Jeso fare ge Dok ne ge ne mbo ya dunya zi ne
1 Pe eya cecew zi Fare ka, Fare ka poseya ne Dok. Fare ka Dok. 2 Ka pe eya cecew zi poseya ne Dok. 3 Kaŋ ma pet a ke da ne na ta, be ge na to, kaŋ a̰me ge ne ke tene ne na pala be na to to. 4 Ndwara ka na zi, ndwara me ka kwaya̰l ge naa dasana ma ne. 5 Kwaya̰l ka zenna tṵ zi, amma tṵ be ame na to bat. 6 Temeya ge Dok ne a̰me mbo ya, na dḭl Yohanna. 7 Mbo ya dimma ne ndu ge sayda go, ndwara ke sayda ge kwaya̰l ne, ne da pe naa pet nama ho̰ fareba na ta. 8 Na sḛ be kwaya̰l ne to, amma mbo ya ndwara ke sayda ge kwaya̰l ne. 9 Fare ka kwaya̰l ge fareba, na ge ne mbo ya dunya zi, ge ne zḛ́ naa ta pet. 10 Ka dunya zi, a ke dunya da ne na ta, amma dunya be wan na pe to. 11 Mbo ya na hir ma buwal zi, amma na hir ma be ame na to. 12 Amma nama ge a ne ame na ma pet, ho̰ nama pool nama gá Dok vya ma, ndwara go, nama ge a ne ho̰ fareba dḭl ge na ne zi ma. 13 A be saŋge Dok vya ma da ne tolla ge duur ne ta to, ko ne laar ɓyareya ge ndu dasana ne ta to, amma ne Dok ta. 14 Fare hé duur naa dasana ma, gá katɗa nee buwal zi no, nee kwa hormo ge na ne, hormo dimma ne hormo ge vya ge ɗu kikit ge ne mbo ne Báá ta ya go, ka da ne dulwak ge kwa a̰se gḛ ne fareba me. 15 Yohanna ke na sayda, ndage na ka̰l oyya go: «No a ndu mbe ge mbi ne ka jan na fare, swaga ge mbi ne ka janna go: ‹Ndu mbo ya go ne mbi go̰r ya, na sḛ ka mbi ndwara zḛ, ago na sḛ mbi ndwara zḛ›.» 16 Nee pet nee ɓo kaŋ kwaɗa ge na ne zuliya bindik. Busugi kwa a̰se ge na ne ya nee pal, ka gwan busugi na ya nee pal ta. 17 Ago eya mbo ya da ne Musa ta, kwa a̰se ma ne fareba mbo ya da ne Jeso Kris ta. 18 Ndu a̰me be kwa Dok to. Vya ge ɗu kikit, na ge Dok, ge ne wá ne Báá zi ya, a na bḛ na ya zum ne.
Sayda ge Yohanna bage ke naa baptisma ne
19 Sayda ge Yohanna ne ke swaga ge Yuda ma ne teme naa ge ke tuwaleya ma ne Levi vya ma ne Ursalima ya na ta no. A ele na go: «Mo wuɗi ne ɗaa?» 20 Be njuɗi na wak to, jya̰ nama zum kwaya̰l go waŋ go: «Mbi Kris ne to.» 21 A gwan ele na go: «Mo wuɗi ne? Mo Iliya ne ya’a?» Na sḛ gwa̰ ne nama janna go: «Mbi be na ne to.» A gwan ele na go: «Mo anabi ne’a?» gwan ne nama janna go: «To!» 22 A jan na go: «Mo wuɗi ne? Jya̰ i, go no i ba mbo gwan ne naa ge a ne teme i ya ma fare janna. Mo sḛ ɗe, mo jan go mo wuɗi ne?» 23 Jan nama go: «Mbi ka̰l ge ne oy ne ful pul zi ne: ‹Ɗaɗe me viya̰ ge Bageyal ne›, dimma ne anabi Isaya ne jya̰ go.» 24 Naa ge a ne teme nama ya Yohanna ta ma Farisi ma ne. 25 A gwan ele na go: «Kadɗa mo be Kris ne to, ko Iliya, ko anabi a̰me ne to ɗe, kyaɗa mo ba ka ke naa baptisma ɗaa?» 26 Yohanna gwan ne nama janna go: «Mbi ke aŋ baptisma mam se, ndu a̰me ya aŋ buwal zi, aŋ kwa na to, 27 mbo ya go ne mbi go̰r ya, mbi be mbyat ge sá na tyarko táál to.» 28 Fare mbe ma no pet a ka ele ta nama ge suwal Betaniya go, maŋgaɗam Urdun le may ya, ge swaga ge Yohanna ne ka ke naa baptisma go.
Jeso, tame vya ge Dok ne
29 Dam ge kwap ge go, kwa Jeso ka mbo ya nà ta, jan go: «Ndi, tame vya ge Dok ne, na ge ne ndage sone ge dunya ne uzi no! 30 A na ge mbi ne ka janna go: ‹Ndu a̰me mbo ya go ne mbi go̰r ya, na sḛ ka mbi ndwara zḛ, ago na sḛ mbi ndwara zḛ.› 31 Mbi ɗe, mbi be kwa na to, amma mbi mbo ya ke naa baptisma mam se ne da pe na sḛ ŋgay tene Israyela vya ma ta.» 32 Yohanna ke naa kwarra go: «Mbi kwa O̰yom sugi ne digi ya dimma ne maale go mbo ya kat na pal. 33 Mbi ɗe, mbi kwa na to, amma bage ne teme mbi ya ke naa baptisma mam se, jya̰ mbi go: ‹Ndu ge mo ne mbo kwa O̰yom ya sugi ne digi ya, kat na pal, a na mbo ke naa baptisma O̰yom ge mbegeya zi ne.› 34 Mbi kwa, mbi ke aŋ na kwarra no go, ndu mbe no a Dok vya ne.»
Jeso naa ge ame hateya ge zḛ ge ma
35 Dam ge kwap ge go uwale, Yohanna ma ne na naa ge ame hateya ma azi ne mḛya, 36 kwa Jeso ne kaleya, jan go: «Tame vya ge Dok ne no!» 37 Na naa ge ame hateya mbe ma jwak a za̰ na fare mbe, a kare Jeso pe ya. 38 Jeso saŋge tene se, swaga ge ne kwa nama ne kare na pe, jan nama go: «Aŋ ɓyare da ɗaa?» A jan na: «Rabbi! Na pe wanna go Bage hateya, mo kat ya da ɗaa?» 39 Jan nama go: «Mbo me ya, aŋ ma̰ kwa!» A mbo, a kwa swaga ge ne ka ne go. A gá katɗa na ta dam mbe go. Ka le gyala tok gasamal. 40 Andrawus ge Siman Bitrus ná vya ka naa ge azi ge a ne za̰ fare janna ge Yohanna ne, ge a ne kare Jeso pe ma buwal zi. 41 Na sḛ e pe gale ɓol na ná vya Siman, jya̰ na no go: «I ɓo Al-Masihu! Na pe wanna go Kris.» 42 Gene na ya Jeso ta. Swaga ge Jeso ne ndi na ɗer, jan go: «Mo Siman ge Yohanna vya, a mbo gá tol mo Kefas, na pe wanna go, Njal.» 43 Dam ge kwap ge go, ka ɓyare go na mbo Galile, ɓol Filibus. jan na go: «Kare mbi pe ya!» 44 Filibus ka ndu ge suwal Betsayda ne, a ne Andrawus ma ne Bitrus ma ka suwal ge ɗu go. 45 Filibus mbo ɓol Natanayel, jan na go: «I ɓo ndu ge Musa ne njaŋge fare na pal ge eya ma zi, na ge anabi ma ne jya̰ na fare: A Jeso ge Yusuf vya, ndu ge suwal Nazaret ne.» 46 Natanayel jan na go: «Kaŋ a̰me ge kwaɗa da ne pool mbo ne suwal Nazaret ya ɗaa?» Filibus jan na go: «Mbo ya, mo kwa!» 47 Swaga ge Jeso ne kwa Natanayel mbo ya na ta, jan fare na pal go: «No a Israyela vya ge fareba ne, mbuɗiya a̰me ne na zi to!» 48 Natanayel jan na go: «Mo kwa mbi da ɗaa?» Jeso gwan ne na janna go: «Zḛ tek Filibus gale ne be ge tol mo, swaga ge mo ne ka fere pe zi, mbi kwa mo.» 49 Natanayel gwan ne na janna go: «Rabbi, mo Dok vya ne, mo Gan ge Israyela ne ne!» 50 Jeso jan na go: «Ne mbi ne jya̰ mo go, mbi kwa mo fere pe zi pe, mo ho̰ fareba no’a? Mo mbo gwan kwa kaŋ ge ɓaŋlaŋ ge waɗe ge no mbe ma.» 51 Gwan jan na uwale go: «Fareba, fareba, mbi jan aŋ, aŋ mbo kwa pḭr hage tene, maleka ge Dok ne ma ka ndé digi, a ka ndé ya se ge Vya ge ndu ne pal.»
Vḛso sanna ge suwal Kanan go
1 Dam ge ataa go, vḛso sanna ka Kanan ge suwal Galile ne go, Jeso ná ka swaga mbe go. 2 A tó Jeso ma ne na naa ge ame hateya ma ya swaga vḛso sanna mbe go me. 3 Swaga ge oyo̰r jiya̰l ne woɗege naa, Jeso ná mbo ya jan na go: «Nama oyo̰r jiya̰l á go.» 4 Jeso jan na go: «Gwale, a ma fare ne nee ne mo buwal zi ne ɗaa? Mbi swaga gale be mbyat to.» 5 Na ná jan naa ge ke temel ma go: «Fare ge ma̰ jan aŋ ya, ke me na.» 6 Il ga̰l ge a ne cer na ne njal ma ka swaga mbe go myanaŋgal, ge daage pul kan kaŋ pul azi ko ataa go. Yuda ma ka zal mam da ne nama zi usi ta ndwara hat ta harcal. 7 Jeso jan nama go: «Wi me il ga̰l mbe ma ne mam.» A wi nama lata̰y. 8 Gwan Jan nama go: «Ne Se no, zá me na, gene me na mbo hon ga̰l ge vḛso ne.» A gene na mbo hon na. 9 Swaga ge ga̰l ge vḛso ne ne tyare mam ge ne saŋge oyo̰r jiya̰l, ne jo̰ na sḛ be kwa swaga ge ne mbo ne ya to, amma a nama ge a ne zá mam ya ma kwa ne ɗeŋgo, tol gwale giya̰l obe, 10 jan na go: «Ndu ge daage é pe gale hon naa oyo̰r jiya̰l ge kwaɗa ɓya, swaga ge naa ne fere ya ba gá ge nde nde. Ndi mo koy ge kwaɗa ɗiŋ ne se no.» 11 No a kaŋ ŋgayya ge Jeso ne e pe ke na ne, ke na Kanan ge suwal Galile go. Ŋgay pool ge na ne, na naa ge ame hateya ma ho̰ fareba na ta no. 12 Go̰r kaŋ mbe ma no go, Jeso ma ne na ná ma, ne na naa ge ame hateya ma, a mbo suwal Kafarnahum ya, a ke na go dam ma kwaɗa lwak.
Jeso yan naa ge ker suk ma ne zok ge mbegeya zi zum
13 Dam vḛso Paska ge Yuda ma ne ga gwa, Jeso mbo Ursalima ya. 14 Ge zok ge mbegeya zi, set naa ge ke suk nday ma, ne tame ma, ne tuk ma, ne naa ge er bware ma ne katɗa. 15 Tigi bol ne táál, yan nama ne zok ge mbegeya zi ya zum pet, poseya ne tame ma, ne nday ma, kan bware ge naa ge er bware ma ne uzi, ɓyan tabul ma se me. 16 Jan naa ge ne ka e tuk ma yatɗa ma go: «Abe me aŋ kaŋ mbe ma ne go go uzi! Saŋge me zok ge mbi Bá ne zok tujar to!» 17 Na naa ge ame hateya ma dwat ge fare ge ne njaŋge ne maktub zi pal, njaŋge go: «Yil ge ne mbi zi ne zok ge mo ne pe zam mbi sḛ.» 18 Yuda ma jan na go: «Swaga ker kaŋ mbe ma no go, mo ŋgay i ma kaŋ ɗaa?» 19 Jeso gwan ne nama janna go: «Gu me zok ge mbegeya mbe no se, dam ataa pul zi mbi mbo ɗage ne na digi.» 20 Yuda ma jan na go: «A ke del wara anda para myanaŋgal gale ɓya a ɗage sin zok ge mbegeya mbe no, mo jan go mo ɗage ne na digi dam ge ataa ma pul zi’a?» 21 Amma zok ge ne ka jan na fare, ka jan da ne na sḛ duur. 22 Swaga ge ne ta̰ ne siya ma buwal zi digi, na fare ge ne jya̰ mbe sya ya na naa ge ame hateya ma pala zi, a hon fareba ge fare ge ne njaŋge ma pal, ne fare ge Jeso ne ka janna ma pal me.
Jeso kwa naa dasana ma dulwak kwa
23 Swaga ge ne ka Ursalima diŋ, dam vḛso Paska go, naa gḛ a hon fareba na ta, ne a ne ka kwa na ke kaŋ ŋgayya ma pe. 24 Amma Jeso hon fareba nama pal to, ne jo̰ kwa nama kwa tyatyat. 25 Uwale, na sḛ ɓyare go a jya̰ na fare ge ndu ne jan to, ne jo̰ na sḛ kwa kaŋ ge ne dulwak ge ndu dasana ne zi kwa.
Ɓol ta ge Jeso ma ne Nikodemu ne
1 Ndu a̰me ɗu ka Farisi ma buwal zi, na dḭl Nikodemu, a Yuda ma ga̰l a̰me ne. 2 Mbo ya Jeso ta ɗaal zi, jan na go: «Rabbi, i kwa kwa go mo bage hateya ne, mo mbo da ne Dok ta ya. Ago ndu ge ke kaŋ ŋgayya ge mo ne ke nama mbe ma no to, kadɗa Dok poseya ne na to.» 3 Jeso gwan ne na janna go: «Fareba, fareba, mbi jan mo: Kadɗa ndu be tol tolla ge giya̰l to, na sḛ ne pool kwa muluk ge Dok ne to bat.» 4 Nikodemu jan na go: «Ndu ge ne hatɗa sabar ke gyana ɗo ba gwan tol giya̰l ɗaa? Gwan na ná laar zi ɗo, ba gwan tol ya se ɗogle ɗaa?» 5 Jeso gwan ne na janna go: «Fareba, fareba, mbi jan mo: Kadɗa ndu be tol tolla ne mam ma ne O̰yom ta to, na sḛ ne pool ge wat muluk ge Dok ne zi to bat. 6 Kaŋ ge ne tó ne duur zi, a duur, kaŋ ge ne tó ne O̰yom zi, a o̰yom. 7 Ke ajab ne mbi ne jya̰ mo go, na kwaɗa aŋ tó tolla ge giya̰l to. 8 Saam kwal mbo swaga ge na ne ɓyare go, mo za̰ na pul, amma mo kwa swaga ge ne ɗage ne ya, ko swaga ge ne mbo go to. Ndu ge ne tol ne O̰yom zi go no me.» 9 Nikodemu jan na go: «Ke go mbe ma̰ gyana ɗaa?» 10 Jeso gwan ne na janna go: «Mo Israyela ma bage hateya ne, mo kwa fare mbe ma no to’a? 11 Fareba, fareba, mbi jan mo: I jan fare ge i ne kwa, i ke sayda kaŋ ge i ne kwa pal, amma aŋ vin sayda ge i ne to. 12 Kadɗa aŋ hon fareba ge kaŋ ge mbi ne jan aŋ ge ne dunya zi ma pal to ɗe, ma̰ kadɗa mbi jya̰ aŋ kaŋ ge ne digi zi ya ma ɗe, aŋ ma̰ hon fareba gyana ɗaa? 13 Ndu a̰me be mbo digi zi ya to, a Vya ge ndu ne ɗeŋgo, na ge ne ka̰ na koo ne digi ya se. 14 Dimma ne Musa ne gabe bom digi ful pul zi go, a mbo gabe Vya ge ndu ne digi go no me. 15 Ne da pe, ndu ge daage pet ge ne hon fareba ya na ta, na ɓó ndwara ge ɗiŋnedin. 16 Ago Dok laar wa̰ dunya ge be to ho̰ na vya ge ɗu kikit ya no, ne da pe ndu ge daage pet ge ne hon fareba ya na ta na ɓa̰ uzi to, amma na ɓo ndwara ge ɗiŋnedin. 17 Ago Dok be teme na vya ya dunya zi na kṵ sarya dunya pal to, amma ne na ta, dunya ɓo máya. 18 Bage ne hon fareba na ta, a kun sarya na pal to, amma bage ne ho̰ fareba to, a kun sarya ya kun na pal zo, ne da pe be hon fareba dḭl ge vya ge ɗu kikit ge Dok ne zi to. 19 Ndi sarya kunna no ɗaŋ: kwaya̰l mbo ya dunya zi, amma naa dasana ma laar wan tṵ waɗe kwaya̰l, ne da pe nama kaŋ kerra ma sone. 20 Ago ndu ge daage pet ge ne dwage sone kerra kwane kwaya̰l kwane, na sḛ mbo ya kwaya̰l go to, ne da pe na kaŋ kerra ge sone ma pe bḛ zum to. 21 Amma ndu ge ne ke mborra fareba zi mbo ya kwaya̰l go, ne da pe a kwa kwaya̰l go waŋ go na kaŋ kerra mbo laar ɓyareya ge Dok ne pal.»
Sayda ge Yohanna bage ke naa baptisma ne Jeso pal
22 Go̰r kaŋ mbe ma no go, Jeso ma ne na naa ge ame hateya ma mbo suwal Yahudiya ya. A gá katɗa swaga mbe go, ka ke naa baptisma. 23 Yohanna ka ke naa baptisma ge Enon se, na ge ne Salim ziyar go gwa, ne da pe mam ka gḛ swaga mbe go. Naa ka mbo ya na ta ke baptisma. 24 Swaga mbe go, a gale ne be dol Yohanna daŋgay zi. 25 Gaage ɗage digi ge naa ge ame hateya ge Yohanna ne ma ne Yuda a̰me buwal zi ge fare ge hat ta harcal pal. 26 A mbo ya Yohanna ta, a jan na go: «Rabbi, ndu ge aŋ ne na ne ka maŋgaɗam Urdun le may ya, na ge mo ne ke sayda na pal mbe, ndi ne ke naa baptisma ne ya go no, naa pet a mbo ne go na ta ya.» 27 Yohanna gwan ne nama janna go: «Ndu ne pool ge ɓol a̰me to, kadɗa a be hon na na da ne digi zi ya to. 28 Aŋ sḛ ma, aŋ za̰ mbi janna go: ‹Mbi be Kris ne to, amma a teme mbi ya na ndwara zḛ baŋ.› 29 Ndu ge ne gwale giya̰l a gwale giya̰l obe, amma gwale giya̰l obe kondore kat na ziyar go, ka za̰ na, na sḛ ka ke tuli ne na ne za̰ gwale giya̰l obe ka̰l pe. Laar saal mbe no a ge mbi ne, se no a wiya tap. 30 A kwaɗa go na do̰ zḛ, mbi me, mbi dage. 31 Ndu ge ne mbo ne digi ya, ya naa pala digi pet, ndu ge ne suwar se, na sḛ ge suwar ne, jan fare ge ne suwar se. Ndu ge ne mbo ne digi ya, ya naa pala digi pet . 32 Ke sayda kaŋ ge na ne kwa ne kaŋ ge na ne za̰ pal, amma ndu a̰me ge vin na sayda mbe to. 33 Ndu ge ne vin na sayda, vin go Dok fareba. 34 Ndu ge Dok ne teme na ya, jan fare ge Dok ne, ago Dok hon na O̰yom be ŋgayya. 35 Bá laar wa̰ vya, ho̰ kaŋ ma pet ya na tok go. 36 Ndu ge ne hon fareba Vya ta da ne ndwara ge ɗiŋnedin, ndu ge ne gwan ne na pala vya pe se to mbo ɓol ndwara to bat, amma pore ge Dok ne ya na pal.»
