «እሱ ከም! እሱ ከም! ሰቀል!» ይቶእ። ጵላጦስን «ዎመዕኔ ሰቀሉንዶ?» ዬሰ። ቄስ አወንሳኑንኩ «ቄሳሬች ህግየን ኔሳ ዎሉ ዎሙ ዮበአ» ይት ፈንቀሽቶስ። 16 ህተ ጄቹተ ዬሱሱ ሰቀለሙንተ ጵላጦስ ህግሽ ኣሴሰ። እሶኦንት አፍ ኦሮሶእ። 17 ህከኒች ዘኪን ዬሱሱ ገግስ መስቀልቹ እይ «ቦቆ ቆሙ» ዬኖ መዕንተ ፉሎ። ህት መዕንት እብር-መን ላጋን «ጎልጎተ» የመንታታ። 18 ህከኔን እሱ ሰቀልቶእ። አሞ ዎሉ ለሙ መንቹ መቱ መኬ ዉዲን መቱስ ጉረ ዉዲን ዬሱሰ ሜሬሮ አስት ሰቀልቶእ። 19 ጵላጦስን «አይሁድ ዎመ፤ ናዝሬት ዬሱሰ» ያኖ ጣፍ ዬሱሱ ሰቀለሞ መስቀልች አሌን ዎሮ። 20 ዬሱሱ ሰቀለሞቡ ከተሚ ኦንጠንተ እኮተኔ ሆለሙ አይሁድ-መኑ ጣፈሞሲ አነበቦእ። ህኩንን እብር-መን ላጋን፥ ላቲንሳኒ + ግሪክሳኒ ጣፈሜሃ እኬ። 21 አይሁድ ቄስ አወንሳኑ ጵላጦሴ « ‹አን አይሁድ-መንየ ዎመ› የቄገ ጣፍ በጋን ‹አይሁድ ዎመ› ይት ጣፎት» ይቶስ። 22 ጵላጦስን «ጣፎሚንከ ጣፌም» ይ ፈንቀሼሰ። 23 ቤጠቦንኩ ዬሱሰ ሰቀልቶኢች ዘኪን ኦድሸስ ኦሮስ አኒንከ አኒንከ መ-መቱ ኢሉንተሰ ቀምቢሰስ ፈእስ ሾልተ መዕንተ ቤኮእ። ጠሁ እኮዳ ቀምቢሱስ አሊች ዎሩተ ኢለንቀጤች ጎበሙዕነ ሜጡ ደደሜሃ እኬ። 24 ህከኒ ቤጠቦ «አዬ ኢለኖንዶ ጡንዶተ ሳመ ኡጅኖ በጋን ቀምቢሰ ዘኑንከ» የቀንቶእ። ህኩንን እኮ «ኦድሸኤ ቤቀንቶእ፤ ቀምቢሳንተኤን ሳመ ኡጀቀንቶእ» ይታ መጣፍ ላገት ዊንቱንታት። ቤጠቦንኩ ህትጉንተ አስቶእ። 25 ህተ ጃተ ዬሱስ መስቀልች ሺናን አመስ፥ አመስ ህዞት፥ ቀሎጵ ምን አመት ማራሚ መግደል ከተም ማራሚ ኡርቴ እኬ። 26 ዬሱሱ አመሲ እስ ኢተኖስ አወናንቹሁ ሺናንተስ ኡርትየን ጡጆ ጃተ አመስ «መንቾ! ቤቱክ ህኩዕኒን» ዬሴ። 27 አሞ አወናንቺሃንስ «አመክ ትዕኒን» ዬስ። ህከን ሳቲች አፍ ህኩ አወናንቹ ዬሱስ አመተ ምንስ ኦሮሾ። 28 ህከኒች ዘኪን ዬሱሱ ሆሩሩንኩ ዊሞገ ደጎ። መጣፋን ጣፈንቶ ላገት ዊንቱንተ «ሰገሴኤ» ዬእ። 29 ህከኔን ሺሹ ዎይኑ ዊሜ ኦዳት ዮ እኬ። ህከኒ ህከኔ ዮ መኑ ህከ ሺሸ ዎይነ ሀላምገ ዮሪን ጬፍ አገደ አጉደኖ ሀቂን አፌስበ ህንጨቶእ። 30 ዬሱሱንኩ ህከ ሺሸ ጉቤኢች ዘኪን «ዊሜእ!» ዬእ። እስን ቦቁስ ቄልጬ አስ ፎልስ ኣሴእ። 31 ህከኒች ዘኪን አይሁድ-መኑ ሰቀለንቶ መነ ፎአተ ቢጤን ድሪሴኑንተ ጵላጦሴ ኡጭቶእ። ዳፉንኩስ ሰንበቲ ቅጠሜኖ በር እኮተኔሃ ህኩ ሰንበቱንኩ አበ አያነ እኮተኔሃ ህከን ሰንበት በሬን ሬሹሰ መስቀል አሌን እሁምቦጊሃት እኬ። 32 ህከኒ ቤጠቦ መርት ዬሱሲን ሰቀለንቶ መን ፎአተ ቢጦእ። 33 ዬሱስበ ዋልታደ እስ ሬህ ፈጆገ ጡድ ፎአስ ቢጥምበአ። 34 ጠሁ እኮዳ ቤጠቤች መቱ ዬሱስ ምዛዙ በገዚን ቀሽየን ህተ ጃንተ ምዛዚችስ ቄጉሁ ዎኡሁ ፉሎ። 35 ህካን ጡጆ አዕኖኦቲ አመዕንቴኑንተ ነቀሾ። ነቃሹንኩስ ገርተ። እስ ጠሃቀኖሩ ገርተ እኮገ እስን ደገኖ። 36 ኩን እኮንኩ መጣፋን «እሲች ሜጡ ምቅቹሃ ቢጤኖበአ» ያኖ ዊሙንታት። 37 አሞ መጣፋን ዎሌ መዕኔን «እሶኦት ቀሶኢ እሌንተሰ ጡዳስ» ያኖ። 38 አይሁድ አወንሳኑ ዋጄተኔ ማጠም ዬሱሰ አወነኖ እኬ አርማት ከተም ዮሴፍ ዬሱስ ሬሸ ኣቆተ ጵላጦሴ ኡጬእ። ጵላጦስን «ኣቅ» ዬሃንስ መር ሬሸ ድሪሽ ኦሮሾ። 39 ዎነስ ኮዳ አንከሬን ዬሱስበ መሬ እኬ «ንቆድሞሴ» ዬኖ መንቹ ሰጀነ መትተ ክሉተ እካ አቆማደ አጉዳ ከርቤታ ቀራሬኒ + ኤሬሬመ አንጀነተ አፍ ዋሎ። 40 እሶኦት ለሙንኩ ዬሱስ ሬሸ ኦሮስ አይሁድ ሮሸጊን አንጀናን በርግት ፉት ኦድሻን ከፈንቶእ። 41 ዬሱሱ ሰቀለሞ ሺናን ሀቀ ካሴመ መዕንት ዮ እኬ። ህከኔን አዪ ሞገሙምቡ ሃሮ ሞጉ ዮ እኬ። 42 ህኩንን አይሁድ-መኑ ሰንበቲ ቅጠንታ በር እኮተኔሃ ህከን ሞግ መዕንት ኦንጠንተ እኮተኔሃ እሶኦት ዬሱስ ሬሸ ህከን ሞጎን ዎርቶእ።
1 ሄዜት ዎነ በር አበ በሬ ገስመ መግደል ከተም ማራም እሩ ሶዚ እክየን ዬሱስ ሞግበ መርታደ ሞጉ እፍሴመ ክኑ ሞግ አፌች ፈነሜ እኬ። 2 ህከኒ እሴ ደጉደን መርት ስሞን ጴጥሮሴሃ ዬሱሱ ኢተኖስ ዎሎ አወናንቺሃ «ቀርቹ ሞጊች ፉሼን ኦሮሴመ። ሀተኤመንዶ ደንግምበአ» ይቶሰ። 3 ህተ ጄቹተ ጴጥሮሲ ዎሉ አወናንቹሁ ፉልት ሞግበ መርቶእ። 4 ለሙንኩ ደጉደንየን ህኩ ዎሉስ አወናንቹ አብሽ ደጉጅ ጴጥሮሴ ኤጅ ብርስ ሞግበ ኢሌእ። 5 እስን ሞግ ኣዝ ህርክይ ጡደኖደ ከፈን ኦድሸት ህከኔ ዮኢ ጡጆ። እኮዳ ኣዝ ኣግምበአ። 6 እስ ዘኮን ስሞን ጴጥሮስ ኢል ሞግ ኣዝ ኣጎ። እስን ከፈን ኦድሸት ህከኔ ዮኢ ጡጆ። 7 አሞ ቦቆ ዉዱ ጣጤመ ከፈኑ ዎሎ ከፈኒች አነነ እክ ቢንን ዎሌ መዕኔንን ጣጠም ዮገ ጡጆ። 8 ህከኒች ዘኪን ህኩ ብርስ ኢሌ አወናንቹሁ ሞግ ኣዝ ኣግ ጡጅ አመዕኔእ። 9 ዳፉንኩስ እሶኦት መጣፋን «ሬሆች ኬኡ ሀስሰኖስ» ይታ ላገተ ቆርስትምበእን እኬ። 10 ህከኒች ዘኪን ህኩ አወናኑ ምንሰ ፈንቀልት ኦሮቶእ። 11 መግደል ከተም ማራምን ኦአን ሞግ ሺናን ኡርቴ እኬ። ኦአንን ሞግ ኣዝ ህርክት ጡዶእ። 12 እሴን ዬሱስ ሬሹ አፉዕሌ መዕኔን ዎጁተ ኦድሸተ ኦደቅቴ ለሙ መገን ሰሜ ሶቀማንቹ መቱ ቦቆ ዉዲን መቱ ሎከ ዉዲን አፉዕልቴኢ ጡዶእ። 13 እሶኦንት ማራሜ «ቴ መንቾ! ሚ ኦአዮንት?» ይቶሴ። እሴን «ቀርቹኤ ኦሮሴን ከሜመ። ሀተኤመስንዶ ደግምበአ» ይቶእ። 14 ህካን ይት ኤተሩ ፈንቀልት ዬሱሱ ኡሬኢ ጡዶእ። እኮዳ እሴ ዬሱሰ እኮገ ደግምበአ። 15 ዬሱሱንኩ «ቴ መንቾ! ሚ ኦአዮንት? አዬኔት ሀሰዮንቲ?» ዬሴ። እሴ ህከኔ ሁጀተኖ መንቹ አጉጅየንሴ «ቀርቾ! አት ኦሮሴንትስደ ሀከኔ አፉሽቴንትስንዶ ኩሌኤ፤ አኒ ኦሮጫንስ» ይቶእ። 16 ዬሱሱንኩ «ማራሜ!» ዬሴ። እሴን እስ ዉዱ ዘህት እብር-መን ላጋን «ረቡኒ!» ይቶእ። ሂረቱንትስ «ሮስሳንቾ!» ዩሀ እኬ። 17 ዬሱሱ «አንኤበ ፉሉዕናን ዮምተኔ አፎቴኤ። ጠሁ እኮዳ ህዛከኤበ መርት ‹አን አንኤነ አንዕኔበ፥ መገንኤነ መገንዕኔበ ፉላም ዬእ› ይት ኩል» ዬሴ። 18 መግደል ከተም ማራምን አወናንበ መርት ቀርቹ ጡዶጋ ህከ ጠሀ ዬሴጋ ኩልቶሰ። 19 ህከ አበ በሬ ሀወሩተ አወናኑ አይሁደ ዋጅቶተኔ ጎጫከተ ጡፍ ምን ኣዜን ጠጵቴ እኬ። ጎጫከንት ጡፈንቶገን ዬሱሱ አወናኑስ ጠጵቶ ምን ኣግ ሜሬሮንተሰ ኡር «ጡሙ ክዕኔኤ እሁን» ዬሰ። 20 ህካን ይ አንገሲ ምዛዙሲ ጡድሾሰ። አወናኑንኩ ቀርቹ ጡዶ ጃተ በጅቀንቶእ። 21 ለንኪሃ ዬሱሱ «ጡሙ ክዕኔኤ እሁን። አኑ መገኑ ኤስ ሶኮገን አኒ ክዕኔኤተ ሶሃም» ዬሰ። 22 ህካን ይ እሶኦ አሌን ፎሸስ ኡፈእ «ጡማንቹ አያነ ኣቅዬ። 23 አዕኖኦት መን ባጢለ አጉርቴንተደ ባጢሉሰ አጉረሜእ። አሞ አጉርቴኑምቦደ አጉረምምበሰ» ዬሰ። 24 ዬሱሱ አወናንስበ ዋሎ ጃተ ቶነ ለሚች መቱ «ቀፈ» የመመኖ ቶማስ እሶኦን በርገም ዮበአ እኬ። 25 ህከኒ ዎሉ አወናኑ ቶማሴ «ቀርቹ ጡንዴም» ይት ኩልቶስ። እኮዳ እስ «ሙስማሪን ቀሴመ መዕንተ አንጋካንተስ ጡዱዕናች፥ መዕኔንተስን ዙሩዕመኤ ኣግሱዕናቺ አንገኤ ምዛዞንተስ ኣግሱዕናቺ አመዕናምበአ» ዬሰ። 26 ሄዜቶ በሬች ዘኪን አወናኑ ለንኪሃ ምን ኣዜን ዮሀኔን ቶማስን እሶኦን በርገም ዮ እኬ። ጎጫከንት ጡፈንቶገን ዬሱሱ ዋል ሜሬሮንተሰ ኡር «ጡሙ ክዕኔኤ እሁን» ዬሰ። 27 ህከኒች ዘኪን ቶማሴ «ዙሩዕመክ ከበ ዋሽት አንገኤ ጡድ። አንገክን ዋሽት ምዛዞንተኤ ኣግስ። አመዕንቴንቲ እህ በጋን አመዕንቱምቡ እኮት» ዬስ። 28 ቶማስን «ኢ ቀርቾ! ኢ መገኖ!» ይ ፈንቀሼስ። 29 ዬሱሱንኩ ቶማሴ «አትዕኑ ጡዶንቴኤተኔ አመዕንቴንት። እኮዳ ጡዱዕናች አመዕንታሩ ማሰአንቴሃረ» ዬስ። 30 ዬሱሱ ከን መጣፋን ጣፈንቱምቡተ ሆለመተ ማለልሲሳ መላተ አወናንስ ብሬን ሁጀቼእ። 31 ጠሁ እኮዳ ዬሱሱ ዶዕረሞ ክርስቶሰ መገን ቤቱ እሁስ አመዕንቴኑንታ እስ ሱዕሚን ዶሊ ሆሪንከ ሄኣ ሄቸተ ደቅቴኑንታ ኩን ጣፈሜእ።
1 ህከኒች ዘኪን ዬሱሱ ጥብራዶስ በሃር ሺናን አወናኒሀንስ ለንኪሃ ጡደሞ። ጡደሞጉንኩ ህትጉተ። 2 ስሞን ጴጥሮስ፥ «ቀፈ» የመሞ ቶማስ፥ ገሊል ባዶን ዮ «ቃነ» ዬኖ ቤች ናትናኤል፥ ዘብዶሴ ኦሱቲ ዎሉ ለሙ አወናኑሁ ሜጦማን ዮ እኬ። 3 ስሞን ጴጥሮስን «ቁርጡሜመተ ቃሾተ መራም» ዬእ። እሶኦንት «ኬሳንን በርገም መናም» ይትኬእ መርት ጀልባን ኣጎእ። ጠሁ እኮዳ ህከ አንከር ሜጥተ ቁርጡሜመታ አፍምበአ። 4 ሶጄሀኔን ዬሱሱ በሃር ቶቾን ኡሬእ። እኮዳ አወናኑስ ዬሱሰ እኮገ ደግምበአ። 5 ዬሱሱ «ኦሶ! ቁርጡሜመት ዮዕኔንዶ?» ዬሰ። እሶኦንት «ሜጡሩ ዮኔበአ» ይቶስ። 6 እስን እሶኦ «ዎሻደ ጀልቢች መኬ ዉዲን ኡጅዬ፤ ደቅቴነንተ» ዬሰ። ህከኒ ዎሻደ በሃር አሌን ኡጅቶእ። ሆለመተ ቁርጡሜመተ አፎተኔ ዎሻደ ምድ ጀልባን ኣግሱ ሆጎእ። 7 ህተ ጄቹተ ዬሱሱ ኢተኖስ እኬ አወናንቹ ስሞን ጴጥሮሴ «ኩን ቀርቿ» ዬስ። ስሞን ጴጥሮስን «ቀርቿ» ዬኢ መጮጬ ጃተ ሁጄ ፉሼ እኬ ኦድሸስ ደዕል ኦደቅ በሃራን ጦጵይ ኣጎ። 8 እኮዳ ዎሉ አወናኑ ኡላች ዎእ ኣዝ ለቅ ጥቤ ጡንኩላል ቀጢች አበ ቄዕርቱዕነ ዮተኔ ህከ ቁርጡሜመት ዊንቴ እኬ ዎሻደ ምደን ጀልቢን ዋልቶእ። 9 እሶኦንት ጀልቢች ኡለተ ድርቶ ጃተ ግጥሎ ከሸል አሌን ዮ ቁርጡሜመታ ዳቡታ ጡዶእ። 10 ዬሱሱንኩ «ቴሱ አፌንተ ቁርጡሜማች ኤብዬ» ዬሰ። 11 ህከኒ ስሞን ጴጥሮስ ጀልባን ኣግ ጥብቲ ኦንታነ ሰስት አበባኑት ቁርጡሜመቲ ዊንቴ ዎሻደ ጎሾሽ ቶቹ ፉሼእ። መሃ በትናሸት ቁርጡሜመት ሄኦዳ ዎሻዱ ጠንቅምበአ እኬ። 12 ህከኒች ዘኪን ዬሱሱ «ዋሌ እቸተ እችዬ» ዬሰ። እስ ቀርቹ እኮገ ሆሩንኩሰ ደጎተኔ አወናኒች ሜጡሁ «አት አዬት?» ይ ጠዕሚ እጌኢ ዮበአ። 13 ዬሱሱ ዋል ዳቡተ ኬእሽ ቁርጡሜማን በርግ ኣሴሰ። 14 ዬሱሱ ሬሆች ኬኦች ዘኪን አወናኒንተስ ደቀሚ ቲን ሰክተ ኮደ እኬ። 15 እት ኬኦሀኒች ዘኪን ዬሱሱ ስሞን ጴጥሮሴ «ዮነ ቤቶ ስሞኔ! ከሮኦች አበ ኢትተዕኔንዶ?» ዬስ። እስን « ቀርቾ! አን ኢታንኬገ አትን ደጋንት» ይ ፈንቀሼስ። ዬሱሱንኩ «ቡታከኤ ቆረብ» ዬእ። 16 ለንኪሃ ዬሱሱ «ዮነ ቤቶ ስሞኔ! ኢትተዕኔንዶ?» ዬስ። እስን « ቀርቾ! ኢታንኬገ አትን ደጋንት» ዬእ። ዬሱሱንኩ «ሀዘተኤ ዜእ» ዬስ። 17 ሰኪሃ ዬሱሱ «ዮነ ቤቶ ስሞኔ! ኢትተዕኔንዶ?» ዬደ ሰክ ኮዳ «ኢትተዕኔንዶ» ዬስተኔ ጴጥሮስ ክቼእ «ቀርቾ! አት ሆረረንከ ደጋንት፤ አን ኢታንኬጋ ደጋንት» ዬእ። ዬሱሱንኩ «ሆለኤ ቆረብ። 18 ገርተ ያንኬ፤ አት ሀርዴኦማን ዮንት ጃተ ጠጠቢን ገጉክን ቆዕርት ሀሶንትበ መርታንት እኬ። እኮዳ ኑባጵቶንት ጃተ አት አንገክ ብድቀትየን ዎሉ መኑ ቆርሲሰኖሄ፤ መሪ ሀሱምቡበንከ መሰኖሄ» ዬስ። 19 ካን ዬኢ ጴጥሮስ ሀትጎነ ሬሆን መገኑ አብሰኖንዶ ጡድሶስታት እኬ። ህከኒች ዘኪን ጴጥሮሴ «አወኔኤ» ዬስ። 20 ጴጥሮስ ዘኩ ለቅ ጡደኖደ ዬሱሱ ኢተኖስ አወናንቹ አወነዮኢ ደጎ። ህኩ አወናንቹ ኦዜ ጄቾን ዬሱስበ ህንጭይ «ቀርቾ! ህግሽ ኣሰኖሄ አዬት?» ይ ጠዕሜሃ እኬ። 21 ጴጥሮስ እሱ ጡጆ ጃተ «ቀርቾ! ኩ መንቹ መ እሀኖለ?» ይ ጠዕሜእ። 22 ዬሱሱ ፈንቀሽ «አን ዋለንቀጤች ሄኡንተ ሀሾምደዕኑ! ኬስ ም ሀውሾሄ? አትስ አወኔኤ» ዬስ። 23 ህከን ዳፊን አመዕናንባን «ኩ አወናንቹ ሬሀኖበአ» ዬኖ ጠሁ መጮጨሞ። ጠሁ እኮዳ ዬሱሱ «አን ዋለንቀጤች ሄኡንተ ሀሾምደዕኑ! ኬስ ም ሀውሾሄ?» ዬ በጋን «ሬሀኖበአ» ይምበአ። 24 ከን ሆራሪንከ ነቀሾሁ ከ ጠሀንከ ጣፎሁ ህከን አወናንቹ። እስ ነቀሾንኩ ገርተ እኮገ ደንጋም። 25 ጠሁ እኮዳ ዬሱሱ አሴ ዎሉ ሆለሙ ጠሁ ዮእ። ኤሳ አጉደኖኤጊን እስ አሴ ጠሀ መ-መቲን ጣፌመ እክየን መጣፋከስ ት ኡለት እይት ደንድታበአ እኬ።
1 - 2 ቴፍሎሴ! ዬሱሱ ዶዕሬሰ ሶቀማኑ ጡማንቾ አያኒን አዘጆሰሀኒች ዘኪን መገኑ ሰማ ፉሸኖስ በሩ ኢለንቀጤች አሶታ ሮስሶታ አፎ ሆራንከ ጠህተኔ ዎነኤ መጣፋን ጣፌንኬ። 3 አሞ ሬሆች ኬኦሀኒች ዘኪን ሾላዱሙ በሩ ኢለንቀጤች ጡደመን መገን ዎሞመተኔ ኩለን ፎላሙ እሁስ መልሲሱምቦ ዎቄን ገገስ እሶኦ ጡድሾ። 4 እሶኦን በርገም ዮ ጄቹተ ዬሱሱ «ዬሩሳሌሚች ፉልቴኖችዬ። ጠሁ እኮዳ ኤሳች መጮጭቴንተረ ህኩስን አኑ መገኑ ኣሴ ተሴስ ላገተ ቆረብዬ። 5 ዳፉንኩስ ዮሃንስ ዎኢን ጠመቄ እኬ። እኮዳ አዕኖኦት ቀሆ በሬች ዘኪን ጡማንቾ አያኒን ጠመቀንቴነንተ» ይ አዘጆሰ። 6 እሶኦንት ጠጵቶ ጃተ «ቀርቾ! ተን ጃን እስራኤሊ ዎሞመተ ፈንቀሽተንንዶ?» ይት ጠዕምቶስ። 7 ዬሱሱንኩ ፈንቀሽ «አኑ መገኑ ገግስ መቄን ቅጠንሴ ጄቹታ ዶለሃ አዕኖኦት ደጌኖተ ኣሰምምበዕኔ። 8 ጠሁ እኮዳ ጡማንቹ አያኑ ዋሎዕኔ ጃተ መቆ ደቅቴነንተ። ዬሩሳሌም ከተማን፥ ይሁድ ባዶኒ ሰማር ባዶኒ ኡለ ቶቹ ኢለንቀጤች ነቃሻከኤ እኬነንተ» ዬእ። 9 ካን ጠሃቅ ጦፎሀኒች ዘኪን እሶኦት ጡደንየንን መገኑ አል ለቅ ኦሮሾስ። ጎሙንኩ እሌችሰ ቴሎስ። 10 እስ ሰማ ኦሮቀንየን እሶኦት ሰማ ለቅ ቀስ አፍ ጡደዮሀኔን ዎጁተ ኦድሸተ ኦደቅቴ ለሙ መኑ ሺናንተሰ ኡርቴ እኬ። 11 ህኩ ለሙንኩ ህከን መኒ «ገሊል መነ! ሰማ ለቄን ጡዴነን ሚ ኡርቴንተ? ኩ ክዕኔኤች አነነ እክ ሰማ ፉለንየን ጡዴንተ ዬሱሱ ኦሮቀንየን ጡዴንተጊንን ዋለኖ» ይቶሰ። 12 ህከኒች ዘኪን እሶኦት ዘይት ሀቁ ሌአኖ ዱኒች ዬሩሳሌም ከተመ ፈንቀልቶእ። ህኩንን ዬሩሳሌሚች ቶነ ኦንቱ ደቂቀ መረንሰኖ ዎቄ ቀጠ ቄዕራበአ። 13 ከተመስ ኣጎ ጃተ ኤጅን ሄኣ ፎቅ ምን ፉልቶእ። እሶኦንት ጴጥሮሴት፥ ዮሃንሴት፥ ያቆቤት፥ እንድራሴት፥ ፍልጶሴት፥ ቶማሴት፥ ባርቶሎሞሴት፥ ማቶሴት፥ እልፎሴየ ቤቱ ያቆቤት፥ ባዱስ ኢተኖ ስሞኔቲ ያቆቤየ ቤቱ ይሁዳቲ እኬ። 14 ህኩ ሆሩንኩ ዬሱስ አማን ማራሜን፥ ህዛካንተሲ ዎሎ ሜንቲኒ በርገንት ሜጦ ዎዘኒን ቃርት መገኑ ኡጭተዮ እኬ። 15 ህተን በራካን ጥብታ ለሞዱመ እሀኖ መኑ ጠጵዬባን አመዕናኖ ህዛከ ሜሬሮን ጴጥሮስ ጦቅይ ኡር 16 «ኢ ህዛከ! ዬሱሰ አፎሪ አወንሳንቹ እኮ ይሁድተኔ ጡማንቹ አያኑ ብርስ ዳዊቴ አፎን ጠሃቄ መጣፍ ላገት ዊሙ ሀስሰኖሴ። 17 እስን ተን ሁጄን ቤቀማንቹ እሆተ ኔሳንን በርገም ዎልሰሜሃ እኬ። 18 ህኩ መንቹንኩ ሾክመስ ግዚን ኡለተ ህዕሬእ። እስን ጎምብሰም ኡብ ጎደቡስ ጦቅየን ህሌስ ሆረንት ፉልቶእ። 19 ህኩ ጠሁንኩ ዬሩሳሌማን ሄአኖ መንባን ሆርባንን ደገሞ። ህከንተኔንከ ህት መዕንት እሶኦ አፌን ‹አኬልዳመ› የመንት ገአንቶእ። ህትጉተ ዩንኩ ‹ቄግ ኡለተ› ዩሀ። 20 መዝሙር መጣፋን ዳዊት ‹እስ ሄአኖቡ ኦነ እሁን። ህተን መዕኔንን አዪ ሄኡንከ። አሞ እስ አወንሰኖ ሁጄ መዕንተ ዎሉ ኣቁን› ይ ጣፌእ። 21 - 22 ህከንተኔ ዮሃንስ ጠመቆ ጄቾች አፍ ቀርቹ ዬሱሱ ኔሳች አነነ እክ ሰማ ፉሎ ጄቹተ ኢለንቀጤች ሜሬሮንተኔ ሄአን ፉለኒ ኣገኒ ዮ ዶለ ሆረንከ ኔሳን ሜጡ ዮ መኒች መቱስ ኔሳንን ዬሱሱ ሬሆች ኬኦገ ነቀሰኖ እሁ ሀስሰኖ» ዬእ። 23 «እዮስጦሴ» ይታ «በርሰባሴ» ዬኖ ዮሴፈኒ + «ማትያሴ» ዬኖሃ ለሙንከ መንቹ ኡርሶእ። 24 - 25 እሶኦንት መገኑ ኡጭተን «ሆር ዎዘነንከ ደጋንት ቀርቾ! ይሁድ ገግስ መዕንተ ኦሮቆተ አጉሮ ተን ሁጄሃ ሶቀማንቾማሃ መዕንተ ኣቁንተ ከን ለሟንከ መኒች አት ዶዕርቶንቲ ጡድስኔ» ይቶእ። 26 እሶኦንከ ሳመ ኡጅትየን ሳሙ ማትያሴ ኢሌእ። እስን ቶነ መቷንከ ሶቀማኒን በርገም ዎልሰሞ።
1 ሻሽጊች ዘኪን ኦንታዱንቅ በር አብሴኖ አያን በሩ + ኢሌ ጃተ ሆሩንኩሰ ሜጤ መዕኔን ጠጵት ዮ እኬ። 2 ደንግተን አበ አንጉሉሎ ቦብርገ ዮ ላገት ሰሜች ዋልት እሶኦት አፉዕልቴ ምን ዊንቶእ። 3 ህከኔን ጊረ ለበን አጉዳ አረብት ጡደንቶሰ። ህኩሩንኩ ቤሀንት አን አን አሌንን አፉዕልቶእ። 4 እሶኦን ሆራንተሰን ጡማንቹ አያኑ ዊሞሰ። እሶኦንት ጡማንቹ አያኑ ኣሴሰጊን አነነ አነነ አፌን ጠሃቁ አፎእ። 5 መገኑ ዋጅታ አይሁድ-መኑ ባዲች ሆሪችን ዋልቴሩ ዬሩሳሌማን ሄአዮ እኬ። 6 ህተ ላገተ መጮጭት በትናሹ መኑ ጠጵት ዋልቶእ። እሶኦንት አኑንኩ አኑንኩ ገግሰ አፌን ጠሃቀመንየን መጮጭት ይታረ ሆጎእ። 7 ህኩ መኑንኩ አብሽ ማለል «ኩ ህትተ ጠሃታሩ ሆሩንኩ ገሊሌየ መነበእንዶ? 8 ነኦንት ገግኔ እለሞም ባድኔ አፌን ጠሃተንየን መጮነዮሚ ኩን ሀትጉተን? 9 ነኦት ጳርቴ ባድ መኑ፥ ሜዴ ባድ መኑ፥ ኤላም ባድ መኑ፥ ሞሶጶታም መኑ፥ ይሁድ ባድ መኑ፥ ቀጳዶቅ ባድ መኑ፥ ጳንጦስ ባድ መኑ፥ እስይ ባድ መኑ፥ 10 ፍርግ ባድ መኑ፥ ጲንፍል ባድ መኑ፥ ግብጥ ባድ መኑ፥ ቃሬን ባድ ዉዲን ዮ ሊብይ ባዶን ሄዕናምሩ፥ ጡዲ ሮሜ ባዲች ዋኖም አይሁድ-መኑ፥ አይሁዶማን ዶረሞምሩ፥ 11 ቀርጤስነ አረብ ባድ መኑሁ መገን አበተ ሁጅተ ገግኔ አፌን ጠሃተንየን መጮነዮም» ይቶእ። 12 ህከኒ ሆሩንኩ ማለልቲ ይታረ ሆጊ መቱ መቲሀንሰ «ኩ ጠሁ መሃን?» የቀንተዮ እኬ። 13 ጠሁ እኮዳ ዎሉሰ ኬኑ ገላጨን «ሃሮ ዎይን ዳጠ አግ ዱቤት» ይቶእ። 14 ጠሁ እኮዳ ጴጥሮስ ቶነ መቷንከ ሶቀማኒን በርገም ኡር ላገስ ጦቀእ «አዕኖኦት አይሁድ-መኑሁ ዬሩሳሌማን ሄኤነንተ ሆሩንኩ ከ እኮ ጠሀ ደጌኖተ ጠሀኤ መጮጭዬ። 15 ክዕኔኤ አጉጆዕኔገን ኩ መኑ ድምቤሃበአ። ዳፉንኩስ ኩን ገስሜ ሰሶ ሳተ። 16 ጠሁ እኮዳ ኩን ህራጋንቾ ዮኤሌን ጠሃቀሟ ጠሀ። 17 ህኩስን መገኑ ‹ዘካንቾ በሬን ህትጉተ እሀኖ። ማለ ኦደቄሀን ሆር አሌንን ጡማንቾ አያኒችኤ ዱናም። ለቦዕኔ ሜኣዕኔ ህራጋእ። ሀርድዕኔን ሀቄገ ጡደመኖረ ጡዳእ። ኑባቡዕኔን ሀቄተ ሀቃቅታእ። 18 አሞ ህከ ዶለ ጎንነ ሜንት ካዕላንኤ አሌን ጡማንቾ አያኒችኤ ዱናም። እሶኦንት ህራጋእ። 19 አንን ማለሉተ አሌ ሰማን መላንተ ኡለ አሌን ጡድሳም። ቄጉ፥ ጊረቲ ውሊሌ ጉንጁቲ እካእ። 20 አቡ ማለልሲሰኖ ቀርች በሩ ዋሉዕናች ብርስ አሪቹት ቱንስታእ። አገንቹንኩ ቄግ እሀኖ። 21 ቀርች ሱዕመ ገአኖ ሆሩንኩ ፈአኖ› ዬእ። 22 እስራኤል መነ! ተ ላገተ መጮጭዬ፤ አዕኖኦት ገጉንኩዕኔ ደጌነንተገን ናዝሬት ዬሱሱ መገኑ ሜሬሮንተዕኔ እስ ዉዲን አሴ ቃረ ሁጄን፥ ማለሎኒ መላኒ መገንቢች ክዕኔኤ ለሌሃ መንቹ እኬ። 23 እሱንከ መገኑ ሰውይ ቅጠንሴ ሰውቲኒ ዎናንከ ዮስ መሌሲኒ ክዕኔኤ ህግሰም ኣሰምየን አዕኖኦንት ሂለ መን አንጋን ሰቀለመኖጋ ሬሀኖጋ አስቴንተ። 24 ጠሁ እኮዳ መገኑ ሬሆ ሀወ በእሽ ሬሆች ኬእሾስ። ዳፉንኩስ ሬሁት እሱ ኤጌዶተ ደንድትምበአ። 25 ዳዊት እስተኔ ‹ቀርቹኤ ሆረንተ ጃተ ብሬንተኤ ጡዳም። ዳፉንኩስ እስ መኬንተኤ እኮተኔ አን ሌንቄቃምበአ። 26 ህከንተኔንከ ዎዘኑኤ በጅቀሞ። አረብንትኤ በጅጉተ ጠሃቶእ። አሞ ማሉኤ ተሴን ፎሎጨኖ። 27 ዳፉንኩስ ፎልኤ ጥለ ሞግ ኣዜን አጉርታንትበአ። አሞ ሙጩሩ ቤቱክን ሸሙንተ ሰዕምታንትበአ። 28 ሄቸ ዎቃንከ ጡድሶንቴኤ። ኤሳን ሜጡ እሂንተክ በጅጉተ ጠለ አስቶንቴኤ› ዬእ። 29 ኢ ህዛከ! አበኑ ዳዊት ሬሄገ፥ ሞገሞጋ ሞጉስን ከበሬ ኢለንቀጤች ኒባን ዮጋ ጫክሽ ኩሎዕኔተ ደንዳም። 30 እስ ህራጋንቹ እኮተኔ እስ ዜሪችን መቱ ዎሞመስ በርጩም አሌን አፉሾተ መገኑ ህድሩ ኣጎስገ ደጎተኔ 31 ክርስቶሱ ሬሆች ኬአኖገ ዎነን ደግ ፎልቹስ ጥለ ሞግ ኣዜን ፈኡምቦጋ ማሉስን ሸሙምቦጋ ጠሃቄእ። 32 ህከ ዬሱሰንከ መገኑ ሬሆች ኬእሾስ። ህከን ጠሂንከ ነኦት ሆሩንኩኔ ነቃሸተ። 33 ህከንተኔ እስ መገን መኬን ጦቅ ጦቅ ይ ጡማንቾ አያን ተሳ አነ መገኒች ኣቅ ከ አዕኖኦት ቴሱ ጡዴነንታሃ መጮቴነንታሃ ድሪሾ። 34 - 35 ዳዊት ሰማ ፉልምበአ። ጠሁ እኮዳ እስ ‹ቀርቹ ቀርቹኤ ዲናከክ ሎካችክ ዎሮዲን አሳሚ ኢለንቀጤች መኬንተኤ አፉዕል ዬእ› ይ ጠሃቄእ። 36 አቼ መገኑ ከ አዕኖኦት ሰቀልቴንተ ዬሱሰ ቀርቹሃ ዶዕረሜኢሃ አሴስገ እስራኤል ዉድ መኑ ሆሩንኩ ቆርስ ደጉን» ዬእ። 37 እሶኦት ህካን መጮጭቶ ጃተ ዎዘኑሰ ባብየን ጴጥሮሴኒ ዎሉ ሶቀማኑሃ «ህዛከ! መ አስኑ?» ይት ጠዕምቶእ። 38 ጴጥሮስን «ባጢሉዕኔ አጉረሙንተ ባጢለዕኔ ቢረ ይቴን አኑንኩ አኑንኩ ዬሱስ ክርስቶስ ሱዕሚን ጠመቀምዬ። ጡማንቾ አያን ኣሰንቸንከ ኣቅቴነንተ። 39 ተሴስ ላገንት ክዕኔኤሃት፥ ኦሶሀዕኔቲ ቀርቹ መገኑ ቄዕሪች ገኤሪሃቲ» ዬሰ። 40 ጴጥሮስን ዎሉ ሆለመ ጠሀ ነቀሰን «ከን ሾከ ቀለንቺች ገገዕኔ ፈእጭዬ» ያን ሰጆሰ። 41 ህከኒ ላገስ ኣቅቶሩንኩ ጠመቀንቶእ። ህከ በርንከ ሰሴ ኩሜ ቀጡ መኑ እሶኦን በርገንቶእ። 42 እሶኦንት ሶቀማኑ ሮስሳረ መጮጭተን ህዛኮማን ሜጡ እክ ሄአን እቸተ በርገንት እተኒ መገኑ ኡጭተኒ ቃርተዮ እኬ። 43 ህተ ጃተ ሶቀማን አንጋን ሆለመት ማለሉቲ መላቲ ሁጀተንተዮተኔ መኑ ሆሩንኩ ዋጄእ። 44 አመዕንቶሩ ሆሩንኩ ዮሰረ ሆረንከ ሜጡ አስት ሜጦማን ሄአዮ እኬ። 45 አሞ ኡለሳ ዮሰራ ህርተን ግዘስ አኒንከ አኒንከ ሀስሰኖስ ቀጠ ቤከዮ እኬ። 46 ሆረንከ በር ሜጦ ዎዘኒን እክ መገን ኬሰሞ ምኔን ጠጵተን ምኔንተሰን እቸተ በጅጎኒ ደናሞ ዎዘኒኒ ሜጦማን እተዮ እኬ። 47 እሶኦንት መገኑ ገለጥተዮ እኬ። አሞ ሆሩንኩ አብሰዮሰ እኬ። ቀርቹንኩ በሪን በሪን አመዕንት ፈኣ መነ ማበራንተሰ በርገዮ እኬ።
1 መቱ በር ጴጥሮሲ ዮሃንሲ መገኑ ኡጬኖ ጃን መገን ኬሰሞ ምን መርተዮ እኬ። ህኩንን ሆንሶ ሳተ እኬ። 2 «ደናምተ» የመንታ መገን ኬሰሞ ምን ኡሩተ ሆረንከ በር መኑ እይ ዋሸኖ መቱ መንቹ ዮ እኬ። እስን አመስ ጎደቢች አፍ ሺሀ እኮተኔ አፉሼኖሲ መገን ኬሰሞ ምን ኣገኖ መኒች ግዘ ኡጨቁንታት እኬ። 3 እስን ጴጥሮሲ ዮሃንሲ መገን ኬሰሞ ምን ኣጎተ ዋልቶገ ደጎ ጃተ ግዘ ኣስቱንተስ ኡጨቄሰ። 4 ጴጥሮስ ዮሃንሴንን በርገም ህከ መንቹ ቀሽ አፍ ጡጅ ኬእ «ኒ ዉዱ ጡድ» ዬእ። 5 እስን እሶኦች መቱረ ደቀኖ አጉጅየንስ እሶኦበ ጡጆ። 6 ጠሁ እኮዳ ጴጥሮስ «ብሩሁ ዎርቁሁ ዮኤበአ። እኮዳ ኤሳ ዮኤረ ኣሳንኬ። ህኩስን ናዝሬት ዬሱስ ክርስቶስ ሱዕሚን ጦቅት መረም» ዬስ። 7 እስን መኬስ አንገተ አፍ ጦቀኤስ። ህከ ጃንተ ሎከሲ ሞቆንቱሲ ቃሮ። 8 አል ጦጵይ ኡሬእ። አሞ መረሙንከ አፎ። ህትጉንተ መረመን፥ ጦጵ-ጦጵ ያኒ መገኑ ገለጠኒ እሶኦን በርገም መገን ኬሰሞ ምን ኣጎ። 9 እስን መገኑ ገለጠንየኒ መረመንየኒ መኑ ሆሩንኩ ጡጆስ። 10 አሞ «ደናምተ» የመንታ መገን ኬሰሞ ምን ኡሮን አፉዕል ግዘ ኡጨቀኖ እኮገ ደግኬእ እሶን እኮ ጠሂች ኬኦ መኑ አብሽ ማለሎ። 11 ህኩ ፈዬ መንቹንኩ ጴጥሮሴቺ ዮሃንሴቺ አነነ እሁ ግብ አወነዮሀኔን መኑ ሆሩንኩ ሜጡ እክ ማለለን እሶኦበ ደጉደን «ሰለሞን መረመኖ ዎቃ» የመንታ መዕንተ ዋሎ። 12 ጴጥሮስ ህካን ጡጅ ምናደቢ «እስራኤል መነ! ከኔን ሚ ማለልቴነዮንተ? አሞ ገግኔ መቄን እንዶ ጡሚንተኔ ኩ መንቹ መረሙንተ አስኖምሀንገ ሚ ቀሴን አፌን ጡዴነዮንተ? 13 አብረሃም፥ ይሳቂ ያቆቢ አናከኔ ሰገዳ መገኑ አዕኖኦት ህግሴን ኣስቴንተነ ጵላጦስ ሂሮስተ ሀሾ ጃተ ጵላጦሴ ብሬን ካዴንተ ቤቱስ ዬሱሰ አብሾስ። 14 ጠሁ እኮዳ አዕኖኦት ጡማንቹሃ ሙጩሩሃ ግቤን መነ ሼ መንቹ ሂረሙንተዕኔ ኡጭቴንተ። 15 ሄቸ ቦቁተ ሽቴንተ። እኮዳ እሱ መገኑ ሬሆች ኬእሾስ። ህከን ጠህተኔ ነኦት ነቃሻከተ። 16 ዬሱስ ሱዕማን አመዕኒን ከ ጡዴነንተነ ደጌነንተ መንቹ እስ ሱዕሙ ቃርሴስ። እስ ዉዲን እኮ አመዕነቱንኩ ሆርዕኔ ብሬንን ተ ዊመተ ፈይመተ ኣሴስ። 17 ቴሱ ኢ ህዛከ! አዕኖኦቲ አወንሳንዕኔገን ደጉ ሆጊን አስቴንተገ ደጋም። 18 ጠሁ እኮዳ ዶዕረሞ ክርስቶሱ ሀወ ኣቀኖገ መገኑ ሆራንከ ህራጋን አፎን ዎነን ጠሃቄኢ ህትጉንተ ዊንሼእ። 19 - 20 አቼ መገን ብሬች ሃሮ ጡም ዶሉ ዋሉንተዕኔ ዎናንከ ብርስ ክዕኔኤ ዶዕሬ ዬሱስ ክርስቶሰ ሶሁንተዕኔኒ ባጢለዕኔ መገኑ አጉሩንታ ቢረ ይቴን ፈንቀልዬ። 21 መገኑ ዎዶችን አፍ ጡማኖ ህራጋንስ አፎን ጠሃቄ ጠሁ ዊመንቀጤች ዬሱሱ ሰማን ኤጌሩ ሀስሰኖሴየ። 22 ሙስን ‹ቀርቹ መገኑ ኤስ ኬእሾገንከ ህዛካችዕኔ ህራጋንቹ ኬእሰኖክዕኔ። እስ ኩለኖዕኔረ ሆረንከ መጮጭዬ። 23 ህኩ ህራጋንቹ ያኖረ መጮጩ ግቦ ፎልቹት ምናደቢች አነነ እክ በኣእ› ዬእ። 24 አሞ ሳሙኤሊች አፍ እሲች ዘኪን ዋልቶ ህራጋኑ ሆሩንኩ ተን ጄቾተኔ ጠሃቴእ። 25 አዕኖኦት መገኑ አብረሃሜ ‹ኪ ዜሪን ኡለ አል መኑ ሆሩንኩ ማሰአመኖ› ይ አባናካንተዕኔ ህድሩ ኣጎ ህድርነ ህራጋንተ ኦሱ። 26 መገኑ ክዕኔኤ ብርስን ቤቱስ ኬእሽ አነንከ አነንከ ሂልማችዕኔ ፈንቀሸን ማሰኡንተዕኔ ሶኬእ» ዬእ።
1 ጴጥሮሲ ዮሃንሲ ምናደቢ ጠሃተንየንን ቄሳከት፥ መገን ኬሰሞ ምን ገሻንቹሁ ሳዱቀቲ + እሶኦበ ዋልቶእ። 2 ህኩሩንኩ አብስ አሙዕረንቶእ። ዳፉንኩስ ህኩ ለሙንኩ ሶቀማኑ ምናደበ ሮስሰዮእኒ ዬሱሲን ደገሞ ሬሆች ኬኡ አዋጅተዮእኒ እኬ። 3 ህከኒ እሶኦተ አፍ እሩ አንከዕሬተኔ ሶዘንቀጤች ኡሱሮ ምኔን ኤጌርታገ አስቶእ። 4 ጠሁ እኮዳ ህተ ላገተ መጮጭቶሪች በትናሹ መኑ መገኑ አመዕንቶእ። አመዕንቶ ጎን ዎሉንት ኦንቴ ኩሜ ቀጠ እኮእ። 5 ለንክ በሬ ገስመ ገሻኑሰ፥ ኑባቡሁ ሴር ሮስሳኑሁ ዬሩሳሌም ከተማን ጠጵቶእ። 6 ህከ ጠጵዬ መን ሜሬሮን አቡ ቄስቹ ሃነ፥ ቀያፍ፥ ዮሃንሲ አለክሰንዴሪ አበ ቄስች እለሙ እኮ መኑ ሆሩንኩ ዮ እኬ። 7 እሶኦንት ጴጥሮሴኒ ዮሃንሴኒ ሜሬሮንተሰ ኡርስ «አዕኖኦት ከ ጠሀ መ መቄን እንዶ አዬ ሱዕሚን አቴነዮንተ ይት?» ጠዕምቶእ። 8 ህተ ጃተ ጴጥሮስ ጡማንቾ አያኒን ዊም «አዕኖኦት ምናደብ ገሻኑሁ ኑባቡሁ መጮጭዬ። 9 ነኦት ከበር መቶ ሺሀ መንቺ እኮስ ደናሜ ሁጄተኔ ‹ኩ መንቹ ሀትጎን ፈዬ?› የመም ጠዕመሞምደ 10 አዕኖኦት ሰቀልቴናን መገኑ ሬሆች ኬእሾ ናዝሬት ዬሱስ ክርስቶስ ሱዕሚን ኩ መንቹ ፈይ ብሬንተዕኔ ኡሬጉ ክዕኔኤ ሆሪንካ እስራኤል ምናደቢ ሆሪንካ ለሌኢ እሁን። 11 አዕኖኦት ግምበ ግምብቴነንተሩ ገዴንተ ክኑ ግምብ ቦቁተ እኮሁ እሶት። 12 ፈኡንኩ ዎሎን ሜጦኒ ዮበአ። ፈዕኑንተኔ መን ሜሬሮን ኡለ አሌን ሆራንን ዎሉ ኣሰሜ ሱዕሙ ዮበአ» ይቶሰ። 13 ጴጥሮሲ ዮሃንሲ እግማን ጠሃቶገ ጡዶ ጃተ መጣፈተ ደጉምቡ ጎኣ መነ እኮገ ደግ ማለልቶእ። ህከኒን እሶኦት ዬሱሲን በርገንት ዮረ እሁሰ ደጎእ። 14 ህኩ ፈዬ መንቹንኩ እሶኦን በርገም ኡሬኢ ጡድ እሶኦን ኡርጨሚ ይታ ጠሁ ሜጡሩ ዮሰበአ እኬ። 15 ጠሁ እኮዳ ህከን ያእ ሜሬሪች ፉልታገ አስት እስ-እሶኦንት 16 «ከ መነ መ አስኑን? ደገንቴ መላት እሶኦ አንጋን አሰንታጉ ዬሩሳሌማን ሄኣ ሆርባንን ለሌኢ እኮተኔ ካንዶተ ደንድናምበአ። 17 ጠሁ እኮዳ ምናደብባን አብሽ ሀራሩምቦገ ከ ዘኩ አዬሃ ከን ሱዕሚን ጠሃቱምቦገ ቃርስን አዘንዙን» የቀንት ኤረንቶእ። 18 ህከኒች ዘኪን እሶኦተ ገእት ዬሱስ ሱዕሚን ሆረን ጠሃቱምቦጋ ሮስሱምቦጋ አዘዞእ። 19 ጠሁ እኮዳ ጴጥሮሲ ዮሃንሲ ፈንቀሽት «መገኒ አዘዘሚች ክዕኔኤ አዘዘሙ መገን ብሬን ዎየኖ እኬደ ሀኖ አዕኖኦት ፍርድዬ። 20 ነኦትዕኑ መጮኖሚሃ ጡንዶሚሃ ጠሃቁ አጉሪ ደንድናምበአ» ይቶሰ። 21 እሶኦንት ጴጥሮሴኒ ዮሃንሴኒ ቀጠእሲሰኖ ጠሀ እሶኦ አሌን ሆጎተኔ ምናደበ ዋጅት ለንኪሃ ዋጅሲስ ገፈርቶሰ። ዳፉንኩስ መኑ ሆሩንኩ እኮ ጠህተኔ መገኑ ገለጠዮ እኬ። 22 ኩ ማለልሲሰኖ ዎቄን ፈዬ መንቹንኩ ቀለሞሀኒች ሾላዱመ ዎጌች አቤሴየ እኬ። 23 ጴጥሮሲ ዮሃንሲ ሂረንቶሀኒች ዘኪን ጃላከሰበ መርት ቄስ አወንሳኑሁ ኑባቡሁ ይቶሰ ጠሀ ሆረንከ ኩልቶሰ። 24 እሶኦንት ህከ ጠሀ መጮጭቶ ጃተ ዎዘነሰ ሜጡ አስት ላገሰ መገንበ ጦቀት «ሰማ፥ ኡለተ፥ በሃረሃ ኣዜንተሰ ዮረ ሆረረንካ ቆጭቶንት ቀርቾ መገኖ! 25 ጡማንቾ አያኒን ቤቷንክ ኒ አነ ዳዊቴ አፎን ‹መገኑ ደጉምቡ መኑ ሚ ቁንቁኖ? ምናደቡስ ካዕሉምቡ ጠሀ ሚ ሰውዬ? 26 ኡለ አል ዎማከት ኬኦእ። አሞ ገሻኑንኩ ሜጦማን ጠጵት መገንነ እስ ዶዕሬ ክርስቶስ አሌን ኬኦእ› ይት ጠሃቶንትየ መገኑ። 27 ገርንተ ዎሙ ሄሮድሲ ጳንጦስ ባድ ጵላጦሲ አይሁደ እኩምቦ መኒኒ እስራኤል መኒኒ በርገንት ከን ከተማን ጠጵት ዶዕርቶንት ጡማንቾ ቤቷንክ ዬሱስ አሌን ኬኦእ። 28 ህትጉንተ እኮ አት ብርስትን ገግክ መቄኒ ሀሲኒ ቅጠንስቶንቲ ዊንሺሃት። 29 ቴሱ ቀርቾ! ሸዕልቶኢ ጡድ። ካዕላኑክን ዋጅቱዕናች እግማን ላገክ ጠሃታገ አስሰ። 30 አሞ ጡማንቾ ቤትክ ዬሱስ ሱዕሚን ሞሳኑ ፈዩንታ መላቲ ማለሉቲ ሁጀተንቱንታ አንገክ ብድቀእ» ይተን መገኑ ኡጭቶእ። 31 እሶኦንት መገኑ ኡጭቶሀኒች ዘኪን ጠጵት ዮ እኬ መዕንት ሌንቄቅቶእ። ሆራንተሰን ጡማንቹ አያኑ ዊምየንሰ መገን ላገተ ዋጅቱዕናን እግማን ጠሃተዮ እኬ። 32 አመዕንቶሩ ሆሩንኩ ሜጦ ዎዘኒኒ ሜጦ ሰውቲኒ ሜጡ እክ አዪ «ኩን ኢሃ» ያኖሩ ዮበኢ ዮሰረ ሆረንከ ሜጡ አስት ሜጦማን ሄአዮ እኬ። 33 ሶቀማኑንኩ ቀርቾ ዬሱስ ሬሆች ኬኡ አበ መቄን ነቀሰዮ እኬ። አሞ ሆርሰ አሌንን አቡ ኣሰንቹ ዮ እኬ። 34 እሶኦ ሜሬሮንን ሀዌኢ ሜጡሁ ዮበአ። ዳፉንኩስ ኡለት ዮሲ እንዶ ምኑ ዮሲ ሆሩንኩ ህረን ህረሞስ ግዘ ዋሸዮ እኬ። 35 ህከ ግዘንከ ኤበን ሶቀማን ብሬን አፉሽተንየን አዬሃ ሀስሰኖስ ቀጠ ቤሄነን ኣሴነዮመ እኬ። 36 «ቆጵሮሰ» ዬኖ ባድ መቱ መንቹ ሌዌ ዉድቢ «ዮሴፈ» + ዬኖ ዮ እኬ። እሱንከ ሶቀማኑ «ባርነባሴ» ይቶእ። ህትጉንተ ዩንኩ «ቃርመ ቤቶ» እኬ። 37 ህኩ መንቹንኩ እረስ ህር ግዘስ ሶቀማን ብሬን አፉሼእ።
1 መቱ «ሀናንየ» ዬኖ መንቹ «ሰጲረ» ዬኖ ምኔማንተስን በርገም ኡለስ ህሮ። 2 ጠሁ እኮዳ ሜንትቹስ ደገንየን ኡለስ ህሮ ግዚች ፈእሽኬእ ካጵስ ቀጠ መስ ሶቀማን ብሬን አፉሼእ። 3 ጴጥሮስን «ሀናንየ! ጡማንቾ አያን አሌን ቆጰንቱንታ ኡለክ ህርቶንት ግዚች ፈእሱንታ ሼጣንቹ ዎዘናንተክ ሚ ዊሞ? 4 ህርቱዕናች ብሬ ኪሃበእኬንዶ? ህርቶንትስሀኒች ዘኪኒ ኪ አንጋኔትበእንዶ? ከ ጠሀ ሚ ዎዘናንተክ ሰውት? አት ቆጰንቶንቲ መናን እሁዕነ መገኖኔት» ዬስ። 5 - 6 ሀናንየን ህተ ላገተ መጮጬ ጃንተ ኡብ ሬሄእ። ሀርድንት ጦቅት ከፈንትኬእ እይት ፉሽት ሞጎስ። ህከ ጠሀ መጮጭቶሩ ሆሩንኩ አብስ ዋጅቶእ። 7 ሰሱ ሳተ እካ ቀጠ ጄቾች ዘኪን እኮ ጠሀ ደጉዕነን ሜንትቹስ ዋልት ኣጎእ። 8 ጴጥሮስን እሴተ «ሀኖ ኩሌኤ፤ ኡለዕኔ ህርቴንታ ከን ቀጠ ግዚሃትንዶ?» ዬሴ። እሴን «፤ ከን ቀጢሃንት ህኖሚ» ይቶእ። 9 ጠሁ እኮዳ ጴጥሮስ «ቀርች ጡማንቹ አያነ ኬንቴኖተ ሚ ኢተንቴን? ህኩዕኒን ምኔነክ ሞጎ መን ሎከት ጎጨኔት። ኬሲ ፉሽት ሞጋኬ» ዬሴ። 10 ህተ ጃንተ ሎከስባን ኡብ ሬቶእ። ሀርድንት ኣጎ ጃተ ሬት ፈዴኢ ጡዶእ። እሶኦንት እይት ፉሽት ምኔንሴ ሺናን ሞጎሴ። 11 ህከኒ አመዕናን ማበሩ ሆሩንኩ ህከ ጠሀ መጮጬ መኑ ሆሩንኩ አብሽ ዋጄእ። 12 ሶቀማን አንጋንን ሆለመት መላቲ ማለሉቲ መን ሜሬሮን ሁጀተንተዮ እኬ። ሆሩንኩሰ ሜጦ ዎዘኒን እክ «ሰለሞን መረመኖ ዎቃ» የመንታ መዕኔን ጠጵተዮ እኬ። 13 ዎሉ ሜጡ መንቹሁ እሶኦን በርገሞተ እግምበአ። እኮዳ ምናደቡ አብሰዮሰ እኬ። 14 እሁን በጋን ቀርቾን አመዕንቶ ጎንነ ሜንት ዎሉት ኤጄች አብስ በተአን መርቶእ። 15 ሶቀማኑ አስተዮእኬሪች ኬኦ ጴጥሮስ ህገንየን ዎሉ ፈእየን ሀሌቹሲ መ-መቶ መን አሌን ኢልቱንተ መኑ ሞሳኑ ዎቃ ፉሸን መዕነ አሌኒ ሰሌን አሌኒ ኦሲሰዮ እኬ። 16 አሞ ዬሩሳሌም ሄጌጎን ዮ ከተማካች ሞሳኑሃ ሂሉ አያኑ አፍየንሰ ሀውታራ ዋሽተን በትናሸ መነ ጠጵአተዮ እኬ። እሶኦንት ሆሩንኩ ፈይተዮ እኬ። 17 ጠሁ እኮዳ አቡ ቄስቹሁ እሲን በርገንት ዮ ሳዱቅ ዉድ መኑሁ ቂንሽት ኡርጨንቶተ ኬኦእ። 18 ሶቀማኑንከ አፍ ምናደብ ኡሱሮ ምኔን ኣግሶእ። 19 - 20 ጠሁ እኮዳ ቀርች ሰሜ ሶቀማንቹ ኡሱሮ ምን ኡሩተ ፈን እሶኦተ ሀደተ ፉሽኬእ «መሬ። መገን ኬሰሞ ምኔን ኡርቴን ምናደቢ ተ ሄቸ ላገተ ሆረንተ ኩልዬ» ዬሰ። 21 ህተ ላገተ መጮጭቶ ጃተ ገስመንከ መገን ኬሰሞ ምን ኣግ ሮስሰዮ እኬ። ጠሁ እኮዳ አቡ ቄስቹሁ እሲን በርገንት ዮሩ ዋልት ያአሃ እስራኤል ኑባቡሃ ሆረንከ ሜጦማን ገእት ኡሱረንቶረ ዋሼኑንተ ኡሱሮ ምን ሶኮእ። 22 - 23 ሶሀንቶ ዘበኑንኩ ዋልት ኡሱሮ ምኔን ደግምበሰ። እሶኦንት ፈንቀልት መርት «ኡሱሮ ምኑ ቃረገ ጡፈምየን ቆረባኑንኩ ኡሮ ኡርቴረ ደንጎም። ጠሁ እኮዳ ፈኖም ጃተ ኣዜንተስ ሜጡሁ ዮበአ» ይቶእ። 24 መገን ኬሰሞ ምን ገሻንቹሁ ቄሳከ አወንሳኑሁ ህካን መጮጭቶ ጃተ «ደንግምበአ። ኩን መሃን?» ይት ማለልት እሶኦተኔ መለንቶእ። 25 መቱ መንቹ ዋልኬእ «ህኩዕኒን፥ አዕኖኦት ኡሱሮ ምን ኣግሴንተ መኑ መገን ኬሰሞ ምኔን ኡርት መነ ሮስሰዮእ» ይ ኩሎሰ። 26 ህተ ጃተ ገሻንቹ ዘበኒን በርገም መር ዋሼሰ። ጠሁ እኮዳ መኑ ክኒን ቀሱምቦሰገ ዋጅቶተኔ መቄን ዋሽምበሰ። 27 ዋሽቶሰሀኒች ዘኪን ያእ ብሬን ኡርሶሰ። አቡ ቄስቹንኩ 28 «ዬሱስ ሱዕሚን ሮስሴኑምቦገ ቃርስን አዘንዝምበክዕኔንዶ? ህኩዕኒን፥ ዬሩሳሌም ከተመ ሆረንከ ሮሻንተዕኔ ዊንሽቴንተ። አሞ ከን መንች ቄግንከ ኒ አሌን ኤቤኖተ ሀሴነዮንተ» ይ ጠዕሜሰ። 29 ጠሁ እኮዳ ጴጥሮሲ ሶቀማኑሁ ፈንቀሽት «መኒ አዘዘሚች አብንስ መገኒ አዘዘሙ ሀስሰኖኔ። 30 አዕኖኦት ሀቃን ሰቀልቴን ሽቴንተ ዬሱሰ አናከኔ መገኑ ሬሆች ኬእሼእ። 31 እሱንከ መገኑ እስራኤል መኑ ቢረ ይት ባጢል አጉረሙ ደቅቱንተ ቦቁታ ፈእሳንቹሃ አስ መኬስ አንገ ዉዲን ጦቅ ጦቅ አሴስ። 32 ነኦንት ከን ጠሂ ነቃሸተ። አሞ መገኑ አዘዘንታስሪ ሆሪንከ ኣሴ ጡማንቹ አያኑሁ ነቃሻ» ይቶእ። 33 እሶኦት ህካን መጮጭቶ ጃተ አብስ አሙዕረንት ሽቶሰተ ሀሶእ። 34 ጠሁ እኮዳ መኑ ሆሩንኩ አብሰኖስነ መገን ሴረ ሮስሰኖ «ገማልየ» ዬኖ ፋሪስቹ + ያእ ሜሬሮን ኡር ሶቀማኑ ቀሆ ጄቾ ሺነ ለቄኖገ አዘጆ። 35 እስን «እስራኤል መነ! ከ መነ መ አስቴነንተንዶ ገገዕኔ ቆረጵዬ። 36 ዳፉንኩስ ከኒች ብሬ ‹ቴዎዳሴ› ዬኖ መንቹ ‹አን አባ› ያን ኬኤ እኬ። ሾልተ ጥብተ እሀኖ ቀጡ መኑንኩ እሲን ሜጡ እኮእ። ጠሁ እኮዳ እሱሃ ሼመስ። አሞ እሱ አወንቶሩ ሆሩንኩ ጠለ ብንት በኦእ። 37 ህከኒች ዘኪን መነ ዎልሴመ ዶለ ገሊል ባድ ‹ይሁደ› ዬኖ መንቹ ኬኦ። ሆለመ መነንከ ፈንጋከተ አስኬእ አወንታስገ አሴእ። እሲ በኦ። አወንቶስሩ ሆሩንኩ ብንቶእ። 38 ህከኒ ቴሱ ያንክዕኔ ከን መኒች አነነ እክዬ። አጉርዬሰን። ኩ ሰውቱ እንዶ ት ሁጅት መኒች እኬደ በኣእ። 39 ጠሁ እኮዳ ኩ ጠሁንኩመ መገኒች እኬደ በእሴኖሰተ ደንድቴነንተበአ። ህከኒችሲ አበ ኩ ጠሁ መገኒን በአሙ እሆኮዕኔ» ዬሰ። 40 ህከ መንች ሰዘነተ መጮጭቶእ። ሶቀማኑንከ እሶኦበ ገእት ኦልቶሰሀኒች ዘኪን ዬሱስ ሱዕሚን ለንኪ ጠሃቱምቦገ አዘዝ ሂርቶሰ። 41 እሶኦንት እስ ሱዕምተኔ ገደሙ ሀስሰኖሰረ እሂንተሰ ያእቢች በጅቀንተን ፉልቶእ። 42 ህከኒ በሪን በሪን መገን ኬሰሞ ምኔኒ ምኔንተሳ ዬሱሱ ዶዕረሞ ክርስቶሰ እኮገ ሮስሱሃ ሰበኩሃ ሆረን አጉርትምበአ እኬ።
1 ቀሆ ጄቾች ዘኪን አመዕናን ዎሉት በተአን መርተንየን ግሪክሳን + ጠሃታ አይሁድ-መኑ ይሁድ ባዶን ሄኣ አይሁድ-መን አሌን ጉንጉንቶእ። ዳፉንኩስ በሪን በሪን ቤሄኖ እቸተ ምኔኑሰ ሬሄ እሶኦ ዉድ ሜንቲ ጠበኤን ኣሴንምበአ እኬ። 2 ህከኒ ቶነ ለሙንኩ ሶቀማኑ ሆረንከ አመዕናኑ ጠጰት «እቸተ ቤንኮተ ይን መገን ላገተ ሮስሱ አጉሩ ሀስሰኗ ጠሀበአ። 3 ህከኒ ኒ ህዛከ! መኑ ‹በሬደተ› ያኖሰ ለመለ መንቹ ጡማንቹ አያኑ ዊሜሰረ ሜሬሪችዕኔ ቆረ መነ ዶዕርዬ። ከን ሁጄንከ ዳኖንስናንሰ። 4 ጠሁ እኮዳ ነኦት መገኑ ኡጮኒ ላገስ ሮስሶኒ ቃናም» ይቶእ። 5 ህኩ ጠሁንኩ ሆረንከሰ በጅግሾ። ህከኒች ዘኪን አመዕነቲኒ ጡማንቾ አያኒኒ ዊመ እኬ እስጥፋኖሴ፥ ፍልጶሴ፥ ጵሮኮሮሴ፥ ንካኖሬ፥ ጥሞኔ፥ ጰርሜናሴኒ አይሁዶማን ዶረሞ አንጦክ ባድ መንቹ ንቆላሴኒ ዶዕርቶእ። 6 ህከረንከ ሶቀማን ብሬን ኡርሶሰ። ሶቀማኑንኩ መገኑ ኡጭቶሀኒች ዘኪን አንገሰ አሌንተሰ ኡጅቶእ። 7 አሞ መገን ላገንት ሀራርተን መርቶእ። ዬሩሳሌማንን አወናን ዎሉት አብስ በተአን መርቶእ። ህትጉንተ አይሁድ ቄሳካች ሆለሙሰ ዬሱሳን አመዕንት ሮሻሀንስ አዘዘንቶእ። 8 እስጥፋኖስን ኣሰንቺኒ መቄኒ ዊም ምናደብ ሜሬሮን ማለሉታ አበተ መላታ አሰዮ እኬ። 9 ህተ ጄቹተ «ዎማንመተ ፉሎ መን ጠጵት ምን» ዬኖ አይሁድ ጠጵት ምን መኑ፥ ቃሬንነ አለክሰንደር ከተም መኑሁ ክልቅይነ እስይ ባድ መኑሁ እስጥፋኖሴን ኦደንተዮ እኬ። 10 ጠሁ እኮዳ እስጥፋኖስ ጠሃቀዮ እኬ መሌሱሃ ጡማንቹ አያነሃ ኡርጨንቶተ ደንድትምበአ። 11 ህተ ጃተ «ኩ መንቹ ሙሴነ መገን አሌን ቦሮዕረንች ላገተ ጠሃቀንየን መጮጭኔም» ይታ መነ ማጥ ኬእሶእ። 12 ህትጎን ምናደበ፥ ኑባቡሃ ሴር ሮስሳኑሃ ኬእሶእ። እስጥፋኖሴበ መርት አፍ ያእበ ህንጨቶስ። 13 እሶኦንት «ኩ መንቹ ተን መገኒ አነነ እኮ መዕኔኒ መገን ሴር አሌኒ ቦሮር ላገተ ጠሃቁ ሆረን አጉር ከሰበአ። 14 ‹ኩ ናዝሬት ዬሱሱ ተ መዕንተ ዝረኖ። ሙስን ኣሴኔ ዎገ ዶረኖ› ያንየን መጮኔም» ይታ ቆጰን ነቃሸተ ኬእሶእ። 15 ህተ ጄቹተ ያኣን አፉዕልቶሩ ሆሩንኩ እስጥፋኖሴ ቀስ አፍ ጡደንየን እሌስ ዉዱ መገን ሰሜ ሶቀማን እሌ ዉዱ አጉጅ ጫክ ጡደሞሰ።
1 አቡ ቄስቹንኩ እስጥፋኖሴ «ኩ የመሞ ጠሁ ገርተንዶ?» ይ ጠዕሜስ። 2 እስጥፋኖስን «ኢ ህዛከቲ አናከቲ! አን ያምረ መጮጭዬ፤ አኑኔ አብረሃም ካራን ባዶን ሄኢ መሩዕናች ብሬን ሞሶጶታም ባዶን ሄኦገንከ አብን መገኑ እሲ ጡደምኬእ 3 ‹ባዲችኪ እለሚችኪ አነነ እክ ፉልት አን ጡድሳንኬ ባዱ ኦሮቅ› ዬስ። 4 ህተ ጃተ ከላድ ባዲች ፉል ‹ካራነ› ዬኖባን አፉዕሌእ። አኑስ ሬሄሀኒች ዘኪን ህከምቢች ከበር አዕኖኦት ሄኤነንተ ከ ባዱ መገኑ ዋሼስ። 5 ከን ባዶንን መትተ ታቹተ እካ ቀጠተ ኡለታ እረስ አስ ኣስምበስ። መሃ አብረሃም እለት ዮስበኢ እኮዳ እሲሃ እሲች ዘኪን ፍካኒሀንሲ እረ አስ ኣሶተ ተሳ ኣሴስ። 6 መገኑንኩ አብረሃሜ ፍካኑ መን ባዶን ኣግቹ እክየን አግዘተ አሴን ሾሌ ጥቤ ዎጌ ጂቼኖሰገ ኩሎስ። 7 አሞ መገኑ ‹ህከ አግዘገ ጠቅታሰ ምናደብ አሌን አን ፍርዳም። ህከኒች ዘኪን ህከን ባዲች ፉልታእ። ተን መዕኔንን ኤሳ ሰገዳእ› ዬእ። 8 ኑጉሰ ህድሩንከ መላተ እሁንተ ኣሴስ። አብረሃምን ይሳቄ እል ሄዜትቅ በር ኑጉሴስ። ይሳቅን ያቆቤ። ያቆብን ቶነ ለሙንከ አይሁድ-መን አበናከተ እኮ ኦሱስ ኑጉሴእ። 9 እሶኦንት ህዞሰ ዮሴፈ ቂንሽት ግብጥ ባዱ ህርቶስ። ጠሁ እኮዳ መገኑ እሲን በርገም ዮ እኬ። 10 ህከኒ ሀዊችስ ሆሪችን ፉሽኬእ ግብጥ ባድ ዎም ብሬን ህበሃ መሌሱሃ ኣሴስ። ዎሙንኩ ግብጥ ባዶኒ ምኔንተሲ ዳኖንሴስ። 11 ህተ ጄቹተ ግብጥ ባዶኒ ከነኣን + ባዶኒ አቡ ጎሩሁ ሀዉሁ እኮ። አናከንትኔ እቸተ ደቅትምበአ። 12 ጠሁ እኮዳ ያቆብ ግብጥ ባዶን ውጠት ዮገ መጮጬ ጃተ አናከኔ ዎነ ኮደተ ሶኮ። 13 ለንኪ ፈንቀልት ግብጥ ባዱ መርቶ ጃተ ዮሴፍ ገገስ ህዛካሀንስ ለሊሾ። እለሙስን ግብጥ ባድ ዎምባን ደገሞ። 14 ህከኒች ዘኪን ዮሴፍ አነስ ያቆቤኒ እለሙሲ ሶክ ገእሲሾ። እለሙስ ሆሩንኩ ለመላነ ኦንቶ መነ እኬ። 15 ያቆብን ግብጥ ባዱ ድሬእ። እሲ አናከኔ ህከኔ ሬቶእ። 16 ሬሸሰን ‹ሴኬመ› ዬኖበ ፈንቀሽት ኦሮስ አብረሃም ሴኬም ከተማን ኤሞሬ ኦሶች ግዚንተስ ህዕሬ ሞጎን ሞጎእ። 17 ጠሁ እኮዳ መገኑ አብረሃሜ ኣሴ ተሳ ዊንሸኖ ጄቹት ህንጭተንየን ምናደቡኔ ግብጥ ባዶን ሌእ በተአን መሮ። 18 ህተ ጃተ ዮሴፈ ደጉምቡ ዎሉ ዎሙ ግብጥ ባዶን ዎሞዕሜእ። 19 ሃሮ ዎሙንኩ ኒ ዉድ መን አሌን ሾክ ጪለተ ሄእሱምቦገ ሀደ ኡጅታገ አስ አናከኔ ሀውሾ። 20 ህተ ጄቹተ ሙስ እለሞ። እስን መገን ብሬን ደናሟ ጪለ እኬ። አንስ ምኔንን ሰሱ አገነ ሌኦ። 21 እሱንከ ኡጄመ ጃተ ፈርኦኔ + ቤቱት ኬእስ ቤትሴገ አስት ሌእሶስ። 22 ሙስን ግብጥ ባድ ቆርመተ ሆረንተ ሮሾ። እስን ጠሂኒ ሁጄኒ ቃረ እኮ። 23 ጠሁ እኮዳ ሾላዱመ ዎጋ እኮስ ጃተ ህዛከስ እስራኤል ኦሱተ ጡዶተ ዎዘናንተስ ሰውዬእ። 24 እስ ዉድ መኒችን መቱ ግብጥ ባድ መንቹ ጌነንየንስ ጡጅ ካዕሌስ። ህከን ጌነሞ መንቺ ካዕል ግብጥ ባድ መንቹ ዎቀር ባደ ፉሎ። 25 ህዛከንትስ እስ አንጋን መገኑ ፈኡ ኣሰኖሰገ ቆርስታኢ አጉደዮስ እኬ። ጠሁ እኮዳ እሶኦት ቆርስትምበአ። 26 ለንክ በርንከ እስራኤል ኦሶች ለሙ ኦዕለንተንየን ጡጆ። ሆቆሰተ ሀሽ ‹መነ! አዕኖኦትዕኑ ህዛከተ። ሚ አዕን-አዕኖኦንት ጌዕነቀንቴነዮንተ?› ዬሰ። 27 ህኩ አጉደስ ጌነዮእኬ መንቹንኩ ‹ኒ አሌን ኬስ ገሻንቹሃ ፍርዳንቹሃ እኩንተ ዳኖንሴሄ አዬት? 28 እንዶ ቤሬ ግብጥ ባድ መንቹ ሽቶንትገንከ ሽቶኤተ ሀሰዮንትንዶ?› ይ ጎምቤስ። 29 ሙስን ህካን መጮጬ ጃተ ግብጥ ባዲች ሁን ሚድያም ባዶን ኣግቹ እክ ሄኦ። ህከኔን ለምተ ጎን ኦሱተ እሎ። 30 ህከኔን ሾላዱሙ ዎጎ ህጎስሀኒች ዘኪን መገን ሰሜ ሶቀማንቹ ‹ሲነ› + ዬኖ ዱን ኡዱመኣን ሀቅ ዱብ ሜሬሮን ጊረ ለበን ኣዜን ጡደሞስ። 31 ሙስን ህካን ጡጆ ጃተ ጡደሞስራን ማለሎ። እስን ጡዶተ ሺነ ህንጭያንየን ቀርቾ መገን ላገት 32 ‹አን አናከክየ መገኑ። አን አብረሃሜ፥ ይሳቂሃ ያቆቤሃ መገኗ› ይተንየን መጮጬእ። ሙስን ዋጅ ሁጮ፤ ጡዶተን እግምበአ። 33 አሞ ‹አት ኡርቶንት መዕንት አነነ እኬኢተ እኮተኔ ሎካችክ ጫመ ፉሽ። 34 ገርንተ ግብጥ ባዶን ዮ ምናደብኤ ሀወ ጡጅ ቅትኑንከሰን መጮጭ ፈእሶሰተ ድሬም። ቴሱ አት ከበ ዋል። አን ኬስ ግብጥ ባዱ ሶሃንኬ› ይታ መገን ላገት እስበ ዋልቶእ። 35 ‹ገሻንቹሃ ፍርዳንቹሃ እኩንተ ዳኖንሴሄ አዬት?› ይት ካዶስ ህከ ሙሴ ህከን ዱብ ኣዜን ጡደሞስ መገን ሰሜ ሶቀማንች ዉዲን መገኑ ገሻንቹሃ ፈእሳንቹሃ አስ ሶኮስ። 36 ህኩ ሙስን ግብጥ ባዶን፥ ቢሸ በሃራኒ ሾላዱመ ዎጋ ኡለ ኡዱመኣኒ ማለሉታ መላታ ሁጀተን ግብጥ ባዲች አወንስ ፉሼሰ። 37 ህኩ ሙስ እስራኤል ኦሶ ‹መገኑ ኤስ ኬእሾገንከ ህዛካችዕኔ ህራጋንቹ ኬእሰኖክዕኔ። እሲች መጮጭዬ› ዬሃ። 38 ህኩ እስን ሲን ዱን አሌን ጠሃቄ መገን ሰሜ ሶቀማንቺኒ አናካንተኔን ኡለ ኡዱመኣን ማበር ሜሬሮኒ በርገም ዮሃ። ኔሳ ኣሶተ ሄቸተ ኣስታ ሴር ላገተ ኣቄእ። 39 እሲንከ አናከኔ አዘዘንቶተ ኢትትምበአ። ጠሁ እኮዳ ጎምብቶስ። ዎዘናንተሰን ግብጥ ባዱ ፈንቀልቶተ ሀሶእ። 40 ህከኒንከ እሶኦት ኣሮኔ + ‹ኩ ኔስ ግብጥ ባዲች አወንስ ፉሼኔ ሙስ መ እኮንዶ ደንግምበአ። ብሬንተኔ መረንተን አወንስታ መገነተ ኔሳ መክስኔ› ይቶእ። 41 ህከ ጄቹንተ ዌእቹ መክሶእ። ህከን ቆጰን መገኒንከ ክትመ ክትንቶእ። ህተን አንገሰ ሁጄንን በጅቀንቶእ። 42 ጠሁ እኮዳ መገኑ እሶኦች አነነ እኮ። አሪቾ፥ አገንቺሃ ቤዜሃ ሰገዱንተ ህግሽ ኣሴሰ። ህኩን እኮንኩ ህራጋን መጣፋን ‹አዕኖኦት እስራኤል ምን መነ! ሾላዱመ ዎጋ ኡለ ኡዱመኣን ዱሌመ ግዘሃ ክትመሃ ህንጨቴንተኤንዶ? 43 ሰገዴኖሰተ መክሴንተ ምስለተ እሶኦንት ‹ሞሎከ› ዬኖ መገንዕኔ ዱንካነሃ ‹ሬፋነ› ዬኖ መገንዕኔ ቤዜቾ ምስለሃ እይቴን መረንቴንተ። አንን ‹ባብሎነ› + ዬኖ ባዲች ካጵ ዉዱ ቄርሳንክዕኔ› የመም ጣፈሞተኔሃት። 44 አበናካሀኔ ኡለ ኡዱመኣን መገኑ ምናደቢንተስ ደቀመኖ ዱንካኑ + ዮሰ እኬ። ህኩ ዱንካኑንኩ መገኑ ሙሴ ኩሎስነ ጡድሾስጊን መኬሃ እኬ። 45 አበናከንትኔ ህከ ዱንካነ ኮዳ ኣቅት መገኑ ብሬችሰ ፉሼ አይሁደ እኩምቦ መን ባዱ ኣጎ ጃተ እያሶንን + በርገንት ኣግሶእ። ዳዊቴ ዶሉ ኢለንቀጤችን ህከኔ ሄኦእ። 46 ዳዊትን መገን ብሬን አብን ደቅ ያቆቤ ፍካን ሜሬሮን መገኒ ገልቴ ምን እሀኖ ምን ምኖተ መገኑ ኡጬእ። 47 ጠሁ እኮዳ መገኒ ምን ምኖ ሰለሞኔት። 48 እኮዳ አቡ መገኑ መን አንገት ሁጀቶ ምኔን ሄአኖበአ። ካንን ህራጋንቹ ጠሃቀን 49 ‹መገኑ ሰሞ ዎሞመእየ በርጩመ። ኡለንት ሎከኤ ሃንታሃበ። ኤሳ ሀትጎነ ምን ምንቴነዕኔ? እንዶ አን ፎሎጫንስ መዕንት ሀትጋምተን? 50 ከ ሆረረንከ አንገኤ ሁጀቴሃረበእንዶ? ዬሃ› ይ ጣፏ ጠሀ። 51 አዕኖኦት ዬመረ ሀዕይቴኑምቡሩ! ዎዘነሃ ዱዴንተሩ! መጨዕኔ ኣቅቱምቡሩ! አናከዕኔ ጡማንቹ አያነ ኡርጨንቶገንከ አዕኖኦቲ ኡርጨንቴነዮንተ። 52 ህራጋኒች አናከዕኔ ሸርቱምቡ ህራጋንቹ አዬት? ጡማንች ዋሉ ብርስት ኩልቶረንከ ሽቴንተ። ህትጉንተ ህከ ጡማንቹ ዬሱሰንከ ህግሴን ኣሲን ሽቴንተስ። 53 አሞ መገን ሰሜ ሶቀማን ዉዲን መገን ሴረ ኣቅቴንተ እኬ። እኮዳ ቆረቤንምበአ» ዬሰ። 54 ያኦ መኑንኩ ህካን መጮጭቶ ጃተ አብስ አሙዕረንት እስጥፋኖሴ አሌን እንቁተ ኢጦእ። 55 ጠሁ እኮዳ እስጥፋኖስ ጡማንቹ አያኑ ዊምየንስ ሰማ ለቅ ቀሽ አፍ ጡደን መገን አብንሃ መገን መኬ ዉዲን ኡሬ ዬሱሰሃ ጡጅኬእ 56 «ህኩዕኒን፥ ሰሞ ፈነምየን መንች ቤቱ መገን መኬ አንገ ዉዲን ኡሬኢ ጡደዮም» ዬእ። 57 ጠሁ እኮዳ እሶኦት አበ ላጋን ያርተን መጨሰ እፍስ ሜጡ እክ አሌንተስ ደጉዶእ። 58 ከተሚች ኤተሩንከ ፉሽት ክኒን ቀሶስ። ነቃሸተ እክ ቀሶሩንኩ ኦድሸሰ «ሰዉሌ» + ዬኖ መቶ ሀርድች ሎከባን አፉሽቶእ። 59 እሶኦንት ክኒን ቀሰንየንስን እስጥፋኖስ «ቀርቾ ዬሱሰ! ፎልኤ ኣቅ» ይ ኡጬእ። 60 እስን ጉሉጵ «ቀርቾ! ከ ባጢለ ዎልሶትሰ» ያን አበ ላጋን ያሮ። ህካንን ይኬእ ሬሄእ።
1 ሰዉል እስጥፋኖሴ ሬሆን ኢተሜ እኬ። ህከ በርንከ ዬሩሳሌመ ዮ አመዕናን ማበር አሌን አቡ ሸረንቹ እኮ። ህተ ጄቹተ ሶቀማኒች በጋን አመዕናኑ ሆሩንኩ ይሁድ ባዱሃ ሰማር ባዱሃ ብንቶእ። 2 አመዕነቶን ቃርቶ መኑ እስጥፋኖሴ ሞግኬእ ቃረገ ኦኦእ። 3 ጠሁ እኮዳ ሰዉል አመዕናኑ በእሶተ አጰመዮ እኬ። አሞ ምኒች ምን ኣገን አመዕንቶ ሜንቱሃ ጎነሃ ጎሾሽ ፉሸን ኡሱሮ ምን ኣግሰዮሰ እኬ። 4 ህኩ ብንቶሩንኩ ምሽራች ላገተ ዘህተን ሰበኮእ። 5 ፍልጶስን ሰማር ባድ ከተማች መቱ ከተመ መር ክርስቶስተኔ አዋጀዮሰ እኬ። 6 ምናደቡንኩ ፍልጶስ ኩለኖረ መጮቶ ጃታ ሁጀተዮ እኬ መላተ ጡዶ ጃታ ዎዘነሰ ሜጡ አስት መጮጭቶእ። 7 ሂሉ አያኑ ሆለመ መኒች አበ ላጋን ያረን ፉለዮ እኬ። አሞ ሆለመት ሺሃከቲ ድናከቲ ፈይቶእ። 8 ህከንተኔ ህከን ከተማን አበት በጅጉት እኮእ። 9 ጠሁ እኮዳ ህከን ከተማን ሄአኖ መቱ «ስሞኔ» ዬኖ መንቹ ዮ እኬ። እስን «አን አባ» ያን አስመተ ሁጀተንኬእ ሰማር ባድ መነ ማለልሲሰዮሃ እኬ። 10 ከተምስ መኑንኩ አቢች ቀሁ ኢለንቀጤች ህከ መንቹ «ኩ መንቹ ‹አባ› የመመኖ መገኔየ መቆ» ይተን ሆሩንኩ መጮጭተዮሴየ እኬ። 11 ሆለመ ዶሊች አፍ አስመቲንተስ ማለልሲሾሰተኔ ያኖረ መጮጭተዮስ እኬ። 12 ጠሁ እኮዳ ፍልጶስ መገን ዎሞመተኔሃ ዬሱስ ክርስቶስተኔሃ ሰበኮሰ ምሽራች ላገተ አመዕንቶሀኒች ዘኪን ጎኑሁ ሜንቱሁ ጠመቀንቶእ። 13 አሞ ስሞን ገጉንኩስ አመዕን ጠመቀሞ። እስን ፍልጶሴን ሜጡ እኮ። አሞ ፍልጶስ ሁጀተኖ መላታ አበተ ማለሉታ ጡደን ማለለዮ እኬ። 14 ህተ ጃተ ዬሩሳሌመ ዮ ሶቀማኑ ሰማር ባድ መኑ መገን ላገተ ኣቅቶገ መጮጭት ጴጥሮሴኒ ዮሃንሴኒ እሶኦበ ሶኮእ። 15 ጴጥሮሲ ዮሃንሲ ህከበ ኢልቶ ጃተ ህኩ መኑ ጡማንቹ አያነ ኣቅታገ መገኑ ኡጭቶሰ። 16 ዳፉንኩስ እሶኦት ሆሩንኩ ቀርቾ ዬሱስ ሱዕሚን ጠሊን ጠመቀንቴ በጋን እሶኦች ሜጥሰ አሌኒ ጡማንቹ አያኑ ድርምበአ እኬ። 17 ህከኒ ጴጥሮሲ ዮሃንሲ እሶኦ አሌን አንገሰ ኡጅቶእ። ህኩ መኑንኩ ጡማንቹ አያነ ኣቅቶእ። 18 ስሞንን ሶቀማኑ አንገሰ መን አሌን ኡጂን ጡማንቹ አያነ ኣስታገ ጡጆ ጃተ ግዘ እሶኦ ኤብ 19 «አንገኤ አሌንተስ ኡጃሚ ሆሩንኩ ጡማንቹ አያነ ኣቁንተ ኤሳሃ ከ መቆ ኣስዬኤ» ዬሰ። 20 ጠሁ እኮዳ ጴጥሮስ «መገን ኣሰንቸ ግዚን ደቅቶተ ሰውቶንትተኔ ብሩክ ኬሳንን በርገም በኡን። 21 ዎዘኑክን መገን ብሬን ጠቤነ እሁምቡተኔ ከን ጠሃን ኬሳ ቤቀንቹ እንዶ ሳሙ ዮኬበአ። 22 አቼ ተን ሂለ ሁጄንተክ ጋብት ቢረ ይ። አይ ደጎ ዎዘንክ ሰውተ አጉረኖሄደ መገኑ ኡጭ። 23 ዳፉንኩስ አት አብስ ሂለ ቂንሻኒ ባጢል ኡሱሮኒ ዮንትጉ ጡደመዮኤ» ዬስ። 24 ስሞንን «ቴሱ ጠሃቴንተሪች ሜጡሩ አሌንተኤ ኢሉምቦገ አዕኖኦንት መገኑ ኡጭዬኤ» ይ ፈንቀሼእ 25 ጴጥሮሲ ዮሃንሲ ቀርች ላገተ ነቀሶሀኒቺ ኩልቶሀኒቺ ዘኪን ሆለመ ሰማር ባዶን ዮ መን ኦላካን ምሽራች ላገተ ሰበከን ዬሩሳሌመ ፈንቀልቶእ። 26 መገን ሰሜ ሶቀማንቹ ፍልጶሴ «ጦቅት ዬሩሳሌሚች ጋዘ መሰኖ ዎቃ ዎሮ ዉዱ መር» ዬስ። ህኩ ዎቆንኩ ኡለ ኡዱመኣን ዮሃ ዎቃ እኬ። 27 እስን ህከምቢች ኬእ መሮ። «ህንዳኬ» የመንታ ቶጴ ባድ ዎማ ዮሴ ግዝ አሌን ሆራንን ሹመሃ ገሻንቹሃ እኬ መቱ ሙሬሰኡ ቶጴ ባድ መንቹ መገኒ ሰገዶተ ዬሩሳሌመ መሬ እኬ። 28 እስን ፈንቀል ኦሮቀን ጋሬንተስ አፉዕል ህራጋንቾ እስያሴ መጣፈ አነበበዮ እኬ። 29 ጡማንቹ አያኑንኩ ፍልጶሴ «ህተን ጋሬበ ህንጭት ደቀም» ዬስ። 30 ፍልጶስን ህከበ ደጉጅ መር ህኩ ቶጵቹ ህራጋንቾ እስያሴ መጣፈ አነበበንየን መጮጭ «አነበባንቲ ቆርስተዮንትንዶ?» ዬስ። 31 ህኩ መንቹንኩ «ሂር ኩለኖኤ መንቹ ዮበኢ ሀተእ ቆርሲ ደንዳም?» ይ ፍልጶሴ «ጋሬ አል ፉልት ኤሳን አፉዕል» ዬእ። 32 እስን መጣፊች አነበበዮእኬ መዕንት «ሆለገ ዱለመኖ መዕንተ ኦተአሞ። ኦርዘተ ጠርታሪ ብሬን ሰዕምታ ሆለ ቡታከገን አፎስ ፈንምበአ። 33 እስን ገደሞ። ጠቤኑ ፍርዱንኩ ኣሰምምበስ። ሄቸስን ኡለ አሊች ከመንቶተኔ ቀለንችስተኔ አይ ኩሊ ደንደኖ?» ያኗበ እኬ። 34 ህኩ ሙሬሰኡንኩ ፍልጶሴ «ህራጋንቹ ካን ጠሃቄኢ አዬተኔሃት? ገግስተኔሃትንዶ ዎሎ መንችተኔሃት? ሀእ ኩሌኤ» ዬእ። 35 ፍልጶስን ህከን መጣፊች አፍ ዬሱስተኔ ምሽራች ላገተ ኩሎስ። 36 መረንተንን ዎኡ ዮበ ኢልቶ ጃተ ህኩ ሙሬሰኡ «ዎኡ ኩዕኒን። ኤስ ጠመቀሙ ም ከመኖ?» ዬእ። [ 37 ፍልጶስን «ዊማንክ ዎዘኒን አመዕንቴንትደ ጠመቀንቶተ ደንድታንት» ዬእ። ሙሬሰኡንኩ «ዬሱስ ክርስቶሱ መገን ቤቱ እሁስ አመዕናም» ዬእ።] 38 ሙሬሰኡንኩ ጋርተ ኡርሴኖገ አዘጆ። ለሙንኩ ዎእበ ድርትየን ፍልጶስ ጠመቆስ። 39 ዎእ ኣዚች ፉልቶሀኒች ዘኪን ቀርች አያኑ ፍልጶሴ ኦሮሾ። ሙሬሰኡንኩ ለንኪ ፍልጶሴ ጡድምበአ። እኮዳ በጅቀመን ዎቃስ መረሞ። 40 ጠሁ እኮዳ ፍልጶስ «አዛጦነ» ዬኖ ከተማካን ደገሞ። እስን ቄሳር ከተመ ኢለንቀጤች ከተማካን ሆራንን ዘሀን ምሽራች ላገተ ሰበከዮ እኬ።
1 ጠሁ እኮዳ ሰዉል ቀርች አወናኑ ሾተ ቴሱ ሸዕለን አበ ቄስችበ መሮ። 2 እስን ቀርች ዎቃ አወንታ መነ ጎነሃ ሜንቱሃ ደጎደ ሆረንከ ኡሱረን ዬሩሳሌመ ዋሾተ ደንዴሳስ ደዳቤተ ደማስቆ ከተማን ዮ ጠጵት ምናከ አወንሳንበ ጣፍ ኣሱንተስ አበ ቄስቹ ጠዕሜእ። 3 መረንን ደማስቁተ ኢሊ ሆባሼሀኔን ደንጎን ሰሜ ጫኩ ሄጌጎንተስ ቤሌሌሾ። 4 ህተ ጃንተ ኡለ ኡብኬእ «ሰዉሌ! ሰዉሌ! ሚ ሸርተዮንቴኤ?» ይታ ላገተ መጮጬእ። 5 እስን «ቀርቾ! አት አዬት?» ዬደ «አን አት ሸርታንቴኤ ዬሱሳት። ቀሰኖ ብረት ሃንቶንትደ አብሽ ሂለኖኬ» ዬስ። 6 ሰዉልን ሁጠኒ ማለለኒ «ቀርቾ መ አሱንተ ሀሰን?» ዬእ። ጠሁ እኮዳ ቀርቹ «ጦቅት ከተመ ኣግ። ህከኔ መ አስታንትንዶ ኩለመኖሄ» ዬስ። 7 እሲን በርገንት መረንተዮእኬ መኑ ጠሃቀዮሲ አዬትንዶ ጡዱዕነ ላገተ ጠለተ መጮጭተን ጀልይት ኡርቴ እኬ። 8 ሰዉል ኡቦቢች ጦቅይ ጡደኖደ እልስ ሜጡራ ደግምበአ እኬ። ህከኒ እሲን በርገንት ዮሩ አንገስ አፍ መጠገን ደማስቆ ከተመ ኣግሶስ። 9 ህከኔን እልስ ጡዱዕናች፥ እቱዕናቺ አጉዕናቺ ሰሱ በር ኤጌሮ። 10 ደማስቆን «ሀናንየ» ዬኖ መቱ አወናንቹ ዮ እኬ። ቀርቹንኩ እሱ ሀቄን «ሀናንየ!» ዬስ። እስን «ቀርቾ! አን ከኔ ዮም» ዬእ። 11 ቀርቹንኩ እሱ «ጦቅት ‹ጠቤነ› የመመኖ ዎቃ መር። ህከኔን ይሁድ ምኔን ዮ ‹ሰዉሌ› ዬኖ ተርሴስ ባድ መንቺን ደቀም። ዳፉንኩስ እስ መገኑ ኡጨዮእ። 12 እስን ጡዲ ደንዱንተ ‹ሀናንየ› ዬኖ መንቹ ኣግ አሌንተስ አንገተ ኡጀንየን ሀቄን ጡጄእ» ዬስ። 13 ጠሁ እኮዳ ሀናንይ ፈንቀሽ «ቀርቾ! ኩ መንቹ ዬሩሳሌመ ዮ ጡማኑ አስቶንት መንክ አሌን ሀበንከተ ሂለተ ሁጅተ አሴንዶ ሆለመ መኒች መጮጬም። 14 ከኔን ሱዕመክ ገእታረ ሆረንከ ኡሱሮተ ቄሳከ አወንሳኒች ዳኖመት ኣሰንቴስ» ዬእ። 15 ጠሁ እኮዳ ቀርቹ «እስበ መር። ኩን መገኑ አመዕኑምቦ መኒ፥ ዎማካሃ እስራኤል ኦሶሃ ፈእሳንቹ እሁኤ ለሊሶተ ኤሳ አነነተ ኦዳተ እኬሃ። 16 ዳፉንኩስ ሱዕምኤተኔ ሀበንከ ሀወ ኣቁ ሀስሰኖስንዶ አን እሲ ጡድሳንስ» ዬእ። 17 ሀናንይን መርኬእ ምን ኣጎ። አንገስን ሰዉሌ አሌን ኡጅ «ኢ ህዞ ሰዉሌ! ህኩ ዋልተንየን ዎቃን ጡደሞሄ ቀርቹ ዬሱሱ ለንኪ ጡዱንታ ጡማንቹ አያኑ ዊሙንተሄ ሶኬኤ» ዬእ። 18 ህተ ጃንተ እሌችስ ግዕልገ ዮሩ ኡብየን ዎነገን ጡዲ ደንዴእ፤ ጦቅይን ጠመቀሞ። 19 እቸንተ እች ቃሮ። ደማስቆ ዮ አወናኒን በርገም ቀሁ በር አፉዕሌእ። 20 ሰዉልን ደዕልን ደማስቆ ዮ ጠጵት ምናን «ዬሱሱ መገኔየ ቤቱ» ያን ሰበኩ አፎ። 21 መጮጭቶሩ ሆሩንኩ ማለልት «ኩን ዬሩሳሌመ ከ ዬሱስ ሱዕመ ገእታረ በእሿ መንቹበእንዶ? ከኔ ዮስረ ኡሱር ቄሳከ አወንሳንበ ኦሮሶተ ከበ ዋሌሃበእንዶ?» ይቶእ። 22 ጠሁ እኮዳ ሰዉል ዎናችን አበ ቃረን መሮ። አሞ ደማስቆ ሄኣ አይሁድ-መኒ ክርስቶሱ ዶዕረሞ እኮገ ቃርስ ኩለን ይታረ ሆጋገ አሰዮሰ እኬ። 23 ሆለመ በሬች ዘኪን አይሁድ-መኑ ሽቶስተ ኤረንቶእ። 24 ጠሁ እኮዳ ሰዉል ኤረሰ ደጎ። እሶኦንት ሰዉሌ ሽቶተ ከተመ ኣጌኖ ጎጫካን አንከርሃ በራሃ ቆረበዮ እኬ። 25 ጠሁ እኮዳ አወናኑስ እሱ ቀርጫታን ዎርት አንከሬን መስት ግምብ ኦተ አሊን ኤተሩ ለቅ ድሪሶስ። 26 ሰዉል ዬሩሳሌመ ኢሌ ጃተ ህከኔ ዮ አወናኒን ሜጡ እሆተ ሀሾ። ጠሁ እኮዳ እሶኦት ሆሩንኩሰ እስ አወናንቹ እኮገ አመዕኑ ሆጎተኔ ዋጅቶስ። 27 ጠሁ እኮዳ በርናባስ ሶቀማንበ ሰዉሌ አፍ መርኬእ ቀርቹ ዬሱሱ ሰዉሌ ዎቃን ጡደሞስጋ ጠሃቄስጋ አሞ ደማስቆ ከተማን ዬሱስ ሱዕሚን እግማን ሰበኮጋ ኩሎሰ። 28 ህከኒ እስ ዬሩሳሌመ እሶኦን በርገም ፉለን ኣገዮ እኬ። 29 እስን ቀርቾ ዬሱስ ሱዕምተኔ እግማን ሰበከዮ እኬ። ግሪክ ባድ አፌን ጠሃታ አይሁድ-መኒን ጠሃቀዮእኒ ኦደመዮእኒ እኬ። እኮዳ እሶኦት ሽቶስተ ሀሶእ። 30 ህካን አመዕናኑ ደጎ ጃተ ቄሳር ከተመ ኦሮሶስ። ህከምቢችን ተርሴስ ከተመ ኦሮቀኖገ አስቶእ። 31 ይሁድ ባዶን፥ ገሊል ባዶኒ ሰማር ባዶኒ ሆራንን አመዕናን ማበሩ ቃርት ጡሚን ሄኦእ። አሞ መገኑ ዋጂኒ ጡማንቹ አያኑ ቃርሰንየንሳ በተአን መርቶእ። 32 ጴጥሮስን መዕኔች መዕንተ ዘሀን ሊድ ከተማን ሄኣ ጡማንበ ድሬእ። 33 ህከኔን ሄዜቱ ዎጋ ዴስ መንቹ እክ ሄአዮ «ኤንየ» ዬኖ መቱ ሺኬ መንቹ ደጎ። 34 ጴጥሮስን «ኤንየ! ዬሱስ ክርስቶሱ ፈይሰኖሄ። ጦቅት መዕነክ ዌኤጭ» ዬስ። እስን ህተ ጃንተ ጦቅዬእ። 35 ሊድነ ሳሮን ከተማን ሄኣ መኑ ሆሩንኩ ህከ መንቹ ጡድ ቀርቾን አመዕንቶእ። 36 እዮጴ ከተማን «ጠብተ» የመንታ መትት ዬሱስ አወናንቹት ዮ እኬ። እሴን ግሪክ መን አፌን «ዶርቀ» ዬኖተ እኬ። ሂረቱንትስ «ጉምቾ» ዩሀ እኬ። እሴን በሬድመት ዊንቴሴተኒ ቡጢ ካዕልታታኒ እኬ። 37 ህተ ጄቹተ እሴን ሞስ ሬቶእ። እሶኦንት ሬሸሴ ኣንሽት ፎቅ ምኔን አፉሽቶእ። 38 ሊድ ከተሙ እዮጴ ከተሚ ኦንጠንተ እኮተኔ እዮጴ ከተማን ዮ ዬሱስ አወናኑ ጴጥሮስ ሊድ ከተማን ዮገ መጮጭት እስበ ለሙ መንቹ «ኒበ ደዕልት ዋል» ይት ሶኮእ። 39 ጴጥሮስን ህከን ሶሀንቶሪንን በርገም ዋሎ። ኢሌ ጃንተ ፎቅ ምን ፉሽቶስ። ህከኔን ምኔኑ ሬሄ ሜንቱ ሆሩንኩ ብሬንተስ ኡርት ጠብተ እሶኦን በርገንት ዮ ጃተ ሁጀቶ ቀምሰታ ኦድሸታ ጡድሰን ኦኦእ። 40 ጠሁ እኮዳ ጴጥሮስ እሶኦተ ሆረንከ ሀደተ ፉሽ ጉሉጵ መገኑ ኡጬእ። እስን ሬሹ ዮ ዉዱ ፈንቀል «ጠብተ! ጦቅይ» ዬእ። እሴን እልሴ ፈንት ጴጥሮሴ ጡዶ ጃተ ጦቅት አፉዕልቶእ። 41 እስን አንገሴ አፍ ጦቀእ ጡማኑሃ ምኔኑ ሬሄ ሜንቱሃ ገእኬእ ፎሉሴ ፈንቀልየን ኣሴሰ። 42 ህኩ ጠሁንኩ እዮጴ ከተማን ሆራንን መጮጨሞ። ሆለሙ መኑንኩ ቀርቾን አመዕኔእ። 43 ጴጥሮስን እዮጴ ከተማን ጎገ ዙገኖ «ስሞኔ» ዬኖ መንቺን በርገም ሆለመ በር አፉዕሌእ።
1 ቄሳር ከተማን ሄአኖ «ቆርኔሎሴ» ዬኖ መቱ መንቹ ዮ እኬ። እስን «ጣላን ባድ ጎጎተ» ዬኖእኬሀኒ ጥቤ መን አዘዛንቿ እኬ። 2 አሞ ምንስ መኒን በርገም መገኒ ሰገደን መገኑ ዋጀኗ መንቹ እኬ። ህትጉንተ ቡጢ አብሽ ካዕለን ሆረንተ ጃተ መገኑ ኡጨኗ መንቹ እኬ። 3 መቱ በር ሆንሶ ሳታን መገን ሰሜ ሶቀማንቹ «ቆርኔሎሴ!» ያን ገአን እስበ ኣገንየን ሀቄገ ጡደሞስ። 4 እስን መገን ሰሜ ሶቀማንቹ ቀሽ አፍ ጡደን ዋጅኬእ «ቀርቾ! መሃን?» ዬእ። መገን ሰሜ ሶቀማንቹንኩ «ኡሰቱኪ ቡጢ ካዕልታንት ካለቱኪ መገን ብሬን ቃገንታንትገ አስቴኬ። 5 ቴሱ እዮጴ ከተማን ዮ ‹ጴጥሮሴ› ዬኖ ስሞኔበ መነ ሶክ ገእሲስ። 6 እስን ምኑስ በሃር ሺናን ዮ ጎገ ዙጋንቾ ስሞኔ ምኔን ኮህነቱ አፉዕሌእ። አሱ ሀስሰኖሄረ እስ ኩለኖሄ» ዬስ። 7 እሲን በርገም ጠሃቀዮ እኬ መገን ሰሜ ሶቀማንቹ እሲች አነነ እክ ኦሮቄኢች ዘኪን ቆርኔሎስ እስ ሁጀታኒች ለሙሃ ሆረንተ ጃተ እሱ ቆረባ ቤጠቤች መገኑ ዋጀኖ መቱ ቤጠቤቹሃ ገእ 8 ጠሀ ሆረንከ ኩልኬእ እዮጴ ከተመ ሶኮሰ። 9 ለንክ በር ገስመ እሶኦት መርት ከተመስ ሆባሶ ጃተ ሌሆ ሳት ቁንጠ ጴጥሮስ መገኑ ኡጮተ ፎቅ አሌን ቆጥገ ዮ መዕንተ ፉሎ። 10 እስን ጎሬክ እቸተ እቶተ ሀሼ እኬ። እቸንተ ቅጠንሴነንቀጤች ገገስ ሀበኖገ አሰኖ ሰውታን ኣጎ። 11 ህተ ጃተ ሰሞ ፈነምየን ሾሎ ዉዲን ኡሱረም ጨልጨልዬ ኦኮነ አጉደኖሩ ሰሜች ኡለተ ድረንየን ጡጆ። 12 ህከን ኣዜንን አነኑ አነኑ ሀገሩ ሞቹ፥ ሃሞንተሰ ሹርይታሩ ሰማን ቡርታ ጪአቲ ዮ እኬ። 13 እስበንከ «ጴጥሮሴ! ጦቅት ካን ዱልት እት» ይታ ላገት ዋልቶእ። 14 ጠሁ እኮዳ ጴጥሮስ «ቀርቾ! እሀኖበአ። አን ህትጎነ ቡሸረ እንዶ ሃሻረመረ እች ከሰበአ» ዬእ። 15 አሞ ለንኪሃ «መገኑ ሙጩርሴኢ አት ቡሽሶት» ይታ ላገት ዋልቶእ። 16 ህኩ ጠሁንኩ ሰስተ ኮደተ እኮሀኒች ዘኪን ኦኮነስ ሜጤን ሰማ ኦሮሴን ከሜመ። 17 አቼ ጴጥሮስን ሀቄገ ጡጆ ጠህተኔ «ኩን እኮ ሚሃት?» ያን ዎዘናንተስ መለመንየንን ቆርኔሎስ ሶኮ መኑ ስሞኔ ምን ጠዕምተን ኡሮ ኡርቴ እኬ። 18 እሶኦንት ላገሰ ጦቀት « ‹ጴጥሮሴ› ዬን ገኤኖ ኮህቹ ስሞን ከኔ ዮእንዶ?» ይት ጠዕምቶእ። 19 ጴጥሮስን ህከን ጡጆ ጠህተኔ ሰውያንየንን ጡማንቹ አያኑ «ህኩዕኒን፥ ሰሱ መኑ ሀሰዮኬ። 20 እሶኦተ አን ሶክየን ዋልቴረ እኮተኔ ጦቅት ድርት መለንቱዕናች እሶኦን በርገንት መር» ዬእ። 21 ጴጥሮስን ህከን መንበ ድርኬእ «አዕኖኦት ሀሴንተ መንቹ አኔት። ዋልቴንታ መ ዳፊኔት?» ዬሰ። 22 እሶኦንት «አይሁድ-መኑ አብሳስ መገኑ ዋጀኖነ በሬዱ ‹ቆርኔሎሴ› ዬኖ ጥቤ መን አዘዛንቹ ሶክየኔት። እሲንከ ኪበ ሶክየን አት ምንስ መርት ይታንትረ መጮጩንተ ጡማንቹ መገን ሰሜ ሶቀማንቹ ኩሌስ» ይቶእ። 23 እስን እሶኦተ ምን ኣግሽ ገግስ ኮህገ ኮህሾሰ። ለንክ በሬ ገስመንከ እሶኦን በርገም መሮተ ፉሎ። እዮጴ ከተማን ዮ አመዕናኒች መ-መቱ እሲን በርገንት መርቶእ። 24 ለንክ በርንከ ቄሳር ከተመ ኢልታደ ቆርኔሎስ እለሙሲ አብስ ህንጭታስ ጃለታ ገእ እሶኦንን በርገም ቆረበዮስ እኬ። 25 ጴጥሮስን ህከበ ኢል ምን ኣጎ ጃተ ቆርኔሎስ ጴጥሮሴን ደቀም ሎካንተስ ኡብ ሰገጆስ። 26 እኮዳ ጴጥሮስ «ጦቅይ! አኒ ኪገን መንቿ» ይ ጦቀኤስ። 27 ጴጥሮስ እሲን ጠሃቀንን ምን ኣገኖደ ሆለሙ መኑ ጠጵ ዬኢ ጡጅኬእ 28 «አይሁድቹ ዎሎ ዜሪን ጣጩ እንዶ ምንስ ኣጉ ኣሰሙምቡ እኮገ አዕኖኦት ገጉንኩዕኔ ደጌነንተ። እኮዳ ኤሳ መገኑ ሀከ መንቹሃ ‹ቡሻ እንዶ ሽግገአኗ› ዩ ሀስሱምቦኤገ ጡድሼኤ። 29 ህከኒሃት ኢበ ሶኬንተ ጃተ ግቡዕናች ዋሎሚ። ‹አቼ ገእቴንተኤ ሚሃት?› ይ ጠዕማንክዕኔ» ዬሰ። 30 ቆርኔሎስን «ከን ሳታን ከበሬ ሾልክ በር ሆንሶ ሳት ኡሰቱተ ምኔንተኤ መገኑ ኡጨንየን አብስ ቤሌሌሳ ኦድሸተ ኦደቄ መቱ መንቹ ብሬንተኤ ኡር 31 ‹ቆርኔሎሴ! ኡሰቱክ መገኑ መጮጬእ። አሞ ቡጢ ካዕልቶንትረ መገኑ ቃጌእ። 32 አቼ እዮጴ ከተመ ሶክ ‹ጴጥሮሴ› ዬን ገኤኖ ስሞኔ ገእሲስ። እስን ጎገ ዙጋንቾ ስሞኔ ምኔን ኮህነቱ አፉዕሌእ። ስሞኔስ ምኑ በሃር ሺናን ዮሃ› ዬእ። 33 ህከኒ ህተ ጃንተ ኪበ ሶኮም። አትን ዋሊንተክ ደናሞገ እኬንት። ቴሱ አሞ መገኑ አዘጆኬረ ሆረንከ መጮጭኖተ ሆሩንኩኔ ከኔ መገን ብሬን ጠጵኔም» ዬእ። 34 ጴጥሮስን ጠሀስ ህትጉተ ያን ጠሃቁ አፎ፦ «መገኑ አዬሃ ጎዕሉምቡ እኮገ ገርንተ ቴመ ደጌም። 35 ጠሁ እኮዳ ሀከን ባድቢ እኮዳ መገኑ ዋጀኖሃ ገርተ እኮ ጠሀ አሰኖሃ እኮች መገኑ አዬኒ ግበኖበአ። 36 አሞ መገኑ ሆሪንከ ቀርቹ እኮ ዬሱስ ክርስቶስ ዉዲን ጡም ምሽራቸ ኩለን ተ ላገተ እስራኤል ኦሶ ሶኮ። 37 ዮሃንስ ጠመቀምተኔ ሰበኮሀኒች ዘኪን ገሊል ባዲች አፍ ይሁድ ባዶን ሆራንን እኮ ጠሀ አዕኖኦንት ደጌነንተ። 38 አሞ መገኑ ናዝሬት ዬሱሰ ጡማንቾ አያኒን ማሰኦስጋ መቆ ኣሴስጋ ደጌነንተ። መገኑንኩ እሲን በርገም ዮተኔ እስ ደናሙ ጠሀ አሰኒ ሼጣንቹ ጂቼረ ሆረንከ ፈይሰኒ ዘሄእ። 39 እስን አይሁድ-መን ባዶኒ ዬሩሳሌም ከተማኒ አሴ ጠሂ ሆሪንከ ነኦት ነቃሸተ። እሱንከ ሀቃን ሰቀልት ሽቶስ። 40 ጠሁ እኮዳ መገኑ ሰክ በር ሬሆች ኬእሽ ጡደመኖገ አሴስ። 41 ህኩ እስን ጡደሞ ብርስን መገኑ ዶዕሬኔ ነቃሻካ ኔሳሃት በጋን ምናደቢ ሆሪሃበአ። እስ ሬሆች ኬኦች ዘኪን እሲን በርገም እንቶምሩ አንጎምሩ ነኦታ። 42 ዬሱሱንኩ ሬቶራኒ ፎሊን ዮራኒ ፍርዱንተ መገኑ አሴሲ እሱ እኮገ ነቀንሱንታ ምናደቢ ሆሪንከ ሰበንኩንታ አዘጄኔ። 43 እሶን አመዕነኖ ሆሩንኩ እስ ሱዕሚን ባጢልስ አጉረሙ ደቀኖገ ህራጋኑ ሆሩንኩ ነቀሴስ» ዬእ። 44 ጴጥሮስ ህከ ጠሀ ጠሃቀንየንን ላገስ መጮቶ ሆራንከ መን አሌን ጡማንቹ አያኑ ድሬእ። 45 ጴጥሮሴን በርገንት ዋልቶ ኑጉሰሞ አመዕናን ዉድ መኑ አይሁደ እኩምቦ መን አሌኒ ጡማንቾ አያን ኣሰንቹ ድሬተኔ ማለልቶእ። 46 - 47 ማለልቶኢንኩ እሶኦት ዎሌ ላጋን ጠሃተንየኒ መገኑ ገለጥተንየኒ መጮጭቶተኔሃት። ጴጥሮስን «ኩ ኒገንከ ጡማንቹ አያነ ኣቅቶ መኑ ጠመቀንቱምቦገ ዎአ ከመኖሳ አዬት?» ዬእ። 48 እሶኦት ዬሱስ ክርስቶስ ሱዕሚን ጠመቀንታገ ጴጥሮስ አዘጆሰ። እሶኦንት ቀሁ በር እሶኦን በርገም ኤጌሩንተ ኡጭቶእ።
1 ሶቀማኑሁ ይሁድ ባዶን ዮ አመዕንቶ መኑሁ አይሁደ እኩምቡ መኑ መገን ላገተ ኣቅቶገ መጮቶእ። 2 ህከኒ ጴጥሮስ ዬሩሳሌመ ፉሎ ጃተ ኑጉሰንቶ አመዕናኑ 3 «ኑጉሰሙምቦ መን ምን ኣግኬእ እሶኦን በርገንት እቶንቲ ሚሃት?» ይት አሙሬን ጠዕምቶስ። 4 ጠሁ እኮዳ ጴጥሮስ ዎናችን አፍ እኮ ጠሀ ሂር ኩሉ አፎ። 5 እስን «አን እዮጴ ከተማን መገኑ ኡጨን ገገኤ ሀባምገ አሰኖ ሰውት ኣዜን ዮምሀኔን ሀቄገ ጡደሞኤ። ህኩስን ኦኮነ አጉደኖሩ ሾሉ ቶቹ ኡሱረሜሩ ሰሜች ኢ ቤቹ ዋሎ። 6 አንን ህካን ህንጭይ ቀሽ አፍ ጡዳምደ ሾሎካሙ ግዙ፥ ሞቹ፥ ኡለ አሌን ጎደቢን ሹርይተን መረንታሩ ሰሜ ጪአቲ ዮኢ ጡጆም። 7 አሞ ‹ጴጥሮሴ! ጦቅት ካን ዱልት እት› ይታ ላገተ መጮጬም። 8 ጠሁ እኮዳ አን ‹ቀርቾ! እሀኖበአ። ቡሸረ እንዶ ህርሙ ከበሬ ኢለንቀጤች አፎንተኤ አፍ ከሰበአ› ዬም። 9 አሞ ለንኪሃ ‹መገኑ ሙጩርሴረ አት ቡሽሶት› ይታ ላገት ሰሜች ዋልቶእ። 10 ህኩ ጠሁንኩ ሰስተ ኮደተ ህትጉተ እኮሀኒች ዘኪን ሆረረንከ ሰማ ለቄን ኦሮሴመ። 11 ህተ ጃንተ ቄሳር ከተሚች ኢበ ሶሀንቴ ሰሱ መንቹ አን ዮም ምን ኢልቶእ። 12 ጡማንቹ አያኑንኩ መለሙዕነ እሶኦን በርገም መራምገ ኩሎኤ። አሞ አመዕናኒች ኩ ሌሁንኩ መኑ ኤሳንን በርገንት መርቶእ። ህከን መንች ምንንከ ኣንጎም። 13 ቆርኔሎስን መገን ሰሜ ሶቀማንቹ ምኔንተስ ኡሬሃን ጡጆጋ ‹እዮጴ ከተመ መነ ሶክ ጴጥሮሴ የመሞ ስሞኔ ገእሲሽየን 14 አቲ ምንክ መኑሁ ሆሩንኩ ፈኤነንተ ጠሀ ኩለኖሄ› ዬስጋ ኩሎኔ። 15 ህከኔን አን ጠሃቁ አፎምገን ጡማንቹ አያኑ ዎና ኔሳን ድሬገን እሶኦ አሌኒ ድሬእ። 16 ህተ ጃተ ‹ዮሃንስ ዎኢን ጠመቄእ። አዕኖኦት ጡማንቾ አያኒን ጠመቀንቴነንተ› ዬ ቀርች ላገተ ቃጎም። 17 አቼ መገኑ ቀርቾ ዬሱስ ክርስቶሳን አመዕንኖም ጃተ ኔሳ ኣሴኔገን ህከ ኣሰንቸንከ እሶኦሃ ኣሴኢች መገኒን ኡርጨሚ ደንዶተ አን አዬት?» ዬእ። 18 እሶኦንት ህካን መጮቶ ጃተ መቱ ቀጠ ሰዕምት አጉርቶእ። አሞ «መገኑ አይሁደ እኩምቦ መኒሃ ፎሊሀንሰ ቢረ ይት ፈንቀልታገ አሴእ» ይተን መገኑ ገለጥቶእ። 19 እስጥፋኖሴ ሼመሀኒች ዘኪን ኬኦ ሸረንች ዳፊን ብንቶ አመዕናኑ ዎሎ መኒ እሁዕነ ጠል አይሁድ-መኒ መገን ላገተ ኩልተን ፊንቄ ባዱ፥ ዎኢን ክበሜ «ቆጵሮሰ» ዬኖ ባዱሃ አንጦክ ከተመሃ ኢለንቀጤች ዘህተዮ እኬ። 20 ጠሁ እኮዳ እሶኦች መ-መቱ ዎኢን ክበሜ «ቆጵሮሰ» ዬኖ ባድነ ቃሬን ከተም መኑ አንጦከ ዋልት ቀርቾ ዬሱስ ክርስቶስ ምሽራች ላገተ ግሪክ ባድ መኒ ኩልተን ሰበከዮሰ እኬ። 21 ቀርቹንኩ እሶኦተ ካዕለዮሰተኔ ሆለሙ መኑ አመዕንት ቀርች ዉዱ ፈንቀልቶእ። 22 ህከን ጠህ ዱዱቡንኩ ዬሩሳሌመ ዮ አመዕናን ማበሪ መጮጨሞ። እሶኦንት ባርነባሴ አንጦክ ከተመ ሶኮእ። 23 እስን መር መገን ኣሰንቸ ጡጆ ጃተ አብሽ በጅቀሞ። ዊማንሰ ዎዘኒን ቀርቾን ቃርት አመዕነንቴረ እክ ሄኣገ ሰጆሰ። 24 ዳፉንኩስ እስ ጡማንቹ አያኑሁ አመዕነቱሁ ዊሜሴየ በሬዳ መንቹ እኬ። ሆለሙ መኑንኩ አመዕንት ቀርች ዉዱ ፈንቀልቶእ። 25 በርናባስን ሰዉሌ ሀሶተ ተርሴስ ከተመ መሮ። 26 እስን ደጎስ ጃተ አንጦክ ከተመ አፍ ዋሎ። ለሙንኩ ዊመ ዎጋ ህከኔ ዮ አመዕናኒን በርገንት ሆለመ መነ ሮስሶእ። አመዕንቶሩንኩ ህከን ባድ መን አፌን ዎነ ኮዳ «አመዕናኑ» የመንቶእ። 27 ህተን በራካን ህራጋኑ ዬሩሳሌሚች አንጦክ ከተመ ድርቶእ። 28 እሶኦችን መቱ «አጋቦሴ» ዬኖ መንቹ ጦቅይ ኡርኬእ ኡለ አሌን ሆራንን አቡ ጎሩ እሀኖገ ጡማንቹ አያኑ ለሊሽየንስ ኩሎ። ህኩ ጎሩንኩ ሮሜ ባድ ዎመ ቀላዶሴ ዶላን ኡቦ። 29 አመዕናኑንኩ አኑንኩ አኑንኩ መቄሰ ቀጠተ ካለቱተ ፉሽት ይሁድ ባዶን ዮ አመዕናኒ ሶኮተ ሙዕርቶእ። 30 እሶኦንት ጠጰት ባርነባሴነ ሰዉሌ አንጋን ኑባብበ ሶኮእ።
1 ህከ ዶለ ዎሙ ሄሮድስ + አመዕናን ማበሪች መ-መቱ መነ ቃረገ ሀውሰን ኡሱሩ አፎ። 2 እስን ዮሃንሴ ህዞ ያቆቤ ብሲን ሼእ። 3 ህኩ ጠሁ አይሁደ በጅግሾገ ጡጅ ጴጥሮሴኒ ኡሱሮ። ህኩን እኮንኩ ጦሮሹ እቴነን አብሴኖ አያን ጄቾኔት እኬ። 4 ሄሮድስን ጴጥሮሴ አፍኬእ ኡሱሮ ምን ኣግሾስ። እስን ሻሽግ አያኒች ዘኪን መን ብርተ ፉሾስተ ሰውይ ሾ-ሾሉ እከን ኮዳን ኮዳን ቆረቡንተ ቶነ ሌሆ ቤጠቤ ህግሽ ኣሴስ። 5 ጴጥሮሴን ኡሱሮ ምኔን ቃርሴን ቆረቤነዮመ እኬ። ጠሁ እኮዳ አመዕናን ማበሩ እስተኔ ቃርስት መገኑ ኡጭተዮ እኬ። 6 ሄሮድስ ጴጥሮሴ መን ብርተ ገኣስገ ህንጨኦስተ ሰውዬ በሬ አንከር ጴጥሮስ ለሞ ሰንሰለቲን ኡሱረም ለሞ ቤጠቤ ሜሬሮን ኦሰኤ እኬ። ቆረባኑንኩ ኡሱሮ ምን ጎጫን ኡርት ቆረበዮ እኬ። 7 ደንጎን መገን ሰሜ ሶቀማንቹ ጡደሞ። ምንስ ኣዙንኩ ጫኬእ። ጴጥሮሴን ምዛዙስ ኡል በቀእ «ሰርብት ጦቅይ» ዬስ። ጴጥሮሴ አንገት ኡሱረንቶ ሰንሰለቱንኩ አንጋችስ ኡቦ። 8 መገን ሰሜ ሶቀማንቹንኩ «ቆዕርት ጫመክ ዎዕር» ዬስ። እስን መገን ሰሜ ሶቀማንቹ ዬገ አሴእ። ቴሱ «ጋብክ ኦደቅት አወኔኤ» ዬስ። 9 ጴጥሮስን ሀደተ ፉል አወኖስ። ጠሁ እኮዳ ጴጥሮስ ሀቄተ ጡደኖ አጉደዮስ በጋን መገን ሰሜ ሶቀማንቹ አሰኖ ጠሁ ገርተ አጉድምበስ። 10 ብሬን ቆረቤኖባ ህከኒች ኤተሪን ቆረቤኖባ ህግ ከተመ ፉሸኖ ብረት ጡፉ ዮበ ኢልቶእ። ህኩ ብረት ጡፉንኩ ገጊንን ፈነሞ። እሶኦንት ፉልት መቶ ቀጮ ዎቄቺን ህጎእ። ህተ ጃንተ መገን ሰሜ ሶቀማንቹ እሲች አነነ እክ ኦሮቄእ። 11 ጴጥሮስን ዎዘኑስ ፈንቀልየን «መገኑ ሰሜ ሶቀማንቹስ ሶክ ሄሮድሴ አንጋቺ አይሁድ-መኑ ቆረቦኤሪች ሆሪቺ ፈእሾኤገ ገርንተ ቴመ ደጎም» ዬእ። 12 እስን ህከ ጠሀ ቆርሴሀኒች ዘኪን ሆለሙ መኑ ሜጦማን ጠጵይ መገኑ ኡጨዮበ ማራሜ ምን መሮ። እሴን «ማርቆሴ» የመመኖ ዮሃንሴተ + አመ እኬ። 13 ጴጥሮስ ጎች ጡፈ ቆጬ ጄቹተ «ሮደ» ዬኖ ህከን ምን ሁጀታንቹት ጡዶተ ጎችበ ዋልቶእ። 14 እሴን ጴጥሮሴ ላገተ እኮገ ደጎ ጃተ አብስ በጅጎተኔ ጎቹስ ፈንቱዕነን ምን ኣዝ ደጉደን ኣግ ጴጥሮስ ፈዶ ኡሬገ ኩልቶሰ። 15 እሶኦንት እሴተ «መቻርቴንትንዶ?» ይቶሴ። ጠሁ እኮዳ እሴ «ገርንተ እሶት» ይተን ቃርስት ኩልቶሰ። እሶኦንት «ጴጥሮሴ ቆረበኗ መገን ሰሜሃ ሶቀማንቹንዶ?» ይቶእ። 16 ጠሁ እኮዳ ጴጥሮስ ጎቹ አጉሩዕነ ሰዕምይ ቆጬእ። እሶኦንት ፈንት ጡዶስ ጃተ አብስ ማለልቶእ። 17 ጴጥሮስን እሶኦተ አንጋን ቀቀሽ ሰዕምታገ አስ መገኑ ኡሱሮ ምኒች ሀትጉተ ፉሼስንዶ ኩሎሰ። እስን «ከ ጠሀ ያቆቤሃ ህዛካሃ ኩልዬ» ይኬእ እሶኦች አነነ እክ ዎሉበ ኦሮቄእ። 18 እሩ ሶጆ ጃተ ቤጠቦ «ጴጥሮስ ሀትኮ?» ይተን አብስ ድዶቆዕለንቶእ። 19 ሄሮድስን ጴጥሮሴ ሀስሲሽ ሆጎ ጃተ ቤጠባ ቆርምኬእ ጠዕሜሰሀኒች ዘኪን ሼኑንተሰ አዘጆ። ህከኒች ዘኪን ይሁድ ባዲች ቄሳር ከተመ ድር ህከኔ አፉዕሌእ። 20 ሄሮድስን ጢሮስነ ሲዶን ባድ መኒን በአሜ እኬ። ህኩ መኑንኩ ሜጡ እክ ዋልት ዎም ምን ገሸኖ ተቄ መንቹ ብላስጦሴ ዎሚን ኢተንሱንተሰ ኡጭቶእ። ዳፉንኩስ ባዱሰ እቸተ ደቀኖ ህከን ዎም ባዲቼት እኬ። 21 ሀንስ በርንከ ሄሮድስ ዎሞመ ኦድሸስ ኦደቅ ዎሞመስ በርጩማን አፉዕል ጠሃቀዮሰ እኬ። 22 ምናደቡንኩ «ኩን መገንተ ላገ በጋን መንተ ላገበአ» ይተን ጨንጭቶእ። 23 እስን መገኒ አብን ኣሱ ግቦተኔ መገን ሰሜ ሶቀማንቹ ቀሽየንስ አልስ ዘቡል ሬሄእ። 24 ጠሁ እኮዳ መገን ላገት ሌአኒ ሀራርተኒ መርቶእ። 25 ህተ ጃተ በርናባሲ ሰዉሊ ሁጅሰ ጦፍ ዬሩሳሌሚች ፈንቀልቶእ። እሶኦንት ፈንቀልት ዋልተን «ማርቆሴ» የመመኖ ዮሃንሴኒ እሶኦን በርግት አፍ ዋልቶእ።
1 «አንጦከ» ዬኖ ከተማን አመዕናን ማበር ሜሬሮን ህራጋኑሁ ሮስሳኑሁ ዮ እኬ። እሶኦንት ባርነባሴት፥ «ገምበለ» የመሞ ስሞኔት፥ ቃሬን ባድ ሉክዮሴት፥ ባድስ ሾልክ አፎ ገሸኖ ዎመ ሄሮድሴን በርገም ሌኦ መናኤኔቲ ሰዉሌቲ እኬ። 2 እሶኦንት መገኒ ሁጀተንየኒ ጦንተንየኒ ጡማንቹ አያኑ «ባርነባሴኒ ሰዉሌኒ አን ዶዕሬንሰ ሁጄ አነነ አስዬ» ዬሰ። 3 ህከኒች ዘኪን ጦንቲ መገኑ ኡጭቲ አንገሰ አሌንተሰ ኡጅቶሀኒች ዘኪን ማሰእ ህርሲሶሰ። 4 በርናባሲ ሰዉሊ ጡማንቾ አያኒን ሶሀንት «ሴሌዉቀ» ዬኖ ከተመ መርቶእ። ህከምቢችን መርከባን ኣግ «ቆጵሮሰ» ዬኖ ባዱ ኢልቶእ። 5 እሶኦንት «ስልማነ» ዬኖ ከተመ ኢልቶ ጃተ አይሁድ ጠጵት ምናን መገን ላገተ አዋጅተዮ እኬ። ዮሃንስን + እሶኦን በርገም ካዕለዮሰ እኬ። 6 ህተ ቆጵሮሰ ዬኖ ዎኢን ክበንቶ ኡለተ ሆሮመንተሴ ዘህተን «ጳፉ» ዬኖ ከተመ ኢልቶ ጃተ «ባርዬሱስ» የመመኖ መቱ አይሁድቹ ኪላንቹ ደጎእ። ህኩ መንቹንኩ ቆጰንየ ህራጋንቹ እኬ። 7 እስን «ሰርግዮስ ጳዉሎሴ» የመመኖ ቆረ ገሻንቺ ጃላ እኬ። ህኩ ገሻንቹንኩ መገን ላገተ መጮጮተ ሀሽ ባርነባሴኒ ሰዉሌኒ እስበ ገእሲሾ። 8 ጠሁ እኮዳ ግሪክ መን አፌን «ኤልማሴ» የመም ገአመኖ ኪላንቹ ባርዬሱስ ህኩ ገሻንቹ አመዕኑምቦገ ሀሽ ባርነባሴኒ ሰዉሌኒ ኡርጨሙ አፎ። 9 እኮዳ «ጳዉሎሴ» + የመሞ ሰዉል ጡማንቾ አያኒን ዊም ህከ መንቹ ቀሽ አፍ ጡደን 10 «አት ሾክመት ሆረንቲ ሂልመት ሆረንቲ ዊንቴሄ ሼጣንች ቤቱ! ሙጩርማ ሆራንከ ዲኑ! ቀርች ጠቤነ ዎቃ ሾክሱ አጉርታንትበእንዶ? 11 ቴሱ ህኩዕኒን፥ መገን አንገት ዎቀርታሄ። ህከኒ ቆቅኬእ ቀሆ ጄቾ አሪቾ ጫከ ጡዳንትበአ» ዬስ። ደንጎን ጉንጆጋ ቱንሶጋ ዮሩ እልስ እፍሾ። እስን አንገስ አፍ አወንሰኖስ መነ ሺነስ ሀሱ አፎ። 12 ህኩ ገሻንቹንኩ ቀርችተኔ ሮስሶ ጠሃን ማለሎተኔ ህከ እኮ ጠሀ ጡጆ ጃተ መገኖን አመዕኔእ። 13 ህከኒች ዘኪን ጳዉሎሲ ጃለሲ መርከባን ኣግ «ጳፉ» ዬኖ ከተሚች «ጲንፍለ» ዬኖ ባዶን ዮ «ጴርገ» ዬኖ ከተመ መርቶእ። ዮሃንስ እሶኦች አነነ እክ ዬሩሳሌመ ፈንቀል ኦሮቄእ። 14 እኮዳ እሶኦት ህከን ጴርግ ከተሚች «ጵሲደ» ዬኖ ባዶን ዮ ዎሉ «አንጦከ» ዬኖ ከተመ ኢልቶእ። ሰንበት በሬንን መቱ አይሁድ ጠጵት ምን ኣግ አፉዕልቶእ። 15 ሴርነ ህራጋን መጣፋች አነበበሞች ዘኪን ጠጵት ምን ገሻኑ «ህዛከ! ምናደበ ቃርስቴነንተ ጠሁ ዮዕኔደ ኩልዬ» ይት እሶኦበ ሶኮእ። 16 ህከኒ ጳዉሎስ ጦቅይ ኡርኬእ ምናደበ አንጋን ቀቀሽ ሰዕመእ «አዕኖኦት እስራኤል መኑሁ መገኑ ዋጅቴነንተ መኑሁ! ከበ መጮጭዬ። 17 ከን እስራኤል መን መገኑ አናከኔ ዶዕር ግብጥ ባዶን ኮህነቱ አፉዕልት ዮ ጃተ አበ ምናደበ አስኬእ አባንስ መቄን ህከምቢች ፉሼሰ። 18 ሾላዱመ ዎጌ ቀጠ ኡለ ኡዱመኣን ደንዴቄሰ። 19 ህከኒች ዘኪን ከነኣን ባዶን ለመለ ዎም ባዱ በእሽ እረሰ እሶኦ ረገእሲሾ። ህኩን ሆሩንኩ ጦፎ ሾሌ ጥብኒ ኦንታዱመ ዎጋኒ እኬ። 20 ህከኒች ዘኪን ህራጋንቾ ሳሙኤሌ ጄቹተ ኢለንቀጤች ዳናከት ገሽታሰገ አሴእ። 21 እሶኦንት ህከኒች ዘኪን ዎመ ኣሱንተሰ መገኑ ጠዕምቶእ። መገኑንኩ ቢንያሜ ቦኪች ቂሴ ቤቱ ሳኦሌ ሾላዱመ ዎጌ ዎሞንሴሰ። 22 ሳኦሌ ዎሞማች ድሪሾች ዘኪን እሴዬ ቤቱ ዳዊቴ ዎሞንሴሰ። መገኑንኩ ዳዊቴተኔ ‹ገግኤ ዎዘንገ ዮኢ አን ዬም ጠሀ ሆረንከ አሰኖ እሴዬ ቤቱ ዳዊቴ ደጎም› ይ ነቀሾስ። 23 ህከን መንች ፍካኒችን መገኑ ተሴስ ላገጊንን እስራኤል መኒ ፈእሳንቹ ዬሱሰ ኤቦሰ። 24 ዬሱሱ ዋለኖሀኒች ብርስ ጠመቃንቹ ዮሃንስ እስራኤል መኒ ሆሪንከ ባጢለ ቢረ ይት ፈንቀልት ጠመቀንታገ አዋጄሰ እኬ። 25 ዮሃንስን ሁጅስ ጦፎ ጃተ ‹ኤስ አዬት ይቴን ሰውቴነዮንተ? አን ዋለኖ ይቴን ቆረቤነንታበአ። ጠሁ እኮዳ አን ጫምስ ኡሱራንቹሃ ሂሮተ ሀስሱምቡ ኤሳች ዘኪን ዋለኖ› ዬእ። 26 አዕኖኦት አብረሃሜ ኦሱት ህዛከኔ ክዕኔኤ ሜሬሪች መገኑ ዋጅቴነንተሩ! ከን ፈእ ሶህኑት ኒበ ሶሀንቴእ። 27 ጠሁ እኮዳ ዬሩሳሌመ ሄኣሩ ገሻኑሳ ዬሱሱ ፈእሳንቹ እኮገ ደግምበአ። ሰንበታን ሰንበታን አነበበንታ ህራጋን መጣፈንተ ቆርስቱዕናች ፍርድት መጣፍስ ላገተ ዊንሽቶእ። 28 መሃ ዬሱሰ ሬሆበ ኢልሰኖ ጠሀ ደጉ ሆጎደኒ ገሻንቹ ጵላጦስ ሹንተስ ኡጭቶእ። 29 እስተኔ ጣፈሞገ ሆረንከ አስት ጦፎሀኒች ዘኪን መስቀሊች ድሪስ ሞጎእ። 30 ጠሁ እኮዳ መገኑ እሱ ሬሆች ኬእሾስ። 31 ዬሱሱንኩ እሲን በርገንት ገሊሊች ዬሩሳሌመ ዋልቶሪ ሆለመ በር ጡደሞሰ። እሶኦንት ቴሱ ምናደቢ እስተኔ ነቀሰዮእ። 32 ነኦንት ክዕኔኤ ቴሱ ኩነዮሚ መገኑ አናካሀኔ ተሴን ኣሴ ምሽራችተ ላገ። 33 ዳፉንኩስ መገኑ ዬሱሰ ሬሆች ኬእሲንተስ ህከ ተሳ ኔሳን ኦሶንተሰ ዊንሼእ። ህኩንን መዝሙር መጣፋን ለንክ መዝሙራን ‹አት ቤቷዕኔ፤ አን ከበር እሌንኬ› የመም ጣፈሟገ። 34 አሞ ሸሙዕነ መገኑ ሬሆች ኬእሾስገ ጡድሶተ ‹ጡማንቹሃ አመዕነሜኢሃ እኮ ተሳ ዳዊቴ ኣሴሚ ኣሳንክዕኔ› ይ ጠሃቄእ። 35 አሞ መዝሙር መጣፋን ዎሌ መዕኔን ‹ጡማንቹ ቤቱክ ሞግ ኣዜን ሸሙንተ አጉርታንትበአ› ያኖ። 36 ጠሁ እኮዳ ዳዊት ዶላንተስ መገኑ ሀሰኖገ ሁጅስ ሁጀች ጦፎች ዘኪን ሬህ አናካንን ሞገምኬእ ሸሜእ። 37 እኮዳ መገኑ ሬሆች ኬእሾ እስ ሸምምበአ። 38 ህከኒ ኢ ህዛከ! ባጢል አጉረሙ ደገሞ ህከን ዬሱሲን እሁስ ኩለሞዕኔገ ደግዬ። 39 አሞ እሶን አመዕነኖ ሆሩንኩ ሙሴ ሴሪን ሙጩርቴኖተ ደንድቴኑምቦሪች ሆሪችን ሙጩረኖ። 40 ህከንተኔ ህራጋን መጣፋን ህትጉተ የመም ኩለሞሩ ኢሉምቦዕኔገ ቆረጵዬ። 41 ህኩስን ‹አዕኖኦት ገላጫኑ! ጡጅዬ፤ ማለልዬ፤ በእዬን! ዳፉንኩስ አዪ ኩሎዕኔደ አመዕንቴኑምቡተ ሁጅተ ዶላንተዕኔ ሁጀታም› ያኖ» ዬእ። 42 ጳዉሎሲ በርናባሲ ጠጵት ምኒች ፉልተንየን ከ ጠሀንከ ዋለኖ ሰንበት በርሃ ፈንቀሽት ኩልቱንተ መኑ ኡጭቶሰ። 43 ጠጵት ምን መኑ ፉሎ ጃተ ሆለሙ አይሁድ-መኑሁ አይሁድ አመናቶን ፈንቀልቶሩ ጳዉሎሴኒ ባርነባሴኒ አወንቶእ። እሶኦንት ህከ መነ መገን ኣሰንቻን ቃርት ሄኣገ ሰዞሰ። 44 ሄዜትስ ሰንበት በር ከተማንተስ ሄአኖ መኒች አቡስ ዉዱ መገን ላገተ መጮጮተ ጠጵዬእ። 45 ጠሁ እኮዳ አይሁድ-መኑ መንስ በትንተ ጡዶ ጃተ ቂንሽት ጳዉሎስ ጠሃቀኖ ጠሀ ኡርጨንተን ቦሮዕረንቶእ። 46 እኮዳ ጳዉሎሲ በርናባሲ እግማን «መገን ላገተ ብርሴን ክዕኔኤ ኩሉ ሀስሰኗ። ጠሁ እኮዳ አዕኖኦት ‹ግምቦም› ይቴንታቺ ዶሊ ሆሪንከ ሄኣ ሄቸተ ግቤን ገጋንተክዕኔ ፍርደቅቴንታቺ ነኦት አጉን አይሁደ እኩምቦ መንበ መናም። 47 ዳፉንኩስ ቀርቹ ‹ኡለ ቶቹ ኢለንቀጤች ፈኡ ኤቡንተ አይሁደ እኩምቦ መኒ ጫከ አሴንኬ› ይ አዘጄኔ» ይቶእ። 48 አይሁደ እኩምቡ መኑንኩ ህከ ጠሀ መጮቶ ጃተ በጅቀንቶእ። መገን ላገንተ አብሶእ። ዶሊ ሆሪንከ ሄኣ ሄቻ ዶዕረንቶሩ ሆሩንኩ አመዕንቶእ። 49 ቀርች ላገንት ህከን ባዶን ሆራንን ሀራርቶእ። 50 ጠሁ እኮዳ አይሁድ-መኑ ህከን ከተማን መገኑ ዋጅታ ቀባጣሙ ሜንቱሃ አባኑታ ኤረንስት ጳዉሎሴነ ባርነባሴ አሌን ሀዉ ኢለኖገ አስት ህከን ባዲች ሸርት ፉሽቶእ። 51 ጳዉሎሲ በርናባሲ ህከን መኒ ጡር እሁንተ ሎከሰ ድረ ቀምበቅት እቆንዮም ከተመ ኦሮቅቶእ። 52 አመዕናኑ በጅጎኒ ጡማንቾ አያኒኒ ዊንቶእ።
