The New Testament of our Lord and Saviour Jesus Christ
1 Iga nyigo marina ga waku wa Yesu Kristo awei o kyishari kya Dawidi na Abrahamu. 2 Abrahamu nalefee Isakyi, Isakyi kafee Yakobo; Yakobo kafee Yuda na wana wa wamae. 3 Yuda kafee Peresi na Sera ipfo ko Tamari; Peresi kafee Esiromu; Esiromu kafee Aramu. 4 Aramu kafee Aminadabu; Aminadabu kafee Nashon, Nashon kafee Salyimone. 5 Salyimone kafee Boasi ko Rahabu; Boasi kafee Obedi ko Ruti, Obedi kafee Yese. 6 Yese kafee Mangyi Dawidi. Dawidi kafee Solomon ko mka ulya o Uria. 7 Solomon kafee Rehoboamu; Rehoboamu kafee Abiya; Abiya kafee Asa. 8 Asa kafee Yoshafati; Yoshafati kafee Yoramu; Yoramu kafee Usia. 9 Usia kafee Yotamu; Yotamu kafee Ahasi; Ahasi kafee Esekyia. 10 Esekyia kafee Manase; Manase kafee Amon; Amon kafee Yosia. 11 Yosia kafee Yekonia na wana wa wamae, kyiyeri kya wana wa Isiraelyi waleṙoo wusingyenyi kulya Babelyi. 12 Na numa ya wusamiṟo wulya wo Babelyi, Yekonia kafee Shealyitielyi; Shealyitielyi kafee Serubabelyi. 13 Serubabelyi kafee Abihudi; Abihudi kafee Elyiakyimu; Elyiakyimu kafee Asori. 14 Asori kafee Sadokyi; Sadokyi kafee Akyimu; Akyimu kafee Elyiudi. 15 Elyiudi kafee Elyieseri; Elyieseri kafee Matani; Matani kafee Yakobo. 16 Yakobo kafee Yosefu mii o Maria alefee Yesu elago Kristo. 17 Koikyo marika goose wookyia Abrahamu mṟasa Dawidi nyi ikumi na gaana. Na wookyia Dawidi mṟasa kyiyeri wana wa Isiraelyi waleṙoo wusingyenyi kulya Babelyi nyi marika ikumi na gaana. Na wookyia wusamiṟo wo Babelyi mṟasa Kristo nyi marika ikumi na gaana. 18 Yesu Kristo nalefeo kuṙi. Maria wamae kyiyeri aweṙuṙo nyi Yosefu, walandekooyane kyimmbiu nalewono ai mlemo kui wuiṙimi wo Mumuyo Mweele. 19 Na Yosefu, mii okye, kyipfa kya ilyi-indi awekyeri mndu msumganyi alakunde imsutsa, kaṙumbuo imṙa kui kyiṟika. 20 Kyasia-ng'u kyiyeri awekusaṟa isho, malaika o Mndumii kamchia ndoṙonyi, echigamba, “Yosefu, mana o Dawidi, ulaowuoe iṙuo Maria mka opfo, kyipfa ikyo kyikyimooge kokye nyi kui wuiṙimi wo Mumuyo Mweele. 21 Na oe nechienengo mana o womi, na iyoe nochimlaga Yesu, kyipfa, nyi oe echiwuta wandu wakye ngyuunyamaṟi tsawo. 22 Isho shoose shaṟundika kundu kyiafukyie kyindo kyileṙeṙo nyi Mndumii kui ndumo ya moonguo shisuku echigamba, 23 ‘Ambuya, mana mkyega nechiira mana, na oe nechienengo mana o womi; nawo wechimlaga Imanuelyi; ikyo nyi kyimwi na igamba, Ruwa hamwi na soe.’ ” 24 Na Yosefu lyilya aleamka iwuka maṙoenyi, nalewuta chandu malaika o Mndumii alemmbia. Kaṙuo mka okye; 25 alakooyane na oe kyimmbiu maa lyimwi, mṟasa kyiyeri aleenengo mana okye; kamlaga Yesu.
1 Lyilya Yesu alefeo Betilehemu ya Uyuda, kacha kyiyeri kya mangyi Herode, wandu wawewoṙe wuṟango wo mbonyi tsa nyenyeri wa ura lo ngamenyi waleshika Yerusalemu, wechigamba, 2 “Nyi kwi ai ulya alefeo mangyi o Wayuda? Kyipfa lulewona nyenyeri yakye ura lo ngamenyi, na soe locha luchemuolokyia.” 3 Kyasia mangyi Herode amuicho isho, nalewoṙo nyi fowa mrimenyi, na wandu wa Yerusalemu taa hamwi na oe. 4 Kasania wang'anyi wa makohanyi woose na walosha wa mawawaso, kapfula mbonyi kowo, Kristo nafeo kwi? 5 Nawo wakammbia, “Kyiiṙi kya Betilehemu ya Uyuda; kyipfa nyi wuṙo kyiwekyiṟeie nyi moonguo shisuku: 6 ‘Na iyoe Betilehemu, urukyenyi lo Yuda, ukyeri mtutu wachilyinyi wa Yuda maa ale-pfo; kyipfa kopfo nechiwuka mochilyia uruka, echilyisa wandu wako Isiraelyi.’ ” 7 Numa Herode kalaga wandu walya wawoṙe wuṟango wo mbonyi tsa nyenyeri kawaṙa nawo kyisanzionyi kyiṟika kawawesa nyi indi nyenyeri-yo ilewoneka. 8 Kawaṙuo Betilehemu, kagamba, “Yendenyi mundewesa mnu mbonyi tsa mana; na mukommbona, ngyiendienyi mbonyi, kundu na inyi ngyindemwindia.” 9 Nawo waicho maṙeṙo ga mangyi, walewooka kyaro; na nyenyeri iya waleiwona ura lo ngamenyi ikawasongoya, mṟasa ikayenda ikagoṟoka wuye ya handu mana awekyeri. 10 Na lyilya walewona nyenyeri iya walewoṙo nyi sia ing'anyi mnu. 11 Wakaiṙa na numba, wakawona mana hamwi na Maria wamae, wakapfiria ndi wakamwindia; nawo wampfunguo mkunja yawo wakamwenengyia shindo sha woguru wung'anyi; sahapu na uvumba na manemane. 12 Nawo wammbawaso nyi Ruwa ndoṙonyi walawiyilyie Herode, wakayenda urukyenyi kowo kui njia ingyi. 13 Na iwo wamuyende, malaika o Mndumii nalecha na ko Yosefu ndoṙonyi kagamba, “Yenda, uṙuo mana na wamae, uṙiche na Misiri, ukae pfo mṟasa ngyikuwie; kyipfa Herode nakundi ipfula mana namrumatse.” 14 Kayenda kaṙuo mana na wamae kyio, kayenda Misiri, 15 kakaa pfo mṟasa Herode kapfa; kundu kyiafukyie kyindo kyileṙeṙo nyi Mndumii kui ndumo ya moonguo shisuku, echigamba, “Iwuka Misiri ngyilelaga mono-ko.” 16 Naaho-ng'u Herode, ammbone kye ammbutio shindo sha ngyeṟo nyi wandu walya wawoṙe wuṟango wo mbonyi tsa nyenyeri naleicho nyashi mnu, kaṙuma wandu wakawaaga wana woose wa kyisoṟo wawekyeri kulya Betilehemu na ipfo mṟasenyi koose, wookyia wawoṙe maka iwi na wanda ya iho, ko kyiyeri kyoose alekyimanya ko wandu walya wawoṙe wuṟango wo mbonyi tsa nyenyeri. 17 Naaho-ng'u kyileafukyia kyindo kyilegambo nyi moonguo shisuku Yeremia, echigamba, 18 “Ṟui lyileaṙanyio Rama, wukyiwa, na ikapa ṟanyi lying'anyi, Raheli echifiiṟia wana wakye, alaiṙikyie iwiyiṟio moo, kyipfa woose wawepfiie.” 19 Kyaindi kyiyeri Herode alepfa, malaika o Mndumii nalecha na ko Yosefu ndoṙonyi ipfo Misiri, 20 kagamba, “Amka, uṙuo mana na wamae uwuye na kulya urukyenyi lo Isiraelyi; kyipfa wampfa walya waweikundi iwaaga mana-cho.” 21 Kayenda kaṙuo mana na wamae, kashika uruka lo Isiraelyi. 22 Kyaindi amwicho kye Arikyelao nawoṙe wuchilyi ipfo Uyuda handu ha Herode awuye, naleowuo iyenda pfo; na oe ammbawaso ndoṙonyi kayenda ngyuura tsa Galyilaya. 23 Kakaa mṟinyi uwekyelago Nasareti; kundu kyiafukyie kyindo kyileṙeṙo nyi weonguo shisuku: “Nechilago Mnasorayo.”
1 Mfiri iya Yohane Mpatisi naleyenda echionguo mbonyi ngyicha nukyenyi ya Uyuda, na igamba, 2 “Ṙumbuyenyi wunyamaṟi; kyipfa Wumangyi wo ruwewu womshika kufuhi.” 3 Cha kyipfa icho nyi oe alegambo nyi moonguo shisuku echigamba, “Ṟui lya mndu aieṙia nuka, ṟeyeṟenyi njia ya Mndumii, goṟotsenyi kundu echiiṙia.” 4 Na Yohane naweṟee ikunya lya mapfukye ga ngamia na ukowa lo njonyi kyitsinyi kyakye; na kyelya kyakye nyi-we nzie na wukyi wo nguṙunyi. 5 Naaho-ng'u wandu wa Yerusalemu waleyenda kokye, na wa Uyuda koose, na wa ngyuuruka tsoose tsa mbai ya Yoridan; 6 na oe kawapatisa kulya mfonyi o Yoridan, wechitocha ngyuunyamaṟi tsawo. 7 Na lyilya alewona wafoi kyiiṙi kya Mafarisayo na Masadukayo wechicha na wupatisonyi wokye, nalewawia, “Nyoe maalea ga njoka, nyi wui alemwikyimbia nyoe iṙicha nyashi-yo iicha? 8 Kyasia kumbienyi ndunda tsiṙuṙanyi na iṙumbuya wunyamaṟi. 9 Maa mulakusaṟe mrimenyi konyu kye, ‘Muwoṙe awu, nyi oe Abrahamu; kyipfa ngammbia kye Ruwa neiṙima kyiiṙi kya magoe-ga iiria Abrahamu wana.’ 10 Na soka lyammbikyio matsindenyi ga mashiṙi; kyasia orio ikyiṙi lyilekyekumbia ndunda ngyicha lyekyemanyo na iwiyitso moṙonyi. 11 Ny'kyaloi inyi ngyimpatisa kui mṟinga kyipfa kya iṙumbuya wunyamaṟi; kyaindi ulya aicha numa yako nawoṙe pfinya kuta inyi, ngyiwaṟi maa iira shiaṙu shakye-pfo; oe nechimpatisa kui Mumuyo Mweele na kui moṙo. 12 Indo lyakye lyeela shindo lyikyeri kuwokonyi kokye, na oe nechiaia muului oose handu hakye heelyia shindo; na isania nganu yakye kyikumbinyi, kyaindi muului nechiurumatsa moṙonyi ulekyeruma.” 13 Kyiyeri-kyo Yesu kacha awuka Galyilaya mṟasa Yoridan ko Yohane kundu napatiso. 14 Kyaindi Yohane katambagana imshingyia, echigamba, “Inyi ngyilangyie ipatiso nyi iyoe, na iyoe nuicha na koko?” 15 Yesu kagaluo kammbia, “Iṙikyia wulalu kuṙi; kyipfa nyi wuṙo kyiluwaṟi iafutsia wusumganyi woose.” Kyasia kamwiṙikyia. 16 Na Yesu ampatiso cha ilyi kaṙo iwuka kulya mṟingyenyi; na mapuchi gakaseia, kawona Mumuyo o Ruwa echisokyia wuye yakye cha mbeta. 17 Na ṟui lyiwukyie ruwewu lyikagamba, “Ichu nyi Mana oko, mkunde oko, ngyimchihiye kyipfa kyakye.”
1 Numa ya iho Yesu kaṙoo nyi Mumuyo kundu ko nuka, kundu nayesho nyi Mokyiriinzi. 2 Kakuretekyia mfiri makumi gaana kyio na kyingoto, mafurumionyi kawoṙo njaa. 3 Myeshi kacha na kokye kammbia, “Kokooya iyoe nyi mana o Ruwa, wia magoe-ga gawe mkate.” 4 Na oe kagaluo, kagamba, “Kyikyiṟeie, ‘Mndu echiwona moo kui mkate tikyi-pfo, kyaindi ko orio ṙeṙo Ruwa agamba.’ ” 5 Kyasia Mokyiriinzi kamṙuo mṟasa Yerusalemu, mṟi mweele, kammbikyia wuye ya uweri lo hekalu 6 kammbia, “Kokooya iyoe nyi Mana o Ruwa kuwiyitse wanda; kyipfa kyikyiṟeie, ‘Nechikuṙumia malaika wakye; na wechikuwaṙa mawokonyi gawo; ulachekapa ṙende igoenyi.’ ” 7 Yesu kammbia, “Ngoseṟa kyikyiṟeie, ‘Ulayeshe Mndumii Ruwa opfo.’ ” 8 Numa ya iho Mokyiriinzi kamṙuo fumvunyi lyileshi mnu, kamloṟa ngyuuchilyi tsoose tsa wuyana, na wung'anyi wotso, 9 kammbia, “Ishi shoose ngyechikuenenga, kongyiindia.” 10 Naaho-ng'u Yesu alemmbia, “Wuka iha, Satana, kyipfa kyikyiṟeie, ‘India Mndumii Ruwa opfo, umterewe oe amonyi.’ ” 11 Numa ya iho Mokyiriinzi kamleka; na malaika wakacha wakamtarama. 12 Yesu amwicho kye Yohane Mpatisi nampfungye, naleyenda mṟasa Galyilaya. 13 Kawuka Nasareti, kacha kakaa Kaperinaumu, mṟi ukyeri mbai ya ipalyipalyi, mṟasenyi o Sabulon na Naftalyi; 14 kundu kyiafukyie kyindo kyileṙeṙo nyi moonguo shisuku Yesaya, echigamba, 15 “Uruka lo Sabulon na uruka lo Naftalyi, ṟuko lya ipalyipalyi, molyolya o Yoridan, Galyilaya ya wandu walaiṙikyie Ruwa. 16 Wandu walya wakyeri meemenyi wammbona saa ing'anyi, na walya wakyeri urukyenyi lo kyirinje kya upfu, ngyeela yammboneka kowo.” 17 Wookyia kyiyeri-kyo Yesu nalewooka ionguo mbonyi ngyicha, na igamba, “Ṙumbuyenyi wunyamaṟi kyipfa Wumangyi wo ruwewu womtikyira kufuhi.” 18 Na oe kyiyeri aweichumia mbai ya ipalyipalyi lya Galyilaya, nalewona wana wa mka wawi, Simion ekyelago Petiro na Anderea mono-wamae wechiwiyitsa ndusu tseṙeia makunga ipalyipalyinyi; kyipfa wawekyeri wandu wekyeṙega makunga. 19 Kawawia, “Ngyioshenyi, na inyi ngyechimugaluo muwe wandu wekyeṙega wandu.” 20 Cha ilyi wakaṙa ndusu tsilya tsawo tseṙega makunga, wakamwosha. 21 Kaengyeṟa ichumia, kawona wana wengyi wa mka wawi, Yakobo mana o Sebedayo, na Yohane mono-wamae, wakyeri ngalawenyi hamwi na Sebedayo awu-yawo, wechiachikyia ndusu tsawo tseṙega makunga; kawalaga. 22 Cha ilyi wakaṙa ngalawa iya yawo na awu-yawo wakamwosha. 23 Na oe nawetenga-tenga urukyenyi lo Galyilaya loose, echilosha masinagoginyi gawo na ilosha Mbonyi Ngyicha ya Wumangyi, na ikyiṟa ndoṟe na wufafa wo orio mbaṟe wandunyi. 24 Na mbonyi tsakye tsikaṙunganana urukyenyi lo Shamu loose; wakamwendie woose waweluoe, wawoṙo nyi orio ndoṟe na orio ilyiso wukyiwa, wawoṙo nyi waṟufui wawicho, na wekyeuma nguku, na wapfiie ngapfu ura lumwi; kawakyiṟa. 25 Na wuingyi wo wandu wukomwosha, iwookyia Galyilaya na Dekapolyi, na Yerusalemu na Uyuda, na molyolya o Yoridan.
1 Na oe kyiyeri alewona wuingyi wo wandu, naleṙo na fumvunyi; na amṙamie, wanalosho wakye walecha na kokye. 2 Kawooka iwalosha echigamba, 3 “Wagusu iwo wawoṙe wukyiwa wo mrima; kyipfa Wumangyi wo ruwewu nyi wowo. 4 Wagusu iwo wawasokyie nyi fowa; kyipfa iwo wechiwiyiṟio moo. 5 Wagusu iwo wawoṙe wuhoo; kyipfa iwo wechioṟa uruka. 6 Wagusu iwo wawoṙe njaa na nyoṙa ya wusumganyi; kyipfa iwo wechiigutso. 7 Wagusu iwo wawoṙe isaṟia; kyipfa iwo wechiwona isaṟia. 8 Wagusu iwo wawoṙe mrima mmbaṙami; kyipfa iwo wechiwona Ruwa. 9 Wagusu iwo wekyeende ufoṟo; kyipfa iwo wechilago wana wa Ruwa. 10 Wagusu iwo wechipfulutso nyashi kyipfa kya iwa wasumganyi; kyipfa Wumangyi wo ruwewu nyi wowo. 11 Wagusu nyoe ilyi wechimkapa kyipfa kya wusumganyi na impfulutsa nyashi na imuiria orio kyindo kyiwicho kui wongo, kyipfa kyako. 12 Chihiyonyi, na ikyesa; kyipfa wori wonyu nyi wung'anyi ruwewu. Kyipfa nyi wuṙo walepfulutsa nyashi weonguo shisuku walemusongoya nyoe.” 13 “Nyoe nyi munyu o wuyana. Kyaindi munyu ukyeri unyamaṟikyie owiko-kyi mṟasa uṙahie? Ochiwaṙa-se kyiira maa ale-pfo, sile iwiyitso nja na ichumo-chumo nyi wandu. 14 Nyoe nyi saa ya wuyana. Mṟi oiṙima ikuṟiika ukyeri wuye ya fumvu-pfo. 15 Maa wandu wekyekoṟa taa na iiwikyia handu hakuṟiikyie-pfo, kyaindi handu hakuirie; nayo ikalyimikyia woose wakyeri numba. 16 Na wuṙo ngyeela yanyu ilyimikye mbele ya wandu, waiṙime iwona mawuto ganyu mecha, waṟumishe Awu-yonyu akyeri ruwewu.” 17 “Mulakusaṟe kye ngyilecha iilacha mawawaso na shilya weonguo shisuku wagambie. Ote. Ngyilecha iilacha-pfo, kyaindi iichuṟia. 18 Kyipfa, ny'kyaloi, ngammbia, mṟasa kyiyeri ruwewu na uruka shechiwuka ho, maa kyindo kyitung'tu kya mawawaso kyechiwuka ho-pfo, mṟasa shoose shiafukyie. 19 Kyasia mndu oose echinyamaṟa iwawaso lyimwi kyiiṙi kya iga gai matutu, na ilosha wandu kuṙo, nechilago mtutu kuta woose Wumangyinyi wo ruwewu; kyaindi mndu echigaosha na igalosha, icho nechilago ang'anyi Wumangyinyi wo ruwewu. 20 Kyipfa ngammbia-kye wusumganyi wonyu wulandeng'anie wulya wo walosha wa mawawaso na Mafarisayo, mochiiṙa maa ale na Wumangyinyi wo ruwewu-pfo.” 21 “Mulemuicho chandu wandu wa kacha walewio ulawaage; na mndu kawaaga kyimmbaṟi ianduyo. 22 Kyaindi inyi ngammbia, orio mndu mokapo nyi nyashi kyipfa kya mono-wamae kyimmbaṟi ianduyo. Na mndu molahia mono-wamae, kyimmbaṟi iṙeṙio moondu. Na mndu kamlaga tondo, kyimmbaṟi ngyehena ya moṙo. 23 Kyasia koende kyiano kyapfo na mbele ya Ruwa, na kunu kokumbuo kye mono-womoo nawoṙe ṙeṙo na iyoe, 24 ṙa kyiano-kyo kyapfo mbele ya Ruwa, uyende, uachikyie kuwooka mbonyi tsapfo na mono-womoo, numa uwuye uenengyie kyiano kyapfo. 25 Achikyia iwinyi mbonyi tsapfo na ulya uwoṙe na oe moondu kyiyeri uṙuṙanyi na oe njienyi; ulya uwoṙe na oe moondu alachekuṙuo ko moṙumbuo moondu, na moṙumbuo moondu kakuṙuo ko asikari, kowiyitso kyipfungonyi. 26 Ny'kyaloi, ngakuwia, ochiwuka pfo maa ale-pfo mṟasa umarise itaa helo iya ya mafurumionyi.” 27 “Muleicho kye kyikyigambe, ulaṟuguye maa ulaṟuguyo. 28 Kyaindi inyi ngammbia orio mndu aambuya mndu mka kui imlanga, amumṟuguya ipfo mrimenyi kokye. 29 Riso lyapfo lya kulyoe lyikakutewe, lyikuluoe ulyiwiyitse kuleshi na iyoe; kyipfa kyikuwaṟi kyoonyi kyapfo kyimwi kyiṙekye kundu mmbiu opfo oose ulawiyitso ngyehenenyi. 30 Na kuwoko kopfo ko kulyoe kukokutewe, ṙumbuo kuwoko-ko uwiyitse kuleshi na iyoe. Kyipfa kyikuwaṟi kyoonyi kyapfo kyimwi kyiṙekye, kundu mmbiu opfo oose ulawiyitso ngyehenenyi.” 31 “Kyiwekyiṙeṙe taa, mndu kaṙa mka okye, namwenengye kyiṟeio kyelekana na oe. 32 Kyaindi inyi ngammbia, orio mndu aṙa mka okye, sile ko mbonyi tsa wuṟui, namgaluo mṟui; na mndu kaalyika ulya aṙio naṟuguya.” 33 “Ngoseṟa mulemuicho chandu wandu wa kacha walewio, ulalye nyamu kui rina lya Ruwa, kyaindi afutsia nyamu tsapfo ko Mndumii. 34 Kyaindi inyi ngammbia, molalye nyamu maa ale; maa kui ruwewu, kyipfa ikyo nyi kyiṙi kya Ruwa kya wuchilyi. 35 Maa kui uruka, kyipfa nyiho hewikyia maṙende gakye; maa kui Yerusalemu, kyipfa nyicho mṟi o mangyi ang'anyi. 36 Maa ulalye nyamu kui mṙoe opfo, kyipfa oiṙima igaluo uchui lumwi iwa uwiṟo ang'u njuu-pfo. 37 Kyaindi maṙeṙo ganyu gawe yee, yee; ote, ote; kyipfa gaelewetsie igo gawukyie ko ulya mmbicho.” 38 “Mulemuicho kye kyikyigambe, riso ko riso, na yego ko yego; 39 kyaindi inyi ngammbia, mulawingane na mndu mmbicho; kyaindi mndu akukapa nguchu ya ura lo kulyoe, mgalutsie na nguchu ya kawi. 40 Na mndu akundi ikulaga moondunyi na iṙuo iwale lyapfo, mṙeeye na ijoho taa. 41 Na mndu echikuitika uyende na oe mailyi imwi, yenda na oe tsiwi. 42 Akuterewa, mwenengye; na mndu akundi iakuo kopfo ulamwime.” 43 “Mulemuicho kye kyikyigambe, ukunde momṟasa opfo, na usuo mokyituwa opfo. 44 Kyaindi inyi ngammbia, kundenyi washituwa wanyu, terewienyi walya waimpfulutsa nyashi; 45 kundu muiṙime iwa wana wa Awu-yonyu akyeri ruwewu. Kyipfa oe nekyeenenga mmbaṟi okye wawicho na wecha, nekyeolotsia mvuo wasumganyi na walai wasumganyi. 46 Kyipfa mukokunda wamukundi nyoe tupu, mowona wori wuha? Maa wesania ukamba, wekyeṟunda isho isho-pfoe? 47 Ngoseṟa mukoiṟikyiṟa wana wa wamanyu tupu, moṟunda kyi kya ngoseṟa? Maa wandu walaiṙikyie Ruwa wekyewuta cha isho-pfoe? 48 Kyasia nyoe mochiwa wandu walawoṙe mti, chandu Awu-yonyu o ruwewu alawoṙe mti.”
1 “Mulaloṟe wucha wonyu mbele ya wandu, kundu wamuambuye. Kyipfa mukoṟunda muṙo, mowona wori ko Awu-yonyu akyeri ruwewu-pfo. 2 Kyasia kyiyeri-kyo uienengyia kyiano kyesaṟia molakushele, chandu wakulembecheṟi wekyewuta ipfo masinagoginyi na njienyi, kundu waṟumisho nyi wandu. 3 Ny'kyaloi, ngammbia, wammbona wori wowo. Kyaindi kyiyeri iyoe uienengyia kyiano kyesaṟia, maa kuwoko kopfo ko kumoso kulamanye kyindo kuwoko kopfo ko kulyoe kuiṟunda. 4 Kyiano kyapfo kyesaṟia kyiwe kui kyiṟika; na Awu-yopfo ulya ekyewona maa shilya shikuṟiikyie nechikuenenga iṟikoso.” 5 “Ngoseṟa kyiyeri muiterewa, mulawe cha wakulembecheṟi; kyipfa wo wakundi iterewa wagoṟokyi masinagoginyi na mbai ya njia, kundu wawono nyi wandu. Ny'kyaloi, ngyimmbia, wamuambilyia wori wowo. 6 Kyaindi iyoe kyiyeri-kyo uiterewa, iṙa na kyiṟinyi kyapfo uwiirie moongo, na komshinga moongo opfo, uterewe mbele ya Awu-yopfo akyeri handu hakuṟiikyie; na Awu-yopfo ekyewona maa shilya shikuṟiikyie nechikuenenga iṟikoso. 7 Na nyoe kyiyeri-kyo mukyeri kyiterewonyi, mulagambe shindo shifoi shilawoṙe kyiira, cha wandu walaichi Ruwa, kyipfa wo wekyekusaṟa kye wechiaṙanyio kyipfa kya maṙeṙo gawo iwa gafoi. 8 Kyasia mulawe cha iwo; kyipfa Awu-yonyu naichi shilya mukundi maa nyoe mulamterewa. 9 Kyasia nyoe terewenyi kuṙi, ‘Awu-yoṙu ukyeri ruwewu, Rina lyapfo lyitano lyiele, 10 Wumangyi wopfo wuche, kyindo ukundi kyiṟundikye, iha wuyanenyi cha kulya ruwewu. 11 Uluenengye kando kaṙu inu. 12 Uluhooṟie maṙeko gaṙu, chandu na soe lokyehooṟia walya wekyeluṙekyio. 13 Na ulaluṙuo kyiyeshionyi, kyaindi ulukyiṟe ngyeṟo tsa ulya mmbicho. [Cha kyipfa Wumangyi nyi wopfo, na pfinya, na mng'ano, mṟasa mlungana. Amen.’ ”] 14 “Cha kyipfa mukohooṟia wandu maṙeko gawo, na Awu-yonyu o ruwewu nechimuhooṟia nyoe. 15 Kyaindi mulandehooṟie wandu maṙeko gawo, maa Awu-yonyu echimuhooṟia nyoe maṙeko ganyu-pfo.” 16 “Ngoseṟa kyiyeri moṙumbuo ikuretekyia kundu muṟumishe Ruwa, mulawe cha wakulembecheṟi wawoṙe shaam shiwoṙe nzineeri. Kyipfa wekyenyamaṟa shaam shawo, kundu wawono nyi wandu kye wailya maa inyo-pfo. Ny'kyaloi ngammbia, wamuambilyia wori wowo. 17 Kyaindi iyoe kyiyeri okuretekyia, kushie mafuṙa mṙoenyi, usambe kyaam; 18 kundu ulawono nyi wandu kye nokuretekyia, sile nyi Awu-yopfo akyeri handu hakuṟiikyie, na Awu-yopfo ekyewona maa shilya shikuṟiikyie nechikuenenga iṟikoso.” 19 “Mulakoome shindo sha woguru kyipfa kyanyu iha wuyanenyi, handu mashinu na koṟa shekyenyamaṟa, na mbafu tsekyefunja na iiwa. 20 Kyaindi koomenyi shindo sha woguru kyipfa kyanyu ruwewu, kulekyenyamaṟika kyindo kyipfa kya mashinu maa koṟa, maa mbafu tsilekyefunja na iiwa. 21 Kyipfa handu kyindo kyapfo kya woguru kyikyeri na ho-ndu na mrima opfo ochikaa.” 22 “Taa ya mmbiu nyi riso. Kyasia riso lyapfo lyechiṟunda necha mmbiu opfo oose ochiwaṙa ngyeela. 23 Kyaindi riso lyapfo lyikanyamaṟika, mmbiu opfo oose ochiwaṙa meema. Kyasia ngyeela iya ikyeri kopfo ikawa meema; nyi meema ung'anyi mnu!” 24 “Kuwoṙe mndu echiiṙima iṟundia wandumii wawi-pfo; cha kyipfa nechisuo ichu, na ikunda ichu; ang'u nechikuwaṙa na ichu na imina ichu. Moiṙima iṟundia Ruwa na masaa-pfo. 25 Kyipfa kya ikyo ngammbia, mulawinie moo yanyu, mulye kyi ang'u munyo kyi; maa mmbiu yanyu muṟaae kyi. Moo chi ngoseṟa ya kyelya, na mmbiu chi ngoseṟa ya kyindo kyeṟaa? 26 Ambuyenyi shileye sha ngyinenyi kye shekyeṙonga-pfo, maa shekyesambuo-pfo, maa shekyesania kyikumbinyi-pfo; na awu-yonyu o ruwewu nekyeshiembeṟa shoose. Nyoe muwoṙe woguru wung'anyi kuta shileye-sho-pfoe? 27 Nyi wui konyu maa kakuwinisha eiṙima iengyeṟa maa ale mfiri yakye ya iha wuyanenyi? 28 Kyatarama kyi iwinia shindo sheṟaa? Kusaṟenyi kya shiwaṟo sha maṙemenyi, chandu shekyeṙo. Shekyeṟunda-pfo, maa shekyeoka-pfo. 29 Na inyi ngammbia kye maa Solomon mng'anonyi okye oose aleṟiko necha cha shiwaṟo-shi pfo. 30 Kyasia, kokooya Ruwa nekyeṟika kuṙo melyi tsa maṟa gai ho inu na ngama gakawiyitso moṙonyi, ngyesa echimṟika nyoe lya ngoseṟa, nyoe wa iiṙikyia lyifofo-pfoe? 31 Kyasia mulakuwinishe, mochigamba, lulye kyi, ang'u lunyo kyi, ang'u lpṟaae kyi? 32 Cha kyipfa isho shoose wandu walaṙikyie Ruwa wekyeshipfula. Na awu-yonyu o ruwewu naichi kye mukundi isho shoose. 33 Kyaindi pfulenyi kuwooka Wumangyi wokye, na wusumganyi wokye; na isho shoose mochiengyeṟio. 34 Kyasia mulakuwinishe na sha ngama; kyipfa ngama yekuwinia imonyi. Kyishikyie ikuwinisha orio mfiri na ngyuukyiwa tsa mfiri-cho.”
1 “Mulaanduye, mulacheanduyo nyoe. 2 Kyipfa chandu muianduya wengyi na wuṙo mochianduyo. Na kyiyeṟo kyilya mueṟa nakyo mochiyeṟio. 3 Kyasia, ny'kyilyi uiambuya kyiunana kyikyeri risonyi lya mono-womoo, na mriti-cho ukyeri ipfo risonyi lyapfo ulauambuye? 4 Ang'u nowia kuṙa mono-womoo, ‘Ngyileka ngyiwute kyiunana ipfo risonyi lyapfo,’ na kunu kuwoṙe mriti ipfo risonyi lyapfo? 5 Iyoe mkulembecheṟi, wuta kuwooka mriti-cho ipfo risonyi lyapfo; naaho-ng'u ochiwona necha iwuta kyiunana kyilya kyikyeri risonyi lya mono-womoo. 6 Mulaenengye shite kyilya kyikyeri kyiele. Maa mulawiyitse lulu tsanyu mbele ya nguwe. Tsilachetsichuma-chuma, tsikagaluka na imtafuo-tafuo.” 7 “Terewenyi na nyoe mochienengo. Pfulenyi, na nyoe mochiwona. Kape-kapenyi moongo na nyoe mochipfunguyo. 8 Kyipfa orio moterewa nekyeambilyia; na ulya mopfula nekyewona; na ulya mokapa-kapa moongo nechipfunguyo moongo. 9 Ang'u kuwoṙe mndu uha konyu, mono-kye kamterewa mkate, echimwenenga igoe? 10 Ang'u kamterewa ikunga, echimwenenga njoka? 11 Kyasia kokooya nyoe, mui wawicho, muichi ienenga wana wanyu shienengo shicha, ngyesa chi ngoseṟa mnu Awu onyu akyeri ruwewu echienenga mecha walya wekyemterewa-pfoe? 12 Kyasia shoose mukundi muṟundio nyi wandu, na nyoe waṟundienyi kuṙo. Kyipfa iga nyigo mawawaso na malosho ga weonguo shisuku.” 13 “Iṙenyi na numba kui moongo ulya msuse. Kyipfa moongo nyi umlandari, na njia iyendie wuṙetsinyi nyi ingyilandari, na nyi wafoi wekyeiṙa na numba kui moongo-cho. 14 Kyaindi moongo nyi umsuse, na njia iyendie moonyi o mlungana nyi ingyisuse, na wekyeiwona nyi sa waangu.” 15 “Kushowenyi na weonguo shisuku wa wongo, wandu wekyecha na konyu wakyeri cha moondo, kyaindi ipfo mrimenyi kowo nyi shisii shilang'a. 16 Mochiwamanya kui ndunda tsawo. Ngyesa wandu wekyehaa sabibu mshenyi, ang'u ndunda ngyicha tseloṙa nduonyi? 17 Na wuṙo orio ikyiṙi lyicha lyekyekumbia ndunda ngyicha; na ikyiṙi lyiwicho lykyekumbia ndunda ngyiwicho. 18 Ikyiṙi lyicha lyeiṙima ikumbia ndunda ngyiwicho maa ikyiṙi lyiwicho ndunda ngyicha-pfo. 19 Orio ikyiṙi lyilekyekumbia ndunda ngyicha lyekyemanyo na iwiyitso moṙonyi. 20 Kyasia na wuṙo kyikyeri kui ndunda tsawo mochiwamanya.” 21 “Chi orio mndu ekyengyiwia, ‘Mndumii, Mndumii’ echiiṙa na ipfo Wumangyinyi wo ruwewu-pfo; sile ulya ekyeosha shilya Awu oko akyeri ruwewu akundi. 22 Wafoi wechingyiwia mfiri ulya, ‘Mndumii, Mndumii, luleonguo shisuku kui rina lyapfo, na kui rina lyapfo iwuta waṟufui wawicho, na kui rina lyapfo iwuta shindo shifoi sha maṟiyisho?’ 23 Naaho-ng'u ngyechiwawia na pata, ‘Ngyimuichi nyoe maa ale-pfo. Wukyenyi koko, nyoe mokyeṟunda mawicho.’ ” 24 “Kyasia orio mndu ekyeicho maṙeṙo-ga gako na igaosha, nechiwa cha mndu awoṙe wuṟango, alewika numba yakye wuye ya iṟaṟa. 25 Mvuo ikakapa, mra ung'anyi ukocha, shiwiṟi shikakuma, shikakapa numba iya, ilaolokye; kyipfa ingyiyekyie wuye ya iṟaṟa. 26 Na orio mndu echiicho maṙeṙo gako alagaoshe, nechiwa cha mndu mtondo, alewika numba yakye wuye ya mlelya; 27 mvuo ikakapa, mra ung'anyi ukocha, shiwiṟi shikakuma, shikakapa numba iya, ikaoloka, na ioloka lyayo lyikawa lying'anyi.” 28 Na lyilya Yesu alemarisa igamba kuṙo, wuingyi wo wandu wuleṟiyio mnu kyipfa kya malosho gakye. 29 Cha kyipfa naweiwalosha cha mndu awoṙe wuchilyi, maa chi cha walya wawekyelosha mawawaso-pfo.
1 Na oe kyiyeri alesoka kulya fumvunyi, wuingyi wufoi wo wandu wulemwosha. 2 Kukocha mndu awoṙo nyi ndoṟe ya taambo kamwindia echigamba, “Mndumii, kokunda, noiṙima ingyiyeṟemtsa.” 3 Yesu kagoṟuo kuwoko kampaaya, echigamba, “Ngyikundi; yeṟemka.” Na cha ilyi ndoṟe yakye ya taambo ikammbuka. 4 Yesu kammbia. “Ulawie mndu; kyaindi yenda, undekuloṟa ko mkohanyi, undeenengyia kyiano chandu Mose alegamba, kyiwe wuṟingyishi kowo.” 5 Na kyiyeri aleiṙa na Kaperinaumu mchilyi umwi mtutu nalecha na kokye. 6 Kamterewa, echigamba, “Mndumii, mṟundi oko nalee kanyi, nawoṙo nyi ndoṟe ya ipfa ngapfu ura lumwi, naiwawio mnu.” 7 Yesu kammbia, “Ngyeecha, ngyimkyiṟe.” 8 Mchilyi ulya kamgaluo, kagamba, “Mndumii, inyi ngyiwaṟi iyoe uiṙe na numba koko-pfo; kyaindi gamba ṙeṙo lyimwi tikyi, na mṟundi oko nechichia. 9 Cha kyipfa inyi nyi mndu ngyiwoṙe wuchilyi, ngyiwoṙe asikari wanda yako; ngawia ichu, ‘yenda’ nekyeyenda; na ichu, ‘nnjo’ nekyecha; na kyisinga kyako, ‘wuta kuṙi’, kyekyewuta.” 10 Kyiyeri Yesu aleicho isho, naleṟiyio, kawia walya waweimwosha, “Ny'kyaloi ngammbia, ngyilandewone iiṙikyia lying'anyi kuṙi, ko mndu oose kunu Isiraelyi-pfo. 11 Na inyi ngammbia, kye wafoi wechicha iwuka ura lo ngamenyi na ura lo kyukonyi, nawo wechiṙamia hamwi na Abrahamu, na Isakyi, na Yakobo Wumangyinyi wo Ruwewu; 12 kyaindi wana wa Wumangyi wechiwiyitso meemenyi o nja. Nyipfo kochiwaṙa ṟanyi na ilya ngakuru.” 13 Na Yesu kawia mchilyi ulya, “Yenda; kyiwe kopfo chandu oiṙikyia.” Mṟundi ulya okye kachia saa iya iya. 14 Kyiyeri Yesu aleshika kanyi ko Petiro, kawona mamka o Petiro, alee kyitaṟenyi nawoṙo nyi isemu. 15 Kampaaya kuwoko, isemu lyikamleka; na oe kafuma kawaṟundia. 16 Na lyilya kuleila, wakamwendie wandu wafoi wawoṙo nyi waṟufui wawicho; kawuta waṟufui wawicho kui ṙeṙo lyakye, kakyiṟa woose walawekuiṙima, 17 kundu kyiafukyie kyindo kyilya kyikyigambe nyi moonguo shisuku Yesaya, echigamba, “Oe amonyi naleṙuo wufafa woṙu, na iṙuo ndoṟe tsaṙu.” 18 Na kyiyeri Yesu alewona wuigyi wufoi wo wandu wochimtengyetia, nalewia wanalosho wakye handu hamwi na oe wayende molyolya. 19 Mlosha umwi o mawawaso kayenda kokye, kammbia, “Mlosha, ngyekuosha orio handu ochiyenda.” 20 Yesu kammbia, “Mapaara gawoṙe mṟeshe, na shileye sha ngyinenyi shiwoṙe singyi kyaindi Mono-Adamu awoṙe handu heonyonyia-pfo.” 21 Ungyi kyiiṙi kya wanalosho wakye kammbia, “Mndumii, ngyienenga momu kuwooka, ngyiyende ngyindeṟika awu-yoko.” 22 Kyaindi Yesu kammbia, “Ngyiosha; leka wapfu waṟikye wapfu wawo.” 23 Kaṙooya ngalawenyi, wanalosho wakye wakamwosha. 24 Kukowaṙa shiwiṟi shing'anyi kulya ipalyipalyinyi; shiwiṟi-sho shikakapa ngalawa iya ikashikyio nyi mṟinga, na oe nawelee maṙoe. 25 Wanalosho wakye wakayenda kokye, wakamwamtsa, wechigamba, “Mndumii, luletse, luisia.” 26 Kawawia, “Ny'kyilyi mowa waowu, nyoe wa iiṙikyia lyiangu?” Cha ilyi kafuma, kaṙeṙia shiwiṟi na ipalyipalyi; kukotsia sau. 27 Wandu walya wakaṟiyio, wechigamba, “Ichu nyi mndu o mbaṟe iha maa shiwiṟi sha ipalyipalyinyi shiosha kyilya aigamba?” 28 Na oe kyiyeri aleshika molyolya, urukyenyi lo Wakyerasi, wandu wawi wawoṙo nyi waṟufui wawicho walekarisana na oe, wawukyie handu heṟika wandu, walang'a mnu, maa mndu alaiṙime iiṙa njia iya. 29 Wakakalagatsa, wechigamba, “Luwoṙe kyikyi na iyoe, Mana o Ruwa? Ngyesa nocha ichelutuura kyiyeri kyaṙu kyilashika?” 30 Kyasia, kuleshi nawo kuwewoṙe poo lya nguwe tsifoi tsechilya. 31 Waṟufui walya wawicho wakamterewa, wechigamba, “Koluwuta, luṙe luyende, lundeiṙa na kulya poonyi lya nguwe.” 32 Kawawia, “Yendenyi.” Wakawuka, wakaiṙa na kulya mmbiunyi ya nguwe; na poo lyilya lyoose lyikasoka halya kyiiṟimikonyi lyeṙicha mṟasa ipalyipalyinyi, lyikapfiia mṟingyenyi. 33 Kyaindi walya wawelyisa nguwe-tso waleṙicha, wakayenda mṟinyi, wakaonguo mbonyi-tso kundu koose, na mbonyi tsa walya wawewoṙo nyi waṟufui wawicho taa. 34 Wandu woose wa mṟi ulya wakafuma indeambilyia Yesu; nawo lyilya walemmbona, walemterewa nawukye mṟasenyi kowo.
1 Kaṙooya ngalawenyi, kaambaṙa, kashika mṟinyi kowo. 2 Wandu wakamwendie mndu awoṙe ndoṟe ya ipfa ngapfu ura lumwi, alee kyitaṟenyi, na Yesu kyiyeri alewona iiṙikyia lyawo, nalewia ulya awoṙe ndoṟe-yo, “Kuwanze lying'anyi mrimenyi, mono-ko; omhooṟio maṙeko gapfo.” 3 Na numa ya iho walosha waata wa mawawaso wakagamba mrimenyi kowo, “Ichu nailahia Ruwa kyipfa naikuloṟa cha ilyi oe nyi Ruwa.” 4 Na Yesu, aichi makusaṟo gawo, kagamba, “Ny'kyilyi mukusaṟa shiwicho mrimenyi konyu? 5 Kyipfa nyi kyiha kyii kyaangu, nyi igamba, ‘Omhooṟio maṙeko gapfo,’ ang'u nyi igamba, ‘Amka, uyende?’ 6 Kyaindi muiṙime imanya kye Mono-Adamu nawoṙe wuchilyi wuyanenyi wo hooṟia ngyuunyamaṟi, (Nawia ulya awoṙe ndoṟe ya ipfa ngapfu ura lumwi,) ‘Amka, ukuṙikye kyitaṟa kyapfo uyende kanyi kopfo.’ ” 7 Kaamka, kayenda kanyi kokye. 8 Kyiyeri wuingyi wo wandu wulemmbona, walewoṙo nyi wuowu, wakang'anyisa Ruwa, aleenenga wandu wuchilyi wo mbaṟe-i. 9 Na Yesu kyiyeri aweiṙa awuka pfo nalewona mndu aṙamie handu hesania ukamba mbai ya ipalyipalyi ekyelago Matayo, kammbia, “Ngyiosha.” Kaamka kamwosha. 10 Na kyiyeri aleṙamia kanyi nalye kyelya, wesania ukamba wafoi na wanyamaṟi walecha wakaṙamia handu hamwi na Yesu na wanalosho wakye. 11 Kyiyeri Mafarisayo walewona, walewia wanalosho wakye, “Ny'kyilyi mlosha onyu ailya handu hamwi na wesania ukamba na wanyamaṟi?” 12 Na oe kyiyeri aleicho, nalewawia, “Walya walaluoe wekyepfula mwaanga-pfo, sile walya waluoe. 13 Kyaindi yendenyi, mundekulosha kyitambuluo kya maṙeṙo-ga. ‘Ngyikundi isaṟia, maa chi shienengo-pfo’, kyipfa ngyilecha ilaga walya wasumganyi-pfo kyaindi wanyamaṟi.” 14 Kyiyeri kyilya wanalosho wa Yohane wakayenda kokye wakagamba, “Ny'kyilyi soe na Mafarisayo lokyekuretekyia kyaindi wanalosho wapfo wekyewuta kuṙo-pfo?” 15 Yesu kawawia, “Wawalage wolyinyi weiṙima kuṙa ikapa ṟanyi kyiyeri monyi wolyi akyeri handu hamwi nawo? Kyaindi kochicha mfiri monyi wolyi echiwuto kowo, nyilyo wechikuretekyia. 16 Kuwoṙe mndu ekyewika kyiṙami kya nguwo ngyihya nguwonyi ngyiku-pfo. Kyipfa ikyo kyihya kyewuta ho ikyo kyiku na handu halya harandukyie hekyeengyeṟa ing'ana. 17 Na wandu wekyewika mpfinyo mhya maselelenyi maku-pfo. Na wakawika pfo, maselela-go gekyepaṟika; mpfinyo ukopusuka, na maselela gakanyamaṟika. Kyaindi wekyewika mpfinyo maselelenyi mahya, shikakyia shoose.” 18 Kyiyeri aweiwawia isho, kukocha mchilyi umwi, kamwindia, echigamba, “Mono-ko o kyika napfa wulalu kuṙi; kyaindi nnjo, uwikyie kuwoko kopfo wuye yakye, na oe nechiwaṙa moo.” 19 Yesu kaamka, kamwosha, hamwi na wanalosho wakye. 20 Na mndu mka awewoṙe ndoṟe yechoṟa kyiyeri kya maka ikumi na iwi, kacha kyanuma kokye, kapaaya ikyechu lya ikunya lyakye. 21 Kyipfa nalegamba mrimenyi kokye: Ngapaaya ikyechu lya ikunya lyakye tikyi ngyechichia. 22 Yesu kagaluka kammbona, kammbia, “Kuwanze mnu mrimenyi, mono-ko; iiṙikyia lyapfo lyakukyiṟa.” Mndu mka ulya kachia saa iya. 23 Kyiyeri Yesu aleshika kanyi ko mchilyi ulya, nalewona wekapa mtoṟiṟo, na wuingyi wo wandu wochikapa ṟanyi. 24 Kawawia, “Wukyenyi iha, kyipfa manakye-chu apfiie-pfo, nalee tikyi.” Wakamsaaṟa mnu. 25 Kyaindi wuingyi wo wandu wommbuto ho, naleiṙa na numba, kammbaṙa kuwoko; manakye ulya kagoṟoka. 26 Mbonyi-tsi tsikaṙunganana uruka lulya loose. 27 Kyiyeri Yesu aweiṙa iwuka pfo, shipfupfuṟe shiwi shikamwosha, shikakuilenga, shechigamba, “Ulusaṟie, Mono-Dawidi.” 28 Na oe kyiyeri aleshika kanyi, shipfupfuṟe shilya shileyenda kokye na oe kashiwia, “Muiṙikyie kye ngyeiṙima iṟunda ikyi?” Shikammbia, “Yee, Mndumii.” 29 Naaho-ng'u kashipaaya meso, kagamba, “Kui kyiyeṟo kya iiṙikyia lyanyu wonenyi.” 30 Meso gasho gakatambaṟuka. Na Yesu kashiwia ko pfinya, echigamba, “Ambuyenyi maa mndu alamanye.” 31 Kyaindi shikafuma, shikaonguo mbonyi tsakye kulya urukyenyi koose. 32 Nawo kyiyeri waweiyenda, wakamwendie mndu ai ndiṟi awoṙo nyi mṟufui mmbicho. 33 Na kyiyeri mṟufui ulya mmbicho alewuto, ulya awei ndiṟi naleṙeṙa, wuingyi wo wandu wakaṟiyio, wakagamba, “Kyilandewonekye kunu Isiraelyi kyiyeri kyoose-pfo.” 34 Kyaindi Mafarisayo wakagamba, “Kui pfinya tsa ang'anyi o waṟufui wawicho naiwuta waṟufui wawicho.” 35 Na Yesu naweitenga-tenga kyiiṙi kya mṟi yoose na shikaṟo, echilosha masinagoginyi gawo, ionguo Mbonyi Ngyicha tsa Wumangyi; na ichihiṟa ndoṟe tsoose na wufafa wo orio mbaṟe. 36 Na kyiyeri alewona wuingyi wo wandu, nalewona wukyiwa mrimenyi kokye kyipfa wawewinie na inyanyaṟika cha moondo galawoṙe mlyisi. 37 Naaho-ng'u kawia wanalosho wakye, “Shilyimu nyi shifoi, kyaindi waṟundi nyi waangu. 38 Kyasia, terewenyi Monyi ṙema naṙikye waṟundi ṙemenyi lyakye.”
1 Kalaga wanalosho wakye ikumi na wawi, kawaenenga pfinya yechilyia waṟufui wawicho, wawawute, na iwuta ndoṟe tsoose na wufafa wo orio mbaṟe. 2 Na marina ga wasu-wo ikumi na wawi nyi iga. O kuwooka nyi Simion awekyelago Petiro, na Anderea mono-wamae; Yakobo o Sebedayo, na Yohane mono-wamae. 3 Filyipo, na Baritolomayo, Tomasi, na Matayo msani o ukamba; Yakobo mana o Alyifayo, na Tadayo. 4 Simion Mkananayo, na Yuda Isikariote, na oe nyi oe alemṟiinga. 5 Iwo ikumi na wawi Yesu nalewaṙuma, kawawia, “Ko walya walakyeri Wayuda mulayende, maa mulaiṙe na mṟinyi maa umwi o Wasamaria. 6 Nanga moyenda ko wandu wa Isiraelyi waṙekyie cha moondo. 7 Na ilyi moyenda, onguonyi mbonyi ngyicha, mochigamba, ‘Wumangyi wo Ruwewu womtikyira kufuhi.’ 8 Kyiṟenyi waluoe, ṟutsenyi wapfu, yeṟemtsenyi wawoṙo nyi taambo, wutenyi waṟufui wawicho; muleenengo mulaitaa kyindo, enengyienyi mulaitoo kyindo. 9 Mulakuṙikye sahapu, maa heleri tsa orio mbaṟe mkunjenyi yanyu. 10 Maa mkunja o kyaro, maa mawale gawi, maa shiaṙu, maa upoi; kyipfa mṟundi nawaṟi kyelya kyakye. 11 Na orio mṟi na kyikaṟo mochiiṙa napfo, pfulenyi pfo mndu awoṙe kyienengo kyeambilyia wayenu; mkae kokye mṟasa ilyi mochiwuya na kanyi. 12 Na nyoe mukoiṙa na kanyi ko mndu-cho muiṟikyiṟenyi. 13 Na kokooya mndu-cho na walya wa kanyi kokye wawaṟi, ufoṟo lo Mndumii lukae nawo; indi kokooya walawaṟi, ufoṟo lo Mndumii lummbiyilyie nyoe. 14 Na mndu alandemuambilyie na iaṙanyia maṙeṙo ganyu, ilyi mowuka ipfo kokye, ang'u ipfo mṟinyi, kute-kutenyi kyilulyi ipfo maṙendenyi ganyu, iloṟa mowalega nakamwi. 15 Ny'kyaloi, ngammbia, kyechiwa kyaangu uruka lo Sodoma na Gomora ihooṟio maṙeko mfiri ulya o ianduyo kuta mṟi-cho.” 16 “Inyi ngyimṙuma cha moondo ko shisii. Kyasia waṙenyi wuṟango cha njoka, na iwa wahoo cha mbuna. 17 Kuṟiisenyi na wandu cha kyipfa wechimṙuo mengyenyi, na masinagoginyi gawo wechimkapa. 18 Na nyoe wechimṙuo mbele ya wachilyi na wamangyi kyipfa kyako, iwa wuṟingyishi kowo na ko walya walai Wayuda. 19 Kyaindi iho-ndu wechimṙuo, mulakusaṟe-saṟe chandu mochiṙeṙa; kyipfa mochienengo saa-yo shilya mochiṙeṙa. 20 Kyipfa chi nyoe muiṙeṙa-pfo, indi nyi Mumuyo o Awu-yonyu aiṙeṙa kui maṙumbu ganyu. 21 Na mongari nechiṟiingyia mono-wamae kundu nawoogo, na awu nechiṟiingyia mana, na wana wechigaluka na iwaaga wafee wawo. 22 Na nyoe wandu woose wechimsuo kyipfa kya rina lyako; kyaindi ulya echikarishia mṟasa mafurumionyi nyi oe echikyia. 23 Kyaindi ilyi wechimfuna mṟinyi umwi, ṙichilyienyi mṟinyi ungyi. Cha kyipfa nyi loi ngammbia mochimarisa ionguo mbonyi mṟinyi ya Isiraelyi Mono-Adamu alacha-pfo. 24 Manalosho ekyeiṙa mlosha okye-pfo, na kyisinga kyekyeiṙa mndumii okyo-pfo. 25 Kyishikyie manalosho iwa cha mlosha okye, na kyisinga iwa cha mndumii okyo. Kokooya walelaga monyi kanyi Beelyisebulyi ngyesa chi ngoseṟa walya wai wa kanyi kokye-pfoe?” 26 “Kyasia, mulawaowuoe, cha kyipfa kuwoṙe kyindo kyikyishikyie maa kyikuṟiikyie kyilechimanyika-pfo. 27 Kyilya ngyimmbia nyoe meemenyi, kyigambenyi saenyi. Na kyilya moicho kui kyiṟika, kyionguonyi na pata. 28 Mulaowuoe iwo waiwaaga mmbiu, walaiṙime iwaaga na mrima. Nanga moowuo ulya echiiṙima irumatsa mmbiu na mrima taa ngyehenenyi. 29 Ngyesa, shileye shiwi shekyekumbo helo imwi-pfoe? Kyaindi maa kyimwi kyekyeṙeka Awu-yonyu alaichi-pfo. 30 Kyaindi nyoe maa njui tsa mṙoe yanyu tsingyitale tsoose. 31 Kyasia mulaowuoe, nanga nyoe kuta shileye shifoi.” 32 “Kyasia, orio mndu echingyiṟingyishia mbele ya wandu, na inyi ngyechimṟingyishia mbele ya Awu-yoko akyeri 33 Kyaindi orio mndu echingyikana mbele ya wandu, na inyi ngyechimkana mbele ya Awu-yoko akyeri ruwewu.” 34 “Mulakusaṟe ngyilecha iende ufoṟo wuyanenyi. Ote! Ngyilecha iende ufoṟo-pfo, indi ushu. 35 Cha kyipfa ngyilecha iṟiingyia mndu na awuye, na mono-waka na wamae, na mndu na mamii okye. 36 Na washituwa wa mndu nyi walya wa kanyi kokye. 37 Akundi awuye ang'u wamae kuta inyi, angyiwaṟi-pfo, maa akundi mono-kyisoṟo ang'u mono-kyika kuta inyi, angyiwaṟi-pfo. 38 Maa mndu alechikuṙika msalaba okye kangyiosha, angyiwaṟi-pfo. 39 Mokyiṟa moo okye nechiuṙetsa; na mouṙetsa kyipfa kyako nechiukyiṟa.” 40 “Amuambilyia nyoe nangyiambilyia inyi, na oe angyiambilyia inyi, naambilyia ulya alengyiṙuma. 41 Moambilyia moonguo shisuku kyipfa oe nyi moonguo shisuku nawaṙilyia wori wo ionguo shisuku; na oe echiambilyia mndu msumganyi kyipfa oe nyi mndu msumganyi, nechiwaṙilyia wori wo mndu msumganyi. 42 Na orio mndu echirutsa umwi o iwa watutu mṟinga uichololyia, kyipfa nyi manalosho, ny'kyaloi, ngammbia, wori wokye wochiṙeka maa ale-pfo.”
1 Na Yesu kyiyeri alemarisa iṙeṙa na wanalosho wakye ikumi na wawi, nalendelosha na ionguo mbonyi ngyicha mṟinyi yawo. 2 Na Yohane kyiyeri aleicho ipfo kyipfungonyi mawuto ga Kristo, naleṙuma wanalosho wakye, immbesa, 3 “Iyoe nyi ulya aicha, ang'u luweṙelyie ungyi?” 4 Yesu kagaluo kawawia, “Yendenyi mundeongoya Yohane shilya mushiicho na ishiwona; 5 shipfupfuṟe shienengo iwona, shiwete shichumia, wawoṙo nyi taambo waiyeṟemtso, wapfu maṙwi waiicho, wapfu waiṟutso, na wakyiwa waiongoyo Mbonyi Ngyicha. 6 Agusu orio mndu alammbihie kyipfa kyako.” 7 Na wanalosho wa Yohane wamuyende, Yesu nalewooka iongoya wuingyi wo wandu mbonyi tsa Yohane. “Mulefuma iyenda nuka iambuya kyikyi? Unyatsi lochiṙeṙemsho nyi mkuma? 8 Kyaindi mulefuma indewona kyi? Mndu amṟikye nguwo tsa wusuṟi? Wandu waṟee nguwo tsa wusuṟi wakyeri numbenyi tsa kyimangyi. 9 Kyaindi kyitewe mukofuma nyi kyikyi? Nyi iwona moonguo shisuku? Yee loi, ngammbia, na akyeri ang'anyi kuta moonguo shisuku. 10 Ichu nyi oe shiṟeio shilegamba, ‘Inyi, ngyiṙuma mndu oko mbele ya ushangu lopfo, echisungusia njia yapfo.’ ” 11 Ny'kyaloi, ngammbia kulandewaṙe mndu kyiiṙi kya walya wawafee nyi waka akyeri ang'anyi kuta Yohane Mpatisi-pfo. Kyaindi akyeri mtutu Wumangyinyi wo ruwewu nyi nang'anyi kuta oe. 12 Wookyia kyiyeri kya Yohane Mpatisi mṟasa wulalu Wumangyi wo ruwewu wokyecha ko pfinya, na iwo wawoṙe pfinya waiwurakuo. 13 Cha kyipfa weonguo shisuku na uwawaso waleonguo mṟasa Yohane. 14 Na kokooya mukundi iiṙikyia, oe nyi oe Elyiya ulya echicha. 15 Awoṙe maṙwi, naaṙanyie. 16 “Kyaindi ngyechilyingatsana na kyi rika-lyi? Lyikyeri cha wana wekyeṙamia sangaṙa, wekyelaga oṙiawo, wechigamba, 17 ‘Lulekapa mtoṟiṟo kyipfa kyanyu, maa muletema-pfo; lulekapa ṟanyi maa mulawoṙo nyi wukyiwa.’ 18 Kyipfa Yohane nalecha, alailya maa alainyo, wakagamba, ‘Nawoṙo nyi mṟufui mmbicho.’ 19 Mono-Adamu nalecha, echilya na inyo, wakagamba, ‘Ichu nawoṙe ndewu, nyi mnanzi, mbuya ya wesania ukamba na wanyamaṟi!’ Na wuṟango wo Ruwa wochimanyika kui shindo wuṟango-wo wuiṟunda.” 20 Naaho-ng'u kawooka iṙeṙia mṟi iya kyiiṙi kyayo kuleṟundika shiṟiyisho shakye shifoi, kyipfa ileṙumbuya wunyamaṟi-pfo. 21 “Ochia lopfo, Korasini! Ochia lopfo Betisaida! Kyipfa cha kokooya shiṟiyisho shilewutika konyu shilewutika kulya Tiro na Sidon wawechiṙumbuya wunyamaṟi kyiyeri kyileshi kyileiṙa kui iṟaa masaṟa na ikushia ifui. 22 Kyaindi ngammbia, kyechiwa kyaangu Tiro na Sidon ikarishia ngapo tsawo mfiri o ianduyo kuta nyoe. 23 Na iyoe Kaperinaumu, ngyesa noching'anyiso mṟasa ruwewu? Nochisotso mṟasa ko waṟumu cha kyipfa shiṟiyisho shilewutika kopfo shiwechiwutika kulya Sodoma, mṟi-cho uwechiṙio ho mṟasa inu. 24 Kyaindi ngammbia, kyechiwa kyaangu ko uruka lo Sodoma ikarishia ngapo yalo mfiri o ianduyo kuta iyoe.” 25 Kyiyeri kyilya Yesu kagaluo, kagamba, “Ngakuana, Awu, Mndumii o ruwewu na uruka, kyipfa shindo-shi ulekunda ishitambuluya wawoṙe wuṟango-pfo, kyaindi kotambuluya wana watutu. 26 Yee, loi, Awu, kyipfa nyi wuṙo kyilechihiṟa mbele yapfo.” 27 Kagamba, “Ngyimṙambikye shoose na Awu-yoko, maa kuwoṙe aichi Mana, sile Awu-pfo; maa kuwoṙe aichi Awu, sile Mana-pfo, na orio oose ulya Mana akunda imtambuluya. 28 Nnjonyi na koko, nyoe moose muiwina na muwalemie nyi maṟio, na inyi ngyechimuonyonyisha. 29 Waṙilyienyi iṟunda-lyi ngyimṙambika, mukuloshe koko; kyipfa inyi ngyimhoo na muindi mrimenyi; na nyoe mochiwaṙa ufoṟo mrimenyi konyu. 30 Cha kyipfa kyilya ngyimmbia kyikyicha konyu, na ṟio ngyimṙika lyilyiangu.”
1 Kyiyeri kyilya Yesu naleiṙa maṙemenyi mfiri o onyonya. Wanalosho wakye wakawoṙo nyi njaa, wakawooka itumuo magaa ga nganu wakalya. 2 Na lyilya Mafarisayo walewona walemmbia, “Wanalosho wapfo waiṟunda kyindo kyilakyeri sungusinyi ikyiṟunda mfiri o onyonya.” 3 Kawawia, “Muichi kyindo Dawidi alewuta, lyilya alewoṙo nyi njaa, oe na woṙoe? 4 Chandu aleiṙa na numbenyi ya Ruwa, kalya mkate iya ngyeele, mkate kyilakyeri sungusinyi kokye maa ko woṙoe iilya, sile ko makohanyi wawenyi? 5 Maa muichi chandu kyikyiṟeie ipfo mawawasonyi, kye mfiri o onyonya makohanyi numbenyi ya Ruwa wekyefanyiṟa mfiri o onyonya walatalyio wunyamaṟi? 6 Kyaindi ngammbia, kye iha nakyeri ho ai ang'anyi kuta numba ya Ruwa. 7 Kyaindi kokooya muweichi kyitambuluo kya maṙeṙo-ga, ‘Ngyikundi isaṟia, maa chi shienengo-pfo,’ muwechigamba wawoṙe ṙeko iwo walawatalyie wunyamaṟi-pfo! 8 Cha kyipfa Mono-Adamu nyi oe Mndumii o mfiri o onyonya.” 9 Kawuka pfo, kaiṙa na sinagoginyi lyawo. 10 Na kuwewoṙe mndu awoṙe kuwoko kupfiie ngapfu. Kyasia kundu waiṙime iwona kyindo kyemmbusia wuwingo wakammbesa, “Nyi sungusinyi ikyiṟa wandu mfiri o onyonya?” 11 Kawawia, “Nyi mndu uha kyiiṙi kyanyu awoṙe ondo lyimwi, na ondo-lyo lyikaoloka mkuwenyi mfiri o onyonya, alechilyiwaṙa nalyikyiṟe? 12 Ngyesa mndu awoṙe kyiira kying'anyi kuta ondo kafong'ui-pfoe? Kyasia nyi sungusinyi iṟunda mecha mfiri o onyonya.” 13 Naaho-ng'u kawia mndu ulya, “Goṟuo kuwoko kopfo.” Kagoṟuo kuwoko, kukochia, kukowaṙa pfinya cha kulya ko kawi. 14 Kyaindi Mafarisayo walya wakalya wuṟiingyi chandu wechimrumatsa. 15 Na Yesu aicho isho shoose nalewuka pfo; na wandu wafoi wakamwosha; kawakyiṟa woose. 16 Kawaima walamṟingyishie; 17 kundu kyiafukyie kyindo kyikyigambe nyi moonguo shisuku Yesaya, echigamba, 18 “Ambuya, mṟundi oko ngyilemsambuṟa; mkunde oko, mrima oko umchihiye kyipfa kyakye; ngyechimwenenga pfinya ya Mumuyo oko, na oe nechianduya wandu walaiṙikyie Ruwa. 19 Echiṙeṙa maa ikuilenga na ṟui lyakye-pfo; maa mndu echiicho ṟui lyakye njienyi-pfo. 20 Echituura mndu mfafa-pfo, maa echiinyala ulya alawoṙe kyitarama-pfo, mṟasa naenengye ianduyo wuwinzi. 21 Na rina lyakye wandu walaiṙikyie Ruwa wechilyikusuria.” 22 Kyiyeri kyilya kaendio mndu awoṙo nyi mṟufui mmbicho, kyipfupfuṟe kyiwekyeiṙima iṙeṙa; kamkyiṟa, na ulya alaweiṙima iṙeṙa kaṙeṙa na iambuo. 23 Wuingyi wo wandu wukoṟiyio, wakagamba, “Ichu chi mono-Dawidi-pfoe?” 24 Kyaindi lyilya Mafarisayo waleicho, walegamba, “Ichu naifuna waṟufui wawicho kui pfinya tsa ang'anyi o waṟufui wawicho.” 25 Kyasia Yesu aichi makusaṟo gawo, kawawia, “Wumangyi wukowaṙa wuṟiingyi, kokyewaṙa wukyiwa; ngoseṟa mṟi ang'u kanyi kukowaṙa wuṟiingyi kuwoṙe kyindo kyechiiṙima igoṟoka-pfo. 26 Na Satana kafuna Satana, nakuṟiinga oe amonyi, kyasia wumangyi wokye wochigoṟoka wuṙa? 27 Na inyi ngafuna waṟufui wawicho kui pfinya tsa ang'anyi o waṟufui wawicho, ngyesa wana wanyu wekyefuna waṟufui wawicho kui pfinya tsa wui? Kyipfa kya ikyo iwo nyiwo wechimuanduya. 28 Kyaindi inyi ngafuna waṟufui wawicho kui Mumuyo o Ruwa, kyasia Wumangyi wo Ruwa wommaa icha na konyu. 29 Ang'u mndu neiṙima kuṙa iiṙa na numbenyi ya mndu awoṙe pfinya na imsoka shindo shakye, alapfunga kuwooka icho awoṙe pfinya? Nyi lyo-ng'u echiiṙima iwaṙa numba-yo ko pfinya. 30 Mndu alakyeri hamwi na inyi ekyeoshana na inyi-pfo; na mndu alekyesania hamwi na inyi nekyeola-ola. 31 Kyipfa kya ikyo ngammbia, ‘Orio wunyamaṟi na orio ṙeṙo lyelahia Ruwa wandu wechihooṟio, kyaindi ko ilahia Mumuyo wechihooṟio-pfo. 32 Na mndu oose echiṙeṙa Mono-Adamu uwicho nechihooṟio, kyaindi ulya echiṙeṙa Mumuyo Mweele uwicho echihooṟio-pfo.’ ” 33 “Kundu ikyiṙi lyiwe lyicha kyiwaṟi iwaṙa ndunda ngyicha; kyaindi kokooya nuwoṙe ikyiṙi lyiwicho na ndunda tsechiwiha, cha kyipfa ikyiṙi lyekyemanyika kui ndunda tsalyo. 34 Nyoe maalea ga njoka, moiṙima kuṙa iṙeṙa shindo shicha, mui wawicho? Kyipfa, ṙumbu lya mndu lyekyeṙeṙa shilya shiichuṟie mrima-cho okye. 35 Mndu mcha kyiseyesoenyi kyicha nekyewuta shicha; na mndu mmbicho kyiseyesoenyi kyiwicho nekyewuta shiwicho. 36 Kyasia ngammbia, ‘Orio ṙeṙo lyilawoṙe kyiira, wandu wechilyiṙeṙa, kyiwawaṟi iwia Ruwa kyimaṙuma kyelyiṙeṙa mfiri ulya o furumia.’ 37 Kyipfa kui maṙeṙo gapfo nochitalyio wusumganyi, na kui maṙeṙo gapfo nochianduyo.” 38 Iho walosha wa mawawaso na Mafarisayo waata wakamgaluo, wakagamba, “Mlosha, lukundi iwona kyiṟingyishio kopfo.” 39 Kagaluo kawawia, “Rika lyiwicho lya wuṟui lyipfula kyiṟingyishio, maa lyechienengo kyiṟingyishio-pfo, sile kyiṟingyishio kya moonguo shisuku Yona. 40 Kyipfa chandu Yona awekyeri mfiri iṟaṟu kyingoto na kyio ndewunyi ya nyangumi, na wuṙo Mono-Adamu echikaa mfiri iṟaṟu kyingoto na kyio amṟikye terinyi. 41 Wandu wa Ninawi wechigoṟoka mfiri o ianduyo hamwi na wandu wa rika-lyi. Nawo wechianduya rika-lyi kye lyileṙeko. Kyipfa wo waleṙumbuya wunyamaṟi kui malosho ga Yona; na iha hakyeri ai ang'anyi kuta Yona. 42 Mangyi o kyika o ura lo kyaseri nechigoṟoka mfiri o ianduyo hamwi na wandu wa rika-lyi, na oe nechiwaanduya kye waleṙeko. Kyipfa oe nalecha iwuka ngyuura tsa kyishingonyi tsa wuyana kundu naicho wuṟango wo Solomon, na iha hakyeri ai ang'anyi kuta Solomon.” 43 “Mṟufui mmbicho, ilyi awuka ko mndu, nekyeiṙia handu halawoṙe mṟinga, echipfula handu heonyonya, alawone. 44 Na numa nekyegamba, ‘Ngyechiwuya na kanyi koko ngyilewuka.’ Na kacha, kawona numba iya ilawoṙe kyindo, ingyiaie, na ichopo, 45 cha ilyi nekyeyenda, kaṙuo handu hamwi na oe waṟufui wengyi wawicho mfungaaṙe wakyeri wawicho kuta oe amonyi, nawo wekyeiṙa na numba na ikaa pfo; na mndu ulya mafurumionyi gakye gekyewiha kuta kulya mawookyionyi. Nyi wuṙo kyechiwa, ko rika-lyi lyii lyiwicho.” 46 Kyiyeri aweiṙeṙa na wuingyi wo wandu, wamae na wana wa wamae wawegoṟokyi iho nja wakundi iṙeṙa na oe. 47 Mndu umwi kammbia, “Womoo na wana wa wama wapfo wagoṟokyi iho nja, wakundi iṙeṙa na iyoe.” 48 Kagaluo, kawia mndu ulya alemwendie mbonyi, “Wama oko nyi wui? Na wana wa wama wako nyi wakyi?” 49 Kagoṟuya wanalosho wakye kuwoko, kagamba, “Wonenyi wama oko na wana wa wama wako! 50 Cha kyipfa orio oose echiṟunda shilya Awu-yoko akyeri ruwewu akundi, ichu nyi oe mono-wama oko, na mshikyi oko, na wama oko.”
1 Mfiri ulya Yesu kawuka kanyi kaṙamia mbai ya ipalyipalyi. 2 Wuingyi wung'anyi wo wandu wukokuumbia kufui na oe, mṟasa kaṙooya ngalawenyi, kaṙamia, na wuingyi wulya woose wukogoṟoka mbai ya ipalyipalyi. 3 Kawawia shindo shifoi kui mfano, echigamba, “Moolyia mbeu nalefuma indewaaya. 4 Na kyiyeri aweiwaaya, mbeu tsingyi tsileoloka kufui na njia, shileye shikacha shikatsilya. 5 Tsingyi tsikaoloka handu hawoṙe iṟaṟa, halawoṙe teri ishikyie. Cha ilyi tsikaṙo, na kyipfa halawewoṙe teri ishikyie; 6 mui ukowaa ukotsikoṟa; na kyipfa tsilawewoṙe mri tsikauma. 7 Tsingyi tsikaoloka handu hawoṙe msha. Msha iya ikaṙo ikatsiilama. 8 Tsingyi tsikaoloka handu hawoṙe teri ngyicha, tsikakumbia, imwi igana, imwi makumi gaṟandaaṟu, imwi makumi gaṟaaṟu. 9 Awoṙe maṙwi naaṙanyie.” 10 Wanalosho wakacha, wakammbia, “Kyitewe uiṙeṙa nawo kui mfano ny'kyi?” 11 Kagaluo kawawia, “Nyoe muwaenengye imanya shiṟika sha Wumangyi wo ruwewu, kyaindi wo wawaenengye-pfo. 12 Cha kyipfa orio oose awoṙe kyindo nechienengo, na oe nechipfumbutsio pacha; kyaindi orio oose alawoṙe kyindo, maa kyilya awoṙe nechisoko. 13 Kyipfa kya ikyi ngyiṙeṙa nawo kui mfano; cha kyipfa wakaambuo wawonyi-pfo, na wakaaṙanyia waiicho maa imanya-pfo. 14 Na ṙeṙo lya moonguo shisuku Yesaya lyaafukyia kowo, lyechigamba, ‘Iicho mochiicho, maa mochimanya-pfo, iambuo mochiambuo, maa mochiwona-pfo. 15 Kyipfa mrima ya wandu-wa yawa ngyiumu, na kui maṙwi gawo wekyeicho necha-pfo, na washingyie meso gawo; walachewona kui meso gawo, walaicho kui maṙwi gawo, wakamanya kui mrima yawo, wakangyigalukyia, ngawakyiṟa.’ ” 16 “Kyaindi, agusu meso ganyu, cha kyipfa gawonyi; na maṙwi ganyu, cha kyipfa gaiicho. 17 Cha kyipfa, ny'kyaloi, ngammbia, weonguo shisuku wafoi na wasumganyi walelanga iwona ishi mushiwonyi nyoe, walashiwone; na iicho ishi muicho nyoe walashiicho.” 18 “Kyasia nyoe aṙanyienyi mfano o moolyia mbeu. 19 Orio mndu kaicho ṙeṙo lya Wumangyi wo ruwewu alalyimanye, mmbicho ulya nekyecha, karakuo kyilya kyikyiṙongye mrimenyi kokye. Iyi nyiyo mbeu iya ingyiṙongye mbai ya njia. 20 Na mbeu iya ingyiṙongye iṟaṟenyi, nyi mndu ulya ekyeicho ṙeṙo lyilya, kalyiambilyia cha ilyi na sia. 21 Kyaindi lyekyewaṙa mri mrimenyi kokye-pfo, na lyekyekaa kyiyeri kyifuhi. Kukocha wukyiwa ang'u matuuro kyipfa kya ṙeṙo-lyo, cha ilyi, lyekyekaa kokye-pfo. 22 Na iya ingyiṙongye mshenyi, icho nyi mndu ekyeicho ṙeṙo lyilya; na mawino ga wuyana, na wulembi wo masaa wokyeilama ṙeṙo lyilya; lyilawaṙe ndunda. 23 Na iya ingyiṙongye terinyi ngyicha, icho nyi oe ekyeicho ṙeṙo lyilya, na ilyimanya. Icho nyi oe ekyekumbia ndunda, ichu igana, na ichu makumi gaṟandaaṟu, na ichu makumi gaṟaaṟu.” 24 Kawaenenga mfano ungyi, echigamba, “Wumangyi wo ruwewu wufananyi na mndu alewaaya mbeu ngyicha ṙemenyi lyakye. 25 Kyaindi wandu wamlae, mokyituwa okye kacha kawaaya makacha nganunyi, kaṙicha. 26 Numa kyiyeri nganu ileṙo na ikumbia, kukowoneka makacha. 27 Shisinga sha monyi kanyi shikayenda shikammbia, ‘Mndumii, ulewaaya mbeu ngyicha ṙemenyi lyapfo-pfoe? Nyi kwi lyileende makacha?’ 28 Kashiwia, ‘Mokyituwa nyi oe aleṟunda kuṙi.’ Shisinga shikammbia, ‘Kyasia nukundi luyende lundegasania?’ 29 Kagamba, ‘Ote, mulachesania makacha, na ikuluo nganu hamwi nago. 30 Ṙenyi shoose shing'ane mṟasa kyiyeri kyesambuo. Na kyiyeri kyesambuo ngyechiwia iwo waisambuo, sanienyi makacha kuwooka, mugapfungye shikonde shikonde mugakoṟe; kyaindi nganu isanienyi kyikumbinyi kyako.’ ” 31 Kawaenenga mfano ungyi, echigamba, “Wumangyi wo ruwewu wufananyi na mbeu ya haradalyi, mndu aleiwuta na iiwaaya ṙemenyi lyakye. 32 Nayo nyi ingyitutu kuta mbeu tsoose. Kyaindi ikamṙo, yekyeng'ana kuta mashiṙi goose, ikawa ikyiṙi, maa shileye sha ngyinenyi shekyecha na iṙamia mbagenyi tsayo.” 33 Kawawia mfano ungyi. “Wumangyi wo ruwewu wufananyi na chachu ilewuto nyi mndu mka, kaikooma shitelenyi shiṟaaṟu sha mso, mṟasa mso-cho ukoshimba oose taa.” 34 Isho shoose Yesu nalewia wuingyi wo wandu kui mfano, maa kulawoṙe mfano alewawia kyindo-pfo. 35 Kundu kyiafukyie kyindo kyikyiṙeṙe nyi moonguo shisuku echigamba, “Ngyechiṙeṙa nawo kui mfano, ngyechigamba shikuṟiikyie wookyia mawookyionyi.” 36 Numa ya iho Yesu kasamana na wuingyi wo wandu. Kaiṙa na kanyi, wanalosho wakye wakayenda kokye, wakagamba, “Lutambuluye mfano o makacha ga ṙemenyi.” 37 Kagaluo, kagamba, “Ekyewaaya mbeu tsilya ngyicha nyi Mono-Adamu. 38 Ṙema-lyo nyi wuyana. Mbeu tsilya ngyicha nyi wana wa Wumangyi wo ruwewu, na makacha-go nyi wana wa mmbicho ulya. 39 Mokyituwa ulya alewaaya nyi Mokyiriinzi. Kyilyimu nyi mafurumionyi ga wuyana; na wesambuo nyi malaika. 40 Kyasia, chandu makacha gekyesanio na ikoṟo moṙonyi; nyi wuṙo kyechiwa mafurumionyi ga wuyana. 41 Mono-Adamu nechiṙuma malaika wakye, nawo wechisania iwuka ipfo Wumangyinyi wokye, woose wekyeende wunyamaṟi, na iwo wekyefunja mawawaso, 42 na iwawiyitsa moṙonyi ung'anyi. Nyi pfo-ndu kochiwaṙa wukyiwa na ilya ngakuru. 43 Nyilyo wasumganyi wechiaka-aka cha mnengyeṟi Wumangyinyi wo Awu-yawo. Awoṙe maṙwi, naaṙanyie.” 44 “Lyingyi-se Wumangyi wo ruwewu wufananyi na kyindo kya woguru wung'anyi kyikyiṟikye ṙemenyi. Kyiyeri mndu alewona kyindo-kyo, nalekyiṟika; na kyipfa alechihiyo mnu naleyenda kakumba shoose awewoṙe, kaguṟa ṙema lyilya.” 45 “Lyingyi-se Wumangyi wo ruwewu wufananyi na mndu o mbucha, awekyepfula lulu ngyicha. 46 Na oe kyiyeri alewona lulu imwi ngyicha ya woguru wung'anyi, naleyenda kakumba shoose awewoṙe kaiguṟa.” 47 “Lyingyi-se Wumangyi wo ruwewu wufananyi na iṟambika, lyilewiyitso ipalyipalyinyi, lyikasania wa orio mbaṟe. 48 Na lyilya lyileichuo, walelyikuruo na mbai ya ipalyipalyi; wakaṙamia, wakasania wai wecha ngalawenyi, kyaindi wai wawicho wakawawiyitsa. 49 Nyi wuṙo kyechiwa mafurumionyi ga wuyana. Malaika wechiwoneka, wewikyia wawicho kuleshi na wasumganyi, 50 na iwawiyitsa moṙonyi ung'anyi. Nyi pfo-ndu kochiwaṙa wukyiwa na ilya ngakuru.” 51 Yesu nalewawesa, “Momanya isho shoose?” Wakammbia, “Yee.” 52 Kawawia, “Kyipfa kya ikyo, orio mlosha o mawawaso awoṙe wuṟango wo malosho ga Wumangyi wo ruwewu nafananyi na monyi kanyi ekyewuta kyindonyi kyakye kya woguru wung'anyi shindo shihya na sha kacha.” 53 Na kyiyeri Yesu alemarisa ilosha kui mfano-yo, nalefuma kayenda. 54 Na lyilya aleshika urukyenyi lokye, nalewalosha sinagoginyi lyawo, mṟasa wakaṟiyio, wakagamba, “Ichu nyi kwi aleende wuṟango-wu na maṟiyisho-ga? 55 Ichu chi mana o ulya ekyepacha mbau? Wamae chi ulya ekyelago Maria? Na wana wa wamae chi Yakobo, na Yosefu, na Simion, na Yuda? 56 Na washikyi wakye woose wakyeri iha koṙu-pfoe? Kyasia ichu nyi kwi alewona ishi shoose?” 57 Wakawihiyo kyipfa kyakye. Yesu kawawia, “Moonguo shisuku nekyeindio kundu koose sile urukyenyi lokye, na kanyi kokye amonyi.” 58 Maa aleṟunda shindo shifoi sha maṟiyisho ipfo-pfo, kyipfa walemwiṙikyia-pfo.
1 Kyiyeri kyilya mangyi Herode naleicho mbonyi tsa Yesu. 2 Kawia waṟundi wakye, “Ichu nyi oe Yohane Mpatisi. Naṟuka ko wapfu. Nyikyo kyitewe awoṙe pfinya tseṟunda ishi shoose.” 3 Kyipfa Herode nalekoawaṙa Yohane, kampfunga, kammbika kyipfungonyi, kyipfa kya Herodia, mka o Filyipo mono-wamae. 4 Kyipfa Yohane nalemmbia, “Chi sungusinyi ikaa na oe-pfo.” 5 Na oe kyiyeri awekundi immbaaga, naleowuo wandu, kyipfa walewona Yohane cha moonguo shisuku. 6 Na kyiyeri mfiri ung'anyi o ifeo lya Herode uleshika mana o Herodia o waka naletema mbele ya wandu, kachihiṟa Herode, 7 mṟasa Herode kawika kyaasa kui ilya nyamu kye nechimwenenga kyindo kyoose echikyiterewa. 8 Na oe, kunu echilosho nyi wamae, kagamba, “Ngyienenga wulalu kuṙi iha ipongonyi mṙoe o Yohane Mpatisi.” 9 Na mangyi kawona fowa mrimenyi. Kyaindi kyipfa kya nyamu tsakye, na kyipfa kya walya waweilya handu hamwi na oe, kagamba naenengo. 10 Kaṙuma mndu, kaṙumbuo Yohane mṙoe kulya kyipfungonyi. 11 Mṙoe okye ukoendo ukyeri ipongonyi, mana ulya o waka kauenengo; kauṙuo ko wamae. 12 Wanalosho wakye wakayenda, wakaṙuo mnying'a ulya, wakamṟika; numa wakayenda wakaongoya Yesu mbonyi. 13 Na Yesu kyiyeri aleicho isho, nalewuka ipfo ngalawenyi, kayenda handu halawoṙe wandu, hatsie sau. Na wuingyi wo wandu kyiyeri waleicho, walemwosha wechumia na maṙende wawuka mṟinyi kowo. 14 Yesu kafuma, kawona wuingyi wo wandu wung'anyi, kawona wukyiwa mrimenyi kyipfa kyawo, kawakyiṟa ndoṟe tsawo. 15 Na kyiyeri kuleila, wanalosho wakye waleyenda kokye, wakagamba, “Handu ha nyi nuka mreesi, na kyiyeri kyamwiṙa. Samana na wuingyi wo wandu, wayende shikaṟonyi, wandeguṟa shelya.” 16 Yesu kawawia, “Wawoṙe kyitewe kyeyenda-pfo. Waenengyenyi kyelya.” 17 Wakammbia, “Luwoṙe kyindo iha sile mkate itanu na makunga gawi-pfo.” 18 Kagamba, “Ngyiendienyi.” 19 Kagamba wuingyi wo wandu waṙamie maṟenyi. Kaira mkate iya itanu na makunga galya gawi, kaambuya wuye ruwewu, kawikyia mboṟa, kafunja mkate iya, kaenengyia wanalosho, wanalosho wakaenengyia wuingyi wulya wo wandu. 20 Wakalya woose wakaiguṙa. Wakasania matsugaṟo ga shipeṟengu sha mkate iya, mkunja ikumi na iwi, iichuo. 21 Nawo walelya wawekyeri wasoṟo washikyie shiku shitaanu, kulawoṙe waka na wana watutu. 22 Cha ilyi kaitika wanalosho wakye waṙooye ngalawenyi wasonguo mbele yakye iyenda molyolya, kyiyeri oe aweisamana na wuingyi wo wandu. 23 Na oe amsamane na wuingyi wo wandu, naleṙooya fumvunyi handu halawoṙe wandu, indeterewa. Na kyiyeri kuleila, nawekyeri pfo amonyi. 24 Na ngalawa iya ilekoyamshika makyiṙi-gawi ga ipalyipalyi, yechilya wukyiwa mnu kyipfa shiwiṟi shiweikapa. 25 Na kyiyeri kya iringa lya kaana lya kyio Yesu naleyenda ko wanalosho walya, echichumia wuye ya ipalyipalyi. 26 Kyiyeri wanalosho walemmbona echichumia wuye ya ipalyipalyi, walewoṙo nyi wuowu, wechigamba, “Nyi kyirinje”; wakafiiṟa kui wuowu. 27 Cha ilyi Yesu kaṙeṙa, kawawia, “Kuwanzenyi mrimenyi; nyi inyi, mulaowuoe.” 28 Petiro kamgaluo, kagamba, “Kokooya nyi iyoe, ngyiwia ngyiche na kopfo wuye ya mṟinga.” 29 Kagamba, “Nnjo.” Petiro kasoka kulya ngalawenyi, kachumia na maṙende wuye ya mṟinga, kundu nayende ko Yesu. 30 Kyaindi kyiyeri alewona kyiwiṟi, kaowuo; kawooka isoṟowia; kafiiṟa, echigamba, “Mndumii, ngyiletsa.” 31 Cha ilyi Yesu kagoṟuo kuwoko kokye, kammbia, “Iyoe uwoṙe iiṙikyia lyaangu, ny'kyilyi ulaleiṙikyia kye ngyeiṙima ikuenenga wuiṙimi wo chumia wuye ya mṟinga?” 32 Nawo wakaṙooya ngalawenyi, kyiwiṟi kyikatsia. 33 Na walya wawekyeri kulya ngalawenyi wakamwindia, wechigamba, “Ny'kyaloi iyoe nui Mono-Ruwa.” 34 Na wamuambaṙe, waleshika uruka lo Kyenesareti. 35 Na wandu wa handu halya kyiyeri walemmanya, waleṙuma wandu iyenda ngyuuruka tsikyeri mṟasenyi, wakamwendie woose walawekuiṙima. 36 Nawo wakamterewa wapaaye maa ikyechu lya ikunya lyakye tupu; na woose walepaaya wakakyiṟo piu.
1 Naaho-ng'u Mafarisayo na walosha wa mawawaso wawukyie Yerusalemu waleyenda ko Yesu wechigamba, 2 “Ny'kyilyi wanalosho wapfo wainyamaṟa shilya shileambilyio ko waku waṙu? Cha kyipfa wekyesamba mawoko ilyi wailya-pfo.” 3 Kagaluo, kawawia, “Ny'kyi kyitewe na nyoe mokyenyamaṟa iwawaso lya Ruwa kyipfa kya shilya muleambilyia ko waku wanyu? 4 Cha kyipfa Ruwa nalegamba, ‘India awuyo na womoo,’ na ‘Alahia awuye ang'u wamae ipfa napfe.’ 5 Kyaindi nyoe mokyegamba, ‘Echiwia awuye ang'u wamae, ikyo kyoose kyikuwaṟi inyi ngyikutarame nyi kyiṙaso,’ 6 kyasia alaindie awuye ang'u wamae. Mukoilacha ṙeṙo lya Ruwa kyipfa kya shilya muleambilyia ko waku wanyu. 7 Nyoe wakulembecheṟi, nyi necha chandu Yesaya aleonguo shisuku kyipfa kya mbonyi tsanyu, echigamba, 8 ‘Wandu-wa wekyengyiindia kui maṙumbu; kyaindi mrima yawo ikyeri kuleshi na inyi. 9 Nawo wekyengyiana na ingyiterewa kya maai, wechilosha malosho gakyeri mawawaso ga wandu.’ ” 10 Kalaga wuingyi wo wandu, kawawia. 11 “Aṙanyienyi, mumanye. Kyekyefanyiṟa mndu kyimṟumoe chi kyilya kyekyeiṙa na ṙumbunyi-pfo. Indi kyilya kyekyewuka ṙumbunyi ny'kyo kyekyefanyiṟa mndu.” 12 Naaho-ng'u wanalosho wakye waleyenda kokye wakammbia, “Uichi kye Mafarisayo kyiyeri waleicho ṙeṙo lyilya walewihiyo?” 13 Kagaluo, kawawia, “Orio kyindo Awu-yoko o ruwewu alalekyiṙonga nechikyikuluo. 14 Walekyenyi. Iwo nyi shipfupfuṟe wai wasongoru wa shipfupfuṟe. Na kyipfupfuṟe kyikasongoya kyipfupfuṟe oṙoe, sheoloka mkuwenyi shoose shishiwi.” 15 Kyasia Petiro kagaluo, kammbia, “Lutambuluye mfano-chu.” 16 Yesu kagamba, “Mṟasa wulalu maa nyoe muwoṙe wuṟango-pfoe? 17 Mulandemanye kye orio kyindo kyekyeiṙa na ṙumbunyi kyekyeiṙa ndewunyi, kyikawiyitso choṟonyi? 18 Kyaindi shekyewuka ṙumbunyi shawuka mrimenyi; nasho nyisho shekyefanyiṟa mndu kyimṟumoe. 19 Cha kyipfa mrimenyi kokyewuka makusaṟo mawicho, uwaagi, wuṟui, wuiwi, wuṟingyishi wo wongo, na shilahio. 20 Igo nyigo gekyefanyiṟa mndu kyimṟumoe. Kyaindi ilya ulasamba mawoko kokyefanyiṟa mndu-pfo.” 21 Yesu kawuka handu halya, kayenda mbai ura lo Tiro na Sidon. 22 Na mndu mka Mkananayo o ura lulya kacha, kakuilengakyika echigamba, “Ungyisaṟie, Mndumii, Mono-Dawidi; mana oko o waka nawoṙo kyetse nyi mṟufui mmbicho.” 23 Maa oe alemgaluo kyindo-pfo. Na wanalosho wakye wakayenda kokye wakamterewa, wechigamba, “Mlekye nayende; cha kyipfa naikalagatsa numa yaṙu.” 24 Kagaluo, kagamba, “Ngyileṙumo ko wandu wengyi sile ko wana wa Isiraelyi waṙekyie cha moondo-pfo.” 25 Na oe kacha kamwolokyia, echigamba, “Mndumii, ungyitarame.” 26 Kagaluo, kagamba, “Chi necha iwuta kyelya kya wana na iwiyitsia shite-pfo.” 27 Mndu mka ulya kagamba, “Yee, Mndumii. Kyaindi maa shite shekyelya matsugaṟo gekyeoloka mesenyi ko wandumii washo.” 28 Naaho-ng'u Yesu kagaluo kammbia, “Mama, iiṙikyia lyapfo nyi lying'anyi; na kyiwe kopfo chandu ukundi.” Mana ulya okye o kyika kachia cha ilyi. 29 Yesu kawuka handu halya, kashika mbai ya ipalyipalyi lya Galyilaya, kaṙooya fumvunyi, kaṙamia ho. 30 Wuingyi wufoi wo wandu wukoyenda kokye, wechimwendie shiwete, shipfupfuṟe, wai ndiṟi, wafiri shiwungo, na wengyi wafoi, wakawawikyia maṙendenyi gakye; kawakyiṟa; 31 mṟasa wuingyi wulya wo wandu wakaṟiyio, kyiyeri walewona wai ndiṟi waiṙeṙa, wawoṙe shiwungo shifiri waichia, shiwete shichumia na shipfupfuṟe shiwona, wakang'anyisa Ruwa o Isiraelyi. 32 Yesu kalaga wanalosho wakye, kagamba, “Ngawoṙo nyi fowa mrimenyi kyipfa kya wuingyi-wu wo wandu, cha kyipfa wulalu nyi mfiri iṟaṟu wakyeri hamwi na inyi, maa wawoṙe kyindo kyelya-pfo. Ngoseṟa isamana nawo walalyiie kyindo ngyikundi-pfo, walacheoloka njienyi.” 33 Wanalosho wakye wakammbia, “Lowona kwi mkate ifoi iha nuka, mṟasa iigutsa wuingyi wung'anyi kuṙi?” 34 Yesu kawawia, “Muwoṙe mkate inga?” Wakagamba, “Mfungaaṙe, na shikunga shaangu.” 35 Kagamba wuingyi wo wandu wuṙamie wanda. 36 Kawaṙa mkate iya na shikunga shilya, kaana, kashifunja-funja, kaenengyia wanalosho wakye, nawo wanalosho wakaenenga wuingyi wo wandu. 37 Wakalya woose wakaiguṙa. Wakasania matsugaṟo ga shifunjoe sha mkate, mkunja mfungaaṙe, iichuo. 38 Nawo walelya wawekyeri wasoṟo shiku shiina, kulawoṙe waka na wana watutu. 39 Kasamana na wuingyi wo wandu, kaṙooya ngalawenyi, kayenda ngyuura tsa Makadan.
1 Mafarisayo na Masadukayo wakacha na kokye, wakamwesha, wakamterewa nawaloṟe kyiṟingyishio kyiwukyie ruwewu. 2 Kagaluo, kawawia, “Kukoila, mokyegamba, ‘Kochiwa mfiri mcha; cha kyipfa ruwewu ifanyi kyimaande.’ 3 Na ngamenyi, mokyegamba, ‘Inu kochiwaṙa shiwiṟi; cha kyipfa ruwewu ifanyi kyimaande; lyingyi-se kushimbi.’ Nyoe wakulembecheṟi, muichi imanya fana ya ruwewu, kyaindi, ngyesa, shiṟingyishio sha shiyeri-shi moiṙima ishimanya? 4 Rika lyiwicho na lya wuṟui lyikundi kyiṟingyishio, maa lyechienengo kyiṟingyishio-pfo, sile kyiṟingyishio kya Yona.” Kalekana nawo, kayenda. 5 Na wanalosho wakayenda mṟasa molyolya, wakawaṙima iṙuo mkate. 6 Yesu kawawia, “Kushowenyi na chachu ya Mafarisayo na Masadukayo.” 7 Wakagaluana wo wenyi ko wenyi, wechigamba, “Nyi kyipfa kya ilyi lulaende mkate.” 8 Na Yesu kamanya, kawawia, “Ny'kyilyi muigaluana nyoe wenyi ko wenyi, nyoe wa iiṙikyia lyaangu? Nyi kyipfa nyoe mulawoṙe mkate? 9 Maa mulandemanye maa mukumburie mkate iya itanu ko walya shiku shitaanu, na nyi mkunja inga mulesania-pfoe? 10 Maa mkate iya mfungaaṙe ko walya shiku shiina, na nyi mkunja inga mulesania-pfoe? 11 Kyawa kuṙa mulalemanya kye chi kyipfa kya mkate ngyilemmbia-pfo? Kyaindi kushowenyi na chachu ya Mafarisayo na Masadukayo.” 12 Naaho-ng'u walemanya kye alewawia ikuringa na chachu ya mkate, indi na malosho ga Mafarisayo na Masadukayo-pfo. 13 Kyasia Yesu kayenda ngyuura tsa Kaisaria-Filyipi, kawesa wanalosho wakye, kagamba, “Wandu wekyegamba Mono-Adamu nyi wui?” 14 Wakagamba, “Wengyi wekyegamba nui Yohane Mpatisi, wengyi Elyiya, wengyi Yeremia ang'u umwi o weonguo shisuku.” 15 Kawawia, “Aa nyoe mokyegamba inyi nyi wui?” 16 Simion Petiro kagaluo, kagamba, “Iyoe nyi oe Kristo, Mono-Ruwa ai na moo mlungana.” 17 Yesu kagaluo, kammbia, “Agusu iyoe Simion Mono-Yona, cha kyipfa chi pfinya ang'u wuṟango wo kyimndu shakutambuluya ikyi-pfo; indi Awu-yoko akyeri ruwewu. 18 Na inyi ngakuwia, iyoe nyi oe Petiro, na kyiyeri-kyo ngyechiwika Siṟi yako iyoe nyilyo iṟaṟa handu ngyechiiyekyia; maa pfinya tsa upfu tseiwinga-pfo. 19 Na inyi ngyechikuenenga iyoe ngyuupfunguo tsa Wumangyi wo ruwewu na orio kyindo ochikyipfunga iha wuyanenyi, kyewa kyikyipfungye ruwewu; na orio kyindo ochikyipfunguo wuyanenyi, kyechiwa kyikyipfunguoe ruwewu.” 20 Naaho-ng'u kaima mnu wanalosho wakye walawie mndu oose kye oe nyi oe Kristo. 21 Wookyia kyiyeri-kyo Yesu nalewooka iwia na pata wanalosho wakye kye kyimmbaṟi iyenda Yerusalemu na iambilyia matuuro gafoi iwuka ko wameeku wa mengye, na wang'anyi wa makohanyi, na walosha wa mawawaso, na iwoogo, na mfiri o kaṟaaṟu iṟuka. 22 Petiro kamṙuo mbai, kawooka imṙeṙia, echigamba, “Maa ale, Mndumii, isho shechikukooya-pfo.” 23 Kagaluka, kawia Petiro, “Wuka koko, Satana, nungyishingyia; kyipfa uikusaṟa shikyeri sha Ruwa-pfo, indi sha wandu.” 24 Kyiyeri-kyo Yesu nalewia wanalosho wakye, “Mndu oose kakunda ingyiosha, nakulege amonyi, nakuṙikye msalaba okye, nangyioshe. 25 Cha kyipfa mndu akundi ikyiṟa mrima okye, nechiuṙetsa; na mndu echiṙetsa mrima okye kyipfa kyako, nechiukyiṟa. 26 Kyipfa mndu nechiiria ho kyi kaenengo wuyana woose, na iṙetsa mrima okye? Ang'u mndu nechienengyia kyi handu ha mrima okye? 27 Cha kyipfa Mono-Adamu nechicha mng'anonyi o Awu-yokye hamwi na malaika wakye. Naaho-ng'u echitaa orio mndu iṙuana na mmbutie yakye. 28 Ny'kyaloi ngammbia, hawoṙe wandu kyiiṙi kya iwa wagoṟokyie iha, walechiwona upfu maa ale mṟasa kyiyeri wechiwona Mono-Adamu echicha Wumangyinyi wokye.”
1 Na mfiri iṟandaaṟu yamuiṙe Yesu kaṙuo Petiro na Yakobo, na Yohane mono-wamae, kawaende mṟasa wuye ya fumvu lyileshi handu halawoṙe wandu. 2 Kailachika fana yakye mbele yawo; kyaam kyakye kyikaaka-aka cha mnengyeṟi; mkoṟoṟi okye ukoila cha ngyesa. 3 Mose na Elyiya wakacha na kowo wakaṙeṙa na Yesu. 4 Petiro kagaluo, kawia Yesu, “Mndumii, nyi kyicha soe ikaa iha. Kokunda, ngyechiachikyia matengo gaṟaaṟu iha. Lyimwi lyapfo iyoe, na lyimwi lya Mose, na lyimwi lya Elyia.” 5 Kyiyeri aweiṙeṙa, ipuchi lyiilyi lyikawaendie mrinje; na ṟui lyikawuka kulya ipuchinyi, lyikagamba, “Ichu nyi Mono-ko, mkunde oko, ngyimchihiye kyipfa kyakye; muaṙanyienyi oe.” 6 Na kyiyeri wanalosho walya waleicho, waleoloka na ndewu, wakaowuo mnu. 7 Yesu kacha, kawapaaya, kagamba, “Amkyenyi, maa mulaowuoe.” 8 Wakaambuo, walawone mndu sile Yesu amonyi. 9 Na kyiyeri waweisoka fumvunyi, Yesu nalewawia, “Mulawie mndu oose mbonyi tsa isho moloṟo, mṟasa kyiyeri Mono-Adamu echiṟuka ko wapfu.” 10 Wanalosho wakye wakammbesa, wechigamba, “Kyasia ny'kyilyi walosha wa mawawaso wekyegamba kye Elyia nawaṟi icha kuwooka?” 11 Na oe kagaluo, kawawia, “Loi Elyia naicha kuwooka, na oe nechiachikyia shoose; 12 kyaindi ngammbia kye Elyiya amcha, walammanye, kyaindi wakammbutia orio kyindo walekunda. Na wuṙo Mono-Adamu na oe aindelyiso wukyiwa kowo.” 13 Naaho-ng'u wanalosho walya walemanya kye naṙeṙa nawo mbonyi tsa Yohane Mpatisi. 14 Nawo kyiyeri waleshika kyisanzionyi, mndu umwi kacha na kokye, kampfiria ndi, echigamba, 15 “Mndumii, usaṟie mono-ko, cha kyipfa nawoṙo nyi iuma nguku, na ilyiso wukyiwa wuwicho; kyipfa kafoi nekyeoloka moṙonyi, na kafoi mṟingyenyi. 16 Ngamwende na ko wanalosho wapfo, walaiṙime imkyiṟa.” 17 Yesu kagaluo, kagamba, “Nyoe rika lyilawoṙe iiṙikyia, lyiendie njia ilawaṟi, ngyechikaa hamwi na nyoe mṟasa indi? Ngyeṙuana na nyoe mṟasa indi? Mwendenyi na kunu koko.” 18 Yesu kaṙeṙia mṟufui ulya mmbicho, kawuka mana ulya. Manakye ulya kyakyia wookyia kyiyeri kyilya. 19 Numa wanalosho walya wakayenda ko Yesu kui kyiṟika, wakagamba, “Ny'kyilyi soe lulaiṙima immbuta?” 20 Yesu kawawia, “Kyipfa kya wufofo wo iiṙikyia lyanyu. Cha kyipfa, ny'kyaloi, ngammbia, mukowaṙa iiṙikyia lyishikyie cha mbeu ya haradalyi mochiwia fumvu-lyi, ‘Wuka iha uyende kulya;’ nalyo lyechiwuka ho; maa kochiwaṙa kyindo kyilechiiṙimika konyu-pfo. [ 21 Kyaindi mbaṟe-i yekyewuka sile kui iterewa na ikuretekyia-pfo.]” 22 Nawo kyiyeri wawekyeri Galyilaya, Yesu kawawia. “Mono-Adamu naindewiko mawokonyi ga wandu, nawo wechimmbaaga, na mfiri o kaṟaaṟu nechiṟuka”. 23 Wakawoṙo nyi fowa mnu mrimenyi kowo. 24 Na kyiyeri waleshika Kaperinaumu, walya wawekyesania kyifunjoe kya shekyelyi waleyenda ko Petiro, wakagamba, “Ngyesa mlosha onyu aienengyia kyifunjoe kya shekyelyi-pfoe?” Kagamba, “Nekyeenengyia.” 25 Na oe kyiyeri aleiṙa na kanyi Yesu nalesonguo immbesa, echigamba, “Nuwonyi kuṙa, Simion? Wamangyi wa wuyana wekyeambilyia kodi ang'u ukamba ko wandu waha? Ko wana wawo ang'u ko wayenu?” 26 Na oe kyiyeri alegamba, “Ko wayenu,” Yesu nalemmbia, “Kyasia, kokooya nyi wuṙo, wana wawaṟi itaa ukamba-pfo. 27 Kyaindi kundu lulachewawutia kyindo lukowawihiṟa, yenda ipalyipalyinyi undewiyitsa-pfo ndoana uwaṙe ikunga lyilya lyawoneka kuwooka, na kotambaṟuo ṙumbu lyalyo nowona shekyelyi yetaa ukamba lo hekalu. Ṙuo iyo undewaenengyia kyipfa kyako na kyipfa kyapfo.”
1 Kyiyeri kyilya wanalosho wakayenda ko Yesu, wechigamba, 2 “Kyasia nyi wui-ng'u ai ang'anyi Wumangyinyi wo ruwewu?” Kalaga mana umwi mtutu, kammbikyia makyiṙi-gawi gawo, 3 kagamba, “Ny'kyaloi, ngammbia, mulandegalukye na iwa cha shiwana shitutu, mochiiṙa maa ale na Wumangyinyi wo ruwewu-pfo. 4 Kyasia, orio oose echikukyiwasha amonyi cha mana-chu, icho nyi oe ai ang'anyi Wumangyinyi wo ruwewu. 5 Na orio oose echiambilyia mana umwi mfano o ichu kui rina lyako, nangyiambilyia inyi.” 6 “Kyaindi echitewe umwi o iwa watutu wangyiiṙikyie, kyimmbaṟi napfungyio nzingonyi ikyesa na iwiyitso kyitsindenyi kya ipalyipalyi. 7 Ochia nyi lo wuyana kyipfa kya shindo shetewe! Kyipfa shindo shetewe icha shechicha; kyaindi ochia lokye mndu ulya aende kyindo kyetewe! 8 Kyasia kuwoko kopfo ang'u kuṙende kopfo kukokutewe; ṙumbuo kuwoko-ko ang'u kuṙende-ko uwiyitse kuleshi na iyoe. Nyi nanga iiṙa na moonyi o mlungana ulawoṙe kuwoko ang'u kuṙende, kuta iwaṙa mawoko gawi na maṙende gawi, na iwiyitso moṙonyi o mlungana. 9 Na riso lyapfo lyikakutewe; lyikuluoe, ulyiwiyitse kuleshi na iyoe. Nyi nanga iiṙa na moonyi o mlungana uwoṙe riso lyimwi, kuta iwaṙa meso gawi na iwiyitso ngyehenenyi ya moṙo.” 10 “Mulamine umwi o iwa watutu, cha kyipfa ngammbia kye malaika wawo ruwewu mfiri yoose wekyeambuya kyaam kya Awu-yoko akyeri ruwewu. [ 11 Cha kyipfa Mono-Adamu nalecha iletsa kyiṙekyie.] 12 Muwonyi muṙa? Mndu awoṙe moondo igana, lyimwi lyikaṙeka, ngyesa ekyeṙa galya makumi kyenda na kyenda, kayenda mafumvunyi, na ipfula lyilya lyaṙeka-pfoe? 13 Na kaiṙima ilyiwona, ny'kyaloi, ngammbia, nekyechihiyo kyipfa kya ilyo ngoseṟa, kuta galya makumi kyenda na kyenda galaṙekyie. 14 Na wuṙo kyilachihiṟie ushangunyi lo Awu-yonyu akyeri ruwewu kye umwi o iwa watutu naṙekye.” 15 “Na mono-womoo kakuṙekyio, yenda umṙeṙie kya ṙeko lyakye, iyoe na oe tupu. Kakuaṙanyia, nowona mono-womoo. 16 Ote, kokooya alaaṙanyia, ṙuo handu hamwi na iyoe mndu umwi ang'u wawi, kundu kui maṙumbu ga waṟingyishi wawi ang'u waṟaaṟu orio ṙeṙo lyimanyikye na pata. 17 Na alandemuaṙanyie nyoe, wia siṟi; na alandeaṙanyie siṟi taa, na nawe kopfo cha mndu alaiṙikyie Ruwa na mosania ukamba.” 18 “Ny'kyaloi, ngammbia, shoose mochishipfunga wuyanenyi shechiwa shishipfungye ruwewu; na shoose mochishipfunguo wuyanenyi shechiwa shishipfunguoe ruwewu. 19 Lyingyi-se ngammbia, kyiyeri wawi wanyu wechisanza kyindonyi kyoose wechikyiterewa, wewutio nyi Awu-yoko akyeri ruwewu. 20 Cha kyipfa hai wawi waṟaaṟu wasanzie kui rina lyako, na inyi ngyikyeri iho makyiṙi-gawi gawo.” 21 Numa ya iho Petiro kayenda kokye kammbia, “Mndumii, mono-wama oko nangyiṙekyio kyenga na inyi ngyimhooṟie? Nyi ka mfungaaṙe ngyesa?” 22 Yesu kammbia, “Ngyikuwia ka mfungaaṙe tupu-pfo, indi umhooṟie makumi mfungaaṙe, ka mfungaaṙe. 23 Kyipfa kya ikyo Wumangyi wo ruwewu wukyeri cha mangyi umwi alekunda isungusia matala na waṟundi wakye. 24 Kyiyeri alewooka iṟunda-lyo naleendio mndu umwi airiko sile ya talanta shiku ikumi. 25 Na oe kyiyeri aleuṟa kyetaa, mndumii okye kagamba nakumbo, oe na mka okye na wana wakye, na shindo shoose awoṙe, sile iya itoo. 26 Kyasia mṟundi ulya kaoloka, kamwindia echigamba, ‘Mndumii, ngyiweṙa, na inyi ngyechikutaa sile yoose taa.’ 27 Mndumii o mṟundi ulya kammbonia wukyiwa kampfunguo, kamhooṟia sile iya. 28 Mṟundi ulya kafuma, kawona umwi o mbuya tsakye, awemmbesa dinari igana. Kamtirimisha, kammbaṙa maṟoo, echigamba, ‘Ngyitaa sile iya uriko.’ 29 Kyasia mbuya iya oṙoe ikaoloka maṙendenyi gakye, ikamterewa, yechigamba, ‘Ngyiweṙa, na inyi ngyechikutaa sile yoose taa.’ 30 Kyaindi alekunda-pfo. Kayenda, kammbiyitsa kyipfungonyi, mṟasa ilyi echitaa sile-yo. 31 Kyasia kyiyeri mbuya tsakye tsilewona shilya shileṟundika, tsilewihiyo mnu mrimenyi, tsikayenda tsikaongoya Mndumii otso shoose shileṟundika. 32 Naaho-ng'u Mndumii okye kamlaga, kammbia, ‘Iyoe mṟundi mmbicho, ngyilekuhooṟia iyoe sile iya yoose, lyilya ulengyiterewa; 33 na iyoe, ngyesa kyiwekuwaṟi isaṟia mbuya yapfo, chandu inyi ngyilekusaṟia iyoe-pfoe?’ 34 Mndumii okye kasuo, kamṙuo ko watuuri, mṟasa kyiyeri echitaa sile iya yoose. 35 Na wuṙo Awu-yoko a ruwewu echimmbutia nyoe, mulandehooṟie kui mrima yanyu orio mndu mono-wamae.”
1 Na lyilya Yesu alemarisa ionguo maṙeṙo-go nalefuma Galyilaya kayenda kaiṙa na urukyenyi lo Uyuda, molyolya o Yoridan. 2 Wuingyi wufoi wo wandu wulemuosha, kawakyiṟia pfo. 3 Kyasia Mafarisayo wakayenda kokye, wakamwesha, wechimmbia, “Ngyesa nyi sungusinyi mndu iṙa mka okye chandu akukundia?” 4 Kagaluo, kawawia, “Muichi kye ulya alewagumba mawookyionyi, nalegumba mndu msoṟo na mndu mka?” 5 Kaengyeṟa igamba, “Kyipfa kya ikyo, mndu nechiṙa awuye na wamae, nawaṙane tapu na ioshana na mka okye; na iwo wawi wechiwa mmbiu umwi. 6 Kyasia wakyeri wawi-se-pfo, indi mmbiu umwi. Kyasia walya Ruwa awalunga, mndu alawaletsane.” 7 Wakammbia, “Kyasia nyi wuṙa-ng'u Mose alegamba kye mka-cho naenengo kyiṟeio kyeletsana wolyi, na imṙa?” 8 Kawawia, “Mose, kyipfa kya wuumu wo mrima yanyu, nalemuenenga momu o lekana na waka wanyu; kyaindi wookyia mawookyionyi kyiwekyeri kuṙo-pfo. 9 Na inyi ngammbia nyoe, orio mndu echiṙa mka okye, sile nyi kyipfa kya wuṟui, kaalyika ungyi, naṟuguya. Na ulya aalyika ulya aṙio naṟuguya.” 10 Wanalosho wakye wakammbia, “Mbonyi tsa mndu na mka okye tsikawa kuṙo, kuwoṙe kyiira ialyika-pfo.” 11 Kyaindi oe kawawia, “Chi woose weiṙima iambilyia ṙeṙo-lyi-pfo, sile walya wawaenengye wuiṙimi. 12 Kyipfa kuwoṙe wandu walekyekuwinisha na mbonyi tsa wolyi kyipfa wawafee mbaṟe-yo iyo. Lyingyi-se kuwoṙe wandu wawaime nyi wandu wengyi pfinya tsekuwinisha na mbonyi tsa wolyi. Ngoseṟa kuwoṙe wandu waleṙumbuo wo wawenyi iṙa ikuwinisha na mbonyi tsa wolyi kyipfa kya Wumangyi wo ruwewu. Eiṙima iambilyia ṙeṙo-lyi, nalyiambilyie.” 13 Naaho-ng'u kaendio wana watutu kundu nayekyie mawoko wuye yawo na iwaterewia; wanalosho wakye wakaṙeṙia walya walewaende. 14 Kyaindi Yesu kagamba, “Lekyenyi wana watutu wache na koko; maa mulawashingyie; cha kyipfa wafananyi na iwo, Wumangyi wo ruwewu nyi wowo.” 15 Kayekyia mawoko gakye wuye yawo kawuka pfo. 16 Na mndu umwi kayenda kokye kammbia, “Mlosha, ngyiwute kyindo kyiha kyicha, kundu ngyiwone moo o mlungana?” 17 Kammbia, “Ny'kyi kyitewe ungyiwesa mbonyi tsa wucha? Ai mcha nyi umwi. Kyaindi kokunda iiṙa na moonyi o mlungana, osha kyilya mawawaso gakundi.” 18 Kammbia, “Mawawaso gaha?” Yesu kagamba, “Nyi iga: Ulawaage, Ulaṟuguye maa Ulaṟuguyo, Ulaiwe, Ulaṟingyishie wongo. 19 India awuyo na womoo, Kunda momṟasa opfo chandu ukukundi iyoe kumonyi.” 20 Manakye ulya kammbia, “Igo goose ngyekyeosha kyilya gakundi. Ny'kyikyi ngyiwuṟie-se?” 21 Yesu kammbia, “Kokunda iwa mndu aafutsie shoose yenda undekumba shoose uwoṙe, uenengye wakyiwa, na iyoe nochiwaṙa kyiseyesoe ruwewu, numa nnjo ungyioshe.” 22 Kyiyeri manakye ulya aleicho ṙeṙo-lyo, kawuka ho akuinyaṙie; kyipfa nawewoṙe masaa gafoi. 23 Yesu kawia wanalosho wakye, “Ny'kyaloi, ngammbia kye kyechiwa kyilemeri mnjama iiṙa na Wumangyinyi wo ruwewu. 24 Lyingyi-se ngammbia, nyi kyaangu ngoseṟa ngamia iiṙa ṟochonyi lya sindanu, kuta mnjama iiṙa na Wumangyinyi wo Ruwa.” 25 Kyiyeri wanalosho waleicho, waleṟiyio mnu, wechigamba, “Nyi wui-ng'u echiiṙima ikyia?” 26 Yesu kawaitukuya na pfinya, kawawia, “Ko wandu ikyo kyeiṙimika-pfo; kyaindi ko Ruwa shoose shekyeiṙimika.” 27 Naaho-ng'u Petiro kagaluo, kammbia, “Soe luleṙa shoose lukokuosha; lochienengo kyi?” 28 Yesu kawawia “Ny'kyaloi, ngammbia kye nyoe mulengyiosha inyi, wuyanenyi wuhya, kyiyeri Mono-Adamu echiṙamia kyiṙinyi kya mng'ano okye, na nyoe mochiṙamia shiṙinyi ikumi na shiwi, mochianduya mbaṟe ikumi na tsiwi tsa wandu wa Isiraelyi. 29 Na orio mndu aleṙa numba, ang'u mono-wamae o kyisoṟo ang'u o kyika, ang'u awuye, ang'u wamae, ang'u wana, ang'u maṙema, kyipfa kya rina lyako, nechiambilyia ka igana, na ioṟa moo o mlungana. 30 Kyaindi wafoi wai wa kuwooka wechiwa wefurumia, na wai wefurumia wechiwa wa kuwooka.”
1 “Cha kyipfa Wumangyi wo ruwewu wufananyi na monyi kanyi, alefuma ngamenyi utuko indeṟeia waṙemi nawaṙuo ṙemenyi lyakye lya msabibu. 2 Na oe ammarise iiṙikyiana woguru na waṙemi walya iwaenenga dinari ko mfiri umwi, nalewaṙuo kulya ṙemenyi lyakye. 3 Kafuma kyiyeri kya saa tsiṟaaṟu tsa ngamenyi, kawona wengyi wagoṟokyi sangaṙa walawoṙe kyindo kyeṟunda. 4 Na iwo kawawia, ‘Na nyoe yendenyi ṙemenyi lyako lya msabibu, na kyilya kyiwaṟi ngyechimuenenga.’ Wakayenda. 5 Kafuma-se kyiyeri kya saa tsiṟandaaṟu na saa kyenda, kawuta wuṙo. 6 Na kyiyeri kya saa kumi na imwi kafuma, kakooya wengyi wagoṟokyi, kawawia, ‘Ny'kyilyi mugoṟokyi iha kyingoto puti kulawoṙe maṟunda?’ 7 Wakammbia, ‘Ny'kyipfa kuwoṙe mndu aluṟeie iṟunda-pfo.’ Kawawia, ‘Na nyoe yendenyi ṙemenyi lyako lya msabibu.’ 8 Kyiyeri kuleila, monyi ṙema ulya kawia mchilyi o waṙemi wakye, ‘Laga waṙemi, uwataae wori wowo, ochiwooka na o mafurumionyi mṟasa o kuwooka.’ 9 Na kyiyeri walecha walya wa saa kumi na imwi, waleambilyia orio mndu dinari. 10 Na walya wa kuwooka kyiyeri walecha, walekusaṟa kye weambilyia ngoseṟa. Kyaindi na iwo taa wakaambilyia oṙio mndu dinari. 11 Kyasia wamuambilyie, wakanunuwia monyi kanyi, 12 wechigamba, ‘Iwo wa mafurumionyi waṟunda saa imwi tupu, na iyoe nowalyingatsana na soe lokarishia ngyuukyiwa na mui o mfiri puti.’ 13 Na oe kagaluo umwi owo, kammbia, ‘Mbuya yako, ngakuima kyilya uwaṟi-pfo. Oiṙikyiana na inyi iambilyia dinari? 14 Ṙuo kyii kyapfo, uyende; ngakunda ienenga ichu o mafurumionyi kyilyingananyi na iyoe. 15 Chi sungusinyi iwuta na shilya shii shako chandu ngyikundi-pfoe? Ang'u riso lyapfo lyanyeng'a kyipfa kya inyi iwa mcha?’ 16 Na wuṙo wa mafurumionyi wechiwa wa kuwooka, na wa kuwooka wechiwa wa mafurumionyi.” 17 Na lyilya Yesu aweiṙo echiyenda Yerusalemu, kaṙuo wanalosho walya ikumi na wawi handu halawoṙe wandu; na njienyi kawawia, 18 “Luiṙo iyenda Yerusalemu; na Mono-Adamu nechiwiko mawokonyi ga wang'anyi wa makohanyi na walosha wa mawawaso; nawo wemwanduya napfe. 19 Numa ya iho wechimṙuo ko masanga waiṙime imkapa makuukuu, na imkapa na ngowa, na imkapia msalabenyi; na mfiri o kaṟaaṟu neṟuka.” 20 Naaho-ng'u mama o wana wa Sebedayo kayenda ko Yesu hamwi na wana wakye kamwindia, na imterewa kyindo. 21 Yesu kammbia, “Nukundi kyikyi?” Kammbia, “Gamba kye wana-wa wako wawi waṙamie umwi kuwoko kopfo ko kulyoe na umwi kuwoko kopfo ko kumoso, Wumangyinyi wopfo.” 22 Yesu kagaluo, kagamba, “Muichi kyindo muiterewa-pfo. Ngyesa moiṙima iiṙia matuuro-ga gaingyiweṙa?” Wakammbia, “Loiṙima.” 23 Kawawia, “Kyaloi mochiiṙima ituuro cha inyi, kyaindi iṙamia kuwoko koko ko kulyoe na kuwoko koko ko kumoso, ngyiwoṙe pfinya yemuenenga-pfo, indi weenengo walya wawaṟeyeṟie nyi Awu-yoko.” 24 Na kyiyeri walya ikumi waleicho walesuuya wana walya wa mka wawi. 25 Kyaindi Yesu kawalaga, kagamba, “Muichi kye wang'anyi wa wandu walaiṙikyie Ruwa wekyechilyia wandu wawo kui pfinya, na wang'anyi wawo wakawagaluo waṟundi. 26 Kyaindi kyechiwa kuṙo konyu-pfo. Mndu oose akundi iwa ang'anyi konyu, na nawe mṟundi onyu; 27 na mndu oose akundi iwa o kuwooka konyu nawe kyisinga kyanyu. 28 Chandu Mono-Adamu alalecha iṟundio, kyaindi iṟunda, na ireka moo uwe kyindo kyekyiṟa wanyamaṟi.” 29 Na lyilya waweiwuka Yeriko wandu wa kyisanzionyi kying'anyi wakamwosha. 30 Na shipfupfuṟe shiwi shiweṙamie mbai ya njia, nasho kyiyeri shileicho kye Yesu naiiṙa, shilekuilenga na ṟui lying'anyi, shechigamba, “Ulusaṟie, Mndumii, mono-Dawidi.” 31 Wandu wa kyisanzionyi kyilya wakashiṙeṙia, kundu shitsie. Kyaindi sho shikaengyeṟa ikuilenga na maṟui gang'anyi, shechigamba, “Ulusaṟie, Mndumii, mono-Dawidi!” 32 Yesu kagoṟoka, kashilaga, kagamba, “Mukundi ngyimmbutie kyi?” 33 Shikammbia, “Lukundi meso gaṙu gatambaṟukye luwone.” 34 Yesu kashiwonia wukyiwa, kapaaya meso gasho; cha ilyi shikaiṙima iwona, shikamwosha.
1 Na lyilya waleshika kufuhi na Yerusalemu, na ishika Betifage, kyikaṟo kyiwekyeri msaṟinyi o mashiṙi ga mseituni, naaho-ng'u Yesu aleṙuma wanalosho wawi, echiwawia, 2 “Yendenyi mṟasa kyikaṟo kyilya kyikyeri mbele ya ushangu lonyu, na cha ilyi mowona nzoi ingyipfungye, na igache lya nzoi hamwi nayo; tsipfunguonyi mungyiendie. 3 Na kokooya mndu ammbesa kyindo, gambenyi, ‘Mndumii nawoṙe kyindo akundi iwuta natso,’ na kulawoṙe iṙetsa kyiyeri nechitsiende.” 4 Ishi shoose shechiwa, kundu kyiafukyie kyindo kyilya kyileṙeṙo nyi moonguo shisuku echigamba, 5 “Wienyi mṟi o Sion, mangyi opfo naicha na kopfo, namhoo, na oe naṙamie wuye ya nzoi. Na igache lya nzoi, mana o nzoi.” 6 Wanalosho walya wakayenda, wakawuta chandu Yesu alewawia. 7 Wakaende nzoi iya na igache lya nzoi, wakawikyia nguwo tsawo wuye yatso, na oe kaṙamia wuye yayo. 8 Wandu wafoi wa kyisanzionyi kyilya wakaala nguwo tsawo njienyi; na wengyi wakamanya maṟamba ga mashiṙi, wakagaala njienyi. 9 Na wuingyi wo wandu wawesongoi, na walya walemwosha, wakakuilenga na ṟui lying'anyi wechigamba, “Hosiana, Mono-Dawidi! Nyi oe ammbikyie mboṟa, ulya aicha kui rina lya Mndumii, Hosiana wuye ruwewu.” 10 Na lyilya aleiṙa na Yerusalemu, mṟi oose ukowaṙa ndiṟimo tsing'anyi, wandu wechigamba, “Nyi wui ichu?” 11 Wuingyi wo wandu wukogamba, “Ichu nyi moonguo shisuku ulya, Yesu o Nasareti ya Galyilaya.” 12 Yesu kaiṙa na hekalunyi, kafuna woose wawekapa mbucha kulya hekalunyi, kapfuluo mesa tsa weilacha heleri, na shiṙi sha walya waweikumba mbeta. 13 Kawawia, “Kyikyiṟeie, ‘Numba yako yechilago numba ya kyiterewionyi,’ kyaindi nyoe moigaluo iwa usanja lo wasokyi.” 14 Na shipfupfuṟe na shiwete shikayenda kokye akyeri kulya hekalunyi, kashikyiṟa. 15 Kyaindi wang'anyi wa makohanyi na walosha wa mawawaso kyiyeri walewona maṟiyisho alewuta, na kyiyeri wana walekuilenga na maṟui gawo hekalunyi, wechigamba, “Hosiana, Mono-Dawidi” walesuo, 16 wakammbia, “Uichuoe chandu iwa waigamba?” Yesu kawawia, “Yee loi. Mulandeicho kye ‘Kui maṙumbu ga wana wanangu na waionga nuleafutsia kyiṟumi?’ ” 17 Kalekana nawo, kayenda nja ya mṟi mṟasa Betania, kalaa pfo. 18 Na lyilya kulekya kyiyeri aweiyenda mṟinyi, nalewoṙo nyi njaa. 19 Kawona mfumu umwi mbai ya njia, kayenda halya-ndu uwekyeri, alawone pfo kyindo sile maṟa tupu. Kauwia, “Kulawonekye ndunda kopfo wookyia inu mṟasa mlungana.” Mfumu ukouma cha ilyi. 20 Kyiyeri wanalosho walewona, waleṟiyio, wechigamba, “Nyi wuṙa mfumu ouma cha ilyi?” 21 Yesu kagaluo, kawawia, “Ny'kyaloi, ngammbia, mukowaṙa iiṙikyia, mulandewe wandu weilacha-ilacha kyilya moiṙikyia, mochiṟunda chi ilyo lya mfumu tupu-pfo, kyaindi maa mukowia fumvu-lyi, ‘Kuluka, uwiyitso ipalyipalyinyi,’ kyechiṟundika. 22 Na shoose mochishiterewa kyiterewonyi mochiiṙikyia, mochiambilyia.” 23 Na kyiyeri amwiṙe na hekalunyi wang'anyi wa makohanyi na wasongoru wa wandu wakayenda kokye kyiyeri aweilosha, wakagamba, “Nyi kui wuchilyi wuha uiwuta shindo-shi? Na oe nyi wui alekuenenga wuchilyi-wu?” 24 Yesu kagaluo, kawawia, “Na inyi ngyemmbesa kyindo kyimwi na nyoe mukongyigaluo, inyi ngyechimmbia nyi kui wuchilyi wuha ngyiwuta ishi. 25 Wupatiso wa Yohane wulewuka kwi? Wulewuka ruwewu, ang'u ko wandu?” Wakawesana wo wenyi ko wenyi, wechigamba, “Lukogamba, wulewuka ruwewu, neluwia, ‘Ny'kyilyi-ng'u mulalemwiṙikyia?’ 26 Na lukogamba, ‘Wulewuka ko wandu,’ luiowuo kyisanzionyi; kyipfa wandu woose wawonyi Yohane nyi moonguo shisuku.” 27 Wakagaluo Yesu, wakagamba, “Luichi-pfo.” Na oe kawawia, “Maa inyi ngyimmbia nyoe nyi kui wuchilyi wuha ngyiwuta ishi-pfo.” 28 “Kyaindi muwonyi kuṙa? Mndu umwi nawewoṙe wana wawi. Kayenda ko ulya o kuwooka, kagamba, ‘Mono-ko, inu yenda undeṟunda ṙemenyi lya msabibu.’ 29 Kagaluo kagamba, ‘Ngyiyenda, Mndumii,’ alayende. 30 Kayenda ko ulya o kawi, kagamba wuṙo. Na oe kagaluo, kagamba, ‘Ngyikundi-pfo.’ Numa ya iho katerewa ihooṟio, kayenda. 31 Ngyesa kyiiṙi kya iwo wawi nyi uha aleṟunda kyilya awuye akundi?” Wakammbia, “Nyi ulya o kawi.” Kyasia Yesu kawawia, “Ny'kyaloi ngammbia, wesania ukamba na maṟai waimusongoya iiṙa na Wumangyinyi wo Ruwa. 32 Cha kyipfa Yohane nalecha na konyu kui njia ya wusumganyi, nyoe mulamwiṙikyie. Kyaindi wesania ukamba na maṟai walemwiṙikyia; na nyoe maa lyilya mulewona, muleṙumbuya kundu mumwiṙikyie-pfo.” 33 “Aṙanyienyi mfano ungyi. Kuwewoṙe mndu umwi monyi kanyi, na oe nalewaaya sabibu ṙemenyi lyakye, kalyiringyichia uṟigo, kasuma rina lyekamia mpfinyo makyiṙi-gawi galyo, kawika kyitaanga, kagawia waṙemi ṙema lyilya, kayenda kyaro. 34 Ilyi kyiyeri kyesambuo kyiletikyira kufuhi, kaṙuma waṟundi wakye ko waṙemi walya, waambilyie ndunda tsakye. 35 Waṙemi walya wakawaṙa waṟundi walya, ichu wakamkapa, na ichu wakammbaaga, na ichu wakamkapa na magoe. 36 Kaṙuma-se waṟundi wengyi wafoi kuta walya wa kuwooka, wakawawutia wuṙo. 37 Mafurumionyi kaṙuma mono-kye o womi kowo, echigamba, weindia mono-ko. 38 Kyaindi waṙemi walya kyiyeri walewona mana ulya, wakaṙeṙa wo wenyi ko wenyi, wechigamba, ‘Ichu nyi mokyioṟa. Sindenyi lummbaage, luṙuo kyooṟa kyakye.’ 39 Wakammbaṙa, wakammbiyitsa nja ya ṙema lya msabibu wakammbaaga. 40 Kyasia kyiyeri echicha mndumii ulya o ṙema lya msabibu nechiwutia kyi waṙemi-wo?” 41 Wakammbia, “Nechirumatsa uwicho walya wawicho; na ṙema lya msabibu nechigawia waṙemi wengyi, wechimtaa ndunda kui kyiyeri kyiwaṟi.” 42 Yesu kawawia, “Muichi chandu kyikyeri shiṟeionyi: ‘Igoe walelyilega wewika numba, ilyo lyawa igoe lying'anyi lya ndumbenyi; ṙeṙo-lyi lyiwukyie ko Mndumii, nalyo nyi kyiṟiyisho mesonyi gaṙu?’ ” 43 Kyipfa kya ikyo ngammbia, “Wumangyi wo Ruwa wochiwuto konyu, na ienengo isanga lyingyi lyekyekumbia ndunda tsa Wumangyi-wo. [ 44 Na icho echioloka wuye ya igoe-lyo nechifinjika-finjika; na ulya lyechimwolokyia, lyechimsaa lyimmamiṟe.]” 45 Wang'anyi wa makohanyi na Mafarisayo, kyiyeri waleicho mfano yakye, walemanya kye nyi kyawo aiṙeṙa. 46 Nawo kyiyeri walepfula immbaṙa, waleowuo wuingyi wo wandu, cha kyipfa wo walemmbona nai moonguo shisuku.
1 Yesu kagaluo, kawawia-se kui mṙeṙie, echigamba, 2 “Wumangyi wo ruwewu wufananyi na mangyi umwi aleachikyia mono-kye wolyi. 3 Kaṙuma shisinga shakye shilage walya wawewalage na kulya wolyinyi; nawo wakalega icha. 4 Kaṙuma-se shisinga shingyi, echigamba, ‘Wienyi walya wawalage, kye ngyiṟeyeṟie shelya shako; umbe tsako na orio kyindo kyinoru shamshinjo, na shoose shammba; nnjonyi na wolyinyi.’ 5 Kyaindi wakamina, wakayenda, umwi ṙemenyi kokye, umwi mbuchenyi yakye; 6 na walya waletsugaa wakawaṙa shisinga shilya shakye, wakashiwutia shindo shiwicho, na ishiwaaga. 7 Kyasia mangyi ulya kakapo nyi nyashi; kaṙika mbaganyi tsakye, karumatsa wawaagi walya, karumatsa mṟi owo kui moṙo. 8 Numa ya iho kawia shisinga shakye, ‘Wolyi wommba, kyaindi walya wawalage wawaṟi-pfo. 9 Kyasia yendenyi mṟasa handu mtandaṟa ikooyanyi na woose mowawona walagenyi na wolyinyi.’ 10 Shisinga shilya shikafuma shikayenda njienyi ing'anyi, shikasania woose walewawona, wawicho na wecha; wolyi wukoichuo wayenu. 11 Kyaindi kyiyeri mangyi ulya aleiṙa na numba kundu naambuye wayenu wakye, kawona pfo mndu umwi alaṟee mkoṟoṟi o wolyi. 12 Kammbia, ‘Mbuya-ko, noiṙa kuṙa na kunu na iyoe uwoṙe mkoṟoṟi o wolyi-pfo?’ Na oe kauṟa kyegamba. 13 Mangyi kawia waṟundi, ‘Mpfungyenyi mawoko na maṙende, mṙuonyi mundemmbiyitsa meemenyi o nja. Nyipfo kochiwaṙa ṟanyi na ilya ngakuru. 14 Cha kyipfa walage nyi wafoi, indi wasambuṟe nyi waangu.’ ” 15 Naaho-ng'u Mafarisayo wakayenda wakalya njama, chandu wemṙega kui maṙeṙo. 16 Wakaṙuma kokye wanalosho wawo hamwi na Maherodi, wakagamba, “Mlosha, luichi kye iyoe nyi mndu o loi, na njia ya Ruwa nokyeilosha kui wuloi, maa okyesaṟa rina lya mndu oose-pfo, cha kyipfa okyeambuya fana tsa wandu-pfo. 17 Kyasia luwie, nuwonyi kuṙa? Nyi sungusinyi ienenga Kaisari kodi, ang'u chi wuṙo-pfo?” 18 Kyaindi Yesu kamanya wuwicho wowo, kagamba, “Ny'kyilyi mungyiyesha, nyoe wakulembecheṟi? 19 Ngyiloṟenyi heleri ya kodi.” Nawo wakamwendie dinari. 20 Kawawia, “Nyi ya wui sanamu-i na kyiṟeio-kyi?” 21 Wakammbia, “Nyi ya Kaisari.” Kawawia, “Kyasia, enengyenyi Kaisari shikyeri sha Kaisari, na Ruwa shikyeri sha Ruwa.” 22 Kyiyeri waleicho waleṟiyio, wakamṙa wakayenda. 23 Mfiri ulya Masadukayo, wandu wekyegamba kye kuwoṙe iṟuka lya wapfu-pfo, waleyenda kokye, wakammbesa, 24 wechigamba, “Mlosha, Mose nalegamba, ‘Mndu kapfa, alawoṙe wana, mono-wamae naalyikye mka ulya okye, kundu mono-wamae nawone mana.’ 25 Kyasia koṙu kuwewoṙe wana wa mka mfungaaṙe. O kuwooka kaalyika, kapfa, na kyipfa alawoṙe mana, kaṙeeya mono-wamae mka okye. 26 Na wuṙo o kawi na oe, na o kaṟaaṟu, mṟasa woose mfungaaṙe. 27 Mafurumionyi ga woose mndu mka ulya na oe kapfa. 28 Kyasia, kyiyeri kya iṟuka lya wapfu, nechiwa mka o uha kyiiṙi kya walya mfungaaṙe? Kyipfa woose wawekyeri na oe.” 29 Yesu kagaluo, kawawia, “Muiṙeka, cha kyipfa muichi shiṟeio maa wuiṙimi wo Ruwa-pfo. 30 Cha kyipfa walya wekyeṟuka ko wapfu wekyealyika maa ialyiko-pfo, kyaindi wekyewa cha malaika wa ruwewu. 31 Lyingyi-se ko mbonyi tsa iṟuka lya wapfu, muichi kyindo kyilya kyileṙeṙo nyi Ruwa, echigamba, 32 ‘Inyi nyi Ruwa o Abrahamu, na Ruwa o Isakyi na Ruwa o Yakobo?’ Ruwa chi Ruwa o wapfu-pfo, indi o wai na moo.” 33 Na kyiyeri wuingyi wo wandu waleicho waleṟiyio, kyipfa kya malosho gakye. 34 Na kyiyeri Mafarisayo waleicho kye nalegaluo ndiṟi Masadukayo walya, waleṙamia kyiṙombo handu hamwi. 35 Umwi owo, aichi mawawaso, kammbesa, echimwesha, 36 “Mlosha, kyiiṙi kya mawawaso nyi lyiha lying'anyi kuta goose?” 37 Yesu kammbia, “Kunda Mndumii Ruwa opfo kui ngoo yapfo yoose, na kui mrima opfo oose, na kui wuṟango wopfo woose. 38 Ilyi nyilyo iwawaso lying'anyi kuta goose, nalyo nyi lya kuwooka. 39 Na lya kawi lyifananyi nalyo, nalyo nyi ilyi, ‘Kunda momṟasa opfo cha mrima opfo.’ 40 Mawawaso goose na malosho ga weonguo shisuku gakyeri kyiiṙi kya mawawaso-ga gawi.” 41 Na kyiyeri Mafarisayo walesanzia handu hamwi, Yesu nalewawesa, echigamba, “Muwonyi kuṙa mbonyi tsa Kristo? 42 Nyi mono-wui?” Wakammbia, “Nyi o Dawidi.” 43 Kawawesa, “Kyasia kyawa-ng'u kuṙa Dawidi kyiiṙi kya Mumuyo ilaga Mndumii, echigamba, 44 ‘Mndumii nalewia Mndumii oko, uṙamie kuwoko koko ko kulyoe, mṟasa kyiyeri ngyechiwika washituwa wapfo, wanda ya wuchilyi wopfo?’ ” 45 “Kyasia, Dawidi kamlaga Mndumii, nawa-se kuṙa mono-kye?” 46 Maa kulewaṙa mndu aleiṙima imgaluo kyindo-pfo; maa kuwoṙe mndu oose alekaria wookyia mfiri ulya immbesa kyindo-se-pfo.
1 Numa ya iho Yesu kaṙeṙa na wuingyi wo wandu na wanalosho wakye, echigamba, 2 “Walosha wa mawawaso na Mafarisayo wawoṙe wuiṙimi wo tambuluo mawawaso ga Mose. 3 Kyasia, shoose wechimmbia, mushiwute; kyaindi kui mfano o mawuto gawo, mulawute; kyipfa wo wekyeṙeṙa kyaindi wekyewuta-pfo. 4 Wo wekyepfunga maṟio malemeri na iṙika wandu mayewenyi gawo; walakunde wo wawenyi igapaaya na kyimnyoe kyawo. 5 Lyingyi-se mmbutie yawo yoose nyi kundu wawono nyi wandu; cha kyipfa shichonyi-sho shishiṟeie maṙeṙo ga Ruwa wekyeṟaa shaamunyi shawo na mawoko nyi shing'anyi mnu, na makyechu ga mkoṟoṟi yawo gangyilesheṟe mnu. 6 Wakundi iṙamia shiṙi sha mbele handu hawoṙe shelya, na iṙamia mbele masinagoginyi, 7 na iiṟikyiṟo sangaṙa, na ilago nyi wandu ‘Rabi.’ 8 Kyaindi nyoe mulalago ‘Rabi,’ kyipfa mlosha onyu nyi umwi, na nyoe moose nyi wana wa mka. 9 Maa mulalage mndu awu wuyanenyi, kyipfa Awu-yonyu nyi umwi, ai o ruwewu. 10 Maa mulalago wasongoru; kyipfa msongoru onyu nyi umwi, na oe nyi oe Kristo. 11 Na oe ai ang'anyi onyu nechiwa mṟundi onyu. 12 Na orio oose echikung'anyisa amonyi nechititiṟo, na orio oose echikutitiṟa amonyi neching'anyiso. ” 13 “Ochia lonyu walosha wa mawawaso na Mafarisayo, wakulembecheṟi! Cha kyipfa mokyeshingyia wandu moongo o Wumangyi wo ruwewu; nyoe muwenyi mulaiṙe napfo, maa walya waiiṙa mulawalekyie waiṙe napfo. [ 14 “Ochia lonyu walosha wa mawawaso na Mafarisayo, wakulembecheṟi! Cha kyipfa mokyesoka wakusu orio kyindo wawoṙe, na kui wukulembecheṟi mokyewika shiterewo shileshi; kyipfa kya ikyo mochiambilyia ianduyo lying'anyi ngoseṟa.] 15 “Ochia lonyu walosha wa mawawaso na Mafarisayo, wakulembecheṟi! Cha kyipfa mokyetenga-tenga mapalyipalyinyi na urukyenyi lugaṙutsu kundu mugaluoe mndu umwi nawaṙe iiṙikyia, na kammboneka, mokyemgaluo kawa mana o ngyehena ammbicho kuta nyoe kawi. 16 “Ochia lonyu wasongoru mui shipfupfuṟe. Nyoe mokyegamba, ‘Mndu echilya nyamu kui hekalu chi kyindo-pfo, indi mndu kalya nyamu kui shindo sha sahapu shikyeri hekalunyi, kyimmbaṟi iwuta shilya ateṟia.’ 17 Nyoe matondo na shipfupfuṟe. Kyipfa nyi kyiha kying'anyi kuta kyingyi, nyi sahapu iya, ang'u hekalu-lyo lyekyeyeṟemtsa sahapu-yo? 18 Lyingyi-se, ‘Mndu echilya nyamu kui alyitaṟe, chi kyindo-pfo; indi mndu echilya nyamu kui kyienengo kyikyeri iho wuye ya alyitaṟe-yo, kyimmbaṟi iwuta shilya ateṟia.’ 19 Shipfupfuṟe nyoe. Kyipfa nyi kyiha kying'anyi kuta kyingyi, kyienengo-kyo, ang'u alyitaṟe-yo yekyeyeṟemtsa kyienengo-kyo? 20 Kyasia ulya alya nyamu kui alyitaṟe, nekyelya nyamu nayo na shindo shoose shikyeri wuye yayo. 21 Na ulya alya nyamu kui hekalu, nekyelya nyamu nalyo, na ilya nyamu kui Ruwa ulya ekyekaa pfo. 22 Na ulya ekyelya nyamu kui ngyina, nekyelya nyamu kui kyiṙi kya mng'ano kya Ruwa, na ilya nyamu kui Ruwa ulya akyiṙamilyie. 23 “Ochia lonyu walosha wa mawawaso na Mafarisayo, wakulembecheṟi! Cha kyipfa mokyetaa orio kyifunjoe kya ikumi kya maṟa gelotsiṟa kyelya, kyaindi mukoṙa mbonyi tsing'anyi tsa mawawaso, cha iṙumbuo moondu kulawoṙe ikundia, na isaṟia, na iiṙikyia. Isho muwaṟi ishiwuta, maa shilya shingyi mulashiṙe. 24 Wasongoru shipfupfuṟe, mokyefifina kyitsina shindonyi shanyu shenyo kyaindi mkomeṟa ngamia.” 25 “Ochia lonyu walosha wa mawawaso na Mafarisayo, wakulembecheṟi! Cha kyipfa mokyesanja kyiṙoo na kyitela ipfo kyanja kyaindi shindo muwikyie pfo nyi sha wusokyi na ikukunda nyoe muwenyi. 26 Iyoe Mfarisayo kyipfupfuṟe. Sanja kyiṙoo kuwooka ipfo kyanumba, kundu na ipfo kyanja kuiṙime iila. 27 “Ochia lonyu, walosha wa mawawaso na Mafarisayo, wakulembecheṟi! Cha kyipfa mufananyi na shilome shishishie kyindo kya uwiṟo, nasho kya ipfo nja shekyewoneka shii shicha, kyaindi ipfo kyanumba shiichuo mafuo ga wapfu; na orio kyindo kyiporu. 28 Na wuṙo na nyoe; ipfo kyanja muwono nyi wandu cha muwoṙe wusumganyi, kyaindi ipfo kyanumba muichuo wukulembecheṟi na ifunja mawawaso lya orio mbaṟe.” 29 “Ochia lonyu, walosha wa mawawaso na Mafarisayo, wakulembecheṟi! Cha kyipfa mokyewika shilome shicha sheṟika weonguo shisuku na waṟundi wengyi wasumganyi wa Ruwa na shilome-sho mkoshichopa mnu, 30 na igamba, ‘Kokooya soe luwekyeri pfo kyiyeri kya kacha kya waku waṙu, luwechisanza nawo ipusuo samu ya weonguo shisuku-pfo.’ 31 Kuṙi muikuṟingyishia muwenyi, kye nyoe nyi wana wa walya walewaaga weonguo shisuku. 32 Afutsienyi-ng'u kyila waku wanyu walewooka. 33 Nyoe njoka, wana wa manjoka, moṙicha kuṙa ngapo ya ngyehena? 34 Kyipfa kya ikyo, inyi ngyiṙuma konyu weonguo shisuku na wawoṙe wuṟango na walosha wa mawawaso na wengyi kyiiṙi kyawo mochiwawaaga na iwakapia msalabenyi, wengyi kyiiṙi kyawo mochiwakapa wakyeri masinagoginyi ganyu na iwafuna mṟi kui mṟi. 35 Na mochiwona ngapo kyipfa kya samu ya wandu wasumganyi mulewaaga, wookyia samu ya Abelyi, ulya msumganyi, mṟasa samu ya Sakaria, mono-Barakyia, mulemmbaagia kyiiṙi kya haele na alyitaṟe. 36 Ny'kyaloi, ngammbienyi, ngapo-tso tsoose tsechiolokyia rika-lyi.” 37 “Iyoe Yerusalemu, Yerusalemu, uiwaaga weonguo shisuku na ikapa na magoe walya wawaṙume kopfo! Nyi kyenga ngyilekunda ikusania hamwi na wana wapfo, chandu nguku yekyesania handu hamwi maalea gayo wanda ya makungo gayo, kyaindi mulekunda-pfo? 38 Ruwa akyeri-se numbenyi yanyu yeterewia-pfo. 39 Cha kyipfa ngammbia, mochingyiwona-se maa ale wookyia wulalu-pfo, mṟasa kyiyeri mochigamba, ‘Namwenengye mboṟa ulya aicha kui rina lya Mndumii.’ ”
1 Yesu kayenda, kawuka hekalunyi. Wanalosho wakye wakayenda kokye wamloṟe numba tsa hekalu. 2 Na oe kagaluo, kawawia, “Muwonyi ishi shoose? Ny'kyaloi, ngammbia, hechitsugaa igoe wuye ya igoe lyingyi lyilechiolotso-pfo.” 3 Na lyilya aweṙamie fumvunyi lya mashiṙi ga mseituni, wanalosho wakye wakayenda kokye kui kyiṟika, wechigamba, “Luwie, mbonyi-tsi tsechiwa indi? Na kyiṟingyishio kya icha lyapfo na kya mafurumionyi ga wuyana nyi kyikyi?” 4 Yesu kagaluo, kawawia, “Mndu alamlembe. 5 Cha kyipfa wafoi wechicha kui rina lyako, wechigamba, ‘Inyi nyi Kristo;’ nawo wechilemba wafoi. 6 Na nyoe mochiicho mbonyi tsa shiṙa na iweweṙo lya shiṙa. Maa mulaowesho; kyipfa isho shiwaṟi iwa kuṙo; kyaindi mafurumionyi galya galandeshikye-pfo. 7 Cha kyipfa isanga lyechiwuka ikapana na isanga, na wumangyi ikapana na wumangyi. Kochiwaṙa njaa, na shiriinza handu kui handu. 8 Isho shoose nyisho mawookyionyi ga iwawio lying'anyi. 9 Kyiyeri-kyo wechimṟiinga nyoe muwoṙo nyi wukyiwa, nawo wechimmbaaga, na nyoe mochiwa wandu wawasuoe nyi masanga goose kyipfa kya rina lyako. 10 Naaho-ng'u wafoi wechikapa tuulyia, nawo wechiṟiingana, na isuana. 11 Na weonguo shisuku wa wongo wechiwoneka na ilemba wafoi. 12 Na kyipfa kya iengyeṟika inyamaṟa mawawaso, ikunda lya wandu wafoi lyechiololyia. 13 Kyaindi ulya echikarishia mṟasa mafurumionyi, nyi oe echikyia. 14 Lyingyi-se mbonyi ngyicha tsa Wumangyi tsechiongoyo wuyanenyi koose, iwa wuṟingyishi wo masanga goose. Iho nyiho mafurumionyi galya gechicha.” 15 “Kyasia kyiyeri-kyo mochiwona ulya ekyenyamaṟa na ifunja orio kyindo kyiele, ulya amgambe nyi moonguo shisuku Danielyi, agoṟokyi handu haele (aikulosha na namanye). 16 Naaho-ng'u wakyeri urukyenyi lo Uyuda waṙichilyie mafumvunyi. 17 Na ai kai alasokye iṙuo shilya shikyeri kanyi kokye. 18 Maa akyeri mṙemenyi alawuye na numa ionduo nguwo yakye. 19 Ochia lo iwo wai wanene na waionza mfiri-yo! 20 Terewenyi, kundu iṙicha lyanyu kulawe kyiyeri kya mbeho, maa mfiri o onyonya. 21 Cha kyipfa kyiyeri-kyo kochiwaṙa wukyiwa wung'anyi, mbaṟe yakye ilandewonekye wookyia mawookyionyi ga wuyana mṟasa wulalu, maa mbaṟe-yo iyo yechiwono-se maa ale-pfo. 22 Na kokooya mfiri-yo ilawechifuhiṟo, mndu oose awechikyia-pfo; kyaindi kyipfa kya wasambuṟe mfiri-yo yechifuhiṟo. 23 Kyiyeri-kyo mndu kammbia, ‘Kristo nakyeri iha, ang'u nakyeri kulya,’ mulaiṙikyie. 24 Cha kyipfa wechiwoneka makristo wa wongo, na weonguo shisuku ga wongo, nawo wechiwuta ṟigo tsing'anyi na shiṟiyisho; waiṙime imuṙetsa, cha kyikaiṙimika, mṟasa wai wasambuṟe. 25 Ngammuikyimbia. 26 Kyasia wakammbia, ‘Nakyeri kundu ko nuka kuumu suwaa kulawoṙe maa mṟinga,’ mulafume; ‘Nakyeri kanyi,’ mulaiṙikyie. 27 Cha kyipfa chandu mbawa yekyewaṟuka iwuka ura lo ngamenyi mṟasa ikawono ura lo kyukonyi, nyi wuṙo kochiwa kyiyeri kya icha lya Mono-Adamu. 28 Cha kyipfa handu mnying'a ukyeri nyi ho-ndu mbeṟo tsekyekuumbia.” 29 “Kyaindi cha ilyi, numa ya wukyiwa wo mfiri iya, mnengyeṟi ochiwiko meema, na mori ochiloṟa ngyesa yacho-pfo, na nyenyeri tsechioloka iwuka ruwewu, na shindo shingyi sha ruwewu shekupaaya-paya na inyanyaṟika. 30 Naaho-ng'u yechiwonekana ṟigo ya Mono-Adamu ruwewu; na masanga goose ga wuyana gechikapa ṟanyi; nago gechiwona Mono-Adamu echicha mapuchinyi ga ruwewu hamwi na pfinya na mng'ano ung'anyi. 31 Na oe nechiṙuma malaika wakye hamwi na ṟui lying'anyi lya iganda, nawo wechisania wasambuṟe wakye iwuka ngyuura tsoose tsa wuyana.” 32 “Kyasia ko mfumu kuloshenyi mfano. Mbaga yakye ikammarisa ioṟia na iwaṙa maṟa, mokyemanya kye kyiyeri kya isambuo kyikyeri kufuhi. 33 Na nyoe taa, ilyi mowona isho shoose, manyenyi kye Mono-Adamu nakyeri kufuhi, moongonyi. 34 Ny'kyaloi, ngammbia, rika-lyi lyechiiṙa-pfo, mṟasa kyiyeri isho shechiafukyia. 35 Ngyina na uruka shechiiṙa, kyaindi, maṙeṙo gako gechiiṙa maa ale-pfo.” 36 “Kyaindi mbonyi tsa mfiri ulya na saa iya kuwoṙe aichi-pfo, maa malaika wakyeri ruwewu, maa Mana, sile Awu amonyi. 37 Cha kyipfa chandu kyiwekyeri kyiyeri kya Noe, nyi wuṙo kochiwa kyiyeri kya icha lya Mono-Adamu. 38 Cha kyipfa chandu kyiwekyeri mfiri iya ilesongoya Mfu wandu waweilya na inyo, wechialyika na ialyiko, mṟasa mfiri ulya Noe aleiṙa na safinenyi 39 walamanye mṟasa Mfu ukocha, ukowarumatsa woose. Nyi wuṙo kochiwa kyiyeri kya icha lya Mono-Adamu. 40 Kyiyeri-kyo wandu wawi wekooya wai ṙemenyi; umwi nawuto ho, umwi naṙio ho. 41 Waka wawi wekooya wesaa; umwi nawuto ho, umwi naṙio ho.” 42 “Kyasia laenyi kyiṙombo; kyipfa muichi nyi mfiri uha Mndumii onyu echicha-pfo. 43 Kyaindi manyenyi kyindo-kyi; kokooya monyi kanyi aweichi kyiyeri mbafu yechicha, nawelaa kyiṙombo, maa awechiṙa numba yakye ifunjo-pfo. 44 Kyipfa kya ikyo na nyoe kuṟeyeṟenyi; cha kyipfa saa mulaikusaṟie Mono-Adamu naicha.” 45 “Kyasia nyi wui-ng'u mṟundi muyendelyi, awoṙe wuṟango, mndumii okye alemwenenga wuchilyi kanyi kokye, naenengye wandu kyelya kyiyeri kyiwaṟi? 46 Agusu mṟundi ulya, mndumii okye echicha namkooye ewuta kuṙo. 47 Ny'kyaloi, ngammbia, nechimwenenga ichilyia shindo shakye shoose. 48 Kyaindi mṟundi ulya mmbicho kagamba mrimenyi kokye, ‘Mndumii oko naikyelyio,’ 49 kawooka ikapa woṙoe, na ilya na inyo hamwi na wananzi. 50 Mndumii o mṟundi-cho neecha mfiri mṟundi-cho alaukusaṟie, na saa alaichi; 51 nechimṙumbuo mateng'eta gawi na immbutia chandu wakulembecheṟi wekyewutio. Nyi lyo-ndu kochiwaṙa wukyiwa na ilya ngakuru.”
