Chɔ᷄ŋ 1

Dīōmndo̍ o̍ to̍sā mī wāŋnda̍ sɔ̄la̍ yōōmū kpe̍e̍kpe̍i̍yo̍ wo̍

1 Lɔ̍ɔ̍pa̍ bɛ̍ɛ̍ Mɛ̄lɛ̄ka̍ tōōsīāā chi̍e̍ēŋndo̍, ō nda̍ vēēlū āā, Dīōmndo̍ wo̍ ō wa̍ ni᷅ŋ. Ō nda̍ vēēlū ko̍ŋ āā, Dīōmndo̍ wo̍ ō wa̍ hɔ̄lāā tūlu̍ nda̍ Mɛ̄lɛ̄ka̍. Ndu̍yɛ̍, Dīōmndo̍ ho̍ō, ndu̍ ko̍ni̍ wa̍ Mɛ̄lɛ̄ka̍ ni̍. 2 Chɔ̍ŋ o̍ kāndɔ᷄ŋndo̍ pe̍kēkē, Dīōmndo̍ ho̍ō ō wa̍ hɔ̄lāā tūlu̍ nda̍ Mɛ̄lɛ̄ka̍. 3 Dīōmndo̍ ho̍ō, ndu̍ Mɛ̄lɛ̄ka̍ tōsa̍ a̍ sa̍bū mbo̍ tōsā nyɛ̄ o̍ nyɛ̄ fe̍e̍ ni̍. Nyɛ̄ o̍ nyɛ̄ cho̍ mbō kɛ̄ɛ̍ wā ndu̍ le̍ to̍o̍si̍a̍a̍ le̍. 4 Dīōmndo̍ ho̍ō, ndu̍ nɔ̍ yōōmū kpe̍e̍kpe̍i̍yo̍ o̍ bā ni̍. Ndu̍yɛ̍, yōōmū kōŋ ndu̍ wa̍ nyɛ̄ wa̍wo̍ŋndo̍ le̍ ŋ̄wāŋndā chīe̍e̍ ni̍. 5 Nyɛ̄ wa̍wo̍ŋndo̍ ho̍ō chō dīōndɔ̄ɔ̍ o̍ nyūmnda̍ŋ ni᷄ŋ. Ndu̍yɛ̍, nyūmnda̍ŋ mā nɔ̍lā ndu̍ nyūmī le̍. 6 Bōōndi̍i̍ pi᷅lɛ̍ mi̍ Mɛ̄lɛ̄ka̍ vīām lāŋu̍nɔ̄ pīlɛ̍, dīōla̍ŋ āā, Chɔ᷄ŋ. 7 Lāŋu̍nɔ̄ɔ̍ ho̍ō, ndu̍ hi᷅ŋ ni̍ le̍ mbō dīmu̍l ŋ̄wāŋndā chīe̍e̍ a̍ nyɛ̄ wa̍wo̍ŋndo̍ ho̍ō o̍kɔ̄ɔ̄ le̍ mī nda̍ kpo̍u̍ a̍ tu̍e̍ī yōōŋgū kālāa̍, ndu̍yɛ̍, mā lāāla̍ŋ. 8 Ō cho̍ Chɔ̍ŋ te̍ wa̍ nyɛ̄ wa̍wo̍ŋndo̍ ho̍ō le̍. Chɔ᷄ŋ ndu̍ hi᷅ŋ māhūnāā le̍ mbō dīmu̍l wāŋnda̍ a̍ nyɛ̄ wa̍wo̍ŋndo̍ ho̍ō o̍kɔ̄ɔ̄. 9 Wāna̍ cho̍ ho̍ō māā tē ō hīŋ o̍ chi̍e̍ēŋndo̍ chōo̍ pɛ̍, ō hu᷄ŋ ke᷅ ŋ̄wāŋndā chīe̍e̍ kpo̍u̍ nyɛ᷅ wa̍wo̍ŋndo̍ wo̍, wānā ko̍ŋ, ndu̍ cho̍ nyɛ̄ wa̍wo̍ŋ kpe̍e̍kpe̍i̍yo̍ ni̍. 10 Ō wa̍ o̍ chi̍e̍ēŋndo̍ chōo̍. Ndu̍yɛ̍, ndu̍ Mɛ̄lɛ̄ka̍ tōsa̍ a̍ sa̍bū ni̍ mbo̍ tōōsīāā chi̍e̍ēŋndo̍. Kɛ̍, o̍ ko̍ŋ ni̍ŋ kpo̍u̍, wāŋnda̍ o̍ chi̍e̍ēŋndo̍ ni᷄ŋ ā chu̍e̍ ndu̍ mɛ̄ɛ̍ o̍ cho̍ yɛ̍ le̍. 11 Mbo̍ hūŋ o̍ lɛ̄ŋndē ndɔ̄le̍ŋ ni᷄ŋ. Kɛ̍, wānāā ndūa̍a̍ o̍ lɛ̄ŋndē ndɔ̄le̍ŋ ni᷄ŋ a̍ chɛ̍l ndu̍ le̍. 12 Wāŋnda̍ ā ti᷄ŋ ko̍ni̍ a̍ chɛ̍l ndu̍ ma̍ dūāū tīīnda᷄ŋ ndāa̍ o̍ ndu̍ ni̍ŋ ni̍. Le̍ he̍ī, a̍ chɛ̍l ka̍ŋ ndu̍ wa̍, nda̍ o̍ to̍sa̍ a̍ sa̍bū ni̍ ma̍ sīmnu᷄ŋ chu̍a̍u̍wāā Mɛ̄lɛ̄ka̍. 13 Ndu̍yɛ̍, sīmnɔ᷄ŋ nda̍ sīmnu᷄ŋ chu̍a̍u̍wāā Mɛ̄lɛ̄ka̍ wo̍, ō cho̍ su̍ɛ̍i̍ yɔ̍nūŋ o̍ nɛ̄i̍ īwāna̍ chi̍e̍e̍ya̍ ni᷄ŋ te̍. Ko̍ŋ cho̍ ni̍, ā vīlu̍ŋ mɛ̄ɛ̍ fi̍nyāa̍ chi̍e̍ēŋ na̍nu᷄ŋ a̍ vi̍a̍lū chu̍a̍ūwa̍ yɛ̍ le̍. Mɛ̄lɛ̄ka̍ pi̍la̍ to̍sa̍ ni̍ ma̍ sīmnu᷄ŋ chu̍a̍u̍wāā ndɔ̄. 14 Mi̍ ō nda̍ vēēlū ko̍ŋ āā, Dīōmndo̍ wo̍ sīmnu᷄ŋ wa᷅na̍ chi̍e̍e̍. Mbo̍ hu᷄ŋ wa᷅ na̍a̍ tɛ̄ɛ̄ŋ. Mi̍ ŋ̄ chā nāŋɔ̄ɔ̄ ndɔ̄ɔ̍, nāŋɔ̄ɔ̄ o̍ sɔ̍la̍ le̍ mɛ̄ɛ̍ o̍ cho̍ Mɛ̄lɛ̄ka̍ fi̍nyāa̍ Po̍ ndɔ̄ pi᷅lɔ̍ɔ̍ wo̍ yɛ̍. O̍ nāŋɔ̄ɔ̄ ndɔ̄ɔ̍ ho̍ō ni᷄ŋ, mbo̍ tōsāl na̍a̍ kɛ̄ndɛ̄ī bɛ̍ndū sa̍na̍a̍ a̍ kāālā o̍ ka̍a̍la̍ na̍a̍ wo̍. Ndu̍yɛ̍ o̍ ko̍ŋ kɔ̍ɔ̍lī, mbo̍ chɔ̄m na̍a̍ wa̍la̍ŋ o̍ ka̍ā ndɔ̄ɔ̍ ni᷄ŋ mɛ̄ɛ̍ Mɛ̄lɛ̄ka̍ chō yɛ̍. 15 Mi̍ Chɔ᷄ŋ di̍mī a̍ ndu̍ o̍kɔ̄ɔ̄. Mbo̍ dīmī chōo̍ cho̍o̍ āā, “Wāna̍ ya̍ I̍ wa̍ sūɛ̍i̍ a̍ ndu̍ o̍kɔ̄ɔ̄ wo̍, ndu̍ cho̍ ho̍ō ni̍. Ndu̍ ya̍ di̍mi̍ ni̍, a̍a̍, ‘Wānā cho̍ hūnɔ̄ɔ̄ ya̍ kɔ̄ɔ̄lī, ō chō ō bɛ̄ndū ō hīōū ya̍. Kāni̍ lɔ̍ɔ̍pa̍ bɛ̍ɛ̍ nda̍ vīālū ya̍ ō wa̍ ni᷅ŋ.’ ” 16 Ō chō wāna̍ īkɛ̄ndɛ̄ bɛ̄ndū bɛ̍ndū nāa̍ na̍a̍ chūā. Le̍ he̍ī, mbo̍ dūāū na̍a̍ kpo̍u̍ sa̍lā ta̍u̍ te̍le̍ŋnda̍ fa̍ŋgā fa̍ŋgā. 17 Sāwāla̍ŋ nda̍ŋ, la̍ŋ Mɛ̄lɛ̄ka̍ yɔ̄ŋgu̍ Mūu̍sē le̍ ŋ̄wāŋndā chīe̍e̍ ni̍. Kɛ̍, nyɛ̄ Mɛ̄lɛ̄ka̍ yɔ̄ŋgu̍ Chi̍i̍sū Ki̍li̍tī le̍ na̍a̍ wo̍, ndu̍ cho̍ kɛ̄ndɛ̄ī bɛ̍ndūī o̍ to̍sa̍l na̍a̍ ve̍ ni̍, kɛ̄ndɛ̄i̍ o̍ to̍sa̍l na̍a̍ sa̍na̍a̍ a̍ kāālā o̍ ka̍a̍la̍ na̍a̍ wo̍, a̍ chɔ̄m o̍ chɔ̍m na̍a̍ wa̍la̍ŋ o̍ ka̍ā ndɔ̄ɔ̍ ni᷄ŋ mɛ̄ɛ̍ Mɛ̍lɛ̄ka̍ chō yɛ̍ wo̍. 18 Wānā o̍ wānā chi̍ wɔ̍ Mɛ̍lɛ̄ka̍ lēpīlɛ̍ bɛ̍ɛ̍ le̍. Kɛ̍, wāna̍ cho̍ ho̍ō Mɛ̄lɛ̄ka̍ Po̍ ndɔ̄ pi᷅lɔ̍ɔ̍ wo̍, mbo̍ wā vɛ̄lɛ̄ Mɛ̄lɛ̄ka̍ wo̍, o̍ ko̍ŋ kɔ̍ɔ̍lī, mbo̍ wā Mɛ̄lɛ̄ka̍ fi̍nyāa̍ īkɛ̄i̍ yo̍, wānā ko̍ŋ, ndu̍ chɔ̍m wāŋndā chīe̍e̍ya̍ kpe̍nde̍ke̍le̍ wāna̍ Mɛ̄lɛ̄ka̍ chō wo̍ ni̍.

Yōōŋgū Chɔ᷄ŋ Wānā Yi̍ŋāa̍ hīŋ ndo̍

19 Mi̍ wānāā bɛ̄ndūāā Chu̍ūwa̍ a̍ cho̍ Chūlu̍sɛ̄lɛ̄m nda̍, vīām wānāā sōlīāā lāsa̍lāa̍, nda̍ wānāa̍ ma̍lā o̍ chīɛ̍i̍ Mɛ̄lɛ̄ka̍a̍ ni᷄ŋ nda̍, nāa̍ Chɔ᷄ŋ Wānā Yi̍ŋāa̍ chūā. Ma̍ vīām nda̍ le̍ mā nyūna̍ Chɔ᷄ŋ āā, “Wāna̍ māāvɛ̄ɛ̍nɛ̍ ŋ̄ chō yɛ̄?” 20 Chɔ᷄ŋ o̍ kɛ̍ɛ̍ le̍ nda̍ dīōm mūlī le̍. Mbo̍ chɔ̄m nda̍ kpe̍nde̍ke̍le̍. Nyɛ̄ o̍ di̍mi̍ a̍ ndu̍ pi̍la̍ o̍kɔ̄ɔ̄ wo̍ ndu̍ cho̍ ho̍ō ni̍. Mbo̍ dīmūl nda̍ āā, “Ō cho̍ ya̍ le̍ cho̍ Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ le̍.” 21 Ma̍ nyūnā ndu̍ āā, “Mɛ̄ɛ̍ wāna̍ māāvɛ̄ɛ̍nɛ̍ ŋ̄ chō yɛ̄? Bāā nu᷄m cho̍ wāna̍ su̍a̍ā le̍ Mɛ̄lɛ̄ka̍ wo̍ Īla̍a̍chā ni̍?” Mi̍ Chɔ᷄ŋ mu̍lī āā, “Ɛ̄ ɛ̍, ō cho̍ ya̍ le̍ cho̍ Īla̍a̍chā le̍.” Ma̍ nyūnā ndu̍ āā, “Bāā nu᷄m cho̍ wāna̍ su̍a̍ā ko̍ŋ le̍ Mɛ̄lɛ̄ka̍ wo̍ ni̍?” Mbo̍ mūlī āā, “Ɛ̄ ɛ̍.” 22 Ma̍ lō o̍ ko̍ŋ ma̍ dīmūl Chɔ᷄ŋ āā, “Mɛ̄ɛ̍ chɔ̄m na̍a̍ wāna̍ ŋ̄ chō wo̍. Ŋ̄ nɔ̄ mī ŋ̄ kɔ̍ di̍mūl wānāa̍ ve᷅m na̍a̍ wa̍ mɛ̄ɛ̍ ŋ̄ chō mūlī yɛ̍. Yɛ̄ɛ̍nɛ̍ ŋ̄ nɔ̄ yɛ̄ le̍ dīmī a̍ nūm pi̍la̍ o̍kɔ̄ɔ̄?” 23 Mi̍ Chɔ᷄ŋ mu̍lī mɛ̄ɛ̍ wāna̍ su̍a̍ā le̍ Mɛ̄lɛ̄ka̍ wo̍ Āīsa̍yā di̍mi̍ yɛ̍. Mbo̍ dīmī āā, “ ‘Ya̍ ya̍ I̍ cho̍ māchūāā wāŋndo̍ o̍ cho̍ yōndāa̍ o̍ po̍llo̍ ni᷄ŋ ndo̍ āā, Lā tōōsi̍a̍a̍ nɛ̍īyo̍ sa̍kpō le̍ Māsānɔ̄ɔ̍ Mɛ̄lɛ̄ka̍.’ ” 24 Mi̍ wānāā ku̍ndā Fālīsi̍īya̍ vēm nda̍ dīmūl Chɔ᷄ŋ āā, 25 “Mɛ̄ɛ̍ ŋ̄ dīmi̍ māā ō cho̍ nu᷅m te̍ cho̍ Ki̍li̍tī le̍ yɛ̍, ndu̍yɛ̍, māā ō cho̍ nūm te̍ cho̍ Īla̍a̍chā le̍, ō cho̍ yɛ̍ nūm te̍ cho̍ wāna̍ su̍a̍ā ko̍ŋ le̍ Mɛ̄lɛ̄ka̍ wo̍ le̍, mɛ̄ɛ̍ vɛ᷅ ni᷅ŋ ma̍ wā wāŋnda̍ yīŋɔ̄ɔ̍?” 26 Mi̍ Chɔ᷄ŋ lo᷅ o̍ ko̍ŋ mbo̍ mūlī āā, “Ya̍ ya̍ a̍ mɛ̄ŋnda̍ŋ ya̍ I̍ pu̍lū wa᷅ŋnda̍ pūlɔ̄ɔ̍ Mɛ̄lɛ̄ka̍a̍ ni̍. Kɛ̍, wānā pu̍m chō nya̍ tɛ̄ɛ̄ŋ lā si̍nā wa᷅na̍ o̍ cho̍ wo̍ le̍. 27 Tē I̍ fa̍ŋa̍ŋ pɛ̍, wānā ko̍ŋ ndu̍ cho̍ hūnɔ̄ɔ̄ ya̍ kɔ̄ɔ̄lī ni̍. I̍ cho̍ bɛ̍ɛ̍ o̍ sɔ᷅vɛ̍ mī ti̍mbi̍ yūēī ndūɛ̍i̍ lākɔ̄ɔ̄vɛ̄i̍ye̍ le̍.” 28 Bɛ̍ta̍nī chi̍e̍e̍ sɔ̄ɔ̍ŋ mu᷅ŋ kpo̍u̍ ŋ̍ yɔ̍nu̍ŋ ni̍, Chɔ̍ɔ̍dāŋ le̍e̍lōo̍, kūmbū pāa̍le̍ŋ lē chāŋ ndo̍, o̍ fo̍ndāŋ Chɔ᷄ŋ wa̍ wāŋnda̍ yīŋɔ̄ɔ̍ wo̍.

Wāna̍ to̍sa̍ mi̍ chi̍e̍ēŋndo̍ sɔ̄lā mālɔ̄ɔ̍ le̍ yɔ̄ŋ wɔ̄ɔ̍ŋndo̍ wo̍

29 Dīi̍mā ndɔ̄ɔ̍ pīlɔ̍ɔ̄, mi̍ Chɔ᷄ŋ cha᷅ Chi̍i̍su̍ hūnɔ̄ɔ̍ nāa̍ ndu̍ chu̍a̍. Mɛ̄ɛ̍ o̍ che᷅ ndu̍ hūnɔ̄ɔ̍, mbo̍ dīmī āā, “Mi̍ lā che᷄ŋ Sa̍a̍ Mɛ̄lɛ̄ka̍a̍. Ndu̍ cho̍ wāna̍ to̍sa̍ mi̍ chi̍e̍ēŋndo̍ sɔ̄lā mālɔ̄ɔ̍ le̍ yɔ̄ŋ wɔ̄ɔ̍ŋndo̍ wo̍ ni̍. 30 Wāna̍ ya̍ I̍ wa̍ sūɛ̍i̍ a̍ ndu̍ o̍kɔ̄ɔ̄ wo̍, ndu̍ cho̍ ho̍ō ni̍. Ndu̍ ya̍ I̍ di̍mi̍ ni̍ a̍a̍, ‘Wānā cho̍ hūnɔ̄ɔ̄ ya̍ kɔ̄ɔ̄lī, ō chō ō bɛ̄ndū ō hīōū ya̍. Kāni̍, lɔ̍ɔ̍pa̍ bɛ̍ɛ̍ nda̍ vīālū ya̍ ō wa̍ ni᷅ŋ.’ 31 Kɛ̍, ya̍ i̍i̍ si̍nā ndu̍ le̍. Kɛ̍ ndu̍yɛ̍, le̍ sa̍bū ya̍ I̍ wa̍ wāŋnda̍ yīŋɔ̄ɔ̍ o̍ mɛ̄ŋnda̍ŋ ni᷄ŋ ndo̍ cho̍ ni̍, māā le̍ mī I̍ to̍sa̍ mī wāŋnda̍ I̍sɔ̄lūɛ̄ī a̍ si̍na̍ wāna̍ o̍ cho̍ wo̍.” 32-33 Mi̍ Chɔ᷄ŋ chɔ᷅m nyɛ̍ yɔ̍nu̍ŋ ndo̍ kpe̍nde̍ke̍le̍. Mbo̍ dīmī āā, “Kāni̍, mi̍ Mɛ̄lɛ̄ka̍ o̍ ve᷅m ya̍ le̍ wāŋnda̍ pūlɔ̄ɔ̍ o̍ mɛ̄ŋnda̍ŋ ni᷄ŋ ndo̍ dīmūl la̍ āā, ‘Ā chō wāŋndo̍ chɔ̄ mī Nyi̍nā nūu̍ tōl ndu̍ kɔ̄ɔ̄lī, ndu̍yɛ̍, mbō wa̍ ndu̍ kɔ̄ɔ̄lī. Wānā ko̍ŋ, ndu̍ cho̍ wāna̍ cho̍ wāŋnda̍ pūlɔ̄ɔ̄ a̍ Nyi̍na̍ Nūu̍ wo̍ ni̍.’ ” Mi̍ Chɔ᷄ŋ di̍mī āā, “Tē Mɛ̄lɛ̄ka̍ ndu̍ o̍o̍ di̍mu̍l la̍ le̍nde̍ le̍ I̍ ve̍ wa̍nā ka̍lāa̍ sīnā le̍. Kɛ̍ ndu̍yɛ̍, o̍ ko̍ŋ kɔ̍ɔ̍lī, mi̍ cha᷅ mi̍ Nyi̍na̍ Mɛ̄lɛ̄ka̍a̍ cha᷄ŋ o̍ fo̍nda᷄ŋ Mɛ̄lɛ̄ka̍a̍ o̍ īka᷅ŋgbo̍ mbo̍ tūāl ndu̍ kɔ̄ɔ̄lī, ndu̍yɛ̍, mbo̍ wā ndu̍ kɔ̄ɔ̄lī. 34 Mi̍ cha᷅ pɛ̍ɛ̍ŋ mi̍ he̍ī yɔ̄nu᷄ŋ. Ndu̍yɛ̍, mī di̍mu̍l nya̍ kpe̍nde̍ke̍le̍, lāŋu̍nɔ̄ɔ̍ ho̍ō, ndu̍ cho̍ Po̍ Mɛ̄lɛ̄ka̍a̍ ni̍.”

Wānāā tāsi̍a̍a̍ a̍ si̍mnu᷄ŋ bu̍ɛ̍īya̍ le̍ Chi̍i̍sū wa̍

35 Dīi̍mā ndɔ̄ɔ̍, Chɔ᷄ŋ nda̍ bu̍ɛ̍i̍yāā ndūāā ŋi̍ɔ̍ɔ̍ŋnda̍ ā wa̍ vɛ̄lɛ̄ o̍ fo̍ndāŋ kōŋ. 36 O̍ ko̍ŋ, mi̍ Chɔ᷄ŋ cha᷅ Chi̍i̍su̍ hīōūwɔ̄ɔ̍. Chɔ̄ɔ̍ ndu̍ hīōūwɔ̄ɔ̍, mbo̍ dīmī āā, “Mi̍ lā che᷄ŋ sa̍a̍ Mɛ̄lɛ̄ka̍a̍.” 37 Mi̍ bu̍ɛ̍i̍yāā ŋīɔ̍ɔ̍ŋnda̍ ha̍ā tūɛ̄ī nyɛ̄ Chɔ᷄ŋ di̍mi̍ wo̍. O̍ ko̍ŋ, ma̍ tūāl Chi̍i̍su̍ kɔ̄ɔ̄lī. 38 Mi̍ Chi̍i̍sū mūli᷄ŋ mbo̍ chā nda̍ ā chō ndu̍ hūnɔ̄ɔ̍ kɔ̄ɔ̄lī. Mbo̍ nyūnā nda̍ āā, “Lā vɛ᷅ hūnɔ̄ɔ̍?” Ma̍ mūlī āā, “Kūɛ̍ɛ̍nɛ̍ ŋ̄ chō yɛ̄ o̍ yīya̍, Lūābo̍nī?” Ko̍ŋ cho̍ ni̍, Ti̍chā. 39 Mi̍ Chi̍i̍sū di̍mūl nda̍ āā, “Lā hu᷄ŋ mī lā hu᷄ŋ to̍fā nāa̍ ya̍ cho̍ o̍ yīya̍ wa̍.” Ma̍ kūā nda̍ nda̍ā. Ma̍ chā nāa̍ o̍ wa̍ o̍ yīya̍a̍ wa̍. Pāa̍le̍ŋ lē wa̍ ni᷅ŋ lē yɔ̄ŋga᷄ŋ. Ma̍ lō ni̍ko̍ lo̍ŋ nda̍ nda̍ā mi̍ pāa̍le̍ŋ lē sīōū dēlɔ̄ɔ̄. 40 Bu̍ɛ̍i̍yāā ŋīɔ̍ɔ̍ŋāa̍ tu̍e̍ī nyɛ̄ Chɔ᷄ŋ di̍mi̍ wo̍, ndu̍yɛ̍, ma̍ tūāl Chi̍i̍su̍ kɔ̄ɔ̄lī wa̍, ō pīlɔ̍ɔ̄ ndu̍ o̍o̍ nɔ̍ dīōla̍ŋ ni̍ āā, A̍ndūlū, pɔ̄mbɔ̄ɔ̍ Sa̍i̍mɔ̄ŋ Pītɛ̍. 41 Mi̍ A̍ndūlū ko̍ŋ ku̍ā lēpīlɛ̍ kpe̍, mbo̍ kɔ̍ nu̍u̍vīāā Sa̍i̍mɔ̄ŋ bɛ̍ ndɔ̄. Mbo̍ dīmūl ndu̍ āā, “Ŋ̄ sāālu̍ŋ wa᷅na̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, ō na̍a̍ ŋ̄ vēēlū āā, Mɛ̄sa̍yā wo̍.” Ki̍li̍tīla̍ŋ la̍ cho̍ yɛ̄ la̍ŋ o̍ Hi̍būlūi̍ye̍ ni᷄ŋ ni̍. 42 O̍ ko̍ŋ, mbo̍ kūā a̍ Sa̍i̍mɔ̄ŋ nāa̍ Chi̍i̍sū chu̍a̍. Mi̍ Chi̍i̍sū to̍fā Sa̍i̍mɔ̄ŋ. Mbo̍ dīmī āā, “Nūm te̍ cho̍ Sa̍i̍mɔ̄ŋ, po̍ Chɔ᷄ŋ ndo̍ le̍? Ā chō nu̍m ni᷅ŋ wā vēēlōo̍ āā, Sɛ̍fa̍sī.” Pītɛ̍la̍ŋ la̍ cho̍ yɛ̄ la̍ŋ ni̍, ko̍ŋ cho̍ māchūāā ni̍ āā, pōūwo̍.

Chi̍i̍sū ve̍e̍lu̍ Fi̍li̍pī nda̍ Nāta̍nīɛ̄l

43 Dīi̍mā ndɔ̄ɔ̍, mi̍ Chi̍i̍sū kɛ̍ɛ̍sīāā le̍ kɔ̄la̍ŋ o̍ lɛ̄ŋndē Kāli̍līle̍ŋ ni᷄ŋ. Mɛ̄ɛ̍ o̍ wa̍ kɔ̄la̍ŋ, mbo̍ kōmāl po̍ pi᷅lɛ̍ dīōla̍ŋ āā, Fi̍li̍pī. Mbo̍ dīmūl ndu̍ āā, “To̍l la̍ kɔ̄ɔ̄lī.” 44 Ndu̍yɛ̍, Bɛ̄tīsa̍i̍dā chi̍e̍e̍ Fi̍li̍pī ko̍ŋ wa̍ īchāli̍ ni̍, A̍ndūlū ni̍, a̍ Pītɛ̍ o̍ nda̍ lo̍ chi̍e̍e̍. 45 O̍ ko̍ŋ kɔ̍ɔ̍lī, mi̍ Fi̍li̍pī nu̍u̍vīāā Nāta̍nīɛ̄l. Mbo̍ dīmūl ndu̍ āā, “Wāna̍ Mūu̍sē po̍o̍nyi̍a̍a̍ a̍ ndu̍ o̍kɔ̄ɔ̄ o̍ Yāu̍ Sāwāla̍ Mɛ̄lɛ̄ka̍la̍ŋ ni᷄ŋ, ndu̍yɛ̍, mi̍ wānāa̍ su̍a̍ā le̍ Mɛ̄lɛ̄ka̍ wa̍ bɛ̍ɛ̍ a̍ po̍o̍nyīāā a̍ ndu̍ o̍kɔ̄ɔ̄ wo̍, ŋ̄ sāālu̍ŋ ndu̍. Chōo̍sɛ̍ ho̍ō Na̍a̍sa̍lūɛ̄ī po̍ ndɔ̄ɔ̍ Chi̍i̍sū ni̍.” 46 Mi̍ Nāta̍nīɛ̄l lo᷅ lo̍ŋ mbo̍ nyu̍nā āā, “Na̍a̍sa̍lūɛ̄ī? Wānā wa̍ā lo̍ŋ nɔ̍lā mbō tōsa̍ sūɛ̍i̍ wāŋnda̍ sɔ̄la̍ tɔ̄nɔ̄ le̍ni̍ŋ?” Mi̍ Fi̍li̍pī mu̍lī āā, “Hu̍ŋ mā hu̍ŋ to̍fā.” 47 Mɛ̄ɛ̍ Chi̍i̍sū che᷅ Nāta̍nīɛ̄l hūnɔ̄ɔ̍ nāa̍ ndu̍ chu̍a̍, mbo̍ dīmī a̍ ndu̍ o̍kɔ̄ɔ̄ āā, “I̍sɔ̄lu̍ɛ̍i̍nɔ̍ kpe̍e̍kpe̍i̍yo̍ cho̍ ho̍ō ni̍, o̍ hu̍ī wa̍nā o̍ wānā le̍ wo̍.” 48 Mi̍ Nāta̍nīɛ̄l nyu̍nā Chi̍i̍sū āā, “Vɛ̄ɛ̍nɛ̍ ŋ̄ lōōku̍ yɛ̄ sīnā wāna̍ su̍u̍ ya̍ I̍ cho̍ wo̍?” Mi̍ Chi̍i̍sū mu̍lī āā, “I̍ che᷅ nu̍m bōōndi̍i̍ ŋ̄ wa̍ o̍ yɔ̄m fi̍kīi̍yo̍ bɛ̄ŋgu̍, mi̍ Fi̍li̍pī ve̍e̍lū nu̍m nde̍.” 49 Mi̍ Nāta̍nīɛ̄l di̍mī āā, “Ti̍chā, nūm kpe̍e̍kpe̍i̍ cho̍ Po̍ Mɛ̄lɛ̄ka̍a̍ ni̍. Nu᷄m cho̍ Māsā Bɛ̍ndōo̍ le̍ wāŋnda̍ I̍sɔ̄lūɛ̄ī ni̍.” 50 Mi̍ Chi̍i̍sū nyu̍nā ndu̍ āā, “Le̍ mɛ̄ɛ̍ ya̍ I̍ di̍mi̍ māā mi̍ cha᷅ nu̍m o̍ yɔ̄m fi̍kīi̍yo̍ bɛ̄ŋgu̍ yɛ̍, le̍la̍ŋ, ŋ̄ lāāla̍ŋ bɛ̍ɛ̍ ni̍? Ā chō sɔ̄ɔ̍ŋ kɔ̄ndɔ̄fi̍li̍ŋ chēle̍ŋ chɔ̄ mbō hīōū he̍ī.” 51 Mi̍ Chi̍i̍sū di̍mī āā, “Mī di̍mu̍l nya̍ tōnya̍a̍ wa̍la̍ŋ, lā chō chɔ̄ mī dīo̍o̍ kūmbi̍ŋ o̍ ɛ̄chɛ̍nɛ̄. O̍ ko̍ŋ, lā chā ni̍ŋ mī ki̍i̍la̍a̍ Mɛ̄lɛ̄ka̍a̍ hīŋ nāa̍ wa᷅na̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ chūā mā hēl ɛ̄chɛ̍nɛ̄ mā tūāl.”

Chɔ᷄ŋ 2

Chi̍i̍sū to̍sa̍ kɔ̄ndɔ̄fi̍llo̍ o̍ bɔ̄ŋa᷅ŋ nɔ̄ɔ̍ Ke̍nā chi̍e̍e̍

1 O̍ ko̍ŋ kɔ̍ɔ̍lī, mɛ̄ɛ̍ pālɛ̍i̍ ī hīōū ī ŋīi̍ŋ, o̍ yāa̍ ndɔ̄ɔ̍ bɔ̄ŋa᷅ŋ nɔ̄ kɛ̍sīa̍a̍ ō wa̍ Ke̍nā chi̍e̍e̍ o̍ lɛ̄ŋndē Kāli̍līle̍ŋ ni᷄ŋ. Chi̍i̍sū kāla̍ ndɔ̄ wa̍ lo̍ŋ. 2 Chi̍i̍sū bɛ̍ɛ̍, nda̍ bu̍ɛ̍i̍yāā ndūa̍a̍, ma̍ sɔ̄lā vēēlōo̍ le̍ wāa̍ o̍ bɔ̄ŋa᷅ŋ nɔ̄ kɛ̍sīa̍a̍ ho̍ō. 3 O̍ ko̍ŋ, mi̍ mūɛ̄īmā nda̍ wa̍ kōlɔ̄ɔ̍ wa̍ŋ mā chūū pa̍ku̍. Tē ī yɔ̄nu̍ŋ le̍nde̍ pɛ̍, Chi̍i̍sū kāla̍ ndɔ̄ di̍mūl ndu̍ āā, “Mūɛ̄īya̍ŋ mā chūū nda̍ o̍ bā.” 4 Mi̍ Chi̍i̍sū mu̍lī āā, “Mī vɛ̄ɛ̄ ya̍ I̍ yɔ̍ŋ yɛ̄, wɛ̄ɛ̄ŋndo̍? Bōōndi̍i̍ nīi̍ ya̍ nɔ̍ mī to̍sa̍ nyɛ̄ ve̍ ī fūūlu̍u̍ wɔ̍ le̍.” 5 O̍ ko̍ŋ, mi̍ Chi̍i̍sū kāla̍ ndɔ̄ di̍mūl bu̍ɛ̍i̍yāa̍ wa̍ nyɛ̄ dīa̍a̍ pīɔ̄ūwo̍ wa̍ āā, “Nyɛ̄ o̍ nyɛ̄ o̍ di̍mu̍l nya̍ le̍ tōsāa̍ pɛ̍, lā tōsa̍.” 6 O̍ Mɛ̄lɛ̄ka̍ ndā pi̍ɛ̍i̍yāa̍ ni᷄ŋ, Chu̍ūwa̍ nda̍ a̍a̍ nɔ̍ sāwāla̍ŋ ta̍u̍ a̍ mɛ̄ɛ̍ nda̍ pūlū nda̍ pi̍la̍ yɛ̍, a̍ mɛ̄ɛ̍ nda̍ tūēī nyɛ᷅m nda᷄ŋ yɛ̍. Le̍ he̍ī, nda̍ a̍a̍ nɔ̍ kpɛ̍ɛ̍nɛ̍ŋ pōūwo̍ŋ mu̍ŋ ŋɔ̍mpu᷅m le̍ mɛ̄ŋnda̍ŋ. Kpɛ̍ɛ̍nɛ̍ŋ mu̍ŋ ī pīlɛ̍ ndi̍ i̍i̍ chu̍ā mɛ᷅ŋnda̍ŋ ti᷅ŋnda̍ŋ lā ŋūɛ̍ɛ̍nu̍, ɔ̄ɔ̄, lā ŋɔ᷄mpu᷅m. 7 O̍ ko̍ŋ kɔ̍ɔ̍lī, mi̍ Chi̍i̍sū di̍mūl bu̍ɛ̍i̍yāā kāŋ āā, “Lā dɔ̄u̍ mɛ᷅ŋnda̍ŋ o̍ kpɛ̍ɛ̍nɔ̍ŋ mu᷅ŋ ni᷄ŋ mī lā pēi̍.” O̍ ko̍ŋ, ma̍ dūāū mɛ̄ŋnda̍ŋ o̍ kpɛ̍ɛ̍nɔ̍ŋ mu᷅ŋ ni᷄ŋ mi̍ mā pīā yɛ̍ŋgi̍ yɛ̍ŋgi̍. 8 Mɛ̄ɛ̍ nda̍ dɔ̄ū, mbo̍ dīmūl nda̍ āā, “Lā kɔ̄ndu̍ ni̍ko̍ mī lā yōu̍ wāna̍ cho̍ bɔ̄ŋa᷅ŋndo̍ bōlle̍ŋ ndo̍.” Ma̍ kūāndū ma̍ yōū wāna̍ wa̍ bɔ̄ŋa᷅ŋndo̍ bōlle̍ŋ ndo̍. 9 Mbo̍ kōl nyɛ̄ pɔ̄mbɔ̄. Ndu̍yɛ̍, mɛ̄ŋnda̍ŋ ma᷅ŋ ma̍ a̍a̍ si̍mnu᷄ŋ ni᷅ŋ māmūɛ̄ī. Kɛ̍, ndu̍ o̍o̍ si̍nā ba᷅ bu̍ɛ̍īya̍ ha̍ā ā fūla̍ a̍ ma̍ŋ ndo̍ le̍. Kɛ̍, bu̍ɛ̍i̍yāa̍ kɔ̍ndū ma̍ chūū ndu̍ wa̍ nda̍ nda̍ a̍a̍ sīna̍ bā ma̍ fu̍la̍ wo̍. O̍ ko̍ŋ, mi̍ wāna̍ wa̍ bɔ̄ŋa᷅ŋndo̍ bōlle̍ŋ ndo̍ vēēlū wāna̍ wa̍ la̍nɔ̍ɔ̍ chūa̍a̍ wo̍. 10 Mbo̍ dīmūl ndu̍ āā, “O̍ bɔ̄ŋa᷅ŋndā wāā nu̍a̍ā chōo̍, mūɛ̄īmā kɛ̄ndɛ̄ kɛ̍ndīa̍ŋ fɛ̍lɛ̍ŋ wānā ke᷅ mi̍ālla̍. Tē ā ko᷄l ni᷅ŋ pɛ̍ ta̍u̍, wānā mɛ̍ɛ̍lu̍ nda̍ ma̍ ni̍ŋ la̍pi̍ le̍ wa̍ŋ kē. Kɛ̍, vɛ᷅ mi̍ nya̍ nya̍ kɛ̄sī mūɛ̄īmā kɛ̄ndɛ̄ kɛ̍ndīa̍ŋ ha̍a̍a̍ mɛ̄ɛ̍ pɛ̄ŋgo̍o̍ ho̍ō ni᷅ŋ?” 11 Ke̍nā chi̍e̍e̍ o̍ lɛ̄ŋndē Kāli̍līle̍ŋ ni᷄ŋ, lo̍ŋ Chi̍i̍sū to̍sa̍ kɔ̄ndɔ̄fi̍li̍ tāso̍o̍ ho̍ō, le̍ wāa̍ māā tāāmāsi̍ ni̍. Ke̍nā lo̍ŋ, o̍ chɔ̍m kɔ̄ndɔ̄fi̍li̍yɛ̍ī ndūɛ̍i̍ ni̍. O̍ ko̍ŋ, mi̍ bu̍ɛ̍i̍yāā ndūa̍a̍ dūāū tīīnda᷄ŋ ndāa̍ o̍ ndu̍ ni̍ŋ. 12 O̍ ko̍ŋ kɔ̍ɔ̍lī, Chi̍i̍sū ni̍, a̍ kāla̍ ndɔ̄, a̍ pɔ̄mbūāā ndūa̍a̍, a̍ bu̍ɛ̍i̍yāā ndūa̍a̍, ma̍ kūā Kēpa̍a̍nīɔ̄m chi̍e̍e̍. Ma̍ chūā lo̍ŋ pa̍lɛ̍i̍ ī ti᷄ŋ.

Chi̍i̍sū to̍ū wānāa̍ wa̍ chīɛ̍i̍ Mɛ̄lɛ̄ka̍a̍ tɛ̄ɛ̄mbūūwo̍ wa̍

13 Te̍le̍ŋ Chu̍ūwa̍ nda̍ a̍a̍ chu̍ūŋgi̍āŋ le̍ nyɛ̄ dīāā lōōna᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄ wo̍, ō wa̍ ni᷅ŋ fūūlūūwo̍. Le̍ he̍ī, mi̍ Chi̍i̍sū ku̍ā Chūlu̍sɛ̄lɛ̄m. 14 Mbo̍ kūā o̍ chīɛ̍i̍ Mɛ̄lɛ̄ka̍a̍ ni᷄ŋ. Mɛ̄ɛ̍ o̍ ku̍ɛ̄, mbo̍ sāālu᷄ŋ wa᷅ŋnda̍ nāūwa̍ pīsīo̍o̍, a̍ sāa̍, a̍ ka᷅ŋgbu̍a̍a̍. Wānāa̍ si̍ŋgā ka̍ni̍o̍ŋ nda̍ bɛ̍ɛ̍, ā wa̍ īchāli̍ o̍ ti̍bīi̍la̍ ndāla̍ŋ mā sīŋgā ka̍ni̍o̍ŋ. 15 Mi̍ Chi̍i̍sū to̍o̍sīāā kpātōōle̍ŋ a̍ yūe̍i̍. Mbo̍ tūāū nda̍, a̍ sāā ka̍ŋ, a̍ nāūwāā kāŋ. Mbo̍ nyīīndūū ti̍bīi̍la̍ wānāa̍ wa̍ ka̍ni̍o̍ŋ sīŋgāa̍ wa̍. Mbo̍ sɛ̄ŋī ka̍ni̍ŋ nda᷄ŋ fa̍sa᷄ŋ. 16 Mbo̍ dīmūl wānāa̍ wa̍ ka᷅ŋgbu̍a̍a̍ pīsīo̍o̍ wa̍ āā, “Lā sōli̍ nya̍a̍ ha̍ā na̍nu᷄ŋ. Vɛ᷅ mī lā sīīŋgu̍u̍ chīɛ̍i̍ Fi̍nyā nūu̍ nāa̍ pi̍sīāā?” 17 Mi̍ bu̍ɛ̍i̍yāā ndūa̍a̍ lōōnu᷄ŋ nyɛ̍ di̍mi̍ŋ o̍ Yāu̍ Mɛ̄lɛ̄ka̍a̍ ni᷄ŋ ndo̍. Āā, “Mɛ̄lɛ̄ka̍, kāāla̍ cho̍ ya̍ o̍ kɔ̄l le̍ chīɛ̄ī nūmndo̍ wo̍, ō hīōū ya̍ o̍ kɔ̄l kɔ̄ɔ̄lī bɔ̄ɔ̍.” 18 Mi̍ wānāā bɛ̄ndūāā Chu̍ūwa̍ hūŋ ma̍ hu᷄ŋ di̍mūl Chi̍i̍sū āā, “To̍sa̍ wɔ̍ su̍ɛ̍i̍ kɔ̄ndɔ̄fi̍lle̍ i̍ chɔ᷅m na̍a̍ māā ā nɔ̄ di̍ le̍ nyɛ̄ ŋ̄ tōsa̍ ho̍ō wo̍.” 19 Mi̍ Chi̍i̍sū mu̍lūl nda̍ āā, “Lā pīɔ̍l chi̍ɛ̍i̍ Mɛ̄lɛ̄ka̍a̍ ho̍ō, I̍ nɔ̍lā mī mi̍ŋgi̍ ndu̍ tāŋgūl o̍ pālɛ̍i̍ ī yāa̍ bɛ̍ŋgu̍. Ko̍ŋ chɔ᷅m ni̍ māā I̍ nɔ̍ di̍ mī to̍sa̍ le̍nde̍.” 20 Ma̍ nyūnā Chi̍i̍sū āā, “Chīɛ̍i̍ chu̍a̍ ho̍ō wɔ̄sīla̍ŋ be̍le̍-hi̍ɔ̍ɔ̍lu̍ a̍ lā ŋɔ᷄mpu᷅m le̍ tāŋgūllo̍ wo̍, ā nɔ̄lā mā ta̍ŋgu̍l ndu̍ o̍ pālɛ̍i̍ ya̍a̍ bɛ̍ŋgu̍?” 21 Kɛ̍ ndu̍yɛ̍, chīɛ̍i̍ Mɛ̄lɛ̄ka̍ Chi̍i̍sū wa̍ ho̍ō dīmīo̍o̍ a̍ ndu̍ o̍kɔ̄ɔ̄ wo̍, ndu̍ wa̍ dīāllūŋ ndɔ᷄ŋ ndu̍ pi̍la̍ŋ ni̍. 22 Le̍ he̍ī, mɛ̄ɛ̍ Mɛ̄lɛ̄ka̍ mīŋgi̍ Chi̍i̍sū yōōmū, mi̍ bu̍ɛ̍i̍yāā ndūa̍a̍ lōōnu᷄ŋ māā mbo̍ dīmī a̍ ndi̍ o̍kɔ̄ɔ̄. O̍ ko̍ŋ, ma̍ lāāla᷄ŋ a̍ nyɛ̄ Yāu̍ Mɛ̄lɛ̄ka̍a̍ dīmi̍ wo̍, a̍ nyɛ̄ Chi̍i̍sū ndu̍ o̍o̍ nɔ̍ nda̍ dīmūllo̍ wo̍.

Chi̍i̍sū si̍nā yi̍ya᷄ŋnda̍ wāŋndā chīe̍e̍ya̍

23 Chi̍i̍sū wa̍ Chūlu̍sɛ̄lɛ̄m le̍ bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄. Mɛ̄ɛ̍ wāŋnda̍ chē wa̍lta̍ kɔ̄ndɔ̄fi̍ltā o̍ to̍sa̍ la̍ŋ, mi̍ ā fāŋgā fa̍ŋgā dūāū tīīnda᷄ŋ ndāa̍ o̍ ndu̍ ni̍ŋ. 24 Kɛ̍, Chi̍i̍sū ndu̍ ndu̍ do̍u̍ la̍a̍la᷄ŋ ndɔ̄ɔ̍ o̍ nda̍ ni᷄ŋ te̍. Kāni̍ fo̍ndōle̍, ō sīnā mɛ̄ɛ̍ wāŋndā chīe̍e̍ya̍ kpo̍u̍ a̍ cho̍ yɛ̍. 25 Mī wānā chɔ̍m ndu̍ bɛ̍ɛ̍ a̍ wāna̍ chi̍o̍o̍ o̍kɔ̄ɔ̄ le̍ ō sīnā. Ndu̍ pi̍la̍ si̍nā yi̍ya᷄ŋnda̍ ndāla̍ŋ.

Chɔ᷄ŋ 3

Chi̍i̍sū nda̍ Nīkōdi̍mɔ̄ɔ̄ ā sūūki̍āŋ

1 Po̍ pi᷅lɛ̍ wa̍ dīōla̍ŋ āā, Nīkōdi̍mɔ̄ɔ̄. Wānā bɛ̍ndū Chu̍ūwa̍ o̍ wa̍ ni̍. Ndu̍yɛ̍, o̍ ku̍ndā Fālīsi̍īya̍ chōo̍ ndu̍ o̍o̍ fu̍la̍ ni̍. 2 Mbo̍ cha᷄ŋ mbo̍ kūā nāa̍ Chi̍i̍sū chu̍a̍ nyūmmā pīlɛ̍. Mɛ̄ɛ̍ o̍ ku̍ɛ̄, mbo̍ dīmūl ndu̍ āā, “Ti̍chā, ŋ̄ sīnā māā Ti̍chɛ̄i̍nɔ̍ɔ̍ ō Mɛ̄lɛ̄ka̍ vēm ndo̍ ŋ̄ chō ni̍. Kāni̍ fo̍ndōle̍, wānā o̍ wānā nɔ̍lā mbō tōsa̍ kɔ̄ndɔ̄fi̍ltā ŋ̄ tōsā la᷅ŋ nda̍ŋ te̍, mɛ̄ɛ̍ mī Mɛ̄lɛ̄ka̍ wa̍ ndu̍ kɔ̄ɔ̄lī.” 3 Mi̍ Chi̍i̍sū lo᷅ o̍ ko̍ŋ mbo̍ mūlūl Nīkōdi̍mɔ̄ɔ̄ āā, “Mī di̍mu̍l nu̍m tōnya̍a̍ wa̍la̍ŋ, wānā o̍ wānā tē a̍ mi̍i̍ŋgu̍ vi̍o̍lɔ᷄ŋ pi̍la̍ le̍, Mɛ̄lɛ̄ka̍ ve᷅ nu̍m chōo̍ Ma̍sā le̍.” 4 Mi̍ Nīkōdi̍mɔ̄ɔ̄ mu̍li᷄ŋ o̍ ko̍ŋ kɔ̍ɔ̍lī, mbo̍ nyūnā Chi̍i̍sū āā vɛ̄ɛ̄, “Wāna̍ cho̍ ni᷅ŋ ho̍ō lāŋu̍nɔ̄ ka̍lāa̍ wo̍ ō nɔ̄lā lɛ̍ mbō mīīŋgu̍ vīōlɔ᷄ŋ vɛ̍lɛ̄? Bāā mbō mīīŋgu̍ kāla̍ ndɔ̍ o̍ dēmbē mā vēlū ndu̍ vɛ̄lɛ̄ dīi̍ŋ ndɔ̄ɔ̍?” 5 Mi̍ Chi̍i̍sū mu̍lī āā, “Mī di̍mu̍l nu̍m tōnya̍a̍ wa̍la̍ŋ, wānā o̍ wānā tē a̍ vi̍lu̍ŋ a̍ mɛ̄ŋnda̍ŋ, ndu̍yɛ̍, mā vēlu᷄ŋ a̍ Nyi̍na̍ Mɛ̄lɛ̄ka̍a̍ le̍, Mɛ̄lɛ̄ka̍ ve᷅ nu̍m chōo̍ Ma̍sā le̍. 6 Vīōlɔ̄ɔ̄ fi̍nyāā nāa̍ nda̍ kālāa̍ nāa̍ ā vīālū na̍a̍ wo̍, ndu̍ ke᷅ na̍a̍ yōōmū yɔ̄ŋāa̍ ho̍ō ni̍. Kɛ̍, vīōlɔ̄ɔ̄ Nyi̍na̍ Mɛ̄lɛ̄ka̍a̍ ō vīālū na̍a̍ wo̍, ndu̍ ke᷅ na̍a̍ yōōmū kpe̍e̍kpe̍i̍yo̍ ni̍. 7 Kɔ̄ndɔ̄fi̍li̍ o̍ kɔ̄ndɔ̄fi̍li̍ ō bi̍ī nu̍m le̍ mɛ̄ɛ̍ ya̍ I̍ di̍mi̍ māā mɛ̄ɛ̍ mī lā mīīŋgu̍ vīōlɔ᷄ŋ pi̍la̍ yɛ̍ le̍.” 8 Mi̍ Chi̍i̍sū hi̍a̍ū lāchī a̍ ndu̍ dīmūllo̍ o̍ lētāle̍ ni᷄ŋ āā, “Bā hūēīye̍ ī hɛ̄nāŋ le̍ hɔ̄ŋndo̍ wo̍, lo̍ŋ i̍ hu̍āŋ ni̍. Mī wānā tu̍e̍ī ndi̍ hɔ̄ŋndo̍, kɛ̍, a̍ si̍nā na̍a̍ i̍ cha᷅ŋ nda̍ le̍. Ndu̍yɛ̍, a̍ si̍nā na̍a̍ i̍ wa᷅ kɔ᷅la̍ŋ nda̍ le̍. Mɛ̄ɛ̍ le̍nde̍ ko̍ni̍ i̍ yɔ̍nūŋ a̍ wānā o̍ wāna̍ Nyi̍na̍ Mɛ̄lɛ̄ka̍a̍ ō vīālū wo̍ ni̍.” 9 Mi̍ Nīkōdi̍mɔ̄ɔ̄ nyu̍nā vɛ̄lɛ̄ ndu̍ āā, “Vɛ̄ɛ̍nɛ̍ he̍ī ī yɔ̄nūŋ yɛ̍?” 10 Mi̍ Chi̍i̍sū mu̍lī āā, “Ti̍chɛ̄i̍nɔ̍ɔ̍, ō wāŋnda̍ I̍sɔ̄lūɛ̄ī a̍ si̍nā wa̍la̍ŋ ndo̍ ŋ̄ chō ni̍. Bāā mā bu̍mba̍ he̍ī pɛ̄ŋgu̍ si̍na̍? 11 Mī di̍mu̍l nu̍m tōnya̍a̍ wa̍la̍ŋ, nyɛ̄ na̍a̍ ŋ̄ sīnā pɛ̍ŋgu̍ wa̍la̍ŋ, ndu̍yɛ̍, mi̍ ŋ̄ chā wo̍ ndu̍ na̍a̍ ŋ̄ chō nya̍ dīmūllo̍ ni̍. Kɛ̍ o̍ ko̍ŋ ni̍ŋ kpo̍u̍, nya̍ fa̍ū lā chɛ᷄l mī lā lāāla̍ŋ a̍ nyɛ̄ na̍a̍ ŋ̄ dīmi̍ wo̍ le̍. 12 I̍ di̍mu̍l nya̍ a̍ sɔ̄ɔ̍ŋ cho̍ yɔ̄nɔ᷄ŋndo̍ o̍ chi̍e̍ēŋndo̍ ho̍ō chōo̍ wo̍ŋ lā lāāla̍ŋ te̍. Tē ō wa̍ pɛ̍, mī di̍mu̍l nya̍ a̍ sɔ̄ɔ̍ŋ cho̍ yɔ̄nɔ᷄ŋndo̍ o̍ fo̍nda᷄ŋ Mɛ̄lɛ̄ka̍a̍ wo̍ŋ pɛ̍, lā lāāla̍ŋ pa̍? 13 Lē pīlɛ̍ bɛ̍ɛ̍ wānā o̍ wānā che̍ŋ ndɔ̍ mbō he᷄l o̍ fo̍nda᷄ŋ Mɛ̄lɛ̄ka̍a̍ le̍, mɛ̄ɛ̍ wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ o̍ chɛ̍ŋ o̍ fo̍nda᷄ŋ Mɛ̄lɛ̄ka̍a̍ mbo̍ tūāl lo̍.” 14 Mi̍ Chi̍i̍sū hi̍a̍ū lāchī a̍ sūɛ̍i̍ āā, “Mɛ̄ɛ̍ Mūu̍sē he̍e̍lu̍ kɛ̄ū nda̍ tūūla̍ a̍ būlɔ̍ŋsīi̍ye̍ o̍ po̍llo̍ ni᷄ŋ yɛ̍, le̍nde̍ ko̍ni̍ nda̍ chō wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ bāŋɔ̄ɔ̄ o̍ yɔ̄mndo̍ chōo̍ mā hēēlu̍ ni̍. 15 O̍ ko̍ŋ, wānā o̍ wāna̍ dɔ̍ū tīīnda᷄ŋ ndɔ̄ɔ̍ o̍ ndu̍ Po̍ Wānā Pɔ̍nɔ̍ɔ̍ ni᷄ŋ pɛ̍, wānā ko̍ŋ sɔ̄la̍ yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍.” 16 Mɛ̄lɛ̄ka̍ kāāla̍ wāŋndā chīe̍e̍ya̍. O̍ ko̍ŋ, mbo̍ yɔ̄ŋgū Po̍ ndɔ̄ pi᷅lɔ̍ɔ̍ kpe̍ le̍ nda̍, māā wānā o̍ wāna̍ dɔ̍ū tīīnda᷄ŋ ndɔ̄ɔ̍ o̍ Po̍ ndɔ̄ pi᷅lɔ̍ɔ̍ ho̍ō ni᷄ŋ pɛ̍, wānā ko̍ŋ ō vi᷅ lɛ̍ le̍. Yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍, ndu̍ o̍ sɔ̍lā ni̍. 17 Mɛ̄lɛ̄ka̍ vi᷄m Po̍ ndɔ̄ɔ̍ o̍ chi̍e̍ēŋndo̍ ni᷄ŋ le̍ mbō hu᷄ŋ ki̍lūl wāŋnda̍ īyāma̍ mbō tūsi̍ nda̍ nyɛ̄ pālāā chōo̍ le̍. Ō vēm māvīāmāā Po̍ ndɔ̄ɔ̍ le̍ mbō hu᷄ŋ pi̍ŋī wāŋndā chīe̍e̍ya̍. 18 Ndu̍yɛ̍, wānā o̍ wāna̍ dɔ̍ū tīīnda᷄ŋ ndɔ̄ɔ̍ o̍ Po̍ ndɔ̄ɔ̍ ho̍ō ni᷄ŋ pɛ̍, ā ki̍lūl lɛ̍ ndu̍ īyāma̍ mā tūsi̍ ndu̍ nyɛ̄ pālāā chōo̍ le̍. Kɛ̍, wānā o̍ wāna̍ do̍u̍ ti̍i̍nda᷄ŋ ndɔ̄ɔ̍ o̍ ndu̍ ni̍ŋ te̍, mɛ̄ɛ̍ ā chīi̍ ni᷅ŋ bɛ̍ɛ̍ wa̍nā ko̍ŋ yāmɛ̍i̍ kīlūl le̍ ndu̍ nyɛ̄ pālāa̍ tūsī chōo̍, kāni̍ fo̍ndōle̍, le̍ mɛ̄ɛ̍ o̍ kɛ̍ɛ̍ le̍ tīīnda᷄ŋndo̍ dɔ̄wɔ̄ɔ̍ o̍ Mɛ̄lɛ̄ka̍ Po̍ ndɔ̄ pi᷅lɔ̍ɔ̍ ni᷄ŋ yɛ̍. 19 Sa̍bū Mɛ̄lɛ̄ka̍ kīlūl ni̍ŋ wa᷅ŋnda̍ o̍ chi̍e̍ēŋndo̍ chōo̍ ya᷅mɛ̍i̍ mbō tūsi̍ nda̍ nyɛ̄ pālāa̍ chōo̍ wo̍, ndu̍ cho̍ ho̍ō ni̍. Mɛ̄lɛ̄ka̍ yɔ̄ŋgu̍ nyɛ̄ wa̍wo̍ŋndo̍ o̍ chi̍e̍ēŋndo̍ chōo̍ ndu̍ yɔ̍nūŋ māā nyɛ̄ wa̍wo̍ŋ tōnya̍a̍ a̍ ndu̍ pi̍la̍ o̍kɔ̄ɔ̄ ni̍. Kɛ̍, yɔ̄ŋi̍ nda̍ kāāla̍ nyɛ᷅ wa̍wo̍ŋ tōnya̍a̍ ho̍ō yɛ̍, nīīlū mānyūmndo̍ nda̍ kāāla̍ ni̍, kāni̍ fo̍ndōle̍, le̍ sɔ̄ɔ̍ŋ wɔ̍ɔ̍ŋ nda̍ tōsā wo̍ŋ. 20 Wāna̍ to̍sā sɔ̍ɔ̍ŋ wɔ̍ɔ̍ŋndo̍ŋ ndo̍, ndu̍ ko̍ tu᷅l nyɛ᷅ wa̍wo̍ŋ tōnya̍a̍ lēyɛ̄ ni̍. Ndu̍yɛ̍, ō fu̍lā na̍a̍ nyɛ̄ wa̍wo̍ŋndo̍ chō wa̍ le̍, yɔ̄ŋi̍ yɔ̄ŋ ndɔ̄ wɔ̍ɔ̍ŋndo̍ chɔ̄ɔ̄mu̍ŋ. 21 Kɛ̍, wānā o̍ wāna̍ to̍sā nyɛ᷅ Mɛ̄lɛ̄ka̍ dīmi̍ māā ō chō sa̍kpo̍ le̍ tōsāa̍ wo̍, wānā wa̍ā le̍nde̍ fūlāa̍ o̍ fu̍lā o̍ nyɛ̄ wa̍wo̍ŋndo̍ ni̍. O̍ ko̍ŋ, mī nyɛ̄ wa̍wo̍ŋndo̍ ho̍ō tōsa̍ mī wāŋnda̍ chē māā ō tōsa̍ nyɛ̄ Mɛ̄lɛ̄ka̍ hɛ̄na̍ŋ ndu̍ mbō tōsa̍ wo̍.

Nyɛ̄ Chɔ᷄ŋ di̍mi̍ a̍ Chi̍i̍sū o̍kɔ̄ɔ̄ wo̍

22 O̍ ko̍ŋ kɔ̍ɔ̍lī, mi̍ Chi̍i̍sū nda̍ bu̍ɛ̍i̍yāā ndūa̍a̍ ā kūā o̍ būŋgɛ̄ī Chūdi̍a̍āve̍ ni᷄ŋ. Mbo̍ chūā pālɛ̍i̍ ī ti᷄ŋ lo̍ŋ nda̍ nda̍ā. O̍ ko̍ŋ kɔ̍ɔ̍lī, mi̍ Chi̍i̍sū yi᷅ŋ wāŋnda̍ lo̍ŋ. 23 Chɔ᷄ŋ Wānā Yi̍ŋāa̍ bɛ̍ɛ̍, ndu̍ wa̍ wāŋnda̍ yīŋɔ̄ɔ̍ E̍nɔ̄ŋ, Sa̍līm chi̍e̍e̍ i̍kɛ̍i̍. Kāni̍ fo̍ndōle̍, mɛ̄ŋnda̍ŋ mā wa̍ lo̍ŋ ta̍u̍. Wāŋnda̍ wa̍ kɔ̄la̍ŋ nāa̍ Chɔ᷄ŋ chu̍a̍ mbo̍ wā nda̍ yīŋɔ̄ɔ̍. 24 Kɛ̍, bōōndi̍i̍ ke̍ŋ nda̍ a̍a̍ do̍u̍ wɔ̍ ndu̍ Chɔ̍ŋ chi̍ɛ̍i̍ ni̍ŋ te̍. 25 O̍ ko̍ŋ kɔ̍ɔ̍lī, mi̍ lāŋu̍nɔ̄ Chu̍ūnɔ̄ pīlɛ̍, nda̍ bu̍ɛ̍i̍yāa̍ Chɔ᷄ŋ nda̍ ā pūm, ā sa̍āŋ di̍ōmnda̍ŋ hīŋa᷅ŋndo̍ a̍ mɛ̄ɛ̍ nda̍ yīŋ nda̍ pi̍la̍, le̍ mā wa̍ ā dīāndāā Mɛ̄lɛ̄ka̍ o̍ hɔ̄l lɛ̍. 26 O̍ ko̍ŋ kɔ̍ɔ̍lī, mi̍ bu̍ɛ̍i̍yāa̍ Chɔ᷄ŋ nda̍ ha̍ā, ā kūā ma̍ kɔ̍ di̍mūl Chɔ᷄ŋ āā, “Ti̍chā, ā lōōnūŋ pa̍ po̍ pi᷅lɛ̍ mi̍ lā wā Chɔ̍ɔ̍dāŋ le̍e̍lōo̍ nya̍ ndu̍, ma̍ dīmī bɛ̍ɛ̍ a̍ ndu̍ o̍kɔ̄ɔ̄? Po̍ ko̍ŋ, ō chō wāŋnda̍ yīŋɔ̄ɔ̍. Ndu̍yɛ̍, wānāā fāŋgā fa̍ŋgā ā chō kɔ̄la̍ŋ nāa̍ ndu̍ chu̍a̍.” 27 Mɛ̄ɛ̍ nda̍ dīmu̍l ndu̍ le̍nde̍, mi̍ Chɔ᷄ŋ di̍mūl nda̍ āā, “Tē ō ve̍ mī Mɛ̄lɛ̄ka̍ ndu̍ chɛ̍l te̍, ī wāā le̍nde̍ i̍ yɔ̍nūŋ a̍ wāŋndo̍ le̍.” 28 O̍ ko̍ŋ kɔ̍ɔ̍lī, mbo̍ dīmūl nda̍ āā, “Nya̍ pi̍la̍ lā wa̍ o̍ hɔ̄lndɔ̄ mi̍ di̍mī māā ō cho̍ ya̍ le̍ cho̍ Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ le̍. Ya̍ ya̍ Mɛ̄lɛ̄ka̍ vēm ya̍ māvīāmāā wānā ko̍ŋ lāchī.” 29 O̍ ko̍ŋ kɔ̍ɔ̍lī, mi̍ Chɔ᷄ŋ di̍mī o̍ lētāle̍ ni᷄ŋ āā, “Wāna̍ cho̍ la̍nɔ̍ɔ̍ chūa̍a̍ wo̍, ndu̍ nɔ̍ la̍nɔ̍ɔ̍ ni̍. Ndi̍a̍a̍mɔ̍ɔ̍ wāna̍ cho̍ la̍nɔ̍ɔ̍ chūa̍a̍ wo̍, ndu̍ ndu̍, sīsi̍la̍ŋ ko̍ni̍ o̍ si᷅m ni̍ mbō ya᷄ŋ nīla̍ŋ. Tē ō tūēī wāna̍ cho̍ la̍nɔ̍ɔ̍ chūa̍a̍ wo̍ sūɛ̍i̍ pɛ̍, ō na᷄ŋ kɔ̄l. Mɛ̄ɛ̍ le̍nde̍ ko̍ni̍, kɔ̄l kɛ̄ndɛ̄ bɛ̄ndōo̍ chō ya̍ ni᷄ŋ ni̍. 30 Ndu̍ nɔ̍ ni̍ mbō hīōū lāchī a̍ wāa̍ ō bɛ̄ndū mī ya̍ I̍ dɔ̍ɔ̍na̍ŋ.”

