Kisii OMOTORIA BW'ENSE Ogosoma gwa kera rituko ase omotienyi korwa ase Emuma Enchenu. Rituko Ri'Eritang'ani OGOTONGWA KWA MWANYABANTO NA OKOGWA KWAYE ASE EBIBE Agwo omochakano Nyasae agatonga Igoro na ense. Nyasae agatonga omonto ase omogwekano oye omonyene, ase omogwekano o Nyasae akamotonga ere, akabatonga omosacha nomokungu. Naende Nyasae akabasesenia. Omonene Nyasae akaira omonto oria na komobeka ase omogondo o Edeni akore emeremo ime yaye na koyorenda. Omonene Nyasae agachika omonto oria akamotebia, Amatunda a kera omote bw'omogondo nonyare koria: korende amatunda 'omote okomanya amaya namabe, tobaisa koria: ekiagera rituko orayarie ekeene nokwe. Bono eng'iti nigo yarenge eng'aini kobua eng'iti ende yonsi y'orosana chiatongetwe na Omonene Nyasae. (Eng'iti, eria ekorokwa Birecha na Saitani, omong'ainereria bw'ense engima.) Egatebia omokungu, Inee, Nyasae nigo atebete ng'a timoria amatunda 'emete yonsi y'omogondo? Omokungu agatebia eng'iti, amatunda 'emete y'omogondo ntonyare koria: korende amatunda y'omote ore gati gati y'omogondo, Nyasae otebire ng'a titoyaria, gose titoyakuna tobaise gokwa. Eng'iti egatebia omokungu, timogokwa ekeene: ekiagera Nyasae omanyire ng'a rituko morayarie, amaiso aino naramokigwe erio mobe buna Nyasae, mokomanya amaya namabe. Nomokungu agachia korora ng'a omote oria nogwenerete ase endagera, naende nigo okogokia amaiso, noro nomote okwegenwa ase obong'aini, agatwa amatunda aye na koyaria; akaa na omosacha oye nere akayaria. Ase omonto oyomo ebibe bigasoa ase ense, na ase ebibe ebio amakweri, naboigo amakweri akabaikera abanto bonsi, naki bonsi bakorire ebibe. OGOSABA 0 Nyasae, namanyire amamocho ane: na ebibe biane nigo bire ase obosio bwane botambe. Omochakano 1 : 1, 27, 28. Omochakano 2 : 15-17. Omochakano 3 : 1-6. Okomanoka 12 : 9. Abarunu 5 : 12. Zaburi 51 : 1, 3. Rituko 2 EIRA Y'OMOTORIA OYORE NYASAE NAENDE MWANYABANTO Isaya akabana: Rigereria, enyaroka nebe morito, naende naibore omwana omoisia, nere erieta riaye namoroke Imanueli. (Imanueli, engencho yaye, Nyasae amo naintwe.) Ase egesaku gia Yese ritina ndirwe aroro, na orosagia rorarwe ase emeri yaye ndoibore amatunda. Na omoika bw'Omonene noikaranse igoro yaye, omoika bw'obong'aini nokoigwa, omoika bw'obokonyi amo ne chinguru, omoika bwe chisemi naende oyokoiroka Omonene. Abanto baria barenge gotara omosunte ime barorire omobaso omonene .. Ekiagera ase tore intwe omwana oiboirwe, ase tore intwe omwana omomura orurwe, na obogambi nabobe igoro ase amareko aye: nerieta riaye narokwe Ogokumia, Omokonyi, Nyasae bwe chinguru, Nyasae o kare na kare, Omogambi bw'omorembe. Ase ogokina kw'obogambi bwaye na omorembe, tibikoba nomoerio, ase ekerogo ki'obogambi gia Daudi, na ase obogambi bwaye, na kobokora bobe ne chinguru, na ase okoboimokia nekina noboronge korwa bono goika kare na kare. Ase omokia bw'Omonene bw'emeganda aya onsi nakorekane. Remia inwe, remia inwe abanto bane, Nyasae oo otebire. Rigereria, Omonene Nyasae nachiche. Narisie riicho riane buna omorisia bwe ching'ondi, nachisangererie ching'ondi ase amaboko aye, na gochibogoria ase egekuba kiaye, nere nachirae ng'ora chiria chikogonkia. Amaene oyebogoirie emechando yaito, bwetwekire obororo bwaito: korende ase tore intwe akarorekana buna oyore nemechando, agaitwa na Nyasae, na gochandwa. Korende nigo aagetwe chingoma ase engencho ya amamocho aito, akaakwa ase engencho y'ebibe biaito: akabogoria egesusuro gekogera tore nomorembe, na ase okoakwa kwaye nigo tokonyora okogwenigwa ... Nigo yagogetie Omonene ase okomoa obororo, akamobeka ase emechando, erio aye onyare bokora enkoro yaye ebe ekeng'wanso ki'ebige: narore oroiboro rwaye, natambeyie amatuko aye na omogoko bw'Omonene mbotenenke ime y'amaboko aye. OGOTOGIA Abakwe Omonene, Nyasae 0 Isirael: Ekiagera obacheire abanto baye na kobaboria. Isaya 7 :14. Mathayo 1: 23. Isaya 11:1,2. Isaya 9:2,6,7. Isaya 40 : 1, 10, 11 Isaya 53 : 4, 5, 10. Luka 1 : 68. Rituko 3 OKOIBORWA KWOMOTORIA BW'ENSE Omomalaika Gabiriel agatomwa na Nyasae kogenda omochie o Galili, erieta riaye Nazareti, ase omoiseke oriereirwe 'boko nomosacha, erieta riaye Yusufu, bw'enyomba ya Daudi, nerieta ri'omoiseke oria Mariamu. Agacha asare akabora, Mbuya ore, oyokwaeirwe obuya, Omonene igo are amo naye. Nere agaichana mono ase ring'ana eri, akarotarotia omoyo oye ime, Oko ngokwania ki oko? Omomalaika akamotebia, Toiroka, Mariamu; ekiagera kwanyorire obuya ase Nyasae. Rora, nobe morito, noibore omwana omoisia, nomoroke erieta riaye Yeso. Oyio nabe omonene, narokwe Omwana oye Oyore Igoro: na Omonene Nyasae namoe ekerogo gia Daudi ise oye: nayegambere enyomba ya Yakobo goika kare na kare, nonya noboruoti bwaye tibokoba nomoerio. Mariamu agatebia omomalaika, Naki rirabe ring'ana eri, ekiagera timomanyed omosacha? Omomalaika akairaneria, Omoika Omochenu nagochere, ne chinguru chiaye Oyore Igoro nachikobekere ekiriri: ase ayio oyoraiborwe narokwe omochenu, Omwana o Nyasae. Mariamu akabora, Rora, inche nenyaroka y'Omonene; nabe asende buna ring'ana riao. Omomalaika akaimoka korwa asare. Agachia koba ase amatuko aria, ogochika gokarua ase Kaisari Augusto, ng'a ense yonsi erikwe ... Abanto bonsi bakagenda korikwa, kera omonto ase omochie oye. Na Yusufu nere akaimoka kogenda ase omochie o Daudi, okorokwa Bethilehemu, ekiagera igo arenge oyo bw'enyomba na eamate ya Daudi; erinde arikwe amo na Mariamu ekiagera onyuomirwe nere, nere igo arenge 'morito. Agachia koba ase ogoikaransa kwabo aroro, amatuko aye agaika ay'okoibora. Akamoibora omwana oye omoisia omotangi; akamobekera chianga chi'obwana, akamwareria ase obweri, ekiagera batanyorete ribaga ase enyomba y'abageni. EKERENGERERIO Yeso Kristo ... oyoiboirwe ase egesaku gia Daudi ase engencho y'omobere ... akaorokigwa ase okobua koba Omwana o Nyasae, ase engencho y'omoika bw'obochenu. Luka 1 : 26-35, 38. Luka 2 : 1, 3-7. Abarumi 1 : 1, 3, 4. Rituko 4 ABATAKA NA ABANDA BAGACHA KOMOSASIMA OMOTORIA Ase ense eyio mbarengeo abarisia baikaransete ebitii, na korenda botuko riicho riabo. Omomalaika bw'Omonene akabaorokera, obonene bw'Omonene bokababarera: bagasogwa nomoondoko omonge. Omomalaika akabatebia, Timoiroka; ekiagera nabareteire inwe amang'ana amaya ay'omogoko omonene, orabe ase abanto bonsi: ekiagera rero ase omochie o Daudi oiboirwe Omotoria ase engencho yaino, nere Kristo Omonene. Neke nekemanyererio asemore; Namomonyore omwana obekirwe chianga chi'obwana; bwareirie obweri. Erio bwango barengeo amo na omomalaika oria, emeganda y'abanto b'lgoro, bakomobaka Nyasae, bakobora, Obonene ase Nyasae oyore igoro mono, Na ase ense omorembe obe gatigati y'abanto baria akogokigwa nabarabwo. Agachia koba, abamalaika bachia koimoka kobatiga kogenda igoro, abarisia baria bagatebania, Gaki togende goika Bethilehemu, torore ring'ana eri riakorekire, eri Omonene atotebirie. Bakagenda bwango ase omoayerero, bakamonyora Mariamu na Yusufu, na omwana bwareirie obweri ime. Abarisia bakairana, bakomotogia Nyasae na komobaka ase amang'ana onsi baigwete, na aya baroche, buna batebetigwe. Na ekero Yeso aiboretwe aria Bethilehemu ya Boyahudi, ase amatuko omoruoti Herode, ekero ekio abanto abang'aini bakarua ensemo ya mocha, bagacha Yerusalemu, bakobora, Ng'ai are oria oiborwa omoruoti bw'Abayahudi? ekiagera eng'enang'eni yaye eyio twayerorire ase mocha, nigo twachire tonyare komosasima. Nero eng'enang'eni bakayerora mocha, eria ebatang'aine, goika ekagenda egatenena igoro aroro ase omwana oria omoke arenge ... Bachia gosoa nyomba bakarora omwana amo na Mariamu ng'ina, bakagwa inse, bakamosasima; bagakunora