1 “Naaho-ng'u Wumangyi wo ruwewu wochifanana na wana wa kyika ikumi, waleira taa tsawo, wakafuma indeambilyia monyi wolyi. 2 Wataanu wawekyeri matondo, na wataanu wawewoṙe wuṟango. 3 Walya wawekyeri matondo waleira taa tsawo, walaṙuo mafuṙa; 4 indi walya wawoṙe wuṟango waleṙuo mafuṙa shindonyi shawo shewika mafuṙa hamwi na taa tsawo. 5 Na lyilya monyi wolyi alekyelyio, woose wakarengyera wakalaa maṙoe. 6 Kyaindi kyio kya mayeleyele, hakawaṙa iiṟuka lya mndu aigamba, ‘Aulya, monyi wolyi; fumenyi mundemwambilyia.’ 7 Cha ilyi wana walya wa kyika woose wakafuma, wakaṟeyeṟa taa tsawo. 8 Walya wai matondo wakawia walya wawoṙe wuṟango, ‘Luenengyenyi shifuṙa shanyu; kyipfa taa tsaṙu tsiruma.’ 9 Kyaindi walya wawoṙe wuṟango wakawagaluo, wechigamba, ‘Chi wuṙo-pfo; gelushika soe na nyoe-pfo. Nanga moyenda ko walya wekyekumba mafuṙa mundeguṟa pfo ganyu.’ 10 Nawo kyiyeri waweiyenda iguṟa, monyi wolyi kacha, na walya wawekuṟeyeṟie wakaiṙa na oe na wolyinyi; moongo ukoshingo. 11 Numa wana walya wa kyika wengyi wakacha, wakagamba, ‘Mndumii, Mndumii, lupfunguye moongo.’ 12 Kagaluo kagamba, ‘Ny'kyaloi, ngammbia, ngyimuichi nyoe-pfo.’ 13 Kyasia laenyi kyiṙombo, cha kyipfa muichi mfiri-cho maa saa-pfo.” 14 “Kyipfa nyi cha mfano o mndu akundi iyenda kyaro. Nalelaga waṟundi wakye, kawaṙambika masaa gakye. 15 Kaenenga umwi talanta tsitaanu, na umwi talanta tsiwi, na umwi talanta imwi; orio mndu iṙuana na wuiṙimi wokye; kayenda kyaro. 16 Cha ilyi ulya aleambilyia talanta tsitaanu kayenda, kakapa natso mbucha, kawona ho kyiira talanta tsingyi tsitaanu. 17 Na wuṙo taa ulya awoṙe tsiwi; oe kawona ho kyiira talanta tsiwi. 18 Kyaindi ulya aleambilyia imwi, naleyenda kasuma wanda terinyi, kaṟika pfo heleri iya ya mndumii okye. 19 Mfiri ifoi yamuiṙe mndumii o waṟundi walya kacha, kaachikyia matala hamwi nawo. 20 Ulya aleambilyia talanta tsitaanu kacha kaende talanta tsingyi tsitaanu, echigamba, ‘Mndumii, nulekooma koko talanta tsitaanu; aitsi talanta tsingyi tsitaanu ndewona ho kyiira.’ 21 Mndumii okye kammbia, ‘Necha, mṟundi mcha na mwendelyi. Nokuloṟa kye numwendelyi maa shindonyi shitutu. Ngyechikuwika mchilyi o shindo shifoi. Iṙa na sienyi ya mndumii opfo.’ 22 Na ulya aleambilyia talanta tsiwi kacha, kagamba, ‘Mndumii, nulekooma koko talanta tsiwi; aitsi, talanta tsingyi tsiwi ndewona ho kyiira.’ 23 Mndumii okye kammbia, ‘Necha, mṟundi mcha na mwendelyi. Nokuloṟa kye numwendelyi maa shindonyi shitutu. Ngyechikuwika mchilyi o shindo shifoi. Iṙa na sienyi ya mndumii opfo.’ 24 Na ulya aleambilyia talanta imwi, kagamba, ‘Mndumii, ngyilemanya kye iyoe nyi mndu muumu. Nokyesambuo handu ulawaaya, nokyesania handu ulaolyie mbeu. 25 Kyasia ngaowuo, ngayenda ngaṟika talanta yapfo terinyi. Wulalu nuwoṙe kyilya kyikyeri kyapfo.’ 26 Mndumii okye kagaluo, kagamba, ‘Iyoe mṟundi mmbicho na mṙoko. Nulemanya kye ngyekyesambuo handu ngyilawaaya, ngyekyesania handu ngyilaolyia mbeu. 27 Kyasia, kyiwekuwaṟi ikooma heleri yako ko walya wekyeilacha heleri; na inyi ngacha ngyiwewona kyilya kyikyeri kyako na heleri ya ngoseṟa. 28 Kyasia, msokyenyi talanta-yo enengyenyi ulya awoṙe talanta ikumi. 29 Cha kyipfa ulya awoṙe kyindo nechienengo, na iengyeṟio pacha; kyaindi alawoṙe kyindo, maa kyilya awoṙe nechisoko. 30 Na mṟundi-cho alawoṙe kyiira, mmbiyitsenyi kuleshi meemenyi o nja. Nyi pfo-ndu kochiwaṙa wukyiwa na ilya ngakuru.’ ” 31 “Kyiyeri-kyo Mono-Adamu echicha mng'anonyi okye na malaika waele woose hamwi na oe, nyi lyo-ndu echiṙamia kyiṙinyi kya mng'ano okye. 32 Na masanga goose gechisanzia mbele yakye; na oe nechiwasawuo chandu mlyisi ekyesawuo moondo na mburu. 33 Nechiwika moondo kuwoko kokye ko kulyoe, na mburu kuwoko kokye ko kumoso. 34 Numa ya iho mangyi nechiwia walya wakyeri kuwoko kokye ko kulyoe, ‘Nnjonyi, nyoe muwawikyie mboṟa nyi Awu-yoko, oṟenyi Wumangyi muleṟeyeṟio wookyia itsano lya wuyana. 35 Cha kyipfa ngyiwewoṙo nyi njaa, mkongyienenga kyelya; ngyiwemwangari mukongyienenga mṟinga o nyo; ngyiwekyeri muyenu, mukongyiambilyia cha mndu onyu; 36 ngyiwemkuuye, mukongyienenga nguwo tseṟaa; ngyiweluoe, mukochengyiwia hai; ngyiwekyeri kyipfungonyi mukochengyisaia.’ 37 Naaho-ng'u wasumganyi wechimgaluo, wechigamba, ‘Mndumii, nyi indi lulekuwona uwoṙo nyi njaa, lukokuenenga kyelya, ang'u umwangari lukokuenenga mṟinga o nyo? 38 Lyingyi-se nyi indi lulekuwona ukyeri muyenu, lukokuambilyia cha mndu oṙu, ang'u umkuuye, lukokuenenga nguwo tseṟaa? 39 Nyi indi-se lulekuwona uluoe, ang'u ukyeri kyipfungonyi, lukokusaia?’ 40 Na Mangyi nechigaluo, echiwawia, ‘Ny'kyaloi ngammbia, chandu mulewutia umwi o wana wa wama-wo wako wai watutu, mulengyiwutia inyi.’ 41 Numa ya iho nechiwia na walya wakyeri kuwoko kokye ko kumoso, ‘Wukyenyi koko, nyoe muwasese, muyende moṙonyi o mlungana, umṟeyeṟie Mokyiriinzi na malaika wakye. 42 Cha kyipfa nyiwewoṙo nyi njaa, mulangyienengye kyelya; ngyiwemwangari, mulangyienengye mṟinga o nyo; 43 ngyiwekyeri muyenu, mulangyiambilyie cha mndu onyu; ngyiwemkuuye, mulangyienengye nguwo tseṟaa; ngyiweluoe, na ngyiwekyeri kyipfungonyi, mulachengyisaia.’ 44 Naaho-ng'u na iwo taa wechigaluo, wechigamba, ‘Mndumii, nyi indi lulekuwona iyoe uwoṙo nyi njaa, ang'u umwangari, ang'u ukyeri muyenu, ang'u umkuuye, ang'u uluoe, ang'u ukyeri kyipfungonyi, lulakupfuṟukanie?’ 45 Na oe newagaluo, echigamba, ‘Ny'kyaloi, ngammbia, chandu mulalewutia umwi o iwo wai watutu, mulengyiwutia inyi-pfo.’ 46 Na iwo wechiyenda na iiṙa na ngaponyi ya mlungana; indi wasumganyi wechiyenda moonyi o mlungana.”
1 Na lyilya Yesu alemarisa ionguo shindo-sho shoose, nalewia wanalosho wakye, 2 “Muichi kye numa ya mfiri iwi kochiwa pasaka, na Mono-Adamu nechiṟiingo nakapio msalabenyi.” 3 Kyiyeri kyilya wang'anyi wa makohanyi, na wasongoru wa wandu, wakasanzia numbenyi ya Mkohanyi ang'anyi kuta woose ekyelago Kayafa; 4 wakachila handu hamwi, kundu wawaṙe Yesu kui ngyeṟo na immbaaga. 5 Kyaindi wakagamba, “Kyilawe kyiyeri kya mfiri ung'anyi, kulacheamka kyituṟu wandunyi.” 6 Na Yesu kyiyeri awekyeri Betania numbenyi ko Simion awewoṙo nyi taambo, 7 mndu mka awewoṙe kyimkyepe kyiwoṙe mafuṙa mecha gekushia ga woguru wung'anyi naletikyira kufuhi na oe, kagaletsia mṙoenyi kokye kyiyeri aweṙamie echilya. 8 Wanalosho wakye kyiyeri walewona, wakasuo, wakagamba, “Iola-ola-lyi ilyi nyi lya kyikyi? 9 Kyipfa mafuṙa-ga gaweiṙima ikumbo ko heleri tsifoi wakyiwa waenengo.” 10 Yesu kamanya, kawawia, “Ny'kyilyi muilyisa mndu mka-chu wukyiwa? Kyipfa nyi iṟunda lyicha angyiṟundia inyi. 11 Cha kyipfa mfiri yoose muwoṙe wakyiwa hamwi na nyoe; kyaindi inyi mungyiwoṙe mfiri yoose-pfo. 12 Kyipfa kui ipusia mmbiu oko mafuṙa-go, nawuta aṙo ingyiṟeyeṟa ko iṟiko lyako. 13 Ny'kyaloi, ngammbienyi orio handu ndumi-i ngyicha yechiongoyo wuyanenyi koose, kyindo-kyo mndu mka-chu aṟunda na kyakye kyegambo kyipfa-kya imkumbuo.” 14 Kyiyeri-kyo umwi o walya ikumi na wawi, awekyelago Yuda Isikariote naleyenda ko wang'anyi wa makohanyi, 15 kagamba, “Ny'kyikyi mochingyienenga, ngamtarama muiṙime immbaṙa?” Wakamteṟia rupia makumi gaṟaaṟu. 16 Wookyia kyiyeri kyilya Yuda kapfula ṙaawa lyicha lyemṟiinga. 17 Na mfiri o kuwooka o mkate ilangyitarang'ishe, wanalosho walya waleyenda ko Yesu, wakammbia, “Nyi hanga ukundi lukuṟeyeṟie ulyiie ho Pasaka?” 18 Kagamba, “Yendenyi mṟinyi ko mndu mlyiwe, mundemmbia, ‘Mlosha nagamba, kyiyeri kyako kyikyisaangye kyikyeri kufuhi; kopfo ngyechiachikyia Pasaka hamwi na wanalosho wako.’ ” 19 Wanalosho wakawuta chandu Yesu alewawia, wakaṟeyeṟa Pasaka. 20 Kyasia kyiyeri kuleila naleṙamia ilya kyelya hamwi na walya ikumi na wawi. 21 Nawo kyiyeri waweilya, nalegamba, “Ny'kyaloi, ngammbia, umwi onyu nechingyiṟiinga.” 22 Wanalosho wakye wakawoṙo nyi fowa mnu, wakawooka immbesa umwi, umwi, “Nyi inyi, Mndumii?” 23 Kagaluo, kagamba, “Icho awika kuwoko kokye hamwi na inyi kyitelenyi, nyi oe echingyiṟiinga. 24 Mono-Adamu naindepfa, chandu kyikyiṟeie; kyaindi ochia lokye mndu ulya echiṟiinga Mono-Adamu! Kyiwechiwa nanga mndu-cho alawefeo.” 25 Yuda, ulya momṟiinga, kagaluo, kagamba, “Nyi inyi, Mlosha?” Kammbia, “Iyoe nogamba.” 26 Nawo kyiyeri waweilya, Yesu naleira mkate, kauwikyia mboṟa, kaupeṟenguo, kaenengyia wanalosho wakye, kagamba, “Waṙilyienyi, mulye. Ichu nyicho mmbiu oko.” 27 Kaira kyiṙoo, kaana, kawaenengyia, echigamba, “Nyonyi moose kyilya kyikyeri kunu 28 cha kyipfa iyi nyi samu yako ya mma, ipusuka kyipfa kya wafoi ko iwuto wunyamaṟi. 29 Kyaindi ngammbia, ngyechinyo-se mpfinyo maa ale-pfo mṟasa kyiyeri ngyechiunyo na nyoe wuyanenyi wuhya wo Awu-yoko.” 30 Nawo kyiyeri walemarisa iimba, wakafuma na nja iyenda fumvunyi lya mashiṙi ga mseituni. 31 Naaho-ng'u Yesu kawawia, “Nyoe moose mochiwihiyo kyipfa kyako kyio-kyi; cha kyipfa kyikyiṟeie, ‘Ngyechiwaaga mlyisi, na moondo ga poo gechinyanyaṟika.’ 32 Kyaindi numa ya iṟuka lyako, ngyechimusongoya iyenda Galyilaya.” 33 Petiro kagaluo, kammbia, “Wakawihiyo woose kyipfa kyapfo, inyi ngyechiwihiyo maa ale-pfo.” 34 Yesu kammbia, “Ny'kyaloi ngakuwia iyoe, kyio-kyi ilying'onyi lyilafuga, nongyikana kaṟaaṟu.” 35 Petiro kammbia, “Maa kokooya ngyechipfa na iyoe, ngyechikukana maa ale-pfo.” Na wanalosho woose wakagamba wuṙo. 36 Numa ya iho Yesu kayenda hamwi nawo mṟasa handu hekyelago Getisemane, kawia wanalosho wakye, “Ṙamienyi iha, mṟasa ngyiyende kulya ngyindeterewa.” 37 Kaṙuo Petiro na wana walya wawi wa Sebedayo, kawooka iiṟewe na iwona fowa mrimenyi. 38 Naaho-ng'u kawawia, “Mrima oko uwoṙo nyi iiṟewe lying'anyi mnu ngyeiṙima maa ipfa. Kaenyi iha, mulae kyiṙombo hamwi na inyi.” 39 Kayenda mbele kyitutu, kaoloka na ndewu, katerewa, echigamba, “Awu-yoko, kyikaiṙimika, ṙombo-lyi lya matuuro lyiiṙe kuleshi na inyi. Kyaindi chi chandu ngyikundi inyi-pfo, indi nyi chandu ukundi iyoe.” 40 Kacha na ko wanalosho walya, kawakooya walee, kawia Petiro, “Ngyesa moiṙima ilaa kyiṙombo na inyi maa saa imwi-pfoe? 41 Laenyi kyiṙombo, muterewe, mulacheiṙa na kyiyeshionyi. Mrima ukundi; kyaindi mmbiu uwoṙe pfinya-pfo.” 42 Kayenda-se lya kawi, katerewa, echigamba, “Awu-yoko kokooya kyilechiiṙimika ṙombo-lyi lya matuuro lyiiṙe kuleshi na inyi, kyilya ukundi kyiwe kuṙo.” 43 Kacha-se, kawakooya walee; kyipfa meso gawo gawewoṙo nyi maṙoe malemeri. 44 Kawaṙa-se, kayenda, katerewa lya kaṟaaṟu, echigamba maṙeṙo galya galya. 45 Numa ya iho kacha na ko wanalosho wakye, kawawia, “Laenyi wulalu, muonyonye. Saa yamtikyira kufuhi, na Mono-Adamu nechiwiko mawokonyi ga wanyamaṟi. 46 Amkyenyi, sindenyi! Ulya aingyiṟiinga amtikyira kufuhi.” 47 Kyasia kyiyeri aweiṙeṙa, Yuda, umwi o walya ikumi na wawi, kacha, aṙuṙanyi na ṟiima lying'anyi lya wandu wawoṙe ngyuushu na ṟungu, wawuka ko wang'anyi wa makohanyi na wasongoru wa wandu. 48 Na ulya momṟiinga nalekoamuwaenenga kyiṟingyishio, echigamba, “Icho ngyechimkomba, nyi oe; mmbaṙenyi.” 49 Cha ilyi kayenda ko Yesu, kagamba, “Ngakuiṟikyiṟa, Mlosha.” Kamkomba. 50 Yesu kammbia, “Mbuya yako, ṟunda ikyo kyakuende.” Wakayenda, wakagoṟuo mawoko gawo wakawaṙa Yesu. 51 Na umwi o walya wawekyeri hamwi na Yesu kagoṟuo kuwoko kokye, kawuta ushu lokye, kamanya isinga lya Mkohanyi ang'anyi kuta woose, kalyiṙumbuo kuṙwi. 52 Naaho-ng'u Yesu alemmbia, “Wiyiṟa ushu lopfo na halya-ndu luwekyeri; kyipfa woose wekyekapana kui ushu wechirumatso kui ushu. 53 Ang'u nokusaṟa kye inyi ngyechiiṙima iterewa Awu-yoko, na oe nangyiendie wulalu kuṙi ngyuulyimalyi tsa malaika tsifoi kuta ikumi na tsiwi-pfoe? 54 Kyasia kokooya Ruwa aṙika ngyuulyimalyi tsengyikapania shiṟeio shechiafutsio kuṙa kye isho nyisho shiwaṟi iwa?” 55 Saa iya Yesu kawia wuingyi wo wandu, “Ngyesa mofuma cha ilyi mundewaṙa msokyi, muwoṙe ngyuushu na ṟungu, ingyiwaṙa? Orio mfiri ngyileṙamia hekalunyi ngyechilosha, mulangyiwaṙe. 56 Kyaindi ishi shoose shawa, kundu shiṟeio sha weonguo shisuku shiwe chandu shigambie.” Naaho-ng'u wanalosho woose wakamṙa wakaṙicha. 57 Nawo wakawaṙa Yesu wakamṙuo ko Kayafa, Mkohanyi ang'anyi kuta woose, handu wawesanzie walosha wa mawawaso na wasongoru. 58 Na Petiro kamwosha ai kuleshi mṟasa numba ya Mkohanyi ang'anyi kuta woose, kaiṙa na numba, kaṙamia hamwi na waṟundi, nawone mafurumionyi. 59 Kyasia wang'anyi wa makohanyi na mengye yoose wakapfula wandu weṟingyishia Yesu shindo sha wongo, waiṙime immbaaga; 60 walawone, maa chandu waṟingyishi wa wongo wafoi walecha. 61 Kyaindi numa ya iho kukocha waṟingyishi wawi, wakagamba, “Ichu nalegamba, ‘Ngyeiṙima ifunja hekalu lya Ruwa, na ilyiwika-se numa ya mfiri iṟaṟu.’ ” 62 Kyasia Mkohanyi ang'anyi kuta woose kammbia, “Ugaluo kyindo? Iwa nyi kyikyi waikuṟingyishia?” 63 Kyaindi Yesu katsia sau. Mkohanyi ang'anyi kuta woose kammbia, “Ngakututuma ulye nyamu kui rina lya Ruwa ai na moo, uluwie kokooya iyoe nyi oe Kristo, Mono-Ruwa.” 64 Yesu kammbia, “Iyoe nogamba; kyaindi ngammbia, wookyia wulalu mochiwona Mono-Adamu aṙamie kuwoko ko kulyoe ko Ruwa echicha mapuchinyi ga ruwewu.” 65 Naaho-ng'u Mkohanyi ang'anyi kuta woose karanduo mkoṟoṟi okye, echigamba, “Nalahia Ruwa. Lukundi-se wuṟingyishi wo ngoseṟa maa ale-pfo. Wulalu momuicho chandu alahia Ruwa. 66 Muwonyi kuṙa nyoe?” Wakagaluo, wakagamba, “Nawaṟi iwoogo.” 67 Naaho-ng'u wakampuchia maṙa ipfo kyaam, wakamkapa nzina; wengyi wakamkapa ngofi, 68 wechigamba, “Iyoe Kristo lutambuluye; nyi wui akukapa?” 69 Na Petiro naweṙamie nja ya numba iya. Kyisinga kyimwi kyikayenda kokye, kyikagamba, “Na iyoe nuwekyeri hamwi na Yesu o Galyilaya.” 70 Kakana mbele ya woose, echigamba, “Ngyiichi ikyo uigamba-pfo.” 71 Na oe kyiyeri alefuma na nja mṟasa kyichuminyi kyisinga kyingyi kyikammbona, kyikawia wandu wawekyeri pfo, “Ichu nawekyeri hamwi na Yesu o Nasareti.” 72 Kakana-se kui nyamu, “Ngyiichi mndu-chu-pfo.” 73 Halaiṙa kyiyeri kyileshi, walya walecha na halya wakayenda kokye, wakammbia, “Petiro, ny'kyaloi iyoe nyi umwi owo; kyipfa maa mṙeṙie opfo ukumanyisha.” 74 Naaho-ng'u Petiro kagamba, “Ngalya nyamu ngyigamba kya loi! Ruwa nangyikape kokooya ngyilaigamba kya loi! Ngyiichi mndu-chu-pfo!” Na cha ilyi ilying'onyi lyikafuga. 75 Petiro kakumbuo kyindo kyilya Yesu alegamba, “Ilying'onyi lyilafuga, nongyikana kaṟaaṟu.” Kafuma na nja katonyitsa mcheṟeṟe ya fowa.
1 Na kyiyeri kulekya, wang'anyi wa makohanyi woose na wasongoru wa wandu wakaṙamia kyama chandu weiṙima iwaaga Yesu. 2 Wakampfunga, wakammbuta halya, wakamṙambika ko Pilato awekyeri mchilyi o uruka lulya. 3 Numa ya iho Yuda, ulya momṟiinga, kyiyeri alewona kye amwanduyo kamanya wuwicho wo kyilya aleṟunda, kawiyiṟia wang'anyi wa makohanyi na wasongoru rupia tsilya makumi gaṟaaṟu, kagamba, “Ngyileṙeko kyiyeri ngyileṟiinga mndu alawoṙe ṙeko.” 4 Wakagamba, “Kyasia, soe luwoṙo pfo-pfo. Isho nyi shapfo kumonyi.” 5 Kawiyitsa rupia tsilya hekalunyi kafuma, kandekuwika kyigowo kapfa. 6 Wang'anyi wa makohanyi wakasania rupia tsilya, wakagamba, “Chi sungusinyi itsisanza na shienengo sha numbenyi ya Ruwa-pfo, cha kyipfa nyi wori wo ipusuo samu.” 7 Wakaṙamia kyiṙombo, wakaṙumbuo iguṟa ṙema lya mndu ekyeachikyia shinungu na heleri tsilya, hakawa handu heṟika wayenu wapfa. 8 Koikyo ṙema-lyo lyekyelago ṙema lya samu mṟasa inu. 9 Naaho-ng'u kyikaafukyia kyindo kyilya kyileṙeṙo nyi moonguo shisuku Yeremia, echigamba, “Walewuta rupia makumi gaṟaaṟu, kyindo wandu waata wa Isiraelyi waleiṙikyiana na oe imtaa; 10 wakaguṟa natso ṙema lya mndu ekyeachikyia shinungu chandu Mndumii alengyiwia.” 11 Na Yesu kagoṟoka mbele ya ulya awekyechilyia uruka lulya. Mchilyi-cho kammbesa, kagamba, “Iyoe nyi oe mangyi o Wayuda?” Yesu kammbia, “Iyoe nogamba.” 12 Kyaindi kyiyeri wang'anyi wa makohanyi na wasongoru walewia Yesu kye nammbicho alegaluo kyindo-pfo. 13 Naaho-ng'u Pilato kammbia, “Uichuo mawicho-ga goose waikusendia?” 14 Alamgaluo maa kyindo kyimwi mṟasa mchilyi ulya kaṟiyio mnu. 15 Kyasia kyiyeri kya mfiri ung'anyi o Pasaka, mchilyi ulya naweichiwie ipfunguo mpfungo umwi wandu wamkunda. 16 Kyasia kuwewoṙe mpfungo orio mndu awemwichi kyipfa kya wuwicho wokye, ekyelago Baraba. 17 Kyasia kyiyeri wandu walesanzia handu hamwi Pilato kawawia, “Mukundi ngyimpfunguye wui? Baraba ulya, ang'u Yesu ekyelago Kristo?” 18 Cha kyipfa nalemanya kye walemṙambika kokye kui wunyenyi. 19 Na kyiyeri Pilato aweṙamie kyiṙinyi kyakye echiṙumbuo moondu, mka okye nalemṙumia ndumo, immbia, “Ulawutie mndu-cho msumganyi kyindo kyoose; cha kyipfa kyio-kyi kyaamkyia inu ngyileloṙo kyakye ngawihiyo mnu.” 20 Na wang'anyi wa makohanyi na wasongoru wa wandu wakawanzia wuingyi wulya wo wandu wuwie Pilato napfunguo Baraba, na iwaaga Yesu. 21 Kyasia mchilyi ulya kagaluo, kawawia, “Mukundi ngyimpfunguye wui kyiiṙi kya iwa wawi?” Wakagamba, “Baraba.” 22 Pilato kawawia, “Kyasia, Yesu-chu ekyelago Kristo ngyimmbutie kyi?” Wakagamba woose, “Nakapio msalabenyi.” 23 Kagamba, “Ny'kyi? Wuwicho wokye nyi kyikyi?” Wakaengyeṟa mnu ikalagatsa, wechigamba, “Nakapio msalabenyi.” 24 Kyasia kyiyeri Pilato alewona kuwoṙe kyiira kyoose-pfo, indi kyituṟu kyikundi iamka, kaira mṟinga, kasamba mawoko gakye mbele ya wuingyi wulya wo wandu, kagamba, “Inyi ngyiwoṙe ṙeko samunyi ya mndu-chu msumganyi-pfo. Ilyi nyi iṟunda lyanyu nyoe.” 25 Wandu woose wakagaluo wakagamba, “Leka samu ya mndu-chu iwe wuye yaṙu na ko wana waṙu.” 26 Naaho-ng'u kawapfunguya Baraba; na ammarise igamba Yesu nakapo na ngowa, kamṙambika ko ngyuulyimalyi tsakye wandemkapia msalabenyi. 27 Naaho-ng'u asikari wa mchilyi o uruka lulya wakaṙuo Yesu mṟasa Praitorio ngyuulyimalyi tsingyi tsoose tsikakuumbia halya-ndu awekyeri. 28 Wakammbuta nguwo, wakamṟika ikunya lyifanyi kyimaande. 29 Wakaoka oṟo ya msha, wakamṟika mṙoenyi kokye, wakammbikyia upoi lo wuchilyi kuwokonyi kokye ko kulyoe; wakapfiria ndi mbele yakye, wakamkapa makuukuu, wechigamba, “Lokuiṟikyiṟa, Mangyi o Wayuda!” 30 Numa ya iho wakampuchia maṙa, wakaira upoi lulya, wakamkapa mṙoenyi. 31 Wammarise imkapa makuukuu, wakawuta ikunya lyilya, wakamṟika mkoṟoṟi okye, wakamṙuo imkapia msalabenyi. 32 Na lyilya waweiwuka kulya mṟinyi wakawona mndu o Kyirene, ekyelago Simion; ichu wakamwitika nakuṙikye msalaba okye. 33 Na kyiyeri waleshika handu hekyelago Golyigota, kyimwi na igamba, “Ipoṟong'u,” 34 wakamwenenga mpfinyo umsanze-sanze na mṟinga o nduu nanyo; kyaindi oe kyiyeri aleukomba na ulumi lokye alakunde inyo. 35 Wammarise imkapia msalabenyi, wakagawa mkoṟoṟi okye wechikapa kuṟu kuha; kundu kyiafukyie kyindo kyilya kyileṙeṙo nyi moonguo shisuku, “Walegawiana nguwo tsako; na kyipfa kya ikunya lyako walekapa kuṟu kuha.” 36 Wakaṙamia wakamringa halya. 37 Wakawikyia wuye ya mṙoe okye kyindo kyeloṟa kyimaṙuma kyewoogo, kyindo kyikyiṟeie: “ICHU NYI YESU, MANGYI O WAYUDA.” 38 Kyiyeri kyilya kyilya wasokyi wawi wakakapio msalabenyi hamwi na oe, umwi kuwoko kokye ko kulyoe, na umwi kuwoko kokye ko kumoso. 39 Na wandu wawekuiṙia wakamlahia, wechisunza-sunza mṙoe yawo, na igamba, 40 “Iyoe ochiiṙima ifunja hekalu na ilyiwika-se numa ya mfiri iṟaṟu, kukyiṟe mrima opfo. Kokooya iyoe nyi mono-Ruwa, soka iho msalabenyi.” 41 Na wang'anyi wa makohanyi taa wakamkapa makuukuu hamwi na walosha wa mawawaso wechigamba, “Nalekyiṟa wengyi, aiiṙima ikukyiṟa amonyi-pfo. 42 Oe nyi mangyi o Isiraelyi; wulalu nasokye msalabenyi, na soe lochimwiṙikyia. 43 Nalekuwaṙa na Ruwa; namkyiṟe wulalu, kokooya namkundi; cha kyipfa nalegamba, ‘Inyi nyi Mono-Ruwa.’ ” 44 Na wasokyi walya walekapio msalabenyi hamwi na oe walemlahia wuṙo. 45 Kyasia wookyia saa tsiṟandaaṟu kulewaṙa meema wuye ya uruka loose mṟasa saa kyenda. 46 Na cha saa kyenda, Yesu kakuilenga na ṟui lying'anyi echigamba, “Eloi, Eloi, lama sabakyitani?” Kyimwi na igamba, “Ruwa oko, Ruwa oko, ny'kyilyi ongyiṙa?” 47 Na kyiyeri wandu waata wawekyeri halya waleicho, walegamba, “Ichu nailaga Elyiya.” 48 Cha ilyi umwi owo kayenda eṙicha, kaira kyindo kyekyeongyia mṟinga, kakyiichuṟa mṟinga okyetarang'ia, kakyipfungyia upoinyi, kamrutsa. 49 Walya wengyi wakagamba, “Leka luwone kokooya Elyiya nechicha imkyiṟa.” 50 Na Yesu amkuilengye-se na ṟui lyakye ko pfinya, kalekyia moo. 51 Na isulyia lyeshingyia ipfo hekalunyi lyikaranduka kawi wookyia wuye mṟasa wanda. Uruka lukoṙeṙema; na maṟaṟa gang'anyi gakapaṟika. 52 Shilome shikaṟuguka; mmbiu ifoi ya waele wapfiie ikaamka. 53 Nawo wammbukye shilomenyi shawo, numa ya iṟuka lyakye, wakaiṙa na mṟinyi mweele, wandu wafoi wakawawona. 54 Kyasia mchilyi ulya, na iwo wawekyeri hamwi na oe wechiringa Yesu, kyiyeri walewona kyiriinza na chandu mbonyi tsilewa, wakaowuo mnu, wechigamba, “Ny'kyaloi ichu nawekyeri Mono-Ruwa.” 55 Hawewoṙe na waka wafoi halya wechiambuya wakyeri kuleshi. Iwo nyiwo waleosha Yesu iwuka Galyilaya, na imṟundia. 56 Kyiiṙi kyawo nawekyeri ho Maria Makyidalena, na Maria mama o Yakobo na Yosefu na mama o wana wa Sebedayo. 57 Na lyilya kuleila mndu mnjama o Arimataya ekyelago Yosefu kacha, na oe nawekyeri manalosho o Yesu. 58 Mndu-chu naleyenda ko Pilato, katerewa mmbiu o Yesu. Naaho-ng'u Pilato kagamba naenengo mmbiu-cho. 59 Yosefu kaira mmbiu ulya, kauaṟahia sandenyi ya uwiṟo, 60 kauwikyia kyilomenyi kyakye kyihya, awekyiachikyie igoenyi; kaiṟimitsia igoe lying'anyi mbele ya moongo o kyilome, kawuka ho. 61 Na halya wawekyeri ho Maria Makyidalena, na Maria ulya o kawi, waṙamie weambuyana na kyilome kyilya. 62 Na Mfiri o kawi, numa ya mfiri o ikuṟeyeṟa lya mfiri o onyonya, wang'anyi wa makohanyi, na Mafarisayo walekooyana na Pilato, 63 wakagamba, “Mndumii, lokumbuo kye ulya ekyeṙeṙa wongo nalegamba kyiyeri-kyo awei na moo, ‘Numa ya mfiri iṟaṟu nechiṟuka!’ 64 Kyasia gamba kye kyilome-kyi kyiringo necha mṟasa mfiri o kaṟaaṟu; wanalosho wakye walachemwiwa, na iwia wandu, ‘Naṟuka ko wapfu; na wulembi wo mafurumionyi wukong'ana kuta wulya wo mawookyionyi.’ ” 65 Pilato kawawia, “Muwoṙe asikari; yendenyi munderinga necha kyilome chandu muichi.” 66 Wakayenda, wakaringa kyilome necha, kui iwikyia igoe lyilya kyiṟingyishio kyiwoṙe mfano owo, hamwi na asikari walya waringyi.
1 Na lyilya mfiri o onyonya uleiṙa, ochikya mfiri o kuwooka o juma Maria Makyidalena, na Maria ulya o kawi, waleyenda indeambuya kyilome kyilya. 2 Na hawewoṙe kyiriinza kying'anyi kya uruka; kyipfa malaika o Mndumii nalesoka iwuka ruwewu, kacha kaiṟimitsa igoe lyilya kalyiṙamilyia. 3 Na fana yakye iwekyeri cha mbawa, na mkoṟoṟi okye mwiilyi cha Kyipoo. 4 Na kui imwowuo, waringyi walya wakaṙeṙema, wakawa cha wapfu. 5 Malaika kagaluo, kawia waka walya, “Mulaowuoe, cha kyipfa ngyiichi kye muipfula Yesu alekapio msalabenyi. 6 Akyeri iha-pfo; kyipfa amṟuka, chandu alegamba. Nnjonyi, muambuye handu awemlaṟe. 7 Na nyoe yendenyi faṟa, mundewia wanalosho wakye, amṟuka ko wapfu. Naimusongoya iyenda Galyilaya. Nyi pfo-ndu mochimmbona. Aikyonyi-ng'u, ngamummbia.” 8 Wakafuma iwinyi iwuka kyilomenyi, kui wuowu na sia ing'anyi, wakayenda weṙicha iongoya wanalosho wakye mbonyi. 9 Na Yesu kakarisana nawo, echigamba, “Ngamuiṟikyiṟa!” Wakatikyira kufuhi wakammbaṙa maṙende, wakamwindia. 10 Numa ya iho Yesu kawawia, “Mulaowuoe. Yendenyi, mundewia wana wa wama wako wayende Galyilaya. Nyi pfo-ndu wechingyiwona.” 11 Na walya kyiyeri waweiyenda, asikari waata waleiṙa na mṟinyi, wakaongoya wang'anyi wa makohanyi mbonyi tsa shindo shoose shileṟundika. 12 Wakasanza hamwi na wasongoru, wakachila, wakaenenga asikari heleri tsifoi, 13 wechigamba, “Gambenyi kye wanalosho wakye walecha kyio, wakamwiwa, kyiyeri soe luwelee. 14 Na mbonyi-tsi tsikamanyika ko mchilyi o uruka-lu, soe loṙeṙa na oe, na echimmbutia kyindo kyiwicho-pfo.” 15 Kyasia wakaambilyia heleri tsilya, wakawuta chandu walelosho. Na mbonyi-tso tsikaṙunganana ko Wayuda mṟasa inu. 16 Na wanalosho walya ikumi na umwi wakayenda Galyilaya mṟasa fumvu lyilya Yesu alewawia. 17 Nawo kyiyeri walemmbona, walemwindia; kyaindi waata walewaṙa iiṙikyia lyaangu. 18 Yesu kacha na kowo, kaṙeṙa nawo, kawawia, “Ngyimṙambikye wuchilyi woose ruwewu na wuyanenyi. 19 Kyasia, yendenyi, mundegaluo masanga goose iwa wanalosho, mochiwapatisa kui rina lya Awu, na Mana, na Mumuyo Mweele; 20 na iwalosha iosha shoose ngyilemmbi nyoe. Na inyi ngyikyeri na nyoe mfiri yoose, mṟasa mafurumionyi ga wuyana.”
1 Iyi nyi Ndumi Ngyicha ya Yesu Kristo, Mono-Ruwa, 2 chandu ingyiṟeie nyi moonguo shisuku Yesaya, “Ambuya, ngyiṙuma mndu awoṙe ulogo loko, mbele ya ushangu lopfo, echiachikyia njia yapfo, 3 Ṟui lya mndu aipoṟogoṟia nuka, reyeṟenyi njia ya Mndumii, Goṟotsenyi kundu echiiṙia.” 4 Yohane nalewoneka, echipatisia kundu ko nuka, na ionguo mbonyi, kundu wandu waṙumbuye wunyamaṟi na ipatiso; na Ruwa nawahooṟie maṙeko. 5 Wandu wafoi mnu wa uruka lo Uyuda wakayenda kokye, na wandu wa Yerusalemu, wakapatiso mfonyi o Yoridan, wechitocha wunyamaṟi wowo. 6 Na Yohane naweṟee mapfukye ga ngamia na ukowa lo njonyi kyitsinyi kyakye, kalya nzie na wukyi wo nguṙunyi. 7 Kalosha echigamba, “Numa yako kuicha awoṙe pfinya kuta inyi. Icho inyi ngyiwaṟi iarama na ituruchuo ngowa tsa shiaṙu shakye-pfo. 8 Inyi ngyilempatisa nyoe kui mṟinga; indi oe nechimpatisa nyoe kui Mumuyo Mweele.” 9 Kyasia mfiri iya, Yesu nalecha awuka Nasareti ya Galyilaya, kapatiso nyi Yohane kulya Yoridan. 10 Na chailyi kyiyeri aleṙo awuka mṟingyenyi, kawona mapuchi geseia na Mumuyo, cha mbuna, echimsokyia. 11 Na ṟui lyikawuka ruwewu, lyikagamba, “Iyoe nyi oe Mono-ko, mkunde oko; ngyimchihiye kyipfa kyapfo.” 12 Cha ilyi Mumuyo kammbuta nayende kundu ko nuka. 13 Kakaa ipfo nukyenyi ngyiumu suwaa ilawoṙe maa mṟinga mfiri makumi gaana, echiyesho nyi Satana. Na oe nawekyeri hamwi na mando ga saka, na malaika wawemṟundia. 14 Kyasia Yohane ammbiko kyipfungonyi, Yesu kayenda Galyilaya, echionguo Mbonyi Ngyicha tsa Ruwa, 15 echigamba, “Kyiyeri kyamshika, na Wumangyi wo Ruwa womtikyira kufuhi; ṙumbuyenyi wunyamaṟi na iiṙikyia Ndumi Ngyicha.” 16 Na oe kyiyeri aweiiṙa mbai ya ipalyipalyi lya Galyilaya, kawona Simion na Anderea, mono-wamae, wechiwiyitsa iṟambika ipalyipalyinyi; cha kyipfa wawekyeri wandu wekyeṙeia makunga. 17 Yesu kawawia, “Nnjonyi mungyioshe, na inyi ngyemugaluo wandu wekyeṙega wandu.” 18 Cha ilyi wakaṙa ngowa tsawo tseṙega makunga, wakamwosha. 19 Kayenda mbele kyitutu, kawona Yakobo o Sebedayo na Yohane, mono-wamae; nawo taa wawei ngalawenyi, wechiachikyia ngowa tsawo tseṙega makunga. 20 Cha ilyi kawalaga, wakaṙa awu-yawo Sebedayo ngalawenyi hamwi na wandu wa wori, wakayenda, wakamwosha. 21 Wakayenda mṟasa Kaperinaumu, na cha ilyi mfiri o onyonya kaiṙa na sinagoginyi, kalosha. 22 Wakaṟiyio mnu kyipfa kya malosho gakye; cha kyipfa naweiwalosha cha mndu awoṙe wuchilyi, maa chi cha walosha wa mawawaso-pfo. 23 Na cha ilyi hawewoṙe sinangoginyi lyawo mndu awoṙo nyi mṟufui mmbicho. Kakuilenga na ṟui lying'anyi, 24 echigamba, “Luwoṙe kyi na iyoe, Yesu o Nasareti? Ngyesa nocha ilurumatsa? 25 Ngyikuichi iyoe nyi Mweele o Ruwa.” Yesu kamṙeṙia, echigamba, “Tsia sau, uwukye ko mndu-chu.” 26 Mṟufui ulya mmbicho kamṙeṙemsha cha mndu ekyeuma nguku, kafiiṟa na ṟui lying'anyi, kammbuka. 27 Wakaṟiyio woose, mṟasa wakawesana, wechigamba, “Ny'kyikyi ikyi? Nyi wuṟango wuhya! Kyipfa kui wuchilyi naiṙeṙia maa waṟufui wawicho, nawo wakamwindia!” 28 Cha ilyi mbonyi tsakye tsikaṙunganana orio handu ngyuurukyenyi tsoose tsa mṟasenyi o Galyilaya. 29 Na kyiyeri walewuka sinagoginyi, waleshika kanyi ko Simion na Anderea, hamwi na Yakobo na Yohane. 30 Na mamka o Simion, nawekyeri kyitaṟenyi, nawoṙo nyi isemu; na cha ilyi wakammbia mbonyi tsakye. 31 Katikyira kufuhi na oe, kammbaṙa kuwoko kokye kamwira, isemu lyikamleka, kawaṟundia. 32 Kyasia kyiyeri kuleila, na mnengyeṟi omwolokyie, wawemwendie woose walawekuiṙima, na wawoṙo nyi waṟufui wawicho. 33 Na wandu wafoi mnu wa mṟi ulya wawekuumbie moongonyi. 34 Kakyiṟa wafoi wawewoṙe ndoṟe tsa orio mbaṟe, kawuta waṟufui wafoi wawicho, maa alelekyia waṟufui wawicho iṙeṙa-pfo, cha kyipfa wawemwichi. 35 Kyasia ngamenyi utuko, kafuma kayenda handu halawoṙe wandu, kandeterewa. 36 Simion na oṙoe wakamwosha. 37 Nawo kyiyeri walemmbona wakammbia, “Wandu woose waikupfula.” 38 Kawawia, “Sindenyi handu hengyi, mṟasa shikaṟo shikyeri kufuhi, na ipfo ngyiiṙime ionguo pfo mbonyi; kyipfa ikyo nyikyo kyilengyiende.” 39 Kayenda echionguo mbonyi masinagoginyi gawo, urukyenyi loose lo Galyilaya, na iwuta waṟufui wawicho. 40 Mndu awoṙo nyi taambo kacha na kokye, echimpfiria ndi, na imterewa, echigamba, “Kokunda noiṙima ingyulyisha na ingyiwuta ndoṟe-i.” 41 Na oe kawona fowa mrimenyi kyipfa kyakye, kalesha kuwoko kokye, kampaaya, kammbia, “Ngyikundi, ila.” 42 Na cha ilyi taambo lyakye lyikammbuka, kaila. 43 Kamwima na pfinya, kammbuta ho cha ilyi, 44 kammbia, “Ulawie mndu kyindo kyoose, indi yenda undekuloṟa ko mkohanyi, undeenengyia kyiṙaso chandu Mose alegamba kyipfa kya iila lyapfo, kyiwe wuṟingyishi kowo.” 45 Kyaindi kafuma, kuwooka iṙeṙa maṙeṙo gafoi, na igamba kyindo kyilya, mṟasa Yesu alaiṙime-se iiṙa na mṟinyi kulawoṙe ikuṟiika; indi nawekyeri nja handu halawoṙe wandu. Wandu wakayenda kokye wawuka ngyuura tsoose.
1 Kaiṙa-se na Kaperinaumu hamwiṙe mfiri ifoi, kyikamanyika kye nakyeri kanyi. 2 Halya kanyi hakasanzia wandu wafoi halatsugae maa ṙaawa moongonyi. Kawaongoya Ṙeṙo lyakye. 3 Kukocha wandu wechimwendie mndu apfiie ngapfu, aṙuṙo nyi wandu waana. 4 Na kyiyeri walelemo itikyira kufuhi na oe kyipfa kya wuingyi wo wandu, waletocha kai halya-ndu awekyeri; na wammarise iifunja walesotsa ikondoṟo mndu ulya apfiie ngapfu awelyilaaye. 5 Na Yesu, kyiyeri alewona iiṙikyia lyawo, kawia ulya apfiie ngapfu, “Mono-ko, omhooṟio ngyuunyamaṟi tsapfo.” 6 Na walosha waata wa mawawaso wawekyeri pfo, waṙamie, wechikusaṟa mrimenyi kowo, 7 “Ny'kyilyi ichu aigamba kuṙi? Nailahia Ruwa. Nyi wui echiiṙima ihooṟia wunyamaṟi sile umwi tupu, nyi oe Ruwa?” 8 Cha ilyi Yesu kamanya mrimenyi kokye kye waikusaṟa kuṙo mrimenyi kowo, kawawia, “Ny'kyilyi muikusaṟa kuṙi mrimenyi konyu? 9 Kyii kyaangu nyi kyiha, iwia apfiie ngapfu, ‘Nohooṟio ngyuunyamaṟi tsapfo’, ang'u igamba, ‘Amka ukuṙikye ikondoṟo lyapfo uyende?’ 10 Kyaindi muiṙime imanya kye Mono-Adamu nawoṙe wuchilyi wuyanenyi wo ihooṟia wunyamaṟi.” Iho naiwia ulya apfiie ngapfu, 11 “Ngakuwia, amka, ukuiṙikye ikondoṟo lyapfo uyende kanyi kopfo.” 12 Cha ilyi kaamka, kakuṙika ikondoṟo lyakye, kawuka mbele yawo woose; mṟasa wakaṟiyio woose, wakang'anyisa Ruwa, wechigamba, “Mbaṟe-i iyi lulandeenengo iiwona maa ale-pfo.” 13 Kafuma-se kayenda mbai ya ipalyipalyi, wandu woose wa kyisanzionyi wakayenda kokye kawalosha. 14 Na kyiyeri aweiiṙa, kawona Lewi, mana o Alyifayo, aṙamie handu hesania ukamba mbai ya ipalyipalyi, kammbia, “Ngyiosha.” Kaamka kamwosha. 15 Na kyiyeri aweṙamie kanyi kokye echilya, wesania ukamba wafoi na wanyamaṟi waleṙamia hamwi na Yesu na wanalosho wakye; cha kyipfa wawei wafoi wechimwosha. 16 Na walosha wa mawawaso na Mafarisayo kyiyeri walemmbona echilya hamwi na wesania ukamba na wanyamaṟi, walewia wanalosho wakye, “Ny'kyilyi ailya hamwi na wesania ukamba na wanyamaṟi?” 17 Kyiyeri Yesu aleicho nalewawia, “Walaluoe wekyepfula mganga-pfo, kyaindi walya walaikuiṙima. Ngyilecha ilaga wasumganyi-pfo, indi wanyamaṟi.” 18 Na wanalosho wa Yohane na Mafarisayo wawekyekuretekyia. Kyasia walecha, wakammbia, “Ny'kyilyi wanalosho wa Yohane na wanalosho wa Mafarisayo wekyekuretekyia, indi wanalosho wapfo wekyewuta kuṙo-pfo?” 19 Yesu kawawia, “Walage wolyinyi weiṙima kuṙa ikuretekyia kyiyeri monyi wolyi akyeri hamwi nawo? Kyiyeri kyoose monyi wolyi akyeri hamwi nawo wechiiṙima ikuretekyia-pfo. 20 Kyaindi kuicha mfiri monyi wolyi echiwuto kowo, nyi lyo-ndu wechiṙa ikuretekyia mfiri-cho. 21 Kuwoṙe mndu ekyewika kyiṙami kya nguwo ngyihya ikunyenyi lyiku-pfo; kawika kuṙo, kyilya kyihya kyawiko ho kyechinyamaṟa ikunya-lyo lyiku, na halya-ndu harandukyie hekyeengyeṟika. 22 Maa kuwoṙe mndu ekyewika mpfinyo shisagenyi shiku-pfo. Kokooya awika, mpfinyo ulya ochipaṟa shisaga-sho, mpfinyo ukopusuka, shisaga shilya shikanyamaṟika. Indi nekyewika mpfinyo shisagenyi shihya.” 23 Kyiyeri aweiiṙa maṙemenyi mfiri o onyonya wanalosho wakye wai kyaronyi walewooka iṙumbuo magaa ga nganu. 24 Mafarisayo wakammbia, “Ny'kyilyi waiwuta kyindo kyilai kya sungusinyi mfiri o onyonya?” 25 Kawawia, “Muichi chandu Dawidi aleṟunda, kyiyeri awemfooye, na iwoṙo nyi njaa, oe na oṙoe? 26 Chandu aleiṙa na numbenyi ya Ruwa, kacha kyiyeri kya Abiatari, Mkohanyi ang'anyi kuta woose, kalya mkate iya Ngyeele, ilawaṟi ilyio nyi mndu sile makohanyi, kaenenga na oṙoe?” 27 Kawawia, “Mfiri o onyonya ulewiko kyipfa kya mndu, chi mndu kyipfa kya mfiri o onyonya-pfo. 28 Kyasia Mono-Adamu nyi oe Mndumii o mfiri o onyonya taa.”
1 Kaiṙa-se na sinagoginyi; napfo kuwewoṙe mndu awoṙe kuwoko kupfiie ngapfu. 2 Wakamwowelyia kundu wawone kokooya nemkyiṟa mfiri o onyonya; waiṙime imṙuo mengyenyi. 3 Kawia ulya awoṙe kuwoko kupfiie ngapfu “Goṟoka makyiṙi-gawi.” 4 Kawawesa, “Nyi sungusinyi mfiri o onyonya iwuta shicha ang'u iwuta shiwicho? Ikyiṟa mrima ang'u iuwaaga?” Wakatsia. 5 Kawaitukuya ngyuura tsoose ko nyashi, echiwoṙo nyi fowa mrimenyi kyipfa kya wuumu wo mrima yawo. Kawia mndu ulya, “Goṟuo kuwoko kopfo.” Na oe kagoṟuo kuwoko; kuwoko kokye kukowaṙa-se pfinya. 6 Cha ilyi Mafarisayo walya wakayenda, wakachila mbonyi tsakye hamwi na Maherodi, chandu wechimrumatsa. 7 Na Yesu kakaa kuleshi, oe na wanalosho wakye, kayenda ipalyipalyinyi. Wuingyi wung'anyi wo wandu wukomwosha, iwuka Galyilaya na Uyuda, 8 na Yerusalemu, na Idumaya, na molyolya o Yoridan, na ngyuura tsa Tiro na Sidon. Wuingyi wung'anyi wo wandu kyiyeri waleicho mbonyi tsoose tsa shindo awekyeri iṟunda, wakayenda kokye. 9 Kawia wanalosho wakye kye kyingalawa kyitutu kyikae kufuhi na oe, kundu wuingyi wo wandu wulampeṟeetse. 10 Cha kyipfa nalekyiṟa wafoi, mṟasa woose wawewoṙe ngyuukyiwa wakamraia waiṙime impaaya. 11 Na waṟufui wawicho, orio kyiyeri walemmbona, waleoloka mbele yakye, wakafuga, wechigamba, “Iyoe nyi oe Mono-Ruwa.” 12 Kawaima mnu walamṟingyishie. 13 Kaṙooya fumvunyi, kalaga walya alekunda oe amonyi; wakayenda kokye. 14 Kawika wandu ikumi na wawi, waiṙime iwa hamwi na oe, na nawaṙume ionguo Mbonyi Ngyicha. 15 Ngoseṟa wawe na wuchilyi wo iwuta waṟufui wawicho. 16 Kawika walya ikumi na wawi. Simion kamlaga Petiro; 17 na Yakobo kamlaga mono-Sebedayo, na Yohane, mono-wama o Yakobo, kawalaga Bonerikye, kyimwi na igamba, wana wa ikuṟuṟuma. 18 Na Anderea, Filyipo, Baritolomayo, Matayo, Tomasi, Yakobo o Alyifayo, Tadayo, na Simion Mkananayo. 19 Na Yuda Isikariote, nyi oe alemṟiinga. 20 Numa ya iho kayenda kanyi. Wuingyi wung'anyi wo wandu wukosanza-se, mṟasa Yesu na wanalosho wakye walaiṙime maa ilya mkate. 21 Wandu wakye kyiyeri waleicho mbonyi wakafuma indemmbaṙa; kyipfa walegamba, “Nasuko.” 22 Na walosha wa mawawaso walesoka iwuka Yerusalemu wakagamba, “Nawoṙe Beelyisebulyi, na kui ang'anyi o waṟufui wawicho naiwuta waṟufui wawicho.” 23 Kawalaga, kawawia kui mfano, “Satana neiṙima kuṙa ifuna Satana? 24 Na wumangyi wukokuṟiinga wumonyi, wochiiṙima igoṟoka-pfo. 25 Na kanyi kukokuṟiinga kumonyi, kanyi-ko koiṙima igoṟoka-pfo. 26 Na kokooya Satana afuma kakapana na mrima okye amonyi, kakuṟiinga, eiṙima igoṟoka-pfo, indi neshika mafurumionyi. 27 Mndu echiiṙima iiṙa na numbenyi ya mndu awoṙe pfinya, na imsoka shindo shakye, sile apfunga kuwooka ulya awoṙe pfinya, naaho-ng'u echiṙuo ko pfinya numba yakye. 28 Ny'kyaloi ngammbia, wandu wechihooṟio ngyuunyamaṟi tsoose, na ilahia Ruwa lyawo lyoose; 29 indi mndu echilahia Mumuyo Mweele echihooṟio mṟasa mlungana-pfo; kyaindi nechiwaṙa ṙeko lyilechisia”; 30 kyipfa kya ilyi walegamba, “Nawoṙo nyi mṟufui mmbicho.” 31 Wamae na wana wa wamae wakacha; wakagoṟoka nja, wakaṙuma mndu imlaga. 32 Na wuingyi wo wandu waweṙamie, wechimwiṟiwia; wakammbia, “Ambuya, womoo na wana wa wama wapfo wai iho nja, waikupfula.” 33 Kawagaluo, echigamba, “Wama oko na wana wa wama wako nyi wakyi?” 34 Kaambuya walya waweṙamie wamwiṟiwie ngyuura tsoose, kagamba, “Ambuya wama oko na wana wa wama wako! 35 Cha kyipfa orio mndu echiṟunda shilya Ruwa akundi, icho nyi oe mono-wama oko, na mshikyi oko, na wama oko.”
1 Kawooka-se iloshia mbai ya ipalyipalyi. Wuingyi wung'anyi mnu wo wandu wukokuumbia kokye, mṟasa oe kaṙooya ngalawenyi, kakaa ipalyipalyinyi. Wuingyi woose wo wandu wuwei handu hagaṙutsu mbai ya ipalyipalyi. 2 Kawalosha shindo shifoi kui mfano. Kawawia maloshonyi gakye, 3 “Aṙanyienyi. Moolyia mbeu nalefuma indewaaya. 4 Na kyiyeri aweiwaaya, mbeu ingyi ileoloka mbai ya njia, shileye shikacha shikailya. 5 Ingyi ikaoloka handu hawoṙe iṟaṟa, halawoṙe teri ishikyie. Cha ilyi ikaṙo kyaindi kyipfa kya iwuṟa teri ishikyie, 6 kyiyeri mui ulewaa ukoikoṟa, na kyipfa ilawoṙe mri ikauma. 7 Ingyi ikaoloka handu hawoṙe msha; msha iya ikaṙo, ikaipfumba, ilakumbie ndunda. 8 Ingyi ikaoloka handu hawoṙe teri ngyicha, tsikakumbia ndunda, tsechiṙo na ing'ana, na ikumbia, imwi makumi gaṟaaṟu, imwi makumi gaṟandaaṟu, na imwi igana.” 9 Kagamba, “Awoṙe maṙwi geaṙanyia, naaṙanyie.” 10 Na oe kyiyeri awekyeri amonyi, wandu walya wawemwiṟiwie, na walya ikumi na wawi, walemmbesa mbonyi tsa mfano iya. 11 Kawawia, “Nyoe muwaenengye imanya kyiṟika kya Wumangyi wo Ruwa, indi ko walya wai nja ya Wumangyi-wo shoose shekyeṟundika kui mfano, 12 ‘Kundu wakaambuya waambuye walawone; na wakaaṙanyia waicho, walamanye; walachengyiwiyilyia, na ihooṟio.’ ” 13 Kawawia, “Muichi mfano-chu? Kyasia mfano yoose moimanya kuṙa? 14 Moolyia mbeu-cho nekyewaaya Ṙeṙo lya Ruwa. 15 Iwa nyiwo wai mbai ya njia, Ṙeṙo lya Ruwa lyekyewooyo kowo. Nawo wakamuicho, cha ilyi Satana nekyecha, kawuta ho Ṙeṙo lyilya lya Ruwa lyileṙongo mrimenyi kowo. 16 Na wuṙo iwa nyiwo wekyeṙongo handu hawoṙe maṟaṟa. Nyiwo wakammaa iicho Ṙeṙo lyilya lya Ruwa, cha ilyi wekyelyiambilyia na sia. 17 Kyaindi wawoṙe mri makyiṙi-gawi gawo-pfo, indi lyekyekaa kowo kyiyeri kyifuhi. Numa ya iho kukocha wukyiwa na ipfulutso nyashi kyipfa kya Ṙeṙo lyilya lya Ruwa, cha ilyi wekyekapa tuulyia. 18 Na iwa nyiwo walya wekyeṙongo handu hawoṙe msha. Nyi wandu wekyeicho Ṙeṙo lyilya lya Ruwa, 19 kyaindi ikuwinisha lya kyiwuyana, na wulembi wo masaa, na lango tsa shindo shingyi tsikacha, shekyepfumba Ṙeṙo lyilya lya Ruwa lyilakumbie. 20 Na iwa nyiwo wawaṙongye handu hawoṙe teri ngyicha. Nyi wandu wekyeicho Ṙeṙo lyilya lya Ruwa na ilyiambilyia, na ikumbia ndunda, umwi makumi gaṟaaṟu, umwi makumi gaṟandaaṟu, na umwi igana.” 21 Kawawia, “Muwonyi kuṙa? Taa yekyekoṟo kundu iwikyio wanda ya kyitela, ang'u wanda ya kyitaṟa? Chi yekyewikyio handu hakuirie-pfoe? 22 Cha kyipfa kuwoṙe kyindo kyikuṟiikyie kyilechimanyika-pfo; maa kuwoṙe kyindo kyikyiṟikye, kyilechiwoneka na pata-pfo. 23 Mndu kawaṙa maṙwi geaṙanyia, naaṙanyie.” 24 Kawawia, “Aṙanyienyi kyindo-kyi. Kyindo kyilya muianduya nakyo oṙianyu ny'kyo Ruwa echimuanduya nakyo, kyaindi na wulang'a ngoseṟa. 25 Cha kyipfa awoṙe kyindo nechienengo, na oe alawoṙe kyindo kying'anyi, maa kyilya kyitutu awoṙe nechisoko.” 26 Kagamba, “Wumangyi wo Ruwa, mfano okye nyi cha mndu aleola mbeu wuye ya uruka. 27 Kawamolaa na iamka, kyio na kyingoto, na mbeu iya ikaṙo na ing'ana, alaichi oe. 28 Kyipfa uruka lokyeṙosa shindo lumonyi; kuwooka iṟa, kawi igaa lya nganu, numa nganu ikoṟie igaenyi. 29 Na ndunda tsikammba tsesambuo, cha ilyi nekyeira ishami, cha kyipfa kyilyimu kyamwafukyia.” 30 Kagamba, “Lulyingatsane Wumangyi wo Ruwa na kyikyi? Ang'u luuwikye mfanonyi uha? 31 Nyi cha ndunda ya haradalyi. Kyiyeri yekyeṙongo urukyenyi, maa chandu ikyeri ngyitutu kuta mbeu tsoose tsikyeri urukyenyi, 32 ikamṙongo yekyeng'ana, ikawa ing'anyi kuta mashiṙi goose gawoṙe maṟa gekyelyio nyi wandu, ikawaṙa mbaga tsing'anyi; mṟasa shileye sha ngyinenyi shikaiṙima ikaa wanda ya mrinje oyo.” 33 Kui mfano ifoi ya mbaṟe-i naweiwaongoya Ṙeṙo lyakye, iṙuana na chandu waleiṙima ilyiaṙanyia. 34 Maa aleṙeṙa nawo kulawoṙe mfano-pfo; kyaindi kaongoya wanalosho wakye amonyi mbonyi tsoose kui kyiṟika. 35 Mfiri ulya kyiyeri kya kyukonyi kawawia, “Luambaṙe mṟasa molyolya.” 36 Wakaṙa wuingyi wulya wo wandu, wakamṙuo wuṙo chandu awekyeri ngalawenyi. Na ngalawa tsingyi tsiwekyeri hamwi na oe. 37 Kukocha kyiwiṟi kying'anyi kya mkuma, mṟinga uiyenda na pfinya ukokapa ngalawa iya mṟasa ikawooka iichuo mṟinga. 38 Na oe amonyi nawekyeri ura lo numa lo ngalawa, alee wuye ya mto. Wakamwamtsa, wakammbia, “Mlosha, chi kyindo kopfo iluṙa lurumare-pfoe?” 39 Kaamka, kaṙeṙia mkuma, kawia ipalyipalyi, “Tsia, ulakupaaye!” Mkuma ukotsia, kukowaṙa itsia sau lying'anyi. 40 Kawawia, “Ny'kyilyi mowa waowu? Mulandewaṙe iiṙikyia-pfoe?” 41 Wakawoṙo nyi wuowu wung'anyi, wakawiana, “Nyi wui ichu-ng'u, maa mkuma na ipalyipalyi shimwindia?”
1 Wakashika molyolya o ipalyipalyi mṟasa uruka lo Wakyerasi. 2 Na amsokye ngalawenyi, cha ilyi nalekarisana na mndu, awewukyie handu heṟika wandu wapfiie, awoṙo nyi mṟufui mmbicho. 3 Kanyi kokye kuwei handu halya heṟika wandu wapfiie; maa kuwoṙe mndu oose aleiṙima impfunga-se maa kui mshe-pfo, 4 cha kyipfa nawekyepfungo kafoi ko pingu na mshe; kaṙumbuo-ṙumbuo mshe iya na ifunja-funja pingu tsilya; maa kuwoṙe mndu awewoṙe pfinya tsemmbinga-pfo. 5 Na mfiri yoose, kyio na kyingoto, nawekyeri kulya kundu koṟika wandu wapfiie na mafumvunyi, ekalagatsa na ikuwega-wega na magoe. 6 Na kyiyeri alewona Yesu ai kuleshi, nalekapa mteeṟa, kamwindia. 7 Kakalagatsa kui ṟui lying'anyi, kagamba, “Lekana na inyi, Yesu, Mono-Ruwa akyeri ruwewu. Kui rina lya Ruwa ulangyilyise wukyiwa.” 8 Cha kyipfa nalemmbia, “Iyoe mṟufui mmbicho, wuka mndu-chu.” 9 Kammbesa, “Rina lyapfo nyi wui?” Kamgaluo, kagamba, “Rina lyako nyi ‘Wandu Walang'a’, cha kyipfa lui wafoi.” 10 Kamterewa mnu alawaṙuo nja ya uruka lulya. 11 Na iho mafumvunyi hawewoṙe poo lying'anyi lya nguwe, tsechilyiso. 12 Waṟufui wawicho woose wakamterewa, wechigamba, “Luṙuo ko nguwe, luiṙime iiṙa na mmbiunyi yatso.” 13 Kawaenenga momu. Waṟufui walya wawicho wakafuma, wakaiṙa na mmbiunyi ya nguwe tsilya; na poo lyilya lyoose lyikaseṟemka kyiiṟimikonyi lyeṙicha, tsikaiṙa na ipalyipalyinyi, cha nguwe shiku shiwi; tsikapfiia ipalyipalyinyi. 14 Walyisi wa nguwe tsilya wakaṙicha, wakaonguo mbonyi-tso mṟinyi na kundu kulai mṟinyi. Wandu wakafuma wawone kyindo kyilewutika. 15 Wakayenda ko Yesu, wakawona ulya awewoṙo nyi waṟufui wawicho, aṙamie, aṟee nguwo, alamsuko-se, na oe nyi oe awewoṙo nyi poo lyilya lya waṟufui wawicho; wakaowuo. 16 Na walya walekowawona walewaongoya mbonyi tsilewutikyia ulya awewoṙo nyi waṟufui wawicho, na mbonyi tsa nguwe. 17 Wakawooka imterewa nawukye kulya kowo. 18 Na oe kyiyeri aweiṙooya ngalawenyi, ulya awewoṙo nyi waṟufui wawicho nalemterewa nayende na oe. 19 Kyaindi alemlekyia-pfo, indi nalemmbia, “Yenda kanyi kopfo, ko wandu wa kopfo, ndewaongoye shindo shilya shing'anyi Mndumii alekuwutia, na chandu alekusaṟia.” 20 Kafuma kawooka ionguo mṟinyi ung'anyi uwoṙe shikaṟo ikumi okyelago Dekapolyi, shindo shilya shing'anyi Yesu alemmbutia; wandu woose wakaṟiyio. 21 Na kyiyeri Yesu amwambaṙe iwuya na molyolya akyeri kulya ngalawenyi, wuingyi wung'anyi wo wandu wukokuumbia kufuhi na oe; na oe nawekyeri mbai ya ipalyipalyi. 22 Kukocha mndu umwi kyiiṙi kya wang'anyi wa sinagogi, ekyelago Yairo; na kyiyeri alemmbona, kaoloka maṙendenyi gakye, 23 echimterewa mnu, echigamba, “Mono-ko mtutu o kyika naipfa. Ngyikuterewa uche, uwikyie kuwoko kopfo wuye yakye, naiṙime ikyia, na iwaṙa moo.” 24 Kayenda hamwi na oe. Wuingyi wung'anyi wo wandu wukomwosha, wechimpeṟeetsa-peṟeetsa. 25 Kuwewoṙe mndu mka umwi awoṙe ndoṟe yechoṟa kyiyeri kya maka ikumi na iwi, 26 maa chandu alelyiso wukyiwa kafoi echiṟundio nyi waganga wafoi. Shindo shoose awewoṙe shileenengyio shemṟundia, kyaindi shilamtarame maa ale, indi ndoṟe yakye ikaengyeṟa ing'ana. 27 Kyiyeri aleicho mbonyi tsa Yesu, naleiṙa wuingyinyi wulya wo wandu kakaa numa ya Yesu, kapaaya ikunya lyakye, 28 kyipfa nalegamba, “Ngapaaya maa mawale gakye tikyi, ngyechikyiṟo.” 29 Cha ilyi shoka ya samu yakye ikauma, na oe kamanya mmbiunyi okye kye amkyia wukyiwa wulya. 30 Cha ilyi Yesu, aichi mrimenyi kokye kye pfinya yammbuka, kaambuya numa kulya wuingyinyi wo wandu, kagamba, “Nyi wui angyipaaya mawale gako?” 31 Wanalosho wakye wakammbia, “Nuwewonyi chandu wuingyi wo wandu waikupeṟeetsa-peṟeetsa, na iyoe nuigamba, ‘Nyi wui angyipaaya?’ ” 32 Kaambuya ngyuura tsoose kundu nawone ulya aleṟunda kyindo-kyo. 33 Na mndu mka ulya kawoṙo nyi wuowu na iṙeṙema, aichi kyammbutikyia, kacha kamwolokyia, kamwongoya wuloi woose. 34 Kammbia, “Mono-ko o kyika, iiṙikyia lyapfo lyakukyiṟa, yenda na ufoṟo, ndoṟe-yo ilawe-se wukyiwa wopfo.” 35 Na kyiyeri aweiṙeṙa, kukocha wandu wawuka ko ulya ang'anyi o sinagogi, wechigamba, “Mono-pfo o kyika ampfa. Kuwoṙe kyiira kyiha iengyeṟa ituura mlosha?” 36 Kyaindi Yesu, kyiyeri aleicho mbonyi-tso, kawia ang'anyi ulya o sinagogi, “Ulaowuoe, waṙa iiṙikyia tupu.” 37 Maa alelekyia mndu ioshana na oe-pfo, sile Petiro, Yakobo, na Yohane, mono-wama o Yakobo. 38 Wakashika kanyi ko ang'anyi ulya o sinagogi, kawona kyituṟu, na wandu wechifiiṟa, wechikapa ṟanyi ing'anyi. 39 Amwiṙe na numba, kawawia, “Ny'kyilyi muwoṙe kyituṟu na ifiiṟa? Mana alandepfe-pfo, indi nalee tupu.” 40 Wakamsaaṟa mnu. Na oe amwafune na nja woose, kaṙuo awu o mana ulya na wamae, na walya wakyeri hamwi na oe, kaiṙa na halya-ndu mana ulya awekyeri. 41 Kawaṙa mana ulya kuwoko, kammbia, “Talyita, kumi”; kyitambuluo kyakye nyi “Mono-waka, ngakuwia, amka.” 42 Cha ilyi mana ulya kagoṟoka, kayenda, cha kyipfa nawewoṙe maka ikumi na iwi. Cha ilyi wakaṟiyio lying'anyi. 43 Kawatutuma mnu, mndu alamanye mbonyi tsilya, kagamba mana ulya naenengo kyelya.
1 Kawuka pfo, kayenda mṟasa uruka lo kowo; wanalosho wakye wakamwosha. 2 Kyiyeri mfiri o onyonya ulecha, nalewooka iloshia sinagoginyi. Wandu wafoi kyiyeri waleicho wakaṟiyio, wechigamba, “Ichu nyi kwi alewona ishi? Nyi wuṟango wuha amwenengye? Nyi kuṙa aiwuta shindo shing'anyi kuṙi sha maṟiyisho? 3 Ichu chi ulya ekyepacha mbau, mana o Maria, na mono-wama o wako-Yakobo, Yose, Yuda, na Simion-pfoe? Na washikyi wakye wakyeri iha koṙu-pfoe?” Koikyo wakammina. 4 Yesu kawawia, “Moonguo shisuku ekyewuṟa iindio, sile urukyenyi lokye amonyi-pfo, ko wandu wakye, na kanyi kokye.” 5 Maa aleiṙima iṟunda kyiṟiyisho kyoose ipfo-pfo, sile nalewikyia mawoko gakye wuye ya wandu waangu waluoe, kawakyiṟa. 6 Kaṟiyio kyipfa kya iiṙikyia lyawo lyaangu. Katenga-tenga kulya shikaṟonyi, echilosha. 7 Kalaga walya ikumi na wawi, kawooka iwaṙuma wawi wawi, kawaenenga pfinya yechilyia waṟufui wawicho. 8 Kawaima walaṙuo kyindo kyoose kyewatarama njienyi sile upoi tupu; maa mkate, maa mkunja, maa heleri tsa kyiseyesoe; 9 kyaindi waṟae shiaṙu. Kagamba, “Mulaṟae mawale gawi.” 10 Kawawia, “Handu hoose mochiiṙa na numba, kaenyi pfo mṟasa kyiyeri mochiwuka handu-ho. 11 Na handu hoose walandemuambilyie nyoe maa imuaṙanyia, kyiyeri mowuka ho, kute-kutenyi kyilulyi kyikyeri maṙendenyi ganyu, kundu wamanye wuwicho wo kyilya wawuta.” 12 Wakafuma, wakaonguo kye wandu waṙumbuye wunyamaṟi. 13 Wakafuna waṟufui wawicho wafoi; wakashia mafuṙa wandu wafoi waweluoe, wakawakyiṟa. 14 Na Mangyi Herode kaicho mbonyi, cha kyipfa rina lya Yesu lyiwesendo orio handu, kagamba, “Yohane Mpatisi naṟuka ko wapfu, koikyo pfinya-tsi tsiṟunda kyiiṙi kyakye.” 15 Wengyi walegamba, “Nyi Elyia.” Wengyi walegamba, “Ichu nyi moonguo shisuku, ang'u nyi cha umwi o weonguo shisuku.” 16 Kyaindi kyiyeri Herode aleicho nalegamba, “Yohane, ulya ngyilemṙumbuo mṙoe, naṟuka.” 17 Cha kyipfa Herode amonyi nalekoaṙuma wandu, kawaṙa Yohane, kammbika kyipfungonyi, kyipfa kya Herodia, mka o Filyipo, mono-wamae; cha kyipfa Herode nawemwalyikyie. 18 Cha kyipfa Yohane nalewia Herode, “Chi sungusinyi kopfo ialyika mka o mono-womoo-pfo.” 19 Na Herodia naweimwotia, kapfula immbaaga, alaiṙime. 20 Cha kyipfa Herode naleouwuo Yohane; amwichi kye nyi mndu o wusumganyi, mweele, kamringa. Na kyiyeri ammwaṙanyie nalewoṙo nyi fowa mrimenyi mnu; na oe nawemwaṙanyia na sia. 21 Na lyilya ṙaawa lyicha lyilewoneka, na Herode, mfiri ung'anyi o iwoneka lyakye, kyiyeri aleachikyia wang'anyi wakye shelya, na wasongoru wa asikari wa shiṙa, na wandu wawoṙe kyiṟumi wa Galyilaya; 22 nyi lyo-ndu mono-kyika o Herodia aleiṙa na numba, katema, kachihiṟa Herode na walya waweilya handu hamwi na oe. Mangyi kawia mana ulya, “Ngyiterewa kyoose ukundi, ngyechikuenenga.” 23 Kammbia, “Kyoose ochingyiterewa ngyekuenenga, maa kokooya nyi igawana wumangyi woko.” 24 Kyasia kafuma kawesa wamae, “Ngyiterewe kyi?” Na wamae kagamba, “Mṙoe o Yohane Mpatisi.” 25 Cha ilyi kayenda faṟa ko mangyi, katerewa echigamba, “Ngyikundi ungyienengye wulalu kuṙi ipongonyi mṙoe o Yohane Mpatisi.” 26 Mangyi kawihiyo mnu mrimenyi, kyaindi kyipfa kya nyamu tsakye, na kyipfa kya walya waweilya na oe, alekunda imlegia-pfo. 27 Cha ilyi mangyi kaṙuma asikari, kagamba mṙoe okye uendo. Asikari ulya kayenda, kaṙumbuo Yohane mṙoe kulya kyipfungonyi, 28 Kaende mṙoe okye ipongonyi, kaenengyia mana ulya, na oe kaenengyia wamae. 29 Kyiyeri wanalosho wa Yohane waleicho mbonyi, waleyenda, wakaṙuo mmbiu okye, wakauṟika kyilomenyi. 30 Na wanalosho wakasanza mbele ya Yesu, wakamwongoya mbonyi tsa shindo shoose waleṟunda, na shindo shoose walelosha. 31 Kawawia, “Nnjonyi nyoe muwenyi, na handu halawoṙe wandu, mucheonyonya kyitutu.” Cha kyipfa hawewoṙe wandu wafoi, wechicha, wechiyenda, mṟasa ṙaawa lyelya lyikawuṟika. 32 Wakayenda handu hakuṟiikyie ngalawenyi, handu halawoṙe wandu. 33 Wandu wakawawona wechiyenda, na wafoi wakamanya, wakayenda pfo mteeṟa ko maṙende, iwuka mṟi yoose, wakawooka ishika. 34 Na oe kyiyeri alesoka ngalawenyi, kawona wuingyi wung'anyi wo wandu, kawawonia wukyiwa; cha kyipfa wawekyeri cha moondo galawoṙe mlyisi; kawooka iwalosha shindo shifoi. 35 Na lyilya kyiyeri kying'anyi kya kyingoto kyileiṙa, wanalosho wakye waleyenda kokye, wakagamba, “Handu-ha nyi nuka mreesi, na wulalu kuila. 36 Sama wandu-wa, kundu wayende, maṙemenyi na shikaṟonyi sha kufuhi na iha, wandeguṟa kyelya.” 37 Kagaluo, kawawia, “Waenengyenyi kyelya.” Wakammbia, “Ngyesa, luende lundeguṟa mkate ya woguru wo dinari magana gawi kundu luwaenengye walye?” 38 Kawawia, “Muwoṙe mkate inga? Yendenyi mundeambuya.” Wammanye, wakagamba, “Itanu na makunga gawi.” 39 Kawawia wawaṟamiṟe woose, shiṙombo shiṙombo, handu hawoṙe maṟa mawishi. 40 Wakaṙamia nzengye nzengye, iha igana, iha makumi gataanu. 41 Kawaṙa mkate iya itanu na makunga galya gawi, kaambuya ruwewu, kaana, kapeṟenguo mkate iya, kaenengyia wanalosho wakye wawagawie; na makunga galya gawi kawagawia woose. 42 Wakalya woose wakaiguṙa. 43 Wakasania shipeṟengu sheiṙima iichuṟa mkunja ikumi na iwi; na shipeṟengu sha makunga taa. 44 Na walelya mkate iya nyi cha wasoṟo shiku shitaanu. 45 Cha ilyi kaitika wanalosho wakye waṙooye ngalawenyi, wasonguo iyenda molyolya mṟasa Betisaida, kyiyeri oe aweisama wuingyi wulya wo wandu. 46 Na amwasame kayenda fumvunyi indeterewa. 47 Na kyiyeri kuleila ngalawa iwekyeri makyiṙi-gawi ga ipalyipalyi, na oe nakyeri amonyi urukyenyi lugaṙutsu. 48 Kawawona wechilya wukyiwa kyipfa kya ikuruo makasia, cha kyipfa kyiwiṟi kyiwekyilang'a. Na lyilya kulewa (cha kamba lya kaana lyeringa kyio) naleyenda ko wanalosho echumia wuye ya ipalyipalyi; kawa cha ilyi nakundi iwaiṙa. 49 Nawo kyiyeri walemmbona echumia wuye ya ipalyipalyi, walekusaṟa kye nyi kyirinje, wakafuga. 50 Cha kyipfa woose walemmbona, wakawoṙo nyi wuowu, cha ilyi kaṙeṙa nawo, kawawia, “Kuwanzenyi nyi inyi, mulaowuoe.” 51 Kaṙooya kulya ngalawenyi kundu wakyeri; kyiwiṟi kyikatsia. Wakaṟiyio mnu mrimenyi kowo; 52 cha kyipfa walemanya mbonyi tsa mkate iya-pfo, kyaindi mrima yawo iwengyiumu. 53 Na wamuambaṙe, waleshika uruka lo Kyenesareti, wakatirimisha ngalawa. 54 Nawo wammbukye ngalawenyi, cha ilyi wandu walemmanya. 55 Wakakapa mteeṟa, wechitenga uruka lulya loose, wakawooka iṙuo wandu waluoe walee shitaṟenyi, iyenda orio handu waleicho kye nakyeri. 56 Na orio handu aleyenda, echiiṙa na shikaṟonyi, ang'u maṙemenyi, wakawikyia wandu waluoe sangaṙa, wakamterewa wapaaye maa ikyechu lya ikunya lyakye. Na woose walempaaya wakachia.
1 Numa ya iho Mafarisayo na walosha waata wa mawawaso wawewukyie Yerusalemu, wakakuumbia mbele yakye. 2 Wakawona wengyi kyiiṙi kya wanalosho wakye, wechilya shelya na mawoko galamasanje kyimṟumoe chandu Mafarisayo wawekyewuta. 3 Cha kyipfa Mafarisayo na Wayuda woose, walandesanje mawoko mṟasa ukokuo wekyelya-pfo, wechiindia shilya waleambilyia ko waku wawo. 4 Lyingyi-se wakawuka sangaṙa walandesambe, wekyelya-pfo. Na kuwoṙe shido shingyi waleshiambilyia ko waku wawo wawekyeshiindia, cha isanja shiṙoo, na shinungu, na shindo cha piṟika. 5 Kyasia Mafarisayo na walosha walya wa mawawaso wakammbesa, “Ny'kyilyi wanalosho wapfo walekyeindia shilya luleambilyia ko waku waṙu, indi wekyelya na mawoko gafanyi?” 6 Kawawia, “Yesaya nalesonguo ionguo necha mbonyi tsanyu nyoe wakulembecheṟi, chandu kyikyiṟeie, ‘Wandu-wa wekyengyiindia kui maṙumbu indi mrima yawo ikyeri kuleshi na inyi; 7 Nawo wekyengyiana na ingyiterewa wulya, wechilosha malosho gakyeri mawawaso ga wandu.’ ” 8 Nyoe mokyemina iwawaso lya Ruwa, na iwaṙa shilya wandu waambilyie ko waku wawo. 9 Kawawia, “Necha! Muilega iwawaso lya Ruwa muiṙime iindia shindo muleambilyia ko waku wanyu. 10 Kyipfa Mose nalegamba, ‘India awuyo na womoo’, na, ‘Alahia awuye ang'u wamae ipfa na napfe.’ 11 Kyaindi nyoe mokyegamba, ‘Mndu kawia awuye ang'u wamae, kyindo ngyikundi ikuenenga uwone ho kyiira nyi Koriban’, kyimwi na igamba, kyindo kyikyiwikyie mboṟa ko maṟunda ga Ruwa, kyekyewa kuṙo. 12 Maa numa ya iho mokyeenenga mndu-cho momu iṟundia awuye ang'u wamae kyindo-pfo; 13 kunu mochilega kyilya Ruwa agambie kui shindo nyoe cha Wayuda muleambilyia ko waku wanyu na iwia wana wanyu ishiṟunda.Lyingyi-se mokyeṟunda shindo shifoi shilyingananyi na isho.” 14 Kalaga-se wuingyi wo wandu, kawawia, “Ngyiaṙanyienyi moose na imanya. 15 Kuwoṙe kyindo kyikyeri nja ya mndu kyekyeiṙa na kokye kyikaiṙima imfanyiṟa kyimṟumoe-pfo. Indi shilya shekyewuka kokye, nyisho shekyefanyiṟa mndu ulya. [ 16 Mndu kawaṙa maṙwi geaṙanyia, na naaṙanyie.]” 17 Na lyilya aleiṙa na kanyi, nalekana na wuingyi wo wandu, wanalosho wakye wakammbesa mbonyi tsa mfano ulya. 18 Kawawia, “Maa nyoe muwoṙe wuṟango-pfoe? Muichi kye orio kyindo kyikyeri nja ya mndu, kyikaiṙa na kokye, kyeiṙima imfanyiṟa-pfo; 19 cha kyipfa kyekyeiṙa na mrimenyi kokye-pfo, indi ndewunyi tikyi; numa ya iho kyekyefuma iyenda choṟonyi?” Kui igamba kuṙo naleloṟa kye kuwoṙe kyelya kyiwicho-pfo. 20 Kagamba, “Kyekyewuka ko mndu nyikyo kyekyemfanyiṟa kyimṟumoe. 21 Cha kyipfa mrimenyi ko wandu kokyewuka makusaṟo mawicho, wuṟui, 22 wuiwi, uwaagi, lango ngyiwicho, wulang'a, ngyeṟo, ukoe, wunyeng'i, shilahio, ikuṙosa na wutondo. 23 Ishi shoose shekyewuka ko mndu, nasho shekyefanyiṟa mndu kyimṟumoe.” 24 Kawuka pfo, kayenda mṟasa uruka lo Tiro na Sidon. Kaiṙa na numba, alakunde kyimanyikye; kyaindi aleiṙima ikuṟiika-pfo. 25 Cha ilyi mndu mka, mono-kye awoṙo nyi mṟufui mmbicho, naleicho mbonyi tsakye, kacha kamwolokyia maṙendenyi gakye. 26 Na mndu mka ulya nyi Mkyiṟikyi, amfee ko Wasirofoinikye. Kamterewa nawute mana ulya okye o kyika mṟufui mmbicho. 27 Kammbia, “Leka wana waiguṙe kuwooka; kyipfa chi necha iwuta kyelya kya wana na iwiyitsia shite-pfo.” 28 Na oe kagaluo, kammbia, “Yee, Mndumii, kyaindi maa shite shikyeri wanda ya mesa shekyelya matsugaṟo ga wana.” 29 Kammbia, “Kyipfa kya ṙeṙo-lyo, yenda; mṟufui mmbicho ammbuka ko mono-opfo.” 30 Kayenda kanyi kokye, kakooya mana ulya amlaṟe kyitaṟenyi, na mṟufui ulya mmbicho amwummbuka. 31 Kawuka-se urukyenyi lo Tiro, kaiṙa makyiṙi-gawi ga Sidon, kayenda mṟasa ipalyipalyi lya Galyilaya, mṟasenyi na uruka luwoṙe mṟi ung'anyi uwoṙe shikaṟo ikumi okyelago Dekapolyi. 32 Wakamwendie mndu mpfu maṙwi, alawekyeiṙima iṙeṙa, wakamterewa namwekyie mawoko. 33 Kammbikyia kuleshi na wuingyi wo wandu handu hakuṟiikyie. Kawika shimnyoe shakye maṙwinyi gakye, kapucha maṙa, kampaaya ulumi. 34 Kaambuya wuye ruwewu, katerewa Ruwa kui isumkyia lying'anyi, kammbia, “Efata”, kyimwi na igamba, “Tambuluka.” 35 Cha ilyi maṙwi gakye gakaṟusuka, ulumi lokye lukoṟengyeṟa, kaṙeṙa necha. 36 Kawaima walaongoye mndu; kyaindi chandu aleengyeṟa iwaima, nyi wuṙo waleengyeṟa ionguo mbonyi. 37 Wakaṟiyio mnu, wechigamba, “Naṟunda shindo shoose necha. Wapfu maṙwi naiwaenenga iicho, na wai ndiṟi iṙeṙe.”
1 Mfiri iya, chandu wuingyi wulya wo wandu wuweng'anyi-se nawo wauṟa kyindo kyelya, kalaga wanalosho wakye, kawawia, 2 “Ngawonia wuingyi-wu wo wandu wukyiwa cha kyipfa nyi mfiri iṟaṟu wakyeri na inyi, maa wawoṙe kyindo kyelya-pfo; 3 na inyi ngawasama wayende kanyi kowo na kunu wakuretekyie, wechioloka njienyi; na waata wawukyie kuleshi.” 4 Wanalosho wakye wakamgaluo, “Ngyesa mndu neiṙima kuṙa iigutsa iwa kui mkate iha nuka?” 5 Kawawesa, “Muwoṙe mkate inga?” Wakagamba, “Mfungaaṙe.” 6 Kagamba wuingyi wo wandu waṙamie wanda. Kaira mkate iya mfungaaṙe, kaana, kaipeṟenguo, kaenengyia wanalosho wakye wawagawie; wakagawia wuingyi wulya wo wandu. 7 Wawewoṙe shipere shaangu; kashiwikyia mboṟa, kagamba wagawio na isho taa. 8 Wakalya, wakaiguṙa, wakasania matsugaṟo ga shipeṟengu sha mkate, mkunja mfungaaṙe ikaichuo. 9 Na wandu walelya waweshikyie shiku shiina. Kawasama. 10 Cha ilyi kaṙooya ngalawenyi hamwi na wanalosho wakye, kayenda mṟasa ura lo Dalyimanuta. 11 Mafarisayo wakacha, wakawooka igaluana na oe; wechipfula kokye kyiṟingyishio kyiwukyie ruwewu; wechimyesha. 12 Kawona fowa mrimenyi kokye, kagamba, “Ny'kyilyi rika-lyi lyipfula kyiṟingyishio? Ny'kyaloi, ngammbienyi, rika-lyi lyechienengo kyiṟingyishio kyiwukyie ruwewu-pfo.” 13 Kalekana nawo, kaṙooya-se ngalawenyi, kayenda mṟasa molyolya. 14 Wakawaṙima iṙuo mkate, maa ngalawenyi wawewoṙe kyindo sile mkate umwi tupu-pfo. 15 Kawaikyimbia, kagamba, “Kushowenyi na chachu ya Mafarisayo na chachu ya Herode.” 16 Wakagaluana wo wenyi ko wenyi, cha kyipfa walawewoṙe mkate. 17 Na Yesu kamanya, kawawia, “Ny'kyilyi muigaluana kyipfa mulawoṙe mkate? Maa mulandemanye-pfoe? Ngyesa mrima yanyu nyi ingyiumu? 18 Muwoṙe meso, muwonyi-pfo. Muwoṙe maṙwi, muichuoe-pfoe? Maa mukumburie-pfoe? 19 Kyiyeri ngyilepeṟenguo mkate iya itanu na ienengyia walya shiku shitaanu, muleira mkunja inga iichuo shipeṟengu?” Wakammbia, “Ikumi na iwi.” 20 “Na iya mfungaaṙe ienengyia walya shiku shiina, muleira mkunja inga iichuo shipeṟengu?” Wakammbia, “Mfungaaṙe.” 21 Kawawia, “Mulandemanye-pfoe?” 27 Yesu kafuma na wanalosho wakye, wakayenda shikaṟonyi sha Kaisaria-Filyipi na njienyi kawesa wanalosho wakye, kagamba, “Wandu wekyegamba kye inyi nyi wui?” 28 Wakamgaluo, “Yohane Mpatisi; wengyi Elyia; wengyi, umwi o waikyimbi.” 29 Na oe kawawesa, “Na nyoe muigamba kye inyi nyi wui?” Petiro kamgaluo, kammbia, “Iyoe nyi oe Kristo.” 30 Kawatutuma walawie mndu mbonyi tsakye. 31 Kawooka iwalosha kye Mono-Mndu nawaṟi iwona matuuro gafoi, na ilego nyi wasongoru, na wang'anyi wa makohanyi, na walosha wa mawawaso, na iwoogo, na numa ya mfiri iṟaṟu iṟuka. 32 Na oe naweionguo mbonyi-tso na pata. Petiro kamṙuo, kawooka imṙeria. 33 Kagaluka, kaambuya wanalosho wakye, kaṙeṙia Petiro, kagamba, “Wuka koko, Satana; kyipfa uikusaṟa shii sha Ruwa-pfo, indi sha wandu.” 34 Kalaga wuingyi wo wandu hamwi na wanalosho wakye, kawawia, “Mndu oose akundi ingyiosha nakulege amonyi, nakuṙikye msalaba okye, nangyioshe. 35 Cha kyipfa mndu akundi ikyiṟa moo okye, nechiuṙetsa, na mndu echiṙetsa moo okye kyipfa kyako na kyipfa kya Ndumi Ngyicha, ichu nechiukyiṟa. 36 Cha kyipfa mndu nechiiria ho kyi iwona wuyana woose, echiṙetsa mrima okye? 37 Ang'u mndu naenengyie kyi handu ha moo okye? 38 Kyipfa orio mndu echirigo nyi sonu kyipfa kyako, na malosho gako, kyiiṙi kya rika-lyi lya wuṟui na wunyamaṟi, Mono-Adamu nechirigo nyi sonu kyipfa kya mndu-cho, kyiyeri echicha mng'anonyi o Awu okye hamwi na malaika waele.”
1 Kawawia, “Ny'kyaloi, ngammbia, kuwoṙe wandu kyiiṙi kya iwa wagoṟokyi iha, wechiwaṙa moo, mṟasa kyiyeri wechiwona Ruwa echichilyia.” 2 Na lyilya mfiri iṟandaaṟu ileiṙa Yesu kaṙuo Petiro, na Yakobo, na Yohane, kawaṙuo wuye ya fumvu lyileshi handu hakuṟiikyie, wo wawenyi; kailachika fana mbele yawo. 3 Mawale gakye gechikyema-kyema, gameelyi mnu, kulawoṙe mndu wuyanenyi koose eiṙima igasanja gaile kuṙo. 4 Elyia hamwi na Mose wakacha na handu halya, nawo waweiṙeṙa na Yesu. 5 Petiro kawia Yesu, “Mlosha, nyi kyicha soe ikaa iha. Luwikye matengo gaṟaaṟu, lyimwi lyapfo iyoe, lyimwi lya Mose, na lyimwi lya Elyia.” 6 Petiro alemanya kyeṙeṙa-pfo, cha kyipfa walewoṙo nyi wuowu wung'anyi. 7 Numa ya iho hakawoneka ipuchi, lyikawaendie kyirinje. Ṟui lyikawuka kulya ipuchinyi, “Ichu nyi Mono-ko, mkunde oko, mwaṙanyienyi oe.” 8 Cha ilyi kyiyeri waleambuya kunu na kunu, walawone mndu akyeri nawo sile Yesu amonyi tupu. 9 Na lyilya waweisoka fumvunyi nalewaima walaongoye mndu shilya walewona, mṟasa kyiyeri Mono-Mndu echiṟuka ko wapfu. 10 Wakawuta kyilya walewio, wechiwesana wo wenyi ko wenyi, “Iṟuka-lyo ko wapfu lyagamba kyi?” 11 Wakammbesa, wechigamba, “Ny'kyilyi walosha wa mawawaso wekyegamba kye kyiwaṟi Elyia icha kuwooka?” 12 Kagaluo kawawia, “Nyi loi Elyia naicha kuwooka, na iwiyiṟia wuhya shindo shoose, kyaindi, hamwi na isho, kyikyiṟeie kuṙa kye Mono-Mndu nechiwona matuuro gafoi na imino? 13 Kyaindi ngammbia, Elyia amcha, nawo wakammbutia shoose walekunda chandu kyiwekyiṟeie.” 14 Na lyilya walekooyana na wanalosho, walewona wuingyi wung'anyi wo wandu wuwaiṟiwie na walosha wa mawawaso wechigaluana nawo. 15 Cha ilyi kyiyeri wuingyi wung'anyi wo wandu walemmbona waleṟiyio, wakakapa mteeṟa, wakamwiṟikyiṟa. 16 Kawawesa, “Ny'kyikyi muigaluana nawo?” 17 Mndu umwi wuingyinyi wulya wo wandu kagaluo kagamba, “Mlosha, ngaende mono-ko na kopfo, nawoṙo nyi mṟufui mmbicho ekyemwima iṙeṙa. 18 Na orio kyiyeri ammbaṙa, nekyemwolotsa wanda, na oe nekyeṙosa mawia na ilya ngakuru na imwumiṟa ng'ashu. Ngaṙeṙa na wanalosho wapfo wammbute mṟufui-cho mmbicho walaiṙime.” 19 Kawagaluo, kagamba, “Nyoe rika lyiwoṙe iiṙikyia lyifofo, ngyikae na nyoe mṟasa indi? Ngyiṙuane na nyoe mṟasa indi? Muendenyi na koko.” 20 Wakamwende na kokye. Na lyilya alemmbona, cha ilyi mṟufui ulya nalemṙeṙemsha, na oe kaoloka wanda, kakuoṟoosa-oṟoosa, echiṙosa mawia. 21 Kawesa awuye, “Ishi shimmbookyie indi?” Kagamba, “Wookyia wututunyi. 22 Na kafoi nekyemmbiyitsa moṙonyi, na mṟingyenyi, namrumatse. Kyaindi koiṙima, luwonie wukyiwa, na ilutarama.” 23 Yesu kammbia, “Koiṙima! Shoose shekyeiṙimika ko ulya aiṙikyie.” 24 Cha ilyi awu o manakye ulya kakuilenga na ṟui lying'anyi, kagamba, “Ngaiṙikyia, ngyitarama kundu ngyiiṙikyie.” 25 Na Yesu awonyi kye wuingyi wo wandu wuisanza iwinyi, kaṙeṙia mṟufui ulya mmbicho, kammbia, “Iyoe mṟufui mmbicho moima iṙeṙa na iaṙanyia, inyi ngakuwia, wuka ko ichu, maa ulaiṙe-se na kokye.” 26 Kafuga, kamṙeṙemsha mnu, kammbuka; na oe kawa cha ilyi apfiie; mṟasa wafoi wakagamba, “Napfa.” 27 Kyaindi Yesu kammbaṙa kuwoko kamwira; na oe kagoṟoka. 28 Na lyilya aleiṙa na kanyi, wanalosho wakye wakammbesa kui kyiṟika, “Kyitewe soe lulaleiṙima immbuta ny'kyi?” 29 Kawawia, “Mbaṟe-i yeiṙima iwuka kui ṙeṙo lyoose, sile kui iterewa-pfo.” 30 Wakawuka pfo, wakaiṙa makyiṙi-gawi ga Galyilaya; na oe alekunda mndu namanye-pfo. 31 Cha kyipfa naweilosha wanalosho wakye, kawawia, “Mono-Mndu naindewiko mawokonyi ga wandu, nawo wechimmbaaga; na kammboogo, numa ya mfiri iṟaṟu nechiṟuka.” 32 Kyaindi walemanya ṙeṙo lyilya-pfo, wakaowuo immbesa. 33 Wakashika Kaperinaumu; na lyilya awekyeri kanyi, kawawesa, “Ny'kyikyi muweiṙeṙa njienyi?” 34 Wakatsia; cha kyipfa njienyi waweigaluana wo wenyi ko wenyi, nyi wui akyeri ang'anyi. 35 Kaṙamia wanda, kalaga walya ikumi na wawi, kawawia, “Mndu akundi iwa o kuwooka nechiwa o mafurumionyi kuta woose, na mṟundi o woose.” 36 Kaira kyikoku, kakyiwikyia makyiṙi-gawi gawo, kakyichunguṟia, kawawia, 37 “Mndu kaambilyia mana umwi o mbaṟe-i kui rina lyako, nangyiambilyia inyi; na mndu kangyiambilyia inyi, naambilyia, chi inyi-pfo, indi ulya alengyiṙuma.” 38 Yohane kamgaluo, kammbia, “Mlosha, lulewona mndu echiwuta waṟufui wawicho kui rina lyapfo, alekyeoshana na soe; lukomwima, cha kyipfa ekyeoshana na soe-pfo.” 39 Yesu kagamba, “Mulamwime-pfo, cha kyipfa kuwoṙe mndu echiwuta kyindo kya kyiṟiyisho kui rina lyako kaweiṙima na iṙeṙa kyiwicho kyako-pfo. 40 Cha kyipfa ai ura loṙu, nyi oṙu. 41 Orio mndu echimrutsa nyoe kyiṙoo kya mṟinga, cha kyipfa nyoe nyi wandu wa Kristo, ny'kyaloi, ngammbia, easha wori wokye-pfo.” 42 “Na mndu echitewe umwi o iwa watutu wangyiiṙikyie, nanga apfungyio ikyesa nzingonyi kokye, na iwiyitso ipalyipalyinyi. 43 Na kuwoko kopfo kukokutewe, ṙumbuo kuwoko-ko. Nyi nanga iiṙa na moonyi o mlungana uwoṙe kuwoko kumwi, kuta iwaṙa mawoko gawi na iyenda ngyehenenyi, kundu kuwoṙe moṙo ulekyeruma; [ 44 kulya-ndu mashinu gekyelya mawoko-ga galekyepfa, maa moṙo ulekyeruma.] 45 Na kuṙende kopfo kukokutewe, ṙumbuo kuṙende-ko. Nyi nanga iiṙa na moonyi o mlungana, ui kyiwete, kuta iwaṙa maṙende gawi na iwiyitso ngyehenenyi; [ 46 kulya-ndu mashinu gekyelya maṙende-ga galekyepfa, maa moṙo ulekyeruma.] 47 Na riso lyapfo lyikakutewe, lyikuluoe, ulyiwiyitse. Nyi nanga iiṙa na Wumangyinyi wo Ruwa, uwoṙe riso lyimwi, kuta iwaṙa meso gawi, na iwiyitso ngyehenenyi 48 kulya-ndu mashinu gekyelya meso-ga galekyepfa, maa moṙo ulekyeruma.” 49 “Cha kyipfa iiṙikyia lya orio mndu lyechilotsiṟo nyi moṙo chandu munyu okyelotsiṟa shindo. 50 Munyu nyi kyindo kyicha, kyaindi munyu ukowa chi munyu-se-pfo, mochiuwika kyi uṙahie? Waṙenyi munyu mrimenyi konyu, mukae na ufoṟo nyoe wenyi ko wenyi.”
1 Kawuka pfo kashika mṟasenyi ya Uyuda, na molyolya o Yoridan. Wuingyi wufoi wukosanza-se wakayenda kokye, kawalosha-se chandu aweichiwie. 2 Kyasia Mafarisayo wakayenda kokye, wakammbesa, “Ngyesa nyi sungusinyi mndu iṙa mka okye?” kunu wechimyesha. 3 Na oe kagaluo, kawawia, “Mose nalemmbia kyi?” 4 Wakagamba, “Mose naleenenga momu iṟeia kyiṟeio kyelekana na imṙa.” 5 Yesu kawawia, “Kyipfa kya wuumu wo mrima yanyu nalemuenenga iwawaso-lyi. 6 Kyaindi wookyia mawookyionyi ga igumbo wuyana, nalegumba mii na mka. 7 Kyipfa kya ikyo mndu nechilekana na awuye na wamae, naawishane na mka okye; 8 na iwo wawi wechiwa mmbiu umwi; kyasia wai-se wawi-pfo, indi mmbiu umwi. 9 Kyasia ikyo Ruwa akyilunga, mndu alakyiletsane.” 10 Na lyilya walewuya na kanyi wanalosho wakammbesa mbonyi tsa ṙeṙo-lyo. 11 Kawawia, “Orio mndu echiṙa mka okye na ialyika ungyi nawa mṟui; 12 na mka, kaṙa mii okye na ialyiko nyi mndu ungyi, nawa mṟui.” 13 Kyasia wakaendie Yesu wana watutu kundu nawapaaye; wanalosho wakye wakawaṙeṙia. 14 Indi Yesu kyiyeri alewona kasuo mnu, kawawia, “Lekyenyi wana watutu wache na koko, mulawashingyie-pfo; cha kyipfa wana cha iwa Wumangyi wo Ruwa nyi wowo. 15 Ny'kyaloi ngammbia, orio oose alechiiṙikyia Wumangyi wo Ruwa cha mana mtutu echiiṙa napfo maa ale-pfo.” 16 Kawachunguṟia, kayekyia mawoko gakye wuye yawo, kawawikyia mboṟa. 17 Na lyilya awefuma iyenda njienyi, mndu umwi kacha eṙicha, kampfiria ndi, kammbesa, “Mlosha mcha, ngyiwute kyi ngyiiṙime ioṟa moo o mlungana?” 18 Yesu kammbia, “Ny'kyilyi uigamba ngyimcha? Kuwoṙe ai mcha sile umwi tupu-pfo, nyi oe Ruwa. 19 Nuichi mawawaso: Ulawaage, Ulaṟuguye maa Ulaṟuguyo, Ulaiwe, Ulaṟingyishie wongo, Ulalembe, India awuyo na womoo.” 20 Kammbia, “Mlosha, iga goose ngyekyegaosha wookyia wututu woko.” 21 Yesu kamwitukuya ko pfinya kamkunda, kammbia, “Nuuṟie kyindo kyimwi. Yenda, undekumba shoose uwoṙe, uenengye wakyiwa, na iyoe nochiwaṙa kyiseyesoe ruwewu; numa ya iho nnjo ungyioshe.” 22 Kyaindi oe kalema nzineeri kyipfa kya ṙeṙo-lyo, kawuka halya ammbihie mrimenyi; cha kyipfa nawewoṙe masaa gafoi. 23 Yesu kaambuya ngyuura tsoose, kawia wanalosho wakye, “Kyechiwa kyuumu ko wawoṙe masaa iiṙa na Wumangyinyi wo Ruwa!” 24 Wanalosho wakaṟiyio kyipfa kya malosho gakye. Yesu kagaluo-se kawawia, “Wana, kyikyilemeri iiṙa na Wumangyinyi wo Ruwa! 25 Kyikyeri kyaangu ngamia iiṙa ṟochonyi lya sindanu kuta mnjama iiṙa na Wumangyinyi wo Ruwa.” 26 Nawo wakaṟiyio mnu, wechimmbia, “Nyi wui-ngu ngyesa, echiiṙima ikyia?” 27 Yesu kawaitukuya, kagamba, “Ko wandu kyechiiṙimika-pfo, indi ko Ruwa chi wuṙo-pfo; kyipfa shoose shekyeiṙimika ko Ruwa.” 28 Petiro kawooka immbia, “Ambuya, soe luleṙa shoose lukokuosha iyoe.” 29 Yesu kagamba, “Ny'kyaloi, ngammbia, kuwoṙe mndu aleṙa numba, ang'u wana wa wama wa kyisoṟo, ang'u washikyi, ang'u mama, ang'u awu, ang'u wana, ang'u maṙema kyipfa kyako, na kyipfa kya Ndumi Ngyicha-pfo, 30 alechienengo ka igana kyiyeri-kyi kya wulalu, numba, na wana wa wama wa kyisoṟo, na washikyi, na mama, na wana, na maṙema, hamwi na ngapo, na kulya wuyanenyi wuicha moo o mlungana. 31 Kyaindi wafoi wakyeri wa kuwooka wechiwa wa mafurumionyi; na wa mafurumionyi wechiwa wa kuwooka.” 32 Nawo wawekyeri njienyi, kunu wechiṙo iyenda Yerusalemu; na Yesu nawewasongoye. Wakaṟiyio, nawo wechiosha wakaowuo. Kawuta-se walya ikumi na wawi, kawooka iwawia mbonyi tsa shindo shechimmbutikyia, 33 echigamba, “Ambuyenyi luiṙo iyenda Yerusalemu; na Mono-Mndu nechiwiko mawokonyi ga wang'anyi wa makohanyi na walosha wa mawawaso. Nawo wechimwanduya napfe, wechimmbika mawokonyi ga masanga, 34 nawo wechimtaluo, na impuchia maṙa, na imkapa na ngowa, na immbaaga, na numa ya mfiri iṟaṟu nechiṟuka.” 35 Na Yakobo na Yohane, wana wa Sebedayo, wakayenda kokye, wakammbia, “Mlosha, lukundi uluwutie ikyo kyoose lochikuterewa.” 36 Kawawia, “Mukundi ngyimmbutie kyi?” 37 Wakammbia, “Uluenengye soe luṙamie, umwi kuwoko kopfo ko kulyoe, na umwi kuwoko kopfo ko kumoso, mng'anonyi opfo.” 38 Yesu kawawia, “Muichi kyindo muiterewa-pfo. Moiṙima iiṙia matuuro ngyigaiṙia, ang'u ipatiso wupatiso ngyipatiso inyi?” 39 Wakammbia, “Loiṙima.” Yesu kawawia, “Matuuro ngyigaiṙia, mochigaiṙia, na wupatiso ngyipatiso inyi mochipatiso, 40 kyaindi mbonyi tsa iṙamia kuwoko koko ko kulyoe ang'u kuwoko koko ko kumoso chi momu oko imuenenga-pfo, sile wechienengo iwo wamuṟeyeṟio.” 41 Na kyiyeri walya ikumi waleicho wakawooka isuuya Yakobo na Yohane. 42 Yesu kawalaga, kawawia, “Muichi kye walya wawatale iwa wang'anyi wa masanga wekyemuchilyia kui pfinya, na wasongoru wawo wekyemugaluo nyoe waṟundi wawo. 43 Kyaindi kyechiwa kuṙo konyu-pfo; indi mndu akundi iwa ang'anyi konyu, nechiwa mṟundi onyu, 44 na mndu akundi iwa o kuwooka konyu, nechiwa isinga lya woose. 45 Cha kyipfa Mono-Adamu alecha icheṟundio-pfo, indi iṟundia wengyi, na ireka moo okye uwe kyindo kyekyiṟa wengyi.” 46 Wakashika Yeriko; na kyiyeri aweiwuka pfo, hamwi na wanalosho wakye, na kyisanzionyi, mana o Timayo, Baritolomayo, kyipfupfuṟe kyilya kyiwekyeeṟeṟa, kyiweṙamie mbai ya njia. 47 Nakyo kyiyeri kyileicho kye nyi Yesu o Nasareti, kyilewooka ikuilenga, na igamba, “Mono-Dawidi, Yesu, ungyisaṟie.” 48 Na wandu wafoi wakakyiṙeṙia kundu kyitsie, kyaindi kyikaengyeṟa ikuilenga, “Mono-Dawidi, ungyisaṟie.” 49 Yesu kagoṟoka, kagamba, “Kyilagenyi.” Wakalaga kyipfupfuṟe kyilya, wakakyiwia, “Kuwanze mrimenyi; goṟoka, naikulaga.” 50 Kyikawiyitsa ikunya lyakyo, kyikatoola, kyikayenda ko Yesu. 51 Yesu kakyigaluo, kakyiwia, “Nukundi ngyikuwutie kyi?” Kyipfupfuṟe kyilya kyikammbia, “Mlosha oko, ngyikundi ngyiiṙime iwona.” 52 Yesu kakyiwia, “Yenda, iiṙikyia lyapfo lyakukyiṟa.” Cha ilyi kyikaenengo iwona; kyikamwosha njienyi.
1 Na kyiyeri wawei kufuhi na Yerusalemu, kufuhi na Betifage na Betania, iambuyana na fumvu lya mashiṙi ga mseituni, naleṙuma wawi kyiiṙi kya wanalosho wakye, 2 kawawia, “Yendenyi mṟasa kyikaṟo kyilya kyiambuyanyi na nyoe; na mukoiṙa napfo, cha ilyi mochiwona igache lya nzoi, lyilandeṙamilyio nyi mndu; lyipfunguonyi, mulyiende. 3 Na mndu kammbia, ‘Ny'kyilyi muiwuta kuṙi?’ gambenyi ‘Mndumii kuwoṙe kyindo aindeṟunda nalyo, na cha ilyi nechilyiwiyiṟa-se na iha.’ ” 4 Wakayenda, wakawona igache lya nzoi lyilyipfungye moongonyi, njienyi ing'anyi. 5 Wandu waata wawegoṟokyi halya-ndu waleṙumo wakawawia, “Ny'kyilyi muipfunguo igache-lyi lya nzoi?” 6 Wakawawia chandu Yesu alewawia, nawo wakawaenenga momu. 7 Wakaendie Yesu igache lyilya lya nzoi, wakaala mawale gawo wuye yalyo; kalyiṙamilyia. 8 Wandu wafoi wakaala mawale gawo njienyi, na wengyi maṟamba walefunja maṙemenyi. 9 Na wandu wawesongoye na walya wawei numa wakakuilenga wechigamba, “Hosiana; nyi oe ammbikyie mboṟa ulya aicha kui rina lya Mndumii. 10 Wumangyi wuicha wo awu-yoṙu Dawidi wuwuwikyie mboṟa. Hosiana wuye ruwewu.” 11 Na oe kaiṙa na Yerusalemu mṟasa hekalunyi; na kyiyeri amwambuye shoose ngyuura tsoose, cha kyipfa nyi kyiyeri kya kyukonyi, kafuma, kayenda Betania hamwi na walya ikumi na wawi. 12 Na lyilya kulekya kyiyeri walewuka Betania nalewoṙo nyi njaa. 13 Kuleshi na oe kawona mfumu uwoṙe maṟa, kayenda kundu nawone kokooya uwoṙe ndunda; na kyiyeri aleshika halya-ndu uwekyeri alewona kyindo sile maṟa-pfo; kyipfa chi kyiyeri kya ikumbia ndunda-pfo. 14 Kagaluo kauwia, “Wookyia inu mṟasa mlungana mndu alalye ndunda kopfo.” Wanalosho wakye wakaicho. 15 Wakashika Yerusalemu, na oe kaiṙa na hekalunyi, kawooka ifuna walya waweikapa mbucha kulya hekalunyi, kapfuluo mesa tsa weilacha heleri, na shiṙi sha walya wekyekumba mbeta. 16 Maa aleenenga mndu momu o iitsia kyindo kulya hekalunyi-pfo. 17 Kalosha, kagamba, “Ngyesa kyikyiṟeie kye numba yako yechiwa yeterewia masanga goose-pfoe? Indi nyoe moigaluo iwa usanja lo wasokyi.” 18 Wang'anyi wa makohanyi na walosha wa mawawaso wakamanya mbonyi wakapfula chandu wechimrumatsa; kyipfa walemwowuo, cha kyipfa wuingyi woose wo wandu waleṟiyio kyipfa kya malosho gakye. 19 Na lyilya kuleila kawuka kulya mṟinyi. 20 Na ngamenyi kyiyeri waweiṙa, walewona mfumu ulya uumie nakamwi. 21 Petiro kakumbuo mbonyi tsa mfumu ulya, kammbia, “Mlosha, ambuya, mfumu ulya uleusesa omwuuma.” 22 Yesu kagaluo, kammbia, “Iṙikyienyi Ruwa. 23 Ny'kyaloi ngammbia, orio oose echiwia fumvu-lyi, kuluka undewiyitso ipalyipalyinyi, maa alawe moilacha-ilacha kyilya aiṙikyie mrimenyi, indi naiṙikyie kye isho agamba shaafukyia, shechiwa kuṙo. 24 Kyipfa kya ikyo ngammbia, orio kyoose moterewa ilyi muiterewa iṙikyienyi kye moshiambilyia, nasho shechiwa shanyu. 25 Na nyoe orio kyiyeri mogoṟoka na iterewa, hooṟienyi, orio ṙeṙo muwoṙe na mndu; kundu na Awu-yonyu akyeri ruwewu namuhooṟie nyoe maṙeko ganyu. [ 26 Kyaindi kokooya nyoe mulaihooṟia, maa Awu-yonyu akyeri ruwewu echimuhooṟia nyoe maṙeko ganyu-pfo.]” 27 Wakashika-se Yerusalemu. Na kyiyeri aweichumia hekalunyi, wang'anyi wa makohanyi, na walosha wa mawawaso na wasongoru wa wandu waleyenda kokye. 28 Wakammbia, “Nyi kui wuchilyi wuha uiṟunda shindo-shi? Na nyi wui alekuenenga wuchilyi uṟunde ishi?” 29 Yesu kawawia, “Ngyechimmbesa kyindo kyimwi, na nyoe mungyigaluoe; naaho-ng'u ngyechimmbia nyi kui wuchilyi wuha ngyiṟunda ishi. 30 ‘Wupatiso wo Yohane wulewuka ruwewu, ang'u ko wandu?’ Ngyigaluonyi.” 31 Wakawesana wo wenyi ko wenyi, wechigamba, “Kokooya logamba wulewuka ruwewu negamba, ‘Ny'kyilyi-ng'u mulalemwiṙikyia?’ 32 Indi lukogamba, ‘Wulewuka ko wandu...’ ”, waleowuo wandu, kyipfa wandu walewona Yohane cha mwikyimbi nakamwi. 33 Wakagaluo Yesu wakagamba, “Luichi-pfo.” Yesu kawawia, “Maa inyi ngyimmbia nyoe nyi kui wuchilyi wuha ngyiṟunda ishi-pfo.”
1 Kawooka iṙeṙa nawo kui mfano. “Mndu umwi naleṙonga ṙema lya msabibu, karingyichia uṟigo, kasuma rina lyekamia mafuṙa, kawika kyitaanga, kagawia waṙemi, kayenda kyaro. 2 Na kui kyiyeri kyakye kaṙuma mtumo ko waṙemi walya, kundu naambilyie ko waṙemi ndunda tsa msabibu. 3 Wakammbaṙa, wakamkapa, wakammbiyitsa nja, alawoṙe kyindo. 4 Kawaṙumia-se mtumo ungyi, na oe wakamfaṟa mṙoenyi, wakammbutia shindo shiwicho. 5 Kaṙuma ungyi, icho wakammbaaga; na wengyi wafoi, iwa wechiwakapa na iwa wechiwawaaga. 6 Kyasia nawewoṙe umwi-se, mana mkunde okye. Ichu na oe kamṙuma kowo mafurumionyi, echigamba, ‘Wechiindia mono-ko.’ 7 Kyaindi waṙemi walya wakawiana, ‘Ichu nyi mokyioṟa, lummbaage, na kyioṟa kyechiwa kyaṙu.’ 8 Wakammbaṙa, wakammbaaga, wakammbiyitsa nja ya ṙema lya msabibu. 9 Kyasia monyi ṙema lya msabibu newuta kyi? Neecha na irumatsa waṙemi walya, na ṙema lyilya lya msabibu neenengyia wengyi. 10 Maa mulandesome shiṟeionyi shiele, ‘Igoe wewika numba walelyilega lyo lyawa igoe lying'anyi lya ndumbenyi. 11 Ṙeṙo-lyi lyiwukyie ko Mndumii, nalyo nyi kyiṟiyisho mbele yaṙu?’ ” 12 Nawo wakapfula immbaṙa, wakaowuo wandu wa kyisanzionyi; kyipfa walemanya kye kui mfano ulya naleṙeṙa mbonyi tsawo. Wakamṙa wakayenda. 13 Wakaṙuma kokye Mafarisayo waata na Maherodi, kundu wamṙege kui maṙeṙo. 14 Na kyiyeri waleafukyia walemmbia, “Mlosha, luichi kye iyoe nyi mndu o loi, maa okyesaṟa kyiṟumi kya mndu-pfo; cha kyipfa okyeambuya fana tsa wandu-pfo kyaindi kyiiṙi kya wuloi nokyelosha njia ya Ruwa. Ngyesa nyi sungusinyi ienenga Kaisari kodi ang'u ote? 15 Lumwenengye, ang'u lulamwenengye?” Na oe, aichi wukulembecheṟi wowo, kawawia, “Ny'kyilyi mongyiyesha? Ngyiendienyi dinari ngyiiwone.” 16 Wakaiende. Kawawia, “Nyi ya wui sanamu-i na kyiṟeio-kyi?” Wakammbia, “Nyi ya Kaisari.” 17 Yesu kagaluo, kawawia, “Enengyenyi Kaisari shikyeri sha Kaisari, na shikyeri sha Ruwa enengyienyi Ruwa.” Wakaṟiyio mnu kyipfa kyakye. 18 Naaho-ng'u Masadukayo, wandu wekyegamba kye kuwoṙe iṟuka lya wapfu-pfo, wakayenda kokye, wakammbesa, wachigamba, 19 “Mlosha, Mose naleluṟeia kye mono-wama o mndu kapfa, kaṙa mka okye alawoṙe mana, mono-wamae naṙuo mka ulya okye nawonie mono-wamae mana. 20 Kyasia kuwewoṙe wana wa mka mfungaaṙe. O kuwooka kaalyika mka, kapfa, alaṙe mana. 21 O kawi na oe kamwalyika kapfa, maa oe aleṙa mana-pfo. Na o kaṟaaṟu na wuṙo taa; 22 mṟasa woose mfungaaṙe, walaṙe mana. Mafurumionyi ga woose mndu mka ulya na oe kapfa. 23 Kyasia, kyiiṙi kya iṟuka lya wapfu nechiwa mka o uha kyiiṙi kya iwo? Kyipfa woose mfungaaṙe walekaa na oe.” 24 Yesu kagaluo, kawawia, “Ngyesa muiṙeka kyipfa kya ikyi, cha kyipfa mulaichi shiṟeio maa wuiṙimi wo Ruwa? 25 Cha kyipfa kyiyeri wechiṟuka ko wapfu, wekyealyika maa ialyiko-pfo, indi wekyewa cha malaika wakyeri ruwewu. 26 Na ko mbonyi tsa wapfu kye wekyeṟutso, mulandesome kyitapunyi kya Mose, halya-ndu haṙeṙie mbonyi tsa kyinguṙu, chandu Ruwa alemmbia echigamba, ‘Inyi nyi Ruwa o Abrahamu, na Ruwa o Isakyi, na Ruwa o Yakobo?’ 27 Oe chi Ruwa o wapfu-pfo, indi o wai na moo. Koikyo muiṙeka mnu.” 28 Na umwi o walosha wa mawawaso kacha, kaicho weṙeṙa na oe, kamanya kye nawagaluo necha, kammbesa, “Kyiiṙi kya mawawaso goose nyi lyiha lyikyeri lya kuwooka?” 29 Yesu kamgaluo, “Lya kuwooka nyilyo ilyi, ‘Aṙanyia, Isiraelyi, Mndumii Ruwa oṙu nyi Mndumii umwi. 30 Na iyoe kunda Mndumii Ruwa opfo kui ngoo yapfo yoose, na kui mrima opfo oose, na kui wuṟango wopfo woose, na kui pfinya tsapfo tsoose.’ 31 Na lya kawi nyilyo ilyi. ‘Kunda momṟasa opfo chandu ukukundi iyoe kumonyi.’ Kuwoṙe iwawaso lying'anyi kuta iga-pfo.” 32 Mlosha ulya o mawawaso kammbia, “Ny'kyaloi, Mlosha, nogamba necha kye Ruwa nyi umwi, kuwoṙe ungyi sile oe-pfo. 33 Na imkunda oe kui ngoo yoose, na kui wuṟango woose, na kui pfinya tsoose, na ikunda momṟasa chandu ukukundi kumonyi kuwoṙe kyiira kuta shiṙaso shoose na shienengo taa.” 34 Na Yesu, kyiyeri alewona kye nagaluo kui wuṟango, nalemmbia, “Iyoe ukyeri kuleshi na Wumangyi wo Ruwa-pfo.” Maa mndu alekaria-se immbesa kyindo wookyia iho-pfo. 35 Na kyiyeri Yesu aweiloshia hekalunyi nalegaluo, kagamba, “Walosha wa mawawaso wekyegamba kuṙa kye Kristo nyi Mono-Dawidi? 36 Dawidi amonyi nalegamba, kui wuiṙimi wo Mumuyo Mweele, ‘Mndumii nalewia mndumii oko, uṙamie kuwoko koko ko kulyoe, mṟasa ngyechiwikyia washituwa wapfo ikaa wanda ya wuchilyi wopfo.’ ” 37 “Dawidi amonyi nagamba nyi Mndumii; kyasia nawa kuṙa mono-kye?” Na wuingyi wung'anyi wo wandu waweimwaṙanyia kui sia. 38 Kawawia maloshonyi gakye, “Kushowenyi na walosha wa mawawaso wakundi ichumia waṟee magale maleshi, na iiṟikyiṟo sangaṙa, 39 na iṙamia mbele masinagoginyi, na shiṙi sha mbele shelyenyi. 40 Wekyesoka wakusu shindo shawo, na kui wukulembecheṟi iterewa shiterewo shileshi. Iwa wechiwona ianduyo lying'anyi.” 41 Na Yesu aṙamie kufuhi na halya-ndu wandu wawekyewika heleri, kaambuya chandu wuingyi wo wandu wawewika heleri handu halya. Wanjama wakawika shifoi. 42 Mndu mka umwi mkusu, mkyiwa kacha, kawika helo tsiwi, tsilyingananyi na kyindo kyilashikyie maa dinari. 43 Kalaga wanalosho wakye, kawawia, “Ny'kyaloi ngammbia, mkusu-chu mkyiwa nawika ngoseṟa kuta woose waiwika handu-ha hewika heleri; 44 kyipfa iwo woose walewika shindo wawuta ngoseṟenyi ya masaa gawo.”
1 Na kyiyeri aweiwuka hekalunyi, umwi o wanalosho wakye nalemmbia, “Mlosha, ambuya, chandu magoe-ga na numba-tsi shikyeri!” 2 Yesu kagaluo, kammbia, “Uwonyi manumba-ga gang'anyi? Hechitsugaa igoe wuye ya igoe lyilechiolotso-pfo.” 3 Na kyiyeri aweṙamie fumvunyi lya mashiṙi ga mseituni; iambuyana na hekalu, Petiro, na Yakobo, na Yohane, na Anderea walemmbesa handu halawoṙe wandu, 4 “Luwie, mbonyi-tsi tsechiwa indi? Na nyi kyikyi kyiṟingyishio kya kyiyeri, isho shoose shechiwa kufuhi iafukyia?” 5 Yesu kawooka iwawia, “Kuṟiisenyi, mndu alamlembe. 6 Wandu wafoi wechicha kui rina lyako, wechigamba, ‘Inyi nyi oe Kristo’, nawo wechilemba wafoi. 7 Na nyoe kyiyeri mochiicho mbonyi tsa shiṙa, na iweweṙo lya shiṙa mulakangaṟikye. Isho shiwaṟi iwoneka, kyaindi mafurumionyi galya galandeche-pfo. 8 Cha kyipfa isanga lyechiamka ikapana na isanga, na wumangyi ikapana na wumangyi. Kochiwaṙa shiṙiinza handu kui handu na kochiwaṙa njaa. Igo nyigo mawookyionyi ga iwawio lying'anyi. 9 “Na nyoe kuṟiisenyi mrima yanyu. Kyipfa wechimṙuo nyoe mengyenyi; na masinagoginyi wechimkapa; na nyoe mochiṙoo mbele ya wachilyi na wamangyi kyipfa kyako, iwa wuṟingyishi kowo. 10 Na kyiwaṟi Ndumi Ngyicha iongoyo kuwooka masangyenyi koose. 11 Na kyiyeri wechimsuo nyoe, na imṟiinga, mulakusaṟe kuwooka shilya mochigamba, kyaindi orio kyindo mochienengo saa iya, kyigambenyi cha kyipfa chi nyoe muiṙeṙa-pfo, indi nyi Mumuyo Mweele. 12 Na mndu nechiṟiinga mono-wamae kundu nawoogo, na awu nechiṟiinga mana, na wana wechigalukyia wafee wawo, na iwawaaga. 13 Na nyoe mochiwa muwasuoe nyi wandu woose kyipfa kya rina lyako; kyaindi mokarishia mṟasa mafurumionyi, nyi oe echikyia.” 14 “Kyaindi mukowona ulya aoweshie, na ekyenyamaṟa shindo shiele agoṟokyi handu halawaṟi, (aisoma namanye), nyi lyo-ng'u wakyeri urukyenyi lo Uyuda waṙichilyie mafumvunyi. 15 Na mndu akyeri kai alasokye pfo, maa alaiṙe na kanyi kokye iṙuo kyindo. 16 Na akyeri mṙemenyi alawuye na numa iṙuo ikunya lyakye. 17 Kyaindi ochia lowo iwo wai wanene, nawo waionza mfiri-yo! 18 Indi terewenyi isho shilawutikye kyiyeri kya mbeho. 19 Cha kyipfa mfiri-yo yechiwaṙa wukyiwa, chandu kyilandewe wookyia mawookyionyi ga Ruwa igumba mṟasa wulalu, maa kyechiwa maa ale-pfo. 20 Na kokooya Mndumii alalefuiṟa mfiri-yo mndu oose awechikyia-pfo; kyaindi kyipfa kya wasambuṟe alewasambuṟa nalefuhiṟa mfiri-yo. 21 Na kyiyeri-kyo mndu kammbia, ‘Kristo nakyeri iha’, ang'u ‘nakyeri kulya’, maa mulaiṙikyie. 22 Cha kyipfa kochiwoneka Makristo ga wongo, na weonguo shisuku wa wongo, wechiloṟa shiṟingyishio na maṟiyisho, waiṙime imlemba, kokooya kyaiṙimika, maa iwo wasambuṟe. 23 Indi nyoe kuṟiisenyi; ngamumuikyimbia shoose.” 24 “Kyaindi mfiri iya, numa ya wukyiwa-wo, mnengyeṟi oshikyio nyi meema, na mori ochiwuta ngyeela yacho-pfo, 25 na nyenyeri tsa ruwewu tsechioloka, shindo shingyi shikyeri ruwewu shechikupaaya-paya. 26 Iho nyilyo wechiwona Mono-Adamu echicha mapuchinyi kui pfinya tsifoi na mng'ano. 27 Nyilyo echiṙuma malaika na isania wasambuṟe wakye iwuka ngyuura tsoose tsiina tsa wuyana, iwuka ura lo kyishingonyi kya uruka mṟasa matsitsionyi ga ruwewu.” 28 “Ko mfumu kuloshenyi mfano. Kyiyeri mbaga yacho yawiṟa-wiṟa, na ioṟia maṟa, mokyemanya kye kyiyeri kya kyilyimu kyikyeri kufuhi. 29 Na nyoe taa, mukowona mbonyi-tso tsewooka, manyenyi kye nai kufuhi moongonyi. 30 Ny'kyaloi, ngammbia, rika-lyi lyechiiṙa-pfo, mṟasa isho shoose shiafukyie. 31 Ruwewu na uruka shechiiṙa; kyaindi maṙeṙo gako gechiiṙa maa ale-pfo.” 32 “Kyaindi mbonyi tsa mfiri ulya na saa iya kuwoṙe aichi-pfo, maa malaika wakyeri ruwewu, maa Mana, sile Awu. 33 Ambuyenyi necha, laenyi kyiṙombo, terewenyi, cha kyipfa muichi kyiyeri kyechiwa indi-pfo. 34 Mfano okye nyi cha mndu aiyenda kyaro, kawia watumo wakye waambuye numba yakye, na ienenga orio mndu iṟunda lyakye, na oe kawia mringyi o moongonyi nalae kyiṙombo. 35 Kyasia, laenyi-ng'u kyiṙombo, cha kyipfa muichi kyiyeri monyi kanyi aicha-pfo, kye nyi kyukonyi, ang'u kye nyi kyio kya mayeleyele, ang'u kyiyeri ilying'onyi lyifuga, ang'u ngamenyi; 36 alache kyituukyia namukooye mulee. 37 Na ikyo ngyimmbia nyoe, ngammbia moose, laenyi kyiṙombo.”
1 Numa ya mfiri iwi kuwekyeri mfiri ung'anyi o Pasaka na mkate ilawengyitarang'ishe wang'anyi wa makohanyi na walosha wa mawawaso wakapfula njia ya immbaṙa kui ngyeṟo na immbaaga. 2 Cha kyipfa walegamba, “Kyilacheewa kyiyeri kya mfiri ung'anyi, kulachewaṙa kyituṟu wandunyi.” 3 Na oe kyiyeri awekyeri Betania, kanyi ko Simion awewoṙo nyi taambo, echilya kyelya, mndu mka awoṙe kyimkyepe kya mafuṙa mecha ga woguru wung'anyi kacha, kapfunuo kyimkyepe kyilya kagaletsia mṙoenyi kokye. 4 Hawewoṙe na wandu walesuo wechigamba, “Kyitewe nyi kyikyi iṙetsa mafuṙa mecha ga woguru wung'anyi mbaṟe-i iyi? 5 Cha kyipfa mafuṙa-ga gaweiṙima ikumbo ko dinari magana gaṟaaṟu na ngoseṟa, wakyiwa wakaenengo. Wakanuṟia mnu kyipfa kya mka ulya.” 6 Yesu kagamba, “Mlekyenyi. Ny'kyilyi mumlyisa wukyiwa? Nangyiṟundia kyindo kyicha. 7 Kyipfa mfiri yoose muwoṙe wakyiwa hamwi na nyoe, na orio kyiyeri mukokunda moiṙima iwaṟundia mecha; kyaindi inyi mungyiwoṙe mfiri yoose-pfo. 8 Naṟunda chandu aiṙima. Nasonguo ishia mmbiu oko mafuṙa mecha kyipfa kya iṟiko. 9 Ny'kyaloi, ngammbia, orio kyiyeri Ndumi Ngyicha yaongoyo wuyanenyi koose, ikyi ichu aṟunda kyechisendo imkumbuo.” 10 Yuda Isikariote, umwi o walya ikumi na wawi, kayenda mṟasa ko wang'anyi wa makohanyi, naiṙime imṟiinga kowo. 11 Nawo kyiyeri waleicho walechihiyo, wakateṟia imwenenga heleri. Kapfula kyiyeri kyicha kyemṟiinga. 12 Na mfiri o kuwooka o mkate ilangyitarang'ishe kyiyeri waleshinja shimana sha moondo ga Pasaka, wanalosho wakye wakammbia, “Nyi kwi ukundi luyende lukuṟeyeṟie ulye pasaka?” 13 Kaṙuma wawi kyiiṙi kya wanalosho wakye, kawawia, “Yendenyi mṟinyi, mndu msoṟo akuṙikyie kyigondi kya mṟinga nechikarisana na nyoe, muoshenyi. 14 Na handu hoose echiiṙa naho wienyi monyi kanyi, ‘Mlosha nagamba, nyi hanga kyiṟi kyako kya wayenu kyikyeri, ngyilyiie pfo pasaka, hamwi na wanalosho wako?’ 15 Na oe amonyi nechimloṟa, kai ing'anyi, ingyichope, ipfo luṟeyeṟienyi.” 16 Wanalosho wakafuma, wakayenda mṟinyi, wakawona chandu alewawia, wakaṟeyeṟa pasaka. 17 Kyasia kyiyeri kuleila Yesu kacha hamwi na walya ikumi na wawi. 18 Kyiyeri waweilya, Yesu nalegamba, “Ny'kyaloi, ngammbia, umwi onyu, na oe nailya hamwi na inyi nechingyiṟiinga.” 19 Wakawooka iwona fowa mrimenyi, wakammbia umwi umwi, “Ngyesa, nyi inyi?” 20 Kawawia, “Nyi umwi o iwo ikumi na wawi, aikapa itongye hamwi na inyi kyitelenyi. 21 Cha kyipfa Mono-Mndu naindepfa chandu shiṟeio shigambie; kyaindi ochia lokye mndu ulya echiṟiinga Mono-Mndu! Kyiwechiwa nanga kokye mndu-cho alawefeo.” 22 Nawo kyiyeri waweilya, kaira mkate, kawikyia mboṟa, kaupeṟenguo, kawaenenga, kagamba, “Ambilyienyi; ichu nyicho mmbiu oko.” 23 Kaira kyiṙoo, kaana, kawaenengyia; wakaikanana kyiṙoo kyilya woose. 24 Kawawia, “Iyi nyiyo samu yako ya mma, ipusuka kyipfa kya wafoi. 25 Ny'kyaloi, ngammbia nyoe, ngyechinyo-se mpfinyo-pfo, mṟasa mfiri ulya ngyechiunyo uhya Wumangyinyi wo Ruwa.” 26 Nawo wamuimbe walefuma iyenda fumvunyi lya mashiṙi ga mseituni. 27 Yesu kawawia, “Kyio-kyi nyoe moose mochiṙicha mungyiṙe ngyimonyi, cha kyipfa kyikyiṟeie, ‘Ngyechikapa mlyisi, na moondo gechinyanyaṟika.’ 28 Kyaindi numa ya iṟuka lyako, ngyechimusongoya iyenda Galyilaya.” 29 Petiro kammbia, “Wechiṙicha woose, kyaindi chi inyi-pfo.” 30 Yesu kammbia, “Ny'kyaloi, ngakuwia iyoe, inu, kyio-kyi, ilying'onyi lyilafuga kawi, nochingyikana kaṟaaṟu.” 31 Na oe kaengyeṟa mnu igamba, “Maa kyikangyikooya ipfa na iyoe, ngyechikukana maa ale-pfo.” Na woose wakawegamba kuṙo. 32 Numa ya iho wakacha mṟasa bustanyi yekyelago Getisemane; kawia wanalosho wakye, “Ṙamienyi iha kyiyeri-kyo ngyiterewa.” 33 Kaṙuo Petiro na Yakobo na Yohane hamwi na oe, kawooka iiṟewe mnu na ikutuura. 34 Kawawia, “Mrima oko uiṟewe cha mndu aipfa. Kaenyi iha mulae kyiṙombo.” 35 Katikyira mbele kyitutu, kaoloka wanda, echiterewa kye, kyikaiṙimika, saa iya ya matuuro immbukye. 36 Kagamba, “Awu, Awu-yoko, shoose shekyeiṙimika kopfo. Ungyiwute matuuro-ga; kyaindi, chi chandu ngyikundi inyi-pfo, indi chandu ukundi iyoe.” 37 Kacha kawakooya walee maṙoe, kawia Petiro, “Ngyesa, Simion, nulee? Oiṙima ilaa kyiṙombo maa saa imwi-pfoe? 38 Laenyi kyiṙombo muterewe, mulacheyesho. Mrima ukundi indi mmbiu umfafa.” 39 Kayenda-se, katerewa, echigamba kyindo kyilya kyilya. 40 Kacha-se kawakooya walee, kyipfa meso gawo gawa malemeri, maa walamanye kyemgaluo. 41 Kacha lya kaṟaaṟu, kawawia, “Laenyi wulalu, muonyonye. Kyishikyie. Saa yamcha. Ambuya, Mono-Adamu naiwiko mawokonyi ga wandu wawoṙe wunyamaṟi. 42 Amkyenyi, sindenyi. Ambuya ulya aingyiṟiinga amshika kufuhi.” 43 Kyasia kyiyeri aweiṙeṙa, cha ilyi Yuda nalecha, umwi o walya ikumi na wawi, na hamwi na oe ṟiima lya wandu, wawoṙe ngyuushu na maṟeta, wawukyie ko wang'anyi wa makohanyi, na walosha wa mawawaso, na wasongoru wa wandu. 44 Na ulya momṟiinga nalekoawaenenga kyiṟingyishio, echigamba, “Icho ngyechimkomba, icho nyi oe; mmbaṙenyi, mumṙuo mochimringa.” 45 Kyasia kyiyeri alecha, cha ilyi kayenda kokye, kagamba, “Rabi,” kamkomba. 46 Wakagoṟuo mawoko gawo wakammbaṙa. 47 Na umwi o walya wawekyeri ho kaira ushu, kakapa mtumo o Mkohanyi ang'anyi kuta woose, kamṙumbuo kurwi. 48 Yesu kagaluo, kawawia, “Ngyesa, nyi cha msokyi mofuma muwoṙe ngyuushu na maṟeta, ingyiwaṙa inyi? 49 Orio mfiri ngyiwekyeri mbele yanyu hekalunyi ngyechilosha, mulangyiwaṙe; kyaindi ishi shawa kundu shiṟeio shiiṙime iafukyia.” 50 Naaho-ng'u wakamṙa, wakaṙicha woose. 51 Na manakye umwi kamwosha, alaṟee kyindo sile iwale lya uwiṟo, wakammbaṙa. 52 Na oe kaṙa iwale lyilya, kaṙicha ai kyiṟanguoe. 53 Nawo wakaṙuo Yesu ko Mkohanyi ang'anyi kuta woose wakakuumbia kufuhi na oe, wang'anyi wa makohanyi na wasongoru wa wandu na walosha wa mawawaso. 54 Na Petiro kamwosha akyeri kuleshi, mṟasa numbenyi ya Mkohanyi ang'anyi kuta woose; kaṙamia hamwi na waṟundi, echioṙa moṙo. 55 Kyasia wang'anyi wa makohanyi na woose halya mengyenyi wakapfula wuṟingyishi waiṙime iwaaga Yesu; walawone. 56 Cha kyipfa wafoi walemṟingyishia wongo, kyaindi wuṟingyishi wowo wulaṙuane. 57 Mṟasa wengyi wakagoṟoka, wakamṟingyishia wongo, wechigamba, 58 “Soe lulemwicho echigamba, ‘Inyi ngyechiunduo hekalu-lyi lyilyiachikyie kui mawoko, na kyiiṙi kya mfiri iṟaṟu ngyechiwika lyingyi lyilalyiachikyie kui mawoko.’ ” 59 Maa kuṙo wuṟingyishi wowo wuleṙuana-pfo. 60 Naaho-ng'u Mkohanyi ang'anyi kuta woose kagoṟoka makyiṙi-gawi, kawesa Yesu, echigamba, “Ugaluo kyindo? Iwa waikuṟingyishia kyi?” 61 Kyaindi katsia tsi, maa alegaluo kyindo-pfo. Mkohanyi ulya ang'anyi kuta woose kammbesa-se kammbia, “Iyoe nyi oe Kristo, Mana o ulya awoṙe mng'ano?” 62 Yesu kagamba, “Inyi nyi oe, na nyoe mochiwona Mono-Adamu aṙamie kuwoko ko kulyoe ko Ruwa monyi pfinya, echicha na mapuchi ga ruwewu.” 63 Mkohanyi ulya ang'anyi kuta woose karanduo mawale gakye, echigamba, “Kuwoṙe-se kyimaṙuma kya kyikyi ipfula waṟingyishi? 64 Momuicho chandu alahia Ruwa. Muwonyi kuṙa nyoe?” Woose wakamwanduya kye kyimmbaṟi iwoogo. 65 Wengyi wakawooka impuchia maṙa, wakamshikyia kyaam, na imkapa nzina, na immbia, “Lasha. Maa waṟundi nawo wakamkapa ngofi.” 66 Na Petiro nawekyeri halya-ndu aweioṙia moṙo. Umwi o shisinga sha Mkohanyi ang'anyi kuta woose kacha, 67 kawona Petiro eoṙa moṙo kamwitukuya, kagamba, “Maa iyoe nuwekyeri hamwi na Yesu, Mnasareti ulya.” 68 Kakana kagamba, “Ngyiichi maa ngyimanya isho ugamba iyoe-pfo.” Kafuma na nja, ilying'onyi lyikafuga. 69 Na kyisinga kyilya kyikammbona-se, kyikawooka-se iwia walya wawegoṟokyi halya, “Ichu nyi umwi owo.” 70 Kakana-se. Numa ya kyiyeri kyifuhi-se walya wawegoṟokyi halya wakawia Petiro, “Loi nui umwi owo, cha kyipfa iyoe nui Mgalyilaya.” 71 Kawooka ilya nyamu, “Ngyiichi mndu-chu mumsenda-pfo.” 72 Na cha ilyi ilying'onyi lyikafuga lya kawi. Petiro kakumbuo kyindo kyilya alewio nyi Yesu, “Ilying'onyi lyilafuga kawi, nochingyikana kaṟaaṟu.” Na kyiyeri alekusaṟa kyipfa kya ṙeṙo-lyo, kalyia.
1 Na kyiyeri kulekya wang'anyi wa makohanyi walewaṙa kyisanzionyi hamwi na wasongoru wa wandu na walosha wa mawawaso na mengye yoose, wakapfunga Yesu, wakamṙuo mbele ya Pilato. 2 Pilato kammbesa, “Iyoe nyi oe mangyi o Wayuda?” Kagaluo, kammbia, “Iyoe nogamba.” 3 Na wang'anyi wa makohanyi wawemwanduya shindo shifoi. 4 Pilato kammbesa-se, echigamba, “Ugaluo kyindo? Ambuya nyi shindo shinga waikuanduya!” 5 Maa Yesu alegaluo kyindo-se-pfo, mṟasa Pilato kaṟiyio. 6 Kyasia kyiyeri kya mfiri ung'anyi nekyewapfunguya mpfungo umwi wamkundi. 7 Hawewoṙe mndu umwi ekyelago Baraba, nampfungye hamwi na walya walelya wuṟiingyi, na iwaaga kyiiṙi kya wuṟiingyi-wo. 8 Wandu wa kyisanzionyi wakacha wakawooka iterewa nawawutie chandu aweichiwie. 9 Pilato kawagaluo, echigamba, “Ngyesa, mukundi ngyimpfunguye mangyi o Wayuda?” 10 Cha kyipfa nalemanya kye wang'anyi wa makohanyi wamṙambika kokye kui wunyenyi. 11 Kyaindi wang'anyi wa makohanyi wakaamtsa kyituṟu kyiiṙi kya walya wawesanzie halya, kye nanga wapfunguyo Baraba. 12 Pilato kagaluo-se, kawawia, “Kyasia ngyimmbutie kyi ichu mugamba kye nyi mangyi o Wayuda?” 13 Wakakalagatsa-se, “Mkapie msalabenyi.” 14 Pilato kawawia, “Nyi wuwicho wuha alewuta?” Wakaengyeṟa mnu ikalagatsa, “Mkapie msalabenyi.” 15 Pilato akundi ichihiṟa walya wasanzie halya, kawapfunguya Baraba; kawuta Yesu, numa ya igamba nakapo na ngowa, kundu nakapio msalabenyi. 16 Na asikari wakamṙuo mṟasa Praitorio (kyimwi na igamba numba ya wuchilyi), wakasanzia ho asikari walya wengyi woose. 17 Wakamṟika iwale lya kyimaande-maande, wakaoka oṟo ya msha, wakaimṟika mṙoenyi. 18 Wakawooka imwiṟikyiṟa, “Lokuiṟikyiṟa, Mangyi o Wayuda!” 19 Wakamkapa na upoi mṙoenyi, wakampuchia maṙa, wakapfiria ndi, wakamwindia. 20 Na wamumkape makuukuu, wakammbuta iwale lyilya lyakye lya kyimaande-maande, wakamṟika mawale gakye amonyi; wakamṙuo nja kundu wamkapie msalabenyi. 21 Wakaitika mndu aweiiṙa, awukyie mṙemenyi, Simion o Kyirene, awu-yawo Iskanda na Ṟufo, kundu naṙuo msalaba okye. 22 Wakamwende mṟasa handu hekyelago Golyigota, kyimwi na igamba, “Ipoṟong'u.” 23 Wakamwenenga mpfinyo ummbikye manemane, alaambilyie. 24 Wakamkapia msalabenyi, wakagawa mawale gakye, wakagakapia kuṟu kuha orio mndu naṙuo kyi. 25 Kyasia kyiwekyeri kyiyeri kya saa tsiṟaaṟu, nawo wakamkapia msalabenyi. 26 Hawewoṙe na kyiṟeio kya ianduyo lyakye kyigambie, “MANGYI O WAYUDA.” 27 Na hamwi na oe walekapia msalabenyi wasokyi wawi, umwi kuwoko kokye ko kulyoe na umwi kuwoko kokye ho kumoso. [ 28 Kyasia kyiṟeio kyikaafutsio kyigambie, “Naletalo hamwi na wefunja mawawaso.]” 29 Na wandu waweiṙa njienyi wakamlahia, wechisunza-sunza mṙoe, wechigamba, “Mwambuye! Iyoe mounduo hekalu na ilyiwika mfirinyi iṟaṟu, 30 kukyiṟe mrima opfo, usokye msalabenyi.” 31 Na wuṙo na wang'anyi wa makohanyi wakamkapa makuukuu, hamwi na walosha wa mawawaso, wechigamba, “Nalekyiṟa wengyi, aiiṙima ikukyiṟa amonyi-pfo. 32 Kristo, mangyi o Isiraelyi, nasokye wulalu msalabenyi luiṙime iwona na iiṙikyia. Maa walya walekapio msalabenyi hamwi na oe wakamṙeṙia maṙeṙo mawicho.” 33 Na kyiyeri kulewa saa tsiṟandaaṟu, kukowaṙa meema urukyenyi koose, mṟasa saa kyenda. 34 Na saa kyenda Yesu kakuilenga na ṟui lyakye ko pfinya, “Eloi, eloi, lama sabakyitani?” Ikyo kyagamba, “Ruwa oko, Ruwa oko, ny'kyilyi ongyiṙa?” 35 Na wandu waata wawegoṟokyi halya, walegamba, “Nailaga Elyiya.” 36 Na umwi kakapa mteeṟa, kaichuṟa kyindo kyekyetarang'ia kyindonyi kyekyeongyia mṟinga, kakyiwikyia upoinyi, kamrutsa, echigamba, “Lekyenyi, luwone kokooya Elyiya neecha imsotsa msalabenyi.” 37 Na Yesu kafiiṟa na pfinya kalekyia moo. 38 Isulyia lyeshingyia hekalunyi lyikaranduka kawi wookyia wuye mṟasa wanda. 39 Kyasia mchilyi ulya, awegoṟokyi ho iambuyana na oe, kyiyeri alewona kye nalelekyia moo mbaṟe-yo, kagamba, “Loi mndu-chu nawekyeri Mono-Ruwa.” 40 Hawewoṙe na waka waiambuya wakyeri kuleshi; kyiiṙi kyawo hawewoṙe Maria Makyidalena, na Maria wama o Yakobo ulya mtutu na Yose, na Salome. 41 Iwo nyiwo waleoshana na oe ipfo Galyilaya, na imṟundia; na wengyi wafoi waleṙo hamwi na oe mṟasa Yerusalemu. 42 Na kommbe kyukonyi, cha kyipfa nyi Ikuṟeyeṟa, nyicho mfiri osongoya mfiri o onyonya, 43 Yosefu, mndu o Arimataya, mndu ekyeindio, mndu o mengye yeanduya wandu, na oe naweiweṙelyia iafukyia lya Wumangyi wo Ruwa; kayenda kulawoṙe wuowu, mṟasa mbele ya Pilato katerewa mmbiu o Yesu. 44 Kyaindi Pilato kaṟiyio, kye ampfa. Kalaga mchilyi ulya kammbesa kokooya ampfa kyiyeri kyileshi kyamwiṙe. 45 Na ammbone wuṟingyishi ko mchilyi ulya, kaenenga Yosefu mnying'a ulya. 46 Na oe kaguṟa sanda, kamsotsa msalabenyi, kamwaṟahia sanda iya, kammbika kyilomenyi kyiwekyiachikyie iṟaṟenyi; kawikyia igoe mbele ya moongo o kyilome. 47 Na Maria Makyidalena na Maria mama o Yose wakaambuya handu alewikyio.
1 Na mfiri o onyonya omwiṙe Maria Makyidalena na Maria mama o Yakobo na Salome waleguṟa mafuṙa gekyepfaama necha waiṙime indemshia. 2 Na ngamenyi utuko, mfiri o kuwooka o juma, wakayenda kyilomenyi, kyiyeri mnengyeṟi uweiṙo; 3 wakawesana wo wenyi ko wenyi, “Nyi wui echiwuta igoe lyilya halya moongonyi o kyilome?” 4 Na lyilya waleambuya walewona kye igoe lyilya lyammbuto ho; nalyo lyiweng'anyi mnu. 5 Wakaiṙa na kyilomenyi wakawona manakye aṙamie kuwoko ko kulyoe, aṟee iwale lya uwiṟo; wakaṟiyio. 6 Na oe kawawia, “Mulaṟiyio. Muipfula Yesu Mnasareti; alekapio msalabenyi. Amṟuka; akyeri iha-pfo. Ambuyenyi handu walemmbikyia. 7 Kyaindi yendenyi, mundewia wanalosho wakye, na Petiro, kye namsongoi iyenda Galyilaya; ipfo mochimmbona, chandu alemmbia.” 8 Wakafuma na nja, iwuka kulya kyilomenyi weṙicha; cha kyipfa walewoṙo nyi iṙeṙema na iṟiyio. Maa walewia mndu kyindo-pfo, kyipfa waleowuo. 9 Na oe kyiyeri aleṟuka mfiri o kuwooka o juma, nalewoneka ko Maria Makyidalena kuwooka, ulya alemmbuta waṟufui wawicho mfungaaṙe. 10 Icho naleyenda kaongoya mbonyi walya wawekyeri hamwi na oe, nawo waweikapa ṟanyi na ifiiṟa. 11 Kyaindi iwo kyiyeri waleicho kye nai na moo, na oe nammbona, waleiṙikyia-pfo. 12 Numa ya isho kawoneka ko wandu wawi kyiiṙi kyawo, nawoṙe fana ingyi; nawo waweiyenda mṙemenyi. 13 Na iwo wakayenda wakaongoya mbonyi walya wengyi; maa iwo walewairikyia-pfo. 14 Numa ya iho kawono nyi walya ikumi na umwi kyiyeri waweilya. Kawaṙeṙia kyipfa kya iiṙikyia lyawo lyaangu na wuumu wo mrima yawo, cha kyipfa waleiṙikyia walya walemmbona kyiyeri aleṟuka ko wapfu-pfo. 15 Kawawia, “Yendenyi wuyanenyi koose, mundeonguo Ndumi Ngyicha ko orio kyigumbe. 16 Aiṙikyia na ipatiso nechikyia; alaiṙikyia, nechianduyo. 17 Na shiṟingyishio-shi shechioshana na iwo waiṙikyie. Kui rina lyako wechifuna waṟufui wawicho; wechiṙeṙa kui mṙeṙie ngyihya. 18 Wechiwaṙa njoka; maa wakanyo kyindo kya wuṟoi; kyechiwawutia kyindo maa ale-pfo. Wechiyekyia mawoko gawo wuye ya waluoe, nawo wechiwaṙa pfinya.” 19 Kyasia Mndumii Yesu, amṙeṙe nawo, kaṙoo wuye ruwewu, kaṙamia kuwoko ko kulyoe ko Ruwa. 20 Na walya wakafuma, wakaonguo Ndumi Ngyicha kundu koose, Mndumii echiṟunda maṟunda hamwi nawo, na iṟingyishia mbonyi tsilya kui shiṟingyishio shileoshana natso.
1 Kyipfa kya ilyi wandu wafoi waletambagana iṟeia necha mbonyi tsilya tsilewutika koṙu, 2 chandu walya waleṟingyishia na iwona mbonyi-tsi waleluongoya, hamwi na waṟundi wa Ṙeṙo lyilya wookyia mawookyionyi, 3 ngawona nyi necha inyi, kyipfa kya ilyi ngyilepfula wuṟingyishi wo mbonyi-tso wookyia mawookyionyi, ikuṟeia necha, Tofilo Monyi Kyiṟumni, 4 umanye necha mbonyi tsilya ulelosho. 5 Kacha kyiyeri kya Herode, mangyi o Wayuda, kuwewoṙe mkohanyi umwi, ekyelago Sakaria, o kamba lya Abiya, na mka okye nawei umwi o kyishari kya Aron, ekyelago Elyisapeti. 6 Na woose wewawi wawewoṙe wusumganyi mbele ya Ruwa, wechiosha mawawaso goose ga Mndumii na shilya atutumie kulawoṙe igambo kye wawoṙe kyindo kyoose kyiwicho. 7 Nawo wawewoṙe mana-pfo, kyipfa Elyisapeti nawei muumba na woose wewawi wawewaku mnu. 8 Kyasia kyiyeri kya kamba lyakye lyeṟunda cha mkohanyi mbele ya Ruwa, 9 chandu kyiwekyeri kyiṙo kya wukohanyi, kaolokyio nyi kuṟu kuha iiṙa na hekalunyi lya Mndumii indekoṟa uvumba. 10 Na wuingyi woose wo wandu wawekyeri iterewa Ruwa nja ya hekalu kyiyeri kya ikoṟa uvumba. 11 Malaika o Mndumii kacha na kokye agoṟokyi ura lo kulyoe lo mesa ya Mndumii yekoṟia shindo shekyeṙutsa mtsu. 12 Kyiyeri Sakaria alemmbona naleiṟewe, kawoṙo nyi wuowu. 13 Kyaindi malaika ulya kammbia, “Ulaowuoe, Sakaria, kyipfa kyiterewo kyapfo kyaaṙanyio, na mka opfo, Elyisapeti, nechifee mana o kyisoṟo, na nochimlaga Yohane. 14 Na iyoe nochiwaṙa sia na ichihiyo lying'anyi, na wandu wafoi wechichihiyo kyiyeri mana-cho echifeo. 15 Kyipfa nechiwa ang'anyi mbele ya Ruwa. Echinyo mpfinyo maa kyindo kya wunanzi-pfo; na oe nechiichuṟo nyi Mumuyo Mweele wookyia wosinyi ko wamae. 16 Na oe nechiwiyiṟa wandu wafoi wa Isiraelyi na ko Mndumii Ruwa owo. 17 Nechisonguo mbele yakye awoṙe pfinya tsa mrima cha tsilya tsa Elyiya, kundu nagaluo waawu wasanze na wana, na ienenga wawicho wuṟango wo wandu wasumganyi, na iṟeyeṟia Mndumii wandu wawaṟeyeṟie Wumangyi wo Ruwa.” 18 Sakaria kawia malaika, “Ngyechimanya kuṙa wuloi wo mbonyi-tsi? Inyi ngyimku na mka oko nyi mkyeku o mfiri ifoi.” 19 Malaika kamgaluo, kammbia, “Inyi nyi Kapreelyi, ngekyegoṟoka mbele ya Ruwa; na inyi ngaṙumo ngyiṙeṙe na iyoe na ikuwia mbonyi-tsi ngyicha. 20 Nochiwa ndiṟi, ulechiiṙima iṙeṙa, mṟasa mfiri ulya shechiṟundika isho, kyipfa oiṙikyia maṙeṙo gako-pfo, nago gechiafukyia kui kyiyeri kyago.” 21 Na wandu walya waweiweṙelyia Sakaria, wakaṟiyio kya ifurumia lyakye kulya hekalunyi. 22 Na lyilya alefuma pfo alaiiṙima iṙeṙa nawo, walemanya kye nalewona shindo shilandewono akyeri cha mndu ailoṙo kulya hekalunyi, na oe kawatsinia kaṙio ai ndiṟi. 23 Kyasia na lyilya mfiri ya kamba lyakye ileafukyia kayenda kanyi kokye. 24 Na numa ya mfiri iya mka okye, Elyisapeti, naleira mana kakaa numba mori itanu, echigamba, 25 “Kuṙi nyi wuṙo Mndumii alengyiwutia mfiri iya alengyiambuya kundu nangyiwute sonu mbele ya wandu.” 26 Mori iṟandaaṟu wookyia kyiyeri Elyisapeti aleira mana, malaika Kapreelyi naleṙumo nyi Ruwa nayende mṟasa mṟi o Galyilaya okyelago Nasareti, 27 ko mana mkyega aweṙuṙo nyi mndu awekyelago Yosefu, o kyishari kya Dawidi; na rina lya mana-cho mkyega nyi Mariamu. 28 Kaiṙa na kanyi kokye, kagamba, “Ngakuiṟikyiṟa, iyoe umwenengye isaṟia, Mndumii nai hamwi na iyoe.” 29 Na oe kaiṟewe mnu mrimenyi kyipfa kya maṙeṙo ga malaika ulya kakusaṟa mrimenyi, “Kyiiṟikyiṟo-kyi nyi kya mbaṟe iha?” 30 Malaika kammbia, “Ulaowuoe, Maria, kyipfa nowona isaṟia ko Ruwa. 31 Nochiira mana na nofee mana o kyisoṟo; na nochimlaga Yesu. 32 Icho nechiwa ang'anyi. Nechilago Mana o ulya ai wuye, na Mndumii Ruwa nemwenenga kyiṙi kya wuchilyi kya Dawidi, awuye. 33 Nechichilyia numba ya Yakobo mlungana, na Wumangyi wokye wochisia-pfo.” 34 Maria kawia malaika ulya, “Kyechiwa kuṙa kyindo-kyi, na inyi ngyilamwalyikye?” 35 Malaika kagaluo, kammbia, “Mumuyo Mweele necha na kopfo na pfinya tsa icho ai wuye tsekushikyia cha kyirinje. Kyipfa kya ikyo, ikyo kyechifeo kyelago nyi kyiele, Mana o Ruwa. 36 Lyingyi-se, mshari opfo, Elyisapeti, na oe naleira mana o kyisoṟo wukunyi wokye; na mori-chu nyi o kaṟandaaṟu ko icho alelago muumba. 37 Kyipfa kuwoṙe kyindo kyilekyeiṙimika ko Ruwa-pfo.” 38 Maria kagamba, “Inyi nyi kyisinga kya Mndumii; kyiwe koko chandu ogamba.” Numa ya iho malaika kawuka halya kayenda. 39 Kyasia, mfiri-yo Maria kafuma, kayenda faṟa mṟasa uruka lo mafumvunyi mṟinyi umwi o Yuda, 40 kaiṙa na kanyi ko Sakaria, kaiṟikyiṟa Elyisapeti. 41 Na lyilya Elyisapeti aleicho kyiiṟikiṟo kyilya kya Maria, kyikoku kyikakupaaya wosinyi kokye. Elyisapeti kaichuṟo Mumuyo Mweele 42 kaṙeṙa kui ṟui lying'anyi, echigamba, “Nummbikyie mboṟa iyoe kyiiṙi kya waka, na mono-pfo nechiwikyio mboṟa. 43 Mbonyi-tsi tsangyiwutikyia kuṙa, utane mama o Mndumii oko acha na koko inyi? 44 Kyipfa ilyi ṟui lyapfo lyeiṟikyiṟa lyileiṙa na maṙwinyi gako, kyikoku kyilekupaaya kui sia wosinyi-koko. 45 Na agusu icho aleiṙikyia; kyipfa isho alewio nyi Mndumii shechiafukyia.” 46 Maria kagamba, 47 “Mrima oko ong'anyisa Mndumii, na ngoo yako yachihiyo kyipfa kya Ruwa, Mkyiṟa oko. 48 Kyipfa naambuya wufofo wo kyisinga kyakye. Kyipfa, ambuya, wookyia wulalu marika goose gengyilaga ammbikyie mboṟa. 49 Kyipfa awoṙe pfinya nangiwutia maṟiyisho, na rina lyakye lyilyiele. 50 Na isaṟia lyakye lyekyekaa marika mṟasa marika ko iwo wekyemwowuo na imwindia. 51 Nawoṙe pfinya yewuta shindo sha maṟiyisho; naleola-ola walekyeicho makusaṟonyi ga ngoo tsawo. 52 Naleolotsa wang'anyi shiṙinyi shawo sha wuchilyi, na wafofo kawang'anyisa. 53 Wawoṙo nyi njaa kawaigutsa mecha, na wanjama kawaima iwona kyiira. 54 Naleikanyia Isiraelyi, mṟundi okye; kundu nakumbuo isaṟia lyakye. 55 Chandu alewia waku waṙu, Abrahamu na ushari lokye mṟasa mlungana.” 56 Maria kakaa na oe cha mori iṟaṟu, numa ya iho kawuya na kanyi kokye. 57 Na kyiyeri mfiri ya Elyisapeti yesaṟio mana ileafukyia, naleenengo mana o kyisoṟo. 58 Wamṟasa na wa kyishari kyakye wakaicho kye Mndumii namwengyeṟia isaṟia lyakye, wakachihiyo hamwi na oe. 59 Mfiri o nyanya wakacha icheṙina mana; wakakunda imṙumbuya rina lya awuye, Sakaria. 60 Wamae kagaluo, kagamba, “Chi wuṙo-pfo; nechilago Yohane.” 61 Wakammbia, “Kuwoṙe mndu ekyelago kuṙo kunu kyisharinyi kyapfo-pfo.” 62 Wakatsinia awuye wamanye chandu echimlaga. 63 Kawawia wamwenenge handu heṟeia, kaṟeia kye rina lyakye nyi Yohane. Wakaṟiyio woose. 64 Iho iho ṙumbu lyakye lyikatambuluka na ulumi lokye taa, kawooka iṙeṙa echiṟumisha Ruwa. 65 Woose wawei kufuhi wakawoṙo nyi wuowu; na mbonyi-tso tsoose tsikaongoyo urukyenyi loose lo Uyuda luwewoṙe mafumvu. 66 Na woose waleicho wakawika mbonyi-tso mrimenyi kowo, wechigamba, “Mana-chu nechiwa o mbaṟe iha? Kyipfa pfinya ya Mndumii iwei hamwi na oe.” 67 Na Sakaria, awuye, kaichuṟo Mumuyo Mweele kaonguo shisuku, kagamba, 68 “Naṟumisho Mndumii, Ruwa o Isiraelyi, kyipfa nalecha na ko wandu wakye, na iwakyiṟa. 69 Nalelugoṟotsia membe ya wukyiṟo moongonyi o Dawidi, mṟundi okye. 70 Chandu agambie wookyia mawookyionyi kui ṙumbu lya weonguo shisuku wakye waele; 71 Lukyiṟo iwuka ko washituwa waṙu na mawokonyi ga woose walusuuye. 72 Kundu nawutie waku waṙu, isaṟia na ikumbuo mma okye mweele. 73 Nyamu alelyiia Abrahamu awu-yoṙu, 74 kye nechilutarama soe, lukyiṟo iwuka mawokonyi ga washituwa waṙu, na imṟundia kulawoṙe wuowu, 75 ko wuele na wusumganyi mbele yakye mfiri yaṙu yoose. 76 Na iyoe, mana, nolago moonguo shisuku o icho ai wuye, kyipfa nochisonguo mbele ya Mndumii umṟeyeṟie njia tsakye; 77 umanyishe wandu wakye wukyiṟo, kyiiṙi kya ihooṟio ngyuunyamaṟi tsawo. 78 Kui njia ya isaṟia lya Ruwa oṙu, na kui njia-tso ngyeela iwukyie wuye yacha na koṙu. 79 Ilyimikyia wai meemenyi na kyirinjenyi kya upfu, na isongoya maṙende gaṙu kui njia ya ufoṟo.” 80 Mana ulya kang'ana, kaengyeṟika pfinya mrimenyi. Kakaa kundu ko nuka kuumu suwaa kulawoṙe maa mṟinga mṟasa mfiri o kuloṟa ko Waisiraelyi.
