1 Folofolo, jannin haali duniya xa da, men be kilila xo Xumo, wo tun be je. Wo Xumo tun nin Ala be i ɲoxo fe, wo Xumo tun mu Ala le ti. 2 Kabirin folofolo a tun nin Ala be i ɲoxo fe. 3 Fenŋo bee data ate le barako to. Dafen fusi man da ate xo. 4 Nilamaya tun be ate le to. Wo nilamaya tun mu hadamadinŋolu la keneya le ti. 5 Wo keneya be manala dibo to, bari dibo man son a to. 6 Ala xa moxo do ki, a toxo xo Yaya. 7 A nata seedeyalo ke. A nata wo keneya seedeya, walasa moxolu bee xa lannaya ke wo xanma. 8 A fan tun nte wo keneya ti, bari a nata le xa keneya seedeya. 9 Wo keneya tun mu keneya soobe le ti, men nata duniya to, xa keneya bo hadamadinŋo bee ɲen. 10 Wo Xumo tun be duniya to. Duniya data ate le barako to, bari duniya man a lon. 11 A nata a fan na moxolu bata, bari a fan na moxolu man son a to. 12 Bari moxo mennu sonta a to, xa la a la, a xa fango di wolu bee ma xa ke Ala dinŋolu ti. 13 Wolu man wulu moxo wuluɲa ma, hadamadinŋo sago man wo ke, walla xeba sago, bari Ala kilin ne xa wo ke. 14 Wo Xumo keta moxo ti, xa na sigi ntelu to. Ntelu x'a nooro je, wo nooro be í xo Dinxe kilinpe nooro, men bota Fa Ala to, neemo nin tonɲa dafaninŋo tun b'a bulu. 15 Yaya x'a la kuwo seedeya, a fetenta xo: «Ń tun x'a fo ate le ma, xo men be nala nte xofe, a be ń ɲa; bawo a tun be je jannin nte xa wulu.» 16 N bee xa do soto a la dafaninɲa to, anin neema nin neema. 17 Ala xa sariya di n ma kila Musa le fe, bari neemo nin tonɲa nata Isa Kirisita le bulu. 18 Moxo si bada ɲa man la Ala xan, bari Dinxe kilinpe men mu Ala ti, nin a be Fa Ala bata, wo le x'a yita n na. 19 Yahudiyalu la ɲamoxolu xa sadaxalasibaxolu nin Lewikundango dolu ki xa bo Yerusaleme, xa taxa Yaya ŋininxa xo a mu jon ti. A x'e jaabi xumo men na, wo fele: 20 A man i ban i jaabila, bari a x'a fo x'a laxoyiya i bee ɲen xo: «Nte nte Kirisita ti.» 21 I xo a ɲen xo: «Í dun mu jon ti? Í mu kila Eli le ti ba?» A xo: «Nte nte wo ti.» I xo: «Kila men na xumo fota, í mu wo le ti ba?» A xo: «Ayi, ń nte wo ti.» 22 I xo: «Í dun mu jon ti? Wo fo n ɲen, walasa n xa taxa jaabi kilin di n kibaxolu ma. Í be mun fola í fan na kuwo to?» 23 A xo: «Men be fetenna wulo xono x'a fo xo: “Alu Marigi la silo latilin!” Nte mu wo le ti, í xo kila Esayi x'a fo ɲa men.» 24 Moxolu mennu kita, wo dolu tunnu mu Farisiya lelu ti. 25 I x'a toŋininxa xo: «Nin í nte Kirisita ti, í nte kila Eli ti, í nte wo kila ti, mun dun na í be moxolu batisela?» 26 Yaya x'e jaabi xo: «Nte ken be batiselo kela jiyo le la. Bari moxo do be alu to, alu man wo lon. 27 A be nanin nte xo. Haali xa wo la samato julo firin, nte nin wo man xan.» 28 Wo kuwolu keta Betani, Yuruden ba xofe, Yaya tun be moxolu batisela dula men. 29 Wo lun do, Yaya xa Isa je nanin a ma, a xo: «Ala la Saaxandinŋo fele, men be duniya la junubo bola je. 30 Ń tun x'a fo ate le ma xo xe do be nala nte xofe, xo bari, a be nte ɲa, bawo jannin nte xa bo duniya to, ate tun be le je. 31 Nte fan tun man a lon. Bari nte nata moxolu batise jiyo la, walasa x'ate yita Banisirayila dinŋolu la.» 32 Yaya xa seedeyalo ke xo: «Ń xa Ni Senunŋo je jigila a xan xa bo sanŋo to í xo jenetubanŋo, xa tu a xan. 33 Nte tun man a lon, bari men xa ń ki xa moxolu batise jiyo la, wo le x'a fo ń ɲen xo: “Í je Ni Senunŋo je jigila men xan xa tu a xan, wo le be moxolu batisela Ni Senunŋo la.” 34 Nte xa wo je anin ń b'a seedeyala xo ɲin xe in mu Ala Dinxe le ti.» 35 Wo lun do, Yaya nin a la xarandinŋolu moxo fula tun be wo dula tugun. 36 A xa Isa tanbito je, x'a mafele, a xo: «Ala la Saaxandinŋo fele.» 37 Xarandin fulo xa Yaya me wo fola, i woman innu x'a lo Isa nofe. 38 Isa x'é xofele. A x'a je xo i b'a nofe. A xo i ɲen xo: «Alu be mun ŋininna?» I xo: «Rabi, í be jiginin min?» «Rabi» xoto mu le xo «Karanmoxo». 39 A xo i ɲen xo: «Alu na, xa je je.» I woman innu taxata a jigidula mafele. Wo benta tilo sumayatumo ma. I tuta a bata wo lunŋo. 40 Xarandin fulo men xa Yaya lame, x'a lo Isa nofe, Simon Piyere doxoxe Andere tun mu wolu to do le ti. 41 Andere taxata a xotoxe Simon ma folo, a xo a ɲen xo: «N xa Alimasiya je, nin wo mu Kirisita ti.» 42 Wo keninŋo, a taxata a ti Isa bata. Isa xa Simon mafele, a xo a ɲen xo: «Í mu Simon ne ti, Yaya dinxe. Í si kili xo: Sefasi». Wo xoto xo «Piyere» walla «fataxulo». 43 Wo lun do, Isa xo x'a be taxala Galile. A xa Filipe je, a xo a ɲen xo: «A lo ń nofe!» 44 Filipe tun be bola Betesayida le, nin wo mu Andere nin Piyere la gallo ti. 45 Filipe taxata Natanayeli ma, a xo a ɲen xo: «Musa xa men na kuwo fo Sariya kitaabo xono anin kilalu dulu xumata men xan, ntelu x'a je. Isa le mu, Nasareti Yusufu dinxe.» 46 Natanayeli xo a ɲen xo: «Fen ɲuma si bo no Nasareti ba?» Filipe xo a ɲen xo: «Na a mafele.» 47 Isa xa Natanayeli je nanin a ma, a xo: «Banisirayilango yeerewuluwo fele, nanbara fusi nte men na kuwo to.» 48 Natanayeli xo a ɲen xo: «Í xa nte lon min?» Isa xo a ɲen xo: «Jannin Filipe x'é kili, nte tun x'é je turojuwo xoto.» 49 Natanayeli x'a jaabi xo: «Karanmoxo, í mu Ala Dinxe le ti. Í mu Banisirayila mansaxe le ti.» 50 Isa x'a jaabi, a xo: «Bawo ń x'a fo í ɲen xo ń x'é je turojuwo xoto, wo le x'a tu í xa lannaya ke ba? Í si kuwolu je mennu barako xa bun ɲinnu ti.» 51 Isa xo: «Tonɲa tonɲa, ń b'a fola alu ɲen xo silan alu si sanxulo dayeleninŋo je, xa Ala la melekiyolu jigito nin i yeleto je Moxo Dinxe xan.»
1 Wo xo tili fula, maaɲoya keta Galile gallo do to, xo Kana. Isa na tun be wo maaɲoya to. 2 I xa Isa du nin a la xarandinŋolu kili wo maaɲoya to. 3 Awa dolo nata dasa. Isa na woman in xo a ɲen xo: «Doli nt'e bulu tugun.» 4 Isa x'a jaabi xo: «Muso, í b'a fe ń xa mun ke? Ń na waxato man si folo.» 5 A na woman in xo baaradinŋolu ɲen xo: «A je fen wo fen fo alu ɲen, alu a ke ten.» 6 Kurudaxa wooro tun be je Yahudiyalu la fansenuya xanma Ala ɲa xoto. Jibifeba ɲa luulu fo wooro tun si ke wo daxolu kilin wo kilin xono. 7 Isa xo baaradinŋolu ɲen xo i xa wo daxolu lafa jiyo la. Wolu x'e lafa, x'e ben i da ma. 8 A xo i ɲen xo: «Alu do ta silan, xa taxa a di domoliɲabobaxo ma.» I taxata do di a ma. 9 Wo x'a nene, a x'a tara a yelemata dolo ti. A man a lon, wo dolo bota dula men. Baaradinŋo mennu xa jiyo ta, wolu xa wo bodula lon. Domoliɲabobaxo xa maaɲoxe kili. 10 A xo: «Moxo bee be folola le xa dolo dimanŋo di moxolu ma. Nin i x'e fa wo la, wo xo, men man di bete, a si laban xa wo di. Ite dun xa dolo dimanŋo lamara fo saasa?» 11 Awa wo le keta Isa la kawaku folo ti, Galile Kana. A x'a la nooro yita. A la xarandinŋolu lata a la. 12 Wo xo, Isa taxata Kaperenahun gallo to, a nin a na nin a badinxelu nin a la xarandinŋolu. I xa tili dantalu ke je. 13 Yahudiyalu la Tanbinxansallo sutiyaninma, Isa taxata Yerusaleme. 14 A xa moxo dolu tara Alabatusuba xono, i be tuuralu nin saaxolu nin jenetubanŋolu fiirila. Xaalisifalinnalu du tunnu be siginin je. 15 A xa julukeso ta xa buso dara, x'e bee labo Alabatusuba xono, i nin i la saaxolu nin i la tuuralu. A xa xaalisifalinnalu la tabalolu kundinmayelema, x'e la xaalisolu jenjen. 16 A xo jenetuban fiirilalu ɲen xo: «Alu ɲinnu bee bo jan. Alu xana ń Fa la luwo ke fiirikedula ti.» 17 A la xarandinŋolu hakilo jigita Kitaabo la ɲin xuma innu la xo: «Í la luwo kuwo hanmo be nte la, fo a be ń janila í xo ta.» 18 Wo keninma, Yahudiyalu la ɲamoxolu xa Isa ŋininxa xo: «Í be taagumanseede joman yitala, men s'a laxoyiya n ma, xo yanmaruya b'é bulu xa ɲin ke?» 19 Isa x'e jaabi xo: «Alu ɲin Alabatusuba in te. Ń s'a tolo tili saba xono.» 20 Yahudiyalu la ɲamoxolu xo a ɲen xo: «Í xo di? Tan naani nin san wooro le keta ɲin Alabatusuba in lo la. Ite xo x'é si wo le tolo tili saba xono?» 21 Bari Isa tun be Alabatusuba men ma, wo mu a fan balo le ti. 22 Isa kunita xa bo furelu to tumo men, a la xarandinŋolu hakilo jigita a la wo xumo kun. I lata Kitaabo xumolu la, xa la Isa du xumaxanŋo la. 23 Xa Isa tu Tanbinxansallo to Yerusaleme, moxo kiika lata a la, bawo i tunnu ɲa b'a la a be taagumanseedolu kela. 24 Bari Isa tun man la i la, bawo a tun x'e bee xonokuwo lon. 25 A haaju tun nt'a la, moxo xa moxo la ɲa fo a ɲen, bawo men be moxo xono, a fan tun xa wo lon.
1 Ɲin keta Farisiya diino moxo do le ti, a toxo xo Nikodeme. Yahudiyalu la ɲamoxo do le tun mu. 2 Lun do, a nata Isa bata suwo to, a xo a ɲen xo: «Karanmoxo, ntelu x'a lon xo Ala le x'é ki xa na n xaran. Bawo í b'a ma xa taagumanseedo mennu ke, moxo si me wolu ke no nin a nin Ala nte i ɲoxo fe.» 3 Isa x'a jaabi xo: «Tonɲa tonɲa, ń b'a fola í ɲen, xo nin moxo men man towulu, wo me dun no Ala la Mansaya xono.» 4 Nikodeme xo a ɲen xo: «Moxo men xotota xa ban, wo si wulu no ɲa di tugun? A s'í koppa no a na xono to tugun ba, xa saagi wulunin?» 5 Isa x'a jaabi xo: «Tonɲa tonɲa, ń b'a fola í ɲen, xo nin jiyo nin Ni Senunŋo man moxo men wulu, wo me dun no Ala la Mansaya xono. 6 Balasubo xa men wulu, wo mu balasubo le ti. Ni Senunŋo xa men wulu, wo mu niyo le ti. 7 Í dabaro xana ban nin ń x'a fo í ɲen xo waajibo le mu, alu xa towulu. 8 Nin í xa foɲo mafele, dula wo dula xa di a ɲen, a si tege non. Í s'a sonxoxanŋo me í tulo la, bari a be bola jan men anin a be taxala jan men, í man wo lon. Niyo xa moxo men wulu, wo be ten.» 9 Nikodeme xo a ɲen xo: «Wo si ke ɲa di?» 10 Isa x'a jaabi xo: «Ite men mu Banisirayila la karanmoxo ti, í man wo kuwolu lon? 11 Tonɲa tonɲa, ń b'a fola í ɲen xo, n xa men lon, n be wo le fola. N xa men je, n be wo le du seedeyala. Bari alu nte n na seedeya mutala. 12 Ń xumata alu ɲen duguxulo xan kuwolu la, bari alu man la ń na. Alu si lannaya ke ɲa di nin ń xumata alu ɲen sanŋo to kuwolu la? 13 Moxo si man yele xa taxa sanŋo to, fo Moxo Dinxe, wo men jigita xa bo je. 14 «Kila Musa xa sa dara, x'a siti guma la, x'a xotota wulo xono ɲa men de, waajibo le mu Moxo Dinxe du xa xotota ten, 15 walasa moxo wo moxo nin í lata a la, wo tigi xa nilamaya banbalo soto. 16 Bawo Ala xa duniya xanu haali fo a x'a Dinxe kilinpe di, walasa xo nin moxo wo moxo lata wo la, wo xana halagi, bari a xa nilamaya banbalo soto. 17 Ala man a Dinxe ki xo a xa na kiito tege duniya xan. A x'a ki le, nin a si duniya kisi. 18 «Moxo men je la a la, wo sin nte sinin kiito to; bari moxo men man la a la, kiito tegeta wo tigi xan xa ban, katugu a man la Ala Dinxe kilinpe la. 19 Wo kiito ɲa fele xo: Keneya nata duniya xono, bari dibo diyata moxolu ɲen keneya ti, bawo i la kebaarolu xa jaxu. 20 Moxo wo moxo be jaxumanŋo kela, keneya man di wo ɲen. Wo tigo me son du xa na keneya la, a la kebaarolu xana taxa je. 21 Bari moxo men, nin a la kebaarolu be tonɲa xan, wo si na keneya la, walasa bee x'a je x'a lon xo a la kebaarolu be Ala to.» 22 Wo xo, Isa nin a la xarandinŋolu taxata Yude maro la. A tuta i bata je xa moxolu batise. 23 Yaya du tun be moxolu batisela Enon, Salimu senbo to, bawo jiyo kiika tun be non. Moxo tunnu be nala je xa batise. 24 Wo x'a tara Yaya tun man bula kaso la folo. 25 Lun do, soosolo wulita Yaya la xarandinŋolu nin Yahudiya do te. Wo soosolo tun be i la senuyaliɲa xan, i la laado silo la. 26 I nata Yaya ma, i xo: «Karanmoxo, í nin xe men tun be Yuruden ba xofe, fo í x'a la kuwo seedeya, a fele: A du be batiselo kela saasa. Moxo bee be taxala a bata.» 27 Yaya x'e jaabi xo: «Moxo me fusi soto no nin Ala man men di a ma. 28 Alu fannu mu ń seedo ti, ń x'a fo alu ɲen xo: Nte nte Kirisita ti, bari nte bulata a ɲa le.» 29 Yaya xo i ɲen du xo: «Maaɲoxe le ta mu maaɲo ti. Bari maaɲoxe xanunte, wo men be maaɲoxe senbo to, x'a xumaxanŋo lame, a du si ɲaxali bete maaɲoxe xumaxanŋo la. Nte du la ɲaxalo be ten ne. Ń na ɲaxalo dafata. 30 Waajibo le mu, do xa kafu ate bunɲa ma, do xa bo nte ta la. 31 «Men bota sanŋo to, wo be bee kunna; men bota duguxulo xan, wo mu duguxulo ta le ti, a be duguxulo xumo lelu fola. Bari men bota sanŋo to, wo be fen bee kunna; 32 a xa men je, a xa men me, a be wo le seedeyala. Bari moxo si nte sonna a la seedeya ma. 33 Moxo men be sonna a la seedeya ma, wo s'a yita x'a xoyiya, xo Ala mu tonɲatigo le ti. 34 Ala xa men ki, wo be Ala la xumaxanŋo lelu fola, katugu Ala xa Ni Senunŋo di a ma x'a dafa. 35 Fa Ala be a Dinxe xanunin. Wo xanma, a xa kuwo bee dun a bulu. 36 Moxo men je la a Dinxe la, wo xa nilamaya banbalo soto; moxo men man son xa la Ala Dinxe la, wo me nilamaya banbalo soto, bari Ala la diminŋo b'a xan.»