enibo yabo, bakamokwaneria nebinto ebiya, ethahabu, ubani, na manemane. EKERENGERERIO Ekeene oyo n'Omotoria bw'ense. Naki Nyasae atomete Omwana gocha ase ense ... erio ense etoreke ase engencho yaye. Luka 2 : 8-16,20. Mathayo 2 : 1, 2, 9, 11. Yohana 4 :42, Yohana 3 : 17. Rituko 5 AMANG'ANA A YOHANA OMOBATISI Ring'ana ria Nyasae rikamoikera Yohana omwana o Zakaria, ase eroro. Akagenda chinse chionsi chi'ensemo ya Yorodani, okorandia ebatiso y'ogoonchoka gokoreta okorusia kw'ebibe, buna yarigetwe ase ebuku y'amang'ana ay'omobani Isaya, Eriogi ri'oyokoaka egeturi eroro ime, Yerosie enchera y'Omonene, Rongeyia oboeto bwaye. Nabarabwo emegenda bakamoboria, bakobora, Tokore ki, rende? Akairaneria, Oyore ne chiganchwa ibere amoe ere oyotari nero, na oyore nendagera, akore boigo. Bagacha abakorusia ebango erinde babatiswe, bakamotebia, Omworokia, inki torakore? Akabatebia, Timorusia kobua biria mwachigetwe. Abasigari nabarabwo bakamoboria bakabora, naintwe inki torakore? Akabatebia, Timomokorera 'monto onde bwensi oboenenu, gose timorusia egento getari ekia boronge, naende eng'eria yaino ebaisane. Nabo abanto baria bagachia koba ase okorigereria, bakarengereria bonsi amang'ana a Yohana, ng'a gose nere Kristo; Yohana akairaneria, akabatebia bonsi, Inche igo nkobabatisa ase amache, korende ngocha are oyore ne chinguru kombua inche, tingwenereti gochisibora chinuga chi'ebikoroto biaye; ere nabatise ase Omoika Omochenu na ase omorero. OKOBATISWA KWOMONENE YESO Agachia koba abanto bonsi kobabatiswa, Yeso nere gatiekire kobatiswa, kagosaba, igoro akamanoka. Omoika Omochenu ogaika igoro asare ase omogwekano bwe riruma, eriogi rikarwa igoro, Aye naye Omwana one, omwanchwa one, ngoIdrie naye. OGOTEMWA KWOMONENE YESO Erio Omoika okamoira eroro ime. Akaba aroro eroro ime amatuko emerongo ene ogotemwa na Saitani: nere igo arenge amo ne ching'iti chi'orosana na abamalaika bakamokorera. EKERENGERERIO Yeso Omwana o Nyasae ... igo atemetwe koreng'ana buna intwe ase amang'ana onsi, atari nabibe. Luka 3 : 2-4, 10-16, 21, 22. Mariko 1 : 12, 13. Abaibirania 4 ; 14,15. Rituko 6 OMONENE YESO KRISTO OCHAKIRE EMEREMO Y'OBONENE BWAYE Y arenge enyangi ase Kana ya Galili; na ng'ina Yeso nao arenge. Yeso nere akarangerigwa amo naborokigwa baye ase enyangi. Goika edivai egachia kobaremera, ng'ina Yeso akamotebia, Tibari nedivai. Yeso akamotebia, Omokungu inki nde inche naye? Ensa yane teraika. Ng'ina akabatebia abasomba, Rinde rionsi arabatebie, rikore. Nchiarenge aroro chinsiongo isano nemo chi'amagena, chiabekire aroro ase engencho y'ogwesibia kwabo Abayahudi, kera eyemo igo yarenge ekerengo kia chigallon emerongo ebere gose etato. Yeso akabatebia, Ichoria chinsiongo namache. Bagachichoria goika igoro. Akabatebia, Bono taa, moirere omonene bw'omoyega. Bakaira. Omonene bw'omoyega agachia koyaigwa amache akoregete koba edivai, tamanya aase yarwa, (korende abasomba mbamanyete ababuchete amache) omonene bw'omoyega akamorangeria omonywomi, akamotebia, Kera omonto ritang'ani igo agochaka nedivai ere engiya, goika abanto kabatiekire konywa mono, erio oreta eyetari engiya: aye nigo kwagachete edivai engiya goika bono. Oyio noro omochakano bw'ebikone Yeso akorete Kana ya Galili, akaorokia obonene bwaye; aborokigwa baye bakamwegena. Agachia koba ase amatuko aria, akaimoka akagenda ase egetunwa gosaba; akabao obotuko bwonsi, okomosaba Nyasae. Bogachia gokia mambia akabarangeria aborokigwa baye; akabachora abanto ikomi na babere korwa asebare, ase abwo nabwo arogete abafomwa. Simion nere aete erieta ria kabere Petero, n'Anderea, momura omwabo; Yakobo na Yohana, Filipo na Baritholomayo. Na Mathayo na Tomasi, Yakobo bw'Alufayo, na Simion ore korokwa Zeiote, Yuda o Yakobo; na Yuda Omoisikariota, nere oyomoruete. Omotomwa Yohana akarika: Narirorio ring'ana rigakoreka omobere, agaikaransa asetore (tokaborora obonene bwaye, obonene buna obw'Omwana omomoima orure ase Tata), oichire obuya nekeene. OGOSABA Inyorokie obonene bwao, nagosabire. Yohana 2 : 1-11. Luka 6 :12-16. Yohaaa 1:14. Okong'anya 33 : 18. Rituko 7 OKOIBORWA KW'OMOIKA IME Y'OKWEGENA ASE OMONENE YESO NARENGE omonto oyomo bw'Abafarisai, erieta riaye Nikodemo, omonene bw'Abayahudi: oyo agacha ase Yeso botuko, akamotebia, Rabii, twamanyire ng'a nomworokia ore, kwarure ase Nyasae: naki omonto onde tari oranyare kobikora ebikone ebi ogokora, tatiga Nyasae abe amo nere. Yeso akamoiraneria, Ekeene, ekeene, nagotebirie, omonto ataiboiri eria kabere, takonyara koborora oboruoti bwa Nyasae. Nikodemo akamotebia, Naki aranyare omonto koiborwa kabeire omogaka? Nanyare gosoa enda ya ng'ina eria kabere aiborwe? Yeso akairaneria, Ekeene, ekeene, nagotebirie, Omonto ataiboiri ase amache na Omoika, takonyara kobosoa oboruoti bwa Nyasae. Ekeiboire ase omobere nomobere, nekeiboire ase Omoika nomoika. Tokumia ekiagera nagotebia, Goika oiboirwe naende. Embeo igo ekogusa aase erigetie, negeturi kiaye iga ogokeigwa, korende tomanyeti aase ekorwa gose aase ekogenda, naboigo na kera monto oiboirwe ase Omoika. Nikodemo akamotebia, Naki aranyare koba aya? Yeso akamoiraneria, Inee! Aye nomworokia ase Isiraeli, naya toyamanyeti? Ekeene, ekeene, nagotebirie, Eritomanyete nario togokwana, neri toroche twariorokia; noborori bwaito timori kobwegena. Kerabe nkobatebia amang'ana 'ense, nainwe timokwegena, naki moregene, kondabatebie amang'ana a igoro? Naende buna Musa aimokereretie eng'iti ase eroro, naboigo Omwana-o-mwanyabanto goika aimokererigwe igoro; erinde tasira omonto onde bwonsi oyomwegenire, korende abe nobogima bwa kare na kare. Naki Nyasae ayianchete ense, goika akarua Omwana oye omomoima, erinde monto onde bwensi oyomwegenire tasira, korende anyore obogima bwa kare na kare. Naki Nyasae tamotomete ase ense Omwana oye agambie ense; korende ense etorigwe nere. OGOSABA Ee, Omonene: Inche negenire ng'a aye naye Kristo, Omwana o Nyasae. Tonga ime yane enkoro ere endabu, 0 Nyasae. Yohana 3 :1-12, 14-17. Yohana 11 : 27. Zaburi 51 : 10. Rituko 8 ENCHERA Y'OGOSESENIA OCHIA koyerdra emeganda eria, akarina egetunwa; na rigoro aikaransire, agachierwa naborokigwa baye; akamanora omonwa oye, akaborokereria, ogoteba, Mbasesenirie abanyene obotaka bw'omoyo ekiagera oboruoti bw'igoro nobwabo. Mbasesenirie abaichanete: ekiagera nabwo bagocha koremigwa. Mbasesenirie abare nobwororo: ekiagera barabwo nabaire ense. Mbasesenirie abare nenchara nerang'o y'okorigia boronge: ekiagera barabwo nabaigotigwe. Mbasesenirie abare namabera: ekiagera barabwo nababerwe. Mbasesenirie abachenu emioyo: ekiagera barabwo nabamorore Nyasae. Mbasesenirie abagokora omorembe: ekiagera barabwo nabarokwe abana ba Nyasae. Mbasesenirie abarosigwe ase oboronge: ekiagera oboruoti bw'igoro nobwabo. Mmosesenirie inwe, ekero bakobarama na kobarosia, nokobatebera kera ring'ana ribe ase oborimo, konye nase inche. Mogoke, nagosasoka: ekiagera eng'eria yaino nenene aria igoro. Naki naboigo babarosetie ababani barenge ritang'ani riaino. Inwe ninwe omobaso bw'ense. Omochie tokobiseka goikaransete ase egetunwa igoro. Nonya nabanto tibagotongia etaya na koyebeka egetonga ime; korende nase ekebekerero kiaye, ebaa omobaso bonsi abare nyomba ime. Nomobaso oino obare boigo ase abanto bonsi, goika bayerore emeremo yaino emiya, bamotogie Iso oino ore igoro. Mwaigwete mbatebetigwe, Ancha omoamate oo, nomobisa oo omogeche. Ko inche nabatebirie, Banche ababisa baino, mobasabere ababarosirie; monyare koba abana b'lso oino ore igoro. Omotomwa Paulo agateba: Nebagwenerete kobakonya abatari ne chinguru, na koyainyora amang'ana ay'Omonene