Jeso ma ne gwale ge suwal Samariya ne
1 Swaga ge Jeso ne kwa go Farisi ma za̰ go na ɓol naa ge ame hateya ma gḛ, na ke naa baptisma gḛ waɗe Yohanna me ɗe, 2 ne jo̰ Jeso sḛ be ka ke naa baptisma to, a na naa ge ame hateya ma ka kerra ne puy ɗe, 3 ya̰ suwal Yahudiya, gwan ndwara mbo Galile. 4 A ŋgat go na kale suwal Samariya go. 5 Swaga ge ne dé ya Samariya suwal a̰me ge a ne tol na Sukar go, ago Sukar gwa ne gaaso ge Yakub ne ho̰ na vya Yusuf. 6 Tub ge Yakub ne ka swaga mbe go. Ne jo̰ Jeso lwage ya swaga kereya go, mbo ya kat na pe tub wak go. Ka le gyala pala. 7 Gwale a̰me ge suwal Samariya ne mbo ya zal mam. Jeso jan na go: «Ho̰ mbi mam njotɗa nde.» 8 Ago na naa ge ame hateya ma mbo ya suwal diŋ mbo yat kaŋzam. 9 Gwale ge suwal Samariya ne mbe jan na go: «Mo Yuda, te ke gyana mo ba kaɗe mbi ge samariya go mbi ho̰ mo mam njotɗa ɗaa?» Ago Yuda ma ne Samariya ma ba̰a̰n to. 10 Jeso gwan ne na janna go: «Mo te kwa bobo ge Dok ne kwa, ko mo te kwa ndu ge ne jya̰ mo go: ‹ho̰ mbi mam njotɗa nde› kwa ɗe, mo te ya kaɗe na, na sḛ te ya hon mo mam ge ndwara.» 11 Gwale mbe jan na go: «Bageyal, mo ne kaŋ a̰me ge gàn mam to, tub ɗugul me. Mo ɓol mam ge ndwara mbe da ne da ɗaa? 12 Mo waɗe i bá Yakub, na ge ne ho̰ i tub mbe no, na sḛ njó na, na vya ma ne nama kavaar ma njó na me, waɗe ɗaa?» 13 Jeso gwan ne na janna go: «Ndu ge daage pet ge ne njot mam mbe no mam njuwal gwan ke na ke. 14 Amma ndu ge ne mbo njot mam ge mbi ne mbo hon na ya, mam njuwal mbo gwan ke na to bat. Mam ge mbi ne mbo hon na ya mbo saŋge mam ge soya na zi ɗiŋ mbo ndwara ge ɗiŋnedin zi.» 15 Gwale mbe jan na go: «Bageyal, ho̰ mbi mam mbe, na kaage mam njuwal gwan ke mbi to, mbi gwa̰ ya go go zal mam to me.» 16 Jeso jan na go: «Mbo tol mo obe ya, mo gwan’a go go.» 17 Gwale mbe jan na go: «Mbi obe to.» Jeso jan na go: «Mo jya̰ fareba, mo be obe, 18 mo sa̰ obe anuwa̰y, na ge aŋ ne na ne ka no, a be mo obe ne to. Ne no pe, mo jya̰ fareba.» 19 Gwale mbe jan na go: «Bageyal, mbi kwa ya go go, mo anabi ne! 20 I bá ma uware Dok njal mbe no pal, aŋ ɗe, aŋ jan go, swaga uware Dok ge kwaɗa ya ge Ursalima go.» 21 Jeso jan na go: «Gwale, mbi jan mo fare ge fareba, dam ma mbo ya go, mbo kat njal mbe no pal, ko Ursalima diŋ aŋ ba ka uware Báá to. 22 Aŋ uware kaŋ ge aŋ ne kwa na to, i uware kaŋ ge i ne kwa na, ago máya mbo da ne Yuda ma ta ya. 23 Dam ma mbo ya go, yan ja, naa ge uware Dok ge fareba ma mbo uware Báá O̰yom zi, ne fareba zi. No a naa ge uware Dok ge fareba ge Báá ne ɓyare nama ma ne. 24 Dok a O̰yom, nama ge a ne uware na ma, a kwaɗa go nama uware na O̰yom zi ne fareba zi.» 25 Gwale mbe jan na go: «Mbi kwa kwa Al-Masihu mbo mbo ya, na ge a ne tol na Kris, swaga ge ne mbo mbo ja, mbo fut i kaŋ ma pe zum pet.» 26 Jeso jan na go: «Mbi ge mbi ne jan mo fare no, mbi na ne.» 27 Swaga mbe go no, na naa ge ame hateya ma yan’a, a ke ajab ne na ne jan fare ne ndu gwale pe, amma ndu a̰me ge jan na go: «Mo te ɓyare da ɗaa», ko: «Mo te jan na gyana ɗaa», kat to bat. 28 Gwale mbe ya̰ na tóól, gwan mbo suwal diŋ mbo jan naa go: 29 «Mbo me ya ndil ndu ge ne jya̰ mbi kaŋ ge mbi ne ke ma pet! A be Kris ne to’a?» 30 Naa wat ne suwal diŋ ya zum mbo ya ɓol Jeso. 31 Swaga mbe go, na naa ge ame hateya ma ne kaɗe na go na za kaŋzam, a ka jan na go: «Rabbi, za kaŋzam!» 32 Amma jan nama go: «Mbi, mbi da ne kaŋzam ge zamma ge aŋ sḛ ma ne kwa na to.» 33 Na naa ge ame hateya ma ka ele ta go: «Ndu a̰me ho̰ na kaŋzam ɗaa?» 34 Jeso jan nama go: «Mbi kaŋzam, a ke laar ɓyareya ge Bage ne teme mbi ya ne, ne wi na temel ma wak me. 35 Aŋ, aŋ jan go: ‹Saba gá anda gale, naa ba ɗage kan siyal.› Mbi, mbi jan aŋ go: Ndi me gaaso gale, swara pala ɓoy go, gá gwa ge naa kan siyal! 36 Bage ne syat swara ɓol na potɗa go, kote swara digi ne ndwara ge ɗiŋnedin pe. Bage ne zare ma ne bage ge ne syat nama ke laar saal dagre. 37 Ago, ne no pe fare sḭ mbe no jan fareba: ‹Ndu a̰me zare, bage may syat.› 38 Mbi teme aŋ mbo syat gaaso ge aŋ ne ke na temel to, a naa ge ɗogle ma ke temel ne, aŋ mbo syat kaŋ ge nama sḛ ne za̰ yál ne na pe no.» 39 Samariya ma gḛ ne suwal mbe diŋ a hon fareba na ta, ne fare ge gwale mbe ne jya̰ bama pe, jya̰ go: «Ndu mbe jya̰ mbi kaŋ ge mbi ne ke ma pet.» 40 Swaga ge Samariya mbe ma ne mbo ya na ta, a kaɗe na go na gá katɗa bama ta. Jeso gá katɗa nama ta dam azi. 41 Swaga mbe go naa gḛ gwan hon fareba na ta ne na fare janna ma pe. 42 A ka jan gwale mbe go: «A be ne fare janna ge mo ne ma ta i ho̰ fareba no to, i sḛ ma za̰ na, i kwa no go, fareba, na sḛ bage má dunya ne.»
Jeso zon asagar ge gan ne ma ga̰l vya
43 Dam ge azi mbe ma go̰r go, Jeso ɗage ne swaga mbe go ndwara mbo Galile. 44 Ago na sḛ jya̰ zaŋgal go: «Anabi ne hormo na suwal go to.» 45 Amma swaga ge ne dé ya Galile go, Galile ma ame na kwaɗa, ne da pe a kwa na kaŋ ge ne ke Ursalima diŋ dam vḛso go ma pet, ago nama sḛ ma me a mbo swaga vḛso ya. 46 Gwan ya Kanan ge suwal Galile ne go, swaga ge na sḛ ne saŋge mam oyo̰r jiya̰l go. Asagar ge gan ne ma ga̰l a̰me vya ka moy ge suwal Kafarnahum ya. 47 Swaga ge ne za̰ go Jeso mbo ja ne suwal Yahudiya ya mbo ya Galile go ɗe, mbo ɓol na, kaɗe na na mbo zon na vya, ago vya mbe ka ɓyare suya. 48 Jeso jan na go: «Te go aŋ be kwa kaŋ ŋgayya ma ne kaŋ ajab ma to, aŋ hon fareba te to bat!» 49 Ga̰l ge asagar ge gan ne ma ne jan na go: «Bageyal, mbo ya, mbi vya ma̰ hat suya!» 50 Jeso jan na go: «Mbo, mo vya da ne ndwara.» Ndu mbe hon fareba fare janna ge Jeso ne pal, dol tene mbo. 51 Ne viya̰ zi gale, na dore ma mbo ya jan na go: «Mo vya zonna ya!» 52 Ele nama go na ɓo zonna ma ler de. A jan na go, na hare mbe ya̰ na dana le gyala pala. 53 Vya mbe bá kwa go na ler mbe go ge Jeso ne jya̰ na go: «Mo vya da ne ndwara.» A ne na yàl mwaɗak a hon fareba. 54 No a kaŋ ŋgayya ge azi ge Jeso ne ke na swaga ge ne ɗage ne Yahudiya ya mbo ya Galile go ne.
Jeso zon ndu ge looɗol
1 Go̰r kaŋ mbe ma no go, dam vḛso a̰me ge Yuda ma ne yan’a, Jeso mbo Ursalima ya. 2 Ge Ursalima diŋ, gwa ne zok wak ge tame ma ne, baal a̰me ya go, na ge a ne tol na ne wak ibriniya Betzata. Ka da ne pak wak ma anuwa̰y. 3 Pak wak mbe ma zi, naa ge moy ma ka tabeya fiya, ɓaal ma, ne giɗi ma, ne naa ge looɗol ma. A ka da̰re go a vuuɗi mam digi. 4 Ago maleka ge Bageyal ne ka kan na koo ya baal mbe se, ba ka vuuɗi mam digi, ndu ge ne watɗa ɓaal se zḛ go̰r ge maleka ne vuuɗi mam digi go ɗe, ka ɓol zonna, ko na ka ne moy hir ge daage. 5 Ndu a̰me ge ne ke moy ya del tapolɗu para tiimal ka swaga mbe go. 6 Swaga ge Jeso ne kwa na fiya, kwa go na ke ya kaal swaga mbe go, jan na go: «Mo ɓyare zonna’a?» 7 Ndu ge moy gwan ne na janna go: «Bageyal, swaga ge a ne vuuɗi mam digi, mbi ne ndu a̰me ge dol mbi ɓaal se to. Swaga ge mbi ne ɗage mbo ya, ndu a̰me ge ɗogle wat ya ɓaal se mbi ndwara zḛ.» 8 Jeso jan na go: «Ɗage digi, hé mo kaŋ fiya, mbo!» 9 Swaga mbe go juju ndu mbe zon, hé na kaŋ fiya, mbo na mborra. Ka dam ɗigliya go. 10 Yuda ma jan ndu ge ne ɓó zonna mbe go: «Ma̰ dam ɗigliya ne, ne na viya̰ go ge mo in mo kaŋ fiya to.» 11 Na sḛ gwan ne nama janna go, ndu ge ne zo̰ mbi jya̰ mbi ne go mbi hé mbi kaŋ fiya, mbi mbo. 12 A ele na go: «Ndu ge ne jya̰ mo go, mo hé mo kaŋ fiya mo mbo mbe wuɗi ɗaa?» 13 Ndu ge ne ɓó zonna mbe be kwa ndu ge ne zo̰ na mbe to, ago Jeso bigi tene naa buwal zi, ne da pe naa ka swaga mbe go gḛ. 14 Dam ma kwaɗa lwak go̰r go, Jeso mbo ɓol ndu mbe zok ge mbegeya zi, jan na go: «Ndi, mo zon ya go, ne gá ne zḛ no gwan ke sone to, ne da pe na kaage kaŋ ge sone waɗeya na ɓo mo to.» 15 Ndu mbe mbo jan Yuda ma go na Jeso zo̰ na ne. 16 Ne no pe, Yuda ma ɗage ke Jeso yál ne na ne ke no dam ɗigliya go pe. 17 Amma Jeso jan nama go: «Ɗiŋ ne se no mbi Bá ke temel, mbi, mbi ke temel me.» 18 Ne no pe uwale, Yuda ma ka ɓyare hun na, ne na ne yele dam ɗigliya pala pe ɗeŋgo to, amma ne na ne jya̰ go Dok na na Bá ne pe, go no ŋgay tene mbyatɗa leɗet ne Dok.
Pool ge Dok vya ne
19 Jeso gwan jan nama go: «Fareba, fareba, mbi jan aŋ: Vya ke fare a̰me ne na pala to, ke kaŋ ge na ne kwa na Bá kerra. Ago kaŋ ge Bá ne ke, Vya ke na go no ca me. 20 Bá laar wa̰ Vya, ka ŋgay na kaŋ ge na ne ke ma pet. Mbo gwan ŋgay na kaŋ ma gḛ waɗe ge no mbe ma, aŋ mbo ke ajab. 21 Dimma ne mbi Bá ne tan naa ge siya ma, ne é nama kat ne ndwara go, go no me Vya e ndu ge na laar ne ɓyare na kat ne ndwara. 22 Mbi Bá kun ndu a̰me sarya to, amma ho̰ sarya kunna ma pet ya Vya tok go. 23 Ne da pe, naa pet nama ho̰ Vya hormo, dimma ne a ne hon Bá hormo go. Ndu ge ne hon vya hormo to, hon Bá, na ge ne teme na ya hormo to me. 24 Fareba, fareba, mbi jan aŋ, bage ne za̰ mbi fare, hon fareba ge bage ne teme mbi ya ta, na sḛ da ne ndwara ge ɗiŋnedin, mbo ya sarya zi to, amma sele siya ya sele zo mbo ya ndwara zi. 25 Fareba, fareba, mbi jan aŋ, swaga ma mbo ya go, se no yan ja, ge naa ge siya ma a mbo za̰ Dok Vya ka̰l, nama ge a ne mbo za̰ na ya ma, a mbo kat ne ndwara. 26 Ago ne jo̰ mbi Bá hon naa ndwara, go no me, ho̰ Vya pool ge hon naa ndwara. 27 Ho̰ na pool ge kun sarya, ne da pe na sḛ Vya ge ndu ne ne. 28 Na kaage fare mbe ma ke aŋ ajab to. Ago dam ma mbo ya go, naa ge ne táál siya se ma a mbo za̰ na ka̰l, 29 nama ge a ne ke kaŋ ge kwaɗa ma, a mbo tan mbo ya ndwara zi, amma nama ge a ne ke kaŋ ge sone ma, a mbo tan mbo ya sarya kunna zi. 30 Mbi ke fare a̰me ne mbi pala to. Mbi kun sarya fare ge mbi ne za̰ pal. Sarya kunna ge mbi ne a dosol, ne da pe mbi ke be laar ɓyareya ge mbi ne to, amma laar ɓyareya ge bage ne teme mbi ya ne.»
Sayda kerra ge Jeso pal
31 Kadɗa mbi ke tene sayda ne, sayda ge mbi ne fareba to. 32 Amma a ndu ge ɗogle ke mbi sayda ne, mbi kwa kwa go na sayda ge ne ke mbi pal, a fareba. 33 A aŋ teme naa mbo ɓol Yohanna ne, na sḛ ke sayda ge fareba pal. 34 Amma mbi ɗe, mbi ɓyare be sayda ge ndu dasana ne to, mbi jan kaŋ mbe ma no, ne da pe aŋ má. 35 Yohanna ka dimma ne ɗuli ge a ne e na ol digi ndwara na ho̰ kwaya̰l go, aŋ ɓyare go aŋ za̰ tuli swak na kwaya̰l pe go. 36 Amma sayda ge mbi ne waɗe ge Yohanna ne da ne ga̰l, ago kaŋ ge mbi Bá ne ho̰ mbi go mbi ke nama, kaŋ mbe ma ŋgay ne go na mbi Bá teme mbi ya ne. 37 Mbi Bá ge ne teme mbi ya ke mbi sayda ne. Amma aŋ be za̰ na ka̰l, ko kwa na ndwara to bat. 38 Aŋ be ame na fare aŋ zi to, ne jo̰ aŋ be hon fareba ge bage na sḛ ne teme na ya ta to. 39 Aŋ hale maktub ma pe, ne da pe aŋ ka dwat go aŋ da ne pool ɓol ndwara ge ɗiŋnedin ne nama ta. A maktub mbe ma sḛ ke mbi sayda ne. 40 Go no puy ɗe, aŋ vin go aŋ mbo ya mbi ta ɗo, aŋ ba ɓol ndwara to. 41 Mbi ɓyare be uwareya ge naa ne to. 42 Amma mbi kwa aŋ kwa tyatyat, aŋ laar be wan Dok to. 43 Mbi mbo ya dḭl ge mbi Bá ne zi, aŋ be ame mbi to, kadɗa ndu a̰me ge ɗogle mbo ja dḭl ge na ne zi, aŋ mbo ame na. 44 Aŋ ɓyare uware ta ta buwal zi, aŋ ɓyare uwareya ge ne mbo ne Dok ta ya to. Go mbe no, aŋ ma̰ hon fareba mbi ta gyana ɗaa? 45 Dwa me go mbi kaŋge aŋ mbi Bá ta ne to, a Musa, na ge aŋ ne é aŋ jobreya na pal kaŋge aŋ ne. 46 Kadɗa aŋ ho̰ fareba Musa ta, aŋ te ya hon fareba mbi ta me, ago njaŋge fare ma mbi pal. 47 Amma kadɗa aŋ be hon fareba na kaŋ njaŋgeya ma ta to ɗe, aŋ ma̰ hon fareba mbi fare janna ma pal ma̰ gyana ɗaa?
Jeso wá naa dudubu anuwa̰y
1 Go̰r kaŋ mbe ma no go, Jeso har maŋgaɗam ga̰l Galile, na ge a ne tol na maŋgaɗam Tiberiya le may ya. 2 Naa gḛ ge be to a kare na pe ya, ne da pe a kwa na kaŋ ŋgayya ma ge ne ka kerra swaga zon moy ma go. 3 Jeso ndé njal pala digi, kat na pe se poseya ne na naa ge ame hateya ma. 4 Paska, ndwara go vḛso ge Yuda ma ne ga ya gwa. 5 Swaga ge Jeso ne he na pala digi, kwa naa tabeya gḛ ge be to ne mborra ya na ta, jan Filibus go: «Nee ɓol katugum yatɗa ma̰ da ne da ɗo, nee ba hon naa mbe ma no zamma ɗaa?» 6 Ka jan go no ndwara kugi na, ne da pe, na sḛ kwa kaŋ ge na ne ɓyare kerra kwa. 7 Filibus gwan ne na janna go: «Ko bware sile kikis azi puy, day ge nee yat katugum mbyatɗa ge ndu ge daage ɓol ŋgeŋgeɗo to.» 8 Ndu a̰me ne na naa ge ame hateya ma buwal zi, Andrawus ge Siman Bitrus ná vya jan na go: 9 «Vya jyale a̰me ne go go no, da ne katugum anuwa̰y ge ne ke ne gḛme ge fogor, ne sii ma azi me, a ma kaŋ vya ne ne naa ge tabeya mbe ma no pe ɗaa?» 10 Jeso jan go: «E me naa katɗa se.» Sugur ka swaga mbe go gḛ. Naa mbe ma kat se, naa sonmo ka mbo kaŋ ge naa dudubu anuwa̰y go. 11 Jeso abe katugum mbe ma, gwan ne gugu hon Dok, var naa ge ne ka swaga mbe go ma, ke go no me ne sii mbe ma, hon nama laar ɓyareya ge nama ne pal. 12 Swaga ge a ne huri, jan na naa ge ame hateya ma go: «Kote me nama pe ge ne gá ma ya digi, ne da pe kaŋ a̰me ba̰ uzi to.» 13 A kote nama ya digi, a wi gum wol para azi ne katugum ge ne ke ne gḛme ge fogor, ge naa ne za, ge nama pe ne gá ma. 14 Swaga ge naa ne kwa kaŋ ŋgayya ge ne ke mbe no, a jan go: «Fareba, ndu mbe no a anabi ge te ya mbo ya dunya zi ne.» 15 Swaga ge Jeso ne kwa go nama ɓyare mbo ya wan na e gan ne pool ɗe, ŋgwate gwan mbo njal pala digi ya hini ɗu.
Mborra ge Jeso ne mam pal
16 Swaga ge swaga ne ke gasamal, na naa ge ame hateya ma mbo maŋgaɗam wak se ya, 17 a hé fak ndwara har mbo le may ya, suwal Kafarnahum ya. Ɗaal wan nama, Jeso gale ne be ge mbo ya nama ta to. 18 Saam ge ɓaŋlaŋ ɗage labreya, sḭḭl kat ge be to. 19 Swaga mbe go, naa ge ame hateya ma har ya zum ya mbo kaŋ ge kilometer anuwa̰y ko myanaŋgal go. A kwa Jeso ne mborra ya fak ta zi mam pal, vo wan nama. 20 Amma jan nama go: «A mbi ne, sya me vo to!» 21 A ɓyare go bama ame na fak go, swaga mbe go fak yabe ge swaga ge a ne ɓyare mbo ya go me.