1 Farisiyalu x'a me xo Isa be xarandinŋo men sotola x'a batise, wo xa sa Yaya ta ti. 2 Bari Isa fan tun nte moxo batisela. A la xarandinŋo le tunnu be wo kela. 3 Isa xa wo me tumo men, a bota Yude maro xono, x'é koppa Galile maro ma. 4 Wo to, a tun xa xan xa Samari maro tokutun. 5 X'a taxato tu non, Isa nata Samari gallo do to xo Sikare. Yahudiyalu mamaxe Yaxuba xa fuuto men di a dinxe Yusufu ma, Sikare be wo fuuto senbo to. 6 Yaxuba la xolonŋo be non. Isa segeninma taxamo la, a taxata í sigi wo xolonda la. Wo benta tilinkunte ma. 7 Awa, Samaringamuso do nata jita la. Isa xo a ɲen xo: «Jiyo do di ń ma, ń xa ń min.» 8 Wo x'a tara a la xarandinŋolu taxata domolisandula gallo xono. 9 Samaringamuso xo a ɲen xo: «Aa, ite Yahudiyama le be minnijiyo ŋininna nte Samaringama la?» Muso xa wo fo, bawo kafu tun nte Yahudiyalu nin Samaringolu te. 10 Isa xa muso jaabi xo: «Nin í tun xa Ala la nilifenŋo lon anin moxo men janxa minjiyo ŋinin í la ten, ite fan tun si jiyo maŋininxa wo la, a tun si nilamaya jiyo d'í ma.» 11 Muso xo a ɲen xo: «Marigi, í si wo nilamaya jiyo bo min? Fate nte í bulu, xolonŋo dun xa jan. 12 Ite xa bun ne ntelu mamaxe Yaxuba ti ba, wo men xa ɲin xolon in di ntelu ma? Ate fan x'a jiyo min, a dinŋolu dulu nin a la marafenŋolu x'a jiyo min.» 13 Isa x'a jaabi xo: «Moxo wo moxo xa ɲin ji in min, mindoxo s'a muta tugun. 14 Bari moxo wo moxo x'é min nte la jiyo la, mindoxo me wo muta abada. Ń je jiyo men di a ma, wo si ke a xono í xo ji woyota, xa nilamaya banbalo di a ma.» 15 Muso xo a ɲen xo: «Marigi, wo jiyo di ń ma, walasa mindoxo xana ń muta tugun, anin ń xana na jita la jan tugun.» 16 Isa xo muso ɲen xo: «Taxa í xe kili, alu xa na jan.» 17 Muso x'a jaabi xo: «Xe nte ń kun.» Isa xo a ɲen xo: «Í xa tonɲa fo, xo xe nte í kun; 18 bawo í sigita xe luulu kun xa tanbi. Haali xe men b'é kun saasa, wo nte í xe ti. Wo to, í xa tonɲa fo.» 19 Muso xo a ɲen xo: «Marigi, nte x'a je xo í mu kila le ti. 20 Ntelu mamaxelu xa Ala batu ɲin kuru in xan. Bari atelu Yahudiyalu xo, xo batulo xa xan xa ke dula men, wo be Yerusaleme le.» 21 Isa xo a ɲen xo: «Muso, la a la, xo waxato si na, alu si Fa Ala batu, jan nte, Yerusaleme nte. 22 Atelu Samaringolu fannu be men batula, alu man wo lon. Ntelu Yahudiyalu be men batula, n xa wo lon. Bawo kisilo be bola Yahudiya lelu to. 23 Waxato be nala, a sita xa ban, batubaxa soobelu si Fa Ala batu niyo nin tonɲa la; bawo Fa Ala be wo ɲoxon batubaxo lelu ŋininna. 24 Ala mu Niyo le ti. Waajibo le mu, a batubaxolu x'a batu niyo nin tonɲa la.» 25 Muso xo a ɲen xo: «Ń x'a lon xo Alimasiya be nala, nin wo mu Kirisita ti. Nin wo nata, a si fenŋo bee ɲa fo n ɲen.» 26 Isa xo a ɲen xo: «Nte men je xumala í ɲen de, nte le mu.» 27 Xa Isa nin wo muso tu xumala, a la xarandinŋolu nata. I x'a nin muso tara xumala tumo men, wo x'e dabaro ban. Bari moxo si man a ŋininxa xo «Í be mun nofe?» walla xo: «Mun na í be xumala a ɲen?» 28 Muso x'a la jitalanŋo sigi, xa taxa gallo xono, x'a fo moxolu ɲen xo: 29 «Alu na xe do mafele, men saagita nte la ku keninŋolu bee ma ń ɲen. A me tara Kirisita ti ba?» 30 Moxolu bota gallo xono xa taxa Isa bata. 31 Wo xono, xarandinŋolu balanta a ma xo: «Karanmoxo, domolo ke!» 32 A xo xarandinŋolu ɲen xo: «Domolifenŋo do be ń bulu x'a domo, atelu man wo lon.» 33 Xarandinŋolu x'e ɲoxo ŋininxa xo: «Do le nata domolo di a ma ba?» 34 Isa xo i ɲen xo: «Xa ń kibaxo sago nin a la baaro ke x'a dafa, wo le mu ń na domolo ti. 35 Alu nte a fola ba xo: “Xaru naani le be lanno nin tegelo te?” Bari nte b'a fola alu ɲen xo: Alu i ɲalu xotota xa fuutolu mafele, i mota xa si tego ma xa ban. 36 Men be tegelo kela, wo s'a sara soto, xa siimankeso du kamari nilamaya banbalo xanma, walasa lannila nin tegelila bee xa ɲaxali i ɲoxo fe. 37 Bawo ɲin sanda in mu tonɲa le ti xo: “Do x'a lan, do x'a tege.” 38 Alu man sege fenŋo men na, ń x'alu bula wo tegela. Dolu segeta, atelu xa wolu la tono soto.» 39 Samari wo gallo moxolu kiika lata Isa la, muso la ɲin xuma in xanma xo: «Ń xa ku wo ku ke, a saagita a bee ma ń ɲen.» 40 Samaringolu naninŋo Isa bata, i x'a matara xo a xa tu i bata. A woman in xa tili fula ke i bata. 41 A la xumo x'a tu moxo kiika lata a la. 42 I xo muso ɲen xo: «Í la xumo doron man a tu ntelu xa lannaya ke. Ntelu fannu x'a lame, n x'a lon tonɲa la, xo duniya Kisibaxo le mu.» 43 Wo tili fulo tanbo xo, Isa bota je xa taxa Galile, 44 bawo Isa fan tun xo, xo kila me bunɲa soto a fan fasuwo la. 45 A sita Galile tumo men, non moxolu x'a kunben bete. A xa kuwo fen wo fen ke Tanbinxansallo to Yerusaleme, wolu tunnu xa wo bee je, bawo i du tunnu taxata salli in to. 46 A x'é koppa Galile Kana ma. A tun xa jiyo yelema dolo ti non ne. Ɲamoxoba do dinxe tun be Kaperenahun gallo to, a man kende. 47 Wo xe x'a me, xo Isa bota Yude, xa na Galile. A woman in nata Isa bata x'a matara, xo a xa na Kaperenahun, a dinxe be ŋinin xa sa, nin a s'a lakisi. 48 Isa xo a ɲen xo: «Xodi, nin alu man taagumanseedolu nin kawakuwolu je de, alu me lannaya ke?» 49 Wo ɲamoxoba x'a jaabi xo: «Marigi, í balan í xa na jannin ń dinxe be sala.» 50 Isa xo a ɲen xo: «Taxa! Í dinxe me sa.» Wo xe lata Isa la xumo la. A xa silo muta xa taxa. 51 A la jonŋolu x'a kunben silo to, x'a fo a ɲen xo: «Í dinŋo kendeyata.» 52 A x'e ŋininxa xo a dinxe kendeyata waxati joman? I x'a jaabi xo: «Kunun tilinkunte tumo le mu, nin xando fatata a ma.» 53 Fa xa jaate muta, x'a lon xo wo waxato fan ne mu, Isa xo a ɲen xo: «Í dinŋo me sa.» A nin a la kore bee lata Isa la. 54 Wo keta Isa la kawaku fulananŋo ti, a boninma Yude, xa na Galile.
1 Wo xo, Yahudiyalu la sallo do keta Yerusaleme. Isa taxata je. 2 Dinxa jima do tun be Yerusaleme xono, Saaxolu la Dunda senbo to. Dinxa jima in toxo heburuxanŋo to xo: Beteseda. Biire luulu tun be lonin je. 3 Jangaruto kiika tun be lanin wolu xoto: Fiyontolu nin sinkilinŋolu nin namatolu. [Wolu tunnu be jiyo lamaxalo laxononin. 4 Marigi la melekiyo do tun si jigi ji in to waxati nin waxati, x'a lamaxa. Nin jiyo lamaxata, jangaruto folo men je jigi a to, a keta jangaru wo jangaru ti, wo si kendeya.] 5 Xe do tun be je, a be jangarunin kabirin san tan saba nin sagi. 6 Isa x'a je lanin tumo men, x'a lon xo jangaru in tun b'a la kabirin waxati jan, a xo a ɲen xo: «Í b'a fe xa kendeya ba?» 7 Jangaruto x'a jaabi xo: «Marigi, moxo nte ń kun xa ń fili jiyo to nin a lamaxata. Nin ń xo, xo ń be jigila, ń s'a tara do xa ń saawa.» 8 Isa xo a ɲen xo: «Wuli, í x'é la laranŋo ta, x'é taxama.» 9 Wo no bee to, a kendeyata. A x'a la laranŋo ta, x'é taxama. Wo kuwo keta tofoɲolunŋo. 10 Yahudiyalu la ɲamoxolu xo xe men kendeyata ɲen xo: «Bi mu tofoɲolunŋo le ti. A dagenin nte í ɲen í x'é la laranŋo ta.» 11 A x'e jaabi xo: «Men xa ń kendeya, wo x'a fo ń ɲen xo: Í la laranŋo ta, x'é taxama.» 12 I x'a ŋininxa xo: «Jon x'a fo í ɲen xo í x'é la laranŋo ta, x'é taxama?» 13 Bari xe men kendeyata, a man a kendeyabaxo lon, bawo Isa tun bota jama to xa ban. 14 Wo xo, Isa xa wo xe tara Alabatusuba xono. A xo a ɲen xo: «A fele, í janxa kendeya. Í xana junube ke tugun, ku xana taxa í soto, men xa jaxu ɲin ti.» 15 Wo xe taxata a fo Yahudiyalu la ɲamoxolu ɲen xo Isa le x'a kendeya. 16 Wo le x'a tu, Yahudiyalu la ɲamoxolu tunnu be Isa nofe, bawo a xa wo kuwo ke tofoɲolunŋo. 17 Isa x'e jaabi xo: «Nte Fa be baaro la tuma bee. Nte du be baaro la.» 18 Wo xumo xanma, Yahudiyalu la ɲamoxolu x'a ŋinin xa Isa faxa xa tanbi folo xan. A xa tofoɲolunŋo toxosi. Wo doron tun nte, bari a tun be Ala du kilila xo a Fa. Wo la, a x'a fan nin Ala xaaɲan. 19 Isa xa xumo ta tugun, a xo i ɲen xo: «Tonɲa tonɲa, ń b'a fola alu ɲen xo: Dinxe me fusi ke no a fan ɲen, fo nin a xa Fa je men kela. Fa je men ke, Dinxe du si wo ke. 20 Fa be Dinxe xanunin, a be fen wo fen kela, a si wo yita a la. A si kebaarolu yita a la, mennu barako xa bun ɲinnu ti, walasa alu dabaro xa ban. 21 Fa be furelu lakunila ɲa men, xa niyo k'e to, wo ɲa ma, a xa di Dinxe ɲen xa niyo ke men to, a s'a ke wo to. 22 Fa nte kiiti du tegela moxo si xan. A xa kiititego bee tu Dinxe le ma, 23 walasa bee xa Dinxe bunɲa í xo i be Fa bunɲala ɲa men. Moxo men nte Dinxe bunɲala, wo nte Fa du bunɲala, wo men x'a ki. 24 «Tonɲa tonɲa, ń b'a fola alu ɲen xo: Moxo wo moxo je ń na xumo lame, xa la ń kibaxo la, wo xa nilamaya banbalo soto. Kiito me tege wo xan abada. A bota saya la, xa nilamaya. 25 Tonɲa tonɲa, ń b'a fola alu ɲen xo: Waxato si na, wo waxato sita fan, furelu si Ala Dinxe xumaxanŋo me. Mennu j'a me, wolu si nilamaya. 26 Nilamaya tigiya be Fa bulu ɲa men, a xa nilamaya tigiya dun Dinxe du bulu ten. 27 A xa kiititego barako di a ma, bawo a mu Moxo Dinxe ti. 28 Alu dabaro xana ban wo la, bawo waxato do be nala; wo tumo moxo, mennu bee be xaburo xono, wolu si a xumaxanŋo me, 29 xa kuni xa bo furelu to. A x'a tara mennu xa ɲuma ke, wolu si kuni nilamaya banbalo xanma. Mennu xa jaxumanŋo ke, wolu si wuli kiito xanma. 30 «Nte me fusi ke no ń fan barako la. Ala be men fola ń ɲen, ń be kiito tegela x'a la wo le xan. Nte la kiito be tilinnin, bawo ń nte ń fan sago ŋininna, bari ń kibaxo sago. 31 Nin nte le be ń fan seedeyala, ń be men fola, wo me muta. 32 Do xote le be nte seedeyala. Ń x'a lon xo a be men fola nte la kuwo to, wo mu tonɲa le ti. 33 Alu xa moxolu bula Yaya bata, a xa men fo ń na kuwo to, wo mu tonɲa le ti. 34 Nin ń xa wo fo, a xoto nte xo nte haaju be hadamadin na seedeyali ma. Ń xa wo fo le, nin alu si kisi. 35 Yaya keta í xo lanpa mananinŋo keneya. A diyata atelu ɲen xa ɲaxali a keneya la waxati la. 36 Fa xa kebaaro mennu dun ń bulu xo ń x'e ke, wolu be nte seedeyala anin x'a yita xo Fa le xa ń ki. Wo seedeyalu xa bun Yaya ta ti. 37 Fa men xa ń ki, wo fan xa ń seedeya. Alu bada man a xumaxanŋo me. Alu bada man a ɲada je. 38 Alu man a la xumo mara, bawo a xa men ki, alu man la wo la. 39 Alu be Kitaabo xumolu xaranbetela, bawo alu ɲala, x'alu si nilamaya banbalo soto wo la. Wo Kitaabu kilinŋo le xonoxumo be nte seedeyala. 40 Bari alu nt'a fe xa na nte ma, xa nilamaya banbalo soto. 41 «Nte nte moxo la bunɲali ŋininna. 42 Ń x'a lon xo alu nte Ala xanula. 43 Ń nata ń Fa toxo la, alu man son ń to. Bari nin do nata a fan toxo la, alu si son wo to. 44 Alu si lannaya ke ɲa di, atelu mennu be i ɲoxo la bunɲa mutala, x'a tara bunɲa be bola Ala kilinpe men to, alu nte wo la bunɲa ŋininna? 45 A xana ke alu ɲen de xo nte le be alu jalagila Fa Ala ɲala. Alu x'alu gigo la Musa men xan de, wo le be kela alu jalagibaxo ti. 46 Nin alu tunnu lata Musa la, alu si la nte du la, bawo a xa nte la kuwo safe. 47 Bari nin alu man la Musa la xuma safeninŋolu la, alu si la nte la xumolu la ɲa di?»