Wāna̍ chɛ̍ŋ o̍ fo̍nda᷄ŋ Mɛ̄lɛ̄ka̍a̍ wo̍ ndu̍ wānā ti̍i̍ndāŋ ni̍

31 Wāna̍ chɛ̍ŋ ɛ̄chɛ̍nɛ̄ wo̍, ndu̍ hi̍o̍ū a̍ wānā o̍ wānā. Wāna̍ chɛ̍ŋ o̍ chi̍e̍ēŋndo̍ ni᷄ŋ ndo̍, ndu̍ ndu̍, wānā wa̍ā chi̍e̍ēŋ na̍nu᷄ŋ o̍ cho̍ ni̍. Ndu̍yɛ̍, a̍ sɔ̄ɔ̍ŋ o̍ chi̍e̍ēŋndo̍ ni᷄ŋ o̍kɔ̄ɔ̄ o̍ su̍a̍ā ni̍. Wāna̍ chɛ̍ŋ ɛ̄chɛ̍nɛ̄ wo̍, ndu̍ cho̍ wānā o̍ wānā fe̍e̍ bo᷅lle̍ŋ ni̍. 32 Ndu̍yɛ̍, nyɛ̄ o̍ che᷅ o̍ ko̍ŋ kɔ̍ɔ̍lī, mbo̍ tūɛ̄ī yo̍, ndu̍ o̍ di̍mūl wa᷅ŋnda̍ ni̍. Kɛ̍, o̍ ko̍ŋ ni̍ŋ kpo̍u̍, wānā bɛ̍ɛ̍ la̍a̍la̍ŋ a̍ nyɛ̄ o̍ di̍mi̍ wo̍ le̍. 33 Wānā o̍ wāna̍ la̍a̍la̍ŋ nyɛ᷅ o̍ di̍mi̍ wo̍ pɛ̍, mɛ̄ɛ̍ wānā ko̍ŋ ndu̍ chɔ̍m ni̍ māā nyɛ̄ Mɛ̄lɛ̄ka̍ dīmi̍ wo̍ chō tōnya̍. 34 Wāna̍ Mɛ̄lɛ̄ka̍ vēm ndo̍, ndu̍ di̍mūl wa᷅ŋnda̍ yōōŋgu̍ chɛ̍ŋ o̍ Mɛ̄lɛ̄ka̍ lo̍ wo̍ ni̍. Kāni̍ fo̍ndōle̍, ndu̍ Mɛ̄lɛ̄ka̍ tōsa̍ ni̍ mi̍ Nyi̍na̍ ndɔ̄ɔ̍ wā ndu̍ kɔ̄ɔ̄lī ta̍u̍. 35 Mɛ̄lɛ̄ka̍ Fi̍nyāa̍ ō kāāla̍ Po̍ ndɔ̄ɔ̍. Ndu̍yɛ̍, ō hāndu̍ Po̍ ndɔ̄ɔ̍ le̍ mī nyɛ̄ o̍ nyɛ̄ fe̍e̍ wa̍ ndu̍ o̍ bā bɛ̄ŋgu̍. 36 Wānā o̍ wāna̍ dɔ̍ū tīīnda᷄ŋndo̍ o̍ Po̍ Mɛ̄lɛ̄ka̍a̍ ho̍ō ni᷄ŋ pɛ̄, wānā ko̍ŋ ō sɔ̄la̍ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍. Kɛ̍, wānā o̍ wāna̍ to̍sa̍ nyɛ᷅ o̍ di̍mūl ndu̍ wo̍ le̍ ō sɔ̍lā yo̍o̍mū kpe̍e̍kpe̍i̍yo̍ le̍. Ndu̍yɛ̍, o̍ ko̍ŋ kɔ̍ɔ̍lī, mī Mɛ̄lɛ̄ka̍ ō lo̍ wānā ko̍ŋ nyɛ̄ pālāa̍ tūsīo̍o̍ chōo̍ ha̍a̍a̍.

Chɔ᷄ŋ 4

Chi̍i̍sū so̍ō nāa̍ chūā Sāme̍e̍li̍tīāŋnɔ̄ pīlɛ̍ chūā

1 Mi̍ ku̍ndā Fālīsi̍īya̍ tūɛ̄ī māā Chi̍i̍sū cho̍ bu̍ɛ̍īya̍ sɔ̄lāa̍, ndu̍yɛ̍ mbo̍ wā wāŋnda̍ yīŋɔ̄ɔ̍ mbo̍ hīāū Chɔ᷄ŋ Wānā Yi̍ŋāa̍. 2 Kɛ̍ ndu̍yɛ̍, ō ve̍ Chi̍i̍sū pi̍la̍ kpe̍e̍kpe̍i̍ le̍ wa̍ wāŋnda̍ yīŋɔ̄ɔ̍ le̍. Bu̍ɛ̍i̍yāā ndūa̍a̍ nda̍ a̍a̍ nɔ̍ wāŋnda̍ yīŋɔ̄ɔ̍ ni̍. 3 O̍ ko̍ŋ kɔ̍ɔ̍lī, mɛ̄ɛ̍ Māsānɔ̄ɔ̍ Chi̍i̍sū tu̍e̍ī nyɛ̄ nda̍ dīmi̍ a̍ ndu̍ o̍kɔ̄ɔ̄ wo̍, mbo̍ fāŋa᷄ŋ o̍ lɛ̄ŋndē Chūdi̍a̍āle̍ŋ ni᷄ŋ. Mbo̍ mīīŋgū o̍ lɛ̄ŋndē Kāli̍līle̍ŋ ni᷄ŋ. 4 O̍ kɔ̄lā ndɔ̄la̍ŋ ni᷄ŋ Kāli̍lī, mɛ̄ɛ̍ mī ndu̍ o̍o̍ ke̍e̍ku̍ o̍ lɛ̄ŋndē Sāme̍e̍līāāle̍ŋ ni᷄ŋ. 5 O̍ ko̍ŋ kɔ̍ɔ̍lī, mbo̍ fūūlūū o̍ chi̍e̍e̍ pu̍m o̍ lɛ̄ŋndē Sāme̍e̍līāālē lēŋ ni᷄ŋ, dīōla̍ŋ āā, Si̍kāā. Chi̍o̍o̍ ho̍ō yɛ̍ ō ve̍ le̍vi̍l a̍ fo̍ndāŋ Che̍kɔ̍pū ndu̍ o̍o̍ ke̍ sīndɛ̄ Chōo̍sɛ̍ po̍ ndɔ̄ wo̍ le̍. 6 Ndu̍yɛ̍, so̍o̍ŋ māmɛ᷄ŋ Che̍kɔ̍pū wo̍ sīndɛ̄, ō wa̍ o̍ fo̍ndāŋ kōŋ. Pāa̍le̍ŋ lē wa̍ ni᷅ŋ o̍ bōlle̍ŋ chōo̍. Ndu̍yɛ̍, Chi̍i̍sū wa̍ ni᷅ŋ ō sāŋgāā a̍ kɔ̄la̍ŋ. Fūūlūūwo̍ lo̍ŋ, mbo̍ chāl o̍ so̍o̍ŋ māmɛ̄ŋ kōŋ īkɛ̄i̍. 7 O̍ ko̍ŋ, mi̍ chūā Sāme̍e̍līāānɔ̄ pīlɛ̍ hūŋ mɛ̄ŋnda̍ŋ kɔ̄ndɔ̄ɔ̍. Mɛ̄ɛ̍ o̍ hi᷅ŋ, mi̍ Chi̍i̍sū di̍mūl ndu̍ āā, “Ke̍ ya̍ mɛ̄ŋnda̍ŋ I̍ ko᷅l.” 8 A̍ bōōndi̍i̍ ke̍ŋ, bu̍ɛ̍i̍yāā ndūa̍a̍ nda̍ a̍a̍ ku̍ɛ̄ chi̍e̍e̍ le̍ nyɛ̄ dīa̍a̍ pīōndɔ̄ɔ̍. 9 Mɛ̄ɛ̍ Chi̍i̍sū pi̍ɛ̍i̍ chūa̍a̍ ho̍ō mɛ̄ŋnda̍ŋ, mi̍ chūa̍a̍ mūlūl ndu̍ āā, “Nūm Chu̍ūnɔ̄ɔ̍ mā pi̍ɛ̍i̍ ya̍ Sāme̍e̍līāānɔ̄ɔ̍ mɛ̄ŋnda̍ŋ?” Chu̍ūwa̍ yɛ̄, nda̍ a̍a̍ chɛ᷅l mā ko᷄l a̍ tāāla̍ Sāme̍e̍līāāŋnda̍ kōl lo̍ le̍. 10 Mi̍ Chi̍i̍sū lo᷅ o̍ ko̍ŋ mbo̍ dīmūl chūa̍a̍ ho̍ō āā, “A̍ si̍nā ke᷅ Mɛ̄lɛ̄ka̍a̍ le̍. Ndu̍yɛ̍, ya̍ cho̍ ho̍ō nu̍m mɛ̄ŋnda̍ŋ pīɛ̄īyo̍ wo̍, a̍ si̍nā ya̍ le̍. Tē nūm o̍o̍ si̍nā ya̍ pɛ̍, nu̍a̍ā nūm o̍o̍ nyu̍nā ya̍, mī ya̍ i̍i̍ ke̍ nu̍m mɛ̄ŋma̍ to̍sā mī wānā wa̍ yōōmū kpe̍e̍kpe̍i̍ ya̍ŋ.” 11 Mi̍ chūa̍a̍ lō o̍ ko̍ŋ mbo̍ dīmūl Chi̍i̍su̍ āā, “Fāllo̍, a̍ so̍o̍ŋ yi̍ŋgi̍lɛ̍i̍yo̍ ho̍ō, nūm yɛ̍ a̍ nɔ̍ ba̍a̍wa̍ nānāā māmɛ̄ŋ te̍. Mī kūɛ̍ɛ̍nɛ̍ ŋ̄ fūla̍ yɛ̄ a̍ mɛ̄ŋma̍ to̍sā ma̍ŋ mī wānā wa̍ yōōmū kpe̍e̍kpe̍i̍ ya̍ŋ? 12 Fi̍nyā nāā ma̍māa̍ Che̍kɔ̍pū, ndu̍ me̍l na̍a̍ so̍o̍ŋndo̍ ho̍ō ni̍. Ndu̍ ni̍, nda̍ pūa̍a̍ ndūa̍a̍, a̍ chɔ̄lūāā ndūa̍a̍, so̍o̍ŋndo̍ ho̍ō nda̍ a̍a̍ ko᷅l ni̍. A̍ hɛ̍na̍ŋ mā di̍mu̍l la̍ māā nūm ā hīōū Che̍kɔ̍pū?” 13 O̍ ko̍ŋ kɔ̍ɔ̍lī, mi̍ Chi̍i̍sū mu̍lī āā, “Mɛ̄ŋmā yɔ̄ŋa᷄ŋ ma᷅ŋ ma̍ŋ, wānā ko̍l ma̍ŋ bɛ̍ɛ̍ bo̍lōla̍ŋ lā nɔ̄lā mī lā vēsa̍ vɛ̄lɛ̄ nu̍m. 14 Kɛ̍, mɛ̄ŋmā ya̍ ya̍ I̍ ke᷅ wa̍nā wa̍ŋ, tē wāŋndo̍ ko᷄l ma̍ŋ pɛ̍, bo̍lōlā ve̍sā lɛ̍ ndu̍ le̍. Kāni̍ fo̍ndōle̍, mɛ̄ŋmā ya̍ ya̍ I̍ ke᷅ wa̍nā wa̍ŋ, sīmnɔ᷄ŋndo̍ ma̍ si̍mnūŋ ndu̍ ni᷄ŋ mɛ̄ɛ̍ pēe̍ būūlōo̍ wā nu̍a̍ā yɛ̍ ni̍, mā chu̍ū kɔ̍ɔ̍lī le̍. Mā tōsā mī wānā ko̍ŋ ō wa̍ yōōmū kpe̍e̍kpe̍i̍. Ndu̍yɛ̍, yōōmū kōŋ, ō nɔ᷅ la̍mɛ̍ɛ̍lu̍ le̍.” 15 O̍ ko̍ŋ, mi̍ chūā Sāme̍e̍li̍tīāŋnɔ̄ɔ̍ ho̍ō dīmūl Chi̍i̍sū āā, “Fāllo̍, mɛ̄ɛ̍ ke̍ ya̍ mɛ̄ŋmā māŋ. Ko̍ŋ to̍sā bo̍lōlā ve̍sā lɛ̍ ya̍ le̍, ndu̍yɛ̍, I̍ hi᷅ŋ lɛ̍ māmɛ̄ŋ kɔ̄ndɔ̄ɔ̄ na̍nu᷄ŋ te̍.” 16 Mi̍ Chi̍i̍sū di̍mūl ndu̍ āā, “Kɔ̍ mā kɔ̍ ve̍e̍lū pɔ̍nɔ̍ nu̍m mī lā hīŋ.” 17 Mi̍ chūa̍a̍ dīmī āā, “I̍ nɔ̍ pɔ̍nɔ̍ le̍.” Mi̍ Chi̍i̍sū di̍mūl ndu̍ āā, “Tē a̍ di̍mi̍ pɛ̍ māā a̍ nɔ̍ pɔ̍nɔ̍ le̍, mɛ̄ɛ̍ a̍ di̍mi̍ tōnya̍. 18 Kāni̍ fo̍ndōle̍, pīāāndūāā ŋ̄ kēēku̍ ni᷅ŋ o̍ bā wa̍, ā pɛ̄ ni᷅ŋ ā ŋūɛ̍ɛ̍nu̍. Ndu̍yɛ̍ po̍ nya̍ chō su̍ŋ su̍ŋ nya̍ ndu̍ wo̍, ō cho̍ pɔ̍nɔ̍ nu̍m te̍. Le̍la̍ŋ, tōnya̍ ŋ̄ dīmi̍ ni̍.” 19 Mi̍ chūa̍a̍ dīmī āā, “I̍ si̍na̍ ni᷅ŋ wāna̍ ŋ̄ chō wo̍, fāllo̍. Wāna̍ su̍a̍ā le̍ Mɛ̄lɛ̄ka̍ wo̍ ŋ̄ chō ni̍. 20 Ya̍ ya̍ fi̍nyāā nīāā ma̍māa̍ o̍ pēmbo᷄ŋ mu᷅ŋ nda̍ a̍a̍ so̍o̍lūū Mɛ̍lɛ̄ka̍ ni̍. Kɛ̍, nya̍ Chu̍ūwa̍ lā dīmi̍ māā Chūlu̍sɛ̄lɛ̄m chi̍e̍e̍ na̍a̍ ŋ̄ nɔ̄ ni̍ mī ŋ̄ sōōlu̍u̍ Mɛ̄lɛ̄ka̍.” 21 Mi̍ Chi̍i̍sū lo᷅ o̍ ko̍ŋ mbo̍ dīmūl chūa̍a̍ ho̍ō āā, “Chūa̍a̍, nyɛ̄ ya̍ I̍ cho̍ ho̍ō nu̍m dīmūllo̍ wo̍, la̍a̍la̍ŋ a̍ ndu̍. Bōōndi̍i̍ cho̍ fūūlūū ō ve᷅ lɛ̍ ni̍ŋ māā mɛ̄ɛ̍ o̍ pēmbo᷄ŋ mu᷅ŋ kɛ̄lɛ̄ŋgāā mɛ̄ɛ̍ Chūlu̍sɛ̄lɛ̄m chi̍e̍e̍, mī wāŋnda̍ sōōlu̍u̍ Mɛ̄lɛ̄ka̍ Fi̍nyāa̍ le̍. A̍ bōōndi̍i̍ ke̍ŋ ō ve᷅ lɛ̍ ni̍ŋ fo̍ndāŋ wāŋndo̍ sōōlūū Mɛ̍lɛ̄ka̍ wo̍ le̍ wa᷅ lɛ̍ ni̍ŋ su̍ɛ̍i̍ le̍bo᷅l te̍. 22 Nya̍ Sāme̍e̍li̍tīāŋnda̍, Mɛ̄lɛ̄ka̍ nya̍ dīmi̍ māā lā chō ndu̍ sōōlūūwo̍ wo̍, lā si̍nā ndu̍ kpe̍e̍kpe̍i̍ le̍. Kɛ̍, na̍a̍ na̍a̍ Chu̍ūwa̍, na̍a̍ ŋ̄ sīnā Mɛ̍lɛ̄ka̍ na̍a̍ ŋ̄ chō sōōlūūwo̍ wo̍. Ndu̍yɛ̍, na̍a̍ Chu̍ūwa̍, o̍ sa̍bū nāa̍ ni᷄ŋ Mɛ̄lɛ̄ka̍ chō ŋ̄wāŋndā chīe̍e̍ pi̍ŋī ni̍. 23 Bōōndi̍i̍ cho̍ fūūlūū, ndu̍yɛ̍, ī chīi̍ ni᷅ŋ bɛ̍ɛ̍ fu̍u̍lūū, bōōndi̍i̍ ke̍ŋ wāna̍ so̍o̍lūū ni̍ŋ Mɛ̍lɛ̄ka̍ Fi̍nyāa̍ mɛ̄ɛ̍ Nyi̍na̍ Mɛ̄lɛ̄ka̍a̍ ō chɔ̄m ndu̍ yɛ̍ wo̍, ndu̍ so̍o̍lūū ni̍ŋ ndu̍ o̍ nɛ̄ī sa̍kpō ni̍. Ndu̍yɛ̍, mbō sōōlu̍u̍ ndu̍ o̍ nɛ̄ī tōnya̍a̍ chōo̍. Wāna̍ so̍o̍lūū Mɛ̍lɛ̄ka̍ Fi̍nyāa̍ o̍ nɛ̄ī wa̍ā nu̍a̍ā cho̍o̍ wo̍, ndu̍ Mɛ̄lɛ̄ka̍ yēēmā māā ō sōōlu̍u̍ ndu̍ ni̍. 24 O̍ Īnyi̍nāya̍ Mɛ̄lɛ̄ka̍ chō ni̍. Wāna̍ so̍o̍lūū ndu̍ Mɛ̍lɛ̄ka̍ wo̍, mɛ̄ɛ̍ mbō sōōlu̍u̍ ndu̍ mɛ̄ɛ̍ Nyi̍na̍ Mɛ̄lɛ̄ka̍a̍ chɔ̄m ndu̍ yɛ̍, ndu̍yɛ̍, mbō sōōlu̍u̍ ndu̍ o̍ nɛ̄i̍ tōnya̍a̍ chōo̍.” 25 Mi̍ chūa̍a̍ lō o̍ ko̍ŋ mbo̍ dīmī āā, “I̍ si̍nā māā Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, ō chō hūnɔ̄ɔ̄. Tē ō hīŋ pɛ̍, ō chō na̍a̍ hūnɔ̄ɔ̄ nyɛ̄ o̍ nyɛ̄ fe̍e̍ chɔ᷅m.” 26 Mi̍ Chi̍i̍sū di̍mūl ndu̍ āā, “Ya̍ cho̍ ho̍ō sūɛ̍i̍ nāa̍ nūm chu̍a̍ wo̍, ya̍ cho̍ wānā ko̍ŋ ni̍.” 27 A̍ te̍le̍ŋ ko̍ŋ ki̍nɛ̍i̍, mi̍ bu̍ɛ̍īyāa̍ Chi̍i̍sūa̍a̍ mīīŋgū nāa̍ ndu̍ chu̍a̍. Mi̍ kɔ̄ndɔ̄fi̍llo̍ bīī nda̍ ta̍u̍ ta̍u̍ le̍ mɛ̄ɛ̍ nda̍ kōma̍l ndu̍ sūɛ̍i̍ nda̍ wānā la̍nɔ̍ɔ̍ yɛ̍. Kɛ̍, wānā pi᷅lɛ̍ bɛ̍ɛ̍ nyu̍na̍ ndu̍ mbō yɔ᷄ŋ, “Ō yɛ̄ɛ̍nɛ̍ ŋ̄ yēēma̍ yɛ̄?” Kɛ̄lɛ̄ŋgāā, “Vɛ᷅ sūɛ̍i̍ nāa̍ chūa̍a̍ ho̍ō chūā le̍?” 28 O̍ ko̍ŋ kɔ̍ɔ̍lī, mi̍ chūa̍a̍ mɛ̄ī kpɛ̍ɛ̍nɛ̍i̍ ndūɛ̍i̍ māmɛ̄ŋ nde̍, mbo̍ mīīŋgū chi̍e̍e̍. Mɛ̄ɛ̍ o̍ ku̍ɛ̄, mbo̍ kɔ̍ di̍mūl wāŋnda̍ lo̍ŋ āā, 29 “Wāŋnda̍ lā hu᷄ŋ mī lā hu᷄ŋ chɔ᷅ po̍ ya̍ ko̍ma̍l o̍ so̍o̍ŋndo̍ wo̍. Nyɛ̄ o̍ nyɛ̄ fe̍e̍ ya̍ I̍ to̍sa̍, mbo̍ chɔ̄m pa̍ku̍. Bāā mbō wa̍ dɔ̍ɔ̍ ndu̍ cho̍ wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ ni̍?” 30 Mɛ̄ɛ̍ chūa̍a̍ ho̍ō dīmi̍ le̍nde̍, mi̍ wāŋnda̍ cha᷄ŋ chi̍e̍e̍ ma̍ kūā nāa̍ Chi̍i̍sū chu̍a̍. 31 A̍ bōōndi̍i̍ ke̍ŋ, Chi̍i̍sū bu̍ɛ̍i̍yāā ndūa̍a̍ ā wa̍ ndu̍ nyɔ̄ɔ̄lōo̍ le̍ mbō dē nyɛ̄ dīa̍a̍. Ma̍ dīmūl ndu̍ āā, “Ti̍chɛ̄i̍nɔ̍ nāa̍, yāndi̍i̍ di̍o̍ nyɛ̍ dīāā pɔ̄mbɔ̄.” 32 Kɛ̍, mi̍ Chi̍i̍sū mu̍lūl nda̍ āā, “I̍ de᷅ nyɛ̄ dīa̍a̍ ō nya̍ si̍nā a̍ ndu̍ o̍kɔ̄ɔ̄ le̍ wo̍.” 33 Mɛ̄ɛ̍ o̍ so̍ō le̍nde̍, mi̍ bu̍ɛ̍i̍yāā ndūa̍a̍ ā kāndū nyūūni̍āŋndo̍ āā, “Bāā mbō wa̍ wāŋndo̍ chu̍u̍ ndu̍ nyɛ̄ dīa̍a̍ ni̍?” 34 Mi̍ Chi̍i̍sū di̍mūl nda̍ āā, “Nyɛ̄ nī di̍a̍a̍ ndu̍ cho̍ nyɛ̄ wāna̍ ve᷅m ya̍ wo̍ ō hɛ̄na̍ŋ ndo̍ tōsāa̍ ni̍, a̍ wa̍li̍ o̍ ve᷅m ya̍ wo̍ sīōūwo̍. 35 Tāle̍ pīlɛ̍ chō mī wāŋnda̍ dīmī ndu̍ āā, ‘Ō lo̍ pāŋgo̍ŋ ŋ̄ hīɔ̍ɔ̍lu̍ mī chīɔ̍ɔ̍ŋ ŋ̄ vēsa̍.’ Kɛ̍, ya̍ ya̍ mī di̍mu̍l nya̍ lā chu̍a̍ wɔ̍ hɔ᷅lla̍ mī lā tōfa̍ chīɔ̍ɔ̍ŋ mɛ̄ɛ̍ ŋ̍ cho̍ ŋ̄ vēsɛ̍i̍ le̍ kōūwɔ̄ɔ̍ yɛ̍. 36 Ndu̍yɛ̍, wānā o̍ wāna̍ ko̍ū pɛ̍, wānā ko̍ŋ chō pāāwāa̍ sɔ̄lā. Ndu̍yɛ̍, tɔ̄lɔ̄ɔ̄ nda̍ chūūŋgīāā ko̍ŋ ndo̍, ndu̍ yɔ̍nūŋ māā ŋ̄wāŋndā chīe̍e̍ ni̍. Ā chō yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍ sɔ̄lā. O̍ ko̍ŋ, wāna̍ wa̍a̍ chīɛ̍i̍ yo̍ ni̍, wāna̍ ko̍ū wo̍ ni̍, ā chō kɔ̄l nāŋɔ̄ɔ̄ dīōm pīlɛ̍. 37 Dīo̍m di̍mi̍ŋ ho̍ō āā, ‘Tē wāŋndo̍ ō pīlɔ̍ɔ̄ wāa̍ pɛ̍, ho̍ō kōū wo̍,’ tōnya̍a̍ o̍ cho̍ ni̍. 38 I̍ ve᷅m nya̍ māvīāmāā le̍ mī lā kɔ̍ ko̍ū chīɛ̄ī nya̍ tōsa̍ wa̍li̍ le̍ni̍ŋ te̍ ve̍. Wānāā chēle̍ŋ a̍ to̍sa̍ wa̍llo̍ o̍ chīɛ̄ī ke̍ŋ ni᷄ŋ ni̍. Kɛ̍, mi̍ nya̍ wā tɔ̄nɔ̄ɔ̍ sɔ̄lāa̍ o̍ lāli̍i̍ ndɛ̄i̍ ni᷄ŋ.” 39 O̍ ko̍ŋ kɔ̍ɔ̍lī, le̍ dīmī chūa̍a̍ kɔ̍ dīmi̍ āā, “Mbo̍ chɔ̄m nyɛ̄ o̍ nyɛ̄ fe̍e̍ ya̍ I̍ to̍sa̍,” wo̍, mi̍ wānāā fāŋgā fa̍ŋgā o̍ chi̍e̍e̍ māSāme̍e̍līāā kōŋ ni᷄ŋ a̍ du̍a̍ū tīīnda᷄ŋ ndāa̍ o̍ Chi̍i̍sū ni̍ŋ. 40 Le̍ he̍ī, mi̍ wāŋnda̍ ha̍ā hūŋ nāa̍ Chi̍i̍sū chu̍a̍, ma̍ nyɔ̄ɔ̄lū ndu̍ māā Chi̍i̍sū wa̍ chi̍e̍e̍ lo̍ŋ nda̍ nda̍ā. O̍ ko̍ŋ kɔ̍ɔ̍lī, mi̍ Chi̍i̍sū chu̍ā pālɛ̍i̍ ī ŋīi̍ŋ lo̍ŋ nda̍ nda̍ā. 41 O̍ ko̍ŋ kɔ̍ɔ̍lī, mɛ̄ɛ̍ nda̍ tūēī nyɛ̄ Chi̍i̍sū so̍ō nāa̍ nda̍ chūā wo̍, mi̍ wānāā ka̍ ka̍ a̍ che᷅le̍ŋ ā dūāū tīīnda᷄ŋ ndāa̍ o̍ ndu̍ ni̍ŋ. 42 Ma̍ dīmūl chu̍a̍ ko̍ma̍l ko̍ŋ Chi̍i̍sū o̍ so̍o̍ŋndo̍ wo̍ āā, “Na̍a̍ bɛ̍ɛ̍, ŋ̄ dɔ̄ū ni᷅ŋ tīīnda᷄ŋ nāa̍ o̍ ndu̍ ni̍ŋ. Ō cho̍ lɛ̍ ko̍ le̍ dīmī nūm ndo̍ le̍. Kāni̍ fo̍ndōle̍, na̍a̍ pi̍la̍ bɛ̍ɛ̍, ŋ̄ tūēī ni᷅ŋ ndu̍ dīōm. Ndu̍yɛ̍, ŋ̄ sīnā māā ndu̍ kpe̍e̍kpe̍i̍ cho̍ wāna̍ cho̍ wāŋndā chīe̍e̍ya̍ pi̍ŋī wo̍ ni̍.”

Chi̍i̍sū si̍ŋgi̍ wānā bɛ̍ndū pīlɛ̍ po̍ ndɔ̄ɔ̍

43 Mɛ̄ɛ̍ Chi̍i̍sū chu̍a̍ pālɛ̍i̍ ī ŋīi̍ŋ lo̍ŋ, mbo̍ māl mbo̍ kūā o̍ lɛ̄ŋndē Kāli̍līle̍ŋ ni᷄ŋ. 44 Kāni̍ fo̍ndōle̍, Chi̍i̍sū pi̍la̍ mbo̍ dīmī āā, “Wāna̍ su̍a̍ā le̍ Mɛ̄lɛ̄ka̍ wo̍ wāŋnda̍ o̍ lɛ̄ŋndē ndɔ̄le̍ŋ ni᷄ŋ ā ke᷅ ndu̍ lēbɛ̄ɛ̄ le̍.” 45 Mɛ̄ɛ̍ o̍ fu̍u̍lu̍u̍ Kāli̍lī, mi̍ wāŋnda̍ lo̍ŋ a̍ cha̍ā ndu̍ bīyɔ̄ɔ̄ ta̍u̍. Kāni̍ fo̍ndōle̍, lɔ̍ɔ̍ bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄ o̍ bi̍i̍nu᷄ŋ Chūlu̍sɛ̄lɛ̄m ndo̍, wāŋnda̍ ha̍ā ā wa̍ lo̍ŋ. Ā wa̍ lo̍ŋ ma̍ chā nyɛ̄ o̍ nyɛ̄ Chi̍i̍sū to̍sa̍ o̍ bɔ̄ŋa᷅ŋ kōŋ. 46 O̍ ko̍ŋ kɔ̍ɔ̍lī, mi̍ Chi̍i̍sū ku̍ā Ke̍nā chi̍e̍e̍ o̍ lɛ̄ŋndē Kāli̍līle̍ŋ ni᷄ŋ nāa̍ o̍ si̍i̍ŋgu̍u̍ mɛ̄ŋnda̍ŋ māmūɛ̄ī ya̍. Wānā bɛ̍ndū pīlɛ̍ ō wa̍ Kēpa̍a̍nīɔ̄m chi̍e̍e̍ o̍ lɛ̄ŋndē lēŋ ni᷄ŋ, po̍ ndɔ̄ɔ̍ wa̍ a̍ nāa̍ lākālu̍ te̍i̍. 47 Mɛ̄ɛ̍ wānā bɛ̍ndōo̍ ho̍ō tūēī tɔ̍ɔ̍ māā Chi̍i̍sū chɛ̍ŋ o̍ lɛ̄ŋndē Chūdi̍a̍āle̍ŋ ni᷄ŋ mbo̍ hūŋ Kāli̍lī, mbo̍ kūā nāa̍ ndu̍ chu̍a̍. Mɛ̄ɛ̍ o̍ ku̍ɛ̄, mbo̍ dīmūl Chi̍i̍sū le̍ mā kūɛ̄ Kēpa̍a̍nīɔ̄m le̍ mbō kɔ̍ si̍ŋgūl ndu̍ po̍ ndɔ̄ɔ̍. Po̍ ndɔ̄ ka̍lāa̍ ō wa̍ ni᷅ŋ tēndu̍ pīɔ̍m. 48 Mi̍ Chi̍i̍sū lo᷅ o̍ ko̍ŋ mbo̍ dīmūl wānā bɛ̍ndōo̍ ho̍ō āā, “Nya̍ ki̍nɛ̍i̍ wānā o̍ wānā cho̍ mbō dɔ̄ū tīīnda᷄ŋ ndɔ̄ɔ̍ o̍ ya̍ ni̍ŋ te̍, mɛ̄ɛ̍ mbō chē fɛ̍lɛ̍ŋ mī I̍ to̍sa̍ ka̍a̍ma̍āla̍ŋ a̍ wa̍lta̍ kɔ̄ndɔ̄fi̍lta̍ŋ.” 49 O̍ ko̍ŋ kɔ̍ɔ̍lī, mi̍ wānā bɛ̍ndōo̍ ho̍ō dīmūl Chi̍i̍su̍ āā, “Fāllo̍, ŋ̄ kɔ̍ fɔ̍, yɔ̄ŋi̍ po̍ nūu̍ ō wu̍.” 50 Mi̍ Chi̍i̍sū di̍mūl ndu̍ āā, “Mi̍i̍ŋgu̍. Po̍ nu̍mndo̍ chō sīōŋgɔ̄ɔ̄.” Dīōmndā Chi̍i̍sū di̍mi̍ la̍ŋ nda̍ŋ, mi̍ wānā bɛ̍ndōo̍ ho̍ō lāāla᷄ŋ a̍ la̍ŋ. Mbo̍ cha᷄ŋ mbo̍ mīīŋgū. 51 Mɛ̄ɛ̍ o̍ wa̍ kɔ̄la̍ŋ, ma̍ kēī bɔ̄ŋa᷅ŋ nda̍ bu̍ɛ̍i̍yāā ndūa̍a̍. Ma̍ chūū ndu̍ yōōŋgōo̍ āā, “Po̍ nu̍mndo̍ chō sīōŋgɔ̄ɔ̄.” 52 Mbo̍ nyūnā nda̍ le̍ bōōndi̍i̍ o̍ ka̍ndu̍ pɛ̄ŋgīo̍o̍ ve̍. Ma̍ dīmūl ndu̍ āā, “Chi̍ɛ̍i̍ īpāla̍a̍ a̍ bōōndi̍i̍ pāa̍le̍ŋ lē fāŋa̍ŋ o̍ bōlle̍ŋ chōo̍ ki̍nɛ̍i̍ ye̍ mi̍ dīāllūŋ tūūwo̍ŋ ŋ̄ pɛ̄ŋgī.” 53 Mi̍ fi̍nyāa̍ pōo̍mbɔ̄ɔ̍ lōōnu᷄ŋ dɔ̍ɔ̍ māā a̍ bōōndi̍i̍ ke̍ŋ ki̍nɛ̍i̍ Chi̍i̍sū di̍mu̍l ndu̍ ni̍ āā, “Po̍ nu̍mndo̍ chō sīōŋgɔ̄ɔ̄.” O̍ ko̍ŋ kɔ̍ɔ̍lī, wānā bɛ̍ndōo̍ ho̍ō ni̍ a̍ yu̍ŋgu̍ ndɔ̄ɔ̍ ma̍ dūāū tīīnda᷄ŋndo̍ o̍ Chi̍i̍sū ni̍ŋ. 54 Mālɔ̄ɔ̄ Chi̍i̍sū ma̍l lɛ̄ŋndē Chūdi̍a̍āle̍ŋ mbo̍ kūā Kāli̍lī wo̍, wa̍lta̍ kɔ̄ndɔ̄fi̍ltā o̍ to̍sa̍ la̍ŋ tīɔ̍ɔ̍ŋ ndɔ̄ɔ̍ wa̍ ho̍ō ni̍.

Chɔ᷄ŋ 5

A̍ sīŋgi̍ yɔ̍nu̍ŋ o̍ so̍o̍ŋ māmɛ̄ŋndo̍ wo̍ o̍kɔ̄ɔ̄

1 O̍ ko̍ŋ kɔ̍ɔ̍lī, bɔ̄ŋa᷅ŋ pīɛ̄īyāā Mɛ̄lɛ̄ka̍a̍ ō pūm ō wa̍ Chūlu̍sɛ̄lɛ̄m. Mi̍ Chi̍i̍sū ku̍ā lo̍ŋ le̍ bɔ̄ŋa᷅ŋ kōŋ. 2 Mɛ̄ŋmā tīīla̍ŋma̍ pūm mā wa̍ Chūlu̍sɛ̄lɛ̄m lo̍ŋ, mā vēēlū ma̍ŋ o̍ Hi̍būlūi̍ye̍ ni᷄ŋ āā, Bɛ̄sa̍tā. Sāāsa̍ wa̍ chi̍o̍o̍ ō bālāā wo̍, o̍ dīō sāāsā ko̍ŋ ō pīlɔ̍ɔ̄ īkɛ̄i̍ lo̍ŋ mɛ̄ŋnda̍ŋ ma᷅ŋ mā wa̍ ni̍, mā ve̍e̍lū di̍o̍ kōŋ āā, Dīō Sāa̍ Lūɛ̄ī yo̍. Fo̍ndāŋndā chālāāla̍ŋ lā wa̍ lā tōōsīāā o̍ mɛ̄ŋmā māŋ īkɛ̄i̍ sa̍lā ŋūɛ̍ɛ̍nu̍. 3 Wānāā lānāāwa̍ ā wa̍ ā yɛ̄ɛ̄mbāā o̍ fo̍ndāŋndā chālāālā sālā ŋūɛ̍ɛ̍nu̍la̍ la̍ŋ ta̍u̍ ta̍u̍. Wānāā sūmɛ̍i̍ya̍ ni̍, a̍ wānāa̍ nɔ̍lā kɔ᷅la̍ŋ lāpi̍ le̍ wa̍, a̍ wānāā bɛ̄vɛ̍i̍ya̍ fa̍ū ā wa̍ lo̍ŋ. Wānāā lānāāwa̍ ha̍ā ā wa̍ chūmndo̍ le̍ bōōndi̍i̍ mɛ̄ŋnda̍ŋ mā hīīlūŋ nde̍. 4 Kāni̍ fo̍ndōle̍, ki̍i̍la̍nɔ̍ Mɛ̄lɛ̄ka̍a̍ ndu̍ o̍o̍ nɔ̍ tōlɔ̄ɔ̍ o̍ mɛ̄ŋnda̍ŋ ma᷅ŋ ni᷄ŋ a̍ bōōndo̍ŋ ŋ̄ pūm ni̍, mbō hīīlūū ma̍ŋ. Ndu̍yɛ̍, te̍le̍ŋ o̍ te̍le̍ŋ o̍ hi̍i̍lu̍u̍ ma̍ŋ le̍nde̍ pɛ̍ wāna̍ tāse̍ tu̍āl le̍ni̍ŋ ndo̍, nāā o̍ nāa̍ wa̍ ndu̍ sīōŋgɔ̍ɔ̍ ndu̍ o̍o̍ si̍a̍ŋgū ni̍. 5 Po̍ pi᷅lɛ̍ ō wa̍ o̍ wānāā lānāāwa̍ ha̍ā tɛ̍ɛ̄ŋ, le̍ wɔ̄sīla̍ŋ be̍le̍-ya̍a̍ a̍ lā ŋɔ̄ma̍a̍ ō chō a̍ nāa̍. 6 Mi̍ Chi̍i̍sū cha᷅ pōo̍ ho̍ō īhīni̍. Ndu̍yɛ̍, mbo̍ sīnā māā ō vīōū ni᷅ŋ a̍ nāa̍ ho̍ō. Mi̍ Chi̍i̍sū nyu̍nā ndu̍ āā vɛ̄ɛ̄, “A̍ hɛ̍na̍ŋ mā sēŋgū?” 7 Mi̍ pōo̍ mūlī āā, “Mī vɛ̄ɛ̍nɛ̍ ya̍ I̍ sēŋgū yɛ̄ kɛ̍i̍, Fāllo̍? I̍ nɔ̍ wa᷅na̍ chu̍a̍ ya̍ mbō tūsi̍ ya̍ o̍ mɛ̄ŋnda̍ŋ ni᷄ŋ te̍. Bōōndi̍i̍ mɛ̄ŋnda̍ŋ mā hīīlūŋ nde̍ I̍ wa᷅ ki̍ndīo̍o̍ le̍ tōlɔ̄ɔ̍ lēni᷄ŋ mī wānā che᷅le̍ŋ kēlū ya̍ lāchī.” 8 Mi̍ Chi̍i̍sū lo᷅ o̍ ko̍ŋ mbo̍ dīmūl ndu̍ āā, “Chɔ̍ŋ mā chu̍a̍ wāla̍ nu̍mndo̍ mā kūɛ̄nu᷄ŋ.” 9 Dīmīo̍o̍ le̍nde̍, mi̍ pōo̍ sīāŋgū o̍ lēpīlɛ̍ ni᷄ŋ kpe̍. Mbo̍ chūā wāla̍ ndɔ̄ɔ̍ mbo̍ kāndū kɔ᷄ŋnda̍ŋ Ndu̍yɛ̍, o̍ pāa̍le̍ pɛ̍ŋgīāālē Chu̍ūwa̍ chōo̍ sūɛ̍i̍ he̍ī yɔ̄nu̍ŋ ni̍. 10 Le̍ he̍ī, mi̍ wānāā bɛ̄ndūāā Chu̍ūwa̍ dīmūl po̍ Chi̍i̍sū si̍ŋgi̍ wo̍ āā, “Pāa̍le̍ nāāle̍ pɛ̍ŋgīāāle̍ŋ le̍ cho̍ hāū ni̍. Sāwa̍ nāa̍ dīmi̍ māā a̍ nɔ̍ mā kūɛ̄ īnɛ̍ a̍ wāla̍ nu̍mndo̍ o̍ pāa̍le̍ŋ nde᷅ŋ chōo̍ le̍.” 11 Mi̍ pōo̍ mūlī āā, “Wāna̍ si̍ŋgi̍ ya̍ wo̍, ndu̍ di̍mu̍l la̍ ni̍ māā ya̍ I̍ chu̍a̍ wa̍la̍ nūu̍ mī ku̍ɛ̍nu᷄ŋ.” 12 Ma̍ nyūnā ndu̍ āā, “Ō nɛ̄ɛ̍ di̍mu̍l lɛ̄ nu̍m ko̍ŋ māā nūm chu̍a̍ wa̍la̍ nu̍mndo̍ mā kūɛ̄nu᷄ŋ?” 13 Kɛ̍, pōo̍ ndu̍ o̍o̍ si̍nā wa᷅na̍ si̍ŋgi̍ ndu̍ wo̍ le̍, ndu̍yɛ̍, wāŋnda̍ wa̍ fāŋgā ta̍u̍ lo̍ŋ. Sīŋgī kōŋ ndu̍, mī Chi̍i̍sū lu̍ɛ̍i̍nu᷄ŋ o̍ fāŋgāa̍ tɛ̄ɛ̄ŋ mbo̍ kūa̍ŋ. 14 Vīōūwɔ̄ɔ̍ kpɛ̍ɛ̍, mi̍ Chi̍i̍sū sa̍a̍lu᷄ŋ po̍ o̍ si̍ŋgi̍ ho̍ō wo̍ o̍ chīɛ̍i̍ Mɛ̄lɛ̄ka̍a̍ ni᷄ŋ. Mi̍ Chi̍i̍sū di̍mūl ndu̍ āā, “Mī di̍mu̍l nu̍m, mɛ̄ɛ̍ ŋ̄ sēŋgū nu̍a̍ā yɛ̍, ma̍l ni̍ko̍ yɔ᷅ŋndā nūmnda̍ wɔ̍ɔ̍ŋnda̍ŋ. Tē a̍ me̍l te̍, ā chō nyɛ̄ pālāā chēle̍ŋ sɔ̄lā mbō hīōū bɛ̍ɛ̍ le̍nde̍.” 15 Mɛ̄ɛ̍ o̍ si̍na̍ māā Chi̍i̍su̍ si̍ŋgi̍ ndu̍ ni̍, mbo̍ kūā mbo̍ kɔ̍ di̍mūl wānāā bɛ̄ndūāā Chu̍ūwa̍. 16 O̍ ko̍ŋ kɔ̍ɔ̍lī, ma̍ kāndū Chi̍i̍su̍ nyɛ̄ pālāa̍ tūsīo̍o̍ chōo̍ le̍ sīŋgī o̍ si̍ŋgi̍ pōo̍ ho̍ō o̍ pāa̍le̍ ndā le̍ pɛ̍ŋgīāā le̍ŋ chōo̍ wo̍. 17 Mi̍ Chi̍i̍sū mu̍lūl wānāā bɛ̄ndūāā Chu̍ūwa̍ ha̍ā āā, “Le̍ te̍le̍ŋ o̍ te̍le̍ŋ Fi̍nyā nūu̍ chō wa̍llo̍. Ya̍ bɛ̍ɛ̍ mɛ̄ɛ̍ mī to̍sa̍ wa̍llo̍.” 18 Le̍ nyɛ̄ Chi̍i̍sū di̍mi̍ ko̍ŋ ndo̍, mi̍ wānāā bɛ̄ndūa̍a̍ chɔ̄ɔ̄lū ni̍ko̍ kɛ̍ɛ̍sīāā le̍ ndu̍ dīyɔ̄ɔ̍. Kāni̍ fo̍ndōle̍, māā ō cho̍ lɛ̍ ko̍ le̍ sāwa̍ pāa̍le̍ pɛ̍ŋgīāā lē Chu̍ūwa̍ tɛ̄ɛ̄mbūūwo̍ le̍, kɛ̍, māā ō dīmi̍ āā, “Mɛ̄lɛ̄ka̍ cho̍ Fi̍nyā ndɔ̄ ni̍.” Māā tē ō dīmi̍ yɛ̄ pɛ̍, māā Mɛ̄lɛ̄ka̍ cho̍ Fi̍nyā nūu̍ ni̍, mɛ̄ɛ̍ dīmīo̍o̍ o̍ di̍mi̍ ko̍ŋ ni̍ māā nda̍ Mɛ̄lɛ̄ka̍ ā sīīma᷅ŋ.

Mɛ̄lɛ̄ka̍ ke̍ Po̍ ndɔ̄ɔ̍ kpāāyāa̍

19 O̍ ko̍ŋ, mi̍ Chi̍i̍sū di̍mūl wānāā bɛ̄ndūāā Chu̍ūwa̍ āā, “Mī di̍mu̍l nya̍ tōnya̍a̍ wa̍la̍ŋ, Po̍ Mɛ̄lɛ̄ka̍a̍ ō nɔ̍lā mbō to̍sa̍ nyɛ̄ o̍ nyɛ̄ a̍ bā ndɔ̄ le̍. Nyɛ̄ o̍ cha᷅ Fi̍nyā ndɔ̍ o̍ tōsāa̍ wo̍, ndu̍ ko̍ni̍ o̍ to̍sā ni̍. Nyɛ̄ Mɛ̄lɛ̄ka̍ Fi̍nyāa̍ ō tōsā wo̍, ndu̍ ko̍ni̍ Po̍ ndɔ̄ɔ̍ bɛ̍ɛ̍ ō tōsā ni̍. 20 Kāni̍ fo̍ndōle̍, Mɛ̄lɛ̄ka̍ Fi̍nyāa̍ kāāla̍ Po̍ ndɔ̄ɔ̍, ndu̍yɛ̍, nyɛ̄ o̍ nyɛ̄ ndu̍ Mɛ̍lɛ̄ka̍ ō wa̍ tōsāa̍ chɔ̄mndo̍ o̍ chɔ᷅m ndu̍ ni̍. Ndu̍yɛ̍, ō chō ndu̍ sɔ̄ɔ̍ŋ bɛ̍ndūŋ chēle̍ŋ chɔ̄m le̍ tōsāa̍ mī ŋ̄ hīōū bɛ̍ɛ̍ i̍ yɔ̍nu̍ŋ he̍ī ye̍. O̍ ko̍ŋ, nya̍ kpo̍u̍ mī kɔ̄ndɔ̄fi̍llo̍ bīī nya̍. 21 Mɛ̄ɛ̍ Mɛ̄lɛ̄ka̍ Fi̍nyāa̍ sōlī wa̍nāā vīlɛ̍i̍ya̍ o̍ pīɔ̍mndo̍ ni᷄ŋ mbō tōsa̍ mā wa̍ yōōmū yɛ̍, le̍nde̍ ko̍ni̍ Po̍ ndɔ̄ɔ̍ ō kē wa̍nāā o̍ ye̍e̍mā wa̍ yōōmōo̍ ni̍. 22 Mɛ̄lɛ̄ka̍ Fi̍nyāa̍ ō ki̍lūl wa̍nā o̍ wānā i̍ya᷅ma̍ le̍. Ō ke̍ Po̍ ndɔ̄ɔ̍ kpāāyāa̍ le̍ wāŋnda̍ kpo̍u̍ ya᷅mɛ̍i̍ kīlūl lo̍. 23 Ndu̍yɛ̍, Mɛ̄lɛ̄ka̍ Fi̍nyāa̍ ō tōsa̍ he̍ī le̍ mī wāŋnda̍ ā ke̍ Po̍ ndɔ̄ɔ̍ bɛ̄ɛ̄le̍ŋ, mɛ̄ɛ̍ nda̍ kē Fi̍nyā ndɔ̍ bɛ̄ɛ̄le̍ŋ yɛ̍. Wānā o̍ wāna̍ ke̍ Po̍ ndɔ̄ɔ̍ bɛ̄ɛ̄le̍ŋ te̍ mɛ̄ɛ̍ Mɛ̄lɛ̄ka̍ o̍ ve᷅m ndu̍ wo̍, mɛ̄ɛ̍ ndu̍ wānā ko̍ŋ ō kɛ̄ɛ̍ ko̍ŋ bɛ̍ɛ̄le̍ŋ kīo̍o̍ ni̍. 24 “Mī di̍mu̍l nya̍ tōnya̍a̍ wa̍la̍ŋ, wānā o̍ wāna̍ tu̍e̍ī nyɛ̄ ya̍ I̍ di̍mī wo̍ pɛ̍, ndu̍yɛ̍, mbō tōsa̍ ndu̍, o̍ ko̍ŋ kɔ̍ɔ̍lī, mbō dɔ̄ū tīīnda᷄ŋndo̍ o̍ Mɛ̄lɛ̄ka̍ ni᷄ŋ o̍ ve᷅m ya̍ wo̍ pɛ̍, mɛ̄ɛ̍ wānā ko̍ŋ ō kāndu̍ ni᷅ŋ bɛ̍ɛ̍ yo̍o̍mū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍ sɔ̄lāa̍. Mɛ̄ɛ̍ wānā ko̍ŋ ā ki̍lūl lɛ̍ ndu̍ īyāma̍ le̍ ndu̍ nyɛ̄ pālāā tūsī chōo̍ le̍. Ō wa̍ māā yɔ̄ŋɔ̄ɔ̄ pɛ̍, mɛ̄ɛ̍ wānā ko̍ŋ ō fāŋa̍ŋ o̍ nɛ̄i̍ ku̍ɛ̄ o̍ pīɔ̍mndo̍ ni᷄ŋ ndo̍ chōo̍ mbo̍ kāndū wāa̍ yōōmū kpe̍e̍kpe̍i̍. 25 Mī di̍mu̍l nya̍ tōnya̍a̍ wa̍la̍ŋ, bōōndi̍i̍ cho̍ fūūlūū, ndu̍yɛ̍, ī chīi̍ ni᷅ŋ bɛ̍ɛ̍ fu̍u̍lūū, tē wānāa̍ cho̍ māā wānāā vīlɛ̍i̍ ya̍ ā tūēī nyɛ̄ Po̍ Mɛ̄lɛ̄ka̍a̍ dīmī wo̍ pɛ̍, ndu̍yɛ̍, mā tōsa̍ ndu̍ pɛ̍, wānāā kāŋ ā chō wā yōōmū kpe̍e̍kpe̍i̍. 26 Mɛ̄ɛ̍ Mɛ̄lɛ̄ka̍ Fi̍nyāa̍ chō wāna̍ to̍sā mī wāŋnda̍ ā wa̍ yōōmū kpe̍e̍kpe̍i̍ yɛ̍, le̍nde̍ ko̍ni̍ o̍ to̍sā mi̍ Po̍ ndɔ̄ɔ̍ ō wā wāna̍ to̍sā mī wāŋnda̍ wā yōōmū kpe̍e̍kpe̍i̍ yɛ̍ ni̍. 27 Ndu̍yɛ̍, ō ke̍ Po̍ ndɔ̄ɔ̍ kpāāyāa̍ le̍ wāŋnda̍ yāmɛ̍i̍ kīlūl lo̍. Kāni̍ fo̍ndōle̍, ndu̍ Po̍ ndɔ̄ɔ̍ ndu̍ cho̍ wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ ni̍. 28 Kɔ̄ndɔ̄fi̍li̍ bi̍ī nya̍ le̍ nyɛ̄ ya̍ I̍ cho̍ nya̍ dīmūllo̍ wo̍ le̍. Ndu̍ cho̍ ni̍, māā te̍le̍ŋ cho̍ fūūlūū mī wānāā vīlɛ̍i̍ya̍ kpo̍u̍ a̍ tu̍e̍ī dīōm ndɔ̄ɔ̍ 29 o̍ ko̍ŋ, mā fūla̍ o̍ sɛ̄īla̍ŋ ni᷄ŋ. O̍ ko̍ŋ, wānāa̍ to̍sa̍ yɔ̄ŋndā kɛ̄ndɛ̄la̍ŋ nda̍ ā chō fūlā mā sɔ̄la̍ yōōmū kpe̍e̍kpe̍i̍yo̍. O̍ ko̍ŋ kɔ̍ɔ̍lī, mī wānāa̍ to̍sa̍ yɔ̄ŋndā wɔ̄ɔ̍ŋnda̍ŋ nda̍ mā fūla̍ mā kūɛ̄ o̍ nyɛ̄ nɛ̄īyāa̍ ni᷄ŋ.”

Wānāa̍ chɔ᷅m wa᷅na̍ Chi̍i̍sū cho̍ wo̍ wa̍

30 Mi̍ Chi̍i̍sū hi̍a̍ū lāchī a̍ sūɛ̍i̍. Mbo̍ dīmī āā, “I̍ to̍sā nyɛ᷅ o̍ nyɛ̄ o̍ kpāāya̍ ni̍ ya̍ pi̍la̍ ni̍ŋ te̍. Mɛ̄ɛ̍ Mɛ̄lɛ̄ka̍ dīmūl la̍ yɛ̍, le̍nde̍ ko̍ni̍ ya̍ I̍ ki̍lūl wa᷅ŋnda̍ yāmɛ̍i̍ ni̍. Le̍la̍ŋ, tē I̍ ki̍lu̍l wānā o̍ wānā ya᷅mɛ̍i̍ pɛ̍, yāmɛ̍ī sa̍kpūe̍i̍ i̍ wa᷅ ni̍. Kāni̍ fu̍u̍le̍, I̍ cho̍ ki̍ndī le̍ hɛ̄na᷄ŋ ni̍ ya̍ pi̍la̍ to̍sā le̍. Wāna̍ ve᷅m ya̍ wo̍ nyɛ̄ o̍ hɛ̍na̍ŋ ndo̍, ndu̍ ya̍ I̍ to̍sā ni̍. 31 “Tē ndu̍ o̍o̍ wa̍ ya̍ pi̍la̍ ko̍ni̍ pɛ̍ chɔ̍m a̍ ya̍ pi̍la̍ o̍kɔ̄ɔ̄ ni̍, wāŋnda̍ nda̍ a̍a̍ nɔ᷅ di̍ le̍ kɛ̄ɛ̄ lāāla᷄ŋndo̍ a̍ nyɛ̄ ya̍ I̍ di̍mi̍ a̍ ya̍ pi̍la̍ o̍kɔ̄ɔ̄ wo̍. 32 Kɛ̍ ndu̍yɛ̍, wānā che᷅le̍ŋ chō o̍ nɔ̍lā mbō chɔ᷄m nyɛ̄ o̍ si̍nā a̍ ya̍ o̍kɔ̄ɔ̄ wo̍. Ndu̍yɛ̍, I̍ si̍nā māā tōnya̍a̍ o̍ di̍mī a̍ ya̍ o̍kɔ̄ɔ̄ ni̍. 33 O̍ ko̍ŋ kɔ̍ɔ̍lī, mi̍ nya̍ pi̍la̍ vīām bu̍ɛ̍i̍yāā nyāa̍ nāa̍ Chɔ᷄ŋ chu̍a̍. Ndu̍yɛ̍, mbo̍ sūāā tōnya̍a̍ a̍ ya̍ o̍kɔ̄ɔ̄. 34 Kɛ̍ ndu̍yɛ̍, ō cho̍ ma̍chu̍a̍ā māā mɛ̄ɛ̍ mī wāna̍ chi̍e̍e̍ o̍ chɔ̍m īsɔ̄ɔ̍ a̍ ya̍ o̍kɔ̄ɔ̄ le̍. I̍ di̍mi̍ mādīmīāā he̍ī a̍ Chɔ᷄ŋ Wānā Yi̍ŋāa̍ o̍kɔ̄ɔ̄ le̍ mī lā pēŋ. 35 Dīōmndā Chɔ᷄ŋ di̍mi̍ la̍ŋ lā chō māchūāā mɛ̄ɛ̍ la̍mbūi̍yo̍ wā nu̍a̍ā sānde̍i̍ mbō yɔ̄ŋgū nyɛ᷅ wa̍wo̍ŋndo̍ yɛ̍. Ndu̍yɛ̍, le̍ te̍le̍ŋ ti̍ŋ mi̍ lā sɔ̄lā tɔ̄nɔ̄ɔ̍, ndu̍yɛ̍, mi̍ lā wā a̍ kɔ̄l kɛ̄ndɛ̄ a̍ nyɛ̄ wa̍wo̍ŋ ko̍ŋ. 36 Kɛ̍ ndu̍yɛ̍, nyɛ̄ chēle̍ŋ chō o̍ chɔ᷅m i̍sɔ̍ɔ̍ a̍ ya̍ o̍kɔ̄ɔ̄ wo̍. Nyɛ̄ kōŋ ndu̍ chɔ᷅m wa᷅na̍ ya̍ I̍ cho̍ wo̍ mbo̍ hīāū bɛ̍ɛ̍ nyɛ᷅ dīōmndā Chɔ᷄ŋ di̍mi̍ a̍ ya̍ o̍kɔ̄ɔ̄ la̍ŋ. Nyɛ̄ kōŋ ndu̍ yɔ̍nūŋ māā wa̍lta̍ ya̍ to̍sā la̍ŋ ni̍, wa̍lta̍ Mɛ̄lɛ̄ka̍ Fi̍nyāa̍ ō ke̍ ya̍ le̍ tōsāa̍ la̍ŋ. Wa̍lta̍ la̍ŋ la̍ŋ la̍ chɔ᷅m wa᷅na̍ ya̍ I̍ cho̍ wo̍ ni̍. La̍ŋ ko̍ni̍ la̍ chɔ᷅m ni̍ māā ndu̍ Mɛ̍lɛ̄ka̍ Fi̍nyāa̍ māā ndu̍ ve᷅m ya̍ ni̍. 37 O̍ ko̍ŋ kɔ̍ɔ̍lī, Mɛ̄lɛ̄ka̍ Fi̍nyāa̍ o̍ ve᷅m ya̍ wo̍, ndu̍ bɛ̍ɛ̍ ō chɔ̄m a̍ ya̍ o̍kɔ̄ɔ̄. Lā tūi̍i̍ yɔ̍ bɛ̍ɛ̍ ndu̍ dīōm te̍. Ndu̍yɛ̍, lā chi̍ wɔ̍ bɛ̍ɛ̍ ndu̍ mī lā sīna̍ mɛ̄ɛ̍ o̍ cho̍ yɛ̍ le̍. 38 Yōōŋgu̍ chɛ̍ŋ o̍ ndu̍ lo̍ wo̍, lā cho̍ chɛ̍lɔ̄ɔ̄ mbō cha᷄l nya̍ o̍ lākɔ̄l te̍, kāni̍ fo̍ndōle̍, lā lāāla̍ŋ a̍ wāna̍ o̍ ve᷅m ndo̍ le̍. 39 Dīōmnda̍ cho̍ o̍ Yāu̍ Mɛ̄lɛ̄ka̍a̍ ni᷄ŋ nda̍ŋ mī lā pɛ̄ɛ̄ku̍ la̍ŋ, kāni̍ fo̍ndōle̍, lā nɔ̄ yīya᷄ŋndo̍ māā, lā nɔ̄lā mī lā sɔ̄la̍ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍ o̍ dīōmndā lāŋ ni᷄ŋ. O̍ Yāu̍ Mɛ̄lɛ̄ka̍ ko̍ŋ ni᷄ŋ ko̍ni̍ dīōmnda̍ŋ lā chō lā dīmīa̍ŋ a̍ ya̍ o̍kɔ̄ɔ̄ ni̍. 40 Kɛ̍ o̍ ko̍ŋ ni̍ŋ kpo̍u̍, lā chɛ᷅l mī lā dɔ̄ū tīīnda᷄ŋ nyāa̍ o̍ ya̍ ni̍ŋ le̍ mī lā sɔ̄la̍ yōōmū kpe̍e̍kpe̍i̍yo̍ le̍.” 41 Mi̍ Chi̍i̍sū hi̍a̍ū lāchī a̍ sūɛ̍i̍ āā, “Ō cho̍ ki̍ndī le̍ ya̍ I̍ cho̍ māā wāna̍ chi̍e̍e̍ o̍ sa̍ŋga̍la̍ ya̍ le̍. 42 Kɛ̍ ndu̍yɛ̍, I̍ si̍nā wānāā nya̍ chō wa̍. I̍ si̍nā māā lā nɔ̍ ka̍a̍lā o̍ kɔ̄ltā nyāla̍ŋ ni᷄ŋ le̍ Mɛ̄lɛ̄ka̍ le̍. 43 Fi̍nyā nūu̍, ndu̍ ve᷅m ya̍ māā hɔ̄ltē ndɔ̄ kpe̍e̍kpe̍i̍ ni̍. Kɛ̍ ndu̍yɛ̍, lā chɛ᷄l mī lā ya᷄ŋ ya̍ lānī le̍. Kɛ̍ o̍ ko̍ŋ kɔ̍ɔ̍lī, tē wānā che᷅le̍ŋ ndu̍ hi᷅ŋ a̍ kpāāya̍ ndɔ̍ ndu̍ pi̍la̍a̍ pɛ̍, nu̍a̍ā nya̍ yāŋ ndu̍ ndu̍ la̍ni̍. 44 Lā lēndu̍ŋ kɔ̍l māā o̍ cho̍ ho̍ō Mɛ̄lɛ̄ka̍ ndu̍ pīlɛ̍ kpe̍ wo̍ māā ndu̍ sa̍ŋga̍la̍ nya̍ le̍. Nya̍ pi̍la̍ sāŋga̍li̍āŋndo̍ vēllāa̍ vēllē, ndu̍ nɛ̍ŋī nya̍ kɔ̄lta̍ŋ ni̍. Le̍la̍ŋ bɛ̍ɛ̍, nya̍ nɔ̍lā mī lā lāāla̍ŋ a̍ ya̍ le̍ ni̍. 45 Kɛ̍ o̍ ko̍ŋ ni̍ŋ kpo̍u̍, lā nɔ᷅ o̍ kɔ̄l māā ya̍ le̍ cho̍ lākɔ̄ sūɛ̍i̍ nyā dɔ̍wɔ̄ɔ̄ o̍ Mɛ̄lɛ̄ka̍ Fi̍nyāa̍ lāchī le̍. Mūu̍sē ō nya̍ tīīnda̍ŋ le̍ nya̍ mālāa̍ wo̍, ndu̍ kpe̍e̍kpe̍i̍ cho̍ lākɔ̄ sūɛ̍i̍ nyɛ̄i̍ dɔ̄wɔ̄ɔ̄ o̍ Mɛ̄lɛ̄ka̍ Fi̍nyāa̍ lāchī ni̍. 46 Tē ndu̍ o̍o̍ wa̍ pɛ̍, mī nya̍ a̍a̍ la̍a̍la̍ŋ a̍ sɔ̄ɔ̍ŋ Mūu̍sē pōōnyīāā wo̍ŋ lēkɛ̍ndɛ̍ī pɛ̍, lā wa̍ lāāla᷄ŋ a̍ ya̍, kāni̍ fo̍ndōle̍, a̍ ya̍ o̍kɔ̄ɔ̄ Mūu̍sē po̍o̍nyi̍a̍a̍ dīōmndā lāŋ ni̍. 47 Kɛ̍, lā kɛ̄ɛ̍ wɔ̄ le̍ lāāla᷄ŋndo̍ a̍ nyɛ̄ o̍ po̍o̍nyi̍a̍a̍ wo̍, vɛ̄ɛ̍nɛ̍ nya̍ lōōkū yɛ̍ lāāla᷄ŋ a̍ dīōmnda̍ ya̍ di̍mi̍ la̍ŋ?”