1 Mfiri iya iwawaso lyilewuka ko Kaisari Agusto kye kuṟeio marina ga wandu woose wa wuyana. 2 Marina-ga nyigo ga kuwooka galeṟeio kyiyeri Kyirenio awekyeri mchilyi o Shamu. 3 Wandu woose wakandeṟeio, orio mndu mṟinyi kokye. 4 Yosefu na oe nalefuma Galyilaya, awuka mṟi o Nasareti, kaṙo kayenda Uyuda mṟasa mṟi o Dawidi, okyelago Betilehemu, kyipfa oe nyi o kyishari kya Dawidi; 5 kundu naṟeio hamwi na Maria awekyeri tindi yakye na oe nawei mnene. 6 Na kyiiṙi kya ikaa-pfo, mfiri yakye yesaṟio mana ikaafukyia, 7 kafee mono-kye mmbele, kamṟika nguwo tsa kyikoku, kamlaṟa mugondinyi o umbe, kyipfa walewona ṙaawa numbenyi ya wayenu-pfo. 8 Na kulya urukyenyi kuwewoṙe walyisi wawekyeri mapatenyi wechiringa mapoo gawo kyio kui iseiyana. 9 Malaika o Mndumii kacha na kowo walakuṟeyeṟie, mng'ano o Mndumii ukowaa ngyuura tsoose, wakaowuo mnu. 10 Malaika kawawia, “Mulaowuoe; kyipfa inyi ngyimuendie mbonyi ngyicha tsa sia ing'anyi yechiwa ko wandu woose. 11 Kyipfa inu mṟinyi o Dawidi nafeo, kyipfa kyanyu, Mkyiṟa, nyi oe Kristo Mndumii. 12 Na ikyi nyikyo kyiṟingyishio konyu; mochikooya mana aionga amṟikye nguwo tsa kyikoku, alee mgondinyi o umbe.” 13 Cha ilyi wawei hamwi na malaika-cho, wuingyi o ngyuulyimalyi tsa ruwewu, wechiṟumisha Ruwa na igamba, 14 “Naṟumisho Ruwa wuye Ruwewu, na wuyanenyi kuwe ufoṟo ko wandu awakundi.” 15 Na lyilya malaika-wo walelekana nawo wechiyenda ruwewu, walyisi walya walewiana, “Luyende mṟasa Betilehemu lundewona kyindo-kyo Ruwa aleluwia.” 16 Wakayenda faṟa wakakooya Maria na Yosefu, na mana ulya aionga alee mgondinyi. 17 Wamummbone wakaonguo mbonyi tsakye chandu walekowaongoyo. 18 Woose waleicho wakaṟiyio kyipfa kya isho walewio nyi walyisi. 19 Kyaindi Maria kakumbuo shindo-sho shoose, echikusaṟa mrimenyi kokye. 20 Walyisi walya wakawuya weching'anyisa na iṟumisha Ruwa kyipfa kya mbonyi tsoose waleicho na iwona chandu walewio. 21 Hamwiṙe mfiri nyanya, kyiyeri kyeṙina mana kyamwafukie, nalelago nyi Yesu, chandu Malaika alekoamlaga kyiyeri alandemogo. 22 Numa ya iho lyilya kyiyeri kya iilyiro lyawo kyileafukyia, chandu mawawaso ga Mose gagambie, waleyenda na oe mṟasa Yerusalemu, wammṙambikye ko Mndumii, 23 Chandu kyikyiṟeie mawawasonyi ga Mndumii: “Orio mana o kyisoṟo mmbele ko wamae nalago mweele ko Mndumii.” 24 Wandewuta kyiano chandu kyikyigambe mawawasonyi ga Mndumii, “Mbuna tsiwi ang'u maalea gawi ga mbeta.” 25 Na halya Yerusalemu hawewoṙe mndu ekyelago Simion, na oe nyi mndu msumganyi, akundi na iowuo Ruwa, echiweṙelyia kyiyeri kya Waisiraelyi, iwiyiṟio moo na Mumuyo Mweele nawei na oe. 26 Na oe nawemmbie nyi Mumuyo Mweele kye echipfa alawona Kristo o Mndumii-pfo. 27 Kyasia kacha na hekalunyi echisongoyo nyi Mumuyo; na lyilya wafee waleende mana ulya Yesu na numba, kundu wammbutie chandu kyiwekyigambe. 28 Oe amonyi nalemwambilyia kaana Ruwa, echigamba, 29 “Wulalu Mndumii, noenenga kyisinga kyapfo momu, kui ufoṟo chandu ugambie. 30 Kyipfa meso gako gawona wukyiro wopfo, 31 ulewuṟeyeṟia wandu woose; 32 Ngyeela yelyimika Masanga, na iwa mng'ano o wandu wapfo Isiraelyi.” 33 Na awuye na wamae waweiṟiyio kyipfa kya isho shileṙeṙo kyipfa kyakye. 34 Simion kawawikyia mboṟa, kawia Maria, wamae, “Ichu nammbikye kyipfa kya ioloka na igoṟoka lya wandu wafoi wakyeri Isiraelyi, na iwa kyindo kya maṟiyisho kyechiṙeṙo uwicho. 35 Na iyoe kumonyi, kyechiwa cha ilyi ushu loiṙa na mrimenyi kopfo, kundu mrima ya wandu wafoi igalutso.” 36 Kuwewoṙe moonguo shisuku o kyika, ekyelago Ana, mana o Fanuelyi, o ushari lo Asheri, na maka yakye iwefoi. Nalekoamkaa na mii maka mfungaaṙe wookyia kyiyeri alealyiko. 37 Na oe nyi mka mkusu o maka makumi nyanya na ina, ekyewuka hekalunyi-pfo, indi nyi iterewa Ruwa kyio na kyingoto echikuretekyia na iterewa. 38 Ichu nalecha kyiyeri kyilya kyilya kaana Ruwa, na woose waweiweṙelyia wukyiṟo kulya Yerusalemu kawawia mbonyi tsakye. 39 Na kyiyeri walemarisa iwuta shoose chandu kyikyigambe mawawasonyi ga Mndumii, walewuya na Galyilaya mṟasa mṟinyi kowo, Nasareti. 40 Mana ulya kang'ana, kaengyeṟika pfinya, aichuo wuṟango na isaṟia lya Ruwa lyiwei wuye yakye. 41 Kyasia, wafee wakye wekyeyenda Yerusalemu orio maka, kyiyeri kya mfiri ung'anyi o Pasaka. 42 Na kyiyeri alesutsa maka ikumi na iwi, waleṙo chandu kyiwekyeri mwichiwie o mfiri ung'anyi. 43 Na mfiri yawo yekaa Yerusalemu yamsie, kyiyeri kya iwuya lyawo, mana ulya Yesu naleṙio numa kulya Yerusalemu, na wafee wakye waweichi-pfo. 44 Nawo wakakusaṟa kye nakyeri wandunyi, wakayenda handu ha mfiri umwi, wechimpfula wandunyi wa kyishari kyakye na woṙiao, 45 na lyilya walalemmbona, wakawuya na Yerusalemu wechimpfula. 46 Na hamwiṙe mfiri iṟaṟu wakammbona hekalunyi, aṙamie makyiṙi-gawi ga walosha, echiwaaṙanyia na iwawesa shindo. 47 Na woose waleicho shilya awegamba waleṟiyio kyipfa kya wuṟango wokye na chandu aweiwagaluo. 48 Lyilya walemmbona waleṟiyio, na wamae kammbia, “Mono-ko, ny'kyilyi oluwutia kuṙi? Awuyo na inyi luwekupfula luwoṙo nyi fowa mrimenyi.” 49 Kawawia, “Kyitewe mungyipfula ny'kyi? Muichi kyangyikooya ikaa numbenyi ya Awu oko?” 50 Nawo walemanya kyindo-kyo alewawia-pfo. 51 Kayenda nawo mṟasa Nasareti, na oe nawekyewaindia; na wamae kawika isho shoose mrimenyi kokye. 52 Na Yesu kang'ana, echiengeṟika wuṟango, echichihiṟa Ruwa na wandu.
1 Maka o ikumi na kataanu o ichilyia lya Kaisari Tiberia, kyiyeri Pontio Pilato awei mchilyi o Uyuda, na Herode mangyi o Galyilaya, na Filyipo, mana o wamae, mangyi o Iturea na uruka lo Tirakoniti, na Lyisania, mangyi o Abilene, 2 kyiyeri kya wukohanyi wung'anyi wo Anasi na Kayafa, Ṙeṙo lya Ruwa lyileshika ko Yohane mana o Sakaria, kundu kuumu suwaa kulawoṙe maa mṟinga. 3 Kashika urukyenyi loose lukyeri kufuhi na Yoridan echionguo mbonyi tsa wupatiso wokyeende iṙumbuya wunyamaṟi na ihooṟio maṙeko. 4 Chandu kyikyiṟeie kyitapunyi kya moonguo shisuku Yesaya, “Ṟui lya mndu aieṟeṟia nuka, ‘Ṟeyeṟenyi njia ya Mndumii, goṟotsenyi kundu echiiṙia. 5 Orio pichi lyechiichuṟo, na orio fumvu na kyifumvu kyechititiṟo; handu haleme hechigoṟoka, na halaharendekyeri herendekyia. 6 Na wandu woose wechiwona wukyiṟo wo Mndumii.’ ” 7 Kyasia kawia wuingyi wo wandu walya waleyenda kokye kundu nawapatise, “Nyoe maalea ga njoka, nyi wui alemuikyimbia nyoe iṙicha nyashi-yo iicha? 8 Kyasia kumbienyi ndunda tsifananyi na iṙumbuya wunyamaṟi; maa mulagambe mrimenyi konyu kye muwoṙe awu, nyi oe Abrahamu, kyipfa ngammbia kye, iwuka kunu magoenyi Ruwa nechiiṙima ienenga Abrahamu wana. 9 Na wulalu kuṙi soka lyilyiwikyie matsindenyi ga mashiṙi. Kyasia orio ikyiṙi lyilaikumbia ndunda ngyicha lyechimanyo na iwiyitso moṙonyi.” 10 Wuingyi wulya wo wandu wukommbesa, “Kyasia luwikye kuṙa?” 11 Kagaluo, echiwawia, “Awoṙe kanzu tsiwi naenengye ulya alawoṙe kanzu; na awoṙe shelya nawewute kuṙo.” 12 Wesania ukamba nawo wakacha ipatiso, wakammbesa, “Mlosha, luwikye kuṙa soe?” 13 Kawawia, “Maa mularikye ngoseṟa ya ikyo muwawie.” 14 Asikari nawo wakammbesa, wechigamba, “A soe luwikye kuṙa?” Kawawia, “Mulaṙuo kyindo kya mndu ko pfinya, maa mulaṙuo mndu mengyenyi kyipfa kya shindo sha wongo, ngoseṟa shikonyi na shilya muitoo cha wori wonyu.” 15 Kyasia, lyilya wandu waweiweṙelyia kyindo kyechiwutika, woose wechikusaṟa mrimenyi kowo mbonyi tsa Yohane, kokooya oe nyi oe Kristo, 16 Yohane nalegaluo kawia woose, “Loi inyi ngyimupatisa kui mṟinga, kyaindi naicha mndu awoṙe pfinya kuta inyi, ngilechiiṙima maa ituruchuo ngowa tsa shiaṙu shakye. Oe nemupatisa kui Mumuyo Mweele na kui moṙo. 17 Oe indo lyakye lyeela shindo lyikeri kuwokonyi kokye, na oe nechiaia muului oose handu hakye heelyia shindo, na isania nganu yakye kyikumbinyi indi muului nechiurumatsa moṙonyi ulekyeruma.” 18 Kyasia, kui shindo shifoi shetutuma naleongoya wandu mbonyi ngyicha. 19 Kyaindi lyilya mangyi Herode aleṙeṙio nyi Yohane kyipfa kya Herodia, mka o mono-wamae, na mawicho goose Herode alewuta, 20 naleengyeṟa-se na wuwicho wungyi wuye ya shoose, kawika Yohane kyipfungonyi. 21 Kyikawa-ng'u wandu woose wampatiso, na Yesu ampatiso na oe naiterewa, mapuchi galeseia. 22 Mumuyo Mweele kasokyia wuye yakye kui mfano o mmbiu cha mbuna; ṟui lyikawuka Ruwewu, “Iyoe nyi Mana oko, mkunde oko, ngyimchihiye kyipfa kyapfo.” 23 Na Yesu amonyi, kyiyeri alewooka ilosha, nawewoṙe cha maka makumi gaṟaaṟu, echikusaṟo kye nyi mana o Yosefu, o Elyi. 24 O Matati, o Lewi, o Melyikyi, o Yana, o Yosefu. 25 O Matatia, o Amosi, o Nahomu, o Esilyi, o Nakai. 26 O Maati, o Matatia, o Semei, o Yosefu, o Yuda. 27 O Yoana, o Resa, o Serubabelyi, o Shealyitielyi, o Neri. 28 O Melyikyi, o Adi, o Kosamu, o Elyimadamu, o Eri. 29 O Yosua, o Elyieseri, o Yorimu, o Matati, o Lewi. 30 O Simion, o Yuda, o Yosefu, o Yonamu, o Elyiakyimu. 31 O Melea, o Mena, o Matata, o Natan, o Dawidi. 32 O Yese, o Obedi, o Boasi, o Salyimone, o Nashon. 33 O Aminadabu, o Aramu, o Hesiron, o Peresi, o Yuda. 34 O Yakobo, o Isakyi, o Abrahamu, o Tera, o Nahori. 35 O Seṟuikyi, o Rakau, o Pelekyi, o Eberi, o Sala. 36 O Kyenan, o Arifakyisadi, o Semu, o Noe, o Lamekyi. 37 O Metusela, o Enokyi, o Yaredi, o Mahalalelyi, o Kyenan. 38 O Enosi, o Seti, o Adamu, o Ruwa.
1 Na Yesu, amwichuṟo nyi Mumuyo Mweele nalewuya iwuka Yoridan, kaṙoo nyi Mumuyo Mweele kyiyeri kya mfiri makumi gaana kundu ko nuka, 2 echiyesho nyi Mokyiriinzi. Na mfiri-yo nawekuretekyia; na kyiyeri mfiri yekuretekyia ilesia nalewoṙo nyi njaa. 3 Mokyiriinzi kammbia, “Kokooya iyoe nyi mana o Ruwa, wia igoe-lyi lyiwe mkate.” 4 Yesu kamgaluo, “Kyikyiṟeie kye mndu echiwona moo kui mkate tikyi-pfo.” 5 Kamṙosia wuye, kamloṟa ngyuuchilyi tsoose tsa wuyana ko kyiyeri kyifuhi. 6 Mokyiriinzi kammbia, “Ishi shoose ngyechikuenenga, na wung'anyi wosho kyipfa nyi shako na inyi ngyekyeenenga orio mndu chandu ngakunda. 7 Kyasia iyoe kongyiindia shoose shechiwa shapfo.” 8 Yesu kagaluo, kammbia, “Kyikyiṟeie ‘India Mndumii Ruwa opfo, umterewe oe amonyi.’ ” 9 Kamṙuo mṟasa Yerusalemu, kammbikyia wuye ya uweri lo hekalu, kammbia, “Kokooya iyoe nyi mana o Ruwa kuwiyitse wanda; 10 kyipfa kyikyiṟeie, ‘Nechikuṙikyia malaika wakye wakuringye;’ ” 11 na kye, “Mawokonyi gawo wechikuwaṙa ulachekapa ṙende igoenyi.” 12 Yesu kagaluo, kammbia, kyikyigambe, “Ulayeshe Mndumii Ruwa opfo.” 13 Kyasia Mokyiriinzi ammarise shiyesho shoose, kamleka ko kyiyeri kyifuhi. 14 Yesu kawuya kui pfinya tsa Mumuyo, kayenda Galyilaya; mbonyi tsakye tsikaṙunganana ngyuurukyenyi tsoose tsa mṟasenyi. 15 Na oe naweiloshia masinagoginyi gawo, echiṟumisho nyi wandu woose. 16 Kayenda Nasareti, halya-ndu aleembeṟio na mfiri o onyonya kaiṙa na sinagoginyi chandu aweichiwie, kagoṟoka kundu nasome. 17 Kaenengyio kyitapu kya moonguo shisuku Yesaya, kakyitaṟahuo, kapfula handu haṟeie, 18 “Mumuyo o Mndumii nai wuye yako, kyipfa nalengyishumbuo iongoya wakyiwa mbonyi ngyicha nalengyiṙuma iongoya wapfungo kya ilekyio lyawo, na shipfupfuṟe iiṙima iwona-se. Na iashuo walya wawailame. 19 Na ionguo kya maka o Mndumii umteseṟe.” 20 Kapfunga kyitapu kyilya kakyienengyia mṟundi ulya, kaṙamia; na wandu woose wawei kulya sinagoginyi wakamwitukuya karii. 21 Kawooka iwawia, “Inu shiṟeio-shi shaafukyia maṙwinyi ganyu.” 22 Wakamṟingyishia woose, wechiṟiyio kyipfa kya shindo sha isaṟia aleṙeṙa, wakagamba, “Ichu chi mana o Yosefu-pfoe?” 23 Kawawia, “Nyi loi mochingyiwia mṙeṙie-chu kye mganga, kukyiṟe kumonyi; mbonyi tsoose luleicho kye tsilewutika Kaperinaumu, uwetsiwute taa iha urukyenyi lopfo kumonyi.” 24 Kagamba, “Ny'kyaloi, ngammbia kye, kuwoṙe moonguo shisuku ekyeiṙikyio urukyenyi lokye amonyi-pfo.” 25 Kyaindi, kyaloi ngyimmbia, “Kuwewoṙe waka wakusu wafoi urukyenyi lo Isiraelyi kacha kyiyeri kya Elyiya, lyilya ngyina tsileshingo tsilawute mvuo kyiyeri kya maka iṟaṟu na mori iṟandaaṟu, uruka loose lukowaṙa njaa ing'anyi. 26 Maa Elyiya aleṙumo ko umwi o wakusu-wo-pfo, indi ko mka umwi mkusu o Serepta urukyenyi lo Sidon. 27 Ngoseṟa, kuwewoṙe wandu wafoi wawewoṙo nyi taambo urukyenyi lo Isiraelyi nyi kacha kyiyeri kya moonguo shisuku Elyisha, maa kuwoṙe aleilyish sile nyi Naiman, mndu o Shamu-pfo.” 28 Wakaicho nyashi woose wawei kulya sinagoginyi kyiyeri waleicho isho. 29 Wakamfuna na nja ya mṟi, wakamṙuo mṟasa wuye ya fumvu handu mṟi owo ummbikye kundu wammbiyitse wanda. 30 Kyaindi oe naleiṙa makyiṙi-gawi gawo kayenda. 31 Kasoka mṟasa Kaperinaumu, mṟi o Galyilaya, kawalosha mfiri o onyonya. 32 Wakaṟiyio mnu kyipfa kya malosho gakye, kyipfa ṙeṙo lyakye lyiwewoṙe pfinya. 33 Na kulya sinagoginyi kuwewoṙe mndu awewoṙo nyi mṟufui mmbicho. Kafiiṟa kui ṟui lying'anyi, 34 echigamba, “Leka! Lokukyi, Yesu o Nasareti? Nocha ilurumatsa? Ngyikuichi iyoe nyi wui, Mweele o Ruwa.” 35 Yesu kamṙeṙia echigamba, “Tsia, mmbukye.” Naaho-ng'u mṟufui ulya mmbicho kamwolotsa makyiṙi-gawi kammbuka kulawoṙe immbutia kyindo kyiwicho. 36 Wakaṟiyio woose, wakawesana, wechigamba, “Kyindo-kyi nyi kya mbaṟe iha, kyipfa naiṙeṙia waṟufui wawicho ko pfinya na wuiṙimi, wakawuka.” 37 Mbonyi tsakye tsikaṙunganana koose kulya urukyenyi. 38 Kawuka kulya sinagoginyi, kaiṙa na kanyi ko Simion. Na mamka o Simion, nawewoṙo nyi isemu, wakamterewa kyipfa kyakye. 39 Kagoṟoka kufuhi na oe, kaṙeṙia isemu lyilya, lyikamleka; cha ilyi kafuma, kawaṟundia. 40 Na lyilya kuleila, wandu woose wawewoṙe wandu waluoe ndoṟe tsa mbaṟe tsoose walewaende na kokye, kayekyia mawoko wuye ya orio umwi owo kawakyiṟa. 41 Waṟufui wawicho nawo wakawuka ko wandu wafoi; wechikalagatsa na igamba, “Iyoe nyi Mana o Ruwa.” Kawaṙeṙia, alawalekyie iṙeṙa, kyipfa walemmanya kye oe nyi Kristo. 42 Na lyilya kulekya nalefuma kayenda handu halawoṙe wandu, wuingyi wo wandu waweimpfula wakashika kokye, wakatambagana imshingyia alawukye kowo. 43 Kawawia, “Kyangyikooya ionguo Mbonyi Ngyicha tsa Wumangyi wo Ruwa mṟi ingyi taa, kyipfa nyi kyipfa kya ikyo ngyileṙumo.” 44 Kyasia, naweionguo Mbonyi Ngyicha masinagoginyi ga Galyilaya.
1 Kyiyeri awekyeri mbai ya ipalyipalyi lya Kyenesareti wuingyi wo wandu wukokuumbia kufui iaṙanyia Ṙeṙo lya Ruwa na oe alawone maa handu hegalukyia. 2 Kawona ngalawa tsiwi tsikyeri mbai ya nduwa, kyaindi weṙeia makunga waweisanja ndusu tsawo. 3 Kaiṙa na ngalawenyi imwi, nayo nyi ya Simion, kammbia, naiṙuo kuleshi kyitutu na halya mbai ya nduwa iya. Kaṙamia, kalosha wuingyi wo wandu akyeri ngalawenyi. 4 Na ammarise iṙeṙa, nalewia Simion, “Ṙuonyi ngalawa mṟasa handu nduwa iyendie wanda kuta hengyi, musotse ndusu tsanyu muwaṙe makunga.” 5 Simion kagaluo, kagamba, “Mndumii, ang'anyi, luwinie kyio kyoose lulawone kyindo, kyaindi kui ṙeṙo lyapfo ngyesotsia ndusu nduwenyi.” 6 Kyasia; wammbute kuṙo wakawaṙa makunga gafoi mnu, ndusu tsawo tsikawooka iṙumbuka. 7 Wakatsinia walya waweiṟunda nawo wawekyeri kulya ngalawenyi ya kawi, wachewatarama. Wakacha, wakaichuṟa ngalawa tsilya tsitsiwi, mṟasa tsikakyiṟesoṟowia. 8 Simion Petiro ammbone kuṙo, naleoloka maṙendenyi ga Yesu, echigamba, “Wuka koko, kyipfa inyi nyi mndu mnyamaṟi, Mndumii.” 9 Kyipfa naleṟiyio, oe na walya wawei na oe woose, kyipfa kya chandu walewaṙa makunga gafoi. 10 Na wuṙo taa kyilewa ko wana wa Sebedayo, wawekyeṟunda hamwi na Simion. Yesu kawia Simion, “Ulaowuoe. Wookyia wulalu nowamoṙega wandu.” 11 Na wammbikyie ngalawa tsawo mbai ya ipalyipalyi, wakaṙa shoose wakamwosha. 12 Na kyiyeri awei mṟinyi umwi kyiiṙi kya mṟi iya hawewoṙe mndu awoṙo nyi taambo. Na oe lyilya alewona Yesu naleoloka na ndewu, kamterewa echigamba, “Mndumii, kokunda, nochiiṙima ingyiilyisha.” 13 Na oe kagoṟuo kuwoko kokye, kampaaya echigamba, “Ngyikundi, ila.” Cha ilyi taambo lyakye lyikammbuka. 14 Kamwima alawie mndu, indi kammbia, “Yenda undekuloṟa ko mkohanyi; undewuta ko iilyiro lyapfo chandu Mose agambie, kyiwe wuṟingyishi kowo.” 15 Kyaindi mbonyi tsakye tsikaengyeṟa iṙunganana, wuingyi wufoi wo wandu wakasanzia handu hamwi, wamwaṙanyie na ikyiṟo ndoṟe tsawo. 16 Kyaindi oe nalelekana nawo, kayenda handu halawoṙe wandu, kandeterewa. 17 Na kyiyeri kyilya naweilosha, na Mafarisayo na walosha wa uwawaso waweṙamie ho, wawewukyie orio kyikaṟo kya Galyilaya, na Uyuda, na Yerusalemu. Na pfinya tsa Mndumii tsiwekyeri ho kundu naiṙime ikyiṟa. 18 Wakacha wandu waṙuṙe mndu kyitaṟenyi awoṙe ndoṟe ya ipfa ngapfu ura lumwi wakundi imṙuo numba wammbikyie mbele yakye. 19 Na lyilya waleuṟa ṙaawa lyemṙuo numba kyipfa kya wuingyi wulya wo wandu, waleṙooya kai, wakatocha kai iya, wakamsotsa oe na kyitaṟa kyakye makyiṙi-gawi mbele ya Yesu. 20 Na oe lyilya alewona iiṙikyia lyawo, nalewia ulya aluoe, “Mbuya-ko, omhooṟio maṙeko gapfo.” 21 Kyasia walosha walya wa mawawaso na Mafarisayo wakawooka iwesana, wechigamba, “Nyi wui ichu ailahia Ruwa? Nyi wui echiiṙima ihooṟia ngyuunyamaṟi sile nyi Ruwa amonyi?” 22 Na Yesu aichi makusaṟo gawo, kagamba, “Ny'kyilyi mukusaṟa shiwicho mrimenyi konyu? 23 Kyipfa nyi kyiha kyii kyaangu, nyi igamba ‘Omhooṟio ngyuunyamaṟi tsapfo,’ ang'u nyi igamba, ‘Amka uyende?’ 24 Kyaindi muiṙime imanya kye Mono-Adamu nawoṙe wuchilyi wuyanenyi wo hooṟia ngyuunyamaṟi, (nalewia ulya awoṙe ndoṟe ya ipfa ngapfu ura lumwi) ‘Ngakuwia, amka ukuṙikye kyitaṟa kyapfo uyende kanyi kopfo.’ ” 25 Cha ilyi kagoṟoka mbele yawo, kakuṙika kyilya awelee wuye yakyo, kayenda kanyi kokye, echiana Mndumii. 26 Wakaṟiyio woose, wakang'anyisa Ruwa; wakawoṙo nyi wuowu, wechigamba, “Inu lowona mbonyi tsa maṟiyisho.” 27 Numa ya isho kawuka pfo kawona mosania ukamba, ekyelago Lewi, aṙamie handu hesania ukamba, kammbia, “Ngyiosha.” 28 Kaṙa shoose, kaamka kamwosha. 29 Na Lewi kamwachikyia shelya shifoi kanyi kokye. Napfo kuwewoṙe wuingyi wufoi wo wesania ukamba na wandu wengyi waweilya hamwi nawo. 30 Mafarisayo na walosha wawo wa mawawaso wakanunuwia wanalosho wakye, wechigamba, “Ny'kyilyi muilya na inyo hamwi na wesania ukamba na wanyamaṟi?” 31 Yesu kagaluo, kawawia, “Walya walaluoe wekyepfula mganga-pfo, sile walya waluoe. 32 Ngyilecha ilaga walya wasumganyi-pfo indi wanyamaṟi waiṙime iṙumbuya.” 33 Nawo wakammbia, “Wanalosho wa Yohane wekyekuretekyia kafong'ui na iterewa. Na wuṙo taa wanalosho wa Mafarisayo; kyaindi wanalosho wapfo wekyelya na inyo!” 34 Kyaindi Yesu kawawia, “Mochiiṙima kuṙa iwia wandu walage wolyinyi wakuretekyie wakyeri na monyi wolyi? 35 Kyaindi kochicha mfiri monyi wolyi echiwuto kowo; nyi lyo-ndu wechikuretekyia.” 36 Kawawia mfano, “Kuwoṙe mndu ekyewika kyiṙami kya nguwo ngihya nguwonyi ngyiku-pfo. Na kokooya awika naṙumbuo iya ngyihya, na kyiṙami kya nguwo iya ngyihya kyechiwa cha kyilya kyiku-pfo. 37 Maa kuwoṙe mndu ekyewika mpfinyo mhya maselelenyi maku-pfo. Na kokooya awika pfo, mpfinyo ulya mhya opaṟa maselela galya, mpfinyo-cho ukopusuka, na maselela gakanyamaṟika. 38 Kyaindi kyiwaṟi iwika mpfinyo mhya maselelenyi mahya. 39 Maa kuwoṙe mndu ekyenyo mpfinyo o kacha kalanga mhya-pfo; kyipfa negamba ulya o kacha nyicho ui mcha.”
1 Kyasia mfiri o onyonya Yesu naweiiṙa maṙemenyi na wanalosho wakye wakawooka itumuo magaa ga nganu na igasusa-susa mawokonyi gawo wakalya. 2 Naaho-ng'u Mafarisayo waata wakawawia, “Ny'kyilyi muiṟunda kyilai kya sungusinyi mfiri o onyonya?” 3 Yesu kawagaluo, kawawia, “Mulekulosha ikyo Dawidi alewuta, lyilya alewoṙo nyi njaa, oe na oṙoe? 4 Chandu aleiṙa na numbenyi ya Ruwa, kalya mkate iya ngyiele, kaenenga na oṙoe kyilawaṟi iilya sile nyi makohanyi wawenyi.” 5 Kawawia, “Mono-Adamu nyi oe Mndumii o mfiri o onyonya.” 6 Kyasia mfiri ungyi o onyonya naleiṙa na sinagoginyi kalosha, napfo kuwewoṙe mndu awewoṙe kuwoko ko kulyoe kupfiie ngapfu. 7 Na walosha wa mawawaso hamwi na Mafarisayo waweimṙega kundu wawone kokooya nekyiṟa mndu mfiri a onyonya; kundu waiṙime iwona kyindo kyemmbusia uwingo. 8 Kyaindi oe kamanya makusaṟo gawo, kawia ulya awoṙe kuwoko kupfiie ngapfu, “Nnjo goṟoka iha makyiṙi-gawi.” Kagoṟoka. 9 Naaho-ng'u Yesu kawawesa, “Nyi sungusinyi iṟunda mecha mfiri o onyonya, ang'u iṟunda mawicho? Ikyiṟa mrima ang'u iurumatsa?” 10 Kawaitukuya woose echiambuya ngyuura tsoose, kawia mndu ulya, “Goṟuo kuwoko kopfo.” Kagoṟuo kuwoko, kukochia na iwaṙa pfinya cha kuwooka. 11 Wakasuo mnu, wakawesana wo wenyi ko wenyi wawutie kyi Yesu. 12 Kyasia mfiri iya naleyenda fumvunyi kundu nandeterewa, kalaa kyiṙombo kyio kyoose echiterewa Ruwa. 13 Na kyiyeri kya kyingoto kalaga wanalosho wakye; kasambuṟa ikumi na wawi kyiiṙi kyawo, kawalaga wasu. 14 Simion, ulya alemlaga rina lya kawi Petiro, Anderea, mono-wamae, Yakobo na Yohane, Filyipo na Baritolomayo. 15 Na Matayo, Tomasi, Yakobo o Alyifayo, na Simion ekyelago Selote. 16 Na Yuda o Yakobo, na Yuda Isikariote, na oe nyi oe alemṟiinga. 17 Kasoka hamwi nawo, kagoṟoka handu ha rendewele, hamwi na wanalosho wakye wafoi. Na wuingyi wo wandu walewuka Uyuda koose na Yerusalemu, na mbai ya Tiro na Sidon; walecha imwaṙanyia na ikyiṟo ndoṟe tsawo. 18 Na walya waweituuro nyi waṟufui wawicho walekyiṟo. 19 Na wuingyi wulya woose wuwekundi impaaya kyipfa pfinya tsekyiṟa tsiwewuka kokye na ikyiṟa woose. 20 Kapaluo meso kaambuya wanalosho wakye, kagamba, “Wagusu nyoe mui wakyiwa wa mrima, kyipfa Wumangyi wo Ruwewu nyi wonyu. 21 Wagusu nyoe muwoṙo nyi njaa wulalu, kyipfa mochiiguṙa. Wagusu nyoe muifiiṟa wulalu, kyipfa mochiseka.” 22 “Wagusu nyoe ilyi wandu wemsuo, na imshingyia nja, na imlahia, na inyamaṟa rina lyanyu, kyipfa kya Mono-Adamu. 23 Chihiyonyi mfiri-cho na ishoonga-shonga, kyipfa wori wonyu wung'anyi Ruwewu, kyipfa nyi wuṙo waawu wawo walewutia weonguo shisuku. 24 Kyaindi, ochia lonyu muwoṙe masaa, kyipfa wori wonyu mulemuambilyia. 25 Ochia lonyu nyoe muigutsu wulalu kyipfa mochiicho njaa. Ochia lonyu nyoe muiseka wulalu, kyipfa mochikapa ṟanyi na ifiiṟa. 26 Ochia lonyu nyoe ilyi wandu woose wechimuenenga kyiṟumi, kyipfa nyi wuṙo waku wawo walewutia weonguo shisuku wa wongo.” 27 “Kyaindi ngyimmbia nyoe muingyiaṙanyia, kundenyi washituwa wanyu, wutienyi mecha walya wamsuuye nyoe. 28 Wikyienyi mboṟa walya waimpfulutsa nyashi, terewienyi walya waimuilama nyoe. 29 Mndu kakukapa ura lumwi, mgalutsie ura lo kawi, na mndu akusoka ijoho lyapfo, ulamwime maa iwale. 30 Enenga orio mndu akuterewa, na mndu akusoka shindo shapfo maa ulalangye nakuwiyiṟie. 31 Na kyilya mukundi wandu wammbutie nyoe, na wuṙo mochiwawutia. 32 Kyipfa mukokunda walya wamukundi nyoe, moloṟa kyi? Kyipfa maa wanyamaṟi na wuṙo wekyekunda walya wawakundi. 33 Na nyoe mukowutia shicha walya wekyemmbutia shicha moloṟa kyi? Maa wanyamaṟi na wuṙo wekyewuta. 34 Mukoakuya mndu kyindo na kunu mukundi iwona kyindo kowo moloṟa kyi? Maa wanyamaṟi wekyeakuya wanyamaṟi kundu wawiyiṟio wuṙo. 35 Indi kundenyi washituwa wanyu. Wutenyi shicha, na mukoakuya mulakunde itoo kyindo, na wori wonyu woching'ana. Na nyoe mochiwa wana wa ai wuye, kyipfa oe namcha ko walya walekyemwana, na wawicho. 36 Kyasia, wenyi wandu wekyehooṟia chandu Awu-yonyu ai mohooṟia.” 37 “Maa mulaanduye, na nyoe mochianduyo-pfo. Mulagambe kye wandu wengyi wawawicho kundu mulagambo kye muwawicho. Lekyienyi na nyoe mochilekyio. 38 Enengyenyi wandu shindo, na nyoe mochienengo. Kyiyeṟo kyiichuo na itsindo, na ipaayo-payo mṟasa ipusuka, nyikyo wandu wechimuenenga nyoe. Kyipfa kyiyeṟo kyilya kyilya mochiyeṟa ny'kyo mochiyeṟio.” 39 Kawawia mṙeṙie, “Ngyesa kyipfupfuṟe kyechiiṙima isongoya kyipfupfuṟe? Shechioloka mkuwenyi shoose shishiwi-pfoe? 40 Manalosho ekyeng'ania mlosha okye-pfo, kyaindi orio mndu aafutsia nechiwa cha mlosha okye. 41 Kyasia, ny'kyilyi uiambuya kyiunana kyikyeri risonyi lya mono-womoo, na mriti-cho ukyeri ipfo risonyi lyapfo ulauambuye? 42 Ang'u nowia kuṙa mono-womoo, ngyileka ngyiwute kyiunana ipfo risonyi kopfo ulaiambuya mriti ukyeri ipfo risonyi lyapfo kumonyi? Iyoe mkulembecheṟi, wuta kuwooka mriti-cho ipfo risonyi lyapfo, naaho-ng'u ochiwona necha iwuta kyiunana kyilya kyikyeri risonyi lya mono-womoo.” 43 “Kyipfa kuwoṙe ikyiṙi lyicha lyekyekumbia ndunda ngyiwicho-pfo; maa ikyiṙi lyiwicho lyekyekumbia ndunda ngyicha-pfo. 44 Kyipfa orio ikyiṙi lyekyemanyika kui ndunda tsalyo; kyipfa wandu wekyehaa sabibu mshenyi ang'u ndunda ngyicha tseloṙa nduonyi-pfo. 45 Mndu mcha kyiseyesoenyi kyicha nekyewuta shicha. Na mndu mmbicho kyiseyesoenyi kyiwicho nekyewuta shiwicho. Kyipfa ṙumbu lya mndu lyekyeṙeṙa shilya shiichuṟie mrima okye.” 46 “Ny'kyilyi mungyilaga, Mndumii, Mndumii, kyaindi mulawute shilya ngyigamba? 47 Orio mndu echa na koko na iaṙanyia maṙeṙo gako na igaosha, ngyemuloṟa mfano okye. 48 Mfano okye nyi cha mndu alewika numba, kasuma wanda na iwika urende wuye ya iṟaṟa; na kyiyeri kulecha mra ung'anyi, mfu ukokapa numba iya ko pfinya, ulaiṙime iiolotsa, kyipfa ingyiwikye necha. 49 Kyaindi ulya aleicho alawute kuṙo, mfano okye nyi cha mndu alewika numba handu halawoṙe iṟaṟa, mfu ukosoka ko pfinya, ikaoloka cha ilyi; na inyamaṟo lyayo lyikawa lying'anyi.”
1 Na kyiyeri alemarisa iwawia maṙeṙo gakye goose naleiṙa na Kaperinaumu. 2 Na mṟundi o mchilyi umwi naweluoe mnu, kufuhi na ipfa; na oe nawemkundi mnu. 3 Kyiyeri aleicho mbonyi tsa Yesu, naleṙuma wameeku wa Kyiyuda kokye imterewa nache nakyiṟe mṟundi okye. 4 Nawo kyiyeri waleshika ko Yesu, walemterewa mnu, wechigamba, “Ichu nawaṟi ummbutie kyindo-kyi, 5 kyipfa nakundi mnu wandu waṙu na oe naleluwikyia sinagogi.” 6 Kyasia Yesu kayenda hamwi nawo. Na lyilya awei kufuhi na numba ya mchilyi ulya, mchilyi ulya naleṙuma mbuya yakye ko Yesu, kammbia, “Mndumii, maa ulakuwinishe, kyipfa inyi ngyiwaṟi iyoe uiṙe na numba koko-pfo. 7 Koikyo ngyilewona kyingyiwaṟi icha ngyimonyi na kopfo-pfo; kyaindi gamba ṙeṙo lyimwi tikyi, na mṟundi oko nechichia. 8 Cha kyipfa inyi nyi mndu ngyiwoṙe wuchilyi. Ngyiwoṙe asikari wanda yako; ngawia ichu ‘yenda’; na ichu ‘nnjo’ nekyecha; na kyisinga kyako, ‘wuta kuṙi’, kyekyewuta.” 9 Kyiyeri Yesu aleicho isho, naleṟiyio, kaindukyia wuingyi wulya wo wandu, kawia walya wawemwosha, “Ngammbia ngyilandewone iiṙikyia lying'anyi kuṙi, kunu Isiraelyi-pfo.” 10 Na walya waleṙumo kyiyeri walewuya na kanyi, wakakooya mṟundi ulya amchia. 11 Numa ya iho naleyenda mṟasa mṟi umwi okyelago Nain, na wanalosho wakye hamwi na wuingyi wung'anyi wo wandu wukooshana na oe. 12 Na kyiyeri aletikyira kufuhi na moongo o mṟi, hawewoṙe mndu apfiie aweiṙoo nja, nyi kyimuumwi kya mndu mka umwi mkusu, na wandu wafoi wa mṟi ulya wawei hamwi na oe. 13 Kyiyeri Mndumii alemmbona nalewoṙo nyi fowa mrimenyi kammbia, “Maa ulafiiṟe.” 14 Katikyira, kapaaya jeneza lyilya; walya wawelyiṙuṙe wakatirima. Kagamba, “Manakye, ngakuwia, amka.” 15 Ulya awepfiie kaamka, kaṙamia, kawooka iṙeṙa. Kamwenengyia wamae. 16 Wuowu wukowawaṙa woose, wakaṟumisha Ruwa, wechigamba, “Moonguo shisuku ang'anyi nacha na koṙu, na Ruwa naambuya wandu wakye.” 17 Mbonyi-tsi tsakye tsikaṙunganana Uyuda koose, na ngyuuruka tsoose tsa mṟasenyi. 18 Wanalosho wa Yohane wakamwendie mbonyi tsa isho shoose. 19 Naaho Yohane kalaga wawi kyiiṙi kya wanalosho wakye, kawaṙuma ko Yesu, echiwesa, “Iyoe nyi ulya aicha, ang'u luweṙelyie ungyi?” 20 Nawo kyiyeri waleshika kokye, walegamba, “Yohane Mpatisi naluṙuma kopfo, echigamba, ‘Iyoe nyi ulya aicha, ang'u luweṙelyie ungyi?’ ” 21 Na kyiyeri kyilya kyilya nalekyiṟa wandu wafoi ndoṟe tsawo, na wawaolokyie nyi ngyuukyiwa, na waṟufui wawicho, na shipfupfuṟe shifoi shikaiṙima iwona. 22 Naaho-ng'u kagaluo, kawawia, “Yendenyi mundeongoya Yohane shilya mushiicho na ishiwona. Shipfupfuṟe shienengo iwona, shileeta shichumia, wawoṙo nyi taambo waiilyiṟo, wapfu maṙwi waiicho, wapfu waiṟutso, na wakyiwa waiongoyo Mbonyi Ngyicha. 23 Agusu orio mndu alammbihie kyipfa kyako.” 24 Kyasia wanalosho wa Yohane wamuyende, Yesu nalewooka iongoya wuingyi wo wandu mbonyi tsa Yohane, “Mulefuma iyenda nuka iambuya-pfo kyi? Unyatsi lochiṙeṙemsho nyi mkuma? 25 Kyaindi mulefuma indewona kyi? Mndu amṟikye nguwo tsa wusuṟi? Manyenyi kye wandu waṟee nguwo tsa wusuṟi wakyeri numbenyi tsa kyimangyi. 26 Kyaindi mulefuma indewona kyikyi? Nyi iwona moonguo shisuku? Yee loi ngammbia, na akyeri ang'anyi kuta moonguo shisuku. 27 Ichu nyi oe shiṟeio shilegamba, ‘Ngyiṙuma mndu oko mbele ya ushangu lopfo, echisungusia njia yapfo mbele yapfo.’ ” 28 “Inyi ngammbia, kyiiṙi kya walya wawafee nyi waka kuwoṙe ang'anyi kuta Yohane Mpatisi-pfo. Kyaindi akyeri mtutu Wumangyinyi wo Ruwewu nang'anyi kuta oe.” 29 Wandu woose na wesania ukamba kyiyeri waleicho isho, waleṟingyishia loi ya Ruwa kyipfa walepatiso wupatiso wo Yohane. 30 Kyaindi Mafarisayo na walosha wa mawawaso, walelega iwuta kyilya Ruwa awekundi wawute, kyipfa wawewapatise nyi Yohane-pfo. 31 Mndumii kagamba, “Ngyilyingatsane na kyikyi wandu wa rika-lyi? Nyi kyikyi kyikyeri chawo? 32 Wakyeri cha wana waṙamie sangaṙa na ilagana, wechigamba, ‘Lulekapa mtoṟiṟo maa muleshina-pfo. Lulekapa ṟanyi, maa mulefiiṟa-pfo.’ 33 Kyipfa Yohane Mpatisi nalecha alailya mkate maa alainyo mpfinyo, na nyoe mukogamba, nawoṙo nyi waṟufui wawicho. 34 Mana o Adamu nalecha echilya na inyo; na nyoe mukogamba, ichu nawoṙe ndewu, na nekyenyo mpfinyo, mbuya ya wesania ukamba na wanyamaṟi. 35 Na wuṟango wo Ruwa womanyika kye wuwoṙe wuloi ko wana wakye woose.” 36 Mndu umwi kyiiṙi kya Mafarisayo nalemlaga nalye kyelya kanyi kokye. Kaiṙa na numba ko Mfarisayo ulya, kaṙamia ilya kyelya. 37 Na mndu mka umwi o mṟi ulya, awei mnyamaṟi, kyiyeri aleicho kye naṙamie numba ko Mfarisayo ulya, naleende kyimkyepe kyiwewoṙe mafuṙa gekyepfaama necha. 38 Kagoṟoka numa kufuhi na maṙende gakye, echifiiṟa, kawooka itonyitsia Yesu mcheṟeṟe maṙendenyi gakye, na imwanguo kui njui tsakye echimkomba-komba maṙende na imshia mafuṙa galya. 39 Kyasia, Mfarisayo ulya alemlaga ammbone kuṙo, nalegamba mrimenyi kokye, mndu-chu kokooya awei moonguo shisuku, naweimanya mndu mka-chu aimpaaya nyi wui, na oe nyi o mbaṟe iha, kye nyi mnyamaṟi. 40 Yesu kagaluo, kammbia, “Simion, ngiwoṙe kyindo ngikundi ikuwia.” Kagamba, “Mlosha, gamba.” 41 Kagamba, “Mndu umwi ekyeakuya nawewoṙe wasile wawi, umwi naweriko dinari magana gataanu, na o kawi makumi gataanu. 42 Nawo kyiyeri walawewoṙe kyemtaa nalewahooṟia woose wewawi. Kyiiṙi kya iwo wawi nyi wui emkunda ngoseṟa?” 43 Simion kagaluo kagamba, “Ngakusaṟa nyi ulya alemhooṟia tsifoi.” Kammbia, “Nogaluo necha.” 44 Kagalukyia mndu mka ulya kawia Simion, “Uwonyi mndu mka-chu? Ngyileiṙa na kanyi kopfo, ulengyienenga mṟinga o sanja maṙende gako-pfo; indi ichu naitonyitsia mcheṟeṟe maṙende gako na ianguo maṙende gako kui njui tsakye. 45 Iyoe ongyikomba-pfo; kyaindi ichu wookyia ngashika iha aṙa ingyikomba maṙende gako-pfo. 46 Oshia mṙoe oko mafuṙa-pfo; indi ichu nashia maṙende gako mafuṙa gekyepfaama necha. 47 Kyipfa kya ikyo ngakuwia, nahooṟio ngyuunyamaṟi tsakye tsifoi, kyipfa nakunda mnu, kyaindi ulya ahooṟio kyitutu, icho nekyekunda kyitutu.” 48 Naaho kawia mndu mka ulya, “Nohooṟio ngyuunyamaṟi tsapfo.” 49 Nyi lyo-ng'u walya waweilya hamwi na oe walewooka ikusaṟa mrimenyi kowo, “Nyi wui ichu tane ahooṟia ngyuunyamaṟi?” 50 Kawia mndu mka ulya, “Iiṙikyia lyapfo lyakukyiṟa. Yenda na ufoṟo.”
1 Kyikawa-ng'u numa ya iho naweitenga-tenga mṟinyi na shikaṟonyi echionguo mbonyi tsa Wumangyi wo Ruwa, na walya ikumi na wawi wawei hamwi na oe. 2 Na waka waata wawewoṙo nyi waṟufui wawicho na ndoṟe wakakyiṟo; nawo nyi Maria ekyelago Makyidalena, alewuto waṟufui wawicho mfungaaṙe, 3 na Yoana, mka o Kusa, mṟundi mṟango o Herode, na Susana, na wengyi wafoi, wawemṟundia kui masaa gawo. 4 Kyiyeri wuingyi wung'anyi wo wandu wulekuumbia na wandu walya walewuka orio mṟi wechicha na kokye, nalewawia kui mfano, 5 “Moolyia mbeu nalefuma indewaaya mbeu tsakye. Na oe kyiyeri aweiwaaya, tsingyi tsileoloka kufuhi na njia, tsikachumo-chumo, na shileye sha ngyinenyi shikatsilya. 6 Tsingyi tsikaoloka handu hawoṙe iṟaṟa; kyiyeri tsilewooka iṙo tsikauma ko iuṟa teri ngyicha. 7 Tsingyi tsikaoloka handu hawoṙe msha, na msha iya ikaṙo hamwi natso ikatsiilama. 8 Tsingyi tsikaoloka handu hawoṙe teri ngyicha; tsikaṙo, tsikakumbia orio imwi igana.” Kyiyeri aweiṙeṙa isho naleṙeṙa na ṟui lying'anyi echigamba, “Awoṙe maṙwi geaṙanyia naaṙanyie.” 9 Wanalosho wakye wakammbesa kyimaṙuma kya mfano-cho. 10 Kagamba, “Nyoe muwaenengye imanya shiṟika sha Wumangyi wo Ruwa; indi wengyi nyi kui mfano, kundu wakaambuya walawone, na wakaicho walamanye. 11 Na mfano-cho kyitambuluo kyacho nyi ikyi, mbeu nyi Ṙeṙo lya Ruwa. 12 Walya wa kufuhi na njia nyi walya wekyeicho, numa Satana nekyecha karakuo Ṙeṙo lyilya lya Ruwa mrimenyi kowo, walacheiṙikyia na ikyia. 13 Na walya wa iṟaṟenyi nyi walya wekyeicho na iambilyia Ṙeṙo-lyo lya Ruwa kui sia; nawo wawoṙe mri-pfo. Wekyeiṙikyia kyiyeri kyifuhi, na kyiyeri kya iyesho wekyewuya na numa. 14 Na tsileoloka mshenyi, nyi walya waleicho na kyiiṙi kya iyenda wakailamo nyi wulembi wo masaa, na ichihiyo lya wuyana, walakumbie ndunda ngyicha. 15 Na tsilya tsa terinyi ngyicha nyi walya wekyeicho na iambilyia Ṙeṙo lyilya lya Ruwa mrimenyi kowo na kui iindia wekyelyiaṙanyia na ilyiwaṙa, numa wekyekumbia ndunda wechikarishia.” 16 “Kuwoṙe mndu ekyekoṟa taa na iishikyia na kyindo numa kaiwikyia handu hakuṟiikyie-pfo, indi nekyeiwikyia handu hakuirie, kundu ilyimikyie woose wechiiṙa na ipfo numba. 17 Cha kyipfa kuwoṙe kyindo kyikyishikyie maa kyikuṟiikyie kyilechimanyika-pfo. 18 Ambuyenyi-ng'u chandu muiaṙanyia, kyipfa awoṙe kyindo nechienengo, na ulya alawoṙe kyindo nechisoko maa kyilya kyitutu awoṙe.” 19 Wamae na wana wa wamae wakayenda kokye, walaiṙime ishika kufuhi na oe kyipfa kya wuingyi wo wandu. 20 Kaendio mbonyi, echiwio, “Womoo na wana wa womoo wagoṟokyi nja wakundi ikuwona.” 21 Kagaluo, kawawia, “Wama oko na wana wa wama wako nyi iwo waiaṙanyia Ṙeṙo lya Ruwa na iosha kyilya lyikundi.” 22 Kyikawa-ng'u kyiyeri kyimwi kyiiṙi kya mfiri iya naleṙooya ngalawenyi hamwi na wanalosho wakye, kawawia, “Luambaṙe mṟasa molyolya o nduwa.” Wakayenda. 23 Nawo kyiyeri waweiyenda, oe nalelaa maṙoe. Kukocha kyiwiṟi kulya nduwenyi, kyikashikyia ngalawa iya, ikawooka iichuo mṟinga, wakawa ndengyenyi. 24 Wakayenda kokye wakamwamtsa, wechigamba, “Mndumii, ung'anyi, Mndumii ung'anyi, luisia.” Kaamka, kaṙeṙia kyiwiṟi na mṟinga ulya o nduwa shikatsia sau, kukowaṙa itsia lying'anyi. 25 Kawawia, “Lyookwi iiṙikyia lyanyu?” Wakaowuo, wakatandiṟi, wechigamba wo wenyi ko wenyi, “Ichu nyi wui aṙeṙia shiwiṟi na mṟinga, nasho shikamwaṙanyia?” 26 Wakashika mbai ya ipalyipalyi lya uruka lo Wakyerasi, iambuyana na Galyilaya. 27 Na oe kyiyeri alesoka ngalawenyi, nalekarisana na mndu awewoṙo nyi waṟufui wawicho; alawendeṟae nguwo mfiri ifoi, maa awekyekaa kanyi-pfo, indi kundu awekyelaa nyi kundu kuwekuṟikye wandu wapfiie. 28 Na kyiyeri alewona Yesu nalekalagatsa na ioloka wanda mbele yakye na iṙeṙa na ṟui lying'anyi, echigamba, “Ngyiwoṙe kyikyi na iyoe, Yesu, Mana o Ruwa ai wuye? Ngyikuterewa ulangyituure.” 29 Kyipfa nalekoaṙeṙia mṟufui ulya mmbicho nawukye mndu ulya. Kyipfa nawekyemmbaṙa kyiyeri kyifoi, mṟasa kawamoringo kyipfungonyi, echipfungo na mshe na ngowa; kaṙumbuo shipfungo shilya, kaṟichiṟo nyi mṟufui ulya mmbicho mṟasa nukyenyi ngyiumu suwaa ilawoṙe maa mṟinga. 30 Yesu kammbesa, “Rina lyapfo nyi wui?” Kagamba, “Rina lyako nyi ulyimalyi.” Kyipfa waṟufui wawicho wafoi wawemmboṙe. 31 Wakamterewa kawawuta alawafune wayende ṟungunyi. 32 Kyasia, iho hawewoṙe poo lya nguwe tsifoi tsiweilyiso fumvunyi, wakamterewa nawaenengye momu waiṙe na kulya nguwenyi. Kawaiṙikyia. 33 Waṟufui walya wawicho wakawuka mndu ulya wakaiṙa na kulya nguwenyi, na poo lyilya lyikaiṟimika iwinyi, tsikasokyia nduwenyi, tsikapfiia mṟingyenyi. 34 Kyiyeri walyisi walewona kyindo kyilewutika, waleṙicha, wakaonguo mbonyi-tso mṟinyi na handu hengyi hoose. 35 Wandu wakafuma indewona ikyo kyilewutika, wakayenda ko Yesu, wakawona mndu ulya alewuto waṟufui wawicho aṙamie maṙendenyi ga Yesu, aṟee nguwo na makusaṟo gakye gai mecha, wakaowuo. 36 Walya walekowammbona waleonguo chandu ulya awewoṙo nyi waṟufui wawicho alekyiṟo. 37 Na wandu wa uruka lo Wakyerasi lui mbai ya halya walemterewa nawukye kowo, kyipfa walewoṙo nyi wuowu wung'anyi. Kyasia na oe kaṙooya ngalawenyi, kawuya. 38 Na mndu ulya alewuto waṟufui wawicho nalemterewa naoshane na oe; kyaindi oe nalesamana na oe echigamba, 39 “Wuya na kanyi kopfo; undeonguo maṟiyisho Ruwa alekuwutia.” Kayenda echionguo kulya mṟinyi koose, maṟiyisho gang'anyi Yesu alemmbutia. 40 Kyasia kyiyeri Yesu alewuya wuingyi wo wandu wulemwambilyia kui sia, kyipfa waweimmbeṙelyia woose. 41 Na mndu umwi ekyelago Yairo kacha, na oe nawei ang'anyi o sinagogi. Kaoloka maṙendenyi ga Yesu, kamterewa naiṙe na kanyi kokye; 42 kyipfa mana okye o kyika nawei kufuhi na ipfa, na nyi mana kyimuumwi kokye, awewoṙe cha maka ikumi na iwi. Na kyiyeri aweiyenda wuingyi wo wandu wulemwiṟiwia. 43 Na mndu mka umwi, awekyechoṟa kyiyeri kya maka ikumi na iwi, [alekoammbuta masaa gakye goose echienenga waanga] alaiṙime ikyiṟo nyi mndu oose, 44 nalekaa kyanuma ko Yesu kapaaya ikyechu lya iwale lyakye; na cha ilyi ichoṟa lyakye lyikaṙumbuka. 45 Yesu kagamba, “Nyi wui angyipaaya?” Kyasia kyiyeri wandu woose wamlege, Petiro nalemmbia, “Mndumii ang'anyi, wuingyi-wu wo wandu wukuiṟiwie na ikupeṟeetsa.” 46 Yesu kagamba, “Kuwoṙe mndu angyipaaya, kyipfa ngyikuichuoe pfinya tsangyiwuka.” 47 Mka ulya ammbone kye echiiṙima ikuṟiika-pfo, kacha eṙeṙema, kaoloka mbele yakye, kamwongoya mbele ya wandu woose, kyimaṙuma kya impaaya, na chandu alewekyiṟo cha ilyi. 48 Kammbia, “Mana, iiṙikyia lyapfo lyakukyiṟa. Yenda na ufoṟo.” 49 Kyiyeri aweiṙeṙa isho, kukocha mndu awuka kanyi ko ulya ang'anyi o sinagogi, kammbia, “Mana opfo ampfa; maa ulawinishe mlosha.” 50 Kyaindi lyilya Yesu aleicho isho, nalemgaluo, “Maa ulaowuoe. Iṙikyia tupu, na oe nechichia.” 51 Kyiyeri aleshika kanyi ko ulya ang'anyi o sinagogi alelekyia mndu iiṙa na kulya numba sile nyi Petiro, Yohane, Yakobo, na awu o mana ulya na wamae-pfo. 52 Na wandu woose wawefiiṟa na ikapa ṟanyi. Kawawia, “Maa mulafiiṟe, ichu apfa-pfo, indi nalaa maṙoe tupu.” 53 Wakamseka mnu, kyipfa walemanya kye awempfa. 54 Kammbaṙa kuwoko, kaṙeṙa na ṟui lying'anyi, echigamba, “Mana, goṟoka.” 55 Moo okye ukommbiyilyia na oe cha ilyi kagoṟoka. Kagamba naenengo kyelya. 56 Wafee wakye wakaṟiyio mnu, kyaindi kawaima walawie mndu kyindo kyilewutika.
1 Yesu kalaga walya ikumi na wawi kawaenenga wuiṙimi na pfinya yechilyia waṟufui woose wawicho na ikyiṟa ndoṟe. 2 Kawaṙuma waonguo Wumangyi wo Ruwa, na ikyiṟa waluoe. 3 Kawawia, “Mulaṙuo kyindo ilyi moyenda kyaro, upoi maa kyikuchu, maa mkate, maa heleri; maa umwi onyu alaṙuo kanzu tsiwi. 4 Na orio numba mochiiṙa napfo kaenyi pfo mṟasa kyiyeri mochiwuka pfo iyenda mṟi ungyi. 5 Na walya walechimuambilyia, ilyi mochiwuka ipfo mṟinyi, kute-kutenyi kyilulyi kyikyeri maṙendenyi ganyu, kyiwe wuṟingyishi kowo.” 6 Wakayenda wakatenga-tenga shikaṟonyi, wechionguo Ndumi Ngyicha, na ikyiṟa wandu handu hoose. 7 Na Mangyi Herode kaicho mbonyi tsa isho shoose shilewutika, kaiṟewe mnu kyipfa wandu wengyi walegamba kye Yohane naṟuka ko wapfu; 8 na wengyi kye nyi Elyiya awoneka, na wengyi kye nyi umwi o weonguo shisuku wa kacha aṟuka. 9 Kyaindi Herode kagamba, “Yohane ngyilemṙumbuo mṙoe, kyasia nyi wui ichu ngyiichuoe mbonyi-tsi tsake?” Kakunda immbona. 10 Kyasia kyiyeri wasu walya walewuya walemwongoya mbonyi tsoose tsilewutika; kawaṙuo kayenda nawo handu hakuṟiikyie mṟasa mṟi umwi okyelago Betisaida. 11 Na kyiyeri wuingyi wo wandu wulemanya, wulemwosha, kawaambilyia, kawamoṙeṙa nawo mbonyi tsa Wumangyi wo Ruwa, kakyiṟa walya wawelangyie ikyiṟo. 12 Na mnengyeṟi ukowooka iolokyia, walya ikumi na wawi wakayenda kokye, wakammbia, “Samana na wuingyi-wu wo wandu kundu wayende shikaṟo sha mṟasenyi na iha, wawone handu helaa na shelya kyipfa iha handu lukyeri nyi nuka mreesi.” 13 Kawawia, “Waenengyenyi kyelya.” Wakagamba, “Luwoṙe kyindo kya ngoseṟa sile nyi mkate itanu na makunga gawi-pfo; ang'u lundewuṟa shelya ko wandu-wa woose.” 14 Kyipfa wasoṟo wawekyeri ho wawei cha shiku shitaanu. Kawia wanalosho wakye, “Ṟamiṟenyi wandu kui nzengye, orio nzengye wandu makumi gataanu.” 15 Wakawuta kuṙo, wakawaṟamiṟa woose. 16 Kawuta mkate iya itanu na makunga galya gawi, kaambuya wuye ruwewu kashiwikyia mboṟa, kapeṟenguo, kaenengyia wanalosho wakye kundu wagawie wuingyi wulya wo wandu. 17 Wakalya, wakaiguṙa woose; na shipeṟengu shilya shiletsugaa walesania shikaichuo mkunja ikumi na iwi. 18 Kyasia kyiyeri aweiterewa handu hakuṟiikyie, wanalosho wakye wawei hamwi na oe, kawawesa, “Wuingyi-wo wo wandu waigamba inyi nyi wui?” 19 Wakamgaluo, wechigamba, “Yohane Mpatisi; kyaindi wengyi, Elyia; na wengyi kye nyi umwi o weonguo shisuku wa kacha aṟuka.” 20 Kawawia, “Aa nyoe mokyegamba inyi nyi wui?” Petiro kamgaluo, kagamba, “Iyoe nyi Mshumbuoe o Ruwa.” 21 Kawawawasa, kawaima walawie mndu kyindo-kyi; 22 echigamba, “Kyakooya Mana o Adamu iwona matuuro gafoi na ilego nyi wameeku wa mengye na wang'anyi wa makohanyi na walosha wa mawawaso, na iwoogo na mfiri o kaṟaaṟu iṟuka.” 23 Kawawia woose, “Mndu oose kakunda ingyiosha nakulege amonyi, nakuṙikye msalaba okye orio mfiri nangyioshe. 24 Kyipfa mndu mokunda ikyiṟa moo okye nechiuṙetsa, na mndu echiṙetsa moo okye kyipfa kyako nyi oe echiukyiṟa. 25 Cha kyipfa nyi kyiira kyiha mndu echiwona kawona wuyana woose; kokooya aṙetsa moo okye na ikuṙetsa amonyi? 26 Cha kyipfa orio mndu echingyiwonia sonu inyi na maṙeṙo gako, Mana o Adamu nechiwonia sonu mndu-cho kyiyeri echicha mng'anonyi okye na o Awu na malaika waele. 27 Na inyi ngyimmbia loi, kuwoṙe wandu wagoṟokyi iha, walechiwona upfu maa ale, mṟasa wawone kuwooka Wumangyi wo Ruwa.” 28 Numa ya mbonyi-tso, hamwiṙe mfiri nyanya, naleṙuo Petiro na Yohane na Yakobo, kaṙo na fumvunyi kundu nandeterewa. 29 Kyiyeri aweiterewa fana ya kyaam kyakye ikailachika, mawale gakye gakailachika gakaila peṟu gakakyema-kyema. 30 Na wandu wawi waweiṙeṙa na oe, nawo nyi Mose na Elyiya; 31 walewono mng'anonyi, wakaṙeṙa mbonyi tsa ipfa lyakye echilyiafutsia Yerusalemu. 32 Petiro hamwi na walya wawei na oe wawewalemie nyi maṙoe; kyaindi kyiyeri wamuamkye walewona mng'ano okye, na walya wawi walegoṟoka hamwi na oe. 33 Kyasia kyiyeri waweilekana na oe, Petiro nalewia Yesu, “Mndumii, ung'anyi, kyachia ilyi lui iha. Luachikyie matengo gaṟaaṟu, lyimwi lyapfo iyoe, na lyimwi lya Mose, na lyimwi lya Elyiya”; alaichi kyindo aweiṙeṙa. 34 Kyiyeri aweigamba isho, kulewoneka ipuchi lyikawashikyia, wakaowuo lyilya waleiṙa na ipfo ipuchinyi. 35 Ṟui lyikawuka kulya ipuchinyi, lyechigamba, “Ichu nyi Mono-ko, msambuṟe oko, mwaṙanyienyi oe.” 36 Na kyiyeri ṟui-lyo lyiletsia, Yesu kawoneka akyeri amonyi. Nawo wakatsia, walaongoye mndu isho shoose walewona mfiri iya yoose. 37 Kyikawa-ng'u ilya-ngama, lyilya walesoka kulya fumvunyi, wuingyi wung'anyi wo wandu wulekarisana na oe. 38 Na mndu umwi kyiiṙi kya kyisanzionyi naleiṟuka, echigamba, “Mlosha, ngyikuterewa usaṟie mono-ko, kyipfa oe nyi mono-ko kyimuumwi. 39 Na mṟufui mmbicho nekyemmbaṙa, na cha ilyi nekyekalagatsa; kamtewe kauma nguku, echiṙosa mawia, maa ekyemṙa sile kui imtuura lying'anyi na impirichuo-pirichuo-pfo. 40 Ngaterewa wanalosho wapfo wammbute, walaiṙime.” 41 Yesu kagaluo, kagamba, “Nyoe rika lyilawoṙe iiṙikyia, lyiyendie njia ilawaṟi, ngyechikaa hamwi na nyoe na iṙuana na nyoe mṟasa indi? Ende mana-cho na iha.” 42 Kyiyeri aweiyenda kokye, mṟufui mmbicho ukomwolotsa wanda, kauma nguku. Yesu kaṙeṙia mṟufui ulya mmbicho, kakyiṟa mana ulya, kammbiyiṟia awuye. 43 Woose wakaṟiyio, wechiwona mng'ano o Ruwa. Nawo kyiyeri waweiṟiyio kyipfa kya shindo shoose aleshiwuta, nalewia wanalosho wakye, 44 “Aṙanyienyi necha mbonyi-tsi ngyimmbia, cha kyipfa Mana o Adamu naindewiko mawokonyi ga wandu.” 45 Kyaindi walemanya kyindo kyilya-pfo, kyikaṟiko kowo walakyimanye; wakaowuo immbesa kyitambuluo kya kyindo-kyo. 46 Wakawooka iwesana, nyi wui echiwa ang'anyi kyiiṙi kyawo. 47 Na Yesu kyiyeri alemanya kyindo wawekusaṟie mrimenyi kowo, nalewuta mana mtutu kammbikyia kufuhi na oe, 48 kawawia, “Mndu oose echiambilyia mana-chu kui rina lyako nangyiambilyia inyi; na mndu oose echingyiambilyia inyi naambilyia ulya alengyiṙuma. Kyipfa ai mtutu kyiiṙi kyanyu moose icho nyi oe ang'anyi.” 49 Yohane kagaluo, kammbia, “Mndumii, ung'anyi, lulewona mndu aiwuta waṟufui wawicho kui rina lyapfo, lukomwima, kyipfa ekyeoshana na soe-pfo.” 50 Yesu kammbia, “Maa mulamwime, cha kyipfa icho alaiwingana na nyoe nakyeri ura lonyu.” 51 Kyikawa-ng'u, kyiyeri mfiri yakye yeṙo na Ruwewu iletikyira kufuhi, nalekuṟeyeṟa iyenda Yerusalemu. 52 Kaṙuma wandu wasonguo mbele yakye, wakayenda wakaiṙa na kyikaṟonyi kya Wasamaria, kundu wamwachikyie handu echikaa. 53 Kyaindi wandu wa ipfo walelega imwambilyia kyipfa kya ilyi awekuṟeyeṟie iyenda Yerusalemu. 54 Wanalosho wakye, Yakobo na Yohane, wammbone isho, walegamba, “Mndumii, nukundi lugambe moṙo usokye iwuka ruwewu, uwarumatse; [chandu na Elyiya alewuta?]” 55 Kawaindukyia, kawaṙeṙia, [kagamba, “Muichi nyi mrima o mbaṟe iha muwoṙe-pfo.] 56 Kyipfa Mana o Adamu alecha irumatsa mrima ya wandu-pfo, indi iikyiṟa.” Wakafuma wakayenda kyikaṟonyi kyingyi. 57 Nawo kyiyeri wawekyeri njiyenyi, mndu umwi nalemmbia, “Ngyekuosha orio handu ochiyenda.” 58 Yesu kammbia, “Mapaara gawoṙe mṟeshe, na shileye sha ngyinenyi shiwoṙe singyi, kyaindi Mana o Adamu awoṙe handu heonyonyia-pfo.” 59 Kawia ungyi, “Ngyiosha.” Kagamba, “Mndumii, ngyienenga momu kuwooka ngyindeṟika awu oko.” 60 Kammbia, “Leka wapfu waṟikye wapfu wawo; indi iyoe yenda undeonguo Wumangyi wo Ruwa.” 61 Mndu ungyi-se kammbia, “Mndumii, ngyekuosha; indi ngyienenga momu kuwooka ngyindesamana na wandu wa kanyi koko.” 62 Yesu kammbia, “Mndu akuṟeyeṟa iṙema, naaho kaambuya numa, awaṟi Wumangyi wo Ruwa-pfo.”
1 Kyasia, numa ya isho Mndumii nalewika wandu wengyi makumi mfungaaṙe, kawaṙuma wawi wawi wamsongoye iyenda orio mṟi na orio handu awekusurie iyenda amonyi. 2 Kawawia, “Shilyimu nyi shifoi, kyaindi waṟundi nyi waangu. Kyasia terewenyi Mndumii o shilyimu naṙikye waṟundi shilyimunyi shakye. 3 Yendenyi; ngyimṙuma nyoe cha shiondo shikyeri na shisii. 4 Maa mulaṙuo mkunja, maa kyikuchu, maa shiaṙu. Maa mulaiṟikiṟe mndu njienyi. 5 Na orio numba mochiiṙa napfo, gambenyi kuwooka kye ufoṟo lukae kunu kanyi. 6 Na kukowaṙa mndu echiiṙima iambilyia ufoṟo, ufoṟo lonyu lochikaa na oe. Kyaindi kokooya kulawoṙe, ufoṟo lonyu lochiwuya na konyu. 7 Kyasia, kaenyi ipfo numbenyi, mochilya na inyo sha kowo; kyipfa mṟundi nawaṟi ienengo wori wokye. Maa mulakyame-kyame iwuka numba imwi iyenda numba ingyi. 8 Na orio mṟi mochiiṙa napfo, wakamuambilyia, lyenyi shelya shechiwikyio mbele yanyu. 9 Kyiṟenyi wandu woose waluoe wakyeri pfo. Wawienyi, ‘Wumangyi wo Ruwa womtikyira kowo.’ 10 Na orio mṟi mochiiṙa napfo, nawo walamuambilyie, wukyenyi pfo, na nyoe mukoiṙa njienyi tsa mṟi-cho gambenyi, 11 ‘Maa kyilulyi kya mṟi onyu kyikuwoṙe maṙendenyi gaṙu luikyimukutia-kutia.’ Kyaindi manyenyi kye Wumangyi wo Ruwa womtikyira kufuhi. 12 Ngammbia kye mfiri ulya kyechiwa kyaangu uruka lo Sodoma ihooṟio maṙeko kuta mṟi-cho.” 13 “Ochia lopfo, Korasini! Ochia lopfo Betisaida! Kyipfa kokooya shiṟiyisho shilewutika konyu shilewutika kulya Tiro na Sidon, wawechiṙumbuya wunyamaṟi wookyia iho, wechiṟaa masaṟa ga makunyia na iṙamia ifunyi. 14 Kyaindi, mfiri o ianduyo kyechiwa kyaangu wandu wa Tiro na Sidon ikarishia ngapo tsawo kuta nyoe. 15 Na iyoe Kaperinaumu, ochienengo kyiṟumi-pfo indi nochisotso mṟasa ko waṟumu. 16 Momuaṙanyia nyoe, nangyiaṙanyia inyi; na amulega nyoe nangyilega inyi; na angyilega inyi nalega ulya alengyiṙuma.” 17 Naaho-ng'u walya makumi mfungaaṙe walewuya na sia, wechigamba, “Mndumii, maa waṟufui wawicho wailuindia kui rina lyapfo.” 18 Kawawia, “Ngyilewona Satana, echioloka iwuka ruwewu cha mbawa. 19 Ngamuenenga pfinya yechuma njoka na shisheshe, na pfinya tsoose tsa mokyituwa ulya, maa kuwoṙe kyindo kyemmbutia kyindo kyiwicho-pfo. 20 Kyaindi mulachihiyo kyipfa kya ilyi waṟufui wawicho waimuindia; indi chihiyonyi kyipfa marina ganyu gamaṟeie ruwewu.” 21 Kyiyeri kyilya kyilya Yesu kachihiyo Mumuyonyi Mweele, kagamba, “Ngakuana, Awu, Mndumii o ruwewu na uruka, kyipfa shindo-shi, uleshitambuluya wandu waṟango-pfo indi nuleshitambuluya wana watutu. Yee, loi Awu, kyipfa nyi wuṙo kyilekuchihiya.” 22 Kagamba, “Ngyimwenengye shoose nyi Awu-yoko, maa kuwoṙe aichi Mana, sile Awu-pfo; maa kuwoṙe aichi Awu, sile Mana-pfo, na orio oose ulya mana akundi imshukuya.” 23 Kaindukyia wanalosho wakye, kaṙeṙa nawo kyiṟika, kawawia, “Wagusu meso ganyu gaiwona isho muwonyi nyoe. 24 Cha kyipfa ngammbia kye weonguo shisuku wafoi na wamangyi walelanga iwona ishi muwonyi nyoe walashiwone; na iicho isho mushiichuoe nyoe walashiicho.” 25 Na mlosha umwi o mawawaso nalegoṟoka nayeshe Yesu, echigamba, “Mlosha, ngyiwute kyi kundu ngyioṟe moo o mlungana?” 26 Kammbia, “Kyikyiṟeie kuṙa uwawasonyi? Nosoma ho kuṙa?” 27 Kagaluo, kagamba, “Kunda Mndumii Ruwa opfo kui ngoo yapfo yoose, na kui mrima opfo oose, na kui pfinya tsapfo tsoose, na kui wuṟango wopfo woose; na momṟasa opfo cha iyoe kumonyi.” 28 Kammbia, “Nogaluo necha; wuta kuṙo na iyoe nochiwaṙa moo.” 29 Na oe akundi ikuloṟa kye nai msumganyi, kawesa Yesu, “Aa momṟasa oko nyi wui?” 30 Yesu kagaluo kagamba, “Mndu umwi nalesoka iwuka Yerusalemu echiyenda Yeriko, kakarisana wasokyi, wakammbuta mawale gakye, wakamkapa, wakayenda, wakamṙa kufuhi na ipfa. 31 Mkohanyi umwi naweiiṙia njia iya; na lyilya alemmbona naleiṙa mbai. 32 Na Mlewi wuṙo, kyiyeri aleshika halya kammbona, kaiṙa mbai. 33 Kyaindi Msamaria umwi echiyenda kyaro naleshika halya-ndu awei; na lyilya alemmbona nalemmbonia wukyiwa. 34 Katikyira kufuhi, kampfunga shifaṟa shakye, kashishia mafuṙa na mpfinyo, kamṙosia wuye ya nzoi yakye, kamṙuo mṟasa numbenyi ya wayenu, kamwonduṟa necha. 35 Na ilya-ngama kawuta dinari tsiwi, kaenengyia ulya monyi numba ya wayenu, echigamba, ‘Onduṟa necha mndu-chu, na kokooya kuwoṙe kyindo kya ngoseṟa ochimwenenga, ilyi ngyechiwuya ngyekutaa.’ 36 Nuwonyi kuṙa iyoe, kyiiṙi kya iwo waṟaaṟu, nyi wui awei momṟasa o ulya alekarisana wasokyi?” 37 Kagamba, “Nyi ulya alemmbonia wukyiwa.” Yesu kammbia, “Yenda na iyoe undewuta wuṙo.” 38 Kyasia kyiyeri waweiyenda naleiṙa kyikaṟonyi kyimwi; mndu mka umwi ekyelago Marita kamlaga na kanyi kokye. 39 Na oe nawewoṙe mono-wamae o kyika ekyelago Maria, aleṙamia maṙendenyi ga Yesu, kaaṙanyia maṙeṙo gakye. 40 Kyaindi Marita naweikuwinisha na maṟunda gafoi, kayenda ko Yesu, kammbia, “Mndumii, uwonyi uwicho chandu mono-wama-chu oko angyiṙa ngyiṟunde ngyimonyi-pfoe? Kyasia mmbie nangyitarame.” 41 Mndumii kagaluo kammbia, “Marita, Marita, nukuwinisha na iiṟewe kyipfa kya shindo shifoi; 42 kyaindi nyi kyindo kyimwi tikyi kyikyikunde; na Maria nasambuṟa ṙombo lyicha lyilechiwuto kokye.”
1 Kyasia kyiyeri awei handu halyiwe echiterewa, ammarise, umwi o wanalosho wakye nalemmbia, “Mndumii, luloshe iterewa chandu Yohane alelosha wanalosho wakye.” 2 Kawawia, “Kyiyeri muiterewa, gambenyi ‘Awu [oṙu ukyeri ruwewu], rina lyapfo lyitano lyiele, Wumangyi wopfo wuche, [kyindo ukundi, kyiṟundikye iha wuyanenyi cha ipfo ruwewu.] 3 Uluenengye kando kaṙu mfiri yoose. 4 Uluhooṟie ngyuunyamaṟi tsaṙu, kyipfa na soe lokyehooṟia orio mndu ekyeluṙekyio. Na ulaluṙuo kyiyeshionyi indi ulukyiṟe ngyeṟo tsa mmbicho ulya.’ ” 5 Kawawia, “Nyi wui konyu awoṙe mbuya, kayenda kokye kyio, na immbia; ‘Mbuya-yako, ngyiakuya mkate iṟaṟu, 6 kyipfa mbuya yako yashika koko, yawuka kyaro, na inyi ngyiwoṙe kyindo kyeienenga-pfo,’ 7 na ulya ai numba namgaluoe echigamba, ‘Maa ulangyiwinishe; moongo omshingo, na soe lomlaa hamwi na wana wako, ngyechiiṙima iamka ngyikuenengye-pfo?’ 8 Ngammbia kye, maa chandu alaiamka namwenengye kyipfa kya ilyi akyeri mbuya yakye, chandu alaiṙa imterewa, nechiamka namwenengye kyilya aiterewa. 9 Na inyi ngyimmbia, ‘Terewenyi na nyoe mochienengo; pfulenyi, na nyoe mochiwona; kape-kapenyi moongo, na nyoe mochipfunguyo.’ 10 Kyipfa orio moterewa nekyeambilyia; na ulya mopfula nekyewona; na ulya mokapa-kapa moongo nechipfunguyo. 11 Kyipfa nyi wui konyu akyeri awu, mono-kye kamterewa mkate, echimwenenga igoe? Ang'u kamterewa ikunga, namwenengye njoka? 12 Ang'u kamterewa iyai, namwenengye kyisheshe? 13 Kyasia, kokooya nyoe mui wawicho muichi ienenga wana wanyu shisumbo shicha, ngyesa chi ngoseṟa mnu awu onyu akyeri ruwewu echienenga Mumuyo Mweele walya wekyemterewa-pfoe?” 14 Na oe naweiwuta mṟufui mmbicho ko mndu awei ndiṟi. Kyiyeri mṟufui ulya mmbicho alewuka, mndu ulya kaṙeṙa wuingyi wo wandu wukoṟiyio. 15 Wengyi wakagamba, “Naifuna waṟufui wawicho kui pfinya tsa Beelyisebulyi, ang'anyi o waṟufui wawicho.” 16 Wengyi walemyesha wepfula kokye kyiṟingyishio kyiwukyie ruwewu. 17 Na oe kamanya makusaṟo gawo, kawawia, “Orio wumangyi wukowaṙa wuṟiingyi kokyewaṙa wukyiwa; na wandu wa nja imwi wakaṟiingana wekyenyanyaṟika. 18 Kyasia, kokooya Satana nakuṟiinga oe amonyi, wumangyi wokye wochigoṟoka kuṙa? Kyipfa nyoe mugamba kye ngyifuna waṟufui wawicho kui Beelyisebulyi, 19 Kyasia, kokooya ngafuna waṟufui wawicho kui Beelyisebulyi, ngyesa wana wanyu wekyewafuna kui pfinya tsa wui? Kyipfa kya ikyo iwo nyiwo wechimuanduya. 20 Kyaindi kokooya inyi ngyifuna waṟufui wawicho kui kyimnyoe kya Ruwa, kyasia Wumangyi wo Ruwa womcha na konyu. 21 Mndu awoṙe pfinya aṟee shisha shakye, karinga numba yakye, shindo shakye shechikaa necha. 22 Kyaindi mndu awoṙe pfinya kuta oe kyiyeri ayenda kokye na imkapa, nemsoka shisha shakye shoose awekusurie, na igawia wandu wakye shoose awewoṙe. 23 Mndu alai hamwi na inyi naiwingana na inyi; na mndu alaisania hamwi na inyi nekyeola-ola.” 24 “Mṟufui mmbicho ilyi awuka ko mndu, nekyeiṙia handu halawoṙe mṟinga, echipfula handu heonyonya, alandewone nekyegamba, 25 ‘Ngyechiwiyilyia numba yako ngyilewuka.’ 26 Na kashika, kawona ingyiaie na ichopo, nyi lyo-ng'u ekyeyenda kaṙuo handu hamwi na oe waṟufui wengyi wawicho mfungaaṙe wakyeri wawicho kuta oe amonyi, wakaiṙa na ikaa pfo; na mndu ulya mafurumionyi gakye gekyewiha kuta kulya mawookyionyi.” 27 Kyikawa-ng'u kyiyeri aweiṙeṙa mbonyi-tso, mndu mka umwi wandunyi wa kyisanzionyi, naleṙeṙa na ṟui lying'anyi kammbia, “Agusu mndu-mka-cho alekufee na mawee uleonga.” 28 Kyaindi oe nalegamba, “Nanga, wagusu walya wekyeicho Ṙeṙo lya Ruwa na iosha shilya lyikundi.” 29 Na kyiyeri wuingyi wo wandu wulekuumbia halya-ndu Yesu awei nalewooka igamba, “Rika-lyi nyi rika lyiwicho. Lyipfula kyiṟingyishio, maa lyechienengo kyiṟingyishio-pfo, sile nyi kyiṟingyishio kya Yona. 30 Kyipfa, chandu Yona alewa kyiṟingyishio ko Waninawi, nyi wuṙo echiwa Mana o Adamu ko rika-lyi. 31 Mangyi o kyika o ura lo kyaseri nechigoṟoka mfiri o ianduyo hamwi na wandu wa rika-lyi, na oe nechiwaanduya kye waleṙeko; kyipfa oe nalecha iwuka ngyuura tsa kyishingonyi tsa wuyana kundu naicho wuṟango wo Solomon, na iha hakyeri ai ang'anyi kuta Solomon. 32 Wandu wa Ninawi wegoṟoka mfiri o ianduyo hamwi na rika-lyi, nawo wechiwaanduya kye waleṙeko; kyipfa wo waleṙumbuya wunyamaṟi kyipfa kya mbonyi Yona aleonguo, na iha hakyeri ang'anyi kuta Yona.” 33 “Kuwoṙe mndu ekyekoṟa taa kaiwikyia handu hakuṟiikyie, ang'u wanda ya kyitela-pfo indi nekyeiwikyia handu hakuirie, kundu iwo wechiiṙa napfo wawone ngyeela. 34 Taa ya mmbiu nyi riso. Kyasia riso lyapfo lyechiwona necha mmbiu opfo oose ochiwaṙa ngyeela. Kyaindi lyikanyamaṟika, mmbiu opfo oose ochiwaṙa meema. 35 Kyasia, ambuya-ng'u, ngyeela iya ikyeri kopfo ilacheewa meema. 36 Kokooya ngyeela yaṙunganana mmbiunyi opfo oose, maa kuwoṙe handu hawoṙe meema-pfo, mmbiu opfo oose ochiwaṙa ngeela tupu; chandu na taa yekyekulyimika kui ngyeela yayo.” 37 Kyiyeri aweiṙeṙa, Mfarisayo umwi nalemlaga nache na kokye nalye kyelya. Kaiṙa, kaṙamia nalye kelya. 38 Kyiyeri Mfarisayo ulya alemmbona, naleṟiyio kyipfa alesamba mawoko kyimṟumoe kuwooka alalya-pfo. 39 Mndumii kammbia, “Nyoe Mafarisayo mokyesanja kyiṙoo na kyitela kyanja, indi mrimenyi konyu muichuo wusokyi na wuwicho. 40 Nyoe matondo; icho aleachikyia isho sha nja chi oe aleachikyia isho shikyeri shiṙoonyi na shitelenyi taa-pfoe? 41 Kyaindi wutenyi kyiano shilya sha kyanumba, na shoose shechiwa shicha konyu. 42 “Indi ochia lonyu, Mafarisayo, cha kyipfa mokyewuta shiano shishiwawase na mboka tsa maṟa tsa orio mbaṟe, na kunu mochiṙa shilya shiwaṟi, na ikunda lya Ruwa. Kyamukooya iwuta isho sha kuwooka kulawoṙe iṙa isho sha kawi. 43 Ochia lonyu, Mafarisayo, cha kyipfa mukundi iṙamia mbele masinagoginyi na iiṟikyiṟo sangaṙa. 44 Ochia lonyu, cha kyipfa mukyeri cha shilome shilekyewono, shikyeri kye wandu wakaiṙa mbai yasho waichi mbonyi tsasho-pfo.” 45 Mndu umwi kyiiṙi kya walosha wa mawawaso kagaluo, kammbia, “Mlosha, kui igamba isho noluṙeṙia uwicho maa soe.” 46 Kagamba, “Na nyoe walosha wa mawawaso, ochia lonyu, cha kyipfa mokyeṙika wandu maṟio malemeri maa nyoe muwenyi mokyepaaya maṟio-go maa na kyimnyoe kyanyu-pfo. 47 Ochia lonyu, cha kyipfa muichopa shilome sha weonguo shisuku walya waku wanyu walewawaaga. 48 Kyasia muṟingyishia na iiṙikyiana na kyilya waku wanyu walewuta; kyipfa wo walewaaga weonguo shisuku-wo, na nyoe muchopa shilome shawo. 49 Na kyipfa kya ikyo wuṟango wo Ruwa wulegamba, ‘Ngyeṙuma kowo weonguo shisuku na wasu, nawo wewaaga waata kyiiṙi kyawo na iwafuna,’ 50 kundu rika-lyi lyiweso samu ya weonguo shisuku woose, ilepusuka wookyia igumbo lya wuyana; 51 wookyia samu ya Abelyi mṟasa samu ya Sakaria, ulya alewoogio kyiiṙi kya mesa ya Mndumii na hekalu. Yee, ngyimmbia kye rika-lyi lyechiweso samu-yo. 52 Ochia lonyu, nyoe walosha wa mawawaso, kyipfa muleṟika upfunguo lo halya-ndu wandu weiṙima iwona wuṟango nyoe muwenyi mulaiṙe napfo, na walya waweiṙa mukowashingyia.” 53 Kyiyeri alewuka pfo, walosha wa mawawaso na Mafarisayo walewooka imringyichia uwicho na imsouo kui immbesa shindo shifoi, 54 wemṙega kundu waicho ṙeṙo lyawuka ṙumbunyi kokye.
1 Kyiyeri-kyo, wuingyi wo wandu wulesanza shiku kui shiku, mṟasa wakachumana, kawooka iwia wanalosho wakye kuwooka, “Kuringyenyi na chachu ya Mafarisayo, ya wukulembecheṟi. 2 Kyaindi kuwoṙe kyindo kyikuṟiikyie kyilechiloṟo na pata, maa kyikyiṟikye kyilechimanyika-pfo. 3 Kyasia orio kyindo muleṙeṙa meemenyi kyemanyika saenyi; na kyindo muleweweṙia mndu shiṟinyi sha numba shegambo iwuka kai.” 4 “Na inyi ngyimmbia nyoe mbuya tsako, maa mulaowuoe iwo wekyewaaga mmbiu, na numa ya iho wawoṙe kyindo kya ngoseṟa weiṙima iwuta-pfo. 5 Kyaindi ngyemmbia mochimwowuo. Owuonyi ulya akyeri kye kammbaaga mndu nechiiṙima immbiyitsa Ngyehenenyi. Yee ngyimmbia, owuonyi icho. 6 Ngyesa shilepuru shitaanu shekyekumbo helo tsiwi-pfoe? Maa kuwoṙe maa kyimwi kyekyewaṙimika mbele ya Ruwa-pfo. 7 Kyaindi maa njui tsa mṙoe yanyu tsingyitale tsoose. Kyasia mulaowuoe; nanga nyoe kuta shilepuru shifoi.” 8 “Na inyi ngyimmbia, orio mndu echingyiṟingyishia mbele ya wandu, Mana o Adamu nemṟingyishia mbele ya malaika wa Ruwa. 9 Na echingyikana mbele ya wandu, icho nekano mbele ya malaika wa Ruwa. 10 Na orio mndu echiṙeṙa kyindo kyiwicho kya Mana o Adamu nechihooṟio, indi mndu alahia Mumuyo Mweele echihooṟio-pfo. 11 Na ilyi wemuṙuo mbele ya Masinagogi na wachilyi na wawoṙe pfinya ya ichilyia, maa mulaiṟewe mochikusaṟa maṙeṙo ganyu chandu mogaluo ang'u iṙeṙa. 12 Cha kyipfa Mumuyo Mweele nemulosha saa iya iya kyilya muwaṟi iṙeṙa.” 13 Mndu umwi halya kyisanzionyi kammbia, “Mlosha, wia mono-wama oko nangyigawie kyioṟa kyaṙu.” 14 Kammbia, “Iyoe mndu, nyi wui alengyiwika inyi ngyiwe moṙumbuo moondu yanyu ang'u mogawa shindo shanyu?” 15 Kawawia, “Kushowenyi na wuneesi, kyipfa moo o mndu ukyeri shindonyi shakye awoṙe-pfo.” 16 Kawawia mfano, echigamba, “Ṙema lya mndu umwi mnjama lyiwewoṙe shilyimu shifoi mnu. 17 Kawooka ikusaṟa mrimenyi kokye, echigamba, ‘Ngyiwikye kuṙa, kyipfa ngyiwoṙe handu ngyekooma shilyimu shako-pfo?’ 18 Kagamba, ‘Ngyewika kuṙi, ngyeunduo shikumbi shako ngyiwikye shingyi shing'anyi kuta ishi, na ipfo ngyechikooma kyilyimu kyako kyoose na shindo shako. 19 Numa ya iho ngyegamba, iyoe mrima oko, nuwoṙe shindo shicha shifoi ukoomie ko maka ifoi. Onyonya-ng'u, ulye, unyo, uchihiyo.’ 20 Kyaindi Ruwa kammbia, ‘Iyoe tondo, kyio-kyi kya inu wakundi mrima opfo. Na shindo-sho ukoomie shewa sha wui?’ 21 Nyi wuṙo akyeri mndu ekyekoomia mrima okye kyiseyesoe alakusurie Ruwa.” 22 Kawia wanalosho wakye, “Kyipfa kya ikyo ngyimmbia, maa mulawinie moo yanyu, mochilya kyi; maa mmbiu yanyu mochiṟaa kyi. 23 Cha kyipfa iwaṙa moo nyi kyindo kying'anyi kuta kyelya, na mmbiu nyi ngoseṟa kuta nguwo. 24 Kusaṟenyi mbonyi tsa makuru, kye gekyewaaya maa isambuo-pfo; gawoṙe shikumbi maa handu hekooma shindo-pfo, indi Ruwa nekyegaenenga kyelya. Nanga nyoe kafoi kuta shileye! 25 Nyi wui konyu kakuwinisha echiiṙima iengyeṟa moo okye maa mfiri umwi? 26 Kyasia, kokooya mulechiiṙima iwuta maa kyindo kyitutu, ny'kyilyi mukuwinisha kya shilya shingyi? 27 Kusaṟenyi mbonyi tsa shiwaṟo chandu shekyeṙo. Shekyeṟunda kyindo kyoose-pfo; indi inyi ngyimmbia kye maa Solomon mng'anonyi okye oose aleṟiko necha cha kyiwaṟo kyimwi kya isho-pfo. 28 Kyasia kokooya Ruwa nekyeṟika kuṙo maṟa ga ipfo ṙemenyi, gakyeri ho inu na ngama gakawiyitso moṙonyi ngyesa emmbutia ngoseṟa, nyoe wa iiṙikyia lyaangu? 29 Nyoe mulapfule mulye kyi ang'u munyo kyi-pfo. Maa mulaiṟewe mrimenyi, 30 kyipfa isho shoose nyisho masanga ga wuyana gekyepfula, kyaindi Awu onyu naichi kye mukundi isho. 31 Indi pfulenyi Wumangyi wo Ruwa, na isho mochiengyeṟio.” 32 “Maa mulaowuoe nyoe poo lyitutu, cha kyipfa Awu onyu nawona nyi kyicha imuenenga Wumangyi wulya. 33 Kumbenyi isho muwoṙe, muwute kyiano. Achikyienyi shikuchu shilekyekuo, koomenyi kyiseyesoe kyanyu ruwewu handu kyechiengyeṟika, handu halekyeshika mbafu, maa shinu lyilekyenyamaṟa. 34 Cha kyipfa handu kyiseyesoe kyanyu kyikyeri nyi ho-ndu na mrima yanyu yechikaa.” 35 “Mukuṟeyeṟe, mukuinewie kyitsinyi, na taa tsanyu tsikae tseaka; 36 muwe cha wandu waiweṙelyia mndumii owo, ilyi ewuya iwuka wolyinyi, kundu kyiyeri echicha na ikapa-kapa moongo, wampfunguye moongo cha ilyi. 37 Wagusu waṟundi walya, kyiyeri mndumii owo echicha nawakooye walee kyiṙombo. Loi ngyimmbia, nekuinewa na iwaenenga kyelya, na iwaṟundia. 38 Na oe kacha lya kawi, ang'u kacha lya kaṟaaṟu, na iwakooya kuṙi, wagusu waṟundi-wo. 39 Kyaindi manyenyi kyindo-kyi kye monyi kanyi awemanya kyiyeri mbafu yechicha, nawelaa kyiṙombo, maa aweṙa numba yakye ifunjo-pfo. 40 Na nyoe kuṟeyeṟenyi, cha kyipfa kyiyeri mulaichi nyi lyo-ndu Mana o Adamu echicha.” 41 Petiro kammbia, “Mndumii, mfano-cho noluwia soe tikyi, ang'u wandu woose taa?” 42 Mndumii kagamba, “Kyasia, nyi wui-ng'u akyeri mṟundi msimiri, amṟango, ulya mndumii okye echimmbika nasongoye maṟunda gakye goose, naenengye wandu shelya kui kyiyeri kyiwaṟi? 43 Agusu mṟundi ulya mndumii okye echicha namkooye echiwuta kuṙo. 44 Loi ngyimmbia, nemmbika nachilyie shindo shakye shoose. 45 Kyaindi, mṟundi ulya kagamba mrimenyi kokye, ‘Mndumii oko naikyelyio icha’, kawooka ikapa walya wekyeṟunda na oe, wasoṟo na waka, echilya na inyo na inango; 46 Mndumii o mṟundi-cho nechicha mfiri alaukusaṟie na kyiyeri alaichi, nemṙumbuo mateng'eta gawi na immbikyia hamwi na walaiṙikyie. 47 Na mṟundi ulya alemanya kyindo mndumii okye akundi, alakuṟeyeṟe, maa alawute kyilya mndumii okye akundi, nechikapo mnu. 48 Na ulya alaichi na oe nawuta kyiwaṟi ikapo, nekapo kyitutu. Na orio mndu aleenengo shifoi, icho neweso shifoi, na ulya alekoomio shindo shifoi, kokye werika na ngoseṟa.” 49 “Ngyilecha iwiyitsa moṙo wuyanenyi; na moṙo-cho wukomwaka ny'kyikyi ngyikundi ngoseṟa? 50 Kyaindi ngyiwoṙe wupatiso ngyiwaṟi ipatiso, na inyi ngyiwoṙo fowa ing'anyi mṟasa wupatiso-wo wuafutsio! 51 Ngyesa mokusaṟa kye ngyilecha iende ufoṟo wuyanenyi? Ngyimmbia, ote, chi wuṙo-pfo, indi maletsano. 52 Cha kyipfa wookyia wulalu numbenyi imwi kowaṙa wandu wataanu walekanyi, waṟaaṟu wewingana na wandu wawi, wawi wewingana na wandu waṟaaṟu. 53 Awu na mono-kye wechilekana, na mana na awuye; mama o mndu na mono-kye o kyika, na mana o kyika na wamae; mndu na watoe okye na watoe na watoe o mndu.” 54 Yesu kawia-se wuingyi wulya wo wandu, “Orio kyiyeri mokyewona ipuchi ura lo kyukonyi cha ilyi mokyegamba, ‘Mvuo iicha’; kyikawa kuṙo. 55 Na ilyi kokyecha mkuma owuka ura lo kyawuye, mokyegamba, ‘Kowaṙa mrikye’; na nyi wuṙo kyikyeri. 56 Nyoe wakulembecheṟi mokyeiṙima imanya chandu kochiwa urukyenyi na ngyinenyi; kyasia, kyawa kuṙa-ng'u kye moiṙima imanya kyiyeri-kyi-pfo?” 57 “ Ny'kyilyi nyoe muwenyi kui mrima yanyu mulekyeṙumbuo iwuta shikyeri sha sungusinyi? 58 Kokooya ooshana na ulya uwoṙe na oe moondu iyenda ko moṙumbuo moondu, ipfo njienyi pfuṟukana isanza na oe, alachekukuruo mṟasa ko mchilyi, mchilyi ulya kakuṙambika mawokonyi ga ulya ekyeṙumbuo moondu, kakuwiyitsa kyipfungonyi. 59 Ngyikuwia, owuka pfo mṟasa umarise itaa helo ya mafurumionyi-pfo.”
1 Na kyiyeri kyilya kyilya kuwewoṙe wandu walemwendie mbonyi tsa Wagalyilaya walya Pilato alewawaaga kyiyeri waweiṙasa. 2 Kawagaluo, kawawia, “Ngyesa mokusaṟa kye Wagalyilaya-wo wawewoṙe maṙeko kuta Wagalyilaya wengyi woose, mṟasa wakawutio kuṙo? 3 Ngyimmbia, chi wuṙo-pfo; kyaindi mulandeṙumbuye wunyamaṟi, nyoe moose mowerumatso mbaṟe-yo iyo. 4 Ang'u walya ikumi na nyanya, waleolokyio nyi numba ipfo Siloamu, ikawawaaga, mokusaṟa kye wawewanyamaṟi kuta wandu woose wawekyeri Yerusalemu? 5 Ngyimmbia, chi wuṙo-pfo, kyaindi mulandeṙumbuye wunyamaṟi, nyoe moose mochirumatso mbaṟe-yo iyo.” 6 Yesu kawawia mfano chu: “Mndu umwi nawewoṙe mfumu umṙongye ṙemenyi lyakye lya msabibu, kayenda indepfula pfo ndunda alawone. 7 Kawia ulya awekyeambuya ṙema-lyo lya msabibu, ‘Maka-i iṟaṟu ngyekyecha ipfula ndunda kunu mfumunyi, ngyilawone kyindo. Umanye, kyipfa uinyamaṟa teri.’ 8 Kagaluo, kammbia, ‘Mndumii uṙe maka-chu, ngyiukawilyie, ngyiuwikye sari; 9 nacho ukowika ndunda, nyi kyicha, ote, numa ya iho ulandewikye ndunda, uumanye-ng'u.’ ” 10 Mfiri o onyonya naweiloshia sinagoginyi lyimwi. 11 Naaho hawewoṙe mndu mka awewoṙo nyi waṟufui wa wufafa kyiyeri kya maka ikumi na nyanya, na oe nalemekyie, eiṙima igoṟoka-pfo. 12 Kyiyeri Yesu alemmbona nalemlaga, kammbia, “Mama, nowuto wufafenyi wopfo.” 13 Kayekyia mawoko wuye yakye, na oe kagoṟoka cha ilyi kaṟumisha Ruwa. 14 Kyasia ang'anyi o sinagogi nalesuo kyipfa Yesu nakyiṟa mndu mfiri o onyonya. Kagaluo, kawia walya wawesanzie halya, “Kuwoṙe mfiri iṟaandaṟu iwaṟi iṟunda, kyasia nnjonyi mukyiṟo mfiri-yo, maa chi mfiri o onyonya-pfo.” 15 Kyaindi Mndumii kagaluo, kagamba, “Nyoe wakulembecheṟi, orio umwi onyu, ngyesa ekyepfunguo umbe yakye ang'u nzoi yakye mfiṟigenyi mfiri o onyonya nandeirutsa mṟinga-pfoe? 16 Na mndu mka-chu, akyeri o kyishari kya Abrahamu, ichu Satana alempfunga maka-i ikumi na nyanya, kyiwewaṟi nawuto kyipfungo-kyi mfiri o onyonya-pfoe?” 17 Kyiyeri alegamba ikyo walewoṙo nyi sonu woose wawewingana na oe. Kyisanzionyi kyoose kyikachihiyo kyipfa kya mbonyi tsa mng'ano tsileṟundo nyi oe. 18 Numa ya iho kagamba, “Wumangyi wo Ruwa wukyeri cha kyikyi? Na inyi ngyiwulyingatsane na kyikyi? 19 Wukyeri cha mbeu ya haradalyi mndu alewuta kaiolyia ṙemenyi lyakye; ikaṙo, ikawa ikyiṙi, shileye sha ngyinenyi shikaṙamia mbagenyi tsalyo.” 20 Kagamba lya kawi, “Ngyilyingatsane na kyikyi Wumangyi wo Ruwa? 21 Wukyeri cha chachu mndu mka alewuta kaisanzia shitelenyi shiṟaaṟu sha mso, mṟasa ukotarang'aa woose taa.” 22 Na oe naweiiṙa mṟinyi na shikaṟonyi echilosha, kyaronyi kyakye kya iyenda Yerusalemu. 23 Mndu umwi kammbesa, “Ngyesa Mndumii, wandu waikyiṟo nyi waangu?” Kawawia, 24 “Pfuṟukanenyi iiṙia moongonyi msuse, cha kyipfa ngyimmbia kye wafoi wechikunda iiṙa walaiṙime. 25 Kyiyeri monyi kanyi echigoṟoka na ishinga moongo, na nyoe mukowooka igoṟoka nja na ikapa-kapa moongo, mochigamba, ‘Hoi Mndumii, lupfunguye moongo’; oe negaluo na immbia, ‘Ngyiichi kundu muwukyie-pfo’. 26 Nyi lyo-ndu mowooka igamba, ‘Lulelya na inyo mbele yapfo, na iyoe nulelosha njienyi tsaṙu.’ 27 Na oe negamba, ‘Ngammbia, ngyiichi kundu muwukyie-pfo; wukyenyi koko nyoe moose mokyeṟunda mawicho.’ 28 Nyi lyo-ndu kochiwaṙa kyifiiṟo na ilya ngakuru, kyiyeri mochiwona Abrahamu, Isakyi na Yakobo na weonguo shisuku woose Wumangyinyi wo Ruwa, na nyoe muwenyi muwawiyitse nja. 29 Na kochicha wandu iwuka ura lo ngamenyi na lo kyukonyi, na iwuka ura lo kyawuye na lo kyaseri, nawo weṙamia wechilya kyelya Wumangyinyi wo Ruwa. 30 Kuwoṙe wakyeri wa mafurumionyi wechiwa wa kuwooka, na wa kuwooka wechiwa wa mafurumionyi.” 31 Kyiyeri kyilya kyilya Mafarisayo waata wakayenda kokye, wakammbia, “Wuka iha, uyende handu hengyi, cha kyipfa Herode nakundi ikuwaaga.” 32 Kawawia, “Yendenyi mundewia ipaara lyilya, ‘Ambuya, inu na ngama ngyiwuta waṟufui wawicho na ikyiṟa waluoe, mfiri o kaṟaaṟu ngyemarisa iṟunda lyako.’ 33 Hamwi na isho, ngama na kyilalau, kyangyikooya iengyeṟa iwa mokyaro. Kyipfa chi kyicha moonguo shisuku nawoogo ai nja ya Yerusalemu-pfo. 34 Iyoe Yerusalemu, Yerusalemu, uiwaaga weonguo shisuku na ikapa na magoe walya waleṙumo kopfo, nyi kyenga ngyilekunda isania wana wapfo chandu nguku yekyesania shiwana shayo makungonyi gayo, maa mulekunda-pfo. 35 Moṙeeyo numba yanyu ilawoṙe mndu! Na inyi ngyimmbia, mochingyiwona-se maa ale-pfo mṟasa kyiyeri mochigamba, ‘Nammbikyie mboṟa ulya aicha kui rina lya Mndumii.’ ”
1 Kyikawa-ng'u kyiyeri aleiṙa na numbenyi ya mndu umwi kyiiṙi kya wang'anyi wa Mafarisayo mfiri o onyonya, nalye kyelya, wawemlaalyia. 2 Na mbele yakye hawewoṙe mndu awoṙe ndoṟe ya safura. 3 Yesu kagaluo, kawia walosha wa mawawaso na Mafarisayo, “Ngyesa nyi sungusinyi ikyiṟa mndu mfiri o onyonya ang'u chi wuṙo-pfo?” 4 Wakatsia. Kammbaṙa kamkyiṟa, kamwenenga momu nayende. 5 Kawawia, “Nyi wui kyiiṙi kyanyu, kokooya umbe yakye ang'u nzoi yakye yaoloka kyisimenyi alechiiwuta-pfo mfiri o onyonya?” 6 Nawo waleiṙima igaluo maṙeṙo-ga-pfo. 7 Kawia mfano walya wawewalage, kyiyeri alewona chandu walesambuṟa shitima sha mbele; echigamba, 8 “Mndu kakulaga na wolyinyi, ulaṙamie kyitimenyi kya mbele. Kyilawe kye mndu ekyeindio kuta iyoe namlage, 9 na ulya awekulagie iyoe kacha na ikuwia, ‘Seiya ichu!’ Nyi lyo-ndu ochiwooka iṙamia handu ha numa kui sonu. 10 Indi kolago, yenda undeṙamia handu ha numa, kundu ulya alekulaga kacha nakuwie, ‘Mbuya-yako, nnjo na kunu mbele ngoseṟa.’ Nyi lyo-ndu owaṙa kyiṟumi mbele ya woose waṙamie hamwi na iyoe. 11 Cha kyipfa orio mokung'anyisa nechititiṟo na ulya mokutitiṟa neching'anyiso.” 12 Kawia ulya alemlaga, “Kyiyeri okoṟa kyelya kya kyingoto ang'u kya kyukonyi, maa ulalage mbuya tsapfo maa wana wa wama wapfo, maa kyishari kyapfo, maa wamṟasa wapfo wawoṙe masaa; kundu wo walachekulaga iyoe kotoo. 13 Indi kyiyeri okoṟa shelya laga wakyiwa, wawoṙe shiwungo shifiri, shileeta, shipfupfuṟe, 14 na iyoe nochiwa nanga, cha kyipfa iwo wawoṙe kyekutaa-pfo; kyipfa nochitoo kyiyeri kya iṟuka lya wasumganyi.” 15 Kyasia kyiyeri aleicho isho umwi o walya waweilya hamwi na oe nalemmbia, “Agusu ulya echilya mkate Wumangyinyi wo Ruwa.” 16 Kammbia, “Mndu umwi naleachikyia karama ing'anyi kalaga wandu wafoi. 17 Kaṙuma mṟundi okye kyiyeri kya ilya kyelya nawie walya wawewalage, ‘Nnjonyi, cha kyipfa shindo shoose shamuṟeyeṟo.’ 18 Wakawooka woose iloṟa chandu walechiiṙima iyenda: O kuwooka nalemmbia, ‘Ngyileguṟa ṙema, kyangyikooya iyenda ngyindelyiambuya; ngyiterewa ungyihooṟie.’ 19 Ungyi kagamba, ‘Ngyileguṟa umbe ikumi tseṙema, ngyindetsiyesha; ngyiterewa ungyihooṟie.’ 20 Ungyi kagamba, ‘Ngyilealyika mka, na kyipfa kya ikyo ngyechiiṙima icha-pfo.’ 21 Mṟundi ulya kayenda, kaenenga mndumii okye mbonyi tsa shindo-sho. Kyasia, ulya monyi kanyi kasuo, kawia mṟundi okye, ‘Fuma iwinyi, uyende njienyi ing'anyi na shimṟaṟu sha mṟi, uende wakyiwa na iha, na wawoṙe shiwungo shifiri, na shipfupfuṟe, na shileeta.’ 22 Mṟundi kagamba, ‘Mndumii, isho ogamba shamṟundika. Kyaindi maa wulalu kuwoṙe ṙaawa.’ 23 Mndumii kawia mṟundi, ‘Fuma na nja uyende mtandaṟenyi na mṟasenyi, undewaitika iiṙa na numba, numba yako iiṙime iichuo. 24 Kyipfa ngyimmbia kye kyiiṙi kya walya wawewalage, kuwoṙe maa umwi esonja karama yako-pfo.’ ” 25 Kyiyeri wuingyi wufoi wo wandu wuweoshana na oe, naleinduka kawawia, 26 “Kokooya mndu acha na koko na oe asuuye awuye maa wamae, na mka okye, na wana wakye, na wana wa wamae wa kyisoṟo na wa kyika; yee maa mrima okye amonyi, echiiṙima iwa manalosho oko-pfo. 27 Mndu oose alechiṙuo msalaba okye na ingyiosha, echiiṙima iwa manalosho oko-pfo. 28 Kyipfa nyi wui kyiiṙi kyanyu, kokooya akundi iwika numba, alechiṙamia na itala woguru, kye nawoṙe sheimarisia? 29 Alachelemo iimarisia ammbikye urende, wandu woose wawonyi wakawooka imwinyala, 30 wechigamba, ‘Mndu-chu nalewooka iwika numba, kyikawa awoṙe pfinya tseimarisia-pfo.’ 31 Ang'u kuwoṙe mangyi uha, akundi indekapana na mangyi ungyi, alechiṙamia kuwooka na ikusaṟa kye oe na wandu shiku ikumi nechiiṙima ikapana na ulya awoṙe wandu shiku makumi gawi? 32 Na kokooya awona echiiṙima-pfo, nekyeṙuma ndumi iterewa ufoṟo, mndu ulya akyeri kuleshi. 33 Kyasia, na wuṙo orio umwi onyu alandeṙe shoose awoṙe, eiṙima iwa manalosho oko-pfo.” 34 “Munyu nyi kyindo kyicha. Kyaindi munyu ukomnyamaṟika owiko-kyi uiṙime ilotsiṟa? 35 Ochiwaṙa-se kyiira ko kyindo kyoose-pfo. Wandu wekyeuwiyitsa nja. Awoṙe maṙwi geaṙanyia, naaṙanyie.”
1 Kyasia wesania ukamba woose na wanyamaṟi wawetikyira kufuhi na oe wamwaṙanyie. 2 Mafarisayo na walosha wa mawawaso wakamnunuwia, wechigamba, “Mndu-chu nekyeambilyia wanyamaṟi, na ngoseṟa nekyelya nawo.” 3 Kawawia mfano-chu, echigamba, 4 “Nyi wui konyu, awoṙe moondo igana, lyimwi lyikaṙeka ho, alechiṙa galya makumi kyenda na kyenda patenyi, nandepfula lyilya lyiṙekyie mṟasa nalyiwone? 5 Na oe kamlyiwona, nekyelyiwika mayewenyi gakye amchihiye. 6 Na kamshika kanyi kokye, nekyelaga mbuya tsakye na wamṟasa wakye, kawawia, ‘Chihiyonyi hamwi na inyi, cha kyipfa ngammbona ondo lyako lyiweṙekyie.’ 7 Ngyimmbia nyi wuṙo kochiwaṙa sia ruwewu kyipfa kya mnyamaṟi umwi echiṙumbuya wunyamaṟi, kuta kyipfa kya wasumganyi makumi kyenda na kyenda walawaṟi iṙumbuya wunyamaṟi.” 8 “Ang'u kuwoṙe mndu mka uha awoṙe shilyingyi ikumi, kaṙetsa imwi alechikoṟa taa na iaiya numba, na ipfula kui wuragari mṟasa naiwone? 9 Na kamwiwona, nekyelaga mbuya tsakye na wamṟasa wakye, kawawia, ‘Chihiyonyi hamwi na inyi, cha kyipfa ngawona-se shilyingyi iya iweṙekyie.’ 10 Ngyimmbia, ‘Nyi wuṙo kuwoṙe sia mbele ya malaika wa Ruwa kyipfa kya mnyamaṟi umwi aṙumbuya wunyamaṟi.’ ” 11 Kagamba, “Mndu umwi nawewoṙe wana wawi. 12 Ulya mtutu kawia awuye, ‘Papa, ngyienenga ugawi loko lungyiwaṟi.’ Kawagawia shindo shakye. 13 Na komiiṙe mfiri ngyaangu, ulya mtutu kasania shoose, kayenda kyaro uruka lo kuleshi; kaola-ola masaa gakye mbonyinyi tsa wuṟui. 14 Na amwole-ole shoose, kukocha njaa ing'anyi kulya urukyenyi, na oe kawooka iuṟa kyindo kyelyio. 15 Kandeterewa kyiṟundio ko mndu umwi o uruka lulya, na oe kamṙuo ṙemenyi lyakye iambuya nguwe. 16 Kalanga ilya makanda gawekyelyio nyi nguwe, maa kuwoṙe mndu alemwenenga kyindo-pfo. 17 Kyiyeri alekusaṟa mrimenyi kokye, nalegamba, ‘Nyi waṟundi wenga wa awu oko wekyelya shelya na itsugaṟa, na inyi iha ngyiipfa njaa?’ 18 Ngyefuma, ngyiyende ko awu oko ngyimmbie, ‘Papa, ngyileṙekyio Ruwa na iyoe. 19 Ngyiwaṟi ngyilago mono-pfo-se-pfo. Ngyigaluo cha umwi o waṟundi wapfo.’ 20 Kafuma kayenda ko awuye. Kyiyeri awekyeri kuleshi, awuye nalemmbona, kamsaṟia, kakapa mteeṟa, kamwolokyia ipfo nzingonyi kamkomba mnu. 21 Mana ulya kammbia, ‘Papa, ngyileṙekyio Ruwa na iyoe; ngyiwaṟi ngyilago-se mana opfo-pfo.’ 22 Kyaindi awuye nalewia waṟundi wakye, ‘Endenyi iwinyi nguwo ngyicha, mumṟikye; mṟikyenyi na peti kyimnyoenyi, na shiaṙu maṙendenyi. 23 Endenyi ngache iya ngyinoru muishinje; na soe lulye na ichihiyo. 24 Cha kyipfa mana-chu oko nawepfiie, na oe naṟuka; naweṙekyie, na oe nawono.’ Wakawooka ianga na ichihiyo. 25 Kyasia, mana ulya okye mmbele nawekyeri ṙemenyi na lyilya aweicha na itikyira kufuhi na numba, naleicho ṟui lya shiimbo na temo. 26 Kalaga mṟundi umwi, kammbesa, ‘Mbonyi-tso tsaloṟa-kyi?’ 27 Kammbia, ‘Mono-womoo nacha, na awuyo namshinjia ngache gyinoru, kyipfa nammbona-se ai na moo.’ 28 Kasuo, kalega iiṙa na numba. Kyasia awuye kafumia nja, kamterewa. 29 Kagaluo awuye, kagamba, ‘Inyi ngyilekuṟundia maka-i yoose, maa ngyilandekuṙekyio-pfo, kyaindi ulandengyienengye maa kyiṙaina, ngyichihiyo na mbuya tsako-pfo. 30 Kyaindi, kyiyeri mana-chu opfo acha, alelya shindo shapfo hamwi na maṟai nomshinjia ngache gyinoru.’ 31 Kammbia, ‘Mono-ko, iyoe nukyeri na inyi mfiri yoose, na shoose ngyiwoṙe nyi shapfo. 32 Lyingyi-se, ichihiyo na ishina kyiwaṟi cha kyipfa mono-wama-chu opfo nawepfiie, na oe naṟuka; naweṙekyie, na oe nawono.’ ”
1 Lyingyi-se nalewia wanalosho wakye. “Kuwewoṙe mndu umwi, mnjama, awewoṙe mringyi okye o masaa. Ichu naleshitakyio kokye kye naiola-ola masaa gakye. 2 Kamlaga, kammbia, ‘Nyi mbonyi tsa mbaṟe iha itsi ngyiichuoe tseṙeṙo kyipfa kyapfo? Loṟa matala ga iṟunda lyapfo, cha kyipfa uiṙima iwa-se mringyi o masaa-pfo.’ 3 Mringyi ulya kagamba mrimenyi kokye, ‘Ngyiwikye kuṙa? Kyipfa mndumii oko naingyifuna kyiṟundionyi kyako. Iṙema ngyeiṙima-pfo, iterewa, ngiwona sonu. 4 Ngammanya kyindo ngyechiwuta, kundu ngamfuno kyiṟundionyi kyako, wangyiambilyie kanyi kowo.’ 5 Kalaga walya waweriko na mndumii okye, umwi umwi; kawia o kuwooka, ‘Nuriko kyi na mndumii oko?’ 6 Kagamba, ‘Shiyeṟo igana sha mafuṙa.’ Kammbia, ‘Wuta kyiṟeio kyapfo, ṙamia iwinyi, ṟeia makumi gataanu.’ 7 Numa kawia ungyi, ‘Aa iyoe nuiriko kyi?’ Kagamba, ‘Makunyia igana ga nganu.’ Kammbia, ‘Wuta kyiṟeio kyapfo, ṟeia makumi nyanya.’ 8 Mndumii ulya kaṟumisha mringyi ulya mmbicho kyipfa ilyi alewuta kui wuṟango; cha kyipfa wana wa wuyana-wu rikyenyi lyawo wawenyi waṟango kuta wana wa saa. 9 Na inyi ngyimmbia, waṙenyi mbuya na shindo sha wuyana, kundu kyiyeri shewuṟika wamuambilyie kulya-ndu mochikaa mlungana. 10 Mndu moringa necha kyilya kyitutu amwenengye, neringa necha na shilya shing'anyi taa. 11 Kyasia, kokooya nyoe mulechiiṙima iringa shindo sha wuyana, nyi wui emuenenga iringa shilya sha wuloi? 12 Na kokooya mulechiiṙima iringa shindo sha mndu ungyi, nyi wui echimuenenga shilya shikyeri shanyu muwenyi. 13 Kuwoṙe mṟundi eiṙima iṟundia wandumii wawi-pfo; cha kyipfa, nechisuo ichu na ikunda ichu, ang'u newaṙana na ichu na imina ichu. Mochiiṙima iṟundia Ruwa na masaa-pfo.” 14 Kyasia Mafarisayo, wakyeri kye wo wawenyi nyi wandu wakundi heleri, waleicho isho shoose, wakamtaluo. 15 Kawawia, “Nyoe mokyekushelyia wusumganyi mbele ya wandu, kyaindi Ruwa naichi mrima yanyu; cha kyipfa kyindo kyang'anyiso ko wandu kyekyewa wusutsu mbele ya Ruwa. 16 Uwawaso na weonguo shisuku shiwekyeri-pfo mṟasa Yohane, wookyia kyiyeri-kyo ulogo lucha lo Wumangyi wo Ruwa lokyeongoyo, na orio mndu nekyeiṙa napfo ko pfinya. 17 Kyaindi nyi kyaangu Ruwewu na uruka shiwukye ho, kuta kyindo kyitung'tu kya uwawaso kyechiwuka ho. 18 Orio mndu echiṙa mka okye na ialyika ungyi naṟuguya; na mndu moalyika ulya aṙio nyi mii okye naṟuguya.” 19 Kagamba, “Kuwewoṙe mndu umwi, mnjama, awekyeṟaa nguwo tsa kyimaande-maande na kyimari-mari kyicha, echilya mfiri yoose kui wunjama. 20 Na mkyiwa umwi, ekyelago Lasaro, awewoṙe mapee gafoi, nawekyeṟamiṟo moongonyi o mnjama-cho, 21 na oe nawekyelanga iigutso kui shelya-sho shiwekyetonyika mesenyi ko mnjama ulya; mṟasa shite shikachemkomba mapee gakye. 22 Kyikawa kye mkyiwa ulya nalepfa, malaika wakamṙuo wakammbikyia kufuhi na Abrahamu. Mnjama ulya na oe kapfa, kaṟiko. 23 Kyasia, akyeri matuuronyi kulya ko wapfu kawona Abrahamu akyeri kuleshi, na Lasaro kufuhi na oe. 24 Kafiiṟa, kagamba, ‘Hoi papa Abrahamu, ngyiwonia wukyiwa, uṙume Lasaro nawikye kyimnyoe kyakye mṟingyenyi naoloṟe ulumi loko, kyipfa ngyituuro kunu moṙonyi.’ 25 Abrahamu kagamba, ‘Mono-ko, kumbuo kye iyoe nuleambilyia mecha gapfo kyiyeri uwekyeri na moo, na Lasaro nyi wuṙo alewona mawicho; na wulalu oe nakyeri iha naiwiyiṟio moo, na iyoe nutuuro. 26 Na ngoseṟa ya isho, makyiṙi-gawi gaṙu soe na nyoe hawikye mkuwa ung'anyi, kundu wakundi iwuka kunu wache na konyu walaiṙime; maa wandu wa konyu walaambaṙe icha na koṙu.’ 27 Kagamba, ‘Kyasia-ng'u papa, ngyikuterewa, uṙume kanyi ko awu oko, 28 cha kyipfa ngyiwoṙe wana wa wama wataanu, kundu nawaṟingyishie, kundu maa wo taa walacheecha na handu-ha ha matuuro.’ 29 Abrahamu kagamba, ‘Wawoṙe Mose na weonguo shisuku; wawaaṙanyie wo.’ 30 Kagamba, ‘Ote, papa Abrahamu, kyaindi kokooya mndu awukyie ko wapfu ayenda kowo, weṙumbuya.’ 31 Kammbia, ‘Walandeaṙanyie Mose na weonguo shisuku, wesaṟa kyindo maa mndu kaṟuka ko wapfu-pfo.’ ”
1 Kawia wanalosho wakye, “Shindo shetewe shiwaṟi icha, kyaindi ochia lo mndu ulya shiicha kyipfa kyakye! 2 Nanga mndu-cho awepfungyio ikyesa nzingonyi kokye, nandewiyitso ipalyipalyinyi, kuta itewe umwi o iwa watutu. 3 Kuṟiisenyi! Kokooya mono-wama opfo akuṙekyio mṙeṙie; kaṙumbuya wunyamaṟi mhooṟie. 4 Na kokooya akuṙekyio ka mfungaaṙe mfiri umwi, na iwuya na kopfo ka mfungaaṙe, kagamba, ‘Ngaṙumbuya’, mhooṟie.” 5 Wasu wakammbia, “Mndumii, luengyeṟie iiṙikyia.” 6 Mndumii kagamba, “Kokooya muwewoṙe iiṙikyia lyitutu cha mbeu ya haradalyi, muwewia mkuu-chu, ‘Kuluka, undeṙongo ipalyipalyinyi’, nakyo kyiwechiwa kuṙo.” 7 “Kyaindi, nyi wui konyu awoṙe mṟundi moṙema ang'u molyisa umbe, echimmbia ilyi awuka patenyi, ‘Nnjo iwinyi, ṙamia, ulye kyelya?’ 8 Ngyesa emmbia, ‘Ngyiachikyia kyelya, ngyilye; kuṟeyeṟe ungyiṟundie, mṟasa ngyimarise ilya na inyo, nyilyo na iyoe ochilya na inyo-pfoe?’ 9 Ngyesa nemmbia haika mṟundi ulya, kyipfa awuta shilya alewio? 10 Nyi wuṙo maa nyoe, mukommarisa iwuta shoose mulewio, gambenyi, ‘Soe nyi waṟundi walawoṙe kyiira, loṟunda shilya shiweluwaṟi iwuta tikyi.’ ” 11 Kyiyeri waweiyenda Yerusalemu, naweiṙa makyiṙi-gawi ga Samaria na Galyilaya. 12 Na kyiyeri aleiṙa na kyikaṟonyi kyimwi, nalekarisana na wandu ikumi wawoṙo nyi taambo; wakagoṟoka kuleshi. 13 Wakakuilenga wechigamba, “Hoi Yesu, Mndumii ung'anyi, ulusaṟie!” 14 Kyiyeri alewawona nalewawia, “Yendenyi mundekuloṟa ko makohanyi.” Kyiyeri waweiyenda, waleila. 15 Na umwi owo ammbone kye nachia, nalewuya, echiana Ruwa kui ṟui lying'anyi. 16 Kakuolotsa wanda maṙendenyi gakye, kamwana; na oe nyi-we Msamaria. 17 Yesu kagaluo, kagamba, “Waleilyisho woose ikumi-pfoe? Walya kyenda wookwi? 18 Ngyesa kuwoṙe walewuya icheenenga Ruwa mng'ano sile myenu-chu?” 19 Kammbia, “Goṟoka, yenda, iiṙikyia lyapfo lyakukyiṟa.” 20 Na kyiyeri aleweso nyi Mafarisayo Wumangyi wo Ruwa wochicha indi nalegaluo, kawawia, “Wumangyi wo Ruwa wuicha kui iwusoruo-pfo. 21 Maa wechigamba, ‘Ambuya, wukyeri kunu, ang'u kulya-pfo;’ cha kyipfa Wumangyi wo Ruwa wukyeri kyiiṙi kyanyu.” 22 Kawia wanalosho wakye, “Mfiri iicha kyiyeri mochilanga iwona mfiri umwi kyiiṙi kya mfiri ya Mana o Adamu, mulechiuwona. 23 Lyingyi-se wemmbia, ‘Ambuya, kulya! Ambuya, kunu!’ Maa mulawukye handu mukyeri, maa mulawaoshe. 24 Cha kyipfa, chandu mbawa tsekyelyimika iwuka ura-lu mṟasa ura-lu wanda ya ngyina, nyi wuṙo kyechiwa ko Mana o Adamu kyiyeri echicha lya kawi. 25 Kyaindi kuwooka, kyamkooya iwona matuuro gafoi, na ilego nyi rika-lyi. 26 Na chandu kuwei kyiyeri kya Noe, nyi wuṙo kochiwa mfiri Mana o Adamu echicha lya kawi. 27 Waweilya na inyo, waweialyika na ialyiko, mṟasa mfiri ulya Noe aleiṙa na Safinenyi, ngapo ikacha ikawarumatsa woose. 28 Nyi wuṙo taa, chandu kuwekyeri mfiri iya ya Loti, weweilya na inyo, waweiguṟa na ikumba, waweiwaaya na iwika numba; 29 kyaindi mfiri ulya Loti alewuka Sodoma kuleoloka moṙo na kyipiriti iwuka ruwewu, shikawarumatsa woose. 30 Nyi wuṙo kochiwa mfiri ulya o iwoneka lya Mana o Adamu. 31 Mfiri ulya, akyeri kai na shindo shakye shikyeri numba, alasokye icheshionduo. Nyi wuṙo taa, akyeri mṙemenyi alaambuye numa. 32 Kumbuonyi mka o Loti. 33 Mndu oose echikyiṟa mrima okye, neuṙetsa, na oose echiuṙetsa neukyiṟa. 34 Ngyimmbia, kyio-kyo wandu wawi wechikooyo kyitaṟenyi kyimwi; umwi neṙoo na umwi neṙio. 35 Waka wawi wekooyo wesaa handu hamwi; umwi neṙoo na umwi neṙio.” [ 36 “Wandu wawi wekooyo mṙemenyi, umwi neṙoo, umwi neṙio.”] 37 Wakagaluo, wakammbesa, “Ny'kwi, Mndumii?” Kawawia, “Handu hawoṙe mnying'a nyi ho-ndu hechikuumbia mtonyi.”
1 Kawawia mfano, kye kyawakooya iterewa Ruwa mfiri yoose, maa walapfiio nyi mṙoe. 2 Kagamba, “Kuwewoṙe moanduo moondu mṟinyi mlyiwe, alekyeindia Ruwa, maa iwutia wandu mecha. 3 Na ipfo mṟinyi kuwewoṙe mndu mka mkusu, awekyeyenda-yenda kokye, echigamba, ‘Ngyienenga kyilya kyingyiwaṟi inyi na mokyituwa oko.’ 4 Na oe kui kyiyeri kyifuhi nalelega. Numa ya iho kagamba mrimenyi kokye, ‘Maa chandu ngyilaiṙikyie Ruwa, maa iwutia wandu mecha, 5 kyipfa mka-chu mkusu naingyipfulutsa nyashi ngyemwenenga kyilya kyimmbaṟi, alechengyiwinisha kui icha na koko shiyeri shoose.’ ” 6 Mndumii kagamba, “Aṙanyienyi chandu aigamba moanduo moondu ulya mmbicho. 7 Ngyesa Ruwa, echiwaenenga kyilya kyiwawaṟi wasambuṟe wakye wekyemfiiṟia kyio na kyingoto- pfoe? Ngyesa nechikyelyio iwatarama? 8 Ngyimmbia, newaenenga kyilya kyiwaṟi iwinyi; kyaindi, kyiyeri Mana o Adamu echicha, ngyesa newona iiṙikyia wuyanenyi?” 9 Kawia mfano wandu walekuloṟa kye wo nyi wandu wawoṙe wusumganyi, wechipiṟa wengyi woose. 10 “Wandu wawi waleṙo iyenda hekalunyi indeterewa, umwi Mfarisayo, na o kawi mosania ukamba. 11 Mfarisayo ulya kagoṟoka echiterewa kuṙi mrimenyi kokye, ‘Hoi Ruwa, ngakuana kyipfa inyi chi kyimwi na wandu wengyi, wasokyi, wawicho, waṟui maa cha mosania ukamba-chu-pfo. 12 Inyi ngyekyekuretekyia kawi ko juma. Ngyekyewuta kyiano iwuka shienengonyi shako shoose.’ 13 Kyaindi mosania ukamba ulya nalegoṟoka kuleshi maa alekaria iambuya ruwewu-pfo, indi nalekapa-kapa kyipoota echigamba, ‘Hoi Ruwa, ungyihooṟie inyi mnyamaṟi.’ 14 Ngyimmbia, ichu nalesoka iyenda kanyi kokye amtalyie wusumganyi kuta ulya; cha kyipfa orio mokung'anyisa nechititiṟo, na ulya mokutitiṟa neching'anyiso.” 15 Wakamwendie wana wanangu kundu nawapaaye; kyaindi kyiyeri wanalosho walewona walewatuukyia. 16 Indi Yesu kawalaga wache na kokye, kagamba, “Lekyenyi wana-wa wache na koko, maa mulawashingyie, cha kyipfa wandu cha iwa Wumangyi wo Ruwa nyi wowo. 17 Kyaloi, ngyimmbia, mndu oose alandeambilyie Wumangyi wo Ruwa cha mana mtutu echiiṙa napfo maa kyitutu-pfo.” 18 Lyingyi-se, mndu umwi msongoru nalemmbesa, echigamba, “Mlosha mcha, ngyiwute kyi kundu ngyiiṙime ioṟa moo o mlungana?” 19 Yesu kammbia, “Ny'kyilyi ungyilaga mcha? Kuwoṙe akyeri mcha sile umwi-pfo, na oe nyi Ruwa. 20 Nuichi mawawaso: Ulaṟuguye maa Ulaṟuguyo, Ulawaage, Ulaiwe; Maa ulaṟingyishie wongo, India awuyo na womoo.” 21 Kagamba, “Isho shoose ngyekyeshiosha wookyia wututunyi woko.” 22 Kyiyeri Yesu aleicho ikyo nalemmbia, “Nuwuṟie kyindo kyimwi. Kumba shoose uwoṙe, undegawia wakyiwa, na iyoe nochiwaṙa kyiseyesoe ruwewu, numa ya iho nnjo ungyioshe.” 23 Indi kyiyeri aleicho ikyo nalewihiyo mrimenyi mnu, kyipfa nawewoṙe masaa gafoi. 24 Kyiyeri Yesu alewona kuṙo nalegamba, “Nyi kui wukyiwa wo mbaṟe iha wanjama wechiiṙa na Wumangyinyi wo Ruwa! 25 Cha kyipfa nyi kyaangu ngamia iiṙa ṟochonyi lya sindanu kuta mnjama iiṙa na Wumangyinyi wo Ruwa.” 26 Na walya waleicho walegamba, “Nyi wui-ng'u echiiṙima ikyia?” 27 Kagamba, “Shilekyeiṙimika ko wandu shekyeiṙimika ko Ruwa.” 28 Petiro kagamba, “Soe luleṙa shindo shoose na ikuosha.” 29 Kawawia, “Ny'kyaloi ngyimmbia, kuwoṙe mndu aleṙa numba, ang'u mka, ang'u wana wa wamae, ang'u wafee, ang'u wana, kyipfa kya Wumangyi wo Ruwa, 30 alechiambilyia ngoseṟa mnu kyiyeri-kyi na wuyanenyi wuicha moo o mlungana-pfo.” 31 Kaṙuo walya ikumi na wawi, kawawia, “Luiṙo iyenda Yerusalemu, na mbonyi tsoose tsa Mana o Adamu weonguo shisuku waleṟeia tseafukyia. 32 Cha kyipfa newiko mawokonyi ga wandu walaiṙikyie Ruwa. Wechimwinyala; wemtaluo, na impuchia maṙa. 33 Nawo wemkapa na msharite, na numa ya iho wemmbaaga; na mfiri o kaṟaaṟu neṟuka.” 34 Kyaindi walemanya mbonyi-tso maa ale-pfo, na kyindo-kyo kyiwekyiṟikye kowo, maa walemanya kyileṙeṙo-pfo. 35 Kyiyeri aleshika kufuhi na Yeriko, mndu umwi kyipfupfuṟe, naweṙamie mbai ya njia, eterewa shienengo. 36 Na lyilya aleicho wuingyi wo wandu wochiiṙa, nalewesa, “Kuwoṙe kyikyi?” 37 Wakammbia, “Yesu o Nasareti aiiṙa.” 38 Kalaga ṟui lying'anyi, echigamba, “Yesu, Mana o Dawidi, ungyisaṟie.” 39 Kyasia walya wawesongoi wakamtuukyia kundu natsie; kyaindi oe naleengyeṟa mnu ilaga na ṟui lying'anyi, “Hoi Mana o Dawidi, ungyisaṟie.” 40 Yesu kagoṟoka, kagamba naendo na kokye, na kyiyeri alecha na kufuhi Yesu nalemmbesa, 41 “Nukundi ngyikuwutie kyi?” Kagamba, “Mndumii, ngyiiṙime iwona.” 42 Yesu kammbia, “Enengo iwona. Iiṙikyia lyapfo lyakukyiṟa.” 43 Cha ilyi kaenengo iwona, kamwosha kunu echiana Ruwa. Na wandu woose wammbone isho waleṟumisha Ruwa.
1 Na oe kyiyeri aleiṙa na Yeriko, naleiṙa makyiṙi-gawi ga mṟi-cho. 2 Na hawewoṙe mndu ekyelago Sakayo, msongoru umwi kyiiṙi kya wesania ukamba, na oe nyi mnjama. 3 Ichu naweipfula iwona Yesu nyi mndu o mbaṟe iha, alaiṙime kyipfa kya wuingyi wo wandu, kyipfa nawemfuhi. 4 Kasonguo eṙicha, kaṙooya mkuunyi naiṙime immbona, cha kyipfa Yesu nawecheiṙia njia iya. 5 Na kyiyeri Yesu aleshika handu halya, naleambuya wuye, kammbia, “Sakayo, soka iwinyi, cha kyipfa inu kyangyikooya itsinda kanyi kopfo.” 6 Kasokyia wanda faṟa, kamwambilyia, kui sia. 7 Lyilya wandu walewona, walenunuwa woose, wechigamba, “Nayenda kanyi ko mndu mnyamaṟi.” 8 Sakayo kagoṟoka, kawia Mndumii, “Mndumii, masaa gako goose ngyechigagawa kawi na kyifunjoe kyimwi ngyienengye wakyiwa, na kokooya ngyisokyie mndu kyindo kui ngyeṟo ngyemmbiyiṟia kaana.” 9 Yesu kammbia, “Inu wukyiṟo woshika kunu kanyi, kyipfa ichu na oe nyi mana o Abrahamu. 10 Cha kyipfa Mana o Adamu nalecha ipfula na ikyiṟa kyilya kyiweṙekyie.” 11 Kyiyeri waleicho isho, naleengyeṟa iṙeṙa kui mfano, kyipfa nawekyeri kufuhi na Yerusalemu, nawo walekowakusaṟa kye Wumangyi wo Ruwa wowono cha ilyi. 12 Kyasia kagamba, “Mndu umwi, awoṙe rina nalepfunga kyaro iyenda kuleshi kundu nandeambilyia wumangyi na iwuya. 13 Kalaga wandu ikumi kyiiṙi kya waṟundi wakye kaenenga orio umwi owo heleri, kawawia, ‘Kapenyi natso mbucha mṟasa ilyi ngyechicha.’ 14 Kyaindi wandu wa uruka lokye walemsuo, wakaṙuma wandu imwosha na igamba, ‘Lukundi ichu naluchilyie-pfo.’ 15 Kyiyeri alewuya, amwambilyie wumangyi wokye, nalegamba waṟundi walya alewaenenga heleri walago kundu namanye kyiira walewona orio mndu mbuchenyi yakye. 16 Kacha o kuwooka, kagamba, ‘Mndumii, kyiira ngyilewona halya helerinyi nyi mafungu ikumi.’ 17 Kammbia, ‘Necha, mṟundi mcha. Kyipfa uleringa necha kyilya kyitutu uleenengo chilyia mṟi ikumi.’ 18 Kacha o kawi, kagamba, ‘Heleri ulengyienenga tsileengyeṟika ngawona ho kyiira mafungu gataanu.’ 19 Kawia ichu na oe, ‘Iyoe nochilyia mṟi itanu.’ 20 Kacha ungyi, kagamba, ‘Mndumii, ilyi nyilyo fungu lyapfo ngyilepfungyia kyitambeenyi. 21 Cha kyipfa ngyilekuowuo kyipfa iyoe nyi mndu muumu, nokyeambilyia kyilakyeri kyapfo, na isambuo ulawaaya.’ 22 Kammbia, ‘Iyoe mṟundi mmbicho. Ngyekuanduya kui maṙeṙo gapfo. Nulemanya kye inyi nyi mndu muumu, ngyekyeambilyia kyilakyeri kyako na isambuo ngyilawaaya. 23 Kyasia, ny'kyilyi ulalekooma heleri tsako ko walya wekyewuta heleri tsa ngoseṟa, kundu ilyi ngyechicha ngyitsiambilyie hamwi na itso tsa ngoseṟa?’ 24 Kawia walya wawegoṟokyi kufuhi, ‘Msokyenyi fungu-lyo, muenengye ulya awoṙe mafungu ikumi.’ 25 Wakammbia, ‘Mndumii, nawoṙe ikumi.’ 26 Ngyimmbia, ‘Orio mndu awoṙe kyindo nechienengo, indi ulya alawoṙe kyindo nesoko maa kyilya awoṙe. 27 Lyingyi-se, washituwa walya wako, walakundi ngyiwachilyie, waendenyi na iha muwawaage mbele yako.’ ” 28 Na kyiyeri amgambe isho, nalesonguo mbele echiṙo iyenda Yerusalemu. 29 Na lyilya aleshika kufuhi na Betifage na Betania, fumvunyi lyekyelago lya Mseituni, naleṙuma wawi kyiiṙi kya wanalosho walya, 30 echigamba, “Yendenyi mṟasa kyikaṟo kyilya kyiambuyanyi na iha, na ilyi mochiiṙa napfo mowona igache lya nzoi lyilyipfungye, lyilandeṙamilyio nyi mndu oose. Lyipfunguonyi mulyiende na iha. 31 Na kokooya mndu ammbesa, ny'kyilyi mulyipfunguo gambenyi kuṙi: ‘Mndumii nawoṙe nalyo iṟunda.’ ” 32 Na walya waleṙumo wakayenda wakawona chandu alewawia. 33 Na kyiyeri wawepfunguo igache lyilya lya nzoi, wenyi walyo walewawia, “Ny'kyilyi mupfunguo igache lya nzoi?” 34 Wakagamba, “Mndumii nawoṙe nalyo iṟunda.” 35 Wakalyiṙuo ko Yesu, wakaala nguwo tsawo wuye ya igache-lyo lya nzoi, wakaṙosia ho Yesu. 36 Na kyiyeri aweiyenda waleala nguo tsawo njienyi. 37 Na kyiyeri awei kufuhi na mseṟemko ya fumvu lya Mseituni, wanalosho wakye woose walewooka ichihiyo na iṟumisha Ruwa na ṟui lying'anyi, kyipfa kya maṟunda goose ga maṟiyisho walegawona, 38 wechigamba, “Nyi oe ammbikyie mboṟa Mangyi aicha kui rina lya Mndumii. Ufoṟo ruwewu, na mng'ano ipfo wuye.” 39 Mafarisayo waata wawekyeri wuingyinyi wo wandu wakammbia, “Mlosha, wia wanalosho wapfo watsie.” 40 Kagaluo, “Ngyimmbia, wakatsia iwa, magoe gekalagatsa.” 41 Kyiyeri aleshika kufuhi nalewona mṟi, kaufiiṟia 42 echigamba, “Kokooya uwemanya, maa iyoe, kyiiṙi kya mfiri-chu, kyiwaṟi ufoṟo! Kyaindi wulalu uiṙima iwona-pfo. 43 Cha kyipfa mfiri iicha, kyiyeri washituwa wapfo wechikuwikyia moombo ukuringyichie. Wechikuiṟiwia na ikushingyia ngyuura tsoose. 44 Wekuolotsa wanda iyoe na wana wapfo wakyeri ipfo moombonyi, walechikuṙeeya igoe wuye ya igoe, kyipfa ulemanya kyiyeri kya Ruwa icha na kopfo-pfo.” 45 Kaiṙa na hekalunyi, kawooka ifuna na nja walya waweikapa mbucha, 46 echiwawia, “Kyikyiṟeie, ‘Numba yako yechiwa numba ya kyiterewo’; kyaindi nyoe moigaluo usanja lo wasokyi.” 47 Na oe kawamolosha mfiri yoose hekalunyi. Indi wang'anyi wa makohanyi, na walosha wa mawawaso, na wang'anyi wa wandu waweipfula njia ya imrumatsa. 48 Walawone kyewuta, cha kyipfa wandu woose waweoshana na oe, wemwaṙanyia.
1 Mfiri umwi, kyiyeri aweilosha wandu hekalunyi, na ionguo Ndumi Ngyicha, wang'anyi wa makohanyi na walosha wa mawawaso hamwi na wasongoru wa wandu wakacha na kokye kyituukyia. 2 Wakammbesa, “Luwie, nuiwuta shindo-sho kui wuchilyi wo wui? Lyingyi-se nyi wui alekuenenga wuchilyi-wu?” 3 Kagaluo, kawawia, “Na inyi ngyemmbesa nyoe kyindo kyimwi. 4 Wupatiso wo Yohane, ngyesa wulewuka ruwewu ang'u nyi ko wandu?” 5 Wakawesana wo wenyi ko wenyi, wechigamba, “Kokooya logamba wulewuka ruwewu, negamba, ‘Kyasia ny'kyilyi mulalemwiṙikyia?’ 6 Na lukogamba wulewuka ko wandu, wandu woose welukapa na magoe, cha kyipfa waleiṙikyia Yohane kye nyi moonguo shisuku.” 7 Wakagaluo, “Luichi kundu wulewuka-pfo.” 8 Yesu kawawia, “Maa inyi ngyimmbia nyoe nyi kui wuchilyi wuha ngyiwuta shindo-shi-pfo.” 9 Kawooka iwia wandu mfano-chu: “Mndu umwi nalewaaya ṙema lya msabibu; kalyiṙambika waṙemi, kayenda kandekaa uruka lungyi kyiyeri kyileshi. 10 Na kyiyeri kya shilyimu naleṙuma mṟundi ko waṙemi walya kundu wamwenengye ndunda ngyaata tsa msabibu; indi waṙemi wakamkapa wakamfuna alawoṙe kyindo. 11 Kaṙuma-se mṟundi ungyi. Ichu na oe wakamkapa, wakamsutsa, wakamfuna alawoṙe kyindo. 12 Kaṙuma na o kaṟaaṟu. Ichu na oe wakamfaṟa, wakammbiyitsa nja. 13 Kyasia, mndumii o ṙema lya msabibu nalegamba, ‘Ngyiwikye kuṙa? Ngyeṙuma mono-ko, mkunde oko; kofia wemwindia oe.’ 14 Kyaindi, waṙemi walya lyilya walemmbona, wakawiana wo wenyi ko wenyi, wechigamba, ‘Ichu nyi oe mokyioṟa. Lummbaage kundu kyioṟa kyiwe kyaṙu.’ 15 Wakammbiyitsa nja ya ṙema lya msabibu, wakammbaaga. Kyasia, mndumii o ṙema lya msabibu newawutia kuṙa? 16 Nechicha na irumatsa waṙemi walya, na ṙema lyilya lya msabibu nechienenga wandu wengyi.” Kyiyeri waleicho isho, walegamba, “Ote! Shilawutikye isho!” 17 Kawaitukuya, kagamba, “Kyasia kyindo-kyi kyagamba-kyi chandu kyikyiṟeie, ‘Igoe walelega wewika numba ilyo lyilewa igoe lying'anyi lya ndumbenyi.’ ” 18 “Orio mndu echioloka wuye ya igoe-lyo nefunjika-funjika; na oose lyechimwolokyia lyemmamiṟa.” 19 Na walosha wa mawawaso na wang'anyi wa makohanyi walepfula immbaṙa kyiyeri kyilya kyilya, wakaowuo wandu, kyipfa walemanya kye mfano-cho alewawia naleṙeṙa kyipfa kyawo. 20 Wakamwowelyia wakaṙuma shisookyi shilekuloṟa cha wandu wasumganyi, kundu wammbaṙe maṙeṙonyi gakye, waiṙime imṙuo ko mchilyi. 21 Wakammbesa, wechigamba, “Mlosha, luichi kye nuiṙeṙa na ilosha gakyeri ga wusumganyi, maa okyesaṟa wung'anyi wo mndu-pfo, indi nuilosha njia ya Ruwa kui wuloi. 22 Ngyesa nyi sungusinyi luenengye Kaisari kodi ang'u ote?” 23 Kyaindi oe nalemanya ngyeṟo tsawo, kawawia, 24 “Ngyiloṟenyi dinari. Iwoṙe fana na kyiṟeio kya wui?” 25 Wakamgaluo, “Kya Kaisari.” Kawawia, “Kyasia, sha Kaisari enengyenyi Kaisari, na sha Ruwa enengyenyi Ruwa.” 26 Maa waleiṙima immbaṙa kui maṙeṙo gakye mbele ya wandu-pfo; wakaṟiyio chandu alewagaluo wakatsia. 27 Numa ya iho Masadukayo waata wakayenda kokye, walya wekyegamba kye kuwoṙe iṟutso lya wapfu-pfo, wakammbesa, 28 wechigamba, “Mlosha, Mose naleluṟeia kye mndu awoṙe mono-wamae awoṙe mka, kyaindi awoṙe mana-pfo, naṙuo mka-chu, nawonie mono-wamae mana. 29 Kyasia, kuwewoṙe wana wa mka mfungaaṙe. O kuwooka nalealyika mka kapfa alawoṙe mana; 30 na o kawi [kaṙuo mka ulya, kapfa alawoṙe mana.] 31 Mṟasa o kaṟaaṟu kamwalyika, na wuṙo woose mfungaaṙe, wakapfa, walaṙe wana. 32 Lyefurumia mka ulya na oe kapfa. 33 Kyasia, kyiyeri kya iṟutso lya wapfu nechiwa mka o wui? Kyipfa nalealyiko na woose mfungaaṙe.” 34 Yesu kawawia, “Wana wa wuyana-wu wekyealyika na ialyiko; 35 kyaindi, walya wekyetalo kye wawaṟi iambilyia wuyana wulya, na kulya iṟuka ko wapfu, wekyealyika maa ialyiko-pfo. 36 Maa weiṙima ipfa-se-pfo; cha kyipfa wekyewa cha malaika, nawo nyi wana wa Ruwa, kyipfa kya ilyi wakyeri wana wa iṟutso. 37 Kyaindi kye wapfu wekyeṟutso, maa Mose naleloṟa kyiṟeionyi kya kyiṙi iho-ndu alegamba kya Mndumii kye nyi Ruwa o Abrahamu, na Ruwa o Isakyi, na Ruwa o Yakobo. 38 Na oe chi Ruwa o wapfu-pfo, indi o wakyeri na moo; cha kyipfa woose wekyewaṙa moo kokye.” 39 Walosha wengyi wa mawawaso wakagaluo, wakammbia, “Mlosha, nogamba necha.” 40 Maa walekaria immbesa kyindo numa ya isho-pfo. 41 Kawawia, “Wandu waigamba kuṙa kye Kristo nyi Mono-Dawidi? 42 Kyipfa Dawidi oe amonyi naigamba kyitapunyi kya Shiimbo, ‘Mndumii nalewia Mndumii oko, uṙamie kuwoko koko ko kulyoe, 43 mṟasa ngyiwikye washituwa wapfo iwa kyitima kyewikyia maṙende gapfo.’ ” 44 “Kyasia Dawidi naimlaga ‘Mndumii,’ nawa-se kuṙa mana okye?” 45 Na kyiyeri wandu woose wawemwaṙanyia, nalewia wanalosho wakye, 46 “Kushowenyi na walosha wa mawawaso, wakundi ichumia waṟee nguwo ngyileshi, na iiṟikyiṟo sangaṙenyi, na iṙamia mbele masinagoginyi, na shitima sha mbele karamenyi. 47 Wekyesoka waka wakusu masaa gawo, na kui wukulembecheṟi wekyeterewa shiterewo shileshi. Iwo wewona ianduyo lying'anyi.”