1 Wo xo, Isa taxata Galile dalaba boxo do. Dolu xo Tiberiyade dalaba. 2 Jamaba tun b'a nofe, bawo i ɲa x'a la taagumanseedolu je jangarutolu kendeyalo fe. 3 Isa nin a la xarandinŋolu yeleta kuro xan, x'e sigi. 4 Wo x'a tara Yahudiyalu la Tanbinxansallo sutiyata. 5 Isa x'a kunŋo xotota xa jamaba je nanin a ma. A xo Filipe ɲen xo: «Alan si buuro san min, walasa xa ɲin moxo innu daŋinin?» 6 A xa wo xumo fo le, xa Filipe xotobo, bawo a tun fan x'a lon a be nala men kela. 7 Filipe x'a jaabi xo: «Haali nin í xa deɲe xaaliso keme fula dun buuro to, x'a fo xo í be dondin dondin dila bee ma, a bee me fen soto.» 8 A la xarandinŋo do, xo Andere, Simon Piyere doxoxe, wo xo a ɲen xo: 9 «Xamarindinŋo do be jan, buurukun luulu anin ɲegexala fula b'a bulu. Bari wolu si mun bo ɲin moxo innu bee ɲen?» 10 Isa xo: «Alu i lasigi.» Bin morosoninŋo tun xa sa wo dula. I woman innu sigita. I xeba haxxo tun be taxala wulu luulu ɲoxon ma. 11 Isa xa buurolu ta, xa barako bula Ala ɲen, x'e di, i xa tala moxolu sigininŋo te. A xa ɲego dulu ta x'e ke wo ɲa in. Moxo wo moxo, bee x'é sago soto. 12 Moxolu faninma, Isa xo a la xarandinŋolu ɲen xo: «Alu tokutunŋolu kamari, walasa fen xana tiɲa.» 13 I x'e kamari, xa sinsi tan nin fula lafa tokutunŋolu la, mennu tuta buurukun luulo domoninŋo xo. 14 Wo moxolu xa Isa la kawakuwo je tumo men, i xo: «Tonɲa, kila men na naxumo fota duniya to, ɲin ne mu.» 15 Isa x'a lon xo i b'a fe x'a muta diyakuwa la, x'a ke mansaxe ti. Wo to, a x'é koppa, xa taxa kuro to, a dan na. 16 Suwo kuninma, Isa la xarandinŋolu jigita dalaba da la. 17 I dunta xulunŋo xono, xa taxa Kaperenahun dalaba boxo do. Dibo tun dunta x'a tara Isa man na i bata. 18 X'e tu jiyo xan, foɲoba wulita xa jiyo xutunba. 19 I taxata ɲafe jiyo xan, kilometere luulu fo wooro ɲoxon na. Wo tumo la, i xa Isa je í taxamala dalaba xan, nanin xulunŋo ma. Xarandinŋolu silata. 20 Bari Isa xo i ɲen xo: «Alu xana sila! Nte le mu.» 21 I tunnu b'a fe x'a ladun xulunŋo xono. Bari wo no bee to, i tunnu be taxanin dula men, xulunŋo sita non danxanŋo ma. 22 Jama men tun be dalaba boxo do, wolu tunnu x'a korosi xo xulun kilin ne tun be je. I x'a lon du xo Isa nin a la xarandinŋolu man taxa i ɲoxo la wo xono, bari xo xarandinŋolu doron nelu taxata. 23 Wo lun do, Marigi tun xa barako bula Ala ɲen dula men, xa domolo di i ma, xulunŋo dolu bota Tiberiyade xa na non. 24 Jama x'a je xo Isa tun nte non, a la xarandinŋo du tunnu nte non. Wo to, i dunta wo xulunŋolu xono, xa taxa Kaperenahun, xa taxa Isa ŋinin. 25 I x'a tara dalaba boxo do tumo men, i xo a ɲen xo: «Karanmoxo, í nata jan tuma joman?» 26 Isa x'e jaabi xo: «Tonɲa tonɲa, ń b'a fola alu ɲen xo alu nte ń ŋininna bawo alu xa taagumanseedolu je. Alu be ń ŋininna le, bawo alu xa domolo ke x'e fa. 27 Domolo men be tiɲala, alu xana baaro ke wo soto xanma. Bari domolo men nte tiɲala, men si nilamaya banbalo di alu ma, alu baaro ke xa wo soto. Moxo Dinxe si wo domolo di alu ma, bawo Fa Ala x'a la taagumanseedo ke ate le la.» 28 I x'a ŋininxa xo: «N xa xan xa mun ke nin n si Ala sago dafa?» 29 Isa x'e jaabi xo: «Ala sago alu xa men ke, wo mu ɲin ne ti xo: A xa men ki, alu xa la wo la.» 30 I xo: «Í be taagumanseede joman yitala n na, men s'a tu n xa la í la? Í be mun kela n x'a je? 31 Alan mamaxelu xa manne domo wulo xono í xo a be safenin Kitaabo to ɲa men xo: “A xa domolo di i ma xa bo sanŋo to.” » 32 Isa x'e jaabi xo: «Tonɲa tonɲa, ń b'a fola alu ɲen, xo Musa man domolo di alu ma xa bo sanŋo to, bari ń Fa le be domoli soobe dila alu ma xa bo sanŋo to. 33 Bawo men jigita xa bo sanŋo to, wo le mu Ala la domolo ti, wo le be nilamaya dila duniya ma.» 34 I xo a ɲen xo: «Marigi, wo domolo di ntelu ma tuma bee.» 35 Isa xo i ɲen xo: «Nte le mu domolo ti, men be nilamaya dila. Moxo men je na nte ma, xonxo me wo tigi muta abada. Moxo men je la nte la, mindoxo me wo muta abada. 36 Ń x'a fo alu ɲen xo: Alu xa ń je, bari haali wo, alu man la nte la. 37 Fa Ala je moxo wo moxo di ń ma, wo si na ń ma. Moxo men je na ń ma, ń me wo tigi xoyi muume. 38 Bawo nte man jigi xa bo sanŋo to ń fan sago ke xanma. Ń jigita xa na ń kibaxo le sago ke. 39 Ń kibaxo sago fele: Xo a xa mennu di ń ma, wolu fen xana sanko ń bulu, bari xo ń x'e lakuni duniya labanlunŋo. 40 Ń Fa sago mu men ti, xo moxo wo moxo xa Dinxe je, xa la a la, wo xa nilamaya banbalo soto. Duniya labanlunŋo, ń si wo tigi lakuni.» 41 Isa la wo xumo xa Yahudiyalu dimin x'e bula daxotoxumo la, bawo a tun x'a fo xo: «Nte le mu domolo ti, men jigita xa bo sanŋo to». 42 I tunnu b'a fola xo: «Yusufu dinxe Isa nte ɲin ti ba? N xa moxo men na nin a fa lon. A dun s'a fo ɲa di xo ate jigita xa bo sanŋo to?» 43 Isa x'e jaabi xo: «Alu ŋuunuŋuunu ku nte. 44 Moxo si me na nte ma no, nin Fa Ala men xa ń ki, wo man a saba xa na a ti ń ma. Men je na ń ma, ń si wo tigo lakuni duniya labanlunŋo. 45 Kilalu do xa ɲin xuma in safe xo: “Ala s'i bee laxaran.” Moxo wo moxo be Fa Ala lamela, xa son a la xaranŋo ma, wo tigi si na ń ma. 46 Wo xoto nte xo moxo xa Fa Ala je, fo men bota Ala bata. Wo le kilinpe x'a je. 47 Tonɲa tonɲa ń b'a fola alu ɲen, xo moxo wo moxo je la nte la, wo xa nilamaya banbalo soto. 48 Nte mu domolo le ti, men be nilamaya dila. 49 Xotonin x'alu mamaxelu tu wulo xono, i xa manne domo, i sata. 50 Bari domolifenŋo men jigita xa bo sanŋo to, moxo wo moxo je wo domo, wo me sa. 51 Nte mu domolifen nilama le ti, men jigita xa bo sanŋo to. Moxo men je ɲin domolifen in domo, wo si nilamaya banbalo soto. Ń be domolifenŋo men dila, wo mu ń balasubo le ti; walasa duniya xa nilamaya soto.» 52 Wo xumo xa Yahudiyalu bula i ɲoxo la. I xo: «Ɲin xe in s'a balasubo di n ma ɲa di, n x'a domo?» 53 Isa xo i ɲen xo: «Tonɲa tonɲa, ń b'a fola alu ɲen: Nin alu man Moxo Dinxe balasubo domo x'a jelo min, nilamaya nte alu fe. 54 Moxo men je ń balasubo domo, xa ń jelo min, wo xa nilamaya banbalo soto. Duniya labanlunŋo, ń si wo tigo lakuni. 55 Nte balasubo mu domolifen soobe le ti, ń jelo mu minfen soobe le ti. 56 Moxo men je ń balasubo domo, xa ń jelo min, wo tigi nin nte kafuta, nte nin wo tigi kafuta. 57 Fa Ala men xa ń ki, wo nilama mu; nte du nilama mu Fa Ala barako to. Wo ɲa ma, moxo men xa nte domo, wo si nilamaya nte barako to. 58 Domolifenŋo men jigita xa bo sanŋo to, wo le je. Alu mamaxelu xa manne domo, wo xo, i sata. Wo nin ɲin nte kilin ti. Men je ɲin domolifen in domo, wo si tu í nila fo abada.» 59 Isa xa ɲin xuma innu fo x'a tu moxolu laxaranna Kaperenahun Alabatusuwo xono. 60 Isa la xarandinŋolu kiika x'a la wo xumo lame tumo men, i xo: «Ɲin xuma in xa xole de! Moxo joman si son a ma no?» 61 Isa x'a lon a fan ma, xo a la xarandinŋolu be daxotoxumo la wo kuwo to. A woman in xo i ɲen xo: «Wo x'alu lamuruti ba? 62 Nin alu xa Moxo Dinxe je yelela xa taxa, a tun be dula men folo, alu si mun fo wo to? 63 Ala Niyo le be nilamaya dila, balasubo nte fusi ti. Ń xa xumo mennu fo alu ɲen, wolu mu Niyo nin nilamaya le ti. 64 Bari dolu b'alu to mennu man lannaya ke.» Isa xa wo fo, bawo kabirin a damuto, a tun x'a lon mennu man lannaya ke anin moxo men b'a dunna bulo to. 65 Isa xo: «Wo le x'a tu, ń x'a fo alu ɲen, xo moxo si me na no nte ma, nin wo man wuli Fa Ala la.» 66 Kabirin wo, a la xarandinŋolu kiika bota. I man taxa a nofe tugun. 67 Isa xo a la xarandin tan nin fulo ɲen xo: «Alu dulu b'a fe x'e koppa ba?» 68 Simon Piyere x'a jaabi xo: «Marigi, n si taxa jon bata? Nilamaya banbalo xumolu be ite le da. 69 N lata í la, n x'a lon du, xo í mu Ala la Senumanŋo ti, a xa men ki.» 70 Isa x'e jaabi xo: «Xodi, nte le man alu tan nin fulo sugandi? Wo bee nin a ta, alu to kilin mu Sentane le ti.» 71 A tun be Simon dinxe Yudasi Isikariyoti le ma, men be nala a dunna bulo to. Haali x'a tara a la xarandin tan nin fulo to kilin ne mu.
1 Wo tanbo xo, Isa xa Galile maro yaala. A tun nt'a fe xa ke Yude, bawo Yahudiyalu la ɲamoxolu tunnu b'a nofe x'a faxa. 2 Wo x'a tara Yahudiyalu la sallo men be kilila xo Ɲafasallo, wo sutiyata. 3 A badinxelu xo: «Í me bo jan í xa taxa Yude, walasa í be kebaaro mennu kela, í la xarandinŋo mennu be non, wolu xa wolu je. 4 Moxo men b'a fe í xa lon, wo me a la kebaarolu ke duguwo to. Nin í be ɲin ɲoxon kawakulu kela, í xa xan ne x'é yita duniya la.» 5 Isa badinxelu xa wo fo, bawo i du tunnu man la a la. 6 Isa xo i ɲen xo: «Nte la waxato man si folo. Waxato bee xa ɲin atelu ɲen, xa taxa. 7 Duniya me atelu jaxuya, bari a be nte jaxuyala, bawo nte b'a yitala duniya la, xo a la kebaarolu xa jaxu. 8 Ate kennu xa taxa sallo to. Nte nte taxala, bawo ń na waxato man si folo.» 9 A xa wo fo i ɲen tumo men, a tuta Galile. 10 Isa badinxelu taxaninŋo sallo to, a du taxata. Bari a taxata duguwo to. 11 Yahudiyalu la ɲamoxolu tunnu b'a ŋininna sallo to. I tunnu be i ɲoxo ŋininxala xo: «A be minto?» 12 A la xumo tun be jama bee da. Dolu tunnu b'a fola xo: «Moxo ɲuma le mu.» Dolu xo: «Moxo ɲuma nte, moxolafilila le mu.» 13 Bari i xa wo xumolu bee fo duguwo to, bawo i tunnu be silala Yahudiyalu la ɲamoxolu ɲa. 14 Xa sallo tu a tala to, Isa dunta Alabatusuba xono, xa moxolu laxaran. 15 Yahudiyalu la ɲamoxolu dabaro banta. I xo: «Ɲin xe in xa Kitaabo lon di, x'a tara a man xaran?» 16 Isa x'e jaabi xo: «Nte la xaranŋo nte bola ń fan to. A be bola ń kibaxo le to. 17 Moxo men b'a fe xa Ala sago ke, wo s'a lon nin ń na xaranŋo be bola Ala la, walla nin ń na xumolu be bola ń fan ne to. 18 Moxo men na xumolu be bola a fan to, wo be a fan ne bunɲa ŋininna. Bari moxo men b'a kibaxo bunɲa ŋininna, wo le mu tonɲatigo ti. Tilinbaliya si nte wo la. 19 Xodi, Musa le man sariya di alu ma? Bari alu si nte í taxamala sariya silo xan. Mun na alu b'a ŋininna xa nte faxa?» 20 Jama x'a jaabi, i xo: «Jinno le b'é to! Jon b'a ŋininna x'é faxa?» 21 Isa xa xumo ta tugun xo: «Ń xa ku kilin ke tofoɲolunŋo, men x'alu bee dabaro ban. 22 Musa xa ɲaxo sariya di alu ma. Wo man damuta Musa ma, a damutata alu mamaxe lelu ma. Wo sariya la, alu si moxo ɲaxa haali tofoɲolunŋo. 23 Nin alu si dinxe ɲaxa no tofoɲolunŋo, walasa Musa la sariya xana tiɲa, mun na alu be diminna nte xanma, bawo ń xa moxo muume lakendeya tofoɲolunŋo? 24 Alu fata kiito tegela kuwolu jeɲa doron ma. Alu kiito tege tonɲa xan.» 25 Yerusaleme moxo dolu xo: «I b'a fe xa xe men faxa, ɲin ne nte ba? 26 A fele, a be xumala keno la, i nte fen fola a ɲen. N na ɲamoxolu lata a la ba, xo ɲin xe in ne mu Kirisita ti? 27 Ntelu xa ɲin bodula lon. Bari nin Kirisita nata, moxo me wo bodula lon.» 28 Xa Isa tu moxolu laxaranna Alabatusuba xono, a fetenta xo: «Alu xo, x'alu xa ń lon, xa ń bodula du lon. Bari ń man na ń fan ma. Men xa ń ki, wo mu tonɲatigo le ti. Alu man wo lon. 29 Nte x'a lon, bawo ń bota ate le bata. A le xa ń ki.» 30 Wo xanma, i x'a ŋinin x'e b'a mutala. Bari moxo si bulo man la a xan, bawo a la waxato tun man si folo. 31 Jama moxo kiika lata a la. I xo: «Nin Kirisita nata, a si taagumanseedolu ke ba xa tanbi ɲin xan?» 32 Jama tun be men fola Isa la kuwo to dibo to, Farisiyalu xa wo me. Wo to, sadaxalasibaxa kuntigolu nin Farisiyalu xa garadolu bula, xo i xa taxa Isa muta. 33 Isa xo wolu ɲen xo: «Ń nin alu be i ɲoxo xan dondin folo. Wo xo, ń be taxala ń kibaxo bata. 34 Alu si ń ŋinin, bari alu me ń je. Ń be taxala dula men, alu me taxa no non.» 35 Wo xumo xan, Yahudiyalu la ɲamoxolu xo i ɲoxo ɲen xo: «A be taxala min, nin n me a je tugun? Yahudiya mennu be jenjennin Gerekolu to, a be taxala wolu bata ba, xa Gerekolu laxaran? 36 A la ɲin xuma innu xoto mu mun ti xo: Alu si ń ŋinin, bari alu me ń je. Ń be taxala dula men, alu me taxa no non?» 37 Sallo lunba, nin wo mu a lun labanŋo ti, xa Isa tu lonin jama ɲa xoto, a fetenta xo: «Nin mindoxo be men na, wo xa na nte ma x'é min. 38 Men je la nte la, bajiyo men be nilamaya dila, wo si woyo xa bo wo to, í xo Kitaabo x'a fo ɲa men.» 39 Isa lannayabaxolu be nala Ni Senunŋo men sotola, a xumata wo le kuwo la ten. Wo waxato, Ni Senunŋo tun man di folo, bawo Isa tun man xotota folo xa taxa a la nooro xono. 40 Jama xono, moxo kiika xa Isa la xumolu lame tumo men, wolu xo: «Sikka nt'a to kila men na naxumo fota, ɲin ne mu.» 41 Dolu xo: «Kirisita le mu.» Dolu xo: «Kirisita si bo no Galile ba? 42 Kitaabo man a fo xo Kirisita si bo mansaxe Dawuda to ba? Xo a si bo Betileheme, Dawuda bota gallo men to?» 43 Jama talata Isa la kuwo to. 44 Dolu tunnu b'a fe x'a muta. Bari moxo si bulo man la a ma. 45 Garadolu x'e koppa xa na sadaxalasibaxa kuntigolu nin Farisiyalu bata. Wolu xo i ɲen xo: «Mun na alu nin a man na?» 46 Garadolu x'e jaabi xo: «Ɲin xe in be xumala ɲa men, moxo man wo ɲoxon je abada.» 47 Farisiyalu xo: «A x'alu dulu lafili ba? 48 Alu xa n na kuntigi walla Farisiya joman kilin ne je lanin a la? 49 Ɲin jama in men lata a la, wolu man Musa la sariya lon. I danganinŋo le mu.» 50 Nikodeme men tun taxata Isa bata suwo to, wo tun mu Farisiya innu to do le ti. Wo xo tolu ɲen xo: 51 «Alan na sariya la, moxo do si jalagi ba, x'a tara n man a lame, x'a lon a xa men ke?» 52 I x'a jaabi xo: «Í du keta Galilengo ti ba? Kitaabo mafele, í s'a je xo kila si nte bola Galile.» [ 53 Wo xo, bee taxata í bata.