Naa ka ɓyare Jeso
22 Dam ge kwap ge go, naa ge ne gá maŋgaɗam ga̰l le may ya ma kwa go fak gá ya go ɗu, Jeso ma ne na naa ge ame hateya ma be ndé fak ge ɗu go har le may ya ne to, amma na na naa ge ame hateya ma ndé fak go ne ɗeŋgo. 23 Fak a̰me ma a mbo ne Tiberiya ya, ge swaga ge a ne za katugum mbe ta gwa, nama ge Bageyal ne gwa̰ ne gugu nama pal mbe ma. 24 Swaga ge ɓase ma ne kwa go Jeso ne go to, ko na naa ge ame hateya ma puy a ne go to ɗe, a gwan ndé fak mbe ma go, a har mbo Kafarnahum ya, mbo ɓyare Jeso. 25 A mbo ɓol Jeso maŋgaɗam ga̰l le may ya, a jan na go: «Rabbi, mo te mbo ya go go ma del ɗaa?» 26 Jeso jan nama go: «Fareba, fareba, mbi jan aŋ: aŋ ɓyare mbi pe ndwara go aŋ kwa kaŋ ŋgayya ma to, a ndwara go aŋ za katugum, aŋ huri no. 27 Ke me temel ne kaŋzam ge ne vḛne uzi pe to, amma ne kaŋzam ge ne kat ɗiŋ mbo ndwara ge ɗiŋnedin zi pe, na ge Vya ge ndu ne mbo hon aŋ na ya. Ago Báá, Dok e na logom ne.» 28 A gwan ne na janna go: «I ke ma kaŋ ma ɗo, ba det ya laar ɓyareya ge Dok ne go ɗaa?» 29 Jeso jan nama go: «Kaŋ ge Dok ne ɓyare, a go aŋ ho̰ fareba bage na ne teme na ya ta.» 30 A gwan ne na janna go: «Mo ke ma kaŋ ŋgayya ma ɗo, i ba kwa nama, i ba hon fareba mo ta ɗaa? Mo ke ma kaŋ ɗaa? 31 I bá ma zá maan ful pul zi, dimma ne a ne njaŋge go: ‹Ho̰ nama kaŋzam ge ne mbo ne digi zi ya zamma.›» 32 Jeso jan nama go: «Fareba, fareba, mbi jan aŋ, a be Musa ho̰ aŋ kaŋzam ge ne mbo ne digi zi ya ne to, amma a mbi Bá hon aŋ kaŋzam ge fareba ge ne mbo ne digi zi ya ne. 33 Ago kaŋzam ge Dok ne, a na ge ne mbo ne digi zi ya, na ge ne hon dunya ndwara.» 34 A jan na go: «Bageyal, ho̰ i kaŋzam mbe no ɗaɗak!» 35 Jeso gwan ne nama janna go: «Mbi, mbi kaŋzam ge ndwara ne. Bage ne mbo ya mbi ta kyamal mbo ke na to bat, bage ne hon fareba ya mbi ta, mam njuwal mbo ke na to bat me. 36 Amma mbi jya̰ aŋ go: Aŋ kwa mbi, aŋ be hon fareba to bat. 37 Ndu ge daage pet ge mbi Bá ne hon mbi na ya, mbo mbo ya mbi ta, bage ne mbo ja mbi ta, mbi mbo yan na uzi ya to bat. 38 Ago mbi ka̰ mbi koo ne digi ya se, a be ne ke laar ɓyareya ge mbi ne pe to, amma ne ke laar ɓyareya ge bage ne teme mbi ya ne. 39 Laar ɓyareya ge bage ne teme mbi ya ne no, ago mbi ba̰ ndu a̰me ɗu ge na ne ho̰ mbi na uzi to, amma mbi ta̰ nama digi dam pe aya go. 40 No a laar ɓyareya ge mbi Bá ne ɗaŋ: ago ndu ge daage na kwa Vya, na ho̰ fareba na ta, na ɓo ndwara ge ɗiŋnedin, mbi me, mbi mbo tan na dam pe aya go.» 41 Yuda ma ɗage tunna na pal ne na ne jya̰ go: «Mbi, mbi kaŋzam ge ne mbo ne digi zi ya ne» pe. 42 A ka janna go: «Ndu mbe no, te be Jeso ge Yusuf vya, na ge nee ne kwa na bá ma ne na ná ma ne to’a? Te jan gyana ne se no go: ‹Mbi ka̰ mbi koo da ne digi zi ya ɗaa?›» 43 Jeso jan nama go: «Kaage aŋ ka tunna ta buwal zi to! 44 Ndu a̰me ne pool ge mbo ya mbi ta to, kadɗa na mbi Bá ge ne teme mbi ya zwa na ya mbi ta ne to. Mbi me, mbi mbo tan na dam pe aya go. 45 A njaŋge ne maktub ge anabi ma ne zi go: ‹Pet a mbo kat naa ge ame hateya ge Dok ne ma.› Ndu ge daage pet ge ne za̰ mbi Bá ka ame na hateya me, mbo ya mbi ta. 46 Ndu a̰me be kwa mbi Bá to, a na ge ne mbo ne Dok ta ya ɗeŋgo, na sḛ kwa mbi Bá ne. 47 Fareba, fareba, mbi jan aŋ, bage ne hon fareba ya, da ne ndwara ge ɗiŋnedin. 48 Mbi katugum ge ndwara ne. 49 Aŋ bá ma za maan ge ful pul zi, a su uzi. 50 No a katugum ge ne mbo ne digi zi ya ne, bage ne zam na, su to. 51 Mbi katugum ge ne hon ndwara ge ne mbo ne digi zi ya ne, bage ne zam katugum mbe no, mbo kat ne ndwara ɗiŋnedin. Katugum ge mbi ne mbo hon na ya, a mbi sḛ duur, ne da pe dunya ɓo ndwara.» 52 Ne fare mbe no pe, gaage ɗage digi Yuda ma buwal zi, a ka janna go: «Ndu mbe hon nee na duur zamma ma̰ gyana ɗaa» 53 Jeso jan nama go: «Fareba, fareba mbi jan aŋ, kadɗa aŋ zam duur ge Vya ge ndu ne ya to, aŋ njot swama ge na ne to me, aŋ mbo kat ne ndwara to bat. 54 Bage ne zam duur ge mbi ne, ka njot swama ge mbi ne me, da ne ndwara ge ɗiŋnedin, mbi mbo tan na digi dam pe aya go. 55 Ago duur ge mbi ne a kaŋzam ge fareba ne, swama ge mbi ne a kaŋ njotɗa ge fareba ne me. 56 Bage ne zam duur ge mbi ne, ka njot swama ge mbi ne me, ka ya mbi zi, mbi sḛ ya na zi me. 57 Dimma ne mbi Bá ge ne hon naa ndwara ne teme mbi ya go, mbi ka ne ndwara da ne na pe, go no me, bage ne zam mbi mbo kat ne ndwara da ne mbi pe. 58 No a katugum ge ne mbo ne digi zi ya ne, a be dimma ne katugum ge aŋ bá ma ne za na, a ne su uzi go to, bage ne zam katugum mbe no mbo kat ne ndwara ge ɗiŋnedin.» 59 Jeso hate fare mbe ma Sinagog ge Kafarnahum ne zi.
Jeso naa ge ame hateya a̰me ma ya̰ na
60 Swaga ge a ne za̰ fare mbe ma no, na naa ge ame hateya a̰me ma jan go: «Fare mbe no a ndaar kaka, a wuɗi day za̰ na ne ɗaa?» 61 Amma ne jo̰ Jeso kwa na sḛ zi go na naa ge ame hateya ma tun ya go fare mbe no pal ɗe, jan nama go: «Fare mbe é aŋ koo syalla ɗaa? 62 Aŋ te kwa Vya ge ndu ne ndé mbo na swaga ge na ne ka dḛ zaŋgal ya ɗe? 63 A O̰yom hon ndwara ne, duur a̰me pe to. Fare ge mbi ne jya̰ aŋ mbe ma no a O̰yom, ne ndwara me. 64 Amma naa a̰me ma ne aŋ buwal zi a hon fareba to.» Ago ne pe eya ya day Jeso kwa nama ge ne ho̰ fareba na ta to ma kwa, ne bage ne mbo ɓyan na naa tok go. 65 Uwale, gwan jan go: «Da ne pe mbi jan aŋ no go, ndu a̰me ne pool ge mbo ya mbi ta to, kadɗa mbi Bá be hon na viya̰ ge mborra ya ne to.» 66 Swaga mbe go no, na naa ge ame hateya ma gḛ a tit ne go̰r, a gwan kare na pe to. 67 Jeso jan nama ge wol para azi ma go: «Aŋ ɗe, aŋ sḛ ma gwan to’a?» 68 Siman Bitrus gwan ne na janna go: «Bageyal, i mbo wuɗi ta ɗaa? Mo da ne fare ge ne hon naa ndwara ge ɗiŋnedin. 69 I da ne hon fareba, i da ne kwarra tyatyat go mo mbegeya ge Dok ne ne.» 70 Jeso gwan ne nama janna go: «Aŋ ge wol para azi ma, mbi te be tal aŋ ne to’a? Ndu a̰me ɗu ne aŋ buwal zi, a saytan ne.» 71 Ka jan da ne Yuda ge Siman Iskariyot vya, ago ne jo̰ ka nama ge wol para azi ma buwal zi puy ɗe, a na ɓya̰ na naa tok go ne.
Hon fareba to ge Jeso ná vya ma ne
1 Go̰r kaŋ mbe ma no go, Jeso gá anna suwal Galile go, ago be ɓyare go na mbo suwal Yahudiya ya to, ne da pe Yuda ma ka ɓyare go bama hun na uzi. 2 Vḛso ge gur ne, na ge Yuda ma ne gá gwa. 3 Na ná vya ma jan na go: «Ɗage ne go go, mo mbo suwal Yahudiya ya, ne da pe mo naa ge ame hateya ma kwa kaŋ ge mo ne ke ma me. 4 Ndu ge ne ɓyare go a kwa na, ke fare ma woyya zi to. Ne jo̰ mo ke kaŋ mbe ma no ne, dya̰ tene naa ta nama kwa mo me.» 5 Ago na ná vya ma sḛ a be hon fareba na ta to. 6 Jeso jan nama go: «Mbi swaga ma gale be mbyat to, amma aŋ swaga ma ya go ɗaɗak. 7 Dunya ne pool ge kwane aŋ to, amma a kwane mbi kwane, ne da pe mbi jan nama zum waŋ go nama kaŋ kerra ma sone. 8 Aŋ sḛ ma, mbo me vḛso mbe ya, mbi mbo vḛso mbe ya to, ne da pe mbi swaga gale be mbyat to.» 9 Swaga ge ne jya̰ nama fare mbe no, gá Galile go.
Jeso mbo vḛso ge gur ma ne ya
10 Swaga ge na ná vya ma ne mbo vḛso ya, na sḛ mbo ya me, be mbo ya naa ndwara go to, amma woyya zi. 11 Yuda ma ka ɓyare na swaga vḛso go, a ka janna go: «Na sḛ te ya da ɗaa?» 12 Naa gḛ a ka or bama wak ne na fare pe. A̰me ma ka janna go: «A ndu ge kwaɗa ne.» Ge may ma ka jan go: «A ndu ge ya̰me naa ne.» 13 Go no puy ɗe, ndu a̰me ge her na ka̰l digi jan na fare kat to bat, ne da pe a ka sya Yuda ma vo. 14 Dam ma ge vḛso ne ma det ja tuŋsi go, Jeso mbo zok ge mbegeya zi ya, ɗage hate naa. 15 Yuda ma ke ajab, a ka ele ta go: «Ndu mbe no be ɓol hateya to, te ke gyana ba ka kwa maktub mbe go no ɗaa?» 16 Jeso jan nama go: «Mbi hateya mbo da ne mbi ta to, amma ne Bage ge teme mbi ya ta ya. 17 Ndu ge ne ɓyare ke laar ɓyareya ge Dok ne, ma̰ kwa ko hateya ge mbi ne mbo da ne Dok ta ya, ko mbi hé fare ma da ne mbi pala janna de. 18 Ndu ge ne jan fare ge na ne, ɓyare uwareya ge na ne. Amma ndu ge ne ɓyare uwareya ge bage ne teme na ya ne jan fare ge fareba, fare ge hale ne na zi to. 19 Te be Musa ho̰ aŋ eya ne to’a? Ndu a̰me ɗu ne aŋ buwal zi ke mborra eya pal to. Aŋ te ɓyare hun mbi gyana ɗaa?» 20 Ɓase ma gwan ne na janna go: «Mo da ne o̰yom ge seŋgre ne mo zi, a wuɗi ɓyare hun mo ne ɗaa?» 21 Jeso gwan ne nama janna go: «Mbi ke kaŋ a̰me ɗu kikit, aŋ pet aŋ ke ajab no. 22 Musa ho̰ aŋ wak go aŋ vya̰ ba̰y, a be Musa e na pe kerra ne to, da ne nee bá ma ya day, aŋ vyan naa sonmo ba̰y dam ɗigliya go no. 23 Kadɗa a da ne pool vyan ndu ba̰y dam ɗigliya go, be ge a yele eya ge Musa ne pala ɗe, aŋ te hot aŋ laar mbi pal gyana ne mbi ne zo̰ ndu duur gijim dam ɗigliya go pe ɗaa? 24 Kṵ me sarya kwarra ge aŋ ne pal to bat, amma kṵ me sarya dosol pal.»
Naa ele ta go Jeso Kris ne ɓa de
25 Naa ge ne Ursalima diŋ a̰me ma ka janna go: «Te be ndu ge a ne ɓyare na hunna mbe ne to’a? 26 Ndi, jan fare ya kwaya̰l go waŋ, ndu a̰me ge jan na fare to! Ga̰l ma sḛ kwa kwa fareba go na Kris ne ɗer’a? 27 Ndu mbe no nee kwa na swaga ge ne mbo ne ya kwa, amma Kris ɗe, ndu kwa na swaga ge ne mbo ne ya to.» 28 Jeso ne swaga hateya zok ge mbegeya zi, oy digi ne ka̰l ndaar go: «Aŋ kwa mbi kwa, aŋ kwa swaga ge mbi ne mbo ne ya kwa me! Amma mbi be mbo ya da ne mbi pala to. Bage ne teme mbi ya a fareba, aŋ ɗe, aŋ kwa na to. 29 Mbi, mbi kwa na kwa, ago mbi mbo da ne na ta ya, a na sḛ teme mbi ya ne.» 30 A ɓyare go bama wan na, amma ndu ge é na tok na pal kat to, ago na swaga be mbyat to gale. 31 Naa a̰me ma gḛ a hon fareba na ta, a ka janna go: «Swaga ge Kris ne mbo mbo ja, mbo ke kaŋ ŋgayya ma gḛ waɗe ge ndu mbe ne ke no ɗaa?»
Yuda ma teme naa mbo wan Jeso
32 Farisi ma za̰ wak orra ge ɓase ma ne ka orra Jeso pal. Ga̰l ge naa ge ke tuwaleya ma ne ma ne Farisi ma teme bama dore ma mbo wan na. 33 Jeso jan go: «Mbi gale ya go swak ne aŋ. Mbi mbo gwan bage ne teme mbi ya ta ya. 34 Aŋ mbo ɓyare mbi, amma aŋ mbo ɓol mbi to bat, ne da pe swaga ge mbi ne mbo katɗa go, aŋ ne pool mbo na ya to.» 35 Yuda ma gá jan ta go: «Na sḛ te mbo may da ɗo, nee ba ɓol na to ɗaa? Mbo ma̰ naa ge a ne ɓarse nama ne grek ma buwal zi ma ta ya, ba mbo hate Grek ma ɗaa? 36 Na fare ge ne jya̰ go: ‹Aŋ mbo ɓyare mbi, aŋ mbo ɓol mbi to, swaga ge mbi ne mbo katɗa go, aŋ ne pool mbo na ya to›, na pe wanna gyana ɗaa?»
Mam ɗermel tuuɗiya
37 Dam ge go̰r dab, dam ga̰l ge vḛso ne go, Jeso ɗage digi mḛya, ndage na ka̰l oyya go: «Kadɗa mam njuwal ke ndu ya go, na mbo ya mbi ta, na njó. 38 Ndu ge ne hon fareba ya mbi ta, maŋgaɗam ma ge ɗermel jargalak a mbo tuuɗi sorra ne na dulwak zi ya dimma ne njaŋgeya ma ne jan go.» 39 Ka jan da ne O̰yom ge naa ge a ne mbo hon fareba ya na ta ma a mbo ame na. Ago O̰yom gale ne go to, ne da pe Jeso gale ne be ge ɓol uwareya.
Naa varse ta se ne Jeso pe
40 Swaga ge naa ne za̰ fare mbe ma no, naa a̰me ma ɗage janna go: «Fareba, ndu mbe no a anabi ne!» 41 A̰me ma ka janna go: «A Kris ne!» Ge may ma ka janna go: «Kris mbo da ne Galile ya ɗaa? 42 Njaŋgeya ma te jan go, Kris mbo mbo da ne hir ge Dawda ne zi ya, ne Betlehem, suwal ge Dawda ne ya to’a?» 43 Ne Jeso pe, ɓase ma caɗe ta se. 44 Naa a̰me ma ka ɓyare wan na, amma ndu ge é na tok na ta kat to bat.
Dulwak togreya ge Yuda ma ga̰l ma ne
45 Dore mbe ma gwan’a ga̰l ge naa ge ke tuwaleya ma ne ma ne Farisi ma ta, nama sḛ ma jan nama go: «Aŋ te wa̰ na ya to gyana ɗaa?» 46 Dore mbe ma gwan ne nama janna go: «Ndu a̰me ge jan fare dimma ne ndu mbe no go a to bat!» 47 Farisi ma gwan ne nama janna go: «Aŋ sḛ ma me, aŋ ya̰ ta ya ya̰meya me’a! 48 Aŋ kwa ga̰l a̰me, ko Farisi a̰me hon fareba na ta ɗaa? 49 Amma naa ge a ne kwa eya to mbe ma no, wak vḛneya ge Dok ne ya nama pal.» 50 Nikodemu, na ge dḛ ne mbo ya Jeso ta, ge ne nama buwal zi, jan nama go: 51 «Eya ge nee ne wan ndu ne fare be ge a gale ne be ge za̰ na, ko a kwa kaŋ ge na sḛ ne ke to ɗaa?» 52 A gwan ne na janna go: «Mo Galile ne me’a? Hale fare pe kwaɗa, mo ma̰ kwa go anabi a̰me be ndage ne Galile ya to.»
Jeso ma ne gwale kaya
53 Ndu ge daage gwan mbo na ya.
1 Jeso gwan mbo njal olive pala digi ya. 2 Cya̰wak vḛ, gwan’a zok ge mbegeya zi, naa pet a ka mbo ya na ta, kat na pe se, ka hate nama. 3 Naa ge njaŋgeya ma ne Farisi ma gene gwale a̰me ge a ne ɓo na ne swaga fi tene go ya, a é na naa ndwara zḛ, 4 a jan Jeso go: «Bage hateya, i ɓo gwale mbe no ne swaga fi tene go. 5 Ne eya zi, Musa ho̰ i wak go i mbá gwale hir ge go mbe no uzi ne njal. Mo ɗe, mo jan i gyana ɗaa?» 6 A jya̰ na fare mbe no ndwara he na pe, ne da pe bama ba e fare na pal. Jeso cwage na pala se, ka njaŋge kaŋ ne na tok suwar zi. 7 Ne jo̰ a ka gwan dwage na fare eleya, Jeso her na pala digi, jan nama go: «Bage ne ke sone ɗu to ne aŋ buwal zi na e pe mbal na ne njal.» 8 Gwan cwage na pala se, ka njaŋge kaŋ suwar zi. 9 Swaga ge a ne za̰ fare mbe no, a pwat ɗu ne ɗu, e pe da ne naa ge ga̰l ma ta, a ya̰ Jeso hini poseya ne gwale ge a ne e na zḛ mbe. 10 Jeso her na pala digi, jan na go: «Gwale, naa mbe ma te ya da ɗaa? Ndu a̰me be wan mo ne fare to’a?» 11 Gwale mbe jan na go: «Bageyal, ndu a̰me to!» Jeso jan na go: «Mbi me, mbi wan mo ne fare to, mbo, ne gá ne zḛ no gwan ke sone to.»