1 Kapaluo meso kawona wanjama wewika shiano shawo sandukunyi ya shiano. 2 Kawona mndu mka umwi mkusu na mkyiwa ewika pfo helo tsiwi. 3 Kagamba, “Kyaloi ngyimmbia, mndu mka-chu mkusu na mkyiwa nawika ngoseṟa kuta woose; 4 kyipfa, iwo woose wawika shindo wawuta ngoseṟenyi ya masaa gawo indi ichu wukyiwenyi wokye nawika shoose awoṙe.” 5 Na kyiyeri wandu waata waweiṙeṙa mbonyi tsa Hekalu, chandu lyiwelyichope kui magoe mecha na shiano sha wandu, nalegamba, 6 “Ishi muishiambuya, kuicha mfiri halechiṙio igoe wuye ya igoe lyingyi indi geolo-olo goose.” 7 Wakammbesa, wechigamba, “Mlosha, shindo-sho shechiwa indi? Na nyi kyiṟingyishio kyiha kyeloṟa kye shindo-sho shikyeri kufuhi na icha?” 8 Kagamba, “Ambuyenyi, mulachelembo, cha kyipfa wafoi wechicha kui rina lyako, wechigamba, ‘Inyi nyi oe.’ Lyingyi-se, ‘Kyiyeri kyamshika.’ Kyasia, maa mulawaoshe. 9 Na nyoe kyiyeri mochiicho mbonyi tsa shiṙa na wuṟiingyi, maa mulaowesho; kyipfa isho shoose kyakooya icha kuwooka, indi mafurumionyi galya gecha iwinyi-pfo.” 10 Numa ya iho kawawia, “Isanga lyefuma ikapana na isanga, na wumangyi ikapana na wumangyi. 11 Kowaṙa shiriinza shing'anyi na njaa na ndoṟe ya tauni; na shindo sheowesha na shiṟingyishio shing'anyi iwuka ruwewu. 12 Kyaindi, maa kyiyeri shoose shilandewono, wemmbaṙa na imsuiṟa; wemṙuo mbele ya masinagogi, na immbika kyipfungonyi, mochiṙoo mbele ya wamangyi na wachilyi kyipfa kya rina lyako. 13 Na isho sheewa kyiṟingyishio konyu. 14 Kyasia, maa mulakusaṟe-saṟe mrimenyi konyu chandu mochiṙeṙa; 15 cha kyipfa inyi ngyemuenenga maṙeṙo na wuṟango watuuri wanyu woose walechiiṙima iwingana nawo maa imulega. 16 Na nyoe mochiṟiingyio nyi wafee wanyu, na wana wa wama wanyu, na wa kanyi konyu, na mbuya tsanyu, na wafoi wanyu mochiwoogo. 17 Na nyoe wandu woose wemusuo kyipfa kya rina lyako. 18 Kyaindi maa uchui lumwi lo mṙoe yanyu loṙeka-pfo. 19 Na nyoe kui wusimiri wonyu mochikyiṟa mrima yanyu.” 20 “Kyaindi, kyiyeri-kyo mochiwona mṟi o Yerusalemu umringyichie nyi wamesa, manyenyi-ng'u kye irumatso lyacho lyatikyira. 21 Nyi lyo-ndu wakyeri urukyenyi lo Uyuda waṙichilyie fumvunyi, na wakyeri makyiṙi-gawi gacho waṙichilyie nja, na wakyeri maṙemenyi walaiṙe na mṟinyi. 22 Cha kyipfa mfiri-yo nyiyo yetaa kyiṟaache, kundu shiafukyie shoose shishiṟeie. 23 Ochia lo iwo wawanene na waionza mfiri-yo! Cha kyipfa kochiwaṙa wukyiwa wung'anyi urukyenyi, na nyashi kyipfa kya isanga-lyi. 24 Wechiwoogo kui ushu, nawo wewoṙo na iṙoo masangyenyi koose, na mṟi o Yerusalemu ochichilyio nyi walya walaiṙikyie Ruwa mṟasa kyiyeri kya walya walaiṙikyie Ruwa kyechiafukyia.” 25 “Lyingyi-se, kochiwaṙa kyiṟingyishio mnengyeṟinyi, na morinyi, na nyenyerinyi, na urukyenyi wukyiwa wung'anyi wo masanga gechiṟiyio kyipfa kya ndiṟimo tsing'anyi tsa ipalyipalyi. 26 Wandu wechiuma wechiweṙelyia shindo shewutikyia wuyana. Cha kyipfa shindo shikyeri ruwewu shekupaaya-paya. 27 Iho nyiho wewona Mana o Adamu echicha ipuchinyi hamwi na pfinya na mng'ano ung'anyi. 28 Kyasia kyiyeri shindo-sho shechiwooka icha, kaṟamkyenyi mochiira mṙoe yanyu, cha kyipfa wukyiṟo wonyu womtikyira.” 29 Kawawia mfano, “Ambuyenyi mfumu na mashiṙi gengyi goose. 30 Kyiyeri gamuoṙie, mokyewona na imanya muwenyi kye kyiyeri kyesambuo kyamtikyira kufuhi. 31 Na nyoe taa, mukowona shindo-sho shewooka icha, manyenyi kye Wumangyi wo Ruwa wukyeri kufuhi. 32 Ny'kyaloi, ngyimmbia, rika-lyi lyechiiṙa-pfo mṟasa isho shoose shiafukyie. 33 Ngyina na uruka shechiiṙa, kyaindi maṙeṙo gako gechiiṙa maa ale-pfo.” 34 “Kyasia ringyenyi mrima yanyu ilachelemeṟo nyi shindo shelya, na wunanzi, na iwinia shindo sha wuyanenyi; mfiri ulya ukocha na konyu kyituukyia chandu mṙego okyetalasuka. 35 Cha kyipfa nyi wuṙo mfiri ulya ochicha ko wandu woose wakyeri wuyanenyi koose. 36 Kyasia, nyoe laenyi kyiṙombo orio kyiyeri, mochiterewa kundu muiṙime ikyia kyiiṙi kya isho shoose shewutika, na igoṟoka mbele ya Mana o Adamu.” 37 Kyasia, orio kyingoto nawekyeloshia hekalunyi, na kyio nawekyendelaa fumvunyi lyiwekyelago Mseituni. 38 Na wandu woose wawekyeamka ngamenyi utuko iyenda hekalunyi kundu wamwaṙanyie.
1 Mfiri ung'anyi o mkate ilangyitarang'ishe, okyelago Mfiri ung'anyi o Pasaka, uletikyira kufuhi. 2 Na wang'anyi wa makohanyi na walosha wa mawawaso waweipfula njia ya immbaaga; kyipfa wawekyeowuo wandu. 3 Satana kacha na ko Yuda, ekyelago Isikariote, na oe nyi umwi o walya ikumi na wawi. 4 Kafuma kandeṙeṙa na wang'anyi wa makohanyi, na wang'anyi wa asikari wa shiṙa, chandu eiṙima immbika mawokonyi gawo. 5 Wakachihiyo, wakaiṙikyiana na oe imwenenga heleri. 6 Kaiṙikyia, kapfula ṙaawa lyemṟiinga kowo kyiyeri wandu wa kyisanzionyi walaichi. 7 Mfiri o mkate ilangyitarang'ishe ukoshika na mfiri-cho kyiwewaṟi ishinja Kyiondo kya Pasaka. 8 Kaṙuma Petiro na Yohane, echigamba, “Yendenyi, mundeluṟeyeṟia Pasaka luiṙime ilya.” 9 Wakammbia, “Nukundi lukuṟeyeṟie hanga?” 10 Kawawia, “Ilyi muiṙa na mṟinyi mokarisana msoṟo akuṙikyie kyitongoṟima. Muoshenyi muiṙe na numba-yo echiyenda. 11 Na mowia monyi numba, ‘Mlosha nakuwia, kyookwi kyiṟi kya wayenu ngyilyiie-pfo pasaka hamwi na wanalosho wako?’ 12 Na oe nemuloṟa kyiṟi kying'anyi kyikyeri kai, kyamchopo; ṟeyeṟenyi pfo.” 13 Wakayenda, wakawona chandu alewawia, wakaṟeyeṟa pasaka. 14 Lyilya kyiyeri kyileshika nalewooka ilya, oe hamwi na wasu walya. 15 Kawawia, “Ngalanga mnu ilya pasaka-i hamwi na nyoe ituuro lyako lyilandeshikye. 16 Cha kyipfa ngyimmbia kye ngyechilya-se mṟasa kyiyeri yeafutsio Wumangyinyi wo Ruwa-pfo.” 17 Kaambilyia kyiṙoo, kaana, echigamba, “Ambilyienyi ikyi, mugawane nyoe wenyi ko wenyi. 18 Kyipfa ngyimmbia kye wookyia wulalu ngyechinyo-se kyindo kyawuka msabibunyi sile mṟasa kyiyeri Wumangyi wo Ruwa wochicha-pfo.” 19 Kaambilyia mkate, kaana, kaupeṟenguo, kawaenengyia echigamba, “Ichu nyicho mmbiu oko uiwuto kyipfa kyanyu. Wutenyi kuṙi kui ingyikumbuo.” 20 Kyiṙoo nakyo na wuṙo amlye; kagamba, “Kyiṙoo-kyi nyi mma mhya samunyi yako, ipusuka kyipfa kyanyu. 21 Kyaindi kuwoko ko ulya aingyiṟiinga kukyeri hamwi na inyi iha mesenyi. 22 Cha kyipfa Mana o Adamu naindepfa chandu kyiwaṟi kyaindi ochia lokye mndu ulya momṟiinga!” 23 Wakawooka iwesana wo wenyi ko wenyi, nyi wui kyiiṙi kyawo ewuta kyindo-kyo. 24 Kukowaṙa iwingana kyiiṙi kyawo, kye nyi wui aitalo nang'anyi. 25 Kawawia, “Wamangyi wa walya walaiṙikyie Ruwa wekyemchilyia, na walya wamchilyie wekyelago nyi wesaṟia; 26 kyaindi konyu nyoe chi wuṙo-pfo, indi ang'anyi konyu nawe cha akyeri mtutu; na mochilyia nawe cha ulya aiṟundia wengyi. 27 Kyipfa ang'anyi nyi uha? Ulya aṙamie echilya ang'u nyi ulya aiṟundia wengyi? Chi ulya aṙamie echilya-pfoe? Kyaindi inyi kyiiṙi kyanyu nyi cha mndu aiṟundia wengyi. 28 Na nyoe muleṙio hamwi na inyi kyiyeri kyoose kya iyesho lyako. 29 Chandu alengyienenga inyi Wumangyi, na wuṙo ngyechimuenenga nyoe Wumangyi; 30 muiṙime ilya na inyo mesenyi yako Wumangyinyi woko; na iṙamia shitimenyi sha mng'ano, kunu mochianduya wandu wa mbaṟe ikumi na tsiwi tsa Isiraelyi.” 31 Kagamba, “Simion, Simion; Satana namlanga nyoe namuele cha nganu. 32 Kyaindi ngakuterewia iyoe kundu iiṙikyia lyapfo lyilawe lyifofo; na iyoe ilyi okyiṟo ukarishe wana wa womoo.” 33 Kammbia, “Mndumii, kyiyeri ngyikyeri hamwi na iyoe, ngyikuṟeyeṟie iyenda kyipfungonyi ang'u upfunyi.” 34 Kagamba, “Ngakuwia, Petiro, ilying'onyi lyechifuga inu, iyoe ulangyikana kaṟaaṟu kye ungyiichi-pfo.” 35 Kawawesa, “Ngyesa lyilya ngyilemuṙuma mulawoṙe kyikuchu, maa mkunja, maa shiaṙu, muleuṟa kyindo?” Wakagamba, “Ote.” 36 Kawawia, “Kyaindi wulalu mndu awoṙe kyikuchu nakyiṙuo, na mkunja na wuṙo; na alawoṙe ushu, nakumbe ijoho lyakye nandeguṟa. 37 Cha kyipfa ngyimmbia, isho shileṟeio kyakooya iafutsio koko, kye naletalyio hamwi na wanyamaṟi. Cha kyipfa isho shingyiwaṟi shiwoṙe mafurumionyi gasho.” 38 Wakagamba, “Mndumii, iha hawoṙe mapanga gawi.” Kawawia, “Lekyenyi, kyishikyie.” 39 Kafuma kayenda mṟasa fumvunyi ya Mseituni chandu aweichiwie, wanalosho wakye wakaoshana na oe. 40 Kyiyeri aleshika handu halya nalewawia, “Terewenyi kundu mulacheṙoo kyiyeshionyi.” 41 Oe amonyi kalekana nawo cha handu hewiyitsa igoe, kapfiria ndi katerewa, 42 echigamba, “Hoi Awu, kokooya nyi wuṙo ukundi ungyiwute kyiṙoo-kyi. Indi chi chandu ngakunda inyi-pfo, kyaindi kyilya ukundi kyiwutikye.” 43 Malaika iwuka ruwewu kacha na kokye kamkarisha. 44 Na oe kyipfa awekyeri wukyiwenyi wung'anyi, kaengyeṟa mnu iterewa; msino okye ukowa cha maṙonyi ga samu gechitonyika wanda. 45 Kyiyeri alewuka kyiterewonyi, kacha na ko wanalosho wakye, kawakooya walee maṙoe kui fowa. 46 Kawawia, “Ny'kyilyi molaa maṙoe? Amkyenyi, mundeterewa, mulacheiṙa na kyiyeshionyi.” 47 Kyasia, kyiyeri aweiṙeṙa, wuingyi wo wandu, na ulya ekyelago Yuda, umwi o walya ikumi na wawi, nawewasongoye. Katikyira ko Yesu kundu namkombe. 48 Yesu kammbia, “Yuda, noṟiinga Mana o Adamu kui imkomba?” 49 Na walya wawekyeri kufuhi na oe kyiyeri walewona kyindo kyichewutika, walegamba, “Mndumii, lukowakapa na ushu?” 50 Umwi owo kakapa mṟundi o Mkohanyi ang'anyi kuta woose kamṙumbuo kuṙwi ko kulyoe. 51 Yesu kagaluo, kagamba, “Lekyenyi, kuwoṙe ikapana-se-pfo.” Kampaaya kuṙwi kamkyiṟa. 52 Yesu kawia wang'anyi wa makohanyi, na wasongoru wa hekalu, na wasongoru wa wandu, walecha kyipfa kyakye, “Ngyesa mocha muwoṙe ngyuushu na ṟungu cha ilyi muichewaṙa msokyi? 53 Orio mfiri ngyiwekyeri na nyoe hekalunyi kyaindi mulengyileshia kuwoko-pfo, indi ikyi nyikyo kyiyeri kyanyu, na wuchilyi wo meema.” 54 Wakammbaṙa, wakamṙuo, wakayenda na oe kanyi ko Mkohanyi ang'anyi kuta woose. Na Petiro nalemwosha ai kuleshi. 55 Na kyiyeri wamuatse moṙo makyiṙi-gawi ga pata, waleṙamia handu hamwi, na Petiro kaṙamia kyiiṙi kyawo. 56 Nyi lyo-ndu kyisinga kyimwi kyilemmbona aṙamie saenyi, kyikamwambuya karii, kyikagamba, “Na ichu nawekyeri hamwi na oe.” 57 Kakana, echigamba, “Iyoe mndu mka, ngimwichi-pfo.” 58 Hamwiṙe kyiyeri kyitutu mndu ungyi nalemmbona, kagamba, “Na iyoe nyi umwi owo.” Petiro kagamba, “Iyoe mndu, chi inyi-pfo.” 59 Numa ya iho cha saa imwi, mndu ungyi kapfuṟukana igamba, “Kyaloi na ichu nawei hamwi na oe, cha kyipfa oe taa nyi Mgalyilaya.” 60 Petiro kagamba, “Iyoe mndu, ngyiichi kyindo uigamba-pfo.” Na kyiyeri aweiṙeṙa kuṙo, ilying'onyi lyilefuga. 61 Mndumii kainduka kaambuya Petiro. Petiro kakumbuo kyindo kyilya Mndumii alemmbia, “Inu ilying'onyi lyilafuga, nongyikana kaṟaaṟu.” 62 Kafuma na nja kafiiṟa mnu. 63 Na wandu walya waweiweṙa Yesu walemtaluo na imkapa. 64 Wakamshikyia meso, numa wakammbesa-wesa, wechigamba, “Manya nyi wui akukapa?” 65 Wakammbia na shindo shingyi shifoi shemlahia. 66 Kyiyeri kulekya, wasongoru wa wandu walewaṙa kyisanzionyi na wang'anyi wa makohanyi, na walosha wa mawawaso, wakamwende na mengyenyi kowo, wechigamba, 67 “Kokooya iyoe nyi oe Kristo, luwie.” Kawawia, “Maa ngammbia, mochiiṙikyia maa ale-pfo. 68 Lyingyi-se, ngammbesa mongyigaluo-pfo. 69 Kyaindi wookyia wulalu Mana o Adamu nechiṙamia ura lo kulyoe lo Ruwa Mopfinya.” 70 Wakagamba woose, “Kyasia, iyoe nyi oe Mono-Ruwa-ng'ue?” Kawawia, “Nyoe mogamba kye inyi nyi oe.” 71 Wakagamba, “Kyasia, lukundi-se wuṟingyishi wokyi? Kyipfa, soe luwenyi loicho maṙeṙo ga ṙumbu lyakye.”
1 Wandu woose wa kyisanzionyi wakagoṟoka wakamṙuo ko Pilato. 2 Wakawooka imshitakyi, wechigamba, “Lulewona ichu eṙetsa wandu waṙu, na iima wandu walatae kodi ko Kaisari, echigamba kye oe amonyi nyi Kristo, mangyi.” 3 Pilato kammbesa, echigamba, “Iyoe nyi oe mangyi o Wayuda?” Kagaluo, kammbia, “Iyoe nogamba.” 4 Pilato kawia wang'anyi wa makohanyi na wuingyi wo wandu, “Ngyiwonyi kyindo kyiwicho ko mndu-chu-pfo.” 5 Nawo wakaengyeṟa mnu, wechigamba, “Nekyeṙetsa wandu elosha urukyenyi lo Uyuda loose wookyia Galyilaya mṟasa kunu.” 6 Kyiyeri Pilato aleicho isho nalewesa kokooya nyi-we mndu o Galyilaya. 7 Na kyiyeri alemanya kye nakyeri wuchilyinyi wo Herode, nalemṙika ko Herode, kyipfa maa oe nawekyeri Yerusalemu mfiri iya. 8 Na kyiyeri Herode alewona Yesu nalechihiyo mnu, cha kyipfa nawekundi immbona wookyia mfiri ifoi, kyipfa awemwicho mbonyi tsakye, kalanga iwona kyiṟingyishio kyilewuto nyi oe. 9 Kammbesa shindo shifoi, oe alamgaluo kyindo kyoose. 10 Wang'anyi wa makohanyi na walosha wa mawawaso wakagoṟoka wakamshitakyi ko pfinya mnu. 11 Kyasia Herode kammina, hamwi na asikari wakye, kamtaluo, na imṟika nguwo ngyicha, numa kammbiyiṟa na ko Pilato. 12 Kyasia mfiri ulya ulya Herode na Pilato wakaiṙikyiana iwaṙa umbuya, cha kyipfa ipfo mawookyionyi wawesuanyi. 13 Na Pilato kasanzia handu hamwi na wang'anyi wa makohanyi, wasongoru wa wandu, na wandu, 14 kawawia, “Mndu-chu momuende na koko mochigamba kye naiṙetsa wandu; na inyi ngaaṙanyia mbonyi tsakye mbele yanyu, indi ngawona ṙeko lyoose kokye ko shindo shilya shamuenenga imshitakyi-pfo. 15 Maa Herode, cha kyipfa nammbiyiṟa na koṙu. Kyasia kuwoṙe kyindo kyoose awutie kyemwenenga ianduyo ipfa-pfo. 16 Koikyo ngyigamba nakapo, numa ya iho ngyimlekyie nayende.” [ 17 Kyipfa kyilemkooya iwapfunguya mpfungo umwi kyiyeri kya mfiri ung'anyi.] 18 Wakakalagatsa woose, wechigamba, “Mmbaage ichu, ulupfunguye Baraba.” 19 Na oe nyi mndu alewiko kyipfungonyi kyipfa kya wuṟiingyi wulecha mṟinyi, na wuwaagi. 20 Kyasia Pilato naleṙeṙa nawo lya kawi, kyipfa kya chandu awekundi ipfunguo Yesu. 21 Kyaindi wakakalagatsa, wechigamba, “Mkapie msalabenyi! Mkapie msalabenyi!” 22 Kawawia lya kaṟaaṟu, “Kyipfa kya kyikyi? Ichu nawuta wuwicho wuha? Ngawona nawoṙe kyindo kyechimwenenga ipfa-pfo. Kyasia ngamumkapa ngyemlekyia.” 23 Kyaindi wakaṙeṙa na pfinya wakundi nawoogo. Maṟui gawo gakawinga. 24 Pilato kaanduo kye kyilya wakundi kyiṟundikye. 25 Kapfunguo ulya awempfungye kyipfa kya wuṟiingyi na wuwaagi, ulya wawemkundi, kawuta Yesu wammbutie chandu wawekundi. 26 Na kyiyeri wawemṙuo walekarisana mndu umwi ekyelago Simion Mkyirene, alekoawuka ṙemenyi, wakamṙika msalaba, nauṙuo numa ya Yesu. 27 Wuingyi wung'anyi wo wandu wukomwosha, na waka wawekapa-kapa shipoota na ikapa ṟanyi kyipfa kyakye. 28 Yesu kawaindukyia, echigamba, “Nyoe waka wa Yerusalemu, maa mulangyilyilyie inyi, indi lyilyienyi mrima yanyu na wana wanyu. 29 Cha kyipfa mfiri iicha, wechigamba, ‘Nanga walawoṙe wana na waumba, na mawee galekyeonza.’ 30 Nyi lyo-ndu wewooka iwia mafumvu, ‘Luolokyienyi’, na shifumvu ‘Lushikyienyi.’ 31 Cha kyipfa kokooya wawutia ikyiṙi lyiwishi shindo-shi, kyechiwa kuṙa ikyiṙinyi lyiumu?” 32 Wakaṙoo na wandu wengyi wawi, wandu wanyamaṟie, wawoogo hamwi na oe. 33 Na lyilya waleshika handu hekyelago, “Ipoṟong'u,” nyi ho-ndu walemkapia msalabenyi, oe na walya wengyi wawi, umwi ura lo kulyoe, na umwi ura lo kumoso. 34 Yesu kagamba, “Awu, uwahooṟie, kyipfa waichi kyindo waiwuta-pfo.” Wakagawana nguwo tsakye, wechikapa kuṟu kuha. 35 Wandu wakagoṟoka wechiambuya. Wasongoru walya nawo wawemtaluo, wegamba, “Nalekyiṟa wengyi; nakukyiṟe amonyi, kokooya oe nyi Kristo o Ruwa, msambuṟe okye.” 36 Asikari walya wakawemtaluo, wechiyenda kokye na imwendie kyindo kyekyetarang'ia, 37 wechigamba, “Kokooya iyoe nyi mangyi o Wayuda, kukyiṟe kumonyi.” 38 Na wuye yakye hawewoṙe kyiṟeio: “ICHU NYI OE MANGYI O WAYUDA.” 39 Na umwi o wanyamaṟi walya wawewamanyikye msalabenyi nalemlahia, echigamba, “Ngyesa iyoe chi Kristo-pfoe? Kyiṟa mrima opfo na soe.” 40 Kyaindi ulya o kawi kamgaluo, kamṙeṙia, echigamba, “Iyoe uowuye maa Ruwa, na iyoe nukyeri kyiiṙi kya ianduyo-lyo ilyo? 41 Nakyo nyi sungusinyi koṙu soe, cha kyipfa luambilyia wori wuwaṟi mawuto gaṙu; indi ichu alewuta kyindo kyoose kyiwicho-pfo.” 42 Numa kagamba, “Hoi Yesu, ungyikumbuo ilyi ochiiṙa na Wumangyinyi wopfo.” 43 Yesu kammbia, “Ny'kyaloi, ngakuwia, inu kuṙi nochikaa hamwi na inyi paradiso heonyonya mlungana.” 44 Kuwekyeri cha saa tsiṟandaaṟu, kukowaṙa meema urukyenyi koose mṟasa saa kyenda. 45 Ngyeela ya mnengyeṟi ikatitia; isulyia lyeshingyia hekalunyi lyikaranduka makyiṙi-gawi. 46 Yesu kakuilenga na ṟui lying'anyi, kagamba, “Hoi Awu, mawokonyi gapfo ngawika mrima oko.” 47 Amgambe kuṙo nalelekyia moo. Kyiyeri mchilyi ulya alewona shindo shilewutika, naleana Ruwa, echigamba, “Loi mndu-chu nawekyeri msumganyi.” 48 Na wandu wa kyisanzionyi kyoose walekowakuumbia iambuya shindo-sho, wammbone kyindo kyilewutika, wakayenda kowo wechikapa-kapa shipoota. 49 Na woose wawemwichi, na waka walya waleoshana na oe iwuka Galyilaya, wakagoṟoka kuleshi weambuya shindo-sho. 50 Kukocha mndu umwi, ekyelago Yosefu, awekyeri nyi mndu o mengye ya Wayuda, mndu mcha, awoṙe wusumganyi. 51 (Maa aleiṙikyiana na kyilya walewuta-pfo), na oe nyi mndu o Arimataya, mṟi umwi o Wayuda, lyingyi-se naweiweṙelyia Wumangyi wo Ruwa. 52 Mndu-cho naleyenda ko Pilato, kakunda naenengo mmbiu o Yesu. 53 Kasotsa mmbiu-cho iwuka msalabenyi, kauaṟahia sanda, kauwika kyilomenyi kyiwekyipache iṟaṟenyi, nakyo kyilawendeṟiko mndu-pfo. 54 Na mfiri ulya uwekyeri mfiri o ikuṟeyeṟa, na mfiri o onyonya ukowooka iafukyia. 55 Na waka walya walecha na oe iwuka Galyilaya waleosha, wakawona kyilome, na chandu mmbiu okye uwemmbikyie. 56 Wakawuya wakaṟeyeṟa mafuṙa gekyepfaama necha. Na mfiri o onyonya walechihiyo chandu kyiwekyigambe.
1 Mfiri o kuwooka o juma, kyiyeri kulewooka ikya, waleyenda kyilomenyi, wechiende mafuṙa galya waweṟeyeṟie. 2 Wakakooya igoe lyilya lyilyiimbiṟitsie kuleshi na kyilome, 3 wakaiṙa napfo walawone mmbiu o Mndumii Yesu. 4 Kyiyeri waweiṟewe kyipfa kya kyindo-kyo, wandu wawi walegoṟoka kufuhi nawo, waṟee nguwo tsikyema-kyema. 5 Nawo kyiyeri walewoṙo nyi fowa na iarama mṟasa wanda, iwo walewawia, “Ny'kyilyi muipfula ai na moo ko wapfu? 6 Akyeri iha-pfo, amṟuka. Kumbuonyi chandu aleṙeṙa na nyoe kyiyeri awekyeri Galyilaya, 7 echigamba, ‘Kyakooya Mana o Adamu iwiko mawokonyi ga wanyamaṟi, na iwoogo, na iṟuka mfiri o kaṟaaṟu.’ ” 8 Wakakumbuo maṙeṙo gakye. 9 Wakawuka kyilomenyi, wakawuya; wakawia walya ikumi na umwi na wengyi woose mbonyi-tso tsoose. 10 Nawo nyi Maria Makyidalena, na Yoana, na Maria, wama o Yakobo, na waka walya wengyi wawekyeri nawo; 11 iwo walewia wasu mbonyi tsa shindo-sho. 12 Maṙeṙo gawo gakawa cha kyindo kyerooiya kowo, maa walewaiṙikyia-pfo. Indi Petiro nalefuma kakapa mteeṟa mṟasa kyilomenyi, kaarama kaimemia pfo, kawona nguwo iya awemwaṟahie, kayenda echiṟiyio ko isho shilewutika. 13 Na mfiri ulya ulya wandu wawi kyiiṙi kyawo waweiyenda kyikaṟo kyimwi, kyekyelago Emau, kyiwekyeri kuleshi na Yerusalemu cha handu ha kyaro kya saa tsiwi. 14 Nawo waweiṙeṙa wo wenyi ko wenyi mbonyi tsa shindo-sho shoose shilewutika. 15 Na kyiiṙi kya ikapa sumu na iwesana lyawo, Yesu amonyi naletikyira kufuhi, kaoshana nawo. 16 Meso gawo gakashingo walammanye. 17 Kawawia, “Nyi maṙeṙo ga mbaṟe iha muwiana kuṙi ilyi muichumia?” Wakagoṟoka walemie nzineeri. 18 Kagaluo umwi owo, ekyelago Kyileopa, kammbia, “Ngyesa nyi iyoe kumonyi ukyeri myenu kulya Yerusalemu, mṟasa ulamanye shilewutika pfo mfiri-i?” 19 Kawawesa, “Mbonyi tsiha?” Wakammbia, “Mbonyi tsa Yesu o Nasareti, awekyeri moonguo shisuku awewoṙe wuiṙimi kyiiṙi kya iwuta na iṙeṙa mbele ya Ruwa na wandu woose. 20 Lyingyi-se chandu wang'anyi wa makohanyi, na wasongoru waṙu walemwanduya ipfa, wakammbaaga. 21 Na soe luwekusurie kye oe nyi oe echikyiṟa Isiraelyi. Ngoseṟa ya isho shoose, inu nyi mfiri o kaṟaaṟu wookyia shilewutika isho. 22 Lyingyi-se, waka waata wa koṙu waleluowesha, waleyenda kyilomenyi ngamenyi utuko, 23 walawone mmbiu okye; wakachegamba kye walechio nyi malaika walegamba kye nakyeri na moo. 24 Na wengyi wawekyeri hamwi na soe waleyenda kyilomenyi wakawewona kuṙo chandu waka walya walegamba, indi oe walemmbona-pfo.” 25 Kawawia, “Nyoe wandu mulaichi, muwoṙe mrima ngyilemeri iiṙikyia shoose weonguo shisuku walegamba! 26 Ngyesa kyilekooya Kristo iwona matuuro-ga na iiṙa na mng'anonyi okye-pfoe?” 27 Kawooka wookyia Mose na weonguo shisuku woose, kawaongoya shiṟeionyi shoose, mbonyi tsakye oe amonyi. 28 Wakatikyira kufuhi na kyikaṟo kyilya waweiyenda, na oe kawa cha ilyi naweiyenda mbele. 29 Wakamterewa, wechigamba, “Kaa hamwi na soe, cha kyipfa komiila na kyio kyamcha.” Kaiṙa na numba ikaa nawo. 30 Na kyiyeri aweṙamie nawo echilya, naleira mkate, kauwikyia mboṟa, kaupeṟenguo. 31 Meso gawo gakatambaṟuka, wakammanya; numa ya iho kawuka mbele yawo. 32 Wakawiana, “Ngyesa mrima-i yaṙu yaluloṟa ilyi aweiṙeṙa na soe njienyi, na ilutambuluya shiṟeio-pfoe?” 33 Wakaamka saaiya-iya, wakawuya na Yerusalemu, wakakooya walya ikumi na umwi wakusanie, wo na walya wawekyeri hamwi nawo, 34 wechigamba, “Mndumii amṟuka loi loi, na oe nawonekyia Simion.” 35 Nawo wakawawia mbonyi tsilya tsa njienyi, na chandu alemanyika kowo kyiyeri alepeṟenguo mkate. 36 Na lyilya waweiṙeṙa mbonyi-tso oe amonyi nalegoṟoka makyiṙi-gawi gawo, kawawia, “Ufoṟo lukae konyu.” 37 Wakaṙumbuko nyi maṙima wakaowuo mnu, wekusaṟa kye wawonyi mumuyo. 38 Kawawia, “Ny'kyilyi muiṟewe? Na kyitewe mokapa kawi mrimenyi konyu ny'kyi? 39 Ambuyenyi mawoko gako na maṙende gako, kye nyi inyi ngyimonyi. Ngyiwaṙe-waṙenyi muwone; cha kyipfa mumuyo uwoṙe mmbiu na mafuo chandu mungyiwonyi ngyiwoṙe-pfo.” 40 Amgambe isho nalewaloṟa mawoko gakye na maṙende gakye. 41 Kyasia kyiyeri walelemo iiṙikyia kyipfa kya sia, na kunu wechiṟiyio, nalewawia, “Muwoṙe kyelya kyoose iha?” 42 Wakamwenenga kyipeṟengu kya ikunga kyiwekyikagaṟe. 43 Kakyiambilyia, kalya mbele yawo. 44 Numa ya iho kawawia, “Igo nyigo maṙeṙo gako ngyilemmbia lyilya ngyiwekyeri hamwi na nyoe, kye kyakooya shiafutsio shoose Mose aleṟeia Uwawasonyi kyipfa kyako na shilya weonguo shisuku waleṟeia na shilya shishiṟeie shiimbonyi.” 45 Nyi lyo-ng'u aletambuluo ngyuuṟango tsawo waiṙime imanya shiṟeio. 46 Kawawia, “Nyi wuṟo kyiwekyiṟeie, kye Kristo nechituuro na iṟuka mfiri o kaṟaaṟu. 47 Na kye masanga goose geongoyo mbonyi ngyicha kui rina lyakye, mbonyi tsa iṙumbuya wunyamaṟi na ihooṟio gyuunyamaṟi, iwookyia Yerusalemu. 48 Na nyoe nyi waṟingyishi wa mbonyi-tsi. 49 Na inyi ngyimuendie kyaasa kya Awu oko; kyaindi ṙionyi kunu mṟinyi, mṟasa muṟiko pfinya tsiwukyie wuye.” 50 Kawasongoya mṟasa Betania, kaira mawoko gakye kawawikyia mboṟa. 51 Na kyiyeri aweiwawikyia mboṟa, nalelekana nawo; kaṙoo wuye ruwewu. 52 Wakamwindia; numa ya iho wakawuya na Yerusalemu wawoṙo nyi sia ing'anyi. 53 Nawo kyiyeri kyoose wawekyeri hekalunyi, weṟumisha Ruwa.
1 Ipfo mawookyionyi wuyana wulandegumbo kuwewoṙe Ṙeṙo, na Ṙeṙo nawekyeri ko Ruwa, na Ṙeṙo nawei Ruwa. 2 Ipfo mawookyionyi nawekyeri ko Ruwa. 3 Shoose shilewutika kui oe; maa kuwoṙe kyindo kyileiṙima iwutika nja yakye-pfo. 4 Oe nyi-we shoka ya moo, na moo-cho uwei ngyeela ya wandu. 5 Na ngyeela-yo yekyelyimika meemenyi, maa meema uleiṙima iirumisha-pfo. 6 Hawewoṙe mndu, amṙume iwuka ko Ruwa, ekyelago Yohane. 7 Icho nalecha iṟingyishia, kundu naṟingyishie ngyeela-yo, wandu woose waiṙime iiṙikyia. 8 Mndu-cho awei ngyeela-yo-pfo, indi nalecha kundu naiṟingyishie. 9 Kuwewoṙe Ngyeela ya loi, ekyeenenga orio mndu saa, echicha na wuyanenyi. 10 Nawekyeri wuyanenyi, na kui oe wuyana wulegumbo kyaindi wuyana wulemmanya-pfo. 11 Nalecha na urukyenyi kokye, kyaindi maa walya wai wakye walemwambilyia-pfo. 12 Indi woose walemwambilyia nalewaenenga wuiṙimi wo iwa wana wa Ruwa; nyi walya waiṙikyie rina lyakye. 13 Wandu-wa wawafee, chi kui pfinya tsa mndu, maa chi kui ikunda lya mmbiu, maa kui chandu mndu akundi-pfo, indi kui pfinya tsa Ruwa. 14 Na Ṙeṙo nalewa mndu, kakaa koṙu; na soe lukowona mng'ano okye, mng'ano cha o Mana kyimuumwi awukyie ko Awu; naichuo isaṟia na wuloi. 15 Yohane nalemṟingyishia, kakuilenga na ṟui lying'anyi, kagamba, “Ichu nyi oe ngyileonguo mbonyi tsakye kye, ‘Aicha numa yako nawekyeri mbele yako; kyipfa nawekyeri pfo maa inyi ngyilafeo.’ ” 16 Kyipfa awoṙe mboṟa tsifoi soe loose luleambilyia isaṟia lying'anyi. 17 Cha kyipfa uwawaso luleṙiko iiṙia Mose; isaṟia na wuloi shilecha iiṙia Yesu Kristo. 18 Kuwoṙe mndu alemmbona Ruwa kyiyeri kyoose-pfo. Mana kyimuumwi ai cha Ruwa nyi oe aleshukuo mbonyi tsakye. 19 Na iwu nyiwo wuṟingyishi wo Yohane, kyiyeri Wayuda waleṙuma makohanyi kokye na Walewi iwuka Yerusalemu kundu wammbese, “Iyoe nukyeri wui?” 20 Na oe naleiṙikyia, maa alekana-pfo. Naleiṙikyia kye, “Inyi chi Kristo-pfo.” 21 Nawo wakammbesa, “Nyi wui-ng'u? Iyoe nyi Elyiya?” Kagamba, “Inyi chi oe-pfo.” “Iyoe nyi moonguo shisuku ulya?” Kagaluo, “Ote.” 22 Naaho wakammbia, “Nui wui? Luiṙime igaluo walya waluṙuma. Nuigamba iyoe nyi wui?” 23 Kagamba, “Inyi nyi ṟui lya mndu aieṙia kundu ko nuka, ‘Goṟotsenyi mṟaṟu o Mndumii!’ Chandu moonguo shisuku Yesaya alegamba.” 24 Na walya walekowaṙumo wawewukyie ko Mafarisayo. 25 Wakammbesa, wakammbia, “Ny'kyilyi-ng'u uipatisa kokooya iyoe chi Kristo, maa Elyiya, maa moonguo shisuku ulya-pfo?” 26 Yohane kawagaluo, echigamba, “Inyi ngyimupatisa kui mṟinga, kyaindi kyiiṙi kyanyu hagoṟokyi mndu mulamuichi nyoe. 27 Nyi oe ulya aicha numa yako, inyi ngyilawaṟi ituruchuo ukowa lo kyiaṙu kyakye.” 28 Isho shilewutika kulya Betania molyolya o Yoridan, kundu Yohane aweipatisia. 29 Ilya-ngama kawona Yesu echicha na kokye, kagamba, “Aikyi Kyiondo kya Ruwa, kyechiwuta ngyuunyamaṟi tsa wuyana! 30 Ichu nyi oe ngyileṙeṙa mbonyi tsakye kye, ‘Kuicha mndu numa yako, alengyisongoya; kyipfa nawekyeri pfo ngyilafeo.’ 31 Maa inyi ngyiwemwichi-pfo; kyaindi kundu naṟingyishio ko wandu wa Isiraelyi inyi ngyilecha ngyechipatisa kui mṟinga.” 32 Lyingyi-se Yohane kaṟingyishia, echigamba, “Ngyilewona Mumuyo echisoka cha mbeta awuka ruwewu; na oe kaṙamia wuye yakye. 33 Maa inyi ngyilemmanya-pfo; kyaindi oe alengyiṙuma ipatisa kui mṟinga nalengyiwia, ‘Ulya ochiwona Mumuyo echisoka na iṙamia wuye yakye, icho nyi oe ekyepatisa kui Mumuyo Mweele.’ 34 Na inyi ngammbona, lyingyi-se ngaṟingyishia kye ichu nyi Mana o Ruwa.” 35 Ilya-ngama-se Yohane nawegoṟokyi hamwi na wanalosho wawi kyiiṙi kya wanalosho wakye. 36 Kaambuya Yesu echumia, kagamba, “Aikyi Kyiondo kya Ruwa!” 37 Wanalosho walya wawi wakaicho eṙeṙa wakayenda halya-ndu Yesu awekyeri. 38 Yesu kainduka, kawawona wechicha na kokye, kawawia, “Muipfula kyi?” Wakammbia, “Rabi (kyimwi na igamba, Mlosha), nyi kwi okyekaa?” 39 Kawawia, “Nnjonyi, na nyoe mowona.” Wakayenda, wakawona handu ekyekaa, wakakaa kokye mfiri ulya. Na nyi-we cha kyiyeri kya saa kumi. 40 Anderea, mono-wama o Simion Petiro, nawei umwi o wanalosho walya wawi waleicho ulogo lo Yohane na iosha Yesu. 41 Icho nalewona Simion kuwooka mono-wama okye oe amonyi, kammbia, “Lommbona Mesia.” (Kyimwi na igamba, Kristo). 42 Kamṙuo ko Yesu. Na Yesu kamwambuya, kammbia, “Iyoe nyi Simion, mana o Yohane; na iyoe nochilago Kyefa (kyimwi na igamba Petiro ang'u Igoe)” 43 Ilya-ngama nawekundi iyenda Galyilaya, na oe kawona Filyipo. Yesu kammbia, “Ngyiosha.” 44 Na Filyipo nawekyeri mndu awukyie Betisaida, mṟi Anderea na Filyipo wawekyekaa. 45 Filyipo kawona Natanaelyi kammbia, “Lommbona ulya mbonyi tsakye tsingyiṟeie mawawasonyi ga Mose na weonguo shisuku, Yesu mana o Yosefu, mndu o Nasareti.” 46 Natanaelyi kammbia, “Kyindo kyicha kyeiṙima iwuka Nasareti?” Filyipo kammbia, “Nnjo uwone.” 47 Kyasia Yesu kawona Natanaelyi echicha na kokye, kaonguo mbonyi tsakye, “Aichu Muisiraelyi loi loi, awoṙe ngyeṟo maa ale-pfo.” 48 Natanaelyi kammbia, “Noiṙima kuṙa ingyimanya?” Yesu kagaluo, kammbia, “Kyiyeri Filyipo alandekulage ukyeri halya wanda ya mfumu ngyilekuwona.” 49 Natanaelyi kamgaluo, kagamba, “Rabi, iyoe nyi Mana o Ruwa, nyi oe mangyi o Isiraelyi.” 50 Yesu kagaluo, kammbia, “Kyipfa ngyilekuwia, ngyilekuwona wanda ya mfumu, noiṙikyia? Nochiwona shindo shing'anyi kuta ishi.” 51 Kammbia, “Loi, loi ngammbia, mochiwona mapuchi geseia na malaika wa Ruwa wechiṙooya na isokyia wuye ya Mana o Adamu.”
1 Na mfiri o kaṟaaṟu kuwewoṙe wolyi kulya Kana, mṟi o Galyilaya; na mama o Yesu nawekyeri ho. 2 Na Yesu nalekoalago na wolyinyi hamwi na wanalosho wakye. 3 Na kyiyeri mpfinyo uleṙumbukyia, mama o Yesu kammbia, “Wawoṙe mpfinyo-pfo.” 4 Yesu kammbia, “Mama, ny' kyikyi luwoṙe inyi na iyoe? Kyiyeri kyako kyilandeshikye-pfo.” 5 Wamae kawia waṟundi, “Kyindo kyoose echimmbia, wutenyi.” 6 Kyasia kuwewoṙe shigondi shiṟandaaṟu sha magoe, shiweshiwikye pfo kui muichiwie o Wayuda o samba kyimṟumoe, orio kyimwi kyiwoṙe cha madewe gaṟaaṟu. 7 Yesu kawawia, “Ichuṟenyi shigondi-shi mṟinga.” Nawo wakashiichuṟa pacha. 8 Kawawia, “Wulalu ṙahienyi, muṙooye monyi kyila.” Wakaṙuo. 9 Na kyiyeri monyi kyila aleria mṟinga ulya ulewa mpfinyo, (maa alamanye kundu ulecha kyaindi waṟundi waweichi, walya waleṙahia mṟinga-cho) nalelaga monyi wolyi, 10 kammbia, “Orio mndu mawookyionyi nekyeṟeyeṟa mpfinyo mcha; na wandu wakamnyo nakamwi nekyeende mpfinyo umwipale. Iyoe nokooma mpfinyo mcha mṟasa wulalu.” 11 Kyindo-kyi kya kuwooka kya kyiṟiyisho Yesu nalekyiwuta kulya Kana ya Galyilaya, kaṟingyishia mng'ano okye, na wanalosho wakye wakamwiṙikyia. 12 Numa ya isho kasoka mṟasa Kaperinaumu, oe na wamae na wana wa wamae na wanalosho wakye; wakakaa pfo mfiri ngyaangu. 13 Na Pasaka ya Wayuda iwekyeri kufuhi; na Yesu kaṙo mṟasa Yerusalemu. 14 Kawona halya hekalunyi wandu waweikumba umbe na moondo na mbeta, na weilacha heleri waṙamie. 15 Kaachikyia msharite, kawafuna woose kulya hekalunyi, na moondo na umbe; kaola-ola heleri tsa weilacha heleri, kapfuluo mesa tsawo; 16 kawia walya waweikumba mbeta, “Wutenyi ishi iha. Mulagaluo numba ya Awu oko iwa numba ya mbucha.” 17 Wanalosho wakye wakakumbuo kye kyikyiṟeie, “Ikunda lyako ko mbonyi tsapfo lyechingyirumatsa.” 18 Kyasia Wayuda wakagaluo wakammbia, “Nyi kyiṟingyishio kyiha ululoṟa kye nuiwuta ishi?” 19 Yesu kagaluo, kawawia, “Unduonyi hekalu-lyi na inyi ngyelyiwika mfirinyi iṟaṟu.” 20 Kyasia Wayuda wakagamba, “Hekalu-lyi lyilewiko kyiyeri kya maka makumi gaana na iṟandaaṟu, na iyoe nochilyiwika mfirinyi iṟaṟu?” 21 Kyaindi oe naleonguo mbonyi tsa hekalu lya mmbiu okye. 22 Koikyo kyiyeri aleṟuka ko wapfu, wanalosho wakye wakakumbuo kye nalegamba kuṙo, wakaiṙikyia kyiṟeio na kyindo kyilya Yesu alekyionguo. 23 Na kyiyeri awekyeri Yerusalemu kyiyeri kya Pasaka wandu wafoi waleiṙikyia rina lyakye, kyiyeri walewona shiṟiyisho alewuta. 24 Kyaindi Yesu alewaiṙikyia-pfo kyipfa nalemanya kyikyeri mrimenyi kowo; 25 kyipfa kuwewoṙe kyimaṙuma kya mndu iṟingyishia mbonyi tsa mndu-pfo; kyipfa oe amonyi nalemanya shikyeri mrimenyi ko mndu.
1 Kuwewoṙe mndu umwi kyiiṙi kya Mafarisayo ekyelago Nikodemo, awei msongoru o Wayuda. 2 Mndu-cho nalecha na ko Yesu kyio, kammbia, “Rabi, luichi kye iyoe nyi mlosha uwukyie ko Ruwa; cha kyipfa kuwoṙe mndu eiṙima iwuta shiṟiyisho-shi uiwuta iyoe-pfo, sile kokooya Ruwa nakyeri na mndu-cho.” 3 Yesu kagaluo, kammbia, “Ny'kyaloi, ngakuwia, mndu alandefeo lya kawi echiiṙima iwona Wumangyi wo Ruwa-pfo.” 4 Nikodemo kammbia, “Mndu neiṙima kuṙa ifeo amku? Neiṙima iwuya na wosinyi ko wamae nafeo-se lya kawi?” 5 Yesu kamgaluo, “Ny'kyaloi, ngakuwia, mndu alandefeo kui mṟinga na Mumuyo echiiṙima iiṙa na Wumangyinyi wo Ruwa-pfo. 6 Kyikyifee nyi mmbiu nyi mmbiu; na kyikyifee kui Mumuyo nyi mumuyo. 7 Ulaṟiyio kyipfa ngakuwia, kyikuwaṟi ifeo lya kawi. 8 Mkuma okyekuma handu ukundi, na ṟui lya mkuma-cho nokyelyiicho, kyaindi uichi kundu owuka ang'u uiyenda-pfo. Na wuṙo mbonyi tsa orio mndu afeo kui Mumuyo.” 9 Nikodemo kagaluo, kammbia, “Mbonyi-tsi tseiṙimika kuṙa?” 10 Yesu kagaluo, kammbia, “Iyoe nyi mlosha o Isiraelyi na mbonyi-tsi utsiichi-pfo? 11 Ny'kyaloi ngakuwia kye, kyilya lukyiichi lukyionguo, na kyilya lulekyiwona lukyiṟingyishia. Kyaindi maa wuṟingyishi woṙu muwuiṙikyia-pfo. 12 Kokooya ngamuongoya mbonyi tsa wuyanenyi mulaiṙikyie, moiṙikyia kuṙa ngamuongoya mbonyi tsa ruwewu? 13 Maa kuwoṙe mndu alemṙo na ruwewu sile Mana o Adamu ulya alesoka iwuka ruwewu-pfo.” 14 “Na chandu Mose aleira njoka iya kulya nukyenyi ngyiumu suwaa ilawoṙe maa mṟinga, na wuṙo Mana o Adamu awaṟi iiro; 15 kundu orio mndu aiṙikyie nawaṙe moo o mlungana kui oe. 16 Cha kyipfa nyi wuṙo Ruwa alekunda wuyana, katana awuta Mana okye kyimuumwi, kundu orio mndu amwiṙikyie alaṙekye, indi nawaṙe moo o mlungana. 17 Cha kyipfa Ruwa aleṙuma Mana wuyanenyi kundu naanduye wuyana-pfo, indi wuyana wukyiṟo kui oe. 18 Amwiṙikyie oe echianduyo-pfo; alaiṙikyie amwanduyo; cha kyipfa aiṙikyia rina lya Mana kyimuumwi o Ruwa-pfo. 19 Na ilyi nyilyo ianduyo; kye ngyeela ilecha na wuyanenyi, na wandu wakakunda meema kuta ngyeela; kyipfa mawuto gawo gawemawicho. 20 Kyipfa orio mndu ekyewuta shindo shiwicho nasuuye ngyeela, maa ekyecha na ngyeelenyi-pfo, mawuto gakye galachemanyika naṟoṟomo. 21 Indi ulya ekyewuta kyindo kya loi nekyecha na ngyeelenyi, kundu mawuto gakye gawono na pata kye gawuto kui Ruwa.” 22 Numa ya isho Yesu na wanalosho wakye waleyenda mṟasa uruka lo Uyuda; katsinda pfo hamwi nawo, echipatisa. 23 Yohane na oe naweipatisa ipfo Ainon, kufuhi na Salyimu, kyipfa ipfo kuwewoṙe mṟinga ushikyie; na wandu wakayenda kokye, wakapatiso. 24 Cha kyipfa Yohane alekoawiko kyipfungonyi-pfo. 25 Kyasia wanalosho wa Yohane wakagaluana na Myuda umwi kya mbonyi tsa isanjo mrima. 26 Wakayenda ko Yohane, wakammbia, “Rabi, ulya awekyeri hamwi na iyoe molyolya o Yoridan, ulya uleṟingyishia mbonyi tsakye, naipatisa, na wandu woose waiyenda kokye.” 27 Yohane kagaluo, kagamba, “Kuwoṙe mndu echiiṙima imanya kyindo kyoose sile Ruwa amwenenga wuiṙimi-pfo. 28 Nyoe mungyiṟingyishia kye ngyilegamba ‘Inyi chi oe Kristo-pfo, indi ngileṙiko oe alacha.’ 29 Ulya awoṙe mono-kyika ailayiko nyi monyi wolyi; kyaindi mbuya ya monyi wolyi, ulya ekyegoṟoka na imwaṙanyia, nekyechihiyo kyipfa kya ṟui lya monyi wolyi. Kyasia sia yako yaafukyia. 30 Kyiwaṟi oe iwaṙa kyiṟumi kying'anyi na kyako ititia.” 31 “Ulya acha awuka wuye, icho nakyeri wuye ya shoose. Ulya akyeri o wuyana, kanyi kokye nyi wuyanenyi, na oe nekyeṙeṙa shindo sha wuyanenyi. Ulya aicha awuka ruwewu nakyeri wuye ya shoose. 32 Shilya aleshiwona na ishiicho nyisho aiṟingyishia, kyaindi maa kuwoṙe mndu aiiṙikyia wuṟingyishi wokye-pfo. 33 Ulya aleiṙikyia wuṟingyishi wokye naloṟa na pata kye Ruwa nyi loi. 34 Cha kyipfa ulya amṙume nyi Ruwa nekyeonguo mbonyi tsa Ruwa; cha kyipfa ekyeenengyia Mumuyo kui iehia-pfo. 35 Awu nakundi Mana, na oe nawikyie shoose mawokonyi gakye. 36 Aiṙikyie Mana nawoṙe moo o mlungana; alaiṙikyie Mana echiwona moo-pfo, indi nyashi ya Ruwa yechimwolokyia.”
1 Kyiyeri Mndumii alemanya kye Mafarisayo wamuicho kye Yesu naigalutsia wandu wafoi ura lokye na iwapatisa kuta Yohane, 2 (kyaindi Yesu alepatisa-pfo, indi wanalosho wakye), 3 nalewuka Uyuda, kayenda-se mṟasa Galyilaya. 4 Na oe kyiwemmbaṟi naiṙe kyiiṙi kya Samaria. 5 Kyasia kashika mṟinyi o Samaria, okyelago Sikari, kufuhi na ṙema lyilya Yakobo alekoaenenga Yosefu mono-kye. 6 Na iho hawewoṙe kyisima kya Yakobo. Kyasia Yesu, kyipfa kyaro kyilekokyamwenenga iwina, kaṙamia halya kyisimenyi. Na nyi-we cha saa tsiṟandaaṟu tsa kyingoto. 7 Mndu mka o kyisamaria kacheṙahia mṟinga. Yesu kammbia, “Ngyienenga mṟinga ngyinyo.” 8 Cha kyipfa wanalosho wakye waweiyenda mṟinyi iguṟa kyelya. 9 Kyasia mndu mka ulya o Kyisamaria kammbia, “Kyawa kuṙa iyoe Myuda iterewa mṟinga koko na inyi nyi mndu mka o Kyisamaria?” (Kyipfa Wayuda na Wasamaria wekyekaa handu hamwi-pfo). 10 Yesu kagaluo, kammbia, “Kokooya uweichi kyindo Ruwa ekyeenengyia, na nyi wui aikuwia ‘Ngyienenga mṟinga ngyinyo’, nuwechimterewa oe, na oe nawechikuenenga mṟinga uwoṙe moo.” 11 Mndu mka ulya kammbia, “Mndumii, uwoṙe kyindo kyeṙahia-pfo, na kyisima kyikyileshi. Nyi kwi owona mṟinga-cho uwoṙe moo? 12 Ngyesa iyoe nung'anyi kuta awu oṙu, Yakobo, aleluenenga kyisima-kyi, na oe kanyo pfo mṟinga, na wana wakye taa, na shima shakye?” 13 Yesu kagaluo, kammbia, “Orio mndu anyo mṟinga-chu nechiwoṙo-se nyi nyoṙa; 14 kyaindi orio mndu echinyo mṟinga ulya ngyechimwenenga inyi echiwoṙo nyoṙa nyi mṟasa mlungana-pfo. Indi mṟinga ulya ngyechimwenenga ochiwa shoka ya mṟinga ochimwenenga moo o mlungana.” 15 Mndu mka ulya kammbia, “Mndumii, ngyienenga mṟinga-cho, ngyilawoṙo nyi nyoṙa, maa ngyilache-se iṙahia iha.” 16 Yesu kammbia, “Yenda undelaga mii opfo, uche na oe na iha.” 17 Mndu mka ulya kagaluo, kagamba, “Ngyiwoṙe mii-pfo.” Yesu kammbia, “Nogamba necha, ‘Ngyiwoṙe mii-pfo’; 18 kyipfa ulemkaa na wasoṟo wataanu, na ulya ukyeri na oe wulalu chi mii opfo-pfo. Iho nogamba loi.” 19 Mndu mka ulya kammbia, “Mndumii, ngyiwonyi kye nui moonguo shisuku! 20 Waku waṙu waleindia Ruwa iha fumvunyi, na nyoe mokyegamba kye ipfo Yerusalemu nyi handu luwaṟi iindia pfo Ruwa.” 21 Yesu kammbia, “Mama, ngyiiṙikyia. Kyiyeri kyiicha mulechiiṙima iindia Ruwa iha fumvunyi, maa kulya Yerusalemu. 22 Nyoe muindia kyindo mulakyiichi; soe luindia kyindo lukyiichi; cha kyipfa wukyiṟo wuwukyie ko Wayuda. 23 Kyaindi kyiyeri kyiicha, na wulalu kyikyeri ho, wandu wechiindia necha Awu mumuyonyi na wuloinyi. Cha kyipfa Awu naipfula wandu cha iwo wamwindie. 24 Ruwa nyi Mumuyo na iwo wekyemwindia kyiwawaṟi imwindia mumuyonyi na wuloinyi.” 25 Mndu mka ulya kammbia, “Ngyiichi kye Mesia naicha (ekyelago Kristo); na oe ilyi echicha, nechilutambuluya shindo shoose.” 26 Yesu kammbia, “Inyi ngyiṙeṙa na iyoe nyi oe.” 27 Kyiyeri kyilya kyilya wanalosho wakye wakacha, wakaṟiyio kyipfa naweiṙeṙa na mndu mka; kyaindi kuwoṙe alegamba, “Nuipfula kyi?” Ang'u “Ny'kyilyi uiṙeṙa na oe-pfo?” 28 Kyasia mndu mka ulya kaṙa kyitongoṟima kyilya kyakye, kayenda mṟinyi, kawia wandu, 29 “Nnjonyi muwone mndu angyiwia shindo shoose ngyilewuta. Ngyesa ichu chi oe Kristo-pfoe?” 30 Kyasia wandu wakawuka mṟinyi wakayenda ko Yesu. 31 Kyiyeri-kyo ikyo wanalosho wakye walemterewa, wechigamba, “Rabi, lya kyelya.” 32 Kawawia, “Inyi ngyiwoṙe kyelya mulakyiichi nyoe.” 33 Kyasia wanalosho wakye wakawesana wo wenyi ko wenyi, “Ngyesa kuwoṙe mndu amwendie kyelya?” 34 Yesu kawawia, “Kyelya kyako ny'kyo ikyi, ngyiwute shilya ulya alengyiṙuma akundi, ngyiafutsie iṟunda lyakye. 35 Ngyesa mokyegamba, ‘Hatsugai mori ina kyiyeri kyesambuo kyishikye-pfoe?’ Inyi ngammbia, kye maṙema gamshika kyiyeri kyesambuo. 36 Na ulya mosambuo nekyeambilyia wori, na isania shilyimu kyipfa kya moo o mlungana; kundu ulya ekyewaaya na ulya ekyesambuo waiṙime ichihiyo handu hamwi. 37 Cha kyipfa iho ṙeṙo-lyo lyekyewa loi, ‘Umwi nekyewaaya ungyi kasambuo.’ 38 Inyi ngyilemṙuma musambuo shilya mulaleshiwinia. Wengyi walewina, nyoe mowona kyiira kyipfa waleṟunda kui wuragari.” 39 Na kulya mṟinyi Wasamaria wafoi walemwiṙikyia kyipfa kya ulogo lo mndu mka ulya, aleṟingyishia kye, “Nalengyiwia shindo shoose ngyilewuta.” 40 Kyasia Wasamaria walya kyiyeri waleyenda kokye, wakamterewa nakae kowo; na oe kakaa pfo mfiri iwi. 41 Wandu wafoi ngoseṟa wakawaṙa iiṙikyia kyipfa kya ulogo lokye. 42 Wakawia mndu mka ulya, “Wulalu loiṙikyia, maa chi kyipfa kya maṙeṙo gapfo tupu-pfo, maa soe loicho luwenyi. Lyingyi-se luichi kye kyaloi ichu nyi oe Mkyiṟa o wuyana.” 43 Na numa ya mfiri iya iwi nalewuka pfo, kayenda Galyilaya. 44 Cha kyipfa Yesu amonyi naleṟingyishia kye moonguo shisuku nekyeindio kundu koose sile kulya urukyenyi kokye. 45 Kyasia kyiyeri aleshika Galyilaya, Wagalyilaya walemwambilyia; cha kyipfa walewona shindo shoose alewuta ipfo Yerusalemu kyiyeri kya mfiri ung'anyi; kyipfa Wagalyilaya-wo walekowayenda Yerusalemu kyipfa kya mṟumoe o Pasaka. 46 Kyasia naleshika-se Kana ya Galyilaya, halya-ndu alekoagaluo mṟinga ukowa mpfinyo. Na kuwewoṙe mchilyi umwi mono-kye aweluoe kulya Kaperinaumu. 47 Mchilyi-cho kyiyeri aleicho kye Yesu nacha awuka uruka lo Uyuda mṟasa Galyilaya, naleyenda kokye, kamterewa nandekyiṟa mono-kye; kyipfa nawekyeri kufuhi na ipfa. 48 Kyasia Yesu kammbia, “Mulandewone shiṟiyisho na ṟigo tsifoi maa ale-pfoe?” 49 Mchilyi ulya kammbia, “Mndumii, nnjo mono-ko alapfa.” 50 Yesu kammbia, “Yenda; mono-pfo nai na moo.” Mndu ulya kaiṙikyia kyindo kyilya alewio nyi Yesu, na oe kayenda. 51 Na kyiyeri aweiyenda, masinga gakye gakamwambilyia, gechigamba kye mono-kye nai na moo. 52 Kyasia kawawesa mbonyi tsa saa alewooka iwa ungyi-ungyi; nawo wakammbia, “Ukou, saa mfungaaṙe, isemu lyilemleka.” 53 Kyasia awuye kamanya kye nyi saa iya iya Yesu alemmbia, “Mono-pfo nai na moo.” Kaiṙikyia oe na woose wa kanyi kokye. 54 Ikyo nyi kyiṟiyisho kya kawi Yesu alekyiwuta, kyiyeri alekoawuka uruka lo Uyuda ishika Galyilaya.
1 Numa ya isho, Yesu kayenda Yerusalemu mṟumoenyi o Wayuda. 2 Na ipfo Yerusalemu kufuhi na moongo o moondo hawewoṙe iruwa lya mṟinga, lyekyelago Betisata ko mṙeṙie o Kyiebrania, nalyo lyiwewoṙe mbuo tsitaanu. 3 Ipfo mbuonyi kuwewoṙe wandu wafoi mnu waluoe wawelee pfo, shipfupfuṟe, shiwete, na wapfiie ngapfu, [wechiweṙa mṟinga uchemkye. 4 Cha kyipfa kuwewoṙe kyiyeri malaika ekyesoka awuka ruwewu, kaiṙa na kulya iruwenyi lya mṟinga kapaaya na ifoga mṟinga ulya. Kyasia ulya echiwa o kuwooka iiṙa napfo numa ya mṟinga-cho ifoika nawekyekyia ndoṟe ilekoyammbaṙa.] 5 Na iho hawewoṙe mndu aweluoe kyiyeri kya maka makumi gaṟaaṟu na nyanya. 6 Kyiyeri Yesu alewona mndu-chu alee, na Yesu aichi kye nawekyeri kuṙo mfiri ifoi, nalemmbia, “Nukundi ichia?” 7 Mndu ulya aweluoe kagaluo, kagamba, “Mndumii, inyi ngyiwoṙe mndu mongyiwikyia ipfo iruwenyi lya mṟinga kyiyeri malaika ekyepaaya na ifoga mṟinga-pfo. Kyiyeri inyi ngacha, mndu ungyi nekyesonguo isokyia pfo.” 8 Yesu kammbia, “Goṟoka, ukuṙikye ikondoṟo lyapfo, uyende.” 9 Cha ilyi mndu ulya kawaṙa pfinya, kakuṙika ikondoṟo lyakye, kayenda. Na mfiri-cho nyi-we mfiri o onyonya. 10 Kyipfa kya ikyo Wayuda wakawia ulya alekyiṟo, “Inu nyi mfiri o onyonya, maa chi sungusinyi kopfo ikuṙika ikondoṟo-pfo.” 11 Kawagaluo kagamba, “Ulya angyikyiṟa nyi oe angyiwia, ‘Kuṙikye ikondoṟo lyapfo, uyende.’ ” 12 Kyasia wakammbesa, “Ulya akuwia ‘Kuṙikye, uyende,’ nyi wui?” 13 Kyaindi ulya alekyiṟo alemmanya nyi wui-pfo; kyipfa Yesu nalekoamlekana nawo, cha kyipfa handu halya hawewoṙe wandu wafoi. 14 Numa ya isho Yesu kamkooya hekalunyi, kammbia, “Ambuya, ommbaṙa pfinya; ulawute-se wunyamaṟi, ulacheolokyio nyi kyindo kyiwicho ngoseṟa.” 15 Mndu ulya kayenda, kaongoya Wayuda kye nyi Yesu amkyiṟa. 16 Cha kyipfa kya ikyo Wayuda wakalyisa Yesu wukyiwa, kyipfa nalewuta isho mfiri o onyonya. 17 Kawagaluo, kawawia, “Awu oko naiṟunda mṟasa wulalu, na inyi ngyiṟunda.” 18 Kyasia kyipfa kya ikyo Wayuda wakaengyeṟa ilanga immbaaga, chi kyipfa alefunja iwawaso lya mfiri o onyonya tupu-pfo, indi hamwi na isho nalelaga Ruwa Awu okye, echikuloṟa kye nalyingananyi na Ruwa. 19 Kyasia Yesu kagaluo kawawia, “Ny'kyaloi ngammbia, Mana eiṙima iwuta kyindo amonyi sile kyilya awonyi Awu ewuta-pfo; cha kyipfa shoose ekyewuta oe, nyisho Mana ekyewuta. 20 Cha kyipfa Awu nakundi Mana na oe nekyemloṟa shoose ekyewuta; maa maṟunda gang'anyi kuta isho ngoseṟa nechimloṟa, kundu nyoe muiṙime iṟiyio. 21 Kyipfa chandu Awu ekyeṟutsa wapfu na iwaenenga moo, na wuṙo Mana echienenga moo walya akundi iwawutia kuṙo. 22 Lyingyi-se Awu ekyeanduya mndu oose-pfo, indi naenengyie Mana ianduya lyoose; 23 kundu wandu woose waindie Mana chandu wekyeindia Awu. Mndu alekyeindia Mana ekyeindia Awu ulya alemṙuma-pfo. 24 Ny'kyaloi ngammbia, ulya aicho ṙeṙo lyako na iiṙikyia ulya alengyiṙuma nawoṙe moo o mlungana; maa echianduyo-pfo, indi ammbuka upfunyi na iira na moonyi o mlungana. 25 Ny'kyaloi ngammbia, kyiyeri kyiicha, nakyo kyamcha, wapfu wechiicho ṟui lya Mono-Ruwa, na walya wechilyiaṙanyia wechiwaṙa moo. 26 Kyipfa chandu Awu awoṙe moo o mlungana, na wuṙo aleenenga mana wuiṙimi wo waṙa moo o mlungana. 27 Na oe kamwenenga wuchilyi wo ianduya kyipfa nyi Mono-Adamu. 28 Mulaṟiyio kyipfa kya maṙeṙo-ga; cha kyipfa kyiyeri kyiicha, kyiyeri wandu woose wakyeri shilomenyi wechiicho ṟui lyakye. 29 Nawo wechiwuka shilomenyi; walya walewuta shindo shicha wawone moo o mlungana na walya walewuta shiwicho waanduyo.” 30 “Inyi ngyeiṙima iwuta kyindo ngyimonyi-pfo. Chandu ngyekyeicho nyi wuṙo ngyekyeanduya; na ianduya lyako nyi lya sungusinyi, cha kyipfa ngyekyewuta kyilya ngyikundi inyi-pfo, indi kyilya ulya alengyiṙuma akundi. 31 Inyi ngakuṟingyishia ngyimonyi wuṟingyishi woko chi loi-pfo. 32 Kuwoṙe ungyi aingyiṟingyishia; na inyi ngyiichi kye kyilya aingyiṟingyishia nyi kya loi. 33 Nyoe muleṙuma wandu ko Yohane, na oe kaṟingyishia wuloi. 34 Kyaindi inyi ngyiambilyia wuṟingyishi ko wandu-pfo; indi ngyigamba ishi kundu nyoe muiṙime ikyia. 35 Yohane nawekyeri cha taa iwuta ngyeela, na nyoe mulechihiyo kyipfa kya kyilya alegamba. 36 Kyaindi wuṟingyishi ngyiwoṙe inyi wung'anyi kuta wulya wo Yohane; cha kyipfa maṟunda galya Awu alengyienenga ngyigaṟunde gangyiṟingyishia kye Awu nalengyiṙuma. 37 Na Awu ulya alengyiṙuma nangyiṟingyishia. Ṟui lyakye mulandelyiicho kyiyeri kyoose maa fana yakye muleiwona-pfo. 38 Maa ulogo lokye lukyeri mrimenyi konyu-pfo, cha kyipfa nyoe muiṙikyie ulya oe alemṙuma-pfo. 39 Mokyekulosha mbonyi tsa shiṟeio shiele, cha kyipfa mokyekusaṟa kye kyiiṙi kyasho mochiwona moo o mlungana; na shiṟeio-sho shagamba mbonyi tsako. 40 Maa mukundi icha na koko muwone moo o mlungana-pfo. 41 Inyi ngyipfula iṟumisho nyi wandu-pfo. 42 Kyaindi ngamanya kye nyoe muwoṙe ikunda lya Ruwa mrimenyi konyu-pfo. 43 Inyi ngyilecha kui rina lya Awu oko kyaindi nyoe muingyiambilyia-pfo; ungyi kacha kui rina lyakye amonyi, icho mochimwambilyia. 44 Moiṙima kuṙa iiṙikyia nyoe muiṟumishana nyoe wenyi ko wenyi, na kyiṟumi kyilya kyiwukyie ko Ruwa alawoṙe amng'anyie muikyipfula-pfo? 45 Mulakusaṟe kye inyi ngyechimshitakyi mbele ya Awu; kuwoṙe echimshitakyi, nyi oe Mose, ulya muikusaṟa nechimtarama. 46 Cha kyipfa kokooya muleiṙikyia Mose, muwechingyiiṙikyia inyi; cha kyipfa Mose naleṟeia mbonyi tsako. 47 Kyaindi mulandeiṙikyie shiṟeio shakye, mochiiṙikyia kuṙa ulogo loko?”
1 Numa ya isho Yesu naleyenda molyolya o Nduwa ya Galyilaya iwekyelago Tiberia. 2 Na kyisanzionyi kying'anyi kya wandu kyikamwosha, cha kyipfa walewona shiṟiyisho alewutia wandu waluoe. 3 Na Yesu kaṙooya fumvunyi, kaṙamia pfo hamwi na wanalosho wakye. 4 Na Pasaka, mfiri ung'anyi o Wayuda, uwekyeri kufuhi. 5 Kyasia kyiyeri Yesu alewona ṟiima lying'anyi lya wandu lyechicha na kokye nalewia Filyipo, “Luguṟe kwi mkate kundu wandu-wa waiṙime ilya?” 6 Na naleṙeṙa kuṙo kundu namyeshe; cha kyipfa naweichi kyindo echiwuta. 7 Filyipo kamgaluo, kagamba, “Mkate ya woguru wo dinari magana gawi gewashika maa kokooya orio umwi alya kyitung'tu-pfo.” 8 Anderea, umwi o wanalosho wakye, mono-wama o Simion Petiro, kammbia, 9 “Iha hawoṙe mana awoṙe mkate itanu na makunga gawi, kyaindi ishi ny'kyikyi ko wandu wafoi cha iwa?” 10 Yesu kagamba, “Wienyi wandu waṙamie.” Na handu halya hawewoṙe maṟa gafoi. Kyasia wasoṟo wakaṙamia, cha shiku shitaanu woose piu. 11 Yesu kaira mkate iya, kaana, kagawia walya waweṙamie; kagawa na makunga galya taa chandu orio mndu alekunda. 12 Nawo kyiyeri waleiguṙa, nalewia wanalosho wakye, “Sanienyi shifunjoe-sho shatsugaa, kyilaṙekye maa kyimwi.” 13 Kyasia wakasania shifunjoe sha mkate iya itanu shiletsugaa wandu wamlye, wakaichuṟa mkunja ikumi na iwi. 14 Kyasia kyiyeri wandu walya walewona kyiṟiyisho alewuta, walegamba, “Loi ichu nyi moonguo shisuku ulya aicha wuyanenyi.” 15 Naaho-ng'u, aichi kye wawekundi ichemmbaṙa kundu wamgaluo mangyi, nalelekana nawo, kayenda-se fumvunyi alaṙuṙanyi na mndu. 16 Kyiyeri kya kyukonyi wanalosho wakye wakasoka na kulya nduwenyi, 17 wakaṙooya ngalawenyi, wakawooka iambaṙa iyenda Kaperinaumu. Napfo kuwemmbaṙa meema, kyaindi Yesu alekoamcha-pfo. 18 Na nduwa ikawooka ifoika kyipfa mkuma ung'anyi uweikuma. 19 Wanalosho walekowamuyenda cha mailyi tsiṟaaṟu tsiina kyiyeri walewona Yesu echumia wuye ya mṟinga na itikyira kufuhi na ngalawa iya; wakaowuo. 20 Na oe kawawia, “Nyi inyi, mulaowuoe.” 21 Kyasia wakamwitsa na kulya ngalawenyi; na cha ilyi ngalawa iya ikashika uruka lulya waweiyenda. 22 Mfiri ulya uleosha kyisanzionyi kya wandu wawegoṟokyi molyolya o nduwa walewona kye kuwewoṙe ngalawa ingyi kulya sile imwi tupu-pfo. Ngoseṟa walewona kye Yesu aleiṙa na kulya ngalawenyi hamwi na wanalosho wakye-pfo, indi wanalosho waleyenda wo wawenyi. 23 (Kyaindi kukocha ngalawa tsingyi iwuka Tiberia mṟasa kufuhi na handu halya walekowalyiia mkate, kyiyeri Mndumii Yesu aleana). 24 Kyasia wandu wa kyisanzionyi, kyiyeri walewona kye Yesu akyeri pfo maa wanalosho wakye-pfo, waleiṙa na ngalawenyi wo wawenyi, wakayenda Kaperinaumu wechipfula Yesu. 25 Na kyiyeri walemmbona molyolya o nduwa, walemmbia, “Rabi, iyoe nocha indi na iha?” 26 Yesu kawagaluo, kagamba, “Ny'kyaloi ngammbia, nyoe muingyipfula, chi kyipfa mulewona shiṟiyisho-pfo, indi kyipfa mulelya mkate iya mukoiguṙa. 27 Mulapfuṟukane ipfula kyelya kyekyenyamaṟika, indi pfulenyi kyelya kyilekyesia kyekyeende moo o mlungana; kyelya kyilya Mana o Adamu echimuenenga cha kyipfa icho nyi oe aṟingyishio nyi Ruwa kye nyi o sungusinyi.” 28 Kyasia wakammbia, “Luwikye kuṙa kundu luiṙime iṟunda maṟunda ga Ruwa?” 29 Yesu kagaluo, kawawia, “Ilyi nyilyo iṟunda lya Ruwa, mumwiṙikyie ulya aleṙumo nyi oe.” 30 Wakammbia, “Kyasia nuiwuta kyiṟingyishio kyiha, kundu luwone lukuiṙikyie? Nuiṟunda kyi? 31 Waku waṙu walelya Manna kulya nukyenyi ngyiumu suwaa ilawoṙe maa mṟinga, chandu kyikyiṟeie, ‘Nalewaenenga kyelya kya ruwewu kundu walye.’ ” 32 Yesu kawawia, “Ny'kyaloi ngammbia, ‘Chi Mose alewaenenga kyelya kyilya kya ruwewu-pfo, indi Awu oko naimuenenga nyoe kyelya kya loi kyiwukyie ruwewu. 33 Cha kyipfa kyelya kya Ruwa nyi kyilya kyisokyie iwuka ruwewu na ienenga wuyana moo o mlungana.’ ” 34 Kyasia wakammbia, “Mndumii, mfiri yoose uluenengye kyelya-kyi.” 35 Yesu kawawia, “Inyi nyi kyelya kya moo; ulya acha na koko echiicho njaa maa ale-pfo; na ulya angyiiṙikyie echiwoṙo nyi nyoṙa-pfo. 36 Kyaindi ngyilemmbia kye momngyiwona indi muiṙikyia-pfo. 37 Walya Awu angyienenga wechicha na koko; maa kuwoṙe mndu echicha na koko ngyimmbiyitse nja maa ale-pfo. 38 Cha kyipfa inyi ngyilesoka iwuka ruwewu kundu ngyiwute kyilya ngyikundi-pfo, indi kyilya ulya alengyiṙuma akundi. 39 Na kyilya ulya alengyiṙuma akundi nyi ikyi, kye kyiiṙi kya woose angyienengyie ngyilaṙetse maa umwi, indi ngyimṟutse mfiri ulya o furumia. 40 Cha kyipfa kyilya Awu oko akundi nyi ikyi, kye orio mndu mokusuria Mana na imwiṙikyia, nawaṙe moo o mlungana; na inyi ngyechimṟutsa mfiri ulya o furumia.” 41 Kyasia Wayuda wakamnunuwia, cha kyipfa nalegamba, “Inyi nyi kyelya kyilesoka iwuka ruwewu.” 42 Wakagamba, “Ichu chi Yesu, mana o Yosefu, ulya luichi awuye na wamae? Wulalu naigamba kuṙa, ‘Ngyilesoka iwuka ruwewu? ’ ” 43 Kyasia Yesu kagaluo, kawawia, “Mulanunuwiane nyoe wenyi ko wenyi. 44 Kuwoṙe mndu eiṙima icha na koko sile Ruwa ulya alengyiṙuma amsongoya-pfo; na inyi ngyechimṟutsa mfiri o furumia. 45 Kyikyiṟeie maloshonyi ga weonguo shisuku, ‘Na woose wekowamlosho nyi Ruwa.’ Kyasia orio mndu aicho na ikulosha ko Awu nekyecha na koko. 46 Chi kye mndu nawona Awu sile ulya awukyie ko Ruwa-pfo. Icho nyi oe alewona Awu. 47 Ny'kyaloi ngammbia, ‘Ulya aiṙikyie nawoṙe moo o mlungana.’ 48 Inyi nyi kyelya kya moo. 49 Waku wanyu walelya Manna kulya nukyenyi ngyiumu suwaa ilawoṙe maa mṟinga, wakapfa. 50 Indi ikyi nyi kyelya kyisokyie iwuka ruwewu, kye mndu kakyilya alapfe. 51 Ikyi nyi kyelya kyiwoṙe moo kyilesoka iwuka ruwewu; mndu kalya kyelya-kyo, nechiwaṙa moo mlungana. Na kyelya ngyechienengyia inyi nyi mmbiu oko, kundu wuyana wuwaṙe moo.” 52 Kyasia Wayuda kui nyashi walegaluana wo wenyi ko wenyi wechigamba, “Mndu-chu neiṙima kuṙa iluenenga mmbiu okye luulye?” 53 Naaho Yesu kawawia, “Ny'kyaloi ngammbia, mulandelye mmbiu o Mana o Adamu na inyo samu yakye, muwoṙe moo mrimenyi konyu-pfo. 54 Mndu alya mmbiu oko na inyo samu yako nawoṙe moo o mlungana; na inyi ngyechimṟutsa mfiri o furumia. 55 Cha kyipfa mmbiu oko nyi kyelya kya loi, na samu yako nyi kyindo kyenyo kya loi. 56 Mndu alya mmbiu oko na inyo samu yako nekyekaa kyiiṙi kyako na inyi ngyekyekaa kyiiṙi kyakye. 57 Chandu Awu ai na moo alengyiṙuma inyi, na inyi ngyiwoṙe moo kyipfa kyakye, na wuṙo taa ulya alya mmbiu oko echiwaṙa moo kyipfa kyako. 58 Ikyi nyikyo kyelya kyisokyie iwuka ruwewu; chi chandu waku walelya wakapfa-pfo; indi mndu alya kyelya-kyo nechiwaṙa moo mlungana.” 59 Mbonyi-tsi naletsionguo akyeri sinagoginyi, kyiyeri aweilosha, kulya Kaperinaumu. 60 Kyasia kyiyeri wandu wafoi kyiiṙi kya wanalosho wakye waleicho, walegamba, “Kyindo-kyi kyikyiumu; nyi wui eiṙima ikyiiṙikyia?” 61 Na Yesu aichi mrimenyi kokye kye wanalosho wakye walenunuwa kyipfa kya kyindo-kyo, kawawia, “Ngyesa kyindo-kyi kyimutewe iilacha iiṙikyia lyanyu? 62 Kyechiwa-se kuṙa kyiyeri mochiwona Mana o Adamu echiṙo na ruwewu kulya-ndu awekyeri? 63 Mumuyo o Ruwa nyi oe ekyeenenga wandu moo, pfinya ya mndu iwoṙe kyiiṙa kyoose-pfo. Mbonyi-tsi ngamuongoya nyi Mumuyo, ngoseṟa nyi moo. 64 Kyaindi kuwoṙe wengyi kyiiṙi kyanyu walawoṙe iiṙikyia.” Cha kyipfa Yesu nalemanya wookyia mawookyionyi nyi wakyi walawoṙe iiṙikyia, na nyi wui echimṟiinga. 65 Kagamba, “Kyipfa kya ikyo ngammbia kye kuwoṙe mndu eiṙima icha na koko sile Awu amwenenga wuiṙimi-pfo.” 66 Kyipfa kya isho wandu wafoi wanaloshonyi wakye wakawuya na numa, walaoshane na oe-se. 67 Kyasia Yesu kawia walya ikumi na wawi, “Ngyesa na nyoe mukundi ilekana na inyi?” 68 Simion Petiro kagaluo, kagamba, “Mndumii! Luyende ko wui? Iyoe nuwoṙe maṙeṙo ga moo o mlungana. 69 Na soe lommbaṙa iiṙikyia; lyingyi-se lomanya kye iyoe nyi oe Mweele o Ruwa.” 70 Yesu kawagaluo, kagamba, “Ngyesa ngyilemusambuṟa nyoe ikumi na wawi kyaindi umwi onyu nyi Satana?” 71 Naleṙeṙa mbonyi tsa Yuda, mana o Simion Isikariote; kyipfa icho nyi oe echimṟiinga; na oe nyi umwi o walya ikumi na wawi.
1 Numa ya isho Yesu naweichumia urukyenyi lo Galyilaya; kyipfa alekunda iyenda uruka lo Uyuda-pfo, cha kyipfa Wayuda wawekundi immbaaga. 2 Na mfiri ung'anyi o Wayuda, mfiri ung'anyi o matengo, uwekyeri kufuhi. 3 Kyasia wana wa wamae wakammbia, “Wuka iha, uyende uruka lo Uyuda, kundu wanalosho wapfo nawo waiṙime iwona maṟunda gapfo. 4 Cha kyipfa kuwoṙe mndu eiṙima iwuta kyindo kui kyiṟika kokooya nakundi imanyika-pfo. Kyipfa kowuta shindo-shi kuṟingyishie ko wandu wa wuyana.” 5 Kyipfa maa wana wa wamae walemwiṙikyia-pfo. 6 Kyasia Yesu kawawia, “Kyiyeri kyako kyilandeafukyie-pfo; indi kyiyeri kyanyu orio mfiri kyikyeri ho. 7 Wandu wa wuyana weiṙima imsuo nyoe-pfo; indi wangyisuuye inyi, cha kyipfa inyi ngyiṟingyishia kye mawuto gawo gamawicho. 8 Yendenyi mundechihiyo ipfo mṟumoenyi o mfiri ung'anyi; inyi ngyiyenda pfo-pfo; cha kyipfa kyiyeri kyako kyilandeshikye-pfo.” 9 Na oe amwawie isho, kakaa mfiri ngyaangu kulya Galyilaya. 10 Na wana wa wamae wamndechihiyo halya-ndu mṟumoe uwekyeri, na oe kayenda ho kui kyiṟika. 11 Kyasia Wayuda wakampfula kulya mṟumoenyi, wakagamba, “Nyi kwi ai mndu ulya?” 12 Kukowaṙa mnunuwo ifoi kyipfa kya Yesu kyiiṙi kya walya wawesanzie halya. Wengyi wakagamba, “Nyi mndu mcha.” Na wengyi wakagamba, “Chi wuṙo-pfo; nailemba walya wasanzie iha.” 13 Kyaindi kuwoṙe mndu alemsenda na pata-pfo, kyipfa kya iowuo Wayuda. 14 Na makyiṙi-gawi ga mṟumoe ulya Yesu kaiṙa na hekalunyi kalosha. 15 Wayuda wakaṟiyio, wechigamba, “Ichu nawaṙa kuṙa wuṟango na oe asomie-pfo?” 16 Kyasia Yesu kawagaluo, kagamba, “Malosho gako chi gako inyi-pfo, indi nyi ga ulya alengyiṙuma. 17 Mndu kakunda iwuta kyilya Ruwa akundi, nechimanya mbonyi tsa malosho-ga, kye gawukyie ko Ruwa, ang'u kye inyi ngyiṙeṙa kui wuchilyi woko inyi ngyimonyi tupu. 18 Ulya aṙeṙa kui wuchilyi wokye amonyi tupu nekyepfula kyiṟumi kyakye amonyi; indi ulya apfula kyiṟumi kya ulya alemṙuma, icho nyi o loi, maa mrimenyi kokye kuwoṙe wunyamaṟi-pfo. 19 Ngyesa Mose alemuenenga uwawaso-pfoe? Maa kuwoṙe umwi onyu aiosha uwawaso-pfoe. Ny'kyilyi mukundi ingyiwaaga.” 20 Wandu wawesanzie halya wakagaluo, wakagamba, “Loi, nuwoṙo nyi mṟufui mmbicho! Nyi wui akundi ikuwaaga?” 21 Yesu kagaluo kawawia, “Inyi ngyilewuta kyindo kyimwi, na nyoe moose muiṟiyio kyipfa kya kyindo-kyo. 22 Mose nalemuenenga mṟumoe o iṙino kyaindi mṟumoe-cho chi uwukyie ko Mose-pfo, indi nyi ko waku wanyu; na nyoe mfiri o onyonya mokyeṙina mndu. 23 Kyasia kokooya mndu nekyeṙino mfiri o onyonya, kundu uwawaso lo Mose lulachenyamaṟika, ny'kyilyi mungyisuuya inyi kyipfa ngyilekyiṟa mndu mfiri o onyonya? 24 Kyasia mulaanduye mndu kui imwambuya ipfo kyanja, indi anduyenyi wandu kui sungusinyi.” 25 Kyasia wandu waata wa Yerusalemu wakagamba, “Ichu chi ulya wandu waimpfula kundu wammbaage-pfoe? 26 Kyeambuya chandu aiṙeṙa kulawoṙe iṟikyia kyindo kyaindi wasongoru wa Wayuda waimmbutia kyindo-pfo. Ngyesa kyeiṙima iwa wasongoru-wo wa Wayuda waichi kye ichu nyi oe Kristo? 27 Ichu luichi nyi kwi awukyie; indi kyiyeri Kristo echicha kuwoṙe aichi kundu awukyie-pfo.” 28 Kyasia Yesu kakuilenga kulya hekalunyi, kalosha echigamba, “Inyi mungyiichi, na kundu ngyiwukyie muichi; maa ngyilecha kui wuchilyi woko ngyimonyi-pfo. Ulya alengyiṙuma nyi o loi indi mumwichi-pfo. 29 Inyi ngyimwichi, cha kyipfa ngyiwukyie kokye, na oe nyi oe alengyiṙuma.” 30 Kyasia wakakunda immbaṙa; kyaindi kuwoṙe mndu alegoṟuo kuwoko kokye immbaṙa-pfo, kyipfa kyiyeri kyakye kyewutio kuṙo kyilekokyamshika-pfo. 31 Na wandu wafoi kyiiṙi kya walya wawesanzie halya wakamwiṙikyia, wakagamba, “Ngyesa kyiyeri Kristo echicha nechiwuta shindo shifoi sha maṟiyisho kuta ishi ichu aiwuta?” 32 Mafarisayo wakaicho wandu walya wechinunuwa kyipfa kya Yesu. Kyasia wang'anyi wa makohanyi na Mafarisayo wakaṙuma waṟundi kundu wammbaṙe. 33 Kyasia Yesu kagamba, “Hatsugai kyiyeri kyifuhi ngyikyeri hamwi na nyoe; numa ya iho ngyechiyenda ko ulya alengyiṙuma. 34 Mochingyipfula maa mochingyiwona-pfo; na inyi handu ngyikyeri nyoe moiṙima icha na ho-pfo.” 35 Kyasia Wayuda wakawesana, “Ichu nechiyenda kwi mṟasa lulechimmbona? Ngyesa nechiyenda mṟinyi ikyeri nja ya uruka loṙu kulya-ndu wandu walai Wayuda wekyekaa na iwalosha? 36 Nyi kyindo kya mbaṟe iha ikyo aigamba, ‘Mochingyipfula maa mochingyiwona-pfo; na handu ngyikyeri nyoe moiṙima icha na ho-pfo?’ ” 37 Na mfiri o furumia, mfiri ulya ung'anyi o mṟumoe, Yesu kagoṟoka, kakuilenga na ṟui lying'anyi, echigamba, “Mndu kawoṙo nyi nyoṙa, nache na koko nawone kyindo kyenyo. 38 Ulya angyiiṙikyia inyi, chandu kyikyiṟeie ipfo shiṟeionyi shiele, mfo ya mṟinga uwoṙe moo yechiwuka mrimenyi kokye.” 39 Kyiyeri Yesu aweiṙeṙa naweionguo mbonyi tsa Mumuyo o Ruwa, walya wamwiṙikyie wechimwambilyia kyiyeri kya numa; cha kyipfa Mumuyo o Ruwa alekoamcha-pfo, cha kyipfa Yesu alekoamwirio wuye na ienengo kyiṟumi-pfo. 40 Kyasia wandu wengyi kyiiṙi kya walya wawesanzie halya kyiyeri waleicho mbonyi-tso, walegamba, “Loi, ichu nyi oe moonguo shisuku ulya.” 41 Wengyi walegamba, “Ichu nyi oe Kristo.” Wengyi wakagamba, “Ngyesa Kristo nechiwuka Galyilaya? 42 Kyikyiṟeie kyiṟeionyi kyiele kye Kristo nechiwuka kyisharinyi kya Dawidi, na iwuka Betilehemu, mṟi ulya Dawidi awekyekaa?” 43 Kyasia wandu waata kyiiṙi kya walya wawesanzie halya wakaṙeṙa Yesu necha, wengyi wakamṙeṙa uwicho. 44 Waata wakakunda immbara kyaindi kuwoṙe mndu alegoṟuo mawoko gakye kundu nammbaṙe-pfo. 45 Kyasia waṟundi walya wakayenda ko wang'anyi wa makohanyi na Mafarisayo. Nawo wakawawesa, “Ny'kyilyi mulamwende?” 46 Waṟundi walya wakagaluo, wakagamba, “Kuwoṙe mndu oose alemgamba shindo-sho ichu agamba-pfo.” 47 Kyasia Mafarisayo wakawagaluo, wakagamba, “Namlemba maa nyoe? 48 Nyi wui kyiiṙi kya wasongoru ang'u Mafarisayo amwiṙikyie?” 49 Kyaindi wandu-wa wasanzie iha walaichi uwawaso wawasese. 50 Nikodemo (ulya alekoayenda ko Yesu kyiyeri kya ipfo numa, kyipfa nyi umwi o wasongoru-wo) kawawia, 51 “Iṙuana na uwawaso loiṙima ianduya mndu lulaaṙanyia ny'kyikyi awoṙe kyegamba-pfo; hamwi na ipfula imanya ny'kyikyi akundi iwuta.” 52 Wakagaluo wakammbia, “Ngyesa na iyoe nuwukyie Galyilaya? Pfula shiṟeionyi shiele umanye kye Galyilaya kochiwuka moonguo shisuku-pfo.”
1 Waleyenda orio mndu kanyi kokye, na Yesu kayenda mṟasa fumvunyi lya Mseituni. 2 Na kyiyeri kya ngamenyi lyilya kulekya kaiṙa-se na hekalunyi, na wandu woose wakayenda kokye. Na oe kaṙamia, kawooka iwalosha. 3 Walosha wa mawawaso na Mafarisayo wakamwendie mndu mka alekooyo wuṟuinyi, wakammbikyia makyiṙi-gawi. 4 Wakammbia, “Mlosha, mndu mka-chu nakooyo eṟuguyo. 5 Kyasia, uwawasonyi, Mose naleluwia lukape na magoe waka wa mbaṟe-i iyi. Iyoe nogamba kyi?” 6 Nawo walegamba kuṙo wechimyesha, kundu wawone kyimaṙuma kyemshitakyi. Kyaindi Yesu kaarama, kaṟeia na kyimnyoe kyakye iho terinyi. 7 Na kyiyeri waleengyeṟa immbesa, nalewawia “Ulya alawoṙe wunyamaṟi kyiiṙi kyanyu nawe o kuwooka imkapa na igoe.” 8 Kaarama-se kaṟeia na kyimnyoe kyakye iho terinyi. 9 Nawo kyiyeri waleicho, wakafuma soṟom soṟom, wechiwooka na ulya mku kuta woose; Yesu kaṙio amonyi, na mndu mka ulya agoṟokyi halya. 10 Yesu kaamkyia wuye alawone mndu sile mndu mka ulya. Kammbia, “Mndu mka, wookwi walya waweigamba kye numnyamaṟi? Kuwoṙe maa umwi aṙio iha igamba kye nuwaṟi iwoogo?” 11 Mndu mka ulya kagamba, “Kuwoṙe-pfo, Mndumii.” Yesu kammbia, “Maa inyi ngyikuanduya-pfo. Yenda kyaindi ulawute-se wunyamaṟi.”] 12 Kyasia Yesu kawia-se Mafarisayo walya, “Inyi nyi ngyeela ya wuyana. Ulya angyiosha inyi nechiwaṙa ngyeela yekyeenenga wandu moo, na echichumia handu hawoṙe meema-pfo.” 13 Mafarisayo wakammbia, “Iyoe nuikuṟingyishia kumonyi; wuṟingyishi wopfo chi loi-pfo.” 14 Yesu kagaluo kawawia, “Inyi maa chandu ngyikuṟingyishia ngyimonyi, wuṟingyishi woko nyi wo loi; cha kyipfa ngyiichi kundu ngyiwukyie na kundu ngyiyenda; kyaindi nyoe muichi kundu ngyiwukyie maa kundu ngyiyenda-pfo. 15 Nyoe mokyeanduya kui iambuya mbonyi tsa mmbiu; inyi ngyekyeanduya mndu-pfo. 16 Na kokooya ngyiwechianduya, ianduya lyako lyechiwa lya loi; cha kyipfa inyi ngyikyeri ngyimonyi-pfo, indi ngyikyeri na ulya alengyiṙuma. 17 Lyingyi-se uwawasonyi lonyu kyikyiṟeie kye ‘Wuṟingyishi wo wandu wawi nyi wo loi.’ 18 Inyi ngyikuṟingyishia ngyimonyi, na Awu ulya alengyiṙuma naingyiṟingyishia.” 19 Kyasia wakammbia, “Ookwi Awu opfo?” Yesu kagaluo kagamba, “Inyi mungyiichi-pfo; maa Awu oko mumwichi-pfo. Kokooya muwengyiichi inyi, muwechimanya na Awu oko.” 20 Mbonyi-tsi naletsiṙeṙa kyiyeri aweilosha hekalunyi, kyiṟinyi kyekooma heleri; maa kuwoṙe mndu alemmbaṙa-pfo, cha kyipfa kyiyeri kyakye kyewutio kuṙo kyilekokyamshika-pfo. 21 Yesu kawawia-se, “Inyi ngyiwuka iha, na nyoe mochingyipfula; na nyoe mochipfa mowuta wunyamaṟi; na inyi kundu ngyiyenda moiṙima iyenda pfo-pfo.” 22 Kyasia Wayuda wakagamba, “Ngyesa nechikuwaaga? Cha kyipfa naigamba, ‘Kundu ngyiyenda nyoe moiṙima iyenda pfo-pfo.’ ” 23 Kawawia, “Nyoe nyi wa iha wanda wuyanenyi, inyi nyi o wuye ruwewu. Nyoe nyi wa wuyana-wu, inyi chi o wuyana-wu-pfo. 24 Koikyo ngammbia kye mochipfa mowuta wunyamaṟi; cha kyipfa mulandeiṙikyie kye inyi nyi oe ulya ngyigamba kye inyi nyi oe mochipfa mowuta wunyamaṟi.” 25 Kyasia wakammbia, “Iyoe nyi wui?” Yesu kawawia, “Inyi nyi ulya ngammbia wookyia mawookyionyi kye inyi oe. 26 Ngyiwoṙe shindo shifoi shegamba na sheanduya kyipfa kyanyu; kyaindi ulya alengyiṙuma nyi o loi, na inyi shilya ngyileicho kokye nyisho ngyishionguo iha wuyanenyi.” 27 Maa walemanya kye naweiwaongoya mbonyi tsa Awu-pfo. 28 Kyasia Yesu kawawia, “Kyiyeri-kyo mochimarisa iwikyia Mana o Adamu msalabenyi nyi lyo-ndu momanya kye inyi nyi oe ulya ngammbia kye inyi nyi oe; na kye inyi ngyekyewuta kyindo kui iambuya kyilya ngyikundi-pfo, indi chandu Awu alengyilosha nyi wuṙo ngyekyeonguo. 29 Na ulya alengyiṙuma nakyeri hamwi na inyi; angyiṙeeye ngyimonyi-pfo; cha kyipfa mfiri yoose ngyekyewuta shilya shimchihiṟie.” 30 Na oe kyiyeri aweionguo isho, wandu wafoi wakamwiṙikyia. 31 Kyasia Yesu kawia Wayuda walya wawemwiṙikyie, “Mukoosha shilya ngyimulosha, mochiwa wanalosho wako loi loi; 32 lyingyi-se mochimanya wuloi wo mbonyi tsa Ruwa, na wuloi-wo wochimmbuta wusingyenyi.” 33 Wakamgaluo, wakagamba, “Soe nyi kyishari kya Abrahamu, maa lulandewe watumo wa mndu kyiyeri maa kyimwi-pfo; na iyoe nuigamba, ‘Mochiwuto wusingyenyi?’ ” 34 Yesu kawagaluo, kagamba, “Ny'kyaloi ngammbia, ‘Orio mndu ekyewuta wunyamaṟi nyi mtumo o wunyamaṟi.’ 35 Mtumo akyeri mndu o mfiri yoose o numba iya ekyeiṟundia-pfo; indi mana nyi mndu o numba-yo mfiri yoose. 36 Kyasia Mana kammbuta wusingyenyi, mochiwuka wusingyenyi loi loi. 37 Ngyiichi kye nyoe nyi kyishari kya Abrahamu; kyaindi mukundi ingyiwaaga cha kyipfa kyilya ngyimlosha kyikyeri mrimenyi konyu-pfo. 38 Shilya ngyileshiwona ko Awu nyisho ngyionguo; na nyoe na wuṙo muwuta shilya muleicho ko awu onyu.” 39 Wakagaluo, wakammbia, “Awu oṙu nyi oe Abrahamu!” Yesu kawawia, “Kokooya muwei wana wa Abrahamu, muweṟunda maṟunda ga Abrahamu. 40 Kyaindi wulalu mukundi ingyiwaaga, mndu ammbia kyikyeri kya loi, ngyilekyiicho ko Ruwa. Abrahamu alewuta kuṙo-pfo. 41 Nyoe muiṟunda maṟunda ga awu onyu.” Nyi lyo-ndu walemmbia, “Soe lulefeo wuṟuinyi-pfo. Soe luwoṙe Awu umwi, nyi oe Ruwa.” 42 Yesu kawawia, “Kokooya Ruwa awekyeri awu onyu, muwengyikunda inyi; cha kyipfa ngyilewuka ko Ruwa, na inyi ngyilecha; maa ngyilecha kui ikunda lyako ngyimonyi-pfo, indi oe nyi oe alengyiṙuma. 43 Kyitewe mulaimanya ikyo ngyigamba ny'kyi? Nyi kyipfa nyoe mulaiiṙima imanya malosho gako. 44 Nyoe nyi wa awu onyu Mokyiriinzi, na lango tsa awu onyu nyitso mukundi itsiosha. Oe nyi mmbaagi wookyia mawookyionyi; maa alandekae ura lo wuloi-pfo, cha kyipfa kokye kuwoṙe wuloi-pfo. Kyiyeri aṙeṙa wongo, nekyeṙeṙa shikyeri shakye amonyi; cha kyipfa oe nekyeṙeṙa wongo na nyi awu o wongo. 45 Na inyi, cha kyipfa ngyiṙeṙa kyikyeri loi, mungyiiṙikyia-pfo. 46 Nyi wui kyiiṙi kyanyu angyiṟingyishia kye ngyiwoṙe wunyamaṟi? Na inyi ngaṙeṙa loi, ny'kyilyi nyoe mulaingyiiṙikyia? 47 Ulya ai o Ruwa nekyeaṙanyia malosho ga Ruwa. Koikyo nyoe muiaṙanyia-pfo cha kyipfa nyoe chi wana wa Ruwa-pfo.” 48 Wayuda wakagaluo, wakammbia, “Ngyesa soe luigamba loi kye iyoe nyi mndu o Samaria, na iyoe nuwoṙo nyi mṟufui mmbicho-pfoe?” 49 Yesu kawagaluo, kagamba, “Inyi ngyiwoṙo nyi mṟufui mmbicho-pfo; kyaindi inyi ngyiindia Awu oko, na nyoe mungyiindia-pfo. 50 Maa inyi ngyipfula kyiṟumi kyako-pfo; kuwoṙe mopfula kyiṟumi na ianduya. 51 Ny'kyaloi, ngammbia ‘Mndu kaosha kyilya malosho gako gagamba mrima okye ochiwaṙa moo mlungana.’ ” 52 Kyasia Wayuda wakammbia, “Wulalu lomanya kye nuwoṙo nyi mṟufui mmbicho. Abrahamu alempfa, na weonguo shisuku walempfa; na iyoe nugamba, ‘Mndu kaosha kyilya malosho gako gagamba mrima okye ochiwaṙa moo mlungana.’ 53 Iyoe nung'anyi kuta awu oṙu Abrahamu, alempfa? Weonguo shisuku nawo walempfa. Nukundi ikuloṟa iyoe nyi wui?” 54 Yesu kagaluo kagamba, “Ngakuṟumisha inyi ngyimonyi, kyiṟumi kyako chi kyindo-pfo. Ekyengyiṟumisha nyi Awu oko, ulya nyoe muigamba kye nyi Ruwa onyu. 55 Maa nyoe mulemmanya-pfo; kyaindi inyi ngyimwichi. Ngagamba kye ngyimwichi-pfo ngyechiwa mndu ekyeṙeṙa wongo cha nyoe; kyaindi ngyimwichi, na malosho gakye ngyekyegaosha. 56 Abrahamu, awu onyu, nalechihiyo chandu echiwona mfiri o icha lyako; na oe kauwona kachihiyo.” 57 Kyasia Wayuda wakammbia, “Nuwewona kuṙa Abrahamu na iyoe ulandewaṙe maa maka makumi gataanu-pfo?” 58 Yesu kawawia, “Ny'kyaloi ngammbia, Abrahamu alafeo, inyi ngyikyeri pfo.” 59 Kyasia wakaira magoe kundu wamkape nago; kyaindi Yesu kakuṟiika, kawuka kulya hekalunyi.
1 Na kyiyeri aweiiṙa nalewona mndu awei kyipfupfuṟe wookyia ifeo lyakye. 2 Wanalosho wakye wakammbesa, wechigamba, “Rabi, nyi wui alewuta wunyamaṟi, mndu-chu ang'u wafee wakye, mṟasa nafeo ai kyipfupfuṟe?” 3 Yesu kagaluo, kagamba, “Ichu alewuta wunyamaṟi maa wafee wakye-pfo; indi nalefeo ai kyipfupfuṟe kundu wandu waiṙime iwona maṟunda galya Ruwa tupu eiṙima iṟunda. 4 Kyiwaṟi iṟunda maṟunda ga ulya alengyiṙuma kyiyeri kuwoṙe ngyeela; kyio kyiicha kyiyeri mndu alechiiṙima iṟunda. 5 Kyiyeri ngyikyeri wuyanenyi, inyi nyi ngyeela ya wuyana.” 6 Kyiyeri alemarisa igamba isho, nalepuchia maṙa iho wanda, kaachikyia toombo na maṙa galya. Kashia mndu ulya awei kyipfupfuṟe toombo ipfo mesonyi, 7 kammbia, “Yenda undesamba kulya iruwenyi lya Siloamu.” (Kyimwi na igamba, “Aleṙumo.”) Kyasia mndu ulya awei kyipfupfuṟe kayenda na isamba; kawuya ewona. 8 Wamṟasa wakye, na walya walekowammbona mfiri ya numa echieṟeṟa, wakagamba, “Ichu chi ulya awekyeeṟeṟa-pfoe?” 9 Wengyi wakagamba, “Nyi oe.” Wengyi wakagamba, “Ote; kyaindi nafananyi na oe.” Oe amonyi kagamba, “Nyi oe.” 10 Kyasia wakammbia, “Meso gapfo gaiṙima kuṙa iwona?” 11 Oe kawagaluo, kagamba, “Mndu ulya ekyelago Yesu naleachikyia toombo, kangyishia mesonyi kangyiwia, ‘Yenda Siloamu undesamba.’ Koikyo ngayenda na isamba, ngaiṙima iwona.” 12 Wakammbia, “Ny'kwi akyeri?” Kagamba, “Inyi ngyiichi-pfo.” 13 Kyasia wakaṙuo ko Mafarisayo mndu ulya awekyeri kyipfupfuṟe mfiri ya numa. 14 Na nyi-we mfiri o onyonya, kyiyeri kyilya Yesu aleachikyia toombo na ienenga mndu ulya iwona. 15 Kyasia Mafarisayo nawo wakammbesa-se chandu aleiṙima iwona. Kawawia, “Nalengyishia toombo mesonyi, na inyi ngasamba, na wulalu ngyiwona.” 16 Kyasia Mafarisayo waata wakagamba, “Mndu-cho awukyie ko Ruwa-pfo, cha kyipfa nekyewuta kyilya kyilawaṟi iwuta mfiri o onyonya.” Wengyi wakagamba, “Mndu mnyamaṟi neiṙima kuṙa iwuta shiṟiyisho cha isho?” Walawaṙe makusaṟo gamwi. 17 Kyasia lya kawi wakawia ulya awei kyipfupfuṟe, “Mbonyi tsiha uigamba tsa ichu akuenenga wuiṙimi wo iwona?” Kagamba, “Nyi moonguo shisuku.” 18 Kyasia Wayuda walaiṙikyie mbonyi tsilya aweigamba, kye nawei kyipfupfuṟe na numa ya iho kaenengo iwona; mṟasa wakalaga wafee wakye. 19 Wakawawesa, “Ichu nyi oe mana onyu, ulya mulegamba kye nalefeo ai kyipfupfuṟe? Wulalu naiṙima kuṙa iwona?” 20 Wafee wakye wakagaluo, wakagamba, “Luichi kye ichu nyi oe mana oṙu, lyingyi-se kye nalefeo ai kyipfupfuṟe; 21 kyaindi chandu aiwona wulalu luichi-pfo; maa luichi nyi wui alemwenenga wuiṙimi wo iwona-pfo. Mmbesenyi oe amonyi; oe nyi mndu apfulukyie, neiṙima ionguo amonyi.” 22 Wafee wakye walegamba kuṙo kui iowuo Wayuda; cha kyipfa Wayuda walekowaiṙikyiana kye mndu echigamba kye nyi Kristo, nechiimo momu o yenda sinagoginyi. 23 Nyikyo kyitewe wafee walya walegamba, “Nyi mndu apfulukyie, mmbesenyi oe.” 24 Kyasia lya kawi Mafarisayo wakalaga mndu ulya awei kyipfupfuṟe, wakammbia, “Enenga Ruwa kyiṟumi. Soe luichi kye mndu-chu nyi mnyamaṟi.” 25 Kyasia mndu ulya kagaluo, kagamba, “Kye oe nyi mnyamaṟi ngyiichi-pfo. Ngyiichi kyindo kyimwi tupu: kye inyi ngyiwei kyipfupfuṟe na wulalu ngyiwona.” 26 Kyasia wakammbia, “Ny'kyikyi alekuwutia? Nalekuenenga kuṙa wuiṙimi wo iwona?” 27 Kawagaluo, kagamba, “Ngamummbia, maa moiṙikyia-pfo. Ny'kyilyi mukundi iwio-se? Na nyoe mukundi iwa wanalosho wakye?” 28 Kyasia wakamnyeṟie, wechigamba, “Iyoe nyi manalosho okye; soe nyi wanalosho wa Mose. 29 Soe luichi kye Ruwa naleṙeṙa na Mose; indi icho luichi kundu awukyie-pfo.” 30 Mndu ulya kagaluo, kawawia, “Ikyi nyi kyindo kyeṟiyisha! Kye nyoe muichi kundu awukyie-pfo, na oe nalengyienenga wuiṙimi wo iwona! 31 Luichi kye Ruwa ekyeaṙanyia wanyamaṟi-pfo; indi mndu kawa naowuye na ikunda Ruwa, na iosha kyilya Ruwa akundi, Ruwa nekyemwaṙanyia. 32 Wookyia kyiyeri-kyo kyilandegambo kye mndu naenenga kyipfupfuṟe wuiṙimi wo iwona, ulya alefeo mbaṟe-yo iyo-pfo. 33 Kokooya icho alawewukyie ko Ruwa, aweiṙima iwuta kyindo kyoose-pfo.” 34 Wakagaluo, wakammbia, “Iyoe nulefeeyo wunyamaṟinyi nakamwi, na iyoe nuilulosha soe?” Kui nyashi wakamtsindikyia nja ya sinagogi. 35 Yesu kaicho kye wamtsindikyia nja; na oe kyiyeri alemmbona nalegamba, “Iyoe nuiṙikyie Mana o Ruwa?” 36 Na oe kagaluo, kagamba, “Nyi wui, Mndumii, ngyiiṙime imwiṙikyia?” 37 Yesu kammbia, “Omummbona, na oe aiṙeṙa na iyoe nyi oe.” 38 Kagamba, “Ngaiṙikyia, Mndumii.” Kamwindia. 39 Yesu kagamba, “Inyi ngyilecha na kunu wuyanenyi ianduya, kundu iwo walaiwona wawone, na walya waiwona wawe shipfupfuṟe.” 40 Mafarisayo waata wawekyeri hamwi na oe wakaicho isho, wakammbia, “Ngyesa na soe nyi shipfupfuṟe?” 41 Yesu kawawia, “Kokooya muwei shipfupfuṟe muweiwaṙa wunyamaṟi-pfo; kyaindi wulalu muigamba, ‘Luwonyi,’ kyasia wunyamaṟi wonyu wuengyeṟa ikaa ho.”
1 Yesu nalewawia, “Ny'kyaloi, ngammbia, ulya alaiiṙa na mfiṟigenyi o moondo kui iiṙia moongonyi, kyaindi kaiṙia handu hengyi, icho nyi mbafu na oe nyi msokyi. 2 Aiṙia moongonyi nyi mlyisi o moondo. 3 Mringyi o moongo nekyepfunguya mlyisi-cho moongo, na moondo gekyemanya ṟui lyakye; na oe nekyelaga moondo gakye kui marina gawo, na igafumiṟia nja. 4 Na oe kyiyeri afumiṟia nja moondo-go gakye goose, nekyegasongoya; na moondo galya gekyemwosha, cha kyipfa gaichi ṟui lyakye. 5 Myenu gechimwosha maa ale-pfo, indi gechimṙicha; cha kyipfa gaichi maṟui ga wayenu-pfo.” 6 Mfano-cho Yesu nalewawia; kyaindi wo walemanya kyindo aweiwawia-pfo. 7 Kyasia Yesu kawawia-se, “Ny'kyaloi, ngammbia, inyi nyi moongo o moondo. 8 Walya walengyisongoya nyi mbafu na wasokyi; kyaindi moondo galewaaṙanyia-pfo. 9 Inyi nyi moongo. Mndu kaiṙia koko, nechikyia. Nechiiṙa na numba na ifumia nja, na oe nechiiguṙa kando. 10 Mbafu yekyecha ikusaṟie kyindo kyingyi sile iiwa na iwaaga na inyamaṟa-pfo. Inyi ngyilecha kundu wawaṙe moo, ngoseṟa wauwaṙe pacha. 11 “Inyi nyi mlyisi mcha. Mlyisi mcha nekyereka moo okye kyipfa kya moondo. 12 Mndu o wori, maa chi mlyisi-pfo, ulya moondo galai gakye, nekyewona kyisii kyeecha, kaṙa moondo na iṙicha, na kyisii kyekyerakuo ho ondo lyimwi na inyanyaṟitsa igo gengyi. 13 Icho nekyeṙicha cha kyipfa nyi mndu o wori; maa mbonyi tsa moondo chi kyindo kokye-pfo. 14 Inyi nyi mlyisi mcha; na walya wakyeri wako ngyiwaichi; na walya wai wako wangyiichi inyi; 15 chandu Awu angyiichi na chandu ngyiichi Awu. Na inyi ngyekyereka moo oko kyipfa kya moondo. 16 Ngyiwoṙe na moondo gengyi, galakyeri ga mfiṟiga-chu; na igo nago kyingyiwaṟi igaende na kunu mfiṟigenyi, na ṟui lyako gechilyiaṙanyia. Naaho-ng'u kochiwaṙa poo lyimwi na mlyisi umwi. 17 Awu nagyikundi, cha kyipfa ngyekyereka moo oko kundu ngyiuambilyie-se numa. 18 Kuwoṙe mndu ekyengyiwuta moo-chu-pfo, indi inyi ngyimonyi ngyekyeureka. Inyi ngyiwoṙe wuiṙimi wo iureka; ngyiwewoṙe taa wuiṙimi wo iuambilyia-se. Iwawaso-lyi ngyilelyiambilyia ko Awu oko.” 19 Lyingyi-se kulawaṙe makusaṟo gamwi kyiiṙi kya Wayuda, kyipfa kya mbonyi tsilya Yesu aleonguo. 20 Wengyi wakagamba, “Ichu nawoṙo nyi mṟufui mmbicho, ngoseṟa nyi msuko; ny'kyilyi muimwaṙanyia?” 21 Wengyi wakagamba, “Maṙeṙo-ga chi ga mndu awoṙo nyi mṟufui mmbicho-pfo. Ngyesa mṟufui mmbicho neiṙima ienenga shipfupfuṟe wuiṙimi wo iwona?” 22 Kyasia kulya Yerusalemu kuwewoṙe mṟumoe o iwikyia hekalu mboṟa lya kawi; na nyi-we kyiyeri kya mbeho. 23 Na Yesu naweichumia-chumia kulya hekalunyi handu hesanzia hawekyelago Solomon. 24 Kyasia Wayuda wakamwiṟiwia, wakammbia, “Nolyisa mrima yaṙu wukyiwa mṟasa indi? Kokooya iyoe nyi oe Kristo uluwie na pata.” 25 Yesu kawagaluo, kawawia, “Ngyilemmbia, kyaindi nyoe mulaiṙikyie. Maṟunda-ga ngyiṟunda kui rina lya Awu oko nyigo gaingyiṟingyishia. 26 Kyaindi nyoe muiṙikyia-pfo, cha kyipfa mukyeri poonyi lya moondo gako-pfo. 27 Moondo gako gekyemanya ṟui lyako; na inyi ngyiichi moondo-go, nago gekyengyiosha. 28 Na inyi ngyekyegaenenga moo o mlungana; maa gechiṙeka maa ale-pfo; maa kuwoṙe mndu eiṙima igangyisoka-pfo. 29 Awu oko alegangyienenga nang'anyi kuta woose; maa kuwoṙe mndu eiṙima igawuta mawokonyi ga Awu oko-pfo. 30 Inyi na Awu lukyeri kyindo kyimwi.” 31 Kyasia Wayuda wakaira-se magoe kundu wamkape nago. 32 Yesu kawagaluo, kawawia, “Ngyilemumloṟa maṟunda mecha gafoi gawukyie ko Awu, nyi lyiha lyamuenenga ilanga ingyikapa na magoe?” 33 Wayuda wakamgaluo, wakagamba, “Luikukapa na magoe kyipfa kya kyindo kyicha uleṟunda-pfo; indi kyipfa kya ilahia Ruwa, na kyipfa nyi mndu uikuloṟa kye nui Ruwa.” 34 Yesu kawagaluo, kagamba, “Ngyesa uwawasonyi kyikyiṟeie kye Ruwa nagamba, ‘Nyoe nyi waruwa?’ 35 Kokooya nalelaga waruwa wandu walya waleambilyia shiṟeio shiele; (na shiṟeio shiele sheiṙima iilachika-pfo); 36 ngyesa ulya Awu alemwilyisha, kamṙuma wuyanenyi, nyoe mummbia ‘Nulahia Ruwa’ cha kyipfa ngyilegamba, ‘Inyi nyi Mono-Ruwa?’ 37 Kokooya ngyilaiṟunda maṟunda ga Awu oko, mulangyiiṙikyie. 38 Kyaindi ngagaṟunda, maa kokooya mulangyiiṙikyia inyi, iṙikyienyi maṟunda-go; muiṙime imanya kye Awu nai kyiiṙi kyako, na inyi ngyii kyiiṙi kya Awu.” 39 Wakalanga-se immbaṙa, kyaindi kakuashuo mawokonyi gawo. 40 Kayenda-se molyolya o Yoridan, mṟasa handu halya Yohane awekyepatisia wandu kyiyeri kya ipfo numa, kakaa pfo. 41 Na wandu wafoi wakayenda kokye wakagamba, “Loi Yohane alewuta kyiṟingyishio kyoose-pfo, kyaindi mbonyi tsoose Yohane aleonguo tsa ichu tsiwei tsa loi.” 42 Wandu wafoi wakamwiṙikyia.
1 Mndu umwi awekyelago Lasaro, awekyekaa Betania, naweluoe. Lasaro-cho nyi-we msacha o Maria na Marita. 2 Maria nyi oe ulya aleshia Mndumii Yesu mafuṙa gekyepfaama necha, kamwanguo maṙende kui njui tsakye. Nyi oe Lasaro msacha okye aweluoe. 3 Kyasia washikyi walya wakaṙuma ndumo ko Yesu wakagamba, “Mndumii, ulya umkundi naluoe.” 4 Na Yesu kyiyeri aleicho, nalegamba, “Ndoṟe-i yechiende upfu-pfo, indi yacha kyipfa kya mng'ano o Ruwa, kundu Mono-Ruwa nang'anyiso kui ndoṟe-yo.” 5 Na Yesu nawekundi Marita na Maria na Lasaro. 6 Kyasia kyiyeri aleicho kye naluoe, nalekaa halya-ndu awekyeri mfiri iwi ya ngoseṟa. 7 Numa ya iho, kawia wanalosho wakye, “Sindenyi-se uruka lo Uyuda.” 8 Wanalosho walya wakammbia, “Rabi, nyi icho-lyi tikyi Wayuda wawekundi ikukapa na magoe, na iyoe nukundi iyenda-se pfo?” 9 Yesu kagaluo, kawawia, “Ngyesa saa tsa kyingoto chi ikumi na tsiwi-pfoe? Mndu kachumia kyingoto ekyekapa tuulyia-pfo; cha kyipfa nawonyi ngyeela ya mnengyeṟi. 10 Indi kachumia kyio nekyekapa tuulyia; cha kyipfa ngyeela ikyeri kokye-pfo.” 11 Nalegamba isho, na numa ya iho kawawia, “Mbuya yaṙu, Lasaro, nalee; kyaindi ngyiyenda ngyiiṙime imwamtsa.” 12 Kyasia wanalosho walya wakammbia, “Mndumii, kokooya nalee, nechia.” 13 Kyaindi Yesu naweiwawia mbonyi tsa upfu lokye; nawo wakakusaṟa kye naṙeṙa mbonyi tsa ilaa maṙoe. 14 Kyasia iho Yesu kawawia na pata, “Lasaro napfa. 15 Inyi ngachihiyo kyipfa kyanyu kye ngyiwekyeri ipfo-pfo, kundu muiṙikyie. Kyaindi sindenyi kokye.” 16 Kyasia Tomasi, awekyelago (Wana wawi wawafee kyiyeri kyimwi), kawia wanalosho woṙoe, “Na soe sindenyi, kundu lupfe hamwi na oe.” 17 Kyasia kyiyeri Yesu aleshika kulya, nalekooya Lasaro amkaa kyilomenyi cha mfiri ina. 18 Na Betania nyi-we kufuhi na Yerusalemu, cha mailyi tsiwi kuṙi. 19 Na wandu wafoi kyiiṙi kya Wayuda walekowacha na ko Marita na Maria, kundu wawawiyiṟie moo kyipfa kya upfu lo msacha owo. 20 Kyasia, Marita kyiyeri aleicho kye Yesu naicha, naleyenda imwambilyia; na Maria naleṙio kanyi. 21 Kyasia Marita kawia Yesu, “Mndumii, kokooya uwekyeri iha, msacha-chu oko aweipfa-pfo. 22 Kyaindi maa wulalu ngyiichi kye orio kyindo oterewa Ruwa nechikuenenga.” 23 Yesu kammbia, “Msacha opfo nechiṟuka.” 24 Marita kammbia, “Ngyiichi kye nechiṟuka kyiyeri kya wuṟutsi wo mfiri o furumia.” 25 Yesu kammbia, “Inyi nyi ulya ekyeende wuṟutsi-wo, na moo. Ulya angyiiṙikyie inyi, maa kapfa, nechiwaṙa moo o mlungana. 26 Na orio mndu awoṙe moo na ingyiiṙikyia inyi echipfa kyimrima mṟasa mlungana-pfo. Ngyesa nuiṙikyie isho?” 27 Kammbia, “Yee, Mndumii, inyi ngyiiṙikyie kye iyoe nyi oe Kristo, Mono-Ruwa, ulya aicha na wuyanenyi.” 28 Marita amgambe kuṙo kayenda; kaṙuo Maria mbai kagamba, “Mlosha naikulaga.” 29 Na oe kyiyeri aleicho naleamka faṟa, kayenda ko Yesu. 30 Na Yesu alekoamwiṙa na kulya kyikaṟonyi-pfo; kyaindi nawekyeri halya-ndu Marita alekoandemwambilyia. 31 Kyasia Wayuda walya wawekyeri na Maria kanyi, wechimmbiyiṟia moo, kyiyeri walewona chandu aamka faṟa na iyenda, walemwosha; kunu wechikusaṟa kye naweiyenda kyilomenyi nandelyilyia pfo. 32 Kyasia kyiyeri Maria aleshika halya-ndu Yesu awekyeri, na immbona, naleoloka maṙendenyi gakye, kammbia, “Mndumii, kokooya uwekyeri iha, msacha oko awechipfa-pfo.” 33 Kyasia kyiyeri Yesu alemmbona echilyia, na Wayuda walya waweiṙuṙanyi na oe welyia, nalewoṙo nyi fowa mrimenyi, mrima okye ukoiṟewe, 34 kagamba, “Ny'kwi mommbikyia?” Wakammbia, “Mndumii, nnjo uwone.” 35 Yesu katonyitsa mcheṟeṟe. 36 Kyasia Wayuda wakagamba, “Ambuyenyi chandu awemkundi.” 37 Indi wengyi wakagamba, “Ngyesa ichu aleenenga kyipfupfuṟe kyilya wuiṙimi wo iwona, aleiṙima ishingyia ichu alapfe-pfoe?” 38 Kyasia Yesu, awoṙo-se nyi fowa mrimenyi, kashika halya kyilomenyi. Nakyo kyiwekyeri usanja, na igoe lyiwelyiyekyie wuye yakyo. 39 Yesu kagamba, “Wutenyi ho igoe-lyo.” Marita, mshikyi o ulya alepfa, kammbia, “Mndumii, naiṙaa wulalu; kyipfa ammba mnying'a mfiri ina.” 40 Yesu kammbia, “Inyi ngyilekuwia kye koiṙikyia nochiwona mng'ano o Ruwa?” 41 Kyasia wakawuta ho igoe lyilya. Yesu kaambuya wuye, kagamba, “Awu, ngakuana cha kyipfa nongyiaṙanyia. 42 Na inyi ngyilemanya kye uyoe nokyengyiaṙanyia mfiri yoose, kyaindi kyipfa kya wandu-wa waisanzia iha ngyilegamba ishi, kundu waiṙime iiṙikyia kye nyi iyoe ulengyiṙuma.” 43 Na oe amgambe isho, kalaga na ṟui lying'anyi, “Lasaro nnjo na kunu nja!” 44 Ulya awepfiie kafumia nja, ampfungye sanda maṙende na mawoko, na kyaam kyakye kyikyipfungye na kyitambaa. Na Yesu kawawia “Mpfunguonyi, mumlekye nayende.” 45 Kyasia Wayuda wafoi kyiiṙi kya walya walecha na ko Maria, na iwona shilya alewuta, wakamwiṙikyia. 46 Kyaindi wengyi wakayenda ko Mafarisayo, wakawawia shilya Yesu alewuta. 47 Kyasia wang'anyi wa makohanyi na Mafarisayo wakalaga wandu na mengyenyi, wakagamba, “Ny'kyikyi luiwuta? Kyipfa mndu-chu naiwuta shindo shifoi sha maṟiyisho. 48 Lukomṙa kuṙi kuṙi, wandu woose wemwiṙikyia; na Waroma weecha walusokye handu haṙu hamwi na uruka loṙu.” 49 Mndu umwi, kyiiṙi kyawo, Kayafa, awekyeri Mkohanyi ang'anyi kuta woose maka ulya, kawawia, “Nyoe muichi kyindo kyoose-pfo; 50 maa mukusaṟa kye kyiwaṟi mndu umwi ipfa kyipfa kya wandu, kundu uruka loose lularumare-pfo.” 51 Na oe aleṙeṙa kuṙo echigamba mbonyi tsakye amonyi-pfo; indi kyipfa awei Mkohanyi ang'anyi kuta woose maka ulya, naleonguo shisuku kye Yesu nechipfa kyipfa kya uruka lulya. 52 Maa chi kyipfa kya uruka-lo tupu-pfo; kyaindi hamwi na isho nasanie wana woose wa Ruwa wanyanyaṟikyie; kundu wawe wamwi. 53 Kyasia wookyia mfiri-cho walewika kyikweena kyemmbaaga. 54 Koikyo Yesu aleyenda-se handu hoose kyiiṙi kya Wayuda orio mndu echimmbona-pfo; indi nalewuka urukyenyi lo Wayuda, kayenda kufuhi na nuka ingyiumu suwaa ilawoṙe maa mṟinga, mṟasa mṟi okyelago Efraimu; kakaa pfo hamwi na wanalosho wakye. 55 Na Pasaka ya Wayuda iwekyeri kufuhi, na wandu wafoi wakawuka maṙemenyi wakaṙo iyenda Yerusalemu, mfiri o Pasaka ulandeshikye, kundu wawute kyilya kyechiwailyiṟa kyimṟumoe mesonyi ga Ruwa. 56 Kyasia wakapfula Yesu, wakawesana kunu wagoṟokyi hekalunyi, wechigamba, “Muwonyi kuṙa? Aicha na kunu mṟumoenyi-pfoe?” 57 Na wang'anyi wa makohanyi na Mafarisayo walekowagamba kye mndu kamanya handu akyeri, naende mbonyi, kundu waiṙime immbaṙa.
1 Kyasia hatsugae mfiri iṟandaaṟu mṟumoe o Pasaka uafukyie, Yesu naleshika Betania, halya-ndu Lasaro awekyeri, ulya Yesu alemṟutsa ko wapfu. 2 Kyasia wakamwachikyia shelya ipfo Betania; na Marita naweiṟunda pfo, na Lasaro nawekyeri umwi o walya waweilya hamwi na Yesu. 3 Kyasia Maria kaira panti ya mafura gekyepfaama necha, na ga woguru wung'anyi, kashia Yesu maṙende, kaanguo maṙende-go kui njui tsakye. Numba iya yoose ikaichuo mpfaamo o mafuṙa-go gekyepfaama necha. 4 Kyasia Yuda Isikariote, umwi o wanalosho wakye, ulya awekundi imṟiinga, kagamba, 5 “Ny'kyilyi mafuṙa-ga gekyepfaama necha galakumbo dinari magana gaṟaaṟu tsikaenengo wakyiwa?” 6 Na oe nalegamba kuṙo, chi kyipfa alewonia wakyiwa wukyiwa-pfo; indi kyipfa oe nawei mbafu, na oe nyi oe awekyekooma kyikuchu kya heleri, kakuwutia pfo heleri chandu alekunda. 7 Kyasia Yesu kagamba, “Mlekyenyi nakumbuo ikyo awuta, kyipfa kyawuto kui ikumbuo mfiri o iṟiko lyako. 8 Cha kyipfa mfiri yoose muwoṙe wakyiwa; indi mochikaa na inyi mfiri yoose-pfo.” 9 Kyasia wandu wafoi kyiiṙi kya Wayuda walemanya kye nawekyeri kulya Betania; wakacha, chi kyipfa kya Yesu tikyi-pfo, indi kundu wawone na Lasaro, ulya Yesu alekoamṟutsa ko wapfu. 10 Na wang'anyi wa makohanyi wakawika kyikweena kyewaaga Lasaro; 11 cha kyipfa kyipfa kya Lasaro wandu wafoi walelekana na wang'anyi-wo wa makohanyi, wakaiṙikyia Yesu. 12 Ilya-ngama wandu wafoi walekowacha kyipfa kya mṟumoe waleicho kye Yesu naicha na Yerusalemu. 13 Wakafunja maṟamba ga mashiṙi gai cha makangachi, wakafumia nja indemwambilyia. Wakakalagatsa, wechigamba, “Mndumii naṟumisho! Ulya ammbikyie mboṟa aicha kui rina lya Mndumii, Mangyi o Isiraelyi!” 14 Na Yesu nalekoammbona nzoi, kaṙamia wuye yayo, chandu kyikyiṟeie, 15 “Mulaowuoe wandu wa Yerusalemu; mangyi onyu naicha, naṙamilyie nzoi.” 16 Mbonyi-tso wanalosho wakye waletsimanya ipfo mawookyionyi-pfo; kyaindi kyiyeri Yesu aleng'anyiso nyi lyo-ndu walekumbuo kye shiṟeio shiwegambie mbonyi tsakye kuṙo, na kye walemmbutia isho. 17 Wandu walya wawei na Yesu kyiyeri kyilya alelaga Lasaro na imṟutsa iwuka upfunyi walekowammbia ny'kyikyi kyilekokyawutika. 18 Na kyipfa kya ikyo wandu wafoi wa kyisanzionyi wakayenda imwambilyia, cha kyipfa waleicho kye nawuta kyindo-kyo kya kyiṟiyisho. 19 Kyasia Mafarisayo wakawiana wo wenyi ko wenyi, “Kuwoṙe kyindo luiria iha-pfo; wandu woose waimwosha.” 20 Kuwewoṙe Wakyiṟikyi waata kyiiṙi kya wandu walekowayenda Yerusalemu iterewa Ruwa kyiyeri kya mṟumoe ulya o Pasaka. 21 Kyasia Wakyiṟikyi-wo waleyenda ko Filyipo (awewukyie Betisaida urukyenyi lo Galyilaya), wakamterewa, wechigamba, “Mndumii, soe lukundi iwona Yesu.” 22 Filyipo kayenda, kawia Anderea; numa ya iho Anderea na Filyipo wakawia Yesu. 23 Yesu na oe kawagaluo, kagamba, “Kyiyeri kyamshika. Mana o Adamu naṟumisho. 24 Ny'kyaloi ngammbia, mbeu ya nganu ilandeolokye terinyi, ikapfa, yekyekaa wuṙo chandu iwekyeri; indi ikapfa yekyekumbia ndunda tsifoi. 25 Ulya akundi mrima okye nechiuṙetsa; na ulya asuuye mrima okye kyiyeri-kyo akyeri kunu wuyanenyi nechiukyiṟa mṟasa moo o mlungana. 26 Mndu kangyiṟundia nangyioshe; na inyi handu ngyikyeri nyi ho-ndu na mṟundi oko echikaa. Lyingyi-se mndu kangyiṟundia, Awu nechimwindia.” 27 “Wulalu mrima oko uiṟewe; na inyi ngyigambe kyi? Ngyigambe ‘Awu ungyiwute kyiyeri-kyi kya iyesho lying'anyi?’ Kyaindi ngyilecha na kunu wuyanenyi kyipfa kya kyiyesho-kyi. 28 Awu, ng'anyisa rina lyapfo.” Kyasia kukocha ṟui lyawuka ruwewu lyikagamba, “Ngalying'anyisa, na inyi ngyechilying'anyisa-se.” 29 Kyasia wandu wa kyisanzionyi kyiwekyeri kufuhi wakaicho, wakagamba, “Kowaṙa ndiṟimo.” Wengyi wakagamba, “Malaika aṙeṙa na oe.” 30 Yesu kagaluo, kagamba, “Ṟui-lyo lyacha kyipfa kyako-pfo, indi kyipfa kyanyu. 31 Wulalu nyi kyiyeri kyeanduya wuyana. Wulalu Satana, mchilyi o wuyana-wu, nechiwiyitso nja. 32 Na inyi ngairo iwuka kunu urukyenyi ngyechikuruo woose wache na koko.” 33 Nalegamba isho echiloṟa nyi upfu lo mbaṟe iha echipfa. 34 Kyasia wandu wa kyisanzionyi wakamgaluo, wakagamba, “Soe luleicho uwawasonyi kye Kristo nai pfo mṟasa mlungana; na iyoe nugamba kuṙa kye Mana o Adamu nawaṟi iirio wuye? Mana-cho o Adamu nyi wui?” 35 Kyasia Yesu kawawia, “Ngyeela ikyeri na nyoe kyiyeri kyifuhi. Yendenyi kyiyeri-kyo muwoṙe ngyeela, meema ulachemuolokyia; kyipfa aichumia meemenyi aichi kundu aiyenda-pfo. 36 Iṙikyienyi ulya ekyeende ngyeela, kyiyeri-kyo akyeri na nyoe, kundu muiṙime iwa wana wa ngyeela.” Isho Yesu naleonguo, kayenda kakuṟiika wandu walammbone. 37 Maa chandu alewuta shindo shifoi kuṙo sha kyiṟiyisho mbele yawo wandu walemwiṙikyia-pfo; 38 kundu kyiafukyie kyindo kyilya moonguo shisuku Yesaya alegamba, “Mndumii, nyi wui aleiṙikyia mbonyi tsaṙu; na nyi wui Ruwa alemloṟa pfinya tsakye?” 39 Nyikyo kyitewe wo walaleiṙima iiṙikyia; cha kyipfa Yesaya nalegamba-se, 40 “Nalewagaluo shipfupfuṟe, mrima yawo kaiumiṟa; kundu meso gawo galawone, na mṙoe yawo ilamanye; wakangyigalukyia, ngawakyiṟa.” 41 Mbonyi-tsi Yesaya naletsionguo, cha kyipfa nalewona mng'ano okye, kasenda mbonyi tsakye. 42 Kyaindi maa kyiiṙi kya wandu wawoṙe rina kyiiṙi kya Wayuda kuwewoṙe wafoi walemwiṙikyia; indi kyipfa kya Mafarisayo waleonguo mbonyi tsakye kulawoṙe iṟikyia-ṟikyia-pfo, kundu walacheimo ikulunga na walya wawekyeyenda sinagoginyi. 43 Cha kyipfa walekunda iṟumisho nyi wandu kuta iṟumisho nyi Ruwa. 44 Yesu kakuilenga na ṟui lying'anyi kagamba, “Ulya angyiiṙikyia inyi, angyiiṙikyia inyi-pfo indi naiṙikyia ulya alengyiṙuma. 45 Na ulya angyiambuya inyi naambuya ulya alengyiṙuma. 46 Inyi ngyilecha kundu ngyiwe ngyeela ya wuyana, kundu orio mndu angyiiṙikyia inyi alakae meemenyi. 47 Na mndu kaicho malosho gako alagaoshe, inyi ngyechimwanduya-pfo; kyipfa ngyilecha kundu ngyianduye wuyana-pfo, indi ngyikyiṟe wuyana. 48 Ulya angyilega inyi, alaambilyie malosho gako, nawoṙe momwanduya; mbonyi-tso ngaonguo nyitso tsechimwanduya mfiri o furumia. 49 Cha kyipfa inyi ngyileonguo mbonyi tsa mrima oko tupu-pfo; indi Awu alengyiṙuma, oe nalengyiwia shindo ngyechigamba. 50 Na inyi ngyiichi iwawaso lyakye nyi moo o mlungana. Kyasia isho ngyionguo inyi, chandu Awu alengyiwia, nyisho ngyionguo.”
1 Kyasia, mṟumoe o Pasaka ulandeafukyie Yesu nalemanya kye kyiyeri kyakye kyewuka kunu wuyanenyi iyenda ko Awu, kyiwemshika. Na nalekunda walya wawekyemwosha kunu wuyanenyi, kawakunda mnu. 2 Na kyiyeri kya kyelya kya kyukonyi; Mokyiriinzi naleenenga Yuda, mana o Simion Isikariote, ngoo yemṟiinga. 3 Yesu aichi kye Awu namṙambikyie shoose na kye nawukyie ko Ruwa na oe naiyenda ko Ruwa, 4 nalewuka halya shelyenyi, kayenda mbai kawuta pfo nguwo tsakye, kaira kyitambaa, kakuinewa kyitsinyi. 5 Numa ya iho kawika mṟinga pakulyinyi, kawooka isanja wanalosho wakye maṙende, na igaanguo kui kyitambaa kyilya awekuinewie. 6 Kashika ko Simion Petiro na oe kammbesa, “Mndumii! Iyoe nungyisanja maṙende?” 7 Yesu kagaluo, kammbia, “Kyindo ngyiwuta ochikyimanya wulalu-pfo; kyaindi nochikyimanya numa ya iha.” 8 Petiro kammbia, “Iyoe ochingyisanja maṙende maa ale-pfo.” Yesu kammbia, “Ngyilandekusanje maṙende, ukyeri ura loko-pfo.” 9 Simion Petiro kammbia, “Mndumii, chi maṙende gako tupu-pfo, indi sanja na mawoko gako na mṙoe oko taa.” 10 Yesu kammbia, “Ulya amsambe awoṙe-se kyimaṙuma kyesamba maṙende-pfo, kyipfa namwilyi mmbiu oose; na nyoe momuila kyaindi chi moose-pfo.” 11 Cha kyipfa nalemanya ulya echimṟiinga; nyikyo kyitewe alegamba, “Chi moose muweelyi-pfo.” 12 Kyasia amuwasanje maṙende, na iṟaa nguwo tsakye na iṙamia-se halya-ndu waweilyiia kyelya, nalewawia, “Ngyesa momanya isho ngammbutia?” 13 Nyoe muingyilaga, “Mlosha” na “Mndumii;” moṙeṙa necha, kyipfa nyi wuṙo ngyikyeri. 14 Kyasia kokooya inyi, ngyikyeri Mndumii na Mlosha, ngamusanja maṙende, na wuṙo kyimmbari isanjana maṙende nyoe wenyi ko wenyi. 15 Cha kyipfa ngamumloṟa chandu mowuta; kundu chandu ngammbutia, na nyoe muwute kuṙo. 16 Ny'kyaloi ngammbia, mtumo ang'anyi kuta mndumii okye-pfo; maa moṙiko ndumo ang'anyi kuta ulya amṙuma-pfo. 17 Wulalu momanya isho ngammbia; agusu nyoe kokooya moshiwuta! 18 Ngyiṙeṙa mbonyi tsa nyoe moose-pfo. Ngyiichi walya ngyilewasambuṟa; kyaindi kyiṟeio kyiiṙime iafukyia; kyiṟeio kyilya kyigambie, “Ulya alelya kyelya kyako nawa mokyituwa oko.” 19 “Wookyia wulalu ngammbia shilya shechiwutika, kyiyeri-kyi shilandewutikye; kundu ilyi shechiwutika muiṙime iiṙikyia kye inyi nyi oe ulya ai pfo wookyia mlungana. 20 Ny'kyaloi ngammbia, ulya aambilyia mndu oose ngamṙuma, nangyiambilyia inyi; na ulya angyiambilyia inyi naambilyia ulya alengyiṙuma.” 21 Na Yesu amwonguo isho, naleiṟewe mrimenyi, kaṟingyishia echigamba, “Ny'kyaloi ngammbia, umwi onyu nechingyiṟiinga.” 22 Wanalosho wakaambuyana, walamanye nyi wui aweimsenda. 23 Na kuwewoṙe umwi o wanalosho wakye, aweṙamie kufuhi na Yesu; Yesu awemkundi. 24 Kyasia Simion Petiro kamtsinia, kammbia, “Wesa, nyi wui amsenda?” 25 Kyasia manalosho ulya katikyira kaaramia ura lo Yesu, kammbesa, “Mndumii, nyi wui?” 26 Kyasia Yesu kagaluo, kagamba, “Nyi mndu ulya ngyechikapa itongye kyitelenyi na imwenengyia.” Kakapa itongye kyitelenyi kalyienengyia Yuda, mana o Simion Isikariote. 27 Yuda amwambilyie itongye lyilya Satana kaiṙa na mrimenyi kokye. Kyasia Yesu kammbia, “Shindo uiwuta shiwute iwinyi.” 28 Maa kuwoṙe mndu oose kyiiṙi kya walya waweṙamie halya alemanya kyitewe kya immbia kuṙo-pfo. 29 Cha kyipfa walekusaṟa, kyipfa Yuda awekyekooma kyikuchu kya heleri, Yesu nammbia kye, guṟa shilya lukundi kyipfa kya mṟumoe-chu; ang'u nammbia kye naenengye wakyiwa kyindo. 30 Kyasia Yuda, amwambilyie itongye lyilya, kawuka halya kyiyeri kyilya kyilya. Na nyi-we kyio. 31 Yuda amfumie nja, Yesu nalegamba, “Wulalu Mana o Adamu nang'anyiso, na Ruwa nang'anyiso kyiiṙi kyakye. 32 Ruwa nechimng'anyisa mrimenyi kokye; na oe nechimng'anyisa cha ilyi. 33 Nyoe wana wako, hatsugai kyiyeri kyitutu ngyikyeri hamwi na nyoe; mochingyipfula; na chandu ngyilewia Wayuda kye, ‘Kulya-ndu ngyiyenda moiṙima icha na pfo-pfo’; na wuṙo wulalu ngyimmbia nyoe. 34 Ngyimuenenga iwawaso lyihya: ‘Mukundane.’ Chandu ngyilemukunda nyoe, na nyoe mukundane wuṙo. 35 Kuṙo wandu woose wechimanya kye nyoe mowa wanalosho wako, kokooya mokundana nyoe wenyi ko wenyi.” 36 Simion Petiro kammbia, “Mndumii, ny'kwi uiyenda?” Yesu kamgaluo, kagamba, “Kulya-ndu ngyiyenda oiṙima ingyiosha wulalu-pfo; kyaindi nongyiosha numa.” 37 Petiro kammbia, “Mndumii, ny'kyilyi inyi ngyilechiiṙima ikuosha wulalu? Inyi ngyechireka moo oko kyipfa kyapfo.” 38 Yesu kamgaluo, kammbia, “Ngyesa iyoe nochireka moo opfo kyipfa kyako? Ny'kyaloi ngakuwia, ilying'onyi lyechifuga ulangyikana kaṟaaṟu-pfo.”
1 “Maa mulaiṟewe mrimenyi konyu; muiṙikyie Ruwa, ngyiiṙikyienyi na inyi. 2 Kanyi ko Awu oko kuwoṙe kundu kufoi kokaa. Kyilawei kuṙo ngyiwechimmbia; kyipfa ngyindemuṟeyeṟia handu hekaa. 3 Kyasia inyi ngyindemuṟeyeṟia handu hekaa. Ngyechicha-se ngyimuṙuo koko; kundu handu ngyikyeri, na nyoe mukae ho. 4 Na kundu ngyiyenda nyoe muichi njia.” 5 Tomasi kammbia, “Mndumii, soe luichi kundu uiyenda-pfo; luichi kuṙa njia?” 6 Yesu kammbia, “Inyi nyi njia, na wuloi na moo. Mndu ekyecha na ko Awu, sile kui iiṙia koko-pfo. 7 Kokooya muwengyiichi inyi, muwechimanya Awu. Wookyia wulalu mumwichi, lyingyi-se momummbona.” 8 Filyipo kammbia, “Mndumii luloṟe Awu, kyilushikyie.” 9 Yesu kammbia, “Inyi ngyiwekyeri hamwi na nyoe mfiri yoose, iyoe ulangyimanye Filyipo? Angyiwona inyi nawona Awu. Kyasia iyoe nuigamba kuṙa ‘ululoṟe Awu?’ 10 Uiṙikyie kye inyi ngyikyeri kyiiṙi kya Awu, na Awu nakyeri kyiiṙi kyako? Isho ngyimuongoya wulalu chi makusaṟo gako inyi-pfo kyaindi nyi Awu ulya akyeri kyiiṙi kyako aiṟunda shilya akundi iṟunda. 11 Iṙikyienyi kye inyi ngyikyeri kyiiṙi kya Awu, na Awu nakyeri kyiiṙi kyako. Mulandeiṙikyie kyipfa kya ikyo iṙikyienyi kyipfa kya shilya ngyiwuta. 12 Ny'kyaloi ngammbia, ulya angyiiṙikyia inyi, shindo shilya ngyiwuta, na oe nechishiwuta; yee, na shing'anyi kuta isho nechiwuta cha kyipfa inyi ngyiyenda ko Awu. 13 Na nyoe, mukoterewa kyindo kyoose kyipfa mukyeri wanalosho wako, ikyo ngyechikyiwuta, kundu Awu nang'anyiso kyiiṙi kya Mana. 14 Mukoterewa kyindo kyoose kyipfa mukyeri wanalosho wako ngyechikyiwuta.” 15 “Mukongyikunda mochiosha kyilya mawawaso gako gakundi. 16 Na inyi ngyechiterewa Awu, na oe nechimuenenga Mtarami ungyi, kundu nakae na nyoe mṟasa mlungana. 17 Nyi oe Mumuyo o loi; ulya wandu wa wuyana walechiiṙima imwambililyia, cha kyipfa wammbonyi maa wamwichi-pfo; indi nyoe mumwichi, kyipfa nekyekaa konyu; na oe nechikaa mrimenyi konyu. 18 Ngyechimṙa ngoṙa-pfo. Ngyiicha na konyu. 19 Hatsugae kyiyeri kyitutu wandu wa wuyana walechingyiwona-se; indi nyoe mungyiwonyi. Na kyipfa inyi ngyiwoṙe moo, maa nyoe mochiwaṙa moo. 20 Mfiri ulya mochimanya kye inyi na Awu oko nyi kyindo kyimwi, na inyi na nyoe nyi kyindo kyimwi. 21 Ulya aambilyia mawawaso gako na igaosha, icho nyi oe angyikundi; na ulya angyikundi Awu oko nechimkunda; na inyi ngyechimkunda na imloṟa mbonyi tsako na pata.” 22 Yuda (chi oe Yuda Isikariote-pfo) kammbia, “Mndumii, kyawa kuṙa ukundi iṟingyishia mbonyi tsapfo koṙu na chi ko wandu wa wuyana-pfo?” 23 Yesu kagaluo, kammbia, “Mndu kangyikunda nechiosha kyilya malosho gako gakundi; na Awu oko nechimkunda; na soe lochicha na kokye, na iwika kyiṟaṟo kokye. 24 Mndu alangyikundi, ekyeosha kyilya malosho gako gakundi-pfo; na malosho-go mugaichuoe chi gako-pfo, indi nyi ga ulya alengyiṙuma.” 25 “Isho nyisho ngyilemuongoya kyiyeri-kyo ngyiwekyekaa konyu. 26 Kyaindi Mtarami-cho, Mumuyo-cho Mweele, ulya Awu echimṙika kui rina lyako, nechimulosha shoose, na imukumbuṟa shoose ngyilemmbia. 27 Ngamṙeeya ufoṟo. Ufoṟo loko ngamuenenga. Chandu ngyimuenenga chi wuṙo wuyana wokyeenenga-pfo. Mulaiṟewe mrimenyi konyu, maa mulawaṙe wuowu. 28 Muleicho kye inyi ngyilemmbia, ‘Ngyiyenda na ngyiicha-se na konyu.’ Kokooya muwengyikundi, muwechichihiyo kyipfa ngyiyenda ko Awu; cha kyipfa Awu nang'anyi kuta inyi. 29 Na wulalu ngamuongoya isho shilaafukyia kundu ilyi shechiafukyia muiṙime iiṙikyia. 30 Inyi ngyechiṙeṙa-se na nyoe shindo shifoi-pfo, cha kyipfa Satana, mchilyi o wuyana-wu naicha, na echiiṙima ingyiwutia kyindo-pfo. 31 Kyaindi wandu wa wuyana wamanye kye ngyikundi Awu; na shilya Awu alengyiwia, nyisho ngyiwuta. Nnjonyi luwukye iha.”
1 “Inyi nyi msabibu o loi, na Awu oko nyi oe mṙemi. 2 Orio mbaga ilekyekumbia ndunda ngyekyeimanya; na orio mbaga yekyekumbia ndunda ngyekyeianguo, kundu iengyeṟe ikumbia ndunda. 3 Nyoe momuila kyipfa kya mbonyi-tsi ngammbia. 4 Nyoe na inyi luwe kyindo kyimwi. Chandu mbaga ilechiiṙima ikumbia ndunda ilakuwoṙe msabibunyi; na wuṙo taa kyechiwa konyu mulandewe kyindo kyimwi na inyi. 5 Inyi nyi msabibu; nyoe nyi mbaga; ulya awa kyindo kyimwi na inyi, nekumbia ndunda tsifoi mnu; kyipfa ngyilai ho inyi moiṙima iwuta kyindo kyoose-pfo. 6 Mndu alandewe kyindo kyimwi na inyi nekyewiyitso cha mbaga na iuma; wandu wakatsisania na itsiwiyitsa moṙonyi tsikasenekyia. 7 Nyoe mukowa kyindo kyimwi na inyi, na malosho gako gakakaa mrimenyi konyu, terewenyi kyindo kyoose mukundi na nyoe mochienengo. 8 Kuṙo Awu oko neching'anyiso, kyipfa muikumbia ndunda tsifoi mnu; na nyoe mochiwa wanalosho wako. 9 “Chandu Awu alengyikunda inyi, na chandu ngyilemukunda nyoe, kaenyi ikundenyi lyako. 10 Mukoosha kyilya mawawaso gako gakundi, mochikaa ikundenyi lyako; chandu inyi ngyekyeosha mawawaso ga Awu oko na ikaa ikundenyi lyakye. 11 Ngamuongoya isho, kundu sia yako ikae mrimenyi konyu, na sia yanyu iafutsio. 12 Iwawaso lyako nyi ilyi, mukundane, chandu ngyilemukunda nyoe. 13 Kuwoṙe awoṙe ikunda lying'anyi kuta ilyi, lya mndu ireka moo okye kyipfa kya mbuya tsakye-pfo. 14 Nyoe mochiwa mbuya tsako, mukowuta shilya ngammbia. 15 Ngyimulaga-se watumo-pfo; cha kyipfa mtumo aichi kyindo mndumii okye ekyewuta-pfo; kyaindi ngamlaga mbuya; cha kyipfa shoose ngyileshiicho ko Awu oko ngamuongoya. 16 Chi nyoe mulengyisambuṟa inyi-pfo, indi nyi inyi ngyilemusambuṟa nyoe; kundu mundekumbia ndunda; na ndunda tsanyu tsiiṙime ikaa ho mfiri yoose; kundu orio kyindo moterewa Awu kui rina lyako namuenengye. 17 Ishi ngammbia nyoe, muiṙime ikundana.” 18 “Kokooya wandu wa wuyana wamsuo, manyenyi kye walengyisuo inyi kuwooka. 19 Kokooya nyoe muwei wandu wa wuyana, wawechimukunda; kyaindi kyipfa nyoe mulakyeri wandu wa wuyana, indi inyi ngyilemusambuṟa nyoe iwuka wandu wa wuyana, kyipfa kya ikyo wandu wa wuyana wamusuuye. 20 Kumbuonyi mbonyi tsilya ngyilemuongoya, kye mtumo ang'anyi kuta mndumii okye-pfo. Kokooya walengyipfulutsa nyashi, wechimpfulutsa nyashi nyoe; kokooya waleosha malosho gako, wechiosha ganyu taa. 21 Kyaindi ishi shoose wechimmbutia kyipfa kya rina lyako, cha kyipfa waichi ulya alengyiṙuma-pfo. 22 Kokooya ngyilalecha na iṙeṙa nawo wawechikumbuṟo kya wunyamaṟi wowo-pfo; kyaindi wulalu wekaria igamba kye waichi kye isho wawekyewuta nyi wunyamaṟi-pfo. 23 Ulya angyisuuye inyi nasuuye na Awu oko. 24 Wawechikumbuṟo kya wunyamaṟi wowo kokooya ngyilalewuta kyiiṙi kyawo shindo shilandewuto mndu ungyi oose-pfo; kyaindi wulalu wammbona shilya ngawuta, wakangyisuo inyi na Awu oko. 25 Kyaindi kundu kyindo kyilya kyikyiṟeie uwawasonyi lowo kyiafukyie, kyindo kyigambie, ‘Walengyisuo wulya.’ 26 Kyaindi kyiyeri-kyo Mtarami-cho echicha, ngyechimṙika iwuka ko Awu, Mumuyo-cho o loi awukyie ko Awu, oe nechingyiṟingyishia. 27 Na nyoe taa muingyiṟingyishia, cha kyipfa wookyia mawookyionyi muwekyeri hamwi na inyi.
1 “Mbonyi-tso ngamuongoya kundu mulacheṙetsa iiṙikyia. 2 Wechimuletsana na walya wekyeyenda masinagoginyi; yee loi kyiyeri kyiicha orio mndu aimbaaga echikusaṟa kye naiindia Ruwa kui iwuta kuṙo. 3 Na isho wechimmbutia cha kyipfa waichi Awu maa inyi-pfo. 4 Kyaindi ngamuongoya isho, kundu kyiyeri kyiyeri-kyo kyechicha mukumbuo kye inyi nyilemmbia. Ngyilemmbia isho wookyia mawookyionyi-pfo, cha kyipfa ngyiwekyeri hamwi na nyoe.” 5 “Kyaindi wulalu inyi ngyiyenda ko ulya alengyiṙuma, maa kuwoṙe umwi onyu aingyiwesa ny'kwi ngyiyenda-pfo. 6 Indi cha kyipfa ngammmbia isho fowa iichuo mrimenyi konyu. 7 Kyaindi inyi ngammbia shii loi; mochiwona kyiira inyi ngayenda; cha kyipfa inyi ngyilandeyende, Mtarami-cho echicha na konyu-pfo; indi inyi ngayenda, ngyechimṙika konyu. 8 Na oe kamcha nechiloṟa wandu wa wuyana kye wekyeṙeko kyiyeri wekyegamba kye waichi mbonyi tsa wunyamaṟi. Kye waichi kyiha kyikyeri kya sungusinyi na kye waichi mbonyi tsa ianduyo nyi Ruwa. 9 Oe nechiloṟa wandu wa wuyana kye wawoṙe wunyamaṟi, kyipfa walengyiiṙikyia inyi-pfo. 10 Kye wawoṙe ṙeko kui igamba waichi kyikyeri kya sungusinyi kyipfa ngyiyenda ko Awu, maa mochingyiwona-se-pfo. 11 Kye wechianduyo kyipfa Satana, mchilyi o wuyana-wu, amwanduyo. 12 Ngyiwoṙe shindo shifoi shemuongoya, kyaindi moiṙima ishienenga ṙaawa makusaṟonyi ganyu wulalu-pfo. 13 Kyaindi kyiyeri oe echicha, Mumuyo-cho o loi, nechimusongoya, namushukuye wuloi woose; cha kyipfa echiṙeṙa kui wuchilyi wokye amonyi-pfo, indi shoose echiicho neshionguo, na shindo shiicha nechimuongoya mbonyi tsakye. 14 Oe nechingying'anyisa inyi; cha kyipfa nechiicho shilya ngyekyegamba na imuongoya. 15 Na shoose Awu awoṙe nyi shako. Ny'kyo kyitewe ngagamba nechiicho shilya ngyekyegamba na imuongoya.” 16 “Hatsugae kyiyeri kyitutu na nyoe mochingyiwona-pfo; lyingyi-se hatsugae kyiyeri kyitutu na nyoe mochingyiwona.” 17 Kyasia wanalosho wakye waata wakawesana, “Mbonyi tsiha itso aigamba, ‘Hatsugae kyiyeri kyitutu na nyoe mochingyiwona-pfo, na lyingyi-se hatsugae kyiyeri kyitutu na nyoe mongyiwona?’ Na ‘Cha kyipfa ngyiyenda ko Awu?’ ” 18 Kyasia wakagamba, “Mbonyi tsiha itso aigamba, ‘hatsugae kyiyeri kyitutu?’ Luichi kyindo aigamba-pfo.” 19 Yesu nalemanya kye wawekundi immbesa; kawawesa, “Ny'kyo muiwesana, kye ngyilegamba, ‘hatsugae kyiyeri kyitutu na nyoe mochingyiwona-pfo; na lyingyi-se hatsugae kyiyeri kyitutu na nyoe mochingyiwona?’ 20 Ny'kyaloi ngammbia, nyoe mochilyia na ikapa ṟanyi, indi wandu wa wuyana wechichihiyo. Nyoe mochiwoṙo nyi fowa, kyaindi nyi fowa yanyu yechiwa sia. 21 Mndu mka kyiyeri-kyo aienengo mana, nekyewoṙo nyi fowa kyipfa kyiyeri kyakye kyelya wukyiwa kyaafukyia; kyaindi kamwenengo mana, ekyekumbuo-se wukyiwa wulya-pfo, kyipfa kya sia ya ifeo mndu wuyanenyi. 22 Kyasia nyoe wulalu muwoṙo nyi fowa; kyaindi inyi ngyechimmbona-se; na mrima yanyu yechichihiyo, na sia yanyu kuwoṙe mndu echimusoka-pfo. 23 Lyingyi-se mfiri ulya mochingyiwesa kyindo kyoose-pfo. Ny'kyaloi ngammbia, mukoterewa Awu kyindo kyoose nechimuenenga kui rina lyako. 24 Mṟasa wulalu mulandeterewe kyindo kui rina lyako-pfo. Terewenyi, na nyoe mochienengo; kundu muchihiyo nakamwi.” 25 “Isho ngamuongoya kui mbia. Kyiyeri kyiicha ngyilechiṙeṙa-se na nyoe kui mbia; kyaindi mbonyi tsa Awu ngyechimuongoya na pata. 26 Na mfiri-cho mochiterewa kui rina lyako; maa ngyimmbia kye inyi ngyechimuterewia ko Awu-pfo; 27 cha kyipfa Awu namukundi kyipfa nyoe mongyikunda inyi, na iiṙikyia kye inyi ngyilewuka ko Awu. 28 Ngyilewuka ko Awu, na inyi ngyilecha na kunu wuyanenyi. Lyingyi-se ngyiwuka kunu wuyanenyi; na iyenda ko Awu.” 29 Kyasia wanalosho wakye wakagamba, “Wulalu nuionguo na pata; uiṙeṙa-se kui mbia-pfo. 30 Wulalu lomanya kye nuichi shindo shoose; kuwoṙe kyimaṙuma kya mndu ikuwesa kyindo-pfo. Koikyo loiṙikyia kye nulewuka ko Ruwa.” 31 Yesu kawagaluo, kawawia, “Ngyesa moiṙikyia wulalu? 32 Kyiyeri kyiicha, nakyo kyamcha, kyiyeri mochinyanyaṟika orio mndu kanyi kokye, na ingyiṙa ngyimonyi. Kyaindi inyi ngyikyeri ngyimonyi-pfo, cha kyipfa Awu nakyeri hamwi na inyi. 33 Isho ngammbia muiṙime iwaṙa ufoṟo muwaṙanyi na inyi. Kunu wuyanenyi muwoṙe fowa; kyaindi kuwanzenyi; inyi ngyilewinga wuyana.”