1 ህከኒች ዘኪን ኤጅ ሮሶገንከ ጳዉሎሲ በርናባሲ እቆንዮመ ዮ አይሁድ ጠጵት ምን ኣጎእ። ህከኔን ቃረገ ሮስሶተኔ በትናሹ አይሁድ-መኑሁ ግሪክ መኑሁ አመዕንቶእ። 2 ጠሁ እኮዳ አመዕንቱምቡ አይሁድ-መኑ አይሁደ እኩምቡ መነ ሂልማን ኬእሰንስት አመዕናን አሌን በአንቸተ ፉሽቶእ። 3 ህከኒ ጳዉሎሲ በርናባሲ ቀርች ላገተ እግማን ጠሃተን ሆለመተ ጃተ ህከኔ ኤጌርቶእ። ቀርቹንኩ ማለሉቲ መላቲ አንጋንተሰ ሁጀተንታ መቆ ኣስ እስ ኣሰንች ላገት ገርተ እኮገ ጡድሰዮ እኬ። 4 ጠሁ እኮዳ ከተምስ መኑ ለሙበ እክ ቤሀም በከኑስ አይሁድ ዉዱ በከኑስ ሶቀማን ዉዱ እኮእ። 5 ጠሁ እኮዳ አይሁድ-መኑሁ አይሁደ እኩምቡ ዎሉ መኑሁ ገሻኒንተሰን በርገንት ጳዉሎሴኒ ባርነባሴኒ አብስ ሀውሶሰታ ክኒን ቀሶሰታ ሀሶእ። 6 ጳዉሎሲ በርናባሲ ህከ ጠሀ ደጎ ጃተ «ልስጥረሃ ደርቤታ» የመንታ ልቃኦን ባድ ከተመታ ሄጌጎንተሰ ዮ ባዱሃ ሁንት ኦሮቅቶእ። 7 ህከኔን ምሽራች ላገተ ሰበኮእ። 8 ህከን ልስጥር ከተማን መቱ መረሚ ደንዱምቡ አመስ ጎደቢች አፍ ሺኬ መንቹ ዮ እኬ። 9 ህኩ መንቹንኩ ጳዉሎስ ጠሃቀንየን መጮጨዮ እኬ። ጳዉሎስን ህከ መንቹ ቀሽ አፍ ጡጅ ፈዪ ደንዴሰኖ አመዕነቱ ዮስገ ደጎ ጃተ 10 አበ ላጋን «ጠብት ሎካንተክ ኡር!» ዬሃንስ ህኩ መንቹንኩ ጦቅይ መረሙ አፎ። 11 ምናደቡንኩ ጳዉሎስ አሴ ጠሀ ጡዶ ጃተ ልቃኦን ባድ አፌን «መገነት መነ አጉድ ኒበ ድርቴእ» ይት አበ ላጋን ጠሃቶእ። 12 እሶኦንት ባርነባሴ «ዙሴ» ይቶእ። አሞ በትናሸተ ጃተ ጠሃቀዮኢ እኮተኔ ጳዉሎሴ «ሄርሜኔ» ይቶስ። 13 ከተሚች ኤተሮ ምኑ ዮ «ዙሴ» ዬኖ መገንሰ ቄስቹ ቦረታ ሸፌገ መክሴመ ዘራሩታ ጎችበ ዋሽ ምናደቢንን በርገም ጳዉሎሴሃ ባርነባሴሃ ክትመ ህንጨኦሰተ ሀሾ። 14 ጠሁ እኮዳ ጳዉሎሲ በርናባሲ ህከ ጠሀ መጮጭቶ ጃተ ክቼቺን ኦድሸሰ ዘርት ያርተን መንበ ደጉደን መርትኬእ 15 «ከን መነ! ከ ጠሀ ሚ አስቴነዮንተ? ነኦንት ክዕኔኤገን ዮምየ መነ። ነኦት ከበ ዋኖሚ አዕኖኦት ከን ጠለለ ጠሂች ሁንቴን ሰማ፥ ኡለተ፥ በሃረሃ ኣዜንተሰ ዮረ ሆረንካ ቆጬነ ሄአኖ መገንበ ፈንቀልቴኑንተ ምሽራች ላገተ ኩኖዕኔታት። 16 ህጎ ዶላን ምናደቡ ሆሩንኩ ሀሾገ ሄኡንተ መገኑ አጉር አጉሬ እኬ። 17 እሁን በጋን እስ ቢዘ መገኑ እኮገ ነቀሳስ ደናምተ ሁጅተ አሱ አጉርምበአ። ዳፉንኩስ ሰሜች ጤነ ኡጄዕኔ። አሞ ላሉት ላልታ አገናከንተ ኣሴዕኔ። እቻኒ በጅጎኒ ዎዘንዕኔ ሰገብተ ሙሮ» ይቶእ። 18 ህትጉንተ ይትኬእ ምናደቡ ለሚንከሰ ክትመ ህንጨቱምቦገ ሀዊን ከንቶእ። 19 እኮዳ አይሁድ-መኑ አንጦክነ እቆንዮም ከተማች ህከበ ዋልት ምናደበ ሂለ ኤረ ኤረንስት ጳዉሎሴ ክኒን ቀስ ሬሄኢ አጉጅየንሰ ጎሾሽት ከተሚች ኤተሮ ኡጅቶእ። 20 ጠሁ እኮዳ አወናኑ ዋልት ሺናንተስ ኡርቴሀኔን ጦቅይ ከተመ ኣጎ። ለንክ በርንከ ባርነባሴንን በርገም «ደርቤ» ዬኖ ከተመ ኦሮቄእ። 21 ጳዉሎሲ በርናባሲ «ደርቤ» ዬኖ ከተማን ምሽራች ላገተ ሰበክ ሆለመ መነ ዬሱስ አወናኑ አስቶእ። ህከኒች ዘኪን «ልስጥረ» ፥ «እቆንዮመሃ» «አንጦከሃ» የመንታ ከተማከተ ፈንቀልት ኦሮቅቶእ። 22 ህተን ከተማካን ዮ አመዕናን ዎዘነ ቃርስተን፥ አመዕነቶንተሰ ቃርት ሄኣገ ሰዘኒ «መገን ዎሞመተ ኣጊ በትናሸ ሀወ ኣቁ ሀስሰኖኔ» ይተኒ ኩልተዮሰ እኬ። 23 እሶኦት አመዕናን ማበሪ ሆሪንከ ኑባቡ ኣስት ጦንቶሀኒቺ መገኑ ኡጭቶሀኒቺ ዘኪን እሶኦት አመዕንቶ መገኒ ሀደረተ ህግስ ኣስቶሰ። 24 እሶኦንት «ጵሲደ» ዬኖ ባዲን ህግ «ጲንፍለ» ዬኖ ባዱ ዋልቶእ። 25 «ጴርገ» ዬኖ ከተማን መገን ላገተ ሮስሶሀኒች ዘኪን «አጣልየ» ዬኖ ከተመ ድርቶእ። 26 ህከምቢችን መርከባን ኣግ አንጦከ ፈንቀልቶእ። ህኩ አንጦክ ከተሙ ቴሱ ሁጀት ጦፎ ሁጄ ፉልቶ ጃተ መገን ኣሰንቺ ህግሴን ሀደረተ ኣሴመሰተ መዕን እኬ። 27 ህከበ ኢልቶ ጃተ አመዕናኑ ሆረንከ ሜጦማን ጠጰት መገኑ እሶኦን በርገም አሴ ጠሀ ሆረንካ አይሁደ እኩምቡ መኑ መገኑ አመዕንቱንተ ሀትጉተ አስ ዎቃ ፈኖሰንዶኒ ኩልቶእ። 28 እሶኦንት ህከኔ አመዕናኒን በርገንት ሆለመተ ጃተ አፉዕልቶእ።
1 መ-መቱ መኑ ይሁድ ባዲች አንጦክ ከተመ ድርትኬእ «ሙሴ ሴርጊን ኑጉሰንቴኑምቦደ ፈኤነንተበአ» ይተን አመዕናኒ ሮስሱ አፎእ። 2 ጳዉሎሲ በርናባሲ ህከን ጠህተኔ መኒንተስ አብስ በአንት ኦደንቶተኔ እሶኦቲ ህከን ባድ አመዕናኒች መ-መቱሁ ዬሩሳሌመ ዮ ሶቀማንባ ኑባብባ መርታጊ ኢተሜመ። 3 ህከኒ እሶኦንከ አመዕናን ማበሩ ዎቄሀንሰ ሽንቅተ ኣስ ሶክየንሰ አይሁደ እሁምቡ መኑ ዬሱሰ አመዕኔገ ኩልተን ፊንቄነ ሰማር ባዲን ህጎእ። ህከን ጠሂንን አመዕናኑ ሆረንከ አብስ በጅቀንስቶእ። 4 እሶኦንት ዬሩሳሌመ ኢልቶ ጃተ አመዕናን ማበሩ፥ ሶቀማኑሁ ኑባቡሁ «ኤመን ጡመ ዋልቴን» ይት ኣቅቶሰ። አሞ መገኑ እሶኦን በርገም አሴ ጠሀ ሆረንከ ዬሩሳሌመ ዮ መኒ ኩልቶእ። 5 ጠሁ እኮዳ ፋሪሰ ዉዲች አመዕንቶ መኒች መ-መቱ ጦቅት ኡርት «ህከ አይሁደ እኩምቡ መነ ኑጉሰንቱንታ ሙሴ ሴረ ቆረቡንታ አዘዙ ሀስሰኖዕኔ» ይቶእ። 6 ሶቀማኑሁ ኑባቡሁ ህከን ጠህተኔ ኤረንቶተ ጠጵቶእ። 7 ሆለመ ኦደንቶሀኒች ዘኪን ጴጥሮስ ጦቅይ «ኢ ህዛከ! አይሁደ እኩምቡ መኑ ኢ አፌች ምሽራች ላገተ መጮት አመዕንቱንተ መገኑ ከኒች ብሬ ኤስ ክዕኔኤ ሜሬሪች ዶዕሬኤገ ደጌነንተ። 8 መን ዎዘነ ደገኖ መገኑ ጡማንቹ አያነ ኔሳ ኣሴገንከ እሶኦሃ ኣሲን ነቀሼሰ። 9 አሞ መገኑ ዎዘነሰ አመዕነቲን ሙጩርሴተኔ እሶኦነ ኒ ሜሬሮን ሜጥተ አነኖመታ አስምበአ። 10 ህካን እኮች አናከኔ ነኦቲ እይኖተ ደንድኑምቡ ሀርቆተ አመዕናን ጌነኖን እዪሴነን መገኒን ሚ ኡርጨንቴነዮንተ? 11 ጠሁ እኮዳ ነኦቲ ፈዕናሚ እሶኦገንከ ቀርቾ ዬሱስ ክርስቶስ ኣሰንቺን እሁስ አመዕንናም» ዬሰ። 12 ህተ ጄቹተ ጠጵዬ መኑ ሆሩንኩ ሰዕምይ አጉሮ። አሞ በርናባሲ ጳዉሎሲ አይሁደ እኩምቦ መን ሜሬሮን እሶኦ ዉዲን መገኑ አሴ ማለሉታ መላታ ሆረንከ ኩልተንየን መጮጭተዮ እኬ። 13 እሶኦንት ጠሃት ጦፎሀኒች ዘኪን ያቆብ + ፈንቀሽ «ኢ ህዛከ ከበ መጮጭዬ። 14 መገኑ አይሁደ እኩምቦ መኒች ሱዕሚንተስ ገአመኖ መነ ዶዕሪን ዎና ሀትጉተ ጡጆሰንዶ ስሞን ጫክሽ ኩሌእ። 15 ከን ሰውቲን ህራጋን ላገት ሜጡ እክ መጠቃእ። ህኩስን ከኒች ዎሮዲን ጣፈሟገ። 16 - 17 ‹ከኒች ዘኪን ፈኦ መኑሁ ሱዕሚንተኤ ገአንቶ አይሁደ እኩምቡ መኑሁ ሆሩንኩ ኤስ መገኑ ሀሱንተ ፈንቀላም። ኡቦ ዳዊቴ ምንንከ ለንኪሃ ምናም። ዝረሞሲንከ ለንኪሃ ፈንቀሽ ኡርሳም። 18 ዎዶችን አፍ ካን ሆረንከ ለሊሾ መገኑ ህትጉተ ያዮእ› የመም ጣፈሜእ። 19 ህከኒ ኢ ሰውቱ መገንበ ፈንቀልቶ አይሁደ እኩምቡ መነ ሀውንሱንከ። 20 ህከን ቆደ ‹ቆጰን መገናካ ክትሜመራን ሃሻረሚች፥ ሳኢች፥ ለንገቅ ሬሄ ግዝ ማለ እቲቺ ቄግ እቲቺ ቆረጵዬ› ይን ጣንፉንሰ። 21 ዳፉንኩስ በሽለ ዶሊች አፍ ሙሴ ሴሩ ሰንበት ሰንበት በር ጠጵትኔ ምናን አነበበመዮእ። ላገንትስ ከተማን ሆራንን ኩለንተዮእ» ዬእ። 22 ህከኒች ዘኪን ሶቀማኑሁ ኑባቡሁ አመዕናን ማበሪን ሆሪንን በርገንት ያእ ሜሬሪች ቀሁንከ መነ ዶዕርት ጳዉሎሴኒ ባርነባሴኒ በርግት አንጦክ ከተመ ሶኮተ ኤረንቶእ። ህከኒ ህዛከ ሜሬሮን አብስ በሬደ መነ «በርሰባሴ» የመሞ ይሁደኒ ስላሴኒ ዶዕርቶእ። 23 ጣፈንቶ ደዳቤንተ እሶኦ አንጋን ሶኮእ። ደዳቤስን «ነኦት ህዛከዕኔ ሶቀማኑሁ ኑባቡሁ አንጦክ ከተማኒ ሶርይነ ክልቅይ ባዶኒ ሄኤነንተ አይሁደ እኬኑምቦ መን ዉድ ህዛከኔ ጡመ ይናንክዕኔ። 24 ኒ ሜሬሪች መ-መቱ መኑ ነኦት ሶንኩዕናንሰ ክዕኔኤበ መርት ኩልቶዕኔ ላጋን ሀውሶዕኔጋ መሉ በአኖዕኔገ አስቶዕኔጋ መጮኔም። 25 ህከንተኔ ሜጦማን ጠጵን ክዕኔኤበ ሶንካምረ ዶዕርን ኢተንቴ ህዛካች ባርነባሴኒ ጳዉሎሴኒ በርግን ክዕኔኤበ ሶንኮተ ኢተሞም። 26 በርናባሲ ጳዉሎሲ ቀርቾ ዬሱስ ክርስቶስተኔ ፎልሰ ህግስ ኣስቴሃረ። 27 ይሁዲ ስላሲ ነኦት ይኖምረ ገግሰ አፌን መክስ ኩልቱንተክዕኔ ሶንኬም። 28 ህከንተኔ ከኒች ዎሮዲን ዮ ሀስሳ ጠሃካች በጋን ዎሉ ኬዕማሸ ጠሀ እዪንሱምቦዕኔገ ጡማንቹ አያኑሁ ነኦቲ ኢተሜም። 29 ቆጰን መገናካ ክትሜመራን ሃሻረሚች፥ ሳኢች፥ ለንገቅ ሬሄ ግዝ ማለ እቲቺ ቄግ እቲቺ ቆረጵዬ። ከን ሆሪችን ቆረጵቴንተደ በሬዳ። አቼ ጡመ ሄእዬ» ይት ጣፎእ። 30 ህከኒች ዘኪን ሶሀንቶ መኑ «ጡመ ሄእዬ» ይት አንጦክ ከተመ ኦሮቅቶእ። እሶኦንት አመዕኔ መነ ጠጰት ደዳቤተ ኣስቶሰ። 31 አመዕናኑንኩ ደዳብስ አነበቦ ጃተ ሶሀንቶሰ ሰዘና አብስ በጅቀንቶእ። 32 አሞ ይሁዲ ስላሲ ህራጋኑ እኮተኔ አመዕናኑ ሆለመ ጠሂን ሰዝ ቃርስቶሰ። 33 እሶኦንት ህከኔ ዮ አመዕናኒን ቀሁንከ በር በርገንት አፉዕልቶሀኒች ዘኪን «ጡመ ሄእዬ» የቀንት ሶኮሰ መንበ ፈንቀልት ኦሮቅቶእ። 34 ጠሁ እኮዳ ስላስ ህከኔ ሄኦተ ኢቴእ። 35 እኮዳ ጳዉሎሲ በርናባሲ ዎሎ ሆለመ መኒን በርገንት ቀርች ላገተ ሮስሰኒ ምሽራች ላገተ ሰበከኒ አንጦክ ከተማን አፉዕልቶእ። 36 ቀሆ በሬች ዘኪን ጳዉሎስ ባርነባሴ «ዋል። ከኒች ብሬ ቀርች ላገተ ሮስንሶም ከተማካን ሆራንን ዮ ህዛከት ሀትጉተ ዮእንዶ ዘህነን ጡንዶ» ዬእ። 37 በርናባስ አሞ «ማርቆሴ» የመሞ ዮሃንስ እሶኦን በርገም መሩንተ ሀሾ። 38 ጠሁ እኮዳ ጳዉሎስ ኩ መንቹ እሶኦን በርገም መሩንተ ሀስምበአ። ዳፉንኩስ እስ «ጲንፍለ» ዬኖባን እሶኦች አነነ እክ ሁጄበ መሩዕነ ፈኦተኔሃት እኬ። 39 ህከኒ አብስ ኦደንቶሀኒች ዘኪን አነነ እኮእ። ህከንተኔ በርናባስ ማርቆሴ አፍ መርከባን ኣግ ዎኢን ክበሜ «ቆጵሮሰ» ዬኖ ባዱ መሮ። 40 ጠሁ እኮዳ ጳዉሎስ ስላሴ ዶዕሬእ። አመዕናኑንኩ ጳዉሎሴ ቀርች ኣሰንቺ ሀደረተ ኣስቶስሀኒች ዘኪን ኦሮቄእ። 41 እስን «ሶርየሃ ክልቅየሃ» ዬኖባን ዮ አመዕናን ማበረ ቃርሰን ዘሀዮ እኬ።
1 ጳዉሎስ «ደርቤታ ልስጥረሃ» ዬኖበ ዋሎ። ህከኔን «ጥማቶሴ» + ዬኖ አወናንቹ ዮ እኬ። አመስን አይሁድ ዉድተ አመዕናንቹ። እኮዳ አኑስ ግሪክቿ እኬ። 2 እሲንከ «ልስጥረሃ እቆንዮመሃ» ዬኖባን አመዕናኖ ህዛከባን ደናሙ ሱዕሙ ዮስየ እኬ። 3 ጳዉሎስ ጥማቶሴ አፍ መረሚ ሀሾተኔ ኑጉሴእ። ዳፉንኩስ ህከምባን ሄኣ አይሁድ-መኑ ሆሩንኩ ጥማቶሴ አኑ ግሪክቹ እኮገ ደጋተኔሃት እኬ። 4 እሶኦንት ከተማከተ ዘህተን ዬሩሳሌም ከተማን ዮ ሶቀማኑሁ ኑባቡሁ ሃሳውት ኡርሶ አዘዙተ አመዕናኑ ሁጄን ሆስሱንተ አስቶሰ። 5 ህከንተኔ አመዕናን ማበሩ አመዕነቲን ቃርተን በሪን በሪን ዎሉሰን በተአን መርተዮ እኬ። 6 አሞ እሶኦት እስይ ባዶን መገን ላገተ ኩልቱምቦገ ጡማንቹ አያኑ ከምየንሰ ፍርግነ ገላትይ + ባዲን ህጎእ። 7 «ምስየ» ዬኖ ባድ ገበለ ኢልቶ ጃተ ቢታን ባዱ ኣጎተ ሰውቶእ። ጠሁ እኮዳ ዬሱስ ጡማንቹ አያኑ ከሞሰ። 8 ህከኒ እሶኦት ምስይ ባዲን ህግ ጢሮኣድ ከተመ ድርቶእ። 9 ህከኔን አንከር መቱ መቄዶን መንቹ ኡር «መቄዶነ ዋልት ካዕልኔ» ያን ኡጨቀንየን ጳዉሎስ ሀቄገ ጡጆ። 10 ጳዉሎስ ሀቄገ ጡጆሀኒች ዘኪን ነኦት ህተ ጃንተ መቄዶነ መሪ ቅጠሞም። ዳፉንኩስ ነኦት ህከኔ ዮ መኒ ምሽራች ላገተ ኩኑንተ መገኑ ገኤኔገ ደንጎምተኔሃት እኬ። 11 ጢሮኣዲች መርከባን ኣንግኬዕን ጠብን «ሳሞትራቄ» ዬኖበ ኢልኖም። አሞ ለንክስ በር «ናጶልሴ» ዬኖበ መኖም። 12 ነኦት ህከምቤቺች ኬዕን ፍልጵሱስ + ከተመ ኢልኖም። ፍልጵሱሱ መቄዶን አዉራጄየ አበ ከተመኒ ሮሜ ባድ ዎም አንጋን ጠቀመዮሃ ባዱኒ እኬ። ነኦት ህከኔ ቀሁ በር ኤጌኖም። 13 አሞ ሰንበት በርንከ ከተሚች ኤተሮ መገኑ ኡጬኖተ ጠጵዬኖ መዕንት ዮኢ አጉጆኔተኔ ፉን ለግ ቶቹ መኖም። ህከኔ ሜጡ እንክ አፉዕልን ጠጵቶ ሜንቲን ሃሳውኖም። 14 ህከኔን መጮጭተዮኔ ሜንቲች መትት ትያጥሮን ከተሚች ዋልቴኢት ቢሸተ ኦድሸተ ዘዘልታነ መገኒ ሰገዳ «ሊድየ» ዬኖ ሜንትቹት ይናምረ መጮጭተዮ እኬ። ጳዉሎስ ጠሃቀኖረንከ ቆርሲ ደንድቱንተ መገኑ ዎዘነሴ ፈኖ። 15 እሴን ምንሴ መኒን ሆሪንን በርገንት ጠመቀንቶሀኒች ዘኪን «ቀርቾ መገኖን አመዕኔሚተ አቴን ዎልሴንተኤች ምንኤ ዋልዬ» ይት ቃርስት ኡጭቶኔተኔ መኖም። 16 ነኦት መቱ በር መገኑ ኡጬኖ መዕንተ መነዮምሀኔን ኪልታገ አሰኖ ሂሉ አያኑ ዮሴ መትት ሶቀማንቹት ሜሴሌት ዎቃን ደቀንቶኔ። ህት ሜሴሌንት ኪልተን ዋለኖ ጠሀ መኒ ኩልተን ቀርባሀንሴ ሆለመ ግዘ ኤበዮሰተ እኬ። 17 እሴን ጳዉሎሴኒ ኔሲ አወንተን «ኩ መኑ ሆሪችን አበ መገንተ አግዘ። እሶኦንት ፈኤኖ ዎቃ ኩልታዕኔየረ» ይተን ያርቶእ። 18 ህካንን ሆለመ በር አስቶእ። ጠሁ እኮዳ ጳዉሎስ ክቼእኬእ ዘኩ ፈንቀል ጡጅ «ከን ሂለ አያነ ዬሱስ ክርስቶስ ሱዕሚን እሴች ፉልቱንተ አዘዛንኬ» ዬእ። ህተ ጃንተ ፉሎ። 19 እኮዳ ቀርበሴ ግዘ ደቅታ ዎቆ ሙረሞሰገ ደጎ ጃተ ጳዉሎሴኒ ስላሴኒ አፍ ድኮበ ጎሾሽተን መስት ያእ ዳናከ ብርተ ህንጨቶእ። 20 እሶኦንት ገሻን ብርተ ህንጨት «ኩ መኑ አይሁድ መነ እከን ከተማንተኔ ብተተ ፉሽተዮእ። 21 ነኦት ሮሜ ባድ መኑ ኣቅኖታ አስኖታ ሴሩኔ አዘዙምቡተ ሮሸተ ሮስሰዮእ» ይቶእ። 22 ምናደቡ እሶኦ አሌን ጣጭት ኬኦእ። ገሻኑንኩ ጳዉሎሴነ ስላሴ ኦድሸተ ቃርቶሀኒች ዘኪን ደሚን ኦለንታገ አዘዞእ። 23 ሆለመ ኦልቶሰሀኒች ዘኪን ኡሱሮ ምን ኣግስኬእ ኡሱሮስ ምን ዘበንቹ ቃርስ ቆረበኖገ አዘዞእ። 24 ህኩ ኡሱሮ ምን ዘበንቹንኩ አዘዙተ ኣቄሀኒች ዘኪን ኣዝ ኮሸ ኣግሽ ሎከሰ ጌዴላን ቃርስ ኡሱሮ። 25 አንከር በቅተ ጳዉሎሲ ስላሲ መገኑ ኡጭተኒ ዘመርተኒ ገለጥተንየን ዎሉ ኡሱረንቶ መኑ መጮጭተዮሰ እኬ። 26 ህከኒ ደንጎን ኡሱሮ ምን ሾሁት ሌንቄቅታኢ ኢለንቀጤች አቡ ኡለ ሌንቄቁ እኮ። ህተ ጃንተ ኡሱሮ ምን ኡራከት ሆረንት ሜጤን ፈነንቶእ። አሞ ሆሩንኩ መኑ ኡሱረንት ዮእኬ ሰንሰለቱ ሂረሞ። 27 ኡሱሮ ምን ዘበንቹ ግሰናች በቅኬእ ኡሱሮ ምን ኡራከት ፈነንቴኢ ጡጆ ጃተ ኡሱረንቶሩ ፉሸቅቶኢ አጉጅየንስ ገገስ ሾተ ብሰ ጦቀኤእ። 28 ጠሁ እኮዳ ጳዉሎስ «ሆሩንኩኔ ከኔ ዮምተኔ ገገክ ጌዕንቶት» ይ አበ ላጋን ያር ከሞ። 29 አሞ እስን መርባት አፍሲሽ አፍ ኣዝ ኮሸ ደጉጅ ኣግ ሁጠን ጳዉሎሴነ ስላሴ ብሬን ኡቦ። 30 እሶኦተ ሀደተ ፉሽኬእ «ቀርበ! አን ፈኦተ መ አሱ ሀስሰኖኤ» ይ ጠዕሜሰ። 31 እሶኦንት «ቀርቾ ዬሱስ ክርስቶሳን አመዕንቶንትደ አቲ ኪ ምን መኑሁ ፈኤነንተ» ይቶስ። 32 አሞ እሶኦንት መገን ላገተ እሲሃ ምኔንተስ ዮ አበሮሲሃ ኩልቶእ። 33 እስ ህተ ጃንተ አንከሬን እሶኦተ መስኬእ መዘሰ ኣንሼሀኒች ዘኪን አበሮሲንተስን በርገም ጠመቀሞ። 34 ህከኒች ዘኪን እስ እሶኦተ ምንስ ዋሽ እቸተ ብርሰ ህንጨኤእ። አሞ እሲ ምንስ መኑሁ መገኖን አመዕንቶተኔ በጅቀንቶእ። 35 ጠሁ እኮዳ ለንክ በሬ ገስመ ከተምስ ገሻኑ «ህኩ መኑ ኦሮቅቱንተ ገፈርዬ» ይት ዘበነ ሶኮእ። 36 ኡሱሮ ምን ዘበንቹ «አዕኖኦት ገፈረንቴነንተጊ ከተም ገሻኑ ሶኬእ። ህከኒ ቴሱ ፉልቴን ጡሚን ኦሮቅዬ» ይ ጳዉሎሴ ኩሎ። 37 እኮዳ ጳዉሎስ «ነኦት ሮሜ + ባድ መነ እንከንየን መሃ በእንሱዕናች ምናደብ ብሬን ኦልት ኡሱሮ ምን ኣግሴኔ። አሞ ቴሱ ማጠም ፉኑንተ አተዮኔንዶ? ፉናምበአ! እሶኦት ገጉንኩሰ ዋልት ፉሽቱኔ» ዬሰ። 38 ዘበኑ እሶኦት ይቶ ላገተ ከተም ገሻኒ ኩልትየንሰ ገሻኑንኩ ጳዉሎሲ ስላሲ ሮሜ ባድ መነ እሁሰ መጮቶ ጃተ ዋጅቶእ። 39 ህከኒ ገሻኑንኩ ዋልት «በእንሴም» ይት ኡሱሮ ምኒች ፉሽት ከተሚች ፉልት ኦሮቅቱንተ ኡጭቶእ። 40 ጳዉሎሲ ስላሲ ኡሱሮ ምኒች ፉልት ሊድየ ምን ኣጎእ። ህከኔን አመዕናኑ ህዛከተ ሰዝ ቃርስት አጉርት ኦሮቅቶእ።
1 ህከኒች ዘኪን ጳዉሎሲ ስላሲ «አንፍጶሊሰሃ አጶሎነሃ» ዬኖ ከተሚን ህግ ተሰሎንቄ + ከተመ ዋልቶእ። ህኩቡንኩ አይሁድ ጠጵት ምኑ ዮሃበ እኬ። 2 ጳዉሎስ ኤጄ ሮሸስገንከ አይሁድ ጠጵት ምን ኣጎ። እስን እሶኦ ሰሱ ሰንበት በር መገን ላገተ ጡማንቾ መጣፋች አነበበን ኩለዮሰ እኬ። 3 ህትጉንተ ዶዕረሞ ክርስቶሱ ሀወ ኣቁሁ ሬሆች ኬኡሁ ሀስሰኖስገ ጫክሽ ኩለን «ኩ አን ኩላንክዕኔ ዬሱሱ ዶዕረሞ ክርስቶሳት» ያዮ እኬ። 4 እሶኦችን መ-መቲሀንስ ጠሁስ ኣግየንሰ አመዕንት ጳዉሎሴኒ ስላሴኒ ሜጡ እኮእ። ህትጉንተ ሆለሙ መገኒ ሰገዳ ግሪክ ባድ መኑሁ ከተማንተስ አብኒን ለልቴ ሜንቱሁ ላገሰ መጮት እሶኦን ሜጡ እኮእ። 5 ጠሁ እኮዳ አመዕንቱምቡ አይሁድ-መኑ ቂንሽት ሁጅት ዮበእ ሶሳከተ ጠጰት በትናሸ መነ ሂለ ኤረ ኤረንስት ከተማንተስ ብተት ኬኣገ አስቶእ። አሞ ጳዉሎሴኒ ስላሴኒ ፉሽት ምናደቢ ኣስቶተ ሀስ «እያሶኔ» ዬኖ መንች ምን ክብቶእ። 6 ጠሁ እኮዳ እሶኦተ ደጉ ሆጎ ጃተ እያሶኔኒ ህዛካች መ-መቱሃ ከተም ገሻን ብርተ ህንጨቶተ ጎሾሽተን ኦሮሶእ። ህትጉንተ «ኩ መኑ ሆረንከ ባዱ ሀውሴሃረ። አሞ ቴሱ ኒ ከተመ ዋልቴእ። 7 እያሶንን ምኔንተስ ‹ኤመን ጡመ ዋልቴን› ይ ኣቄሰ። አሞ ‹ዬሱሰ ዬኖ ዎሉ ዎሙ ዮኔ› ይት ሮሜ ባድ ዎም አዘዙተ ግበዮሃረ» ይት ያርቶእ። 8 ምናደቡሁ ከተም ገሻኑሁ ህከ ጠሀ መጮጭቶ ጃተ ሌንቄቅቶእ። 9 እሶኦንት እያሶኔኒ ዎሉ ኬኑሃ ሩበቶን ገፈርቶሰ። 10 ህተ ጃተ አመዕናኑ ጳዉሎሴኒ ስላሴኒ አንከሬን «ቤርየ» ዬኖ ከተመ ሂርሲሶሰ። እሶኦንት ህከበ ኢልቶገንከ አይሁድ ጠጵት ምን ኣጎእ። 11 ህከኔ ዮ አይሁድ-መኑ ተሰሎንቄ ከተማን ዮ አይሁድ-መኒች ሰውቲን አብስ ጠቤነ መነ እኮተኔ ኩ ጳዉሎስ ዬ ጠሁ ገርተንዶ ደጊ በሪን በሪን ጡማንቹተ መጣፈተ ቆርምተን ላገስ አበ በጅጎን ኣቅቶእ። 12 ህከኒ እሶኦች ሆለሙሰ፥ ግሪክ ቀባጣመት ሜንቱሁ በትናሹ ጎኑሁ አመዕንቶእ። 13 ጠሁ እኮዳ ተሰሎንቄ ከተማን ዮ አይሁድ-መኑ ጳዉሎስ ቤርይ ከተም መኒ መገን ላገተ ኩሎገ መጮጭቶ ጃተ ህከበ ዋልትኬእ መነ ሂለ ኤረ ኤረንስት ምናደቡ አሌንተሰ ኬአኖገ አስቶእ። 14 ህተ ጃንተ አመዕናኑ ህዛከት ጳዉሎስ ደዕል በሃር ቶቹ መረኖገ አቶእ። እኮዳ ስላሲ ጥማቶሲ ህከኔ ፈኦእ። 15 ጳዉሎሴ ህርሲስ አቴን ከተመ ኢልሶ መኑ «ስላሲ ጥማቶሲ ደዕልት ኢበ ዋልቱን» ዬ ጳዉሎሴ ሶህኑተ አፍ ቤርየ ፈንቀልቶእ። 16 ጳዉሎስ አቴን ከተማን አፉዕል ስላሴኒ ጥማቶሴኒ ቆረበን ከተማንተስ ቆጰን መገናካ ሰገዴኖሩ ዊሞገ ጡጆ ጃተ ዎዘናንተስ አብሽ አጂፌእ። 17 ህከኒ ጠጵት ምኔን አይሁድ-መኒን፥ መገኒ ሰገዳ መኒኒ አሞ በሪን በሪን ድኮ መዕኔን ደቀመኖ መኒኒ ጠሃቀዮ እኬ። 18 «እጵቁራነሃ + እስጦከሃ» የመንታ ኤንኬዕናኑ ጳዉሎሴበ ዋልተን ኦደንተዮ እኬ። መ-መቱሰ «ኩ ጎእቹ መ ዮታት?» ይተዮ እኬ። አሞ ዎሉሰ ፈንቀሽት «ሮሰንቱምቦ መገናከተኔ ጠሃቀኖ አጉደዮእ» ይተዮ እኬ። ህካንን ይቶ ዳፉ ጳዉሎስ ዬሱሱ ሬሆች ኬኦ ዱዱቡ ኩሎሰተኔሃት እኬ። 19 እሶኦንት ጳዉሎሴ አፍ «ኣርዮፋጎሰ» + ዬኖ ያእ መዕንተ ዋሽት «ኩ አት ኩልታንትኔ ሃሮ ጠሁ መሃንዶ ደጊ ደንድናምንዶ? 20 ኩ አት መጫሃኔ ሃሮ ጠሀ ጠሃተዮንቲ መሃንዶ ደጊ ሀንሳምተኔ ሂርት ኩልኔ» ይቶእ። 21 ዳፉንኩስ አቴን ከተም መኑ ሆሩንኩ ህከኔ ሄአኖ ዎሎ ባድ መኑሁ ሃሮ ጠሀ ጠሃተኒ መጮተኒ ሆሲች በጋን ዎሉረ ሜጡራ አስቱምቧረ እኬ። 22 ህከኒ ጳዉሎስ «ኣርዮፋጎሰ» ዬኖ ያእባን ኡር «አቴን መነ! ሆራንከ ዉዲን አመዕነቱ ዮዕኔ መነ እሁዕኔ ደጌም። 23 ከተመዕኔ ዘሀን አዕኖኦት ሰገዴነንተረ ጡደን ‹ደገሙምቦ መገኒ› የመም ጣፈሜሩ ዮ ክትም መዕንተ ኢሌም። አቼ ህከ ደጌኑዕናች ሰገዴነንታ አን ኩላንክዕኔ። 24 መገኑ ኡለታ ኡለ አሌን ዮራ ሆረንከ ቆጬእ። እስን ሰሜነ ኡለ ቀርቹ እኮተኔ መኑ ምኖ ምኔን ሄአኖበአ። 25 እስን ፎልሃ ዎሉረ ሆረረንካ መኒ ኣሰኖ እኮተኔ መቱሩ ኮቾስሀንገ መን አንገ ካለቱተ ሀሰኖበአ። 26 አሞ መገኑ ኡለ አሌን ሄአኖ መን ዜረ ሆረንከ ሜጦ ቄጊች ቆጬእ። እሶኦንከ ሄኣ ዶለሃ ሄኣ መዕኔ ገበለሃ ቅጠንሴሰ። 27 ህካን አሴኢንኩ መኑ መገኑ ሀሱንታ ሀሽ���እ እሱ ኢል ደጊ ደንደኖዳ ይኔት። እሁን በጋን እስ ኔሳች ሆሪችኔን ቄዕሬሃበአ። 28 ዳፉንኩስ ሀዩተ ጠሃታ መኒችዕኔ መ-መቱ ‹ነኦት ኦሱተንስ› ይቶገንከ ፎላመተ እንክ ሌንቄቅናሚሁ ሄዕናሚሁ መገኒኔት። 29 አቼ ነኦት መገን ኦሱተ እንኮሚች ‹መገኑ መን ቆርማኒ ሰውቲኒ መኬ ዎርቅ እንዶ ቡሬች እንዶ ክን ምስለ አጉደኗ› ይን ሰውዩ ሀስሰኖበአ። 30 ህከኒ መገኑ ቀልመ ዶለ ህግሽ ቴሱ እኮዳ መዕኔን ሆራንን ዮ መኑ ባጢለ ቢረ ይ ፈንቀሉንተ አዘዘዮእ። 31 ዳፉንኩስ መገኑ ዶዕሬ መንች ዉዲን ሆራንከ መን አሌን ገርተ ፍርደኖ በር አፌእ። ህካንን ገርተ እኮገ መኒ ሆሪንከ ጡድሾ ህከ እስ ዶዕሬ መንቹ ሬሆች ኬእሲኔት» ዬእ። 32 እሶኦት «ሬቶሪ ኬእተኔ» መጮቶሀኒች ዘኪን እሶኦች በከኑሰ ገላጮእ። ጠሁ እኮዳ በከኑሰ «ከን ጠህተኔ ለንኪሃ ኬሳች መጮኖተ ሀንሳም» ይቶእ። 33 ጳዉሎስን ሜሬሪችሰ ኬእ ኦሮቄእ። 34 ጠሁ እኮዳ ቀሁ ቀጡ መኑ ጳዉሎስ ዬ ጠሀ ኢትት አመዕንቶእ። እሶኦንን በርገንት «ኣርዮፋጎሰ» ዬኖ ያእ መኒች መቱ «ዳዮንሱስ» ዬኖ መንቹ፥ «ዳማርሴ» ዬኖ ሜንትቹቲ ዎሉ ሆለሙ መኑሁ ዮ እኬ።
1 ህከኒች ዘኪን ጳዉሎስ «አቴነ» ዬኖ ከተሚች ኬእ ቆሮንቶስ + ከተመ ኦሮቄእ። 2 ህከኔን ጳንጦስ ባድቢ ሱዕመስ «አቅለ» ዬኖ አይሁድቹ ደጎ። እስን ቀሆ ጄቾች ብሬ ሜንትቾንተስ ጵርስቅላንን በርገም ጣላን ከተሚች ዋሌሃ እኬ። ዳፉንኩስ አይሁድ-መኑ ሆሩንኩ ከተሚችሰ ፉልቱንተ ሮሜ ባድ ዎሙ ቀላዶስ አዘጆተኔሃት እኬ። ጳዉሎስን እሶኦተ ጡዲ መሮ። 3 ጳዉሎሴ ሁጅቲ እሶኦ ሁጅቲ ዱንካነ ጎቡ እኮተኔ እሶኦንን በርገም ሄአን እሲ ዱንካነ ጎቡ አፎ። 4 እስን ሰንበት በር ሆረንከ አይሁድ-መኒሃ ግሪክ መኒሃ ጠጵት ምኔን ደገመን ሮስሰን አመዕንሰዮሰ እኬ። 5 ህከኒች ዘኪን ጥማቶሲ ስላሲ መቄዶን ባዲች ዋልታደ ጳዉሎስ ዬሱሱ ዶዕረሞ ክርስቶሰ እኮገ አይሁድ-መኒ ሆረንተ ጃተ ቃርስ ኩለዮሰ እኬ። 6 ጠሁ እኮዳ አይሁድ-መኑ ጳዉሎሴ ጠሀ ግብ አሌንተስ ኬኦ ጃተ ኦድሸስ ግግሸን «ቄጊሀንክዕኔ አዕኖኦት ገጉዕኔ ጠዕመንቴነንተ። አን ቄጊችዕኔ ሙጩሯ። ቴሱ አን አይሁደ እኩምቦ መንበ ኦሮቃም» ዬእ። 7 ህከኒ ጳዉሎስ ህከምቢች ኬእ መገኒ ሰገደኖ «ቲቶስ እዮስጦሴ» ዬኖ መንች ምን መሮ። ምኑንኩስ አይሁድ ጠጵት ምኔየ ሺነ እኬ። 8 አይሁድ ጠጵት ምን ገሸኖ «ክርስጶሴ» ዬኖ መንቹ ምንስ መኒን ሆሪንን መገኑ አመዕኔእ። አሞ ሆለሙ ቆሮንቶስ ከተም መኑ ጳዉሎሴች መገን ላገተ መጮጭት አመዕንት ጠመቀንቶእ። 9 ቀርቹ መገኑንኩ መቱ አንከር ሀቄገ ጡደመኖሪን ጳዉሎሴ «ዋጅቶት ሰዕምት ጠሃቅ። 10 አን ኬሳኔት። ሀኩ መንቹሁ ኬስ ጌኒ ደንደኖበአ። ዳፉንኩስ ከን ከተማን ኤሳ ሆለሙ መኑ ዮኤ» ዬስ። 11 ህከኔን ጳዉሎስ መገን ላገተ ሮስሰን መቱ ዎጋሃ ሌሁ አገነሃ እሶኦባን አፉዕሌእ። 12 ጠሁ እኮዳ «ጋልዮሴ» ዬኖ መንቹ አካይ ባዱ ገሸኖ ጃተ አይሁድ-መኑ ሜጡ እክ ጳዉሎሴ አሌን ኬእ አፍ ፍርድ ምን ኦሮሶእ። 13 ህከምባንን «ኩ መንቹ ሴሩ አዘዙምቦጊን መኑ መገኒ ሰገዳገ አሰዮእ» ይቶእ። 14 ጠሁ እኮዳ ጳዉሎስ ህከን ጠህተኔ ፈንቀሾተ ቅጠሜሀኔን ጋልዩ አይሁድ-መኒ «አዕኖኦት አይሁድ-መነ! በእሼዕኔ ሂለት እንዶ አሴዕኔ ጠሁ ዮ እክየን ኦደዕኔ መጮጫም እኬ። 15 እኮዳ ኩ ጠሁ ጠል ላገተኔ፥ ሱዕምተኔሃ ገግዕኔ ሴርተኔሃ እኮች አዕኖኦንት ጦፍዬ። አን ከ ጠሀ ፍርዲ ሀሳምበአ» ዬእ። 16 አሞ እስን እሶኦተ ፍርድ ምኒች ሀደተ ፉሼሰ። 17 ህከኒች ዘኪን እሶኦት ሆሩንኩ ጠጵት ምን ገሻንቹ «ሶስቴኔሴ» ዬኖ አፍ ፍርድ ምን ኡሮን ኦልቶስ። እኮዳ ህኩ ጠሁ ጋልዮሴ መሃ አጉድምበስ። 18 ጳዉሎስ ሆለመተ ጄቹተ ቆሮንቶስ ከተማን ኤጌሮሀኒች ዘኪን አመዕናኑ «ጡመ ሄእዬ» ይ መርከባን ኣግ ሶርይ ባዱ ኦሮቄእ። አሞ ጵርስቅላ አቅላ እሲን በርገንት ዮ እኬ። እኮዳ እስ ስለቼኢ እኮተኔ ኦሮቀኖሀኒች ብርስ ሙምስ «ክንክሮሰ» ዬኖ መዕኔን ሜጤእ። 19 እሶኦት ኤፌሶን + ከተመ ኢልቶ ጃተ እስ ጵርስቅለኒ አቅለኒ ህከኔ አጉር አይሁድ ጠጵት ምን ኣግ አይሁድ-መነ ሃሳውሰዮሰ እኬ። 20 ጳዉሎስ ቀሁ ቀጠ እሶኦባን ኤጌሩንተ ኡጭቶስደ «ኤኩ» ዩ ግቦሰ። 21 ጠሁ እኮዳ እሶኦች አነነ እሀን «ዋለኖ አያነ ዬሩሳሌም ከተማን አብሱ ሀስሰኖኤ። መገኑ ዬደ ክዕኔኤበ ፈንቀል ዋላም» ይ ተሳ አስ ኤፌሶኒች መርከባን ኣግ ኦሮቄእ። 22 ህከኒች ዘኪን እስ «ቄሳረ» ዬኖ ከተሚን ህግ ዬሩሳሌመ ኢል አመዕናን ማበረ ጡምሾሀኒች ዘኪን አንጦክ ከተመ ድሬእ። 23 እስን ቀሁተ ጃተ አንጦክ ከተማን ኤጌሮሀኒች ዘኪን ህከምቢች ኬእ «ገላትየሃ ፍርገሃ» ዬኖ ባዶን መዕኔች መዕንተ ዘሀን አመዕናኑ ሆረንከ ቃርሰዮ እኬ። 24 «አጵሎሴ» ዬኖ አለክሰንደር ከተማን እለሜ አይሁድቹ ኤፌሶን ከተመ ዋሎ። እስን ደናሞገ ጠሃቀኗኒ ጡማንቹተ መጣፈተ ቆርስ ደገኗኒ እኬ። 25 እስን ቀርቾ መገን ዎቄተኔ ደናሞገ ሮሼሃ። አሞ ጡማንቾ አያኒን ቃር ዬሱስ ገሬ ጠሀ ጫክሽ ጠሃቀኗኒ ሮስሰኗኒ እኬ። እኮዳ እስ ዮሃንስ ጠመቆ ጠመቀንቸ ጠለ ደገኗ እኬ። 26 አሞ እስን እግማን አይሁድ ጠጵት ምኔን ጠሃቀኖረ ጵርስቅላ አቅላ መጮጭቶ ጃተ ምንሰ ኦሮስ መገን ዎቃ ዎናች አብስ ሮስሶስ። 27 አሞ አጵሎስ አካይ ባዱ መሮተ ሀሾ ጃተ አመዕናኑ ህዛከት ቃርስቶስ። እሶኦንት አካይ ባዶን ዮ አመዕናኑ ኣቅቱንተስ ደዳቤተ ጣፎስ። እስን ህከበ ኢሌ ጃተ መገን ኣሰንች ዉዲን አመዕንቶረ አብሽ ካዕለዮሰ እኬ። 28 ህከኒ ዬሱሱ ዶዕረሞ ክርስቶሰ እኮገ ሆራንከ መን ብሬን አይሁድ-መኒ ጡማንቾ መጣፋች አነበበን ቃርስ ኦደመን ገረዮሰ እኬ።
1 አጵሎስ ቆሮንቶስ ከተማን ዮ ጃተ ጳዉሎስ አል ባዲን ህግ ኤፌሶን ከተመ ዋሎ። እስን ህከኔ መ-መቱ አመዕናኑ ደጎ። 2 ጳዉሎስን እሶኦተ «አመዕንቴንተ ጃተ ጡማንቹ አያነ ኣቅቴንተንዶ?» ዬሰ። እሶኦንት «ኣቅንምበአ። ጡማንቹ አያኑ ሄኡሲ ሆረን መጮን ከሰበአ» ይቶእ። 3 አሞ ጳዉሎስ «ህከደ ሚን ጠመቀንቴንታ?» ዬሰ። እሶኦንት «ዮሃንሴ ጥንቀቲኔት ጠመቀሜሚ» ይቶእ። 4 ጳዉሎስ «ዮሃንስ ‹ባጢለዕኔ ቢረ ይቴን ፈንቀልቴን ኤሳች ዘኪን ዋለኖ ዬሱሳን አመዕንቴን ጠመቀሜ› ዬእ» ዬሰ። 5 እሶኦንት ህካን መጮቶ ጃተ ቀርቾ ዬሱስ ሱዕሚን ጠመቀንቶእ። 6 አሞ ጳዉሎስ አንገስ እሶኦ አሌን ኡጄ ጃተ ጡማንቹ አያኑ እሶኦ አሌን ድሬሃን ዎሌ ላጋን ጠሃቶእኒ ህራጎእኒ። 7 እሶኦንት ሆሩንኩሰ ቶነ ለሞ መነ እኬ። 8 ጳዉሎስን አይሁድ ጠጵት ምን መር ሰሶ አገን ቀጠ መገን ዎሞመተኔ ኦደመን እግማን መኒ ኩለዮ እኬ። 9 ጠሁ እኮዳ መ-መቱ ጠሁ ኣጉምቡሰ ሾከ መነ እኮተኔ ዬሱስ ዎቃ ምናደብ ብሬን ቦሮርተን አመዕኑ ግቦ ጃተ እሶኦተ አጉር አጉሮ። እስን አመዕናኑ አነነ አስ እስበ ኦሮሽ «ጥራኑሴ» ዬኖ መንቹ ሮስሰኖ መዕኔን መኒ በሪን በሪን ሮስሰዮሰ እኬ። 10 እስይ ባዶን ሄኣ አይሁድ-መኑሁ ግሪክ መኑሁ ሆሩንኩ ቀርቾ መገን ላገተ መጮታኢ ኢለንቀጤች ጳዉሎስ ህከኔ ለሙ ዎጋ ሮስሼእ። 11 አሞ መገኑ ጳዉሎሴ አንጋን አብሽ ማለልሲሰኖረ ሁጀትሲሰዮ እኬ። 12 ህከኒ ጳዉሎሴ ኦድሻች ቃፈተ ኣቄን ሞሳን አሌን ዎሬነንየን ሞሲችሰ ፈይተዮ እኬ። ሞሳኒችን ሂሉ አያኑ ፉለዮ እኬ። 13 መኒች ሀቡሰ ፉሽተን ዘህታ አይሁድ-መኒች መ-መቱ ቀርቾ ዬሱስ ሱዕመ ገእተን «ጳዉሎስ ሰበከኖ ዬሱስ ሱዕሚን ፉልቴኑንተ አዘንዛንክዕኔ» ይተን መኒች ሀቡሰ ፉሺ አጰንተዮ እኬ። 14 «አስቄወ» ዬኖ አይሁድ አበ ቄስቺ ህትጉተ አስታ ለመልት ኦሱት ዮስ እኬ። 15 ጠሁ እኮዳ ሂሉ አያኑ ፈንቀሽ «ዬሱሰ ደጋም። አሞ ጳዉሎሴኒ ደጋም። እኮዳ አዕኖኦስ አዬኤታለ?» ዬሰ። 16 አሞ ሂሉ አያኑ አፎስ መንቹንኩ እሶኦተ ጦጵይ ለንግ አፍ ሆረንከሰ ቄል መዜሽ ኦድሸሰ ዘር ቃር ከምየን ህከን ምኒች ከልን ሁንተን ፉልቶእ። 17 ህኩ ጠሁንኩ ኤፌሶን ከተማን ሄኣ አይሁድ-መኒሃ ግሪኪሃ ሆሪንከ መጮጨሞ ጃተ አብስ ዋጅቶእ። ህከምባንን ቀርቾ ዬሱስ ሱዕሙ አቤእ። 18 አመዕንቶ መኒች ሆለሙሰ ሁጀቶ ሂለ ሁጄች ቢረ ይተኒ ኩልተኒ ፈንቀልተዮ እኬ። 19 አሞ አስመተ ሁጀታሪች በትናሹ መኑ አስመትሰ መጣፈተ ጠጰት ዋሽት ሆራንከ መን ብሬን ቡስቶእ። መጣፈስ ህሬናን ፉሽታ ቀጠ ግዘ ሸለጌመደ ኦንታዱመ ኩሜ ብረ እኮ። 20 ህከኒ መገን ላገት አብስ ቄልተኒ ሌአኒ መርተዮ እኬ። 21 ህኩን ሆሩንኩ እኮሀኒች ዘኪን ጳዉሎስ መቄዶንነ አካይ ባድ ዉዲን ህግ ዬሩሳሌም ከተመ መሮተ ጡማንቾ አያኒን ሰውኬእ «ህከበ ኢሌምሀኒች ዘኪን አሞ ሮሜ ከተመሃ መር ጡዱ ሀስሰኖኤ» ዬእ። 22 ጳዉሎስ ካዕልታስሪች ለሙ ጥማቶሴኒ ኤራስጦሴኒ መቄዶን ባዱ ሶክ እስ ገጉስ እስይ ባዶን ቀሁ ቀጠ ኤጌሮ። 23 ህተ ጄቹተ ዬሱስ ዎቄተኔ ኤፌሶን ከተማን አበት ብተት ኬኦእ። 24 ህከኔን ብረ ሺልሰኖ «ዴሜጥሮሴ» ዬኖ መቱ መንቹ «አርጤምሴ» + ዬኖ ቆጰን መገነ ምኒ ምስለተ ብሪን ሁጀትሲሰን ሁጀታኒሀንስ ሆለመ ግዘ ደገኖ እኬ። 25 ህከኒ እሲን ህከ ብረ ሺልስታ መነሃ ህትጉንተ ሁጅተ ሁጀታራ ጠጰእኬእ «መነ! ነኦት ግዘ ደቅናሚ ተን ሁጄን እኮገ ደጌነንተ። 26 አሞ ኩ ጳዉሎስ ‹መን አንጋን ሁጀተንቶ ምስለት መገናከተበአ› ያን ኤፌሶን ከተማን ጠላን እሁዕናች ቀሆ ባዲች ጠሊች በጋን እስይ ባዶን ሆራንን በትናሸ መነ አመዕንሾጋ ሉስሾጋ አዕኖኦንት ጡዴንተኒ መጮቴንተኒ። 27 ህከኒ አይደጎ ኒ ሁጅት ገደንቴኢተ እሁ ጠለ እሁዕናች እስይ ባድ መኑ ሆሩንኩ ኡለ አሌን ዮ መኑሁ ሰገዳ አበ ‹አርጤምሴ› ዬኖ መገን ምኑ ጠለ እክ ፈአኖ። አሞ እሴ አብኑንኩ ዝረመኖበእንዶ?» ዬሰ። 28 እሶኦንት ህካን መጮቶ ጃተ አሙዕረንት «ኤፌሶን ከተም አርጤምስ አበተ» ይተን ያርቶእ። 29 ህከንተኔ ኤፌሶን ከተማን ሆለመት ብተት እክየን መቄዶን ባዲች ዋልቴ ጳዉሎሴ ጃላከተ ጋዮሴኒ አርስጣርኮሴኒ አፍ ጎሾሽተን ምናደቡ ጠጵያኖ መዕንተ ሜጡ እክ ደጉደን ዋልቶእ። 30 ጳዉሎስ ህከን ጠጵዬ መንበ መሮተ ሀሾደ አመዕናኑ ከንቶስ። 31 እስይ ባድ ገሻኒች ጳዉሎሴ ጃለተ እኮሩ ጳዉሎሴበ ሶክ ምናደብ ጠጵት ቤቹ መሩምቦገ ኡጭቶእ። 32 ምናደብስ ሜሬሮን አበት ብተት እኮተኔ መቱስ መቱረንከ አሞ ዎሉስ ዎሉረንከ ያን ያረዮ እኬ። እኮዳ ሆለሙስ ሚ ጠጵቴእንዶ ደግምበአ እኬ። 33 መ-መቱ አይሁድ-መኑ «አለክሰንዴሬ» ዬኖ መንቹ ምናደብ ሜሬሪች ጎምበንስት መን ብርተ ፉሽቶእ። አሞ እስን መኑ ሰዕም ዩንተ አንገተ ጦቀእ መን ብሬን ኡር ኦደሚ ሀሾ። 34 ጠሁ እኮዳ እስ አይሁድቹ እሁስ እሶኦት ደጎ ጃተ «ኤፌሶን ከተም መን አርጤምስ አበተ» ይተን ለሙ ሳተ እሀኖ ቀጠ ሆሩንኩሰ ሜጡ እክ ያርቶእ። 35 አሞ ኤፌሶን ከተም መን ጣፍቹ ምናደበ ሰዕመእ «ኤፌሶን ከተም መነ! ኤፌሶን ከተም መኑ አበ ‹አርጤምሴ› ዬኖሪ ሰገዴኖ ምንሃ ሰሜች ኡቦ ምስሊሃ ቆረባኑ እሁሰ ደጉምቡ መንቹ አዬት? 36 ህከኒ ካን ካደኖ ዮበእገ ደጌንታች ሰዕምዬ በጋን ሜጡራ ሰርበንቺን አስቴኖችዬ። 37 ዳፉንኩስ አዕኖኦት አርጤምሴ ምን ኦዳተ ቦጉምቡራ ህከ መገኑኔ ቦሮርቱምቡራ አፌን ከበ ዋልቴንተ። 38 አሞ ዴሜጥሮሲ እሲን በርገንት አንገ ሁጅተ ሁጀታሩ ኦዳ መንቹ ዮደ ኦዱን። ፍርዴኖ በሩሁ ኦደንስታ ዳናከቲ ህከኔን ዮተኔ ኦደንቱን። 39 እኮዳ ዎሉ ሀሴነንተ ጠሁ ዮደ ባድ ያእባን ጡደመኖ። 40 ህካን እሁምቦደ ነኦት ‹ከበር እኮ ጠህ ብተተ ኬእሴሃረ› ዬን ኦዴኑምቦኔገ ዋጅናም። ዳፉንኩስ ‹ት ብተት ኬኦኢ ሚኔት?› ዬን ጠዕሜመኔደ ይናምሩ ዮኔበአ» ዬእ። 41 እስ ህካን ዬሀኒች ዘኪን ያእ መኑ ብንያኖገ አሴእ።
1 ብተት አጉርቶሀኒች ዘኪን ጳዉሎስ አመዕናኑ ገእሲሽ ሰጅ «ጡመ ሄእዬ» ይኬእ መቄዶን ባዱ ኦሮቄእ። 2 አሞ እስን ህከን ባዲን ህገን አመዕናኑ ሆለመ ሰዘን ቃርሰን ግሪክ ባዱ ዋሎ። 3 ህከኔን ጳዉሎስ ሰሱ አገነ ኤጌሮሀኒች ዘኪን መርከቢን ሶርይ ባዱ መሮተ ሰውዬእ። እኮዳ አይሁድ-መኑ ግቦስተኔ ዎቃን ገፈነ ቆረብሲሶገ ደጎ ጃተ መቄዶን ባዲን ህጎተ ሰውዬእ። 4 እሲን በርገንት ዮሩንኩ ቤርይ ከተም ሶጳቴሬየ ቤቱ ጵሩሴት፥ ተሰሎንቄ ከተም መኒች አርስጣርኮሴት፥ ሴኮንዶሴት፥ ደርቤ ከተም ጋዮሴት፥ እስይ ባድ ትክቆሴት፥ ጥሮፍሞሴቲ አሞ ጥማቶሴቲ እኬ። 5 ህኩሩንኩ ብርተ ህግ ኬእ ጢሮኣድ ከተማን ቆረቦኔ። 6 ጠሁ እኮዳ ነኦት ጦሮሹ እቴነን አብሴኖ አያኒች ዘኪን ፍልጵሱስ ከተሚች መርከባን ኣንግኬዕን ኦንትቅ በር ጢሮኣድ ከተመ እሶኦበ ኢልኖም። ህከኔን ለመለ በር አፉዕልኖም። 7 ሄዜትስ ዎነ በሬን እቸተ ሜጦማን እንቶተ ጠጵኔምሀኔን ጳዉሎስ ለንክ በሬ ገስመ ዎሉበ መረኖተኔ ህከኔ ጠጵዬ መኒ ጠሃቁ አፎ። እስን ጠሀስ ኩለንየንን አንከሬ በቅተ እኮ። 8 ነኦት ጠጵኖም ፎቅ ምኔን ሆለሙ መርባቱ ቡበዮ እኬ። 9 «አዉጤኪሶ» ዬኖ መቱ ሀርድቹ መንቹ መስኮት ሺናን አፉዕሌ እኬ። ጳዉሎስ ጠሀ ቄራርሴተኔ ህኩ ሀርድቹ ቅልይ ግሽኬእ ሰክ ፎቂች ኡለተ ለቅ ኡቦ። መኑ ኬእሳስደ ሬህ ፈጄ እኬ። 10 ጠሁ እኮዳ ጳዉሎስ ድር ሀርድቹ አንጋንተስ ሀንቀፍ «ህልቄኖችዬ፤ ፎሊን ዮእ» ዬሰ። 11 ጳዉሎስን ፎቅ አል ፈንቀል ፉልኬእ እሶኦንን ቀርች ኦዝተ ኣቄሀኒች ዘኪን እቸተ እችኬእ እሩ ሶዘንቀጤች እሶኦ ኩሎሀኒች ዘኪን ኦሮቄእ። 12 አሞ እሶኦንት ፈዬ ሀርድቹ መንቹ ምን አፍ ኦሮቅት አብስ በጅግ ቃርሰቀንቶእ። 13 ህከኒች ዘኪን ነኦት «አሶሰ» ዬኖ ከተማን ጳዉሎሴ ኣቅኖተ ብርስን መርከባን ኣንግኬዕን መኖም። ዳፉንኩስ እስ ህከ ከተመ ሎካን መሮተ ሰውይ ነኦት ህትጉተ አስኑንተ አዘጄኔ እኬ። 14 አሞ ነኦት እሲን አሶስ ከተማን ደቀሞም ጃተ እሲንን በርገም ምጡሌን ከተመ ኦሮኖም። 15 ነኦት ለንክስ በር ኬዕን መርከቢን ዎኢን ክበንቴ «ክዮ» ዬኖ ኡለ ሺነ ኢልኖም። አሞ ለንክስ በር ዎኢን ክበንቴ «ሰሞሰ» ዬኖ ኡለተ ኢልኖም። ህከኒች ዘኪን ምልጦን ከተመ ኢልኖም። 16 ጳዉሎስ እስይ ባዶን ሆለመተ ጃተ በእሲ ሀሱምቡተኔ ኤፌሶን ከተመ አጉር ህጊ ሀሾ። ዳፉንኩስ ደንዴሾስደ ሻሽገ አብሴመ ኦንታዱንቅ በሬ አያነ ዬሩሳሌም ከተመ ኢል አብሲ ሀሾተኔሃት እኬ። 17 ጳዉሎስ ምልጦን ከተሚች መነ ሶክ ኤፌሶን አመዕናን ማበር ኑባቡ ገእሲሾ። 18 እሶኦንት እስበ ዋልቶ ጃተ «አን እስይ ባዱ ኣግ አፉዕሌም በሬች አፍ ሆረንተ ጃተ ሜሬሮንተዕኔ ሀትጉተ ሄኦምንዶ አዕኖኦት ገጉዕኔ ደጌነንተ። 19 አሞ አይሁድ-መኑ ሀውሶኤዳ ሆረረንከ ደንደን ቢዝማኒ እንጂጄኒ ህግሰን ቀርቿ መገኒ ሁጀቼም። 20 ያእባኒ እኮ ምኒች ምን ዘሀን ሮስሳም ጃታ ካዕለኖዕኔረ ሆረንከ ኩሌንክዕኔ በጋን ሜጡራ ኩሉዕነ ፈእስምበክዕኔ። 21 አሞ አይሁድ-መኑሁ ግሪክ መኑሁ ለሙንኩ ባጢሊችሰ ቢረ ይት ፈንቀልት ቀርቿኔ ዬሱሳን አመዕንቱንተ ነቀሼንሰ። 22 ቴሱ አሞ ጡማንቹ አያኑ አዘጅየዕኔ ዬሩሳሌም ከተመ መረዮም። ህከኔን ም ኢለኖኤንዶ ደጋምበአ። 23 ጠሁ እኮዳ ጡማንቹ አያኑ ሆራንከ ከተማን ኩሎኤጊን ኡሱሩቲ ሀዉሁ ቆረበኖኤገ ደጋም። 24 እኮዳ አን ቀርቾ ዬሱሲች ኣቄም ሁጅተ ጦፈንቀጤች ገግኤ ፎሊ ቅሽጣምበአ። ህኩስን መገን ኣሰንች ምሽራች ላገተ ኩሏ። 25 አሞ ከበሬ ኢለንቀጤች ክዕኔኤ ሆርዕኔ ሜሬሮን ፈንቀላመን መገን ዎሞመተኔ ሮስሼንክዕኔ። ከኒች ዘኪን ለንኪ ኢ እልተ ጡዴኑምቦገ ደጋም። 26 ህከኒ አን ሆራንከ መን ቄጊች ሙጩሩ እሁኤ ከበር ነቀሳንክዕኔ። 27 ዳፉንኩስ መገን ሰውተ ሆረንከ ኩሌንክዕኔ በጋን ኩሉዕነ ፈእሾምሩ ሜጡሩ ዮበአ። 28 መገኑ ገግስ ቤት ቄጊን ህዕሬ አመዕናን ማበረ ቆረቤኑንተ ጡማንቹ አያኑ ክዕኔኤተ ዜማኑ አስ ሹሞዕኔ ዜመተ ሆረንታ ገገዕኔ ቆረጵዬ። 29 አን ኦሮቄምሀኒች ዘኪን ዜማ ቅሽጥቱምቡ ኦሮገ ዮ ሂሉ መኑ ዋልት ክዕኔኤ ሜሬሩ ኣጋገ ደጋም። 30 ህትጉንተ መ-መቱ መኑ ሜሬሪችዕኔ ኬእ ሾከተ ሮሸተ ሮስሰን ሆለመ አመዕናኑ እሶኦ ዉዱ ፈንቀሽታእ። 31 ህከኒ አን አኒንከ አኒንከ አንከርሃ በራሃ እንጂጅተ ዱነን ሰሱ ዎጋ ሰጆንክዕኔገ ሰውቴን ቃርዬ። 32 አሞ ቴሱ መገኒሃ ሆራንከ ጡማን ሜሬሮን ቃርስታዕኔነ መገን ማሰ ቤቀንቸ ኣሲ ደንድታ መገን ኣሰንች ላጋሃ ሀደረተ ኣሴንክዕኔ። 33 አን አዬቺ ብረ እንዶ ዎርቀ እንዶ ኦድሸተ ቁልጥምበአ። 34 ኤሳሃ ኤሳን በርገንት ዮሪሃ ሀስሰኖረ አንጋንተኤ ሁጀተን ካዕሌምገ አዕኖኦት ገጉዕኔን ደጌነንተ። 35 ‹ኣቀኖሀኒች ኣሰኖ ማሰአሜሃ› ዬ ቀርቾ ዬሱስ ላገተ ሰውይን አንጋንተኔ ሁጀንተን ሆንጋኑ ካዕሉ ሀስሰኖኔገ ሆለመ ዎቄን ጡድሼንክዕኔ» ዬሰ። 36 ጳዉሎስ ህካን ዬሀኒች ዘኪን እሶኦን ሆሪንተሰን ሜጡ እክ ጉሉጵ መገኑ ኡጬእ። 37 እሶኦት ሆሩንኩሰ ኦአን ጳዉሎሴ ሀንቀፍ አፍ ሱንቅቶእ። 38 እሶኦንት አብስ ክቼኦ ዳፉ «ከኒች ዘኪን ለንኪ እልኤ ጡዲ ሆረን ደንድቴነንተበአ» ዬሰተኔሃት እኬ። እሶኦንት መርከቡ ዮበ ኢለንቀጤች ህርሲሶስ።
1 ነኦት እሶኦች አነነ እንክ መርከባን ኣንግ ዎኢን ክበንቴ «ቆሰ» ዬኖ ኡለተ ጠብን መኖም። አሞ ለንክስ በር ዎኢን ክበንቴ «ሮዴሰ» ዬኖ ኡለተ ኢልኖም። ህከምቢችን ኬዕን «ጳጠረ» ዬኖ ከተመ ኦሮኖም። 2 ህከኔን ፊንቄ ባዱ መረኖ መርከበ ደቅንኬዕን እሶን ኣንግ ኦሮኖም። 3 ዎኢን ክበንቴ «ቆጵሮሰ» ዬኖ ኡለተ ጉረ ዉዲን አጉን ሶርይ ባዱ መንኬዕን «ጢሮሰ» ዬኖ ከተመ ኢልኖም። ዳፉንኩስ ህኩ ቤቹ መርከቢች ኦዳተ ድሪሴኗ ቤቹ እኬ። 4 ህከምባን አመዕናኑ ሀንስ ደንጎም ጃተ እሶኦባን ለመለ በር ኤጌኖም። እሶኦንከ ጡማንቹ አያኑ ለሊሽየንሰ ጳዉሎሴ «ዬሩሳሌም ከተመ መርቶት» ይት ኩልቶስ። 5 እኮዳ ነኦት ህከኔ ኤጌናም ጃት ጎፍየን መረሚ ኬዕኖም። እሶኦንት ሆሩንኩሰ ሜንቲንተሳ ኦሶንተሳ በርገንት ከተሚች ኤተሩ ኢለንቀጤች ህርሲሶኔ። በሃር ቶቾን ጉሉጵን መገኑ ኡጭኖምሀኒች ዘኪን «ጡመ ሄእዬ» ይን አነነ እንኮም። 6 ህከኒች ዘኪን ነኦት መርከባን ኣንጎም። አሞ እሶኦት ምንሰ ፈንቀልት ኦሮቶእ። 7 ነኦት ጢሮሲች ኬዕን በሃር አሌን መረንቸተ ጦንፍ «ጵጦሌማሰ» ዬኖ ከተመ ኢልኖም። ህከኔ አመዕናኖ ህዛካንተኔ ደቀም ጡምጨም እሶኦንን መቱ በር ሆንሶም። 8 ለንክስ በር እሶኦች አነነ እንክ ቄሳር ከተመ ኢልኖም። ህከኔን ዶዕረንቶ ለመለ መኒች «ፍልጶሴ» ዬኖ መንች ምን ኣንግኬዕን እሲን ሜጡ አፉዕልኖም። ፍልጶስን መገን ላገተ ኩለኗ እኬ። 9 እሲንከ ህራጋ ሾልት ባጃመት ሜሴላከት ዮስ እኬ። 10 ህከኔ ሆለመ በር አፉዕልኖምሀኒች ዘኪን «አጋቦሴ» ዬኖ ህራጋንቹ ይሁድ ባዲች ዋሎ። 11 ህኩ ህራጋንቹ ኒበ ዋል ጳዉሎሴ ጠጠበ ኣቅ ገግስ ሎከታ አንገታ ኡሱዕር «ጡማንቹ አያኑ ‹ከን ጠጠብ አነ ዬሩሳሌማን ዮ አይሁድ-መኑ ህትተ ኡሱርት አይሁደ እሁምቦ መን አንጋን ህግስ ኣታእ› ያዮእ» ዬእ። 12 ህከ ጠሀ መጮኖም ጃተ ነኦቲ ህከኔ ዮ መኑሁ ጳዉሎሴ «ዬሩሳሌመ መርቶት» ይን ኡጭኖም። 13 እኮዳ ጳዉሎስ «ህትተ ኦኤነን ኢ ዎዘነ ሚ ሆግሴነዮንተኤ? አን ቀርቾ ዬሱስተኔ ዬሩሳሌመ ኡሱረሙ ጠለ እሁዕናች ሬሆታ ቅጠሜምየ» ይ ፈንቀሼሰ። 14 ጳዉሎስ ሰዘነኔ ኣቁ ግቦ ጃተ «አቼ መገኑ ዬገ እሁን» ይን አጉን አጉኖም። 15 ህከኒች ዘኪን ነኦት ኦዳኔ ቅጠንስን ዬሩሳሌመ ኦሮኖም። 16 አሞ ቄሳር ከተማን ዮ አወናኒች መ-መቱ ኔሳንን ሜጡ እክ ዋልቶእ። እሶኦንት ምናሶኔ ምኔን ኤጌኑንተ መስቶኔ። ህኩ መንቹንኩ ዎኢን ክበሜ «ቆጵሮሰ» ዬኖ ባዶን ቀለሜሃ ዎና አመዕናንቹ እኬ። 17 ነኦት ዬሩሳሌመ ኢልኖም ጃተ አመዕናኑ ህዛከት በጅጎን ኣቅቶኔ። 18 ለንክስ በር ጳዉሎስ ኔሳንን ሜጡ እክ ያቆቤበ መረኖደ ሆሩንኩ ኑባቡ ህከኔ ዮ እኬ። 19 ጳዉሎስ እሶኦተ ጡምሾሰሀኒች ዘኪን መገኑ አይሁደ እኩምቦ መን ሜሬሮን እስ ዉዲን አሴረ መ-መቲን ኩሎሰ። 20 እሶኦንት ህካን መጮጭት መገኑ ገለጥት «ኒ ህዞ ጳዉሎሴ! አመዕንቴ ሆለሜ ኩሜ መኑ አይሁድ ሜሬሮን ዮጋ ሆሩንኩሰ ሙሴ ሴሪ ቃረገ አዘዘንታጋ ደጋንት። 21 እሶኦንት አት ‹አይሁደ እሁምቦ መን ሜሬሮን ሄኣ አይሁድ-መኒ ሆሪንከ ኦሱሰ ኑጉስቱምቦጋ ሙሴ ሴረ ቆረቡምቦጋ ሮስሴንት› ዬኖ ጠሀ ኪተኔ መጮቴእ። 22 ህከደ መ አስኑን? እሶኦንት ዋሉክ ገርንተ መጮታእ። 23 ህከኒ ነኦት ይናምረ አስ። ኒባን ስለት ኣጌ ሾሉ መኑ ዮእ። 24 ከ መነ አፍ መርት እሶኦንን መገን ብሬን ገገክ ሙጩር። አሞ ሙምሰ ሜጥቱንተ ህንጨኤኖ ክትም ግዘ አት ባትሰ። ህካንመ አቶንትደ ኪተኔ ኩሌመ ጠሁ ቆጰነ እኮጋ አት ገጉክ ሴረ ቆረበን ሄኣንትጋ ሆሩንኩ ደጋእ። 25 እኮዳ አይሁደ እኩምቦ መን ዉዲች አመዕንቶሩ ክትንትየን ቡሾ እቸተ እቱምቦገ፥ ቄግ እቱምቦገ፥ ለንገቅ ሬሄ ግዝ ማለ እቱምቦጋ ሳኡምቦጋ ቆረጵቱንተ ኢተም ሙኖም ጠሀ ጣንፍ ሶንኬንሰ» ይቶስ። 26 ህከኒች ዘኪን ጳዉሎስ ለንክስ በር ህከ መነ አፍ እሶኦንን በርገም ሙጩሮ። እስን ህኩ መኑ ሀበንኩ በሩ ኢለንቀጤች ሙጩርተን ኤጌርታእንዶ አሞ አን-አንሰ ክትም ግዙ ሀከደ ኣሰመኖንዶ ኩሎተ መገን ምን ኣጎ። 27 ለመሉ በሩ ጎፊ እክየን እስይ ባዲች ዋልቴ አይሁድ-መኑ ጳዉሎሴ መገን ኬሰሞ ምኔን ጡድኬእ መነ ሆረንከ ኤረንስት አፍሲሶእ። 28 እሶኦንት «እስራኤል መነ! ካዕልዬኔ፤ ኩ መንቹ ምናደበኔ፥ ሴረኔ ተ መዕንታ ቦሮረን ሆረንተ መዕንተ መረን ሆራንከ መኒ ሮስሰዮሃ። ህኩንን እሁ ሆግየንስ ግሪክ ባድ መነ መገን ኬሰሞ ምን ኣግሽ ሙጩሩተ መዕንተ ቡሽሼሃ» ይት ያርቶእ። 29 እሶኦንት ህካን ይቶኢ ብርስት ጳዉሎሴ ኤፌሶን ከተም ጥሮፍሞሴንን ሜጡ እክ ዬሩሳሌም ከተማን ዮኢ ጡዶስተኔ እሱ መገን ኬሰሞ ምን አፍ ኣጎ አጉጆሰተኔሃት እኬ። 30 ከተሙስ ሆሩንኩ ሌንቄቄእ። አሞ መኑ ሆሩንኩ ሜጡ እክ ደጉደን ዋልት ጳዉሎሴ አፍኬእ ጎሾሽተን መገን ኬሰሞ ምኒች ሀደተ ፉሽቶስ። ህተ ጃንተ መገን ኬሰሞ ምን ኡራከት ጡፈንቶእ። 31 አሞ እሶኦንት ጳዉሎሴ ሺ ሀሶ ጃተ ሮሜ ባድ በገዝ ጋጠኒ «ዬሩሳሌም ከተሙ ሆሩንኩ ድድቄእ» ዬኖ ዱዱቡ መጮጨሞ። 32 እስን ህተ ጃንተ ቤጠባሃ ቤጠቤ አወንሳኑሃ አፍ ደጉደን መንበ ኢሌእ። ህኩ ጳዉሎሴ ኦልታሩንኩ በገዝ ጋጠነሃ ቤጠባሃ ጡዶ ጃተ ኦሉ አጉርቶእ። 33 ህተ ጃንተ በገዝ ጋጠኑ ኢልኬእ ጳዉሎሴ አፍሲሽ ለሞ ሰንሰለቲን ኡሱርታገ አዘጅኬእ «ኩ መንቹ አዬት? አሞ መሃን አሴኢ?» ይ ጠዕሜእ። 34 መኒች በከኑስ መቱረ በከኑስ አሞ ዎሉረንከ ይተን ጨንጭቶተኔ በገዝ ጋጠኑ ገሬስ ጠሀ ደጊ ደንዱ ሆጎ ጃተ ጳዉሎሴ ቤጠቤ ገልትተ ኦሮሳስጊ አዘጆ። 35 ህከበንከ ኦሮሰንየን ጳዉሎስ ጦቅቴ መዕንተ ኢሌ ጃተ መኑ አበ አሙሬን አፊ ሀሶ ዳፊ ቤጠቦ እይት ኦሮሶስ። 36 ህኩ በትናሹ ምናደቡ «ሽዬ!» ይተን ጨንጭተን ዘክሰዮ እኬ። 37 ጳዉሎሴ ቤጠቦ ገልቴበ ኣግሲ ህንጭቶ ጃተ ጳዉሎስ በገዝ ጋጠነ «አን መቱ ጠሀ ኩሎሄተ ጃተ ኣተዕኔንዶ?» ዬእ። ህኩ በገዝ ጋጠኑንኩ «ግሪክ ባድ አፎ ደገንንዶ? 38 መነ ሽቴ ሾሌ ኩሜ መነ ኤረንስት ፈገርስት አፍ በገተ ጄቾን ኡለ ኡዱመአ ሁንቶንት ግብጥ ባድ መንቹ አቴትበእንዶ?» ዬስ። 39 ጳዉሎስ በገዝ ጋጠንቺ « ‹ክልቅየ› ዬኖ ባዶን ሱዕመንቴ ተርሴስ ከተማን እለሜምየ አይሁድቹ። ሀእ መኒ ኩሉንተ ጄቹተ ኣሴኤ» ይ ኡጨቄስ። 40 አሞ እስን ጠሃቁንተ ጄቹተ ኣሴስ ጃተ ጳዉሎስ ጦቅቴ መዕኔን ኡር መኑ ሰዕምዩንተ አንገስ ሌንቄቅሽየን አቡ ሰዕምቱ እኮ ጃተ እብር-መን አፌን መኒ ጠሃቁ አፎ።
1 ጳዉሎስ «ኢ ህዛከቲ ኢ አናከቲ! አን ኩዕላም ጠሀ መጮጭዬ» ዬእ። 2 - 3 እሶኦንት እስ እብር-መን ላጋን ጠሃቀንየን መጮቶ ጃተ ሰዕምቶእ። እስን «አን ክልቅይ ባዶን ዮ ተርሴስ ከተማን እለሜምየ አይሁድቹ። እኮዳ ሌኦሚንኩ ከን ዬሩሳሌም ከተማኔት። ሮሾሚንኩ ገማሌሌቼት። እሲችን አናከኔ ሴረ ቃርስ ሮሼምየኒ ከበር አዕኖኦት ሆሩንኩ እኬነንተገንከ መገኒ አዘዘሚ ምጣምየ መንቹ እኬ። 4 ዬሱስ ዎቃ አወንታ መነ ሆረንከ ሬታኢ ኢለንቀጤች ሸረን ጎነሃ ሜንቱሃ አፈን ኡሱሮ ምን ኣግሼምየ እኬ። 5 ህትጉንተ ቄስ አወንሳኑሁ ባድ ያእ ኑባቡሁ ሆሩንኩ ኤሳ ነቃሸተ። አን እሶኦች ደዳቤተ ኣቅ ደማስቆ ከተማን ዮ አመዕናኑ ኡሱር ዬሩሳሌመ ዋሽ ቀጠእሲሶተ ህከኔ ዮ አይሁድ-መንበ መረዮም እኬ። 6 አንን ደማስቆ ከተመ መረን ኢሊ ኦንጠኮም ጃተ በሬ ሜሬሮን ደንጎን ሰሜች አቡ ጫኩ ሄጌጎንተኤ ጫኬእ። 7 አሞ ኡለ ኡብ ‹ሰዉሌ! ሰዉሌ! ሚ ሸርተዮንቴኤ?› ይታ ላገተ መጮጬም። 8 አንን ፈንቀሽ ‹ቀርቾ አት አዬት?› ዬም። እስን ‹አት ሸርተዮንቴኤ ናዝሬትቹ ዬሱሱ አኔት› ዬእ። 9 ህኩ ኤሳን በርገንት ዮሩንኩ ጫከስ ጡዶ በጋን አይ ጠሃቀዮእንዶ ላገስ መጮትምበአ። 10 አንን ‹ቀርቾ! መ አሱ?› ዬም። ቀርቹንኩ ‹ጦቅት ደማስቆ ከተመ መር። አስቱንተ ቅጠሞሩ ሆሩንኩ ህከኔ ኩለመኖኬ› ዬእ። 11 ህከን ጫክ ቤሌሌሲን ኬኦ ጡዲ ደንዱ ሆጎምተኔ ኤሳን በርገንት ዮ መኑ አንገኤ አፍ አወንስት ደማስቆ ከተመ ኢልሶኤ። 12 ህከን ከተማን ‹ሀናንየ› ዬኖ መቱ መንቹ ዮ እኬ። ህከ መንቹንከ ደማስቆ ከተማን ሄኣ አይሁድ-መኑ ሆሩንኩ አብሳሃነ መገን አዘዙንተ ደናሞገ ቆረበኗ መንቹ እኬ። 13 እስን ኢበ ዋል ሺናንተኤ ኡርኬእ ‹ኢ ህዞ ሰዉሌ! ቴሱ ጡዲ ደንድታንት› ዬእ። አንን ህተ ጃንተ ጡዲ ደንዴም። 14 እስን ‹አናከኔ መገኑ ሰውተስ አት ደጉንተ፥ ሙጩሩስ ቤቱ ጡዱንታ ላገስ መጮቱንታ ብርስን ዶዕሬሄ። 15 ህኩስን ጡዶንትነ መጮቶንትሪተኔ ሆራንከ መን ብሬን እስተኔ ነቃሸ እኩንታት። 16 ህከደ ሚ ደሰዮንት? ቴሱ ጦቅት ሱዕሚንተስ ጠመቀንት ባጢሊችክን ሙጩር› ይ ኩሎኤ። 17 አንን ዬሩሳሌመ ፈንቀሎምሀኒች ዘኪን መገን ኬሰሞ ምኔን መገኑ ኡጨንየን ሀቄገ ዮሩ ጡደሞኤ። 18 ቀርቹንኩ ‹አት ኢተኔ ነቀሳንት ጠሀ እሶኦት ኣቅቱምቡተኔ ዬሩሳሌሚች ሰርብት ፉል› ያንየን ጡጆም። 19 አንን ‹ቀርቾ! ጠጵት ምን ሆረንከ መረን ኬሳን አመዕኔ መነ ኦላምጋ ኡሱራምጋ እሶኦት ገጉንኩሰ ደጋእ። 20 ኬሳ ነቀሰኖ እኬ እስጥፋኖሴ ቄግ ዱኔመ ጃተ አኒ ጠሃንተስ ኢተም ሽታ መን ሺናን ኡርኬእ ኦድሸሰ ቆረበዮም እኬ› ዬም። 21 ቀርቹንኩ ‹ቄዕረ ዮ አይሁደ እኩምቦ መንበ ሶሃንኬተኔ ከምቢች ጦቅት መር› ይ ኩሎኤ» ዬእ። + እሁስ ኩሎገ 22 እስ ከ ጠሀ ኩለንቀጤች መጮጭተዮ እኬ። እሶኦንት ላገሰ ጦቀት «ህትጎኑ መንቹ ፎሊን ሄኡ ሀስሱምቡተኔ ኡለ አሊች ከም» ይት ያርቶእ። 23 አሞ እሶኦንት ያርተን ኦድሸሰ ብን ብን አተን ቡሁተ ሰማ ለቅ ብነተዮ እኬ። 24 በገዝ ጋጠንቹ ጳዉሎሴ ቤጠቤ ገልቴበ ኦሮሳጊ አዘጆ። አሞ እስን መኑ ሚ ጨንጨዮእንዶ ደጎተ «ኦልቴነን ቆርምዬ» ዬሰ። 25 ጠሁ እኮዳ እሶኦት ፎጦሮን ቃርስት ኡሱርቶ ጃተ ጳዉሎስ ሺናንተስ ኡሬ ጥቤ መን አዘዛንቺ «ሮምቹ ፍርዱ ዮበኢ ኦልቴኑንተ ኣሰሜክዕኔንዶ?» ዬስ። 26 ህተ ጃንተ ጥቤ መን አዘዛንቹ መጮጭ በገዝ ጋጠንበ መርኬእ «መ አስቶታት? ኩ መንቹዕኑ ሮምቿ» ዬእ። 27 ህከኒ በገዝ ጋጠንቹ ጳዉሎሴበ መርኬእ «ሀኖ ኩሌኤ! አት ሮምቿንዶ?» ይ ጠዕሜስ። እስን «፤ አን ሮምቿ» ዬእ። 28 በገዝ ጋጠንቹንኩ ፈንቀሽ «አን ተ ሮምቾመተ ህዕሬሚ ሆለመ ግዚኔት» ዬስ ጃተ ጳዉሎስ አሞ «አን እለሞሚንኩ ሮምቾማኔት» ዬስ። 29 ህከኒ ጳዉሎሴ ቆርምቶስተ ቅጠንቶሩ ህተ ጃንተ እሲች አነነ እኮእ። በገዝ ጋጠንቹ ጳዉሎስ ሮምቹ እኮገ ደጎ ጃተ ኡሱርሲሾስተኔ ዋጄእ። 30 ለንክ በሬ ገስመ በገዝ ጋጠንቹ አይሁድ-መኑ ጳዉሎሴ ኦዲ ሀሶኢ ሚሃትንዶ ጠህስ ገርተ ደጎተ ሀሾተኔ ቄስ አወንሳኑሁ ያእ ኑባቡሁ ሆሩንኩ ጠጵታገ አዘጆ። እስን ጳዉሎሴች ሰንሰለተ ሂር ኡሱሮ ምኒች ዋሽሲሽኬእ ብሬንተሰ ኡርሾ።
1 ህከኒች ዘኪን ጳዉሎስ ያእ ኑባቡ ቀሽ አፍ ጡጅ «ኢ ህዛከ! ከበሬ ኢለንቀጤች ደናሞ ሰውቲን ሆሪንን መገን ብሬን ሄኤምየ» ዬእ። 2 አሞ አቡ ቄስቹ «ሀናንየ» ዬኖ ሺናንተስ ኡርቶሩ ጳዉሎሴ አፎ ዎቀርቱንተ አዘጆ። 3 ህተ ጃተ ጳዉሎስ ሀናንየ «ኩ ቦነ ቡሬመ ግግደ አጉዳንቲ። ኬሲ መገኑ ዎቀረኖሄ። ሴርጊን ፍርድቶተ አፉዕልት ሴሩ ዮበኢ ዎቀሬኑንተኤ አዘዘንንዶ?» ዬስ። 4 ህከኔ ሺናንተስ ኡርቶሩንኩ ጳዉሎሴ «መገኒ ሁጀተኖ አበ ቄስቹ ቦሮርተንንዶ?» ይቶስ። 5 አሞ ጳዉሎስ ፈንቀሽ «ኢ ህዛከ! አበ ቄስቹ እሁስ ደጋምበአ። ዳፉንኩስ ‹ምናደበ ገሸኖሀን አሌን ሂለተ ላገተ ጠሃቶት› የመም ጣፈሜእ» ዬሰ። 6 ጠሁ እኮዳ ጳዉሎስ ህከን መኒች በከኑሰ ሳዱቀተ አሞ በከኑሰ ፋሪሰተ እሁሰ ደግኬእ «ኢ ህዛከ! አን ፋሪስቿ። አኑኤ ፋሪስቿ። ቴሱ ፍርድበ ህንጭዬሚንኩ ሬቶሩ ሬሆች ኬኣገ ተሳ አሴምተኔሃት» ይ ላገስ ጦቀእ ያእ ኑባቢ ጠሃቄእ። 7 ጳዉሎስ ህካን ጠሃቄ ጃተ ፋሪሰነ ሳዱቀ ሜሬሮን ብተት ኬእየን ያኡሰ ለሙበ እኮ። 8 ሳዱቀት «ሬቶ መኑ ሬሆች ኬኣበአ። መገን ሰሜ ሶቀማኑንኩ ዮበአ። አያኑንኩ + ዮበአ» ይታሃረ። አሞ ፋሪሰት «ህኩሩ ሆሩንኩ ዮ» ይታሃረ። 9 ህተ ጃንተ አበት ጨንጨነት እኮእ። ፋሪሰ ዉዲች መገን ሴረ ሮስሳሪች መ-መቱ ጦቅትኬእ «ነኦት ከን መንቾን ሂለረ ሜጡራ ደንግምበአ። አይደጎ አያኑ እንዶ መገን ሰሜ ሶቀማንቹ ጠሃቄሲ እሀኖ» ይት ኦደንቶእ። 10 አሞ ብተት በተአን መርቶ ጃተ መኑ ጳዉሎሴ ጀወተዮስተኔ በገዝ ጋጠንቹ ዋጅኬእ ቤጠባ «መርቴን ጳዉሎሴ መን ሜሬሪች መቄሴን ዋሽቴን ቤጠቤ ገልትተ ኣግሽዬ» ይ አዘጆ። 11 ለንክስ በሬ አንከር ቀርቹ ጳዉሎሴ ሺናን ኡርኬእ «ዬሩሳሌም ከተማን ኢተኔ ነቀሶንትገንከ ሮሜ ከተማኒ ነቀሶተ ሀስሰኖሄተኔ ዋጅቶት» ዬስ። 12 ለንክ በሬ ገስመ አይሁድ-መኑ ጠጵት ኤረንትኬእ «ጳዉሎሴ ሽነንቀጤች እቸተ እንቱንከ፤ ዎአንከ አንጉንከ» ይት ጤሌዕልቶእ። 13 ህከ ኤረ ኤረንቶሩ ሾላዱሚች አብታሃ መነ እኬ። 14 አሞ እሶኦንት ቄስ አወንሳንባ ኑባብባ መርትኬእ « ‹ጳዉሎሴ ሽኑዕናች ሜጡራ እንታምበአ› ይን ጤሌዕልኔም። 15 ህከኒ ቴሱ አዕኖኦት ያእ ኑባቢን በርገንቴን ኤረንቴን ቃርስቴን ቆርምቴነንተሀንገ አቴን ጳዉሎሴ በገዝ ጋጠንቹ ክዕኔኤበ ዋሹንተ ጠዕምዬ። እኮዳ ነኦት ክዕኔኤበ ኢሉዕናች ብርስን ሽኖስተ ቅጠሜም» ይት ኩልቶሰ። 16 ጠሁ እኮዳ ጳዉሎሴ ህዞ ቤቱ ህከ ኤረንቶ ጠሀ መጮጬ ጃተ ቤጠቤ ገልትተ መርኬእ ጳዉሎሴ ኩሎ። 17 አሞ ጳዉሎስን ጥቤ መን አዘዛኒች መቱ ገእኬእ «ኩ አደቦ በገዝ ጋጠንቺ ኩለኖ ጠሁ ዮተኔ እስ ቤቹ መስስ» ዬስ። 18 ህከኒ ጥቤ መን አዘዛንቹ አደባስ በገዝ ጋጠንችበ አፍ መርኬእ «ኩ አደቦ ኩለኖሄሩ ዮተኔ ኡሱሮ ዮ ጳዉሎስ ኤስ ገእኬእ ከ አደባ ኪበ ኤቡንተ ኡጬኤ» ዬእ። 19 በገዝ ጋጠኑንኩ አደቤስ አንገተ አፍ ሺነ ለቅኬእ «ኩልታንቴኤ ጠሁ መሃን?» ይ ሜጥንስን ጠዕሜስ። 20 ህኩ አደቦንኩ «አይሁድ አወንሳኑ ጳዉሎሴ ዎናችን አበ ቃርስት ቆርምታሀንገ እክኬእ ገኣተ ያእበ ህንጨቱንተ ኬስ ጠዕምቶሄተ ኢተንቴእ። 21 ጠሁ እኮዳ አት እሶኦ ‹ኤኩ› ይቶት። ዳፉንኩስ እሶኦት ጳዉሎሴ ሽታኢ ኢለንቀጤች እቸተ እቱምቦጋ አጉምቦጋ ጤሌዕልት ሾላዱሚች አቡ መኑ ሽቶተ ማጠንት ቆረበዮእ። ቴሱ አት ይታንትረ ቆረበዮእ» ዬእ። 22 ህከኒ በገዝ ጋጠንቹንኩ ህከ አደባ «ከ ኤሳ ኩልቶንት ጠሀ አት ኤሳ ኩልቶንትገ አዬኒ ኩልቶኮንት» ይኬእ ህርሲሾስ። 23 ህከኒች ዘኪን በገዝ ጋጠንቹ ጥቤ መን አዘዛኒች ለሙ ገእኬእ «አንከሬ ሰሶ ሳታን ቄሳር ከተመ መሪ ለሜ ጥቤ ቤጠባ፥ ለመላዱመ ፋርሳኑሃ ለሜ ጥቤ በገዝ መነሃ ቅጠንስዬ። 24 አሞ ጳዉሎሴ ኮዕረኖ ገማሙ ቅጠንስቴን ገሻንቾ ፍልክሴበ ጡሚን ኢልሳስገ አስዬ» ይ አዘጆሰ። 25 - 26 አሞ እስን «ቀላዶስ ሉስያሴች፥ አብስ አብቴንት ገሻንቾ ፍልክሴ! ጡሙ ኬሳ እሁን። 27 ከ መንቹ አይሁድ-መኑ አፍ ሽቶስተ እከንየን እስ ሮምቹ እኮገ ደጎምተኔ ቤጠቤንተኤን መር ኢልኬእ ፈእሾንስ። 28 አሞ እሶኦንት እሱ መ ዳፊን ኦደዮስንዶ ደጎተ ያእሰበ ህንጨኤም እኬ። 29 እሶኦት እሱ ኦዶሲንኩ ገግሰ ሴርተኔ እኮገ ደጎም። ጠሁ እኮዳ ሬሆ እንዶ ኡሱሮ ኢልሰኖስ ጠሁ ሜጡሩ ዮበአ። 30 አይሁድ-መኑ ከ መንቹ ሽቶስተ ኤረንቶገ ህተ ጃንተ መጮጭ ኪ ቤቹ ሶኮም። ኦዳስ መኑንኩ ኪ ብሬን ኦዳስጊ አዘጄንሰ» ይታ ደዳቤተ ሶኮ። 31 ህከኒ ቤጠቦ አዘዘንቶጊንን ጳዉሎሴ አፍ አንከሬን ኦሮስ «አንትጳጥሪሰ» ዬኖ ከተመ ኢልሶእ። 32 ለንክ በሬ ገስመ ጳዉሎሴ ፋርሳኑ አፍ ኦሮቅታገ አስት እሶኦት አጉርት ቤጠቤ ገልቴበ ፈንቀልቶእ። 33 ህኩ ፋርሳኑንኩ ቄሳር ከተመ ኢልሶ ጃተ ደዳቤተ ገሻንቺ ኣስት ጳዉሎሴ ብሬንተስ ኡርሶእ። 34 ገሻንቹንኩ ደዳቤተ አነበቦሀኒች ዘኪን ጳዉሎሴ «አት ሀከን ባድየ?» ይ ጠዕምኬእ ክልቅይ ባድ መንቹ እሁስ ደጎ ጃተ 35 «ኦዳኬሩ ዋልቶ ጃተ ጠሀክ መጮጫም» ዬስ። አሞ እሱ ሄሮድሴ ኦተ ኣዜን ቆረባገ አዘጆ።
1 ኦንቶ በሬች ዘኪን አቡ ቄስቹ ሀናንየ መ-መቶ ኑባቢኒ «ጤርጡሉሴ» ዬኖ መንቺኒ በርገም ቄሳር ከተመ መሮ። እሶኦንት ጳዉሎሴ ጠሀ ገሻንቾ ፍልክሴ ብርተ ህንጨት ኦዶስ። 2 - 3 አሞ ጳዉሎሴ ገኤን ዋሼመ ጃተ ጠበቅቹ ጤርጡሉስ «አብቴንት ፍልክሴ! ኪ ዉዲን ነኦት ሆለመ ጡመ ደቅኔም። አሞ ከን ምናደቢ ሰውታንተክ ሆራንከ ዉዲን ሆራባንን ደናሙ ዶረንቹ እኮተኔ አብንስ ገለጥናንኬ። 4 ጠሁ እኮዳ ጃክ በእሱዕናች ገበንቾን ጠሀኤ ኩለንየንኬ ማሽማን መጮታንቴኤገ ኡጨቃንኬ። 5 ኩ መንቹ ኔሳ አበ ሞሱ እክ ኡለ አሌን ሆራንን ዮ አይሁድ ሜሬሮን ብተተ ኬእሰን ‹ናዝረ› ዬኖ ቆጰን ሮሸ ሀጊ አወንሳንቹ እኮገ ደንጌም። 6 እስን መገን ኬሰሞ ምን ቡሽሲ ሰውያንየን ደንግ አንፍኬዕን ሴርኔጊን ፍርድኖተ ሀንሴም እኬ። 7 ጠሁ እኮዳ በገዝ ጋጠንቹ ሉስያስ ዋልኬእ አንጋችኔ መቄሽ ኦሮሾ። 8 ት ነኦት ኦንዶም ኦደት ገርተ እኮገ አት ገጉክ ቆርምት ደጊ ደንድታንት» ዬእ። 9 አይሁድ-መኑ «ኩ ጠሁ ሆሩንኩ ገርተ» ይት ኦዶስተ ኢተንቶእ። 10 ገሻንቹ ፍልክስ ጳዉሎስ ጠሃቁንተ ጄቹተ ኣሴሃንስ ጳዉሎስ «አት ሆለመ ዶሊች አፍ ከን ምናደብ አሌን ፍርድ ዳነ እኮንትገ ደጋምተኔ ‹ኤስ ኦዲ ህንጨቶ ጠሁ ቆጰና› ያን በጅጎን ኩላንኬ። 11 አት ደጋንትገንከ አን ዬሩሳሌመ ሰገዶተ መሮምሀኒች ቶነ ለሞ በሬች አበኖበአ። 12 እሶኦንት ኤስ መገን ኬሰሞ ምኔን ኦደመንየኒ ጠጵት ምኔን እንዶ ከተማን መነ ጠጰእ ብተተ ኬእሰንየኒ አፍምበኤ። 13 እኮዳ ቴሱ እሶኦት ኤስ ኦዳኤ ጠህተኔ ህንጨኢ ደንድታሄሩ ዮበአ። 14 ጠሁ እኮዳ አን ካን ኩላንኬ። ህኩስን አናከኔ መገኒ እሶኦት ‹ገሬ አመዕነቲች አነነተ ሮሸተ› ይት ገእታ ዉዲን ሰገዳምየ። አሞ ሴራን ዮኢሃ ህራጋን መጣፋን ጣፈሞሃ ሆረንከ አመዕናምየ። 15 እሶኦንት ‹ሙጩረቲ ባጢላመቲ ሬሆች ኬኣእ› ይት ተሳ አታገንከ ኤሳንከ መገኖን ተሶ ዮኤ። 16 ህከኒ አን መንነ መገን ብሬን ሙጩሩ ሰውቱ ሄኡንተኤ ሆረንተ ጃተ አጰመዮም። 17 ዬሩሳሌም ከተሚች ፉሎሚች ሆለመ ዎጋ እኮሀኒች ዘኪን ባድኤ መኒ ካዕላም ግዘሃ መገኒ ኣሳም ግዘሃ አፍ ፈንቀል ዋሎም። 18 አን መገን ኬሰሞ ምኔን ሙጩረንየን እሶኦት ደጎኤ ጃተ ህከኔ ኤሳን በርገም ጠጵዬ ምናደቡሁ ብተቲ ዮበአ እኬ። 19 ጠሁ እኮዳ እስይ ባዲች ዋልቴ መ-መቱ አይሁድ-መኑ ከኔ ዮእ። እሶኦት ኤስ ኦዳ ጠሁ ዮሰደ ኪ ብርተ ህንጭት ኩልቱን። 20 እንዶ ያእ ብርተ ህንጭ ዬም ጃተ አሴንሰ ጠሁ ዮደ ሀኖ ኩ መኑ ኩልቱን። 21 ገርንተ ሜሬሮንተሰ ኡር ‹ሬቶሩ ሬሆች ኬኣእ› ይ ጠሃቄም ጠህተኔ ከበር ብርክ ህንጭ ዬም በጋን ዎሉ አሴም ጠሁ ዮበአ» ዬእ። 22 ጠሁ እኮዳ ፍልክስ ዬሱስ ዎቃ ጦፍ ደጎተኔ «በገዝ ጋጠንቹ ሉስያስ ዋሎ ጃተ አን ጠሀዕኔ ጦፋም» ይ ኤጌጆ። 23 እስን ጳዉሎሴ ቆረበዮእኬ ጥቤ መን አዘዛንቹ «ቆረበን ጳዉሎሴ ቅሽጥ። ጃላችስ አዪ ሀስሰኖረ ኤቦስደ ከንቶት» ዬእ። 24 ቀሆ በሬች ዘኪን ፍልክስ «ድሩስለ» ዬኖ አይሁድቾ ሜንትቾንተስን ሜጡ እክ ዋሎ። እስን ጳዉሎሴ ገእሲሽ ዬሱስ ክርስቶሳን አመዕንተኔ ጠሃቀንየን መጮጬእ። 25 አሞ ጳዉሎስ ሙጩርመተኔ፥ ገገ ቆረጵተኔሃ ዋለኖ ፍርድተኔሃ ኩሎደ ፍልክስ ዋጅ «ቴሶሀንስ እሀኖኤ። አት ፈድ! ሀሾም ጃተ ገእሲሳንኬ» ዬእ። 26 ህተ ጃተ ፍልክስ ጳዉሎሴች መቀንጡተ ኣቆተ ተሳ አሰዮ እኬ። ህከኒ ሆለመተ ጃተ ጳዉሎሴ እስበ ገእሲሰን ሃሳውሰኖ እኬ። 27 እኮዳ ለሞ ዎጌች ዘኪን ጶርቅዮስ ፍስጦስ ፍልክሴ መዕኔን ገሻንቹ እኮ። ፍልክስ አይሁደ በጅግሲ ሀሾተኔ ጳዉሎሴ ኡሱሮ ምኔን አጉሮ።
1 ፍስጦስ ገጉስ ገሸኖ ቄሳር ከተመ ኢሌ ሰሶ በሬች ዘኪን ዬሩሳሌመ መሮ። 2 ህከኔን ቄስ አወንሳኑሁ አይሁድ-መን አወንሳኑሁ ጳዉሎሴ ኦዳ ጠሀ ህንጨቶእ። 3 እሶኦንት ፍስጦስ ጳዉሎሴ ዬሩሳሌመ ፈንቀሹንተ ኡጭቶእ። ህካን ይቶ ዳፉ ዎቃን ቆረብ ሽቶስተ ሀሶተኔሃት። 4 ፍስጦስ «ጳዉሎስ ቄሳረ ኡሱሮ ምኔን ዮእ። አን ገጉኤ ህከበ ደዕል መራም። 5 አወንሳኒችዕኔ መ-መቱ ኤሳንን በርገንት ቄሳረ መርቱን። ጳዉሎስ አሴ ሂሉሩ ዮደ ህከኔ ኦዱንስ» ዬሰ። 6 ፍስጦስ ሄዜቱ እንዶ ቶርዱሙ በሩ ኢለንቀጤች እሶኦባን ኤጌሮሀኒች ዘኪን ቄሳር ባዱ መሮ። ህከበ ኢሌ ለንክ በር ፍርድ በርጩማን አፉዕልኬእ ጳዉሎሴ ህንጨታገ አዘጆ። 7 አሞ ጳዉሎሴ ዳንበ ህንጨኤመ ጃተ አይሁድ-መኑ እሱ ገሪ ደንድቱምቡ ሆለመ ኬዕማሸ ኦደ ጠሀ ህንጨቶእ። 8 ጳዉሎስ «አን አይሁድ ሴራን፥ መገን ኬሰሞ ምኔኒ ሮሜ ዎም አሌኒ አሴም ሂልመት ሜጡሩ ዮኤበአ» ዬእ። 9 እኮዳ ፍስጦስ አይሁድ-መነ በጅግሶተ ሀሽ ጳዉሎሴ «ዬሩሳሌመ መርትኬእ ከ ጠሀ ኢ ብሬን ፍርደንቶተ ሀሰንንዶ?» ይ ጠዕሜእ። 10 ጳዉሎስ «አን ፍርደሞተ ሀስሰኖኤ ሮሜ ዎም ፍርድ በርጩም ብሬን ኡር ፍርደማም። እኮዳ አት ገጉክ ደናሞገ ደጋንትገንከ አይሁድ-መኒ አሴም ሂልመት ሜጡሩ ዮበአ። 11 አሞ አን በእሼም ጠሁ ዮደ ሬሆች ፈኦ ያምበአ። ጠሁ እኮዳ ኩሩ ኦዳኤ ጠሁ ቆጰነ እኬደ አዪ ህግሽ ኣሶኤተ ደንደኖበአ። ሮሜ ባድ ዎም አሌን ህግ ያራም» ዬእ። 12 ህተ ጃተ ፍስጦስ እስ ኤር መኒን ኤረም «አት ‹ሮሜ ባድ ዎም አሌን ህግ ያራም› ይቶንቲች ህከን ዎምበንከ መርታንት» ይ ፈንቀሼእ። 13 ቀሆ በሬች ዘኪን ዎሙ አግሪጲ ባርኒቂ ፍስጦሴ «ኤመን ጡመ ዋልት» ይቶተ ቄሳረ መርቶእ። 14 እሶኦንት ህከኔ ሆለመ በር አፉዕልቶተኔ ፍስጦስ ጳዉሎሴ ጠሀ ዎመ አግሪጲ ኩለን «ፍልክስ ኡሱርሲሼ መቱ መንቹ ኡሱሮ ምኔን ዮእ። 15 አሞ አን ዬሩሳሌመ ዮም ጃተ ቄስ አወንሳኑሁ አይሁድ ኑባቡሁ እስተኔ ኩልቶኤሀኒች ዘኪን አሌንተስ ፍርዱንተ ጠዕምቴኤ። 16 ጠሁ እኮዳ አን ‹ኦደማንቹ ኦጆስ መኒን ቅጡ ኦደሙምቦች ሮሜ ባድ ሴርጊን ፍርዲ ደንዴሰኖበአ› ዬንሰ። 17 ህከኒ እሶኦት ጠጵት ከበ ዋልቶ ጃተ አን ኤጌሩዕነ ለንክ በር ፍርድ በርጩም አሌን ፍርዲ አፉዕል ጳዉሎሴ ዋሼኑንተ አዘጆም። 18 ህኩ ኦዳስሩንኩ ሺናንተስ ኡርቶ ጃተ አን ኩ መንቹ በእሼእ ይኬእ ሰውዬም ቀጠ እሱ ኦደበ ኢልሰኖ ጠሀ መሃ ህንጨትምበአ። 19 ጠሁ እኮዳ እሶኦት እሲን ኦደንተዮእኬ ጠሁ ገግሰ አመናቶተኔሃቲ መቱ ‹ዬሱሰ› ዬኖ መንቹ ሬሄኢ ጳዉሎስ ‹ፎላሟ› ዬሰተኔሃቲ እኬ። 20 ህትጎነ ጠሀ ቆርም ደጉ ኤስ ሀውሾኤተኔ ጳዉሎሴ ‹ዬሩሳሌመ መርት ህከኔ ፍርደንተንንዶ?› ይ ጠዕሜም። 21 እኮዳ ጳዉሎስ ኦደመኖ ጠሀ ሮሜ ባድ ዎሙ ጡዱንተ ሀሾተኔ አን ሶሀንቀጤች ኡሱሮ ምኔን ኤጌረኖገ አዘጄም» ዬእ። 22 አሞ አግሪጵ «አን ገጉኤ ኩ መንቹ ኩለንየን መጮጮተ ሀሳም» ዬደ ፍስጦስ «ገኣተ መጮታንት» ዬእ። 23 ለንክ በር አግሪጲ ባርኒቂ አብን ኦድሸተ ኦደቅት ኦል ጋጠናካኒ ከተም አበባኖ መኒኒ አጀበንት ዋልትኬእ ፍርድ ምን ቤሩተ ኣጎእ። ህከኒች ዘኪን ፍስጦስ ጳዉሎሴ ዋሽሲሾ። 24 ፍስጦስን «ዎሙ አግሪጲ ኔሳንን ከኔ ዮንተ መኑ ሆሩንኩ! አይሁድ-መኑ ‹ኩ መንቹ ከኒች ዘኪን ፎሊን ሄኡ ሀስሰኖስበአ› ይተን ዬሩሳሌመኒ ከኔኒ ፍርደሙንተስ ሹርተን ጠዕምቶኤ መንቹ ከኔት። 25 አን ጳዉሎሴ ሬሆ ኢልሳ ሂልመተ ደግምበአ። እኮዳ እስ ገጉስ ‹ሮሜ ዎም አሌን ህግ ያራም› ዬተኔ ሶሆተ ሙዕሬም። 26 እኮዳ አን እስተኔ ዎሚሀዕኔ ጣፎተ ቆርሜም ጠሁ ዮኤበአ። አይደጎ ክዕኔኤ ሆርዕኔበ አብሽን ዎመ አግሪጵ ብርተ ህንጨኤሚ ቆርመሞሀኒች ዘኪን ‹ጣፋም ጠሀ ደቃምንዶ› ይ ሰውኔት። 27 ዳፉንኩስ ኡሱረሞ መንቹ ዎሉ ቤቹ ህግሴኖ ጃተ መንቹስ ኦደሞ ጠሀ ጣፌን ለሊሱ ሆጉ ቀልመተ አጉደኖኤ» ዬእ።
1 ዎሙ አግሪጵ ጳዉሎሴ «ገግክ ጠሀ ኩልቱንተ ጃት ኣሰንቴኬ» ዬስ። ህከኒ ጳዉሎስ አንገስ ብድቀእ 2 «ዎመ አግሪጰ! አይሁድ-መኑ ኦዳኤ ጠሁ ቆጰነ እሁስ ከበር ኪ ብሬን ኡር ኩዕላምተኔ በጅቀማም። 3 ዳፉንኩስ አት አነነንከ አይሁድ ዎገሃ ኦደሳ ሆረንከ ሞሽት ደጋንት። ህከንተኔ ኢ ጠሀ እየቂን መጮታንቴኤጊ ኡጨቃንኬ። 4 ዎና ኦሶመኒች አፍ ገግኤ መን ሜሬሮኒ ዬሩሳሌመኒ ሀትተ ሄኦምንዶ ሄኦም ሄቸኤ አይሁድ-መኑ ሆሩንኩ ደጋእ። 5 አሞ እሶኦት ኢ ጠሀ ኩሊ ሀሶደ አመዕነትኔተኔ ሴረ ቆረቢን አብስ ቃረ እኮ ፋሪሰ ሀግቢ እኮምገ ዎናችን አፍ ደጋእ። 6 አን ቴሱ ከኔ ፍርደሞተ ኡሬሚ መገኑ ኒ አናካ ኣሴ ላገ ተሴተኔሃት። 7 ህከ ተሳ ደቂ እስራኤል ቶነ ለሙንኩ ዜሩ አንከርሃ በራሃ መገኒ ቃርት ሰገደዮ እኬ። ዎመ አግሪጰ! አይሁድ-መኑ ኤስ ኦዳኤ ህከን ዳፊኔት። 8 መገኑ ሬቶ ኬኑ ሬሆች ኬእሰኖ እሁስ አይሁደ እኬንተ ክዕኔኤባን ሀትተ አመዕነሚ ደንዴሁ ሆጎ? 9 አን ገጉኤ ‹ናዝሬትቾ ዬሱስ ሱዕመ ደንዴም ቀጢን ኡርጨሙ ደናሟ› ይኬእ ሰውያም እኬ። 10 አን ዬሩሳሌመ አሴሚ ከኔት። ህኩስን ቄስ አወንሳኒች ኣቄም ዳኖማን አመዕንቶ ጡማኑ ኡሱሮ ምን ኣግሼም። አሞ እሶኦተ ሽታሪንን በርገም ኤረሜም። 11 አን ሆለመተ ጃተ ሆራንከ ጠጵት ምን መረን ኦለንታጋ አመዕነቱሰ ካዳጋ አሴም። አሞ እሶኦ አሌን አሙዕረምኬእ ዎሎ ባድ ከተመተ ኢለንቀጤች መረን ሸረዮንሰ እኬ። 12 ህከኒ አንን አበ ቄሳካች ዊመተ ዳኖመታ አዘዙታ ኣቅ ደማስቆ ከተመ መረዮም እኬ። 13 ዎመ! አን ዎቃን መረመንየን አመ በራ እኬሀኔን አሪቾ ጫኪች አበኖ ጫኩ ኤሳኒ ኤሳን በርገንት ዮ መን ሄጌጎኒ ጫኬእ። 14 ነኦት ሆሩንኩ ኡለ አሌን ኡምብየን እብር-መን አፌን ‹ሰዉሌ! ሰዉሌ! ሚ ሸርተዮንቴኤ? ቀሰኖ ብረቲን ኡርጨንቶንትደ ጌነንታንት› ይታ ላገተ መጮጬም። 15 አን ‹ቀርቾ! አት አዬት?› ዬም። አሞ ቀርቹንኩ ‹አን አት ሸርታንቴኤ ዬሱሳት። 16 ጠሁ እኮዳ ቴሱ ጦቅት ሎካንተክ ኡር። አን ቴሱ ኬሳ ለሌንኬ አት ኢተኔ ጡዶንቲሃ ብርተ ለቅ ጡድሳንኬሃ ነቀሰን ሁጀቱንተ ዳኖንሳንኬ። 17 አን እስራኤል ምናደብ አንጋቺ አሞ አን ሶሃንኬ አይሁደ እኩምቦ መን አንጋቺ ፈእሳንኬ። 18 እሶኦንት ኤሳን አመዕኒንተሰ ባጢልሰ አጉረሙ ደቅቱንታ ዶዕረንቶሪ ሜሬሮን እረ ቤቀንቱንታ አት እልሰ ፈንቱንታ ቱንሶች ጫካን ፉሽቱንታ ሼጣንች ዎሞማች መገን ዉዱ ፈንቀሽታንትገ አሳንኬ› ዬእ። 19 ህከኒ ዎመ አግሪጰ! ሰሜች ሀቄገ ጡደሞኤሪተኔ ‹ግቦም› ያምበአ። 20 ጠሁ እኮዳ አን ብርስ ደማስቆ ከተማን ዮ መኒ፥ ዬሩሳሌም ከተማን ዮሪሃ ይሁድ ባዶን ዮሪ ሆሪንካ አሞ አይሁደ እኩምቡ መኑ ባጢለሰ ቢረ ይት መገን ዉዱ ፈንቀልታጋ ሰበኮንሰ። አሞ ባጢለሰ ቢረ ይት ፈንቀልቶገ ጡድሳ ሁጅተ ሁጀታጋ ኩሌንሰ። 21 ህከንተኔሃት አይሁድ-መኑ ኤስ መገን ኬሰሞ ምኔን ዮምሀኔን አፍኬእ ሽቶኤተ ሀሶኤ። 22 ጠሁ እኮዳ ከበሬ ኢለንቀጤች መገን ካለቱት ኤሳች አነነ እክምበኤ። ህከንተኔ አን አቢሃ ቀሂሃ ነቀሰን ከኔ ዮም። ብሬን ሙሲ ህራጋኑሁ ‹ህትተ እሀኖ› ይቶገንከ ጠሃቄምሀኒች በጋን መሃ ጠሃቅምበአ። 23 ህኩ ጠሃቶሩንኩ ‹ክርስቶሱ ሀወ ኣቀኖ። አሞ ሬሆች ኬኢን ዎነቢ እክ ፈእ ጫከ እስራኤል ምናደቢሃ አይሁደ እኩምቦ መኒሃ አዋጀኖ› ይቴት» ዬእ። 24 ጳዉሎስ ህትተ ጠሃቀንየን ፍስጦስ «ጳዉሎሴ! ቴሱዕኑ መቻርቴንት። ሆለሙ መሌሱ መቻራንቹ አሴሄ» ይ ላገስ ጦቀእ ጠሃቄእ። 25 ጠሁ እኮዳ ጳዉሎስ «አብቴንት ፍስጦሴ! አን ገሬ ጠሀ ፈየ ዎዘኒን ጠሃቀዮም በጋን መቻርምበአ። 26 አን ብሬንተስ ማጡዕናች ጠሃቄም ጠሀ ዎሙ ደገኖ። ህኩስን ማጣን እሁምቦተኔ ከ ጠሀ ቆርሰኖገ አመዕናም። 27 ዎመ አግሪጰ! ህራጋኑ አመዕንታንትበእንዶ? አት አመዕንታንትገ ደጋም» ይ ፈንቀሼእ። 28 አግሪጵ ጳዉሎሴ «አት ኤስ ቀሆ ቀጣን አመዕናንቹ አቶኤተ ሰውቴንት» ዬስ። 29 አሞ ጳዉሎስ «ገበንቾ እንዶ ቄራዕሮ ጃን ኬስ ጠለ እሁዕናች ከበር ኩላምረ መጮጨኖ ሆሩንኩ ተን ኡሱሮች በጋን ኢገ እሁንተ መገኑ ኡጫም» ዬእ። 30 ህከኒች ዘኪን ዎሙ፥ ባድ ገሻንቹ፥ ባርኒቂ እሶኦንን በርገንት አፉዕልቶሩ ኬኦእ። 31 እሶኦንት ህከምቢች ኬእ ኦሮቅተን «ኩ መንቹ ሬሆበ ኢልሰኖስረ እንዶ ኡሱርሲሰኖስረ መ ጠሀሃ አስምበአ» የቀንቶእ። 32 አሞ አግሪጵ ፍስጦሴ «ኩ መንቹ ‹ሮሜ ባድ ዎም አሌን ህግ ያረም› ዩምቦ እክየን ጠለንከ ሂረመኖ እኬ» ዬእ።
1 ህከኒች ዘኪን ጣላን ባዱ መርከቢን መኑንተ ሙረሞ ጃተ እሶኦት ጳዉሎሴኒ ዎሉ ኡሱረንቶራ በርግት «አጉስጦሴ» ዬኖ ዎም በገዝ ጋጠናካች «ዩልዮሴ» ዬኖ ጥቤ መን አዘዛንቺ ህግስ ኣስቶሰ። 2 ነኦት እስይ ባዶን ዮ በሃር ቶቾን መርከቡ ኡረኖ መዕንተ «አድራሚጦነ» ዬኖቢች ዋለኖ መርከባን ኣንግ ኦሮኖም። ተሰሎንቄ ሄአኖ መቄዶን ባድ መንቹ አርስጥሮኮስ ኔሳንን በርገም ዮ እኬ። 3 ነኦት ለንክ በር ሲዶን ከተመ ኢልኖም። ዩልዮስ ጳዉሎሴ ቅሽጤተኔ ጃላከስበ መር እሶኦች ሀስሰኖስረ ኤበቁንተ አሴስ። 4 ነኦት ለንክ በር ቦብሩ ቃረገ ቦብርሰን ጠብን መረሙ ከሞኔተኔ ዎኢን ክበንቴ «ቆጵሮሰ» ዬኖ ኡላን ቴዕልን በሃር አሌን መርከቢን መረሙ አንፎም። 5 ክልቅይነ ጲንፍል ሺናን ዮ በሃረ ቶኖምሀኒች ዘኪን «ሉቅየ» ዬኖ ባዲን ህንግ «ሙረ» ዬኖ ከተመ ኢልኖም። 6 ጥቤ መን አዘዛንቹ ጣላን ባዱ መረኖ አለክሰንደር ከተም መርከበ ደግኬእ እሶን ኣግሾኔ። 7 ነኦት ሆለመ በር ለጭን መረመን «ቅንዶሰ» ዬኖ ከተም ሺነ ኢልኖም። ቦብሩ ብርተ ለንቅ መሩ ከሞኔተኔ «ሰልሞነ» ዬኖቢን ህንግኬዕን ዎኢን ክበንቴ «ቀርጤሰ» ዬኖ ኡላን ቴዕልን ኦሮኖም። 8 ነኦት ሆለመ ሀዊን ገበ-ገበ መረመን ህንግ «ላስየ» ዬኖ ከተም ሺናን ደገንታ «ደናምተ» ዬኖ ፎሎጭ መዕንተ ኢልኖም። 9 መረንቸኔ አሌን ሆለመት ጃት በኦተኔሃ ጦም ጃት ህጎተኔሃ ህተን ጃን በሃር አሌን መረሙ ሀውሰኖ እኮተኔ 10 ጳዉሎስ «መነ! ከኒች ዘኪን ዮኔ ዎቃን ሀዉ ዮኔጉ ጡደመዮኤ። ህኩስን ሆጎቦኒ መርከባኒ ኢለኖ ሀወ ጠለ እሁዕናች ኒ ገግ ፎሌኒ አቡ ሀዉ ኢሊ ደንደኖ» ይ ሰጆሰ። 11 ጠሁ እኮዳ ጥቤ መን አዘዛንቹ ጳዉሎሴ ሰዘናች አብሽ ኦተኣንቹሁ መርከብስ አኑሁ ይታረ መጮጨዮ እኬ። 12 ህኩ መርከቡ ኡረኖቡ መጦ ህከኔ ፉሊ ደናሙበ እሁ ሆጎተኔ መኒች ሆለሙሰ «መረመን ደንዴሾደ መርከቡ ኡረኖ ‹ፎንክሰ› ዬኖቢን ህንግ ‹ቀርጤሰ› ዬኖበ ኢልን መጦ ህከኔ ኤጌናም» ይት ሰውተሰ ህንጨቶእ። ፎንክሱ «ቀርጤሰ» ዬኖ ባዶን አራግ ዉዲን መርከቡ ኡረኖተ መዕን እኬ። 13 ቀሁ ቦብሩ ሙጌን ዉዲን ቦብርሴሃን ጡዶ ጃተ እሶኦት ሰውቶገ እሀኖ አጉጅየንሰ መረንቶተ ኬኦእ። ህኩ መርከቡ ኡረኖቤቺች ኬእ «ቀርጤሰ» ዬኖ ኡለ ሺኒን ህጎእ። 14 ጠሁ እኮዳ ህተ ጃንተ ብዜን አርፉል ዉድ መቃሙ ቦብሩ ዎኢን ክበንቴ ኡላች ኬኦ። 15 ቦብሩ ጎምበንየን መርከቡ ጠብይ መረሚ ደንዱ ሆጎተኔ ሰዕምን ኦተአም ኦሮኖም። 16 ዎኢን ክበንቴ «ቄደ» ዬኖ ኡለ ሺኒን ህንግኬዕን መርከበስ ካዕለኖ ጀልበ አበ ሀዊን ኡሱን ኤጌዲ ደንድኖም። 17 መርከብ ኣዜን ሁጀታ መኑ ጀልበ ኣዝ ኣግስ መርከበስ ፎጦሮን ኡሱርቶእ። አሞ መርከቡስ «ሱርትሰ» ዬኖ ሻፋን ኡቡምቦገ ዋጅት ሸረ ድሪስ ቦብሩ ጎምበንየን ኦሮቅቶእ። 18 ኒ አሌን ቦብሩ ቃረን መሮተኔ መርከባን ሆጎበንቶ ኦዳች መ-መቱ ለንክስ በር እሶኦት ድሪስ በሃር ኣዜን ኡጁ አፎእ። 19 እሶኦት ሰክ በር መርከብ ኦዳች በሃር ዎእ አሌን ኡጁ አፎእ። 20 ሆለመ በር ቃሩ አንጉሉሎ ቦብሩ ኬእ አሪቹታ ቤዜታ ጡዱ ከሞተኔ «ፈዕናምበአ» ይን ተሳ ሙኖም። 21 መኑ እቸተ እቱዕናች ሆለመ በር ኤጌሮተኔ ጳዉሎስ ሜሬሮንተሰ ኡር «መነ! ከኒች ብሬ ሰጆንክዕኔ ሰዘነተ መጮቴን ዎኢን ክበንቴ ‹ቀርጤሰ› ዬኖ መዕኔች ኬኤኑምቦ እክየን ኩ ሀዉሁ በኡሁ ኢለኖዕኔበአ እኬ። 22 ቴሱ መርከቡስመ በአኖ በጋን ክዕኔኤች መትዕኔ ፎሉሁ በአኖበአ። ዋጅቴኖችዬ ይ ሰዛንክዕኔ። 23 ዳፉንኩስ አንከዕሩተ አን እሲ ጠቀም ሰገዳም መገኑ ሶኬስ ሰሜ ሶቀማንቹ ሺናንተኤ ኡርኬእ 24 ‹ጳዉሎሴ! ዋጅቶት፤ ሮሜ ባድ ዎም ብሬን ኡሩ ሀስሰኖሄ። አሞ ኬሳን ሜጡ እክ መረንታ መነ ሆረንከ ፈእሳንትጊ መገኑ ኣሴሄ› ይ ኩሌኤ። 25 ህከኒ መነ ዋጅቴኖችዬ። መገኑ ኤሳ ኩሎኤረ አሰኖገ አመዕናም። 26 ጠሁ እኮዳ ነኦት መቴ ዎኢን ክበንቴ ኡላን ፉናም» ዬእ። 27 ቶነ ሾልክ በሬ አንከር «ሜዴቴራነ» ዬኖ በሃር አሌን ቦብሩ ጎምበንየን አንከሬ በቅታን መርከብ ኦተኣኑ ኡለተ ኢልቶኢ አጉጆሰ። 28 ህከኒ እሶኦት ህተን መዕኔ ጥልመተ ፎጦሮን ክኑ ኡሱርት ሙገት ኬንትየን ሾላዱመ ጡንኩላለ እኮ። አሞ ቀሆ ጄቾች ዘኪን ለንኪ ኬንቶ ጃተ ሰጀዱመ ጡንኩላለ እኮ። 29 ህከኒ ነኦት መርከቡ በሃር ቶቾን ዮ ክኖን ዎቀዕረኖሀኒ ዋጅን መርከብ ዘኪን ሾሉ «ማሌቀ» ዬኖ ብረት ዎእ ኣዜን ኡርንሶም። ህከኒች ዘኪን እሩ ሶዘኖጊ መገኑ ኡጭኖም። 30 መርከበ ኦተኣ መኑ መርከቢች ፉልት ሁኒ ሀሶተኔ መርከብ ብሬን ዮ «ማሌቀ» ዬኖረ ኡጅታረ አጉድ መርከብ አሌን ዮ ጀልበ ዎእ አሌን ኡጅቶእ። 31 ጳዉሎስ ህካን ጡጆ ጃተ ጥቤ መን አዘዛንቺሃ ቤጠቤሃ «ኩ መርከብ ኦተኣኑ መርከብ ኣዜን ኤጌርቱምቡች አዕኖኦት ፈኢ ደንድቴነንተበአ» ዬሰ። 32 ህከኒ ቤጠቦ ጀልቡስ ኡሱረሞ ፎጦሩተ ሙርት ዎእ አሌን ቸል ያኖገ አቶእ። 33 እሩ ሶዚ እኬሀኔን ጳዉሎስ ሆሩንኩሰ እቸተ እቱንተ «አዕኖኦት እቸተ እቴኑዕናች ኤጌርቴንተሀኒች ከበር ቶነ ሾልክዕኔየ በር። 34 ህከኒ አዕኖኦት እቸተ እቴኑንተ ኡጫንክዕኔ። እቸት ቃርስታክዕኔ። ክዕኔኤች አዬቺ መቱ ሙም ዱጥቹሁ በአኖበአ» ይ ኡጬሰ። 35 እስ ህካን ዬሀኒች ዘኪን እቸተ ኣቅ ሆርሰ ብሬን መገኑ ኡጭ ቢጭ እቱ አፎ። 36 ህከኒች ዘኪን ሆሩንኩሰ ቃርሰቀንትኬእ እቸተ እቶእ። 37 መርከብ ኣዜን ዮምሩ ሆሩንኩ ለምተ ጥብተ ለመላነ ሌሆ መነ እኬ። 38 እሶኦንት እት ዱቦሀኒች ዘኪን መርከቡ ቢሉንተ አለሱ በሃር ዎኣን ቶርቶእ። 39 እሶኦት እሩ ሶዘኖደ ኢልቶ ቤቹ ደግምበአ። ጠሁ እኮዳ በሃር ቶቾን ዮ ሻፍ ኡለተ ጡዶእ። ደንዴታኢ እክየን መርከበስ ህከበ ህንጨቶተ ሰውቶእ። 40 ህከኒ እሶኦት መርከበ ኡርሳ «ማሌቀ» ዬኖሀን ፎጦሩተ ሙርት ኡጅቶእ። አሞ መርከቡስ ብርተ ለቅ መረሙንተ ካዕለኖሀን ፎጦሩተ ሂርት ሸረስ ጦቀት ኡሱርትየን ቦብሩ ብርተ ለቅ መረንሰንየን በሃሪች ቶቹ ለቅ መረመኖገ አቶእ። 41 ጠሁ እኮዳ መርከቡ ቱበሜ ሻፋን ቆዕል ብሬ ዉዲን ኡላን ገተሞተኔ ሌንቄቁምቦገ እኮ። አሞ ዘክ ዉዲን ዎእ ዎርጃሙ አብሽ ጎምበዮተኔ ቢጠሙ አፎ። 42 ኡሱረንቶሪች ሀኩ መንቹሁ በሃረ ዋች ፉሸቁምቦገ ቤጠቦ ሽቶተ ኤረንቶእ። 43 ጠሁ እኮዳ ጥቤ መን አዘዛንቹ ጳዉሎሴ ፈእሶተ ሀሾተኔ ሰውተሰ ኣቅምበአ። ህከኒ ዋቹ ደንደኖ አዪ መርከቢች ጦጵይ ድር ዋች ቶቹ ፉለኖገ አዘጆ። 44 ፈኦሪች በከኑ ሀቅ ሻጲን በከኑሰ መርከቢች ቢጠሞ ሜትገ ዮሪን ፉልታገ አዘጅየን ሆሩንኩሰ ጡሚን ዎኢች ቶቹ ፉልቶእ።