Jeso, kwaya̰l ge dunya ne
12 Jeso gwan jan nama go: «Mbi kwaya̰l ge dunya ne, bage ne kare mbi pe na sḛ mbo mbo tṵ zi to bat, amma mbo ɓol kwaya̰l ge ndwara». 13 Farisi ma jan na go: «A mo sḛ mo ke tene sayda ne, sayda ge mo ne a fareba to!» 14 Jeso gwan ne nama janna go: «Ko mbi ke tene sayda ne puy, sayda ge mbi ne a fareba, ago mbi kwa swaga ge mbi ne mbo ne ya kwa, mbi kwa swaga ge mbi ne mbo go kwa me. Amma aŋ ɗe, aŋ kwa swaga ge mbi ne mbo ne ya, ko swaga ge mbi ne mbo go to. 15 Aŋ ɗe, aŋ kun sarya duur pal, mbi ɗe, mbi kun ndu a̰me sarya to bat. 16 Te go mbi kun sarya, sarya kunna ge mbi ne a fareba pal, ne da pe a be mbi hini ɗu to, mbi Bá ge ne teme mbi ya a poseya ne mbi. 17 Ge eya ge aŋ ne zi, a njaŋge go sayda ge naa azi ne a fareba. 18 Mbi, mbi ke tene sayda ne, mbi Bá ge ne teme mbi ya ke mbi sayda ne me.» 19 A jan na go: «Mo Bá ya da ɗaa?» Jeso gwan ne nama janna go: «Aŋ kwa mbi, ko mbi Bá to. Aŋ te kwa mbi ɗe, aŋ te ya kwa mbi Bá me.» 20 Jeso jya̰ fare mbe ma no ge zok ge mbegeya zi, swaga ge naa ne mbo dol bware go ziyar go. Ndu a̰me ge wan na kat to, ne da pe na swaga gale be mbyat to.
Jeso waage mborra ge na ne na bá ta ya
21 Jeso gwan jan nama uwale go: «Mbi mbo mbo, aŋ mbo ɓyare mbi pe, amma aŋ mbo su sone ge aŋ ne ma zi. Swaga ge mbi ne mbo go, aŋ ne pool ge mbo na ya to bat.» 22 Yuda ma jan ta go: «Ɓyare hun tene ɗaa? Ne jo̰ jan go: ‹Swaga ge mbi ne mbo go, aŋ ne pool ge mbo na ya to.›» 23 Jan nama go: «Aŋ ɗe, aŋ ge seɗe ge ne, mbi ɗe, mbi ge digi ge ne, aŋ ɗe, aŋ ge dunya mbe no ne, mbi ɗe, mbi be ge dunya mbe no ne ne to. 24 Da ne pe no, mbi jya̰ aŋ no go, aŋ mbo su sone ge aŋ ne ma zi. Ago kadɗa aŋ hon fareba go Mbi, MBI NE to, aŋ mbo su sone ge aŋ ne ma zi.» 25 A ele na go: «Mo wuɗi ne ɗaa?» Jeso gwan ne nama janna go: «Mbi ndu mbe ge mbi ne e pe jan aŋ na fare ne pe eya ya day ne. 26 Mbi da ne fare ma gḛ ge janna aŋ pal, ne fare ma gḛ ge mbi kun sarya nama pal me, amma bage ne teme mbi ya a fareba, mbi jan dunya kaŋ ge mbi ne za̰ ne na ta.» 27 A wan pe go na jan bama fare ge na Bá ne to. 28 Jeso gwan jan nama go: «Swaga ge aŋ ne mbo her Vya ge ndu ne ya digi, aŋ mbo kwa mbi, Mbi ne, aŋ mbo kwa go mbi ke kaŋ ma da ne mbi pala to, mbi jan fare ge mbi Bá ne hate mbi ma. 29 Bage ne teme mbi ya a poseya ne mbi. Be ya̰ mbi hini to, ne da pe mbi ke kaŋ ge ne ke na sḛ tuli ma ɗaɗak.» 30 Swaga jan fare mbe no go, naa gḛ a hon fareba na ta.
Pehir ge Abraham ne ge fareba ma
31 Jeso jan Yuda ge ne ho̰ fareba na ta ma go: «Kadɗa aŋ wan ta ya katɗa mbi fare zi, aŋ mbi naa ge ame hateya ge fareba ma ne, 32 aŋ mbo kwa fareba, fareba mbo e aŋ gá suli.» 33 A gwan ne na janna go: «I pehir ge Abraham ne ne, i be kat mo̰r ge ndu a̰me ne to. Mo te jan gyana go, i mbo gá suli ɗaa?» 34 Jeso gwan ne nama janna go: «Fareba, fareba mbi jan aŋ, ndu ge ne ke sone a mo̰r ge sone ne. 35 Mo̰r kat yadiŋ ne ndwara dedet to, amma vya twala kat ne ndwara ne. 36 Kadɗa a Vya há aŋ suli ne, aŋ mbo gá suli ge fareba. 37 Mbi kwa kwa, aŋ pehir ge Abraham ne ma ne. Ne jo̰ mbi fare wat aŋ zi to, da ne pe aŋ ɓyare hun mbi no. 38 Mbi, mbi jan aŋ kaŋ ge mbi ne kwa na ne mbi Bá ta ya, amma aŋ, aŋ ke kaŋ ge aŋ ne za̰ na ne aŋ bá ta me.» 39 A gwan ne na janna go: «I ba Abraham.» Jeso jan nama go: «Te go aŋ Abraham vya ma ne ɗe, aŋ te ya ke kaŋ ge Abraham ne ma. 40 Ne se no, aŋ ɓyare hun mbi, mbi ge mbi ne jan aŋ fare ge fareba, ge mbi ne za̰ na ne Dok ta ya. Abraham be ke kaŋ ge go to. 41 Aŋ ɗe, aŋ ke fare ge aŋ bá ne.» A jan na go: «I be vya buwal pe ma ne to, i bá ɗu kikit, a Dok.» 42 Jeso jan nama go: «Te go Dok a aŋ Bá ne ɗe, aŋ laar te ya wan mbi, ago mbi ɗage da ne Dok ta ya mbi mbo ya no, mbi be mbo ya da ne mbi pala to, a na sḛ teme mbi ya ne. 43 Aŋ te za̰ mbi to kyaɗa ɗaa? Ne jo̰ aŋ day ge za̰ fare ge mbi ne jan to. 44 Aŋ bá Saytan, aŋ ɓyare ke laar ɓyareya ge aŋ bá ne. Na sḛ bage hun siya ne ne pe dolla ya day, ne fareba zi to, ne da pe fareba ne na zi to. Swaga ge ne kun hale, her fare mbe ma da ne na pala zi, ne da pe, na sḛ bage hale ne, a hale ma bá ne me. 45 Ne jo̰ mbi, mbi jan fare ge fareba, aŋ hon fareba mbi ta to. 46 A wuɗi ne aŋ buwal zi ge ne mbya ŋgay go mbi ke sone ne ɗaa? Kadɗa mbi jan fare ge fareba, aŋ hon fareba mbi ta to gyana ɗaa? 47 Ndu ge Dok ne, za̰ fare janna ge Dok ne. Ne jo̰ aŋ be ge Dok ne ne to, ne pe no aŋ za̰ to no.» 48 Yuda ma gwan na janna go: «Da ne na viya̰ go, i jan no go, mo Samariya ne, mo da ne o̰yom ge seŋgre ne mo zi.» 49 Jeso jan nama go: «Mbi ne o̰yom ge seŋgre ne mbi zi to, mbi hon mbi Bá hormo, aŋ sḛ ma aŋ ɓyare hon mbi hormo to. 50 Mbi ɓyare go naa uware mbi to, ndu a̰me ya go ge ne ɓyare go a uware mbi, na sḛ bage kun sarya ne me. 51 Fareba, fareba mbi jan aŋ, bage ne koy mbi fare, na sḛ mbo su to bat.» 52 Yuda ma jan na go: «Se no i kwa ya go go mo da ne o̰yom ge seŋgre ne mo zi. Abraham su ga ya tetek, anabi ma me, mo, mo jan go: ‹Bage ne koy mbi fare, na sḛ mbo su to bat.› 53 Mo waɗe i bá Abraham ge ne su waɗe ɗaa? Anabi ma su ya swaga me. Mo ndil tene go mo wuɗi ne ɗaa?» 54 Jeso gwan ne nama janna go: «Kadɗa mbi uware tene, uwareya ge mbi ne mbe na hamba to. A mbi Bá uware mbi ne, na ge aŋ ne tol na go na aŋ Dok ne. 55 Aŋ kwa na to, amma mbi, mbi kwa na kwa. Te go mbi jan go mbi kwa na to, mbi te ya kat ndu ge hale dimma ne aŋ go. Amma mbi kwa na kwa, mbi koy na fare no me. 56 Aŋ bá Abraham sḛ ke tuli go na kwa dam ge mbi ne, kwa na, na sḛ ke laar saal.» 57 Yuda ma jan na go: «Mo gale be ke del wara anuwa̰y to, mo kwa Abraham’a?» 58 Jeso jan nama go: «Fareba, fareba mbi jan aŋ, Abraham gale ne be tolla to, Mbi ne go.» 59 Ne fare mbe no pe, a abe njal ma go bama mbal na, amma Jeso bigi tene, wat ne zok ge mbegeya zi ya zum.
Jeso zon ndu ge ne tó ɓaal
1 Swaga mborra go, Jeso kwa ndu a̰me ge ne tó ɓaal. 2 Na naa ge ame hateya ma ele na go: «Rabbi, a wuɗi ke sone ne ɗo, ndu mbe tó ɓaal no ɗaa? A na bá ma, ko na sḛ ɗaa?» 3 Jeso gwan ne nama janna go: «A be na sḛ, ko na bá ma ke sone ne to. A ndwara go, ne na ta, pool ge Dok ne dya̰ ya zum naa ta. 4 Tek ge swaga gale gyala, a kwaɗa go nee ke temel ge bage ne teme mbi ya ne. Ɗaal mbo ya go, ndu a̰me ne pool gwan ke temel to. 5 Tek ge mbi gale ya dunya zi, mbi kwaya̰l ge dunya ne.» 6 Swaga ge ne jya̰ fare mbe no, sen waktwara suwar se, ke njiyal ne na waktwara mbe, fat na ɓaal mbe ndwara go, 7 jan na go: «Mbo usi mo ndwara baal Silowam se ya, na ge na pe wanna go, ‹Temeya›.» Ɓaal mbe mbo usi na ndwara, swaga ge ne gwa̰ ya, gá kwa swaga yaɗat. 8 Na naa ge gulum pala ma, ne naa ge a ne ka kwa na kaɗe kaŋ ma, a ka janna go: «Te be ɓaal mbe ge ne ka kat go go kaɗe kaŋ mbe ne to’a?» 9 Naa a̰me ma ka janna go: «A na ne!» A̰me ma ka janna go: «A be na ne to, ndu mbe di na dim!» Na sḛ jan go: «A mbi ne!» 10 A ele na go: «Mo ndwara fa̰ ma hage pe gyana ɗaa?» 11 Na sḛ gwan ne nama janna go: «Ndu ge a ne tol na Jeso, ke njiyal, fá na mbi ndwara ma go no, jya̰ mbi no go: ‹Mbo usi mo ndwara ɓaal Silowam se.› Swaga ge mbi ne mbo usi mbi ndwara, mbi gá kwa swaga no.» 12 A ele na go: «Na sḛ ya da ɗaa?» Jan nama go: «Mbi kwa to!»
Fare eleya ge Farisi ma ne ɓaal ta
13 A gene ndu ge ne ka ɓaal mbe ya Farisi ma ta. 14 Ago Jeso ke njiyal zon ɓaal mbe ndwara dam ɗigliya go. 15 Uwale, Farisi ma ele na go na ɓo swaga kwarra pe gyana gyana de. Jan nama go: «Fá njiyal mbi ndwara go, mbi usi mbi ndwara no, mbi gá kwa swaga no.» 16 Naa a̰me ma ne Farisi ma buwal zi jan go: «Ndu mbe be mbo da ne Dok ta ya to, ne da pe koy dam ɗigliya to.» Ge may ma ka jan go: «Ndu ge sone da ne pool ke kaŋ ŋgayya hir ge go mbe ma no ɗaa?» A varse se. 17 A gwan ele ɓaal mbe go: «Mo ɗe, mo jan ne ndu ge ne hage mo ndwara mbe gyana ɗaa?» Jan nama go: «A anabi ne.» 18 Yuda ma hon fareba go na ka ɓaal ɗo, na ndwara fa̰ ma hage no to. Ne no pe, a tol na bá ma ya, 19 a ele nama go: «No a aŋ vya, na ge aŋ ne jan go na tó ɓaal ne’a? Te ke gyana ba gá kwa swaga ne se no ɗaa?» 20 Na bá ma gwan ne nama janna go: «I kwa kwa go na i vya ne, uwale tó ɓaal. 21 Amma ne se no, ke gyana kwa swaga no, i kwa to. Ko ndu ge ne hage na ndwara puy, i kwa na to. Ele me fare na sḛ, hatɗa ndu pool, ma̰ wan aŋ fare ge na ne pe.» 22 Na bá ma jya̰ go mbe no, ne da pe a ka sya Yuda ma vo. Ago Yuda ma za̰ ta go, ndu ge ne vinna go Jeso a Kris ne, a mbo yan na ne Sinagog zi zum. 23 Da ne pe no na bá ma jya̰ no go: «A ndu pool ne, ele me fare na sḛ!» 24 A gwan tol ndu ge ne ka ɓaal mbe ya ge ndwara azi, a jan na go: «Sya Dok vo, i kwa kwa go ndu mbe no a ndu ge sone ne.» 25 Na sḛ gwan ne nama janna go: «Tamekyala, a ndu ge ne ke sone ne, mbi kwa to, kaŋ ɗu ge mbi ne kwa, zaŋgal mbi ka ɓaal, se no mbi gá ya kwa swaga.» 26 A jan na go: «Ke mo gyana ɗaa? Hage mo ndwara ma pe gyana gyana ɗaa?» 27 Na sḛ gwan ne nama janna go: «Mbi wan aŋ na pe ya go, aŋ be za̰ mbi to. Aŋ gwan ɓyare za̰ na da ne da pe ɗaa? Aŋ ɓyare saŋge ta na naa ge ame hateya ma me ɗaa?» 28 Farisi ma kan na sáso, a jan na go: «A mo na ndu ge ame hateya ne, i, i Musa naa ge ame hateya ma ne. 29 I kwa go Dok jya̰ fare Musa, amma ndu mbe no ɗe i kwa swaga ge na sḛ ne mbo ne ya to.» 30 Ndu mbe jan nama go: «No a fare ge ne waɗe ajab ne. Aŋ kwa swaga ge na sḛ ne mbo ne ya to, ndi, a na sḛ hage mbi ndwara ne! 31 Nee kwa kwa go Dok za̰ naa ge sone ma to. Amma za̰ nama ge ne gwan ne bama pala na pe se ma, ne nama ge ne ke na laar ɓyareya ma. 32 Nee be za̰ dam ɗu go ndu a̰me hage ndu ge ne tó ɓaal ndwara to. 33 Te go ndu mbe no be mbo da ne Dok ta ya to, ke a̰me te to.» 34 A gwan ne na janna go: «Mo ya sone zi ne tolla ge mo ne ya day, mo ɓyare hate i da ɗaa?» A yan na ya zum.
Ɓaal ge fareba ma
35 Jeso za̰ go a yan na ja zum, mbo ɓol na, jan na go: «Mo hon fareba ya Vya ge ndu ne ta ɗaa?» 36 Na sḛ gwan ne na janna go: «Bageyal, na sḛ wuɗi ne ɗo, mbi ba hon fareba na ta ɗaa?» 37 Jeso jan na go: «Mo ndil ne go na no! Ndu ge ne jan mo fare no, a na ne!» 38 Ndu mbe jan go: «Bageyal, mbi hon fareba go!» Gur na koo na ndwara se. 39 Uwale, Jeso jan go: «Mbi mbo ya dunya zi da ne sarya kunna pe, ne da pe, nama ge a ne ka kwa swaga to ma, nama kwa swaga, nama ge ne kwa swaga ma saŋge ɓaal.» 40 Farisi ge ne ka poseya ne na ma, swaga ge a ne za̰ fare mbe no, a jan na go: «I ɓaal ma ne me ya’a?» 41 Jeso gwan ne nama janna go: «Te go aŋ ka ɓaal ɗe, aŋ te ya kat ne sone to. Ne jo̰ aŋ jan go: ‹I kwa swaga yaɗat,› aŋ ya sone zi.»
Fare sḭ ge bage koyya ge kwaɗa ne
1 Jeso jan go: «Fareba, fareba, mbi jan aŋ, bage ne wat viya̰ wak ge ɗyagarta ne mbo tame ma pe zi to, amma ge ne yal ne swaga ge ɗogle go, a syala ne, a bage maŋge naa kaŋ ne. 2 Amma bage ne wat viya̰ wak, a bage koy tame ma ne. 3 Bage koy viya̰ wak ka hage na viya̰ wak, tame ma za̰ na ka̰l za̰ me. Tol ge daage da ne na dḭl, ka pole nama mbo zum me. 4 Swaga ge ne pole nama ya zum mwaɗak, dol tene nama ndwara zḛ, tame ma ka kare na pe, ne da pe a za̰ na ka̰l za̰. 5 A kare ndu ge ɗogle pe to, amma a syat bama pe so uzi ya ne na ta, ne da pe a za̰ ndu ge ɗogle mbe ka̰l to.» 6 Jeso ke nama fare sḭ mbe no, amma a wan na fare ge ne jya̰ mbe pe to. 7 Jeso gwan jan nama go: «Fareba, fareba, mbi jan aŋ, mbi viya̰ wak ge tame ma ne ne. 8 Nama ge a ne mbo ya mbi ndwara zḛ ma pet a syala ma ne, a naa ge maŋge naa kaŋ ma ne. Amma tame ma be za̰ nama to. 9 Mbi, mbi viya̰ wak ne. Ndu ge daage pet ge ne wat ya zi ne mbi ta, mbo má, mbo ka wat zi, ne wat zum, mbo ɓol zám me. 10 Syala mbo ya da ne sella pe, ne hun na pe, ne ban uzi pe, amma mbi, mbi mbo ya da ne hon naa dasana ma ndwara pe, nama ɓo na zuliya ceɗed. 11 Mbi, mbi bage koyya ge kwaɗa ne. Bage koyya ge kwaɗa hon na sḛ ne na tame ma pe. 12 Amma bage a ne wan na koy tame ma, a be bage koy tame ma ge fareba ne to, a be na tame ma ne to me. Swaga ge ne kwa bagomso yanna ya, ya̰ tame ma, syat na pe so, bagomso gá wan tame ma, ɓarse nama se. 13 Ago a wa̰ na wan koy tame ma baŋ, be par na ne zi ne tame ma pe to. 14 Mbi, mbi bage koyya ge kwaɗa ne, mbi kwa mbi tame ma kwa, mbi tame ma kwa mbi kwa me, 15 dimma ne mbi Bá ne kwa mbi go, mbi kwa mbi Bá kwa me, mbi hon mbi sḛ ne mbi tame ma pe. 16 Mbi da ne tame ge ɗogle ma ge ne ɗyagarta mbe no zi to, nama mbe ma no uwale, ɓyare go mbi koy nama. A mbo za̰ mbi ka̰l, a mbo gá vog ɗu, a mbo kat ne bage koyya ɗu me. 17 Mbi Bá laar wa̰ mbi, ndwara go mbi hon mbi sḛ uzi ne, mbi mbo gwan ame na. 18 Ndu ne pool ge hun mbi to, kadɗa mbi be vin ne to. Mbi da ne pool ge hon tene, mbi da ne pool ge gwan ne tene ya me. No a wak ge mbi Bá ne ho̰ mbi ne.» 19 Yuda ma gwan varse ta se ne na fare janna mbe ma no pe. 20 Naa gḛ ne nama buwal zi a ka janna go: «Da ne o̰yom ge seŋgre, na ndwara abe na abe, aŋ za̰ na gyana ɗaa?» 21 Ge may ma ka janna go: «Ndu ge ne o̰yom ge seŋgre jan fare go ɗaa? O̰yom ge seŋgre da ne pool hage ɓaal ndwara ɗaa?»