1 Yesu nalegamba mbonyi-tso, kaambuya ruwewu, kagamba, “Awu, kyiyeri kyamshika. Ng'anyisa Mono-pfo, kundu Mono-pfo nakung'anyise iyoe; 2 chandu ulemwenenga momu o ichilyia wandu, kundu woose ulemwenenga nawaenengye moo o mlungana. 3 Na moo o mlungana nyi: ‘Wakumanye iyoe, Ruwa o loi kulawoṙe ungyi; na Yesu Kristo ulemṙuma.’ 4 Inyi ngyilekung'anyisa wuyanenyi, iṟunda ulengyiwia ngyiṟunde ngyilelyimarisa. 5 Na wulalu, Awu, ungying'anyise inyi hamwi na iyoe, kui kyiṟumi kyilya ngyiwewoṙe kyiyeri wuyana wulagumbo. 6 Walya ulengyienenga kunu wuyanenyi ngyilewashukuya kyiṟumi kyapfo. Wawekyeri wapfo, kowangyienenga, na malosho gapfo wekyegaosha. 7 Wulalu waichi kye shoose ungyienengyie shiwukyie kopfo. 8 Cha kyipfa malosho ulengyienenga ngyilewaṙambika; nawo wakagaambilyia, wakamanya loi kye ngyilewuka kopfo, wakaiṙikyia kye nyi iyoe ulengyiṙuma. 9 Inyi ngyiwaterewia iwo; ngyiterewia wandu wa wuyana-pfo; indi iwo ulengyienenga, cha kyipfa iwo nyi wako; 10 na woose wai wako nyi wapfo; na wai wapfo nyi wako, na inyi ngaṟumisho mrimenyi kowo. 11 “Maa inyi ngyikyeri-se wuyanenyi-pfo, kyaindi wo wakyeri wuyanenyi, na inyi ngyiicha na kopfo. Awu mweele, kui rina lyapfo ulengyienenga uwaringye iwa, kundu wawaṙane tapu chandu soe lukyeri. 12 Kyiyeri ngyiwekyeri hamwi nawo, inyi ngyilewaringa kui rina lyapfo ulengyienenga, ngawaambuya; maa kuwoṙe umwi owo aleṙeka-pfo, sile mana ulya o wuṙetsi, kundu kyiṟeio kyiafukyie. 13 Na wulalu ngyiicha na kopfo; na mbonyi-tsi ngyitsionguo wuyanenyi, kundu sia yako iafutsio mrimenyi kowo. 14 Inyi ngyilewaṙambika malosho gako; na wandu wa wuyana walewasuo kyipfa wo chi wa wuyana-pfo, chandu inyi ngyilakyeri o wuyana. 15 Inyi ngyiterewa kye uwawute kunu wuyanenyi-pfo indi uwaringye walaolotso nyi Satana. 16 Wo chi wandu wa wuyana-pfo, chandu inyi ngyilakyeri o wuyana. 17 Uwailyishe kui Ṙeṙo lyapfo. Mbonyi tsapfo nyitso wuloi. 18 Chandu ulengyiṙuma inyi wuyanenyi, na inyi nyi wuṙo ngyilewaṙuma wuyanenyi. 19 Na kyipfa kyawo ngakuṙambika kopfo ngyikuṟundie, kundu nawo wakuṙambikye kopfo wakuṟundie, wailyisho nyi Ṙeṙo lyapfo lyii lya loi. 20 “Maa chi iwo tupu ngyiwaterewia-pfo; kyaindi ngyiterewia na walya wechingyiiṙikyia kyipfa kya malosho gawo. 21 Woose wawaṙane tapu; chandu iyoe, Awu, ukyeri kyindo kyimwi na inyi, na inyi kyindo kyimwi na iyoe; iwo nawo wawe kyindo kyimwi na soe; kundu wandu wa wuyana waiṙime iiṙikyia kye nyi iyoe ulengyiṙuma. 22 Na inyi mng'ano ulya ulengyienenga ngyilewaenenga; kundu wawaṙane tapu chandu soe luwaṙanyi tapu. 23 Inyi ngyiwe kyindo kyimwi nawo, na iyoe uwe kyindo kyimwi na inyi, kundu wawaṙane tapu; na wandu wa wuyana wamanye kye nyi iyoe ulengyiṙuma, kowakunda wo chandu ulengyikunda inyi. 24 Awu, iwo ulengyienenga ngyikundi wakae handu hamwi na inyi orio handu ngyikyeri, waiṙime iwona mng'ano ulengyienenga; cha kyipfa nulengyikunda wookyia wuyana wulagumbo. 25 Awu, iyoe okyeanduya kulawoṙe ikundia, wandu wa wuyana walekumanya-pfo; kyaindi inyi ngyilekumanya, na iwo wamanya kye nyi iyoe ulengyiṙuma. 26 Na inyi ngyilewaloṟa iyoe nyi wui, lyingyi-se ngyechiengyeṟa iwuta kuṙo, kundu ikunda lyilya ulyiwoṙe koko lyikae mrimenyi kowo na inyi ngyiwe kyindo kyimwi nawo.”
1 Kyiyeri amwonguoe isho, Yesu nalefuma hamwi na wanalosho wakye iyenda molyolya o kyimfo kyekyelago Kyediron, handu hawewoṙe bustanyi, kaiṙa na ipfo bustanyinyi hamwi na wanalosho wakye. 2 Na Yuda, ulya awekundi imṟiinga, naweichi handu halya; cha kyipfa Yesu kafoi nawekyeyenda pfo hamwi na wanalosho wakye. 3 Kyasia Yuda, aṙuṙanyi na asikari na waṟundi wawewukyie ko wang'anyi wa makohanyi na Mafarisayo, kayenda pfo, waṙuṙe taa na shimii na shisha. 4 Kyasia Yesu, aichi shoose shechimmbutikyia, kafuma kulya bustanyinyi, kawawia, “Nyi wui muimpfula?” 5 Wo wakamgaluo, wakagamba, “Nyi Yesu o Nasareti.” Yesu kawawia, “Nyi inyi.” Yuda ulya alemṟiinga nawegoṟokyi hamwi nawo. 6 Kyasia kyiyeri alewawia, “Nyi inyi,” walewuya na numa, wakaoloka wanda. 7 Kawawesa-se, “Muipfula wui?” Wakagamba, “Yesu o Nasareti.” 8 Yesu kagaluo, kagamba, “Ngamummbia kye nyi inyi. Kyasia kokooya muingyipfula inyi, lekyienyi iwa wayende.” 9 Kundu kyiafukyie kyindo kyilya alekoagamba, “Walya ulengyienenga ngyileṙetsa maa umwi-pfo.” 10 Kyasia Simion Petiro nawewoṙe ushu, kalusoṟomuo, kamanya nalo mtumo o Mkohanyi ang'anyi kuta woose, kamṙumbuo kuṙwi ko kulyoe. Na mtumo ulya nawekyelago Malyiko. 11 Kyasia Yesu kawia Petiro, “Wiyiṟia ushu-lo ipfo kyiṟandenyi. Ngyesa, nokusaṟa ngyikundi ituurika chandu Awu angyiṟeyeṟie ngyituurikye-pfoe?” 12 Kyasia asikari walya na msongoru o wayuda walewaṙa Yesu, wakampfunga. 13 Wakamṙuo ko Anasi kuwooka, cha kyipfa nawekyeri watoe o Kayafa, ulya awekyeri Mkohanyi ang'anyi kuta woose maka ulya. 14 Na Kayafa nyi oe alewia Wayuda kye kyiwechia mndu umwi napfe kyipfa kya wandu wengyi. 15 Petiro na manalosho ungyi wakayenda ko Yesu. Na manalosho-cho naweichio nyi Mkohanyi ang'anyi kuta woose. Kyipfa kya ikyo oe na Yesu wakaiṙa na handu hesanzia ha numba ya Mkohanyi-cho ang'anyi kuta woose. 16 Kyaindi Petiro kagoṟoka nja moongonyi. Kyasia manalosho ulya ungyi aweichio nyi Mkohanyi ang'anyi kuta woose kafuma, kaṙeṙa na kyisinga kyekyeringa moongo, kaitsa Petiro na numba. 17 Kyasia kyisinga kyilya, kyiwewoṙe iṟunda lyeringa moongo, kyikawia Petiro, “Ngyesa iyoe ui umwi o wanalosho wa mndu-chu-pfoe?” Na oe kagamba, “Chi inyi-pfo.” 18 Na watumo walya wa waṟundi wawegoṟokyi mbai weoṙa moṙo; kyipfa kuwewoṙe mbeho. Petiro na oe nawekyeri hamwi nawo, echioṙa moṙo. 19 Kyasia Mkohanyi ulya ang'anyi kuta woose kawesa Yesu mbonyi tsa wanalosho wakye, na mbonyi tsa malosho gakye. 20 Yesu kamgaluo, kagamba, “Inyi ngaṙeṙa na wandu wa wuyana na pata. Mfiri yoose ngyileloshia sinagoginyi na hekalunyi, handu Wayuda woose wekyesanzia; maa ngyileonguo kyindo kyoose kui kyiṟika-pfo. 21 Ny'kyilyi ungyiwesa inyi? Wesa walya waleicho ny'kyikyi ngyilewawia; wo waichi kyindo ngyileonguo.” 22 Kyasia kyiyeri alegamba isho, mṟundi umwi kyiiṙi kya walya wawegoṟokyi kufuhi kakapa Yesu ukofi, echigamba, “Nuigaluo kuṙo Mkohanyi ang'anyi kuta woose?” 23 Yesu kamgaluo, kagamba, “Kokooya ngaṙeṙa uwicho, uṟingyishie wuwicho woko; indi kokooya ngaṙeṙa necha, ny'kyilyi ongyikapa ukofi?” 24 Kyasia Anasi kamṙuo ko Kayafa ampfungye. 25 Simion Petiro nawekyeri pfo echioṙa moṙo. Kyasia wakammbia, “Ngyesa iyoe ui umwi o wanalosho wakye-pfoe?” Na oe kakana, kagamba, “Chi inyi-pfo.” 26 Mtumo umwi kyiiṙi kya walya wa Mkohanyi ang'anyi kuta woose, na oe nyi o kyishari kya ulya Petiro alemṙumbuo kuṙwi, kagamba, “Ngyilekuwona kulya bustanyinyi hamwi na oe-pfoe?” 27 Kyasia Petiro kakana-se, na cha ilyi ilying'onyi lyikafuga. 28 Kyasia wakawuta Yesu ko Kayafa wakamṙuo mṟasa numba ya wuchilyi iwekyelago Praitorio. Napfo kukokya, kyaindi wo waleiṙa na kulya numbenyi-pfo, walachefana kyimṟumoe, wachelemo ilya shelya sha mṟumoe ulya o Pasaka. 29 Kyasia Pilato kafumia nja, kagamba, “Mogamba wuwicho wo mndu-chu ny'kyikyi?” 30 Wakamgaluo, wakammbia, “Kokooya ichu alawewoṙe wuwicho luwechimwende na kopfo-pfo.” 31 Kyasia Pilato kawawia, “Mṙuonyi nyoe, mundemwanduya chandu uwawaso lonyu luwawasie!” Wayuda wakammbia, “Soe luwoṙe momu o iwaaga mndu-pfo.” 32 Kundu kyiafukyie kyindo kyilya Yesu alekyigamba, echiloṟa nyi upfu lo mbaṟe iha echipfa. 33 Kyasia Pilato kaiṙa-se na kulya numbenyi ya wuchilyi, kalaga Yesu, kammbia, “Ngyesa iyoe nyi Mangyi o Wayuda?” 34 Yesu kamgaluo, kagamba, “Iyoe nuigamba kuṙo kui makusaṟo gapfo, ang'u wandu wengyi walekuwia mbonyi tsako?” 35 Pilato kagaluo, kagamba, “Nokusaṟa kye inyi nyi Myuda? Wandu wa uruka lopfo na wang'anyi wa makohanyi nyiwo walekuende na koko. Ny'kyikyi ulewuta?” 36 Yesu kagaluo, kagamba, “Wumangyi woko chi wo wuyana-wu-pfo. Kokooya Wumangyi woko wuwekyeri wo wuyana-wu, waṟundi wako wawechikapana kyipfa kyako, kundu wasongoru wa Wayuda walaiṙime ingyiwaṙa. Kyaindi Wumangyi woko chi wo iha-pfo.” 37 Kyasia Pilato kammbia, “Kokooya nyi wuṙo iyoe nyi Mangyi-ng'ue?” Yesu kagaluo, kagamba, “Nogamba kye inyi nyi Mangyi. Ngyilefeo kunu wuyanenyi kyipfa kya kyindo kyimwi tupu, ionguo mbonyi tsa loi. Orio mndu aichi mbonyi-tso tsa loi nekyeosha shilya ngyekyegamba.” 38 Pilato kammbia, “Mbonyi tsa loi ny'kyikyi?” Pilato amṙeṙe na Yesu kawuya-se na ko Wayuda, kawawia, “Inyi ngyiwonyi ṙeko lyoose ko mndu-chu-pfo. 39 Kyaindi muichiwie inyi ngyimpfunguye mndu umwi kyiyeri kya Pasaka. Kyasia mukundi ngyimpfunguye Mangyi o Wayuda?” 40 Wakakalagatsa-se, wakagamba, “Chi ichu-pfo! Lukundi Baraba.” Na Baraba-cho nawei msokyi.
1 Kyasia Pilato kawia asikari wawute Yesu halya wandemkapa na ngowa. 2 Na asikari-wo wakaoka oṟo ya msha wakaṟika Yesu mṙoenyi kokye, wakamṟika na nguwo ya kyimaande-maande. 3 Wakayenda halya-ndu awekyeri, wechigamba, “Lokuiṟikyiṟa, Mangyi o Wayuda!” Wakamkapa ngofi. 4 Numa ya iho Pilato kafumia-se nja, kawawia, “Mndu-chu ngyimwende na konyu, muiṙime imanya kye inyi ngyiwonyi ṙeko lyoose kokye-pfo.” 5 Naaho-ng'u Yesu kafumia nja, aṟee oṟo iya ya msha, na nguwo iya ya kyimaande-maande. Pilato kawawia, “Lanyoe! Mndu ulya aichu iha!” 6 Kyasia wang'anyi walya wa makohanyi na waṟundi wawo kyiyeri walemmbona, walekalagatsa, wechigamba, “Mkapie msalabenyi! Mkapie msalabenyi!” Pilato kawawia, “Mṙuonyi nyoe, mundemkapia msalabenyi; cha kyipfa ngyiwonyi ṙeko kokye-pfo.” 7 Wayuda wakamgaluo, wakagamba, “Koṙu soe mndu o mbaṟe-i nawaṟi ipfa, cha kyipfa nalekuloṟa oe nyi Mono-Ruwa.” 8 Kyasia kyiyeri Pilato aleicho mbonyi-tso kaengyeṟa iowuo. 9 Kaiṙa-se na kulya numbenyi ya wuchilyi, kawia Yesu, “Iyoe nuwukyie kwi?” Kyaindi Yesu alemgaluo kyindo-pfo. 10 Kyasia Pilato kammbia, “Uiṙeṙa na inyi-pfoe? Uichi ngyiwoṙe wuiṙimi wo ikupfunguo hamwi na wuiṙimi wo ikukapia msalabenyi?” 11 Yesu kamgaluo, kagamba, “Iyoe uwechiwaṙa wuiṙimi woose wo ingyichilyia, kokooya Ruwa alawekuenengyie wuchilyi-wo-pfo. Koikyo icho angyiende na kopfo nawoṙe ṙeko lying'anyi kuta.” 12 Na wookyia kyiyeri-kyo Pilato kakunda impfunguo; kyaindi Wayuda wakakalagatsa, wechigamba, “Kopfunguo ichu, iyoe chi mbuya ya Kaisari-pfo. Orio mndu aikuloṟa cha ilyi oe nyi mangyi akyeri ura lo Kaisari-pfo.” 13 Kyasia kyiyeri Pilato aleicho mbonyi-tso, nalefumiṟia Yesu nja, kaṙamia kyiṙinyi kyakye kyeanduya, handu hawehaale magoe gang'anyi, hekyelago Gabata, ko mṙeṙie o Kyiebrania. 14 Na nyi-we mfiri o ikuṟeyeṟa ko mṟumoe o Pasaka, kyiyeri kya saa tsiṟandaaṟu tsa kyingoto. Kawawia, “Lanyoe, Wayuda. Aichu Mangyi onyu!” 15 Kyasia wakakalagatsa, wechigamba, “Mmbute iha! Mmbute iha! Mkapie msalabenyi!” Pilato kawawia, “Ngyesa mangyi onyu ngyimkapie msalabenyi!” Wang'anyi wa makohanyi wakamgaluo, wakammbia, “Soe luwoṙe mangi sile Kaisari-pfo.” 16 Kyasia Pilato kawaṙambika Yesu kundu nakapio msalabenyi; nawo wakamwambilyia. 17 Yesu kafuma, akuṙikyie msalaba okye, mṟasa handu hawekyelago, “Ipoṟong'u” ang'u kui mṙeṙie o Kyiebrania, Golyigota. 18 Wakamkapia msalabenyi ipfo Golyigota, hamwi na wandu wengyi wawi, umwi ura-lu na umwi ura-lu, na Yesu makyiṙi-gawi. 19 Na Pilato kaachikyia kyiṟeio, kakyiwikyia halya msalabenyi, kyigambie: “YESU O NASARETI, MANGYI O WAYUDA.” 20 Kyasia kyiṟeio-kyo kyilewono nyi wandu wafoi kyiiṙi kya Wayuda, kyipfa halya-ndu Yesu alekapio msalabenyi nyi-we kufuhi na mṟi; na kyiṟeio-kyo kyiwekyeri kui mṙeṙie iṟaṟu: Kyiebrania, Kyilatin na Kyikyiṟikyi. 21 Kyasia wang'anyi wa makohanyi na Wayuda wakawia Pilato, “Ulaṟeie ‘Mangyi o Wayuda’; ṟeia chandu alegamba ‘Inyi nyi mangyi o Wayuda.’ ” 22 Pilato kagaluo, kagamba, “Ngyeilacha kyilya ngamṟeie-pfo.” 23 Na asikari walya kyiyeri walekapia Yesu msalabenyi, waleira nguwo tsakye, wakatsigawa kaana, orio asikari ugawi lokye; na kanzu taa. Kyasia kanzu iya iwengyishone-pfo, iwengyilungye-lungye tupu wookyia wuye mṟasa wanda. 24 Kyasia wakawiana, “Lulairanduo, kyaindi luikapie kuṟu kuha, lumanye yechiwa ya wui. Kundu kyiṟeio kyiafukyie, kyilya kyigambie, ‘Walegawa nguwo tsako, na ikunya lyako walelyikapia kuṟu kuha.’ ” Nyi wuṙo asikari walya walewuta. 25 Na halya-ndu msalaba o Yesu uwekyeri hawegoṟokyi mama o Yesu na mono-wama o wamae, Maria, mka o Kyileopa, na Maria Makyidalena. 26 Kyasia kyiyeri Yesu alewona wamae, na manalosho ulya awemkundi agoṟokyi kufuhi, nalewia wamae, “Mama, mmbutie cha nyi mono-pfo.” 27 Numa ya iho kawia manalosho ulya, “Mmbutie cha nyi womoo.” Na wookyia kyiyeri kyilya manalosho ulya kamṙuo kanyi kokye. 28 Isho shoose shammbutikye, na Yesu aichi kye shoose shammbutika kundu kyiṟeio kyiafukyie, nalegamba, “Ngyiwoṙo nyi nyoṙa.” 29 Na halya hawewoṙe pakulyi iwoṙe mpfinyo uwetarang'ia. Kyasia wakawika mpfinyo ulya uwetarang'ia indonyi lyekyeongyia mṟinga wakalyiwikyia kyiṙinyi kyikyeri cha mtemu, wakawikyia Yesu ṙumbunyi kokye. 30 Yesu amwambilyie mpfinyo ulya uwetarang'ia na iunyo, nalegamba, “Kyammba chandu kyiwaṟi iwa.” Kaaramtsa mṙoe okye, kalekyia moo. 31 Kyasia Wayuda, kyipfa nyi mfiri o ikuṟeyeṟa lya mfiri o onyonya, na kundu mmbiu ilakae msalabenyi mfiri o onyonya, (cha kyipfa mfiri ulya o onyonya uweng'anyi), waleterewa Pilato maṙende ga Yesu na ga walya wawewakapie halya msalabenyi gafunjo-funjo, wawuto halya msalabenyi. 32 Kyasia asikari wakayenda, wakafunja maṙende ga wandu walya wawi wawewakapie msalabenyi hamwi na Yesu. 33 Kyaindi kyiyeri waleyenda halya-ndu Yesu awekyeri na iwona kye ampfa, walemfunja maṙende-pfo; 34 kyaindi asikari umwi nalemkapa pfumu uwarinyi kokye; na cha ilyi hakawuka samu na mṟinga. 35 (Na ulya alewona kaṟingyishia, na wuṟingyishi wokye nyi wo loi, na oe naichi kye nagamba loi kundu na nyoe muiṙime iiṙikyia). 36 Cha kyipfa isho shilewutika kundu kyiṟeio kyiafukyie, “Kuwoṙe fuo lyakye lyechifunjo-pfo.” 37 Lyingyi-se kyiṟeio kyingyi kyagamba, “Wechiwona ulya walemkapa pfumu.” 38 Isho shoose shammbutikye Yosefu awukyie Arimataya, na oe nyi manalosho o Yesu, (kyaindi kui kyiṟika, kyipfa kya iowuo Wayuda), naleterewa Pilato momu kundu nawute mmbiu o Yesu halya msalabenyi. Na Pilato kamwenenga momu. Kyasia kayenda, kawuta mbiu ulya halya msalabenyi. 39 Nikodemo na oe kayenda, (ulya alekoayenda ko Yesu mfiri ya numa), aṙuṙe cha shilo makumi gaṟaaṟu sha shindo shekyeshio shindonyi shingyi kundu shilanyamaṟikye. 40 Kyasia wakaṙuo mmbiu ulya o Yesu, wakauaṟahia sanda na iushia mafuṙa gekyepfaama necha, chandu Wayuda waweichiwie iwuta kyiyeri-kyo waiṟika mndu. 41 Na halya-ndu alekapio msalabenyi hawewoṙe bustanyi, na ipfo bustanyinyi kuwewoṙe kyilome kyihya, kyilawendeṟiko mndu. 42 Kyipfa Wayuda waweikuṟeyeṟa ko mfiri o onyonya, wakawika Yesu kulya kyilomenyi, kyipfa kyiwekyeri kufuhi.
1 Na mfiri o kuwooka o juma Maria Makyidalena naleyenda kulya kyilomenyi, ngamenyi utuko, kyiyeri kulandekye necha; kawona igoe lyilya lyilyiwute halya kyilomenyi. 2 Kyasia kayenda eṙicha, kashika ko Simion Petiro na ko manalosho ulya ungyi Yesu awemkundi, kawawia, “Wawuta Mndumii Yesu kulya kyilomenyi; maa luichi kundu wammbikyia-pfo.” 3 Petiro kafuma na manalosho ulya ungyi, wakayenda kulya kyilomenyi. 4 Wakayenda weṙicha woose wewawi; na manalosho ulya ungyi kaṙicha kuta Petiro, kawa o kuwooka ishika halya kyilomenyi. 5 Kaarama na iimemia kulya kyilomenyi, kawona pfo shiṙami shilya sha sanda; kyaindi aleiṙa napfo-pfo. 6 Kyasia Simion Petiro kacha numa yakye, kaiṙa na kulya kyilomenyi; kaambuya shiṙami shilya shiwekyeri pfo; 7 na kyitambaa kyilya kyiwekyeri mṙoenyi kokye kyiwekyeri handu hamwi na shiṙami shilya-pfo, indi kyiwekyiumbie-umbie haleshi. 8 Naaho manalosho ulya ungyi awekyeri o kuwooka ishika halya kyilomenyi na oe kawona na iiṙikyia. 9 Cha kyipfa walekowammanya kyiṟeio kyiwegambie kye Yesu nawaṟi iṟuka-pfo. 10 Kyasia wanalosho wakayenda-se kanyi kowo. 11 Kyaindi Maria nawegoṟokyi kufuhi na kyilome kyilya, ura lo nja, echilyia. Kyasia echilyia kuṙo, nalearama na iimemia kulya kyilomenyi. 12 Kawona malaika wawi, waṟee nguwo ngiilyi, waṙamie, umwi ura lo mṙoenyi na umwi ura lo maṙende lo halya-ndu mmbiu o Yesu uwemlaṟe. 13 Nawo wakammbia, “Nuilyilyia kyi?” Kawawia, “Kyipfa wawuta Mndumii oko iha; maa ngyiichi kundu wammbikyia-pfo.” 14 Na amgambe kuṙo, kainduka, kawona Yesu agoṟokyi, indi alamanye kye nyi Yesu. 15 Yesu kammbia, “Nulyilyia kyi? Nupfula wui?” Na Maria, akusaṟie kye nyi moambuya bustanyi, kammbia, “Mndumii, kokooya nyi iyoe ommbuta kunu kyilomenyi, ngyiwia nyi kwi ommbikyia, na inyi ngyechimmbuta pfo.” 16 Yesu kammbia, “Maria.” Oe kainduka, kammbia kui mṙeṙie o Kyiebrania “Raboni! Kyimwi na igamba, ‘Mlosha oko.’ ” 17 Yesu kammbia, “Ulangyipaaye, cha kyipfa ngyilandeṙo na ruwewu ko Awu-pfo. Kyaindi yenda ko wana wa wama wako uwawie ngyiiṙo na ruwewu ko Awu oko na oe nyi Awu onyu, ko Ruwa oko na oe nyi Ruwa onyu.” 18 Maria Makyidalena kayenda, kaongoya wanalosho mbonyi kagamba, “Ngawona Mndumii Yesu, na nyi oe angyiwia ishi ngyimuongoya.” 19 Kyukonyi, mfiri ulya o kuwooka o juma; na halya-ndu wanalosho wawekyeri moongo iwengyishingye kyipfa kya iowuo Wayuda, Yesu kacha kagoṟoka makyiṙi-gawi gawo, kawawia, “Ufoṟo lukae konyu.” 20 Na oe amgambe kuṙo, kawaloṟa mawoko gakye na uwari lokye. Kyasia wanalosho walya wakachihiyo kyiyeri walewona Mndumii Yesu. 21 Yesu kawawia-se “Ufoṟo lukae konyu. Chandu Awu alengyiṙuma inyi, na inyi ngyimṙuma nyoe.” 22 Na oe amgambe kuṙo, kawaumuya mṟufui, kawawia, “Ambilyienyi Mumuyo Mweele. 23 Mndu oose mochimhooṟia wunyamaṟi nechihooṟio loi; na ulya mulamhooṟia echihooṟio-pfo.” 24 Kyaindi umwi o walya ikumi na wawi Tomasi, awekyelago-se, (Wana wawafee wawi mfiri umwi) awekyeri na woṙoe kyiyeri Yesu alecha-pfo. 25 Kyasia wanalosho walya wengyi wakammbia, “Lowona Mndumii Yesu.” Kawawia, “Inyi ngyilandewone ngoru tsa msemaari mawokonyi kokye, na iwaṙa halya-ndu msemaari ilemtocha, na iwaṙa uwarinyi kokye halya-ndu pfumu lyilemtocha, ngyechiiṙikyia maa ale-pfo.” 26 Kyasia, hamwiṙe mfiri nyanya, wanalosho wakye wawekyeri-se numba, na Tomasi nawekyeri hamwi nawo. Yesu kacha, na moongo iwengyishingye. Kagoṟoka makyiṙi-gawi gawo, kagamba, “Ufoṟo lukae konyu.” 27 Numa ya iho kawia Tomasi, “Goṟuo kuwoko kopfo; ambuya mawoko gako, waṙa uwarinyi koko; molawe mndu alaiṙikyie, indi aiṙikyie.” 28 Tomasi kagaluo, kammbia, “Mndumii oko na Ruwa oko!” 29 Yesu kammbia, “Iyoe, kyipfa ongyiwona, noiṙikyia. Wagusu walya walawonyi kyaindi wakaiṙikyia.” 30 Kyasia kuwoṙe shiṟiyisho shingyi shifoi Yesu aleshiwuta mbele ya wanalosho wakye, shilashiṟeie kunu kyitapunyi. 31 Kyaindi ishi shileṟeio, kundu muiṙime iiṙikyia kye Yesu nyi oe Kristo, Mono-Ruwa; na kui iiṙikyia muwone moo o mlungana kui rina lyakye.
1 Numa ya isho Yesu nalekuṟingyishia-se ko wanalosho wakye, halya nduwenyi yekyelago Tiberia. Na oe nalekuṟingyishia kuṙi: 2 Simion Petiro, Tomasi awekyelago-se, (Wana wawafee wawi mfiri umwi), Natanaelyi awukyie Kana ya Galyilaya, wana wa Sebedayo, na wanalosho wengyi wawi, wawekyeri hamwi na oe. 3 Simion Petiro kawawia, “Ngyindeṙega makunga.” Nawo wakammbia, “Na soe lochiyenda hamwi na iyoe.” Kyasia wakafuma, wakaṙooya ngalawenyi; indi kyio kyilya walewaṙa ikunga maa lyimwi-pfo. 4 Na lyilya kulekya, Yesu nalegoṟoka mbai ya nduwa, kyaindi wanalosho walemanya kye nyi oe-pfo. 5 Kyasia Yesu kawawia, “Wana wako, muwoṙe kyindo kyelya?” Wakamgaluo, wakammbia, “Ote.” 6 Kawawia, “Wikyenyi iṟambika ipfo mṟingyenyi ura lo kulyoe lo ngalawa, na nyoe mochiwaṙa makunga.” Wakawuta chandu Yesu alegamba indi kyiyeri-kyo walaiṙime ilyikuruo-se kyipfa kya makunga gafoi. 7 Kyasia manalosho ulya Yesu awemkundi kawia Petiro, “Nyi Mndumii Yesu.” Na Simion Petiro, kyiyeri aleicho kye nyi Mndumii Yesu, kakuinewa mkoṟoṟi okye (kyipfa nawei kyiṟanguoe), kashoongyia kulya nduwenyi. 8 Na wanalosho walya wengyi wakacha wakyeri ngalawenyi ingyi, wakyeri cha meta magana gawi wamarise iambaṙa nduwa iya, nawo wechikuruo iṟambika lyilya lyiichuo makunga. 9 Kyasia kyiyeri waleshika mbai ya nduwa, walewuka kulya ngalawenyi, wakawona moṙo o makaa, na iho moṙonyi hawehawikyie makunga na mkate. 10 Yesu kawawia, “Endenyi na iha makunga maata mogawaṙa wulalu kuṙi.” 11 Kyasia Simion Petiro kaṙooya ngalawenyi, kakuruo iṟambika lyilya na handu hagaṙutsu, lyiichuo makunga gang'anyi, igana makumi gataanu na gaṟaaṟu; na maa chandu gawefoi kuṙo, iṟambika lyilya lyileranduka-pfo. 12 Yesu kawawia, “Nnjonyi mususuo.” Maa kuwoṙe mndu kyiiṙi kya wanalosho walya alekaria immbesa oe nyi wui-pfo; waichi kye nyi Mndumii Yesu. 13 Yesu kayenda kaira mkate, kawaenengyia, na makunga taa. 14 Koikyo kyikawa Yesu nawonekyia wanalosho wakye lya kaṟaaṟu numa ya iṟuka ko wapfu. 15 Kyasia wamlye, Yesu kawia Simion Petiro, “Simion mana o Yohane, ungyikundi kuta iwa?” Kammbia, “Yee, Mndumii, iyoe nuichi kye ngyikukundi.” Kammbia, “Ambuya shiondo shako.” 16 Kammbia-se lya kawi, “Simion mana o Yohane, ungyikundi?” Kammbia, “Iye, Mndumii, iyoe nuichi kye ngyikukundi.” Kammbia, “Lyisa moondo gako.” 17 Kammbia-se lya kaṟaaṟu, “Simion mana o Yohane, ungyikundi?” Kammbia, “Mndumii, iyoe nuichi shoose; iyoe nuichi kye ngyikukundi.” Yesu kammbia, “Ambuya moondo gako.” 18 Kagamba, “Ny'kyaloi, kakuwia, kyiyeri uwekyeri manakye, muwekyekuṟeyeṟa na iyenda kundu koose ukundi; kyaindi kyiyeri ochikuo, nochigoṟuo mawoko gapfo, na mndu ungyi nechikuwutia kyilya akunda na ikuṙuo kundu ulakundi.” 19 Kaonguo mbonyi-tso iloṟa nyi upfu lo mbaṟe iha Petiro echipfa naenengye Ruwa kyiṟumi. Na Yesu amwonguo isho, kawia Petiro, “Ngyiosha.” 20 Petiro kainduka kawona manalosho ulya awemkunde nyi Yesu echiwaosha (ulya alearamia Yesu kyiyeri kya ilya kyelya kya kyukonyi, kagamba, “Mndumii, nyi wui aikuṟiinga?”) 21 Kyasia Petiro, kawona manalosho-cho, kawia Yesu, “Mndumii, aa ichu nechiwutio kyi?” 22 Yesu kammbia, “Kokooya ngyikundi ichu nawaṙe moo mṟasa kyiyeri ngyechicha, kyikuwaṟi kyi iyoe? Iyoe ngyiosha.” 23 Kyasia mbonyi-tso tsikaṙunganana ko walya wawekyeosha Yesu kye manalosho ulya echipfa-pfo. Kyaindi Yesu alewawia kye echipfa-pfo indi nalegamba, “Kokooya ngyikundi ichu nawaṙe moo mṟasa kyiyeri ngyechicha, ikyo kyakuenenga kuṙa wukyiwa?” 24 Ichu nyi manalosho ulya aṟingyishia na iṟeia mbonyi-tsi; na soe luichi kye wuṟingyishi wokye nyi loi. 25 Kuwoṙe shindo shingyi shifoi Yesu alewuta, shilaleṟeio, kyipfa ngakusaṟa shiweṟeio shoose wuyana uwechiwaṙa handu hewikyia shitapu-sho shoose-pfo.
1 Tofilo Mkunde, kyitapu kyilya kya kuwooka ngyilekuṙikyia ngyileṟeia mbonyi tsa shindo shoose Yesu alewuta na ilosha. 2 Mṟasa mfiri ulya aleṙoso na wuye ruwewu, amloṟe kui Mumuyo Mweele wasu walya alewasambuṟa. 3 Walya alekuṟingyishia kowo, kui iwuta shindo shifoi, numa ya ilyiso wukyiwa, kye nai na moo; echiwawonekyia kyiyeri kya mfiri makumi gaana, na ionguo mbonyi tsa Wumangyi wo Ruwa. 4 Na kyiyeri awekyeri nawo kyisanzionyi nalewawia walawukye Yerusalemu, kyaindi waweṙelyie kyiteṟio kya Awu, kyiteṟio ngyilemuongoya mbonyi tsakyo; 5 kye Yohane nalepatisa kui mṟinga, indi nyoe mochipatiso kui Mumuyo Mweele numa ya mfiri-i ngyaangu. 6 Kyasia kyiyeri wawekyeri na Yesu kyisanzionyi, wakammbesa, “Ngyesa, Mndumii kyiyeri-kyi nyi lyo-ndu uiwiyiṟia Isiraelyi Wumangyi?” 7 Kawawia, “Chi iṟunda lyanyu imanya shiyeri Awu awikyie sile oe amonyi-pfo. 8 Kyaindi mochiambilyia pfinya, Mumuyo Mweele kamcha na konyu, na nyoe mochingyiṟingyishia Yerusalemu, na urukyenyi loose lo Wayuda, na Samaria, mṟasa matsitsionyi ga uruka.” 9 Amgambe isho, kyiyeri waweimwambuya kairo, ipuchi lyikammbuta mbele yawo. 10 Kyiyeri waweiitukuya ruwewu karii, kyiyeri aweiyenda, wandu wawi wakagoṟoka kufuhi nawo, waṟee nguwo tsa uwiṟo, 11 wakagamba, “Nyoe wandu wa Galyilaya, ny'kyilyi muiambuya ruwewu? Yesu-chu aṙoo iwuka konyu iyenda wuye ruwewu, newuya chandu mommbona echiyenda ruwewu.” 12 Numa ya iho wakawuya na Yerusalemu iwuka fumvu lyiwekyelago lya Mseituni, lyikyeri kufuhi na Yerusalemu, cha kyilometa kyimwi kuṙi. 13 Na lyilya waleshika Yerusalemu, wakaṙooya kai, kundu wawekyekaa: Petiro, Yohane, Yakobo, Anderea, Filyipo na Tomasi, Baritolomayo na Matayo, Yakobo o Alyifayo, Simion Selote, na Yuda o Yakobo. 14 Iwa woose wawei kyindo kyimwi kyiiṙi kya iterewa, hamwi na waka na Maria, wama o Yesu, na wana wa wamae. 15 Mfiri iya Petiro kagoṟoka kyiiṙi kya walya wawekyeosha Yesu (itala lyawo cha igana na makumi gawi), 16 kagamba, “Wana wa wama, kyiwewaṟi shiṟeio shiele shiafukyie, shiṟeio Mumuyo Mweele aleshionguo kui ṙumbu lya Dawidi, mbonyinyi tsa Yuda, alesongoya walya walewaṙa Yesu. 17 Cha kyipfa nawemtale hamwi na soe, kagawio iṟunda-lyi. 18 (Kyasia mndu-chu naleguṟa ṙema kui woguru wo iwuta wunyamaṟi; kaoloka kapasakana, maula gakye goose gakafumia nja. 19 Wandu woose wekyekaa Yerusalemu wakamanya mbonyi-tsi; mṟasa ṙema lyilya lyikalago kyikowo Akyelyidama, kyimwi na igamba, ṙema lya samu). 20 Cha kyipfa kulya kyitapunyi kya shiimbo kyikyiṟeie kye, ‘Kyiṟaṟo kyakye kyechiwaṙa kyindo-pfo, maa kochiwaṙa mndu echikaa ho-pfo.’ Lyingyi-se kyikyiṟeie, ‘Mndu ungyi naṙuo wuṟundi wokye.’ ” 21 “Kyasia kyiiṙi kya wandu waleoshana na soe kyiyeri kyoose Mndumii Yesu aweicha na iwuka koṙu, 22 iwookyia wupatiso wo Yohane, mṟasa mfiri ulya alewuto koṙu iyenda wuye ruwewu, kyiwaṟi umwi owo nawe mṟingyishi o iṟuka lyakye hamwi na soe.” 23 Wakawika wandu wawi: Yosefu, awekyelago Barisaba, awewoṙe rina lya kawi Yusto, na Matiya. 24 Numa ya iho wakaterewa, wakagamba, “Iyoe, Mndumii, uichi mrima ya wandu woose, luloṟe nyi wui omsambuṟa kyiiṙi kya iwa wawi, 25 nawe msu handu ha Yuda; kyipfa Yuda nalelekana na soe kayenda handu alewutikyio kyilya kyimmbaṟi.” 26 Wakakapa kuṟu kuha isambuṟa Yosefu na Matiya na Matiya kasambuṟo; na oe kawiko handu hamwi na wasu walya ikumi na umwi.
1 Na kyiyeri mfiri o Pentekoste uleafukyia wawekyeri woose handu hamwi. 2 Cha ilyi iwuka ruwewu kukocha ndiṟimo cha ndiṟimo tsa mkuma o pfinya, ukoichuṟa numba iya yoose waweṙamie. 3 Kukowaṙa ngyuulumi tsilekanyi-lekanyi, cha ngyuulumi tsa moṙo ukokaa mṙoenyi ko orio mndu awekyeri halya. 4 Woose wakaichuṟo nyi Mumuyo Mweele, wakawooka iṙeṙa kui mṙeṙie ingyi, chandu Mumuyo alewaenenga wuiṙimi. 5 Na kuwewoṙe Wayuda wawekyekaa Yerusalemu, wandu waiṙikyie na iowuo Ruwa, wandu wawukyie orio isanga lya kunu wuyanenyi. 6 Kyasia kyiyeri wuingyi wo wandu wawesanzie halya waleicho ndiṟimo tsilya, wakawoṙo nyi wuowu, cha kyipfa orio umwi naleicho weṙeṙa kui mṙeṙie okye. 7 Wakaṟiyio woose, wakawiana, “Lanyoe-ko, iwa woose waiṙeṙa chi wandu wa Galyilaya-pfoe? 8 Kyawa kuṙa soe iicho orio mndu mṙeṙie yaṙu lulefeo nayo? 9 Wapariti na Wamedi na Waelami, na walya wekyekaa Mesopotamia, Uyuda na Kapadokyia, Ponto na Asia, 10 Firikyia na Pamfilyia, Misiri na ngyuura tsa Lyibia kufuhi na Kyirene, na wayenu wawukyie Roma, Wayuda na walya wekyeindia Ruwa, 11 Wakyirete na Waarabu; luichuoe iwa wechionguo kui mṙeṙie yaṙu mawuto gang'anyi ga Ruwa.” 12 Wakaṟiyio woose, wakawoṙo nyi iwuṟa iiṙikyia, wakawiana, “Shindo-shi shaloṟa kyi?” 13 Wengyi wakanyeṟe, wechigamba “Wawananzi.” 14 Kyaindi Petiro kagoṟoka hamwi na wanalosho walya ikumi na umwi, kakuilenga na ṟui lying'anyi, kawawia, “Nyoe wandu wa uruka lo Uyuda, na nyoe moose mokyekaa Yerusalemu, manyenyi mbonyi-tsi muaṙanyie maṙeṙo gako. 15 Chandu mukusaṟie chi wuṙo-pfo. Wandu-wa wawananzi-pfo, cha kyipfa nyi saa tsiṟaaṟu tsa kyingoto tikyi; 16 kyaindi mbonyi-tsi nyi tsilya tsilegambo nyi moonguo shisuku Yoelyi, 17 ‘Mfiri yefurumia, Ruwa nagamba ngyechipusia wandu woose Mumuyo oko, na wana wanyu wa kyisoṟo na wa kyika wechionguo shisuku; na wanakye wanyu wechiwona shindo shilandeafukyie; na wandu waku wechiloṙo. 18 Yee, na mfiri-yo ngyechipusia waṟundi wako wa kyisoṟo na wa kyika Mumuyo oko, nawo wechionguo shisuku. 19 Na inyi ngyechiloṟa ṟigo wuye ruwewu, na shindo sheṟiyisha wuyanenyi, samu na moṙo, na ipuchi lya mtsu ufoi. 20 Mnengyeṟi ochiwa meema, na mori ochiwa samu, mfiri ulya o Mndumii ulacha, mfiri ung'anyi uichio na pata. 21 Na orio mndu echipfula Mndumii Ruwa nechikyiṟo.’ ” 22 “Nyoe wasoṟo wa Isiraelyi, aṙanyienyi mbonyi-tsi: Yesu awukyie Nasareti, mndu Ruwa alemloṟa konyu kui ṟigo na shindo sheṟiyisha, Ruwa aletsiwuta amonyi, chandu nyoe muichi. 23 Mndu-chu aleṙiko wuyanenyi chandu Ruwa alekunda amonyi, na chandu Ruwa aweṟeyeṟie wookyia kacha, kamṙambika konyu, nyoe mukomkapia msalabenyi, mukombaaga. 24 Ulya Ruwa alemṟutsa, kammbuta wukyiwenyi wo ipfa, cha kyipfa kyileiṙimika wukyiwa-wo wumpaaye-pfo. 25 Kyipfa Dawidi naonguo mbonyi tsakye, ‘Ngyilewona Mndumii mbele yako mfiri yoose cha kyipfa nakyeri ura loko lo kulyoe ngyilasunzukye. 26 Koikyo mrima oko ulechihiyo ulumi loko lukochihiyo; lyingyi-se mmbiu oko ukoweṙelyia. 27 Cha kyipfa echiṙa mrima oko ko wapfu-pfo; maa echiṙa mndu okye msimiri napuye kyilomenyi-pfo. 28 Nulengyiloṟa njia tsiendie moonyi o mlungana.’ ” 29 “Wasoṟo, wana wa wama wako, maa mulangyisuuye, ngyionguo mbele yanyu kulawoṙe wuowu mbonyi tsa awu oṙu, Dawidi, kye nalepfa kaṟiko, na kyilome kyakye kyikyeri koṙu mṟasa inu. 30 Kyasia kyipfa nyi moonguo shisuku, aichi kye Ruwa nalemwenenga kyaasa, kye kyisharinyi kokye kochiwuka mangyi. 31 Na oe chandu alesonguo iwona mbonyi-tsi, naleonguo mbonyi tsa iṟuka lya Yesu Kristo, kye mrima okye ochiṙio ko wapfu-pfo, maa mmbiu okye ochipuya kyilomenyi-pfo. 32 Yesu-cho Ruwa nalemṟutsa, na soe loose lui waṟingyishi. 33 Kyasia oe, kamṙoso mṟasa kuwoko ko kulyoe ko Ruwa, na iambilyia ko Awu kyaasa kyilya kya Mumuyo Mweele, napusuo kyindo-kyi mukyiwonyi na ikyiicho wulalu. 34 Kyipfa Dawidi aleṙo na ruwewu-pfo; indi oe nalegamba, ‘Ruwa nalewia Mndumii oko, ṙamia ura loko lo kulyoe, 35 mṟasa kyiyeri ngyechikuenenga wuiṙimi wo ichilyia washituwa wapfo.’ ” 36 “Kyasia wandu woose wa Isiraelyi wamanye na pata kye Ruwa naleenenga Yesu-cho walemkapia msalabenyi wuiṙimi wo iwa Mndumii na Kristo.” 37 Kyiyeri wandu walya waleicho mbonyi-tso, wakaiṟewe mrimenyi kowo, wakawia Petiro na wanalosho walya wengyi, “Luwute-kyi, wana wa wama waṙu?” 38 Petiro kawawia, “Ṙumbuyenyi iwuta sha wunyamaṟi, mupatiso orio umwi kui rina lya Yesu Kristo, muiṙime iambilyia ihooṟio lya ngyuunyamaṟi tsanyu, na nyoe mochiambilyia kyienengo kya Mumuyo Mweele. 39 Cha kyipfa kyaasa-kyi nyi kyipfa kyanyu, na ko wana wanyu, na ko walya wai kuleshi, na ko woose wechilago nyi Mndumii oṙu Ruwa wache na kokye.” 40 Kawaṟingyishia kui maṙeṙo gengyi gafoi mnu na iwaikyimbia, echigamba, “Kaenyi kuleshi na rika-lyi lyilekyeicho.” 41 Na walya waleicho malosho gakye na igaosha wakapatiso; na mfiri ulya wakaengyeṟika cha wandu shiku shiṟaaṟu. 42 Mfiri yoose wakaosha malosho ga wanalosho, wakyeri kyindo kyimwi shindonyi shoose, na kyiiṙi kya ilya mkate handu hamwi, na kyiiṙi kya iterewa. 43 Wanalosho wakawuta shindo shifoi sheṟiyisha na ṟigo, orio mndu kawoṙo nyi wuowu. 44 Na woose waweiṙikyie Yesu wawekyekaa handu hamwi, na iwuta shindo shoose wakyeri kyindo kyimwi, 45 wechikumba masaa gawo, na shindo shawo wawewoṙe, na igawia wandu woose orio mndu iṙuana na chandu awekundi. 46 Na orio mfiri wechiyenda hekalunyi handu hamwi, wechilya mkate numba kui numba, na ilya kyelya kyawo na sia na mrima iwoṙe ilekyia, 47 wechiṟumisha Ruwa, na ichihiṟa wandu woose. Mndumii kapfumbutsa siṟi orio mfiri ko walya waweikyiṟo.
1 Kyasia Petiro na Yohane waweiṙo wechiyenda hekalunyi kyiyeri kyeterewa Ruwa, cha saa kyenda. 2 Na mndu umwi awei kyileeta wookyia kyiyeri alefeo nawekyeendo nyi wandu wakammbikyia orio mfiri moongonyi o hekalu uwekyelago “Moongo Mcha,” kundu naterewe isaṟio nyi walya wawekyeiṙa na ipfo hekalunyi. 3 Mndu-cho kyiyeri alewona Petiro na Yohane wechiiṙa na hekalunyi naleterewa naenengo kyindo kyemsaṟia. 4 Na Petiro, kamwitukuya karii, hamwi na Yohane, kagamba, “Ambuya kunu.” 5 Kawaitukuya, alangyie wamwenengye kyindo. 6 Kyaindi Petiro kagamba, “Inyi ngyiwoṙe heleri, maa sahapu-pfo, indi kyilya ngyiwoṙe ny'kyo ngyikuenenga. Ko rina lya Yesu Kristo awukyie Nasareti, goṟoka uyende.” 7 Kammbaṙa kuwoko ko kulyoe, kamwira, na cha ilyi maṙende gakye gakawaṙa pfinya. 8 Kaamka faṟa kawooka iyenda, kaiṙa na hekalunyi hamwi nawo, kachumia echitoola-toola, na iṟumisha Ruwa. 9 Wandu woose wakammbona echumia na iṟumisha Ruwa. 10 Wakammanya, kye oe nyi ulya awekyeṙamia na iterewa shindo shemsaṟia halya moongonyi okyelago “Mcha;” wakaṟiyio mnu kyipfa kya shilya shilewutika kokye. 11 Kyasia kyiyeri aweinyaia Petiro na Yohane wandu woose wakakuumbia halya-ndu hawekyelago “Itala lya Solomon,” wechiṟiyio mnu. 12 Na kyiyeri Petiro alewona kuṙo kagaluo wandu walya, kawawia, “Nyoe wandu wa Isiraelyi ny'kyilyi muiṟiyio kyipfa kya shindo-shi? Ang'u ny'kyilyi muluitukuya cha ilyi nyi pfinya tsaṙu tsaenenga mndu-chu wuiṙimi wo ichumia? Maa achia kyipfa soe luiṙikyie Ruwa-pfo. 13 Ruwa o Abrahamu na o Isakyi na o Yakobo, Ruwa o waku waṙu, nang'anyisa mṟundi okye Yesu, ulya nyoe mulemṟiinga na imkana mbele ya Pilato, kyiyeri aleṙumbuo kye nalekyio. 14 Indi nyoe mulekana ulya Mweele, ulya alawoṙe tewe, mukokunda ienengo mmbaagi. 15 Mukowaaga ulya Ang'anyi o moo o mlungana, ulya Ruwa alemṟutsa ko wapfu; na soe nyi waṟingyishi wakye. 16 Na kui iiṙikyia rinenyi lyakye, rina lyakye lyaenenga pfinya mndu-chu mummbonyi na immanya; na iiṙikyia lyilya lyikyeri kokye nyilyo lyamwenenga moo-chu ulakyeri mti mbele yanyu nyoe moose. 17 “Kyasia wulalu, wana wa wama, ngyiichi kye mulewuta isho kyipfa mulaweichi, chandu na wasongoru wanyu walewuta. 18 Kyaindi shindo shilya Ruwa aleshionguo wookyia kacha kui maṙumbu ga weonguo shisuku woose, kye Kristo nechilyiso wukyiwa, naafutsia isho. 19 Kyasia ṙumbuyenyi wunyamaṟi, muwiyilyie Ruwa, kundu ngyuunyamaṟi tsanyu tsiwuto piu, kyiyeri kyilya kyewiyiṟio moo kyipfa kya Mndumii Yesu iṙiko koṙu kyiiṙime iafukyia. 20 Ruwa naiṙime iṙuma Yesu Kristo ulya muleṟeyeṟio wookyia kacha. 21 Ulya awaṟi ikaa ruwewu mṟasa kyiyeri shindo shoose shewa shihya, kyiyeri kyikyigambe nyi Ruwa kui ṙumbu lya weonguo shisuku waele wookyia mawookyionyi ga wuyana. 22 Cha kyipfa loi Mose nalegamba kye Mndumii onyu nechimuenenga moonguo shisuku iwuka ko wana wa wamanyu, cha inyi; mwaṙanyienyi shindonyi shoose echimuongoya. 23 Na kyechiwa kye orio mndu alechiaṙanyia moonguo shisuku-cho nechirumatso na iwiko kuleshi na wandu wakye. 24 Yee, na weonguo shisuku woose wookyia Samolyi na walya walecha numa yakye, woose waleṙeṙa, waleonguo mbonyi tsa mfiri-i. 25 Nyoe mowa wana wa weonguo shisuku na wa mma iya Ruwa alelya na waku wanyu, echiwia Abrahamu, ‘Kyisharinyi kyapfo, mbaṟe tsoose tsa wandu wa wuyana tsechiwikyio mboṟa. 26 Ruwa, amṟutse mṟundi okye Yesu, nalemṙuma konyu kuwooka, kundu nammbikyie mboṟa kui igalutsa orio umwi onyu nakae kuleshi na wuwicho wokye.’ ”
1 Na kyiyeri waweiṙeṙa na wandu walya, makohanyi na wachilyi wa hekalu na Masadukayo wakacha, 2 weiṟewe mrimenyi mnu cha kyipfa wailosha wandu na ionguo mbonyi tsa iṟutso lya wapfu kyiiṙi kya Yesu. 3 Wakawawaṙa, wakawawika kyipfungonyi mṟasa ngamenyi; cha kyipfa kulekokoila. 4 Kyaindi wandu wafoi kyiiṙi kya walya waleicho Ṙeṙo lya Ruwa waleiṙikyia; na itala lya wasoṟo lyikawa cha shiku shitaanu. 5 Na kyiyeri kulekya wasongoru na wameeku na walosha wa mawawaso ga Mose walesanzia Yerusalemu, 6 na Anasi Mkohanyi ang'anyi kuta woose, na Kayafa taa, na Yohane na Iskanda, na woose walya wawei wa kanyi ko Mkohanyi ang'anyi kuta woose. 7 Kyiyeri walewawikyia makyiṙi-gawi, wakawawesa, “Nyi kui pfinya tsiha na nyi kui rina lya wui nyoe muiwuta ishi?” 8 Naaho Petiro, aichuo Mumuyo Mweele, kawawia, “Nyoe wasongoru wa wandu na wameeku wa Isiraelyi; 9 kokooya loweso inu mbonyi tsa kyindo kyicha mndu ulya mfafa alewutio, chandu alekyiṟo, 10 manyenyi moose na wandu woose wa Isiraelyi kye kui rina lya Yesu Kristo awukyie Nasareti, ulya nyoe mulemkapia msalabenyi, na Ruwa kamṟutsa ko wapfu, kui rina-lyo mndu-chu nagoṟoka mbele yanyu, awoṙe pfinya. 11 Oe nyi oe igoe lyilya lyilemino nyi wewika numba, ‘Nalyo lyawiko iwa igoe lying'anyi lya ndumbenyi.’ ” 12 “Maa kuwoṙe wukyiṟo kui mndu ungyi oose-pfo, cha kyipfa kuwoṙe rina lyingyi kunu wuyanenyi soe wandu luleenengo lyelukyiṟa-pfo.” 13 Kyasia kyiyeri walewona wuṟango na wukari wo Petiro na Yohane, na imanya kye nyi wandu walasomie, walaichi shindo shifoi, wakaṟiyio, wakamanya kye wawekyeri hamwi na Yesu. 14 Na wawonyi ulya alekyiṟo agoṟokyi hamwi nawo walewona kyindo kyegamba-pfo. 15 Wakawawia wawukye halya mengyenyi, wakachila wawenyi 16 wechigamba, “Luwutie kyi wandu-wa? Kyipfa kyikyeri na pata ko wandu woose wekyekaa Yerusalemu kye walewuta kyiṟiyisho kying'anyi, maa lochiiṙima ikana-pfo. 17 Kyaindi kundu mbonyi-tsi tsilamanyike ko wandu, luwaoweshe walaṙeṙe na mndu oose kui rina-lyi.” 18 Wakawalaga, wakawawia walaṙeṙe maa ale ang'u ilosha kui rina lya Yesu. 19 Petiro na Yohane wakawagaluo, wakawawia, “Kye nyi sungusinyi mbele ya Ruwa imuaṙanyia nyoe kuta Ruwa, ṙumbuonyi nyoe muwenyi, 20 kyipfa soe lochiiṙima iṙa ionguo shindo luleshiwona na ishiicho-pfo.” 21 Nawo kyiyeri walemarisa iwaowesha-se wakawapfunguo, walawone kyindo kyewaenenga iwakapa, kyipfa kya iowuo wandu, cha kyipfa wandu woose waweṟumisha Ruwa kyipfa kya isho shilewutika; 22 kyipfa mndu ulya alewutio kyiṟigyishio kya ikyiṟo nawewoṙe maka makumi gaana na ngoseṟa. 23 Na kyiyeri walelekyio, wakayenda ko wandu wawo, wakawaongoya mbonyi tsa shindo shoose walewio nyi wang'anyi wa makohanyi na wameeku. 24 Nawo kyiyeri waleicho wakawia Ruwa kui maṟui gang'anyi na kui mrima umwi, wechigamba, “Mndumii, iyoe nyi oe Ruwa Mopfinya. Nyi iyoe ulegumba ruwewu na uruka na mapalyipalyi na shoose shikyeri pfo. 25 Na iyoe nuleṙeṙa kui Mumuyo Mweele kui ṙumbu lya mku oṙu Dawidi, mṟundi opfo, ‘Ny'kyilyi wandu walaiṙikyie Ruwa wailang'aa, na wandu waikusaṟa shiwicho? 26 Wamangyi wa wuyana wakuṟeyeṟie, na wasongoru waichila handu hamwi chandu wewingana na Ruwa na Kristo okye.’ ” 27 “Kyipfa nyi loi, Herode na Pontio Pilato hamwi na wandu walaiṙikyie Ruwa na wandu wa Isiraelyi, walesanzia kunu mṟinyi, wechichila mbonyi tsa Mṟundi opfo mweele Yesu, ulemshumbuo, 28 kundu wawute shoose uwekundi shiwutikye wookyia kacha. 29 Kyasia wulalu, Mndumii, ambuya chandu waiowesha; uenengye waṟundi wapfo ionguo Ṙeṙo lyapfo kui wuṟango na wukari, 30 ochigoṟuo kuwoko kopfo ikyiṟa; ṟigo na shindo sheṟiyisha shiwutikye kui rina lya Mṟundi opfo mweele Yesu.” 31 Na wamterewe Ruwa, handu halya wawesanzie hakasunzo-sunzo, woose wakaichuo Mumuyo Mweele, wakaonguo Ṙeṙo lya Ruwa kui wuṟango na wukari. 32 Na wandu walya waweiṙikyie Yesu wawekyeri kyindo kyimwi; maa kuwoṙe maa umwi alegamba kye kyindo kyoose awoṙe nyi kyakye amonyi-pfo; indi shindo shoose waleikanana. 33 Na wasu wakaṟingyishia na pfinya iṟuka lya Yesu, nawo wakaenengo mboṟa tsifoi. 34 Maa kuwewoṙe mndu oose kyiiṙi kyawo alawewoṙe kyindo-pfo; cha kyipfa wandu woose wawewoṙe shigamba ang'u numba, walekumba, wakaende woguru wo shindo-sho shilekumbo, 35 wakaenengyia wasu walya; orio mndu kagawio chandu awekundi. 36 Na Yosefu, wasu wawekyemlaga Barinaba, kyimwi na igamba Mana ekyewiyiṟia moo, Mlewi, mndu awukyie Kyipiro, 37 nawewoṙe ṙema kalyikumba, kaende heleri, katsienengyia wasu.
1 Kyaindi mndu umwi awekyelago Anania, hamwi na Safira, mka okye, nalekumba masaa, 2 kaṟika kyifunjoe kya woguru, na mka okye aichi mbonyi-tso kaende kyifunjoe kyilya kyiletsugaa kakyienengyia wasu. 3 Petiro kagamba, “Anania, ny'kyilyi Satana aichuṟa mrima opfo iwia Mumuyo Mweele wongo, na iṟika kyifunjoe kya woguru wulya wo ṙema? 4 Kyiyeri ṙema-lyo lyiwekyeri kopfo, lyiwekyeri lyapfo-pfoe? Na lyamkumbo, woguru wolyo chi nuweiṙima iwuta nawo chandu ukundi-pfoe? Kyawa kuṙa kowuta kyindo kya mbaṟe-i iyi? Chi nowia mndu wongo-pfo, indi Ruwa.” 5 Kyiyeri Anania aleicho mbonyi-tsi kaoloka wanda, kapfa. Kyiyeri wandu waleicho mbonyi-tsi wakawoṙo nyi wuowu wung'anyi. 6 Wanakye wakafuma, wakampfunga na sanda, wakamfumiṟia nja, wakamṟika. 7 Hamwiṙe cha saa tsiṟaaṟu, mka okye kacha, alaichi mbonyi tsiwemmbutika. 8 Petiro kammbia, “Ngyiwia, iwo nyiwo woguru wo ṙema-lyo?” Safira kagaluo, kagamba, “Yee, iwo nyiwo woguru wolyo.” 9 Petiro kammbia, “Kyawa kuṙa moiṙikyiana iyesha Mumuyo o Mndumii? Walya waṟika mii opfo nyi iho moongonyi wagoṟokyi, nawo wekuṙuo na iyoe taa.” 10 Cha ilyi Safira kaoloka wanda, kapfa. Wanakye walya wakaiṙa na numba wakakooya ampfa, wakamfumiṟia nja, wakamṟika hamwi na mii okye. 11 Siṟi yoose ikawoṙo nyi wuowu wung'anyi hamwi na wandu woose waleicho mbonyi-tso. 12 Na wasu wakawuta shindo shifoi sheṟiyisha hamwi na ṟigo; nawo woose wawewoṙe makusaṟo gamwi wechisanzia kulya italenyi lya Solomon; 13 na kyiiṙi kya wandu woose kuwoṙe maa mndu umwi alekaria ioshana na wasu-pfo; indi wandu walewaṟumisha. 14 Walya waweiṙikyie Yesu wakaengyeṟika, wasoṟo na waka; 15 na kyikawa kye wandu wawekyefumiṟia wandu waluoe mṟaṟunyi ung'anyi na iwawikyia majamvinyi na makondoṟonyi, kundu ilyi Petiro echicha, maa kyirinje kyakye kyipaaye umwi owo. 16 Na wuingyi wo wandu wa mṟi ikyeri mbai ya Yerusalemu wakasanza, wechiende wandu waluoe, na walya wawekyelyiso wukyiwa nyi waṟufui wawicho; nawo woose wakakyiṟo. 17 Mkohanyi ang'anyi kuta woose kafuma na wandu woose wawekyeri hamwi na oe (iwo nyi walya wawekyechilyia hamwi na Masadukayo), wawoṙo nyi wunyenyi. 18 Wakawaṙa wasu walya wakawawika kyipfungonyi; 19 kyaindi malaika o Mndumii kyiyeri kya kyio kapfunguo moongo ya numba iya wawewapfungyie, kawawuta pfo, kagamba, 20 “Yendenyi mundegoṟoka hekalunyi muongoye wandu mbonyi tsoose tsa Moo-chu o mlungana.” 21 Nawo kyiyeri waleicho wakayenda hekalunyi ngamenyi utuko, wakawooka ilosha. Mkohanyi ulya ang'anyi kuta woose kacha na walya wawekyeri hamwi na oe, wakalaga wandu na mengyenyi, na wameeku woose na wana wa Isiraelyi, wakaṙuma wandu kulya kyipfungonyi kundu waende wasu walya. 22 Na kyiyeri waṟundi waleshika halya kyipfungonyi walewona wasu walya-pfo wakawuya wakaende mbonyi-tso, 23 wechigamba, “Numba iya yepfungyia wandu loikooya ingyishingye nakamwi, na waringyi wa numba-yo wagoṟokyi mbele ya moongo; kyaindi kyiyeri lopfunguo moongo-cho lulawone pfo mndu.” 24 Kyasia msongoru o asikari wekyeringa hekalu na wang'anyi wa makohanyi kyiyeri waleicho mbonyi-tso, walamanye kyewuta, kye mbonyi-tso tsechiwa kuṙa. 25 Mndu umwi kawawia, “Wandu walya mulewawika kyipfungonyi wakyeri hekalunyi, wailosha wandu.” 26 Naaho-ng'u msongoru ulya o asikari wekyeringa hekalu kayenda hamwi na waṟundi, wakawaende, kui iwalemba-lemba, cha kyipfa waleowuo wandu walachewakapa na magoe. 27 Kyiyeri walewaende wakawawikyia halya mengyenyi. Mkohanyi ulya ang'anyi kuta woose kawawesa, echigamba, 28 “Ngamba lulemuima ilosha kui rina-lyi lya Yesu? Kyaindi nyoe moichuṟa mṟi oose o Yerusalemu na malosho ganyu, na mukundi luwio kye nyi soe lulembaaga.” 29 Petiro na wasu woṙoe wakagaluo, wechigamba, “Kyiluwaṟi iindia Ruwa kuta wandu. 30 Ruwa o waku waṙu naleṟutsa Yesu, ulya nyoe mulembaaga na immanyika ikyiṙinyi. 31 Mndu-cho Ruwa nalemng'anyisa kui kuwoko kokye ko kulyoe, nawe Ang'anyi na Mkyiṟa naenengye wandu wa Isiraelyi iṙumbuya na ihooṟio wunyamaṟi. 32 Na soe lui waṟingyishi wa mbonyi-tsi, hamwi na Mumuyo Mweele ulya Ruwa aleenenga woose wekyemwindia.” 33 Kyiyeri waleicho mbonyi-tsi wakawoṙo nyi nyashi mrimenyi kowo, wakachila chandu wewaaga wasu walya. 34 Kyaindi mndu umwi, Mfarisayo, ekyelago Kamalyielyi, mlosha o uwawaso, awekyeindio nyi wandu woose, kagoṟoka halya mengyenyi, kagamba wasu waṙoo nja kyiyeri kyifuhi, 35 kawawia, “Nyoe wasoṟo wa Isiraelyi, owuoenyi iwutia wandu kyindo kyiwicho. 36 Cha kyipfa mfiri ya numa Teuda nalecha, echikuloṟa kye oe nyi mndu ang'anyi, cha wandu magana gaana wakakaa ura lokye; na oe nalewoogo na woose walemwiṙikyia, wakanyanyaṟika wakawa wulya. 37 Numa ya mndu-cho kulecha Yuda awukyie Galyilaya, mfiri iya yeṟeia wandu marina, kagaluo wandu wafoi wakamwosha, na oe taa kaṙeka na woose walemwiṙikyia wakanyanyaṟika. 38 Kyasia wulalu ngammbia, kaenyi kuleshi na wandu-wa; walekyienyi; cha kyipfa kokooya mbonyi-tsi ang'u iṟunda-lyi lyiwukyie ko wandu lyechinyamaṟika, 39 kyaindi kokooya lyiwukyie ko Ruwa mochiiṙima ilyinyamaṟa-pfo; mulachewono cha ilyi muiwingana na Ruwa.” 40 Wakaiṙikyia kyilya Kamalyielyi alegamba. Nawo kyiyeri walelaga wasu walya, wakawakapa, wakawawia walaloshe kui rina lya Yesu; na numa ya iho wakawalekyia. 41 Nawo wakawuka halya mengyenyi, wechihiyo cha kyipfa watalo kye wawaṟi isutso kyipfa kya Rina lya Yesu. 42 Na orio mfiri, hekalunyi na kanyi kowo, waleṙa ilosha na ionguo Ndumi Ngyicha tsa Yesu kye nyi Kristo-pfo.
1 Na mfiri iya wanalosho waweiengyeṟika, Wayuda wawekyeṙeṙa mṙeṙie o Wakyiṟikyi walenunuwa kyipfa kya Wayuda walya wawekyeṙeṙa Kyiebrania; na kyitewe kyenunuwa nyi kyipfa wakusu wawo walewaṙimika ienengo kyilya wawaṟi. 2 Walya ikumi na wawi wakalaga wandu woose waweiṙikyie Yesu, wakagamba, “Chi kyicha soe iṙa ionguo Ṙeṙo lya Ruwa na ikuwinisha na heleri-pfo. 3 Kyasia, wana wa wama, sambuṟenyi wandu mfungaaṙe kyiiṙi kyanyu, wawaṟingyishie kye wai wecha, waichuo Mumuyo, wawoṙe wuṟango, kundu luwaṙambikye iṟunda-lyi lyeambuya heleri; 4 na soe luwaṙe iṟunda lyeterewa na ionguo Ṙeṙo lya Ruwa.” 5 Kyindo-kyi wasu walegamba kyikachihiṟa woose wawesanzie halya. Wakasambuṟa Stefano, mndu aweichuo iiṙikyia na Mumuyo Mweele, Filyipo, Prokoro, Nikanori, Timoni, Parimena, na Nikolao, mndu aiṙikyie Ruwa, awukyie Antiokyia. 6 Wakawawikyia mbele ya wasu, na wamterewe wakawayekyia mawoko. 7 Mbonyi-tsi tsikaṙunganana orio handu; na itala lya wanalosho lyikaengyeṟika mnu kulya Yerusalemu; makohanyi wafoi wakaambilyia iiṙikyia. 8 Na Stefano, aichuo isaṟia na wuiṙimi, nawekyewuta shindo sha maṟiyisho na ṟigo tsing'anyi mbele ya wandu. 9 Kyaindi wandu waata wa sinagogi lyiwekyelago sinagogi lya “Wandu walawachilyie nyi kyindo,” na lya Wakyirene, na lya Waisikanderia, na lya walya wa Kyilyikyia na Asia, wakafuma na indegaluana na Stefano; 10 kyaindi waleiṙima iwingana na wuṟango na Mumuyo-cho aweṙeṙa na oe-pfo, 11 wakawia wandu wagambe, “Luleicho mndu-chu echiṙeṙa mbonyi tselahia Mose na Ruwa.” 12 Kui igamba kuṙo wakaende kyituṟu wandunyi na wameeku na walosha wa mawawaso. Wakayenda kokye, wakammbaṙa, wakamṙuo mengyenyi. 13 Wakapfula waṟingyishi wa wongo, walegamba, “Mndu-chu mfiri yoose nawekyeṙeṙa mbonyi tselahia hekalu na uwawaso; 14 kyipfa luleicho echigamba kye Yesu-cho awukyie Nasareti nechinyamaṟa hekalu na igaluo miichiwie Mose aleluenenga.” 15 Wandu woose waweṙamie halya mengyenyi wakamwitukuya karii, wakawona kyaam kyakye kyikyeri cha kyaam kya kya malaika.
1 Mkohanyi ang'anyi kuta woose kagamba, “Ngyesa mbonyi-tsi nyi wuṙo tsikyeri?” 2 Na oe kagamba, “Wana wa wama wako na waawu wako, aṙanyienyi. Ruwa o kyiṟumi nalecha na ko awu oṙu Abrahamu, kyiyeri awekyeri uruka lo Mesopotamia, kyiyeri alandekae uruka lo Harani, 3 kammbia, ‘Wuka kunu urukyenyi kopfo na ko wandu wa kyishari kyapfo, uyende mṟasa uruka ngyechikuloṟa.’ 4 Naaho-ng'u kawuka urukyenyi lo Wakalyidayo, kakaa Harani, kawuka pfo awuye ampfe, Ruwa kamsamiṟa mṟasa uruka-lu mukyeri nyoe wulalu. 5 Maa alemwenenga kyioṟa maa kya kyigamba kyitung'tu-pfo; kyaindi Ruwa nalewika kyaasa kyemwenenga, kyiwe wuchilyinyi wokye, na wa ushari lokye mfiri iweicha maa chandu alawewoṙe mana. 6 Ruwa kagamba kuṙo, kye wandu wa kyishari kya Abrahamu wechikaa urukyenyi lo wandu wengyi, nawo wewagaluo watumo wawo, na iwawutia shindo shewatuura kyiyeri kya maka magana gaana. 7 Na wandu wa isanga-lyo lyechimgaluo watumo ngyechiwaanduya, Ruwa nalegamba; na numa ya isho shoose wechiwuka, nawo wechingyiindia handu-ha. 8 Kamwenenga mma o iṙino. Kyasia Abrahamu kafee Isakyi, kamṙina mfiri o nyanya. Isakyi kafee Yakobo. Yakobo kafee walya ikumi na wawi, waku waṙu. 9 “Waku-wo waṙu walewoṙo nyi wunyenyi kyipfa kya Yosefu, wakamkumba nayende uruka lo Misiri. Ruwa kakaa hamwi na oe, 10 kammbuta wukyiwenyi wokye woose, kamwenenga isaṟia mbele ya Farao, mangyi o Misiri; na oe kamgaluo mchilyi o Misiri na o walya wa kanyi kokye. 11 Kyasia kukowaṙa njaa urukyenyi loose lo Misiri na Kanaan, na ngyuukyiwa tsifoi, maa waku waṙu walewona kyelya kyewashika-pfo. 12 Na kyiyeri Yakobo aleicho kye kulya Misiri kuwoṙe shelya, kaṙuma waku waṙu lya kuwooka. 13 Na lyilya alewaṙuma lya kawi Yosefu kawia wana wa wamae kye oe nyi samu yawo Farao kamanya na wa kyishari kya Yosefu. 14 Yosefu kaṙuma wandu wakalaga Yakobo awuye na wandu wa kyishari kyakye woose, wandu makumi mfungaaṙe na wataanu. 15 Kyasia Yakobo kasoka mṟasa Misiri, kapfa oe na waku waṙu; 16 wakaṙoo mṟasa Shekyemu wakaṟiko kulya kyilomenyi Abrahamu alekoakyiguṟa kui woguru wo heleri tsa wana wa Hamori, kulya Shekyemu. 17 “Kyasia kyiyeri kya kyaasa kyilya Ruwa aleenenga Abrahamu kyiwetikyirie kufuhi, wandu walya wakaengyeṟika mnu kulya Misiri. 18 Naaho mangyi ungyi alaichi Yosefu kawaṙa uruka kulya Misiri. 19 Icho kawutia wandu waṙu shindo sha ngyeṟo, na iwutia waku waṙu shindo shiwicho, echiwawia wawiyitse wana wawo wanangu, kundu walakae wuyanenyi. 20 Kyiyeri-kyo Mose kafeo, na oe nawewoṙe fana ngyicha mnu, kaembeṟo mori iṟaṟu kanyi ko awuye. 21 Na kyiyeri alewiyitso, mana o Farao o kyika kamṙuo, kammbutia cha mono-kye. 22 Mose kalosho mbonyi tsoose tsa Wamisiri, kawaṙa wuṟango wo maṙeṙo na mawuto. 23 Kyiyeri alewaṙa cha maka makumi gaana kaṙumbuo mrimenyi kokye indeiṟikyiṟa wana wa wamae, Waisiraelyi. 24 Kawona umwi echikapo kamkapania, kataaya kyiṟaache ulya aweionio, kakapa Mmisiri ulya kammbaaga. 25 Mose nalekusaṟa kye wana wa wamae wawemanya kye Ruwa nechiwakyiṟa kui iiṙia Mose, kyaindi walemanya-pfo. 26 Mfiri ulya uleosha kakooya Waisiraelyi wawi waweiluyana, kakunda iwasanza, echigamba, ‘Lanyoe wandu! Nyoe chi wana wa mka? Ny'kyilyi muiluyana? ’ 27 Kyaindi ulya aweikapa oṙoe kamicha Mose, echigamba, ‘Nyi wui alekuwika iyoe iwa ang'anyi oṙu na moṙumbuo moondu yaṙu? 28 Ngyesa nukundi ingyiwaaga inyi chandu ulewaaga Mmisiri ulya ukou?’ 29 Mose kaṙicha kyipfa kya mbonyi-tsi, kakaa cha myenu urukyenyi lo Midian, kafee pfo wana wawi. 30 Na kyiyeri maka makumi gaana ileiṙa, malaika o Mndumii kacha na ko Mose moṙonyi uiaka nguṙunyi, kulya nukyenyi ngyiumu suwaa ilawoṙe maa mṟinga ya fumvu lya Sinai. 31 Kyiyeri Mose alewona moṙo ulya, kaṟiyio kya shindo shilandeafukyie aweiloṟo, na kyiyeri aletikyira kufuhi kundu naambuye, ṟui lya Ruwa lyikammbia, 32 ‘Inyi nyi Ruwa o waku wapfo, Ruwa o Abrahamu, na Ruwa o Isakyi, na Ruwa o Yakobo.’ Mose kaṙeṙema, alakarie iambuya. 33 Mndumii Ruwa kammbia, ‘Wuta shiaṙu ipfo maṙende kopfo, cha kyipfa handu-ha ugoṟokyi nyi teri ngyiele. 34 Loi ngawona matuuro ga wandu wako wakyeri Misiri. Ngaicho kyifiiṟo kyawo, na inyi ngasoka na kunu wuyanenyi ngyiwawute pfo. Kyasia wulalu, ngyechikuṙuma mṟasa Misiri.’ 35 “Mose-cho walemlega, wechigamba, ‘Nyi wui alekuwika uwe ang'anyi na moṙumbuo moondu’, nyi oe aleṙumo nyi Ruwa iwa ang'anyi na mkyiṟa, kui iiṙia malaika ulya alecha na ko Mose kyiiṙi kya moṙo ulya. 36 Icho nyi oe alewawuta Misiri echiwuta shindo sheṟiyisha na ṟigo urukyenyi lo Misiri, na ipalyipalyinyi lya Shamu, na nukyenyi ngyiumu suwaa ilawoṙe maa mṟinga kyiyeri kya maka makumi gaana. 37 Mose-cho nyi oe alewia Waisiraelyi, ‘Mndumii Ruwa onyu nechiwasambuṟia moonguo shisuku, kyiiṙi kya wana wa wamanyu, cha inyi; mwaṙanyienyi oe.’ 38 Oe nyi oe awekyeri siṟinyi nukyenyi ngyiumu suwaa ilawoṙe maa mṟinga hamwi na malaika ulya aleṙeṙa na oe fumvunyi lya Sinai. Lyingyi-se hamwi na waku waṙu; nyi oe aleambilyia mbonyi tsa moo o mlungana naluwie soe. 39 Mndu-cho waku waṙu walekunda imwindia-pfo, indi walemmichia kuleshi, wakalanga iwuya na Misiri. 40 Wakawia Aron, ‘Luachikyie waruwa wengyi, wechilusongoya; cha kyipfa Mose-cho, aleluwuta urukyenyi lo Misiri, luichi ny'kyikyi kyammbutikyia-pfo.’ 41 Wakaachikyia ifano lya igache, wakalyiendie shienengo, wakachihiyo kyipfa kya maṟunda ga mawoko gawo. 42 Kyasia Ruwa kailacha makusaṟo, kawaṙa kundu waterewe na iindia nyenyeri tsa ruwewu, chandu kyikyiṟeie ipfo kyitapunyi kya weonguo shisuku, ‘Ngyesa mulengyiṙasia maka makumi gaana nukyenyi ngyiumu suwaa ilawoṙe maa mṟinga nyoe wandu wa Isiraelyi? 43 Na nyoe mulekuṙika Hema lya ruwa ekyelago Molekyi, na ifano lya nyenyeri tsa ruwa onyu Refani, mafano muleachikyia na igaterewa na igaindia. Na inyi ngyechimusamiṟa muyende kuleshi na Babelyi.’ ” 44 “Hema lyilya lya wuṟingyishi lyiwekyeri hamwi na waku waṙu kulya nukyenyi ngyiumu suwaa ilawoṙe maa mṟinga, chandu ulya aleṙeṙa na Mose alegamba kye naachikyie hema-lyo iṙuana na mfano ulya aleuwona. 45 Hema lyilya waku waṙu, kui ienengyiana, walelyiitsa hamwi na Yosua wuchilyinyi wo Masanga galya Ruwa alegafuna mbele ya waku waṙu, mṟasa kyiyeri kya Dawidi; 46 alewona isaṟia mbele ya Ruwa, na oe naleterewa naenengye Ruwa o Yakobo handu hekaa. 47 Kyaindi Solomon nalechemmbikyia numba. 48 Indi ulya ekyekaa wuye ruwewu ekyekaa numbenyi tsingyiwikye kui mawoko-pfo; chandu moonguo shisuku agambie, 49 ‘Ruwewu nyi kyitima kyako kya wuchilyi na uruka nyi handu heyekyia maṙende gako; nyi numba iha mochiwika nyoe kyipfa kyako?’ Ruwa nagamba, 50 ‘Ang'u nyi hanga ngyechikaa ngyichihiyo? Chi inyi ngyilewuta ishi shoose-pfoe?’ ” 51 “Nyoe shichoi, mulawaṙine mrima maa maṙwi ganyu. Mfiri yoose mulelega Mumuyo Mweele; chandu waku wanyu walewuta, na nyoe nyi wuṙo. 52 Nyi wui kyiiṙi kya weonguo shisuku waku wanyu walalempfulutsa nyashi? Wo walewaaga walya waleṙumo nyi Ruwa ionguo mbonyi tsa icha lya ulya Msumganyi; ulya nyoe wulalu mowa waṟiingyi wakye, mukommbaaga. 53 Nyoe muleambilyia uwawaso-lo luleendo na konyu nyi malaika kyaindi mukomina.” 54 Kyasia kyiyeri wandu wawei halya mengyenyi waleicho shilya Stefano alegamba, wakawoṙo nyi nyashi mrimenyi, wakasuo mnu kyipfa kyakye. 55 Kyaindi oe aichuo Mumuyo Mweele, kaambuo karii, eambuya ruwewu, kawona mng'ano o Ruwa, na Yesu agoṟokyi ura lo kuwoko ko kulyoe ko Ruwa. 56 Kagamba, “Ngyiwonyi ruwewu iṟuukyie, na Mono-Adamu nagoṟokyi kuwoko ko kulyoe ko Ruwa.” 57 Wakakalagatsa na ṟui lying'anyi, wakapfinyika maṙwi gawo, wakamshoongyia woose piu, 58 wakamṙuo nja ya mṟi, wakamkapa na magoe. Na waṟingyishi wakawikyia nguwo tsakye maṙendenyi ga manakye umwi awekyelago Saulyi. 59 Wakakapa Stefano na magoe, na oe eterewa, kagamba, “Mndumii Yesu, ambilyia mrima oko.” 60 Kapfiria ndi, kafiiṟa na ṟui lying'anyi, echigamba, “Mndumii ulawatalyie wunyamaṟi-wu.” Amgambe kuṙo kalekyia moo. Na Saulyi nawewonyi kye iwoogo lyakye nyi necha.
1 Mfiri ulya kukowaṙa wukyiwa wung'anyi kulya siṟinyi ya Yerusalemu. Wandu woose wa siṟi wakanyanyaṟika urukyenyi lo Uyuda na Samaria, kyaindi wasu walenyanyaṟika-pfo. 2 Wandu waweiṙikyie Ruwa wakaṟika Stefano, wakakapa ṟanyi ing'anyi mnu kyipfa kyakye. 3 Saulyi kapfuṟukana irumatsa Siṟi, echiyenda numba kui numba kawaṙa wasoṟo na waka na iwawika kyipfungonyi. 4 Kyaindi wandu walya wa siṟi walenyanyaṟika wakayenda ipfo na ipfo wechionguo Ṙeṙo lya Ruwa. 5 Filyipo kasoka kaiṙa na mṟinyi o Samaria kaonguo mbonyi tsa Kristo. 6 Na wuingyi wo wandu wawesanzie halya wakyeri kyindo kyimwi wakaaṙanyia mbonyi tsilya Filyipo alelosha kyiyeri waletsiicho na iwona shiṟiyisho alewuta. 7 Cha kyipfa waṟufui wawicho walewuka wandu wafoi, wechilyia na ṟui lying'anyi; na wandu wafoi wawepfiie ngapfu, na shileeta, wakakyiṟo. 8 Kukowaṙa sia ing'anyi kulya mṟinyi. 9 Na kuwewoṙe mndu umwi, ekyelago Simion, mndu mfiri ya numa awei msawi, echiṟiyisha wandu wa uruka lo Samaria, kui igamba kye oe nyi mndu ang'anyi. 10 Wandu woose wakaaṙanyia Simion, wookyia mtutu mṟasa ang'anyi, wechigamba, “Ichu nyi wuiṙimi wo Ruwa, wokyelago ‘Wuiṙimi Wung'anyi.’ ” 11 Wakamwaṙanyia, cha kyipfa kyiyeri kyileshi naleṟiyisha wandu kui wusawi wokye. 12 Kyaindi kyiyeri waleiṙikyia Filyipo, echionguo mbonyi ngyicha tsa Wumangyi wo Ruwa, na rina lya Yesu Kristo, wakapatiso, wasoṟo na waka. 13 Na Simion kaiṙikyia kapatiso, kawaṙana tapu na Filyipo; kaṟiyio kyiyeri alewona ṟigo na shindo shing'anyi sheṟiyisha shiweiwutika. 14 Na wasu wawekyeri Yerusalemu; kyiyeri waleicho kye wandu wa Samaria waambilyia Ṙeṙo lya Ruwa, wakaṙuma Petiro na Yohane. 15 Na kyiyeri waleyenda, wakaterewia walya waweiṙikyie wuiṙimi wo iambilyia Mumuyo Mweele; 16 cha kyipfa kuwoṙe maa umwi alekoamwambilyia Mumuyo Mweele-pfo. Wawewapatise tupu kui rina lya Mndumii Yesu. 17 Naaho-ng'u wakawayekyia mawoko, nawo wakaambilyia Mumuyo Mweele. 18 Na kyiyeri Simion alewona kye wandu waienengo Mumuyo Mweele kui iyekyio mawoko na wasu, kakunda ienenga wasu heleri, echigamba, 19 “Ngyienengyenyi wuiṙimi-wu, kundu orio mndu ngyechimyekyia mawoko gako, naambilyie Mumuyo Mweele.” 20 Kyaindi Petiro kammbia, “Heleri tsapfo tsiṙekye kulu hamwi na iyoe, cha kyipfa nokusaṟa kye masaa geiṙima ikuendie kyienengo kya Ruwa. 21 Uwoṙe ṙombo kyienengonyi kya ienenga wandu Mumuyo Mweele-pfo cha kyipfa mbele ya Ruwa mrima opfo uwoṙe wunyamaṟi. 22 Kyasia ṙumbuya wunyamaṟi-wu wopfo, uterewe Mndumii, kundu uhooṟio makusaṟo-ga mawicho uwoṙe mrimenyi kopfo. 23 Cha kyipfa ngyikuwonyi nuwoṙe wunyenyi wukuenenga iwawio ipfo mrimenyi cha nduu; na lyingyi-se kyipfa kya wunyamaṟi nui cha mndu akyeri kyipfungonyi.” 24 Simion kagaluo kagamba, “Ngyiterewienyi ko Mndumii, shindo-shi mogamba shilachengyiwutikyia maa kyimwi.” 25 Na wasu wamṟingyishie na ionguo Ṙeṙo lya Mndumii wakawuya na Yerusalemu, wechionguo Ndumi Ngyicha shikaṟonyi shifoi sha Wasamaria. 26 Malaika o Mndumii kaṙeṙa na Filyipo, kammbia, “Fuma uyende ura lo kyaseri mṟasa njia iya isokyie iwuka Yerusalemu mṟasa Gaza, nayo nyi nuka ngyiumu suwaa ilawoṙe maa mṟinga.” 27 Na oe kafuma, kayenda. Cha ilyi kawona mndu awukyie uruka lo Kushi, awoṙe wuchilyi wanda ya Kandakye, Mangyi o kyika o Kushi, ammbikye iambuya heleri tsoose. Na oe naleyenda Yerusalemu indeterewa Ruwa. 28 Kawa naiwuya na kanyi, aṙamie ikarinyi lyakye esoma kyitapu kya moonguo shisuku Yesaya. 29 Mumuyo Mweele kawia Filyipo, “Tikyira kufuhi na ikari-lyi, uwaṙane nalyo.” 30 Kyasia Filyipo kayenda eṙicha, kaicho mndu ulya o Kushi esoma kyitapu kya moonguo shisuku Yesaya; kammbesa, “Ngyesa numanya isho uisoma?” 31 Kagamba, “Ngyeiṙima kuṙa imanya mndu alandengyiloṟe?” Katerewa Filyipo naṙooye kulya ikarinyi na iṙamia hamwi na oe. 32 Na kyifunjoe kya shiṟeio shiele aweisoma nyi ikyi: “Naleṙoo handu heshinjia cha ondo, na chandu ondo lyekyetsia sau mbele ya ulya ailyiṙumbuo mberi, na wuṙo oe alaiṙeṙa kyindo. 33 Kyipfa kya ikutitiṟa aleanduyo-pfo. Nyi wui echiongoya wa kyishari kyakye? Kyipfa moo okye wuyanenyi ommbuto.” 34 Mndu ulya o Kushi kagaluo Filyipo, kammbia, “Ngyikuterewa ungyiwie, moonguo shisuku-chu naionguo mbonyi tsa wui; nyi mbonyi tsakye ang'u tsa mndu ungyi?” 35 Filyipo kamwongoya mbonyi ngyicha tsa Yesu Kristo, echiwooka na kyiṟeio kyilya kyilya mndu ulya o Kushi aweisoma. 36 Wakaengyeṟa iyenda, wakashika handu hawoṙe mṟinga. Mndu ulya o Kushi kagamba, “Kyeambuya mṟinga-chu; ny'kyikyi kyingyishingyia ngyilapatiso?” 37 Filyipo kagamba, “Koiṙikyia kui mrima opfo oose, kyechiiṙimika.” Kagaluo, kagamba, “Ngaiṙikyia kye Yesu Kristo nyi oe Mana o Ruwa.” 38 Kagamba ikari lyilya lyitirimisho; wakasokyia woose wewawi mṟingyenyi na oe kapatiso. 39 Numa ya iho, kyiyeri walewuka kulya mṟingyenyi, Mumuyo o Mndumii Ruwa karakuo Filyipo; mndu ulya o Kushi alammbone-se. Kayenda kanyi amchihiye. 40 Kyaindi Filyipo kawono urukyenyi lo Asoto, na kyiyeri aweiiṙa kaonguo Ndumi Ngyicha mṟi yoose, mṟasa kashika Kaisaria.
1 Kyaindi Saulyi, kaengyeṟa iowesha na ikusaṟa iwaaga wanalosho wa Mndumii Yesu. Kayenda ko Mkohanyi ang'anyi kuta woose, 2 katerewa naenengo paruo tsa iyenda Dameskyi, tsingyiṙikye ko walya wawekyesongoya masinagogi, kundu kawona wandu walya wawekyeosha Mndumii Yesu, wasoṟo na waka, nawapfungye na iwaende na Yerusalemu. 3 Na kyiyeri awei kyaronyi, kyikawa nakyeri kufuhi na Dameskyi. Cha ilyi ngyeela iwukyie ruwewu ikamlyimika ngyuura tsoose. 4 Kaoloka wanda, kaicho ṟui lyechimmbia, “Saulyi, Saulyi, ny'kyilyi ungyilyisa wukyiwa?” 5 Kagamba, “Nyi wui iyoe, Mndumii?” Na oe kagamba, “Inyi nyi Yesu ungyilyisa wukyiwa. 6 Kyaindi goṟoka, uiṙe na mṟinyi, na iyoe nochiwio shikuwaṟi iwuta.” 7 Na wandu walya wawei kyaro hamwi na oe wakagoṟoka watsie sau, wechiicho ṟui, walawone mndu. 8 Saulyi kaamka halya wanda, na kyiyeri meso gakye galepfunguka, alewona kyindo-pfo. Wakammbaṙa kuwoko wakamwende mṟasa Dameskyi. 9 Alawone kyiyeri kya mfiri iṟaṟu; alailya maa inyo kyindo. 10 Kyasia kulya Dameskyi kuwewoṙe manalosho ekyelago Anania. Mndumii kamlaga akyeri cha mndu ailoṙo. Anania kaiṙikyia kagamba, “Nyi iha ngyikyeri, Mndumii.” 11 Mndumii kammbia, “Amka, yenda kulya mṟaṟunyi okyelago ‘Mṟaṟu Mgoṟotsu’ undewesa numbenyi ko Yuda mndu ekyelago Saulyi awukyie Tariso; cha kyipfa mndu-cho naiterewa. 12 Na oe ammbona mndu ekyelago Anania echicha, na imyekyia mawoko, naiṙime iwona-se.” 13 Kyaindi Anania kagaluo, kagamba, “Mndumii, ngyilemwicho mbonyi tsa mndu-chu ko wandu wafoi, kye alemmbutia wandu walya wapfo wakyeri Yerusalemu shindo shiwicho mnu. 14 Maa wulalu nawoṙe momu amwenengye nyi wang'anyi wa makohanyi napfungye wandu woose wekyeterewa kui rina lyapfo.” 15 Kyaindi Mndumii kammbia, “Yenda tupu; cha kyipfa mndu-chu nyi kyindo kyako kyikyisaangye, naonguo mbonyi tsako ko walya walangyiiṙikyie, na ko wamangyi, na ko wandu wa Isiraelyi. 16 Kyipfa ngyechimloṟa chandu echilyiso ngyuukyiwa tsifoi kyipfa kya iongoya wandu wengyi mbonyi tsako kundu wangyimanye.” 17 Anania kafuma, kaiṙa na kulya numbenyi Saulyi awekyeri, kamyekyia mawoko echigamba, “Mono-wama, Saulyi, Mndumii nangyiṙuma, Yesu ulya alecha na kopfo ukyeri njienyi icha na kunu Dameskyi, uiṙime iwona-se, uichuṟo Mumuyo Mweele.” 18 Cha ilyi shindo shikyeri cha masuoe shikaoloka mesonyi gakye, kaiṙima iwona. 19 Kagoṟoka kapatiso; kalya kyelya, kawaṙa pfinya. Kakaa kulya Dameskyi mfiri ngyaangu, hamwi na wanalosho wawekyeri pfo. 20 Saulyi akyeri kulya Dameskyi kaonguo mbonyi masinagoginyi, kye Yesu nyi Mana o Ruwa. 21 Na wandu woose waleicho wakaṟiyio, wakagamba, “Ichu chi ulya awekyelyisa wukyiwa walya wawekyeterewa kui rina lya Yesu kulya Yerusalemu-pfoe? Na alecha na kunu Dameskyi awoṙe makusaṟo igo igo, nawapfungye na iwaṙuo ko wang'anyi-pfoe?” 22 Saulyi kaengyeṟa iwaṙa pfinya kyiiṙi kya ionguo mbonyi tsa Yesu, kaowesha Wayuda wawekyekaa Dameskyi, echiloṟa na pata kye ulya aweionguo mbonyi tsakye nyi oe Kristo. 23 Na mfiri ifoi yamuiṙe, Wayuda wakachila chandu wembaaga; 24 kyaindi ngyeṟo tsawo Saulyi katsimanya. Wakamwotia kyingoto na kyio kundu waiṙime immbaaga. 25 Wanalosho wakye wakammbika mkunjenyi kyio na imsotsia wanda wechimwitsa dirishenyi. 26 Na kyiyeri Saulyi aleshika Yerusalemu, nalepfuṟukana ikulunga na wanalosho, nawo wawemwowuye woose walaiṙikyie kye oe nyi manalosho. 27 Kyaindi Barinaba kaṙuo Saulyi ko wasu, kawawia chandu alewona Mndumii Yesu njienyi, na kye naleṙeṙa na oe, na chandu aleonguo mbonyi ngyicha tsa Yesu kulya Dameskyi kui wuṟango na wukari. 28 Na Saulyi kakaa hamwi na wasu kulya Yerusalemu echioshana nawo kyiiṙi kya shoose waweiwuta. 29 Kaonguo mbonyi tsa Mndumii Yesu kui wukari, echiṙeṙa na igaluana na Wayuda wawekyeṙeṙa mṙeṙie o Kyikyiṟikyi. Nawo wakatambagana immbaaga. 30 Kyaindi kyiyeri walya waweiṙikyie Yesu walemanya mbonyi-tsi wakamṙuo Kaisaria, wakamṙuo nayende Tariso. 31 Kyasia Siṟi ikawona sia urukyenyi lo Uyuda na Galyilaya na Samaria. Siṟi ikawaṙa pfinya, ikaengyeṟika, yechiindia Mndumii Yesu na iwiyiṟio moo nyi Mumuyo Mweele. 32 Na kyiyeri Petiro aweitenga-tenga ngyuura tsoose kayenda ko wandu wa Ruwa wawekyekaa Lyida. 33 Kawona mndu umwi kulya, awekyelago Ainea. Mndu-cho nawelee kyitaṟenyi kyiyeri kya maka nyanya; kyipfa nawepfiie ngapfu ura lumwi. 34 Petiro kammbia, “Ainea, Yesu Kristo amkukyiṟa. Amka, uale kyitaṟa kyapfo.” Cha ilyi kaamka. 35 Na wandu woose wawekyekaa Lyida na Sharoni wakammbona, wakaiṙikyia Mndumii Yesu na imwosha. 36 Na kulya Yafa kuwewoṙe manalosho umwi ekyelago Tabita (kyimwi na igamba Dorikasi ang'u moṟinyi). Mndu mka-chu nawewoṙe mawuto mecha na ienengyia shienengo shetarama wakyiwa. 37 Kyiyeri kyilya Tabita kaluo, kapfa; na wamumsanje, wakamṙuo kai. 38 Na kyipfa mṟi o Lyida uwekyeri kufuhi na Yafa, na wanalosho waleicho kye Petiro nakyeri pfo, wakaṙuma wandu wawi kokye, imterewa wechigamba, “Ulakyelyio icha na koṙu.” 39 Petiro kafuma kaoshana nawo. Kyiyeri aleafukyia, wakamṙuo kulya kai; wakusu woose wakagoṟoka kufuhi na oe, welyia na imloṟa kanzu na nguwo tsilya Dorikasi alepfuma kyiyeri kyilya awekyeri hamwi nawo. 40 Petiro kawawia woose wafumie nja, kapfiria ndi, katerewa, numa ya iho kapaaya mnying'a ulya o Dorikasi, kagamba, “Tabita, amka.” Dorikasi ulya awepfiie kaambuo, kawona Petiro, kaamka, kaṙamia. 41 Petiro kalesha kuwoko, kamwira. Na amlage wandu walya wa Ruwa na wakusu kawikyia Dorikasi mbele yawo, ai na moo. 42 Mbonyi-tsi tsikaṙunganana ko wandu woose wa mṟi o Yafa; wandu wafoi wakaiṙikyia Yesu. 43 Kyasia Petiro kakaa mfiri ngyaangu kulya Yafa, kanyi ko mndu umwi ekyelago Simion, awekyeachikyia njonyi.
1 Kulya Kaisaria kuwewoṙe mndu awekyelago Korinelyio, mchilyi o ulyimalyi lokyelago “Kyiitalyia.” 2 Mndu aowuye na ikunda Ruwa, oe na wandu woose wa kanyi kokye, na oe nawekyeenengyia shienengo shifoi shesaṟia wandu, na nawekyeterewa Ruwa mfiri yoose. 3 Kawona na pata malaika o Ruwa akyeri cha mndu ailoṙo, cha saa kyenda tsa kyingoto, malaika o Ruwa echicha na kokye na immbia, “Korinelyio!” 4 Kamwitukuya mnu, kaowuo, kagamba, “Ny'kyikyi kyacha pfo, Mndumii?” Kammbia, “Ruwa naicho shiterewo shapfo na mawuto gapfo mecha gesaṟia wandu na wulalu naigaluo shilya okyemterewa. 5 Kyasia, wulalu ṙuo wandu Yafa, undelaga Simion, ekyelago Petiro. 6 Oe nyi myenu o mndu umwi, ekyelago Simion, ekyeachikyia njonyi, ulya numba yakye ikyeri mbai ya ipalyipalyi; nekuwia shindo shikuwaṟi iwuta.” 7 Na malaika ulya aleṙeṙa na oe amyende, Korinelyio kalaga waṟundi wawi kyiiṙi kya waṟundi wakye wa kanyi, na asikari umwi, mndu aowuye na ikunda Ruwa kyiiṙi kya walya wawekyemṟundia mfiri yoose; 8 na amwawie chandu shindo shoose shechiwa kawaṙuma iyenda Yafa. 9 Na ilya-ngama, kyiyeri wawei kyaronyi na ishika kufuhi na mṟi, Petiro naleṙooya kai indeterewa, cha saa tsiṟandaaṟu tsa kyingoto. 10 Kawoṙo nyi njaa, kakunda ilya; kyaindi kyiyeri waweiṟeyeṟa kyelya, kaloṟo kyindo akyeri cha mndu ailoṙo. 11 Kawona ngyina yeṟuguka, na kyindo kyikyeri cha nguwo ngyilandari kyesoka, kyikasotso mṟasa wuyanenyi kyii cha ilyi kyikyiwaṙe ngyuura tsoose tsiina. 12 Ipfo kyindonyi kyilesotso kuwewoṙe orio indo lya saka lyiwoṙe maṙende gaana, na mando ga saka gekyekukuruo na ndewu, na shileye sha ngyinenyi. 13 Numa ya iho kaicho ṟui lyigamba, “Amka, Petiro, ushinje ulye.” 14 Kyaindi Petiro kagamba, “Maa ale, Mndumii, cha kyipfa ngyilandelye kyindo kyoose kyilawaṟi na kyifanyi kyimṟumoe-pfo.” 15 Kaicho ṟui lya kawi, lyemmbia, “Molakusaṟe kye kuwoṙe kyindo kyilawaṟi ilyio kokooya Ruwa nagambie shoose shiwaṟi ilyio.” 16 Kyindo-kyi kyikawutika kaṟaaṟu. Numa ya iho kyindo kyilya kyilekokyasoka ruwewu kyikawuya napfo. 17 Na kyiyeri Petiro awemṟiyie mrimenyi kokye, echikuwesa shindo shilya aleloṟo akyeri cha mndu ailoṙo shiwemmbia kyi, wandu walya Korinelyio alewaṙuma, wammbese mbonyi tsa numba ya Simion, wakagoṟoka mbele ya moongo, 18 wakalaga; wakawesa kokooya Simion ekyelago Petiro nekyekaa pfo. 19 Na Petiro naweikusaṟa mbonyi tsa shindo shilya alekoaloṟo akyeri cha mndu ailoṙo. Mumuyo kammbia, “Kuwoṙe wandu waṟaaṟu waikupfula. 20 Kyasia fuma uoshane nawo, molapfiio nyi mṙoe, cha kyipfa nyi inyi ngyilewaṙuma.” 21 Petiro kayenda ko wandu walya, kagamba, “Nyi inyi mungyipfula. Mocha kyipfa kya kyikyi?” 22 Wakagamba, “Mchilyi Korinelyio, mndu ulya msumganyi, aowuye na ikunda Ruwa, awoṙe kyiṟumi kyicha ko isanga lyoose lya Wayuda, nalewio nyi malaika mweele iṙuma wandu kopfo, wakuwie uyende kokye, kundu naicho kyilya okyelosha.” 23 Petiro kaambilyia wayenu walya, wawe wayenu wakye. Na ilya-ngama, Petiro kafuma hamwi nawo, na wandu waata wawekyeosha Yesu kulya Yafa wakaoshana na oe. 24 Ilya-ngama wakashika Kaisaria. Na Korinelyio naweiwaweṙelyia, asanzie hamwi na wa kyishari kyakye na mbuya tsakye. 25 Kyiyeri Petiro aletikyira kufuhi Korinelyio kafuma indemwambilyia, kakuwiyitsa maṙendenyi gakye, kamwindia. 26 Kyaindi Petiro, kamwira, kagamba, “Goṟoka; inyi nyi mndu cha wandu wengyi ngyilawaṟi iindio cha malaika.” 27 Na echigamba kuṙo kaiṙa na numba, kawona wandu wafoi wasanzie pfo. 28 Kawawia, “Nyoe muichi kye chi sungusinyi mndu alakyeri Myuda naoshane na mndu o isanga lyingyi maa iyenda kokye-pfo, kyaindi Ruwa nalegyiikyimbia, ngyilagambe kye kuwoṙe mndu afanyi kyimṟumoe alawaṟi ikaa na wandu wengyi-pfo. 29 Kyipfa kya ikyo ngyilecha lyilya ngyilelago, ngyilalege; kyasia ngammbesa, ny'kyikyi mongyilaiya.” 30 Korinelyio kagamba, “Mfiri iṟaṟu ileira, kyiyeri-kyi ikyi, kyiyeri kya saa kyenda, ngyiweiterewa kanyi koko; mndu umwi kagoṟoka mbele yako, awoṙe nguwo tsiaka-aka, 31 kagamba, ‘Korinelyio, shiterewo shapfo shaaṙanyio na shienengo okyeenengyia shiwonio na pata mbele ya Ruwa. 32 Kyasia, ṙuma wandu kulya Yafa, undelaga Simion ekyelago Petiro, ekyekaa kanyi ko Simion, ekyeachikyia njonyi, kufuhi na mbai ya ipalyipalyi; na oe kacha nechiṙeṙa na iyoe.’ 33 Cha ilyi ngaṙuma wandu kopfo, na iyoe nowuta necha icha. Kyasia soe loose lukyeri iha mbele ya Ruwa, luiṙime iaṙanyia mbonyi tsilya Mndumii alekuwia uluongoye.” 34 Petiro kawooka iṙeṙa, kagamba, “Loi ngyiichi kye Ruwa awoṙe ikundia-pfo; 35 indi kyiiṙi kya orio isanga mndu ekyeindia Ruwa na iwuta sha sungusinyi Ruwa nekyemwiṙikyia. 36 Mbonyi tsilya aleṙooya wana wa Isiraelyi, echionguo mbonyi ngyicha tsa ufoṟo kui Yesu Kristo (nyi oe Mndumii o woose), 37 kyindo-kyi nyoe mukyiichi, kyileongoyo urukyenyi loose lo Uyuda, kyechiwookyia Galyilaya, numa ya wupatiso wulya Yohane aleonguo mbonyi tsakye. 38 Mbonyi tsa Yesu awukyie Nasareti, chandu Ruwa alemshumbuo kui Mumuyo Mweele na pfinya; na oe katenga-tenga ipfo na ipfo, echiṟunda iṟunda lyicha na ikyiṟa woose Mokyiriinzi aweiwalyisa wukyiwa; cha kyipfa Ruwa nawekyeri hamwi na oe. 39 Na soe lui waṟingyishi wa shindo shoose aleshiwuta urukyenyi lo Wayuda na Yerusalemu; ulya walemmbaaga na immanyika ikyiṙinyi. 40 Icho Ruwa nalemṟutsa mfiri o kaṟaaṟu, kamsaṟia imanyika, 41 chi ko wandu woose-pfo, indi ko waṟingyishi walekowamsambuṟo nyi Ruwa, nyiwo soe, lulelya na inyo hamwi na oe numa ya iṟuka lyakye iwuka ko wapfu. 42 Naleluwia luongoye wandu mbonyi ngyicha na iṟingyishia kye ichu nyi oe ammbikye nyi Ruwa nawe moanduya wai na moo na wapfu. 43 Icho weonguo shisuku woose walemṟingyishia, kye kui rina lyakye orio momwiṙikyia nechihooṟio wunyamaṟi.” 44 Kyiyeri Petiro aweionguo mbonyi-tso Mumuyo Mweele kasokyia wuye ya woose waleicho kyilya alegamba. 45 Na Wayuda waweiṙikyie Yesu walekowacha hamwi na Petiro wawuka Yafa waleṟiyio, cha kyipfa maa wandu walaweiṙikyie Yesu walesumbo kyienengo kya Mumuyo Mweele. 46 Cha kyipfa waleicho weṙeṙa mṙeṙie ngyiyenu, na iṟumisha Ruwa. Naaho-ng'u Petiro kagaluo, kagamba, 47 “Nyi wui eiṙima ishingyia mṟinga, wandu-wa walapatiso? Wandu waambilyie Mumuyo Mweele kyimwi na soe?” 48 Kagamba wapatiso kui Rina lya Yesu Kristo. Naaho wakamterewa naengyeṟe ikaa kowo mfiri ngyaangu.
1 Kyasia wasu na wandu waweiṙikyie Yesu kulya urukyenyi lo Uyuda wakamanya kye wandu walaweiṙikyie Yesu nawo waambilyia Ṙeṙo lya Ruwa. 2 Na Petiro kyiyeri aleṙo iyenda Yerusalemu Wayuda walya wawekundi wandu walakyeri Wayuda wakundi iosha Yesu waṙino wakagaluana na oe, 3 wechigamba, “Nuleyenda ko wandu walawaṙine kolya nawo.” 4 Petiro kawooka iwaongoya necha, kagamba, 5 “Ngyiwekyeri mṟinyi o Yafa, ngyeterewa, ngawa cha mndu ailoṙo. Ngawona kyindo kyisoka ruwewu, cha nguwo ngyilandari yesotso iwuka ruwewu, ikyeri cha ilyi ingyiwaṙe ngyuura tsoose tsiina, kyikashika halya-ndu ngyiwei. 6 Ngakyiitukuya mnu, ngyekusaṟa, ngawona mando ga saka gawoṙe maṙende gaana; na mando ga nguṙunyi, na galya gekyekukuruo na ndewu, na shileye sha ngyinenyi. 7 Ngaicho na ṟui lyingyiwia, ‘Petiro, amka, ushinje ulye.’ 8 Ngagamba, ‘Maa ale, Mndumii, cha kyipfa ngyilandelye kyindo kyoose kyifanyi-pfo.’ 9 Ṟui lyilya lyawuka ruwewu lyikangyigaluo lya kawi lyikagamba, ‘Shilya Ruwa agambie shiwaṟi ilyio iyoe ulagambe kye shekyelyio-pfo.’ 10 Kyindo-kyi kyikawutika kaṟaaṟu; numa ya iho ngawona kyindo kyakuruo shindo shilya shoose shikawuya-se na ruwewu. 11 Kyiyeri kyilya wandu waṟaaṟu wakagoṟoka mbele ya numba iya luwekyeri, waleṙumo koko iwuka Kaisaria. 12 Mumuyo kangyiwia ngyioshane nawo, ngyilapfiio nyi mṙoe. Wandu-wa waṟandaaṟu waiṙikyie Yesu wakayenda hamwi na inyi, lukoiṙa na numba ko mndu ulya. 13 Kaluongoya chandu alewona malaika alegoṟoka kanyi kokye na immbia, ‘Ṙuma wandu wayende Yafa, walage Simion ekyelago Petiro, 14 echikuongoya mbonyi tsechikukyiṟa, iyoe na walya wa kanyi kopfo woose.’ 15 Na kyiyeri ngyilewooka iṙeṙa, Mumuyo Mweele kasokyia wuye yawo chandu alelusokyia soe ipfo mawookyionyi. 16 Ngakumbuo ṙeṙo lyilya lya Mndumii, chandu alegamba, ‘Yohane nalepatisa kui mṟinga loi, indi nyoe mochipatiso kui Mumuyo Mweele.’ 17 Kyasia kokooya Mndumii Ruwa nalewaenenga wo kyienengo kyilya kyilya aleluenenga soe luiṙikyie Mndumii Yesu Kristo, inyi nyi wui ngyiiṙime iwingana na Ruwa?” 18 Kyiyeri waleicho mbonyi-tsi wakatsia sau, wakaṟumisha Ruwa, wechigamba, “Kyasia Ruwa naenenga walya walaiṙikyie Yesu isaṟia lya iṙumbuya wunyamaṟi, irumbuya lyekyeende moo o mlungana.” 19 Kyasia wandu walya walekowanyanyaṟika kyipfa kya wukyiwa wulya wulecha kyipfa kya Stefano iwoogo, wakapfunga kyaro mṟasa Foinikye na Kyipiro na Antiokyia, walaonguoe mbonyi tsa Yesu sile ko Wayuda tikyi. 20 Kyaindi waata kyiiṙi kya iwo walepfunga kyaro nyi-we wandu wa Kyipiro na Kyirene, nawo kyiyeri waleshika Antiokyia wakaṙeṙa na Wayuda kui mṙeṙie o Kyikyiṟikyi, wechionguo mbonyi ngyicha tsa Mndumii Yesu. 21 Pfinya ya Mndumii ikakaa hamwi nawo; wandu wafoi wakaiṙikyia wakagalukyia Mndumii. 22 Mbonyi tsa wandu-wo tsikashika ko wandu wa siṟi ya kulya Yerusalemu; wakaṙuma Barinaba, nayende mṟasa Antiokyia. 23 Na oe, amshikye na iwona isaṟia lya Ruwa kachihiyo, katerewa wandu woose waoshane na Mndumii kui iiṙikyia lyiwukyie mrimenyi. 24 Kyipfa nawekyeri mndu mcha aichuo Mumuyo Mweele na iiṙikyia; wandu wafoi wakaengyeṟika ura lo Mndumii. 25 Numa ya iho kafuma kayenda Tariso indepfula Saulyi; 26 na amummbone kamwende na Antiokyia. Kyikawa ko kyiyeri kya maka umwi wakasanza hamwi na siṟi na ilosha wandu wafoi. Na wanalosho walelago Wakristiano lya kuwooka halya Antiokyia. 27 Mfiri iya iya weonguo shisuku walewuka Yerusalemu wakasoka na Antiokyia. 28 Na kyiyeri lulesanzia handu hamwi, umwi owo ekyelago Agabo kagoṟoka, kaloṟa kui wuiṙimi wo Mumuyo Mweele kye njaa ing'anyi yeecha mfiri ya kufuhi wuyanenyi koose; na njaa-yo ikacha kyiyeri Kyilaudio awewoṙe uruka. 29 Na wanalosho walya, orio mndu chandu awewoṙe, wakaiṙikyia iṙuo kyindo kyetarama wana wa wamawo kyiiṙi kya iiṙikyia wawekyekaa uruka lo Uyuda. 30 Wakawuta kuṙo, Barinaba na Saulyi wakaṙumo ko wameeku wa siṟi waṙuṙe kyindo kyilya wanalosho waleenengyia kyetarama woṙiawo.
1 Kyiyeri kyilya kyilya mangyi Herode kawooka ilyisa wandu waata wa siṟi wukyiwa. 2 Kawaaga Yakobo, mono-wama o Yohane na ushu. 3 Na awonyi kye nyi kyindo kyichihiṟie Wayuda kaengyeṟa ilyisa siṟi wukyiwa, kawaṙa na Petiro. Kyiyeri-kyo kyiwekyeri kyiyeri kya mkate ilangyitarang'ishe. 4 Ammbaṙe Petiro, kammbika kyipfungonyi, kamṙambika ko shikosi sha asikari waana waana, wamringye, akundi immbikyia mbele ya wandu numa ya Pasaka kundu naanduyo. 5 Kyasia Petiro karingo kulya kyipfungonyi, na siṟi ikaterewa Ruwa kui wuragari kyipfa kyakye. 6 Na kyiyeri Herode awekundi iwuta Petiro kyipfungonyi, kyio kyilya nawelee makyiṙi-gawi ga asikari wawi, ampfungye na mshe iwi; waringyi wakaringa moongo o numba iya ya ipfungyia wandu. 7 Cha ilyi malaika o Ruwa kagoṟoka kufuhi na oe, ngyeela ikalyimika kulya kyiṟinyi, kakapa Petiro uwarinyi, kamwamtsa, echigamba, “Amka iwinyi.” Mshe iya ikawuka kulya mawoko kokye. 8 Malaika kammbia, “Kuṟeyeṟe, ṟaa shiaṙu shapfo.” Kawuta kuṙo. Numa ya iho kammbia, “Ṟaa nguwo tsapfo ungyioshe.” 9 Kafuma na nja kamwosha, maa alemanya kye nyi loi shilya shilewuto nyi malaika-pfo; indi nalekusaṟa kye nawonyi shindo cha mndu ailoṙo. 10 Na kyiyeri wamuiṙe handu ha kuwooka na ha hawi hawewoṙe asikari waringyi, wakacha mṟasa moongo o menya o iṙa na mṟinyi, ukoṟuguka umonyi kulawoṙe mndu aupaaya. Wakafumia nja wakyeri njienyi imwi. Cha ilyi malaika ulya kalekana nawo. 11 Na kyiyeri wuṟango wo Petiro wulemmbiyilyia, kagamba, “Wulalu ngyiichi na pata kye Mndumii naṙuma malaika okye na ingyiwuta wuchilyinyi wo Herode na matuuro galya Wayuda wawekusurie ingyienenga.” 12 Na kyiyeri aweikusaṟa isho kashika kanyi ko Mariamu, wama o Yohane, ulya rina lyakye lya kawi lyiwekyeri nyi Mariko; na wandu wafoi walekowasanzia pfo weterewa. 13 Na oe kyiyeri alekapa hodi halya kyichuminyi, kyisinga kyekyelago Roda, kyikacheaṙanyia. 14 Kyiyeri kyilemanya nyi ṟui lya Petiro, kyikaṟuguo moongo, kyipfa kya ichihiyo; indi kyikakapa mteeṟa, kyikaiṙa na numba kyikawia walya wawekyeri pfo kye Petiro nagoṟokyi halya kyichuminyi. 15 Wakakyiwia, “Nuisuko.” Kyaindi kyo kyikaengyeṟa igamba nyi loi kye Petiro nawekyeri halya. Wakagamba, “Nyi malaika okye.” 16 Petiro kaengyeṟa ikapa hodi, na wampfunguo moongo wakammbona, wakaṟiyio. 17 Na oe kawatsinia watsie, kawaongoya chandu Mndumii alemmbuta kyipfungonyi. Kagamba, “Ndewienyi Yakobo na wandu walya waiṙikyie Yesu mbonyi-tsi.” Kafuma, kayenda handu hengyi. 18 Na kyiyeri kulekya asikari wakawoṙo nyi wuowu wung'anyi, mbonyi tsa Petiro tsawa kuṙa. 19 Na kyiyeri Herode alempfula alammbone, nalewesa-wesa waringyi, kagamba wawoogo. Numa ya iho kawuka uruka lo Uyuda kasoka na Kaisaria, kakaa pfo. 20 Na Herode nawesuuye mnu kyipfa kya wandu wa Tiro na Sidon. Wakayenda kokye wakyeri kyindo kyimwi, na wammbaṙe mbuya na Blasto, awekyeambuya kyiṟi kya Mangyi Herode kyelaa, wakakunda ikaa na wandu ko ufoṟo; cha kyipfa uruka lowo lulewona kyelya iwuka urukyenyi lo Herode. 21 Kyasia mfiri umwi uwemṟeyeṟe, Herode, kaṟaa nguwo tsa kyimangyi, kaṙamia kyiṙinyi kya wumangyi, kaṙeṙa nawo. 22 Wandu wakakalagatsa, wechigamba, “Nyi ṟui lya Ruwa; chi ṟui lya mndu-pfo.” 23 Cha ilyi malaika o Ruwa kamkapa, cha kyipfa aleenenga Ruwa kyiṟumi-pfo. Shiwoṙoe shikamlya kapfa. 24 Ṙeṙo lya Ruwa lyikaengyeṟa imanyika ko wandu wafoi. 25 Na Barinaba na Saulyi, wamṟunde kyilya kyiwewaṟi iṟunda, wakacha wawuka Yerusalemu, wakacha hamwi na Yohane ekyelago Mariko.
1 Na kulya siṟinyi ya Antiokyia kuwewoṙe weonguo shisuku na walosha, nawo nyi Barinaba, na Simion ekyelago Nikyeri, na Lukyio awukyie Kyirene, na Manaeni aweongyie wee lyimwi na Mangyi Herode, na Saulyi. 2 Kyasia kyiyeri iwa waweiterewa Ruwa na ikuretekyia, Mumuyo Mweele kagamba, “Ngyisaangyienyi Barinaba na Saulyi ko iṟunda lyilya ngyilemulagia.” 3 Naaho-ng'u wamkuretekyie na iterewa, wakawayekyia mawoko, wakawaṙuma. 4 Kyasia wandu-wo, wamṙumo nyi Mumuyo Mweele, wakasoka na Seleukyia, na iwuka pfo wakaiṙa ipalyipalyinyi mṟasa Kyipiro. 5 Na kyiyeri wawekyeri Salami wakaonguo Ṙeṙo lya Ruwa masinagoginyi ga Wayuda, nawo wawekyeri na Yohane cha mṟundi owo. 6 Wamuiṙe kyiiṙi kya Kyipiro mṟasa Pafo, wakawona mndu umwi, msawi, moonguo shisuku o wongo, Myuda awekyelago Bar-Yesu. 7 Mndu-chu nawekyeri hamwi na mchilyi Serikyio Paulo, mndu mṟango. Mchilyi-cho kalaga Barinaba na Saulyi wache na kokye, kakunda iicho Ṙeṙo lya Ruwa. 8 Kyaindi Elyima, msawi ulya (kyipfa ikyo ny'kyo rina lyakye lyagamba), kagaluana nawo, akundi ilemba mchilyi ulya naṙe iiṙikyia Yesu. 9 Kyaindi Saulyi ang'u Paulo, aichuo Mumuyo Mweele, kamwitukuya karii, 10 kagamba, “Iyoe uwoṙe ngyeṟo na wuwicho woose, mana o Mokyiriinzi, mokyituwa o wusumganyi woose, okyeṙa igaluo wuloi wo Mndumii wuwe wongo? 11 Ruwa nechikukapa na ikuanduya; na iyoe nochipfa meso, ulewona kyindo kyoose.” Cha ilyi rundu lya meema lyikamwolokyia katenga-tenga na ipfula mndu mommbaṙa kuwoko na imsongoya. 12 Naaho-ng'u mchilyi ulya, kyiyeri alewona shawutika, kaiṙikyia, echiṟiyio kyipfa kya malosho ga Mndumii. 13 Numa ya iho Paulo na oṙoe wakawooka kyaro kya ipalyipalyinyi, wakawuka Pafo wakashika Perikye, urukyenyi lo Pamfilyia. Yohane kalekana nawo kawuya na Yerusalemu. 14 Kyaindi wo wakawuka Perikye, walaiṙe-se ipalyipalyinyi, wakashika Antiokyia, mṟi o uruka lo Pisidia, wakaiṙa na sinagoginyi mfiri o onyonya, wakaṙamia. 15 Numa ya isoma kyitumbuṟe kya uwawaso na kyitapu kya weonguo shisuku, wasongoru wa sinagogi wakaṙuma mndu kowo na iwawia, “Wana wa wama kyiiṙi kya iiṙikyia, kokooya muwoṙe ṙeṙo lyetarama wandu-wa, lyionguonyi.” 16 Paulo kagoṟoka, kawatsinia, kagamba, “Nyoe wasoṟo wa Isiraelyi, na nyoe muowuye na ikunda Ruwa, aṙanyienyi. 17 Ruwa o wandu wa Isiraelyi nalesambuṟa waku waṙu, kawaenenga mng'ano, kyiyeri wawekyekaa cha wayenu urukyenyi lo Misiri, na kui pfinya yakye kawawuta pfo, kawasongoya. 18 Na kyiyeri kya maka makumi gaana kakarishia mkaṟo yawo ngyiwicho kulya nukyenyi ngyiumu suwaa ilawoṙe maa mṟinga. 19 Na amrumatse masanga mfungaaṙe urukyenyi lo Kanaan kawaenenga uruka-lo luwe kyioṟa ko kyiyeri kya maka cha magana gaana na makumi gataanu; 20 numa ya iho kawaenenga wamangyi wookyia kacha kyiyeri kya Samolyi. 21 Numa ya iho wakaterewa ienengo mowaṙa uruka. Ruwa kawaenenga Saulyi, mana o Kyishi, mndu o kyishari kya Benyamen, kyiyeri kya maka makumi gaana. 22 Na amwawute Saulyi, kasambuṟa Dawidi nawe mowaṙa uruka lowo, ulya alemṟingyishia, echigamba, ‘Ngawona Dawidi, mana o Yese, mndu achihiṟie ngoo yako, echiwuta shilya ngyikundi shoose.’ 23 Kyisharinyi kya Dawidi Ruwa naleendie wandu wa Isiraelyi Mkyiṟa, Yesu, chandu alewika kyaasa. 24 Yohane aweiongoya wandu woose wa Isiraelyi mbonyi ngyicha tsa wupatiso wo iṙumbuya wunyamaṟi, kyiyeri oe Yesu alandeche. 25 Na Yohane kyiyeri aweimarisa iṟunda lyakye nalegamba, ‘Mokusaṟa inyi nyi wui? Inyi chi oe-pfo. Kyaindi kuicha umwi numa yako, ulya inyi ngyilawaṟi ituruchuo ukowa lo shiaṙu shakye.’ ” 26 “Wana wa wama wako, wana wa kyishari kya Abrahamu, na iwo wai konyu waowuye na ikunda Ruwa, Ṙeṙo lya wukyiṟo-wu lyaendo na koṙu nyi mndu Ruwa amṙumie. 27 Cha kyipfa walya wekyekaa Yerusalemu, na wasongoru wawo, kyipfa walalemmanya oe, maa imanya malosho ga weonguo shisuku gekyesomo orio mfiri o onyonya, walegaafutsia kui imwanduya. 28 Maa chandu walalewona kyimaṙuma kyemmbaaga wakaterewa Pilato nawoogo. 29 Na wammbute shoose shiweshigambe kye shechimmbutikyia, wakamsotsa halya msalabenyi, wakammbika kyilomenyi. 30 Kyaindi Ruwa kamṟutsa ko wapfu; 31 mfiri ifoi kawono akyeri na walya walecha na oe iwuka Galyilaya mṟasa Yerusalemu,walya wulalu wekyemṟingyishia mbele ya wandu. 32 Na soe lokyemuongoya mbonyi ngyicha tsa kyaasa kyilya waku waṙu waleenengo, 33 kye Ruwa naleafutsia kyaasa-kyo ko wana waṙu, kui iṟutsa Yesu; chandu kyikyiṟeie Kyiimbonyi kya Kawi, ‘Iyoe nyi oe Mono-ko, inyi inu ngawa Awuyo.’ ” 34 “Lyingyi-se kye nalemṟutsa ko wapfu, kundu alapfe na ipuo. Nalegamba kuṙi, ‘Ngyemuenenga nyoe shindo shiele sha Dawidi shikyeri sha loi.’ ” 35 “Koikyo handu hengyi nagambie, ‘Ochilekyia mweele opfo napfe na ipuo-pfo;’ ” 36 “Cha kyipfa Dawidi naleṟundia Ruwa kyiyeri kyakye, naaho kapfa kaṟiko hamwi na waku wakye na mmbiu okye ukopuo; 37 indi ichu aleṟutso nyi Ruwa nalepfa indi alepuo-pfo. 38 Kyasia kyimanyikye konyu, wana wa wama wako, kye kui rina lya Yesu muongoyo mbonyi tsa ihooṟio wunyamaṟi. 39 Na kui oe orio momwiṙikyia nekyetalo kye namsumganyi shindonyi shoose alechiiṙima italo kye namsumganyi kui uwawaso lo Mose. 40 Kyasia, kuringyenyi mulachewutikyio mbonyi iya ilegambo shiṟeionyi sha weonguo shisuku, 41 ‘Aṙanyienyi, nyoe mokyemina kyilya Ruwa agambie, ṟiyionyi na ipfa cha kyipfa kyilya ngyiwuta inu nyi kyindo mulechikyiiṙikyia maa kyiyeri mndu amuongoya.’ ” 42 Na kyiyeri Paulo na Barinaba waweiwuka halya Sinagoginyi wakawaterewa waongoyo mbonyi-tso mfiri o kawi o onyonya. 43 Kyiyeri walya wawesanzie sinagoginyi walelekana, Wayuda na wandu wafoi waweowuye Ruwa na imkunda wakaoshana na Paulo na Barinaba waleṙeṙa nawo wechiwakarisha wakae isaṟienyi lya Ruwa mfiri yoose. 44 Na mfiri o kawi o onyonya, wandu wafoi iwuka mṟinyi koose, wakasanzia handu hamwi kundu waicho Ṙeṙo lya Ruwa. 45 Indi Wayuda, kyiyeri walewona wuingyi wo wandu, wakawoṙo wunyenyi, wakakangyila kyilya Paulo alekoagamba, wechigamba chi loi-pfo na ilahia. 46 Paulo na Barinaba wakaṙeṙa kui wukari, wakagamba, “Kyiwewaṟi Ṙeṙo lya Ruwa lyiongoyo konyu kuwooka; kyaindi kyipfa mulyitsindikyia kuleshi, na ikuicho mrimenyi konyu kye muwaṟi moo o mlungana-pfo, wulalu luyenda ko wandu walaiṙikyie Ruwa. 47 Cha kyipfa nyi wuṙo Mndumii aleluwia, echigamba, ‘Ngakuwika uwe ngyeela ya wandu walaichi Ruwa kundu wuyana woose wuwone wukyiṟo.’ ” 48 Kyiyeri wandu walaichi Ruwa waleicho isho wakachihiyo, wakang'anyisa Ṙeṙo lya Ruwa na walya wawewaṟeyeṟie moo o mlungana wakaiṙikyia. 49 Ṙeṙo lya Ruwa lyikaṙunganana kulya urukyenyi koose. 50 Kyaindi Wayuda wakaamtsa shiloyano kyiiṙi kya waka waowuye na ikunda Ruwa, waka wawoṙe rina na wasoṟo wawoṙe kyiṟumi, wakawanzia wandu wakape Paulo na Barinaba; wakawamichia nja ya uruka lulya lowo. 51 Nawo wakaambutsa kyilulyi maṙendenyi gawo, wakayenda mṟinyi okyelago Ikonio. 52 Na wanalosho waleichuo sia na Mumuyo Mweele.
1 Kyiyeri wawei kulya Ikonio wakaiṙa na sinagoginyi lya Wayuda; na chandu waleonguo mbonyi, Wayuda na Wakyiṟikyi wafoi wakaiṙikyia Yesu. 2 Kyaindi Wayuda walelega iiṙikyia Yesu wakawutia wandu walaweiṙikyie Yesu shindo sha kyinyala na ienenga walya waweiṙikyie Yesu ipfuluko mrimenyi. 3 Kyasia wakakaa pfo kyiyeri kyileshi, wechiṙeṙa kulawoṙe wuowu mbonyi tsa Mndumii, aleṟingyishia Ṙeṙo lya isaṟia lyakye, echiwasaṟia ṟigo na shindo sha maṟiyisho shiwutikye kui shilya aweiwuta. 4 Kyaindi wandu wa kulya mṟinyi walawaṙe makusaṟo gamwi. Iwa wakakaa ura lo Wayuda, na wengyi ura lo Wasu. 5 Na kyiyeri wandu waata walaweiṙikyie Yesu na Wayuda, hamwi na wasongoru wawo waleṙumbuo iwawutia shindo sha kyinyala na iwakapa na magoe, 6 nawo wakamanya mbonyi-tso, waleṙicha wakayenda Lyistira na Deribe, mṟi ya Lyikaonia, na ngyuuruka tsa mṟasenyi; 7 wakakaa pfo, wechionguo Ndumi Ngyicha. 8 Na kulya Lyistira kuwewoṙe mndu umwi, mfiri maṙende, awei kyiwete wookyia kyiyeri alefeo, alawendechumie maa ale. 9 Mndu-cho naleicho Paulo kyiyeri aweilosha. Paulo kamwitukuya karii na iwona kye nawoṙe iiṙikyia lya ikyiṟo, 10 kagamba na ṟui lying'anyi, “Goṟoka necha kui maṙende gapfo.” Mndu ulya kagoṟoka faṟa kayenda. 11 Na kyiyeri wuingyi wo wandu walewona kyindo Paulo awuta wakakuilenga na ṟui lying'anyi, wechigamba kui mṙeṙie o Kyilyikaonia, “Waruwa wacha na koṙu wakyeri cha wandu.” 12 Wakalaga Barinaba Seu na Paulo Herime, cha kyipfa nyi oe aweiṙeṙa. 13 Mkohanyi o Seu, ulya hekalu lyakye lyiwekyeri mbele ya mṟi, kaende umbe na oṟo tsa shiwaṟo mṟasa kyichuminyi, akundi ienengyia kyiṙaso hamwi na wuingyi wo wandu wuwekyeri halya. 14 Kyaindi kyiyeri Barinaba na Paulo walemanya mbonyi-tsi wakaranduo nguwo tsawo, wakayenda weṙicha wakakulunga na wuingyi wulya wo wandu, wakakalagatsa, 15 wechigamba, “Lanyoe, ny'kyilyi muiwuta ishi? Soe lukyeri wandu cha nyoe. Lumuongoya mbonyi ngyicha, kundu mugalukye na iṙa shindo sha wuwicho na iyenda ko Ruwa ai na moo, alegumba ruwewu na uruka na mapalyipalyi na shoose shikyeri pfo. 16 Ulya nyoe kyiyeri kya kacha kyileiṙa aleṙa masanga goose gawute chandu gakundi. 17 Kyaindi aleṙa imuṟingyishia-pfo, cha kyipfa nalewuta shindo shicha, echimuenenga mvuo iwuka ruwewu na kyiyeri kya shilyimu, echiigutsa mrima yanyu shelya na sia.” 18 Maa chandu wasu walegamba isho, waleiṙima ishingyia wandu walya walaweiṙikyie Yesu iwaenenga shiṙaso-pfo. 19 Kyaindi Wayuda wakacha wawuka Antiokyia na Ikonio, wakawanzia wuingyi wo wandu wawesanzie halya wakakapa Paulo na magoe, wakamkuruya nja ya mṟi, wakusaṟie kye ampfa. 20 Kyaindi kyiyeri wanalosho wawemwiṟiwie, kagoṟoka, kaiṙa na mṟinyi; na ilya-ngama kafuma, kayenda mṟasa Deribe waṙuṙanyi na Barinaba. 21 Na wamuonguo Ndumi Ngyicha kulya mṟinyi, na igaluo wandu wafoi wakawa wanalosho, wakawuya mṟasa Lyistira na Ikonio na Antiokyia, 22 wechikarisha mrima ya wanalosho na iwawia wakae kyiiṙi kya Iiṙikyia lyilya, na kye kyiluwaṟi iiṙa na Wumangyinyi wo Ruwa kui njia ya matuuro gafoi. 23 Na wamsambuṟe wameeku wa siṟi kulya siṟinyi, na iterewa hamwi na ikuretekyia, wakawawika mawokonyi ga Ruwa ulya wawemwiṙikyie. 24 Wakaiṙia Pisidia wakashika Pamfilyia. 25 Na numa ya ionguo Ṙeṙo lya Ruwa kulya Perikye wakayenda mṟasa Atalyia. 26 Na iwuka kulya Atalyia wakawuya na Antiokyia weiṙia ipalyipalyinyi. Kulya Antiokyia nyipfo waleterewio isaṟia lya Ruwa kui iṟunda lyilya walekowamlyimarisa. 27 Kyiyeri waleshika kulya Antiokyia walewia wandu wa siṟi wasanzie handu hamwi, wakawaongoya shindo shoose Ruwa aleshiwuta hamwi nawo, na kye Ruwa nalepfunguya moongo o iiṙikyia wandu walaweiṙikyie Yesu. 28 Wakakaa kulya Antiokyia kyiyeri kyileshi, hamwi na wanalosho.
1 Kukocha wandu wawukyie uruka lo Uyuda wakalosha walya waweiṙikyie Yesu, wechigamba, “Mulandeṙino chandu kyikyeri muichiwie o Mose mochiiṙima ikyiṟo-pfo.” 2 Kyasia numa ya Paulo na Barinaba iwingana na wandu-wa na igaluana nawo mnu, wandu walya waweiṙikyie Yesu wakagamba kye Paulo na Barinaba na wandu wengyi waangu waṙo iyenda Yerusalemu ko wasu na wameeku wa siṟi kyipfa kya mbonyi-tso tsa iṙino. 3 Kyasia, wawaṙume nyi siṟi, wakaiṙia uruka lo Foinikye na Samaria, wechionguo mbonyi tsa chandu wandu walaiṙikyie Yesu walemwiṙikyia; wakachihiṟa mnu walya waweiṙikyie Yesu. 4 Kyiyeri waleshika Yerusalemu wakaambilyio nyi siṟi na wasu na wameeku wa siṟi, nawo wakawaongoya shindo shoose Ruwa alewuta hamwi nawo. 5 Kyaindi wandu waata wawekyeri miiṙikyienyi ya Mafarisayo waweiṙikyie wakagoṟoka, wechigamba, “Kyiwaṟi iwaṙina na iwawia waoshe uwawaso lo Mose!” 6 Wasu na wameeku wa siṟi wakasanzia handu hamwi kundu waiṙime ikusaṟa kya mbonyi-tsi. 7 Na numa ya wandu wafong'ui igamba kyilya wawekusaṟie Petiro kagoṟoka, kawawia, “Wana wa wama, nyoe muichi kye wookyia mfiri ya ipfo numa Ruwa nalengyisambuṟa kyiiṙi kyanyu kundu ngyiongoye wandu walaiṙikyie Yesu Ṙeṙo lya Ruwa na ilyiiṙikyia. 8 Na Ruwa, aichi mrima ya wandu, kamṟingyishia, echimuenenga nyoe Mumuyo Mweele chandu aleluenenga soe. 9 Maa aleluwutia soe kyindo kyilafananyi na kyilya alewawutia-pfo, echiwailyisha mrima yawo kui iiṙikyia. 10 Kyasia wulalu ny'kyilyi muiyesha Ruwa na iṙika wanalosho ṟio lyilemeri, ṟio waku waṙu maa soe lulaiṙima ilyiṙuo? 11 Indi luiṙikyie kye lochikyia kui isaṟia lya Mndumii Yesu cha wo.” 12 Kyasia wandu walya woose wawesanzie halya wakatsia tsii, wakaaṙanyia Barinaba na Paulo wechiwaongoya mbonyi tsa ṟigo na shindo sha maṟiyisho, Ruwa alewuta kui ulogo kyiiṙi kya walya walaweiṙikyie Yesu. 13 Na iwo wamtsie Yakobo kagaluo, echigamba, “Wana wa wama wako ngyiaṙanyienyi, 14 Simion naluongoya chandu Ruwa ipfo mawookyionyi aleloṟa chandu ekyeembeṟa wandu walaiṙikyie Yesu kundu nasambuṟe wandu kyiiṙi kyawo kyipfa kya rina lyakye. 15 Na maṙeṙo ga weonguo shisuku gaṙuana na isho, chandu kyikyiṟeie, 16 ‘Numa ya shindo-sho ngyechiwuya na inyi ngyechiwika-se numba ya Dawidi ileoloka. Ngyechiiwuta kyiiṙi kya ioloka lyayo, na inyi ngyechiigoṟotsa. 17 Kundu wandu waṙio ho wapfule Mndumii, na masanga goose galeongoyo mbonyi tsako, 18 Ruwa nagamba, ekyeonguo mbonyi-tsi mṟasa mlungana.’ ” 19 “Kyipfa kya ikyo inyi ngaṙumbuo kuṙi, lulalyise wukyiwa wandu walya walaiṙikyie Yesu kyiyeri waigalukyia Ruwa. 20 Indi luwaṟeie paruo kye wakushowe na ukoe lo mafano, na wuṟui, na nyama tsa mando gapfa kui ipfumbo, na samu. 21 Cha kyipfa wookyia kacha Mawawaso ga Mose gekyelosho orio mṟi na isomo masinagoginyi orio mfiri o onyonya.” 22 Kyasia kyikachihiṟa wasu na wameeku wa siṟi yoose isambuṟa wandu kyiiṙi kyawo na iwaṙika Antiokyia hamwi na Paulo na Barinaba, nawo nyi iwa: Yuda awekyelago Barisaba, na Sila, wawekyeri wasongoru kyiiṙi kya walya waweiṙikyie Yesu. Wakaṟeia paruo na iiṙuo kui mawoko gawo wawenyi. Paruo-yo ilegamba kuṙi: 23 “Soe wasu na wandu waku waiṙikyie Yesu, ko wana wa wamaṙu wakyeri Antiokyia na Shamu, na Kyilyikyia, wai wandu walaiṙikyie Yesu; lomuiṟikyiṟa. 24 Cha kyipfa luleicho kye wandu walewuka koṙu walemulyisa wukyiwa kui maṙeṙo gawo, wechiṙetsa mrima yanyu, wandu soe lulalewaṙuma. 25 Soe lowona nyi kyicha, lukyeri kyindo kyimwi, isambuṟa wandu na iwaṙika konyu hamwi na wakunde waṙu Barinaba na Paulo, 26 wandu walereka moo yawo kyipfa kya rina lya Mndumii oṙu Yesu Kristo. 27 Kyasia loṙuma Yuda na Sila, wechimuongoya mbonyi-tso itso. 28 Cha kyipfa kyilechihiṟa Mumuyo Mweele na soe, lulamuṙikye nyoe ṟio mulawaṟi iṙiko, 29 kyimwi na immbia mukushowe na shindo shoose shileṙasio mafano, na samu, na nyama tsa mando gapfa kui ipfumbo, na wuṟui. Mukowuta kuṙo, mowuta necha. Lomukundia orio kyindo kyicha.” 30 Na iwo wamuenengo momu wakasoka na Antiokyia; na numa ya iwia wandu woose wasanzie handu hamwi wakawaenengyia paruo iya. 31 Nawo wamuisome wakachihiyo kyipfa kya iwiyiṟio moo lyilya. 32 Lyingyi-se Yuda na Sila, cha kyipfa wo nyi weonguo shisuku, wakaongoya walya waweiṙikyie Yesu shindo shifoi shewakarisha. 33 Na wamkae pfo kyiyeri kyileshi taa, walya waweiṙikyie Yesu wakawaenenga momu wayende na ufoṟo, wawuye na ko walya walewaṙuma. 34 Kyaindi Sila kawona nyi kyicha ikaa pfo. 35 Na Paulo na Barinaba wakakaa kulya Antiokyia, wechilosha na ionguo Ṙeṙo lya Mndumii, hamwi na wandu wengyi wafoi. 36 Hamwiṙe mfiri ngyaangu Paulo kawia Barinaba, “Luwuye wulalu lundeambuya walya waiṙikyie Yesu kulya mṟinyi luleonguo Ṙeṙo lya Mndumii, lumanye mbonyi tsawo.” 37 Barinaba kakunda Yohane awekyelago Mariko nayende hamwi nawo. 38 Indi Paulo alewona nyi kyicha iyenda na icho walemṙa kulya Pamfilyia-pfo, kyipfa alalekunda ioshana nawo mṟasa mafurumionyi. 39 Kyasia hakaamka igaluana kyiiṙi kyawo mṟasa wakalekana. Barinaba kaṙuo Mariko, wakaiṙia ipalyipalyinyi iyenda Kyipiro. 40 Kyaindi Paulo kasambuṟa Sila, kafuma, walya waweiṙikyie Yesu wechimterewia, naenengo isaṟia lya Mndumii. 41 Kaiṙia Shamu na Kyilyikyia, echikarisha siṟi.
1 Kyasia kashika Deribe na Lyistira, na iho hawewoṙe manalosho umwi ekyelago Timoteo, mana o Mndu mka Myuda aweiṙikyie Yesu; kyaindi awuye nawekyeri Mkyiṟikyi. 2 Mndu-cho naleṟingyishio wucha na wandu waweiṙikyie Yesu wawekyekaa Lyistira na Ikonio. 3 Paulo kawia Timoteo naoshane na oe, kamṙuo kamṙina kyipfa kya Wayuda wawekyeri ngyuura tsilya; cha kyipfa woose waweichi kye awuye nyi Mkyiṟikyi. 4 Kyasia kyiyeri waweiiṙa kyiiṙi kya mṟi iya, wakawaenenga mawawaso galya galewuka ko wasu na wameeku wa siṟi wakyeri Yerusalemu, kundu wagaoshe. 5 Siṟi tsikawaṙa pfinya kyiiṙi kya Iiṙikyia lyilya, wandu waiṙikyie Yesu wakaengyeṟika orio mfiri. 6 Wakaiṙa urukyenyi lo Firikyia na Galatia, wechiimo nyi Mumuyo Mweele, walaonguo Ṙeṙo lya Ruwa kulya Asia. 7 Kyiyeri waleshika mṟasenyi na Misia, wakatambagana iyenda Bitinia, kyaindi Mumuyo o Yesu alawaenengye momu. 8 Wakaiṙa Misinia wakasoka na Tiroa. 9 Kyiyeri kya kyio Paulo kaloṟo kyindo kyilandewono, akyeri cha mndu ailoṙo. Nalewona mndu awukyie Makyedonia agoṟokyi, echimterewa, na immbia, “Ambaṙa, uche na Makyedonia ulutarame.” 10 Kyasia amloṟo kyindo-kyo, cha ilyi lukokunda iyenda Makyedonia, cha kyipfa lulewona na pata kye Ruwa nalulagie luwaongoye Mbonyi Ngyicha. 11 Lukyeri ngalawenyi lukowuka Tiroa, lukoshika Samotirakye, na ilya-ngama lukoshika Neapolyi; 12 na iwuka pfo lukoshika Filyipi, mṟi ung'anyi o Makyedonia, handu Waroma walekowasamia; lukokaa kyiiṙi kya mṟi-chu mfiri ngyaangu. 13 Na mfiri o onyonya lukoyenda nja ya mṟi, lukoyenda mbai ya mfo, handu lulekusaṟa kye hai hecha hewika kyiterewo; lukoṙamia, lukoṙeṙa na waka wawesanzie halya. 14 Mndu mka umwi ekyelago Lyidia, ekyekumba ṟangyi ya kyimaande-maande, mndu awukyie Tiatira, aowuye na ikunda Ruwa, kaluaṙanyia, ulya Mndumii alemwenenga imanya mrimenyi kokye, naambilyie na iiṙikyia malosho ga Paulo. 15 Na ampatiso, oe na walya wa kanyi kokye, kaluterewa, echigamba, “Kokooya mowona ngyiiṙikyie Ruwa, iṙenyi na kanyi koko mukae pfo. Kawatsindika wawute kuṙo.” 16 Kyiyeri luweiyenda handu heterewa Ruwa, kyisinga kyimwi kyiwewoṙo nyi mṟufui o ilasha kyikakarisana na soe, kyisinga kyileendie wandumii wakyo kyiira kying'anyi kui iṟunda lya ilasha. 17 Kyikaosha Paulo na soe, kyikakalagatsa, kyechigamba, “Wandu-wa nyi waṟundi wa Ruwa, wekyemuongoya mbonyi tsa wukyiṟo.” 18 Kyikawuta isho mfiri ifoi. Kyaindi Paulo kawihiyo mnu, kainduka kawia mṟufui ulya mmbicho, “Ngakuwia kui rina lya Yesu wuka mndu-chu.” Kammbuka kyiyeri kyilya kyilya. 19 Kyasia wandumii wa kyisinga kyilya kyiyeri walewona kyiira kyawo kyeṙeka wakawaṙa Paulo na Sila wakawakuruo mṟasa sangaṙa mbele ya wandu wa mṟi. 20 Wakawaṙuo ko weṙumbuo moondu, wakagamba, “Wandu-wa waifanyiṟa mnu mṟi oṙu, nawo nyi Wayuda. 21 Lyingyi-se waionguo mbonyi tsa miichiwie ilakyeri sungusinyi koṙu iiambilyia maa iiosha, cha kyipfa soe nyi Waroma.” 22 Wuingyi woose wo wandu wawekyeri halya wakafuma wakayenda halya-ndu Paulo na Sila wawekyeri, weṙumbuo moondu wakawawuta nguwo ko pfinya, wakagamba wakapo na ngowa. 23 Na wamuwakape mnu, wakawawiyitsa kyipfungonyi, wakawia mringyi o numba iya yepfungyia wandu nawaringye mnu. 24 Na mringyi ulya amwicho kyilya alewio kawawika kyiṟinyi kya makyiṙi-gawi, kapfungyia maṙende gawo matsindenyi. 25 Kyaindi kyiyeri kya kyio kya mayeleyele Paulo na Sila waweiterewa Ruwa na imwimbia shiimbo sha imṟumisha, na wandu wengyi wawewawikye kulya kyipfungonyi waweiwaaṙanyia. 26 Cha ilyi kukowaṙa mṙeṙemo ung'anyi o uruka, numba iya ikakupaaya-paya yoose, na kyiyeri kyilya kyilya moongo ikaṟuguka, na shindo shiwepfungyie walya wawei kulya kyipfungonyi shikalekyia. 27 Mringyi ulya o numba yepfungyia wandu kaamka, na oe kyiyeri alewona kye moongo iṟugukyie, kaira ushu kundu nakuwaage, akusaṟie kye walya wawewawikye kyipfungonyi waṙicha. 28 Indi Paulo kaṙeṙa na ṟui lying'anyi, echigamba, “Ulakuwaage, cha kyipfa soe loose lukyeri iha.” 29 Kagamba taa tsiendo, kashoongyia numba, echiṙeṙema kui wuowu, kaolokyia Paulo na Sila. 30 Numa ya iho kawafumiṟia nja, kagamba, “Wandumii wako, kyingyiwaṟi ngyiwute kyikyi ngyiiṙime ikyia?” 31 Wakammbia, “Iṙikyia Mndumii Yesu, na iyoe nochikyia hamwi na wandu wa kanyi kopfo.” 32 Wakamwongoya Ṙeṙo lya Mndumii, oe na wandu woose wawekyeri kanyi kokye. 33 Kyio kyilya kyilya kawaambilyia kanyi kokye, kawasanja shifaṟa shawo, numa kapatiso, oe na wandu wakye woose kyiyeri kyilya kyilya. 34 Kawaitsa na kanyi kokye, kawaenenga kyelya, kachihiyo mnu, oe na wandu wa kanyi kokye woose, kyipfa nalekoamwiṙikyia Ruwa. 35 Kyiyeri kulekya weṙumbuo moondu wakaṙuma wasongoru wa asikari, wechigamba, “Lekyenyi wandu walya wayende.” 36 Mringyi ulya o numba iya yepfungyia wandu kawia Paulo mbonyi-tsi echigamba, “Weṙumbuo moondu waṙuma wandu kundu wampfunguo; kyasia wulalu fumienyi nja, muyende kui ufoṟo.” 37 Paulo kammbia, “Walukapa mbele ya wandu woose kulawoṙe iluanduya, na soe lui Waroma, lyingyi-se waluwika kyipfungonyi; na wulalu wakundi iluwuta pfo kui kyiṟika? Chi wuṙo maa ale-pfo. Wache wo wawenyi wacheluwuta pfo.” 38 Wasongoru wa asikari wakaongoya weṙumbuo moondu mbonyi-tsi; nawo wakaowuo, kyiyeri waleicho kye iwo nyi Waroma. 39 Wakacha wakawaterewa; na wamuwafumiṟie nja, wakawaterewa wawukye kulya mṟinyi. 40 Nawo wakawuka kyipfungonyi, wakaiṙa na kanyi ko Lyidia; na wammbonane na wandu walya waweiṙikyie Yesu wakawawiyiṟia moo, wakawuka kulya.
1 Wamuiṙe mṟinyi ya Amfipolyi na Apolonia wakashika Tesalonikye, handu hawewoṙe sinagogi lya Wayuda. 2 Na Paulo chandu kyiwekyeri kyiṙo kyakye, kaiṙa na halya-ndu wawekyeri, na kyiyeri kya mfiri iṟaṙu yeonyonya kagaluana nawo, echitambuluo shiṟeio shiele, 3 echiwawia kye kyiwewaṟi Kristo ilyiso wukyiwa, na iṟuka ko wapfu; na kye Yesu ulya Paulo aweiwaongoya mbonyi tsakye nyi oe Kristo. 4 Wandu wengyi kyiiṙi kya Wayuda walya wakaiṙikyia, wakaoshana na Paulo na Sila; na Wakyiṟikyi waweiṙikyie Ruwa, wafoi mnu hamwi na waka wawoṙe rina. 5 Na Wayuda wakawoṙo nyi wunyenyi, wakasania wandu wa mbocha, wakaende kyituṟu mṟinyi. Wakayenda ko wandu wa kanyi ko Yason, wakakunda iwaṙuo mbele ya wandu wa mṟi. 6 Na kyiyeri walalewakooya kanyi, wakakuruo Yason na wandu waata wa walya waweiṙikyie Yesu, wakawaṙuo mbele ya wasongoru wa mṟi, wechikalagatsa, wechigamba, “Wandu-wa waipfuluo-pfuluo wuyana washika na kunu taa, 7 na Yason nawaambilyia kanyi kokye; na iwa woose waiwuta shindo shilaṙuṙanyi na mawawaso ga Kaisari, wechigamba kye kuwoṙe mangyi ungyi ekyelago Yesu.” 8 Wakaowesha wandu walya wawesanzie halya na wasongoru wa mṟi kyiyeri waleicho mbonyi-tsi. 9 Nawo wamtose Yason na oṙoe wakawaleka wakayenda. 10 Cha ilyi wandu walya waweiṙikyie Yesu wakaṙuma Paulo na Sila kyiyeri kya kyio, wakayenda mṟasa Beroya. Nawo kyiyeri waleshika pfo wakaiṙa na Sinagoginyi lya Wayuda. 11 Wandu-wa wawewoṙe ngaruo cha walya wa Tesalonikye-pfo, cha kyipfa waleambilyia ndumo iya kui mrima mkyesi, wakakulosha shiṟeio shiele orio mfiri, kundu wamanye kokooya mbonyi na wuṙo tsikyeri chandu Paulo alewawia. 12 Kyasia wandu wafoi kyiiṙi kyawo wakaiṙikyia, na waka wa kyikyiṟikyi wawoṙe rina, na wasoṟo waangu. 13 Kyaindi kyiyeri Wayuda wa Tesalonikye waleicho kye Paulo naonguo Ṙeṙo lya Ruwa maa kulya Beroya, wakayenda pfo, wakafoga-foga na iowesha wuingyi wo wandu wawesanzie pfo. 14 Kyiyeri kyilya kyilya walya waiṙikyie Yesu wakaṙuma Paulo nayende mṟasa mbai ya ipalyipalyi; indi Sila na Timoteo wakaṙio kulya Beroya. 15 Kyaindi walya waleimia Paulo wakayenda na oe mṟasa Atene; nawo wamuambilyie mawawaso geṙuo ko Sila na Timoteo, kye walakyelyio imwosha, wakalekana na Paulo. 16 Kyiyeri Paulo aweiwaweṙelyia kulya Atene na iwona chandu mri-cho uweichuo mafano, nalewihiyo mnu mrimenyi kokye. 17 Kyasia sinagoginyi kagaluana na Wayuda na walya waweiṙikyie Ruwa, na walya walegaluana na oe sangaṙa orio mfiri. 18 Na wandu waata wawekyelosha malosho ga Waepikureo na Wastoiko, wakagaluana na oe. Wengyi wakagamba, “Tondo-lyi lyikundi igamba kyi?” Wengyi wakagamba, “Nai cha mndu aionguo mbonyi tsa waruwa wengyi, cha kyipfa naweionguo mbonyi tsa Yesu na iṟutso lya wapfu.” 19 Wakammbaṙa, wakamṙuo Areopago, wechigamba “Ngyesa loiṙima imanya mbonyi-tsi ngyiyenu uilosha tsagamba kyi? 20 Cha kyipfa nuiluendie shindo shiyenu, na lukundi imanya shindo-shi shagamba kyi.” 21 Cha kyipfa wandu wa Atene na wayenu wawekyekaa pfo wawewoṙe kyiyeri kyeaṙanyia kyindo kyoose kyiyenu-pfo. 22 Paulo kagoṟoka makyiṙi-gawi ga Areopago, kagamba, “Nyoe wandu wa Atene! Kyiiṙi kya mbonyi-tsi ngyiwonyi kye nyoe nyi wandu mokyekuwinisha mnu na mbonyi tsa waruwa... 23 Cha kyipfa kyiyeri ngyiweiiṙa ipfo na ipfo na iwona kundu mokyeterewa waruwa, ngyilewona alyitaṟe ingyiṟeie: ‘KO RUWA LULAMWICHI’ Kyasia inyi ngyimuongoya mbonyi tsa ulya nyoe mokyemwindia kulawoṙe immanya. 24 “Ruwa nalegumba wuyana na shindo shoose shikyeri-pfo. Oe, cha kyipfa nyi Mndumii o ruwewu na uruka, ekyekaa mahekalunyi gamawikye kui mawoko; 25 maa ekyeṟundio kui mawoko ga wandu cha ilyi nauṟie kyindo kyoose-pfo; cha kyipfa nyi oe ekyeenenga wandu woose moo na mṟufui na shindo shoose. 26 Na oe iwuka mndu umwi nalegumba mbaṟe tsa wandu tsoose, wakae urukyenyi koose. Oe amonyi wookyia mawookyionyi kawawikyia kyiyeri kyileiṙima iilacho kyekaa kunu wuyanenyi, na iwaloṟa nyi ura luha lochiwa kanyi kowo. 27 Kundu wapfule Ruwa, maa kokooya nyi kui ipaaya-paya cha shipfupfuṟe, wammbone, maa chandu alekyekaa kuleshi na soe. 28 Cha kyipfa kui pfinya ya Ruwa lokyeenengo moo na ichumia, lukowa chandu lukyeri. Chandu wandu waata kyiiṙi kyanyu wekyeṟeia mashairi walegamba, ‘Cha kyipfa soe nyi wana wa Ruwa.’ 29 Kyasia, cha kyipfa soe lukyeri wana wa Ruwa, kyiluwaṟi ikusaṟa kye iwa cha Ruwa nyi kyindo kyikyeri cha sahapu ang'u igoe, shindo shishiachikyie kui wuiṙimi na ngyuuṟango tsa wandu-pfo. 30 “Kyasia, kyiyeri kyilya kya kacha kya wutondo Ruwa nalewa cha ilyi alawonyi; indi wulalu naiwia wandu woose wa orio handu waṙumbuye wunyamaṟi. 31 Cha kyipfa nawikyie mfiri echianduya wandu woose kunu wuyanenyi kulawoṙe ikundia; na echianduya wandu-wo nyi ulya Ruwa amsambuṟie. Na Ruwa naloṟie wandu woose kye nechiwuta kuṙo, kui imṟutsa ko wapfu.” 32 Kyasia kyiyeri waleicho mbonyi tsa iṟutso lya wapfu wengyi wakanyeṟe; na wengyi wakagamba, “Lochikuaṙanyia-se lyingyi.” 33 Kyasia Paulo kalekana nawo. 34 Wandu waata wakawaṙana na oe, wakaiṙikyia Yesu. Kyiiṙi kyawo nyi-we Dionisio, mndu awukyie Areopago, na mndu mka umwi ekyelago Damari, na wandu wengyi hamwi nawo.