1 ነኦት ዎኢን ክበንቴ ኡለበ ጡሚን ኢልኖምሀኒች ዘኪን ህት ኡለንት «ማልተ» የመንት ገአንታኢተ እኮገ ደንጎም። 2 ጤናኒ ግዳኒ መረም ዋኖምተኔ ህከን ባዶን ሄኣ መኑ ሆሩንኩ ጊረተ ቡስት ማለልሲሰኖገ አስት ኮህንተ ኣቅቶኔ። 3 ጳዉሎስ ጠጠረተ ጠጰእ ጊራን ዎርየን አበ ኢቢን ኬኦ መቱ ዎሪቹ ፉል ጳዉሎሴ አንጋን ጣጠሞ። 4 ዎኢን ክበንቴ «ማልተ» የመንታ ኡላን ሄኣ መኑ ዎሪቹ ጳዉሎሴ አንጋን ጣጠሞገ ጡዶ ጃተ እስ-እሶኦንት «ኩ መንቹ ገርንተ መነ ሼሃ። በሃሪች ጡሚን ፉሎዳ መገን ፍርዲች ሁን ፉሸቅ ሄኢ ደንድምበአ» የቀንቶእ። 5 ጠሁ እኮዳ አንጋችስ ዎሪቹ ግግሽ ጊራን ኡጅ ጌነሙዕነ ፈኦ። 6 እሶኦት «ቴሶች ቴሱ አሉስ ደርሸኖ እንዶ ሬሀኖ» ይት ቆረበዮ እኬ። ጠሁ እኮዳ እሶኦት ሆለመተ ጃተ ቆረብኬእ ጌነሙ ሆጎገ ጡድ ሰውተሰ ዶርት «ኩን መገኗ» ይቶእ። 7 ህከን ዮም መዕኔ ሺናን ዎኢን ክበሜ ባዱ ገሸኖ «ጱጵሎሴ» ዬኖ መንቺ ኡለት ዮስ እኬ። እስን ምንስ ኦሮሽ ሰሱ በር ኮህንተ ገሼኔ። 8 ህተ ጃንተ ጱጵሎሴ አነ ኢቡሁ ሙግቱሁ አፍየንስ ኦሰኤ እኬ። ህከኒ ጳዉሎስ እስ ምን መርኬእ አንገስ አሌንተስ ኡጅ መገኑ ኡጬሃን ፈዬእ። 9 ህኩን እኮሀኒች ዘኪን ህከን ሄጌጎን ሄኣ መኒች ዎሉ ሞሳኑሁ ዋልት ሞሲችሰ ፈይቶእ። 10 እሶኦት ኔሳ ሆለመረ ኣሲን አብሶኔ። ነኦት መርከባን ኣንግ ኦሮቂ ኬዕኖም ጃተ ኔሳ ሀስሰኖረ መርከባን ሆጎቦኔ። 11 ሰሱ አገነ ዎኢን ክበንቴ «ማልተ» የመንታ ኡላን ኤጌኖምሀኒች ዘኪን መጦ ህከኔ ፉሌ አለክሰንደር ከተም መርከባን ኣንግ መረሚ ኬዕኖም። መርከብስ አሌን «ድዮስቆሮሰ» ዬኖ ቆጰን መገን ለም ቀፋምት መላት ዮሴየ እኬ። 12 «ስራኩሰ» ዬኖ ከተመ ኢልን ሰሱ በር አፉዕልኖም። 13 ህከምቢችን በሃር ቶቺን ዘህን «ሬግዮመ» ዬኖበ ኢልኖም። መቶ በሬች ዘኪን ሙጌን ዉዲን ቦብርሰኖ ቦብሩ ቦብርሴተኔ ለንክስ በር «ጱጥሎሰ» ዬኖበ ዋኖም። 14 ህከኔ ዮ አመዕናኒን ደቀም እሶኦንን በርገም ለመለ በር ኤጌኑንተ ኡጭቶኔ። ህከኒች ዘኪን ሮሜ ከተመ ኦሮኖም። 15 አመዕናኑ ኒተኔ መጮቶ ጃተ «አፍዮሰ» ዬኖ ድኮባ «ሰስተ ኮህ ገልቴ ምነተ» ዬኖባ ኢለንቀጤች ኔስ ኣቅቶተ ዋልቶእ። ህከኒ ጳዉሎስ እሶኦተ ጡጆ ጃተ መገኑ ገለጥ ቃሮ። 16 ነኦት ሮሜ ከተመ ኣንጎም ጃተ ጳዉሎስ ቆረበኖስ ቤጠቤቺንን ሜጥን ሄአኖገ አሴመስ። 17 ሰሶ በሬች ዘኪን ጳዉሎስ ሮሜ ከተማን ሄኣእኬ አይሁድ-መን አወንሳኑ ገእሲሽ መኑስ ጠጵቶ ጃተ «ኢ ህዛከ! እስራኤል ምናደብ አሌኒ አናከኔ ዎግ አሌኒ አሴም ሂልመት ሜጡሩ ዮበአ። እሁን በጋን ዬሩሳሌም ከተማን ኡሱረሞምቢች ሮሜ መኒ ህግሴን ኣሴመኤ። 18 ሮሜ ባድ መኑ ቆርምቶኤሀኒች ዘኪን ጠለንከ ገፈርቶኤተ ሰውቶእ። ዳፉንኩስ ኤስ ሬሆ ኢልሳኤ ገጃጁተ ደጉ ሆጎተኔሃት። 19 ጠሁ እኮዳ አይሁድ-መኑ አን ጠለንከ ገፈረሙ ግቦ ጃተ ሮሜ ባድ ዎም አሌን ህግ ያሩ ሀስሾኤ በጋን ኢ ምናደበ ኦዳም ጠሁ ዮኤበአ። 20 ህከንተኔ አን ክዕኔኤተ ጡዶታ ክዕኔኤን ሜጡ ጠሃቆታ ጠዕሜም። ዳፉንኩስ አን ሰንሰለቲን ኡሱረሞሚ እስራኤሊ ኣሰሞ ተሴተኔሃት» ዬሰ። 21 እሶኦንት ጳዉሎሴ «ኪተኔ ኔሳ አይሁድ ባዲች ደዳቤት ኢልትምበኔ። አሞ ከበ ዋልቶ ህዛካች አዪ ኪ ሂልመተኔ ኩሎኔሁ ጠሃቄኢሁ ዮበአ። 22 እኮዳ ነኦት አት አወንታንት አመዕነቱ አነነ አነነ መዕኔን ዮ መኑ ግበኖገ ደንጋም። ህከኒ ኪ ሰውቱ መሃንዶ መጮጪ ሀንሳም» ይቶስ። 23 ህከኒ እሶኦት በር አፎሀኒች ዘኪን ሆለሙ መኑ እስ ገለኖ ምንበ ዋልቶእ። ጳዉሎስን ገስሜች ሀወሩተ ኢለንቀጤች መገን ዎሞመተኔ ዮስ ሰውተ ኩሎ። ሙሴ ሴሪቺ ህራጋን መጣፋቺ ለሚችን ዬሱስተኔ ኩሎሰ። 24 ህከኒች ዘኪን መ-መቱሰ እስ ኩሎሰራን አመዕንቶእ። እኮዳ መ-መቱሰ አመዕንትምበአ። 25 ህከኒ እስ-እሶኦንት ኢተንቱዕነ አነነ እኮገ ጳዉሎስ ጡጆ ጃተ «ጡማንቹ አያኑ ህራጋንቾ እስያሴን አናካሃንክዕኔ ጠሃቄኢ ገርተ። 26 ‹ምናደብበ መርትኬእ መጮጩስ መጮጭቴነንተ። እኮዳ ሆረን ዘህሴን ኣቅቴነንተበአ። ጡዱስ ጡዴነንተ፤ እኮዳ ሆረን ደጌነንተበአ። 27 ዳፉንኩስ ከን ምናደብ ዎዘኑ ዱጄእ። መጨሰን ደንቅቴእ። እልሰን ቆቅጭቴእ። ህትተ እኩምቦ እክየን እሌንተሰ ጡድ መጫንተሰ መጮት ዎዘኒንተሰ ሰውት ኢበ ፈንቀልቴ እክየን ፈይሳንሰ እኬ› ዬእ። 28 አቼ ት መገን ፈእስ ሶህኑት አይሁደ እኩምቦ መኒ ሶሀንቴኢተ እኮገ ደግዬ። አሞ እሶኦንት መጮታእ» ዬእ። 29 ጳዉሎስ ህካን ኩሎሰሀኒች ዘኪን አይሁድ-መኑ እስ-እሶኦንት ኦደንተን ኦሮቅቶእ። 30 ጳዉሎስ ባቴን ገሌኖ ምኔን ገግስ ግዘ ባተን ለሙ ዎጋ ሄኦ። እስቤቹ ዋለኖ መነ ሆረንከ ኮህንተ ኣቀዮ እኬ። 31 ጳዉሎስ መገን ዎሞመተ ኩለን ቀርቾ ዬሱስ ክርስቶስተኔ አዪ ከሙዕናችስ እግማን ሮስሰዮ እኬ።
1 - 2 ሶቀማንቹ እሆተ ገአሞምነ ህራጋንስ ዉዲን ጡማንቾ መጣፍ ኣዜን ዎናንከ ተሳ አሴ መገን ምሽራች ላጋ አነነ እኮም ዬሱስ ክርስቶስ አግሹ አን ጳዉሎስ ሶኬምተ ሶህኑ። 3 - 4 ህት ምሽራች ላገንት ማል ዉዲን ዳዊቴ ዜሪች እለሞነ ሬሆች ኬኢን መገን ቤቱ እሁስ ጡማንቹ አያኑ አበ መቄን ለሊሾ ቤቷንስ ቀርቿኔ ዬሱስ ክርስቶስተኔ ኩልታታ። 5 እስ ዉዲንን ሆራንከ ምናደብ ሜሬሪች ዬሱስ ሱዕምተኔ መኑ አመዕነቲን አዘዘመኖገ አሲ መገን ኣሰንቸሃ ሶቀማኑ እሁሃ ኣቅኔም። 6 ህከን መኒንን በርገንቴን አዕኖኦቲ ዬሱስ ክርስቶስረ እኬኖተ ገአንቴንታረ። 7 መገኑ ኢቴዕኔነ ጡማኑ እኬኖተ ገአንቴንተ ሮሜ ከተማን ዮንተሪ ሆሪንከ አናኔ መገኒቺ ቀርቾ ዬሱስ ክርስቶሲቺ ኣሰንቹሁ ጡሙሁ ክዕኔኤን እሁን። 8 አመዕነቱዕኔ ባዶን ሆራንን መጮጨሞተኔ ሆርዕኔተኔንከ ብርስ ዬሱስ ክርስቶሲን መገኑኤ ገለጣም። 9 አሞ መገኑ ኡጫም ጃተ ሆረንተ ቃጋንክዕኔገ ቤትስ ምሽራች ላገተ ዊማዕኔ ዎዘኒን ሁጀታም መገኑ ነቃሻዕኔ። 10 ቴሱ ዘካንቾን መገኑ ዬደ ክዕኔኤበ ዋሎተ ዎቆኤ ጠብዩንተ መገኑ ኡጫም። 11 ዳፉንኩስ ክዕኔኤተ ቃርሶተ ጡማንቹ አያኑ ኣሴኤ ኣሰንቺች ቤሃንክዕኔ ይኬእ ጡዶክዕኔተ ቁልጠዮም። 12 ህትተ ዬሚንኩ አን ክዕኔኤ አመዕነቲን፥ አዕኖኦንት ኢ አመዕነቲን ነ-ነኦንት ቃርሰቀሙንታት። 13 ኢ ህዛከ! አይሁደ እኩምቦ ዎሎ መንባን ላሉተ ደጎምገንከ ክዕኔኤባኒ ላሉተ ደጎተ ይኬእ በትናሸተ ጃተ ክዕኔኤበ ዋሎተ ሰውዬም እኬ። እኮዳ ቴሶ ኢለንቀጤች ዋሉ ከሞኤገ ደጌኑንተ ሀሳም። 14 ዳፉንኩስ መሌሰ መኒ፥ ጎእቾ መኒ፥ ሮሾ መኒሃ ሮሱምቦ መኒሃ ሮስስ ግዱ ዮኤ። 15 ህከኒ ሮሜ ከተማን ዮንተ ክዕኔኤሃ ምሽራች ላገተ ሰበኮተ ቁልጠዮም። 16 ዎና አይሁደ አሞ ግሪክሳን ጠሃታ መነ ህትጉንተ አመዕኔኢ ሆረንከ ፈእሳ ምሽራች ላጋን ሳላምበአ። ህት ምሽራች ላገንት መገንየ መቆ። 17 ዳፉንኩስ «ሙጩሩ መንቹ አመዕነቲን ሄአኖ» የመም ጣፈሞገንከ መገኑ መነ ሙጩርሰኖ ዎናች ዘካንቹ ኢለንቀጤች አመዕነቲን ጠሊን እኮጉ ህተን ምሽራች ላጋን ለሌእ። 18 ገርተ ሾክማንተሰ ማጣ መናን ባጢልሰነ ሾክመሰ አሌን መገን አሙርት ሰሜች ዋልታእ። 19 ዳፉንኩስ መገንተኔ ደገሙ ሀስሰኖረ ሆረንከ መገኑ ለሊሾሰተኔ እሶኦ ጫክ ለሌሃ። 20 ኡለት ቆጨንቶሀኒች አፍ ጡደም ከሱምቡ መገን ቆጩ ህኩስን ዶሊ ሆሪንከ ሄአኖ መቆሲ መገኖመሲ እስ ቆጬሪ ዉዲን ጫክ ጡደሜእ። ህከኒ እሶኦት ገጃጅታረ ሆጎእ። 21 አሞ እሶኦት መገኑ ደገንን መገኖመስጊን አብሱሃ እሱንከ ገለጡሃ ግቦእ። ሰውቱሰን ጠለለ እኮ። ቆርሱምቡ ዎዘኑሰን ቱንሴእ። 22 «ነኦት ቆራከተ» የቅተንን ቀላከተ እኮእ። 23 አሞ በኡምቦ መገን አብን በአኖ መን አጉዲሻን፥ ጪአ አጉዲሻን፥ ሾሎካም አጉዲሻኒ ሃሞን ሹርይተን መረንታሪ አጉዲሻኒ ዶርቶእ። 24 ህከኒ እስ-እሶኦንት መኖመሰ ቢልሰኖረ አስቱንተ ዎዘኑሰ ቁሉጮ ሂልማን መገኑ ቡሽማ ህግሽ ኣሴሰ። 25 ዳፉንኩስ እሶኦት መገን ገርተ ቆጰናን ዶርቶተኔሃት፥ ቆጫንች ቆደ ቆጨሞራን ሰገዶተኔሃቲ ህከ ቆጨሞሪ ሁጀቶተኔሃቲ። እኮዳ መገኑ ዶሊ ሆሪንከ ገለጠሜሃ፤ አሚዕን። 26 መኑ ህካን አሴሀኒ ሳልሲሰኖ ቁልጢ ህግሽ ኣሴሰ። ሜንቱሰን ሮሰሞጊን ጎኒን ኦሰኡ አጉርት ሀስሱምቦገ እሆን ዶርቶእ። 27 ህትጉንተ ጎኑ ሮሰሞጊን ሜንቲን ኦሰኡ አጉርት እስ-እሶኦንት ቁልጢንተሰ ጊረንቶእ። ጎኑ ጎናን ፎኩተ ሁጀቶእ። በእሲሀንሰን ሀስሰኖ ዋገ ኣቅቶእ። 28 መገኑ ደጉ ግቦሀኒ ሀስሱምቡረ አስቱንተ ካዕሉምቦ ሰውቲ ህግሽ ኣሴሰ። 29 ሾክመት ሆረንት፥ ደምጉ፥ ቁልጡ፥ ሂልመት፥ ቂንሸት፥ ነሰ ሹ፥ በአንቹ፥ መለጡሁ ሀንታሩሁ ዊሜሳረ። እሶኦንት ሄዕማኗ፥ 30 መን ሱዕመ በእሳሃረ፥ መገኑ ግባሃረ፥ ቢልሳሃረ፥ ቦልጥታሃረ፥ ገጋንተሰ ድከኣሃረ፥ ሂልመተ ሀሳሃረ፥ አኒሃ አማሃ አዘዘንቱምቧረ፥ 31 ቀላከተ፥ አመዕነንቱምቧረ፥ ኢተት ዮሰበእየረኒ ጎደበ ቃራከተኒ። 32 «ህትጎነ ጠሀ አስታ መኑ ሆሩንኩ ሬሁ ሀስሰኖሰ» ይታ መገን አዘዙተ ደገንን ህከ ጠሀ አስታእ። ህካን አሱ ጠለ እሁዕናች ዎሉ መኑሁ ህትጎነረ አሱንተ ጎምበንስታእ።
1 አት ዎሎ መን አሌን ፍርድታንት መንቾ! አዬኒ እኮንትደ ገጃጅታንትሩ ዮኬበአ። ዳፉንኩስ አት ዎሎ መን አሌን ፍርድተን ህኩ ፍርድታንትስ መኑ አሰኖረንከ አስተዮንትተኔ ዎሎ መን አሌን ፍርድታንት ጃተ ገግክ አሌን ፍርድተዮንት። 2 ህትጎነ ጠሀ አሰኖ መን አሌን መገኑ ፍርደኖ ፍርዱ ገሬቢ እኮገ ደንጋም። 3 አት ህትጎነ ጠሀ አሰኖ መናን ፍርድተን እሶኦት አስታረንከ አስታንቲ እኮንቲች መገን ፍርዲች ፈኣንቲ አጉደዮሄንዶ? 4 እንዶ መገን ቢዝመታ ደንዴቅስነ እየቅስ በትንታ ገደዮንትንዶ? መገኑ ቢዝመስ በትሾሄ ኬስ ባጢለ ቢረ ይታንትገ አሶሄተ እኮገ ደጋንትበእንዶ? 5 ጠሁ እኮዳ ጎደብክ ቃርመገነ ባጢለ ቢረ ዩምቦ ዎዘንክጊን መገን አሙርቲ ጠቤኑስ ፍርዱሁ ዋለኖ በሬ ገጋንተክ አሙርተ ጠጴጭተዮንት። 6 ዳፉንኩስ መገኑ አኒንከ አኒንከ ሁጄስገ ኣሰኖ። 7 ህትጉንተ እየቂኒ ደናሙረ ሁጀቲኒ ገለት፥ አብንሃ በኡምቡተ ሄቸታ ሀሳሪ ሆሪንከ ዶሊ ሆሪንከ ሄኣ ሄቸተ ኣሰኖሰ። 8 ጠሁ እኮዳ ሾካከተ እኮሪነ አዘዘሙ ግብ ቆጰኒ አዘዘንታ መን አሌን መገን አሙርቲ ቦበኑሁ ድረኖ። 9 አይሁደሃ እኮ ግሪክሳን ጠሃታ መነሃ እኮ ሂለረ አሰኖ መን አሌን ሆራንን ሀዉሁ ኡዕነቲ ዋልታእ። 10 ጠሁ እኮዳ አይሁድ-መኒሃ እኮ ግሪክሳን ጠሃታ መኒ ደናሙረ አሰኖ መኒ ሆሪንከ ገለቱ፥ አብኑሁ ጡሙሁ ኣሰመኖሰ። 11 ዳፉንኩስ መገኑ መን እልተ ጡጅ ጎዕለኖበአ። 12 ሴሩ ዮበኢ ባጢለ ሁጀቾ መኑ ሆሩንኩ ሴሩ ዮበኢንከ በአኖ። አሞ ሴሩ ሄአንየን ባጢለ ሁጀቾ መን አሌን ሆራንን ሴሪን ፍርደመኖ። 13 ዳፉንኩስ መገን ብሬን ሙጩርታሩ ሴረ ቆረባሃረ በጋን ሴረ መጮት ቆረቡምቡሩ ሙጩራከተበአ። 14 አሞ አይሁደ እኩምቡነ ሴሩ ዮሰበእ መኑ ቆጨንቺንተሰ ሴሩ ያኖረ ዊንሽታተኔ ሴሩ ዮሰበእረ እኮዳ እሶኦት ገጊሀንሰን ሴርየገ። 15 ህኩንን ሴሩ አዘዘኖሩ ሆሩንኩ ዎዘናንተሰ ጣፈሞ እኮገ ጡድሰኖ። አሞ ዎዘኑሰ አሌንተሰ ነቀሰኖ። ዳፉንኩስ ዎዘኑሰ መ-መቴኒ ዎቀሰኖሰ፤ መ-መቴኒ እሶኦንተ ድክሰኖሰ። 16 ህኩን እሀኖንኩ አን ኩላም ምሽራች ላገጊን መገኑ ዬሱስ ክርስቶስ ዉዲን መኑ ሁጀቾ ማጠሞ ጠህ አሌን ፍርደኗ በር። 17 ጠሁ እኮዳ አት ገገክ «አን አይሁድቿ» የቅቶንትደ፥ ሴራን ድከኦንትደ፥ መገንቢ እሂንተክ ቦልጥቶንትደ፥ 18 መገኑ ሀሰኖረ ደጎንትደ፥ ሴሪች ሮሶንትተኔ ደናሙስ ጠሀ ቆርስት ደጎንትደ፥ 19 - 20 ቆርመነ ገሬ አጉዲሸት ሴር ዉዲን ዮኬተኔ ቆቃከ አወንሳንቹ እኮንትደ፥ ቱንሶን ዮሪ ጫከ እኮንትደ፥ ቀሉ ኬኑ ሮስሳንቲ እኮንትዳ ጪላከ ሮስሳንቹ እኮንትሀንገ አስት ገገክ ዎልጭቶንትዳ 21 አቼ አት ዎሉ መነ ሮስሳንቲ ገገክ ሮስሳንትበእንዶ? አሞ «ሞገኦት» ይት ሰበከን አትስ ሞገአንንዶ? 22 «መኑ ሳኡ ሀስሰኖበአ» ይታንቲ አትስ ሳአንንዶ? ቆጰን መገናካ ሰገዱ ግባንቲ ህከሮኦስ ጠጵት ምናከተ ቦገንንዶ? 23 አት ኩ ሴራን ድከኣንቲ ሴረስ ዝሪን መገኑ ገደንንዶ? 24 ህኩንን «ክዕኔኤ ዳፊን መገን ሱዕሙ አይሁደ እኩምቦ መን ሜሬሮን ቦሮረመኖ» የመም ጣፈሟገ። 25 ሴረ ዊንሽታንቲ እኮደ ኑጉሰሙ ካዕለኖሄ። እኮዳ ሴረ ዝርታንቲ እኮደ ኑጉሰሙክ ኑጉሰሙ ሆግየገ። 26 አቼ ኑጉሰሙምቡ መንቹ ሴር ዎገ ቆረቦደ ኑጉሰሙ ሆጉስ ኑጉሰምገ ዎልሰመኖስበእንዶ? 27 አት ጣፈሜ ሴሩ ሄአንየንኬ ኑጉሰንቴንቲ እኪ ሴረ ዝርቶንትደ ሴረ ቆረበኖነ ኑጉሰ ሮሸት ዮበእ መንቹ ኪ አሌን ፍርደኖ። 28 ሱዕም አይሁድቹ ገሬየ አይሁድቹበአ። አሞ ኤተሪን ጡደንታ ማል ኑጉሰት ገሬተ ኑጉሰበአ። 29 ማጠተ አይሁድቹ እኮ ገሬየ አይሁድቹ። ገሬ ኑጉሰንት ጡማንቾ አያኒን እኬታ ዎዘንተ ኑጉሰ በጋን ማልተ ኑጉሰበአ። ህከን መንች ገለቱንኩ መገኒቼት በጋን መኒቼበአ።
1 አቼ አይሁድቹ እሁ ዎየኖ ሚኔት? እንዶ ኑጉሰሙስ መ ካዕለኖ? 2 አይሁድቹ እሁ ሆራንከ ዎቄን ዎየኗ። ዎነስቢንኩ መገኑ ላገስ ኣሴኢ አይሁድ-መኒሃት። 3 ህከደ እሶኦች መ-መቱ አመዕነሙ ሆጎደ አመዕነሙ ሆጉሰ መገኑ አመዕነሜኢ እሁ ከመኖንዶ? 4 ሆረኒ ከመኖበአ። «ጠሃታንት ላጋችክ ኬኦ ሙጩርታንት። አሞ ኦደንቶንት ጃንተ ገርታንት» የመም ጣፈሞገንከ መኑ ሆሩንኩ ቆጰናንቹ እኮዳ መገኑ ገሬቢ እሁን። 5 ጠሁ እኮዳ ባጢሉኔ መገን ሙጩርመተ ጡድሰኖ እኮች መ ይናም? መገኑ አሙርተ አሌንተኔ ኤቦደ ሉሼእ ዩሃንዶ? መኑ ያኖገ ያም። 6 ህካን መገኑ ኤቡንከ! ህትጉተ እኮችዕኑ መገኑ ኡለ አሌን ዮ መን አሌን ፍርዲ ሀትክ ደንደኖ? 7 ጠሁ እኮዳ አን ቆጰናንቹ እሁኤ መገን ገርተ አብኒሀንስ በተኣገ አሴኢች ሚሃመ ቴሶ ኢለንቀጤች ባጢላሞ መንችገ አሌንተኤ ፍርደመዮኤ? 8 መ-መቱ መኑ «ደናሙሩ ዋሉንተ ሚ ሂለረ አስናምበይ?» ይን ጠሃቅኖምሀንገ አስት ሄሜን ቦሮርተዮኔ። እሶኦ አሌን ፍርደመኖ ፍርዱንኩ ገሬየ ፍርደ። 9 አቼ መ ይናም? ነኦት አይሁድ-መኑ አይሁደ እኩምቦ መኒች ዎይናምንዶ? ሆረኒ ዎይናምበአ። ነኦት ዎናንከ «መኑ ሆሩንኩ አይሁደሃ እኮ ግሪክሳን ጠሃታ መነሃ እኮ ባጢላመተ» ይኔም። 10 ዳፉንኩስ «ሜጡሁ ጡማንቹ ዮበአ። 11 ቆርሰኖንኩ ሜጡሁ ዮበአ። ህትጉንተ ሜጡሁ መገኑ ሀሰኖ ዮበአ። 12 ሆሩንኩሰ ሉሴእ። አሞ ሜጦማንን ደበልቱምቡረ እኬእ። ደናሙረ አሰኖንኩ ሆረን ዮበአ። 13 አፎሰን ፈነሞ ሞግየገ። አረቤንተሰን መለጣእ። የቡሮንተሰን ዎር መርዙ ዮሃረ። 14 አፎንተሰን ጤሌሉሁ ቀራራሹ ጠሁሁ ዊሜሃረ። 15 ሎከሰን መን ቄግ ዱኒ ሰርበንታታ። 16 ዎቃንተሰን በኡሁ ሀዉሁ ዮእ። 17 ጡም ዎቃንከ ደጋበአ። 18 እሌሰ ብሬንን መገኑ ዋጁ ዮበአ» የመም ጣፈሞተኔ 19 መኑ ሆሩንኩ አፎስ አጱንታ ኡለ አሌን ዮ መኑ ሆሩንኩ መገን ፍርድ ኣዜን እሁንታ ሴሩ ያኖሩ ሆሩንኩ ሴር ኣዜን ዮ መኒ እኮገ ደንጋም። 20 ህከኒ መኑ ሆሩንኩ መገን ብሬን ሴረ ቆረቢን ሙጩሪ ደንደኖበአ። ዳፉንኩስ ባጢሉ ለለኖ ሴሪኔት። 21 ቴሱ መገኑ መነ ሙጩርሰኖ ዎቆ ሴሪች አነነ ዎቄን ለሌእ። ህኩስን ሴራኒ ህራጋኖኒ ነቀሰሜእ። 22 አዬሃ አነኖመት ዮበእተኔ ህት መገን ሙጩርመት አመዕነኖ መኒ ሆሪንከ ዋልታኢ ዬሱስ ክርስቶሳን አመዕኒኔት። 23 ዳፉንኩስ ሆሩንኩ መኑ ባጢለ ሁጀቾተኔ መገኑ ኣሴሰ አብን ሆጌእ። 24 ህከኒ መኑ ዬሱስ ክርስቶሲች እኮ ዎዝኖን ጠለንከ መገን ኣሰንቺን ሙጩረኖ። 25 መገኑንኩ ዬሱሰ ክትመ አስ ኣሴኢ ቄጊንተስ ባጢል ማረንቸ አመዕነቲን ደቄኑንታት። ህካን አሴኢንኩ ብሬ ሁጀተሞ ባጢለ መገኑ እየቂንተስ ማሪን ገግስ ሙጩርመተ ጡድሶታት። 26 አሞ መገኑ ህካን አሴኢ ገጉስ ሙጩሩ እኮጋ ዬሱሳን አመዕንታረ ሙጩርሰኖ እኮጋ ከን ዶላን ለሊሶታት። 27 አቼ ገጋንተኔ ድከዕናምሩ ም ዮኔ? ድከዕናምሩ ዮበአ። ሚን ፈኦ? ሴረ ቆረቢኔትንዶ? ህትጉተበአ፤ ድከኡ ፈኦ አመዕነት ሴሪኔት። 28 ህከኒ መኑ ሴረ ቆረቢን እሁዕናች አመዕነቲን ሙጩረኖገ ደንጋም። 29 እንዶ መገኑ ጠል አይሁድ-መንየ መገኑንዶ? አይሁደ እኩምቦ መኒሃ መገኗበእንዶ? ፤ አይሁደ እኩምቦ መኒሃ መገኗ። 30 ህከንተኔ ኑጉሰንቶራ ኑጉሰንቱምቡራ ሜጧንከ አመዕነቲን ሙጩርሰኖ መገኑ ሜጦት። 31 አቼ ከን አመዕነት ዳፊን ሴረ ዝርናምንዶ? ህትጉተበአ፤ ሴረ ቃርስናም በጋን ዝርናምበአ።
1 ማሊን አበኑኔ አብረሃም ደቄ ይናምሩ ምሁ ዮእ? 2 አብረሃም ሁጀቾ ሁጄን ሙጩሬ እክየን ቦልጠኖሩ ዮስ እኬ። ጠሁ እኮዳ መገን ብሬን ቦልጥሰኖስሩ ዮበአ። 3 ዳፉንኩስ መጣፋን መ ያኖ? መጣፋንዕኑ «አብረሃም መገኑ አመዕኔእ። ህኩንን ሙጩርመተ እክ ዎልሰሞስ» የመም ጣፈሜእ። 4 ሁጀተኖ መንቺ ደሞሱስ ሁጄስ ቆድገ ዎልሰመኖ በጋን ኣሰንችገ ዎልሰመኖበአ። 5 ጠሁ እኮዳ በሬደት ሁጅት ዮስበእዳ ባጢላሙ መነ ሙጩርሰኖ መገኖን አመዕነኖ መንቺ አመዕነቱስ ሙጩርመተ እክ ዎልሰመኖስ። 6 ህትጉንተ ሜጡራ ሁጀቱምቡንከ ሙጩሩ እኮሀንገ መገኑ ዎልሰኖስ መንቹ ማሰአሜኢ እኮገ ዳዊት ጠሃቀን 7 «ሾክመሰ አጉረንቶነ ባጢሉሰን ‹ፈኡን› የመሞ መኑ ማሰአሜሃ። 8 አሞ መገኑ ባጢለስ ዎልሱምቡ መንቹ ማሰአሜሃ» ዬእ። 9 ህከደ ት ማሰት ኑጉሰሞ መኒ ጠሊሃትንዶ ኑጉሰሙምቡ መኒሃቲ? ነኦንት « ‹አብረሃሜ አመዕነቱ ሙጩርመተ እክ ዎልሰሞስ› የመሜእ» ይኔም። 10 አብረሃሜ አመዕነቱ ሙጩርመተ እክ ዎልሰሞ ሀትጉተን? ኑጉሰሞሀኒች ዘኪኔትንዶ ኑጉሰሙዕናቼንት? ኑጉሰሙዕናች ብሬኔት በጋን ኑጉሰሞሀኒች ዘኪኔበአ። 11 እስን ኑጉሰሙዕናች ብሬን ዮስ አመዕነቲን ደቄ ሙጩርማ መላተ እሁንተ ኑጉሰሞ። ህኩንን እኮ እሶኦቲ ሙጩረተ እክ ዎልሰንቱንተ ኑጉሰንቱዕነ አመዕንታ መኒ ሆሪንከ አነ እሁንታት። 12 ህትጉንተ ኑጉሰንቶ መኒሃ አነ እሁንታት። ህኩንን ኑጉሰሙ ጠለ እሁዕናች አኑኔ አብረሃም ኑጉሰሙዕናች ብሬን ዮስ አመዕነት አጉዲሸተ አወንታ መኒ አነ እሁንታት። 13 አብረሃሜሃ ፍካኒሀንሲ ተ ኡለተ ረገኣ ተሶ ዋሎሳ ሴረ ቆረቢን እሁዕናች አመዕነቲን ደገንታ ሙጩርማኔት። 14 ረገኣስሩ ሴረ ቆረባረ እኮኢችዕኑ አመዕነቱ ጠለለ እሀኖ። አሞ ተሶንኩ ዋጉ ዮበኢ እሀኖ። 15 ዳፉንኩስ ሴሩ መገን አሙርተ ኤበኖ። ጠሁ እኮዳ ሴሩ ዮበእባን ሴረ ዝሩ ሄአኖበአ። 16 ተሶስ ሾሀሞ አመዕነት አሌኔት። ህከኒ አብረሃሜ ፍካኑ ሆሩንኩ ህከ ተሳ ረገኣኢ መገን ኣሰንቺኔት። ህኩን እሀኖንኩ ሴረ ቆረባሪ ጠሊ እሁዕናች አብረሃሜገንከ አመዕንታሪሃቲ። ዳፉንኩስ አብረሃም ሆሪንከኔ አና። 17 «በትናሸ ምናደቢ አነ አሴንኬ» የመም ጣፈሞገንከ እስ አመዕኔ መገኖን ህኩስን ሬቶረ ሬሆች ኬእሰኖነ ዮበእረ ዮኢ አስ ገአኖ መገን ብሬን አብረሃም አናኔ። 18 ህከኒ «ፍካኑክ ህትጉተ በተአኖ» የመም ጣፈሞስገንከ ተሳ አሰኖሩ ዮበኢንከ አብረሃም ተሴን አመዕን በትናሸ ምናደቢ አነ እኮ። 19 እስን መሃ ጥቤ ዎጋ እኮስተኔ ማልስ ሆንጌን እሊ ደንዱምቦገ ደጎዳ ሳረን አልጬነተ እኮገ ደጎዳ አመዕነቲን ሆግምበአ። 20 - 21 አሞ መገኒ አብን ኣሰን መገኑ ኣሴስ ተሳ ዊንሺ ደንደኖገ ቆርስ ደግኬእ አመዕነቶንተስ ቃሮ በጋን አመዕኑ ሆጊን መገን ተሳን መለምምበአ። 22 ህከኒሃንት «አመዕነቱስ ሙጩርመተ እክ ዎልሰሞስ» የመሞ። 23 - 25 ጠሁ እኮዳ «ሙጩርመተ እክ ዎልሰሞስ» ይታ ላገት እስተኔ ጠሊ ጣፈንቴኢተ እኩዕናች ኒተኔሃ ጣፈንቴታ። ዳፉንኩስ ባጢልኔተኔ ሬሆ ህግሰም ኣሰም ሙጩርሶኔተ ሬሆች ኬኦ ቀርቹኔ ዬሱሰ ሬሆች ኬእሾ መገኖን አመዕንኖም ኔሳሃ አመዕነቱኔ ሙጩርመተ እክ ዎልሰመኖኔ።
1 አቼ አመዕነቲን ሙጩኖሚች ቀርቿኔ ዬሱስ ክርስቶስ ዉዲን መገኒን ጡሙ ዮኔ። 2 እስ ዉዲንን ቴሱ ኡርኖም ከን መገን ኣሰንችበ አመዕነቲን ኣንጎም። አሞ ተሴን መገን አብን ቤቀማኑ እንኮምተኔ በጅቀማም። 3 ህካን ጠለ እሁዕናች ሀዋንተኔ በጅቀማም። ዳፉንኩስ ሀዉ እየቁ ኤበኖገ ደንጋምተኔሃት። 4 እየቁንኩ ቃርመተ ኤበኖገ አሞ ቃርመት ተሳ ኤባገ ደንጋም። 5 መገኑ ኣሴኔ ጡማንቾ አያን ዉዲንን መገን ኢተት ዎዘናንተኔ አብስ ዊንቶተኔ ተሶስ ሳልሲሰኖኔበአ። 6 ነኦት ሆንጋኑ እንኮምገን መገኑ ዬ ጃት ኢልቶ ጃተ ክርስቶሱ ባጢላመተኔ ሬሄእ። 7 ሙጩሮ መንችተኔ ሬሀኖ መንቹ ዋይ ሄአኖ። አይደጎ በሬደ መንችተኔ ሬሀኖ መንቹ ደገመኖ እሀኖ። 8 ጠሁ እኮዳ ነኦት ባጢላመተ እንኮምገን ክርስቶሱ ኒተኔ ሬሄእ። ህኩንን መገኑ ሀበንከ ኢተኖኔንዶ ጡድሰኗ። 9 አቼ ነኦት ሙጩኖሚ ዬሱስ ቄጊን እኮች ህከኒችን ባሰ መገን አሙሬች ፈዕናሚሁ ዬሱሲኔት። 10 ዳፉንኩስ ነኦት መገን ዲናከተ እንኮምገንከ ቤትስ ሬሆን መገኒን ሆቀሜም። ሆቀሞምሀኒች ዘኪን ህከኒችን አበ ዬሱስ ሄቻን ፈዕናም። 11 ህካን ጠለ እሁዕናች ቴሱ ሆቀተ ደቅኖም ቀርቿኔ ዬሱስ ክርስቶስ ዉዲን መገኖን በጅቀማም። 12 ሜጦ መንች ዉዲን ባጢሉ ተ ኡለ አል ዋሎ። ባጢል ዳፊንን ሬሁት ዋልቶእ። ህትጉንተ መኑ ሆሩንኩ ባጢለ ሁጀቾተኔ ሬሁት ሆራንከ መን አሌን ኢልቶእ። 13 ዳፉንኩስ ሴሩ ኣሰመኖሀኒች ብሬን ባጢሉ ኡለ አሌን ዮ እኬ። ጠሁ እኮዳ ሴሩ ዮበእ ጃተ ባጢሉ ባጢልገ ዎልሰምምበአ። 14 እሁን በጋን ባጢሉሰ መገኑ አዘጆረ ዝሬ አዳሜሀንገ + እሁምቡ መኑሁ ፈኡዕነ አዳሜች ሙሴ ኢለንቀጤች ሬሁት ሆራንከ መን አሌን ዎሞዕምቶእ። አዳምን ክርስቶስተ አጉዲሸ እኬ። 15 ህኩ ጠለሉ ኣሰንቹ እኮዳ ባጢልየገበአ። ዳፉንኩስ ሜጦ አዳሜ ባጢልተኔ በትናሹ መኑ ሬሄኢች መገን ኣሰንቹሁ ሜጧንከ መንቾ ዬሱስ ክርስቶስ ዉዲን እኮ ጠለሉ ኣሰንቹሁ ሆለመ መኒ በትናሹ ኣሰሞ። 16 ህትጉንተ መገን ጠለለ ኣሰንቺን ዋለኖ ጠሁ ህከን አዳሜ ባጢሊን ዋለኖ ጠህየገበአ። ሜጦ ባጢልተኔ ኣሰሞ ፍርዱ ቀጠአሙ ኤቦ። እኮዳ በትናሸ ባጢልተኔ ኣሰሞ መገን ኣሰንቹ ሙጩርመተ ኤቦ። 17 ሜጦ መንች ባጢልተኔ ሬሁት ህከን ሜጦ መንች ዉዲን ዎሞዕምቶኢች ህከኒችን አበ መገን በትናሸ ኣሰንቸሃ ሙጩርመስ ኣሰንቸሃ ኣቅታ መኑ ሜጦ ዬሱስ ክርስቶስ ዉዲን ዎሞዕምት ሄኣእ። 18 አቼ ሜጦ መንች ባጢልተኔ ሆራንከ መን አሌን ፍርዱ ዋሎገንከ ሜጦ መንች ሙጩርመ ሁጄተኔ መኒ ሆሪንከ ፍርዲች ፈኡሁ ሄቸቲ ዋልቶእ። 19 ዳፉንኩስ ሜጦ መንች አዘዘሙ ሆጊን በትናሹ መኑ ባጢላመተ እኮገንከ ሜጦ መንች አዘዘሚን በትናሹ መኑ ሙጩረተ እካእ። 20 ሴሩ ዋሎ ዳፉ ባጢለ በትሲሃት። ጠሁ እኮዳ ባጢሉ በተኦባን መገን ኣሰንቹ አብሽ በተኦ። 21 ህከኒ ባጢሉ ሬሆ ዉዲን ዎሞዕሜገንከ ቀርቿኔ ዬሱስ ክርስቶስ ዉዲን ዶሊ ሆሪንከ ሄኣ ሄቸት ዋልቱንተ መገን ኣሰንቹ ሙጩርማን ዎሞዕመኖ።
1 አቼ መ ይናም? መገን ኣሰንቹ በተኡንተ ባጢለ ሁጀንተን ሄዕኑንዶ? 2 ሆረኒ ህትጉተበአ። ነኦት ባጢለ ሁጀቲች ሬኖምሩ አሞ ሀትንክ ባጢል ኣዜን ሄዕናም? 3 ዬሱስ ክርስቶሲን ሜጡ እንኮተ ጠመቀሞምሩ ሆሩንኩኔ ሬሆንተስ ሜጡ እሂ ጠመቀሞምገ ደጌነንተበእንዶ? 4 ህከኒ ክርስቶሱ አነ መገን አብኒን ሬሆች ኬኦገንከ ነኦቲ ሃሮ ሄቻን ሄኢ ሬሆንተስ ሜጡ እንኮተ ጠመቀንቺን እሲንን በርገም ሞገሞም። 5 ነኦት ሬሁስ አጉዳ ሬሆን እሲን ሜጡ እንኮሚች ሬሆችስ ኬኡ አጉደኖ ሬሆች ኬኢኒ እሲን ሜጡ እንካም። 6 ከዘኩ ባጢል አግዘተ እንኩምቦጋ ባጢላምኔ መኖመት ኔሳች ፈዱንታ ኑባቹኔ መኖመት ዬሱሲን በርገንት ሰቀለንቶገ ደንጋም። 7 ዳፉንኩስ ሬሄ መንቹ ባጢሊች ዎማንማን ፉሌሃ። 8 ጠሁ እኮዳ ክርስቶሲን በርገም ሬኖሚች እሲንን በርገም ሄዕናምገ አመዕንናም። 9 ዳፉንኩስ ክርስቶሱ ሬሆች ኬኦተኔ ለንኪ ሆረን ሬሁምቦጋ ሬሆንከ ከዘኩ እስ አሌን መቆ ዮሴበእጋ ደንጋም። 10 እስን ሬሁተ ባጢሊ ሜጥንተ ኮደተ ጦፍ ሬሄእ። እኮዳ ፎሊን ሄኡ መገኒ ሄአኖ። 11 ህከኒ አዕኖኦቲ ባጢሊ ሬቴን ዬሱስ ክርስቶሲን መገኒ ሄኤነንተገ አስቴን ገገዕኔ ዎልጭዬ። 12 አቼ ማል ሂለ ሰውቲ ጠቀንቴነንተገ አሶተ ሬሀኖ ማላንተዕኔ ባጢሉ ዎሞዕሙንከ። 13 መኖመዕኔ ሂልመ ኦዳተ አስቴን ባጢሊ ኣስቴኖችዬ። ጠሁ እኮዳ ሬሆች ሄቻን ህጎ መንገ አስቴን ገገዕኔ መገኒ ኣስዬ። አሞ መኖመዕኔ ሙጩርመ ኦዳተ አስቴን መገኒ ኣስዬ። 14 ዳፉንኩስ አዕኖኦት ሴር ኣዜን እሁዕነ መገን ኣሰንች ኣዜን ዮንተተኔ ባጢሉ ጠቆዕኔተ ደንደኖበአ። 15 ህከደ ሀትጎትመ? ነኦት ሴር ኣዜን እሁዕነ መገን ኣሰንች ኣዜን ዮምተኔ ባጢለ ሁጀንቱንዶ? ሆረኒ ህትጉተበአ። 16 ገገዕኔ መቶ መንቺ አግዘገ አዘዘሚ ህንጨቴንተደ ህከን አዘዘንቴነንተ መንቺ አግዘተ እኬንተገ ደጌነንተበእንዶ? ባጢሊ አግዘተ እኬንተደ ባጢሉ ሬሁተ ኤበኖ። አሞ መገኒ አግዘተ እኬንተደ መገኑ ሙጩርሰኖክዕኔ። 17 - 18 መሃ አዕኖኦት ከኒች ብሬ ባጢል አግዘተ እኬንተዳ ቴሱ ኣሰንቶዕኔ ሮሻ ዊማንክዕኔ ዎዘኒን አዘዘንቴንተተኔሃ ባጢሊችን ዎማንማን ፉልቴን ሙጩርማ አግዘተ እኬንተተኔሃ መገኒ ገለቱ ኢሉስ። 19 አንን ሰውትዕኔ ሆንጌተኔ መኒ ሮሰንቶ ላጋን ጠሃቃም። መኖመዕኔ ሆረንተ ቡሽማሃ መቃሜ ሂለ ሾክማሃ ጠቀንታገ አስቴንተገንከ ቴሱ መኖመዕኔ ሆረንተ ማሰአንቱንተ ሙጩርማ ጠቀንታገ አስዬ። 20 አዕኖኦት ባጢሊ አግዘተ እኬን ዮንተ ጃተ ሙጩርመተኔ ደጌነንተሩ ዮበአ እኬ። 21 ህከን ጠሂች ደቅቴንተሩ ምሁ ዮእ? ህከን ጠህ ዘካንቹንኩ ሬሁተ እኮተኔ ቴሱ ሳልሲሰኖዕኔሪች ህግየን ሜጡራ ደቅቴንምበአ። 22 እኮዳ ቴሱ ባጢሊች ዎማንማን ፉልቴን መገኒ አግዘተ እኬንተ። ህከን ቆደንከ ሙጩርመተ ደቅቴነንተ፤ ዘካንቹስን ዶሊ ሆሪንከ ሄኣታ ሄቸ። 23 ዳፉንኩስ ባጢል ዋጉ ሬሁተ። ጠሁ እኮዳ መገን ጠለሉ ኣሰንቹ ቀርቿኔ ዬሱስ ክርስቶሲን ዶሊ ሆሪንከ ሄኣታ ሄቸ።
1 ኢ ህዛከ! አን ሴረ ደጋ መኒ ጠሃቀዮም። ሴሩ መነ ፎሊን ዮ ቀጣን ጠላን ጠቀኖገ ደጌነንተበእንዶ? 2 አጉዲሻሀንስ መትት ሜንትቹት ምኔኑሴ ፎሊን ዮ ቀጣን ምኔኒንተሴ ሴሪን ኡሱረንቴታ፤ ጠሁ እኮዳ ምኔኑሴ ሬሄደ ምኔኒንተሴ ኡሱረንቶ ሴሪች ገፈረንቴታ። 3 ህከኒ ምኔኑሴ ፎሌ ሄአንየን ዎሎ ጎናን ገልቶደ ሳኣንቹተ የመንታእ። ጠሁ እኮዳ ምኔኑሴ ሬሄደ ምኔኒንተሴ ኡሱረንቶ ሴሪች ገፈረንቶተኔ ዎሎ ጎናን ገልቶዳ ሳኣንቹተበአ። 4 ኢ ህዛከ! ህትጉንተ አዕኖኦት ክርስቶስ አል እኬንተተኔ እስ ሬሆን ሴሪ ሬቴንተ። ህከኒ ነኦት መገኒ ላሉተ ላኑንተ አዕኖኦት ዎሎ መንችረ ህኩስን ሬሆች ኬኦ ክርስቶስረ እኬንተ። 5 ዳፉንኩስ ነኦት ማል ሰውትገ ሄዕናም ጃተ ሴር ዳፊን ኬአኖ ሂሉ ቁልጡኔ ሬሆ ላሉተ ላኑንተ መኖማንተኔ ሁጀተዮ እኬ። 6 እኮዳ ቴሱ ቀፈጄኔእኬሀኒች ሬኖምተኔ ሴሪች ሂረሜም። ህከኒ ከኒች ዘኪን መገን አያን ሃሮ ሄቻን ሄዕናም በጋን ኑባቾ ሴርጊን ሄዕናምበአ። 7 ህከደ መ ይናም? ሴሩ ገጉስ ባጢላንዶ? ሆረኒ ህትጉተበአ። ጠሁ እኮዳ ሴሩ ዮበእክየን ባጢሉ መሃንዶ ደጋምበአ እኬ። ዳፉንኩስ ሴሩ «ሂለረ ቁልጥቶት» ዩምቦ እክየን ቁልጡ መሃንዶ ደጋምበአ እኬ። 8 ጠሁ እኮዳ ሴሩ ዮበኢች ባጢሉ ሬሸ እኮተኔ ባጢሉ አዘዞ ዉዲን ዎቃ ደቅኬእ ሂለ ቁልጡ ሆረንከ ኣዜንተኤ ቆጬእ። 9 አንን ዎና ሴሩ ዮበእ ጃተ ፎላሟ እኬ። እኮዳ አዘዙት ዋልቶ ጃተ ባጢሉ ፎላሙ እክየን አን ሬሄም። 10 ህት ሄቸተ ኣስቱንተ ኣሰንቶ አዘዙት ገጉንኩሴ ኤሳ ሬሁተ እኮኤገ ደጎም። 11 ዳፉንኩስ ባጢሉ አዘዞ ዉዲን ዎቃ ደቅ ኤስ መለጭኬእ አዘዞ ዉዲንን ሼኤ። 12 ህከኒ ሴሩ ሙጩሯ። አዘዙንት ሙጩሩተ፥ ጠቤነተኒ በሬደተኒ። 13 ህከደ ህኩ ደናሙ እኮ ጠሁ ኤሳ ሬሁተ እኮኤንዶ? ሆረኒ ህትጉተበአ። ህከን ደናሞ ጠህ ዉዲን ሬሁተ ኤሳ ኤቦዕኑ ባጢላ። ህኩን እኮንኩ ባጢሉ ባጢለ እሁስ ለሉንታቲ ባጢሉ አብሽ ሂለ እሁስ አዘዞ ዉዲን ደገሙንታቲ። 14 ነኦት ሴሩ ጡማንቾ አያንቢ እኮገ ደንጋም። እኮዳ አን ባጢሊ አግሹ እሆተ ህረሜምየ ማልየ። 15 አን አሶተ ሀሳም ጠሀ እሁዕናች ግባም ጠሀ አሳምተኔ ገግኤ ሁጅንተ ቆርሳምበአ። 16 አቼ አን ሀሱምቡረ አሳሚ እኮሚች ሴሩ በሬደ እሁስ ህከኒን ለሊሰዮም። 17 ህትጉተ እኮች ህካን አሰዮኢ ኣዜንተኤ ዮሃ ባጢለ በጋን አኔበአ። 18 ኢ ኣዜን እንዶ ማላንተኤ ደናሙሩ ሜጡሩ ሄኡምቦገ ደጋም። ዳፉንኩስ ደናሙ ጠሀ አሲ ቁልጤምዳ አሶተ ደንዳምበአ። 19 ህትጉንተ አሶተ ሀሳም ደናሙ ጠሀ እሁዕናች አሲ ሀሱምቡ ሂለ ጠሀ አሰዮም። 20 አቼ አን ሀሱምቡረ አሳሚ እኮሚች ህካን አሰዮኢ ኣዜንተኤ ዮሃ ባጢለ በጋን አኔበአ። 21 ደናሙረ አሲ ሀሰን ሂለረ አሰዮም። ህከኒንን ሴሩ ሁጀተን ዮገ ደጋም። 22 ዳፉንኩስ አን ኣዜንተኤ መገን ሴራን በጅቀማም። 23 ጠሁ እኮዳ ዎዘናንተኤ ዮ ሴሪን በአመኖነ መኖመኤ ኣዜን ሄአኖ ባጢል ሴሪ ቀፈደማምገ አሰኖ ዎሉ ሴሩ መኖማንተኤ ዮገ ጡደዮም። 24 አን ሀበንከ አደራዕሬምየ መንቹ! ከን ሬሀኖ ማሊች አይ ፈእሰኖኤ? 25 ቀርቿኔ ዬሱስ ክርስቶሲን መገኒ ገለቱ ኢሉንስ። አቼ አን ዎዘናንተኤ መገን ሴሪ ጠቀማም። እኮዳ ማሊንተኤ ባጢል ሴሪ ጠቀማም።
1 አቼ ዬሱስ ክርስቶሳን ዮ መን አሌን ፍርደመኖበአ። 2 ዳፉንኩስ ዬሱስ ክርስቶሳን ዮ ሄቸተ ኣሰኖ ጡማንቾ አያን ሴሩ ባጢልነ ሬሆ ሴሪች ዎማንማን ፉሼኤ። 3 ማል ሆንጌች ኬኦ ሴሩ ሁጀቶተ ደንዱምቡረ መገኑ ባጢላሞ ማል አጉዲሻን ባጢሊ ክትመ አስ ገግስ ቤቱ ሶክኬእ ሁጀቼእ። ህትጎንን ቤቱስ ማልስ መኖማን ባጢለ ቄሌእ። 4 ህኩን እኮንኩ ማል ሰውትጊን እሁዕናች ጡማንቹ አያኑ ሀሰኖጊን ሄዕናም ኔሳን ሴሩ ጠዕመኖኔ ገሬ ጠሁ ዊሙንታት። 5 ዳፉንኩስ ማል ሰውትጊን ሄኣሩ ማል ጠሀንከ ሰውታእ። ጡማንቾ አያን ሰውትጊን ሄኣሩ ጡማንቾ አያን ጠሀንከ ሰውታእ። 6 ማልተኔ ሰውዩ ሬሁተ። ጡማንቾ አያንተኔ ሰውዩ ሄቸተኒ ጡማኒ። 7 ዳፉንኩስ ማል ሰውቱ መገን ሴሪ አዘዘሙምቦተኔሃ አዘዘምን ደንዱምቦተኔሃ መገንየ ዲነ። 8 ማል ሰውትጊን ሄኣሩ መገኑ በጅቀንሲ ደንድታበአ። 9 ገርንተ መገን ጡማንቹ አያኑ ኣዜንተዕኔ ሄኦች አዕኖኦት ዮንታ ማሊን እሁዕናች ጡማንቾ አያኒኔት። ክርስቶስ ጡማንቹ አያኑ ዮስበኢ አዪ ክርስቶስየበአ። 10 ጠሁ እኮዳ ክርስቶሱ ኣዜንተዕኔ ሄኦደ መሃ ማሉዕኔ ባጢል ዳፊን ሬሀኖ እኮዳ ፎሉዕኔ ሙጩርመ ዳፊን ሄአኗ። 11 አሞ ዬሱሰ ሬሆች ኬእሾ መገኗ። እስ አያኑ ኣዜንተዕኔ ሄኦደ ዬሱስ ክርስቶሰ ሬሆች ኬእሾ መገኑ ኣዜንተዕኔ ሄአኖ አያኒንተስ ሬሀኖ ማሊሃዕኔ ሄቸተ ኣሰኖ። 12 ኢ ህዛከ! ቤኑ ዮኔ። ጠሁ እኮዳ ቤኑስ ማል ሰውትጊን ሄዕኑንተ ግድሰኖኔየበአ። 13 ህከኒ ማል ሰውትገ ሄኤንተደ ሬቴነንተ። እኮዳ ጡማንቾ አያኒን ማል ሁጅተ ሽቴንተደ ፎሊን ሄኤነንተ። 14 መገን አያኑ አወንሰኖሰሩ ሆሩንኩ መገንተ ኦሱ። 15 ህከኒ አዕኖኦት «አበ! አነ!» ይቴን ገእቴነንተ መገን ቤቶመተ ጡማንቾ አያኒን ኣቅቴንተ በጋን ዋጆን ፈንቀሽ ኣግሰኖ አግዞመ ዎዘነ ኣቅቴንምበአ። 16 ነኦት መገን ኦሱተ እንኮምገ መገን አያኑ ገጉንኩሲ ዎዘኑኔ ነቀሰኖ። 17 አሞ ኦሱተ እንኮሚች መገንየ ረገኣኑ። ህትጉንተ ክርስቶሲን በርገም አብን ደቅኖተ እሲንን ሀውኖምደ እሲንን ሜጡ ረገዕናምየረ። 18 ተን ጄቾ ሀዉ ከዘኩ ኔሳ ዋለኖ አብኒን ሆረን ቅጠሚ ደንዱምቦገ ደጋም። 19 ቆጨንቹ ሆሩንኩ መገን ኦሱት አብኒን ጡደንታ በር ቃረገ ቁልጠን ቆረበዮእ። 20 ቆጨንቹ ሆሩንኩ ገግስ ሀሲን እሁዕናች ተሴን ጠቀመኖገ አሴ መገን ሀሲን ጠለለ ጠሂ ጠቀሜእ። 21 ዳፉንኩስ ተሶስ ቆጨንቹ ገጉንኩስ በእ አግዞማች ዎማንማን ፉልኬእ መገን ኦሶ አብን ዎማንመ ቤቀማንቹ እሁንታት። 22 ቆጨንቹ ሆሩንኩ ከበሬ ኢለንቀጤች ባል ኡዕነገ ዮ ሀዊን ቅትነን ዮገ ደንጋም። 23 ጠሁ እኮዳ ቅትን አሌን ዮኢ ቆጨንቸ ጠለ እሁዕናች ጡማንቾ አያን ዎነ ላሉት ዮኔሩ ነኦቲ ገጉንኩኔ መገን ኦሱተ እሁኔ ዎዘሙኔ ቆረምበን ኣዜንተኔ ቅትን አሌን ዮም። 24 ዳፉንኩስ ነኦት ፈዕኖሚ ህከን ተሴኔት። እኮዳ ተሳ አሴኖስሩ ጡደመኖ እኮች ህኩን ተሳ እሂ ደንደኖበአ። ጡደኖረ ተሳ አሰኖዕኑ አይ ዮ? 25 ጠሁ እኮዳ ጡንዱምቡረ ተሳ አስኖሚች እየቂን ቆረምባም። 26 ነኦት መገኑ ሀትጉተ ኡጭናምንዶ ደንጉምቡተኔ ሆንጌንተኔ ጡማንቹ አያኑ ካዕለኖኔ። ህትጉንተ ጡማንቹ አያኑ ላጋን ጠሃቂ ደንዴኑምቡ ቅትኒን መገኑ ኡጨኖኔ። 27 ጡማንቹ አያኑ መገኑ ሀሰኖጊን ጡማኖ መኒ መገኑ ኡጨኖሰተኔ መን ዎዘነ ቆርም ደገኖ መገኑ ጡማንቾ አያን ሰውቱ መሃንዶ ደገኖ። 28 መገኑ ኢትታ መኒ ሰውትስገን ገአንቶሪ ሆረንከ ጠሀ መገኑ ደናምማ አሰኖሰገ ደንጋም። 29 ዳፉንኩስ ቤቱስ በትናሸ ህዛከ ሜሬሮን በህሩ እሁንተ መገኑ ዎና ደጎሰረ ቤቱስ አጉዱንተ ዎናንከ ኡርሼሃ ጠሀ። 30 እሶኦንተ ገኤሰ። አሞ ህከ ገኤረንከ ሙጩርሴሰ። ህከ ሙጩርሴሰረንከ አብሾሰ። 31 ህከደ ከን ጠሂ መ ይናም? መገኑ ኔሳን በርገም ሄኦች ኡርጨመኖኔ አዬት? 32 ሜጧንስ ቤቲ ቅሽጡዕነ ሆርኔተኔንከ ህግሽ ኣሴ መገኑ ቤቲንተስን በርግ ሆረረንከ ጠለንከ ኣሰኖበእንዶ? 33 ሙጩርሰኖ መገኑ እኮች መገኑ ዶዕሬሰረ አይ መ አሰኖሰ? 34 እሶኦስ አሌን ፍርደኖ አዬት? ዬሱስ ክርስቶሱ እሶኦ አሌን ፍርደኖንዶ? እስዕኑ ሬሄሃ፥ ሬሆች ኬ፥ መገን መኬን አፉዕሌሃኒ ኔሳንከ መገኑ ኡጨኗኒ። 35 አቼ ክርስቶስ ኢታች አነነ አሰኖኔ አዬት? ሀዋንዶ? ኡዕነተንዶ? ሸረንቻንዶ? ጎሯንዶ? ከልመተንዶ? ሬሁተንዶ? በገዟን? 36 ህኩንን «ኪተኔ በር ሆረንከ ሼኖኔ። ዱሌኖ ሆለገንከ ዎልሰሞም» የመም ጣፈሟገ። 37 እኮዳ ህከን ሆራንከ ጠሃን ነኦት ኢቴኔ ክርስቶሲን ቄላኒቺ አብናም። 38 ዳፉንኩስ ሬሁታ እኮ፥ ሄቸታ እኮ፥ መገን ሰሜ ሶቀማኑሃ እኮ፥ ዳናከታ እኮ፥ ቴሱ ዮ ጠሀሃ እኮ፥ ከዘኩ ዋለኖ ጠሀሃ እኮ፥ ሀከ መቆሃ እኮ፥ 39 ሰማሃ እኮ፥ ኡለታ እኮ፥ ቆጨንች ኣዜን መሃ እኮደ ቀርቿኔ ዬሱስ ክርስቶሳን ዮ መገን ኢታች አነነ አሶኔተ ደንዱምቦገ ደጌም።
1 - 2 አጉሩምቡ አቡ ክቼቹሁ ኡዕነቲ ዎዘናንተኤ ዮገ አን ክርስቶስቢ እኮምተኔ ገርተ ጠሃቀዮም በጋን ቆጰንምበአ። ዎዘኑኤን ጡማንቾ አያኒን እክ ቆጰኑ ሆጉእ ነቀሰዮኤ። 3 ዳፉንኩስ ማሊን እለሙኤ እኮ ህዛከኤነ ቦክኤተኔ አን ክርስቶሲች አነነ እክ ጤሌለሜም እክየን ኢታም እኬ። 4 ህኩስን እሶኦት እስራኤለ እኮተኔሃት። አሞ መገን ኦሱተ እሁ፥ አብኑ፥ ላገ ህድሩ፥ ሴሩ፥ መገኒ ሰገዱሁ ተሴ ላገቲ ኣሰንቶኢ እሶኦ እኮተኔሃት። 5 ህትጉንተ ስር አናከት እስራኤሊቼት። ክርስቶሱንኩ ማሊን እለሞ እሶኦ ቦኪቼት። ሆሪችን አቡ መገኑ ዶሊ ሆሪንከ ገለጠሙን፤ አሚዕን። 6 ጠሁ እኮዳ «መገን ላገት ሻረንቴእ» ዩሃበአ። ዳፉንኩስ እስራኤል ፍካኑ ሆሩንኩ ገሬየ እስራኤለበአ። 7 አሞ አብረሃሜ ፍካነ እኮተኔ ሆሩንኩሰ እስተ ኦሱበአ። ጠሁ እኮዳ «ዜሩክ ገአመኖ ይሳቂኔት» የመሜስ እኬ። 8 ህካን ዩንኩ ተሴ ላገ ኦሱት ፍካነስ እክ ዎልሰንታ በጋን ማሊን ኦሱስ እኮሩ መገንተ ኦሱበአ ዩሀ። 9 ተሴስ ላገንት «ዎኑር ተደ ፈንቀል ዋላም። ሳረን + ጎንቹ ቤቱ እልታእ» ይታታ እኬ። 10 ህካን ጠለ እሁዕናች ርብቀ + ሜጧንከ መንቺች ህኩስን አበናኔ ይሳቂች ቀፈ እሊ ሆጎ ጃተ 11 መገኑ ዶዕረኖጉ ሁጄን እሁዕናች እስ ገአኖጊን እኮገ ደግሲሲ ህት ለምንት ኦሱት እለንቱዕናቺ ሂለሃ ጡመሃ አስቱዕናቺ ብሬን 12 መገኑ ርብቃ «በህሩስ ማዕኒሀንስ ጠቀመኖ» ዬሴ። 13 ህኩንን እኮ «ያቆቤ ኢቴም። እኮዳ ኤሰ + ግቦም» የመም ጣፈሟገ። 14 አቼ መ ይናም? መገን ዉዲን ሉሰት ዮእንዶ? ሆረኒ ህትጉተበአ። 15 ዳፉንኩስ መገኑ ሙሴ «ማሪ ሀሾሚንከ ማራም። ቅሽጣንስሀኒንከ ቅሽጣንስ» ዬስ። 16 ህከኒ መገኑ መነ ዶዕረኖ መኑ ሀሾጊን እንዶ ሁጀቾጊን እሁዕናች መገን ቅሽጢኔት። 17 ዳፉንኩስ መጣፋን ፈርኦኔተኔ «መቆኤ ኬሳን ለሊሶታ ሱዕሙኤን ኡለ አሌን ሆራንን ደገሙንታ ዎሞንሴንኬ» የመም ጣፈሜእ። 18 ህከኒ መገኑ ሀሾ ሀካኒ ማረኖስ፤ አሞ ሀሾ ሀካኒ ዎዘነስ ዱድሰኖ። 19 አቼ «መገን ሰውተ ከሚ ደንደኖ ዮበኢች ሚሃመ ሉሳሀኔ መገኑ ዎቀሰዮኔ?» ይቴነንተኤ እሀኖ። 20 መንቾ! መገኒ ፈንቀሽት ጠሃቂ ደንድቶተ አት አዬት? ሁጀተሞሩ ሁጀቾስ መንቹ «ህትጉተ አስት ሁጀቶንቴኤ ሚሃት?» ያኖንዶ? 21 ቡች ኦዳተ ዌዛንቹ ሜጧንከ ቡቺች መትስ ኦዳተ አብኒ መትስ አሞ ፈራሪ ሁጀቶተ መቆ ዮስበእንዶ? 22 መገኑ አሙርስ ጡድሶታ መቆስ ለሊሶታ ሀሽኬእ በኢ ቅጠንቶ አሙሬ ኦዳ በትናሸተ ጃተ ደንዴቄሰ። 23 ህካን አሴኢንኩ ዎናንከ አብኒ ቅጠንሴ ማረቶ ኦዳ አብንስ በትንተ ለሊሲሃት። 24 ህት ማረቶ ኦዳንት መገኑ ገኤኔ ኔሳቼት። ህኩስን አይሁድ-መኒች ጠሊች እሁዕናች አይሁደ እኩምቦ መኒቼቲ። 25 ህኩን እኮንኩ መገኑ ሆሴኤ መጣፋን « ምናደበኤ እኩምቡረ ‹ምናደበኤ› ይ ገኣም። አሞ ኢቴኑምቡ መነንከ ‹አን ኢታንስ መነ› ይ ገኣም። 26 አሞ ‹አዕኖኦት ምናደባዕንበአ› ዬመሰ መዕኔንን ‹ሄአኖ መገን ኦሱተ› የመንት ገአንታእ» ዬሃገንከ። 27 ህትጉንተ እስያስ እስራኤል ኦሶተኔ ላገስ ጦቀእ «መሃ እስራኤል ኦሶ ዎሉት በሃር ኣዝ ሻፍ ቀጠ እኮዳ እሶኦች ቀሁስ ቀጡ ጠሉ ፈአኖ። 28 ዳፉንኩስ መገኑ ሰርብን ኡለ አሌን ጦፍ ፍርደኖ» ዬእ። 29 ህኩንን እስያስ «ሆራሪንከ ቀርቹ መገኑ መን ፍካነ ፈእሱምቦኔ እክየን ሶዶምነ ጎሞር ከተምገ እንካም እኬ» ይ ዎናንከ ህራገ። 30 አቼ መ ይናም? ሙጩርመተ ሀሱምቡ አይሁደ እኩምቡ መኑ ሙጩርመተ ደቅቶእ። ህት ሙጩርመንት አመዕነቲን ደገንታታ። 31 ጠሁ እኮዳ እስራኤሉ ሴረ ቆረቢን ደገንታ ሙጩርመተ ሀሰን ሴረ ቆረቡ ሆጎተኔ ሙጩርመስ ደቂ ደንድትምበአ። 32 - 33 ህኩን እኮ ሚሃት? እሶኦት ሙጩርመተ ሀሶኢ አመዕነቲን እሁዕናች ሁጄን እኮተኔሃት። አሞ «መነ ቆል ኡጀኖ ክኑ ጥዮነ አፉሻም። እሶን አመዕነኖንኩ ሳለኖበአ» የመም ጣፈሞገንከ ቆለኖ ክኖን ቆዕልቶእ።
1 ኢ ህዛከ! እስራኤሉ ፈኡንተ ዎዘናንተኤ አብሽ ቁልጠዮምኒ መገኑ ኡጨዮንሰኒ። 2 ዳፉንኩስ ገሬ ቆርማን እሁ ሆጊች በጋን እሶኦት መገኒ አዘዘሚ ቃረገ ሀሳረ እኮገ ነቀሳንሰ። 3 እሶኦት መገን ሙጩርመተ ደጉዕናች ገግሰ ሙጩርመተ ኡርጪ ሀሰን መገን ሙጩርማ አዘዘንትምበአ። 4 ህከኒ አመዕነኖ ሆሩንኩ ሙጩሩንተ ክርስቶሱ ሴረ ዊንሼእ። 5 ሙስ «ሴረ ቆረቢን ደገንታ ሙጩርመተ ሁጀተኖ መንቹ ህኩ ሴሩንኩ ሄአኖገ አሰኖስ» ይ ጣፌእ። 6 ጠሁ እኮዳ አመዕነቲን ደገንታ ሙጩርመት «ዎዘናንተክ ‹ሰማ አይ ፉለኖ?› ይቶት» ይታእ። ህኩንን ክርስቶሰ ኡለተ ድሪሲሃት። 7 አሞ «ዎዘናንተክ ‹ጥለ በሌን አይ ድረኖ?› ይቶት» ይታእ። ህኩንን ክርስቶሰ ሬሆች ኬእሲሃት። 8 ጠሁ እኮዳ መ ይታእ? «አፎንተኪ ዎዘናንተኪ እክ መገን ላገት ህንጭቴኬ» ይታእ። ህቲንን ነኦት ሰበንካምተ አመዕነትተ ላገ። 9 አትን ዬሱሱ ቀርቹ እሁስ አፌንተክ ነቀሶንትዳ መገኑ ሬሆች ኬእሾስገ ዎዘናንተክ አመዕንቶንትዳ ፈኣንት። 10 ዳፉንኩስ መኑ ዎዘናንተስ አመዕን ሙጩረኖ። አሞ አመዕነትስተኔ አፌንተስ ነቀሽ ፈአኖ። 11 መጣፋንን «እሶን አመዕነኖ አዪ ሳለኖበአ» የመሜእ። 12 ዳፉንኩስ ሜጡንኩ ቀርቹ ዬሱሱ ሆሪንከ ቀርቹ እኮተኔ አይሁድ-መንነ ግሪክሳን ጠሃታ መን ሜሬሮን አነኖመት ዮበአ። እስን ኡጭታስ ኬኒ ሆሪንከ ማሰስ በትሽ ኣሰኖሰ። 13 ዳፉንኩስ «ቀርች ሱዕመ ገአኖ ሆሩንኩ ፈአኖ» የመሜእ። 14 አቼ አመዕንቱምቡሲ ሀትጉተ አስት ገእታስ? አሞ እስተኔንከ መጮት ከሱምቦሀኔን ሀትጉተ እክ አመዕንታስ? ሰበከኖ መንቹ ዮበኢንከ ሀትጉተ መጮታእ? 15 አሞ «ምሽራች ላገተ ሰበካሪ ሎከት ሀበንከ ደናምተን?» የመም ጣፈሞገንከ መኑ ሶሀሙዕናች ሀትክ ሰበኪ ደንደኖ? 16 ጠሁ እኮዳ እስያስ «ቀርቾ! ኔሳች መጮጬ ጠሀ አይ አመዕኔእ?» ዬገንከ ሆሩንኩሰ ምሽራች ላጋ አዘዘንትምበአ። 17 አቼ አመዕነቱ ዋለኖ መጮጪኔት። መጮጬኖሲንኩ ክርስቶስተኔ ኩለንቶ ላጋቼት። 18 ሀኖ ጠዕማም፤ እሶኦት መጮጩ ሆጎተኔሃትንዶ? መጣፋን «ላገሰ ኡለ አሌን ሆራንን መጮጨንቶእ። አሞ እሶኦት ጠሃቶሩንኩ ኡለ ቶቺች ቶቹ ኢሌእ» የመሞተኔ መጮቴእ። 19 ቴሱ ጠዕማም፤ እስራኤሉ ቆርሱ ሆጎተኔሃትንዶ? ሙስ ዎናንከ «ገደሜ መኒን ጋብቴነንተገ አሳንክዕኔ። ዘህጩ ዮበእ መን ዳፊንን አሙዕረንቴነንተገ አሳንክዕኔ» ዬእ። 20 አሞ እስያስ እግማን «ኤስ ሀሱምቦ መኒ ለሌም። ኢተኔንከ ጠዕምቱምቦ መኒ ገገኤ ለሊሾም» ዬእ። 21 እኮዳ እስራኤልተኔ «ሾከነ አዘዘሙምቦ መንበ በር ሆረንከ አንገኤ ብድቀኤም» ዬእ።
1 ሀኖ ጠዕማም፤ መገኑ ምናደበስ ኡጄእንዶ? ሆረኒ ህትጉተበአ። ዳፉንኩስ አን ገጉንኩኤ እስራኤልቿኒ አብረሃሜ ዜሪች ቢንያሜ + ቦክየኒ። 2 መገኑ ዎና ደጎ ምናደበስ ኡጅምበሰ። እስራኤለ መገን ብሬን ኦጆገ ኤልያሴተኔ መጣፉ ያኖገ ደጌነንተበእንዶ? 3 ኤልያስን «ቀርቾ! ህራጋኑክ ሽቴእ። ኬሳ ክትመ ክትሜኖ መዕንተ ሆረንተ ዝርቴእ። አንን ሜጥዕኔን ፈኤም። እሶኦንት ኤስ ሺ ሀሰዮእ» ዬእ። 4 ጠሁ እኮዳ መገኑ መ ይ ፈንቀሼስ? መገኑንኩ «አን ‹በኣለ› + ዬኖ ቆጰን መገኒ ሰገዱምቡ ለመሌ ኩሜ መነ ገጊሀዕኔ ፈእጬም» ዬስ። 5 ህከንገንከ ከን ዶላኒ መገኑ ኣሰንቺን ዶዕሬ ቀሁ ቀጡ መኑ ዮእ። 6 ጠሁ እኮዳ መገኑ መነ ዶዕረኖ ኣሰንቺንተሴት በጋን ሁጄንተሳበአ። መገኑ ዶዕረኖ ሁጄን እኬ እክየን መገን ኣሰንቹ ኣሰንቸ እሀኖበአ እኬ። 7 - 8 አቼ መሃን? እስራኤሉ ሀሶረ ደቅትምበአ። እኮዳ መገኑ ዶዕሬሰሩ ደቅቶእ። አሞ «እልሰ ጡዱምቦጋ መጨሰ መጮቱምቦጋ መገኑ ከበሬ ኢለንቀጤች ዎዘነሰ ዱድሼእ» የመም ጣፈሞገንከ ፈኦስ ቀጠ መን ዎዘኑ ዱጆ። 9 አሞ ዳዊት «ማዱሰ ዎሻደ፥ ቃሸ፥ ጉፍቹሃ ሀወሃ እሁ። 10 እልሰን ጡዱምቦገ ጃንቱን። ጉጁሰን ሆረንተ ጃተ ቁቱን» ዬእ። 11 ቴሱ ጠዕማም፤ እስራኤሉ ሉሶኢ ኬኡምቡ ኡቡ ኡቢሃትንዶ? ሆረኒ ህትጉተበአ። ህከን ቆደ እሶኦት ጋብቱንተ እስራኤሉ ባጢለ ሁጀቶ ዳፊን አይሁደ እሁምቡ መኑ ፈኡ ደቄእ። 12 ጠሁ እኮዳ እስራኤል ሉሰት ተን ኡለ አል መኒ ማሰተ ደግሲሶኢቺ እሶኦ ኡቡንኩ አይሁደ እሁምቦ መኒ ማሰተ እኮቺ ሆሩንኩሰ ፈኤ እክየንዕኑ ሀበንከ ደናሙ እሀኖ እኬ። 13 - 14 አን ክዕኔኤ አይሁደ እኬኑምቦ መኒ ጠሃቀዮንክዕኔ። አን አይሁደ እኩምቦ መን ሶቀማንቹ እኮምተኔ ቦኩኤ እኮ አይሁደ ጋብሲሽ አይደጎ እሶኦች መ-መቱሰ ፈእሳሚ እሀኖ ይኬእ ሁጅኤ አብሳም። 15 ዳፉንኩስ አይሁድ ኡቡ ኡለ አሌን ዮ መኒ መገኒን ኢተሙ ኤቦች እሶኦት መገንበ ፈንቀሉዕኑ ሀትጉተ እሀኖ? ህኩንዕኑ ሬሆች ሄቻን ኬእየገ። 16 ቡኩስ መገኒ የመንቴኢተ እኮኢች ሾለሞሲሁ መገኒ የመሜሃ። አሞ ጠጱስ መገኒ የመሜኢ እኮች ሀማከሲ መገኒ የመንቴሃረ። 17 ጠሁ እኮዳ ሀማካች መ-መቱ ቢጠንትየን አት ዌርቺችስ + ፉለኖ ዘይተ ቤቀማንቹ እኮተ ሀቅ ኣዝ ዌሪች ዋልት መዕኔንተሰ ኣጎንቲች 18 ህተን ቢጠንቶ ሀማካን ቦልጥቶት። እኮዳ ቦልጥቶንትደ ጠጱስ ኬስ እዬኬ በጋን ጠጰ እይቶንቲ ኬስ እሁ ሆጉክ ደግ። 19 አቼ «አን ኣጉንተ ሀማከት ቢጠንቶእ» ይታንቲ እሀኖ። 20 ህኩን ገርተ። እሶኦት ቢጠንቶኢ አመዕኑ ሆጎተኔሃት። አትን አመዕንቶንትተኔ ቃርት ኡርቴንት። ህከኒ ዋጅ በጋን ቦልጥቶት። 21 ዳፉንኩስ መገኑ ዎነ ሌኦ ሀሚ ቅሽጡምቡች ኬሳሃ ቅሽጠኖበአ። 22 አቼ መገን ቢዝመታ ሞንግታ ጡድ። ሞንግሲ ኡቦ ኬን አሌኔት። እኮዳ መገን ቢዝመት ቢዝማንተስ ቃርት ሄኦንትደ ኪ አሌኔት። ህኩ ዮበእደ አቲ ሙረንታንት። 23 እሶኦንት አመዕኑ ሆጊች ፈንቀልቶደ ዎና ሙረንቶ መዕኔን ፈንቀልት ኣጋእ። ዳፉንኩስ መገኑ ፈንቀሽ ኣግሶሰተ ደንደኖ። 24 ቆጨንቺን ሀቅ ኣዜን ዮ ዘይት ዌርቺች ሙረንትኬእ አት ቆጨንቱምቦ ደናሞ ዌርቾን ኣጎንቲች ህኩ ዎነ ቆጨንቺንተሰ መዕኔ ዮ እኬ ሀማከት ገግሰ ዌርቾን ፈንቀልት ኣጉ ምሁ ከመኖሰ? 25 ኢ ህዛከ! ቆራከተ እኬንታ አጉዱምቦዕኔገ ከ ማጠሞ ጠሀ ደጌኑንተ ሀሳም። አይሁደ እኩምቡ መኑ መገንበ ፈንቀልተንየን መገኑ ሰውዬ ዎሉት ዊንተንቀጤች እስራኤሊች በከንስ ዎዘኑ ዱጆ። 26 - 27 አሞ «ፈእሳንቹ ጥዮኒች ዋለኖ። እስን ያቆቤ ፍካኒች ባጢለ ቄርሰኖ። ህኩንን ባጢለሰ እሶኦች ቄርሴም ጃተ እሶኦን ኣጋምየ ላጋ ህድሩ» የመም ጣፈሞገንከ እስራኤሉ ሆሩንኩ ፈአኖ። 28 እሶኦንት ምሽራች ላገተ መጮጩ ግቢንተሰ ክዕኔኤተኔ መገንተ ዲናከ። እኮዳ ዶዕረንችጊን አበናከሰተኔ መገኑ ኢተኖሳረ። 29 ዳፉንኩስ መገን ኣሰንቹሁ መገኑ ገአኖጉ ዶረሙምቧ። 30 አዕኖኦት መገኒ ዎና አዘዘሙ ሆጌንተገንካ ቴሱ እኮዳ እስራኤል አዘዘሙ ሆጊን ማረቱተ ደቅቴንተገንካ 31 አዕኖኦት ደቅቴንተ ማረቱተ እሶኦቲ ደቅቶተ ቴሱ አዘዘንትምበአ። 32 ዳፉንኩስ መገኑ ሆረንከ መነ ማሮተ ሆሩንኩ መኑ አዘዘሙምቦገ አሴእ። 33 መገን ዱበላሽመት፥ መሌሱሁ ቆርመቲ ሀበንከ ጥላን? ፍርደስን ቆርሜን ደጌኑምቧ፤ ዎቆስን ደገሙምቧ። 34 ቀርች ዎዘነ ደጎ አዬት? እንዶ እሱ ሰዘኖሲ አዬት? 35 እንዶ ፈንቀሽ ባቱንተስ እሲ ሌኤሼኢ አዬት? 36 ዳፉንኩስ ሆሩሩንኩ እሲቼት፥ እሲኔቲ እሲሃቲ። እሲንከ ዶሊ ሆሪንከ አብኑ እሁስ፤ አሚዕን።
1 አቼ ኢ ህዛከ! መኖመዕኔ መገኒ አነነ እኬ በጅቀንሰኖነ ሄአኖ ክትመ አስቴን ህንጨቴኑንተ መገን ቅሽጢን ኡጫንክዕኔ። ህኩስን መገኒ ዎዘኒንተዕኔ ሁጀቴነንተተ ሁጅ። 2 አሞ ደናሙ በጅቀንሰኖነ ቡሽመት ዮበእ መገን ሰውቱ መሃንዶ ቆርምቴን ደጌኖተ ዎዘኑዕኔ ሃሮ እሁን በጋን ተን ኡለ አል መንገ እኬኖችዬ። 3 «ክዕኔኤ ሜሬሮን አኑንኩ አኑንኩ መገኑ ኣሴስ አመዕነትጊን ማሽማን ሰውዩን በጋን ገግስተኔ ሀስሰኖሀኒች አሉዲን ቦልጢን ሰውዩንከ» ይኬእ መገኑ ኣሴኤ ኣሰንቺን ሰዛንክዕኔ። 4 ሜጤየንተ መኖማን በትናሹ ቤለዩ ዮኔገንካ ህተን ቤለያከ ሁጅት ሆርቢንት አነነ እኮገንካ 5 ነኦቲ መሃ በትናሻከተ እንኮምዳ ክርስቶሲን ሜጦ አል። ነ-ነኦንት መቱ-መቲሀኔ ቤለያከተ። 6 መገኒች ኣሰሞኔ ኣሰንችገንከ አነኑ አነኑ ኣሰንቹ ዮኔ። ህራገ እኬደ አመዕነትኔ ቀጢን ህራንጉን። 7 ካዕለኖንኩ ካለቶንተስ ቃሩን። ሮስሰኖንኩ ሮስሶን ቃሩን። 8 ህትጉንተ ሰዘኖ ሰዞን ቃሩን። ኣሰኖንኩ ቢዝማን ኣሱን። ገሸኖንኩ ቃርማን ገሹን። ማረኖንኩ በጅጎን ማሩን። 9 ኢተዕኔ ሳድጨንቹ ዮበኢ እኩን። ሂለ ጠሀ ግብዬ። ደናሞ ጠሂን ሜጡ እክዬ። 10 አሞ አዕን-አዕኖኦንት ህዛኮመ ኢታን ኢተምዬ። አዕን-አዕኖኦንት አብጨምዬ። 11 ጬምት ዮበኢ ቃርቴን ዊመ ዎዘኒን ቀርቾ ዬሱሲ ሁጀችዬ። 12 ተሳን በጅቀምዬ። ሀዋን እየቅዬ። ሆረንተ ጃተ መገኑ ኡጭዬ። 13 መገን መነ ሀስሰኖሰ ጠሂን ካዕልዬ። ኮሀ ኣቅዬ። 14 ሸርታዕኔ መነ ማሰእዬ። ማሰእዬሰ በጋን ጤሌልቴኖችዬሰ። 15 አሞ በጅቀንታ መኒን በርገንቴን በጅቀምዬ። ኦኣ መኒን በርገንቴን ኦእዬ። 16 አዕን-አዕኖኦንት ኢታን ሄእዬ። ቡጢን ሜጡ እኬን ሄእዬ በጋን ቦልጥቴኖችዬ። «ኤሳች ህግየን ቆሩ ዮበአ» ይቴኖችዬ። 17 ሆራንከ መን ብሬን ደናሙ ጠሀ ሰውዬ በጋን አዬሃ ሂለ አሴ ቆደ ሂለ አስቴን ፈንቀሽቴኖችዬ። 18 አሞ ደንዴሾዕኔደ ክዕኔኤ ዉዲን መኒን ሆሪንን ጡሚን ሄእዬ። 19 ኢ ጃላከ! «ቀርቹ መገኑ ‹ባደ ፉሉ ኢሃ። አን ባደ ፉላም› ዬእ» የመም ጣፈሞተኔ መገን አሙሬ መዕንተ ኣስዬ በጋን አዕኖኦት ገጉዕኔ ባደ ፉልቴኖችዬ። 20 ህከን ቆደ ዲኑክ ጎሬኮደ እትስ፤ ሰገቦደን አግስ። ህካን አሲንተክ ጊረ ሩቀን ቦቆንተስ ቱባንት። 21 ሂለረ ደናሞ ጠሂን ቄል በጋን ሂላሪ ቄለንቶት።
1 ዳኖመት ሆረንት ዋልታኢ መገኒች እኮተኔሃ ቴሱ ዮ ዳናከተ መገኑ ዳኖንሴሰረ እኮተኔሃ መኑ ሆሩንኩ ገሽታ ዳናካ አዘዘሙን። 2 ህከኒ ዳናካን ኡርጨመኖ ሆሩንኩ መገኑ ኡርሾ ዎገ ዝረዮሃ። አዘዘንቱምቡሩንኩ ገግሰ አሌን ፍርደ ኤበቅታእ። 3 ገሻኑንኩ ሂለረ አስታ መኒች ህግየን ደናሙረ አስታ መኒ ዋጅሲሱምቧረ። ገሻንቹ ዋጅሲሱምቦሄገ ሀሰንንዶ? ደናሙረ አስ። እስን ገለጠኖኬ። 4 ዳፉንኩስ ገሻንቹ ኬሳ ደናሙረ አሶኬተ ዳኖዕሜሃ መገንየ ሁጀታንቹ። ጠሁ እኮዳ ገሻንቹ ብሰ ቆዕረኖ ጠለንከ እሁምቡተኔ ሂለረ አስቶንትደ ገሻንቹ ዋጅ። አሞ እስን ሂለረ አስታረ ቀጠኢን መገን አሙርተ ጡድሰኗ መገንየ ሁጀታንቹ። 5 ህከኒ ገሻኒ አዘዘሙ ሀስሰኖ። ህኩስን መገን አሙርተ ዋጂን ጠሊን እሁዕናች ዎዘኑ ቀነጠኖሀኒሃት። 6 አዕኖኦንት ግብረ ባቴነንታ ገሻኒ አዘዘሙ ሀስሰኖተኔሃት። ዳፉንኩስ ገሻኑ ህካን አሲን መገኒ ሁጀተዮሃረ። 7 አቼ ሆራንከ መኒ አሱ ሀስሰኖረ አስዬ። ግብሩ ሀስሰኖሀኒ ግብርዬ። ቀረጠ ባቱ ሀስሰኖሀኒ ቀረጠ ባቼ። ዋጁ ሀስሰኖንከ ዋጅዬ። አብሱ ሀስሰኖንከ አብሽዬ። 8 አዕን-አዕኖኦንት ኢተሚች ህግየን አዬ ቤኑሁ አሌንተዕኔ ሄኡንከ። ዳፉንኩስ ኦሌቹስ ኢተኖ አዪ ሴረ ዊንሼሃ። 9 «ሳኦት፥ ሽቶት፥ ሞገኦት፥ ቆጰነ ነቀሶት፥ መንረ ቁልጥቶት» ይታ አዘዙቲ ዎልት አዘዙት ሆረንቲ «ኦሌቹክ ፎልክገ ኢት» ይታ ላጋን ዊንታእ። 10 ኢተት ሄኦደ ኦሌቹ ጌኔኖበአ። ህከኒ ኢታን ሴሩ ዊመኖ። 11 አቼ ቴሱ ግሰናች በቅቴነንተ ሳቱ ኢሌገ ደግዬ። ዳፉንኩስ አመዕንኖም ጄቾች አበ ፈዕናም ጃት ኒበ ህንጭቴእ። 12 አንከሩንኩ ህጌእ። በሮ ህንጭዬእ። ህከኒ አንከሬ ሁጅተ ፉሽን ኡጅን ጫክ ኦል ኦድሸተ ኦደቅኑን። 13 ህከኒ በራን እንካምሀንገ ሀስሰኖገ ሄዕኖ በጋን ሄዕናሚ ሸላን፥ ድምቢን፥ ሳኢን፥ በለሌን፥ ኦዳኒ ቂንሻኒ እሁንከ። 14 ጠሁ እኮዳ ቀርቹ ዬሱስ ክርስቶሰ ኦደቅዬ በጋን ቁልጠኖረ ዊንሸቁንተ ማሊሀንክዕኔ ሰውቴኖችዬ።
1 አመዕነቲን ሆጎ መንቹ ኢታን ኣቅዬስ በጋን ሰውተስ ገዴኖችዬ። 2 ሆረረንከ እቱ ሀስሰኖስገ አመዕነኖ ዮእ። እኮዳ አመዕነቲን ሆግሙ አትክልተ ጠለ እተኖ። 3 እተኖ መንቹ እቱምቡሲ ገዱንከ። አሞ መገኑ ግቡምቡስተኔ እቱምቡ መንቹ እተኖሀን አሌን ፍርዱንከ። 4 ዎሎ መንች ሶቀማንቾን ፍርድቶተ አት አዬት? እስ ኡሬዳ ኡቦዳ ቀርቺሀንሴት። ቀርቹ ዬሱሱ ኡርሶስተ ደንደኖተኔ ኡረኖ። 5 መቱ መንቹ መቱ በሩ ዎሊችስ ዎየኖገ ሰውያኖ። አሞ ዎሉስ «በሩ ሆሩንኩ ቅጧ» ይ ሰውያኖ። ህካንን አኑንኩ አኑንኩ ዎዘናንተስ ቆርስ ደጉ ሀስሰኖስ። 6 አሞ በር አብሰኖ መንቹ ቀርቹ ዬሱሰ አብሶተ ይኬእ አብሰኖ። እተኖንኩ መገኑ ገለጠኖተኔ ቀርቹ ዬሱሰ አብሶተ ይኬእ እተኖ። እቱምቡ መንቹ ቀርቹ አብሶተ ይኬእ እተኖበአ። እስን መገኑ ገለጠኖ። 7 ኔሳችን ገጊሀንስ ሄአኖነ ገጊሀንስ ሬሀኖ መንቹ ዮበአ። 8 ህከኒ ፎሊን ሄዕኖምዳ ቀርቾ ዬሱሲ ሄዕናም፤ ሬኖምደን ቀርቾ ዬሱሲ ሬናም። አቼ ሬኖምዳ ሄዕኖምዳ ነኦት ዬሱስየረ። 9 ዳፉንኩስ ክርስቶሱ ሬቶሪነ ፎሊን ዮሪ ቀርቹ እሆተ ሬህ ሬሆች ኬኤእ። 10 ህዜክ አሌን ፍርድታንቲ ሚሃት? እንዶ አትስ ህዞክ ገዳንቲ ሚሃት? ነኦት ሆሩንኩኔ መገን ፍርድ በርጩም ብሬን ኡርናም። 11 ዳፉንኩስ «ቀርቹ መገኑ ‹አን ሄኣሚ እኮምገንከ መኑ ሆሩንኩ ኤሳ ጉሉጰኖ። አረብት ሆረንት መገኑ ገለጥታእ› ዬእ» የመም ጣፈሜእ። 12 ህከኒ አኑንኩኔ አኑንኩኔ ገግኔተኔ መገኒ መልሰ ኣስናም። 13 አቼ መቱ-መትኔ አሌን ፍርደቀሙንከ። ህከን ቆደ አዪ ህዜሀንክዕኔ ጉፍቹ እኬኑምቦገ እንዶ ህዞዕኔ ሉስሴኑምቦገ ቆረጵዬ። 14 አንን ቀርቾ ዬሱስቢ እኮምተኔ እቸት ገጉሴ ዎና ቡሸተ እሁ ሆጉሴ ቆርስ ደጌም። እኮዳ መቱረ «ቡሻ» ይ ሰውያኖ መንቺ አዬሃ ህኩን እሲ ቡሻ። 15 አት እታንት እቻን ህዞክ ክቼአኖ እኮች ኢታን ፈንቀላንትምበአ። ህከኒ ክርስቶሱ እስተኔ ሬሄ መንቹ እታንት እቸ ዳፊን በአኖገ አስቶት። 16 አሞ ክዕኔኤ ዮ ደናሙ ጠሁ ቦሮረመኖገ አስቴኖችዬ። 17 ዳፉንኩስ መገን ዎሞመት ሙጩርመተ፥ ጡማኒ ጡማንቾ አያኒች እኬታ በጅጉኒ በጋን እቸተኒ አጋኒበአ። 18 ህትጎነ ዎቄን ክርስቶሲ ሁጀተኖ መንቹ መገኑ በጅቀንሰኗኒ መንባን ገለጠሜሃኒ። 19 አቼ ጡሙ ደገመኖነ ነ-ነኦንት ቃርሰቀማም ዎቃ አወኑን። 20 እቸተኔ ይቴን መገን ሁጅተ በእሴኖችዬ። ገርንተ ሆሩሩንኩ ሙጩሩ እኮዳ መቱ መንቹ እተኖ እቻን ዎሉ መነ ክቼእሱ ሉሰተ። 21 ህከኒ ማለ እቱ ግቡ እንዶ ዎይን ዳጠ አጉ ግቡ እንዶ መነ ሉስሰኖረ መሃ አሱ ግቡ ደናሟ። 22 አሞ ኬሳ ዮኬ አመዕነቱ መገንነ ኪ ሜሬሮን እሁንኬ። ደናሟ ይ አመዕን አሰኖ ጠሃን ዎዘኑስ ቀነጠኖ ጠሁ ዮበእ መንቹ ማሰአሜሃ። 23 ጠሁ እኮዳ መለመኖ መንቹ እቾደ አመዕነቲን እሁምቡተኔ እስ አሌን ፍርደሜእ። ዳፉንኩስ አመዕነቲን እሁምቡሩ ሆሩንኩ ባጢላ።
1 ነኦት አመዕነቲን ቃራከተ እንኮንስሩ ሆግመስ ኬን እይነተ እዩ ሀስሰኖኔ በጋን ገገኔ ጠለ በጅቀንስናምረ እሁ ሀስሰኖኔበአ። 2 አኑንኩኔ አኑንኩኔ አመዕነቲን ቃሩንተ ካዕለኖስ ጠሀ አሲን ኦሌቹኔ በጅቀንስኑን። 3 ዳፉንኩስ «ኬስ ቦሮሬመ ቦሮሩ ኢ አሌን ኢሌእ» የመም ጣፈሞገንከ እኮስ በጋን ክርስቶሱ ገገስ በጅቀንስምበአ። 4 አሞ እየቂኒ ጡማንቹት መጣፈት ኣስታኔ ሰዘናኒ ኔሳ ተሶ ሄኡንተ ከኒች ብሬ ጣፈሞሩ ሆሩሩንኩ ሮስሶኔተ ጣፈሜሃ። 5 - 6 ሜጦ ዎዘኒን እኬን ሜጦ አፌን መገኑ እሱንከ ቀርቿኔ ዬሱስ ክርስቶስ አነ አብሴኑንተ እየቅነ ቃርመ መገኑ ዬሱስ ክርስቶስ ሰውትጊን አዕን-አዕኖኦንት ኢታን ሄኤነንተገ አሱንክዕኔ። 7 አሞ መገኑ አቡንተ ክርስቶሱ ገግስረ አስ ኣቄዕኔገንከ አዕን-አዕኖኦቲ መቱ-መቱዕኔ ኢታን ኣቀቀምዬ። 8 - 9 ዳፉንኩስ አን ኩላንክዕኔ፦ «ህከኒ አይሁደ እኩምቦ መን ሜሬሮን ገለጣንኬ። ሱዕሚሀንክን መዝሙረ ዘመራም» የመም ጣፈሞገንከ አናካ ኣሰንቶ ተሴ ላገተ ዊንሾታ አይሁደ እኩምቡ መኑ ማረቶስተኔ መገኑ ገለጥቱንታ ክርስቶሱ መገን ገርተ ጡድሶተ ይኬእ አይሁድ-መኒ አሽከርቹ እኮ። 10 አሞ «አይሁደ እኬኑምቡ መኑ መገኑ ዶዕሬ ምናደቢን በርገንቴን በጅቀምዬ» የመም ጣፈሜእ። 11 ህትጉንተ «አዕኖኦት አይሁደ እኬኑምቡ መኑ ሆሩንኩዕኔ ቀርቹ መገኑ ገለጥዬ። አሞ ምናደቡ ሆሩንኩ ገለጡንስ» የመም ጣፈሜእ። 12 አሞ እስያስ «እሴዬ ጠጲች አይሁደ እኩምቡ መነ ገሸኖ ኬአኖ። እሶኦንት እሱ ተሳ አሰቅታእ» ያኖ። 13 ተሴ መገኑ ጡማንቾ አያን መቄኒ ተሴኒ ሌኤኑንተ እሶን አመዕኒንተክዕኔ በጅጉታ ጡመሃ ሆረንከ ዊንሹንክዕኔ። 14 ኢ ህዛከ! አዕኖኦት በሬድማን ዊንቴንተረ እኬንተገ፥ መሌሱ ዊሜዕኔረ እኬንተጋ መቱ-መቱዕኔ ሰዚ ደንድቴነንተጋ ቆርስ ደጌም። 15 ጠሁ እኮዳ መ-መቶ ጠህተኔ ቃግሶክዕኔተ ይ መገኑ ኣሴኤ ኣሰንቺን እግማን ጣፌንክዕኔ። 16 ህኩ ኣሰንቹንኩ ኣሰሞኤ መገን ምሽራች ላገተ አይሁደ እኩምቦ መኒ ሰበኪን ቄስችገ እክ ዬሱስ ክርስቶሲ ሁጀቱንታት። ህከኒ አይሁደ እኩምቡ መኑ ጡማንቾ አያኒን ማሰአንቴነ መገኑ በጅቀንስታ ክትመ እክ ህንጭቱንተ ሁጀተዮም። 17 ህከኒ መገኒ ሁጀታም ሁጄኤተኔ ዬሱስ ክርስቶሲን ቦልጣምሩ ዮኤ። 18 - 19 አሞ አይሁደ እኩምቡ መኑ መገኒ አዘዘንቱንተ ክርስቶሱ አን ጠሃቄምሪን፥ አን አሴምሪን፥ ሁጀተንቶ መላነ ማለሎ መቄኒ ጡማንቾ አያን መቄኒ ኤሳን እክ ሁጀቾሀኒች ህግየን ዎሉረ ሜጡራ ጠሃቂ እጋምበአ። ህከኒ ዬሩሳሌም ከተሚች ኬእሽ «እልዋርቆነ» ዬኖቡ ኢለንቀጤች ዘሀን ክርስቶስ ምሽራች ላገተ ጦፍ ሰበኬም። 20 ህትጉንተ ሆረንተ ጃተ ቁልጣሚ ዎሉ መንቹ ሾኮሀን አሌን ሁጀቱ እሁዕናች ክርስቶስ ሱዕሙ ገአሙምቦ መዕኔን ምሽራች ላገተ ሰበኳ። 21 ህኩንን «እስተኔ ኩለም ከሱምቡሰሩ ጡዳእ። እስተኔ መጮት ከሱምቡሩንኩ ቆርስታእ» የመም ጣፈሟገ። 22 ህከኒሃንት ተደ ኢለንቀጤች ክዕኔኤበ ዋሊ ደንዱ ሆጎሚ። 23 ከኒች ዘኪን ከን ባድ ሄጌጎን ሁጀታምረ ጦፎምተኔሃ በትናሸ ዎጌች ከበ ክዕኔኤተ ጡዶተ አብሽ ቁልጠዮምተኔሃ 24 እስጴን ባዱ መረን ሎከኤ ዎቃንከ ጡዶዕኔተ ተሳ አሳም። ቀሆ ጄቾ ክዕኔኤተ ጡጅ ዱቦምሀኒች ዘኪን ዎቄሃዕኔ ሽንቅተ ካዕልቴን ህርሲሴነንተኤ። 25 እኮዳ ቴሱ አመዕናኒ ካለቶረ አፍ ዬሩሳሌመ መረዮም። 26 ዳፉንኩስ መቄዶንነ አካይ ባድ አመዕናኑ ዬሩሳሌም አመዕናን ሜሬሮን ዮ ቡጢ ካዕልቶተ ሀሶተኔሃት። 27 እሶኦት ህካን አሲ ሀሶኢ አሱ ሀስሰኖሰረ እኮተኔሃት። ዳፉንኩስ አይሁደ እኩምቡ መኑ አይሁድ-መኒ መገኑ ኣሴ ማሰተ ቤቀማኑ እኮኢች አይሁደ እኩምቡ መኑ ዮሰሪን አይሁደ ካዕሉ ሀስሰኖሰ። 28 ህከኒ ተ ሁጅተ ጦፎምሀኒችነ ጠጵዬ ግዘ ኣሴንሰሀኒች ዘኪን እስጴን ባዱ መራም ዎቃ ክዕኔኤተ ጡጅ ህጋም። 29 ህከኒ ክዕኔኤበ ዋላም ጃንተ ክርስቶስ ማሰ ዊምማን ዋላምገ ደጋም። 30 ኢ ህዛከ! ኤሳንን ሜጡ እኬን ኢተኔ መገኑ ቃረገ ኡጭቴኑንተ ቀርቾ ዬሱስ ክርስቶሲኒ ጡማንቾ አያን ኢታኒ ኡጫንክዕኔ። 31 - 32 መገኑ ዬደ በጅጎን ክዕኔኤበ ዋልኬእ ክዕኔኤንን በርገም ፎሎጩንተ፥ አይሁድ ባዶን ዮ አመዕኑምቦ መን አንጋች ፈኡንታ ዬሩሳሌም ከተማን ሁጀታም ሁጅት አመዕናኑ በጅቀንስታኢተ እኩንታ መገኑ ኡጭዬ። 33 ጡም መገኑ ሆሪንተዕኔን በርገም እሁን፤ አሚዕን።
1 ክንክራኦስ ከተማን ዮ ጠጵት ምኔን ሁጀታ ህዞኔ ፌቤኔ ደጌኑንተሴ ሀሳም። 2 እሴን በትናሸ ኬኒሃ ኤሳ ገጊንከኤ ካዕልቴኢተ እኮተኔ ጡማኒ ሀስሰኖ ዎቄን እሴተ ቀርች ሱዕሚን ኣቅቴን ክዕኔኤች ሀሳሪን ሆሪንን ካዕልዬሴ። 3 ዬሱስ ክርስቶስ ሁጄን ኤሳንን በርገንት ሁጀታ ጵርስቅለኒ አቅለኒ ጡመ ይዬሰ። 4 እሶኦንት ኢተኔ ፎልሰ ህግስ ኣስቴሃረ። ህከኒንከ አን ጠሉ እሁዕናች አይሁደ እኩምቡ መን አመዕናን ማበሩ ሆሩንኩ ገለጠኖሳረ። 5 አሞ እሶኦ ምኔን ጠጵያኖ አመዕናን ማበረሃ ጡመ ይዬ። ህትጉንተ እስይ ባዶን ብርስ ክርስቶሰ አመዕኔነ አንን አብሽ ኢታንስ ኤጴንጦሴ ጡመ ይዬስ። 6 ክዕኔኤ ሜሬሮንን ቃረገ ሁጀቶ ማራሜ ጡመ ይዬሴ። 7 ህትጉንተ ሶቀማን ሜሬሮን ደገንቴረ እኮነ ኤሳችን ብሬ ክርስቶሰ አመዕንቶረ አሞ ኤሳንን በርገንት ኡሱረንቶ እለሙኤ አንድሮኒቆሴኒ ዩንያሴኒ ጡመ ይዬሰ። 8 አሞ ቀርቾ ዬሱሲን ኢታንስ አምጵልያጦሴ ጡመ ይዬስ። 9 ህትጉንተ ክርስቶስ ሁጄን ኔሳንን በርገም ሁጀተኖ ኡርባኖሴኒ አን አብሽ ኢታንስ እስጣኮሴኒ ጡመ ይዬሰ። 10 አሞ ክርስቶስቢ እሁስ ኬነም ደገሞ አጴሊሴ ጡመ ይዬስ። ህትጉንተ አርስጦቡሎሴ ምን መነ ጡመ ይዬሰ። 11 አሞ እለንቹኤ ሄሮድዮነ ጡመ ይዬስ። ህትጉንተ ነርክሲሴ ምን መኒች ዬሱሳን አመዕንቶረ ጡመ ይዬሰ። 12 አሞ ቀርቾ ዬሱስ ሁጅተ ሁጀታ ቱሩፋኖኒ ትርፎሴኒ ጡመ ይዬሰ። ህትጉንተ ቀርቾ ዬሱስ ሁጅተ ቃረገ ሁጀታነ አንን አብሽ ኢታንሴ ጴርሲዴ ጡመ ይዬሴ። 13 አሞ ቀርቾ ዬሱስ ሁጄን ዎነቢ እኮ ሩፎሴኒ እስነ ኢ አመታ ጡመ ይዬሰ። 14 ህትጉንተ አስንክርጦሴ፥ ፍሌጎኔ፥ ሄርሜሴ፥ ጳጥሮባሴ፥ ሄርማሴኒ እሶኦን በርገንት ዮ ህዛከታ ጡመ ይዬሰ። 15 አሞ ፍሎሎጎሴ፥ ዩልየ፥ ኔሮሴ፥ ኔሮሴ ህዞተ፥ ኦሉምጳሴኒ እሶኦን በርገንት ዮ አመዕናኑ ሆረንካ ጡመ ይዬሰ። 16 ህትጉንተ አመዕናኒ አጉደኖ ሱንቀንቺን ጡምጨምዬ። ክርስቶሰ አመዕኔ መን ማበሩ ሆሩንኩ ጡመ ሶኬዕኔ። 17 ኢ ህዛከ! አዕኖኦት ሮሴንተ ሮሻን ኡርጨንታነ ሜሬሮንተዕኔ አነኖመታ ጉፍቹ እሀኖራ ኤባ መኒች ቆረጵቴኑንተ ኡጫንክዕኔ። እሶኦችን ሁንዬ። 18 ህትጎኑ መኑ ገግሰ ቆቄ ሄኣሃረ በጋን ቀርቿኔ ዬሱስ ክርስቶሲ ሁጀቱምቧረ። እሶኦንት ሄልስ ደናሞገ ጠሃተን ሂልመት ዮሰበእ መን ዎዘነ ሉስሳእ። 19 አዕኖኦንት አዘዘንቴነንተረ እኬንተገ መኑ ሆሩንኩ መጮጬተኔ ክዕኔኤተኔ አን አብሽ በጅቀሜም። ጠሁ እኮዳ ደናሞ ጠሂ ቆራከተ እኬኑንታ ሂለ ጠሂ ቀላከተ እኬኑንታ ሀሳም። 20 አቼ ጡም መገኑ ሰርብን ሼጣንቹ ሎካችዕኔ ዎሮን ቡት-ቡተአኖ። ቀርቿኔ ዬሱስ ክርስቶስ ኣሰንቹ ክዕኔኤን በርገም እሁን። 21 ኤሳንን በርገም ሁጀተኖ ጥማቶስ ጡመ ሶኬዕኔ። ህትጉንተ እለሙኤ ሎቅዮስ፥ እያሶኒ ሶስጳጥሮሲ ጡመ ሶኬዕኔ። 22 አሞ አን ተ ደዳቤ ጣፍቹ ጤርጦስ ቀርቾ ዬሱስ ሱዕሚን «ጡመ ዮንተንዶ?» ያንክዕኔ። 23 ኤሲ አመዕናን ማበረ ሆረንካ ኮህሰኖ ጋዮስ ጡመ ሶኬዕኔ። ከተምስ ግዘ አፈኖ ኤራስጦሲ ህዞኔ ቆኣርጦሲ ጡመ ሶኬዕኔ። 24 ቀርቿኔ ዬሱስ ክርስቶስ ኣሰንቹ ሆሪንተዕኔን በርገም እሁን፤ አሚዕን። 25 - 26 አቼ አን ክዕኔኤ ኩሎንክዕኔ ምሽራች ላገጊን፥ ዬሱስ ክርስቶስተኔ አዋጀሞ ጠህጊን፥ በትናሸ ጄቾ ማጠም ሄእኬእ ቴሱ ጫክ ለሌነ ህራጋኑ ጣፎሀኒን ምናደቢ ሆሪንከ ደገሞ ማጠሞ ጠህጊኒ ዶሊ ሆሪንከ ሄአኖ መገኑ ምናደቡ ሆሩንኩ አመዕን አዘዘሙንተ አዘጆጊኒ አመዕነቶን ቃርቴነንተገ አሶዕኔተ ደንደኖነ 27 እስ ጠሉ ቆረ እኮ መገኒ ዬሱስ ክርስቶሲን ዶሊ ሆሪንከ አብኑ እሁንስ፤ አሚዕን።
1 ዬሱስ ክርስቶስ ሶቀማንቹ እሆተ መገን ሰውቲን ገአሞም አን ጳዉሎሲ ህዞኔ ሶስቴኔሲ 2 ዬሱስ ክርስቶሱ ሙጩርሴሰነ ጡማኑ እኩንተ መገኑ ገኤሰ ቆሮንቶስ ከተማን ዮ አመዕናን ማበሪሃ እሶኦነ ኒ ቀርቹ እኮ ቀርቿኔ ዬሱስ ክርስቶስ ሱዕመ መዕኔን ሆራንን ገእታሪ ሆሪንካ ሶንኬምተ ሶህኑ። 3 አናኔ መገኒቺ ቀርቾ ዬሱስ ክርስቶሲቺ ኣሰንቹሁ ጡሙሁ ክዕኔኤን እሁን። 4 ዬሱስ ክርስቶስ ዉዲን ኣሰሞዕኔ መገን ኣሰንችተኔ ክዕኔኤ ዳፊን አን ሆረንተ ጃተ መገኑ ገለጣም። 5 ዳፉንኩስ አዕኖኦት ጠሃቴነንተ ጠሂን ሆሪኒ ቆርማን ሆራኒ ክርስቶስ ዉዲን ሆራንከ ዎቄን ቀባጣመተ እኬንተ። 6 አሞ ነኦት ክርስቶስተኔ ነቀንሶንክዕኔ ጠሁንኩ ክዕኔኤ ሜሬሮን ቃሬእ። 7 ህከኒ ቀርቿኔ ዬሱስ ክርስቶስ ዋሉ ቆረቤነንየን መገን ኣሰንቺች ሜጡሩ ኮተኖክዕኔበአ። 8 እስን ቀርቹኔ ዬሱሱ ክርስቶሱ ፈንቀል ዋለኖ በር ቀነጤኖዕኔሩ ዮዕኔበእረ እኬኑንተ ዘካንቹ ኢለንቀጤች ቃርቴን ሄኤነንተገ አሰኖዕኔ። 9 ዳፉንኩስ ቤቷንስ ቀርቿኔ ዬሱስ ክርስቶሲን ሜጦመት ሄኡንተክዕኔ ገኤዕኔ መገኑ አመዕነሜሃ። 10 ኢ ህዛከ! ሜጡ ጠሀ ጠሃቴኑንተ፥ ሜጡ ዎዘኑሁ ሜጡ ሰውቱሁ ሄአኖዕኔጊ በጋን ሜሬሮንተዕኔ አነኖመት ሄኡምቦገ ቀርቿኔ ዬሱስ ክርስቶስ ሱዕሚን ኡጫንክዕኔ። 11 ዳፉንኩስ ኢ ህዛከ! ሜሬሮንተዕኔ በአንቹ ዮገ ቀሎኤ ምን መኑ ኩሌኤ። 12 ህካን ዩንኩኤ አኑንኩዕኔ አኑንኩዕኔ «አን ጳዉሎሴየ» እንዶ «አን አጶሎሴየ» እንዶ «አን ጴጥሮሴየ» እንዶ «አን ክርስቶስየ» ይቴነዮንተ። 13 ክርስቶሱ ቤሀሜእንዶ? አሞ ጳዉሎስ ክዕኔኤተኔ ሰቀለሜእንዶ? እንዶ ጠመቀንቴንታ ጳዉሎሴ ሱዕሚኔትንዶ? 14 አንን ቀርስጶሴቺ ጋዮሴቺ ህግየን ክዕኔኤች ሜጡዕኔ ጠመቁምቡተኔ መገኑ ገለጣም። 15 ህከኒ አዪ ክዕኔኤተ «ጳዉሎሴ ሱዕሚን ጠመቀንቴንታረ» ዪ ደንደኖበአ። 16 አሞ እስጥፋኖሴ ምን መነሃ ጠመቄም። ህከኒች ዎሉ በርግ ጠመቄምደ ደግምበአ። 17 ዳፉንኩስ ክርስቶሱ ሶኮኤ ምሽራች ላገተ ሰበኩንታት በጋን ጠመቁንታበአ። ሰበካንሲንኩ ክርስቶስ መስቀልች መቆ ጠለለ እሁምቦገ መን መሌስ ላጋኔትበአ። 18 ክርስቶስ መስቀልችተኔ ኩለመኖ ጠሁ በኣ መኒ ቀልመተ። እኮዳ ኔሳ ፈዕናም ኬኒ መገንየ መቆ። 19 ዳፉንኩስ «ቆረ መን ቆርመተ በእሳም። መሌሰ መን መሌሱንከ ኡጃም» የመም ጣፈሜእ። 20 ህከኒ ቆሩ መንቹ አዬለ? ሴር ሮስሳንቹስ አዬለ? ተን ኡለ አሌን ቆርም ደገኖሲ አዬለ? መገኑ ተን ኡለ አል ቆርመት ቀልመተ እካገ አስምበእንዶ? 21 ዳፉንኩስ መገኑ ቆርማንተስ ተን ኡለ አል መኑ ገግስ ቆርማን መገኑ ደጉ ሆጎተኔ ነኦት ሰበንካም ቀልመ ላገ ዉዲን አመዕንታ ኬኑ ፈእሶተ ኢቴእ። 22 አይሁድ-መኑ መላተ ጠዕምታእ። አሞ ግሪክሳን ጠሃታ መኑ ቆርመተ ሀሳእ። 23 ጠሁ እኮዳ ነኦት አይሁድ-መኒ ጉፍቹ እኮነ አይሁደ እኩምቡ መኒ ቀልመተ እኮ ሰቀለም ሬሄ ክርስቶስተኔ ሰበንካም። 24 አሞ ገአንቶ መኒ አይሁድ-መኒሃ እኮ ግሪክሳን ጠሃታ መኒ ክርስቶሱ መገንየ መቆኒ መገንተ ቆርመኒ። 25 ዳፉንኩስ መገን ቀልመት መን ቆርማች አብታታ። አሞ መገን ሆንግት መን መቄች ቃረተ። 26 ኢ ህዛከ! አዕኖኦት ገአንቴንተገ ሰውዬለ። መን ሰውትጊን ሜሬሮንተዕኔ በትናሸት ቆራከት እንዶ በትናሸት ቆጠረት እንዶ በትናሸት አባኑት ዮበአ። 27 ጠሁ እኮዳ ቆራከተ ሳልሲሶተ መገኑ ተን ኡለ አል ቀሉረ ዶዕሬእ። አሞ ቆጠረተ ሳልሲሶተ መገኑ ተን ኡለ አል ሆግመረ ዶዕሬእ። 28 ተን ኡለ አል አበ ጠሀ ኮትሶተ መገኑ ተን ኡለ አል ቀሁ ጠሀ፥ ገደሞ ጠሀሃ ጠለለ ጠሀሃ ዶዕሬእ። 29 ህካን አሴኢንኩ ማለ ኦደቄኢ ሆሩንኩ መገን ብሬን ቦልጡምቦጊሃት። 30 - 31 ህከኒ «ድከአኖ መገኖን ድከኡን» የመም ጣፈሞገንከ ዬሱስ ክርስቶሲን ሄቸተ ደቅቴንታ መገኒቼት። አሞ መገኑ ክርስቶሰ ኔሳ ቆርመተ፥ ሙጩርመተ፥ መገኒ አነነ እንኬምረ አሰኖሃ ዎዝኑታ አሴእ።
1 ኢ ህዛከ! አን ክዕኔኤበ ዋሎም ጃተ መገንተኔ ነቀሳምረ አበ መሌሲኒ ቃረ ላጋኒ ክዕኔኤ አዋጀን ዋልምበአ። 2 ዳፉንኩስ አን ክዕኔኤባን ዮም ጄቹተ ሰቀለሞ ዬሱስ ክርስቶሲች ህግየን ዎሉረ ሜጡራ ደጉምቦገ ሙርትጬም። 3 ህከኒ አን ሆንጌን፥ ዋጂኒ አበ ሁጠናኒ ክዕኔኤባን ዮም እኬ። 4 - 5 አሞ ክዕኔኤ አመዕነቱ መን ቆርማን እሁዕናች መገን መቆን ሾሀሙንተ ይኬእ ጠሃቄም ጠሁሁ ሮስሾሚሁ መገን አያን መቄን ጫክሽ ኩሊኔት በጋን መነ መለጢ ጠሃቄኖ ቆርመ ላጋኔትበአ። 6 ጠሁ እኮዳ አመዕነቲን ኤጌሮ መንባን ቆርማን ጠሃናም። ጠሃናንሲንኩ ተን ኡለ አል ቆርማን እንዶ ተን ኡለ አል በኣ ገሻን ቆርማኔትበአ። 7 አሞ በትናሸ ዶሊች ብሬን መገኑ አብኒሀኔ ቅጠንሴ ደጵቶነ ማጠንቶ መገን ቆርመተ ጠሃናም። 8 ተ ቆርመንተ ተን ኡለ አል ገሻኒች ሜጡሁ ዘህጭትምበአ። ዘህጭቴ እክየን አብን ቀርቹ ሰቀልት ሽታበአ እኬ። 9 ጠሁ እኮዳ መጣፋን ጣፈሞገን መን እልት ጡድ ከሱምቡረ፥ መጨንት መጮጭቱምቡራ መን ዎዘናንን ሰውየመምቡራ ኢትታስ መኒ መገኑ ቅጠንሴእ። 10 ጡማንቹ አያኑ መገን ጥሉ ጠሁሁ ፈኡዕናች ሆረረንከ ቆርም ደገኖተኔ መገኑ ኔሳ ጡማንቿንስ አያኒን ጫክሽ ኩሎኔ። 11 ዳፉንኩስ ገግስ ዎዘኒች ህግየን መቶ መንች ሰውተ ደጊ ደንደኖ አዬት? ህትጉንተ መገን አያኒች ህግየን መገን ሰውተ ዘህጪ ሜጡሁ ደንደኖበአ። 12 አሞ መገኑ ኣሴኔ ኣሰንቸ ቆርስናምገ አሰኖ መገን አያነ ኣቅኔም በጋን ተን ኡለ አል አያነ ኣቅንምበአ። 13 ህከኒ ነኦት መገን ገርተ ጡማንቹ አያኑ ዮ ኬኒ ሂን ኩናሚ ጡማንቹ አያኑ ሮስሼኔ ላጋኔት በጋን መን ቆርማን ሮንሶምሀኒኔትበአ። 14 መገን አያኑ ዮስበእ መንቹ መገን አያን ኣሰንቸ ኣቅ ደንደኖበአ። ዳፉንኩስ ህኩ ኣሰንቹ አነነ እክ ለለኖ ጡማንቾ አያኒን እኮተኔሃ መንቺሀንስ ህኩን ቀልመተ አጉደኖስተኔሃ ኣሰንቸስ ቆርሶተ ደንደኖበአ። 15 ጠሁ እኮዳ መገን አያኑ ዮስ መንቹ ሆረረንከ ቆርም ደገኖ። እኮዳ ህከ መንቹ አዪ ቆርሚ ደንደኖበአ። 16 ህኩንን «መገኑ ሰዞተ ሰውተስ ደገኖ መንቹ አዬት?» የመም ጣፈሟገ። እኮዳ ኔሳ ክርስቶስ ዎዘኑ ዮኔ።
1 ኢ ህዛከ! አን ማሊን ዮንተሀንገነ ክርስቶሳን ቃርቴኑዕነ ዮንተ ጪለገ አስ በጋን መገን አያኒን ዮ መንገ አስ ጠሃቆዕኔተ ደንድምበአ። 2 አዕኖኦንት ቃረተ እቸተ እቲ ደንድቴኑምቡተኔ አዙተ ኦንሴንክዕኔ በጋን ቃረተ እቸተ ኣስምበዕኔ። ቴሱ ቃረተ እቸተ እቲ ደንድቴነንተበአ። 3 ህከኒ አዕኖኦት ቴሶ ኢለንቀጤች ማሊን ዮንተ። ሜሬሮንተዕኔ ቂንሸቲ ኦደቲ ሄኦኢች ማሊን ዮንታረበእንዶ? አሞ እኬነዮንተሲ አመዕኑምቦ መንየገበእንዶ? 4 አሞ ክዕኔኤች መቱ «አን ጳዉሎሴየ» ህትጉንተ ዎሉስ «አን አጶሎሴየ» ያኖ እኮች አዕኖኦት አመዕኑምቦ መንገ እንክዕኔበእንዶ? 5 አቼ አጶሎስ መሃን? አሞ ጳዉሎስስ መሃን? እሶኦትዕኑ አኒንከ አኒንከ መገኑ ኣሴሰጊን አዕኖኦት አመዕንቴነንተገ አስቴሃ መገንየ ሁጀታኑ። 6 አን ካሼም። አጶሎስን ዎአ አግሼእ። እኮዳ ሌእሾሲ መገኗ። 7 ህከኒ ሌእሰኖ መገኒች ጠሊች ህግየን ካሾሁ እኮ ዎአ አግሾ ሜጡራ ካዕልቱምቧረ። 8 አሞ ካሾሁ ዎአ አግሾሁ ለሙንኩ ቅጧ። እኮዳ አኑንኩ አኑንኩ ሁጀጤጊን ሁጄስ ቆደ ደቀኖ። 9 ዳፉንኩስ ነኦት መገኒን ሜጡ እንክ ሁጀንታምየረ። አዕኖኦንት መገንተ ሆጉኒ መገንየ ምንኒ። 10 መገኑ ኣሴኤ ኣሰንች ቀጢን አብሽ ቆረ ግምባንችገ ሾሁተ ሾኮም። ህተን ሾሆ አሌንን ዎሉ መንቹ ምነዮእ። ጠሁ እኮዳ አኑንኩ አኑንኩ ህተን ሾሆ አሌን ሀትጉተ ምነኖንዶ ቆርስ ደጉን። 11 ዳፉንኩስ ህተን ሾሀንቶ ሾሆች ህግየን አዪ ዎልተ ሾሁተ ሾሆተ ደንደኖበአ። ህት ሾሁንት ዬሱስ ክርስቶሳ። 12 ቴሱ አዪ ህተን ሾሆ አሌን ዎርቂን እንዶ ብሪን እንዶ ደናሞ ክኒን እንዶ ሀቂን እንዶ አገዲን እንዶ ፍሺን ምኖደ 13 አኑንኩ አኑንኩ ሀትጎነተ ሁጅተ ሁጀቼእንዶ ጊራን ኬነም አነነ እክ ለለኖተኔሃ ፍርድ በር ማጠሙዕነ ለለኖተኔሃ ሆራንከ መን ሁጅት ለልታእ። 14 አዪ ህተን ሾሆን ሁጀቾ ሁጅት በኡዕነ ፈኦስደ እርፉተ ኣቀኖ። 15 እኮዳ አዪ ሁጀቾ ሁጅት ቡቦደ ገጉስ ጊረ ኣዚች ፉሎሀንገ እክ ፈኦዳ መንቹስ እርፉተ ደቀኖበአ። 16 አዕኖኦት መገን ምን እኬንተጋ መገን አያኑንኩ ኣዜንተዕኔ ሄአኖጋ ደጌነንተበእንዶ? 17 ህከኒ አዪ መገን ምን ዝሬደ እሱንከ መገኑ ዝረኖስ። ዳፉንኩስ መገን ምኑ ኬሰሜሃ። ህኩስን አዕኖኦታ። 18 አዪ ገገስ ሉስጩንከ። ተን ኡለ አሌን አዪ ክዕኔኤ ሜሬሪች ቆረ እኮ አጉጆስደ ቆረ እሆተ ቀሉ እሁን። 19 - 20 ዳፉንኩስ «መገኑ ቆረ መነ ሾክማንተሰን አፈኖሰ» አሞ «መገኑ ቆረ መን ሰውቱ ጠለለ እኮገ ደገኖ» የመም ጣፈሞተኔ ተን ኡለ አል ቆርመት መገንባን ቀልመተ። 21 ህከኒ አዪ መናን ድከኡንከ። ዳፉንኩስ ሆሩሩንኩ ክዕኔኤሃ። 22 አሞ ጳዉሎሴኒ እኮ አጶሎሴኒ እኮ ጴጥሮሴኒ እኮ ተን ኡለ አልራ እኮ ሄቸታ እኮ ሬሁታ እኮ ቴሱ ዮኢሃ እኮ ከዘኩ ዋለኖሃ እኮ ሆሩሩንኩ ክዕኔኤሃ። 23 አዕኖኦንት ክርስቶስየረ። አሞ ክርስቶሱ መገንየ።
1 አቼ መኑ ኔስ ክርስቶስ አሽከርጋ መገን ደጵዬ ጠህ ሀደረት ኣሰንቶኔ መንጋ አስ ጡዱኔ። 2 ህካን እኮች ህተ ሀደረተ ኣቄስ መኑ አመዕነሜኢ እሁ ሀስሰኗ። 3 ኢተኔ እኮደ ክዕኔኤተ እኮ ዎሉ መኑ አሌንተኤ ፍርዴዳ ሀዉ ዮኤበአ። አንን ኢ ገግ አሌኒ ፍርዳምበአ። 4 አን ደቃም ሂልመት ኤሳን ሜጡሩ ዮኤበአ። ህካን ዩኤ «አን ሙጩሯ» ዩሃበአ። እኮዳ ኢ አሌን ፍርደኖ ቀርቾ ዬሱሳት። 5 ህከኒ ቱንሶን ማጠሞ ጠሀ ጫካን ፉሸኖነ ዎዘን ሰውተ ለሊሰኖ ቀርቹ ዬሱሱ ዋለንቀጤች ጃት ኢልቱዕናች ሜጡራ ፍርድቴኖችዬ። ህተ ጃንተ አኒንከ አኒንከ ገለትስ ኣሰኖ መገኗ። 6 ኢ ህዛከ! ክዕኔኤ ይኬእ ከ ሆረንከ ጠሀ ጠሃቄሚ ኢ ገገሃ አጶሎሴኒ አጉዲሸተ አስኔት። ህካን አሴሚንኩ «ጣፈሞሀኒች ህጎት» ያኖ ጠሁ መ ዩሃንዶ ኔሳች ሮሴኑንታት። ህከኒ መቱስ መንቹ አብሴነን ዎሉስ ገዱ ሀስሰኖክዕኔበአ። 7 ዳፉንኩስ ኬስ ዎሎ መኒች አብታንትገ አሴሄ አዬት? አሞ አት ኣቅቱምቡሩ ም ዮኬ? ህከደ ሆረረንከ መገኒች ኣቅቴንቲ እኮች ገግክሪገ ቦልጥታንቲ ሚሃት? 8 ቴሱ ሀስሰኖዕኔረ ሆረንከ ደቅቴንተ። ዱበላከንተ እኬንተ። አሞ ነኦት ዮምበኢንከ ዎሞዕምቴንተ። ነኦቲ ክዕኔኤንን በርገም ዎመተ እንኩንተ ዎሞዕምቴንተ እክየን ደናሟ እኬ። 9 ተን ኡለ አሌን ዮ መኒሃ ሰሜ ሶቀማኒሃ መገኑ ኔስ ሶቀማኑስ ሬሁት አሌንተሰ ፍርደንቶ መንገ መኒች ሆሪችን ዘካኑ አስ ጡድሾ አጉደዮኤ። 10 አሞ ነኦት ክርስቶስተኔ ቀላከተ እንኬም። አዕኖኦንት ክርስቶስ ዉዲን ቆራከተ። ህትጉንተ ነኦት ሆግመተ። እኮዳ አዕኖኦት ቃራከተ። አሞ አዕኖኦት አብቴንታረ። ነኦንት ገደሜምየረ። 11 ተደ ኢለንቀጤችን ጎሬንከዮም፥ ሰገምበዮም፥ ከልነዮም፥ ኦሌነዮመኔኒ ምኑንኩ ዮኔበእኒ። 12 ነኦንት ገግኔ አንጋን ሁጀንታም። ጤሌለኖኔ መነንከ ማሰዕናም። ሸሬመኔደን ደንዴቅናም። 13 አሞ ሱዕመኔ በእሴመደ ማሽማን ፈንቀሽናም። ቴሶ ኢለንቀጤችን ተን ኡለ አል ሀጨ እንኬም። አሞ ሆራሪችን ሀረበሰ እንኬም። 14 አን ከ ጠሀ ጣፈዮንክዕኔ ኢታም ኦሶኤገ አስ አሙዕሮዕኔታት በጋን ሳልሲሶክዕኔታበአ። 15 አሞ መሃ ክርስቶሲን ሌእሳዕኔ በትናሹ መኑ ሄኦዳ በትናሸት አናከት ዮዕኔበአ። ዳፉንኩስ አን ክርስቶስ ዉዲን ምሽራች ላጋን አነዕኔ እኬም። 16 አቼ ኤስ አጉዴነንተረ እኬኑንተ ኡጫንክዕኔ። 17 ህከኒ አን ኢታንስነ አመዕነሜኢ እኮ ቀርቾ ዬሱሲን ቤቱኤ ጥማቶሴ ክዕኔኤበ ሶኬም። እስን አን መዕኔን ሆራንን አመዕናን ማበራን ሆራንን ሮስሾምገንከ ዬሱስ ክርስቶሲን ደጎም ዎቄእተኔ ቃግሰኖክዕኔ። 18 ክዕኔኤች መ-መቱ አን ክዕኔኤበ ዋሉምቡ አጉጅየንሰ ቦልጥተዮሩ ዮእ። 19 ጠሁ እኮዳ መገኑ ዬደ አን ክዕኔኤበ ሰርብን ዋላም። ህተ ጃንተ ህከን ቦልጥታ መንቢ ጠሀሰ ጠለ እሁዕናች መቆሳ ደጎተ ሀሳም። 20 ዳፉንኩስ መገን ዎሞመት ጠሂን ጠሊን እኩዕናች መገን መቄኔት። 21 አቼ አዕኖኦት ሀሴነንታ መሃን? ክዕኔኤበ ደመ አፍንዶ ኢታኒ ማሽመ ሰውቲኒ ዋሉ?