Yuda ma gwan ɓyare mbal Jeso ne njal
22 A swaga iyalam go, naa ne ke vḛso ge zok wak hageya ne Ursalima diŋ. 23 Jeso ka wat ne zok ge mbegeya zi zum, ka gwan’a zi ne zok wak ge Salomon ne. 24 Yuda ma ver na zi, a jan na go: «Mo ya̰ i a̰reya zi go mbe no ɗiŋ ma swaga go ga ɗaa? Kadɗa mo Kris ne ɗe, jya̰ i na zum waŋ!» 25 Jeso gwan ne nama janna go: «Mbi jya̰ aŋ na, amma aŋ be hon fareba to. Kaŋ ge mbi ne ke nama dḭl ge mbi Bá ne zi, a nama ke mbi sayda ne. 26 Amma aŋ hon fareba to, ndwara go aŋ be mbi tame ma ne to. 27 Mbi tame ma za̰ mbi ka̰l za̰, mbi kwa nama kwa me, nama sḛ ma kare mbi pe. 28 Mbi hon nama ndwara ge ɗiŋnedin, a mbo ban uzi to bat, ndu a̰me ne pool ge maŋge nama ne mbi tok go to. 29 Mbi Bá ge ne ho̰ mbi nama waɗe kaŋ ma pet, ndu a̰me ne pool ge maŋge nama ne mbi Bá tok go to. 30 I ne mbi Bá ɗu.» 31 Yuda ma gwan abe njal ma go bama mbal na. 32 Jeso jan nama go: «Mbi ŋgay aŋ kaŋ ge kwaɗa ma gḛ ge ne mbo ne mbi Bá ta ya. Ne kaŋ mbe ma no pe, aŋ ɓyare mbal mbi ne njal no ɗaa?» 33 Yuda ma gwan ne na janna go: «Da ne kaŋ kwaɗa ma pe i mbal mo ne njal no to, da ne salla ge mo ne sal Dok pe. Ne da pe, mo ge ndu dasana baŋ, mo ke tene go mo Dok ne.» 34 Jeso jan nama go: «A te be njaŋge ne eya ge aŋ ne zi go, mbi, mbi jan go: ‹Aŋ dok ma ne› to’a? 35 Kadɗa tó nama ge a ne jya̰ nama fare ge Dok ne ma dok ma ɗe, ago fare ge Dok ne gul to. 36 Na ge mbi Bá ne mbege na, ne teme na ya dunya zi, aŋ jan ne na go: ‹Mo sal Dok›, ne mbi ne jya̰ go mbi Dok vya ne pe. 37 Kadɗa mbi ke kaŋ ge mbi Bá ne ma to, ho̰ me fareba mbi ta to. 38 Amma kadɗa mbi ké nama, ko aŋ ho̰ fareba mbi ta to puy, ho̰ me fareba kaŋ mbe ma ta, ne da pe aŋ kwa tyatyat go mbi Bá ya mbi zi, mbi ya mbi Bá zi me.» 39 Uwale, a gwan ɓyare go bama wan na, amma yṵwa̰le. 40 Jeso gwan mbo maŋgaɗam Urdun le may ya, ge swaga ge Yohanna ne e pe ke naa baptisma go, gá katɗa ya go. 41 Naa gḛ a ka mbo ya na ta, a ka jan go: «Yohanna be ke kaŋ ŋgayya a̰me to, amma na fare ge ne jya̰ ndu mbe no pal ma pet a fareba.» 42 Naa gḛ a hon fareba na ta swaga mbe go.
Tanna ge Lyazaru ne
1 Ndu a̰me det moy, na dḭl Lyazaru, a ndu ge suwal Betaniya ne, Maryam ma ne ná vya Marta ka suwal mbe go. 2 A Maryam mbe ge ne ka̰ idir ge Bageyal ta, ge ne ka gyat na koo ma ne na pala susu mbe. A na ná vya Lyazaru dé moy ne. 3 Lyazaru ná vya ge gwale ma dol temel mbo jan Jeso go: «Bageyal, ndu ge mo laar ne wa̰ na ne go moy.» 4 Swaga ge Jeso ne za̰ fare mbe no, jan go: «Moy mbe gene na mbo siya zi to, amma da ne uware Dok dḭl pe, ne da pe, ne na ta Dok vya ɓo uwareya me.» 5 Ago Jeso laar wa̰ Marta ma ne na ná vya ge gwale, ma ne Lyazaru ma wan. 6 Swaga ge ne za̰ na moy ɗe, gwan ke ta dam azi ge swaga ge na ne ka go. 7 Ne go̰r go, jan na naa ge ame hateya ma go: «Gwa̰ me nee mbo suwal Yahudiya.» 8 Na naa ge ame hateya ma jan na go: «Rabbi, Yuda ma ɓyare mbal mo ne njal gwa gale no, mo gwan ɓyare gwan’a go uwale’a?» 9 Jeso gwan ne nama janna go: «Gyala ge ɗu zi, ler te be wol para azi to’a? Kadɗa ndu an gyala, na koo syal to, ne da pe kwa kwaya̰l ge dunya mbe ne ya go. 10 Amma kadɗa na an ɗaal zi, na koo ka syal na syal, ne da pe kwaya̰l ne na ta to.» 11 Swaga ge ne jya̰ nama fare mbe ma no, gwan jan nama go uwale: «Nee kondore Lyazaru fi ne ya dam, mbi mbo mbo kore na digi.» 12 Naa ge ame hateya ma gwan ne na janna go: «Bageyal, kadɗa fí ne ya dam, zon zon.» 13 Jeso ka jan da ne siya ge na ne, amma naa ge ame hateya ma ka dwat go, na jan da ne dam ge fiya baŋ. 14 Swaga mbe go no Jeso jan nama zum waŋ go: «Lyazaru su ne ya su. 15 Ne aŋ pe, mbi da ne laar saal ne mbi ne ka go to pe, ne da pe aŋ ho̰ fareba. Mbo me nee na ta ya.» 16 Toma, na ge a ne tol na Bumurma, jan na kaam ma go: «Mbo me nee, nee mbo su dagre ne na me!» 17 Swaga ge Jeso ne ya̰ ya, za̰ go Lyazaru ke ya táál zi dam anda. 18 Suwal Betaniya gwa ne Ursalima, mbo kaŋ ge kilometer ataa go. 19 Da ne pe no, Yuda ma gḛ a mbo ya Marta ma ne Maryam ta no ndwara sun nama ndwara, ne siya ge nama ná vya ne pe. 20 Swaga ge Marta ne za̰ go Jeso mbo ya go ɗe, ɗage mbo na ndwara zi ya, Maryam gá katɗa yadiŋ. 21 Marta jan Jeso go: «Bageyal, te go mo ka go go, mbi ná vya te ya su to. 22 Amma ne se no puy ɗe, mbi kwa kwa go kaŋ ge daage pet ge mo ma̰ kaɗe na ya ne Dok ta, ma̰ hon mo na.» 23 Jeso jan na go: «Mo ná vya ma̰ tan.» 24 Marta jan na go: «Mbi kwa kwa go mbo tan digi, ge tanna ge dam pe aya ne go.» 25 Jeso jan na go: «Mbi bage ne tan naa ge siya ma ne, mbi hon ndwara ne me. bage ne hon fareba ya mbi ta, ko na su, mbo kat ne ndwara. 26 Ndu ge daage pet ge ne ndwara, ge ne hon fareba mbi ta, mbo su to bat. Mo hon fareba ya fare mbe pal’a?» 27 Na sḛ gwan ne na janna go: «O̰ Bageyal, mbi da ne hon fareba go mo Kris ne, mo Dok vya ne, na ge ne mbo ya dunya zi.» 28 Swaga ge ne jya̰ fare mbe no, gwan mbo tol na ná vya Maryam ya, waase na fare go: «Bage hateya ya go, tol mo ya go.» 29 Swaga ge Maryam ne za̰ no, ɗage avun cap mbo ɓol na. 30 Ago Jeso gale ne be wat ya suwal diŋ to, gale ne swaga ge Marta ne ɓo na ya go. 31 Swaga ge Yuda ge a ne mbo ya sun Maryam ndwara ma ne kwa na ɗage digi avun cap wat zum ɗe, a kare na pe ya, ne da pe a ka dwat go, na mbo táál pal ya mbo fyalla. 32 Swaga ge Maryam ne dé ya, ne ka̰ na ndwara kwa Jeso ɗe, dol tene na koo se, jan na go: «Bageyal, te go mo ka go go, mbi ná vya su te to.» 33 Swaga ge Jeso ne kwa na ka fyalla, Yuda ge ne mbo ya na pe go ma ka fyalla me ɗe, na duur tin na, ɓol iigiya na sḛ zi, 34 jan go: «Aŋ é na ya da ɗaa?» A jan na go: «Bageyal, mbo ya ndil na.» 35 Jeso fyal. 36 Yuda ma jan go: «Ndi me gale, na laar wa̰ na gḛ ge be to!» 37 Amma naa a̰me ma ne nama buwal zi a jan go: «Na ge ne hage ɓaal ma ndwara ma, te tele na be suya to kyaɗa ɗaa?» 38 Jeso duur gwan tin na, mbo táál wak ya. Táál mbe ka cerra njal zi, a dibi na wak ne njal no. 39 Jeso jan go: «Viŋgri me njal mbe uzi!» Marta, bage ne su ná vya jan na go: «Bageyal, hatɗa huri, ke ma̰ ya dam no anda táál zi.» 40 Jeso jan na go: «Mbi te be jan mo go, kadɗa mo hon fareba ya, mo ma̰ kwa pool ge Dok ne to’a?» 41 A viŋgri njal mbe uzi. Jeso her na ndwara digi, jan go: «O Báá, mbi gwa̰ ne gugu hon mo ne mo ne za̰ mbi pe. 42 Mbi Kwa kwa go mo za̰ mbi za̰ ɗaɗak, amma ne tabeya ma ge a ne mḛ ne swaga mbe no go ma pe, mbi jan no, ne da pe nama ho̰ fareba go mo teme mbi ya ne.» 43 Swaga ge ne jya̰ go no, oy ne ka̰l ndaar go: «Lyazaru, wa ya zum!» 44 Na ge ne su wat ya zum, na koo ma ne na tok ma twarra ne ba̰r, na ndwara vwalla ne ba̰r me. Jeso jan nama go: «Sá me na, ya̰ me na mborra!»
Yuda ma vin ta bama hṵ Jeso
45 Ne Yuda ge a ne mbo ya Maryam ta ma buwal zi, nama ge a kwa kaŋ ge Jeso ne ke ma, gḛ a hon fareba na ta. 46 A̰me ma mbo ɓol Farisi ma, a wan nama kaŋ ge Jeso ne ke pe. 47 Naa ge ke tuwaleya ma ga̰l ma, ne Farisi ma tol koteya, a jan go: «Nee ke gyana ɗaa? Ndu mbe gá ke kaŋ ŋgayya ma gḛ ge be to. 48 Kadɗa nee ya̰ na kerra go mbe no, naa pet a mbo hon fareba na ta, Roma ma mbo mbo ya, a mbo burmi nee swaga ge harcal, ma ne nee suwal uzi.» 49 Ndu a̰me ɗu ne nama buwal zi, na dḭl Kayafa, ka kep tuwaleya del mbe go, jan nama go: «Aŋ wan fare pe to! 50 Aŋ kwa go na golgo ne aŋ pe ge ndu ɗu su ne ɓase ma pe, ge suwal mwaɗak burmi uzi to to’a?» 51 A be na sḛ ne na pala ka jan fare ne to, ne jo̰ ka kep tuwaleya del mbe go, ka waage fare go, Jeso mbya suya ne suwal pe, 52 a be ne suwal pe ɗeŋgo to, amma ne kote Dok vya ge ne ɓarse se ma digi dagre ɗu pe. 53 Ne dam mbe ya day, a vin ta go bama hṵ Jeso. 54 Jeso me ɗe, gá be ge anna kwaya̰l go Yuda ma ndwara go to, abe tene mbo gwa ne babur pul ya, a ne na naa ge ame hateya ma mbo kat suwal ge a ne tol na Efrayim ya. 55 Dam vḛso Paska ge Yuda ma ne ga gwa, naa gḛ a ka ɗage ne bama suwal ma go mbo Ursalima ya, dam vḛso Paska ndwara zḛ ndwara mbo hat ta harcal. 56 A ka ɓyare Jeso, a ka jan ta ge zok ge mbegeya zi go: «Aŋ dwat gyana ɗaa? Mbo ma̰ ya vḛso go to’a?» 57 Naa ge tuwaleya ma ga̰l ma ne Farisi ma ho̰ wak go, kadɗa ndu a̰me kwa swaga ge na sḛ ne go ya, na mbo ya janna, a ba wan na.
Maryam kan idir Jeso koo ma ta
1 Dam myanaŋgal vḛso Paska ndwara zḛ, Jeso mbo ya Betaniya go, suwal ge Lyazaru, na ge Jeso ne ta̰ na ne naa ge siya ma buwal zi digi ne ka go. 2 A ke na gwasal. Marta ka var kaŋzam ne. Lyazaru ka nama ge a ne ka poseya ne na swaga zam kaŋzam go ma buwal zi. 3 Maryam hé idir ge yé gḛ, ge a ne ke na ne Nar ge siŋli tool vya ɗu, kan na Jeso koo ma ta, ka tigɗi na uzi ne na pala susu. Zok pul wi ne idir mbe huri. 4 Ne na naa ge ame hateya ma buwal zi, Yuda Iskariyot, na ge ne mbo ɓyan na naa tok go, jan go: 5 «A te yá idir mbe uzi ne bware sile kikis ataa ɗo, a hon a̰se ma na puy, te ya kat golgo to’a!» 6 Ka jan go no, a be go ka dwat da ne a̰se ma to, ne da pe na sḛ ka syala. Ne jo̰ ka koy bware ne, ka sel kaŋ ge a ne ka e na tok go ma. 7 Jeso jan go: «Ya̰ na! Ke no da ne dam mbulla ge mbi ne pe. 8 Ago aŋ da ne a̰se ma ɗaɗak, amma aŋ ne mbi ɗaɗak to.»
Yuda ma ka ɓyare viya̰ ge hun Lyazaru
9 Yuda ma gḛ a za̰ go Jeso ya Betaniya ya. A ka mbo ya Betaniya go da ne Jeso pe ɗeŋgo to, amma ne ndil Lyazaru, na ge Jeso ne ta̰ na ne naa ge siya ma buwal zi digi pe. 10 Naa ge ke tuwaleya ma ga̰l ma za̰ ta go bama hṵ Lyazaru uzi me. 11 Ne Lyazaru pe, Yuda ma gḛ a ka abe ta uzi ne bama naa ga̰l ma ta, a ka hon fareba Jeso ta.
Watɗa ge Jeso ne Ursalima diŋ
12 Dam ge kwap ge go, ɓase ge a ne mbo ya ne vḛso pe ma za̰ go Jeso mbo ya go Ursalima go, 13 a syal tumur gar ma, a mbo ya kun na, a ka oyya go: «Hosanna! Uwareya na ge ne mbo ya dḭl ge Bageyal ne zi, Gan ge Israyela ne pal.» 14 Jeso ɓol kwara vya, ndwar na pal, dimma ne a ne njaŋge go: 15 «Sya vo to, suwal Siyona, ndi, mo Gan ne yan ja no, ndwa ya kwara vya pal.» 16 Pe eya go, na naa ge ame hateya ma be wan fare mbe pe to, a swaga ge Jeso ne ɓo uwareya go gale, a ɗage dwat no go a njaŋge fare mbe ma na pal. A go no ɓase mbe ma ke na kaŋ mbe ma no. 17 Naa ge a ne ka swaga ge Jeso ne tó Lyazaru ne táál zi ya zum, ne ta̰ na ne naa ge siya ma buwal zi digi go ma, a ka wan fare mbe pe hon naa. 18 Da ne pe naa ka mbo ya na ta no, ne da pe a za̰ go na ke kaŋ ŋgayya mbe no. 19 Farisi ma jan ta go: «Ndi, aŋ ɓol da ne zi ɗaa? Naa pet a mbo ya na pe ya!»
Jeso waage siya ge na ne
20 Grek a̰me ma ge a ne mbo ya uware Dok dam vḛso go ma 21 mbo ya ɓol Filibus. Filibus ka ndu ge Betsayda ge suwal Galile ne, a jan na go: «Bageyal, i ɓyare kwa Jeso.» 22 Filibus mbo jan Andrawus, nama sḛ ma jwak a mbo ya ɓol Jeso, a jan na. 23 Jeso jan nama go: «Swaga mbyat ya go ge Vya ge ndu ne ɓol uwareya. 24 Fareba, fareba mbi jan aŋ, kadɗa gḛme hir detɗa suwar zi su to, kat na sḛ ɗu hini kikit, amma kadɗa na su ya, tol vya ma gḛ. 25 Bage na laar ne wa̰ na sḛ mbo ban na, amma bage ne sen na sḛ dunya mbe no zi, mbo koy na ne ndwara ge ɗiŋnedin pe. 26 Kadɗa ndu ɓyare ke mbi temel, na kare mbi pe ya, swaga ge mbi ne go, mbi dore mbo kat go me. Ndu ge ne ke mbi temel, mbi Bá mbo uware na. 27 Se no mbi da ne iigiya. Mbi jya̰ gyana ɗaa? Báá, zu mbi ne swaga yál mbe no go! Amma da ne no mbe pe mbi dé ya swaga mbe go no. 28 Báá uware mo dḭl.» Ka̰l a̰me ndage ne digi zi ya, jan go: «Mbi uware na, mbi mbo gwan uware na uwale.» 29 Ɓase ge ne ka swaga mbe go ma, swaga ge a ne za̰ ka̰l mbe, a jan go: «A mam tunna ne!» A̰me ma ka janna go: «A maleka a̰me jya̰ na fare ne!» 30 Jeso jan go: «Ka̰l mbe be jan fare da ne mbi pe to, amma jya̰ da ne aŋ pe. 31 Ne se no, a swaga kun dunya mbe sarya mbya ne, se no, a mbo dol bage ne ke muluk ne dunya mbe no pal ya zum. 32 Mbi ɗe, swaga ge a ne mbo hé mbi ya digi, mbi mbo zwal naa ya mbi ta pet.» 33 Jya̰ no, ndwara ŋgay gyana gyana ge na dḛ ba mbo suya. 34 Ɓase ma jan na go: «I za̰ ne eya zi go, Kris mbo kat ɗiŋnedin. Mo te jan i gyana go, na kwaɗa go a hé Vya ge ndu ne digi ɗaa? A wuɗi Vya ge ndu ne ne ɗaa?» 35 Jeso gwan ne nama janna go: «Kwaya̰l gale ya aŋ ta swak. A̰ me tek ge kwaya̰l gale ne aŋ ta, ne da pe, na kaage tṵ na ta̰ aŋ tukcuk to. Ago ndu ge ne an tṵ zi kwa swaga ge na ne mbo go to. 36 Tek ge aŋ gale ne kwaya̰l, ho̰ me fareba kwaya̰l ta, go no aŋ mbo gá kwaya̰l vya ma.» Swaga ge Jeso ne jya̰ fare mbe ma no, abe tene uzi ya, mbo woy tene ɓase ma ndwara zḛ.
Dulwak togreya ge Yuda ma ne
37 Ne jo̰ Jeso ke kaŋ ŋgayya ma gḛ nama ndwara go puy ɗe, a be hon fareba na ta to, 38 ne da pe fare ge anabi Isaya ne jya̰ wak wi. Jya̰ go: «Bageyal, a wuɗi ho̰ fareba ge fare janna ge nee ne ta ne ɗaa? Bageyal dya̰ na pool wuɗi ta ɗaa?» 39 Uwale, a be detɗa hon fareba to, ne da pe Isaya jya̰ go: 40 «Dame nama ndwara fa̰ ma dame, togre nama dulwak ma togre, ne da pe, na kaage nama kwa swaga ne nama ndwara fa̰ ma to, nama dulwak ma wa̰ fare pe to, na kaage nama saŋge ya se ɗo, mbi zo̰ nama to.» 41 Isaya jya̰ fare mbe ma no, ne da pe kwa hormo ge na ne, waage fare na pal no. 42 Go no puy ɗe, ne naa ga̰l ma buwal zi, naa gḛ a hon fareba na ta, amma ne Farisi ma pe a ka dyan ta kwaya̰l go to, ne da pe na kaage a ya̰ bama ne Sinagog zi zum to. 43 Ago nama laar wa̰ uwareya ge naa dasana ma ne waɗe uwareya ge ne mbo ne Dok ta ya. 44 Jeso ndage na ka̰l oyya go: «Bage ne hon fareba mbi ta, hon fareba be mbi ta to, amma ge bage ne teme mbi ya ta. 45 Bage ne ndil mbi, ndil bage ne teme mbi ya. 46 Mbi, mbi mbo ya dunya zi dimma ne kwaya̰l go, ne da pe ndu ge daage pet ge ne hon fareba ya mbi ta, na gwan kat tṵ zi to bat. 47 Ndu ge daage pet ge ne za̰ mbi fare ma, ke mborra nama pal to, a be mbi ke na sarya ne to. Ago mbi be mbo ya kun sarya dunya pal to, amma mbi mbo ya ndwara má dunya. 48 Bage ne kuri mbi, ge ne ame mbi fare ma to, da ne bage mbo ke na sarya. Fare ge mbi ne jan mbe no mbo kun na sarya dam pe aya go ne. 49 Ago mbi be hé fare da ne mbi pala janna to, amma a mbi Bá ge ne teme mbi ya hon mbi fare ge mbi ba mbo janna, ko waageya ne. 50 Mbi kwa kwa go, wak honna ge mbi Bá ne, hon naa ndwara ge ɗiŋnedin. Fare ge mbi ne jan ma pet, mbi jan nama dimma ne mbi Bá ne jya̰ mbi go.»