1 Numa ya iho, Paulo kawuka Atene kashika Korinto. 2 Kawona Myuda umwi ekyelago Akyila, amfee Ponto; na oe nacha iwuka uruka lo Italyia mfiri ngyaangu ilekoyaiṙa hamwi na mka okye awekyelago Pirisikyila, cha kyipfa Kyilaudio nalewia Wayuda woose wawukye Roma, na oe kacha na kowo. 3 Kyipfa iṟunda lyawo nyi-we lyimwi, kakaa kowo, kaṟunda hamwi nawo, cha kyipfa wawewoṙe wuṟango wo ipfuma mahema. 4 Orio mfiri o onyonya kagamba shilya awekusaṟie sinagoginyi, kapfuṟukana ikuruo Wayuda na Wakyiṟikyi wagalukyie ura lokye. 5 Na Sila na Timoteo wamsokye iwuka Makyedonia, Paulo alawute kyindo kyingyi kyoose sile iṟingyishia Wayuda kye Yesu nyi Kristo. 6 Kyiyeri walekaṟuana na oe na ilahia Ruwa, kakuta-kuta nguwo tsakye, kawawia, “Kokooya mokuṙetsa nyoe muwenyi wuwicho-wo nyi wonyu na chi wo wandu wengyi-pfo. Inyi ngyiwoṙe wuwicho-pfo na wookyia wulalu ngyindeongoya Ṙeṙo lya Ruwa wandu walya walaiṙikyie Yesu.” 7 Kawuka pfo kaiṙa na numbenyi ya mndu ekyelago Tito Yusto, mndu aowuye na ikunda Ruwa, mndu numba yakye iwekyeri mṟasenyi na sinagogi. 8 Na Krispo, ang'anyi o sinagogi, kaiṙikyia Mndumii hamwi na wandu wa kanyi kokye woose. Kyiyeri Wakorinto wengyi waleicho wakaiṙikyia Yesu, wakapatiso. 9 Kyiyeri kya kyio, Paulo akyeri cha mndu ailoṙo, kaicho Mndumii emmbia, “Molaowuoe, indi ṙeṙa, maa ulatsie, 10 cha kyipfa inyi ngyikyeri na iyoe, maa kuwoṙe mndu eiṙima ikukapa-pfo; cha kyipfa inyi ngyiwoṙe wandu wafoi kunu mṟinyi.” 11 Kakaa pfo kyiyeri kya maka umwi na mori iṟandaaṟu echilosha Ṙeṙo lya Ruwa. 12 Na kyiyeri Galyio awekyeri mchilyi o Akaya Wayuda woose piu wakakapa Paulo, wakamwende na handu heanduya wandu, 13 wechigamba, “Mndu-chu naikuruo wandu kundu waiṙikyie Ruwa kyilaṙuṙanyi na chandu kyikyeri sungusinyi.” 14 Na Paulo kyiyeri awekundi iṙeṙa, Galyio kawia Wayuda, “Kokooya kyiwekyeri kyindo kya kyinyala ang'u kya ngyeṟo ngyiwicho, lanyoe Wayuda, kyiwechiwa sungusinyi inyi ikaa ura lonyu. 15 Indi kokooya kyindo mukusaṟie nyi mbonyi tsa maṙeṙo na marina na shindo chandu shiwaṟi iwa sungusinyi konyu, ngamṙeeya kyindo-kyi, cha kyipfa inyi ngyikundi igamba nyi kyiha kyikyicha ang'u nyi kyiha kyilakyicha-pfo.” 16 Kawafuna wawukye mbele ya halya-ndu awekyeṙamia kaanduya wandu. 17 Nawo woose wakawaṙa Sostene, ang'anyi o sinagogi, wakamkapa mbele ya handu halya heanduya wandu. Maa Galyio alewona mbonyi-tso kye nyi kyindo-pfo. 18 Numa ya iho Paulo kaengyeṟa ikaa pfo mfiri ifoi, naaho kasamana na walya waweiṙikyie Yesu, kayenda Shamu eiṙia ipalyipalyinyi. Pirisikyila na Akyila wakayenda hamwi na oe, ammbute njui ipfo Kyenkrea; cha kyipfa nalekoalya nyamu mbele ya Ruwa iwuta kuṙo. 19 Wakashika Efeso, kawaṙa pfo. Oe kaiṙa na sinagoginyi, kagaluana na Wayuda. 20 Kyiyeri walekunda nakae kyiyeri kyileshi ngoseṟa, aleiṙikyia-pfo. 21 Indi nalesamana nawo, echigamba, “Ngyewuya-se na konyu, Ruwa kangyienenga wuiṙimi wo iwuta kuṙo.” Kawuka Efeso, eiṙia ipalyipalyinyi, 22 na amshikye Kaisaria, kaṙo na Yerusalemu, kaiṟikyiṟa siṟi naaho kasoka na Antiokyia. 23 Na amkae pfo mfiri ngyaangu, kafuma, kaiṙa urukyenyi lo Galatia na Firikyia, mṟi kui mṟi, echikarisha wanalosho. 24 Kyasia Myuda umwi ekyelago Apolo, awemfee Iskanderia, mndu aichi shindo shifoi, kashika Efeso; na oe nawoṙe wuragari wo ikulosha shiṟeio. 25 Mndu-cho nawemloshe mbonyi tsa Mndumii, na kyipfa mrima okye uwelangyie nakamwi, kawooka iṙeṙa na ilosha mbonyi tsa Yesu kui sungusinyi, maa kuṙo naweichi wupatiso wo Yohane tikyi. 26 Akyeri sinagoginyi kawooka iṙeṙa kulawoṙe wuowu; na kyiyeri Pirisikyila na Akyila waleicho eṙeṙa wakamṙuo kowo, wakamwongoya mbonyi tsa Mndumii necha ngoseṟa. 27 Na kyiyeri awekundi iambaṙa nayende mṟasa Akaya, wandu walya waweiṙikyie Yesu wakamtarama, wakaṟeia wanalosho walya paruo kundu wamwambilyie. Na oe kyiyeri aleshika katarama mnu walya walekowamwiṙikyia kui isaṟia lya Ruwa. 28 Cha kyipfa nalewinga Wayuda nakamwi mbele ya wandu woose, echiloṟa kui maṙeṙo ga shiṟeio kye Yesu nyi Kristo.
1 Kyiyeri Apolo awekyeri Korinto, Paulo, amwiṙie ngyuurukyenyi tsikyeri kuleshi na ipalyipalyi, kashika Efeso, kakooya wanalosho waangu wawekyeri pfo; 2 kawawesa, “Kyiyeri muleiṙikyia Yesu muleambilyia Mumuyo Mweele?” Wakamgaluo wakagamba, “Ote. Maa luleicho kye kuwoṙe Mumuyo Mweele-pfo.” 3 Kawawesa, “Kokooya nyi wuṙo mulepatiso kui wupatiso wuha?” Wakagamba, “Kui wupatiso wo Yohane.” 4 Paulo kagamba, “Yohane nalepatisa kui wupatiso wo itocha wunyamaṟi, echiwia wandu waiṙikyie Yesu Kristo ulya echicha numa yakye.” 5 Kyiyeri waleicho kuṙo wakapatiso kui rina lya Mndumii Yesu. 6 Na Paulo, amwayekyie mawoko, Mumuyo Mweele kasokyia wuye yawo; wakawooka iṙeṙa kui mṙeṙie ngyihya na ionguo shisuku. 7 Na itala lyawo nyi-we wasoṟo ikumi na wawi. 8 Kaiṙa na sinagoginyi, kaṙeṙa kui wukari kyiyeri kya mori iṟaṟu, echigaluana na wandu, na iwakuṙuo waiṙikyie mbonyi tsa Wumangyi wo Ruwa. 9 Kyaindi wengyi wakalega iiṙikyia, wechilahia Njia iya Mndumii aleloṟa. Kyasia Paulo kalekana nawo, kaṙuo wanalosho walya, kagaluana na wandu orio mfiri inumbenyi lying'anyi lyeloshia wandu lya mndu umwi ekyelago Tirano. 10 Mbonyi-tsi tsikawutika kyiyeri kya maka iwi, mṟasa wandu woose, Wayuda na Wakyiṟikyi, wawekyekaa Asia wakaicho Ṙeṙo lya Ruwa. 11 Ruwa kaenenga Paulo wuiṙimi wo iwuta shindo sha maṟiyisho mnu; 12 maa wandu waluoe wakaendio shitambaa na nguwo tsiwukyie mmbiunyi o Paulo, wakachia ndoṟe tsawo, na waṟufui wawicho wakawuka kowo. 13 Wayuda waata wawekyetenga-tenga, wandu wawewoṙe iṟunda lya ifuna waṟufui wawicho, wakatambagana isenda rina lya Mndumii Yesu kyipfa kya walya wawewoṙo nyi waṟufui wawicho, wechigamba, “Kui rina lya Yesu ulya Paulo ekyeonguo mbonyi tsakye wuka mndu-chu!” 14 Hawewoṙe wana mfungaaṙe wa mndu umwi ekyelago Skyewa, Myuda awei mkohanyi ang'anyi, walewuta kuṙo. 15 Mṟufui ulya mmbicho kawagaluo, kawawia, “Yesu ngyimwichi na Paulo ngyimwichi, kyaindi nyoe nyi wakyi?” 16 Na mndu ulya awoṙo nyi mṟufui mmbicho kashoongyia wana wawi kyiiṙi kya walya mfungaaṙe, kawawinga, mṟasa wakafuma kulya numbenyi weṙicha, wakyeri kyiṟanguoe na wawafaṟe. 17 Wayuda woose wakamanya mbonyi-tsi na Wakyiṟikyi woose wawekyekaa Efeso, woose wakawoṙo nyi wuowu, na rina lya Mndumii Yesu lyikang'anyiso. 18 Na wandu wafoi kyiiṙi kya walya waweiṙikyie Yesu wakacha wakatocha wunyamaṟi, wechiṟingyishia mawuto gawo. 19 Na wandu wafoi kyiiṙi kya walya wawekyewuta shindo sha wusawi wakasania shitapu shawo, wakashikoṟa mbele ya wandu woose; wakaachikyia matala ga woguru wosho, wakawona kye nyi-we cha shilyingyi shiku makumi gaṟaaṟu na shiina. 20 Nyi wuṙo wandu wafoi waleengyeṟa iicho Ṙeṙo lya Mndumii, lyechiwinga chandu wandu wafoi walelyiaṙanyia. 21 Mbonyi-tso tsamsie, Paulo kaṙumbuo mrimenyi kokye iyenda Makyedonia na Akaya mṟasa Yerusalemu, echigamba, “Ngamkaa pfo kyingyiwaṟi iwona na Roma taa.” 22 Kaṙuma wandu wawi kyiiṙi kya walya walemtarama iyenda Makyedonia, nawo nyi Timoteo na Erasto, oe amonyi kakaa Asia kyiyeri kyifuhi. 23 Kyiyeri-kyo kukoamka kyituṟu kying'anyi kyiiṙi kya Njia iya Mndumii aleilora. 24 Cha kyipfa mndu umwi, ekyelago Demetirio, awekyetsana heleri; na iwika shihekalu sha heleri sha Aritemi, nawekyeenenga waaria kyiira kying'anyi. 25 Kasania waaria-wo, hamwi na wengyi wawoṙe iṟunda lyilya, kagamba, “Lanyoe wasoṟo, muichi kye wunjama woṙu wokyewuka kyiiṙi kya iṟunda-lyi. 26 Lyingyi-se muwonyi na iicho kye chi kyiiṙi kya Efeso tupu-pfo indi urukyenyi loose lo Asia taa, Paulo-cho nalelemba wandu wafoi na iilacha makusaṟo gawo, echigamba kye iwo wekyeachikyio kui mawoko chi waruwa-pfo. 27 Chi igamba kye iṟunda lyaṙu lyikyeri ndengyenyi ya ipiṟo tikyi-pfo; indi na hekalu lya ruwa o kyika akyeri ang'anyi, Aritemi, lyiwono chi kyindo-pfo, na Aritemi naiwuto mng'ano okye, ulya wandu woose wa Asia na wuyana woose wekyemwowuo na imwindia.” 28 Kyiyeri waleicho isho wakawoṙonyi nyashi ing'anyi, wakakalagatsa, wechigamba, “Aritemi o Waefeso nang'anyi!” 29 Mṟi oose ukowaṙa kyituṟu, wakayenda weṙicha wakaiṙa na handu ha temo wakyeri kyindo kyimwi, wammbaṙe Gayo na Arisitariko, wandu wa Makyedonia wawei kyaronyi hamwi na Paulo. 30 Na Paulo kyiyeri awekundi iiṙa na wandunyi, wanalosho walemlekyia nawute kuṙo-pfo. 31 Na wasongoru waata wa Asia, wawekyeri mbuya tsakye wakaṙuma wandu kokye, wechimterewa alaiṙe na handu halya ha temo. 32 Kyasia wengyi waweilyia kuṙi na wengyi kuṙi; cha kyipfa kyisanzionyi kyilya kyilekokyafoika-foika, na wandu wengyi halya kyisanzionyi walemanya kyitewe kya isanzia handu hamwi-pfo. 33 Wakawuta Iskanda kulya kyisanzionyi, Wayuda wechimmbikyia mbele ya wandu. Iskanda kawatsinia na kuwoko, akundi iloṟa mbele ya wandu chandu alawewoṙe wuwicho woose. 34 Kyaindi kyiyeri walemanya kye oe nyi Myuda, wakakalagatsa woose piu kui ṟui lyimwi kyiyeri cha kya saa tsiwi, wechigamba, “Aritemi o Waefeso nang'anyi!” 35 Na kyiyeri kaṟanyi o mṟi ammbie wandu watsie tsii, kagamba, “Lanyoe wasoṟo wa Efeso, nyi mndu uha alaichi kye mṟi o Efeso nyi moambuya hekalu lya Aritemi akyeri ang'anyi, na moambuya igoe lyilya lyiele lyileoloka iwuka ruwewu? 36 Kyasia kyipfa mbonyi-tsi tsilechiiṙima igambo kye chi loi-pfo, kyimmbaṟi iololyia; mulawute kyindo mulaselyie maṙima. 37 Cha kyipfa moende wandu-wa walaiwie shindo sha hekalu maa ilahia ruwa oṙu o kyika. 38 Kyasia kokooya Demetirio na waaria wakyeri hamwi na oe wawoṙe ṙeṙo kyipfa kya mndu-chu, mengye tsikyeri-pfo, na wachilyi wakyeri pfo; koikyo waṙuane mengyenyi. 39 Indi mukopfula ṙeṙo lyoose shindonyi shingyi, shechiachikyio nyi kyisanzionyi kya raia, kyisanzionyi kyekyeṟunda chandu kyiwaṟi. 40 Cha kyipfa luwoṙe ndenga ya iṙoo mengyenyi kyipfa kya kyituṟu kya inu, kyituṟu kyaamka kulawoṙe kyimaṙuma; na kyiiṙi kya ṙeṙo-lyo, loiṙima igamba kye kuwewoṙe kyimaṙuma kyeamtsa kyituṟu-pfo.” 41 Amgambe isho kawia wandu wayende kanyi.
1 Kyiyeri mtiṟi ulya uletsia, Paulo kaṙuma wanalosho wandelago, kawakarisha na isamana nawo; numa ya iho kayenda mṟasa Makyedonia. 2 Na oe amwiṙie ngyuura tsilya na iwiyiṟia wandu moo kui maṙeṙo gafoi, kashika uruka lo Wakyiṟikyi. 3 Amkae pfo kyiyeri kya mori iṟaṟu, na Wayuda immbikyia ngyeṟo, kakunda iyenda shamu kui njia ya ipalyipalyinyi. Kyasia kaṙumbuo iwuya kui njia ya Makyedonia. 4 Wandu-wa wakaoshana na oe; Sopatiro, awukyie Beroya, mana o Piro, na Arisitariko na Sekundo, wandu wa Tesalonikye; na Gayo, mndu o Deribe, na Timoteo; na Tikyiko na Tirofimo, wandu wa Asia. 5 Indi wandu-wo walekowasonguo wakaluweṙelyia Tiroa. 6 Soe lukopfunga kyaro, numa ya mṟumoe o mkate ilangyitarang'ishe, lukowuka Filyipi, lukowakooya Tiroa, kyaro kya mfiri itanu, lukokaa pfo mfiri mfungaaṙe. 7 Na mfiri o kuwooka o juma, kyiyeri lulesanzia handu hamwi kundu lulye mkate o Mndumii, Paulo nalewalosha, akundi iyenda kyaro ilya-ngama, na oe kalosha mṟasa kyio kya mayeleyele. 8 Hawewoṙe taa tsifoi halya kai, handu luwesanzie. 9 Manakye umwi, ekyelago Eutiko, naweṙamie dirishenyi, kawoṙo nyi maṙoe mnu; na kyiyeri Paulo aleengyeṟa ilosha, kafooyo nyi maṙoe kaoloka iwuka kai ya kaṟaaṟu iyenda wuye; kairo ampfe. 10 Paulo kasoka kulya kai, kaarama, kamchunguṟia, kagamba, “Kutsienyi, kyipfa moo ukyeri kyiiṙi kyakye.” 11 Kaṙooya-se kulya kai, kapeṟenguo mkate, kalya, kaengyeṟa ilosha mṟasa ngamenyi utuko, naaho kawuka halya. 12 Wakaende manakye ulya, ai na moo, wakakuicho iwiyiṟio moo mnu. 13 Kyaindi soe lukosonguo iyenda ngalawenyi, lukoiṙa ipalyipalyinyi iyenda Aso, lukusurie iṙa pfo Paulo; cha kyipfa nyi wuṙo alekoaluwia. Oe amonyi nalekunda iyenda na maṙende. 14 Kyiyeri alelukooya kulya Aso, lukommbika kulya ngalawenyi, na numa ya iho lukoshika Mitilene. 15 Lukowuka pfo na ilya-ngama lukoshika handu haambuyanyi na mṟi okyelago Kyio. Mfiri o kaṟaaṟu lukoafukyia Samo, lukokaa Tirogilyio, mfiri o kaana lukoshika Mileto. 16 Paulo nawekundi iiṙa Efeso akyeri ngalawenyi, kundu alachekyelyio kulya Asia; cha kyipfa awewoṙe kyiyeri kya iretsa-pfo. Nawekundi ishika Yerusalemu iwinyi mfiri o Pentekoste, kokooya kyiwechiiṙimika. 17 Iwuka Mileto Yesu kaṙuma wandu iyenda Efeso, kalaga wameeku wa siṟi. 18 Kyiyeri waleshika kokye, kawawia, “Nyoe muichi wookyia mfiri ya kuwooka kyiyeri ngyilecha na kunu Asia, chandu ngyiwekyeri konyu mfiri yoose, 19 ngyechiṟundia Mndumii kui wusimiri woose, na kui mcheṟeṟe, na shiyesho shilengyichia kui ngyeṟo tsa Wayuda. 20 Kye ngyileṙa imuongoya kyindo kyoose kyechimuendie nyoe kyiira-pfo, kyaindi ngyilemulosha kulawoṙe iṟikyia kyindo, na numba kui numba, 21 ngyechiṟingyishia Wayuda na Wakyiṟikyi watochie Ruwa wunyamaṟi na iiṙikyia Mndumii oṙu Yesu Kristo. 22 Kyasia, wulalu ngyiyenda Yerusalemu, Mumuyo Mweele engyitsindika mrimenyi, ngyilamanya shindo shechingyiwutikyia pfo; 23 kyaindi Mumuyo mweele mṟi kui mṟi nekyengyiṟingyishia echigamba kye ngyuukyiwa tsifoi tsingyiweṙa. 24 Kyaindi ngyiwonyi moo oko kye nyi kyindo kya woguru koko kuta iafutsia iṟunda lyilya Yesu alengyienenga-pfo. Iṟunda ngyileenengo nyi ionguo Mbonyi Ngyicha tsa isaṟia lya Ruwa. 25 Na wulalu inyi ngyiichi kye nyoe moose ngyilemuongoya mbonyi tsa Wumangyi wo Ruwa, ngayenda ipfo na ipfo, mochingyiwona-se-pfo. 26 Koikyo ngamuṟingyishia moose mfiri-chu o inu, kye kokooya maa umwi onyu aṙeka ngyiwoṙo pfo-pfo. 27 Cha kyipfa ngyileṙa imuongoya mbonyi tsa orio kyindo Ruwa akundi-pfo. 28 Ringyenyi mrima yanyu, na poo-lyo lyoose, lyilya Mumuyo Mweele alemusambuṟa nyoe mulyiambuye, muiṙime ienenga Siṟi yakye kando, Siṟi aleigaluo yakye amonyi kui upfu lokye. 29 Ngyiichi kye ngammbuka iha, wandu walang'a cha shisii wechicha na konyu, wanyamaṟe Siṟi. 30 Lyingyi-se kyiiṙi kyanyu nyoe kochiwuka wandu, wechiṙeṙa shindo sha wuṙetsi, walembe wanalosho wakae ura lowo. 31 Koikyo laenyi kyiṙombo, mochikumbuo kye maka iṟaṟu, kyio na kyingoto, ngyileṙa iṙeṙia orio umwi onyu, ngyechilya wukyiwa wung'anyi mnu-pfo.” 32 “Kyasia, wulalu ngamuṙambika ko Ruwa, na kui ṙeṙo lya isaṟia lyechiiṙima imtarama na imuenenga kyioṟa hamwi na woose wawailyishe mrimenyi kowo. 33 Ngyilelanga heleri maa sahapu maa nguwo tsa mndu-pfo. 34 Nyoe muichi kye ngyileṟunda kui mawoko gako ngawona kyengyitarama hamwi na walya wawekyeri hamwi na inyi. 35 Kui iṟunda na wuragari ngyilemloṟa kye kyimmbaṟi itarama wandu wafofo, na ikumbuo maṙeṙo ga Mndumii Yesu, chandu alegamba, ‘Nanga ienengyia kuta iambilyia.’ ” 36 Kyiyeri Paulo amgambe kuṙo kapfiria ndi, katerewa hamwi nawo woose. 37 Wakafiiṟa woose, wakachunguṟia Paulo, wakamkomba-komba, 38 wechiwihiyo mnu kyipfa kya kyilya alegamba, kye wechimmbona-se-pfo. Wakamwimia mṟasa wakamsitsa ngalawenyi.
1 Kyiyeri lomlekane nawo, lukoiṙia ipalyipalyinyi lukoshika Kosi, na ilya-ngama lukoshika Rodo na iwuka pfo lukoshika Patara, 2 lukowona ngalawa iambaṙa mṟasa Foinikye lukoṙooya pfo. Lukoengyeṟa iiṙia ipalyipalyinyi na 3 kyiyeri lulewona kyiṟingyiti kya Kyipiro lukokyiṙa ura lo kumoso; lukoyenda mṟasa Shamu lukosoka na Tiro. Cha kyipfa ipfo nyipfo ngalawa yaṙu iweisotsia mlari oyo. 4 Lommbone wanalosho lukokaa pfo mfiri mfungaaṙe, nawo wakawia Paulo kui wuiṙimi wo Mumuyo alayende Yerusalemu. 5 Na kyiyeri mfiri mfungaaṙe ilesia lukofuma lukoyenda mṟasa nja ya mṟi, lukopfiria ndi mbai ya ipalyipalyi lukoterewa; 6 na lomsamane lukoṙooya ngalawenyi, nawo wakawuya na kanyi kowo. 7 Na kyiyeri lulemarisa kyaro kyaṙu iwuka Tiro lukoshika Tolemai; lukoiṟikyiṟa walya waweiṙikyie Yesu lukokaa kowo mfiri umwi. 8 Ilya-ngama ngamenyi lukofuma, lukoshika Kaisaria, lukoiṙa na kanyi ko Filyipo, mndu awekyeonguo Ndumi Ngyicha, awekyeri umwi o walya mfungaaṙe, lukokaa kokye. 9 Mndu-cho nawewoṙe wana waana wa kyika, wakyega, wawekyeonguo shisuku. 10 Kyasia kyiyeri luwekyeri pfo mfiri ifoi, moonguo shisuku umwi ekyelago Akabo kacha awuka uruka lo Uyuda. 11 Kyiyeri aleshika halya-ndu luwekyeri kaira mkanda o Paulo, kapfunga nacho maṙende na mawoko gakye, kagamba “Mumuyo Mweele nagamba kuṙi, ‘Nyi wuṙo Wayuda wa Yerusalemu wechipfunga monyi o mkanda-chu, nawo wechimṙambika ko wandu walaiṙikyie Yesu.’ ” 12 Kyasia kyiyeri luleicho kuṙo, soe na wandu wa handu halya, lukomterewa alayende Yerusalemu. 13 Nyi lyo-ndu Paulo alelugaluo na iluwia, “Ny'kyikyi muiwuta kui ifiiṟa na ingyienenga wuowu? Cha kyipfa inyi, hamwi na iwiko kyipfungonyi ngyikuṟeyeṟie iwoogo kulya Yerusalemu kyipfa kya rina lya Mndumii Yesu.” 14 Kyiyeri alelega kyilya luwemmbia, lukotsia, lochigamba, “Kyilya Mndumii akundi kyiwutikye.” 15 Numa ya mfiri iya lukoira shindo shaṙu lukoṙo na Yerusalemu. 16 Wanalosho waata wa Kaisaria wakaoshana na soe, wakaṙuo Mnasoni awukyie Kyipiro, awei manalosho o kacha ulya lulekaa kokye. 17 Kyiyeri luleshika Yerusalemu walya waweiṙikyie Yesu wakaluambilyia na sia. 18 Na ilya-ngama Paulo kayenda ko Yakobo hamwi na soe, na wameeku woose wa siṟi wawekyeri pfo. 19 Lomuwaiṟikyiṟe, kawaongoya shindo shoose kyimwi kyimwi Ruwa alewuta kyiiṙi kya walya walaiṙikyie Yesu kui iṟunda lya Paulo. 20 Nawo kyiyeri waleicho wakaṟumisha Ruwa, wakammbia, “Mono-wama oṙu, nuwonyi chandu Wayuda waleiṙikyia Yesu wakyeri shiku shifoi, na woose wawoṙe wunyenyi mnu kyipfa kya uwawaso. 21 Nawo wammbio mbonyi tsapfo, kye nuilosha Wayuda woose wekyekaa ngyuurukyenyi tsa wandu walaiṙikyie Yesu iṙa malosho ya Mose, ochiwawia walaṙine wana wawo, maa iosha miichiwie ya Wayuda. 22 Kyasia ny'kyikyi? Loi wechimanya kye nocha. 23 Koikyo wuta ikyi luikuwia. Kuwoṙe wandu waana kyiiṙi kyaṙu wawikyie kyaasa. 24 Ṙuo wandu-wo, usanjo hamwi nawo, mulawaṙe ukoe mbele ya Ruwa; na itaa kyilya kyiwaṟi itoo kundu wasanjo, wawute njui mṙoenyi yawo, wandu woose waiṙime imanya kye mbonyi tsilya tsapfo walewio chi kyindo-pfo, indi iyoe nuiwuta chandu kyiwaṟi na iosha uwawaso. 25 Kyaindi ko mbonyi tsa wandu walaweiṙikyie waleiṙikyia Yesu, luleṟeia na iṙumbuo kye wakushowe mrima yawo na shindo shishiṙasie mafano, na samu, na kyindo kyikyiwaage kui ipfumbo, na wuṟui.” 26 Naaho-ng'u Paulo kalaga wasoṟo walya, na ilya-ngama kasanja mrima okye hamwi nawo, kaiṙa na hekalulyi, echionguo kyindo kyiwaṟi iwuto mfiri iya ya isanjo, mṟasa kyienengo kyiwuto kyipfa kyawo. 27 Kyasia kyiyeri mfiri iya mfungaaṙe iwekyeri kufuhi na iafukyia, Wayuda wawewukyie Asia wakammbona akyeri hekalunyi, wakatuṟutsana wandu woose, wakammbaṙa, 28 wakakalagatsa, na igamba, “Lanyoe wasoṟo wa Isiraelyi lutaramenyi. Ichu nyi oe mndu ulya ekyelosha wandu woose orio handu, chandu kyilaṙuṙanyi na isanga lyaṙu maa uwawaso, maa miichiwie ya handu-ha. Lyingyi-se, ngoseṟa ya isho, naitsa Wakyiṟikyi na hekalunyi, kafanyiṟa kyimṟumoe handu-ha haele.” 29 Cha kyipfa walekowawona Tirofimo, mndu awukyie Efeso, akyeri mṟinyi hamwi na Paulo, wakakusaṟa kye Paulo namwitsa na hekalunyi. 30 Mṟi oose ukowa kyituṟu, cha ilyi wandu woose wakasanzia handu hamwi, wakawaṙa Paulo wakamkuruo, wakammbuta hekalunyi, na kulawoṙe iṙetsa ṙaawa moongo ikashingo. 31 Na kyiyeri waweipfula chandu wembaaga, mbonyi tsikashika ko msongoru o asikari wa shiṙa kye mṟi oose o Yerusalemu ofoika. 32 Kulawoṙe iṙetsa kyiyeri kawuta asikari na wachilyi, kayenda Yerusalemu eṙicha. Kyiyeri wandu walewona msongoru ulya o asikari wa shiṙa wakaṙa ikapa Paulo. 33 Numa ya iho msongoru ulya o asikari wa shiṙa katikyira kufuhi na Paulo, kammbaṙa, kagamba napfungo na mshe iwi; kawesa, “Nyi wui ichu? Ny'kyikyi awuta?” 34 Wengyi wuingyinyi wulya wo wandu wakakalagatsa wegamba ikyi na wengyi kyingyi. Kyasia kyiyeri msongoru ulya o asikari wa shiṙa alelemo imanya mbonyi kyipfa kya kyikalagatso kyilya, kagamba naitso na moombonyi. 35 Kyasia kyiyeri Paulo aleshika shitengunyi alaiṙime itikyira; koikyo asikari walya wakamyekyia mayewenyi kyipfa kya kyituṟu kya ṟiima lyilya. 36 Kyipfa ṟiima lying'anyi lya wandu lyilemwosha, wechikalagatsa na igamba, “Mmbaage!” 37 Paulo amwitso na kulya moombonyi kawia msongoru ulya o asikari wa shiṙa, “Ngyiwoṙe momu o kuwia kyindo?” Na oe kagamba, “Iyoe nuichi mṙeṙie o Kyikyiṟikyi? 38 Iyoe chi Mmisiri ulya mfiri ya ipfo numa aleenenga wandu shiku shiina isuana, wandu wawekyelago Wawaagi, kowasongoya iyenda kundu ko nuka ngyiumu suwaa ilawoṙe maa mṟinga?” 39 Paulo kagamba, “Inyi nyi Myuda, mndu awukyie Tariso, mṟi o Kyilyikyia, mndu awukyie mṟinyi uwoṙe rina. Ngyikuterewa ungyienengye momu ngyiṙeṙe na wandu-wa.” 40 Kyasia, kyiyeri alemwenenga momu, Paulo kagoṟoka halya shitengunyi, katsinia wandu wa mṟi ulya; na kyiyeri waletsia sau, kaṙeṙa nawo kui mṙeṙie o Kyiebrania, echigamba,
1 “Lanyoe wasoṟo, wana wa wama wako na waawu wako, ngyiaṙanyienyi ngyechiloṟa mbele yanyu wulalu, chandu ngyilammbicho.” 2 Kyiyeri waleicho eṙeṙa nawo kui mṙeṙie o Kyiebrania wakaengyeṟa itsia, na oe kagamba, 3 “Inyi nyi Myuda, ngyilefeo Tariso, mṟi o Kyilyikyia, indi ngyileng'anyisio kunu mṟinyi, ngyikyeri manalosho o Kamalyielyi. Ngalosho chandu kyiwaṟi mawawaso goose ga waku waṙu, ngawa mndu ekyepfuṟukania Ruwa chandu nyoe mukyeri inu. 4 Ngalyisa wukyiwa wandu walya wekyeosha njia iya ya Mndumii ngawapfunga na iwawaaga, ngyechiwawika kyipfungonyi, wasoṟo na waka. 5 Chandu Mkohanyi ulya ang'anyi kuta woose aingyiṟingyishia, na wameeku woose wa mengye, walya ngyilewuta paruo kowo, ngayenda Dameskyi, kundu ngyiende wandu waiṙikyie Yesu wakyeri pfo, wawapfungye, kundu walyiso wukyiwa.” 6 “Kyikawa-ng'u kyiyeri ngyiwekyeri kyaronyi, ngyikyeri kufuhi na Dameskyi, kyiyeri kya saa tsiṟandaaṟu tsa kyingoto, cha ilyi ngyeela ing'anyi ilewuka ruwewu, ikangyilyimika ngyuura tsoose. 7 Ngaoloka wanda, ngaicho ṟui lyechingyiwia, ‘Saulyi Saulyi, ny'kyilyi ungyilyisa wukyiwa?’ 8 Ngagaluo ngagamba, ‘Iyoe nyi wui, Mndumii?’ Kangyiwia, ‘Inyi nyi Yesu o Nasareti, ulya iyoe umlyisa wukyiwa.’ 9 Na walya wawekyeri hamwi na inyi walewona ngyeela-yo, kyaindi waleicho ṟui lya ulya aleṙeṙa na inyi-pfo. 10 Ngagamba, ‘Ngyiwute kyi, Mndumii?’ Mndumii kangyiwia, ‘Goṟoka, uiṙe na Dameskyi, na ipfo nochiwio mbonyi tsa shindo shoose shishigambe ushiṟunde.’ 11 Na kyiyeri ngyilepfa meso kyipfa kya mng'ano o ngyeela iya, walya wawekyeri hamwi na inyi wakangyiwaṙa mawoko wakangyiṙuo Dameskyi. 12 Kyasia mndu umwi, Anania, mndu akundi na iowuo Ruwa kui iosha mawawaso, aleṟingyishio wucha nyi Wayuda woose wawekyekaa pfo, 13 kacha na koko, kagoṟoka kufuhi na inyi, kangyiwia, ‘Mono-wama oko, Saulyi, wona.’ Kyiyeri kyilya kyilya ngawona, ngamwitukuya. 14 Kagamba, ‘Ruwa o waku waṙu nakusambuṟa iyoe uiṙime imanya shilya akundi, na iwona ulya awoṙe wusumganyi, na iicho kyindo agamba. 15 Cha kyipfa nochiwa mṟingyishi okye ko wandu woose, o shindo-sho ulewona na iicho. 16 Kyasia wulalu, ny'kyikyi uweṙa? Goṟoka, upatiso, usanjo maṙeko gapfo, uterewe kui rina lyakye.’ ” 17 “Kyikawa-ng'u kyiyeri ngyiwewuya na Yerusalemu, kyiyeri ngyiweiterewa ngyikyeri hekalunyi, ngawa cha mndu ailoṙo. 18 Ngammbona, na oe kangyiwia, ‘Pfuṟukana uwukye Yerusalemu iwinyi, cha kyipfa wechiiṙikyia wuṟingyishi wulya wo mbonyi tsako ochiwaenenga-pfo.’ 19 Na inyi ngagamba, ‘Mndumii, iwo waichi kye inyi ngyilewika kyipfungonyi walya wakuiṙikyie na iwakapa orio sinagoginyi. 20 Na kyiyeri mṟingyishi opfo Stefano alewoogo, inyi ngyiwegoṟokyi kufuhi, ngyiwonyi nyi necha kyilya waweiwuta, na iambuya nguwo tsa walya walembaaga.’ 21 Na oe kangyiwia, ‘Yenda, cha kyipfa inyi ngyechikuṙuma uyende kuleshi ko wandu walangyiiṙikyie.” 22 Wakamwaṙanyia mṟasa kyiyeri alegamba kuṙo, wakaṙeṙa na ṟui lying'anyi, wechigamba, “Wuta mndu-chu iha. Nawaṟi iwoogo!” 23 Kyiyeri waweikalagatsa na ikucha-kucha nguwo tsawo na iputsa kyilulyi, 24 ang'anyi ulya o asikari wa shiṙa kagamba naitso na kulya moombonyi, echigamba, “Naweso mbonyi tsakye kui imkapa na ngowa, kundu namanye kyitewe kya imkalagatsia kuṙi.” 25 Na kyiyeri wamumpfungye na shigowo, Paulo kawia mchilyi ulya awegoṟokyi kufuhi, “Ngyesa nyi sungusinyi ikapa mndu ai Mroma alaanduyo?” 26 Kyiyeri Mchilyi ulya aleicho, kayenda kawia ang'anyi ulya o asikari wa shiṙa, echigamba, “Nukundi iwuta kyi? Cha kyipfa mndu-chu nyi Mroma.” 27 Ang'anyi ulya o asikari wa shiṙa kacha, kammbesa, “Kyengyiwia; iyoe nyi Mroma?” Kagamba, “Yee.” 28 Ang'anyi ulya o asikari wa shiṙa kagaluo, kagamba, “Inyi ngyilewa raia o uruka-lu kui ienengyia heleri tsifoi.” Paulo kagamba, “Wafee wako inyi nyi Waroma wookyia ngyilandefeo.” 29 Kyasia walya wawekuṟeyeṟie immbesa wakawuka halya wakamleka. Ang'anyi ulya o asikari wa shiṙa na oe kaowuo, kyiyeri alemanya kye nyi Mroma, na kyipfa alempfunga. 30 Ilya-ngama, ang'anyi ulya o asikari wa shiṙa akundi imanya wuloi, nyi kyikyi kyileenenga Wayuda igamba kye Paulo nammbicho, kampfunguo, kawia wang'anyi wa makohanyi na wandu woose wa mengyenyi wasanzie handu hamwi. Kaende Paulo, kammbikyia mbele yawo.
1 Paulo kaitukuya wandu walya wa halya mengyenyi karii, kagamba, “Wana wa wama wako, inyi kui mrima muyendelyi nakamwi ngyilekaa mbele ya Ruwa mṟasa inu.” 2 Anania, mkohanyi ang'anyi kuta woose, kawia walya wawegoṟokyi kufuhi walachuoe Paulo ṙumbunyi. 3 Naaho Paulo kammbia, “Ruwa nechikukapa iyoe kyiambasa kyikyishie chokaa. Iyoe nukyeri iha ingyianduya chandu mawawaso gagambie, na kunu iyoe nugamba ngyikapo, kyindo mawawaso galagambie?” 4 Walya wawegoṟokyi kufuhi, wakagamba, “Nulahia Mkohanyi ang'anyi kuta woose o Ruwa mcho?” 5 Paulo kagamba, “Ngamanya-pfo, wana wa wama, kye oe nyi Mkohanyi ang'anyi kuta woose; cha kyipfa kyikyiṟeie, ‘Maa ulaṙeṙe uwicho msongoru o wandu wapfo.’ ” 6 Kyiyeri Paulo alemanya kye kyitumbuṟe kyimwi nyi Masadukayo, na kyitumbuṟe kyingyi nyi Mafarisayo, kakuilenga na ṟui lyakye halya mengyenyi kagamba, “Wana wa wama wako, inyi nyi Mfarisayo, mana o Mfarisayo. Inyi ngyianduyo kyipfa kya ikusuria iṟutso lya wapfu.” 7 Kyiyeri alemarisa igamba kuṙo Masadukayo na Mafarisayo wakaluyana, wandu walya wawesanzie halya walawaṙe makusaṟo gamwi. 8 Cha kyipfa Masadukayo wekyegamba kye kuwoṙe iṟutso lya wapfu maa malaika maa mumuyo-pfo; indi Mafarisayo wekyeiṙikyia isho shoose. 9 Hakawaṙa kyikalagatso kying'anyi. Walosha wengyi wa mawawaso ga Mose wawekyeri ura lo Mafarisayo wakagoṟoka, wakaṙeṙa, wechigamba, “Luwonyi wuwicho woose ko mndu-chu-pfo; indi kokooya mumuyo ang'u malaika naṙeṙa na oe, nyi kyikyi?” 10 Kyiyeri halewaṙa iluyana lying'anyi, asikari ulya o shiṙa kaowuo Paulo alachepaṟika kawi, kawia asikari wache wammbute halya ko pfinya, na imwitsa na moombonyi. 11 Kyio kyilya Mndumii kagoṟoka kufuhi na oe, kagamba, “Kuwanze; cha kyipfa chandu uleṟingyishia mbonyi tsako Yerusalemu, kyikuwaṟi ingyiṟingyishia kuṙo kulya Roma.” 12 Kyiyeri kulekya Wayuda wakawaṙa kyama, wakalya nyamu kye wechilya maa inyo kyindo kyoose mṟasa wawaage Paulo-pfo. 13 Na iwo walelya nyamu-yo nyi-we wandu ngoseṟa ya makumi gaana. 14 Nawo wakayenda ko wang'anyi wa makohanyi na wasongoru wa wandu, wakagamba, “Lolya nyamu, lulalye kyindo maa inyo kyindo kyoose mṟasa luwaage Paulo. 15 Kyasia wulalu nyoe na wameeku wa mengye wienyi ang'anyi o asikari wa shiṙa namsotse na konyu, cha ilyi mukundi imanya mbonyi tsakye necha ngoseṟa; na soe lukuṟeyeṟie immbaaga alashika konyu.” 16 Mho o Paulo kaicho mbonyi tsa imlaalyia, kayenda kaiṙa na kulya moombonyi kaongoya Paulo mbonyi-tso. 17 Paulo kalaga mchilyi umwi, kagamba, “Ṙuo manakye-chu ko ang'anyi o asikari wa shiṙa; kyipfa ngyiwoṙe kyindo kyemmbia.” 18 Kyasia kamṙuo ko ang'anyi o asikari wa shiṙa, kammbia, “Paulo, ulya ammbikye kyipfungonyi, nalengyilaga kangyiwia ngyikuendie manakye-chu kyipfa nawoṙe kyindo akundi ikuwia.” 19 Ang'anyi ulya o asikari wa shiṙa kammbaṙa kuwoko kayenda na oe mbai, kammbesa kui kyiṟika, “Ny'kyikyi ukundi ingyiwia?” 20 Kagamba, “Wayuda waṙumbuo ikuterewa usotse Paulo ngama, ummbikye mbele ya mengye, cha ilyi wakundi imanya mbonyi tsakye necha ngoseṟa. 21 Kyasia iyoe ulaiṙikyie; cha kyipfa wandu ngoseṟa ya makumi gaana waimlaalyia; walyiie nyamu walalye maa inyo kyindo kyoose mṟasa wammbaage; nawo wulalu wakuṟeyeṟie, wechiweṙelyia kyaasa kyapfo.” 22 Kyasia ang'anyi ulya o asikari wa shiṙa kalekyia manakye ulya nayende, echimmbia, “Ulawie mndu oose kye nongyiongoya ishi.” 23 Kalaga wachilyi watutu wawi, kawawia, “Ṟeyeṟenyi asikari magana gawi iyenda Kaisaria, na asikari makumi mfungaaṙe wekyechumia waṙamie wuye ya farasi, na asikari magana gawi wawoṙe mapfumu, lukoshika saa tsiṟaaṟu tsa kyio wawe wamkuṟeyeṟa. 24 Kawawia wakuṟeyeṟe iṙuo Paulo na imsitsa kyipuo ko mchilyi Filekyisi.” 25 Kaṟeia paruo igambie kuṙi: 26 “Kyilaudio Lyisia, ko Filekyisi, mchilyi awoṙe rina. Ngakuiṟikyiṟa! 27 Mndu-chu nalewoṙo nyi Wayuda, wakakyiṟemmbaaga; naaho-ng'u ngayenda hamwi na kyikosi kya asikari ngamkyiṟa, kyiyeri ngyilemanya mbonyi kye oe nyi Mroma. 28 Na inyi ngyikundi imanya kyindo kyilewaenenga imshitakyi, ngamsotsa na immbikyia mengyenyi. 29 Ngawona naweshitakyio kyipfa kya mbonyi tsa mawawaso ga Mose; maa aleshitakyio kyipfa kya kyindo kyoose kyechiiṙima imwenenga iwoogo ang'u iwiko kyipfungonyi-pfo. 30 Na kyiyeri ngyileendio mbonyi kye kuwoṙe ngyeṟo tsewaaga mndu-chu, cha ilyi ngamṙika kopfo, ngawia na walya walemshitakyi waonguo mbonyi tsakye mbele yapfo. Ngakukundia mecha.” 31 Kyasia asikari walya wakaṙuo Paulo chandu walewio, wakamṙuo mṟasa ko Antipatiri kyio. 32 Na kyiyeri kulekya wakaṙa asikari walya wekyechumia waṙamie wuye ya farasi wayende handu hamwi na oe, nawo wakawuya na kulya moombonyi. 33 Na walya kyiyeri waleshika Kaisaria, na ienenga mchilyi paruo iya, wakawika Paulo mbele yakye. 34 Na oe amwisome, kawawesa, “Mndu-chu nyi o uruka luha?” Kyiyeri alewio kye nawukyie Kyilyikyia, 35 kagamba, “Ngyechiicho kyindo ukundi igamba kyiyeri wechicha walya walekushitakyi.” Kagamba naringo akyeri numbenyi ya Herode ya wuchilyi.
1 Hamwiṙe mfiri itanu, Anania, Mkohanyi ang'anyi kuta woose, kayenda hamwi na wasongoru wa wandu, na mndu ekyekania wandu mengyenyi ekyelago Teritulo, wakaongoya mchilyi mbonyi tsa Paulo. 2 Na oe kyiyeri alelago, Teritulo kawooka ishitakyi Paulo, echigamba, “Kyipfa wuchilyi wopfo wokyeluendie ufoṟo iyoe Filekyisi uwoṙe rina, na kyipfa kya wusongoru wopfo shindo shiwicho kunu urukyenyi loṙu shekyeachikyio, 3 kyasia lochiambilyia orio kyiyeri na orio handu, lochigamba haika. 4 Kyaindi ngyilakutuure nawi, ngakuterewa uluaṙanyie shindonyi shaangu kui wucha wopfo. 5 Cha kyipfa lowona mndu-chu kye namlang'a, nekyewooka wuṟiingyi kyiiṙi kya Wayuda woose wuyanenyi; lyingyi-se nyi msongoru o mwiṙikyie o Wanasorayo. 6 Na lyingyi-se naletambagana ifanyiṟa hekalu kyimṟumoe; lukommbaṙa [lukokunda imwanduya kui mawawaso gaṙu. 7 Kyaindi Lyisia, ang'anyi o asikari wa shiṙa, kacha, kammbuta koṙu ko pfinya, 8 kagamba walya wawemshitakyi wache na kopfo.] Iyoe kumonyi kui imsoruo-soruo noiṙima imanya mbonyi tsa shindo shaluenenga imshitakyi. 9 Wayuda nawo wakamshitakyi, wechigamba kye nyi wuṙo mbonyi-tsi tsikyeri.” 10 Kyiyeri mchilyi alemtsinia kundu naṙeṙe, Paulo nalegamba, “Cha kyipfa ngyiichi kye iyoe nui moṙumbuo moondu o uruka-lu ko maka ifoi, ngyiloṟa chandu ngyilammbicho kui mrima uwoṙe sia. 11 Kyipfa noiṙima imanya kye halandeiṙe mfiri ikumi na iwi wookyia ngyileṙo na Yerusalemu indeterewa-pfo. 12 Wandu-wa walengyiwona hekalunyi, ngyegaluana na mndu, ang'u iamtsa kyituṟu kyisanzionyi, maa sinagoginyi maa mṟinyi-pfo. 13 Maa weiṙima iṟingyishia shindo-shi shiwaenenga wulalu ingyishitakyi-pfo. 14 Indi kyindo ngyigamba kopfo nyi kye kui Njia iya ya Mndumii waigamba nyi ya wongo, ngyekyeindia Ruwa o waku waṙu, ngyiiṙikyie shoose shiṙuṙanyi na uwawaso na shilya shishiṟeie shitapunyi sha weonguo shisuku. 15 Ngyiwoṙe ikusuria ko Ruwa, ikusuria maa iwo wailyiweṙelyia, kye kochiwaṙa iṟutso lya wapfu, wasumganyi na walawasumganyi taa. 16 Na inyi ngyekyetambagana iichiwia kyindo-kyi ngyiwaṙe mrima ulawoṙe mti mbele ya Ruwa na mbele ya wandu mfiri yoose. 17 Hamwiṙe maka ifoi ngyilecha ngyiendie wandu wa uruka loko shienengo. 18 Wakangyiwona hekalunyi ngyepfuṟukania mbonyi-tsi, ngyimwilyi peṟu kyimṟumoe, maa ngyiwewika kyisanzionyi maa iamtsa kyituṟu-pfo; kyaindi kuwewoṙe Wayuda waata wawukyie Asia; 19 wawaṟi iwa iha mbele yapfo ingyishitakyi, kokooya wawoṙe kyindo kyoose kyiwicho waigamba ngyilewuta. 20 Ang'u wandu-wa wawenyi wagambe, nyi ṙeko lyiha walelyiwona koko kyiyeri ngyilegoṟoka mengyenyi, 21 sile kyipfa kya ṟui-lyi lyimwi, kyiyeri ngyilegoṟoka makyiṙi-gawi gawo, na igamba, ‘Kyipfa kya iṟutso lya wapfu ngyianduyo mbele yanyu inu.’ ” 22 Kyasia Filekyisi kafunja kyisanzionyi kyilya, cha kyipfa naweichi necha nakamwi mbonyi tsa Njia ya Mndumii iya Paulo aweiṙeṙa mbonyi tsayo, kagamba, “Kyiyeri Lyisia, ang'anyi o asikari wa shiṙa, echicha ngyeṙumbuo moondu onyu.” 23 Kawia mchilyi ulya kye Paulo naringo; indi nawaṙe ṙaawa, na mbuya tsakye waenengo momu o mmbutia kyilya akundi. 24 Hamwiṙe mfiri ngyaangu, Filekyisi kacha aṙuṙanyi na mka okye, Durusila, awei Myuda, kagamba Paulo nalago kaaṙanyia mbonyi tsa iiṙikyia Yesu Kristo. 25 Na Kyiyeri Paulo aweionguo mbonyi tsa wusumganyi, na iwa na meena, na ianduyo lyiicha, Filekyisi kaowuo kagaluo, kagamba, “Wulalu yenda, na inyi ngawona ṙaawa ngyekulaga.” 26 Hamwi na isho nalekusaṟa kye Paulo nechimwenenga heleri; koikyo nalemlaga kafoi kaṙeṙa na oe. 27 Na kyiyeri maka iwi ileiṙa Filekyisi kaambilyia Porikyio Festo nawaṙe wuchilyi handu ha Filekyisi. Na Filekyisi akundi Wayuda wamkunde kaṙa Paulo kyipfungonyi.
1 Hamwiṙe mfiṟi iṟaṟu wookyia Festo awa mchilyi, kawuka Kaisaria kaṙo na Yerusalemu. 2 Mkohanyi ang'anyi kuta woose na wang'anyi wa Wayuda wakamwongoya mbonyi tsa Paulo, 3 wakamterewa nawawutie wucha kui igamba Paulo naendo na Yerusalemu, kundu waiṙime imlaalyia njienyi na immbaaga. 4 Kyaindi Festo kagaluo kagamba kye Paulo nairingo kulya Kaisaria; na kye oe nawekuṟeyeṟie iyenda pfo mfiri ya kufuhi. 5 Kagamba, “Walya wawoṙe wuchilyi konyu wasokye hamwi na inyi wandemshitakyi, kokooya mndu-chu nawoṙe ṙeko lyoose.” 6 Kyiyeri Festo amkae kowo cha mfiri ikumi kasoka na Kaisaria; na ilya-ngama kaṙamia halya-ndu awekyeṙamia eanduya wandu, kagamba Paulo naendo. 7 Kyiyeri alecha, Wayuda walya walesoka iwuka Yerusalemu wakagoṟoka kufuhi na oe wakasenda wuwicho wokye wufoi kyaindi walaleiṙima iwuṟingyishia. 8 Paulo, echiloṟa chandu alammbicho, kagamba, “Inyi ngyilefunja iwawaso lyoose lya Wayuda-pfo; maa lya mbonyi tsa hekalu, maa lya mbonyi tsa Kaisari-pfo.” 9 Kyaindi Festo akundi iloṟa kye namcha ko Wayuda kagaluo Paulo, echigamba, “Ngyesa nukundi iyenda Yerusalemu, undeanduyo pfo mbele yako kyipfa kya shindo-shi?” 10 Paulo kagamba, “Inyi ngyigoṟokyi iha mbele ya kyiṙi kya Kaisari kyeanduya, nyiho hangyiwaṟi ianduyo. Ngyileṙekyio Wayuda kyindo kyoose, chandu iyoe uichi mnu-pfo. 11 Kyasia kokooya ngyileṙeko kyindo kyeiṙima ingyienenga iwoogo, ngyilega ipfa-pfo. Indi kokooya wuwicho-wu waingyisendia chi loi-pfo, kuwoṙe mndu eiṙima ingyiṙambika kowo-pfo. Ngyikundi mbonyi-tsi tsako tsiṙoo ko Kaisari.” 12 Kyasia Festo kyiyeri alemarisa iṙeṙa na wandu wa mengye kagaluo, kagamba, “Kyipfa nokunda mbonyi-tsi tsapfo tsiṙoo ko Kaisari, nochiyenda ko Kaisari.” 13 Hamwiṙe mfiri ngyaangu mangyi Akyiṟipa na Berinikye wakashika Kaisaria, wakaiṟikyiṟa Festo. 14 Na wamkae pfo mfiri ifoi, Festo kaongoya mangyi mbonyi tsa Paulo, echigamba, “Kuwoṙe mndu umwi iha Filekyisi alemṙa kyipfungonyi; 15 ulya kyiyeri awekyeri Yerusalemu wang'anyi wa makohanyi na wasongoru wa wandu walengyiongoya mbonyi tsakye, wakundi naanduyo. 16 Ngawagaluo ngawawia kye chi kyiṙo kya Waroma ienengyia mndu oose ashitakyio alawonana kuwooka na walya wamshitakyi, na ienengo ṙaawa lyeloṟa chandu alawoṙe wuwicho wulya aiwio nawoṙe-pfo. 17 Koikyo kyiyeri walesanzia iha ngyilekyelyio-pfo; kyipfa ilya-ngama ngyileṙamia halya-ndu ngyekyeṙamia ianduya wandu ngagamba mndu-cho naendo. 18 Na kyiyeri walya walemshitakyi walegoṟoka, walegamba kyindo kyoose kyakye kyiwicho chandu ngyilekusaṟa-pfo. 19 Indi wawewoṙe shindo shifoi walewesa kyipfa kyakye na kyipfa kya mwiṙikyie owo wawenyi, mbonyinyi tsa mndu umwi ekyelago Yesu, alekoampfa, ulya Paulo alegamba kye nai na moo. 20 Na inyi ngyilamanye necha chandu ngyepfula wuloi wo mbonyi-tsi, ngammbesa kokooya nakundi iyenda Yerusalemu nandeanduyo pfo kyipfa kya shindo-shi. 21 Kyaindi kyiyeri Paulo alegamba kye nakundi naanduyo nyi Kaisari, ngagamba naringo mṟasa kyiyeri ngyechimṙuo ko Kaisari.” 22 Akyiṟipa kawia Festo, “Na inyi ngyiwekundi iicho mndu-chu.” Kagamba, “Nomwicho ngama.” 23 Kyiyeri kulekya Akyiṟipa kacha hamwi na Berinikye wekutuuta mnu, wakaiṙa na handu halya heaṙanyia moondu ya wandu. Naweṙuṙanyi taa na wachilyi wang'anyi na wandu wawoṙe rina wa mṟi ulya. Festo kagamba Paulo naendo. 24 Paulo amwendo Festo kagamba, “Mangyi Akyiṟipa, na nyoe moose mukyeri hamwi na soe iha, kyeambuyenyi mndu-chu, ulya wandu woose wa ipfo Yerusalemu na iha taa walekunda ngyiwatarame, wechikalagatsa kye nawaṟi iwoogo iwinyi. 25 Kyaindi inyi ngyilewona kye awutie kyindo kyoose kyechimwenenga iwoogo-pfo; na oe amonyi kyiyeri alekunda ianduyo nyi Kaisari, ngamṙika kokye. 26 Na inyi mbonyinyi tsakye ngyilewona kyindo kya loi kyeṙikyia Kaisari-pfo. Koikyo ngamwende na iha mbele yanyu, maa mbele yapfo iyoe, mangyi Akyiṟipa, kundu lukomruwa-ruwa mbonyi tsakye ngyiwone kyindo kyeṟeia. 27 Cha kyipfa ngyiwonyi nyi kyindo kyilawoṙe wuṟango iṙika mndu akyeri kyipfungonyi kulawoṙe iloṟa nyi wuwicho wuha awio kye nawoṙe.”
1 Akyiṟipa kawia Paulo, “Nuwoṙe momu ionguo mbonyi tsapfo.” Naaho Paulo kagoṟuo kuwoko kokye, kaloṟa chandu alammbicho, echigamba, 2 “Mangyi Akyiṟipa! Ngyikuichuoe iwaṙa isaṟia mrimenyi, kyipfa inu mbele yapfo ngyiloṟa chandu ngyilammbicho, kyiiṙi kya wuwicho wulya Wayuda walegamba kye ngyiwoṙe. 3 Iyoe kyipfa uichi mnu miichiwie ya Wayuda na shindo shoose wawoṙe shewesa, ngyikuterewa ungyiaṙanyie kulawoṙe iwina. 4 “Cha kyipfa Wayuda woose wangyiichi wookyia ngyii manakye, shindo shiwekyeri urukyenyi loko ipfo Yerusalemu wookyia mawookyionyi, 5 wangyiichi mnu wookyia mawookyionyi, kokooya wakunda iṟingyishia, kye ngyiwekyeri Mfarisayo kui iosha mawawaso gaṙu ga iindia Ruwa kulawoṙe iloloma maa ale. 6 Na wulalu ngyigoṟokyi iha ianduyo kyipfa kya iweṙelyia kyaasa waku waṙu waleenengo nyi Ruwa. 7 Kyaasa wandu waṙu wa mbaṟe ikumi na tsiwi waiweṙelyia ikyikooya, wechiterewa Ruwa na iana. Na inyi, mangyi mkunde, Wayuda waigamba kye ngyimmbicho kyipfa kya iweṙelyia-lyo. 8 Ny'kyilyi konyu kyawa kyindo kyilechiiṙimika, kye Ruwa nekyeṟutsa wapfu? 9 Loi, inyi ngyilewona mrimenyi koko kye kyingyiwaṟi iwuta shindo shifoi shelyisa wukyiwa walya wekyeosha Yesu awukyie Nasareti; 10 na inyi ngawuta isho kulya Yerusalemu; ngyilewika wandu wafoi wa Ruwa kyipfungonyi, ngamwenengo momu na wang'anyi wa makohanyi, na kyiyeri walewoogo ngyilegamba nyi sungusinyi. 11 Na kafoi masinagoginyi goose ngyilewalyisa wukyiwa, ngawaitika ilahia Ruwa; ngakapo nyi nyashi kyipfa kyawo cha msuko, ngawalyisa wukyiwa maa mṟinyi ya wuyenunyi.” 12 “Kyasia kyiiṙi kya iṟunda-lyo kyiyeri ngyiweiyenda Dameskyi, ngyiwoṙe wuchilyi wo wang'anyi wa makohanyi; 13 mangyi mkunde, naaho-ng'u kyiyeri kya kyingoto njienyi ngawona ngyeela yewuka ruwewu, iiṟie ngyeela ya mnengyeṟi, yengyilyimika inyi, na walya waweioshana na inyi ngyuura tsoose. 14 Lukooloka wanda loose, ngaicho ṟui lyeṙeṙa na inyi kui mṙeṙie o Kyiebrania, ‘Saulyi! Saulyi! Ny'kyilyi ungyilyisa wukyiwa? Nyi kyuumu kopfo ikuhuuya kyiṙinyi.’ 15 Na inyi ngagamba, ‘Iyoe nyi wui, Mndumii?’ Mndumii kangyiwia, ‘Inyi nyi Yesu, ulya iyoe umlyisa wukyiwa. 16 Kyaindi amka, ugoṟokye na maṙende gapfo, cha kyipfa ngacha na kopfo kyipfa kya ikyi, ngyikuwikye uwe mṟundi na mṟingyishi o shindo-shi uleshiwona, na shindo ochishiwona koko na shilya ngyechikuloṟa. 17 Ngyechikukyiṟa iwuka wandu wa Isiraelyi na wandu walangyiiṙikyie wechiiṙima ikuwutia kyindo-pfo, walya ngyechikuṙuma kowo. 18 Uwapfunguoe meso, na iwaweṟutsa waṙe meema na iyenda saenyi, waṙe pfinya tsa Satana na iyenda ko Ruwa; naaho-ng'u Ruwa nawahooṟie ngyuunyamaṟi tsawo na wechikaa halya-ndu walya Ruwa awailyishie wechikaa kui ingyiiṙikyia inyi.’ ” 19 “Koikyo, mkunde mangyi Akyiṟipa, ngyilelega shindo shilya sha ruwewu ngyileloṟo ngyikyeri cha mndu ailoṙo-pfo, 20 indi ngyileonguo Ṙeṙo lya Ruwa kuwooka ko wandu wa Dameskyi na Yerusalemu, na urukyenyi loose lo Uyuda, na ko wandu walaiṙikyie Yesu, kye waṙumbuye wunyamaṟi na igalukyia Ruwa, wechiwuta shilya shiṙuṙanyi na iṙumbuya wunyamaṟi. 21 Kyipfa kya isho Wayuda wakangyiwaṙa ngyikyeri hekalunyi wakatambagana ingyiwaaga. 22 Kyasia cha kyipfa ngawona kyitarama kyiwukyie ko Ruwa ngyigoṟokyi iha inu ngyeṟingyishia wana watutu na wandu wang'anyi, maa ngyigamba kyindo sile shilya weonguo shisuku na Mose waleonguo-pfo. Shindo walegamba kye shechiwa, 23 kye Kristo nawaṟi ilyiso wukyiwa na kye oe kuwooka kui iṟutso ko wapfu nechionguo mbonyi tsa ngyeela ko wandu wakye na ko wandu walamwiṙikyie.” 24 Kyiyeri Paulo aweloṟa chandu alammbicho, Festo kaṙeṙa na ṟui lying'anyi, kagamba, “Paulo, numsuko! Isoma mnu lyilekuenenga wusuko.” 25 Kyaindi Paulo kagamba, “Festo monyi kyiṟumi, ngyimsuko-pfo. Ngyiṙeṙa shindo sha loi ngyilamsuko maa ale. 26 Cha kyipfa mangyi naichi mbonyi-tsi, na inyi ngyeiṙima iṙeṙa na oe kulawoṙe wuowu, cha kyipfa ngyiichi kye kuwoṙe kyindo maa kyimwi kyiiṙi kya mbonyi-tsi alakyiichi-pfo; kyipfa kyindo-kyo kyilewutika kyiṟika-pfo. 27 Mangyi Akyiṟipa, ngyesa uiṙikyie malosho ga weonguo shisuku-pfoe? Ngyiichi kye nuiṙikyie.” 28 Akyiṟipa kawia Paulo, “Kui maṙeṙo maangu nokusaṟa kye noiṙima ingyigaluo ngyiwe Mkristiano?” 29 Paulo kagaluo, kammbia, “Ngyiterewa Ruwa kye, kokooya nyi kui maṙeṙo maangu ang'u kui maṙeṙo gafoi, chi iyoe tupu-pfo indi na iwo woose waingyiaṙanyia inyi wawe cha inyi, kyaindi ngyiterewa mulawiko kyipfungonyi cha inyi.” 30 Mangyi na mchilyi na Berinikye na walya waweṙamie hamwi nawo wakagoṟoka. 31 Na kyiyeri walewuka halya wakawiana, “Mndu-chu aiwuta kyindo kyoose kyechimwenenga ipfungo ang'u iwoogo-pfo.” 32 Akyiṟipa kawia Festo, “Mndu-cho naweiiṙima ilekyio, kokooya alalegamba kye moondu okye uṙoo ko Kaisari.”
1 Kyasia kyiyeri kyilegambo kye lupfungye kyaro kya iiṙa ipalyipalyinyi mṟasa Italyia, wakaṙambika Paulo na wandu walya wengyi wawekyeri kyipfungonyi ko mchilyi umwi ekyelago Yulyio, awukyie kyikosinyi kya Agusto. 2 Lukoṙooya ngalawenyi ya Adiramitio iwekuṟeyeṟie iyenda mṟasa mṟi ya Asia ikyeri mbai ya ipalyipalyi. Lukowooka kyaro, Arisitariko awukyie Makyedonia mṟinyi o Tesalonikye akyeri hamwi na soe. 3 Ilya-ngama lukoafukyia Sidon. Yulyio kaloṟa Paulo isaṟia lying'anyi kui imwenenga momu o yenda ko mbuya tsakye kundu wamwenengye shilya awekundi. 4 Iwuka Sidon lukopfunga kyaro lukoyenda mṟasa Kyipiro kundu kyiwiṟi kyilakukape, cha kyipfa shiwiṟi shiweng'anyi. 5 Kyiyeri luleira ipalyipalyinyi ura lo Kyilyikyia na Pamfilyia, lukoshika Mira, mṟi o Lyikyia. 6 Na ipfo mchilyi ulya kakooya ngalawa iya ya Iskanderia, ikuṟeyeṟie iyenda Italyia; kaluṙosia pfo. 7 Lukoyenda kyimbung'ho mfiri ifoi, lukoshika mṟasa Nido kui ilya wukyiwa; cha kyipfa kyiwiṟi kyiwelushingyia, lukoiṙa seri ya Kyirete, lukoambuyana na Salyimone. 8 Lukoiṙa lochilya wukyiwa, mbaimbai ya ipalyipalyi lukoshika handu hekyelago “Handu hecha Heringa Ngalawa.” Kufuhi na handu-ho hawoṙe mṟi okyelago Lasea. 9 Na kyiyeri kyileshi kyamwiṙe, na kyaro wulalu kyikawaṙa ngataṟa tsifoi, cha kyipfa mfiri ya ikuretekyia ilekoyaiṙa, Paulo kawaikyimbia, 10 kawawia, “Wasoṟo, ngyiwonyi kye kyaro-kyi kyechiwaṙa ngataṟa na iṙetsa shifoi. Lochiṙetsa shindo na ngalawa tupu-pfo, indi na moo yaṙu taa.” 11 Kyaindi mchilyi ulya kaaṙanyia msongoru o ngalawa iya na monyi ngalawa kuta shilya Paulo alegamba. 12 Na kyipfa kyilawechiiṙimika ikaa kulya mṟinyi ukyeri kufuhi na ipalyipalyi kyiyeri kya mbeho, wandu wafoi wakagamba kye nyi kyicha iwuka pfo waiṙime ishika Foinikye, kokooya kyechiiṙimika, na ikaa pfo kyiyeri kya mbeho. Na nyi-we mṟi o Kyirete, iambuyana na ngyuura tsilya mkuma okyechia. 13 Na kyiyeri mkuma ulewooka ikuma, wakusaṟie kye wawona shilya wawelangyie iwona, wakawooka kyaro, wakaiṙa kufuhi na Kyirete, mbaimbai ya ipalyipalyi. 14 Hamwiṙe kyiyeri kyifuhi mkuma ung'anyi cha kyiwiṟi okyelago Eurakyilo ukokuma. 15 Ngalawa ikakapo nyi mkuma ulya, na kyipfa ilelemo iwingana na mkuma-cho, ukoiṙuo. 16 Na lochiiṙa iwinyi kufuhi na kyiṟingyiti kyekyelago Kauda, lukoiṙima iiṟicha kyingalawa ngalawa iya yaṙu iwekyekyikuruo, kyaindi lochilya wukyiwa mnu. 17 Wamuiṟiche kyingalawa kyilya kyitutu, wakapfunga ngalawa iya luwekyeri kui iitsa kyigowo wanda yayo, nawo wechiowuo walachewoṙo mlelyenyi o ipalyipalyinyi kufuhi na uruka lo Siriti, wakaenenga mkuma momu o waṙuo chandu ulekunda. 18 Na kyipfa luweikapo mnu nyi kyiwiṟi kyilya, ilya-ngama wakawooka iwiyitsa mlari ipalyipalyinyi. 19 Mfiri o kaṟaaṟu wakawiyitsa shindo sha ngalawa kui mawoko gawo wawenyi. 20 Mfiri ifoi mnengyeṟi maa nyenyeri shilewoneka-pfo; na kyiwiṟi kying'anyi kyikalukapa. Kyasia lukowona lokyia maa ale-pfo. 21 Na kyiyeri walekowamkaa kyiyeri kyileshi walalya kyelya, Paulo kagoṟoka makyiṙi-gawi gawo, kagamba, “Wasoṟo, kyiwemmbaṟi ingyiaṙanyia lulapfunga kyaro iwuka Kyirete na iwona ndenga na iṙetsa shindo shifoi kuṙi. 22 Wulalu ngammbia, kuwanzenyi, cha kyipfa kuwoṙe mndu maa umwi kyiiṙi kyaṙu echiṙeka sile ngalawa tupu-pfo. 23 Cha kyipfa kyio kya inu malaika o Ruwa ulya inyi ngyikyeri okye, na oe nyi oe ngyekyemwowuo na imterewa, nalegoṟoka kufuhi na inyi, 24 kangyiwia, ‘Ulaowuoe, Paulo, kyikuwaṟi igoṟoka mbele ya Kaisari. Lyingyi-se, Ruwa nakuenengyie wandu woose ukyeri kyaronyi hamwi nawo.’ 25 Kyasia, wasoṟo, mulakuinaṙie; cha kyipfa ngyiiṙikyie Ruwa, kye shindo shechiwa wuṙo chandu ngawio. 26 Kyaindi mkuma ochiluṙuo kyiṟingyitinyi kyilyiwe.” 27 Na kyio kyimwi, hamwiṙe mfiri ikumi na ina, kyiyeri mkuma uweluwiyitsa ipfo na ipfo ipalyipalyinyi lya Adiria, cha kyio kya mayeleyele, waṟundi wa ngalawa wakakusaṟa kye wai kufuhi na handu hagaṙutsu. 28 Wakatonyitsa kyindo kyesenguṙa chandu ipalyipalyi lyiyendie wanda wakakooya ipalyipalyi lyiwewoṙe meta makumi gaana iyenda wanda. Wakayenda mbele kyitutu wakayesha-se wakakooya nyi meta makumi gaṟaaṟu. 29 Wakaowuo mkuma ulachewawiyitsa handu hawoṙe maṟaṟa, wakaolotsa kulya mringyenyi shindo shoose shiina shekyetirimisha shindo shekyeiṙa mringyenyi, wakaterewa kukye. 30 Na kyiyeri waṟundi wa ngalawa wawekundi iṙicha na iṙa ngalawa iya, wechisotsa kyingalawa kyiwekyepfungyio halya ngalawenyi cha ilyi wawekundi itonyitsa kulya mṟingyenyi kyindo kyekyetirimisha shindo shekeiṙa mṟingyenyi, 31 Paulo kawia ang'anyi o asikari wa shiṙa hamwi na asikari, “Iwa walandekae kunu ngalawenyi moiṙima ikyia-pfo.” 32 Kyasia asikari wakaṙumbuo shigowo shilya sha kyingalawa kyilya wakakyiṙa kyiolokye. 33 Na kyiyeri kuweikya Paulo katerewa woose walye kyelya, echigamba, “Inu nyi mfiri o ikumi na kaana moweṙelyia na ikuretekyia, mulalya kyindo kyoose. 34 Kyasia ngamuterewa mulye kyelya, cha kyipfa kyemukyiṟa; kyipfa kuwoṙe maa uchui lo mṟoe o mndu maa umwi lochiṙeka-pfo.” 35 Amgambe kuṙo kaira mkate, kaana Ruwa mbele yawo woose, kaupeṟenguo, kawooka ilya. 36 Naaho-ng'u woose walakuinaṙie-se, wakalya kyelya. 37 Na soe luwekyeri kulya ngalawenyi nyi-we wandu magana gawi na makumi mfungaaṙe na waṟandaaṟu. 38 Kyiyeri wamuiguṙe wakaanguṟa mlari ya ngalawa, kui iwiyitsa mlari-yo ipalyipalyinyi. 39 Kyiyeri kulekya walemanya uruka lulya-pfo, indi walewona handu hagaṙutsu kyimcholenyi kya mṟinga o ipalyipalyi, wakawiana watirimishe ho ngalawa, kokooya kyiweiṙimika. 40 Wakawiyitsa shindo shilya shekyetirimisha shindo shekyeiṙa mṟingyenyi, wakashiṙa ipalyipalyinyi, hamwi na iṟawisha shigowo shekyepfunga kyindo kyesongoya ngalawa, wakapfunga kyindo kyewaṙa mkuma halya ngalawenyi, wakayenda halya-ndu hagaṙutsu. 41 Kyaindi wakashika handu mapalyipalyi gawi gakooyanyi, wakatirimisha ngalawa, ura loyo lo mbele lukokuwaṙa lulakupaaye, indi ura loyo lo numa luweluanuoe kui pfinya tsa kyiwiṟi kya ipalyipalyinyi. 42 Makusaṟo ga asikari gakawa iwaaga walya wawewawikye kyipfungonyi, mndu alaiṙime iiṙa mṟingyenyi iṙicha. 43 Indi ang'anyi o asikari wa shiṙa, akundi ikyiṟa Paulo, kawashingyia, walawute chandu wawekusaṟie, kawia walya weiṙima iiṙa mṟingyenyi wawookye ikuwiyitsa ipalyipalyinyi, washikye handu hagaṙutsu, 44 na walya waletsugaa, wengyi waṙamilyie mbau na wengyi waṙamilyie shindo shingyi sha ngalawa. Na kuṙo wandu woose wakaiṙima ishika handu hagaṙutsu kyipuo.
1 Kyiyeri lomkyie, nyi lyo-ndu lulemanya kye kyiṟingyiti kyilya kyekyelago Melyita. 2 Wandu wa uruka-lo wakaluloṟa isaṟia lyilewa igamba. Cha kyipfa waleatsa moṙo, wakaluambilyia loose, kyipfa kya mvuo ilekapa na kyipfa kya mbeho. 3 Kyiyeri Paulo awesania mlari o ngwi na iuwika moṙonyi, njoka ikafuma kulya ngwinyi kyipfa kya moṙo ulya, nayo ikakuoṟowia kuwokonyi kokye. 4 Kyiyeri wandu wa kyiṟingyiti kyilya walewona njoka iya inenewie kuwokonyi ko Paulo wakawiana, “Mndu-chu aṙeeye alakyeri mmbaagi-pfo. Maa chandu alekyia ndenga tsa ipalyipalyinyi ruwa ekyelago Wusumganyi eṙa alembaaga-pfo.” 5 Kyaindi Paulo kakutia-kutia njoka iya moṙonyi ilammbutie kyindo kyoose. 6 Wo wakakusaṟa kye nechishimba ang'u ioloka wanda kui ipfa cha ilyi; na wamumwitukuye mnu, na iwona kye kuwoṙe kyindo kyoose kyiwicho kyiwemmbutikyia-pfo, wakainduka, wakagamba kye oe nyi ruwa. 7 Kufuhi na handu halya hawewoṙe maṙema ga msongoru o kyiṟingyiti kyilya, awekyelago Pubilyio. Mndu-chu naleluambilyia kui mrima uwoṙe umbuya, kalugaluo wayenu wakye kyiyeri kya mfiri iṟaṟu. 8 Kyikawa-ng'u awu o Pubilyio nawewoṙo nyi homa na iaṟaka samu. Paulo kaiṙa na halya-ndu awekyeri, katerewa, kayekyia mawoko gakye wuye yakye, na imkyiṟa. 9 Isho shammbutikye wandu wengyi wawewoṙe ndoṟe kulya kyiṟingyitinyi wakacha wakakyiṟo. 10 Nawo wakaluindia mnu. Kyasia kyiyeri lulewooka kyaro kya iiṙa ipalyipalyinyi wakawikyia ngalawenyi shindo shilya luwekundi. 11 Hamwiṙe mori iṟaṟu lukoyenda lukyeri ngalawenyi ya mṟi o Iskanderia, ngalawa ilekoyakaa halya kyiṟingyitinyi kyiyeri kya mbeho. Na ngalawa-yo iwekyelago “waruwa wawi.” 12 Lukoshika Sirakusa, lukokaa mfiri iṟaṟu. 13 Iwuka pfo lukotenga lukoshika Rekyio; hamwiṙe mfiri umwi mkuma ukokuma iwuka ura lo kyaseri, na ilya-ngama lukoafukyia Puteolyi. 14 Lukokooya pfo wandu waata waiṙikyie Yesu, wakaluterewa lukae nawo mfiri mfungaaṙe; na kuṙo lukoshika Roma. 15 Na iwuka pfo, kyiyeri walya waiṙikyie Yesu waleicho mbonyi tsaṙu, wakacheluambilyia, wakacha mṟasa Sangaṙa ya Apiyo na numba tsiṟaaṟu tseambilyia wayenu. Kyiyeri Paulo alewawona naleana Ruwa, kokuicho pfinya ing'anyi mrimenyi. 16 Kyiyeri luleiṙa na Roma Paulo naleenengo momu o ikaa amonyi hamwi na asikari alemringa. 17 Kyikawa-ng'u hamwiṙe mfiri iṟaṟu kalaga wang'anyi wa Wayuda wasanzie handu hamwi, na wammbute kuṙo, kawawia, “Wana wa wama wako, maa chandu ngyilalewuta kyindo kyoose kyilaṙuṙanyi na miichiwie ya wandu waṙu ang'u miichiwie ya waku waṙu, ngyilewiko mawokonyi ga Waroma, ngyimpfungye wookyia Yerusalemu. 18 Na iwo wamungyisoruo-soruo walekunda ingyilekyia, cha kyipfa kuwewoṙe kyimaṙuma kyoose kya inyi iwoogo-pfo. 19 Kyaindi kyiyeri Wayuda walegamba kyilya wawekusaṟie ngyileitiko iṙuo mbonyi-tsi ko Kaisari. Chi kye ngyiwewoṙe kyindo kyiwicho ngyeiṙima igamba kye wandu wa uruka loko walewuta-pfo. 20 Kyasia kyipfa kya ikyo, ngamulaga muchengyiambuya na iṙeṙa na inyi; cha kyipfa ngyimfungye na mshe-chu kyipfa kya kyilya wandu wa Isiraelyi waiweṙelyia.” 21 Walya wakammbia, “Soe luleambilyia paruo tsiwoṙe mbonyi tsapfo iwuka Uyuda-pfo; maa kuwoṙe maa mndu umwi aiṙikyie Yesu aleshika iha na iluendie mbonyi ang'u igamba kyindo kyoose kyiwicho kyapfo-pfo. 22 Kyaindi lukundi iicho chandu uwonyi iyoe; cha kyipfa mbonyi tsa wandu-wa iyoe ukyeri umwi owo kyimanyikyie koṙu kye tsiṙeṙe uwicho orio handu.” 23 Wamteṟiane na Paulo mfiri wechiwaṙa kyisanzionyi na oe wandu wafoi mnu wakacha na kulya numbenyi awekyekaa. Kawaongoya necha na iṟingyishia Wumangyi wo Ruwa, echiwaikyimbia kui mbonyi tsa Yesu, na mbonyi tsa mawawaso ga Mose na ga weonguo shisuku, wookyia ngamenyi mṟasa kyukonyi. 24 Wengyi wakaiṙikyia shilya shilegambo kyaindi wengyi waleiṙikyia-pfo. 25 Na kyiyeri walawewoṙe makusaṟo gamwi, wakayenda, kyiyeri Paulo amgambe kye, “Mumuyo Mweele naleṙeṙa necha na waku waṙu, kui ṙumbu lya moonguo shisuku Yesaya, 26 echigamba, ‘Yenda ko wandu-wa, undewawia, Iicho moicho, indi momanya-pfo, na iwona mowona, indi momanya-pfo. 27 Cha kyipfa mrima ya wandu-wa irumai, na maṙwi gawo nyi gamalemeri iicho, na washingyie meso gawo; walacheicho kui maṙwi gawo. Na imanya kui mrima yawo, na iilacha makusaṟo gawo, ngawakyiṟa.’ ” 28 “Kyasia manyenyi kye wukyiṟo-wu wo Ruwa wuleṙoo ko wandu walaiṙikyie Yesu, nawo wechiiṙikyia!” [ 29 Amgambe kuṙo, Wayuda wakayenda, wechiwesana shindo shifoi wenyi ko wenyi.] 30 Paulo kakaa kyiyeri kya maka iwi kulya numbenyi awekyekaa, kaambilyia wandu woose wawekyeyenda kokye, 31 echionguo mbonyi tsa Wumangyi wo Ruwa, na ilosha mbonyi tsa Yesu Kristo, kulawoṙe wuowu, na kulawoṙe mndu alemshingyia.
1 Paruo-i yawuka koko inyi Paulo, mṟundi o Yesu Kristo, alelago nawe msu, na iteseṟo naonguoe Ndumi Ngyicha ya Ruwa; 2 nayo nyiyo Ruwa alekoamwenenga kyaasa kui ṙumbu lya weonguo shisuku shiṟeionyi shiele. 3 Mbonyi tsa Mono-kye alefeo kyisharinyi kya Dawidi, 4 na iṟingyishio kui wuiṙimi iwa Mana o Ruwa, kui mbaṟe ya ngoo ya wuele, kui iṟutso lya wapfu, Yesu Kristo Mndumii oṙu. 5 Icho ai kye kyiiṙi kyakye luleambilyia isaṟia na ndumo kundu masanga goose gaiṙime iindia kui iiṙikyia kyipfa kya rina lyakye. 6 Na kyiiṙi kya iwo nyoe mulewa wasambuṟe wa Yesu Kristo; 7 ko woose wakyeri Roma, wawakunde nyi Ruwa, walelago wawe wandu wa Ruwa. Isaṟia lyikae konyu na ufoṟo luwukyie ko Ruwa Awu oṙu, na ko Mndumii Yesu Kristo. 8 Kuwooka ngyiana Ruwa oko kyiiṙi kya Yesu Kristo kyipfa kyanyu nyoe moose, kyipfa iiṙikyia lyanyu lyiongoyo wuyanenyi koose. 9 Kyipfa Ruwa, ichu ngyekyemterewa na imwindia kui mrima oko kyiiṙi kya Ndumi Ngyicha ya Mono-kye, nyi mṟingyishi oko chandu ngyekyemukumbuo kulawoṙe itsia, 10 mfiri yoose shiterewonyi shako, ngyechiterewa ngyiche na konyu mfiri ya kufuhi, Ruwa kakunda ingyigoṟokyia kyaronyi kyako. 11 Kyipfa ngyilangyie mnu immbona nyoe, ngyiiṙime imuenenga kyisumbo kya mrimenyi, kundu mukarisho mulalolome. 12 Kyimwi na igamba, luwiyiṟiane moo inyi na nyoe, orio mndu kui iiṙikyia lya oṙoe, lyanyu na lyako. 13 Kyaindi wana wa wama wako, ngyikundi muṙe mulamanya kye kafong'ui ngyilekunda icha na konyu; indi maa mṟasa wulalu ngyilalekyio, kundu ngyiiṙime igaluo wandu konyu wagalukyie Kristo taa. Chandu ngyiwoṙe wandu wagalukyie Kristo iwuka ko wandu wa masanga walai wa kunu Roma. 14 Ngyiriko nyi Wakyiṟikyi na walakyeri Wakyiṟikyi, ngyiriko nyi waṟango na matondo. 15 Koikyo, ko ura loko, inyi ngyikuṟeyeṟie ionguo Ndumi Ngyicha maa konyu nyoe mokyekaa Roma. 16 Kyipfa ngyiwonia sonu Ndumi Ngyicha-pfo; kyipfa nyi wuiṙimi wo Ruwa wokyeende wukyiṟo, ko orio mndu aiṙikyie, ko Myuda kuwooka, na ko Mkyiṟikyi taa. 17 Kyipfa wusumganyi wo Ruwa wuloṟo kyiiṙi kyakye; wookyia mawookyionyi ga iiṙikyia mṟasa mafurumionyi; chandu kyikyiṟeie, “Awoṙe wusumganyi nechikaa kui iiṙikyia.” 18 Cha kyipfa nyashi ya Ruwa ilemanyika na pata iwuka Ruwewu kyipfa kya wunyamaṟi na wuwicho woose wo wandu wekyewingana na wuloi kui wuwicho. 19 Kyipfa mbonyi tsa Ruwa tsiichio tsamanyika mrimenyi kowo kyipfa Ruwa nalewaloṟa na pata. 20 Kyipfa wookyia kyiyeri Ruwa alegumba wuyana wandu weiṙima imanya na pata kye pfinya tsakye nyi tsa mlungana na kye nai Ruwa loi. Mbonyi tsi tsekyeiṙima iwono-pfo kyaindi tsekyemanyika. Wandu weiṙima imanya mbonyi-tsi tsa Ruwa kyipfa kya shindo Ruwa agumbie. Kyipfa kya ikyo wechiiṙima ikuwaṙa na kyindo kyoose kyiiṙi kya shilya wawutie-pfo. 21 Cha kyipfa kyiyeri walemanya Ruwa walemṟumisha cha kye oe nyi Ruwa maa imwana-pfo; indi waleṙekyia maloshonyi gawo ga wongo, na mrima yawo iwoṙe wutondo ikawiko meema. 22 Wechikuloṟa kye waṟango waletondoka. 23 Wakagaluo kyiṟumi kya Ruwa alekyepfa kui mafano ga mndu, shileye, na ga mando ga saka, na shekyekukuruo na ndewu. 24 Kyipfa kya isho Ruwa nalewaṙa langonyi tsa mrima yawo, waoshe ukoe, mṟasa wakawutiana shindo sha sonu kui mmbiu yawo. 25 Cha kyipfa walegaluo wuloi wo Ruwa iwa wongo, wakapfiria ndi kyindo Ruwa agumbie, wakawaṙima Ruwa ekyeṟumisho mlungana. Amen. 26 Koikyo Ruwa nalewaṙa waoshe lango tsawo tsa sonu. Waka wakailacha mkaṟo wakawutiana mbonyi tsa wolyi kui mmbiu yawo, kyindo kyilawaṟi iwa kuṙo. 27 Wasoṟo nawo na wuṙo wakaṙa iwuta mbonyi tsa wolyi na waka chandu kyiwaṟi wookyia mawookyionyi, wakalangana, wasoṟo wechiwuta shilawaṟi, wakaambilyia ngapo mrimenyi kowo, ngapo ikyeri wori wawaṟi. 28 Na chandu walelega iwika Ruwa ngyuuṟangonyi tsawo, Ruwa nalewaṙa waoshe ngyuuṟango tsawo tsilawoṙe kyiira, wawute shilawaṟi iwuta. 29 Wawoṙe wuwicho wo orio mbaṟe, wunyamaṟi na lango na wuwicho. Wawoṙe wunyeng'i, na uwaagi, na wuṟiingyi, na wulembi; wandu wa makusaṟo mawicho, wekyeṙeṙa wengyi. 30 Wekyeiria woṙiawo wongo, wasuuye Ruwa, wawoṙe tiri, wekyekushela, wekyeṙamia kyiṙombo kyeṙeṙa wongo, walekyeindia wafee wawo. 31 Walaichi kyindo, walekyeafutsia shilya wateṟie, walakundi wandu wa kanyi kowo, walawoṙe isaṟia. 32 Waichi mnu ianduyo lya wusumganyi wo Ruwa, kye wekyewuta isho wawaṟi upfu, wekyewuta isho; maa chi isho tupu-pfo, indi wakaiṙikyiana na walya wekyewuta waṙo.
1 Koikyo, iyoe mndu uianduya oṙoo uwoṙe kyegamba-pfo. Kyipfa isho uanduya ungyi nukuanduya kumonyi kye nunyamaṟie; kyipfa iyoe uianduya nuiwuta shilya shilya. 2 Na soe luichi kye ianduyo lyiwukyie ko Ruwa nyi lya sungusinyi ko iwo wekyewuta isho. 3 Iyoe mndu, okyeanduya walya wekyeṟunda isho na iwuta isho isho kumonyi, nokusaṟa nochiiṙima iṙicha ianduyo lyiwukyie ko Ruwa? 4 Ang'u nuimina wucha wokye wufoi na wusimiri wokye na ikarishia lyakye, ulamanye kye wucha wo Ruwa wukukuruo uiṙime iṙumbuya wunyamaṟi? 5 Indi kyipfa kya wuumu wopfo, na kui mrima opfo ulawoṙe iṙumbuya wunyamaṟi, nuiengeṟa nyashi ya Ruwa kopfo mfiri ulya o nyashi ya Ruwa na iloṟo lya chandu Ruwa ekyeanduya kulawoṙe ikundia. 6 Echitaa orio mndu iṙuana na mawuto gakye. 7 Walya kui wusimiri kyiiṙi kya iwuta mecha waipfula mng'ano na kyiṟumi na ikaa ho mlungana, wechienengo moo o mlungana. 8 Na walya wawoṙe wuṟiingyi, walekyeindia wuloi, indi wakaiṙikyiana na mbaka, wewona nyashi na isuo lying'anyi; 9 matuuro na wukyiwa wuye ya orio mndu ekyewuta mawicho, Myuda kuwooka na Mkyiṟikyi taa. 10 Indi mng'ano na kyiṟumi na ufoṟo ko orio mndu ekyewuta shicha, Myuda kuwooka na Mkyiṟikyi taa; 11 kyipfa kuwoṙe ikundia ko Ruwa-pfo. 12 Kyipfa iwo woose walenyamaṟa kulawoṙe mawawaso weṙeka kulawoṙe mawawaso, na woose walemyamaṟa waichi mawawaso, weanduyo kui mawawaso. 13 Kyipfa chi woose wekyeicho mawawaso wai wasumganyi mbele ya Ruwa-pfo, indi nyi walya wekyewuta kyilya mawawaso gakundi wechitalyio wusumganyi. 14 Kyipfa ilyi wandu wa Masanga walawoṙe mawawaso wekyewuta kui mkaṟo yawo shilya shikyeri uwawasonyi, walawoṙe mawawaso wakuenenga mawawaso wawenyi. 15 Iwo wailoṟa iṟunda lya uwawaso luluṟeie mrimenyi kowo na kyilya kyikyeri mrimenyi kowo kyechiwaṟingyishia, na makusaṟo gawo gawenyi gechiloṟa kye wawawicho ang'u wawawicho-pfo, 16 mfiri ulya Ruwa echianduya makusaṟo ga kyiṟika ga wandu, iṙuana na Ndumi-i Ngyicha ya Kristo Yesu ngyilemuongoya. 17 Kyaindi iyoe, kokooya nuilago Myuda na ikusuria uwawaso, na ikushela kyiiṙi kya Ruwa, 18 na imanya kyilya akundi, na iiṙikyia mbonyi ngyicha, na iyoe numloshe mawawasonyi, 19 na imanya loi kye iyoe kumonyi nyi msongoru o shipfupfuṟe, ngyeela ya iwo wakyeri meemenyi, 20 mlosha o matondo, na wana wanangu, awoṙe wuṟango na wuloi uwawasonyi; 21 kyasia iyoe uilosha ungyi, okulosha kumonyi-pfoe? Iyoe uionguo kye mndu alaiwe, nuiiwa kumonyi? 22 Iyoe ugamba mndu alaṟuguye ang'u alaṟuguyo, nuiṟuguya ang'u iṟuguyo kumonyi? Iyoe nusuuye mafano ga waruwa na kunu nuikugaluo mnjama kui iiwa mahekalunyi ga waruwa? 23 Iyoe okyekushelyia mawawaso, nokyefunjia Ruwa kyiṟumi kyakye kui ifunja uwawaso? 24 Kyipfa rina lya Ruwa lyilahio wandunyi walaiṙikyie Ruwa kyipfa kyanyu, chandu kyikyiṟeie. 25 Kyipfa iṙino lyiwoṙe kyiira kokooya ui mndu okyewuta kyilya mawawaso gakundi. Kyaindi kowa mofunja mawawaso iṙino lyapfo lyawa cha ilyi ulamṙine. 26 Kyasia kokooya icho alamṙine nekyeosha shilya uwawaso luwawasie, ngyesa iṙa iṙino lyakye lyechitalo cha nyi iṙino-pfoe? 27 Na icho alamṙine wookyia kuwooka, ekyeosha kyilya uwawaso lukundi, echikuanduya iyoe umṙine, konyamaṟa uwawaso-pfoe? 28 Kyipfa oe chi Myuda ai Myuda kyanja tupu-pfo, maa iṙino chi lyilya lya kyanja tupu mmbiunyi-pfo. 29 Indi oe nyi Myuda ai Myuda o mrimenyi; na iṙino nyi lya mrima, Mumuyonyi o Ruwa, chi shiṟeionyi-pfo. Uwawaso-lo kyiṟumi kyalo kyilekyewuka ko wandu indi ko Ruwa.
1 Kyasia Myuda nawoṙe-kyi kya ngoseṟa? Na iṙino lyiwoṙe kyiiṙa kyiha? 2 Lyiwoṙe kyiiṙa ngoseṟa ko njia tsoose. Kya kuwooka nyi kyipfa wawaenengye ulogo lo Ruwa. 3 Nyi kyikyi-ng'u, kokooya wandu waata walaleiṙikyia? Aa ilega iiṙikyia lyawo lyechiilacha shilya Ruwa ateṟie? 4 Maa ale; kundu Ruwa nawono nyi o loi, na orio mndu nyi o wongo; chandu kyikyiṟeie, “Kundu umanyikye kye nuwoṙe wusumganyi maṙeṙonyi gapfo, undewinga kyiyeri kya ianduyo.” 5 Kyaindi kokooya wuwicho woṙu wuṟingyishia wusumganyi wo Ruwa, lugambe kyikyi? Ruwa nyi mmbicho aiende nyashi? (Ngyigamba kui mbaṟe ya kyimndu.) 6 Ote! Kyipfa iho Ruwa neiṙima kuṙa ianduya wuyana? 7 Kyaindi kokooya loi ya Ruwa yaengyeṟa iṟingyishia mng'ano okye kyipfa kya iṙeṙa wongo lyako, ny' kyilyi inyi ngyiengyeṟa ianduyo kye ngyimnyamaṟi? 8 Kyitewe ny' kyi lulagambe (chandu luleirio, na chandu wengyi waigamba na pfinya kye kyi wuṙo luigamba), luwute shiwicho kundu kuche mecha? Ruwa nechiwaolotsia ngapo chandu wawaṟi iwutio. 9 Kyasia ny' kyikyi-ng'u? Lukyeri wecha kuta wengyi? Ote! Maa ale. Cha kyipfa lomshitakyi Wayuda na Wakyiṟikyi kye wawachilyie nyi wunyamaṟi taa. 10 Chandu kyikyiṟeie kye, “Kuwoṙe msumganyi maa umwi-pfo. 11 Kuwoṙe aichi-pfo, kuwoṙe aipfula Ruwa-pfo. 12 Woose waṙekyie, kuwoṙe aiwuta mecha-pfo, ote! Maa umwi. 13 Uṟoo lowo nyi kyilome kyilakyishikyie, kui ngyuulumi tsawo walewika ngyeṟo wekyeṙeṙa shindo shikyeri cha uṟoi lo njoka. 14 Maṙumbu gawo gaichuo seso ngyiwicho. 15 Maṙende gawo gaipfuṟukana iwaaga wandu. 16 Wunyamaṟi na ikapa kawi shikyeri njienyi tsawo. 17 Maa njia ya ufoṟo waleimanya-pfo. 18 Maa wakuloshie iowuo na ikunda Ruwa-pfo.” 19 Kyasia luichi kye mbonyi tsoose uwawaso lugambie ko walya wawachilyie nyi uwawaso, kundu orio mndu nawio natsie, na wuyana woose wuchilyio nyi ianduyo lya Ruwa. 20 Kyipfa kuwoṙe mndu oose echitalo kye namsumganyi mbele yakye kui iwuta shilya mawawaso gakundi-pfo, kyipfa mawawaso gekyeenenga mndu imanya wunyamaṟi. 21 Kyaindi wulalu, wusumganyi wo Ruwa womanyika kulawoṙe mawawaso. Wuṟingyishio kui uwawaso na malosho ga weonguo shisuku. 22 Nyi wusumganyi wo Ruwa wukyeri kui njia ya iiṙikyia kyiiṙi kya Yesu Kristo ko woose waiṙikyie. Kyipfa kuwoṙe kya mbaṟe ingyi-pfo. 23 Kyipfa woose wawutie sha wunyamaṟi na mng'ano o Ruwa otitia kowo. 24 Waitalyio wusumganyi walaitaa kyindo kui isaṟia lyakye, kui njia ya wukyiṟo wukyeri kyiiṙi kya Kristo Yesu. 25 Ichu Ruwa amwummbikye nawe kyisanza kui njia ya iiṙikyia samunyi yakye, kundu naloṟe wusumganyi wokye, kyipfa kya ilekyia wusimirinyi wo Ruwa maṙeko goose galesonguo iwuto. 26 Naiṙime iloṟa wusumganyi wokye kyiyeri-kyi, kundu nawe msumganyi na momtalyia wusumganyi icho aiṙikyie Yesu. 27 Kyasia ikushela nyi kwi lyikyeri-ng'u? Lyashingyio nja. Kui iwawaso lya mbaṟe iha? Kui iwawaso lya mawuto? Ote! Indi kui iwawaso lya iiṙikyia. 28 Kyasia, luwonyi kye mndu nekyetalyio wusumganyi kui iiṙikyia kulawoṙe iwuta shilya mawawaso gakundi. 29 Aa ngyesa Ruwa nyi Ruwa o Wayuda tupu? Chi Ruwa o wandu walakyeri Wayuda taa-pfoe? Yee, nyi Ruwa o walakyeri Wayuda taa. 30 Kokooya loi Ruwa nyi umwi, echitalyia wusumganyi walya wawaṙine iiṙikyienyi, na walya walawaṙine nechiwatalyia wusumganyi kui njia ya iiṙikyia-lyo ilyo. 31 Kyasia, ngyesa luilacha mawawaso kui iiṙikyia-lyo? Ote! Cha kyipfa luindia mawawaso chandu gawaṟi iindio.
1 Kyasia, lugambe luṙa mbonyi tsa Abrahamu, awu oṙu? 2 Kyipfa kokooya Abrahamu naletalyio wusumganyi kyipfa kya mawuto gakye, nawoṙe kyekushelyia; indi chi mbele ya Ruwa-pfo. 3 Kyipfa shiṟeio shagamba-kyi? Abrahamu naleiṙikyia Ruwa, kyikatalyio kokye kye nyi wusumganyi. 4 Kyaindi ko mndu aiṟunda, wori wokye wokyetalo nyi isaṟia-pfo, indi kye nyi sile. 5 Kyaindi ko mndu alaiṟunda, indi kaiṙikyia ulya aimtalyia wusumganyi mndu alakundi na iowuo Ruwa, iiṙikyia lya mndu-cho lyatalo kye nyi wusumganyi. 6 Chandu Dawidi alegamba agusu mndu ulya Ruwa amtalyia kye namsumganyi kulawoṙe mawuto, 7 “Agusu wawahooṟie maṙeko gawo na ngyuunyamaṟi tsawo tsilatsisende nyi Ruwa. 8 Agusu mndu ulya Mndumii alaimtalyia ngyuunyamaṟi.” 9 Kyasia ngyesa sia-yo nyi ko iwo wawaṙine, ang'u nyi ko iwo walawaṙine taa? Kyipfa luigamba kye ko Abrahamu iiṙikyia lyakye lyiletalo kye nyi wusumganyi. 10 Ngyesa naletalyio kuṙa-ng'u? Nyi kyiyeri amṙino ang'u alandeṙino? Chi numa ya iṙino-pfo, indi alandeṙino. 11 Na oe naleambilyia kyindo-kyi kyeloṟa kye namṙine, iṟingyishia lya wusumganyi wulya wo iiṙikyia awelyiwoṙe alandeṙino. Naiṙime iwa awu o woose waiṙikyie, maa chandu walawaṙine, kundu nawo wawetalyio wusumganyi taa. 12 Lyingyi-se nawe awu o wandu waṙine, na chi ko iwo waṙine tikyi-pfo, indi walya wekyeosha ndifo tsa mwiṙikyie o awu oṙu, Abrahamu, awewoṙe wookyia kyiyeri alandeṙino. 13 Kyipfa kyaasa kyilya kye nechiwa mokyioṟa o wuyana Abrahamu na kyishari kyakye waleenengo chi kui mawawaso-pfo indi kui wusumganyi waletalyio kui iiṙikyia. 14 Kyipfa kokooya walya wa mawawaso nyiwo weoṟa, iiṙikyia lyawa wulya, na kyaasa kyailachika. 15 Kyipfa mawawaso nyigo gekyeende nyashi, cha kyipfa kulawoṙe mawawaso kuwoṙe ṙeko-pfo. 16 Koikyo kyaasa kyiwukyie iiṙikyienyi, kyiwe kui njia ya isaṟia, kundu kyaasa kyilya kyilalolome ko shishari shoose. Chi ko walya wa uwawaso tikyi-pfo, indi na ko walya wai wa iiṙikyia lya Abrahamu; akyeri awu oṙu soe loose; 17 (chandu kyikyiṟeie, “Ngyilekuwika uwe awu o Masanga gafoi;”) mbele ya Ruwa ulya alemwiṙikyia, moenenga wapfu moo, ekyeloṟa maa shindo shilakyeri pfo. 18 Na oe naleiṙikyia echiweṙelyia kyindo kyilechiiṙima iweṙelyio, kundu naiṙime iwa awu o masanga gafoi, chandu kyiwekyiṙeṙe kye, “Nyi wuṙo kyechiwa kyishari kyapfo.” 19 Oe alawemfofo iiṙikyienyi, nalekusaṟa kya mmbiu okye ulekoompfa (ammbaṙe cha maka igana), na Sara awewoṙe wuiṙimi wo waṙa mana-pfo. 20 Kyaindi awonyi kyaasa kya Ruwa alekapa kawi kui iṙa iiṙikyia-pfo, indi naleenengo pfinya kui iiṙikyia, echiṟumisha Ruwa. 21 Echimanya kye loi Ruwa neiṙima iṟunda shilya aweteṟie. 22 Koikyo kyikatalyio kokye kye nyi wusumganyi. 23 Kyaindi kyikyiṟeie kye nyi Abrahamu tupu aletalyio wusumganyi-pfo; 24 indi na kyipfa kyaṙu soe lochitalyio kuṙo taa, soe luiṙikyie icho aleṟutsa Yesu Mndumii oṙu ko wapfu. 25 Ulya alewuto kyipfa kya maṙeko gaṙu, na iṟutso kundu luiṙime italyio wusumganyi.
1 Kyasia lukomtalyio wusumganyi uwukyie iiṙikyienyi luwaṙe ufoṟo na Ruwa, kui njia ya Mndumii oṙu Yesu Kristo. 2 Ulya kui oe lulewona kui njia ya iiṙikyia ikooya isaṟia-lyi lugoṟokyi kyiiṙi kyalyo; na ichihiyo ikusurienyi lya mng'ano o Ruwa. 3 Maa chi wuṙo tikyi-pfo, indi luchihiyo taa ngyuukyiwenyi; luichi kye wukyiwa, iṟunda lyakye nyi iende wusimiri. 4 Na iṟunda lya wusimiri nyi ikarisho lya mrima. Na iṟunda lya ikarisho lya mrima nyi ikusuria. 5 Na ikusuria lyekyeende sonu-pfo; cha kyipfa ikunda lya Ruwa lyamletsio mrimenyi koṙu kui Mumuyo Mweele luleenengo soe. 6 Cha kyipfa kyiyeri kyilya lulawewoṙe pfinya, ilyi kyiyeri kyileafukyia, Kristo nalepfa kyipfa kya wanyamaṟi. 7 Cha kyipfa nyi kyindo kyuumu; mndu ipfa kyipfa kya mndu msumganyi. Kyaindi kyeiṙimika mndu ikaria ipfa kyipfa kya mndu awoṙe mawuto mecha. 8 Indi Ruwa naloṟa ikunda lyakye oe amonyi koṙu soe, kyipfa Kristo nalepfa kyipfa kyaṙu, kyiyeri luwei wanyamaṟi. 9 Kyasia ngoseṟa mnu lukomtalyio wusumganyi samunyi yakye, nelushingyia lulaolokyio nyi nyashi ya Ruwa. 10 Cha kyipfa kokooya kyiyeri luwewoṙe kyituwa na Ruwa lulesanzo kui upfu lo Mono-kye; ngoseṟa mnu lukomsanzo lochikyiṟo kui moo okye. 11 Maa chi wuṙo tikyi-pfo, indi na ichihiyo kyiiṙi kya Ruwa kui Mndumii oṙu Yesu Kristo, ulya kui oe wulalu loambilyia isanzo-lyo. 12 Koikyo, kokooya kui mndu umwi wunyamaṟi wulecha na wuyanenyi, na kyipfa kya wunyamaṟi-wo kukocha upfu; na kuṙo upfu lukoshika ko wandu woose kyipfa woose walewuta wunyamaṟi. 13 Kyipfa kyiyeri mawawaso galawendewiko wunyamaṟi wuwekyeri wuyanenyi, indi wunyamaṟi wokyetalo kulawoṙe mawawaso-pfo. 14 Kyaindi upfu lulechilyia wookyia Adamu mṟasa Mose, nalo lulechilyia maa iwo walawekyewuta wunyamaṟi wufananyi na ṙeko lya Adamu, akyeri mfano okye oe echicha. 15 Kyaindi kyisumbo kyilya kyiwekyeri cha ṙeko lyilya-pfo. Cha kyipfa kokooya kyipfa kya iṙeko lya ulya umwi wafoi walepfa, ngoseṟa mnu isaṟia lya Ruwa na kyienengo kyikyeri isaṟienyi lyakye mndu umwi Yesu Kristo kyileengyeṟika kyipfa kya walya wafoi. 16 Maa chandu mndu ulya umwi alewuta wunyamaṟi chi kyimwi na kyienengo kyilya-pfo. Cha kyipfa ianduyo lyilecha kui njia ya mndu umwi lyikaende ngapo; indi kyisumbo kya isaṟia kyilecha kyipfa kya maṙeko gafoi, kyikaende italyio wusumganyi. 17 Kyipfa kokooya kui iṙeko lya mndu umwi upfu lulechilyia kyipfa kya ulya umwi, ngoseṟa mnu iwo wekyeambilyia isaṟia lyifoi, na kyienengo kyilya kya wusumganyi, wechichilyia moonyi kui ulya umwi, Yesu Kristo. 18 Kyasia-ng'u, kokooya kui ṙeko lyimwi wandu woose waleanduyo ngapo, na wuṙo kui iṟunda lyimwi lya wusumganyi wandu woose waletalyio wusumganyi wuwoṙe moo. 19 Kyipfa kokooya kui inyamaṟa lya mndu umwi wandu wafoi walewiko wandunyi wawoṙe wunyamaṟi, na wuṙo kui iindia lya mndu umwi wandu wafoi wechisanzio kyiiṙi kya wawoṙe wusumganyi. 20 Indi mawawaso galecha kundu ṙeko lyilya lying'ane mnu. Na kyiyeri wunyamaṟi wuleengyeṟika, isaṟia lyiwefoi ngoseṟa; 21 kundu kye chandu wunyamaṟi wulechilyia upfunyi, na wuṙo kui njia ya wusumganyi isaṟia lyichilyie mṟasa moo o mlungana kui Yesu Kristo Mndumii oṙu.
1 Kyasia lugambe kyikyi-ng'u? Lukae wunyamaṟinyi kundu isaṟia lyiengyeṟe ifo? 2 Maa ale! Soe lulawoṙe-se moo o wuta sha wunyamaṟi lochikaa-se luṙa wunyamaṟinyi? 3 Muichi kye soe loose lulepatiso kyiiṙi kya Kristo Yesu lulepatiso upfunyi lokye? 4 Kyasia luleṟiko hamwi na oe kui njia ya wupatiso upfunyi lokye, kundu luwaṙe moo ngyihya nakamwi chandu Awu aleṟutsa Kristo iwuka upfunyi kui pfinya yakye ing'anyi. 5 Cha kyipfa chandu lulelungana na oe mfanonyi o upfu lokye na wuṙo lowelungana na oe mfanonyi o iṟuka lyakye. 6 Luichi mbonyi-tsi kye, mkaṟo oṙu o kacha ulekapio msalabenyi hamwi na oe, kundu mmbiu o wunyamaṟi uilachikye lulachilyio-se nyi wunyamaṟi. 7 Kyipfa oe alepfa naletalyio wusumganyi kuleshi na wunyamaṟi. 8 Kyaindi lui kye lulepfa hamwi na Kristo, luiṙikyie kye lochiwaṙa moo hamwi na oe; 9 luichi kye Kristo kamṟuka ko wapfu epfa-se-pfo, maa upfu lomchilyia-se-pfo. 10 Kyipfa kui ipfa lyakye, wunyamaṟi woiṙima-se imchilyia-pfo; indi kulya oe iwaṙa moo, nawaṙa moo ko Ruwa. 11 Na wuṙo maa nyoe kutalenyi kye muwapfu ko mbonyi tsa wunyamaṟi, na wai na moo ko Ruwa kyiiṙi kya Kristo Yesu. 12 Kyasia, wunyamaṟi wulachilyie mmbiunyi yanyu yekyepfa mṟasa mukoosha lango tsayo. 13 Maa mulaengyeṟe iwuta shiwungo shanyu shiwe shisha sha mbaka ko wunyamaṟi. Indi kuwutenyi muwenyi ko Ruwa cha wai na moo numa ya ipfa, na shiwungo shanyu ko Ruwa iwa shisha sha wusumganyi. 14 Kyipfa wunyamaṟi wochimuchilyia nyoe-pfo, cha kyipfa muwachilyie nyi mawawaso-pfo, indi muwachilyie nyi isaṟia. 15 Kyasia ny'kyikyi-ngu? Luwute wunyamaṟi kyipfa lulawachilyie nyi mawawaso indi isaṟia? Ote! 16 Muichi kye icho muiwuta mrima yanyu kokye iwa waṟundi wakye kyiiṙi kya imwindia, mowa waṟundi wakye ulya muimwindia, kokooya nyi wuṟundi wo wunyamaṟi wokyeende upfu, ang'u kokooya nyi wuṟundi wo wuindi wokyeende wusumganyi. 17 Kyaindi Ruwa naano, cha kyipfa muwewachilyie nyi wunyamaṟi, indi muleindia kui mrima yanyu mbaṟe iya ya wuṟango wulewiko wumchilyie. 18 Na mommbiko kuleshi na wunyamaṟi, mukochilyio nyi wusumganyi. 19 Ngyiṙeṙa kui mbaṟe ya kyimndu kyipfa kya wufofo wo mmbiu yanyu. Cha kyipfa chandu mulewuta shiwungo shanyu shiṟunde mbonyi tsa ukoe na wunyamaṟi muiṙime iwuta wunyamaṟi, na wuṙo-ng'u wulalu wutenyi shiwungo shanyu shiṟunde sha wusumganyi muiṙime iyeṟemtso. 20 Kyipfa kyiyeri muwewachilyie nyi wunyamaṟi, muwekyeri kuleshi na wusumganyi. 21 Kyasia nyi kyiira kyiha-ng'u mulewona mfiri iya ko shindo-sho shimuriisa sonu wulalu? Kyipfa mafurumionyi ga shindo-sho nyi upfu. 22 Kyaindi wulalu mukomlekyio, na iwa kuleshi na wunyamaṟi, na iwa waṟundi wa Ruwa, muwoṙe kyiira kyanyu, nyikyo iilyisho, na mafurumionyi gakyo nyi moo o mlungana. 23 Kyipfa wori wo wunyamaṟi nyi upfu, indi kyisumbo kya Ruwa nyi moo o mlungana kyiiṙi kya Kristo Yesu Mndumii oṙu.
1 Wana wa wama wako, muichi (kyipfa ngyiṙeṙa na iwo waichi mawawaso), kye mawawaso gekyechilyia mndu ilyi akyeri na moo? 2 Kyipfa mndu mka awoṙe mii nampfungye nyi mawawaso ko ulya amwalyikyie kyiyeri akyeri na moo. Indi kapfa ulya amwalyikyie, nalekyio iwuka iwawasonyi lya wolyi. 3 Kyasia kyiyeri mii okye akyeri na moo, kokooya mka-chu awaṙa mii ungyi nekyelago mṟui. Indi mii okye kapfa, nalekyio, eshingyio-se nyi iwawaso lyilya-pfo, na oe chi mṟui-se-pfo, maa kaalyiko nyi mii ungyi. 4 Na wuṙo, wana wa wama wako, nyoe taa muwoṙe-se moo o osha uwawaso-pfo, kyipfa mukyeri kyoonyi kya mmbiu o Kristo, muiṙime iwa masaa ga ungyi, ulya aleṟuka ko wapfu, kundu soe lukumbie ndunda ko Ruwa. 5 Kyipfa kyiyeri luwekyeri na mbaṟe ya mmbiu, lango tsa wunyamaṟi tsiwekyeri pfo kyipfa kya uwawaso, tsileṟunda mmbiunyi yaṙu lukopfa. 6 Indi wulalu lolekyio iwuka uwawasonyi, luwoṙe-se moo o osha wunyamaṟi wulya wuleluchilyia-pfo, kundu soe luiṙime iṟunda mbaṟenyi ngyihya ya Mumuyo o Ruwa, chi mbaṟenyi ya kacha ya kyiṟeio-pfo. 7 Kyasia lugambe kyikyi-ng'u? Uwawaso nyi wunyamaṟi? Ote! Indi ngyiweiṙima imanya wunyamaṟi sile nyi kui mawawaso-pfo; cha kyipfa kokooya uwawaso lulalegamba “Ulalangye” gyiwechimanya ilanga-pfo. 8 Kyaindi wunyamaṟi wulewona ṙaawa ko iwawaso lyilya, wukowuta mrimenyi koko orio mbaṟe ya ilanga. Kyipfa wunyamaṟi kulawoṙe mawawaso upfiie. 9 Na inyi ngyiwekyeri na moo ipfo mawookyionyi kulawoṙe mawawaso, indi kyiyeri iwawaso lyilya lyilecha, wunyamaṟi wulewaṙa pfinya na inyi ngapfa. 10 Ngawona iwawaso lyilya lyekyeende moo kye koko inyi lyileende upfu. 11 Kyipfa wunyamaṟi, kui iwona ṙaawa ko iwawaso lyilya, wulengyilemba, koikyo wukongyiwaaga. 12 Kyasia uwawaso lungyiele. Na iwawaso lyilya lyilyiele, na lya wusumganyi, na lyilyicha. 13 Kyasia-ng'u ngyesa, lyilya lyikyeri lyicha lyiwekyeri upfu koko inyi? Ote! Indi wunyamaṟi, kundu wuwono kye nyi wunyamaṟi loi, wulengyiwaaga kui iwawaso lyilya lyicha, kundu kui iwawaso lyilya wunyamaṟi wuengyeṟe iwiha mnu. 14 Cha kyipfa luichi kye uwawaso mawookyionyi galo nyi mrimenyi; indi inyi nyi mndu o mmbiunyi, ngyimchilyie nyi wunyamaṟi. 15 Kyipfa ngyiichi kyindo ngyiwuta-pfo; cha kyipfa kyilya ngyikundi, ngyikyiwuta-pfo; indi kyilya ngyikyisuuye nyikyo ngyekyewuta. 16 Kyaindi kokooya ngawuta kyilya ngyilakyikundi, ngaiṙikyia kye iwawaso lyilya lyilyicha. 17 Kyasia wulalu chi inyi mrimenyi koko ngyiwuta ikyo-pfo, indi nyi wunyamaṟi wulya wukyeri mrimenyi koko. 18 Cha kyipfa ngyiichi kye mrimenyi koko, lugambe mmbiunyi oko, kokyekaa kyindo kyicha-pfo cha kyipfa ikunda ngyikundi, indi iwuta kyindo kyicha ngiiṙima-pfo. 19 Cha kyipfa kyilya kyicha ngyikyikundi ngyikyiwuta-pfo; indi kyilya kyiwicho ngyilakyikundi nyikyo ngyekyewuta. 20 Kyasia kokooya kyilya ngyilakyikundi nyikyo ngyikyiwuta, chi inyi mrimenyi koko ngyikyiwuta-pfo, indi nyi wunyamaṟi wulya wukyeri mrimenyi koko. 21 Kyasia ngawona iwawaso-lyi, kye koko inyi ngyikundi iwuta kyindo kyicha, kuwoṙe lyilyiwicho. 22 Cha kyipfa mrimenyi koko ngyimchihiye kyipfa kya iwawaso lya Ruwa. 23 Kyaindi shiwungonyi shako, ngyiwonyi iwawaso lyikyeri kuleshi, lyikapana shiṙa na iwawaso lyilya lya wuṟango woko, na ingyiwaṙa ko pfinya kui iwawaso lyilya lya wunyamaṟi lyikyeri shiwungonyi shako. 24 Ochia loko, mkyiwa inyi, nyi wui echingyiletsa na mmbiu-chu o upfu? 25 Ngyiana Ruwa, kui Yesu Kristo Mndumii oṙu. Kyasia, kokooya nyi wuṙo, inyi ngyimonyi kui wuṟango woko ngyiṟundia iwawaso lya Ruwa, indi kui mmbiu oko iwawaso lya wunyamaṟi.
1 Kyasia-ng'u, wulalu, kuwoṙe ianduyo lya ngapo ko iwo wakyeri kyiiṙi kya Kristo Yesu-pfo. 2 Cha kyipfa iwawaso lya Mumuyo o moo ulya ukyeri kyiiṙi kya Kristo Yesu lyilengyilekyia, kuleshi na iwawaso lya wunyamaṟi na upfu. 3 Kyipfa shilya shilekyeiṙimika kui iwawaso, kyipfa kya ilyi lyiwewoṙe wufofo kyipfa kya mmbiu, Ruwa kui iṙuma Mana okye amonyi kui mbaṟe ya mmbiu ui o wunyamaṟi, na kyipfa kya wunyamaṟi, naleanduya wunyamaṟi mmbiunyi. 4 Kundu shilya shishigambe mawawasonyi, shiafutsio mrimenyi koṙu soe, lulekyekaa kui iosha mbonyi tsa mmbiu, indi mbonyi tsa mrima. 5 Cha kyipfa walya wekyeosha mmbiu wekyekusaṟa mbonyi tsa mmbiu; indi walya wekyeosha mrima wekyekusaṟa mbonyi tsa mrima. 6 Cha kyipfa kyindo mmbiu ukundi nyi upfu; indi kyindo mrima ukundi nyi moo na ufoṟo. 7 Cha kyipfa kyilya mmbiu ukundi nyi kyituwa ko Ruwa, kyipfa kyekyeindia iwawaso lya Ruwa-pfo, maa kyeiṙima ilyiindia-pfo. 8 Walya wekyeosha mmbiu wechiiṙima ichihiṟa Ruwa-pfo. 9 Kyaindi kokooya Mumuyo o Ruwa nakyeri mrimenyi konyu, nyoe muiosha mmbiu-pfo; indi muiosha Mumuyo. Kyaindi kokooya mndu oose alawoṙe Mumuyo o Kristo, icho chi okye-pfo. 10 Na Kristo akyeri mrimenyi konyu, mmbiu yanyu iwoṙe-se moo o osha wunyamaṟi-pfo; indi mrima yanyu ikyeri na moo kyipfa kya wusumganyi. 11 Kyaindi kokooya Mumuyo okye ulya aleṟutsa Yesu ko wapfu nakyeri mrimenyi konyu, ulya aleṟutsa Kristo Yesu ko wapfu naiṟutsa na mmbiu yanyu ikyeri mbaṟenyi ya ipfa, kui Mumuyo okye akyeri mrimenyi konyu. 12 Kyasia, kokooya nyi wuṙo, wana wa wama, lui wasile, chi wa mmbiu lukae na moo kui iosha mbonyi tsa mmbiu-pfo. 13 Kyipfa kokooya mokaa na moo kui iosha mbonyi tsa mmbiu, mukundi ipfa; indi kokooya mowaaga mawuto ga mmbiu kui Mumuyo, mokaa na moo. 14 Cha kyipfa woose wekyesongoyo nyi Mumuyo o Ruwa, iwo nyiwo wana wa Ruwa. 15 Cha kyipfa Mumuyo ulya Ruwa amuenengyie omugaluo nyoe watumo na imuenenga wuowu-pfo; indi muleambilyia Mumuyo o imugaluo wana, na kui Mumuyo-cho luilaga Papa, nyi kyimwi na igamba Awu. 16 Mumuyo oe amonyi nekyeṟingyishia hamwi na mrima yaṙu, kye soe nyi wana wa Ruwa. 17 Na kokooya soe nyi wana, kyasia, soe nyi weoṟa mboṟa tsa Ruwa, wekyeoṟa hamwi na Kristo. Yee, lochituuro hamwi na oe kundu luweiṙima ing'anyiso hamwi na oe. 18 Cha kyipfa ngyitala matuuro ga kyiyeri-kyi kya wulalu kye chi kyindo cha mng'ano ulya ochiloṟo koṙu-pfo. 19 Cha kyipfa shigumbe shoose shiweṙelyia kui sia ing'anyi iloṟo lya wana wa Ruwa. 20 Cha kyipfa shigumbe shoose shilewiko wanda ya kyindo kyilawoṙe kyiira; chi kui ikunda lyasho-pfo, indi kyipfa kyakye oe aleshiwika kyiiṙi kya ikusuria. 21 Kyipfa shigumbe-sho shimonyi nasho shechiwiko handu halawoṙe ichilyio na iwuto wutumonyi wo inyamaṟika, mṟasa shiiṙe handunyi halawoṙe ichilyio ha mng'ano o wana wa Ruwa. 22 Cha kyipfa luichi kye shigumbe shoose taa shiwawio handu hamwi, nasho shiwoṙe fowa cha ya mndu mka aienengo mana handu hamwi maa wulalu. 23 Maa chi wuṙo tikyi-pfo, indi maa soe luwenyi luwoṙe shindo shikyeri ndunda tsa kuwooka tsa Mumuyo, soe taa luiwawio mrimenyi koṙu, lochiweṙelyia iwa wana, nyi kyimwi na wukyiṟo wo mmbiu yaṙu. 24 Cha kyipfa lulekyiṟo kui kyindo kyiweṙelyio, kyilawonio. Indi kyindo kyiweiweṙelyio kyikammboneka, kuwoṙe-se iweṙelyia-pfo. Cha kyipfa nyi wui ekyeweṙelyia kyilya akyiwonyi? 25 Indi lukoweṙelyia kyindo lulakyiwonyi, lokyiweṙelyia kui wusimiri. 26 Na wuṙo Mumuyo na oe nekyelutarama wufofo woṙu, kyipfa luichi iterewa chandu kyiluwaṟi-pfo; indi Mumuyo amonyi nekyeluterewia kui isumkyia lyilechiiṙima isendo. 27 Na oe ai moruwa-ruwa mrima, naichi kyilya Mumuyo akundi cha kyipfa nekyeterewia wandu wa Ruwa chandu Ruwa akundi. 28 Na soe luichi kye shindonyi shoose Ruwa nekyeṟunda hamwi na walya wamkundi kyiiṙi kya iwanenga mecha, kyimwi na igamba soe luwalage chandu Ruwa akundi. 29 Kyipfa walya awewaichi wookyia mawookyionyi, nalewasambuṟa wookyia mawookyionyi wafananyisho na mfano o Mono-kye, kundu oe nawe mmbele o wana wa wama wafoi. 30 Na walya alewasambuṟa wookyia mawookyionyi, iwo kawalaga; na walya alewalaga, iwo kawatalyia wusumganyi; na walya alewatalyia wusumganyi, iwo kawang'anyisa. 31 Kyasia lugambe kyi kyipfa kya isho? Ruwa akyeri ura loṙu, nyi wui eiṙima iluwutia kyindo kyiwicho? 32 Ulya alalelekyia Mono-kye amonyi, indi kammbuta kyipfa kyaṙu soe loose nechilemo kuṙa iluenenga necha shindo shoose hamwi na oe? 33 Nyi wui echiṙuo mengyenyi wasambuṟe wa Ruwa? Ruwa nyi oe aiwatalyia wusumganyi. 34 Nyi wui eiṙima igamba kye nawaṟi iolotsio ngapo? Kristo Yesu nyi oe alepfa; yee, na ngoseṟa ya isho, naleṟuka ko wapfu, na oe naṙamie kuwoko ko kulyoe ko Ruwa. Ngoseṟa nyi oe ailuterewia. 35 Nyi wui echiluletsana na ikunda lya Kristo? Ngyesa nyi fowa, ang'u wukyiwa, ang'u kyiwi, ang'u njaa, ang'u iwuṟa nguo, ang'u ndenga, ang'u ushu? 36 Chandu kyikyiṟeie kye, “Kyipfa kyapfo luiwoogo kyingoto puti, luwatale cha moondo geshinja.” 37 Kyaindi kyiiṙi kya mbonyi-tso tsoose luiwinga, na ngoseṟa ya iwinga, kui ulya alelukunda! 38 Cha kyipfa ngammanya kui wuloi kye, maa upfu, maa moo, maa malaika, maa wawoṙe wuchilyi, maa shikyeri pfo, maa shilya shechiwa pfo, maa wawoṙe wuiṙimi, 39 maa shikyeri wuye, maa shikyeri wanda, maa kyindo kyingyi kyoose kyikyigumbe kyechiiṙima iluletsana na ikunda lya Ruwa lyikyeri kyiiṙi kya Kristo Yesu Mndumii oṙu-pfo.
1 Ngyiṙeṙa loi kyiiṙi kya Kristo, ngyiṙeṙa wongo-pfo, mrima oko ongyiṟingyishia Mumuyonyi Mweele, 2 kye ngyiwoṙo nyi fowa ing'anyi na mawawio galekyesia mrimenyi koko. 3 Kyipfa ngyiweiṙima iterewa inyi ngyimonyi iseso nyi Ruwa na iletsano na Kristo kyipfa kya wana wa wama wako, kyishari kyako kyimmbiu. 4 Iwo wakyeri Waisiraelyi wawoṙe kulya ilago nyi wana, na kyiṟumi kyilya; na shiteṟio, na ienengo uwawaso, na iindia na iterewa Ruwa, na shaasa shakye. 5 Iwo wakyeri wachuku wa waku, na kyiiṙi kya iwo kulewuka Kristo kui mbaṟe ya mmbiu. Nyi oe akyeri wuye ya shindo shoose, Ruwa, ekyeano shiyeri shoose. Amen. 6 Chi kye Ṙeṙo lya Ruwa lyailachika-pfo. Kyipfa wandu Ruwa asambuṟie chi Waisiraelyi tikyi-pfo. 7 Maa wailago wana kyipfa kya ilyi wakyeri wa ushari lo Abrahamu-pfo, indi, “Kyiiṙi kya Isakyi ushari lopfo lochilago.” 8 Kyimwi na igamba chi wana wa mmbiu wai wana wa Ruwa-pfo, indi wana wa kyaasa kyilya wekyetalo kye nyi wa ushari. 9 Cha kyipfa mbonyi tsa kyaasa nyi itsi: “Kyiyeri cha ikyi ngyechicha, na Sara nekoamwenengo mana.” 10 Maa chi wuṙo tikyi-pfo, indi Rebeka na oe, amwire mana kui mii umwi, na oe nyi Isakyi, awu oṙu, 11 (kyipfa walandefeo wana walya, maa walandewute kyindo kyicha ang'u kyiwicho, kundu kyindo Ruwa akundi kui isambuṟa kyigoṟokye, chi kyipfa kya mawuto-pfo, indi kyipfa kya kyilya ulya ailaga akundi), 12 nalewio kuṙi: “Ang'anyi nechiṟundia mtutu.” 13 Chandu kyikyiṟeie, “Ngakunda Yakobo, indi Esau ngamsuo.” 14 Kyasia lugambe kyikyi-ng'u? Kuwoṙe wuwicho ko Ruwa? Ote! 15 Kyipfa naiwia Mose, “Ngyehooṟia ulya ngemhooṟia; ngyesaṟia ulya ngyemsaria.” 16 Kyasia, kokooya nyi wuṙo, chi wuiṙiminyi wo ulya akundi, maa wo ulya aikapa mteeṟa-pfo; indi wo Ruwa ulya aihooṟia. 17 Kyipfa shiṟeio shagamba kya Farao kye, “Ngyilekugoṟotsa kyipfa kya ikyi, kundu ngyiloṟe pfinya tsako kopfo, rina lyako lyiongoyo urukyenyi koose.” 18 Kyasia, kokooya nyi wuṙo, akunda imhooṟia nekyemhooṟia, na akunda imwenenga mrima muumu nekyemgaluo muumu. 19 Kyasia, nongyiwia, “Ny'kyilyi Ruwa aiengyeṟa igamba kye luwoṙe tewe? Cha kyipfa nyi wui ekyewingana na kyilya oe akundi?” 20 Ote! Chi wuṙo-pfo, iyoe mndu. Iyoe nyi wui uigaluo Ruwa? Ngyesa kyindo kyigumbe kyiwie ulya alekyigumba, “Ny'kyilyi ongyigumba kuṙi?” 21 Ang'u moachikyia shinungu ngyesa achilyie teri, kui ṙombo lyimwi lya teri iachikyia kyindo kyimwi kyiwaṙe kyiṟumi na kyingyi kyilawoṙe kyiṟumi-pfoe? 22 Kyasia ny' kyikyi-ng'u, kokooya Ruwa kui ikunda iloṟa nyashi yakye, na iṟingyishia wuiṙimi wokye, kui ikarishia lying'anyi, naleṙuana na walya wawewaṟi inyamaṟo nyi nyashi ya Ruwa. 23 Lyingyi-se, kundu naṟingyishie wung'anyi wo kyiṟumi kyakye kui shindo shilya sha isaṟia, aleshiachikyia wookyia kacha shiwaṙe kyiṟumi. 24 Nyi soe-ng'u alelulaga. Chi wandu wai Wayuda tikyi-pfo, indi na wandu walai Wayuda taa. 25 Nyi chandu awegambie ipfo ko Hosea, “Ngyelaga wandu wako walya walakyeri wandu wako, na mkunde oko ulya alakyeri mkunde oko, 26 Lyingyi-se kyechiwa handu halya walewio, nyoe chi wandu wako-pfo, iho welago wana wa Ruwa ai na moo.” 27 Yesaya na oe naiṙeṙa kya Isiraelyi, echigamba, “Itala lya wana wa Isiraelyi, maa chandu lyikyeri cha mlelya o ipalyipalyi, nyi matsugaṟo gawo tikyi gechikyiṟo. 28 Kyipfa Mndumii kulawoṙe iṙetsa kyiyeri nechianduya wandu woose wa Wuyana, echimarisa na iṙumbuo.” 29 “Lyingyi-se chandu Yesaya alesonguo iṙeṙa, ‘Kokooya Mndumii o ngyuulyimalyi alaleluṙeeya ushari, luwewa cha Sodoma, luwechifananyisho na Gomora.’ ” 30 Kyasia lugambe kyikyi-ng'u? Kye wandu walaiṙikyie Ruwa, walekyeosha wusumganyi; walewona wusumganyi; kyaindi nyi wusumganyi wulya wukyeri wo iiṙikyia. 31 Indi Isiraelyi wechiosha iwawaso lya wusumganyi walewona iwawaso lyilya-pfo. 32 Kyipfa kya kyikyi? Kyipfa walelyiosha kui njia ya iiṙikyia-pfo, indi cha ilyi kye nyi kui njia ya mawuto. Wakakapa tuulyia halya igoenyi lyekyeenenga wandu ikapa ṙende, 33 chandu kyileṟeio, “Ngyiwika Sion igoe lyekyeenenga wandu ikapa ṙende na iṟaṟa lyekyeolotsa. Na orio echimwiṙikyia echirigo nyi sonu-pfo.”
1 Wana wa wama wako, kyindo ngyilangyie mnu mrimenyi koko, na kyiterewo kyako ko Ruwa, nyi kyipfa kyawo kundu wakyiṟo. 2 Cha kyipfa ngyiwaṟingyishia kye wawoṙe wuragari kyipfa kya Ruwa, indi chi kyiiṙi kya wuṟango-pfo. 3 Cha kyipfa, walaichi wusumganyi wo Ruwa, na wakundi iṟingyishia wusumganyi wowo wawenyi, walechilyio nyi wusumganyi wo Ruwa-pfo. 4 Cha kyipfa Kristo amche kuwoṙe-se kyimaṙuma kya uwawaso-pfo; kundu orio aiṙikyie natalyio wusumganyi. 5 Cha kyipfa Mose naleṟeia kui wusumganyi wuwukyie kui mawawaso, kye mndu ekyewuta isho nechiwaṙa moo kui isho. 6 Indi wusumganyi wulya wokyewono kui iiṙikyia wogamba kuṙi: “Maa ulagambe mrimenyi kopfo, nyi wui echiṙo iyenda Ruwewu?” (Nyi kyimwi na isotsa Kristo na wanda). 7 Ang'u, “Nyi wui echisoka iyenda ko waṟumu?” (Nyi kyimwi na iṙosia Kristo wuye, iwuka ko wapfu.) 8 Kyaindi wusumganyi wogamba kuṙa? Ṙeṙo lyilya lyikyeri kufuhi na iyoe, ṙumbunyi lyapfo, na mrimenyi opfo, nyi ṙeṙo lyilya lya iiṙikyia lokyelyionguo. 9 Cha kyipfa, koṟingyishia Yesu kui ṙumbu lyapfo kye nyi Mndumii, na iiṙikyia mrimenyi kopfo kye Ruwa nalemṟutsa ko wapfu, nochikyiṟo. 10 Cha kyipfa kui mrima mndu nekyeiṙikyia mṟasa kawona wusumganyi, na kui ṙumbu nekyeṟingyishia kawona wukyiṟo. 11 Cha kyipfa kyiṟeio kyagamba, “Orio momwiṙikyia echiwona sonu-pfo.” 12 Cha kyipfa kuwoṙe mbaṟe ingyi ko Myuda na Mkyiṟikyi-pfo, kyipfa oe nyi Mndumii o woose, awoṙe wunjama ko woose wekyemlaga; 13 kyipfa orio mndu echilaga rina lya Mndumii nechikyiṟo. 14 Kyasia wamlage kuṙa icho walamwiṙikyie? Lyingyi-se wamwiṙikyie kuṙa icho walandemwicho? Lyingyi-se wamwicho kuṙa icho kulawoṙe moonguo mbonyi? 15 Lyingyi-se weonguo mbonyi kuṙa walawaṙume? Chandu kyikyiṟeie, “Gamecha cha kyikyi maṙende ga iwo wekyeonguo mbonyi tsa mecha.” 16 Kyaindi chi woose waleindia mbonyi iya ngyicha-pfo, kyipfa Yesaya naigamba, “Mndumii, nyi wui aleiṙikyia mbonyi tsaṙu?” 17 Kyasia iiṙikyia lyekyecha kui kyilya mndu aiicho; na kyilya mndu aiicho kyekyecha kui ionguo Ṙeṙo lya Kristo. 18 Kyaindi ngyigamba, ngyesa wo waleicho-pfoe? Yee waleicho. “Ṟui lyawo lyileṙunganana wuyanenyi koose, na maṙeṙo gawo mṟasa matsitsionyi ga wuyana.” 19 Indi ngyigamba, ngyesa Waisiraelyi walemanya-pfoe? Kya kuwooka Mose naigamba, “Ngyewawika wunyenyi kui wandu walakyeri Isanga, kui isanga lyilaichi kyindo ngyewapfulutsa nyashi.” 20 Na Yesaya awoṙe wuṟango na wukari wung'anyi, naigamba, “Ngyilekooyo nyi iwo walekyengyipfula, ngyileṟingyishio ko iwo walaiwesa mbonyi tsako.” 21 Indi ko Isiraelyi naigamba, “Kyingoto puti ngyilewaleshia mawoko wandu walawoṙe wuindi na walekyeicho.”
1 Kyasia, ngyiwesa, ngyesa Ruwa naletsindikyia wandu wakye kuleshi? Ote! Kyipfa maa inyi nyi mndu o Isiraelyi, umwi o washari wa Abrahamu, mndu o mbaṟe ya Benyamen. 2 Ruwa aletsindikyia wandu wakye kuleshi awewaichi wookyia mawookyionyi-pfo. Ang'u muichi kyilya kyileṙeṙo nyi shiṟeio ko mbonyi tsa Elyiya-pfoe? Chandu aishitakyi Waisiraelyi mbele ya Ruwa. 3 “Mndumii, wawaaga weonguo shisuku wapfo, wanyamaṟa alyitaṟe tsapfo, na inyi ngaṙio ngyimonyi, nawo waingyipfula wangyiwaage.” 4 Indi Ruwa nalemgaluo kuṙa? “Ngyiwoṙe wandu shiku mfungaaṙe walekyepfiria ndi mbele ya Baalyi.” 5 Kyasia na wuṙo kyiyeri-kyi kya wulalu, kuwoṙe mtsugaṟo o wandu wasambuṟe kui isaṟia. 6 Kyaindi kokooya nyi kui isaṟia, kyewa-se kui mawuto-pfo, ang'u iho isaṟia lyiwechiwa-se isaṟia-pfo. 7 Kyasia kyawa kuṙa-ng'u? Kyindo kyilya Isiraelyi aweikyipfula alekyiwona-pfo, indi walya walesambuṟo walekyiwona, na wengyi waleming'a. 8 Chandu kyiwekyiṟeie, Ruwa nalewaenenga mrima mlemeri, mṟasa maa maṙwi galaicho, mṟasa inu. 9 Na Dawidi naigamba, “Shelya shawo shiwe mṙego o wawaṙa, waolokye na ianduyo 10 Meso gawo gawiko meema walaiṙime iwona moongo yawo ilemekye shiyeri shoose.” 11 Kyasia ngyiwesa, ngyesa walekapa ṙende mṟasa waolokye piu? Ote! Kyaindi kui ṙeko lyawo wukyiṟo wuleafukyia ko walya walaiṙikyie Ruwa, kundu wo wawenyi wawoṙo nyi wunyeng'i. 12 Kyasia, kokooya ṙeko lyawo lyawa nyi wunjama wo wuyana, na wufofo wowo wo kyimrima wuleende mboṟa ing'anyi ko wandu wa masanga wengyi, ngyesa kyechiwa ngoseṟa iafutsia lyawo-pfoe? 13 Kyaindi ngyiṙeṙa na nyoe, mui wandu walakyeri Wayuda. Kyasia, chandu ngyikyeri msu o wandu walakyeri Wayuda, ngyiṟumisha iṟunda lyako. 14 Kofia ngyeiṙima iwaenenga wunyenyi wandu wa samu yako ngyimonyi na ikyiṟa wandu waata. 15 Kyipfa kokooya iwiyitso lyawo lyileende kyisanza kya wuyana na Ruwa, ngyesa iiṙikyio lyawo lyechiwa-kyi sile nyi moo ko walya walempfa? 16 Lyingyi-se kokooya kyifunjoe kyikyienengye Ruwa, na wuṙo mkate oose; na itsinde lyikawa nyi lya Ruwa, na wuṙo maa mbaga tsalyo. 17 Kyaindi kokooya mbaga tsingyi tsilemanyo, na iyoe mseituni o nguṙunyi nuleṙongo kyiiṙi kyatso, kowa mbumbu imwi ya ikyiṙi lya mseituni na wucha wolyo, 18 maa ulakushele kyiiṙi kya mbaga tsilya, ang'u kokooya nukushela, chi iyoe uṙuṙe itsinde-pfo, indi nyi itsinde lyikuṙuṙe iyoe. 19 Kyasia nogamba, mbaga tsilya tsilemanyo kundu ngyipario ho inyi. 20 Nyi kyicha. Galemanyo kyipfa kya ilemo iiṙikyia lyawo; na iyoe nugoṟokyi kui iiṙikyia lyapfo. Maa ulakushele, indi uowuo. 21 Cha kyipfa kokooya Ruwa alalelekyia mbaga tsa kuwooka, maa ekulekyia iyoe-pfo. 22 Kyasia, ambuya-ng'u, wucha na wulang'a wo Ruwa; ko walya waolokyie wulang'a; indi kopfo iyoe wucha wo Ruwa, kokaa kyiiṙi kya wucha-wo; sile nyi wuṙo, iyoe taa nowiyitso kuleshi. 23 Na iwo taa, wakaṙa wufofo wowo wo iiṙikyia, wechiṙongo, cha kyipfa Ruwa neiṙima iwaṙonga-se. 24 Cha kyipfa kokooya iyoe nulemanyo kowuto mseituninyi, ukyeri mseituni o nguṙunyi wookyia mawookyionyi, numa koṙongo mbaṟe ingyi, mseituninyi ui mcha; chi ngoseṟa walya wakyeri mseituni mcha wookyia mawookyionyi iiṙima iṙongo mseituninyi owo wawenyi-pfoe? 25 Cha kyipfa wana wa wama wako, ngyikundi mulamanye wuṟikyi-wu-pfo, kundu mulachekusaṟa kye mulawaṟango; kye wuumu wo Waisiraelyi nyi kundu masanga gengyi gamanye Ruwa. 26 Koikyo Waisiraelyi woose wechikyiṟo; chandu kyikyiṟeie, “Mkyiṟa nechicha awuka Sion, neletsana Yakobo na washituwa wakye. 27 Na ikyi nyikyo kyiteṟio kyako nawo, llyi ngyechiwahooṟia ngyuunyamaṟi tsawo.” 28 Kyasia ko mbonyi tsa Ndumi Ngyicha walewa washituwa kyipfa kyanyu; indi kyipfa kya isambuṟo walewa nyi wakunde kyipfa kya waku waṙu. 29 Cha kyipfa shisumbo sha Ruwa shiwoṙe isumkyia-pfo, maa ilago lyasho. 30 Kyipfa kokooya chandu nyoe kacha mulelega Ruwa, kyaindi wulalu mulewona isaṟia kui ilega lyawo; 31 na wuṙo maa wo walelega wulalu, kundu kui nyoe isaṟio nawo wasaṟio. 32 Kyipfa Ruwa nalewawika handu hamwi woose kyiiṙi kya ilega kundu nawasaṟie woose. 33 Chandu wunjama na wuṟango na imanya lya Ruwa shikyeri, ianduya lyakye lyekyemanyika-pfo, maa njia tsakye tsechiwa isoruo-soruo-pfo! 34 Kyipfa nyi wui aichi kyindo Mndumii akusaṟie? Ang'u nyi wui alemmba mlosha okye? 35 Ang'u nyi wui alemwenenga kyindo kuwooka, na oe namtae-se? 36 Cha kyipfa shindo shoose shiwukyie kokye, shikyeri pfo kui pfinya tsakye; lyingyi-se shiwuya na kokye. Kyiṟumi nyi kyakye shiyeri shoose. Amen.
1 Kyasia, wana wa wama wako, ngyimuterewa, kui ihooṟia lya Ruwa, wutenyi mmbiu yanyu iwe kyiṙaso kyiwoṙe moo, kyiele, kyechihiṟa Ruwa, ilyi nyilyo iindia na iterewa Ruwa lyilyicha na lya loi. 2 Maa mulaoshe mbaṟe ya wuyana-wu; indi mugalukye kundu Ruwa naiṙime igaluo makusaṟo ganyu. Iho nyi lyo-ndu moiṙima imanya kyilya Ruwa akundi, imanya kyilya kyii kyicha, kyemchihiṟa na kyikyiafutsie. 3 Cha kyipfa kui isaṟia ngyileenengo ngyiwia orio mndu akyeri konyu alakusurie kyindo kya ngoseṟa kuta chandu awaṟi ikusuria; indi nawaṙe meena chandu Ruwa agawie orio mndu meena o iiṙikyia. 4 Kyipfa chandu mmbiunyi umwi luwoṙe shiwungo shifoi, maa shiwungo shoose shekyeṟunda iṟunda lyimwi-pfo; 5 na wuṙo na soe chandu lukyeri wafoi lukyeri mmbiu umwi kyiiṙi kya Kristo, na shiwungo, orio umwi ko oṙoe. 6 Kyasia cha kyipfa luwoṙe shisumbo sha orio mndu mbaṟe yakye, iṙuana na chandu luleenengo isaṟia; kokooya nyi ionguo shisuku, luonguo shisuku iṙuana na iiṙikyia. 7 Kokooya nyi maṟunda lukae maṟundenyi gaṙu. Molosha, kyiiṙi kya ilosha lyakye; 8 motutuma, kyiiṙi kya itutuma lyakye; motarama oṙoe, kui mrima mkyesi; mogoṟokyia, kui wuragari; mosaṟia, kui sia. 9 Ikunda lyilawaṙe wukulembecheṟi. Suonyi kyikyeri kyiwicho, oshanenyi na kyikyeri kyicha. 10 Kui ikunda lya mono-wama, mukundane nyoe wenyi ko wenyi; kui kyiṟumi mochisongoṟa woṙianyu. 11 Kui wuragari, chi waṙoko-pfo, muwoṙe wuragari mrimenyi konyu; mochiṟundia Ruwa. 12 Kui ikusuria, mochichihiyo; fowenyi, mochiweṙelyia; kyiiṙi kya iterewa, kyiyeri kyoose. 13 Mochitarama wandu wa Ruwa shilya wakundi; kui iambilyia wayenu, mochipfuṟukana. 14 Wikyienyi mboṟa walya waimsuiṟa; wikyienyi mboṟa, maa mulasese. 15 Chihiyonyi hamwi na iwo waichihiyo; fiiṟenyi hamwi na walya waifiiṟa. 16 Muiṙikyiane shilya mukusurie nyoe wenyi ko wenyi. Maa mulakusurie shindo shing'anyi, indi muiṙikyie iwinisho nyi mbonyi tsifofo. Maa mulakushelyie wuṟango. 17 Maa mulatae mndu wuwicho ko wuwicho. Ṟundenyi shindo shicha mbele ya wandu woose. 18 Kokooya kyechiwa, ko ura lonyu, mukae ufoṟonyi na wandu woose. 19 Wakunde, maa mulatae kyiṟaache, indi seiyenyi nyashi ya Ruwa; kyipfa kyikyiṟeie, “Kyiṟaache nyi kyako inyi; inyi ngyetaa,” Mndumii nagamba. 20 Kyaindi, mokyituwa opfo awoṙo nyi njaa, mwenengye kyelya; amwangari, mwenengye kyindo kyenyo; kyipfa kowuta kuṙo, nowika makaa ga moṙo mṙoenyi kokye. 21 Wuwicho wulakuwingye, indi uwingye wuwicho kui wucha.
1 Orio mndu naindie wuchilyi na wang'anyi wa uruka, kyipfa kuwoṙe wuchilyi wulawukyie ko Ruwa-pfo; na wulya wukyeri pfo wuwukyie ko Ruwa. 2 Koikyo molega awoṙe wuchilyi urukenyi na iwingana na kyilya Ruwa awawasie, na walya wekyewingana na oe wechianduyo. 3 Kyipfa walya wekyechilyia wekyeowesha wandu kyipfa kya mecha-pfo, indi kyipfa kya mawuto mawicho. Kyasia nukundi ulaowuo awoṙe wuchilyi? Wuta shindo shicha na iyoe nochienengo kyiṟumi na iyoe nochiwona kyiṟumi kokye. 4 Cha kyipfa oe nyi mṟundi o Ruwa kopfo kyipfa kya mecha. Indi kyiyeri owuta shindo shiwicho, owuo, kyipfa aiṙuo ushu wulya-pfo; cha kyipfa nyi mṟundi o Ruwa, ekyetaa kyiṟaache ulya ekyewuta shindo shiwicho kyipfa kya nyashi. 5 Koikyo kyikuwaṟi iindia, chi kyipfa kya nyashi iya tupu-pfo, indi na kyipfa kya kyilya mrima ukundi. 6 Lyingyi-se kyipfa kya ikyo taa mokyetaa kodi; kyipfa wo nyi waṟundi wa Ruwa, wechikaa iṟundenyi-lyo ilyo. 7 Enengyenyi woose kyilya kyiwawaṟi, mndu o kodi, kodi; mndu o ukamba, ukamba; awaṟi iṙeṙemio, iṙeṙemio; awaṟi wuindi, wuindi. 8 Maa mulariko nyi mndu kyindo kyoose, sile ikundana; cha kyipfa mokunda oṙoe naafutsia mawawaso. 9 Kyipfa kulya igamba, Ulaṟuguye ang'u ulaṟuguyo, Ulawaage, Ulaiwe, Ulalangye; na kuwoṙe iwawaso lyingyi lyoose, lyasanzo na ṙeṙo-lyi, kye, “Kunda momṟasa opfo cha iyoe kumonyi.” 10 Ikunda lyekyewutia momṟasa kyindo kyiwicho-pfo. Kyasia ikunda nyilyo lyaafutsia mawawaso. 11 Yee, lukomanya kyiyeri, kye kyiyeri kyeamka maṙoenyi kyamwafukyia; cha kyipfa wulalu wukyiṟo woṙu wukyeri kufuhi na soe kuta lyilya lulewooka iiṙikyia. 12 Kyio nyi iiṙa kyii kyingoto kyamtikyira kufuhi; kyasia luṙe mawuto ga meema, na iṟaa shisha sha ngyeela. 13 Chandu kyiwaṟi iwuto kyingoto luchumie kui wuyendelyi wucha. Chi kui ilya na ielewetsa na wunanzi-pfo, chi kui ukoe na wuṟui-pfo, chi kui shiloyano na wunyenyi-pfo. 14 Indi irenyi shisha sha Mndumii Yesu Kristo, maa mulaambuye mmbiu, mṟasa muamtse lango tsacho.
1 Mndu awoṙe iiṙikyia lyifofo, mwambilyienyi, indi mulamwanduye makusaṟo gakye. 2 Mndu umwi nawoṙe iiṙikyia, nekyelya shoose; kyaindi ulya akyeri mfofo nekyelya mboka tsa maṟa. 3 Ulya ekyelya alaanduye ulya alailya; kyipfa Ruwa naiṙikyiana na oe. 4 Iyoe nyi wui uianduya mṟundi o mndu ungyi? Ko mndumii okye amonyi ulya nekyegoṟoka ang'u ioloka. Yee, nechigoṟotso cha kyipfa Mndumii neiṙima imgoṟotsa. 5 Mndu umwi nekyewona kye mfiri yoose ifananyi-pfo. Ungyi nekyewona mfiri yoose ifananyi. Orio mndu nawute chandu wuṟango wokye womloṟa. 6 Ulya mong'anyisa mfiri, nekyeung'anyisa ko Mndumii; na molya, nekyelya ko Mndumii, cha kyipfa naana Ruwa; lyingyi-se, ulya alekyelya ailya ko Mndumii-pfo, na oe taa naiana Ruwa. 7 Kyipfa kuwoṙe mndu kyiiṙi kyaṙu ai na moo kyipfa kyakye amonyi, maa kuwoṙe mndu ekyepfa kyipfa kyakye-pfo. 8 Cha kyipfa kokooya lokaa na moo, lui na moo kyiiṙi kya Mndumii, ang'u kokooya lopfa, lopfa ko Mndumii. Kyasia kokooya lokaa na moo ang'u kokooya lopfa, soe nyi masaa ga Mndumii. 9 Kyipfa Kristo nalepfa kawaṙa-se moo kyipfa kya ikyi, nachilyie wapfu na wai na moo taa. 10 Kyaindi iyoe ngyesa ny'kyilyi uianduya mono-womoo? Ang'u ngyesa iyoe ny'kyilyi uimina mono-womoo? Cha kyipfa soe loose lochigoṟoka mbele ya kyiṙi kya ianduyo kya Ruwa. 11 Cha kyipfa kyikyiṟeie, “Chandu ngyikyeri na moo, Mndumii nagamba, orio mndu nepfiria ndi mbele yako, na orio ulumi lochisenda Ruwa.” 12 Kyasia nyi wuṙo, orio mndu kyiiṙi kyaṙu echiwuta mbonyi tsakye amonyi mbele ya Ruwa. 13 Kyasia lulaengyeṟe ianduyana, indi nanga mowuta ianduya lya mbaṟe-i, mndu alawute kyindo kyetewe mono-wamae ang'u kyemwolotsa. 14 Ngyiichi, ngoseṟa ngyimṟingyishie mnu kyiiṙi kya Mndumii Yesu, kye kuwoṙe kyindo kyifanyi kyimṟumoe wookyia mawookyionyi gakyo-pfo; kyaindi ko ulya awona kyindo kyifanyi kyimṟumoe, ko mndu-cho kyindo kyilya kyifanyi kyimṟumoe. 15 Na mono-womoo kawoṙo nyi fowa kyipfa kya kyelya, noṙa ichumia ikundenyi. Kui kyelya kyapfo ulanyamaṟe mndu ulya Kristo alepfa kyipfa kyakye. 16 Kyasia, wucha-wo wonyu wulasendo kui wuwicho. 17 Kyipfa Wumangyi wo Ruwa chi ilya maa inyo-pfo, indi nyi wusumganyi na ufoṟo na sia Mumuyonyi Mweele. 18 Kyipfa ulya aiṟundia Kristo mbonyi-tso tsekyechihiṟa Ruwa, na lyingyi-se nekyeiṙikyio nyi wandu. 19 Kyasia kokooya nyi wuṙo, luoshe mbonyi tsa ufoṟo na mbonyi tsiwoṙe kyiira kui ikarishana. 20 Kyipfa kya kyelya ulanyamaṟe iṟunda lya Ruwa. Loi, shoose shishicha; indi nyi uwicho ko mndu ilya na ikuicho uwicho mrimenyi. 21 Nyi kyicha iṙa ilya nyama maa inyo mpfinyo maa iwuta kyindo kyoose kyetewe mono-womoo naolokye. 22 Iiṙikyia lyilya uwoṙe ukae nalyo mrimenyi kopfo mbele ya Ruwa. Nanga mndu ulya alekyekuanduya mrimenyi kokye kui kyindo kyilya ekyekyiiṙikyia. 23 Kyaindi awoṙe ikapa kawi, kokooya alya naanduyo kye nanyamaṟie, kyipfa alya kui iiṙikyia-pfo. Na orio kyindo kyilawukyie iiṙikyienyi nyi wunyamaṟi.