Chɔ᷄ŋ 6

Chi̍i̍sū ke̍ fāŋgā bɛ̍ndōo̍ nyɛ̄ dīa̍a̍

1 Mɛ̄ɛ̍ te̍le̍ŋ ti̍ŋ hīōū, mi̍ Chi̍i̍sū ta᷅ŋ o̍ Mɛ̄ŋmā Ībūŋga᷄ŋ Kāli̍lī le̍e̍lōo̍. Ā vēēlū vɛ̍lɛ̄ mɛ̄ŋmā ībūŋga᷄ŋ ma᷅ŋ āā, mɛ̄ŋmā ībūŋga᷄ŋ Tābi̍līāā. 2 Mɛ̄ɛ̍ o̍ ta̍ŋ kɔ̄ŋgɔ̍ɔ̍ lēe̍lōo̍, mi̍ wāŋnda̍ tūāl ndu̍ kɔ̄ɔ̄lī fāŋgā bɛ̍ndōo̍, kāni̍ fo̍ndōle̍, le̍ wa̍lta̍ bɛ̍ndūlā nda̍ chē mbo̍ tōsā la̍ŋ. La̍ŋ la̍ yɔ̍nūŋ māā wānāā lānāā o̍ si̍ŋgi̍ wa̍ ni̍. 3 Mi̍ Chi̍i̍sū lo᷅ o̍ ko̍ŋ mbo̍ hēl pēmbēi̍ chōo̍ mbo̍ chāl nda̍ bu̍ɛ̍i̍yāā ndūa̍a̍. 4 Ndu̍yɛ̍, pāa̍le̍ Chu̍ūwa̍ bīī bɔ᷅ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄ le̍ŋ lē wa̍ ni᷅ŋ kpɛ̍ɛ̍lūŋ. 5 Mɛ̄ɛ̍ Chi̍i̍sū wa̍ mɛ̄ɛ̄ndīa̍ŋndo̍, mbo̍ chā wāŋnda̍ fāŋgā bɛ̍ndōo̍ ā chō hūnɔ̄ɔ̍ nāa̍ ndu̍ chu̍a̍. Mbo̍ nyūnā bu̍ɛ̍ī ndɔ̄ɔ̍ ō pīlɔ̍ɔ̄ Fi̍li̍pī āā, “Kūɛ̍ɛ̍nɛ̍ na̍a̍ ŋ̄ sɔ̄lā yɛ̍ nyɛ̄ dīa̍a̍ tūu̍le̍ŋ le̍ pīōndɔ̄ɔ̍ mī wāŋnda̍ ha̍ā dē?” 6 Kɛ̍ ndu̍yɛ̍, le̍ Fi̍li̍pī kɔ̄llo̍ tōfāa̍ ni᷄ŋ ko̍ni̍ o̍ nyu̍na̍ ndu̍ nyūnā kōŋ ni̍. Ndu̍ pi̍la̍ ndu̍ o̍o̍ si̍nā nyɛ᷅ ndu̍ o̍o̍ nɔ̍ le̍ tōsāa̍ wo̍. 7 Mi̍ Fi̍li̍pī lo᷅ o̍ ko̍ŋ mbo̍ mūlī Chi̍i̍su̍ dīōm āā, “A̍ fāŋgā ka̍āku̍u̍wo̍ ho̍ō, mɛ̄ɛ̍ ni᷅ŋ dɔ̍ɔ̍ mī ŋ̄ pēndū bēe̍dīi̍yo̍ a̍ nyɛ̄ sɔ̄lāa̍ ō bānā ba̍na̍ mālāŋ nda̍ kpo̍u̍ a̍ sɔ̍lā bɛ̍ɛ̍ o̍ pɔ᷅m pɔ̍mbɔ̄.” 8 O̍ ko̍ŋ, Chi̍i̍sū bu̍ɛ̍i̍yāā ndūa̍a̍ ō pīlɔ̍ɔ̄ dīōla̍ŋ A̍ndūlū, pɔ̄mbɔ̄ɔ̍ Sa̍i̍mɔ̄ŋ Pītɛ̍, mbo̍ dīmī āā, 9 “Pōo̍mbɔ̄ pīlɛ̍ chō na̍nu᷄ŋ ō nɔ̄ bēe̍dīi̍ ŋ̄ba̍a̍līi̍yo̍ kpūŋgba᷄ŋ ŋ̄ ŋūɛ̍ɛ̍nu̍ a̍ sūūwa̍ ā ŋīɔ̍ɔ̍ŋ. Kɛ̍, mī yɛ̄ɛ̍nɛ̍ ko̍ŋ yɔ̍ŋ yɛ̄ a̍ fāŋgā ka̍āku̍u̍wo̍ ho̍ō?” 10 Mi̍ Chi̍i̍sū di̍mūl nda̍ āā, “Lā tōsa̍ mī wāŋnda̍ cha᷄l.” Ndu̍yɛ̍, bīl pūīyāa̍ wa̍ o̍ fo̍ndāŋ kōŋ ta̍u̍. Mi̍ wāŋnda̍ kpo̍u̍ a̍ cha᷅l. Pūa̍a̍ su̍e̍e̍ nda̍ a̍a̍ wa᷅ wa̍a̍la̍ŋ lā ŋūɛ̍ɛ̍nu̍. 11 Mi̍ Chi̍i̍sū bi̍ī bēe̍dīi̍ kpūŋgba᷄ŋ ŋūɛ̍ɛ̍no̍o̍ ho̍ō mbo̍ me᷅l Mɛ̄lɛ̄ka̍ ba̍li̍ka̍a̍ le̍ ndu̍. Mbo̍ pīɔ̄ū wānāa̍ wa̍ īchāli̍ lo̍ŋ nda̍. Sūūwāā ŋīɔ̍ɔ̍ŋnda̍ bɛ̍ɛ̍, le̍nde̍ ko̍ni̍ o̍ to̍sa̍ a̍ nda̍ ni̍. Mɛ̄lɛ̄ka̍ ba̍li̍ka̍a̍ mēllo̍, mbo̍ pīɔ̄ū nda̍. Wāŋnda̍ kpo̍u̍ ma̍ dīā ma̍ pūm. 12 Mɛ̄ɛ̍ nda̍ kpo̍u̍ a̍ de᷅ ma̍ pūm, mi̍ Chi̍i̍sū di̍mūl bu̍ɛ̍i̍yāā ndūa̍a̍ āā, “Lā chɔ̄ɔ̄vi̍a̍a̍ o̍ nda̍ dēma̍ wo̍. Ō pɔ̄mbɔ̄ bɛ̍ɛ̍ ō ta̍mbū le̍.” 13 Ma̍ chɔ̄ɔ̄vīāā ō bīŋgī bi̍ŋgi̍ nda̍ dēma̍ ko̍ŋ ndo̍ ma̍ dūāū o̍ kāmbɛ̍i̍la̍ŋ ni᷄ŋ. Bēe̍dīi̍ ŋ̄ba̍a̍līi̍ kpūŋgba᷄ŋ ŋūɛ̍ɛ̍nu̍ wāŋnda̍ dē ko̍ŋ ndo̍, mɛ̄ɛ̍ bu̍ɛ̍īya̍ chɔ̄ɔ̄vi̍a̍a̍ ō bīŋgī bi̍ŋgī nda̍ dēma̍ wo̍, mbo̍ pīā kāmbɛ̍i̍la̍ŋ tɔ̍ a̍ lā tīɔ̍ɔ̍ŋ. 14 Mɛ̄ɛ̍ wāŋnda̍ chē sūɛ̍i̍ kɔ̄ndɔ̄fi̍li̍i̍ bɛ̄ndūīī Chi̍i̍sū to̍sa̍ ve̍, ma̍ kāndū dīmu̍la᷅ŋndo̍ āā, “Lē kɛ̍ndɛ̍ī, wāna̍ su̍a̍ā le̍ Mɛ̄lɛ̄ka̍ wo̍ ō nda̍ dīmi̍ māā ō chō hūnɔ̄ɔ̄ o̍ chi̍e̍ēŋndo̍ ni᷄ŋ ndo̍, ndu̍ kpe̍e̍kpe̍i̍ cho̍ ho̍ō ni̍.” 15 O̍ ko̍ŋ kɔ̍ɔ̍lī, mi̍ Chi̍i̍sū du̍a̍ū tāāsi̍ māā wāŋnda̍ cha᷄l le̍ ndu̍ chūa̍a̍ a̍ ka̍ka̍ mā sīīŋgu̍u̍ ndu̍ māsā bɛ̍ndōo̍. Sīnāa̍ le̍nde̍, mbo̍ kūānu᷄ŋ vɛ̍lɛ̄ pɔ̍ o̍ pēmbo᷄ŋ tɛ̄ɛ̄ŋ ndu̍ pīlɛ̍.

Chi̍i̍sū ku̍ɛ̄ o̍ mɛ̄ŋnda̍ŋ chōo̍

16 Mɛ̄ɛ̍ pāa̍le̍ŋ lē de᷄l, mi̍ bu̍ɛ̍i̍yāa̍ Chi̍i̍sūa̍a̍ tūāl o̍ mɛ̄ŋmā ībūŋga᷄ŋ kɔ̄ŋgɔ̍. 17 O̍ ko̍ŋ kɔ̍ɔ̍lī, ma̍ lūɛ̄īnu᷄ŋ o̍ dɛ̄ndɔ̄ɔ̍ ni᷄ŋ ma̍ kāndū mɛ̄ŋmā ībūŋga᷄ŋ tāŋɔ̄ɔ̍ kūmbū Kēpa̍a̍nīɔ̄m ndo̍. Mbo̍ lō o̍ ko̍ŋ mi̍ nyūmnda̍ŋ mā tūāl, Chi̍i̍sū mi̍i̍ŋgū nda̍ o̍ ībūŋ te̍. 18 A̍ bōōndi̍i̍ ke̍ŋ, hūēīye̍ ī wa̍ hɔ̄ŋndo̍ mi̍ mɛ̄ŋnda̍ŋ mā wā hīīlɔ᷄ŋndo̍ ta̍u̍. 19 Mɛ̄ɛ̍ bu̍ɛ̍īya̍ lo̍ kɔ̄la̍ŋ a̍ mɛ̄ŋnda̍ŋ kɔ̄ndɔ̄ɔ̍, ma̍ kūā la̍nda̍ŋ, le̍ mɛ̍ɛ̍līi̍la̍ ya̍a̍, kɛ̄lɛ̄ŋgāā lā hīɔ̍ɔ̍lu̍, ma̍ chā Chi̍i̍su̍ ō chō hūnɔ̄ɔ̍ o̍ mɛ̄ŋnda̍ŋ chōo̍, o̍ dɛ̄ndɔ̄ɔ̍ īkɛ̄i̍. Chɔ̄ɔ̍ ndu̍ hūnɔ̄ɔ̍, mi̍ sīōōŋnde̍ bīī nda̍ ta̍u̍ ta̍u̍. 20 Mi̍ Chi̍i̍sū lo᷅ o̍ ko̍ŋ mbo̍ dīmūl nda̍ āā, “Lā yɔ᷅ŋ īsīōōŋ te̍, ya̍ ni̍.” 21 O̍ ko̍ŋ, ma̍ dīmūl ndu̍ a̍ kɔ̄l kɛ̄ndɛ̄ māā ō lūɛ̍i̍ o̍ dɛ̄ndɔ̄ɔ̍ ni᷄ŋ. He̍ī yɔ̄nɔ᷄ŋndo̍ dɔ̍ɔ̍, mi̍ dɛ̄ndɔ̄ɔ̍ fūūlūū bɛ̍ɛ̍ o̍ kɔ̄ŋgɔ̍ɔ̍ nāa̍ nda̍ a̍a̍ nɔ̍ le̍ tāŋɔ̄ɔ̍ wa̍.

Wāŋnda̍ fāŋgā bɛ̍ndōo̍ ā nūūvi̍a̍a̍ Chi̍i̍sū

22 Dīi̍māndɔ̄ɔ̍, wāŋnda̍ fāŋgā bɛ̍ndōo̍ ho̍ō ā wa̍ wɔ̍ o̍ kɔ̄ŋgɔ̍ɔ̍ lēe̍lōo̍. Ndu̍yɛ̍, nda̍ a̍a̍ si̍nā māā dɛ̄ndɔ̄ɔ̍ ō pīlɛ̍ ko̍ni̍ o̍ wa̍ lo̍ŋ pa̍a̍le̍ le̍ŋ ni̍. Ndu̍yɛ̍, nda̍ a̍a̍ si̍nā māā bōōndi̍i̍ bu̍ɛ̍īya̍ ā lūɛ̄ī ō dɛ̄ndɛ̄ ko̍ŋ ni᷄ŋ ma̍ wā kɔ̄la̍ŋ nde̍, māā Chi̍i̍sū ndu̍ ve̍ nda̍ tɛ̄ɛ̄ŋ te̍. 23 Dīi̍māndɔ̄ ko̍ŋ, mi̍ dɛ̄ndɛ̄la̍ che᷅le̍ŋ lā cha᷄ŋ Tābi̍līāā chi̍e̍e̍, mi̍ lā hūŋ o̍ fo̍ndāŋ Māsānɔ̄ɔ̍ Chi̍i̍sū me̍l Mɛ̄lɛ̄ka̍ ba̍li̍ka̍a̍ le̍ bēe̍dīi̍yo̍, mbo̍ kē wāŋnda̍ ma̍ dīā wo̍. 24 Mɛ̄ɛ̍ fāŋgāa̍ sāālu̍ŋ māā Chi̍i̍sū ni̍, a̍ bu̍ɛ̍i̍yāā ndūa̍a̍ māā ā cho̍ lo̍ŋ te̍, ma̍ lūɛ̄ī o̍ dɛ̄ndɛ̄la̍ la̍ŋ ni᷄ŋ. Ma̍ kūā Kēpa̍a̍nīɔ̄m chi̍e̍e̍ Chi̍i̍su̍ nūūvīa̍a̍.

Bēe̍dīi̍ to̍sā mī wāŋnda̍ ā wa̍ yo̍o̍mū kpe̍e̍kpe̍i̍ yo̍

25 Mɛ̄ɛ̍ fāŋgāa̍ sāālu̍ŋ Chi̍i̍sū o̍ mɛ̄ŋmā ībūŋga᷄ŋ lēe̍lōo̍ pīlɔ̍ɔ̄, ma̍ nyūnā ndu̍ āā, “Lɔ̍ɔ̍ kūɛ̍ɛ̍nɛ̍ ŋ̄ hīŋ yɛ̄ na̍nu᷄ŋ, Ti̍chā?” 26 Mi̍ Chi̍i̍sū mu̍lūl nda̍ āā, “Mī di̍mu̍l nya̍ tōnya̍a̍ wa̍la̍ŋ, le̍ mɛ̄ɛ̍ ya̍ I̍ ke̍ nya̍ nyɛ̄ dīa̍a̍ mi̍ lā dīā mɛ̄ɛ̍ nya̍ hɛ̄na̍ŋ yɛ̍, le̍la̍ŋ nya̍ chō ya̍ nūūvīa̍a̍ ni̍. Ō cho̍ ma̍chu̍a̍ā māā wa̍lta̍ kɔ̄ndɔ̄fi̍lta̍ ya̍ I̍ to̍sa̍ la̍ŋ māā la̍ŋ te̍ nya̍ sīna̍ pɛ̄ŋgu̍ le̍. 27 Lā fa̍fālā le̍ nyɛ̄ dīa̍a̍ o̍ nɔ̍lā mbō tāmbu̍ wo̍ le̍. Lā fāfa̍la̍ le̍ nyɛ̄ dīa̍a̍ o̍ te̍mbū le̍ wo̍. Ko̍ŋ cho̍ ni̍, nyɛ̄ dīa̍a̍ o̍ to̍sā mī wāŋnda̍ sɔ̄la̍ yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍. Ndu̍ yɔ̍nūŋ māā nyɛ̄ dīāā wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ ō kē nya̍ wo̍ ni̍. Kāni̍, ndu̍ Mɛ̄lɛ̄ka̍ Fi̍nyāa̍ ō hāndu̍ tāāmāsi̍ ndɔ̄ɔ̍ chōo̍ ni̍ le̍ chɔ̄mndo̍ māā ō hīni̍ kɔ̄l a̍ ndu̍.” 28 O̍ ko̍ŋ, mi̍ wāŋnda̍ ha̍ā nyūnā Chi̍i̍su̍ āā, “Mɛ̄ɛ̍ yɛ̄ɛ̍nɛ̍ na̍a̍ ŋ̄ tōsa̍ yɛ̍ mbō wa̍ wa̍lta̍ Mɛ̄lɛ̄ka̍la̍ŋ?” 29 Mi̍ Chi̍i̍sū di̍mūl nda̍ āā, “Wa̍li̍ Mɛ̄lɛ̄ka̍ hɛ̄na̍ŋ nya̍ mī lā tōsa̍ wo̍, ndu̍ cho̍ ni̍, lā dɔ̄u̍ tīīndāŋ nyāa̍ o̍ wāna̍ o̍ ve᷅m ndo̍ ni᷄ŋ.” 30 O̍ ko̍ŋ kɔ̍ɔ̍lī, ma̍ dīmūl ndu̍ āā, “To̍sa̍ wɔ̍ su̍ɛ̍i̍ kɔ̄ndɔ̄fi̍li̍ na̍a̍ ŋ̄ chā, o̍ ko̍ŋ kɔ̍ɔ̍lī, mī ŋ̄ dɔ̄ū tīīnda᷄ŋndo̍ o̍ nūm ni̍ŋ nde̍. To̍sa̍ wɔ̍ mī ŋ̄ chē. 31 Bōōndi̍i̍ fi̍nyāā nāā ma̍māa̍ ā wa̍ o̍ po̍llo̍ ni᷄ŋ nde̍, ma̍nɛ̄i̍yo̍ nda̍ a̍a̍ di̍ā ni̍. Ī chō ī dīmīa̍ŋ o̍ Yāu̍ Mɛ̄lɛ̄ka̍a̍ ni᷄ŋ le̍nde̍ āā, ‘Mbo̍ kē nda̍ bēe̍dīi̍yo̍ chɔ̄nɔ᷄ŋndo̍ ɛ̄chɛ̍nɛ̄ le̍ mā dē.’ ” 32 Mi̍ Chi̍i̍sū lo᷅ o̍ ko̍ŋ mbo̍ dīmūl nda̍ āā, “Mī di̍mu̍l nya̍ tōnya̍a̍ wa̍la̍ŋ, ō ve̍ Mūu̍sē le̍ yɔ̍ŋgu̍ nya̍ bēe̍dīi̍ chɛ̍ŋ o̍ fo̍nda᷄ŋ Mɛ̄lɛ̄ka̍a̍ wo̍ le̍. Fi̍nyā nūu̍, ndu̍ ke᷅ nya̍ bēe̍dīi̍ kpe̍e̍kpe̍i̍ cha᷅ŋ ɛ̄chɛ̍nɛ̄ mbo̍ tūāl lo̍ ni̍. 33 Kāni̍, bēe̍dīi̍ Mɛ̄lɛ̄ka̍ yɔ̄ŋgu̍ wo̍, ndu̍ cho̍ wāna̍ chɛ̍ŋ ɛ̄chɛ̍nɛ̄ mbo̍ tūāl lo̍ ni̍. Ndu̍yɛ̍, wānā ko̍ŋ, ndu̍ yɔ̍ŋgū ŋ̍wa᷅ŋndā chīe̍e̍ yo̍o̍mū kpe̍e̍kpe̍i̍yo̍ ni̍.” 34 Ma̍ dīmūl Chi̍i̍sū āā, “Mɛ̄ɛ̍ wa̍ na̍a̍ bēe̍dīi̍yo̍ ho̍ō kīo̍o̍ lɔ̍ɔ̍ lɔ̍ɔ̍ wa᷅, Fāllo̍.” 35 Mi̍ Chi̍i̍sū di̍mūl nda̍ āā, “Ya̍ cho̍ bēe̍dīi̍ to̍sā mī wāŋnda̍ ā wa̍ yōōmū kpe̍e̍kpe̍i̍yo̍ ni̍. Wāna̍ to᷅l la̍ kɔ̄ɔ̄lī pɛ̍, yīmā nɛ̍ī lɛ̍ ndu̍ le̍. Ndu̍yɛ̍, wāna̍ dɔ̍ū tīīnda᷄ŋ ndɔ̄ɔ̍ o̍ ya̍ ni̍ŋ pɛ̍, bo̍lōlā ve̍sā lɛ̍ ndu̍ le̍. 36 Kɛ̍, mi̍ I̍ di̍mūl nya̍ māā lā chē ya̍, kɛ̍ ndu̍yɛ̍, lā do̍ū ti̍i̍nda᷄ŋ nyāa̍ o̍ ya̍ ni̍ŋ te̍. 37 Ndu̍yɛ̍, wānāā Fi̍nyā nūu̍ ō chu̍a̍ chɔ̍ mbo̍ kē ya̍ wa̍, nda̍ kpo̍u̍ ā chō ya̍ tōlɔ̄ɔ̄ kɔ̄ɔ̄lī. Ndu̍yɛ̍, wānā o̍ wāna̍ hi᷅ŋ nāa̍ ya̍ chu̍a̍ pɛ̍, I̍ tu̍ū ndu̍ le̍. 38 Kāni̍ fo̍ndōle̍, Mɛ̄lɛ̄ka̍ o̍ ve᷅m ya̍ wo̍, le̍ nyɛ̄ o̍ hɛ̍na̍ŋ ndo̍ tōsāa̍ ya̍ I̍ chɛ̍ŋ ɛ̄chɛ̍nɛ̄ mi̍ hu᷅ŋ ni̍. I̍ hi̍ŋ le̍ hɛ̄na᷄ŋ ni̍ ya̍ pi̍la̍ to̍sā le̍. 39 Mɛ̄lɛ̄ka̍ o̍ ve᷅m ya̍ wo̍, nyɛ̄ o̍ hɛ̍na̍ŋ mī I̍ to̍sa̍ wo̍, ndu̍ cho̍ ho̍ō ni̍ māā wānāā o̍ ke̍ ya̍ wa̍ ki̍nɛ̍i̍ ō pīlɛ̍ bɛ̍ɛ̍ ō la̍a̍sīa̍ŋ te̍. Ndu̍yɛ̍ o̍ ko̍ŋ kɔ̍ɔ̍lī, māā nda̍ kpo̍u̍ mī I̍ hu̍ŋ mi̍ŋgī nda̍ yōōmū o̍ pāa̍le̍ mɛ̍ɛ̍lāāle̍ŋ chōo̍. 40 Kāni̍, nyɛ̄ ndu̍ Fi̍nyā nūu̍ hɛ̄na̍ŋ ndo̍, ndu̍ cho̍ ni̍ māā wānāa̍ tu̍āl Po̍ Mɛ̄lɛ̄ka̍a̍ kɔ̄ɔ̄lī wa̍, ndu̍yɛ̍, mā dɔ̄ū tīīnda᷄ŋndo̍ o̍ ndu̍ ni̍ŋ nda̍, māā ā nɔ̄ mā sɔ̄la̍ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍. Ndu̍yɛ̍ o̍ ko̍ŋ kɔ̍ɔ̍lī, I̍ cho̍ wānāā kāŋ mīŋgī yōōmū o̍ pāa̍le̍ mɛ̍ɛ̍lāā le̍ŋ chōo̍.” 41 O̍ ko̍ŋ kɔ̍ɔ̍lī, mi̍ Chu̍ūwa̍ kāndū ŋɔ̄ɔ̄chīa̍ŋnda̍ŋ a̍ Chi̍i̍sū, kāni̍ fo̍ndōle̍, māā ō dīmi̍ māā ndu̍ cho̍ bēe̍dīi̍yo̍ chɛ̍ŋ ɛ̄chɛ̍nɛ̄ mbo̍ tūāl lo̍ ni̍. 42 Ma̍ hīāū lāchī a̍ ŋɔ̄ɔ̄chīa̍ŋnda̍ŋ āā, “Chi̍i̍su̍ cho̍ ho̍ō ni̍, Chōo̍sɛ̍ po̍ ndɔ̄ɔ̍. Fi̍nyā ndɔ̄ ni̍, kāla̍ ndɔ̄ ni̍, ŋ̄ sīnā nda̍. Kɛ̍, vɛ᷅ ni᷅ŋ mbo̍ dīmī māā ɛ̄chɛ̍nɛ̄ o̍ chɛ̍ŋ ni̍ mbo̍ tūāl?” 43 Mi̍ Chi̍i̍sū mu̍lī nda̍ dīōm, mbo̍ dīmī āā, “Lā pɛ̄ŋgi̍ ŋɔ̍ɔ̍chīa̍ŋnda̍ŋ nya̍ pi̍la̍ tɛ̄ɛ̄ŋ. 44 Wānā o̍ wānā nɔ̍lā mbō tōl la̍ kɔ̄ɔ̄lī le̍, mɛ̄ɛ̍ mī Mɛ̄lɛ̄ka̍ Fi̍nyāa̍ tōsa̍ a̍ sa̍bū mālāŋ o̍ tu̍āl la̍ kɔ̄ɔ̄lī. O̍ ko̍ŋ, I̍ nɔ̍lā mī mi̍ŋgi̍ ndu̍ yōōmū o̍ pāa̍le̍ mɛ̍ɛ̍lāāle̍ŋ chōo̍.” 45 Mi̍ Chi̍i̍sū hi̍a̍ū lāchī a̍ sūɛ̍i̍ nāa̍ nda̍ chūā āā, “Ī chō ī pōōnyīāā o̍ yāu̍ wānāa̍ su̍a̍ā le̍ Mɛ̄lɛ̄ka̍ wa̍ ō pīlɛ̍ ni᷄ŋ āā, ‘Mɛ̄lɛ̄ka̍ chō wāŋnda̍ kpo̍u̍ pɛ̍ɛ̍kū.’ Wānā o̍ wāna̍ ya̍ŋ Mɛ̄lɛ̄ka̍ Fi̍nyāa̍ lānī, ndu̍yɛ̍ o̍ ko̍ŋ kɔ̍ɔ̍lī, mbō sɔ̄la̍ pɛ̄ɛ̄kōo̍ ndu̍ o̍ bā bɛ̄ŋgu̍ pɛ̍, tōlɔ̄ɔ̍ wānā ko̍ŋ ō tūāl lā kɔ̄ɔ̄lī ni̍. 46 Kɛ̍ ndu̍yɛ̍, ke̍ŋ chɔ᷅m ma̍chɔ̍māā māā wāŋndo̍ ō pīlɛ̍ bɛ̍ɛ̍ ō chē ni᷅ŋ Mɛ̄lɛ̄ka̍ Fi̍nyāa̍ lē pīlɛ̍ le̍, mɛ̄ɛ̍ wāna̍ chɛ̍ŋ ɛ̄chɛ̍nɛ̄ wo̍. Ndu̍ ko̍ni̍ che᷅ wɔ̄ Mɛ̄lɛ̄ka̍ Fi̍nyāa̍ ni̍. 47 Mī di̍mu̍l nya̍ tōnya̍a̍ wa̍la̍ŋ, wāna̍ du̍a̍ū ti̍i̍nda᷄ŋ ndɔ̄ɔ̍ o̍ ya̍ ni̍ŋ ndo̍, ō sɔ̄la̍ ni᷅ŋ bɛ̍ɛ̍ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍. 48 Ya̍ cho̍ bēe̍dīi̍ to̍sā mī wāŋnda̍ ā wa̍ yo̍o̍mū kpe̍e̍kpe̍i̍yo̍ ni̍. 49 Mi̍ fi̍nyāā nyāa̍ dīā ma̍nɛ̄i̍yo̍ o̍ po̍llo̍ ni᷄ŋ. Kɛ̍ ndu̍yɛ̍, o̍ ko̍ŋ ni̍ŋ fa̍ū, ma̍ wū. 50 Kɛ̍, bēe̍dīi̍ chɛ̍ŋ ɛ̄chɛ̍nɛ̄ wo̍ ndu̍ ndu̍ wānā o̍ wāna̍ de᷅ ndu̍ pɛ̍, ō vi᷅ le̍. 51 Ya̍ cho̍ bēe̍dīi̍ ke᷅ wa᷅ŋnda̍ yōōmū kpe̍e̍kpe̍i̍yo̍ o̍ chɛ̍ŋ ɛ̄chɛ̍nɛ̄ mbo̍ tūāl lo̍ ni̍. Wānā o̍ wāna̍ de᷅ bēe̍dīi̍yo̍ ho̍ō pɛ̍, wānā ko̍ŋ chō wā yōōmū le̍ fɛ̍ɛ̍ŋ a̍ fɛ̍ɛ̍ŋ. Bēe̍dīi̍ ya̍ I̍ ke᷅ ko̍ŋ wa᷅ŋnda̍ wo̍, ndu̍ cho̍ dīāllūŋ nu᷄ŋ ni̍. Mu̍ŋ ya̍ I̍ yɔ̍ŋgu̍ le̍ mī wāŋndā chīe̍e̍ya̍ ā sɔ̄la̍ yōōmū kpe̍e̍kpe̍i̍yo̍ ni̍.” 52 O̍ ko̍ŋ kɔ̍ɔ̍lī, mi̍ Chu̍ūwa̍ ā tūūlū kɔ̄l a̍ Chi̍i̍sū. Ma̍ kāndū dīōmnda̍ŋ hīŋa᷅ŋndo̍ nda̍ pi̍la̍ tɛ̄ɛ̄ŋ mā dīmī āā, “Mī vɛ̄ɛ̍nɛ̍ po̍o̍ ho̍ō ō lōōku̍ yɛ̄ na̍a̍ dīāllūŋ ndɔ̄ɔ̍ŋ kē mī ŋ̄ dē mu̍ŋ?” 53 Mi̍ Chi̍i̍sū di̍mūl nda̍ āā, “Mī di̍mu̍l nya̍ tōnya̍a̍ wa̍la̍ŋ, tē lā di̍ di̍a̍llūŋ wāna̍ nda̍ vēēlū āā Po̍ Wānā Pɔ̍nɔ̍ɔ̍ wo̍ŋ, ndu̍yɛ̍, mī lā ko᷄l kōo̍ma̍ ndūa̍ŋ te̍, lā ve᷅ yo̍o̍mū kpe̍e̍kpe̍i̍ le̍. 54 Ndu̍yɛ̍, wāna̍ di̍ā dīāllūŋ nu᷄ŋ, ndu̍yɛ̍, mbō ko᷄l kōo̍ma̍ nīa̍ŋ ndo̍, ō sɔ̄la̍ ni᷅ŋ bɛ̍ɛ̍ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍. O̍ ko̍ŋ kɔ̍ɔ̍lī, I̍ cho̍ wānā ko̍ŋ mīŋgī yōōmū o̍ pāa̍le̍ mɛ̍ɛ̍lāāle̍ŋ chōo̍. 55 Dīāllūŋ nu᷄ŋ mu̍ŋ cho̍ nyɛ̄ dīāā kpe̍e̍kpe̍i̍yo̍ ni̍. Ndu̍yɛ̍, kōo̍ma̍ nīa̍ŋ ma̍ŋ ma̍ cho̍ nyɛ̄ kōlāā kpe̍e̍kpe̍i̍yo̍ ni̍. 56 Wāna̍ di̍ā dīāllūŋ nu᷄ŋ, ndu̍yɛ̍, mbō ko᷄l kōo̍ma̍ nīa̍ŋ ndo̍, wānā ko̍ŋ mɛ̄ɛ̍ ō chō o̍ dīōm pīlɛ̍ ni᷄ŋ a̍ ya̍, ndu̍yɛ̍, mi̍ ya̍ I̍ wa᷅ o̍ dīōm pīlɛ̍ ni᷄ŋ a̍ ndu̍. 57 Mɛ̄lɛ̄ka̍ Fi̍nyāa̍ o̍ to̍sā mī wāŋnda̍ ā wa̍ yōōmū wo̍, ndu̍ ve᷅m ya̍ ni̍. Ndu̍yɛ̍, ō tōsa̍ mi̍ I̍ wa᷅ yōōmū. Le̍nde̍ ko̍ni̍, wānā o̍ wāna̍ de᷅ dīāllūŋ nu᷄ŋ pɛ̍, I̍ to̍sa̍ wānā ko̍ŋ ō wa̍ yōōmū. 58 Le̍la̍ŋ, bēe̍dīi̍ chɛ̍ŋ o̍ fo̍nda᷄ŋ Mɛ̄lɛ̄ka̍a̍ wo̍, ndu̍ cho̍ ho̍ō ni̍. Ndu̍ cho̍ māā bēe̍dīi̍ fi̍nyāā nyāā ma̍māa̍ ā dē wo̍ le̍. Bēe̍dīi̍ nda̍ dē ko̍ŋ ndo̍, ndu̍ to̍sa̍ mā wa̍ yōōmū le̍ fɛ̍ɛ̍ŋ a̍ fɛ̍ɛ̍ŋ te̍. Kɛ̍, bēe̍dīi̍ chɛ̍ŋ o̍ fo̍nda᷄ŋ Mɛ̄lɛ̄ka̍a̍ wo̍, ndu̍ ndu̍ wānā de᷅ ndu̍ pɛ̍, a̍ wa̍ yōōmū le̍ fɛ̍ɛ̍ŋ a̍ fɛ̍ɛ̍ŋ.” 59 Bōōndi̍i̍ Chi̍i̍sū wa̍ o̍ chīɛ̄ī Chu̍ūwa̍ pīɛ̄ī Mɛ̍lɛ̄ka̍ wo̍ ni᷄ŋ Kēpa̍a̍nīɔ̄m chi̍e̍e̍ ve̍, o̍ ko̍ŋ o̍ di̍mi̍ dīōmnda̍ŋ nda᷅ŋ ni̍.

Dīōmnda̍ ke᷅ wa̍nā yo̍o̍mū kpe̍e̍kpe̍i̍yo̍ la̍ŋ

60 Mi̍ bu̍ɛ̍i̍yāa̍ Chi̍i̍sūa̍a̍ ā ka̍ ka̍, a̍ tu̍ɛ̍ī nyɛ̄ Chi̍i̍sū di̍mi̍ wo̍. O̍ ko̍ŋ, ma̍ dīmī āā, “Pɛ̄ɛ̄kū o̍ pɛ̍ɛ̍ku̍ ho̍ō wo̍, ō kēndū bɔ̄ɔ̍. Ō nɛ̄ɛ̍nɛ̍ nɔ̍lā yɛ̍ mbō chɛ̄la᷅ŋ a̍ ndu̍ a̍ pɛ̄ɛ̄kū ndɔ̄ɔ̍ ho̍ō?” 61 Wānā o̍ wānā bɛ̍ɛ̍ o̍ di̍mu̍l Chi̍i̍sū a̍ nyɛ̄ bu̍ɛ̍īya̍ ā dīmi̍ wo̍ o̍kɔ̄ɔ̄ le̍. Kɛ̍ ndu̍yɛ̍, mbo̍ sīnā māā ŋɔ̄ɔ̄chīa̍ŋnda̍ŋ nda̍ wa̍ a̍ nyɛ̄ o̍ di̍mi̍ wo̍ o̍kɔ̄ɔ̄ ni̍. Mi̍ Chi̍i̍sū nyu̍nā nda̍ āā, “Bāā mī dīōmndā ya̍ I̍ di̍mi̍ la᷅ŋ nda̍ŋ lā tɛ̄ɛ̄mbu̍u̍ nya̍ lākɔ᷄l? 62 Tē ō wa̍ yɛ̄ mī lā chē wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ mbō mīīŋgu̍ nāa̍ o̍ chɛ̍ŋ nda̍?” 63 Mi̍ Chi̍i̍sū di̍mī āā, “Nyi̍na̍ Mɛ̄lɛ̄ka̍a̍, ndu̍ ke᷅ wa̍nā yo̍o̍mū kpe̍e̍kpe̍i̍yo̍ ni̍. Wāna̍ chi̍e̍e̍ nɔ̍lā mbō sɔ̄la̍ yōōmōo̍ ho̍ō o̍ kpāāya̍ ndɔ̍ ndu̍ pi̍la̍ ni̍ŋ te̍. Dīōmnda̍ ya̍ I̍ so̍ō la᷅ŋ nāa̍ nya̍ chūā la̍ŋ, la̍ŋ la̍ to̍sā ni̍ mī Nyi̍na̍ Mɛ̄lɛ̄ka̍a̍ ō tōl nya̍ kɔ̄ɔ̄lī. Ndu̍yɛ̍, la̍ŋ la̍ to̍sā ni̍ mī lā sɔ̄la̍ yōōmū kpe̍e̍kpe̍i̍yo̍. 64 Kɛ̍ ndu̍yɛ̍, nya̍ pūm nda̍ lā dōu̍ ti̍i̍nda᷄ŋ o̍ ya̍ ni̍ŋ te̍.” Chɔ̍ŋ o̍ kāndɔ᷄ŋndo̍ di̍ Chi̍i̍sū ndu̍ o̍o̍ si̍nā wa̍nāa̍ nda̍ a̍a̍ dɔ̍ū tīīnda᷄ŋndo̍ o̍ ndu̍ ni̍ŋ nda̍. Ndu̍yɛ̍, ndu̍ o̍o̍ si̍nā wa᷅na̍ wa̍ ndu̍ hūnɔ̄ɔ̄ pīsī wo̍. 65 Mi̍ Chi̍i̍sū di̍mī vɛ̄lɛ̄ āā, “Le̍ sa̍bōo̍ ho̍ō ya̍ I̍ di̍mu̍l nya̍ ni̍ māā wānā o̍ wānā nɔ̍lā mbō tōl la̍ kɔ̄ɔ̄lī le̍ mɛ̄ɛ̍ mī Mɛ̄lɛ̄ka̍ Fi̍nyāa̍ tōsa̍ a̍ sa̍bū mālāŋ o̍ tu̍āl la̍ kɔ̄ɔ̄lī.” 66 Chɔ̍ŋ a̍ bōōndi̍i̍ ke̍ŋ, mi̍ wānāa̍ wa̍ ndu̍ kɔ̄ɔ̄lī wa̍ cha̍po̍ ma̍ māl ndu̍. Ā ve̍ lɛ̍ ndu̍ bālɔ̄ɔ̄ kɔ̄ɔ̄lī le̍. 67 Le̍ he̍ī, mi̍ Chi̍i̍sū nyu̍nā bu̍ɛ̍i̍yāā ndūāā tɔ̍ a̍ ā ŋīɔ̍ɔ̍ŋnda̍ āā, “Nya̍ yɛ̄, lā yēēma̍ mī lā ma᷄l la̍ mī lā kūɛ̄nu᷄ŋ?” 68 Mi̍ Sa̍i̍mɔ̄ŋ Pītɛ̍ lo᷅ lo̍ŋ mbo̍ mūlī āā, “Māsānɔ̄ɔ̍, tē ŋ̄ ma᷄l nu̍m pɛ̍, mī nɛ̄ɛ̍nɛ̍ na̍a̍ ŋ̄ tōl lɛ̄ kɔ̄ɔ̄lī? Dīōmndā nūmnda̍ŋ, la̍ŋ la̍ to̍sā ni̍ mī wāŋnda̍ sɔ̄la̍ yōōmū kpe̍e̍kpe̍i̍yo̍, o̍ nɔ̍ la̍mɛ̍ɛ̍lu̍ le̍ wo̍. 69 Ŋ̄ dɔ̄ū tīīnda᷄ŋndo̍ o̍ nūm ni̍ŋ. Ndu̍yɛ̍ vɛ̍lɛ̄, ŋ̄ sīnā māā nu᷄m cho̍ wāna̍ cho̍ le̍ Mɛ̄lɛ̄ka̍ wo̍ ni̍.” 70 Mi̍ Chi̍i̍sū nyu̍nā nda̍ āā vɛ̄ɛ̄, “Ya̍ le̍ hɛ̍li̍ nya̍ ŋ̄ wāŋ tɔ̍ a̍ wānāā ŋīɔ̍ɔ̍ŋnda̍ ha̍ā le̍? Kɛ̍ ndu̍yɛ̍, wānā pi᷅lɛ̍ chō nya̍ tɛ̄ɛ̄ŋ, nyi̍nā wɔ̄ɔ̍ŋndo̍ o̍ cho̍ ni̍.” 71 A̍ Chu̍da̍sī po̍ Sa̍i̍mɔ̄ŋ Īsīka̍a̍līɔ̄ɔ̄ wo̍ o̍kɔ̄ɔ̄ o̍ wa̍ sūɛ̍i̍ he̍ī ni̍. Kāni̍, mi̍ chē bɛ̍ɛ̍ mi̍ Chu̍da̍sī wa᷅ bu̍ɛ̍īyo̍ ō pīlɛ̍ bu̍ɛ̍i̍yāā tɔ̍ a̍ ā ŋīɔ̍ɔ̍ŋāa̍ Chi̍i̍sūa̍a̍ tɛ̄ɛ̄ŋ ni̍, kɛ̍ ndu̍yɛ̍, ndu̍ wa̍ ndu̍ hūnɔ̄ɔ̄ pīsī ni̍.

Chɔ᷄ŋ 7

Ā dīmu̍l Chi̍i̍sū le̍ mbō kūɛ̄ o̍ bɔ̄ŋa᷅ŋ lābāfɛ̄i̍yo̍

1 O̍ ko̍ŋ kɔ̍ɔ̍lī, Mi̍ Chi̍i̍sū ba̍lū wāŋnda̍ chōo̍ o̍ būŋgɛ̄ī Kāli̍līve̍ ni᷄ŋ. Kɛ̍, ndu̍ o̍o̍ ku̍ē o̍ būŋgɛ̄ī Chūdi̍a̍āve̍ ni᷄ŋ te̍. Kāni̍ fo̍ndōle̍, wānāā bɛ̄ndūāā Chu̍ūwa̍ ā wa̍ nɛ̄īla̍ŋ nūūvīa̍a̍ le̍ ndu̍ dīyɔ̄ɔ̍. 2 A̍ bōōndi̍i̍ ke̍ŋ, bɔ̄ŋa᷅ŋ lābāfɛ̄i̍yo̍ wa̍ ni᷅ŋ le̍ fūūlūūwo̍. 3 Le̍ he̍ī, mi̍ Chi̍i̍sū pɔ̄mbūāā ndūa̍a̍ dīmūl ndu̍ āā, “Ma̍l na̍nu᷄ŋ mā kūɛ̄ Chūdi̍a̍ā, le̍ mī bu̍ɛ̍i̍yāā nūmnda̍ lo̍ŋ a̍ che᷅ ka̍a̍ma̍ālā ŋ̄ chō tōsāa̍ la̍ŋ. 4 Kāni̍, wānā o̍ wānā tē a̍ hɛ̍na̍ŋ mā he̍l tɔ̍ɔ̍ pɛ̍, a̍ to̍sā i̍sɔ̍ɔ̍ o̍ īsɔ̄ɔ̍ o̍ vīōŋnɔ᷄ŋ ni̍ŋ te̍. Le̍la̍ŋ, tē a̍ wa̍ ka̍a̍ma̍āla̍ŋ nda᷅ŋ tōsāa̍ pɛ̍, to̍sa̍ mī wāŋnda̍ kpo̍u̍ a̍ che᷅ nu̍m o̍ la̍ŋ tōsāa̍.” 5 Kɛ̍ ndu̍yɛ̍, pɔ̄mbūāā ndūāā kālāa̍ bɛ̍ɛ̍, nda̍ a̍a̍ do̍u̍ ti̍i̍nda᷄ŋ o̍ ndu̍ ni̍ŋ te̍. 6 Mi̍ Chi̍i̍sū di̍mūl pɔ̄mbūāā ndūa̍a̍ āā, “Bōōndi̍i̍ nīi̍ ī fūūlu̍u̍ wɔ̍ le̍ he̍ī tōsā le̍. Le̍ nya̍ nya̍, te̍le̍ŋ o̍ te̍le̍ŋ wa᷅ o̍ bɛ̍ndāā. 7 Ya̍ I̍ cho̍ wāŋnda̍ dīmūllo̍ māā ka̍ālā ndāla̍ŋ lā ni᷄ŋ te̍. Le̍ he̍ī ya̍ nda̍ tūl le̍yɛ̍ ni̍. Nya̍ nya̍ sa̍bū o̍ sa̍bū cho̍ mā tu᷄l nya̍ lēyɛ̄ le̍ ndu̍ le̍. 8 Nya̍ kɔ̍. Ya̍ I̍ cho̍ la̍kɔ̍ o̍ bɔ̄ŋa᷅ŋndo̍ ho̍ō le̍, kāni̍, te̍le̍ŋ nī kpe̍e̍kpe̍i̍yo̍ ō fūūlu̍u̍ wɔ̍ le̍.” 9 Mɛ̄ɛ̍ o̍ so̍ō dīōmnda̍ŋ nda᷅ŋ, mbo̍ lōnu᷄ŋ Kāli̍lī.

Chi̍i̍sū ku̍ɛ̄ o̍ bɔ̄ŋa᷅ŋ lābāfɛ̄i̍yo̍

10 Mɛ̄ɛ̍ pɔ̄mbūa̍a̍ Chi̍i̍sūa̍a̍ kūɛ̄ Chūlu̍sɛ̄lɛ̄m le̍ bɔ̄ŋa᷅ŋ lābāfɛ̄i̍yo̍, o̍ ko̍ŋ kɔ̍ɔ̍lī, mi̍ Chi̍i̍sū bɛ̍ɛ̍ cha̍ŋ mbo̍ kūā lo̍ŋ. Kɛ̍, ō ku̍e̍ kpe̍nde̍ke̍le̍ le̍. Mbo̍ kūā sɔ̍ɔ̍ sɔ̍ɔ̍ yɔ̍ŋi̍ wāŋnda̍ nda̍ a̍a̍ si̍na̍. 11 Wānāā bɛ̄ndūāā Chu̍ūwa̍ ā wa̍ ndu̍ nūūvīa̍a̍ o̍ bɔ̄ŋa᷅ŋ kōŋ ni᷄ŋ. Ma̍ sa̍āŋ nyu̍u̍nīa̍a̍ āā, “Ɔ̍ɔ̄ lāŋu̍nɔ̄ɔ̍ ho̍ō?” 12 Wāŋnda̍ ka̍ ka̍, ā wa̍ sɔ̄ɔ̍ŋ to̍o̍lo᷄ŋ a̍ Chi̍i̍sū o̍kɔ̄ɔ̄. Mi̍ ā pūm ā wā dīmīo̍o̍ āā, “Wānā kɛ̍ndɔ̄ɔ̍ po̍ ko̍ŋ chō ni̍.” Kɛ̍, mi̍ ā pūm ā dīmī āā, “Hūīyo̍ o̍ cho̍ wāŋnda̍ ni̍.” 13 Kɛ̍, wānā o̍ wānā ndu̍ o̍o̍ su̍ū kpe̍nde̍ke̍le̍ a̍ Chi̍i̍sū o̍kɔ̄ɔ̄ le̍. Kāni̍, ā wa̍ wānāā bɛ̄ndūāā Chu̍ūwa̍ wōo̍. 14 Pālɛ̍i̍ bɔ̄ŋa᷅ŋnde̍ ndi̍ i̍i̍ pi̍ɔ̍u̍ ni᷅ŋ tɛ̄ɛ̄ŋ. O̍ ko̍ŋ, mi̍ Chi̍i̍sū ku̍ā o̍ chīɛ̍i̍ Mɛ̄lɛ̄ka̍a̍ mbo̍ kāndū wāŋnda̍ pɛ̄ɛ̄kōo̍. 15 Mi̍ kɔ̄ndɔ̄fi̍llo̍ bīī wānāā bɛ̄ndūāā Chu̍ūwa̍ a̍ mɛ̄ɛ̍ o̍ pɛ̍ɛ̍ku̍ yɛ̍. Ma̍ dīmī āā, “Vɛ̄ɛ̍nɛ̍ po̍o̍ ho̍ō lōōku̍ yɛ̄ dɛ̍nɛ̍ si̍nāa̍ ho̍ō sɔ̄lā, ō ku̍e̍ yɛ̍ o̍ pɛ̄ɛ̄kū bɛ̄ŋgu̍ ti̍chɛ̄i̍ya̍a̍ nāa̍ o̍ bā bɛ̄ŋgu̍ le̍?” 16 Mi̍ Chi̍i̍sū mu̍lī āā, “Mɛ̄lɛ̄ka̍ o̍ ve᷅m ya̍ wo̍, o̍ ndu̍ lo̍ pɛ̄ɛ̄kū ya̍ I̍ pɛ̍ɛ̍kū wa᷅ŋnda̍ wo̍ ō chɛ᷄ŋ ni̍. Ō cho̍ pɛ̍ɛ̍kū ni̍ ya̍ pi̍la̍ le̍. 17 Wānā o̍ wāna̍ nɔ̍ yēēmɛ̍i̍ le̍ nyɛ̄ Mɛ̄lɛ̄ka̍ hɛ̄na̍ŋ ndo̍ tōsāa̍ pɛ̍, ō nɔ̄lā mbō sīna̍ tē o̍ Mɛ̄lɛ̄ka̍ lo̍ pɛ̄ɛ̄kū ya̍ I̍ pɛ̍ɛ̍kū wa᷅ŋnda̍ wo̍ chɛ᷄ŋ ni̍, ɔ̄ɔ̄ tē kɛ̄ɛ̄sīāā ni̍ ya̍ pi̍la̍a̍ ko̍ni̍. 18 Wāna̍ hu᷅ŋ ho̍ō mbō pɛ̄ɛ̄ku̍ wāŋnda̍ nyɛ̄ ndu̍ pi̍la̍ o̍ kɛ̍ɛ̍si̍a̍a̍ wo̍ wo̍, mɛ̄ɛ̍ wānā ko̍ŋ, ndu̍ pi̍la̍ le̍ tɔ̍ɔ̍ ndɔ̄ kɛ̍ndɔ̄ɔ̍ o̍ wa᷅ ki̍ndīo̍o̍ ni̍. Kɛ̍, wāna̍ ki̍ndī ho̍ō le̍ mī wāna̍ ve᷅m ndu̍ wo̍ ō sɔ̄la̍ tɔ̍ɔ̍ kɛ̍ndɔ̄ɔ̍ wo̍, mɛ̄ɛ̍ ndu̍ cho̍ wāna̍ di̍mī to᷅nya̍a̍ wo̍ ni̍. Ndu̍yɛ̍, wānā ko̍ŋ cho̍ wa᷅na̍ lāchōōwā le̍. 19 Lā sīnā māā Mūu̍sē ndu̍ chɔ̍m nya̍ sāwāla̍ŋ le̍ mī lā chu̍a̍ ni̍. Kɛ̍ ndu̍yɛ̍, nya̍ fa̍ū wānā pi᷅lɛ̍ bɛ̍ɛ̍ chɛ᷅l le̍ sāwāla̍ la̍ŋ chūa̍a̍ le̍. Vɛ᷅ ni᷅ŋ mi̍ lā wā kīndīo̍o̍ le̍ ya̍ dīyɔ̄ɔ̍?” 20 Mi̍ wāŋnda̍ o̍ fāŋgā ko̍ŋ tɛ̄ɛ̄ŋ a̍ mu̍lūl Chi̍i̍sū āā, “Mbɔ̄ nyi̍nā wɔ̄ɔ̍ŋndo̍ cho̍ nu̍m kɔ̄ɔ̄lī ni̍. Nɛ̄ɛ̍ni̍a̍ā cho̍ yɛ̄ kīndīo̍o̍ le̍ nu̍m dīyɔ̄ɔ̍?” 21 Mi̍ Chi̍i̍sū di̍mī āā, “Wa̍li̍ ka̍a̍ma̍a̍ ō pīlɛ̍ ko̍ni̍ ya̍ to̍sa̍ ni̍, mi̍ kɔ̄ndɔ̄fi̍llo̍ bīī nya̍. 22 Ō ve̍ Mūu̍sē le̍ wa̍ wāna̍ tāse̍ le̍ nya̍ dīmūllo̍ le̍ chūāā nyāa̍ hīvīo̍o̍ o̍ chīɛ̄ī kɔ̄ɔ̄lī le̍. Fi̍nyāā nyāā ma̍māa̍ fɛ̍lɛ̍ŋ di̍mu̍l nya̍ le̍nde̍. Kɛ̍ ndu̍yɛ̍, le̍ sāwa̍ Mūu̍sē do̍u̍ nya̍ ko̍ŋ ndo̍, lā hīvī māhīvīāā wāŋndo̍ o̍ pāa̍le̍ nāāle̍ pɛ̍ŋgīāāle̍ŋ chōo̍. 23 Tē ō wa̍ pɛ̍ mī lā hīvi̍ wāŋndo̍ o̍ pāa̍le̍ŋ nde᷅ŋ chōo̍, yɔ̄ŋi̍ nya̍ tɛ̄ɛ̄mbu̍u̍ sa᷅wa̍ Mūu̍sē do̍u̍ nya̍ ko̍ŋ ndo̍ pɛ̍, mɛ̄ɛ̍ vɛ᷅ ni᷅ŋ tē I̍ si̍ŋgi̍ wāna̍ dīālīī nāa̍ lēchōo̍ pɛ̍, lā dɔ̄ɔ̄nu᷄ŋ tu̍mbe̍? 24 Lā pɛ̄ŋgi̍ wa᷅ŋnda̍ yāma̍ŋ kīlūllo̍ le̍ kīōlɔ̄ɔ̍ le̍ŋ. Lā wa̍ wāŋndo̍ yāmɛ̍i̍ kīlūllo̍ pɛ̍, lā tōsa̍ ndi̍ o̍ nɛ̄ī sa̍kpo̍.”

Wāŋnda̍ nyūūni̍āŋ māā tē Chi̍i̍su̍ cho̍ Ki̍li̍tī ni̍

25 Mi̍ wāŋnda̍ Chūlu̍sɛ̄lɛ̄m ā pūm ā nyūnā āā, “Ō cho̍ po̍o̍ ho̍ō le̍ nda̍ chō kīndīo̍o̍ le̍ dīyɔ̄ɔ̍ le̍?” 26 Ma̍ dīmī āā, “Mi̍ lā che᷄ŋ ndu̍ sūɛ̍i̍ kpe̍nde̍ke̍le̍, ā ku̍u̍nā bɛ̍ɛ̍ ndu̍ le̍. Bāā mbō wa̍ sīnāa̍ nda̍ sīna̍ kpe̍e̍kpe̍i̍ ni̍ māā ndu̍ cho̍ Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ ni̍? 27 Kɛ̍ ndu̍yɛ̍, pōo̍ ho̍ō ndu̍ ndu̍ na̍a̍ kpo̍u̍ ŋ̄ sīnā chi̍e̍e̍ ndɔ̄ɔ̍. Ki̍li̍tī, ō Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ wo̍, ndu̍ ndu̍ āā, tē ō hīŋ pɛ̍, wānā si̍nā ni̍ŋ na̍a̍ o̍ fu̍lā ni̍ŋ nda̍ le̍.” 28 O̍ ko̍ŋ, mɛ̄ɛ̍ Chi̍i̍sū wa̍ wāŋnda̍ pɛ̄ɛ̄kōo̍ o̍ chīɛ̍i̍ Mɛ̄lɛ̄ka̍a̍ ni᷄ŋ, mbo̍ nyūnā chōo̍ cho̍o̍ āā, “Lē kɛ̍ndɛ̄, lā sīnā ya̍ a̍ nāa̍ ya̍ I̍ fu̍la̍ wa̍? I̍ hi̍ŋ o̍ kpāāya̍ ni̍ ya̍ pi̍la̍ ni̍ŋ te̍. Wāna̍ ve᷅m ya̍ wo̍, ndu̍ cho̍ sa̍kpō. Ndu̍yɛ̍, lā si̍nā ndu̍ le̍. 29 Kɛ̍, ya̍ ya̍ I̍ si̍nā ndu̍. Kāni̍ fu̍u̍le̍, nāa̍ ndu̍ chu̍a̍ ya̍ I̍ chɛ̍ŋ ni̍. Ndu̍ ve᷅m ya̍ ni̍.” 30 O̍ ko̍ŋ kɔ̍ɔ̍lī, ma̍ kīndī le̍ ndu̍ bīyɔ̄ɔ̍. Kɛ̍ ndu̍yɛ̍, ā nɔ̄la̍ mā bīī ndu̍ le̍, kāni̍, bōōnde̍i̍ ndi̍ i̍i̍ fu̍u̍lu̍u̍ wɔ̍ le̍. 31 Kɛ̍ o̍ ko̍ŋ ni̍ŋ kpo̍u̍, mi̍ wānāā fāŋgā ā dūāū tīīnda᷄ŋ ndāa̍ o̍ ndu̍ ni̍ŋ. Ma̍ dīmī āā, “Tē Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, ō hīŋ pɛ̍, ō tōsā ni̍ŋ pa̍ wa̍lta̍ ka̍a̍ma̍ālā chēle̍ŋ mī lā hīōū lā pōo̍ ho̍ō tōsa̍ la̍ŋ?”

Ku̍ndā Fālīsi̍īya̍ vēm wāŋnda̍ le̍ Chi̍i̍su̍ bīyɔ̄ɔ̍

32 O̍ ko̍ŋ kɔ̍ɔ̍lī, mi̍ sɔ̄ɔ̍ŋ to̍o̍lōŋ wāŋnda̍ ā wa̍ dīmīo̍o̍ a̍ Chi̍i̍sū o̍kɔ̄ɔ̄ wo̍ŋ, ŋ̄ dēl ku̍ndā Fālīsi̍īya̍ o̍ lānī. Nda̍ ni̍, a̍ wānāā bɛ̄ndūāā sōlīāā lāsa̍lāa̍, ma̍ chāl nāa̍ pi᷅lɛ̍ ma̍ vīām pōli̍sīi̍yāa̍ ma̍ndā chīɛ̍i̍ Mɛ̄lɛ̄ka̍a̍ wa̍, le̍ ndu̍ bīyɔ̄ɔ̍. 33 O̍ ko̍ŋ, mi̍ Chi̍i̍sū di̍mī āā, “I̍ cho̍ wɔ̍ wā lātūlu̍ a̍ nya̍ le̍ te̍le̍ŋ ti̍ŋ. O̍ ko̍ŋ kɔ̍ɔ̍lī, mī mi̍i̍ŋgu̍ nāa̍ wāna̍ ve᷅m ya̍ wo̍ chūā. 34 Lā nūūvīāā ni̍ŋ ya̍, kɛ̍ ndu̍yɛ̍, lā se̍e̍lūŋ ni̍ŋ ya̍ le̍. Kāni̍ fu̍u̍le̍, nāa̍ ya̍ I̍ cho̍ wā wa̍ lā nɔ̍lā mī lā kūɛ̄ lo̍ŋ te̍.” 35 O̍ ko̍ŋ kɔ̍ɔ̍lī, mi̍ wānāā bɛ̄ndūāā Chu̍ūwa̍ ha̍ā, ā sa̍āŋ nyu̍ūni̍āŋndo̍ āā, “Kūɛ̍ɛ̍nɛ̍ pōo̍ ho̍ō ō chō yɛ̄ dīmīo̍o̍ le̍ kɔ̄la̍ŋ wānā nɔ̍lā mā sa̍a̍lu̍ŋ ndu̍ le̍ nɛ̍? Bāā mbō wa̍ o̍ chi̍e̍e̍ŋ Kīli̍kīi̍ya̍ nāa̍ Chu̍ūwa̍ ā chō wa̍, lo̍ŋ o̍ cho̍ kɔ̄la̍ŋ ni̍ le̍ mbō kɔ̍ pɛ̍ɛ̍kū Kīli̍kīi̍ya̍? 36 Ō dīmi̍ māā ŋ̄ chō ndu̍ nūūvīāā, kɛ̍ ŋ̄ se̍e̍lūŋ ni̍ŋ ndu̍ le̍. Ndu̍yɛ̍, māā ŋ̄ nɔ̍lā mī ŋ̄ kūɛ̄ nāa̍ o̍ cho̍ wā wa̍ le̍. Yɛ̄ɛ̍nɛ̍ o̍ di̍mi̍ yɛ̄ ko̍ŋ?”

Chi̍i̍sū so̍ō a̍ mɛ̄ŋma̍ ke᷅ wa̍nā yo̍o̍mū kpe̍e̍kpe̍i̍yo̍ wa̍ŋ o̍kɔ̄ɔ̄

37 Mi̍ pāa̍le̍ bɔ̄ŋa᷅ŋ lābāfɛ̄i̍yo̍ lē mɛ̄ɛ̄lū le̍ŋ lē fūūlūū. Ndu̍yɛ̍, le̍ŋ le̍ wa̍ pāa̍le̍ bɛ̍ndūlē kpe̍e̍kpe̍i̍le̍ŋ le̍ bɔ̄ŋa᷅ŋndo̍ ho̍ō ni̍. O̍ pāa̍le̍ mɛ̍ɛ̍lāālē lēŋ chōo̍, mi̍ Chi̍i̍sū si᷅m mbo̍ dīmī chōo̍ cho̍o̍ āā, “Wānā o̍ wāna̍ kōlɔ̄ɔ̍ chō ō bīyāā, lā hu᷄ŋ nāa̍ ya̍ chu̍a̍ mī lā ko᷄l. 38 Le̍nde̍ i̍ cho̍ ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ ni̍ māā wānā o̍ wāna̍ dɔ̍ū tīīnda᷄ŋ ndɔ̄ɔ̍ o̍ ya̍ ni̍ŋ pɛ̍, wānā ko̍ŋ, pēēla̍ mɛ̄ŋma̍ ke᷅ wa̍nā yo̍o̍mū kpe̍e̍kpe̍i̍yo̍ la̍ŋ, lā wā ni̍ŋ chɔ̍nɔ᷄ŋndo̍ o̍ ndu̍ ni̍ŋ mī lā hīāū wo᷅lu̍ wo᷅lu̍.” 39 Chi̍i̍sū wa̍ māwāā dīōmnda̍ŋ nda᷅ŋ dīmīo̍o̍ a̍ Nyi̍na̍ Mɛ̄lɛ̄ka̍a̍ o̍kɔ̄ɔ̄ ō ndu̍ o̍o̍ nɔ̍ le̍ hūnɔ̄ɔ̄ wānāa̍ du̍a̍ū ti̍i̍nda᷄ŋ ndāa̍ o̍ ndu̍ Chi̍i̍sū ni̍ŋ nda̍ tōlɔ̄ɔ̄ kɔ̄ɔ̄lī wo̍. Bōōndi̍i̍ ke̍ŋ, Mɛ̄lɛ̄ka̍ ndu̍ o̍o̍ to̍sa̍ wɔ̍ mī Nyi̍nā ndɔ̄ɔ̍ ndu̍ o̍o̍ to᷅l wāŋnda̍ kɔ̄ɔ̄lī le̍, kāni̍ fo̍ndōle̍, ndu̍ o̍o̍ to̍sa̍ wɔ̍ mī Chi̍i̍sū lu̍ɛ̍ī o̍ nāŋɔ̄ɔ̄ ndɔ̄ɔ̍ ni᷄ŋ te̍.

Wāŋnda̍ hīŋa᷅ŋ di̍ōmnda̍ŋ a̍ Chi̍i̍sū o̍kɔ̄ɔ̄

40 Mi̍ wānāā fāŋgā a̍ wa̍ o̍ fāŋgāa̍ ho̍ō tɛ̄ɛ̄ŋ nda̍ ā tūɛ̄ī dīōmndā Chi̍i̍sū di̍mi̍ la᷅ŋ nda̍ŋ. Ma̍ dīmu̍la᷅ŋ āā, “Wāna̍ su̍a̍ā le̍ Mɛ̄lɛ̄ka̍ wo̍ ō na̍a̍ ŋ̄ chō lēhɔ̄l o̍ nɛ̄ī le̍ ndu̍ wo̍ ndu̍ kpe̍e̍kpe̍i̍ cho̍ pōo̍ ho̍ō ni̍.” 41 Mi̍ wāŋnda̍ ā pīli̍a̍ā dīmī āā, “Ndu̍ cho̍ Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ ni̍.” Kɛ̍ ndu̍yɛ̍, mi̍ ā pūm ā dīmī āā, “Ō cho̍ Kāli̍lī le̍ Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, ō nɔ̄ le̍ fūlāa̍ le̍. 42 Ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ, māā o̍ pūlāle̍ Māsāa̍ Dēēve̍le̍ŋ chōo̍ o̍ nɔ̍ le̍ fūlāa̍ ni̍, ndu̍yɛ̍, māā Bɛ̍ti̍lɛ̍hɛ̄m chi̍e̍e̍ nāa̍ Māsāa̍ Dēēve̍ wa̍ īchāli̍, wa̍ lo̍ŋ o̍ nɔ̍ ni̍ mbō vēlu᷄ŋ.” 43 Le̍ he̍ī, mi̍ wāŋnda̍ ā pīɔ̄ūva᷅ŋ tɛ̍ɛ̄ŋ o̍ Chi̍i̍sū cho̍o̍. 44 Wāŋnda̍ ā pūm nda̍ a̍a̍ hɛ̍na̍ŋ mī nda̍ a̍a̍ bi̍ī ndu̍. Kɛ̍ ndu̍yɛ̍, ā nɔ̄la̍ le̍.