1 ክዕኔኤ ሜሬሮን ገርንተ ሳኡ ዮጉ መጮጨሜእ። አንስ ምኔመተ ገሼ መንቹ ዮጉ ኩለሞተኔ ህትጎኑ ሳኡ ገሬ መገኑ አመዕኑምቦ መንባኒ ደገሙምቧ። 2 አዕኖኦንት ቦልጥቴነዮንተ። ቦልጥቴነንተ ቆደ ክቼኡ ሀስሰኖዕኔበእኬንዶ? አሞ ህትጎነ ጠሀ አሴ መንቹ ሜሬሪችዕኔ ከሙ ሀስሰኖዕኔ። 3 - 4 አን መሃ ማሊን ክዕኔኤን ሜጡ እክ ሄኡምቦዳ ሰውቲን ክዕኔኤንን በርገሜት ዮሚ። ህከኒ አን ክዕኔኤባን ዮምሀንገ እክ ህትጎነ ጠሀ አሴ መንች አሌን ቀርቾ ዬሱስ ሱዕሚን ፍርዴም። አዕኖኦንት ሜጦማን ጠጵቴነንተ ጃተ ቀርቿኔ ዬሱስ መቆ ክዕኔኤን በርገም እሀኖተኔሃ አን ሰውቲንተኤ ሜሬሮንተዕኔ እሃምተኔሃ 5 ህከን መንች ማሉ በኡንተ ሼጣንቺ ህግሴን ኣስዬ። ህካን አስቴነንታንኩ ቀርቹ ዬሱሱ ዋለኖ በር ህከን መንች ፎሉ ፈኡንታት። 6 ቦልጡዕኔ ደናሟበአ። ቀክቹ ሺሹ ሙጥሴመ ቀመ ሆረንከ ሺሽሰኖገ ደጌነንተበእንዶ? 7 አቼ ሻሽግኔ ሆልቹ ክርስቶሱ ክትመሞተኔ ሺሹ ዮበእ ሃሮ ቡኮገ እኬኖተ ኤጌሮ ሺሸ ክዕኔኤች ቄርስዬ። 8 ህከኒ ሂልመቲ ሾክመቲ ዊሞ ኤጌሮ ሺሺን እሁዕናች ጠቤንመቲ ገርቲ ዊንቴ ጦሮሺን አያነ አብንሱን። 9 ከኒች ብሬ ጣፎንክዕኔ ደዳቤንተኤ ሳኣኒን ሜጡ እኬኑምቦገ ኩሌንክዕኔ። 10 ህካን ዩንኩኤ ተን ኡለ አሌን ዮ ሳኣኒን እንዶ እዲዳኒን እንዶ ቦጋኒን እንዶ ቆጰን መገኒ ሰገዳሪን ሜጡ እኬኖችዬ ዩሃዕንበአ። ህትጉተ እኮችዕኑ ተን ኡለ አሊች ፉሉ ሀስሰኖዕኔ እኬ። 11 ጠሁ እኮዳ «አመዕናኗ» ዬነንየን ሳኣሪች፥ እዲዳሪች፥ ቆጰን መገኒ ሰገዳሪች፥ መን ሱዕመ በእሳሪች፥ ድምብታሪቺ ቦጋሪቺ አነነ እኬኑንታት። ህትጎነ መኒን ዎሉ ፈእየን እቸታ እቴኖችዬ። 12 አመዕኑምቦ መን አሌን ፍርዱ ኢታ ሁጅበአ። አመዕናን ማበር ኣዜን ዮ መን አሌን አዕኖኦት ፍርድቴነንተበእንዶ? 13 አመዕኑምቦ መን አሌን ፍርደኖ መገኗ። መጣፋን «ሂለ መንቹ ሜሬሪችዕኔ ፉሽቴን ከምዬ» ዬገንከ አስዬ።
1 ክዕኔኤች መቱ ህዜንተስ በአሞደ ጠሀስ አመዕናኑ ጡዳገ አስ ቆደ መገኑ አመዕንቱምቦ ዳናከበ እግ መረኖንዶ? 2 ጡማኑ ተን ኡለ አል መን አሌን ፍርድታገ ደጌነንተበእንዶ? አዕኖኦት ተን ኡለ አል መን አሌን ፍርድቴነንተረ እኬንታች ቀ-ቀሁ ጠሀ ሀትተ ፍርዱ ሆጌነን? 3 አሞ ነኦት መገን ሰሜ ሶቀማን አሌን ፍርዲ ደንድናምገ ደጌነንተበእንዶ? ህከደ ባሰንከስ ተን ኡለ አል ጠሃን ፍርዲ ሀትተ ደንድናምበይ? 4 አቼ ህካን እኮች ህትጎነ ጠህተኔ በአንቸት ሄኦዕኔደ አመዕናን ማበሩ ገደኖ መን ብርተ ጠሀስ አፌን ሚመ መርቴነዮንተ? 5 አንን ካን ያዮሚ ሳልሲሶክዕኔታት። አመዕናኑተ ህዛከተ ኢተንሲ ደንደኖ ቆሩ ኑባቹ ሜሬሮንተዕኔ ዮበእንዶ? 6 ህከን ቆደ አመዕኔ መንቹ ዎሉስ አመዕናንቹ ኦዲ አመዕንቱምቦ ዳናከበ መረኖንዶ? 7 አዕን-አዕኖኦንት ኦደሙ ገጉንኩስ ቄለሟንክዕኔ። ህከን ቆደ አዕኖኦት ጌነንቴንተዳ መለጠንቴንተዳ ዎየኖበእንዶ? 8 ጠሁ እኮዳ አዕኖኦት ገጉዕኔ ዎሉ ፈእየን አመዕንቶ ህዛከዕኔ ጌንቴነዮንተኒ መለጤነዮንተኒ። 9 ሾኩ መኑ መገን ዎሞመተ ረገኢ ደንድቱምቦገ ደጌነንተበእንዶ? ሉሴኖችዬ። ፎኩተ ሁጀታሩ እንዶ ቆጰን መገኒ ሰገዳሩ እንዶ ሳኣሩ እንዶ ጎኑ ጎናን ፎኩተ ሁጀታሩ 10 እንዶ ሞገኣሩ እንዶ እዲዳሩ እንዶ ድምብታሩ እንዶ መን ሱዕመ በእሳሩ እንዶ ቦጋሩ መገን ዎሞመተ ረገኣበአ። 11 ክዕኔኤችን መ-መቱዕኔ ህትጋመተ እኬ። ጠሁ እኮዳ ቀርቾ ዬሱስ ክርስቶስ ሱዕሚኒ መገንኔ አያኒኒ ኣዕልቴንተ፥ መገኒ አነነ እኬንተኒ ሙጩርቴንተኒ። 12 ሆረንከ ጠሀ አሲ ደንዳም። እኮዳ ሆሩንኩስ ካዕሉምቡኤየ። ቴሱ ሆረንከ ጠሀ አሲ ደንዳም። ጠሁ እኮዳ ሜጡሩ አግዞመተ ጠቆኤተ ደንደኖበአ። 13 አሞ «እቸት ጎደቢሃት። ጎደቡንኩ እቻሃት» የመሜእ። እኮዳ መገኑ ለሙንከስ በእሰኖ። መኖመት ቀርቾ ዬሱስተ በጋን ሳእተበአ። ቀርቹ ዬሱሱንኩ መኖማ። 14 አሞ ቀርቹ ዬሱሰ ሬሆች ኬእሾ መገኑ ኔሲ መቄንተስ ሬሆች ኬእሰኖኔ። 15 ክዕኔኤ መኖመት ክርስቶስ ብሊተ እኮገ ደጌነንተበእንዶ? ህከደ አን ክርስቶስ ብሊተ መስኬእ ሳኣንቾ ብሊተ አሱንዶ? ህኩን ሆረኒ ሀስሰኖበአ። 16 ዳፉንኩስ «ለሙንኩሰ ሜጡ አል እካእ» የመም ጣፈሞገንከ ሳኣንቾ ሜንትቾን ኦሰአኖ መንቹ ህተን ሜንትቾን ሜጡ አል እሀኖገ ደጌነንተበእንዶ? 17 ጠሁ እኮዳ ቀርቾ ዬሱሲን ሜጡ እሀኖ መንቹ ዬሱሲን ዎዘኒን ሜጡ እሀኖ። 18 አሞ መኑ ሁጀተኖ ዎሉ ባጢሉ ሆሩንኩ መኖማችስ ኤተሪኔት። እኮዳ ሳአኖ መንቹ ገግስ መኖመ አሌን ባጢለ ሁጀተኖተኔ ሳኢች ሁንዬ። 19 ህትጉንተ መኖመዕኔ መገን ምን እኮገ ደጌነንተበእንዶ? እሴንን መገኒች ኣቅቴንተ ኣዜንተዕኔ ዮ ጡማንቹ አያኑ ገለኗበ። አዕኖኦንት ገግዕኔየረበአ። 20 ክዕኔኤተ ዋገ ባች ህዕሬዕኔተኔ መኖማንተዕኔ መገኑ አብሽዬ።
1 አዕኖኦት ጣፌንተኤ ጠህተኔ እኮደ መኑ ሜንቱ ኤቡዕነ ሄኦደ ደናሟ። 2 ጠሁ እኮዳ ሳኢች ቆረጵተኔ አኒንከ አኒንከ ገግስ ምኔመት ሄኡንስ። አሞ አማንከ አማንከ ገግሴ ምኔኑ ሄኡንሴ። 3 ምኔኑ ምኔማሀንስ ሀስሰኖሴረ አሱንሴ። ህትጉንተ ምኔመቲ ምኔኒሀንሴ ሀስሰኖስረ አስቱንስ። 4 መኖመሴ አሌን መቆ ዮሲ ምኔኒሀንሴት በጋን ምኔማ ገግሴ መኖመ አሌን መቆ ዮሴበአ። ህትጉንተ መኖመስ አሌን መቆ ዮሴት ምኔመተንስ በጋን ምኔኒ ገግስ መኖመ አሌን መቆ ዮስበአ። 5 አሞ መገኑ ኡጪ ኢተንቴን ቀሆ ጄቾ አጉሩ እሁምቡች ህግየን አዕን-አዕኖኦንት ከዕመንቴኖችዬ። ህትጉንተ ገገ ኤጌጡ ሆጊን ሼጣንቹ ሉስሱምቦዕኔገ ፈንቀልቴን ሜጡ እክዬ። 6 ጠሁ እኮዳ አን ካን ያዮሚ ሰዘናገ በጋን አዘዜየገበአ። 7 መኑ ሆሩንኩ ኢገ እኬ እክየን ኢታም እኬ። ጠሁ እኮዳ መገኑ አኒንከ አኒንከ አነነ አነነ ኣሰንቸ ኣሴእ። ህከኒ መቲሀንስ መቱ ሀገሩ ኣሰንቹ ዮስ። አሞ ዎሊሀንስ ዎሉንኩ ሀገሩ ኣሰንቹ ዮስ። 8 ኤበቀሙምቡ መኑሁ ምኔኑሰ ሬሄ ሜንቱሁ ኤበቅቱዕናቺ ገልቱዕናቺ ኢገ ሄኤ እክየን ደናሟ እኬ። 9 ጠሁ እኮዳ ቁልጢን ቡቢች ኤበቀሙ ዎየኖተኔ ገገሰ ኤጌጢ ደንድቱምቦደ ኤበቀንቱን። 10 - 11 ምኔመት ምኔንሴ ምኒች ፉልቱንከ። ፉልቴስቢቺ ዎሎ ጎናን ገልቱዕናች ሄኡን። እንዶ ምኔኒንተሴ ኢተንቱን። አሞ ምኔኑንኩ ምኔመስ ሸሩንከ ይ ኤበቀንቶረ አዘዛም። አዘዙንትስ ቀርቾ ዬሱስተ በጋን ኢታበአ። 12 ዎሎስ ኬኒ ቀርቹ ዬሱሱ እሁዕናች አን ያሚ መቶ አመዕናንቺ አመዕንቱምቡት ምኔመት ዮስደ እሴን ምኔኒተሴ በርገንት ሄኢ ሀሶደ ሸሩንከሴ። 13 ህትጉንተ አመዕኑምቡ ምኔኑ ዮሴ ምኔመት ምኔኑሴ እሴን በርገም ሄኢ ሀሾደ እሲች ፉልቱንከ። 14 ዳፉንኩስ አመዕኑምቡ ምኔኑ አመዕናንቾ ምኔመስተኔ ሙጩሯ። ህትጉንተ አመዕንቱምቡት ምኔመት አመዕናንቾ ምኔንሴተኔ ሙጩሩተ። ህካን እሁምቦደ ኦሱዕኔ ሙጩረተበአ። እኮዳ ቴሱ ኦሱዕኔ ሙጩረተ። 15 ጠሁ እኮዳ ጎንቹ እኮ ሜንትቹተ አመዕኑምቡሲ አነነ እሂ ሀሾደ አነነ እሁን። ዳፉንኩስ መገኑ ኔስ ጡሚን ሄዕኑንተ ገኤኔተኔ አመዕናንቹ እንዶ አመዕናንቹት ህትጎነ ጠሂ ጠቀንታበአ። 16 ሜንትቾ! ምኔነክ ፈእሶተ ደንድታንትንዶ ሚን ደገን? ህትጉንተ መንቾ! ምኔመክ ፈእሶተ ደንድታንትንዶ ሚን ደገን? 17 አኑንኩ አኑንኩ መገኑ ሄእ ዬስጊኒ መገኑ ገኤስጊኒ ሄኡን። አመዕናን ማበሪ ሆሪንከ ኣሴም አዘዙት ተኔት። 18 አሞ ኑጉሰሞሀኒች ዘኪን አመዕኔ መንቹ አዪ ሄኦደ ኑጉሰሙምቡሀንገ እሆተ ሀሱንከ። ህትጉንተ ኑጉሰሙዕናች ብሬ አመዕኔኢንኩ ኑጉሰሚ ሀሱንከ። 19 ዳፉንኩስ መገን አዘዙተ ቆረቢች ህግየን ኑጉሰሙ እኮ ኑጉሰሙ ሆጉ ሜጡራ ካዕለኖበአ። 20 ህከኒ አኑንኩ አኑንኩ መገኖን አመዕኔ ጃተ ዮእኬገንከ እክ ሄኡን። 21 አሞ አት መገኑ አመዕንቶንት ጃተ አግሿ እኬንዶ? ህከኒ ሆረኒ ሀውቶት። እኮዳ ዎማንማን ፉልቶተ መከ ደቅቶንትደ ሆረኒ አጉርቶት። 22 ዳፉንኩስ አግዞማን ሄኦገን ቀርቹ ዬሱሰ አመዕኔ መንቹ ዬሱሲን ዎማንቿ። ህትጉንተ አመዕነኖ ጃንተ ዎማንቹ እኮ መንቹ ክርስቶስየ አግሹ። 23 አዕኖኦት ክርስቶሱ ዋገ ባች ህዕሬዕኔረ እኬንተተኔ መኒ አግዘተ እኬኖችዬ። 24 ህከኒ ኢ ህዛከ! አኑንኩ አኑንኩ መገኑ አመዕኔ ጃተ ዮእኬገንከ እክ መገኒን ሄኡን። 25 አቼ ኤበቀሙምቦ መንተኔ ቀርቾ ዬሱሲች ኣቄም አዘዙት ዮኤበአ። ጠሁ እኮዳ አመዕነሜሚ እሆተ መገኒች ማረቱተ ደቄሚ እኮምተኔ ገግኤ ሰውተ ኣሳንክዕኔ። 26 ከን ዶል ሀውተኔ መኑ ዮገንከ ሄኦደ ደናሙ አጉደዮኤ። 27 ህከኒ ሜንትቹተ ኤበቅቴንቲ እኬንትደ ሸሪ ሀሶት። አሞ ኤበቅቱዕነ ዮንቲ እኬንትደ ኤበቂ ሀሶት። 28 ጠሁ እኮዳ አት ኤበቅቶንትደ ባጢላበአ። አሞ መትት ሜሴሌት ገልቶደ ባጢለ ሁጀትምበአ። እኮዳ ኤበቀሞ መኑ ተን ኡለ አል ሄቻን ሆለመ ሀወኖ። አዕኖኦንት ህከኒች ፈኤንተ እክየን ኢታም እኬ። 29 ኢ ህዛከ! ዶሉ ገቦጤተኔ ተን ጄቾች አፍ ምነማከት ዮሰሩ ዮሰበእሪገ እክ ሄኡን። 30 አሞ ኦኣሩንኩ ኦኡምቦሪገ እክ ሄኡን። በጅቀንታሩንኩ በጅቀንቱምቦሪገ እክ ሄኡን። ህዕርታሩንኩ ሜጡሩ ዮሰበእሪገ እክ ሄኡን። 31 ህትጉንተ ተን ኡለ አሌን ዮረ ገግሰቢ ኤጭታሩ ሆረረንከ ገግሰቢ ኤጭቱምቦሀንገ እክ ሄኡን። ዳፉንኩስ ተን ኡለ አሌን ዮሩ ሆሩንኩ ህገኗ። 32 አዕኖኦት ስኣዜኑዕናች ሄኤኑንተ ሀሳም። ሜንቱ ኤበቁምቡ መንቹ ቀርቹ ዬሱሰ በጅቀንሰኖ ጠሀ ሀሰኖተኔ ቀርቾ ዬሱስ ጠህተኔ ሰውያኖ። 33 ጠሁ እኮዳ ኤበቄ መንቹ ምኔመስ በጅቀንሰኖ ጠሀ ሀሰኖተኔ ተን ኡለ አል ጠህተኔ ሰውያኖ። 34 ህከን መንች ዎዘኑንኩ ቤሀሜሃ። ህትጉንተ ጎናን ገልቱምቡት ሜንትቹት እንዶ ሜሴሌት ማሉሴ ፎሉሴ ሙጩሩ እሁንተ ሀሳተኔ ቀርቾ ዬሱስ ጠህተኔ ሰውታእ። እኮዳ ጎናን ገልቶ ሜንትቹት ምኔነሴ በጅቀንሲ ሀሳተኔ ተን ኡለ አል ጠህተኔ ሰውታእ። 35 አንን ህትጉተ ዬንክዕኔ ዎሻዲን አፎክዕኔተ እሁዕናች ክዕኔኤ ካዕለኖ ይኔት። አሞ ሀስሰኖጊን ሄኤኑንታቲ ሰውቱዕኔ ብንዩዕናች ዊማንክዕኔ ዎዘኒን ቀርቾ ዬሱሳን ቃርቴን ሄኤኑንታቲ። 36 መቱ መንቹ ጠዕመቄሴ ሜሴሌት ገልታ ቀጠተ እኮ ጃተ ገገስ ኤጌጢ ደንዱ ሆጊን ኤበቆሴተ ሀሾደ ከመኖስሩ ዮበአ። እሶኦንት ኤበቀንቱን። ህኩን ባጢላበአ። 37 ጠሁ እኮዳ አዪ ጠዕመቄ ሜሴሌተ ኤበቁንተ ግድሰኖስሩ ዮበኢች ኤበቁዕናች ኤጌሪ ደንዴዳ ጠሀስን ዎዘናንተስ ሙዕሬዳ ህኩ መንቹ ደናሞገ እኬእ። 38 ህከኒ ጠዕመቄ ሜሴሌተ ኤበቄኢ ደናሞገ እኬእ። እኮዳ ኤበቁምቡሲ ዎየኖ ጠሀ አሰዮእ። 39 ምኔመት ምኔኑሴ ፎሊን ዮ ቀጣን ኤበቀንች ሴሪን ኡሱረንቴታ። እኮዳ ምኔኑሴ ሬሄ ጃተ ገልታስ መንቹ አመዕናንቹ እሁን በጋን ሀሶሀኔን ገልቶተ ደንድታእ። 40 ጠሁ እኮዳ አን ሰውያምጊን ህት ሜንትቹት ገልቱዕናች ሄኤ እክየን በጅጎን ሄኣ እኬ። አሞ ኤሳንከ መገን አያኑ ዮኤ አጉደዮኤ።
1 ቆጰን መገኒ ክትመሞ ማልተኔ ሆሪንከኔ መሌሱ ዮኔ። መሌሱንኩ ቦልጥሰኖ። እኮዳ ኢተት ቃርስታእ። 2 መቱ መንቹንኩመ «መሌሱ ዮኤ» ይ ሰውዬደ ህኩ መንቹ ደጉ ሀስሰኖስገ ደጉዕነን ዮሃ። 3 ጠሁ እኮዳ መቱ መንቹ መገኑ ኢቴደ ህኩ መንቹ መገንባን ደገሜሃ። 4 አቼ ቆጰን መገኒ ክትመሞ ማለ እትተኔ እኮደዕኑ ቆጰን መገኑ ሆሩንኩ ተን ኡለ አሌን ሄኡምቡረ እኮጋ ሜጦ መገኒች ህግየን ዎሉ መገኑ ዮበእጋ ደንጋም። 5 ዳፉንኩስ በትናሸት ቆጰን መገነቲ በትናሸት ቀርበቲ ዮእ። ጠሁ እኮዳ መሃ ሰማኒ እኮ ኡለኒ «መገነተ» የመንታሩ ሄኦዳ 6 ሆሩሩንኩ እሲች እኮነ ነኦንት ሄዕናም እሲ እኮ አኑ መገኑ ጠሉ ዮኔ። አሞ ሆሩሩንኩ እስ ዉዲን እኮነ ነኦንት ሄዕናሚ እስ ዉዲን እኮ ቀርቹ ዬሱሱ ክርስቶሱ ጠሉ ዮኔ። 7 ጠሁ እኮዳ ካን ሆሩንኩ መኑ ደገኖበአ። መ-መቱ መኑ ከበሬ ኢለንቀጤች ቆጰን መገኒን ሮሰንቶተኔ ማለ እታኢ ገርንተ ቆጰን መገኒ ክትመሞሀንገ አስት ሰውተኔት። ህከኒ ሰውቱሰ ሆግመ እኮተኔ ቡሼእ። 8 ኔስን መገንበ ህንጨታኔት እቸተበአ። እንቱምቦዳ ኮተኖኔሩ ዮበአ። እንቶምዳ በርገመኖኔሩ ዮበአ። 9 ጠሁ እኮዳ ህት ዎማንመዕኔ አመዕነቲን ሆንጋኑ ሉስሳኢተ እኩምቦሰገ ቆረጵዬ። 10 ዳፉንኩስ አዪ አት ቆረ እኮንትሲ ቆጰን መገን ምኔን ማዳን አፉዕልትየን ጡጆሄደ ህከን መንች ሰውቱንኩ ሆግመ እኬደ ቆጰን መገኒ ክትመሞ ማለ እቲ እገኖበእንዶ? 11 ህከኒ ክርስቶሱ እስተኔ ሬሄ ህኩ አመዕነቲን ሆግሙ መንቹ ኪ ቆርማን በአኖ ዩሀ። 12 ህትጎንን አመዕናን አሌን ባጢለ ሁጀቴነንተነ ሆግመሰ ሰውተ መዜሴነንተ ጃተ ክርስቶስ አሌን ባጢለ ሁጀቴነዮንተ ዩሀ። 13 ህከኒ እቸት ህዜሃዕን ጉፍቹ እካኢ እኮች አን ህዞኤ ሉስሳምሀኒች ማለ ሆረን እታምበአ።
1 አን ዎማንቿበእንዶ? አሞ አን ሶቀማንቿበእንዶ? አንስ ቀርቹኔ ዬሱሰ ጡድምበእንዶ? አዕኖኦስ ቀርቾ ዬሱሲ ሁጀቾም ሁጄእተ ላሉበእንዶ? 2 ቀርቾ ዬሱሲን አዕኖኦት ኤሳ ሶቀማንቹ እህኤ መላተ እኬንተተኔ ዎሎ መኒ ሶቀማንቹ እሁምቦዳ አን ክዕኔኤ ገርንተ ሶቀማንቿ። 3 ቆርምታኤ መኒ ፈንቀሻም ጠሁ ከኔት። 4 ኔሳሃንስ እቲሃ አጊሃ ገርት ዮኔበእንዶ? 5 አሞ ዎሎ ሶቀማንገ፥ ቀርቾ ዬሱስ ህዛከጋ ጴጥሮሴጋ መገኑ አመዕንቶ ምኔማከኔ አንፍ መረሚ ገርት ዮኔበእንዶ? 6 እንዶ ሁጄን አጰመን ሄኡ ሀስሰኖኔ ጠል አኔቲ ባርነባሴቲንዶ? 7 ገግስ ግዚን ቤጠቦማን ሁጀተኖ መንቹ ዮእንዶ? አሞ ዎይነ ካሽኬእ ላሎችስ እቱምቡ አዬት? ህትጉንተ ለሉ ጠቅኬእ ለልስ አዞች አጉምቡ አዬት? 8 አን ከ ጠሀ ጠሃቀዮሚ መንጊን ጠሊኔትንዶ? ሴሩስ ህትጉተ ያኖበእንዶ? 9 ዳፉንኩስ «ውጠተ ኦተአኖ ቦረ አፎስ ኡሱርቶት» የመም ሙሴ ሴራን ጣፈሜእ። መገኑ ህካን ዬኢ ቦረተኔ ሰውያኖተኔሃትንዶ? 10 መገኑ ህካን ዬኢ ኒተኔሃበእንዶ? ለሙንኩሰ ውጣች ቆደሰ ደቅቶተ ሆገአኖ ተሴን ሆገአኖተኔሃ ውጠተ ኦተአኖንኩ ተሴን ኦተአኖተኔሃ ህኩ ጠሁ ጣፈሞ ገርንተ ኒተኔሃት። 11 ነኦት ክዕኔኤ ሜሬሮን መገን ጠሀ ውንጤምረ እንኮሚች ኔሳ ሀስሰኖረ ክዕኔኤች ኣቅኖምደ ህኩን አባ ጠሀንዶ? 12 ዎሉ መኑ ክዕኔኤች ሀስሰኖሰረ ኣቂ ደንድታኢ እኮች ነኦት አብንስ ኣቁ ሀስሰኖኔበእንዶ? ጠሁ እኮዳ ክርስቶስ ምሽራች ላገት ሀራርታበ ከሙምቦገ ይንኬዕን ሆራንከ ጠሃን እየቅኔም በጋን ኔሳ ሀስሰኖረ ኣቂ ሀንስምበአ። 13 መገን ምኔን ሁጀታ መኑ እቸሰ መገን ምኒችን ደቅታጋ ክትመ ክትሜኖ መዕኔን ሁጀታ መኑ ክትሚ ህንጨኤመሪች ቤቀንት እታጋ ደጌነንተበእንዶ? 14 ህከንገንከ ምሽራች ላገተ አዋጅታ መኑ ምሽራች ላገ ሁጄችን እታረ ደቅታገ ቀርቹ ዬሱሱ አዘጄእ። 15 እኮዳ አን ከን ሆራንከ ጠሂች ሜጡራ ደቅምበአ። ቴሱ ጣፈዮሚሁ ህትጎኑ ጠሁ አሰሙንተኤ ሀሼበአ። ዳፉንኩስ አን ቦልጣም ጠሀ አዪ ጠለለ አሰኖሀኒች ሬሁ ዎየኖኤ። 16 አሞ ምሽራች ላገተ ሰበኩ ኤሳ ግደ እኮተኔ ምሽራች ላገተ ሰበኪንተኤ ቦልጣምሩ ዮኤበአ። ህከኒ ምሽራች ላገተ ሰበኩምቦደ ኤሳ ኣዬ! 17 ዳፉንኩስ አን ገጉኤ ኢት ሰበካሚ እኮምደ እርፉት ዮኤ። ጠሁ እኮዳ ግዲን አሳሚ እኮምደ ሀደረት ኣሰንቶኤተኔሃት አሰዮሚ ዩሀ። 18 ህከደ እርፉኤ መሃን? እርፉዕኑ ምሽራች ላገተ ሰበከን ኣቁ ሀስሰኖኤረ ኣቁዕናች ምሽራች ላገተ ጠለ ሰበኮምዳት። 19 መኒች ሆሪችን ዎማንቹ እኮምዳ በትናሸ ኬኑ ፈእሶተ ይኬእ መኒ ሆሪንከ ገገኤ አግሹ አሴም። 20 አሞ አይሁደ ፈእሶተ ይኬእ አይሁድ-መኒ አይሁድገንከ እኮም። ህትጉንተ አን መሃ ሴር ኣዜን ሄኣሚ እሁምቦዳ ሴር ኣዜን ዮረ ፈእሶተ ይኬእ ሴር ኣዜን ዮ መኒ ሴር ኣዜን ዮ መንገን እኮም። 21 አሞ ሴሩ ዮሰበእ መነ ፈእሶተ ይኬእ መገን ሴሩ ዮኤነ ክርስቶስ ሴር ኣዜን ዮሚ እኮምገን ሴሩ ዮሰበእ መኒ ሴሩ ዮበእ መንገን እኮም። 22 ህትጉንተ አመዕነቲን ሆግመ መነ ፈእሶተ ይኬእ ሆግመ መኒ ሆግመ መንገን እኮም። ደንዴሾ ቀጢን መ-መቱ መነ ፈእሶተ ይኬእ ጠሃን ሆራንን ሆራንከ መኒን እሶኦገንከ እኮም። 23 አንን ምሽራች ላገ ማሰተ ቤቀማንቹ እሆተ ይኬእ ምሽራች ላገተኔ ህከ ሆረንከ ጠሀ አሴም። 24 ኤዜጨሜኖባን ደጉደኖ ሆሩንኩ ኤዜጨመኖጋ ሜጡስ ጠሉ እርፉተ ኣቀኖጋ ደጌነንተበእንዶ? ህትጉንተ ደቅቴኖተ ደጉጅዬ። 25 ኤዜጨመኖ ሆሩንኩ ሆረራንን ገገስ ኤጌጡ ሮሰኖ። እሶኦንት ህካን አስታኢ በአኖ ላሀ ደቅቶታት። እኮዳ ነኦት በኡምቡ ላሀ ደቅናም። 26 ህከኒ አን ሰውቱ ዮበእ መንገ ደጉዳምበአ። አሞ ቦብሪን ኡጀቀመኖ መንገ ጠለለንከ ኡጀቀማምበአ። 27 ጠሁ እኮዳ ዎሎ መኒ ሰበኮምሀኒች ዘኪን ገጉኤ ኡቤሚ እሁምቦገ መኖመኤ ቅጣጠቀን አዘዘንታኤገ አሳም።
1 ኢ ህዛከ! አናከኔ ሆሩንኩ ጎሙ አሊን እክ አወንሰንየንሰ ሆሩንኩሰ በሃረ ቶልቶገ ደጌኑንተ ሀሳም። 2 እሶኦንት ሆሩንኩሰ ሙሴን ሜጡ እኮተ ይትኬእ ጎማኒ በሃራኒ ጠመቀንቶእ። 3 አሞ ሆሩንኩሰ ኤጅ እት ከሱምቡ ሜጥንተ ሀገረተ እቸተ እቶእ። 4 ህትጉንተ ሆሩንኩሰ ኤጅ አግ ከሱምቡ ሜጡንከ ዎአ አጎእ። አጎሲንኩ አወነዮሰ እኬ መገን ክኒቼት። ህኩ ክኑንኩ ክርስቶሳት። 5 እኮዳ እሶኦት ኡለ ኡዱመኣን ጎፎተኔ መገኑ እሶኦች በትናሻንሰ ኬኖን በጅቀምምበአ። 6 ኩ ጠሁንኩ እሶኦት ሂለረ ቁሉጦገንከ ነኦቲ ሂለረ ቁሉንጡምቦገ ቆረጵናምገ አሰኖኔየ። 7 መጣፋን «መኑ እቲሃ አጊሃ አፉዕሌእ። ሸለተ አለጲንከ ጦቅዬእ» የመም ጣፈሞገንከ እሶኦች መ-መቱሰ ቆጰን መገኒ ሰገዳረ እኮገን አዕኖኦቲ ቆጰን መገኒ ሰገዴነንተረ እኬኖችዬ። 8 እሶኦችን መ-መቱሰ ሳእኬእ ሜጦ በሬን ለሜነ ሰሴ ኩሜ መኑ ሬቶገንከ ነኦቲ ሳዕኑንከ። 9 አሞ እሶኦች መ-መቱሰ ቀርቹ መገኑ ኬንትየን ዎሩ ከር ሽ ጦፎሰገንከ ነኦቲ መገኑ ኬኑንከ። 10 ህትጉንተ እሶኦች መ-መቱሰ ጉንጉንትየን በእሳንቹ በእሾሰገንከ አዕኖኦቲ ጉንጉንቴኖችዬ። 11 ህኩ ሆሩንኩ ጠሁ እሶኦ አሌን እኮጉ ዶሉ ጎፌ ጄቾን ሄዕናም ነኦት ቆረጵኑንተ አጉዲሸተ እክ ጣፈሜኔ። 12 ህከኒ ቃር ኡሬኢ አጉደኖስ መንቹ አዪ ኡቡምቦገ ቆረጱን። 13 መናን ኢለኖሀኒች አነኑ ሀዉ ክዕኔኤ አሌን ኢልምበአ። ዳፉንኩስ መቄችዕኔ አሉዲን እኬ ዎቄን ሀውቴኑንተ ሰዕምዩምቡ መገኑ አመዕነሜሃ። እስን ሀወስ እየቂ ደንድቴኑንተ ሀዊንተስን በርግ ሀዊችስ ፉልቴነንተ ዎቃ ቅጠንሰኖክዕኔ። 14 አቼ ኢ ጃላከ! ቆጰን መገኒ ሰገዲች ቆረጵዬ። 15 አንን መሌሰ መኒ ጠሃቄኖሀንገ ጠሃቀዮንክዕኔ። ህከኒ ጠሃቄንስ ጠህተኔ አዕኖኦት ገጊሃንክዕኔ ፍርደቅዬ። 16 ነኦት መገኑ ገለጥን አንጋም ማሰ ኩባይቢ ክርስቶስ ቄጊን ሜጦመት ዮሃበእንዶ? አሞ ሜጦማን እንታንስ ዳቡት ክርስቶስ ማሊን ሜጦመት ዮሃበእንዶ? 17 ዳፉንኩስ ዳቡስ ሜጥተ እኮተኔሃ ህተን ሜጤየንተ ዳቦች ቤቀማምተኔሃ መሃ በትናሸ መነ እንኮምዳ ነኦት ሜጦ አል። 18 ሀኖ እስራኤል መንተኔ ሰውዬለ። ክትሜመረ እታ መኑ ክትመ ክትሜኖስ መዕኔን ሜጦመት ዮሳረበእንዶ? 19 ህካን ዩኤ መ ዩሃዕን? ቆጰን መገኒ ክትሜመ ማሉ ዎየኖ ዩሃዕኔንዶ ቆጰን መገኑ ዎየኖ ዩሃዕን? 20 ህትጉተበአ። ገሬ መገኑ ደጉምቡ መኑ ክትመዮኢ ሀቡሲሃት በጋን መገኒሃበአ። ህከኒ አዕኖኦት ሀቡሲን ሜጡ እኬኑንተ አን ሀሳምበአ። 21 አሞ አዕኖኦት ቀርቾ ዬሱስ ኩባይቢሃ ሀቡስ ኩባይቢሃ አጌኖተ ደንድቴነንተበአ። ህትጉንተ ቀርቾ ዬሱስ ማዲቺ ሀቡስ ማዲቺ ዳየንቴኖተ ደንድቴነንተበአ። 22 አቼ ነኦት መገኑ አሙርሲንሱንዶ? ነኦስ እሲች አበ ቃራከተንዶ? 23 ሆረረንከ አሲ ደንዴኖ። እኮዳ ሆሩሩንኩ ካዕለኗበአ። አሞ ሆረንከ ጠሀ አሲ ደንዴኖ። እኮዳ ሆሩሩንኩ ቃርሰኗበአ። 24 አዪ ገግስ መከ ጠለ እሁዕናች ዎሎ መን መከሃ ሀሱን። 25 ማለ ህሬኖ ድኮን ህረመኖረ ሆረንከ ዎዘናንተዕኔ መልቴኑዕናች እችዬ። 26 ዳፉንኩስ ኡለቲ ኡለ አሌን ዮሩ ሆሩንኩ መገንየ። 27 መገኑ አመዕኑምቦ መኒች መቱ እቸተ ቅጠንስ ገእየን አዕኖኦንት መሪ ሀሴንተደ ኣሰመኖዕኔረ ሆረንከ ዎዘናንተዕኔ መልቴኑዕናች እችዬ። 28 ጠሁ እኮዳ አዪ «ኩ ማሉ ቆጰን መገኒ ክትመሜሃ» ዬዕኔደ ህከ ኩሎዕኔ መንችተኔሃ ዎዘን ሰውትተኔሃ እቴኖችዬ። 29 ህካን ዬሚንኩ ጃልክ ዎዘን ሰውትተኔሃት በጋን ኪ ዎዘን ሰውትተኔሃትበአ። ዳፉንኩስ ዎሎ መን ዎዘን ሰውትተኔ ኢ ዎማንመ አሌን ፍርዴኖ ሚሃለ? 30 አሞ አን መገኑ ገለጥ እቾምደ ህከ መገኑ ገለጣም ጠህተኔ ዎቀሴኖኤ ሚሃት? 31 አቼ እቴንተደን አጌንተደን መሃ አስቴንተደ ሆረረንከ መገን አብኒ አስዬ። 32 - 33 አንን በትናሹ መኑ ፈኡንተ ይኬእ እሶኦ መኪች ህግየን ገግኤ መከ ሀሱዕናች ሆረንከ መነ በጅቀንሳምገንከ አይሁድ-መኒሃ እኮ ግሪክሳን ጠሃታሪሃ እኮ መገኑ አመዕኔ መን ማበሪ ጉፍቹ እኬኖችዬ።
1 አን ክርስቶሰ አጉጆምገን አዕኖኦቲ ኤስ አጉጅዬ። 2 ኢ ህዛከ! ሆራንከ ጠሂን ቃጌነንተኤተኔሃ ክዕኔኤ ኣሴም ሮሸተ ቃርስቴን አፌንተተኔሃ ገለጣንክዕኔ። 3 ጠሁ እኮዳ ሆራንከ ጎን ቦቁት ክርስቶሰ እኮገ፥ ሜንት ቦቁት ጎነ እኮጋ ክርስቶስ ቦቁት መገኑ እኮጋ ቆርስቴን ደጌኑንተ ሀሳም። 4 አሞ ጉንጉዕል መገኑ ኡጨኖ እንዶ ህራገኖ ጎንቹ አዪ ቦቁስ ቢልሰዮሃ። 5 ህትጉንተ ሻሸ ጣጠቅቱዕናች መገኑ ኡጭታ እንዶ ህራጋ ሜንትቹት ሀቲኒ ቦቁሴ ቢልሰዮታ። ህኩንን ሙምሴ ሜጥቶሀንየገ። 6 ዳፉንኩስ መትት ሜንትቹት ሻሸ ጣጠቅቱምቦች ሙምሴ ሙርሲሱን። እኮዳ ሙምሴ ሙርሲጩ እንዶ ሜዱ ቢልሰኖሴ እኮች ሻሸ ጣጠቅቱን። 7 አሞ ጎንቹ መገን አጉዲሸታ አብንሃ እኮተኔ ጉንጉዕሉ ሀስሰኖስበአ። ጠሁ እኮዳ ሜንትቹት ጎንችየ አብን። 8 ዳፉንኩስ ሜንትቹት ጎንቺች ቆጨንቴ በጋን ጎንቹ ሜንትቾች ቆጨምምበአ። 9 አሞ ሜንትቹት ጎንቺ ቆጨንቴ በጋን ጎንቹ ሜንትቾ ቆጨምምበአ። 10 ህከንተኔሃ መገን ሰሜ ሶቀማንተኔሃ ሜንትቹት ጎንችሴ መቄ ኣዜን ዮኢተ እኮገ ጡድሲ ሻሸ ጣጠቅቱን። 11 ጠሁ እኮዳ ቀርቾ ዬሱስባን ሜንትቹት ጎንቹ ዮበኢ ጎንቹንኩ ሜንትቹት ዮበኢ ሄኢ ደንድታበአ። 12 ዳፉንኩስ ሜንትቹት ጎንቺች ቆጨንቶገንከ ጎንቹሁ እለመኖ ሜንትቾቼት። አሞ ሆሩሩንኩ ደገመኖ መገኒቼት። 13 ሀኖ ገጉዕኔን ፍርድዬለ። መትት ሜንትቹት ሻሸ ጣጠቅቱዕናች መገኑ ኡጩ ሀስሰኖሴየንዶ? 14 - 15 ጎንቹ ሙምስ ቄራርስ ሌእሾደ ህኩን እሲ ሳለ እኮጋ ሜንትቹት ሙምሴ ቄራርስት ሌእሶደ ህኩን እሴ አብን እኮጋ መኑ ቆጨሞጉ ገጉንኩስ ሮስሰኖክዕኔበእንዶ? ዳፉንኩስ ሙሙ ሜንትቾ ቦቁሴ ማጠቅቱንተ ኣሰሜሴየረ። 16 ህከንተኔንከ አዪ ኦደሚ ሀሾደ ኔሳሃ እኮ መገኑ አመዕኔ መን ማበራካ ከኒች ዎልት ሮሸት ዮኔበአ። 17 አዕኖኦት ጠጵቴነንተ ጃተ ጌነኖዕኔሪች ህግየን ካዕለኖዕኔረ አስቴኑምቡተኔ ከኒች ዎሮዲን ዮ አዘዙተ ኣሳንክዕኔ ጃተ አን ክዕኔኤተ ገለጠኔትበአ። 18 ዳፉንኩስ ሆራሪችን ብርስ መገኑ አመዕኔ መን ማበርበ ጠጵቴነንተ ጃተ ሜሬሮንተዕኔ አነኖመት ዮገ መጮጬም። ህከን ጠሂችን በከኑስ ገርተ እኮገ አመዕናም። 19 ህከኒ ጠቤኑስ መኑ አዬኤታንዶ መለዕልቱንተ ሜሬሮንተዕኔ ሀገ ፉሌ መኑ ሄኡ ሀስሰኗ። 20 ህከኒ ሜጦማን ጠጵቴነንተ ጃተ እቴነዮንታ ቀርቾ ዬሱስተ ኦዝበአ። 21 ዳፉንኩስ እቴነንተ ጃተ አኑንኩ አኑንኩ ኤዜጨንቺን ገግስ ኦዝተ እተኖተኔ መቱስ ጎሬኮገን ፈአኖ። አሞ ዎሉስ ድምበኖ። 22 እቴኖታ አጌኖታ ምነት ዮዕኔበእንዶ? እንዶ መገኑ አመዕኔ መን ማበረ ገዴነንንዶ? አሞ ሜጡሩ ዮሰበእ መነ ሳልሲሴነንሰንዶ? አቼ አን ክዕኔኤተ መ ዩለ? ከን ጠህተኔ ገለጡክዕኔንዶ? ሆረኒ ገለጣንክዕኔበአ። 23 ቀርቾ ዬሱሲች ኣቄምነ ክዕኔኤንከ ኣሴም ሮሸት ከኒች ዎሮን ዮሃ። ህግሴን ኣሴመስ አንከር ቀርቹ ዬሱሱ ዳቡተ አፍ 24 መገኑ ገለጥኬእ ቢጭ «ዬ እችዬ። ኩን ክዕኔኤተኔ ኣሰሜሃ ማላዕኔ። ካንን ኤስ ቃጊ አስዬ» ዬሰ። 25 ህትጉንተ ኦዜች ዘኪን ኩባየ ኬእሽ «ኩ ኩባይቢ ቄጊንተኤ እሀኗ ሃሮሃ ህድሩ። ህካንን አጌንተ ጃተ ሆረንተ ካን ኤስ ቃጊ አስዬ» ዬሰ። 26 ዳፉንኩስ ተ ዳቡተ እቴነንተነ ከ ኩባይቢ አጌነንተ ጃተ ሆረንተ ቀርቹ ዬሱሱ ፈንቀል ዋለንቀጤች ሬሆስተኔ አዋጅቴነንተ። 27 አዪ ሀስሱምቦጊን ቀርቾ ዬሱስ ኦዝተ እቾዳ ቀርቾ ዬሱስ ኩባይቢ አጎዳ ቀርቾ ዬሱስ ማለሃ ቄግሃ ቡሽሾተኔ ባጢለ እሀኖስ። 28 ህከኒ መቱ መንቹ ህተን ዳቦች እተኖሀኒቺ ህከን ኩባይሀኒች አገኖሀኒቺ ብርስ ገገስ ቆርመቁን። 29 ዳፉንኩስ ቀርቾ ዬሱስ ማል መሆመስ አነነ አስ ደጉዕናች እተኖነ አገኖ ሆሩንኩ ፍርደ እተዮሃኒ አገዮሃኒ። 30 ክዕኔኤ ሜሬሪችን በትናሹ ኬኑ ሆጎኢሁ ሞሶኢሁ ህከኒሃት። አሞ በትናሹሰ ኬኑ ሬቴእ። 31 ገግኔተኔ ቆርምን ደቅኔም እክየን አሌንተኔ ፍርደመኖበአ እኬ። 32 ጠሁ እኮዳ ተን ኡለ አል መኒንን በርገም ኒ አሌኒ ፍርደሙምቦኔገ ቀርቹ ዬሱሱ ኒ አሌን ፍርደኖ ጉዙም ፈንቀሾኔታት። 33 ህከኒ ኢ ህዛከ! ቀርቾ ዬሱስ ኦዝተ እቴኖተ ጠጵቴነንተ ጃተ አዕን-አዕኖኦንት ቆረጰምዬ። 34 ጠጵቴነንታንኩ ፍርዲ እሁምቦገ ጎሬኬኢ ዮደ ምኔንተስ እቱን። ፈኦ ጠሃከተኔ አሱ ሀስሰኖዕኔረ ዋሎም ጃተ ኩላንክዕኔ።
1 ኢ ህዛከ! ጡማንቾ አያን ኣሰንችተኔ ደጌኑንተ ሀሳም። 2 ገሬ መገኑ ደጌኑዕናች ዮንተ ጃተ ደጌኑምቡ ጠሀ አወንቴን ጠሃት ደንድቱምቦ ቆጰን መገነበ መርቴንተገ ደጌነንተ። 3 ህከኒ ቴሱ አዪ መገን አያን መቄን ጠሃቀን «ዬሱሱ ጤሌለሜሃ» ያኖ ሆረን ዮበእጋ ጡማንቾ አያን መቄን እሁምቡች ህግየን «ዬሱሱ ቀርቿ» ዪ ሜጡሁ ደንዱምቦጋ ቆርስቴን ደጌኑንተ ሀሳም። 4 አነኑ አነኑ ጡማንቾ አያን ኣሰንቹ ዮእ። እኮዳ ጡማንቹ አያኑስ ሜጦንት። 5 አሞ አነነት አነነት ሁጅት ዮእ። እኮዳ ቀርቹ ክርስቶሱ ሜጦንት። 6 ህትጉንተ ሁጀቴኖ አነኑ አነኑ ዎቆ ዮእ። ጠሁ እኮዳ ህከ ሆረረንከ ሆራንከ መን ዉዲን ሁጀተኖ ሜጧንከ መገኑ። 7 አኒንከ አኒንከ ጡማንቹ አያኑ መቱረ ጫክሽ ጡድሰኖ ሆሪንከ ካዕለኖ ጠሂሃት። 8 ጡማንቹ አያኑ መቶ መንቺ ቆርማን ጠሃቁ ኣሰኖስ። ህኩ ጡማንቹ አያኑንኩ ዎሊሀንስ መሌሲን ጠሃቁ ኣሰኖስ። 9 አሞ ህኩ ጡማንቹ አያኑንኩ መቲሀንስ አመዕነቱ ዎሊሀንስ ሞሳኑ ፈይሲ ደንደኖ ኣሰንቸ 10 አሞ መቲ ማለሉተ ሁጀቱ ዎሊሀንስ ህራገ ጠሃቁ ህትጉንተ መቲ ገሬነ ቆጰን አያነ አነነ አሴን ደጉ ዎሊሀንስ አነነ አነነ አፌን ጠሃቁ አሞ መቲ አነነ አነነ አፌን ጠሃቄመስረ ሂሪ ደንዱ ኣሰኖ። 11 ጠሁ እኮዳ ህከ ሆረንከ ጠሀ ህኩ ሜጡንኩ ጡማንቹ አያኑ ሀሾገ አኒንከ አኒንከ ቤክ ኣሰኖ። 12 ሜጤየንተ መኖማን በትናሹ ቤለዩ ዮሀንገንካ መሃ በትናሻከተ እኮዳ ሆሩንኩ ቤለዩ ሜጥንተ መኖመተ እኮሀንገንካ ክርስቶሱሁ ህትጎንት። 13 ዳፉንኩስ አይሁደሃ እንኮምደ ግሪክሳን ጠሃናም መነሃ እንኮምደ አግዘታ እንኮምደ ዎማኑታ እንኮምደ ነኦት ሆሩንኩኔ ሜጡ አል እንኮተ ሜጧንከ ጡማንቾ አያኒን ጠመቀሜም። አሞ ሆሩንኩኔ ህከን ሜጧንከ ጡማንቾ አያኒች አንጌም። 14 መኖመት ሁጀተንቶኢ በትናሸ ቤለዪቼት በጋን ሜጦ ቤለዪቼትበአ። 15 ህከኒ ሎከት «አን አንገተ እሁምቡተኔ መኖማ በርጋምቡ ዮኤበአ» ይቶደ ህካን ዪንተሴ መኖማች መትሴ እሁ ፈኣእንዶ? 16 መጨንት «አን እልተ እሁምቡተኔ መኖማ በርጋምቡ ዮኤበአ» ይቶደ ህካን ዪንተሴ መኖማች መትሴ እሁ ፈኣእንዶ? 17 ህከኒ መኖመት ሆረንት እልተ ጠለ እኬ እክየን መጮጩ ሀከኔ ሄአኖ እኬ? አሞ መኖመት ሆረንት መጨተ ጠለ እኬ እክየን ሀንሱሱ ሀከኔ ሄአኖ እኬ? 18 ጠሁ እኮዳ መገኑ ኢቴጊን ቤለየ ሆረንከ መኖማን ሀስሳ መዕኔን ሄአኖገ አሴእ። 19 አሞ ሆሮመንትስ ሜጡ ቤለየ ጠለ እኬ እክየን መኖመት ሀከኔ ሄኣ እኬ? 20 ቴሱ በትናሹ ቤለዩ ሄኦዳ መኖመት ሜጤት። 21 ህከኒ እልት አንገተ «ሀሳንኬበአ» ዪ ደንድታበአ። ቦቁንት ሎከተ «ሀሳንኬበአ» ዪ ደንድታበአ። 22 ጠሁ እኮዳ መኖማን ሆግመ አጉደኖስ ቤለዩ አብሽ ሀስሰኗ። 23 አሞ አሌንተኔ አብኑሰ ቀሁ አጉደኖኔ ቤለያካ አበስ አብን ኣስናንሰ። ህትጉንተ ጡደንቱምቦገ ሳናም ቤለያከኔን አበ አብኒን ቆረምባንሰ። 24 - 25 እኮዳ አብኑ ዮሰ ቤለያካሀኔ ህኩን ሀስሰኖሰበአ። ጠሁ እኮዳ ቤለዩ እስ-እሲንን ካዕለቀሙንተ በጋን መኖመ ኣዜን አነኖመት ሄኡምቦገ ቀንስ ቤለዪ በትናሸ አብን ኣሲን መገኑ መኖመ ቤለያከተ ሜጡ አስ መክሼእ። 26 ህከኒ ቤለዪች መቱስ ሀወኖ ጃተ ሆሩንኩ ቤለዩ ሜጡ እክ ሀወኖ። አሞ መቱ ቤለዩ አበኖ ጃተ ሆሩንኩ ቤለዩ ሜጦማን በጅቀመኖ። 27 አቼ አዕኖኦት ክርስቶስተ መኖመ። አኑንኩኔ አኑንኩኔ ህተን መኖማ ቤለየ። 28 አሞ መገኑ ዎና ሶቀማኑ ለንኪ ህራጋኑ ሰኪ ሮስሳኑ ህከኒች ዘኪን ማለሉተ ሁጀታ መነ ህከኒች ዘኪን ሞሳኑ ፈይሳ መነ ህከኒች ዘኪን መኒ ካዕልታ መነ ህከኒች ዘኪን ገሽታ መነ ህከኒች ዘኪን አነነ አነነ አፌን ጠሃታ መነ አመዕናን ማበር ኣዜን ኡርሼእ። 29 እሶኦት ሆሩንኩሰ ሶቀማኗንዶ? አሞ ሆሩንኩሰ ህራጋኗንዶ? ህትጉንተ ሆሩንኩሰ ሮስሳኗንዶ? አሞ ሆሩንኩሰ ማለሉተ ሁጀታሃረንዶ? 30 ህትጉንተ ሆሪንከሰ ሞሳኑ ፈይሳ ኣሰንቹ ዮሳረንዶ? አሞ ሆሩንኩሰ አነነ አነነ አፌን ጠሃታሃረንዶ? አነነ አነነ አፌን ጠሃቄመሲ ሆሩንኩሰ ሂሪ ደንድታሃረንዶ? 31 ጠሁ እኮዳ አዕኖኦት ሆሪችን አበኖስ ኣሰንቸ ደቅቴኖተ ቃረገ ቁልጥዬ። አሞ አን ሆሪችን ዎየኖ ዎቃ ጡድሳንክዕኔ።
1 መንነ መገን ሰሜ ሶቀማን አፌን ጠሃቄምዳ ኢተት ዮኤበእደ ቡሴኖ መላትገ እንዶ ዎደኖ ዶልገ እኬም። 2 ህከኒ ህራጋም መቆ ሄኦኤደ፥ ማጠሞ ጠሀ ሆረንከ ደጎምደ፥ መሌሱ ሆሩንኩ ሄኦኤዳ ዱኑ መዕኔችስ ኬእ ዎሉበ ኦሮቀኖገ አሳም አመዕነቱ ሄኦኤዳ ኢተት ዮኤበእደ አን ጠለላ። 3 አሞ ዮኤረ ሆረንከ ቡጢ ቤኮምዳ መኖመኤን ጊረ ቡቡንተ ህግሽ ኣሴምዳ ኢተት ዮኤበእደ ሜጡራ ካዕለኖኤበአ። 4 ኢተት እየቅታእ። ኢተት በሬደተ። ኢተት ቂንሽታበአ። ኢተት ዮሴራን ድከኣበአ። ቦልጥታበእን። 5 ኢተት ፈረገ እካበአ። ኢተት ገጊሀንሴ ጠሊ ይታበአ። ኢተት ዮርታበአ። በእሴመረ ዎልሳበአ። 6 ኢተት ገሬ በጅቀንታ በጋን ሂለ ጠሃን በጅቀንታበአ። 7 ኢተት ሆረንከ ጠሀ ደንዴቅታእ። ኢተት ሆረረንከ አመዕንታእ። ኢተት ሆረረንከ ተሴን ቆረባእ። ኢተት ሆራንከ ጠሃን ቃርት ሄኣእ። 8 ኢተት ሆረን በኣበአ። ህራገ እኮደን ህገኖ። አነነ አነነ አፌን ጠሃቁንኩ ፈአኖ። መሌሱ እኮደን ህገኖ። 9 ዳፉንኩስ ነኦት ደንጋሚሁ ህራንጋሚሁ በከንየንስ። 10 ጠሁ እኮዳ ዊመ እኮ ጠሁ ዋሎ ጃተ በከን እኮስ ጠሁ ህገኖ። 11 ጪለ ዮም ጃተ ጪልገን ጠሃቃም፥ ሰውያምኒ ቆርሳምኒ እኬ። ቴሱ ኦሶመኑኤ ጦጴም ጃተ ጪልነትኤ ጠሀ ሆረንከ አጉሮም። 12 ዳፉንኩስ ቴሱ ገግሞጢን ጡዴኖሀንገ ህሺሸ ጡንዳም። ጠሁ እኮዳ ህተ ጃተ እልተ እሌንን ጡንዳም። ቴሱ አን ደጋሚ በከንየንስ። እኮዳ ህተ ጃተ መገኑ ኤስ ደጎኤ ቀጠንከ ዊሙ ደጉ ሄአኖኤ። 13 ህከኒ አመዕነቱ፥ ኢተቲ ተሶሁ ኩ ሰሱንኩ ቃርት ሄኣእ። ጠሁ እኮዳ ኢተት ህከሮኦችሲ አብታእ።
1 ኢተተ አወንዬ። አሞ ጡማንቾ አያን ኣሰንቸ ደቂ ቃረገ ሀሽዬ። ባሰንከስ ህራገ ጠሃቂ ደንዴኖ ኣሰንቸ ሀሽዬ። 2 ዳፉንኩስ አነነ አነነ አፌን ጠሃቀኖ መንቹ መገኒች ህግየን መኒ ጠሃቀኖበአ። እስን ጡማንቾ አያኒን ማጠሞ ጠሀ ጠሃቀኖተኔ ጠሃቀኖስረ ደገኖ ዮበአ። 3 ጠሁ እኮዳ ህራገኖ መንቹ አቦዮሰተ፥ ሰዞሰታ ቃርሶሰታ መኒ ጠሃቀኖ። 4 ህከኒ አነነ አነነ አፌን ጠሃቀኖ መንቹ ገገስ አቦየቀኖ። ጠሁ እኮዳ ህራገኖ መንቹ አመዕናን ማበረ አቦየኖ። 5 አሞ ሆሩንኩዕኔ አነነ አነነ አፌን ጠሃቴንተ እክየን ኢታም እኬ። እኮዳ አብሽ ሀሳሚ ህራጌኑንታት። ዳፉንኩስ አመዕናን ማበሩ አቦየሙንተ ጠሃቄስረ ሂር ኩለኖ ዮበኢች አነነ አነነ አፌን ጠሃቀኖሀኒች ህራገኖ አበኖ። 6 አቼ ኢ ህዛከ! ክዕኔኤበ ዋሎም ጃተ መገኑ ሀሰኖረ ጫክሽ ኩሊን እንዶ ቆርመታ ህራገሃ ጠሃቂን እንዶ ሮስሲን ኩሉምቦዕኔች ህግየን አነነ አነነ አፌን ጠሃቄንክዕኔደ መ ካዕለኖዕኔ? 7 ዎሉ ፈእየን ገምባብይጋ ዲትጋ ዮ ፎሉ ዮበእ ኦዳታ እኮደ ላገሰ አነነ እክ ለልቱምቦች ገምባብይ ላገተ እሁሲ ዲት ላገተ እሁሲ ሚን ደጌኖ? 8 አሞ መላት ሮሰንቱምቦ ላጋን ቡሴመደ ኦሊ መሪ ቅጠመኖ አዬት? 9 አዕኖኦቲ ህትጎንት። ህከኒ አነነ አነነ አፌን መኒ ኣጉምቦገ ጠሃቴንተደ ቦብሪ ጠሃቴነንተሀንገ እኬነንተ በጋን ጠሃቴንተስረ አይ ቆርሲ ደንደኖ? 10 ተን ኡለ አሌን አነኑ አነኑ በትናሹ አፎ ዮእ። ጠሁ እኮዳ ሂረቱት ዮበእ አፎ ዮበአ። 11 አቼ መቱ መንቹ ጠሃቀኖ አፌ ሂረቱተ ደጉምቦች አን ጠሃቃንቺሀንስ ኮህቹ እሃም። እስን ኤሳ ኮህቹ እሀኖ። 12 አዕኖኦቲ ህትጎንት። ህከኒ ጡማንቾ አያን ኣሰንቸ ሀሴነንተረ እኬንታች አመዕናን ማበረ አቦዪ ደንድቴነንተ ኣሰንቸ አብሴን ሀሽዬ። 13 ህከኒ አነነ አነነ አፌን ጠሃቀኖ መንቹ ጠሃቀኖስረ ሂር ኩሊ ደንደኖ መቆ ደቆተ መገኑ ኡጩን። 14 ዳፉንኩስ አነነ አነነ አፌን መገኑ ኡጬምደ ዎዘኑኤ መገኑ ኡጨኖ። ሰውታንተኤ ላሉተ እሀኖሩ ሜጡሩ ሄአኖበአ። 15 አቼ አሱ ሀስሰኖኤሩ መሃን? ዎዘኒንተኤ መገኑ ኡጨን ሰውቲንተኤ መገኑ ኡጫም። ህትጉንተ ዎዘኒንተኤ ዘመረን ሰውቲንተኤ ዘመራም። 16 ህካን እሁምቦች አት ዎዘናንተክ መገኑ ገለጥቶንትደ መቱ ኮህቹ መንቹ ይቶንትስረ ደጉምቡተኔ አት መገኑ ገለጥቶንትሀኒ ሀትክ «አሚዕን» ያኖ? 17 ዳፉንኩስ አት መገኑ ገለጥቶንትስጉ በሬዳ እኬ። እኮዳ ህኩን ዎሉስ መንቹ ቃርሰኖበአ። 18 ሆሪችዕኔን አበ አነነ አነነ አፌን ጠሃቃምተኔ መገኑ ገለጣም። 19 ጠሁ እኮዳ አነነ አነነ አፌን ቶርዱሜ ኩሜ ላገተ ጠሃቂች ዎሉ መነ ሮስሲ ደገመኖ አፌን አመዕናን ማበርባን ኦንትተ ላገተ ጠሃቁ ኢታም። 20 ኢ ህዛከ! ሂለ ጠሂ ጪላከተ እክዬ በጋን ሰውቲንተክዕኔ ጪላከተ እኬኖችዬ። ጠሁ እኮዳ ሰውቲንተክዕኔ አንጀ ቁርጨቴንተራ እክዬ። 21 ሴራን «ቀርቹ መገኑ ‹አን ከን መኒ አነነ አነነ አፌን ጠሃታ መን ዉዲኒ ዎሎ ባድ መን አፌኒ ጠሃቄንሰዳ መጮታኤበአ› ዬእ» የመም ጣፈሜእ። 22 አቼ አነነ አነነ አፌን ጠሃቁ መላተ እሀኖ አመዕኑምቡ መኒሃት በጋን አመዕኔ መኒሃበአ። ጠሁ እኮዳ ህራገ ጠሃቁ አመዕናኒሃት በጋን አመዕኑምቡ መኒሃበአ። 23 አቼ አመዕናን ማበሩ ሆሩንኩ ጠጵኬእ ሆሩንኩ አነነ አነነ አፌን ጠሃቀዮሀኔን ደጉምቡ እንዶ አመዕኑምቡ መኑ ኣጎደ «ኩ መኑ መቻርቴእ» ያኖዕኔበእንዶ? 24 ጠሁ እኮዳ ሆሩንኩሰ ህራገዮሀኔን ደጉምቡ እንዶ አመዕኑምቡ መንቹ ኣጎደ ባጢላሙ እሁስ አመዕነኖኒ መጮጬ ላገት ሆረንት ዎቀሳስኒ። 25 ዎዘናንተስ ዮ ማጠሞ ጠሁንኩ ለለኖ። ህከኒ ህኩ መንቹ ኡለ ኡብ «ገርንተ መገኑ ክዕኔኤ ሜሬሮን ዮእ» ያን መገኒ ሰገደኖ። 26 ኢ ህዛከ! አቼ መ ይናም? አዕኖኦት ጠጵቴነንተ ጃተ አኒንከ አኒንከ መዝሙሩ ዮሲ ዮእ። ሮስሰኖሩ ዮሲ ዮእ። መገኑ መቱረ ጫክሽ ኩሌሲ ዮእ። አነነ አነነ አፌን ጠሃቀኖ ዮእ። አነነ አነነ አፌን ጠሃቄማ ሂረኖ ዮእ። እኮዳ ህኩ ሆሩንኩ አመዕናኑ አቦዪ እሁን። 27 አሞ አነነ አነነ አፌን ጠሃቀኖ ሄኦደ ለሚ እንዶ በተኦደ ሰሲ እክኬእ ኮዳን ኮዳን ጠሃቱን። ህከስን መቱ መንቹ ሂር መኒ ኩሉን። 28 ጠሁ እኮዳ ሂር ኩሊ ደንደኖ መንቹ ዮበእደ አነነ አነነ አፌን አመዕናን ማበርባን ጠሃቱንከ። ህከን ቆደ ገጊሀንሳ መገኒሃ ጠሃቱን። 29 ህራጋኑንኩ ለሙ እንዶ ሰሱ እክ ጠሃቱን። ዎሉስ መኑንኩ ጠሃቀሞስ ጠሀ ቆርምት አነነ አስት ደጉን። 30 ጠሁ እኮዳ አፉዕሌ መኒች መቲሀንስ መቱሩ ጫክ ለሌስደ ዎና ጠሃቀኖሲ ሰዕምዩን። 31 መኑ ሆሩንኩ ሮሱንታ ቃሩንታ ሆሩንኩዕኔ ኮዳን ኮዳን ህራጊ ደንድቴነንተ። 32 አሞ ህራጋን አያኑ ህራጋኒ አዘዘመኖ። 33 ዳፉንኩስ መገኑ ጡምየ መገኑ በጋን ደምበቅየ መገኑበአ። መገኑ አመዕኔ መን ማበርባን ሆርባንን እሀኖገንከ 34 ሜንቱ አመዕናን ማበር ኣዜን ጠሃቱንከ። ዳፉንኩስ ሴራኒ የመሞገንከ እሶኦት አዘዘሚች ህግየን ጠሃቂ ደንድታበአ። 35 ህከኒ መትት ሜንትቹት አመዕናን ማበር ሜሬሮን ጠሃቁ ፎኩተ እኮተኔ ሜንቱ ደጊ ሀሳሩ ሄኦደ ምኔነሰ ምኔ ጠዕምቱን። 36 አሞ መገን ላገት ኬኦኢ ክዕኔኤቢቼትንዶ? እንዶ መገን ላገት ኢልቶኢ ክዕኔኤሃበ ጠለንዶ? 37 አዪ «አን ህራጋንቿ» ያኖ እንዶ «ኤሳ ጡማንቾ አያን ኣሰንቹ ዮኤየ» ያኖ ሄኦደ ኩ ጣፎንክዕኔ ቀርቾ ዬሱስ አዘዙተ እኮገ ደጉን። 38 ጠሁ እኮዳ አዪ ካን ደጉምቦደ ደጉንከ። 39 ህከኒ ኢ ህዛከ! ህራገ ጠሃቂ ቃረገ ሀሽዬ። አሞ አነነ አነነ ላጋን ጠሃቁሃ ከንቴኖችዬ። 40 ጠሁ እኮዳ ሆሩንኩ ጠሁ አጉደኖጊኒ ዎጊኒ እሁን።
1 ኢ ህዛከ! አዕኖኦት አን ሰበክየንክዕኔ ኣቅቴን ቃርቴን ኡርቴንተ ምሽራች ላገተ ቃግሶክዕኔተ ሀሳም። 2 ህተ ምሽራች ላገንተ ቃርስቴን አፌንተደ ህተን ላገ ዉዲንን ፈኤነንተ። ህኩን ዮበኢች አመዕነቱዕኔ ጠለላንከ። 3 ሆራሪችን አብሽ ሀስሰኖ ጠሀ አንን ኣቄሚ ክዕኔኤ ህግሽ ኣሴም። ህኩስን ጡማንቾ መጣፋን የመሞገንከ ክርስቶሱ ባጢልኔተኔ ሬሄእ፥ 4 ሞገሞኒ ጡማንቾ መጣፋን ጣፈሞገንከ ሰክ በር ሬሆች ኬኦኒ። 5 እስን ጴጥሮሴ ጡደሞ። ህከኒች ዘኪንን ቶነ ለሟንከ አወናኒ ጡደሞ። 6 አሞ ኦንቴ ጥቤች አብታ አመዕናኒ ሜጥንተ ኮደተ ለሌእ። እሶኦችን መ-መቱሰ ሬቶዳ በትናሹሰ ኬኑ ቴሶ ኢለንቀጤች ፎሌን ዮእ። 7 ህትጉንተ ዬሱሱ ያቆቤ ጡደሞ። ዘኮን ሆራንከ ሶቀማኒ ጡደሞ። 8 ሆሪችን ዘኪን ከረ እኮም ኤሳሃ ጡደሞ። 9 ዳፉንኩስ መገኑ አመዕኔ መን ማበረ ሸረን ሀውሼሚ እኮምተኔ አን ሶቀማኒች ሆሪችን ኮታምየኒ ሶቀማንቹ የመም ገአሙንኩ ሀስሱምቦኤየኒ። 10 ጠሁ እኮዳ አን ቴሱ ዮምገ እኮሚ መገን ኣሰንቺኔት። አሞ ህኩ ኣሰሞኤ ኣሰንቹንኩ ላሉት ዮበኢ እህምበአ። አንን ዎሎ መኒች ሆሪችን አበ ሁጀቼም። ጠሁ እኮዳ ሁጀቾሲ ኤሳን ዮሃ መገንየ ኣሰንቸ በጋን አኔትበአ። 11 አቼ አኒ እኮም እሶኦት ሰበንካሚ ከኔንት። አዕኖኦቲ አመዕንቴንታ ከኔንት። 12 አቼ ክርስቶሱ ሬሆች ኬኦጉ ሰበከመኖ እኮች ሀትጉመ ክዕኔኤች መ-መቱ «ሬቶሩ ሬሆች ኬኡ ዮበአ» ይተዮእ? 13 ሬቶሩ ሬሆች ኬኡ ዮበኢ እኮች ክርስቶሱ ሬሆች ኬእምበበለ! 14 አሞ ክርስቶሱ ሬሆች ኬኡምቦች ኒ ሰበኩሁ ክዕኔኤ አመዕነቱሁ ጠለላ ዩሃበለ! 15 ህከኒችን አበ «መገኑ ክርስቶሰ ሬሆች ኬእሼእ» ይን እስተኔ ነቀንሶምተኔ መገኒ ቆጰን ነቃሻከተ እንኬም ዩሃበለ! ጠሁ እኮዳ ሬቶ መኑ ሬሆች ኬኡምቡረ እኮኢች መገኑ ክርስቶሰ ገርንተ ሬሆች ኬእስምበአ ዩሀ። 16 ዳፉንኩስ ሬቶ መኑ ሬሆች ኬኡምቡረ እኮኢች ክርስቶሱሁ ሬሆች ኬእምበአ ዩሃበለ! 17 አሞ ክርስቶሱ ሬሆች ኬኡምቦች አመዕነቱዕኔ ላሉት ዮበኢ እኬእኒ አዕኖኦንት ተደ ኢለንቀጤችን ባጢሊንተዕኔን ዮንተኒ ዩሀ። 18 አቼ ክርስቶሰ አመዕንት ሬቶሩ በኤእ ዩሃበለ! 19 ነኦንት ክርስቶሳን ተሳ አስናሚ ተን ኡለ አል ሄቻ ጠሊ እኮደዕኑ መኒች ሆሪችን አብሴን ቅሽጤኖኔገ ዮምየረ ዩሃበለ! 20 ጠሁ እኮደ ክርስቶሱ ሬቶ ኬኒች ዎነቢ እክ ገርንተ ሬሆች ኬኤእ። 21 ዳፉንኩስ ሬሁት መቶ መንች ዉዲን ዋልቶገንከ ሬቶሩ ሬሆች ኬኡሁ መቶ መንች ዉዲን ዋሎ። 22 መኑ ሆሩንኩ አዳሜ ዳፊን ሬሀኖገንከ ክርስቶስ ዳፊን መኑ ሆሩንኩ ሄቸተ ደቀኖ። 23 ጠሁ እኮዳ አኑንኩ አኑንኩ ገግስ ገግስ ኮዳን ዋለኖ። ክርስቶሱ ሬሆች ኬኢን ዎና። አሞ ዘኪን ክርስቶሱ ዋሎ ጃተ እስረ እኮ መኑ ሬሆች ኬአኖ። 24 ክርስቶሱንኩ ገሹ ሆረንከ፥ ዳኖመተ ሆረንታ መቆ ሆረንካ በእሾሀኒች ዘኪን ዎሞመተ አና መገኒ ህግሽ ኣሰኖ ጃተ ዶል ጎፉ እሀኖ። 25 ዳፉንኩስ መገኑ ዲናከስ ሎካችስ ዎሮዲን አሰኖ ኢለንቀጤች ክርስቶሱ ዎሞዕሙ ሀስሰኖስ። 26 ዘካንቾን በኡ ሀስሰኖስ ዲኑንኩ ሬሁተ። 27 አሞ «መገኑ ሆረረንከ ሎካችስ ዎሮዲን አሴእ» ያኖ ጃተ ህከ ሆረንከ ጠሀ ክርስቶስ ሎካች ዎሮዲን አሴ መገኑ ጠሉ ፈአንየን እኮጉ ለሌሃ። 28 ሆሩሩንኩ ዬሱሲ ጠቀሞሀኒች ዘኪን መገኑ ሆረረንከ ጠቀኖ እሁንተ ህተ ጃተ ቤቱ ገጉንኩስ ሆረረንከ ጠቀኖገ አሴስ መገኒ ጠቀመኖ። 29 ህካን እሁምቡች ሬሄ መን ቆደ ጠመቀመኖ መኑ መቤ አሰዮኢ? አሞ ሬሄ መኑ ሆረን ሬሆች ኬኡምቡ እኮች መኑ እሶኦ ቆደ ጠመቀመዮኢ ሚሃት? 30 ነኦት ገጉንኩኔ ሆረንተ ጃተ ሀውነን ሄዕናሚ ሚሃት? 31 ኢ ህዛከ! አን በሪን በሪን ሬሃም። አንን ህካን ያዮሚ ቀርቿኔ ዬሱስ ክርስቶስ ዉዲን ክዕኔኤን ዮኤ አመዕነትጊኔት። 32 አሞ አን ኤፌሶን ከተማን ሞቺን ኡጀቀሞሚ ማል ጠሂ እኮደ መ ካዕለኖኤ? ህትጉንተ ሬቶ መኑ ሬሆች ኬኡምቡረ እኮች «ገኣተ ሬናምተኔ ከበር እንቱኒ አንጉኒ» የመሞሀንገ እበለ! 33 አዕኖኦት ሉሴኖችዬ። «ሂለት ጃሎመት ደናሙ ሀለ በእሳእ» የመሜእ። 34 አቼ ዎዘዕንዬ። ባጢለ ሁጀቱ አጉርዬ። መገኑ ደጉምቡ መኑ ሜሬሮንተዕኔ ዮእ። አንን ህካን ያዮሚ ሳልሲሶዕኔተ ይኔት። 35 መቱ መንቹ «ሬቶ መኑ ኬኣኢ ሀትጉተ እኬት? አሞ ሀትጎነ ማለ ኦደቅቴት ኬኣኢ?» ይ ጠዕመኖ እሀኖ። 36 አት ኩ ቀሉ መንቹ! አት ውጣንት ውጠት ሸንቱምቦች ሙታበአ። 37 አትን ውጣንት አለስ እንዶ ዎሎሪ ዜሬቱ ዘኮ ሌአኖስ ሙተ አጉደኖበአ። 38 ጠሁ እኮዳ መገኑ ኢተኖጊን ህከ ዜሬተ ውጠተ አሰኖስ። አሞ ዜሬተ ሆረንከ ገገስን አጉዳ ውጠተ አሰኖስ። 39 ዳፉንኩስ ማሉ ሆሩንኩ ሜጦ ሀገረበአ። እኮዳ መን ማሉ መቶ ሀገረ። ግዝ ማሉንኩ ዎሎ ሀገረ። አሞ ጪአ ማሉ አነና ሀገረ። ቁርጡሜመ ማሉንኩ ዎሎ ሀገረ። 40 ህትጉንተ ሰሜ መኖመት ዮእ። ኡለ መኖመንት ዮእ። እኮዳ ሰሜ መኖመ አብኑ መቶ ሀገረ። አሞ ኡለ መኖመ አብኑ ዎሎ ሀገረ። 41 አሞ አሪቾ አብኑ መቶ ሀገረ። አገንች አብኑ ዎሎንት። ቤዜ አብኑንኩ ዎሎት። ዳፉንኩስ መቴስ ቤዜቾ አብኑ ዎሌስሀኒች አነና። 42 ሬቶ መኑ ሬሆች ኬኣጉ ህትጎኔንት። ውጠንቶስ መኖመት በኣታ። ሬሆች ኬኣስ መኖመት በኡምቡተ። 43 ህትስን ቢልማን ውጠንት አብኒን ኬኣእ። ህትጉንተ ሆንጌን ውጠንት ቃርማን ኬኣእ። 44 አሞ ማል መኖማን ውጠንት መገን ዉድ መኖማን ኬኣእ። ማል መኖመት ሄኦኢች መገን ዉድ መኖመቲ ዮእ። 45 ህከኒ «ዎነ መንቹ አዳም ሄአኖ ቆጨንቸ እኮ» የመም ጣፈሜእ። እኮዳ ዘክ አዳም ሄቸተ ኣሰኖ አያነ እኮ። 46 ጠሁ እኮዳ ዎና ዋሎሲ ማል ዉድየ መንቹ በጋን መገን ዉድየ መንቹበአ። ማል ዉድ መንቺች ዘኪን መገን ዉድ መንቹ ዋሎ። 47 ዎነስ መንቹ ቆጨሞ ኡለ ቡቺች እኮተኔ ኡላንከ። እኮዳ ለንክስ መንቹ ዋሎ ሰሜቼት። 48 ህከኒ ኡላች እኮ መኑ ኡላች ቆጨሞ መንችየገንከ። ህትጉንተ ሰሜች እኮ መኑ ሰሜች ዋሎሀንየገንከ። 49 ነኦንት ኡለ ቡቺች ቆጨሞ መንች ሀገረ አጉንዶምገንከ ሰሜች ዋሎ መንች ሀገረሃ አጉንዳም። 50 ኢ ህዛከ! መቱረ ኩላንክዕኔ። ማሉሁ ቄጉሁ መገን ዎሞመተ ረገኢ ደንደኖበአ። ህትጉንተ ሸመኖ ማሉ ሸሙምቡ ማለ ረገኢ ደንደኖበአ። 51 - 52 አቼ መቱ ማጠሜ ጠሀ ኩላንክዕኔ። ሆሩንኩኔ ሬናምበአ። ጠሁ እኮዳ ዘካንች ጡሩምቡሉ ቡሰሞ ጃተ ሆሩንኩኔ ቱ ዬመ አንጅቹ ሞሉዕናችን ሰርብንን ዶረማም። መላቱ ቡሰመኖ። ሬቶሩንኩ በኡምቡረ እክ ሬሆች ኬኣእ። ነኦንት ዶረማም። 53 ዳፉንኩስ ኩ ሸመኖ ማሉ ሸሙምቡ ኦደቁ አሞ ኩ ሬሀኖ ማሉ ሬሁምቡ ኦደቁ ሀስሰኖስ። 54 ኩ በአኖ ማሉ በኡምቡ ኦደቄ ጃተ አሞ ኩ ሬሀኖ ማሉ ሬሁምቡ ኦደቄ ጃተ «ሬሁት ቄለንት ቁርጭይቶእ» የመም ጣፈሞ ዊመኖ። 55 አሞ «ሬሆ! ቄሉክ ሀከኔ ዮእ? ሬሆ! ጥምዛንትስ መቆ ሀከኔ ዮእ?» የመሜእ። 56 ሬሆ ጥምዙንኩ ባጢላ። ባጢል መቆንኩ ሴራ። 57 ጠሁ እኮዳ ቀርቿኔ ዬሱስ ክርስቶስ ዉዲን ቄሉ ኣሰኖኔ መገኑ ገለጠሙን። 58 ህከኒ ኢተንቴንተ ኢ ህዛከ! ቃርቴን ኡርዬ። ቀርቾ ዬሱሲ ሁጀቴነንተ ሁጅት ጠለለተ እኩምቦገ ደጌነንተተኔ ሌንቄቅቴኑዕናች ቀርቾ ዬሱስ ሁጅተ ሆረንተ ጃተ ሁጀችዬ።
1 ጡማኒ ካዕሌኖ ግዘ ጠጰእተኔ ገላትይ ባዶን ዮ አመዕናን ማበራካ ኩሎንሰገንከ አዕኖኦቲ ህትጉንተ አስዬ። 2 ህኩ ግዘ ጠጰኡንኩ አን ዋሎም ጄቹተ እሁምቦገ አኑንኩ አኑንኩ ደቅቴነንተሪች መቆዕኔ ደንዴ ቀጠ ሆረንተ ጃተ ሄዜት ዎነ በር አነነ አስቴነን አፉሽዬ። 3 አንን ዋሎም ጃተ አዕኖኦት አመዕንቴነንተ መኑ ህከ ጠጰቴንተ ግዘ ዬሩሳሌመ መስቱንተ ደዳቤተ ጣፍ ኣስ ሶሃንሰ። 4 አይደጎ አኒ ዬሩሳሌመ መሩ ሀስሰኖ እኮደ እሶኦት ኤሳንን በርገንት መርታእ። 5 መቄዶን ባድ ዉዲን ህጎተ ሰውዬምተኔ ህከኒን ህጋም ዎቃንከ ክዕኔኤተ ጡዶተ ዋላም። 6 አንን ሀከበሃ መሮምደ ዎቄሃዕኔ ሽንቅተ ኣስቴኑንተኤ አይደጎ ክዕኔኤባን ቀሁንከ አፉዕላሚ እሀኖ። አሞ መጦንከስ ክዕኔኤባን አፉዕላሚ እሀኖ። 7 ህከኒ ቴሱ ጠል ህጋም ዎቄን ጡዶዕኔተ ሀሳምበአ። መገኑ ዬደ ክዕኔኤን በርገም ቀሁንከ ኤጌሮተ ተሳ አሳም። 8 ጠሁ እኮዳ ሻሽጊች ዘኪን ኦንታዱንቅ በር አብሴኖ አያኑ ኢለንቀጤች ኤፌሶን ከተማን ኤጌራም። 9 ዳፉንኩስ ሆለመት ሁጅት ዮ ሀራረት ኡሩት ፈነንቴኤ። እኮዳ ኤሳን ኡርጨመኖ መኑ በትናሻ። 10 ጥማቶስ ዋሎ ጃተ ዋጁዕናች ሜሬሮንተዕኔ አፉዕለኖገ አስዬስ። ዳፉንኩስ እሲ ኢገንከ ቀርቾ ዬሱስ ሁጅተ ሁጀተዮሃ። 11 ህከኒ አዪ ገዱንከስ። እኮዳ አመዕናኒንን በርገም ቆረበዮምተኔ ኢበ ጡሚን ፈንቀሉንተ ዎቄሀንስ ሽንቅተ ኣስቴን ህርሲሽዬስ። 12 ህዞኔ አጵሎስ ዎሎ አመዕናኒንን በርገም ክዕኔኤበ መሩንተ አብሽ ኡጬንስ እኬ። እኮዳ እስ ቴሱ ክዕኔኤበ ዋሊ ሀስምበአ። መኬስ ጃተ ክዕኔኤበ ዋለኖ። 13 በቅቴንተረ እክዬ። አመዕነቶንተዕኔ ቃርቴን ኡርዬ። ቆጠርዬ። ቃርዬ። 14 አሞ አስቴነንተረ ሆረንከ ኢታን አስዬ። 15 ኢ ህዛከ! አካይ ባዶን ብርስት መገኑ አመዕንቶሩ እስጥፋኖሴ ምን መነ እኮጋ እሶኦንት አመዕናኑ ካዕልቶተ ገገሰ ህግስ ኣስቶጋ ደጌነንተ። 16 ህከን መንገ ዮ መኒሃ እሶኦንን በርገንት ሁጀተን ኦርበኣ መኒሃ ሆሪንከ አዘዘንቴነንተገ ኡጫንክዕኔ። 17 አንን እስጥፋኖስ፥ ፈርዶናጢሲ አካይቆሲ ኢበ ዋልቶ ጃተ አዕኖኦት ኢባን ዮንተበእተኔ ክዕኔኤ ቆደ እሶኦተ ጡጅ አብሽ በጅቀሜም። 18 አሞ እሶኦት ኢነ ክዕኔኤ ዎዘነ ፎሎጭሴሃረ። ህከኒ ህትጎነ መነ መሌሱ ሀስሰኖክዕኔ። 19 እስይ ባዶን ዮ አመዕናን ማበራከት «ጡመ ዮንተንዶ?» ይተዮክዕኔ። አሞ አቅሊ ጵርስቅሊ ምኔንተሰ ጠጵያኖ አመዕናን ማበሪንን በርገንት ቀርቾ ዬሱስ ሱዕሚን አብስ «ጡመ ዮንተንዶ?» ይተዮዕኔ። 20 አሞ አመዕናኑ ሆሩንኩ «ጡመ ዮንተንዶ?» ይቴዕኔ። አዕን-አዕኖኦንት አመዕናኒ አጉደኖ ሱንቀንቺን ጡምጨምዬ። 21 አን ጳዉሎስ ከ ጡመ ገግኤ አንጋን ጣፌም። 22 ቀርቹ ዬሱስ ክርስቶሰ ኢቱምቡ ሄኦደ ጤሌለሜኢ እሁን። ኒ ቀርቾ! ዋል። 23 ቀርቾ ዬሱስ ኣሰንቹ ክዕኔኤን በርገም እሁን። 24 ኢ ኢተት ዬሱስ ክርስቶስ ዉዲን ሆሪንተዕኔን በርገንት እኩን፤ አሚዕን።
1 መገን ሰውቲን ዬሱስ ክርስቶስ ሶቀማንቹ እኮም አን ጳዉሎሲ ህዞኔ ጥማቶሲ መገኑ አመዕኔ መን ማበሪ ቆሮንቶስ ከተማን ዮሀኒሃ አካይ ባዶን ሆራንን ዮ ጡማኒሃ ሶንኬምተ ሶህኑ። 2 አናኔ መገኒቺ ቀርቾ ዬሱስ ክርስቶሲቺ ኣሰንቹሁ ጡሙሁ ክዕኔኤን እሁን። 3 ቅሽጢ አነ እኮነ ቃርማ ሆሪንከ መገኑ እኮ ቀርቿኔ ዬሱስ ክርስቶስ አኑ መገኑ ገለጠሜኢ እሁን። 4 ነኦንት መገኒች ኣቅኖም ቃርማን መ ሀው ኣዜኒ ዮ ኬኑ ቃርሲ ደንድኑንተ መገኑ ኔስ ሀዋንተኔ ሆራንን ቃርሰኖኔ። 5 ዳፉንኩስ ክርስቶስ ሀወ በትንስ ቤቀማምገንከ ቃርመታ ክርስቶስ ዉዲን በትንስ ደቅናም። 6 አሞ ነኦት ሀወ ኣቅኖምደ ህኩን አዕኖኦት ቃርቴኑንታቲ ፈኤኑንታቲ። ህትጉንተ ነኦት ቃኖምደ ህኩን ነኦት ኣቅኖም ሀወ እየቂን ኣቅቴን ቃርቴኑንታት። 7 ህከኒ ኒ ሀወ ቤቀንቴንተገንከ ቃርመኔ ቤቀንቴነንተገ ደንጋምተኔ ክዕኔኤ አሌን ዮ ተሶኔ ቃራ። 8 ኢ ህዛከ! እስይ ባዶን ኢሌኔ ሀወ ደጌኑንተ ሀንሳም። ህኩስን ዎሉ ፈእየን ሄዕኖተ ዮኔ ተሳ ሙናሚ ኢለንቀጤች እየቂ ደንድኑምቡ ቀጠ አብሽ ኬዕማሻ እኬ። 9 ገርንተ ነኦንት ሬሁት አሌንተኔ ፍርደንቶሀንገ አስን ዎዘናንተኔ ሰውኔም እኬ። እኮዳ ህኩ ሆሩንኩ ጠሁ አሌንተኔ ኢሌኢ ሬቶ መነ ሬሆች ኬእሰኖ መገኖን ድከኢች ህግየን ገጋንተኔ ድከዕኑምቦጊሃት። 10 መገኑንኩ ሬሆገ ዮ ህትጎነ ሀዊች ፈእሾኔ። ቴሱ ፈእሰኖኔ። አሞ ከ ዘኩሃ ፈእሰኖኔገ መገኖን ተሳ አስናም። 11 አዕኖኦንት ኔሳ መገኑ ኡጪን ካዕሉ ሀስሰኖክዕኔ። ህትጉንተ ሆለመ መን ኡሰቶን ኣሰንቶኔ ማሰተኔ በትናሹ መኑ ኒ ዳፊን መገኑ ገለጠኖ። 12 ነኦት ድከዕናም ጠሁ ከኔት። ህኩስን ኒ ቆርማን እሁዕናች መገን ኣሰንቺን መገኒች ደገንቶ ሙጩርማኒ ጠቤንማኒ ተን ኡለ አሌን ባሰንከስ ክዕኔኤባን ሄዕኖምገ ዎዘኑኔ ነቀሰዮእ። 13 - 14 ዳፉንኩስ አዕኖኦት አነበቢሃ ቆርሲሃ ደንድቴነንተሪች ዎሉረ ሜጡራ ጣንፍምበክዕኔ። ህከኒ ቀርቹኔ ዬሱሱ ዋለኖ በር ነኦት ክዕኔኤን በጅቀሙንታ አዕኖኦት ኔሳን በጅቀንቴኑንታ ከኒች ብሬ ኒተኔ ቀሁንከ ቆርስቴነንታ ዘኮ ጦፌን ቆርስቴነንተገ ተሳ አሳም። 15 ከን ጠሃንን መለማምሩ ዮኤበእተኔ አዕኖኦት ኤሳን ለምተ ኮደተ ደቀም ሳመ ደቅቴኑንተ ይኬእ ሆራሪችን ብርስ ክዕኔኤበ ዋሊ ሀሼም። 16 አንን መቄዶን ባዱ መረኒ ህከምቢችን ዋለኒ ክዕኔኤበ ዋሎተ ሰውዬም። ህትጉንተ ክዕኔኤቢች ይሁድ ባዱ መራም ጃንተ ዎቄሃዕኔ ሽንቅተ ኣስቴን ህርሲሴነንተኤገ ሰውያዮም። 17 አሞ አን ህከ ጠሀ ሰውዬም ጃተ መለመኔትንዶ? ህትጉንተ አን ሰውያሚ አመዕኑምቦ መንገ ሜጥንተ ኮደተ «እሁን» ይኬእ ፈንቀሽ «እሁንከ» ያኔትንዶ? 18 መገኑ ገርንተ አመዕነሜኢ እኮገንከ ነኦት ኩናንክዕኔ ላገቲ «እሁን» ዬን «እሁንከ» ዬኖተበአ። 19 ዳፉንኩስ አን፥ ስላሲ ጥማቶሲ መገን ቤቶ ዬሱስ ክርስቶስተኔ ሰበንኮንክዕኔ ጃተ ሆረንተ «እሁን» ይታ ላጋን ጠሊኔት በጋን መቴኒ «እሁን» መቴኒ «እሁንከ» ይኔትበአ። 20 አሞ መገኑ ተሳ አሴ ላገት ሆረንት «እሁን» ዩ ደቅታኢ ክርስቶሲኔት። ነኦት ክርስቶስ ዉዲን መገን አብኒ «አሚዕን» + ይናሚ ህከኒሃት። 21 ኔሲ ክዕኔኤታ ክርስቶሳን ቃናምገ አሴኔ መገኗ። ዶዕሬኔንኩ እሶት። 22 እስረ እንኮምገ ጡድሰኖ ገግስ ማተበ ኒ አሌን አሴኢሁ ጡማንቹ አያነስ ቀብድገ እሁንተ ዎዘናንተኔ አፉሼኢሁ እሶንት። 23 አን ቆሮንቶስ ከተመ ፈንቀል ዋሉ ሆጎሚ ክዕኔኤ ቅሽጥኔት። ህከኒንከ መገኑ ነቃሻዕኔ። 24 አዕኖኦንት አመዕነቶንተዕኔ ቃርቴን ኡርቴንተረ እኬንተተኔ አዕኖኦት በጅቀንቴኑንተ ክዕኔኤን በርገም ሁጀንታምሪች ህግየን አመዕነትዕኔ አሌን ቀርበተ እንካምበአ።
1 አቼ ክቼእሶዕኔተ ሀሱምቦተኔ ለንኪ ክዕኔኤበ ዋሉ ሆጊ ሙዕሬም። 2 አን ክቼእሾንክዕኔዳ ክቼእሾንክዕኔ ክዕኔኤች ህግየን ኤስ በጅቀንሰኖ ዎሉ አይ ዮኤ? 3 አሞ አን ህትጉተ ጣፎንክዕኔ ክዕኔኤበ ዋሎም ጃተ ኤስ በጅቀንሱ ሀስሰኖስ መኑ ክቼእሱምቦኤገ ይኔት። ዳፉንኩስ ኢ በጅጉት ሆርዕኔ በጅጉንተ እኮገ አመዕናም። 4 ዳፉንኩስ አን በትናሸ ሀዊን፥ ዎዘን ክቼቺኒ ሆለመ እንጂጄኒ ጣፎንክዕኔ ክዕኔኤተ አብሽ ኢታንክዕኔገ ደጌኑንታት በጋን ክቼእሶዕኔታበአ። 5 ክቼቸ ኤቤ መንቹ አዪ ሄኦደ ክቼእሾሲ ኤስ ጠለ እሁዕናች ሰበርሱ እሁንከ በጋን ሆረንከዕኔ እሁምቦዳ በትናሸዕኔ ኬኑ ክቼእሼሃ። 6 ህትጎነ መንቹ ክዕኔኤች በትናሹዕኔ ጉዙንቴንተስ ቀጡንኩ እሀኖስ። 7 ህከኒ ህኩ መንቹ አብሽ ክቼኦተኔ ተሳ ሙሩምቦገ አዕኖኦት ፈንቀልቴን እሱ ፈኡን ዩሁ ቃርሱሁ ሀስሰኖዕኔ። 8 አሞ እሲን ዮዕኔ ኢተተ ፈንቀሽቴን ቃርስቴኑንተ ኡጫንክዕኔ። 9 አንን ህካን ጣፎንክዕኔ ሆራንከ ጠሃን አዘዘንቴነንተረ እሁዕኔ ኬን ደጎተ ይኔት። 10 አዕኖኦት ፈኡን ይቴነንተ መንቹ አዬኒ እኮደ አኒ ፈኡን ዬንስ። ህኩ መንቹ በእሼሩ ዮደ አን ክርስቶስ ብሬን «ፈኡን» ያንሲ ክዕኔኤተኔሃት። 11 አንን ህካን አሳሚ ሼጣንች ሂልመተ ደንጋምተኔ ኔስ መለጡምቦገ ይኔት። 12 አን ክርስቶስተኔ ምሽራች ላገተ ሰበኮተ ጢሮኣድ ከተመ መሮም ጃተ ቀርቾ ዬሱስ ሁጄ ኡሩት ፈነንቴኤ እኬ። 13 እኮዳ ህዜንተኤ ቲቶን ደቀሙ ሆጎምተኔ ዎዘኑኤ ቁላቼ እኬ። ህከኒ «ጡመ ሄእዬ» የቀም እሶኦች አነነ እክኬእ መቄዶን ባዱ መሮም። 14 ጠሁ እኮዳ ኔስ ሆረንተ ጃተ ክርስቶሲን ቄላኑ አስ አወንሰኖኔነ ደናምት አንጀነት ዮ ሽቶገ መዕኔን ሆራንን ኒ ዉዲን ክርስቶስተኔ ደጌኖገ አሰኖ መገኑ ገለጠሜኢ እሁን። 15 ዳፉንኩስ ነኦት ፈአኖነ በአኖ መን ሜሬሮን መገኒ ክርስቶስተ አንጀነ። 16 ህከኒ ነኦት በአኖ መኒ ሬሆተ አንጀነ። እኮዳ ፈአኖ መኒ ሄቸተ አንጀነ። ህከን ጠሂ አጉደኖ መንቹ አዬት? 17 ዳፉንኩስ ነኦት መገን ላገተ ዘዘልታ በትናሸ መንየገበአ። ጠሁ እኮዳ ነኦት መገኒች ሶሀሞ መንገ ክርስቶስ ዉዲን መገን ብሬን ጠቤንማን ጠሃናም።
1 ገገኔ ፈንቀሽን ገለጠቅነዮምንዶ? እንዶ መ-መቱ መኑ አሰኖሀንገንከ ነኦት ክዕኔኤተ ገለጥን ጣንፉንተክዕኔ እንዶ አዕኖኦት ኔስ ገለጥቴን ጣፌኑንተኔ ሀንሰዮምንዶ? 2 መኑ ሆሩንኩ ደጊሃ አነበቢሃ ደንደኖ ገለትኔ ደዳብት ዎዘኒችኔ በኤኑምቡሩ አዕኖኦታ ገጋንክዕኔ። 3 አዕኖኦንት ኒ ሁጄን ደገንቴንተ ክርስቶስ ደዳቤተ እኬንተጉ ደገሜሃ። ህት ደዳቤንት ጣፈንቶኢ ሄአኖ መገን አያኒኔት በጋን ቀለሚኔትበአ። ህትጉንተ ጣፈንቶኢ መን ዎዘናኔት በጋን ክኖኔትበአ። 4 ኔሳ ክርስቶስ ዉዲን መገንባን ዮኔ አመዕነቱ ህትጎና። 5 አሞ ሁጀቲ ደንድናም መቆ ኣሰኖኔ መገኗ በጋን ነኦት ገጊንተኔ ሜጡራ አሲ ደንድናም መቆ ዮኔበአ። 6 አሞ ጣፈሞ ሴሪን እሁዕናች ጡማንቾ አያኒን እኮ ሃሮ ህድር ሁጀታኑ እንካምገ አሴኔ መገኗ። ዳፉንኩስ ጣፈሞ ሴሩ ሻኖ። እኮዳ ጡማንቹ አያኑ ሄቸተ ኣሰኖ። 7 ክኖን ፍደሊን ጣፈሞ ሴሩ ኣሰሞ ጃተ መገን አብኑ ቤሌልይ ጡደሞ። ሙሴ እሌን ቤሌልያዮ እኬ ጫኩ ኮተን መረኖ እኮዳ እስራኤል ኦሱት ሙሴ እልተ ጠበት ጡዲ ደንድትምበአ እኬ። አቼ ሬሁተ ኤቦ ሴሩ ህትጎነ አብኒን ጡደሞች 8 ጡማንቾ አያን ዉዲን እኮ ሁጅት ሀበንከ አበተ እካእ? 9 ዳፉንኩስ መን አሌን ፍርደ ኤቦ ሁጄ ህወንኩ አብኑ ሄኦሴች መኒ ሙጩርመተ ኤባ ሁጄ በትናሹ አብኑ ሄኡ ሀስሰኖሴ። 10 ህትጎንን ዘኮ ዋሎ አብኑ ዎነሀኒች አበ እኮተኔ ዎነ አብኑ ኮተኖ። 11 ህኩ ኮቾንኩ አብኒን ዋሎች በኡምቡስሀኒ በትናሹ አብኑ ሄኡ ሀስሰኖስ። 12 አቼ ህትጎኑ ተሶ ሄኦኔች ነኦት እግማን ጠሃናም። 13 ነኦንት እስራኤል ኦሱት ህከን ኮተን መረኖሀን አብን ጡዱምቦገ ሚንስ ሻሺን ኡሱዕሬ ሙሴየገበአ። 14 እሶኦ ዎዘኑንኩ ዱጄእ። ከበሬ ኢለንቀጤችን ኑባቾ ህድር መጣፈተ አነበበንየን ዎዘኑሰ ህከን ቴለኖሀኒንን እፍሰሞገን ዮእ። ዳፉንኩስ ህኩ ቴለኖሩ ፈደኖ ክርስቶሲን ጠሊኔት። 15 ፤ ከበሬ ኢለንቀጤች ሙሴ መጣፈት አነበበንታ ጃተ ሆረንተ ህኩ ቴለኖሩ ዎዘናንተሰን ሄአኖ። 16 ጠሁ እኮዳ መኑ ቀርቾ ዬሱስበ ፈንቀሎ ጃተ ህኩ ቴለኖሩ ከመመኖ። 17 አሞ ቀርቹ ዬሱሱ ጡማንቹ አያነ እኮተኔ ቀርቾ ዬሱስ ጡማንቹ አያኑ ዮባን ሆራንን ዎማንመት ዮእ። 18 ህከኒ ነኦት ሆሩንኩኔ ቀርቾ ዬሱስ አብን መጋረጂን ቴለንቱምቦ እሌን ጡንዳም። አሞ ጡማንቹ አያነ እኮ ቀርቾ ዬሱሲች ደገመኖ አብኑንኩ አብኔን አብን በርገን ቀርቹ ዬሱሰ አጉንዳምገ አሰኖኔ።
1 መገን ማረቶን ት ሁጅት ሄኦኔች ተሳ ሙናምበአ። 2 ጠሁ እኮዳ ማጠሞነ ሳልሲሰኖ ጠሀ ኡጅኖምተኔ ሂልመተ ሁጀቱ አጉኔም። አሞ መገን ላገተ ቆጰኒን ኤሬናምበአ። እኮዳ ገርተ ጫክንስ ጠሃነን ገገኔ መኑ ሆሩንኩ ቆርስ ደገኖገ አስነን መገን ብሬን ሄዕናም። 3 ነኦት ጠሃኖም ምሽራች ላገንት ቴለንቴኢተ እኬደ ቴለንቶኢ በኣ መኒ ጠሊሃት። 4 አሞ መገን አጉዲሸተ እኮ ክርስቶስ አብንተኔ ኩለንቶ ምሽራች ላገ ጫከ ጡዱምቦገ ተን ኡለ አል ቆጰን መገኑ አመዕንቱምቦ መን ዎዘነ ቆቅሾ። 5 ነኦንት ዬሱስ ክርስቶሱ ቀርቹ እኮጋ ገጉኔ ዬሱስተኔ ክዕኔኤ አግዘተ እንኮምጋ በጋን ገግኔተኔ ሰበንካምበአ። 6 ዳፉንኩስ «ጫኩ ቱንሶ ኣዜን ጫኩን» ዬ መገኑ ክርስቶስ ሚኔን ጫክ ለሌ መገን አብን ደግሲሰኖ ጫኩ ኔሳ ኣሰሙንተ ጫከስ ዎዘናንተኔ ጫክሼእ። 7 ጠሁ እኮዳ ኩ አቡ መቆ መገንቢ እሁስ በጋን ኒቢ እሁ ሆጉስ ጡድሲ ኩ አቡ ጠሁ ቡች ኦዳገ ዮም ኒ ኣዜን ዮእ። 8 ነኦንት ሆራንከ ዉዲን ቃረገ ሀውናም በጋን ቄለማምበአ። አሞ መለማም በጋን ተሳ ሙናምበአ። 9 ህትጉንተ ሸረማም በጋን ኡምባምበአ። አሞ ኦሌን ኡጄኖኔ በጋን በዕናምበአ። 10 ዬሱስ ሄቸት መኖማንተኔ ለልቱንተ ሆረንተ ጃተ መኖማንተኔ ዬሱስ ሬሁተ እይን ዘህናም። 11 ዳፉንኩስ ዬሱስ ሄቸት ሬሀኖ ማላንተኔ ለልቱንተ ኔስ ቴሱ ፎሌ ዮምረ ዬሱስተኔ ሆረንተ ጃተ ሬሆ ህግሴን ኣሴኖኔ። 12 ህከኒ ሬሁት ኒ አሌን ሁጀተዮእ። እኮዳ ሄቸት ክዕኔኤ አሌን ሁጀተዮእ። 13 እሁን በጋን «አመዕኔም። ህከኒንከ ጠሃቄም» የመም ጣፈሞገንከ ህኩ አመዕነት ዎዘኑንኩ ዮኔተኔ ነኦቲ አመዕንናም። ህከኒንከ ጠሃናም። 14 ቀርቹ ዬሱሰ ሬሆች ኬእሾ መገኑ ኔሲ ዬሱሲንን በርግ ኬእሰኖኔጋ ክዕኔኤንን በርግ እስ ብርተ ህንጨአኖኔጋ ደንጋም። 15 ዳፉንኩስ ሆለመ መኒ በተኦ መገን ኣሰንቹ መገን አብኒ እሀኖ ገለት ኤቡንተ ህኩ ሆሩንኩ ጠሁ እሀኖ ክዕኔኤ መኪሃት። 16 መሃ ብፉኔ በአን መሮዳ ኣዝኔ መኖመት በሪን በሪን ሃሮተ እኮተኔ ተሳ ሙናምበአ። 17 ኩ ቀሆ ጄቾ ሀውናም ቢላሹ ሀዉ ሆራሪችን አበነ ዶሊ ሆሪንከ ሄአኖ አብን ቅጠንሰዮኔ። 18 ዳፉንኩስ ነኦት ጡንዳሚ ጡደሙምቡሴየረ በጋን ጡደመኖሴየረበአ። ጡደመኖሩ ቀሆ ጄቾ ጠሊ ሄአኗ። እኮዳ ጡደሙምቡሩ ዶሊ ሆሪንከ ሄአኗ።
1 ኩ ዱንካንገ ዮ ኡለ አል ምኑኔ ዝረሞደ መን አንጋን እሁዕናች መገኑ ምኔኢ ዶሊ ሆሪንከ ሄአኖ ምኑ ሰማን ዮኔገ ደንጋም። 2 ገርንተ ነኦት ሰሜ ምንኔ ኣንጎተ ቁሉንጠን ቅትነዮም። 3 ዳፉንኩስ ህከበ ኣንጎምሀኒች ዘኪን ከልመራከተ እንክ ደገማምበአ። 4 አሞ ከን ዱንካናን ዮም ቀጣ�� ኬዕሜሃኔ ቅትነዮም። ነኦት ቅትነዮሚንኩ ሬሀኖ ማሉኔ ሄቻን ዶረሙንተ ሰማን ዮ ምንኔ ኣንጎተ ሀንሴት በጋን ተን ኡለ አል መኖማችን አነነ እሂ ሀሲን ጠሊኔትበአ። 5 ከን ጠሂ ቅጠንሴኔሁ ጡማንቹ አያነ ኔሳ ቀብድገ እሁንተ ኣሴኔሁ መገኗ። 6 ነኦንት ማሊን ተን ኡለ አሌን ዮም ቀጣን ቀርቾ ዬሱሲች ቄዕርን ሄዕናምገ ደንጋም። ህከኒ ነኦት ሆረንተ ጃተ ዋጅኑዕናች ጋጌዕን ሄዕናም። 7 ዳፉንኩስ ነኦት ሄዕናሚ አመዕነቲኔት በጋን ጡደመኖሪኔትበአ። 8 አሞ ከን ማሊች አነነ እንክ ቀርቾ ዬሱሲን በርገም ሄኢ ቁሉንጣምተኔ ዋጅኑዕናች ጋጌዕን ሄዕናም። 9 ህከኒ ማሊንተኔ ሄዕኖምዳ እንዶ ማሊችኔ አነነ እንኮምዳ ሰውቱኔ ቀርቹ ዬሱሰ በጅግሷ። 10 ዳፉንኩስ አኑንኩ አኑንኩ ማሊንተስ አሴ ደናሞ ጠሂሃ እኮ ሂለ ጠሂሃ ሁጄስገ ሁጄስገ ሀስሰኖስረ ኣቂ ሆሩንኩኔ ክርስቶስ ፍርድ በርጩም ብርተ ህንጭዩ ሀስሰኖኔ። 11 መገኑ ዋጁ ዩ መ ዩሃንዶ ደንጋምተኔ መነ አመዕንንሳም። እኮዳ ነኦት ሀትጎና መነንዶ መገኑ ደገኖ። ክዕኔኤ ዎዘኑሁ ህካን ደገኖገ ተሳ አሳም። 12 ዎዘን ኣዜን ዮ ጠሃን እሁዕናች ኤተሪን ጡደመኖ ጠሃን ድከኣ መኒ ፈንቀሽቴነንተ ፈንቀሹት ሄኡንተዕኔ ኔሳን ድከኤነንተ ዎቃ ደቅቴነንተገ አስኖዕኔታት በጋን ቴሱ ገገኔ ክዕኔኤ ደግሲጪሃበአ። 13 ነኦንት መቻራኑ እንኮምደ መገኒ ይኔት። አሞ ፈያከተ እንኮምደ ክዕኔኤ ይኔት። 14 ዳፉንኩስ ሜጡንኩ ክርስቶሱ መኒ ሆሪንከ ሬሄጋ ሆሩንኩ መኑ እስ ሬሆን ቤቀማኑ እኮጋ አመዕንኖምተኔ ክርስቶስ ኢተት ሁጄ ግድሳኔ። 15 አሞ ፎሊን ዮ መኑ ሆሩንኩ እሶኦ ይኬእ ሬሄነ ሬሆችን ኬኦ ክርስቶሲ ሄኡንተ በጋን ከዘኩ ገጊሀንሰ ሄኡምቦገ ክርስቶሱ ሆሪንከ ሬሄእ። 16 አቼ ከዘኩ አዬኒ ማል ሰውትጊን ጡንዳምበአ። ከኒች ብሬ ክርስቶሰ ጡንዶሚ ማል ሰውትጊን እኮዳ ከዘኩ ጡንዳንሲ ህትጎኔትበአ። 17 ህከኒ አዪ ክርስቶሲን ሜጡ እኮች ሃሮሃ ቆጨንቸ። ኑባቹስ ህጌእ። ህኩዕኒን ሃሮስ ዋሌእ። 18 ህኩ ሆሩንኩ ጠሁ እኮ ኔስ ገጊንተስ ክርስቶስ ዉዲን ሆቆኔነ ሆቀ ሁጅተ ኣሴኔ መገኒቼት። 19 መገኑንኩ መን ባጢለ ዎልሱዕናች ክርስቶሲን ተን ኡለ አል መነ ገጊንተስ ሆቄእ። እስን ሆቀ ላገተ ኔሳ ኣሴእ። 20 መገኑ ኒ ዉዲን መነ ገአኖተኔ ነኦት ክርስቶስተ እንድራሳከ። + ነኦንት «መገኒን ሆቀምዬ» ይን ክርስቶስ ቆደ ኡጭናንክዕኔ። 21 ነኦንት ክርስቶስ ዉዲን መገኒ ሙጩረተ እንክ ዎልሰሙንተ ባጢሉ ዮበእ ክርስቶሰ መገኑ ኒተኔ ባጢላምገ አስ ዎልሾስ።
1 ነኦት መገኒን በርገም ሁጀንታምረ እንኮምተኔ መገን ኣሰንቸ ጠለ በእሲ ኣቅቴኑምቦገ ኡጭናንክዕኔ። 2 ዳፉንኩስ መገኑ «አን ኢታም ሳታን መጮጬንኬ። ፈእ በርንከ ካዕሌንኬ» ያኖተኔ ህኩዕኒን፥ እስ ኢተኖ ሳቱ ቴሶት። ፈእ በሩንኩ ቴሶት። 3 ኒ ሁጅት ገደንቱምቦገ ይንኬዕን መ ጠሃኒ አዬሃ ጉፍቹ እንካምበአ። 4 ጠሁ እኮዳ ነኦት መገኒ ሁጀንታምረ እንኮምገ ሆራንከ ዎቄን ጡድንሳም። ጡድንሳንሲንኩ በትናሸ ቃርማኔት፥ ሀዊኔት፥ ክቼቺኔት፥ ኡዕነሚኔት፥ 5 ገረፈሚኔት፥ ኡሱረሚኔት፥ ደምበቂኔት፥ ቃረ ሁጄኔት፥ ግሰነተ ሆጊኔት፥ ጎሪኔት፥ 6 ሙጩርማኔት፥ ቆርማኔት፥ ደንዴቂኔት፥ ቢዝማኔት፥ ጡማንቾ አያኒኔት፥ ገሬ ኢታኔት፥ 7 ገሬ ጠሀ ጠሃቂኔት፥ መገን መቄኔት፥ ጉረነ መኬ አንጋን አጴኖ ሙጩርመ ኦል ኦዳኔቲ፥ 8 አብሴመኔደ፥ ቢልሴመኔደ፥ ሱዕመኔ በእሴመዳ ገለጤመኔዳ ህከን ሆራንከ ጠሂ ቅጠሚኔቲ። ኔስን «ሉስሳሃረ» ዬነንየኔን ነኦት ገሬየ መነ። 9 «ደገንቱምቧ መነ» ዬመኔዳ አብንስ ደገሜምየረ። ሬናምረ አጉንዶምዳ ሄዕናምየረ። ቅጣጠሞምዳ ሬንምበአ። 10 ክቼኦ መንገ እንኮምዳ ሆረንተ ጃተ በጅቀማም። ቡጠ እንኮምዳ በትናሸ መነ ቀባጣመተ አስናም። ሜጡሩ ዮኔበእረ እንኮምዳ ሆሩሩንኩ ኒሃ። 11 ቆሮንቶስ ከተማን ዮንተ መነ! ነኦት አፎኔ ፈን ጎደብኔቢ ማንጡዕነ ጠሃኔንክዕኔ። 12 አዕኖኦት ሰውተዕኔ ኔሳች ማጤንተ በጋን ነኦት ሰውተኔ ክዕኔኤች ማንጥምበአ። 13 ጠሁ እኮዳ አዕኖኦት ኦሱኤ እኬንተተኔ ያንክዕኔ ነኦት ዎዘንኔቢ ማንጡዕነ ኩኖንክዕኔገንከ አዕኖኦቲ ዎዘንዕኔቢ ማጤኑዕነ ኩሌኔ። 14 አመዕኑምቦ መኒን አጉዱምቦ ዎቄን ሜጡ እኬኖችዬ። ዳፉንኩስ ሙጩርማሃ ባጢሊሃ መ ሜጦመት ዮእ? አሞ ጫኪሃ ቱንሶሃ መ ሜጦመት ዮእ? 15 ህትጉንተ ክርስቶሲሃ ዳቡሎሴሃ መ ኢተት ዮእ? አሞ አመዕናንቹሁ አመዕኑምቡሁ ሚን ደቀንታእ? 16 መገን ምኒሃ ቆጰን መገኒሃ መ ኢተት ዮእ? ዳፉንኩስ መገኑ «አን እሶኦን በርገም ሄኣም። ሜሬሮንተሰን ፈንቀላማም። መገኑሰን እሃም። እሶኦንት ኢ ምናደበ እካእ» ዬገንከ ነኦት ሄአኖ መገንየ ምን። 17 ህከኒ ሆረንከ ደንደኖ ቀርቹ መገኑ «እሶኦ ኣዚች ፉልቴን አነነ እክዬ። ቡሸረንከ መሃ ኡልቴኖችዬ። አንን ኢረ አስ ኣቃንክዕኔ። 18 አሞ አን አነዕኔ እሃንክዕኔ። አዕኖኦንት ኤሳ ጎነሃ ሜሴላከተ ኦሱታ እኬነንተኤ» ዬእ።
1 ኢ ጃላከ! አቼ ኩ ሆሩንኩ ተሶ ኣሰሞ ኔሳ እኮች ማለሃ ፎልሃ ቡሽሰኖ ጠሂች ሆሪችን ገገኔ ሙጩርስኑን። አሞ መገኑ ዋጂን ሙጩርመኔ ቀነጤኖሩ ዮበኢተ እካገ አስኑን። 2 ዎዘነዕኔ ኔሳ ፈንዬ። ነኦት ሜጦ መንቺሃ በእንስምበአ። አሞ አዬኒ ጌንምበአ። ህትጉንተ አዬቺ መለንጥ ኣቅንምበአ። 3 አንን ህካን ያዮንክዕኔ ዎቀሶክዕኔታበአ። ዳፉንኩስ አን ሬሆኒ እኮ ሄቻን ክዕኔኤን ሜጡ እንኩንተ አዕኖኦት ኒ ዎዘናን ዮንተገ ከኒች ብሬን ኩሌንክዕኔ። 4 ክዕኔኤተ አን አብሽ አመዕናንክዕኔ። አንን ክዕኔኤን ቃረገ ድከኣም። አሞ ቃርማን ዊሜም። ሀዋንተኔ ሆራንን በጅጉኔ በትናሸተ። 5 ነኦት መቄዶን ባዱ ዋኖም ጃተ በትናሸ ዉዲን ሀዉ ኢሌኔ በጋን ማሉኔ ፎሎጭምበአ። ኤተሪኒ በአንቸት ኣዚኒ ዋጁ ዮ እኬ። 6 ጠሁ እኮዳ ክቼኦ መነ ቃርሰኖ መገኑ ቲቶ ዋሊን ቃርሴኔ። 7 ነኦንት ቃኖሚ እስ ዋሊን ጠሊን እሁዕናች አዕኖኦት እሱ ቃርስቴንተገ መጮጭኔት። አሞ አዕኖኦት ኤስ ቃጌነንተገ፥ ኤሳ ክቼኤነንተጋ ኢ ቆደ ሀውቴነንተጋ ኩሎኔ ጃተ አን አብሽ በጅቀሜም። 8 ዳፉንኩስ ከኒች ብሬ ጣፎንክዕኔ ሶህኖን ክቼእሾንክዕኔዳ አን ህከኒ ጋባምበአ። ጋቤምዳ ጋባሚ ሶህኑኤ ቀሆ ጄቾ ክቼእሶዕኔገ ደጎምተኔሃት። 9 ጠሁ እኮዳ ቴሱ አዕኖኦት ክቼኤንተተኔ እሁዕናች ክቼቹዕኔ ባጢለ ቢረ ይቴነንተገ አሴክዕኔተኔ አን በጅቀሜም። አቼ አዕኖኦት ክቼኤንታ መገኑ ሰውያኖጊን እኮተኔ ነኦት ሀከን ዎቄኒ ጎደዕንምበክዕኔ ዩሀ። 10 መገን ሰውትጊን እኮ ክቼቹ ባጢለ ቢረ ዬን ፈኤኖገ አሰኖተኔ ጋብሰኖበአ። ጠሁ እኮዳ ተን ኡለ አል ክቼቹ ሬሁተ ኤበኗ። 11 ኩ መገን ሰውትጊን እኮ ክቼቹ ደናሙ አስቴነንተገ፥ ባጢሊች ሙጩረተ እኬን ሙጩረተ እሁዕኔ ለሊሴነንተገ፥ ባጢል አሌን አሙዕረንቴነንተገ፥ ባጢለ ዋጅቴነንተገ፥ ኤስ ቃጌነንተገ፥ ጠቤነ ዎዘኒን ገርተ ፍርድቴነንተጋ በእሾ መንቹ ጉዙንቴነንተጋ አሴዕኔ። ሆራንከ ዉዲን ከን ጠሃን ሙጩረተ እኬንተገ ለሊሴንተ። 12 አንን ጣፎንክዕኔ ኒተኔ ዮክዕኔ ደናሙ ሰውቱ መገን ብሬን ክዕኔኤ ጫክ ለሉንተ ይኔት በጋን በእሾ መንችተኔ እንዶ ጌነሞ መንችተኔሃበአ። 13 ህከኒሃት ነኦት ቃኖሚ። ኒ ቃርማንን በርግን አዕኖኦት ሆሩንኩዕኔ ቲቶ ዎዘነ ፎሎጭሴናን ቲቱ በጅቀሞተኔ ነኦት አብንስ በጅቀሜም። 14 አን ክዕኔኤን ድከኣምገ ቲቶ ኩሌም እኬ። አዕኖኦንት ሳልሲሴንምበኤ። ነኦንት ሆረንተ ጃተ ገርተ ኩኔንክዕኔ። ኩ ነኦት ክዕኔኤን ድከዕናምገ ቲቶ ኩኖሚ ገርተ እኮተኔ ገርተ እሁስ ለሌእ። 15 ህከኒ ቲቶ ዋጂኒ ሁጢኒ ኣቅቴንተስጋ ሆሩንኩዕኔ አዘዘንቴነንተረ እኬንተጋ ሰውያን ክዕኔኤተ ኢተኖ ኢተስ አብስ በተኤእ። 16 አንን ጦፍ አመዕናንክዕኔተኔ አብሽ በጅቀሜም።
1 ኒ ህዛከ! መገኑ መቄዶን ባዶን ዮ አመዕናን ማበራካ ኣሴ ኣሰንችተኔ ደጌኑንተ ሀሳም። 2 እሶኦ አሌንን ቃሩ ሀዉሁ ኬነንቹሁ ኢሌሰ። እሁን በጋን በጅጉሰ አበተ እኮተኔ መሃ እሶኦት ቡጠ እኮዳ በትናሸረ ኣስቴእ። 3 እሶኦንት ደንድቶ ቀጠ ጠለ እሁዕናች ደንድታሀኒቺ አሉዲን ኢትት ኣስቶገ አን ነቀሳንሰ። 4 አሞ እሶኦት «አመዕናኑ ካዕለኖ ግዘ ነኦቲ ጠጰዕናም» ይት ቃርስት ኡጭቶኔ። 5 ህትጉንተ እሶኦት ነኦት ሰውኖምሀኒች አሉዲን አስቴእ። ዎና ገገሰ ቀርቾ ዬሱሲ ህግስ ኣስቴእ። ህከኒች ዘኪንን መገን ሰውትጊን ገገሰ ኔሳ ህግስ ኣስቴእ። 6 ህከኒ ቲቱ ዎናንከ ሁጀቱ አፎተኔ ቴሱ ክዕኔኤ ሜሬሮን ህተ ደናምተ ሁጅተ ጦፍ ሁጀቱንተ ኡጭኖንስ። 7 አዕኖኦት ሆረራንን ህኩስን አመዕነቲን፥ ጠሃቅቴነንተ ጠሂን፥ ቆርማን፥ ጠቤነ ሰውቲን ሆሪኒ ኔስ ኢትቴነንተ ኢታኒ አብቴንተገን ተ መኒ አሴኖ ደናሜ ሁጄኒ አብዬ። 8 አን ህትጉተ ዬንክዕኔ ክዕኔኤተ አዘዚ እሁዕናች ኢተዕኔ ገሬቢተ እኮገ ዎሎ መን ጠቤንማን ኬን ጡዶታት። 9 አዕኖኦት ቀርቿኔ ዬሱስ ክርስቶስ ኣሰንቸ ደጌነንተ። እስን መሃ ቀባጣሙ እኮዳ እስ ቡጥማን አዕኖኦት ቀባጣመተ እኬኑንተ ክዕኔኤተኔ ቡጥቹ እኮ። 10 አቼ ከን ጠህተኔ ካዕለኖዕኔ ጠሀ ሰዛንክዕኔ። ኑሬች አፌን ኣሲ ጠሊ እሁዕናች ከ ጠሀ አሲ ሰውቴንተሩ አዕኖኦታ እኬ። 11 ህከኒ ዮዕኔ ቀጢች ኣሲ ሀሴንተ ሰውቱዕኔ ዊሙንተ ቴሱ ህተ ሁጅተ ጦፌን ሁጀችዬ። 12 መቱ መንቹ ዮስበእ ቀጢን እሁዕናች ዮስ ቀጢን ኢት ኣሰኖ እኮች ህከን ኣሰንቻን መገኑ በጅቀመኖ። 13 አንን ካን ያዮሚ ሆሩንኩ ቅጦን ኣሱንታት በጋን አዕኖኦት ሀውቴነንየን ዎሉ መኑ ፎሎጩንታበአ። 14 አዕኖኦት ሀውቴንተ ጃተ እሶኦ ዮሩ ክዕኔኤ ሀወ ፉሹንተ ቴሱ ክዕኔኤ ዮሩ እሶኦ ሀወ ፉሹን። ህትጎንን ሜሬሮንተዕኔ ቅጦመት ሄኣእ። 15 ህኩንን «በትሽ ጠጰኤሀኒ ትርፍምበስ። አሞ ቀሁ ጠጰኤሀኒ ኮትምበስ» የመም ጣፈሟገ። 16 አን ክዕኔኤተ ሰውያም ቀጠንከ ቲቱ ክዕኔኤተ ሰውያኖገ አሴ መገኑ ገለጠሙን። 17 ቲቱን ክዕኔኤበ ዋለኖ ነኦት መሩንተ ጠዕምኖንስተኔ ጠሊ እሁዕናች ገጉንኩስ ቃረገ ሀሾተኔ በጅጎኔት። 18 አሞ ምሽራች ላገተ ሰበኪን አመዕናን ማበርባን ሆርባንን ደገሜ አመዕናንቹሃ እሲንን በርግን ሶንከዮም። 19 ህከኒችን አሉዲን ህኩ አመዕናንቹ ተ ደናምተ ሁጅተ ቀርቾ ዬሱስ አብኒ ሁጀንተንየኒ ሁጄሀንስ ዮኔ ደናሙ ሰውተኔ ለሊንሰንየኒ ኔሳንን በርገም ሁጀቱንተ አመዕናን ማበሩ ዶዕሬስየ። 20 ከ መኒ ኢልሲ ሁጀንታም በትናሸ ግዝተኔ አዪ ዎቀሱምቦኔገ ቆረጵናም። 21 ዳፉንኩስ ነኦት ሀንሳሚ ቀርቾ ዬሱስ ብሬን ጠላን እሁዕናች መን ብሬኒ ደናሙ እኮ ጠሀ አሲሃት። 22 በትናሸተ ጃተ ነኦት ሆለመ ዎቄን ኬን ደናሙ አሰኖገ ደንጎም ህዞኔ ቲቶንን በርግን ሶንኮሚ ህከኒሃንት። እሲንከ ክዕኔኤን ዮ አመዕነቱስ ቃረ እኮተኔ ቴሱ ክዕኔኤተ ካዕሎተ ዮ ደናሙ ሰውቱስ ዎናቺ አባ። 23 ቲቶተኔ እኮደ ክዕኔኤተኔ ኤሳን በርገም ሁጀተኗ ጃላዕኔ። እሲን በርገንት ዮ ህዛከኔተኔ እኮዳ እሶኦት አመዕናን ማበራካ ሶቀማኑኒ ክርስቶስየ አብንኒ። 24 ህከኒ ነኦት ክዕኔኤን ድከዕናም ገጃጁተ አመዕናን ማበራከት ደጉንተ ኢተዕኔ እሶኦ ጡድሽዬሰ።
1 አመዕናኑ ካዕሊ ጠጰኤኖ ግዝተኔ ክዕኔኤ ጣፉ ሀስሰኖኤበአ። 2 ዳፉንኩስ አዕኖኦት ካዕሊ ቅጠንቴንተረ እኬንተገ ደጎምተኔ «አካይ ባድ መኑ ኑሬች አፍ ካዕልቶተ ቅጠንቴሃረ» ይ መቄዶን ባድ መኒ ክዕኔኤተኔ አመዕን ጠሃቄም። መነ ካዕሊ ዮዕኔ ደናሙ ሰውቱንኩ እሶኦች በትናሹሰ ኬኑ ካዕልታገ አሴእ። 3 ጠሁ እኮዳ ከን ጠሃንን ክዕኔኤተኔ ቦልጥናም ቦልጡኔ ጠለለ እሁምቦገ ተ ህዛከተ ሶሀዮም። አዕኖኦንት አን ከኒች ብሬ ዬምገንከ ቅጠንቴን ቆረብዬ። 4 አይደጎ መቄዶን ባድ መኑ ኤሳን በርገም ክዕኔኤበ ዋሎ ጃተ ቅጠንቴኑዕናች ኢሌዕኔደ ክዕኔኤተ አመዕንኖምተኔ ክዕኔኤተኔ ይናምረ ሆንግ አብንስ ቢልኖኮም። 5 ህከኒ ኣሲ ተሳ አስቴንተረ ብርስቴን ቅጠንስቴነንተገ አስቱንተ ይኬእ ት ህዛከት ኤሳች ብርስት ክዕኔኤበ መርታገ አሱ ሀስሰኖገ ሰውዬም። ህትጎንን ግዲን እሁዕናች ኢትቴን ኣስቴነንተሩ ቅጠሜኢ እሀኖ። 6 «ቀሁ ውጮ መንቹ ቀሁንከስ ሀጢጠኖ። አሞ በትናሸ ውጮ መንቹ በትናሸንከ ሀጢጠኖ» ይታ ላገተ ሰውዬ። 7 በጅቀመን ኣሰኖ ሆረንከ መገኑ ኢተኖተኔ አኑንኩ አኑንኩ ዎዘናንተስ ሰውዬገ ኣሱን በጋን ክቼአን እንዶ ግዲን ኣሱንከ። 8 - 9 «ብነኤእ፤ ቡጢንከ ኣሴእ። እስ ሙጩርመንት ዶሊ ሆሪንከ ሄኣእ» የመም ጣፈሞገንከ መገኑ ሆረራንን ሆረንተ ጃተ ሀሴነንተረ ሆረንከ ደቅቴናን ደናሜ ሁጄ ሆራንከ እሀኖዕኔ ቀጠ ኣሰንቸስ በትሽ ኣሶዕኔተ ደንደኖ። 10 ውጠኖሀኒ ዜሬተ አሞ እቲ እቸተ ኣሰኖ መገኑ ውጤነንተ ዜሬተ በትሽ ኣሰኖክዕኔ። ህትጉንተ ሙጩርመክዕኔ ላሉተ በትሳክዕኔ። 11 አዕኖኦንት ኣስቴነንተረ ኒ ዉዲን ኣቀኖ መኑ ሆሩንኩ መገኑ ገለጡንተ ሆረንተ ጃተ ኣስቴነንተጊ ሆራንከ ዉዲን ቀባጣመተ እኬነንተ። 12 ኩ አዕኖኦት ኣስቴነንተ ኣሰንቹ አመዕናን ሀወ ፉሹ ጠለ እሁዕናች መኑ መገኑ አብሽ ገለጠኖገ አሰኖ። 13 ት አዕኖኦት ሁጀቴነንተ ሁጅት ክርስቶስ ምሽራች ላገተ ኣቅቴን አመዕነንቴንተረ እኬን ነቀሱክዕኔ እሶኦሃ ዎሎ መኒሃ ኣስቴንተረ እሁክዕኔ ጡድሳኢተ እኮተኔ መኑ መገኑ ገለጠኖ። 14 እሶኦንት መገኑ ክዕኔኤ ኣሴዕኔ አበ ኣሰንችተኔ መገኑ ኡጭታክዕኔ ጃተ እልዕኔ ጡዶተ ቁልጥተዮእ። 15 ላጋን ጠሃቂ ደንዴኖሀኒች አሉዲን እኮ ኣሰንችስተኔ መገኑ ገለጠሙን።
1 ክዕኔኤ ብሬን ዮም ጃታ «ሳላንቿ» ክዕኔኤቢች ቄዕሬም ጃታ «እጋ» ዬኖኤ አን ጳዉሎስ ገጉንኩኤ ክርስቶስ ማሽማኒ በሬድማኒ ኡጫንክዕኔ። 2 ኡጫንክዕኔንኩ አን ክዕኔኤበ ዋሎም ጃተ ማል ሰውትጊን ፈንቀላማምሀንገ አስት ሰውታ መ-መቶ መኒ «እግማን ጠሃቁ ሀስሰኖኤ» ይ ሰውያምገን ክዕኔኤባኒ እግማን ጠሃቃምገ አስቴኑምቦኤጊሃት። 3 ዳፉንኩስ ነኦት መሃ ተን ኡለ አሌን ሄዕኖምዳ ተን ኡለ አል መንገ ኦለማምበአ። 4 ኒ ኦል ኦዳንት ግምበ ዝሪ ደንዴሰኖ መገን መቆ ዮሃረ በጋን ተን ኡለ አል ኦል ኦዳገ ዮሃረበአ። 5 ህከኒ መገኑ ደጌኖበ ከንታ ኦደታ ቦልጥ ጠሀሃ ሆረንከ በእንሳም። አሞ ዎዘነ ሆረንከ ቀፈንድ ክርስቶሲ አዘዘመኖገ አስናም። 6 ህትጉንተ ክዕኔኤ አዘዘሙ ዊመ እኮ ጃተ አዘዘሙ ሆግ ሁጅተ ሆረንተ ጉዙሞተ ቅጠሜምረ እንካም። 7 እሌዕኔ ብሬን ዮ ጠሀ ጡጅዬለ። ሀኩ መንቹሁ «አን ክርስቶስየ» ይ አመዕኔኢች ነኦቲ እስገንከ ክርስቶስረ እንኮምገ ደጉ ሀስሰኖስ። 8 ዳፉንኩስ ቀርቹ ዬሱሱ ክዕኔኤተ ዝርኑንተ እሁዕናች ክዕኔኤተ አቦይኑንተ ኣሴኔ መቄተኔ አብሽ ቦልጤምዳ ሳላምበአ። 9 አንን ጣፎንክዕኔ ደዳባካን ዋጅሲሳንክዕኔ አጉዱንከዕኔ። 10 ዳፉንኩስ መ-መቱ መኑ «ደዳባከስ ኬዕማሻከተኒ ቃራከተኒ። እኮዳ መኖመስ ጡዴመደ ሆግመተ። ጠሃቀኖ ጠሁንኩ ገደሜሃ» ይተዮእ። 11 ህኩ መኑንኩ ነኦት ቄዕረ ዮም ጃተ ደዳቤንተኔ ጣንፎሚሁ ኦንጠኔ ክዕኔኤን በርገም ዮም ጃተ ሁጀንታሚሁ ሜጡ እኮገ ደጉን። 12 ነኦት ገገሰ ገለጠቅታ መ-መቶ መኒን ገገኔ ዎልሲ እንዶ አጉጠንሲ እግናምበአ። ጠሁ እኮዳ እሶኦት ገገሰ መቱ-መቲን ኬንት ጡዳ ጃታ ገገሰ መቱ-መቲን አጉጠንስታ ጃታ መሌሱ ዮሰበእየረ። 13 ነኦት እኮዳ ክዕኔኤበ ኢለንቀጤች ዮ ሁጄኔ ቆዳን መገኑ ኣሴኔሀኔን ቦልጥናምየረ በጋን መቄችኔ አሉዲን ቦልጥናምየረበአ። 14 ዳፉንኩስ ክርስቶስተኔ ምሽራች ላገተ ሰበኪ ክዕኔኤቡ ኢለንቀጤች ብርስን ዋኖሚ ኔስ እንኮምተኔ ክዕኔኤበ ኢልኑዕናች ፈዕኖምሀንገ እንክ መቄችኔ አሉዲን ቦልጥናምበአ። 15 ህከኒ ሁጄኔ ቆዲች ህንግ ዎሎ መን ሁጄን ቦልጥናምበአ። ጠሁ እኮዳ አመዕነቱዕኔ ሌአን መረንየን ሁጀንታም መዕንት ክዕኔኤ ሜሬሮን አብስ ሀራርተን መርታገ ተሳ አስናም። 16 አሞ ከኒች ብሬን ዎሉ መኑ ሁጀቶ መዕኔን ቦልጥኑዕናች ክዕኔኤች ካጵ ዉዲን ዮ ባዶኒ ምሽራች ላገተ ሰበኪ ደንድናም። 17 ጠሁ እኮዳ «ድከአኖ መገኖን ድከኡን» የመሜእ። 18 ዳፉንኩስ መቱ መንቹ ገለጠሜኢ እሀኖ መገኑ ገለጤስዳት በጋን ገጉስ ገለጠቄዳበአ።
1 አዕኖኦት ኢ ቀልመተኔ ቀሁንከ እየቅቴንተ እክየን በሬዳ እኬ። አዕኖኦት ገርንተ እየቅቴነዮንተኤ። 2 አንን መገኑ ደናሙረ ሰውያኖጊን ክዕኔኤ ደናሙረ ቁልጣንክዕኔ። ዳፉንኩስ አን ክዕኔኤተ ሙጩሮ ባጃሜገ ሜጦ ጎንቺ ህኩስን ክርስቶሲ ህንጨኦዕኔተ ጠዕሜንክዕኔ። 3 ጠሁ እኮዳ ዎሪቹ ሄዋኔ + ሾክማንተስ ሉስሾሴገንከ አይደጎ ክዕኔኤ ሰውቱሁ በእየን ክርስቶሲ ዮዕኔ ጠቤነ ሰውቲቺ ሙጩርማቺ ፉልቴን ኦሮቅቴነንተንዶ ይ ዋጀዮም። 4 ዳፉንኩስ መቱ መንቹ ክዕኔኤበ ዋል ነኦት ሰበንኮንክዕኔ ዬሱሲች ዎሎ ዬሱስተኔ ሰበኬዕኔ እክየን እንዶ ዎና ኣቅቴንተሀኒች ዎሉ አያነ ኣቅቴንተ እክየን እንዶ ዎና ኣቅቴንተ ምሽራች ላጋች ዎልተ ኣቅቴንተ እክየን «ኤኩ» ይቴን አዘዘንቴነንተ እኬ። 5 ጠሁ እኮዳ አን ህከን አበባኖ ሶቀማኒች መ ጠሂኒ ኮታሚ አጉደኖኤበአ። 6 አሞ አን ደናሞገ ጠሃቃም መንቹ እሁምቦዳ ቆርማን ኮታምሩ ዮኤበአ። ህካንን በትናሸተ ጃተ ሆለመ ዎቄን ጫክንስ ኩኔንክዕኔ። 7 አዕኖኦት አብቴኑንተ አን ገገኤ ህርከእ መገን ምሽራች ላገተ ደሞሱ ዮበኢ ሰበኮንክዕኔተኔ ባጢለ ሁጀቾምንዶ? 8 አንን ክዕኔኤ ሁጀቶተ ይኬእ ዎሌ አመዕናን ማበራካች ካለቱተ ኣቂንተኤ እሶኦተ ቦጌም። 9 አሞ ክዕኔኤባን ዮም ጃታ ሀውሾኤ ጃተ አዬሃ ኬዕምምበስ። ዳፉንኩስ መቄዶን ባዲች ዋልቶ አመዕናኑ ኮቾኤረ ሆረንከ ኣስቴኤ። ህከኒ መ ዎቄኒ አን ክዕኔኤ ኬዕሙምቦዕኔገ ቆረጴም። ከዘኩሃ ቆረጳም። 10 ገርንተ ክርስቶስ ገርት ኣዜንተኤ ዮተኔ ቦልጣምበ ከመኖኤሩ አካይ ባዶን ሜጡሩ ዮበአ። 11 ህከንስ ገጃጁት መሃን? አን ኢቱምቡዕኔተኔሃትንዶ? ኢታንክዕኔገዕኑ መገኑ ደገኖ። 12 ህከ ነኦት ሁጀንቶምገን «ሁጀንታም» ይተን ቦልጥታ መኑ ገጃጅታረ ሆጋገ አሲ ቴሱ አሳምረ ከዘኩሃ አሳም። 13 ዳፉንኩስ ህትጎኑ መኑ ቆጰንየ ሶቀማኑ፥ ሉስሳሃ ሁጀታኑኒ ገገሰ ክርስቶስ ሶቀማኑ አጉዲጭታሃረኒ። 14 ህኩንን ማለልሲሰኗ ጠሀበአ። ዳፉንኩስ ሼጣንቹ ገጉንኩስ ጫክ መገን ሰሜ ሶቀማንቹ አጉዶተ ገገስ ዶረኖ። 15 ህከኒ ሼጣንች አሽከሩ ሙጩርመ አሽከረ አጉዲ ገገሰ ዶርቶደ ህኩን አባ ጠሀንዶ? ዘካንቾንን ሁጄሰ ዋገ ደቅታእ። 16 ቴሱ ያም። አዪ አን ቀሉ እኮምገ ሰውዩንከ። አን ቀሉ አጉጆንክዕኔዳ ቀሁንከ ቦልጢ ደንዱንተ ቀሎ መንችገንከ አስቴን ኣቅዬኤ። 17 ህትጉተ አመዕን ቦልጢን ጠሃቀዮሚ ቀርቾ ዬሱስ ሰውትጊን እሁዕናች ቀሎ መንችገ እኬት። 18 በትናሹ መኑ ተን ኡለ አል ጠሃን ድከኣተኔ አኒ ድከኣም። 19 ዳፉንኩስ አዕኖኦት ቆራከተ እኬንተተኔ ቀላከተ ቀልማንተሰ ደንዴቅቴነዮንተ። 20 አሞ አዪ አግዞመተ ጠቄዕኔደ እንዶ ቦጎዕኔደ እንዶ መቄሾዕኔደ እንዶ አሌንተዕኔ ቦልጤደ እንዶ ሞክዕኔ ቀምቤደ ደንዴቅቴነዮንተ። 21 መሃ ሳልሲሰኖኤ እኮዳ ደንዴቂን ነኦት ክዕኔኤ ቀጠ ቆጠራከተበአ። ጠሁ እኮዳ አዪ ቦልጢ እጌደ አን እስገን እግ ቦልጣም። ህካንን ያዮሚ ቀሎ መንችገ እኬት። 22 እሶኦት እብር-መናንዶ? አንን እብር-መንቿ። አሞ እሶኦት እስራኤልየ መነንዶ? አንን እስራኤልቿ። እሶኦት አብረሃሜየ ፍካነንዶ? አንን አብረሃሜየ ፍካንቹ። 23 እሶኦት ክርስቶስየ ሁጀታኑንዶ? መቻሮ መንችገ ያም። አን እሶኦች አባም። አን ቃረተ ሁጅተ ሁጀቼም። በትናሸተ ጃተ ኡሱረሜም። ሆለመተ ኮደተ ኦለሜም። በትናሸተ ጃንተ ሬህ ሆጌም። 24 አይሁድ-መኑንኩ ኦንትተ ኮደተ ሰጀነ ሆ-ሆንሴ ገረፎኤ። 25 አሞ ሰስተ ኮደተ ደሚን ኦሌመኤ። መትተ ኮደተ ክኒን ቀሴመኤ። መርከቡኤን በሃር አሌን ሰስተ ኮደተ ቢጠሞ። አሞ መቱ አንከርሃ መቱ በርሃ በሃር አሌን ኤጌሮም። 26 አንን በትናሸተ ጃተ ዎቄ አሌን ሄአንየን ለጋካች፥ ፈንጋካች፥ ገግኤ ቦኪች፥ አይሁደ እኩምቡ መኒች፥ ከተማካች፥ ኡለ ኡዱመኢች፥ በሃሪቺ ቆጰናኖ አመዕናኒቺ ዋጅሲሰኖኤሩ ኢሌኤ እኬ። 27 አሞ ሆንግቲ በትናሸት ሁጅቲ ዮኤ እኬ። በትናሸተ ጃንተ ግሰነተ ሆጊን፥ ጎሪን፥ ሰገቤን፥ እቸተ ሆጊን፥ ግዲኒ ከልማኒ ሀዌም። 28 ህከን ሆራንከ ጠህ አሌን በሪን በሪን ኬዕመኖኤ አመዕናን ማበራካ ሆሪንከ ሰውያምየ ሰውተ። 29 መቱ መንቹ ሆገኖ ጃተ አኒ እሲን በርገም ሆጋምየበእንዶ? አሞ መቱ መንቹ ባጢላን ኡቦደ አን ነደዳምየበእንዶ? 30 ድከኡ ሀስሾኤደ አን ድከኣሚ ሆንግኤ ጡድሰኖ ጠሀኔት። 31 ዶሊ ሆሪንከ ማሰአሞ ቀርቾ ዬሱስ አኑ መገኑ ቆጰኑ ሆጉኤ ደገኖ። 32 አንን ደማስቆ ከተማን ዮም ጃተ ዎመ አርስጦሴች ዎሮዲን ዮ ገሻንቹ አፎኤተ ሀሽ ደማስቆ ከተመ ቆረብሲሼ እኬ። 33 ጠሁ እኮዳ ኤስ ቀርጫታን ዎሬን ከተምስ ኦታን ዮ መስኮቲን ድሪሴናን ህከን መንች አንጋች ቡቅጬም።
1 ቦልጡ ካዕለኖ እሁምቦዳ ቦልጡ ሀስሾደ ቀርቾ ዬሱሲች ኣሰሞኤ ሀቄገ ዮነ ጫክ ለሌኤ ጠሃን ቦልጣም። 2 አንን ቶነ ሾሎ ዎጌች ብሬ ሰክ ሰማ ኦሮሴመስ መቱ መንቹ ክርስቶሲን ደጋም። እሱንከ ኦሮሴማ ማሊን ሄኦገኔትንዶ ገገስ ሀበኖገ አሰኖ ሰውታን ዮሀኔኔትንዶ መገኑ ደገኖ በጋን አን ደግምበአ። 3 ህከ መንቹንከ ገነተ ኦሮሴመስገ ደጋም። እኮዳ ማሊን ሄኦገን ኦሮሴመንዶ ገገስ ሀበኖገ አሰኖ ሰውታን ዮሀኔን ኦሮሴመንዶ መገኑ ደገኖ በጋን አን ደጋምበአ። 4 እስን ኩሌኖተ ደንዴኑምቡረነ መኑ ጠሃቂ ደንዱምቡረ መጮጬእ። 5 አንን ህከን መንች ቆደ ቦልጣም። ገግኤ ቆደ እኮደ ሆንጌችኤ ህግየን ቦልጣምሩ ዮኤበአ። 6 አሞ ገርተ ጠሃቃምተኔ ቦልጢ ሀሾምዳ ቀሉ መንቹ እሃምበአ። ጠሁ እኮዳ አዪ ኤሳን ጡደኖነ ኤሳች መጮጨኖሀኒች አበ ኢተኔ ሰውዩምቦገ ቦልጢች ቆረጳም። 7 ከ ጫክ ለሌኤ አበ ጠሂች ኬኦ ቦልጡምቦገ ማለኤ ኡትገ ቀሰን አብሽ ሀውሰኖኤ ሼጣንች ሶቀማንቹ ኣሰሜኤ። 8 ህኩ ቀሰን ሀውሰኖኤሩ ኤሳች ቄዕሩንተ ቀርቹ ዬሱሰ ሰስተ ኮደተ ኡጬም። 9 ቀርቹንኩ «ኢ መቆ ለለኖ ኪ ሆንጌን እኮተኔ ኣሰንቹኤ እሀኖኬ» ዬኤ። ህከኒ ክርስቶስ መቆ ኢ አሌን እሁንተ ዎናቺ አበ ሆንጌንተኤ በጅጎን ቦልጦተ ሀሳም። 10 ህከኒ መቆ ደቃሚ ሆግመ እኮም ጃተ እኮተኔ ክርስቶስተኔ ሆጎም ጃተ፥ ቦሮረሞም ጃተ፥ ሀዌም ጃተ፥ ሸረሞም ጃታ ኡዕነሞም ጃታ በጅቀማም። 11 አን ቀሌም እኬ። እኮዳ ቀላምገ አስቴንተኤ አዕኖኦታ። አዕኖኦንት ኤስ ገለጡ ሀስሰኖዕኔ እኬ። ዳፉንኩስ አን መሃ ቀሁ መንቹ እኮምዳ ህከን አበባኖ ሶቀማኒች ሆረኒ ኮቱምቧ። 12 ገሬ ሶቀማንቹ እህኤ መላት ህኩስን ማለሉት፥ ማለልሲሳ ሁጅቲ መላቲ ሜሬሮንተዕኔ በትናሸ ደንዴቂን ሁጀተንቴእ። 13 አን ክዕኔኤ አሌን ኬዕሙ ሆጊችኤ ህግየን ዎሌ አመዕናን ማበራካች ኮትሾንክዕኔ ሚኔት? ህኩን ሉሰተ እኬደ ማርዬኤ። 14 አን ክዕኔኤበ ዋሎተ ቅጠሚሀዕኔ ቲን ሰክተ ኮደ። አንን ክዕኔኤተ ገገዕኔ በጋን ክዕኔኤረ ሀሱምቡተኔ ክዕኔኤ አሌን ኬዕሞተ ሀሳምበአ። ዳፉንኩስ አናከት ኦሶ ግዘ ጠጰት አፉሹ ሀስሰኖሰ በጋን ኦሱት አናካ ግዘ ጠጰታበአ። 15 አንን ክዕኔኤተኔ ግዙኤ ፈእየን ፎልኤ ህግሽ ኣሴምዳ አብሽ በጅቀማም። ህከደ አን ከንከ አብሽ ኢታንክዕኔ እኮች አዕኖኦት ኤስ ኢቱ ሀስሰኖዕኔ ቀንዶ? 16 እሁን በጋን አን ክዕኔኤ አሌን ኬዕምምበአ። ጠሁ እኮዳ አዕኖኦት ይቴንተገንከ መለጭ ቆርማንበለ አፌንክዕኔ? 17 ክዕኔኤበ ሶኮም መኒች መትስ ዉዲኒ እኮደ ክዕኔኤች መለጭ ኣቅ ከሰንዶ? 18 ቲቱ ክዕኔኤበ መሩንተ ኡጬንስ። ኒ ህዞንከ እሲን በርግ ሶኮም። ቲቱስ መለጭ ኣቅ ከሰንዶ? አኒ እሲ ሁጀንቶሚ ሜጦ ሰውቲኔትበእንዶ? አሞ ለምኔ ዎቆንኩ ሜጦበእንዶ? 19 አዕኖኦት ቴሶ ኢለንቀጤች ነኦት ክዕኔኤ ብሬን ጉጁኔ መክጭናምሀንገ አስቴኔትንዶ ሰውቴነዮንታ? ነኦንት ክርስቶስ ዉዲን እንክ ጠሃነዮሚ መገን ብሬኔት። ኒ ጃላከ! ጠሃኖንስረ ሆረንከ ጠሃኖሚ ክዕኔኤተ ቃርሲ ይኔት። 20 አይደጎ አን ክዕኔኤበ ዋላም ጃተ አዕኖኦቲ አን ሀሳምገ እኬኑዕናች አኒ አዕኖኦት ሀሴነንተገ እሁዕናች ደቀማምንዶ ይ ዋጀዮም። አሞ ክዕኔኤ ሜሬሮን በአንቹ፥ ቂንሸት፥ አሙርት፥ ሞቁተ ፉሉ፥ መን ሱዕመ በእሱ፥ ሄምት፥ ቦልጡሁ ደምበቁሁ ሄአኖንዶ ይ ዋጀዮም። 21 ህትጉንተ አን ለንኪሃ ክዕኔኤበ ዋሎም ጃተ ኢ መገኑ ክዕኔኤ ብሬን ቢልሰኖኤንዶ ይ ዋጀዮም። አሞ ከኒች ብሬ ሁጀትኬእ ህከን ሁጀቶ ቡሽመተኔ፥ ሳእተኔሃ ዎሾመተኔሃ ቢረ ይቱምቦ በትናሸ መንተኔ ክቼኣምንዶ ይ ዋጀዮም።
1 አን ክዕኔኤበ ዋሊ ቲን ሰክተ ኮደ። ጠሁ ሆሩንኩ ለሞ እንዶ ሰሶ ነቃሽ ላጋን ኡረኖ። 2 - 3 ለንክ ኮደተ ክዕኔኤበ መሮም ጃተ ቃርስ ኩሌም እኬ። ቴሱ ክዕኔኤን በርገም ዮምበእ ጃታ ኢ ዉዲን ጠሃቀኖ ክርስቶሰ እኮገ ደጊ ሀሴንታች ከኒች ብሬ ባጢለ ሁጀቶሪሃ ዎሎስ ኬኒሃ ተ ኮደተ ክዕኔኤበ ዋሎምደ ሆረን ቅሽጡምቦገ ደጌኑንተ ሀሳም። ክርስቶሱንኩ ክዕኔኤ ሜሬሮን ለለኖ መቄኔት በጋን ሆንጌኔትበአ። 4 ዳፉንኩስ እስ ሰቀለም ሬሄኢ ሆንጌን እኮዳ ቴሱ መገን መቄን ሄአኖ። አሞ ነኦት እሲንን ሆግመተ እንኬም። እኮዳ ነኦት ክዕኔኤ ሁጀቲ መገን መቄን እሲንን በርገም ሄዕናም። 5 አመዕነቱ ዮዕኔንዶ ደጌኖተ ገገዕኔ ቆርምቴን ጡጅዬ። አሞ ገገዕኔ ኬዕንዬ። ዬሱሱ ክርስቶሱ ኣዜንተዕኔ ዮገ ደጌንምበእንዶ? ህኩ ዮበኢች ገርንተ ኬነቶን ኡቤንታረ ዩሀ። 6 ነኦት ኬነቶን ኡቡ ሆጉኔ ደጌነንተገ ተሳ አሳም። 7 አዕኖኦት ሂለረ አስቴኑምቦገ መገኑ ኡጭናም። ህኩስን ነኦት መሃ ኬነቶሀንስ አጉንዴምረ እንኩምቦዳ አዕኖኦት ሆረንተ ጃተ ደናሙ ጠሀ አስቴኑንታት በጋን ነኦት ኬነቶሀንስ አጉንዴምረ እሁኔ ጡድሲሃበአ። 8 ዳፉንኩስ ነኦት ገሬ በጋን ገሬ አሌን ሜጡራ ሁጀቲ ደንድናምበአ። 9 ነኦት ሆንጋኑ እንኮምነ አዕኖኦት ቆጠረተ እኬንተ ጃተ አብንስ በጅቀማም። ነኦት መገኑ ኡጭናሚንኩ አዕኖኦት ኮተኖዕኔሩ ዮበእረ እኬኑንታት። 10 አን ካን ክዕኔኤቢች ቄዕር ዮም ጃተ ጣፎንክዕኔ ክዕኔኤበ ዋሎም ጃተ ቀርቹ ዬሱሱ ኣሴኤ መቄን ሀውሱምቦዕኔጊሃት። ዳፉንኩስ ህኩ ቀርቹ ዬሱሱ ኣሴኤ መቆ ክዕኔኤተ ቃርሲሃት በጋን ዝሪሃበአ። 11 አቼ ኢ ህዛከ! ጡመ ሄእዬ። ኮተኖዕኔሩ ዮበእረ እክዬ። ሰዘነኤን ቆርስዬ። አዕን-አዕኖኦንት ኢተምዬ። ጡሚን ሄእዬ። ኢተነ ጡም መገኑንኩ ክዕኔኤን እሀኖ። 12 አመዕናኒ አጉደኖ ሱንቀንቺን ጡምጨምዬ። 13 አመዕናኑ ሆሩንኩ «ጡመ ዮንተንዶ?» ይቴዕኔ። 14 ቀርቾ ዬሱስ ክርስቶስ ኣሰንቹ፥ መገን ኢተቲ ጡማንቾ አያን ሜጦመቲ ሆሪንተዕኔን በርገንት እኩን።
1 - 2 አን ሶቀማንቹ ጳዉሎሲ ኤሳን በርገንት ዮ ሆረንት ህዛከቲ ገላትይ ባዶን ዮንተ አመዕናን ማበራካ ሶንኬምተ ሶህኑ። አንን ሶቀማንቹ እኮሚ መኒች እንዶ መን ዉዲን እሁዕናች ዬሱስ ክርስቶሲኔቲ ዬሱሰ ሬሆች ኬእሾ አና መገኒኔቲ። 3 አናኔ መገኒቺ ቀርቾ ዬሱስ ክርስቶሲቺ ኣሰንቹሁ ጡሙሁ ክዕኔኤ እሁን። 4 ዬሱሱንኩ ከን ሂለ ዶሊች ፈእሶኔተ አና መገንኔ ሰውቲን ባጢሊሀኔ ገገስ ህግሽ ኣሴእ። 5 አና መገኒ ዶሊ ሆሪንከ አብኑ እሁንስ፤ አሚዕን። 6 ክርስቶስ ኣሰንቺን ገኤዕኔ መገኒች ሰርብቴን አነነ እኬን ዎሌ ምሽራች ላገበ ፈንቀልቴንተጉ ማለልሲሰኖኤ። 7 ህካን ዬሚንኩ ክርስቶስ ምሽራች ላገተ ሾክሶተ ሀሳነ ሉስሳዕኔ መ-መቱ መኑ ዮተኔሃት በጋን ዎልት ምሽራች ላገት ዮተኔሃትበአ። 8 ጠሁ እኮዳ ዎና ሰበንኮንክዕኔ ምሽራች ላጋች ዎልተ ነኦንቲ እንኮም ሰሜ መገን ሶቀማኑሁ ሰበኮዕኔደ ጤሌለሜኢ እሁን። 9 ዎናሃ ይኖንክዕኔገን አኒ ቴሱ ያንክዕኔ። አዪ አዕኖኦት ኣቅቴንተ ምሽራች ላጋች ዎልተ ሰበኮዕኔደ ጤሌለሜኢ እሁን። 10 ህከደ አን መኑንዶ መገኑ ገለጡንተኤ ሀሰዮም? እንዶ አን መነ በጅቀንሲ ሀሰዮምንዶ? ቴሶ ኢለንቀጤች መነ በጅቀንሲ ሀሼም እክየን ክርስቶስ አግሹ እሃምበአ እኬ። 11 ኢ ህዛከ! አን ሰበኮንክዕኔ ምሽራች ላገት መንቢተ እሁ ሆጉሴ ደጌኑንተ ሀሳም። 12 ዳፉንኩስ ህካን ኤሳ ለሊሾኤ ዬሱስ ክርስቶሳ በጋን አን ኣቄሚ መኒቼበአ። እንዶ መኑ ሮስስምበኤ። 13 ከኒች ብሬ አይሁድ አመዕነቶን ዮም ጄቾ ሄቸኤተኔ መጮቴንተ። መገኑ አመዕኔ መን ማበረ ኬዕማሸገ ሸረን በእሶተ አጰመዮምየ እኬ። 14 አይሁድ አመዕነቱ ቆረቢንን ዜርኤ ሜሬሮን ኢ ደረቢች በትናሺችስ አባምየ እኬ። አሞ አናከኤ ዎጉ በኡምቦገ ቃረገ ሀሳምየ እኬ። 15 - 16 ጠሁ እኮዳ እለሙዕናች ብሬን ዶዕሬኤነ ኣሰንቺንተስ ገኤኤ መገኑ አይሁደ እኩምቦ መን ሜሬሮን ቤትስተኔ ምሽራች ላገተ ሰበኩንተ ቤቱስ ኢ ዉዲን ለሊሶተ ሀሾ ጃተ አን አዬኒ ኤረምምበአ። 17 አሞ ኤሳች ብሬን ሶቀማኑ እኮሪበ ዬሩሳሌም ከተመሃ ፉልምበአ። ጠሁ እኮዳ አረብ ባዱ ድሬም። ህከኒች ዘኪንን ደማስቆ ከተመ ፈንቀሎም። 18 ሰሶ ዎጌች ዘኪን ጴጥሮሴን ደቀሞተ ዬሩሳሌመ ፉልኬእ እሲን በርገም ቶነ ኦንቱ በር ኤጌሮም። 19 ጠሁ እኮዳ ቀርቾ ዬሱስ ህዜች ያቆቤች በጋን ሶቀማኒች ዎሉ ሜጡሃ ጡድምበአ። 20 ኩ ጣፋንክዕኔ ጠሁ ገርተ። አንን ከን ጠህተኔ መገን ብሬን ቆጰነ ጠሃቃምበአ። 21 ህከኒች ዘኪን ሶርይነ ክልቅ ባዱ መሮም። 22 ኤስን ክርስቶሰ አመዕኔ መን ማበሩ ይሁድ ባዶን ዮኢ ጡድምበኤን እኬ። 23 ጠሁ እኮዳ እሶኦት «ኤጅ ኔስ ሸረኖእኬ መንቹ ቴሱ ዎና በእሶተ አጰመዮእኬ አመዕነትተኔ ገጉንኩስ ሰበከዮእ» ዬኖ ጠለ መጮጭቴ እኬ። 24 ኢተኔንከ መገኑ ገለጥተዮ እኬ።
1 ቶነ ሾሎ ዎጌች ዘኪን ባርነባሴኒ ቲቶኒ አፍ ለንኪሃ ዬሩሳሌመ ፉሎም። 2 ፉሎሚንኩ መገኑ ጫክሽ ኩሎኤጊኔት እኬ። አንን ብሬ ሁጀቾም ሁጅቲ ሁጀታሚሁ ጠለለ እሁምቦገ ይኬእ አይሁደ እኩምቦ መን ሜሬሮን ሰበኮም ምሽራች ላገተኔ ዬሩሳሌመ ዮ እኬ አወንሳኒ ቢንን ኩሎንሰ። 3 እሶኦንት ኤሳን በርገም ዮ እኬ ቲቶ መሃ ግሪክ ባድ መንቹ እኮዳ ኑጉሰሙንተ ግድስምበስ እኬ። 4 ጠሁ እኮዳ ሜሬሮንተኔ ሙጩጭት ማጠንት ኣጌ መ-መቱ ቆጰናኑ አመዕናኑ ቲቶ ኑጉሰሙንተ ሀሴ እኬ። ህኩሩንኩ ዬሱስ ክርስቶሲን ደቅኖም ዎማንመተ ሻሽት አግዞማን ፈንቀሽቶኔተ ሰውቴ እኬ። 5 እኮዳ ነኦት ምሽራች ላገ ገርት ክዕኔኤባን ቃርት ሄኡንተ ይንኬዕን ቀክቾ ጄቾሃ ህከን ኬኒ ቄለምምበአ። 6 ህኩ አወንሳኑ አጉድ ጡደንታሩ መገኑ እልተ ጡጅ ጎዕሉምቡ እኮተኔ እሶኦት ከኒች ብሬ አዬኤታ እካበለ። ህኩን ኤስ ሀውሰኖኤበአ። ህኩ መኑንኩ አን ሰበኮምሀኔን ሜጡራ በርግትምበአ። 7 ጠሁ እኮዳ ህከን ቆደ ጴጥሮስ ምሽራች ላገተ አይሁድ-መኒ ሰበኩንተ ሀደረት ኣሰንቶስሀንገንከ ኤሳሃ አይሁደ እኩምቦ መኒ ምሽራች ላገተ ሰበኩንተ ሀደረት ኣሰንቶኤገ ደጎእ። 8 ዳፉንኩስ ጴጥሮሴ ዉዲን አይሁድ-መኒ ሁጀቾ መገኑ ኢ ዉዲኒ አይሁደ እኩምቦ መኒ ሁጀቼእ። 9 አሞ አወንሳኑ እኮ ያቆብ፥ ጴጥሮሲ ዮሃንሲ መገኑ ኣሴኤ ኣሰንቸ ደጎ ጃተ ነኦቲ አይሁደ እኩምቦ መንበ መሪ እሶኦቲ አይሁድ-መንበ መሪ ኢተንት ኤሳሃ ባርነባሴሃ ሜጦመ መላተ እሁንተ መኬሰ አንጋን ሰላመቶኔ። 10 እሶኦንት ቡጠ ቃንጉንተ ሀደርስቶኔ። አንን ህካን አሶተ ቃረገ አጰሞም። 11 ጴጥሮስ አንጦክ ከተመ ዋሎ ጃተ በእሾተኔ ብሬንተስን «አቶንትጉ ገርተበአ» ዬንስ። 12 ዳፉንኩስ መ-መቱ መኑ ያቆቤቢች አንጦክ ከተመ ዋልታሀኒች ብሬ ጴጥሮስ አይሁደ እኩምቦ መኒን በርገም እተዮ እኬ። እኮዳ ህኩ መኑ ዋልቶ ጃተ አይሁደ ዋጅኬእ ዘኩ ምጅ አይሁደ እኩምቦ መኒች አነነ እኮ። 13 ፈኦ አይሁድ-መኑሁ ጴጥሮሴ ሉሰተ አወንቶእ። ህኩንን ዎሉ ፈእየን ባርነባሴኒ መለጬ እኬ። 14 ጠሁ እኮዳ እሶኦጉ ምሽራች ላገ ገሬተኔ ጠቤነ እሁ ሆጉስ ጡጆም ጃተ ሆራንከ መን ብሬን ጴጥሮሴ «አት አይሁድቹ እክኬእ አይሁድገ እሁዕናች አይሁደ እኩምቦ መንገ ሄኤንት እኬ። ህከደ ቴሱ አይሁደ እኩምቡ መነ አይሁድ-መንገ ሄኡንተ ሀትጉተ ግድሰዮንትሰ?» ዬንስ። 15 ነኦት ስሩንኩኔ አይሁዳ በጋን ባጢላመተ እኮሃ አይሁደ እኩምቧ መነበአ። 16 ጠሁ እኮዳ መኑ ዬሱስ ክርስቶሳን አመዕኒን ሙጩረኖ በጋን ሴረ ቆረቢን ሙጩሩምቦገ ደንጌም። አዪ ሴረ ቆረቢን ሙጩሩምቦተኔ ነኦቲ ገጉንኩኔ ሴረ ቆረቢን እሁዕናች ክርስቶሳን አመዕኒን ሙጩኖተ ዬሱስ ክርስቶሳን አመዕንኔም። 17 ክርስቶሲን ሙጩሪ ሀንሳምረ እንከን ገጉኔን ባጢላመተ እንክ ደገሞሚች ባጢለ ሁጀንታምገ አሰዮኢ ክርስቶሳ ዩሀበላ? ሆረኒ ህትጉተበአ። 18 ህከ ዎና ዝሬሚ ፈንቀሽ ምናሚ እኮሚች ሴረ ዝራንቹ እሁኤ ገጉንኩኤ ኩዕለዮም ዩሀ። 19 ዳፉንኩስ አን መገኒ ሄኦተ ይኬእ ሴር ዉዲን እኮደ ሴሪ ሬሄምየ። 20 አንን ክርስቶሲን በርገም ሰቀለሜም። ቴሱ ክርስቶሱ ኢ ኣዜን ሄአኖ በጋን አን ሄኣምበአ። ቴሱ ት ማሊን ሄኣም ሄቸት ኢቴኤነ ኢተኔ ገገስ ህግሽ ኣሴ መገን ቤቶን አመዕኒን ደገንቴታ። 21 ህከኒ መገን ኣሰንቸ ጠለ በእሳምበአ። ህከደ ሙጩሬኖ ሴረ ቆረቢን እኮችዕኑ ክርስቶሱ ጠለንከ ሬሄእ ዩሀበላ?