1 Kyasia kyiluwaṟi soe luwoṙe pfinya iṙuo wufofo wo iwo walawoṙe pfinya, maa kyiluwaṟi iwuta shindo sheluchihiṟa soe luwenyi-pfo. 2 Orio mndu kyiiṙi kyaṙu nachihiṟe momṟasa okye, naambilyie wucha, kundu naiṙime ikarisha iiṙikyia lyakye. 3 Cha kyipfa Kristo alewuta shindo shekuchihiṟa amonyi-pfo; indi chandu kyikyiṟeie, “Shilahio shawo walekulahia iyoe shilengyikooya inyi.” 4 Cha kyipfa shoose shilesonguo iṟeio shileṟeio kundu shiluloshe soe; kundu kui wusimiri na iwiyiṟio moo lya shiṟeio luiṙime iwaṙa ikusuria. 5 Na Ruwa ai o wusimiri na iwiyiṟia moo namuenengye ikusuria kyindo kyimwi nyoe wenyi ko wenyi kui mfano o Kristo Yesu; 6 kundu kui mrima umwi na kui ṙumbu lyimwi muiṙime iṟumisha Ruwa, Awu o Mndumii oṙu Yesu Kristo. 7 Koikyo muambilyiane nyoe wenyi ko wenyi, chandu na Kristo aleluambilyia, kundu Ruwa nang'anyiso. 8 Kyipfa ngyigamba kye Kristo ammba mṟundi o mma o iṙino kyipfa kya wuloi wo Ruwa, kundu naṟingyishie shiteṟio waku waṙu waleenengo. 9 Lyingyi-se kundu wandu walakyeri Wayuda waṟumishe Ruwa kyipfa kya ihooṟia lyakye; chandu kyikyiṟeie, “Koikyo ngyekuana wandunyi walakyeri Wayuda, na inyi ngyeimbia rina lyapfo.” 10 Lyingyi-se nagamba, “Chihiyonyi, wandu walakyeri Wayuda, hamwi na wasambuṟe wa Ruwa.” 11 Lyingyi-se, “Nyoe wandu moose mulakyeri Wayuda, ṟumishenyi Mndumii nyoe wandu moose, mng'anyisenyi.” 12 Na lyingyi-se Yesaya nagamba, “Kochiwaṙa mndu kyisharinyi kya Yese, na oe nechichilyia wandu walakyeri Wayuda, nawo wechikusuria kokye.” 13 Kyasia-ng'u Ruwa mokusuria namuichuṟe nyoe sia yoose na ufoṟo iiṙikyienyi, kundu muengyeṟikye mnu iwaṙa ikusuria, pfinyenyi tsa Mumuyo Mweele. 14 Wana wa wama wako, inyi ngyimonyi ngyileṟingyishio kui mbonyi tsanyu kye mui wandu wecha, muwaenengye wuṟango woose; lyingyi-se moiṙima itutumana. 15 Indi ngyimuṟeia, kui wukari ngoseṟa ngyuurenyi tsingyi tsa paruo-i, cha imukumbuṟa, kui isaṟia lyilya ngyileenengo nyi Ruwa, 16 kundu ngiwe mṟundi o Kristo Yesu wandunyi walakyeri Wayuda. Ngyiṟundie Ndumi Ngyicha ya Ruwa iṟunda lya wukohanyi, kundu wandu walakyeri Wayuda wawe kyiano kyechiambilyio, kyikamwilyiṟo nyi Mumuyo Mweele. 17 Kyasia, ngyiwoṙe kyimaṙuma kyewona kyiṟumi kyiiṙi kya Kristo Yesu mbele ya Ruwa. 18 Kyipfa ngyekaria igamba kyindo Kristo alakyiwutie kui iṟunda lyako-pfo, wandu walakyeri Wayuda waiṙime iindia kui iṙeṙa ang'u kui mawuto, 19 kui pfinya tsa kyiṟingyishio na maṟiyisho, pfinyenyi tsa Mumuyo Mweele; mṟasa kyikawa wookyia Yerusalemu, na mṟasenyi mṟasa Ilyiriko, ngamwonguo Ndumi Ngyicha ya Kristo chandu kyiwaṟi. 20 Na wuṙo-se ngyechitambagana ionguo Ndumi Ngyicha, ngyilaonguo handu rina lya Kristo lyammarise igambo, ngyilachewika numba wuye ya mndu ungyi. 21 Indi chandu kyikyiṟeie, “Walya walandeongoyo mbonyi tsakye wechiwona, na walya walandeicho wechimanya.” 22 Ny'kyo kyitewe ngyileimo kyiyeri kyifoi ngyilache na konyu. 23 Kyaindi wulalu, cha kyipfa kulawoṙe-se kyindo kyingyishingyie ngyuura tsa kunu, lyingyi-se wookyia maka ifoi ngyilangyie icha na konyu; 24 kyiyeri kyoose ngyechipfunga kyaro kyeyenda Spania [ngyeecha na konyu]. Cha kyipfa ngyikusurie immbona nyoe kyaronyi kyako, na iṙoo kyaro na nyoe, mrima oko uchihiyo kyitutu kyipfa kyanyu. 25 Indi wulalu ngyiyenda Yerusalemu, ngyechiṟundia wandu wa Ruwa; 26 kyipfa kyachihiṟa wandu wa Makyedonia na Akaya wasanie kyindo kyetarama wandu wa Ruwa wai wafofo ipfo Yerusalemu. 27 Yee, kyachihiṟa wandu wa Makyedonia, lyingyi-se wairiko nyi wandu walya wafofo wa Yerusalemu. Cha kyipfa kokooya wandu walakyeri Wayuda waleambilyia iwuka kowo shindo sha mrima, kyawakooya wo iwatarama kui shienengo sha kyiwuyana. 28 Ngammarisa iṟunda-lyo na iwaenengyia kyilya kyilesanio kyipfa kyawo, ngyeiṙia konyu ngyechiyenda Spania. 29 Ngyiichi kye ngacha na konyu ngyemuendie mboṟa ing'anyi ya Kristo. 30 Kyasia-ng'u, wana wa wama wako, ngyimuterewa kyipfa kya Mndumii oṙu Yesu Kristo, na kyipfa kya ikunda lyekyeendo nyi Mumuyo, pfuṟukanenyi hamwi na inyi shiterewonyi shanyu kyipfa kyako mbele ya Ruwa. 31 Terewenyi kundu ngyilakapo nyi walya walaiṙikyie Yesu urukyenyi lo Uyuda, na lyingyi-se kundu iṟunda ngyiwoṙe ipfo Yerusalemu lyiiṙikyio nyi wandu wa Ruwa. 32 Ngyiiṙime ishika konyu kui sia, chandu Ruwa akundi, ngyiiṙime ionyonya hamwi na nyoe. 33 Ruwa o ufoṟo nawe na nyoe moose. Amen.
1 Ngyimanyisha konyu mshikyi oṙu Foibe; akyeri mṟundi siṟinyi ya Kyenkrea. 2 Mwambilyienyi kyiiṙi kya Mndumii, chandu kyiwaṟi wandu wa Ruwa mumwenengye orio kyindo kyoose echikunda konyu; cha kyipfa oe nataramie wandu wafoi, kawengyitarama na inyi taa. 3 Ngyiiṟikyiṟienyi Pirisikyila na Akyila, wandu wai waṟundi hamwi na inyi kyiiṙi kya Kristo Yesu, 4 wawekuṟeyeṟie maa iwoogo kyipfa kyako. Iwo ngyiwaana, maa chi inyi tikyi-pfo, indi na siṟi tsa wandu woose walakyeri Wayuda taa. Ngyiiṟikyiṟienyi na siṟi ikyeri numbenyi kowo. 5 Ngyiiṟikyiṟienyi Epaineto, mkunde oko, aleambilyia Yesu kulya Asia. 6 Ngyiiṟikyiṟienyi Maria, ulya alekulyisa wukyiwa mnu kyipfa kyanyu. 7 Ngyiiṟikyiṟienyi Andironiko na Yunia, washari wako, walepfungo hamwi na inyi, wandu waichio kyiiṙi kya wasu; nawo walengyisongoya inyi iwa Wakristiano. 8 Ngyiiṟikyiṟienyi Ampilyiato, mkunde oko kyiiṙi kya Mndumii. 9 Ngyiiṟikyiṟienyi Urubano, mndu aiṟunda hamwi na inyi kyiiṙi kya Kristo, na Stakyisi, mkunde oko. 10 Ngyiiṟikyiṟienyi Apele, amwiṙikyie kyiiṙi kya Kristo. Ngyiiṟikyiṟienyi wandu wa kanyi ko Aristobulo. 11 Ngyiiṟikyiṟienyi Herodioni, ushari loko. Ngyiiṟikyiṟienyi wandu wa kanyi ko Narikyiso, wai kyiiṙi kya Mndumii. 12 Ngyiiṟikyiṟienyi Turufaina na Turufosa, wawoṙe wuragari kyiiṙi kya Mndumii. Ngyiiṟikyiṟienyi Perisisi, mkunde alewika wuragari mnu kyiiṙi kya Mndumii. 13 Ngyiiṟikyiṟienyi Ṟufo, msambuṟe kyiiṙi kya Mndumii, na wamae akyeri nyi wama oko taa. 14 Ngyiiṟikyiṟienyi Asinkoito, Filekoni, Herime, Patiroba, Herima, na wana wa wama wakyeri hamwi nawo. 15 Ngyiiṟikyiṟienyi Filoloko na Yulyia, Nerea na mshikyi okye; na Olyimpa, na wandu wa Ruwa woose wakyeri hamwi nawo. 16 Iṟikyiṟanenyi nyoe wenyi ko wenyi chandu wandu waiṙikyie Yesu wekyeiṟikyiṟana. Siṟi tsoose tsa Kristo tsamuiṟikyiṟa. 17 Wana wa wama wako, ngyimuterewa ambuyenyi walya wawoṙe wuṟiingyi na mbonyi tseolotsa wengyi kui malosho galaṙuṙanyi na shilya mulekulosha. Kushowenyi nawo. 18 Kyipfa wandu wa mbaṟe-yo waiṟundia Mndumii oṙu Yesu Kristo-pfo, indi nyi ndewu tsawo wawenyi; na kui maṙeṙo ga wulembi na maṙeṙo gekuloṟa kye wawecha kundu wakundo, wailemba wandu wanyotsu. 19 Kyipfa wuindi wonyu wuleshika ko wandu woose. Kyasia ngyimchihiye kyipfa kyanyu, kyaindi ngyikundi nyoe muwaṙe wuṟango shindonyi shicha na iwa matondo shindonyi shiwicho. 20 Na Ruwa o ufoṟo nechirumatsa Satana wanda ya maṙende ganyu iwinyi. Isaṟia lya Mndumii oṙu Yesu Kristo lyikae hamwi na nyoe [Amen.] 21 Timoteo, mṟundi hamwi na inyi, namuiṟikyiṟa, na Lukyio, na Yason, na Sasipatiro, washari wako. 22 Inyi Teritio, ngyileṟeia paruo-i, ngamuiṟikyiṟa kyiiṙi kya Mndumii. 23 Gayo, ulya alengyiambilyia na ngyikyeri kokye hamwi na Siṟi yoose taa wamuiṟikyiṟa. Erasto, moambilyia heleri tsa mṟi, na Kwarito mono-wama oṙu, wamuiṟikyiṟa. [ 24 Isaṟia lya Mndumii oṙu Yesu Kristo lyikae hamwi na nyoe moose. Amen.] 25 Wulalu naṟumisho ulya echiiṙima imukarisha, iṙuana na Ndumi Ngyicha ngyileonguo kya wucha wo Yesu Kristo, kyilyingananyi na kyilya kyiwekuṟiikyie wookyia kyiyeri kyileshi kyileiṙa. Wulalu Ruwa nashukuo 26 na pata kui shiṟeio sha weonguo shisuku, kyikamanyika ko masanga goose chandu Ruwa o mlungana alegamba, kundu waindie Iiṙikyia. 27 Nyi oe Ruwa, kulawoṙe ungyi awoṙe wuṟango cha oe. Kyiṟumi nyi kyakye kui Yesu Kristo, mlungana na mlungana. Amen.
1 Inyi Paulo ngyikyeri msu o Yesu Kristo, chandu Ruwa akundi, ngaṟeia paruo-i na Sositene, mono-wama oṙu, 2 ko siṟi ya Ruwa ikyeri Korinto. Walya wawailyishe kyiiṙi kya Yesu Kristo, wawalage wawe wandu wa Ruwa, hamwi na woose wekyeterewa kui rina lya Mndumii oṙu Yesu Kristo orio handu, Mndumii owo na oṙu. 3 Isaṟia lyikae konyu na ufoṟo uwukyie ko Ruwa Awu oṙu, na ko Mndumii Yesu Kristo. 4 Ngyiana Ruwa mfiri yoose kyipfa kyanyu, kyipfa kya isaṟia lya Ruwa muleenengo kyiiṙi kya Kristo Yesu. 5 Kyipfa kyiiṙi kya orio kyindo mulewa wanjama kyiiṙi kyakye, mbonyinyi tsoose, na wuṟangonyi woose. 6 Chandu wuṟingyishi wo Kristo wulemanyika konyu; 7 mṟasa mulauṟe kyienengo kyoose, mochiweṙelyia mnu kyiyeri Ruwa echishukuo Yesu Kristo; 8 ulya echimukarisha nyoe mṟasa mafurumionyi, kundu mfiri ulya mulawio kye mulewuta kyindo kyiwicho. 9 Ruwa nekyeafutsia shilya agamba, ulya alemulaga nyoe mukae handu hamwi na Mono-kye, Yesu Kristo Mndumii oṙu. 10 Kyasia wana wa wama wako, ngamuterewa, kui rina lya Mndumii oṙu Yesu Kristo, nyoe muṙeṙe kyindo kyimwi; maa halawaṙe nduutsano, indi muwaṙe makusaṟo gamwi. 11 Cha kyipfa, wana wa wama wako, walya wa kanyi ko Kyiloe wangyiwia kye kuwoṙe wuṟiingyi konyu. 12 Kyasia, kyindo ngyigamba nyi ikyi, kye orio mndu o konyu nekyegamba, “Inyi nyi o ura lo Paulo,” na “Inyi nyi o ura lo Apolo,” na “Inyi nyi o ura lo Kyefa,” na “Inyi nyi o ura lo Kristo.” 13 Ngyesa Kristo nakyeri shindo shiwi? Ngyesa Paulo nalekapio msalabenyi kyipfa kyanyu? Ang'u ngyesa mulepatiso kui rina lya Paulo? 14 Ngyiana, kyipfa ngyilepatisa mndu konyu sile Krispo na Gayo-pfo; 15 mndu alachegamba kye mulepatiso kui rina lyako. 16 Lyingyi-se ngyilepatisa wandu wa kanyi ko Stefano. Ngoseṟa ya iwo, ngyiichi kokooya ngyilepatisa mndu oose ungyi-pfo. 17 Kyipfa Kristo alengyiṙuma kundu ngyipatise-pfo, indi ngyionguo Mbonyi Ngyicha; maa chi kui wuṟango wo maṙeṙo-pfo, upfu lo Kristo msalabenyi lulacheewa lo wulya. 18 Cha kyipfa mbonyi tsa upfu lo Yesu msalabenyi ko walya waiṙeka nyi wutondo, indi soe luikyiṟo luichi kye nyi pfinya ya Ruwa. 19 Cha kyipfa kyikyiṟeie, “Ngyechinyamaṟa wuṟango wo walya wawoṙe wuṟango, na ngyuuṟango tsa walya wawoṙe wuṟango ngyetsilega.” 20 Nyi kwi awoṙe wuṟango akyeri? Nyi kwi mlosha o mawawaso akyeri? Nyi kwi moende shigaluano akyeri? Ngyesa Ruwa alegaluo wuṟango wo wuyana iwa wutondo-pfoe? 21 Cha kyipfa wuṟangonyi wo Ruwa, wandu wa wuyana walandeiṙime imanya Ruwa kui wuṟango wokye, Ruwa nalekunda ikyiṟa waiṙikyie Ruwa kui wutondo wo mbonyi tsilya tsilosho. 22 Cha kyipfa Wayuda wakundi kyiṟingyishio, na Wakyiṟikyi waipfula wuṟango; 23 indi soe luonguo mbonyi tsa Kristo, alekapio msalabenyi. Ko Wayuda nyi kyindo kyeolotsa mndu, na ko wandu walai Wayuda nyi wutondo; 24 indi ko walya wekyelago Wayuda na Wakyiṟikyi, nyi Kristo, pfinya na wuṟango wo Ruwa. 25 Cha kyipfa wutondo wo Ruwa wuwoṙe wuṟango ngoseṟa ya wulya wo wandu, na wufofo wo Ruwa wuwoṙe pfinya ngoseṟa ya wulya wo wandu. 26 Kyipfa, wana wa wama wako, kumbuonyi ilago lyanyu, kye chi wafoi wawoṙe wuṟango wo kyimmbiu-pfo; chi wafoi wawoṙe pfinya-pfo; chi wafoi wawoṙe rina wawalage-pfo. 27 Indi Ruwa nalesambuṟa matondo ga wuyana nariise sonu wawoṙe wuṟango. Lyingyi-se Ruwa nalesambuṟa shindo shifofo sha wuyana kundu nariise sonu shilya shiwoṙe pfinya. 28 Lyingyi-se Ruwa nalesambuṟa shindo shifafa sha wuyana na shishimine, yee, shindo shilai pfo, kundu shilya shikyeri pfo shilakae pfo; 29 orio mndu oose alachekushela mbele ya Ruwa. 30 Indi kui oe nyoe moiṙima iwa kyiiṙi kya Kristo Yesu, alefeo koṙu cha wuṟango wuwukyie ko Ruwa, na wusumganyi, na wuele, na wukyiṟo; 31 kundu chandu kyikyiṟeie, “Ulya aikushela na nakushele kyiiṙi kya Mndumii.”
1 Kyasia, wana wa wama, kyiyeri ngyilecha na konyu, ngyilecha imuongoya shiṟika sha Ruwa kui maṙeṙo mecha ang'u wuṟango-pfo. 2 Kyipfa ngyileṙumbuo mrimenyi ngyilamanye kyindo kyoose konyu sile Yesu Kristo, na oe nalekapio msalabenyi. 3 Na inyi ngyiwekyeri konyu wufofonyi na wuowunyi na iṙeṙema lying'anyi. 4 Na mbonyi tsako na ilosha lyako lya Ṙeṙo lya Ruwa kuwei kui maṙeṙo ga wuṟango wokyekuruo ngyuuṟango tsa wandu-pfo, indi kui iloṟa kye Mumuyo o Ruwa naweiṟunda na pfinya, 5 kundu iiṙikyia lyanyu lyilawe wuṟangonyi wo wandu, indi pfinyenyi tsa Ruwa. 6 Kyaindi kuwoṙe wuṟango luwuonguoe ko walya wapfulukyie kyimrima; indi chi wuṟango wo wuyana-wu-pfo, maa wo iwo waichilyia wuyana-wu, wekyeilachika-pfo. 7 Indi lokyeonguo wuṟango wo Ruwa kui kyiṟika, wuṟango wulya wuwuṟikye, wulya Ruwa awekundi luuonguo wookyia mawookyionyi, kundu lung'anyiso. 8 Wuṟango walya wachilyie wuyana-wu walawuichi maa umwi; kyipfa kokooya wawewuichi, wawechikapia msalabenyi Mndumii o mng'ano-pfo. 9 Kyaindi, chandu kyikyiṟeie, “Shindo shilya riso lyilaleshiwona, maa kuṙwi kulaleshiicho (Maa iiṙa na mrimenyi ko mndu), shindo shilya Ruwa aleṟeyeṟia wamkundi.” 10 Kyaindi Ruwa nalushukuya soe kui Mumuyo. Kyipfa Mumuyo nekyeruwa-ruwa shoose, maa shindo sha Ruwa shikuokyie-okyie. 11 Cha kyipfa nyi wui kyiiṙi kya wandu aichi mbonyi tsa wandu sile mrima o mndu ukyeri kyiiṙi kyakye? Na wuṙo na mbonyi tsa Ruwa kuwoṙe atsiichi sile Mumuyo o Ruwa-pfo. 12 Kyaindi soe luleambilyia mrima o wuyana-pfo, indi Mumuyo awukyie ko Ruwa, kundu luiṙime imanya shilya Ruwa akusaṟie. 13 Na isho lushionguo, chi kui maṙeṙo gamaloshe kui wuṟango wo kyimndu-pfo, indi gamaloshe nyi Mumuyo, lochitambuluo mbonyi tsa mrimenyi kui maṙeṙo ga mrimenyi. 14 Kyasia mndu alakyeri o kyimrima ekyeambilyia shindo sha Mumuyo o Ruwa-pfo; cha kyipfa kokye icho nyi wutondo, maa eiṙima ishimanya-pfo, cha kyipfa shekyemanyika kui njia ya kyimrima. 15 Kyaindi mndu o kyimrima nekyemanya shoose, maa oe kuwoṙe mndu ekyemmanya-pfo. 16 Kyipfa chandu shiṟeio shiele shigambie, “Nyi wui alemanya kyindo Mndumii akundi, namloshe?” Kyaindi soe luwoṙe makusaṟo ga Kristo, kyipfa lokyekusaṟa cha Kristo.
1 Kyaindi, wana wa wama wako, inyi ngyileiṙima iṙeṙa na nyoe cha wandu wawoṙe mkaṟo ya kyimrima-pfo, indi cha wandu wawoṙe mkaṟo ya kyimmbiu, cha wana wanangu kyiiṙi kya Kristo. 2 Ngyilemuenenga maruwa, ngyilemuenenga kyelya-pfo; cha kyipfa mulekomokyiiṙima-pfo. Yee, maa wulalu mokyiiṙima-pfo, 3 cha kyipfa mṟasa wulalu nyoe nyi wandu wa mkaṟo ya kyimmbiu. Kyipfa kokooya konyu kuwoṙe wunyenyi na wuṟiingyi, ngyesa nyoe chi wandu wa mkaṟo ya kyimmbiu-pfoe? Lyingyi-se mokyewuta kui mbaṟe ya kyimndu? 4 Kyipfa kyiyeri-kyo mndu umwi ekyegamba, “Inyi nyi o ura lo Paulo,” na ungyi, “Inyi nyi o ura lo Apolo,” ngyesa nyoe chi wandu-pfoe? 5 Kyasia Apolo nyi wui? Na Paulo nyi wui? Nyi waṟundi walya kui wo muleiṙikyia Ruwa na orio mndu chandu Ruwa alemuenenga wuiṙimi. 6 Inyi ngyilewaaya, Apolo kanyosa; indi mong'anyisa nyi Ruwa. 7 Koikyo mowaaya chi kyindo-pfo, maa monyosa, indi Ruwa ekyeng'anyisa. 8 Kyasia ulya mowaaya, na ulya monyosa nyi kyindo kyimwi, kyaindi orio mndu nechiambilyia wori wokye iṙuana na wukyiwa alelya. 9 Kyipfa soe lukyeri waṟundi hamwi na Ruwa; nyoe nyi ṙema lya Ruwa, nyi numba ya Ruwa. 10 Iṙuana na isaṟia lya Ruwa ngyileenengo, inyi cha msongoru o wewika numba wawoṙe wuṟango, ngyilewika urende, na mndu ungyi naiwika numba wuye ya urende-lo. Kyaindi orio mndu naambuye chandu aiwika numba wuye ya urende-lo. 11 Kyipfa urende lungyi kuwoṙe mndu eiṙima iluwika, sile nyi lulya lulemmbiko, lukyeri nyi Yesu Kristo-pfo. 12 Kyaindi kokooya mndu awika numba wuye ya urende-lo, sahapu ang'u heleri ang'u magoe ga woguru, ang'u mashiṙi ang'u maṟa ang'u nyatsi, iṟunda lya orio mndu lyechimanyika na pata. 13 Kyipfa mfiri ulya o ianduyo ochiloṟa iṟunda-lyo na pata cha kyipfa lyechiloṟo moṙonyi; na moṙo ulya ochiyesha iṟunda lya orio mndu, nyi lya mbaṟe iha. 14 Iṟunda lya mndu alyiwikyie wuye ya urende-lo lyilanderumatso nyi moṙo, nechiambilyia wori. 15 Iṟunda lya mndu lyikarumatso nyi moṙo, nechiwaṙa wanda; indi oe nechikyiṟo; kyaindi nyi cha kui moṙo. 16 Muichi kye nyoe mowa hekalu lya Ruwa, na kye Mumuyo o Ruwa nekyekaa mrimenyi konyu? 17 Kokooya mndu anyamaṟa hekalu lya Ruwa, Ruwa nechinyamaṟa mndu-cho. Cha kyipfa hekalu lya Ruwa nyi lyiele, nalyo nyi nyoe. 18 Mndu alakulembe amonyi. Kokooya mndu awona kye nawoṙe wuṟango kyiiṙi kyanyu kunu wuyanenyi, nawe tondo, kundu naiṙime iwa mndu awoṙe wuṟango. 19 Kyipfa wuṟango wo wuyana-wu nyi wutondo mbele ya Ruwa. Cha kyipfa kyikyiṟeie, “Oe nyi oe ekyewaṙa wawoṙe wuṟango ngyeṟonyi tsawo.” 20 Na lyingyi-se, “Mndumii naichi makusaṟo ga wawoṙe wuṟango kye chi ga sungusinyi-pfo.” 21 Kyasia, mndu oose alakushelyie wandu. Cha kyipfa shoose nyi shanyu; 22 kye nyi Paulo, ang'u Apolo, ang'u Kyefa; ang'u wuyana, ang'u moo, ang'u upfu; ang'u shindo shilya shikyeri pfo wulalu, ang'u shilya shekoshikyeri pfo ipfo-ndu luiyenda; shoose nyi shanyu. 23 Na nyoe nyi wandu wa Kristo, na Kristo nyi o Ruwa.
Mndu naluwone kye lukyeri waṟundi wa Kristo, na wandu Ruwa awaenengyie iṟunda lyeonguo wuloi wokye wukuṟiikyie. 2 Iho-se kyindo kyikyikunde waṟundinyi wa mbaṟe-i nyi mndu naafutsie kyilya ateṟie. 3 Kyaindi koko inyi chi kyindo maa ale nyoe mukongyianduya-pfo, maa kui ianduya lya kyimndu, maa ngyianduya mrima oko-pfo. 4 Kyipfa ngyiwoṙe kyimaṙuma kyewona kye ngyiwoṙe wuwicho mrimenyi koko-pfo, kyaindi ngyiwono kye ngyiwoṙe wusumganyi kyipfa kya ikyo-pfo; indi ekyengyianduya inyi nyi Mndumii. 5 Kyasia nyoe mulangyianduye kye ngyimmbicho kyipfa kya kyindo kyoose kyiyeri kyilashika, mṟasa ilyi Mndumii echicha; ulya echiloṟa shilya shikuṟiikyie meemenyi, na iloṟa makusaṟo gakyeri mrimenyi; nyi lyo-ndu orio mndu echiwona kyiṟumi kyakye ko Ruwa. 6 Kyasia, wandu muiṙikyie Ruwa, shindo-shi ngashiwuta kui mfano o inyi na Apolo kyipfa kyanyu, kundu kye kui mfano oṙu muiṙime ikulosha shilya shishiṟeie; kundu umwi onyu alakushele kyipfa kya ichu, na imina oṙoe. 7 Kyipfa nyi wui echiloṟa chandu ulafananyi na ungyi? Na iyoe nuwoṙe kyikyi ulaikyiambilyia? Kyaindi kokooya nuleambilyia, nuikushelyia kyi kye uleambilyia-pfo? 8 Momuiguṙa, momuwona wunjama, momchilyia soe lulakyeri ho. Yee, ngyesa muweichilyia, kundu soe na soe luchilyie hamwi na nyoe! 9 Kyipfa ngakusaṟa kye Ruwa nalelusambuṟa soe wasu mafurumionyi, cha wandu wawaanduye wawoogo; cha kyipfa lowa kyindo kyesetsa wandu; ko malaika na wandu. 10 Soe luwatondo kyipfa kya Kristo, kyaindi nyoe muwoṙe wuṟango kyiiṙi kya Kristo. Soe luwafofo, kyaindi nyoe muwoṙe pfinya; nyoe muwoṙe kyiṟumi, indi soe luindio-pfo. 11 Maa kyiyeri kya wulalu, luwoṙo nyi njaa na nyoṙa, lukyeri kyiṟanguoe, lukapo nzina, lyingyi-se luwoṙe kanyi-pfo. 12 Lya wueṟa luilya wukyiwa lochiṟunda kui mawoko gaṙu luwenyi. Lukolahiyo lokyewikyia mboṟa, lukowihiṟo lokyekarishia; 13 lukoirio sha wongo lokyeṙeṙa kya wandu necha. Lowa cha mboshia tsa wuyana na shindo shoose shishilege mṟasa inu. 14 Ngyimuṟeia ishi kundu ngyimuendie wusutsu-pfo; indi imtutuma cha wana ngyiwakundi. 15 Cha kyipfa maa kokooya muwoṙe walosha shiku ikumi kyiiṙi kya Kristo muwoṙe waawu wafoi-pfo. Kyipfa inyi ngyilemfee kyiiṙi kya Kristo Yesu kui njia ya Ndumi Ngyicha. 16 Kyasia, ngamterewa mungyioshe inyi. 17 Kyipfa kya ikyo ngaṙuma Timoteo konyu, akyeri mono-ko mkunde, ekyeafutsia shilya ateṟia kyiiṙi kya Mndumii, echimukumbuṟa njia tsako tsoose tsikyeri kyiiṙi kya Kristo, chandu ngyekyelosha orio handu kyiiṙi kya orio siṟi. 18 Kyasia wengyi walekushela cha ilyi ngyilaicha na konyu. 19 Kyaindi ngyechicha iwinyi, kokooya ngaringo, na inyi ngyechimanya, chi shindo sha walya walekushela tupu-pfo, indi na pfinya tsawo. 20 Cha kyipfa Wumangyi wo Ruwa wokyeloṟo moonyi ya wandu kui shilya waiwuta kuta kui shilya waiṙeṙa. 21 Mukundi kuṙa? Ngyiche na konyu na msengye, ang'u ngyiche ikundenyi na mrimenyi o wuhoo?
1 Kuwoṙe mbonyi tsiṙeṙo orio handu kye konyu kuwoṙe wuṟui, wuṟui wo mbaṟe ilakyeri maa ko walya walaiṙikyie Ruwa, kye mndu nakae na mka o awuye. 2 Na nyoe mokyekushela, maa mokyewoṙo nyi fowa mrimenyi-pfo, kye nawuto konyu ulya awuta kyindo kya mbaṟe-yo. 3 Cha kyipfa loi, ngyilakyeri konyu kyimmbiu, kyaindi ngyikyeri konyu kyimrima, inyi ngyimonyi ngamwanduya ulya awuta kyindo-kyo, cha ilyi ngyikyeri pfo. 4 Rinenyi lya Mndumii oṙu Yesu, nyoe musanzie handu hamwi na mrima oko, hamwi na wuiṙimi wo Mndumii oṙu Yesu; 5 iṙambika Satana mndu-cho, kundu mmbiu ulyiso wukyiwa, kundu na mrima ukyiṟo mfiri ulya Mndumii Yesu echicha. 6 Ikushela lyanyu chi kyindo kyicha-pfo. Muichi kye chachu kyitung'tu yekyetarang'isha itongye lyoose? 7 Kyasia, kusanjenyi, muwute chachu iya ya kacha, muiṙime iwa itongye lyihya, muwe cha mulawawikye chachu. Cha kyipfa Kristo, Kyiondo kyaṙu kya mṟumoe o Pasaka amṙaso. 8 Kyasia luwaṙe mṟumoe, chi kui chachu ya kacha-pfo, maa kui chachu ya wuwicho-pfo, indi kui shindo shilechitarang'ia, nyiwo wuilyi wo mrima na wuloi. 9 Ngyilemuṟeia kyiiṙi kya paruo-i, kye mulakusanze-sanze na waṟui. 10 Ngyigamba maa mulakusanze-sanze maa ale na waṟui wa wuyana-wu-pfo, ang'u na wawoṙe wulanga, ang'u na wasokyi, ang'u na wekyeindia mafano-pfo; kyipfa kuṙo muwaṟi iwuka wuyanenyi. 11 Kyaindi, chandu mbonyi tsikyeri, ngyilemuṟeia kye mulakusanze-sanze na mndu oose ekyegamba oe nyi mndu aiṙikyie Ruwa, kokooya nyi mṟui ang'u nawoṙe wulanga ang'u nekyeindia mafano ang'u nekyelahia ang'u nekyenango ang'u msokyi; mndu o mbaṟe-i mulaiṙikyie maa ilya na oe. 12 Kyipfa kyingyiwaṟi kuṙa ianduya walya walaiṙikyie Ruwa? Nyoe mokyeanduya walya waiṙikyie Ruwa-pfoe? 13 Kyaindi walya walaiṙikyie Ruwa, oe amonyi nechiwaanduya. Nyoe wutenyi ulya mmbicho kyiiṙi kyanyu.
1 Ngyesa kokooya kuwoṙe mndu konyu awoṙe moondu na oṙoe nekaria iṙuo moondu-cho mbele ya wandu walawasumganyi, na chi mbele ya wandu wa Ruwa-pfo? 2 Ang'u muichi kye wandu wa Ruwa wechianduya wandu wa wuyana? Na kokooya wandu wa wuyana wechianduyo nyi nyoe, ngyesa muwaṟi ianduya maa shindo shitutu-pfoe? 3 Muichi kye lochianduya maa malaika-pfoe? Na kokooya nyi wuṙo chi loiṙima ngoseṟa ianduya shindo sha iha wuyanenyi-pfoe? 4 Kyasia, mukyeri handu heṙeṙia moondu ya iha wuyanenyi, mokyewika walya walawoṙe kyiira siṟinyi iwa weṙumbuo moondu yanyu? 5 Ngyigamba kuṙo ngyiiṙime imuriisa sonu. Ngyesa nyi wuṙo, kye konyu kuwoṙe maa mndu umwi awoṙe wuṟango eiṙima iṙumbuo moondu o wana wa wamae? 6 Indi mokyeṙuana mengyenyi, wandu muiṙikyie Ruwa, mbele ya walya walaiṙikyie Ruwa. 7 Kyasia nyi wufafa wung'anyi konyu kye muṙuana mengyenyi nyoe wenyi ko wenyi. Kyipfa chi nanga iilamo-pfoe? Kyipfa chi necha isoko masaa ganyu-pfoe? 8 Indi kyilaṙuṙanyi na ikyo mokyeilama wandu na iwasoka masaa gawo; yee, maa wana wa wama wanyu. 9 Ang'u muichi kye wandu wawicho wechioṟa Wumangyi wo Ruwa-pfo? Maa mulakulembe. Waṟui wechioṟa Wumangyi wo Ruwa-pfo. Maa wekyeindia mafano, maa wekyewuta shindo shiwicho na wandu wa nguwo tsawo, 10 maa mbafu, maa wawoṙe wulanga, maa wekyenango, maa wekyelahia, maa wasokyi. 11 Na waata kyiiṙi kyanyu wawekyeri wandu wa mbaṟe-i; kyaindi mulesanjo, kyaindi muleilyisho, kyaindi muletalo kye muwasumganyi rinenyi lya Mndumii Yesu Kristo, na Mumuyonyi o Ruwa oṙu. 12 Ngyiwoṙe momu o wuta kyindo kyoose ngyikundi, kyaindi chi shoose shiwoṙe kyiira-pfo. Ngyiwoṙe momu o wuta kyindo kyoose, kyaindi inyi ngyechiwa mtumo o kyindo kyoose-pfo. 13 Shelya shiwaṟi ikaa ndewunyi, na ndewu iwaṟi iwaṙa shelya; kyaindi Ruwa nechinyamaṟa shoose shishiwi, ndewu na shelya. Kyaindi mmbiu uwaṟi iwa o wuṟui-pfo indi o iṟundia Mndumii, na nyi Mndumii ekyeembeṟa mmbiu. 14 Na Ruwa naleṟutsa Mndumii, na lyingyi-se nechiluṟutsa soe kui wuiṙimi wokye. 15 Ngyesa muichi kye mmbiu yanyu nyi shiwungo sha Kristo-pfoe? Kyasia ngyiwute shiwungo sha Kristo na ishigaluo sha iṟai? Ote! 16 Ang'u muichi kye ulya amlungye na iṟai nakyeri mmbiu umwi na oe? Kyipfa shiṟeio shiele shigambie, “Iwo wawi wechiwa mmbiu umwi.” 17 Kyaindi ulya amlungye na Mndumii nakyeri kyindo kyimwi na oe mrimenyi kokye. 18 Kaenyi kuleshi na wuṟui. Orio ṙeko mndu ekyewuta nyi nja ya mmbiu okye; indi ulya awuta shindo sha wuṟui nawuta kyindo kyechinyamaṟa mmbiu okye amonyi. 19 Ang'u muichi kye mmbiu yanyu nyi hekalu lya Mumuyo Mweele akyeri mrimenyi konyu, muleenengo nyi Ruwa-pfoe? Maa nyoe chi masaa ganyu muwenyi-pfo; 20 kyipfa muleguṟo kui woguru wung'anyi. Kyasia wulalu, ṟumishenyi Ruwa kui mmbiu yanyu.
1 Kyasia ko mbonyi tsa shindo shilya mulengyiṟeia, nyi necha mndu msoṟo alaalyikye. 2 Kyaindi kyipfa kya wuṟui orio mndu msoṟo nawaṙe mka okye amonyi, na orio mndu mka nawaṙe mii okye amonyi. 3 Mii naenengye mka okye kyilya kyimmbaṟi, na wuṙo na mka naenengye mii okye kyilya kyimmbaṟi. 4 Mka eiṙima igamba kye mmbiu okye nyi okye amonyi-pfo, indi mmbiu okye nyi o mii okye. Na wuṙo mii alechiiṙima igamba kye mmbiu okye nyi okye amonyi, indi mmbiu okye nyi o mka okye. 5 Maa mulaimane, sile kofia kyiyeri moiṙikyiana ko kyiyeri kyifuhi, kundu muwone ṙaawa lyeterewa Ruwa; mukooyane-se kyimmbiu, Satana alachemuyesha kyipfa kya iuṟa meena. 6 Kyaindi ngyigamba isho, iloṟa makusaṟo gako tikyi, na chi kui imuitika-pfo. 7 Indi kyindo ngyikundi nyi kye wandu woose wawe chandu inyi ngyikyeri. Kyaindi orio mndu nawoṙe kyienengo kyakye amonyi kyiwukyie ko Ruwa, ichu kuṙi na ichu kuṙi. 8 Kyaindi ngawia walya walandealyikye, na wakusu, nyi nanga wakae chandu inyi ngyikyeri. 9 Kyaindi kokooya walechiiṙima ikarishia, waalyikye; kyipfa nyi nanga ialyika kuta iwaṙa lango. 10 Kyaindi walya walemualyika, ngawawia; maa iho chi inyi-pfo indi nyi Mndumii; mka alalekane na mii okye; 11 kyaindi kokooya nalekana na oe, maa alaalyiko, ang'u naiṙikyiane na mii okye; lyingyi-se mii alaṙe mka okye. 12 Kyaindi wandu wengyi ngawawia inyi, maa chi Mndumii-pfo; kye kokooya mndu aiṙikyie Ruwa nawoṙe mka alaiṙikyie Ruwa, na mka-cho nakundi ikaa na oe, alalekane na oe. 13 Na mndu mka, awoṙe mii alaiṙikyie Ruwa, na mii-cho nakundi ikaa na oe, alalekane na mii okye. 14 Cha kyipfa mii ulya alaiṙikyie Ruwa nekyeendo na ko wandu wa Ruwa kui njia ya isanzo na mka okye, na mka alaiṙikyie Ruwa nekyewa kyiwungo kya wandu wa Ruwa kui njia ya mii okye. Kokooya kyilawekyeri kuṙo, wana wanyu wawechiwa wana wa wandu walaiṙikyie Ruwa o loi; kyaindi wulalu nyi wandu wa Ruwa. 15 Kyaindi ulya alaiṙikyie Ruwa kakunda ilekana na ulya aiṙikyie Ruwa, kyikuwiie kuṙo. Iho mii ang'u mka aiṙikyie Ruwa neiṙima iwuta chandu akunda. Wakulekanie ko ufoṟo kyipfa Ruwa nalelulaga luwe wandu wa ufoṟo. 16 Cha kyipfa nomanya kuṙa, iyoe mndu mka, kokooya nochikyiṟa mii opfo? Ang'u nomanya kuṙa, iyoe mndu msoṟo, kokooya nochikyiṟa mka opfo? 17 Kyaindi chandu Ruwa alegawia orio mndu, na chandu Ruwa alelaga orio mndu, nawute kuṙo. Nyi wuṙo ngawia siṟi tsoose . 18 Ngyesa mndu mlyiwe alelago amṙino-pfoe? Alawe cha ilyi alamṙine. Mndu mlyiwe nalelago alaṙino? Kyasia alaṙino. 19 Iṙino chi kyindo-pfo, na iṙa iṙino chi kyindo-pfo; kying'anyi nyi iosha mawawaso ga Ruwa. 20 Orio mndu nakae chandu awei lyilya alelago. 21 Ngyesa nulelago uwe mtumo? Maa ulawone nyi kyiwicho. Kyaindi koiṙima iwa cha mndu alaichilyio nyi kyindo, wa cha mndu alamchilyie nyi kyindo. 22 Cha kyipfa ulya alelago kyiiṙi kya Mndumii ai cha mtumo, icho ai mtumo kyiiṙi kya Mndumii-pfo. Na wuṙo ulya alelago alai mtumo, icho nyi mtumo o Kristo. 23 Muleguṟo kui woguru; maa mulawe watumo wa wandu. 24 Wana wa wama wako, orio mndu nakae mbele ya Ruwa akyeri chandu awei lyilya alelago. 25 Ko mbonyi tsa walya walawaalyikye na walaalyikyie Mndumii angyiwiie kyindo kyoose-pfo, kyaindi ngyigamba kya makusaṟo gako inyi ngyimonyi, inyi ngyileenengo isaṟia lya Mndumii iwa mndu msimiri. 26 Kyasia, ngyiwonyi nyi necha, kyipfa kya wukyiwa wukyeri pfo, kye nyi necha mndu nakae chandu akyeri. 27 Ngyesa numlungye tapu na mka opfo? Maa ulakunde iletsano. Numletsane? Maa ulapfule mka. 28 Kyaindi kokooya oalyika onyamaṟa-pfo; maa mana o kyika kaalyiko anyamaṟa-pfo. Kyaindi wandu cha iwo mmbiu yawo yechiwalyisa wukyiwa; na inyi ngyikundi iwashingyia walalye wukyiwa. 29 Kyaindi, wana wa wama, ngagamba kuṙi, kyiyeri kyitsugai kyikyileshi-pfo. Kyasia wookyia wulalu walya wawoṙe waka wawe cha ilyi walawoṙe; 30 na walya wailyia cha ilyi walailyia; na walya waichihiyo cha ilyi walaichihiyo; na walya waiguṟa cha ilyi walawoṙe kyindo. 31 Na walya wekyekuwinisha na wuyana cha ilyi walaikuwinisha mnu na wuyana; kyipfa shindo sha wuyana-wu shiiṙa. 32 Kyaindi ngyikundi kulawaṙe shindo shemuṟaisha. Ulya alaalyikyie nekyekuwinisha na shindo sha Mndumii, nachihiṟe kuṙa Mndumii; 33 indi ulya aalyikyie nekyekuwinisha na shindo sha wuyana-wu, chandu echihiṟa mka okye. 34 Lyingyi-se mana o kyika chi kyimwi na mndu mka mwalyikye-pfo. Ulya alamwalyikye nekyekuwinisha na mbonyi tsa Mndumii, naiṙime iwa mweele kyimmbiu na kyimrima. Kyaindi ulya amwalyikye nekyekuwinisha na mbonyi tsa wuyana-wu, chandu echichihiṟa mii okye. 35 Ngagamba isho kundu ngyimuenengye kyiira, chi kye ngyimuoṟowie kyigowo-pfo indi kyipfa kya shilya shichihiṟie, lyingyi-se muiṙime iṟundia Ruwa kulawoṙe shindo shingyi shimkuruo nyoe. 36 Kyaindi mndu oose kawona kye aiiṙima ikarishia mbele ya ulya akundi imwalyika-pfo, kokooya lango tsakye tsa mmbiu tsing'anyi, na nyi wuṙo kyiwaṟi iwa, nawute chandu akundi; waalyikane, kuwoṙe wuwicho-pfo. 37 Kyaindi ulya alawoṙe lango, aichi ikarishia na ikuringa, kuwoṙe mndu aimwitika ialyika-pfo. Lyingyi-se kokooya mrimenyi kokye nakusaṟie ikaa na oe cha mndu akundi imwalyika, nechiwuta necha. 38 Kyasia aalyika ulya akundi imwalyika nawuta necha, na ulya akuringa alaalyikye nawuta necha ngoseṟa. 39 Mndu mka namlungye tapu na mii okye kyiyeri mii okye ai na moo; kyaindi kokooya mii okye apfa, neiṙima ialyiko na mndu oose amkundi; kyiiṙi kya Mndumii tupu. 40 Kyaindi nanga oe kakaa chandu akyeri. Nyi wuṙo ngyiwonyi inyi; na inyi ngakusaṟa kye inyi ngyiwoṙe Mumuyo o Ruwa.
1 Na mbonyi tsa shindo shaṙasio mafano, luichi kye soe loose luwoṙe wuṟango. Wuṟango wokyeende makushelo, indi ikunda lyekyekarisha iiṙikyia. 2 Mndu kakusaṟa kye naichi kyindo, aichi kyindo kyoose chandu kyimmbaṟi imanya-pfo. 3 Kyaindi mndu kakunda Ruwa, icho Ruwa namwichi. 4 Kyasia ko mbonyi tsa ilya shindo shaṙasio mafano; luichi kye ifano chi kyindo kunu wuyanenyi-pfo, na kye kuwoṙe Ruwa ungyi sile umwi tupu-pfo. 5 Cha kyipfa maa chandu kuwoṙe wekyelago waruwa, ruwewu ang'u wuyanenyi, chandu kuwoṙe waruwa wafoi na wandumii wafoi; 6 kyaindi koṙu soe Ruwa nyi umwi tupu, akyeri Awu, ulya shindo shoose shiwukyie kokye, na soe lokyekaa kokye. Kuwoṙe na Mndumii umwi Yesu Kristo, ulya kui oe shindo shoose shilegumbo, na soe lulegumbo kui oe. 7 Indi wuṟango-wu wukyeri ko wandu woose-pfo. Kyaindi wengyi kui iichiwia ifano lyilya wekyelya cha ilyi nyi kyindo kyikyiṙasie mafano, wuṟango wowo wo imanya kyicha na kyiwicho wuwufofo, na wekyefana kyimṟumoe. 8 Kyaindi kyelya kyekyeluṙuo mbele ya Ruwa-pfo; kyipfa lulalye losoko kyindo-pfo; maa lukolya loengyeṟio kyindo-pfo. 9 Kyaindi ambuyenyi wuiṙimi-wu wonyu wo iwuta kyoose mokunda wulachetewe walya wafafa wanyamaṟe. 10 Cha kyipfa mndu kakuwona iyoe uwoṙe wuṟango, ochilya kyelya hekalunyi lya ifano, ngyesa wuiṙimi wokye wo imanya kyicha na kyiwicho, kookoya namfofo, kyechimanyika mṟasa oe nalye shindo shishiṙasie mafano-pfoe? 11 Na ulya amfofo nechirumatso kui wuṟango wopfo, na oe nyi mndu Kristo alepfa kyipfa kyakye. 12 Koikyo mukotewe wana wa wama wanyu wakanyamaṟa, na inyamaṟa wuiṙimi wufofo wo manya kyicha na kyiwicho, monyamaṟia Kristo. 13 Koikyo kyelya kyikatewe mono-wama oko nanyamaṟe, loi ngyechilya nyama mṟasa mlungana-pfo, ngyilachetewe mono-wama oko nanyamaṟe.
1 Ngyesa inyi chi mndu alamchilyie nyi kyindo kyoose-pfoe? Inyi chi msu-pfoe? Inyi ngyilewona Yesu Mndumii oṙu-pfoe? Nyoe chi kyilyimu kya inyi iṟundia Mndumii-pfoe? 2 Cha kyipfa kokooya inyi ngyilakyeri msu ko wandu wengyi, nyi msu konyu nyoe; cha kyipfa nyoe muwalungye na Mndumii kyaloṟa na pata kye inyi nyi msu. 3 Ikyo nyikyo kyindo ngagaluo ko walya waingyiwesa. 4 Ngyesa luwoṙe wuiṙimi wo ilya na inyo-pfoe? 5 Luwoṙe wuiṙimi wo iṙuo hamwi na soe mka mkristiano, cha wasu-wo wengyi na wana wa wama wa Mndumii na Kyefa-pfoe? 6 Ang'u ngyesa, nyi inyi ngyimonyi na Barinaba lulawoṙe wuiṙimi wo iṟunda? 7 Nyi asikari uha ekyeyenda shiṙenyi kyiyeri kyoose kulawoṙe ienengo wori? Nyi wui ekyewaaya sabibu alekyelya ndunda tsa kyilya awaaya? Ang'u nyi wui ekyelyisa shima alekyenyo maruwa ga shima shilya? 8 Ngyesa ngyigamba isho kyipfa kya wuiṙimi wo kyimndu? Ang'u uwawaso lokyegamba isho-pfoe? 9 Cha kyipfa mawawasonyi ga Mose kyikyiṟeie, “Umbe ikutarama iṟunda ulaiime ilya.” Ngyesa iho Ruwa nekyeambuya mbonyi tsa umbe? 10 Ang'u naigamba kuṙo kyipfa kyaṙu? Yee, shileṟeio kyipfa kyaṙu; kyipfa ulya ekyeṙema nawaṟi iṙema kulawoṙe ipfiio nyi mṙoe; na ulya aihuo shindo nawaṟi ienengo ṙombo lyakye. 11 Kokooya soe lulemuṙongyia shindo sha kyimrima, ngyesa nyi kyindo kying'anyi lukosambuo shindo shanyu sha kyimmbiu? 12 Kokooya wandu wengyi wawoṙe ugawi kyiiṙi kya wuiṙimi-wu, soe chi ngoseṟa-pfoe? Indi lulekuwinisha iiṙia kyindo kyoose iwuka konyu-pfo. Lulekarishia shindo shoose lulacheshingyia Mbonyi Ngyicha tsa Yesu Kristo. 13 Muichi kye walya wekyeṟunda maṟunda ga hekalunyi wekyelya shindo sha hekalu, na walya wekyeṟundia shindo alyitaṟenyi wawoṙe ṙombo lyawo shindonyi sha alyitaṟe? 14 Na Mndumii wuṙo nagambie kye walya wekyeonguo Ndumi Ngyicha waenengo kando kawo ipfo Nduminyi Ngyicha. 15 Kyaindi inyi ngyilewuta shindo-sho maa kyimwi-pfo. Maa ngyiṟeia isho kundu kyiwe kuṙo koko-pfo; kyipfa nanga ngapfa kuta mndu oose igamba kye ikushela lyako chi lya sungusinyi-pfo. 16 Kyipfa maa kokooya ngyekyeonguo Ndumi Ngyicha, ngyiwoṙe kyindo kyeiṙima ingyienenga ikushela-pfo; kyipfa Ruwa nangyiwiie ngyiwute kuṙo. Lyingyi-se ochia loko ngyilandeonguo Ndumi Ngyicha. 17 Kyipfa ngaṟunda iṟunda-lyi kulawoṙe iitiko ngyiwoṙe wori; indi kokooya nyi kui iitiko, Ruwa nangyisambuṟie ngyiringye iṟunda lyakye. 18 Kyasia wori woko nyi kyikyi? Nyi iwu, kye kyiyeri ngyionguo Ṙeṙo lya Ruwa, ngyechiwuta kuṙo kulawoṙe itosa kyindo, kyaindi kui iṟunda necha na wuiṙimi woko ngyiwoṙe Nduminyi Ngyicha. 19 Kyipfa, maa chandu ngyilakyeri mtumo o mndu oose, ngyekyekugaluo cha ilyi ngyikyeri mtumo o wandu woose, kundu ngyigalutsie ura lo Yesu wandu wafoi ngoseṟa. 20 Ngyiwekyeri cha Myuda ko Wayuda, kundu ngyigalutsie Wayuda ura lo Yesu. Ko walya wakyeri wuchilyinyi wo mawawaso, ngyilewa cha ilyi ngyichilyio nyi mawawaso (maa chandu inyi ngyimonyi ngyilamchilyie nyi mawawaso), kundu ngyigalutsie ura lo Yesu walya wakyeri wuchilyinyi wo mawawaso. 21 Ko walya walawoṙe mawawaso ngyilewa cha ngyilawoṙe mawawaso (chi kye ngyilawoṙe mawawaso mbele ya Ruwa-pfo, indi ngyiwoṙe mawawaso mbele ya Kristo), kundu ngyigalutsie ura lo Yesu walya walawoṙe mawawaso. 22 Ko wafofo ngyilewa mfofo, kundu ngyigalutsie wafofo ura lo Yesu. Ngyilewa orio kyindo ko wandu woose, kundu kui njia tsoose ngyiiṙime ikyiṟa wandu. 23 Na inyi ngyekyewuta shindo shoose kyipfa kya Ndumi Ngyicha kundu ngyikae handu hamwi na wandu wengyi. 24 Ngyesa muichi kye walya wekyeṙicha, wekyekapa mteeṟa woose, kyaindi ekyeambilyia iṟikoso nyi umwi-pfoe? Kapenyi mteeṟa kuṙo kundu muenengo iṟikoso. 25 Na orio mndu ekyeṙicha nekyekuima shindo shifoi. Kyasia iwo wekyewuta kuṙo kundu waambilyie iṟikoso lyekyenyamaṟika; indi soe lokyeambilyia iṟikoso lyilekyenyamaṟika. 26 Maa inyi ngyiṙicha kuṙo, chi cha mndu alawoṙe kundu aiṙicha napfo-pfo. Ngyikapana nzina wuṙo, chi cha mndu aikapa kyindo kyilakyeri ho-pfo; 27 indi ngyilyisa mmbiu oko wukyiwa na iuwinisha; kyilacheewa, ngamuongoya wandu wengyi Ṙeṙo lya Ruwa, inyi ngyiwe mndu molego.
1 Cha kyipfa, wana wa wama, ngyikundi mulemo imanya kye waku waṙu wawekyeri woose wanda ya ipuchi; woose wakaiṙa ipalyipalyinyi. 2 Woose wakapatiso wawe wa Mose ipuchinyi na ipalyipalyinyi. 3 Woose wakalya kyelya kyilya kyilya kya mrima. 4 Woose wakanyo kyindo kyilya kyilya kya mrima; cha kyipfa walenyo iwuka kulya iṟaṟenyi lyilewaosha; na iṟaṟa-lyo lyiwei nyi Kristo. 5 Kyaindi wafoi kyiiṙi kyawo, walechihiṟa Ruwa-pfo, koikyo wakarumatso nukyenyi ngyuumu suwaa ilawoṙe maa mṟinga. 6 Kyasia shindo-shi shiwekyeri mfano koṙu, kundu soe lulawe wandu welanga shindo shiwicho, chandu walya nawo walelanga. 7 Maa mulawe weindia mafano, chandu wengyi nawo wawekyeri; chandu kyikyiṟeie, “Wandu waleṙamia ilya na inyo, na numa ya iho wakagoṟoka wateme.” 8 Maa lulawute shindo sha wuṟui, chandu wandu wengyi wawo walewuta, wakapfa mfiri umwi wandu shiku makumi gawi na shiṟaaṟu. 9 Maa lulayeshe Mndumii, chandu wengyi wawo walemyesha, wakaumaṙo nyi njoka. 10 Maa lulanunuwe, chandu wengyi wawo walenunuwa, wakarumatso nyi malaika o upfu. 11 Kyasia shindo-sho shilewutika kowo kui mfano, shikaṟeio kundu shiluikyimbie soe, wa shiyeri-shi shikyeri kufuhi na mafurumionyi. 12 Koikyo akusaṟie kye nagoṟokyi naambuye necha alaolokye. 13 Nyoe muleyesho, sile kyiyesho kyilya kyekyecha na ko wandu woose-pfo. Indi Ruwa nekyeafutsia shilya ateṟia. Ruwa ulya alechimuṙa nyoe muyesho kuta wuiṙimi wonyu. Kyaindi hamwi na kyiyesho kyilya nechiwika na moongo o fumia, kundu muiṙime ikarishia. 14 Kyipfa kya ikyo, wakunde wako, kushowenyi na iindia mafano. 15 Ngyigamba kuṙo kyipfa ngyiṙeṙa na wandu waṟango. Ngyimuitika iiṙikyia ishi ngyigamba-pfo; indi kusaṟenyi nyoe muwenyi. 16 Kyiṙoo kyilya kya kyilaayo kyiele lokyeana Ruwa kyipfa kyakyo chi samu ya Kristo lokyeinyo handu hamwi-pfoe? Mkate ulya lokyeupeṟenguo, chi mmbiu o Kristo lokyeulya handu hamwi-pfoe? 17 Cha kyipfa mkate nyi umwi, soe lui wafoi lukyeri mmbiu umwi; cha kyipfa soe loose lokyeambilyia kyifunjoe kya mkate umwi. 18 Wonenyi Waisiraelyi-wo chandu wawekyeri mbaṟe ya mmbiu; walya wekyelya shiṙaso. Ngyesa wekyeikanana shiṙaso-pfoe? 19 Kyasia ngyigambe kyi? Kye kyilya kyaṙasio mafano nyi kyindo? Ang'u kye mafano nyi kyindo? 20 Chi wuṙo-pfo, kyaindi shindo shoose wandu walaiṙikyie Yesu wekyeṙasa wekyeshienenga waṟufui wa Satana, maa chi Ruwa-pfo; na inyi ngyikundi muṟundie masatana-pfo. 21 Moiṙima inyo kyindo iwuka kyiṙoonyi kya Mndumii na kyiṙoonyi kya waṟufui wa Satana-pfo. 22 Ang'u lokusaṟa loiṙima imina Ruwa lulechiolotsio ngapo? Ngyesa luwoṙe pfinya kuta oe? 23 Kuwoṙe momu o wuta kyindo kyoose, indi chi shoose shiwoṙe kyiira-pfo. Kuwoṙe momu o wuta kyindo kyoose, indi chi shoose shekyetarama siṟi-pfo. 24 Mndu alapfule kyiira kyakye amonyi, indi kyiira kya oṙoe. 25 Orio kyindo kyekyekumbo sangaṙa lyenyi kulawoṙe iwesa-wesa; maa mulaikulyisa wukyiwa mrimenyi kui ikusaṟa nyi kyiha kyii kyicha na nyi kyiha kyii kyiwicho. 26 Kyipfa, “Wuyana nyi isaa lya Mndumii na shoose shikyeri pfo.” 27 Na mndu alaiṙikyie Ruwa kakunda muyende kanyi kokye, na nyoe mukokunda iyenda, lyenyi orio kyindo moenengo kulawoṙe iwesa-awesa; maa mulaikulyisa wukyiwa mrimenyi kui ikusaṟa nyi kyiha kyii kyicha na nyi kyiha kyii kyiwicho. 28 Kyaindi mndu kammbia, “Kyindo-kyi kyawuto kyiwe kyiṙaso,” maa mulalye, kyipfa kya ulya ammbia na kyipfa kya makusaṟo ga mrimenyi, nyi kyiha kyii kyicha na nyi kyiha kyii kyiwicho; 29 chi kyipfa kyapfo-pfo indi kyipfa kya icho ungyi ammbia mbonyi-tso. Kyipfa kulya inyi iwa mndu alamchilyie nyi kyindo kulaanduyo nyi makusaṟo ga mndu kye nyi kyiha kyii kyicha na nyi kyiha kyii kyiwicho. Chi kyipfa kyapfo-pfo indi kyipfa kya ulya ungyi ammbia mbonyi-tso. Kyipfa kulya inyi iwa mndu alamchilyie nyi kyindo kuleanduyo nyi makusaṟo ga mndu kye nyi kyiha kyii kyicha na nyi kyiha kyii kyiwicho. 30 Kokooya inyi ngawona kyitumbuṟe kyako kya isaṟia, kyitewe ngyilahiyo ny'kyi? 31 Kyasia, kyiyeri muilya, ang'u muinyo, ang'u muiwuta kyindo kyoose, wutenyi kuṙo kui ienenga Ruwa kyiṟumi. 32 Maa mulatewe Wayuda maa Wakyiṟikyi maa siṟi ya Ruwa wawute kyindo kyiwicho. 33 Nyi wuṙo chandu inyi ngyekyechihiṟa wandu woose shindonyi shoose, ngyilalepfula kyiira kyako ngyimonyi, indi kyiira kya wandu wafoi, kundu wakyiṟo.
1 Ngyioshenyi chandu na inyi ngyekyeosha Kristo. 2 Kyasia ngyimuiring'isha nyoe, cha kyipfa mulengyikumbuo shindonyi shoose, na nyoe muleosha shilya muleambilyia ko waku wanyu wuṙo chandu ngyilemuenengyia shilya ngyileambilyia. 3 Kyaindi ngyikundi mumanye kye msongoru o mndu msoṟo nyi Kristo, na msongoru o mndu mka nyi mndu msoṟo, na msongoru o Kristo nyi Ruwa. 4 Orio mndu msoṟo kyiyeri aiterewa Ruwa, ang'u kyiyeri aiṙeṙa mbele ya wandu, na oe namshikyie mṙoe, nairiisa mṟoe okye sonu. 5 Indi orio mndu mka kyiyeri aiterewa Ruwa, ang'u kyiyeri aiṙeṙa mbele ya wandu, mṙoe okye ulamshikyie, nairiisa mṙoe okye sonu; cha kyipfa nyi kyimwi na ulya ammbute njui. 6 Kyipfa mndu mka alandeshikyio nawuto njui. Ang'u kokooya nyi sonu mndu mka iwuto njui tsakye ang'u iṟemo nashikyio. 7 Kyipfa loi mndu msoṟo awaṟi ishikyio mṙoe-pfo, kyipfa oe nyi mfano o mng'ano o Ruwa. Kyaindi mndu mka nyi mng'ano o mndu msoṟo. 8 Kyipfa mndu msoṟo alewuto ko mndu mka chandu mndu mka alewuto ko mndu msoṟo-pfo. 9 Maa mndu msoṟo alegumbo kyipfa kya mndu mka chandu mndu mka alegumbo kyipfa kya mndu msoṟo-pfo. 10 Kyipfa kya ikyo mndu mka nawaṟi ishikyia mṙoe okye iloṟa kye namwenengye momu o wuta shilya malaika wekyeambuya. 11 Kyaindi kyiiṙi kya Mndumii kuwoṙe mndu mka kulawoṙe mndu msoṟo-pfo; maa kuwoṙe mndu msoṟo kulawoṙe mndu mka-pfo. 12 Kyipfa chandu mndu mka alewuka ko mndu msoṟo, na wuṟo mndu msoṟo na oe nekyefeo nyi mndu mka; na shindo shoose shiwukyie ko Ruwa. Anduyenyi nyoe muwenyi mrimenyi konyu. 13 Ngyesa kyichihiṟie mndu mka naterewe Ruwa mṙoe okye ulamshikyie? 14 Ngyesa chandu mndu amugumbe kyimlosha kye mndu msoṟo kawaṙa njui tsileshi nyi sonu kokye-pfoe? 15 Kyaindi mndu mka kawaṙa njui tsileshi nyi kyiṟumi kokye. Cha kyipfa namwenengye njui-tso tsileshi kundu tsikae handu ha nguwo. 16 Kyaindi mndu oose kakunda iende wuṟiingyi, soe luwoṙe mkaṟo cha iyo-pfo, maa siṟi tsa Ruwa. 17 Kyaindi kyiiṙi kya immbia ishi, ngyimuiṟing'isha nyoe-pfo, kyipfa kyiyeri-kyo mokyesanzia handu hamwi mokyewuta kuṙo kyipfa kya wucha-pfo indi kyipfa kya wuwicho. 18 Cha kyipfa kuwooka kyiyeri mokyesanzia handu hamwi cha siṟi ngyiichuoe kye mukyeri kyindo kyimwi-pfo; na inyi ngyiiṙikyie ikyo piu-pfo; 19 cha kyipfa kyiwaṟi konyu kuwaṙe iṙeṙa wongo; kundu walya wawalage loi wamanyikye konyu. 20 Kyasia kyiyeri mosanzia handu hamwi moiṙima ilya kyilaayo kya Mndumii-pfo; 21 cha kyipfa orio umwi nekyesonguo iwuta kyelya kyakye kyiiṙi kya ilya-lyo; mṟasa kyikawa ichu nawoṙo nyi njaa na ichu namnanzi. 22 Ngyesa muwoṙe numba yelyiia kyelya kya Mndumii na yenyooya shindo shenanza-pfoe? Ang'u mumina Siṟi ya Mndumii, na iriisa sonu iwo walawoṙe kyindo? Ngyimmbie? Ngyimuiring'ishe nyoe? Ote! Ngyimuiring'isha kyipfa kya isho-pfo. 23 Cha kyipfa inyi ngyileambilyia ko Mndumii shilya ngyilemuenenga nyoe. Kye Mndumii Yesu kyio kyilya aleṟiingo naleira mkate, 24 na oe amwane Ruwa kaupeṟenguo, kagamba, “Ichu nyi mmbiu oko ummbute kyipfa kyanyu; wutenyi kuṙi kui ingyikumbuo inyi.” 25 Na wuṙo numa ya ilya kaira kyiṙoo, echigamba, “Kyiṙoo-kyi nyi mma mhya samunyi yako; wutenyi kuṙi orio kyiyeri muinyo, kui ingyikumbuo.” 26 Kyipfa orio kyiyeri muilya mkate-chu na inyo iwuka kunu kyiṙoonyi, muonguo mbonyi tsa upfu lo Mndumii mṟasa kyiyeri echicha. 27 Kyasia orio mndu alawaṟi alya mkate-cho, ang'u inyo iwuka ipfo kyiṙoonyi kya Mndumii, nalahia Ruwa ko mbonyi tsa upfu lo Yesu msalabenyi. 28 Kyaindi mndu nakuwese mrimenyi kokye kokooya mbonyi tsikyeri necha, naaho nalye mkate na inyo iwuka kyiṙoonyi. 29 Kyipfa alya na inyo, nekyelya na inyo ianduyo lya mrima okye, kokooya alemo imanya mmbiu o Mndumii nyi kyikyi. 30 Kyipfa kya ikyo kuwoṙe wandu wafoi konyu waluoe na wafafa, na waata walempfa. 31 Kyipfa kokooya loambuya kuwooka kyilya kyikyeri mrimenyi koṙu kuwoṙe kyindo kyeiṙima iluenenga ianduyo kyiyeri-kyo luilya Kyilaayo kya Mndumii-pfo. 32 Indi kyiyeri loanduyo, lotoṟisho nyi Mndumii, kundu nyashi ya Ruwa wawaṟi wandu wa wuyana ilacheluolokyia. 33 Koikyo, wana wa wama wako, kyiyeri mosanzia handu hamwi muiṙime ilya, muweṙane. 34 Mndu kawoṙo nyi njaa, nalye kanyi kokye; kundu kyiyeri-kyo mosanzia handu hamwi mulachewuta shindo shechienenga Ruwa imuolotsia ngapo yakye. Na isho shatsugaa ngyechishiachikyia kyiyeri-kyo ngyechicha.
1 Kyasia, wana wa wama wako, ko mbonyi tsa shisumbo sha mrimenyi, ngyikundi muṙe mulamanya-pfo. 2 Muichi kye kyiyeri muwei wandu walaiṙikyie Yesu, muwekyeosha mafano galekyeṙeṙa, chandu muwekyesongoyo nyi makusaṟo ganyu. 3 Koikyo ngammbia kye kuwoṙe mndu ekyeṙeṙa Mumuyonyi o Ruwa igamba, “Yesu namsese,” maa mndu eiṙima igamba, “Yesu nyi Mndumii,” sile Mumuyonyi Mweele-pfo. 4 Kyasia kuwoṙe mbaṟe tsifoi tsa shisumbo indi Mumuyo nyi ulya ulya. 5 Lyingyi-se kuwoṙe mbaṟe tsifoi tsa maṟunda, na Mndumii nyi ulya ulya. 6 Naaho-ng'u kuwoṙe mbaṟe tsifoi tseṟunda, indi Ruwa nyi ulya ulya ekyeṟunda maṟunda goose kyiiṙi kya woose. 7 Kyaindi orio mndu nekyeenengo nyi Ruwa imanya kye Mumuyo nakyeri ho, kui ienengana kyiira. 8 Kyipfa mndu umwi kui Mumuyo namwenengye wunyotsu; na ungyi iṙeṙa kui wuṟango chandu Mumuyo ulya ulya akundi. 9 Ungyi iiṙikyia Mumuyonyi ulya ulya; na ungyi shisumbo shekyiṟa waluoe Mumuyonyi ulya umwi. 10 Na ungyi mawuto ya maṟiyisho; na ungyi ionguo shisuku na ungyi wuiṙimi wo manya nyi shisumbo shiha shiwukyie ko Mumuyo na nyi shiha shilawukyie ko Mumuyo; ungyi mbaṟe tsa mṙeṙie wandu walaiichi; na ungyi itambaluo mṙeṙie wandu walaiichi. 11 Kyaindi maṟunda-ga goose gekyeṟundo nyi Mumuyo-cho umwi, ulya ekyegawia orio mndu chandu akundi oe. 12 Chandu mmbiu ukyeri umwi, nacho uwoṙe shiwungo shifoi, na shiwungo shoose sha mmbiu-cho, maa chandu shifoi, nyi mmbiu umwi, nyi wuṙo na Kristo. 13 Cha Kyipfa Mumuyonyi umwi soe loose lulepatiso iwa mmbiu umwi. Kye lui Wayuda, ang'u kye lui Wakyiṟikyi; kokooya lui watumo ang'u wandu lulawachilyie nyi mndu; na soe loose luleletsio Mumuyo umwi. 14 Cha kyipfa mmbiu chi kyiwungo kyimwi-pfo, indi nyi shifoi. 15 Kuṙende kukogamba, “Kyipfa inyi ngyilai kuwoko, inyi chi o mmbiu-pfo;” ngyesa kuṙende-ko koṙa iwa kyiwungo kya mmbiu kyipfa kya ikyo-ng'ue? 16 Na kuṙwi kukogamba, “Kyipfa inyi ngyilai riso, inyi chi o mmbiu-pfo;” ngyesa kuṙwi-ko koṙa iwa kyiwungo kya mmbiu kyipfa kya ikyo-ng'ue? 17 Kokooya mmbiu oose owa riso, ny'kyikyi kyeaṙanyia? Kokooya mmbiu oose owa kuṙwi ny'kyikyi kyepfaamiṟa? 18 Indi Ruwa nawikyie shiwungo orio kyimwi mmbiunyi chandu alekunda. 19 Kyaindi kokooya shiwungo shoose shiwei kyiwungo kyimwi, mmbiu uwekaa kwi? 20 Kyaindi wulalu shiwungo nyi shifoi, indi mmbiu nyi umwi. 21 Na riso lyeiṙima iwia kuwoko, “Ungyiwoṙie kyiiṙa-pfo;” maa lyingyi-se mṙoe oiṙima iwia maṙende, “Mungyiwoṙie kyiira-pfo.” 22 Indi ngoseṟa mnu shiwungo shilya sha mmbiu shekyekusaṟo kye shishifofo mnu shiwoṙe kyiira ngoseṟa. 23 Na shiwungo shilya sha mmbiu shekyekusaṟo kye nyi sha wusutsu, shiwungo-sho lokyeshienenga mng'ano ngoseṟa; na shiwungo shaṙu shilawoṙe wucha nyi shiwoṙe wucha ngoseṟa mnu. 24 Cha kyipfa shiwungo shaṙu shiwoṙe wucha shiwoṙe kyiira-pfo; indi Ruwa nagumbie mmbiu, na ienenga mng'ano ngoseṟa kyiwungo kyilakyicha, 25 kundu mmbiu ulaṙe iwa kyindo kyimwi, indi shiwungo shitaramane, orio kyiwungo na oṙoe. 26 Na kyiwungo kyimwi kyikawawio, shiwungo shoose shekyewawio hamwi nakyo; na kyiwungo kyimwi kyikang'anyiso, shiwungo shoose shekyechihiyo hamwi nakyo. 27 Kyasia nyoe mowa mmbiu o Kristo, na shiwungo orio kyimwi handu hakyo. 28 Na Ruwa nawikyie wengyi Siṟinyi, wa kuwooka wasu, wa kawi weonguo shisuku, wa kaṟaaṟu walosha; numa ya iho shindo sheṟiyisha, shisumbo sha ikyiṟa waluoe, na itaramana, na wusongoru, na mbaṟe tsa iṙeṙa mṙeṙie wandu walaiichi. 29 Ngyesa woose nyi wasu? Woose nyi weonguo shisuku? Woose nyi walosha? Woose wekyewuta shindo sheṟiyisha? 30 Woose wawoṙe shisumbo shekyiṟa waluoe? Woose wekyeṙeṙa mṙeṙie wandu walaiichi? Woose wekyetambuluo mṙeṙie wandu walaiichi? 31 Kundenyi mnu mrimenyi konyu iwona shisumbo shicha kuta isho. Maa kuṙo ngyimuloṟa nyoe njia ngyicha.
1 Ngaṙeṙa kui mṙeṙie ya wandu na ya malaika, kokooya ngyilawoṙe ikunda, ngawa cha menya iwuta ṟui na mmanga uiṙeṙa. 2 Lyingyi-se ngaiṙima ionguo shisuku na imanya shiṟika shoose na wuṟango woose; ngawaṙa iiṙikyia lying'anyi ngaiṙima maa isamiṟa fumvu, kokooya ngyilawoṙe ikunda, inyi chi kyindo-pfo. 3 Lyingyi-se ngawuta masaa gako goose iigutsa wakyiwa; lyingyi-se ngaenengyia mmbiu oko ukoṟo nyi moṙo, kokooya ngyilawoṙe ikunda, ngyeiria ho kyindo-pfo. 4 Ikunda lyekyekarishia, lyekyesaṟia. Ikunda lyiwoṙe wunyeng'i-pfo. Ikunda lyekyekutuuta maa lyekyekushela-pfo. 5 Lyekyeṙa iwaṙa wupfereri-pfo; lyekyepfula shindo shalyo lyimonyi-pfo; lyiwoṙe isuo-pfo; lyekyetala mawicho-pfo. 6 Lyekyechihiyo kyipfa kya wuwicho-pfo, indi lyekyechihiyo hamwi na wuloi. 7 Lyekyekarishia shoose; lyekyeiṙikyia shoose; lyiwoṙe ikusuria; lyekyekarishia shoose. 8 Ikunda lyekyekaa mlungana; indi kuwoṙe ionguo shisuku ionguo-lyo lyechiiṙa. Kukowaṙa iṙeṙa mṙeṙie wandu walaiichi mṙeṙie-yo yechisia. Kukowaṙa ngyuuṟango, tsechisia. 9 Cha kyipfa lokyemanya mbashu-mbashu; na lokyeonguo shisuku mbashu-mbashu; 10 kyaindi kyiyeri-kyo kyilya kyilakyeri mti kyechicha, kyilya kyii mbashu-mbashu kyechisia. 11 Kyiyeri ngyiwei mana mnangu, ngyileṙeṙa cha mana mnangu, ngyilemanya cha mana mnangu, ngyilekusaṟa cha mana mnangu. Wookyia kyiyeri ngyilewa mndu apfulukyie, ngyileṙa shindo shilya sha wututu. 12 Kyipfa kyiyeri kya wulalu luwonyi kui kyiyewo cha maushe-ushe. Kyiyeri kyilya lochiwona ushangu kui ushangu. Kyiyeri kya wulalu ngyiichi mbashu-mbashu. Kyiyeri kyilya ngyechimanya mnu chandu inyi ngyiichio mnu. 13 Kyasia, wulalu hatsugaa iiṙikyia, ikusuria na ikunda; ishi shiṟaaṟu, na kyiiṙi kya isho kying'anyi kuta shoose nyi ikunda.
1 Pfulenyi ikunda, na ikunda mnu iwona shisumbo sha mrimenyi, kyaindi ngoseṟa muiṙime ienengo kyisumbo kyeonguo shisuku. 2 Cha kyipfa ulya ekyeṙeṙa kui mṙeṙie wandu walaiichi, ekyeṙeṙa na wandu-pfo, indi nekyeṙeṙa na Ruwa. Kyipfa kuwoṙe ekyemanya-pfo; kyaindi naṙeṙa mbonyi tsa shiṟika mrimenyi kokye. 3 Indi ulya ekyeonguo shisuku, naṙeṙa na wandu mbonyi tsewatarama, na iwawiyiṟia moo, na iwakarisha. 4 Ulya ekyeṙeṙa kui mṙeṙie wandu walaiichi nekyekarisha iiṙikyia lyakye amonyi; indi ekyeonguo shisuku nekyetarama siṟi. 5 Na inyi ngyikundi nyoe moose muṙeṙe kui mṙeṙie wandu walaiichi, kyaindi ngoseṟa muiṙime ionguo shisuku; kyipfa ulya ekyeonguo shisuku nang'anyi kuta ulya ekyeṙeṙa kui mṙeṙie wandu walaiichi, sile kokooya nekyetambuluo, kundu siṟi iiṙime itaramika. 6 Indi wulalu, wana wa wama, ngacha na konyu na iṙeṙa kui mṙeṙie wandu walaiichi, ngyemtarama kyi, sile kokooya ngyiṙeṙa na nyoe kui njia ya itambuluo, ang'u kui njia ya wuṟango, ang'u kui njia ya ionguo shisuku, ang'u kui njia ya malosho? 7 Maa shindo shilawoṙe moo kyiyeri shekyewuta ṟui, kokooya nyi mtoṟiṟo, kokooya nyi kyinubi, shikawuta maṟui gafananyi kyemanyika kuṙa kyiimbo kyiimbo kui mtoṟiṟo ang'u kui kyinubi? 8 Cha kyipfa iraa lyikawuta ṟui lyilamanyikyie, nyi wui echikuloṟa kye nakuṟeyeṟie ikapana shiṙa? 9 Na wuṙo nyoe, mulandeṙeṙe kyindo kyilawoṙe wuṟikyi, kyindo-kyo kyiṙeṙa kyemanyika kuṙa? Kyipfa mowa muiṙeṙa wulya tupu. 10 Loi kuwoṙe maṟui ga mbaṟe tsifoi wuyanenyi, maa kuwoṙe maa lyimwi lyilawoṙe kyindo lyikundi igamba-pfo. 11 Kyasia ngyilandemanye kyindo ṟui lyilya lyigamba ngyewa cha tondo ko ulya aiṙeṙa; na ulya aiṙeṙa newa tondo koko. 12 Nyi wuṙo na nyoe, kyipfa mulangyie mnu iwa wandu wawoṙe shisumbo sha mrima, kundenyi kye muengyeṟe mnu iwaṙa shisumbo-sho kundu siṟi itaramikye. 13 Kyipfa kya ikyo ulya ekyeṙeṙa kui mṙeṙie wandu walaiichi naterewe ienengo wuiṙimi wo itambuluo. 14 Kyipfa ngaterewa Ruwa kui mṙeṙie wandu walaiichi, mrima oko okyeterewa, kyaindi wuṟango woko wuwoṙe ndunda-pfo. 15 Kyasia kyawa-ng'u kuṙa? Ngyechiterewa kui mrima, lyingyi-se ngyeterewa kui wuṟango taa. Ngyechiimba kui mrima, lyingyi-se ngyechiimba kui wuṟango taa. 16 Cha kyipfa iyoe kowikyia mboṟa kui mrima, ulya aṙamie handu ha tondo nechiiṙikyia kuṙa, “Amen,” numa ya iana lyapfo, alaichi isho ugamba? 17 Kyipfa nyi loi, iyoe nuana necha, indi ulya ungyi aitaramika-pfo. 18 Ngyiana Ruwa kye ngyiṙeṙa kui mṙeṙie wandu walaiichi kuta nyoe moose. 19 Kyaindi siṟinyi ngyikundi iṙeṙa maṙeṙo gataanu kui wuṟango woko, ngyiiṙime ilosha wengyi, ngoseṟa ya iṙeṙa maṙeṙo shiku ikumi kui mṙeṙie wandu walaiichi. 20 Wana wa wama wako, wuṟango wonyu wulawe cha wo wana watutu; kyaindi ko mbonyi tsa wuwicho wenyi cha wana wanangu, indi wuṟango wonyu wuwe cha wo wandu wapfulukyie. 21 Kyikyiṟeie uwawasonyi, “Ngyechiṙeṙa na wandu-wa kui wandu wa mṙeṙie ingyi, na kui maṙumbu ga wayenu, maa kuṙo wechingyiaṙanyia-pfo, Ruwa nagamba.” 22 Kyasia, mṙeṙie-i nyi kyiṟingyishio, chi ko walya waiṙikyie-pfo, indi ko walya walaiṙikyie. Kyaindi ionguo shisuku chi kyipfa kya walya walaiṙikyie-pfo, indi kyipfa kya walya waiṙikyie. 23 Kokooya siṟi yoose isanzie handu hamwi, na wandu woose waṙeṙe kui mṙeṙie wandu walaiichi naaho kukocha wandu walaiṙikyie na matondo, ngyesa wechigamba kye muwasuko-pfoe? 24 Kyaindi woose wakaonguo shisuku, na mndu alaiṙikyie, ang'u mtondo kacha, kyilya kyigambo kyechimloṟa wunyamaṟi wokye, na nechianduyo nyi walya aichuoe weonguo shisuku. 25 Shiṟika sha mrima okye shechimanyika; na kuṙo nechiterewa na iana Ruwa, echioloka na ndewu, na igamba kye Ruwa nakyeri konyu loi. 26 Kyasia, wana wa wama, kyawa kuṙa? Kyiyeri-kyo mosanzia handu hamwi, orio umwi nawoṙe Kyiimbo, nawoṙe malosho, nawoṙe kyindo Ruwa amshukuya, nawoṙe mṙeṙie wandu walaiichi, nawoṙe itambuluo mṙeṙie iya wandu walaiichi. Shindo shoose shiwutikye kui kyimaṙuma kya ikarisha iiṙikyia. 27 Kokooya mndu aiṙeṙa kui mṙeṙie wandu walaiichi, waṙeṙe wandu wawi ang'u waṟaaṟu, chi ngoseṟa ya iho-pfo. Lyingyi-se orio mndu naṙeṙe kyiyeri kyakye, na umwi natambuluo. 28 Kyaindi kokooya kulawoṙe motambuluo, mndu natsie alaṙeṙe siṟinyi, naṙeṙe na mrima okye; lyingyi-se na Ruwa. 29 Na weonguo shisuku waṙeṙe wawi, ang'u waṟaaṟu, na wengyi watambuluo. 30 Kyaindi ungyi aṙamie kashukuyo kyindo, ulya o kuwooka natsie. 31 Cha kyipfa nyoe moose moiṙima ionguo shisuku umwi umwi, kundu woose waiṙime ikulosha, na woose wawiyiṟio moo. 32 Na mumuyo ya weonguo shisuku yekyeindia weonguo shisuku. 33 Cha kyipfa Ruwa chi Ruwa o kyituṟu na ngapano-pfo indi o ufoṟo; wuṙo chandu kyiwaṟi iwa siṟinyi tsa wandu wa Ruwa. 34 Waka watsie siṟinyi; kyipfa wawoṙe momu o ṙeṙa-pfo; indi waindie, chandu uwawaso logamba. 35 Nawo wakakunda ikulosha kyindo kyoose, wawese wamii wawo kanyi kowo; kyipfa nyi sonu mndu mka iṙeṙa siṟinyi. 36 Ang'u, ngyesa Ṙeṙo lya Ruwa lyilewuka konyu ang'u icha na konyu nyoe muwenyi? 37 Mndu kakuwona kye oe nyi moonguo shisuku ang'u mndu o kyimrima, namanye isho ngamuṟeia, kye nyi mawawaso ga Mndumii. 38 Kyaindi mndu kawa tondo, na nawe tondo. 39 Kyipfa kya ikyo, wana wa wama, kundenyi mnu ienengo ionguo shisuku, maa mulashingyie iṙeṙa kui mṙeṙie wandu walaiichi. 40 Kyaindi shindo shoose shiwutikye kui wucha na kui wuyendelyi.
1 Kyasia, wana wa wama wako, ngamukumbuṟa mbonyi tsa Ndumi Ngyicha ngyilemuongoya; iya muleiambilyia, na kyiiṙi kyayo mugoṟokyi; 2 na kui yo muikyiṟo; kokooya muiosha mbonyi tsilya ngyilemuongoya; sile kokooya muleiṙikyia kya wulya. 3 Cha kyipfa ngyilemuenenga iho mawookyionyi shilya ngyileambilyia inyi ngyimonyi, kye Kristo nalepfa kyipfa kya ngyuunyamaṟi tsaṙu, chandu shiṟeio shiele shagamba. 4 Na kye naleṟiko; na kye naleṟuka mfiri o kaṟaaṟu, chandu shiṟeio shiele shagamba. 5 Na kye nalewonekyia Kyefa; lyingyi-se na walya ikumi na wawi. 6 Numa ya iho nalewonekyia wandu wekyeosha Yesu ngoseṟa ya magana gataanu; na kyiiṙi kya iwo wafoi wai na moo mṟasa wulalu; indi waata walempfa. 7 Numa ya iho kachia Yakobo; lyingyi-se na wasu woose. 8 Na mafurumionyi ga wandu woose nalengyichia inyi, cha mndu alefeo kyilakyeri kyiyeri kyakye. 9 Kyipfa inyi ngyimtutu kuta wasu woose, ngyilawaṟi ilago msu, cha kyipfa ngyilelyisa Siṟi ya Ruwa wukyiwa. 10 Kyaindi kui isaṟia lya Ruwa ngawa kuṙi chandu ngyikyeri; na isaṟia lyikyeri koko chi wulya-pfo, indi ngyileengyeṟa mnu iṟunda kuta wo woose; maa chi inyi-pfo, indi nyi isaṟia lya Ruwa hamwi na inyi. 11 Kyasia, kokooya nyi inyi, kokooya nyi walya, nyi wuṙo lokyeonguo mbonyi, na nyi wuṙo muleiṙikyia. 12 Kyasia, kokooya mbonyi tsa Kristo tsigambo kye naleṟuka ko wapfu, ny'kyilyi wandu waata kyiiṙi kyanyu waigamba kye kuwoṙe iṟutso lya wapfu-pfo. 13 Kyaindi kokooya kulawoṙe iṟutso lya wapfu, Kristo na oe aleṟuka-pfo. 14 Lyingyi-se kokooya Kristo alaleṟuka, kyasia ionguo mbonyi lyaṙu nyi wulya na iiṙikyia lyanyu nyi wulya. 15 Yee, na soe lowa cha waṟingyishi wa wongo wa Ruwa; cha kyipfa luleṟingyishia kye Ruwa naleṟutsa Kristo, ulya alalemṟutsa, kokooya wapfu walekyeṟutso. 16 Kyipfa kokooya wapfu walekyeṟutso, Kristo na oe aleṟuka-pfo. 17 Na kokooya Kristo alaleṟuka, iiṙikyia lyanyu nyi lya wulya; muwekyeri ngyuunyamaṟinyi tsanyu. 18 Na iho walya walepfa waiṙikyie Kristo waleṙeka. 19 Kokooya nyi kyiiṙi kya moo-chu tikyi lulekusuria Kristo, soe nyi wakyiwa kuta wandu woose. 20 Kyaindi wulalu Kristo naṟuka ko wapfu, iloṟa na pata kye na wuṙo Ruwa echiṟutsa walya wapfiie. 21 Kyipfa kokooya upfu luleendo nyi mndu, na wuṙo iṟutso lya wapfu lyileendo nyi mndu. 22 Cha kyipfa kyiiṙi kya Adamu woose wekyepfa, na wuṙo kyiiṙi kya Kristo woose wechienengo moo. 23 Kyaindi orio umwi handu hakye; o kuwooka iṟuka ko wapfu nyi Kristo; numa walya wakyeri wa Kristo, kyiyeri echicha. 24 Iho nyiho mafurumionyi, kyiyeri echienenga Ruwa Awu Wumangyi wokye; kyiyeri echiwinga pfinya tsa mumuyo yekyechilyia wuyana. 25 Cha kyipfa kyiwaṟi nachilyie oe, mṟasa nawingye washituwa woose. 26 Mokyituwa o mafurumionyi echiwingo nyi upfu. 27 Chandu shiṟeio shiele shagamba, “Nalewika shindo shoose wanda ya wuchilyi wokye.” Kyaindi kyiyeri echigamba, “Shindo shoose shawingo,” nyi kyindo kyii na pata kye ulya alemmbingyia shindo shoose akyeri ho-pfo. 28 Kyasia, shindo shoose shikammbingo na iwiko wanda yakye, nyi lyo-ndu Mana o Adamu amonyi na oe echiwiko wanda ya ulya alewika shindo shoose wanda yakye, kundu Ruwa nawe shoose kyiiṙi kya shoose. 29 Ang'u ngyesa walya wekyepatiso kyipfa kya wapfu wewika kuṙa? Kokooya wapfu walekyeṟutso maa ale, kyitewe kyepatiso kyipfa kyawo nyi kyikyi? 30 Na soe kyitewe lukyeri ngataṟenyi orio saa ny'kyi? 31 Yee, wana wa wama, ikushela-lyi lyako ngyikyeri nalyo kyipfa kyanyu kyiiṙi kya Kristo Yesu Mndumii oṙu, ngyekyepfa orio mfiri. 32 Kokooya, kui mboṟa ya kyimndu, kulya Efeso ngyilekapana na wandu wawicho cha mando ga saka, ngyiwoṙe kyiiṙa kyiha? Wapfu walandeṟutso, lulye na inyo, kyipfa ngama lochipfa. 33 Maa mulalembo nyi wandu. Wandu wawicho wekyenyamaṟa mkaṟo mcha. 34 Ambuyenyi necha; maa mulawute kya wunyamaṟi; cha kyipfa wengyi waichi Ruwa-pfo. Ngyigamba isho kundu ngyimuriise sonu. 35 Kyaindi kofia mndu negamba, “Wapfu wekyeṟutso kuṙa? Nawo wekyecha na mmbiu uha?” 36 Iyoe tondo! Kyilya okyeṙonga kyekyewaṙa moo kyilandepfe-pfo. 37 Na kyilya okyekyiṙonga, okyeṙonga mmbiu ulya uicha-pfo, indi nokyeṟonga mbeu tikyi, kokooya nyi ya nganu ang'u ingyi; 38 kyaindi Ruwa nekyeienenga mmbiu chandu akundi, na orio mbeu mmbiu oyo. 39 Mmbiu yoose chi mmbiu umwi-pfo; indi mmbiu ingyi nyi ya wandu, ingyi nyi ya mando ga saka, ingyi nyi ya shileye, ingyi ya makunga. 40 Lyingyi-se kuwoṙe mmbiu ya ruwewu, na mmbiu ya wuyanenyi; kyaindi mng'ano o iya ya ruwewu wufananyi na mng'ano o iya ya wuyanenyi-pfo. 41 Kuwoṙe mng'ano o mnengyeṟi, na mng'ano o mori, na mng'ano ungyi o nyenyeri; kyipfa mng'ano o nyenyeri imwi na ingyi ufananyi-pfo. 42 Na wuṙo na iṟutso lya wapfu. Kyekyeṙongo kyinyamaṟikyie, kyekyeṟutso kyilanyamaṟikyie. 43 Kyekyeṙongo sonunyi, kyekyeṟutso mng'anonyi. Kyekyeṙongo wufafenyi, kyekyeṟutso pfinyenyi. 44 Kyekyeṙongo mmbiu o teri, kyekyeṟutso mmbiu o mumuyo. Kokooya kuwoṙe mmbiu o teri, na o mumuyo taa ukyeri pfo. 45 Nyi wuṙo kyikyiṟeie, “Mndu o kuwooka, Adamu, nalewa kyindo kyiwoṙe moo, Adamu o mafurumionyi nyi mumuyo okyeende moo.” 46 Kyaindi okyesongoya ulya o mumuyo-pfo, indi ulya o teri; numa ya iho okyecha ulya o mumuyo. 47 Mndu o kuwooka nalewuka urukyenyi, nyi o teri. Mndu o kawi nalewuka ruwewu. 48 Chandu akyeri ulya o teri, nyi wuṙo wakyeri walya wa teri; na chandu akyeri ulya o ruwewu, nyi wuṙo wakyeri walya wa ruwewu. 49 Na chandu luleṙuo fana yakye ulya o teri, na wuṙo lochiṙuo fana yakye ulya akyeri o ruwewu. 50 Wana wa wama wako, shindo ngyigamba nyi ishi, kye mmbiu na samu sheiṙima ioṟa Wumangyi wo Ruwa-pfo. Maa kyindo kyinyamaṟikyie ioṟa kyindo kyilanyamaṟikyie-pfo. 51 Ngammbia kui kyiṟika; lochipfa loose-pfo, kyaindi loose lochiilachika, 52 na cha mndu akyema, kyiyeri kya iraa lya mafurumionyi; kyipfa iganda lyechikapo, na wapfu wechiṟutso, walanyamaṟikye, na soe lochiilachika. 53 Kyipfa kyiwaṟi mmbiu-chu okyenyamaṟika ulanyamaṟikye, na ichu okyepfa ulapfe. 54 Kyasia kyiyeri mmbiu-chu okyenyamaṟika ulechinyamaṟika, na mmbiu-chu okyepfa ulechipfa, nyi lyo-ndu kyeafukyia kyindo kyilya kyikyiṟeie, “Upfu lulemeṟo kui iwinga. 55 Iwinga lyapfo nyi kwi lyikyeri iyoe upfu? Iwawio lyapfo nyi kwi lyikyeri, iyoe upfu? 56 Iwawio lya upfu nyi wunyamaṟi, na pfinya ya wunyamaṟi nyi uwawaso.” 57 Kyaindi Ruwa naano, ekyeluenenga iwinga kui Mndumii oṙu Yesu Kristo. 58 Kyasia, wana wa wama wakunde, kuwanzenyi, mulalolome, muengyeṟe mnu iṟundia Mndumii mfiri yoose, cha kyipfa muichi kye iṟunda lyanyu chi wulya kyiiṙi kya Mndumii-pfo.
1 Ko mbonyi tsa isania heleri tsetarama wandu wa Ruwa walya waiṙikyie Yesu, chandu ngyilewia siṟi tsa Galatia, na nyoe wutenyi kuṙo. 2 Orio mfiri o Ruwa orio mndu konyu nakoome kyiseyesoe, iṙuana na chandu awona; kundu heleri-tso tsilasanio kyiyeri ngyechicha. 3 Na inyi ilyi ngyeafukyia ngyeṙuma walya mochiwasambuṟa waṙuṙe paruo, waṙuo Yerusalemu heleri tsilya mosania. 4 Na kyikachia na inyi ngyiyende, wechiyenda na inyi. 5 Kyaindi ngyechicha na konyu, ngamuiṙia uruka lo Makyedonia; kyipfa ngyiiṙia Makyedonia. 6 Kofia ngyechikaa konyu. Yee, kofia kyiyeri kyoose kya mbeho, muiṙime ingyiṙuo kundu koose ngyechiyenda. 7 Kyipfa ngyikundi iwonana na nyoe wulalu-pfo, nyi ikuiṙia tupu, cha kyipfa ngyikusaṟie ikaa konyu kyiyeri kyitutu, Mndumii kangyienenga wuiṙimi wo wuta kuṙo. 8 Kyaindi ngyechikaa Efeso mṟasa kyiyeri kya Pentekoste; 9 cha kyipfa ngaenengo ṙaawa lying'anyi na lyicha mnu, na kuwoṙe wengyi waiwingana na inyi. 10 Kyaindi Timoteo kacha, nakae konyu kulawoṙe wuowu; kyipfa naiṟundia Mndumii cha inyi ngyimonyi. 11 Kyasia mndu oose alammine, kyaindi muimienyi kui ufoṟo, kundu nache na koko; kyipfa ngyimmbeṙelyia nawuye hamwi na wana wa wama waṙu. 12 Kyaindi ko mbonyi tsa Apolo, mono-wama oṙu, ngyilemterewa mnu nayende konyu hamwi na wana wa wama-wo waṙu; ulya kyilakyeri makusaṟo gakye iyenda wulalu; indi nechicha ilyi ewona ṙaawa. 13 Laenyi kyiṙombo, mulalolome Iiṙikyienyi, waṙenyi wukari wo kyisoṟo; muwaṙe wuṟango. 14 Shindo shanyu shoose shiwutikye ikundenyi. 15 Lyingyi-se, wana wa wama, ngamterewa; (muichi wandu wa kanyi ko Stefana kye nyi wandu wa kuwooka kulya Akaya walegalutso wakaiṙikyia Yesu. Wandu-wa wakuwikyie nakamwi iṟundenyi lyetarama wandu wa Ruwa.) 16 Indienyi wandu cha iwo, na orio mndu ekyeṟunda na ikulyisa wukyiwa hamwi nawo. 17 Na inyi ngachihiyo kyipfa kya icha lya Stefana na Foritunato na Akaiko; kyipfa iwa walengyienenga kui mrima shilya mulalengyienenga. 18 Kyipfa walechihiṟa mrima oko, na mrima yanyu taa; kyasia manyenyi mnu wandu cha iwo. 19 Siṟi tsa Asia tsamuiṟikyiṟa. Akyila na Pirisikyila wamuiṟikyiṟa mnu kyiiṙi kya Mndumii, hamwi na siṟi ikyeri kanyi kowo. 20 Wana wa wamanyu wekyeosha Yesu iha wamuiṟikyiṟa. Iṟikyiṟanenyi chandu walya waiṙikyie Yesu wekyeiṟikyiṟana. 21 Ikyi nyi kyiiṟikyiṟo kyako Paulo ngaṟeia ngyimonyi. 22 Mndu oose alakundi Mndumii nawe namsese. Maranata (kyimwi na igamba Mndumii oṙu naicha.) 23 Isaṟia lya Mndumii Yesu lyiwe na nyoe. 24 Ikunda lyako lyiwe hamwi na nyoe moose kyiiṙi kya Kristo Yesu.
1 Inyi Paulo, ngyikyeri msu o Kristo Yesu chandu Ruwa akundi, na Timoteo mono-wama oṙu; ngaṟeia paruo-i ko siṟi ya Ruwa ikyeri Korinto, hamwi na wandu wa Ruwa woose wakyeri urukyenyi loose lo Akaya. 2 Isaṟia lyikae konyu na ufoṟo, shiwukyie ko Ruwa Awu oṙu na ko Mndumii Yesu Kristo. 3 Ruwa naṟumisho, Awu o Mndumii oṙu Yesu Kristo, Awu o isaṟia, Ruwa o iwiyiṟia moo lyoose; 4 ekyeluwiyiṟia moo ngyuukyiwenyi tsaṙu tsoose kundu na soe luiṙime iwawiyiṟia moo walya wakyeri ngyuukyiwenyi tsa mbaṟe tsoose, kui iwiyiṟio moo-lyo, lokyewiyiṟio moo nyi Ruwa. 5 Kyipfa chandu matuuro ga Kristo gaiengyeṟika koṙu, na wuṙo iwiyiṟio moo lyaṙu lyiengyeṟika kui rina lya Kristo. 6 Kyaindi kokooya soe lukyeri wukyiwenyi wung'anyi, nyi kyipfa kya iwiyiṟio moo lyanyu na wukyiṟo wonyu; ang'u kokooya lowiyiṟio moo, nyi kyipfa kya nyoe iluwiyiṟia moo; lyekyeṟunda iṟunda lyayo kui ikarishia matuuro galya galya lokyetuuro soe. 7 Na ikusuria lyaṙu kyipfa kyanyu lyilolomie-pfo, lochimanya kye chandu muwekyeri wandu walewetuuro nyi matuuro galya, na wuṙo mulewewutio iwiyiṟio moo lyilya. 8 Kyipfa, wana wa wama, lukundi muṙe mulamanya mbonyi tsa wukyiwa wulya wung'anyi wulelukooya kulya Asia-pfo. Kye lulelemio mnu kuta chandu luwechiiṙima, mṟasa lukopfiiyo nyi mṙoe kye luwechiiṙima-se ikaa na moo-pfo. 9 Yee, soe luwenyi luwewoṙe ianduyo lya upfu mrimenyi koṙu, kundu lulachekusuria kya mrima yaṙu, indi lukusurie Ruwa, moṟutsa wapfu. 10 Alelukyiṟa soe upfunyi lung'anyi kuṙo; lyingyi-se nelukyiṟa. Ulya lulekusuria kye neengyeṟa ilukyiṟa. 11 Na nyoe mukotaramana na soe kyipfa kyaṙu kyiiṙi kya iterewa, kundu kyipfa kya kyisumbo kyilya luenengo soe kui itarama wandu wafoi, wandu wafoi waane kyipfa kyaṙu. 12 Cha kyipfa ikushela lyaṙu nyi ilyi, iṟingyishia lya kyilya mrima yaṙu iwonyi kye kyikyicha, kye kui wuele na ngoo ngyiilyi iwukyie ko Ruwa; chi kui wuṟango wo mmbiu-pfo, indi kui isaṟia lya Ruwa; lulewaṙa mchumie wuyanenyi, na ngoseṟa konyu nyoe. 13 Kyipfa luimuṟeia nyoe kyindo, sile kyilya muisoma, na ikyiṟingyishia-pfo; na inyi ngyikusurie kye mochiṟingyishia isho mṟasa mafurumionyi. 14 Na wuṙo chandu muleṟingyishia mbonyi tsaṙu kyitutu, kye soe nyi kyimaṙuma kya ikushela lyanyu, chandu nyoe mukyeri koṙu, mfiri ulya Mndumii oṙu Yesu echicha lya kawi. 15 Na inyi ngiwoṙe ikusuria-lyo ngiwekundi ishika konyu iho kuwooka, kundu muwone kyisumbo kya kawi; 16 na iiṙa konyu ngyiyende mṟasa Makyedonia. Na lyingyi-se iwuka Makyedonia ngyiwuye na konyu muṙuo ṟio lya kyaro kyako kya iyenda Uyuda. 17 Kyasia, kyiyeri ngyilekunda iwuta isho, ngyesa ngyileilacha kyilya ngyiweteṟie? Ang'u isho ngyikundi iwuta ngyikundi ishiwuta kui mbaṟe ya mmbiu kye shiwe kuṙi koko, igamba “Yee, yee,” na chi “Ote, ote-pfo?” 18 Kyaindi chandu Ruwa ai msimiri, ṙeṙo lyaṙu konyu chi “Yee” na “Ote-pfo.” 19 Kyipfa Mana o Ruwa, Kristo Yesu, ulya mbonyi tsakye muleongoyo nyi soe, kyimwi na igamba, “Inyi na Silyiwano na Timoteo,” awekyeri “Yee” na “Ote-pfo;” indi kyilaṙuṙanyi na ikyo oe nyi “Yee” ya Ruwa. 20 Kyipfa shaasa shoose sha Ruwa shikyeri kokye nyi “Yee.” Lyingyi-se kyipfa kya ikyo kokye oe nyi “Amen;” Ruwa naiṙime iṟumisho kui soe. 21 Kyasia ulya ekyelukarisha hamwi na nyoe kui Kristo, na ilushia mafuṙa, nyi Ruwa, 22 na oe nyi oe aleluwika kyiṟingyishio kyiwoṙe mfano okye kyaluenenga Mumuyo mrimenyi yaṙu. 23 Kyaindi inyi ngyilaga Ruwa nawe mṟingyishi o mrima oko, kye, kui iwawonia wukyiwa ngyilandeshikye Korinto-pfo. 24 Chi kye luichilyia iiṙikyia lyanyu-pfo; indi lukyeri watarami wa sia yanyu; kyipfa kui iiṙikyia lyanyu mugoṟokyi.
1 Kyaindi mrimenyi koko ngyilekusuria kuṙi, ngyilache-se na konyu kui ikuinaṙia. 2 Kyipfa inyi ngamtewe mukokuinaṙia, kyasia nyi wui engyichihiṟa inyi sile nyi ulya inyi ngamwenenga ikuinaṙia? 3 Na inyi ngyilemṟeia kyindo-kyo ikyo, kundu kyiyeri ngyechicha ngyilacheenengo ikuinaṙia nyi walya kyiwengyiwaṟi ichihiyo kyipfa kyawo; ngyechimukusuria nyoe moose kye sia yako nyi yanyu moose taa. 4 Ngyilemuṟeia paruo kui mcheṟeṟe ifoi na mrima uwoṙe fowa na ikuinyṙia lying'anyi. Chi kye muwaṙe ikuinaṙia-pfo, indi muiṙime imanya ikunda lyako konyu chandu lying'anyi. 5 Kyaindi kokooya mndu atewe oṙoe iwaṙa ikuinaṙia, angyitewe inyi tikyi-pfo, indi kui ura lumwi (ngyilacheewa ṟio mnu ko mndu), namutewe nyoe moose iwaṙa ikuinaṙia. 6 Ianduyo lyilya mndu-cho aleenengo iwuka ko wandu wafoi lyimshikyie. 7 Maa kyilaṙuṙanyi na isho, nyi nanga mumhooṟie na immbiyiṟia moo, mndu cha icho alachemeṟo nyi ikuinaṙia lyakye lying'anyi mnu. 8 Koikyo ngyimuterewa mumṟingyishie ikunda lyanyu. 9 Kyipfa ngyileṟeia kyipfa kya ikyo taa, kundu ngyimanye na pata konyu kye muleindia shindo shoose. 10 Kyaindi kokooya mohooṟia mndu kyindo kyoose, na inyi ngyewemhooṟia; kyipfa maa inyi, kookoya ngahooṟia mndu kyindo kyoose, ngamhooṟia kyipfa kyanyu mbele ya Kristo. 11 Satana alaenengo ṙaawa lyelulemba; cha kyipfa lolemo imanya ngyeṟo tsakye-pfo. 12 Kyasia kyiyeri ngyileshika Tiroa kyipfa kya Ndumi Ngyicha ya Kristo, Mndumii kangyipfunguya moongo. 13 Ngyilewona sia mrimenyi koko-pfo, kyipfa ngyilewona mono-wama oko Tito-pfo, indi ngyilesamana nawo, ngafuma iyenda Makyedonia. 14 Kyaindi Ruwa naano, ekyeluenenga ichihiyo kyipfa kya wuwinzi kyiiṙi kya Kristo, na iloṟa mpfaamo mcha o ulogo lo Kristo handu hoose kui iṟunda lyaṙu. 15 Cha kyipfa soe nyi mafuṙa ga Kristo, gekyepfaama necha, mbele ya Ruwa, ko iwo waikyiṟo, na ko iwo waiṙeka. 16 Ko iwo wa kawi mpfaamo o upfu okyeende upfu; ko iwo wa kuwooka mpfaamo o moo okyeende moo. Na oe nyi wui echiiṙima shindo-sho? 17 Cha kyipfa soe chi kyimwi na wandu wafoi wekyekapa mbucha na ulogo lo Ruwa-pfo. Soe luonguo ulogo lo Ruwa kui wuwaṙami wo mrima cha wandu waleṙumo nyi Ruwa, luwalungye na Kristo.
1 Ngyesa luwooka-se ikushela luwenyi? Ang'u lukundi-se cha iwo wengyi, paruo tsiwoṙe kyiṟumi tsiche na konyu, ang'u iwuka konyu? 2 Nyoe nyi paruo yaṙu yeloṟa soe luwaṙume nyi siṟi, ingyiṟeie mrimenyi koṙu, imanyikyie na pata na isomo nyi wandu woose. 3 Muṟingyishio kye mowa paruo iwukyie ko Kristo lulemṙambika nyoe, ingyiṟeie chi kui wiino-pfo, indi na Mumuyo o Ruwa ai na moo; chi shibaunyi sha magoe-pfo; indi shibaunyi shikyeri nyi mrima ya nyama. 4 Na ikusuria-lyo lulyiwoṙe mbele ya Ruwa kui njia ya Kristo. 5 Chi kye soe lochiiṙima iwuta kyindo kyoose kui pfinya tsaṙu luwenyi-pfo, wuiṙimi woṙu woose wuwukyie ko Ruwa. 6 Na oe nyi oe alelutarama iwa waṟundi wa mma mhya; chi wa kyiṟeio-pfo, indi wa Mumuyo; cha kyipfa kyiṟeio kyekyewaaga, indi Mumuyo okyekyiṟa. 7 Kyasia, kokooya iṟunda lya upfu lyilekolyaṟeio na itaricho magoenyi, lyilecha mng'anonyi, mṟasa Waisiraelyi walaiṙime iitukuya kyaam kya Mose karii, kyipfa kya mng'ano o kyaam kyakye, nacho nyi-we mng'ano uweiilachika. 8 Ngyesa iṟunda lya Mumuyo lyechiengyeṟika iwa mng'anonyi-pfoe? 9 Cha kyipfa kokooya iṟunda lya ianduyo lyiwoṙe mng'ano, iṟunda lya wusumganyi lyiwoṙe mng'ano o ngoseṟa. 10 Kyipfa maa lyilya lyileng'anyiso lyiwewoṙe mng'ano kuṙi-pfo, kyipfa kya mng'ano uiengyeṟika mnu. 11 Cha kyipfa kokooya lyilya lyiweilachika lyiwewoṙe mng'ano, ngoseṟa mnu lyilya lyekyekaa ho mlungana lyiwoṙe mng'ano ung'anyi ngoseṟa. 12 Kyasia, kyipfa luwoṙe iweṙelyia lya mbaṟe-i luwika wuragari na wukari wung'anyi. 13 Na soe chi chandu Mose alewika kyindo wuye ya kyaam kyakye, kundu Waisiraelyi walaitukuye mnu mafurumionyi ga kyilya kyiweilachika-pfo; 14 indi makusaṟo gawo galewiko meema. Kyipfa maa mṟasa inu, kyiyeri Mma Mku okyesomo, kyindo-kyo kyeshikyia kyaam kyekyeweṙio ho. Kyimwi na igamba kye, kyileloṟo kye kyindo-kyo kyeshikyia kyewuto ho kyiiṙi kya Kristo-pfo. 15 Indi mṟasa inu, kyiyeri uwawaso lo Mose lokyesomo, kyindo-kyo kyekyeṙio mrimenyi kowo. 16 Indi kyiyeri kyoose wechigalukyia Mndumii, kyindo kyilya kyeshikyia kyaam kyewuto ho. 17 Kyasia “Mndumii” nyi oe Mumuyo; kyaindi handu akyeri Mumuyo o Mndumii, iho nyi ho-ndu hawoṙe ikaa kulawoṙe ichilyio nyi kyindo. 18 Kyaindi soe loose, kui kyaam kyilakyishikyie nyi kyindo, luloṟa mng'ano o Mndumii, cha mng'ano uwukyie kyiyewonyi, lokyeilacho luwe cha mfano-cho icho, iwuka mng'ano mṟasa mng'ano ung'anyi ngoseṟa cha mng'ano uwukyie ko Mndumii, akyeri Mumuyo.
1 Kyipfa kya ikyo, cha kyipfa luwoṙe iṟunda-lyi, chandu lulewona isaṟia, luiloloma-pfo. 2 Kyaindi lulelega mbonyi tsa sonu tsikuṟiikyie, maa luichumia kui mtambo-pfo, maa isanza-sanza Ṙeṙo lya Ruwa na wongo, indi kui iṟingyishia loi lukuloṟa kye luwoṙe wusumganyi, kyilya mrima ya wandu iwonyi kye kyikyicha kyeluṟingyishia mbele ya Ruwa. 3 Kyaindi kookoya Ndumi-i Ngyicha luionguo ikuṟiikyie, yakuṟiika ko iwo waiṙeka; 4 wakyeri kye kyiiṙi kyawo ruwa o wuyana-wu naleshingyia makusaṟo ga iwo walaiṙikyie, walachekooyo nyi ngyeela ya Ndumi Ngyicha ya mng'ano okye Kristo akyeri fana ya Ruwa. 5 Cha kyipfa lukuongoya mbonyi luwenyi-pfo, indi Kristo Yesu kye nyi Mndumii; na soe luwenyi kye lukyeri waṟundi wanyu kyipfa kya Yesu. 6 Cha kyipfa Ruwa, icho alegamba, “Ngyeela yewaa iwuka meemenyi,” nyi oe alewaa mrimenyi koṙu, naluenengye ngyeela ya wuṟango wo mng'ano o Ruwa kyaamunyi kya Yesu Kristo. 7 Kyaindi luwoṙe wunjama-wu shindonyi sha teri, kundu pfinya ing'anyi ya wuiṙimi iwe ko Ruwa, maa chi iwuka koṙu-pfo. 8 Ngyuura tsoose luilya wukyiwa, indi luiwingo-pfo; lukapa kawi, indi luiloṟa lupfiiyo nyi mṙoe-pfo. 9 Lusuiṟo, indi luṙio kulawoṙe itaramo-pfo; luwiyitso wanda, indi luirumatso-pfo. 10 Mfiri yoose luṙuṙe mmbiunyi yaṙu iwoogo lya Yesu, kundu moo o Yesu uṟingyishio mmbiunyi yaṙu. 11 Kyipfa soe lukyeri na moo, mfiri yoose lokyewuto lupfe kyipfa kya Yesu, kundu moo o Yesu uṟingyishio mmbiunyi yaṙu yekyepfa. 12 Kyasia iho upfu lokyeṟunda, mrimenyi koṙu, indi moo mrimenyi konyu. 13 Kyaindi cha kyipfa luwoṙe Mumuyo ulya ulya o iiṙikyia; chandu kyileṟeio, “Ngyileiṙikyia, na kyipfa kya ikyo ngyileṙeṙa.” Soe na soe luiṙikyie, na kyipfa kya ikyo luṙeṙa. 14 Luichi kye ulya aleṟutsa Mndumii Yesu nechiluṟutsa na soe hamwi na Yesu, na iluende na mbele yakye hamwi na nyoe. 15 Cha kyipfa mbonyi tsoose nyi kyipfa kyanyu, kundu isaṟia-lyo lyikaengyeṟika mnu, ko iwo wakyeri wafoi kyiano kyiengyeṟikye, na Ruwa nang'anyiso. 16 Koikyo luiloloma-pfo; indi maa chandu kyanja mmbiu yaṙu iloṟa iuṟa pfinya; mrimenyi koṙu lukokohoka orio mfiri. 17 Kyipfa matuuro gaṙu gai maangu, gakyeri ga kyiyeri kyifuhi tikyi, gekyeluwutia mng'ano o mlungana uingyikyie mnu. 18 Lulaambuye shekyewono indi shilya shilekyewono. Shilya shekyewono shekyekaa kyiyeri kyifuhi, indi shilya shilekyewono shekyekaa mlungana.
1 Cha kyipfa luichi kye mmbiu yaṙu lukyeri nayo iha wuyanenyi ikamnyamaṟika, luwoṙe numba iwukyie ko Ruwa, numba ilangyiwikye kui mawoko, ikyeri ya mlungana ruwewu. 2 Kyipfa kyiiṙi kya numba-i luiwawio lochilanga mnu ienengo kanyi koṙu kuwukyie ruwewu; 3 kundu lukomṟiko mmbiu ungyi lochiwono lui-se kyiṟanguoe-pfo. 4 Cha kyipfa soe lukyeri kyiiṙi kya mmbiu-i luwawio, lochilemio; chi kye lukundi iwuta mmbiu-chu okyepfa-pfo, indi lulangyie iṟiko ulya ulekyepfa, kundu kyilya kyekyepfa kyimeṟo piu nyi moo. 5 Kyasia ulya aleluṟeyeṟia isho nyi Ruwa, na oe naleluenenga Mumuyo okye moluringa. 6 Kyasia mfiri yoose luwoṙe wukari; lyingyi-se luichi kye, kyiyeri lukyeri iha na mmbiu-chu, lukyeri kuleshi na Mndumii. 7 (Kyipfa lokyekaa kui iiṙikyia, chi kui iwona-pfo.) 8 Kyaindi luwoṙe mrima ngyikarishe; na soe luwonyi nyi nanga ilekana na mmbiu-i na ikaa hamwi na Mndumii. 9 Koikyo-se, kokooya lukyeri iha ang'u lukyeri iha-pfo, luipfuṟukana imchihiṟa oe. 10 Kyipfa kyalukooya soe loose iloṟo halya kyiṙinyi kya ianduyo kya Kristo, kundu orio mndu naambilyie wori wo shindo alewuta kyimmbiu, chandu alewuta, kye shicha ang'u shiwicho. 11 Kyasia lukomanya iowuo Ruwa, lukuruo wandu; indi loṟingyishio mbele ya Ruwa. Na inyi ngyikusurie kye luwaṟingyishie mrimenyi konyu taa. 12 Kyipfa luikushela luwenyi mbele yanyu-se-pfo, indi lumuenenga kyimaṙuma kya ikushela kyipfa kyaṙu, kundu muiṙime iwaṙa kyindo kyeloṟa mbele ya iwo waikushela ko shindo sha nja tikyi, maa chi shindo sha mrimenyi-pfo. 13 Kyipfa kokooya luwasuko nyi kyipfa kya Ruwa; ang'u kokooya lulawasuko, nyi kyipfa kyanyu. 14 Kyipfa ikunda lya Kristo lyiluchilyia kyipfa lowona kuṙi, kye umwi nalepfa kyipfa kya woose, kyasia walepfa woose. 15 Lyingyi-se nalepfa kyipfa kya woose, kundu wai na moo walawe-se na moo kyipfa kya mrima yawo wawenyi, indi kyipfa kyakye oe alepfa kaṟuka kyipfa kyawo. 16 Na kyawa soe wookyia wulalu luichi mndu oose kui mbaṟe ya mmbiu-pfo. Maa chandu soe lulemanya Kristo kui mbaṟe ya mmbiu, kyaindi wulalu lumwichi-se kuṙo-pfo. 17 Na kyawa kye, mndu kakaa kyiiṙi kya Kristo nawa mndu mhya; sha kacha shaiṙa, shoose shawa shihya. 18 Kyaindi shoose taa shiwukyie ko Ruwa alelusanza soe na oe kui Kristo. Na oe naleluenenga iṟunda lyesanza wandu na Ruwa. 19 Ulogo loṙu nyi kye Ruwa naisanza wandu woose na oe kui Kristo. Ruwa aletala ngyuunyamaṟi tsawo-pfo. Na naluenenga ulogo lo sanza washituwa. 20 Kyasia soe luiṙeṙa handu ha Kristo, cha ilyi Ruwa naiterewa kui maṙumbu gaṙu, lumuterewa nyoe kyipfa kya Kristo musanzo na Ruwa. 21 Oe alaichi wunyamaṟi nalemmbuta kyipfa kyaṙu, kundu soe luiṙime iwa wusumganyi wo Ruwa kui oe.
1 Na soe lukoṟunda handu hamwi na oe lumuterewa maa mulaambilyie isaṟia lya Ruwa wulya. 2 (Cha kyipfa naigamba, “Kyiyeri kyiiṙikyie ngyilekuaṙanyia, mfiri o wukyiṟo ngyilekutarama.” Kyiyeri kyiiṙikyie nyi wulalu; mfiri o wukyiṟo nyi wulalu.) 3 Maa lulawe wandu wetewe wengyi ioloka kyindonyi kyoose, kundu ṙeko lyilawono iṟundenyi lyaṙu. 4 Indi orio kyindonyi luiwuta luwone kyiṟumi kyicha, cha waṟundi wa Ruwa; kui wusimiri wung'anyi, wukyiwenyi, fowenyi, matuuronyi. 5 Ngaponyi, shipfungonyi, wuṟiingyinyi, ilya wukyiwa, ilaa kyiṙombo, ikuretekyia. 6 Mkaṟonyi ngyicha, wuṟangonyi, isimiria, wupfererinyi, Mumuyonyi Mweele, ikundenyi lyilawoṙe wukulembecheṟi. 7 Ṙeṙonyi lya loi, pfinyenyi ya Ruwa; kui shisha sha wusumganyi sha kuwoko ko kulyoe na sha kuwoko ko kumoso. 8 Kui kyiṟumi na sonu; kui iṙeṙo uwicho na iṙeṙo necha; cha wandu wailemba, indi lukyeri wandu wa loi. 9 Cha walaichio, indi waichio mnu; cha waipfa, ate lukyeri na moo; cha waitoṟisho, indi walaiwoogo. 10 Cha wandu wawoṙo nyi fowa, indi mfiri yoose luwoṙe sia; cha wakyiwa indi lochiiritsa wafoi; cha walawoṙe kyindo, indi luwoṙe shido shoose. 11 Luilosha kulawoṙe wuowu konyu nyoe Wakorinto. Mrima yaṙu yaloṟa ikunda konyu. 12 Mrima yaṙu yamukunda nyoe, indi mrima yanyu mukoishinga. 13 Kyasia kundu mutae iṙuana na chandu muleambilyia (ngaṙeṙa na nyoe cha wana watutu) na mrima yanyu iweloṟe ikunda taa. 14 Maa mulasanzo hamwi na walaiṙikyie, chandu kyilai sungusinyi; kyipfa kuwoṙe umbuya o mbaṟe iha kyiiṙi kya wusumganyi na wunyamaṟi? Lyingyi-se hawoṙe isanza lya mbaṟe iha kyiiṙi kya ngyeela na meema? 15 Kuwoṙe iiṙikyiana lya mbaṟe iha kyiiṙi kya Kristo na ulya Mmbicho? Ang'u ulya aiṙikyie nawoṙe kyi hamwi na ulya alaiṙikyie? 16 Lyingyi-se hawoṙe iiṙikyiana lya mbaṟe iha kyiiṙi kya hekalu lya Ruwa na ifano? Cha kyipfa soe nyi hekalu lya Ruwa akyeri na moo; chandu Ruwa alegamba kye, “Ngyechikaa mrimenyi kowo na ichumia kyiiṙi kyawo na inyi ngyewa Ruwa owo, nawo wechiwa wandu wako.” 17 Koikyo, “Wukyenyi kyiiṙi kyawo, mukae kuleshi nawo, Mndumii nagamba, Maa mulapaaye kyindo kyifanyi, na inyi ngyemuambilyia. 18 Ngyewa Awu konyu, na nyoe mochiwa wana koko wa kyisoṟo na wa kyika, Mndumii Mopfinya nagamba.”
1 Kyasia-ng'u, wakunde wako, cha kyipfa luwoṙe shaasa-sho, lusanje mrima-i yaṙu ilekane na ukoe loose lo mmbiu na mrima, kunu lochiafutsia wuele kui iindia Ruwa. 2 Luenengyenyi ṙaawa mrimenyi. Lulelyiiya mndu oose mbaka-pfo, maa lulenyamaṟa mndu-pfo, maa lulandewutie mndu kyindo kundu luwone ho kyiira-pfo. 3 Ngyiṙeṙa kyindo-kyo kundu ngyimuanduye nyoe kye muwoṙe ṙeko-pfo; cha kyipfa ngamsonguo igamba kye, nyoe mukyeri mrimenyi koṙu maa kui ipfa handu hamwi, na ikaa na moo handu hamwi. 4 Ngyiwoṙe wukari wung'anyi konyu; ngyiwoṙo nyi ikushela lying'anyi kyipfa kyanyu. Ngyiichuo nyi iwiyiṟio moo, wukyiwenyi woṙu woose ngaichuo sia ya ngosera. 5 Cha kyipfa maa kyiyeri luleshika Makyedonia wukyiwa wulya mmbiu yaṙu iweilya wuleanguha-pfo, indi lulewona wukyiwa ngyuura tsoose. Nja kuwewoṙe shiṙa, na mrimenyi fowa. 6 Kyaindi Ruwa, ekyewiyiṟia wafofo moo, naleluwiyiṟia moo kui icha lya Tito. 7 Maa chi kui icha lyake tikyi-pfo, indi chandu alewiyiṟio moo nyi nyoe, echiluwia mbonyi tsa ilanga lyanyu, na ṟanyi yanyu, na wuragari wonyu kyipfa kyako, mṟasa ngaengyeṟa ichihiyo. 8 Cha kyipfa maa chandu paruo iya yako ilemuendie fowa ngyiwihiyo mrimenyi-pfo; maa kokooya ngyilewihiyo mrimenyi, ngyiwonyi kye paruo iya ilemuendie fowa, kyiyeri kyifuhi tikyi. 9 Wulalu ngyimchihiye, chi kyipfa kya nyoe iwona fowa-pfo, indi kyipfa kya ilyi mulewona fowa, mṟasa mukoṙumbuya wunyamaṟi. Kyipfa mulewona fowa kyipfa kya Ruwa, kundu mulaṙetse kyindo kyipfa kya kyindo lulewuta soe. 10 Iwona fowa lyikyeri kui mbaṟe ya Ruwa lyekyeende iṙumbuya wunyamaṟi wokyeende wukyiṟo wulawoṙe isumkyia indi fowa ya wuyana yekyeende upfu. 11 Wulalu moiṙima iwona kyindo kyekyeendo nyi iwona fowa chandu Ruwa akundi. Nyoe moiṙima wulalu iwa wandu wawoṙe ipfuṟukana, wawoṙe kyindo kyegamba. Mokyeṙumbuko nyi maṙima na iowuo; mokyepfuṟukana na iwona kye kya wusumganyi kyiṟundo. Nyoe moloṟa na pata kye muwoṙe ṙeko kyiiṙi kya ikyi ngyigamba-pfo. 12 Kyasia, maa chandu ngyilemuṟeia paruo, ngyileṟeia kyipfa kya ulya alenyamaṟa, maa chi kyipfa kya ulya alewutio kuṙo-pfo, indi ipfuṟukana lyanyu kyipfa kyaṙu lyiiṙime iṟingyishio konyu mbele ya Ruwa. 13 Koikyo lulewiyiṟio moo. Lyingyi-se kyiiṙi kya iwiyiṟio moo lyaṙu lulechihiyo mnu ngoseṟa kyipfa kya sia ya Tito; kyipfa nyoe moose mulechihiṟa mrima okye. 14 Cha kyipfa kokooya ngyilekushela mbele yakye kyindonyi kyoose kyipfa kyanyu, ngyilewona sonu-pfo; indi chandu lulemmbia mbonyi tsoose kui wuloi, na wuṙo ikushela lyaṙu mbele ya Tito lyiwei lya loi. 15 Na ikunda lyakye konyu lyekyeengyeṟika ngoseṟa, kyiyeri ekyekumbuo iindia lyanyu nyoe moose, chandu mulemwambilyia kui wuowu na iṙeṙema. 16 Ngachihiyo, kyipfa kyiiṙi kya orio kyindo ngyechiiṙima ikusuria konyu.
1 Lyingyi-se, wana wa wana waṙu, lummbia ulogo lo isaṟia lya Ruwa, siṟi tsa Makyedonia tsileenengo; 2 kyipfa kyiyeri waweiyesho kui wukyiwa wung'anyi, sia yawo na wufofo wowo wung'anyi mnu wuleengyeṟa wunjama wo ilekyia lyawo. 3 Kyipfa ngyimuṟingyishia kye, kui pfinya tsawo, na ngoseṟa ya pfinya tsawo, kulawoṙe iitiko nyi mndu walewuta shindo shawo; 4 wechiluterewa mnu ko mbonyi tsa isaṟia-lyi, na iṟunda-lyi lyeṟundia wandu wa Ruwa. 5 Lyingyi-se walewuta kuṙi chi chandu luwekusurie tikyi-pfo, indi kuwooka waleṙambika mrima yawo ko Mndumii; na koṙu taa, iṙuana na chandu Ruwa akundi. 6 Mṟasa lukoikyimbia Tito naafutsie isaṟia-lyi konyu chandu oe alekoalyiwooka. 7 Kyaindi chandu muwoṙe shindo shifoi, iiṙikyia, iṙeṙa, na wuṟango, na wuragari woose, na ikunda lyanyu koṙu soe; kyasia na wuṙo muambilyie wuingyi wo isaṟia-lyi taa. 8 Ngyiṙeṙa kundu ngyimutsindikye-pfo, indi kui wuragari wo wandu wengyi ngyimanye wusimiri wo ikunda lyanyu. 9 Kyipfa mommanya isaṟia lya Mndumii oṙu Yesu Kristo, maa chandu awekyeri mnjama, kyipfa kyanyu, nalewa mkyiwa kundu nyoe muiṙime iwa wanjama kui wufofo wokye. 10 Na inyi kyipfa kya ikyo, ngyigamba kuṙi, kyachia ko ura lonyu muwookye iwuta shilya mulewooka maka ulesia. Nyoe muwekyeri wa kuwooka iwuta kuṙo. 11 Kyaindi wulalu afutsienyi kyindo-kyo; kundu chandu muwelangyie itarama, pfuṟukanenyi kuṙo chandu mochiiṙima, muafutsie. 12 Kyipfa kokooya mndu awoṙe mrima o tarama, Ruwa nekyeambilyia kyilya echiiṙima iwuta, ekyerika kya ngoseṟa-pfo. 13 Kyipfa ngyigamba isho, kundu wengyi wachihiyo na nyoe muwone wukyiwa-pfo; 14 indi mbonyi tsiwe necha; kyiyeri-kyi kya wulalu wuingyi wonyu wutarame iuṟa lyawo, kundu na wuingyi wowo wumutarame nyoe kyiyeri nyoe mulawoṙe; kundu mbonyi tsiwe necha. 15 Chandu kyikyiṟeie, “Alesania shifoi, aleengyeṟikyio-pfo, maa ulya alesania shitutu aleuṟa kyindo-pfo.” 16 Kyaindi Ruwa naṟumisho, ulya mowika wuragari wulya wulya kyipfa kyanyu mrimenyi ko Tito. 17 Kyipfa naleambilyia loi iikyimbio lyilya ngoseṟa. Lyingyi-se echiwika wuragari, nalepfunga kyaro kya iyenda konyu kulawoṙe iitiko. 18 Na hamwi na oe lukoṙuma mono-wama ulya kyiṟumi kyakye Nduminyi Ngyicha kyileṙunganana siṟinyi koose. 19 Maa chi wuṙo tikyi-pfo, indi nalesambuṟo nyi siṟi na iyenda kyaro hamwi na soe mbonyinyi tsa isaṟia-lyi, lulyiṟundia, kundu Mndumii naṟumisho, ikuṟeyeṟa lyaṙu lyimanyikye. 20 Lochikuringa na kyindo-kyi, mndu alachewona ṙeko lyaṙu mbonyinyi tsa kyisumbo-kyi lukyiṟundia; 21 lukosonguo ikusaṟa gai mecha, chi mbele ya Mndumii tikyi-pfo, indi na mbele ya wandu. 22 Na soe hamwi nawo loṙuma mono-wama oṙu lulemmbona kyiyeri kyileshi kye nawoṙe wuragari, na wulalu nawoṙe wuragari ngoseṟa mnu kyipfa kya ikusuria lying'anyi awoṙe konyu. 23 Kyasia mndu kakunda mbonyi tsa Tito, oe nyi mongari oko, na mndu ngyekyeṟunda na oe kyipfa kyanyu; na mndu kakunda mbonyi tsa wana wa wama waṙu, wo nyi wandu wawaṙume nyi siṟi, na mng'ano o Kristo. 24 Kyasia waloṟenyi mbele ya siṟi wuloi wo ikunda lyanyu, na ikushela lyaṙu kyipfa kyanyu.
1 Ko mbonyi tseṟundia wandu wa Ruwa kuwoṙe kyimaṙuma ngyimuṟeie-pfo. 2 Kyipfa ngyiichi ikuṟeyeṟa lyanyu; ikuṟeyeṟa ngyekyekushelyia kyipfa kyanyu ko wandu wa Makyedonia, kye Akaya iwekuṟeyeṟie maka oose; na wuragari wonyu wulekarisha wafoi. 3 Kyaindi ngyileṙuma wana wa wama-wo, kundu ikushela lyaṙu kyipfa kyanyu lyilailachikye kyiiṙi kya kyindo-kyi; muiṙime ikuṟeyeṟa chandu ngyilegamba, 4 kundu wandu wa Makyedonia wakacha hamwi na inyi, wakamukooya mulakuṟeyeṟie, soe lulacherigo nyi sonu (lulagambe nyoe), kyiiṙi kya mbaṟe-yo iyo ya ikusuria. 5 Kyasia ngyilewona kyangyikooya ngyitutume wana wa wama-wa wasonguoe ishika konyu, na iachikyia iwinyi kyisumbo kyanyu mulekyiteṟia wookyia kacha, kundu kyiwe kyamuṟeyeṟo, na kuṙi kyiwe cha kyienengo, maa chi cha kyindo kyekyeenengyio kui iitiko-pfo. 6 Kyaindi ngyigamba kyindo-kyi, “Mowaaya shaangu nesambuo shaangu; mowaaya kui ilekyia nesambuo kui ilekyia.” 7 Orio mndu nawute chandu akusurie mrimenyi kokye, chi kui ikuinaṙia, maa chi kui iitiko-pfo; kyipfa Ruwa nakundi ulya ekyeenengyia kui mrima mkyesi. 8 Na Ruwa neiṙima imuenenga orio mboṟa iingikyie, kundu nyoe mfiri yoose muiṙime iwaṙa orio kyindo mukundi, na muwoṙe orio kyindo mukundi muiṙime ienengyia kulawoṙe iehia. 9 Chandu kyikyiṟeie, “Oe nekyeenengyia kui ilekyia, kaenenga wakyiwa wusumganyi wokye wokaa mlungana.” 10 Na ulya ekyeenenga mbeu mndu mowaaya, na mkate uwe kyelya, nemuenenga mbeu tsewaaya na itsiengyeṟa, na oe nechiengyeṟa shilyimu sha wusumganyi wonyu. 11 Mochiiritso shindonyi shoose muiṙime iwaṙa ilekyia lyoose, lyekyeenenga Ruwa wandu wafoi waimmbia haika kyipfa kya shienengo shanyu wekyeambilyia iwuka koṙu. 12 Kyipfa iṟunda-lya iṟunda-lyi chi lyetarama wandu wa Ruwa shindo shilya wauṟie tikyi-pfo, indi lyekyeengyeṟika mnu iwaṙa kyiira kui iana lying'anyi Ruwa ekyeenengo. 13 Cha kyipfa mukoyesho kui iṟunda-lyo, waiṟumisha Ruwa kyipfa kya wuindi wonyu kui iṟingyishia Ndumi Ngyicha ya Kristo, na kyipfa kya ilekyia lyanyu mulewaambutsia wo na wandu woose. 14 Nawo wawenyi, wechiterewa kyipfa kyanyu, wamukundi mnu mrimenyi kowo kyipfa kya isaṟia lya Ruwa lyileingyikyi mnu konyu. 15 Ruwa naano kyipfa kya kyienengo kyakye, lulawoṙe maṙeṙo geonguo mbonyi tsakyo.
1 Kyasia, inyi Paulo ngyimonyi ngyimuterewa kui wuhoo na wuyendelyi wo Kristo, inyi ngyikyeri msimiri ngyikyeri hamwi na nyoe, indi ngyilakyeri ho ngyiwoṙe wuṟango na wukari konyu. 2 Yee, ngyiterewa kye ngyikyeri ho ngyilawaṙe wuṟango na wukari cha wulya ngyiwoṙe ko walya wekyelushitakyi kye soe lokyeosha shindo sha kyiwuyana. 3 Kyipfa maa chandu luosha shindo sha kyiwuyana, lokyekapana shiṙa kui mbaṟe ya kyiwuyana-pfo; 4 (kyipfa shisha sha shiṙa shaṙu chi sha kyiwuyana-pfo, indi shiwoṙe pfinya kyiiṙi kya Ruwa mṟasa iunduo moombo;) 5 lochinyamaṟa makusaṟo na orio kyindo kyekyeshingyia, kyekyeshingyia wuṟango wo Ruwa, na lochichilyia orio mndu naiṙime iindia Kristo. 6 Lyingyi-se lukowa lukuṟeyeṟie itaa kyiṟaache wuwicho woose, kyiyeri iiṙikyia lyanyu lyeafukyia. 7 Ambuyenyi shikyeri mbele ya meso ganyu. Mndu kawona oe amonyi kye nyi mndu o Kristo, nawekusaṟe kuṙi taa mrimenyi kokye, kye chandu oe akyeri mndu o Kristo, nyi wuṙo na soe. 8 Kyipfa maa ngakushela ngoseṟa kyitutu kyipfa kya wuchilyi woṙu (luleenengo nyi Ruwa, luiṙime imugoṟotsa maa chi imuolotsa-pfo), ngyerigo nyi sonu-pfo; 9 ngyilachewono cha ilyi kye ngyikundi imuowesha kui paruo tsako. 10 Kyipfa wekyegamba, paruo tsakye tsingyikari na tsioweshie; indi akyeri amonyi kyimmbiu namfofo, na maṙeṙo gakye chi kyindo-pfo. 11 Mndu o mbaṟe-yo iyo nakusaṟe kuṙi, kye kyindo kyilya lokyeṟeia paruonyi lulakyeri na nyoe nyikyo lochiwuta lukyeri na nyoe. 12 Cha kyipfa lochikaria ikutala hamwi na wandu waata wa iwo wekyekushela wawenyi, maa ikulyingatsana nawo-pfo. Wandu wekyekuloṟa kye wo nyi kyiyeṟo kyekuyeṟa, na wandu wekyekulyingatsana wo wenyi ko wenyi nyi matondo. 13 Kyaindi soe luikushela ngoseṟa ya chandu kyiwaṟi koṙu-pfo; indi chandu kyiwaṟi kyiyeṟo kyilya kyikyiwikye nyi Ruwa, nakyo nyi ishika mṟasa konyu. 14 Kyipfa luikulandaṟa luwenyi kuta chandu kyiwaṟi-pfo, cha ilyi lulaishika konyu nyoe; cha kyipfa lulesonguo ishika mṟasa konyu Nduminyi Ngyicha ya Kristo. 15 Maa luikushela kuta chandu kyiwaṟi, kyipfa kya iṟunda lya wandu wengyi-pfo; indi ikusuria lyaṙu nyi kye chandu iiṙikyia lyanyu lyiengyeṟika, iṟunda lyaṙu konyu lyeng'ana, 16 kundu luiṙime ionguo Ndumi Ngyicha ngyuurukyenyi tsingyi kuleshi na nyoe; kulawoṙe ikushelyia iṟunda lyiṟunde nyi wandu wengyi. 17 Kyaindi ulya mokushela, nakushele kyiiṙi kya Mndumii. 18 Kyipfa mndu moiṙikyio chi ulya ekyekushela-pfo, indi nyi ulya ekyeṟumisho nyi Mndumii.
1 Nanga muweṙuana na inyi wutondonyi woko kyitutu! Yee, muṙuane na inyi. 2 Kyipfa ngyimunyeng'ia, wunyeng'i wo Ruwa; kyipfa ngyilemukosia msoṟo umwi, kundu ngyiendie Kristo mana mkyega mcha. 3 Kyaindi ngyiowuo; chandu njoka iya ilelemba Eva kui ngyeṟo tsayo, ilachenyamaṟa makusaṟo ganyu, mukoṙa wunyotsu na wucha wonyu ko Kristo. 4 Kyipfa mndu oose kacha eonguo Yesu ungyi lulalemwonguo soe, ang'u mukoambilyia mumuyo ungyi alakyeri cha ulya muleambilyia, ang'u ndumi ngyicha ingyi ilakyeri cha iya muleambilyia, muwuta necha iṙuana na oe! 5 Kyipfa ngakusaṟa kye kuwoṙe kyindo wasu wang'anyi wawoṙe ngyilakyiwoṙe inyi-pfo. 6 Kyaindi maa kokooya inyi nyi mndu alaichi iṙeṙa, ikyo chi mbaṟe yako wuṟangonyi-pfo, indi ko orio kyindo luleṟingyishio konyu. 7 Ngyesa ngyilenyamaṟa kui iindia kundu nyoe mung'anyiso, kyipfa kya ilyi ngyilewaongoya Ndumi Ngyicha kulawoṙe wori? 8 Ngyilesoka siṟi tsingyi masaa gawo, ngawuta kowo kyindo kyako kyelyio kundu ngyimuṟundie nyoe. 9 Na inyi kyiyeri ngyiwekyeri hamwi na nyoe na ipfula kyindo kyengyitarama, ngyilewa ṟio ko mndu-pfo. Kyipfa wana wa wama walewuka Makyedonia walengyienenga orio kyindo ngyiwekundi; na inyi mbonyinyi tsoose ngyilekuringa ngyilacheewa ṟio konyu maa ale. Lyingyi-se ngyekuringa. 10 Chandu loi iya ya Kristo ikyeri mrimenyi koko, kuwoṙe mndu echiiṙima ingyiima ikushela mṟasenyi ya Akaya-pfo. 11 Kyitewe ny' kyi? Ngyesa nyi kyipfa nygilamukundi nyoe? Ruwa naichi. 12 Kyaindi kyindo ngyiwuta ngyekyiwuta, kundu ngyiwingane na iwo waipfula ṙaawa walawone, kundu kyindo-kyo waikushelyia wawono wakyeri cha soe. 13 Kyipfa wandu wa mbaṟe-yo-iyo nyi wasu wa wongo, wekyeṟunda kui ngyeṟo, wekyekuloṟa cha ilyi nyi wasu wa Kristo. 14 Maa chi kyindo kyeṟiyio-pfo. Kyipfa Satana oe amonyi nekyekuloṟa cha ilyi nyi malaika o ngyeela. 15 Kyasia chi kyindo kying'anyi waṟundi wakye ikuloṟa cha ilyi nyi waṟundi wa wusumganyi wakyeri kye ifurumia lyawo lyechiwa kyimwi na maṟunda gawo-pfo. 16 Ngyigamba-se, mndu alakusaṟe kye inyi ngyimtondo. Kyaindi maa mukokusaṟa kyako kuṙo, mungyiambilyie cha tondo; kundu na inyi ngyiiṙime ikushela kyitutu. 17 Kyindo ngyiṙeṙa kyiwukyie ko Mndumii-pfo, indi nyi cha kya wutondo, kui wukari-wu wo ikushela. 18 Cha kyipfa wafoi waikushela kui mbaṟe ya kyimndu na inyi ngyekushela. 19 Nyoe, kyipfa muwaṟango, mokyeṙuana na matondo kui sia. 20 Kyipfa mokyeṙuana na mndu echimmbika wutumonyi, na immbutia shindo shiwicho sha orio mbaṟe maa imukapa ipfo kyaam. 21 Ngyiṙeṙa kui mbaṟe ya wufofo cha ilyi luwewafofo. Kyaindi kokooya mndu awoṙe wuṟango na wukari kyindonyi kyoose (ngyiṙeṙa kyitondo), maa inyi ngyiwoṙe wuṟango na wukari. 22 Wo nyi Waebrania? Na inyi taa. Wo nyi Waisiraelyi? Na inyi taa. Wo nyi wa kyishari kya Abrahamu? Na inyi taa. 23 Wo nyi waṟundi wa Kristo? (Ngyiṙeṙa cha msuko), inyi nyi ngoseṟa. Wukyiwenyi nyi ngoseṟa mnu; shipfungonyi nyi ngoseṟa mnu; kyiiṙi kya ikapo nyi ngoseṟa na kuta; kyiiṙi kya ikyia upfu kyiyeri kyileshi. 24 Ko Wayuda kataanu ngyilekapo ka makumi gaṟaaṟu na kyenda. 25 Kaṟaaṟu ngyilekapo na upoi; lyimwi ngyilekapo magoe; kaṟaaṟu ngyilenyamaṟikyio nyi ngalawa; kyingoto puti na kyio taṟaṟa ngyikyeri mṟingyenyi. 26 Kui iyenda kyaro kafoi; ngataṟa tsa mfo; ngataṟa tsa wasokyi; ngataṟa iwuka ko Wayuda woṙia; ngataṟa iwuka ko wandu wa masanga gengyi; ngataṟa tsa mṟinyi; ngataṟa tsa nukyenyi ngyuumu suwa ilawoṙe maa mṟinga; ngataṟa tsa ipalyipalyinyi; ngataṟa tsa wambuya wa wongo. 27 Wukyiwenyi na matuuronyi; ilaa kyiṙombo kafoi; njaenyi na wuangarinyi; kyiiṙi kya ikuretekyia kafoi; mbehonyi na iṙio kyiṟanguoe. 28 Kulawoṙe ionguo shindo shingyi shifoi, orio mfiri ngyiwoṙe maṟunda ga iambuya siṟi tsoose. 29 Nyi wui akyeri mfofo, na inyi ngyilawe mfofo? Nyi wui aletewo na mndu inyamaṟa na inyi ngyilawihiyo? 30 Kyikangyikooya ikushela, ngyekushelyia wufofo woko. 31 Ruwa, Awu o Mndumii Yesu, awaṟi kyiṟumi mṟasa mlungana, naichi kye ngyiṙeṙa wongo-pfo. 32 Ipfo Dameskyi mchilyi o mangyi Areta naweiringa mṟi o Wadameskyi, kundu nangyiwaṙe; 33 na inyi ngasotso dirishenyi lya kyiambasa ngyikyeri kyikapunyi, ngakyiṟo iwuka mawokonyi gakye.
1 Kyangyikooya ikushela, maa chandu kyilakyicha; kyaindi ngyegamba shindo Mndumii alengyiloṟa ngyikyeri cha mndu ailoṙo na ingyishukuya. 2 Ngyiichi mndu umwi kyiiṙi kya Kristo, hamsia cha maka ikumi na ina wulalu (kye nawekyeri kyiiṙi kya mmbiu ngyiichi-pfo; kye nawekyeri nja ya mmbiu ngyiichi-pfo; Ruwa naichi). Mndu-cho naleirio wuye mṟasa ngyinenyi ya kaṟaaṟu. 3 Na inyi ngyiichi mndu-cho, (kye nawekyeri kyiiṙi kya mmbiu ngiichi-pfo; kye nawekyeri nja ya mmbiu ngiichi-pfo; Ruwa naichi). 4 Kye naleiro mṟasa Paradiso, kaicho maṙeṙo galekyeiṙima iṙeṙo, galakyeri sungusinyi mndu igaṙeṙa. 5 Ko mbonyi tsa mndu cha icho ngyekushela; kyaindi kyipfa kyako ngyekushela-pfo, sile mbonyinyi tsa wufofo woko. 6 Kyipfa kokooya ngyiwekundi ikushela ngyiwechiwa tondo-pfo, kyipfa ngyegamba loi. Kyaindi ngyekushela-pfo, kundu mndu alachengyitalyia ngoseṟa ya isho awonyi koko ang'u ishiicho koko. 7 Na kyimaṙuma ngyilaiṙime ikushela na ielewetsa kyipfa kya shilya ngyileshukuyo, ngyileenengo kyindo kyewawiṟa mmbiu mbaṟe ya msha, kyindo kyikyeri cha mndu amṙume nyi Satana kundu nangyikape, ngyilachekushela na ielewetsa. 8 Kyipfa kya kyindo-kyo ngyileterewa Mndumii kaṟaaṟu kye kyingyiwukye. 9 Na oe kangyiwia, “Isaṟia lyako lyikushikyie; kyipfa wuiṙimi woko wokyeafukyia wufofonyi.” Kyasia ngyekushelyia wufofo woko kui sia ing'anyi, kundu wuiṙimi wo Kristo wukae na inyi. 10 Koikyo ngyichihiṟo nyi wufofo, shilahio, ngyuukyiwa tsa orio mbaṟe, kyipfa kya Kristo. Kyipfa kyiyeri ngyikyeri mfofo nyi lyo-ndu ngyiwoṙe pfinya. 11 Ngawa tondo, nyi nyoe mulengyitewe. Kyipfa kyiwekyiwaṟi nyoe mungyiṟumishe, kyipfa kuwoṙe kyindo wasu wang'anyi walengyiiṟa nakyo-pfo, maa chandu ngyilakyeri kyindo. 12 Nyi loi shiṟingyishio shekyeoshana na wasu shileṟundika konyu kui wusimiri woose, kui shiṟingyishio na maṟiyisho na ṟigo. 13 Kyipfa nyi kyikyi muleuṟa kuta siṟi tsingyi, sile nyi ilyi ngyilalewa ṟio konyu? Ngamuterewa mungyihooṟie wuwicho-wu. 14 Ambuyenyi kye nyi lya kaṟaaṟu inyi ngyikuṟeyeṟie icha na konyu, maa ngyechiwa ṟio konyu-pfo. Kyipfa ngyipfula masaa ganyu-pfo, indi ngyimupfula nyoe; kyipfa kyiwaṟi wana ikooma kyiseyesoe ko wafee-pfo, indi wafee ko wana. 15 Na inyi kui sia ing'anyi ngyikuṟeyeṟie iwuta kyoose ngyiwoṙe, maa ikuwuta inyi ngyimonyi kyipfa kya mrima yanyu. Ngyesa mongyikunda kyitutu kyipfa kya ilyi inyi ngyimukundi mnu-pfoe? 16 Kyaindi kyikuwiie kuṙo, inyi ngyilewa ṟio konyu-pfo; indi nyoe muigamba kye kui iwa mṟango ngyilewawaṙa kui ngyeṟo. 17 Ngyesa kuwoṙe mndu oose ngyilemṙuma konyu, ngammbia namtose kyindo? 18 Ngyileikyimbia Tito, ngaṙuma mono-wama ulya hamwi na oe. Ngyesa Tito nalemtosa kyindo? Ngyesa lulechumia kui Mumuyo ulya ulya na ndifonyi tsilya tsilya-pfoe? 19 Mokusaṟa kye maa wulalu luṙeṙa mbonyi tsekuringa konyu! Mbele ya Ruwa luiṙeṙa kyiiṙi kya Kristo. Na isho shoose, wakunde, nyi kyipfa kya imukarisha nyoe. 20 Kyipfa ngiowuo, ngyilachemukooya chandu ngyilakundi imukooya mukongyiwona konyu chandu mulawekusurie ingyiwona ngyilachekooya kofia nyi wuṟiingyi na wunyeng'i, na nyashi, na maluyano, na iiriana wongo, na iṙeṙana, na makushelo, na kyituṟu. 21 Na inyi ilyi ngyechicha-se, Ruwa oko alachengyienenga irigo nyi sonu konyu, na inyi ngyisuo kyipfa kya wafoi waleṙeko wookyia iho, walaṙumbuye wunyamaṟi wo ukoe, na wuṟui, na lango tsingyi tsa sonu.
1 Nyi kamba lya kaṟaaṟu inyi icha na konyu. Kui maṙumbu ga waṟingyishi wawi ang'u waṟaaṟu orio ṙeṙo lyechimanyika na pata. 2 Ngasonguo immbia, na chandu ngyiwekyeri ho lya kawi, na wuṙo maa wulalu ngyilakyeri ho, ngyimmbia na pata iwo walewuta sha wunyamaṟi wookyia kyiyeri-kyo, na wengyi woose, kye ngacha, ngyehooṟia-pfo. 3 Cha kyipfa muipfula chandu Kristo akyeri, icho aiṙeṙa mrimenyi koko, ulya alakyeri mfofo konyu, indi nawoṙe pfinya mrimenyi konyu. 4 Kyipfa nalewoogio msalabenyi, wufafenyi, kyaindi nai na moo kui pfinya tsa Ruwa. Kyipfa maa soe lukyeri wafafa kyiiṙi kyakye; indi lochikaa na moo hamwi na oe kui pfinya tsa Ruwa. 5 Kuruwe-ruwenyi muwenyi kye mukyeri iiṙikyienyi. Kuṟingyishienyi muwenyi. Ang'u muichi muwenyi kye Yesu Kristo nakyeri mrimenyi konyu? Sile molego. 6 Kyaindi ngyikusurie kye momanya kye soe lulelego-pfo. 7 Na soe luiterewa Ruwa, maa mulawute kyindo kyoose kyiwicho. Chi kundu soe lukuloṟe kye luwaiṙikyie-pfo, indi nyoe muwute kyilya kyikyicha, maa chandu soe lukyeri cha wandu walelego. 8 Kyipfa loiṙima iwuta kyindo kyoose kyilakyeri kya loi-pfo, indi kyipfa kya wuloi. 9 Kyipfa luchihiyo, kokooya soe lukyeri wafofo, na nyoe muwoṙe pfinya. Lyingyi-se loterewa muwe wandu waafutsie kyiiṙikyia. 10 Kyipfa kya ikyo, ngyiṟeia ishi ngyilakyeri ho, kundu ngyikyeri ho, ngyilaṟunde kui wuchilyi wulya ngyileenengo nyi Mndumii, kui ikarisha mrima maa chi iinyamaṟa-pfo. 11 Numa ya iho, wana wa wama, nakonyu. Muafutsie, muwiyiṟio moo. Kusurienyi kyimwi, mukae ufoṟonyi. Na Ruwa o ikunda na ufoṟo nechikaa hamwi na nyoe. 12 Iṟikyiṟanenyi chandu walya waiṙikyie Yesu wekyeiṟikyiṟana. 13 Wandu wa Ruwa woose wamuiṟikyiṟa. 14 Isaṟia lya Mndumii Yesu Kristo, na ikunda lya Ruwa, na isanza lya Mumuyo Mweele, lyikae na nyoe moose.
1 Inyi Paulo, ngaṟeia paruo-i, ngyikyeri msu (chi msu o wandu maa amṙume nyi mndu-pfo, indi amṙume nyi Yesu Kristo, na Ruwa Awu alemṟutsa iwuka ko wapfu), 2 na woose waiṙikyie Yesu wakyeri hamwi na inyi loiṟikyiṟa siṟi tsoose tsa Galatia. 3 Isaṟia lyikae konyu, na ufoṟo, shiwukyie ko Ruwa Awu, na ko Mndumii oṙu Yesu Kristo. 4 Ulya alereka mrima okye kyipfa kya ngyuunyamaṟi tsaṙu, kundu nalukyiṟe mawicho ga kunu wuyanenyi lukyeri wulalu, chandu Ruwa, Awu oṙu, alekunda. 5 Kyiṟumi kyikae na oe, mlungana na mlungana. Amen. 6 Ngyimṟiyie kyipfa muiṙa iwinyi kuṙo ulya alemulaga isaṟienyi lya Kristo, na igalukyia malosho ga mbaṟe ingyi gaigambo kye nyi ndumi ngyicha. 7 Kuwoṙe ndumi ngyicha ingyi-pfo; kyaindi kuwoṙe wandu waipfuṟukana wakundi iilacha Ndumi Ngyicha ya Yesu Kristo. 8 Kyaindi kokooya soe ang'u malaika o ruwewu amulosha shindo shingyi shilakyeri shilya lumuongoya, nawusio kyiseso. 9 Chandu lulesonguo igamba, na wulalu ngyigamba-se, mndu oose kamuongoya ndumi ngyicha ingyi ilakyeri iya muleambilyia koṙu, mndu-cho nawusio kyiseso. 10 Kyipfa wulalu ngyesa ngyikundi ikundo nyi wandu? Ote! Kyindo ngyikundi nyi ikundo nyi Ruwa. Kyipfa kokooya ngyiwekundi mṟasa wulalu ichihiṟa wandu, ngyiwechiwa mṟundi o Kristo-pfo. 11 Cha kyipfa, wana wa wama wako, Ndumi-yo Ngyicha ngyilemuongoya, ngyimmbia kye ilewuka ko wandu-pfo. 12 Cha kyipfa ngyileiambilyia ko wandu, maa ilosho nyi mndu-pfo, indi kui ishukuyo nyi Yesu Kristo. 13 Kyipfa muleicho mbonyi tsa mkaṟo yako wookyia mawookyionyi kyiyeri ngyiwekyeindia Ruwa chandu Wayuda wekyemwindia; kye ngyilelyisa Siṟi ya Mndumii wukyiwa wuelewetsie, ngyetambagana iinyamaṟa. 14 Na inyi wandunyi wa rika lyako inyi ngyiwekyeri mbele kuta wengyi kyipfuṟukanionyi kyeindia Ruwa chandu Wayuda wekyemwindia, ngatambagana mnu iosha shilya ngyileambilyia ko waku wako. 15 Kyaindi Ruwa alengyisaanga wookyia wosinyi ko wama oko, kangyilaga kui isaṟia lyakye; 16 kyiyeri alewona nyi necha iṟingyishia Mono-kye mrimenyi koko, kundu ngyiongoye walya walaiṙikyie Yesu mbonyi tsakye; maa ngyileyenda ko mndu oose immbesa kyindo-pfo. 17 Maa ngyilekunda iyenda Yerusalemu ko walya walengyisongoya iwa wasu-pfo; indi ngyileyenda uruka lo Waarabu na numa ya iho ngawuya-se na Dameskyi. 18 Numa ya iho; hamwiṙe maka iṟaṟu, ngaṙo iyenda Yerusalemu kundu ngyiwonane na Kyefa, ngakaa kokye mfiri ikumi na itanu. 19 Kyaindi ngyilewona msu ungyi sile Yakobo, mono-wama o Mndumii-pfo. 20 Na isho ngyimuṟeia nyoe, ambuyenyi, mbele ya Ruwa, ngyiṙeṙa wongo-pfo. 21 Numa ya iho ngyileyenda ngyuura tsa Shamu na Kyilyikyia. 22 Kyaindi ngyilewono kyaam kyako nyi siṟi tsa Uyuda tsiwekyeri kyiiṙi kya Kristo-pfo; 23 indi waleicho tupu kye icho mfiri ya ipfo numa awekyewalyisa wukyiwa, wulalu naionguo mbonyi tsa iiṙikyia alelyinyamaṟa ilyi kacha. 24 Wakaṟumisha Ruwa kyipfa kyako.