Wānāā bɛ̄ndūāā Chu̍ūwa̍ kɛ̄ɛ̍ le̍ tīīnda᷄ŋndo̍ dɔ̄wɔ̄ɔ̍ o̍ Chi̍i̍sū ni̍ŋ

45 O̍ ko̍ŋ kɔ̍ɔ̍lī, mi̍ pōli̍sīi̍yāā nda̍ vēm le̍ mī nda̍ a̍a̍ kɔ̍ bi̍ī Chi̍i̍sū wa̍, ā mīīŋgū. Mɛ̄ɛ̍ nda̍ mīīŋgu̍, mi̍ wānāā bɛ̄ndūāā sōlīāā lāsa̍lāa̍, a̍ ku̍ndā Fālīsi̍īya̍ ā nyūnā nda̍ āā, “Vɛ᷅ lā hi᷄ŋ a̍ ndu̍ le̍?” 46 Mi̍ pōli̍si̍i̍ya̍ mūlī āā, “Dīōmnda̍ fu̍lā po̍ ko̍ŋ o̍ sōndō la̍ŋ, kāni̍ bɛ̍ɛ̍ ŋ̄ tūi̍i̍ yɔ̍ la̍ŋ wānā o̍ wānā che᷅le̍ŋ o̍ sōndō le̍.” 47 Mi̍ ku̍ndā Fālīsi̍īya̍ lō o̍ ko̍ŋ ma̍ nyūnā pōli̍si̍i̍ya̍ āā, “Nya̍ bɛ̍ɛ̍, pōo̍ ho̍ō ō nɔ̄la̍ nya̍ bōlle̍ hi᷄ŋ? 48 Lā chē ni᷅ŋ wānāā bɛ̄ndūa̍a̍ ni̍ a̍ na̍a̍ ku̍ndā Fālīsi̍īya̍ mī ō pīlɛ̍ bɛ̍ɛ̍ o̍ dɔ̍ū tīīnda᷄ŋndo̍ o̍ ndu̍ ni̍ŋ? 49 Wānāā kāŋ nda̍ nda̍ ā si̍nā nyɛ᷅ sāwāla̍ Mɛ̄lɛ̄ka̍ ke̍ Mūu̍sē le̍ na̍a̍ la̍ŋ lā dīmi̍ wo̍ le̍. Le̍ he̍ī, Mɛ̄lɛ̄ka̍ chō nda̍ hūnɔ̄ɔ̄ nyɛ̄ pālāa̍ tūsī chōo̍.” 50 Nīkōdi̍mɔ̄ɔ̄, ō ndu̍ o̍o̍ ku̍ɛ̄ nāa̍ Chi̍i̍sū chu̍a̍ te̍le̍ŋ pi᷅lɛ̍ wo̍, nda̍ wa̍ Fālīsi̍īya̍ ni̍. Mbo̍ lō o̍ ko̍ŋ mbo̍ dīmūl nda̍ āā, 51 “Sāwā na̍a̍ dīmi̍ māā wānā ki̍lūl wa᷅ŋndo̍ yāmɛ̍i̍ ndu̍ yōndō kɔ̄ɔ̄lī le̍, mɛ̄ɛ̍ mī lā tōsa̍ mbō kɔ̄ɔ̄sa̍ mī lā sīna̍ nyɛ̄ o̍ to̍sa̍ wo̍.” 52 Mɛ̄ɛ̍ Nīkōdi̍mɔ̄ɔ̄ so̍ō le̍nde̍, ma̍ nyūnā ndu̍ āā, “Nya̍ fa̍u̍ fu̍la̍ Kāli̍lī ni̍?” Ma̍ dīmī āā, “Mɛ̍ɛ̍ndi̍a̍ŋ bɛ̍ɛ̍ o̍ Yāu̍ Mɛ̄lɛ̄ka̍a̍ ni᷄ŋ fa̍ū, a̍ se̍e̍lūŋ na̍a̍ i̍ cho̍ ī pōōnyīāā māā wānāa̍ su̍a̍ā le̍ Mɛ̄lɛ̄ka̍ wa̍, ō pīlɛ̍ bɛ̍ɛ̍ nɔ̍ mbō fūla̍ o̍ lɛ̄ŋndē Kāli̍līle̍ŋ ni᷄ŋ te̍.” 53 O̍ ko̍ŋ kɔ̍ɔ̍lī, mi̍ wāŋnda̍ kpo̍u̍ a̍ ku̍a̍nu᷄ŋ o̍ chīɛ̄īlā ndāla̍ŋ.

Chɔ᷄ŋ 8

A̍ chūā nda̍ bīī o̍ sūūndāa̍ wo̍ o̍kɔ̄ɔ̄

1 O̍ ko̍ŋ kɔ̍ɔ̍lī, mi̍ Chi̍i̍sū ndu̍ cha̍ŋ mbo̍ kūānu᷄ŋ o̍ Pēmbīī Yɔ̄mīī Ɔ̄li̍fīi̍ve̍ chōo̍. 2 Mɛ̄ɛ̍ pāa̍le̍ŋ lē sɛ̄ īdīi̍yo̍, mbo̍ mīīŋgū o̍ chīɛ̍i̍ Mɛ̄lɛ̄ka̍a̍ ni᷄ŋ. Mɛ̄ɛ̍ o̍ mi̍i̍ŋgu̍, mi̍ wāŋnda̍ kpo̍u̍ a̍ chu̍ūŋgi̍āŋ fa̍ŋgā bɛ̍ndōo̍ ma̍ bālū ndu̍ si̍lɔ̍. Mbo̍ chāl. Mbo̍ kāndū nda̍ pɛ̄ɛ̄kōo̍. 3 O̍ ko̍ŋ, mi̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍, a̍ ku̍ndā Fālīsi̍īya̍ ā hūŋ a̍ chūā pīlɛ̍. Nda̍ a̍a̍ bi̍ī chūa̍a̍ ho̍ō o̍ sūūndāa̍. Hūnɔ̄ɔ̍ a̍ ndu̍, ma̍ sīmī ndu̍ wāŋnda̍ kpo̍u̍ la̍chī. 4 Ma̍ dīmūl Chi̍i̍su̍ āā, “Ŋ̄ bīī chūa̍a̍ ho̍ō tɔ̍ɔ̍sɛ̍ɛ̍ o̍ sūūndāa̍. 5 Ndu̍yɛ̍, sāwāla̍ Mɛ̄lɛ̄ka̍ ke̍ Mūu̍sē le̍ na̍a̍ la̍ŋ, lā dīmi̍ māā ŋ̄ nɔ̄ mī ŋ̄ lo̍ wānā wa̍ā nu̍a̍ā vīī vīīyo̍ a̍ pōūta̍ŋ mbō vī. Le̍la̍ŋ, ō fūūlu̍u̍ o̍ nūmndo̍.” 6 Ndu̍yɛ̍, yāŋɔ̄ɔ̄le̍ŋ wāŋnda̍ ha̍ā nda̍ a̍a̍ ye̍ŋ Chi̍i̍su̍ ni̍, le̍ nɛ̄i̍ nda̍ hōl ndu̍ sūɛ̍i̍ yo̍. Kɛ̍, mi̍ Chi̍i̍sū tu̍ndu᷄ŋ mbo̍ sāā pōōnyīa̍a̍ lɛ̄ŋ a̍ īsū. 7 Mi̍ wāŋnda̍ ha̍ā nda̍ nda̍ wā hīōūwɔ̄ɔ̍ lāchī a̍ ndu̍ nyūūnīāā. O̍ ko̍ŋ kɔ̍ɔ̍lī, mbo̍ cha᷄ŋ mbo̍ sīm. Mbo̍ dīmūl nda̍ āā, “Bālā tīɔ̍ɔ̍ŋ. Kɛ̍ ndu̍yɛ̍, wāna̍ cho̍ na̍nu᷄ŋ ō tōsa̍ wɔ̍ yɔ᷅ŋ wɔ̄ɔ̍ŋ lēpīlɛ̍ bɛ̍ɛ̍ le̍ wo̍, ndu̍ wa᷅ wa᷅na̍ tāso̍o̍ le̍ pōūwo̍ chūa̍a̍ mbō vɛ̄ ndu̍ ni̍.” 8 Mi̍ Chi̍i̍sū tu̍ndu᷄ŋ vɛ̍lɛ̄ mbo̍ sāā pōōnyīa̍a̍ lɛ̄ŋ. 9 Mɛ̄ɛ̍ wāŋnda̍ ha̍ā tūēī nyɛ̄ Chi̍i̍sū di̍mi̍ wo̍, ma̍ kāndū kɔ᷄ŋnda̍ŋ ā pīlɛ̍ŋ pi̍lɛ̍ŋnda̍. Wāŋ bānāa̍ fɛ̍lɛ̍ŋ a̍ ku̍ɛ̍nu᷄ŋ. Ma̍ kūānu᷄ŋ ma̍ mɛ̄ī Chi̍i̍sū ndu̍ pīlɛ̍ kpe̍. Chūa̍a̍ ndu̍ wa̍ īsīsi̍. 10 Mi̍ Chi̍i̍sū cha̍ŋ i̍si̍si̍ mbo̍ nyūnā ndu̍ āā, “Chūa̍a̍, wāŋnda̍ ha̍ā yɛ̍? Nda̍ ki̍nɛ̍i̍ wānā pi᷅lɛ̍ bɛ̍ɛ̍ cho̍ lɛ̍ mbō tūsi̍ nu̍m nyɛ̄ pālāa̍ chōo̍ le̍ yɔ̄ŋ nūm wɔ̍ɔ̍ŋndo̍ le̍?” 11 Mi̍ chūa̍a̍ mūlī āā, “Wānā bɛ̍ɛ̍, fāllo̍.” Mi̍ Chi̍i̍sū di̍mūl ndu̍ āā, “Mɛ̄ɛ̍ kɔ̍nu̍ŋ. Ya̍ bɛ̍ɛ̍ I̍ cho̍ nu̍m nyɛ̄ pālāā tūsī chōo̍ le̍ yɔ̄ŋ nūm wɔ̍ɔ̍ŋndo̍ le̍. Kɛ̍ ndu̍yɛ̍, kɔ̍ hi̍o̍ū lɛ̄ lāchī a̍ nīīlū yɔ̄ŋ wɔ̄ɔ̍ŋ ŋ̄ wa̍ lēni᷄ŋ ndo̍ le̍.”

Chi̍i̍sū ndu̍ cho̍ nyɛ̄ wa̍wo̍ŋndo̍ le̍ chi̍e̍ēŋndo̍ ni̍

12 Mi̍ Chi̍i̍sū di̍mūl vɛ̄lɛ̄ wāŋnda̍ āā, “Ya̍ cho̍ nyɛ̄ wa̍wo̍ŋndo̍ le̍ ŋ̄wāŋnda̍ chīe̍e̍ ni̍. Wānā o̍ wāna̍ si̍mnu᷄ŋ bu̍ɛ̍ī nī pɛ̍, ō sɔ̄la̍ nyɛ̄ wa̍wo̍ŋ ke᷅ wa᷅ŋnda̍ yōōmū kpe̍e̍kpe̍i̍yo̍ wo̍. Ndu̍yɛ̍, wānā ko̍ŋ ō ke̍lā lɛ̍ o̍ mānyūm ni᷄ŋ te̍.” 13 Mi̍ ku̍ndā Fālīsi̍īya̍ dīmūl ndu̍ āā, “Ŋ̄ nɔ̍lā mī ŋ̄ chu̍a̍ nyɛ̄ ŋ̄ chō ho̍ō dīmīo̍o̍ a̍ nūm pi̍la̍ o̍kɔ̄ɔ̄ wo̍, māā ō chō tōnya̍ le̍. Le̍ yɛ̄ɛ̍nɛ̍, ko̍na̍ nūm pi̍la̍a̍ cho̍ ho̍ō ni̍, se̍ī chēle̍ŋ cho̍ o̍ to̍sā mī ŋ̄ lāāla̍ŋ a̍ nyɛ̄ ŋ̄ dīmi̍ wo̍ le̍.” 14 Mi̍ Chi̍i̍sū di̍mī āā, “Ā yɔ᷄ŋ bɛ̍ɛ̍ mī I̍ chɔ̍m a̍ ya̍ pi̍la̍ o̍kɔ̄ɔ̄, tōnya̍a̍ nyɛ̄ ya̍ I̍ di̍mī wo̍ ō wā ni̍. Kāni̍ fu̍u̍le̍, ya̍ pi̍la̍ I̍ si̍nā nāa̍ ya̍ I̍ chɛ̍ŋ nda̍. Ndu̍yɛ̍, I̍ si̍nā na̍a̍ ya̍ I̍ cho̍ kɔ̄la̍ŋ nda̍. Nya̍ si̍nā na̍a̍ ya̍ I̍ chɛ̍ŋ nda̍ le̍, ndu̍yɛ̍, lā si̍nā na̍a̍ ya̍ I̍ cho̍ kɔ̄la̍ŋ nda̍ le̍. 15 Nya̍ nya̍ o̍ nɛ̄i̍ īwāna̍ chi̍e̍e̍ya̍a̍ ni᷄ŋ ko̍ni̍, nya̍ kīlūl wa᷅ŋnda̍ yāma̍ŋ ni̍. Kɛ̍, ya̍ I̍ cho̍ wa̍nā i̍ya᷅ma̍ kīlūl te̍. 16 Kɛ̍, ā yɔ᷄ŋ bɛ̍ɛ̍ mī ya̍ i̍i̍ ki̍lu̍l wānā i̍ya᷅ma̍, tōnya̍a̍ ko̍ni̍ yāmɛ̍ī ya̍ I̍ ki̍a̍lū ve̍ ī wā ni̍. Kāni̍ fo̍ndōle̍, ō cho̍ ya̍ pīlɛ̍ le̍ ki̍a̍lū ndi̍ le̍. Fi̍nyā nūu̍ o̍ ve᷅m ya̍ wo̍ na̍a̍ ndu̍ dīōm pīlɛ̍ na̍a̍ ŋ̄ wā o̍ ndi̍ kīōlɔ̄ɔ̍ ni᷄ŋ ni̍. 17 Dīōmnda̍ŋ lā chō lā pōōnyīāā o̍ yāu̍la̍ nyāla̍ lāsāwāla̍ŋ ni᷄ŋ māā tē wāŋnda̍ ā ŋīɔ̍ɔ̍ŋ ā chɔ᷄m a̍ īsɔ̄ɔ̍ o̍ īsɔ̄ɔ̍ o̍kɔ̄ɔ̄ pɛ̍, ndu̍yɛ̍, mī nyɛ̄ nda̍ dīmi̍ wo̍ ō wa̍ nyɛ̄ pīlɛ̍ kpe̍ pɛ̍, mɛ̄ɛ̍ tōnya̍a̍ sūɛ̍i̍ ke̍ŋ ī wā ni̍. 18 I̍ chɔ̍m a̍ ya̍ pi̍la̍ o̍kɔ̄ɔ̄. O̍ ko̍ŋ kɔ̍ɔ̍lī, mi̍ Fi̍nyā nūu̍ o̍ ve᷅m ya̍ wo̍, ndu̍ bɛ̍ɛ̍ mbo̍ chɔ̄m nyɛ̄ pīlɔ̍ɔ̍ kpe̍ a̍ ya̍ o̍kɔ̄ɔ̄.” 19 Ma̍ nyūnā ndu̍ āā, “Kūɛ̍ɛ̍nɛ̍ Fi̍nyā nūm o̍ cho̍ yɛ̄?” Mi̍ Chi̍i̍sū mu̍lī āā, “Lā si̍nā wa᷅na̍ ya̍ I̍ cho̍ kpe̍e̍kpe̍i̍ yo̍ le̍. Ndu̍yɛ̍, lā si̍nā Fi̍nyā nūu̍ le̍. Tē nya̍ a̍a̍ si̍nā kpe̍e̍kpe̍i̍ wa᷅na̍ ya̍ I̍ cho̍ wo̍ pɛ̍, Fi̍nyā nūu̍ bɛ̍ɛ̍ lā wa̍ sīnā wāna̍ o̍ cho̍ wo̍.” 20 Bōōndi̍i̍ Chi̍i̍sū wa̍ wāŋnda̍ pɛ̄ɛ̄kōo̍ o̍ chīɛ̍i̍ Mɛ̄lɛ̄ka̍a̍ ni᷄ŋ nde̍ o̍ so̍ō dīōmnda̍ŋ nda᷅ŋ ni̍. Ō wa̍ o̍ fo̍ndāŋ nda̍ kɛ̄si̍ kɔ̍fūlā nda̍ dūāū ka̍ni̍ŋ wāŋnda̍ kē Mɛ̍lɛ̄ka̍ wo̍ŋ ndo̍. Ndu̍yɛ̍, wānā o̍ wānā bi̍i̍ ndu̍ le̍. Kāni̍ fo̍ndōle̍, bōōnde̍i̍ ndi̍ i̍i̍ fu̍u̍lu̍u̍ wɔ̍ le̍.

Kɔ̄ndɔ̄fi̍llo̍ bīī wāŋnda̍ a̍ nyɛ̄ Chi̍i̍sū di̍mi̍ a̍ ndu̍ pi̍la̍ o̍kɔ̄ɔ̄ wo̍

21 Mi̍ Chi̍i̍sū di̍mūl nda̍ vɛ̄lɛ̄ āā, “I̍ cho̍ lākɔ̄nɔ᷄ŋ. O̍ ko̍ŋ, lā chō ya̍ nūūvīāā, ndu̍yɛ̍ o̍ ko̍ŋ kɔ̍ɔ̍lī, lā chō lō o̍ yɔ̄ŋndā nyāla̍ wɔ̍ɔ̍ŋnda̍ŋ ni᷄ŋ mī lā vī. Lā nɔ̍lā mī lā kūɛ̄ nāa̍ ya̍ I̍ cho̍ kɔ̄la̍ŋ nda̍ le̍.” 22 O̍ ko̍ŋ, mi̍ wānāā bɛ̄ndūāā Chu̍ūwa̍ dīmī āā, “Ō dīmi̍ māā ŋ̄ nɔ̍lā mī ŋ̄ kūɛ̄ nāa̍ o̍ cho̍ kɔ̄la̍ŋ nda̍ le̍. Bāā ō hɛ̄na̍ŋ ma̍hɛ̍na᷄ŋ mbō dīīnu᷄ŋ?” 23 Mi̍ Chi̍i̍sū mu̍lūl nda̍ āā, “Chi̍e̍ēŋ na̍nu᷄ŋ nya̍ nya̍ fūla̍ ni̍. Kɛ̍, ya̍ yā, Ɛ̄chɛ̍nɛ̄ ya̍ I̍ fu̍la̍ ni̍. Wānāā wāā chi̍e̍ēŋ na̍nu᷄ŋ nya̍ nya̍ chō ni̍. Kɛ̍, ya̍ ya̍ wānā wa̍ā Ɛ̄chɛ̍nɛ̄ I̍ cho̍ ni̍. 24 Le̍la̍ŋ ya̍ I̍ di̍mu̍l nya̍ ni̍ māā, lā chō lō o̍ yɔ̄ŋndā nyāla̍ wɔ̍ɔ̍ŋnda̍ŋ ni᷄ŋ mī lā vī. Tē lā lāāla̍ŋ māā ya̍ le̍ cho̍ wāna̍ cho̍ kāni̍ ma̍si̍ndɛ̄ wo̍ le̍, mɛ̄ɛ̍ lā chō lō o̍ yɔ̄ŋndā nyāla̍ wɔ̍ɔ̍ŋnda̍ŋ ni᷄ŋ mī lā vī pɛ̍.” 25 Ma̍ nyūnā ndu̍ āā, “Wāna̍ māā vɛ̄ɛ̍nɛ̍ ŋ̄ chō yɛ̄ nɛ̍?” Mi̍ Chi̍i̍sū mu̍lī āā, “Chɔ̍ŋ o̍ kāndɔ᷄ŋndo̍ pe̍kēkē wāna̍ ya̍ I̍ di̍mu̍l nya̍ māā ndu̍ ya̍ I̍ cho̍ ni̍ wo̍, wānā ko̍ŋ, ndu̍ kpe̍e̍kpe̍i̍ ya̍ I̍ cho̍ ni̍. 26 Sɔ̄ɔ̍ŋ ka̍ ka̍ ŋ̍ cho̍, ŋ̄ ya̍ I̍ nɔ̍lā mī di̍mi̍ mu̍ŋ a̍ nya̍ o̍kɔ̄ɔ̄, ndu̍yɛ̍, mī I̍ kɔ̍ɔ̍sa̍ a̍ nya̍ a̍ mu̍ŋ ndo̍ŋ. Kɛ̍, Fi̍nyā nūu̍ o̍ ve᷅m ya̍ wo̍ ō chō wānā sa̍na̍a̍. Ndu̍yɛ̍, nyɛ̄ o̍ chɔ᷅m ya̍ wo̍, ndu̍ ko̍ni̍ ya̍ I̍ di̍mūl wa᷅ŋnda̍ o̍ chi̍e̍ēŋndo̍ ni᷄ŋ ni̍.” 27 Kɛ̍, ā sīna̍ pɛ̍ŋgu̍ māā a̍ Mɛ̄lɛ̄ka̍ Fi̍nyāa̍ o̍kɔ̄ɔ̄ le̍ o̍ wa̍ sūɛ̍i̍ nāa̍ nda̍ chūā le̍. 28 Le̍ he̍ī, mi̍ Chi̍i̍sū di̍mūl nda̍ āā, “Tē lā hēēlu̍ wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ o̍ yɔ̄m sīŋgāfīlāa̍ chōo̍ pɛ̍, lā chō sīnā māā ya̍ cho̍ wāna̍ cho̍ kāni̍ ma̍si̍ndɛ̄ wo̍ ni̍. O̍ ko̍ŋ, lā chō sīnā māā I̍ to̍sā nyɛ᷅ o̍ nyɛ̄ o̍ kpāāya̍ ni̍ ya̍ pi̍la̍ ni̍ŋ te̍. Kɛ̍ o̍ ko̍ŋ kɔ̍ɔ̍lī, lā chō sīnā māā nyɛ̄ Mɛ̄lɛ̄ka̍ Fi̍nyāa̍ ō pɛ̄ɛ̄ku̍ ya̍ wo̍, māā ndu̍ ko̍ni̍ ya̍ I̍ di̍mi̍ ni̍. 29 Ndu̍yɛ̍, Mɛ̄lɛ̄ka̍ Fi̍nyāa̍ o̍ ve᷅m ya̍ wo̍, ō chō lātūlu̍ a̍ ya̍ lɔ̍ɔ̍ lɔ̍ɔ̍. Ō me᷅l la̍ mī wa̍ ya̍ pīlɛ̍ kpe̍ le̍. Kāni̍ fo̍ndōle̍, nyɛ̄ o̍ hɛ̍na̍ŋ ndo̍, ndu̍ ya̍ I̍ to̍sā lɔ̍ɔ̍ lɔ̍ɔ̍ ni̍.” 30 Ndu̍yɛ̍, mi̍ wāŋnda̍ ta̍u̍ a̍ tu̍e̍ī dīōmndā Chi̍i̍sū di̍mi̍ la᷅ŋ nda̍ŋ nda̍, ā dūāū tīīnda᷄ŋ ndāa̍ o̍ ndu̍ ni̍ŋ.

Wānāa̍ cho̍ chūāūwāa̍ E̍bīlāha᷅m nda̍ wa̍

31 Mi̍ Chi̍i̍sū di̍mūl Chu̍ūwa̍ a̍ dɔ̍ū tīīnda᷄ŋndo̍ o̍ ndu̍ ni̍ŋ nda̍ āā, “Tē lā hīōū lāchī a̍ nyɛ̄ ya̍ I̍ pɛ̍ɛ̍ku̍ nya̍ wo̍ tōsāa̍ pɛ̍, mɛ̄ɛ̍ bu̍ɛ̍i̍yāā nīa̍a̍ nya̍ chō lēkɛ̍ndɛ̍ī ni̍. 32 Lā chō tōnya̍ cho̍ a̍ Mɛ̄lɛ̄ka̍ o̍kɔ̄ɔ̄ wo̍ sīnā, ndu̍yɛ̍, mī tōnya̍ ko̍ŋ ō bāŋa̍ nya̍.” 33 Ma̍ mūlī āā, “O̍ pūlāle̍ E̍bīlāha᷅mnde̍ŋ chōo̍ na̍a̍ ŋ̄ fūla̍ ni̍. Ndu̍yɛ̍, lēpīlɛ̍ bɛ̍ɛ̍ ŋ̄ ve̍ wɔ̍ o̍ lēchɛ̄ ni᷄ŋ wa̍nā o̍ bā bɛ̄ŋgu̍ le̍. Dīmī yɛ̄ɛ̍nɛ̍ ŋ̄ dīmi̍ yɛ̄ ni᷅ŋ māā ŋ̄ chō bāŋa᷄ŋndo̍ sɔ̄lā?” 34 Mi̍ Chi̍i̍sū di̍mūl nda̍ āā, “Mī di̍mu̍l nya̍ tōnya̍a̍ wa̍la̍ŋ, wānā o̍ wāna̍ to̍sa̍ yɔ̄ŋ wɔ̄ɔ̍ŋndo̍ pɛ̍, mɛ̄ɛ̍ chīɔ̍ɔ̍ o̍ cho̍ yɔ̄ŋ wɔ̄ɔ̍ŋndo̍ o̍ bā bɛ̄ŋgu̍ ni̍. 35 Chīɔ̍ɔ̍ ndu̍ cho̍ wa̍nā wa̍ā o̍ yu̍ŋgo̍o̍ chōo̍ le̍ lɔ̍ɔ̍ lɔ̍ɔ̍ le̍. Kɛ̍, po̍ ve̍lu᷄ŋ yɛ̍ ho̍ō o̍ yu̍ŋgu̍ wāŋndo̍ chōo̍ wo̍, ndu̍ ndu̍ cho̍ o̍ yu̍ŋgu̍ fi̍nyā ndɔ̄ɔ̍ chōo̍ le̍ lɔ̍ɔ̍ lɔ̍ɔ̍. 36 Le̍la̍ŋ, tē Po̍ Mɛ̄lɛ̄ka̍a̍ bāŋa̍ nu̍m pɛ̍, mɛ̄ɛ̍ a̍ sɔ̍la̍ bāŋa᷄ŋndo̍ lēkɛ̍ndɛ̍ī. 37 I̍ si̍nā māā o̍ pūlāle̍ E̍bīlāha᷅mnde̍ŋ chōo̍ nya̍ fūla̍ ni̍. Kɛ̍ ndu̍yɛ̍, mi̍ lā wā kīndīo̍o̍ le̍ ya̍ dīyɔ̄ɔ̍, kāni̍ fo̍ndōle̍, lā chu̍ē nyɛ᷅ ya̍ I̍ pɛ̍ɛ̍kū nya̍ wo̍ le̍. 38 Ya̍ ya̍, nyɛ̄ ya̍ I̍ che᷅ a̍ Fi̍nyā nūu̍ o̍kɔ̄ɔ̄ wo̍, a̍ ndu̍ o̍kɔ̄ɔ̄ ya̍ I̍ di̍mī ni̍. Nya̍ bɛ̍ɛ̍ nyɛ̄ fi̍nyā nyā di̍mūl nya̍ wo̍, ndu̍ nya̍ tōsā ni̍.” 39 Ma̍ mūlī āā, “E̍bīlāha᷅m, ndu̍ cho̍ fi̍nyā nāā ma̍māa̍ ni̍.” Mi̍ Chi̍i̍sū di̍mī āā, “Tē nya̍ a̍a̍ wa̍ chūāūwāā māmāa̍ E̍bīlāha᷅mnda̍ lēkɛ̍ndɛ̍ī pɛ̍, lā wa̍ nyɛ̄ E̍bīlāha᷅m to̍sa̍ wo̍ tōsā. 40 E̍bīlāha᷅m ndu̍ to̍sa̍ mɛ̄ɛ̍ nya̍ chō nu̍a̍ā tōsāa̍ yɛ̍ le̍. Kāni̍, sɔ̄ɔ̍ŋ tōnya᷅ŋ Fi̍nyā nūu̍ chɔ᷄m ya̍ wo̍ŋ, mu̍ŋ ko̍ni̍ ya̍ I̍ cho̍ nya̍ dīmūllo̍ ni̍. Kɛ̍ ndu̍yɛ̍, o̍ ko̍ŋ ni̍ŋ kpo̍u̍, mi̍ lā wā kīndīo̍o̍ le̍ ya̍ dīyɔ̄ɔ̍. E̍bīlāha᷅m ndu̍ to̍sa̍ le̍nde̍ le̍. 41 Nyɛ̄ fi̍nyā nyā o̍ to̍sā wo̍, ndu̍ ko̍ni̍ nya̍ chō tōsāa̍ ni̍.” Ma̍ dīmī āā, “Na̍a̍ na̍a̍ ŋ̄ cho̍ chu̍a̍u̍wāā sa̍ma̍ le̍. Mɛ̄lɛ̄ka̍ pi̍la̍, ndu̍ ko̍ni̍ cho̍ fi̍nyā nāa̍ ni̍.” 42 Mi̍ Chi̍i̍sū di̍mūl nda̍ āā, “Tē Mɛ̄lɛ̄ka̍ ndu̍ o̍o̍ wa̍ fi̍nyā nyā pɛ̍, lā wa̍ hɛ̄na᷄ŋ a̍ sūɛ̍i̍ nīi̍. Kāni̍, o̍ Mɛ̄lɛ̄ka̍ lo̍ ya̍ I̍ chɛ̍ŋ ni̍. Lo̍ŋ ya̍ chɛ̍ŋ ni̍ mi̍ hu᷅ŋ na̍nu᷄ŋ. Ō cho̍ o̍ kpāāya̍ ni̍ ya̍ pi̍la̍ ni̍ŋ te̍ ya̍ I̍ hi᷅ŋ na̍nu᷄ŋ te̍. Ndu̍ ve᷅m ya̍ ni̍. 43 Lā sīnā pa̍ le̍ sa̍bū nya̍ si̍nā nyɛ᷅ ya̍ I̍ di̍mūl nya̍ wo̍ pɛ̄ŋgu̍ le̍ wo̍? Ō cho̍ fo̍ndōle̍, lā tu̍i̍ī nyɛ᷅ ya̍ I̍ di̍mī wo̍ le̍. 44 Māsa̍ nyi̍nāā wɔ̄ɔ̍ŋnda̍, ndu̍ cho̍ fi̍nyā nyā ni̍. Ndu̍yɛ̍, sɔ̄ɔ̍ŋ hi̍nī fi̍nyā nya̍ kɔ̄llo̍ wo̍ŋ, mu̍ŋ nya̍ hɛ̍na̍ŋ to̍sāa̍ ni̍. O̍ kāndɔ᷄ŋndo̍ bɛ̍ɛ̍ ō wa̍ wānā di̍u̍wāā ŋ̄wāŋndā chīe̍e̍. Ō cho̍ wa᷅na̍ si̍m o̍ tōnya̍ chōo̍ le̍, kāni̍ fo̍ndōle̍, tōnya̍ o̍ tōnya̍ cho̍ o̍ ndu̍ ni̍ŋ te̍. Ō dīmi̍ bɛ̍ɛ̍ cho̍ōla̍ŋ ō bāāla̍ŋ te̍. Kāni̍ fu̍u̍le̍, wāna̍ lāchōōwāa̍ o̍ cho̍ ni̍. Ndu̍yɛ̍, ndu̍ vi̍ām wa᷅ŋnda̍ chōōla̍ŋ dīmīo̍o̍ ni̍. 45 Kɛ̍, ya̍ ya̍, tōnya̍a̍ ya̍ I̍ di̍mūl nya̍ ni̍. Le̍ sa̍bōo̍ ho̍ō nya̍ lāāla̍ŋ a̍ ya̍ le̍ ni̍. 46 Nya̍ ki̍nɛ̍i̍, wānā pi᷅lɛ̍ bɛ̍ɛ̍ cho̍ o̍ chɔ᷅m māā I̍ to̍sa̍ ni᷅ŋ yɔ̄ŋ wɔ̄ɔ̍ŋndo̍ lēpīlɛ̍ bɛ̍ɛ̍ wo̍? Wānā bɛ̍ɛ̍. Kɛ̍, o̍ ko̍ŋ kɔ̍ɔ̍lī, tē ō wa̍ tōnya̍a̍ pɛ̍ ya̍ I̍ cho̍ nya̍ dīmūllo̍ ni̍, mɛ̄ɛ̍ vɛ᷅ ni᷅ŋ lā la̍a̍lāŋ a̍ ya̍ le̍? 47 Wānā o̍ wāna̍ cho̍ chu̍a̍ Mɛ̄lɛ̄ka̍ pɛ̍, yāŋɔ̄ɔ̍ o̍ ya᷅ŋ ni᷅la̍ŋ o̍ dīōmnda̍ Mɛ̄lɛ̄ka̍la̍ŋ ni̍. Ndu̍yɛ̍, sa̍bū nya̍ ye᷅ŋ dīōmnda̍ Mɛ̄lɛ̄ka̍la̍ŋ lānī lē wo̍ cho̍ ni̍ māā lā cho̍ chu̍a̍u̍wāā ndɔ̄ le̍.”

Lɔ̍ɔ̍pa̍ mi̍ E̍bīlāha᷅m vi̍a̍lu᷄ŋ Chi̍i̍sū wa̍ ni᷅ŋ

48 Mi̍ Chu̍ūwa̍ mūlūl Chi̍i̍sū āā, “Nyɛ̄ na̍a̍ ŋ̄ dīmi̍ māā Sāme̍e̍līāānɔ̄ɔ̍ ŋ̄ chō ni̍ wo̍, ndu̍yɛ̍, māā nyi̍nā wɔ̄ɔ̍ŋndo̍ ndu̍ cho̍ nu̍m kɔ̄ɔ̄lī ni̍ wo̍, tōnya̍ kpe̍e̍kpe̍i̍ na̍a̍ ŋ̄ dīmi̍ ni̍.” 49 Mi̍ Chi̍i̍sū mu̍lī āā, “Nyi̍nā wɔ̄ɔ̍ŋ o̍ nyi̍nā wɔ̄ɔ̍ŋ ō cho̍ ya̍ kɔ̄ɔ̄lī le̍. Fi̍nyā nūu̍, ndu̍ ya̍ ya̍ I̍ cho̍ bɛ̄ɛ̄le̍ŋ kīo̍o̍ ni̍. Kɛ̍, mi̍ nya̍ nya̍ wā ya̍ lābɛ̄ɛ̄ tɛ̍ɛ̍mbūū. 50 Ndu̍yɛ̍, I̍ cho̍ sa̍ŋgālā nūūvīāā ŋ̄wāŋndā chīe̍e̍ o̍ bā le̍. Wānā cho̍, o̍ cho̍ kīndīo̍o̍ māā I̍ sɔ̍la̍ sa̍ŋgālāa̍ wo̍. Ndu̍ su̍a̍ā le̍ ya̍ ni̍. 51 Mī di̍mu̍l nya̍ tōnya̍a̍ wa̍la̍ŋ, wānā o̍ wāna̍ chu̍a̍ nyɛ̄ ya̍ I̍ di̍mi̍ wo̍ pɛ̍, ō vi᷅ lɛ̍ le̍.” 52 O̍ ko̍ŋ, mi̍ Chu̍ūwa̍ dīmī āā, “Ŋ̄ sīna̍ ni᷅ŋ lēkɛ̍ndɛ̍ī māā nyi̍nā wɔ̄ɔ̍ŋndo̍ cho̍ nu̍m kɔ̄ɔ̄lī ni̍. E̍bīlāha᷅m vi᷅. Wānāa̍ su̍a̍ā le̍ Mɛ̄lɛ̄ka̍ wa̍ bɛ̍ɛ̍ ā vī. Ndu̍ ŋ̄ dīmī ni̍ māā wānā o̍ wāna̍ chu̍a̍ nyɛ̄ ŋ̄ dīmi̍ wo̍ pɛ̍, ō vi᷅ le̍? 53 Nāa̍ fi̍nyā nāā ma̍māa̍ E̍bīlāha᷅m ndu̍ vi᷅ wɔ̄, bāā dīmīo̍o̍ ŋ̄ chō ni̍ māā nu᷄m hi̍o̍ū a̍ E̍bīlāha᷅m? Wānāa̍ su̍a̍ā le̍ Mɛ̄lɛ̄ka̍ wa̍ nda̍ vī. A̍ la̍a̍la̍ŋ, wāna̍ māāvɛ̄ɛ̍nɛ̍ ŋ̄ chō yɛ̄?” 54 Mi̍ Chi̍i̍sū mu̍lī nda̍ dīōm āā, “Tē ndu̍ o̍o̍ wa̍ pɛ̍ ya̍ pi̍la̍ cho̍ sāŋgāla᷄ŋndo̍ ni̍, sāŋgālā kōŋ ndu̍ o̍o̍ ve᷅ nyɛ᷅ o̍ nyɛ̄ le̍. Wāna̍ sa̍ŋgālā ya̍ wo̍, ndu̍ cho̍ Fi̍nyā nūu̍ ni̍, Mɛ̄lɛ̄ka̍ nya̍ dīmi̍ māā ndu̍ nya̍ chō pīɛ̄īyo̍ ni̍ wo̍, ndu̍ kpe̍e̍kpe̍i̍. 55 Nya̍ nya̍ si̍nā ndu̍ le̍. Kɛ̍, ya̍ ya̍ I̍ si̍nā ndu̍. Tē I̍ di̍mi̍ pɛ̍ māā I̍ si̍nā ndu̍ le̍, mɛ̄ɛ̍ I̍ si̍mnu᷄ŋ wa᷅na̍ lāchōōwā mɛ̄ɛ̍ nya̍ chō yɛ̍. Kɛ̍ ndu̍yɛ̍, I̍ si̍nā ndu̍. Ndu̍yɛ̍, I̍ chu̍ā nyɛ᷅ o̍ di̍mī wo̍. 56 Mi̍ E̍bīlāha᷅m fi̍nyā nyā ma̍mā o̍ na᷅ŋ kɔ̄l, kāni̍ fo̍ndōle̍, ndu̍ o̍o̍ nɔ̍ le̍ te̍le̍ŋ nī hu̍nāa̍ chɔ̄ɔ̍. Ndu̍yɛ̍, mbo̍ chā te̍le̍ŋ nī hu̍nāa̍ mbo̍ nāŋ kɔ̄l.” 57 Mi̍ Chu̍ūwa̍ dīmūl ndu̍ āā, “A̍ cho̍ wɔ̍ bɛ̍ɛ̍ wɔ̍sīlā be̍le̍-ŋu̍ɛ̍ɛ̍nu̍ le̍, vɛ̄ɛ̍nɛ̍ ŋ̄ lōōku̍ yɛ̄ E̍bīlāha᷅m chɔ̄?” 58 Mi̍ Chi̍i̍sū mu̍lī āā, “Mī di̍mu̍l nya̍ tōnya̍a̍ wa̍la̍ŋ, lɔ̍ɔ̍pa̍ E̍bīlāha᷅m vi̍a̍lūŋ, I̍ wa̍ ni᷅ŋ.” 59 Mɛ̄ɛ̍ Chi̍i̍sū so̍ō le̍nde̍, ma̍ chɔ̄ɔ̄vīāā pōūta̍ŋ le̍ ndu̍ vīī vīīyo̍. Kɛ̍, mi̍ Chi̍i̍sū vi̍a̍ŋnu᷄ŋ mbo̍ māl chīɛ̍i̍ Mɛ̄lɛ̄ka̍a̍ mbo̍ kūānu᷄ŋ.

Chɔ᷄ŋ 9

Chi̍i̍sū si̍ŋgi̍ po̍ nda̍ vēlū ō sūmɛ̍i̍yo̍

1 Bōōndi̍i̍ pi᷅lɛ̍ mɛ̄ɛ̍ Chi̍i̍sū wa̍ hīōūwɔ̄ɔ̍, mbo̍ chā wānā su̍mɛ̍i̍yo̍. Pōo̍ ho̍ō yɛ̍, ō sūmɛ̍i̍ nda̍ a̍a̍ ve̍lū ndu̍ ni̍. 2 Mi̍ Chi̍i̍sū bu̍ɛ̍i̍yāā ndūa̍a̍ nyūnā ndu̍ āā, “Ti̍chā, yɔ̄ŋ wɔ̄ɔ̍ŋ nɛ̄ɛ̍nɛ̍ to̍sa̍ yɛ̄ ma̍ vīālū pōo̍ ho̍ō ō sūmɛ̍i̍? Yɔ̄ŋ wɔ̄ɔ̍ŋ ndu̍ pi̍la̍a̍ ni̍, ɔ̄ɔ̄ yɔ̄ŋ wɔ̄ɔ̍ŋ wānāa̍ ve̍lū ndu̍ wa̍?” 3 Mi̍ Chi̍i̍sū mu̍lī āā, “Ō cho̍ le̍ yɔ̄ŋ wɔ̄ɔ̍ŋ ndɔ̄ le̍, ɔ̄ɔ̄ le̍ yɔ̄ŋ wɔ̄ɔ̍ŋ wānāa̍ ve̍lū ndu̍ wa̍ le̍. Ō sɔ̄la̍ sūmāa̍ ho̍ō le̍ mī Mɛ̄lɛ̄ka̍ chɔ᷄m kpāāya̍ ndɔ̄ɔ̍ o̍ yōōmū pōo̍ ho̍ō ni᷄ŋ mī wāŋnda̍ chē. 4 Ŋ̄ nɔ̄ mī ŋ̄ tōsa̍ wa̍li̍ wāna̍ ve᷅m ya̍ wo̍ bōōndi̍i̍ pāa̍le̍ŋ lē chō ve̍. Nyūmnda̍ŋ mā chō tōlɔ̄ɔ̄. O̍ ko̍ŋ, wānā to̍sā lɛ̍ wa̍li̍ le̍. 5 Bōōndi̍i̍ ya̍ I̍ cho̍ he̍ī o̍ chi̍e̍ēŋndo̍ ni᷄ŋ nde̍, ya̍ cho̍ nyɛ̄ wa̍wo̍ŋndo̍ le̍ chi̍e̍ēŋndo̍ ni̍.” 6 Mɛ̄ɛ̍ Chi̍i̍sū di̍mi̍ dīōmnda̍ŋ nda᷅ŋ, mbo̍ tūfū lɔ̄lūa̍ŋ lɛ̄ŋ. Mbo̍ līndā pūūlōo̍ a̍ ma̍ŋ. Mbo̍ sūū pōo̍ ho̍ō o̍ lāhɔ̄l. 7 Mbo̍ dīmūl ndu̍ āā, “Kɔ̍ mā kɔ̍ pu̍lū hɔ̄lla̍ o̍ Pīo̍o̍ Sa̍i̍lo̍wām.” Sa̍i̍lo̍wām tɛ̄ɛ̄sīāā ndɔ̄ɔ̍ cho̍ ni̍ āā, vīōmɔ̄ɔ̍. Mi̍ pōo̍ ho̍ō kūā mbo̍ kɔ̍ pu̍lū hɔ̄lla̍. O̍ ko̍ŋ kɔ̍ɔ̍lī, mbo̍ mīīŋgū. Ndu̍yɛ̍, ō wa̍ ni᷅ŋ chɔ̄ɔ̍. 8 Mɛ̄ɛ̍ wānāā nda̍ chīɛ̄ɛ̄li̍āŋ nda̍, a̍ wānāā nda̍ a̍a̍ cha᷅ ndu̍ pāāndū pīɛ̄īle̍ŋ nda̍ chē ndu̍, ma̍ kāndū nyūūni̍āŋndo̍. Ma̍ dīmī āā, “Ō cho̍ po̍o̍ ho̍ō le̍ ndu̍ o̍o̍ nɔ̍ pāāndū cha᷄lle̍ pīɛ̄īle̍ŋ te̍?” 9 Mi̍ ā pūm dīmī āā, “Ndu̍ ni̍.” Kɛ̍, mi̍ ha̍ā dīmī āā, “Ō cho̍ ndu̍ le̍. Vēla᷅ŋndo̍ ko̍ni̍ nda̍ vēla᷅ŋ ni̍.” O̍ ko̍ŋ, mi̍ pōo̍ pi̍la̍ di̍mī āā, “Ya̍ ni̍.” 10 Ma̍ nyūnā ndu̍ āā, “Vɛ̄ɛ̍nɛ̍ ŋ̄ lōōku̍ yɛ̄ chɔ̄?” 11 Mi̍ pōo̍ mūlī āā, “Po̍ nda̍ vēēlū āā, Chi̍i̍sū wo̍, ndu̍ li̍nda̍ pūūlōo̍ ni̍ mbo̍ sūū ya̍ o̍ lāhɔ̄l. Mbo̍ dīmūl la̍ āā, ‘Kɔ̍ mā kɔ̍ pu̍lū hɔ̄lla̍ o̍ Pīo̍o̍ Sa̍i̍lo̍wām.’ Mi̍ ku̍ā mi̍ kɔ̍ pu̍lū hɔ̄lla̍. Mɛ̄ɛ̍ ya̍ pu̍lū, mi̍ cha᷅.” 12 Ma̍ nyūnā āā, “Kūɛ̍ɛ̍nɛ̍ po̍ ka̍lāa̍ cho̍ yɛ̄?” Mbo̍ mūlī āā, “I̍ si̍nā bā o̍ cho̍ le̍.”

Ku̍ndā Fālīsi̍īya̍ nyūūni̍a̍a̍ po̍ Chi̍i̍sū si̍ŋgi̍ wo̍

13 Ma̍ hūŋ a̍ po̍ ndu̍ o̍o̍ wa̍ ko̍ŋ o̍ su̍mɛ̍i̍ yo̍, nāa̍ ku̍ndā Fālīsi̍īya̍ chūā. 14 Ndu̍yɛ̍, o̍ pāa̍le̍ pɛ̍ŋgīāālē Chu̍ūwa̍ chōo̍ Chi̍i̍sū ndu̍ o̍o̍ li̍nda̍ pūūlōo̍ ni̍ mbo̍ tōsā mi̍ pōo̍ chā. 15 Ku̍ndā Fālīsi̍īya̍ bɛ̍ɛ̍ ma̍ nyūnā pōo̍ a̍ mɛ̄ɛ̍ o̍ lo̍o̍ku̍ chɔ̄ yɛ̍. Mbo̍ dīmūl nda̍ āā, “Mɛ̄ɛ̍ o̍ su̍u̍ pūūlōo̍ ya̍ o̍ lāhɔ̄l, mi̍ kɔ̍ pu̍lū hɔ̄lla̍ mi̍ wa᷅ ni᷅ŋ chɔ̄ɔ̍.” 16 Mi̍ ku̍ndā Fālīsi̍īya̍ ā pūm ā dīmī āā, “Wāna̍ to̍sa̍ ke̍ŋ ndo̍, ō ve᷅ ni̍ŋ Mɛ̍lɛ̄ka̍ le̍ ve᷅m ndu̍ le̍. Kāni̍ fo̍ndōle̍, ō tɛ̄ɛ̄mbu̍u̍ sāwa̍ pāa̍le̍ na̍a̍ lē pɛ̄ŋgīāā le̍ŋ.” Kɛ̍, mi̍ Fālīsi̍īya̍ ā pīli̍a̍ā dīmī āā, “Tē wānā ko̍ŋ ndu̍ o̍o̍ wa̍ wāna̍ yɔ̄ŋ wɔ̄ɔ̍ŋ pɛ̍, vɛ̄ɛ̍nɛ̍ ndu̍ o̍o̍ nɔ̍lā yɛ̍ sɔ̄ɔ̍ŋ kɔ̄ndɔ̄fi̍li̍ ŋ̄ wāā nu̍a̍ā tōsā?” O̍ ko̍ŋ, mi̍ pīɔ̄ūwa᷅ŋndo̍ dēl nda̍ tɛ̍ɛ̄ŋ. 17 Ma̍ hīāū lāchī a̍ po̍ ndu̍ o̍o̍ wa̍ ko̍ŋ o̍ su̍mɛ̍i̍ yo̍ nyūūnīa̍a̍. Ma̍ dīmī āā, “A̍ di̍mi̍ māā po̍ ko̍ŋ to̍sa̍ ni̍ ma̍ chā. Vɛ̄ɛ̍nɛ̍ nu̍m yīya̍ŋ yɛ̍ a̍ ndu̍ o̍kɔ̄ɔ̄?” Mbo̍ mūlī āā, “Wāna̍ su̍a̍ā le̍ Mɛ̄lɛ̄ka̍ wo̍ o̍ cho̍ ni̍.” 18 Kɛ̍, wānāā bɛ̄ndūāā Chu̍ūwa̍ ā lāāla̍ŋ ndi̍ māā pōo̍ ho̍ō ō wa̍ pāāndū ō sūmɛ̍i̍, kɛ̍ mbo̍ wā ni᷅ŋ chɔ̄ɔ̍ le̍, mɛ̄ɛ̍ ma̍ vēēlū fi̍nyā ndɔ̍ a̍ kāla̍ ndɔ̄. 19 Vēēlōo̍ nda̍ ma̍ nyūnā nda̍ āā, “Po̍ nyāa̍ cho̍ ho̍ō ni̍? Ō sūmɛ̍i̍ nya̍ vēlū ndu̍ lē kɛ̍ndɛ̍ī ni̍? Mɛ̄ɛ̍ vɛ̄ɛ̍nɛ̍ o̍ lo̍o̍ku̍ yɛ̄ ni᷅ŋ chɔ̄ pɛ̄ŋgo̍o̍ ho̍ō?” 20 Mi̍ fi̍nyā ndɔ̄ a̍ kāla̍ ndɔ̄ a̍ mu̍lī āā, “Ŋ̄ sīnā māā po̍ nāa̍ cho̍ ho̍ō ni̍. Ndu̍yɛ̍, ŋ̄ sīnā māā ō sūmɛ̍i̍yo̍ na̍a̍ ŋ̄ vēlū ndu̍ ni̍. 21 Kɛ̍, ŋ̄ si̍nā mɛ̄ɛ̍ o̍ lo̍o̍ku̍ chɔ̄ yɛ̍ le̍. Ndu̍yɛ̍, ŋ̄ si̍nā wa᷅na̍ to̍sa̍ mbo̍ chā wo̍ le̍. Wāŋndo̍ chō ni᷅ŋ lāŋu̍nɔ̄ ka̍lā. Lā nyūna̍ ndu̍ mī ndu̍ pi̍la̍ chɔ̍m nya̍.” 22 Wānāa̍ ve̍lū pōo̍ ho̍ō wa̍ ā dīmi̍ fo̍ndō le̍nde̍ le̍. Ā wa̍ wānāā bɛ̄ndūāā Chu̍ūwa̍ wōo̍. Kāni̍, wānāā bɛ̄ndūa̍a̍ ha̍ā, nda̍ a̍a̍ chɛ̍la᷅ŋ ni᷅ŋ māā wānā o̍ wāna̍ nda̍ bīī pɛ̍ o̍ dīmīo̍o̍ māā Chi̍i̍sū ndu̍ cho̍ Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ ni̍, ā sōli̍ ndu̍ o̍ chīɛ̄ī nda̍ pīɛ̄ī Mɛ̍lɛ̄ka̍ wo̍ ni᷄ŋ. 23 Le̍ sa̍bū kōŋ, fi̍nyāa̍ pōo̍ ho̍ō a̍ kālāa̍ ā dīmi̍ ni̍ āā, “Wāŋndo̍ chō ni᷅ŋ lāŋu̍nɔ̄ kālā. Nya̍ pi̍la̍ lā nyūna̍ ndu̍.” 24 O̍ ko̍ŋ, ma̍ vēēlū vɛ̄lɛ̄ po̍ nda̍ a̍a̍ ve̍lū ko̍ŋ o̍ su̍mɛ̍i̍ yo̍ dīi̍ŋ ndɔ̄ɔ̍. Ma̍ dīmūl ndu̍ āā, “Ŋ̄ sīnā māā wāna̍ to̍sa̍ ko̍ŋ ma̍ chā wo̍, wāna̍ yɔ̄ŋ wɔ̄ɔ̍ŋndo̍ o̍ cho̍ ni̍. Le̍la̍ŋ, di̍mu̍l lɔ̍ na̍a̍ tōnya̍a̍ le̍ Mɛ̄lɛ̄ka̍.” 25 Mi̍ pōo̍ dīmī āā, “Ō wa̍ wa᷅na̍ yɔ̄ŋ wɔ̄ɔ̍ŋ, ō wa᷅ wāna̍ yɔ̄ŋ wɔ̄ɔ̍ŋ te̍, ya̍ ya̍ I̍ si̍nā ke̍ŋ te̍. Ō ya̍ I̍ si̍nā wo̍ ko̍ni̍ cho̍ ni̍, I̍ wa̍ pāāndū ō sūmɛ̍i̍. Kɛ̍, I̍ cho̍ ni᷅ŋ chɔ̄ɔ̍.” 26 Ma̍ nyūnā ndu̍ āā, “Ō yɛ̄ɛ̄ o̍ to̍sa̍ yɛ̄ a̍ nūm? Vɛ̄ɛ̍nɛ̍ o̍ lo̍o̍ku̍ yɛ̄ tōsā ma̍ chā?” 27 Mbo̍ mūlūl nda̍ āā, “I̍ chɔ̍m nya̍ ni᷅ŋ. Bāā lā tūi̍i̍ le̍? Ɔ̍ɔ̄ le̍ sa̍bū nya̍ hɛ̄na̍ŋ vɛ̍lɛ̄ le̍ ndi̍ tūēīyɔ̄ɔ̍ wo̍? Bāā nya̍ bɛ̍ɛ̍ lā hɛ̄na̍ŋ mī lā sīmnu᷄ŋ bu̍ɛ̍i̍yāā ndɔ̄ nɛ̄ɛ̍?” 28 Ma̍ yēī ndu̍. Mā dīmī āā, “Nu᷄m cho̍ bu̍ɛ̍ī ndɔ̄ɔ̍ ni̍. Na̍a̍ na̍a̍ bu̍ɛ̍i̍yāa̍ Mūu̍sē wa̍ na̍a̍ ŋ̄ chō ni̍. 29 Ŋ̄ sīnā kpe̍e̍kpe̍i̍ māā Mūu̍sē ndu̍ ndu̍ mi̍ Mɛ̄lɛ̄ka̍ sūāā nāa̍ ndu̍ chu̍a̍. Kɛ̍, lāŋu̍nɔ̄ kōŋ ndu̍, ŋ̄ lōōnu̍ŋ māā Mɛ̄lɛ̄ka̍ le̍ ve᷅m ndu̍ le̍.” 30 Mi̍ pōo̍ dīmī āā, “Kpa̍, mɛ̄ɛ̍ he̍ī chō sūɛ̍i̍ bi̍ī wānā kɔ̄ndɔ̄fi̍li̍. Pōo̍ ho̍ō tōsa̍ mi̍ cha᷅. Vɛ̄ɛ̍nɛ̍ nya̍ lōōkū yɛ̍ dīmī māā ō cho̍ Mɛ̍lɛ̄ka̍ le̍ ve᷅m ndu̍ le̍? 31 Ŋ̄ sīnā kpe̍e̍kpe̍i̍ māā wānāa̍ to̍sā yɔ᷅ŋ wɔ̄ɔ̍ŋndo̍ wa̍, Mɛ̄lɛ̄ka̍ mu̍lī pi̍ɛ̍īlē ndāle̍ŋ te̍. Wānāa̍ pi̍ɛ̍ī ndu̍, o̍ ko̍ŋ kɔ̍ɔ̍lī, mā tōsā nyɛ᷅ ndu̍ Mɛ̄lɛ̄ka̍ ō hɛ̄na̍ŋ ndo̍ wa̍, nda̍ o̍ mu̍lī pi̍ɛ̍īlē ndāle̍ŋ ni̍. 32 Kāni̍ mi̍ chi̍e̍ēŋndo̍ kāndu᷄ŋ, wānā tu̍i̍i̍ yɔ̍ nu̍a̍ā māā wāŋndo̍ tōsa̍ ni᷅ŋ mi̍ wāna̍ nda̍ vēlū ō sūmɛ̍i̍ yo̍ ō chā le̍. 33 Tē ndu̍ o̍o̍ ve̍ Mɛ̍lɛ̄ka̍ le̍ ve᷅m lāŋu̍nɔ̄ɔ̍ ho̍ō le̍, ndu̍ o̍o̍ nɔ̍lā mī ndu̍ o̍o̍ to̍sa̍ sūɛ̍i̍ wa̍ā nu̍a̍ā le̍.” 34 Mɛ̄ɛ̍ pōo̍ sōō le̍nde̍, ma̍ dīmūl ndu̍ āā, “Nu᷄m cho̍ ho̍ō chɔ̍ŋ a̍ vīōlɔ᷄ŋ nu̍mndo̍ o̍ yɔ̄ŋ wɔ̄ɔ̍ŋndo̍ ni᷄ŋ ko̍ni̍ ŋ̄ chō ni̍, nu᷄m pɛ̍ɛ̍kū na̍a̍ ni̍?” Ma̍ sōlī ndu̍ o̍ chīɛ̄ī nda̍ pīɛ̄ī Mɛ̍lɛ̄ka̍ wo̍ ni᷄ŋ, māā ō pi̍ɛ̍ī lɛ̄ Mɛ̄lɛ̄ka̍ lo̍ŋ te̍.

Chi̍i̍sū hi᷅ŋ le̍ mbō tōsa̍ mī wānāā sūmɛ̍i̍ya̍ chē

35 Mi̍ Chi̍i̍sū tu̍ɛ̍ī māā ā sōli̍ pōo̍ ho̍ō o̍ chīɛ̄ī nda̍ pīɛ̄ī Mɛ̍lɛ̄ka̍ wo̍ ni᷄ŋ. O̍ ko̍ŋ, mi̍ Chi̍i̍sū nu̍u̍vīāā ndu̍. Mɛ̄ɛ̍ o̍ sa̍a̍lu̍ŋ ndu̍, mbo̍ nyūnā ndu̍ āā, “Ā nɔ̄ pa̍ ti̍i̍nda᷄ŋndo̍ o̍ wa᷅na̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ ni᷄ŋ?” 36 Mi̍ pōo̍ mūlī āā, “Fāllo̍, chɔ̍m ya̍ wāna̍ nda̍ vēēlū ko̍ŋ āā, Po̍ Wānā Pɔ̍nɔ̍ɔ̍ wo̍ le̍ mī dɔ̍ū tīīnda᷄ŋndo̍ o̍ ndu̍ ni̍ŋ.” 37 Mi̍ Chi̍i̍sū di̍mūl ndu̍ āā, “Ā chē ni᷅ŋ ndu̍. Ya̍ cho̍ ho̍ō sūūki̍āŋndo̍ a̍ nūm ndo̍, ya̍ cho̍ wānā ko̍ŋ ni̍.” 38 Mi̍ pōo̍ dīmī āā, “I̍ dɔ̍ū tīīnda᷄ŋ nūu̍ o̍ nūm ni̍ŋ, Māsānɔ̄ɔ̍.” O̍ ko̍ŋ, mbo̍ bēŋ Chi̍i̍su̍ wūla̍ŋ. 39 Mi̍ Chi̍i̍sū di̍mī āā, “Le̍ wāŋnda̍ yāmɛ̍i̍ kīlūllo̍, o̍ ko̍ŋ kɔ̍ɔ̍lī, mī I̍ tu̍si̍ nda̍ nyɛ̄ pālāa̍ chōo̍, le̍la̍ŋ, ya̍ I̍ hi᷅ŋ o̍ chi̍e̍ēŋndo̍ ho̍ō ni᷄ŋ ni̍. O̍ ko̍ŋ, wānāa̍ cho̍ ā sūmɛ̍i̍ya̍ cho̍ chɔ̄, ndu̍yɛ̍, mī wānāa̍ chō chɔ̄ɔ̍ wa̍ ā sīmnu᷄ŋ a̍ su̍mɛ̍i̍.” 40 Mi̍ ku̍ndā Fālīsi̍īya̍ ā pūm, a̍ wa̍ lo̍ŋ nda̍ ā tūɛ̄ī dīōmnda̍ŋ nda᷅ŋ. Ma̍ nyūnā Chi̍i̍sū āā, “Bāā dīmīo̍o̍ ŋ̄ chō ni̍ māā na̍a̍ bɛ̍ɛ̍ ŋ̄ chō ā sūmɛ̍i̍?” 41 Mi̍ Chi̍i̍sū mu̍lī āā, “Tē nya̍ a̍a̍ sɔ̍lɔ̍la̍ŋ pɛ̍ māā lā chō ā sūmɛ̍i̍, lā ve̍ wa᷅ o̍ pɛ̄ɛ̄sā bɛ̄ŋgu̍ le̍ yɔ̄ŋndā nyāla̍ wɔ̄ɔ̍ŋnda̍ŋ te̍. Kɛ̍, lā dīmi̍ māā lā chō chɔ̄ɔ̍. Le̍ he̍ī, lā chō o̍ pɛ̄ɛ̄sāa̍ bɛ̄ŋgu̍ le̍ yɔ̄ŋndā nyāla̍ wɔ̍ɔ̍ŋnda̍ŋ.”

Chɔ᷄ŋ 10

Pɛ̄ɛ̄kōo̍ a̍ wānā ma̍ndāā lāsāa̍ o̍kɔ̄ɔ̄

1 Mi̍ Chi̍i̍sū di̍mī āā, “Mī di̍mu̍l nya̍ tōnya̍a̍ wa̍la̍ŋ, wāna̍ mɛ̍i̍ pɛ̍ dīo̍o̍ le̍ lūɛ̄īyɔ̄ɔ̍ o̍ fo̍ndāŋ māndāā lāsāa̍, ndu̍yɛ̍, mbō kēēku̍ nāa̍ che᷅le̍ŋ pɛ̍, wānā ko̍ŋ, vīīnɔ̄ɔ̍ o̍ cho̍ ni̍. 2 Wāna̍ ke̍e̍kū ho̍ō o̍ dīo̍o̍ mbō lūɛ̄ī yo̍, ndu̍ cho̍ wāna̍ cho̍ sāa̍ māndāa̍ wo̍ ni̍. 3 Ndu̍yɛ̍, kūmbūllo̍ wāna̍ ma̍ndā di̍o̍o̍ wo̍ ō kūmbūl ndu̍ dīo̍o̍ ni̍. Wāna̍ cho̍ sāa̍ māndāa̍ wo̍, sāa̍ ndūa̍a̍ sīnā di̍ōm ndɔ̄ɔ̍. Vēēlōo̍ nda̍ dīōla̍ŋ ā pīlɛ̍ŋ pi̍lɛ̍ŋnda̍, mbō fūla̍ a̍ nda̍. 4 Tē ō sōli̍ a̍ ndūa̍a̍ pɛ̍ kpo̍u̍, ō si᷄m nda̍ lāchī, ndu̍yɛ̍, mā tōl ndu̍ kɔ̄ɔ̄lī. Fo̍ndōle̍, ā sīnā di̍ōm ndɔ̄ɔ̍. 5 Ā tu᷅l wa̍nā che᷅le̍ŋ kɔ̄ɔ̄lī le̍. Nyāānɔ᷄ŋndo̍ nda̍ nyāānūŋ ndu̍ ni̍, kāni̍ fo̍ndōle̍, ā si̍nā di̍ōm wānā ko̍ŋ te̍.” 6 Tāle̍ Chi̍i̍sū di̍mu̍l nda̍ wo̍, ndu̍ cho̍ ho̍ō ni̍. Kɛ̍, ā sīna̍ nyɛ᷅ kpe̍e̍kpe̍i̍ o̍ wa̍ nda̍ chɔ̄mndo̍ wo̍ le̍.