Jeso usi na naa ge ame hateya ma koo
1 Dam ɗu vḛso Paska ndwara zḛ, ne jo̰ Jeso kwa go na swaga ge na ya̰ dunya mbe no na ba gwan na Bá ta ya mbya ne, ne jo̰ na laar wa̰ na naa ge ne dunya zi ma wan, na laar mbo gwan wan nama ɗiŋ dam pe aya ɗe, 2 swaga zam kaŋzam ge gasamal go, ne jo̰ Saytan pá fare ya Yuda Iskariyot, ge Siman vya dulwak zi, na ɓya̰ na naa tok go, 3 ne jo̰ Jeso sḛ da ne kwarra go na Bá ho̰ kaŋ ma pet ya na tok go, na mbo da ne Dok ta ya, na gwan mbo Dok ta ya uwale ɗe, 4 ɗage digi ne kaŋzam wak go, fage na ba̰r ma uzi, abe ba̰r a̰me, vwal na pul. 5 Kan mam kaŋ go, ɗage usi na naa ge ame hateya ma koo, ka gyat nama ne ba̰r ge na ne vwa na ne na pul go. 6 Yan ya Siman Bitrus ta, Siman jan na go: «Bageyal, a mo usi mbi koo ne’a!» 7 Jeso gwan ne na janna go: «Kaŋ ge mbi ne ke mo na no, ne se no mo wan na pe to, amma mo mbo wan na pe go̰r go.» 8 Bitrus gwan jan na go: «Mo usi mbi koo to bat!» Jeso jan na go: «Kadɗa mbi usi mo koo to, mo ne kaŋ joo a̰me ne mbi ta to bat.» 9 Siman Bitrus jan na go: «Bageyal, na ka mbi koo ma ɗeŋgo to, amma mbi tok ma ne mbi pala me!» 10 Jeso jan na go: «Ndu ge ne son tene ya, gwan ɓyare son tene ta to, amma gá usi na koo ma ɗeŋgo, ne da pe na sḛ kwaya̰l harcal. Aŋ ɗe, aŋ kwaya̰l harcal, amma a be aŋ sḛ ma pet to.» 11 Ago Jeso ka kwa ndu ge ne mbo ɓyan na naa tok go kwa, ne pe no jya̰ no go: «A be aŋ sḛ ma pet harcal ne to.» 12 Swaga ge ne á ne nama koo ma usiya ɗe, kan na ba̰r ma na ta, gwan’a kat kaŋzam wak go, jan nama go: «Aŋ wan kaŋ ge mbi ne ke ne aŋ mbe pe wan’a? 13 Aŋ tol mbi go: ‹Bage hateya, Bageyal›, aŋ jan kwaɗa, ago mbi go no. 14 Kadɗa mbi ge Bageyal, ne bage hateya usi aŋ koo ma ne ɗe, aŋ sḛ ma me, usi me ta koo ma. 15 Ago mbi ŋgay aŋ kaŋ koo-pul, ne da pe aŋ sḛ ma ke dimma ne mbi ne ke aŋ go me. 16 Fareba, fareba, mbi jan aŋ, mo̰r be waɗe na bageyal to, bage a ne teme na be waɗe bage ne teme na to. 17 Ne jo̰ aŋ kwa kaŋ mbe ma ya pet, aŋ mbo kat ne laar saal kadɗa aŋ ke mborra ya nama pal. 18 Mbi jan da ne aŋ pet to, mbi kwa nama ge mbi ne tá nama ma kwa. Amma ge go fare ge ne njaŋge ma wak wi ɗe, ndu ge ne zam mbi kaŋzam saŋge na ndwara ja mbi pal. 19 Ne se no, mbi jan aŋ na zḛ tek fare mbe gale ne be ge kerra to, ne da pe, swaga ge ne mbo ke ya, aŋ ho̰ fareba go ‹Mbi, Mbi ne.› 20 Fareba, fareba, mbi jan aŋ, bage ne mbo ame ndu ge mbi ne teme na ya, ame mbi, bage ne ame mbi, ame bage ne teme mbi ya.»
Jeso waage go Yuda mbo ɓyan na naa tok go
21 Swaga ge Jeso ne jya̰ fare mbe ma no, ɓol iigiya na o̰yom zi, jan go: «Fareba, fareba, mbi jan aŋ, ndu a̰me ɗu ne aŋ buwal zi mbo ɓyan mbi naa tok go.» 22 Naa ge ame hateya ma ka ndil ta, a wan ndu ge na sḛ ne jan fare na pal pe to. 23 Ne naa ge ame hateya ma buwal zi, na ge Jeso laar ne wa̰ na, ká ɓyarra Jeso ko̰o̰l zi. 24 Siman Bitrus kar na na tok ndwara jan na go, na ele Jeso go na jan da ne wuɗi de. 25 Ndu ge ame hateya ge ne ɓya tene Jeso ko̰o̰l zi mbe, ele na go: «Bageyal, a wuɗi ɗaa?» 26 Jeso gwan ne janna go: «A na ge mbi ma̰ hon na mbi kaŋ ge mbi ne tan na ya.» Jeso siɗi katugum tan na kaŋ pal, hon Yuda Iskariyot, ge Siman vya. 27 Swaga ge Yuda ne ame katugum mbe ɗe, Saytan wat na zi. Jeso jan na go: «Kaŋ ge mo ne ɓyare kerra, ke na avun cap.» 28 Ne nama ge a ne ka swaga mbe go ma buwal zi, ndu a̰me be wan fare ge Jeso ne jya̰ na mbe pe to. 29 Ne jo̰ Yuda ka koy bware ne ɗe, a̰me ma dwat go, Jeso jan na go, na yá kaŋ a̰me ma ne vḛso pe, ko na ho̰ a̰se ma kaŋ a̰me ma. 30 Swaga ge ne ame katugum mbe, ɗage wat zum. Swaga ke ya ɗaal.
Wak honna ge giya̰l
31 Swaga ge Yuda ne wá zum ɗe, Jeso jan go: «Se no, Vya ge ndu ne ɓol uwareya go, Dok ɓol uwareya go na zi me. 32Kadɗa Dok ɓó uwareya na zi, Dok mbo uware na na zi me, go no uwale, mbo ɓol uwareya na zi me. 33 Mbi vya ge jabso ma, mbi gá kat poseya ne aŋ swak baŋ. Aŋ mbo ɓyare mbi pe, dimma ne mbi ne jya̰ Yuda ma go: ‹Swaga ge mbi ne mbo go, aŋ ne pool ge mbo na ya to›, ne se no mbi jan aŋ go no me. 34 Mbi hon aŋ wak honna ge giya̰l: aŋ laar wa̰ ta. Dimma ne mbi laar ne wa̰ aŋ go, aŋ laar wa̰ ta go no me. 35 Kadɗa aŋ da ne laar wanna ta buwal zi, go no naa pet a mbo kwa go aŋ mbi naa ge ame hateya ma ne.»
Jeso jan Bitrus go na mbo njuɗi na wak na kwa na to
36 Siman Bitrus ele na go: «Bageyal, mo mbo da ɗaa?» Jeso gwan ne na janna go: «Swaga ge mbi ne mbo go, mo day ge kare mbi pe ne se no to gale, amma mo mbo kare mbi pe dḛ gale.» 37 Bitrus jan na go: «Bageyal, mbi day ge kare mo pe ne se no to gyana ɗaa? Mbi jejew ge hon mbi sḛ uzi ne mo pe.» 38 Jeso jan go: «Mo jejew ge hon mo sḛ uzi ne mbi pe ya’a! Fareba, fareba, mbi jan mo, zḛ ge baare tó fyaso, mo mbo njuɗi mo wak go mo kwa mbi to ndwara ataa.»
Jeso viya̰ ge ɗame naa mbo Dok ta ya ne
1 «Aŋ dulwak na iigi to, ho̰ me fareba Dok ta, ho̰ me fareba mbi ta me. 2 Yàl ge mbi Ba ne diŋ, zok ma ya go gḛ, te go to, mbi te ya jan aŋ. Ago mbi mbo mbo nṵsi aŋ swaga. 3 Swaga ge mbi ne mbo mbo ya mbo nṵsi aŋ swaga, mbi mbo gwan’a, mbi abe aŋ mbo mbi ta ya, ne da pe swaga ge mbi ne go, aŋ ká go me. 4 Swaga ge mbi ne mbo go, aŋ kwa viya̰ mbe kwa.» 5 Toma jan na go: «Bageyal, i kwa swaga ge mo ne mbo go to, i kwa viya̰ mbe ma̰ gyana ɗaa?» 6 Jeso jan na go: «Mbi viya̰, mbi fareba, mbi ndwara, ndu a̰me ne pool mbo mbi Bá ta ya to, kadɗa na mbo da ne mbi ta to. 7 Ne jo̰ aŋ kwa mbi go, aŋ mbo kwa mbi Bá me. Ne se no, aŋ kwa na ya go, aŋ kwa na dḛ me.» 8 Filibus gwan jan na go: «Bageyal, ŋgay i Báá, no ma̰ mbyat i.» 9 Jeso jan na go: «Mbi ne ke ya káál ne aŋ no go ga puy, mo Filibus, mo kwa mbi to’a! Ndu ge ne kwa mbi, kwa mbi Bá. Mo te jan gyana go, mbi ŋgay aŋ Báá ɗaa? 10 Mo be hon fareba go mbi ya mbi Bá zi, mbi Bá ya mbi zi me to’a? Fare ge mbi ne jan aŋ, mbi her nama da ne mbi pala janna to, amma a mbi Bá ge ne ká ne mbi zi ke na kaŋ ma ne. 11 Ho̰ me fareba mbi fare janna pal, mbi ya mbi Bá zi, mbi Bá ya mbi zi me. Kadɗa go to puy ɗe, ho̰ me fareba ne mbi kaŋ ge mbi ne ke ma pe. 12 Fareba, fareba, mbi jan aŋ, bage ne hon fareba mbi ta, kaŋ ge mbi ne ke ma, na sḛ mbo ke nama, mbo gwan ke nama waɗeya, ne da pe mbi gwan mbi Bá ta ya. 13 Kaŋ ge daage pet ge aŋ ne mbo kaɗe ya dḭl ge mbi ne zi, mbi mbo ke na, ne da pe mbi Bá ɓo uwareya mbi zi. 14 Kadɗa aŋ kaɗe mbi kaŋ a̰me ya dḭl ge mbi ne zi, mbi mbo ke na.
Wak tuli ne temeya ge O̰yom ge mbegeya ne ya pe
15 Kadɗa aŋ laar wá̰ mbi, aŋ mbo koy mbi wak honna ma. 16 Mbi me, mbi mbo kaɗe mbi Bá, na sḛ mbo hon aŋ Bage iyal laar ge ɗogle ya, ne da pe na ka poseya ne aŋ ɗiŋnedin. 17 A O̰yom ge fareba, na ge dunya ma ne pool ge ame na to, ne da pe a kwa na to, a wan na pe to me. Aŋ ɗe, aŋ kwa na kwa, ne da pe kat poseya ne aŋ, na sḛ ya aŋ zi me. 18 Mbi mbo ya̰ aŋ kya̰le to, mbi mbo mbo ya aŋ ta. 19 Ta swak, naa ge ne dunya zi ma mbo gwan kwa mbi to bat. Amma aŋ ɗe, aŋ mbo kwa mbi, ne da pe mbi da ne ndwara, aŋ sḛ ma me, aŋ mbo kat ne ndwara. 20 Dam mbe go no, aŋ mbo kwa go mbi ya mbi Bá zi, aŋ sḛ ma ya mbi zi, mbi ya aŋ zi me. 21 Bage ne koy mbi wak honna ma, ka ke mborra nama pal, na laar wa̰ mbi wan. Bage na laar ne wa̰ mbi, mbi Bá laar mbo wan na me, mbi me, mbi laar mbo wan na, mbi mbo dyan tene na ta.» 22 Yuda, a be Yuda Iskariyot to, jan na go: «Bageyal, mo te ŋgay tene gyana i ta ɗeŋgo ɗo, mo ba ŋgay tene naa ge ne dunya zi ma ta pet to ɗaa?» 23 Jeso gwan ne na janna go: «Ndu ge na laar ne wa̰ mbi, mbo koy mbi fare, mbi Bá laar mbo wan na me. I mbo mbo ya na zi, i mbo kat dagre ne na me. 24 Ndu ge na laar ne wa̰ mbi to, koy mbi fare ma to. Fare ge mbi ne jan aŋ ma no, mbi hé nama da ne mbi pala janna to, amma a mbo da ne mbi Bá ge ne teme mbi ya wak zi ya. 25 Mbi jya̰ aŋ kaŋ mbe ma no tek ge mbi gale ne katɗa poseya ne aŋ. 26 Bage iyal laar, O̰yom ge mbegeya ge mbi Bá ne mbo teme na ja dḭl ge mbi ne zi, na sḛ mbo hate aŋ kaŋ ma pet, mbo dwat aŋ pala ne kaŋ ma pet ge mbi ne jya̰ aŋ. 27 Mbi yá̰ aŋ halas, mbi hon aŋ halas ge mbi ne. Mbi hon aŋ na dimma ne dunya ne hon go to. Iigi me ta to, sya me vo to me. 28 Aŋ za̰ go mbi jya̰ aŋ go: ‹Mbi gwan gwan, amma mbi mbo gwan’a aŋ ta.› Kadɗa aŋ laar wa̰ mbi wan, aŋ ke laar saal go mbi gwa̰ mbi Bá ta ya. Ago mbi Bá waɗe mbi waɗe. 29 Mbi jya̰ aŋ fare mbe ma ne se no, zḛ tek ge kaŋ mbe ma dé ya. Ne da pe swaga ge kaŋ mbe ma ne mbo yan ja, aŋ ho̰ fareba. 30 Mbi mbo gwan sigɗi fare ne aŋ ta to, ago ga̰l ge ne dunya mbe no pal mbo ya go, na sḛ day ge ke mbi a̰me to. 31 Amma a ndwara go dunya kwa go mbi laar wa̰ mbi Bá wan, uwale mbi ke wak honna ge mbi Bá ne ho̰ mbi pal. Ɗage me digi, mbo me nee.»
Jeso, oyo̰r ge fareba
1 Mbi oyo̰r ge fareba ne, mbi Bá bage garra ne me. 2 Oyo̰r tok ge daage pet ge ne mbi ta, ge ne tol to, syal na uzi. Amma oyo̰r tok ge daage pet ge ne tol, ka ɗaɗe na uzi yaɗat, ne da pe na gwan tol gḛ. 3 Aŋ ɗe, fare ge mbi ne jya̰ aŋ ma hat aŋ ya yaɗat. 4 Ka me mbi zi, dimma ne mbi ne ka ne aŋ zi go. Ne jo̰ oyo̰r tok ne na pala hini ne pool ge tolla to, ago na ka tatɗa na ná ta mbḛ, go no me, kadɗa aŋ katɗa mbi zi to, aŋ ne pool ge tolla to me. 5 Mbi oyo̰r ne, aŋ oyo̰r tok ma ne. Bage ne kat mbi zi, mbi, mbi kat na zi me, na sḛ tol gḛ ge be to. Ago be mbi to, aŋ ne pool ke kaŋ a̰me to. 6 Bage ne kat mbi zi to, a dol na zum uzi ya dimma ne oyo̰r tok go, fya̰, a kote nama, a kan nama ol zi, a til nama uzi. 7 Kadɗa aŋ katɗa mbi zi, mbi fare ma kat aŋ zi me, kaɗe me kaŋ ge daage pet ge aŋ ne ɓyare, a mbo hon aŋ na. 8 Kadɗa aŋ tol gḛ ge be to, aŋ ka ŋgay go aŋ mbi naa ge ame hateya ma ne, go no aŋ mbo ŋgay hormo ge mbi Bá ne naa ta. 9 Dimma ne mbi Bá laar ne wa̰ mbi go, mbi me, mbi laar wa̰ aŋ wan. Ka me laar wanna ge mbi ne zi. 10 Kadɗa aŋ koy mbi wak honna ma ya, aŋ mbo kat laar wanna ge mbi ne zi, dimma ne mbi ne koy wak honna ge mbi Bá ne ma go, mbi ká ne laar wanna ge na ne zi no me. 11 Mbi jya̰ aŋ fare mbe ma no, ne da pe laar saal ge mbi ne na ka aŋ zi, laar saal ge aŋ ne na ka mbyatɗa tap. 12 Wak honna ge mbi ne no: aŋ laar wa̰ ta dimma ne mbi laar ne wa̰ aŋ go. 13 Ndu ge ne hon na sḛ uzi ne na kondore ma pe, laar wanna ge gwan waɗe ge no mbe to. 14 Kadɗa aŋ ke mborra wak honna ge mbi ne pal, aŋ mbi kondore ma ne. 15 Mbi gwan tol aŋ mo̰r ma to, ne da pe mo̰r kwa kaŋ ge na bageyal ne ke to. Mbi tol aŋ kondore ma, ago kaŋ ge daage pet ge mbi ne za̰ na ne mbi Bá ta ya, mbi ke aŋ nama na kwarra. 16 A be aŋ tá mbi ne to, a mbi, mbi tá aŋ ne, mbi mbege aŋ no, ne da pe aŋ mbo, aŋ tó vya ma, aŋ vya ma ka ɗiŋnedin, ne da pe kaŋ ge daage pet ge aŋ ne mbo kaɗe na ya ne mbi Bá ta dḭl ge mbi ne zi, mbo hon aŋ na. 17 Wak honna ge mbi ne hon aŋ, ago aŋ laar wa̰ ta.
Dunya kwane Jeso ma ne na naa ma kwane
18 Kadɗa dunya kwane aŋ kwane, kwa me go gale e pe kwane mbi ɓya. 19 Aŋ te ka ge dunya ne, dunya laar te ya wan aŋ, ne da pe aŋ ge na ne ne. Ne jo̰ mbi tá aŋ ne, aŋ be ge dunya ne ne to, aŋ be gwan gá ge dunya ne to, da ne pe no, dunya kwane aŋ no. 20 Dwa me ne fare ge mbi dḛ ne jya̰ aŋ: Mo̰r be waɗe na bageyal to. Kadɗa a ke mbi yál, a mbo ke aŋ yál me, kadɗa a koy mbi fare, a mbo koy aŋ fare ma me. 21 Amma kaŋ mbe ma no pet a mbo ke aŋ nama ne dḭl ge mbi ne pe, ne da pe a kwa bage ne teme mbi ya to. 22 Te go mbi be mbo ya to, mbi be jan nama fare to me, a te ya kat ne sone to, amma ne se no nama wak eya ne bama sone ma pe to. 23 Bage ne kwane mbi, kwane mbi Ba me. 24 Te go mbi be ke kaŋ ma ge ndu a̰me ne ke nama dam ɗu to nama buwal zi to, a te ya kat ne sone to. Se no a kwa nama ya go, a kwane i ne mbi Bá no jwak me. 25 Ago kaŋ mbe ma dé ya kerra, ne da pe, fare ge a ne njaŋge na ne eya ge nama ne zi na wak wi. Njaŋge go: «A kwane mbi baŋ ɗar!» 26 Swaga ge Bage iyal laar ne mbo mbo ja, na ge mbi ne mbo teme aŋ na ja ne mbi Bá ta ya, ndwara go, O̰yom ge fareba, na ge ne mbo ne mbi Bá ta ya, na sḛ mbo jan aŋ mbi fare. 27 Aŋ sḛ ma me, aŋ mbo waage mbi fare naa ta, ne da pe aŋ poseya ne mbi ne pe eya ya day
1 Mbi jya̰ aŋ fare mbe ma no, ne da pe na kaage aŋ koo ma sya to. 2 A mbo yan aŋ ne Sinagog ma zi. Dam ma mbo ya go, nama ge a ne mbo katɗa ka hun aŋ ma a mbo ka dwatɗa go bama ke temel hon Dok. 3 A mbo ke aŋ go no, ne da pe a kwa mbi Bá, ko mbi to bat. 4 Mbi jya̰ aŋ fare mbe ma no, ne da pe, swaga ge dam mbe ma ne mbo yan ja, aŋ dwa ge fare ge mbi ne jya̰ aŋ ma pal. Mbi be jan aŋ fare mbe ma ne zḛ ya to, ne da pe mbi ka poseya ne aŋ.