Yeso, buna akwanete omonyene, Negesio korua kobua okonyora. OGOSABA Osesenigwe aye, 0 Nyasae: inyorokererie amachiko ao. Mathayo 5 : 1-12, 14-16, 43-45. Ogokora 20:35. Zaburi 119 : 12. Rituko 9 OBOSIBORE KORWA ASE OKOGANIA 0 monene Yeso agateba: Karue, nainwe namoegwe. Mwerende timokora obuya bwaino ase obosio bw'abanto babarore, naki komogokora ayio, timori neng'eria ase Iso oino ore igoro. Korende kamogosaba timogotererera amang'ana a bosa buna baria b'ebisaku: naki barabwo nigo bagokaga ng'a nabaigugwe ase amang'ana abo are amange. Gaki timoba omogwekano oyomo nabarabwo: naki Iso oino oyamanyire aya morigetie, rigoro motaramosaba. Inwe gaki saba iga:. Tata oito ore igoro, Erieta riao ribe buya. Obonda bwao boche. Obwanchani bwao bokoreke ense, buna bwakoretwe igoro. Toe ntwe rero endagera yaito. Naye otige ebibe biaito, buna intwe twatigire abagotokora bobe. Togotoira ase ogotemwa, ko tokonye noria omobe. Timogacha chinibo chiaino ase ense, aase ebigwankwa na obobosu bigosaria, na abaibi bakobochora na koiba: korende chinibo chiaino chigache igoro, aase egento getagosareka ase ebigwankwa gose obobosu, na abaibi tibakobochora nonya nkoiba. Naki aase enibo yao ere, nenkoro yao nao ekoba. Onde tari oranyare kobakorera abanene babere, naki nageche oyomo naende nanche oyonde, gose nabwatane noyomo nagochaya oyonde. Timokonyara gokorera Nyasae na enibo. Gaki, timogwechanda, mogoteba, Ninki torarie? gose, Ninki torabeke? Naki ebi bionsi bikorigigwa na baria b'ebisaku-saku; naki Iso oino o igoro omanyire buna morigetie ebi bionsi. Korende ritang'ani rigia oboruod bwa Nyasae noboronge bwaye, nebi bionsi namomenterwe inwe. OGOTOGIA Nyasae nomorisia one, Tinkoremerwe. Luka 6 : 38. Mathayo 6 : 1, 7-13, 19-21, 24, 31-33. Zaburi 23 :1. Rituko 10 OBOSIBORE KORWA ASE OBWOBA MONENE Yeso agateba: Oyore namachiko ane, na koyabwata, nere onyanchete ... nainche nimwanche, na kweorokia asare. Remia emioyo, ninche; timoiroka. Nainwe timoiroka abagoita omobere, abatanyare goita omoika: kobua moiroke oyo oranyare kobiita omobere na omoika bionsi ase Chaanam. Inee, chinchiro ibere tichiri kogorwa egesabwa ekemo? Ko nonya nakamo kaye tigakogwa inse Iso oino atamanyeti. Korende inwe, nonya ne chitukia chi'emctwe yaino chionsi chiabarirwe. Ase ayio timoiroka; inwe nabaya kobua ebinyoni ebinge. Timoiroka inwe omoganda omoke: naki Iso oino ororire buya kobaa oboruoti. Komoraikaranse ase ring'ana riane, igo more aborokigwa bane b'ekeene, naende namomanye ekeene, nakerokio ekeene nakebasibore. Ekeene, ekeene, nabatebirie, kera oyogokora ebibe, nomosomba bw'ebibe, Gaki Omwana karabasibore namobe abasibore kegima. Nyuma ekero Yeso agendete igoro akabora: Toiroka; Inche noyo bw'omochakano, na oyo bw'omoerio oyore moyo; nainche konya nakure, korende rigereria igo nde moyo goika kare na kare. Nainche ninde nebigorero bi'amakweri nebie chimbera. Omotomwa Yohana akarika: Nyasae nobwanchani, nere oyogoikaransa ase obwanchani igo agoikaransa ime ase Nyasae, na Nyasae ime asare. Obwanchani tibori nokoiroka: korende obwanchani oboikeranu iga bogotuguta okoiroka isiko, ekiagera okoiroka nkore nokoakwa: nomonyene okoiroka taikeraniri ase obwanchani. OGOTOGIA Omonene nere orankonye; tinkwoboa: mwanyabanto inki arankorere? Naende nimba inkoetande ase omwenya bwe Idriria ki'amakweri, tinkoiroka bobe bonde, ekiagera aye nigo ore amo nainche. O! motogie Omonene amo nainche, tiga tobake erieta riaye amo. Inkarigia Omonene, erio akang'iraneria na kondusia ase obwoba bwane bwonsi. Yohana 14 : 21. Mathayo 14 : 27. Mathayo 10 : 28-31. Luka 12 :32. Yohana 8:31,32,34,36. Okomanoka 1:17, i8. 1 Yohana 4 : 16, 18. Abaibirania 13 : 6. Zaburi 23 : 4. Zaburi 34 : 3, 4. Rituko 11 NINKI KEGOKORA OMONTO OBA OMOSAREKU? OMONENE Yeso agateba: Nyigwe mwensi, na manya: tari egento kere isiko ase omonto kegosoa keranyare komobeka riko: korende ebikorua omonto nabio bikomobeka riko omonto oria. Aborokigwa baye bakamoboria amang'ana ase omoreng'anio oria. Akabatebia, Igo nainwe timori na obong'aini? Timomanyeti ng'a kera egento kere isiko ase omonto, gokeramosoe, tigekonyara komosaria; ekiagera tigekomosoa enkoro, tatiga enda yoka, erio giasoka kiagwa kebara? Ase ogoteba iga, osibirie chindagera chionsi. Akabora, Egekomosoka omonto nakio gekomosaria. Ekiagera ime, ase chinkoro chi'abanto, igo gokorwa okogania okobe, obonyaka, oboibi, oboiti, obotomani, okorengereria okobe, obobe, obong'ainereria, oboenenu, ribero, oborami, obwerori, oboriri: aya onsi amabe igo akorwa ime y'omonto, naro akamosaria. OGOKWANA NA OGOKORA Omonene Yeso agateba: Tari omonto bwensi ogontebia, Omonene, Omonene, orasoe ime ase oboruoti bw'igoro, korende noyogokora ogwancha gwa Tata one ore igoro. Ase rituko riria nabange barantebie, Omonene, Omonene, intwe titware gokora obobani ase erieta riao? na ase erieta riao goseria ebirecha, na ase erieta riao gokora ogokumia okonge? Nainche erio nimbatebie boronge abanto baria, Timbamanyeti inwe nonya ng'ake: karue asende inwe abakori ebibe. Gaki onde omo oyokoigwa amang'ana aya ane, na koyabwata, nagwekanigwe nomosacha omonyene obong'aini, oagachete mwaye ase egetare igoro: embura egatwa, omogoko ogacha, amo nomwaga, bigachia ase enyomba eria, tiyagwa: ekiagera oboroso bwaye boagachire ase egetare igoro. Nonde omo oyokoigwa amang'ana aya ane, gotayabwata, nagwekanigwe nomosacha omokayayu, oagachete mwaye ase amaroba: embura egatwa, omogoko ogacha, amo nomwaga, bikaaka enyomba eria ekagwa; nokogwa kwaye gokaba okonene mono. OGOSABA Tiga amang'ana 'omonwa one nebirengererio bi'enkoro yane biancherwe ase obosio bwao, 0 aye Omonene, egetare kiane amo nomoboria one. Mariko 7 :14,15,17-23. Mathayo 7 :21-27. Zaburi 19:14. Rituko 12 ABARE NENCHARA BAKORAGERIGWA Yeso akagenda ng'umbu y'enyancha ya Galili, nero enyancha ya Tiberia. Omoganda omonene okamotunyana, ekiagera baroche ebikone abakorerete abarwaire. Yeso agatira gochia egetunwa, agaikaransa agwo amo naborokigwa baye. Na rituko rinene rie pasaka ya Abayahudi, riarenge ang'e. Nabo Yeso agachia koimokia amaiso aye, akarora omoganda omonene ogocha asare, akamotebia Filipo, Ng'ai tokogora emegati, aba banyare koria? Iga aborete aya erinde amoteme: naki amanyete omonyene eki arakore. Filipo akamoiraneria, Emegati ye chidinari chimia ibere tekobaisana, kera oyomo anyore moke igo. Oyomo bw'aborokigwa baye, Anderea, momura omwabo Simion Petero, akamotebia, Naraa omosae, oyore nemegati etano y'engano ne chinswe ibere: korende ebi inki biraisane ase abanto abange buna aba? Yeso akabora, Baikaransie abanto. Mbwarenge aroro obonyansi obonge aase aria. Igo abasacha bagaikaransa ase omobaro chilifu isano. Yeso akayebogoria emegati; gasesenirie, akabagabera abaikaransete: naboigo na chiria chinswe koreng'ana buna barigetie. Kobaigotire, akabatebia aborokigwa baye, Sangereria ebisamunye biatigaire, gento tigesira. Nabo bakabisangereria, bagaichoria ebitonga ikomi na bibere ase ebisamunye bi'emegati etano y'engano, ebiatigarete ase abwo bariete. Nabo Yeso, akamanya ng'a mbarigetie gocha komoira, erinde bamokore omoruoti, akerusanania, akagenda naende egetunwa ere bweka. Omonene Yeso agateba: Omogati o Nyasae noria ogoika korwa igoro na koyea ense obogima. Inche nomogati bw'obogima: ere oyogocha asende takoigwa enchara naende, nere oyoranyegene takorang'a nonya ng'ake. Inche nomogati bw'obogima oigete korwa igoro: omonto kararie omogad oyio, nabe moyo goika kare na kare: nomogati ndarue inche, ase engencho y'obogima bw'ense, nomobere one. OGOSABA Omonene, amatuko onsi otoe omogati