Chi̍i̍su̍ cho̍ wāna̍ cha̍ā sa̍a̍ māndā wo̍ ni̍

7 O̍ ko̍ŋ, mi̍ Chi̍i̍sū di̍mī vɛ̄lɛ̄ āā, “Mī di̍mu̍l nya̍ tōnya̍a̍ wa̍la̍ŋ, ya̍ I̍ cho̍ māchūāā mɛ̄ɛ̍ dīō sāa̍ kēēkū wo̍ chō nu̍a̍ā yɛ̍. 8 Wānāa̍ hi᷅ŋ pāāndū ya̍ tāse̍ wa̍ kpo̍u̍, vīīya̍ nda̍ chō ni̍. Kɛ̍, sāa̍ ā ye᷄ŋ nda̍ lānī le̍. 9 Ya̍ I̍ cho̍ māchūāā māā dīo̍o̍. Ndu̍yɛ̍, wānā o̍ wāna̍ ke̍e̍ku̍ o̍ ya̍ ni̍ŋ pɛ̍, ō sɔ̄la̍ pīōŋɔ̄ɔ̍. O̍ ko̍ŋ kɔ̍ɔ̍lī, ō nɔ̄lā mbō lūɛ̄ī mbō fūla̍, mbō sāālu̍ŋ nyɛ̍ dīāā o̍ nɔ̍ le̍ sɔ̄lāa̍ wo̍. 10 Vīīnɔ̄ɔ̍ ndu̍ ndu̍, le̍ chīīmbūūwo̍ a̍ dīyɔ̄ɔ̍ a̍ tɛ̄ɛ̄mbūūwo̍ ko̍ni̍ o̍ hu᷅ŋ ni̍. Kɛ̍, ya̍ ya̍ I̍ hi᷅ŋ māhūnāā le̍ mī wāŋnda̍ sɔ̄la̍ yōōmū kpe̍e̍kpe̍i̍yo̍, ndu̍yɛ̍, mā sɔ̄la̍ nyɛ̄ o̍ nyɛ̍ nda̍ nɔ̄ le̍ sɔ̄lāa̍ le̍ wāa̍ yōōmū kpe̍e̍kpe̍i̍. 11 “Ya̍ cho̍ wānā ma̍ndāā lāsāa̍ o̍ dɔ̍ū kɔ̄llo̍ kpo̍u̍ o̍ sāa̍ ndūa̍a̍ lo̍ wo̍ ni̍. Wānā ma̍ndāā lāsāa̍ o̍ dɔ̍ū kɔ̄llo̍ kpo̍u̍ o̍ sāa̍ ndūa̍a̍ lo̍ wo̍, ndu̍ cho̍ ō chɛ̄lāā le̍ wūo̍o̍ le̍ sāa̍, hāli̍ kpe̍ŋ ā yɔ̄nu᷄ŋ nyɛ̍ le̍. 12 Wāna̍ nda̍ chūā ho̍ō le̍ sāa̍ wāa̍ lēhɔ̄l lo̍, ndu̍ ndu̍ cho̍ wa̍nā ma̍ndāā lāsāā le̍. Ndu̍yɛ̍, ō cho̍ ndu̍ le̍ nɔ̍ sāa̍ le̍. Tē wānā wa̍ā le̍ndo̍o̍ ō chē vīsī bīyāa̍ pɛ̍, nyāānɔ᷄ŋndo̍ o̍ nya̍a̍nūŋ ni̍ mbō mɛ̄i̍ sāa̍ lo̍ŋ. O̍ ko̍ŋ, mī vīsī bīyāa̍ de᷄l ō pīlɛ̍ chōo̍ mbō pūūsi̍a̍a̍ vɛ̄lɛ̄ ā tūāā. 13 Le̍ sa̍bū o̍ nya̍a̍nūŋ ndo̍ cho̍ ni̍ māā chūa̍a̍ ko̍ni̍ nda̍ chu̍a̍ ndu̍ le̍ wāa̍ sāa̍ lēhɔ̄l ni̍. Le̍ he̍ī, ō būūla̍ŋ a̍ nda̍ le̍. 14-15 Ya̍ cho̍ wānā ma̍ndāā lāsāa̍ o̍ dɔ̍ū kɔ̄llo̍ o̍ sāa̍ ndūa̍a̍ lo̍ wo̍ ni̍. Mɛ̄ɛ̍ Fi̍nyā nūu̍ sīnā ya̍, ndu̍yɛ̍, mi̍ si̍nā Fi̍nyā nūu̍ yɛ̍, le̍nde̍ ko̍ni̍ ya̍ I̍ si̍nā sa̍a̍ nīa̍a̍, ndu̍yɛ̍, mi̍ nda̍ si̍nā ya̍ ni̍. Ndu̍yɛ̍, I̍ cho̍ ō chɛ̄lāā mī vi᷅ hāli̍ kpe̍ŋ māā ā yɔ̄nu᷄ŋ nyɛ̍ le̍. 16 I̍ nɔ̍ sāā che᷅le̍ŋ a̍ cho̍ o̍ ku̍ndāa̍ ho̍ō chōo̍ le̍ wa̍. Nda̍ bɛ̍ɛ̍, I̍ nɔ̍ mī hi᷅ŋ a̍ nda̍. Ā chō ya̍ dīōm tūēīyɔ̄ɔ̄. Ndu̍yɛ̍, ā chō sīmnɔ᷄ŋ ku̍ndāa̍ ō pīlɛ̍ mī wānā māndāa̍ ō pīlɛ̍ mānda̍ nda̍. 17 “Fi̍nyā nūu̍ kāāla̍ ya̍, kāni̍ fo̍ndōle̍, le̍ mɛ̄ɛ̍ ya̍ I̍ chɛ̍l le̍ mī I̍ vi᷅ mī mi̍i̍ŋgu̍ vɛ̄lɛ̄ yōōmū yɛ̍. 18 Wānā o̍ wānā nɔ̍lā mbō dīī ya̍ le̍, mɛ̄ɛ̍ mī ya̍ pi̍la̍ I̍ chɛ̍l mālāŋ wānā di̍ī ya̍. Ya̍ pi̍la̍ chɛ᷅l ni̍ mā dīī ya̍. I̍ nɔ̍ di̍ mī chɛ̍l mā dīī ya̍. Ndu̍yɛ̍, I̍ nɔ̍ di̍ mī mi̍ŋgi̍ ya̍ pi̍la̍ yōōmū. Nyɛ̄ Fi̍nyā nūu̍ dīmu̍l la̍ māā ya̍ I̍ to̍sa̍ wo̍, ndu̍ cho̍ ko̍ŋ ni̍.” 19 Mi̍ dīōmndā Chi̍i̍sū di̍mi̍ la̍ŋ nda̍ŋ lā tōsā mi̍ pīɔ̄ūwa᷅ŋndo̍ dēl vɛ̄lɛ̄ wāŋnda̍ tɛ̄ɛ̄ŋ. 20 Mi̍ wāŋnda̍ ta̍u̍ a̍ lo᷅ o̍ ko̍ŋ ma̍ dīmī āā, “Nyi̍nā wɔ̄ɔ̍ŋndo̍ chō ndu̍ kɔ̄ɔ̄lī. Le̍ he̍ī, ō hīŋa᷄ŋ le̍bo̍l o̍ cho̍ nu̍a̍ā ni̍. Lā ya᷅ŋ ndu̍ lānī le̍.” 21 Kɛ̍, mi̍ wāŋnda̍ ā pīli̍a̍ā dīmī āā, “Wāna̍ nyi̍nā wɔ̄ɔ̍ŋndo̍ chō kɔ̄ɔ̄lī wo̍, ō su̍ū nu̍a̍ā le̍. Mī nyi̍nā wɔ̄ɔ̍ŋndo̍ ndu̍ to̍sa̍ mī wānāā sūmɛ̍i̍ya̍ chē?”

Wāŋnda̍ kɛ̄ɛ̍ Chi̍i̍sū

22 Mi̍ bōōndi̍i̍ nda̍ bīī bɔ᷅ŋa᷅ŋndo̍ Chūlu̍sɛ̄lɛ̄m chi̍e̍e̍ ve̍ ī fūūlūū. Bōōndi̍i̍ ke̍ŋ nda̍ a̍a̍ lo̍o̍nūŋ a̍ pāa̍le̍ nda̍ a̍a̍ ma̍l chīɛ̍i̍ Mɛ̄lɛ̄ka̍a̍ ndu̍ Mɛ̍lɛ̄ka̍ o̍ bā ve̍ ni̍. Ndu̍yɛ̍, a̍ te̍le̍ŋ wɔ̄ɔ̄lē pɔ̄mbɔ̄le̍ŋ. 23 A̍ bōōndi̍i̍ ke̍ŋ, Chi̍i̍sū wa̍ bālɔ̄ɔ̍ o̍ chīɛ̍i̍ Mɛ̄lɛ̄ka̍a̍ ni᷄ŋ o̍ fo̍ndāŋ nda̍ vēēlū āā, Tōŋgo̍ Sɔ̍lɔ̍mɔ̄ŋndo̍ wo̍. 24 O̍ ko̍ŋ, mi̍ Chu̍ūwa̍ ā pūm ā hūŋ ma̍ chūūŋgi̍āŋ na̍a̍ o̍ wa̍ wa̍ ma̍ bālū ndu̍ si̍lɔ̍. Ma̍ dīmūl ndu̍ āā, “Mɛ̍i̍ na̍a̍ kūɛ̍i̍ yɛ̄īyo̍. Tē nu᷄m cho̍ Ki̍li̍tī wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ ni̍, mɛ̄ɛ̍ di̍mu̍l na̍a̍ kpe̍nde̍ke̍le̍.” 25 Mi̍ Chi̍i̍sū mu̍lī āā, “I̍ di̍mu̍l nya̍. Kɛ̍, lā lāāla̍ŋ a̍ ya̍ le̍. Wa̍lta̍ ya̍ I̍ to̍sa̍ o̍ kpāāya̍ fi̍nyā nūu̍ ni᷄ŋ nda̍ŋ lā chō se̍īle̍ŋ le̍ ya̍. 26 Kɛ̍, lā lāāla̍ŋ a̍ ya̍ le̍. Kāni̍ fo̍ndōle̍, lā cho̍ sa̍a̍ nī le̍. 27 Sāa̍ nīa̍a̍ nda̍ nda̍, dīōmndo̍ nda̍ tūɛ̄ī ya̍ ni̍. I̍ si̍nā nda̍. Ndu̍yɛ̍, tōlɔ̄ɔ̍ nda̍ tūāl la̍ kɔ̄ɔ̄lī ni̍. 28 O̍ ko̍ŋ kɔ̍ɔ̍lī, yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍, ndu̍ ya̍ I̍ ke᷅ nda̍ ni̍. Le̍ fɛ̍ɛ̍ŋ a̍ fɛ̍ɛ̍ŋ ā vi᷅ le̍. Ndu̍yɛ̍, wānā o̍ wāna̍ nɔ̍lā mbō pūu̍ nda̍ ya̍ o̍ bā le̍. 29 Fi̍nyā nūu̍ o̍ ke̍ ya̍ nda̍ wo̍, ndu̍ hi̍o̍ū a̍ nyɛ̄ o̍ nyɛ̄ fe̍e̍. Ndu̍yɛ̍, wānā o̍ wānā nɔ̍lā mbō pūu̍ nda̍ Fi̍nyā nūu̍ o̍ bā le̍. 30 Ya̍ ni̍, Fi̍nyā nūu̍ ni̍, nyɔ̄ɔ̍ ō pīlɛ̍ kpe̍ na̍a̍ ŋ̄ chō ni̍.” 31 O̍ ko̍ŋ kɔ̍ɔ̍lī, mi̍ wāŋnda̍ ha̍ā ā chɔ̄ɔ̄vīāā pōūta̍ŋ le̍ mā vīī vi̍i̍ ndu̍. 32 Mi̍ Chi̍i̍sū di̍mūl nda̍ āā, “I̍ to̍sa̍ wa̍lta̍ kɛ̍ndɛ̄lā ka̍ ka̍ lā Fi̍nyā nūu̍ ō chɔ᷄m ya̍ la̍ŋ, mi̍ lā chā. Wa̍lta̍ ya̍ I̍ to̍sa̍ la̍ŋ ki̍nɛ̍i̍ la̍ŋ, le̍ o̍ kūɛ̍ɛ̍nɛ̍ nya̍ hɛ̄na̍ŋ yɛ̍ mī lā vīī vīi̍ ya̍ a̍ pōūta̍ŋ?” 33 Mi̍ Chu̍ūwa̍ mūlī āā, “Ō cho̍ le̍ wa̍lta̍ kɛ̍ndɛ̄ le̍ na̍a̍ ŋ̄ chō nu̍m vīī le̍. Nūm wāna̍ chi̍o̍o̍, tē a̍ di̍mi̍ pɛ̍ māā Mɛ̄lɛ̄ka̍ ŋ̄ chō ni̍, mɛ̄ɛ̍ dīōla̍ Mɛ̄lɛ̄ka̍la̍ŋ ŋ̄ chō la̍ŋ tɛ̍ɛ̍mbūūwo̍ ni̍. Le̍la̍ŋ, na̍a̍ ŋ̄ hɛ̄na̍ŋ ni̍ mī ŋ̄ vi̍i̍ vi̍i̍ nu̍m a̍ pōūta̍ŋ mā vī.” 34 Mi̍ Chi̍i̍sū di̍mī āā, “Kɛ̍, ī chō ī pōōnyīāā o̍ yāu̍ nya̍ lāsāwāa̍ ni᷄ŋ māā mi̍ Mɛ̄lɛ̄ka̍ vēēlu̍ wāŋnda̍ mɛ̄lɛ̄ka̍la̍ŋ. 35 Ndu̍yɛ̍, ŋ̄ sīnā māā nyɛ̄ Yāu̍ Mɛ̄lɛ̄ka̍a̍ dīmi̍ wo̍ chō tōnya̍ le̍ fɛ̍ɛ̍ŋ a̍ fɛ̍ɛ̍ŋ. Nāa̍ Mɛ̄lɛ̄ka̍ vēēlu̍ wɔ̄ wānāā o̍ wa̍ dīōmnda̍ŋ nda᷅ŋ sūɛ̍i̍ nāa̍ nda̍ chūā wa̍ mɛ̄lɛ̄ka̍la̍ŋ, 36 ya̍ yɛ̍? Ya̍ Mɛ̄lɛ̄ka̍ chu̍a̍ māā wāna̍ cho̍ ō yɔ̄ŋga᷄ŋ le̍ ndu̍ mbo̍ vīām ya̍ o̍ chi̍e̍ēŋndo̍ ni᷄ŋ ndo̍, vɛ᷅ tē I̍ di̍mi̍ pɛ̍, a̍a̍, ‘Po̍ Mɛ̄lɛ̄ka̍a̍ ya̍ I̍ cho̍ ni̍,’ lā dīmi̍ māā I̍ tɛ̍ɛ̍mbu̍u̍ dīōla̍ Mɛ̄lɛ̄ka̍la̍ŋ? 37 Tē ō wa̍ pɛ̍ mī I̍ to̍sa̍ wa̍lta̍ Fi̍nyā nūu̍ le̍, mɛ̄ɛ̍ lā la̍a̍la᷄ŋ a̍ ya̍ le̍. 38 Kɛ̍ ndu̍yɛ̍, tē wa̍lta̍ Fi̍nyā nūu̍ ya̍ I̍ cho̍ tōsāa̍ ni̍, mi̍ chē bɛ̍ɛ̍ lā lāāla̍ŋ a̍ ya̍ le̍ ni̍, kɛ̍, ō wa̍ bɛ̍ɛ̍ le̍ wa̍lta̍ la̍ŋ lā lāāla̍ŋ. O̍ ko̍ŋ, lā chō sīnā wa̍la̍ŋ māā ya̍ ni̍, Fi̍nyā nūu̍ ni̍, māā nyɔ̄ɔ̍ ō pīlɛ̍ na̍a̍ ŋ̄ chō ni̍.” 39 O̍ ko̍ŋ kɔ̍ɔ̍lī, ma̍ kīndī vɛ̄lɛ̄ le̍ ndu̍ bīyɔ̄ɔ̍. Kɛ̍, mbo̍ hīālu᷄ŋ nda̍. 40 Mi̍ Chi̍i̍sū lo᷅ o̍ ko̍ŋ mbo̍ mīīŋgū Chɔ̍ɔ̍dāŋ le̍e̍lōo̍ o̍ fo̍ndāŋ Chɔ᷄ŋ ndu̍ o̍o̍ nɔ̍ wāŋnda̍ pūlɔ̄ɔ̍ Mɛ̄lɛ̄ka̍a̍ wo̍. Mbo̍ wānu᷄ŋ lo̍ŋ. 41 Mi̍ wāŋnda̍ ta̍u̍ a̍ hu᷅ŋ nāa̍ ndu̍ chu̍a̍ lo̍ŋ. Mi̍ wāŋnda̍ ha̍ā wā dīmu̍la᷅ŋndo̍ āā, “Chɔ᷄ŋ, ndu̍ to̍sa̍ wa̍lta̍ kɔ̄ndɔ̄fi̍li̍ le̍. Kɛ̍ ndu̍yɛ̍, nyɛ̄ o̍ nyɛ̄ o̍ di̍mi̍ a̍ pōo̍ ho̍ō o̍kɔ̄ɔ̄, tōnya̍ o̍ di̍mi̍ ni̍.” 42 Mi̍ wāŋnda̍ ta̍u̍ lo̍ŋ a̍ du̍a̍ū tīīnda᷄ŋndo̍ o̍ Chi̍i̍sū ni̍ŋ.

Chɔ᷄ŋ 11

A̍ pīɔ̍m La̍sa̍lɔ̄ɔ̄wo̍ o̍kɔ̄ɔ̄

1-2 Po̍ pi᷅lɛ̍ wa̍ ni̍ dīōla̍ŋ āā, La̍sa̍lɔ̄ɔ̄. Bɛ̍ta̍nī chi̍e̍e̍ o̍ wa̍ īchāli̍ ni̍. Pōo̍ ho̍ō ndu̍ o̍o̍ nɔ̍ yēmāa̍ ā ŋīɔ̍ɔ̍ŋ, Mēēle̍ nda̍ Ma̍tā. Nda̍ bɛ̍ɛ̍ Bɛ̍ta̍nī lo̍ŋ nda̍ wa̍ īchāli̍ ni̍. Mēēle̍ kōŋ, ndu̍ ndu̍ o̍o̍ ta̍la̍ Māsānɔ̄ɔ̍ Chi̍i̍su̍ si̍ɛ̍ndīi̍ma̍ ba̍ā kāla᷄ŋ chōo̍, mbo̍ wɔ̄ɔ̄sūū ndu̍ pēlo᷄ŋ a̍ yīīŋnde̍ ndu̍ o̍ lēbōl ni̍. Mi̍ ī yɔ̄nu᷄ŋ mi̍ La̍sa̍lɔ̄ɔ̄ wo̍ ho̍ō de᷅l a̍ nāa̍. 3 Dēlɔ̄ɔ̍ a̍ nāa̍, mi̍ yēmāa̍ ndūa̍a̍ vīām wānā a̍ yōōŋgōo̍ nāa̍ Chi̍i̍sū chu̍a̍ āā, “Māsānɔ̄ɔ̍, ndi̍a̍a̍mɔ̍ɔ̍ nu̍m kāālāa̍ chō a̍ nāa̍.” 4 Mɛ̄ɛ̍ Chi̍i̍sū tu̍e̍ī yōōŋgōo̍ ho̍ō, mbo̍ dīmī āā, “Dīālīī nɛ̄i̍ he̍ī, ī chō dīālīī nāa̍ i̍ di̍ī ndu̍ le̍. Ī yɔ̄nu̍ŋ le̍ mī wāŋnda̍ chē mɛ̄ɛ̍ Mɛ̄lɛ̄ka̍ chō wāna̍ kɔ̄ndɔ̄fi̍li̍ yɛ̍. Ndu̍yɛ̍, ī yɔ̄nu̍ŋ le̍ mī Po̍ Mɛ̄lɛ̄ka̍a̍ sɔ̄la̍ sāŋgālāa̍ lēni᷄ŋ.” 5 Chi̍i̍sū ndu̍ o̍o̍ ka̍a̍la̍ Ma̍tā nda̍ Mēēle̍ pɔ̍mbɔ̄ ndɔ̄ a̍ La̍sa̍lɔ̄ɔ̄ ye̍mā nda̍ ta̍u̍. 6 Kɛ̍ ndu̍yɛ̍, mɛ̄ɛ̍ o̍ tu̍e̍ī yōōŋgōo̍ māā La̍sa̍lɔ̄ɔ̄ cho̍ a̍ nāa̍, mbo̍ chɔ̄ɔ̄lū pālɛ̍i̍ chūā ī ŋīi̍ŋ o̍ fo̍ndāŋ o̍ wa̍ ko̍ŋ ndo̍. 7 O̍ ko̍ŋ kɔ̍ɔ̍lī, mbo̍ dīmūl bu̍ɛ̍i̍yāā ndūa̍a̍ āā, “Ŋ̄ mīīŋgu᷅ŋ o̍ lɛ̄ŋndē Chūdi̍a̍āle̍ŋ ni᷄ŋ.” 8 Mi̍ bu̍ɛ̍i̍yāā ndūa̍a̍ nyūnā ndu̍ āā, “Ti̍chā, nāa̍ Chu̍ūwa̍ ā wa̍ le̍ nu̍m vīī a̍ pōūta̍ŋ pɛ̍i̍ su̍ŋ su̍ŋ nda̍, lo̍ŋ ŋ̄ chō vɛ̄lɛ̄ kɛ̄ɛ̄sīa̍a̍ le̍ kɔ̄la̍ŋ ni̍?” 9 Mi̍ Chi̍i̍sū di̍mūl nda̍ āā, “Le̍ pāa̍le̍ŋ kāndɔ᷄ŋndo̍ a̍ dēlɔ̄ɔ̍, ha̍vɛ̄i̍la̍ŋ tɔ̍ a̍ lā tīɔ̍ɔ̍ŋ la̍ cho̍ ni̍. Le̍la̍ŋ, tē wāŋndo̍ bālu̍ pɛ̍ i̍pa̍la̍ de᷅ŋ, ō de᷅l te̍. Kāni̍ fo̍ndōle̍, ō chō nyɛ̄ wa̍wo̍ŋ cho̍ le̍ chi̍e̍ēŋndo̍ ho̍ō wo̍ chɔ̄ɔ̍. 10 Kɛ̍ tē wāŋndo̍ bālu̍ pɛ̍ a̍ nyūmnda̍ŋ, dēlɔ̄ɔ̍ o̍ de᷅l ni̍. Kāni̍ fo̍ndōle̍, nyɛ̄ wa̍wo̍ŋ cho̍ mbō chē le̍.” 11 Mɛ̄ɛ̍ Chi̍i̍sū so̍ō dīōmnda̍ŋ nda᷅ŋ, mbo̍ dīmī vɛ̄lɛ̄ āā, “Chāa̍ŋ nāa̍ La̍sa̍lɔ̄ɔ̄ cho̍ o̍ mālɔ̄. Kɛ̍, I̍ cho̍ lākɔ̄ mī I̍ kɔ̍ ti̍ndī ndu̍.” 12 Mi̍ bu̍ɛ̍i̍yāā ndūa̍a̍ dīmī āā, “Māsānɔ̄ɔ̍, tē ō wa̍ o̍ mālɔ̄ pɛ̍ o̍ cho̍ ni̍, mɛ̄ɛ̍ ō chō sīōŋgɔ̄ɔ̄.” 13 Kɛ̍, nyɛ̍ Chi̍i̍sū wa̍ dīmīo̍o̍ wo̍ cho̍ ni̍, māā La̍sa̍lɔ̄ɔ̄ vi᷅. Kɛ̍, bu̍ɛ̍īya̍ ā wa̍ ko̍ kɔ̍l māā lɔ̄mā yɔ̄ŋa᷄ŋ ma᷅ŋ o̍ wa̍ dīmīo̍o̍ ni̍. 14 O̍ ko̍ŋ, mi̍ Chi̍i̍sū di̍mūl nda̍ kpe̍nde̍ke̍le̍ āā, “La̍sa̍lɔ̄ɔ̄ vi᷅. 15 Kɛ̍, le̍ sa̍bū nyāa̍ I̍ na̍ŋ bɛ̍ɛ̍ kɔ̍l māā I̍ ve̍ lo̍ŋ te̍. Kāni̍ fo̍ndōle̍, he̍ī chō tōsā mī lā dɔ̄ū tīīnda᷄ŋ nyāa̍ o̍ ya̍ ni̍ŋ. Lā chɔ᷄ŋ ŋ̄ kɔ̄ŋnu᷅ŋ nāa̍ ndu̍ chu̍a̍.” 16 O̍ ko̍ŋ, mi̍ Tɔ̄mɔ̍si̍ ō nda̍ vēēlū āā, Pɛ̄ndūnɔ̍ɔ̍ wo̍ dīmūl chāāŋāā ndūāā bu̍ɛ̍īya̍ ā pīli̍a̍a̍ āā, “Lā ŋ̄ kɔ̄ŋnu᷅ŋ na̍a̍ Ti̍chɛ̄i̍nɔ̍ nāa̍ wa̍ā, mī ŋ̄ kɔ̍ wu̍nūŋ lātūlu̍.”

Chi̍i̍su̍ cho̍ wāna̍ mi̍ŋgī wa᷅ŋnda̍ yōōmū wo̍ ni̍

17 A̍ bōōndi̍i̍ Chi̍i̍sū fu̍u̍lu̍u̍ Bɛ̍ta̍nī ve̍, ma̍ dīmūl ndu̍ māā chɔ̍ŋ a̍ pāa̍le̍ nda̍ chɔ̍ La̍sa̍lɔ̄ɔ̄ le̍ŋ mbo̍ fūūlūū a̍ pāa̍le̍ le̍ŋ, ndu̍ o̍o̍ chu̍a̍ ni᷅ŋ pālɛ̍i̍ ī hīɔ̍ɔ̍lu̍. 18 Chɔ̍ŋ Chūlu̍sɛ̄lɛ̄m kɔ̍ Bɛ̍ta̍nī, ō ve̍ ti᷅ŋ vīlɛ̄ī le̍. Ndu̍ o̍o̍ su᷅l bɛ̍ɛ̍ mɛ̍ɛ̍līi̍la̍ ti̍ɔ̍ɔ̍ŋ te̍. 19 Mi̍ Chu̍ūwa̍ ta̍u̍ a̍ cha̍ŋ lo̍ŋ ma̍ hūŋ nāa̍ Ma̍tā chu̍a̍ nda̍ Mēēle̍, le̍ nda̍ kɔ̄lta̍ŋ dɛ̄ɛ̄nīa̍a̍ ni᷄ŋ le̍ pīɔ̍m yēmā nda̍a̍. 20 Mɛ̄ɛ̍ Ma̍tā tu̍e̍ī māā Chi̍i̍sū cho̍ hūnɔ̄ɔ̍, mbo̍ kūā ndu̍ lāchī. Kɛ̍, Mēēle̍ ndu̍ wa̍ chīɛ̄ī ni̍ŋ. 21 Mi̍ Ma̍tā di̍mūl Chi̍i̍sū āā, “Māsānɔ̄ɔ̍, tē nūm o̍o̍ wa̍ na̍nu᷄ŋ pɛ̍, yēma̍ nūu̍ ō ve̍ wu̍ le̍. 22 Kɛ̍, pɛ̄ŋgo̍o̍ ho̍ō bɛ̍ɛ̍, I̍ si̍nā māā te̍ a̍ pi̍ɛ̍i̍ Mɛ̍lɛ̄ka̍ pɛ̍, ō nɔ̄lā mbō tōsa̍ nyɛ̄ ŋ̄ nyūna̍ ndu̍ dīōm ndo̍.” 23 Mi̍ Chi̍i̍sū di̍mūl ndu̍ āā, “Yēmā nu̍m chō mīīŋgū yōōmū.” 24 Mi̍ Ma̍tā di̍mūl ndu̍ āā, “I̍ si̍nā māā ō chō mīīŋgū yōōmū o̍ pāa̍le̍ mɛ̍ɛ̍lāāle̍ŋ chōo̍, pāa̍le̍ Mɛ̄lɛ̄ka̍ mīŋgī ni̍ŋ wa᷅ŋnda̍ yōōmū le̍ŋ.” 25 Mi̍ Chi̍i̍sū di̍mūl ndu̍ āā, “Ya̍ cho̍ wāna̍ mi̍ŋgī wa᷅ŋnda̍ yōōmū wo̍ ni̍. Ndu̍yɛ̍, ya̍ to̍sā ni̍ mī wāŋnda̍ ā wa̍ yōōmū kpe̍e̍kpe̍i̍. Wānā o̍ wāna̍ dɔ̍ū tīīnda᷄ŋ ndɔ̄ɔ̍ o̍ ya̍ ni̍ŋ pɛ̍, ā yɔ᷄ŋ bɛ̍ɛ̍ mbō vī ō chō wā yōōmū. 26 Ndu̍yɛ̍, wānā o̍ wāna̍ wa̍ yōōmū kpe̍e̍kpe̍i̍ pɛ̍, ndu̍yɛ̍, mbō dɔ̄ū tīīnda᷄ŋ ndɔ̄ɔ̍ o̍ ya̍ ni̍ŋ pɛ̍, ō vi᷅ le̍. A̍ la̍a̍la̍ŋ te̍?” 27 Mi̍ Ma̍tā di̍mī āā, “Māsānɔ̄ɔ̍, I̍ la̍a̍la̍ŋ māā nu᷄m cho̍ Ki̍li̍tī ni̍, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍. Nu᷄m cho̍ Po̍ Mɛ̄lɛ̄ka̍a̍ ni̍ ō Mɛ̄lɛ̄ka̍ dīmi̍ māā ō chō hūnɔ̄ɔ̄ o̍ chi̍e̍ēŋndo̍ ni᷄ŋ ndo̍.”

Chi̍i̍sū cha̍ŋ le̍ pīɔ̍m La̍sa̍lɔ̄ɔ̄wo̍

28 Mɛ̄ɛ̍ Ma̍tā chi̍i̍ dīōmnda̍ŋ nda᷅ŋ dīmī, mbo̍ mīīŋgū. Mbo̍ kɔ̍ di̍mūl Mēēle̍ pɔ̍mbɔ̄ ndɔ̍ nda̍ nda̍ ŋi̍ɔ̍ɔ̍ŋ āā, “Ti̍chɛ̄i̍nɔ̍ nāa̍ hīŋ. Ō chō nu̍m vēēlū.” 29 Mɛ̄ɛ̍ Mēēle̍ tu̍e̍ī nyɛ̄ o̍ di̍mi̍ wo̍, mbo̍ cha᷄ŋ nya̍ mbo̍ kūā Chi̍i̍su̍ lāchī. 30 Ndu̍yɛ̍, Chi̍i̍sū ndu̍ o̍o̍ he̍l lɔ̍ chi̍e̍e̍ le̍. Ō wa̍ wɔ̄ o̍ fo̍ndāŋ Ma̍tā ko̍ma̍l ndu̍ wo̍. 31 Mɛ̄ɛ̍ Chu̍ūwa̍ a̍ wa̍ Mēēle̍ īkɛ̄i̍ chi̍ɛ̍ī ni̍ŋ le̍ ndu̍ nyɔ̄ɔ̄lōo̍ wa̍ chē mi̍ Mēēle̍ cha̍ŋ nya̍ mbo̍ fūlā ma̍ tūāl ndu̍ kɔ̄ɔ̄lī. Ā wa̍ ko̍ kɔ̍l māā kɔ̄la̍ŋ o̍ wa̍ o̍ sɛ̄īyo̍ le̍ kɔ̄la̍ŋ cha᷄ŋndo̍ lo̍ŋ ni̍. 32 Mɛ̄ɛ̍ Mēēle̍ fu̍u̍lu̍u̍ nāa̍ Chi̍i̍sū wa̍ wa̍, mbo̍ chā Chi̍i̍su̍ mbo̍ dēl lɛ̄ŋ ndu̍ o̍ lābɛ̄ŋgu̍ ni̍ŋ. Mbo̍ dīmūl ndu̍ āā, “Māsānɔ̄ɔ̍, tē nūm o̍o̍ wa̍ na̍nu᷄ŋ pɛ̍, yēma̍ nūu̍ ō ve̍ wu̍ le̍.” 33 Mɛ̄ɛ̍ Chi̍i̍sū che᷅ Mēēle̍ ni̍ a̍ Chu̍ūwa̍ a̍ to᷅l ndu̍ kɔ̄ɔ̄lī wa̍ nda̍ kpo̍u̍ ā chō cha᷄ŋnda̍ŋ, mi̍ mɔ̍nɛ̍i̍ bīī ndu̍, ndu̍yɛ̍, mbo̍ tāmbū kɔ̄l. 34 Mbo̍ nyūnā nda̍ āā, “Kūɛ̍ɛ̍nɛ̍ nya̍ chɔ̍ yɛ̄ ndu̍?” Ma̍ dīmī āā, “Hu̍ŋ mā hu̍ŋ to̍fā, Māsānɔ̄ɔ̍.” 35 Mi̍ mɛ̍mi̍a̍ŋ mā tūāl Chi̍i̍sū kpa̍sū kpāsū. 36 O̍ ko̍ŋ, mi̍ Chu̍ūwa̍ dīmu̍la᷅ŋ āā, “Lā tōfa̍ wɔ̍ ka̍a̍lā bɛ̄ndū o̍ ka̍a̍la̍ ndu̍ wo̍.” 37 Kɛ̍, mi̍ ā pūm ā wā dīmu̍la᷅ŋndo̍ āā, “Nāa̍ o̍ to̍sa̍ wɔ̄ mi̍ wānāā sūmɛ̍i̍ya̍ chā, ndu̍ o̍o̍ nɔ̍lā mī ndu̍ o̍o̍ to̍sa̍ La̍sa̍lɔ̄ɔ̄ ndu̍ o̍o̍ vi᷅ le̍.”

Chi̍i̍sū mi̍ŋgi̍ La̍sa̍lɔ̄ɔ̄ yōōmū

38 Mi̍ mɔ̍nɛ̍i̍ bīī vɛ̄lɛ̄ Chi̍i̍sū. Mbo̍ kūā o̍ sɛ̄īyo̍, ndu̍yɛ̍, sɛ̄i̍ būūlōo̍. Pōūwo̍ wa̍ ō hāndāā o̍ sōndōo̍. 39 Mi̍ Chi̍i̍sū di̍mī āā, “Lā fāŋa̍ po̍ūwo̍.” Mi̍ po̍ vi᷅ wo̍ yēma̍ ndɔ̄ Ma̍tā mbo̍ dīmī āā, “Māsānɔ̄ɔ̍, chɔ̍ŋ a̍ bōōndi̍i̍ o̍ chɔ̍nu̍ŋ nde̍ ō chō ni᷅ŋ pālɛ̍i̍ ī hīɔ̍ɔ̍lu̍. Tē wānā fa̍ŋa̍ pɛ̍ po̍ūwo̍, chūŋndo̍ tīu̍ si̍lɔ̍.” 40 Mi̍ Chi̍i̍sū di̍mūl ndu̍ āā, “I̍ di̍mu̍l nu̍m nu̍a̍ā māā tē a̍ la̍a̍la̍ŋ pɛ̍, ā chā ni̍ŋ mɛ̄ɛ̍ Mɛ̄lɛ̄ka̍ chō wāna̍ kɔ̄ndɔ̄fi̍li̍ yɛ̍ le̍?” 41 O̍ ko̍ŋ, ma̍ fāŋā pōūwo̍. Mi̍ Chi̍i̍sū to̍fā chōo̍. Mbo̍ dīmī āā, “Kɛ̄kɛ̍, I̍ me̍l nu̍m ba̍li̍ka̍ le̍ mɛ̄ɛ̍ ŋ̄ mūli̍ ya̍ dīōm yɛ̍. 42 I̍ si̍nā māā ā mūlī ya̍ dīōm lɔ̍ɔ̍ lɔ̍ɔ̍. Kɛ̍, le̍ wānāa̍ si̍m ha̍ā wa̍, ya̍ cho̍ he̍ī dīmīo̍o̍ ni̍ le̍ mā lāāla̍ŋ māā nu᷄m ve᷅m ya̍ ni̍.” 43 Mɛ̄ɛ̍ o̍ di̍mi̍ le̍nde̍, mbo̍ dīmī chōo̍ cho̍o̍ āā, “La̍sa̍lɔ̄ɔ̄, fu̍la̍.” 44 Mi̍ po̍ ndu̍ o̍o̍ vi᷅ wo̍ fūlā. Bāla̍ŋ ni̍ a̍ pēlo᷄ŋ, lā wa̍ ndu̍ lā yīū yīūwāā a̍ nyɛ̄lā nda̍ chɔ̍ ndu̍ la̍ŋ. Kōlāa̍ wa̍ ndu̍ ō yīyāā o̍ hɔ̄l. Mi̍ Chi̍i̍sū di̍mūl nda̍ āā, “Lā tīīmbu̍u̍ ndu̍ ō kɔ̄nu̍ŋ.”

Wānāā bɛ̄ndūāā Chu̍ūwa̍ kɛ̄ɛ̄si̍a̍a̍ le̍ Chi̍i̍su̍ dīyɔ̄ɔ̍

45 O̍ ko̍ŋ, mɛ̄ɛ̍ Chu̍ūwa̍ a̍ hi᷅ŋ Mēēle̍ yīlɔ̄ɔ̄ wa̍ chē nyɛ̄ Chi̍i̍sū to̍sa̍ wo̍, mi̍ ā ka̍ ka̍ du̍a̍ū tīīnda᷄ŋndo̍ o̍ ndu̍ ni̍ŋ. 46 Kɛ̍, mi̍ ā ti᷄ŋ ā mīīŋgū o̍ ku̍ndā Fālīsi̍īya̍ lo̍ ma̍ chɔ̄m nda̍ nyɛ̄ Chi̍i̍sū to̍sa̍ wo̍. 47 O̍ ko̍ŋ kɔ̍ɔ̍lī, mi̍ ku̍ndā Fālīsi̍īya̍ a̍ wānāā bɛ̄ndūāā sōlīāā lāsa̍lāa̍, a̍ lāŋgba̍ā kālāa̍ ki̍a̍lū ya᷅ma̍ŋnda̍ ā bīī bɔ̄ŋa᷅ŋndo̍. Ma̍ dīmī āā, “Ō yɛ̄ɛ̍nɛ̍ na̍a̍ ŋ̄ yɔ᷄ŋ yɛ̍? Ā chē wa̍lta̍ kɔ̄ndɔ̄fi̍ltā fāŋgā pōo̍ ho̍ō chō tōsāa̍ la̍ŋ. 48 Tē ŋ̄ ma᷄l ndu̍ mbō hīōū lāchī nu̍a̍ā pɛ̍, wāŋnda̍ kpo̍u̍ ā chō tīīnda᷄ŋndo̍ dɔ̄wɔ̄ɔ̄ o̍ ndu̍ ni̍ŋ. Ndu̍yɛ̍, tē ī yɔ̄nu̍ŋ le̍nde̍ pɛ̍, wānāā bɛ̄ndūāā Lu̍o̍ma᷅ŋnda̍ ā chō hūnɔ̄ɔ̄ chīɛ̍i̍ Mɛ̄lɛ̄ka̍a̍ ho̍ō tɛ̄ɛ̄mbūū, ndu̍yɛ̍, mā sōli̍ na̍a̍ o̍ lɛ̄ŋndē nāāle̍ŋ ni᷄ŋ.” 49 Wānā pi᷅lɛ̍ wa̍ nda̍ tɛ̄ɛ̄ŋ dīōla̍ŋ āā, Ka̍ya̍fāā. Ndu̍ wa̍ māsa̍ wānāā so̍līāā lāsa̍lāa̍ wɔ̄sī kōŋ ni̍. Mbo̍ dīmī āā, “Lā si̍nā bɛ̍ɛ̍ nyɛ᷅ o̍ nyɛ̄ a̍ sūɛ̍i̍ he̍ī o̍kɔ̄ɔ̄ le̍. 50 Lā si̍nā nu̍a̍ā, māā ō bɛ̄nda̍ mī wāŋndo̍ ō pīlɛ̍ vī le̍ wāŋnda̍ mbo̍ hīāū a̍ na̍a̍ sōlīo̍o̍ o̍ lɛ̄ŋndē nāāle̍ŋ ni᷄ŋ te̍?” 51 Kɛ̍, dīōmndā Ka̍ya̍fāā o̍ di̍mi̍ la̍ŋ nda̍ŋ, ō ve̍ la̍ŋ dīmī o̍ ndu̍ pi̍la̍ ni̍ŋ te̍. Mɛ̄ɛ̍ o̍ wa̍ yɛ̄ māsa̍ wānāā sōlīāā lāsa̍lāa̍ wɔ̄sī kōŋ yɛ̍, ō wa̍ māwāā sūɛ̍i̍ wa̍ā lāchī dīmīo̍o̍ a̍ Chi̍i̍sū o̍kɔ̄ɔ̄. Ō wa̍ dīmīo̍o̍ a̍ mɛ̄ɛ̍ Chi̍i̍sū wa̍ hūnɔ̄ɔ̄ pīɔ̍mndo̍ sɔ̄lā le̍ Chu̍ūwa̍ yɛ̍. 52 Ndu̍yɛ̍, ō cho̍ ko̍ le̍ nda̍ le̍, kɛ̍, le̍ chūāūwāa̍ Mɛ̄lɛ̄ka̍a̍ a̍ cho̍ bā o̍ bā fe̍e̍ wa̍, le̍ tōsāa̍ mā wa̍ dīōmndo̍ ō pīlɛ̍ ku̍ndā. 53 Chɔ̍ŋ a̍ pāa̍le̍ le̍ŋ, mi̍ wānāā bɛ̄ndūāā Chu̍ūwa̍ ā kɛ̄ɛ̄sīāā le̍ Chi̍i̍su̍ dīyɔ̄ɔ̍. 54 Le̍ he̍ī, Chi̍i̍sū ndu̍ o̍o̍ be̍lū lɛ̍ kpe̍nde̍ke̍le̍ Chu̍ūwa̍ tɛ̄ɛ̄ŋ te̍. O̍ ko̍ŋ, mbo̍ māl mbo̍ kūā o̍ būŋgɛ̄i̍ cho̍ o̍ po̍llo̍ īkɛ̄i̍ ye̍, o̍ chi̍o̍o̍ dīōla̍ŋ āā, E̍fi̍lūēm. Mbo̍ wānu᷄ŋ lo̍ŋ nda̍ bu̍ɛ̍i̍yāā ndūa̍a̍. 55 Bōōndi̍i̍ Chu̍ūwa̍ bīī bɔ᷅ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄ ve̍ ī wa̍ ni᷅ŋ kpɛ̍ɛ̍lūŋ. Le̍ he̍ī, mi̍ wāŋnda̍ cha᷄ŋ o̍ tāndāla̍ŋ ni᷄ŋ ta̍u̍. Ma̍ kūā Chūlu̍sɛ̄lɛ̄m chi̍e̍e̍ le̍ dīōndɔ̄ɔ̍ sɔ̄lāa̍ Mɛ̄lɛ̄ka̍ o̍ hɔ̄l, lɔ̍ɔ̍pa̍ bɔ̄ŋa᷅ŋndo̍ fūūlūū. 56 Ndu̍yɛ̍, ā wa̍ Chi̍i̍su̍ nūūvīa̍a̍ kpe̍e̍kpe̍i̍. Mɛ̄ɛ̍ nda̍ chu̍ūŋgi̍āŋ o̍ chīɛ̍i̍ Mɛ̄lɛ̄ka̍a̍ ni᷄ŋ, ma̍ sa̍āŋ nyu̍ūni̍āŋndo̍ āā, “Lā yīya̍ŋ māā ō chō hūnɔ̄ɔ̄ o̍ bɔ̄ŋa᷅ŋndo̍ ho̍ō?” Āā, “Mbɔ̄ ō hi᷅ŋ ni̍ŋ te̍.” 57 Ndu̍yɛ̍, wānāā bɛ̄ndūāā sōlīāā lāsa̍lāa̍, a̍ ku̍ndā Fālīsi̍īya̍ nda̍ a̍a̍ di̍mu̍l ni᷅ŋ wāŋnda̍ māā wānā o̍ wāna̍ si̍na̍ bā Chi̍i̍sū cho̍ wo̍ pɛ̍, māā ō hu᷄ŋ mbō hu᷄ŋ di̍mūl nda̍ le̍ mā bīī ndu̍.

Chɔ᷄ŋ 12

Mēēle̍ tāla̍ si̍ɛ̍ndīi̍ma̍ chūŋ kɛ̄ndīa̍ŋ Chi̍i̍sū o̍ ŋ̄pēlū

1 Ndu̍ o̍o̍ lo̍ ni᷅ŋ pālɛ̍i̍ ī ŋɔ᷄mpu᷅m, le̍ mī bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ wo̍ o̍kɔ̄ɔ̄ ndu̍ o̍o̍ fu̍u̍lu̍u̍. Mi̍ Chi̍i̍sū cha̍ŋ mbo̍ kūā Bɛ̍ta̍nī chi̍e̍e̍. La̍sa̍lɔ̄ɔ̄ ō Chi̍i̍sū mi̍ŋgi̍ yōōmū wo̍, lo̍ŋ o̍ wa̍ īchāli̍ ni̍. 2 Ma̍ tōōsīāl Chi̍i̍su̍ nyɛ̄ dīa̍a̍. Ma̍tā wa̍ nda̍ nyɛ̄ dīa̍a̍ pīɔ̄ūwo̍ ni̍. Ndu̍yɛ̍, La̍sa̍lɔ̄ɔ̄ wa̍ā nda̍ wa̍ īchāli̍ nyɛ̍ dīa̍a̍ ho̍ō dīo̍o̍ nda̍ Chi̍i̍sū wa̍ā ni̍. 3 O̍ ko̍ŋ, mi̍ Mēēle̍ chu̍ā sānīo̍o̍ a̍ si̍ɛ̍ndīi̍ma̍ ba̍ā kālā mā pūm lēni᷄ŋ. Tɔ̄lɔ̄ɔ̍ ō pūm dīōla̍ŋ āā, na̍ād, a̍ ndu̍ nda̍ a̍a̍ to̍o̍si̍a̍a̍ si̍ɛ̍ndīi̍ya̍ŋ ma᷅ŋ ni̍. Mā kɛ̄ndɛ̄ wa̍la̍ŋ. Mɛ̄ɛ̍ o̍ chu̍a̍ ma̍ŋ, mbo̍ tālā ma̍ŋ Chi̍i̍sū o̍ ŋ̄pēlū wu̍ū. Mbo̍ mūli᷄ŋ mbo̍ wɔ̄ɔ̄sūū ndu̍ pēlo᷄ŋ a̍ yīīŋnde̍ ndu̍ o̍ lēbōl. Mi̍ chūŋ kɛ̄ndɔ̄ɔ̍ tīū chīɛ̄ī ni̍ŋ si̍lɔ̍. 4 Mi̍ bu̍ɛ̍i̍yāa̍ Chi̍i̍sūa̍a̍ ō pīlɔ̍ɔ̄ dīōla̍ŋ āā, Chu̍da̍sī Īsīka̍a̍līɔ̄ɔ̄, o̍ wa̍ Chi̍i̍su̍ hūnɔ̄ɔ̄ pīsī wāŋnda̍ o̍ bā wo̍, mbo̍ lō o̍ ko̍ŋ mbo̍ dīmī āā, 5 “Si̍ɛ̍ndīi̍ya̍ŋ ma᷅ŋ ma̍ a̍a̍ pi̍sīŋ le̍ nyɛ̄ sɔ̄lāā ba̍nā ba̍na̍ mī wānā ndu̍ o̍o̍ ke̍ wānāā tāmbɛ̍i̍ya̍ ka̍ni̍ŋ mu̍ŋ.” 6 Kɛ̍ ndu̍yɛ̍, nyɛ̄ Chu̍da̍sī di̍mi̍ ko̍ŋ ndo̍ ō dīmi̍ ndu̍ le̍ būūla᷄ŋ wānāā tāmbɛ̍i̍ le̍. Vīīnɔ̄ɔ̍ o̍ wa̍ ni̍. Ndu̍yɛ̍, ndu̍ wa̍ wānā kɛ̍sīāā ŋ̄ka̍ni̍o̍o̍ ni̍. Pɛ̄ŋgu̍ o̍ pɛ̍ŋgu̍ ō wa̍ nyɛ̄ sɔ̄lāa̍ ho̍ō dīo̍o̍ lēchōo̍. Si̍ɛ̍ndīi̍ya̍ŋ ma᷅ŋ ba̍ā ndɔ̄ɔ̍, ndu̍ o̍o̍ wa᷅ le̍ pāāwā wa̍li̍ wɔ̄sī pīlɛ̍ kpu̍lu̍ku̍u̍ mɛ̄ɛ̍ wa̍li̍ īchīɔ̍ɔ̍ cho̍ nu̍a̍ā yɛ̍. 7 Kɛ̍, mi̍ Chi̍i̍sū di̍mī āā, “Lā pa̍lā chūa̍a̍ ho̍ō le̍. Ō kɛ̄si̍ mākɛ̄sīāā si̍ɛ̍ndīi̍ma̍ ma̍ŋ le̍ pāa̍le̍ nda̍ chɔ̄ ni̍ŋ ya̍ le̍ŋ. 8 Wānāā tāmbɛ̍i̍ya̍, nda̍ nda̍ chō nya̍ tɛ̄ɛ̄ŋ te̍le̍ŋ o̍ te̍le̍ŋ. Kɛ̍, ya̍ ya̍ I̍ ve᷅ ni̍ŋ la̍tu̍lu̍ a̍ nya̍ le̍ te̍le̍ŋ o̍ te̍le̍ŋ te̍.”

Ā kɛ̄ɛ̄si̍a̍a̍ le̍ La̍sa̍lɔ̄ɔ̄ dīyɔ̄ɔ̍

9 Mi̍ Chu̍ūwa̍ fāŋga̍ bɛ̍ndōo̍ ā tūɛ̄ī māā Chi̍i̍sū cho̍ Bɛ̍ta̍nī. Tūēīyɔ̄ɔ̍ le̍nde̍, ma̍ kūā lo̍ŋ. Kɛ̍, ō ve̍ ko̍ le̍ Chi̍i̍sū le̍ nda̍ kūɛ̄ lo̍ŋ te̍. Nda̍ a̍a̍ ku̍ɛ̄ vɛ̄lɛ̄ le̍ mī nda̍ a̍a̍ che᷅ La̍sa̍lɔ̄ɔ̄ ō Chi̍i̍sū mi̍ŋgi̍ yōōmū wo̍. 10 O̍ ko̍ŋ, mi̍ wānāā bɛ̄ndūāā sōlīāā lāsa̍lāa̍ ā kɛ̄ɛ̄sīāā le̍ mī nda̍ a̍a̍ di̍ī La̍sa̍lɔ̄ɔ̄ bɛ̍ɛ̍. 11 Le̍ sa̍bū nda̍ a̍a̍ kɛ̍ɛ̍si̍a̍a̍ he̍ī yo̍ cho̍ ni̍, māā sūɛ̍i̍ yɔ̍nu̍ŋ a̍ La̍sa̍lɔ̄ɔ̄ ve̍, māā ke̍ŋ to̍sa̍ ni̍ mi̍ Chu̍ūwa̍ ta̍u̍ a̍ wa᷅ nda̍ mālɔ̄ɔ̍ ma̍ wā tīīnda᷄ŋndo̍ dɔ̄wɔ̄ɔ̍ o̍ Chi̍i̍sū ni̍ŋ.

Chi̍i̍sū he̍l Chūlu̍sɛ̄lɛ̄m chi̍e̍e̍

12 Dīi̍mā ndɔ̄ɔ̍, mi̍ fāŋgā bɛ̍ndu̍ hi᷅ŋ o̍ bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ wo̍ o̍kɔ̄ɔ̄ wo̍ tūɛ̄ī māā Chi̍i̍sū cho̍ hūnɔ̄ɔ̍ Chūlu̍sɛ̄lɛ̄m. 13 Tūēīyɔ̄ɔ̍ le̍nde̍, ma̍ bīī sīɔ̍ɔ̍la̍ wāūla̍ŋ o̍ lābā ma̍ kūā ndu̍ dēmūl. Ā wa̍ dēŋīo̍o̍ mā dīmī āā, “Lā ŋ̄ sāŋga̍la᷅ŋ Mɛ̄lɛ̄ka̍. Wāna̍ hi᷅ŋ ho̍ō sɔ̍ŋgɔ̍ Māsānɔ̄ɔ̍ Mɛ̄lɛ̄ka̍a̍ wo̍, o̍ cho̍ ho̍ō māsā bɛ̍ndōo̍ le̍ I̍sɔ̄lūɛ̄ī yo̍, Mɛ̄lɛ̄ka̍ dɔ̄ū ndu̍ sa̍lā bɔ̄ɔ̍.” 14 Mi̍ Chi̍i̍sū sɔ̍lā sōfɛ̍lɛ̍ fɔ̍ŋndɔ̍ɔ̍ mbo̍ chāl lēchōo̍. O̍ he̍ī ni᷄ŋ, mi̍ ī yɔ̄nu᷄ŋ mɛ̄ɛ̍ Yāu̍ Mɛ̄lɛ̄ka̍a̍ ō dīmi̍ yɛ̍. 15 Kāni̍, Yāu̍ Mɛ̄lɛ̄ka̍ dīmī āā, “Lā wo᷅ nyɛ̄ o̍ nyɛ̄ le̍, wāŋnda̍ Sa̍a̍yɔ̄ŋ chi̍e̍e̍. Lā tōfa̍ wɔ̍, māsa̍ nyāa̍ chō hūnɔ̄ɔ̍. Ō chō hūnɔ̄ɔ̍ o̍ sōfɛ̍lɛ̍ fɔ̍ŋndɔ̍ɔ̍ chōo̍.” 16 Bōōndi̍i̍ sɔ̄ɔ̍ŋ mu᷅ŋ ŋ̄ yɔ̄nu̍ŋ nde̍, bu̍ɛ̍i̍yāa̍ Chi̍i̍sūa̍a̍ ā sīna̍ mu̍ŋ pɛ̄ŋgu̍ le̍. Kɛ̍, mɛ̄ɛ̍ Mɛ̄lɛ̄ka̍ tōsa̍ mi̍ Chi̍i̍sū lu̍ɛ̍ī o̍ nāŋɔ̄ɔ̄ ndɔ̍ kɔ̄ndɔ̄fi̍llo̍ ni᷄ŋ, ma̍ lōōnu᷄ŋ māā Yāu̍ Mɛ̄lɛ̄ka̍a̍ dīmi̍ sɔ̄ɔ̍ŋ mu᷅ŋ a̍ ndu̍ o̍kɔ̄ɔ̄, ndu̍yɛ̍, māā mi̍ wāŋnda̍ tōsā le̍nde̍ a̍ ndu̍. 17 Bōōndi̍i̍ Chi̍i̍sū ve̍e̍lu̍ La̍sa̍lɔ̄ɔ̄ le̍ mbō fūla̍ o̍ sɛ̄īyo̍ ni᷄ŋ nde̍, ndu̍yɛ̍, mbo̍ mīŋgī ndu̍ yōōmū ve̍, mi̍ wānāa̍ wa̍ o̍ hɔ̄lndɔ̄ ma̍ chā wa̍ ā kɔ̍ di̍mūl wāŋnda̍ a̍ ndi̍ o̍kɔ̄ɔ̄. 18 Mɛ̄ɛ̍ tūēīyɔ̄ɔ̄ nda̍ tūēī ko̍ŋ a̍ kɔ̄ndɔ̄fi̍li̍ o̍ to̍sa̍ ho̍ō wo̍ o̍kɔ̄ɔ̄ wo̍, o̍ ko̍ŋ, fāŋgā bɛ̍ndōo̍ kūɛ̄ ndu̍ dēmūl ni̍. 19 O̍ ko̍ŋ, mi̍ ku̍ndā Fālīsi̍īya̍ dīmu̍la᷅ŋ āā, “Nyɛ̄ o̍ nyɛ̄ fe̍e̍ na̍a̍ ŋ̄ kɛ̄ɛ̄si̍a̍a̍ ŋ̄ būmba̍. Chi̍e̍ēŋndo̍ kpo̍u̍ ā chō ndu̍ tōlɔ̄ɔ̍ kɔ̄ɔ̄lī.”

Kīli̍kīi̍ya̍ ā pūm ā hɛ̄na̍ŋ mā chē Chi̍i̍sū

20 Bōōndi̍i̍ wāŋnda̍ kūɛ̄ Chūlu̍sɛ̄lɛ̄m o̍ bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ wo̍ o̍kɔ̄ɔ̄ le̍ Mɛ̄lɛ̄ka̍ pīɛ̄īyo̍ ve̍, Kīli̍kīi̍ya̍ ā pūm bɛ̍ɛ̍ ā wa̍ nda̍ tɛ̄ɛ̄ŋ. 21 Mi̍ Kīli̍kīi̍ya̍ ha̍ā kūā nāa̍ po̍ pi᷅lɛ̍ chūā dīōla̍ŋ āā, Fi̍li̍pī, wānā wa̍ā Bɛ̄tīsa̍i̍dā chi̍e̍e̍ o̍ lɛ̄ŋndē Kāli̍līle̍ŋ ni᷄ŋ. Ma̍ kɔ̍ dīmūl ndu̍ āā, “Fāllo̍, ŋ̄ hɛ̄na̍ŋ mī ŋ̄ chē Chi̍i̍sū.” 22 Mi̍ Fi̍li̍pī ku̍ā mbo̍ kɔ̍ di̍mūl A̍ndūlū. O̍ ko̍ŋ kɔ̍ɔ̍lī, ma̍ kūā nda̍ ŋi̍ɔ̍ɔ̍ŋ ma̍ kɔ̍ di̍mūl Chi̍i̍sū. 23 Mi̍ Chi̍i̍sū lo᷅ o̍ ko̍ŋ mbo̍ mūlūl nda̍ āā, “Te̍le̍ŋndo̍ ō fūūlu̍u̍ le̍ mī Mɛ̄lɛ̄ka̍ chɔ᷄m mɛ̄ɛ̍ wāna̍ nda̍ vēēlū āā, Po̍ Wa̍nā Pɔ̍nɔ̍ɔ̍ wo̍ chō wāna̍ kɔ̄ndɔ̄fi̍li̍ yɛ̍. 24 Mī di̍mu̍l nya̍ tōnya̍a̍ wa̍la̍ŋ, tē ō ve̍ mā wōu̍ ku̍lo̍o̍ o̍ pūūlōo̍ bɛ̄ŋgu̍, o̍ ko̍ŋ kɔ̍ɔ̍lī mbō vī le̍, mɛ̄ɛ̍ ndu̍ pīlɛ̍ o̍ wa᷅ ni̍. Kɛ̍, tē ō vī pɛ̍, ō chō wūlɔ̄ɔ̄ mbō hu᷄ŋ to̍sā ku̍lu̍la̍ŋ ta̍u̍. 25 Wānā o̍ wāna̍ ka̍a̍la̍ yōōmū ndɔ̄ɔ̍ pɛ̍, mɛ̄ɛ̍ ō chō yōōmū kpe̍e̍kpe̍i̍yo̍ fūlā. Ndu̍yɛ̍, wānā o̍ wāna̍ tu̍l yōōmū ndɔ̄ɔ̍ ho̍ō chi̍e̍ēŋ na̍nu᷄ŋ le̍yɛ̍ pɛ̍, mɛ̄ɛ̍ wānā ko̍ŋ chō hūnɔ̄ɔ̄ yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍ sɔ̄lā. 26 Wānā o̍ wāna̍ hɛ̄na̍ŋ mbō tōsa̍ wa̍llo̍ le̍ ya̍ pɛ̍, mɛ̄ɛ̍ mbō tōl la̍ kɔ̄ɔ̄lī. Nāa̍ ya̍ I̍ chō wā wa̍, lo̍ŋ bu̍ɛ̍i̍yāā nīa̍a̍ bɛ̍ɛ̍ a̍ cho̍ wā ni̍. Ndu̍yɛ̍, wānā o̍ wāna̍ to̍sa̍ wa̍llo̍ le̍ ya̍ pɛ̍, fi̍nyā nūu̍ chō wānā ko̍ŋ bɛ̄ɛ̄le̍ŋ kē.”

Chi̍i̍sū di̍mi̍ māā ā chō ndu̍ dīyɔ̄ɔ̄

27 Mi̍ Chi̍i̍sū di̍mī āā, “Mɔ̍nɛ̍i̍ chō o̍ kɔ̄l nūu̍ ni᷄ŋ pɛ̍ŋgo̍o̍ ho̍ō. I̍ si̍nā bɛ̍ɛ̍ nyɛ᷅ ya̍ I̍ di̍mī le̍. Bāā I̍ di̍mi̍ nu̍a̍ā āā, ‘Kɛ̄kɛ̍, chɛ᷅l mī I̍ ke̍e̍ku̍ o̍ nyɛ̄ pālāa̍ ho̍ō ni᷄ŋ te̍?’ Kɛ̍ ndu̍yɛ̍, le̍ sa̍bōo̍ ho̍ō ya̍ I̍ hi᷅ŋ o̍ chi̍e̍ēŋndo̍ chōo̍ ni̍, le̍ mī I̍ ke̍e̍ku̍ o̍ nyɛ̄ pālāa̍ ho̍ō ni᷄ŋ. 28 Kɛ̄kɛ̍, chɔ̍m wa᷅ŋnda̍ a̍ mɛ̄ɛ̍ ŋ̄ chō wāna̍ kɔ̄ndɔ̄fi̍li̍ yɛ̍.” O̍ ko̍ŋ, mi̍ dīōmndo̍ sūāā ɛ̄chɛ̍nɛ̄. Mbo̍ dīmī āā, “I̍ chɔ̍m mɛ̄ɛ̍ ya̍ I̍ cho̍ wāna̍ kɔ̄ndɔ̄fi̍li̍ yɛ̍. Ndu̍yɛ̍, I̍ cho̍ vɛ̄lɛ̄ chɔ̄ɔ̄lū chɔ̄m.” 29 Mi̍ fāŋga̍ wa̍ īsīsi̍ lo̍ŋ ndo̍ tūɛ̄ī dīōm kōŋ. Ma̍ dīmī āā, “Ta᷅ŋnda̍ŋ ma̍ dēŋī ni̍.” Mi̍ ā pūm ā dīmī āā, “Ki̍i̍la̍nɔ̍ Mɛ̄lɛ̄ka̍a̍ so̍ō nāa̍ ndu̍ chu̍a̍ ni̍.” 30 Kɛ̍, mi̍ Chi̍i̍sū di̍mūl nda̍ āā, “Ō cho̍ le̍ ya̍ le̍ dīōmnda̍ŋ nda᷅ŋ lā sōōnu᷄ŋ te̍. Le̍ mālā nyāa̍ la̍ so̍o̍nu᷄ŋ ni̍. 31 Bōōnde̍i̍ he̍ī Mɛ̄lɛ̄ka̍ chō kɔ̍ɔ̍sɔ̍ a̍ chi̍e̍ēŋndo̍ ni̍. Ndu̍yɛ̍, bōōnde̍i̍ he̍ī wāna̍ cho̍ māsāa̍ le̍ chi̍e̍ēŋndo̍ ho̍ō wo̍ chō pīɔ̄lɔ̄ɔ̍ sɔ̄lā o̍ lēmāsā ni̍. 32 Tē ā ba᷄ŋ ya̍ pɛ̍ o̍ yɔ̄mndo̍ chōo̍, mī I̍ fa̍ŋa̍ŋ o̍ chi̍e̍ēŋndo̍ chōo̍ pɛ̍, I̍ cho̍ tōsā wāŋnda̍ kpo̍u̍ mā hīŋ nāa̍ ya̍ chu̍a̍.” 33 Chi̍i̍sū wa̍ māwāā dīōmnda̍ŋ nda᷅ŋ dīmīo̍o̍ a̍ mɛ̄ɛ̍ ndu̍ o̍o̍ wa̍ hūnɔ̄ɔ̄ pīɔ̍mndo̍ sɔ̄lā yɛ̍. 34 Mi̍ fāŋgāa̍ dīmī āā, “Yāu̍ Mɛ̄lɛ̄ka̍a̍ dīmi̍ māā Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ chō wā yōōmū le̍ fɛ̍ɛ̍ŋ a̍ fɛ̍ɛ̍ŋ. Kɛ̍, vɛ᷅ ni᷅ŋ ma̍ dīmī māā mɛ̄ɛ̍ mā ba᷄ŋ wāna̍ nda̍ vēēlū āā, Po̍ Wa̍nā Pɔ̍nɔ̍ɔ̍ wo̍ o̍ yɔ̄mndo̍ chōo̍? Nɛ̄ɛ̍nɛ̍ cho̍ yɛ̄ Po̍ Wa̍nā Pɔ̍nɔ̍ɔ̍ ho̍ō?” 35 Mi̍ Chi̍i̍sū mu̍lī āā, “Nyɛ̄ wa̍wo̍ŋndo̍ chō chɔ̄ɔ̄lū wā nya̍ tɛ̄ɛ̄ŋ le̍ te̍le̍ŋ ti̍ŋ. Lā hīo̍u̍ la̍chi̍ a̍ kɔ̄la̍ŋ lɔ̍ɔ̍ nyɛ̄ wa̍wo̍ŋndo̍ chō nya̍ tɛ̄ɛ̄ŋ ndo̍, yɔ̄ŋi̍ nyūmnda̍ŋ mā bīi̍ nya̍. Kāni̍ fo̍ndōle̍, wāna̍ ku̍ā ho̍ō o̍ nyūmnda̍ŋ ni᷄ŋ ndo̍, ō si̍nā na̍a̍ o̍ wa᷅ kɔ᷅la̍ŋ nda̍ le̍. 36 Lā dɔ̄u̍ ti̍i̍nda᷄ŋ nyāa̍ o̍ nyɛ̄ wa̍wo̍ŋndo̍ ni᷄ŋ bōōndi̍i̍ o̍ cho̍ nya̍ tɛ̄ɛ̄ŋ nde̍, le̍ mī lā sīmnu᷄ŋ wa̍nāā wāā o̍ nyɛ̄ wa̍wo̍ŋ ni̍ŋ.”

Chu̍ūwa̍ ā ka̍ ka̍ kɛ̍ɛ̍ le̍ tīīnda᷄ŋndo̍ dɔ̄wɔ̄ɔ̍ o̍ Chi̍i̍sū ni̍ŋ

Mɛ̄ɛ̍ Chi̍i̍sū so̍ō dīōmnda̍ŋ nda᷅ŋ, mbo̍ fa̍ŋa᷄ŋ lo̍ŋ mbo̍ kɔ̍ vi̍o̍ŋnu᷄ŋ. 37 Mi̍ chē bɛ̍ɛ̍ mbo̍ tōsā wa̍lta̍ kɔ̄ndɔ̄fi̍lta̍ŋ nda᷅ŋ kpo̍u̍ nda̍ o̍ hɔ̄l kpe̍nde̍ke̍le̍ ni̍, kɛ̍, ā chɛ᷄l mā dɔ̄ū tīīnda᷄ŋndo̍ o̍ ndu̍ ni̍ŋ te̍. 38 He̍ī yɔ̄nu̍ŋ le̍ mī nyɛ̄ wāna̍ su̍a̍ā le̍ Mɛ̄lɛ̄ka̍ wo̍ Āīsa̍yā o̍ di̍mi̍ wo̍ ō yɔ̄nu̍ŋ. Mbo̍ dīmī āā, “Māsānɔ̄ɔ̍ Mɛ̄lɛ̄ka̍, ō nɛ̄ɛ̍nɛ̍ la̍a̍lāŋ yɛ̍ ni̍ŋ yo̍o̍ŋgū na̍a̍ ŋ̄ dīmi̍ wo̍? Ō nɛ̄ɛ̍nɛ̍ Māsānɔ̄ɔ̍ Mɛ̄lɛ̄ka̍ ō chɔ᷄m yɛ̄ kpāāya̍ ndɔ̄ɔ̍?” 39-40 Mi̍ Āīsa̍yā di̍mī vɛ̄lɛ̄ āā, “Mɛ̄lɛ̄ka̍ sūūmi̍a̍a̍ nda̍ yɔ̄ŋi̍ nda̍ chɔ̍. Ndu̍yɛ̍, ō kīnda̍ nda̍ hūlla̍ŋ yɔ̍ŋi̍ nda̍ sīna̍ pɛ̍ŋgu̍. Mi̍ Mɛ̄lɛ̄ka̍ dīmī āā, ‘I̍ to̍sa̍ he̍ī yɔ̄ŋi̍ nda̍ hu᷄ŋ nāa̍ ya̍ chu̍a̍ le̍ mī si̍ŋgi̍ nda̍.’ ” Le̍ sa̍bōo̍ ho̍ō nda̍ nɔ̄la̍ mā lāāla̍ŋ te̍ ni̍. 41 A̍ Chi̍i̍sū o̍kɔ̄ɔ̄ Āīsa̍yā so̍ō dīōmnda̍ŋ nda᷅ŋ ni̍. Kāni̍ fu̍u̍le̍, chɔ̄ɔ̍ ndu̍ o̍o̍ che᷅ Chi̍i̍sū o̍ nāŋɔ̄ɔ̄ ndɔ̍ kɔ̄ndɔ̄fi̍llo̍ ni᷄ŋ ni̍. 42 O̍ sa̍na̍a̍ īsɔ̄ɔ̍ ni᷄ŋ, wānāā bɛ̄ndūāā Chu̍ūwa̍ ta̍u̍ nda̍ a̍a̍ dɔ̍ū tīīnda᷄ŋndo̍ o̍ Chi̍i̍sū ni̍ŋ. Kɛ̍, nda̍ a̍a̍ sɔ̍lɔ̄lāŋ wa᷅ŋnda̍ o̍ hɔ̄l le̍nde̍ le̍, kāni̍ fo̍ndōle̍, ā wa̍ wōo̍ yɔ̄ŋi̍ ku̍ndā Fālīsi̍īya̍ sōli̍ nda̍ o̍ chīɛ̄ī nda̍ pīɛ̄ī Mɛ̍lɛ̄ka̍ wo̍ ni᷄ŋ. 43 Chāndɔ̄ɔ̄ wāŋnda̍ chīe̍e̍ya̍ nda̍ hīōū hɛ̄na᷄ŋ a̍ Mɛ̄lɛ̄ka̍ ndu̍ ndu̍ cha̍ndɔ̄ɔ̍ nda̍.