Temel ge O̰yom ne
5 Ne se no, mbi gwan bage ne teme mbi ya ta ya. Ndu a̰me ɗu ne aŋ buwal zi ge ele mbi go: Mo mbo da, to. 6 Ne mbi ne jya̰ aŋ fare mbe ma no pe, aŋ da ne laar pisil ge be to. 7 Amma mbi jya̰ aŋ fare ge fareba: A kwaɗa ne aŋ pe ge mbi gwan. Ago kadɗa mbi gwan na to, Bage iyal laar mbo mbo ya aŋ ta to. Kadɗa mbi gwan’a, mbi mbo teme aŋ na ya. 8 Swaga ge ne mbo mbo ja, mbo dol dunya ne fare ge fare ge sone ne pal, ne ge dosol ne pal, ne ge sarya kunna ge Dok ne pal me. 9 Ge fare ge sone ne pal, ne da pe a be hon fareba mbi ta to, 10 ge fare ge dosol ne pal, ne da pe mbi gwan mbi Bá ta ya, aŋ mbo gwan kwa mbi to bat, 11 ge fare ge sarya ne pal, ne da pe a kun sarya ya kun zo ge ga̰l ge ne dunya no pal. 12 Mbi da ne fare ma gḛ ge gwan jan aŋ gale, amma aŋ ne pool ge wan nama aŋ pala zi ne se no to. 13 Swaga ge O̰yom ge fareba ne mbo mbo ja, mbo ɗame aŋ fareba zi pet. Ago mbo hé fare ma da ne na pala janna to, amma mbo jan kaŋ ge na ne za̰ ma mwaɗak, mbo waage aŋ kaŋ ge ne mbo mbo ya ma me. 14 Mbo dyan hormo ge mbi ne aŋ ta, ago mbo hé kaŋ ge ne mbi ta ya ma, ba waage aŋ nama. 15 Kaŋ ge mbi Bá ne ma mwaɗak, a ge mbi ne ma ne. Da ne pe no mbi jya̰ no go: Mbo hé kaŋ ge ne mbi ta ya ma, ba waage aŋ nama.
Aŋ kḭḭmi ma mbo er ne laar saal
16 Ta swak, aŋ mbo gwan kwa mbi to, go̰r go ta ŋgeɗo uwale aŋ mbo gwan kwa mbi. 17 Swaga ge ne jya̰ fare mbe no, na naa ge ame hateya a̰me ma a ka jan ta go: «Te jan gyana go: ‹Ta swak aŋ mbo gwan kwa mbi to, go̰r go ta ŋgeɗo uwale aŋ mbo gwan kwa mbi›, go no me: ‹mbi gwan mbi Bá ta ya› ɗaa?» 18 A ka jan go: «Na fare ge go: ‹Ta swak› mbe pe wanna gyana ɗaa? Nee wan na fare mbe pe to.» 19 Swaga ge Jeso ne kwa go nama ɓyare ele na fare ɗe, jan nama go: «Aŋ te ele ta fare ge mbi ne jya̰ go: ‹Ta swak aŋ mbo gwan kwa mbi to, go̰r go ta ŋgeɗo uwale aŋ mbo gwan kwa mbi› pal gyana ɗaa? 20 Fareba, fareba, mbi jan aŋ, aŋ mbo fyal, aŋ ka sun ta, amma naa ge ne dunya mbe no zi ma mbo ke laar saal. Aŋ mbo ke kḭḭmi, amma kḭḭmi ge aŋ ne mbo saŋge laar saal. 21 Swaga ge gwale ne ɗage ke twala, wan kḭḭmi, ne da pe na dam njot yál mbya ne. Swaga ge ne tol na vya ya se, vyale na yál uzi, gá ke laar saal ne na ne tó ndu dasana ya dunya zi pe. 22 Ne se no uwale, aŋ da ne kḭḭmi, amma mbi mbo gwan kwa aŋ. Ago aŋ mbo ke laar saal, laar saal ge aŋ ne mbe, ndu a̰me ge ndage na uzi mbo kat to bat. 23 Dam mbe go, aŋ mbo gwan ele mbi fare a̰me to bat. Fareba, fareba, mbi jan aŋ, kaŋ ge daage pet ge aŋ ne mbo kaɗe mbi Bá ya dḭl ge mbi ne zi, mbo hon aŋ na. 24 Ɗiŋ ne se no, aŋ gale be kaɗe a̰me dḭl ge mbi ne zi to. Kaɗe me, Dok mbo hon aŋ, ne da pe laar saal ge aŋ ne na ka mbyatɗa tap.
Jeso hal dunya go
25 Mbi jya̰ aŋ fare mbe ma no mwaɗak da ne sḭ. Dam ma mbo ya go, mbi mbo gwan jan aŋ fare ne sḭ to, amma mbi mbo jan aŋ fare ge mbi Bá ne ma zum waŋ. 26 Dam mbe ma go, aŋ mbo kaɗe Báá dḭl ge mbi ne zi, mbi jan aŋ go, a be mbi gwan kaɗe na ne aŋ pe ne to. 27 Ago mbi Bá sḛ ne na pala na laar wa̰ aŋ wan, ne da pe, aŋ sḛ ma laar wa̰ mbi wan, aŋ ho̰ fareba go mbi mbo da ne Dok ta ya. 28 Mbi ɗage da ne mbi Bá ta ya, mbi mbo ya dunya zi no. Ne se no, mbi yá̰ dunya, mbi gwan mbo mbi Bá ta ya.» 29 Na naa ge ame hateya ma jan na go: «Ndi, se no, mo jan fare ne go zum waŋ, mo jan fare ne sḭ to. 30 Ne se no, i kwa ya go go, mo kwa fare ma kwa pet, mo ɓyare go ndu ele mo fare ele mbḛ to, da ne pe no i hon fareba no go mo mbo da ne Dok ta ya.» 31 Jeso gwan ne nama janna go: «Ne se no, aŋ hon fareba gale ya go’a? 32 Ndi, dam ma mbo ya go, se no yan ja, aŋ mbo ɓarse se teteŋ, ndu ge daage mbo her na viya̰ na pal, aŋ mbo ya̰ mbi hini, amma mbi hini to, ago mbi Bá ya go poseya ne mbi. 33 Mbi jya̰ aŋ fare mbe ma no, ne da pe aŋ ka halas mbi zi. Aŋ mbo za̰ yál dunya zi, amma wa̰ me aŋ dulwak, mbi hal dunya go.»
Kaɗeya ge Jeso ne ne na naa ge ame hateya ma pe
1 Swaga ge Jeso ne jya̰ fare mbe ma no, hé na ndwara digi, jan go: «O Báá, swaga mbyat go. Uware mo vya, go no mo vya ba uware mo me, 2 dimma ne mo ne ho̰ na pool naa dasana ma pal pet go. Ne da pe, na ho̰ nama ge mo ne ho̰ na nama ndwara ge ɗiŋnedin. 3 Ndwara ge ɗiŋnedin, a kwa go, mo, mo Dok ge fareba ne ɗu kikit, ne bage mo ne teme na ya me, ndwara go, Jeso Kris. 4 Mbi uware mo dunya zi, mbi wi temel ge mo ne ho̰ mbi kerra ma wak pet. 5 Se no, o Báá, ho̰ mbi mbi hormo ge mbi dḛ ne ka ne na mo ta ya tek dunya pe gale ne be ge dolla to go day mbe. 6 Nama ge mo ne abe nama ne dunya zi ya hon mbi ma, mbi ŋgay nama mo dḭl. A ká ge mo ne ma, mo ho̰ mbi nama no, nama sḛ ma koy mo fare. 7 Se no, a kwa kwa go kaŋ ge mo ne ho̰ mbi ma pet a mbo da ne mo ta ya, 8 mbi ho̰ nama fare ge mo ne ho̰ mbi ma. A ame nama, a da ne kwarra tyatyat go mbi mbo da ne mo ta ya, a da ne hon fareba go mo teme mbi ya ne. 9 Mbi kaɗe da ne nama pe. Mbi kaɗe da ne dunya pe to, amma mbi kaɗe da ne nama ge mo ne ho̰ mbi nama pe, ne da pe a ge mo ne ma ne. 10 Ne jo̰ kaŋ ge mbi ne ma pet, a ge mo ne ma ne, ge mo ne ma me, a ge mbi ne ma ne, mbi ɓol uwareya ya nama zi. 11 Ne gá ne zḛ no, mbi ne dunya zi to, amma nama sḛ ma ya dunya zi, mbi, mbi gwan mo ta ya. Báá ge mbegeya, koy nama dḭl ge mo ne zi, na ge mo ne ho̰ mbi na mbe zi. Go no a ba kat ɗu, dimma ne nee ne mo ne go ɗu go. 12 Swaga ge mbi ne ka poseya ne nama, mbi koy nama dḭl ge mo ne zi, na ge mo ne ho̰ mbi na zi. Mbi koy nama, a̰me ɗu ne nama buwal zi be ban uzi to, a banna vya ɗeŋgo, ne da pe fare njaŋgeya wak wi. 13 Se no mbi gwan mo ta ya. Mbi jan go no, tek ge mbi gale ne dunya zi no, ne da pe nama ɓo laar saal ge mbi ne nama zi, nama laar saal mbe ka mbyatɗa tap me. 14 Mbi ho̰ nama fare ge mo ne, da ne pe no dunya kwane nama no, ne da pe nama sḛ ma be dunya ne ne to, dimma ne mbi ne ka ge dunya ne to go. 15 Mbi kaɗe mo go, mo abe nama ne dunya zi uzi to, amma mo koy nama ne Bage sone tok go. 16 Nama sḛ ma be dunya ne ne to, dimma ne mbi go, mbi be ge dunya ne ne to. 17 Mbege nama ne fareba, fare ge mo ne a fareba ne. 18 Dimma ne mo ne teme mbi ya dunya zi go, mbi teme nama dunya zi go no me. 19 Mbi, mbi mbege tene ne nama pe, ne da pe nama sḛ ma ka mbegeya fareba zi. 20 Mbi kaɗe da ne nama pe ɗeŋgo to, amma ne nama ge a ne mbo hon fareba ya ne nama fare janna ma ta pe me, 21 ne da pe nama sḛ ma pet, nama ka ɗu. Dimma ne mo Báá, mo ne ka ne mbi zi, mbi me, mbi ne ka ne mo zi go, nama sḛ ma me nama ka nee zi, ne da pe dunya ma ho̰ fareba go mo teme mbi ya ne. 22 Mbi ho̰ nama hormo ge mo ne ho̰ mbi na, ne da pe nama ka ɗu dimma ne nee ne mo ne ka ɗu go. 23 Mbi ya nama zi, mo ya mbi zi me, ne da pe nama ka ɗu kikit, ne da pe dunya ma kwa mo teme mbi ya ne, mo laar wa̰ nama wan dimma ne mo laar ne wa̰ mbi go me. 24 Báá, nama ge mo ne ho̰ mbi ma, mbi ɓyare go, swaga ge mbi ne go, nama sḛ ma ka poseya ne mbi, ne da pe nama kwa hormo ge mo ne ho̰ mbi, ago mo laar wa̰ mbi wan tek mo gale ne be dol dunya pe go day. 25 Báá ge dosol, dunya be kwa mo to, amma mbi, mbi kwa mo, nama mbe ma no, a kwa go mo teme mbi ya ne. 26 Mbi ŋgay nama mo dḭl, mbi mbo gwan é nama kwa mo waɗeya. Ne da pe laar wanna ge mo ne ka ne na ne mbi pe na ka nama zi, mbi me mbi ka nama zi.»
Wanna ge Jeso ne
1 Swaga ge Jeso ne jya̰ fare mbe ma no, wat ya zum poseya ne na naa ge ame hateya ma, a mbo baal pul Sedron wak le may ya. Swaga mbe go, gaaso a̰me ya go, a ne na naa ge ame hateya ma wat na zi. 2 Yuda, na ge ne ɓya̰ na naa tok go kwa swaga mbe kwa, ne da pe Jeso ma ne na naa ge ame hateya ma ka kote na zi ɗaɗak. 3 Yuda dol tene vog ge asagar ma ne poseya ne dore ge naa ge ke tuwaleya ma ga̰l ma ne ma ne Farisi ma ne ma ndwara zḛ, a mbo ya ne ɗuli ma, ne gil ma ne kaŋ pore ma bama tok go. 4 Ne jo̰ Jeso kwa kaŋ ge ne ɓyare ɓol na kwa ɗe, mbo ya nama ndwara zi, jan nama go: «Aŋ ɓyare wuɗi ɗaa?» 5 A gwan ne na janna go: «Jeso ge Nazaret!» Jeso jan nama go: «Mbi ne!» Yuda, na ge ne ɓya̰ na naa tok go ka poseya ne nama. 6 Swaga ge Jeso ne jya̰ nama go: «Mbi ne» ɗe, a tit ne go̰r, a det suwar zi. 7 Gwan ele nama go: «Aŋ ɓyare wuɗi ɗaa?» A gwan ne na janna go: «Jeso ge Nazaret!» 8 Jeso gwan ne nama janna go: «Mbi te jan aŋ ya go, na mbi ne ɓa! Kadɗa aŋ ɓyare mbi ɗe, ya̰ me nama mbe ma no mborra.» 9 A go mbe no, fare ge na sḛ ne jya̰ wak wi no, jya̰ go: «Ne nama ge mo ne ho̰ mbi ma buwal zi, mbi be ban a̰me ɗu to.» 10 Siman Bitrus ka ne kasagar. Pwat na, syal kep tuwaleya dore, fete na togor matoson. Dore mbe dḭl Malkos. 11 Jeso jan Bitrus go: «Gwa̰ ne mo kasagar na vum zi. Kop yál ge mbi Bá ne ho̰ mbi njotɗa, mbi njó na to ɗaa?»
A gene Jeso kep tuwaleya Hanna ndwara se ya
12 Vog ge Asagar ma ne poseya ne bama ga̰l, ne dore ge Yuda ma ga̰l ma ne ma, a wan Jeso, a vwal na. 13 A gene na gale mbo Hanna ta ya ɓya. Hanna ka Kayafa tisi ge son. A Kayafa ka kep tuwaleya del mbe go ne. 14 A Kayafa ho̰ Yuda ma yuwaleya ne go: «A golgo ndu ɗu su ne ɓase ma pe.»
Wak njuɗiya ge Bitrus ne
15 Siman Bitrus ma ne ndu ge ame hateya a̰me ɗu a ka kare Jeso pe. Kep tuwaleya kwa ndu mbe kwa, wat ge kep tuwaleya yapul diŋ ya poseya ne Jeso. 16 Amma Bitrus gá mḛya zok wak zum. Ndu ge ame hateya ge may, na ge kep tuwaleya ne kwa na mbe wat ya zum, jan gwale ge ne ka koy zok wak fare, yá̰ Bitrus wat yadiŋ. 17 Kale ge ne ka koy zok wak jan Bitrus go: «Mo me, mo te ya naa ge ame hateya ge ndu mbe ne ma buwal zi to’a?» Bitrus jan na go: «A be mbi to!» 18 Dore ma ne naa ge koyya ma ka mḛya ol wak go uwalla, ne da pe swaga ka iyalam. Bitrus mbo ya mḛya uwal ol nama ta me. 19 Kep tuwaleya ɗage ele Jeso fare ge na naa ge ame hateya ma ne na hateya ge ne hon pal. 20 Jeso gwan ne na janna go: «Mbi ka jan naa fare kwaya̰l go waŋ, mbi ka hateya ɗaɗak Sinagog ma zi, ne zok ge mbegeya zi, swaga ge Yuda ma ne kote ne go pet, mbi be jan fare a̰me ɗimil zi to bat. 21 Mo te ele mbi fare gyana ɗaa? Ele naa ge a ne za̰ fare ge mbi ne jya̰ ma, a kwa fare ge mbi ne jya̰ ma kwa.» 22 Swaga ge ne jya̰ fare mbe no, ndu ge koyya a̰me ge ne ka swaga mbe go yar na, jan na go: «Mo gwan ne kep tuwaleya fare janna go ne’a?» 23 Jeso gwan ne na janna go: «Kadɗa mbi jya̰ sone ɗe, ŋgay fare ge sone ge mbi ne jya̰. Amma kadɗa mbi jya̰ fare kwaɗa ɗe, mo yar mbi da ne da pe ɗaa?» 24 Hanna teme na ne na vwalla jyan mbo kep tuwaleya Kayafa ta ya. 25 Simon Bitrus gale ne na swaga mḛya uwal ol go, a jan na go: «Mo te ya na naa ge ame hateya ma buwal zi me to’a?» Njuɗi na wak, jan go: «A be mbi to!» 26 Kep tuwaleya dore a̰me, ka ndu ge Bitrus ne fete na togor sele, jan na go: «Mbi te kwa mo gaaso zi ya poseya ne na to’a?» 27 Bitrus gwan njuɗi na wak na kwa na to, se se no baare tol fyaso.
A gene Jeso Pilatus ndwara se ya
28 Ne Kayafa diŋ ya, a gene Jeso ya bage ne dó na ndwara ne suwal pal diŋ, ka cya̰wak vḛ. Nama sḛ ma wat diŋ ya to, ne da pe bama ma̰ hát hat ta seŋgre, bama ma̰ ban be ge zam kaŋzam ge vḛso Paska ne. 29 Pilatus wat ya nama ndwara zum, jan nama go: «Ndu mbe ke ma kaŋ ge sone ɗaa?» 30 A gwan ne na janna go: «Te go ndu mbe be ke fare ge sone to ɗe, i te ya gene na ya mo ta ɗaa?» 31 Pilatus jan nama go: «Aŋ sḛ ma, aŋ wa̰ me na, kṵ me na sarya eya ge aŋ ne pal.» Yuda ma gwan ne na janna go: «I ne viya̰ ge hun ndu a̰me to.» 32 Dé ya go no, ne da pe fare ge Jeso ne jya̰ suya hir ge na pal na wak wi. 33 Pilatus gwan na yadiŋ ya, tol Jeso, ele na go: «Mo, mo gan ge Yuda ma ne ne’a?» 34 Jeso gwan ne na janna go: «Mo hé fare mbe janna da ne mo pala, ko a jya̰ mo ya jan go mo jya̰ mbi go ɗaa?» 35 Pilatus gwan ne na janna go: «Mbi ɗe, mbi Yuda ne’a? Mo hir ma, ne naa ge ke tuwaleya ma ga̰l ma ɓya̰ mo ya mbi tok go ne! Mo ke da ɗaa?» 36 Jeso gwan ne na janna go: «Mbi muluk a be ge dunya mbe no ne ne to. Te go mbi muluk ka ge dunya mbe no ne, mbi naa ma te ya mbal pore, ne da pe, na kaage a ɓya̰ mbi Yuda ma tok go to. Amma mbi muluk a be se go to.» 37 Pilatus jan na go: «Mo gan ne’a?» Jeso gwan ne na janna go: «A mo jya̰ ne go, mbi gan ne. Mbi tó, mbi mbo ya dunya zi ndwara ke sayda ge fareba pal. Ndu ge daage ge go na ge fareba ne, za̰ mbi ka̰l za̰.»
Sarya kunna ge siya Jeso pal
38 Pilatus ele na go: «Fareba da ɗaa?» Swaga ge ne jya̰ fare mbe no, gwan wat ya Yuda ma ta zum, jan nama go: «Mbi be ɓol fare a̰me ge wan ndu mbe to bat. 39 Amma ne jo̰ hada ge aŋ ne zi, mbi dol aŋ ndu a̰me digi ɗu ne daŋgay zi dam vḛso Paska go ɗe, aŋ ɓyare go mbi dó aŋ digi gan ge Yuda ma ne’a?» 40 A ɗage oyya ne ka̰l ndaar go: «Na ka ndu mbe to! Amma Barabas!» Ago Barabas ka syala.