oyio. Yohana 6 : 1-13, 15, 33, 35, 51, 34. Rituko 13 OMWANA O NYASAE BW'OBONENE BWEBEKIRE ANG'E GOKWA ASE ENGENCHO YA MWANYABANTO ABANYENE EBIBE Yeso akamoira Petero na Yohana na Yakobo, akarina egetunwa gosaba. Ekaba ochia gosaba, ekieni ki'obosio bwaye gegaonchoka, ne chianga chiaye chikaba chindabu, chikamekameka. Naende rora, abanto babere barenge bagokwana nere, nabarabwo Musa na Elija; barorekanete ase obonene, bagakwana amang'ana ogokwa kwaye nagwenerete goikerania Yerusalemu. Petero, nabarabwo abarenge amo nere, chitoro konya chiabanyarire: korende bachia koboka, bakaborora obonene bwaye, na abanto baria babere, batenenete amo nere. Egachia koba ekero abwo barenge gweatanana nere, Petero akamotebia Yeso, Omonene, imbuya intwe koba aiga: tokore ebigutu bitato; ekemo ekiao, ekemo ekia Musa, ekemo ekia Elija: nere tamanyete eki are gokwana. Ekero agokwana amang'ana aya, rikabao rire, rikababeka ekiriri: bakairoka kobachia gosoa ase rire. Eriogi rigasoka ase rire riria rigoteba, Oyo n'Omwana one, omwanchi one, moigwere. Neriogi eri riachia gocha, Yeso akarorekana ere bweka. Nabarabwo bagakira, tibamotebia 'monto ase amatuko aria ring'ana rinde rionsi ri'ayio baroche. Rigoro baikaransete aroro Galili, Yeso akabatebia, Omwana-o-mwanyabanto nkogenda are kobekwa ase amaboko a mwanyabanto. Nabarabwo nabamoite, nerituko ria gatato naboke. Bagaichana mono. EKERENGERERIO Naki mobe nomoyo oyo ime yaino oyorenge ime ase Kristo Yeso; Ere omochakano igo arenge omogwekano buna Nyasae, nere tabarete gose ngento koba koreng'ana buna Nyasae, korende agekora buna tari nobonene, akaimokia omogwekano bw'omosomba, akaba omogwekano bw'abana ba mwanyabanto, naende, ochia kororekana igo are nekieni buna mwanyabanto, agakanyeka, akaba omoigweri goika amakweri, naro namakweri av'omosalaba. Luka 9 : 28-36. Mathayo 17 : 22, 23. Abafilipi 2 : 5-8. Rituko 14 NING'O OMOAMATE ONE? Omwana bw'amachiko oyomo agatenena okomotema, akabora, Omworokia, inki ndakore nyore obogima bwa kare na kare? Akamotebia, Ase amariko inki kerikire? Naki ogosoma? Nere akairaneria akabora, Mwanche Omonene Nyasae oo nomoyo oo bwonsi, nenkoro yao yonsi, nechinguru chiao chionsi, nobong' aini bwao bwonsi, na omoamate oo mwanche buna bwanchete omobere oo. Akamotebia, Kwairaneirie buya: kora iga, nario orachie kare. Nere akarigia gwekora omonyene oboronge, akamotebia Yeso, Nomoamate one ning'o? Yeso akairaneria akabora, Narenge omonto orenge, gotirimboka korwa Yerusalemu goika Yeriko: akagwa ase amaboko 'abauri, bakamorusia chianga, bakamoaka chingoma, bakagenda, bakamotiga oisire gokwa. Ase egesio akaoroka omokuani oyomo ogoeta ase enchera eria: akamorora, agaeta ensemo. N'Omolawi boigo agachia goika aase aria akamorora agaeta ensemo. Korende Omosamaria oyomo gagotara, akamochiera: nere agachia komorora akamororera amabera, nabo akamoika ang'e, akamorinia igoro ase eng'id yaye, akamoreta ase enyomba y'abageni, akamorwaria. Goika mambia yaye akarua chishilingi ibere, akamoa omonyene enyomba, akamotebia, Morende buya; na kende gionsi orarue kobua, kondairane naende, ninkoakane. Naki oroche rende ase abaiga batato, norori orenge omoamate bw'oyo ere oyogwete ase amaboko 'abauri? Akabora, Noria omororerete amabera. Yeso akamotebia, Genda, naye okore boigo. Omonene Yeso agateba: Gaki ande onsi morigetie mokorerwe nabanto, nainwe bakorere bo. Ekiagera ayio naro ogochika na ababani. EKERENGERERIO Ere okworokirie aye, mwanyabanto, eki kere ekiya. Na ninki Nyasae aganetie korwa asore? Tari ogokora amaronge, nagwancha amabera na gotara na Nyasae ase obwororo? Luka 10 : 25-37. Mathayo 7 : 12. Mika 6 : 8. Rituko 15 BUNA NYASAE AKOMWANCHA KERA OMOKORI EBIBE ORIA OKOONCHOKA Nabo abakorusia ebango bonsi na abanyene ebibe igo bare komoika ang'e na komoigwera. Abafarisai na abariki bakemurungania, bakabora, Oyo iga akoroisia abanyene ebibe, na koria amo na barabwo. Agateba, Omonto oyomo narenge nabana babere. Oria orenge omoke akamotebia ise, Tata, 'ing'a ensemo y'enibo enchigete. Akabatananera ebinto biaye. Goika nyuma y'amatuko amake oria omoke agasangereria ebinto biaye bionsi, akaimoka kogenda orogendo gochia ense y'are; agasiarera agwo enibo yaye as'ogokora kw'obokayayu. Agachia kobikora bionsi, enchara enene egasoa ense eria, nere agachaka kogania. Akagenda akabwatana noyomo obo bw'abanyene ense eria; nere akamoira ebitii biaye, korisia chingurue. Akaba nkorengereria are koigotia enda yaye ase amasabo aria chikoria chingurue: 'monto onde tarenge ore komoa 'gento. Akaonchora ebirengererio biaye, akabora, Abasomba b'eng'eria mbarenga ba tata bakoria endagera na godgaria, nainche aiga ngokwa ase enchara! Ninyimoke, ngende ase tata, nimotebie, Tata, namochire igoro ase erioba, na ase obosio bwao: tingwenereti naende ndokwe omwana oo: inkore imbe buna oyomo bw'abasomba bao. Akaimoka, akagenda ase ise. Agachia koba okare are, ise akamorora, akamororera amabera, akaminyoka, akamogwera rigoti, akamonyunyunta mono. Oria omwana akamotebia, Tata, nasaririe igoro ase erioba na ase obosio bwao: tingwenereti naende ndokwe omwana oo. Korende ise akabatebia abasomba baye, Reta eganchwa ere engiya, momobekere; beka ebeta ase ekiara kiaye, na ebikoroto ase amagoro aye. Nyerete eria emori ere enoru, moyenyenye, torie na kogoka: ekiagera oyo omwana one konya okure, na bono obokire, konya osirire, nere ororekanire. Bagachaka gokora omogoko. Naboigo ... nore omogoko ase amasio abamalaika ba Nyasae ase omonyene ebibe oyomo oonchokire. EKERENGERERIO Aye, Omonene, oyore omuya naende ore ang'e ase okwabera, oichire na amabera ase baria bonsi bakorangeria erieta riao. Luka 15 : 1, 2, 11-24, 10. Zaburi 86 : 5. Rituko 16 OBWERORI NA OBOITONGO Yeso akabatebia omoreng'anio ase bana barangeretigwe, gachia korora buna bachorire ebirogo bie ritang'ani; akabatebia, Gokorangerigwa nomonto enyangi, toikaransa ase ekerogo kie ritang'ani, ekiagera gose omonyene amasikani kobua aye orangerigwe nere, ogocha omonyene okorangeirie aye nere, agotebie motigerere oyo; erio nochake koba nobosoku gogoikaransa aase anyuma. Korende gokorangerigwa, genda oikaranse aase anyuma, erinde gagocha oyokorangeretie, agotebie, 'Mosani, tigera gocha aase ritang'ani; erio nobe nogosikwa ase amaiso abo bonsi abaikaransete amo naye. Ekiagera ker'oyokweimokereria igoro nairanigwe inse; na ere oyokweirania inse naimokererigwe igoro. Yeso akabatebia omoreng'anio oyo ase abanto bare gwekaga ng'a nabanyene oboronge, bakobachaya abande bonsi: Abanto babere bagatira gochia hekalu gosaba, oyomo Omofarisai, oyo kabere omorusia ebango. Oria Omofarisai agatenena, agasaba iga ase omoyo oye, Nyasae nakoiraneirie ng'a mbuya mono ekiagera inche tindi buna abanto bande, abauri, abatari boronge, abatomani, gose buna oyo omorusia ebango. Iga nkweng'ata ara kabere ase echuma; ndua ensemo y'ikomi y'okonyora kwane gwonsi. Noria omorusia ebango agatenena are, tarigia nonya nkoramokia amaiso aye igoro, korende akeaka-aka egekuba, akabora, Nyasae, ondorere amabera inche omonyene ebibe. Nabatebirie inwe, oyio igo aigete nyomba yaye akanyora oboronge kobua oria: ekiagera oyokweimokereria igoro nairanigwe inse, nere oyokweirania inse naimokererigwe igoro. Ensa eria bagachia baria aborokigwa ase Yeso, bakabora, Ning'o ore omonene ase oboruoti bwa igoro? Akarangeria omwana omoke, akamotenenia gatigati yabo, akabora, Nekeene nabatebirie, motaonchoged mobe buna abana abake, timogosoa oboruoti bwa igoro nonya ng'ake. Gaki, onde bwensi oyo orororobe omonyene koba buna omwana oyo, oyo nere ore omonene ase oboruoti bwa igoro. EKERENGERERIO Nabo mwensi eboe oboitongo, monyare gokorerana: naki Nyasae igo akoamererania nabanyene oboenenu, na kobaa abaitongo obuva. Luka 14 : 7-11. Luka 18 : 9-14. Mathayo 18 : 1-4. 