1 Isa taxata Oliwe kuro xan. 2 Wo lun do saxo ma junna, a taxata Alabatusuba xono tugun, jama bee kamarita a ma. A x'é sigi, x'e laxaran. 3 Sariya karanmoxolu nin Farisiyalu nata muso do ti a bata. I xa wo muso muta fuyanɲa la. I xa muso lalo jama ɲa xoto. 4 I xo Isa ɲen xo: «Karanmoxo, n xa ɲin musu in muta fuyanɲa la. 5 Musa xa yanmaro di sariya xono xo n xa ɲin ɲoxon musulu bun kuro la, x'e faxa. Ite dun xo di?» 6 I la wo xumo fokunŋo mu le, x'a xotobo, nin i s'a jalagi. Isa x'a kunŋo lajigi xa safelo ke duguxulo ma, a buluxonondinŋo la. 7 I tuta a ŋininxala. Isa x'a kunŋo lawuli. A xo i ɲen xo: «Alu to, moxo men bada man junube ke, wo tigo folo xa kuro fayi a ma.» 8 Wo xo, a x'a kunŋo lajigi tugun, xa safelo ke duguxulo ma. 9 I xa wo me tumo men, i bee kilin kilin taxata, x'a damuta i to xotolu ma, fo xa taxa a bula i xo doxolu la. Isa nin muso kilin tuta je, wo be lonin a xoto. 10 Isa x'a kunŋo lawuli, a xo: «Muso, i dunnu be min? Moxo man í ɲangi ba?» 11 Muso x'a jaabi xo: «Marigi, moxo si man ń ɲangi.» Isa xo a ɲen xo: «Nte du nte í ɲangila. Taxa! Bari í xana junube ke tugun.»] 12 Isa xumata jama ɲen tugun xo: «Nte mu duniya keneya le ti. Men je a lo ń nofe, wo me í taxama dibo to. A si keneya soto men si nilamaya di a ma.» 13 Wo xanma, Farisiyalu xo: «Í be í fan seedeyala. Wo xanma, í la seedeya me muta.» 14 Isa x'e jaabi xo: «Haali nin ń be ń fan seedeyala, nte la seedeya mu tonɲa le ti, bawo nte x'a lon, ń bota dula men, anin ń be taxala dula men. Atelu man a lon ń bota dula men, anin ń be taxala dula men. 15 Alu be kiito tegela hadamadin miiriya le la. Nte ken nte kiiti tegela moxo si xan. 16 Bari nin nte xa kiito tege, ń b'a tegela tonɲa le xan, bawo ń kilin nte wo kiito tegela. Fa Ala men xa ń ki, nte nin wo be i ɲoxo fe. 17 A nte safenin alu la sariya xono ba, xo moxo fula je kuwo men seedeya, wo mu tonɲa le ti? 18 Nte be ń fan seedeyala. Fa Ala men xa ń ki, wo du be ń seedeyala.» 19 I xo a ɲen xo: «Í Fa be min?» Isa x'e jaabi xo: «Alu man nte lon, sakuta ń Fa. Nin alu tunnu xa nte lon, alu si ń Fa du lon.» 20 Isa xa wo xumolu fo, x'a tu laxaranno la Alabatusuba xono. A tun be nilifenbulamiranŋo senbo to. Moxo si man a muta, bawo a la waxato tun man si folo. 21 Isa xo i ɲen tugun xo: «Ń be taxala. Nin ń taxata, alu si ń ŋinin, bari alu si sa alu la junubolu xono. Ń be taxala dula men, alu me taxa no non.» 22 Wo xumo xan, Yahudiyalu la ɲamoxolu xo: «A b'a fan faxala ba? Bawo a xo: “Ń be taxala dula men, alu me taxa no non.” » 23 Isa x'e jaabi xo: «Alu mu duguxulo ta le ti. Nte mu sanxulo ta le ti. Alu mu ɲin duniya in ta le ti. Nte nte ɲin duniya in ta ti. 24 Wo le x'a tu, ń x'a fo xo alu be sala alu la junubolu xono. Bawo nin alu man la a la xo: “Nte mu” wo mu nte le ti, alu si sa alu la junubolu xono.» 25 I xo: «Í mu jon ti?» Isa x'e jaabi xo: «Ń xa men fo alu ɲen kabirin folofolo, ń mu wo le ti. 26 Fen kiika be ń ma, x'a fo alu la kuwo to, fen kiika du be je ń si kiito tege alu xan mennu to. Men xa ń ki, wo mu tonɲatigo le ti. Ń xa men me a la, ń be wo le fola duniya ɲen.» 27 A tun be xumala Fa Ala le ma i ɲen. Bari i man wo faamu. 28 Isa xo i ɲen xo: «Nin alu xa Moxo Dinxe xotota tumo men, alu s'a lon xo: “Nte mu” wo mu nte le ti. Alu s'a lon du xo ń nte ku kela ń fan ma: Fa Ala xa ń naxaran men na, ń be wo doron ne fola. 29 Men xa ń ki, ń nin a be i ɲoxo fe; a man ń kilin doron tu, bawo ń b'a sago kela tuma bee.» 30 Isa la wo xumo x'a tu, moxo kiika lata a la. 31 Yahudiya mennu lata Isa la, a xo wolu ɲen xo: «Nin alu tuta ń na xumaxanŋo xo, alu mu ń na xarandinŋolu ti soobe la. 32 Alu si tonɲa lon, tonɲa si alu hooroya.» 33 I x'a jaabi xo: «Ntelu mu Burehima bonsonŋo lelu ti. Ntelu bada man ke moxo la jon ti. Í dun s'a fo ɲa di xo: “Alu si hooroya?” » 34 Isa x'e jaabi xo: «Tonɲa tonɲa, ń b'a fola alu ɲen xo: Moxo wo moxo be junubo kela, wo mu junubo la jonŋo le ti. 35 Jonŋo nte tula a marigi la luwo ma kadawu. Bari a fan dinxe ken be tula je kadawu. 36 Wo to, nin Ala Dinxe x'alu hooroya, alu si hooroya soobeya la. 37 Ń x'a lon, xo alu mu Burehima bonsonŋolu ti. Bari haali wo, alu b'a fe xa nte faxa, bawo ń na xumo korita kunna alu to. 38 Nte xa men je ń Fa bata, ń be wo le fola alu ɲen. Alu dulu xa kuwo mennu me alu fa la, alu be wo lelu kela.» 39 I x'a jaabi xo: «Ntelu fa mu Burehima le ti.» Isa xo i ɲen xo: «Nin alu mu Burehima dinŋo lelu ti, alu Burehima la kewalolu ɲoxonnu ke. 40 A fele saasa, alu b'a fe xa nte faxa, nte men xa tonɲa fo alu ɲen, ń xa men me Ala la. Burehima man wo ɲoxon ke de! 41 Atelu be alu fa la kebaaro lelu kela.» I x'a jaabi xo: «Ntelu nte jangadinnu ti. Fa kilinpe le be ntelu la, nin wo mu Ala ti.» 42 Isa xo i ɲen xo: «Nin Ala le tun mu alu Fa ti, alu tunnu si nte xanu, bawo nte bota Ala le to xa na. Ń man na ń fan ma. Ate le xa ń bula xa na. 43 Mun na alu nte ń na xumo faamula? Bawo alu me a no xa nte la xumolu lame. 44 Alu fa mu Sentane le ti. Alu b'a fe x'alu fa le diyanɲekuwolu ke. Ate keta moxofaxala ti kabirin folofolo. A man tu tonɲa xan, bawo haali tonɲa kese kilin nt'a fe. Nin a be faniya fola, a si xuma x'a la a fan keɲa xan, bawo faniyafola le mu. Faniya fan fa le mu. 45 Nte ken be tonɲa le fola. Wo xanma alu nte lala nte la. 46 Alu to moxo joman s'a fo no, xo nte xa ɲin junube in ne ke? Nin ń xa tonɲa fo, mun na alu nte lala ń na? 47 Men mu Ala la moxo ti, wo si Ala la xumolu lame. Alu nte lameli kela bawo alu nte Ala la moxo ti.» 48 Yahudiyalu x'a jaabi, i xo: «Nin n xo x'é mu Samaringo le ti anin xo jinno b'é to, n man tonɲa fo ba?» 49 Isa x'e jaabi xo: «Jinne nte ń to. Ń be ń Fa le bunɲala, alu be nte doxoyala. 50 Ń nte ń fan bunɲa ŋininna. Do be je men be kiito tegela, wo le b'a ŋininna xa nte bunɲa. 51 Tonɲa tonɲa, ń b'a fola alu ɲen xo, nin moxo men xa nte la xumolu muta, wo me sa abada.» 52 Yahudiyalu xo: «N x'a lon saasa xo jinno le b'é to. Burehima sata, kila dulu sata, ite xo, xo men je í la xumo muta, wo me sa abada. 53 Ite xa bun ne ntelu fa Burehima ti ba, wo dun sata, kila dulu sata? Í b'é fan kela jon ti?» 54 Isa x'e jaabi xo: «Nin nte tun be ń fan bunɲala, wo bunɲa nte fusi ti. Ń Fa le be nte bunɲala, alu xo wo men ma xo “alu la Ala”. 55 Alu man a lon. Nte ken x'a lon. Nin nte tun xo, xo ń man a lon, ń si ke faniyafola ti, í xo atelu. Nte x'a lon, ń b'a la xumo marala. 56 Alu fa Burehima ɲaxalita xo a si nte tilo je. A x'a je, a ɲaɲata.» 57 Yahudiyalu xo a ɲen xo: «Í man haali tan luulu sanji soto, ite xa Burehima je ba?» 58 Isa xo i ɲen xo: «Tonɲa tonɲa, ń b'a fola alu ɲen xo, jannin Burehima xa wulu, “Nte mu.” » 59 Wo xumo nofe, i xa kurolu ta, x'e b'a bunna. Bari Isa x'é dugu, xa bo Alabatusuba xono.
1 Xa Isa tanbito tu, a xa xe do je, a fiyonto le wuluta. 2 Isa la xarandinŋolu x'a ŋininxa xo: «Karanmoxo, jon xa junubo ke? Ɲin xe in ba walla a wulubaxolu, fo a nin ɲa man wulu?» 3 Isa x'e jaabi xo: «Ɲin xe in na junube no nte, a wulubaxolu la junube no nte, bari a keta le, walasa Ala la sintigiya xa yita a la kuwo to. 4 Waajibo le mu, n xa ń kibaxo la kebaarolu ke tiliya to. Suwo si ku; nin suwo kuta, moxo si me baara ke no wo tumo. 5 Xa nte tu duniya xono, nte mu duniya keneya le ti.» 6 Wo xumo foninma, Isa xa dajiyo tuppu dugo ma, xa wo banxu ɲiginninŋo ta, x'a mu fiyonto ɲalu ma. 7 A x'a fo a ɲen xo: «Taxa í ɲa ku Silowe dinxo jiyo la.» Silowe xoto xo «Kiladinŋo». Fiyonto taxata je, x'a ɲa ku. A ɲa yeleninŋo x'é koppa. 8 A senbetomoxolu nin mennu dalita a jela sadaxatara la xo: «Xe men tun be siginin sadaxatara la, wo le nte ɲin ti ba?» 9 Dolu xo: «Ate le mu.» Dolu xo: «Ayi, ate nte, bari a nin a xa don.» Xe fan xo: «Nte le mu.» 10 I x'a ŋininxa xo: «Í ɲa yeleta ɲa di?» 11 A x'e jaabi xo: «Xe men toxo xo Isa, wo le xa banxo mu ń ɲa la, x'a fo ń ɲen xo ń xa taxa ń ɲa ku Silowe dinxo jiyo la. Ń du taxata ń ɲa ku, ń ɲa woman in yeleta.» 12 I saagita x'a ŋininxa xo: «Wo xe be min?» Fiyonto xoto x'e jaabi xo: «Nte man a lon.» 13 I taxata wo fiyonto xoto ti Farisiyalu bata. 14 Isa xa banxo ke, x'a ɲa yele lunŋo men, wo lun tun mu tofoɲolunŋo le ti. 15 Wo sabaabo le x'a tu, Farisiyalu x'a ŋininxa, a ɲa yeleɲa la. A xo i ɲen xo: «A xa banxo le mu ń ɲa la, ń xa ń ɲa ku, wo no bee to, ń xa dula je.» 16 Farisiya dolu xo: «Ɲin xe in me bo no Ala la, bawo a nte tofoɲolunŋo sariya labatula.» Do xotelu xo: «Nin ɲin xe in tun mu junubekela le ti, a si ɲin ɲoxon taagumanseede ke no ɲa di?» I man ben a la kuwo to. 17 Farisiyalu saagita xa fiyonto xoto ŋininxa tugun xo: «Men xa í ɲa yele, ite be mun fola a la kuwo to?» Fiyonto xoto xo: «Kila le mu.» 18 Bari Yahudiyalu la ɲamoxolu tunnu man la a la, xo ɲin xe in tun fiyonto mu, fo i taxata a wulubaxolu kili, 19 x'e ŋininxa xo: «Alu dinxe le je ba, alu xo, xo men fiyonto wuluta? A be dula jela ɲa di saasa?» 20 A wulubaxolu x'e jaabi xo: «Ntelu x'a lon xo n dinxe le je, a fiyonto le wuluta. 21 Bari a be dula jela ɲa di saasa, ntelu man wo ɲa lon de! N man a lon du, men x'a ɲa yele. Dindin nte tugun, alu a fan ŋininxa. A si wo ɲa faranfansi alu ɲen.» 22 Fiyonto xoto wulubaxolu xumata wo ɲa ma, katugala i silata Yahudiyalu la ɲamoxolu ɲa. Bawo wolu tunnu benta a to, xo nin moxo wo moxo x'a fo doron, xo Isa mu Kirisita ti, wo tigo si xoyi, xa bo Alabatusuwo kafo xono. 23 Wo le x'a tu, a wulubaxolu xo: «Dindin nte tugun, alu a fan ŋininxa.» 24 Farisiyalu saagita fiyonto xoto kilinin x'a fo a ɲen xo: «Í tilin Ala la xa tonɲa fo. Nte kennu x'a lon, xo ɲin xe in mu junubeto le ti.» 25 Fiyonto xoto x'e jaabi xo: «Nin junubeto mu, walla nin junubeto nte, nte man wo lon de. Nte xa ku kilinŋo men lon, wo fele: Nte tun mu fiyonto ti, bari saasa ń be dula jela.» 26 I saagita x'a ŋininxa xo: «A xa mun ke í la? A xa í ɲa yele ɲa di?» 27 Fiyonto xoto x'e jaabi xo: «Nte xa wo fo alu ɲen xa ban, bari alu man nte lame. Mun dun na alu b'a fe xa wo me tugun? Alu dulu b'a fe xa ke a la xarandinŋolu ti ba?» 28 I xa fiyonto xoto nani. I xo: «Ite le mu a la xarandinŋo ti! Nte kennu mu Musa le la xarandinŋolu ti. 29 N x'a lon xo Ala xumata Musa ɲen. Bari ɲin xe in, ntelu man ɲin bodula lon!» 30 Fiyonto xoto x'e jaabi xo: «Ɲin mu kawaku ti de: Atelu man a bodula lon, a dun xa nte ɲa yele. 31 Alan bee x'a lon xo Ala nte junubetolu lamela. Bari moxo men be silala a ɲa, x'a sago ke, a be wo tigo le lamela. 32 N man a me abada, xo moxo do xa fiyonto wuluninŋo ɲa yele. 33 Nin ɲin xe in tun man bo Ala la, a tun me fusi ke no.» 34 I xa wo xe jaabi xo: «Í junubeto fan ne wuluta. Í b'a fe xa ntelu laxaran ba?» Wo xo, i xa xe xoyi, x'a labo Alabatusuwo xono. 35 Isa x'a me xo i xa fiyonto xoto xoyi. Isa x'a kunben x'a fo a ɲen xo: «Í lata Moxo Dinxe la ba?» 36 A x'a jaabi xo: «Marigi, jon mu wo tigo ti, walasa nte xa la a la?» 37 Isa xo a ɲen xo: «Í ɲa je men na, nin a be xumala í ɲen, wo le mu.» 38 Xe xo: «Marigi, nte lata í la.» A x'é buti Isa xoto, x'a batu. 39 Wo keninŋo, Isa xo: «Ń nata ɲin duniya in to ɲin kiiti in ne xanma: Walasa mennu fiyonto mu, wolu xa dula je, mennu ɲa be dula la, wolu xa fiyonɲa.» 40 Farisiya dolu tunnu be Isa senbo to, wolu x'a ŋininxa xo: «Wo tumo la, nte dulu mu fiyonto le ti ba?» 41 Isa x'e jaabi xo: «Nin alu tunnu fiyonto mu, junube tun me tu alu xan. Bari alu xo, x'alu ɲa be dula la. Wo xanma, alu la junubolu be alu xan».
1 Isa xo: «Tonɲa tonɲa, ń b'a fola alu ɲen xo, nin moxo do dunta saaxabunŋo xono, a dun man dun da la, fo boxo xote la, wo mu sunŋo nin boyinxannila le ti. 2 Bari men je dun da la, wo le mu saaxolu negaanibaxo ti. 3 Dakantabaxo si da yele a ɲa, saaxolu si a xumaxanŋo me. Saaxo mennu mu a ta ti, a si wolu kili i toxo la, x'e labo banto to. 4 Nin a x'a fan na saaxolu bee labo tumo men, a si bula i ɲa. Wolu s'a lo a nofe, katugala i x'a xanŋo mategeninŋo lon. 5 I me a lo luntan nofe. I s'i bori, x'e soobo luntanŋo la, bawo i man luntan xumaxan lon.» 6 Isa xa ɲin tali in la moxolu ɲen, bari i man a faamu. 7 Isa xo i ɲen tugun xo: «Tonɲa tonɲa, ń b'a fola alu ɲen xo: Nte le mu saaxolu la dunda ti. 8 Fen wo fen nata nte ɲa, wolu mu sunŋolu nin boyinxannila lelu ti. Bari saaxolu man i xumaxanŋo lame. 9 Nte le mu da ti. Men je dun nte fe, wo si kisi. Wo si dun, xa bo, xa domolo soto. 10 Sunŋo be nala suuɲalo nin faxalo nin tiɲalo le doron xanma. Nte nata le walasa hadamadinŋolu xa nilamaya soto, dandula nte men ma. 11 Nte le mu negaanila beto ti. Negaanila beto si a niyo di a la saaxolu xanma. 12 Bari men b'a la sara doron ŋininna, wo men nte saaxolu negaanibaxo nin i tigo ti, nin wo xa waro nato je, a s'í bori xa saaxolu tu. Waro si na, xa mutalo ke, x'e jenjen. 13 Wo negaanila s'í bori, katugala saraŋininna le mu. Saaxolu hanme nt'a la. 14 Nte le mu negaanila beto ti. Nte xa ń na saaxolu lon, ń na saaxo dulu xa nte lon, 15 í xo Fa Ala xa ń lon ɲa men, anin nte xa Fa Ala lon ɲa men. Ń be ń niyo dila ń na saaxolu xanma. 16 Saaxo do xotelu be ń kun, mennu nte ɲin saaxabun in xono. Fo ń xa na wo saaxo dulu ti le. I si ń na xumo lame. I bee si ke saaxagoore kilin ti. Negaanibaxa kilin si ke i bee ma. 17 Fa Ala be ń xanunin, katugala ń be bola ń niyo la, xa saagi a sotonin tugun. 18 Moxo si nte ń niyo mutala ń na. Ń fan ne be bola a la x'a di. A sinŋo be ń ɲen x'a di, a sinŋo du be ń ɲen, x'a soto tugun. Ń Fa xa wo le yanmaro di ń ma.» 19 Wo xumolu xa Yahudiyalu tala xan ma tugun. 20 Moxo kiika xo i to xo: «Jinno le b'a to. A kunxulo nte je. Mun na alu b'a lamela?» 21 Dolu xo: «Jinneto xuma nte ɲinnu ti de! Jinno si fiyonto ɲalu yele no ba?» 22 Yahudiyalu la sallo do keta Yerusaleme sankunŋo to. Wo sallo be i hakilo lajigila Alabatusuba xarifalo la Ala ma. 23 Wo sallo to, Isa tun be taxaninsaago la Alabatusuba biire do xoto, men be kilila xo mansaxe Sulemani la biire. 24 Yahudiyalu kamarita a ma, x'a ŋininxa xo: «Í be n tula hakili fulanfulanŋo la fo tuma joman? Nin í mu Kirisita le ti, wo laxoyiya n ma.» 25 Isa x'e jaabi, a xo: «Ń xa wo fo alu ɲen xa ban, bari alu man la a la. Ń be kebaaro mennu kela ń Fa toxo la, wo lelu be nte seedeyala. 26 Bari alu man la ń na, bawo alu nte nte la saaxolu do ti. 27 Nte la saaxolu be ń xumaxanŋo mela. Ń x'e lon, i s'a lo ń nofe. 28 Ń si nilamaya banbalo di i ma, i me halagi abada. Moxo si me i bo no nte bulu. 29 Ń Fa men x'e di ń ma, wo xa bun bee ti. Moxo si me i bo no ń Fa bulu. 30 Nte nin Fa Ala mu kilin ne ti.» 31 Wo tumo la, Yahudiyalu xa kurolu ta tugun, xo i b'a bunna x'a faxa. 32 Isa xo i ɲen xo: «Ń xa kebaara beto kiika yita alu la, ń Fa barako to. Wo kebaarolu to, alu be ń bunna kuro la joman ne xanma?» 33 Yahudiyalu x'a jaabi xo: «N nte í bunna kuro la kebaara bete xanma. Í la Ala toxotiɲa le nofe mu, nin n b'é bunna. Ite men mu hadamadinŋo ti, í x'é fan ke Ala ti.» 34 Isa x'e jaabi xo: «A nte safenin alu la sariya xono ba xo: “Nte Ala xo: Alu mu ala dolu ti”? 35 Alan x'a lon xo Kitaabo xumaxanŋo nte yelemala. Ala la xumo fota mennu ɲen, alaya fota wolu ma. 36 Wo to, nin nte xo, xo ń mu Ala Dinxe ti, alu dunnu s'a fo di, xo ń be Ala toxo tiɲala? Fa Ala xa nte men sugandi, xa ń ki duniya xono. 37 Nin nte nte ń Fa la kebaarolu kela, alu xana la ń na. 38 Bari x'a tu, ń be a la kebaarolu kela, alu la wo kebaarolu la, haali nin alu man la nte la, walasa alu x'a lon, x'a faamu, xo nte nin ń Fa mu kilin ne ti, xo Fa Ala nin nte mu kilin ti.» 39 Wo xumo xan, i x'a ŋinin tugun, x'e b'a mutala. Bari a x'a fan soto i la xa taxa. 40 Isa taxata Yuruden ba boxo do tugun. Yaya tun xa batiselo ke dula men folo, a sigita non. 41 Moxo kiika nata a ma non. Wolu xo: «Yaya man kawaku kilin ke. Bari a xa fen fen fo ɲin xe in na kuwo to, keso le mu.» 42 Moxo kiika lata a la non.