1 Swaga mbe go, Pilatus é naa wan Jeso, a fol na ne bol. 2 Asagar ma tigi kadmul gumi, a kubi na na pal, a kan na ba̰r ga̰l ge káál sasaw, 3 a ka mbo ya na ta, a ka jan na go: «I sa̰ mo wak, gan ge Yuda ma ne!» A ka yar na. 4 Pilatus gwan wat ya Yuda ma ta zum, jan nama go: «Ndi, mbi wan aŋ na ya zum, ne da pe aŋ kwa go, mbi be ɓol fare a̰me ge sone ne na pal to.» 5 Jeso wat ya zum ne kadmul gumi na pal, ne ba̰r ga̰l káál sasaw na ta me. Pilatus jan nama go: «Ndi me, ndu mbe no!» 6 Swaga ge naa ge ke tuwaleya ma ga̰l ma ne naa ge koyya ma ne kwa na, a ɗage oyya ne ka̰l ndaar janna go: «Pé na kaŋgre pal! Pé na kaŋgre pal!» Pilatus jan nama go: «Aŋ sḛ ma, wa̰ me na, aŋ pel na kaŋgre pal. Ago mbi be ɓol fare a̰me ge sone ne na pal to bat.» 7 Yuda ma gwan ne na janna go: «I da ne eya a̰me, ge eya mbe pal, na sḛ mbya suya. Ne da pe, tol tene go na Dok vya ne.» 8 Swaga ge Pilatus ne za̰ fare janna mbe no, gwan siya vo gḛ waɗeya. 9 Gwan na yadiŋ ya, ele Jeso go: «Mo da ne ma suwal ya ɗaa?» Amma Jeso gwan ne na fare janna pal to. 10 Pilatus jan na go: «Mo jan mbi fare to’a? Mo kwa go mbi da pool ge kan mo digi, ko ne pool ge pel mo kaŋgre pal me to’a?» 11 Jeso gwan ne na janna go: «Mo ne pool a̰me ne mbi pal to, te go a be hon mo na da ne digi zi ya to. Da ne pe no, ndu ge ne ɓya̰ mbi mo tok go na sone waɗe waɗe.» 12 Ne swaga mbe go no, Pilatus ɓyare viya̰ go na kan na digi, amma Yuda ma ɗage oyya ne ka̰l ndaar go: «Kadɗa mo kan ndu mbe no digi, mo be Kaysar kondore ne to! Ndu ge daage pet ge ne ker tene go na gan, a Kaysar ndu ge ho̰l ne.» 13 Swaga ge Pilatus ne za̰ fare mbe no, wan Jeso ya zum, mbo kat hool kun sarya go, swaga ge a ne tol na tandal go, ne Yuda ma wak Gabbata. 14 Ka dam ge a ne nṵsi vḛso Paska go, gwa ne gyala pala. Pilatus jan Yuda ma go: «Nā, aŋ gan no!» 15 A ɗage oyya go: «Hṵ na! Hṵ na! Pé na kaŋgre pal!» Pilatus jan nama go: «Mbi pé aŋ gan kaŋgre pal’a?» Naa ge ke tuwaleya ma ga̰l ma gwan ne na janna go: «Be ge Kaysar to, i ne gan a̰me ge ɗogle to!» 16 Go mbe no, Pilatus ɓyan na nama tok go, nama pé na kaŋgre pal. A wan Jeso, a mbo ne na.
Pella ge Jeso ne kaŋgre pal
17 Na sḛ ka in na kaŋgre, wat ne suwal diŋ ya zum ndwara mbo swaga ge a ne tol na «Swaga pala kal» ya, ne wak ibriniya Golgota. 18 A swaga mbe go a pé na kaŋgre pal no poseya ne naa a̰me ma azi, na tok le no go, ne le ge may me, Jeso gá tuŋsi zi. 19 Pilatus njaŋge kaŋ a̰me, a gabe na na kaŋgre pala digi. Kaŋ mbe njaŋge go: «Jeso ge Nazaret, Gan ge Yuda ma ne.» 20 Yuda ma gḛ a ka isi kaŋ mbe, ago swaga ge a ne pé Jeso go ka gwa ne suwal. Kaŋ mbe njaŋge da ne Ibriniya ma wak, ne Roma ma wak, ne Grek ma wak me. 21 Yuda ma naa ge ke tuwaleya ma ga̰l jan Pilatus go: «Njaŋge go: ‹Gan ge Yuda ma ne› to, amma njaŋge go: ‹Ndu mbe jya̰ go, na gan ge Yuda ma ne ne›.» 22 Pilatus gwan ne nama janna go: «Kaŋ ge mbi ne njaŋge, mbi njaŋge na go.» 23 Swaga ge asagar ma tok ne á ne Jeso pella kaŋgre pal ɗe, a abe na ba̰r ma, a var nama se pe anda, asagar ge daage ɓol na ne ndwara, na ba̰r ge pul zi ge ga. Ba̰r mbe swaga a̰me ge yarra be kat to, zo zor ne digi cat mbo se. 24 Asagar ma jan ta go: «Taabe me nee na to, uusi me nee na baare na dé ndu a̰me ɗu», ne da pe fare njaŋgeya wak wi, njaŋge go: «A va ta mbi ba̰r ga̰l ma, a uusi baare ne mbi ba̰r pe.» No a kaŋ ge asagar ma ne ke ne. 25 Jeso ná ma ne na ná vya ge gwale, ne Maryam ge Klopas gwale, ne Maryam ge suwal Magdala ne, a ka mḛya Jeso kaŋgre ta gwa. 26 Swaga ge Jeso ne kwa na ná, ne kwa na ndu ge ame hateya ge na laar ne wa̰ na gḛ mḛya na ziyar go ɗe, jan na ná go: «Gwale, ndi mo vya!» 27 Jan na ndu ge ame hateya go: «Ndi mo ná!» Ne swaga mbe ya day, na ndu ge ame hateya mbe wan na nà ta diŋ.
Siya ge Jeso ne
28 Go̰r kaŋ mbe ma no go, ne jo̰ Jeso da ne kwarra go kaŋ ma wak wi go, ne wi fare ge ne njaŋge wak pe, jan go: «Mam njuwal ke mbi ya go!» 29 A e fal wiya ne oyo̰r jiya̰l ge ka̰mul swaga mbe go. a par ba̰r oyo̰r jiya̰l mbe pal, a fiŋli na hisop wak zi, a tyare na mbo na wak zi. 30 Swaga ge ne ame oyo̰r jiya̰l ge ka̰mul, jan go: «Kaŋ ma wak wi go!» Cwage na pala se, na o̰yom ndage.
Asagar a̰me tun Jeso na ziyar zi ne ra̰y
31 Ne jo̰ ka dam ge a ne nṵsi dam ɗigliya go ɗe, Yuda ma, ne viya̰ ge go a ya̰ duur kaŋgre pala digi dam ɗigliya go to pe, ne jo̰ dam ɗigliya mbe a dam ge ga̰l ne ɗe, a mbo ya Pilatus ta, a jan na go na ho̰ wak a há nama koo ma, a gabe nama duur ma ya se. 32 Asagar ma mbo ya, a hal ge zḛ ge koo ma, ne ge may koo ma me, ndwara go nama ge a ne pé nama poseya ge Jeso ma. 33 Swaga ge a ne mbo ya Jeso ta, a ɓol go na su su, da ne pe a há na koo ma to no. 34 Amma asagar a̰me ɗu ne na kaam buwal zi tun na ziyar zi ne na ra̰y, se se no, swama ma ne mam ɓul ya se. 35 Ndu ge ne kwa na ke sayda ne, sayda ge na ne a fareba. Na sḛ kwa go na jan fare ge fareba, ne da pe aŋ sḛ ma ho̰ fareba me. 36 Ago kaŋ mbe ma no a dé ya kerra ne da pe fare njaŋgeya wak wi, njaŋge go: «A mbo hal na kal a̰me to bat.» 37 Uwale, swaga a̰me njaŋge ya go go: «A mbo saŋge bama ndwara ndil na ge bama ne tṵ na.»
Eya ge Jeso ne táál zi
38 Go̰r kaŋ mbe ma no go, Yusuf ge suwal Arimate ne, na sḛ ka ndu ge ame hateya ge Jeso ne. Ne vo ge Yuda ma ne pe, ka ɗimil zi. Mbo ya ele Pilatus na ho̰ na viya̰ na gabe Jeso duur ya se. Pilatus vin na. Mbo, gabe na duur ya se. 39 Nikodemu, na ge ne mbo ɓol Jeso ɗaal zi mbo ya ne dukan mir ma ne alowes kirgiya, mbo kaŋ ge kilo tapolɗu go me. 40 A her Jeso, a twar na ba̰r mbul siya zi poseya ne dukan, hada mbul siya ge Yuda ma ne pal. 41 Gaaso a̰me ka ge swaga ge a ne pé Jeso kaŋgre pala digi ziyar go. Gaaso mbe zi, táál ge giya̰l, ge a ne é siya na zi ɗu to ka. 42 Ne dam ɗigliya ge Yuda ma ne nṵsiya pe, ne jo̰ táál mbe ka gwa ɗe, a é Jeso na zi.
Tanna ge Jeso ne
1 Dumas cya̰wak vḛ, swaga gale ne pisil pupurum, Maryam ge suwal Magdala ne mbo ya táál wak go, kwa go a viŋgri njal ya ne táál wak go uzi. 2 Gwan so mbo ɓol Siman Bitrus ma ne ndu ge ame hateya ge may, na ge Jeso laar ne wa̰ na, jan nama go: «A hé Bageyal ya swaga ne táál zi, i kwa swaga ge a ne é na ne go to.» 3 Bitrus ma ne ndu ge ame hateya ge may mbe a wat ya zum, a mbo táál wak ya. 4 Nama sḛ ma jwak, a ka sya dagre, amma ndu ge ame hateya ge may mbe sya waɗe Bitrus, det ya táál wak go zḛ, 5 hugi se, kwa ba̰r mbul siya ne kanna, amma wat zi ya to bat. 6 Siman Bitrus yan ne go̰r ya, wat táál se ya, kwa ba̰r mbul siya ne kanna, 7 ne ba̰r mbul siya ge a ne twa na pala me. Na sḛ no be kan dagre ne ba̰r mbul siya to, amma worge kanna swaga ge ɗogle go hini jyan. 8 Swaga mbe go no, ndu ge ame hateya ge ne dé ya zḛ mbe wat ya táál zi me, kwa kaŋ mbe ma, hon fareba. 9 Ago a be wan fare njaŋgeya ge ne jan go, Jeso mbo tan ne siya se digi pe to gale. 10 Ne go̰r go, a gwan bama yàl ma diŋ ya.
Jeso dyan tene Maryam ge suwal Magdala ne ta
11 Maryam gá mḛya táál wak zum, ka fyalla. Ne fyaso, ka hugi ndil swaga táál pul se ya, 12 kwa maleka ma azi ne ba̰r saal taɗak katɗa swaga ge a ne dó Jeso go, ɗu pala zḛ, ɗu koo se me. 13 A jan na go: «Gwale, mo te fyal gyana ɗaa?» Gwan ne nama janna go: «A her mbi Bageyal ya swaga, mbi kwa swaga ge a ne é na ne go to.» 14 Swaga ge ne jya̰ fare mbe no, saŋge tene se, kwa Jeso ne mḛya, amma wan pe go na Jeso ne to. 15 Jeso jan na go: «Gwale, mo te fyal gyana ɗaa? Mo ɓyare wuɗi ɗaa?» Ka dwat go na bage gaaso ne, jan na go: «Mbi bageyal, kadɗa mo hé na ne ɗe, ŋgay mbi swaga ge mo ne é na ne go, mbi ba mbo her na.» 16 Jeso tol na: «Maryam!» Saŋge tene se, jan na ne wak ibriniya go: «Rabbuni!» Na sḭ go, Bage hateya. 17 Jeso jan na go: «Kaage mo tage mbi to, ago mbi be ndé mbo mbi Bá ta ya to gale. Mo ɗe, mbo ɓol mbi ná vya ma, mo jan nama go, mbi ndé mbo mbi Bá, ne aŋ Bá ta ya, Dok ge mbi ne, ne Dok ge aŋ ne ta ya.» 18 Maryam ge suwal Magdala ne mbo waage naa ge ame hateya ma go: «Mbi kwa Bageyal, na fare ge ne jya̰ mbi ma no.»
Jeso dyan tene na naa ge ame hateya ma ta
19 Dam dumas mbe go, na gasamal, ne vo ge Yuda ma ne pe, naa ge ame hateya ma fé bama wak ne zok zi, Jeso mbo ya mḛ nama buwal zi, jan nama go: «Ka me halas!» 20 Swaga ge ne jya̰ fare mbe no, ŋgay nama na tok pul ma ne na ziyar. Swaga ge naa ge ame hateya ma ne kwa Bageyal, a ke laar saal ge be to. 21 Jeso gwan jan nama go: «Ka me halas! Dimma ne mbi Bá ne teme mbi ya go, mbi me, mbi teme aŋ.» 22 Swaga ge ne jya̰ fare mbe no, uusi nama pal, jan nama go: «Ame me O̰yom ge mbegeya. 23 Naa ge aŋ ne pore nama sone ma ya, a mbo ɓol poreya, naa ge aŋ ne pore nama sone ma ya to, a mbo ɓol poreya to me.»
Fare ɗaŋgreya ge Toma ne
24 Toma, na ge a ne tol na Bumurma, ɗu ne nama ge wol para azi ma buwal zi, swaga ge Jeso ne mbo ya be kat nama buwal zi to. 25 Naa ge ame hateya ge may ma jan na go: «I kwa Bageyal!» Amma jan nama go: «Kadɗa mbi kwa pyalaŋ ge ponde ne ma ya na tok ma go to, mbi pá mbi tok vya ma ya ponde ma byalam zi to, mbi pá mbi tok na ziyar zi to me, mbi hon fareba to bat.» 26 Dam tiimal go̰r go, naa ge ame hateya ma gwan kote ya zok zi, Toma kat poseya ne nama me. Zok wak ma ne dibiya, Jeso mbo ya mḛ nama buwal zi, jan nama go: «Ka me halas!» 27 Jan Toma go: «Tyare mo tok vya ya go go, ndi mbi tok pul ma no, tyare mo tok ya, pá na mbi ziyar zi, kaage mo kat ndu ge hon fareba to to, amma ka ndu ge hon fareba.» 28 Toma gwan ne na janna go: «Mbi Bageyal, mbi Dok!» 29 Jeso jan na go: «Ne mo ne kwa mbi pe, mo ho̰ fareba no’a? Nama ge a ne kwa to, ge a ne ho̰ fareba ma da ne laar saal.»
Maktub mbe njaŋge da ne da pe ɗaa
30 Jeso gwan ke kaŋ ŋgayya ge ɗogle ma gḛ na naa ge ame hateya ma ndwara go ge a ne njaŋge nama ne maktub mbe no zi to. 31 Amma a njaŋge kaŋ mbe ma no, ne da pe aŋ ho̰ fareba go Jeso Kris ne, a Dok Vya ne, aŋ ho̰ fareba, aŋ ɓo ndwara dḭl ge na ne zi.
Jeso dyan tene maŋgaɗam Tiberiya wak go
1 Go̰r go, Jeso gwan dyan tene uwale naa ge ame hateya ma ta maŋgaɗam Tiberiya wak go. Ndi, dyanna ge ne dya̰ tene nama ta no. 2 Siman Bitrus, ne Toma, na ge a ne tol na Bumurma, ne Natanayel ge Kanan ge suwal Galile ne, ne Zebede vya ma, ne na naa ge ame hateya ma ge ɗogle ma azi me, a ka dagre. 3 Siman Bitrus jan nama go: «Mbi mbo soso.» A jan na go: «I mbo dagre ne mo me.» A ne nama zut, a ndé fak go, ɗaal mbe zi, a wan a̰me to bat. 4 Swaga ge swaga ne ko̰y, Jeso mbo ya mḛ mam wak go, amma naa ge ame hateya ma wan pe go na Jeso ne to. 5 Jeso jan nama go: «Vya ma, aŋ sii ya go’a?» A gwan ne na janna go: «To!» 6 Jan nama go: «Dó me kool fak le tok matoson pal, aŋ ma̰ ɓol.» A dol na, nama pool kat ge zwal na ya digi to ne sii gḛ pe. 7 Ndu ge ame hateya ge Jeso laar ne wa̰ na gḛ jan Bitrus go: «A Bageyal ne!» Swaga ge Siman Bitrus ne za̰ go na Bageyal ne ɗe, kan na ba̰r na ta, zon mam, ago ka ko̰o̰l suli. 8 Naa ge ame hateya ge may ma mbo ne fak ya wakal zi ne sii kool zi wiya, ago a be kat kaal ne wakal to, mbo kaŋ ge tok pyaso ŋgayya kikis azi go. 9 Swaga ge a ne ka̰ bama koo ya se, a kwa ol ne sii ma na pal, ne katugum me. 10 Jeso jan nama go: «Abe me sii ge aŋ ne wá̰ ma ya mbut.» 11 Siman Bitrus ndé fak go, zwal kool ya wakal digi, wiya ne sii ga̰l kis para wara anuwa̰y pare ataa. Ne jo̰ sii gḛ go puy ɗe, kool be ryan to bat. 12 Jeso jan nama go: «Mbo me ya, zam kaŋzam!» Ne naa ge ame hateya ma buwal zi, ndu a̰me ge wan na dulwak ele na go: «Mo wuɗi ne», kat to bat, ago a kwa tyatyat go na Bageyal ne. 13 Jeso mbo ya, hé katugum, hon nama, ke ne sii go no me. 14 No a ge ndwara ataa ge Jeso ne dya̰ tene naa ge ame hateya ma ta, go̰r tanna ge na ne ne naa ge siya ma buwal zi go.
Fare eleya ge Jeso ne ele Bitrus
15 Swaga ge a ne á ne kaŋzam zamma go, Jeso jan Siman Bitrus go: «Siman ge Yohanna vya, mo laar hé mbi gḛ waɗe nama mbe ma no’a?» Siman gwan ne na janna go: «O̰, Bageyal, mo kwa kwa go mbi laar wa̰ mo wan.» Jeso jan na go: «Wá mbi tame vya ma.» 16 Gwan jan na ge ndwara azi: «Siman ge Yohanna vya, mo laar hé mbi he’a?» Siman gwan ne na janna go: «O̰, Bageyal, mo kwa kwa go mbi laar wa̰ mo wan.» Jan na go: «Koy mbi tame ma.» 17 Gwan jan na ge ndwara ataa go: «Siman ge Yohanna vya, mo laar wa̰ mbi wan’a?» Fare eleya ge Jeso ne ge ndwara ataa go: «Mo laar wa̰ mbi wan’a», mbe ke Bitrus yál, gwan ne na janna go: «Bageyal, mo kwa kaŋ ma kwa pet, mo kwa kwa go mbi laar wa̰ mo wan.» Jeso jan na go: «Wá mbi tame ma. 18 Fareba, fareba, mbi jan mo, swaga ge mo ne ka bool, mo ka vwal mo swaga pe ne bit ne, mo ka mbo swaga ge mo laar ne ɓyare go. Amma swaga ge mo ne mbo sabe ya, mo mbo ka abe mo tok digi, ndu ge ɗogle mbo vwal mo swaga pe, mbo gene mo swaga ge mo ne ɓyare go to.» 19 Jya̰ fare mbe no, ndwara ŋgay suya ge Bitrus ne, ne honna ge ne mbo hon Dok hormo. Jeso gwan jan na go: «Kare mbi pe.»
Jeso ma ne na ndu ge ame hateya ge na laar ne wa̰ na
20 Bitrus saŋge tene se, kwa ndu ge ame hateya ge Jeso laar ne wa̰ na ne kare na pe, na ge ne deŋge tene na ko̰o̰l zi swaga ge a ne ka zam kaŋzam go, na ge ne ele na go: «Bageyal, a wuɗi ɓyan mo naa tok go ne ɗaa?» 21 Swaga ge Bitrus ne kwa na, jan Jeso go: «Bageyal, ne bage no mbe ɗe, a gyana?» 22 Jeso gwan ne na janna go: «Kadɗa mbi ɓyare go na ka ɗiŋ gwanna ge mbi ne ya puy ɗe, pá mo ne zi da ɗaa? Mo ɗe, kare mbi pe.» 23 Fare dasare ná vya ma buwal zi go, ndu ge ame hateya mbe no mbo su to. Amma Jeso be jan Bitrus go na mbo su to to, jya̰ na go: «Kadɗa mbi ɓyare go na ka ɗiŋ gwanna ge mbi ne ya puy ɗe, pá mo ne zi da ɗaa?» 24 A ndu ge ame hateya mbe sḛ ke fare mbe ma sayda ne, a na sḛ njaŋge kaŋ mbe ma ne me. I kwa go sayda ge na ne fareba. 25 Uwale, Jeso ke kaŋ ge ɗogle ma gḛ, te go a njaŋge nama njaŋge ɗu ne ɗu, mbi dwat go, dunya go mwaɗak puy ne pool day ge ame maktub ge a ne njaŋge na pal ma̰ to.