1 አዕኖኦት ኩ ቀላከት ገላትይ ባድ መኑ! ከኒች ብሬ ዬሱሱ ክርስቶሱ መስቀላን ሰቀለሞጉ እሌዕኔ ብሬን ምስልገ እክ ጡደመዮዕኔየ እኬበእንዶ? አስመተ ሁጀች ሉስሾዕኔ አዬት? 2 መቱ ጠሀ ጠለ ክዕኔኤች ደጎተ ሀሳም። ጡማንቹ አያነ ኣቅቴንታ ሴረ ቆረቢኔትንዶ መጮጭቴንተረ አመዕኒኔት? 3 አደ ህወንከንከ ቀላከተን? ጡማንቾ አያኒን አፌን ቴሱ ማሊን ጦፌነንንዶ? 4 አዕኖኦንት አብሴን ሀውቴነንታ ሜጡሩ ዮበኢሃንትንዶ? ህካን እኬደዕኑ ገርንተ ጠላንከ። 5 መገኑ ጡማንቹ አያነ ኣሴዕኔሁ ማለሉተ ሜሬሮንተዕኔ ሁጀቾሁ ሴረ ቆረቤንተተኔሃትንዶ መጮጭቴንተረ አመዕንቴንተተኔሃት? 6 «አብረሃምን መገኑ አመዕኔእ። ህኩንን እሲ ሙጩርመተ እክ ዎልሰሞስ» የመሜእ። 7 ህካን እኮች አመዕናኑ ሆሩንኩ አብረሃሜ ኦሱተ እኮገ ደግዬ። 8 መጣፉንኩ መገኑ አይሁደ እኩምቡ መነ አመዕነቲን ሙጩርሰኖሰገ ብርስን ደግኬእ አብረሃሜ «ኬሳን ምናደቡ ሆሩንኩ ማሰአመኖ» ይ ምሽራች ላገተ ዎናንከ ኩሌስ። 9 ህከኒ አመዕናኑ ሆሩንኩ አመዕኔ አብረሃሜንን ማሰአንቴሃረ። 10 «ሴሩ ዮ መጣፋን ጣፈሞራን ቃር ሄኡምቡነ ቆረቡምቡ ሆሩንኩ ጤሌለሜሃ» የመም ጣፈሞገንከ «ሴረ ቆረምብ ሙጩናም» ይታሩ ሆሩንኩ ጤሌለንቴሃረ። 11 አሞ «ሙጩሩ መንቹ አመዕነቲን ሄአኖ» የመሞተኔ አዪ ሴረ ቆረቢን መገን ብሬን ሙጩሪ ደንደኖበአ። 12 ጠሁ እኮዳ ሴሩ አመዕነቶን ሾሀሜሃበአ። ዳፉንኩስ ሴረ ቆረበኖ ሴራንን ሄአኖ። 13 «ሀቅ አሌን ሰቀለመኖ ሆሩንኩ ጤሌለሜሃ» የመም ጣፈሞተኔ ክርስቶሱ ኒተኔ ጤሌለሜኢ እክ ሴር ጤሌሊች ዎጄኔ። 14 ህኩንን እኮ አብረሃሜ ኣሰንቶ ማሰት ዬሱስ ክርስቶስ ዉዲን አይሁደ እኩምቦ መኒ ኢልቱንታቲ ነኦት መገኑ ኣሲ ተሳ አሴ ጡማንቹ አያነ አመዕነቲን ኣቅኑንታቲ። 15 ኢ ህዛከ! መንባን ሮሰንቴ አጉዲሸተ ኩላንክዕኔ። መኑ ኢተም ኡርሾ ጠሀ ኡሬሀኒች ዘኪን አዪ በእሶተ እንዶ ዎሉረ በርጎተ ደንደኖበአ። 16 ተሶስ ጠሃቀሞ አብረሃሜሃቲ ፍካኒሃንሴቲ። ህኩንን ሆለመ መኒ ጠሃቄሀንገ «ፍካኒሀንክ» ያኖበአ። ጠሁ እኮዳ ሜጦ መንቺ ጠሃቄኖሀንገ «ፍካንቺሀንክ» ያኖ። ህኩ «መቱ» የመሞንኩ ክርስቶሳት። 17 አቼ አን ያንክዕኔ ከኔት። ሾሌ ጥቤቺ ሰጀዱመ ዎጌቺ ዘኪን ኣሰሞ ሴሩ ህከኒች ብሬን መገኑ ኡርሾ ላገ ህድሩ ዝረኖበአ። አሞ ተሳሲ በእሰኖበአ። 18 ዳፉንኩስ እርስተ ደቄኖ ሴር ዉዲን እኬ እክየን ተሴ ዉዲን እሁስ ፈአኖ እኬ። ጠሁ እኮዳ መገኑ አብረሃሜ እርስተ ኣሴኢ ተሴ ዉዲኔት። 19 ህከደ ሴሩ ኣሰሞ ሚሃት? ሴሩ ኣሰሞ ተሳ አሰሞ አብረሃሜ ፍካንቢ ዋለንቀጤች ባጢለ ጡድሱንታት። ሴሩንኩስ ዋሎ መገን ሰሜ ሶቀማን ዉዲን መቶ ሜሬር መንች አንጋኔት እኬ። 20 ሜሬር መንቹንኩ ሜጦ መንቺ ሜሬር መንቹ እሀኖበአ። መገኑ እኮዳ ሜጦት። 21 ህካን እኮች ሴሩ መገኑ ኣሴ ተሴን ኡርጨመኖንዶ? ሆረኒ ኡርጨመኖበአ። ዳፉንኩስ ሄቸተ ኣሲ ደንደኖ ሴሩ ኣሰሜ እክየን ገርንተ ሙጩርመት ሴር ዉዲን ደገንታ እኬ። 22 ጠሁ እኮዳ ዬሱስ ክርስቶሳን አመዕኒን ደገመኖ ተሶ አመዕንታ መኒ ኣሰሙንተ መጣፉ ያኖገንከ ሆረንከ መነ ባጢሉ ኡሱሬእ። 23 አመዕነቱ ዋለኖሀኒች ብሬ አመዕነቱ ለለንቀጤች ሴሩ ኡሱርየኔ ጡፈሜኔ እኬ። 24 ህከኒ ነኦት አመዕነቲን ሙጩኑንተ ክርስቶሱ ዋለንቀጤች ሴሩ ቆረባንቿኔ እኬ። 25 ጠሁ እኮዳ ቴሱ ህኩ አመዕነቱ ዋሎተኔ ነኦት ከዘኩ ቆረባንች አንጋኔበአ። 26 ዳፉንኩስ አመዕነት ዉዲን ሆሩንኩዕኔ ዬሱስ ክርስቶሲን መገንተ ኦሱ። 27 አሞ ጠመቀሚን ክርስቶሲን ሜጡ እኬንተሩ ሆሩንኩ ክርስቶሰ ኦደቅቴንተ። 28 ህከኔንን አይሁድቹ እንዶ ግሪክቹ እንዶ አግሹ እንዶ ዎማንቹ እንዶ ጎንቹ እንዶ ሜንትቹት ዮበአ። ዳፉንኩስ አዕኖኦት ሆሩንኩዕኔ ዬሱስ ክርስቶሲን ሜጦት። 29 አሞ አዕኖኦት ክርስቶስረ እኬንታች አብረሃሜተ ኦሱ። አሞ ተሴ ላገጊንን ረገኣኗ።
1 ቴሱ አን ያሚ መሃ ሆሩሩንኩ እስቢ እኮዳ ረገኣንቹ ጪልነቲን አግሺች ዎያበአ። 2 ጠሁ እኮዳ እስ አኑስ ኡርሾ ጃት ኢልተንቀጤች ቆረባነ ሀደረ መን አንጋን ኤጌረኖ። 3 ህትጉንተ ነኦቲ ጪለተ ዮም ጃተ ተን ኡለ አሌን ዮ ዎጊ ጠቀሜምተ አግዘ እኬ። 4 ጠሁ እኮዳ ጃት ኢልትየን መገኑ ቤቱስ ሶኮኔ። እስን ሜንትቾች እለሞ። አሞ መገን ሴሪንከ አዘዘሞ። 5 ህካን አሴኢንኩ ሴር ኣዜን ዮ መነ ዎዞታቲ ነኦቲ ኦሱስ እንኩንታቲ። 6 መገን ኦሱተ እኬንተተኔንከ መገኑ «አባ! አነ መገኖ!» ይ ገአኖ ቤትስ ጡማንቹ አያነ ዎዘናንተዕኔ ሶኬእ። 7 ህከኒ ከዘኩ አት መገንጊን ቤቷ በጋን አግሿበአ። አሞ ቤቱ እኮንቲች ረገኣንቿ። 8 ዎና አዕኖኦት መገኑ ደጌኑምቡ ዶለ ቆጨንቺንተሰ መገነተ እኩምቦሪ አግዘተ እኬን ጠቀንቴንተ እኬ። 9 ጠሁ እኮዳ ቴሱ መገኑ ደጌንተ። ባሰንከስ መገኑ ደጌዕኔ። ህከደ ሀትጉመ ሆግመነ ዎነ ሂለ ዎግበ ፈንቀልቴነዮንተ? ቴሱ ህከሮኦንከ አግዘተ እኬን ጠቀሚ ሀሴነዮንተንዶ? 10 አዕኖኦንት በራከተ፥ አገናከተ፥ ጄቻከታ ዎጋከታ ቃርስቴን ቆረቤነንተ። 11 ህከኒ አን አይደጎ ክዕኔኤ ይ ኦርበኦሚ ጠለ በአኖንዶ ይ ዋጀዮም። 12 ኢ ህዛከ! አን ክዕኔኤገ እኮምተኔ አዕኖኦቲ ኢገ እክዬ ይ ኡጫንክዕኔ። አዕኖኦንት ሜጡራ በእሴንምበኤ። 13 አን ዎነ ኮደተ ምሽራች ላገተ ሰበኮንክዕኔ ሞሾምተኔ እኮገ ደጌነንተ። 14 ሞሱኤ መሃ ክዕኔኤ ሀወ እኮዳ መገን ሰሜ ሶቀማንችገ ህከኒችን አሉዲን ዬሱስ ክርስቶስገ አስቴን ኣቅቴንተኤ በጋን ጬንቴንምበኤ እንዶ ገዴንምበኤ። 15 ከኒች ብሬ ዮዕኔ በጅጉት ቴሱ ሀትኮለ? ደንዴሼዕኔ እክየን ህተ ጃተ እልዕኔ ፉሽቴን ኣስቴነንተኤ እኬ ይ ነቀሳንክዕኔ። 16 ህከደ ገርተ ኩሎንክዕኔተኔ ዲነዕኔ እኮምንዶ? 17 ህኩ ዎነ መኑ ቃረገ ሀሳዕኔ። ጠሁ እኮዳ ሀሰዮሲ ክዕኔኤታ ኔሲ አነነ አስት እሶኦ ቃረገ ሰውቴነንተገ አስቶታት በጋን ጡሚሃበአ። 18 እኮዳ አን ክዕኔኤባን ሄኣም ጃተ ጠለ እሁዕናች ሆረንተ ጃተ ደናሙ ጠሀ አስቴንተደ በሬዳ። 19 ኢ ኦሶ! ክርስቶሱ ሄቻንተዕኔ ጡደመንቀጤች ክዕኔኤተኔ ለንኪሃ ባሉ አፌኤ። 20 ዳፉንኩስ ክዕኔኤተኔ መ አሳምንዶ ደጉ ሆጎምተኔ ቴሱ ክዕኔኤባን ሄእ ላገኤ ዶሮተ ሀሳም እኬ። 21 ሀኖ ኩልዬኤ። አዕኖኦት ሴሪች ዎሮዲን ሄኢ ሀሴነንተሩ ሴሩ ያኖሲ መጮቴነንተበእንዶ? 22 ዳፉንኩስ አብረሃሜ ለምት ኦሱት ዮስጉ ጣፈሜእ። ህኩሩንኩ መቱስ አግሾች መቱስ ዎማንቾች እለንቴሃረ እኬ። 23 ጠሁ እኮዳ አግሾስ ቤቱ ማልጊን እለሜሃ እኬ። አሞ ዎማንቾስቢ እለሞ ተሴ ላገጊኔት እኬ። 24 ኩ ጠሁንኩ አጉዲሸተ እኬ። ህኩ ሜንቱንኩ ለሞ ህድሬየገ። መትሴን «ሲነ» ዬኖ ዱን አሌን ኣሰሞ ህድሪ አጉዲሸተ እኮ አጋሬት። እሴን ኦሱተ እልታኢ አግዞማሃት። 25 ህት አጋርን + አረብ ባዶን ዮ «ሲነ» ዬኖ ዱንተ አጉዲሸ። እሴን ቴሱ ዮ ዬሩሳሌም ከተሚን አጉጠንታእ። እሴን ኦሶንተሴን አግዞማን ዮታ። 26 ጠሁ እኮዳ አሌ ሰማን ዮ ዬሩሳሌንቹት ዎማንማን ሄኣታ። እሴን ኒታ አመ። 27 ዳፉንኩስ መጣፋን «አት እልቱምቡ አልጬነት በጅቀም። አትን ባልት ከሱምቡት እልል ይ። ምኔኑ ዮሴተኔች አበ ምኔኑሴ ኡጄ ሜንትቾ ኦሱት በተኤእ» የመም ጣፈሜእ። 28 ኢ ህዛከ! ነኦንት ቴሱ ይሳቄገን ተሴታ ኦሱ። 29 ጠሁ እኮዳ ህተ ጃተ ማሊን እለሞ ጡማንቾ አያን መቄን እለሞሲ ሸሬገንከ ቴሱ ህትጉተንተ። 30 እኮዳ ጡማንቹ መጣፉ መ ያኖ? መጣፉዕኑ «አግሾ ቤቱ ዎማንቾ ቤቲን በርገም ረገኢ ደንዱምቡተኔ አግሹተ ቤቲንተሴን በርግት ሸር!» ያኖ። 31 ህከኒ ኢ ህዛከ! ነኦት ዎማንቾተ ኦሱ በጋን አግሾተ ኦሱበአ።
1 ዎማንማን ሄዕኑንተ ክርስቶሱ ዎማንማን ፉሼኔ። ህከኒ ቃርቴን ኡርዬ በጋን ለንኪ ፈንቀልቴን አግዞማን ጠቀንቴኖችዬ። 2 ቴሱ አን ጳዉሎስ ያንክዕኔ «ኑጉሰሙ ካዕለኖ» ይቴነንታ እኮች ክርስቶሱ ሜጡራ ካዕለኖዕኔበአ። 3 «ኑጉሰሙ ካዕለኖ» ያኖ ሆሩንኩ ሴረ ሆረንከ ቆረብ ግዱ ዮስገ ለንኪሃ ቃርስ ኩላንስ። 4 ሴረ ቆረቢን ሙጩሪ ሀሴነንተ መኑ ክርስቶሲች አነነ እኬን ኣሰንቺችስ ኡቤንተ። 5 ጠሁ እኮዳ ነኦት ተሳ አስናም ሙጩርመተ ጡማንቾ አያን ዉዲን አመዕነቲን ቆረምበዮም። 6 ዳፉንኩስ ዬሱስ ክርስቶስባን ኢታን ሁጀተኖ አመዕነቲች በጋን ኑጉሰሙ እኮ ኑጉሰሙ ሆጉ ሜጡራ ካዕለኖበአ። 7 አመዕነቲን ደናሞገ ደጉዴነዮንተ እኬ። ቴሱስ ገሬ አዘዘሙ ከሞዕኔ አዬት? 8 ኩ መለጥ ሰውቱ ዋሎ ገኤዕኔ መገኒቼበአ። 9 ህኩንን «ቀሁ ሺሹ ሙጥሴመ ቀመ ሆረንከ ሺሽሰኖ» የመሞሀንየገ። 10 ጠሁ እኮዳ አን ሰውያምጊች ዎሉ ሰውቱ ሄኡምቦዕኔገ ቀርቾ ዬሱስ ዉዲን እክ አመዕናንክዕኔ። ሀውሰኖዕኔ አዬኒ እኮዳ ፍርደስ ኣቀኖ። 11 ኢ ህዛከ! አን ቴሶ ኢለንቀጤች ኑጉሰተኔ ሰበኬም እክየን ቴሶ ኢለንቀጤች ሚ ሸረማም እኬ? ህካን እኬ እክየን ክርስቶስ መስቀልቹ ጉፍቹ እሀኖበአ እኬ። 12 ህከን ጠህተኔ ሀውሳዕኔ መኑ ገገሰ መራጠቅቴ እክየን ኢታም እኬ። 13 ኢ ህዛከ! አዕኖኦት ዎማንማ ገአንቴንተ። ጠሁ እኮዳ ኢታን መቱ-መቲሀዕኔ አግዘገ ጠቀምዬ በጋን ዎማንመዕኔ ማል ሰውተ ዊንሺ ገጃጁተ እኩንከ። 14 ሴሩ ሆሩንኩ ሜጤ ላጋን ዊመኖ። ህኩስን «ኦሌቹክ ገግክገ ኢት» ያኗ። 15 ጠሁ እኮዳ አዕን-አዕኖኦንት ገዕመቀንቴንተዳ እተቀንቴንተዳ ጎጰንቴኑምቦገ ቆረጵዬ። 16 ጡማንቾ አያኒን ሄእዬ በጋን ማል ሰውተ ዊንሽቴኖችዬ ያንክዕኔ። 17 ዳፉንኩስ ማሉ ሰውያኖሩ ጡማንቹ አያኑ ግበኗረ። አሞ ጡማንቹ አያኑ ሰውያኖሩ ማሉ ግበኗረ። እስ-እሶኦንት ግጰንታተኔ አዕኖኦት ሀሴንተረ አሲ ደንድቴነንተበአ። 18 ጠሁ እኮዳ ጡማንቹ አያኑ አወንሴዕኔደ ሴሩ ጠቀኖዕኔበአ። 19 ማል ሁጅንት ጫክት ለልቴታ። ህኩስን ሳ፥ ቡሽመተ፥ በለልተ፥ 20 ቆጰን መገኒ ሰገዷ፥ አስመታ፥ በአንቸተ፥ ኦደተ፥ ቂንሸተ፥ አሙርተ፥ ገገ ኢቷ፥ ሂላ ኤረ፥ አነኖመተ፥ 21 ዲኖመተ፥ ድምቧ፥ ሸለተኒ መነ ሿኒ። አሞ ህከረ አጉደኗ ሆራረንከ። ዎናሃ ቃርስ ኩሎንክዕኔገንከ ቴሱ ኩላንክዕኔ። ህትጎነረ አስታ መኑ መገን ዎሞመተ ረገኣበአ። 22 ጠሁ እኮዳ ጡማንቾ አያን ላሉት ኢተተ፥ በጅጉተ፥ ጡማ፥ እየቋ፥ ቢዝመተ፥ ጡምመተ፥ አመዕነሟ፥ 23 ማሽመተኒ ገገ ኤጌጧኒ። ህትጎነ ጠሂን ግጰመኖ ሴሩ ዮበአ። 24 ዬሱስ ክርስቶስረ እኮ መኑንኩ ማለ ሂላንስ ሰውቲንተሲ ቁልጢንተሲ በርግት ሽቴእ። 25 ነኦት ጡማንቾ አያኒን ሄዕኖሚች ጡማንቾ አያኒንን ሄዕኑን። 26 ነ-ነኦንት መቱ መትኔ አሌን ኬዕነኒ ቂንሸቀመኒ ጠለንከ ቦልጥኑንከ።
1 ኢ ህዛከ! መቱ መንቹ መ ባጢለሃ ሁጀች ደገሞደ አዕኖኦት አመዕነቶን ቃራከተ እኬንተስሩ ህትጎነ መንቹ ማሽማን ጠበእዬስ። ጠሁ እኮዳ አቲ ኬነንቱምቦገ ገገክ ቆረጵ። 2 አዕኖኦንት መቱ መትዕኔ እይነተ እይዬ። ህትጎንን ክርስቶስ ሴረ ዊንሽቴነንተ። 3 አዪ ገገስ ዎሎ መኒች ዎየኖ አስ ሰውዬደ ህኩን ገገስ መለጠቀዮሃ። 4 ጠሁ እኮዳ አኑንኩ አኑንኩ ገግስ ሁጅተ ኬዕን ጡዱን። ህከኒች ዘኪን ዎሎ መን ሁጄን እሁዕናች ገግስ ሁጄን ጠላን ቦልጦተ ደንደኖ። 5 ዳፉንኩስ አኑንኩ አኑንኩ ገግስ እይነንተ እየቁ ሀስሰኖስ። 6 መገን ላገተ ሮሾ መንቹ ሮስሾስ መንቺንን በርገም ደናሙ ጠሀ ሆረንከ ቤቀሙ ሀስሰኖስ። 7 ሉሴኖችዬ። መገኖን ገላጪ ደንዴኖበአ። ዳፉንኩስ መኑ ውጠቄኢ ህካንን ሀጢጠኖ። 8 ጠሁ እኮዳ ገግስ ማለ በጅቀንሲ ውጠኖ ማሊችስ በኡ ሀጢጠኖ። አሞ ጡማንቹ አያነ በጅቀንሲ ውጠኖ ጡማንቾ አያኒች ዶሊ ሆሪንከ ሄኣ ሄቸተ ሀጢጠኖ። 9 ህከኒ ሆንጉዕነ ሁጀጥኖምደ ጄቾንተስ ሀጢጥናምተኔ ደናምተ ሁጅተ ሁጀቱ አጉኑንከ። 10 አቼ መከ ደንጎም ጃተ ሆረንተ መኒ ሆሪንከ ደናሙ ጠሀ አስኑን። ባሰንከስ አመዕኔ መኒ ደናሙ ጠሀ አስኑን። 11 ሀወንከ አበባኖ ፍደላካን ገግኤ አንጋን ጣፎንክዕኔገ ጡጅዬለ። 12 ማሊን ደናሙ አጉድ ጡደሚ ሀሳ መኑ ክርስቶስ መስቀልችተኔ ሸረንቱምቦገ ሀሶተኔ ጠሊ ኑጉሰንቴኑንተ ግድሳእ። 13 እሶኦንት ኑጉሰንቴኑንተ ሀሰዮኢ ኑጉሰሞንተዕኔ ቦልጥቶታት በጋን ኑጉሰንቶስሩ ገጉንኩሰ ሴረ ቆረብምበአ። 14 ጠሁ እኮዳ አን ተን ኡለ አል ጠሂ ሬሄምነ ተን ኡለ አል ጠሁ ኤሳች ሬሄ ቀርቾ ዬሱስ ክርስቶስ መስቀልቺች ህግየን ዎሎራን ድከኡ መገኑ ኤቡንከ። 15 ዳፉንኩስ ሃሮ ቆጨንቸ እሁ በጋን ኑጉሰሙ እኮ ኑጉሰሙ ሆጉ ሜጡራ ካዕለኖበአ። 16 ከን ዎጊን ሄኣ መኒ ሆሪንካ መገን መኒ እስራኤሊሃ ጡሙሁ ማረቱቲ እኩን። 17 ዬሱስ መላት አሌንተኤ ዮተኔ ከኒች ዘኪን አዪ ሆግሱንከኤ። 18 ኢ ህዛከ! ቀርቿኔ ዬሱስ ክርስቶስ ኣሰንቹ ክዕኔኤን እሁን፤ አሚዕን።
1 መገን ሰውቲን ዬሱስ ክርስቶስ ሶቀማንቹ እኮም ጳዉሎሴች ዬሱስ ክርስቶሲን አመዕነንቴረ እኮ ኤፌሶን ከተማን ዮ ጡማኒ ሶሀንቴታ ሶህኑ። 2 አናኔ መገኒቺ ቀርቾ ዬሱስ ክርስቶሲቺ ኣሰንቹሁ ጡሙሁ ክዕኔኤን እሁን። 3 ጡማንቾ አያን ማሰተ ሆረንተ ክርስቶሲን ኣሲን ሰማን ማሰኦኔ ቀርቿኔ ዬሱስ ክርስቶስ አኑ መገኑ ገለጠሙን። 4 ዳፉንኩስ ነኦት ብሬንተስ ጡማኑሃ ቡሽመት ዮበእራ እንኩንተ መገኑ ት ኡለት ቆጨንቱዕናች ብሬን ክርስቶሲን ዶዕሬኔ። 5 አሞ እስ በጅቀመኖጊኒ ሀሰኖጊኒ ክርስቶስ ዉዲን ኦሱስ እንኩንተ ዎናንከ ኢታንተስ ኡርሼሃ ጠሀ። 6 ህካን አሴኢንኩ ኢተሞ ቤትስ ዉዲን ጠለንከ ኣሴኔ አብንስ ኣሰንቹ ገለጠሙንታት። 7 እሲንን መገን ኣሰንች በትኔጊን ነኦት ቤትስ ቄጊን ዎዘም ባጢልኔ ማረቱተ ደቅኖም። 8 ኣሰንቸስን መሌሲኒ ቆርማኒ በትሽ ኣሴኔ። 9 መገኑ ደናሟንስ ሰውቲን ክርስቶስ ዉዲን ዎናንከ ኡርሾጊን ማጠሞ ሰውተስ ደግሲሾኔ። 10 ጃት ኢልቶ ጃተ ሰማኒ ኡለኒ ዮሩ ሆሩንኩ ሜጦማን ሜጧንከ ክርስቶስ መቄ ኣዜን እሀኖ። ህትጎንን መገን ሰውቱ ዊመኖ። 11 ሆረረንከ ገግስ ሰውቲን ሁጀተኖ መገኑ ዎናንከ ኡርሾጊንን ዶዕረሞምሩ አሞ ክርስቶስ ዉዲን ግዘስ እንኬም። 12 ህኩን እኮንኩ ዎና ክርስቶሳን ተሳ አስኖም ኒ ዳፊን መገኒ አብኑሁ ገለቱሁ እሁንታት። 13 ገሬ ላገተ ህኩስን ፈእኔ ምሽራች ላገተ መጮቴን ክርስቶሳን አመዕንቴንተሪ ተሳ አሰሞ ጡማንቹ አያኑ ማተብገ ዎቀረሜዕኔ። 14 እስ አብኒ ገለቱ እሁንተ መገኑ ገግስረ ሆረንከ ዎዘንቀጤች ረገዕናም እሪሀኔ ህኩ ጡማንቹ አያኑ ቀብድየገ። 15 ህከንተኔ አን ቀርቾ ዬሱሳን ዮዕኔ አመዕነቱሃ ጡማኒ ሆሪንከ ዮዕኔ ኢተታ መጮጭኬእ 16 መገኑ ኡጫም ጃተ ክዕኔኤተ ቃገን ክዕኔኤ ዳፊን መገኒ ገለት ህንጨኡ አጉራምበአ። 17 አሞ ቀርቿኔ ዬሱስ ክርስቶስ መገኑ እኮ አብን አኑ እሱ ደናሞገ ደጌነንተገ አሰኖ ቆርመነ ጫክሽ ጡድሰኖ አያነ ኣሱንተክዕኔ መገኑ ኡጫም። 18 - 19 ህትጉንተ ዎዘንዕኔ እልት ፈነንትየን መገኑ ገኤዕኔ ተሶ፥ ጡማኑ ረገኣ እር አብን በትንቲ ኔሳ አመዕንናም ኬኒ ቅጠሞ መቄስ በትንቲ ሀበንከተንዶ ደጌኑንተ መገኑ ኡጫም። ህኩ ኒ ኣዜን ሁጀተኖ አቡ መቆንኩ 20 - 21 ክርስቶሰ ሬሆች ኬእሾ ጃተ ገሽ መቄች፥ ዳኖማች፥ መቄቺ ቀርቦማቺ ሆሪችን አሉዲኒ ከን ዶላን ጠላን እሁዕናች ዋለኖ ዶላኒ ገአመኖ ሱዕሚች ሆሪችን አሉዲኒ አስ ሰማን መኬስ ዉዲን አፉዕለኖገ አሲን ክርስቶስ ዉዲን ዊንሼ ሁጄን ለሌእ። 22 መገኑንኩ ሆረረንከ ክርስቶስ ሎካች ዎሮዲን ጠቀመኖገ አሴእ። አሞ ሆራሪችን አሉዲን አመዕናን ማበሪ ቦቁተ እሀኖገ አሴእ። 23 አመዕናን ማበሩንኩ ክርስቶስተ መኖመኒ እስተ ዊምመኒ። እስን ሆረረንከ ሆራባንን ዊንሸኗ።
1 አዕኖኦት በእስዕኔነ ባጢልዕኔ ዳፊን ሬቴንታረ እኬ። 2 ህተ ጃተ ተን ኡለ አል ጠሀሃ ቦብር አሌን ገሽ መቆ ዮሲሃ አወንቴነን ሂልማን ሄኤነዮንተ እኬ። ህኩስን መገኒ አዘዘሙምቦ መን አሌን ቴሱ ሁጀተዮሃ ሂላ አያነ። 3 ህከን መን ሜሬሮን ነኦቲ ሆሩንኩኔ ማልኔነ ዎዘንኔ ሰውተ አወነን ከኒች ብሬ ማልኔ ቁልጢን ሄዕነዮም እኬ። ዎሎ ኬንገንከ ነኦቲ ቆጨንቺንተኔ መገን አሙሬ ኣዜን ዮም እኬ። 4 ጠሁ እኮዳ መገን ማረቱቲ ኔስ ኢተኖ ኢተሲ አበተ እኮተኔ 5 መሃ ባጢልኔ ዳፊን ሬኔምረ እንኮምዳ መገኑ ክርስቶሲን ሄቸተ ኣሴኔ። አዕኖኦንት ፈኤንታ መገን ኣሰንቺኔት። 6 አሞ መገኑ ኔስ ክርስቶሲን በርግ ሬሆች ኬእሽ ክርስቶስ ዉዲን እሲንን በርገም ሰማን አፉዕልናምገ አሴኔ። 7 ህካን አሴኢንኩ ዋለኖ ዶላን ልኪች ህጌ ኣሰንችስ በትንተ ዬሱስ ክርስቶስ ዉዲን ኔሳ ቢዝማንተስ ጡድሶታት። 8 ዳፉንኩስ አዕኖኦት አመዕነቲን ፈኤንታ መገን ኣሰንቺኔት። ህኩስን መገንየ ኣሰንቸ በጋን ክዕኔኤቼበአ። 9 አሞ አዪ ቦልጡምቦገ ፈኤኖ ሁጄኔበአ። 10 ዳፉንኩስ ነኦት መገኑ ዎናንከ ቅጠንሴ ደናምተ ሁጅተ ሁጀንቶተ ዬሱስ ክርስቶሲን ቆጨሜምየ መገንየ ቆጨንቸ። 11 ዎና ቀለንቺንተዕኔ አይሁደ እኬኑምቦጋ ማሊን መን አንጋን ኑጉሰንቶተኔ ገገሰ «ኑጉሰሜምየረ» የቅታሩ ክዕኔኤተ «ኑጉሰንቱምቡረ» ይት ገእታዕኔጋ ሰውዬ። 12 አሞ አዕኖኦት ህተ ጃተ እስራኤል ምናደቢች አለግሰንቴን፥ ተሴ ላገ ህድሪንከ ኮሀ እኬን፥ ተን ኡለ አሌንን ተሳ ሆጌኒ መገኒች አነነ እኬኒ ክርስቶሱ ዮዕኔበኢ ሄኤንተገ ቃግዬ። 13 ጠሁ እኮዳ አዕኖኦት ከኒች ብሬ ቄዕርቴን ዮንተ እኬሩ ቴሱ ዬሱስ ክርስቶሳን እኬን ክርስቶስ ቄጊን ህንጭቴንተ። 14 ዳፉንኩስ አነነ አሴኔ እኬ በአንች ግግደ ዝሬኢሁ አይሁደሃ አይሁደ እኩምቡ መነሃ ሜጡ አሴኢሁ ጡመኔ እኮ ክርስቶሳት። 15 አሞ ጡመ አሲን ለሚችን እሲን ሜጡ እሀኖ መቱ ሃሮ መንቹ ቆጮተ ሴር አዘዙታ ዎገሃ ማሊንተስ ዝሬእ። 16 እስን መስቀል አሌን ሬሂን ዲኖመተ ቄርሴእ። ህተእ ለሙንከ ሜጡ አል አስ መገኒን ሆቆሰ። 17 ህከኒች ዘኪን ዋልኬእ ቄዕርቴን ዮንተእኬ ክዕኔኤሃ ኦንጠኔ ዮእኬ መኒሃ ጡም ምሽራቸ ሰበኮ። 18 ዳፉንኩስ እስ ዉዲን ሆሩንኩኔ ሜጧንከ ጡማንቾ አያኒን አና መገንበ ህንጭኔም። 19 አቼ አዕኖኦት ጡማኒንን ሜጦ ባድየ መነኒ መገን ምንየ መነኒ በጋን ከኒች ዘኪን ኮሃኒ ኣግቻከተኒበአ። 20 አሞ አዕኖኦት ሶቀማንነ ህራጋን ሾሆ አሌን ምነንቴንተ። ምንስ ኡቱቡንኩ ዬሱስ ክርስቶሳ። 21 እሶንን ምኑ ሆሮመንትስ አጰም ቀርቾ ዬሱሲን ኬሰሜ መገን ምን እሂ ሌአኖ። 22 ህትጉንተ አዕኖኦቲ መገኑ ጡማንቾ አያኒንተስ ገለኖ ምን እኬኖተ ክርስቶሲን ሜጡ እኬን ምነንቴንተ።
1 ህከኒ አይሁደ እኬኑምቦ ክዕኔኤ ዳፊን ዬሱስ ክርስቶስተኔ ኡሱረሞም አን ጳዉሎስ ጉሉጵ መገኑ ኡጫም። 2 አሞ አን ክዕኔኤ ካዕሉንተ መገኑ ኣሴኤ ኣሰንች ገሽ ሁጄተኔ ገርንተ መጮቴንተ። 3 አን ዎናንከ ገበንቾን ጣፎንክዕኔገንከ መገኑ ማጠሞ ጠሀ ጫክሽ ጡድሼኤ። 4 አዕኖኦንት ከ ጣፎንክዕኔ አነበቤነንተ ጃተ ክርስቶስ ማጠሞ ጠሀ አን ሀበንከ ቆርሳምንዶ ደጊ ደንድቴነንተ። 5 ህኩ ማጠሞ ጠሁንኩ ጡማንቾ አያኒን ጡማኗንስ ሶቀማኒሃ ህራጋኒሃ ደገሞጊን ዎዶ ዶለ ዮእኬ መኒ ደገምምበአ። 6 ህኩስን አይሁደ እኩምቡ መኑ ምሽራች ላገ ዉዲን አይሁድ-መኒንን በርገንት ረገኣኑ እኮጉ፥ ሜጤየንተ መኖመ ቤለየ እኮጉ ዬሱስ ክርስቶሲን እኮ ተሳ ቤቀማኑ እኮጉ ለልምበአ እኬ ዩሀ። 7 መገኑ መቄንተስ ሁጀተኖ ሁጄን ጠለንከ ኣሴኤ ኣሰንቺንተስ ህተን ምሽራች ላጋ ሁጀታንቹ እኬም። 8 አንን መሃ ጡማኒች ሆሪችን ቀሁ እኮምዳ ገበሉ ዮበእ ክርስቶስ ቀባጦተኔ አይሁደ እኩምቦ መኒ ሰበኩንተ ኩ መገን ኣሰንቹ ኣሰሞኤ። 9 አሞ ህኩ ኣሰንቹ ኣሰሞኤ ሆረረንከ ቆጬ መገኑ በትናሸ ዶሊ ደጰኤ ማጠሞ ጠህተኔ መገን ሰውቱ መሃንዶ መኑ ሆሩንኩ ደገኖገ አሱንታት። 10 አሞ ከን ዶላን አመዕናን ማበር ዉዲን አነነተ አነነተ ሀገረተ መገን ቆርመተ ሰማን ዮ ገሻኑሁ ዳናከቲ ደጉንታት። 11 ህኩን እኮንኩ መገኑ ቀርቿኔ ዬሱስ ክርስቶሲን ዊንሼ ዎናንከ ዮ ሰውትስጊኔት። 12 ዬሱስ ክርስቶሳን ዮኔ አመዕነቲን መገን ብርተ እግማኒ አመዕነቲኒ ህንጭኖተ ደንድናም። 13 ህከኒ ኩ ክዕኔኤተኔ ኣቃም ሀዉ አብንዕኔ እኮተኔ ተሳ ሙርቴኑምቦገ ኡጫንክዕኔ። 14 - 15 ህከንተኔ ሰማኒ ኡለኒ ዮ አበሮሱ ሆሩንኩ ሱዕሚንተስ ገአመኖነ ሆሪንከ አነ እኮ መገን ብሬን ጉሉጵኬእ 16 ኣዝዕኔ መኖመተ ቃርሰኖ መቆ መገኑ ጡማንቿንስ አያኒን አብንስ ቀባጦጊን ኣሱንተክዕኔ፥ 17 ክርስቶሱ አመዕነቲን ዎዘናንተዕኔ ሄኡንተ፥ ክዕኔኤ ጠጱሁ ሾሁቲ ኢታን ቃሬኢ እሁንተ፥ 18 ክርስቶስ ኢተ ሀራርመት፥ ቄራዕርመቲ ጥልመቲ ሀበንከተንዶ ጡማኒን ሆሪንን በርገንቴን ቆርሲ ደንድቴኑንተ፥ 19 ሰውቲች ሆሪችን አበተ እኮ ህተ ኢተስ ደጌኑንታ መገን ዊመ ዊምማን ዊንቴኑንታ መገኑ ኡጫንክዕኔ። 20 አቼ ኒ ኣዜን ሁጀተኖ መቄንተስ ኡጭናምሀኒች እንዶ ሰውናምሀኒች ሆሪችን አሉዲን አሶተ ደንደኖ መገኒ 21 እሲ አመዕናን ማበር ኣዜኒ ዬሱስ ክርስቶሲኒ ሆረንተ ጃተ ዶሊ ሆሪንከ አብኑ እሁስ፤ አሚዕን።
1 አቼ ቀርቾ ዬሱስተኔ ኡሱረሞም አን ገአንቴንተ ገአንቺሀዕኔ አጉደኖጊን ሄኤኑንተ ኡጫንክዕኔ። 2 ኢታን አዕን-አዕኖኦንት ደንዴቀቀንቴነን ማሽማን፥ በሬድማኒ ደንዴቂኒ ሄእዬ። 3 አሞ ጡሚን ኡሱዕረቀንቴን ጡማንቾ አያኒች ደገንታ ሜጦመተ ቃርቴን ቆረብዬ። 4 አዕኖኦት ገአንቴንተ ጃተ ሜጦ ተሴ ገአንቴንተገንከ ሜጥት መኖመት፥ ሜጡ ጡማንቹ አያኑ፥ 5 ሜጡ ቀርቹ ዬሱሱ፥ ሜጡ አመዕነቱ፥ ሜጡ ጥንቀቱሁ 6 ሆሪችን አሉዲን እኬኢ ሆር ዉዲንን ሁጀተኖነ ሆር ኣዜንን ሄአኖ ሆሪንከ አነ እኮ ሜጡ መገኑሁ ዮእ። 7 ጠሁ እኮዳ ክርስቶሱ ኣሲ ሀሾጊን አኒንከ አኒንከ መገን ኣሰንቹ ኣሰሜኔ። 8 ህኩንን «ሰማ ፉሎ ጃተ በትናሸ ቀፈደሜ መነ አፍ ፉሎ። መኒንከ ኣሰንቸ ኣሴእ» የመሟገ። 9 ህከደ ኩ «ሰማ ፉሎ» ዩ ኡለ አል ድሩስ ጡድሰኖ እሁምቦች ህግየን ዎሉ መ ጡድሰኖ? 10 ህኩ ኡለ አል ድሬኢ ሆረረንከ ዊንሾተ ሰሜች ሆሪችን አል ፉሎሁ እሶንት። 11 - 12 አሞ እስ ኣሰንቹንኩ ክርስቶስ አል እኮ አመዕናን ማበሩ ቃሩንተ አመዕናኑ ሁጄ ቅጠመኖጊ መ-መቱ መኑ ሶቀማኑ አሞ መ-መቱ ህራጋኑ ህትጉንተ መ-መቱ ምሽራች ላገተ ሰበካረ መ-መቱ ቄሳከታ ሮስሳኑሃ እካገ አሴእ። 13 ዳፉንኩስ ሆሩንኩኔ መገን ቤቱ አመዕኒኒ ደጊኒ ደገንታ ሜጦመበ፥ ዊመ መነ እህባ ክርስቶስ ዊመ ዊምመበ ኢልናምጋ አሲ ሀሾተኔሃት። 14 አቼ መን መለጢኒ ሉስስ ሾክማኒ እኮ ሉሰ ሮሸ ቦብሪን ከእታ ከበሃ እንከን ኦሮቅነን ከዘኩ ጪላከተ እሁ ሀስሰኖኔበአ። 15 ህከን ቆደ ገርተ ኢታን ጠሃነን ቦቁተ እኮ ክርስቶሳን ሆራንከ ዉዲን ሌዕኑን። 16 መኖመት ሆረንት ኣሰንቶሴ ቡንቺን ክርስቶሳን አጰንትኬእ ሜጡ እክየን ቤለዩ አኑንኩ አኑንኩ ደናሞገ ሁጀቱንተ ኢታን ገገሴ ቃርስት መኖመት ሌኣገ አስታእ። 17 ከዘኩ ሰውቱሰ ጠለለ እኮ ገሬ መገኑ ደጉምቦ መንገ ሄኤኑምቦገ ቀርቾ ዬሱስ ሱዕሚን ቃርስ ኩላንክዕኔ። 18 እሶኦ ዎዘኑንኩ ቱንሴእ። አሞ ዎዘንሰ ዱድማች ኬኦ ኣዜንተሰ ዮ ደጉ ሆግ ዳፊን መገኑ ኣሰኖ ሄቻች ቄዕርቶእ። 19 እሶኦንት መሄንንከ ኡጅቶተኔ ቡሽመተ ሆረንተ ሙርቱዕናች ሁጀቶተ ሳኢ ገገሰ ህግስ ኣስቴእ። 20 እኮዳ አዕኖኦት ክርስቶስተኔ ህትጉተ ሮሴንምበአ። 21 ገርንተ አዕኖኦት እስተኔ መጮቴንተ። አሞ እስረ እኬንተተኔ ገርንት ዬሱሳን ዮገ ሮሴንተ። 22 ህከኒ ሉስሰኖ ቁልጢን ቡሽ በኦ ዎና ሄኤነንተ እኬ ኑባቹተ መኖመተ ክዕኔኤች ከንቴን 23 ዎዘንዕኔ ሰውቲን ሃራከተ እክዬ። 24 አሞ ገሬ ሙጩርማኒ ጡሚኒ መገን አጉዲሻን ቆጨንቶ ሃሮተ መኖመተ ኦደቅዬ። 25 ህከኒ ነ-ነኦንት ቤለያከተ እንኮምተኔ ቆጰነ አጉርቴን አዕን-አዕኖኦንት ገርተ ጠሃቀቀምዬ። 26 አሙዕረንቴንተዳ ባጢለ ሁጀቴኖችዬ። አሞ አሙሬን ሄኤንተገንከ አሪቹት ኣጉንከ። 27 ህትጉንተ ሼጣንቺ መዕንተ ሆረን ኣስቴኖችዬ። 28 አሞ ሞገኣንቹ ከዘኩ ሞገኡንከ። ጠሁ እኮዳ ህከን ቆደ ሀዋኒ ኣሲ ደንዶተ ገግስ አንጋን ደናሙረ ሁጀቱን። 29 ህትጉንተ መጮጨኖ ኬኒ ማሰተ እካነ መዕኔሀንስ አጉዳ ቃርስታ ላጋች ህግየን አፌችዕኔ ሂለት ላገት ፉልቱንከ። 30 አሞ ዎዘንቴነንተ በሬ አሌንተዕኔ ማተብገ ዎቀረሞ ጡማንቹ መገን አያነ ክቼእሴኖችዬ። 31 ህትጉንተ ቀራራሽመት ሆረንት፥ ነደጁ፥ አሙርት፥ ያረነቲ መን ሱዕመ በእሱሁ ሂልማን ሆራንን በርገም ክዕኔኤች ቄዕሩን። 32 አሞ መቱ-መቲሀዕኔ በሬዳከታ ቅሽጥቴነንተራ እክዬ። መገኑ ባጢለዕኔ ክርስቶሲን አጉሮገንከ አዕን-አዕኖኦቲ አጉዕረምዬ።
1 አቼ ኢቴኖ ኦሶገ መገኑ አጉዴነንተረ እክዬ። 2 መገኑ በጅቀንሰኖነ ደናሞገ አንጀኖ ምጡዋተሃ ክትመሃ አስ ገገስ ኒተኔ ህግሽ ኣሴገንካ ክርስቶሱ ኔስ ኢቴገንካ አዕኖኦቲ ኢታን ሄእዬ። 3 ሳኡ እንዶ ቡሽመት ሆረንት እንዶ ሂሉ ቁልጡ ህትጎኑሩ ጡማኒ አጉዱምቡ እኮተኔ ክዕኔኤ ሜሬሮን መጮጨሙንከ። 4 ህከን ቆደ መገኒ ገለት ኣሲች ህግየን ሳልሲሰኖነ ፈቱምቡ ጠሁ እንዶ አጉዱምቡ ናጩ ክዕኔኤባን ደገሙንከ። ዳፉንኩስ ህትጎኑሩ ሀስሱምቧ ጠሀ። 5 ሳኣንቺ እንዶ ፎኩተ ሁጀተኖ መንቺ እንዶ እዲዳንቺ ክርስቶስነ መገን ዎሞማን መዕንት ሄኡምቦስገ ደግዬ። እዲዱንኩ ቆጰን መገኒ ሰገድገ ዮሃ። 6 ህከን ጠህ ዳፊን አዘዘሙምቦ መን አሌን መገን አሙርት ዋልታተኔ አዪ አጉዱምቦ ጠሂን መለጡንከዕኔ። 7 ህከኒ እሶኦን ጃሎንቴኖችዬ። 8 አዕኖኦንት ዎና ቱንሶን ዮንታረ እኬ። እኮዳ ቴሱ ቀርቾ ዬሱሲን ጫካን ፉልቴንተ። ህከኒ ጫክ ኦሶገ ሄእዬ። 9 ዳፉንኩስ ጫክ ላሉት ደገንታኢ በሬድማን ሆራኔንት፥ ሙጩርማኔቲ ገሬኔቲ። 10 ህከኒ ቀርቹ ዬሱሰ በጅቀንሰኖ ጠሁ መሃንዶ ደጊ ቆርምዬ። 11 አዕኖኦት ህተ ላሉት ዮበእ ቱንሶ ሁጅተ ፉሽቴን ለሊሽዬ በጋን ህተን ሁጄን ቤቀማኑ እኬኖችዬ። 12 ዳፉንኩስ ህተ እሶኦት ማጥ ሁጀታ ሁጄተኔ ጠሃቁ ሳልሲሰኗ። 13 ጠሁ እኮዳ ጡደመኖሩ ሆሩንኩ ጫከ እኮተኔ ሆሩሩንኩ ጫካን ፉሎ ጃተ ጡደመኖ። 14 ህከንተኔ «አት ኩ ግሳንቲ በቅይ! ሬሆችን ጦቅይ! ክርስቶሱንኩ ጫከ ኣሰኖሄ» የመሜእ። 15 አቼ ቆረ መንገ በጋን ቀሎ መንገ እኬኑዕናች ሀትጉተ ሄኤነንተንዶ ቃርቴን ቆረጵዬ። 16 አሞ ዶሉስ ሂለ እኮተኔ ጄቹዕኔ ጠለ በእሴኖችዬ። 17 ህከኒ መገኑ ሀሰኖ ጠሁ መሃንዶ ቆርስዬ በጋን ቀላከተ እኬኖችዬ። 18 አሞ ጡማንቾ አያኒን ዊምዬ በጋን በእሰኖዕኔ እኮተኔ ዎይን ዳጢን ድምብቴኖችዬ። 19 ህትጉንተ መዝሙሪን፥ ገለቲኒ አመዕናኑ ዘመረኖጊኒ መቱ-መቲንተዕኔ ጠሃቀቀምዬ። አሞ ዘመርቴነን ዊማንክዕኔ ዎዘኒን ቀርቹ ዬሱሰ ገለጥዬ። 20 ህትጉንተ ሆራንከ ጠሂ ቀርቿኔ ዬሱስ ክርስቶስ ሱዕሚን ሆረንተ ጃተ አነ መገኑ ገለጥዬ። 21 ክርስቶስ አብኒ ይቴን አዕን-አዕኖኦት አዘጨምዬ። 22 ምኔማከ! ቀርቾ ዬሱሲ አዘዘንቴነንተሀንገን ምኔናካሀዕኔ አዘዘምዬ። 23 ዳፉንኩስ ክርስቶሱ አመዕናን ማበሪ ቦቁተ እኮገንከ ምኔኑ ምኔማ ቦቁተ። አሞ መኖመስ እኮ አመዕናን ማበሪ ክርስቶሱ ፈእሳንቿንሰ። 24 አሞ አመዕናን ማበሩ ክርስቶሲ አዘዘመኖገንከ ምኔማከት ሆራንከ ጠሃን ምኔናካሀንሰ አዘዘንቱን። 25 ምኔናከ! ክርስቶሱ አመዕናን ማበረ ኢቴገንካ ገገስ እሶኦተኔ ህግሽ ኣሴገንካ አዕኖኦቲ ምኔማከዕኔ ኢትዬ። 26 ክርስቶሱ ህካን አሴኢ ላገስ ዉዲን አመዕናን ማበረ ዎኢን ኣንሽ ሙጩርስኬእ መገኒ አነነ እኬረ አሶታት። 27 አሞ አመዕናን ማበረ ጡሩ እንዶ እልተ ገምበል እሁ እንዶ ህትጎኑሩ ዮበኢ ቀነጤኖሩ ዮበእ ሙጩረታ ህባመታ አስ ገጊሀንስ ህንጨኢሃት። 28 ህትጉንተ ምኔናከት ምኔማከሰ ገግሰገ ኢቱ ሀስሰኖሰ። ምኔመስ ኢተኖ መንቹ ገገስ ኢተኗ። 29 - 30 ዳፉንኩስ ነኦት ክርስቶስ ቤለያከተ እንኮምተኔ ክርስቶሱ አመዕናን ማበሪ አሰኖሀንገንከ መኑ ገገስ አቦየቀኖኒ ቆረጰኖኒ በጋን አዪ ገገስ ሆረን ግጰኖበአ። 31 አሞ «ህከንተኔ መንቹ አነሲ አመሲ አጉረኖ። ምኔማንተስን ሜጡ እሀኖ። ለሙንኩሰ ሜጡ ማለ እካእ» የመሜእ። 32 ኩ ቤስቹ ጠሁንኩ አባ። ጠሁ እኮዳ አን ካን ያዮሚ ክርስቶስነ አመዕናን ማበርተኔሃት። 33 እኮዳ አዕኖኦቲ አኑንኩዕኔ አኑንኩዕኔ ምኔማከዕኔ ገግዕኔገ ኢትዬ። ምኔመንት ምኔነሴ አብሱን።
1 ኦሶ! ህኩን ሀስሰኖ ጠሀ እኮተኔ አናካሀዕኔ አማካሀዕኔ ቀርቾ ዬሱሲን አዘዘምዬ። 2 - 3 አሞ «አነኪ አመኪ አብስ» ይታ አዘዙት አበተኒ «ሆሩሩንኩ ጠብያኖሄኒ ተን ኡለ አሌን ሄኣንት ጃት ቄራዕርታእኒ» ይታ ተሴ ላገት ዮሴተኒ። 4 አዕኖኦት አናከቲ አማከቲ! ኦሱዕኔ ቀርቾ ዬሱስተኔ ሮስሲኒ ሰዚኒ ሌእሽዬሰ በጋን አሙርሲሴኖቼሰ። 5 አላኖ! ክርስቶሲ አዘዘንቴነንተሀንገን ዋጂን፥ ሁጢኒ ጠቤነ ዎዘኒኒ ተን ኡለ አሌን ዮ ቀርባሀንክዕኔ አዘዘምዬ። 6 አዘዘንቴነንተሲንኩ መገን ሰውተ ዎዘኒችሰ ኬእስ ዊንሽታ ክርስቶስ አላንገ እሂኔት በጋን መነ በጅቀንስታ መንገ ጡደሚ እሁንከ። 7 አሞ መኒ እሁዕናች ቀርቾ ዬሱሲ ሁጀቴነንተሀንገ አስቴን ጠቤነ ዎዘኒን ሁጀችዬ። 8 ዳፉንኩስ አላንቹሃ እኮ ቀርቹ አኑንኩ አኑንኩ ሁጀቾ ደናሜ ሁጄ ሆራንከ ቀርቾ ዬሱሲች ኣቀኖ። 9 አሞ ቀርበ! መኒ ጎዕሉምቡ እሶኦነ ክዕኔኤ ቀርቹ ሰማን ዮገ ደጌነንተተኔ ዋጅሲሱ አጉርቴን አዕኖኦቲ አላኒሀንክዕኔ ደናሙ ጠሀ አስዬሰ። 10 ዘካንቾንን ቀርቾ ዬሱሳኒ መቄስ ቃርማኒ ቃርዬ። 11 አሞ ሼጣንች ሂልማን ኡርጨሚ ደንድቴኖተ መገን ኦል ኦዳተ ሆረንተ ኦደቅዬ። 12 ዳፉንኩስ ነኦት ኡጀቀማሚ ቦብር አሌን ዮ ሂለ አያን ጎጎቲኔት፥ አወንሳኒኔት፥ ዳናካኔቲ ከን ቱንሶ ዶል ገሻኒኔቲ በጋን ማሊኔቲ ቄጊኔቲበአ። 13 ህከኒ ሂሉ በሩ ዋሎ ጃተ ኡርጨሚ ደንድቴኖታ ሆረረንከ ጦፌን ኡሪ ደንድቴኖታ መገን ኦል ኦዳተ ሆረንተ አጵዬ። 14 - 15 አቼ የመዙዕኔ ገሬን ቆዕርቴን፥ ሃሙተ እፍሰኖ ሙጩርመ ኦል ኦዳተ ሃሞንተዕኔ ዎዕርቴን፥ ጡም ምሽራች ላጋ ቅጠንቴኒ እሴንተ ጫምገ ሎካንተዕኔ ዎዕርቴኒ ኡርዬ። 16 ህከን ሆራንን በርግቴን ጊረ ለበንገ እሀኖረ ህኩስን ሼጣንቹ አሌንተዕኔ ቶረኖረ ሆረንከ በእሲ ደንድቴነንተ አመዕነት ዎልተ ኬእሽዬ። 17 አሞ ቦቆን ቆሜገ ዎዕሬኖ ፈእ ኦል ኦዳታ ጡማንቾ አያን ብሰሃ አጵዬ። ህኩ ብሱንኩ መገንተ ላገ። 18 ሆረንተ ጃተ ሀስሰኖዕኔሪ ሆሪንከ ኡጭቴነን ጡማንቾ አያኒን መገኑ ኡጭዬ። ህትጎንን ሆጌኑዕናች በቅቴን ጡማኒ ሆሪንከ መገኑ ኡጭዬ። 19 ህትጉንተ አፎእ እግማን ፈን ምሽራች ላገ ቤስቹ ጠሀ ጠሃቃም ላገት ኣሰንቱንተኤ መገኑ ኡጭዬኤ። 20 አሞ አን ኡሱረሞምዳ ህተን ምሽራች ላጋ እንድራስተ እኮምተኔ ጠሃቁ ሀስሰኖኤገ እግማን ጠሃቁንተ መገኑ ኡጭዬኤ። 21 አቼ አን ሀትጉተ ዮምንዶ አሞ መ አሰዮምንዶ አዕኖኦቲ ደጌኑንተ ኢተሜ ህዞነ ቀርቾ ዬሱሲን አመዕነሜ ሁጀታንቹ እኮ ትክቆስ ኢተኔ ሆረረንከ ኩለኖዕኔ። 22 አሞ ነኦት ሀትጉተ ዮምንዶ ደጌኑንታ እስ ዎዘነዕኔ ቃርሱንታ አን እሱ ክዕኔኤበ ሶኮሚ ህከኒሃት። 23 አነ መገኒቺ ቀርቾ ዬሱስ ክርስቶሲቺ ጡሙሁ ኢተቲ አመዕነቲን በርገንት አመዕናኒን ሜጡ እኩን። 24 ቀርቹኔ ዬሱስ ክርስቶሰ ሙረንቱምቦ ኢታን ኢትታስ ኬኒን ሆሪንን መገን ኣሰንቹ እሁን፤ አሚዕን።
1 ት ሶህኑት ዬሱስ ክርስቶስ ሶቀማኑ እኮ ጳዉሎሴቺ ጥማቶሴቺ ሶሀንቴታ። ሶሀንቶኢንኩ «ፍልጵሱሰ» ዬኖ ከተማን ሄኣ አመዕናን ጠጵት አወንሳኒሃት፥ አመዕናን ጠጵት ሁጀታኒሃቲ ዬሱስ ክርስቶሳን አመዕንት ጡማኑ እኮሪ ሆሪሃንቲ። 2 እሶኦንት ሶኮኢ «ኣሰንቹሁ ጡሙሁ አናኔ መገኒቺ ቀርቾ ዬሱስ ክርስቶሲቺ ክዕኔኤ እሁን» ይቴት። 3 አን ክዕኔኤተ ቃጋም ጃተ ሆረንተ መገኑኤ ገለጠዮም። 4 አን ክዕኔኤተኔ መገኑ ኡጫም ጃተ ሆረንተ በጅጎን ኡጨዮም። 5 ዳፉንኩስ ዎናች አፍ ከበሬ ኢለንቀጤች ምሽራች ላገ ሁጅተ ኤሳንን በርገንቴን ሁጀቴንተተኔሃት። 6 ተ ደናምተ ሁጅተ ክዕኔኤን ሁጀቱ አፎ መገኑ ዬሱሱ ክርስቶሱ ዋለኖ በር ጦፈኖ ኢለንቀጤች ቆረበኖገ አመዕናም። 7 አን ሆሪንከዕኔን ህትጉተ ሰውዩ ሀስሰኖኤ። ዳፉንኩስ አን ክዕኔኤተ ጎደቢን ኢታምተኔሃት። ክዕኔኤተኔ ህትጉተ ሰውያም ዎሉስ ጠሁ ምሽራች ላገተ መዕንተ አፍሲሶተ ኡርጨማም ጃታ ቴሱ ኡሱረም ዮም ጃታ አዕኖኦት ኤሳንን በርገንቴን መገኑ ኣሴ ሁጄ ቤቀማኑ እኬንተተኔሃት። 8 ዬሱስ ክርስቶስ ኢታን ሆረንከዕኔ ሀበንከ ቃገዮምንዶ መገኑ ደገኖ። 9 ኢተዕኔ ቆርመቲ መሌሱሁ ዊሜኢተ እክ ሌአን መርቱንተ መገኑ ኡጫም። 10 ህኩስን ዎየስ ጠሀ ቆርምቴን ደጌኖተ፥ ክርስቶሱ ዋለኖ በሬ ሙጩረታ ሳልሲሰኖሩ ዮበእራ እኬኑንታት። 11 ህትጉንተ ሄቸዕኔ ዬሱሱ ክርስቶሱ ኣሰኖ ሙጩርመ ላሎን ዊንቴኢተ እክ መገኒ ገለትሃ አብንሃ ኣስታኢተ እኩንታት። 12 ኢ ህዛከ! ኢ አሌን ኢሌ ጠሁ ምሽራች ላገት አብስ ሀራርታጋ ሆራንከ መኒ ኢልታጋ አሴገ ደጌኑንተ ሀሳም። 13 ህከኒ አን ኡሱረሞሚ ዬሱስተኔ እኮገ ዎም ምን ቆረባኑ ሆሩንኩ ዎሉ መኑ ሆሩንኩ ደጌእ። 14 ቀርቾን አመዕንቶ ህዛካች ሆለሙሰ ኢ ኡሱረምተኔ ቀርቾን አብስ አመዕንት መገን ላገተ ኤጄችን አብስ ዋጅቱዕነ እግማን አዋጅተዮእ። 15 እኮዳ መ-መቱ መኑ ክርስቶስተኔ ሰበከዮኢ ቂንሻኔቲ ፉሸቀንቺኔቲ። ጠሁ እኮዳ ዎሉስ መኑ ክርስቶስተኔ ጠቤነ ዎዘኒን ሰበከዮእ። 16 ህኩ ምሽራች ላገተ ጠቤነ ዎዘኒን ሰበካሩ ሰበከዮኢ ኢታኔት። ዳፉንኩስ አን ኡሱረሞሚ ምሽራች ላገ ገርተ ሰበኮተ ኡርጨሞምገ ደጎተኔሃት። 17 ጠሁ እኮዳ ቂንሻኒ ፉሸቀንቺኒ ሰበካስሩ ሰበከዮኢ ጠቤንማን እሁዕነ ገገሰ ኢቲን ኡሱረሞምባን ኢ አሌን ሀወ በርግታኢ አጉጅየንሳት። 18 ም ዮ! ሀከስ እኮዳ ሆራንከ ዎቄን አጉዲሲኒ እኮ ገሬኒ እኮ ክርስቶስተኔ ሰበከመዮተኔ በጅቀሜም። 19 ከኒች ዘኪሃ በጅቀማም። ዳፉንኩስ ክዕኔኤ ኡሰቶኒ ዬሱስ ክርስቶስ ጡማንቾ አያን ካለቶኒ ዮኤ ሀዊች ፉላምገ ደጎምተኔሃት። 20 ህትጉንተ እኮተኔ መ ጠሃኒ ሳሉምቦገ ዊሙ ተሶሁ አመዕነቱሁ ዮኤ። ጠሁ እኮዳ ሄኦምዳ እንዶ ሬሄምዳ ክርስቶሱ ኤጄገንከ ቴሱ ኢተኔ አበኖገ ዊመት እግመት ዮኤ። 21 ህከኒ ኢ ሄቸት ክርስቶሳት፤ ሬሁተ እኮዳ ኤሳ መካዕኔ። 22 ጠሁ እኮዳ ፎሊን ሄኦምደ ቀርቺ ሁጀቲ ደንዳም። እኮዳ ሬሆቺ ሄቻቺ ሀከስ ዶዕራምንዶ ደግምበአ። 23 ከን ለሞ ጠሃን መለመዮም። ህኩስን መቶ ዉዲን ተን ሄቻች አነነ እክ ክርስቶሲን በርገም እሂ ሀሳም። ዳፉንኩስ ህኩን ሆራሪችን አበኖ እኮተኔሃት። 24 ጠሁ እኮዳ አን ፎሊን ሄኦምደ ክዕኔኤ አብሽ በሬዳ። 25 አንን ከ ጠሀ አመዕኔም። ህኩስን በጅጉዕኔ አመዕነቱዕኔ ሌአን መርቱንተ ሄኣምጋ ሆሪንተዕኔን በርገም ኤጌራምጋ ደጋም። 26 ህከንተኔ አን ክዕኔኤን ለንኪ ደቀሞምደ ኢ ዳፊን ዬሱስ ክርስቶሳን ዮዕኔ ድከኡ አበ እሀኖ። 27 እሁን በጋን ዋልኬእ ጡጆንክዕኔዳ እንዶ ክዕኔኤች ቄዕሬምዳ ሜጦ ዎዘኒን ምሽራች ላገ አመዕነትተኔ ሜጦማን ሁጀቴነን ሜጦ ሰውቲን ኡሪ ደንድቴንተገ ሄቸዕኔተኔ አን መጮጩንተ ክርስቶስ ምሽራች ላጋ ሀስሰኖገ ሄእዬ። 28 ክዕኔኤን ኡርጨንታረ መ ጠሃኒ ዋጅቴኖችዬ። ህኩስን እሶኦ በእተ መላ። ጠሁ እኮዳ ክዕኔኤ ፈእተ መላ። ህኩንን መገኒቼት። 29 ዳፉንኩስ ክርስቶሳን አመዕንቴኑንተ ጠሊ እሁዕናች እስተኔ ሀወ ኣቅቴኑንተ ህኩን ኣሰሜክዕኔ። 30 ህኩስን አን ሀወንየን ጡዴንተነ ቴሱ አን ሀወዮምገ መጮቴነንተ ኡጀቀንቹ ክዕኔኤ አሌኒ ኢሌዕኔ።
1 ዬሱስ ክርስቶስረ እኬንተተኔ አዕን-አዕኖኦንት ሰጨሚን ቃርቴንተ። አሞ እስ ኢታንን ቃርሰቀንቴንተ። ህትጉንተ ጡማንቾ አያኒን ሜጦመት ዮዕኔ። አሞ መቱ-መቲሀዕኔ በሬድመቲ ቅሽጠቀንቹሁ ዮዕኔ። 2 ህከኒ ሰውቲን፥ ኢታን፥ ዎዘኒኒ ሁጄኒ ሜጡ እኬንኬኤን በጅቀንስዬኤ። 3 ገገ ኢቲን እንዶ ቦልጢን ሜጡረ አስቴኖችዬ። ጠሁ እኮዳ ዎሉ መኑ ክዕኔኤ ገጊች ዎየኖገ ማሽማን ዎልሽዬ። 4 አሞ አኑንኩ አኑንኩ ዎሎ መን መከሃ ሀሱን በጋን ገግስ መከ ጠለ ሀሱንከ። 5 ህትጉንተ ኩ ዬሱስ ክርስቶሳን ዮ ሰውቱ ክዕኔኤ ሜሬሮኒ ሄኡን። 6 እስ መገንገ ዮኢ እኮዳ መገኒን ዮስ ቅጦመተ አጉሩ ሀስሱምቦስ ጠህገ አስ ዎልስምበአ። 7 ጠሁ እኮዳ ገገስ ሜጡሩ ዮበኢ እክ አግሽ ቆጨ ኣቅ መነ አጉጅ እለሞ። 8 ገገስ ህርከእ ሀገሪንተስን መነ አጉጅ ሬሆ ህኩስን መስቀላን ሰቀለም ሬሀኖ ኢለንቀጤች አዘዘሞ። 9 ህከንተኔ መገኑ ሆሪችን አብሽ ጦቅ ጦቅ አስኬእ ሱዕሚች ሆሪችን አበ ሱዕመ ኣሴስ። 10 ህከኒ ሰማን፥ ኡለኒ ኡላች ኣዚኒ ዮሩ ሆሩንኩ ዬሱሲ ኣሰሞ ሱዕሚ ጉሉቤንተሰ ጉሉጵታእ። 11 አሞ አረብት ሆረንት አና መገን አብኒ ዬሱሱ ክርስቶሱ ቀርቹ እኮገ ነቀሳእ። 12 ህከኒ ኢ ጃላከ! ሆረንተ ጄቹተ አዘዘንቴንተኤገንከ ክዕኔኤባን ሄኦም ጃተ ጠለ እሁዕናች ባሰንከስ ቴሱ ክዕኔኤች ቄዕሬም ጃታ ፈኤንተገ ጡድሳ ሁጅተ ዋጂኒ ሁጢኒ ሁጀቴነን መርዬ። 13 ዳፉንኩስ እስ ደናሙ ሰውተ ሀሴኑንታ ሁጀቴኑንታ ክዕኔኤ ኣዜን ሁጀተኖ መገኗ። 14 ሆረረንከ ጉንጉንቴኑዕናቺ ኦደንቴኑዕናቺ ሁጀችዬ። 15 ህከኒ አዕኖኦት ከን ሂላነ ሾከ ቀለንች ሜሬሮን ሚቄኖሩ ገዴኖሩ ዮዕኔበእ መገን ኦሱተ እኬን ተን ኡለ አል ምናደቢ ጫክገ ጫክሴነንተ። 16 ህከኒ ጠለንከ ደጉጆምሀንጋ ጠለንከ ሁጀቾምሀንጋ እሁዕናች ክርስቶሱ ፈንቀል ዋለኖ በር ቦልጣምሩ ሄኡንተኤ ሄቸ ላገተ ቃርስቴን አፍዬ። 17 አዕኖኦት መገኒ አመዕነቲን ህንጨቴነንተ ክትምነ ሁጄ አሌን አኒ በርገም ክትመ እክ ህንጭዬምዳ ክዕኔኤን ሆሪንተዕኔን በርገም በጅቀማም። 18 ህትጉንተ አዕኖኦቲ ኤሳንን በርገንቴን በጅቀንቴነንተ። 19 ቀርቹ ዬሱሱ ዬደ ክዕኔኤተኔ መጮጭ በጅቀሞተ ጥማቶሴ ሰርብ ክዕኔኤበ ሶሃም። 20 ክዕኔኤ ጡምተኔ ጠቤንማን ኢገ ሰውያን ክቼአኖ ጥማቶሴገ ዮኢ አዪ ዮኤበአ። 21 ዎሉ ሆሩንኩ ገግሰ ጠሂች በጋን ዬሱስ ክርስቶስቢ ሰውታበአ። 22 ጠሁ እኮዳ ጥማቶስ ሀስሼኢ እሁሲ ቤቱ አኒን እሀኖሀንገ እክ ምሽራች ላገተ ሰበኪን ኤሳን በርገም ሁጀቾጋ አዕኖኦንት ደጌነንተ። 23 ኢ ጠሁ መ እሀኖንዶ ጡጆምገንከ ጥማቶሴ ሰርብ ክዕኔኤበ ሶሆተ ተሳ አሳም። 24 አሞ አን ገጉንኩኤ ደዕል ክዕኔኤበ ዋሎተ ደንዳምገ መገኑ አሰኖኤገ አመዕናም። 25 ጠሁ እኮዳ ህዞእ፥ ኤሳን በርገም ሁጀታንቹሃ ቤጠቤቹሃ እኮነ ክዕኔኤ ሶቀማንቹዕኔ እኮ ሀስሰኖኤነ ሁጀተኖኤ አፍሮዲጦ ክዕኔኤበ ሶሆተ አብሽ ሀሳም። 26 እሱ ክዕኔኤበ ሶሃሚ ሆረንከዕኔ ጡዲ ቁልጤተኔሃቲ እስ ሞሾገ መጮቴንተተኔ አብሽ ክቼኦተኔሃቲ። 27 ገርንተ እስ አብሽ ሞሽ ሬሆበ ኢሌ እኬ። ጠሁ እኮዳ መገኑ ቅሽጥ ፈይሼስ። እሲ ጠሊ እሁዕናች ኤሳሃ ቅሽጤተኔ ክቼቹ ክቼች አሌን በርገቁምቦኤገ አሴእ። 28 ህከንተኔ አዕኖኦት እሱ ለንኪ ጡዴን በጅቀንቴኑንታ ኢ ክቼቹንኩ ቢሉንታ አን እሱ ክዕኔኤበ ሰርብ ሶሆተ አብሽ ቁሉጬም። 29 አቼ ቀርች ሱዕሚን አበ በጅጎን ኣቅዬስ። አሞ እስገ ዮ መነ ሆረንከ አብሽዬ። 30 ዳፉንኩስ አዕኖኦት ኦንጠኔ ሄኤን አስቴኖኤተ ደንድቴኑምቡ ካለቱተ እስ ካዕሎኤተ ክርስቶስ ሁጄ ፎልስ ህግሽ ኣሲን ሬሆበ ኢለንቀጤች አጰሜእ።
1 አቼ ኢ ህዛከ! ቀርቾን በጅቀምዬ። አን ከኒች ብሬ ጣፎሚ ፈንቀሽ ጣፎምዳ ጬንሲሰኖኤበአ። ህኩስን ክዕኔኤተ ሂልማች ቆረበኖዕኔየ። 2 ዎሻች ቆረጵዬ። አሞ ሂለረ ሁጀታሪቺ ቆጰን ኑጉሳቺ ቆረጵዬ። 3 ነኦት መገኒ ጡማንቾ አያኒን ሰገንዳምሩ፥ ዬሱስ ክርስቶሳን ድከዕናምሩ ገጋን ድከዕኑምቡሩ ገሬ ኑጉሰሙ ኑጉሰሜምየረ። 4 አሞ አን ማሊኒ እኮደ ድከኣምሩ ዮኤ። አዪ ማሊን ድከአኖሩ ዮኢ አጉጆስዳ አን አባንስ። 5 አን እለሞም ሄዜትቅ በር ኑጉሰሜምየ፤ ቢንያሜ ፍካንየ እስራኤልቹ። እብር-መኒችን እብርቿ። ሴርተኔ ጠዕምቴንተኤደ ፋሪስቿ። 6 ቂንሸተኔ እኮደ ዬሱስ ክርስቶሳን አመዕንታረ ሸራምየ እኬ። አሞ መገን ሴረ ቆረቤን ፈእተኔ እኮደ ኩሌኖኤሩ ዮበእየ። 7 ጠሁ እኮዳ ኤሳ ካዕለኖኤየረ ዬምረ ሆረንከ ክርስቶስተኔ ሜጡራ ካዕሉምቦሪገ ዎልሳም። 8 ቀርቹ ዬሱስ ክርስቶሰ ደጊች አበኖሩ ሜጡሩ ዮበእገ አመዕናምተኔ ሆሩሩንኩ ሜጡራ ካዕሉምቦገ ዎልሳም። ህከኒ ክርስቶስተኔ ሆረረንከ አጉሬም። እሱ ደቆተ ይ ሆረረንከ ሀበረስገ ዎልሼም። 9 አሞ ህካን አሳሚ ሴረ ቆረቢን ሾሀንቶ ገግኤ ሙጩርመተ አጉር አመዕነት አሌን ሾሀንቶ መገን ሙጩርመተ ክርስቶስ ዉዲን ደቆታ እሲን ሄኦታ ይኔት። 10 ህኩስን ክርስቶሰ ደጊ፥ ክርስቶስ ሬሆች ኬእ መቆ ደጊ፥ ሬሆን እሱ አጉዲሃ እስ ሀወ ቤቀሚሃ ደንዲሃት። 11 ህትጉንተ ሬሄሚች ዘኪኒ ሬሆች ኬኡ ተሳ አሳም። 12 ከ ሆረረንከ ደቅምበአ። እንዶ ከን ሆረራንን ሙጩሯ ዮተ ደንዳምበአ። ጠሁ እኮዳ ዬሱሱ ክርስቶሱ ኤስ ገግስቢ አሴኤተኔ ህካን ኣቆተ ብርለቅ ደጉዱ አጉራምበአ። 13 ኢ ህዛከ! አን ህካን ገግኤቢ አሰቄምሀንገ ዎልሳምበአ። ጠሁ እኮዳ መቱ ጠሀ አሳም። ህኩስን ከኒች ብሬቢ ሀበን ብሬንተኤ ዮኢ አፎተ ደጉዳም። 14 መገኑ ዬሱስ ክርስቶስ ዉዲን ገኤኤ ሰሜ ገአንች ዋገ ደቆተ ኢሉ ሀስሰኖኤበ ኢሎተ ብርለቅ ደጉዳም። 15 አቼ ቆርስን ደንጋምሪ ሆሪንከ ህትጎኑ ሰውቱ ሄኦኔደ ጡማ። አነኑ ሰውቱ ሄኦደ ህከ ሰውተ መገኑ ጫክሰኖዕኔ። 16 ነኦት ቴሱ ደቅኖም ገርተ ጠለተ ቃርስን አጵኖ። 17 ኢ ህዛከ! ኤስ አጉዴነንተረ እክዬ። ነኦት አጉዲሸተ እንኮንክዕኔገን ህካን አጉደን ሄኣረ አወንዬ። 18 ዳፉንኩስ ከኒች ብሬ ሆለመተ ጃተ ኩሎንክዕኔገን ቴሱ ኦአን ኩላንክዕኔ። ሆለሙ መኑ ክርስቶስ መስቀሊ ዲናከተ እክ ሄአዮእ። 19 እሶኦ ጎደቡሰ መገኗንሰ። እሶኦ አብኑ ሳልሲሰኖሰራኔት። ሰውቱሰን ተን ኡላ። እሶኦ ዘካንቹ በ። 20 ጠሁ እኮዳ ኒ ባዱ ሰማሃ። ህከምቢች ዋለኖ ፈእሳንቹ ቀርቹኔ ዬሱስ ክርስቶሰ ቆረጵናም። 21 እስን ተ ኒ ገደንቶ መኖመተ አብኒን ዊንቴ መኖመስ አጉዳገ አሰኖ። ህካንን አሰኖ ሆረረንከ ገጊሀንስ ጠቀኖገ አሰኖ መቄኔት።
1 ኢ ህዛከ! ኢታንክዕኔነ ቃጋንክዕኔ በጅጉኤ ዘዉደኤ እኬንተ ኢ ጃለ! ቀርቾን አመዕንቴን ቃርቴን ኡርዬ። 2 ኤዎድየኒ ስንጤኪ ቀርች ሰውታን ሜጡ እኬን ኢተንቴኑንተ ኡጫንክዕኔ። 3 አት አመዕነንቴንት ሁጄኤ ጃለ! ከ ሜንቱ ካዕልታንትሰጊ ኡጫንኬ። ዳፉንኩስ ኩ ሜንቱ ቀለሜንጦሴኒ ሱዕሙሰ ሄቸ መጣፋን ጣፈሞ ዎሌ ሁጄ ጃላኒ በርገንት ምሽራች ላገተ ኢልሲ ካዕልቴኤየረ። 4 ሆረንተ ጄቹተ ቀርቾን በጅቀምዬ። ቴሱ ያንክዕኔ በጅግዬ። 5 በሬድመዕኔ ሆራንከ መንባን ለልቴኢተ እኩን። ቀርቹንኩ ዋሎተ ኦንጠኬእ። 6 ሆራንከ ጠሂ ገለቱ ዊሜ ኡሰቶን መገኑ ኡጭዬ በጋን ሜጧሪሃ ክቼኤኖችዬ። 7 መን መሌሲች አሉዲን ዮ መገን ጡሙ ዬሱስ ክርስቶሳን ዮንተተኔ ዎዘነዕኔ ሰውተዕኔ ቆረበኖዕኔ። 8 አቼ ኢ ህዛከ! ገርተ እኮ ጠሀ ሆረንከ፥ ጪዕምመት ዮ ጠሀ ሆረንከ፥ ጡመ እኮ ጠሀ ሆረንከ፥ ሙጩሩ እኮ ጠሀ ሆረንከ፥ ኢተት ዮ ጠሀ ሆረንከ፥ ደናሙ ዱዱቡ ዮ ጠሀ ሆረንካ ደናምመታ እኮ ገለት ተን ጠሃከተኔ ሰውዬ። 9 ኤሳች ሮሴንታ፥ ኣቅቴንታ፥ መጮቴንታሃ ጡዴንታሃ ህከረ አስዬ። ጡም መገኑንኩ ክዕኔኤን ሜጡ እሀኖ። 10 ጠሁ እኮዳ ሆለመ ጄቾች ዘኪን ቴሱ ኢተኔ ሰውዩ አፌንተተኔ ቀርቾን አብሽ በጅቀማም። ጄቹተ ሆጌንተ በጋን ኢተኔ ሰውዩ አጉርቴንምበአ። 11 ህትጉተ ያም ጃተ ኮቾኤሪ ክቼኤበአ። ዳፉንኩስ «ዮኤ ሄቸት ኤሳ እኬኤ» ዩ ሮሼም። 12 ህከኒ አን ቢሌኖጋ አቤኖጋ ደጋም። ሆራንከ ጠሃኒ ሆረንተ ጃታ ዱቢኒ እኮ ጎሪን በትኔኒ እኮ ኮንቴን «ዮኤ እሀኖኤ» ዬኖገ ሮሼም። 13 መቆ ኣሰኖኤ ክርስቶሲን ሆረረንከ አሶተ ደንዳም። 14 እኮዳ አዕኖኦት ሀውኤ ቤቀማኑ እሂን ደናሙ አስቴንተ። 15 ፍልጵሱሳን ዮንተ መነ! ዎና ምሽራች ላገተ ሰበከን መቄዶን ባዲች ፉሎም ጃተ ክዕኔኤች ጠሊች በጋን ዎሉ አመዕናን ማበሩ ኣስነ ኣቅ ሜጦማን ኤሳን ሜጡ እሁምቦገ አዕኖኦት ገጉንኩዕኔ ደጌነንተ። 16 አሞ ተሰሎንቄ ከተማን ዮም ጄቹታ ሀስሰኖኤረ መቴ ለሜ ሶኬን ካዕልቴንተኤ። 17 ህትጉንተ ያም ጃተ አዕኖኦት ኣስቴነንተኤረ ሀሽ እሁዕናች ገለጥሳክዕኔ ላሉት በተኡንተክዕኔ ሀሼት። 18 ኤሳ ሀስሰኖኤነ ሀስሰኖኤሀኒችን አሉዲን እኬ ኣሰንቸዕኔ አፍሮዲጥ አንጋች ኣቄም። ህኩ ክዕኔኤ ኣሰንቹንኩ ደናምት አንጀነት ዊንቶስ ክትምገ መገኑ በጅግሰኗኒ መገኑ ኣቀኗኒ። 19 ህከኒ ኢ መገኑ ገበሉ ዮበእ ቀባጦችስ አብኒንተስ ዬሱስ ክርስቶስ ዉዲን ሀስሰኖዕኔ ጠሀ ሆረንከ በትሽ ኣሱዕኔ። 20 አናኔ መገኒ ዶሊ ሆሪንከ አብኑ እሁን፤ አሚዕን። 21 ዬሱስ ክርስቶሳን አመዕንቶ ጡማኒ ሆሪንከ ጡመኤ ኢልሽዬ፤ ኤሳን በርገንት ዮ ህዛከቲ «ጡመ» ይተዮዕኔ። 22 ጡማኑ ሆሩንኩ አነነንከ ሮሜ ባድ ዎመ ቄሳሬ ምን መኑ «ጡመ» ይተዮዕኔ። 23 ቀርቿኔ ዬሱስ ክርስቶስ ኣሰንቹ ሆሪንተዕኔን በርገም እሁን፤ አሚዕን።
1 ዬሱስ ክርስቶስ ሶቀማንቹ እሁንተ መገኑ ዶዕሬስ ጳዉሎሴቺ ህዜችኔ ጥማቶሴቺ ሶሀንቴታ ሶህኑ። 2 ቆላስያስ ከተማን ሄኤነንተ ጡማኒሃ ክርስቶሲን አመዕነንቴንተ ህዛካሃ አናኔ መገኒች ኣሰንቹሁ ጡሙሁ እሁዕኔ። 3 ክዕኔኤተኔ መገኑ ኡጭናም ጃተ ቀርቿኔ ዬሱስ ክርስቶሲ አነ እኮ መገኑ ሆረንተ ጃተ ገለጥናም። 4 ዳፉንኩስ ዬሱስ ክርስቶሳን ዮዕኔ አመዕነቱሃ ጡማኑ ሆረንከ ኢትቴነንተ ቀጠሃ መጮኖምተኔሃት። 5 ገሬቢተ እኮ ምሽራች ላገት ብርስት ክዕኔኤበ ኢልቶ ጃተ እሴን ዮ ተሳ መጮቴንተ። ህከኒ አመዕነቱዕኔ ኢተዕኔ ሾሀንቶኢ ሰማን ቅጠም ቆረበኖዕኔ ህከን ተሳኔት። 6 አዕኖኦት ምሽራች ላገተ መጮቴንተነ መገን ኣሰንች ገርተ ዘህጭቴንተ በሬች አፍ ክዕኔኤ ሜሬሮን እኮሀንገን ኡለ አሌን ሆራንን ሌአዮእኒ ላልተዮእኒ። 7 ህከስን አመዕነሜ ክርስቶስ ሁጀታንቹነ ኢተሜ ሁጄኔ ጃሉ ኤጳፍረ ኒ ቆደ እክ ኩሌዕኔ። 8 አሞ ጡማንቾ አያኒች ኣሰንቶዕኔ ኢተተኔሃ ኩሌኔ። 9 ህከኒ ከ ጠሀ መጮኖም በሬች አፍ ጡማንቾ አያን ቆርማኒ ዘህጪኒ መገኑ ሀሰኖ መሃንዶ ሞሽቴን ደጌነንተ መሌሱ ሄኡንተዕኔ መገኑ ኡጩ አጉንምበአ። 10 ህካን እኮች ቀርቾ ዬሱሲ ሀስሰኖገ ሄኤነኒ ሆራንከ ጠሃን እሱ በጅቀንስቴነኒ በሬደ ሁጄን ላሉተ ላልቴነን መገኑ መሌሲን ሌኤነንተ። 11 ህትጉንተ ሆራንከ ጠሃን እየቂን ቃርቴኖተ አባንስ መቄች ቃርመተ ደቂ ደንድቴነንተ። 12 አሞ ጫክ ዎሞማን ጡማኒን ሜጡ እረ ቤቀንቴኑንተ ሀስሴንተሃረ አሴዕኔ አነ መገኑ በጅጎን ገለጥቴነንተ። 13 ዳፉንኩስ መገኑ ቱንሶ ኣዚች ፉሽ ኢተሜ ቤትስ ዎሞማን ኣንጉንተ አሴኔ። 14 እስ ዎዥየኔ ባጢልኔ ማረንቸ ደቅኔም። 15 ክርስቶሱ ጡደሙምቦ መገኒ ገሬተ አጉዲሸ። እስን ቆጨንቺች ሆሪችን በህሯ። 16 ዳፉንኩስ ሰማኒ ኡለኒ ዮሩ ሆሩንኩ ጡደመኖሩ፥ ጡደሙምቡሩ፥ ዎሞመ በርጩመት፥ ገሽ መቆ፥ ገሻኑሁ ዳናከቲ ሆሩንኩ ቆጨንቶኢ እስ ዉዲኔት። ሆሩሩንኩ እስ ዉዲን እሲንከ ቆጨሜእ። 17 እስን ሆራሪችን ብርስ ዮኢ እኮተኔ ሆሩሩንኩ ሜጡ እክ አጰሞ እሲኔት። 18 እስን ገግስ አል እኮ አመዕናን ማበሪ ቦቁተ። አሞ ሆሪችን ብራንቹ እሆተ ሬሆች ኬኢን ዎናኒ በህሯኒ። 19 ህኩስን እኮ መገኖመስ ዊምመት ሆረንት ቤቶንተስ ሄኡንተ አኑ መገኑ ሀሾተኔሃት። 20 አሞ ቤትስ ዉዲን ሰማኒ ኡለኒ ዮሩ ሆሩንኩ መገኒን ሆቀሙንተ መስቀል አሌን ዱነሞ ቄጊንተስ ጡሙ እሁንተ መገኑ አሴእ። 21 ሰውቲንተዕኔ ሂለ ሁጄንተዕኔ ባረጋረተ እኬን መገኒች ቄዕርቴን ሄኤነንታረ እኬ። 22 እኮዳ ቴሱ ቤቱስ ማሊን ሬሄተኔ ጡማኑ፥ ቀነጤኖሩ ዮበእራ ገዴኖሩ ዮበእራ አስ ገግስበ ህንጨኦዕኔተ መገኑ ቤትስ ዉዲን ክዕኔኤን ሆቀሜእ። 23 ህኩስን እሀኖ መጮቴንተ ምሽራች ላገ ተሴች ሌንቄቅቴዕነ ሾሀንቴን አመዕነቲን ቃርቴን ሄኤንተዳት። ህት ምሽራች ላገንት ሰሜች ዎሮዲን ዮ ቆጨንቺ ሆሪንከ ሰበከንቴታ። አን ጳዉሎስ ሁጀታንቹ እኮሚሁ እሴሃንት። 24 ቴሱ ክዕኔኤተኔ ኣቃም ሀዋን በጅቀማም። ክርስቶሲ አልስ እኮ አመዕናን ማበሪ ክርስቶሱ ሀወንየን ፈኦ ቀጠ ማሊንተኤ ሀወ ኣቀን ዊንሻም። 25 መገን ላጋች ሜጡራ ፈእሱዕናን ክዕኔኤ ኩሉንተ መገኒች ኣሰንቶኤ ሀደራን አመዕናን ማበሪ ሁጀታንቹ እኬም። 26 ት ላገንት ሆለመ ዶሊ መን ኦሶች ማጠንት ሄኤታ። ቴሱ እኮዳ ጡማኒሃንስ መገኑ ጫክሽ ጡድሼእ። 27 እሶኦንከ መገኑ ከን ማጠሞ ጠህ አብን በትንት አይሁደ እኩምቦ መን ሜሬሮን ሀበንከ አበተንዶ ደግሲሶተ ኢቴእ። ህኩ ማጠሞስ ጠሁንኩ አብን ተሶ ዮስ ክርስቶሱ ክዕኔኤ ኣዜን ሄንስ። 28 ነኦንት መነ ሆረንከ ቆርማን ሆራንን ሰንዘኒ ሮስንሰኒ ክርስቶሲን ዊመ መንቹ እሁንተ አኒንከ አኒንከ ክርስቶስተኔ አዋጅናም። 29 መገኑ አባንስ መቄን ኣዜንተኤ ሁጀተዮተኔ ህከን መቄን አጰመን ቆንዶዳም።
1 ክዕኔኤተኔ፥ ሎዶቅ ከተማን ዮ መንተኔሃ ህትጉንተ እልኤ ጡድ ከሱምቡ መንተኔ ሆሪንከ ሀወንከ ቃረገ ኡጀቀሞምንዶ ደጌኑንተ ሀሳም። 2 ኡጀቀማንሲንኩ ዎዘኑሰ ቃርየን ኢተ ሜጦማን ዊመ ዘህጭበ ኢልቱንታት። አሞ መገን ማጠሞ ጠሀ ህኩስን ክርስቶሰ ደጉንታት። 3 ቆርመነ መሌስ ቀባጡት ማጠንት ዮኢ እስባኔት። 4 ካን ያዮሚ አዪ ቆጰን ላጋን መለጦኮዕኔ ዬት። 5 መሃ ማሊን ክዕኔኤች ቄዕሬምዳ ሰውቲን ክዕኔኤን በርገም ዮምተኔ ደናሞ ዎጊን ሄኤነንተጋ ክርስቶሳን ዮዕኔ አመዕነት ቃርመታ ጡጅ በጅቀሜም። 6 አቼ ቀርቾ ዬሱስ ክርስቶሳን አመዕንቴንተገን እሲን ሜጡ ሄእዬ። 7 እሶን ጠጰ አቴኒ ሾሀንቴኒ ሮሴንተጊንን አመዕነቶንተዕኔ ቃርቴን ሄእዬ። ገለቱሁ በተኡክዕኔ። 8 ክርስቶሳን እሁዕናች መን ሮሸጊኒ ተን ኡለ አል ዎግጊኒ ሾሀንቶ መለጦን ዊንቴ ጠለለ መን ቆርማን አዪ ቀፈዱምቦዕኔገ ቆረጵዬ። 9 ዳፉንኩስ መገኖመት ዊምማን ማል መኖማን ዮኢ ክርስቶሳኔት። 10 አሞ አዕኖኦንት ዊመተ ሄቸተ ደቅቴንታ መቄሃ ዳኖማሃ ሆሪንከ ቦቁተ እኮ ክርስቶስ ዉዲኔት። 11 እሲን ሜጡ እሂንተዕኔ ኑጉሰንቴንተ። ህት ኑጉሰንት ባጢላምተ መኖመተ ከሚ ክርስቶሲን እኬታ ኑጉሰ በጋን ማልተ ኑጉሰበአ። 12 ጥንቀቲን ክርስቶሲን በርገንቴን ሞገንቴን ክርስቶሲንን ሬሆች ኬኤንተ። ህኩስን ክርስቶሰ ሬሆች ኬእሾ መገን መቆን አመዕንቴንተተኔሃት። 13 አዕኖኦት በእሲንተዕኔ ባጢላምተ መኖመዕኔ ኑጉስቴን ከሙ ሆጊንተዕኔ ሬቴንታረ እኬ። እኮዳ መገኑ በእሱኔ ሆረንከ «ፈኡን» ይ ክርስቶስ ዉዲን ሄቸተ ኣሴኔ። 14 በእሱኔ ኩሎተ ጣፈሞራ ዎገሲ ክርስቶሱ መስቀል አሌን ሰቀል ኔሳች ቄርሴእ። 15 አሞ ህከን መስቀልቺን ዳናከታ መቃመታ ቄል ኦለንታ ኦዳተ ከሞች ዘኪን መኑ ሆሩንኩ ጡደኖሰገ አሴሰ። 16 አቼ እቸተኔ እኮ አግተኔ እኮ አያን በሬተኔ እኮ አገን ኣግተኔ እኮ ሰንበት በሬተኔ አዪ አሌንተዕኔ ፍርዱንከ። 17 ህኩሩ ሆሩንኩ ዋሊ ዮ ጠህተ ሀሌቹ። እኮዳ ገርስ ክርስቶሳ። 18 ቆጰን ማሽማን፥ «መገን ሰሜ ሶቀማንቺ ሰገጅዬ» ያን፥ ጫክ ጡደሞስራን ድከአኒ ማል ሰውቲን ጠለንከ ቦልጠኒ አዪ ሉስሱንከዕኔ። 19 ቦቁተ እኮ ክርስቶሲን ህትጋሞ መንቺ ሜጦመት ዮስበአ። መኖመት ሆረንት ንጊኒ ቡንቺኒ አጰንት መገኑ ሌእሰኖጊን ሌኦተ እቸተ ደቅታኢ ቦቆ ዉዲኔት። 20 - 21 ተን ኡለ አል ዎጊች አነነ እኬን ክርስቶሲን ሜጡ ሬቴንተረ እኬንታች ህከን ጠሂች አነነ እኬኑምቦሀንገ ሚመ «አፎት፤ ቆጥት ጡዶት፤ ኡልቶት» ይታ ተን ኡለ አዘዞ ጠቀንቴነዮንተ? 22 ኩሩ ሆሩንኩ መኑ ፉሼ ዎገሃ ሮሸታ እኮተኔ ጠሁስ ሁጀቾች ዘኪን በአኖ። 23 ህኩስን ገግ ዶዕርገ ሰገዲን፥ ማሽማኒ ገግ መኖመተ ጪሚኒ ቆርመት ዮስ ጠሀ አጉደኖ። ጠሁ እኮዳ ህኩን ማል ሂለ ጠሀ ኤጌጢ መሃ ካዕለኖበአ።
1 አቼ አዕኖኦት ክርስቶሲን ሜጡ ሬሆች ኬኤንታች ሰማን እስ አንስ መኬን አፉዕል ዮ ቤቾን ዮ ጠሀ ሀሽዬ። 2 ሰማን ዮ ጠህተኔ ሰውዬ በጋን ኡለ ዮ ጠህተኔ ሰውቴኖችዬ። 3 ዳፉንኩስ አዕኖኦት ሬቴንተተኔ ሄቸዕኔ ክርስቶሲን መገን ኣዜን ማጠንቴእ። 4 ሄቸኔ እኮ ክርስቶሱ ዋለኖ በር አዕኖኦቲ እሲንን አብኒን ጡደንቴነንተ። 5 አቼ ተን ኡለ አሊች እኮ ማልዕኔ ቁልጡ ሆረንከ ሽቴን ከሜ። ህኩስን ሳ፥ ቡሽመተ፥ ማሌየ ቁልጡ፥ ሂላ ምጠነኒ ቆጰን መገኒ ሰገዱ እኮ እዲዷኒ። 6 ህከሮኦ ዳፊን አዘዘሙምቦ መን አሌን መገን አሙርት ዋልታእ። 7 አዕኖኦት ገጉዕኔን ከኒች ብሬ ህከ ጠሀ አቴነን ሄኤንታረ እኬ። 8 ቴሱ እኮዳ አሙርተ፥ ነደጀ፥ ሂልመተ፥ ቦሮዕረንቸሃ አፌችዕኔ ፉለኖ ሳልሲሰኖ ጠሀሃ ሆረንከ ክዕኔኤች ቄርስዬ። 9 ዳፉንኩስ ኑባቹዕኔ መኖመተ ሁጄንተሴን ፉሽቴን ኡጅቴንተተኔ መቱ መቲሃዕኔ ቆጰነ ጠሃቴኖችዬ። 10 አዕኖኦንት ቆርማን ሃሮተ እከን መርታ ቆጫንቹሴ አጉዳ ሃሮተ መኖመተ ኦደቅቴንተ። 11 ህከኒ ግሪክሳን ጠሃቀኖ መንችነ አይሁድች ሜሬሮን እንዶ ኑጉሰሞነ ኑጉሰሙምቦ መንች ሜሬሮን እንዶ ጎእች እንዶ ቀል እንዶ ዎማንች እንዶ አግሽ ሜሬሮን አነኖመት ዮበአ። ክርስቶሱ ሆራንካ ሆራኔንቲ። 12 አቼ መገኒ ዶዕረንቴንተ ጡማኑሃ ኢተንቴንተራ እኬንተተኔ ቅሽጡ፥ ቢዝመተ፥ ማሽመተ፥ በሬድመታ እየቁሃ ኦድሸገ ኦደቅዬ። 13 መቱዕኔ መትዕኔ ጠሀ ደንዴቅዬ። መቱዕኔ መትዕኔ አሌን አፌንተ ባዱ ዮደ «ፈኡን» የቀምዬ። ቀርቹ «ፈኡን» ዬዕኔገን አዕኖኦቲ «ፈኡን» የቀሙ ሀስሰኖዕኔ። 14 ህከሮኦች ሆሪችን አበ ሆረንከ ሜጡ አስታነ ዊመተ ሜጦመተ ኣስታ ኢተተ ኦደቅዬ። 15 ሜጡ አል እኬን ገአንቴንታ ጡሚ እኮተኔ ክርስቶስ ጡሙ ዎዘነዕኔ ጠቁን። አሞ ገለጥቴነንተረ እክዬ። 16 ክርስቶስ ላገት ኣዜንተዕኔ ዊምማን ሄኡን። መቱ መቱዕኔ ቆርማን ሆራንን ሮስሽዬኒ ሰጅዬኒ። መዝሙሪን፥ ገለጢኒ ገሬ አያኒን ዊንቴ ላጋኒ መገኑ ጎደቢን ገለጥቴነን ዘመሬ። 17 አነ መገኑ እሲን ገለጥቴነን ላጋን እኮ ሁጄን አቴነንተ ጠሀ ሆረንከ ቀርቾ ዬሱስ ሱዕሚን አስዬ። 18 ምኔናከ! ቀርቾ ዬሱስረ እኬንተተኔ ምኔማካሀንክዕኔ አዘዘምዬ። 19 ምኔናከ! ምኔማከዕኔ ኢትዬ። ሂላከተ እኬኖችዬሰ። 20 ኦሶ! ኩን ቀርቹ ዬሱሰ በጅቀንሰኖ እኮተኔ ሆራራንን እልቶዕኔ ኬኒ አዘዘምዬ። 21 አናከነ አማከ! ተሳ ሙርቱምቦገ ኦሱክዕኔ አሙርሲሴኖችዬ። 22 አላኖ! መነ በጅቀንሲሃ ጡደሚሃ እሁዕነ ጠቤነ ዎዘኒን ቀርቹ ዬሱሰ ዋጅቴነን ማሊን ቀርበተ እኮዕኔ ኬኒ ሆራራንን አዘዘምዬ። 23 መኒ እሁዕነ ቀርቾ ዬሱሲ አስቴነንተሀንገ አስቴነንተረ ሆረንከ ጎደቢን አስዬ። 24 ሁጀቴነንታ ቀርቾ ክርስቶሲ እኮተኔ እሲች እርፉተ ኣቅቴነንተገ ደጌነንተ። 25 ሂልመተ ሁጀቾ መንቹ ሁጄስ ዋገ ኣቀኖ። መገን ብሬን ሚንተ ጡዴን ጎዕሉ ዮበአ።