1 Petero 5 : 5. Rituko 17 OMONENE YESO OKOBOKIA LAZARO KORWA ASE AMAKWERI Nabo omonto gete narenge omorwaire, erieta riaye Lazaro o Bethania, omonto bw'omochie o Mariamu na Maritha mosubati omwabo. Nabo baria basubati bamwabo bagatoma omotomwa asare, bakobora, Omonene, ere oyobwanchete orwarire. Erio agachia koigwa ng'a nomorwaire, agaikaransa amatuko abere aase aria arenge. Erio nyuma ase aya akabatebia aborokigwa baye, Togende Boyahudi naende. Erio agachia goika Yeso, akamonyora otiekire koba embera amatuko ane. Erio Maritha akamotebia Yeso, Omonene, onye naa kwarenge, momura ominto anga takwete. Yeso akamotebia, Oyomino naboke naende. Maritha akamotebia, Namanyire ng'a naboke ase okobokigwa kwe rituko ri'omoerio. Yeso akamotebia, Inche nokoboldgwa na obogima: oyonyegenire inche, nonya ogokwa, nanyare koba moyo. Naende ker'oyore moyo na konyegena inche tagokwa nonya ng'ake. Inee! kwegenire aya? Akamotebia, Ee, Omonene: Inche negenire ng'a aye naye Kristo, Omwana o Nyasae, oria ogocha ase ense. Yeso akabora, Ng'ai mwamobegete? Bakamotebia, Omonene, nchuo orore. Yeso akaiyeria amariga. Nabo Yeso oichanete naende ase omoyo oye, agaika oboina. Naborobwo igo bwarenge rikuruma, naende rigena ndiabegetwe igoro yaye. Yeso akabora, Ritigerie rigena ... Nabo bakarirusia riria rigena. Yeso akaimokia amaiso aye igoro, akabora, Tata, nakoiraneirie ng'a mbuya mono ekiagera okonyigwa. Nainche namanyete ng'a iga okonyigwa amatuko onsi: korende ase engencho y'omoganda oyo ong'etanaine, ngakwana aya, banyare kwegena ng'a naye gwantomete. Erio gakwanire iga, akaaka eriogi rinene, Lazaro, soka isiko. Agasoka oria okwete, oboirie egetambaa amagoro namaboko; obosio bwaye boboirie egetambaa. Yeso akabatebia, Mosansor momotige agende. EKERENGERERIO Omonene Yeso agateba: Oko nakwo ogwancha kwaye oria ontomete, ng'a kera oyokomorigereria. Omwana na komwegena, nabe nobogima bwa kare na kare, ninche nimobokie ase rituko ri'omoerio. Yohana n : 1, 3, 6, 7, 17, 21, 23-27, 34, 35, 38, 39, 41-44. Yohana 6 : 40. Rituko 18 ABANTO ABABE BAKOMOGECHA Nabo abange ase Abayahudi abachete ase Mariamu na koyarora ayakorete Yeso, bakamwegena. Korende abande babo bakagenda ase Abafarisai, bakabatebia ayakora Yeso. Abakuani abanene na Abafarisai bagasangerereka ritongo, bakabora, Ninki togokora? Naki omonto oyo agokora ebikone ebinge. Gatoramotige iga, abanto bonsi nabamwegene; na Abarumi nabache, nabarusie aase aito negesaku giaito. Omonto oyomo asebare, Kaifa, oyorenge omokuani omonene omwaka oria, akabatebia, Inwe timomanyeti kende gionsi. Gose timorengerereti ng'a negwenerete omonto oyomo akwe ase engencho y'abanto aba, ng'a egesaku tigesira ekegima. Naende eii takwanete ase omoyo oye omonyene, korende ekiagera arenge omokuani omonene omwaka oria, akabana ng'a Yeso nakwe ase engencho y'egesaku keria; gose tari ase engencho y'egesaku keria gioka, korende amo naya, abasangererie abana ba Nyasae abatananekire babe abamo. Nabo korwa rituko riria bagakora ekina banyare komoita. OBWANCHANI BW'OMONENE YESO Egachia koba ... ase enchera kogenda Yerusalemu, ngoeta arenge egati ya Samaria na Galili. Agachia gosoa omochie oyomo, bakaumerana nere abanto ikomi abanyene ukoma, bateneine are: nabarabwo bakaaka eriogi bakobora, Yeso, Omonene, otororere amabera. Agachia kobarora, akabatebia, Genda mweorokia ase abakuani. Ekaba kobakogenda bagasibeka. Oyomo obo gachia korora ng'a ogwenire, akairana akamobaka Nyasae ase eriogi rinene; akagwa maumama ase amagoro aye, okomotogia, nere n'Omosamaria. Yeso akairaneria, akabora, Tari bonsi ikomi basibeka? baria kianda ng'ai bare? Tibanyorekanete abakoirana komoa Nyasae ogotogia kwaye, tatiga omogeni oyo. Akamotebia, Tenena, ogende: okwegena kwao gwakogwenirie. OGOSABA 0 Nyasae, insibie korwa ase ebibe biane. Yohana 11 : 45-53. Luka 17 : 11-19. Zaburi 51 : 1, 2. Rituko 19 ENG'ERIA Y'OGOTIGA BIONSI ASE ENGENCHO YA KRISTO Omogambi gete akamoboria, okobora, Omworokia omuya, ninki ndakore inyare konyora obogima bwa kare na kare? Yeso akamotebia ... Kwayamanyire amachiko, Totomana, Toita, Toiba, Toteba oborimo, Basike 'so na nyoko. Akabora, Aya onsi nayabwatire korwa obwana bwane. Yeso agachia koigwa aya, akamotebia, Ring'ana erimo ndikoremerete: bionie ebinto bionsi ore nabio, obagabere abataka, naye nobe nenibo igoro. Erio ochiche ontunyane. Korende agachia koigwa amang'ana aya akaba nogoichana okonge, naki arenge omonda mono. Nabo Yeso okomorigereria akabora, Nabe aakong'u abare nenibo gosoa oboruoti bwa Nyasae! Naki naororo engamia goeta ase ekebao gi'esindani, kobua omonda gosoa ase oboruoti bwa Nyasae. Nabarabwo bagachia koigwa, bakabora, Ning'o rende oranyare gotoreka? Akabora, Ayatakonyarekana ase mwanyabanto, igo akonyarekana ase Nyasae. Petero akabora, Rora, intwe twatigire bionsi twagotunyire aye. Akabatebia, Ekeene nabatebirie, Tari omonto otigire enyomba, gose omokungu, gose abamwabo, gose abaibori, gose abana, ase engencho y'oboruoti bwa Nyasae, korende nanyore kobua ara aange bono ekero eke, naende ase ense egocha obogima bwa kare na kare. Erio Yeso akabaira baria ikomi na babere akabatebia, Rora, ngotira tore kogenda Yerusalemu, naende naikeranigwe amang'ana onsi ayarikeretwe Omwana-o-mwanyabanto na ababani. Naki nabekwe ase amaboko 'Ebisaku, nakorerwe echeche na gochegigwa, na gotwerwa amate: naende nabamoake nechinkini, nabamoite: nerituko ria gatato naboke. Nabarabwo tibainyora aya nonya ng'ake; ring'ana eri rikaba igo riabiswa asebare, gose tibayamanya ayatebetwe. EKERENGERERIO Omotomwa Paulo akarika iga: Ee, nayabarire onsi ng'a abeire bosa ase engencho y'obuya botari nekerengo gi'okomomanya Kristo Yeso, Omonene one; korende ase engencho yaye nanyorire ogosira kw'ebinto bionsi, na kobibara ng'a biabeire buna esike, erinde imonyore Kristo. Luka 18 : 18-34. Abafilipi 3 : 8. Rituko 20 OMOUKO OKONYORA OKORORA Asachia koba gagoika ang'e na Yeriko, narenge omouko oyomo, oikaransete ensemo y'enchera ogosaba ebiegwa: agachia koigwa emeganda egoeta, akabora, inki ekio? Bakamotebia, ng'a Yeso o Nazareti ogoeta. Akaaka eriogi akabora, Yeso Omwana o Daudi, ondorere amabera. Nabwo batang'aine bakamokania, akire: korende ere akamenta mono koaka eriogi, Omwana o Daudi, ondorere amabera. Yeso agatenena, agachika aretwe asare; agachia komoika ang'e, akamoboria, Ninki origetie ngokorere? Akabora, Omonene, inyore okorora. Yeso akamotebia, Oegwe okorora; okwegena kwao gwakogwenirie. Erio kegima akanyora okorora, akamotunyana, okomotogia Nyasae: nabanto bonsi bagachia korora bakamoa Nyasae ogotogigwa. OMONYABIBE OKONYORA OGOTOREKA Yeso agasoa Yeriko akaba ngoetare egati gati yaye. Narora omonto oyomo erieta riaye ore korokwa Zakayo, omonene bw'abakorusia ebango, nere nomonda. Akarigia komorora Yeso, gose 'monto ki: tanyara ase engencho y'emeganda, ekiagera arenge omweng'e. Agatang'ana bwango, akarina igoro ase omoko anyare komorora, ekiagera ngoeta arenge enchera eria. Na Yeso, agachia goika aase aria, akarigereria igoro, akamorora, akamotebia, Zakayo, ika bwango, naki rero ningwenerete goikaransa nyomba mwao. Agaika bwango, akamoroisia ase omogoko. Goika abanto bachia korora bakemurungania bonsi bakabora, ng'a osoire goikaransa ase omonto omonyene ebibe. Zakayo agatenena, akamotebia Omonene, Rora Omonene, enusu y'enibo yane nabaire abataka, naende onye naurete omonto egento ase okomourereria