1 Xe do tun be Betani xo Lasare, a jangaruta. Mariyama nin a badinmuso Marate la gallo le mu Betani ti. 2 Wo Mariyama le xa tulu sumadimanŋo yelema Marigi sinŋolu xan, x'a kunsino ke, x'e masuusa. Wo maxe Lasare le tun man kende. 3 Lasare mamusuwolu xa kila bula Isa ma, x'a fo a ɲen xo: «Marigi, í xanuntexe man kende.» 4 Isa xa wo me tumo men, a xo: «Lasare la jangaro nte a faxajangaru ti. A keta le nin Ala la sintigiya nooroma si je, anin nin Ala Dinxe la sintigiya si yita wo fe.» 5 Isa be Marate nin a badinmuso nin a maxe Lasare xanula. 6 A x'a me, xo Lasare man kende. A xa tili fula ke non tugun. 7 Wo xo, a xo xarandinŋolu ɲen xo: «Alan x'e koppa, xa taxa Yude.» 8 Xarandinŋolu xo a ɲen xo: «Karanmoxo, haali a man me, Yahudiyalu tunnu b'a fe, x'é bun kuro la, x'é faxa. Í b'a fe x'é koppa non ma tugun ba?» 9 Isa x'e jaabi xo: «Leere tan nin fula le nte tilo xono ba? Xa moxo tu í taxamala tiliya to, a me yele fen na, bawo a ɲa be duniya keneya la. 10 Bari nin moxo b'é taxamala suwo to, a si yele fenŋo do la, bawo keneya nt'a to.» 11 Wo xumolu foninŋo xo, a xo: «Alan terixe Lasare sinnoxota. Bari ń be taxala a lakunila.» 12 Xarandinŋolu xo a ɲen xo: «Marigi, nin a sinnoxota le, a si kendeya.» 13 Isa xa Lasare la saya le fo. Bari xarandinŋolu ɲen, x'a be sinnoxo gansanŋo le ma. 14 Wo to, Isa x'a late i ɲen, a xo: «Lasare sata. 15 Nte man ke je, wo keta nte diyanɲekuwo ti atelu xanma, walasa alu xa lannaya ke. Alu na alan xa taxa je.» 16 Wo to, Tomasi men be kilila xo Fune, wo xo xarandin tolu ɲen xo: «Alu na alan dulu xa taxa, n nin karanmoxo xa sa i ɲoxo fe.» 17 Isa be sila je tumo men, a x'a tara Lasare xa tili naani ke xaburo xono xa ban. 18 Betani nin Yerusaleme tun te man jan. A dasata kilometere saba to dondin ne la. 19 Wo xanma, Yahudiyalu kiika nata Marate nin Mariyama bata, xa na i maxe banxonton. 20 Marate x'a me tumo men xo Isa be nanin, a taxata a kunben. Mariyama, wo tuta siginin luwo ma. 21 Marate sininma Isa ma, a xo a ɲen xo: «Marigi, nin í tun be jan, ń maxe tun me sa. 22 Bari haali saasa, ń x'a lon xo í je kuwo men ŋinin Ala la, a si wo ke í ɲen.» 23 Isa xo a ɲen xo: «Í maxe si kuni.» 24 Marate x'a jaabi xo: «Ń x'a lon, xo a si kuni duniya labanlunŋo, furelu kunilunŋo.» 25 Isa xo a ɲen xo: «Nte le mu furekuniyo nin nilamaya ti. Moxo men je la nte la, haali nin a sata a si nilamaya. 26 Moxo wo moxo be í nila, a dun be lanin nte la, wo me sa abada. Í lata wo la ba?» 27 A x'a jaabi xo: «Iyo, Marigi, ń lata a la, xo í mu Kirisita le ti, Ala Dinxe, men tun xa xan xa na duniya xono.» 28 Isa la wo xumo xo, Marate taxata a badinmusu Mariyama kili x'a ladunmun xo: «Karanmoxo be jan, a b'é maŋininxala.» 29 Mariyama xa wo me doron, a wulita wo no bee to, xa taxa Isa bata. 30 Isa tun man dun gallo xono folo. Marate x'a kunben dula men, a tun be non ne. 31 Mariyama nin Yahudiya do tunnu be luwo xono, mennu nata banxontonno la. Wolu xa Mariyama gidito je xa wuli tumo men, i x'a lo a nofe. A tun be i ɲen xo a be taxala xasila xaburuda le la. 32 Mariyama sita Isa ma tumo men, x'a je, a x'é boyi a xoto, x'a fo a ɲen xo: «Marigi, nin í tun be jan, ń maxe me sa.» 33 Isa xa Mariyama je xasila tumo men, a nin Yahudiya dulu, mennu nata a nofe, wo x'a juso xasi, x'a hakilo ɲaxami. 34 A xo: «Alu x'a bula minto?» I xo: «Marigi, na a mafele.» 35 Wo to, Isa xasita. 36 Yahudiyalu mennu x'a xasito je, wolu xo: «Alu a mafele de! A tun b'a xanula ɲa men.» 37 Bari dolu xo i to xo: «Ate men xa fiyonto ɲalu yele, a tun si kori a kela Lasare xana sa?» 38 Isa juso xasita tugun. A taxata xaburuda la. Kuruwuwo le tun mu. Kuro tun be lanin a da la. 39 Isa xo: «Alu kuro bo je!» Fure mamusuwo Marate xo Isa ɲen xo: «Marigi, a sumo bota xa ban, bawo a tili naano le je jan.» 40 Isa xo a ɲen xo: «Nte man a fo í ɲen ba, xo nin í xa lannaya ke, í si Ala la sintigiya je?» 41 I xa kuro bo je. Isa x'a ɲalu xotota sanŋo to. A xo: «Ń Fa, ń be barako bulala í ɲen, bawo í xa nte lame. 42 Nte x'a lon xo í be nte lamela tuma bee. Bari ɲin jama in men be ń namininnin, ń xumata wo lelu ɲen, walasa i xa la a la, xo ite le xa ń ki.» 43 Wo xumo xo, a fetenbeteta xo: «Lasare, bo!» 44 Fure bota, a sinŋolu nin a bulolu be sitinin faano la, a ɲada be buurinin faanuxoyo la. Isa xo i ɲen xo: «Alu a firin, x'a bula a xa taxa.» 45 Yahudiya mennu nata Mariyama la luwo ma, wolu xa Isa la wo kebaaro je. I kiika lata a la. 46 Bari i to, dolu taxata Isa la wo kebaaro laxali Farisiyalu ɲen. 47 Wo to, sadaxalasibaxa kuntigolu nin Farisiyalu xa Yahudiyalu la Kiititegekafo kamari x'a fo i ɲen xo: «Alan si mun ke? Bawo ɲin xe in xa kawakuwo kiika ke saasa. 48 Nin n x'a tu je, moxo bee si lannaya ke a la. Wo to, Romengolu si na n na Alabatusuba te, xa n na siya silatunu.» 49 I to kilin, a toxo xo Kayife, ate le tun mu sadaxalasibaxa kuntigiba ti wo sanŋo. Wo xo i ɲen xo: «Atelu man fusi lon. 50 Alu man a lon ba xo moxo kilin xa sa jamano bee ɲen, wo xa fisa siya bee la halago ti?» 51 Bari Kayife man wo xumo fo a fan ma. Ate le tun mu sadaxalasibaxa kuntigiba ti wo san. Ala le janxa wo xumo dun a da, xo Isa xa xan xa sa Yahudiyalu la siya ɲen. 52 A nte sala Yahudiyalu la siya doron ɲen. A be sala du, walasa Ala dinŋolu mennu be jenjennin duniya xono, wolu xa kamari, xa ke kilin ti. 53 X'é ta wo lunŋo ma, Yahudiyalu la ɲamoxolu benta a to, xa Isa faxa. 54 Wo xa Isa lafata í yaalala Yahudiyalu to. A taxata Efarayime gallo to, wulaba da la. A nin a la xarandinŋolu sigita non. 55 Yahudiyalu la Tanbinxansallo sutiyaninŋo, jamano moxo kiika taxata Yerusaleme, xa taxa i senuya, í xo i la laado x'a fo ɲa men, jannin sallo xa si. 56 I tunnu be Isa ŋininna. X'e tu Alabatusuba xono, i tunnu b'a fola i ɲoxo ɲen xo: «Atelu xo di dun? A si na salli in to ba, walla a me na?» 57 Sadaxalasibaxa kuntigolu nin Farisiyalu tunnu xa yanmaro di, xo nin moxo men x'a dula lon, wo x'a fo; walasa a xa muta.
1 Xa tili wooro tu Tanbinxansallo la, Isa nata Betani tugun. A xa Lasare men nakuni xa bo furelu to, wo tun be siginin non ne. 2 I xa siimanŋo dara Isa ɲen je. Marate le tun be domolo dila moxolu ma. Lasare tun be Isa domoliɲoxolu to. 3 Mariyama xa tulu sumadimanŋo litere tala ta, men toxo xo nare, x'a yelema Isa sinŋolu xan. Wo tun mu tulu hooro le ti, men da xa xole. Wo xo, a x'a kunsino ke xa Isa sinŋolu masuusa. Tulo sumo xa bugo bee ta. 4 Isa la xarandinŋo do, xo Yudasi Isikariyoti, men tun b'a dunna bulo to, wo xo: 5 «Mun na ɲin tulu in man fiiri, x'a sonŋo di segebaxantunŋolu ma? A tun si deɲe xaaliso keme saba bo.» 6 A man wo fo, xo segebaxantunŋolu hinna b'a la. A x'a fo le, bawo a tun mu sunŋo le ti. I la xaaliso tun be lamaranin ate le ma. Men je di a ma, a si do bo wo la. 7 Isa xo: «Alu fata a ma. A xa wo ke nte kasankelunŋo le ɲen. 8 Alu nin segebaxantunŋolu be i ɲoxo xan tuma bee. Bari alu nin nte nte tula kadawu.» 9 Yahudiyalu moxo kiika x'a me, xo Isa be Betani. I taxata Isa je. Bari i taxata le du, walasa xa Lasare je, Isa xa men nakuni xa bo furelu to. 10 Sadaxalasibaxa kuntigolu x'a latege, xo xa Lasare du faxa. 11 Katugala ate le la kuwo x'a tu Yahudiyalu kiika yelemata, xa la Isa la. 12 Wo lun do, jamaba men nata Tanbinxansallo la, wolu x'a me xo Isa be silo to, nanin Yerusaleme. 13 I xa tamarabulolu xati, xa taxa Isa kunben. I tunnu be fetenna xo: «Tanto xa ke Ala ɲen! Men nato fele Marigi toxo la, duwawo be wo fe! Duwawo be Banisirayila mansaxe fe!» 14 Isa xa falindinŋo do soto, xa yele a xan, í xo a safeta Kitaabo to ɲa men xo: 15 «Siyon gallo, í xana sila: A fele, í la mansaxe be nanin, a be siginin falimuso dinŋo xan.» 16 Wo kuwolu kewaxato, a la xarandinŋolu tunnu man i faamu. Bari Isa kunita tumo men, xa dun a la nooro xono, i hakilo jigita a la, xo wo kuwolu safeta Kitaabo to a la kuwo to, xo moxolu xa wo lelu ke a ɲen ten. 17 Moxo men tunnu be Isa nofe, a be Lasare kilila xaburo xono tumo men, x'a labo furelu to, wolu x'a seedeya. 18 Jama x'a me, xo a xa wo kawakuwo ke. Wo le x'a tu, i x'a kunben. 19 Farisiyalu xo i ɲoxo ɲen xo: «Alu ɲa b'a la, alan me fusi bo no a to. A fele, duniya bee taxata a nofe.» 20 Gereko mennu taxata sallo to Yerusaleme batulo xanma, 21 wolu dolu x'e sodun Filipe la, men bota Galile Betesayida, x'a fo a ɲen xo: «Jatigixe, n b'a fe xa Isa je.» 22 Filipe taxata a fo Andere ɲen, i fulo taxata a lasi Isa ma. 23 Isa x'e jaabi xo: «Nooro be lala Moxo Dinxe xan waxato men, wo sita. 24 Tonɲa tonɲa, ń b'a fola alu ɲen xo, nin ɲokeso man bula duguxulo xoto, xa sa, a kilin si tu. Bari nin a sata, a si keso kiika ke. 25 Moxo men niyo xa di a ɲen, wo si bono a niyo to. Bari moxo men niyo man di a ɲen ɲin duniya in xono, wo s'a niyo lamara nilamaya banbalo xanma. 26 Nin men b'a fe xa baaro ke nte ɲen, wo x'a lo ń nofe. Wo to, ń be dula men, ń na baaradinŋo du si ke non. Men be baaro kela nte ɲen, Fa Ala si wo tigi bunɲa. 27 «Saasa nte juso be ɲaxaminin. Ń si mun fo? X'a fo ba xo: “Ń Fa, ń kisi ɲin waxati in tooro ma?” Bari ń nata ɲin waxati in fan fan ne xanma.» 28 Isa xo: «Ń Fa, í toxo bunɲa!» A xa wo fo tumo men, xumaxanŋo bota sanŋo to, wo xo: «Ń x'a bunɲa xa ban. Ń si do kafu a ma tugun.» 29 Jama men tun be je, wolu xa wo xumaxanŋo me tumo men, dolu xo: «Sanjiyo le fetenta.» Dolu xo: «Melekiyo do le xumata a ɲen.» 30 Isa xo i ɲen xo: «Ɲin xumaxan in man ke nte xanma. A keta a lelu xanma. 31 Saasa kiito be nala tegela ɲin duniya in xan. Ɲin duniya in kuntigo be nala xoyila saasa. 32 Bari nte, nin ń xototata xa bo duguxulo xan tumo men, ń si moxolu bee saba xa na i ti ń ma.» 33 Wo xumolu fe, Isa x'a la saya ɲa fo. 34 Jama x'a jaabi ɲin na xo: «N x'a xaran Kitaabo xono, xo Kirisita si tu í nila fo abada. Ite dun xo, xo waajibo le mu Moxo Dinxe xa xotota? Wo Moxo Dinxe mu jon ne ti?» 35 Isa xo i ɲen xo: «Haalibi, keneya be tula alu bata, bari dondin doron. Alu i taxama x'alu tu keneya la, dibo xana dun alu ma. Moxo men be í taxamala dibo to, wo man a taxadula lon. 36 Xa keneya tu alu bata, alu la keneya la, walasa alu xa ke keneya la moxolu ti.» Isa xa wo xumolu fo i ɲen tumo men, a taxata, x'é dugu i ma. 37 A xa taagumanseede kiika ke i ɲala, bari haali wo bee xan, i man la a la. 38 Wo ɲa ma, kila Esayi tun xa ɲin xuma in men fo, wo keta. A xo: «Marigi, n xa xibaro men fo, jon lata wo la? Marigi x'a la sintigiya yita jon na?» 39 I tunnu me lannaya ke no du, bawo Esayi tun xa ɲin du fo xo: 40 «Ala x'e fiyonɲa, x'e jusukunŋo xoleya; walasa i ɲalu xana jeli ke, i xana faamuyali ke i hakilolu la, i xana taxa i yelema ń ma, nte Ala x'e kendeya.» 41 Esayi xa wo xumolu fo Isa la kuwo to, bawo a tun x'a nooro je. 42 Wo bee nin a ta, haali Yahudiyalu la ɲamoxolu to, fo kiika lata Isa la. Bari Farisiyalu ɲasilanɲa bulu, wolu tunnu me fatiya, x'e la lannaya labo keno ma, i xana taxa labo Alabatusuwo kafo xono. 43 Moxolu la bunɲa tun xa di i ɲen Ala ta ti. 44 Isa fetenta xo: «Moxo men lata nte la, a man la nte la, a lata ń kibaxo le la. 45 Moxo men xa nte je, a xa ń kibaxo du je. 46 Nte nata duniya xono í xo keneya, walasa moxo wo moxo je la ń na, wo xana tu dibo to. 47 Nin moxo do xa nte la xumolu me, bari a man i mara, nte nte kiito tegela wo xan, bawo ń man na kiito tege duniya xan, ń nata duniya kisilo le xanma. 48 Moxo men j'í ban nte to, x'é ban xa ń na xumolu muta, men be kiito tegela wo tigi xan, wo fele: Nte xa xumo mennu fo, wo lelu be kiito tegela a xan duniya labanlunŋo. 49 Katugala ń na xumo man bo nte fan to. Ń xa xan xa xaranŋo men di, ń xa wo soto Fa Ala le la, ate men mu ń kibaxo ti. 50 Nte x'a lon xo yanmaro men bota Fa Ala la, wo si nilamaya banbalo di moxolu ma. Ń be men fola, Fa Ala x'a fo ń ɲen ɲa men, ń b'a fola wo ɲa in ne.»