1 ቀርበ! ክዕኔኤሃ ሰማን ቀርቹ ዮዕኔገ ደጌነንተተኔ አላኑክዕኔ ጠቤንማኒ በሬድማኒ ገሽዬሰ። 2 ገለጥቴነን ሆረንተ ጃተ ቃርቴን መገኑ ኡጭዬ። 3 ክርስቶስ ቤስቹ ጠሀ ኩኖተ መገኑ ላጋሀንስ ኡሩተ ፈኑንተ ኒተኔ መገኑ ኡጭዬ። አን ኡሱረሞሚንኩ ህከኒሃት። 4 ጠሃቁ ሀስሰኖኤጊን ጫክሽ ጠሃቆተ ኤሳ መገኑ ኡጭዬ። 5 ደንዴሾዕኔጊን ሆሪንን መገኑ አመዕኑምቦ መን ሜሬሮን ቆርማን ፈንቀላምዬ። 6 አዪ ጠዕመኖ ጠሀ ሀስሰኖጊን ፈንቀሺ ደንድቴኖተ ጠሁዕኔ ሆረንተ ጃተ መጥኔገ ጤአኖ እሁን። 7 ኢተሜ ህዞነ አመዕነሜ ሁጀታንቹ ኤሳን በርገም ቀርቾ ዬሱስ ሁጅተ ሁጀተኖ ትክቆስ ኢ ጠሀ ሆረንከ ኩለኖክዕኔ። 8 እሱ ክዕኔኤበ ሶኮሚ ነኦት እንክ ሄዕነዮምገ ክዕኔኤ ኩሉንታቲ ዎዘነዕኔ ቃርሱንታቲ። 9 እሲንን በርገም ክዕኔኤ ዉድቢ እኮ አመዕነሜነ ኢተሜ ህዞ አናስሞስ ክዕኔኤበ ዋለኖ። እሶኦት ከኔ እኮ ጠሀ ሆረንከ ኩልታዕኔ። 10 ኤሳን በርገም ኡሱረሞ አርስጥሮርኮስ «ጡመ» ያዮዕኔ። ክዕኔኤበ ዋሎ ጃተ ኣቅቴኑንተ ቃግሾንክዕኔ ባርነባሴ ለንካን ቤቱ ማርቆስ «ጡመ» ያዮዕኔ። 11 «እዮስጦሴ» የመሞ እያሱ «ጡመ» ያዮዕኔ። መገን ዎሞማ ኤሳን በርገንት ሁጀታ መን ሜሬሮን አይሁደ እኬሩ ከሮኦታ ጠለ። ኤስን ቃርስቴኤ። 12 ክዕኔኤ ዉድቢ እኮ ዬሱስ ክርስቶስ ሁጀታንቹ ኤጳፍረ «ጡመ» ያዮዕኔ። መገኑ ሀሰኖረ ሆረንከ ደጌን ዊማከተ እኬኑንታ ቃርቴን ኡርቴኑንታ ሆረንተ ጃተ ክዕኔኤተኔ መገኑ ኡጪን አጰመዮሃ። 13 ክዕኔኤተኔሃ ሎዶቅነ እያር ከተማን ዮ መኒሃ ቃረገ ሁጀተዮገ ገጉእን ነቀሳም። 14 ኢተሜ ሀኪንቹ ሉቃሲ ዴማሲ «ጡመ» ይተዮዕኔ። 15 ሎዶቀ ዮ ህዛከተ፥ ላምፎኒ ምኔንተሴ ጠጵያኖ አመዕናን ማበረሃ «ጡመ» ይዬሰ። 16 ተ ደዳቤተ አዕኖኦት አነበቤንታች ዘኪን ሎዶቀ ዮ አመዕናን ማበር ሜሬሮኒ አነበበንታገ አስዬ። አዕኖኦቲ ሎዶቂች ሶሀንታዕኔ ደዳቤተ አነበቤ። 17 አርክጳሴ «ቀርቾ ዬሱሲች ኣቅቶንት ሁጅተ ዊንሽቶተ ቃር» ይቴን ኩሌስ። 18 ከ ጡመ ገግኤ አንጋን ጣፎሚ አኔት ጳዉሎሴት። ኡሱረሞምገ ቃግዬ። መገን ኣሰንቹ ክዕኔኤን እሁን።
1 ጳዉሎስ፥ ስላሲ ጥማቶሲ አነ መገኖኒ ቀርቾ ዬሱስ ክርስቶሳኒ ዮንተ ተሰሎንቄ ከተም አመዕናን ማበሪ ሶንኬምተ ሶህኑ። ኣሰንቹሁ ጡሙሁ ክዕኔኤ እሁን። 2 - 3 መገኑ ኡጭናም ጃተ አመዕነትዕኔ ሁጅተ፥ ኢታን ቆንዶዴነንተጋ ቀርቿኔ ዬሱስ ክርስቶስ ዉዲን ዮ ተሳን ቃርቴነንተጋ ክዕኔኤተኔ ሰውነን አናኔ መገን ብሬን ሆርዕኔ ዳፊንን ሙኑዕናች መገኑ ገለጥነዮም። 4 መገኑ ኢቴዕኔ ህዛከ! ክዕኔኤተ መገኑ ዶዕሬዕኔገ ደንጋም። 5 ዳፉንኩስ ምሽራች ላገተ ኩኖንክዕኔ ላጋን ጠሊን እሁዕናች መገን አያን መቄኔቲ ሞሽን ደንጌቲ። አሞ ክዕኔኤን በርገም ሄዕኖም ጃተ ክዕኔኤተኔ ይን ሀትተ እንክ ሄዕኖምንዶ ደጌነንተ። 6 መሃ አቡ ሀዉ ኢሌዕኔዳ ጡማንቾ አያን በጅጎን ላገስ ኣቅቴን ኔሲ ቀርቹ ዬሱሰሃ አጉዴነንተረ እኬንተ። 7 ህከኒ አዕኖኦት መቄዶንነ አካይ ባዶን ዮ አመዕናኒ ሆሪንከ ደናምተ አጉዲሸተ እኬንተሰ። 8 መገን ላገት ክዕኔኤች ፉልት መጮጨንቶኢ መቄዶንነ አካይ ባዶን ጠላን እሁዕናች መገኖን ዮዕኔ አመዕነቱ ሆራንተ መዕኔን መጮጨሞ እኮተኔ ከን ጠህተኔ ነኦት ሜጡራ ጠሃቁ ሀስሰኖኔበአ። 9 ክዕኔኤበ ዋኖም ጃተ ደናሞገ ኣቅቴንተኔጋ ሄአኖነ ገሬ መገኒ ሁጀቲ ቆጰን መገናካች ሀትተ እኬን መገንበ ፈንቀልቴንተእንዶ እሶኦት ገጉንኩሰ ነቀሰዮእ። 10 ህትጉንተ መገኑ ሬሆች ኬእሾስነ ዋልታ አሙሬች ፈእሰኖኔ ቤቱስ ዬሱሰ ሰሜች ዋለኖገ ቆረቤነንተጋ ነቀሰዮእ።
1 ኢ ህዛከ! ነኦት ክዕኔኤበ ዋሉኔ ጠለንከ እሁ ሆጉስ አዕኖኦት ገጉዕኔን ደጌነንተ። 2 አዕኖኦት ደጌነንተገንከ ህከኒች ብሬ ፍልጵሱስ ከተማን ዮም ጃተ ሀዉሁ ቦሮረንቹሁ ኢሌኔዳ ሆለመ ኡጀቀንቺን መገን ምሽራች ላገተ ክዕኔኤ ጠሃኑንተ መገኑኔ እግመተ ኣሴኔ። 3 ነኦት ሉሳን እንዶ ቡሽማን እንዶ መለንጦክዕኔተ ኡጭንምበክዕኔ። 4 ጠሁ እኮዳ መገኑ ምሽራች ላገ ሀደረተ ኔሳ አመዕን ኣሴኔ እኮተኔ ዎዘነኔ ቆርም ደገኖ መገኑ በጅቀንሲች ህግየን መነ በጅቀንሲ ጠሃናምበአ። 5 አዕኖኦት ደጌነንተገንከ መለንጥ መቱረ ደቂ ዋንግን ጠሃቁ ሆጊሃኔ መገኑ ገጉንኩስ ነቃሻ። 6 መሃ ክርስቶስ ሶቀማኑ እንኮምተኔ አብኑ ሀስሰኖኔረ እንኮምዳ ክዕኔኤች እኮ ዎሎ መኒች አብን ሀንስምበአ። 7 ጠሁ እኮዳ አመት ኦሶሀንሴ ቅሽጥታሀንገን ሜሬሮንተዕኔ ማሻከተ እንኬም። 8 አብንስ ኢትኖንክዕኔተኔ መገን ምሽራች ላገተ ክዕኔኤ ኩሉ ጠለ እሁዕናች ፎልኔ ህግንስ ኣስኖተ ቅጠሜም እኬ። ዳፉንኩስ ክዕኔኤተ ጎደቢን ኢትናንክዕኔየረ። 9 ኢ ህዛከ! መገን ምሽራች ላገተ ክዕኔኤ ኩነን ሜጢሀንክዕኔ ኬዕምኑምቦገ አንከርሃ በራሃ ሁጀንተን ሀበንከ ቆንዶንዶምንዶ ቃጌነንተ። 10 ክዕኔኤን አመዕናኒን በርገም ሄዕኖም ጃተ ነኦት ጡማኑ፥ ሙጩረታ ቀነጤኖሩ ዮበእራ እንክ ሄዕኖምጊ አዕኖኦቲ መገኑሁ ነቃሸተ። 11 - 12 ዎሞመስ አብኒ ገኤዕኔ መገኒ ሀስሰኖገ ሄኤኑንተ አነንከዕኔ አነንከዕኔ ሰንዘን፥ ቃርስነኒ ቃግንሰኒ አኑ ኦሶሀንስ እሀኖሀንገ እንኮንክዕኔገ ደጌነንተ። 13 ኔሳች መገን ላገተ መጮቴንተ ጃተ መን ላገገ እሁዕናች መገን ላገገ አስቴን ኣቅቴንተተኔ መገኑ ሆረንተ ጃተ ገለጥናም። ህት ላገንት ገርንተ መገንተ ላገ እኬ። እሴን አመዕንቴንተ ክዕኔኤ ኣዜን ቴሱ ሁጀተዮእ። 14 ኢ ህዛከ! አዕኖኦቲ ዬሱስ ክርስቶስ ዉዲን መገኑ አመዕኔ መን ማበረ ይሁድ ባዶን ዮኢ አጉዴነንተረ እኬንተ። ዳፉንኩስ እሶኦት አይሁድ-መኒች ሀወ ኣቅቶገን አዕኖኦቲ ገግዕኔ ዉድ መኒች ሀወ ኣቅቴንተ። 15 አይሁድ-መኑንኩ ቀርቹ ዬሱሰሃ ህራጋኑሃ ሽቴሃረ፤ ኔስን ሸርት ባዲች ፉሽቴሃረ። አሞ እሶኦት መገኑ ክቼእሳሃረኒ መነ ሆረንከ ግባሃረኒ። 16 አሞ አይሁደ እኩምቡ መኑ ፈኡንተ መገን ላገተ ኩኑምቦገ ቆልታሃረ። ባጢለ ባጢል አሌን በርግተን መርታረ እኮተኔ ዘካንቾንተስ መገን አሙርት እሶኦ አሌን ዋልቴእ። 17 ኢ ህዛከ! ሰውቲን እሁዕናች ማሊን አነነ እንክ እልተ እሌን ጡደቀሙዕናች መቱ ቀጠ ኤጌኖምተኔ ጡንዶዕኔተ አብንስ ቁልጥኔም። 18 ክዕኔኤበ ዋኖተ አብንስ ሀንሴም እኬ። ባሰንከስ አን ጳዉሎስ ክዕኔኤበ ዋሊ ለሜ ሰሴ ሀሼም እኬ። ጠሁ እኮዳ ሼጣንቹ ከሞኔ። 19 አቼ ተሶኔነ በጅጉኔ እንዶ ቀርቹኔ ዬሱሱ ዋሎ ጃተ ብሬንተስ ቦልጥናም ዘዉዱኔ አዬት? አዕኖኦታበእንዶ? 20 ገሬየንተ፤ አብኑኔ በጅጉኔ አዕኖኦታ።
1 ከኒች ዘኪን እየቂ ደንዱ ሆንጎምተኔ ነኦት ጠሉ አቴን ከተማን ፈኢ ሀንሶም። 2 ኔሳንን በርገም ክርስቶስ ምሽራች ላገተ ኩለኖ መገን ሁጀታንቹ ህዞኔ ጥማቶሴ ክዕኔኤተ ሰዙንታ አመዕነቶንተዕኔ ቃርሱንታ ሶንኬም። 3 ህኩስን ኢሌዕኔ ሀዋን አዪ ሌንቄቁምቦጊሃት። ዳፉንኩስ ሀዉ ቤቀንቸኔ እኮገ አዕኖኦት ገጉዕኔን ደጌነንተ። 4 ክዕኔኤን በርገም ዮም ጃንተ ሀዉ ኢለኖኔገ ብርስን ኩኖንክዕኔገን ቴሱ ህኩ ሀዉ ኢሌኔ። ህከስን አዕኖኦንት ደጌንተ። 5 ህከኒ እየቂ ደንዱ ሆጎምተኔ አይደጎ ሼጣንቹ ኬንየንክዕኔ ቆንዶዱኔ ጠለንከ በኤንዶ ይ ዋጅኬእ አመዕነቱዕኔ ደጎተ ጥማቶሴ ክዕኔኤበ ሶኬም። 6 ጠሁ እኮዳ ቴሱ ጥማቶስ ክዕኔኤቢች ፈንቀል አመዕነትዕኔተኔሃ ኢተዕኔተኔሃ ነኦት ክዕኔኤተ ጡዲ ቁልጥኖምገን አዕኖኦቲ ኔስ ጡዲ ቁልጥቴነንተጋ በሬድማን ሰውቴነንተጋ ክዕኔኤተኔ ደናሙ ዱዱቡ ኩሌኔ። 7 ኢ ህዛከ! አበ ሀው ኣዜን ሄዕኖምዳ አመዕነትዕኔ ዳፊን ክዕኔኤተኔ ቃኔም። 8 ዳፉንኩስ አዕኖኦት ቀርቾ ዬሱሳን ቃርቴን ሄኤንተደ ነኦቲ ፎሊን ዮም ዩሀ። 9 ክዕኔኤ ዳፊን መገን ብሬን በጅቀማም በጅጎ መገኑ ሀበንከ ገለጥናም። 10 ክዕኔኤን ደቀም ጡንዶዕኔታ አመዕነቶንተዕኔ ኮቾረ ዊንሺሃ ደንድኖተ አንከርሃ በራሃ መገኑ ቃረገ ኡጭነዮም። 11 አነኔ እኮ መገኑ ገጉንኩሲ ቀርቹኔ ዬሱሱሁ ክዕኔኤበ ዋኑንተ ዎቃኔ ጠበኡን። 12 - 13 ቀርቹኔ ዬሱሱ ክርስቶሱ ጡማኒንተስ ሆሪንን በርገም ዋለኖ በር አናኔ መገን ብሬን ሙጩርማን ቀነጤኖሩ ዮበእረ አስ ዎዘነዕኔ ቃርስ ኡርሱንተ ነኦት ክዕኔኤተ ኢትናምገንከ አዕን-አዕኖኦንት ኢተንቴኑንታ ዎሉ ኬኑ ኢትቴኑንታ ቀርቹ ኢተተ በትሽ በርጉክዕኔ።
1 አቼ ኢ ህዛከ! መገኑ በጅቀንሲ ሀትተ ሄኡ ሀስሰኖዕኔንዶ ኔሳች ሮሴንተገን ቴሱ ሄኤነንተጊች ባሰስ አቴኑንተ ቀርቾ ዬሱስ ሱዕሚን ኡጭናንክዕኔኒ ሰንዛንክዕኔኒ። 2 ቀርቿኔ ዬሱስ ዉዲን ሀትጎነተ አዘዙተ ኣስኖንክዕኔንዶ ደጌነንተ። 3 መገኑ ሀሰኖ አዕኖኦት ሙጩረተ እኬኑንታቲ ሳኢች ቄዕርቴኑንታቲ። 4 ክዕኔኤች አኑንኩ አኑንኩ ገጊሀንስ ሙጩርማኒ አብኒኒ ሜንትቹተ ኤበቁ ሀስሰኖገ ደጌነንተ። 5 ገሬ መገኑ ደጉምቦ መንገ ሂሉ ማል ቁልጡ ሄኡንከስ። 6 አዪ ከን ጠሃን ህዜስ አሌን ደምጉንከ እንዶ መለጡንከ። ከኒች ብሬ ቃርስን ኩኖንክዕኔገን ህትጉተ አታ ኬኑ ቀርቹ ቅጣጠኖሰ። 7 ዳፉንኩስ መገኑ ገኤኔ ሙጩርማን ሄዕኑንታት በጋን ቡሽማን ሄዕኑንታበአ። 8 ህከኒ ተን ሰዘናን ኡርጨመኖ አዪ መኒን እሁዕናች ጡማንቹ አያነስ ኣሴዕኔ መገኒን ኡርጨመዮሃ። 9 አዕን-አዕኖኦንት ኢተንቴነንተጊ ገጉንኩዕኔ መገኒች ሮሴንተተኔ አመዕናን ኢተተኔ አዪ ክዕኔኤ ጣፉንተ ሀስሰኖበአ። 10 መቄዶን ባዶን ዮ አመዕናኑ ሆረንከ ገርንተ ኢትቴነዮንተ። እኮዳ ኢ ህዛከ! ቴሱ ሰዛንክዕኔ ኤጄቺ ባሰ ኢትቴኑንታት። 11 ከኒች ብሬ ኩኖንክዕኔ አደቢን ሄኤኑንታት፥ ገግዕኔ ቁጠ ቆረጵቴኑንታቲ አንጋንተዕኔ ሁጀጥቴን ገልቴኑንታቲ። 12 ህትጉንተ አቴንተደ አመዕኑምቡ መኑ አብሰኖዕኔራ ቦቁዕኔ ደንድቴን ገልቴንተራ እኬነንተ። 13 ኢ ህዛከ! ተሶ ዮበእ ዎሎ ኬንገ ክቼኤኑምቦገ ሬቶ መንተኔ ደጌኑንተ ኢትናም። 14 ዬሱሱ ሬሄጋ ሬሆች ኬኦጋ አመዕንኖሚች ዬሱሳን አመዕንት ሬቶረ መገኑ ዬሱሲንን ሜጡ ዋሸኖሰ። 15 ቀርቺች ኣቅኖም ላጋን ኩናንክዕኔ ቀርቹ ዋለንቀጤች ፎሊን ሄዕናም ኬኑ ሬቶ ኬኑ ብርስናምበአ። 16 ቀርቹ ገጉንኩስ አዘዞ አበ ላጋን፥ መገን ሰሜ ሶቀማን አወንሳንች ላጋኒ መገን ጡሩምቡል ላጋኒ ሰሜች ዋለኖ። ክርስቶሰ አመዕንት ሬቶሩንኩ ብርስት ሬሆች ኬኣእ። 17 ህከኒች ዘኪን ነኦት ፎሊን ፈዕኖም ኬኑ እሶኦንን በርገም ቀርቾ ዬሱሲን ቦብር አሌን ደቀሞተ ኬዕናም። ህትጉንተ ሆረንተ ጃተ ቀርቺን በርገም ሄዕናም። 18 ህከኒ አዕን-አዕኖኦንት ተን ላጋን ቃርሰቀምዬ።
1 ኢ ህዛከ! ኩ ጠሁ ዊመኖ ዶልነ ጃተኔ ሜጡሩ ጣፈሙንተዕኔ ሀስሰኖበአ። 2 ዳፉንኩስ ቀርቾ ዬሱስ በሩ ሞገኣንቹ አንከር ዋለኖሀንገ ዋለኖ እኮገ አዕኖኦት ቆርስቴን ደጌነንተ። 3 መኑ «ሆሩሩንኩ ጡማ» ያንየንን ባሉ መቄቤሉተ አፈኖሀንገ ህተ ጃንተ በኡ ደንጎን ዋል አፈኖሰ፤ ፉሸቂንከ ደንድታበአ። 4 እኮዳ ኢ ህዛከ! በሩስ ሞገኣንችገ እክ ኢሉምቦዕኔገ አዕኖኦት ቱንሶ ኣዜኔበአ። 5 ሆሩንኩዕኔ ጫክነ በሬታ ኦሱ። ነኦት አንከሬች እንዶ ቱንሶቼበአ። 6 ህከንተኔ ነኦት በቅን ገገ ኤጌጢን ሄዕኖ በጋን ዎሎ ኬንገን ግንሱንከ። 7 ዳፉንኩስ ግሳሩ አንከር ግሳእ። ድምብታሩንኩ አንከር ድምብታእ። 8 ነኦት እኮዳ ጫክ ኦሱተ እንኮምተኔ አመዕነቱሃ ኢተታ ኦል ኦድሸገ ኦደቅን ፈእ ተሳ ቦቆን ዎዕሬኖ ቆሜገ ዎዕርን ገገ ኤጌጢን ሄዕኑን። 9 መገኑ ገኤኔ አሙሬ እሁዕናች ቀርቿኔ ዬሱስ ክርስቶስ ዉዲን ፈኡ ደቅኑንታት። 10 ፎሊን ሄዕኖምደን ሬኖምደን እሲን በርገም ሄዕኑንተ ክርስቶሱ ኒተኔ ሬሄእ። 11 ህከንተኔ ኤጅ አቴነንተገን መቱ መቱዕኔ ሰጨንቴነን አዕን-አዕኖኦንት ካዕለቀምዬ። 12 ኢ ህዛከ! ክዕኔኤ ሜሬሮን ሁጀተን ቆንዶዳ ቀርቾ ዬሱስ ዉዲን አወንሳኑዕኔ ሰዛኑዕኔ እኮ ኬኑ አብሴኑንተ ኡጭናንክዕኔ። 13 ሁጄሰተኔ አብሼሰኒ ኢትዬሰኒ። አሞ አዕን-አዕኖኦንት ኢታን ሄእዬ። 14 ኢ ህዛከ! ሶሰ ኬኑ ሻቄኑንተ፥ ዋጀላሻከተ እግሴኑንተ፥ ሆንጋኑ ካዕልቴኑንታ መነ ሆረንከ እየቂን ኣቅቴኑንታ ሰንዛንክዕኔ። 15 አዪ ሂለረ አሴሀኒ ሂለረ አስ ፈንቀሹምቦገ ቆረጵዬ። ህከን ቆደ ሆረንተ ጃተ መቱ መቲሀዕኔ ደናሙ አሲ ቃርዬ። ህትጉንተ ሆራንከ መኒ ደናሙ አስዬ። 16 ሆረንተ ጃተ በጅቀሜ። 17 አጉርቴኑዕናን መገኑ ኡጭዬ። 18 ሆራንከ ጠሃን መገኑ ገለጥዬ። ዳፉንኩስ ዬሱስ ክርስቶስ ዉዲን መገኑ ክዕኔኤ ሰውያኖ ከኔት። 19 ጡማንቾ አያን ጊረተ ጠእሴኖቼ። 20 ህራገ ገዴኖቼ። 21 ሆረንከ ጠሀ ኬንቴን ደጌን በሬደስ አጵዬ። 22 ሂለ እኮ ጠሂች ሆሪችን ሁንዬ። 23 ጡም መገኑ ገጉስ ሆሮመንተዕኔ ማሰኡክዕኔ። ሰውቱዕኔ፥ ፎሉዕኔ ማሉዕኔ ቀርቹኔ ዬሱሱ ክርስቶሱ ዋለኖ በሬ ቀነጤኖሩ ዮበኢ ቆረበም ሄኡን። 24 ገኤዕኔ አመዕነሜኢ እኮተኔ ህካን ዊንሸኖክዕኔ። 25 ኢ ህዛከ! ኔሳ መገኑ ኡጭዬ። 26 አመዕናኑ ሆረንከ አመዕናኒ አጉደኖ ሱንቀንቺን ጡምሽዬ። 27 ት ደዳቤት አመዕናኒ ሆሪንከ አነበበንቱንተ ቀርቾ ዬሱስ ሱዕሚን ሀደረ ያንክዕኔ። 28 ቀርቿኔ ዬሱስ ክርስቶስ ኣሰንቹ ክዕኔኤን እሁን።
1 ጳዉሎስ፥ ስላሲ ጥማቶሲ አናኔ መገንነ ቀርቾ ዬሱስ ክርስቶስረ እኬንተ ተሰሎንቄ ከተማን ዮንተ አመዕናን ማበሪ ሶንኬምተ ሶህኑ። 2 አና መገኒቺ ቀርቾ ዬሱስ ክርስቶሲቺ ኣሰንቹሁ ጡሙሁ ክዕኔኤ እሁን። 3 አመዕነቱዕኔ ኤጄች አበ ሌአን መረዮተኔሃ አዕን-አዕኖኦንት ኢተንቴነንተ ኢተት በርገቅተን መርተዮተኔሃ መገኑ ገለጡ ሀስሰኖተኔ ክዕኔኤ ዳፊን መገኑ ሆረንተ ጃተ ገለጥናም። 4 ኢሌዕኔ ሀወሃ ሸረንቸሃ እየቂን አመዕነቲን ቃርቴን ኡርቴንተተኔ ክዕኔኤተኔ መገኑ አመዕኔ መን ማበሪ ሆሪንከ ጠሃቂ ሳንምበአ። 5 መገን ዎሞማ ሀስሴነንተረ እኬን ዎልሰሙክዕኔ መገን ጠቤነ ፍርዲ መላታ። አዕኖኦንት ሀወ ኣቅቴነዮንታ ህተን መገን ዎሞመተኔሃት። 6 መገኑ ጠቤነ ፍርደኖ እኮተኔ ሀወ ኤባዕኔ ኬን አሌን ፈንቀሽ ሀወ ኤበኖሰ። 7 ቀርቹ ዬሱሱ አቡ መቆ ዮሰ መገን ሰሜ ሶቀማኒን በርገም ሰሜች ጊረ ለበኒን ዋለኖ ጃተ ቴሱ ሀወ ኣቅቴነንተ ክዕኔኤ ኔሳንን ቅጡ ፎሎጩ ኣሰኖክዕኔ። 8 መገኑ ደጉምቡራ ቀርቿኔ ዬሱስ ክርስቶስ ምሽራች ላጋ አዘዘንቱምቡራ ባደ ፉለኖሰ። 9 እሶኦንት ቀርች ብሬቺ አብንስ መቄቺ አነነ እክ ዶሊ ሆሪንከ በኢን ቅጣጠንታእ። 10 ህኩስን እሀኖ ጡማኑ አብሱንተሲ ነቀንሶም ጠሀ አመዕንቴን ኣቅቴንተ አዕኖኦቲ መገኑ አመዕንቶ ኬኑ ሆሩንኩ ማለልቱንታ እስ ዋለኖ ጃኔት። 11 ሆረንተ ጃተ ሙኑዕናች መገኑ ኡጭናንክዕኔ ኒ መገኑ ገአንቺሀንስ ሀስሴንታረ አሱንታቲ በሬደረ አሲ ዮዕኔ ቁልጡሃ አመዕነትዕኔ ሁጅታ መቄንተስ ዊንሹንታቲ። 12 ህትጉንተ ኒ መገንነ ቀርቾ ዬሱስ ኣሰንችጊን ቀርቿኔ ዬሱስ ክርስቶስ ሱዕሙ ክዕኔኤን አቡንታ አዕኖኦት እሶን አብቴኑንታ መገኑ ኡጭናም።
1 - 2 ኢ ህዛከ! ቀርቿኔ ዬሱስ ክርስቶስ ዋልተኔነ ነኦንት እስባን ጠጵናምተኔ ነኦት ህራንጎምሀንገ፥ ሰበንኮምሀንጋ ደዳቤተ ጣንፎምሀንጋ አስቴን «ቀርች ዋል በሩ ኢል ፈጄእ» ይቴን ሰውታንተዕኔ ሰርብቴን ሌንቄቅቴኑምቦጋ ህልቄኑምቦጋ ኡጭናንክዕኔ። 3 አዪ ሀከን ዎቄኒ ሉስሱንከዕኔ። ዳፉንኩስ ብርስ መገኑ ካዱሁ ሾኩ መንቹ እስን በእ ቤቱ ለሉዕናቺ ህኩ በሩ ዋለኖበአ። 4 ህኩ ሾኩ መንቹንኩ መገኒቺ መገኗ ዬን ሰገዴኖሪቺ ሆሪችን ገገስ አሊን አስ ኡርጨመኗ። አሞ «አን መገኗ» ያን አዋጀን መገን ምኔን አፉዕለኖ። 5 ክዕኔኤን በርገም ዮም ጃንተ ከ ጠሀ ኩሎንክዕኔገ ቃጌነንተበእንዶ? 6 እስን ጄቹስ ኢልትየን ለለኖ ኢለንቀጤች ቴሱ ለሉ ከመኖስሩ መሃንዶ አዕኖኦት ደጌነንተ። 7 ዳፉንኩስ ሾክመ ሁጅት ማጣን ሁጀተንተዮእ። ህኩስን ቴሱ ኤጌጅ ዮ መቆ ዎቄች ፈደንቀጤሃት። 8 ህከኒች ዘኪን ህኩ ሾኩ መንቹ ለለኖ። እሱንከ ቀርቹ ዬሱሱ አፌችስ ፉለኖ ፎሺኒ ዋልስ ህቢኒ ሻኖ። 9 ህኩ ሾኩ መንቹ ዋለኖንኩ ሼጣንች መቄን ቆጰን ማለሉተ፥ መላታ ማለልሲሳ ጠሃከታ ሆረንተ ሁጀተኔት። 10 ህትጉንተ በኣ መነ አነነ አነነ ሉስሳ ሂልማን መለጠኖ። ህኩሩንኩ በኣኢ ፈእሳሰ ገርተ ኢትት ኣቁ ግቦተኔሃት። 11 ህከንተኔ ቆጰን ጠሀ አመዕንቱንተ መገኑ አበተ ሉሰተ ሶሀኖሰ። 12 ህኩን እሀኖ ገሬን አመዕኑ ግብ ሾክመ ሁጄን በጅቀንታ ኬን አሌን ፍርደሙንታት። 13 ቀርቹ ዬሱሱ ኢቴዕኔ ኢ ህዛከ! አዕኖኦት ጡማንቾ አያኒን ማሰአሚኒ ገሬን አመዕኒኒ ፈኤኑንተ መገኑ ዎናችን ዶዕሬዕኔተኔ ክዕኔኤ ዳፊን መገኑ አብንስ ገለጡ ሀስሰኖኔ። 14 ነኦት ኩኖንክዕኔ ምሽራች ላገ ዉዲን ቀርቿኔ ዬሱስ ክርስቶስ አብን ደቅቴኑንተ መገኑ ገኤዕኔ ከኒሃት። 15 ኢ ህዛከ! ህከንተኔ አቼ ቃርቴን ኡርዬ። አፌችኔ ፉልቶ ላጋን እንዶ ደዳቤን ሮስንሶንክዕኔ ሮሸተ ሀቤኖችዬ። 16 - 17 ቀርቹኔ ዬሱሱ ክርስቶሱ ገጉሲ ኢቴኔነ ኣሰንቺንተስ ዶሊ ሆሪንከ እካ ቃርመታ በሬደ ተሳሃ ኣሴኔ አኑኔ መገኑሁ ዎዘነዕኔ ቃርሱን። በሬደ ሁጄኒ ላጋኒ ቃርሱዕኔ።
1 ኢ ህዛከ! ክዕኔኤባን እኮሀንገን መገን ላገት ደዕልት ሀራርቱንታ ሌኡንታ ኒተኔ መገኑ ኡጭዬ። 2 መናን ሆራንን አመዕነቱ ሄኢ ደንዱምቡተኔ ሾካነ ሂለ መኒች ፈዕኑንተ መገኑ ኡጭዬኔ። 3 ጠሁ እኮዳ ቃርሰኖዕኔነ ዳቡሎሴች ቆረበኖዕኔ ቀርቹ ዬሱሱ አመዕነሜሃ። 4 አዘንዛንክዕኔ ጠሀ ቴሱ እኮ ከ ዘኩ አቴነንተገ ቀርቾ ዬሱሲን አመዕንናንክዕኔ። 5 ቀርቹ ዬሱሱ ዎዘነዕኔ መገን ኢተባ ክርስቶስ እየቅባ አወንሱን። 6 ኢ ህዛከ! ኔሳች ሮሴንተ ሮሸጊን እሁዕናች መቁጣሎማን ሄአኖ አመዕናንቺች ሀከኒቺ አነነ እኬኑንተ ቀርቾ ዬሱስ ክርስቶስ ሱዕሚን አዘንዛንክዕኔ። 7 ነኦት ክዕኔኤባን ሄዕኖም ጄቹተ መቁጣለተ እሁ ሆጉኔ አዕኖኦንት ደጌነንተተኔ ኔስ አጉዴን ሄኡ ሀስሰኖዕኔጋ ደጌነንተ። 8 አዬዕኔ አሌኒ ኬዕምኑምቦገ አንከርሃ በራሃ አጰመን ሁጀንተን ሄዕኖም በጋን አዬቺ እንጄረ ጠለንከ እንትምበአ። 9 ህኩስን አዕኖኦት ኒ አጉዲሸተ አወንቴኑንተ ይኔት በጋን ህኩን ኔሳ ሀስሱምቡ እኮተኔሃበአ። 10 ዳፉንኩስ ነኦት ክዕኔኤባን ዮም ጃንተ «ሁጀቱምቡ መንቹ እቱንከ» ይን ተ አዘዙተ ኣስኔንክዕኔ እኬ። 11 ዳፉንኩስ መ-መቱ ሶሳከት ሜሬሮንተዕኔ ዮገ መጮነዮም። ህኩሩንኩ ገኤኑምቦሰራን ኣገን ሜጡራ ሁጀቱዕነ ሄኣሃረ። 12 ህትጋሙ መኑ አደቢን ሁጀተን ገግሰ እንጄረ እቱንተ ቀርቿኔ ዬሱስ ክርስቶስ ሱዕሚን አዘንዛንሰኒ ሰንዛንሰኒ። 13 ኢ ህዛከ! አዕኖኦት እኮዳ በሬደተ ሁጅተ ሁጀቲ «ቆንዶንዴም» ይቴኖችዬ። 14 ተን ደዳቤን ክዕኔኤ ኩኖም ሰዘነተ መጮጩምቡ መንቹ ሄኦደ እሱ ሞሽቴን ደግዬ። እስን ሳሉንተ እሲን ጣጭቴኖችዬ። 15 ጠሁ እኮዳ ህዜገ አሙዕርዬስ በጋን ባረጋርገ አቴን ጡዴኖችዬስ። 16 ጡም ቀርቹ ዬሱሱ ገጉንኩስ ሆረንተ ጃተ ሆራንከ ጠሃን ጡመ ኣሱንክዕኔ። ቀርቹ ዬሱሱ ሆሪንተዕኔን በርገም እሁን። 17 ከ ጡመ ገግኤ አንጋን ጣፎንክዕኔ አኔት ጳዉሎሴት። አን ሶኮም ሶህኖን ሆራንን ለልታ መላት ተኔት። ጣፋንስጉንኩ ህትጉተ። 18 ቀርቿኔ ዬሱስ ክርስቶስ ኣሰንቹ ክዕኔኤን ሆሪንተዕኔን እሁን።
1 ፈእሳንቹኔ እኮ መገንነ ተሳኔ እኮ ቀርቾ ዬሱስ ክርስቶስ አዘዞን ዬሱስ ክርስቶሲ ሶቀማንቹ እኮም ጳዉሎሴች 2 አመዕነቲን ገሬ ቤቱኤ እኮ ጥማቶሴ ሶሀንቴታ ሶህኑ። አነ መገኒቺ ቀርቿኔ ዬሱስ ክርስቶሲቺ ኣሰንቹ፥ ማረቱቲ ጡሙሁ ኬሳን እሁን። 3 - 4 አን መቄዶን ባዱ መሮም ጃተ ሀደረ ዬንኬገንከ መ-መቱ መኑ ቆጰን ሮሸተ ሮስሱምቦጋ ማኦነ ዘካንቹ ዮበእ እለንቸ ዎልስበ ፈንቀልቱምቦጋ አዘዞተ ኤፌሶን ከተማን አፉዕል። ህትጎኑ ጠሁንኩ ኦደተ ኤቢች ህግየን አመዕነቲን ሁጀተንታ መገን ሁጄ ካዕሉምቧ። 5 እኮዳ ተን አዘዞ ቆሜ ሰውቱ ሙጩሮ ዎዘኒች፥ ጠቤነ ሰውቲቺ ገሬ አመዕነቲቺ ደገንታታ ኢተ። 6 መ-መቱ መኑንኩ ህትጎነ ጠሂች አነነ እክ ካዕልቱምቡ ኦደበ ፈንቀሌእ። 7 እሶኦንት ሴር ሮስሳኑ እኮተ ሀሰን ይታስረንከ ደጋበአ። እንዶ «ደንግ ጠሃነዮም» ይተን ጠሃታስረንከ ቆርስታበአ። 8 መኑ ሴሪ አጉደኖጊን ሄኦደ ሴሩ ደናሙ እኮገ ደንጋም። 9 አሞ ሴሩ ኣሰሞ ሴረ ዝርታሪነ አዘዘንቱምቦ መኒሃት፥ ሾከነ ባጢላሞ ኬኒሃት፥ ሙጩርመት ዮሰበእነ አመዕነት ጠሀ ግባሪሃት፥ አናከታ አማከታ ሽታሪሃት፥ ነሰ ሽታሪሃት፥ 10 - 11 ሳኣኒሃት፥ ጎኑ ጎናን ፎኩተ ሁጀታሪሃት፥ መነ ዘዘልታሪሃት፥ ቆጰንታሪሃት፥ ቆጰነንከ ጤሌዕልታሪሃቲ ማሰአሞ መገን አብን ምሽራች ላገተ ኩሉንተ ኤሳ ሀደረት ኣሰንቶኤ ጠቤነ ሮሻን ኡርጨንታ መኒሃቲ በጋን ጡማኒሃበአ። 12 ኤስ ሁጄሀንስ ዶዕር አመዕነሜሚ አስ ዎልሾኤነ መቆ ኣሴኤ ቀርቹኔ ዬሱስ ክርስቶሰ ገለጣም። 13 አንን ከኒች ብሬ ክርስቶሰ ቦሮሬሚ፥ ሸሬሚሃ ቢልሼሚሃ እኮምዳ ህከ ሆረንከ አሴሚ ደጉ ሆጊኒ አመዕኑ ሆጊኒ እኮተኔ ማረቱተ ደቄም። 14 አሞ ዬሱስ ክርስቶሲን ደገመኖ አመዕነቲኒ ኢታኒ በርገም መገንኔ ኣሰንቹ በተእ ኣሰሞኤ። 15 «ባጢላመተ ፈእሶተ ዬሱሱ ክርስቶሱ ተ ኡለ አል ዋሎ» ይታ ላገት ገሬተኒ መኑ ሆሩንኩ ኣቁ ሀስሰኖተኒ። አንን ባጢላማች ሆሪችን ባሳንስ። 16 ጠሁ እኮዳ ዶሊ ሆሪንከ ሄኣ ሄቸተ ደቅቶተ እሶን አመዕንታ መኒ አጉዲሸተ እሁንተ ባጢላማች ሆሪችን ባሰ እኮም ኤሳን ዬሱሱ ክርስቶሱ ደንዴቁስ ጡድሱንተ ማረቱተ ደቄም። 17 ህከኒ ዶሊ ሆሪንከ ዎመ እኮ ሬሁምቦነ ጡደሙምቦ ሜጧንከ መገኒ አብኑሁ ገለቱሁ ዶሊ ሆሪንከ እሁንስ፤ አሚዕን። 18 - 19 ኢ ቤቶ ጥማቶሴ! ዎናንከ ኪተኔ ኩለሞ ህራግጊንን ደናሙ ኦለ ኦለንቱንታ አመዕነቱሁ ጠቤኑ ዎዘኑሁ ሄኡንተሄ ተ አዘዙተ ሀደረተ ኣሰዮንኬ። ዳፉንኩስ መ-መቱ መኑ መርከቡ ኦተኣንቹ ዮበእደ በአኖሀንገንከ ዎዘነ ሆጊን አመዕነቱሰ በእሴእ። 20 ህከሮኦ ሜሬሮንን ሄሜኖሲ እስክንድሪ ደገንታእ። እሶኦንት መገኑ ቦሮሩ አጉሩ ሮሱንተ ሼጣንቺ አን ህግሽ ኣሴንሳረ።
1 - 2 አቼ ነኦት መገኑ አጉዲን፥ ሙጩርማኒ ጡሚኒ ጋጊሀኔ ሄዕኖተ መኒ ሆሪንከ፥ ዎማካሃ አባኖ ሆሪንካ መገኑ ጠዕሙ፥ እሶኦ ቆደ መገኑ ኡጩሁ መገኑ ገለጡሁ ሀስሰኖገ ሆራሪችን ብርስ ሰዛም። 3 - 4 ህኩንን መኑ ሆሩንኩ ፈኡንታ ገርተ ደግበ ኢሉንታ ሀሰኖ ፈእሳንቿኔ መገን ብሬን በሬዳኒ በጅቀንሰኗኒ። 5 መገኑ ሜጦት። አሞ መገንነ መን ሜሬሮን ሜጡ ሜሬር መንቹ ዮእ። እስን መንቹ እኮ ዬሱስ ክርስቶሳት። 6 እስን መነ ሆረንከ ባጢሊች ዎዞተ ገገስ ዎዝኑተ አስ ኣሴእ። ህኩስን መገኑ መነ ፈእሲ ሀሾጊ ሀስሳ ጄቾንተስ ኣሰሜሃ ነቃሸ። 7 ህከንተኔ አን አይሁደ እኩምቦ መኒ አመዕነቱሃ ገርታ ሮስሶተ ሰበካንቹሃ ሶቀማንቹሃ እክ ሹመሞም። ህካን ያም ጃንተ ገርተ ጠሃቀዮም በጋን ቆጰንምበአ። 8 አቼ ጎኑ መዕኔን ሆራንን አሙርት እንዶ በአንቹ ዮበኢ ሙጩሩተ አንገተ ጦቀት መገኑ ኡጭቱንተ ሀሳም። 9 - 10 ህትጉንተ ሜንቱ አመዕናኖ ሜንቲ ሀስሳ አጉዳ ኦድሸተ ኦደቂን ማሽማኒ ገገ ኤጌጢኒ መክጨንቱን። አሞ «መገኒ ሰገንዳም» ያኖ ሜንቲ ሀስሰኖጊን ደናሜ ሁጄን በጋን ሙም ደጢን፥ ዎርቂን፥ ጆሎቦገ ዮሪኒ እትሰ ኦድሻኒ ገገሰ መክጭቱንከ። 11 አሞ ሜንትቹት ሆራንከ ጠሃን አዘዘሚን ለጭት ሮሱን። 12 ህትጉንተ ሜንትቹት ሰዕምዪች ህግየን ሮስሱን እንዶ ጎን አሌን ዳኖመት ሄኡንሴ ያምበአ። 13 ዳፉንኩስ ብርስ ቆጨሞ አዳሜት። ህከኒች ዘኪን ሄዋን ቆጨንቶእ። 14 አሞ መለጠንትኬእ መገን አዘዙተ ዝራንቹተ እኮኢት ሄዋኔት በጋን አዳም መለጠምምበአ። 15 ጠሁ እኮዳ ሜንትቹት አመዕነቲን፥ ኢታን፥ ሙጩርማኒ ገገ ኤጌጢኒ ሄኦደ ኦሱተ እሊን ፈኣእ።
1 «አዪ አመዕናን ማበር አወንሳንቹ እሂ ሀሾደ አበተ ሁጅተ ቁልጠዮእ» ይታ ላገት ገርተ። 2 አመዕናን ማበር አወንሳንቹንኩ ቀነጤኖስሩ ዮበኢ፥ ሜጥተ ሜንትቹተ ኤቤኢ፥ ልኪን ሄአኖ፥ ገገስ ኤጌጠኖ፥ አብንስ ቆረጰኖ፥ ኮሀ ኣቀኖ፥ ሮስሲ ደንደኖ፥ 3 ድምቡምቡ፥ ገንጨሩምቡ ማሸ፥ በአሙምቡ፥ ግዘ ኢቱምቡ፥ 4 ገግስ ምን ደናሞገ ገሺ ደንደኖ፥ ኦሱስ አዘዘንታሲሃ ሆራንከ ዉዲን አብሳሲሃ እሁ ሀስሰኖስ። 5 ዳፉንኩስ መቱ መንቹ ምንስ ገሼኖገ ደጉምቡች መገኑ አመዕኔ መን ማበረ ገሺ ሀትክ ደንደኖ? 6 አሞ ዳቡሎሴ አሌን ፍርደሞገንከ ቦልጢን ቡሰምየን አሌንተስ ፍርደሙምቦገ ሃሮ አመዕኔ መንቹ አወንሳንቹ እሁንከ። 7 ህትጉንተ ቢልማኒ ሼጣንች ዎሻዳኒ ኣጉምቦገ አመዕኑምቦ መንባን ገለጠሜኢ እሁ ሀስሰኖስ። 8 ህትጉንተ አመዕናን ማበር ዳቁነት አብኑ ሀስሰኖሰረ፥ ለምተ ጠሃቱምቡረ፥ በትናሸ ዎይን ዳጠ አጉምቡራ ባቅባልቱምቡራ እሁ ሀስሰኖሰ። 9 ህትጉንተ አመዕነት ቤስቹ ጠሀ ሙጩሮ ዎዘኒን ቃርስት አፉ ሀስሰኖሰ። 10 እሶኦንተ ብርሴን ኬኔን ጡዱ ሀስሰኖ። ህከኒች ዘኪን ቀነጤኖሰሩ ዮበእረ እኮኢች አመዕናን ማበር ዳቁነተ እሂ ደንድታእ። 11 ህትጉንተ ምኔማከሰ አብሴኖሰረ፥ ሄዕምቱምቡረ፥ ገገ ኤጌጥታራ ሆረራንን አመዕነንቴራ እሁ ሀስሰኖሰ። 12 አሞ አመዕናን ማበር ዳቁነት ሜጥተ ሜንትቹተ ኤቤራ ገግሰ ምንሃ ኦሱሳ ደናሞገ ገሽታራ እኩን። 13 ዳፉንኩስ አመዕናን ማበር ኣዜን ደናሞገ ሁጀታሩ ገጊሀንሰ አበ አብን ደቅታእ። አሞ ዬሱስ ክርስቶሳን ዮሰ አመዕነትተኔ በትናሸተ እግመተ ደቅታእ። 14 - 15 መሃ ኪበ ሰርብን ዋሎተ ሰውዬምዳ አይደጌ አን ደሼምቤቺቺ መገን ምን መን ሜሬሮን ሄኤኖገ ደጉንተ ይ ተ ሰዘነተ ጣፈዮንኬ። ህኩ መገን ምን መኑንኩ ገሬ ኡቱቡሃ ሾሁታ እኮነ ሄአኖ መገኑ አመዕኔ መንየ ማበረ። 16 አመዕነትኔ ቤስቹ ጠሁ መሉ ዮበኢ አባ። እስን መንቹ እክ ለሌሃ፤ ገርተ እሁስ ጡማንቾ አያኒን ደገሜሃ፤ መገን ሰሜ ሶቀማኒ ጡደሜሃ፤ ምናደቢ ሆሪንከ ሰበከሜሃ፤ ተን ኡለ አል መኑ አመዕኔስየ፤ አብኒን ሰማ ፉሌሃ።
1 ጡማንቹ አያኑ ጫክሽ «ዘካንቾ ዶላን መ-መቱ መኑ ሉስሰኖ ሂለ አያነሃ ሀቡስ ሮሸታ አወንተን አመዕነቲች አነነ እክ ቄዕርታእ» ያኖ። 2 ህት ሮሸንት ዋልታኢ ኢቦ ብረቲን ቡሴመሪገ ዎዘኑሰ ዱጄ ሳድጨንታ ቆጰናኒቼት። 3 እሶኦንት ኤበቀንቸ ከንታእ። አሞ ገርተ አመዕንታነ ደጋ መኑ ገለቲን ኣቅቱንተ መገኑ ቆጬ እቸተ እቱምቦገ አስታእ። 4 ጠሁ እኮዳ መገኑ ቆጬሩ ሆሩንኩ ደናሙ እኮተኔ ገለቲን ኣቄመደ ኡጄኖሩ ሜጡሩ ዮበአ። 5 ዳፉንኩስ ህኩን መገን ላጋኒ መገኑ ኡጪኒ ማሰአሜሃ። 6 ከ ጠሀ አመዕናኒ ቃግሶንትደ አመዕነት ላገታ አወንቶንት ደናምተ ሮሸታ እት ሌኤንት ደናሙ ዬሱስ ክርስቶስ ሶቀማንቹ እካንት። 7 አሞ ተን ኡለ አል ሾከነ ካዕሉምቦ ጠሂቺ ኑባቦ ሜንት ማኦገ ዮሪቺ ሁን። ገገክን መገን ጠሂ ሮስስ። 8 ዳፉንኩስ ገገ ማል ጠሂ ሮስሱ ቀሁንከ ካዕለኖ። እኮዳ ገገ መገን ጠሂ ሮስሱ ተን ሄቻነ ዋልታ ሄቻ ተሶ ዮስተኔ ሆራንከ ጠሂ ካዕለኖ። 9 ህኩ የኑንኩ መኑ ሆሩንኩ ጦፍ ኣቁ ሀስሰኗ አመዕነሜሃ ጠሀ። 10 ነኦንት መነ ሆረንከ አነነንከ አመዕንታ ኬኑ ፈእሰኖ ሄቸ መገኖን ተሳ አስናምተኔ ኦርበዕነዮሚሁ አጰመዮሚሁ ከ ጠሀ ደቂሃት። 11 አት ከ ጠሀ አዘዝኒ ሮስስኒ። 12 አሞ ጠሃታንት ጠሂን፥ ሀሊን፥ ኢታን፥ አመዕነቲኒ ሙጩርማኒ አመዕናኒ አጉዲሸተ እህ በጋን አዪ ኦሶመኑክ ገዱንከ። 13 ህትጉንተ አን ዋለንቀጤች ጡማንቹ መጣፈ መኒ አነበቡ፥ ሰበኩሃ ሮስሱሃ ቃር። 14 አሞ ህራጉ ጠሃቀምየን ኑባቡ አሌንተክ አንገሰ ኡጅቶ ጃተ ኣሰሞሄ ኬሳን ዮ ኣሰንቸ ገዶት። 15 ከ ጠሀንከ አስ። ሌእኑክን መኑ ሆሩንኩ ደጉንተ ጄቹክ ሆረንተ ከን ጠሂ ኣስ። 16 ገጊሀንኪ ሮስሳንት ሮሻሀንኪ ቆረጵ። ህከን ጠሃንን ቃር። ህካን አስቶንትደ ገገኪ ኬሳች መጮጨኖ መነሃ ፈእሳንት።
1 ኑባቹ መንቹ አንክገ ሰዝ በጋን ሻቆት። አሞ ዎደለተ ህዛከገ፥ 2 ኑባቡ ሜንቱ አማከገ፥ ሜሴላከንተ ህዛከገ አስት ዊመ ሙጩርማን ጡድ። 3 ምኔናከሰ ሬቶ ገሬ ህዬሰ ሜንቱ አብስሰ። 4 ጠሁ እኮዳ ምኔኑሴ ሬሄ ሜንትቾ ኦሱት እንዶ ኦሶ ኦሱት ዮሴተ እኮደ ህት ኦሱት ብርስት ምንሰ መነ ካዕሊን ቤነሰ ፈንቀሽቱን። ህከኒንን አመዕነት ሁጅተ ሮሱን። ዳፉንኩስ ህኩን መገኑ በጅቀንሰኗ ጠሀ። 5 ምኔኑሴ ሬሄ ገሬ ህዬሰት ሜጥንሴን ሄኣ ሜንትቹት መገኖን ተሳ አስታተኔ አንከርሃ በራሃ መገኑ ጠዕሚኒ መገኑ ኡጪኒ ቃርት ሄኣእ። 6 ጠሁ እኮዳ ተን ኡለ አል መከ ጠለ ሀሳ ምኔኑሴ ሬሄ ሜንትቹት ፎሊን ሄኦዳ ሬቴታ። 7 እሶኦንት ቀነጤኖሰሩ ዮበእረ እኩንተ ካን አዘዝ። 8 ህከኒ እለሚሀንስ አነነንከ ምንስ መኒ ሰውዩምቡ መንቹ አዪ አመዕነቱስ ኡጄሃ። አሞ ህኩ መንቹ አመዕኑምቡ መንቺቺ ሂላ። 9 ዎና ሜጦ ጎንቾን ጠላን ገልቴ እኬነ እለንቶሀኒች ሌሃዱመ ዎጋ ኮቱምቡ ምኔኑሴ ሬሄ ሜንትቹት ምኔኑሰ ሬሄ ሜንት መዝገባን ጣፈንቱን። 10 አሞ ኦሱተ ሌእሲን፥ ኮሀ ኣቂን፥ ጡማን ሎከተ ኣንሺን፥ ሀዌ መነ ካዕሊኒ ደናምተ ሁጅተ ሆረንተ ሁጀቲኒ ደናሜ ሁጄንተሴ ገለጠንቴኢተ እሁ ሀስሰኖሴ። 11 ጠሁ እኮዳ ምኔኑሰ ሬሄ ሀርዴ ሜንቱ ምኔኑሰ ሬሄ ሜንት መዝገባን ጣፎት። ዳፉንኩስ እሶኦት ማልሰ ቁልጡ ቄልየንሰ ክርስቶሲ ዮሰ ኢተት በእየን ጎናን ገልቶተ ሀሳእ። 12 አሞ ዎና ይቶ ላገተ ዝርቶተኔ አሌንተሰ ፍርደ ኤበቅታእ። 13 ህከኒችን አሉዲን ሁጅተ ገፈሩሃ ምኒች ምን ዘሁሃ ሮሳእ። አሞ ጠል ሁጅተ ገፈሩ እሁዕናች ሄዕምታራ መን ጠሃን ኣገን ጠሃቁ ሀስሱምቡሰረ ጠሃታራ እካእ። 14 ህከኒ አን ምኔኑሰ ሬሄ ሀርዴ ሜንቱ ገልቱንተ፥ ኦሱተ እልቱንታ ምንሰ ደናሞገ ገሽቱንታ ሰዛም። ህትጎንን ዲኑኔ ቦሮረኖ ጠሀ ሆገኖ። 15 ዳፉንኩስ ከኒች ብሬን ምኔኑሰ ሬሄ መ-መቱ ሜንቱ ሼጣንቹ አወንተን አመዕነት ዎቄች ፉልቴእ። 16 መቴ አመዕናንቾ ሜንትቾ እንዶ መቶ አመዕናንቾ መንች ምኔን ምኔኑሰ ሬሄ ሜንቱ ሄኦደ አመዕናን ማበሪ ኬዕሙምቦገ እሶኦት ካዕልቱንሰ። አመዕናን ማበሩንኩ ካዕለኖሳ ዮበእ ምኔኑሰ ሬሄ ሜንቲ ካዕለኖ። 17 አመዕናን ማበረ ደናሞገ ገሽታ ኑባቢ አነነንከ ሰበኪኒ ሮስሲኒ ቃረገ ሁጀታሪ ለሙ አፎ አብኑ ሀስሰኖሰ። 18 ዳፉንኩስ መጣፋን «ውጠተ ኦተአንየን ቦር አፎ ኡሱርቶት» አሞ «ሁጀታንቺ ደሞሱ ሀስሰኖስ» የመሜእ። 19 ለሙ እንዶ ሰሱ መንቹ ነቀሱምቦች ህግየን አመዕናን ማበር ኑባች አሌን ህንጨኤኖ ኦደተ ኣቅቶት። 20 አሞ ዎሉ ኬኑ ዋጅቱንተ ባጢለ ሁጀታ መነ ሆራንከ መን ብሬን አሙዕር። 21 ህትጉንተ መነ አነነ አሱ ዮበኢ ጎዕልቱዕናች ከ ኩለሞሄ ጠሀ ቆረቡንተ መገን ብሬን፥ ዬሱስ ክርስቶስ ብሬኒ ዶዕረንቶ መገን ሰሜ ሶቀማን ብሬኒ ሀደረ ያንኬ። 22 አሞ አንገክ + አዬ አሌኒ ሰርብት ኡጅቶት። ዎሎ መን ባጢላንን ቤቀማንቹ እኮት። ገገክ ሙጩርማን ቆረጵ። 23 ጎደብክተኔሃ በትናሸተ ጃተ ጥደኖኬተኔሃ ቀሁንከ ዎይን ዳጠ አግ በጋን ከ ዘኩ ዎአ ጠለ አጎት። 24 መ-መቶ መን ባጢሉ ጫክ ለለኗ። ህኩስን ፍርድበ ኢልሰኗ። አሞ ዎሎስ መን ባጢሉ ለለኖ ዘኪኔት። 25 ህትጉንተ ደናምት ሁጅት ጫክት ለልታታ። ጫክት ለልቱምቦዳ ማጠንቶገ ሄኣበአ።
1 መገን ሱዕሙሁ ሮሸሲ ቦሮረንቱምቦገ አግዞመ ሀርቆት ኣዜን ዮሩ ሆሩንኩ ቀርባሀንሰ ዊሙ አብኑ ሀስሰኖሰገ ደጉን። 2 አሞ አመዕናኑት ቀርበት ዮሰ አላኑት አመዕነቲን ህዛከተ እኮተኔ ቀርበሰ አብሱምቡረ እሁ ሀስሰኖሰበአ። ህከን ቆደ ደናሜ ሁጄንተሰ ካዕለቅታሩ አመዕናኑሃ ኢተንቴራ እኮተኔ ዎናቺ አበ ሁጀቱ ሀስሰኖሰ። ከ ጠሀንከ ሮስስኒ ሰዝኒ። 3 አዪ ቀርቿኔ ዬሱስ ክርስቶስ ሙጩሮ ላጋኒ መገን ጠሂን ኢተንታ ሮሻኒ ኡርጨመን ዎልተ ሮሸተ ሮስሾደ 4 ህኩ መንቹ ቦልጢን ቡሰሜሃ በጋን ሜጡራ ደጉምቧ። ጠሁ እኮዳ ላገተኔ ብተዕመምነ ኦደ ሂሉ ሀሉ አፌስ። ህኩስን ቂንሸተ፥ በአንቸ፥ ቦሮዕረንቸ፥ ሂለ መለ፥ 5 ዎዘኑሰ በኤነ ገሬች ፉልቴ መን ሜሬሮን እካ ሙረንቱምቡ ኦደታ ነደጀሃ ኤበኗ። እሶኦንከ መገኑ አመዕኑ ትርፈ ደቄኖ ዎቃ አጉጄሳረ። 6 ጠሁ እኮዳ «ዮኤ እሀኖኤ» ያኖ መንቺ አመዕነቶን ገርንተ አቡ ትርፉ ዮሃ። 7 ዳፉንኩስ ነኦት ተ ኡለ አል ዋኖሚ ሜጡራ አንፉዕናቼት። አሞ ተን ኡለ አሊች አንፍ ኦሮናምሩ ሜጡሩ ዮበአ። 8 ጠሁ እኮዳ እንታምሩ ኦደቅናምሩ ሄኦኔደ ህኩን እሀኖኔ። 9 አሞ ቀባጣመተ እሂ ሀሳ መኑ ኬነንቻን፥ ዎሻዳኒ መኒ በኡ ኤበኖ ቀልሰኖነ ጌነኖ በትናሸ ቁልጦኒ ኡባእ። 10 ዳፉንኩስ ግዘ ኢቱ ሂልማ ሆሪንከ ጠጳ። መ-መቱ መኑንኩ ግዘ ደቂ አብስ ሀሰን አመዕነቲች ኡቤእ። በትናሸ ክቼቺን ዎዘኑሰ ቢጠመኖገ አሰቅቴእ። 11 ጠሁ እኮዳ አት መገን መንቾ! ከን ሆራንከ ጠሂች ሁን። ሙጩርመተ፥ መገን ጠሀ፥ አመዕነቱ፥ ኢተተ፥ ቃርመታ በሬድመታ አወን። 12 ደናሙ አመዕነት ኦለ ኦለም። አሞ በትናሸ ነቃሽ ብሬን ደናሞ አመዕነቲን ነቀሶንት ጃተ ገአንቶንት ዶሊ ሆሪንከ ሄኣ ሄቸተ አፍ። 13 ህትጉንተ ሆራሪንከ ሄቸተ ኣሰኖ መገንነ ጴንጤንቾ ጵላጦሴ ብሬን ደናሞ አመዕነቲን ነቀሾ ዬሱስ ክርስቶስ ብሬን 14 ቀርቹኔ ዬሱስ ክርስቶሱ ፈንቀል ዋለንቀጤች ተ አዘዙተ ሉሰቲ ቀነጤኖሩ ዮበእገ እክ ቆረቡንታ አዘዛንኬ። 15 ዬሱስ ዋሉንኩ ለለኖ ማሰአሞነ ሜጥንስን ገሻንቹ እኮ ዎማከ ዎሙሁ ቀርባንከ ቀርቹ መገኑሁ ኡርሾ በሬኔት። 16 አሞ እስ ጠሉ ሬሁምቧ። አዪ ህንጭዮተ ደንዱምቦ ጫካን ሄአኗ። እሱንከ አዪ ጡጅ ከሰበአ። አሞ አዪ ጡዶስተ ደንደኖበአ። እሲንከ አብኑሁ መቆሁ ዶሊ ሆሪንከ እሁንስ፤ አሚዕን። 17 ነኦት በጅቀሙንተ ሆረረንከ በትሽ ኣሰኖ መገኒች ህግየን ተን ኡለ አሌን ዮ ቀባጣመት ቦልጥቱምቦገ እንዶ ህጋ ቀባጦን ተሳ አስቱምቦገ አዘዝሰ። 18 አሞ ደናምተ ሁጅተ ሁጀቱንተ፥ ደናሜ ሁጄን ቀባጣመተ እኩንታ መኒ ካዕሊሃ ዮሰረ ቤሂሃ ቅጠንቱንታ አዘዝሰ። 19 ህትጎንን ገሬ ሄቸተ ደቅቶተ ሾሁስ ቃረተ እኬ ቀባጡተ ዋለኖ ዶሊ ገጊሀንሰ ጠጴጭታእ። 20 ጥማቶሴ! ኣሰንቶኬ ሀደረተ ቆረብ። አሞ ቆጰነንከ «ቆርመተ» የመመኖሪተኔ ኦደሚቺ ካዕሉምቦ ጠሂቺ ሁን። 21 መ-መቱ ኬኑንኩ «ህትጎነት ቆርመት ዮኔ» ይተን አመዕነት ዎቃ ሉሴእ። መገን ኣሰንቹ ክዕኔኤን እሁን።
1 ዬሱስ ክርስቶሳን ዮ ሄቸ ተሴጊን መገን ሰውቲን ዬሱስ ክርስቶስ ሶቀማንቹ እኮም ጳዉሎሴች 2 አብሽ ኢታም ቤቲሀዕኔ ጥማቶሴ ሶሀንቴታ ሶህኑ። አነ መገኒቺ ቀርቿኔ ዬሱስ ክርስቶሲቺ ኣሰንቹ፥ ማረቱቲ ጡሙሁ ኬሳን እሁን። 3 አንከርሃ በራሃ መገኑ ኡጪን ቃጋንኬ ጃተ ሆረንተ አናከኤገንከ ሙጩሮ ዎዘኒን ሰገዳም መገኑ ገለጣም። 4 አሞ እንጂጅክ ቃገን አብሽ በጅቀሞተ ኬስ ጡዶተ ቁልጠዮም። 5 ህትጉንተ ኬሳን ዮ ገሬ አመዕነቱ ሰውያዮም። ህኩ አመዕነቱንኩ ስረ አበማንተክ ሎይዳኒ አማንተክ ኤዉንቄኒ ዮሃ እኬ። ኬሳኒ ህኩ አመዕነቱ ዮገ ደጌም። 6 ህከንተኔ አንገኤ አሌንተክ ኡጄም ጃተ ኣሰሞኬ መገን ኣሰንቸ ቴሱሃ ጊረገ አጰኖገ አስቱንተ ቃግሳንኬ። 7 ዳፉንኩስ መገኑ መቄቢሃ ኢተነ ገገ ኤጌጥ ዎዘኒቺ ህግየን ዋጅ ዎዘነ ኣስምበኔ። 8 አቼ ቀርቿኔ ዬሱሲ ነቀሱ እንዶ እስተኔ ኡሱረሞም ኤሳን ሳልቶት። ጠሁ እኮዳ መገን መቄን ምሽራች ላገተኔ ኤሳንን በርገንት ሀወ ኣቅ። 9 አሞ ነኦት ሁጀንቶም ሁጄኔጊን እሁዕናች ገግስ ሰውትጊኒ ኣሰንቺኒ ፈእሾኔሁ ሙጩሮ ገኢን ገኤኔሁ መገኗ። ህኩ ኣሰንቹንኩ ዬሱስ ክርስቶሲን ስረን ኣሰሜኔየ። 10 ህኩ ኣሰንቹንኩ ፈእሳንቹኔ ዬሱሱ ክርስቶሱ ዋሊንተስ ቴሱ ለሌእ። ዬሱሱንኩ ሬሁተ በእሽ ምሽራች ላገ ዉዲን ሬሁት ዮበእ ሄቸተ ኤቦ። 11 አንን ህተን ምሽራች ላጋ ሰበካንቹ፥ ሶቀማንቹሃ አይሁደ እኩምቡ መን ሮስሳንቹሃ እክ ሹመሜም። 12 ከ ሀወ ኣቀዮሚንኩ ህከኒሃት። ጠሁ እኮዳ አዬ አመዕኔምንዶ ደጋምተኔ ሳላምበአ። አሞ አን እሲ ኣሴም ሀደረተ ህኩ በሩ ኢለንቀጤች ቆረበኖገ አመዕኔም። 13 አትን ዬሱስ ክርስቶሳን ዮ አመዕነቲኒ ኢታኒ ኤሳች መጮቶንት ሙጩሩተ ላገተ አጉዲሸተ አስት አወን። 14 አሞ ኒ ኣዜን ሄአኖ ጡማንቾ አያኒን ኣሰንቶኬ ሀደረተ ቆረብ። 15 እስይ ባዶን ዮ አመዕናኑ ሆሩንኩ ግቦኤገ አት ደጋንት። ህከሮኦ ሜሬሮንን ፍጌሎሲ ሄርሞጌኔሲ ደገንታእ። 16 ኡሱረሞንተኤ ሳሉዕናች ኦኔስፎር በትናሸተ ጄቹተ ፎሎጭሾኤተኔ ቀርቹ ዬሱሱ ኦኔስፎሬ አበሮሲ ቅሽጡሰ። 17 አሞ ሮሜ ከተመ ዋሎ ጃንተ ሀሽ ሀሽ ኤሳን ደቀሞ። 18 ህከኒ ቀርቹ ዬሱሱ ህከ በር መገኒች ማረቱተ ደቀኖገ አሱስ። አሞ ኤፌሶን ከተማን ዮም ጃተ ሀበንከ ካዕሌኤንዶ አት ደናሞገ ደጋንት።
1 አቼ ኢ ቤቶ! አት ቀርቾ ዬሱስ ክርስቶሳን ዮ ኣሰንቻን ቃር። 2 አሞ በትናሸ ነቃሽ ብሬን ኤሳች መጮቶንትረ ዎሉ መነ ሮስሲ ደንድታነ አመዕነንቴ መኒ ሀደረተ ኣስ። 3 አትን ዬሱስ ክርስቶስ ቃረ ቤጠቤቹ እክ ኤሳንን እየቂን ሀወ ኣቅ። 4 አሞ ጋጠንቹስ በጅቀንሲ ሀሰኖ ቤጠቤቹ ሀኩኒ ቤጠቦማ አጉዱምቦ ሄቻን ዎሻደመኖበአ። 5 ህትጉንተ ኤዜጨመኖ መንቹ ዎግስጊን ኤዜጨሙምቦች ቄል እርፉተ ደቀኖበአ። 6 ቃረገ ሁጀተኖ ሆገኣንቹንኩ ውጣች ዎነስ ላሉተ ደቁ ሀስሰኖስ። 7 ቀርቹ ዬሱሱ ሆራንከ ጠሃን መሌሱ ኣሰኖኬተኔ አን ያንኬ ጠህተኔ ሰውይ። 8 ሬሆች ኬኦነ ዳዊቴ ዜሪች እኮ ዬሱስ ክርስቶሰ ሰውይ። አን ሰበካም ምሽራች ላገንት ተኔት። 9 ሂለተ ሁጀቾ መንችገ ህተን ምሽራች ላገ ዳፊን ኡሱረማሚ ኢለንቀጤች ሀወ ኣቀዮም። ጠሁ እኮዳ መገን ላገት ኡሱረንትምበአ። 10 ህከኒ እሶኦቲ ዶሊ ሆሪንከ ሄአኖ አብኒን በርግት ዬሱስ ክርስቶሲን ደገመኖ ፈኡ ደቅቱንተ ዶዕረንቶ መንተኔ ይኬእ ሆረረንከ ደንዴቃም። 11 አሞ «እሲን በርገም ሬኖምደ እሲንን በርገም ሄዕናም። 12 ህትጉንተ እየቅኖምደ እሲንን በርገም ዎሞዕምናም። ነኦት እሱ ካንዶምደ እስን ኔስ ካደኖኔ። 13 አሞ ነኦት አመዕነሙምቡረ እንኮምዳ እስ ገገስ ካዲ ደንዱምቡተኔ አመዕነሜኢ እክ ሄአኖ» ይታ ላገት ገሬተ። 14 ከን ጠህተኔንከ ቃግስሰ። አሞ መጮጨኖ መነ በእሲች ህግየን ሜጡራ ካዕሉምቡ እኮተኔ ላጋከተኔ ኦደንቱምቦገ መገን ብሬን ቃርስት ኩልሰ። 15 ህትጉንተ ገሬ ላገተ ጠቤንማን ጠሃቀኖነ ሳልሲሱምቡ ሁጀታንቹ እክኬእ ሀወ ቄል መለዕሌ ገገክ መገን ብሬን ህንጨኢ ቃር። 16 አሞ ተን ኡለነ ካዕሉምቦ ሃሳዊች ሁን። ዳፉንኩስ ህትጎኑ ጠሁ መነ ባጢለ ሁጀተን መረኖገ አሰኗ። 17 እሶኦት ጠሃታ ጠሁንኩ ፈይቱምቡ ቃረ መዘገ እተኗ። ህከን መን ሜሬሮንን ሄሜኖሲ ፍሊጦሲ ደገንታእ። 18 ህኩ መኑንኩ «ሬሄ መን ኬኡ ከኒች ብሬን እኬእ» ይተን ገሬ ዎቄች ፉልቴሃረ። እሶኦንት መ-መቶ መን አመዕነቱ ሌንቄቅሰዮእ። 19 ጠሁ እኮዳ «መገኑ ገግስ መነ ደገኖ» ህትጉንተ «ቀርቾ ዬሱስ ሱዕመ ገአኖ ሆሩንኩ ሂልማች ሁኑን» ያኖ ማተቡ ዮ ሌንቄቅቱምቡት መገን ሾሁት ቃርት ኡርቴእ። 20 መቶ አበ ምኔን ዎርቅነ ብር ኦዳት ጠሉ እሁዕናች ሀቅነ ቡች ኦዳቲ ዮእ። ህከሮኦችን መ-መቱስ አብን ሁጄን አሞ መ-መቱስ ጬሜኖ ሁጄን ሆሳእ። 21 አቼ አዪ ገገስ ከን ሂለ ጠሂች ሙጩርሴደ ሙጩሩተ፥ ቀርቺሀንሴ ካዕልታኢታ ደናሜ ሁጄ ሆራንከ ቅጠንቴ አብን ኦዳታ እሀኖ። 22 ህከኒ ሂለ ዎደሎመ ምጠኒች ሁን። ሙጩሮ ዎዘኒን ቀርቹ ዬሱሰ ገእታ መኒን በርገንት ሙጩርመተ፥ አመዕነቱ፥ ኢተታ ጡመሃ ቃርት አወን። 23 ጠሁ እኮዳ በአንቸ ኤበኖገ ደጋንትተኔ ቀልመነ ካዕልቱምቦ ኦዳች ሁን። 24 ቀርቾ ዬሱስ ሶቀማንቹ መኒ ሆሪንከ ቢዘ፥ ሮስሶተ ደንደኖሃ ደንዴቀሃ እሁ ሀስሰኖስ በጋን በአሙ ሀስሰኖስበአ። 25 አይደጌ መገኑ ባጢለ ቢረ ይነ ገርተ ደግ ሳመ ኣሶሰተ ደንደኖተኔ እሲን ኡርጨንታ ኬኑ ማሽማን ጠበአኖ እሁ ሀስሰኖስ። 26 ህትጎንን ዎዘኑሰ ፈንቀልየን ሰውተስ ዊንሽቱንተ ኡሱር አፎሰ ሼጣንች ዎሻዲች ቡቅጭታእ።
1 ዘካንቾ ዶላን ሀውሳ ጄቹት ዋልታገ ካን ደግ። 2 ዳፉንኩስ መኑ ገገሰ ኢትታረ፥ ግዘ ኢትታረ፥ ዮሰራን ድከኣረ፥ ቦልጥታረ፥ ቦሮዕረንታረ፥ አኒሃ አማሃ አዘዘንቱምቡረ፥ አንገተ ፈንቀሽቱምቡረ፥ ሙጩርመት ዮሰበእረ፥ 3 ኢተት ዮሰበእረ፥ መ ጠሃኒ መኒን ኢተንቱምቡረ፥ መን ሱዕመ በእሳረ፥ ገገሰ ኤጌጥቱምቡረ፥ ጎደበ ቃራከተ፥ ደናሙረ ግባረ፥ 4 ካዳረ፥ ሰርበንታረ፥ ቦልጢን ቡሰንቴራ መገኑ ኢቲች አበ ማል በጅጉተ ኢትታራ እካእ። 5 ህትጉንተ እሶኦንት አመዕነቱ ዮሰረ አጉዳእ። እኮዳ አመዕነትስ መቆ ካዳእ። ህትጎነ መኒች ሁን። 6 - 7 ህከን መን ሜሬሮንን ባጢሉ አሌንተሰ ቱበሞነ አነነ አነነ ምጠኒን አወንታረ አሞ ሆረንተ ጃተ ሮሰን ገርተ ደግበ ሆረን ኢሊ ደንድቱምቡ ቀሉ ሜንቱ ምኒች ምን ዘህተን ቀፈዳሩ ዮእ። 8 አሞ እያኔሲ እያንበሬሲ ሙሴን ኡርጨንቶገንከ ኩ መኑሁ ቦቁሰ በኤነ አመዕነቲች ኡቤ መነ እክ ገሬን ኡርጨንታእ። 9 ጠሁ እኮዳ እያኔሴነ እያንበሬሴ ቀልመት ለልቶገንከ ከን መን ቀልመቲ ሆራንከ መን ብሬን ለልታተኔ መከኖሰበአ። 10 ጠሁ እኮዳ አት ሮሸኤ፥ አን ሄኦምገ፥ ሰውተኤ፥ አመዕነቱኤ፥ ደንዴቁኤ፥ ኢተኤ ቃርመኤ አወንቴንት። 11 ህትጉንተ ሸረንችኤነ ሀውኤ ቤቀማንቹ እኬንት። አሞ «አንጦከ» ፥ «እቆንዮነሃ» «ልስጥረሃ» ዬኖ ከተማካን አሌንተኤ ኢሌ ጠሀሃ ደንዴቄም ሸረንቸሃ ደጋንት። ጠሁ እኮዳ ሆራሪችስን ቀርቹ ዬሱሱ ፈእሾኤ። 12 ገርንተ ዬሱስ ክርስቶሲን መገኑ አጉደን ሄኢ ሀሳ መኑ ሆሩንኩ ሸረንታእ። 13 ጠሁ እኮዳ ሂሉነ ሳድጨማኑ መኑ ሉስሰኒ ሉሰኒ ሂልማን ባሰን መርታእ። 14 እኮዳ አት አዬች ሮሶንትንዶ ደጋንትተኔ ሮሶንትነ ቆርስት ደጎንት ጠሃን ቃርት ሄእ። 15 አትን ኦሶመኒችክ አፍ ዬሱስ ክርስቶሳን አመዕኒን ፈኡ ደቄኖ ቆርመተ ኣሲ ደንድታ ጡማንቹተ መጣፈተ ደጌንት። 16 - 17 ጡማንቹት መጣፈት ሆረንት መገኑ አወንሰንየን ጣፈንቴሃረ። ህኩሩንኩ መገን መንቹ ቀነጤኖሩ ዮበኢሃ ደናሜ ሁጄ ሆራንከ ቅጠሜኢሃ እሁንተ ሮስሲ፥ ዎቀሲ፥ ሉሳች ፈንቀሺሃ ሙጩርማን ሮስሲሃ ካዕልታእ።
1 መገን ብሬኒ ፈንቀል ዋለኖነ ዎሞዕመኖ ጃተ ፎሌ ዮነ ሬቶ መን አሌን ፍርደኖ ዬሱስ ክርስቶስ ብሬኒ ሀደርሳንኬ። 2 መገን ላገተ ሰበክ፤ ጃኒ ጃቤሎኒ ቃር። እየቂኒ ሮስሲኒ ሆጉዕናች መኒ ኣገኖገ ኩል፥ አሙዕርኒ ሰዝኒ። 3 ዳፉንኩስ መኑ ጠቤነተ መገን ላገተ መጮጪ ሀሱምቡት ጃት ዋልታእ። ጠሁ እኮዳ መጫሀንሰ ተሸአኖ ጠሀ ኩልታሰ ሮስሳኑ እሶኦ ሰውቲን ኢተንታኢተ ጠጴጭታእ። 4 እሶኦንት ገርተ መጮጪች መጨሰ ማኡተ መጮጭበ ፈንቀሽታእ። 5 ጠሁ እኮዳ አት ሆረንተ ጃተ ዶረንቱምቡ እህ። ሀወንከ ደንዴቅ። ምሽራች ላገተ ሰበክ ሁጅተ ሁጀት። ሁጅክን ዊንሽት ሁጀት። 6 አን ክትመማም ጃት ህንጭቴእ። አሞ ተን ኡለ አሊች አነነ እክ ኦሮቃም ጃንት ኢልቴእ። 7 ኦለንከ ደናሞገ ኦለሜም፤ ኤዜጨንቸንከ ጦፌም። አመዕነቱንከ ቆረቤም። 8 አቼ ከኒች ዘኪን ሙጩርመ ዘዉዱ ቅጠሜኤ። ህካንን ጠቤነ ፍርደ ፍርደኖ ቀርቹ ዬሱሱ ህከ በር ኣሰኖኤ። ህከስን ኤሳ ጠሊ እሁዕናች እስ ዋለኖገ ኢትታ መኒ ሆሪንከ ኣሰኖሰ። 9 ሰርብት ኢበ ዋሊ ቃር። 10 ዳፉንኩስ ዴማስ ከን ዶል ጠሀ ኢት ኤሳች አነነ እክኬእ ተሰሎንቄ ከተመ ኦሮቄእ። አሞ ቄርቂስ ገላትይ ባዱ ኦሮቄእ። ህትጉንተ ቲቱ ደልማት ባዱ ኦሮቄእ። 11 ሉቃስ ጠሉ ኤሳን በርገም ዮእ። ማርቆስ ሁጄ አብሽ ካዕለኖኤተኔ እሱ አፍ ዋል። 12 ጠሁ እኮዳ ትክቆሴ ኤፌሶን ከተመ ሶኬም። 13 አሞ ዋልታንት ጃተ ጢሮኣድ ከተማን አክርጵባን አጉሮም ዋሩታ መጣፈታ አነነንከ ጎጊች መክሴመሀኔን ጣፈንቶረ አፍ ዋል። 14 ናሽ ቱማንቹ እስክንድር ኢ አሌን አበ ሂለ ጠሀ አሴእ። እሲንከ ቀርቹ ዬሱሱ ሁጄስገ ባተኖስ። 15 ነኦት ጠሃናም ጠሂን አብሽ ኡርጨመዮተኔ አት ገጉኪ እሲች ቆረጵ። 16 ኦዴመኤ ጠሂ ዎና መልሰ ፈንቀሼም ጃተ ሆሩንኩ ኤሳች አነነ እኮ በጋን ካዕሌኤ ሜጡሁ ዮበአ። ህካንን መገኑ እሶኦ አሌን ባጢለ አስ ዎልሱንከሰ። 17 ጠሁ እኮዳ ኢ ዉዲን መገን ላገት ሆረንት ሰበከንቱንታ አይሁደ እኩምቡ መኑ መጮጩንታ ቀርቹ ዬሱሱ ኢ ሺናን ኡር ቃርሴኤ። ዞቤ አፌችን ፈኦም። 18 ቀርቹ ዬሱሱንኩ ሂላሪች ሆሪችን በራረኖኤ። ሰሜስ ዎሞማንከ ቆረበኖኤ። እሲንከ ዶሊ ሆሪንከ አብኑ እሁንስ፤ አሚዕን። 19 ጵርስቅለ፥ አቅለኒ ኦኔስፎሬ ምን መነሃ «ጡመ» ይ። 20 ኤራስጦስ ቆሮንቶስ ከተማን ፈኤእ። አሞ ጥሮፍሞስ ሞሾተኔ ዎኢን ክበሜ «ምልጦነ» ዬኖ ባዶን አጉሮም። 21 አት መጤች ብርስት ዋል። ኤዉቡሎስ፥ ጱዴስ፥ ሊኖስ፥ ቅለዉዲ አመዕናኑ ሆሩንኩ «ጡመ ዮንትንዶ» ይተዮኬ። 22 ቀርቹ ዬሱስ ክርስቶሱ ሰውቲንተክ በርገም እሁን። መገን ኣሰንቹ ክዕኔኤን በርገም እሁን።
1 መገን ካዕላንቹሃ ዬሱስ ክርስቶስ ሶቀማንቹሃ እኮም ጳዉሎስ መገኑ ዶዕሬሰ መን አመዕነቱ ቃርሲሃ መገኑ አጉዴኖገ አስታ ገርተ ደጋገ አሲሃ ሶሀሜምየ። 2 ህኩ አመዕነቱንኩ ቆጰን ከሱምቡ መገኑ በትናሸ ዶሊች ብሬን ተሳ አሴ ዶሊ ሆሪንከ ሄኣ ሄቸ ተሴ አሌን ሾሀሜሃ። 3 ህካን መገኑ ጄቹስ ኢልቶ ጃተ ላጋንተስ ለሊሾ። ህት ላገንት ፈእሳንቿኔ መገን አዘዞን ኤሳ ሀደረተ ኣሰንቶኤተኔ ሰበከዮም። 4 ሜጦመኔ አመዕነትጊን ገሬ ቤቱኤ እኮ ቲቶ አና መገኒቺ ፈእሳንቿኔ ዬሱስ ክርስቶሲቺ ኣሰንቹሁ ጡሙሁ እሁንኬ። 5 ኬስ «ቀርጤሰ» ዬኖባን አጉሮሚ አን አዘጆንኬጊን ኮቾ ጠሀ ዊንሽቱንታቲ ከተማን ሆራንን አመዕናን ማበሪ ኑባቡ ዳኖንስቱንታቲ። 6 አመዕናን ማበር ኑባቹንኩ ቀነጤኖስሩ ዮበኢሃ ሜጤ ሜንትቾ ምኔነሃ እክ ፎኩተ ሁጀቲን እንዶ አዘዘሙ ሆጊን ዎቀሰንቱምቡት መገኑ አመዕንቴ ኦሱት ዮሲ እሁ ሀስሰኖስ። 7 ዳፉንኩስ አመዕናን ጠጵት አወንሳንቹ መገን ሁጄ ሀደረተ ኣቄኢ እኮተኔ ቀነጤኖስሩ ዮበኢ እሁ ሀስሰኖስ። እስን ቦልጡምቡ፥ አሙዕረሙምቡ፥ ድምቡምቡ፥ ገንጨሩምቡሃ ባቅባሉምቡሃ እሁ ሀስሰኖስ። 8 ጠሁ እኮዳ ኮሀ ኣቀኖ፥ ደናሙ ጠሀ ኢተኖ፥ ገገስ ቆረጰኖ፥ ጠቤነ፥ ጡማንቹሃ ጣጠሃ እሁ ሀስሰኖስ። 9 እስን ዎሉ መነ ገሬ ሮሻን ሰዚሃ ህተን ላጋን ኡርጨንታ መነ ዎቀሲሃ ደንዶተ ከኒች ብሬ ሮሾገንከ አመዕነንቶ መገን ላገተ ቃርስ አፉ ሀስሰኖስ። 10 ዳፉንኩስ ሆለሙ መኑ ባሰንከስ ኑጉሰንቶሪ ዉድረ እኮሩ አዘዘንቱምቡሩ፥ ጠለለ ጠሀ ጠሃታሩ ሉስሳሩ ዮእ። 11 እሶኦት ሀስሱምቡ ጠሀ ሮስሰን ምን መናከተ ሀምበላችታተኔ አፎሰ አጵታገ አሱ ሀስሰኖ። 12 እሶኦች መቱ ገግሰ ህራጋንቹ «ቀርጤስ መኑ ሆረንተ ጄቹተ ቆጰናኗ፥ ሂላ ሞቹኒ ጬሜን ዊንቴታ ቦንጫመኒ» ዬእ። 13 ኩ ነቀሰሞሩንኩ ገርተ። ህከንተኔ አመዕነቲን ጠቤነተ እኩንተ ቃርስት አሙዕርሰ። 14 አይሁድ መን ማኡተ አወንቱምቦጋ ገሬን ኡርጨንታ መን ሰዘነተ መጮቱምቦጋ አሙዕርሰ። 15 ሙጩሮ መኒ ሆሩሩንኩ ሙጩሯ። ጠሁ እኮዳ ቡሻካሃ አመዕንቱምቦሪሃ ሜጡሩ ሙጩሯበአ። ህትጉንተ ዎዘኑሳ ሰውቱሳ ቡሼሃ። 16 እሶኦንት «መገኑ ደንጋም» ይተን ሁጄንተሰ እሱ ካዳሃረ። አሞ ሽግገታሃረ፥ አዘዘንቱምቧረኒ ደናሞ ጠሂ ሆሪንከ አጉዱምቧረኒ።
1 አት እኮንትዳ ገሬ ሮሸተ ሮስስ። 2 ጎን ኑባቡ መቄሰ ቀጢን ሄኣረ፥ አብንሰ ቆረጵታረ፥ ገገሰ ኤጌጥታረ፥ አመዕነቲን፥ ኢታኒ እየቂኒ ሂልመት ዮሰበእረ እካገ ሰዝሰ። 3 ህትጉንተ ሜንት ኑባቡ አብኒን ሄኣረ፥ ሄዕምቱምቡረ፥ ድምብቱምቡራ ደናሙ ጠሀ ሮስሳራ እሁ ሀስሰኖሰ። 4 - 5 አሞ ቀጨሌ ሜንቱ እሶኦ ዳፊን መገን ላገት ገደንቱምቦገ ምኔናከሰ ኢትታረ፥ ኦሱሰ ኢትታረ፥ ገገሰ ቆረጵታረ፥ ሙጩረተ፥ ምኔንተሰ ሁጀታረ፥ በሬደታ ምኔናካሀንሰ አዘዘንታራ እኩንተ ሮስሴኑንሰ። 6 ህትጉንተ ዎደለት ገገሰ ቆረጵቴረ እካጊ ሰዝሰ። 7 - 8 ኬሳን ኡርጨመኖ መኑ ኒተኔ ጠሃቀኖ ሂለ ጠሀ ሆግ ሳሉንተ ደናሙረ አሲን ሆራንከ ጠሃን ገገክ አጉዲሸተ አስት ጡድስ። አሞ ሮስሳንትራንን ጠቤንመተ፥ ጪዕምመታ ገደሙምቡ ገሬ ጠሀሃ ጡድስ። 9 አላኑንኩ ቀርባሀንሰ አዘዘንታገ፥ ሆረራንን ቀርበሰ በጅቀንስታገ፥ ሂለተ ላገተ ፈንቀሽት ጠሃቱምቦጋ 10 ሞገኡምቦጋ ሰዝሰ። አሞ እሶኦት ፈእሳንቿኔ መገንተኔ ሮስሴኖሩ ሆራንከ ዉዲን በጅቀንሰኖ እሁንተ ሆረንተ ጃተ አመዕንቴረ እሁሰ ጡድሱን። 11 መነ ሆረንከ ፈእሲ ደንደኖ መገን ኣሰንቹ ለሌእ። 12 - 13 ህኩ ኣሰንቹንኩ ባጢላመተ እሁሃ ማል ቁልጡሃ አጉን ማሰአሜ ተሳኔ ህኩስን አበ መገኑኔነ ፈእሳንቹኔ ዬሱስ ክርስቶሰ አብኒን ፈንቀል ዋለኖገ ቆረምበን ገገኔ ቆረጲን፥ ጠቤነ ሰውቲኒ መገኑ አጉዲኒ ከን ዶላን ሄዕናምገ ሮስሰኖኔ። 14 ክርስቶሱ ኔስ ሾክማች ሆራችን ዎዞኔተ፥ ደናምተ ሁጅተ ሁጀቲ ቆጠረተ እንኩንታ ገጊሀንስ ሙጩሩ ምናደበ አሶኔታ ገገስ ህግሽ ኣሴእ። 15 አቼ ከ ጠሀ ሆረንከ ሮስስ። ዊማንክ መቄን ሰዝኒ አሙዕርኒ። አዪ ገዱንከሄ።
1 - 2 መኑ ገሻኒሃ ዳናካሃ አዘዘንታረ፥ ደናሜ ሁጄ ሆራንከ ቅጠንቴረ፥ መነ ሄዕምቱምቡረ፥ በአንቱምቡረ፥ ቢዛከታ መኒ ሆሪንከ ጡማከታ እኩንተ ቃግስሰ። 3 ዳፉንኩስ ነኦት ገጉንኩኔ ቀላከተ፥ አዘዘሙምቧረ፥ ሉንሴምየረኒ አነነ አነነ ቁልጢሃ ማል በጅጎሃ አግዘገ ጠቀሜምየረኒ እኬ። አሞ ሂልማኒ ቂንሻኒ ሄዕናምየረኒ እኬ። 4 ጠሁ እኮዳ ፈእሳንቾ መገንኔ ቢዝመቲ መነ ኢቱሲ ለሌ ጃተ 5 ነኦት ሁጀንቶም ደናሜ ሁጄተኔ እሁዕናች መገኑ ቅሽጢንተስ፥ ሃሮ እለንቸ አስ ኣንሺኒ ጡማንቾ አያኒን ሃሮ መነ አሲኒ ፈእሼኔ። 6 - 7 ነኦት መገን ኣሰንቺን ሙጩንኬዕን ተሴን ቆረምባም ዶሊ ሆሪንከ ሄኣ ሄቸተ ረገኣኑ እንኩንተ ፈእሳንቿኔ ዬሱስ ክርስቶስ ዉዲን መገኑ ህከ ጡማንቹ አያነ ኒ አሌን ዱኔእ። 8 ኩ ጠሁንኩ አመዕነሜሃ። መገኑ አመዕንቶ መኑ ደናሜ ሁጄ ቅጠንቴረ እኩንተ ቃርስት ኩልታንትገ ቃግሳንኬ። ኩ ጠሁንኩ በሬዳኒ መኒ ሆሪንከ ካዕለኗኒ። 9 ጠሁ እኮዳ ቀልመ ኦዳች፥ ዜረ ዎልሲች፥ በአንቻቺ ሴርተኔ ኦደሚቺ ቆረጵ። ዳፉንኩስ ህኩሩ ካለቱት ዮበእየ ጠለላረ። 10 አነኖመተ ኤበኖ መንቹ መቴ እንዶ ለሜ ሰዞንትስሀኒች ዘኪን እሲች አነነ እህ። 11 ህትጎኑ መንቹ ሾከሃ ገግስ አሌን ፍርደቅ ባጢለ ሁጀተኖሃ እኮገ ደግ። 12 አን አርጤማሴ እንዶ ትክቆሴ ኪበ ሶኮም ጃተ ኢበ ንቆጶልዮነ ዋልቱዕናች ፈኦኮንት። ዳፉንኩስ አን ህከኔ መጦ ፉሎተ ሙዕሬም። 13 ሴረ ደገኖ ዜናሴኒ አጵሎሴኒ ሜጡሩ ኮቱምቦሰገ ዎቄሀንሰ ሀስሰኖሪን ቃርት ካዕልሰ። 14 አሞ ኒ መኑንኩ ላሉት ዮበእረ እኩምቦጋ ሄቻሀንሰ ሀስሰኖረ ደቅቶታ ደናምተ ሁጅተ ሁጀቱ ሮሱን። 15 ኤሳን በርገንት ዮሩ ሆሩንኩ «ጡመ ዮንተንዶ?» ይቴዕኔ ይሰ። አመዕነት ዳፊን ኢትታኔረ ሆረንከ «ጡመ» ይ። መገን ኣሰንቹ ሆሪንተዕኔን እሁን።
1 ዬሱስ ክርስቶስተኔ ኡሱረሞም ኤሳች ጳዉሎሴቺ ህዜችኔ ጥማቶሴቺ ኢተሜ ህዜሀኔነ ሁጄኔ ጃለ እኮ ፍልሞኔ፥ + 2 ምኔንተክ ጠጵታ አመዕናን ማበሪ፥ ህዞታኔ አፊባሃ ህትጉንተ ኔሳን ሜጡንከ ክርስቶስ ቤጠቤቹ እኮ አርክጳሴሃ ሶንኬምተ ሶህኑ። 3 አናኔ መገኒቺ ቀርቿኔ ዬሱስ ክርስቶሲቺ ጡሙሁ ኣሰንቹሁ ክዕኔኤን እሁን። 4 መገኑ ኡጫም ጃተ ኬስ ሰውያን መገኑኤ ሆረንተ ጃተ ገለጠዮም። 5 ዳፉንኩስ ጡማኑ ኢትታንትጋ ቀርቾ ዬሱሳን ዮኬ አመዕነቱሃ መጮጭኔት። 6 አሞ አት አመዕነቲን ኔሳን ሜጡ እክ ሁጀታንት ጃተ መገኑ ክርስቶስ ዉዲን ኣሴኔ ደናሙ ጠሀ አብስ ደጉንተ መገኑ ኡጫም። 7 ኢ ህዞ! ኪ ዳፊን አመዕናን ዎዘኑ በጅቀሞተኔ ኢታንተክ አበተ በጅጉታ ቃርመታ ደቄም። 8 - 9 አት ክርስቶስቢ እኮንትተኔ እግማን አዘዙ ሀስሰኖኤ። እኮዳ አን ጳዉሎስ ዬሱስ ክርስቶስ እንድራስት፥ + ቱክቹሁ ቴሱ አሞ ኡሱሮ ዮሚሁ አሱ ሀስሰኖሄረ አስቱንተ ኢታን ጠዕማንኬ። 10 አን ኡሱሮ ምኔን ሄአን አመዕነቲን አነስ እኮም ቤቷዕኔ አናስሞሴተኔ ኡጫንኬ። 11 አናስሞስ ከኒች ብሬ ካዕሉምቦሄየ እኬ። ጠሁ እኮዳ ቴሱ ኤሳሃ ኬሳሃ ካዕለኖኔ። 12 አሞ እሱንከ ኪ ቤቹ ፈንቀሽ ሶኬም። እሱ ኪበ ሶሂንተኤ ገጉኤ ኪበ መሮምሀንገ ዎልሳም። 13 አን ምሽራች ላገተኔ ኡሱረሞምባን አናስሞስ ኪ ቆደ ካዕሉንተኤ ፈእጮተ ሀሼም እኬ። 14 ጠሁ እኮዳ አት አታንት ደናምተ ሁጅተ ግዲን እሁዕናች ኢታን እሁንተ አት ኢትቱዕናች ሜጡራ አሳምበአ። 15 አናስሞስ ቀሆ ጄቾ ኬሳች አነነ እኮ አይደጎ ከዘኩ ሆለመ ጄቾ ኬሳን ሜጡ ሄአኖ እሀኖ። 16 እስ ከዘኩ አግሹ እሁዕናች አግሺች አበ ኢተሜሃ ህዞ። አን እሱ ኢታምየ ህዞ። ኬሳ አሞ ማሊኒ ክርስቶሲኒ ህዞክ እኮተኔ አብስ ኢቱ ሀስሰኖሄ። 17 ህከንተኔ አት ኤስ ጃለክ አት ኣቅቶንትገንከ እሱሃ ኢገንከ አት ኣቅ። 18 እስ ኬሳ በእሼሩ እንዶ ኬሳች ኣቄሩ ዮደ ቤኑስ ኢ አሌን ዮሀንገ አስት ዎልስ። 19 አን ጳዉሎስ «ቤነስ ባታም» ይ አንጋንተኤ ጣፌም። እኮዳ አት ክርስቶሰ ኢ ዉዲን አመዕንቶንትተኔ «አት ኤሳ ባታንት ቤኑ ዮ» ይ ቃግሶሄተ ሀሳምበአ። 20 አቼ ኢ ህዞ! ቀርች ሱዕሚን መቱረ አቱንተኤ ኡጫንኬ። ሀእ ዎዘነኤ ክርስቶሲን ፎሎጭሴኤ። 21 ከ አን ጣፎንኬ አስታንትገ አመዕናም። ሆረን አን ጠዕሜምሀኒች አሉዲን አስታንትገ ደጋም። 22 አሞ መገኑ ኡሰቱዕኔ መጮጭ ክዕኔኤበ ዋላምገ አሰኖኤገ ተሳ አሳምተኔ ኤሳ ኮህ ምን ቅጠንሴኤ። 23 ኤሳን ሜጡንከ ዬሱስ ክርስቶስተኔ ኡሱረሞ ኤጳፍረ «ጡመ ዮንትንዶ?» ያዮኬ። 24 አሞ ህትጉንተ ሁጄኤ ጃላከት ማርቆስ፥ አርስጥሮኮስ፥ ዴማሲ ሉቃሲ «ጡመ ዮንትንዶ?» ይተዮኬ። 25 ቀርቾ ዬሱስ ክርስቶስ ኣሰንቹ ክዕኔኤን እሁን።
1 ብሬ ዶላን መገኑ ሆለመ አነነ አነነ ዎቃካን አናካሀኔ ህራጋን ዉዲን ሆለመተ ጃተ ጠሃቄ እኬ። 2 እኮዳ ከን ዘካንቾ ዶላን ሆረረንከ ረገኣንቹ አሴስ ቤትስ ዉዲን ኔሳ ጠሃቄኔ። ህትጉንተ ሆረረንከ ቆጬኢ እስ ዉዲኔት። 3 ቤቱንኩስ መገን አብንየ ጫከ። እስን ዊመ ዊሚን መገኖመተ አጉዲሸ። መቆ ዮ ላጋንተስ ሆረረንከ ድክሽ አፌእ። አሞ መነ ባጢሊች ሙጩርሴሀኒች ዘኪን ህባሞ መገን መኬን ሰማን አፉዕሌእ። 4 መገን ቤቲ መገን ሰሜ ሶቀማን ሱዕሚች አቡ ሱዕሙ ኣሰሞስገንከ እሶኦች አብሽ አቤእ። 5 ዳፉንኩስ መገኑ ሰሜ ሶቀማኒችስ ሜጢሀንሲ «አት ኢሃ ቤቱ። አን ከበር እሌንኬ» እንዶ ለንኪሃ «አን አነ እሃንስ። እሲ ቤቱኤ እሀኖኤ» ይምበአ። 6 ህትጉንተ በህሩስ ቤቱ ተን ኡለ አል ዋሸን «መገን ሰሜ ሶቀማኑ ሆሩንኩ እሲ ሰገዱንስ» ያኖ። 7 እኮዳ መገን ሰሜ ሶቀማንተኔ ጠሃቀን «ሰሜ ሶቀማኑስ ቦብረ፥ ሁጀታኑንከስ ጊረ ለበን አሰኖ» ያኖ። 8 ጠሁ እኮዳ ቤትስተኔ «መገኖ! ዎሞመክ በርጩሙ ዶሊ ሆሪንከ ሄአኖ። ዎሞመክ ብጡንኩ ጠቤንማ ብጡ። 9 አትን ሙጩርመተ ኢትት ሾክመተ ግቦንት። ህከንተኔ አኑክ መገኑ ጃላካችክ አብሽ በጅጉታ አብንሃ ኣሴኬ» ያኖ። 10 ህትንተ «አት ቀርቾ! ኡለተ ብርስት ቆጭቶንት። ሰሞንኩ አንገክተ ሁጅ። 11 እሶኦንት በኣእ፤ እኮዳ አት ሄኣንት። ሆሩንኩሰ ኦድሸገ ኑባጵታእ። 12 ኦኮንገንከ ጣጣንትሰ። እሶኦንት ዶረንታእ። አት እኮንትዳ አቴንት። ዶላከንትክ ሆረኒ ጎፋበአ» ያኖ። 13 ጠሁ እኮዳ መገኑ ሰሜ ሶቀማኒችስ ሜጢሀንሲ «ዲናከክ ሎካችክ ዎሮዲን ኡጀንቀጤች መኬኤ ዉዲን አፉዕል» ይምበአ። 14 መገን ሰሜ ሶቀማኑ ሆሩንኩ ፈኡ ደቅታ መኒ ካዕልቶተ ሶሀንቴታ አያናከበእንዶ?