namoiraneirie ara kane. Yeso akamotebia, Rero ogotoreka gwaikire enyomba eye, ekiagera oyo nere nomwana o Ibrahimu. Naki Omwana-o-mwanyabanto igo achete erinde arigie egiasirete na kogetoria. EKERENGERERIO Saba, namonyore, omogoko oino obe oikeranete. Luka 18 : 35-43. Luka 19 : 1-10. Yohana 16 : 24. Rituko 21 YESO, OMORUOTI BW'ENSE ENGIMA, NGOCHARE NAENDE Erio gaikaransire ase egetunwa ki'Emezeituni, agachierwa naborokigwa baye bobisi, bakobora ... Naro nkemanyererio ki ki'ogocha kwao, na ay'omoerio bw'ense? Yeso akabairaneria akabatebia, Erende timobaisa kong'ainwa na 'monto onde bwensi. Naki abange nabache ase erieta riane, babore, Inche ninche Kristo; nabasirie abanto abange. Nainwe namoigwe amang'ana y'esegi nebirage bi'esegi, rigereria timoondoka, naki bori nabe aya onsi; ko omoerio toracha. Naki ebisaku nabimokerane korwana nebisaku binde, na oboruoti naboimokerane korwana na oboruoti bonde; naende enchara nebe, nomotengecho bw'ense, chinsemo-chinsemo. ... Nainwe namobe abanto bakogechwa nebisaku bionsi ase engencho y'erieta riane. Naende amang'ana aya amaya ay'oboruoti narandigwe ase ense yonsi koba ekiorokererio ase ebisaku bionsi; erio omoerio ochiche. Erio oboruoti bwa igoro naboreng'anigwe na abaiseke ikomi, basogete ne chitaya chiabo gochia korotota omonyuomi. Nase barabwo igo barenge abariri batano, na abang'aini batano. Naki baria abariri bakaimokia chitaya chiabo, ko tibaimokia namaguta: baria abang'aini bakaimokia amaguta ase ebinto biabo amo ne chitaya chiabo. Goika ochia gotebana omonyuonii, bagasundoka bonsi bakarara. Botuko gati gekaba negeturi, Omonyuomi oyo! soka momorotote. Erio agwo bakaimoka abaiseke baria bonsi, bakaroisia chitaya chiabo. Abariri bakabatebia abang'aini, Twatanere amaguta aino, ekiagera chitaya chiaito chiarimire. Baria abang'aini bakabairaneria, bakabora, Genda, takonyara gotoisana intwe nainwe twensi; mbuya komoragende kwegorera ase abaonia. Barabwo bagachia koimoka gochia kogora, agacha omonyuomi, baria babete ang'e bagasoa amo nere ase enyangi, egesieri gegasiekwa. Naende nyuma bagacha baria abaiseke bande bakobora, Omonene, Omonene, toigorere! Akabairaneria, akabora, Nekeene nabatebirie, timbamanyeti inwe. Gaki kabe nokorenda, naki timomanyeti rituko nonya nensa. OGOSABA Amin: oche, Omonene Yeso. Mathayo 24 : 3-7, 9, 14. Mathayo 25 : 1-13. Okomanoka 22 :20. Rituko 22 MARIAMU OMORUA NA YUDAS OMOIBI Nabo Yeso amatuko atano na rimo ritang'ani ri'epasaka agaika Bethania, agwo aase arenge Lazaro, oria okwete obogetigwe nere. Bakamokorera endagera aria: Maritha akamokorera; korende Lazaro igo arenge oyomo ase baria baikaransete ase endagera amo nere. Erio Mariamu akabogoria ekerengo ki'eratili eyemo y'amanukato, aye rigori rinene, akamoaka Yeso amagoro, akayatinyia amagoro aye netukia yaye: enyomba egaichora rimisu ri'amaguta aria. Korende Yudas Omoisikariota omwana o Simon, oyomo bw'aborokigwa baye, oyoramorue, akabora, Naki amaguta aya atagorwa chidinari chimia isato, na koegwa abataka? Iga akwanete aya, tari ng'a igo arengereretie abataka; korende nekiagera arenge omoibi, naende obwate esanduku ye chishilingi, nagochirusia echiabekire aroro. Erio Yeso agateba, Motige agache aya ase rituko ri'ogotindekwa kwane. Naki abataka more nabarabwo amatuko onsi amo nainwe; korende timori nainche amatuko onsi. Rituko ria kabere abanto abange abachete ase rituko rinene, kobachia koigwa ng'a Yeso ngochare Yerusalemu, bakabogoria chinsagia chi'amakendo bagasoka isiko kogenda komorotota, bakaaka eriogi, Hosana: Osesenigwe oyochire ase erieta ri'Omonene, omoruoti o Isiraeli. Yeso akanyora emori y'etigere akayerina; buna yarigetwe, Toiroka, enyaroka ya Zayoni: rigereria, Omoruoti oo ochichire igo aikaransete igoro ase emori y'etigere. Amang'ana aya aborokigwa baye tibainyora agwo ritang'ani; korende Yeso agachia kobakwa, erio bakainyora ng'a narikeire aya naende ng'a mbamokorerete aya. Erio Abafarisai bagatebania barabwo ase barabwo, Mwarorire ng'a timokonyara gokora gento: ense yagendire komotunyana ere. Nekero ekio akagenda oyomo ase baria ikomi na babere, nere okorokwa Yudasi Omoisikariota, akabachiera abakuani abanene, akabatebia,Ngento ki morang'e inyare kobamobekera ase amaboko aino? Bakamorengera ebisamunye emerongo etato bi'efetha. Korwa ekero ekio akaba nkoririgiare ribaga anyare komorua. EKERENGERERIO Naki ritina ri'obobe bwonsi nogwancha chibesa. Ninki eramogwenere omonto koyenyora ense yonsi, korende asirie obogima bwaye? Yohana 12 : 1-8, 12-16, 19. Mathayo 26 : 14-16. 1 Timotheo 6 : 10. Mariko 8 : 36. Rituko 23 "KORA IGA ASE OKONYINYORA INCHE" Rigaika rituko rinene ri'emegati etabekire ememera, erio epasaka egwenerete konyenywa. Yeso agatoma Petero na Yohana, akabora, Genda, motoroiserie epasaka, erinde toyerie.... Erio ensa egachia goika ang'e agaikaransa, nabatomwa amo nere. Gokaba nokoamererania ase bare, ning'o obarirwekoba omonene. Akabatebia, Abaruoti b'Ebisaku bakobagambera; naende abare ne chinguru igoro yabo barokwa Abakori abaya. Korende ase more inwe taibo; korende oyore omonene oino abe buna oyore omoke, nere oyogotang'ana buna omokori. Inee! ning'o omonene, noyoikaransete ase endagera gose noyogokora? tari ere oyogoikaransa ase endagera? korende inche nde ase egad yaino buna omokori. Ekero ki'endagera, Saitani gatiekire komobeka Yudasi, omwana o Simion Omoisikariota, omoyo bw'okomorua, Yeso kamanya ng'a Tata omoeire bionsi amaboko aye, naende ng'a igo aruete ase Nyasae, naende nkogenda are ase Nyasae, akaimoka korwa ase endagera, akabeka ensemo chianga chiaye; akabogoria egetambaa, akeboyia. Erio akabeka amache ase esani, agachaka kobasibia aborokigwa amagoro abo, na koyatinyia na egetambaa keria eboyetie. Nabo ochia gokora kobasibia amagoro abo, na gochibogoria chianga chiaye, na goikaransa naende, akabatebia, Mwamanyire eki nabakorera? Inwe igo mokondoka Omworokia, naende Omonene: naende inwe mbuya mokobora; naki naboigo inde. Nabo onye inche, inde Omonene naende Omworokia, nabasibirie amagoro aino, nebagwenerete inwe nainwe gosibania amagoro. Naki nabeire ekiorokererio erinde ayio nabakorera inwe, nainwe moyakore. Akabogoria omogati, gasasimire, akayosamunyora, akabaa, akabora, Oyo nomobere one orurwe ase engencho yaino: kora igo ase okong'myora. Nakerokio egekombe nyuma ase okoria, akabora, egekombe eke nemuma enyia ase amanyinga ane, aitekire ase engencho yaino. EKERENGERERIO Ekiagera Omwana-o-mwanyabanto tachete gokorerwa, korende gokora, na korua obogima bwaye bobe okoboria kw'abange. Luka 22 : 7, 8, 14, 24-27. Yohana 13 : 2-5,12-15. Luka 22 : 19, 20. Mariko 10.: 45. Rituko 24 OBWANCHANI, OMOGOKO, NA OMOREMBE Omonene Yeso agatebia aborokigwa baye: Timoichana ase chinkoro chiaino: mwegenire ase Nyasae, egene n'asende. Ase enyomba ya Tata nere nobomenyo obonge, onye taibo, anga nabatebia, nkogendande kobaroseria aase. Kondagende kobaroseria aase, ninchiche naende, nimbaroisie asende; erinde aase nde inche, nainwe mobeo. Naende aase nkogenda inche, mwayemanyire enchera. Tomasi akamotebia, Omonene, titomanyeti aase ogochia, naki torayemanye enchera? Yeso akamotebia, Ninche inde enchera, naende ekeene, naende obogima: omonto onde tagocha ase Tata tatiga ase nde.... Oyondorire inche, omororire Tata.... Inyegena ng'a inche igande ase Tata, naende Tata ime yane. Aya nabatebirie, kong'ikaransete asemore. Korende Omoremia Omoika Omochenu, oyo Tata aratome ase erieta riane, ere naborokererie onsi, naende kobainyoria onsi aya nabatebirie. Omorembe nabatigeire: omorembe one nabaruereire: tari buna ense