Dīōmndā Chi̍i̍sū di̍mi̍ la̍ŋ la̍ cho̍ wāŋnda̍ yāmɛ̍i̍ kīlūl ni̍

44 Mi̍ Chi̍i̍sū di̍mī chōo̍ cho̍o̍ āā, “Wānā o̍ wāna̍ dɔ̍ū tīīnda᷄ŋndo̍ o̍ ya̍ ni̍ŋ pɛ̍, mɛ̄ɛ̍ ō cho̍ ko̍ ya̍ le̍ o̍ dɔ̍ū tīīnda᷄ŋndo̍ o̍ ya̍ ni̍ŋ te̍. Mɛ̄ɛ̍ wāna̍ ve᷅m ya̍ wo̍, o̍ ndu̍ ni̍ŋ o̍ dɔ̍ū tīīnda᷄ŋndo̍ ni̍. 45 Wānā o̍ wāna̍ che᷅ ya̍ pɛ̍, mɛ̄ɛ̍ ō chīi̍ wāna̍ ve᷅m ya̍ wo̍ chɔ̄. 46 I̍ hi᷅ŋ māhūnāā o̍ chi̍e̍ēŋndo̍ chōo̍ māā nyɛ̄ wa̍wo̍ŋ māā wānā o̍ wāna̍ dɔ̍ū tīīnda᷄ŋndo̍ o̍ ya̍ ni̍ŋ pɛ̍, ō lo᷅ lɛ̍ o̍ mānyūm ni᷄ŋ te̍. 47 Wānā o̍ wāna̍ tu̍e̍ī pɛ̍ di̍ōmndā ya̍ I̍ di̍mī la̍ŋ, kɛ̍, mbō tōsa̍ nyɛ᷅ la̍ di̍mi̍ wo̍ le̍, mɛ̄ɛ̍ ō cho̍ ya̍ le̍ cho̍ ndu̍ īyāma̍ kīlūl te̍. Kāni̍ fu̍u̍le̍, ya̍ I̍ hi᷅ŋ māhūnāā le̍ mī wāŋnda̍ sɔ̄la̍ pīōŋɔ̄ɔ̍. I̍ hi̍ŋ le̍ mī I̍ ki̍lu̍l wāŋnda̍ o̍ chi̍e̍ēŋndo̍ ni᷄ŋ i̍ya᷅ma̍ le̍. 48 Wānā o̍ wānā kɛ̍ɛ̍ ya̍ pɛ̍, ndu̍yɛ̍, mbō kɛ̄ɛ̍ le̍ nyɛ̄ ya̍ di̍mi̍ wo̍ chūa̍a̍ pɛ̍, nyɛ̄ chō o̍ cho̍ ndu̍ yāmɛ̍i̍ kīlūl lo̍. Dīōmndā ya̍ di̍mi̍ la̍ŋ, la̍ŋ la̍ cho̍ ndu̍ yāmɛ̍i̍ kīlūl o̍ pāa̍le̍ mɛ̍ɛ̍lāāle̍ŋ chōo̍ ni̍. 49 Kāni̍ fu̍u̍le̍, dīōmndā ya̍ I̍ di̍mi̍ la̍ŋ, ō cho̍ di̍ōmndā nīla̍ ya̍ pi̍la̍ kɛ̍ɛ̍si̍a̍a̍ le̍. Fi̍nyā nūu̍ o̍ ve᷅m ya̍ wo̍, ndu̍ chɔ̍m ya̍ nyɛ̄ ya̍ I̍ nɔ̍ le̍ dīmīo̍o̍ wo̍ ni̍. Ndu̍yɛ̍, ndu̍ ve᷅m ya̍ ndu̍ dīmī ni̍. 50 I̍ si̍nā māā nyɛ̄ o̍ ve᷅m ya̍ ko̍ŋ le̍ dīmīo̍o̍ wo̍, ndu̍ chu̍ū wa᷅ŋnda̍ yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wō ni̍. Le̍la̍ŋ, dīōmndā Fi̍nyā nūu̍ vīām ya̍ le̍ dīmīo̍o̍ la̍ŋ, la̍ŋ ko̍ ya̍ di̍mī ni̍.”

Chɔ᷄ŋ 13

Chi̍i̍sū pu̍lū bu̍ɛ̍i̍yāā ndūa̍a̍ pēlo᷄ŋ

1 Pāa̍le̍ wāŋnda̍ bīī bɔ᷅ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ wo̍ o̍kɔ̄ɔ̄ le̍ŋ, lē wa̍ māā sīɔ̄dīi̍. Ndu̍yɛ̍, mi̍ Chi̍i̍sū si̍nā ndi̍ pɛ̄ŋgu̍ māā te̍le̍ŋndo̍ chō ni᷅ŋ kpɛ̍ɛ̍lūŋ le̍ mbō fāŋa̍ŋ o̍ chi̍e̍ēŋndo̍ ho̍ō chōo̍, le̍ mbō kūɛ̄ nāa̍ Fi̍nyā ndɔ̄ chu̍a̍. Chi̍i̍sū ndu̍ o̍o̍ ka̍a̍la̍ wānāā ndūa̍a̍ a̍ cho̍ o̍ chi̍e̍ēŋndo̍ ni᷄ŋ nda̍ le̍ te̍le̍ŋ o̍ te̍le̍ŋ. Ndu̍yɛ̍, mbo̍ chɔ̄m nda̍ o̍ bōōndi̍i̍ ke̍ŋ ni᷄ŋ mɛ̄ɛ̍ kpɛ̍ o̍ ka̍a̍la̍ nda̍ yɛ̍. 2 Mi̍ ī yɔ̄nu᷄ŋ, Chi̍i̍sū nda̍ bu̍ɛ̍i̍yāā ndūa̍a̍ ā wa̍ nyɛ̄ dīāā īchɔ̄llo̍ dīo̍o̍. Ndu̍yɛ̍, māsa̍ nyi̍nāā wɔ̄ɔ̍ŋnda̍ Sēta̍nā, ndu̍ o̍o̍ chi̍i̍ ni᷅ŋ Chu̍da̍sī po̍ Sa̍i̍mɔ̄ŋ Īsīka̍a̍līɔ̄ɔ̄ wo̍ dɔ̄wɔ̄ɔ̄ o̍ kɔ̄l le̍ Chi̍i̍su̍ pīsīo̍o̍. 3 Ndu̍yɛ̍, Chi̍i̍sū ndu̍ o̍o̍ si̍nā māā Fi̍nyā ndɔ̄ o̍ ke̍ ndu̍ kpāāyāa̍ nyɛ̄ o̍ nyɛ̄ fe̍e̍ cho̍o̍. Ndu̍ o̍o̍ si̍nā māā Mɛ̄lɛ̄ka̍ ve᷅m ndu̍ ni̍, ndu̍yɛ̍, māā nāa̍ Mɛ̄lɛ̄ka̍ chūā o̍ cho̍ vɛ̄lɛ̄ mīīŋgū ni̍. 4 Mɛ̄ɛ̍ nda̍ wa̍ nyɛ̄ dīa̍a̍ dīo̍o̍, mi̍ Chi̍i̍sū cha̍ŋ mbo̍ sōlī dōmā le̍cho̍o̍ wa̍ ndu̍ lēkɔ̄ɔ̍ wo̍. Mbo̍ chūā kōlāa̍ mbo̍ yīīnu᷄ŋ o̍ chāŋ. 5 Mbo̍ dūāū mɛ̄ŋnda̍ŋ o̍ hɛ̄ŋgɔ̍ɔ̍ ni᷄ŋ mbo̍ sāā bu̍ɛ̍i̍yāā ndūa̍a̍ pēlo᷄ŋ pūlɔ̄ɔ̍. Bu̍ɛ̍ī o̍ pu̍lū ko̍ pe̍lo᷄ŋ ō wɔ̄ɔ̄sūū mu̍ŋ a̍ kōla̍ wa̍ ko̍ŋ ndu̍ o̍ chāŋ ndo̍. 6 Kɛ̍, mɛ̄ɛ̍ o̍ fu̍u̍lu̍u̍ o̍ Sa̍i̍mɔ̄ŋ Pītɛ̍ lo̍, mi̍ Pītɛ̍ di̍mūl ndu̍ āā, “Māsānɔ̄ɔ̍, ya̍ ŋ̄ pūlū pe̍lo᷄ŋ ni̍?” 7 Mi̍ Chi̍i̍sū mu̍lī āā, “A̍ si̍nā wɔ̍ nyɛ̄ ya̍ I̍ cho̍ ho̍ō tōsāa̍ wo̍ pɛ̄ŋgu̍ le̍. Kɛ̍ ndu̍yɛ̍, ā chō hūnɔ̄ɔ̄ ndu̍ pɛ̄ŋgu̍ si̍nā.” 8 Mi̍ Pītɛ̍ di̍mī āā, “I̍ cho̍ chɛ̍lɔ̄ɔ̄ mā pūlū ya̍ pēlo᷄ŋ kpo̍so̍ŋ te̍.” Mi̍ Chi̍i̍sū di̍mī āā, “Tē I̍ pu̍lu̍ nu̍m pēlo᷄ŋ te̍, na̍a̍ nūm ŋ̄ ve᷅ o̍ dīōm pīlɛ̍ ni᷄ŋ te̍.” 9 Mɛ̄ɛ̍ Chi̍i̍sū di̍mi̍ le̍nde̍, mi̍ Sa̍i̍mɔ̄ŋ Pītɛ̍ di̍mūl ndu̍ āā, “Māsānɔ̄ɔ̍, mɛ̄ɛ̍ ō wa᷅ pēlo᷄ŋ ko̍ le̍ ŋ̄ pūlu̍ ya̍ le̍. Pu̍lu̍ ya̍ bāla̍ŋ a̍ bōlle̍ŋ kpo̍u̍.” 10 Mi̍ Chi̍i̍sū lo᷅ lo̍ŋ mbo̍ dīmī āā, “Wāna̍ pu̍lu᷄ŋ ni᷅ŋ ndo̍, ndu̍ ndu̍ cho̍ ni᷅ŋ ō dīāndāā pa̍ku̍. Pēlo᷄ŋ ko̍ o̍ nɔ᷅ ni᷅ŋ ni̍ mbō pūlū. Nya̍ kpo̍u̍ lā chō ā dīāndāā, mɛ̄ɛ̍ wānā pi᷅lɛ̍ ō cho̍ o̍ di̍a̍ndāā le̍.” 11 Chi̍i̍sū ndu̍ o̍o̍ si̍nā ni᷅ŋ wāna̍ wa̍ ndu̍ hūnɔ̄ɔ̄ pīsī wo̍. Le̍ sa̍bū kōŋ o̍ di̍mi̍ ni̍ āā, “Nya̍ kpo̍u̍ lā chō mɛ̄ɛ̍ wānā pi᷅lɛ̍ ō cho̍ o̍ di̍a̍ndāā le̍.” 12 Mɛ̄ɛ̍ Chi̍i̍sū chi̍i̍ nda̍ pēlo᷄ŋ pūlɔ̄ɔ̄, mbō mīŋgī dōma̍ ndɔ̄ le̍cho̍o̍wo̍ wōūnɔ᷄ŋ mbo̍ mīīŋgū o̍ fo̍ndāŋ ndɔ̄ɔ̍, mbo̍ chāl. Mbo̍ nyūnā nda̍ āā vɛ̄ɛ̄, “Lā sīnā pa̍ nyɛ᷅ ya̍ I̍ to̍sa̍ ho̍ō a̍ nya̍ wo̍ pɛ̄ŋgu̍? 13 Lā chō ya̍ vēēlōo̍ āā, Ti̍chɛ̄i̍nɔ̍ nāa̍, mī lā vēēlū vɛ̍lɛ̄ ya̍ āā, Māsānɔ̄ɔ̍. Ī chō tōnya̍ mī lā vēēlu̍ ya̍ le̍nde̍. Kāni̍ fu̍u̍le̍, wānā wa̍ā le̍nde̍ ya̍ I̍ cho̍ ni̍. 14 Ya̍ cho̍ Ma̍sānɔ̄ nyāa̍, ndu̍yɛ̍, mi̍ wa᷅ Ti̍chɛ̄i̍nɔ̍ nyā wo̍, nāa̍ ya̍ ya̍ I̍ pu̍lū wɔ̄ nya̍ pēlo᷄ŋ, mɛ̄ɛ̍ nya̍ bɛ̍ɛ̍ lā pūla᷅ŋ pe̍lo᷄ŋ vēllāa̍ vēllē le̍nde̍. 15 Tāāmāsi̍o̍o̍ ya̍ I̍ chɔ̍m nya̍ ho̍ō ni̍. Lā tōsa̍ mɛ̄ɛ̍ ya̍ I̍ to̍sa̍ a̍ nya̍ yɛ̍. 16 Mī di̍mu̍l nya̍ tōnya̍a̍ wa̍la̍ŋ, chɛ̄ o̍ chɛ̄ bɛ̍ɛ̍ cho̍ mbō hīōū wāna̍ ō cho̍ o̍ bā wo̍ le̍. Ndu̍yɛ̍, wāna̍ nda̍ vīām ki̍i̍la̍le̍ŋ ndo̍, ō hi̍ū wa᷅na̍ vi̍ām ndu̍ wo̍ le̍. 17 Mɛ̄ɛ̍ nya̍ sīna̍ ni᷅ŋ sɔ̄ɔ̍ŋ mu᷅ŋ nu̍a̍ā yɛ̍, tē ō wa̍ pɛ̍ mī lā tōsa̍ mu̍ŋ, mɛ̄ɛ̍ lā pɛ̄l tɔ̄nɔ̄ɔ̍. 18 “Ō cho̍ le̍ nya̍ kpo̍u̍ le̍ ya̍ I̍ cho̍ he̍ī dīmīo̍o̍ le̍. Kāni̍, nya̍ ya̍ I̍ hɛ̍li̍ wa̍ ki̍nɛ̍i̍, I̍ si̍nā a̍ nya̍ o̍kɔ̄ɔ̄. Ndu̍yɛ̍, mɛ̄ɛ̍ mī nyɛ̄ Yāu̍ Mɛ̄lɛ̄ka̍a̍ dīmi̍ ho̍ō wo̍ ō yɔ̄nu̍ŋ. Mbo̍ dīmī āā, ‘Wāna̍ na̍a̍ ŋ̄ chō nyɛ̄ dīa̍a̍ dīo̍o̍ lātūlu̍ na̍a̍ ndu̍ wo̍, ō sīmu̍l la̍.’ 19 I̍ cho̍ nya̍ sɔ̄ɔ̍ŋ mu᷅ŋ pɔ̄ɔ̄ dīmūllo̍ pɛ̄ŋgo̍o̍ ho̍ō, ko̍ŋ to̍sā ni̍, tē sɔ̄ɔ̍ŋ ka̍la᷄ŋ ŋ̄ hu᷄ŋ yɔ̄nu᷄ŋ pɛ̍, lā lāāla̍ŋ māā ya̍ cho̍ wāna̍ cho̍ kāni̍ ma̍si̍ndɛ̄ wo̍ ni̍. 20 Mī di̍mu̍l nya̍ tōnya̍a̍ wa̍la̍ŋ, wāna̍ chɛ̍l wāna̍ ya̍ I̍ vi̍ām ndo̍ pɛ̍, mɛ̄ɛ̍ ya̍ o̍ chɛ̍l ko̍ŋ ni̍. Ndu̍yɛ̍, wāna̍ chɛ̍l la̍ pɛ̍, mɛ̄ɛ̍ wāna̍ ve᷅m ya̍ wo̍, ndu̍ o̍ chɛ̍l ko̍ŋ ni̍.”

Chi̍i̍sū di̍mi̍ māā ā chō ndu̍ hūnɔ̄ɔ̄ pīsī

21 Mɛ̄ɛ̍ Chi̍i̍sū chi̍i̍ dīōmnda̍ŋ nda᷅ŋ dīmī, mi̍ mɔ̍nɛ̍i̍ pīā o̍ kɔ̄l ndɔ̄ɔ̍ ni᷄ŋ ta̍u̍. Mbo̍ dīmī kpe̍nde̍ke̍le̍ āā, “Mī di̍mu̍l nya̍ tōnya̍a̍ wa̍la̍ŋ, wānā pi᷅lɛ̍ chō nya̍ tɛ̄ɛ̄ŋ ō chō ya̍ hūnɔ̄ɔ̄ pīsī.” 22 Mi̍ bu̍ɛ̍i̍yāā ndūa̍a̍ sāā nūāna᷅ŋndo̍. Mi̍ sūɛ̍i̍ he̍ī ī bīī nda̍ kɔ̄ndɔ̄fi̍li̍, le̍ wāna̍ Chi̍i̍sū wa̍ ho̍ō dīmīo̍o̍ māā ō chō ndu̍ pīsī wo̍. 23 Bu̍ɛ̍ī Chi̍i̍sū ndu̍ o̍o̍ ka̍a̍la̍ kāālā bɛ̄ndōo̍ wo̍ ō wa̍ ndu̍ īchāli̍ i̍kɛ̍i̍. 24 Mi̍ Sa̍i̍mɔ̄ŋ Pītɛ̍ tu̍u̍līāl bu̍ɛ̍ī kōŋ a̍ lābā mbo̍ dīmūl ndu̍ āā, “Nyu̍na̍ wɔ̍ ndu̍ le̍ wāna̍ o̍ cho̍ ho̍ō sūɛ̍i̍ a̍ ndu̍ o̍kɔ̄ɔ̄ wo̍.” 25 Mi̍ bu̍ɛ̍ī Chi̍i̍sū ka̍a̍la̍ ko̍ŋ ndo̍ nāŋnu᷄ŋ Chi̍i̍su̍ īkɛ̄i̍ mbo̍ nyūnā ndu̍ āā, “Māsānɔ̄ɔ̍, ō nɛ̄ɛ̍nɛ̍ cho̍ yɛ̄ nu̍m hūnɔ̄ɔ̄ pīsī?” 26 Mi̍ Chi̍i̍sū lo᷅ o̍ ko̍ŋ mbo̍ mūlī āā, “Wāna̍ ya̍ I̍ cho̍ bēe̍dīi̍yo̍ yīŋɔ̄ɔ̄ o̍ lāmndo̍ ni᷄ŋ mī I̍ ke̍ ndu̍ wo̍, mɛ̄ɛ̍ ndu̍ ni̍.” Mbo̍ chūā bēe̍dīi̍yo̍. Mɛ̄ɛ̍ o̍ yi᷅ŋ o̍ lāmndo̍ ni᷄ŋ, mbo̍ kē Chu̍da̍sī, po̍ Sa̍i̍mɔ̄ŋ Īsīka̍a̍līɔ̄ɔ̄ wo̍. 27 Mɛ̄ɛ̍ Chu̍da̍sī bi̍ī dɔ̍ɔ̍ bēe̍dīi̍ ko̍ŋ mbo̍ dīā, mi̍ Sēta̍nā māsa̍ nyi̍nāā wɔ̄ɔ̍ŋnda̍ tūāl bɛ̍ɛ̍ ndu̍ kɔ̄ɔ̄lī. Mi̍ Chi̍i̍sū di̍mūl ndu̍ āā, “Nyɛ̄ ŋ̄ nɔ̄ le̍ tōsāa̍ wo̍, sē kɔ̍ ni̍ko̍ chɔ̍ chɔ̍ mā kɔ̍ to̍sā ndu̍.” 28 Bu̍ɛ̍īya̍ ā tūa̍a̍ kpo̍u̍, ā nda̍ wa̍ īchāli̍ nyɛ̍ dīa̍a̍ dīo̍o̍ wa̍, ā sīna̍ le̍ sa̍bū Chi̍i̍sū di̍mu̍l Chu̍da̍sī dīōmnda̍ŋ nda᷅ŋ ndo̍ le̍. 29 Chu̍da̍sī wa̍ wānā kɛ̍sīāā ŋ̄ka̍ni̍o̍o̍ ni̍. Le̍ he̍ī, mɛ̄ɛ̍ Chi̍i̍sū di̍mu̍l Chu̍da̍sī le̍nde̍, mi̍ bu̍ɛ̍īya̍ ā pūm ā yīya᷄ŋ māā vīōmɔ̄ɔ̍ Chi̍i̍sū wa̍ ndu̍ le̍ mbō kɔ̍ pi̍i̍ndūū nyɔ̄ɔ̍ŋ le̍ bɔ̄ŋa᷅ŋndo̍ ni̍, ɔ̄ɔ̄, māā vīōmɔ̄ɔ̍ o̍ wa̍ ndu̍ ni̍ le̍ mbō kɔ̍ ke᷅ wānāā tāmbɛ̍i̍ya̍ nyɛ̄ sɔ̄lāā pɔ̄mbɔ̄. 30 Mɛ̄ɛ̍ Chu̍da̍sī de᷅ dɔ̍ɔ̍ bēe̍dīi̍ Chi̍i̍sū ke̍ ndu̍ ko̍ŋ ndo̍, mbo̍ cha᷄ŋ le̍pi᷅lɛ̍ kpe̍ mbo̍ fūlā. Ndu̍yɛ̍, nyūmnda̍ŋ mā wa̍ ni᷅ŋ mā tūālāā.

Chi̍i̍sū dɔ̍ū sāwā sɛ̍nɛ̄īyo̍

31 Mɛ̄ɛ̍ Chu̍da̍sī fu̍la̍, mi̍ Chi̍i̍sū di̍mūl bu̍ɛ̍i̍yāā ndūa̍a̍ āā, “Te̍le̍ŋndo̍ fūūlu̍u̍ le̍ mī Mɛ̄lɛ̄ka̍ chɔ᷄m mɛ̄ɛ̍ wāna̍ nda̍ vēēlū āā, Po̍ Wa̍nā Pɔ̍nɔ̍ɔ̍ wo̍ ō chō wāna̍ kɔ̄ndɔ̄fi̍li̍ yɛ̍. Ndu̍yɛ̍ te̍le̍ŋndo̍ ho̍ō, ndu̍ Po̍ Wa̍nā Pɔ̍nɔ̍ɔ̍ chō chɔ̄m mɛ̄ɛ̍ Mɛ̄lɛ̄ka̍ chō wāna̍ kɔ̄ndɔ̄fi̍li̍ yɛ̍ ni̍. 32 Ndu̍yɛ̍, tē ō chɔ᷄m mɛ̄ɛ̍ Mɛ̄lɛ̄ka̍ chō wāna̍ kɔ̄ndɔ̄fi̍li̍ yɛ̍ pɛ̍, Mɛ̄lɛ̄ka̍ pi̍la̍ o̍ cho̍ chɔ̄m mɛ̄ɛ̍ ndu̍ Po̍ Wa̍nā Pɔ̍nɔ̍ɔ̍ chō wāna̍ kɔ̄ndɔ̄fi̍li̍ yɛ̍. Ndu̍yɛ̍, ō chō ke̍ŋ to̍sā su̍ŋ su̍ŋ. 33 Nya̍ chāāŋāā nīāā ka̍a̍lāa̍, le̍ te̍le̍ŋ bi̍ŋgī ko̍ni̍ ya̍ I̍ cho̍ ni᷅ŋ lātūlu̍ a̍ nya̍ ni̍. Lā chō ya̍ hūnɔ̄ɔ̄ nūūvīāā. Ndu̍yɛ̍, nyɛ̄ ya̍ I̍ di̍mu̍l Chu̍ūwa̍ wo̍, ndu̍ ko̍ni̍ ya̍ I̍ cho̍ nya̍ dīmūl ni̍. Ndu̍ yɔ̍nūŋ ni̍ māā, lā nɔ̍lā mī lā kūɛ̄ nāa̍ ya̍ I̍ cho̍ kɔ̄la̍ŋ nda̍ le̍. 34 Ndu̍yɛ̍, I̍ cho̍ nya̍ sāwā sɛ̍nɛ̄ī dōū, ndu̍ yɔ̍nūŋ ho̍ō ni̍ māā, lā kāāli̍āŋ ve᷅llāa̍ vēllē. Mɛ̄ɛ̍ ya̍ I̍ ka̍a̍la̍ nya̍ yɛ̍, le̍nde̍ nya̍ kāāli̍āŋ ve᷅llāa̍ vēllē ni̍. 35 Tē lā kāāli̍āŋ ve᷅llāa̍ vēllē pɛ̍, o̍ ko̍ŋ, wānā o̍ wānā si̍na̍ dɔ̍ɔ̍ māā bu̍ɛ̍i̍yāā nīa̍a̍ nya̍ chō ni̍.”

Chi̍i̍sū di̍mi̍ māā Pītɛ̍ cho̍ ndu̍ vīīnɔ᷄ŋ

36 O̍ ko̍ŋ kɔ̍ɔ̍lī, mi̍ Sa̍i̍mɔ̄ŋ Pītɛ̍ nyu̍nā āā, “Māsānɔ̄ɔ̍, kūɛ̍ɛ̍nɛ̍ ŋ̄ chō yɛ̄ kɔ̄la̍ŋ?” Mi̍ Chi̍i̍sū lo᷅ o̍ ko̍ŋ mbo̍ mūlī āā, “A̍ nɔ̍lā pɛ̍ŋgo̍o̍ ho̍ō mā tōl la̍ kɔ̄ɔ̄lī nāa̍ ya̍ I̍ cho̍ kɔ̄la̍ŋ nda̍ le̍. Kɛ̍ ndu̍yɛ̍, tē bōōndi̍i̍ ti̍ŋ Ī hīōū pɛ̍, ā tūāl ni̍ŋ ya̍ kɔ̄ɔ̄lī.” 37 Mi̍ Pītɛ̍ lo᷅ o̍ ko̍ŋ mbo̍ nyūnā Chi̍i̍su̍ āā, “Māsānɔ̄ɔ̍, ɔ̍ɔ̄ le̍ sa̍bū ya̍ I̍ nɔ̍lā nu̍m tōlɔ̄ɔ̄ kɔ̄ɔ̄lī pɛ̄ŋgo̍o̍ ho̍ō le̍ wo̍? I̍ cho̍ ō bɛ̄ɛ̄ndīa̍ŋ mī I̍ vi᷅ le̍ nūm.” 38 Mɛ̄ɛ̍ Pītɛ̍ so̍ō le̍nde̍, mi̍ Chi̍i̍sū lo᷅ o̍ ko̍ŋ mbo̍ nyūnā ndu̍ āā, “Lēkɛ̍ndɛ̍ī ā chō ō bɛ̄ɛ̄ndīa̍ŋ mā vī le̍ ya̍?” Āā, “Mī di̍mu̍l nu̍m tōnya̍a̍ wa̍la̍ŋ, sɔ̄ɔ̍ cho̍ ko̍o̍wā le̍ mā vi̍i̍nu̍ŋ le̍ ya̍a̍ māā a̍ si̍nā ya̍ le̍.”

Chɔ᷄ŋ 14

Mɛ̄ɛ̍ Wānā lo̍o̍kū la̍kɔ̍ o̍ Mɛ̄lɛ̄ka̍ Fi̍nyāa̍ lo̍ yɛ̍

1 Mi̍ Chi̍i̍sū di̍mūl bu̍ɛ̍i̍yāā ndūa̍a̍ āā, “Lā wa᷅ a̍ kɔ̄ltā tāmbɛ̍i̍ le̍. Lā dɔ̄u̍ ti̍i̍nda᷄ŋ nyāa̍ o̍ Mɛ̄lɛ̄ka̍ ni᷄ŋ, ndu̍yɛ̍, mī lā dɔ̄ū vɛ̄lɛ̄ tīīnda᷄ŋ nyāa̍ o̍ ya̍ ni̍ŋ. 2 Chīɛ̍i̍ Fi̍nyā nūu̍ nɔ̄ yīya̍la̍ŋ ta̍u̍. Ndu̍yɛ̍, I̍ cho̍ lākɔ̄ yīya̍la̍ŋ bɛ̄ɛ̄ndīāā le̍ nya̍. Tē ndi̍ i̍i̍ ve̍ le̍nde̍ le̍, ya̍ i̍i̍ di̍mūl nya̍ le̍nde̍ le̍. 3 Ndu̍yɛ̍, tē I̍ kɔ̍ chi̍ī yīya̍la̍ŋ bɛ̄ɛ̄ndīāā pɛ̍, I̍ cho̍ mīīŋgū mī I̍ hu̍ŋ kɔ᷅ a̍ nya̍ le̍ mī ŋ̄ wa̍ na̍a̍ nya̍ā nāa̍ ya̍ I̍ wa᷅ ni̍ŋ nda̍. 4 Lā sīnā nɛ̍īyo̍ le̍ kɔ̄la̍ŋ o̍ fo̍ndāŋ ya̍ I̍ cho̍ kɔ̄la̍ŋ ndo̍.” 5 O̍ ko̍ŋ kɔ̍ɔ̍lī, mi̍ Tɔ̄mɔ̍si̍ di̍mūl Chi̍i̍sū āā, “Māsānɔ̄ɔ̍, ŋ̄ si̍nā na̍a̍ ŋ̄ chō kɔ̄la̍ŋ nda̍ le̍. Mī vɛ̄ɛ̄ na̍a̍ ŋ̄ lōōku̍ yɛ̄ nɛ̄īyo̍ sīnā le̍ kɔ̄la̍ŋ lo̍ŋ?” 6 Mi̍ Chi̍i̍sū lo᷅ lo̍ŋ mbo̍ dīmūl ndu̍ āā, “Ya̍ cho̍ nɛ̄īyo̍ ni̍, a̍ tōnya̍a̍, a̍ yōōmōo̍. Wānā o̍ wānā nɔ̍lā mbō fu̍u̍lu̍u̍ nāa̍ Mɛ̄lɛ̄ka̍ Fi̍nyāa̍ chūā le̍ mɛ̄ɛ̍ o̍ sa̍bū nūu̍ ni᷄ŋ. 7 Mɛ̄ɛ̍ nya̍ sīna̍ ni᷅ŋ nu̍a̍ā wāna̍ ya̍ I̍ cho̍ wo̍ yɛ̍, lā chō wāna̍ Fi̍nyā nūu̍ bɛ̍ɛ̍ o̍ cho̍ wo̍ si̍nā. Ndu̍yɛ̍, chɔ̍ŋ ni᷅ŋ a̍ bōōnde̍i̍ he̍ī, lā sīnā ni᷅ŋ ndu̍, ndu̍yɛ̍, lā chē ni᷅ŋ ndu̍.” 8 O̍ ko̍ŋ kɔ̍ɔ̍lī, mi̍ Fi̍li̍pī di̍mūl Chi̍i̍su̍ āā, “Māsānɔ̄ɔ̍, to̍sa̍ mī ŋ̄ chē Mɛ̄lɛ̄ka̍ Fi̍nyāa̍. Ko̍ŋ wa᷅ le̍tu̍u̍.” 9 Mi̍ Chi̍i̍sū mu̍lī āā, “Fi̍li̍pī, le̍ te̍le̍ŋ vi̍lɛ̄ī ni᷅ŋ na̍a̍ nya̍ā ŋ̄ chō hɔ̄lāā tūlu̍. Bāā ho̍ō kpo̍u̍ a̍ si̍na̍ wɔ̍ wa᷅na̍ ya̍ I̍ cho̍ wo̍ le̍?” Mbo̍ dīmī āā, “Wānā o̍ wāna̍ che᷅ ya̍ pɛ̍, mɛ̄ɛ̍ ō chīi̍ Fi̍nyā nūu̍ chɔ̄. Ɔ̍ɔ̄ le̍ sa̍bū ŋ̄ dīmī vɛ̍lɛ̄ māā, Chɔ̍m na̍a̍ Mɛ̄lɛ̄ka̍ Fi̍nyāa̍ wo̍? 10 Fi̍li̍pī, bāā a̍ la̍a̍la̍ŋ māā ya̍ ni̍, fi̍nyā nūu̍ ni̍, māā nyɔ̄ɔ̍ ō pīlɛ̍ le̍ na̍a̍ ŋ̄ chō le̍? Dīōmndā ya̍ I̍ di̍mu̍l nya̍ la᷅ŋ nda̍ŋ, I̍ di̍mi̍ la̍ŋ o̍ kpāāya̍ ni̍ ya̍ pi̍la̍ ni̍ŋ te̍. Mɛ̄lɛ̄ka̍ Fi̍nyāa̍ o̍ cho̍ ya̍ kɔ̄ɔ̄lī wo̍, ndu̍ pi̍la̍ cho̍ wa̍li̍ ndɔ̄ɔ̍ tōsāa̍ ni̍. 11 Tē I̍ di̍mu̍l nya̍ pɛ̍ māā ya̍ ni̍, Fi̍nyā nūu̍ ni̍, māā nyɔ̄ɔ̍ ō pīlɛ̍ na̍a̍ ŋ̄ chō ni̍, lā lāāla̍ŋ a̍ ya̍. Kɛ̍ ndu̍yɛ̍, ā yɔ᷄ŋ bɛ̍ɛ̍ mī dīōmndā ya̍ I̍ di̍mu̍l nya̍ la̍ŋ mī la̍ŋ la̍ to̍sa̍ mī lā lāāla̍ŋ a̍ ya̍ le̍, ō wa̍ bɛ̍ɛ̍ le̍ wa̍lta̍ kɔ̄ndɔ̄fi̍ltā ya̍ I̍ to̍sa̍ la̍ŋ su̍e̍e̍, lā lāāla̍ŋ. 12 Mī di̍mu̍l nya̍ tōnya̍a̍ wa̍la̍ŋ, wānā o̍ wāna̍ dɔ̍ū tīīnda᷄ŋndo̍ o̍ ya̍ ni̍ŋ pɛ̍, wa̍lta̍ kɔ̄ndɔ̄fi̍ltā ya̍ I̍ to̍sā la̍ŋ, wānā ko̍ŋ chō la̍ŋ tōsā. Wānā ko̍ŋ chō wa̍lta̍ bɛ̍ndū tōsā mbō hīōū bɛ̍ɛ̍ la᷅ŋ, kāni̍ fo̍ndōle̍, ya̍ ya̍ I̍ cho̍ lākɔ̄nɔ᷄ŋ nāa̍ Fi̍nyā nūu̍ chūā. 13 Ndu̍yɛ̍, o̍ ko̍ŋ kɔ̍ɔ̍lī, nyɛ̄ o̍ nyɛ̄ nya̍ nyūna̍ le̍ ndu̍ a̍ dīōlā nīla̍ŋ pɛ̍, tōsāa̍ ya̍ I̍ to̍sāl nya̍ ni̍. Kāni̍ fu̍u̍le̍, le̍ mī Po̍ Mɛ̄lɛ̄ka̍a̍ tōsa̍ mī wāŋnda̍ chē mɛ̄ɛ̍ Mɛ̄lɛ̄ka̍ chō wāna̍ kɔ̄ndɔ̄fi̍li̍ yɛ̍. 14 Nyɛ̄ o̍ nyɛ̄ lā nyūna̍ le̍ ndu̍ a̍ dīōlā nīla̍ŋ pɛ̍, tōsāa̍ ya̍ I̍ to̍sā ni̍.”

Chi̍i̍sū chu̍e̍l bu̍ɛ̍īya̍ būŋgɛ̄i̍ le̍ Nyi̍na̍ Kāsīo̍o̍ vīōmɔ̄ɔ̍

15 Mi̍ Chi̍i̍sū di̍mī āā, “Tē lā kāāla̍ ya̍ pɛ̍, mɛ̄ɛ̍ lā chō sāwāla̍ nīla̍ŋ chūā. 16 Ndu̍yɛ̍ o̍ ko̍ŋ kɔ̍ɔ̍lī, I̍ nɔ̍lā mī di̍mu̍l Fi̍nyā nūu̍ mbō ke̍ nya̍ Wānā Ma̍lāā chēle̍ŋ mbō wa̍ a̍ nya̍ la̍tu̍lu̍ le̍ fɛ̍ɛ̍ŋ a̍ fɛ̍ɛ̍ŋ. 17 Ndu̍ Nyi̍na̍ Mɛ̄lɛ̄ka̍a̍, ndu̍ chɔ᷅m wa᷅ŋnda̍ tōnya̍ cho̍ a̍ Mɛ̄lɛ̄ka̍ o̍kɔ̄ɔ̄ wo̍ ni̍. Kɛ̍ ndu̍yɛ̍, wānāa̍ do̍ū ti̍i̍nda᷄ŋ ndāa̍ o̍ Mɛ̄lɛ̄ka̍ ni᷄ŋ te̍ wa̍, ō tu᷅l nda̍ kɔ̄ɔ̄lī le̍. Kāni̍ fu̍u̍le̍, ā chi᷅ ndu̍ le̍, ndu̍yɛ̍, ā si̍nā ndu̍ le̍. Kɛ̍ ndu̍yɛ̍, nya̍ nya̍ sīnā ndu̍ ni᷅ŋ, kāni̍ fo̍ndōle̍, ō chō a̍ nya̍ la̍tu̍lu̍. Ndu̍yɛ̍, ō chō wā nya̍ kɔ̄ɔ̄lī. 18 “Kɔ̄lā ya̍ I̍ cho̍ la̍ŋ, I̍ cho̍ nya̍ mɛ̄ī nya̍ kpe̍e̍le̍ le̍. I̍ cho̍ hūnɔ̄ɔ̄ nāa̍ nya̍ chūā. 19 Te̍le̍ŋndo̍ ō bīŋgī ko̍ni̍ lo̍ ni᷅ŋ ni̍, o̍ ko̍ŋ, wānāa̍ do̍u̍ ti̍i̍nda᷄ŋ ndāa̍ o̍ Mɛ̄lɛ̄ka̍ ni᷄ŋ te̍ wa̍, ā chi᷅ lɛ̍ ni̍ŋ ya̍ le̍. Kɛ̍, nya̍ nya̍ lā chō vɛ̄lɛ̄ ya̍ chɔ̄. Ndu̍yɛ̍, mɛ̄ɛ̍ ya̍ I̍ cho̍ yōōmū yɛ̍, nya̍ bɛ̍ɛ̍ lā chō wā yōōmū. 20 Ndu̍yɛ̍, tē pāa̍le̍ le̍ŋ lē fūūlu̍u̍ pɛ̍, lā chō hūnɔ̄ɔ̄ sīnā māā ya̍ ni̍, Fi̍nyā nūu̍ ni̍, māā nyɛ̄ pīlɛ̍ na̍a̍ ŋ̄ chō ni̍. Ndu̍yɛ̍ o̍ ko̍ŋ kɔ̍ɔ̍lī, mī lā sīna̍ māā ya̍ ni̍, nya̍ ni̍, māā nyɛ̄ pīlɛ̍ na̍a̍ ŋ̄ chō ni̍. 21 “Wānā o̍ wāna̍ chu̍a̍ sāwāla̍ nīla̍ŋ pɛ̍, mɛ̄ɛ̍ ndu̍ ka̍a̍la̍ ya̍ ni̍. Ndu̍yɛ̍, wānā o̍ wāna̍ ka̍a̍la̍ ya̍ pɛ̍, kāālāa̍ Fi̍nyā nūu̍ ō kāālā wa̍nā ko̍ŋ ni̍. Ya̍ bɛ̍ɛ̍ I̍ cho̍ wānā ko̍ŋ kāālā, ndu̍yɛ̍, mī I̍ chɔ̍mnu̍ŋ ndu̍.” 22 O̍ ko̍ŋ kɔ̍ɔ̍lī, mi̍ Chu̍da̍sī nyu̍nā, kɛ̍, ō cho̍ Chu̍da̍sī Īsīka̍a̍līɔ̄ɔ̄ le̍. Mbo̍ nyūnā āā, “Māsānɔ̄ɔ̍, vɛ̄ɛ̍nɛ̍ ŋ̄ chɔ̍mnu̍ŋ yɛ̍ ni̍ŋ na̍a̍, kɛ̍, a̍ chɔ̍mnūŋ wa̍nāa̍ do̍u̍ ti̍i̍nda᷄ŋndo̍ o̍ Mɛ̄lɛ̄ka̍ ni᷄ŋ te̍ wa̍ le̍ nɛ̍?” 23 Mi̍ Chi̍i̍sū mu̍lī āā, “Wānā o̍ wāna̍ ka̍a̍la̍ ya̍ pɛ̍, chūa̍a̍ o̍ chu̍ā pɛ̍ɛ̍kūlā nīla̍ŋ ni̍. Ndu̍yɛ̍, wānā ko̍ŋ, Fi̍nyā nūu̍ chō ndu̍ kāālā. O̍ ko̍ŋ kɔ̍ɔ̍lī, ya̍ ni̍, Fi̍nyā nūu̍ ni̍, ŋ̄ nɔ̄lā mī ŋ̄ hīŋ nāa̍ ndu̍ chu̍a̍ mī ŋ̄ wa̍ lātūlu̍ na̍a̍ nda̍ā. 24 Wānā o̍ wāna̍ ka̍a̍la̍ ya̍ le̍, ō chu̍ē pɛ̍ɛ̍kūlā nīla̍ŋ te̍. Mɛ̄lɛ̄ka̍ Fi̍nyāa̍ o̍ ve᷅m ya̍ wo̍, ndu̍ ve᷅m ya̍ la̍ŋ dīmī ni̍. 25 “Dīōmndā ya̍ I̍ di̍mu̍l nya̍ la᷅ŋ nda̍ŋ, I̍ di̍mu̍l nya̍ la̍ŋ pɔ̄ɔ̄ bōōndi̍i̍ ya̍ I̍ cho̍ wɔ̄ he̍ī a̍ nya̍ la̍tu̍lu̍ ve̍. 26 Mɛ̄lɛ̄ka̍ Fi̍nyāa̍ chō nya̍ Wānā Ma̍lāa̍ vīm, ndu̍ yɔ̍nūŋ māā Nyi̍na̍ ndɔ̄ɔ̍ ni̍. Ō chō ndu̍ vīōmɔ̄ɔ̄ a̍ dīōlā nīla̍ŋ. Ō hīŋ pɛ̍, nyɛ̄ o̍ nyɛ̄ nya̍ nɔ̄ le̍ sīnāa̍, ō chō nya̍ mu̍ŋ pɛ̄ɛ̄kū kpo̍u̍. Ndu̍yɛ̍, nyɛ̄ o̍ nyɛ̄ ya̍ I̍ di̍mu̍l nya̍, ō chō nya̍ yīyāla᷄ŋ. 27 “Kɔ̄l nyūlōo̍ ya̍ I̍ cho̍ nya̍ mēl ni̍. Kɔ̄l nyūlū ya̍ I̍ nɔ̍ wo̍, ndu̍ ya̍ I̍ cho̍ nya̍ kē ni̍. Kɔ̄l nyūlū kōŋ, chi̍e̍ēŋndo̍ ō nɔ̍lā mbō ke̍ nya̍ ndu̍ le̍. Lā wa᷅ a̍ kɔ̄ltā tāmbɛ̍i̍ le̍. Ndu̍yɛ̍, lā yɔ᷅ŋ īsīōōŋ tē. 28 Lā tūēī mi̍ I̍ di̍mūl nya̍ māā I̍ cho̍ lākɔ̄nɔ᷄ŋ. Kɛ̍ ndu̍yɛ̍, I̍ cho̍ vɛ̄lɛ̄ mīīŋgū nya̍ o̍ ībūŋ. Ndu̍yɛ̍, tē nya̍ a̍a̍ ka̍a̍la̍ ya̍ lēkɛ̍ndɛ̍ī pɛ̍, mɛ̄ɛ̍ lā wa̍ wā a̍ kɔ̄l kɛ̄ndɛ̄ le̍ tūēīyɔ̄ɔ̍ māā I̍ cho̍ kɔ̄la̍ŋ nāa̍ Fi̍nyā nūu̍ chūā. Kāni̍ fo̍ndōle̍, Fi̍nyā nūu̍ ndu̍ hi̍o̍ū a̍ ya̍. 29 I̍ di̍mu̍l pɔ̄ɔ̄ nya̍ sɔ̄ɔ̍ŋ mu᷅ŋ pɛ̄ŋgo̍o̍ ho̍ō lɔ̍ɔ̍ ŋ̍ yɔ̍nu̍ŋ ndɔ̍ le̍ wo̍ŋ. O̍ ko̍ŋ, tē ŋ̄ yɔ̄nu̍ŋ pɛ̍, lā lāāla̍ŋ māā nyɛ̄ ya̍ I̍ di̍mi̍ wo̍ chō tōnya̍. 30 I̍ nɔ̍ lɛ̍ te̍le̍ŋ bɔ̍ɔ̍ le̍ hīōūwɔ̄ɔ̍ lāchī a̍ sūūki̍āŋndo̍ na̍a̍ nya̍ le̍. Kāni̍ fo̍ndōle̍, wāna̍ cho̍ māsāa̍ le̍ chi̍e̍ēŋndo̍ ho̍ō wo̍ chō hūnɔ̄ɔ̍. Kɛ̍ ō nɔ̍lā ya̍ nyɛ̄ o̍ nyɛ̄ yɔ̄ŋ te̍. 31 Sɔ̄ɔ̍ŋ mu᷅ŋ ŋ̄ nɔ̄ le̍ yɔ̄nɔ᷄ŋndo̍. O̍ ko̍ŋ, mī chi̍e̍ēŋndo̍ sīna̍ māā I̍ ka̍a̍la̍ Fi̍nyā nūu̍, ndu̍yɛ̍, māā nyɛ̄ o̍ di̍mu̍l la̍ le̍ tōsāa̍ wo̍ māā ndu̍ ki̍nɛ̍i̍ ko̍ni̍ ya̍ I̍ to̍sa̍ ni̍. “Lā chɔ᷄ŋ ŋ̄ fāŋa̍ŋ o̍ fo̍ndāa̍ ho̍ō.”

Chɔ᷄ŋ 15

Chi̍i̍sū di̍mi̍ māā ō chō māchūāā mɛ̄ɛ̍ tɔ̄lɔ̄ɔ̍ chō yɛ̍

1 Mi̍ Chi̍i̍sū di̍mu̍l vɛ̄lɛ̄ bu̍ɛ̍i̍yāā ndūa̍a̍, āā, “I̍ cho̍ māchūāā mɛ̄ɛ̍ tɔ̄lɔ̄ɔ̄ kpe̍e̍kpe̍i̍yo̍ chō nu̍a̍ā yɛ̍. Fi̍nyā nūu̍ ndu̍ cho̍ māchūāā māā wāna̍ ma̍ndā tɔ̍lɔ̄ɔ̍ wo̍. 2 Lɛ̄vīi̍ wa̍ o̍ ya̍ mī ī kɛ̄ɛ̍ le̍ kōmɔ̄ɔ̍ pɛ̍, Fi̍nyā nūu̍ fāŋa̍ ndi̍. Lɛ̄vīi̍ ku̍ām ko̍mɔ̄ɔ̄ kɛ̄ndɔ̄ɔ̍ ve̍, ndi̍ ndi̍ mbō kēlū ndi̍ ī ti᷄ŋ lēchōo̍ mbō bɛ̄ɛ̄ndi̍a̍a̍ ndi̍ nyɛ̄ kɛ̄ndɛ̍ī le̍ mī ī chɔ̄ɔ̄lu̍ kōmɔ̄ɔ̄. 3 Dīōmndā ya̍ I̍ so̍ō nāa̍ nya̍ chūā lāŋ, lā bɛ̄ɛ̄ndi̍a̍a̍ ni᷅ŋ nya̍ nyɛ̄ kɛ̄ndɛ̍ī. 4 Tē lā hīōū lāchī a̍ wāa̍ ā mɔ̄ɔ̄sa᷅ŋ a̍ ya̍ pɛ̍, ya̍ bɛ̍ɛ̍ I̍ hi̍o̍ū lāchī a̍ wāa̍ ō mɔ̍ɔ̄sa᷅ŋ a̍ nya̍. Tē lɛ̄vīī tɔ̄lɔ̄ɔ̍ ī ve̍ i̍ mɔ̍ɔ̄sa᷅ŋ a̍ tɔ̄lɔ̄ɔ̄ bɛ̄ŋgo̍o̍ le̍, lɛ̄vīī kēŋ ī ku᷅m te̍. Le̍ mī lɛ̄vīī tɔ̄lɔ̄ɔ̍ ī kōm, mɛ̄ɛ̍ mī ī hīōū lāchī a̍ wāa̍ ī mɔ̄ɔ̄sa᷅ŋ a̍ tɔ̄lɔ̄ɔ̄ bɛ̄ŋgo̍o̍. Le̍nde̍ ko̍ni̍ nya̍ bɛ̍ɛ̍ nya̍ chō ni̍. Le̍ mī lā yɔ̄ŋgu̍ kōmɔ̄ɔ̍ mɛ̄ɛ̍ mī lā hīōū lāchī a̍ wāa̍ ā mɔ̄ɔ̄sa᷅ŋ a̍ ya̍. 5 “Ya̍ I̍ cho̍ māchūāā mɛ̄ɛ̍ tɔ̄lɔ̄ɔ̍ chō nu̍a̍ā yɛ̍. Nya̍ nya̍ chō māchūāā mɛ̄ɛ̍ lɛ̄ūwo̍ŋ ŋ̄ chō yɛ̍. Tē wāŋndo̍ hīōū lāchī a̍ wāa̍ ō mɔ̄ɔ̄sa᷅ŋ a̍ ya̍ pɛ̍, ndu̍yɛ̍, mī ya̍ I̍ hi̍o̍ū lāchī a̍ wāa̍ ō mɔ̄ɔ̄sa᷅ŋ a̍ ndu̍ pɛ̍, ō nɔ̄lā mbō yɔ̄ŋgu̍ kōmɔ̄ɔ̄ kɛ̄ndɔ̄ɔ̍ ta̍u̍. Kāni̍, tē ō cho̍ ya̍ le̍, lā nɔ̍lā mī lā tōsa̍ nyɛ̄ o̍ nyɛ̄ le̍. 6 Ndu̍yɛ̍, ī chō yɔ̄nɔ᷄ŋ mɛ̄ɛ̍ nda̍ kīālū nu̍a̍ā lɛ̄vīī tɔ̄lɔ̄ɔ̍, mā vīōū ndi̍, mī ī vēsa̍ yɛ̍. Tē lɛ̄ūwūŋ wāā le̍ndo̍ŋ ŋ̄ vēsa̍ yɛ̄ pɛ̍, wāŋnda̍ hu᷄ŋ chɔ̍ɔ̍vīāā ā kɔ̍ dɔ̍ū o̍ yīŋ, ŋ̄ ŋūɛ̄. Le̍nde̍ i̍ cho̍ yɔ̄nɔ᷄ŋ a̍ wānāa̍ hi̍ū la̍chi̍ a̍ wāa̍ ā mɔ̄ɔ̄sa᷅ŋ a̍ ya̍ le̍ wa̍ ni̍. 7 Tē lā hīōū lāchī a̍ wāa̍ ā mɔ̄ɔ̄sa᷅ŋ a̍ ya̍ pɛ̍, mī dīōmndā nīla̍ŋ lā hīōū lāchī a̍ wāa̍ o̍ nya̍ ni̍ŋ pɛ̍, lā nɔ̄lā mī lā nyūna̍ Fi̍nyā nūu̍ le̍ nyɛ̄ o̍ nyɛ̄ nya̍ yēēma̍, ndu̍yɛ̍, kīo̍o̍ o̍ ke᷅ nya̍ ni̍. 8 Tē lā yɔ̄ŋgu̍ kōmɔ̄ɔ̄ kɛ̄ndɔ̄ɔ̍ pɛ̍ ta̍u̍, mɛ̄ɛ̍ o̍ nɛ̄īyo̍ ho̍ō ni᷄ŋ lā chɔ᷄m wāŋnda̍ māā bu̍ɛ̍i̍yāā nīa̍a̍ nya̍ chō ni̍. Ndu̍yɛ̍, o̍ he̍ī ni᷄ŋ ko̍ni̍ nya̍ tōsā ni̍ mī wāŋnda̍ chē mɛ̄ɛ̍ Fi̍nyā nūu̍ chō wāna̍ kɔ̄ndɔ̄fi̍li̍ yɛ̍. 9 Mɛ̄ɛ̍ Mɛ̄lɛ̄ka̍ Fi̍nyā nūu̍ kāāla̍ ya̍ yɛ̍, le̍nde̍ ko̍ni̍ ya̍ I̍ ka̍a̍la̍ nya̍ ni̍. Lā hīo̍u̍ la̍chi̍ a̍ wāa̍ o̍ kāālā nūu̍ bɛ̄ŋgu̍. 10 Tē lā chu̍a̍ sāwāla̍ nīla̍ŋ pɛ̍, mɛ̄ɛ̍ lā chō hīōūwɔ̄ɔ̄ lāchī a̍ wāa̍ o̍ kāālā nūu̍ bɛ̄ŋgu̍. Mɛ̄ɛ̍ ya̍ I̍ chu̍a̍ sāwāla̍ Fi̍nyā nūu̍, mi̍ I̍ wa᷅ hīōūwɔ̄ɔ̍ lāchī a̍ wāa̍ o̍ kāālā ndɔ̄ɔ̍ bɛ̄ŋgu̍ yɛ̍. 11 “Dīōmndā ya̍ I̍ di̍mu̍l nya̍ la᷅ŋ nda̍ŋ, I̍ di̍mu̍l nya̍ la̍ŋ kpo̍u̍ le̍ mī lā sɔ̄la̍ kɔ̄l kɛ̄ndɛ̍ cho̍ ya̍ ni᷄ŋ ndo̍, ndu̍yɛ̍ mī kɔ̄l nyā kɛ̍ndɔ̄ɔ̍ fūūlu̍u̍ mɛ̍ɛ̄. 12 Lā kāāli̍āŋ ve᷅llāa̍ vēllē mɛ̄ɛ̍ ya̍ I̍ ka̍a̍la̍ nya̍ yɛ̍. Sāwa̍ nūu̍ cho̍ ho̍ō le̍ nya̍ ni̍. 13 Kāālā o̍ kāālā hīu̍ lɛ̍ ho̍ō le̍, ō wāŋndo̍ kāālā ndi̍a̍a̍mɔ̍ɔ̍wa̍a̍ ndūa̍a̍, o̍ ko̍ŋ kɔ̍ɔ̍lī mbō sɔ̄la̍ pīɔ̍mndo̍ le̍ nda̍ wo̍. 14 Tē lā tōsa̍ nyɛ̄ ya̍ I̍ di̍mu̍l nya̍ wo̍ pɛ̍, mɛ̄ɛ̍ ndi̍a̍a̍mɔ̍ɔ̍wa̍a̍ nīa̍a̍ nya̍ chō ni̍. 15 I̍ cho̍ lɛ̍ nya̍ vēēlū āā bu̍ɛ̍i̍yāā nī le̍. Kāni̍ fu̍u̍le̍, bu̍ɛ̍īyo̍ ō chi̍ī nyɛ᷅ ma̍sānɔ̄ ndɔ̄ɔ̍ kɛ̄ɛ̄sīāā le̍ tōsāa̍ wo̍ sīnā le̍. I̍ ve̍e̍lū ni᷅ŋ ma̍ve̍e̍lāā nya̍ āā ndi̍a̍a̍mɔ̍ɔ̍wa̍a̍ nīa̍a̍. Kāni̍ fu̍u̍le̍, I̍ bi̍ī mi̍ chɔ᷅m nya̍ nyɛ̄ o̍ nyɛ̄ Fi̍nyā nūu̍ ō dīmu̍l la̍. 16 Ō cho̍ nya̍ le̍ hɛ̍li̍ ya̍ le̍. Ya̍ hɛ̍li̍ nya̍ ni̍, mi̍ ke᷅ nya̍ wa̍li̍ kpe̍e̍kpe̍i̍ le̍ tōsāa̍. Ndu̍ yɔ̍nu̍ŋ ni̍ māā, mī lā yɔ̍ŋgu̍ kōmɔ̄ɔ̍ o̍ cho̍ le̍ fɛ̍ɛ̍ŋ a̍ fɛ̍ɛ̍ŋ ndo̍. O̍ ko̍ŋ, nyɛ̄ o̍ nyɛ̄ tē lā nyūna̍ Fi̍nyā nūu̍ le̍ ndu̍ a̍ dīōlā nīla̍ŋ pɛ̍, kīo̍o̍ o̍ ke᷅ nya̍ ni̍. 17 Le̍la̍ŋ, sāwa̍ ya̍ I̍ cho̍ nya̍ dōū wo̍, ndu̍ cho̍ ho̍ō ni̍, māā lā kāāli̍āŋ ve᷅llāa̍ vēllē.”

Sa̍bū wānāa̍ cho̍ le̍ chi̍e̍ēŋndo̍ wa̍ ā tu᷄l wānāa̍ Chi̍i̍sūa̍a̍ lēyɛ̄ wo̍

18 “Wānāa̍ cho̍ le̍ chi̍e̍ēŋndo̍ wa̍ ā chō nya̍ yɛ̄le̍ŋ tūl. Kɛ̍ ndu̍yɛ̍, tē ā tu᷄l nya̍ lēyɛ̄ pɛ̍, lā lōōnu̍ŋ māā ya̍ fɛ̍lɛ̍ŋ nda̍ tu᷄l lēyɛ̄. 19 Tē nya̍ a̍a̍ wa̍ le̍ chi̍e̍ēŋndo̍ pɛ̍, wānāa̍ cho̍ le̍ chi̍e̍ēŋndo̍ wa̍, ā wa̍ nya̍ kāālā māā wānāā ndā. Kɛ̍ ndu̍yɛ̍, I̍ hɛ̍li̍ nya̍ le̍ mī lā sōli̍ bāla̍ŋ o̍ sɔ̄ɔ̍ŋ chi̍e̍ēŋndo̍ŋ ni᷄ŋ. Le̍ he̍ī lā cho̍ lɛ̍ le̍ chi̍e̍ēŋndo̍ le̍. Le̍ sa̍bōo̍ ho̍ō nda̍ tu᷄l nya̍ lēyɛ̄ ni̍. 20 Lā lōōnu̍ŋ a̍ dīōm ya̍ I̍ di̍mu̍l nya̍ wo̍. Mi̍ di̍mūl nya̍ māā chīɔ̍ɔ̍ ō cho̍ o̍ bɛ̍ndū mbō hīōū wāna̍ o̍ cho̍ o̍ bā wo̍ le̍. Mɛ̄ɛ̍ nda̍ tūsi̍ ya̍ nyɛ̄ pālāa̍ chōo̍ yɛ̍, le̍nde̍ ko̍ni̍ nda̍ chō nya̍ nyɛ̄ pālāa̍ tūsī chōo̍ ni̍. Mɛ̄ɛ̍ nda̍ chu̍a̍ pɛ̄ɛ̄kūlā nīla̍ŋ yɛ̍, le̍nde̍ ko̍ni̍ nda̍ chō pɛ̄ɛ̄kūlā nyāla̍ŋ chūā ni̍. 21 Ā chō mu᷅ŋ ki̍nɛ̍i̍ to̍sā a̍ nya̍ le̍ mɛ̄ɛ̍ nya̍ chō bu̍ɛ̍i̍yāā nīa̍a̍ yɛ̍, ndu̍yɛ̍ vɛ̄lɛ̄, le̍ mɛ̄ɛ̍ nda̍ si̍nā wa᷅na̍ ve᷅m ya̍ wo̍ le̍ yɛ̍. 22 Tē ya̍ i̍i̍ hi̍ŋ kpo̍so̍ŋ mi̍ hu̍ŋ so̍ō nāa̍ nda̍ chūā le̍, mɛ̄ɛ̍ tɔ̍ɔ̍ya̍ŋ ve̍ wa᷅ nda̍ chōo̍ le̍ yɔ̄ŋndā ndāla̍ wɔ̍ɔ̍ŋnda̍ŋ te̍. Kɛ̍ ndu̍yɛ̍, I̍ hi᷅ŋ mi̍ hu̍ŋ so̍ō nāa̍ nda̍ chūā. Le̍la̍ŋ, ā nɔ̍lā lɛ̍ mā dīmi̍ māā ā sīna̍ pɛ̍ŋgu̍ māā yɔ̄ŋ wɔ̄ɔ̍ŋ te̍ le̍ nda̍ tōsa̍ le̍. 23 Wānā o̍ wāna̍ tu̍l la̍ lēyɛ̄ pɛ̍, mɛ̄ɛ̍ ō cho̍ ko̍ ya̍ le̍ o̍ tu̍l lēyɛ̄ le̍, mɛ̄ɛ̍ ō tu᷄l Fi̍nyā nūu̍ bɛ̍ɛ̍ le̍yɛ̍. 24 I̍ hi᷅ŋ mi̍ to̍sā sɔ̄ɔ̍ŋ kɔ̄ndɔ̄fi̍llo̍ŋ mu᷅ŋ nda̍ o̍ hɔ̄l ŋ̄ wānā o̍ wānā che᷅le̍ŋ to̍sa̍ wɔ̍ le̍ wo̍ŋ. Tē ya̍ i̍i̍ to̍sa̍ le̍nde̍ le̍, tɔ̍ɔ̍ya̍ŋ yɔ̄ŋndā ndāla̍ wɔ̍ɔ̍ŋnda̍ŋ ō ve̍ wa᷅ nda̍ chōo̍ le̍. Ā chē sɔ̄ɔ̍ŋ kɔ̄ndɔ̄fi̍li̍ŋ ya̍ I̍ to̍sa̍ wo̍ŋ. Kɛ̍ o̍ ko̍ŋ ni̍ŋ kpo̍u̍, ma̍ tūl la̍ lēyɛ̄ na̍a̍ Fi̍nyā nūu̍. 25 Kɛ̍ ndu̍yɛ̍, mɛ̄ɛ̍ mī ī yɔ̄nu̍ŋ le̍nde̍ le̍ mī nyɛ̍ cho̍ ō pōōnyīāā o̍ yāu̍ nda̍ lāsāwāa̍ ni᷄ŋ ndo̍ ō yɔ̄nu̍ŋ. Ī chō ī pōōnyīāā āā, ‘Fo̍ndō fu̍u̍ nda̍ tu᷄l la̍ lēyɛ̄ ni̍.’ 26 “I̍ cho̍ nya̍ wānā ma̍lāa̍ yɔ̄ŋ, chɔ̄nɔ᷄ŋndo̍ nāa̍ Fi̍nyā nūu̍ chūā. Nyi̍na̍ chɔ᷅m ko̍ŋ wa᷅ŋnda̍ tōnya̍ cho̍ a̍ Mɛ̄lɛ̄ka̍ o̍kɔ̄ɔ̄ wo̍ wo̍, o̍ cho̍ chɔ̄nɔ᷄ŋndo̍ o̍ Mɛ̄lɛ̄ka̍ Fi̍nyāa̍ lo̍ wo̍, tē ō hīŋ pɛ̍, ndu̍ cho̍ hūnɔ̄ɔ̄ wāŋnda̍ dīmūl a̍ ya̍ o̍kɔ̄ɔ̄ ni̍. 27 Ndu̍yɛ̍, nya̍ bɛ̍ɛ̍ lā dīmūl ni̍ŋ wa᷅ŋnda̍ a̍ ya̍ o̍kɔ̄ɔ̄. Kāni̍ fu̍u̍le̍, lā wa̍ hɔ̄lāā tūlu̍ a̍ ya̍ chɔ̍ŋ o̍ kāndɔ᷄ŋndo̍ di̍.