1 Tanbinxansallo sutiyata. Isa tun x'a lon xo a la waxato sita, xa bo ɲin duniya in xono, xa taxa Fa Ala bata. Moxo mennu lata a la, duniya xono, a xa wolu xanu fo xa si a danŋo ma. 2 Isa nin a la xarandinŋolu tunnu be siimandomo la. Sentane tun x'a bula Simon dinxe Yudasi Isikariyoti jusukunŋo la xa ban, xa Isa dun bulo to. 3 Isa tun x'a lon a fan na kuwo to, xo Fa Ala xa kuwo bee sinŋo di a ma, a tun x'a lon du xo a bota Ala la, anin xo a b'é koppala Ala bata tugun. 4 Wo to, Isa wulita domolo kunna, x'a la dorokeba bo, xa faano do ta, x'a te tositi wo la. 5 Wo keninma, a xa jiyo ke miranŋo do xono, xa boyi a la xarandinŋolu sinŋolu kula, x'e masuusa a la wo tetositilanŋo la. 6 A sita Simon Piyere ma tumo men, wo xo a ɲen xo: «Marigi, ite le be nte sinŋolu kula ba?» 7 Isa x'a jaabi xo: «Ń be men kela, í man a xoto lon folo, bari í si laban x'a faamu.» 8 Piyere xo a ɲen xo: «Í me nte sinŋolu maku abada.» Isa x'a jaabi xo: «Nin nte man í sinŋolu maku, nidula nte í ɲen nte kun tugun.» 9 Simon Piyere xo a ɲen xo: «Awa Marigi, nin wo le mu, xana dan ń sinŋolu ma, bari ń bulolu nin ń kunŋo du maku.» 10 Isa xo a ɲen xo: «Moxo men x'é ku, a maaku nt'a la x'é ku tugun, bari a si a sinŋolu maku. Bawo alu senuyaninŋo le mu xa ban. Alu senuyaninŋo le mu, bari alu bee nte de.» 11 A tun x'a lon, men be nala a dunna bulo to. Wo le x'a tu a xo: «Alu bee senuyanin nte de.» 12 A x'e sinŋolu maku tumo men, a x'a la faanolu dun, x'é sigi domolo kunna tugun. A xo i ɲen xo: «Ń xa men ke alu la, alu x'a xoto lon ba? 13 Alu be nte kilila xo alu Karanmoxo anin alu Marigi. Alu xa tonɲa fo, bawo ń mu wolu ti. 14 Wo to, nte men mu alu Marigi nin alu Karanmoxo ti, nin nte x'alu sinŋolu maku, alu dulu xa xan xa i ɲoxo sinŋo maku. 15 Nte xa wo ke, x'a ɲa yita alu la, walasa alu dulu xa wo ɲoxon ke i ɲoxo ɲen. 16 Tonɲa tonɲa, ń b'a fola alu ɲen xo jonŋo man bun a marigi ti, kiladinŋo du man bun a kibaxo ti. 17 Nin alu xa wo kuwolu lon, x'e ke, alu si heero soto. 18 Ń nte alu bee ma de; ń xa mennu sugandi, ń xa wolu lon. Bari waajibo le mu Kitaabo la ɲin xumaxan in xa ke xo: “Ń domolikeɲoxo fan xa ń jaxuya.” 19 Kabirin saasa, ń b'a fola alu ɲen, walasa nin a keta, alu xa la a la xo: “Nte mu”. 20 Tonɲa la, ń b'a fola alu ɲen xo: Moxo wo moxo je nte la kiladinŋo jigiya, wo xa nte le jigiya; men du xa nte jigiya, wo xa ń kibaxo le jigiya.» 21 A x'é soto wo xumo fola tumo men, a jusukunŋo toorota. A woman in xo: «Tonɲa tonɲa, ń b'a fola alu ɲen xo, alu do be nala ń dunna bulo to.» 22 xarandinŋolu x'e ɲoxo mafele, x'e fannu toŋininxa, a si tara men tigi ma wo ti. 23 Isa la xarandinŋo do, a xa men xanu, wo tun be tabalo la Isa senbo to. 24 Simon Piyere x'a ɲa maxati wo ɲen, xo a xa Isa ŋininxa, a be men tigi ma. 25 Wo xarandinŋo x'e jenge Isa mafan, x'a ŋininxa xo: «Marigi, jontigi mu?» 26 Isa x'a jaabi xo: «Ń je buurukutunŋo su domolo to x'a di men ma, wo le mu.» A xa buurukutunŋo su domolo to, x'a di Simon Isikariyoti dinxe Yudasi ma. 27 Yudasi xa buuro muta tumo men, Sentane x'é dun a to. Isa xo a ɲen xo: «Í be men kela, wo ke tariya.» 28 A xa wo fo, xa wo la kunŋo men xan, a domoliɲoxolu si tun man wo lon. 29 I la xaaliso tun be maranin Yudasi le ma. A keta dolu ɲen xo Isa xo a ɲen ne xo: «N haajo be fenŋo mennu la sallo to, wolu san!» Walla x'a xo le, xo a xa fen do di segebaxantunŋolu ma. 30 Yudasi xa buuro muta doron, a wulita xa bo wo no bee to. Wo x'a tara suwo kuta. 31 Yudasi bota tumo men, Isa xo: «Saasa, Moxo Dinxe xa bunɲa soto, Ala du xa bunɲa soto a la kuwo xanma. 32 Nin Ala xa bunɲa soto a la kuwo xanma, Ala fan du si a Dinxe la bunɲa yita. Wo nte mela tugun. 33 Ń na dindinŋolu, haalibi, ń nin alu be tula í ɲoxo xan, bari waxatindin xono. Alu si nte ŋinin, bari, ń xa men fo Yahudiyalu ɲen, ń be wo fola alu dulu ɲen saasa: Nte be taxala dula men, alu me taxa no je. 34 Ń be ɲin sariya kuta in dila alu ma: Alu i ɲoxo xanu! Ń x'alu xanu ɲa men, alu dulu x'e ɲoxo xanu ten. 35 Nin alu be i ɲoxo xanula, moxolu bee s'a lon wo le ma, xo alu mu nte la xarandinŋolu ti.» 36 Simon Piyere xa Isa ŋininxa xo: «Marigi, í be taxala min?» Isa x'a jaabi xo: «Ń be taxala dula men, í me taxa no je saasa, bari lun do, í si taxa je.» 37 Piyere xo a ɲen xo: «Marigi, mun na nin nte me taxa no je saasa? Ń si bo ń niyo la í ɲen.» 38 Isa x'a jaabi xo: «Xa bo í niyo la nte ɲen ba? Tonɲa tonɲa, ń b'a fola í ɲen xo, jannin duntunŋo xa kokori, í s'í xaro í xo sinɲa saba, xo í man nte lon.»
1 Wo xo, Isa xo a la xarandinŋolu ɲen xo: «Alu hakilo xana ɲaxami. Alu la Ala la, alu la nte du la. 2 Sigidula kiika be ń Fa Ala la luwo xono. Wo mu tonɲa le ti, nin wo tun nte, ń me a fo alu ɲen. Ń be taxala dula do tobenna alu ɲen je. 3 Nin ń taxata xa dula do toben alu ɲen tumo men, ń si na tugun, x'alu ta, walasa ń be jan men, alu dulu xa ke non. 4 Alu xa ń taxadula silo lon.» 5 Tomasi xo a ɲen xo: «Marigi, n s'í taxadula silo lon ɲa di, x'a tara, n man í taxadula lon?» 6 Isa xo a ɲen xo: «Nte le mu silo ti, anin tonɲa nin nilamaya. Moxo si me taxa no Fa Ala bata, fo nte doron fe. 7 Nin alu tunnu xa nte lon, alu tunnu si ń Fa du lon. Kabirin saasa, alu x'a lon, alu x'a je.» 8 Filipe xo a ɲen xo: «Marigi, Fa Ala yita n na, wo si n bo.» 9 Isa x'a jaabi, a xo: «Filipe, bi man ń nin alu bula i ɲoxo xan, bari í man ń lon. Men xa nte je, wo xa Fa Ala du je. Wo to, í dun s'a fo ɲa di xo: “Fa Ala yita n na?” 10 Í man la a la ba, xo nte nin Fa Ala mu kilin ne ti, anin xo Fa Ala du nin nte mu kilin ne ti? Ń be xumo mennu ma x'e fo alu ɲen, wolu nte bola ń fan to. Ń Fa Ala men be tunin nte la, wo fan ne b'a la kebaarolu ma x'e ke. 11 Alu la ń na, xo nte nin Fa Ala mu kilin ne ti, anin xo Fa Ala du nin nte mu kilin ne ti. Haali nin alu man la ń na ń na xumolu xanma, ń be ɲin kebaara innu mennu ma x'e ke, alu la ń na wolu xanma. 12 Tonɲa tonɲa, ń b'a fola alu ɲen xo: Men je la nte la, a si nte la kebaarolu ɲoxonnu ke. A si kebaarolu ke fan, mennu barako xa bun nte talu ti, bawo ń be taxala Fa Ala bata. 13 Alu je fen wo fen tara Ala la, nte toxo la, ń si wo ke, walasa Dinxe xa Fa Ala la nooro yita. 14 Nin alu xa fen do tara nte toxo la, ń si wo ke.» 15 «Nin alu be nte xanula, alu si ń na sariyalu labatu. 16 Nte si xuma Fa Ala ɲen, a si Deemabaxo do xote di alu ma, alu nin men si tu i ɲoxo fe fo abada. 17 Wo Deemabaxo mu Ni Senunŋo le ti, nin wo mu tonɲa Niyo ti. Duniya me wo Niyo soto no, bawo a ɲa nte a la, a man a lon du. Bari atelu kennu x'a lon, bawo a be alu bata, a si ke alu jusukunŋo la du. 18 Ń me alu kilondinma tu. Ń si na alu bata tugun. 19 Dondin duniya me ń je tugun, bari atelu si ń je, bawo nte be ń nila, alu dulu si ke i nila. 20 Wo lunŋo, alu s'a lon, xo nte nin ń Fa mu kilin ne ti, xo atelu nin nte mu kilin ti, anin xo nte nin alu mu kilin ti. 21 «Moxo men be nte la sariyalu marala, x'e ke, wo tigi le be ń xanula. Moxo men be nte xanula, ń Fa si wo xanu. Nte du s'a xanu, xa ń yita a la.» 22 Isa la xarandinŋo do xote tun be je, wo du toxo xo Yudasi, wo xo Isa ɲen xo: «Marigi, mun na í s'í yita ntelu la, bari í nte í yitala duniya la?» 23 Isa x'a jaabi xo: «Nin men be nte xanula, a si ń na xumaxanŋolu labatu. Ń Fa s'a xanu, ntelu si na wo tigi bata, xa sigi je. 24 Moxo men nte ń xanula, wo me ń na xumaxanŋolu labatu. Alu tulo be xumo men na, wo man bo nte to. Fa Ala men xa ń ki, a bota wo le to. 25 Ń xa wo fo alu ɲen, xa nte nin alu tu i ɲoxo xan. 26 Deemabaxo, nin wo mu Ni Senunŋo ti, Fa Ala be men kila nte toxo la, wo si alu laxaran kuwo bee la, x'alu hakilo lajigi nte la xumolu bee kun. 27 «Ń be alu nin heero tula. Ń xa ń na heero di alu ma. Duniya b'a dila ɲa men, nte nt'a dila alu ma ten. Alu juso xana ɲaxami. Alu xana sila. 28 Alu x'a me ń na xo: “Ń be taxala, bari wo xo, ń si na alu bata tugun.” Nin alu be ń xanula, alu si ɲaxali nte la taxo la Fa Ala bata, katugala Fa Ala xa bun nte ti. 29 Ń xa ɲin fen innu fo alu ɲen saasa jannin i xa ke, walasa nin i keta, alu xa lannaya ke. 30 Ń nin alu nte xuma kiika fola tugun, bawo ɲin duniya in kuntigo be nanin. Sin fusi nt'a ɲen nte xan. 31 Bari ɲin duniya in xa xan x'a lon, xo nte be Fa Ala xanula. Wo to, a xa nte bula men na, ń be wo le kela. Alu wuli, alan xa taxa, xa bo jan.»
1 Isa xo: «Nte le mu resenju soobe ti. Ń Fa mu a senebaxo ti. 2 Bulu wo bulu be nte la, nin a nt'é dinna, a si wo tege. Bulu wo bulu be dinŋo kela, a si wo kunnakutun, walasa a xa dinŋo kiika ke, xa tanbi folo xan. 3 Ń xa xumo men fo alu ɲen, wo xanma, alu senuyata xa ban. 4 Alu tu nte la, nte xa tu alu la. Resenbulo gansanŋo me dinŋo ke no nin a nte a juwo la. Wo be ɲa men de, nin alu dulu man tu nte la, alu me í din no. 5 «Nte le mu resenjuwo ti, atelu mu a bulolu ti. Men je tu nte la, nte xa tu a la, wo s'í din bete, bawo nin nte nte, alu me fusi ke no. 6 Men man tu nte la, wo si fili banto to. A si ke í xo yiribulo mennu tegeta xa bo resenjuwo la. A si ja, xa kamari x'a fili ta to, x'a jani. 7 Nin alu tuta nte la, anin nte la xumaxanŋolu xa tu alu xono, fen wo fen xa di alu ɲen, alu wo tara, alu si wo soto. 8 Nin alu b'é dinbetela, wo si nooro la ń Fa xan. Wo s'a yita xo alu mu nte la xarandinŋolu ti. 9 Fa Ala xa nte xanu ɲa men, nte du x'alu xanu ten. Alu tu ń na xanuya xono. 10 Nin alu be ń na sariyalu labatula, alu be ń na xanuya xono, í xo nte xa ń Fa la sariyalu labatu ɲa men, xa tu a la xanuya xono. 11 «Ń xa ɲin xuma innu fo alu ɲen, walasa alu xa ń na ɲaxalo soto, anin alu la ɲaxalo xa dafa. 12 Ń na sariya fele: “Alu i ɲoxo xanu í xo nte x'alu xanu ɲa men.” 13 Xanuya me tanbi don na, xa bo í niyo la í xanuntelu ɲen. 14 Nte xa men waajibiya alu ma, nin alu be wo kela, alu mu nte xanuntelu ti. 15 Ń nte alu kilila tugun xo jonŋolu, bawo jonŋo man a marigi la ku ketalu lon. Ń x'alu kili xo ń xanuntelu, bawo ń xa fen wo fen me ń Fa la, ń x'alu lalon wo bee la. 16 Atelu man nte sugandi. Nte le x'atelu sugandi, x'alu bula, xa taxa, walasa alu x'e din, dinŋo men si tu. Wo to, alu je Fa Ala tara fen wo fen na nte toxo la, a si wo di alu ma. 17 Nte be men waajibiyala alu ma, wo fele: Alu i ɲoxo xanu.» 18 «Nin duniya x'alu jaxuya, alu a lon, xo a xa nte folo le jaxuya. 19 Nin alu tunnu mu duniya talu ti, duniya tun si alu xanu, katugu alu mu a ta ti. Bari alu nte duniya ta ti, nte x'alu sugandi x'alu fata duniya ma, wo xanma, duniya be alu jaxuyala. 20 Ń xa ɲin xuma in men fo alu ɲen, alu hakilo xa jigi wo la xo: “Jonŋo man bun a marigi ti.” Nin i xa nte tooro, i si alu dulu tooro. Nin i xa nte la xumolu muta, i si alu dulu talu muta. 21 Bari i be ɲin ku innu bee kela alu la nte toxo le nofe, bawo i man nte kibaxo lon. 22 Nin ń tun man na xa xuma i ɲen, junube tun nt'e xan. Bari saasa, i me fusi fo no men si jelamuta bo. 23 Moxo men be nte jaxuyala, wo be ń Fa du jaxuyala. 24 Nin ń tun man kebaarolu ke, moxo man dali xa men ɲoxonnu ke, junube tun me ke i la. Bari saasa, i xa ń na kebaarolu je, i xa nte nin ń Fa bee jaxuya. 25 Bari wo keta walasa ɲin xuma in, men safeta i la sariya xono, wo xa ke xo: “I xa ń jaxuya, x'a tara kun nt'a la.” 26 «Deemabaxo, nin wo mu Ni Senunŋo ti, men be tonɲa yitala duniya la, wo si na, xa bo Fa Ala bata. Ń s'a bula xa na alu ma ń Fa toxo la. Nin a nata, a si nte la kuwo seedeya moxolu ɲen. 27 Alu dulu si nte la kuwo seedeya moxolu ɲen, bawo alu nin nte keta i ɲoxo fe kabirin folofolo.»