ekorua, nabaruereire. Timoichana chinkoro chiaino gose timoba nobwoba. Komorayabwate amachiko ane, namoikaranse ase obwanchani bwane, buna inche nabwatete amachiko a Tata one, na goikaransa ase obwanchani bwaye. Aya nabatebirie, erinde omogoko one obe ime yaino, naende omogoko oino oikeranigwe. Ogochika kwane nakwo oko, mwanchane, buna nabanchete inwe. Tari oyore nobwanchani obonge kobua obo, obw'omonto akobeka obogima ase engencho y'abasani baye. Inwe igo more abasani bane, komorakore aya nabachikire. Rora, ensa neche, nabo yatiekire gocha, namwatananeke, ker'oyomo ase mwaye, namontige inche bweka: korende ninche tari inche bweka, ekiagera Tata igo are amo nainche. Aya nabatebirie, monyare koba nomorembe ime yane. Ase ense namonyore emechando: korende remia chinkoro, inche nayebuire ense. EKERENGERERIO Korende okwama kw'Omoika nobwanchani, omogoko, omorembe, oboremereria, ogokora amaya, obuya, okwegena, obwororo, okwerita ase onsi. Yohana 14 : 1-6, 9, 11, 25-27. Yohana 15 : 10-14. Yohana 16 : 32, 33. Abagalatia 5 : 22, 23. Rituko 25 OMONENE YESO OGOSOA ASE EMECHANDO YAYE Yeso agasoka, akagenda goika egetunwa y ki'Emezeituni, buna engencho yaye yarenge; aborokigwa baye bakamotunyana, Agachia goika aase aria, akabatebia, Saba, timosoa ase ogotemwa. Akeatanana na barabwo ekerengo gi'okoruta rigena; akaaka amaru inse agasaba, ogoteba, Tata, koranche, onduserie egekombe eke: korende tari buna ndigetie inche, korende buna origetie aye bikoreke. Omomalaika akamoorokera korwa igoro akamobeka chinguru. Nere ekiagera arenge nogoichana mono, akamenta gosaba nomokia: ebigeri biaye bikaba buna amatoima amanyinga akogwa inse. Agachia koimoka korwa ase ogosaba, akabachera aborokigwa baye, akabanyora bararire ase ogoichana, akabatebia, Naki mwararire? Imoka, mosabe, timonyara gosoa ase ogotemwa. Nere gagokwana, rora, omoganda, na ere oyokorokwa Yudas, oyomo ase ikomi na babere, otang'aine asebare, akamoika Yeso ang'e akamonyunyunta. Yeso akamotebia, Yudas, kwamorure Omwana-o-mwanyabanto ase okomonyunyunta?... Bakamobwata, bakamoira, bakamoreta nyomba ime ase omokuani omonene. Na Petero akamotunya korwa nyuma are. Na abanto baria bamobwatete Yeso bakamosekereria, bakamoaka. Bwachia gokia bagasangerereka abagaka b'abanto, na abakuani abanene, na abariki, bakamoreta ase ekegambero kiabo, bakobora, Onye aye naye Kristo, totebie. Korende akabatebia, Ninsa kobatebia, timokonyara kwegena: nainche ninsa kobaboria timokong'iraneria. Korende korwa bono Omwana-o-mwanyabanto naikaranse okoboko gw'okorio kw'obonene bwa Nyasae. Bakabora bonsi, Nabo, aye naye Omwana o Nyasae? Akabatebia, Inwe mwatebire ng'a ninche ere. Bakabora, Nabo, inki tokorigeria birori? Naki intwe abanyene twaigure ase omonwa oye. EKERENGERERIO Nigo achayetwe, na kwangwa nabanto, omonto bw'obororo, oyomanyete emechando. ... Amaene oimokirie emechando yaito, bwetwekire obororo bwaito ... na ase okoakwa kwaye nigo tokogwenigwa. Luka 22: 39-48, 54, 63, 66-71. Isaya 53 : 3-5. Rituko 26 OMONENE YESO ONACHEIRWE OGOKWA Bakaimoka bonsi, bakamoreta ase Pilato. Bagachaka komosoera, bakabora, Twamororire omonto oyo oonchoire egesaku giaito, obakanirie abanto tibamoa Kaisari ebango, okobora ng'a ere omonyene nere Kristo, omoruoti. Pilato akamoboria, akabora, Naye omoruoti bw'Abayahudi? Akairaneria, akamotebia, Gwatebire aye. Pilato akabatebia abakuani abanene na emeganda, Inche tindochi bobe bonde ase omonto oyo ... erio konamoakire, nimosibore. Bakaaka egeturi bonsi amo, bakabora. Moire oyo, tosiborere Baraba: nere nomonto obegetwe ase echela ase engencho y'esugu yakoregete ase omochie ime, na ase oboid. Nabo eria kabere Pilato agakwana na barabwo, akarigia komosibora Yeso. Na barabwo bakaaka eriogi, bakabora, Mobambe, mobambe. Nere akabatebia eria gatato, Naki? mbobe ki akorete oyo? Tmdochi nonya nering'ana asare rigwenerete ogokwa: nabo konamoakire nimosibore. Korende bakabetereria kobora ase eriogi rinene, bakarigia abambwe. Eriogi riabo, neria abakuani abanene rikabua. Pilato akanacha amang'ana akoreke buna barigetie. Akamosibora ere oyobegetwe echela ase esugu noboiti, oyobarigetie; akamorua Yeso ase okorigia kwabo. Ekamotunyana emeganda emenge y'abanto, na abakungu, bare kweaka-aka, bakweng'ereria. Yeso ageonchora, akabora, Abaiseke ba Yerusalemu, timondera inche, korende erere abanyene, na abana baino. Naki amatuko nache bararigie goteba, Mbare negesio abare abagomba, ne chinda chitaiboreti, ne chimbere chitanakogonkwa. Erio nabachake kobitebia ebitunwa, Togwere; nebigoro, Totube. Ekiagera kobagokora aya ekero omote ore omobese, ekero ki'oria ore omwomo naki arabe? EKERENGERERIO Kristo ... agachandwa ara rimo ase engencho y'ebibe, omonyene oboronge, ase engencho y'abwo batari ba boronge, erinde atorete ase Nyasae. Luka 23 :1-4, 16, 18-25, 27-31. 1 Petero 3 : 18. Rituko 27 OGOKWA KW'OMONENE YESO Bakairwa babere naende, abasaria, baitwe amo nere. Bagachia goika aase akorokwa Ekeore, nao bamobambete, na baria abasaria, oyomo okoboko gw'okorio, noyonde okoboko gw'okobee. Yeso akabora, Tata, obabere; ekiagera tibamanyeti eke bagokora. Bakagabana chianga chiaye, bagakora obomera. Abanto bagatenena, bakarigereria. Nabarabwo abanene bakamokorera echeche, bakobora, Natoretie abande, tiga etorie omonyene, onye oyo nere Kristo o Nyasae, omochore oye. Abasigari bakamosekereria, bakamochera, bakamoa chinkama, na kobora, Onye aye naye omoluod bw'Abayahudi, etorie. Nkiarenge ekemanyererio igoro asare kerikire ase chinuguta chi'Ekeyunani, n'Ekerumi, n'Ekeibirania, OYO MERE OMORUOTI BW'ABAYAHUDI. Oyomo bwa baria abasaria babambetwe akamorama, akabora, Tari aye ore Kristo? Etorie omonyene naintwe. Oyo kabere akairaneria, akamokania akabora. Tori komoiroka aye nonya Nyasae, kore ase ekina keria keria? Naintwe ekeene mboronge; naki intwe twaeirwe eng'eria ya boronge y'ogokora gwaito; korende oyo takoreti ring'ana ritagwenereti. Akamotebia Yeso, ong'inyore kogochia ase oboruoti bwao. Akamotebia, Ekeene nagotebirie, Rero nobe amo nainche Igoro. Nekero ekio chikaba chinsa isano nemo, omosunte okaba igoro ase ense yonsi goika chinsa kianda. Omobaso ogakea: egetambaa gi'okonacha hekalu gegatandoka gati gati. Yeso akarera ase eriogi rinene akabora, Tata, ase amaboko ao nayobekire omoika one: ochia gokwana aya agatwekamo. Omotang'ani bw'abasigari emia, agachia korora eriakoreka, akamotogia Nyasae, akabora, Ekeene omonto oyo igo arenge omonyene oboronge. Naende emeganda yonsi abasangererekanete korora aya bagachia korora ayakoreka, bakairana, bakweaka ebikuba. Abasani baye bonsi, amo nabakungu bamotunyanete korwa Galili, bagatenenera are, barigereretie aya. EKERENGERERIO Kristo igakwete ase engencho y'ebibe biaito. Tata omotomire Omwana koba Omotoria bw'ense. Na amanyinga aye Yeso Kristo, Omwana oye, natosibie ebibe biaito bionsi. Luka 23 : 32-49. 1 Korintho 15 : 3. 1 Yohana 4 : 14. 