1 አይደገኖበአ ነኦት መጮጭኖም ጠሂች ዘኩ ለንቁምቦገ አብንስ ቆረጱ ሀስሰኖኔ። 2 መገን ሰሜ ሶቀማን ዉዲን ኩለንቶ ላገት ገሬቢተ እኮኢቺ ህተ ላገንተ ህገኖነ አዘዘሙምቡ መንቹ ሀስሰኖጊን ቅጣጠመኖ እኮቺ 3 ነኦት ህከ አበ ፈኡ ቡሸዕናምረ እንኮምደ ሀትንክ ፉሸቅናም? ከ ፈኡንከ ዎና ኩሎኔ ቀርቾ ዬሱሳት። ህከስን ሞሽት ኩልቶኔሩ እሲች መጮጭቶሃ መነ። 4 ህትጉንተ መገኑሁ ህከን ፈእተኔ መላን፥ አበ ማለሎ ሁጄን፥ አነነ አነነ ማለልሲሰኖ ጠሂኒ እስ ሀሾጊን ቤኮ ጡማንቾ አያን ኣሰንቻካኒ ነቀሼእ። 5 ነኦት «ከ ዘኩ ዋልታእ» ይን ጠሃናም ኡለተ መገኑ ሰሜ ሶቀማኒሀንስ ጠቅቱንተ ኣስምበአ። 6 መቴ መዕኔን «ሰውቶስተ መኑ መሃን? እንዶ አቦይቶስተ መንች ቤቱ መሃን? 7 እሱንከ መገን ሰሜ ሶቀማኒች ቀሆ ጄቾ ኮትሶንትስ። አብንሃ ገለት ዘዉደሃ ዎርቶንትስ። አንገክ ሁጄ አሌንን ዳኖንስቶንትስ። 8 ሆረረንከ ሎካችስ ዎሮዲን ጠቀኖገ አስቶንት» የመሜእ። ሆሩሩንኩ ዬሱሲ ጠቀመኖገ አሲን ፈእሾሩ ሜጡሩ ዮበአ። እኮዳ ቴሱ ሆሩሩንኩ እሲ ጠቀምየን ጡንድምበአ። 9 ጠሁ እኮዳ መገን ኣሰንቺን ሆራንከ መንተኔ ሬሁተ ጡዱንተ ቀሆ ጄቾ መገን ሰሜ ሶቀማኒች ዎሮን እክ ጡደሞ ዬሱሱ ሬሆ ሀወ ኣቄተኔ አብንነ ገለት ዘዉደ ዎዕሬኢ ጡንዳም። 10 መገኑ ሆረረንከ ገግስ አብኒ ቆጬእ። ህከኒ በትናሸ መነ አብንበ ዋሾተ ይኬእ ፈእበ አወንሰኖሰ ዬሱሱ ዊመ ዊሚን ሀወ ኣቀኖገ አሱ መገኒ ሀስሾስ። 11 ሙጩርሴሀንነ ሙጩርቶ ኬን አኑ ሜጡ እኮተኔ ዬሱሱ እሶኦተ «ኢ ህዛከ» ዮሰተ ሳልምበአ። 12 ህከንተኔ «አን ሱዕመክ ህዛካሀዕኔ ኩላም። አመዕናን ጠጵት ሜሬሮን ኬስ ገለጣም» ዬእ። 13 ቴሱ «አመዕነቱኤ እስ አሌን አሳም» ህትጉንተ «አኒ መገኑ ኣሴኤ ኦሱቲ ህኩዕኒን» ያኖ። 14 ኦሱት ማሉሁ ቄጉሁ ዮሰረ እኮገንከ ዬሱሱሁ እሶኦገንከ መንቹ እኮ። ህኩስን ሬሆንተስ ሬሆ አሌን መቆ ዮስ ዳቡሎሴ በእሶታት። 15 ህትጉንተ ሄቸሰ ዶላን ሆራንን ሬሁተ ዋጅ አግዞመ ኣዜን ጠቀንት ዮረ ሆረንከ ዎዞታት። 16 ገሬጊን ዬሱሱ ሀሾ መገን ሰሜ ሶቀማኑ ካዕሎተ እሁዕናች አብረሃሜ ፍካነ ካዕሎታት። 17 ህከኒ ማራንቹነ አመዕነሜ አበ ቄስቹ እክ መገኒ ሁጀቶታ ምናደብ ባጢለ አጉሮታ መ ጠሂኒ ህዛከስ አጉዱ ሀስሾስ። 18 እስ ገጉንኩስ ሀወ ኣቄተኔሃ ኬነሞተኔሃ ኬነንቻን ኣጎረ ካዕሎተ ደንደኖ።
1 ህከንተኔ ሰሜ ገአንቺ ቤቀማኑ እኬንተ ጡማኖ ህዛከ! አመዕነትኔ ሶቀማንቹነ አበ ቄስቹ እኮ ዬሱሰ ሰውዬ። 2 ሙስ መገን ምኔን አመዕነሞገን ዬሱሱሁ እሱ ዳኖንሴስሀኒ አመዕነሜሃ እኬ። 3 ምን ምናንቹ ምኒችስ በተአኖ አብኑ ሄአኖስሀንገንከ ዬሱሲሃ ሙሴ አብኒች በተአኖ አብኑ ሀስሼሲ እክ ደገሞ። 4 ዳፉንኩስ ምኒ ሆሪንከ መቱ ምናንቹ ሄአኖስ። ጠሁ እኮዳ ሆረረንከ ምናንቹ መገኗ። 5 አቼ ሙስዕኑ ከ ዘኩ ኩለመኖ ጠሂ ነቃሸ እሆተ መገን ምኔን ሁጀታንችገ እክ አመዕነሜሃ እኬ። 6 ክርስቶሱ እኮዳ መገን ምኔን ቤትገ አመዕነሜሃ። ነኦንት አመዕንናምነ ድከዕናም ተሳ ዘካንቹ ኢለንቀጤች ቃርስን አንፎምደ እስ ምን እንካም። 7 ህከንተኔ ጡማንቹ አያኑ «ከበር ላገስ መጮቴነን 8 አዕኖኦት ኡለ ኡዱመኣን ኬንቴንተኤ ጃተ ሾክቴንተኤሀንገንከ ዎዘነዕኔ ዱድሴኖችዬ። 9 ህከኔን አናከዕኔ ኬንቶኤኒ አሙርሲሶኤኒ። አሴምረንከ ሾላዱመ ዎጌ ጡዶእ። 10 ህከኒ አን ህከን ዶል መናን አሙዕረሞም። አሞ ‹ሆረንተ ጃተ ዎዘኑሰ ሉሼሃኒ ዎቃኤን ደጉምቧረኒ› ዬም። 11 አንን አሙሬን ‹እሶኦት ኢ ፎሎጨቶን ሆረን ኣጋበአ› ይ ጤሌዕሌም» ያኖሀንየገ። 12 ኢ ህዛከ! አይደገኖበአ ሄቸ መገኑ ካድሲሰኖ ሂሉ አመዕኑምቡ ዎዘኑ ክዕኔኤች አዬኒ ሄኡምቦገ ቆረጵዬ። 13 እኮዳ ክዕኔኤች አዪ ባጢል መለጦን ዎዘነስ ዱድሱዕናን «ከበር» የመሞ በሩ ጎፉዕነ በሪን በሪን አዕን-አዕኖኦንት ኤረምዬ። 14 ዎነኔ አመዕነቱ ዘካንቹ ኢለንቀጤች ቃርስን አጵኖምደ ክርስቶሲን በርገም ቤቀማኑ እንካም። 15 ከኒች ብሬ «ከበር ላገስ መጮቴነን ህከ ሾክቴንተ ጃተ እኬንተሀንገንከ ዎዘነዕኔ ዱድሴኖችዬ» የመሟገ። 16 ላገስ መጮጭት ሾክቶሩ አዬኤታን? ሙሴ አወንት ግብጥ ባዲች ፉልቶ ሆራንከ መነበእንዶ? 17 ሾላዱመ ዎጋ ሆረንከ መገኑ አሙርሲሶ መኑ አዬኤታን? ባጢለ ሁጀቶተኔ ሬሹሰ ኡለ ኡዱመኣን ኡቧረበእንዶ? 18 ህከን አዘዘንቱምቦ መኒች በጋን ፎሎጭስበ ሆረን ኣጉምቦገ ጤሌዕሌ መኑ አዬኤታን? 19 አቼ እሶኦት አመዕኑ ሆጎ ዳፊን ፎሎጭበ ኣጉ ሆጉሰ ደንጋም።
1 መገን ፎሎጨቶን ኣግ ተሶ ዮ ቀጣን አይዕኔ ህከበ ኣጌኑዕናች ፈኤኑምቦገ ዋጅነን ቆረጵኖ። 2 እሶኦ ምሽራች ላገት ኩለንቶገን ኔሳሃ ኩለንቴኔ። እኮዳ እሶኦት መጮቶ ላገተ አመዕነቲን መጠቅስ ኣቅቱምቦተኔ ካዕልትምበሰ። 3 መገኑ « ‹እሶኦት ፎሎጨቶንተኤ ሆረኒ ኣጋበአ› ይ አሙሬን ጤሌዕሌም» ዬሀንገንከ ነኦት አመዕንኖም መኑ ፎሎጭስበ ኣንጋም። እኮዳ ሁጅስ ኡለት ቆጨንታሀኒች ብሬን ጎፌታ። 4 መቴ መዕኔን ለመልቅ በሬተኔ «መገኑ ለመልቅ በሬን ሁጄችስ ሆራችን ፎሎጬእ» የመሜእ። 5 አሞ ህተን መዕኔንን ለንኪሃ «ፎሎጨቶንተኤ ሆረኒ ኣጋበአ» ዬእ። 6 ህኩ ስረ ምሽራች ላገት ሰበከንትየንሰ አዘዘሙ ሆጎሩ ፎሎጨትበ ኣጉዕነ ፈኦዳ ህከበ ኣጋ መ-መቱ መኑ ዮጉ ገርተ። 7 ህከንተኔ ብሬ ዶላን የመሞገን ቴሱ ሆለመ ዶሊች ዘኪን ዳዊቴ አፎን «ከበር ላገስ መጮቴነን ዎዘነዕኔ ዱድሴኖችዬ» ይ «ከበር» ዬኖ መቱ በር ኡርሼእ። 8 እያሱ ፎሎጭሼሰ እክየን መገኑ ዘኮ ዎሎ በሬተኔ ጠሃቀኖበአ እኬ። 9 አቼ መገን ምናደቢ ሰንበት በሬ ፎሎጩ ከ ዘኩ ሄአኖ። 10 አሞ መገን ፎሎጭበ ኣገኖ አዪ መገኑ ሁጄችስ ፎሎጬገንከ እሲ ሁጄችስ ፎሎጨኖ። 11 ህከኒ ነኦት ብሬ ዶል መን አዘዘሙ ግብ አጉዲሸተ አወኒን ኡምቡምቦገ ህከን ፎሎጨቶን ኣንጎተ ቃኖ። 12 መገን ላገት ሄኣታኒ ሁጀታታኒ። ለሞ ዉዲን ሙረኖ ብሲቺ አብስ ኢጳሸተ። ፎል፥ ሰውተ፥ ቡንቹሃ ቆህሃ ሁሩርት ኣጋታ። ዎዘን ኣዜን ዮራ ቁልጡሲ አነነ አስት ደጋታ። 13 ቆጨሞሩ ሆሩንኩ መገን ብሬን ማጠመኖበአ። እስ እሌ ብሬን ምሁ ከል ጫክ ለለኖ። ነኦንት ፈንቀሹተ ኣስናሚ እሲሃት። 14 ሰማ ፉሎ አቡ ቄስቹ መገን ቤቱ ዬሱሱ ዮኔተኔ አመዕነቱኔ ቃርስን አጵኑን። 15 ዳፉንኩስ ኔሳ ዮ አቡ ቄስቹ ሆንጌንተኔ ቅሽጠኗ። ሆራንከ ጠሃን ኒገ ኬነሜኢ እኮዳ ኒገ ባጢለ ሁጀቱምቧ። 16 አቼ መገኒች ማረቱታ ሀስሰኖኔ ጄቾ ካዕለኖኔ ኣሰንቸሃ ኣቅኖተ መገን ኣሰንቹ ደገመኖ ዎሞመ በርጩም ብርተ አመዕነቲን ህንጭኑን።
1 አበ ቄስቹ እሆተ መን ሜሬሪች ዶዕረመኖ ሆሩንኩ ባጢሉ አጉረሙንተ ክትመሃ መገን ብርተ ህንጭያኖራ አፍ መን ቆደ መገን ብርተ ህንጨኦተ ሹመሜሃ። 2 ህኩ ቄስቹንኩ ሆግመ እኮተኔ ጎኣካሃ ሉሳ ኬኒሃ ቅሽጦሰተ ደንደኖ። 3 እስን ገግስ ባጢሊሃ ምናደብ ባጢሊሃ ክትመ ህንጨኡ ሀስሰኖሲ ሆግመ እኮተኔሃት። 4 መገኑ ኣሮኔገ ገእ አብን ኣሰኖስሀኒች ህግየን ህከ አብን ገግስ አንጋን ኣቀኖ ዮበአ። 5 ህትጉንተ አሞ ክርስቶሱ አበ ቄስቹ እሆተ ገገስ አብጭምበአ። እኮዳ ህከ አብን «አት ኢሃ ቤቱ። አንን ከበር እሌንኬ» ዬስሀኒቼት ኣቄኢ። 6 አሞ መገኑ ዎሌ መዕኔን «አት መልከጤዴቄ + ዳኖመገ ዶሊ ሆሪንከ ቄስቿ» ያኖ። 7 ዬሱሱንኩ ማለ ኦደቅ ዮ ዶላን ሬሆች ፈእሶስተ ደንደኖ መገንበ ቃረ ያረናኒ እንጂጄኒ ኡሰቱተ ህንጨኤእ። ዬሱሱንኩ መገኒ አዘዘሞተኔ ኡሰቱስ መጮጨንቶእ። 8 እስን መገን ቤቱ እኮዳ ሀዌ ሀዊች አዘዘሙ ሮሾ። 9 እስን ኩሌኖስሩ ዮበኢ እክ አዘዘንታስሪ ሆሪንከ ዶሊ ሆሪ ፈእ ቡዕሌቹተ እኮሰ። 10 መገኑ ዬሱሰ መልከጤዴቄ ዳኖመገ ዮ ቄሶማን አበ ቄስቹ አሴስ። 11 ከን ጠህተኔ በትናሹ ኩናምሩ ሄኦዳ ቆርሲ ደንድቴኑምቡረ እኬንተተኔ ጫክሴን ኩሉ ደንዴሱምቧ። 12 ተደ አዕኖኦት ሮስሳኑ እኬነንታ በር እኬ። እኮዳ መቱ መንቹ መገን ላገ ዎነ ሮሸተ ክዕኔኤ ሮስሱ ሀስሰዮእ። አሞ ቃረተ እቸተ እኩዕነ አዙት ሀስሰዮዕኔ። 13 ዳፉንኩስ አዙተ ኦንሴኖ ሆሩንኩ ጪለ እኮተኔ ሙጩርመ ሮሸተ ደገኖበአ። 14 ቃረት እቸት ሀስሳኢ ደናሙሃ ሂለሃ መለሌን ደግ ሮሸት ዮስ ቆረ መኒሃት።
1 ህከኒ ክርስቶስተኔ ዎነ ኩለንቶ ሮሻች ህንግ ቃረተንስ ሮሸበ መኖ። ሬቶ ሁጄች ቢረ ይነ መገኖን አመዕን ሮሸተ ለንኪ ሾንኩንከ። 2 ህትጉንተ ጠመቀንችተኔ፥ መን አሌን አንገተ ኡጄን መገኑ ኡጭተኔ፥ ሬሄ መን ኬእተኔሃ ዶሊ ሆሪ እሀኖ ፍርድተኔሃ ኩለንቶ ሮሸተ ለንኪ ሾንኩንከ። 3 ህካን አጉን መገኑ ዬደ ብርተ ለንቅ መኑን። 4 ከኒች ብሬ ጫኩ ጫክየንሰ ሰሜ ኣሰንች ጤዕነ ጡድ ጡማንቾ አያን ቤቀማኑ እኮሩ 5 መገን ላገ በሬድመታ ዋለኖ ዶል መቆሃ ጤዕነስ ጡዶሀኒች ዘኪን 6 ፈንቀልት ካዶደ ባጢለ ቢረ ዪበ እሶኦተ ፈንቀሹ ደንዴሱምቧ። ዳፉንኩስ እሶኦት ገጉንኩሰ መገን ቤቱ ለንኪሃ ሰቀልተዮሃረኒ ቢልሰዮሃረኒ። 7 ሆለመተ ጃተ አሌንተሴ ኡቦ ጤነ አግ ሆገአኖሴ መንቺ ውጠተ ኣስታ ኡለት መገኒች ማሰተ ደቅታእ። 8 እኮዳ ህት ኡለንትመ ኡተሃ ጩአሃ ሌእሶደ ሀሰንቱምቡተ እካእ። ጤሌለንቴኢንተ እክ ዘካንቾን ቡባእ። 9 ኢተንቴንተ ኢ ህዛከ! መሃ ክዕኔኤተኔ ህትጉተ ጠሃኖምዳ ፈኢ ካዕለኖ ዎዩ ጠሁ ዮዕኔገ ደንጌም። 10 መገኑ እስ ሱዕምተኔ ይቴን ጡማኑ ካዕሊ ኤጅ እኮ ቴሱ ሁጀቴንተ ሁጅታ ጡድሴንተ ኢተታ ሀቦተ ሾካበአ። 11 አዕኖኦት ሆሩንኩዕኔ ተሴን ቆረጵቴነንተረ ጩዕመቅቴነንቀጤች ቃርመዕኔ ዘካንቹ ኢለንቀጤች ጡድሴኑንተ ቁልጥናም። 12 ነኦት ቁልጥናንሲንኩ አመዕነቲኒ እየቂኒ ቃርት ተሳ አሰሞ ጠሀ ረገኣ መነ አጉዴኑንታት በጋን ጬመላሸ መነ እኬኑንታበአ። 13 መገኑ አብረሃሜ ተሳ አሴስ ጄቹተ ገጊችስ አቡ ጤሌዕለኖሩ ዮስበእተኔ እስ ገጋንን ጤሌዕለን 14 «ገርንተ አን ማሰኣንኬኒ ፍካንሳንኬኒ» ዬስ። 15 አብረሃምን ደንዴቂን ተሳ አሰሞስረ ደቄእ። 16 መኑ ጤሌዕለን ገጊችስ አበኖራን ጤሌዕለኖ። ጠሃቀመኖስሩንኩ ጤሌዕሊን ገርተ እክየን በአንቹሰ ጎፈኖ። 17 ህትጉንተ መገኑ ዬሩ ፈኡምቡ እኮገ ጡድሲ ሀሾተኔ ተሴስ ላገ ረገኣኒ ጤሌዕሊን ቃርሴእ። 18 መገኑንኩ ህካን አሴኢ ከን ዶረሙምቦነ መገኑ ቆጰኒ ደንዱምቦ ጠህ ዉዲን ብሬንተኔ ዮ ተሳ ቃርስን አጵኑንታት። ህኩስን ተሴስተ ላገኒ ጤሌዕሏንሲ። አሞ ፎሎጭኖተ እስበ ሁኖም ነኦት ህከን ለሟንከ ጠህ ዉዲን አበተ ቃርመተ ደቅናም። 19 ኩ ኣሰሞኔ ተሶንኩ ሄቻሀኔ ቃረገ ገተሞ ጥርብገ ዮሃ። ህኩንን መገን ኬሰሞ ምን መጋረጅ ኣዝ ለቅ ኣጌሃ። 20 ህኩ ኣዙንኩ መልከጤዴቄ ዳኖመገ ዶሊ ሆሪ አበ ቄስቹ እኮ ዬሱሱ ኒተኔ ብራንቹ እክ ኣበ።
1 ኩ «ሳሌመ» ዬኖ ባድ ዎመሃ ሆሪችን አበ መገን ቄስቹሃ እኮ መልከጤዴቅ አብረሃም ዎማከተ ሽ ፈንቀሎ ጃተ እሲን ደቀም ማሰኦስ። 2 አብረሃምን እሲ ሆራሪችን ቶርዱሚች መቱ ኣሴስ። መልከጤዴቄ ሱዕም ሂረቱት ዎና «ሙጩርመ ዎመ» ዩሀ። አሞ «ሳሌም ዎመ» ህኩስን «ጡም ዎመ» ዩሀ። 3 እሲንከ አኑሁ አመቲ ዮስበእየ። ዜራንስ ዬኖ ጠጱሁ ዮስበእየ። ዶሊንከስ ብርት ሄቻሀንስን ዘካንቹ ዮበእየ። እኮዳ መገን ቤት አጉዲሻን ዶሊ ሆሪንከ ቄስቹ እክ ሄአኖ። 4 ስር አኑ አብረሃም ቀፈጅ ኤቦሪች ቶርዱሚች መቱ ኣሴስ ኩ መንቹ ሀበንከ አባንዶ ጡጄለ! 5 ሌዌ + ፍካኒች ቄሳከተ እኮሩ ህዛከሰ እኮ መኒች ቶርዱሚች መቱ ኣቅታጊ ኩልታ አዘዙት ሴር ኣዜን ዮእ። ህትስ ህዛከንት አብረሃምየ ፍካነ። 6 ህኩ እሶኦ ዜራን ጣጩምቡ መንቹ ቶርዱሚች መቱ ኣቅኬእ ተሶ ዮስ አብረሃሜ ማሰኦ። 7 ህከኒ በህሩ ማዕነስ ማሰኡ ቦርሲሱምቧ ጠሀ። 8 መቶ ዉዲኒ ሬታ መኑ ቶርዱሚች መቱ ጠጰቴእ። አሞ ዎሎ ዉዲኒ ሬሁምቡ እኮገ ነቀሰሞሲ ጠጰኤእ። 9 አቼ ቶርዱሚች መቱ ጠጰኣንቹ ሌው ገጉንኩስ አብረሃሜ ዉዲን ቶርዱሚች መቱ ባቾ ዩሀ። 10 ዳፉንኩስ መልከጤዴቅ አብረሃሜን ደቀሞ ጃተ ሌው አበንስ ጉሉቤ ኣዜን ሄኦተኔሃት እኬ። 11 አቼ ሴሩ እስራኤል ምናደቢ ኣሰሞ ሌዌ ኦሶ ቄሶመ ዉዲኔት። ህተን ቄሶማን ሆሩሩንኩ ዊመ እክ ደገሜ እክየን ኣሮኔገ እሁዕነ መልከጤዴቄገ ዮ ዎሉ ቄስቹ ሚ ሀስሰኖ እኬ? 12 ዳፉንኩስ ቄሶመት ዶረንቶኢች ህትጉንተ ሴሩሁ ዶረሙ ሀስሰኖስ። 13 ኩ ጠሁ እስተኔ ኩለሞ ቄስቹ ዎሎ ዜሪቼት። ህከን ዜሪችን አዪ ክትሜኖ መዕኔን ክትመ ህንጨእ ከሰበአ። 14 ዳፉንኩስ ቀርቹኔ እለሞ ይሁድ + ዜሪች እኮጉ ለሌሃ ጠሀ። ሙስን ይሁድ ዜር ቄሳከተኔ ሜጡራ ኩሌሩ ዮበአ። 15 መልከጤዴቄገ ዮ ዎሉ ቄስቹ ዋሎ ጃተ ኩ ጠሁ ጫክ ለለኖ። 16 እስ ቄሶመት መን ዎግጊን ዋልቴኢተ እኩዕነ ህጉምቦ ሄቸ መቄን ዋልቴታ። 17 ዳፉንኩስ «አት መልከጤዴቄገ ዶሊ ሆሪንከ ቄስቿ» የመም ነቀሰሜስ። 18 ህከኒ ብሬ ዶል ሴሩ ላፈሃ ካዕሉምቡሃ እኮተኔ ዝረሜእ። 19 እኮዳ ነኦት መገንበ ህንጭናም ዎዩ ተሶ ዋሌእ። ዳፉንኩስ አዘዞ ዉዲን ሜጡሩ ዊሚ ደንድምበአ። 20 ት ቄሶመት ህድሩ ዮበኢ እኬታበአ። 21 ብሬ ኬኑ ህድሩ ዮበኢንከ ቄሳከተ እኬሃረ። እኮዳ እስ ቄሶመት ህድሪን እኬታ። ዳፉንኩስ «ቀርቹ ‹አት ዶሊ ሆሪንከ ቄስቿ› ይ ጤሌዕሌተኔ ሀስሰኖበአ» የመም እስተኔ ጠሃቀሜእ። 22 ህከን ጤሌዕል ዳፊን ዬሱሱ ዎየኖ ህድር ሩበታንቹ እኬእ። 23 ብሬ ዶል ቄሳከት ሁጅሰ ሙርቱዕነ ሁጀቱምቦገ ሬሁት ከንታተኔ እሶኦ ዎሉት በትናሸተ እኬ። 24 እኮዳ ዬሱሱ ሆረኒ ሬሁምቡ እኮተኔ ዶረንቱምቡት ቄሶመት ዮስ። 25 መገኑ ኡጮሰተ ሆረንተ ጃተ ሄአኖ እኮተኔ እስ ዉዲን መገንበ ህንጭታረ ዶሊ ሆሪንከ ፈእሶሰተ ደንደኖ። 26 ኔሳ ጡማንቹ፥ ቀነጤኖሩ ዮስበኢ፥ ሙጩሩ፥ ባጢለ ሁጀታ መኒን በርገም ባጢልሰ ቤቀማንቹ እሁምቡሁ ሰማካች አሊን ጦቅኬእ አቤኢሁ ሀስሰኖኔረ ደገኖ አቡ ቄስቹ ዮኔ። 27 እስን ህታጵ ቄሳከገ ብርስ ገግስ ባጢልተኔ ዘኮኒ ምናደብ ባጢልተኔ በሪን በሪን ክትመ ህንጨኡ ሀስሰኖስበአ። ገገስ ክትመ አስ ህንጨኤ ጃተ ሜጤን ጦፍ ቅጠንሴእ። 28 ሴሩዕኑ ሆግመ መነንከ አበተ ቄሳከተ አሰኖ። እኮዳ ሴሪች ዘኮ ዋሎ ህድሩ ዶሊ ሆሪንከ ዊመ እኮ መገን ቤቱ ዳኖንሰኖ።
1 አቼ ጠሃኖንስ ጠሂች ቦቁስ ተኔት። ህኩስን ህባሞ መገን ዎሞመ በርጩም መኬ ዉዲን ሰማን አፉዕሌ ህትጎኑ አቡ ቄስቹ ዮኔ። 2 እስን ገሬ ዱንካነ እኮ መገን ኬሰሞ ምን ኣዝየ ሁጀታንቹ። ዱንካኑንኩስ መን አንጋን እሁዕነ መገን አንጋን ኡሬሃ። 3 አቡ ቄሱ ሆሩንኩ ዶዕረመኖ መገኒ ኣሴኖረ ህንጨኦታቲ ክትመ ክትሞታቲ። ህከኒ ከን ቄስቺሃ ክትሚ ህንጨአኖሩ መቱሩ ሄኡ ሀስሰኖስ። 4 እስ ኡለ አሌን ዮ እክየን ቄስቹ እሀኖበአ እኬ። ህኩስን ሴርጊን መገኒ ኣሴኖረ ህንጨታ ዎሉ መኑ ዮተኔሃት። 5 እሶኦት ሁጀቶኢንኩ ሰማን ዮሪ አጉዲሸታ ሀሌቹታ እኮሀን ኣዜኔት እኬ። ህኩን እኮንኩ ሙስ ዱንካነ ሁጀቾ ጃተ መገኑ «ዱን አሌን ጡደሞሄሀን አጉዲሻን ሆረረንከ ቆረብ ሁጀት» ይ አዘጆስጊኔት። 6 እኮዳ ክርስቶሱ ሜሬር መንቹ እኮ ህድሩ ኑባቾ ህድሪች አበ እኮተኔሃ ዎየኖ ተሳን ሾሀሜኢ እኮተኔሃ እሲ ኣሰንቶ ሁጅት አብስ አበተ። 7 ዎነ ህድሮን ሉሰት ዮበአ እክየን ለንክስ ህድሪ መዕንት ሄኣስበአ እኬ። 8 ዳፉንኩስ ቀርቹ መገኑ እሶኦን ሉሰተ ደግ «አቼ አን እስራኤልነ ይሁድ ባድ ምናደቢን ሃሮ ህድሩ ኣጋም ጄቹት ዋልታእ። 9 ህኩ ህድሩንኩ አን ግብጥ ባዲች ፉሾሰተ አንገሰ አፎም በር አናካንተሰ ኣጎም ህድርገ ዮበእየ። ዳፉንኩስ እሶኦንት ኢ ህድሮን ቃርት ሄኡ ሆጎተኔ አጉር አጉሮንሰ። 10 ህከን ዶሊች ዘኪን እስራኤል ምናደቢን ኣጋም ህድሩ ከኔት። ኢ ሴረንከ ዎዘናንተሰ አፉሻምኒ ጣፋምኒ። አንን መገኑሰ እሃንሰ፤ እሶኦንት ኢ ምናደበ እካኤ። 11 እሶኦችን አዪ ኦሌቹሲ እኮ ህዞሲ ‹መገኑ መሌስ› ይ ሮስሰኖበአ። ዳፉንኩስ ማዕኒች አፍ በህሩ ኢለንቀጤች ኤስ መሌሳተኔሃት። 12 አን እሶኦ ሾክመተ ፈኡን ይ ባጢለሰን ለንኪ ቃጋምበአ» ዬእ። 13 አቼ «ሃሮ ህድሩ» ይ ጠሃቂንተስ ብሬስ ህድሩ ኑባሴእ። ህከኒ ኑባጵ ሆጎሲ በኦተ ህንጭዬእ።
1 ዎነ ህድሪ መገኒ ሰገዴኖገ መለሀኖ ሴሩሁ መን አንጋን ምነሜ መገን ኬሰሞ ምኑሁ ዮሴየ እኬ። 2 ለምት ቀላንጡት ዮስ ዱንካኑ ቅጠሜ እኬ። መጋረጂች ኤተሪን «ኬስቹተ» ዬኖ መዕኔን ቡበኖ ሻም አፉሻንቹ፥ መገኒ የመንቶ ዳቡቲ ጠረጴሱሁ ዮ እኬ። 3 መጋረጂች ኣዚን «ኬስቾችን ኬስቹተ» የመንታ መዕንት ዮ እኬ። 4 ህከኔን ዎርቂን መክሴመ ህጣነ ውሊሼኖሩ ሆሮማንተስን ዎርቀ ቡሬን መክሴመ መገን ህድር አዘዙት ዮ ሳጥኑሁ + ዮ እኬ። ህከን ሳጥን ኣዜን «ማነ» ዬኖ እቸት ዮ ዎርቅ ሌማቱ፥ ለቼ ኣሮኔ ብጡሁ ህድር ላገት ጣፈንቴ ለሙ ክኑሁ ዮ እኬ። 5 ህትጉንተ ባጢሉ አጉረመኖ መዕንተ ቴልታ አብን «ክሩቤላከተ» የመንታሩ መገን አዘዙት ዮ ሳጥን አሌን ዮ እኬ። ነኦት ቴሱ እሶኦ መ-መትሰተኔ ጠሃኖተ ደንድናምበአ። 6 ሆሩሩንኩ ህትጉተ ቅጠሞሀኒች ዘኪን ቄሳከት ሁጅሰ ሁጀቶተ ዱንካን ኣዝ መጋረጂች ኤተሪን ዮ መዕንተ ሆረንተ ጃተ ኣጋ እኬ። 7 እኮዳ መጋረጂች ኣዚን ዮ መዕንተ አቡ ቄስቹ ጠሉ ዎጋን ሜጤ ኣገኖ። እስን ገግስነ ምናደብ ሉሰተኔ ህንጨአኖ ቄግ አፉዕነ ህከበ ኣገኖበአ። 8 ዎነ ዱንካኑ ህከኔ ኡር ሄአንየን ኬስቾችን ኬስቹተ መዕንተ መሰኖ ዎቆ ለሉ ሆጎገ ጡማንቹ አያኑ ኩለኖ። 9 ኩ ጠሁ ከን ዶሊ አጉዲሸተ እሀኖ። ህትጉንተ መገኒ ህንጨኤኖሩ ክትሙሁ ህንጨአኖስ መንች ዎዘነ ሙጩርሶተ ደንደኖበአ። 10 ህኩሩንኩ መኑ ክርስቶሲን ሃሮተ ሄቸተ ደቀንቀጤች ጠሊ ሁጀቴሃረ። እሶኦንት እቸነ አግ ህትጉንተ ዎኢን ኣዕሌን ሙጩርተ ዎጋከ እኬ። 11 ጠሁ እኮዳ ክርስቶሱ ቴሱ እሀኖ ደናሞ ጠሂ አበ ቄስቹ እክ ዋሌእ። እስ ኣጎ ዱንካኑንኩ አባኒ ዊመ ዊሚን ሁጀተሜሃኒ። ህኩ ዱንካኑንኩ መን አንጋን ሁጀተሙምቧኒ ተን ኡለ አሌን ዮበእየኒ። 12 ኬስቾችን ኬስቹተ መዕንተ ሜጤን ገግስ ቄጊን ኣጎ በጋን ፌላእነ ዎርጃመ ቄግ አፍ ኣግምበአ። ህትጎንን ዶሊ ሆሪንከ ሄኣ ዎዝኑተ ኣሴኔ። 13 ህኩ ዎርጃመነ ፌላእ ቄጉሁ ክትሚ ቡሴመ ሱሉም ጠበሩሁ ባጢሊን ቡሾ መን አሌን ውጤናን ሙጩርሰኖ እኮች 14 ዶሊ ሆሪንከ ሄአኖ ጡማንቾ አያን ዉዲን ገገስ ቀነጤኖሩ ዮበእ ክትመ አስ መገኒ ህንጨኤ ክርስቶስ ቄጉዕኑ ሬሁተ ኤባ ሂለ ሁጄች ሄቸ መገኒ ሁጀንቱንተ ዎዘነኔ ሀበንከ ሙጩርሰኖ? 15 መገኑ ገኤሰሩ እስ ተሴን ኣሴሰ ዶሊ ሆሪ ጎፉምቡ እረ ረገኡንተ ክርስቶሱ ሃሮ ህድር ሜሬር መንቹ እኮ። ህኩስን መኑ ዎነ ህድር ኣዜን ጠቀም ዮ ጃተ ሁጀቾ ባጢሊች ገግስ ሬሆን ዎዞታት። 16 ሬሀኖ መንቹ ኩዕሌሩ ሄኦች መንችስ ሬሁተ ቆርሴን ደጉ ሀስሰኖ። 17 ዳፉንኩስ ሬሀኖ መንቹ ኩዕሌሩ ዊመኖ ሬሄሀኒች ዘኪኔት። ጠሁ እኮዳ ኩዕሌስ መንቹ ሬሁምቦች ጠሁስ ዊሞተ ደንደኖበአ። 18 ህከኒ ዎነስ ህድሩሁ ቄጉ ዱነሙዕናች ጠለለ ቃርምበአ እኬ። 19 ሙስን ሴር አዘዙተ ምናደቢ ኩሎሀኒች ዘኪን ዎርጃመነ ፌላእ ቄጉ ዎኢን ኤሬር ቢሸ ሆለ ኦርዛኒ «ህሶጰ» + ዬኖ ሀቅ ቦንጢኒ መጣፍነ ምናደብ አሌን ውጮ። 20 ህካንን ውጠን «መገኑ አዘጆክዕኔ ህድር ቄጉ ከኔት» ዬእ። 21 ህትጉንተ ዱንካናኒ ኣዜንተስ ዮ ሆራንተ ኦዳ አሌኒ ቄግ ውጮ። 22 ገርንተ ሴርጊን ቀሆሪች በጋን ሆሩሩንኩ ቄጊን ሙጩረኖ። ቄጉንኩ ዱነሙዕናች ባጢል አጉረሙ ዮበአ። 23 አቼ ት ሰማን ዮሪ አጉዲሸተ እኮ ኦዳት ሆረንት ተን ክትማካን ሙጩርታእ። እኮዳ ሰማን ዮሩ ከኒች አበኖ ክትሚን ሙጩሩ ሀስሰኖሰ። 24 ክርስቶሱ ገሬ ዱንካን አጉዲሸተ እኮ አንጋን ሁጀተንቶ ኬስቾችን ኬስቹተ መዕንተ ኣግምበአ። ጠሁ እኮዳ ኒተኔ መገን ብሬን ቴሱ ለሎተ እስ ሰማ ኣጌእ። 25 አቡ ቄስቹንኩ ዎጋን ዎጋን ገግስቢ እሁምቡ ቄግ አፍ ኬስቾችን ኬስቹተ መዕንተ ኣገኖሀንገ ክርስቶሱ ገገስ ሆለመተ ጄቹተ ክትመ አስ ህንጨኦተ ኣግምበአ። 26 ህትጉተ እኮችዕኑ ኡለት ቆጨንቶሀኒች ከበለቅ ሆለመተ ጃተ ሀወ ኣቁ ሀስሰኖስ እኬ። እኮዳ ቴሱ ዶል ጎፎን እስ ገገስ ክትመ አስ ህንጨኢን ባጢለ በእሶተ ሜጥንተ ጄቹተ ለሌእ። 27 መኑ መቴ ሬሁ ሀስሰኖስ። አሞ ሬሆች ዘኪንን ፍርዱ ዮስ። 28 ህትጉንተ ክርስቶሱ ሆለመ መን ባጢለ በእሶተ ሜጤ ክትመሞሀኒች ዘኪን እሱ ቆረጵታ ኬኑ ፈእሶተ ለንኪ ባጢሉ ዮበኢ ለለኖ።
1 አቼ ሴሩ ከዘኩ ዋለኖ ደናሞ ጠህተ አጉዲሸ በጋን ህከን ጠሀ ገጋንስበአ። ህከኒ ሆረንተ ጃተ ዎጋን ዎጋን መገንበ ክትመ ህንጨታ መነ ሆረን ሙጩርሶሰተ ደንደኖበአ። 2 ደንደኖ እክየንዕኑ ህኩ ክትመ ህንጬጭታ መኑ ሜጤን ባጢሊችሰ ሙጩርቶኢች ዘኪን ሙጩርቶገ ዎዘኑሰ ደገኖተኔ ክትመስ ህንጨኡ አጉርታበእኬንዶ? 3 ጠሁ እኮዳ ህት ክትመት ዎጋን ዎጋን ባጢለ ቃግሳሃረ። 4 ዳፉንኩስ ዎርጃመነ ፌላእ ቄጉ ባጢለ በእሶተ ደንዴቀኖበአ። 5 ህከኒ ክርስቶሱ ተ ኡለተ ዋሎ ጃተ «ክትመሃ መገኒ ህንጨኤኖራ አት ሀስምበአ። ጠሁ እኮዳ መኖመተ ቅጠቶንቴኤ። 6 አሞ ሆሮመንተስ ቡሴኖ ክትማኒ ባጢለ ሙጩርሰኖ ክትማኒ በጅግምበአ። 7 ህተ ጃንተ መጣፍ ኣዜን ‹ኢተኔ ጣፈሞገንከ ህኩዕኒን ኢ፥ መገኖ! አን ኪ ሀሱ ዊንሾተ ዋሌም› ዬም» ዬእ። 8 ዎነ «ክትማከት፥ መገኒ ህንጨኤኖሩ፥ ሆሮመንተስ ቡሴኖ ክትሙሁ ባጢለ ሙጩርሰኖ ክትሙሁ ሴርጊን ህንጭያኖ እኮዳ አት እሶኦተ ሀስምበአ። ህከሮኦንን በጅቀንትምበአ» ዬእ። 9 አሞ ቴሱ በርግ «ህኩዕኒን፥ አን ኪ ሀሱ ዊንሾተ ዋሌም» ዬእ። ህትጉንተ ዎነስቢ ከም መዕኔንተስ ለንክ ክትመ ቃርሴእ። 10 ህከን እስ ሀስጊን ዬሱሱ ክርስቶሱ ሜጤን ጦፍ ማለስ ክትመ አስ ህንጨኢንተስ ነኦት ባጢሊችኔ ሙጩኔም። 11 ሀኩ ቄስቹሁ ህከ ባጢለ በእሶተ ሆረን ደንድቱምቡተ ክትማከተ ሆለመተ ጃተ ህንጨአን በሪን በሪን ኡር ሁጀተዮእ። 12 ጠሁ እኮዳ ክርስቶሱ ዶሊ ሆሪንከ ባጢለ ሙጩርሰኖ ሜጡ ክትመ ህንጨኤሀኒች ዘኪን መገን መኬ ዉዲን አፉዕሌእ። 13 አቼ ዲናከስ ሎካችስ ዎሮዲን እክ ሃመንተንቀጤች ቆረበዮእ። 14 ዳፉንኩስ መገኒ አነነ እኮ ኬኑ ሜጥተ ጃተ ህንጨኤ ክትሚን ዶሊ ሆሪ ጦፍ ሙጩርሴሰተኔሃት። 15 - 17 ጡማንቹ አያኑንኩ «መገኑ ዎና ‹ህከን ዶሊች ዘኪን እሶኦን ኣጋም ህድሩ ከኔት። ዎዘናንተሰን ኢ ሴረ አፉሻም፤ ቦቆሰ ኣዜንን ጣፋም› ዬእ። አሞ ለንኪ ‹እሶኦ ባጢለሃ ደምገሳ ፈንቀሽ ቃጋምበአ› ዬእ» ይ ነቀሰኖኔ። 18 ባጢሉ ሆሩንኩ አጉረሞሀኒች ዘኪን ባጢልተኔ ህንጨኤኖ ክትሙ ሆረን ሄአኖበአ። 19 አቼ ኢ ህዛከ! ክርስቶስ ቄጊን ኬስቾችን ኬስቹተ መዕንተ ኣንጋምገ አመዕንናም። 20 ኣንጋንሲንኩ መጋረጅ ዉዲን ህኩስን ገግስ መኖመ ዉዲን ፈኖኔ ሃሮነ ዶሊ ሆሪ ሄአኖ ዎቄኔት። 21 መገን ምኔን መቆ ዮስ አቡ ቄስቹ ዮኔ። 22 ህካን እኮች ሂለ ጠሂች ሙጩኖተ ዎዘነኔ ክርስቶስ ቄጊን ሙጩርሰቅን አልኔን ሙጩሮ ዎኢን ኣዕልን ገሬ አመዕነቲኒ ጠቤነ ዎዘኒኒ መገንበ ህንጭኖ። 23 ተ ተሴ ላገተ ኣሴኔ አመዕነሞ እኮተኔ ከ አመዕንን ነቀንሳም ተሳ ሌንቄቅኑዕናች ቃርስን አጵኑን። 24 ኢታኒ ደናሜ ሁጄኒ ቃርሰቀሙ ሀጰሙንከ። 25 ሆረንተ ጃተ ደቀመን ቃርሰቀሙን በጋን መ-መቱ መኑ ጣጩ አጉርቶገንከ ጣጩ አጉኑንከ። ባሰንከስ ቀርች ዋል በሩ ህንጭዬገ ቃጌነን ከ ጠሀ አስዬ። 26 ነኦት ገሬ መሌሱ ደቅኖሚች ዘኪን ደንገንን ባጢለ ሁጀንቶምደ ባጢሊሀኔ እሀኖ ክትሙ ሄአኖበአ። 27 ጠሁ እኮዳ ከዘኩ ዋለኖ ዋጅሲሰኖ ፍርድ በሩሁ መገኑ ግባ መነ እታ ቃረት ጊረቲ ዮእ። 28 ሙሴ ሴረ ዝሬ መንቹ ለሙ እንዶ ሰሱ ነቃሹ አሌንተስ ነቀሾች ቅሽጡ ዮበኢ ሬሀኖ። 29 ህከደ መገን ቤቱ ገጆ፥ ገገንከስ ሙጩርሴ ህድር ቄግ ቡሽሾሁ መገን ኣሰንች አያነ ቦሮሮሁ ሀበንከ ቃረገ ቅጣጠመኖ አጉደኖክዕኔ? 30 ዳፉንኩስ «ባደ ፉላሚሁ ቤነ ፈንቀሻሚሁ አኔት» አሞ «መገኑንኩ ምናደባንተስ ፍርደኖ» ዬኢ አዬትንዶ ደንጋም። 31 አቼ ሄቸ መገን አንጋን ኡቡ አብሽ ዋጅሲሰኗ ጠሀ። 32 መገን ጫኩ ጫኬዕኔች ዘኪን ሆለመ ሀወ ኣቅቴን ቃረ ኡጀቀንቺን እየቅቴንተ ህጎ ዶለ ሰውዬ። 33 መ-መቴ መን ብሬን ቦሮረንቴንተኒ ሀውቴንተኒ። መ-መትተ ጃንተ ህትጎኑ ሀዉ ኢሌሰሪን በርገንቴን አዕኖኦንት ሀወ ኣቅቴንተ። 34 አዕኖኦንት ዎየኖነ ጎፉምቡ ግዙ ዮዕኔገ ደጌነንተተኔ ኡሱረንቶ መኒ ቅሽጥቴንተሰ። ሄቸዕኔን ቦገንቶዳ እየቅቴን ጠሀስ በጅጎን ኣቅቴንተ። 35 አቼ አበተ እርፉተ ደቅቴነንተገ አሰኖ አመዕነቱዕኔ ኡጅቴኖችዬ። 36 መገኑ ኢተኖረ ሁጀቴነን ተሳ አሰሞረ ደቅቴኖተ ቃሩ ሀስሰኖዕኔ። 37 ዳፉንኩስ «ጄቹንትስ አብስ ገበንቹተ። ዋለኖሲንኩ ደለሱዕነ ዋለኖ። 38 ሙጩሩ መንቹ አመዕነቲን ሄአኖ። እኮዳ ዘኩ ለቅ ፈንቀሎደ ኢ ፎሉ እሶን በጅቀመኖበአ» የመሜእ። 39 ነኦት እኮዳ አመዕንት ፈኣ ኬኒኔት በጋን ዘኩ ለቅ በኣ ኬኒኔትበአ።
1 አመዕነቱ ተሴን ቆረምባምረ ደቅናምጋ ቴሱ ጡንዱምቡሩ ዮጋ ሞሽ ኩለኖኔየ። 2 ዎዶ ዶል መኒ ነቀሰሞሳ አመዕነትሰ ዳፊኔት። 3 ቆጨሞሩ ሆሩንኩስ መገን ላጋን ቆጨሞጋ ጡደመኖሩ ሆሩንኩ ጡደሙምቦሪች እኮጋ አመዕነቲን ደንጋም። 4 ኣቤል ቃዬሌ + ክትሚች አበ መገኑ በጅቀንሰኖ ክትመ ህንጨኤኢ አመዕነቲኔት። እስ ህንጨኤ ክትመ መገኑ ኢት ኣቄ ጃተ ኣቤል አመዕነቲን ሙጩሩ እኮገ ነቀሰሞስ። ኣቤል ሬሄዳ አመዕነቲንተስ ከበሬ ኢለንቀጤች ጠሃቀዮእ። 5 ሄኖክ ሬሁተ ጡዱዕናችን ኦሮቄኢ አመዕነቲኔት። እሱ መገኑ ኦሮሾስተኔ ለልምበአ። ሄኖክን መገኑ ኦሮሱዕናችስ ብርስ መገኑ በጅቀንሴጉ ነቀሰሜስየ። 6 አሞ አመዕነቱ ዮበኢ መገኑ በጅቀንሱ ደንዴሰኖበአ። ዳፉንኩስ መገንበ ህንጭያኖ ሆሩንኩ መገን ሄኡሃ እሱ ሀሳሪንከ እርፉተ ኣሰኖጋ አመዕኑ ሀስሰኖስ። 7 ኖህ እሌ ጡደሙምቡሩንኩ እሀኖገ መገኑ ኩልየንስ መገኑ ዋጅ ምንስ አበሮሱ ፈእሶተ መርከበ መክሾ አመዕነቲኔት። አመዕነቲንተስ ኡለ አል መን አሌን ፍርደመኖገ እኮሀኒች ዘኪን አመዕነቲን ደገንታ ሙጩርመ ረገኣንቹ እኮ። 8 አብረሃም እረ ኤጭ አጰኖበ መሮተ ገአሞ ጃተ መረኖስቡ ሀከባንዶ ደጉዕናን አዘዘም መሮ አመዕነቲኔት። 9 አብረሃምን እስገንከ ተሴ ላገተ ረገኣ ይሳቂኒ ያቆቤኒ ተሴን ኣሰሞ ባዶን ኣግቹ እክ ዱንካናን ሄኦ አመዕነቲኔት። 10 ዳፉንኩስ አብረሃም መገኑ መክሽ ምኔ ቃረት ሾሁት ዮሴ ከተንቹተ ቆረጰዮተኔሃት እኬ። 11 አሞ ሳረን ተሳ ኣሴ መገኑ አመዕነሜኢ እኮገ ደጎተኔ መሃ ኑባቹተ እሂንተሴ እሊ ደንድቱምቡተ እኮዳ ሰላዕኒ ደንድታ መቆ ደቅቶኢ አመዕነቲኔት። 12 ህከኒ ሬሄ መንገ ዎልሰሜ መቶ መንቺች አብረሃሜች ሰሜ ቤዜገ በትናሹነ ዎልሴን ደንዴኑምቦ በሃር ሺን ሻፍ ቀጠ እካ መኑ እለንቶእ። 13 ህኩ መኑ ሆሩንኩ አመዕነቲን ሬቴእ። እሶኦንት ተሳ አሰሞሰረ ደቅትምበአ። ጠሁ እኮዳ ህከስን ቄዕረን ጡድ በጅጎን ኣቅቶእ። ኡለ አሌንን ኣግቻከታ ኮሃከታ እኮገ ደጎእ። 14 «ነኦት ኣግቻከተኒ ኮሃኒ» ይታ መኑ ገግሰ ባዱ ቆረጵታገ መለካእ። 15 ዎነ ፉልቶ ባዱ ቃጌ እክየን ፈንቀልቶተ ደንድታ እኬ። 16 ቴሱ እኮዳ እሶኦት ሰማን ዮ ዎየ ባዱ ቁልጥተዮ እኬ። ህከኒ መገኑ እሶኦት ሄኣ ከተመ ቅጠንሴሰተኔ «መገኑሰ» የመም ገአሞተ ሳለኖበአ። 17 አብረሃም ኬነሞ ጃተ አመዕነቲን ይሳቀ ክትሚ ህንጨኤእ። ተሴ ላገተ ኣቄ አብረሃምን ሜጡስ ቤቱ ክትሞተ ቅጠሜ እኬ። 18 እሲንከ «ዜሩክ ይሳቂን ገአመኖሄ» የመሜስ እኬ። 19 አብረሃምን መገኑ ሬሆቺ ኬእሶተ ደንደኖገ ደጎተኔ ሬሆች ፈንቀሎሀንገ አስ ቤቱስ ደቄእ። 20 ይሳቅን ዋለኖሪተኔ አመዕነቲን ያቆቤኒ ኤሰኒ ማሰኦሰ። 21 ያቆብን ሬሀን ዮሴፍ ኦሱተ አነንከ አነንከ አመዕነቲን ማሰኦሰ። ብጡንከስ ሽከእ መገኒ ሰገጆ። 22 ዮሴፍን ዘካንቾን ሬሆተ ኦንጠኮ ጃተ እስራኤል ኦሱት ግብጥ ባዲች ፉልታገ ቃግሽ ምቅቹስ አጉርት ኦሮቱምቦገ አዘጆሳ አመዕነቲኔት። 23 ሙስ እለሞ ጃተ አብሽ ጩሉአሰኖ ጪለ እኮገ አመሲ አኑሲ ጡዶተኔ ዎም አዘዙተ ዋጅቱዕናች አመዕነቲን ሰሱ አገነ ማጦስ። 24 እስን ሌኦ ጃተ «ፈርኦኔ ቤቶ ቤቱ» ዬን ገኤኑምቦስገ አመዕነቲን ግቦ። 25 ዳፉንኩስ ባጢሊን ቀሆ ጄቾ ደገንታ በጅጎች አበ መገን ምናደቢን ሜጡ እክ ሀወ ኣቁ ዶዕሬተኔሃት። 26 ሙስ ከ ዘኩ መገኒች እርፉተ ደቀኖገ አመዕኔተኔ ግብጥ ባድ ዱቢች አበ ክርስቶስተኔ ገደሙ አበኖገ ሰውዬእ። 27 እስን ዎም አሙርተ ዋጁዕናች ግብጥ ባዲች አመዕነቲን ፉሎ። ጡደሙምቡ መገኑ ጡጆሀንገ አስ ቃሮ። 28 በህሩተ ኦሱተ በእሰኖ መገን ሰሜ ሶቀማንቹ እስራኤል በህሩተ ኦሱተ ኡሉምቦገ ሻሽግነ ቄጉ ውጥ ዎገ አመዕነቲን አሴእ። 29 እስራኤል ምናደቡ ሞለ ኡላን ህጌኖሀንገ እክ አመዕነቲን ቢሸ በሃረ ቶልቶእ። እኮዳ ግብጥ ባድ መኑ «እሶኦገንከ ህንጋም» ይት ኬኦ ጃተ በሃር ዎኣን አገንቶእ። 30 አሞ እያርኮ ከተም ግምቡ እስራኤል ኦሱት ለመለ በር አመዕነቲን ዘህቶሀኒች ዘኪን ዝረም ኡቦ። 31 ሳኣንቹት ረኣብ + እረ ሻሽታ መነ አመዕነቲን ጡሚን ኣቅቶተኔ ህከን አዘዘንቱምቦ መኒን በርገንት በእምበአ። 32 አቼ ዎሉረ መ ኩላንክዕኔ። ዳፉንኩስ ጌዴኦኔተኔ፥ + ባራቄተኔ፥ + ሶምሶኔተኔ፥ ዮፍታሄተኔ፥ + ዳዊቴተኔ፥ ሳሙኤሌተኔሃ ህራጋንተኔሃ ኩሉምቦገ ጄቹት ገቦጥታኤተኔሃት። 33 እሶኦንት አመዕነቲን ዎማከተ ቄልቶእ። ጠቤነተ ሁጅተ ሁጀቶእ። ኣሰሞሰ ተሴ ላገንተ ደቅቶእ። ዞቤ አፎንከ ጡፎእ። 34 አሞ ጊረ መቆንከ ጠእሶእ። ኢጳሸ ብሲችን ፉሸቅቶእ። ሆንጌችን ቆጠርማን ፈንቀልቶእ። ኦላንን ቆጠርቶእ። አለግቾ መን ጋዛኑ ሸርቶእ። 35 ሜንቱንኩ ሬቶ እለሙሰ ሬሆች ኬእየን ደቅቶእ። ዎሉ ኬኑ ዎይታ ሄቻ ሬሆች ኬኣገ ደጎተኔ በርችተ አሴነንየንሰ እየቅቶእ። ኡሱሮችን ሂረሙ ግቦእ። 36 አሞ ዎሉሰ ኬኑ ገላጬመሰ፥ ገረፌመሰኒ ህከኒችን አበ ሰንሰለቲን ኡሱሬን ኡሱሮ ምን ኣግሴመሰኒ። 37 አሞ ክኒን ቀሴናንሰ ሬቶእ። መጋዚን ሙሬመሰ። ብሲን ሼመሰ። ሆረረንከ ሆገን ሸረንተኒ ሙደንተኒ ሆለነ ፌላእ ለንደ ኦደቅት ዞህቶእ። 38 እሶኦንከ ት ኡለት አጉዱምቦሰተኔ ኡለ ኡዱመኣን፥ ዱናካን፥ ቦዋኒ ቦንቆቆኒ ዘህተን ሄኦእ። 39 ኩ ሆሩንኩ መኑ አመዕነትሰተኔ ነቀሰሞሰዳ ኣሰሞሰ ተሳ ደቅቱዕናን ዮእ። 40 እኮዳ መገኑ ኔሳ ሆረ ዎየኖረ ቅጠንሴተኔ ህኩ መኑ ነኦት ዮምበኢ ዊማከተ እኮተ ደንድትምበአ።
1 አቼ ሄጌጉኔ ጎምገ ዘህት አፌ ከንከ በትናሸት ነቃሻከት ሄኦኔች እይነገ ኬዕመኖኔረ ሆረንካ ደዕልን ክብ አፈኖኔ ባጢለሃ አሊችኔ ከም ብሬንተኔ ዮ ኤዜጨንቸ ደንዴቂን ደጉንዱን። 2 ደጉንዳንሲንኩ አመዕነቲሀኔ ቦቁታ ዊንሻንቹሃ እኮ ዬሱሰ ጡንዴት። እስን ብሬንተስ ዮ በጅጎተኔ ይ መስቀልች አሌን ሬሀኖ ሬሆ ቢልመተ መሃኒ ዎልሱዕነ እየቅ መገን ዎሞመ በርጩማን መኬ ዉዲን አፉዕሌእ። 3 አሞ አዕኖኦት ዎዘነ ላፌን ተሳ ሙርቴኑዕነ ባጢላመ ኡርጨንቸ ደንዴ ዬሱሰ ሰውዬ። 4 አዕኖኦት ባጢሊን ኡጀቀንቴነን ቄጉዕኔ ዱንቴነንታ ኢለንቀጤች ኡርጨንቴንምበአ። 5 መገኑ ክዕኔኤተ ገግስ ኦሶገ «ኢ ቤቶ! መገን ቅጣጥ ቢልሶት። አሙዕረኖሄ ጃንተ ተሳ ሙርቶት። 6 ዳፉንኩስ መገኑ ኢተኖስ መንቹ ቅጣጠኖስ። ቤትስገ አስ ጡደኖ ሆረንከ ኦለኖ» ዬ ሰዘነተ ሀቤንተንዶ? 7 አኑ ቅጣጡምቡስ ቤቱ አዬት? መገኑ ክዕኔኤተ ኦሶስገ አስ ጡደኖክዕኔተኔ ቅጣጮዕኔዳ እየቅዬ። 8 አሞ ኦሱስ እኮሩ ሆሩንኩ ቅጣጠንታ ቅጣጥ አዕኖኦት ቅጣጠንቴኑዕነ ፈኤንተደ ሀጥቻከተ በጋን ኦሱተንስበአ። 9 ማሊን እልቶኔ አናከት ቅጣጤኔየረ እኬ። እኮዳ ነኦት እሶኦተ አብንሳንሰ እኬ። ህካን እኮች ፎሊ ሆሪንከ አነ እኮ መገኒ ሀበንከ አብንስ ጠቀሙሁ ሄኡሁ ሀስሰኖኔ? 10 አናከኔ ቀሆ ጄቾ ደናሙ አጉጅ ለሌሰገ ቅጣጤኔ እኬ። እኮዳ መገኑ እስ ሙጩርማች ቤቀሙንተ ኒ መኪ ይ ቅጣጠኖኔ። 11 ቅጣጡ ሆሩንኩ ጄቾሀንስ ክቼእሰኖ በጋን በጅቀንሰኖበአ። ጠሁ እኮዳ ሮሶ ኬኒ ዘካንቾን ጡምነ ሙጩርመ ላሉተ ደግሲሰኖሰ። 12 ህከኒ ሆጎ አንጋከዕኔ ላፎ ሞጎላከዕኔ ቃርስዬ። 13 ድዕኔ መንቹ ፈዩንተ በጋን ባሰስ ቡቀኡምቦጊ ሎካሀዕኔ ጠቤነ ዎቃ መክሽዬ። 14 መኒን ሆሪንን ጡሚን ሄኢሃ ሙጩርማን ሄኢሃ ቃርዬ። ዳፉንኩስ ሙጩርመት ዮበኢ አዪ መገኑ ጡዶተ ደንደኖበአ። 15 ክዕኔኤች አዬሃ መገን ኣሰንቹ ኮቱምቦስጋ በትናሸ መነ ቡሽሰኖ ቀራራሹ ጠጱ ብዝይ ሙች ሀውሱምቦዕኔጋ ቆረጵዬ። 16 አሞ በህሮመስ ሜጤ ጄቾ እቻ ይኬእ ህሮ ኤስገ መገኑ ዋጁምቡነ ፎኩተ ሁጀተኖ መንቹ ደገሙምቦገ ቆረጵዬ። 17 ኤስ ማሰተ ደቆተ ዘኮ ጋብ መሃ እንጂጄን ሀሾዳ ደቂ ደንዱ ሆጎገ ደጌነንተ። 18 አዕኖኦት አንጋን አፊ ደንዴኖ ሲን ዱንበ ኢልቴንምበአ። ህኩ ዱኑ ጊራን ቡበዮ እኬ። ህከኔን ገዳመት ቱንሱት፥ አንጉሉሎ ቦብሩሁ 19 ጡሩምቡልነ መጮጪ ዋጅሲሳ ላገቲ ዮ እኬ። ህተ ላገተ መጮጭቶሩንኩ ዎልት ላገት በርገንት ኩለንቱምቦሰገ ኡጭቶእ። 20 ዳፉንኩስ «ዎሉ ፈእየን ግዙሁ ህከ ዱነ ኡሎደ ክኒን ቀሰም ሬሁን» ይታ አዘዙተ እየቅቶተ ደንድትምበአ። 21 ጡደሞስሩ ዋጅሲሰኖ እኮተኔ ሙስ «አን አብሽ ዋጄምኒ ሁጮምኒ» ዬእ። 22 አዕኖኦት እኮዳ ጥዮን ዱነ፥ ሄቸ መገን ከተመ ሰማን ዮ ዬሩሳሌመሃ በጅጎን ጠጵቴ ዎሉት ዮበእ መገን ሰሜ ሶቀማንባ ኦንጠኬንተ። 23 ሰማን ጣፈንቶ በህራከተ እኮ አመዕናን ጠጵትበ፥ ሆሪንከ ዳነ እኮ መገንበ፥ ዊመ ዊሚን ሙጩርቶ መን ፎላከበ፥ 24 ሃሮ ህድሪ ሜሬር መንቹ እኮ ዬሱስባ ኣቤሌ ቄጊች ዎየገ ጠሃቀኖነ ባጢሊች ሙጩርሱንተ ውጠሞ ቄግባ ኢልቴንተ። 25 ከ ጠሀ ኩላንቹ ግቤኑምቦገ ቆረጵዬ። ዳፉንኩስ ህኩ ኡለ አሌን ኩሎሰሀኒ ግቦሩ ሁንት ፉሸቅቱምቦች ሰማን እክ ጠሃቀኖሀኒች ፎርጎ ይናም ነኦስ ሀትንክ ፉሸቂ ደንድናም? 26 ህተ ጃንተ ላገስ ኡለተ ሌንቄቅሶእ። እኮዳ ቴሱ እስ «አሞ መቴኒ ኡለተ ጠለ እሁዕናች ሰማሃ ሌንቄቅሳም» ይ ተሳ አሴእ። 27 ጠሁ እኮዳ ት «አሞ መቴኒ» ይታ ላገት ሌንቄቅቱምቡት ጠሃከት ቃርት ሄኣጋ ሌንቄቅታ እንዶ ቆጨንቶ ጠሃከት ዶረንታጋ ጡድሳእ። 28 ህከንተኔ ነኦት ሌንቄቅቱምቡተ ዎሞመተ ረገዕናምተኔ መገኑ ገለጥኑን። እስ በጅቀመኖጊን ዋጂኒ አብሲኒ መገኒ ሰገንዱን። 29 ዳፉንኩስ ኒ መገኑ እታታ ጊረ።
1 ህዞመ ኢተት ሆረንተ ጃተ ሜሬሮንተዕኔ ሄኡን። 2 ኮሀ ኣቁ ሀቤኖችዬ። ዳፉንኩስ መ-መቱ መኑ ደጉዕናችን መገን ሰሜ ሶቀማኑ ኮህሴ እኬ። 3 ኡሱረንቶረንከ እሶኦንን በርገንቴን ኡሱረንቴንተሀንገ ዎልሴን ቃግዬሰ። ሀውሴመሰ መነሃ ገጉዕኔ እሶኦገን ማሊንተዕኔ ሀዋን ዮንተሀንገ አስቴን ሰውዬሰ። 4 ኤበቀንቹ ሆራንከ መንባን አብሰሜኢ እሁን። ምኔኑ ምኔማሀንስ አሞ ምኔመንት ምኔኒሀንሴ አመዕነንቴረ እኩን። ዳፉንኩስ ፎኩተ ሁጀታነ ሳኣ መን አሌን መገኑ ፍርደኖ። 5 ግዝ ኢታች ገገዕኔ ቆረጵዬ። ዮዕኔሩ እሁንክዕኔ። ዳፉንኩስ መገኑ ገጉንኩስ «አን ኡጃንኬበአ። ሆረኒ አጉራንኬበአ» ዬእ። 6 ህከኒ ነኦት እግማን «መገኑ ካዕላንቿዕን፤ አን ዋጃምበአ። መኑ መ አሰኖኤ?» ይናም። 7 መገን ላገተ ኩልቶዕኔ አወንሳኑዕኔ ቃግዬሰ። ሄቸሰ ላሉንተ ጡዴነን አመዕነትሰገ ዮ አመዕነቱ ሄኡንክዕኔ። 8 ዬሱሱ ክርስቶሱ ቤሬን ከበርን ዶሊ ሆሪንከ ጦኔ እሶንት። 9 አነነ አነነ ኮህቾ ሮሻን አገንቴኖችዬ። ዎዘኑዕኔ እቻን ጠሊን እሁዕነ መገን ኣሰንቺን ቃሮደ ደናሟ። እቸ ዎገ ቆረቦ መኑ ገጊሀንሰ ሜጡራ ደቅትምበአ። 10 ኔሳሃ ክትሙ ዮኔ። እኮዳ ዱንካን ኣዜን ሁጀታ ቄሳከት ክትመ ህንጨኤኖ መዕኔች ኣቅት እቲ ደንድቱምቡ ክትሙ ዮ እኬ። 11 ዳፉንኩስ አቡ ቄስቹ ባጢልተኔ ክትመሞ ግዝ ቄጉ ኬስቾችን ኬስቹተ መዕንተ ህንጨአኖ። እኮዳ ግዝስ ማለ ከተም ገልቴች ኤተሮ ቡሴኖ እኬ። 12 ህትጉንተ ዬሱሱሁ ገግስ ቄጊን ምናደበ ሙጩርሶተ ከተሚች ኤተሮ ሀወ ኣቄእ። 13 አቼ ነኦቲ ከተሚች ኤተሩ ዬሱስበ ፉንኬዕን እስ እየቄ ገደንቸ እየቅኑን። 14 ዳፉንኩስ ኔሳ ተን ኡለ አሌን ሄአኖ ከተሙ ዮኔበአ። ጠሁ እኮዳ ከዘኩ ዋለኖ ከተመ ቆረጵናም። 15 አሞ ነኦት ሆረን ሙረሙምቡ ገለት ክትመ ዬሱስ ዉዲን መገኒ ኣስኑን። ህኩስን ሱዕሚሀንስ ነቀሳ አፌታ ላሉ። 16 ደናሙ ጠሀ አሱሃ ዮዕኔረ ዎሎ ኬኒን ቤቀሙሃ ሀቤኖችዬ። ዳፉንኩስ ህትጎኑ ክትሙ መገኑ በጅቀንሰኗ። 17 አዕኖኦት አወንስታዕኔ መኒ አዘዘንቴነን ጠቀምዬሰ። ዳፉንኩስ እሶኦት ፎልዕኔተኔ ጠዕመንታረ እኮተኔ አጰንተዮእ። አዘዘንቴንተሰደ በጅጎን ሁጀታእ። አዘዘንቴኑምቦች በጅጎን ሁጀታበአ። ህኩንን ክዕኔኤ ደናሟበአ። 18 አዕኖኦት ኔሳ መገኑ ኡጭዬኔ። ነኦት ሙጩሮ ዎዘኒን ዮምገ ሞሽን ደንጋም። አሞ ሆራራንን ደናሞገ ሄኢ ቁልጥናም። 19 ክዕኔኤበ ደዕል ፈንቀሉንተ ባሰንከስ መገኑ ኡጭቴኑንተ ቃርስ ኩላንክዕኔ። 20 ዶሊ ሆሪንከ እሀኖ ህድር ቄጊን ሆላሀንስ አበ ዜማንቹ እኮ ቀርቹ ዬሱሰ ሬሆች ኬእሾ ጡም መገኑ 21 ሰውተስ ዊንሽቴነንተረ እኬኑንተ ደናሜ ሁጄ ሆራንከ ቅጠንሱክዕኔ። እሱ በጅቀንሰኖረንከ ዬሱስ ክርስቶስ ዉዲን ክዕኔኤን ሁጀቱን። እሲንከ ዶሊ ሆሪ አብኑ እሁንስ፤ አሚዕን። 22 ኢ ህዛከ! ት ጣፎንክዕኔ ደዳቤት ገበንቹተ እኮተኔ ሰዘነኤ ላገተ ደንዴቂን ኣቅቴኑንተ ኡጫንክዕኔ። 23 ህዞኔ ጥማቶስ ኡሱሮች ሂረሞገ ደጌኑንተ ሀሳም። እስን ደዕል ኢበ ዋሎደ አኒ እሲንን በርገም ክዕኔኤተ ጡዳንክዕኔ። 24 አወንሳኒሀንክዕኔ ጡማኒ ሆሪንካ ጡመኤ ኩልዬሰ። ጣላን ባዲች ዋልቶ አመዕናኑሁ ጡመሰ ሶኬዕኔ። 25 መገን ኣሰንቹ ሆሪንተዕኔን ሜጡ እሁን፤ አሚዕን።
1 መገንነ ቀርቾ ዬሱስ ክርስቶስ ካዕላንቹ እኮም ያቆቤች ባዶን ሆራንን ብንቶ ቶነ ለሟንከ እስራኤል ቦኪ ሶሀንቴታ ሶህኑ። ጡመ ዮንተንዶ? 2 ኢ ህዛከ! አነኑ አነኑ ሀዉ ኢሌዕኔ ጃተ በጅቀምዬ። 3 አመዕነቶንተዕኔ ኢለኖ ሀው ዳፊን እየቁ ሮሴነንተገ ደጌነንተ። 4 አንጀ ቁርጨቴንታረ፥ ቀነጤኖሩ ዮዕኔበእራ ሜጡሩ ኮቱምቦዕኔራ እኬኑንተ ደንዴቁ ኮቱንከዕኔ። 5 ክዕኔኤች አዬሃ መሌሱ ኮቾስደ ገዱዕናች ቢዝማን ሆሪንከ ኣሰኖ መገኑ ኡጩን። እሲንከ ኣሰመኖስ። 6 ጠሁ እኮዳ ለሞዕሙዕናች አመዕነቲን ኡጩን። ለሞዕመኖ መንቹ ቦብሪን ጎምበም ሌንቄቀኖ ዎእ ዎርጃሙ አጉደኖ። 7 - 8 ለሞዕመኖነ ዎቃንተስ ሆራንን ቃሩምቡ መንቹ መገንቢች ሜጡራ ደቀኖ አጉዱንከስ። 9 ሄቻንተስ ገደሞ መንቹ መገኑ አብሰኖስተኔ በጅቀሙን። 10 አሞ ሄቻንተስ አቤ መንቹ መገኑ ህርከኤስደ በጅቀሙን። ዳፉንኩስ መን አብኑ ህጤ ዘራሮገ ግግለኖ። 11 አሪቹት አብስ ቡስተን ፉልቶ ጃተ ህተ ህጤ ዘራሩተ ሞሽታእ። ዘራሩንትስ ግግልታእ። አሞ ዘራሮስ ደኑንኩ በአኖ። ህትጉንተ ዱበላሹ አልሃ ዎሩታ እሀንን ሬሀኖ። 12 ሀዉ ኢሌስ ጃተ ቃር ኡረኖ መንቹ ማሰአሜሃ። ዳፉንኩስ ሀዋን ቃር ኡሬተኔ መገኑ ኢትታስ ኬኒ ኣሶተ ተሳ አሴ ሄቸ ዘዉደ + ኣቀኖ። 13 አዪ ኬነመኖ ጃተ «መገኑ ኬኖኤ» ሆረን ዩንከ። ዳፉንኩስ መገኑ ሂላሪን ኬነኖበአ። አሞ ገጉንኩስ አዬኒ ኬነኖበአ። 14 ጠሁ እኮዳ ሀኩ መንቹሁ ኬነመኖ ገግስ ሂለ ቁልጢን ምደሜቲ መለጠሜቲ። 15 ህከኒች ዘኪን ሂሉ ቁልጡ ሰላዕን ባጢለ ቀለኖ። አሞ ባጢሉንኩ ሌእኬእ ሬሁተ ቀለኖ። 16 ኢተንቴንተ ኢ ህዛከ! ሉሴኖችዬ። 17 ዊሙነ ደናሙ ኣሰንቹ ሆሩንኩ ዋለኖ ሰሜቼት። ህኩሩንኩ ጫክ አነ እኮነ ዶረሙምቦ እንዶ ሀሌቾገ ዘሁምቦ መገንቢች ድርታእ። 18 ቆጨንቺችስ በህረተ እንኩንተ መገኑ ገግስ ሀሲኒ ገሬስ ላጋኒ እሌኔ። 19 ኢተንቴንተ ኢ ህዛከ! ካን ደግዬ። መኑ ሆሩንኩ መጮጪ ሰርበሜኢ እሁን። ጠሁ እኮዳ ጠሃቂሃ አሙዕረሚሃ ደሰ እሁን። 20 ዳፉንኩስ መን አሙሬን መገን ሙጩርመት ሁጀተንታበአ። 21 ህከንተኔ ቡሽመታ ሂልመተ ሆረንታ ኡጅቴን ዎዘናንተዕኔ ካሰንቶ ፎልዕኔ ፈእሲ ደንድታ ላገተ ማሽማን ኣቅዬ። 22 መገን ላገተ ዊንሽቴነንተረ እክዬ በጋን ገገዕኔ ሉስጭቴነን መጮጫኑ ጠለ እኬኖችዬ። 23 ላገስ መጮጭ ሁጄን ሆስሱምቡ መንቹ ገግሞጢን ገገስ ጡደቀኖ መንቹ አጉደኖ። 24 ዳፉንኩስ ህኩ መንቹ ገገስ ገግሞጢን ጡደቅ ሀደተ ፉሎገን መ አጉደኖንዶ ሰርብን ሀበኖ። 25 ጠሁ እኮዳ ዎማንማን ፉሸኖ መገን ሴረ ጡጅ እሶን ቃረኖሁ እሱንከ መጮጭ ሀቡዕናች ሁጄ አሌን ሆስሰኖሁ ሁጄንተስ ሆራንን ማሰአሜኢ እሀኖ። 26 አረብስ ኤጌጡዕናች «መገኑ አመዕኔምየ» ያኖ ሆሩንኩ ገገስ ሉስጨዮሃ። አሞ አመዕነቱንኩስ ጠለላ። 27 አነ መገን ብሬን ቡሽመት ዮበእ ሙጩሩ አመዕነቱ ከኔት። ህኩስን ህዬሰተ ኦሱታ ምኔኑ ሬሄ ሜንቱሃ ሀውቶ ጃተ ካዕሏ። አሞ ገገ ተን ኡለ ቡሽማች ቆረጷ።
1 አብን ቀርቹ እኮ ቀርቿኔ ዬሱስ ክርስቶሳን አመዕንቴንተ ኢ ህዛከ! አዕኖኦት መን ሜሬሮን ሆረን አነኖመተ አስቴኖችዬ። 2 አጉዲሻሀንስ ለሙ መንቹ ጠጵቴንተበ ዋልታእ። መቱስ አንጋንተስ ዎርቅ ቁብቹተ ዎዕር ደናምተ ኦድሸተ ኦደቄሃ። ዎሉስ ጡርቴ ኦድሸተ ኦደቄሃ ቡጥቹ። 3 ህተ ጃንተ ደናምተ ኦድሸተ ኦደቄ መንቹ አብኒን «ተን ደናሜ መዕኔን አፉዕል» ይቴነንተ። ጠሁ እኮዳ ቡጥቹስ «አት ህከኤ ኡር» እንዶ «ሎከኤባን ኡለ አፉዕል» ይቴነንተስ። 4 ህካን እኮች ኩን ሜሬሮንተዕኔ አነኖመተ ቆጯኒ እልተ ጡዴን ፍርዷኒበእንዶ? 5 ኢተንቴንተ ኢ ህዛከ! መጮጭዬ። አመዕነቲን ዱበላሻከተ እኩንታ እሱ ኢትታ ኬኒ ተሳ አሴ ሰሜ ዎሞመተ ረገኡንታ መገኑ ተን ኡለ አል ቡጠ ዶዕሬሰ። 6 ጠሁ እኮዳ አዕኖኦት ቡጠ ቢልሴነዮንተ። ጂችታክዕኔሩ ፍርድ ምን ጎሾሽታክዕኔሩ ቀባጣመተበእንዶ? 7 አዕኖኦት ገአንቴነንተ ደናሙ ሱዕመ ቦሮርታሩ ቀባጣመተበእንዶ? 8 «ገገክዕኔ ኢትቴነንተገ ዎሉ መነሃ ኢትዬ» የመም ጣፈሞ መገን ዎሞመ ሴረ ዊንሽቴንተደ ደናሙ አቴነዮንተ። 9 ጠሁ እኮዳ መን እልተ ጡዴን ጎዕልቴነንታ እኮች ባጢለ ሁጀቴነዮንተ። መገን ሴሩ ደምጊሀንክዕኔ ዎቀሰኖዕኔ። 10 መኑ መገን አዘዞች መትሴ ዝር ፈኦስረ ሆረንተ ዊንሼዳ ሆረንተ ዝሬሀንገ ዎልሰመኖ። 11 ዳፉንኩስ «ሳኦት» ዬ መገኑ አሞ «ሽቶት» ዬተኔ ሳኡምቦዳ ሽቶንቲች መገን ሴረ ዝርቴንት። 12 አሞ ሃሳዉዕኔ ሁጅዕኔ ዎማንማን ፉሸኖ መገን ሴራን ፍርደመኖክዕኔ እኮገ ሰውዪን እሁን። 13 ዳፉንኩስ መን ባጢለ ፈኡን ዩምቦ መንች አሌን መገኑሁ ፈኡን ዩምቡ ፍርደ ፍርደኖ። እኮዳ አጉሩ ፍርደ ቄለኖ። 14 ኢ ህዛከ! መቱ መንቹ «አመዕነቱ ዮኤ» ያን አመዕነቱስ ደናሜ ሁጄን መለሁምቦደ መ ካዕለኖስ? አሞ ህኩ አመዕነቱ ፈእሶስተ ደንደኖንዶ? 15 አጉዲሻሀንስ ኦደቅታሩ እታሩ ዮሰበእ ህዛከት ሄኦደ 16 ክዕኔኤች መቱ ሀስሰኖሰረ ኣሱዕናችሰን «ኢቡንክዕኔ። ዱብዬ። ጡመ ኦሮቅዬ» ዬሰደ ህኩን መ ካዕለኖሰ? 17 ህከኒ ሁጅት ዮበእ አመዕነቱ ገጉንኩስ ሬሄሃ። 18 ጠሁ እኮዳ መቱ መንቹ «ኬሳ አመዕነቱ ዮኬ። ኤሳንከ ሁጅት ዮኤ» ዬደ «አመዕነቱክ ሁጄችክ አነነ አስት ጡድሴኤ። አሞ አን አመዕነቱኤ ሁጄንተኤ ጡድሳንኬ» ያንስ። 19 አት መገኑ ሜጡ እኮገ አመዕንታንት። ህኩን ደናሟ። ጠሁ እኮዳ አመዕኑዕኑ ሀቡሱሁ ሁጠን አመዕነኖ። 20 አት ኩ ቀሉ መንቹ! ሁጄች አነነ እኮ አመዕነቱ ላሉት ዮበኢ እኮገ ደጋንትበእንዶ? 21 አኑኔ አብረሃም ቤቱስ ይሳቀ ክትሜኖ መዕኔን መገኒ ክትመ አስ ህንጨኤ ጃተ ሁጄን ሙጩርምበእንዶ? 22 ህከንተኔ አመዕነቱሲ ሁጅሲ ሜጡ እኮጋ አመዕነቱስ እስ ሁጀቾ ሁጄን ዊመ እኮጋ ጡዳንትበእንዶ? 23 ጡማንቾ መጣፋን «አብረሃም መገኑ አመዕኔእ። አመዕነቱንኩስ ሙጩርመተ እክ ዎልሰሞስ» የመንቶ ላገት ዊንቶእ። አብረሃምን «መገን ጃለ» የመም ገአሜእ። 24 ህከኒ መኑ ሙጩረኖ አመዕነቲን ጠሊን እሁዕናች ሁጄን በርግ እሁስ ጡዴነዮንተ። 25 ህትጉንተ ሳኣንቹት ረኣብ እስራኤል ሶቀማኑ ምኔንተሴ ኣቅት ዎሎ ዉዲን ኦሮታገ አስቶሰ ጃተ ሁጄንተሴ ሙጩርትምበእንዶ? 26 ፎሊች አነነ እኮ ማሉ ሬሄኢ እኮገንከ ሁጄች አነነ እኮ አመዕነቱሁ ሬሄሃ።
1 ኢ ህዛከ! ክዕኔኤች በትናሹክዕኔ ሮስሳኑ እኬኖችዬ። ዳፉንኩስ አዕኖኦት ደጌነንተገን ነኦት ሮስሳኑ እንኮምሩ ዎሎ ኬኒች ባሰ ፍርደ ኣቅናምተኔሃት። 2 ነኦት ሆሩንኩኔ ሆለመተ ጃተ ሉንሳም። ጠሁ እኮዳ ያኖራን ሆራንን ሉሱምቡ እስ ገገስ ቆረጲ ደንደኗ ቀነጤኖስሩ ዮበእየ መንቹ። 3 ፋርሱ ኔሳ አዘዘሙንተ አፎንተሰ ብጣለ ዎናም። ህከኒች ዘኪን ሀንሶም ዉዱ ሆረንከ መረኖገ አስኖተ ደንድናም። 4 አሞ መርከብተኔ ሰውዬለ። መርከቡ መሃ ቃሩ ቦብሩ ጎምበንየን መረመኖ አበረ እኮዳ መርከብስ ኦተኣንቹ ውጠ ሞቆገ ዮ ቀሆሪን ሀሾበ መሰኖ። 5 ህትጉንተ አረብት መኖማች ሆራችን ቀሁተ እኮዳ ቦልጠ ጠሀ ጠሃታእ። አሞ ቀሁት ጊረት አበ ሀቅ በረ ቡስታእ። 6 ህትጉንተ አረብት ጊረተ። እሴን መኖማችኔ ሆራችን ሾከተ። መኖመተ ሆረንተ ቡሽሳእ። አሞ ዶሊ ሆሪንከ ጠእቱምቦ ጊራን ቡበን መኖመተ ሆረንተ ቡስታእ። 7 ሞቹ፥ ጪአተ፥ ሃሞን ሹርይተን መረንታራ ዎእ ኣዜን ሌንቄቅታ ቆጨንቸ ሆረንካ መኑ ገበሪ ደንደኖ። አሞ ገበረንቴእን። 8 ጠሁ እኮዳ አረብተ ገበሮተ ደንዴኢ አዪ ዮበአ። ሻኖ መርዙ ዊሜሴተ። አሞ ፎሎጩ ዮሴበእተ ሂለ። 9 ህተን አረቤን ቀርቹሃ አነ መገኑሃ ገለጥናም። እሴንን መገን አጉዲሻን ቆጨሜ መነ ጤሌናም። 10 ሜጦ አፌች ገለቱሁ ጤሌሉሁ ፉለዮእ። ኢ ህዛከ! ህትተ እሁ ሀስሰኖበአ። 11 ሜጤ ቡዕሌቾችን ጤአኖ ዎኡሁ ቀራረኖ ዎኡሁ ቡቆተ ደንደኖንዶ? 12 ኢ ህዛከ! ኦዴቹት ዌር ላሉተ ላሊ ደንድታእንዶ? አሞ ዎይን ጡዱ ኦዴቾ ላሉተ ላሎተ ደንደኖንዶ? ህትጉንተ መጥናሞ ዎኢች አጌኖ ዎአ ደቂ ደንዴኖንዶ? 13 ክዕኔኤ ሜሬሪች ቆሩሁ መሌሱሁ አዬት? ደናሞገ ሄኢኒ ማሽማን ዊንቴ ቆርማኒ ሁጅስ ጡድሱን። 14 ጠሁ እኮዳ ሂለት መሶኦመቲ ገገ ኢቱሁ ዎዘናንተክዕኔ ሄኦደ ህከኔን ቦልጥቴኖችዬ። ገሬ አሌኒ ቆጰንቴኖችዬ። 15 ዳፉንኩስ ህትጎነት ቆርመት ተን ኡላቼት፥ ማሊቼቲ ሼጣንቺቼቲ በጋን መገኒቼትበአ። 16 መሶኦመቲ ገገ ኢቱሁ ዮ ቤቾን ብተቲ ሂለት ሁጅት ሆረንቲ ሄኣእ። 17 ጠሁ እኮዳ መገኒች ኣሰንታ ቆርመት ዎና ሙጩሩተ፤ ጡማንቹተ፤ ቢዘተኒ አዘዘንታታኒ። አሞ «ፈኡን» ዪን በሬደት ላሉት ዊንቴሴተ። ጎዕሉሁ ሳድጨንቹሁ ዮሴበእተ። 18 ጡመ ኢትታ መኑ ጡሚን ውጥ ሙጩርመ ላሉተ ጠጰታእ።
1 ክዕኔኤ ሜሬሮን ዮ ኦሉሁ በአንቸቲ ሀኖች ዋልቴሃረ? ኣዜንተዕኔ ኦለመኖ ማልዕኔ ቁልጢቼትበእንዶ? 2 መቱረ ቁልጥቴን ሀሴን ደቁ ሆጌንተተኔ መነ ሽቴነንተ። አሞ ቂንሻን ሀሴንተስረ ደቁ ሆጌንተ ጃተ በአንቴነንተኒ ቀጨንቴነንተኒ። መገኑ ኡጭቴኑምቡተኔ ሀሴንተረ ደቅቴነንተበአ። 3 ኡጭቴንተዳ ማልዕኔ ሰውታን ሆስሲ ሉሳን መገኑ ኡጭቴነንተተኔ ኡጭቴንተስረ ደቅቴነንተበአ። 4 አዕኖኦት ኩ አመዕነንቴኑምቡ መኑ! ተን ኡለ ጠሀ ኢትታሩ መገኒ ዲናከተ እሁሰ ደጌነንተበእንዶ? አቼ ተን ኡለ አል ጠሀ ኢተኖ ሆሩንኩ መገኒ ዲነ እኬእ። 5 መጣፋን «መገኑ ኣዜንተኔ አፉሼ ጡማንቹ አያኑ እሲ ጠሊ እንኩንተ ቃርስ ቁልጠዮእ» ዬኢ ጠላንከንዶ? 6 አሞ «መገኑ ቦልጥታረ ግበኖ። እኮዳ ማሸ ኬኒ ኣሰንቸስ ኣሰኖ» ያኖተኔ መገን ኣሰንቹ ሆሪችን አባ። 7 ህከንተኔ መገኒ ጠቀሜ። ጠሁ እኮዳ ሼጣንቺን ኡርጨምዬ። እስን ክዕኔኤች ሁነኖ። 8 መገንበ ህንጭዬ። እስን ክዕኔኤበ ህንጭያኖ። አዕኖኦት ባጢላመት! አንገዕኔ ሙጩርስዬ። አሞ ለሞዕምቴነንተሩ! ዎዘነክዕኔ ሙጩርስዬ። 9 ባጢልዕኔተኔ ክቼእዬ። ኣዬሽዬ። ኦእዬ። ኦሰሉክዕኔ ኦናን፥ በጅጉክዕኔ ክቼቻን ዶረንቱን። 10 ቀርች ብሬን ገገዕኔ ህርከእዬ። መገኑ ጦቅ ጦቅ አሰኖክዕኔ። 11 ኢ ህዛከ! መቱ መትዕኔ አሌን ሂለረ ጠሃቴኖችዬ። መቶ ህዜ አሌን ሂለረ ጠሃቀኖ እንዶ ህዜስ አሌን ፍርደኖ መገን ሴር አሌን ሂለረ ጠሃቀዮሃኒ ሴር አሌን ፍርደዮሃኒ። መገን ሴር አሌን ፍርድቶንቲች አት ሴር ቆረባንቹ እኩዕናች ፍርዳንቿ። 12 ሴረ ኣሰኖሁ ፍርደኖሁ ሜጦ መገኑ ጠለ። አሞ ፈእሲሃ በእሲሃ ደንደኖ እሶት ጠለ። እኮዳ መን አሌን ፍርድታንቲ አት አዬት? 13 አዕኖኦት «ከበር እንዶ ገኣተ ዎሉ ባዱ መን ህከኔ መቱ ዎጋ ኤጌናም። ዘዘን ቀልሲንሳም። ሆለመ ግዘ ጠጰዕናም» ይቴነንተሩ መጮጭዬ። 14 ዳፉንኩስ ገኣተ ም እሀኖንዶ ደጌነንተበአ። ፎሉዕኔ መሃቤ? አዕኖኦት ቀክቾ ጄቾ ጡደም በአኖ ፎሮፊትየገ። 15 ህከን ቆደ አዕኖኦት «መገኑ ዬደ ሄዕናም። አሞ ካንን ህካጵን አስናም» ዩ ሀስሰኖክዕኔ። 16 ጠሁ እኮዳ አዕኖኦት ህከን ቆደ ቦልጦንተክዕኔ ድከኤነዮንተ። ህትጎኑ ቦልጡ ሆሩንኩ ሂላ። 17 አቼ ደናሙ ጠሀ አሱ ደገን አሱምቦ መንቺ ባጢለ እሀኖስ።
1 ቴሱ አዕኖኦት ቀባጣመት መጮጭዬ። ቃሩ ሀዉ አሌንተዕኔ ዋለኖተኔ ክቼእዬኒ ኦእዬኒ። 2 ቀባጡዕኔ ሆረንት ሸንት በኤእ። ኦድሸዕኔን ብሊን እተንቴእ። 3 ዎርቁዕኔ ብሩዕኔ ጭኔእ። ህኩ ዎርቅዕኔነ ብርዕኔ ጭኑ ክዕኔኤ ነቃሸ እሀኖክዕኔኒ መኖመክዕኔን ጊረገ እተኖኒ። ከን ዘካንቾ በሬ ሆለመ ዱቡ ጠጴጭቴንተ። 4 አዕኖኦት ሀጢዳዕኔ መኒ ሁጄሰ ሁንክ ባቴንምበአ። እሶኦንት ያርተዮእ። ያረነሰን ሆረንከ ደንደኖ መገኑ መጮጬእ። 5 አዕኖኦንት ኡለ አሌን ሄሊኒ በጅጎኒ ሄኤንተ። ዱሊ ጢኬኖ ግዝገን ሜሼልቴንተ። 6 ሙጩሩ መንቹንከ ፍርድቴን ሽቴንተስ። ጠሁ እኮዳ እስ ኡርጨምምበክዕኔ። 7 ኢ ህዛከ! አቼ ቀርቹ ዋለንቀጤች ደንዴቂን ቆረጵዬ። ሆገኣንቹ ዎነቢሃ ዘክ ጤነሃ ደቀንቀጤች ደንዴቂን ደናምተ ኡለ ላሉተ ቆረጰኖ። 8 አዕኖኦቲ ህትጉንተ ደንዴቅዬ። ቀርች ዋል በሩ አብሽ ህንጭዬተኔ ቃርቴን ቆረጵዬ። 9 ኢ ህዛከ! ክዕኔኤ አሌን ፍርደሙምቦገ መቱ መትዕኔ አሌን ጉንጉንቴኖችዬ። ህኩዕኒን፥ ፍርዳንቹ ዋሎተ ህንጭዬእ። 10 ኢ ህዛከ! ቀርች ሱዕሚን ጠሃታ ህራጋኑ ሀወ ኣቂኒ እየቂኒ አጉዲሸተ እኮገ ጡጅዬለ። 11 አሞ ደንዴቂን ቃርቶረ «ማሰአንቴሃረ» ይናንሰ። እዮብ ደንዴቄገ መጮቴንተ። መገኑንኩ ዘካንቾን አሴስ በሬደ ጠሀ ሆረንከ ጡዴንተ። ዳፉንኩስ መገኑ አብሽ ቅሽጠኗኒ ቢዛኒ። 12 ኢ ህዛከ! መ ጠሂቺ ብርስቴን ሰማን እንዶ ኡላን ዎሎራን መሃኒ ጤሌዕልቴኖችዬ። ጠሁ እኮዳ ፍርዳን ኣጌኑምቦገ ጠሁዕኔ እሀኖ እኮደ «እሁን» እሁምቡ እኮደ «እሁንከ» ይዬ። 13 ክዕኔኤ ሜሬሮን አብሽ ክቼኤኢ ሄኦደ መገኑ ኡጩን። አሞ በጅቀሞ ሄኦደ መገኑ ገለጠን ዘመሩን። 14 ክዕኔኤ ሜሬሮን አዪ ሞሼ መንቹ ሄኦደ አመዕናን ማበር ኑባቡ ገኡን። እሶኦንት ሞሳንቾንተስ ቀርች ሱዕሚን ዘይተ ቡርት መገኑ ኡጭቱንስ። 15 አመዕነት ኡሰቱት ሞሳንቹ ፈይሳእ። ቀርቹንኩ ሞሲች ኬእሰኖስ። ሁጀቼ ባጢሉ ዮደ ፈኡን የመመኖስ። 16 ህከንተኔ አዕኖኦት ፈይቴኖተ ባጢለዕኔ አዕን-አዕኖኦንት ቢረ ይዬ። መቱ መቲሀዕኔ መገኑ ኡጭዬ። ሙጩሮ መንች ኡሰቶን መቆ ዮተኔ አበተ ሁጅተ ሁጀታእ። 17 ኤልያስ ኒገንከ ዮሃ መንቹ እኬ። ጠሁ እኮዳ ጤኑ ኡቡምቦገ ቃርስ መገኑ ኡጬ ጃተ ሰሱ ዎጋሃ ሌሁ አገነሃ ኡለ አሌን ጤኑ ሆረን ኡብምበአ። 18 ለንኪ መገኑ ኡጬ ጃተ ጤኑ ኡቦ። ኡለንት ላሉተ ላልቶእ። 19 - 20 ኢ ህዛከ! ክዕኔኤ ሜሬሪች መቱ ገሬ ዎቄች ሉጨሞደ ዎሉስ መንቹ ገሬበ ፈንቀሼስደ ባጢላሙ ሉሰ ዎቄች ፈንቀሺንተስ ባጢላም ፎል ሬሆች ፈእሼሃ። አሞ በትናሹ ባጢሉስ አጉረመኖገ አሴገ ደጉን።
1 - 2 ዬሱስ ክርስቶስ ሶቀማንቹ እኮም ጴጥሮሴች አኑ መገኑ ብርስን ደገኖ ቆርማንተስ ዶዕረንቴንተሪሃ ዬሱስ ክርስቶሲ አዘዘንቴኖታ ቄጊንተስ ኣዕልቴን ሙጩርቴኖታ ጡማንቾ አያኒን አነነ እኬንተሪሃ ጶንጦስ፥ ገላትይ፥ ቀጳዶቅ፥ እስይነ ቢታን ባዶን ብንቴን ኣግቻከተ እኬን ዮንተ መኒ ሶሀንቴታ ሶህኑ። ክዕኔኤንከ መገን ኣሰንቹሁ ጡሙሁ በተኡክዕኔ። 3 ዬሱስ ክርስቶስ ሬሆች ኬእ ዳፊን ሄአኖ ተሴ አባንስ ቅሽጢን ለንኪ እሎኔ ቀርቿኔ ዬሱስ ክርስቶስ አኑ መገኑ ገለጠሙን። 4 እስን ለንኪ እሎኔ ሆረን በኡምቡነ ቡሽመት ዮበእ እንዶ ህጉምቡ እረ ረገዕኑንታት። ህኩ እሩንኩ ሰማን ክዕኔኤ ቆረበም ዮእ። 5 አዕኖኦንት ዘካንቾ ጄቾን ደገሞተ ቅጠሞ ፈኢ አመዕነት ዉዲን መገን መቄን ቆረበንቴንተ። 6 መሃ ቴሱ ቀሆ ጄቾ አነነ አነነ ሀዊን ክቼኤንተዳ ከን ጠሃን በጅቀንቴነንተ። 7 ህኩንን መሃ ጊራን ኬነሞዳ በአኖ ዎርቂቺ አብሽ አበ እኮ አመዕነቱዕኔ ገሬቢ እኮጉ ለሉንታት። ህኩ አመዕነቱዕኔን ዬሱሱ ክርስቶሱ ፈንቀል ዋለኖ ጃተ ገለት፥ አብንሃ ህበሃ ኤበኖክዕኔ። 8 አዕኖኦንት እሱ ጡዴኑዕናችን ኢትቴነዮንተስ። አሞ ቴሱ መሃ እሱ ጡዴኑምቦስዳ አመዕንቴንተስኒ ኩሌኖሀኒች አሉዲን እኬነ አበ በጅጎን በጅቀንቴነዮንተኒ። 9 ዳፉንኩስ አመዕነትዕኔ ቱመቱተ እኮ ፎልዕኔ ፈኡ ደቅቴነንተተኔሃት። 10 ክዕኔኤ ኣሰመኖ መገን ኣሰንችተኔ ህራጎ ህራጋኑ ከን ፈእተኔ ቃርስት ቆርምተን ሀሶእ። 11 እሶኦንት ኣዜንተሰ ዮ ክርስቶስ ጡማንቹ አያኑ ክርስቶስ ሀውተኔሃ ሀዊችስ ዘኪን ዋለኖ አብንተኔሃ ዎናንከ ደግሲሽየንሰ ሀተ ጃተ እንዶ ሀትጎነ ዎቄን እሀኖንዶ ቆርምተዮ እኬ። 12 አሞ ሰሜች ሶሀሞሰ ጡማንቾ አያኒን ምሽራች ላገተ ኩልቶዕኔ መኑ ቴሱ ኩልቶዕኔ ጠህተኔ ህራጋኑ ጠሃቶ ጃተ ካዕልቶኢ ገጊሀንሰ እሁዕናች ክዕኔኤ እኮጉ ጫክ ለሌሰ። ህከ ጠሀንከ መገን ሰሜ ሶቀማኑ ጡዲ ቁልጥተዮእ። 13 ህከኒ ዎዘነዕኔ ሁጄ ቅጠንስቴን ገገ ኤጌጢን ሄእዬ። ዬሱሱ ክርስቶሱ ፈንቀል ዋለኖ ጃተ ደቅቴነንተ መገን ኣሰንቸ ዊመ ዎዘኒን ተሳ አስዬ። 14 አዘዘንታ ኦሶገ እክዬ በጋን ደጉ ሆጊን ዎና ሄኤነንተ እኬ ሂለ ቁልጡ አወንቴኖችዬ። 15 ጠሁ እኮዳ ገኤዕኔ መገኑ ጡማንቹ እኮገንከ አዕኖኦቲ ሄቻንተዕኔ ሆራንን ጡማኑ እክዬ። 16 ዳፉንኩስ «አን ጡማንቹ እኮምተኔ አዕኖኦቲ ጡማኑ እክዬ» የመም ጣፈሜእ። 17 አዬሃ ጎዕሉዕናች አን-አን አሌንን ሁጄስገ ፍርደኖ መገኑ «ኒ አነ» ይቴን ገእቴነንታ እኮች ተን ኡለ አሌን ዮንተ ቀጣን መገኑ ዋጂን ሄእዬ። 18 - 19 አዕኖኦት አናካችዕኔ ረገኤንተ ጠለለ ሄቻች ፈኤንታ ህገኖሪን ብሪን እንዶ ዎርቂን እሁዕናች ቀነጤኖሩ ቡሽመቲ ዮበእ ሆልች ቄግገ ዮ ክርስቶስ ሙጩሮ ቄጊን ዎዘንቴንተገ ደጌነንተ። 20 ክርስቶሱንኩ ዶዕረሞ ት ኡለት ቆጨንታሀኒች ብሬን እኮዳ ቴሱ ዘካንቾ ዶላን ክዕኔኤተኔ ለሌእ። 21 ሬሆች ኬእሾስነ አብን ኣሴስ መገኖን ዬሱስ ዉዲን አመዕንቴንተተኔ አመዕነቱዕኔ ተሶዕኔ መገኖኔት። 22 ገሬ አዘዘንቴነን ሳድጨንቹ ዮበእ ህዛኮመ ኢታን ገገዕኔ ሙጩርስቴን አዕን-አዕኖኦንት ጎደቢን ቃርስቴን ኢተምዬ። 23 ለንኪ እለንቴንታንኩ ዶሊ ሆሪንከ ቃርት ሄኣ መገን ላገ ዉዲን በኡምቡ ዜሪቼት በጋን በአኖ ዜሪቼትበአ። 24 ዳፉንኩስ «መኑ ሆሩንኩ ህጤየገ። አብኑስ ሆሩንኩ ህጤ ዘራሯገ። ህጥንት ሞልታእ። ዘራሩንት ግግልታእ። 25 ጠሁ እኮዳ መገን ላገት ዶሊ ሆሪንከ ቃርት ሄኣእ» የመሜእ። ክዕኔኤ ሰበከንቶ ምሽራች ላገንት ህተን ላገ።
1 አቼ ሂልመተ ሆረንተ፥ መለጡ ሆረንከ፥ ሳድጨንቸ፥ ቂንሸታ ሄምተ ሆረንታ ክዕኔኤች ቄርስዬ። 2 - 3 ቀርቹ ዬሱሱ ቢዘ እኮገ ጤዕነስ ጡዴንታች ቴመ እለንቶ ጪለገ ህተን ላጋን ፈኢ ሌኤኖተ ሂልመት ዮበእ መገን ላገ አዙተ ቁልጥዬ። 4 መንባን ግበሞነ መገኑ ዶዕር አብሾስ ሄቸ ክኑ እኮ ክርስቶስበ ህንጭዬ። 5 አዕኖኦቲ ሄቸ ክንገ እኬን ዬሱስ ክርስቶስ ዉዲን መገኑ በጅቀንሰኖነ መገኒ አጉደኖ ክትመ ህንጨቴኖታ ጡማኑተ ቄሳከተ እኬኖታ መገን ምን እኬን ምነምዬ። 6 ዳፉንኩስ ጡማንቾ መጣፋን «ዶዕረሜነ አብኑ ዮስ ኡቱብ ክኑ ጥዮን ዱን አሌን አፉሻም። እሶን አመዕነኖንኩ ሳለኖበአ» የመሜእ። 7 አቼ ክዕኔኤ አመዕንቴነንተ ኬኒ ህኩ ክኑ አብኑ ዮስየ። ጠሁ እኮዳ አመዕንቱምቦ ኬኒ «ምን ምንታ መኑ ገዶ ህኩ ክንቹ ምንስ ኡቱቡ እኮ» 8 አሞ «መኒ ጉፍቹ እሀኖ ክኑሃ መኑ ቆዕል ኡበኖገ አሰኖ ክኑሃ እሀኖ» የመሞሀንየገ። እሶኦት ቆዕልታኢንኩ እሶኦተኔ ስረን ደገም ገሎገንከ ላጋሀንስ አዘዘንቱምቡተኔሃት። 9 ጠሁ እኮዳ አዕኖኦት ቱንሶች ማለልሲሰኖ ጫካንተስ ገኤዕኔ መገን ማለልሲሳ ሁጅተ ኩልቴኖተ ዶዕረንቴንታ ዜረ፥ ዎምተ ቄሳከ፥ ጡማንቿ ምናደበኒ መገኒ ገግስየ መነኒ። 10 ስረ አዕኖኦት መገንየ መነበአ እኬ። እኮዳ ቴሱ መገንየ መነ። አሞ አዕኖኦት ስረ ማረቱተ ደቅቴኑምቧረ እኬ። እኮዳ ቴሱ ማረቱተ ደቅቴንተ። 11 ኢ ጃላከ! አዕኖኦት ተን ኡለ አሌን ኮሀሃ ኣግቻከታ እኬንተተኔ ፎሊንተዕኔ ኦለመኖ ማል ቁልጢች ቄዕርቴኑንተ ኡጫንክዕኔ። 12 ሂለረ ሁጀቴነንተሀንገ ሄዕምታዕኔ መገኑ አመዕንቱምቡ መኑ መገኑ ዋለኖ በር ደናምዕኔ ሁጅተ ጡድ መገኑ ገለጥቱንተ ህከን መንባን ሄቸዕኔ ደናምተ እኩን። 13 ቀርቾ ዬሱስተኔ ይቴን መን ሴሪ ሆሪንከ አዘዘምዬ። ሆራንከ መኒች አሉዲን ዮኢ እኮተኔ ዎሚ አዘዘምዬ። 14 ገሻኒሃ እኮደ ሂለረ ሁጀታ መነ ቀጠኡንታ ደናሙረ ሁጀታ መነ አብሱንታ ዎሙ ሶኬሰረ እኮተኔ አዘዘምዬሰ። 15 ዳፉንኩስ ደናሙረ ሁጀቴነን ደጉምቦ ኬን ቀልመ ሃሳወ ሰዕመኡ ህኩን መገኑ ሀሰኗ ጠሀ። 16 መገን ካዕላንገ እኬን ዎማንማን ሄእዬ በጋን ዎማንመዕኔ ሂልመተ ቤስቴነንተረ አስቴኖችዬ። 17 መነ ሆረንከ አብሽዬ። አመዕናኑንከ ኢትዬ። መገኑ ዋጅዬ። ዎመ አብሽዬ። 18 አላኖ! ቢዛነ በሬደ ቀርባሀንክዕኔ ጠሊ እሁዕናች ሂላከ ቀርባሃ ሆራራንን አብሴነን አዘዘምዬሰ። 19 ዳፉንኩስ መቱ መንቹ ደምጌነንየንስ ሀወ ኣቀን መገንተኔ ይ ደንዴቄደ ገለጠመኖ። 20 ሂለረ ሁጀቴን ህከንተኔ ቅጣጠንቴነን ደንዴቅቴንተደ አይ ገለጠኖዕኔ? ጠሁ እኮዳ ደናሙረ ሁጀቴን ህከንተኔ ሀወ ኣቅቴነን ደንዴቅቴንተደ መገኒች ገለት ደቅቴነንተ። 21 ገአንቴንታንኩ ከኒሃት። ዳፉንኩስ ክርስቶሱ አጉዲሸስ አወንቴኑንተ ክዕኔኤተኔ ሀወ ኣቂን አጉዲሸተ እኬዕኔ። 22 እስን «ሆረን ባጢለ ሁጀትምበአ። አፎንተስን ሾክመት ሆረን ደገንትምበአ» የመሟገ። 23 ቦሮሬመስ ጃንተ ፈንቀሽ ቦሮርምበአ። ሀወ ኣቄ ጃንተ ጠቤንማን ፍርደኖ መገኒ ገገስ ህግሽ ኣሴ በጋን ሸዕልምበአ። 24 አሞ ነኦት ባጢሊ ሬን ሙጩርማ ሄዕኑንተ እስ ገጉንኩስ ባጢለኔ ማሊንተስ መስቀልች አሌን እዬእ። እስ መዛንን አዕኖኦት ፈይቴንተ። 25 ዳፉንኩስ አዕኖኦት በኦ ሆለገ እኬንታረ እኬ። እኮዳ ቴሱ ፎልዕኔ ዜማንችነ ቆረባንችበ ፈንቀልቴንተ።
1 - 2 ህትጉንተ ምኔማከ! ምኔናካችዕኔ መ-መቱ መገን ላጋ አዘዘንቱምቡረ እኮዳ ሙጩሩተነ መነ አብሳ ሄቸዕኔ ጡድኬእ ላጋን ጠሃቱዕናችን ምኔማከሰ ደናሙ ሀለ ጡዲን ፈንቀልታኢ እሀኖተኔ ምኔናካሀዕኔ አዘዘምዬ። 3 ክዕኔኤ ደኑንኩ ሹሩበ ደጢን፥ ዎርቅ እረሃ እንገሃ ዎዕሪኒ ህረሴ እትሰተ ኦድሸተ ኦደቂኒ ጡደመኖጊን መክጨሙ እሁንከ። 4 ጠሁ እኮዳ ደኑዕኔ መገን ብሬን አብሰሜነ በኡምቦ መክጨንቺን ማሽማኒ ጪዕምመ ሰውቲኒ ኣዝ መኖማን እሁን። 5 ዳፉንኩስ ዎዶ ዶለ መገኑ ተሳ አስታ ጡማኑ ሜንቱ መክጨንቶኢ ህትጎኔት እኬ። እሶኦንት ምኔናካሀንሰ አዘዘንተዮ እኬ። 6 አዘዘንቶኢንኩ ሳረ አብረሃሜ «ኢ ቀርቾ» ይተን አዘዘንቶስሀንጊኔት። አዕኖኦቲ ደናሙ ጠሀ አስቴንተዳ ዋጀላሻከተ እኬኑምቦዳ ሳረተ ኦሱ። 7 ህትጉንተ ምኔናከ! ምኔማከዕኔ ሆግመ ቆጨንቸ እኮተኔ ቆርማን ሜጡ እኬን ሄእዬ። አሞ ኡሰቱዕኔ ከመንቱምቦገ ክዕኔኤንን በርገንት ሄቸ ኣሰንቸ ረገኣተኔ አብሽዬሰ። 8 አቼ ሆሩንኩዕኔ መቱ-መቲንተዕኔ ኢታን ሄእዬ። ዎሎ መን ሀወ ገግዕኔሀንገ አስቴን ሰውዬ። ህዛኮማን ኢተምዬ። በሬዳከታ ማሻከታ እክዬ። 9 አሞ ማሰኢች ህግየን ሂልመተ ሂልማን ቦሮዕረንቸ ቦሮዕረንቺን ፈንቀሽቴኖችዬ። ዳፉንኩስ አዕኖኦት ገአንቴንታ ማሰተ ረገኢሃት። 10 መጣፋን «ሄቸተ ኢተኖነ በሬደ በር ጡዲ ቁልጠኖ መንቹ አረብስ ሂልመተ ጠሃቂቺ አፎስ ሾክመተ ጠሃቂቺ ኤጌጡን። 11 አሞ ሂልማች ፈንቀልኬእ ደናሙረ አሱን። ህትጉንተ ጡመ ሀሱን። ጡመንከ አወኑን። 12 ዳፉንኩስ መገን እልት ጡማንበ ጡዳእ። መጨስን ኡሰቱሰ መጮጭቶተ ፈነንቴታ። ጠሁ እኮዳ ሂለረ አስታ መን አሌን መገኑ አሙሬ እልተ ጡድሰኖ» የመሜእ። 13 ደናሙረ አሲ ቁልጥቴንተደ ጌነኖዕኔ አዬት? 14 ጠሁ እኮዳ ገርተ እኮ ጠህተኔ ሀወ ኣቅቴንተደ ማሰአንቴንተረ እኬነንተ። እሶኦ ሸዕሉንከ ዋጅቴኖችዬ፤ ባቤኖችዬን። 15 እኮዳ ክርስቶሰ ቀርችገ አስቴን ዎዘናንተዕኔ አብሽዬ። ኣዜንተዕኔ ዮ ተሴተኔ ጠዕመኖክዕኔሀኒ ሆሪንከ ፈንቀሽቴኖተ ሆረንተ ጃተ ቅጠንቴንተረ እክዬ። ፈንቀሽቴነንተሲመ ማሽማኒ መነ አብሲኒ እሁን። 16 ክርስቶስረ እኬንተተኔ ዮዕኔ ደናሙዕኔ ሀለ ቦሮርታ መኑ ሂለረ አስቴንተሀንገ ሄዕምታዕኔ ጠሃን ሳልቱንተ ደናሙ ሰውቱ ሄኡንክዕኔ። 17 ዳፉንኩስ ህኩን መገን ሰውተ እኮች ሂለረ ሁጀቴን ሀወ ኣቂች ደናሙረ አሴን ሀወ ኣቁ ዎየኖ። 18 አሞ ክርስቶሱ ኔስ መገንበ ህንጨኦተ ይኬእ እስ መሃ ሙጩሩ እኮዳ ባጢላሞ መንተኔ ሜጥንተ ኮደተ ሬሄእ። እስን ማሊን ሬህኬእ ፎሊን ሄአኖ እኮ። 19 ህትጎንን ሞግ ኣዜን ኡሱረንት ዮ ፎላከበ መር ሰበኮሰ። 20 ህኩ ሞግ ኣዜን ዮሩንኩ ኖሄ ዶለ መርከቡ ቅጠመንየን መገኑ ደንዴቂን ቆረቦሰ ጃተ አዘዘሙ ግቦሃረ። መርከባን ኣግ ዎእ በኢች ፈኦ መኑ ቀ። ህኩስን ሄዜቶ መነ እኬ። 21 ህኩ ዎኡንኩ ክዕኔኤተ ፈእሰኖ ጥንቀትተ አጉዲሸ። ጥንቀቱንኩ አሊች ጡር ከሙ እሁዕናች ደናሞ ሰውቲን መገኒ ህንጨኤኖተ ኡሰቱ። ፈእሰኖንኩ ዬሱስ ክርስቶስ ሬሆች ኬኢኔት። 22 እስን ሰማ ፉል መገን መኬን አፉዕሌእ። እሲንከ መገን ሰሜ ሶቀማኑ፥ ዳናከቲ መቆ ዮሰሩ አዘዘንቴስ።
1 - 2 ክርስቶሱ ማሊን ኒተኔ ሀወ ኣቄተኔ ከኒች ዘኪን ተን ኡለ አሌን ሄኤነንተ ዶላን መገን ሰውትጊች ህግየን መን ቁልጥገ ሄኤኑምቦገ አዕኖኦቲ ከ ሰውተ ኦል ኦዳገ አስቴን አጵዬ። ዳፉንኩስ ማሊንተስ ሀወ ኣቄኢ አዪ ባጢለ ሁጀቱ አጉሬሃ። 3 አሞ መገኑ አመዕኑምቡ መኑ አሰኖሀንገንከ በለሌን፥ ሳኢን፥ ድምቢን፥ ሸላን፥ ልኪች ህግሴን አጊኒ ሽግገአኖ ቆጰን መገኒ ሰገዲኒ ሄኤንተ ህጎ ዶሉ እሀኖ። 4 እኮዳ ቴሱ ህከን በለሌ በትኔን እሶኦን ሜጡ እኬኑምቡተኔ ቦሮርታዕኔኒ ማለልታእኒ። 5 ጠሁ እኮዳ እሶኦት ሬሄ መንነ ፎሌ ዮ መን አሌን ፍርዶተ ቅጠሞ መገኒ ፈንቀሹተ ኣስታእ። 6 ማሊንተሰ መንገ ፍርደሞሰዳ ፎሊንተሰ መገንገ ሄኡንተ ምሽራች ላገት ሬሄ መኒሃ ሰበከንቶኢ ህከኒሃንት። 7 ሆራንከ ጠህ ዘካንቹ ኢሌእ። መገኑ ኡጪ ደንድቴነንተ ጋጌኤ ዎዘኑ ሄኡንክዕኔ። አሞ ገገ ኤጌጢን ሄእዬ። 8 ኢተት በትናሸ ባጢለ ማጢ ደንድታተኔ ሆራሪችን አሉዲን አዕን-አዕኖኦንት ቃርስቴን ኢተምዬ። 9 አሞ ጉንጉንቴኑዕናች አዕን-አዕኖኦንት ኮህጨምዬ። 10 ህትጉንተ አነነ አነነ መገን ኣሰንቺ አመዕነንቴንተ ቆረባኑ እኬን አኑንኩዕኔ አኑንኩዕኔ ኣሰሞዕኔ ኣሰንቺን ካዕለቀምዬ። 11 ህከኒ ጠሃቀኖ አዪ መገን ላገተ ጠሃቀኖሀንገ ጠሃቁን። አሞ ሁጀተኖ አዪ መገኑ ኣሴስ መቄን ሁጀቱን። ህትጎንን መገኑ ዬሱስ ክርስቶስ ዉዲን ሆራንከ ጠሃን አበኖ። አብኑሁ መቆሁ ዶሊ ሆሪንከ እሲ እሁን፤ አሚዕን። 12 ኢ ጃላከ! ጊረገ ቡስ ኬነኖ ሀው ኣዜን እኬንተ ጃተ ሮሰሙምቡ ጠሁ አሌንተዕኔ ኢሌሀንገ አስቴን ማለልቴኖችዬ። 13 ጠሁ እኮዳ ክርስቶስ አብኑ ለለኖ ጃተ በጅቀንቴነንተገን ክርስቶስ ሀው ቤቀማኑ እኬንተተኔ በጅቀምዬ። 14 አሞ ክርስቶስ ሱዕምተኔ ቦሮረንቴንተደ መገን አብሰሜ ጡማንቹ አያኑ ክዕኔኤ አሌን ፎሎጨኖተኔ ማሰአንቴንተሃረ። 15 ጠሁ እኮዳ ክዕኔኤች አዪ ሀወ ኣቀን ነሰ ሻንችገ እንዶ ሞገኣንችገ እንዶ ሂለረ ሁጀቾ መንችገ እንዶ መን ጠሃን ገኤኑዕናንስን ኣገኖ መንችገ እክ ሀወ ኣቁንከ። 16 እኮዳ አመዕናንቹ እኮተኔ ሀወ ኣቀኖ ሄኦደ ህከን ሱዕምተኔ መገኑ ገለጢች ህግየን ሳሉንከ። 17 ዳፉንኩስ ፍርዱ መገን ምኒች ኬእሽ አፈኖ ጃት ኢልቴእ። ፍርዱስ ብርስ ኔሳን ኬአኖ እኮች መገን ምሽራች ላጋ አዘዘንቱምቡ መን ዘካንቹ መቤ እሀኖ? 18 አሞ ጡማንቹ መንቹ ሀዊን ፈአኖ እኮች ሾኩነ ባጢላሙ መንቹ ሀትተ እሀኖለ? 19 ህከኒ መገኑ ሀሰኖ ዎቄን ሀወ ኣቅታሩ ደናሙረ ሁጀተን አመዕነሜ ቆጫንቺ ፎልሰ ሀደረተ ኣስቱን።
1 አቼ አን እሶኦንን በርገም አመዕናን ማበር ኑባቹ እኮሚ፥ ክርስቶስ ሀውተኔ ነቃሸ እኮሚሁ ከዘኩ ጡደመኖ አብን ቤቀማንቹ እኮሚሁ ሜሬሮንተዕኔ ዮ አመዕናን ማበር ኑባቡ ሰዛንሰ። 2 ክዕኔኤባን ዮ መገን ዜመተ ቆረብዬ። ቆረቤነንተሲንኩ ግዲን እሁዕናች መገኑ ሀሰኖጊን ኢታን እሁን። አሞ ባቅባሊን እሁዕናች ሁጄ ዮዕኔ ገሬ ሀሰናን እሁን። 3 ህትጉንተ ዜማሀንስ አጉዲሸተ እሂን በጋን ክዕኔኤ ኣዜን ዮ መነ መቄን ጠቅቴኖችዬሰ። 4 ህከኒ ዜማን አወንሳንቹ ዋለኖ ጃተ በኡምቡ አብን ዘዉደ ኣቅቴነንተ። 5 ህትጉንተ አዕኖኦት ሀርድት ኑባቢ አዘዘምዬ። «መገኑ ቦልጠኖ መነ ግበኖ። እኮዳ ቢዘ መኒ ኣሰንቸስ ኣሰኖሰ» የመሞተኔ ሆሩንኩዕኔ ቢዝመተ ኦድሸገ ኦደቅቴን መቱ-መቲሀዕኔ ካዕልዬ። 6 መገኑ ጄቾንተስ ጦቅ ጦቅ አሱንተክዕኔ ቃረ መገን አንጋች ዎሮዲን ገገዕኔ ህርክ ህርክ አስዬ። 7 አሞ መገኑ ክዕኔኤተኔ ሰውያኖተኔ ክቼእሰኖዕኔረ ሆረንከ እስ አሌን ኡጅዬ። 8 ህትጉንተ ገገዕኔ ኤጌጢን ሄእዬ፤ በቅዬን። ዲኑክዕኔ ዳቡሎስ ቁርጨአኖረ ሀሰን ቡርቀኖ ዞቤችገ ዘሀዮእ። 9 ተን ኡለ አሌን ሆራንን ዮ አመዕናኑት ህዛከዕኔ ህትጎነ ሀወ ኣቅታገ ደጌንኬኤን አመዕነቲን ቃርቴን ዳቡሎሴን ኡርጨምዬ። 10 ዬሱስ ክርስቶስ ዉዲን ዶሊ ሆሪንከ ሄአኖ አብንስበ ገኤዕኔ ሆራንከ ኣሰንች መገኑ ቀሆ ጄቾ ሀወ ኣቅቴንተሀኒች ዘኪን እስ ገጉንኩስ ሙጩርሰኖክዕኔ፥ ጋጌእሰኖክዕኔ፥ ቃርሰኖክዕኔኒ ቆጠርሰኖክዕኔኒ። 11 እሲንከ መቆ ዶሊ ሆሪንከ እሁንስ፤ አሚዕን! 12 አመዕነሜሃ ህዞ ይ ሰውያም ስላሴ ዉዲን ተ ሶህኑተ ገበንቾን ጣፌንክዕኔ። ጣፎዕኔንኩ ሰዞክዕኔታ ኩን መገን ገሬ ኣሰንቸ እኮገ ኩሎዕኔታ ይኔት። ህከኒ ከን መገን ኣሰንቻን ቃርቴን ኡርዬ። 13 ክዕኔኤገንከ ዶዕረሞ አመዕናን ማበሩ ባብሎን ከተማን ዮኢሁ ቤቱኤ ማርቆሲ «ጡመ ዮንተንዶ?» ይተዮክዕኔ። 14 ኢታን ሱንቀንቴነን አዕን-አዕኖኦንት ጡምጨምዬ። ክርስቶስረ እኬንተ ኬኒ ሆሪንከ ጡሙ እሁክዕኔ።
1 ዬሱስ ክርስቶስ አግሹሃ ሶቀማንቹሃ እኮም ስሞን ጴጥሮሴች መገንኔነ ፈእሳንቿኔ ዬሱስ ክርስቶስ ሙጩርማን ነኦት ደቅኖም አመዕነትገንከ ዮ አበ አመዕነቱ ደቅቶ መኒ ሶሀንቴታ ሶህኑ። 2 መገኑሃ ቀርቹኔ ዬሱሰሃ ደጊን ኣሰንቹሁ ጡሙሁ በተኡክዕኔ። 3 ገግስ አብኒኒ ቢዝማንተሲ ገኤኔ መገኑ ደንጎንስተኔ ሄቻሃ መገኑ አጉዲሃ ሀስሰኖረ ሆረንከ መገኖመ መቄንተስ ኣሴኔ። 4 ህከን ኣሴኔሪ ዉዲንን ሂለ ቁልጥ ዳፊን ተን ኡለ አሌን ዮ ቡሽማች ፉሸቅቴን መገኖመ ቆጨ ቤቀማኑ እኬኑንተ አብሽ አበ ተሳ ኣሴኔ። 5 ህከንተኔ አመዕነቶንተዕኔ በሬድመተ በርግቴኖተ ቃረገ አጰምዬ። በሬድማንን ቆርመተ በርግዬ። 6 ቆርማን ገገ ኤጌጡ በርግዬ። ገገ ኤጌጦን ደንዴቁ በርግዬ። ደንዴቆን መገኑ አጉዱ በርግዬ። 7 መገኑ አጉዶን ህዛኮመ ኢተተ በርግዬ። ህዛኮመ ኢታን ኢተተ በርግዬ። 8 ዳፉንኩስ ህኩሩ በተእ ሄኦክዕኔደ ቀርቹኔ ዬሱስ ክርስቶሰ ደጊን ሁጅተ ገፈርቴንተራ ላሉት ዮዕኔበእራ እኬኑምቦገ አስታክዕኔ። 9 ህከኒ ኩ ጠሁ ዮስበኢ አዪ ቄዕረ ዮረ ጡዲ ደንዱምቧ ቆቀ። እስ ከኒች ብሬ አሴ ባጢሉስ አጉረሞገ ሀቤሃ። 10 ህከኒ ኢ ህዛከ! ገአሙዕኔ ዶዕረሙዕኔ ቃርስቴኖተ ዎናቺ አብሴን ቃርዬ። ህካን አስቴንተደ ሆረን ቆዕልቴነንተበአ። 11 ህትጎንን ዶሊ ሆሪንከ ሄኣ ቀርቿኔነ ፈእሳንቿኔ ዬሱስ ክርስቶስ ዎሞማን ኣጌነንተ ዊሙ መቆ ኣሰመኖክዕኔ። 12 መሃ ከ ጠሀ ደጌንተዳ አፌንተ ገሬን ቃርቴን ሄኤንተዳ ከን ጠህተኔ ሆረንተ ጃተ ቃግሱ አጉራምበአ። 13 ህከኒ አን ፎሊን ዮም ቀጣን ክዕኔኤተ ቃግሲን በቀኡ ሀስሰኖኤ እኮገ ሰውያዮም። 14 ዳፉንኩስ ቀርቹኔ ዬሱሱ ክርስቶሱ ኩሎኤጊን ተን ኡለ አሊች ሬሆን ሰርብ አነነ እሃምገ ደጋም። 15 አን ቴሱ አጰመዮሚ ሬሄምሀኒች ዘኪን ከ ጠሀ ሆረንተ ጃተ ቃጊ ደንድቴኑንታት። 16 ቀርቿኔ ዬሱስ ክርስቶስ መቄነ ዋልስተኔ ኩኖንክዕኔ ጃተ ገጉኔ ህበስ ጡንዴት በጋን መን ቆርማን ዋልቶ ማኡተ አወኔበአ። 17 ዳፉንኩስ ህባሞ መገንቢች «እሶን በጅቀማምነ ኢታንስ ቤቱኤ ከኔት» ይታ ላገት ዋልቶስ ጃተ አነ መገኒች አብንሃ ገለትሃ ኣቄእ። 18 ነኦንት መገኒ አነነ እኬ ዱን አሌን እሲንን በርገም ዮምሀኔን ተ ሰሜች ዋልቶስ ላገተ መጮጭኔም። 19 ህከኒ ዎናቺ አበ ገርተ እኬ ህራግ ላገት ዮኔ። ህተ ላገንተ አንከሩ ሶዘንቀጤቺ ሶዝሜ ቤዜቹት ዎዘናንተዕኔ ጫክተንቀጤቺ ቱንሶን ጫክሰኖ ጫክገ አስቴን ቆረቤንተደ ደናሞገ አስቴነዮንተ። 20 ሆራሪችን ብርስቴን ጡማንቾ መጣፋን ዮ ህራገ ሆረንከ አዪ ገግስ ሰውትጊን ሂሪ ደንዱምቡ እኮገ ቆርስቴን ደግዬ። 21 ዳፉንኩስ ጡማኑ መነ መገኑ ሶክየንሰ ጡማንቹ አያኑ አወንሰንየንሰ ጠሃቴሃ በጋን ህራጉ ሆሩንኩ መን ሰውቲን ዋሉምቧ።
1 ከኒች ብሬ ቆጰናኑ ህራጋኑ መን ሜሬሮን ሄኦገንከ ክዕኔኤ ሜሬሮኒ ቆጰናኑ ሮስሳኑ ሄኣእ። እሶኦንት በኡ ኤባ ቆጰን ሮሸተ ሙጩጭስ ኣግሳእ። ዎዦሰ ቀርቹንከ ካድኬእ ገግሰ አሌን ሰርብት በኡ ኤበቅታእ። 2 በትናሹ መኑንኩ እሶኦ በለሌ ዎቃ አወንታእ። እሶኦ ዳፊንን ገሬ ዎቆ ቦሮረመኖ። 3 እሶኦንት ባቅባሊንተሰ ቆጰን ላገተ ጠሃተን ገግሰ መኪ ይት ቦጋክዕኔ። ፍርዱሰን ዎዶችን አፍ ደሰኖበአ። በኡሰን በቅይ ቆረበዮሳረ። 4 መገኑ ባጢለ ሁጀቶ ሰሜ ሶቀማኒ ቅሽጡዕናችሰ ጥለ በሌን ኡጅ ቱንሶ ኣዜን ኡሱርኬእ ፍርድ በር ቆረቡንተ ህግሽ ኣሴሳች፥ 5 ህትጉንተ ህጎ ዶላን ዮ መኒ ቅሽጡዕነ ሙጩርመተኔ ሰበከኖ ኖሄ ዎሎ ለመለ መኒንን በርግ ፈእሽኬእ ባጢላሞ መን አሌን በእ ዎአ ኤቦች፥ 6 ባጢለ ሁጀተኖ መኒ አጉዲሸተ እኩንተ ሶዶምነ ጎሞር ከተማከተ ቡስ ጠበሩ አስኒ ህምብርቅ ብጭርቀእኒ አሌንተሰ ፍርዴኢቺ 7 - 8 ጡማንቹ ሎጥ ሜሬሮንተሰ ሄአን በሪን በሪን ጡደኖነ መጮጨኖ ሂለተንሰ ሁጄ ዳፊን ሙጩሩ ፎሉስ ሀወዮ እኬተኔ ሾከ መን በለሌን ክቼአን ሄአዮእኬ ህከ ጡማንቹ ሎጤ ፈእሾቺ 9 መገኑ ሰገዳስ መነ ሀዊች ሀተእ ፈእሰኖንዶ ደገኖ። አሞ ባጢላሙ መነ ቅጣጠን ፍርድ በሩ ኢለንቀጤች ቆረበኖገ ደገኖ። 10 አነነንከ ቡሸ ሰውቲን ማል ቁልጡ አወንተን መገን መቆ ገዳ መነ ፍርዲ ቆረብ አፉሼሰ። ህኩሩንኩ እጋከታ ቦልጥታራ እኮተኔ ሰማን አብኑ ዮሰረ ቦሮርተኒ ዋጅታበአ። 11 ጠሁ እኮዳ መገን ሰሜ ሶቀማኑ እሶኦች መቄኒ ቃርማኒ አብታረ እኮዳ ቀርች ብሬን እሶኦ አሌን ቦሮር ፍርደ ኤባበአ። 12 ኩ ቆጰን ሮስሳኑንኩ ደጉምቡረንከ ቦሮርታእ። እሶኦንት ዎሻደሚሃ በኢሃ ቀለንቶነ ቆጨንቶጊንን ሄኣ ሰውቱ ዮሰበእ ግዝየገ። ህኩ ግዙ በአኖገንከ እሶኦቲ በኣእ። 13 ሾክመሰ ቆደ ደቅታእ። በራን ሸለተ አለጱ በጅጎገ ዎልሳእ። ክዕኔኤንን በርገንት እቻ ገአንታ ጃተ በጅቀንቶተ አለጵታተኔ ሳልሲሳሃራ ሽግገታሃራ። 14 እሶኦንከ ባጢለ ሁጀቱ አጉርቱምቡነ ሳኢን ዊንቴ እልት ዮሰ። አመዕነቶን ቃሩምቡ መነንከ ሉስሳእ። እዲዱ ሮሼ ዎዘኑ ዮሰ። እሶኦንት ጤሌለንቴሃ መነ። 15 አሞ ጠቤነ ዎቃ አጉርት ሂለ ሁጄች ቀሉተ ደቆተ ሀሾ ባሶሬ ቤት ባለኣሜ + ዎቃ አወንተን ሉሶእ። 16 ጠሁ እኮዳ ሾክማሀንስ ዎቀሰሞ። ዱደት ሀሩቹት መን ላጋን ጠሃትኬእ ህራጋንች መቻረ ኤጌዶእ። 17 ህኩ መኑንኩ ዎኡ ዮበእ ቡዕሌገ ዮሃረ። አሞ ቡብት ጎምብተንየን ኦሮቅታ ጉንጆገ ዮሃረ። ገዳመት ቱንሱት ቆረበዮሳረ። 18 ዳፉንኩስ ሉሰ ኣዜን ሄኣ መን ሜሬሪች ፉልት ዋልቶኢች ሆለመ ኤጌርቱምቡ መነ ጠለለተ ላገተ አፎ ዊንሽት ጠሃቂን ማል ቁልጢኒ ሳኢኒ ሉስሳእ። 19 መንቹ ቄሎስሪ ሚሃ ጠቀሞደ ህከን ጠሂ አግሹ እኮተኔ ገጉሰን ባጢል አግዘተ እኮገን ዎሉ መነ «ዎማንማን ፉልቴነንተ» ይተን ተሳ ኣስታሰ። 20 ቀርቹኔነ ፈእሳንቹኔ ዬሱስ ክርስቶሰ ደጊን ተን ኡለ አል ቡሽማች ፉሸቅቶሀኒች ዘኪን ፈንቀልትኬእ ህተን ቡሽማንን ቄለንት አፈንቶደ ዎነሰ ሄቻች ዘክ ሄቸት ሂለተ እካእ። 21 ዳፉንኩስ ሙጩርመ ዎቃ ደጎሀኒች ዘኪን ኣሰንቶሰ ጡማንቾ አዘዞች ዘኩ ፈንቀልታሀኒች ደጉዕናችስ ፈኤ እክየን ደናሟ እኬ። 22 «ዎሽቹ ቱፈነስበ ፈንቀለኖ» አሞ «ኣንሼመ ቦክቹ ኦርጫን ብርቂቅበ ፈንቀለኖ» ይታ አጉዲሸት እሶኦ አሌን ገርተ እኮእ።
1 - 2 ኢ ጃላከ! ት ቴሱ ጣፋንክዕኔት ለንክተ ደዳቤ። ለምንተ ደዳቤተ ጣፎንክዕኔ ከኒች ብሬ ጡማኑ ህራጋኑ ጠሃቶ ላገታ ሶቀማንዕኔ ዉዲን ደቅቴንተ ቀርችኔነ ፈእሳንችኔ አዘዙታ ቃጌኑንተ ጠቤነዕኔ ዎዘነ በቅ-በቀኦተ ይኔት። 3 ሆራሪችን ብርስቴን ዘካንቾ ዶላን ገግሰ ሂለ ምጠነ አወንታነ ገላጫ መኑ ገላጨን ዋልታገ ደግዬ። 4 እሶኦንት « ‹ዬሱሱ ዋለኖ› የመሞ ተሶ ሀከኔ ዮእ? ዳፉንኩስ ዎዶ አናከት ሬቶ ጄቾች አፍ ሆሩሩንኩ ቆጨሞ ጄቹተ ዮገንከ እክ ሄአኖ» ይታእ። 5 ህኩ መኑንኩ በትናሸ ጄቾች ብሬን ሰሞሁ ኡለቲ መገን ላጋን ቆጨንቶገ ደገንን «ደንጋምበአ» ይታእ። አሞ ኡለት ዎኢቺ ዎኢኒ ቆጨንቶገ ካዳእ። 6 ህኩ ዎኡንኩ ህተ ጃተ ዮእኬ ኡለተ በእሾ። 7 ጠሁ እኮዳ ህተን ላጋንን ቴሱ ዮ ሰሞሁ ኡለቲ ባጢላሙ መኑ በአኖ ፍርድ በሩ ኢለንቀጤች ጊራ ቆረበንት ኤጌርቴእ። 8 ኢ ጃላከ! መገንባን መቱ በሩ መቴ ኩሜ ዎጌገ እኮጋ መቴ ኩሜ ዎጎ መቶ በሬገ እኮጋ ከ ሜጡ ጠሀ ሀቤኖችዬ። 9 መ-መቶ መኒ ደሰኖ አጉጆሰዳ ቀርቹ ዬሱሱ ተሴ ላገስተኔ ደሰኖበአ። ጠሁ እኮዳ መኑ ሆሩንኩ ባጢለ ቢረ ይበ ኢሉንተ በጋን አዪ በኡንተ ሀሱምቡተኔ ክዕኔኤተኔ እየቀኖ። 10 ቀርቾ ዬሱስ ዋል በሩ ሞገኣንችገ ደንጎ ዋለኖ። ህከ በርንከ ሰሞ አበ ላጋን ህገኖ። ቆጨንቹ ሆሩንኩ ጊራን ቡብ ሺለኖ። አሞ ኡለቲ ኡለ አሌን ዮሩ ሆሩንኩ ቡበኖ። 11 - 12 ኩ ሆሩሩንኩ ህትጉተ ሺል በአኖ እኮች መገን በር ዋሉ ቆረቤነኒ ህኩ በሩንኩ ሰርብ ዋለኖገ አስቴነኒ ሙጩርማኒ መገኑ አጉዲኒ ሄኡ ሀስሰኖዕኔበእንዶ? ህከ በርንከ ሰሞ ጊራን ቡብ በአኖ። ቆጨንቹንኩ ጊረ አበ ኢቢን ሺለኖ። 13 ጠሁ እኮዳ ነኦት እስ ኣሴ ላገጊንን ሙጩርመት ሄኣ ሃሮ ሰማሃ ሃሮተ ኡለታ ቆረምባም። 14 ህከኒ ኢ ጃላከ! ኩ ጠሁ እሀኖገ ቆረቤነን ቡሽመቲ ቀነጤኖሩ ዮዕኔበእራ መገኒን ጡሙ ዮዕኔራ እኬን ደገንቴኖተ ቃርዬ። 15 ቀርቹኔ ዬሱሱ እየቄኢንኩ አዕኖኦት ፈኤኑንተ እኮገ ደግዬ። ህትጉንተ ኢተሜ ህዞኔ ጳዉሎሲ ኣሰንቶስ ቆርማን ጣፎክዕኔ ከኔንት። 16 እስን ደዳባካንተስ ሆራንን ከን ጠህተኔ ህትጉንተ ጣፌእ። ህተን ደዳባካንን ቆርሲ ሀውሰኖ መ-መቱ ጠሁ ዮእ። ቀሉነ ቃሩዕነ ዮ መኑ ዎልተ ጡማንቹተ መጣፈተ ሾክሳገንከ ህከ ጠሀሃ ሾክሳእ። ህካን አሲንተሰን በኣእ። 17 አቼ አዕኖኦት ኢ ጃላከ! ከ ጠሀ ዎናንከ ደጌንተተኔ ሾከ መን ሉሳን ምደንቴን ቃርቴን ኡርቴንተቢች ኡቤኑምቦገ ቆረጵዬ። 18 ጠሁ እኮዳ ቀርቿኔነ ፈእሳንቿኔ ዬሱስ ክርስቶስ ኣሰንቺኒ እሱ ደጊኒ ሌእዬ። እሲንከ ቴሱ ዶሊ ሆሪንካ አብኑ እሁን፤ አሚዕን።
1 ቆጨንቺች ብሬን ዮ ሄቸ ላገተኔ መጮኖሚ፥ እሌንተኔ ጡንዶሚ፥ ቆርስን ደንጎሚሃ አንጋንተኔ አንፎሚሃ ኩናንክዕኔ። 2 ህት ሄቸት ለልትየን ነኦት ጡንዶሚ ነቀንሳም። ከኒች ብሬ አና መገንባን ዮነ ኔሳ ጡደንቶ ዶሊ ሆሪንከ ሄኣ ሄቸተኔ ኩናንክዕኔ። 3 ክዕኔኤ ኔሳን ሜጦመት ሄኣጊ ጡንዶሚሃ መጮኖሚሃ ኩናንክዕኔ። ኒ ሜጦመንት አና መገኒኔቲ ቤቷንስ ዬሱስ ክርስቶሲኔቲ። 4 ካን ጣንፈዮሚ ሆርኔ በጅጉንት ዊመተ እኩንታት። 5 ዬሱሲች መጮኖሚሁ ክዕኔኤ ኩናም ሶህኑቲ «መገኑ ጫከ እኮተኔ እስባን ቱንሱት ሆረን ዮበአ» ይታታ። 6 ህከኒ «መገኒን ሜጦመት ዮኔ» ይነን ቱንሶ ኣዜን ሄዕናሚ እንኮሚች ቆጰነዮም በጋን ገሬን ሄዕንምበአ። 7 ጠሁ እኮዳ እስ ጫካን ዮገን ነኦንት ጫካን ሄዕኖምደ መቱ መቲሀኔ ሜጦመት ሄኣኔ። አሞ ቤቷንስ ዬሱስ ቄጉ ባጢሊች ሆሪችን ሙጩርሰኖኔ። 8 ህከኒ ነኦንትመ «ባጢሉ ዮኔበአ» ይናሚ እንኮምደ ገገኔ ሉስንሰዮም በጋን ገርት ኒ ኣዜን ዮበአ። 9 አሞ ባጢለኔ ቢረ ይኖምደ መገኑ አመዕነሜኢሃ ሙጩሩሃ እኮተኔ ባጢለኔ ሆረንከ «ፈኡን» ያኖ። አሞ ሂልማች ሆሪችን ሙጩርሰኖኔ። 10 ነኦንትመ «ባጢለ ሁጀንትምበአ» ይናሚ እንኮምደ መገኑ ቆጰናንቹ አስናም። አሞ መገን ላገንት ኒ ኣዜን ዮበአ።
1 ኢ ኦሶ! ካን ጣፈዮንክዕኔ ባጢለ ሁጀቴኑምቦጊሃት። ጠሁ እኮዳ ሀኩ መንቹሁ ባጢለ ሁጀቾደ አነ መገንባን ጠበቁ ዮኔ። እስን ሙጩሮ ዬሱስ ክርስቶሳት። 2 እስን ባጢለኔ አጉርሲሰኗ። አሞ ኒ ባጢለ ጠለ እሁዕናች ኡለ አሌን ሄአኖ ሆራንከ መን ባጢለ አጉርሲሲ ደንደኗ። 3 አዘዙስ ቆረምቦምደ መገኑ ደንጋምገ ህከኒን ቆርስናም። 4 እኮዳ «አን መገኑ ደጋም» ያን እስ አዘዙተ ቆረቡምቡ መንቹ ቆጰናንቿ በጋን ገርት እስ ኣዜን ዮበአ። 5 ጠሁ እኮዳ መገን ላጋ አዘዘመኖሀኔን ሆራንን መገኒ ዮስ ኢተት ዊመተ። ህከኒን እሶን ዮምገ ደንጋም። 6 አዪ «መገኒን በርገም ሄኣም» ያኖ ክርስቶሱ ሄኦገ እክ ሄኡ ሀስሰኖስ። 7 ኢ ጃላከ! ት ጣፋንክዕኔ አዘዙት ዎዶችን አፍ ዮታ አዘዙ በጋን ሃሮታ አዘዙበአ። ት ኤጅን ዮ አዘዙት ዎናንከ መጮጭቴንተተ ላገ። 8 አሞ ቴሱ ክርስቶሳኒ ክዕኔኤኒ ገርተ እክ ጡደንቶ ሃሮተ አዘዙተ ጣፈዮንክዕኔ። ዳፉንኩስ ቱንሱት ህግየን ቴሱ ገሬ ጫኩ ጫከዮእ። 9 አዪ «ጫካን ሄአዮም» ያን ህዞስ ግበኖ ቴሶ ኢለንቀጤች ቱንሶን ሄአዮእ። 10 ህዞስ ኢተኖ ጫክ ኣዜን ሄአኖ። ህከኒ እሱ ቆል ሉስሰኖሩ ዮበአ። 11 ጠሁ እኮዳ ህዞስ ግበኖ ቱንሶ ኣዜን ዮእ። ቱንሶ ኣዜንን ሄአኖ። ቱንሱንት እልስ ቆቅሶተኔ መረኖበ ደገኖበአ። 12 ኢ ኦሶ! ባጢሉዕኔ ዬሱስተኔ አጉረሞተኔ ጣፈዮንክዕኔ። 13 አናከ! ዎናችን ዮ እሱ ደጌነንተተኔ ጣፈዮንክዕኔ። ሀርዴ! ሂለረ ቄልቴንተተኔ ጣፈዮንክዕኔ። ኦሶ! አነ መገኑ ደጌነንተተኔ ጣፈዮንክዕኔ። 14 አሞ አናከ! ዎናችን ዮ እሱ ደጌነንተተኔ ጣፈዮንክዕኔ። ሀርዴ! ቆጠረተ እኬንተተኔ፥ መገን ላገት ክዕኔኤ ኣዜን ሄኣተኔሃ ሂለረ ቄልቴንተተኔሃ ጣፈዮንክዕኔ። 15 - 16 ኡለታ ኡለ አሌን ዮ ሂልመታ ኢትቴኖችዬ። ኡለ አሌን ዮሩ ሆሩንኩ ማልየ ቁልጡ፥ እሌየ ምጠነኒ ቀባጦን ድከኒ። ህኩ ሆሩንኩ ኡላ ጠሀ በጋን መገኒች እሁምቡ እኮተኔ አዪ ኡለ አሌን ዮረ ኢቴደ መገኑ ኢቱ እስ ኣዜን ዮበአ። 17 ኡለቲ ኡለ አሌን ዮረ ቁልጡሁ ህገኖ። ጠሁ እኮዳ መገን ሀሱ ዊንሸኖ ዶሊ ሆሪንከ ሄአኖ። 18 ኢ ኦሶ! ቲን ዘካንቹተ ጄቹ። ዘካንቾ ጄቾን «ክርስቶሰ ግበኖ ዋለኖ» ዬማ መጮጭቴንተገን ቴሱ ሆለሙ ክርስቶሰ ግባሩ ዋልቴእ። ህከኒን ዘካንቹተ ጄቹተ እኮገ ደንጋም። 19 ህኩሩንኩ ፉልቶኢ ኔሳቼት። ጠሁ እኮዳ እሶኦንት ኒሃረበአ። እሶኦት ኒረ እኬ እኬራን ኔሳንን ሜጡ ቃርት ሄኣ እኬ። ጠሁ እኮዳ እሶኦት ሆሩንኩ ኒረ እሁ ሆጉሰ ለሉንተ ኔሳች ፉልቶእ። 20 እኮዳ አዕኖኦት ጡማንቹ አያነ ኣቅቴንተተኔ ሆሩንኩዕኔ ገርተ ደጌነንተ። 21 አን ጣፈዮንክዕኔ ገርተ ደጌኑምቡረ እኬንተተኔ እሁዕናች ገርተ ደጌነንተራ ቆጰኑ ገሬ ኣዜን ዮበእገ ደጌነንተራ እኬንተተኔሃት። 22 ዬሱሰ «ክርስቶሳበአ» ይ ካደኖሀኒች በጋን ቆጰናንቹ አይ ዮእ? አሞ አነ መገኑሃ ቤቱሃ ካደኖ እስ ክርስቶሴየ ዲነ። 23 ቤቱ ካደኖሀኒ ሆሪንከ አኑ መገኑ ዮስበአ። አሞ ቤቶን አመዕነኖሀኒ ሆሪንከ አኑ መገኑ ዮስ። 24 ህከኒ አዕኖኦት ዎዶችን መጮቴንታ ክዕኔኤ ኣዜን ቃር ሄኡን። ዎና መጮቴንታንኩመ ክዕኔኤ ኣዜን ቃር ሄኦደ አዕኖኦት አነ መገኒኒ ቤቲኒ ሜጦማን ሄኤነንተ። 25 ቲን ዬሱሱ ኔሳ ኣሶተ ተሳ አሴታ ዶሊ ሆሪንከ ሄኣታ ሄቸ። 26 ካን አን ክዕኔኤተ ሉስሳ መንተኔ ጣፈዮም። 27 ጠሁ እኮዳ ክርስቶሲች ኣቅቴንተ ጡማንቹ አያኑ ኣዜንተዕኔ ዮተኔ ዎሉ ሮስሳንቹ ሀስሰኖዕኔበአ። እስ ሆረረንከ ሮስሰኖዕኔ። እስ ሮስሰኖዕኔንኩ ገርተ በጋን ቆጰናበአ። ህከንተኔ እስ ሮስሰኖዕኔጊን ክርስቶሳን ቃርቴን ሄእዬ። 28 ቴሱ ኢ ኦሶ! ዬሱሱ ዋለኖ በር ዋጅኑምቦጋ ሳኑምቦጋ እሶን ሄእዬ። 29 ክርስቶሱ ሙጩሩ እሁስ ደጌንታች ሙጩርመተ አሰኖ ሆሩንኩ መገን ቤቱ እሁስ ደጊ ደንድቴነንተ።