Chɔ᷄ŋ 16

1 “Dīōmndā ya̍ I̍ di̍mu̍l nya̍ la᷅ŋ nda̍ŋ, I̍ di̍mi̍ la̍ŋ yɔ̄ŋi̍ nya̍ hu᷄ŋ ma᷅l lāāla᷄ŋ nya̍ nɔ̄ o̍ ya̍ ni̍ŋ ndo̍. 2 Ā chō hūnɔ̄ɔ̄ nya̍ sōlī o̍ chīɛ̄īlā ndāla̍ nda̍ pīɛ̄ī Mɛ̍lɛ̄ka̍ la̍ŋ ni᷄ŋ. Ndu̍yɛ̍, te̍le̍ŋ fu̍u̍lūū ni̍ŋ mā dīī nya̍, kɛ̍ ndu̍yɛ̍, mī wānāa̍ di̍ī nya̍ ka̍ŋ nda̍ ā yīya̍ŋ māā tē ā tōsa̍ le̍nde̍ pɛ̍, mɛ̄ɛ̍ wa̍li̍ Mɛ̄lɛ̄ka̍a̍ nda̍ chō ko̍ŋ to̍sāa̍ ni̍. 3 Wāŋnda̍ tōsā ni̍ŋ sɔ̍ɔ̍ŋ mu᷅ŋ a̍ nya̍, kāni̍ fo̍ndōle̍, pāāndu̍ bɛ̍ɛ̍ ā sīna̍ wa᷅na̍ Fi̍nyā nūu̍ ō chō wo̍ le̍, ndu̍yɛ̍, ā si̍nā wa᷅na̍ ya̍ I̍ cho̍ wo̍ le̍. 4 Le̍ sa̍bū ya̍ I̍ cho̍ nya̍ pɔ̄ɔ̄ he̍ī dīmūl lo̍ cho̍ ni̍ māā tē bōōndi̍i̍ nda̍ chō sɔ̄ɔ̍ŋ mu᷅ŋ tōsā a̍ nya̍ ve̍ ī fūūlu̍u̍ pɛ̍, lā kɛ̄si̍ŋ dɔ̍ɔ̍ o̍ kɔ̄l māā I̍ di̍mu̍l nya̍ a̍ ndi̍ o̍kɔ̄ɔ̄.

Nyɛ̄ Nyi̍na̍ Mɛ̄lɛ̄ka̍a̍ tōsā wo̍

“Sɔ̄ɔ̍ŋ ya̍ I̍ cho̍ mu᷅ŋ nya̍ dīmūllo̍ wo̍ŋ, I̍ di̍mu̍l nya̍ mu̍ŋ o̍ pāāndōo̍ ni᷄ŋ te̍, kāni̍ fu̍u̍le̍, I̍ wa̍ wɔ̄ hɔ̄lāā tūlu̍ a̍ nya̍. 5 Kɛ̍ pɛ̄ŋgo̍o̍ ho̍ō ni᷅ŋ, I̍ cho̍ mīīŋgōo̍ nāa̍ Fi̍nyā nūu̍ o̍ ve᷅m ya̍ wo̍ chūā. Kɛ̍ ndu̍yɛ̍, nya̍ ki̍nɛ̍i̍ wānā pi᷅lɛ̍ bɛ̍ɛ̍ o̍ nyu̍na̍ ya̍ bɛ̍ɛ̍ le̍ nāa̍ ya̍ I̍ cho̍ kɔ̄la̍ŋ nda̍ le̍. 6 Kɛ̍ ndu̍yɛ̍, mɛ̄ɛ̍ ya̍ I̍ di̍mu̍l nya̍ māā I̍ cho̍ lākɔ̄nɔ᷄ŋ mi̍ kɔ̄lta̍ŋ lā tāmbū nya̍. 7 Kɛ̍ ndu̍yɛ̍, mī di̍mu̍l nya̍ tōnya̍a̍, sūɛ̍i̍ kɛ̍ndɛ̄i̍ i̍ wa᷅ le̍ nya̍ ni̍ tē ō wa̍ pɛ̍ mī ma̍l mī ku̍ɛ̄. Kāni̍ fu̍u̍le̍, tē ō ve̍ mī I̍ ku̍ɛ̄ le̍, Wānā Ma̍lāa̍ ō hi᷅ŋ mbō hu᷄ŋ wa᷅ lātūlu̍ a̍ nya̍ le̍. Kɛ̍, tē ō wa̍ pɛ̍ mī I̍ ku̍ɛ̄, I̍ cho̍ ndu̍ yɔ̄ŋ nāa̍ nya̍ chūā. 8 Tē ō hīŋ pɛ̍, ō chō hūnɔ̄ɔ̄ wāŋndā chīe̍e̍ya̍ chɔ̄m o̍ chi̍e̍ēŋndo̍ ni᷄ŋ māā ā bēndū nɛ̄īyo̍ a̍ nyɛ̍ kpe̍e̍kpe̍i̍ yɔ̄ŋ wɔ̄ɔ̍ŋndo̍ ō chō wo̍, ndu̍yɛ̍, mbō chɔ᷄m nda̍ māā ā bēndū nɛ̄īyo̍ le̍ yīya᷄ŋ nda̍ yīya̍ŋ māā I̍ cho̍ wa̍nā sa̍kpō Mɛ̄lɛ̄ka̍ o̍ hɔ̄l te̍ wo̍, ndu̍yɛ̍, ō chɔ̄m ni̍ŋ nda̍ vɛ̄lɛ̄ māā ā bēndū nɛ̄īyo̍ a̍ kɔ̍ɔ̍sɔ̍ Mɛ̄lɛ̄ka̍a̍ o̍kɔ̄ɔ̄. 9 Nāa̍ nda̍ bēndū nɛ̄īyo̍ a̍ nyɛ̄ kpe̍e̍kpe̍i̍ cho̍ yɔ̄ŋ wɔ̄ɔ̍ŋndo̍ wo̍, ndu̍ cho̍ ni̍ māā wānā ma̍lāa̍ chō hūnɔ̄ɔ̄ tōsā mā sīna̍ māā tē wāŋndo̍ dōu̍ ti̍i̍nda᷄ŋndo̍ o̍ ya̍ ni̍ŋ te̍, mɛ̄ɛ̍ yɔ̄ŋ wɔ̄ɔ̍ŋndo̍ i̍ cho̍ ni̍. 10 O̍ ko̍ŋ kɔ̍ɔ̍lī, nāa̍ nda̍ bēndū nɛ̄īyo̍ le̍ yīya᷄ŋ nda̍ yīya̍ŋ māā I̍ cho̍ wa̍nā sa̍kpō Mɛ̄lɛ̄ka̍ o̍ hɔ̄l te̍ wo̍, ndu̍ cho̍ ni̍ māā, ō chō tōsā mā sīna̍ māā wānā sa̍kpōo̍ ya̍ I̍ cho̍ Mɛ̄lɛ̄ka̍ o̍ hɔ̄l ni̍, kāni̍ fu̍u̍le̍ le̍ kɔ̄lā ya̍ I̍ cho̍ o̍ Fi̍nyā nūu̍ lo̍ lā chi᷅ lɛ̍ ya̍ le̍ wo̍. 11 Ndu̍yɛ̍, nāa̍ nda̍ bēndū nɛ̄īyo̍ a̍ kɔ̍ɔ̍sɔ̍ Mɛ̄lɛ̄ka̍a̍ o̍kɔ̄ɔ̄ wa̍, ndu̍ cho̍ ni̍ māā ō chō tōsā mā sīna̍ māā Mɛ̄lɛ̄ka̍ chīi̍ yāmɛ̍i̍ kīōlɔ̄ɔ̄, kāni̍ fu̍u̍le̍, ō chīi̍ wāna̍ cho̍ māsāa̍ le̍ chi̍e̍ēŋndo̍ ho̍ō wo̍ yāmɛ̍i̍ kīlūl. 12 “Sɔ̄ɔ̍ŋ ka̍ ka̍ ŋ̍ cho̍ I̍ nɔ̍ mī I̍ di̍mu̍l nya̍ mu̍ŋ. Kɛ̍ ndu̍yɛ̍, tē I̍ chi̍i̍ nya̍ mu̍ŋ dīmūl pɛ̄ŋgo̍o̍ ho̍ō pɛ̍, ŋ̄ wā nya̍ ŋ̄ hīāūwāā māyōōmū. 13 Tē ō lo̍ pɛ̍ o̍ ko̍ŋ mī nyi̍na̍ chɔ᷅m wa᷅ŋnda̍ tōnya̍ cho̍ a̍ Mɛ̄lɛ̄ka̍ o̍kɔ̄ɔ̄ wo̍ ō hīŋ, ndu̍ cho̍ tōsā ni̍ mī lā sīna̍ īsɔ̄ɔ̍ o̍ īsɔ̄ɔ̍ to᷅nya̍. Ō cho̍ di̍ōmndā ndɔ̄la̍ ndu̍ pi̍la̍ le̍ ō su̍a̍ā ni̍ŋ te̍. Nyɛ̄ o̍ tu̍ɛ̍ī Mɛ̍lɛ̄ka̍ o̍ sōndō wo̍, ndu̍ o̍ su̍a̍ā ni̍ŋ ni̍. Ndu̍yɛ̍, ō dīmūl ni̍ŋ nya̍ a̍ sɔ̄ɔ̍ŋ nɔ̍ le̍ hūnɔ̄ɔ̄ yɔ̄nɔ᷄ŋ ndo̍ wo̍ŋ o̍kɔ̄ɔ̄. 14 Ndu̍ Nyi̍nā kōŋ ō chō tōsā mī wāŋnda̍ chē mɛ̄ɛ̍ ya̍ I̍ cho̍ wāna̍ kɔ̄ndɔ̄fi̍li̍ yɛ̍. Kāni̍ fo̍ndōle̍, tē ō tūēī sɔ̄ɔ̍ŋ mu᷅ŋ ya̍ o̍ sōndō pɛ̍, ō chu̍a̍ mu̍ŋ, o̍ ko̍ŋ kɔ̍ɔ̍lī, ō dīmu̍l nya̍ mu̍ŋ. 15 Nyɛ̄ o̍ nyɛ̄ kpo̍u̍ Fi̍nyā nūu̍ nɔ̄, ya̍ nɔ̍ ni̍. Le̍ sa̍bōo̍ ho̍ō ya̍ I̍ di̍mi̍ ni̍ māā, tē Nyi̍na̍ Mɛ̄lɛ̄ka̍a̍ tūēī sɔ̄ɔ̍ŋ mu᷅ŋ ya̍ o̍ sōndō pɛ̍, ō chu̍a̍ mu̍ŋ, o̍ ko̍ŋ kɔ̍ɔ̍lī, ō dīmu̍l nya̍ mu̍ŋ.”

Kɔ̄l nyā ta̍mbɛ̍i̍yo̍ sīmnūŋ ni̍ŋ kɔ᷅l kɛ̄ndɛ̄

16 Mi̍ Chi̍i̍sū di̍mūl vɛ̄lɛ̄ bu̍ɛ̍i̍yāā ndūa̍a̍ āā, “Te̍le̍ŋ bi̍ŋgī ko̍ni̍ o̍ lo̍ ni̍, lā chi᷅ lɛ̍ ni̍ŋ ya̍ le̍. Kɛ̍ ndu̍yɛ̍, tē te̍le̍ŋ bi̍ŋgī ō hīōū vɛ̄lɛ̄ pɛ̍, lā chē vɛ̄lɛ̄ ya̍.” 17 O̍ ko̍ŋ kɔ̍ɔ̍lī, mi̍ bu̍ɛ̍i̍yāā ndūa̍a̍ ā pūm ā kāndū nyūūni̍āŋndo̍ āā, “Ō yɛ̄ɛ̍nɛ̍ o̍ di̍mi̍ yɛ̄ ko̍ŋ? Vɛ᷅ mbo̍ dīmī māā, te̍le̍ŋ bi̍ŋgī ko̍ni̍ o̍ lo̍ ni̍ ŋ̄ chi᷅ lɛ̍ ni̍ŋ ndu̍ le̍, māā kɛ̍ ndu̍yɛ̍, tē te̍le̍ŋ bi̍ŋgī ō hīōū vɛ̄lɛ̄ pɛ̍, ŋ̄ chē vɛ̄lɛ̄ ndu̍? Ō dīmi̍ vɛ̄lɛ̄ māā ŋ̄ chi᷅ ndu̍ le̍, māā, fo̍ndōle̍, ō chō la̍ŋ o̍ Fi̍nyā ndɔ̄ lo̍. 18 Yɛ̄ɛ̍nɛ̍ o̍ di̍mi̍ yɛ̄ ko̍ŋ māā te̍le̍ŋ bi̍ŋgī ko̍ni̍ o̍ lo̍ ni̍? Ŋ̄ si̍nā nyɛ᷅ o̍ di̍mi̍ ko̍ŋ ndo̍ pɛ̄ŋgu̍ le̍.” 19 Mi̍ Chi̍i̍sū si̍nā māā ā hɛ̄na̍ŋ mā nyūna̍ ndu̍ a̍ sɔ̄ɔ̍ŋ o̍ di̍mi̍ wo̍ŋ o̍kɔ̄ɔ̄. O̍ ko̍ŋ, mbo̍ dīmūl nda̍, āā, “Ya̍ di̍mu̍l nya̍ ni̍ māā te̍le̍ŋ bi̍ŋgī ko̍ni̍ o̍ lo̍ ni̍, lā chi᷅ lɛ̍ ni̍ŋ ya̍ le̍. Kɛ̍ ndu̍yɛ̍, māā tē te̍le̍ŋ bi̍ŋgī ō hīōū vɛ̄lɛ̄ pɛ̍, lā chē vɛ̄lɛ̄ ya̍. Dīōmnda̍ŋ nda᷅ŋ te̍ nya̍ chō nyūūni̍āŋndo̍ le̍ nyɛ̄ la̍ si̍m ndo̍ le̍? 20 Mī I̍ di̍mu̍l nya̍ tōnya̍a̍ wa̍la̍ŋ, lā chō hūnɔ̄ɔ̄ cha᷄ŋ cha̍ŋ īmɔ̍nɔ̍ɔ̍. Kɛ̍, wāŋnda̍ o̍ chi̍e̍ēŋndo̍ ni᷄ŋ, nda̍ nda̍ chō wā a̍ kɔ̄l kɛ̄ndɛ̄. Lā chō hūnɔ̄ɔ̄ kɔ̄l tāmbu̍. Kɛ̍ ndu̍yɛ̍ o̍ ko̍ŋ kɔ̍ɔ̍lī, kɔ̄l tāmbɛ̍i̍ ka̍lāa̍ sīmnūŋ ni̍ŋ kɔ᷅l kɛ̄ndɔ̄ɔ̍. 21 Tē bōōndi̍i̍ wānā la̍nɔ̍ɔ̍ ō nɔ̄ le̍ vīōlɔ̄ɔ̍ ve̍ ī fūūlu̍u̍ pɛ̍, nyɛ̄ nɛ̄īyāa̍ pi̍la̍ wa᷅ ndu̍ chōo̍ ni̍. Kāni̍ fu̍u̍le̍, bōōndi̍i̍ nyɛ̄ nɛ̄īyāa̍ ō kōmāl ndu̍ ve̍ ī fūūlu̍u̍. Kɛ̍, tē ō vēlū ni᷅ŋ pɛ̍, ō pu̍ɛ̍ɛ̍ŋ dɔ̍ɔ̍ nyɛ̄ nɛ̄īyāā o̍ wa̍ lēni᷄ŋ ndo̍. Kāni̍ fu̍u̍le̍, ō wā ni᷅ŋ a̍ kɔ̄l kɛ̄ndɛ̄ le̍ mɛ̄ɛ̍ o̍ ve̍lū chɛ̄lɛ̄kpɛ̍ sɛ̍nɛ̄īyo̍ yɛ̍. 22 Le̍nde̍ i̍ wa᷅ ni̍ŋ a̍ nya̍ ni̍. Lā chō a̍ kɔ̄ltā tāmbɛ̍i̍la̍ŋ bōōnde̍i̍ he̍ī. Kɛ̍, bōōndi̍i̍ cho̍ hūnɔ̄ɔ̄ fūūlūū, na̍a̍ nya̍ā mī ŋ̄ chāna᷅ŋ vɛ̍lɛ̄. O̍ ko̍ŋ, lā wā ni̍ŋ a̍ kɔ̄l kɛ̄ndɛ̄ ta̍u̍. Ndu̍yɛ̍, wānā o̍ wānā nɔ̍lā ni̍ŋ mbō tɛ̄ɛ̄mbu̍u̍ kɔ̄l nyā kɛ̍ndɛ̄ kōŋ te̍. 23 “Tē pāa̍le̍ le̍ŋ lē fūūlu̍u̍ pɛ̍, lā nyu̍u̍nīāā lɛ̍ ni̍ŋ ya̍ nyūūnīāālā chēle̍ŋ te̍. Mī di̍mu̍l nya̍ tōnya̍a̍ wa̍la̍ŋ, nyɛ̄ o̍ nyɛ̄ nya̍ nyūna̍ Fi̍nyā nūu̍ dīōm le̍ ndu̍ a̍ dīōlā nīla̍ŋ pɛ̍, kīo̍o̍ o̍ ke᷅ nya̍ ni̍. 24 Chɔ̍ŋ ha̍a̍a̍ mbo̍ fūūlūū a̍ bōōnde̍i̍ he̍ī, lā nyūna̍ wɔ̍ Fi̍nyā nūu̍ dīōm le̍ nyɛ̄ a̍ dīōlā nīla̍ŋ te̍. Lā nyūna̍ ndu̍ dīōm le̍ nyɛ̄ nya̍ hāu̍ bā wo̍. Ō nɔ̄lā mbō ke̍ nya̍ le̍ mī lā wa̍ a̍ kɔ̄l kɛ̄ndɛ̄ mī kɔ̄l nyā kɛ̍ndɔ̄ɔ̍ fūūlu̍u̍ mɛ̍ɛ̄.”

Chi̍i̍sū chi̍i̍ chi̍e̍ēŋndo̍ yōmɔ̄ɔ̄

25 “O̍ tāle̍la̍ŋ ni᷄ŋ ya̍ i̍i̍ nɔ̍ nya̍ sɔ̄ɔ̍ŋ dīmūllo̍ ni̍. Kɛ̍, bōōndi̍i̍ chō fūūlūū, tē ī fūūlu̍u̍ pɛ̍, I̍ su̍ū lɛ̍ ni̍ŋ na̍a̍ nya̍ chūā o̍ lātāle̍ ni᷄ŋ te̍. I̍ cho̍ hūnɔ̄ɔ̄ nya̍ sɔ̄ɔ̍ŋ chɔ̄m kpe̍nde̍ke̍le̍ a̍ Fi̍nyā nūu̍ o̍kɔ̄ɔ̄. 26 Pāa̍le̍ le̍ŋ lā chō Fi̍nyā nūu̍ dīōm nyūnā le̍ nyɛ̄ nya̍ hāu̍ bā wo̍ a̍ dīōlā nīla̍ŋ. O̍ ko̍ŋ, mī I̍ nyu̍na̍ lɛ̍ bɛ̍ɛ̍ Mɛ̍lɛ̄ka̍ dīōm le̍ mbō ke̍ nya̍ nyɛ̄m mu᷅ŋ tē. 27 Kāni̍ fu̍u̍le̍, Fi̍nyā nūu̍ pi̍la̍ ō kāāla̍ nya̍ le̍ mɛ̄ɛ̍ nya̍ kāāla̍ ya̍, ndu̍yɛ̍, mi̍ lā lāāla᷄ŋ māā nāa̍ ndu̍ Mɛ̍lɛ̄ka̍ chūā ya̍ I̍ chɛ̍ŋ ni̍ yɛ̍. 28 Ī chō tōnya̍ māā nāa̍ ndu̍ chu̍a̍ ya̍ I̍ chɛ̍ŋ ni̍, mi̍ hu᷅ŋ o̍ chi̍e̍ēŋndo̍ chōo̍. Ndu̍yɛ̍, I̍ cho̍ hūnɔ̄ɔ̄ su̍ŋ chi̍e̍ēŋndo̍ ho̍ō mālɔ̄ɔ̄ mī I̍ mi̍i̍ŋgu̍ nāa̍ ndu̍ Fi̍nyā nūu̍ chūā.” 29 Mi̍ bu̍ɛ̍i̍yāā ndūa̍a̍ dīmūl ndu̍ āā, “Ɛ̄ɛ̄ hɛ̍ɛ̄, ā chō ni᷅ŋ sūɛ̍i̍ nyɛ̄ kɛ̄ndɛ̄ wa̍la̍ŋ. A̍ cho̍ lɛ̍ īsɔ̄ɔ̍ o̍ lātāle̍ ni᷄ŋ te̍. 30 Ŋ̄ sīna̍ ni᷅ŋ wa̍la̍ŋ māā nūm ā sīnā i̍sɔ̍ɔ̍ o̍ īsɔ̄ɔ̍ fe̍e̍. Nyūna̍ wa᷅ wa᷅ŋndo̍ o̍ kɔ̄l lo̍, mī wānā chɔ̍m nu̍m bɛ̍ɛ̍ le̍, ā sīnā. He̍ī to̍sa̍ ni̍ mi̍ ŋ̄ lāāla̍ŋ māā nāa̍ Mɛ̄lɛ̄ka̍ chūā ŋ̄ chɛ᷄ŋ ni̍.” 31 Mi̍ Chi̍i̍sū nyu̍nā nda̍ āā, “Lēkɛ̍ndɛ̄, lā lāāla̍ŋ ni᷅ŋ? 32 Bōōndi̍i̍ cho̍ fūūlūū, ndu̍yɛ̍, ī fūūlāā bɛ̍ɛ̍ i̍ cho̍ ni᷅ŋ ni̍, lā chō sāŋnɔ᷄ŋ. Nya̍ pi̍lɛ̍ŋ pi̍lɛ̍ŋ nda̍ fa̍ū lā chō lākɔ̄nɔ᷄ŋ o̍ lā nya̍ lo̍, mī lā mɛ̄i̍ ya̍ ya̍ pīlɛ̍ kpe̍. Kɛ̍ ndu̍yɛ̍ vɛ̍lɛ̄, I̍ ve᷅ ni̍ŋ ya̍ pīlɛ̍ le̍, kāni̍, Fi̍nyā nūu̍ chō hɔ̄lāā tūlu̍ a̍ ya̍. 33 I̍ di̍mu̍l nya̍ he̍ī le̍ mī lā sɔ̄la̍ kɔ̄l nyūlōo̍ le̍ chō nya̍ chō dīōm pīlɛ̍ a̍ ya̍ wo̍. Lā sɔ̄lā ni̍ŋ nyɛ᷅ pālāa̍ o̍ chi̍e̍ēŋndo̍ ho̍ō ni᷄ŋ, kɛ̍ ndu̍yɛ̍, lā bīi̍ kɔ᷅ltā nyāla̍ŋ. I̍ chi̍i̍ chi̍e̍ēŋndo̍ ho̍ō yōmɔ̄ɔ̄.”

Chɔ᷄ŋ 17

Chi̍i̍sū pi̍ɛ̍i̍ Mɛ̄lɛ̄ka̍ le̍ wānāa̍ cho̍ ndu̍ kɔ̄ɔ̄lī wa̍

1 Mɛ̄ɛ̍ Chi̍i̍sū chi̍i̍ dīōmnda̍ŋ nda᷅ŋ īsɔ̄ɔ̍, mbo̍ kāndū Mɛ̄lɛ̄ka̍ pīɛ̄īyo̍. Mbo̍ tōfā chōo̍ cho̍o̍ ɛ̄chɛ̍nɛ̄. Mbo̍ dīmī āā, “Kɛ̄kɛ̍, te̍le̍ŋndo̍ fūūlu̍u̍. To̍sa̍ ni̍ko̍ mī wāŋnda̍ chē mɛ̄ɛ̍ Po̍ nu̍mndo̍ chō wāna̍ kɔ̄ndɔ̄fi̍li̍ yɛ̍, mī Po̍ nu̍mndo̍ ō tōsa̍ mī wāŋnda̍ chē mɛ̄ɛ̍ ŋ̄ chō wāna̍ kɔ̄ndɔ̄fi̍li̍ yɛ̍. 2 Ā bīī ma̍ kē ndu̍ kpāāyāa̍ ŋ̄wāŋndā chīe̍e̍ cho̍o̍ kpo̍u̍. Mbō tōsa̍ wānāā ŋ̄ ke̍ ndu̍ wa̍ kpo̍u̍, mā sɔ̄la̍ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ le̍ wo̍. 3 Yōōmū kpe̍e̍kpe̍i̍yo̍ ho̍ō ndu̍ cho̍ yɛ̄ ni̍, wāŋndo̍ sīnāa̍ māā nu᷄m pīlɛ̍ kpe̍ cho̍ Mɛ̄lɛ̄ka̍ ni̍, ndu̍yɛ̍, mbō sīna̍ vɛ̄lɛ̄ Chi̍i̍sū Ki̍li̍tī, wa᷅na̍ ŋ̄ vēm ndo̍. 4 Bōōndi̍i̍ ya̍ I̍ wa̍ o̍ chi̍e̍ēŋndo̍ chōo̍ ve̍, mi̍ I̍ chɔ᷅m wāŋnda̍ mɛ̄ɛ̍ ŋ̄ chō wāna̍ kɔ̄ndɔ̄fi̍li̍ yɛ̍, sa̍na̍a̍ a̍ chīī ya̍ I̍ chi̍i̍ wa̍li̍ ŋ̄ ke̍ ya̍ le̍ tōsāa̍ wo̍ wo̍. 5 Le̍la̍ŋ, Kɛ̄kɛ̍ nūu̍, to̍sa̍ mī I̍ wa̍ o̍ nāŋɔ̄ɔ̍ ni᷄ŋ nāa̍ ŋ̄ chō wa̍, nāŋɔ̄ɔ̄ na̍a̍ ŋ̄ wa̍ lēni᷄ŋ na̍a̍ nūm lɔ̍ɔ̍pa̍ bɛ̍ɛ̍ chi̍e̍ēŋndo̍ ō kāndūŋ ndo̍. 6 “I̍ to̍sa̍ mi̍ wānāā ŋ̄ ke̍ ya̍ ha̍ā wa̍ sīnā nu̍m. Ā wa̍ le̍ chi̍e̍ēŋndo̍, kɛ̍ ndu̍yɛ̍, ma̍ chūā nda̍ ma̍ kē ya̍ nda̍. Nu᷄m nɔ̍ nda̍ ni̍, kɛ̍, ma̍ kē ya̍ nda̍. Ndu̍yɛ̍, ā tūēī nu̍m dīōm. 7 Ā sīna̍ ni᷅ŋ māā nyɛ̄ o̍ nyɛ̄ fe̍e̍ ŋ̄ ke̍ ya̍ māā o̍ nūmndo̍ kpe̍e̍kpe̍i̍ ŋ̄ cho̍ chɔ̄nɔ᷄ŋndo̍ ni̍. 8 I̍ di̍mu̍l nda̍ dīōmndā ŋ̄ dīmu̍l la̍ la̍ŋ ndu̍yɛ̍, ma̍ chūā la̍ŋ. Ā sīnā wa̍la̍ŋ māā o̍ nūm ndo̍ ya̍ I̍ fu̍la̍ ni̍. Ndu̍yɛ̍, ā lāāla̍ŋ māā nu᷄m ve᷅m ya̍ ni̍. 9 “Le̍ nda̍ ya̍ I̍ cho̍ nu̍m pīɛ̄īyo̍ ni̍. Ō cho̍ le̍ wānāa̍ cho̍ le̍ chi̍e̍ēŋndo̍ wa̍ le̍ ya̍ I̍ cho̍ nu̍m pīɛ̄ī le̍. Wānāā ŋ̄ ke̍ ya̍ wa̍, le̍ nda̍ ya̍ I̍ cho̍ nu̍m pīɛ̄īyo̍ ni̍, kāni̍ fo̍ndōle̍, nu᷄m nɔ̍ nda̍ ni̍. 10 Wānā o̍ wānā ya̍ I̍ nɔ̍, nu᷄m nɔ̍ ni̍. Ndu̍yɛ̍, wānā o̍ wānā ŋ̄ nɔ̄, ya̍ nɔ̍ ni̍. Wāŋnda̍ ha̍ā, nda̍ cho̍ tōsāa̍ ni̍ mī wāŋnda̍ ā chā mɛ̄ɛ̍ ya̍ I̍ cho̍ wāna̍ kɔ̄ndɔ̄fi̍li̍ yɛ̍. 11 I̍ cho̍ lɛ̍ wā o̍ chi̍e̍ēŋndo̍ chōo̍ le̍ te̍le̍ŋ vi̍lɛ̄ī le̍. Kɛ̍, nda̍ nda̍ chō wā o̍ chi̍e̍ēŋndo̍ chōo̍. Ya̍ I̍ cho̍ hūnɔ̄ɔ̍ nāa̍ nūm chu̍a̍. Fi̍nyā nūu̍, nūm nɔ̍ ho̍ō mā sɔ̍la̍ sāŋgālāa̍ wo̍, ma̍nda̍ wa̍nāā ŋ̄ ke̍ ya̍ ha̍ā wa̍ a̍ kpāāyā nūmndo̍, kpāāya̍ ŋ̄ ke̍ ya̍ wo̍. Ma̍nda̍ nda̍ le̍ mā wa̍ dīōm pīlɛ̍, mɛ̄ɛ̍ na̍a̍ ŋ̄ chō dīōm pīlɛ̍ na̍a̍ nūm yɛ̍. 12 Bōōndi̍i̍ ya̍ I̍ wa̍ hɔ̄lāā tūlu̍ a̍ nda̍ ve̍, mi̍ I̍ ma̍ndā nda̍ a̍ kpāāyā nu̍mndo̍, kpāāya̍ ŋ̄ ke̍ ya̍ wo̍. Mi̍ I̍ ma̍ndā nda̍, ndu̍yɛ̍, ō pīlɛ̍ bɛ̍ɛ̍ o̍ la̍a̍si̍a̍ŋ te̍, mɛ̄ɛ̍ wāna̍ wa̍ ō yūlāā le̍ lāāsīa̍ŋndo̍ wo̍ le̍ mī nyɛ̄ Yāu̍ Mɛ̄lɛ̄ka̍a̍ ō dīmi̍ wo̍ yɔ̄nu̍ŋ. 13 I̍ cho̍ ni᷅ŋ hūnɔ̄ɔ̍ nāa̍ nūm chu̍a̍. Ndu̍yɛ̍, lɔ̍ɔ̍ ya̍ I̍ cho̍ wɔ̄ o̍ chi̍e̍ēŋndo̍ chōo̍ wo̍, I̍ cho̍ sɔ̄ɔ̍ŋ mu᷅ŋ dīmī le̍ mā sɔ̄la̍ kɔ̄l kɛ̄ndɛ̍ cho̍ ya̍ ni᷅ŋ ndo̍, ndu̍yɛ̍, mā sɔ̄la̍ ndu̍ ō fūūlāā mɛ̍ɛ̄. 14 I̍ di̍mu̍l nda̍ dīōmndā nūmnda̍ŋ. Ndu̍yɛ̍, mi̍ wāŋnda̍ o̍ chi̍e̍ēŋndo̍ ni᷄ŋ a̍ tu᷅l nda̍ lēyɛ̄ le̍ mɛ̄ɛ̍ nda̍ cho̍ wa̍nāā wāā chi̍e̍ēŋ na̍ŋ mɛ̄ɛ̍ ya̍ bɛ̍ɛ̍ ya̍ I̍ cho̍ wa̍nā wa̍ā chi̍e̍ēŋ na̍ŋ te̍ yɛ̍. 15 I̍ cho̍ nu̍m pīɛ̄ī le̍ mā fa̍ŋa̍ nda̍ o̍ chi̍e̍ēŋndo̍ chōo̍ le̍. I̍ cho̍ māchūāā nu̍m pīɛ̄īyo̍ māā bā nūmndo̍ ō wa̍ nda̍ chōo̍, yɔ̄ŋi̍ ō nda̍ vēēlū āā, Wāna̍ Dɛ̍nɛ̍ Wɔ̍ɔ̍ŋndo̍ wo̍ ō yɔ᷄ŋ nda̍ nyɛ̄. 16 Nda̍ nda̍, ā cho̍ le̍ chi̍e̍ēŋndo̍ ho̍ō le̍, mɛ̄ɛ̍ ya̍ I̍ cho̍ le̍ chi̍e̍ēŋndo̍ ho̍ō le̍ yɛ̍. 17 To̍sa̍ mā wa̍ ā yɔ̄ŋga᷄ŋ o̍ nūm ndo̍ sa̍na̍a̍ a̍ tōnya̍ cho̍ a̍ nūm o̍kɔ̄ɔ̄ wo̍. Dīōm nūmndo̍, ndu̍ cho̍ tōnya̍a̍ ni̍. 18 I̍ ve᷅m nda̍ o̍ ŋ̄wāŋndā chīe̍e̍ lo̍ o̍ chi̍e̍ēŋndo̍ ni᷄ŋ mɛ̄ɛ̍ ŋ̄ vēm ya̍ o̍ ŋ̄wāŋndā chīe̍e̍ lo̍ o̍ chi̍e̍ēŋndo̍ ni᷄ŋ yɛ̍. 19 I̍ yɔ̍ŋgu̍ŋ ya̍ pi̍la̍ nāa̍ nūm chu̍a̍ le̍ nda̍ le̍ mī nda̍ bɛ̍ɛ̍ mā yɔ̄ŋgu̍ŋ nda̍ pi̍la̍ nyɛ̄ kɛ̄ndɛ̄ kɛ̍ndɛ̄ nāa̍ nūm chu̍a̍. 20 “Ō cho̍ ko̍ le̍ wānāa̍ cho̍ ha̍ā na̍ŋ nda̍ le̍ ya̍ I̍ cho̍ nu̍m pīɛ̄īyo̍ le̍. I̍ cho̍ vɛ̄lɛ̄ nu̍m pīɛ̄īyo̍ le̍ wānāā nda̍ chō hūnɔ̄ɔ̄ dīōmndā nūmnda̍ŋ dīmūl, o̍ ko̍ŋ kɔ̍ɔ̍lī, mā dɔ̄ū tīīnda᷄ŋ ndāa̍ o̍ ya̍ ni̍ŋ nda̍. 21 I̍ cho̍ nu̍m pīɛ̄ī māā to̍sa̍ mī nda̍ kpo̍u̍, mā wa̍ dīōmndo̍ ō pīlɛ̍. Fi̍nyā nūu̍, to̍sa̍ a̍ sa̍bū mā wa̍ ā mɔ̄ɔ̄sa᷅ŋ a̍ na̍a̍, mɛ̄ɛ̍ ya̍ I̍ cho̍ ō mɔ̄ɔ̄sa᷅ŋ a̍ nūm, mi̍ nūm bɛ̍ɛ̍ ma̍ wā ō mɔ̄ɔ̄sa᷅ŋ a̍ ya̍ yɛ̍. Ho̍ō to̍sā ni̍ mī wāŋnda̍ o̍ chi̍e̍ēŋndo̍ ni᷄ŋ a̍ la̍a̍la̍ŋ māā nu᷄m ve᷅m ya̍ ni̍. 22 I̍ ke̍ nda̍ nāŋɔ̄ɔ̄ kɔ̄ndɔ̄fi̍li̍ ŋ̄ ke̍ ya̍ wo̍. I̍ to̍sa̍ he̍ī le̍ mā wa̍ o̍ dīōm pīlɛ̍ ni᷄ŋ, mɛ̄ɛ̍ na̍a̍ ŋ̄ chō o̍ dīōm pīlɔ̄ɔ̍ ni᷄ŋ na̍a̍ nūm yɛ̍. 23 Ko̍ŋ cho̍ ni̍ na̍a̍ na̍a̍ nda̍ā mī ŋ̄ wa̍ ā mɔ̄ɔ̄sa᷅ŋ mɛ̄ɛ̍ na̍a̍ nūm na̍a̍ ŋ̄ chō ā mɔ̄ɔ̄sa᷅ŋ yɛ̍. To̍sa̍ mā wa̍ dīōm pīlɛ̍ le̍ mī ŋ̄wāŋndā chīe̍e̍ a̍ sīna̍ māā nu᷄m ve᷅m ya̍ ni̍. Ndu̍yɛ̍, mā sīna̍ māā mɛ̄ɛ̍ ŋ̄ kāāla̍ ya̍ yɛ̍ māā nda̍ bɛ̍ɛ̍ le̍nde̍ ko̍ni̍ ŋ̄ kāāla̍ nda̍ ni̍. 24 “Kɛ̄kɛ̍, I̍ hɛ̍na̍ŋ nāa̍ ya̍ I̍ cho̍ wa̍ mī ŋ̄ wa̍ lo̍ŋ na̍a̍ wānāā ŋ̄ ke̍ ya̍ wa̍ le̍ mā chē nāŋɔ̄ɔ̄ nūu̍, ndu̍ yɔ̍nūŋ māā nāŋɔ̄ɔ̄ ŋ̄ ke̍ ya̍ le̍ kāālā ŋ̄ kāāla̍ ya̍ lɔ̍ɔ̍pa̍ chi̍e̍ēŋndo̍ ō kāndūŋ ndo̍ ni̍. 25 Kɛ̄kɛ̍, nūm wānā sa̍kpōo̍, wāŋnda̍ o̍ chi̍e̍ēŋndo̍ ni᷄ŋ ā si̍nā nu̍m te̍. Kɛ̍, ya̍ ya̍, I̍ si̍nā nu̍m. Ha̍ā nda̍ nda̍ sīnā māā nu᷄m ve᷅m ya̍ ni̍. 26 I̍ to̍sa̍ ma̍ sīnā wāna̍ ŋ̄ chō wo̍. Ndu̍yɛ̍, I̍ cho̍ hīōūwɔ̄ɔ̄ lāchī a̍ nda̍ chɔ̄mndo̍ wāna̍ ŋ̄ chō wo̍ le̍ mā ka̍a̍la̍ nda̍ mɛ̄ɛ̍ ŋ̄ kāāla̍ ya̍ yɛ̍, ndu̍yɛ̍ vɛ̍lɛ̄ māā ya̍ bɛ̍ɛ̍ mī I̍ wa̍ ō mɔ̄ɔ̄sa᷅ŋ a̍ nda̍.”

Chɔ᷄ŋ 18

A̍ mɛ̄ɛ̍ nda̍ bīī Chi̍i̍sū yɛ̍

1 Mɛ̄ɛ̍ Chi̍i̍sū chi̍i̍ Mɛ̄lɛ̄ka̍ pīɛ̄īyo̍ mbo̍ chūā bu̍ɛ̍i̍yāā ndūa̍a̍, ma̍ kūānu᷄ŋ. Ma̍ tāŋ pēē pɔ̍mbɔ̄ pīlɛ̍ dīōla̍ŋ āā, Ki̍di̍lɔ̄ŋ. Kpe̍le̍ pu̍m wa̍ pēē pɔ̍mbɔ̄ kōŋ lēe̍lōo̍ lo̍ŋ, mi̍ Chi̍i̍sū nda̍ bu̍ɛ̍i̍yāā ndūa̍a̍ ā lūɛ̄ī lēni᷄ŋ. 2 Ndu̍yɛ̍, Chu̍da̍sī o̍ wa̍ hūnɔ̄ɔ̄ ndu̍ pīsī wo̍ ndu̍ o̍o̍ si̍nā fo̍ndāŋ kōŋ. Kāni̍ fu̍u̍le̍, lo̍ŋ Chi̍i̍sū nda̍ bu̍ɛ̍i̍yāā ndūa̍a̍ nda̍ a̍a̍ nɔ̍ chūūŋgi̍āŋndo̍ ni̍. 3 O̍ ko̍ŋ kɔ̍ɔ̍lī, mi̍ Chu̍da̍sī hu᷅ŋ a̍ so̍vɛ̄i̍ya̍a̍ māLu̍o̍māŋnda̍ ku̍ndā a̍ pōli̍si̍i̍ya̍a̍ ma̍ndā chi̍ɛ̍ī Chu̍ūwa̍ sōlī sa̍lāa̍ wo̍ wa̍ o̍ kpe̍le̍ ko̍ŋ ni᷄ŋ. Wānāā bɛ̄ndūāā sōlīāā lāsa̍lāa̍ a̍ ku̍ndā Fālīsi̍īya̍ nda̍ nda̍ a̍a̍ ve᷅m nda̍ ni̍. Ma̍ hūŋ a̍ la̍mbūi̍la̍ŋ o̍ lābā, a̍ tɛ̄ŋgɛ̍la̍ŋ, a̍ nyɛ̄m pīāāndo᷄ŋ. 4 Chi̍i̍sū ndu̍ o̍o̍ si̍nā ni᷅ŋ nyɛ̄ o̍ nyɛ̍ wa̍ ndu̍ hūnɔ̄ɔ̄ yɔ̄nɔ᷄ŋ. Mɛ̄ɛ̍ nda̍ fūūlu̍u̍ lo̍ŋ, mi̍ Chi̍i̍sū fu̍lā mbo̍ nyūnā nda̍ āā, “Ō nɛ̄ɛ̍nɛ̍ nya̍ chō yɛ̄ nūūvīa̍a̍?” 5 Ma̍ dīmī āā, “Chi̍i̍sū o̍ fu̍la̍ Na̍a̍sa̍lūɛ̄ī chi̍e̍e̍ wo̍, ndu̍ na̍a̍ ŋ̄ chō nūūvīa̍a̍ ni̍.” Mi̍ Chi̍i̍sū mu̍lī āā, “Mɛ̄ɛ̍ mi̍ che᷄ŋ ya̍.” Chu̍da̍sī o̍ pi̍si̍ ndu̍ wo̍ ō wa̍ īsīsi̍ lo̍ŋ nda̍ tɛ̄ɛ̄ŋ. 6 Mɛ̄ɛ̍ Chi̍i̍sū di̍mi̍ dɔ̍ɔ̍ āā, “Mɛ̄ɛ̍ mi̍ che᷄ŋ ya̍,” ma̍ mīīŋgū a̍ mākɔ̄ɔ̄ ma̍ dēlī lɛ̄ŋ lɛ̍ɛ̍si̍ɛ̍ŋ. 7 Mbo̍ nyūnā nda̍ vɛ̄lɛ̄ āā, “Nɛ̄ɛ̍nɛ̍ nya̍ chō yɛ̄ nūūvīa̍a̍?” Ma̍ dīmī vɛ̄lɛ̄ āā, “Chi̍i̍sū fu̍la̍ Na̍a̍sa̍lūɛ̄ī yo̍.” 8 Mi̍ Chi̍i̍sū di̍mī āā, “I̍ chi̍i̍ nya̍ dīmūl māā ya̍ cho̍ Chi̍i̍sū ni̍. Tē ō wa̍ ya̍ pɛ̍ nya̍ chō nūūvīa̍a̍ ni̍, mɛ̄ɛ̍ ha̍ā nda̍ nda̍ kɔ̄nu̍ŋ.” 9 He̍ī yɔ̄nu̍ŋ le̍ mī nyɛ̄ ndu̍ o̍o̍ di̍mi̍ wo̍ ō yɔ̄nu̍ŋ. Kāni̍, mbo̍ dīmī āā, “Wānāā ŋ̄ ke̍ ya̍ wa̍ ki̍nɛ̍i̍, ō pīlɛ̍ bɛ̍ɛ̍ o̍ la̍a̍si̍a̍ŋ te̍.” 10 O̍ ko̍ŋ kɔ̍ɔ̍lī, Sa̍i̍mɔ̄ŋ Pītɛ̍ ndu̍ o̍o̍ nɔ̍ mūɛ̄ī fāŋnde̍. Mbo̍ nāŋ ndi̍ ya̍ū, mbo̍ lɔ̄wā po̍ pi᷅lɛ̍ a̍ ndi̍ chu̍ɛ̍i̍, mbo̍ kīālū ndu̍ nīlē bā kɛ̄ndɛ̄le̍ŋ kpa̍li̍. Māsa̍ wānāā sōlīāā lāsa̍lāa̍, chɛ̄ ndɔ̄ɔ̍ pōo̍ ho̍ō wa̍ ni̍, mā vēēlū po̍ chɛ᷅ kōŋ āā, Ma̍li̍kɔ̄ɔ̄. 11 Mi̍ Chi̍i̍sū di̍mūl Pītɛ̍ āā, “Mi̍ŋgi̍ mu̍ɛ̍ī nūmnde̍ o̍ bōo̍ ni᷄ŋ. Kāni̍ fu̍u̍le̍, I̍ nɔ̍ mī I̍ ko̍l o̍ tāāla̍ īmɔ̍nɛ̍ Fi̍nyā nūu̍ ke̍ ya̍ le̍ kōlɔ̄ɔ̍ lēni᷄ŋ ndo̍.”

Ā hīŋ a̍ Chi̍i̍sū nāa̍ A̍na̍sī chu̍a̍

12 Mi̍ so̍vɛ̄i̍ya̍a̍ māLu̍o̍māŋnda̍, a̍ wāna̍ wa̍ nda̍ bōlle̍ŋ ndo̍, a̍ pūa̍a̍ ma̍ndā chi̍ɛ̍ī Chu̍ūwa̍ sōlī sa̍lāa̍ wo̍ wa̍, ā bīī Chi̍i̍sū. Bīyɔ̄ɔ̍ ndu̍, ma̍ yīī ndu̍ po᷅ŋ. 13 Ma̍ kūā fɛ̍ɛ̍ŋ a̍ ndu̍ o̍ A̍na̍sī lo̍, Ka̍ya̍fāā, o̍ wa̍ māsa̍ wānāā sōlīāā lāsa̍lāa̍ wɔ̄sī kōŋ ndo̍, lēfū ndɔ̄. 14 Ka̍ya̍fāā ko̍ŋ yɛ̍, ndu̍ ndu̍ o̍o̍ di̍mu̍l wānāā bɛ̄ndūāā Chu̍ūwa̍ te̍le̍ŋ pi᷅lɛ̍ ni̍ māā ō bɛ̄nda̍ mī wānā pi᷅lɛ̍ vī le̍ wāŋnda̍.

Pītɛ̍ vi̍i̍nu̍ŋ māā ō si̍nā Chi̍i̍sū le̍

15 Sa̍i̍mɔ̄ŋ Pītɛ̍ ni̍, a̍ Chi̍i̍sū bu̍ɛ̍ī ndɔ̄ pi᷅lɛ̍, ma̍ tūāl Chi̍i̍su̍ kɔ̄ɔ̄lī. Māsa̍ wānāā sōlīāā lāsa̍lāa̍, nda̍ a̍a̍ si᷅na᷅ŋ ta̍u̍ nda̍ nda̍ bu̍ɛ̍ī kōŋ. Mɛ̄ɛ̍ nda̍ fūūlu̍u̍ o̍ bɛ̍ɛ̄ chīɛ̄ī māsa̍ wānā so̍līāā lāsa̍lāa̍ kōŋ, mi̍ bu̍ɛ̍ī kōŋ lūɛ̄ī Chi̍i̍su̍ kɔ̄ɔ̄lī. 16 Mi̍ Pītɛ̍ ndu̍ si᷅m o̍ kpākīo̍o̍ lēkɔ̍ɔ̍lī o̍ dīō. Mi̍ bu̍ɛ̍i̍ nda̍ a̍a̍ si᷅na᷅ŋ ko̍ŋ nda̍ māsa̍ wānā so̍līāā lāsa̍lāa̍ wo̍ o̍ mīīŋgū. Mbo̍ kɔ̍ so̍ō nāa̍ chūāāmbɔ̄ bu̍ɛ̍īyo̍ chūā, o̍ wa̍ o̍ kpākīo̍o̍ sōndōo̍ wo̍. Mbo̍ tōsā ma̍ lūɛ̄ī nda̍ Pītɛ̍. 17 Mi̍ chūāāmbɔ̄ bu̍ɛ̍i̍ wa̍ ko̍ŋ o̍ dīō wo̍ lō o̍ ko̍ŋ mbo̍ nyūnā Pītɛ̍ āā, “Nya̍ le̍ cho̍ pōo̍ ho̍ō bu̍ɛ̍i̍yāā ndūa̍a̍ le̍?” Mi̍ Pītɛ̍ vi̍i̍nu᷄ŋ. Mbo̍ dīmī āā, “Ɛ̄ ɛ̍, I̍ cho̍ bu̍ɛ̍ī ndɔ̄ le̍. 18 “Mi̍ bu̍ɛ̍i̍yāā māsa̍ wānāā sōlīāā lāsa̍lāa̍ a̍ pōli̍sīi̍yāa̍ ma̍ndā chi̍ɛ̍ī Chu̍ūwa̍ sōlī sa̍lāa̍ wo̍ wa̍ ā kīīsūū yīŋnde̍ŋ, kāni̍, hūēīye̍ ī wa̍. Mɛ̄ɛ̍ nda̍ kīīsu̍u̍ yīŋnde̍ŋ, ma̍ sīm hāŋgɔ̄ɔ̍ ā bālāā yīŋnde̍ŋ si̍lɔ̍. Mi̍ Pītɛ̍ bɛ̍ɛ̍ o̍ ku̍ā, mbo̍ sīm hāŋgɔ̄ɔ̍ nda̍ nda̍ā.”

Māsa̍ wānāā sōlīāā lāsa̍lāa̍ nyūūni̍a̍a̍ Chi̍i̍sū

19 Mi̍ māsa̍ wānāā sōlīāā lāsa̍lāa̍ ō nyūnā Chi̍i̍su̍ a̍ bu̍ɛ̍i̍yāa̍ ndūa̍a̍ o̍kɔ̄ɔ̄. Mbo̍ nyūnā ndu̍ vɛ̄lɛ̄ a̍ pɛ̄ɛ̄kūlā o̍ wa̍ wāŋnda̍ la̍ŋ o̍kɔ̄ɔ̄. 20 Mi̍ Chi̍i̍sū di̍mūl ndu̍ āā, “Kpe̍nde̍ke̍le̍ ya̍ I̍ wa̍ wāŋnda̍ pɛ̄ɛ̄kōo̍ lɔ̍ɔ̍ lɔ̍ɔ̍ ni̍. O̍ chīɛ̄īlā Chu̍ūwa̍ pi̍ɛ̍i̍ Mɛ̄lɛ̄ka̍la̍ŋ ni᷄ŋ ni̍ a̍ o̍ chīɛ̍i̍ Mɛ̄lɛ̄ka̍a̍ ni᷄ŋ, nāa̍ wānāā nāa̍ ā chūūŋgi̍āŋ nda̍, lo̍ŋ ya̍ I̍ wa̍ wāŋnda̍ pɛ̄ɛ̄kōo̍ ni̍. Nyɛ̄ o̍ nyɛ̄ ya̍ di̍mu̍l nda̍, I̍ di̍mu̍l nda̍ ndu̍ sɔ̍ɔ̍ sɔ̍ɔ̍ le̍. 21 Le̍ sa̍bū yɛ̄ɛ̍nɛ̍ ŋ̄ chō yɛ̄ ni᷅ŋ ya̍ nyūnāa̍? Wānāa̍ tu̍e̍ī dīōmndā ya̍ I̍ di̍mi̍ la̍ŋ nda̍ ŋ̄ nyūnā ni̍. Nda̍ sīnā nyɛ᷅ ya̍ I̍ di̍mi̍ wo̍.” 22 Mɛ̄ɛ̍ Chi̍i̍sū di̍mi̍ le̍nde̍, pōli̍sīi̍yāa̍ ma̍ndā chi̍ɛ̍i̍ Mɛ̄lɛ̄ka̍a̍ wa̍ ō pīlɛ̍ wa̍ īsīsi̍ lo̍ŋ, mbo̍ sōlī bāa̍ mbo̍ lūāā Chi̍i̍su̍ kpa᷅ŋnde̍. Mbo̍ dīmūl ndu̍ āā, “Vɛ᷅ mā mu̍li̍ bāli̍o̍o̍ māsa̍ wānāā sōlīāā lāsa̍lāa̍ o̍ sōndō le̍nde̍?” 23 Mi̍ Chi̍i̍sū di̍mūl ndu̍ āā, “Tē ō wa̍ dīōm wɔ̄ɔ̍ŋ pɛ̍ ya̍ I̍ di̍mi̍ pɛ̍, mɛ̄ɛ̍ chɔ̍m ndɔ̍ di̍ōm wɔ̄ɔ̍ŋ kōŋ. Kɛ̍, tē I̍ di̍mi̍ di̍ōm wɔ̄ɔ̍ŋ te̍, mɛ̄ɛ̍ le̍ sa̍bū yɛ̄ɛ̍nɛ̍ ŋ̄ lɔ̄ɔ̄ yɛ̄ ni᷅ŋ ya̍?” 24 O̍ ko̍ŋ kɔ̍ɔ̍lī, mi̍ A̍na̍sī yɔ᷅ŋ Chi̍i̍su̍ ō yīyāā le̍nde̍ nāa̍ Ka̍ya̍fāā chu̍a̍, o̍ wa̍ māsa̍ wānāā sōlīāā lāsa̍lāa̍ wo̍.

Pītɛ̍ vi̍i̍nu̍ŋ vɛ̍lɛ̄ māā ō si̍nā Chi̍i̍sū le̍

25 A̍ bōōndi̍i̍ ke̍ŋ Sa̍i̍mɔ̄ŋ Pītɛ̍ wa̍ wɔ̄ īsīsi̍ ha̍ŋgɔ̄ɔ̍. Mi̍ wānā pu̍m lō o̍ ko̍ŋ mbo̍ nyūnā ndu̍ āā, “Nūm bɛ̍ɛ̍ bu̍ɛ̍ī ndɔ̄ɔ̍ ŋ̄ chō ni̍ nɛ̄ɛ̍?” Kɛ̍, mi̍ Pītɛ̍ vi̍i̍nu᷄ŋ. Mbo̍ dīmī āā, “Ɛ̄ Ɛ̍. I̍ cho̍ bu̍ɛ̍ī ndɔ̄ le̍.” 26 Po̍ Pītɛ̍ lɔ̍wa̍ nīle̍ŋ ndo̍, wāna̍ ndɔ̄ pi᷅lɛ̍ ō wa̍ vɛ̄lɛ̄ lo̍ŋ, wāna̍ ndɔ̄ ko̍ŋ bɛ̍ɛ̍, chīɔ̍ɔ̍ o̍ wa̍ māsa̍ wānāā sōlīāā lāsa̍lāa̍ o̍ bā ni̍. Mbo̍ nyūnā Pītɛ̍ āā, “Ō cho̍ nu᷅m te̍ ya̍ che᷅ o̍ kpe̍lo̍o̍ ni᷄ŋ nya̍ nda̍ā le̍?” 27 Mi̍ Pītɛ̍ vi̍i̍nu᷄ŋ vɛ̍lɛ̄. Vīīnɔ᷄ŋ ko̍ŋ dɔ̍ɔ̍ mi̍ sɔ̄ɔ̍ kōōwā bɛ̍ɛ̍.

Ā hīŋ a̍ Chi̍i̍sū nāa̍ Māsāa̍ Pa̍i̍lē chu̍a̍

28 Īdīi̍yo̍ pu̍u̍ŋ, ma̍ cha᷄ŋ a̍ Chi̍i̍sū o̍ chīɛ̍i̍ Ka̍ya̍fāāwo̍, ma̍ kūā a̍ ndu̍ o̍ bɛ̍ɛ̄ lēmāsa̍ Pa̍i̍lē wo̍ nāa̍ Māsāa̍ Pa̍i̍lē chu̍a̍ o̍ wa̍ māsa̍ māLu̍o̍ma᷅ŋndo̍ le̍ būŋgɛ̄ī kēŋ ndo̍. Mɛ̄ɛ̍ nda̍ fūūlu̍u̍, Chu̍ūwa̍ nda̍ nda̍ lūe̍i̍ chi̍ɛ̍ī ni̍ŋ te̍, kāni̍ nda̍ a̍a̍ hɛ̍na̍ŋ mī nda̍ a̍a̍ to̍sa̍ īsɔ̄ɔ̍ o̍ īsɔ̄ɔ̍ i̍ si̍i̍ŋgūū nda̍ wānāā nɔ̄ɔ̄lɛ̍i̍ Mɛ̍lɛ̄ka̍ o̍ hɔ̄l te̍. Kāni̍ fo̍ndōle̍, nda̍ a̍a̍ hɛ̍na̍ŋ mī nda̍ a̍a̍ de᷅ nyɛ̄ dīāā bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄. 29 Le̍ sa̍bōo̍ ho̍ō mi̍ Pa̍i̍lē fu̍lā, mbo̍ hūŋ nāa̍ nda̍ chūā. Mbo̍ nyūnā nda̍ āā, “Sūɛ̍i̍ yɛ̄ɛ̄ po̍o̍ ho̍ō tɛ̄ɛ̄mbu̍u̍ yɛ̄ mi̍ lā hūŋ a̍ ndu̍?” 30 Ma̍ dīmī āā, “Tē ndu̍ o̍o̍ ve̍ wa̍nā wɔ̍ɔ̍ŋ te̍, ŋ̄ ve̍ hu̍nɔ̄ɔ̄ a̍ ndu̍ nāa̍ nūm chu̍a̍ le̍.” 31 Mi̍ Pa̍i̍lē di̍mūl nda̍ āā, “Nya̍ pi̍la̍ lā kɔ̍, mī lā kɔ̍ kɔ̍ɔ̍sā a̍ ndu̍ mɛ̄ɛ̍ sāwā nya̍a̍ dīmi̍ yɛ̍.” Ma̍ dīmī āā, “Kpāāyā cho̍ na̍a̍ ō kēna᷄ŋ le̍ mī ŋ̄ kēlū īyāma̍ le̍ wāna̍ chi̍e̍e̍ di̍yɔ̄ɔ̄ le̍.” 32 He̍ī ī yɔ̄nu̍ŋ ma̍yɔ̍ŋna᷄ŋ le̍ mī nyɛ̄ Chi̍i̍sū di̍mu̍l pāāndū wāŋnda̍ a̍ pīɔ̍m ndɔ̄ɔ̍ o̍kɔ̄ɔ̄ wo̍ mbō yɔ̄nu̍ŋ mɛ̄ɛ̍ o̍ di̍mi̍ yɛ̍. 33 Mi̍ Māsāa̍ Pa̍i̍lē mi̍i̍ŋgū mbo̍ lūɛ̄ī o̍ chīɛ̄ī lēmāsāa̍ ni᷄ŋ. Mbo̍ vēēlū vɛ̄lɛ̄ Chi̍i̍sū, mbo̍ nyūnā ndu̍ āā, “Nu᷄m cho̍ māsā bɛ̍ndū Chu̍ūwa̍ ni̍?” 34 Mi̍ Chi̍i̍sū nyu̍nā ndu̍ āā, “Nyūnā ŋ̄ nyūna̍ ho̍ō wo̍, bāā nūm pi̍la̍ kɛ̍ɛ̍si̍a̍a̍ ndu̍ ni̍, bāā dīmūllo̍ nda̍ dīmu̍l nu̍m a̍ ya̍ o̍kɔ̄ɔ̄ ni̍?” 35 Mi̍ Pa̍i̍lē mu̍lī āā, “Bāā Chu̍ūnɔ̄ ya̍ I̍ cho̍ ni̍? Wānāā nyāa̍, a̍ wānāā bɛ̄ndūāā sōlīāā lāsa̍lāa̍, nda̍ hi᷅ŋ a̍ nūm nāa̍ ya̍ chu̍a̍ ni̍. Chɔ̍m ya̍ sūɛ̍i̍ ŋ̄ tɛ̄ɛ̄mbu̍u̍ ve̍.” 36 Mi̍ Chi̍i̍sū mu̍lī āā, “Māsāle̍ nīle̍ŋ lē cho̍ ma̍sāle̍ wa̍ā chi̍e̍ēŋ na̍ŋ te̍. Tē le̍ le̍e̍ wa̍ māsāle̍ wa̍ā chi̍e̍ēŋ na̍ŋ pɛ̍ bu̍ɛ̍i̍yāā nīa̍a̍ cho̍ ya̍ kɔ̄ɔ̄lī wa̍ nda̍ a̍a̍ sɔ̍ŋgā yɔ̍ŋi̍ Chu̍ūwa̍ nda̍ a̍a̍ bi̍i̍ ya̍. Kɛ̍ ndu̍yɛ̍ māsāle̍ nīle̍ŋ lē cho̍ ma̍sāle̍ wa̍ā chi̍e̍ēŋ na̍ŋ kpo̍so̍ŋ te̍.” 37 Mi̍ Pa̍i̍lē nyu̍nā ndu̍ āā, “Mɛ̄ɛ̍ māsā bɛ̍ndōo̍ ŋ̄ chō ni̍?” Mi̍ Chi̍i̍sū di̍mī āā, “A̍ di̍mi̍ māā māsā bɛ̍ndōo̍ ya̍ I̍ cho̍ ni̍, ndu̍yɛ̍ ī chō tōnya̍. Le̍ sa̍bū ya̍ I̍ hi̍ŋ mi̍ I̍ vi̍a̍lu᷄ŋ o̍ chi̍e̍ēŋndo̍ ho̍ō chōo̍ wo̍ cho̍ ni̍ māā le̍ mī I̍ chɔ̍m tōnya̍a̍ nāa̍ wāŋnda̍ chūā. Ndu̍yɛ̍, wānā o̍ wāna̍ wa̍ o̍ kūmbū tōnya̍a̍ chōo̍ pɛ̍, nīla̍ŋ o̍ ya᷅ŋ o̍ dīōmndā ya̍ I̍ di̍mī la̍ŋ ni̍.” 38 Mi̍ Pa̍i̍le̍ nyu̍nā ndu̍ āā, “Yɛ̄ɛ̍nɛ̍ cho̍ yɛ̄ tōnya̍a̍?”

Ā dīmi̍ māā ā dīi̍ Chi̍i̍sū

O̍ ko̍ŋ kɔ̍ɔ̍lī, mi̍ Pa̍i̍lē cha̍ŋ mbo̍ fūlā vɛ̄lɛ̄ nāa̍ Chu̍ūwa̍ chūā. Mbo̍ dīmūl nda̍ āā, “I̍ se̍e̍lu̍ŋ nyɛ̄ o̍ nyɛ̄ wɔ̄ɔ̍ŋ pōo̍ ho̍ō tōsa̍ le̍. 39 Kɛ̍, mɛ̄ɛ̍ nya̍ tōsā pa̍a̍ndū māā tē bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄ wa̍ pɛ̍, lā nyūna̍ ya̍ le̍ mī I̍ me̍l nya̍ wānāa̍ cho̍ o̍ chīɛ̄ī mānyūmndo̍ ni᷄ŋ nda̍ ō pīlɛ̍ yɛ̍, lā hɛ̄nāŋ mī I̍ me̍l nya̍ Māsā Bɛ̍ndū Chu̍ūwa̍?” 40 Kɛ̍, ma̍ dīmī vɛ̄lɛ̄ chōo̍ cho̍o̍ āā, “Ɛ̄ Ɛ̍. Ō cho̍ ndu̍ le̍ ŋ̄ māl te̍. Ba̍lu̍a̍bāā ŋ̄ mēl na̍a̍ ni̍.” Ndu̍yɛ̍, Ba̍lu̍a̍bāā nda̍ wa̍ ko̍ŋ yēēmɛ̍i̍ le̍ nda̍ mēllo̍ wo̍, vīīnɔ̄ ma᷅ŋto̍ndōnɔ̄ bɛ̄ndōo̍ o̍ wa̍ ni̍.