1 «Ń xa ɲin fen innu fo alu ɲen walasa nin i sita, alu la lannaya xana tiɲa. 2 I si alu xoyi Alabatusuwolu xono. Waxato do fan si na, moxo men je alu faxa, a si ke wo tigo ɲen xo a janxa baaro le ke Ala ɲen ten. 3 I si wo kuwolu ke alu la, bawo i man Fa Ala lon, i man nte du lon. 4 Bari nin ń xa ɲin ku innu fo alu ɲen, ń x'a ke le, walasa nin i waxato sita, alu hakilo xa jigi a la xo nte xa wolu fo alu ɲen.» Kabirin folofolo, nte tun man i fo alu ɲen, bawo ń nin alu b'e ɲoxo xan. 5 Bari saasa, ń be taxala ń kibaxo bata. Alu to moxo si man soto xa ń ŋininxa xo: “Í be taxala min?” 6 Alu juso xasita fo xa danmatanbi, bawo ń xa wo fo alu ɲen. 7 A dun, xa tonɲa fo alu ɲen, a xa fisa alu ma nte xa taxa; bawo nin nte man taxa, Deemabaxo me na alu bata. Bari nin ń taxata, ń s'a ki alu ma. 8 Nin a nata, a si duniya moxolu la filo yita: Junubo kuwo to, Ala la tilinninɲa kuwo to, anin Ala la kiito kuwo to. 9 I filita junubo kuwo to; bawo i man la nte la. 10 I filita Ala la tilinninɲa kuwo to; bawo nte be taxala Fa Ala bata, anin x'alu me nte je tugun. 11 I filita Ala la kiito kuwo to; bawo kiito tegeta ɲin duniya in kuntigo xan xa ban. 12 «Xuma kiika be ń ma x'a fo alu ɲen, bari alu me wolu bee muɲa no saasa. 13 Nin tonɲa Niyo nata tumo men, a si tonɲa muume bee lasi alu ma. Bawo a la xumolu nte bola a fan to. Bari a je fen wo fen me, a si wo lasi alu ma, xa ku natalu fo alu ɲen. 14 A si nte la nooro yita, bawo xumo men be nte kun, a si wo soto, x'a lasi alu ma. 15 Fen wo fen be Fa Ala kun, nte ta le mu wo bee ti. Wo le x'a tu, ń x'a fo xo a si nte talu ta, x'e lasi alu ma.» 16 «Dondin dondin, alu me ń je tugun. Wo xo dondin, alu si ń je tugun.» 17 Wo to, a la xarandinŋo dolu xo i ɲoxo ɲen xo: «A la ɲin xuma in xoto mu mun ti xo: “Dondin dondin, alu me ń je tugun, wo xo dondin, alu si ń je tugun,” anin xo: “Ń be taxala Fa Ala bata?” 18 “Dondin dondin!” Wo xoto mu mun ti? N man a la ɲin xuma in xoto lon de.» 19 Isa x'a lon, xo i b'a fe x'a ŋininxa. A xo i ɲen xo: «Nte xa men fo alu ɲen xo: “Dondin dondin, alu me ń je tugun, wo xo dondin, alu si ń je tugun”, alu be i ɲoxo toŋininxala wo le ma ba? 20 Tonɲa tonɲa, ń b'a fola alu ɲen xo: Alu si xasi, xa maɲumatoxanŋolu fo, duniya si ɲaxali. Alu si nitokuwa, bari alu la nitokuwa si laban xa ke ɲaɲo ti. 21 Muso tinto si nitokuwa, bawo tinŋo waxato sita. Bari nin a x'a dinŋo wulu tumo men, a hakilo nt'a la tooro la tugun, bawo a si ɲaxali xo moxo do bangeta duniya xono. 22 Atelu dulu fele nitokuwala saasa. Bari ń si alu je tugun, alu si ɲaɲa. Moxo si me alu bo no wo ɲaɲo xono. 23 Wo lunŋo, alu me nte ŋininxa fusi la tugun. Tonɲa tonɲa, ń b'a fola alu ɲen xo: Alu je fen wo fen tara Fa Ala la nte toxo la, a si wo di alu ma. 24 Haalibi alu man fusi tara nte toxo la. Alu taralo ke, alu si soto ke, walasa alu la ɲaɲo xa dafa.» 25 «Ń xumata alu ɲen ɲin ku innu xan taliyolu la. Bari waxato be nanin, nte me xuma alu ɲen tali la tugun, bari ń si xuma, xa Fa Ala la kuwo xoyiya alu ɲen. 26 Wo lunŋo, alu si Fa Ala matara nte toxo la. Ń me a fo wo lunŋo xo nte si Fa Ala matara alu ɲen. 27 Bawo Fa Ala fan be alu xanula x'a la a xan, alu be nte xanula, anin alu lata a la xo nte bota Ala le to. 28 Ń bota Fa Ala bata xa na duniya to. Saasa ń be bola duniya to xa taxa Fa Ala bata.» 29 A la xarandinŋolu xo a ɲen xo: «Saasa í be xumala n ɲen x'a xoyiya. Í nte xumala tali si to tugun. 30 Saasa n x'a lon, xo í xa fen bee lon. Moxolu b'a fe x'é ŋininxa fen fen na, í xa wolu bee lon xa ban. Wo le x'a tu, n lata a la, xo í bota Ala to.» 31 Isa x'e jaabi xo: «Alu xa lannaya ke saasa ba? 32 A fele, waxato be nala, a sita xa ban, alu si jenjen, bee si taxa í ta boxo, xa ń kilin tu. Bari ń kilin nte tula de! Bawo ń nin Fa Ala le mu. 33 Ń xa ɲinnu fo alu ɲen, walasa alu xa heero soto nte kafuɲoxoya fe. Alu si tooro soto duniya to, bari alu i jija, nte sinta le duniya la.»
1 Isa xa wo xumolu fo tumo men, a x'a ɲalu xotota sanŋo to, xa Ala matara xo: «Ń Fa, waxato sita. Í Dinxe la nooro yita, walasa ate du xa ite la nooro yita. 2 Í xa fango di a ma hadamadinŋolu bee xan, walasa í xa moxo mennu di a ma, a xa nilamaya banbalo di wolu bee ma. 3 Ite men kilinpe mu Ala soobe ti, nin i xa ite lon, xa Isa Kirisita lon, í xa wo men ki, wo le mu nilamaya banbalo ti. 4 Ń xa bunɲa la í xan xa ń tu duguxulo xan; í xa baaro men dun ń bulu, ń xa wo dafa. 5 Saasa, ń Fa, bunɲa la ń xan í fan bata, bunɲa men tun be ń xan í bata jannin duniya xa da. 6 «I xa moxolu mennu fata duniya moxolu ma, x'e dun ń bulu, nte xa í toxo yita wolu la. I tunnu mu ite le ta ti, í x'e di nte ma, i x'é la xumo muta. 7 Saasa i x'a lon, xo í xa fen wo fen di nte ma, wolu bee bota ite le to. 8 Bawo í xa xumo mennu dun ń da, ń xa wolu lasi i ma. I xa wo xumolu muta. I x'a lon tonɲa la, xo ń bota ite le to. I lata a la du xo ite le xa ń ki. 9 «Ń b'é tarala ite lelu ɲen. Ń nt'é tarala duniya ɲen. Í xa mennu di ń ma, ń b'é tarala wo lelu ɲen; bawo ite le talu mu. 10 Fen wo fen mu nte ta ti, wo bee mu ite ta le ti. Ite ta du bee mu nte ta le ti. I la kuwo x'a tu, nte la bunɲa lonta. 11 Nte nte tula duniya xono tugun, bari itelu be duniya xono; nte be taxala ite bata. Ń Fa, ite men xa senu, i lakanta í toxo barako to, wo toxo men, nin í x'a di nte ma; walasa i xa ke kilin ti, í xo nte nin ite mu kilin ti ɲa men. 12 Xa nte nin i tu i ɲoxo xan, nte x'e lakanta í toxo barako to, í xa wo toxo men di nte ma. Nte x'e lakanta, i fen man halagi, fo halagibaxato kilin doron, men na kuwo safeta Kitaabo xono. Wo ɲa ma, wo xumo dafata. 13 Saasa nte be taxala í bata. Ń be ɲin xuma innu fola xa ń tu duniya xono, walasa i xa nte la ɲaxalo soto, ɲaxalo men be dafanin. 14 Ń x'é la xumo lasi i ma. Wo xanma, duniya x'e jaxuya, bawo i nte duniya ta ti, í xo nte nte duniya ta ti ɲa men. 15 Ń nt'é tarala xo í x'e labo duniya xono. Ń b'é tarala le xo í x'e kisi Jaxumanŋo ma. 16 Duniya talu nte, í xo nte nte duniya ta ti ɲa men. 17 I senuya tonɲa la. Í la xumo le mu tonɲa ti. 18 Í xa nte ki duniya xono ɲa men, nte du xa itelu ki duniya xono wo ɲa ma. 19 Nte xa ń fan di ite ma wolu ɲen, xa ke ite kilinpe ta ti, walasa i dulu xa i fannu di ite ma xa ke ite kilinpe ta ti, tonɲa la. 20 «Ń nte í tarala itelu doronnu ɲen. Men dulu be nala lala ń na i la xumolu xanma, ń b'é tarala wo dulu ɲen; 21 walasa, ń Fa, i bee xa ke kilin ti, í xo nte nin ite mu kilin ti ɲa men, wolu dulu nin ntelu xa ke kilin ti, walasa duniya xa la a la, xo ite xa nte ki. 22 Í xa bunɲa men di nte ma, nte xa wo d'i ma, walasa i xa ke kilin ti, í xo ntelu mu kilin ti ɲa men. 23 Nte nin itelu kafuta xa ke kilin ti ɲa men, anin ite nin nte be kafunin xa ke kilin ti ɲa men, a ke xo wo dulu xa kafu xa ke kilin ti, i la kilinɲa xa dafa. Nin wo keta, duniya s'a lon xo ite le xa ń ki, anin xo í x'e xanu, í xo í xa nte xanu ɲa men. 24 «Ń Fa, í xa mennu di ń ma, nte be dula men, ń b'a fe i dulu xa ke ń bata non, walasa í xa nooro men di ń ma, i xa wo je; bawo í xa nte xanu jannin duniya xa da. 25 Ń Fa, ite men be tilinnin, duniya man í lon, bari nte x'é lon, ɲin dulu x'a lon, xo ite xa ń ki. 26 Ń x'é toxo yita i la, walasa i x'é lon. Ń s'a yita i la tugun, walasa í xa nte xanu xanuya men na, wo xanuya xa ke i la, anin nte du xa ke i la.»
1 Isa x'é soto wo xumolu la tumo men, a nin a la xarandinŋolu wulita xa taxa Sedoron xo boxo do. Yirifuuto do tun be non, a nin a la xarandinŋolu dunta wo xono. 2 Yudasi men be nala a dunna bulo to, wo tun xa wo dula lon, bawo Isa nin a la xarandinŋolu dalita kela je kiika ti. 3 Yudasi nata yirifuuto to, a nin sorodasolu nin garadolu, sadaxalasibaxa kuntigolu nin Farisiyalu xa mennu ki. I nin maramafenŋolu nin lanpolu nin mooɲolu nata. 4 Kuwo fen wo fen tun xa xan xa ke Isa la, a fan tun xa wo bee lon. Wo to, a taxata i kunben, x'e ŋininxa xo: «Alu be jon ŋininna?» 5 I xo: «Nasareti Isa.» A xo i ɲen xo: «Nte le mu!» Yudasi men b'a dunna bulo to, wo tun b'e to. 6 Isa xo i ɲen tumo men xo: «Nte le mu», i x'e koppa i xo la, xa boyi dugo ma. 7 Isa x'e ŋininxa tugun xo: «Alu be jon ŋininna?» I xo: «Nasareti Isa.» 8 Isa x'e jaabi xo: «Ń x'a fo alu ɲen xo nte le mu. Nin alu be nte le ŋininna, alu ń nofemoxolu bula i xa taxa.» 9 Isa xa wo xumo fo, walasa a tun xa ɲin xuma in men fo xa dafa xo: «Ń Fa, í xa mennu di ń ma, i fen man sanko ń kun.» 10 Fanŋo tun be Simon Piyere bulu, a x'a boosi, xa sadaxalasibaxa kuntigiba la jonxe kininbulu tulo carun. Wo jonxe toxo xo Malikusi. 11 Isa xo Piyere ɲen xo: «Í la fanŋo bula a la to. Wo tuma, Fa Ala xa tooro jipoto men di nte ma, nte man xan xa son wo to ba?» 12 Wo to, sorodasi kuntigo nin a la sorodasi jama nin Yahudiyalu la garadolu xa Isa muta, x'a bulolu siti, 13 xa taxa a ti Ane bata folo. Ane mu Kayife bitanxe le ti, wo le tun mu sadaxalasibaxa kuntigiba ti wo san. 14 Kayife le tun xa Yahudiyalu la ɲamoxolu tonben ten xo: «A xa fisa moxo kilin xa sa jamanadinŋolu bee ɲen.» 15 Simon Piyere nin Isa la xarandin xote x'a lo a nofe taxanin. Wo xarandinŋo tun mu sadaxalasibaxa kuntigiba lonbaxo le ti. Wo le x'a tu wo dunta Isa nofe sadaxalasibaxa kuntigiba la luwo ma. 16 Bari Piyere tuta lonin da la, banto to. Xarandinŋo men tun mu sadaxalasibaxa kuntigiba lonbaxo ti, wo bota xa xuma muso ɲen, men be da korosila. A x'a tu Piyere xa dun luwo xono. 17 Wo to, baaradinmuso men tun be da korosila, wo xo Piyere ɲen xo: «Ite du nte ɲin xe in na xarandinŋo do le ti ba?» Piyere xo: «Nte nt'a la xarandin ti de!» 18 Jonŋolu nin garado men tunnu be je, wolu xa ta bula x'e ja, bawo neno tun b'a to. Piyere tun b'e bata. A du tun b'é jala. 19 Sadaxalasibaxa kuntigiba xa Isa ŋininxa a la xarandinŋolu la kuwo nin a la xaranŋo kuwo la. 20 Isa x'a jaabi xo: «Nte xumata moxolu bee ɲen keno la. Tuma bee ń xa moxolu laxaran Alabatusuwolu nin Alabatusuba xono, Yahudiyalu bee be kamarila dula mennu. Nte man fusi fo duguwo to. 21 Mun na í be nte ŋininxala? Ń xumata mennu ɲala, wolu ŋininxa. Ń xa men fo, wolu xa wo lon bete.» 22 Wo xumolu xan, garadolu to do, men tun be je, xa Isa te a ɲa xan, x'a fo xo: «Í be sadaxalasibaxa kuntigiba jaabila ten ne ba?» 23 Isa x'a jaabi xo: «Nin ń xa xuma jaxo le fo, wo yita. Nin ń dun man xuma jaxu fo, mun na í be ń lippala?» 24 Wo tumo la, Ane xa Isa bulolu sitininŋo bula, xa taxa sadaxalasibaxa kuntigiba Kayife bata. 25 Simon Piyere tun be non, a b'é jala. Dolu x'a ŋininxa xo: «Ite du nt'a la xarandinŋo do le ti?» A x'é xaro a la, a xo: «Nte nt'a la xarandin ti de!» 26 Sadaxalasibaxa kuntigiba la jonxe do, Piyere xa men tulo tege, wo badinxe xo Piyere ɲen xo: «Nte man í nin xe in je yirifuuto to ba?» 27 Piyere x'é xaro a la tugun. Wo no bee to, duntunŋo do kokorita. 28 Wo xo, Yahudiyalu la ɲamoxolu nin Isa bota Kayife bata, xa taxa a ti goferenere la xube la. Wo keta saxo ma junna. I fannu man dun luwo xono, bawo i tunnu nt'a fe xa noxo, men tun s'i bali xa Tanbinxansallo domolo ke. 29 Goferenere Pilate bota, xa si i ma. A xo: «Alu be ɲin xe in jalagila kun joman na?» 30 I x'a jaabi xo: «Nin kujaxukela tun nte, n tunnu me a dun í bulu.» 31 Wo to, Pilate xo i ɲen xo: «Alu fannu x'a muta, xa kiito tege a xan, alu la sariya la.» Yahudiyalu la ɲamoxolu xo a ɲen xo: «A nte dagenin ntelu ɲen xa moxo si faxa.» 32 Wo ɲa ma, Isa tun xa men fo x'a la saya keɲa yita, wo keta. 33 Pilate dunta xube xono, xa Isa kili x'a ŋininxa. A xo: «Í mu Yahudiyalu la mansaxe le ti ba?» 34 Isa x'a jaabi xo: «Wo mu í fan na miiriya ti ba, walla do xotelu xa wo fo nte ma í ɲen?» 35 Pilate x'a jaabi xo: «Nte mu Yahudiya le ti ba? Í fan na siya moxolu nin sadaxalasibaxa kuntigolu x'é dun nte bulu. Í xa mun ne ke?» 36 Isa x'a jaabi xo: «Nte la mansaya nte ɲin duniya in ku ti. Nin ń na mansaya tun mu ɲin duniya in ku ti, ń na moxo tunnu si kelo ke, walasa ń xana dun Yahudiyalu la ɲamoxolu bulu. Bari saasa, nte la mansaya nte ɲin duniya in ku ti.» 37 Pilate xo a ɲen xo: «Wo to, í mu mansaxe le ti ba?» Isa xo: «Í x'a fo ɲa men, a be ten. Ń mu mansaxe le ti. Ń nata wulu duniya to men xanma, wo mu le, xa na tonɲa yita moxolu la. Moxo wo moxo be tonɲa fe, wo si ń name.» 38 Pilate xo a ɲen xo: «Tonɲa mu mun ne ti?» A xa wo xumo fo tumo men, a bota tugun xa taxa Yahudiyalu la ɲamoxolu bata keno ma. A xo i ɲen xo: «Nte man jalagikun si je ɲin xe in ma. 39 Bari x'a la alu la laado xan, san wo san Tanbinxansallo to, ń si kasolamoxo kilin bula alu ɲen. Alu b'a fe ba, ń xa Yahudiyalu la mansaxe bula alu ɲen?» 40 Wo to, Yahudiyalu fetenta tugun x'a fo xo: «Ayi! Barabasi le be bulala.» Barabasi tun mu boyinxannila le ti.