1 Yohana 1:7. Rituko 28 KORWA OGOKWA GOIKA OBOGIMA Rora, narenge omonto, erieta riaye Yusufu, nere nomonto bw'ekegambero kiabo, omonto omuya, omonyene oboronge (ere tanchete amang'ana abo nonya nogokora kwabo), omonyene bw'ense y'Arimathaya, omochie bw'Abayahudi, nere igo aganyete oboruoti bwa Nyasae: omonto oyio akamochiera Filato agasaba aegwe omobere o Yeso. Akayoikia, akayotuba egetambaa ki'egetani, akayobeka ase oboina bwabachetwe ase egetare, aase 'monto onde atanyakobekwa. Igo riarenge rituko ri'Okwebeka ang'e, esabato egaika. Abakungu abachete amo nere korwa Galili, bagatunyana, bakaborigereria oboina, naende buna obegetwe omobere oye. Bakairana bakaroisia amaguta amanukato erimisu rigiya. Ne rituko ri'esabato bagatimoka buna yachigetwe. Ase rituko rie ritang'ani ri'echuma, kobogokiamoka, bakagenda oboina, bakareta amanukato aria ayababegete ang'e. Bakarinyora riria rigena riatigerigwe are noboina. Bagasoa, tibayonyora omobere bw'Omonene Yeso. Agachia koba ekero baichanete ase aya, rora! abanto babere mbateneine ang'e asebare, beboyetie chianga chikomekameka: na barabwo bagasogwa nokoiroka na gotung'ama maumama goika inse, bakabatebia, Naseki mokomorigia oyore moyo ase ebitondo? Tari aa, korende obokire: inyora buna akwanete nainwe ekero arenge Galili, akabora, ng'a nemogwenerete Omwana-omwanyabanto abekwe ase amaboko abanto abanyene ebibe, na kobambwa, na koboka rituko ria gatato. Bakainyora amang'ana aya. Bakairana korwa ase oboina, bakabatebia baria ikomi nomo na baria abande bonsi amang'ana ayio onsi. OGOTOGIA Amakweri amerirwe ase okobua. Amakweri, ng'ai okobua kwao kore? Amakweri, ng'ai obororo bwao bore? Obororo bw'amakweri nebibe ... korende mbuya mono ase Nyasae otoeire okobua ase Omonene oito Yeso Kristo. Nonya namakweri, nonya nobogima ... nonya nayare aroro, nonya nayagocha kobao ... tigekonyara gotwatanana na obwanchani bwa Nyasae bore ime ase Yeso Kristo Omonene oito. Luka 23 : 50-56. Luka 24 : 1-9. 1 Korintho 15 : 54-57. Abarumi 8 : 38, 39. Rituko 29 "NIGO INDE AMO NAINWE" Rituko riria babere babo nkogenda barenge omochie, erieta riaye Emmao. Egachia koba kabagokwana na koborania, Yeso omonyene agaika ang'e akagenda amo na barabwo. Amaiso abo akamumekerigwa, tibanyara komomanya. Akabatebia, 'Mang'ana ki aya mokoborania ase orogendo rwaino? Bagatenena bagatoerera bakaondoka. ... Bakamotebia, Amang'ana a Yeso Omonazareti, orenge omonto omobani omonyene chinguru ase ogokora na ase ring'ana ase obosio bwa Nyasae nabanto bonsi: buna abakuani abanene na abanene baito bamoruete ase ekina ki'ogokwa, bakamobamba. Naintwe iga twasemerede ng'a ere nere oraborie Isiraeli. Goika amo naya onsi, rero nerituko ria gatato korwa ekero abete aya. Nere akabatebia, Inwe abariri, na abanyene chinkoro chindito ase okoyancha onsi batebete ababani! Tiyamogwenerete Kristo konyora emechando eye, erio asoe obonene bwaye? Agachaka korwa Musa na ababani bonsi akabaonchorera ase amariko onsi amang'ana are igoro asare. Bakayoika omochie barenge kogenda; nere agekora buna igo arigetie goeta kogenda, bakamobetereria, bakabora, Ikaransa amo naintwe: ekiagera bwairire, nomobaso oerire bono. Agasoa goikaransa amo na barabwo. Ekaba gagoikaransa amo na barabwo koragera, akabogoria omogati, akayosesenia, akayosamunyora, akabaa. Bakaramokigwa amaiso abo, bakamomanya; agasira tarorekana na barabwo. Bagatebania, Inee! Emioyo yaito tiyarenge gwoka ime yaito, ekero aba ngokwanare naintwe inchera, kagotoorokeria amariko? Bakaimoka ensa eria eria, bakairana Yerusalemu, bakabanyora baria ikomi nomo basangererekanire, na barabwo abarenge amo na barabwo, bakabora, Ekeene Omonene obokire, oorokeire Simion. Na barabwo bakabatebia aria 'nchera, buna amanyeka na barabwo ase ogosamunyora omogati. EKERENGERERIO Omonene Yeso oria konyora obokire agateba: Igande amo nainwe amatuko onsi, goika omoerio bw'ense. Luka 24 : 13, 15-17, 19-21, 25-35. Mathayo 28 : 20. Rituko 30 OMONENE YESO OKOIRANA GOCHIA ASE NYASAE Yeso ... nyuma y'ogochandwa kwaye, akabaorokera ng'a moyo are, ase ebiorokererio ebinge, are kobaorokera ase engaki y'amatuko emerongo ene, na gokwana chingencho chiagwenerete ase oboruoti bwa Nyasae: naende, agasangererekana na barabwo, akabachika tibabaisa korua Yerusalemu, korende baganye eira ya Tata, eria mwaigwete chingencho chiaye korwa asende: naki Yohana igare kobatisa ase amache: korende inwe namobatiswe ase Omoika Omochenu nyuma ase amatuko aya atai mange. Erio ekero basangererekanete amo, bakamoboria bakobora, Omonene, ekero eke nario orabairanerie Abaisiraeli oboruoti bwabo? Akabatebia, Tari emeremo yaino komanya ebiro gose chingaki Tata abibekire ase okobua kwaye omonyene. Korende namonyore chinguru, ekero obacheire Omoika Omochenu: nainwe namobe birori bane ase Yerusalemu, na ase Boyahudi yonsi na Samaria, na goika chinsinyo chi'ense. Erio ochia gokwana aya, ekero barigereretie, akabogorigwa: rire rikamobwata korwa ase amaiso abo. Ekero barenge korigereria mono namaiso abo gochia igoro, ekero arenge kogenda, abanto babere bagatenena ang'e na barabwo, abarenge ne chianga chindabu; bakabora, Abanto ba Galili naki moteneine mokorigereria igoro? oyo Yeso, obogorigwe korwa asemore kogenda igoro, nabo arache omogwekano oyio oyio buna mwamorora akogenda igoro. YESU KRISTO OYORE KIRORI OMWEGENWA, OMOTANGI BW'ABAKURE NAENDE OMOGAMBI BW'ABAGAMBI B'ENSE. OGOTOGIA Asare ere oyotwanchete na gotosibia ebibe biaito ase amanyinga aye; naende agatokora koba abaruoti, na abakuani ase Nyasae, Iso oye; nobonene nobonguru iga bore asare ere goika kare na kare. Amin. Ogokora 1: 1-11. Okomanoka 1 : 5,6. Rituko 31 OGOTOREKA ASE OKWEGENA IME Y'OMONENE YESO Nabo mbire ebikone binde ebinge akorete Yeso ase amaiso 'aborokigwa baye, bitarikiri ase ebuku eye: korende ebi biarikirwe monyare kwegena ng'a Yeso nere Kristo, Omwana o Nyasae; naende ase okwegena mobe nobogima ase erieta riaye. Korende bonsi abamwanchete, akabaa okobua babe abana ba Nyasae, nabwo bariegenire erieta riaye. INCHUO! Omonene Yeso agateba: Nchuo asende inwe mwensi abwo mwarosigwe ase emeremo emerito, abwo mwabunekire ne chigurube, nainche nimbatimokie. Mwetweke egesibo kiane, mwegere asende, ekiagera inche nomwororo nde, nomoitongo bw'omoyo: naiawe namorore ogotimoka ase emebere yaino. Naki egesibo kiane nekiororo, negurube yane nengusu. Nere oyogocha asende tinkomotuguta isiko nonya ng'ake. Rigereria, natenenire gesieri gotura; omonto karaigwe eriogi riane na koigora egesieri, ninsoe asare, nindagere amo nere, nere amo nainche. GENDA! Omonene Yeso agateba: Genda seino, ase abanto baino, obatebie amang'ana amanene agokorera Omonene, naende buna akwabera. Gaki genda mokore ebisaku bionsi koba aborokigwa, mokobabatisa ase erieta ria Tata, neri'Omwana, neri'Omoika Omochenu: mokoborokereria koyabwata onsi nabachigete, nainche igande amo nainwe amatuko onsi, goika omoerio bw'ense. Yohana 20 : 30, 31. Yohana 1 : 12. Mathayo 11 : 28-30. Yohana 6 : 37. Okomanoka 3 : 20. Mariko 5 : 19. Mathayo 28 : 19, 20. OKORORA KWA OMOTOMWA YOHANA NKARORA igoro ayia nense enyia: naki igoro ye ritaag'ani na ense ye ritang'ani chiatiekire goeta; nonya nenyancha teri naende. Nainche Yohana nkayorora omochie oria omochenu, Yerusalemu omoyia, ogoika korwa igoro ase Nyasae, obekirwe ang'e buna omoriakari bw'enyangi oyotiekire koroisigwa ase omosacha oye. Nkaigwa eriogi rinene rikorwa igoro rigoteba, Rora, obomenyo bwa Nyasae mbore amo na mwanyabanto, nere namenye amo na barabwo, nere nabe Nyasae obo. Nere natinyie kera ririga ase amaiso abo, amakweri takobao naende, nonya nokweumia, nonya nokorera, nonya nobororo tibokobao naende: ekiagera amang'ana eritang'ani atiekire goeta. Nere oyoikaransete igoro ase ekerogo ki'obonene agateba, Rora, nakorire onsi koba amayia. Agantebia, Rika; naki aya namang'ana ay'ekeene, nay'obwegeni. Agantebia, Atiekire koba. Inche Alifa n'Omega, omochakano nomoerio. Inche nimoe omonyene erang'o amache ay'ensoko y'amache obogima, bosa. Ere oyorabue nayanyore aya; nainche nimbe Nyasae oye, nere nabe omwana one. Rigereria, ngochande bwango: neng'eria yane igo ere amo nainche, komoa kera omonto buna emeremo yaye ere. Ninche Alifa n'Omega, omochakano na omoerio, oyo bwe ritang'ani noyo bw'omoerio. Amin: oche, Omonene Yeso.