Chɔ᷄ŋ 19

1 O̍ ko̍ŋ, mi̍ Pa̍i̍lē yɔ̍ŋgū Chi̍i̍sū ma̍ lūāā ndu̍. 2 Mi̍ so̍vɛ̄i̍ya̍ lūā yɔ̄ɔ̍ŋ fi̍ŋɔ̍ɔ̍ ma̍ wōū ndu̍ o̍ lēbōl māā mɔ̍si̍l lēmāsā. Ma̍ chūā dōmā bɛ̍ndū sīāŋāa̍ ō pūm ma̍ wōū ndu̍ māā dōma̍ lēmāsā. 3 Ma̍ kūā nāa̍ ndu̍ chu̍a̍ ma̍ dīmī āā, “Māsā bɛ̍ndū Chu̍ūwa̍, vi̍o̍u̍ na̍a̍ chōo̍ kɛ̍ndi̍a̍a̍.” Ma̍ mūli᷄ŋ ma̍ lūāā ndu̍. 4 Mi̍ Pa̍i̍lē fu̍lā vɛ̄lɛ̄ nāa̍ Chu̍ūwa̍ chūā. Mbo̍ dīmūl nda̍ āā, “Lā ya᷄ŋ ndɔ̍ ya̍ nīla̍ŋ, I̍ cho̍ fūlā a̍ pōo̍ ho̍ō nya̍ o̍ hɔ̄l le̍ mī lā sīna̍ māā I̍ se̍e̍lu̍ŋ nyɛ᷅ o̍ nyɛ̄ wɔ̄ɔ̍ŋ o̍ to̍sa̍ le̍.” 5 Mi̍ Chi̍i̍sū fu̍lā. Fi̍ŋɛ̍ ŋ̄yɔ̄ kōŋ ō wa̍ wɔ̄ ndu̍ ō wōūwāā o̍ lēbōl. Dōmā si̍a̍ŋā kōŋ bɛ̍ɛ̍, ō wa̍ ndu̍ lēkɔ̄ɔ̍. Mi̍ Pa̍i̍lē di̍mūl nda̍ āā, “Lā che᷄ŋ ndu̍.” 6 Mɛ̄ɛ̍ wānāā bɛ̄ndūāā sōlīāā lāsa̍lāa̍, a̍ pōli̍si̍i̍ya̍ a̍ ma̍ndā chi̍ɛ̍ī Mɛ̄lɛ̄ka̍a̍ wa̍ ā chē Chi̍i̍sū, ma̍ dīmī chōo̍ cho̍o̍ āā, “Ba̍ŋ ndu̍ o̍ yɔ̄m sīŋgāfīlāa̍ chōo̍ ō wu̍. Ba̍ŋ ndu̍ o̍ yɔ̄m sīŋgāfīlāa̍ chōo̍ ō wu̍.” Mi̍ Pa̍i̍lē di̍mūl nda̍ āā, “Nya̍ pi̍la̍ lā kɔ̍ ba᷅ŋ ndu̍ o̍ yɔ̄m sīŋgāfīlāa̍ chōo̍. Ya̍ ya̍ I̍ se̍e̍lu̍ŋ nyɛ᷅ o̍ nyɛ̄ wɔ̄ɔ̍ŋ o̍ to̍sa̍ le̍.” 7 Mi̍ Chu̍ūwāā kāŋ dīmī āā, “Pōo̍ ho̍ō dīmi̍ māā ndu̍ cho̍ Po̍ Mɛ̄lɛ̄ka̍a̍ ni̍. Mɛ̄ɛ̍ sāwā na̍a̍ dīmi̍ yɛ̍, tē wāŋndo̍ sōō le̍nde̍ pɛ̍, ō nɔ̄ mbō sɔ̄la̍ pīɔ̍mndo̍. Le̍la̍ŋ pīɔ̍mndo̍ o̍ sɔ̍lā ni̍.” 8 Mɛ̄ɛ̍ nda̍ dīmi̍ le̍nde̍, mi̍ sīōōŋnde̍ chɔ̄ɔ̄lū Māsāa̍ Pa̍i̍le̍ bīyɔ̄ɔ̄. 9 Mbo̍ mīīŋgū vɛ̄lɛ̄ o̍ chīɛ̄ī lēmāsāa̍ ni᷄ŋ a̍ Chi̍i̍sū. Mbo̍ nyūnā Chi̍i̍su̍ āā, “Kūɛ̍ɛ̍nɛ̍ ŋ̄ fūla̍ yɛ̄?” Kɛ̍, Chi̍i̍sū mu̍li̍ le̍. 10 Mi̍ Pa̍i̍lē nyu̍nā ndu̍ āā, “Vɛ᷅ a̍ mu̍lī ya̍ dīōm te̍? A̍ si̍nā nu̍a̍ā māā I̍ nɔ̍ kpāāyāa̍ mī I̍ ma̍l nu̍m mā kūɛ̄nu᷄ŋ, kɛ̄lɛ̄ŋgāā mī I̍ to̍sa̍ mā ba᷄ŋ nu̍m o̍ yɔ̄m sīŋgāfīlāa̍ chōo̍ mā dīī nu̍m te̍?” 11 Mi̍ Chi̍i̍sū di̍mūl ndu̍ āā, “Mɛ̄lɛ̄ka̍ ndu̍ ke̍ nu̍m kpāāyā ko̍ŋ ni̍. Kɛ̍ tē ō cho̍ ko̍ŋ te̍, a̍ nɔ᷅ ya̍ kpāāyā o̍ kpāāyā cho̍o̍ le̍. Le̍ he̍ī, wāna̍ ma̍l la̍ nu̍m o̍ bā wo̍, ndu̍ hi̍o̍ū yɔ̄ŋ wɔ̄ɔ̍ŋ tōsā.” 12 Mɛ̄ɛ̍ Pa̍i̍lē tu̍e̍ī he̍ī, mbo̍ chīɔ̄ū le̍ Chi̍i̍su̍ ma̍lɔ̄ɔ̍. Kɛ̍, mi̍ Chu̍ūwa̍ hīāū lāchī a̍ dēŋīo̍o̍. Ma̍ dīmī āā, “Tē a̍ ma̍l ndu̍ pɛ̍, mɛ̄ɛ̍ māsā bɛ̍ndōo̍ o̍ cho̍ māsāa̍ kpe̍de̍ bo᷅lle̍ŋ o̍ lɛ̄ŋīī Lu̍o̍ma᷅ŋnde̍ ni᷄ŋ ndo̍, mɛ̄ɛ̍ a̍ cho̍ bɛ̍ɛ̍ ndi̍a̍a̍mɔ̍ɔ̍ ndɔ̄ le̍. Kāni̍ fo̍ndōle̍, wānā o̍ wāna̍ di̍mi̍ pɛ̍ māā māsā bɛ̍ndōo̍ o̍ cho̍ ni̍, mɛ̄ɛ̍ māsā bɛ̍ndu̍ cho̍ māsāa̍ kpe̍de̍ bo᷅lle̍ŋ ndo̍ o̍ si̍mu̍l ni̍.” 13 Mɛ̄ɛ̍ nda̍ dīmi̍ le̍nde̍, mi̍ Pa̍i̍lē fu̍lā a̍ Chi̍i̍sū. Mbo̍ kūā mbo̍ kɔ̍ cha᷅l o̍ kpe̍ŋgbe̍i̍ ndɔ̍ lēmāsāa̍ chōo̍. Ā vēēlu̍ fo̍ndāŋ kōŋ āā, fo̍ndāŋ nda̍ tōōsi̍a̍a̍ a̍ pōūwo̍ wo̍, ō Hi̍būlūi̍ye̍ ni᷄ŋ āā, Kāba̍tāā. 14 Ndu̍yɛ̍, pāa̍le̍ lo̍o̍na᷄ŋnde̍ŋ a̍ hīōūwɔ̄ɔ̍ chōo̍ wo̍ o̍kɔ̄ɔ̄ lē wa̍ ni᷅ŋ māā sīɔ̄dīi̍. Pāa̍le̍ŋ wāa̍ le̍ sīsi̍la̍ŋ o̍ bōlle̍ŋ chōo̍ ki̍nɛ̍i̍ mi̍ Pa̍i̍lē di̍mūl wāŋnda̍ ha̍ā āā, “Lā che᷄ŋ ma̍sā nya̍ bɛ̄ndōo̍.” 15 Ma̍ dīmī chōo̍ cho̍o̍ āā, “Lā kɔ̍ a̍ ndu̍. Lā kɔ̍ a̍ ndu̍, lā kɔ̍ di̍ī ndu̍. Lā kɔ̍ ba᷅ŋ ndu̍ o̍ yɔ̄m sīŋgāfīlāa̍ chōo̍ mī lā dīī ndu̍.” Mi̍ Pa̍i̍lē nyu̍nā nda̍ āā, “Lā hɛ̄na̍ŋ mī I̍ ba̍ŋ māsā nya̍ bɛ̄ndōo̍ o̍ yɔ̄m sīŋgāfīlāa̍ chōo̍?” Mi̍ wānāā bɛ̄ndūāā sōlīāā lāsa̍lāa̍ ā mūlī āā, “Māsā bɛ̍ndōo̍ ō pīlɛ̍ kpe̍ na̍a̍ ŋ̄ nɔ̄ ni̍, ndu̍ yɔ̍nūŋ ni̍ māā māsā bɛ̍ndōo̍ o̍ cho̍ māsāa̍ kpe̍de̍ bo᷅lle̍ŋ o̍ lɛ̄ŋīī Lu̍o̍ma᷅ŋnde̍ ni᷄ŋ ndo̍.” 16 O̍ mɛ̄ɛ̄lu̍la̍ŋ kpɔ̍ŋ Pa̍i̍lē bɛ̍ɛ̍ mbo̍ māl Chi̍i̍su̍ nda̍ o̍ bā le̍ mā kɔ̍ ba᷅ŋ ndu̍ o̍ yɔ̄m sīŋgāfīlāa̍ chōo̍ mā dīī ndu̍.

Ā ba᷄ŋ Chi̍i̍sū o̍ yɔ̄m sīŋgāfīlāa̍ chōo̍

Mi̍ so̍vɛ̄i̍ya̍ kūā a̍ Chi̍i̍sū. 17 Kɔ̄la̍ŋ a̍ ndu̍, ma̍ kɔ̍ ha̍ndū ndu̍ yɔ̄m sīŋgāfīlāā nda̍ wa̍ ndu̍ lākɔ̄ bāŋɔ̄ɔ̄ wo̍ o̍ chōŋgu̍. O̍ ko̍ŋ kɔ̍ɔ̍lī, ma̍ kūā a̍ ndu̍ o̍ fo̍ndāŋ pūm, mā vēēlū ndu̍ āā, fo̍ndāŋ lākpōkpōo̍, o̍ Hi̍būlūi̍ye̍ ni᷄ŋ āā, Kɔ̍ɔ̍kɔ̍tā. 18 Lo̍ŋ nda̍ kɔ̍ ba᷅ŋ ndu̍ o̍ yɔ̄m sīŋgāfīlāa̍ chōo̍ ni̍. O̍ ko̍ŋ kɔ̍ɔ̍lī, ma̍ bāŋ vɛ̄lɛ̄ wānāā ŋīɔ̍ɔ̍ŋāā chēle̍ŋ o̍ yɔ̄mīī sīŋgāfīlɛ̄i̍ chōo̍. Mɛ̄ɛ̍ nda̍ ba᷄ŋ ho̍ō ba̍ā, ma̍ bāŋ ho̍ō ba̍ā, mi̍ Chi̍i̍sū wa᷅ nda̍ tɛ̄ɛ̄ŋ. 19 Mɛ̄ɛ̍ nda̍ wa̍ ndu̍ bāŋɔ̄ɔ̍, mi̍ Māsāa̍ Pa̍i̍lē to̍sā ma̍ po̍o̍nyīāā dīōmnda̍ŋ ma̍ hōl o̍ yɔ̄m sīŋgāfīlāa̍ Chi̍i̍sōo̍ le̍ mī wāŋnda̍ chē. Dīōmndā nda̍ pōōnyi̍a̍a̍ la̍ŋ la̍ cho̍ la᷅ŋ ni̍ āā, “Chi̍i̍su̍ fu̍la̍ Na̍a̍sa̍lūɛ̄ī chi̍e̍e̍ wo̍ cho̍ ho̍ō ni̍, Māsā Bɛ̄ndū Chu̍ūwa̍.” 20 Dīōmnda̍ŋ nda᷅ŋ lā wa̍ lā pōōnyīāā o̍ Hi̍būlūi̍ye̍ ni᷄ŋ, a̍ La̍tīŋnde̍, a̍ Kīli̍kīi̍ye̍. Ndu̍yɛ̍, fo̍ndāŋ nda̍ ba᷄ŋ ndu̍ ko̍ŋ o̍ yɔ̄mndo̍ chōo̍ wo̍ ō ve̍ le̍vi̍l a̍ Chūlu̍sɛ̄lɛ̄m tē. Lē he̍ī, Chu̍ūwa̍ ā fāŋgā fa̍ŋgā ma̍ chā dīōmndā lāŋ. 21 Mɛ̄ɛ̍ wānāā bɛ̄ndūāā sōlīāā lāsa̍lāa̍ le̍ Chu̍ūwa̍ ā chē nyɛ̄ Māsāa̍ Pa̍i̍lē po̍o̍nyi̍a̍a̍ ko̍ŋ ndo̍, ma̍ kūā nāa̍ ndu̍ chu̍a̍. Ma̍ dīmūl ndu̍ āā, “Ō bɛ̄nda̍ mā po̍o̍nyi̍a̍a̍ āā, ‘Chu̍ūwa̍ Māsā nda̍ Bɛ̄ndōo̍’ le̍. Po̍o̍nyi̍a̍a̍ āā, ‘Ō dīmi̍ māā ndu̍ cho̍ Chu̍ūwa̍ Māsā nda̍ Bɛ̄ndōo̍ ni̍.’ ” 22 Kɛ̍, mi̍ Pa̍i̍lē di̍mūl nda̍ āā, “I̍ chi̍i̍ ni᷅ŋ pōōnyīāā, ō fe̍ŋāŋ lɛ̍ lēchōo̍ le̍.” 23 Mɛ̄ɛ̍ so̍vɛ̄i̍ya̍ ba᷄ŋ Chi̍i̍sū, o̍ ko̍ŋ kɔ̍ɔ̍lī, ma̍ chūā nyɛ̄lā ndɔ̄la̍ŋ ma̍ pīɔ̄ū la̍ŋ sālā hīɔ̍ɔ̍lu̍. Ma̍ chɔ̄ɔ̄vīāā, wānā pi᷅lɛ̍ ō pīlɛ̍. Ma̍ chūā vɛ̄lɛ̄ dōma̍ ndɔ̄ɔ̍ ō pīlɔ̍ɔ̄. Kɛ̍ ndu̍ ndu̍, a̍ kōla̍ pūli̍i̍ pi᷅lɔ̍ɔ̍ o̍ wa̍ ō sūāndāā ni̍. Ndu̍ o̍o̍ nɔ̍ na̍a̍ bɔ̄ŋāā le̍ mī nda̍ a̍a̍ ti̍mbi̍ ndu̍ tɛ̄ɛ̄ŋ te̍. 24 Ma̍ dīmu̍la᷅ŋ āā, “Ŋ̄ tɛ̍ndāŋ ndu̍ le̍. Lā ŋ̄ wūūnu᷅ŋ kōo̍ŋ le̍ ndu̍, wāna̍ dē pɛ̍, ō kūɛ̄nu᷄ŋ a̍ ndu̍.” Mɛ̄ɛ̍ i̍ cho̍ ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ yɛ̍, le̍nde̍ ko̍ni̍ so̍vɛ̄i̍ya̍ tōsa̍ ni̍. Kāni̍ fo̍ndōle̍, ī chō ī pōōnyīāā āā, “Ma̍ pīɔ̄ūvi̍āŋ nyɛ̍lā nīla̍ŋ nda̍ pi̍la̍ tɛ̄ɛ̄ŋ, ndu̍yɛ̍, ma̍ wūū kōo̍ŋ le̍ wāna̍ ku̍ā a̍ dōma̍ nūu̍ wo̍.” 25 Kālāa̍ Chi̍i̍sū ni̍, a̍ kālāa̍ Chi̍i̍sū pɔ̄mbɔ̄ ndɔ̄, a̍ la̍nɔ̍ɔ̍ Ki̍lo̍pāā, a̍ Mēēle̍ Māŋgāli᷅ŋ, ā wa̍ īsīsi̍ o̍ yɔ̄m sīŋgāfīlāā nda̍ ba᷄ŋ Chi̍i̍su̍ wo̍ īkɛ̄i̍. 26 O̍ ko̍ŋ, mi̍ Chi̍i̍sū cha᷅ kāla̍ ndɔ̄. Mbo̍ chā bu̍ɛ̍ī ndu̍ o̍o̍ ka̍a̍la̍ wo̍. Ndu̍ bɛ̍ɛ̍, ō wa̍ īsīsi̍ lo̍ŋ ka̍lāa̍ Chi̍i̍su̍ īkɛ̄i̍. Mi̍ Chi̍i̍sū lo᷅ o̍ ko̍ŋ mbo̍ di̍mūl kāla̍ ndɔ̍ āā, “Wɛ̄ɛ̄ŋndo̍, ā chē po̍ nu̍mndo̍.” 27 Mbo̍ dīmūl bu̍ɛ̍ī kōŋ āā, “Pōo̍, ā chē kālā nu̍m.” Chɔ̍ŋ ni᷅ŋ a̍ bōōndi̍i̍ ke̍ŋ mi̍ bu̍ɛ̍īyo̍ ho̍ō kūā a̍ kālāa̍ Chi̍i̍sū ō chīɛ̄ī ndɔ̄ɔ̍ mbo̍ kɔ̍ wa᷅ lo̍ŋ.

Mɛ̄ɛ̍ Chi̍i̍sū vi᷅ yɛ̍

28 O̍ ko̍ŋ kɔ̍ɔ̍lī, mi̍ Chi̍i̍sū si̍nā māā nyɛ̄ o̍ nyɛ̄ ndu̍ o̍o̍ nɔ̍ le̍ tōsāa̍ māā ō chīi̍ tōsā. O̍ ko̍ŋ, mbo̍ dīmī āā, “Kōlɔ̄ɔ̍ bīī ya̍ fɔ̍.” Ndu̍ o̍o̍ di̍mi̍ mādīmīāā dīōmnda̍ŋ nda᷅ŋ le̍ mī ī yɔ̄nu̍ŋ mɛ̄ɛ̍ Yāu̍ Mɛ̄lɛ̄ka̍a̍ dīmi̍ yɛ̍. 29 Mɛ̄ɛ̍ o̍ di̍mi̍ āā, kōlɔ̄ɔ̍ bīī ya̍, nda̍ a̍a̍ nɔ̍ mūɛ̄īmā wāālɛ̍i̍ma̍ pu̍m o̍ kpɛ̍ɛ̍nɛ̍i̍ ni᷄ŋ lo̍ŋ. Ma̍ chūā nyɛ̄ fɔ̄fɔ̄ū pūm ma̍ māl o̍ mūɛ̄īmā māŋ ni᷄ŋ, ma̍ sɔ̄ɔ̄ŋā o̍ yɔ̄m ha̍sɔ̍pī wo̍. Ma̍ hēēlū, ma̍ hāndū ndu̍ o̍ sōndō. 30 Mɛ̄ɛ̍ Chi̍i̍sū sɔ̍sa̍ mūɛ̄īmā māŋ, mbo̍ dīmī āā, “Nyɛ̄ o̍ nyɛ̄ chūū yɔ̄nɔ᷄ŋ.” Mɛ̄ɛ̍ o̍ di̍mi̍ dīōmndā lāŋ, mbo̍ māl bōlle̍ŋ. Mbo̍ mālnu᷄ŋ kɔ̍l.

Ā chūkū Chi̍i̍su̍ lūŋgbu̍e̍i̍ a̍ ba̍llo̍

31 O̍ Chi̍mɛ̄i̍yo̍ chōo̍ sūɛ̍i̍ he̍ī ī yɔ̄nu̍ŋ ni̍. Ndu̍yɛ̍, pāa̍le̍ le̍ŋ nda̍ a̍a̍ bɛ̍ɛ̍ndīāŋ le̍ pāa̍le̍ pɛ̍ŋgīāā lē Chu̍ūwa̍ ni̍. Chu̍ūwa̍ nda̍ a̍a̍ chɛ᷅l mī wānāā nda̍ bāŋ o̍ yɔ̄m sīŋgāfīlāa̍ chōo̍ wa̍ ā lo̍ lo̍ŋ mī pāa̍le̍ pɛ̍ŋgīāāle̍ŋ lē fūūlu̍u̍ le̍. Tāāma̍ pāa̍le̍ pɛ̍ŋgīāāle̍ wa̍ le̍ŋ fūūlūūwo̍ le̍ŋ lē wa̍ pāa̍le̍ pɛ̍ŋgīāālē bɛ̄ndū. Le̍ sa̍bōo̍ ho̍ō, mi̍ Chu̍ūwa̍ cha᷄ŋ ma̍ kūā nāa̍ Māsāa̍ Pa̍i̍lē chu̍a̍. Ma̍ kɔ̍ nyu̍nā ndu̍ dīōm le̍ mbō chɛ᷄l nda̍ mā kɔ̍ yi̍mī wānāā nda̍ ba᷄ŋ o̍ yɔ̄mīī sīŋgāfīlɛ̄i̍ chōo̍ wa̍ pēlo᷄ŋ mā tūsi̍ nda̍. 32 O̍ ko̍ŋ, mi̍ so̍vɛ̄i̍ya̍ kūā ma̍ kɔ̍ yīmī pūa̍a̍ nda̍ ba᷄ŋ nda̍ Chi̍i̍sūa̍a̍ wa̍ pēlo᷄ŋ. Yīmīo̍o̍ ō tāso̍o̍, ma̍ kɔ̍ yi̍mī vɛ̄lɛ̄ ō pīlɔ̍ɔ̄. 33 Kɛ̍ mɛ̄ɛ̍ nda̍ hīŋ o̍ Chi̍i̍sū lo̍ le̍ ndu̍ pēlo᷄ŋ yīmīo̍o̍, ma̍ sāālu᷄ŋ māā ō vī ni᷅ŋ. O̍ ko̍ŋ, ā yīmi̍ lɛ̍ ndu̍ pēlo᷄ŋ te̍. 34 Kɛ̍, mi̍ so̍vɛ̄i̍nɔ̍ɔ̍ ō pīlɔ̍ɔ̄ chūā ba̍l ndɔ̄ɔ̍ mbo̍ chūkū ndu̍ lūŋgbu̍e̍i̍ a̍ ndu̍. Chūkɔ̄ɔ̍ ndu̍ dɔ̍ɔ̍, mi̍ kōo̍wa̍ŋ mā tālā a̍ mɛ̄ŋnda̍ŋ lātūlu̍. 35 Wāna̍ che᷅ sɔ̄ɔ̍ŋ mu᷅ŋ o̍ yɔ̄nɔ᷄ŋndo̍ wo̍, ndu̍ cho̍ nya̍ ho̍ō chɔ̄mndo̍ a̍ nyɛ̍ yɔ̄nu᷄ŋ ndo̍ o̍kɔ̄ɔ̄ ni̍. Ndu̍yɛ̍, tōnya̍a̍ kpe̍e̍kpe̍i̍ o̍ cho̍ dīmīo̍o̍ ni̍. Ō sīnā māā tōnya̍a̍ o̍ cho̍ dīmīo̍o̍ ni̍. Ndu̍yɛ̍, le̍ sa̍bū o̍ di̍mi̍ dīōmnda̍ŋ nda᷅ŋ ndo̍ cho̍ ni̍ māā le̍ mī nya̍ bɛ̍ɛ̍ mī lā nɔ̄ lāāla᷄ŋndo̍. 36 Sɔ̄ɔ̍ŋ mu᷅ŋ kpo̍u̍ ŋ̄ yɔ̄nu̍ŋ le̍ mī nyɛ̍ cho̍ ō pōōnyīa̍ŋ o̍ Yāu̍ Mɛ̄lɛ̄ka̍a̍ ni᷄ŋ ndo̍ ō yɔ̄nu̍ŋ. Kāni̍ fo̍ndōle̍, ī chō ī pōōnyīāā āā, “Ā yi᷅m ni̍ŋ pa̍ā ndɔ̄ɔ̍ ō pīlɛ̍ bɛ̍ɛ̍ le̍.” 37 Ī chō vɛ̄lɛ̄ ī pōōnyīāā o̍ fo̍ndāŋ chēle̍ŋ o̍ Yāu̍ Mɛ̄lɛ̄ka̍a̍ ni᷄ŋ āā, “Wāŋnda̍ chō hūnɔ̄ɔ̄ hɔ̄lla̍ chūā mā tōfa̍ wāna̍ nda̍ chūkū a̍ ba̍llo̍ wo̍.”

A̍ mɛ̄ɛ̍ nda̍ chɔ̍ Chi̍i̍sū yɛ̍

38 Po̍ pi᷅lɛ̍ ō wa̍ dīōla̍ŋ āā, Chōo̍sɛ̍, wānā wa̍ā Ālīmāti̍a̍ā chi̍e̍e̍. Ndu̍ bɛ̍ɛ̍, bu̍ɛ̍i̍ Chi̍i̍sōo̍ o̍ wa̍ ni̍. Kɛ̍ ndu̍yɛ̍, ndu̍ o̍o̍ chɔ̍mnūŋ kpe̍nde̍ke̍le̍ māā bu̍ɛ̍i̍ Chi̍i̍sōo̍ le̍ o̍ cho̍ le̍. Kāni̍ fo̍ndōle̍, sīōōŋnde̍ ī wa̍ ndu̍ le̍ wānāā bɛ̄ndūa̍a̍ Chu̍ūwa̍. Mɛ̄ɛ̍ Chi̍i̍sū vi᷅, mi̍ pōo̍ ho̍ō kūā mbo̍ kɔ̍ di̍mūl Pa̍i̍lē māā Pa̍i̍lē fe̍ŋa̍l ndu̍ bāla̍ŋ mbō kūɛ̄ a̍ dīāllu᷄ŋ Chi̍i̍so᷄ŋ. Mi̍ Pa̍i̍lē chɛ᷅l. O̍ ko̍ŋ kɔ̍ɔ̍lī, mi̍ Chōo̍sɛ̍ ku̍ā, mbo̍ kɔ̍ chu̍ā dīāllu᷄ŋ Chi̍i̍so᷄ŋ. Mbo̍ kūā a̍ mu̍ŋ. 39 Nīkōdi̍mɔ̄ɔ̄, ō ndu̍ o̍o̍ ku̍ɛ̄ te̍le̍ŋ pi᷅lɛ̍ a̍ nyūmnda̍ŋ nāa̍ Chi̍i̍sū chu̍a̍ wo̍, ndu̍ bɛ̍ɛ̍, mbo̍ kūā nda̍ Chōo̍sɛ̍. Mi̍ Nīkōdi̍mɔ̄ɔ̄ ko̍ŋ chūā nyɛ̄m chūŋ kɛ̄ndɔ᷄ŋ a̍ kōo̍ma̍ pu̍m mbo̍ kūā a̍ ma̍ŋ. Lūsu̍l nyɛ̄m mu᷅ŋ a̍ kōo̍ma̍ ma̍ŋ ndu̍ o̍o̍ wa᷅ pa᷅ŋnda̍ŋ kɛ̄mɛ̄. Dīōlā nyɛ̄m mu᷄ŋ la̍ cho̍ la᷅ŋ ni̍, ā vēēlū ho̍ō āā, mɔ̍ɔ̄, ā vēēlu̍ ō pīlɔ̍ɔ̄ āā, a̍lo̍o̍sī. 40 Mi̍ pūa̍a̍ ŋi̍ɔ̍ɔ̍ŋnda̍ ha̍ā ā chūā dīāllu᷄ŋ Chi̍i̍so᷄ŋ ma̍ kɔ̍ dɔ̍ū mu̍ŋ o̍ kōlāla̍ fe̍ŋgbɛ̍la̍ŋ ni᷄ŋ la̍tu̍lu̍ a̍ nyɛ̄m chūŋ kɛ̄ndɛ̄ŋ mu᷅ŋ a̍ kōo̍ma̍ ma̍ŋ. Le̍nde̍ Chu̍ūwa̍ nda̍ a̍a̍ bɛ̍ɛ̍ndīāā wa̍nā vi̍lɛ̍i̍yo̍ le̍ ndu̍ kɔ̄la̍ŋ kūmbɔ̄ɔ̍ ni̍. 41 Kpe̍lo̍o̍ ō wa̍ o̍ fo̍ndāŋ nda̍ ba᷄ŋ ko̍ŋ Chi̍i̍sū o̍ yɔ̄m sīŋgāfīlāa̍ chōo̍ wo̍. Sɛ̄īyo̍ wa̍ ō tūāūwāā sɛ̄nɛ̄ī o̍ kpe̍lo̍o̍ ho̍ō ni᷄ŋ, tōūwɔ̄ɔ̍ ndu̍ o̍ pōūwo̍ ni᷄ŋ māā būūlū. Ndu̍yɛ̍, nda̍ a̍a̍ chɔ̍ wɔ̍ wa̍nā o̍ wānā le̍ni̍ŋ le̍pi᷅lɛ̍ bɛ̍ɛ̍ le̍. 42 Sɛ̄īyo̍ ho̍ō, ō ve̍ le̍vi̍l a̍ fo̍ndāŋ nda̍ ba᷄ŋ Chi̍i̍sū wo̍ le̍, ndu̍yɛ̍, pāa̍le̍ bɛ̍ɛ̍ndīa̍ŋnde̍ŋ le̍ pāa̍le̍ pɛ̍ŋgīāālē Chu̍ūwa̍, le̍ŋ le̍ wa̍ pāa̍le̍ le̍ŋ ni̍. Le̍ he̍ī, mɛ̄ɛ̍ nda̍ dɔ̄ū dīāllu᷄ŋ Chi̍i̍so᷄ŋ o̍ fe̍ŋgbɔ̍ɔ̍ ni᷄ŋ, ma̍ lūēī mu̍ŋ o̍ sɛ̄ī ko̍ŋ ni᷄ŋ ma̍ yāmbū.

Chɔ᷄ŋ 20

Chi̍i̍sū mi̍i̍ŋgu̍ yōōmū

1 Īdīi̍yo̍ pu̍u̍ŋ o̍ pāa̍le̍ Kpu̍yāle̍ŋ chōo̍, mi̍ Mēēle̍ Māŋgāli᷅ŋ cha̍ŋ mbo̍ kūā o̍ sɛ̄īyo̍. Nyɔ̄ɔ̍ ndu̍ o̍o̍ te̍ŋga̍ wɔ̍ bɛ̍ɛ̍ le̍. Mɛ̄ɛ̍ o̍ fu̍u̍lu̍u̍, mbo̍ sāālu᷄ŋ po̍ū nda̍ a̍a̍ ha̍ndu̍ o̍ sɛ̄īyo̍ sōndōo̍ wo̍ ō fāŋāā, ndu̍yɛ̍, sɛ̄i̍ būūlōo̍. 2 Sāālɔ᷄ŋndo̍ le̍nde̍, mbo̍ mīīŋgū a̍ kīlta̍ŋ nāa̍ Sa̍i̍mɔ̄ŋ Pītɛ̍ chu̍a̍ nda̍ bu̍ɛ̍īyo̍ ō pīlɔ̍ɔ̄, ō Chi̍i̍sū ndu̍ o̍o̍ ka̍a̍la̍ wo̍. Mbo̍ kɔ̍ di̍mūl nda̍ āā, “Ā sōli̍ dīāllūŋ Ma̍sānɔ̄ɔ̍ o̍ sɛ̄īyo̍ ni᷄ŋ, ndu̍yɛ̍, ŋ̄ si̍nā nāa̍ nda̍ hīvi̍ mu̍ŋ nda̍ le̍.” 3 O̍ ko̍ŋ, mi̍ Pītɛ̍ nda̍ bu̍ɛ̍īyo̍ ō pīlɔ̍ɔ̄ ā cha᷄ŋ kɔ᷅la̍ŋ o̍ sɛ̄īyo̍. 4 Nda̍ ŋi̍ɔ̍ɔ̍ŋ ma̍ kāndū kīlta̍ŋ, kɛ̍, mi̍ bu̍ɛ̍īyo̍ ō pīlɔ̍ɔ̄ ō mɛ̄ī Pītɛ̍ kɔ̄ɔ̄lī. Mbo̍ fūūlūū o̍ sɛ̄īyo̍ ndu̍ tāse̍. 5 Mɛ̄ɛ̍ o̍ fu̍u̍lu̍u̍, mbo̍ tūndu᷄ŋ mbo̍ tōfā o̍ sɛ̄īyo̍ ni᷄ŋ. Mbo̍ chā kōlāla̍ fe̍ŋgbɛ̍la̍ dīāllo̍ŋ ŋ̄ wa̍ lēni᷄ŋ nda̍ŋ o̍ sɛ̄īyo̍ ni᷄ŋ. Kɛ̍, ō lūe̍i̍ le̍ni̍ŋ te̍. 6 O̍ ko̍ŋ, mi̍ Sa̍i̍mɔ̄ŋ Pītɛ̍ o̍ wa̍ kɔ̄ɔ̄lī wo̍ bɛ̍ɛ̍ o̍ fu̍u̍lūū. Mɛ̄ɛ̍ o̍ fu̍u̍lu̍u̍ dɔ̍ɔ̍, mbo̍ lūɛ̄ī sa̍kpō o̍ sɛ̄i̍ būūlōo̍ ho̍ō ni᷄ŋ. Mbo̍ chā fe̍ŋgbɛ̍la̍ dīāllo̍ŋ ŋ̄ wa̍ lēni᷄ŋ nda̍ŋ o̍ sɛ̄īyo̍ ni᷄ŋ. 7 Mbo̍ chā vɛ̄lɛ̄ kōla̍ nda̍ a̍a̍ pi̍nda̍ pi̍nda̍ ndu̍ o̍ lēbōl lo̍. Kɛ̍ ndu̍ ndu̍ wa̍ ō tūī tūīyāā, ō kɛ̄sīāā nāa̍ ndɔ̄ te̍ŋge̍le̍ŋ. 8 Mi̍ bu̍ɛ̍īyo̍ ō pīlɔ̍ɔ̄, o̍ ke̍le̍ŋa̍ fūūlūū wo̍ bɛ̍ɛ̍ o̍ lu̍ɛ̍ī o̍ sɛ̄īyo̍ ni᷄ŋ. Mbo̍ chā wōlɔ̄ɔ̄la̍ŋ nda᷅ŋ. Mbo̍ lāāla᷄ŋ. 9 Nyɛ̄ Yāu̍ Mɛ̄lɛ̄ka̍a̍ dīmi̍ a̍ chi̍i̍sū o̍kɔ̄ɔ̄ māā mɛ̄ɛ̍ mbō mīīŋgū yōōmū wo̍, nda̍ a̍a̍ si̍na̍ wɔ̍ ndu̍ pɛ̄ŋgu̍ le̍. 10 O̍ ko̍ŋ kɔ̍ɔ̍lī, mi̍ bu̍ɛ̍īya̍ ha̍ā ā mīīŋgu᷄ŋ o̍ chīɛ̄īlā ndāla̍ŋ.

Chi̍i̍sū chɔ̍mnu̍ŋ Me̍ēle̍ Māŋgāli᷅ŋ

11 Mēēle̍ Māŋgāli᷅ŋ wa̍ īsīsi̍ o̍ sɛ̄īyo̍ kɔ̄ŋgɔ̍ mbo̍ wā cha᷄ŋndo̍. Ō lo̍ cha᷄ŋndo̍ mbo̍ sɔ̄ɔ̄ŋgūū mbo̍ tōfā o̍ sɛ̄ī būūlōo̍ ho̍ō ni᷄ŋ. 12 Mɛ̄ɛ̍ o̍ mɛ̍ɛ̍nda̍ŋ o̍ sɛ̄īyo̍ ni᷄ŋ, mbo̍ chā ki̍i̍la̍a̍ Mɛ̄lɛ̄ka̍a̍ ā ŋīɔ̍ɔ̍ŋ a̍ nyɛ̄lā hūmbūla̍ŋ nda̍ lēkɔ̄ɔ̍. Ā wa̍ īchāli̍ nāa̍ dīāllu᷄ŋ Chi̍i̍so᷄ŋ ŋ̄ wa̍ ŋ̄ yāmbāā wa̍. Ho̍ō wa̍ īchāli̍ nāa̍ nda̍ a̍a̍ mu̍li̍ wānā vi̍lɛ̍i̍yo̍ bōlle̍ŋ nda̍, mi̍ ō pīlɔ̍ɔ̄ wā īchāli̍ nāa̍ pēlo᷄ŋ ŋ̄ wa̍ wa̍. 13 Mi̍ ki̍i̍la̍a̍ Mɛ̄lɛ̄ka̍a̍ ha̍ā ā nyūnā Mēēle̍ āā, “Wɛ̄ɛ̄ŋndo̍ cha᷄ŋ yɛ̄ɛ̍nɛ̍ ŋ̄ chō yɛ̄?” Mi̍ Mēēle̍ mu̍lī āā, “Ma̍sānɔ̄ nūu̍ nda̍ chu̍a̍ ni̍, ndu̍yɛ̍, I̍ si̍nā bā nda̍ hīōū a̍ ndu̍ le̍.” 14 Mɛ̄ɛ̍ o̍ di̍mi̍ le̍nde̍, mbo̍ mūli᷄ŋ. Mūli᷄ŋ ko̍ŋ, mbo̍ chā Chi̍i̍su̍ īsīsi̍. Kɛ̍, ō sīna̍ māā ndu̍ le̍. 15 Mi̍ Chi̍i̍sū nyu̍nā ndu̍ āā, “Wɛ̄ɛ̄ŋndo̍, vɛ᷅ cha᷄ŋndo̍? Ō nɛ̄ɛ̍nɛ̍ ŋ̄ chō yɛ̄ nūūvīāā?” Mēēle̍ wa̍ ko̍ kɔ̍l māā wāna̍ to̍sā wa̍llo̍ o̍ kpe̍le̍ ko̍ŋ ni᷄ŋ ndo̍ ni̍. O̍ ko̍ŋ, mbo̍ dīmūl ndu̍ āā, “Fāllo̍, tē nu᷄m chu̍a̍ dīāllūŋ ndɔ᷄ŋ ni̍, mɛ̄ɛ̍ chɔ̍m ya̍ nāa̍ ŋ̄ hīvi̍ mu̍ŋ nda̍. Chɔ̍m ya̍ mī I̍ kɔ᷅ chu̍ā.” 16 O̍ ko̍ŋ, mi̍ Chi̍i̍sū ve̍e̍lū ndu̍ āā, “Mēēle̍.” Mi̍ Mēēle̍ mūli᷄ŋ mbo̍ ve̍e̍lū o̍ Hi̍būlūi̍ye̍ ni᷄ŋ āā, “Lūābo̍nī,” ko̍ŋ cho̍ ni̍, Ti̍chā. 17 Mi̍ Chi̍i̍sū di̍mūl ndu̍ āā, “Ba̍a̍mba᷄ŋ ndɔ̍ ya̍ le̍, kāni̍, I̍ mi̍i̍ŋgu̍ wɔ̍ nāa̍ Mɛ̄lɛ̄ka̍ Fi̍nyāa̍ chūā le̍. Kɔ̍ nāa̍ bu̍ɛ̍i̍yāā nīa̍a̍ chūā mā kɔ̍ di̍mūl nda̍ māā I̍ cho̍ mīīŋgōo̍ nāa̍ Fi̍nyā nūu̍ chūā, nda̍ bɛ̍ɛ̍, Fi̍nyā ndā. I̍ cho̍ mīīŋgōo̍ nāa̍ Mɛ̄lɛ̄ka̍ nūu̍ chūā, nda̍ bɛ̍ɛ̍, Mɛ̄lɛ̄ka̍ ndāa̍.” 18 O̍ ko̍ŋ kɔ̍ɔ̍lī, mi̍ Mēēle̍ Māŋgāli᷅ŋ ku̍ā, mbo̍ kɔ̍ di̍mūl bu̍ɛ̍i̍yāa̍ Chi̍i̍sūa̍a̍ māā ō chē Māsānɔ̄ɔ̍. O̍ ko̍ŋ kɔ̍ɔ̍lī, mbo̍ chɔ̄m nda̍ nyɛ̄ Chi̍i̍sū di̍mu̍l ndu̍ wo̍.

Chi̍i̍sū chɔ̍mnu̍ŋ bu̍ɛ̍i̍yāā ndūa̍a̍

19 O̍ pāa̍le̍ Kpu̍yālē lēŋ chōo̍ i̍chɔ᷅llo̍, mi̍ bu̍ɛ̍īya̍ chūūŋgi̍āŋ na̍a̍ pi᷅lɛ̍. Kɛ̍, ā wa̍ sīōōŋnde̍ le̍ wānāā bɛ̄ndūāā Chu̍ūwa̍. Le̍ he̍ī, ma̍ kīīndīāā dīōla̍ŋ kpa̍ŋ kpa̍ŋ. Kɛ̍, o̍ lēpīlɛ̍ ni᷄ŋ kpe̍ mɛ̄ɛ̍ ma̍ chā ni᷅ŋ Chi̍i̍su̍ nda̍ tɛ̄ɛ̄ŋ. Mbo̍ yīl nda̍ āā, “Lā wa̍ a̍ kɔ̄ltā nyūlū.” 20 Mɛ̄ɛ̍ o̍ di̍mi̍ le̍nde̍, mbo̍ chɔ̄m nda̍ bāla̍ŋ a̍ lūŋgbu̍e̍i̍. Mɛ̄ɛ̍ bu̍ɛ̍īya̍ chē Māsānɔ̄ɔ̍, ma̍ nāŋ kɔ̄l ta̍u̍ ta̍u̍. 21 Mi̍ Chi̍i̍sū di̍mūl nda̍ vɛ̄lɛ̄ āā, “Lā wa̍ a̍ kɔ̄ltā nyūlū. Mɛ̄ɛ̍ Mɛ̄lɛ̄ka̍ vēm ya̍ yɛ̍, le̍nde̍ ko̍ni̍ ya̍ bɛ̍ɛ̍ ya̍ I̍ cho̍ nya̍ vīōmɔ̄ɔ̍ ni̍.” 22 Mɛ̄ɛ̍ o̍ di̍mi̍ le̍nde̍, mbo̍ hūl nda̍ fu̍ū. Mbo̍ dīmūl nda̍ āā, “Lā chē Nyi̍nā Kāsīo̍o̍. 23 Wānā o̍ wāna̍ nya̍ ma᷄l le̍ yɔ̄ŋndā ndɔ̄la̍ wɔ̍ɔ̍ŋnda̍ŋ pɛ̍, wānā ko̍ŋ ō sɔ̄la̍ mālɔ̄ɔ̍. Kɛ̍, wānā o̍ wāna̍ nya̍ me᷄l te̍, ō sɔ̍lā ma̍lɔ̄ɔ̄ le̍.”

Tɔ̄mɔ̍si̍ bɛ̍ɛ̍ ō chē Chi̍i̍sū

24 Bu̍ɛ̍īyāā tɔ̍ a̍ ā ŋīɔ̍ɔ̍ŋnda̍ ō pīlɔ̍ɔ̄, ndu̍ yɔ̍nūŋ māā Tɔ̄mɔ̍si̍ ni̍, mā vēēlū vɛ̍lɛ̄ ndu̍ āā, Pɛ̄ndūnɔ̍ɔ̍, ō ve̍ lo̍ŋ bo̍o̍ndi̍i̍ bu̍ɛ̍īya̍ ā pīli̍a̍ā chē Chi̍i̍sū ve̍ le̍. 25 O̍ ko̍ŋ kɔ̍ɔ̍lī, ma̍ dīmūl ndu̍ māā ma̍ chā Māsānɔ̄ɔ̍. Kɛ̍, mi̍ Tɔ̄mɔ̍si̍ lo᷅ lo̍ŋ mbo̍ dīmūl nda̍ āā, “Tē I̍ chi̍ yɛ̍ ndu̍ tīndīlā ŋ̄lɔ̄ndīmɛ̄i̍la̍ŋ o̍ lābā pɛ̍ɛ̍ŋ, ndu̍yɛ̍, mī ha̍ndu̍ sūe̍i̍ o̍ tīndīlā lāŋ te̍, I̍ la̍a̍lāŋ māā ī chō tōnya̍ le̍. Mɛ̄ɛ̍ mī I̍ ha̍ndu̍ sūe̍i̍ o̍ tīndīlā lāŋ, ndu̍yɛ̍, mī I̍ wo̍u̍ bāa̍ ndu̍ o̍ lūŋgbu̍e̍i̍ nāa̍ nda̍ chūkū ndu̍ wa̍.” 26 O̍ ko̍ŋ kɔ̍ɔ̍lī, mɛ̄ɛ̍ lɔ̍ɔ̍ hīōū ō pīlɛ̍, bu̍ɛ̍īya̍ wa̍ nāa̍ pi᷅lɛ̍ vɛ̄lɛ̄ chīɛ̄ī ni̍ŋ. Tɔ̄mɔ̍si̍ bɛ̍ɛ̍ ō wa̍ lo̍ŋ pa̍a̍le̍ le̍ŋ. Dīōla̍ŋ lā wa̍ lā kīīndīāā. Kɛ̍, o̍ lēpīlɛ̍ ni᷄ŋ kpe̍ mā chā Chi̍i̍su̍ īsīsi̍ nda̍ tɛ̄ɛ̄ŋ. Mbo̍ yīl nda̍ āā, “Lā wa̍ a̍ kɔ̄ltā nyūlū.” 27 O̍ ko̍ŋ kɔ̍ɔ̍lī, mbo̍ dīmūl Tɔ̄mɔ̍si̍ āā, “Tɔ̄mɔ̍si̍, hu̍ŋ ha̍ndū ya̍ sūe̍i̍ na̍ŋ. O̍ ko̍ŋ kɔ̍ɔ̍lī, mā to̍fa̍ ya̍ bāla̍ŋ. Ndu̍yɛ̍ vɛ̍lɛ̄, mā si̍ɛ̍ndi̍ bāa̍ mā wo̍u̍ ya̍ o̍ lūŋgbu̍e̍i̍. Ma̍l ki̍i̍sa᷄ŋndo̍ mā nɔ̄ lāāla᷄ŋndo̍.” 28 O̍ ko̍ŋ, mi̍ Tɔ̄mɔ̍si̍ di̍mī āā, “Nu᷄m cho̍ Māsānɔ̍ nūu̍ ni̍, nu᷄m cho̍ Mɛ̄lɛ̄ka̍ nūu̍ ni̍.” 29 Mi̍ Chi̍i̍sū di̍mūl ndu̍ āā, “Le̍ chɔ̄ ŋ̄ chē ya̍ wo̍ ŋ̄ lāāla̍ŋ ni᷅ŋ ni̍? Wāna̍ chi̍ wɔ̍ ya̍ le̍ wo̍, kɛ̍ ndu̍yɛ̍, mbo̍ lāāla᷄ŋ ndo̍, wānā ko̍ŋ ō pɛ̄l tɔ̄nɔ̄ɔ̍.” Le̍ sa̍bū yāu̍wo̍ ho̍ō pōōnyi̍a̍ŋ ndo̍. 30 Mi̍ Chi̍i̍sū to̍sā wa̍lta̍ fa̍ŋgā fa̍ŋgālā chēle̍ŋ bu̍ɛ̍i̍yāā ndūa̍a̍ o̍ hɔ̄l la̍ cho̍ bɛ̍ɛ̍ la̍ po̍o̍nyīāā o̍ yāu̍wo̍ ho̍ō ni᷄ŋ te̍ la̍ŋ. 31 Kɛ̍ ndu̍yɛ̍, la᷅ŋ lā pōōnyi̍a̍ŋ le̍ mī lā lāāla̍ŋ māā Chi̍i̍sū ndu̍ cho̍ Ki̍li̍tī ni̍, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, Mɛ̄lɛ̄ka̍ Po̍ ndɔ̄ɔ̍. Ndu̍yɛ̍, o̍ lāāla᷄ŋndo̍ ho̍ō ni᷄ŋ, mi̍ lā sɔ̄la̍ yōōmū kpe̍e̍kpe̍i̍yo̍ o̍ sa̍bū ndɔ̄ɔ̍ ni᷄ŋ.

Chɔ᷄ŋ 21

Chi̍i̍sū chɔ̍mnu̍ŋ bu̍ɛ̍i̍ya̍ o̍ yɔ̄ɔ̄yā nda̍ wa̍ wo̍

1 Mɛ̄ɛ̍ pālɛ̍i̍ ti᷄ŋ ī hīōū, mi̍ Chi̍i̍sū chɔ̍mnu᷄ŋ vɛ̍lɛ̄ bu̍ɛ̍i̍yāā ndūa̍a̍ nāa̍ nda̍ wa̍ yɔ̄ɔ̄yāa̍ o̍ mɛ̄ŋmā ībūŋga᷄ŋ Tābi̍līāā wa̍. Mɛ̄ɛ̍ i̍ yɔ̍nu̍ŋ yɛ̍ cho̍ nu̍a̍ā ni̍. 2 Bōōndi̍i̍ pi᷅lɛ̍, Sa̍i̍mɔ̄ŋ Pītɛ̍ nda̍ bu̍ɛ̍īya̍ ā pīli̍a̍ā ā wa̍ ku̍ndā. Nda̍ wa̍ lo̍ŋ nda̍ cho̍ ha̍ā ni̍, Tɔ̄mɔ̍si̍, ō nda̍ a̍a̍ ve̍e̍lū āā pɛ̄ndūnɔ̍ɔ̍ wo̍ ni̍, a̍ Nāta̍nīɛ̄l, wānā wa̍ā Ke̍nā chi̍e̍e̍ o̍ lɛ̄ŋndē Kāli̍lī le̍ŋ, a̍ pūa̍a̍ Sɛ̍bɛ̍dīī, a̍ bu̍ɛ̍i̍yāā ŋi̍ɔ̍ɔ̍ŋāā chēle̍ŋ. 3 Mi̍ Pītɛ̍ lo᷅ o̍ ko̍ŋ mbo̍ dīmūl chāāŋāā ndūa̍a̍ āā, “I̍ cho̍ lākɔ̄ yɔ̄ɔ̄yāa̍.” Mi̍ bu̍ɛ̍īya̍ ā pīli̍a̍ā bɛ̍ɛ̍ a̍ di̍mī āā, “Na̍a̍ bɛ̍ɛ̍, ŋ̄ chō lākɔ̄.” Ma̍ cha᷄ŋ ma̍ kūā. Ma̍ kɔ̍ lu̍ɛ̍ī o̍ dɛ̄ndɔ̄ɔ̍ ni᷄ŋ. Ma̍ lɔ̄ɔ̄lū yɔ̄ɔ̄yāa̍ pi̍i̍ pi̍i̍, kɛ̍ nyɛ̄ bɛ̍ɛ̍, ā chu̍e̍ le̍. 4 Mɛ̄ɛ̍ pāa̍le̍ŋ lē sɛ̄ īdīi̍yo̍, mi̍ Chi̍i̍sū chɔ̍mnu᷄ŋ nda̍. Ō wa̍ īsīsi̍ o̍ mɛ̄ŋmā ībūŋga᷄ŋ kɔ̄ŋgɔ̍, kɛ̍ ā sīna̍ māā ndu̍ le̍. 5 Mi̍ Chi̍i̍sū nyu̍nā nda̍ āā, “Pūa̍a̍, lā chu̍a̍ pa̍?” Ma̍ mūlī āā, “Ɛ̄ Ɛ̍.” 6 Mbo̍ dīmūl nda̍ āā, “Lā wūu̍ wɔ̍ ya̍lāa̍ o̍ bā nyā kɛ̍ndɔ̄ɔ̍ chōo̍. Lā chō sūūwa̍ chūā.” Ma̍ wūū yālāa̍ ō bā kɛ̄ndɔ̄ɔ̍ chōo̍. Mbɔ̄ kɛ̍ nūm. Sūūwāā pīlɛ̍ kpe̍ nda̍ a̍a̍ lu̍ɛ̍ī lēni᷄ŋ ni̍. Ma̍ būmbā nda̍ nānɔ̄ɔ̄ o̍ dɛ̄ndɔ̄ɔ̍ ni᷄ŋ. 7 O̍ ko̍ŋ, mi̍ bu̍ɛ̍ī Chi̍i̍sū ka̍a̍la̍ wo̍ dīmūl Pītɛ̍ āā, “Māsānɔ̄ɔ̍ Chi̍i̍su̍ cho̍ ko̍ŋ ni̍.” Mɛ̄ɛ̍ Pītɛ̍ tu̍e̍ī le̍nde̍ māā Māsānɔ̄ɔ̍ ni̍, mbo̍ chūā dōmāa̍, mbo̍ wōūnu᷄ŋ. Kāni̍, yɔ̄ɔ̄yā nda̍ wa̍ wo̍, mi̍ ndu̍ o̍o̍ so̍o̍lu᷄ŋ. Mɛ̄ɛ̍ o̍ wo̍u̍nu̍ŋ do̍māa̍, mbo̍ tūāl o̍ mɛ̄ŋnda̍ŋ ni᷄ŋ, mbo̍ tāŋ. 8 Bu̍ɛ̍īya̍ ā pīli̍a̍ā, nda̍ nda̍ wa̍ hūnɔ̄ɔ̍ o̍ dɛ̄ndɔ̄ɔ̍ ni᷄ŋ. Dɛ̄ndɔ̄ɔ̍ wa̍ hūnɔ̄ɔ̍ a̍ yālāa̍ nānɔ̄ɔ̍ a̍ sūūwa̍ lēni᷄ŋ. Ā lo̍ hūnɔ̄ɔ̍ le̍nde̍ ma̍ fūūlūū o̍ kɔ̄ŋgɔ̍ɔ̍ bɛ̄ŋgu̍. Chɔ̍ŋ o̍ fo̍ndāŋ nda̍ wa̍ ko̍ŋ o̍ mɛ̄ŋnda̍ŋ chōo̍ wo̍ hu̍ŋ o̍ kɔ̄ŋgɔ̍, ō ve̍ le̍vi̍l te̍. Ō wa̍ kɔ̄lā wāā o̍ kɔ̄ŋgɔ̍ pɛ̍, ndu̍ o̍o̍ wa᷅ nɛ̍īyo̍ kɛ̄mɛ̄. 9 Mɛ̄ɛ̍ nda̍ fūūlu̍u̍ o̍ kɔ̄ŋgɔ̍ɔ̍ bɛ̄ŋgu̍, ma̍ fūlā o̍ dɛ̄ndɔ̄ɔ̍ ni᷄ŋ. Mɛ̄ɛ̍ nda̍ he᷄l o̍ kɔ̄ŋgɔ̍, ma̍ chā yīŋnde̍ŋ lē kīīsāā a̍ sūɛ̍ɛ̍ŋnde̍. Ma̍ chā bēe̍dīi̍yo̍ a̍ sūūwo̍. Sūūwo̍ wa̍ o̍ dɛ̄ŋgūlta̍ŋ chōo̍. 10 Mi̍ Chi̍i̍sū di̍mūl nda̍ āā, “Lā hu᷄ŋ a̍ sūūwāā nya̍ lāŋga̍ bi̍ī wa̍ ā ti᷄ŋ.” 11 Mi̍ Sa̍i̍mɔ̄ŋ Pītɛ̍ mi̍i̍ŋgū o̍ dɛ̄ndɔ̄ɔ̍, mbo̍ kɔ̍ ti̍mbī yālāa̍, mbo̍ hūŋ a̍ ndu̍ nānɔ̄ɔ̍. Ō wa̍ ō pīāā a̍ sūūwāā bɛ̄ndūa̍a̍. Sūūwāa̍ wa̍ lēni᷄ŋ nda̍, ā wa̍ kɛ̄mɛ̄ a̍ sūūwa̍ be̍le̍-ŋu̍ɛ̍ɛ̍nu̍ a̍ ā yāa̍. Kɛ̍, a̍ sūūwāā kāāku̍u̍wāa̍ wa̍ ka̍ŋ le̍ni̍ŋ nda̍ fa̍ū, kīōlī bɛ̍ɛ̍ yālāa̍ kīōli̍ le̍. 12 Mi̍ Chi̍i̍sū di̍mūl nda̍ āā, “Lā hu᷄ŋ di̍ō nyɛ̄ dīa̍a̍.” Bu̍ɛ̍īya̍ ha̍ā ki̍nɛ̍i̍ ō pīlɛ̍ bɛ̍ɛ̍ bi̍i̍ kɔ᷅llo̍ mbō nyūna̍ ndu̍ āā, “Nūm nɛ̄ɛ̍nɛ̍,” le̍, kāni̍ fo̍ndōle̍, nda̍ a̍a̍ si̍nā māā Māsānɔ̄ɔ̍ ni̍. 13 Mi̍ Chi̍i̍sū cha̍ŋ mbo̍ kɔ̍ chu̍ā bēe̍dīi̍yo̍ mbo̍ kē nda̍. Sūūwo̍ bɛ̄ɛ̄ le̍nde̍ ko̍ni̍, mbo̍ chūā mbo̍ kē nda̍. 14 Chɔ̍ŋ a̍ mīīŋgū Chi̍i̍sū mi̍i̍ŋgu̍ yōōmū wo̍, mɛ̄ɛ̍ yāa̍ ndɔ̄ɔ̍ wa̍ ni᷅ŋ ho̍ō le̍ bu̍ɛ̍i̍yāā ndūa̍a̍ chɔ̄mnɔ᷄ŋndo̍ ni̍.

Mɛ̄ɛ̍ Chi̍i̍sū nda̍ Pītɛ̍ a̍ su̍u̍ki̍āŋ yɛ̍

15 Mɛ̄ɛ̍ nda̍ chīi̍ nyɛ̄ dīa̍a̍ di̍o̍, mi̍ Chi̍i̍sū nyu̍nā Sa̍i̍mɔ̄ŋ Pītɛ̍ āā, “Sa̍i̍mɔ̄ŋ, po̍ Chɔ᷄ŋ ndo̍, a̍ ka̍a̍la̍ ya̍ mbo̍ hīāū mɛ̄ɛ̍ ha̍ā ā kāāla̍ ya̍ yɛ̍?” Mi̍ Pītɛ̍ chɛ᷅l āā, “E̍ī, Māsānɔ̄ɔ̍, ā sīnā māā I̍ ka̍a̍la̍ nu̍m.” Mi̍ Chi̍i̍sū di̍mūl ndu̍ āā, “Mɛ̄ɛ̍ ke̍ sa̍a̍ nīāā pɔ̍mbūa̍a̍ nyɛ̄ dīa̍a̍.” 16 Mbo̍ nyūnā ndu̍ vɛ̄lɛ̄ dīi̍ŋ ndɔ̄ɔ̍ āā, “Sa̍i̍mɔ̄ŋ, po̍ Chɔ᷄ŋ ndo̍, a̍ ka̍a̍la̍ ya̍?” Mi̍ Pītɛ̍ mu̍lī āā, “E̍ī, Māsānɔ̄ɔ̍. Ā sīnā māā I̍ ka̍a̍la̍ nu̍m.” Mi̍ Chi̍i̍sū di̍mūl ndu̍ vɛ̄lɛ̄ āā, “Mɛ̄ɛ̍ ma̍nda̍ sa̍a̍ nīa̍a̍.” 17 O̍ ko̍ŋ kɔ̍ɔ̍lī, mi̍ Chi̍i̍sū nyu̍nā ndu̍ yāa̍ ndɔ̄ɔ̍ āā, “Sa̍i̍mɔ̄ŋ, po̍ Chɔ᷄ŋ ndo̍, a̍ ka̍a̍la̍ ya̍?” O̍ ko̍ŋ, mi̍ kɔ̄llo̍ tāmbū Pītɛ̍, kāni̍ fu̍u̍le̍ le̍ nyūnā kōŋ lēyāa̍ māā tē Pītɛ̍ ka̍a̍la̍ ndu̍ pɛ̍. Mbo̍ dīmūl Chi̍i̍su̍ āā, “Māsānɔ̄ɔ̍, ā sīnā nyɛ᷅ o̍ nyɛ̄ fe̍e̍. Ā sīnā māā I̍ ka̍a̍la̍ nu̍m.” Mi̍ Chi̍i̍sū di̍mūl ndu̍ āā, “Mɛ̄ɛ̍ ke̍ sa̍a̍ nīa̍a̍ nyɛ̄ dīa̍a̍.” 18 Mi̍ Chi̍i̍sū di̍mūl Pītɛ̍ āā, “Mī di̍mu̍l nu̍m tōnya̍a̍ wa̍la̍ŋ, te̍le̍ŋ ŋ̄ wa̍ chūā pīāāndū wo̍, nūm o̍o̍ do̍vi̍ŋ pɛ̍ ā kūɛ̄nu᷄ŋ ba᷅ o̍ bā ŋ̄ yēēma̍. Kɛ̍ ndu̍yɛ̍, bōōndi̍i̍ ŋ̄ yūwā ni̍ŋ nde̍, ā yɔ̄ŋgū ni̍ŋ ba᷅la̍ŋ mī wānā che᷅le̍ŋndo̍ ō sāāli̍a̍a̍ nu̍m la̍ŋ mbō yīi̍ nu̍m po᷅ŋ, mbō kūɛ̄ a̍ nūm nāa̍ ŋ̄ hɛ̍nāŋ bɛ̍ɛ̍ le̍ lākɔ̄ le̍ wa̍.” 19 Dīōmndā Chi̍i̍sū so̍ō la᷅ŋ nāa̍ Pītɛ̍ chu̍a̍ la̍ŋ ō dīmi̍ mādīmīāā la̍ŋ le̍ chɔ̄mndo̍ mɛ̄ɛ̍ Pītɛ̍ o̍ wa̍ hūnɔ̄ɔ̄ wu̍ le̍ hāli̍ kpe̍ŋ māā mī wāŋnda̍ ā ke̍ Mɛ̄lɛ̄ka̍ bɛ̄ɛ̄le̍ŋ yɛ̍. Mbo̍ dīmūl Pītɛ̍ āā, “To̍l la̍ kɔ̄ɔ̄lī.” Nyɛ̄ Chi̍i̍sū di̍mi̍ a̍ bu̍ɛ̍īyo̍ ō pīlɔ̍ɔ̄ o̍kɔ̄ɔ̄ wo̍ 20 O̍ ko̍ŋ kɔ̍ɔ̍lī, mi̍ Pītɛ̍ mu̍li᷄ŋ mbo̍ chā bu̍ɛ̍ī Chi̍i̍sū ndu̍ o̍o̍ ka̍a̍la̍ wo̍, ō wa̍ nda̍ tōlɔ̄ɔ̍ kɔ̄ɔ̄lī. Bōōndi̍i̍ nda̍ a̍a̍ wa̍ nyɛ̄ dīa̍a̍ dīo̍o̍ nda̍ Chi̍i̍sū wa̍ā ve̍, bu̍ɛ̍īyo̍ ho̍ō, ndu̍ ndu̍ o̍o̍ sɔ̍ɔ̍ŋgu̍u̍ Chi̍i̍su̍ īkɛ̄i̍ ni̍. Ndu̍ ko̍ni̍ ndu̍ o̍o̍ nyu̍na̍ Chi̍i̍sū ni̍ āā, “Māsānɔ̄ɔ̍, ō nɛ̄ɛ̍nɛ̍ cho̍ yɛ̄ nu̍m pīsī?” 21 Mɛ̄ɛ̍ Pītɛ̍ che᷅ mi̍ bu̍ɛ̍ī kōŋ ō wā nda̍ tōlɔ̄ɔ̍ kɔ̄ɔ̄lī, mi̍ Pītɛ̍ nyu̍nā Chi̍i̍sū āā, “Māsānɔ̄ɔ̍, pōo̍ ho̍ō, ndu̍ ndu̍ yɛ̍?” 22 Mi̍ Chi̍i̍sū lo᷅ o̍ ko̍ŋ mbo̍ dīmūl Pītɛ̍ āā, “I̍ ye̍e̍ma̍ bɛ̍ɛ̍ māā mbō lo̍ yōōmū ha̍a̍a̍ mbō lo̍ o̍ ko̍ŋ mī I̍ mi̍i̍ŋgu̍ na̍ŋ, ɔ̍ɔ̄ būūla᷄ŋ nu̍mndo̍ o̍ ko̍ŋ ni̍ŋ? Nūm to̍l la̍ kɔ̄ɔ̄lī su̍e̍e̍.” 23 O̍ ko̍ŋ, mi̍ tɔ̍ɔ̍ ō tīū wānāā lāāla᷄ŋnda̍ tɛ̄ɛ̄ŋ māā bu̍ɛ̍īyo̍ ho̍ō ndu̍ vi᷅ ni̍ŋ te̍. Kɛ̍, ō cho̍ mī Chi̍i̍sū di̍mi̍ māā ō cho̍ wu̍ le̍ le̍. Ō dīmi̍ mādīmīāā āā, “I̍ ye̍e̍ma̍ bɛ̍ɛ̍ mbō lo̍ yōōmū ha̍a̍a̍ mbō lo̍ o̍ ko̍ŋ mī I̍ mi̍i̍ŋgu̍ na̍ŋ ɔ̍ɔ̄ būūla᷄ŋ nu̍mndo̍ o̍ ko̍ŋ ni̍ŋ?” 24 Bu̍ɛ̍īyo̍ ho̍ō, ndu̍ cho̍ nya̍ ho̍ō sɔ̄ɔ̍ŋ mu᷅ŋ chɔ̄mndo̍ ni̍. Ndu̍ ko̍ po̍o̍nyi̍a̍a̍ vɛ̄lɛ̄ sɔ̄ɔ̍ŋ ka̍la᷄ŋ ni̍. Ndu̍yɛ̍, ŋ̄ sīnā māā sɔ̄ɔ̍ŋ o̍ chɔ̍m mu᷅ŋ ndo̍ŋ ŋ̄ chō tōnya̍. 25 Sɔ̄ɔ̍ŋ fa̍ŋgā fa̍ŋgā ŋ̄ chēle̍ŋ chō mi̍ Chi̍i̍sū to̍sā mu̍ŋ. Nyɛ̄ o̍ nyɛ̄ Chi̍i̍sū to̍sa̍ tē ndu̍ o̍o̍ wa̍ nyɛ̍ chu̍ū pōōnyīāā o̍ lāyāu̍ ni̍ŋ pɛ̍, I̍ nɔ̍ o̍ kɔ̄l māā ō wa̍ bɛ̍ɛ̍ chi̍e̍ēŋndo̍ ho̍ō kpo̍u̍, yāu̍la̍ la̍ŋ la̍a̍ su᷅l le̍ni̍ŋ te̍.