1 Wo tumo, Pilate x'e bula Isa mutala, x'a xosi gaɲo la. 2 Sorodasolu xa mansakufuno dara ŋaninŋo la, x'a ke a kunŋo la, xa mansadoroke wulenŋo dun a xanna. 3 I x'e sodun a la, x'a fo xo: «Yahudiyalu la mansaxe, í nin sege!» I x'a te a ɲa xan. 4 Pilate bota tugun keno ma, x'a fo Yahudiyalu ɲen xo: «Ń fele a labola keno ma alu ɲen, walasa alu x'a lon xo nte man jalagikun si soto ɲin xe in na.» 5 Isa bota keno ma, a nin ŋaninkufuno nin mansadoroke wulenŋo. Pilate xo i ɲen xo: «Xe fele.» 6 Sadaxalasibaxa kuntigolu nin garadolu x'a je tumo men, i fetenta xo: «A gengen yiro ma, a gengen yiro ma!» Pilate xo i ɲen xo: «Alu fannu x'a muta, x'a gengen yiro ma, bawo nte man jalagikun si je a ma.» 7 Yahudiyalu x'a jaabi xo: «Sariya do be n bulu. Wo sariya la, a xa xan xa faxa, bawo a x'a fan ke Ala Dinxe ti.» 8 Pilate xa wo me tumo men, do kafuta a la silanɲa ma tugun. 9 A nin Isa dunta a la xube xono tugun, a xo Isa ɲen xo: «Í bota dula joman?» Isa man jaabi fusi di a ma. 10 Wo to, Pilate xo a ɲen xo: «Í be í dela nte le la ba? Í man a lon ba xo a sinŋo be nte ɲen x'é bula, walla x'é gengen yiro ma?» 11 Isa x'a jaabi xo: «Í tun me sin fusi soto nte xan nin a tun man di í ma xa bo sanŋo to. Wo le x'a tu, men xa ń dun í bulu, wo la junubo xa bun ite ta ti.» 12 Kabirin wo tumo, Pilate x'a ŋinin xa Isa bula. Bari Yahudiyalu fetenta xo: «Nin í x'a bula, í nte Rome mansaxe xanunte ti. Bawo moxo men b'a fan kela mansaxe ti, wo mu mansaxe jaxo le ti.» 13 Pilate xa wo xumolu lame tumo men, a xa Isa labo keno ma. Dula do tun be je, men dugumala be dalaxaaɲannin kuro la. Wo dula toxo heburuxanŋo to xo «Gabata». Pilate nata í sigi kiititegesigilanŋo xan non. 14 Wo keta tilinkunte waxato, Tanbinxansallo tobenlunŋo. Pilate xo Yahudiyalu ɲen xo: «Alu la mansaxe fele.» 15 Yahudiyalu fetenta xo: «A faxa! A faxa! A gengen yiro ma!» Pilate xo i ɲen xo: «Nte x'alu la mansaxe gengen yiro ma ba?» Sadaxalasibaxa kuntigolu xo: «Mansaxe xote nte ntelu kun nin Rome mansaxe nte.» 16 Wo to, Pilate x'a dun i bulu, i x'a gengen yiro ma. I xa Isa muta xa taxa a ti. 17 Isa fan x'a gengenyiro ta, xa na si dula do, men toxo xo «Kunxuludula». Non be kilila heburuxanŋo to xo «Goligota». 18 Sorodasolu x'a gengen yiro ma non. I xa moxo fula xote dulu gengen yirolu ma je. Kilin gengenta a kininŋo, do gengenta a numanŋo, Isa be i temo to. 19 Pilate xa safelo do ke, x'a noto Isa gengenyiro ma, a kunnamato. A xa men safe, wo fele xo: «Nasareti Isa, Yahudiyalu la mansaxe.» 20 Yahudiyalu kiika xa wo safelo xaran, bawo i xa Isa gengen yiro ma dula men, non tun xa sutu gallo la. Wo safelo tun be heburuxanŋo nin latenxanŋo nin gerekixanŋo to. 21 Yahudiyalu la sadaxalasibaxa kuntigolu xo Pilate ɲen xo: «Í tun man xan x'a safe xo: “Yahudiyalu la mansaxe”. Bari í xa xan x'a safe xo: “A xo, xo ate mu Yahudiyalu la mansaxe le ti.” » 22 Pilate x'e jaabi xo: «Ń xa men safe, ń xa wo safe le!» 23 Sorodasolu xa Isa gengen tumo men xa ban, i x'a la faanolu ta x'e tala naani ti, xa tala kilin di sorodasolu kilin wo kilin ma. I x'a la dorokexotobulo ta, xaralisila si tun nte wo la. Faanuxono kilin doron ne tun mu, x'a ta a sanŋo to, fo x'a bula a xoto la. 24 Sorodasolu xo i ɲoxo ɲen xo: «Alan xana a tofara, bari alan xa dokkolo ke, x'a lon, a si ke men ta ti.» Wo ɲa ma, Kitaabo tun xa men fo xo: «I xa ń na faanolu tala i ɲoxo te, xa dokkolo ke ń na dorokexotobulo xanma,» wo keta. Sorodasolu xa men ke, wo le fele. 25 Isa na nin a na badinmuso, anin Kulopasi musu Mariyama, nin Magidala Mariyama tunnu be lonin Isa gengenyiro senbo to. 26 Isa x'a na je, anin a xa xarandinŋo je lonin a na senbo to, a xa wo men xanu. A xo a na ɲen xo: «Ń na, í dinŋo fele.» 27 Wo xo, a xo wo xarandinŋo du ɲen xo: «Í na fele.» Kabirin wo waxato, wo xarandinŋo taxata Isa na ti a bata. 28 Wo xo, Isa x'a lon xo kuwo bee keta xa ban tumo men, a xo: «Mindoxo be ń na.» Wo ɲa ma, Kitaabo tun xa men fo, wo keta. 29 Miranŋo do tun be je, wo be fanin binegaro la. Sorodasolu xa fuulanŋo bula wo binegaro to, x'a siti hisope yiribulo kunŋo la, x'a lasi Isa da ma. 30 Isa xa binegaro min tumo men, a xo: «Kuwo bee dafata.» Wo xo, a x'a kunŋo lajigi, a niyo bota. 31 Tanbinxansallo tobenlunŋo le tun mu. Yahudiyalu la ɲamoxolu tunnu nt'a fe furelu xa tu gengennin yiro xan tofoɲolunŋo, bawo wo tofoɲolunŋo tun mu lunba le ti. Wo la, i x'a ŋinin Pilate la, xo moxo gengenninŋolu sinxalolu xa xati, nin i si sa tariya x'e fure lajigi. 32 Sorodasolu nata xa si Isa gengenɲoxo folo ma, xa wo sinxalolu xati, i sita do du ma, xa wo talu xati. 33 I sininma Isa ma, i x'a je xo a sata xa ban. Wo to, i man a sinxalolu xati. 34 Sorodaso do x'a soxo a baraso xan a la tanbo la. Wo no bee to, jelo nin jiyo bota. 35 Moxo men xa ɲin ku innu laxali, wo fan ne x'a je a ɲa la. A xa men je x'a seedeya, wo mu tonɲa le ti. A fan x'a lon xo a be tonɲa le fola. A b'a fola le walasa alu dulu xa lannaya ke. 36 Wo ɲa ma, Kitaabo tun xa ɲin xumaxan in men fo xo: «A xulolu si me xati», wo keta. 37 Kitaabo dula xote b'a fola xo: «I xa men soxo, i ɲa si wo je.» 38 Wo xo, Arimate Yusufu x'a ŋinin Pilate la, xo a xa Isa fure di a ma. Yusufu tun mu Isa la xarandinŋo do le ti. Bari Yahudiyalu la ɲamoxolu ɲasilanɲa bulu, a xa wo dugu. Pilate sonta. Yusufu nata, xa Isa fure ta. 39 Nikodeme men tun taxata Isa bata suwo to, wo du nata a nin mire nin alowesi tulu sumadiman ɲaxamininŋo tan saba kilo ɲoxon ti. 40 Wo moxo fulo xa Isa fure ta, x'a kasanke, xa wo tulu sumadimanŋolu ke a ma, í xo Yahudiyalu la furetobenɲa be kela ɲa men. 41 Isa gengenta dula men, yirifuuto do tun be non, xaburu kuto tun be non, moxo bada man nasi non folo. 42 I xa Isa lala non, bawo Yahudiyalu la tofoɲolunŋo tobenlunŋo le tun mu, anin du, wo xaburo tun xa sutu je la.
1 Alahado, saxo ma junna, jannin keneya xa bo, Magidala Mariyama taxata xaburo da la. A x'a je xo kuro men tun be xaburo dataxunnin, wo bota je. 2 A x'é bori xa taxa Simon Piyere bata, anin Isa tun xa xarandinŋo men xanu. A xo wolu ɲen xo: «I xa Marigi fure labo xaburo xono. N man a lon i x'a bula dula men.» 3 Wo to, Piyere nin wo xarandinŋo bota, xa taxa xaburuda la. 4 I fulo tun b'e borila i ɲoxo fe taxanin. Bari xarandin do x'é bori xa Piyere dan. Wo folo sita xaburuda la. 5 A sininma, a x'é majigi xa xaburo xono mafele, a xa kasanke je dugo ma, bari a man dun xaburo xono. 6 Wo xo, Simon Piyere du sita, ate dunta xaburo xono, xa kasanke je bulanin dugo ma, 7 anin faano, men tun keta Isa kunŋo la. Wo kunnafaano nin kasanke tun nte dula kilin. Bari wo tun be xutunin xa bula a dan na. 8 Wo xo le mu, xarandinŋo men tun folo sita, wo du dunta xaburo xono. A ɲa xa wo fenŋolu je, a xa lannaya ke. 9 Kitaabo xa men yita, xo Isa xa xan xa kuni xa bo furelu to, i tunnu man wo faamu folo. 10 Wo xo, xarandinŋolu x'e koppa xa taxa i bata. 11 Mariyama ken tun be lonin keno ma, xaburo senbo to. A tun be xasila. X'a tu xaso la, a x'é majigi xa xaburo xono mafele. 12 A xa meleke fula je, faanu xoyo b'e ma. Wolu tunnu be siginin Isa fure ladula, do b'a kunmafanŋo, do b'a sinmafanŋo. 13 Melekiyolu xo Mariyama ɲen xo: «Muso, í be mun xasila?» A x'e jaabi xo: «Bawo i xa ń Marigi fure ta. Ń man a lon i x'a bula dula men.» 14 A xa wo fo tumo men, a x'é yelema, a xa Isa je lonin. Bari a tun man a lon xo Isa le mu. 15 Isa xo a ɲen xo: «Í be mun xasila? Í be jon ŋininna?» A tun be Mariyama ɲen xo yirifuuto xono baarabaxo le mu. A xo: «Jatigixe, nin í le x'a ta, í x'a bula dula men, wo fo ń ɲen, ń xa taxa a ta.» 16 Isa xo a ɲen xo: «Mariyama!» Mariyama x'é yelema a mafan x'a fo a ɲen heburuxanŋo to xo: «Rabuni!» Wo xoto xo: «Karanmoxo.» 17 Isa xo a ɲen xo: «Ń bula, bawo ń man yele xa taxa ń Fa bata folo. Taxa ń badinŋolu bata í x'a fo i ɲen xo: Ń be yelela xa taxa ń Fa nin alu Fa bata, ń na Ala nin alu la Ala bata.» 18 Magidala Mariyama taxata a fo xarandinŋolu ɲen, xo a xa Marigi je. Isa xa xumo mennu fo a ɲen, a xa wolu laxali i ɲen. 19 Wo lunŋo, alahado wura la, xarandinŋolu kamarininŋo tun be bunŋo do xono, wolu xa bundalu soxo i da la, bawo i tunnu be silanin Yahudiyalu la ɲamoxolu ɲa. Isa nata x'é lo i temo to, x'a fo i ɲen xo: «Heero xa ke alu fe.» 20 A xa wo fo tumo men, a x'a bulolu nin a baraso yita i la. Xarandinŋolu xa Marigi je tumo men, i ɲaɲabeteta. 21 Isa xo i ɲen tugun xo: «Heero xa ke alu fe! Fa Ala xa ń ki ɲa men, nte du be atelu kila ten.» 22 Wo xumolu xo, a x'e fuute, x'a fo i ɲen xo: «Alu Ni Senunŋo muta. 23 Alu je moxo wo moxo la junubolu yaafa, yaafo si ke wo ma. Alu man moxo wo moxo la junubolu yaafa, wo la junubolu me yaafa.» 24 Isa nata a la xarandinŋolu ma tumo men, wo x'a tara a la xarandinŋolu to do, xo Tomasi, men kilita xo Fune, wo tun nte je wo tumo. 25 Xarandin tolu xo a ɲen xo: «Ntelu xa Marigi je.» A xo i ɲen xo: «Nin ń man pontidalu je a bulutego to, xa ń buluxonondinŋo dun wo pontidalu wuwo la, xa ń bulo la a barasa soxoninŋo ma, ń me la a la abada.» 26 Wo xo tili sagi, Isa la xarandinŋolu tunnu be bunŋo xono tugun. Tomasi du tun be je. Da tunnu be soxonin. Isa nata x'e lo i temo to. A xo i ɲen xo: «Heero xa ke alu fe.» 27 Wo keninma, a xo Tomasi ɲen xo: «Í buluxonondinŋo dun jan, ń bulutegolu mafele, í bulo tosaba x'a la ń baraso ma. Fata lannayabaliya ma, xa lannaya ke.» 28 Tomasi x'a jaabi xo: «Ń Marigi nin ń na Ala.» 29 Isa xo a ɲen xo: «Bawo í xa ń je, í xa lannaya ke! Mennu be lannaya kela x'a tara i ɲa man la ń xan, heero be wolu ɲen!» 30 Isa xa taagumanseede kiika xotelu ke a la xarandinŋolu ɲala, mennu man safe ɲin bukke in xono. 31 Ɲinnu safeta le, walasa alu xa la a la xo Isa le mu Kirisita ti, Ala Dinxe; anin walasa alu xa nilamaya soto a toxo barako to, wo lannaya xanma.
1 Wo xo, Isa x'é yita a la xarandinŋolu la Tiberiyade dalaba da la. A x'é yita ɲa men ma, wo fele: 2 Simon Piyere nin Tomasi, men kilita xo Fune, nin Natanayeli, men bota Galile maro gallo do to xo Kana, nin Sebede dinxelu anin Isa la xarandin fula xote, wolu tunnu be i ɲoxo fe. 3 Simon Piyere xo tolu ɲen xo: «Ń be taxala ɲegemutadula.» I xo a ɲen xo: «N dulu be taxala.» Wo to, i wulita xa taxa dun xulunŋo xono. Bari wo lunŋo suwo to, i man fusi muta. 4 Saxo yeleninma, i xa Isa je lonin dalaba da la. Bari xarandinŋo tunnu man a lon xo Isa le mu. 5 Isa xo i ɲen xo: «Ń na dindinŋolu, alu man ɲege soto ba?» I x'a jaabi xo: «Ayi, n man fen soto.» 6 A xo i ɲen xo: «Alu jala fili xulunŋo kininbulo xoto, alu si do soto.» I xa jala fili. Ɲego siyakujaxo bulu, i korita jala sabala. 7 Isa tun xa xarandinŋo men xanu, wo xo Piyere ɲen xo: «Marigi le mu!» Kabirin Simon Piyere x'a me doron xo Marigi le mu, a x'a la doroko dun, bawo a xannaxulunŋo le tun mu, x'é fili jiyo to. 8 Xarandin tolu nin xulunŋo nata. I tunnu be jala ma, x'a saba, a be fanin ɲego la. I tunnu nin danxanŋo te mu nonxon keme fula ɲoxon ne ti. 9 I sita danxanŋo la tumo men, i xa takeso je, ɲego be lanin a to, anin buuro. 10 Isa xo i ɲen xo: «Alu birin ɲego mennu mutala, alu na dolu ti.» 11 Simon Piyere dunta xulunŋo xono, xa jala nin ɲego saba, x'a lasi tinto la. Jala faninŋo tun be ɲege belebeleba keme nin tan luulu nin saba la. Bari haali ɲege innu nin i la siya, jala man fara. 12 Isa xo i ɲen xo: «Alu na domolo ke.» Xarandin si man fatiya x'a ŋininxa xo: «Ite mu jon ti!» Bawo i x'a lon xo Marigi le mu. 13 Isa x'é sodun i la, xa buuro ta, x'a di i ma. A xa ɲego du di i ma. 14 Ɲin keta Isa yita kunɲa sabananŋo ti a la xarandinŋolu la, a kuniyo xo xa bo furelu to. 15 Domolo keninma, Isa xo Simon Piyere ɲen xo: «Yaya dinxe Simon, í be nte xanula ba xa tanbi ɲinnu xan?» A xo: «Iyo Marigi, í x'a lon xo nte b'é xanula.» Isa xo a ɲen xo: «Ń na saaxandinŋolu negaani.» 16 Isa xo a ɲen sinɲa fulananŋo to xo: «Yaya dinxe Simon, í be nte xanula ba?» Piyere x'a jaabi xo: «Iyo Marigi, í x'a lon xo ń b'é xanula.» Isa xo a ɲen xo: «Ń na saaxolu korosi.» 17 Isa xo a ɲen sinɲa sabananŋo to xo: «Yaya dinxe Simon, í be nte xanula ba?» Piyere juso xasita bawo Isa x'a ŋininxa í xo sinɲa saba nin a b'a xanula. A xo: «Marigi, í xa fen bee lon. Í x'a lon xo nte b'é xanula.» Isa xo a ɲen xo: «Ń na saaxolu negaani. 18 Tonɲa tonɲa, ń b'a fola í ɲen xo, x'é xamarindinma tu, í fan tun si í te siti, xa taxa í diyanɲedula. Bari nin í xotota, í s'í bulolu xotota, do xote s'í te siti, xa taxa í ti dula, dula men man di í ɲen.» 19 Piyere be nala sala ɲa men, xa bunɲa la Ala toxo xan, Isa xa wo le yita wo xumolu la. Wo xo, a xo Piyere ɲen xo: «A lo ń nofe.» 20 Piyere x'é yelema, Isa xa xarandinŋo men xanu, a xa wo nato je i nofe. Wo xarandinŋo le tun x'é jenge Isa mafan, x'e tu siimandomo la, x'a ŋininxa xo: «Marigi, jon be nala í dunna bulo to?» 21 Piyere xa wo xarandinŋo je tumo men, a xo: «Marigi, mun si ke ɲin dun ɲen?» 22 Isa xo a ɲen xo: «Nin a xa di ń ɲen, a nilama si tu fo nte xa na tumo men, ite la mun be wo to? Ite x'a lo ń nofe doron.» 23 Wo xumo jenjenta badin lannayabaxolu to, xo wo xarandinŋo nte sala. Tonɲa la, Isa tun man a fo a ɲen xo a nte sala. Bari a xo le: «Nin a xa di ń ɲen, a nilama si tu fo nte xa na tumo men. Ite la mun be wo to?» 24 Wo xarandinŋo le xa wo kuwolu seedeya x'e safe. N x'a lon, xo a la seedeya mu tonɲa le ti. 25 Isa xa ku kiika xotelu ke, nin wo tunnu bee safeta, ń na miiro to, xo wo bukkolu bee tun me kun no duniya xono.