1 «መገን ኦሱተ» የመም ገአሙንተ አኑ መገኑ ኣሴኔ ኢተት ሀበንከተንዶ ከ ጡጅዬ። አሞ ገርንተ ነኦት መገንተ ኦሱ። ህከኒ አመዕኑምቡ መኑ መገኑ ደጉምቡተኔ ኔሲ ደገኖበአ። 2 ኢ ህዛከ! ቴሱ ነኦት መገንተ ኦሱ። ዘኮስ መ እንካምንዶ ደንጋምበአ። ጠሁ እኮዳ ዬሱሱ ዋሎ ጃተ እሱ ገገንከስ ጡንዳምተኔ እሱ አጉንዳምገ ደንጋም። 3 ኩን እሀኖገ ክርስቶሳን ተሳ አሰኖ ሆሩንኩ ክርስቶሱ ሙጩሩ እኮገን እሲ ገገስ ሙጩርሰኖ። 4 ባጢለ አሰኖ ሆሩንኩ መገን ሴረ ዝረኖ። ዳፉንኩስ ባጢሉ ገጉንኩስ መገን ሴረ ዝሯ። 5 ክርስቶሱ መን ባጢለ ቄርሶተ ዋሎገ ደጌነንተ። አሞ እሶን ባጢሉ ዮበአ። 6 እሶን ቃር ሄአኖ ሆሩንኩ ባጢለ አሰኖበአ። ባጢለ ሁጀተኖ ሆሩንኩ ክርስቶሰ ጡድምበእኒ ደግምበእኒ። 7 ኢ ኦሶ! አዪ ሉስሱንከዕኔ። ክርስቶሱ ሙጩሩ እኮገንከ መገን አዘዙተ ቆረበኖ ሆሩንኩ ሙጩሯ። 8 ሼጣንቹ ዎዶችን አፍ ባጢለ ሁጀተኖተኔ ባጢለ ሁጀተኖ ሆሩንኩ ሼጣንቺቼት። ህከኒ ሼጣንች ሁጅተ በእሶተ መገን ቤቱ ዋሌእ። 9 መገን ኦሱተ እኮሩ ሆሩንኩ ባጢለ ሁጀቲ ደንድታበአ። ዳፉንኩስ መገን ቆጩ እሶኦ ኣዜን ሄአኖተኔሃቲ መገኒች እለንቶተኔሃቲ። 10 መገን ኦሱቲ ሼጣንች ኦሱቲ ከኒን አነነ እክ ለልታእ። መገን አዘዙተ ቆረቡምቡሁ ህዞስ ኢቱምቡሁ ሆሩንኩ መገንየበአ። 11 ዎዶችን አፌን መጮቴንተ ሶህኑት «ነ-ነኦንት ኢተሙን» ይታታ። 12 ሼጣንች ዉዱ እክ ህዞስ ሼ ቃኤልገ እንኩንከ። እስ ህዞስ ሼኢ ሚሃት? ሁጅስ ሂለተ እክየን ህዜስ ሁጅት ደናምተ እኮተኔሃትበእንዶ? 13 ህከኒ ኢ ህዛከ! መኑ ግቦዕኔደ ማለልቴኖችዬ። 14 ነኦት ህዛከኔ ኢትናምተኔ ሬሆች ሄቻን ህንጎምገ ደንጋም። ጠሁ እኮዳ ህዞስ ኢቱምቡ ሬሆ ኣዜን ሄአዮእ። 15 አሞ ህዞስ ግበኖ ሆሩንኩ ነሰ ሼሃ። ነሰ ሻኖሀኒ ሆሪንከ ዶሊ ሆሪንከ ሄኣ ሄቸት ሄኡምቦስገ ደጌነንተ። 16 ክርስቶሱ ኔሳ ይኬእ ፎልስ ህግሽ ኣሴተኔ ኢተት መሃንዶ ደንጋም። ህከኒ ነኦቲ ህዛካሀኔ ፎልኔ ህግንስ ኣሱ ሀስሰኖኔ። 17 ጠሁ እኮዳ ተን ኡለ አል ቀባጡት ዮስ መንቹ ሀዋንቹ ህዞስ ጡጅ ቅሽጡምቡሲ እኮደ መገኖን ዮ ኢተት እሶን ሀትክ ሄኣእ? 18 ኢ ኦሶ! ሁጄኒ ገሬኒ ኢተሙን በጋን ጠል አፌኒ ላጋኒ ኢተሙንከ። 19 ህከኒ ገሬ መነ እሁኔነ መገን ብሬን ዋጁ ዮበኢ እግማን ህንጭዪ ደንድናምገ ደንጋም። 20 ዎዘኑኔ ሂለተ ሁጄሀኔ ቀነጠኖ እኮች መገኑ ዎዘኒችኔ አበ እኮሀኒ ሆረንከ ጠሀ ደገኖገ ደንጋም። 21 ኢ ጃላከ! ዎዘኑኔ ቀነጡምቡ እኮች መገን ብሬን ሳናምበአ። 22 ህትጉንተ ነኦንት መገን አዘዙተ ቆረምባምተኔሃ እሱ በጅግሰኖረ አስናምተኔሃ ኡጭናምረ ሆረረንከ እሲች ደቅናም። 23 መገን አዘዙንት ቤቷንስ ዬሱስ ክርስቶስ ሱዕማን አመዕንናምጊሃቲ መገኑ አዘጆኔ አዘዞገንከ ነ-ነኦንት ኢተማምጊሃቲ። 24 አዘዙስ ቆረበኖ ሆሩንኩ መገኒን ሄአኖ። አሞ መገኑሁ እሲን ሄአኖ። ህከኒ መገኑ ኔሳን ሄኡስ ደንጋሚ እስ ኣሴኔ ጡማንቾ አያኒኔት።
1 ኢ ጃላከ! አያኑ ሆሩንኩ መገንቢ እሁሃ መገንቢ እሁ ሆጉሲ ቆርምዬ በጋን አያነ ሆረንከ አመዕንቴኖችዬ። ዳፉንኩስ ኡለ አሌን ሆለሙ ቆጰን ህራጋኑ ኬኤእ። 2 መገን አያነ እሁስ አነነ አስቴን ደጌነንታ ከኒኔት። «ዬሱስ ክርስቶሱ ማለ ኦደቅ ዋሌእ» ይ አመዕን ኩለኖ ሆሩንኩ መገንየ አያነ። 3 ጠሁ እኮዳ ዬሱስ ክርስቶሱ ማለ ኦደቅ ዋሉስ ኩሉምቡ አያኑ ሆሩንኩ መገኔየ አያነበአ። «ህትጎኑ አያኑ ዋለኖ» ዬነንየን መጮቴንተገንከ ክርስቶሰ ግበኖ አያኑ ቴሱ ኡለ አሌን ዮእ። 4 ኢ ኦሶ! አዕኖኦት መገንየረ። ክዕኔኤን ዮኢ ተን ኡለ አሌን ዮሀኒች አበኖተኔ እሶኦተ ቄልቴንተ። 5 እሶኦት ተን ኡለ አል መነ እኮተኔ ተን ኡለ አል ጠሀ ጠለ ጠሃታእ። ህከኒ ተን ኡለ አሌን ሄአኖ መኑ መጮጨኖሰ። 6 ነኦት መገንረ እንኮምተኔ መገኑ ደገኖ ሆሩንኩ መጮጨኖኔ። እኮዳ መገኒች እሁምቡ መጮጨኖኔበአ። ህከኒን ገሬ አያነሃ ቆጰን አያነሃ ደንጋም። 7 ኢ ጃላከ! ኢተት መገኒች እኮተኔ ነ-ነኦንት ኢተሞ። ኢተኖ ሆሩንኩ መገኒች እለሜሃ። አሞ መገኑሃ ደገኖ። 8 መገኑ ኢተተ እኮተኔ ኢቱምቡ ሆሩንኩ መገኑ ደገኖበአ። 9 ቤት ዉዲን ሄቸተ ደቅኑንተ መገኑ ሜጡንከ ቤቱስ ኡለ አል ሶኮ። ህከኒን መገን ኢተት ሀበንከተንዶ ለልቴኔ። 10 ኢተተ ዩ ህትጉተ። ነኦት መገኑ ኢትኖምተኔ እሁዕናች መገኑ ኢቴኔተኔሃቲ ባጢሉኔ አጉረሙንተ ቤቱስ ሶኮኔተኔሃቲ። 11 ኢ ጃላከ! መገኑ ህትተ ኢቴኔች ነ-ነኦት ኢተሙ ሀስሰኖኔ። 12 መገኑ ጡጄ መንቹ ሆረን ዮበአ። እኮዳ ነ-ነኦንት ኢተሞምደ መገኑ ኔሳን ሄአኖ። አሞ እስ ኢተት ኔሳን ዊመተ እክ ሄኣእ። 13 መገኑ ጡማንቹ አያነስ ኣሴኔተኔ እሲን ሄዕናምገነ እስን ኔሳን ሄአኖገ ህከኒን ደንጋም። 14 አኑ መገኑ ቤቱስ ኡለ አል መነ ፈእሱንተ ሶኮገ ጡንዶሚ ኩናም። 15 «ዬሱሱ መገንየ ቤቱ» ይ ነቀሰኖ መንቾን ሆራንን መገኑ ሄአኖ። አሞ እስን መገኒን ሄአኖ። 16 ህከኒ መገኑ ኔስ ኢተኖገ ደንጋምኒ አመዕንናምኒ። መገኑንኩ ኢተተ። ኢታን ሄአኖ መገኖን ሄአኖ። አሞ መገኑንኩ እሶን ሄአኖ። 17 ተን ኡለ አሌን ክርስቶሱ ሄኦገ ሄዕኖምደ ኢተት ኔሳን ዊመተ እካእ። ህከኒ ፍርድ በር ብርስ እግማን ህንጭኖተ ደንድናም። 18 ገሬ ኢተት ዋጁ ፉሽት ኡጅታ በጋን ኢታን ዋጁ ዮበአ። ዋጁ ቅጣጢን ሜጡ እክ ዮተኔ ዋጀኖ መንቾን ገሬ ኢተት ዊመተበአ። 19 መገኑ ኔስ ብርስ ኢቴተኔ ነኦንት ኢትናንስ። 20 አዪ «መገኑ ኢታም» ያን ህዞስ ግበኖ ቆጰናንቿ። ጡደኖ ህዞስ ኢቱምቡ ጡዱምቡ መገኑ ኢቲ ደንደኖበአ። 21 ህከኒ ክርስቶሱ ኣሴኔ አዘዙት «መገኑ ኢተኖ ህዞሲ ኢቱን» ይታታ።
1 ዬሱሰ «ክርስቶሳ» ይት አመዕንታሩ ሆሩንኩ መገንተ ኦሱ። አነ ኢተኖ ሆሩንኩ ቤቱሲ ኢተኖ። 2 መገን ኦሱተ ኢትናምገ ደንጋሚ መገኑ ኢትኖምዳቲ አዘዙስ ቆረምቦምዳቲ። 3 «መገኑ ኢትኔም» ዩ አዘዙስ ቆረቧ። አሞ አዘዙስን ኬዕማሸተበአ። 4 ዳፉንኩስ መገኒች እኮ ሆሩንኩ ኡለ አሌን ዮ ሂለረ ቄለኖ። ኡለ አሌን ዮ ሂለረ ቄናሚንኩ አመዕነቲኔት። 5 ዬሱሱ መገን ቤቱ እኮገ አመዕነኖሀኒች በጋን ኡለ አሌን ዮ ሂለረ ቄለኖ አዬት? 6 ዬሱስ ክርስቶሱ ዋሎ ዎኢኔቲ ቄጊኔቲ በጋን እስ ዋሎ ጠል ዎኢኔትበአ። 7 ጡማንቹ አያኑ ገርተ እኮተኔ እስ ገርተ ነቀሳንቿ። 8 ገርተ ነቀሳሩንኩ ሰሶት። እሶኦንት ጡማንቿ አያነ፥ ዎኣኒ ቄግየኒ። አሞ ሰሲንከሰ ሜጦመት ዮእ። 9 ነኦት መን ነቃሸ ኣቅኖምደ መገን ነቃሹ ሆሪችን አባ። ነቃሹንኩስ መገኑ ቤትስተኔ ነቀሿ ጠሀ። 10 መገን ቤቶን አመዕነኖሀኔን ገግስ ኣዜን ነቃሹ ዮእ። መገኖን አመዕኑምቡ መንቹ መገኑ ቤትስተኔ ነቀሾ ጠሃን አመዕኑ ሆጎተኔ ህኩ መንቹ መገኑ ቆጰናንቹ አሴእ። 11 ነቃሹንኩስ መገኑ ዶሊ ሆሪንከ ሄኣ ሄቸተ ኣሴኔገነ ህት ሄቸንት ቤቶንተስ ዮገ ነቀሰኗ። 12 መገን ቤቱ ዮስ መንቺ ሄቸት ዮስ። ጠሁ እኮዳ መገን ቤቱ ዮስበእ መንቺ ሄቸት ዮስበአ። 13 መገን ቤት ሱዕማን አመዕንቴንተ ሆሪንከ ዶሊ ሆሪንከ ሄኣ ሄቸት ዮዕኔ እኮገ ደጌነንተጊ ጣፋንክዕኔ። 14 ነኦት ሆረረንከ እስ ሀሰኖጊን ጠዕምኖምደ መጮጨኖኔገ አመዕንናም። 15 ነኦት ኡጭናምረ ሆረንከ መገኑ መጮጨኖኔገ ደንጎሚች እሱ ኡጭኖምረ ሆረንከ ኣቅኖምገ ደንጋም። 16 አዪ ህዞስ ሬሆበ ኢልሱምቡ ባጢለ ሁጀተንየን ጡጆደ መገኑ ኡጩንስ። ባጢሉስ ሬሆበ ኢልሱምቡ እኮደ መገኑ ፈእሰኖስ። ጠሁ እኮዳ ሬሆበ ኢልሰኖ ባጢሉ ዮእ። ህትጎነ ባጢሊ «ኡጩን» ያምበአ። 17 ሂለት ሁጅት ሆረንት ባጢላ። ጠሁ እኮዳ ሹምቡ ባጢሉ ዮእ። 18 መገን ኦሱተ እኮሩ ሆሩንኩ ባጢለ ሁጀቱምቦገ ደንጋም። ዳፉንኩስ መገን ቤቱ ቆረበኖሰተኔ ሼጣንቹ ኡለኖሰበአ። 19 ነኦት መገንረ እንኮምገ ደንጋም። ጠሁ እኮዳ ተን ኡላን ዮ መነ ሆረንከ ሼጣንቹ ጠቄእ። 20 መገን ቤቱ ዋሎጋ ገሬቢ እኮ እሱ ደንጉንተ መሌሱ ኣሴኔጋ ደንጋም። ነኦንት ገሬቢ እኮ ቤቶ ዬሱስ ክርስቶሳን ሄዕናም። እስ ገሬየ መገኑኒ ዶሊ ሆሪንከ ሄኣታ ሄቸኒ። 21 አቼ ኢ ኦሶ! ቆጰን መገናካ ሰገዲች ገገዕኔ ቆረጵዬ።
1 ኑባቹ አን ዶዕረንቶ አማሃ ኦሶሃንሴ ሶኬምተ ሶህኑ። አን ገርተ ኢታንክዕኔገንከ ገርተ ደጋ መኑ ሆሩንኩ ኢትታክዕኔ። 2 ዳፉንኩስ ት ሜሬሮንተኔ ዮ ገርት ዶሊ ሆሪንከ ኔሳንን ሄኣታ። 3 አነ መገንነ ቤቷንስ ዬሱስ ክርስቶስ ኣሰንቹ፥ ማረቱቲ ጡሙሁ ገሬኒ ኢታኒ ኔሳን እሁን። 4 አን ኦሶችክ መ-መትት አኑ መገኑ አዘጆኔገንከ ገሬን ሄአዮረ ደጎምተኔ አብሽ በጅቀሜም። 5 ኢተንቴንትተኔ! ት አን ቴሱ ጣፋሚት ሃሮታ አዘዙበአ። እኮዳ ቴሱ ጣፋንኬት «ነ-ነኦንት ኢተሙን» ይ ኡጫንኬ ዎናችን አፍ ዮታ አዘዙ። 6 ገሬ ኢተተ ዩ መገን አዘዙተ ዊንሿ። ት አዘዙት ዎና መጮቴንተገን «ኢታን ሄእዬ» ይታታ። 7 ዬሱሱ ክርስቶሱ «ማለ ኦደቅ ዋልምበአ» ይታ ሆለሙ ሉስሳ መኑ ባዶን ሆራንን ኬኤእ። ህትጎኑ መንቹ ሉስሰኗኒ ክርስቶሰ ግበኗኒ። 8 አዕኖኦት ሁጀቴንተ ቆደ ሆረንከ ዊመ ደቅቴኖተ በጋን በኡምቦዕኔገ ቃርቴን ቆረጵዬ። 9 ክርስቶሱ ሮስሾሀኒች ቄዕረኖነ ክርስቶሱ ሮስሾሀኔን ቃሩምቦ መንቾን መገኑ ዮበእየ። ጠሁ እኮዳ ክርስቶሱ ሮስሾሀኔን ቃረኖ መንቺ አኑ መገኑሁ ቤቱ ዬሱሱሁ ሄኣስ። 10 አዪ ክርስቶሱ ሮስሱምቡረ አፍ ክዕኔኤበ ዋሎደ ምንዕኔ ኣግሴኖችዬስኒ ጡምሴኖችዬስኒ። 11 እሱ «ጡመ» ያኖ መንቹ እስ ሂለ ሁጄ ቤቀማንቹ እሀኖ። 12 ጣፎዕኔተ ሀሳም ሆለሙ ጠሁ ሄኦዳ ዎረቀታን ጣፎዕኔተ ሀሳምበአ። ህከን ቆደ ገጉንኩኤ ክዕኔኤበ ዋል ሃሳዎታ ሜጡንከ በጅቀሞታ ተሳ አሳም። 13 ዶዕረንቶ ህዞክ ኦሱት «ጡመ» ይተዮሄ።
1 ኑባቹ አን ገሬን ኢታንኬ ጋዮሴ ሶኬምተ ሶህኑ። 2 ኢ ጃለ! ፎሊን ጡመ ዮንትገ ደጋም። አሞ አን ሆሩሩንኩ ደነኖሄጊሃ ፈየ እካንትጊሃ መገኑ ኡጫንኬ። 3 መ-መትት ህዛከት ኢበ ዋልት አት ገርተ አፍ ሄኣንትገ ኩልትየን መጮጭኬእ አብሽ በጅቀሜም። 4 አን ኦሱኤ ገርተ አወንታገ መጮጭኬእ በጅቀማም ቀጠ ሚሃ አብሽ በጅቀማምበአ። 5 ኢ ጃለ! አት አመዕናኒ አነነንከ ኮሂ ካዕልታንትረ አመዕነቲን አተዮንት። 6 እሶኦት ኢተክተኔ አመዕናን ማበር ብሬን ኩልቴእ። ቴሱ መገኑ በጅግሰኖጊን ዎቄሰ ሽንቅተ ካዕልቶንትደ ደናሞገ ሁጀተዮንት። 7 ዳፉንኩስ እሶኦት አመዕኑምቦ መኒች ሽንቅተ ሜጡራ ኣቅቱዕናች ክርስቶስ ሱዕሚን ፉልቴእ። 8 ነኦት ገሬ ሁጄ ቤቀማኑ እንኮተ ህትጎነ መነ ካዕሉ ሀስሰኖኔ። 9 አመዕናን ማበሪ ጣፌም እኬ። ጠሁ እኮዳ ገጊንተስ አወንሳንቹ እሂ ሀሰኖ ድዮጥሮስ ጠሀኤ ኣቅምበአ። 10 ህከኒ አን ክዕኔኤበ ዋሎም ጃተ ድዮጥሮስ ኔስ ቦሮሮገ፥ ሄዕሜጋ አሞ እስ ኮሀ ኣቁ ግቦሀኒች አሉዲን ኮሀ ኣቅታ መነ አመዕናን ሜጦማች ፉሼጋ ሆረረንከ ኩላንክዕኔ። 11 ኢ ጃለ! ደናሙ አጉድ በጋን ሂለ አጉዶት። ደናሙ አሰኖ ሆሩንኩ መገንየ። እኮዳ ደናሙ አሱምቡ መገኑ ደገኖበአ። 12 ድሜጥሮሴተኔ መኑ ሆሩንኩ ደናሙ ነቀሰዮእ። አሞ ገርት ገጉንኩሴ ኩልተዮእ። ነኦቲ ነቀንሳንስ። ኒ ነቀሱንኩ ገርተ እኮገ አት ደጋንት። 13 አን ጣፋንኬ ሆለሙ ጠሁ ዮ እኬ። እኮዳ ዎረቀታን ጣፊ ሀስምበአ። 14 አን በገተ ጃተ ደቀማንኬገ ተሳ አሳም። ህተ ጃተ ሜጡ እንክ ሆረረንከ ሃሳውናም። 15 ጡሙ ኬሳን እሁን። ጃለክ ሆሩንኩ «ጡመ» ይተዮሄ። አሞ ጃለኔ ሆረንከ «ጡመ» ይ።
1 ዬሱስ ክርስቶስ ሶቀማንቹሃ ያቆቤ ህዞሃ እኮም ይሁድ ገአንቶሪ፥ አኑ መገኑ ኢቴሰሪሃ ዬሱሱ ክርስቶሱ ቆረቦሰሪሃ ሶኬምተ ሶህኑ። 2 ክዕኔኤንከ ማረንቹ፥ ጡሙሁ ኢተቲ በተኡክዕኔ። 3 ኢ ጃላከ! ሆሪንከኔን ሜጦማን ዮ ፈእኔተኔ ጣፎዕኔተ አብሽ ሀሼም እኬ። ጡማኒ ሜጤን ኣሰሞ አመዕነትተኔ ቃረገ አጰንቴኑንተ ሰዞዕኔተ ጣፉ ግደ እኮኤ። 4 ዳፉንኩስ ሆለመ ጄቾች ብሬን አሌንተሰ ፍርደመኖ እኮገ እሶኦተኔ ጣፈሜ መ-መቱ መኑ ክዕኔኤ ሜሬሩ ሙጩጭት ኣጌእ። እሶኦት መገንኔ ኣሰንቸ ሳኦን ዶርታታ ባጢላመ። አሞ እስ ጠሉ ዎመኔ ቀርቹኔ እኮ ዬሱስ ክርስቶሰ ካዳሃረ። 5 መሃ ከ ሆረረንከ ብርስቴን ጦፌን ደጌነንታ እኮዳ መገኑ መነስ ግብጥ ባዲች ፉሽ ፈእሾጋ አመዕንቱምቡረ ዘኮ በእሾሰጋ ቃግሶዕኔተ ሀሳም። 6 ህትጉንተ አብንሰ አጉርት ሀስሳሰ መዕንተ ሉሶ ሰሜ ሶቀማኑ መገኑ ዘካንች አቡ ፍርድ በሩ ኢለንቀጤች ዶሊ ሆሪንከ ገዳመ ቱንሶ ኣዜን ኡሱር ቆረበዮሰ። 7 አሞ እሶኦገን ሮሰንቱምቡተ ፎኩተ ሁጀቶ ሶዶምነ ጎሞር ከተማከቲ ሄጌጎንተሰ ዮ ከተመቲ ዶሊ ሆሪንከ ሄኣ ጊራን ቡብ አጉዲሸተ እኬእ። 8 ህትጉንተ ኩ ሀቃቃኑ ገግሰ መኖመተ ቡሽሰን መገን መቆ ገደዮእኒ ሰማን አብኑ ዮሰረ ቦሮርተዮእኒ። 9 ጠሁ እኮዳ መገን ሰሜ ሶቀማን አወንሳንቹ ምከኤል ሙሴ ሬሽተኔ ዳቡሎሴን ኦደሞ ጃተ «ቀርቹ አሙዕሮሄ» ዬስ በጋን ቦሮዕረንች ላገተ አሌንተስ ፍርዲ ሀስምበአ። 10 እኮዳ ኩ መኑ ዎሉ ፈእየን እሶኦት ቆርሲ ደንድቱምቡራ ቦሮርታእ። ዎዘኑ ዮበእ ግዝገ ቆጨንቺንተሰ ደጋ ጠሁ ሄኦሰዳ ህኩ ጠሁንኩ በእሰኖሰ። 11 ቃኤሌ ዎቃ አወንቶተኔ፥ ግዝተኔ ይት ባለኣሜ ሉሳን ኡቦተኔሃ «ቆሬ» ዬኖ መንቹ ኡርጨሞገን ኡርጨሚንተሰ በኦተኔሃ እሶኦ ኣዬ! 12 ህኩሩንኩ ክዕኔኤን በርገንት ኢተ ሜጦመ ማዳን ሄኦዳ ጉፍችየገ። እሶኦንት ገገሰ ማሬከቅታሃ ዜማኑ። አሞ እሶኦት ቦብሩ ብነእ ከምየን ጤኑ ዮበእ ጎምየገ። ህትጉንተ ጠጲን ጦቆለም ለሜ ሬሄነ ላለኖ አገናኒ ላሉምቦ ሀቅየገ። 13 ቴሱ እሶኦት ሳልሲሳሰ ሁጄሰ ሁምብ ኩፈተን አሙዕረሞ ዎእ ዎርጃምጋ ዶሊ ሆሪንከ ገዳመት ቱንሱት ቆረባሰ መዕኔች መዕንተ ዘህታ ቤዜጋ ዮሃረ። 14 አዳሜች አፍ ለመልቅ ቀለንች ሄኖክ ከሮኦተኔ «ህኩዕኒን፥ ቀርቹ ሆለመ ኩሜ ጡማኒን ዋለኖ። 15 ሆራንከ መን አሌን ፍርዶተ ሾካከታ ባጢላመታ ሾክመሰ ሁጄተኔሃ መገን አሌን ጠሃቶ ቦሮር ላገተኔሃ ዎቀሶተ ዋለኖ» ይ ህራጌእ። 16 ህኩሩ ገግሰ ዎዘንገ እከን ጉንጉንታሃረኒ ሳምሰተኔንከ ቁንቁንታሃረኒ። አፎንኩሰ ቦልጥ ላጋን ዊሜሃ። አሞ ገጊሀንሰ ካዕለኖረ ጠለ ሀሰን ዎሉ መነ መለጣእ። 17 ጠሁ እኮዳ ኢ ጃላከ! አዕኖኦት ቀርቿኔ ዬሱስ ክርስቶስ ሶቀማኑ ከኒች ብሬ ይቶ ጠሀ ሰውዬ። 18 እሶኦት «ዘካንቾ ዶላን ገግሰ ሂለ ሰውተ አወንተን ገላጫ መኑ ዋልታእ» ይቴ እኬ። 19 እሶኦንት መነ አነነ አስታሃረ፥ ማል ሰውተ አወንታሃራ ጡማንቹ አያኑ ዮሰበእየራ። 20 ጠሁ እኮዳ ኢ ጃላከ! አዕኖኦት ሆራሪችን አበኖ ጡማንቾ አመናቶንተዕኔ ቃርቴን ጡማንቾ አያን መቄን መገኑ ኡጭዬ። 21 ቀርቹኔ ዬሱሱ ክርስቶሱ ቅሽጢንተስ ዶሊ ሆሪንከ ሄኣ ሄቸተ ኣሰኖገ ቆረቤነን መገን ኢታን ገገዕኔ ቆረጵዬ። 22 መ-መቱ መለንታ መነ አመዕንታገ አስዬሰ። 23 መ-መቱ ኬኑንከ ጊራች ፉሽቴን ፈእሽዬሰ። ዎሊሀንሰ ዋጂን ቅሽጥዬሰ። እኮዳ ባጢላሙሰ አል ኡልቶ ኦድሸሳ ግብዬ። 24 ቆዕልቴኑዕናች ቆረቦዕኔታ አብንስ ብሬን በጅጎን ሳልሲሰኖሩ ዮበእረ አስ ኡርሶዕኔታ ደንደኖ 25 እስ ጠሉ ፈእሳንቹኔ እኮ መገኒ ቀርቿኔ ዬሱስ ክርስቶስ ዉዲን ዎዶችን አፍ ቴሱ ዶሊ ሆሪንከ አብኑ፥ ህቡ፥ መቆሁ ዳኖመቲ እሲ እሁን፤ አሚዕን።
1 ኩ ጫክ ለሌ ጠሁ በገ ጄቾን እሀኖገ ሶቀማኒሀንስ ጡድሶተ መገኑ ዬሱስ ክርስቶሲ ኣሴሃኒ ለሊሼሃኒ። ህከኒ እስ ሰሜ ሶቀማንቹስ ሶክ ሶቀማንቺሀንስ ኤሳ ዮሃንሴ ለሊሾኤ። 2 አን ዮሃንስ ተን መገን ላገ ገሬተኔ ዬሱሱ ክርስቶሱ ጫክሽ ጡድሾኤረ ሆረንከ ኩለዮም። 3 ከን መጣፋን ዮ ጠሁ ሰርብ ዊመኖ እኮተኔ ከ ህራግ መጣፈ አነበበኖሁ ከን መጣፍ ኣዜን ጣፈሞ ጠሀ መጮት ቆረባሩ ማሰአንቴሃረ። 4 - 5 አን ዮሃንስ «እስየ» ዬኖ ባዶን ዮ ለመለ አመዕናን ማበሪ ሶሀዮምየ ጡመ። ኤጂ ቴሱ ዮነ አሞ ፈንቀል ዋለኖ መገኒቺ ዎሞመስ በርጩም ብሬን ዮ ጡማንቾ አያኒቺ + አመዕነሜ ነቃሸ፥ ሬሆች ኬኢን ዎነቢሃ ኡለ አል ዎማካ ገሻንቹሃ እኮ ዬሱስ ክርስቶሲቺ ኣሰንቹሁ ጡሙሁ ክዕኔኤ እሁን። ኢቴኔሀኒ፥ ቄጊንተስ ባጢሊችኔ ሙጩርሴኔሀኒሃ 6 አናንስ መገን ዎሞመ ቄሳከተ አሴኔ ዬሱስ ክርስቶሲ አብኑሁ መቆሁ ዶሊ ሆሪንከ እሁን። አሚዕን። 7 መኑ ሆሩንኩ እሱ ቀሶሩ ፈኡዕናች ጎሚን ዋለንየን ጡዳእ። አሞ ኡለ አሌን ዮ ምናደቡ ሆሩንኩ እስ ዋልተኔ ኦአእ። ህኩ ጠሁ እሁን። 8 ሆረንከ ደንደኖ ኤጂ ቴሱ ዮነ ዋለኖ ቀርቹ መገኑ «ዎነቢሁ ዘክቢሁ አኔት» ያዮእ። 9 አን ህዞዕኔ ዮሃንስ ዬሱስተኔ ሀወ ኣቁ፥ እየቁሃ መገን ዎሞመተ ኣጉሃ ክዕኔኤንን ቤቀማምየ። አንን ዬሱሱ ክርስቶሱ ነቀሾ መገን ላገተ ጠሃቄምተኔ ዎኢን ክበሜ «ፍጥሞ» ዬኖ ባዶን ዮም እኬ። 10 - 11 መገን በሬን ጡማንቾ አያኒን እክ ዮምሀኔን ዘክኤ ዉዲን «ከ ጡዳንት ጠሀ መጣፋን ጣፍ። መጣፈስ ‹እስየ› ዬኖ ባዶን ዮ ‹ኤፌሶነ፥ ሰምርኔሰ፥ ጴርጋሞነ፥ ትያጥሮነ፥ ሰርዴሰ፥ ፌሌዴልፈሃ ሎዶቀሃ› ዬኖ ለመላንከ ከተማን ዮ አመዕናን ማበሪ ሶህ» ይታ ጡሩምቡልገ ዮ አበተ ላገተ መጮጬም። 12 ጠሃቄስ መንቹ ጡዲ ዘኩ ፈንቀሎም ጃተ ዎርቂን ሁጀተሜ ለመለ ጫከኖ ሻመ አፉሻንቺንተስ ጡጆም። 13 ህከን ሻም አፉሻንች ሜሬሮን ሎከተ ኢለኖ ቀምቢሰ ኦደቅ ሃሙስ ዎርቅ ጠጠቢን ቆዕሬ መንች ቤቱ አጉደኖ ጡጆም። 14 ቦቆስ ሙሙ ፉትገ እንዶ ቃንጭገ ዎጅኬሃ እኬ። አሞ እልስ ጊረ ለበን አጉዳታ እኬ። 15 ሎከስ ጊራን ሺልሴን መክሴመ ቡሬችገ ጭልጭል ይታታ እኬ። ላገንትስ ቦዋን ድረኖ ዎእገ ዮታ እኬ። 16 መኬስ አንጋን ለመልተ ቤዜተ አፌ እኬ። እስ አፌችን ለሞ ዉዲን ኢጳሽመት ዮ ጎራድት ፉልተዮ እኬ። አሞ ሚንስ በሬ ሜሬር አሪቾ ቀጠ ቤሌሌሰዮ እኬ። 17 አን እሱ ጡጆም ጃተ ሎከስ ኣዜን ሬሄ መንችገ እክ ኡቦም። እኮዳ እስ መኬስ አንገተ አሌንተኤ ኡጅ «ዋጅቶት! ዎነቢሁ ዘክቢሁ አኔት። 18 አን ሄኣምየ። አንን ሬሄም እኬ። ቴሱ ዶሊ ሆሪንከ ፎሊን ሄኣም። አሞ ሬሁታ ሲኦለሃ ቄላም መቆ ዮኤ። 19 አቼ ቴሱ ዮኢ፥ ከኒች ዘኪን እሀኖሃ ጡዳንቲሃ ጣፍ። 20 ዎርቂን መክሴመ ለመላንከ ሻም አፉሻንችነ መኬ አንጋን አፍየን ጡዶንት ለመልየንተ ቤዜ ሂረቱት ተኔት። ለመልንት ቤዜት ለመላንከ አመዕናን ማበርየ መገን ሰሜሃ ሶቀማኑ። አሞ ለመሉንኩ ሻም አፉሻንቹ ለመላንከ አመዕናንየ ማበረ» ዬእ።
1 «ኤፌሶነ» ዬኖ ከተማን ዮ አመዕናን ማበር መገን ሰሜ ሶቀማንቺ «ለመልተ ቤዜተ መኬስ አንጋን አፍ ዎርቂን ሁጀቴመ ለመለ ሻም አፉሻንች ሜሬሮን መረመኖ 2 ‹አን ሁጀቶንትገ፥ ኦርበኦንትጋ እየቅቶንትጋ ደጋም። አሞ ሶቀማኑኤ እኩዕናችን ‹ሶቀማኗ› ይታ መነ ቆጰናኑ እኮገ ቆርምት ደግኬእ እየቁ ሆጎንትገ ደጋም። 3 ሱዕምኤተኔ ሼኔቱዕነ እየቂን ደንድት ሀወ ኣቅቶንትገ ደጋም። 4 ጠሁ እኮዳ መቱ ግባንኬ ጠሁ ዮኢ ዎነ ዮኬ ኢተተ አጉርቴንት። 5 አቼ ኡባንትሀኒች ብሬ ሀከኔ ዮንትንዶ ሰውት ‹ቢረ› ይትኬእ ኤጄክ ሁጅተ ሁጀት። ህካንመ አቱምቦዳ ‹ቢረ› ይቱምቦዳ አን ዋል ሻምክ አፉሻንቹ መዕኔችስ ኦሮሽ ከማም። 6 ጠሁ እኮዳ አን ግቦምገንከ ‹ንቆለ› ዬኖ መን ሂለተ ሁጅተ ግቦንትጉ ደናሟ። 7 አቼ ጡማንቹ አያኑ አመዕናን ማበሪ ያኖ መጮታ መጨት ዮኢ አዪ ቃርስ መጮጩን። ሀወ ቄሎሀኒ መገንባን ዮ ፎሎጬኖ መዕኔን ሌኦ ሄቸ ሀቅ ላሉተ እቱንተ ኣሳም› ያዮእ» ይት ጣፍ። 8 «ሰምርኔሰ» ዬኖ ከተማን ዮ አመዕናን ማበር መገን ሰሜ ሶቀማንቺ «ት ሶህኑት ዎነ ዮነ ዘኮኒ ሄአኖ ሬህ ኬኦሀኒች ሶሀንቴታ። 9 እስን ‹ሀወኪ ቡጥመኪ ደጋም። እኮዳ አት ቀባጣሟ። አይሁደ እክ አይሁድ-መንገ እኩዕናች ሼጣንች ሀገ እክ ሱዕመክ ቆጰኒን በእሳገ ደጋም። 10 ብርተ ለቅ ኢለኖዕኔ ሀወ ዋጅቴኖችዬ። ሼጣንቹ አመዕነቱዕኔ ደጎተ ቶርዱመ በር ሀወ ኣቅቴኑንተ ክዕኔኤች መ-መቱዕኔ ኡሱሮ ምን ኣግሰኖ። አንን ሉየ ኣሴኖሀንገ ቄልቴንተ ቆደ ሄቸተ ኣሳንክዕኔተኔ ሬቴነንቀጤች ቃርዬ። 11 አቼ ጡማንቹ አያኑ አመዕናን ማበሪ ያኖ መጮታ መጨት ዮኢ አዪ ቃርስ መጮጩን። ሀወ ቄሎ ለንክ ኮደ ሬሁት ኡልታስበአ› ያዮእ» ይት ጣፍ። 12 «ጴርጋሞነ» ዬኖ ከተማን ዮ አመዕናን ማበር መገን ሰሜ ሶቀማንቺ «ት ሶህኑት ለሟንከ ዉዲን ኢጳሽመት ዮ ጎራድት ዮሀኒቼት። 13 እስን ‹ሼጣንቹ ዎሞዕሜባን ሄኣንትገ ደጋም። እኮዳ ክዕኔኤ ከተማን ሄአኖ አመዕነሜ ኢ ነቃሸ እኮ አንትጳሴ ሼጣንቹ ሄአኖባን ሼመ ጃተ ኤሳን ዮኬ አመዕነቱክ ካድምበአ። 14 ጠሁ እኮዳ ቀሁንኩ ግባንኬ ጠሁ ዮእ። ህኩስን ባላቅ ባለኣሜ ሰጅየን እስራኤል ኦሱት ሳኣጋ ሼጣንቺ ክትሜመ ክትም ማለ ሉስ እት ኡባጋ አሴ ጠሀ ኣቅት አወንታ መኑ ሜሬሮንተዕኔ ዮእ። 15 ህትጉንተ ክዕኔኤ ሜሬሮን ‹ንቆለ› ዬኖ መን ሂለተ ሮሸተ ኣቅት አወንተዮ መኑ ዮእ። 16 ቴሱ ቢረ ይ። ታበእደ ኪበ ደዕል ዋል አፌችኤ ፉልታ ጎራዴን ቀሳንሰ። 17 አቼ ጡማንቹ አያኑ አመዕናን ማበሪ ያኖ መጮታ መጨት ዮኢ አዪ ቃርስ መጮጩን። ሀወ ቄልቶሪ ማጠሜ ማነሃ ኣሰሞስ መንቺች በጋን ዎሉ መኑ ደጉምቡ ሃሮ ሱዕሙ ጣፈሜ ዎጁ ክኑሃ ኣሳም› ይ ሶኬእ» ይት ጣፍ። 18 «ትያጥሮነ» ዬኖ ከተማን ዮ አመዕናን ማበር መገን ሰሜ ሶቀማንቺ «ጊረ ለበን አጉዳ እልቲ ጊረ ሺልሴን መክሴመ ቡሬቹ አጉዳ ሎከቲ ዮ መገን ቤቱ 19 ‹አን ኢተክ፥ አመዕነቱክ፥ ሁጅኪ ቃርት እየቁኪ ደጋም። አሞ ኤጄክ ሁጄች ቴሶክ ሁጅት አበተ። 20 ጠሁ እኮዳ መቱ ግባንኬ ጠሁ ዮኢ ‹አን ህራጋንቹተ› ይታ ሜንትቹት ኤልዛቤል ኢ አግዘት ሳኡንታ ሼጣንቺ ክትሜመ ክትም ማለ እቱንታ ሮስሰን ሉስሰንየን ሰዕምት አጉርቴንት። 21 አን ሂልማችሴ ቢረ ይት ፈንቀልታ ጃተ ኣሴንሴ እኬ። እኮዳ ሳኡ አጉሩ ግቦእ። 22 ህከኒ አን እሴተ ዴስ አሌን ኡጃም። አሞ እሴንን ሳአኖ መኑ እሴን ሁጀቶ ሂለ ሁጄች ቢረ ይት ፈንቀልቱምቦደ አብስ ሀውታገ አሳም። 23 እሴ ኦሱተ በርችተ አስ ሻም። ህከኒ አመዕናን ማበሩ ሆሩንኩ መን ሙልሃ ዎዘነሃ ቆርም ደጋሚ ኤስ እሁኤ ደጋእ። አንን አኒንከዕኔ አኒንከዕኔ ሁጄዕኔገ ኣሳም። 24 ተ ሂለተ ሮሸተ ኣቅቴኑዕናቺ መ-መቱ መኑ ‹ሼጣንችተ ቆርመ› ያኖረ ሮሴኑዕናቺ ፈኤንተ ‹ትያጥሮነ› ዬኖባን ሄኤነንተ መኒ ዎልተ እይነተ እይሳንክዕኔበአ። 25 አን ዋለንቀጤች ዮዕኔ ቃርስቴን አጵዬ። 26 ዘካንቹ ኢለንቀጤች ሀወ ቄል ሁጄንተኤ ቃረኖሀኒ ምናደበ ገሸኖ መቆ ኣሳም። 27 አን አኒችኤ ኣቄምገንከ መቆ ኣሴሀን ቡች ኦዳተ ቢጠንሴኖሀንገ ብረት ደሚን ቢጠንሰን ጠቀኖ። 28 አሞ አን እሲ ሶዝሜ ብሬ ቤዜቹተ ኣሳንስ። 29 አቼ ጡማንቹ አያኑ አመዕናን ማበሪ ያኖ መጮታ መጨት ዮኢ አዪ ቃርስ መጮጩን› ያዮእ» ይት ጣፍ።
1 «ሰርዴሰ» ዬኖ ከተማን ዮ አመዕናን ማበር መገን ሰሜ ሶቀማንቺ «መገን አያኑሁ ለመልት ቤዜቲ ዮሲ ‹አን ሁጅክ ደጋም። ‹ሄአዮንት› ዬኖ ሱዕሙ ጠሉ ዮኬ በጋን አት ሬቴንት። 2 አን ሁጅክ መገንኤ ብሬን ሙጩሩተ እሁ ሆጎገ ደጎምተኔ በቅትኬእ ፈእ ሬሂ እኮረ ሬቱምቦገ ቃርስ። 3 ሀኖ መ ሮስሴመሄንዶ መ መጮቴንትንዶ ሰውት አዘዘንት ቢረ ይ። ቆረጵቱምቦደ ሞገኣንችገ ደንጎ ዋላም። ህከኒ መ ጃተ ኪበ ዋላምንዶ ደጋንትበአ። 4 እኮዳ ኦድሸሰ ጡርስቱምቡ ቀሁ መኑ ኬሳንን በርገንት ሰርዴስ ከተማን ዮእ። እሶኦንት ሀስሳረ እኮተኔ ዎጁተ ኦድሸተ ኦዲሴናንሰ ኤሳን በርገንት መረንታእ። 5 ሀወ ቄሎ ህትጉንተ ዎጁተ ኦድሸተ ኦደቀኖ። አን ሱዕመስ አንኤነ መገን ሰሜ ሶቀማንስ ብሬን በጅገን ኩላም በጋን ሄቸ መጣፊች ሱዕመስ ሺንሻምበአ። 6 አቼ ጡማንቹ አያኑ አመዕናን ማበሪ ያኖ መጮታ መጨት ዮኢ አዪ ቃርስ መጮጩን› ይ ሶኬእ» ይት ጣፍ። 7 «ፌሌዴልፈ» ዬኖ ከተማን ዮ አመዕናን ማበር መገን ሰሜ ሶቀማንቺ «ት ላገት ጡማንቹሃ ገሬቢሃ እኮሀኒቼት። አሞ እሲንከ ዳዊቴ ቁልፉ ዮሲ እኮተኔ እስ ፈኖ ኡሩተ አዪ ጡፈኖበአ። አሞ እስ ጡፎ ኡሩተ አዪ ፈነኖበአ። 8 እስን ‹ሁጅኪ መቆኪ ቀሁ እኮጋ ደጋም። እሁን በጋን ላገኤ ቆረቤንት። አሞ ሱዕመኤ ካድምበአ። ህከኒ አዪ ጡፊ ደንዱምቡ ኡሩተ ብሬንተክ ፈኔም። 9 አይሁደ እክ አይሁድ-መንገ እኩዕናች ሼጣንች ሀገ እኮ ቆጰናኑ ዋልት ሎከክ ኣዜን ኡብ ሰገዳኬገ አሳም። ህከኒን እሶኦት ኢቴንኬገ ደጋእ። 10 ‹እየቅ› ይ አዘጆንኬ ላገኤ ቆረቦንትተኔ ኡለ አሌን ሄአኖ ሆረንከ መነ ኬኖተ ዋለኖ ሀው ጄቾች ቆረባንኬ። 11 አን ደዕል ዋላም። አሞ አዪ ኬሳ የመሞ ሉየ ኣቁምቦገ ዮኬረ ቃርስት አጵ። 12 አን ሀወ ቄለኖ ኢ መገን ምን ኡቱቡ አሳምተኔ እስን ህከን ምኒች ሀደተ ፉለኖበአ። መገንኤ ሱዕመሃ መገንኤ ከተም ሱዕመሃ እስ አሌን ጣፋም። ህኩ ከተሙንኩ ሰሜች መገንኤቢች ዋለኗ ሃሮሃ ዬሩሳሌመ። አሞ ኢ ገግኤ ሃሮ ሱዕመሃ ጣፋም። 13 አቼ ጡማንቹ አያኑ አመዕናን ማበሪ ያኖ መጮታ መጨት ዮኢ አዪ ቃርስ መጮጩን› ይ ሶኬእ» ይት ጣፍ። 14 «ሎዶቀ» ዬኖ ከተማን ዮ አመዕናን ማበር መገን ሰሜ ሶቀማንቺ «ኩን ገርታ አመዕነሜ ገሬ ነቃሸሃ እኮሀኒች አሞ መገን ቆጨንቸ ዎና ቆጬሀኒች ኩለሜሃ። 15 እስን ‹አን ሁጅክ ደጋም። አት ግዴንትየበአ እንዶ ኢቤንትየበአ። ህከኒ ግደ እንዶ ኢበ እኬንት እክ አብሽ ደናሟ እኬ። 16 ግደ እንዶ ኢበ እኩዕናች ጉሙቴንቲ እኮንትተኔ አፌችኤ ፉሽ ቱ ዮሄታት። 17 አት ‹ሆለሙ ግዙ ዮኤ፤ ቀባጣሟ። ኮቼኤሩ ሜጡሩ ዮኤበአ› ይተዮንት። ጠሁ እኮዳ ሀዋንቹ፥ ሆግመ፥ ቡጥቹ፥ ቆቀሃ ከልማንቹሃ እኮንትገ ደቅትምበአ። 18 አት ቀባጣሙ እኮተ ጊራን ሺል መኬ ዎርቀ፥ ሸይዱክ ጡደሙምቦገ ኦደቅትየን ከልመክ ማጡንተ ዎጁተ ኦድሸታ ጠበት ጡዲ እሌንተክ ቡዕርታንት እሌ ዘቡሃ ኤሳች ህዕርታንትገ ሰዛንኬ። 19 አን ኢታም መነ ሆረንከ አሙዕራምኒ ቀጠኣምኒ። ህከኒ ጋብትኬእ ቢረ ይ። 20 አን ኡሮ ጎጨ ቆጨዮም። አዪ ላገኤ መጮጭ ፈኖደ እስበ ኣግ እሲንን እቸተ እታም። አሞ እሲ ኤሳንን በርገም እተኖ። 21 አን ሀወ ቄል አኒንተኤን ዎሞመስ በርጩማን አፉዕሌምገንከ ሀወ ቄለኖ ዎሞመኤ በርጩማን ኤሳንን በርገም አፉዕለኖገ አሳም። 22 አቼ ጡማንቹ አያኑ አመዕናን ማበሪ ያኖ መጮታ መጨት ዮኢ አዪ ቃርስ መጮጩን› ይ ሶኬእ» ይት ጣፍ።
1 ህከኒች ዘኪን ሰማን ፈነንቴ ኡሩተ ጡጆም። ከኒች ብሬ ኤሳን ጠሃተንየን መጮጬም ጡሩምቡል ላገገ ዮ ላገት «ከኒች ዘኪን እሀኖረ ጡድሳንኬ፤ ከበ ዋል» ይቶእ። 2 ሜጤን ጡማንቾ አያኒን እክኬእ ሰሜ ዎሞመ በርጩማን መገኑ አፉዕሌኢ ጡጆም። 3 ዎሞመ በርጩማን አፉዕሌኢንኩ ቡርጩቅጋ ገግሞጥጋ አብሽ ቤሌሌሰኗ እኬ። አሞ ዎሞመስ በርጩም ቶቾን ዘህት ሀሚሉ አጉዳ መገንዜቡት ዮሃ እኬ። 4 ህትጉንተ ዎሞመ በርጩም ቶቾን ዘህት ለሜነ ሾልት ዎሞመ በርጩመት ዮ እኬ። ህተን ዎሞመ በርጩማንን ዎጁተ ኦድሸተ ኦደቅት ቦቆንተሰ ዎርቅ ዘዉደ ዎዕርቴ ለሜነ ሾሉ ኑባቡ አፉዕልቴ እኬ። 5 ዎሞመስ በርጩሚች በሌሱት፥ ላገቲ ጉገነቲ ፉልተዮ እኬ። ዎሞመስ በርጩም ብሬን ለመሉ መርባቱ ቡበዮ እኬ። ህኩ ለመሉንኩ መርባቱ መገንየ አያነ እኬ። 6 አሞ ዎሞመስ በርጩም ብሬን ሬቄቾገ ዮ መጠሉ ቡርጩቁ አጉደኖ በሃር ዎእገ ዮኢ ዮ እኬ። ዎሞመስ በርጩመንከ ዘህት ሚኔ ዉዲኒ ኤተር ዉዲኒ ሆለመት እልት ዮ ሾሉ ፎላሙ ቆጨንቹ ዮ እኬ። 7 ህኩሩንኩ ዎነስቢ ዞቤቹ፥ ለንክስቢ ቦረ አጉዳሃረ እኬ። ሰክስሀኒ መን ሚንተ አጉዳ ሚንት ዮሃ እኬ። አሞ ሾልክቢ ቡር ያኖ ጋቅቹ + አጉደኗ እኬ። 8 ህከን ሾሏንከ ፎላሞ ቆጨንቺ አኒንከ አኒንከ ሌህት ጎኑት ዮ እኬ። ህተን ጎናካንን ኣዚኒ ቶቾኒ ዘህት ሆለመት እልት ዮሃረ እኬ። እሶኦንት «ጡማንቾ! ጡማንቾ! ጡማንቾ! ሆረንከ ደንድታንት ቀርቾ መገኖ! ዮንቲ፥ ሄኣንቲሁ ዋልታንቲሁ አቴት» ይተን አንከርሃ በራሃ ሙርቱዕናች ዘመርተዮ እኬ። 9 - 10 ህኩ ሾሉንኩ ፎላሙ ቆጨንቹ «አማዱ፥ አብኑሁ ገለቱሁ ኬሳ እሁን» ይተን ዎሞመ በርጩማን አፉዕል ዶሊ ሆሪንከ ሄአኖ ገለጥታ ጃተ ሆረንተ ለሜነ ሾሉንኩ ኑባቡ ብሬንተስ ኡብ ዶሊ ሆሪንከ ሄአኖሀኒ ሰገደዮ እኬ። አሞ ቦቆንተሰ ዮ ዎርቅ ዘዉደ ፉሽት ዎሞመስ በርጩም ብሬን አፉሽት 11 «ኒ ቀርቾ መገኖ! ሆረረንከ ቆጭቶንትሀኒሃ ገጊንተክን ሆሪንከ ፎል ኣስቶንትሀኒሃ አማድ፥ አብንሃ መቆሃ ኣቁ ሀስሰኖሄ አቴት» ይተን ዘመርተዮ እኬ።
1 ዎሞመ በርጩማን አፉዕሌሀን መኬ አንጋን አሊኒ ኣዚኒ ጣፈም ኡሱረምየን ለመለ ማተበ ዎሬን አፍሲሴመ ጣፈሜ ጣጠሞ ጎገ ጡጆም። 2 አሞ ቃሩ መገን ሰሜ ሶቀማንቹ አበ ላጋን «ከ ማተበ ዘሪሃ ጣፈም ጣጠሞ ጎገ ፈኒሃ ደንደኖ አዬት?» ያን አዋጀዮኢ ጡጆም። 3 እኮዳ ሰማን፥ ኡላኒ ኡላች ኣዚኒ ጣፈም ጣጠሞ ጎገ ፈኒ እንዶ ኣዝስ ጡዲ ደንደኖ አዪ ዮበአ። 4 አንን ጣፈም ጣጠሞ ጎገ ፈኒ እንዶ ኣዝስ ጡዲ ደንደኖ በጮተኔ አብሽ ኦኦም። 5 ህከ ጃንተ ህከኔ ዮ ኑባቢች መቱ «ኦኦት፤ ይሁድ ዜር ዞቤቹ ዳዊቴ ጠጵቢ ቄሎተኔ ጣጠሞ ጎገስ ፈኖታ ለመለንከ ማተበ ዘሮታ ደንደኖ» ዬእ። 6 አሞ ዎሞመ በርጩም ብሬን ሾሏንከ ቆጨንችነ ለሜነ ሾሏንከ ኑባብ ሜሬሮን ጎረጠሞ አጉደኖ ሆልች ቡትቹ ኡሬኢ ጡጆም። እሲንከ ለመሉ ቡዱሁ ለመልት እልቲ ዮሃ እኬ። ህት ለመልንት እልት ኡለ አል ሆረንከ ሶሀሜሃ መገንየ አያነ እኬ። 7 ህኩ ሆልች ቡትቹንኩ ዎሞመ በርጩማን አፉዕሌሀንበ መር መኬስ አንጋች ጣፈም ጣጠሞ ጎገ ኣቄእ። 8 ጣጠሞስ ጎገ ኣቄ ጃተ ሾሉንኩ ቆጨንቹሁ ለሜነ ሾሉንኩ ኑባቡሁ ሆልች ቡትች ብሬን ኡብ ሰገዶእ። አሞ አኑንኩ አኑንኩ ዲተሃ ህጣነ ዊንሼመ ዎርቅ ሙዴታ አፌ እኬ። ህኩ ህጣኑንኩ መገን መንተ ኡሰቱ እኬ። 9 - 10 እሶኦንት ሃሮ መዝሙረ «ጣፈም ጣጠሞ ጎገ ኣቅት ማተበንከስ ዘሪ ደንድታንቲ አቴት። አት ጎረጠንቶንትተኔ ቄጊንተክ ዜሪች ሆሪች፥ አነነተ አነነተ ላገተ ጠሃታ መኒች ሆሪች፥ ምናደቢች ሆሪቺ ባዲች ሆሪቺ መነ ዎዝ ኒ መገኒ ሁጀቱንተ ሰሜ ዎሞመ ቄሳከተ አስቴንት። እሶኦንት ኡለ አሌን ዎሞዕምታእ» ይት ዘመርቶእ። 11 ለንኪሃ ጡጆም ጃተ ዎሞመ በርጩመ፥ ሾሉንከ ቆጨንቸሃ ለሜነ ሾሉንከ ኑባቡሃ ዘህት ክብቴ ሆለመ መገን ሰሜ ሶቀማን ላገተ መጮጬም። እሶኦ ዎሉንት ዎልሴን ደንዴኑምቡተ አብስ በትናሸተ እኬ። 12 ህኩሩንኩ አበ ላጋን «ጎረጠንቶንት ሆልች ቡትቺ መቆ፥ ቀባጡት፥ ቆርመት፥ ቃርመት፥ አብኑ፥ አማዱሁ ማሰቲ ሀስሰኖሄ» ይቶእ። 13 አሞ ቴሱ ሰማን፥ ኡላን፥ ኡለ ኣዜኒ በሃር ኣዜኒ ሆራባንን ዮ ቆጨንቹ ሆሩንኩ «ዎሞመ በርጩማን አፉዕሌሀኒሃ ሆልች ቡትቺሃ ማሰት፥ አብኑ፥ አማዱሁ መቆሁ ዶሊ ሆሪንከ እሁን» ይተንየን መጮጬም። 14 ሾሉንኩ ቆጨንቹ «አሚዕን» ይቶእ። አሞ ኑባቡንኩ ኡብ ሰገዶእ።
1 ህከኒች ዘኪን ሆልች ቡትቹ ለመላንከ ማተቢች ዎነስቢ ዘር ፈነንየን ጡጆም። አሞ ሾሏንከ ቆጨንቺች መቱስ በንቆገ ጉጋ ላጋን «ከበ ዋል!» ያኖ መጮጬም። 2 አሞ ዎጁ ፋሹ ጡጆም። ፋሾንተስ ኮዕሬሀኒ ሉይገ ቄል መላተ ኣሴናን ፌጦነተ አፍ ቄለኒ ቄሎታ መሮ። 3 ህከኒች ዘኪን ሆልች ቡትቹ ለንክ ማተበ ዘር ፈኖ ጃተ ለንክስ ቆጨንቹ «ከበ ዋል!» ያኖ መጮጬም። 4 አሞ ዎሉ ዳሙ ፋሹ ፉሎ። ህከን ፋሾን ኮዕሬሀኒ ኡለ አሊች ጡመ ከምየን መኑ እስ-እሲንን ሸቀመኖገ አሰኖ መቆሃ አበ ብሰሃ ኣሴመስ። 5 ህከኒች ዘኪን ሆልች ቡትቹ ሰክ ማተበ ዘር ፈኖ ጃተ ሰክስ ቆጨንቹ «ከበ ዋል!» ያኖ መጮጬም። ህከኔን ገምበለ ፋሾን ኮዕሬ መንቹ አንጋንተስ ኬናንቹ አፌኢ ጡጆም። 6 ላገት ሾሏንከ ቆጨንች ሜሬሪች ዋልታኢ አጉደንየን መጮጬም። ህት ላገንት «አለሱ እኮደ መቶ በሬ ደሞሲን ለሙ ቡርጩቁ፥ ሶአ እኮደ መቶ በሬ ደሞሲን ሌሁ ቡርጩቁ እሁን። ጠሁ እኮዳ ዎይነሃ ዘይተሃ በእሶት» ይቶእ። 7 ህከኒች ዘኪን ሆልች ቡትቹ ሾልክ ማተበ ዘር ፈኖ ጃተ ሾልክስ ቆጨንቹ «ከበ ዋል!» ያኖ መጮጬም። 8 ህተ ጃተ ሺረ ፋሹ ጡጆም። እሶንን ኮዕሬሀን ሱዕሙ ሬሁተ። ስኦሉንኩ ዘኮንተስ አወነዮ እኬ። እሶኦንት ኡለ አል መኒች ሾልክ አፎ ኦሊን፥ ጎሪን፥ አበ ሞሲኒ ሞቺኒ ሽታጊ መቆ ኣሴመሰ። 9 ህከኒች ዘኪን ሆልች ቡትቹ ኦንትቅ ማተበ ዘር ፈኖ ጃተ መገን ላገተ ኩልቶተኔሃ አመዕነንት ነቀሶተኔሃ ሼመ መን ፎሉ ህጣነ ውሊሼኖ ጠረጴሲች ዎሮን ዮኢ ጡጆም። 10 እሶኦንት «ጡማንቹሃ ገሬቢሃ እኮንት ሆሪችን አሉዲን ዮንት ቀርቾ! ኡለ አሌን ዮ መናን ፍርድቱምቡሁ ቄግኔ ፉልቱምቡሁ ሀኩ በሩ ኢለንቀጤቼት!» ይተን አበ ላጋን ያርተዮ እኬ። 11 አኒንከ አኒንከ ዎጁተ ኦድሸተ ኣሴመሰ። አሞ እሶኦንከ «ክዕኔኤገንከ ዮ ሁጄዕኔ ጃለታ ህዛከዕኔ ሼናን ዎሉት ዊንተንቀጤች ፎሎጭቴን ኤጌርዬ» ዬን ኩሌመሰ። 12 ህከኒች ዘኪን ሆልች ቡትቹ ሌህቅ ማተበ ዘር ፈንየን ጡጆም ጃተ ኡለት አብስ ሌንቄቅቶእ። አሞ አሪቹት ጥጅ ኦድሸገ ድመተ ገምበለተ እኮእ። አገንቹንኩ ቄግገ ሆሮመንትስ ቢሽኮ። 13 አቡ ቦብሩ ኦዴቹተ ሌንቄቅሽየን ላሉሴ ግግልታሀንገንከ ሰሜ ቤዜት ኡለ አሌን ግግልቶእ። 14 ሰሞንኩ ጎግገ ጣጠም በኦ። አሞ ዱኑሁ ዎኢን ክበንቶ ኡለቲ መዕኔችሰ ኬእ በኦእ። 15 ህከኒች ዘኪን ኡለ አል ዎመት፥ አባኑት፥ ኦል ጋጠናከት፥ ቀባጣመት፥ መቃመት፥ አግዘቲ ዎማኑቲ ሆሩንኩ መኑ ቦንቆቆኒ ዱን አሌን ዮ ክነ ኣዜኒ ገጊሀንሰ ማጠንቶእ። 16 እሶኦንት ዱነታ ክነታ ገእተን «አሌንተኔ ኡቤን ዎሞመ በርጩማን አፉዕሌሀን እሌቺ ሆልች ቡትች አሙሬቺ ማጬኔ። 17 አቡ አሙሬሰ በሩ ዋሎተኔ አይ ኡሪ ደንደኖ» ይቶእ።
1 ህከኒች ዘኪን ሾሉ መገን ሰሜ ሶቀማኑ ሾሏንከ ኡለ ቶቾን ኡርትኬእ ኡለ አሌን፥ ሀቅ አሌኒ በሃር አሌኒ ሜጡሩ ቦብርሱምቦገ ኡለ ሾሏንከ ዉድ ቦብረ አፍየን ጡጆም። 2 - 3 ሄቸ መገን ማተበ አፌ ዎሉ ሰሜ ሶቀማንቹ አርፉል ዉዲች ዋሌኢ ጡጆም። እስን ኡለታ በሃረሃ በእሱንተ መቆ ኣሰሞሰ ሾሉንከ መገን ሰሜ ሶቀማኑ አበተ ላጋን ገእ «መገንኔ ሶቀማን ሚኔን ማተበ ዎነንቀጤች ኡለተ፥ በሃረሃ ሀቀሃ በእሴኖችዬ» ይ ኩሎ። 4 እስራኤል ቶነ ለሟንከ ቦኪች ሆሪችን ሚኔንተሰ መገን ማተበ ዎሬመ መን ዎሉት ጥብታ ሾላነ ሾልተ ኩምታ እኮገ መጮጬም። 5 ማተቡ ዎረሞሩንኩ ይሁድ ፍካኒች ቶነ ለሜ ኩም፥ ሮቤሌ ፍካኒች ቶነ ለሜ ኩም፥ ጋዴ ፍካኒች ቶነ ለሜ ኩም፥ 6 አሶሬ ፍካኒች ቶነ ለሜ ኩም፥ ንፍታሌሜ ፍካኒች ቶነ ለሜ ኩም፥ ምናሴ ፍካኒች ቶነ ለሜ ኩም፥ 7 ስሞኔ ፍካኒች ቶነ ለሜ ኩም፥ ሌዌ ፍካኒች ቶነ ለሜ ኩም፥ ይሳኮሬ ፍካኒች ቶነ ለሜ ኩም፥ 8 ዛብሎኔ ፍካኒች ቶነ ለሜ ኩም፥ ዮሴፌ ፍካኒች ቶነ ለሜ ኩምኒ ቢንያሜ ፍካኒች ቶነ ለሜ ኩምኒ እኬ። 9 ህከኒች ዘኪን አዪ ዎልሽ ደንዱምቡ አብሽ በትናሸ ምናደበ ጡጆም። እሶኦንት ምናደቢች፥ ዜሪች፥ ባዲቺ አነነተ አነነተ ላገተ ጠሃታ መኒቺ ሆሪችን ጠጵት ዎጁተ ኦድሸተ ኦደቅት አንጋንተሰ ዘምባት ቦንጠ አፍ ዎሞመ በርጩምነ ሆልች ቡትች ብሬን ኡርቴ እኬ። 10 እሶኦንት አበ ላጋን ሹርተን «ፈእሱ ዎሞመ በርጩማን አፉዕሌ ኒ መገንየኒ ሆልች ቡትችየኒ» ይተዮ እኬ። 11 መገን ሰሜ ሶቀማኑ ሆሩንኩ ዎሞመ በርጩመ፥ ሾሉንከ ቆጨንቸሃ ኑባቡሃ ዘህት ኡርኬእ ዎሞመ በርጩም ብሬን ሚኔንተሰ ህርክት መገኒ ሰገዶእ። 12 እሶኦንት «አሚዕን። ማሰት፥ አማዱ፥ ቆርመት፥ ገለቱ፥ አብኑ፥ መቆሁ ቃርመቲ መገኒሃኔ ዶሊች ዶለ ኢለንቀጤች እሁን» ይቶእ። 13 ህከኒች ዘኪን ኑባቢች መቱ ኢ ዉዱ ፈንቀል «ኩ ዎጁተ ኦድሸተ ኦደቅቶ መኑ አዬኤታን? እሶኦስ ሀኖች ዋልቴሃረ?» ዬኤ። 14 አንን «ቀርቾ! አት ደጋንት» ይ ፈንቀሼም። እስን «ህከን አበ ሀዊች ፉልት ዋልቴሃረ። እሶኦንት ኦድሸሰ ሆልች ቡትች ቄጊን ኣንሽት ዎጀቴእ። 15 ህከንተኔ እሶኦንት መገን ዎሞመ በርጩም ብሬን እክ አንከርሃ በራሃ መገን ምኔን ሁጀታስ። አሞ ዎሞመ በርጩማን አፉዕሌኢ እሶኦ ሜሬሮን እክ ዎልተ እሀኖሰ። 16 - 17 መገኑንኩ እንጂጅሰ ሆረንተ እሌችሰ ሺንሸኖ። አቼ እሶኦት ለንኪ ጎሬታበእኒ ሰገባበእኒ። ህትጉንተ አሪቹት እንዶ ኢቡ ኢል ቡሰኖሰበአ። ዳፉንኩስ ዎሞመ በርጩም ሜሬሮን ዮ ሆልች ቡትቹ ዜማንቹሰ እክ ሄቸ ዎእ ቡዕሌቾበ አወንሰኖሰ» ዬእ።
1 ሆልች ቡትቹ ለመልቅ ማተበ ዘር ፈኖ ጃተ በከኔ ሳት ቀጠ ሰማን ሰዕምቱ እኮ። 2 ህከኒች ዘኪን መገን ብሬን ኡርቴ ለመለ መገን ሰሜ ሶቀማኑ ጡጆም። እሶኦንከ ለመለ ጡሩምቡለ ኣሴመሰ። 3 ዎርቂን ሁጀቴመ ህጣን ውሊሻንቹ አፌ ዎሉ መገን ሰሜ ሶቀማንቹ ህጣነ ውሊሼኖ ጠረጴስባን ኡሬእ። እሲንከ ዎሞመ በርጩም ብሬን ዮ ዎርቂን ሁጀቴመ ጠረጴስ አሌን ሆራንከ ጡማን ኡሰቶን በርግ ህንጨኡንተ ሆለመ ህጣነ ኣሴመስ። 4 መገን ብሬን ኡሬ መገን ሰሜ ሶቀማንች አንጋች ህጣን ውሊልት ጡማን ኡሰቶን በርገንት ፉልቶእ። 5 ህከኒች ዘኪን መገን ሰሜ ሶቀማንቹ ህጣነ ውሊሼኖ ጠረጴሲች ጊረተ ኣቅ ህጣን ውሊሻንቾን ዎርኬእ ኡለተ ለቅ ቶሬሀን ጉገነት፥ ላገት፥ በሌሱቲ ኡለ ሌንቄቁሁ እኮ። 6 ለመሉ ጡሩምቡሉ ዮሰ ለመሉንኩ መገን ሰሜ ሶቀማኑ ጡሩምቡለሰ ቡሲ ቅጠንቶእ። 7 ዎነ መገን ሰሜ ሶቀማንቹ ጡሩምቡለስ ቡሾ ጃተ በረዱሁ ጊረቲ ቄጊን ኤሬረንት ኡለ አሌን ኡበንየን ኡለ ሰክ አፎ፥ ሀቅ ሰክ አፎሁ ቦሌኮ ህጥት ሆረንቲ ቡብ ፈዶእ። 8 ህከኒች ዘኪን ለንክ መገን ሰሜ ሶቀማንቹ ጡሩምቡለስ ቡሽየን ጊራን ቡበዮ አበ ዱነ አጉደኖሩ በሃር ዎእ ኣዜን ቶረሞ። 9 ህተ ጃተ በሃር ዎእ ሰክ አፎ ቄግ እክየን ኣዜንተስ ዮ ፎላሞ ቆጨንቺች ሰክ አፎ ሬሄእ። ህትጉንተ በሃር ዎእ አሌን ዮ መርከባች ሰክ አፎሁ በኦ። 10 ሰክ መገን ሰሜ ሶቀማንቹ ጡሩምቡለስ ቡሾ ጃተ መርባትገ ቡበዮ አበት ቤዜቹት ሰሜች ዋልት ለጋከ ሰክ አፎኒ ዎእ ቡዕሌ አሌኒ ኡቦእ። 11 ህተን ቤዜቾ ሱዕሙ «ቀራሬ» ዬኖተ። ዎእስ ሰክ አፎንኩ ቀራረኖ እኮ። ህከ ቀራረኖ ዎአ አጎተኔ ሆለሙ መኑ ሬሄእ። 12 ህከኒች ዘኪን ሾልክ መገን ሰሜ ሶቀማንቹ ጡሩምቡለስ ቡሾ ጃተ አሪቾ ሰክ አፎ፥ አገንች ሰክ አፎሁ ቤዜ ሰክ አፎሁ ዎቀረምየን እሶኦ ሰክ አፎ ቱንሴእ። አሞ በሬ ሰክ አፎሁ አንከሬ ሰክ አፎሁ ቱንሱተ እኮ። 13 ህከኒች ዘኪን ጋቅቹ ሰሜ ሜሬሮን ቡርያንየን ጡጆም። እስን አበ ላጋን ያረን «ፈኦ ሰሱንኩ መገን ሰሜ ሶቀማኑ ጡሩምቡለሰ ቡሳ ጃተ ኡለ አሌን ዮ መኒ ኣዬ! ኣዬ! ኣዬ!» ያንየን መጮጬም።
1 ህከኒች ዘኪን ኦንትቅ መገን ሰሜ ሶቀማንቹ ጡሩምቡለስ ቡሾ። አንን ሰሜች ኡለ ኡቤ ቤዜቹተ ጡጆም። እሴንከ አብስ ጥለ በሌ ቁልፈ ኣሴመሴ። 2 እሴን አብስ ጥለተ በልተ ፈንተንየን ውሊልት አበ ጉዶች ፉልታሀንገ እክ በሌች ፉልቶእ። በሌችስ ፉልቶ ውሊሌ ዳፊን አሪቹቲ ሰሞሁ ቱንስቶእ። 3 ህከኒች ዘኪን ዜሩ ውሊሌ ኣዚች ኡለ አሌን ፉሎ። እሶኦንከ ኡለ አሌን ዮ «ግንጠ» ዬኖ ማርዛሞ ቆጨንች መቄገ ዮ መቆ ኣሴመሰ። 4 እሶኦንከ መገን ማተቡ ሚኔንተሰ ዮበእ መኒች ጠሊች በጋን ኡለ አሌን ዮ ህጥተ፥ ቦሌኮራ ሀቀሃ በእሱምቦገ ኩሌመሰ። 5 እሶኦንት መነስ ሽቱዕናን ኦንቱ አገነ ሀውሳገ አሴመሰ። እሶኦንት ሀውሳ ሀዉ «ግንጠ» ዬኖ መርዛሙ ቆጨንቹ መነ ከሮ ጃተ ጥሲሰኖሀንገ ዮሃ። 6 ህተ ጃተ መኑ ሬሁተ ሀሰኖ። ጠሁ እኮዳ ሬሁተ ደቀኖበአ። እሶኦንት ሬቶተ ቁልጥታእ። ሬሁንት እሶኦች ሁንታእ። 7 ህኩ ዜሩ ኦሊ ቅጠንሴመ ፋርሱ አጉደኗ እኬ። እሶኦንከ ዎርቅ ዘዉደ አጉደኖሩ ቦቆንተሰ ዮ እኬ። አሞ ሚኔሰ ዉዱ መን ሚንተ አጉደኗ እኬ። 8 እሶኦንከ ሜንት ሙም አጉደኖ ሙሙሁ ዞቤ እንቁተ አጉዳ እንቁቲ ዮሃረ። 9 ሃሞንተሰ ብረቲን መክሴመ ዎልተ አጉደኖ ብረቱ ዮ እኬ። አሞ ጎኖሰ ላገት ኦሊ ፍሪጠን መርታ ሆለሙ ፋርሱ ጎሾሽታ ጋሬ ላገገ ዮታ። 10 እሶኦንከ «ግንጠ» ዬኖ መርዛሞ ቆጨንቺ ዮ ደሰንገ ዮ ከረኖ ደሰኑ ዮሰ። አሞ ደሰኒንተሰ መነ ከርተን ኦንቱ አገነ ሀውሳእ። 11 እሶኦተ ገሸኖ ዎሙንኩ ህከን አብስ ጥለ በሌየ ሶቀማንቹ። ሱዕሙስን እብር-መን አፌን «አብዶነ» ግሪክ መን አፌን «አጶልዮነ» ዬኗ። 12 ዎነ «ኣዬ» ዬኖ ሀዉ ህጌእ። ህኩዕኒን፥ ለሙ «ኣዬ» ዬኖ ሀዉ ዋለኖ። 13 ህከኒች ዘኪን ሌህቅ መገን ሰሜ ሶቀማንቹ ጡሩምቡለስ ቡሾ። ህጣነ ውሊሺ ዎርቂን መክሴመ ጠረጴስ ሾሏንከ ቡዲች መገን ብሬን ዮሀኒች ዋልተዮ መትተ ላገተ መጮጬም። 14 ላገንትስ ህከ ጡሩምቡለ አፎ ሌህቅ መገን ሰሜ ሶቀማንቹ «አበ ኤፍራጢስ ለጋን ኡሱረንቶ ሾሉንከ መገን ሰሜ ሶቀማኑ ሂር» ይቶእ። 15 ህከኒ መን ሰክ አፎ ሽቶተ ህከን ሳቲ፥ ህከን በሬ፥ ህከን አገኒሃ ህከን ዎጌሃ ቅጠንቶ ሾሉንኩ መገን ሰሜ ሶቀማኑ ሂረንቶእ። 16 አንን ፋርሳኖ ቤጠቤ ዎሉት ለሜ ጥቤ ምሎነ እኮገ መጮጬም። 17 አሞ ፋርሱሃ ፋርሶንተስ ኮዕርቶራ ሀቄንተኤ ጡጆምጉ ህትጉተ። ፋርሳኑ ሃሞንተሰ ኦደቅቶ ዎልትገ ዮኢ ጊረገ ቢሻ፥ «ያክንተ» ዬኖ ክንገ ሀሚሉ አጉደኗኒ «ዲኘ» + ዬኖሪገ ባራኒ እኬ። ህትጉንተ ፋርስሰ ቦቁት ዞቤ ቦቁተ አጉዳታ። አሞ አፌችሰ ጊረት፥ ውሊልቲ «ዲኘ» ዬኖሩ ፉለዮ እኬ። 18 አፌችሰ ፉልታ ጊራን፥ ውሊሌኒ «ዲኘ» ዬኖሪኒ ህከን ሰሷንከ ቦበኒን መን ሰክ አፎ ሬሄእ። 19 ዳፉንኩስ ፋርሲሃንሰ መቆ ዮኢ አፎንተሳቲ ጭራንተሳቲ እኬ። ጭሩሰን ዎረ አጉደኖ ቦቃሙ እኮተኔ መነ ጌንታኢ ህከኒኔት እኬ። 20 ህከን ቦበኒን ሬቱዕነ ፈኦ መኑ ሀቡሲ፥ ገጊንተሰ ሁጀቶ ጡዱ፥ መጮጩሃ መረሙሃ ደንድቱምቦ ዎርቅ ምስሊ፥ ብር ምስሊ፥ ቡሬች ምስሊሃ ክንነ ሀቅ ምስሊሃ ሰገዲች ቢረ ይት ፈንቀሉ ግቦእ። 21 ህትጉንተ መነ ሹ፥ ኪሉ፥ ሳኡሃ ሞገኡሃ ቢረ ይት አጉሩ ግቦእ።
1 ህከኒች ዘኪን ጎመ ኦደቄ ዎሉ አቡ መቆ ዮስ መገን ሰሜ ሶቀማንቹ ሰሜች ድረንየን ጡጆም። ቦቆስባንን መገንዜቡት ዮ እኬ። አሞ እሌስ ዉዱ አሪቾገ ዮሃ እኬ። ሎከስ ጊረ ኡቱቡ አጉዳታ እኬ። 2 እስን ፈነሜ ቀሁ ዎረቀተ አንጋንተስ አፍ መኬስ ሎካን በሃረ፥ ጉረስ ሎካን ኡለተ ሃምኬእ 3 ዞቤቹ ቡርቀኖሀንገ ዮ አበ ላጋን ሹሮ። ሹሮ ጃተ ለመልት በንቁት ጉገን ጠሃቶእ። 4 ለመልንት በንቁት ጠሃት ኬኦ ጃተ ጣፎተ እኮም። ጠሁ እኮዳ «ለመልንት በንቁት ጠሃቶ ጠሀ ማጥ በጋን ጣፎት» ይታ ላገተ ሰሜች መጮጬም። 5 - 6 ህከኒች ዘኪን በሃርነ ኡለ አሌን ኡርየን ጡጆም መገን ሰሜ ሶቀማንቹ መኬስ አንገተ ሰማ ለቅ ኬእሽ ዶሊ ሆሪንከ ሄአኖነ ሰማ፥ በሃረ፥ ኣዜንተሰ ዮረ፥ ኡለታ አሌንተሴ ዮራ ቆጬ መገን ሱዕሚን ጤሌዕለን «ቴሱ ደሰኖበአ። 7 ጠሁ እኮዳ ለመልቅ መገን ሰሜ ሶቀማንቹ ጡሩምቡለስ ቡሽየን መጮጨመኖ በር አግዛሀንስ ህራጋኒ ኩሎገንከ መገን ቤስቹ ጠሁ ዊመኖ» ዬእ። 8 ህከኒች ዘኪን ዎነ ሰሜች መጮጬም ላገት ለንኪሃ «ዎእ አሌኒ ኡለ አሌኒ ኡሬ መገን ሰሜ ሶቀማንች አንጋን ዮ ፈነሞ ዎረቀተ መርት ኣቅ» ይቶኤ። 9 ህከኒ መገን ሰሜ ሶቀማንችስበ መር «ህከ ቀሁ ዎረቀተ ኣሴኤ» ይ ጠዕሜምደ «ኣቅት እት። አፎንተክ መለብገ ጤአኖ። ጠሁ እኮዳ ጎደበክ ቀራርሰኖ» ዬእ። 10 ህከ ቀሁ ዎረቀተ መገን ሰሜ ሶቀማንች አንጋች ኣቅ እተንየን አፌእ ኣዜን መለብገ ጤኦኤ። ጠሁ እኮዳ እች ኬኦም ጃተ ጎደቡኤ ቀራሮ። 11 ህከኒች ዘኪን «ሆለመ መንተኔ፥ ምናደብተኔ፥ አነነተ አነነተ ላገተ ጠሃታሪተኔሃ ዎማከተኔሃ ለንኪሃ ህረገ ጠሃቁ ሀስሰኖሄ» የመም ኩለሞኤ።
1 ህከኒች ዘኪን ኤሳ ብጥገ ዮ ኬኔኖ ሾምቦቅች ቶመ ኣሴመኤ። ኤስን «ጦቅት መገን ምን፥ ክትመ ክትሜኖ መዕንታ ህከኔ ሰገዳ መነሃ ኬን። 2 እኮዳ መገን ምኒች ኤተሪን ዮ ኦተ ኣዙ መገኑ ደጉምቦ መኒ ኣሰሜኢ እኮተኔ ኬንቶት። እሶኦንት ጡማንቹ ከተመ ሾላነ ለሙ አገነ ከዲሳእ። 3 ኢ ለሙንኩ ነቃሹ ጥጅ ኦድሸተ ኦደቅት መትተ ኩምተ ለምተ ጥብተ ሌሃዱመ በርሃ ህራጉንተ መቆ ኣሳንሰ» ዬእ። 4 ኩ ለሙንኩ ነቃሸት ኡለ ቀርች ብሬን ኡርታ ለሞ ዌርቹኒ ኩራዝ ለሞ አፉሻንቹኒ። 5 አዪ እሶኦተ ጌኒ ሀሾደ ጊረት አፌችሰ ፉልት ዲናከሰ ቡስታእ። ህትጉንተ እሶኦተ ጌኒ ሀሳ መኑ ህከን ዎቄንን ሬሁ ሀስሰኖሰ። 6 እሶኦት ህራጋ ጃተ ሰሜች ጤኑ ኡቡምቦገ ከሚሃ ዎአ ቄግ አስት ዶሪሃ አሞ ኡለተ ሀከን ቦበኒኒ ሀሶ ጃተ ሆረንተ ዎቀሪሃ መቆ ዮሰ። 7 እሶኦንት ሶህኑሰ ኩልት ጦፎ ጃተ አብስ ጥለ በሌች ፉለኖ ሞችቹ እሶኦን ኦለም ቄል ሻኖሰ። 8 ሬሹሰ አበ ከተም ዎቃን ኡበኖ። ህኩ ከተሙንኩ «ሶዶመ እንዶ ግብጠ» ዬን ገኤኖ ከተምተ አጉዲሸ። ህኩቡንኩ እሶኦ ቀርቹ ሰቀለሟበ። 9 ህከኒች ዘኪን ምናደቢች፥ ዜሪች፥ አነነተ አነነተ ላገተ ጠሃታሪቺ ባዲች ሆሪቺ ሆለሙ መኑ ሞገንቱምቦገ ከንትኬእ ሰሱ በርሃ በከንሃ ሬሸሰ ጡዳእ። 10 ህኩ ለሙንኩ ህራጋኑ ኡለ አል መነ ሀውሶተኔ ኡለ አሌን ሄአኖ መኑ እሶኦት ሬቶሀኒ አብስ በጅቀንታእ። አሞ ፈንጠዝየ አስት እስ-እሶኦንት ኣሰንቸ ኣሰቀንታእ። 11 ጠሁ እኮዳ ሰሱ በሩሁ በከኑሁ ህጎሀኒች ዘኪን ፎል ኣሰኖ ፎሹ መገኒች ዋል ኣግየንሰ ሎካንተሰ ኡርቶእ። ህከኒ እሶኦተ ጡዶ መኑ አብስ ዋጅቶእ። 12 ህከኒች ዘኪን «ከበ ዋሌ» ይታ ላገተ ሰሜች መጮት ዲናከሰ ጡደንየንን ጎሚን ሰማ ፉልቶእ። 13 ህተ ጃንተ ኡለት አብስ ሌንቄቅትየን ከተምስ ቶርዱንቅ አፎ በኦ። አሞ ኡለት ሌንቄቅቶ ዳፊን ለመሌ ኩሜ መኑ ሬሄእ። ሬሆች ፈኦሩንኩ አብስ ዋጅት ሰሜ መገኑ አብሶእ። 14 ለንክ «ኣዬ» ዬኖ ሀዉ ህጌእ። አሞ ህኩዕኒን፥ ሰክ «ኣዬ» ዬኖ ሀዉ ደዕል ዋለኖ። 15 ህከኒች ዘኪን ለመልቅ መገን ሰሜ ሶቀማንቹ ጡሩምቡለስ ቡሾ ጃተ «ኡለ አል ዎሞመት ቀርቺሀኔ እስ ክርስቶሲሃ እኬእ። እስን ዶሊ ሆሪንከ ዎሞዕመኖ» ይታ ሆለመት አበት ላገት ሰማን መጮጨንቶእ። 16 ዎሞመሰ በርጩማን መገን ብሬን አፉዕልቶ ለሜነ ሾሉንኩ ኑባቡ ሚኔንተሰ ህርክት 17 «ዮንቲሁ ሄኦንቲሁ ሆረንከ ደንድታንት ቀርቾ መገኖ! አበክ መቆ ኣቅት ዎሞዕምቶንትተኔ ገለጥናንኬ። 18 ኬስ አመዕንቱምቡ መኑ አሙዕረንቶእ። ጠሁ እኮዳ ኪ አሙርት ዋልቴእ። አሞ ሬቶ መን አሌን ፍርድታንት ጃት ኢልቴእ። ካዕላኒሀንኬ ህራጋኒ፥ ሱዕመክን አብሳ ቀቀሃኒሃ አበባኒሃ መገን መኒ ሆሪንከ ሁጄሰ ቆደ ኣስታንት ጃት ኢልቴእ። ህትጉንተ ኡለተ በእሶ መነ በእሳንት ጃት ኢልቴእ» ይተን መገኒ ሰገዶእ። 19 ህከኒች ዘኪን ሰማን ዮ መገን ምኑ ፈነምየን አዘዙት ዮ ሳጥኑ መገን ምን ኣዜን ጡደሞ። አሞ በሌሱት፥ ላገት፥ ጉገነት፥ ኡለ ሌንቄቁሁ አቡ በረዱሁ እኮ።
1 ህከኒች ዘኪን አብስ ማለልሲሳ መላት ሰማን ጡደንቶእ። ህኩስን መትት ሜንትቹት አሪቹተ ኦደቅቴኢት አገንቹ ሎካችሴ ዎሮዲን ዮኢት ቶነ ለሜ ቤዜቾ ዘዉደ ቦቆንተሴ ዎዕርቴኢት ዮ እኬ። 2 እሴን ሰላንቹተ እኮተኔ ባሉ አፍየንሴ እልቶተ ጥጠንተን አብስ ያርቶእ። 3 ህትጉንተ ዎልት መላቲ ሰማን ጡደንቶእ። ህኩስን ለመልት ቦቁቲ ቶርዱሙ ቡዱሁ ቦቃካንተስን ለመሉ ዘዉዱሁ ዮሃ አባ ቢሻ ደህቹ + እኬ። 4 ደህቹስ ደሰኒንተስ ቤዜ ሰክ አፎ ሰሜች አባሽ ኡለ ኡጄእ። እስን ህት ባልታ ሜንትቹት እልቶ ጃተ ጪለሴ ቁርጨእ ከሞተ እሊ ሆባሶ ሜንትቾ ብሬን ኡሬእ። 5 እሴን ምናደበ ሆረንከ ብረት ብጢን አዘጅ ገሸኖ ጎንቹ ቤቱ እልቶእ። እኮዳ ቤቱሴ መገንበ ህኩስን መገን ዎሞመ በርጩምበ ቀለወኤን ኦሮሴመ። 6 ህት ሜንትቹንት መትተ ኩምተ ለምተ ጥብተ ሌሃዱመ በሬሀ አቦዬኑንተሴ መገኑ ቅጠንሴሴ መዕንተ ኡለ ኡዱመአ ሁንቶእ። 7 ህከኒች ዘኪን ሰማን ኦሉ ኬእየን ምካኤሊ መገን ሰሜ ሶቀማኑሁ ደህቺኒ ሶቀማኒንተሲ ኦለንቶእ። 8 ጠሁ እኮዳ ደህቹሁ ሶቀማኑሲ ቄለንቶእ። ቄለንቶሀኒች ዘኪን እሶኦት ሰማን ሄኡምቦገ መዕንት ሆረን በጮሰ። 9 ህከ አበ ደህቹ ኡለ አሌን ኡጄመ። እስን «መነ ሆረንከ ሉስሰኖ ሀቡስቹ እንዶ ሼጣንቹ» ዬን ገኤኗ ዎዷ ዎሪቹ። እሱሃ እስ ሶቀማኑሃ ኡለ አሌን ኡጄመ። 10 ህከኒች ዘኪን መትት አበት ላገት ሰማን «ቴሱ መገንኔ ፈእሱ፥ መቆ፥ ዎሞመቲ እስ ክርስቶስ ዳኖመቲ ዋልቴእ። ዳፉንኩስ መገንኔ ብሬን ህዛከኔ በራሃ አንከርሃ ኦደዮ እኬ ኦዳንቹሰ ኡጄመ። 11 እሶኦት ፎሊሃንሰ ቅሽጥቱዕነ ገገሰ ሬሆ ህግስ ኣስቶተኔ ሆልች ቡትች ቄጊኒ ነቀሶ ላጋኒ እሱ ቄልቶእ። 12 ህከንተኔ ሰሞሁ ሰማን ሄኤነንተሩ ሆሩንኩ በጅግዬ። ጠሁ እኮዳ ሼጣንቹ ጄቹስ ቀሁተ እኮገ ደግ አበ አሙሬን ክዕኔኤበ ድሬተኔ ኡላሃ በሃሪሃ ኣዬ!» ይተንየን መጮጬም። 13 ህኩ ደህቹ ኡለ ኡጄመስገ ደጎ ጃተ ጎንቹ ቤቱ እልቶ ሜንትቹተ ሸሩ አፎ። 14 እኮዳ ሜንትቹት ኡለ ኡዱመኣን ሰሱ ዎጋሃ በከንሃ አቦዬኖሴተ ቅጠንቶ መዕንተ ህከን ዎሪች ብሬች ቡርት ኦሮቱንተ አበ ጋቅች ለምተ ጎኑተ ኣሴመሴ። 15 ህተ ሜንትቹተ ዞፉ ኦሮሱንተ ዎሪቹ ለግ ዎእ ቀጠ ዎአ አፌችስ ዘኮንተሴ ባ አስ ዱኖ። 16 ጠሁ እኮዳ ኡለት ሜንትቾ ካዕልት አፎሴ ፈንት ደህቹ አፌችስ ባ አስ ዱኖ ዎአ ቁርጨት ከንቶእ። 17 ህከኒች ዘኪን ደህቹ ሜንትቾን አሙዕረም መገን አዘዙተ ቆረባሪኒ ዬሱሲ አመዕነንት ነቀሳሪኒ ፈኦ እሴ ዜሪን ኦለሞተ መሮ። 18 እስን በሃር ሻፍ አሌን ኡሬእ።
1 ህከኒች ዘኪን መቱ ሞችቹ በሃሪች ፉለንየን ጡጆም። እሲንከ ቶርዱሙ ቡዱሁ ለመልት ቦቁቲ ዮሃ እኬ። ቶርዱማንከ ቡዳን ቶርዱሙ ዘዉዱሁ መገኑ ቦሮር ሱዕሙ ቦቃከስ አሌኒ ዮሃ እኬ። 2 ጡጆንስ ሞችቹ ሰማግቹ አጉደኗ። ጠሁ እኮዳ ሎከስ ትቤ ሎከተ፥ አፎስ ዞቤች አፎ አጉደኗ እኬ። አሞ ደህቹ መቆስ፥ ዎሞመስ በርጩመሃ ገሸኖ አበ መቆሃ ህከን ሞችቺ ኣሴእ። 3 ቦቆችስ መትት ሬታ ቀጠ መዜኮኢ አጉጆኤ። እኮዳ ህት ሬሆበ ኢልሳ መዘት ፈይትየን ኡለ አሌን ዮ መኑ ሆሩንኩ ማለል ሞችቹስ አወኖ። 4 ደህቹ ሞችቺ መቆስ ኣሴተኔ መኑ ሆሩንኩ ደህቺ ሰገዶእ። ህትጉንተ «ሞችቺን ቅጠመኖ አዬት? አሞ እሲንተስ ኦለሚ ደንደኖ አዬት?» ይተን ሞችቺ ሰገዶእ። 5 ሞችቺንከ መገን አሌን ቦልጠን ቦሮር ላገተ ጠሃቀኖ አፎሃ ሾላነ ለሙ አገነ መቄን ሁጀቱንታ መቆ ኣሴመስ። 6 መገን ሱዕመ፥ መገኑ ሄአኖባ ሰማን ሄኣራ ቦሮሪን መገኑ ቦሮሩ አፎ። 7 እስን ጡማኒን ኦለም ቄለኖሰገ አሴመስ። አሞ ዜረ፥ መነ፥ አነነተ አነነተ ላገተ ጠሃታራ ምናደበሃ ሆረንከ ገሸኖ መቆ ኣሴመስ። 8 ጎረጠሞ ሆልች ቡትች ሄቸ መጣፋን ኡለት ቆጨንታሀኒች ብርስ ሱዕሙሰ ጣፈሙምቡ ኡለ አሌን ሄኣ መኑ ሆሩንኩ ሞችቺ ሰገዳእ። 9 መጮታ መጨት ዮሲ አዪ ቃርስ መጮጩን። 10 አዪ ቀፈጆሁ ቀፈደም ኦሮቁን። አዪ ጎራዴን ሼኢ ጎራዴንን ሬሁን። ጡማን እየቁሁ አመዕነቱሁ ለለኖ ህከኒኔት። 11 ቴሱ ዎሉ ሞችቹ ኡላች ፉለንየን ጡጆም። እሲንከ ጌጠ ሆለ ቡድገ ዮ ለሙ ቡዱ ዮሃ። ጠሃቀኖስጉ ደህችየገ እኬ። 12 እስን ዎነ ሞችች መቄን ሆሪንን ህከን ሞችች ብሬንን ሁጀተንኬእ ኡለ አሌን ሄአኖ መኑ ሆሩንኩ ዎነ ሬሆበ ኢለንቀጤች መዜክ ፈዬ ሞችቺ ሰገዳገ ግድሰኖ። 13 ለንክስ ሞችቹ ጊረተ ሰሜች ኡለተ ድሪሰኖ ቀጠ አበተ መላተ መን ብሬን ሁጀተኖ። 14 ዎነ ሞችች ብሬን ሁጀቱንተ ኣሰንቶስ ማለሎን ብሲን መዜክ ፈዬ ሞችች ምስለ ሁጀቱንተ ኡለ አሌን ሄአኖ ምናደበ አዘዘን ሉስሰኖ። 15 ህኩ ምስሉ ጠሃቆታ እሲ ሰገዱምቡረ ሆረንከ ሽሲሶታ ደንዱንተ ለንክ ሞችቹ ዎነስ ሞችች ምስላን ፎል ኡፈእ ዎሩንተ ኣሰሞስ። 16 አሞ ቀሁሁ አቡሁ፥ ዱበሉሁ ቡጥቹሁ፥ ዎማንቹሁ አግሹሁ ሆሩንኩ መኬሰ አንጋን እንዶ ሚኔሰ አሌን መላተ ዎዕርታጊ ሞችቹ ግድሰኖ። 17 ህከኒ ህት መላት ህኩስን ሞችች ሱዕሙ እንዶ ሱዕምስ ዎሉት ዮበኢ አዪ ህዕሪሃ ህሪሃ ደንደኖበአ። 18 አቼ ቆርመት ዮኢ ተን መዕኔኔት። መሌሱ ዮሲ ሞችች ዎሉተ ሸለጉን። ህት ዎሉንት መንችተ ዎሉ። ዎሉስን ሌህተ ጥብተ ሌሃነ ሌሆት።
1 ህከኒች ዘኪን ጢዮን ዱን አሌን ሆልች ቡትቹ ኡሬኢ ጡጆም። እሲን በርገንት እስ ሱዕሙሁ አንስ ሱዕሙሁ ሚኔሰ አሌን ጣፈሜ መትተ ጥብተ ሾላነ ሾሌ ኩሜ መኑ ኡርቴ እኬ። 2 ሰሜች ሆለመ ዎእ ላገጋ አበ ጉገነ ላገጋ ዮ ላገተ መጮጬም። መጮጬንስ ላገት ዲተ ኦልታሩ ዲተሰ ኦልተን አለጵታ ዲት ላገገ ዮታ ላገ እኬ። 3 ህኩ መትተ ጥብተ ሾላነ ሾሌ ኩሜ መኑ ዎሞመ በርጩም ብሬን፥ ሾሏንከ ቆጨንች ብሬኒ ለሜነ ሾሏንከ ኑባብ ብሬኒ ሃሮ መዝሙረ ዘመርቶእ። ህከ መዝሙረንከ ኡላች ዎዘንቶ መትተ ጥብተ ሾላነ ሾሌ ኩሜ መኒች በጋን ዎሉ መኑ ሮሶተ ደንድምበአ። 4 እሶኦት ገገሰ ቆረጵት ሙጩረተ እኮተኔ ሜንቲን ቡሹምቧረ፤ ህከኒ ሆልች ቡትቹ መሮበ ሆረንከ አወንታእ። ህትጉንተ መገኒሃ ሆልች ቡትቺሃ በህረተ እክ መን ሜሬሪች ዎዘንቴሃረ። 5 እሶኦንት ቡሽሰኖሰሩ ዮበእረ እኮተኔ ቆጰነ ጠሃት ከሱምቧረ። 6 ህከኒች ዘኪን ዎሉ መገን ሰሜ ሶቀማንቹ ኡለ አሌን ሄአኖ ምናደቢ፥ ባዲ፥ ዜሪሃ አነነተ አነነተ ላገተ ጠሃታሪሃ ሆራንከ መኒ ዶሊ ሆሪንከ ሄኣ ምሽራች ላገተ ኩሎተ ሰሜ ሜሬሮን ቡርያንየን ጡጆም። 7 እስን አበ ላጋን «መገኑ ዋጅዬኒ አብሽዬኒ፤ አሞ መገኑ ፍርደኖ ጃት ኢልቶተኔ ሰማ፥ ኡለተ፥ በሃረሃ ዎእ ቡዕሌታ ቆጬ መገኒ ሰገጅዬ» ዬእ። 8 አሞ ለንክ መገን ሰሜ ሶቀማንቹ «መገን አሙርተ ኤበኖ ሳእሴ ዎይን ዳጠ ምናደቢ ሆሪንከ አግሶ ‹ባብሎነ› የመንታ አበት ከተንቹት ኡቦእ! ኡቦእ!» ያን አወኖስ። 9 - 10 ሰክ መገን ሰሜ ሶቀማንቹ አበ ላጋን «አዪ ሞችቺሃ እስ ምስሊሃ ሰገጆዳ ሞችች መላተ ሚኔንተስ እንዶ አንጋንተስ ዎዕሬዳ መገን አሙሬ ኩባያን ዎሉሩ ኤሬረሙዕነ እንኪለሞ መገን አሙሬ ዎይን ዳጠ አገኖ። አሞ ጡማኖ መገን ሰሜ ሶቀማንነ ሆልች ቡትች ብሬን ጊራኒ ‹ዲኘ› ዬኖሪ ሩቀኔኒ በርችተ እሀኖ። 11 እሶኦተ በርችተ አስታሰ ጊራች ፉልታ ውሊልት ዶሊ ሆሪንከ ሰማ ለቅ ፉልታእ። ህከን ሞችቺሃ እስ ምስሊሃ ሰገዳሩ ሞችችስ ሱዕም መላተ ዎዕርቶሩ ሆሩንኩ በራሃ አንከርሃ ፎሎጩ ዮሰበአ» ያን አወኖሰ። 12 መገን አዘዙተ ቆረባነ ዬሱሳን አመዕንት ቃርታ ጡማን እየቁ ለለኖ ከኒኔት። 13 ህከኒች ዘኪን ሰሜች «ካን ጣፍ። ከኒች ኤተሪን ቀርቹ አመዕንት ሬታሩ ማሰአንቴሃረ» ይታ ላገተ መጮጬም። አሞ ጡማንቹ አያኑ «ሁጄሰ ሆንጌች ፎሎጭቱንተ ሁጅሰ አወንታሰተኔ እሶኦት ገርንተ ማሰአንቴሃረ» ዬእ። 14 ህከኒች ዘኪን ዎጁ ጎመ ጡጆም። ጎምስ አሌን ቦቆንተስ ዎርቅ ዘዉደ ዎዕር ኢጳሸተ ባጨስተ አንጋንተስ አፍ አፉዕሌ መቱ መንች ቤቱ አጉደኖ ጡጆም። 15 ዎሉ መገን ሰሜ ሶቀማንቹ መገን ምኒች ዋልኬእ ጎም አሌን አፉዕሌኢ አበ ላጋን «ሀጢድ ጃት ኢልቶተኔ ባጨስክ ሶክ ሀጢድ። ዳፉንኩስ ኡለ አሌን ዮሩ ሀጢደመኖገ እኬእ» ዬእ። 16 ህከኒ ህኩ ጎም አሌን አፉዕሌኢ ባጨስስ ኡለ አል ሶክየን ኡለት ሀጢደንቶእ። 17 ህከኒች ዘኪን ዎሉ መገን ሰሜ ሶቀማንቹ ሰማን ዮ መገን ምኒች ፉሎ። እሲሃ ኢጳሸት ባጨስት ዮሴየ እኬ። 18 ዎሉ ጊረ አሌን መቆ ዮስ መገን ሰሜ ሶቀማንቹ ክትመ ክትሜኖ ሳጥንቢች ፉል ዋል ኢጳሸት ባጨስት ዮሲ አበ ላጋን «ዎይኑ ላሎተኔ ባጨስክ ሶክ ኡለ አል ዎይኒች ዙረስ ሙር» ዬእ። 19 መገን ሰሜ ሶቀማንቹንኩ ባጨስስ ኡለተ ሶክ ኡለ ዎይን ዙረ ሙርኬእ ዎይነ ጡንሼኖ አበ መዕኔን ዎሮ። ህኩቡንኩ መገን አሙሬየበ። 20 ህኩ ዎይነ ጡንሼኖባን ዎረሞንኩ ከተሚች ኤተሮ ከደሞ። ህከን ዎይነ ጡንሼኖቢች ፉለኖ ቄጉ ፋርስ ብጣሉ ኢለኖ ቀጠ እክ ሌሁ በር መረሜኖ ቀጠበ ዛጆ።
1 ዎልተ አበተ ማለልሲሳ መላተ ሰማን ጡጆም። ህኩስን መገን አሙርት ጎፋ ዘካንች ለመለ ቦበነ አፌሃ ለመለ መገን ሰሜሃ ሶቀማኑ እኬ። 2 ህከኒች ዘኪን ጊራን ኤሬረሜ ቡርጩቅ በሃርገ ዮኢ ጡጆም። አሞ ሞችቹ፥ ሞችች ምስለሃ ሱዕምስ ዎሉታ ቄልቶሩ መገን ዲተ አንጋንተሰ አፍ ህከን ቡርጩቅ በሃር ሺናን ኡርቴኢ ጡጆም። 3 እሶኦንት መገን አግሾ ሙሴ መዝሙረሃ ሆልች ቡትች መዝሙረሃ «ሆረንከ ደንድታንት ቀርቾ መገኖ! ሁጅክ አበተኒ ማለልሲሳታኒ። ሆራንከ ምናደብ ዎመ! ዎቆክ ጠብዬሃኒ ገሬየኒ። 4 ቀርቾ! ኬስ ዋጁምቡሁ ሱዕመክ አብሱምቡሁ አዬት? ዳፉንኩስ ጡማንቹ አቴት ጠለ። ፍርዱክ ለሌተኔ ምናደቡ ሆሩንኩ ዋል ብሬንተክ ሰገደኖ» ይተን ዘመርተዮ እኬ። 5 ህከኒች ዘኪን ነቀስ ዱንካኑ ህኩስን መገን ምኑ ሰማን ፈነምየን ጡጆም። 6 ህከ ለመለንከ ቦበነ አፎ ለመሉንኩ መገን ሰሜ ሶቀማኑ ሙጩሩተ ዎጁተ ተልብ ኦድሸተ ኦደቅት ሃሙሰ ዎርቅ ቀበቶን ቆዕርት ህከን መገን ምኒች ፉልቶእ። 7 ሾሏንከ ቆጨንቺች መቱ ለመላንከ መገን ሰሜ ሶቃማኒ ዶሊ ሆሪንከ ሄአኖ መገን አሙርት ዊንቴ ለመልተ ዎርቅ ጤንቁተ ኣሴእ። 8 መገን አብኒቺ መቄቺ ኬኦ መገን ምኔን ውሊልት ዊንቶእ። ህኩ ለመሉንኩ መገን ሰሜ ሶቀማኑ አፎ ለመሉንኩ ቦበኑ ጎፈንቀጤች አዪ መገን ምን ኣጊ ደንድምበአ።
1 ህከኒች ዘኪን ለመላንከ መገን ሰሜ ሶቀማኒ መገን ምኒች «ህከ መገን አሙርት ዊንቶ ለመሌ ጤንቆቢ መስቴን ኡለ አሌን ዱንዬ» ይታ አበተ ላገተ መጮጬም። 2 ህከኒ ዎነስ መገን ሰሜ ሶቀማንቹ መር ጤንቆስቢ ኡለ አሌን ዱንየን ሞችች መላት ዮሰራኒ ምስሊሀንስ ሰገዳ መናኒ አብስ ቀስ ጥዳ መዘት ፉልቶእ። 3 ህከኒች ዘኪን ለንክ መገን ሰሜ ሶቀማንቹ ጤንቆስቢ በሃር አሌን ዱኖ። ህተ ጃተ በሃሩ ሬሄ መንች ቄግገ እኮ። አሞ ህከን በሃር ኣዜን ሄአኖ ፎላሙሩ ሆሩንኩ ሬሄእ። 4 ህትጉንተ ሰክ መገን ሰሜ ሶቀማንቹ ጤንቆስቢ ለጋኒ ዎእ ቡዕሌኒ ዱንየን ህኩሩ ቄግ እኮእ። 5 ህከኒች ዘኪን ዎእ አሌን መቆ ዮስ መገን ሰሜ ሶቀማንቹ «ዮንትነ ሄኦንት ጡማንቾ መገኖ! ህትጉተ ፍርድቶንትተኔ አት ገሬየ። 6 መኑ ጡማንነ ህራጋን ቄግ ዱንቶተኔ እሶኦ ቄግ አግሴንትሰ። ህኩንን እሶኦ ሀስሰኖሰ» ያንየን መጮጬም። 7 አሞ ህጣነ ውሊሼኖ ጠረጴሱ «፤ ሆረንከ ደንድታንት ቀርቾ መገኖ! ፍርዱክ ገርተኒ ጠቤናኒ» ያንየን መጮጬም። 8 ህከኒች ዘኪን ሾልክ መገን ሰሜ ሶቀማንቹ ጤንቆስቢ አሪቾ አሌን ዱኖ። አሪቹንት መነ ጊራን ቡስታ መቆ ኣሴመሴ። 9 መኑንኩ አበ ኢቢን ቡብ ህከን ቦበን አሌን መቆ ዮስ መገን ሱዕመ ቦሮርቶእ። አሞ ቢረ ዩሃ እሱ አብሱሃ ግቦእ። 10 አሞ ኦንትቅ መገን ሰሜ ሶቀማንቹ ጤንቆስቢ ሞችች ዎሞመ በርጩም አሌን ዱኖ። ህከኒ ሞችች ዎሞመት ቱንሱተ እኮእ። መኑንኩ አብስ ሀውቶተኔ አረብሰ ኢጦእ። 11 እሶኦንት አብስ ሀውቶተኔሃ መዜኮተኔሃ ሰሜ መገኑ ጤሌልቶ በጋን ሂለ ሁጄችሰ ቢረ ይት ፈንቀልትምበአ። 12 ህከኒች ዘኪን ሌህቅ መገን ሰሜ ሶቀማንቹ ጤንቆስቢ «ኤፍራጢሰ» ዬኖ አበ ለጋን ዱኖ። ለግስ ዎኡንኩ አርፉል ዉዲች ዋልታ ዎማካ ዎቆ መኩንተ ሞሎ። 13 አሞ ደህች አፌች፥ ሞችች አፌቺ ቆጰናንቾ ህራጋንች አፌቺ ፌዕሎመተ አጉደኖ ሰሱ ሂሉ አያኑ ፉለንየን ጡጆም። 14 እሶኦንት ሀቡስ አያነ እኮተኔ ማለሉተ ሁጀተን ሆረንከ ደንደኖ መገን አባ በሬን እሀኖ ኦሊ ጠጰቶሰተ ሆራንከ ባድ ዎማከበ መርታእ። 15 «ህኩዕኒን፤ አን ሞገኣንችገ ደንጎ ዋላም። ህከኒ ከልመረ እክየን መኑ ሸይደስ ጡዱምቦገ በቅይ ኦድሸስ ቆረጰኖ መንቹ ማሰአሜሃ።» 16 ህኩ ሰሱንኩ ሂሉ አያኑ ዎማከተ እብር-መን አፌን «አርማጌዶነ» ዬኖ መዕኔን ኦሊ ጠጵቶእ። 17 ህከኒች ዘኪን ለመልቅ መገን ሰሜ ሶቀማንቹ ጤንቆስቢ ቦብር አሌን ዱኖ። ህተ ጃተ መገን ምን ኣዜን ዮ ዎሞመ በርጩሚች «ጎፌእ» ይታ አበት ላገት ፉልት ዋልቶእ። 18 አሞ በሌሱት፥ ላገት፥ በንቁቲ አቡ ኡለ ሌንቄቁሁ እኮ። ህትጎኑ አቡ ኡለ ሌንቄቁ መኑ ኡለ አሌን ቆጨሞሀኒች እክ ከሱምቧ እኬ። 19 ህትጉንተ አበት ከተንቹንት ሰሱበ እክ ቤሀንቶእ። አሞ ባዶን ሆራንን ዮ ከተሙ ሆሩንኩ በኦ። ህተ አበተ «ባብሎነ» የመንታ ከተንቹተ መገኑ ቃግ አቡ አሙሬስ ዎይን ዳጡ ዊሞ ኩባየ አጉንተ ኣሴሴ። 20 አሞ ዎኢን ክበንቶ ኡለት ሆረንት ሁንቶእ። ዱናከንት በኦእ። 21 ህትጉንተ አቡ በረዱ ሰሜች መን አሌን ኡቦ። ህከንቢንኩ ሜ-ሜጡስ በረድቹ መቶ ሸር ውጠ ቀጠ ኬዕመኗ እኬ። ህኩ ቦበኑንኩ አብሽ ቃረ እኮተኔ መኑ መገኑ ጤሌሎ።
1 ህከኒች ዘኪን ለመልተ ጤንቆኦተ አፌ እኬ ለመለ መገን ሰሜ ሶቀማኒች መቱስ ዋል ኤስ «ከበ ዋል! ሆለመ ዎእ አሌን አፉዕልቶ ሱዕመንቴ ሳኣንቾ ሜንትቾ ፍርደ ጡድሳንኬ። 2 ኡለ አል ዎማከት ሳኦኢ እሴኔት። አሞ ኡለ አሌን ሄኣሩ ሆሩንኩ ድምብቶኢ ሳእሴ ዎይን ዳጢኔት» ይ ኩሎኤ። 3 ህኩ መገን ሰሜ ሶቀማንቹ ጡማንቾ አያኒን ኡለ ኡዱመአ ኦሮሽየዕኔ ቦሮር ሱዕማከት ዊንቴ ቢሸ ሞችች አሌን ኮዕርቴ መትተ ሜንትቹተ ጡጆም። እሲንከ ለመልት ቦቁቲ ቶርዱሙ ቡዱሁ ዮስየ እኬ። 4 ህት ሜንትቹንት ገምበል ዳመተ ኦድሸታ ቢሸተ ኦድሸታ ኦደቅት ዎርቀ፥ እረሃ እንገሃ፥ ዎጁተ ጆሎቡተ አጉደኖራ ዎዕርት ሽግገታ ሳእሴ ቡሽመት ዊንቴ ዎርቅ ኩባየ አንጋንተሴ አፌ እኬ። 5 እሴ ሚኔንን «ሳኣንነ ኡለ አል ቡሽመ አመተ አበተ ባብሎንቹተ» ያኖ ቤስቹ ሱዕሙ ጣፈሜ እኬ። 6 ህት ሜንትቹንት ጡማን ቄጊኒ ዬሱሲ ነቃሻከተ እኮተኔ ሼመሪ ቄጊኒ ድምብትየን ጡጆም ጃተ አብሽ ማለሎም። 7 ጠሁ እኮዳ መገን ሰሜ ሶቀማንቹ «ሚ ማለልተዮንት? ሜንትቾ ቤስቹ ጠሀሃ እሴ ኮዕርቶ ለመልት ቦቁቲ ቶርዱሙ ቡዱሁ ዮስ ሞችች ቤስቹ ጠሀሃ ኩላንኬ። 8 ህኩ አት ጡዶንት ሞችቹ ከኒች ብሬ ዮሃ እኬ። እኮዳ ቴሱ ዮበአ። ዘኮ አብስ ጥለ በሌ ኣዚች ፉል በእበ ኦሮቀኖ። አሞ ሱዕሙሰ ቆጨንቺች ብሬ ሄቸ መጣፋን ጣፈሙምቡ ኡለ አሌን ሄኣ መኑ ሞችቹስ ከኒች ብሬ ዮኢ፥ ቴሱ ዮበኢሃ ዘኪ ዋለኖሃ እኮገ ጡዶ ጃተ አብስ ማለልታእ። 9 ቆርመት ዮ ሰውቱ ከኔኔት። ለመልንት ቦቁት ሜንትቹት አፉዕልቴታ ለመሌ ዱናከ። 10 አሞ ህኩሩንኩ ለመሌ ዎመ። እሶኦችን ኦንቱስ ኡቤእ። መቱስ ቴሱ ዮእ። አሞ ዎሉስ ቴሶ ኢለንቀጤች ዋልምበአ። ህኩን ዋሎ ጃተ ቀሁተ ጄቹተ ጠለ ሄኡ ሀስሰኖ። 11 ህኩ ከኒች ብሬ ዮነ ቴሱ ዮበእ ሞችቹ ሄዜትቅየ። እስ ህከን ለመሊችን መቷንስ። እስን በእበ ኦሮቀኖ። 12 ህኩ ጡዶንት ቶርዱምንት ቡደት ዎሞዕምቱዕነ ዮታ ቶርዱሜ ዎማከ። ጠሁ እኮዳ ሞችቺንን በርገንት መቶ ሳቲ ዎሞዕምቱንተ ዎሞዕም መቆ ኣሰመኖሰ። 13 ህተን ቶርዱምየንተ ዎማካ ሜጡ ሰውቱ ዮሳረ። እሶኦንት መቆሳ ዳኖመሳ ህከን ሞችቺ ኣስታእ። 14 እሶኦንት ሆልች ቡትቺን ኦለንታእ። ጠሁ እኮዳ ሆልች ቡትቹ ቀርበ ቀርቹሃ ዎማከ ዎመሃ እኮተኔ ቄለኖሰ። አሞ ሆልች ቡትቺን በርገንት ዮሩንኩ ገአንቴሃረ፥ ዶዕረንቴሃራ አመዕነንቴሃራ» ዬኤ። 15 አሞ መገን ሰሜ ሶቀማንቹ «ህት ሳኣንቹት አፉዕልትየን ጡዶንት ሆለሙ ዎኡ ምናደባ፥ መና፥ ባዷኒ አነነተ አነነተ ላገተ ጠሃታሃረኒ። 16 ህኩ ጡዶንት ቶርዱሙንኩ ቡዱሁ ሞችቹሁ ህተ ሳኣንቹተ ብፈንከሴ ግብ ያየንቴኢታ ከልመረታ አስትኬእ ማለሴ እት ጊራን ቡስታሴ። 17 ዳፉንኩስ መገኑ ዬ ጠሁ ዊመንቀጤች እሶኦት ሜጦ ሰውታን ኢተሚኒ ዎሞመሰ መቆ ሞችቺ ኣሲኒ መገን ሰውተ ዊንሽቱንተ ካን ዎዘንሰ ኣዜን አፉሼኢ መገኗ። 18 ህት ጡዶንት ሜንትቹንት ኡለ አል ዎማከ አሌን ዎሞዕምቴታ አበተ ከተንቹ» ዬኤ።
1 ህከኒች ዘኪን አቡ መቆ ዮስ ዎሉ መገን ሰሜ ሶቀማንቹ ሰሜች ድረንየን ጡጆም። ህከን መገን ሰሜ ሶቀማንች ህቢች ኬኦ ኡለት ጫክቶእ። 2 እስን አበ ላጋን «አበት ባብሎንቹት ኡቦእ! ኡቦእ! እሴን ሀቡስ ገልትተ እኮእ። ሂሉ አያኑ ሆሩንኩ ሽግገታነ ግበንቶ ጪአት ሆረንቲ ጠጵታበ እኮእ። 3 ዳፉንኩስ ሳእሴ ዎይን ዳጠ ምናደቡ ሆሩንኩ አጌእ። አሞ ኡለ አል ዎመት እሴን በርገንት ሳኤእ። ህትጉንተ ኡለ አል ዘዘላኑ እሴ በትናሸ ሄሊን ዱበላሻከተ እኬእ» ያን ሹሮ። 4 ህከኒች ዘኪን ሰሜች ዎልት ላገት «ኢ ምናደበ! እሴ ባጢላን በርገንቴኑምቦጋ እሴ አሌን ዋለኖ ቦበኒች ቤቀንቴኑምቦጋ እሴ ኣዚች ፉልዬ። 5 ዳፉንኩስ ባጢልሴ በትንት ሰማ ኢልቴእ። መገኑንኩ ሾክመሴ ቃጌእ። 6 እሴ አስቶገንከ አስዬሴ። ሁጀቶ ሁጄሀንሴ ለሙ አፎ በርግቴን ባችዬሴ። እሴ ኤሬርቶ ኩባያን ለሙ አፎ ቃረ ኤሬርዬሴ። 7 ገገሴ አብጭቶ ቀጠሃ ሄልጭቶ ቀጠሃ በርችተ አስዬሴኒ ክቼእሼሴኒ። እሴን ዎዘናንተሴ ‹አን ዎመተ በጋን ህዬሰተበአ። ክቼቸንከ ሆረን ጡዳምበአ› ይተን ቦልጥተዮእ። 8 ህከንተኔ ቦበኑሴ ሆሩንኩ አሌንተሴ ሜጦ በሬን ዋለኖ። ህኩስን ሬሁት፥ ክቼቹሁ ጎሩሁ ዋለኖሴ። እሴንተ ጊራን ቡሴኖሴ። ዳፉንኩስ እሴ አሌን ፍርደኖ ቀርቹ መገኑ አባ» ይተንየን መጮጬም። 9 እሴ ቡበንየን ፉልታ ውሊልተ ጡዶ ጃተ እሴን በርገንት ሳኦነ ሄሊንተሴ ሄለንቶ ኡለ አል ዎመት እሴ «ኣዬ! ኣዬ!» ይተን ኦኣሴ። 10 እሶኦንት ሀወሴ ዋጅት ቄዕረ ኡርት «አት አበ ከተንቾ! አት ቃረ ከተንቾ ባብሎነ! ፍርዱክ ሜጦ ሳት ኣዜን ዋሎተኔ ኬሳ ኣዬ! ኣዬ!» ይታሴ። 11 አሞ ኡለ አል ዘዘላኑ ዘዘሎሰ ኦዳተ ከኒች ዘኪን ህዕረኖሳ ዮበእተኔ ኦኣሴኒ ክቼኣሴኒ። 12 ዘዘልታስሩንኩ ዎርቃ፥ ብራ፥ እራኒ እንጋኒ፥ ጆሎቡተ አጉደኗረ፥ ተልብተ ኦድሸ፥ ዳመተ ኦድሸ፥ ሃርተ ኦድሸ፥ ቢሸተ ኦድሸ፥ አንጀኖ ሀቅየ ሀገረ ሆራንከ፥ ዘኔ እንቆን ሁጀተንቴታ ኦዳ ሆራንተ፥ አብሽ እትሰ ሀቂን፥ ቡሬቺን፥ ብረቲኒ ደናሞ ክኒኒ ሁጀተንቴታ ኦዳ ሆራንተ፥ 13 «ቀረፈ» ዬኗ አንጀኗ ኦሞለ፥ አንጀነተ፥ ህጣና፥ «ከርቤተ» ዬኗ አንጀኗረ፥ ህጣንገ ዮሃ አቆማደ፥ ዎይንየ ዳጠ፥ ዘይታ፥ ደናሟ ቀመ፥ አለሷ፥ ለሏ፥ ሆለተ፥ ፋርሷ፥ ጋርተኒ መንየ ፎል ህኩስን አግዘተኒ እኬ። 14 «ፎልቹክ ቁልጥቶ ላልቹት ሆረንት ኬሳች ቄዕርቴእ። ዱቡኪ ህቡኪ ሆሩንኩ በኤእ። ከኒች ዘኪን ህኩሩ ሆረን ደገንታበአ።» 15 አሞ ህከረ ሆረንከ ህዕርተን ቀባጡተ እሴች ደቅቶ ዘዘላኑ ሀወሴ ዋጅት ቄዕረ ኡርት አበ ላጋን 16 «ተልብ ኦድሸተ፥ ዳመተ ኦድሸታ ቢሸተ ኦድሸታ ኦደቅታነ ዎርቀ፥ ዎጁተ ጆሎቡተ አጉደኖረ፥ እረሃ እንገሃ ዎዕርት መክጨንቶ አበ ከተንቾ ኣዬ! ኣዬ! 17 ከንከት ቀባጡት ሜጦ ሳታን በኦእ» ይተን ኦኣሴኒ ክቼኣሴኒ። አሞ መርከበ ገሻኑ ሆሩንኩ፥ መርከቢን መረንታ መኑ ሆሩንኩ፥ መርከባን ሁጀታሩ ሆሩንኩ በሃር አሌን ዘዘልታሩ ሆሩንኩ ቄዕረ ኡርት 18 እሴ ቡበንየን ፉልታ ውሊልተ ጡዶ ጃተ «ተ አበተ ከተንቹተ አጉዳ ከተንቹት ዮእኬንዶ?» ይተን ያርቶእ። 19 አሞ ቦቆሰ አሌን ቡሁተ ዎርትኬእ ያርተን «በሃር አሌን መርከቡ ዮሰረ ቀባጦንተሴ ቀባጣመተ አስቶ አበት ከተንቹት ሜጦ ሳታን በኦኢ ኣዬ! ኣዬ! 20 ሰማ! እሴ በኦተኔ በጅቀም። ህትጉንተ አዕኖኦት ጡማኑ፥ ሶቀማኑሁ ህራጋኑሁ በጅቀምዬ። ዳፉንኩስ መገኑ ክዕኔኤተኔ እሴ አሌን ፍርዴእ» ይተን ኦኦእኒ፥ ክቼኦእኒ። 21 ህከኒች ዘኪን አቡ መቆ ዮስ መገን ሰሜ ሶቀማንቹ ዊትመ አጉደኖ ክኑ ኬእሽኬእ በሃራን ቶር «አበት ባብሎን ከተንቹት ህትጉንተ መቄን ቶረንታእ። እሴን ከኒች ዘኪን ሆረን ደገንታበአ። 22 ዲተ ኦልታሪ ላገት፥ አዝማሬ ላገቲ ገምባብየሃ ጡሩምቡለሃ ቡሳሪ ላገቲ ከኒች ዘኪን ኪባን መጮጨንታበአ። አሞ አንገ ሁጄ ቆርመት ዮስ መንቹ ከኒች ዘኪን ኪባን ደገመኖበአ። ህትጉንተ ዊትም ላገቲ ከኒች ዘኪን ኪባን መጮጨንታበአ። 23 አሞ ከኒች ዘኪን መርባት ጫኩ ኪባን ጫከኖበአ። ከኒች ዘኪን እዜቾነ እዜቸን ላገት ኪባን መጮጨንታበአ። ዘዘላኑክን ኡለ አልተ አባኑ እኬ። አትን አስመቲንተክ ሆረንከ መነ ሉስሴንት። 24 አሞ ህራጋንቢ፥ ጡማንቢሁ ኡለ አሌን ሼመ ሆራንከ መን ቄጉሁ እሴ ኣዜን ደገሜእ» ዬእ።
1 ህከኒች ዘኪን ሰማን ሆለመ መን ላገተ አጉደዮ አበት ላገት «መገኒ ገለቱ እሁን። ፈእሱ፥ አብኑሁ መቆሁ መገንኔየ። 2 ዳፉንኩስ ፍርዱስ ገሬየኒ ጠቤናኒ። ኡለተ ሳኢንተሴ ቡሽሶ አበተ ሳኣንቹተ ፍርዴእ። አሞ አግዘስ ቄግ ባደንከ እሴች ፉሌእ» ይተን ሹርተንየን መጮጬም። 3 ቴሱ «መገኒ ገለቱ እሁን። እሴ ቡበንየን ውሊልት ዶሊ ሆሪንከ ሰማ ለቅ ፉልታእ» ይተን ሹርቶእ። 4 አሞ ለሜነ ሾሉንኩ ኑባቡሁ ሾሉንኩ ቆጨንቹሁ ዎሞመ በርጩም አሌን አፉዕሌ መገኒ ኡብ «አሚዕን፤ መገኑ ገለጠሙን» ይተን ሰገዶእ። 5 መትት ላገት «እሱ ዋጅቴነንተ አግዘስ ሆሩንኩ ቀቀሃኑሁ አበባኑሁ መገኑኔ ገለጥዬ» ይተን ዎሞመ በርጩሚች ፉልት ዋልቶእ። 6 ህከኒች ዘኪን ሆለመ መን ላገገ፥ አበ ዎእ ላገጋ አበ በንቆ ላገጋ ዮ ላገት «ሆረንከ ደንደኖ ቀርቹ መገኑኔ ዎሞዕሜተኔ መገኒ ገለቱ እሁን። 7 ሆልች ቡትች ቦሎቹ ኢሌተኔሃ እዜቹስን ገገሴ ቅጠንሰቅቶተኔሃ በጅቀሙን። በጅጉንተ አስን እሱ አብንሱን። 8 እሴንከ ቤሌሌሳ ሙጩሩተ ተልብ ኦድሸተ ኦደቅቱንተ ኣሴመሴ» ይተንየን መጮጬም። ህት ተልብ ኦድሸንት ጡማንተ ሙጩርመ። 9 ህከኒች ዘኪን መገን ሰሜ ሶቀማንቹ ኤስ « ‹ሆልች ቡትች ቦሎች ኦዜ ገአንቶሩ ማሰአንቴሃረ› ይት ጣፍ» ዬኤ። አሞ «ቲን መገን ገሬተ ላገ» ዬኤ። 10 ህተ ጃንተ አን መገን ሰሜ ሶቀማንቺ ሰገዶስተ ሎካንተስ ኡቦም። ጠሁ እኮዳ እስ «አጉር! ካን አስቶት። አን ኬሳኒ ዬሱሱ ነቀሾ ጠሀ አፎ ኪ ህዛካኒ በርገም ሶቀማንቿ። አት መገኒ ሰገድ። ዳፉንኩስ ዬሱስ ነቃሹ ህራግየ አያነ» ዬኤ። 11 ህከኒች ዘኪን ሰሞ ፈነምየን ቡለ ፋሹ ጡጆም። ፋሽስ አሌን «ኮዕሬኢንኩ አመዕነሜኢሃ ገሬቢሃ» የመመኗ። እስን ገሬን ፍርደኗኒ ኦለመኗኒ። 12 ህትጉንተ እልስ ጊረ ለበን አጉዳታ። ቦቆስ አሌንን ሆለሙ ዘዉዱ ዮእ። እሲች በጋን አዪ ደጉምቡ ጣፈሜ ሱዕሙ አሌንተስ ዮስየ። 13 ህትጉንተ ቄጌን ጬፌመ ኦድሸተ ኦደቄ እኬ። እስ ሱዕሙንኩ «መገን ላገተ» ዬን ገኤኗ። 14 አሞ ሙጩሩተ ዎጁተ ተልብ ኦድሸተ ኦደቅት ቡለ ፋርሶን ኮዕርቴ ሰሜ ቤጠቤ ጎጎቱ አወንተዮስ እኬ። 15 ምናደበ ሆረንከ ዎቀሩንተ ኢጳሸት ጎራድት አፌችስ ፉልተዮ እኬ። አሞ ብረት ደሚን ጠቀኖሰ። እስን ሆረንከ ደንደኖ መገን አበ አሙሬ ዎይነ ጡንሼኖባን ዎይነ ጡንሸኖ። 16 ኦድሸስነ ጋልስ አሌን «ዎማከ ዎመ፤ ቀርበ ቀርቹ» ያኖ ጣፈሜ ሱዕሙ ዮሃ። 17 ህከኒች ዘኪን መቱ መገን ሰሜ ሶቀማንቹ አሪቾ ኣዜን ኡሬኢ ጡጆም። እስን ሰሜ ሜሬሮን ቡርታ ጪአተ ሆረንተ አበ ላጋን «ዋልዬ፤ መገኑ ቅጠንሴዕኔ አበ ኦዜ ጠጵዬ። 18 ዎማከ ማለ፥ ኦል ጋጠናከ ማለ፥ ቆጠረ መን ማለ፥ ፋርስ ማለ፥ ፋርሶንተስ ኮዕርቶሪ ማለ፥ ሆራንከ መን ማለ ህኩስን ዎማኖነ አግዘ ማለሃ ቀቀሃንነ አበባን ማለሃ ዋልቴን እችዬ» ዬእ። 19 ህከኒች ዘኪን ሞችቹሁ ኡለ አል ዎማከት ቤጠቤ ጎጎቲንተሰኒ ፋሾን ኮዕሬሀኒኒ እስ ቤጠቤ ጎጎቲኒ ኦለንቶተ ጠጵትየን ጡጆም። 20 ጠሁ እኮዳ ሞችቹ ቀፈደሞ። አሞ እሲን በርገም ብሬንተስ ሆለመተ ማለሉተ ሁጀተዮእኬ ቆጰናንቹ ህራጋንቹሁ ቀፈደሞ። እስን ሞችች መላት ዮሰራ ሞችች ምስሊ ሰገዳራ ሉስሰዮሃ እኬ። ህከ ለሙንከ ፎሊን ሄኦገንከ «ዲኘ» ዬኖሪን ቡባ ጊረ በሃር ኣዜን ኡጄመሰ። 21 ህትጉንተ ፈኦሩ ሆሩንኩ ህከን ፋሾን ኮዕሬሀን አፌች ፉልታ ጎራዴን ሬትየን ጪአት ሆረንት ማለሰ እት ዱቦእ።
1 ህከኒች ዘኪን አብስ ጥለ በሌ ቁልፈሃ አበ ችምችመሃ አንጋንተስ አፌ መገን ሰሜ ሶቀማንቹ ሰሜች ድረንየን ጡጆም። 2 እስን ደህቹ አፍ ኩሜ ዎጌ ኡሱሮ። ህኩ ደህቹ «ዳቡሎስቹ እንዶ ሼጣንቹ» ዬኖ ዎዷ ዎሪቹ እኬ። 3 መቴ ኩሜ ዎጎ ጎፈንቀጤች ምናደበ ሉስሱምቦገ መገን ሰሜ ሶቀማንቹ ደህቹስ አብስ ጥለ በሌን ቶር አሌንተስ ጡፍ ማተበ ዎሮ። ህኩ ኩሜ ዎጎ ጎፎች ዘኪን ቀሆ ጄቾ ሂረሙ ሀስሰኖስ። 4 ህከኒች ዘኪን ዎሞመ በርጩመተ ጡጆም። አሞ ህተን ዎሞመ በርጩመ አሌን ፍርድታ መቆ ኣሰሞሰሩ አፉዕልቴኢ ጡጆም። ህትጉንተ ዬሱሲ ነቀሶተኔሃ መገን ላገተኔሃ ቦቁሰ ሙረንቶ መን ፎል ጡጆም። እሶኦንት ህከን ሞችቺሃ ምስሊሀንሲ ሰገዱምቧረኒ መላንተስ ሚኔንተሰ እንዶ አንጋንተሰ ኣቅቱምቧረኒ እኬ። እሶኦንት ሬሆች ኬእ ክርስቶሲን በርገንት ኩሜ ዎጌ ዎሞዕምቶእ። 5 ህኩንን ዎነ ኮደ ሬሆች ኬ። ጠሁ እኮዳ ሬሆች ኬኡዕነ ፈኦሩ ኩሜ ዎጎ ጎፈንቀጤች ሬሆች ኬእምበአ። 6 ዎነ ሬሆች ኬእ ሳመ ደቅታሩ ማሰአንቴሃረኒ ጡማኗኒ። ዳፉንኩስ ለንክ ሬሆ እሶኦ አሌን መቆ ዮበአ። እሶኦንት መገንነ ክርስቶስ ቄሳከተ እክ ክርስቶሲን በርገንት ኩሜ ዎጋ ዎሞዕምታእ። 7 ህኩ ኩሜ ዎጎ ጎፎች ዘኪን ሼጣንቹ ኡሱሮችስ ገፈረመኖ። 8 እስን ኡለ አሌን ዮ ምናደበ ሆረንከ «ጎገሃ መጎገሃ» የመንታረ ሉስሶታ ኦሊንከ ቅጠንሶታ ፉለኖ። እሶኦ ዎሉንት በሃር ቶቾን ዮ ሻፍየ ቀጠ። 9 እሶኦንት ኡለ ሀዳን ፉልት ጡማን ገልትታ ኢተንቴ ከተንቹታ ክብቶእ። ጠሁ እኮዳ ሰሜች ጊረት ዋልት ቡስት ከንቶሰ። 10 እሶኦተ ሉስሾ ዳቡሎስቹ «ዲኘ» ዬኖሪነ ጊረ በሃር ኣዜን ሞችቹሁ ቆጰናንቹ ህራጋንቹሁ ዮበ ቶረሞ። እሶኦንት ዶሊ ሆሪንከ አንከርሃ በራሃ በርችተ እካእ። 11 ህከኒች ዘኪን አበ ዎጁ ዎሞመ በርጩመሃ በርጩምስ አሌን አፉዕሌኢሃ ጡጆም። ብሬችስን ሰሞሁ ኡለቲ ሁንቶእ። መዕንንት ደገንትምበሰ። 12 አሞ ቀቀሃኑሁ አበባኑሁ ሬቶሩ ሆሩንኩ ዎሞመ በርጩም ብሬን ኡርትየን ጡጆም። ህከኔን መጣፈት ፈነንቶእ። ህትጉንተ ዎሉ መጣፉ ህኩስን ሄቸ መጣፉሁ ፈነሞ። ህኩ ሬቶሩንኩ መጣፋን ጣፈንቶ ሁጄሰጊን ፍርደሞሰ። 13 በሃሩንኩ እስ ኣዜን ዮ ሬቶረ ኣሴእ። አሞ ሬሁቲ ሲኦሉሁ እሶኦ ኣዜን ዮ ሬቶረ ኣስቶእ። ሆሩንኩ ሁጄስገ ፍርደ ኣቄእ። 14 ህከኒች ዘኪን ሬሁቲ ሲኦሉሁ ጊረ በሃር ኣዝ ቶረንቶእ። ህኩ ጊረ በሃሩንኩ ለንክተ ሬሁ። 15 ሱዕሙስ ሄቸ መጣፋን ጣፈም ደገሙምቡ ሆሩንኩ ጊረ በሃር ኣዜን ቶረሞ።
1 ህከኒች ዘኪን ሃሮ ሰማሃ ሃሮተ ኡለታ ጡጆም። ዳፉንኩስ ዎነ ሰሞሁ ኡለቲ ህጌእ። በሃሩንኩ ህከኒች ዘኪን ሄአኖበአ። 2 አሞ ጡማንቹት ሃሮት ዬሩሳሌም ከተንቹት ምኔኒሀንሴ መክቶ እዜቾገ ቅጠንት ሰሜች መገንቢች ድርተንየን ጡጆም። 3 ህትጉንተ አበት ላገት ዎሞመ በርጩሚች «ህኩዕኒን፥ መገን ገልትት መኒን ሜጡ እኬእ። እስን እሶኦን በርገም ሄአኖ። እሶኦንት እስ መነ እካእ። መገኑ ገጉንኩስ መገኑሰ እክ እሶኦን ሜጡ እሀኖ። 4 አሞ እሌችሰ እንጂጅተ ሆረንተ ሺንሸኖ። ህከኒች ዘኪን ሬሁት እንዶ ክቼቹ እንዶ ኦነት እንዶ በርችተ እሁ እሀኖበአ። ዳፉንኩስ ከኒች ብሬ ጠሁ ሆሩንኩ ህጌእ» ይተንየን መጮጬም። 5 ህከኒች ዘኪን ዎሞመ በርጩም አሌን አፉዕሌኢ «ህኩዕኒን፥ አን ሆረረንከ ሃሮ አሳም» ዬእ። አሞ እስን ኤሳ «ት ላገት አመዕነንቴኢታ ገሬቢታ እኮተኔ ጣፍ» ዬኤ። 6 አሞ «እኬእ። ዎነቢሁ ዘክቢሁ፥ ሆሪችን ብሬ ዮሚሁ ሆራሪችን ዘኪን ሄኣሚሁ አኔት። ሰገቦሀኒ ሄቸ ዎእ ቡዕሌቾች ጠለንከ ኣሳም። 7 ቄሎ ካን ረገአኖ። አንን መገኑስ እሃም። እስን ቤቱኤ እሀኖ። 8 ጠሁ እኮዳ ዋጀላሻከት፥ አመዕንቱምቡሩ፥ ቡሻከት፥ መነ ሽቶሩ፥ ሳኣኑ፥ ኪላኑ፥ መገኒ ሰገድ ቆደ ዎሎራን ሰገዳሩ ቆጰናኑሁ ሆሩንኩ ቆዱሰ «ዲኘ» ዬኖሪነ ጊረ በሃር ኣዝ እሀኖ። ህኩስን ለንክተ ሬሁ» ዬኤ። 9 ህከኒች ዘኪን ዘካንች ለመሉንኩ ቦበኑ ዊሜ ለመልተ ጤንቁተ አፎ ለመላንከ መገን ሰሜ ሶቀማኒች መቱ ዋልኬእ «ዋል! ሆልች ቡትች ምን አመተ እኮ እዜቹተ ጡድሳንኬ» ያን ጠሃቄኤ። 10 ጡማንቾ አያኒን መቶ አብሽ አበ ዱን አል ፉሽ ጡማንቹት ዬሩሳሌም ከተንቹት ሰሜች መገንቢች ድርተንየን ጡድሾኤ። 11 እሴን መገን አብኒን ጫክተዮ እኬ። ጫኩንኩሴ ገግሞጠ አጉደኖ ህረስ አብስ እትሰ ክን ቀጠ ቤሌሌሰዮሃ እኬ። 12 ህተን ከተንቾንከ አብስ አበት ቄራዕሩት ግምብ ኦተቲ ቶነ ለሙ ጎጩሁ ዮሴየ እኬ። አሞ ቶነ ለሟንከ ጎጫን ቶነ ለሙ መገን ሰሜ ሶቀማኑ ዮ እኬ። ህተን ጎጫከ አሌንን ቶነ ለሟንከ እስራኤል ዜር ሱዕሙ ጣፈሜ እኬ። 13 አሞ እሴ ጎጫከንት አርፉል ዉዲን ሰሱ፥ ብዜን ዉዲን ሰሱ፥ ሙጌን ዉዲን ሰሱ፥ አራግ ዉዲን ሰሱ ዮ እኬ። 14 ህከን ከተም ግምብ ኦታንከ ቶነ ለምት ሾሁት ዮ እኬ። ህተን ሾሆ አሌን ሆልች ቡትች ቶነ ለሟንከ ሶቀማን ሱዕሙ ጣፈሜሃ እኬ። 15 ህከን ኤሳን ጠሃቄ መገን ሰሜ ሶቀማንቺ ከተመ፥ ከተምስ ጎጨሃ ኦተሲ ኬነኖ ዎርቅ ብጡ ዮስ እኬ። 16 ከተንቹስ ቄራዕርመሴ ሀራርመሴ ቅጠመተ እክ ሾሉንኩሴ ዉዱ ቅጠሜሃ። መገን ሰሜ ሶቀማንቹንኩ ከተንቹስ ብጢንተስ ኬንየን ለሙ አገነ መረንሰኖ ቀጠበ እኮእ። ከተንቾስ ቄራዕርመት፥ ሀራርመቲ ኡርሸቲ ቅጧ እኬ። 17 አሞ መገን ሰሜ ሶቀማንቹ ከተምስ ግምብ ኦተተ ኬንየን መንቹ ኬነኖሀኒን መትተ ጥብተ ሾላነ ሾልተ አንገታ እኮ። ህኩስን መገን ሰሜ ሶቀማንችየ ኬናንቹ እኬ። 18 ግምብስ ኦተንት ሁጀተንቶኢ ሀሚሉ አጉደኖ ክኒኔት። ህት ከተንቹንት ደናሞ ገግሞጥገ ዮ ሙጩሮ ዎርቂን ሁጀተንቴታ። 19 ህከን ከተም ግምብ ኦተ ሾሁት አነነ አነነ ሀገረ ጩሉአሰኖ ክኒን መክቴታ እኬ። እሶኦንት ዎነቢ ሀሚሉ አጉደኗ ክኑ። ለንክቢ ዎአ አጉደኗ ክኑ። ሰክቢ «ኬልቄዶነ» ዬኖ ባዶን ደገመኗ ሀሚሉ አጉደኗ ክኑ። ሾልክቢ ሀበረ አጉደኗ ክኑ። 20 ኦንትቅቢ ገደራ ክኑ። ሌህቅቢ ቢሻ ክኑ። ለመልቅቢ ዎርቀ አጉደኗ ክኑ። ሄዜትቅቢ ህጥተ አጉደኗ ክኑ። ሆንስቅቢ ባራ ክኑ። ቶርዱንቅቢ «ኬልቄዶነ» ዬኖ ባዶን ደገመኗ ቡላ ክኑ። ቶነ መትቅቢ ሰማ አጉደኗ ክኑ። ቶነ ለንክቢ ዳማ ክኑ እኬ። 21 ህኩ ቶነ ለሙንኩ ጎጫከት ጆሎቦገ ዮሃ ቶነ ለሟረ። ህት ጎጫከንት አኑንኩ አኑንኩ መ-መቶ ጆሎቦገ ዮሪን ሁጀተንቴታ። ከተምስ ዎቆ ቡርጩቅገ ለሊሰኗ ሙጩሯ ዎርቀ እኬ። 22 ሆረንከ ደንደኖ ቀርቹ መገኑሁ ሆልች ቡትቹሁ ህተን ከተንቾ መገን ምን እኮተኔ ከተምስ ኣዜን መገን ምን ጡድምበአ። 23 ህከን ከተሚንከ መገን አብኑ ጫክሰኖሴተኔሃ ሆልች ቡትቹ ገጉንኩስ ጫከሴ እኮተኔሃ አሪቹት እንዶ አገንቹ ጫክሶሴተ ሀስሰኖሴበአ። 24 ምናደቡንኩ ህከን ከተም ጫኪን መረንታእ። ህትጉንተ ኡለ አል ዎማከንት አብንሰ ከተምስ ኣዝ ኤባእ። 25 ከተምስ ጎጫከንት በራን ሆረን ጡፈንታበአ። አንከሩንኩ ሆረን ዮበአ። 26 ምናደብ ህበሃ አብንሃ እሴበ ኤባእ። 27 ጠሁ እኮዳ ሆልች ቡትች ሄቸ መጣፋን ጣፈንቶሪች ጠሊች በጋን ቡሹሩ ሆሩንኩ፥ ሽግገአኖረ አስታሩ ቆጰነ ጠሃታሩ ህከ ከተመ ሆረን ኣጋበአ።
1 ህከኒች ዘኪን መገን ሰሜ ሶቀማንቹ መገንነ ሆልች ቡትች ዎሞመ በርጩሚች ዛዘዮ ሬቄቹተ አጉደኖ መጠለ ሄቸ ዎእ ለገ ጡድሾኤ። 2 ህኩ ለጉንኩ ህከን ከተም ዎቄ ቅጡ ሜሬሩ ሙር ህገኖ እኬ። ህከን ለግ ከ ዉዲኒ ካጵ ዉዲኒ አገናን አገናን ቶነ ለምተ ሀገረተ ላሉተ ላለኖ ሄቸ ሀቁቹ ዮ እኬ። አሞ ህከን ሀቁች ቦንጡ ምናደቡ ፈይማን ሄአኖገ አሰዮ እኬ። 3 አቼ ጤሌሉ ሆረን ሄአኖበአ። ከተማንተስን መገንነ ሆልች ቡትች ዎሞመ በርጩሙ ሄአኖ። ሶቀማኑስን ሰገዳስ። 4 እሶኦንት እልስ ጡዳእ። አሞ ሚኔንተሰን እስ ሱዕሙ ሄአኖ። 5 ቴሶ አንከሩ ሆረን ሄአኖበአ። ቀርቹ መገኑ ጫክሰኖሰተኔ መርባት ጫኩ እንዶ አሪቾ ጫኩ ሆረን ሀስሰኖሰበአ። እሶኦንት ዶሊ ሆሪንከ ዎሞዕምታእ። 6 ህከኒች ዘኪን መገን ሰሜ ሶቀማንቹ «ት ላጋከት አመዕነንቴሃረኒ ገርተኒ። ህራጋን አያን ቀርቹ መገኑ ቀሆ ጄቾች ዘኪን እሀኖ ጠሀ ሶቀማኒሀንስ ኩሉንተ ሰሜ ሶቀማንቹስ ሶኬእ» ዬእ። 7 «ህኩዕኒን፥ አን ሰርብ ዋላም። ከን መጣፍ ህራግ ላገተ ቆረበኖ ማሰአሜሃ።» 8 አን ዮሃንስ ገጉንኩኤ ህከረ ጡጆምኒ መጮጬምኒ። አንን ጡጆምነ መጮጬም ጃተ ህከረ ጡድሾኤ መገን ሰሜ ሶቀማንቺ ሰገዶስተ ሎካንተስ ኡቦም። 9 ጠሁ እኮዳ መገን ሰሜ ሶቀማንቹስ «አጉር! ካን አስቶት። አን ኬሳን፥ ህዛካንተክ ህራጋኒኒ ከን መጣፍ ላገተ ቆረባ መኒኒ በርገም ሶቀማንቿ። አት መገኒ ሰገድ» ዬኤ። 10 አሞ እስን «ጄቹት ኢልቶተኔ ከን መጣፋን ዮ ህራግ ላገተ ማተቢን ጡፎት። 11 ሾኩንኩ ብርተ ለቅ ሾኩን። ቡሹንኩ ብርተ ለቅ ቡሹን። ሙጩሩንኩ ብርተ ለቅ ሙጩሩን። ጡማንቹንኩ ብርተ ለቅ ጡማንቹንከ እሁን» ዬኤ። 12 አሞ «ህኩዕኒን፥ አን አኒንከ አኒንከ ሁጄስ ቆደ ኣሳምረ አፍ ሰርብ ዋላም። 13 አን ዎናኒ ዘክየኒ፥ ብሬየኒ ኤተርየኒ፥ ሆራሪችን ብሬ ዮምየኒ፥ ሆራሪችን ዘኪን ሄኣምየኒ» ዬእ። 14 ጎጪንተስ ጠብት ከተመ ኣጎታ ሄቸ ሀቅበ ኢልቶታ መቆ ኣሰሙንተሰ ኦድሸሰ ኣንሽታሩ ማሰአንቴሃረ። 15 ጠሁ እኮዳ ዎሸት፥ አስመተ አስታሩ፥ ሳኣሩ፥ መነ ሽታሩ፥ መገኒ ሰገድ ቆደ ዎሎራን ሰገዳሩ ቆጰነ ኢትታነ ጠሃታሩ ዮኢ ኤተሪኔት። 16 «አን ዬሱሱ ከ ጠሀ ክዕኔኤ ነቀሱንተ ሰሜ ሶቀማንቹኤ ሆራንከ አመዕናን ጠጵቲ ሶኬም። አንን ዳዊቴ ጠጵየኒ ዜርየኒ። ጫክሳ ሶዝሜ ብሬ ቤዜቹቲ አኔት።» 17 ጡማንቹ አያኑሁ እዜቹቲ «ዋል» ይታእ። አሞ መጮጨኖንኩ «ዋል» ዩን። ሰገቦንኩ ዋሉን። ሀሾንኩ ሄቸ ዎአ ጠለንከ ኣቁን። 18 ከን መጣፍ ኣዜን ጣፈንቶ ህራግ ላገተ መጮጨኖሀኒ ሆሪንከ ቃርስ ኩላም። አዪ ተን ላገ አሌን መቱረ በርጌደ ከን መጣፋን ጣፈሞ ቦበነ መገኑ በርገኖስ። 19 አሞ አዪ ከን ህራግ መጣፋን ጣፈንቶ ላጋች መቱረ ኮትሾደ ከን መጣፋን ኩለንቶ ሄቸ ሀቅ ላሎቺ ጡማንቾ ከተንቾቺ መገኑ ቆደስ ከመኖ። 20 ከን ሆራሪንከ ነቃሸ እኮ «ገርንተ ሰርብን ዋላም» ያዮእ። አሚዕን። ቀርቾ ዬሱሰ ዋል። 21 ቀርቾ ዬሱስ ኣሰንቹ ሆሪንተዕኔን ሜጡ እሁን። አሚዕን።