1 Numa ya iho, hamwiṙe maka ikumi na ina, ngaṙo-se iyenda Yerusalemu ngyiṙuṙanyi na Barinaba na Tito. 2 Na inyi ngyileyenda kyipfa ngyileshukuyo ngawia wandu Ndumi Ngyicha iya ngyekyeongoya walya walakyeri Wayuda, kyaindi kui kyiṟika ko walya wawoṙe kyiṟumi, kyilacheewa kofia ngyiṙicha wulya, ang'u ngyileṙicha wulya. 3 Kyaindi Tito awekyeri hamwi na inyi, na oe nyi Mkyiṟikyi, aleitiko iṙino-pfo. 4 Indi kyipfa kya wandu walekuloṟa kye waiṙikyie Yesu na kunu waweiṙikyie-pfo, wandu walekulunga na soe kui kyiṟika kundu wamanye mbonyi tsaṙu soe lulawachilyie nyi kyindo kyiiṙi kya Kristo Yesu, kundu ilyi numa waluwikye wusingyenyi. 5 Kyaindi kyipfa kya iringa ulogo lo Ndumi Ngyicha luleiṙikyia waluchilyie maa ale-pfo, kundu wuloi wo Ndumi Ngyicha wukae na nyoe. 6 Kyaindi walya wawoṙe kyiṟumi na kye wawoṙe rina (ngyilesaṟa wawei kuṙa-pfo kyipfa koko shilyingananyi shoose; na Ruwa ekyeambuya kyaam kya mndu-pfo); ngagamba iwo wawoṙe kyiṟumi walengyiengyeṟia kyindo-pfo. 7 Indi kyilaṙuṙanyi na isho, kyiyeri walewona kye ngyimṙambikye Ndumi Ngyicha ya wandu walakyeri Wayuda, chandu Petiro aleṙambiko Ndumi Ngyicha ya Wayuda; 8 (kyipfa ulya aleenenga Petiro wuiṙimi wo iwa Msu o Wayuda nyi oe alengyienenga na inyi wuiṙimi wo iyenda ko walya walakyeri Wayuda.) 9 Lyingyi-se kyiyeri walemanya isaṟia lyilya ngyileenengo; Yakobo, na Kyefa, na Yohane, wawoṙe kyiṟumi kye nyi ngoe, waleiṙikyia iṟunda hamwi na inyi na Barinaba; kundu soe luyende ko walya walakyeri Wayuda, nawo wayende ko Wayuda. 10 Indi waleluwia luwute kyindo kyimwi, lutarame wakyiwa, na ikyo ngyilekyiṟunda kui wuragari. 11 Kyaindi kyiyeri Kyefa alecha na Antiokyia, ngyilegaluana na oe ushangu kui ushangu, kyipfa nawewaṟi ianduyo. 12 Cha kyipfa kyiyeri wandu waata wawukyie ko Yakobo walawendeche, naweilya handu hamwi na wandu walaiṙikyie Yesu; kyaindi kyiyeri wo walecha, kawuya na numa, kalekana nawo, kunu echiowuo Wayuda. 13 Na Wayuda-wo, wengyi wakaowuo hamwi na oe, mṟasa na Barinaba kawaṙa wukulembecheṟi chawo. 14 Kyaindi, kyiyeri ngyilewona kye mkaṟo yawo iṙuṙanyi necha na wuloi wo Ndumi Ngyicha-pfo, ngyilewia Kyefa mbele ya wandu woose, “Kokooya iyoe ukyeri Myuda nuosha miichiwie ya wandu walaiṙikyie Yesu, maa chi ya Wayuda-pfo, ny'kyilyi uitika wandu walaiṙikyie Yesu iosha miichiwie ya Wayuda?” 15 Soe lukyeri Wayuda kui ifeo, maa chi waṙeko wawukyie ko walya walakyeri Wayuda-pfo, 16 luichi kye mndu ekyetalyio wusumganyi kui mawuto ga mawawaso-pfo, indi kui iwaṙa iiṙikyia kyiiṙi kya Kristo Yesu. Soe luleiṙikyia Kristo Yesu kundu lutalyio wusumganyi kui iiṙikyia Kristo, maa chi kui mawuto ga mawawaso-pfo; kyipfa kui mawuto ga mawawaso kuwoṙe mndu echitalyio wusumganyi-pfo. 17 Kyaindi kokooya soe luwenyi, kui ipfula italyio wusumganyi kyiiṙi kya Kristo, lulewono kye luwanyamaṟi, ngyesa Kristo nawa mṟundi o wunyamaṟi? Ote! 18 Kyipfa ngawika-se shilya ngyilemshiunduo, ngaloṟa kye inyi ngyimonyi nyi mṙeko. 19 Kyipfa inyi ko mbonyi tsa mawawaso ngyipfiie kundu ngyiwaṙe moo kyipfa kya Ruwa. 20 Ngyilekapio msalabenyi hamwi na Kristo; kyaindi ngyiwoṙe moo; maa chi inyi-se-pfo, indi Kristo nai na moo mrimenyi koko. Na moo ngyiwoṙe wulalu mmbiunyi ngyiuwoṙe kyiiṙi kya iiṙikyia Mana o Ruwa, ulya alengyikunda kareka moo okye kyipfa kyako. 21 Ngyikundi iwiyitsa kuleshi ikunda lya Ruwa ko wandu-pfo; kyipfa kokooya wusumganyi wokyewono kui njia ya mawawaso, kyasia Kristo nalepfa wulya.
1 Lanyoe Wagalatia mulawoṙe wuṟango, nyi wui alemloga, nyoe walya Yesu Kristo alemuloṟa na pata kye nalekapio msalabenyi? 2 Ngyikundi ikulosha kyindo kyimwi konyu. Ngyesa muleambilyia Mumuyo Mweele kui mawuto ga mawawaso ang'u kui iicho Ndumi Ngyicha na iiṙikyia Yesu? 3 Ngyesa mulewa matondo mbaṟe-i iyi? Mommbookye kui Mumuyo, mukundi iafutsia kui pfinya tsanyu muwenyi? 4 Ngyesa molya wukyiwa wung'anyi kuṙi wulya? Loi chi wulya-pfo. Kyilya kyilemmbutikyia kyiwaṟi imuenenga ikusaṟa chandu kyiweng'anyi. 5 Kyasia, ulya ekyemuenenga Mumuyo na iwuta shindo sha maṟiyisho kyiiṙi kyanyu, ngyesa nekyewuta kuṙo kui mawuto ga mawawaso, ang'u kui iicho Ndumi Ngyicha yekyeende iiṙikyia Yesu? 6 Chandu Abrahamu aleiṙikyia Ruwa katalyio wusumganyi. 7 Kyasia manyenyi-ng'u kye walya wawoṙe iiṙikyia, iwo nyiwo wana wa Abrahamu. 8 Na kyiṟeio kyiele, chandu kyilewona wookyia kacha kye Ruwa nechitalyia wusumganyi walya walaiṙikyie Yesu kui iiṙikyia, kyileongoya Abrahamu Mbonyi Ngyicha kyiyeri kya kacha igamba, “Kyiiṙi kyapfo iyoe walya walaiṙikyie Yesu wechiwona mboṟa.” 9 Kyasia iwo wakyeri wa iiṙikyia wekyewona mboṟa hamwi na Abrahamu awekyeri mndu awoṙe iiṙikyia. 10 Cha kyipfa woose wakyeri wa mawuto ga mawawaso, wakyeri kyisesonyi; kyipfa kyikyiṟeie, “Namsese ulya alekyeosha shindo shoose shikyeri kyitapunyi kya uwawaso.” 11 Nyi kyindo kyiichio na pata kye kuwoṙe mndu ekyetalyio wusumganyi mbele ya Ruwa kui mawawaso-pfo; cha kyipfa, “Mndu msumganyi nechiwaṙa moo kui iiṙikyia.” 12 Na uwawaso lulecha kui iiṙikyia-pfo, indi, “Ekyewuta isho nechiwaṙa moo kyiiṙi kya isho.” 13 Kristo naleluwuta kyisesonyi kya uwawaso, cha kyipfa naleseso kyipfa kyaṙu; kyipfa kyikyiṟeie, “Orio mndu amkapie msalabenyi namsese.” 14 Kundu kye mboṟa ya Abrahamu ikooye walya walaiṙikyie Yesu kyiiṙi kya Yesu Kristo, luiṙime iambilyia kyaasa kya Mumuyo kui njia ya iiṙikyia. 15 Wana wa wama wako, ngyiṙeṙa kyimndu. Maa chandu kyikyeri nyi kyaasa kya wandu, kyaasa kyikammbiko, kuwoṙe mokyiilacha ang'u ikyiengyeṟa-pfo. 16 Kyasia Abrahamu naleenengo shaasa hamwi na ulya alemfee. Aigamba, “Ko walya alefee” cha ilyi nyi wafoi-pfo, indi cha ilyi nyi umwi, “Ko ulya ochimfee,” kyimwi na igamba Kristo. 17 Kyindo ngyigamba nyi ikyi, kyaasa kyilewiko mawookyionyi nyi Ruwa, uwawaso lulecha maka magana gaana na makumi gaṟaaṟu numa ya kyaasa-kyo loiṙima iilacha kyaasa-kyo-pfo. 18 Cha kyipfa kyioṟa kyikawa nyi kui mawawaso, kyikyewa-se kyaasa-pfo; kyaindi Ruwa nalesaṟia Abrahamu kui njia ya kyaasa. 19 Kyasia uwawaso nyi kyikyi-ng'u? Uwawaso luleṙiko kyipfa kya maṙeko, mṟasa nache icho amwenengye kyaasa-kyo; kyaasa kyileendo nyi malaika kyiyeri Mose alewa mndu Ruwa alemṙuma ko wandu. 20 Kyasia ulya akyeri moṙumo chi moṙumo ko mndu umwi-pfo; indi Ruwa nyi umwi. 21 Kyasia, ngyesa uwawaso lokyewingana na shaasa sha Ruwa? Ote! Cha kyipfa kokooya mawawaso gekyeende moo galaleṙiko, loi wusumganyi wuwechiwono kui mawawaso. 22 Kyaindi kyiṟeio kyiele kyagamba kye wuyana woose wuwuchilyie nyi wunyamaṟi kundu iwo waiṙikyie waenengo kyaasa kui iiṙikyia waenengo kyaasa-kyo kui iiṙikyia Yesu Kristo. 23 Kyaindi kyiyeri iiṙikyia lyilya lyilawendeche luwewachilyie nyi mawawaso, lukowa cha wandu wakyeri kyipfungonyi, mṟasa kyiyeri kyeiṙikyia Yesu kyechicha, kyiyeri Ruwa echiloṟa. 24 Koikyo uwawaso lowa msongoru moluende na ko Kristo, kundu lutalyio wusumganyi kui iiṙikyia. 25 Kyaindi kokooya iiṙikyia lyilemcha, lukyeri-se wanda ya msongoru-pfo. 26 Cha kyipfa nyoe moose mowa wana wa Ruwa kui njia ya iiṙikyia Kristo Yesu. 27 Kyipfa nyoe moose muwapatise kyiiṙi kya Kristo muṟee Kristo. 28 Kuwoṙe-se Myuda maa Mkyiṟikyi-pfo. Kuwoṙe-se mtumo ang'u alakyeri mtumo-pfo. Kuwoṙe-se mndu msoṟo maa mndu mka-pfo. Kyipfa nyoe moose mowa kyindo kyimwi kyiiṙi kya Kristo Yesu. 29 Na kokooya nyoe nyi wandu wa Kristo, kyasia mowa wana wa Abrahamu, na weoṟa iṙuana na kyaasa.
1 Kyaindi ngagamba kye mokyioṟa, kyiyeri kyoose ai mana, nakyeri cha mtumo, kyiyeri awuye ammbiie kyindo echioṟa. 2 Indi nakyeri wuchilyinyi wo walya wawawikye wamwambuye na imwenenga shilya akundi mṟasa kyiyeri awuye echigamba kye kuwoṙe-se kyimaṙuma kyewika wandu weambuya mokyioṟa-cho-pfo. 3 Na wuṙo na soe, kyiyeri luwekyeri wana watutu, lukowa watumo wa mumuyo ichilyie wuyana. 4 Na lyilya kyiyeri kyilya kyiwekyikunde kyileafukyia, Ruwa naleṙuma Mono-kye, ulya alefeo nyi mndu mka, nafeo wuchilyinyi wo mawawaso, 5 kundu nakyiṟe walya wawewachilyie nyi mawawaso, kundu soe luiṙime iambilyia iwa wana. 6 Na kyipfa nyoe mowa wana, Ruwa naleṙuma Mumuyo o Mono-kye mrimenyi konyu, ekyegamba, “Aba,” kyimwi na igamba Awu. 7 Kokooya nyi wuṙo, iyoe chi mtumo-se-pfo indi nukyeri mana; na kokooya nukyeri mana, kyasia nukyeri mokyioṟa ko Ruwa. 8 Kyaindi kyiyeri kyilya, kyipfa mulaweichi Ruwa, muleṟundia shindo shilakyeri waruwa. 9 Indi wulalu mommanye Ruwa, ang'u ngoseṟa Ruwa imumanya nyoe, nyi kyikyi kyitewe kyewiyilyia malosho ga mawookyionyi gamafofo, gai mti, galya mukundi igaṟundia-se? 10 Mokyekuwinisha na mfiri, na mori, na shiyeri, na maka. 11 Ngyikusaṟa mnu kyipfa kyanyu, kyilawe kofia ngyilekuwinisha wulya kyipfa kyanyu. 12 Wana wa wama wako, ngamterewa, muwe cha inyi, kyipfa inyi nyi cha nyoe. Mulengyilyiia mbaka kyindonyi kyoose-pfo. 13 Kyaindi muichi kye ngyilemuongoya Ndumi Ngyicha lya kuwooka kyipfa kya wufafa wo mmbiu. 14 Na kyiyesho kyilempaaya nyoe mmbiunyi oko mulekyimina maa ikyilega-pfo, indi mulengyiambilyia cha malaika o Ruwa, cha Kristo Yesu. 15 Kyasia, nyi kyikyi kyammbutikye kyeiṙima igaluo ishi shoose? Kyipfa ngyiṟingyishia kye, kokooya kyiwechiiṙimika, muwekuluo meso ganyu, mungyienengye inyi. 16 Ngyesa ngawa mokyituwa onyu kyipfa ngyimmbia shikyeri sha loi? 17 Iwo wawoṙe ilanga lying'anyi kyipfa kyanyu, kyaindi chi kui njia ngyicha-pfo, indi wakundi imshingyia nja, kundu kye nyoe muwalangye wo. 18 Na nyi kyindo kyicha iwaṙa wunyeng'i kyipfa kya kyindo kyicha mfiri yoose, maa chi kyiyeri ngyikyeri na nyoe tupu-pfo. 19 Mbuya tsako wakunde, walya kyipfa kyawo ngyiwoṙe iwawio lying'anyi mrimenyi mṟasa muwe cha Kristo; 20 ngyilangyie kui mrima oko oose ikaa halya-ndu mukyeri wulalu, kundu ngyiilachikye na iloṟa lyako chandu ngyimukundi. 21 Ngyiwienyi, nyoe mukundi ichilyio nyi mawawaso. Ngyesa mokyeicho kyindo mawawaso gagamba-pfoe? 22 Cha kyipfa kyikyiṟeie kye Abrahamu nawewoṙe wana wawi, umwi alefee na kyisinga, na umwi na mka o wolyi. 23 Kyaindi mana ulya o kyisinga nalefeo kui mmbiu, na ulya o mka o wolyi kui kyaasa. 24 Shindo-shi shekyeṙeṙo kui mfano; cha kyipfa iwa wawi nyi cha mma ya mbaṟe tsiwi; mma umwi iwuka fumvu lya Sinai, okyewaṙa wana kui wusinga, na mma-cho nyi Hajiri. 25 Kyipfa Hajiri nyi cha fumvu lya Sinai lyikyeri urukyenyi lo Waarabu, lyilyingananyi na Yerusalemu ya wulalu; cha kyipfa nekyeṟunda hamwi na wana. 26 Indi Yerusalemu ya wuye nyi mka ulya o wolyi, na oe nyi oe wama oṙu soe. 27 Cha kyipfa kyikyiṟeie, “Chihiyo, iyoe muumba, ulekyewaṙa wana; kuilengye na ṟui lying'anyi, ufiiṟe, iyoe ulawoṙe fowa cha ya mndu mka aienengo mana. Kyipfa wana wa ulya amṙe amonyi nyi wafoi kuta wa ulya awoṙe mii.” 28 Kyasia, wana wa wama wako, cha Isakyi, soe nyi wana wa kyaasa. 29 Kyaindi chandu kyiyeri kyilya ulya alefeo kui mmbiu alelyisa wukyiwa ulya alefeo kui Mumuyo, nyi wuṙo kyikyeri maa wulalu. 30 Kyaindi kyiṟeio kyiele kyagamba kuṙa? “Funa kyisinga na mono-kyo, cha kyipfa mana o kyisinga echioṟa maa ale hamwi na mana o mka o wolyi-pfo.” 31 Koikyo, wana wa wama wako, soe chi wana wa kyisinga-pfo indi nyi wana wa ulya ai mka o wolyi.
1 Kyiiṙi kya iwa wana wa mka o wolyi Kristo nalelugaluo wandu walakyeri wuchilyinyi wo kyindo kyoose. Koikyo maa mulalolome, maa ichilyio-se nyi wutumo. 2 Inyi Paulo ngammbia nyoe kye, mukoṙino, Kristo echiwaṙa kyiira konyu-pfo. 3 Lyingyi-se ngyiṟingyishia orio mndu ekyeṙino kye nyi iṟunda lyakye iafutsia uwawaso loose. 4 Muwasaangye nyi Kristo, nyoe mukundi italyio wusumganyi kui mawawaso, mooloka na iwuka isaṟienyi. 5 Kyipfa soe kui Mumuyo luiweṙelyia ikusuria lya wusumganyi kui njia ya iiṙikyia. 6 Kyipfa kyiiṙi kya Kristo Yesu iṙino, maa iṙa iṙino lyiwoṙe kyiira kyoose-pfo, indi iiṙikyia lyekyeṟunda kui ikunda. 7 Muweitambagana necha; nyi wui alemushingyia mulaindie wuloi? 8 Chi Ruwa alemushingyia-pfo, kyipfa nyi oe ekyemlaga muyende kokye. 9 Chachu kyitung'tu yekyetarang'isha itongye lyoose. 10 Kyiiṙi kya Mndumii ngyikusaṟie kye moiṙima iwaṙa makusaṟo ga mbaṟe ingyi-pfo. Kyaindi mndu oose aimuenenga wuowu nechianduyo. 11 Na inyi, wana wa wama wako, kokooya ngyionguo mbonyi tsa iṙino, ny'kyilyi ngyilyiso wukyiwa mṟasa wulalu? Kokooya ngyiweionguo kuṙo ilosha lyako kye Kristo nalepfa msalabenyi lyiwewa lya wulya. 12 Ngyiwechihiyo mnu kokooya iwo waimfoga-foga wawekuletsana na nyoe nakamwi. 13 Kyipfa nyoe, wana wa wama, mulelago muwe wandu mulawachilyie nyi kyindo. Kyaindi kulya iwa wandu walawachilyie nyi kyindo kulawe kyimaṙuma kyeosha lango tsa mmbiu, indi ṟundianenyi kui ikunda. 14 Kyipfa uwawaso loose lukyeri kyindonyi kyimwi tupu, nakyo nyi ikyi, “Ukunde momṟasa opfo chandu ukukundi kumonyi.” 15 Kyaindi mukowika cha mando ga saka, ambuyenyi mularumatsane. 16 Kyasia ngagamba, chilyionyi nyi Mumuyo Mweele; maa mulawute kyilya mrima yanyu ikundi tupu. 17 Cha kyipfa mmbiu okyelanga ochiwingana na Mumuyo, na Mumuyo iwingana na mmbiu; kyipfa ishi shekyeṙuana-pfo, na moiṙima iwuta shilya mukundi-pfo. 18 Kyaindi mukosongoyo nyi Mumuyo, mukyeri wuchilyinyi wo mawawaso-pfo. 19 Kyasia mawuto ga mmbiu gai na pata, nyigo iga: wuṟui, ukoe na lango tsa sonu, 20 iindia mafano, wusawi, isuana, iluyana, wunyeng'i, nyashi, wuṟiingyi, nduutsano, iṙeṙa wongo. 21 Wunanzi, ilya na ielewetsa, na shindo shifananyi na isho; kyiiṙi kya isho ngammbia kulawoṙe ikyelyio, chandu ngyilemummbia kye wandu wekyewuta shindo sha mbaṟe-yo wechioṟa Wumangyi wo Ruwa-pfo. 22 Kyaindi ndunda tsa Mumuyo nyi ikunda, sia, ufoṟo, ikarishia, kyiṙo kyicha, itarama wakyeri wukyiwenyi, iwuta kyilya mndu ateṟia, 23 wuhoo, iwaṙa meena. Kuwoṙe iwawaso lya mbonyi tsa shindo cha isho-pfo. 24 Na iwo wakyeri wa Kristo Yesu wekyechilyio-se nyi lango tsa mmbiu yawo-pfo. 25 Mumuyo naluenengyie moo, koikyo lumwenengye momu o iluchilyia. 26 Maa lulakushele wulya, lochisouana na iwoniana wunyeng'i.
1 Wana wa wama wako, mndu kaasha kyindonyi kyoose, nyoe mukyeri wa Mumuyo mmbiyiṟenyi kui ngoo ya wuhoo, ochikuringa mrima opfo ulacheyesho. 2 Taramanenyi na iosha iwawaso lya Kristo. 3 Kyipfa mndu kakuwona kye nyi kyindo, na oe chi kyindo-pfo, nakulemba mrimenyi kokye. 4 Kyaindi orio mndu naeneng'ene iṟunda lyakye amonyi, nyi lyo-ndu eiṙima iwaṙa kyimaṙuma kyekushela mrimenyi kokye tupu, maa chi ko oṙoe-pfo. 5 Kyipfa orio mndu nechikuṙika mlari okye amonyi. 6 Manalosho naongoye mlosha okye shindo shicha shoose. 7 Maa mulakulembe, Ruwa chi tondo-pfo; cha kyipfa kyilya mndu awaaya nyikyo echisambuo. 8 Kyipfa ulya awaaya kui mmbiu okye, mmbiunyi okye nechisambuo wunyamaṟi; indi ulya awaaya kui Mumuyo, Mumuyonyi nechisambuo moo o mlungana. 9 Lyingyi-se maa lulalemo iwuta shindo shicha; kyipfa lochisambuo ilyi kyiyeri kyechishika, lulandewine. 10 Koikyo iṙuana na chandu lowona ṙaawa luwutie wandu shindo shicha; ngoseṟa walya waiṙikyie Yesu. 11 Chandu inyi ngyimonyi ngyimuṟeia paruo wulalu, 12 woose wakundi iwono kye nyi wandu wecha ko mbonyi tsa mmbiu nyiwo waimuitika iṙino; kundu walalyiso wukyiwa nyi msalaba o Kristo tikyi. 13 Cha kyipfa maa walya wawaṙine wekyeosha kyilya mawawaso gakundi-pfo; indi wakundi nyoe muṙino, waiṙime ikushelyia mmbiu yanyu. 14 Kyaindi inyi, ote, ngyilakushelyie kyindo kyoose sile msalaba o Mndumii oṙu Yesu Kristo, ulya ulengyienenga inyi iṙa iosha mbonyi tsa wuyana. 15 Cha kyipfa iṙino ang'u iṙa iṙino chi kyindo-pfo, indi kyindo kying'anyi nyi iwa mndu mhya. 16 Na woose wechiwaṙa mkaṟo iṙuṙanyi na ikyo, ufoṟo lukae kowo na iwoniana wukyiwa, yee ko wandu woose wa Ruwa. 17 Wookyia wulalu mndu alangyilyise wukyiwa; cha kyipfa ngyiṙuṙe ngoru tsa Kristo mmbiunyi koko. 18 Wana wa wama wako, isaṟia lya Mndumii oṙu Yesu Kristo lyikae hamwi na mrima yanyu. Amen.
1 Inyi Paulo, ngyikyeri msu o Kristo Yesu chandu Ruwa akundi, ngaṟeia paruo-i konyu nyoe wandu wa Ruwa wakyeri [Efeso] waiṙikyie Kristo Yesu. 2 Isaṟia lyikae konyu na ufoṟo shiwukyie ko Ruwa Awu oṙu na ko Mndumii Yesu Kristo. 3 Ruwa naṟumisho, Awu o Mndumii oṙu Yesu Kristo, aleluwikyia mboṟa kui mboṟa tsoose tsa mrimenyi, wuyanenyi wo mumuyo, kyiiṙi kya Kristo. 4 Chandu alelusambuṟa kyiiṙi kyakye kyiyeri wuyana wulawendegumbo, kundu luwe wandu wa Ruwa, wandu walawoṙe mti mbele yakye ikundenyi. 5 Cha kyipfa nalesonguo ilusambuṟa, kundu nalugaluo wana wakye kui njia ya Yesu Kristo, iṙuana na kyilya akundi. 6 Mng'ano o isaṟia lyakye uṟumisho, alelusaṟia kyiiṙi kya icho Mkunde. 7 Kyiiṙi kyakye kui samu yakye, luwoṙe wukyiro woṙu, ihooṟio wunyamaṟi, iṙuana na isaṟia lyakye lying'anyi. 8 Na oe naleluengyeṟia ikyo wuṟangonyi woose na wunyotsu; 9 amluloṟe kyiṟika kya kyilya akundi, iṙuana na kyilya akundi kyiiṙi kya icho. 10 Nyi kyimwi na igamba kye, iende wusongoru wo kyiyeri kyiafukyie nesanzia handu hamwi shindo shoose kyiiṙi kya Kristo, shindo sha ruwewu na shindo sha wuyanenyi taa. Yee, kyiiṙi kya icho. 11 Na kyiiṙi kyakye soe taa lulewiko kyioṟa, kunu lochisambuṟo wookyia mawookyionyi iṙuana na kyilya oe akundi, ekyewuta shindo shoose iṙuana na kyilya akundi. 12 Na soe kyiiṙi kya icho luiṙime iwa kyiṟumi kya mng'ano okye, soe lulesonguo iwikyia Kristo ikusuria lyaṙu. 13 Na nyoe taa kyiiṙi kya icho momuicho ulogo lo loi, Ndumi Ngyicha ya wukyiṟo wonyu. Lyingyi-se momumwiṙikyia oe, na iwiko fana nyi Mumuyo ulya o kyaasa akyeri Mweele. 14 Nyi oe akyeri mogoṟokyia kyioṟa kyaṙu, kundu naende wukyiṟo wo Wumangyi wokye, wuwe kyiṟumi na mng'ano okye. 15 Kyipfa kya ikyo maa inyi, wookyia ngyileicho mbonyi tsa iiṙikyia lyanyu kyiiṙi kya Mndumii Yesu, na ikunda lyanyu ko wandu wa Ruwa woose, 16 ngyekyeṙa iana kyipfa kyanyu-pfo; ngyemukumbuo shiterewonyi shako. 17 Ruwa o Mndumii oṙu Yesu Kristo, Awu o mng'ano, namuenengye nyoe Mumuyo o wunyotsu na o ishukuyo kui Mumuyo kyiiṙi kya immanya oe. 18 Ruwa naṟuguo mrima yanyu iiṙime iwona, mumanye ikusuria lya ilaga lyakye chandu lyikyeri; na wusuṟi wo mng'ano wo kyioṟa kyakye wandunyi wa Ruwa chandu wukyeri. 19 Na wucha wo wung'anyi wo wuiṙimi wokye mrimenyi koṙu luiṙikyie chandu wukyeri; kui iṙuana na iwuta lya pfinya tsa wuiṙimi wokye; 20 alewuta kyiiṙi kya Kristo lyilya alemṟutsa ko wapfu, kammbika kuwoko kokye ko kulyoe ruwewu; 21 wuye mnu kuta Wumangyi woose, na wuchilyi na pfinya, na orio rina lyekyesendo, maa chi kunu wuyanenyi tupu-pfo, indi wulya wuicha taa. 22 Kawika shindo shoose wuchilyinyi wo Kristo, kammbika nawe mṙoe wuye ya shindo shoose kyipfa kya Siṟi; ikyeri 23 nyiyo mmbiu okye, na iafutsia lyakye oe ekyeenenga shindo shoose iafutsio koose.
1 Na nyoe muwewapfu kyipfa kya iuṟa wuindi na ngyuunyamaṟi tsanyu. 2 Ngyuunyamaṟi muletsiwuta kacha kui iosha mchilyi ang'anyi o waṟufui wa ngyinenyi, mṟufui ulya o Satana aiṟunda maṟunda wulalu kyiiṙi kya walya waiwingana na Ruwa; 3 wakyeri kye kacha, soe loose luleweṟunda kui isanza nawo, langonyi tsa mmbiu yaṙu, kyiyeri luleosha lango tsa mmbiu na makusaṟo gaṙu, lukowa kui mwichiwie oṙu wana wa nyashi kyimwi na iwo wengyi. 4 Kyaindi Ruwa kyipfa akyeri o isaṟia lying'anyi, kui ikunda lyakye lying'anyi alelukunda; 5 mṟasa kyiyeri kyilya luwekyeri wapfu kyipfa kya maṙeko gaṙu; naleluṟutsa hamwi na Kristo; kyimwi na igamba kye, mulekyiṟo kui isaṟia. 6 Kaluṟutsa hamwi na oe, kaluṟamiṟa hamwi na oe wuyanenyi wo ruwewu, kyiiṙi kya Kristo Yesu. 7 Kundu kyiiṙi kya shiyeri-sho shiicha naloṟe ielewetsa lya isaṟia lyakye kui wucha wokye koṙu soe kyiiṙi kya Kristo Yesu. 8 Cha kyipfa mulekyiṟo kui isaṟia, kui njia ya iiṙikyia; chi kui ipfuṟukana lyanyu-pfo, nyi kyisumbo kya Ruwa; 9 maa chi kui mawuto-pfo, mndu oose alachekushela. 10 Kyipfa nyi wuṙo luwagumbe, lulegumbo kyiiṙi kya Kristo Yesu, luwute mawuto mecha, igo wookyia kacha Ruwa alegaṟeyeṟa kundu luwute luṙo. 11 Kyipfa kya ikyo kumbuonyi kye kacha nyoe, muwewafee cha wandu walaiṙikyie Ruwa. Wayuda wekyemulaga, “Wandu walawaṙine,” Wayuda walya wekyegamba kye wo nyi “Wandu waṙine,” kyimwi na igamba kye, nyi iṙino lya mmbiu lyilyiwute kui mawoko. 12 Kyiyeri-kyo kya kacha mulawewoṙe Kristo, muwelekanyi na mbaṟe ya Isiraelyi, wayenu walawoṙe shiteṟio sha kyaasa kyilya. Muwewoṙe ikusuria-pfo, maa muweichi Ruwa-pfo. 13 Kyaindi wulalu, kyiiṙi kya Kristo Yesu, nyoe muwekyeri kuleshi iho mawookyionyi, mowa kufuhi kui samu ya Kristo. 14 Kyipfa oe nyi oe ufoṟo loṙu, aleluwutia soe luwekyeri wawi lukowa umwi; kafunja kyiambasa kya makyiṙi-gawi kyiweluletsanie. 15 Na oe ammbute kyituwa kyilya kui mmbiu okye; nyigo mawawaso ga shindo wandu wawaṟi iwuta na walawaṟi iwuta; kundu nawikye iwo wawi wawe mndu umwi mhya kyiiṙi kyakye; kaende ufoṟo. 16 Kawasanza woose wewawi na Ruwa mmbiunyi umwi, kui njia ya msalaba, amrumatse kyituwa kyilya kui msalaba-cho. 17 Kacha kacheonguo ufoṟo konyu nyoe muwekyeri kuleshi, na ufoṟo ko walya wawekyeri kufuhi. 18 Cha kyipfa kokye soe loose lulewona njia yetikyira kufuhi na Awu Mumuyonyi umwi. 19 Kyasia wookyia wulalu nyoe chi wayenu maa wandu waikuiṙia-pfo, indi nyoe nyi wandu walakyeri wayenu hamwi na wandu wa Ruwa, wandu wa kanyi ko Ruwa. 20 Muwawikye urendenyi lo wasu na weonguo shisuku, na Kristo Yesu amonyi nyi igoe lying'anyi lya ndumbenyi. 21 Kyiiṙi kyakye numba yoose iwaṙanyi necha na ing'ana mṟasa iwe hekalu lyiele kyiiṙi kya Mndumii. 22 Kyiiṙi kyakye nyoe muwawikye handu hamwi ikaa kanyi ko Ruwa Mumuyonyi.
1 Kyipfa kya ikyo inyi Paulo nyi mpfungo o Kristo Yesu kyipfa kyanyu nyoe wandu mulaiṙikyie Ruwa; 2 kokooya mulemuicho mbonyi tsa isaṟia lya Ruwa ngyileenengo kyipfa kyanyu. 3 Kye kui ishukuyo nyi Mumuyo ngyileloṟo kyiṟika-kyo chandu ngyilesonguo iṟeia kui maṙeṙo maangu. 4 Koikyo mukogasoma, moiṙima imanya shindo ngyiichi kyiiṙi kya wuṟikyi-wu wo Kristo. 5 Kyiṟika-kyo kyilaleloṟo wandu wa marika gengyi; chandu waleloṟo kui Mumuyo wasu wakye waele na weonguo shisuku kyiyeri-kyi kya wulalu Mumuyonyi. 6 Kye wandu walaiṙikyie Ruwa nyi weoṟa handu hamwi na soe wa kyioṟa kyimwi, na wa mmbiu umwi, na iambilyia hamwi kilya Ruwa aleteṟia, kyikyeri kyiiṙi kya Kristo Yesu kui njia ya Ndumi Ngyicha. 7 Ndumi-yo Ngyicha ngyilewiko mṟundi oyo, iṙuana na kyisumbo kya isaṟia lya Ruwa ngyileenengo iṙuana na iṟunda lya wuiṙimi wokye. 8 Inyi, ngyikyeri mtutu kuta ulya akyeri mtutu o wandu wa Ruwa woose, ngyileenengo isaṟia-lyi lyeongoya wandu walaiṙikyie Ruwa wunjama wo Kristo wulekyeiṙima iyeṟo; 9 na iloṟa ngyeela ko wandu woose wamanye mbonyi tsa wuchilyi wo kyiṟika-kyo kyikyeri kye wookyia shiyeri shoose kyiwekyiṟikye kyiiṙi kya Ruwa alegumba shindo shoose. 10 Kundu wulalu, kui njia ya Siṟi, wunyotsu wo Ruwa wukyeri wo mbaṟe tsifoi wumanyikye na ngyuumangyi na wuchilyi wuyanenyi wo Mumuyo, 11 iṙuana na ikusuria lya mlungana alelyikusuria kyiiṙi kya Kristo Yesu Mndumii oṙu. 12 Kyiiṙi kyakye luwoṙe wuṟango na wukari na wuiṙimi wo tikyira kufuhi ikusurienyi kui njia ya imwiṙikyia. 13 Kyasia ngyiterewa maa mulapfiiyo nyi mṙoe kyipfa kya ngyuukyiwa tsako kyipfa kyanyu, tsikyeri mng'ano konyu. 14 Koikyo ngyipfiria Awu ndi, 15 icho akyeri kye kui rina lyakye wuawu woose wo ruwewu na wo wuyanenyi wuisendo. 16 Namutarame, iṙuana na wunjama wo mng'ano okye, ikarisha kui pfinya, kui iṟunda lya Mumuyo okye, naengyeṟe imukarisha. 17 Kristo nakae mrimenyi konyu kui iiṙikyia, muwakarishe ikundenyi. 18 Kundu muiṙime imanya handu hamwi na wandu wa Ruwa woose chandu ikunda lya Kristo lyilyilandari, na chandu lyiwoṙe wuleshi wo iyenda wuye na wo iyenda wanda. 19 Na imanya ikunda lya Kristo lyieṟie wuṟango woose chandu lying'anyi, muiṙime iafutsia kui iafutsio lyoose lya Ruwa. 20 Kyasia naṟumisho oe ekyeiṙima iṟunda shindo sha maṟiyisho mnu kuta shoose lokyeterewa na ikusaṟa, iṙuana na pfinya iṟunda maṟunda mrimenyi koṙu. 21 Yee, naṟumisho Siṟinyi na kyiiṙi kya Kristo Yesu mṟasa marika goose ga mlungana na mlungana. Amen.
1 Koikyo ngyimuterewa, inyi ngikyeri mpfungo kyiiṙi kya Mndumii, mukae chandu kyiwaṟi kyilya mulelagio. 2 Kui wuindi woose na wuhoo, kui wusimiri, mochiwanzana ikundenyi; 3 na ipfuṟukana iwa mbumbu imwi kui iwaṙana kui ufoṟo. 4 Mmbiu umwi, na Mumuyo umwi, chandu mulewelago ikusurienyi lyimwi lya kyilya mulelagio. 5 Mndumii umwi, iiṙikyia lyimwi, wupatiso wumwi. 6 Ruwa umwi, na oe nyi Awu o wandu woose, akyeri Mndumii o shoose, ekyeṟunda kyiiṙi kya shoose na akyeri shindonyi shoose. 7 Kyaindi orio umwi oṙu naleenengo isaṟia iṙuana na kyiyeṟo kya kyisumbo kya Kristo. 8 Chandu shiṟeio shiele shigambie, “Lyilya aleṙo na ruwewu, nalewinga na isoka Satana walya awewachilyie kaenenga wandu shienengo.” 9 Kyasia ṙeṙo-lyo, “Iṙo na ruwewu,” lyagamba-kyi kokooya sile nyi igamba kye na oe taa nalesoka mṟasa wanda ya uruka? 10 Na icho alesoka nyi oe aleirio wuye mnu kuta ngyina tsoose, kundu naichuṟe shindo shoose. 11 Na oe nalesambuṟa wengyi iwa wasu; na wengyi iwa weonguo shisuku; na wengyi iwa wainjilisti; na wengyi iwa walyisi na walosha; 12 kyipfa kya iafutsia wandu wa Ruwa, kundu maṟunda getaramana gaṟundikye, mṟasa mmbiu o Kristo ukarisho. 13 Mṟasa na soe loose luiṙime iwa mbumbu imwi kui iiṙikyia na imanya mnu Mana o Ruwa, mṟasa iwa wandu waafutsie kyiiṙikyia, na wapfulukyie cha Kristo. 14 Kundu lulawe-se wana watutu, lochiwiyitso ipfo na ipfo, na iṙoo nyi orio mkuma o malosho geṙetsa, kui ngyeṟo tsa wandu, kui mbiṟi, lochiosha njia tsa wulembi. 15 Kyaindi luṙeṙe loi ikundenyi na ing'ana mṟasa lumkooye shindonyi shoose, oe akyeri mṙoe, Kristo. 16 Kui oe mmbiu oose ochilungo na iwaṙana kui wutarami wo orio kyiwungo, iṙuana na iṟunda lya orio kyiwungo; iṟunda lyekyeṙosa mmbiu uiṙime ikukarisha umonyi ikundenyi. 17 Kyasia ngyigamba kuṙi, lyingyi-se ngyiṟingyishia kyiiṙi kya Mndumii, wookyia wulalu maa mulawute chandu wandu wekyewuta, wuwichonyi wo makusaṟo gawo. 18 Walya ngyuuṟango tsawo tsilewiko meema, nawo walewiko kuleshi na moo o Ruwa, kyipfa kya wutondo wukyeri mrimenyi kowo, kyipfa kya wuumu wo mrima yawo. 19 Wakyeri kye wakampfa ngapfu wekyekuwika mbonyinyi tsa ukoe waiṙime iwuta orio kyindo kya wunyamaṟi kui ilanga. 20 Indi nyoe, chi wuṙo mulekulosha ko Kristo-pfo. 21 Mulemuicho mukolosho kyiiṙi kyakye, chandu loi ikyeri kyiiṙi kya Yesu. 22 Ṙenyi mbonyi tsa mchumie o kuwooka o mndu o kacha, okyenyamaṟika kui iosha lango tsekyelemba. 23 Mugalutso muwe wandu wahya ikusurienyi lya mrima yanyu. 24 Muwaṙe mchumie o mndu mhya, ulegumbo kui mbaṟe ya Ruwa wusumganyinyi na wuelenyi wo loi. 25 Kyasia ṙenyi wongo, muṙeṙe loi orio mndu na momṟasa okye; kyipfa soe lukyeri shiwungo, orio umwi kyiwungo kya oṙoe. 26 Kaponyi nyi nyashi, indi mulanyamaṟe; mnengyeṟi ulaolokyie nyashi ilandesie. 27 Maa mulaenengye Mokyiriinzi ṙaawa. 28 Mwiwi alaiwe-se; indi nanga apfuṟukana, echiwika wuragari wo iṟunda lyicha kui mawoko gakye amonyi, nawaṙe kyindo kyetarama mndu alawoṙe. 29 Ṙeṙo lyoose lyiwicho lyilawukye maṙumbunyi ganyu, indi lyilyicha lyeiṙima itarama ulya alangyie ṙeṙo lyicha, kundu lyienengye isaṟia walya wechilyiicho. 30 Maa mulaenengye ikuinaṙia Mumuyo ulya Mweele o Ruwa; akyeri kye kokye mulewiko fana yeṟingyishia mṟasa mfiri o ikyiṟo. 31 Isuo lyoose lying'anyi na nyashi tsoose na ikalagatsa na shilahio shilakae konyu, hamwi na wuwicho wo orio mbaṟe. 32 Lyingyi-se taramanenyi nyoe wenyi ko wenyi mochiwoniana fowa mrimenyi, muhooṟiane chandu na Ruwa kyiiṙi kya Kristo alemuhooṟia nyoe.
1 Koikyo oshenyi Ruwa, cha wana wakunde. 2 Muchumie ikundenyi, chandu na Kristo alemukunda nyoe, lyingyi-se kareka moo okye kyipfa kyaṙu, kyiano na kyiṙaso ko Ruwa, iwa mpfaamo o kyindo kyekyepfaama necha. 3 Kyaindi wuṟui wulawono konyu maa ale, maa ukoe loose, maa ilanga, chandu kyiwaṟi wandu wa Ruwa. 4 Maa sonu, maa maṙeṙo ga wutondo, maa ngaruo; isho shekyechihiṟa-pfo; indi nanga iana. 5 Kyipfa mbonyi-tsi mutsiichi necha, kye kuwoṙe mṟui maa mndu o wuilala wo wolyi, maa mndu awoṙe wulanga, nyi oe moindia ifano, awoṙe kyioṟa Wumangyinyi wo Kristo na Ruwa-pfo. 6 Mndu alamulembe kui maṙeṙo galawoṙe kyiira; cha kyipfa, kyipfa kya ikyo nyashi ya Ruwa yekyeolokyia wana wa wunyamaṟi. 7 Kyasia mulakae handu hamwi nawo. 8 Cha kyipfa kacha nyoe muwekyeri meema, indi wulalu mowa ngyeela kyiiṙi kya Mndumii. Wutenyi cha wana wa ngyeela; 9 kyipfa ndunda ya ngyeela nyi wuchenyi woose na wusumganyinyi na loi; 10 mochipfuṟukana ikulosha nyi kyikyi kyekyechihiṟa Mndumii. 11 Mulakae handu hamwi na wandu wawoṙe mawuto ga meema galawoṙe ndunda, indi mugaṙeṙie. 12 Kyipfa isho shiwutika kowo kui kyiṟika, nyi sonu maa ishigamba. 13 Kyaindi shoose shishiṙeṙie shekyeloṟo nyi ngyeela; kyipfa orio kyindo kyikyiloṟe nyi ngyeela. 14 Koikyo shiṟeio shagamba, “Amka, iyoe uirengyera, uṟukye ko wapfu, na Kristo nekulyimikyia.” 15 Kyasia ambuyenyi necha chandu muiwuta; chi cha wandu walawaṟango-pfo indi cha wandu waṟango. 16 Mochiwuta necha mfiri-i cha kyipfa shiyeri-shi sha wulalu nyi sha mawicho. 17 Kyipfa kya ikyo mulawe matondo, indi mumanye ny'kyikyi Mndumii akundi. 18 Lyingyi-se mulanango mpfinyo, kyipfa wuwoṙe mbonyi tsa ukoe, indi muichuṟo nyi Mumuyo. 19 Ṙeṙenyi kui shiimbo shetembecheṟa mrima. Imbienyi Mndumii na ianga mrimenyi konyu; 20 na iana Ruwa Awu mfiri yoose kyipfa kya shindo shoose, rinenyi lya Mndumii oṙu Yesu Kristo; 21 orio mndu echiṟundia oṙoe necha kyiiṙi kya iindia Kristo. 22 Lanyoe waka, indienyi wamii wanyu cha iindia Mndumii oṙu. 23 Cha kyipfa mii nyi mṙoe o mka, chandu Kristo na oe nyi mṙoe o Siṟi; na oe nyi mkyiṟa o mmbiu. 24 Kyaindi chandu Siṟi yekyeindia Kristo, nyi wuṙo waka nawo waindie wamii wawo shindonyi shoose. 25 Lanyoe wasoṟo, kundenyi waka wanyu, chandu Kristo na oe alekunda Siṟi, kareka moo okye kyipfa kyayo; 26 kundu nailyishe Siṟi na iisanja kui mṟinga Ṙeṙonyi. 27 Naiṙime ikuenenga oe amonyi Siṟi iwoṙe kyiṟumi ilawoṙe ṙeko ang'u kyindo kyoose kyiwicho, indi iwe ngyiele ilawoṙe maṙeko. 28 Wuṙo wuṙo wasoṟo kyawakooya ikunda waka wawo cha mmbiu yawo wawenyi. Akunda mka nakukunda amonyi. 29 Kyipfa kuwoṙe mndu asuuye mmbiu okye handu hoose-pfo; indi nekyeuenenga kyelya na iuambuya necha, chandu Kristo na oe aiwutia Siṟi. 30 Kyipfa soe lukyeri shiwungo sha mmbiu okye. 31 Kyipfa kya ikyo mndu nechiṙa awuye na wamae, naoshane na mka okye, na iwo wewawi wechiwa mmbiu umwi. 32 Wuṟikyi-wu wung'anyi; indi inyi ngyiṙeṙa mbonyi tsa Kristo na Siṟi. 33 Kyaindi orio mndu nakunde mka okye chandu akukundi amonyi, maa mka alaṙe iindia mii okye.
1 Lanyoe wana, indienyi wafee wanyu kyiiṙi kya Mndumii, kyipfa iwu nyiwo wusumganyi. 2 India awuyo na womoo. Iwawaso-lyi nyilyo iwawaso lya kuwooka lyiwoṙe kyaasa, 3 uwone ona, ukae mfiri ifoi wuyanenyi. 4 Na nyoe waawu, maa mulasouoe wana wanyu; indi waṙosenyi kyiiṙi kya iowuo na iindia Mndumii. 5 Nyoe watumo, indienyi iwo wai wandumii wanyu kui mbaṟe ya mmbiu, kui wuowu na iṙeṙema, kui ikutitiṟa mrimenyi, cha iindia Kristo. 6 Maa chi kui wutumo wo meso tikyi cha waikukomba ko wandu-pfo; indi cha watumo wa Kristo, mowuta shechihiṟa Ruwa kui mrima. 7 Kui ikusuria lyicha cha iṟundia Mndumii maa chi mndu-pfo. 8 Mochimanya kye orio kyindo kyicha mndu echiwuta neenengo ikyo ikyo nyi Mndumii, kokooya nyi mtumo ang'u ote. 9 Na nyoe wandumii wawutienyi wo isho isho, mochiṙa iwaowesha, kunu mochimanya kye oe akyeri Mndumii owo na onyu nakyeri ruwewu, maa kokye kuwoṙe ikundia-pfo. 10 Mafurumionyi, engyeṟenyi iwaṙa wukari kyiiṙi kya Mndumii na wuiṙiminyi wo pfinya tsakye. 11 Ṟaenyi shisha shoose sha Ruwa, muiṙime iwingana na ngyeṟo tsa Satana. 12 Kyipfa ikapana lyaṙu soe chi na wandu-pfo; indi nyi na ngyuumangyi na pfinya, na wang'anyi wa meema-chu, nguulyimalyi tsa waṟufui wawicho wuyanenyi wo waṟufui. 13 Kyipfa kya ikyo irenyi shisha shoose sha Ruwa, muiṙime iwingana mfiri ya mawicho na mukommarisa shoose, igoṟoka. 14 Kyasia goṟokyenyi, mukuinewie loi shitsinyi, na iṟaa wusumganyi kyipootenyi, 15 na iwa wandu wakuṟeyeṟie iyenda ionguo Ndumi Ngyicha ya ufoṟo. 16 Ngoseṟa ya shoose mochiambilyia ngawo ya iiṙikyia, iya kui iyo mochiiṙima irumisha mfi yoose ya moṙo ya mmbicho ulya. 17 Lyingyi-se ambilyienyi wukyiṟo wukyeri cha kofia yanyu ya menya, na Ṙeṙo lya Ruwa cha ushu muenengo nyi Mumuyo. 18 Kui shiterewo shoose mochiterewa orio kyiyeri Mumuyonyi, mochilaa kyiṙombo kyipfa kya kyindo-kyo, mochiterewia wandu wa Ruwa woose; 19 na kyipfa kyako taa, ngyienengo pfinya yeonguo kundu ngyiiṙime iloṟa wandu kyiṟika kyilya kya Ndumi Ngyicha. 20 Ndumi Ngyicha iya kyipfa kyayo inyi ngyiṙeṙa handu ha Kristo maa chandu ngyimpfungye, ngyiwaṙe wuṟango na wukari wo ionguo chandu kyingyiwaṟi ionguo. 21 Kyasia kundu nyoe muiṙime imanya mbonyi tsako, Tikyiko, mono-wama mkunde, aiṟunda na soe, akyeri msimiri kyiiṙi kya Mndumii, nemumanyisha shindo shoose. 22 Ulya ngyimṙuma konyu kyipfa kya ikyo muiṙime imanya mbonyi tsaṙu, na oe nawiyiṟie mrima yanyu moo. 23 Ufoṟo lukae na wana wa wama waiṙikyie Yesu, na ikunda, hamwi na iiṙikyia, shiwukyie ko Ruwa Awu na ko Mndumii Yesu Kristo. 24 Isaṟia lyikae na woose wakundi Mndumii oṙu Yesu Kristo kui njia ilawoṙe inyamaṟika.
1 Paulo na Timoteo, waṟundi wa Kristo Yesu, lomuṟeia paruo nyoe wandu wa Ruwa moose kyiiṙi kya Kristo Yesu, mukyeri Filyipi, hamwi na maaskofu na mashemasi. 2 Isaṟia lyiwe konyu na ufoṟo luwukyie ko Ruwa Awu oṙu na ko Mndumii Yesu Kristo. 3 Ngyiana Ruwa oko orio kyiyeri ngyekyemukumbuo, 4 mfiri yoose orio kyiyeri ngyekyemuterewia nyoe moose, ngyechiterewa kui sia, 5 kyipfa kya iwaṙana lyanyu iṟundenyi lyeonguo Ndumi Ngyicha, wookyia mfiri ulya o kuwooka mṟasa inu. 6 Na inyi ngyikyiiṙikyie nyikyo ikyi, kye ulya alewooka iṟunda lyicha mrimenyi konyu nechilyiafutsia mṟasa mfiri Yesu Kristo echiwuya. 7 Wuṙo wuṙo chandu kyikyeri iṟunda lyako ikusaṟa ishi kyipfa kyanyu moose; cha kyipfa nyoe mukyeri mrimenyi koko; cha kyipfa kyipfungonyi kyako na iṟundenyi lyeringa kyiṟumi kya Ndumi Ngyicha, na iiṟingyishia, nyoe moose muleambilyia isaṟia-lyi hamwi na inyi. 8 Kyipfa Ruwa nyi mṟingyishi oko, ngyimkundi nyoe chandu Yesu Kristo amkundi. 9 Na ikyi nyikyo kyiterewo kyako, kye ikunda lyiengyeṟikye, wuṟangonyi na imanya lyoose; 10 muiṙime iambilyia gai mecha; kundu muiṙime iwaṙa mrima ilawoṙe ukoe, kulawoṙe ṙeko, mṟasa mfiri ulya Yesu Kristo echiwuya; 11 muwaichuṟe shindo shicha shilya Yesu tikyi eiṙima imuenenga wuiṙimi wo ishiwuta, kui mng'ano na kyiṟumi kya Ruwa. 12 Kyaindi, wana wa wama wako, ngyikundi mumanye kye shindo shoose shilengyiwutikyia nyi kyipfa kya ionguo Ndumi Ngyicha. 13 Kyipfa kya ikyo, maa asikari woose wekyeringa numba iya Kaisari ekyekaa ilyi ai maṟundenyi na wandu wengyi woose waichi kye inyi ngyikyeri kyipfungonyi kyipfa ngyii mṟundi o Kristo. 14 Na wana wa wama wengyi wakyeri kyiiṙi kya Kristo, wechikarisho nyi iwiko lyako kyipfungonyi, waleengyeṟa mnu ionguo Ṙeṙo lya Ruwa kulawoṙe wuowu. 15 Wengyi waionguo mbonyi tsa Kristo, kyipfa kya wunyeng'i na wuṟiingyi; na wengyi kui makusaṟo mecha. 16 Iwa wekyeonguo mbonyi tsa Kristo kui ikunda, waichi kye ngyimmbikye ngyiringye kyiṟumi kya Ndumi Ngyicha. 17 Indi wengyi wekyeonguo mbonyi tsa Kristo kui wuṟiingyi, maa chi kui mrima mwilyi-pfo, wakusaṟie kye kui iwuta kuṙo wechiengyeṟa ngyuukyiwa tsa iwiko lyako kyipfungonyi. 18 Ikyo wakundi ingyiwutia koko chi kyindo-pfo. Kyaindi ko orio njia, kokooya nyi kui ngyeṟo, ang'u kokooya nyi kui wuloi, mbonyi tsa Kristo tsigambo; koikyo ngyichihiyo, yee, na inyi ngyechichihiyo. 19 Kyipfa ngyiichi kye ishi shengyigalukyia shiwe wukyiṟo woko, kyipfa kya shiterewo shanyu na kyitarama kyiwukyie ko Mumuyo o Yesu Kristo ngyechiwa mndu alamchilyie nyi kyindo; 20 chandu ngyileweṙelyia mnu, na ikusuria, kye ngyechirigo nyi sonu maa ale-pfo, indi kui wusimiri woose, cha mfiri yoose, na wulalu nyi wuṙo Kristo echienengo kyiṟumi mmbiunyi koko; kokooya ngyii na moo, ang'u ngyipfiie. 21 Cha kyipfa koko inyi iwaṙa moo nyi Kristo, na ipfa nyi kyiira. 22 Indi kokooya iengyeṟa iwaṙa moo kyimmbiu koko inyi nyi ndunda tsa iṟunda lyicha, kyasia, ngyiichi nyi kyindo kyiha ngyesambuṟa-pfo. 23 Kuwoṙe shindo shiwi shingyikuruo. Ngyikundi iyenda ngyikae na Kristo; kyipfa nyi necha ngoseṟa. 24 Indi iengyeṟa ikaa iha wuyanenyi nyi kyindo kying'anyi ngoseṟa kyipfa kyanyu. 25 Na inyi ngyikusurie isho, ngyiichi kye ngyechikaa hamwi na nyoe, kundu muiṙime ichihiyo iiṙikyienyi; 26 mṟasa muengyeṟe ikushela kyiiṙi kya Kristo kyipfa kyako, kyipfa kya ikaa lyako hamwi na nyoe-se. 27 Kyaindi mkaṟo yanyu iwe chandu malosho ga Ndumi Ngyicha ya Kristo gakundi, kundu ngacha na immbona nyoe, maa ngyilakyeri ho, ngyiicho mbonyi tsanyu, kulawoṙe iloloma kye mugoṟokyi Mumuyonyi umwi, kui mrima umwi mochikapania iiṙikyia lya Ndumi Ngyicha; 28 maa muowuye washituwa wanyu kyindonyi kyoose-pfo. Kowo iwo nyi kyiṟingyishio kya iṙeka, indi konyu nyoe nyi kyiṟingyishio kya wukyiṟo, wulya wuwukyie ko Ruwa. 29 Kyipfa muwaenengye kyipfa kya Kristo, chi imwiṙikyia tupu-pfo, kyaindi na ilyiso wukyiwa kyipfa kyakye; 30 mochiwaṙa iwingana lyilya lyilya mulelyiwona koko, na iicho kye ngyiwoṙe mṟasa wulalu.
1 Kyasia kokooya kuwoṙe iwiyiṟiana moo kyiiṙi kya Kristo, kokooya kuwoṙe ikarishana kui ikunda, kokooya kuwoṙe iwaṙana Mumuyonyi, kokooya kuwoṙe iwoniana wukyiwa, 2 ngyienengyenyi sia ing'anyi, kundu muwe na makusaṟo gamwi, wandu muwoṙe ikunda lyimwi, wawoṙe mrima umwi, mochikusaṟa iwuta kyindo kyimwi. 3 Maa mulawute kyindo kyoose kui iwingana ang'u kui makushelo; indi kui wupfereri, orio mndu nawone oṙoe kye nawoṙe kyiira kuta oe. 4 Mndu alakuwinishe kyipfa kya shindo shakye amonyi, indi nakuwinishe kyipfa kya shindo sha oṙoe. 5 Waṙenyi makusaṟo galya galya Yesu Kristo awewoṙe; 6 ulya ipfo mawookyionyi awei Ruwa, kyaindi alalewona kulya iwa kyimwi na Ruwa kye nyi kyindo kyemwenenga ikuyeṟa na Ruwa; 7 kyaindi nalekuloṟa kye awoṙe mng'ano oose-pfo, kawa cha mtumo, kafanana na mndu. 8 Lyingyi-se, kyiyeri alewono ai cha mndu, nalepfereria, kawaṙa wuindi mṟasa upfunyi, yee, upfu lo msalabenyi. 9 Koikyo lyingyi-se Ruwa nalemwiria wuye, kamwenenga Rina lyiiṟie orio rina; 10 kundu kui iiṙia ko Yesu shindo shoose shipfirie ndi, sha ruwewu, sha wuyanenyi, na sha wanda ya wuyana; 11 na kundu orio mndu nagambe kye YESU KRISTO NYI MNDUMII, kui mng'ano o Ruwa Awu. 12 Kyasia wakunde wako, chandu mulepfereria mfiri yoose, chi kyiyeri inyi ngyiwekyeri ho tupu-pfo, indi wulalu ngoseṟa mnu ngyilakyeri ho, afutsienyi wukyiṟo wonyu muwenyi kui iowuo na iṙeṙema. 13 Cha kyipfa nyi oe Ruwa aiṟunda maṟunda mrimenyi konyu, iambilyia lyanyu na iṟunda lyanyu, kui iafutsia makusaṟo gakye mecha. 14 Ṟundenyi shindo shoose kulawoṙe inuṟia maa iwingana, 15 muiṙime iwa wana wa Ruwa walaiwio kye wawawicho, maa walekyelemba, walawoṙe tewe rikyenyi lyilekyeicho, lyilakyeri njienyi ya sungusinyi. Walya kyiiṙi kyawo muwonekanyi cha ilyi mukyeri shimii wuyanenyi, 16 mochiosha mbonyi tsekyeende moo, ngyiwone kyimaṙuma kya ikushela mfiri ulya Kristo echiwuya, kye ngyileṙicha wulya maa ikuwinisha wulya-pfo. 17 Yee, maa kokooya ngyechiwoogo na kuṙo ngyiwe cha samu yawuto iwe kyiṙaso kyilya iiṙikyia lyanyu lyekyeenenga Ruwa. Ngachihiyo; lyingyi-se ngachihiyo hamwi na nyoe moose. 18 Na nyoe wuṙo chihiyonyi; lyingyi-se chihiyonyi hamwi na inyi. 19 Kyaindi ngyikusaṟie kyiiṙi kya Yesu Kristo iṙuma Timoteo nache na konyu mfiri ya kufuhi, na inyi ngyiwiyiṟio moo, ngyiichi mbonyi tsanyu. 20 Kyipfa ngyiwoṙe mndu ungyi awoṙe makusaṟo gamwi na inyi, echikuwinisha mnu na nyoe-pfo. 21 Kyipfa woose waikuwinisha na mbonyi tsawo wawenyi, chi sha Kristo Yesu-pfo. 22 Kyaindi muichi kyiṟumi kyakye, kye naleṟunda handu hamwi na inyi iṟundenyi lyeonguo Ndumi Ngyicha, cha mana o awu okye. 23 Kyasia, ngyikusaṟie iṙuma icho iwinyi, kyiyeri-kyo ngyechimanya shindo shechingyiwutikyia. 24 Na inyi ngyiiṙikyie kyiiṙi kya Mndumii kye na inyi ngyechicha mfiri ya kufuhi. 25 Kyaindi ngyilewona kyingyiwaṟi iṙuma Epafurodito konyu, mono-wama oko, alewuka konyu icheṟunda handu hamwi na inyi. 26 Cha kyipfa nalangyie mnu immbona nyoe na nalewihiyo mnu mrimenyi kyiyeri aleicho kye momanya mbonyi tsa ndoṟe yakye. 27 Cha kyipfa naweluoe nakamwi, ai kufuhi na ipfa; kyaindi Ruwa nalemmbonia wukyiwa; maa chi oe amonyi tupu-pfo, indi na inyi taa; ngyilawaṙe ikuinaṙia lyielewetsie. 28 Koikyo ngapfuṟukana mnu imṙuma, kundu ilyi mochimmbona-se muiṙime ichihiyo, na inyi ngyianguhiṟio ikuinaṙia lyako. 29 Kyasia muambilyienyi kyiiṙi kya Mndumii kui sia yoose, mochiwona wandu cha ichu kye nyi wandu wawoṙe rina. 30 Cha Kyipfa kyipfa kya iṟunda lya Kristo nalekyiṟe-pfa; na nalewuta isho shoose kundu ngyienengo kyitarama nyoe mulaleiṙima ingyienenga.
1 Numa ya iho, wana wa wama wako, chihiyonyi kyiiṙi kya Mndumii. Imuṟeia mbonyi tsilya tsilya chi kyindo kyilengyienenga nyashi-pfo, indi nyi kyindo kyechimuenenga kyiira nyoe. 2 Kushowenyi na wandu wakyeri cha shite, walya wekyewuta shindo shiwicho. Kaenyi kuleshi na walya wekyeitika wandu iṙino. 3 Kyipfa soe luwaṙine loi, soe lokyeana na iterewa Ruwa kui Mumuyo, na ikushela kyipfa kya Kristo Yesu, maa lokyekusuria mmbiu-pfo. 4 Kyaindi inyi ngyeiṙima ikusuria mmbiu. Mndu oose kawona kye nawoṙe kyimaṙuma kya ikusuria mmbiu, inyi ngyekusuria mmbiu ngoseṟa. 5 Ngyileṙino mfiri o nyanya, nyi Mwisiraelyi, o mbaṟe ya Benyamen, waku wako woose nyi-we Waebrania, na ko mbonyi tsa iosha uwawaso inyi nyi Mfarisayo. 6 Ko mbonyi tsa ipfuṟukana, ngyilepfuṟukana loi ilyisa Siṟi wukyiwa, na kui iwaṙa wusumganyi kyipfa kya iosha kyilya mawawaso gakundi ngyiwewoṙe tewe-pfo. 7 Kyaindi shindo shilya shiwewoṙe kyiiṙa koko ngyileshiwona nyi shindo sha wulya kyipfa kya Kristo. 8 Yee, ngoseṟa ya isho, ngyiwonyi shindo shoose nyi sha wulya kyipfa kya wucha wung'anyi mnu wo imanya Kristo Yesu, Mndumii oko; ulya kyipfa kyakye ngyileṙetsa shindo shoose ngyechishiwona kye nyi mboshia kundu ngyiwone Kristo. 9 Lyingyi-se ngyilungo tapu na oe, ngyilawaṙe wusumganyi woko ngyimonyi wulya mndu ekyewona kui iosha mawawaso, indi ngyiwaṙe wusumganyi wulya wokyewono kui iiṙikyia lyikyeri kyiiṙi kya Kristo, wusumganyi wulya wuwukyie ko Ruwa, kui iiṙikyia. 10 Kundu ngyimmanye oe, na wuiṙimi wo iṟuka lyakye, na ilya wukyiwa wulya alelya, ngyechifananyisho na ipfa lyakye; 11 kundu ngyiiṙime kui njia yoose ishika mfiri o iṟutso lya wapfu. 12 Chi kye ngamshika, ang'u ngamwafutsia-pfo; indi ngyipfuṟukana iṙicha kundu ngyiiṙime irakuo iṟikoso lyilya Yesu Kristo awelyikusaṟie mṙoenyi kokye kyiyeri alengyigaluo ngawa mndu okye. 13 Wana wa wama, ngyikusaṟie mrimenyi koko kye ngamrakuo iṟikoso-lyo-pfo; indi ngyiwuta kyindo kyimwi tupu; ngyechiwaṙima shilya shikyeri numa na ipfuṟukania shilya shikyeri mbele. 14 Ngyiengyeṟa iṙicha, ngyikooye iṟikoso lya moo mhya, ulya Ruwa alengyilagia kyiiṙi kya Kristo Yesu. 15 Kyasia soe lukyeri wandu waafutsie kyimrima lukusaṟe isho; na maa mukokusaṟa shindo shingyi kyindonyi kyoose, Ruwa nechimushukuya na ilyo. 16 Kyaindi luengyeṟe iwuta iṙuana na shilya luleosha mṟasa iho. 17 Wana wa wama wako, ngyioshenyi inyi, muambuye na iosha walya wekyewuta shilya lulemummbia. 18 Kyipfa ngyilemummbia kafoi na wulalu ngyimmbia-se kui mcheṟeṟe kye kuwoṙe wandu wafoi mkaṟo yawo yekyenyamaṟa kyimaṙuma kya Yesu ipfa halya msalabenyi. 19 Mafurumionyi gawo nyi irumatso, ruwa owo nyi lango tsa mmbiu, wekyekushelyia shindo sha sonu, na iwinia shindo sha kunu wuyanenyi. 20 Cha kyipfa soe nyi wandu wa ruwewu; lyingyi-se luiweṙelyia na macha gang'anyi, Mkyiṟa Mndumii Yesu Kristo; 21 echiilacha mmbiu oṙu o wufofo, uiṙime ifanana na mmbiu okye o kyiṟumi, kui wuiṙimi wulya echiiṙima ichilyia nawo shindo shoose.
1 Kyasia, wana wa wama wako, wakunde wako, ngyiwoṙe ilanga lying'anyi kyipfa kyanyu, sia yako na iṟikoso lyako, koikyo goṟokyenyi kyiiṙi kya Mndumii kulawoṙe iloloma, wakunde wako. 2 Ngaterewa Euodia, ngaterewa na Sintikye, wawaṙe makusaṟo gamwi kyiiṙi kya Mndumii. 3 Yee, ngyikundi na iyoe taa, mongari o loi, utarame waka-wo; cha kyipfa walepfuṟukana hamwi na inyi ionguo Ndumi Ngyicha, na Kyilementi, na walya wengyi waleṟunda hamwi na inyi, walya marina gawo gakyeri kyitapunyi kyiwoṙe marina ga walya wawoṙe moo o loi uwukyie ko Ruwa. 4 Chihiyonyi kyiiṙi kya Mndumii mfiri yoose; lyingyi-se ngagamba, chihiyonyi. 5 Wuhoo wonyu wumanyikye ko wandu woose. Mndumii nakyeri kufuhi. 6 Maa mulakuwinishe kyipfa kya kyindo kyoose; indi kyiyeri muiterewa Ruwa kyilya mukundi wutenyi kuṙo muwoṙe mrima iwoṙe iana. 7 Na ufoṟo lo Ruwa, luiṟie wuṟango woose lochiringa mrima yanyu na makusaṟo ganyu kyipfa muwalungye na Kristo Yesu. 8 Naaho-ng'u, wana wa wama, kyindo kyoose kyikyeri kya loi, kyoose kyilai kya sonu, kyoose kyikyeri kya wusumganyi, kyoose kyilawoṙe ukoe, kyoose kyechihiṟa, kyoose kyiwoṙe kyiṟumi kyicha; kokooya kuwoṙe wucha woose, kukowaṙa kyiṟumi kyoose kyicha, kusaṟenyi kyipfa kya shindo sha mbaṟe-yo. 9 Shindo mulekulosha koko na ishiambilyia, na ishiicho na ishiwona koko, shiwutenyi; na Ruwa o ufoṟo nechikaa hamwi na nyoe. 10 Ngyilechihiyo mnu kyipfa kya Mndumii, cha kyipfa mafurumionyi mowiyiṟa-se makusaṟo ganyu kyipfa kyako, chandu muwekyekusaṟa mbonyi tsako; kyaindi mulawone ṙaawa. 11 Chi ngyigamba kuṙo kyipfa ngyiuṟie kyindo-pfo; kyipfa ngyikuloshie ishiko na shilya ngyiwoṙe. 12 Ngyiichi iuṟa nyi kyikyi na ngyiichi iwaṙa nyi kyikyi. Kyiiṙi kya shindo shoose ngyilelosho iiguṙa na iicho njaa, iwaṙa shindo shifoi na iuṟa. 13 Ngyekyeiṙima shindo shoose kyiiṙi kya ulya ekyengyienenga pfinya. 14 Kyaindi mulewuta necha, kyiyeri mulelya wukyiwa hamwi na inyi. 15 Na nyoe taa, nyoe muwenyi muichi, lanyoe Wafilyipi, kye mawookyionyi ga Ndumi ngyicha, kyiyeri ngyilewuka Makyedonia, kuwoṙe siṟi ingyi ilekaa hamwi na inyi kyiiṙi kya ienengyia na iambilyia, sile nyoe-pfo. 16 Cha kyipfa maa kulya Tesalonikye mulengyiendie shindo shengyitarama kafong'ui. 17 Chi kye ngyikundi iambilyia shisumbo tikyi-pfo indi ngyikundi iwona ngoseṟa ya shindo shilya shicha mulemmbuta. 18 Kyaindi ngyiwoṙe shindo shoose na ielewetsa; lyingyi-se ngyiichuo pacha. Ngyileambilyia ko Epafurodito shindo shoose shilewuka konyu, mpfaamo o shindo shekyepfaama necha, kyienengo kyikyiiṙikyie na kyichihiṟie Ruwa. 19 Na Ruwa oko nechimuenenga na imuichuṟia pacha orio kyindo muuṟie iṙuana na wunjama wokye, kyiṟuminyi kya Yesu Kristo. 20 Wulalu Ruwa naṟumisho, Awu oṙu, mlungana na mlungana. Amen. 21 Kyiiṙi kya Kristo Yesu iṟikyiṟenyi orio mndu o Ruwa. Walya waiṙikyie Yesu wakyeri hamwi na inyi wamuiṟikyiṟa. 22 Wandu wa Ruwa woose wamuiṟikyiṟa, ngoseṟa walya wa kanyi ko Kaisari. 23 Isaṟia lya Mndumii Yesu Kristo lyikae na mrima yanyu.
1 Inyi Paulo, ngyikyeri msu o Kristo Yesu, chandu Ruwa akundi, na Timoteo, mono-wama oṙu, 2 ngamuṟeia paruo nyoe wana wa wama wai wandu wa Ruwa, waafutsie kyilya Ruwa ateṟie kyiiṙi kya Kristo, wakyeri Kolosai. Isaṟia lyikae konyu, na ufoṟo, shiwukyie ko Ruwa Awu oṙu. 3 Luiana Ruwa, Awu o Mndumii oṙu Yesu Kristo, mfiri yoose lochimuterewia, 4 wookyia luleicho mbonyi tsa iiṙikyia lyanyu kyiiṙi kya Kristo Yesu, na ikunda muwoṙe ko wandu wa Ruwa woose. 5 Kyipfa kya ikusuria mulewikyio kyiseyesoe ruwewu; muleicho mbonyi tsalyo kacha ko mbonyi tsa loi tsa Ndumi Ngyicha; 6 ileshika konyu, chandu kyikyeri wuyanenyi koose; na ikumbia ndunda na ing'ana, chandu ing'ana konyu taa, wookyia mfiri ulya muleicho mukomanya mnu isaṟia lya Ruwa kyiiṙi kya loi. 7 Chandu mulelosho na Epafura, mongari oṙu mkunde iṟundenyi, akyeri mṟundi ekyeafutsia kyilya Ruwa ateṟie ko Kristo kyipfa kyanyu; 8 na oe naleluongoya ikunda lyanyu Mumuyonyi. 9 Kyipfa kya ikyo maa soe, wookyia mfiri ulya luleicho, luwika shiterewo kyipfa kyanyu, kundu muichuṟio imanya lya mrimenyi ko ikunda lyakye wuṟangonyi woose na imanyisho lya mrimenyi. 10 Mukae chandu Mndumii akundi, mochimchihiṟa piu; mochikumbia ndunda kui orio iṟunda lyicha, na iengyeṟika wuṟangonyi wo Ruwa. 11 Mochitaramo kui wuiṙimi woose, iṙuana na pfinya ya mng'ano okye, muiṙime iwaṙa wusimiri wo orio mbaṟe na ikarishia hamwi na ichihiyo. 12 Mochiana Awu, alemuenenga iambilyia kyitumbuṟe kya kyioṟa kya wandu wa Ruwa ngyeelenyi. 13 Na oe nalelukyiṟa iwuka pfinyenyi tsa meema, kalusamiṟa na iluṙuo Wumangyinyi wo Mana o ikunda lyakye; 14 akyeri kye kyiiṙi kyakye luwoṙe wukyiṟo, nyi kyimwi na igamba kye, ihooṟio lya wunyamaṟi. 15 Kristo nyi mfano o Ruwa alekyewono, mmbele o shindo shoose shishigumbe. 16 Cha kyipfa kyiiṙi kyakye shindo shoose shilegumbo; shikyeri ruwewu na shikyeri urukyenyi, shekyewono na shilekyewono; kokooya nyi shiṙi sha mng'ano, ang'u wumangyi, ang'u wuchilyi; shindo shoose shilegumbo kui njia yakye na kyipfa kyakye. 17 Na oe nawekyeri pfo kyiyeri shindo shoose shilawendegumbo, na shindo shoose shekyewaṙana kyiiṙi kyakye. 18 Na oe nyi oe mṙoe o mmbiu, o Siṟi; na oe nyi mawookyionyi, nyi o kuwooka iṟutso ko wapfu, kundu nawe msongoru kyiiṙi kya shoose. 19 Cha kyipfa kyilechihiṟa iafutsio lya Ruwa lyoose lyikae kyiiṙi kya Kristo. 20 Na kyiiṙi kyakye isanza shindo shoose na oe amonyi, amwende ufoṟo kui samu ya msalaba okye; kokooya nyi shindo shikyeri urukyenyi, ang'u shikyeri ruwewu. 21 Na nyoe muwekyeri ipfo mawookyionyi kuleshi na Ruwa, lyingyi-se washituwa wakye makusaṟonyi ganyu, kui mawuto ganyu mawicho, namusanza wulalu; 22 mmbiunyi o nyama yakye, kui ipfa lyakye, kundu namuende na mbele yakye, nyoe wandu wa Ruwa, mulawoṙe maṙeko maa italyio kyindo kyiwicho. 23 Mukokuwaṙa na isaṟia lyilya tikyi, muwawikye wuye ya urende, mukokarisho; mulandeilacho na iṙa ikusuria lya Ndumi Ngyicha muleicho mbonyi tsayo, ileongoyo ko shindo shoose shigumbe shikyeri wuyanenyi, ikyeri kye inyi Paulo ngyiwekyeri mṟundi oyo. 24 Wulalu ngyimchihiye kyipfa kya matuuro ngyiwoṙe kyipfa kyanyu. Lyingyi-se ngyiafutsia mmbiunyi koko shilya shilaleafutsio sha matuuro ga Kristo, kyipfa kya mmbiu okye, kyimwi na igamba kye nyi Siṟi yakye. 25 Siṟi inyi ngyikyeri mṟundi oyo, iṙuana na iṟunda lya Ruwa, alengyiṙambika, na ngyileenengo kyipfa kya kyiira kyanyu, ngyiafutsie Ṙeṙo lya Ruwa. 26 Wuṟikyi wulya wuwewuṟikye shiyeri shoose sha kacha na wookyia shishari shoose, indi wulalu woloṟo ko wandu wa Ruwa. 27 Iwo Ruwa alekunda iwamanyisha chandu wukyeri wunjana wo mng'ano wo wuṟikyi-wu kyiiṙi kya walya walaiṙikyie Ruwa nawo nyi Kristo mrimenyi konyu, ikusuria lya mng'ano. 28 Icho luionguo mbonyi tsakye, lochiikyimbia orio mndu, na ilosha orio mndu wuṟangonyi woose, luiṙime iende orio mndu aafutsie iiṙikyia kyiiṙi kya Kristo. 29 Na inyi ngyikuwinisha kui kyindo-kyo ikyo, ngyechipfuṟukana iṙuana na pfinya ing'anyi iwukyie ko Kristo, ekyeṟunda kyiiṙi kyako.
1 Kyipfa ngyikundi mumanye chandu ngyiwoṙe ipfuṟukana lying'anyi kyipfa kyanyu, na kyipfa kya walya wa Laodikyia, na walya walandengyiwone kyaam kyako kyimmbiu. 2 Kundu wawiyiṟio moo mrima yawo, wechisanzo ikundenyi wawone wunjama woose wo imanya kui wuloi, waiṙime imanya nakamwi wuṟikyi wo Ruwa, kyimwi na igamba kye nyi Kristo; 3 akyeri kye kyiiṙi kyakye oe shiseyesoe shoose sha wuṟango na imanya shishiṟikye. 4 Ngyigamba mbonyi-tsi, mndu alachemulemba kui maṙeṙo ga wulembi. 5 Kyipfa maa chandu ngyilakyeri ho kyimmbiu, kyaindi ngyikyeri hamwi na nyoe kyimrima, ngyechihiyo na iwona wuyendelyi wonyu na igoṟoka lyanyu kulawoṙe iloloma lya iiṙikyia lyanyu kyiiṙi kya Kristo. 6 Kyasia chandu muleambilyia Kristo Yesu, Mndumii, wutenyi kuṙo kyiiṙi kyakye; 7 muwalungye tapu na oe, muwakarishe kui iiṙikyia, chandu mulelosho, mochiengyeṟa iana. 8 Mndu alachemuṙetsa kui wuṟango wokye na wulembi wulawoṙe kyiira, kui mbaṟe ya malosho ga shilya wandu wekyeambilyia ko waku wawo, kui mbaṟe ya malosho ga kuwooka ga wuyana, maa chi kui mbaṟe ya Kristo-pfo. 9 Kyipfa kyiiṙi kyakye nyi pfo-ndu iafutsia lyoose lya Ruwa lyikyeri, kui mbaṟe ya kyimmbiu. 10 Na nyoe muafutsie iiṙikyia kyiiṙi kyakye oe akyeri mṙoe o wumangyi woose na wuchilyi. 11 Kyiiṙi kyakye muleṙino kui iṙino lyilekyewuto kui mawoko, kui iṙa lango tsa mmbiu, kui iṙino lya Kristo. 12 Mukoṟiko hamwi na oe wupatisonyi, na kyiiṙi kya wupatiso-wo mukoṟutso hamwi na oe, kui iiṙikyia pfinya tsa Ruwa alemuṟutsa ko wapfu. 13 Na nyoe kyiyeri muwepfiie kyipfa kya maṙeko ganyu na kyipfa kya ilyi mulawekyeri Wayuda, nalemuṟutsa hamwi na oe, amluhooṟie maṙeko goose. 14 Amfurunje kyiṟeio kyiwekyiṟeie kyeluṙuo mengyenyi kui ianduya lyakye, lyiwewoṙe kyituwa koṙu; kalyiwuta lyilakae-se ho, kalyikapia msalabenyi, 15 amsokye wachilyi wa meema wumangyi na wuchilyi wowo, na iwamichia numa yakye kui wukari kundu orio mndu nawone, echiloṟa chandu alewawingyia msalabenyi. 16 Kyasia, mndu alamuanduye nyoe shelyenyi ang'u shindonyi shenyo, ang'u kyipfa kya mfiri ung'anyi ang'u iiṙa lya mori, ang'u mfiri o onyonya. 17 Mbonyi-tso nyi kyirinje kya mbonyi tsiicha, indi mmbiu nyi o Kristo. 18 Mndu alamusokye wori wonyu, kui iindia chandu akukundia amonyi tikyi, na iindia malaika, echikuloṟa shindonyi amloṟe indi shilai sha loi echikushela, kui wuṟango wokye wo kyimmbiu. 19 Maa alawaṙe Mṙoe, ukyeri kye kui icho mmbiu oose uigutso na isanzo kui shiwungo na mri ya mmbiu, okyeng'ana kui chandu Ruwa akundi. 20 Kyasia kokooya mulepfa hamwi na Kristo mukoṙa malosho galya ga kuwooka ga wuyana, ny'kyilyi muichilyio nyi mawawaso cha wandu wakyeri wuyanenyi, kunu mochiosha mawawaso na malosho ga wandu? 21 Mulawaṙe, mulasonje, mulapaaye! 22 (Shindo-sho shoose shiwoṙe kyiira kawi-pfo.) 23 Mbonyi-tso tsiloṟie cha ilyi tsiwoṙe wuṟango, mbaṟenyi ya wuyendelyi wo iterewa Ruwa muleachikyia muwenyi, na kyiiṙi kya ipfereria, na kyiiṙi kya ichilyia mmbiu kui wulang'a nakamwi, kyaindi tsiwoṙe kyiira kyoose kyiiri kya ichilyia lango tsa mmbiu-pfo.
1 Kyasia, mukyeri kye muleṟutso hamwi na Kristo, pfulenyi shindo shikyeri ruwewu, kundu Kristo akyeri, naṙamie kuwoko ko kulyoe ko Ruwa. 2 Kusaṟenyi shikyeri wuye, chi shikyeri urukyenyi-pfo. 3 Cha kyipfa mulepfa, na moo onyu umṟikye hamwi na Kristo kyiiṙi kya Ruwa. 4 Ilyi Kristo echiloṟo na pata, akyeri moo oṙu, nyi lyo-ndu na nyoe mochiloṟo hamwi na oe mng'anonyi. 5 Kyasia, lekanenyi na shindo wandu wa wuyana wawoṙe: wuṟui, ukoe, lango ngyiwicho, makusaṟo mawicho, na ilanga iwaṙa sha ngoseṟa, nyiwo wuyendelyi wo iindia mafano. 6 Kyipfa kya shindo-sho nyashi ya Ruwa yekyeolokyia walya walekyemwindia. 7 Kyiiṙi kya isho maa nyoe taa mulewuta kyiyeri kya kacha, kyiyeri shilemuchilyia. 8 Kyaindi wulalu wikyienyi kuleshi na nyoe ishi shoose: nyashi, na isuo lying'anyi, na uwicho, na shilahio, na maṙeṙo ga wusutsu ṙumbunyi konyu. 9 Maa mulawiane wongo, cha kyipfa moṙa nakamwi mkaṟo o kacha, hamwi na mawuto gacho, 10 mochiṟaa mkaṟo mhya. Ikyi nyikyo kyindo kyihya Ruwa ulya alekyigumba aikyigumba orio mfiri kui mfano okye, kundu namuenengye pfinya ya immanya nakamwi. 11 Iho kuwoṙe Mkyiṟikyi maa Myuda-pfo, iṙino maa iṙa iṙino-pfo, muyenu maa tondo, mtumo maa ulya alakyeri mtumo-pfo, indi Kristo nyi shoose, na kyiiṙi kya shoose. 12 Kyasia, kyipfa mommbe wasambuṟe wa Ruwa, wandu wa Ruwa wakunde, ṟaenyi mrima o isaṟia, mkaṟo mcha, wupfereri, wuhoo, ikarishia. 13 Mochiṙuana na ihooṟiana, mndu awoṙe kyimaṙuma kyesuuya oṙoe, chandu Mndumii alemuhooṟia nyoe, nyi wuṙo na nyoe. 14 Ngoseṟa ya isho shoose waṙenyi ikunda, lyikyeri nyilyo lyaafutsia iiṙikyia. 15 Na ufoṟo lo Kristo luloṟe kyilya kyiwaṟi mrimenyi konyu, nyikyo mulelagio mmbiunyi umwi; lyingyi-se muwe wandu wekyeana. 16 Ṙeṙo lya Kristo lyiingyikye mrimenyi konyu na wuṟangonyi woose, mochiloshana na itutumana kui shiimbo, na shiimbo shetembecheṟa mrima; kunu mochiimbia Ruwa kui iana mrimenyi konyu. 17 Na orio kyindo mochiwuta, kui ṙeṙo ang'u kui iṟunda, wutenyi shoose rinenyi lya Mndumii Yesu, mochiana Ruwa Awu kui oe. 18 Nyoe waka, indienyi wamii wanyu, chandu kyichihiṟie kyiiṙi kya Mndumii. 19 Nyoe wasoṟo, kundenyi waka wanyu maa mulawihiyo kyipfa kyawo. 20 Nyoe wana, indienyi wafee wanyu shindonyi shoose, kyipfa kyindo-kyi kyichihiṟie kyiiṙi kya Mndumii. 21 Nyoe waawu, mulasouoe wana wanyu, walachepfiiyo nyi mṙoe. 22 Nyoe watumo, indienyi iwo wakyeri kye kui mmbiu nyi wandumii wanyu, mbonyinyi tsoose. Chi kui wutumo wo meso, cha waikulembecheṟa ko wandu-pfo, indi kui mrima ukutitiṟie, mochiindia Mndumii. 23 Kyoose mochiwuta, wutenyi kui mrima, cha iṟundia Mndumii, maa chi cha iwutia wandu-pfo, 24 muichi kye moambilyia ko Mndumii wori wo kyioṟa. Muiṟundia Mndumii Kristo. 25 Kyipfa molya mbaka netoo wori wo ilya mbaka, maa kuwoṙe ikundia-pfo.
1 Nyoe wandumii, enengyenyi watumo wanyu kyikyeri kya sungusinyi na kya wuloi, muichi kye maa nyoe muwoṙe Mndumii ruwewu. 2 Mfiri yoose terewenyi, mochilaa kyiṙombo kyiterewonyi na iana. 3 Mochiluterewia na soe taa, kye Ruwa nalupfunguye moongo kui Ṙeṙo lyilya lyakye, luonguo wuṟikyi wo Kristo, ngyimpfungye kyipfa kya wuṟikyi-wo, 4 kundu ngyiwuloṟe na pata, chandu kyingyiwaṟi iṙeṙa. 5 Kaenyi kui wuṟango mbele ya iwo walaiṙikyie Yesu, mochiambuya mndu alaṙetse kyiyeri. 6 Maṙeṙo ganyu gawaṙe wuindi mfiri yoose, gai mecha, muiṙime imanya chandu kyimmbaṟi igaluo orio mndu. 7 Tikyiko, mono-wama mkunde, mṟundi ekyeapfutsia kyilya ateṟia, mongari oko kyiiṙi kya Mndumii, nemuongoya mbonyi tsako tsoose. 8 Icho ngamṙuma konyu kyipfa kya kyindo-kyo ikyo, kundu mumanye mbonyi tsaṙu, na oe nammbiyiṟie moo mrima yanyu. 9 Hamwi na Onesimo, mono-wama mkunde ekyeafutsia shilya ateṟia, akyeri mndu o konyu. Iwo wemuongoya mbonyi tsoose tsa iha koṙu. 10 Arisitariko, ampfungye hamwi na inyi, namuiṟikyiṟa; na Mariko, washiṙie o Barinaba, icho muleambilyia mawawaso kui mbonyi tsakye; kashika konyu mwambilyienyi. 11 Na Yesu ekyelago Yusto; iwa nyi Wakristiano wa Kyiyuda. Lyingyi-se iwo nyiwo wawenyi waiṟunda hamwi na inyi kyipfa kya Wumangyi wo Ruwa; nawo walengyiwiyiṟia moo. 12 Epafura, akyeri mndu o konyu, mṟundi o Yesu Kristo, namuiṟikyiṟa, echipfuṟukana mfiri yoose kyipfa kyanyu shiterewonyi shakye, kundu kye mugoṟokye muafutsie iiṙikyia na iṟingyishio mnu shindonyi shoose Ruwa akundi. 13 Kyipfa ngyimṟingyishia kye nawoṙe wuragari wung'anyi kyipfa kyanyu, na kyipfa kya iwo wakyeri Laodikyia, na kyipfa kya iwo wakyeri Hierapolyi. 14 Luka mganga ulya mkunde, na Dema, wamuiṟikyiṟa. 15 Iṟikyiṟenyi wana wa wama wakyeri Laodikyia, na Nimfa, na Siṟi ikyeri numbenyi yakye. 16 Paruo-i ikamsomo konyu wonenyi kye yasomo siṟinyi ya Walaodikyia taa; na iya ya Laodikyia isomo nyi nyoe. 17 Wienyi Arikyipo, “Ringa mnu iṟunda lyilya uleenengo kyiiṙi kya Mndumii, kundu ulyiafutsie.” 18 Kyiiṟikyiṟo kyako inyi Paulo, ngaṟeia ngyimonyi. Kumbuonyi ipfungo lyako. Isaṟia lyikae hamwi na nyoe.
1 Inyi Paulo na Silyiwano na Timoteo lumuṟeia paruo nyoe siṟi ya Watesalonikye, ikyeri kyiiṙi kya Ruwa Awu, na kyiiṙi kya Mndumii Yesu Kristo. Isaṟia lyikae konyu na ufoṟo. 2 Lokyeana Ruwa mfiri yoose kyipfa kyanyu nyoe moose, lochimusenda shiterewonyi shaṙu. 3 Maa lokyeṙa ikumbuo iṟunda lyanyu lya iiṙikyia, na wukyiwa wonyu ikundenyi, na wusimiri wonyu na ikusuria lyikyeri kyiiṙi kya Mndumii oṙu Yesu Kristo, mbele ya Ruwa Awu oṙu-pfo. 4 Cha kyipfa, wana wa wama muwakunde nyi Ruwa, luichi kya wusambuṟe wonyu. 5 Kye Ndumi Ngyicha lulemuongoya iwekyeri kui maṙeṙo tikyi-pfo, indi na kui pfinya, na Mumuyonyi Mweele, kui iṟingyishia na pata kye ulogo-lu nyi lo loi. Chandu muichi chandu mkaṟo yaṙu iwekyeri konyu, kyipfa kyanyu. 6 Na nyoe mukoluosha na iosha Mndumii, momuambilyie Ṙeṙo lya Ruwa kyiiṙi kya ilya wukyiwa, hamwi na sia ya Mumuyo Mweele. 7 Mṟasa mukowa mfano mcha ko wandu woose waiṙikyie Yesu urukyenyi lo Makyedonia na Akaya. 8 Kyipfa iwuka konyu Ṙeṙo lya Ruwa lyileṟuma, chi Makyedonia na Akaya tupu-pfo, indi na orio handu iiṙikyia lyanyu muwoṙe ko Ruwa lyileshika; maa kuwoṙe kyimaṙuma soe ionguo kyindo kyoose-pfo. 9 Cha kyipfa wo wawenyi waionguo mbonyi tsaṙu, chandu mbonyi tsaṙu tsilewa kyiyeri lulecha na konyu; na chandu muleindukyia Ruwa mukolekana na mafano, kundu muṟundie Ruwa ai na moo, o loi. 10 Na iweṙelyia Mono-kye iwuka Ruwewu, ulya alemṟutsa iwuka ko wapfu, na oe nyi Yesu, echilushingyia lulaolokyio nyi nyashi ya Ruwa iya iicha.
1 Kyipfa nyoe muwenyi, wana wa wama, muichi chandu lulecha na konyu, kye kulewa wulya-pfo. 2 Kyaindi kuwooka lomulyiso wukyiwa na iinyalo, chandu muichi, kulya Filyipi, lulekaria kyiiṙi kya Ruwa imuongoya nyoe Ndumi Ngyicha ya Ruwa, kui iikapania mnu. 3 Cha kyipfa imterewa lyaṙu muambilyie ulogo lokyeonguo chi lya wuṙetsi, maa chi lya ukoe, maa lya ngyeṟo-pfo; 4 indi chandu luleenengo momu o ionguo Ndumi Ngyicha, nyi wuṙo luonguo. Chi cha wandu waichihiṟa wandu-pfo, indi waichihiṟa Ruwa ekyeluyeṟa mrimenyi koṙu. 5 Kyipfa chandu muichi lulewaṙa maṙeṙo gepfula ikundo maa kyiyeri kyifuhi-pfo. Maa maṙeṙo gemuiring'ishia kya wongo gawewoṙe kyimaṙuma kyeṟika wuehi wo mrima yaṙu-pfo, na Ruwa nyi oe mṟingyishi. 6 Lulepfula kyiṟumi ko wandu, maa konyu, maa ko wandu wengyi kyiyeri luwewoṙe wuiṙimi wo iwa ṟio konyu cha wasu wa Kristo-pfo. 7 Indi luwekyeri wandu wahoo kyiyeri luwekyeri na nyoe, chandu mfee ekyeambuya wana wakye amonyi. 8 Na wuṙo na soe lochiṙuana na nyoe kui ikunda lying'anyi, lulewoṙo nyi sia imuenenga, chi Ndumi Ngyicha tupu-pfo, indi na moo yaṙu taa, cha kyipfa mowa wakunde waṙu. 9 Kyipfa wana wa wama, mukumburie wukyiwa woṙu na iṟaisho lyaṙu; cha kyipfa kyingoto na kyio luleṟunda lulacheewa ṟio ko mndu o konyu oose, lukomuongoya kuṙo Ndumi Ngyicha ya Ruwa. 10 Nyoe nyi waṟingyishi, na Ruwa taa, chandu lulekaa konyu nyoe muiṙikyie Yesu, kui wuele, na kui wusumganyi, kulawoṙe igamba kye lowuta kyindo kyiwicho. 11 Na wuṙo, chandu muichi, chandu luleṙeṙia orio umwi onyu chandu Awu ekyeṙeṙia wana wakye amonyi, lochimukarisha na imuṟingyishia nyoe, 12 kundu mkaṟo yanyu iṙuane na chandu Ruwa akundi, ulya ekyemulaga nyoe kundu muiṙe na Wumangyinyi wokye na kyiṟumi kyakye. 13 Kyipfa kya ikyo na soe lokyeana Ruwa orio kyiyeri, cha kyipfa kyiyeri muleambilyia ndumo ya Ruwa muleiicho koṙu, muleiambilyia chi cha ulogo lo wandu-pfo, indi cha ulogo lo Ruwa; na nyi wuṙo ulogo-lo lukyeri; lokyeṟunda taa mrimenyi konyu nyoe muiṙikyie. 14 Kyipfa nyoe, wana wa wama, muwekyeri wandu wa siṟi tsa Ruwa tsikyeri urukyenyi lo Uyuda, kyiiṙi kya Kristo Yesu; cha kyipfa mulelyiso wukyiwa wulya wulya iwuka ko wandu wa uruka lonyu muwenyi, wukyiwa mulelyiso nyi Wayuda. 15 Walya walewaaga Mndumii Yesu, na weonguo shisuku, na ilulyisa soe wukyiwa; maa wekyechihiṟa Ruwa, maa iṙuana na wandu-pfo. 16 Kunu wechilushingyia lulaṙeṙe na wandu walaiṙikyie Yesu waiṙime ikyiṟo; kundu waafutsie ngyuunyamaṟi tsawo mfiri yoose. Kyaindi Ruwa naiwaanduya kui nyashi. 17 Kyaindi soe, wana wa wama, lulekanyi na nyoe kyiyeri kyifuhi, lulekanyi na nyoe kyimmbiu indi chi kyimrima-pfo, lulelanga mnu immbona nyoe. 18 Koikyo lulekunda icha na konyu, yee, inyi Paulo, lya kuwooka na lya kawi Satana kalushingyia. 19 Kyipfa ikusuria lyaṙu ang'u sia yaṙu, ang'u iṟikoso lya ikushela, nyi kyikyi? Ngyesa chi nyoe, mbele ya Mndumii oṙu Yesu kyiyeri kya icha lyakye-pfoe? 20 Kyipfa nyoe nyi kyiṟumi kyaṙu, na sia yaṙu.
1 Kyasia kyiyeri lulaleiṙima ikarishia ngoseṟa, lulewona nyi kyicha iṙio Atene soe luwenyi. 2 Lukoṙuma Timoteo mono-wama oṙu, mṟundi o Ruwa iṟundenyi lyeonguo Ndumi Ngyicha ya Kristo, kundu namukarishe nyoe na immbiyiṟia moo ko mbonyi tsa iiṙikyia lyanyu; 3 mndu alaowesho nyi ngyuukyiwa-tsi; kyipfa nyoe muwenyi muichi kye luwaṟi ikooyana natso. 4 Cha kyipfa kyiyeri luwekyeri konyu lulesonguo immbia kye lochilya wukyiwa, chandu kyilewutika, na nyoe muichi. 5 Koikyo na inyi kyiyeri ngyilaleiṙima ikarishia-se, ngyileṙuma mndu kundu ngyimanye iiṙikyia lyanyu, Satana alache namuyeshe, na ilya wukyiwa lyanyu lyikawa lyiwoṙe kyiira-pfo. 6 Kyaindi kyiyeri Timoteo alecha na koṙu iwuka konyu, naleluendie mbonyi ngyicha tsa iiṙikyia lyanyu na ikunda lyanyu na kye mokyelukumbuo necha mfiri yoose, mulangyie iluwona chandu soe lulangyie immbona. 7 Kyipfa kya ikyo, wana wa wama, mbonyi tsanyu tsileluwiyiṟia moo, ngyuukyiwenyi tsaṙu tsoose, kui iiṙikyia lyanyu. 8 Cha kyipfa wulalu luwoṙe moo, kokoooya nyoe mulaloloma kyiiṙi kya Mndumii. 9 Kyipfa nyi kyikyi loiṙima iana nakyo Ruwa imtaa kyilya alemmbutia nyoe, kui sia iya luichihiyo kyipfa kyayo, kyipfa kyanyu mbele yanyu na mbele ya Ruwa; 10 kyio na kyingoto kyiyeri lokyeterewa kui ipfuṟukana lying'anyi luiṙime immbona nyoe, na iichuṟia shilya iiṙikyia lyanyu lyilashiwoṙe? 11 Kyasia Ruwa amonyi, Awu oṙu, na Mndumii oṙu Yesu, nalusongoye njienyi lushikye konyu. 12 Mndumii namusongoye nyoe na imuengyeṟia ikunda, nyoe wenyi ko wenyi, na ko wandu woose chandu na soe lumkundi nyoe. 13 Naiṙime itarama mrima yanyu ilalolome ilawaṙe kyindo kyoose mndu eiṙima igamba kye ingyiwicho, wuelenyi mbele ya Ruwa, Awu oṙu, kyiyeri kya icha lya Mndumii oṙu Yesu hamwi na wandu wa Ruwa woose.
1 Kyatsugaa ho, wana wa wama, luimuterewa na imuikyimbia kye muwaṙe mkaṟo iṙuṙanyi na shilya Mndumii Yesu akundi; chandu mulewona na ishiicho koṙu nyi wuṙo muwaṟi iwuta muchihiṟe Ruwa; chandu mokyewuta, wutenyi kuṙo na ngoseṟa. 2 Cha kyipfa muichi nyi shindo shiha lulemmbia mushiwute kyiiṙi kya Mndumii Yesu. 3 Kyipfa isho nyisho Ruwa akundi shiwutikye, iilyisho lyanyu, mukushowe na wuṟui. 4 Orio umwi onyu naiṙime ichilyia lango tsa mmbiu okye wuelenyi na wuindi; 5 chi kui mkaṟo ya lango ngyiwicho, cha wandu walaichi Ruwa-pfo. 6 Mndu alalembe oṙoe maa imṙekyio kyiiṙi kya kyindo-kyi-pfo; cha kyipfa Mndumii nyi oe ekyetaa kyiṟaache kya ishi shoose; chandu lulemmbia kuwooka, lukoṟingyishia mnu. 7 Kyipfa Ruwa alelulagia wuṟui-pfo, indi luwe wandu wawailyishe. 8 Kyasia ulya ailega, ailega mndu-pfo indi Ruwa, ekyemuenenga nyoe Mumuyo okye Mweele. 9 Ko mbonyi tsa ikundana, kuwoṙe kyimaṙuma kya imuṟeia-pfo; kyipfa nyoe muwenyi muwaloshe nyi Ruwa ikundana. 10 Cha kyipfa mukundi wana wa wama woose wakyeri urukyenyi loose lo Makyedonia. Kyaindi lomuterewa, wana wa wama, muengyeṟe ikundana. 11 Lyingyi-se mutambagane iṙa iṙicha-ṙicha, na iṟunda maṟunda ganyu, na iṟunda kui mawoko ganyu muwenyi, chandu lulemmbia; 12 kundu muwaṙe mkaṟo ngyicha mbele ya walya walakyeri poonyi lya walya waiṙikyie Yesu, maa mulatengye-tengye mochieṟeṟa. 13 Kyaindi, wana wa wama, lukundi muṙe mulamanya mbonyi tsa iwo wapfiie-pfo, mulachewuta ho iwihiyo mrimenyi cha wengyi walawoṙe ikusuria. 14 Kyipfa kokooya loiṙikyia kye Yesu nalepfa kaṟuka, na wuṙo walya wapfiie waiṙikyie Yesu, Ruwa nechiwaṟutsa cha Yesu. 15 Koikyo lummbia ishi kui Ṙeṙo lya Mndumii, kye soe lui ho na moo, lochitsugaa ho mṟasa kyiyeri kya icha lya Mndumii; ny'kyaloi lochisongoya walya walempfa-pfo. 16 Cha kyipfa Mndumii amonyi nechisoka iwuka ruwewu, na wandu wechiicho ṟui lying'anyi lyilaga, na ṟui lya msongoru o malaika, na iganda lya Ruwa; na walya walepfa waiṙikyie Kristo wechiṟutso kuwooka. 17 Naaho-ng'u soe lui ho na moo, luletsugaa ho, Ruwa nechilurakuo na iluṙosia handu hamwi mapuchinyi; kundu luambilyie Mndumii ruwewu; na kuṙo lochikaa hamwi na Mndumii mlungana. 18 Kyasia, wiyiṟianenyi moo kui maṙeṙo-ga.
1 Kyaindi, wana wa wama, ko mbonyi tsa shiyeri, kuwoṙe kyimaṙuma kyemuṟeia-pfo. 2 Kyipfa nyoe muwenyi muichi na pata kye Mndumii nechicha kyiyeri mulakusaṟie chandu mbafu yekyecha kyio. 3 Kyiyeri wandu waigamba, “Kuwoṙe ufoṟo na kuwoṙe ndenga-pfo,” nyi lyo-ndu irumatso lyechicha kulawoṙe mndu akusaṟie, chandu fowa yekyecha na ko mndu mka mnene, na kya loi wechikyia-pfo. 4 Indi nyoe, wana wa wama, mukyeri meemenyi, mṟasa Yesu nache kyiyeri mulakyikusaṟie chandu mbafu yekyewuta-pfo. 5 Cha kyipfa nyoe moose mowa wandu wekyewuta shindo cha ilyi orio kyindo kyekyeṟundo ngyeelenyi; soe chi wandu wekyewuta shindo meemenyi-pfo. 6 Kyasia lulalae maṙoe cha wandu wengyi, indi lulae kyiṙombo, na iwaṙa meena. 7 Kyipfa walya wekyelaa maṙoe wekyelaa kyio, na walya wekyenango taa wekyenango kyio. 8 Kyaindi soe lokyewuta shindo cha ilyi orio kyindo kyekyewuto ngyeelenyi, luwaṙe meena, kunu lochiwaṙa iiṙikyia na ikunda na lukusurie nakamwi ikyiṟo nyi Ruwa, na ikyo kyechiwa kyindo kyeringa mṙoe yaṙu ilakapo nyi kyindo. 9 Cha kyipfa Ruwa alalekunda ilukapa kui nyashi yakye, indi luwone wukyiṟo, kui Mndumii oṙu Yesu Kristo; 10 ulya alepfa kyipfa kyaṙu, kundu luwaṙe moo hamwi na oe, kokooya lulee kyiṙombo ang'u kokooya lulee maṙoe. 11 Kyasia, wiyiṟianenyi moo na iloshana orio mndu na oṙoe, chandu muiwuta. 12 Kyaindi, wana wa wama, lukundi mumanye walya wekyekutuura kyipfa kyanyu, na imugoṟokyia nyoe kyiiṙi kya Mndumii, na imuikyimbia; 13 muwaindie mnu ikundenyi, kyipfa kya maṟunda gawo. Waṙenyi ufoṟo nyoe wenyi ko wenyi. 14 Wana wa wama, lomuterewa, ṙeṙienyi walya walawoṙe wuyendelyi wucha; karishenyi wafofo, iṟichenyi wafafa; karishienyi wandu woose. 15 Kuringyenyi mndu oose alatae oṙoe kyiwicho awutio; indi mfiri yoose oshenyi kyilya kyikyicha, nyoe wenyi ko wenyi na ko wandu woose. 16 Chihiyonyi mfiri yoose; 17 terewenyi kulawoṙe itsitsia; 18 anenyi kyipfa kya orio kyindo; kyipfa isho nyisho shilya Ruwa akundi shiwutikye konyu kyiiṙi kya Kristo Yesu. 19 Mularumishe Mumuyo Mweele; 20 mulamine ionguo shisuku; 21 yeshenyi shindo shoose; wutenyi kyilya kyikyicha. 22 Kushowenyi na wuwicho wa orio mbaṟe. 23 Ruwa o ufoṟo amonyi namuilyishe nakamwi, na nyoe mrima yanyu na ngoo tsanyu na mmbiu yanyu, muwe wandu mulawoṙe ṙeko, kyiyeri kya icha lya Mndumii oṙu Yesu Kristo. 24 Ulya alemulaga nyoe nechiwuta, kyipfa nekyewuta shilya ateṟia. 25 Wana wa wama, luterewienyi. 26 Iṟikyiṟenyi wana wa wama chandu walya waiṙikyie Yesu wekyeiṟikyiṟana. 27 Ngammbia kui wuchilyi wo Mndumii, woose waiṙikyie Yesu wasomio paruo-i. 28 Isaṟia lya Mndumii oṙu Yesu Kristo lyikae hamwi na nyoe.
1 Inyi Paulo hamwi na Silyiwano, na Timoteo, loṟeia paruo-i ko siṟi ya Watesalonikye, ikyeri kyiiṙi kya Ruwa Awu, na kyiiṙi kya Mndumii Yesu Kristo. 2 Isaṟia lyikae konyu na ufoṟo uwukyie ko Ruwa Awu, na ko Mndumii Yesu Kristo. 3 Wana wa wama, kyalukooya iana Ruwa mfiri yoose kyipfa kyanyu, chandu kyiwaṟi, cha kyipfa iiṙikyia lyanyu lyiengyeṟika mnu, na ikunda lya orio mndu konyu ko oṙoe lyang'ana. 4 Mṟasa na soe luwenyi lukushela kyipfa kyanyu siṟinyi tsa Ruwa kyipfa kya isimiria lyanyu, na iiṙikyia muwoṙe fowenyi tsanyu tsoose na wukyiwa wung'anyi muikarishia. 5 Nyikyo kyiṟingyishio kya sungusinyi kya ianduyo lyikyeri wusumganyi wo Ruwa, kundu mutalyio kye kyimmbaṟi iiṙa na Wumangyinyi wo Ruwa, iwo womuenenga ilyiso wukyiwa. 6 Cha kyipfa nyi necha mbele ya Ruwa ilyisa wukyiwa walya waimulyisa wukyiwa nyoe; 7 na imutaa nyoe muilyiso wukyiwa sia hamwi na soe; kyiyeri kya iloṟo lya Mndumii Yesu iwuka ruwewu hamwi na malaika wa wuiṙimi wokye. 8 Nesoka moṙonyi wuiaka; kunu echitaa kyiṟaache iwo walaichi Ruwa, na iwo walaindie Ndumi Ngyicha ya Mndumii oṙu Yesu. 9 Wechianduyo kui irumatso lya mlungana, iwiko kuleshi na kyaam kya Mndumii na mng'ano o pfinya tsakye. 10 Oe kyiyeri echicha kundu nang'anyiso wandunyi wa Ruwa, na kochiwaṙa iṟiyio lying'anyi kyiiṙi kya woose waleiṙikyia mfiri ulya (kyipfa wuṟingyishi woṙu wuleiṙikyio konyu.) 11 Koikyo lumuterewia nyoe mfiri yoose, kundu Ruwa oṙu namutale kye muwaṟi ilago lyanyu, kaafutsia orio njia ya wucha na orio iṟunda lya iiṙikyia kui pfinya. 12 Rina lya Mndumii oṙu Yesu lying'anyiso mrimenyi konyu, na nyoe kyiiṙi kyakye, kui isaṟia lya Ruwa oṙu na lya Mndumii Yesu Kristo.
1 Kyasia, wana wa wama, lumuterewa, ko mbonyi tsa icha lya Mndumii oṙu Yesu Kristo, na ikuumbia lyaṙu mbele yakye, 2 kye maa mulaiṟewe iwinyi mṟasa iṙa iwuta kyilya mukundi, maa mulaowesho, kui mumuyo, maa kui ṙeṙo, maa kui paruo ikusaṟo kye nyi yaṙu, cha ilyi kye mfiri Mndumii aicha lya kawi ulemcha. 3 Mndu oose ulamulembe kui mbaṟe yoose; kyipfa mfiri-cho uicha-pfo, mṟasa kuche kuwooka Ikana Ruwa, kaloṟo na pata mndu ulya molega kilya Ruwa awawasie, mana ekyekana Ruwa. 4 Ulya ekyewingana, ekyekuiria oe amonyi wuye ya orio kyindo kyekyelago Ruwa ang'u ikundo na iindio; mṟasa oe amonyi iṙamia hekalunyi lya Ruwa, kakuloṟa oe amonyi cha ilyi kye oe nyi oe Ruwa. 5 Ngyesa mukumburie kye kyiyeri ngyiwekyeri hamwi na nyoe ngyilemmbia isho-pfoe? 6 Na wulalu kyishingyie mukyiichi, ulya naiṙime iloṟo na pata kyiyeri kyakye. 7 Kyipfa wuṟikyi wulya wo iwingana wuiṟunda wulalu; kyaindi kuwoṙe ashingyie wulalu mṟasa kyiyeri ewuto ho. 8 Iho nyi ho-ndu eloṟo-ng'u ulya alewie Ruwa, ulya Mndumii Yesu emmbaaga kui mṟufui o ṙumbu lyakye, na imrumatsa kui iloṟo lya oe ikaa pfo. 9 Ulya akyeri kye icha lyakye nyi kui pfinya ya Satana, kui wuiṙimi woose, na shiṟingyishio na maṟiyisho ga wongo. 10 Na wulembinyi woose wo wunyamaṟi ko iwo waiṙeka; cha kyipfa waleiṙikyia ikunda loi iya waiṙime ikyiṟo-pfo. 11 Koikyo Ruwa naiwaendie pfinya ya iṙeka, waiṙikyie wongo; 12 kundu waanduyo woose walaleiṙikyia loi, indi wawechihiyo kyipfa kya iwuta wunyamaṟi. 13 Kyaindi kyalukooya soe iana Ruwa mfiri yoose kyipfa kyanyu, wana wa wama mulekundo nyi Mndumii, cha kyipfa Ruwa nalemusambuṟa wookyia mawookyionyi muambilyie wukyiṟo, kyiiṙi kya iilyisho nyi Mumuyo, na iiṙikyia loi; 14 alemulagia nyoe kui Ndumi Ngyicha yaṙu, kundu luambilyie mng'ano o Mndumii oṙu Yesu Kristo. 15 Kyasia, wana wa wama waṙu, goṟokyenyi kulawoṙe iloloma, muoshe shilya muleambilyia kui malosho gaṙu, kokooya nyi kui maṙeṙo, ang'u kui paruo yaṙu. 16 Na Mndumii oṙu Yesu Kristo amonyi, na Ruwa Awu oṙu, alelukunda kaluenenga iwiyiṟio moo lya mlungana na ikusuria lyicha, isaṟienyi, 17 namuwiyiṟie moo na imukarisha orio ṙeṙonyi na iṟundenyi lyicha.
1 Lyefurumia, wana wa wama, luterewienyi, Ṙeṙo lya Mndumii lyiengyeṟikye na ing'anyiso chandu kyikyeri konyu. 2 Lundekyiṟo iwuka ko wandu wulawoṙe wusumganyi, wawicho, kyipfa chi woose wawoṙe iiṙikyia-pfo. 3 Kyaindi Mndumii nekyeafutsia shilya ateṟia, echimukarisha na imuringa mulatewo nyi mmbicho ulya. 4 Na soe lukusurie Mndumii ko mbonyi tsanyu, kye muiwuta shilya lulemmbia, lyingyi-se kye mochishiwuta. 5 Mndumii namusongoye mrima yanyu muambilyie ikunda lya Ruwa na wusimiri wo Kristo. 6 Wana wa wama waṙu, lummbia rinenyi lya Mndumii Yesu Kristo, kaenyi kuleshi na mono-wama alaiosha kyilya muleambilyia koṙu. 7 Muichi muwenyi chandu kyimmbaṟi iluosha; cha kyipfa lulewaṙa mkaṟo mmbicho konyu-pfo. 8 Maa lulelya kyelya ko mndu oose kui imteng'elyia-pfo indi kui wukyiwa na matuuro, kyio na kyingoto luleṟunda, kundu mndu oose o konyu alaluenengye kyindo kulawoṙe imtaa. 9 Chi kye lulawewoṙe pfinya ya imuitika muluenengye shindo-pfo, kundu nyoe mukuloshie koṙu, muluoshe. 10 Cha kyipfa maa kyiyeri kyilya luwekyeri konyu lulemmbia kyindo-kyi, kye kokooya mndu alakundi iṟunda kyindo, kyasia, alalye kyelya. 11 Kyipfa luichuoe kye kuwoṙe wandu konyu walawoṙe mkaṟo mcha, wawoṙe maṟunda-pfo, kyaindi wekyekuwinisha na mbonyi tsa wandu wengyi. 12 Kyasia luwia iwo na iwatutuma kyiiṙi kya Mndumii Yesu Kristo, waṟunde maṟunda kui wuramiri na ilya kyelya kya msino owo wawenyi. 13 Kyaindi nyoe, wana wa wama, maa mulapfiiyo nyi mṙoe kyiiṙi kya iwuta shindo shicha. 14 Na kokooya mndu oose alaosha malosho gaṙu gakyeri iha paruonyi kushowenyi na mndu-cho, maa mulaṙeṙe na oe, naiṙime irigo nyi sonu; 15 kyaindi mulamtale cha mokyituwa, kyaindi mtutumenyi cha mono-wama. 16 Wulalu, Mndumii o ufoṟo amonyi namuenengye ufoṟo kyiyeri kyoose kui njia tsoose. Mndumii nawe hamwi na nyoe moose. 17 Shiiṟikyiṟo shako inyi Paulo, inyi ngyimonyi. Ikyi nyikyo kyindo kyeloṟa orio paruo; nyi kuṙo ngyekyeṟeia. 18 Isaṟia lya Mndumii oṙu Yesu Kristo lyikae na nyoe moose.
1 Inyi Paulo, msu o Kristo Yesu, kui iwawaso lya Ruwa Mkyiṟa oṙu na Kristo Yesu, ulya lukuwoṙe na oe tapu; 2 ngaṟeia paruo-i ko Timoteo, mana oko mkunde iiṙikyienyi. Isaṟia lyikae kopfo, na ihooṟia, na ufoṟo, shiwukyie ko Ruwa Awu na ko Kristo Yesu Mndumii oṙu. 3 Ngyilekuterewa ukae Efeso, kyiyeri ngyiweiyenda Makyedonia, kundu uime wandu wengyi walaloshe shindo shingyi. 4 Walaṙetsie shiyeri shawo mbonyinyi tsa wongo na marinenyi gafoi ga waku wawo, shekyeenenga wandu iwesa shindo shifoi sha wutondo. Shindo-sho shiwoṙe ṙaawa kyindonyi Ruwa aluṟeyeṟie-pfo, kyindo lukyiichi kui iiṙikyia. 5 Kyaindi kyimaṙuma kya iwawaso-lyo nyi ikunda lyiwukyie mrimenyi mwilyi na makusaṟonyi mecha, na iiṙikyia lyilawoṙe wukulembecheṟi. 6 Wengyi walaichi isho waleosha shindo shiwicho; 7 wakundi iwa walosha wa mawawaso, maa chandu walaichi shilya waigamba maa shindo shilya waionguo kulawoṙe wuowu. 8 Kyaindi luichi kye mawawaso nyi kyindo kyicha, kokooya mndu agakusuria kui njia ikyeri ya sungusinyi. 9 Aichi kyindo-kyi kye mawawaso chi galeṙiko kyipfa kya wandu wasumganyi-pfo indi kyipfa kya wanyamaṟi, na walakyeri wayendelyi, na wekyefunja mawawaso ga Ruwa, na walya walekyeindia shindo shiele, na wekyewaaga wafee wawo, na wawaagi. 10 Na waṟui, na wekyelaa na wandu wa nguwo tsawo, na wekyeiwa wandu, na wekyeṙeṙa wongo, na wekyelya nyamu kui wongo; na kuwoṙe kyindo kyingyi kyoose kyilaṙuṙanyi na malosho gawoṙe moo. 11 Chandu kyikyionguoe Nduminyi Ngyicha ya kyiṟumi kya Ruwa ekyeṟumisho, Ndumi Ngyicha ngyileenengo iṟunda lyeionguo. 12 Na inyi ngyiana Kristo Yesu Mndumii oṙu, alengyienenga pfinya cha kyipfa alengyiwona kye ngyekyeafutsia shilya ngateṟia, kangyiwika iṟundenyi lyakye. 13 Maa chandu ipfo mawookyionyi ngyiwekyelahia, mndu ekyelyisa wandu wukyiwa, ngyilekyeaṙanyia shilya ngyiwio; kyaindi ngyileenengo isaṟia cha kyipfa ngyilewuta kuṙo kui wutondo, na kyipfa kya iuṟa iiṙikyia. 14 Na isaṟia lya Mndumii oṙu lyileengyeṟika mnu, hamwi na iiṙikyia na ikunda lyikyeri kyiiṙi kya Kristo Yesu. 15 Nyi kyindo kya loi, na kyiwaṟi iiṙikyio nakamwi, kye Kristo Yesu nalecha na wuyanenyi nakyiṟe wanyamaṟi; walya o kuwooka ai nyi inyi. 16 Kyaindi kyipfa kya ikyo ngyilewona isaṟia, kundu mrimenyi koko inyi o kuwooka, Yesu Kristo naṟingyishie wucha wokye wulekyesia; ngyiwe kyindo walya wechimwiṙikyia wechikyiambuya, wawone moo o mlungana. 17 Wulalu ko Mangyi o shiyeri shoose, alekyerumatso, alekyewono na meso, Ruwa alawoṙe ungyi ai cha oe, kokye kuwaṙe wuindi na kyiṟumi mlungana na mlungana. Amen. 18 Mono-ko, Timoteo, gakuenenga iwawaso-lyi lyiwe kyiseyesoe, kyipfa kya mbonyi tsapfo tsa ionguo shisuku, kundu kyiiṙi kya isho ukapane shiṙa shilya shicha. 19 Uwe mndu awoṙe iiṙikyia na makusaṟo mecha, galya wandu wengyi walegatakulyia kuleshi, wakarumara ko mbonyi tsa iiṙikyia. 20 Kyiiṙi kya iwo kuwoṙe Himenayo na Iskanda, walya ngyilewaṙambika Satana, kundu nawakape, na kui iwutio kuṙo wakuloshe walalahie Ruwa.
1 Kyasia kyindo kying'anyi kuta shoose nyi iterewiana, iterewa Ruwa shilya lukundi, na iana Ruwa kyipfa kya mboṟa tsakye. Isho shiwutikye kyipfa kya wandu woose; 2 kyipfa kya wamangyi na wawoṙe wuchilyi, luwe wandu walakyeri ndengyenyi na wawoṙe ufoṟo, kyiiṙi kya iindia Ruwa na wandu woose. 3 Ikyi nyi kyindo kyicha, nakyo nyi kyindo kyikyikunde mbele ya Ruwa Mkyiṟa oṙu, 4 ulya akundi wandu woose wakyiṟo, na iiṙima imanya shikyeri sha loi. 5 Cha kyipfa Ruwa nyi umwi, na ulya ekyesanza Ruwa na wandu nyi umwi, mndu ulya ai Kristo Yesu. 6 Ulya alekuwuta amonyi kundu naendie wandu woose wukyiṟo; ikuwuta lyileloṟa kyiyeri Ruwa akundi ikyiṟa wandu woose. 7 Na inyi kyipfa kya wukyiṟo-wo ngyilewiko ngyiwe moonguo Ṙeṙo lya Ruwa na msu (ngyiṙeṙa loi, ngyiṙeṙa wongo-pfo), mlosha o wandu walaiṙikyie Ruwa iiṙikyienyi na wuloi. 8 Kyasia ngyikundi wasoṟo waloshe siṟinyi, wawoṙe mrima ngyiwaṙami. Waire mawoko ilyi waiterewa Ruwa, kulawoṙe ikapo nyi nyashi ang'u igaluana. 9 Na wuṙo waka wakuchope kui nguwo, wakushikyie necha, hamwi na wupfereri wucha, na mrima uwoṙe meena; chi kui ioka njui, maa iṟaa shindo sha sahapu na lulu, maa nguwo tsa woguru wung'anyi-pfo; 10 indi kui mawuto mecha, chandu kyiwaṟi waka wekyeloṟa kye waowuye na ikunda Ruwa. 11 Mndu mka nakuloshe alaiamtsa kyituṟu, echipfereria nakamwi. 12 Ngyienenga mndu mka momu o ilosha maa o ichilyia mndu msoṟo-pfo, indi nawe mndu alaiamtsa kyituṟu. 13 Cha kyipfa Adamu nyi oe alegumbo kuwooka, na Eva kagumbo numa. 14 Maa Adamu alelembo-pfo, indi mndu mka nalelembo nakamwi kaṙeko. 15 Kyaindi mndu mka nechikyiṟo kui iwaṙa wana, kokooya awaṙa iiṙikyia Yesu na ikunda na iilyisho, hamwi na mrima uwoṙe meena.
1 Nyi kyindo kya loi kye mndu kakunda iṟunda lya askofu, nalanga kyindo kyicha. 2 Kyasia kyiwaṟi askofu nawe mndu alekyegambo kye nawoṙe wuwicho woose, mii o mka umwi, awoṙe meena na wuṟango, mndu muyendelyi, ekyeambilyia wandu, aichi ilosha. 3 Chi mndu aichiwie wunanzi-pfo, chi mndu ekyekapa wandu-pfo; indi nawe mhoo. Chi mndu mogaluana kui maṙeṙo, maa mndu akundi heleri-pfo. 4 Mndu ekyechilyia necha kanyi kokye, aichi itoṟisha wana; 5 (kyimwi na igamba, mndu alawoṙe wuiṙimi wo ichilyia kanyi kokye, neiṙima kuṙa iambuya Siṟi ya Ruwa?) 6 Maa alawe mndu aleilachika na iosha Yesu mfiri ya kufuhi, alachekushela kaanduyo chandu Mokyiriinzi alekushela kaanduyo. 7 Lyingyi-se nawaṟi iṟingyishio wucha na wandu walya walakyeri poonyi lya walya waiṙikyie Yesu, kundu alachewuta shindo sha sonu na iwingo nyi Mokyiriinzi. 8 Na wuṙo mashemasi wawe wandu wawoṙe mkaṟo yechienenga wandu iwaindia. Chi wandu wekyegamba ikyi inu na kyingyi ngama-pfo. Chi wandu wekyenyo mpfinyo mnu-pfo. Chi wandu wawoṙe wulanga wo masaa ga sonu-pfo. 9 Wechiosha malosho ga iiṙikyia Yesu kui mrima ngyiwaṙami. 10 Iwa taa wayesho kuwooka, naaho waṟunde iṟunda lya mashemasi; wammbono kye wawoṙe tewe-pfo. 11 Na wuṙo waka wawo wawaṙe mkaṟo yechienenga wandu iwaindia. Chi wandu wekyeiria wengyi shindo sha wongo-pfo. Wandu wawoṙe meena, wekyeafutsia shoose wateṟia. 12 Mashemasi wawe mamii wa mka umwi, wechitoṟisha wana wawo necha, na kanyi kowo. 13 Cha kyipfa wekyeṟunda necha iṟunda lya ushemasi wekyewona rina lyicha, na wekyeiṙima ionguo kulawoṙe wuowu mbonyi tsa iiṙikyia lyikyeri kyiiṙi kya Kristo Yesu. 14 Ngyikuṟeia isho ngyikusaṟie icha na kopfo mfiri ya kufuhi. 15 Kyaindi ngakyelyio, umanye chandu kyiwaṟi wandu iwuta kyiyeri-kyo wakyeri numbenyi ya Ruwa, ikyeri Siṟi ya Mndumii ai na moo, ngoe na urende lo loi. 16 Na loi kyiṟika kya iowuo na ikunda Ruwa nyi kyindo kying'anyi. “Ruwa naleṟingyishio mmbiunyi, kamanyika nawoṙe wusumganyi Mumuyonyi, kawono nyi malaika. Mbonyi tsakye tsikagambo ko walya walaiṙikyie Yesu, wandu wa wuyana wakamwiṙikyia, kaṙoo wuye ruwewu kyiṟuminyi.”
1 Kyasia Mumuyo naiṙeṙa na pata kye shiyeri sha mafurumionyi wandu wengyi wechikuletsana na iiṙikyia, wechiaṙanyia mumuyo ngyiwicho yekyelemba, na malosho ga wandu waikuloṟa cha ilyi wawoṙe Mumuyo o Ruwa kyaindi wawachilyie nyi Satana. 2 Kui wukulembecheṟi wo wandu wekyeṙeṙa wongo, na mrima ipfiie ngapfu kyipfa ingyichilyie nyi Satana. 3 Wechilosha kye wandu walaalyikye ang'u ialyiko, na iwawia walalye shelya shilyiwe, shilya Ruwa aleshigumba, na soe luiṙikyie Yesu imanya wuloi kye luwaṟi iana Ruwa kyiyeri loambilyia shindo-sho. 4 Cha kyipfa orio kyindo Ruwa agumbie kyikyicha, maa kuwoṙe kyiwaṟi ilego-pfo, kokooya kyaambilyio kui iana. 5 Kyipfa kyikyiilyishe kui Ṙeṙo lya Ruwa na kui iterewa. 6 Ukumbuṟe wandu shindo-sho, na iyoe nochiwa mṟundi mcha o Kristo Yesu, na mndu uichiwie mbonyi tsa iiṙikyia, na malosho mecha galya uleosha. 7 Indi malosho galaṙuṙanyi na galya ya Ndumi Ngyicha ugalege, na iyoe ukuichiwiṟe iwaṙa iowuo na ikunda Ruwa. 8 Cha kyipfa ikuichiwiṟa iwaṙa pfinya tsa mmbiu kuwoṙe kyiira kyitutu, kyaindi iowuo na ikunda Ruwa shindonyi shoose nyi kyindo kyicha. Kyimwi na igamba, nuwoṙe kyiteṟio kya moo o wulalu, na ulya ochikouipfo mfiri-yo iicha. 9 Nyi kyindo kya loi nakamwi, na kyiwaṟi iiṙikyio nyi woose wekyeosha Yesu, 10 kye lokyekulyisa wukyiwa na itambagana kyipfa kya ikyo, na luwikyie ikusuria lyaṙu ko Ruwa ai na moo, akyeri Mkyiṟa o wandu woose, ngoseṟa o walya waiṙikyie. 11 Shindo-sho ushigambe na ishilosha. 12 Mndu oose alamine wundaka wopfo, indi uwaṙe mkaṟo mcha mbele ya walya waiṙikyie Yesu, kyiiṙi kya iṙeṙa na ikundenyi na ufoṟo na mkaṟonyi ulawoṙe ukoe lo wuṟui. 13 Mṟasa kyiyeri ngyechicha, upfuṟukane kyiiṙi kya ikulosha shiṟeio shiele na iikyimba na ilosha. 14 Ulaṙe iṟunda na kyisumbo kyilya uwoṙe, umwenengye kui ionguo shisuku na kui iyekyio mawoko nyi wameeku wa siṟi. 15 Isho ukusaṟe kyipfa kyasho; ushioshe; kundu wandu woose wamanye handu ushikyie. 16 Ringa mrima opfo, na malosho gapfo. Ulalekane na shindo-sho; kyipfa kui iwuta kuṙo nochikyiṟa mrima opfo na mrima ya walya wechiicho shilya uilosha.
1 Ulaṟoṟome mndu meeku, indi ṙeṙa na oe cha awu opfo; na ndaka cha wana wa womoo. 2 Ṙeṙa na wakyeku cha wamama wapfo; wana wa kyika cha washikyi wapfo; kui mkaṟo ulawoṙe ukoe lo wuṟui. 3 Uindie wakusu wai wakusu wa loi. 4 Kyaindi mkusu kokooya nawoṙe wana ang'u wachuku, wakuloshe kuwooka iwuta shilya wawaṟi iwutia wa kanyi kowo, na itaa wafee wawo. Cha kyipfa nyi kyindo kyichihiṟie mbele ya Ruwa. 5 Kyasia, ulya ai mkusu o loi, namṙe amonyi, icho nakusurie Ruwa, na oe orio mfiri nekyeterewa kyingoto na kyio. 6 Indi, ulya alekyeringa mrima okye napfiie maa chandu ai na moo. 7 Shindo-sho taa ushigambe, kundu mndu oose alagambe kye walya owawia wawoṙe ṙeko. 8 Kyaindi mndu oose alekyeambuya walya wakyeri wakye, ngoseṟa walya wa kanyi kokye, nakana Iirikyia, lyingyi-se nammbicho kuta mndu alaiṙikyie Yesu. 9 Mkusu alatalo nyi mkusu sile awaṙa maka makumi gaṟandaaṟu; na oe nai mka o mii umwi. 10 Na oe naṟingyishio kye nawoṙe mawuto mecha; kokooya naleambuya na iṙosa wana necha, kokooya naleambilyia wayenu, kookoya nalekutitiṟa mṟasa kaanguo wandu wa Ruwa maṙende, kokooya naletarama wandu wailyiso wukyiwa, kokooya nalewika wuragari iṟundenyi lyicha. 11 Indi wakusu wakoho ulawatale kye nyi wakusu, kyipfa wakang'anyio nyi lango kyilaṙuṙanyi na malosho ga Kristo, wakundi ialyiko. 12 Nawo wechianduyo kyipfa waṙa iiṙikyia lyilya lyawo lya kuwooka. 13 Lyingyi-se, hamwi na isho, wekyekulosha iṙokuo, wechitenga-tenga numba kui numba. Maa chi waṙoko tupu-pfo; kyaindi wekyeṙeṙa shindo shekyeende kyituwa na wekyesuma-suma shindo sha wandu wengyi wechiṙeṙa shindo shilawawaṟi iṙeṙa. 14 Kyasia ngyikundi wakusu, walawaku, waalyiko, wafee wana, wachilyie kanyi kowo; kundu walaenengye mokyituwa ṙaawa lyegamba kye luwoṙe ṙeko. 15 Cha kyipfa wengyi wamuilachika na iosha Satana. 16 Mndu mka aiṙikyie, kokooya nawoṙe wakusu, nawatarame oe amonyi, kundu siṟi ilalemio; kundu siṟi itarame walya wakyeri wakusu wa loi. 17 Wameeku wa siṟi wekyechilyia necha na watalo kye wawaṟi iindio ngoseṟa, ngoseṟa walya wekyekuwinisha iṙeṙa mbele ya wandu na ilosha. 18 Kyipfa kyiṟeio kyiele kyagamba, “Maa ulaime umbe ilya ilyi ikutarama ihuo nganu.” Na lyingyi-se, “Mṟundi nawaṟi wori wokye.” 19 Molaiṙikyie kyiyeri oicho kye mndu meeku nawuta kyindo kyiwicho, sile kokooya noicho waṟingyishi wawi ang'u waṟaaṟu wegamba kuṙo. 20 Walya wekyewuta sha wunyamaṟi orio kyiyeri uwaṟoṟome mbele ya wandu woose kundu na wengyi waowuo. 21 Ngakuwia mbele ya Ruwa, mbele ya Kristo Yesu, na mbele ya malaika wasambuṟe, uwute isho kulawoṙe ianduya kui iṙimaṙima. Ulawute kyindo kyoose kui ikundia. 22 Ulayekyie mndu mawoko kui iṙimaṙima, maa ulakuwikye ngyuunyamaṟinyi tsa wandu wengyi. Uringye mrima opfo ulafanyiṟo nyi ukoe. 23 Wookyia wulalu ulanyo mṟinga tupu-pfo kyaindi nyo mpfinyo kyitutu, kyipfa kya ndewu yapfo, na ndoṟe-tso tsekyekutuura orio kyiyeri. 24 Ngyuunyamaṟi tsa wandu wengyi tsiwonio na pata, na tsiwasongoya iyenda kyianduyonyi, kyaindi ngyuunyamaṟi tsa wandu wengyi tsechiwono kyiyeri kyilya kyeanduya kyilashika-pfo. 25 Na wuṙo mawuto mecha gawonio na pata; maa kokooya galawonio nyi wandu chi kyindo kyeiṙima ikuṟiika-pfo.
1 Wandu woose waiṙikyie Yesu wawapfungye nyi mshe ya wusinga, wawone wandumii wawo kye wawaṟi iindio mnu, rina lya Ruwa lyilamino hamwi na malosho gaṙu. 2 Na walya wawoṙe wandumii waiṙikyie Yesu walawamine cha kyipfa nyi wana wa wama kyiiṙi kya Yesu; indi nyi kyicha wawaṟundie, cha kyipfa wandumii-wo wekyewona kyiira kya iṟunda lyawo wawa wandu wakunde. 3 Uloshe na itutuma shindo-shi. Mndu oose kalosha mbonyi tsingyi, alaiṙikyie mbonyi tsiwoṙe moo o Mndumii oṙu Yesu Kristo, maa malosho galaṙuṙanyi na iowuo na ikunda Ruwa, 4 mndu-cho nakushela. Maa aichi kyindo kyoose-pfo; indi nawoṙe wusuko wo ikunda igaluana na iluyana kui maṙeṙo, maṙeṙo gekyeende wunyeng'i, shiloyano, shilahio, na ikusaṟa kye mndu ungyi nawuta kyindo kyiwicho. 5 Na igaluana lya maṙeṙo lya wandu wanyamaṟikyie mṙoe yawo, walaichi wuloi, kunu wechikusaṟa kye iowuo na ikunda Ruwa nyi njia ya iwona kyiira. 6 Kyaindi iowuo na ikunda Ruwa hamwi na iṙa ilanga shindo shifong'ui nyi kyindo kyiwoṙe kyiiṙa kying'anyi. 7 Cha kyipfa lulecha na wuyanenyi luwoṙe kyindo-pfo; lyingyi-se lochiwuka pfo luwoṙe kyindo-pfo. 8 Indi lukowaṙa kyelya na nguwo lulapfule-pfule-se shindo sha ngoseṟa. 9 Kyaindi iwo wakundi iwaṙa masaa wekyeoloka shiyeshonyi na mṙegonyi, na langonyi tsingyi tsa maai, tsekyelyisa wukyiwa, tsekyeolotsa wandu wuṙetsinyi na wunyamaṟinyi. 10 Kyipfa mri o mawicho ga orio mbaṟe nyi ikunda heleri. Nyi kui ikunda mnu heleri wandu waata walelekana na iiṙikyia wechikulyisa ngyuukyiwa tsifoi. 11 Indi iyoe mndu o Ruwa, uṙiche shindo-sho; uoshe wusumganyi, iowuo na ikunda Ruwa, iiṙikyia, ikunda, wusimiri, na wuhoo. 12 Kapana shiṙa shilya shicha sha iiṙikyia. Waṙa moo ulya o mlungana ulelagio nyi Ruwa kyiyeri ulegamba na pata iiṙikyia lyapfo mbele ya waṟingyishi wafoi. 13 Ngakuwia mbele ya Ruwa ekyeringa shindo shoose, na mbele ya Kristo Yesu, alegamba iiṙikyia lyakye mbele ya Pontio Pilato, 14 kye uringye iwawaso-lyi kulawoṙe tewe, kulawoṙe mndu igamba kye nowuta kyindo kyiwicho, mṟasa kyiyeri Ruwa echishukuo Mndumii oṙu Yesu Kristo. 15 Kyiyeri oe amonyi echikuṟingyishia kyiyeri kyikashika, ulya aleṟumisho, awoṙe pfinya oe amonyi, Mangyi o wamangyi, Mndumii o wandumii. 16 Ulya alekyepfa, akyeri ngyeelenyi ilekyeiṙima irumisho; maa kulawoṙe mndu alemummbona, maa eiṙima immbona. Kyiyeri kyoose naenengo kyiṟumi na pfinya mṟasa mlungana. Amen. 17 Walya wakyeri wanjama wa wuyana wo wulalu uwawie walakushele, maa walakusurie wunjama wowo wukyeri cha mboshia, indi wakusurie Ruwa ekyeluenenga shindo shoose kulawoṙe iehia kundu luṟunde nasho kui sia. 18 Wawute shindo shicha, wawe wanjama kui iwuta wucha, waenengyie masaa gawo, wakae na wandu wengyi kui mrima; 19 kunu wechikooma kyiseyesoe kyiwe urende lucha ko kyiyeri kyiicha, kundu wawone moo o loi. 20 Iyoe Timoteo, ringa kyilya Ruwa alekuṙambika, ukushowe na malosho galaṙuṙanyi na galya ga wandu wekyeindia Ruwa, ga wutondo, na maṙeṙo ga wutondo gekyelago malosho kui wongo; 21 galya wengyi wekyegaṙeṙa wakaasha Iiṙikyia. Isaṟia lyikae na nyoe moose.
1 Inyi Paulo, msu o Kristo Yesu, iṙuana na chandu Ruwa akundi, kyipfa kya kyaasa kya moo ukyeri kyiiṙi kya Kristo Yesu; 2 ngaṟeia paruo-i ko Timoteo, mono-ko mkunde. Isaṟia lyikae kopfo, na ufoṟo, shiwukyie ko Ruwa Awu na ko Kristo Yesu Mndumii oṙu. 3 Ngyiana Ruwa, ngyekyemwindia na imterewa kui mrima mmbaṙami wookyia kacha lya waku wako, chandu ngyekyekukumbuo iyoe kyiyeri kyoose, kyiiṙi kya iterewa lyako kyio na kyingoto. 4 Na inyi ngyilangyie mnu ikuwona, ngyechikumbuo mcheṟeṟe yapfo, kundu ngiichuo sia; 5 ngyechikumbuo iiṙikyia uwoṙe lyilawoṙe wukulembecheṟi lyiwekyeri kuwooka ko wakyekuyo ekyelago Loisi, na ko womoo ekyelago Eunikye, na inyi ngyiichi kye maa iyoe nulyiwoṙe. 6 Kyipfa kya ikyo ngyikukumbuṟa, ulanyamaṟe kyisumbo kya Ruwa, kyikyeri mrimenyi kopfo kui iyekyio mawoko gako. 7 Kyipfa Ruwa aleluenenga mrima o wuowu-pfo, indi o pfinya na o ikunda na uwoṙe meena. 8 Kyasia ularigo nyi sonu kyipfa kya iṟingyishia lyaṙu. Ularigo nyi sonu kyipfa kyako inyi mpfungo okye, indi ukarishie mawicho hamwi na inyi kyipfa kya Ndumi Ngyicha, iṙuana na pfinya ya Ruwa. 9 Ulya alelukyiṟa kalulaga kui ndago ngyiele; chi iṙuana na mawuto gaṙu soe-pfo; indi na kyilya oe akundi na isaṟia lyakye. Isaṟia-lyo luleenengo kyiiṙi kya Kristo Yesu wookyia mlungana. 10 Na wulalu lyiṟingyishio kui iloṟo lya Mkyiṟa oṙu Kristo Yesu; alegalutsa upfu, na ishukuo moo na kulawoṙe inyamaṟika, kui Ndumi iya Ngyicha; 11 ikyeri kye kyipfa kyayo ngyilewiko ngyiwe moonguo mbonyi na msu na mlosha. 12 Kyipfa kya ikyo ngyileolokyio matuuro-ga maa ngyirigo nyi sonu-pfo; kyipfa ngyiichi icho ngyimwiṙikyie, na imanya piu kye neiṙima iringa kyilya ngyilekooma kokye mṟasa mfiri ulya. 13 Osha necha kui wuragari mbonyi tsiwoṙe moo uletsiicho koko, iiṙikyienyi lya ikunda lyikyeri kyiiri kya Kristo Yesu. 14 Ringa kyindo kyilya kyicha kui Mumuyo Mweele ekyekaa mrimenyi koṙu. 15 Nuichi kyindo-kyi, kye woose wakyeri wa Asia walengyiṙicha. Kyiiṙi kyawo kuwoṙe Fikyelo na Herimokyene. 16 Mndumii naenengye isaṟia walya wa ura lo Onesifoṟo, kyipfa kafoi nalengyichihiṟa, maa alerigo sonu nyi kyipfa kya ilyi ngyiwempfungye-pfo, 17 indi kyiyeri awekyeri iha Roma, nalengyipfula kui wuragari kangyiwona. 18 Mndumii namwenengye iwona isaṟia mbele ya Mndumii mfiri ulya o ianduyo. Na chandu alengyiṟundia kulya Efeso, iyoe nuichi mnu.
1 Kyasia iyoe, mono-ko, uwaṙe wukari isaṟienyi lyikyeri kyiiṙi kya Kristo Yesu. 2 Na shindo shilya uleshiicho koko mbele ya waṟingyishi wafoi, isho ushiṙambikye wandu wasimiri wechiiṙima ilosha wengyi. 3 Ulye wukyiwa hamwi na inyi, cha asikari mcha o Kristo Yesu. 4 Kuwoṙe mndu ekyekapana shiṙa ekyekuwika shindonyi sha wuyana-pfo, kundu nachihiṟe ulya alemṟeia nawe asikari. 5 Maa mndu kawingana temonyi ekyeenengo kyindo kyeloṟa nammbinzi, sile awingana kulawoṙe ngyeṟo-pfo. 6 Kyiwaṟi mṙemi awoṙe wukyiwa wo maṟunda nawe o kuwooka iambilyia ṙombo lya ndunda. 7 Manya mnu isho ngyigamba, cha kyipfa Mndumii nekuenenga wuṟango mbonyinyi tsoose. 8 Kumbuo Yesu Kristo aleṟuka ko wapfu, o mbaṟe ya Dawidi chandu malosho gako ga Ndumi-i Ngyicha gaigamba. 9 Na inyi kyiiṙi kyayo ngyiletuuro mṟasa ipfungo cha mndu awutie mawicho; kyaindi Ṙeṙo lya Ruwa lyekyepfungo-pfo. 10 Kyipfa kya ikyo ngyikarishia mbonyi tsoose, kyipfa kya wasambuṟe, kundu nawo waambilyie wukyiṟo wulya wukyeri kyiiṙi kya Kristo Yesu, hamwi na mng'ano o mlungana. 11 Nyi mbonyi iwaṟi iiṙikyio, cha kyipfa kokooya lopfa hamwi na oe, lochiwaṙa moo hamwi na oe taa. 12 Kokooya losimiria, lochichilyia hamwi na oe. Kokooya lomkana oe, na oe nelukana soe. 13 Kokooya soe lulaiṙikyie, oe nekyeṙio ho kui iiṙikyio; cha kyipfa echiiṙima ikukana amonyi-pfo. 14 Uwakumbuṟe mbonyi-tso, ochiwaikyimbia mbele ya Ruwa, walawaṙe iwingana kui maṙeṙo, galawoṙe kyiira, indi gekyenyamaṟa walya wekyegaicho. 15 Pfuṟukana iloṟa kye numwiṙikyie nyi Ruwa, mṟundi alawoṙe kyitewe kyerigo nyi sonu, na ilosha necha Ndumi Ngyicha. 16 Kaa kuleshi na mbonyi tsilawoṙe kyiira, tsilakyeri tsa mwiṙikyie o india Ruwa; kyipfa wechiengyeṟika ngoseṟa kyiiṙi kya iwuta shiwicho 17 na mbonyi tsawo tseṙunganana cha pee lyilekyechia. Kyiiṙi kya iwo kuwoṙe Himenayo na Fileto, 18 waleguṟa wuloi wulya wo Ndumi Ngyicha wechigamba kye mfiri o furumia ulemcha, mṟasa iilacha iiṙikyia lya wandu wafoi. 19 Kyaindi urende lo Ruwa luluikare, na mbonyi tsa Ndumi Ngyicha tsingyiṟeie wuye yalo: “Mndumii naichi wai wakye na lyingyi-se, orio mndu ekyesenda Rina lya Mndumii naṙe wunyamaṟi.” 20 Kyasia numbenyi kuwoṙe shindo sha sahapu na heleri tikyi-pfo, indi na sha shiṙi, na sha teri. Shingyi shiwoṙe kyiṟumi, shingyi shiwoṙe-pfo. 21 Kyasia kokooya mndu nakuilyisha kui ikushowa na isho, nechiwa kyindo kyewona kyiṟumi, kyikyisanje, kyiwoṙie Mndumii kyiira, kyikyiachikyie kui orio iṟunda lyicha. 22 Kyaindi ṙicha lango tsa wundakyenyi, undeosha wusumganyi, na iiṙikyia, na ikunda, na ufoṟo, hamwi na walya wekyeindia Mndumii kui mrima mmbaṙami. 23 Kyaindi ulege maṙeṙo gesoruo-soruo ga kyitondo, galawoṙe wuṟango, ochimanya kye gekyeende maluyano. 24 Lyingyi-se kyiwaṟi mṟundi o Mndumii iwa mndu moluyana-pfo; indi iwa muoloru ko wandu woose, eiṙima ilosha, aichi ikarishia; 25 echiikyimbia kui wuoloru iwo waiwingana na oe, kundu kokooya kyaiṙimika, Ruwa nawaenengye iṙumbuya wunyamaṟi na imanya wuloi wo Ndumi Ngyicha. 26 Waiṙime-se iwiyiṟio makusaṟo mecha, na ikuashuo mṙegonyi o Mokyiriinzi, walya waleṙego nyi Mokyiriinzi, mṟasa iwuta shilya akundi.
1 Kyaindi umanye mbonyi-tsi kye mfiri ya mafurumionyi kowaṙa shiyeri sha ngataṟa. 2 Kyipfa wandu wechiwa nyi wandu wakukundi wawenyi, wakundi heleri, wekyekuiring'isha, wawoṙe tiri, wekyelahia, walekyeindia wafee wawo, walekyeana, wa kyiwuyana. 3 Walakundi wandu wa kanyi kowo, walakundi isanzo na walya waluyanyi nawo, wekyeiria woṙoe shindo sha wongo, walekyeiṙima ichilyia lango, walang'a, walakundi mecha. 4 Wekyeṟiinga woṙoe, walekyeicho, wekyekushela, wakundi sia tsa wuyana kuta ikunda Ruwa. 5 Wawoṙe mbaṟe ya iowuo na ikunda Ruwa, kyaindi wechikana pfinya tsakye. Iwo taa ukushowe nawo. 6 Cha kyipfa kyiiṙi kya iwo kuwoṙe walya wekyekuwika numbenyi tsa wandu, na iwaṙa pfo waka wai matondo wawoṙe maṟio ga wunyamaṟi, waleṙoo nyi lango tsa orio mbaṟe; 7 wechikulosha mfiri yoose, indi walaiṙime maa ale iwaṙa wuṟango wo loi. 8 Na chandu Yane na Yambre walewingana na Mose, na wuṙo na iwa waiwingana na wuloi wo Ndumi Ngyicha. Nyi wandu wanyamaṟikyie mṙoe yawo, wawalege kyipfa kya iuṟa iiṙikyia. 9 Kyaindi wechishika kuleshi nawi-pfo, kyipfa wutondo wowo wochimanyika na pata ko wandu woose, chandu na wutondo wo iwo wulewemanyika. 10 Indi iyoe noosha malosho gako, na mchumie oko, na kyilya ngyikundi, na iiṙikyia, na wusimiri, 11 na ikunda, na ikarishia. Lyingyi-se na ngyuukyiwa na matuuro gako. Shindo shilengyikooya kulya Antiokyia, kulya Ikonio, na kulya Lyistira. Orio mbaṟe ya wukyiwa wung'anyi ngyilekarishia; na Mndumii nalengyikyiṟa iwuka isho shoose. 12 Yee, na woose wakundi iwaṙa mkaṟo yeowuo na ikunda Ruwa kyiiṙi kya Kristo Yesu wechipfulutso nyashi. 13 Kyaindi wandu wawicho na walya wekyelemba wechiengyeṟika, na iengyeṟa iwa wawicho, wechilemba na ilembo. 14 Indi iyoe ukae kyiiṙi kya shindo shilya ulelosho na iṟingyishio, cha kyipfa nuichi nyi wakyi ulekulosha kowo. 15 Na kye wookyia wututu nulemanya shiṟeio shiele, isho shechiiṙima ikuṟangusha mṟasa uambilyie wukyiṟo kui iiṙikyia lyikyeri kyiiṙi kya Kristo Yesu. 16 Orio kyiṟeio kyiwoṙe mṟufui o Ruwa, kyikyicha kyelosha, na iikyimbia wandu kyipfa kya maṙeko gawo, na kui ilosha wandu wawe wusumganyinyi. 17 Kundu mṟundi o Ruwa nawe mndu aafutsie echiiṙima iṟunda orio iṟunda lyicha.
1 Ngyikuwia mbele ya Ruwa na Kristo Yesu, echianduya wai na moo na wapfiie; kui iloṟo lyakye na kui Wumangyi wokye, 2 onguo Ṙeṙo lya Ruwa ukuṟeyeṟe kyiyeri kyicha na kyiyeri kyilakyicha kopfo. Ṟoṟoma kui pfinya, na iikyimbia kui wusimiri woose na malosho. 3 Kyipfa kuicha kyiyeri wechilega malosho gawoṙe moo; indi kui iosha kyilya wakundi wawenyi wepfula walosha wawo wafoi, cha kyipfa wawoṙe maṙwi gesoruo-soruo shindo. 4 Nawo wekaa kuleshi walacheicho mbonyi tsa loi, na iindukyia malosho ga wongo. 5 Indi iyoe uwaṙe meena shindonyi shoose. Karishia mawicho, ṟunda iṟunda lyeonguo Ndumi Ngyicha, ṟunda kyilya kyikuwaṟi cha mṟundi o Ruwa. 6 Cha kyipfa wulalu inyi ngyiambilyia matuuro ga upfu, na kyiyeri kya ipfa lyako kyashika. 7 Ngyilekapana shiṙa ngyicha, kyaro ngamkyimarisa, Iiṙikyia ngyilelyiringa. 8 Numa ya iho Ruwa nangyikoomie oṟo ya wusumganyi, iya Mndumii moanduya awoṙe wusumganyi echingyienenga mfiri ulya, maa chi inyi tupu-pfo, indi na wandu woose taa wakundi iwona iloṟo lyakye. 9 Pfuṟukana icha na koko iwinyi. 10 Kyipfa Dema nalengyiṙa echikunda wuyana-wu wo wulalu, kapfunga kyaro iyenda Tesalonikye. Kyiresikye nayenda Galatia; Tito nayenda Dalyimatia. 11 Nyi Luka amonyi tikyi akyeri iha hamwi na inyi. Uwute Mariko uche na oe, kyipfa nangyiwoṙie kyiira iṟundenyi. 12 Kyaindi Tikyiko ngyilemṙuma Efeso. 13 Ijoho lyilya ngyileṙa ko Karipo ipfo Tiroa, kyiyeri uicha ulyiende, na shitapu shilya, ngoseṟa shilya sha njonyi. 14 Iskanda, ulya akyeri mnganya, naleloṟa wuwicho wung'anyi koko; Mndumii nemtaa iṙuana na mawuto gakye. 15 Na iyoe ukushowe na oe, cha kyipfa nalelega mnu maṙeṙo gaṙu. 16 Kyiyeri kyilya ngyilegoṟotso mengyenyi lya kuwooka kuwoṙe mndu alegoṟoka ura loko-pfo, indi woose walengyiṙa. Ngyiterewa walatalyio ṙeko kyipfa kya kyindo-kyo. 17 Kyaindi Mndumii nalegoṟoka ura loko kangyienenga pfinya, kundu kui iṟunda lyako mbonyi tsilya tsigambo nakamwi, mṟasa woose walaiṙikyie Ruwa waicho; na inyi ngakyiṟo iwuka upfunyi. 18 Mndumii nengyikyiṟa na orio kyindo kyiwicho, na ingyiringa mṟasa ngyishikye Wumangyinyi wo Ruwewu. Mng'ano ukyeri kokye mlungana na mlungana. Amen. 19 Ngyiiṟikyiṟia Pirisikyila na Akyila, na walya wa kanyi ko Onesifoṟo. 20 Erasto nalekaa Korinto. Tirofimo ngyilemṙa kulya Mileto, aluoe. 21 Pfuṟukana uche kyiyeri mbeho ilandeche. Eubulo, Pude, Lyino, Kyilaudia na wana wa wama waiṙikyie Yesu woose taa wakuiṟikyiṟa. 22 Mndumii nakae hamwi na mrima opfo. Isaṟia lyikae hamwi na nyoe.
1 Inyi Paulo, mṟundi o Ruwa, na msu o Yesu Kristo; kyipfa kya ionguo iiṙikyia lya wasambuṟe wa Ruwa, na wuṟango wo wuloi wulya wokyeende iowuo na ikunda Ruwa. 2 Kyiiṙi kya ikusuria lya moo o mlungana, ulya Ruwa alekyeṙeṙa wongo aleluteṟia wookyia wuyana wulagumbo. 3 Kashukuo Ṙeṙo lyakye kui kyiyeri kyakye kyiiṙi kya ulogo lulya ngyileṙambiko inyi kui iwawaso lya Mkyiṟa oṙu Ruwa. 4 Ngaṟeia paruo-i ko Tito, mono-ko nakamwi iiṙikyienyi lyaṙu. Isaṟia lyikae kopfo na ufoṟo shiwukyie ko Ruwa Awu na Kristo Yesu Mkyiṟa oṙu. 5 Kyipfa kya ikyo ngyilekuṙa Kyirete, kundu uachikyie shindo shilya shiwewaṟi iachikyio, na iwika wameeku wa siṟi kyiiṙi kya orio mṟi chandu ngyilekuwia, 6 kokooya mndu alalegambo kye nawoṙe wuwicho woose, na oe nyi mii o mka umwi, nawoṙe wana waiṙikyie, walekyegambo kye nyi waṟui ang'u walawoṙe wuindi. 7 Kyipfa kyiwaṟi askofu nawe nyi mndu alekyegambo kye nawoṙe wuwicho woose. Alawe mndu mokushela, cha kyipfa nyi mndu ekyeringa iṟunda lya Ruwa. Alawe mndu ekyepfula ichihiṟa mrima okye. Alawe mwanguhu ikapo nyi nyashi, alawe mnanzi ang'u mndu moluyana. Alawe mndu awoṙe wulanga wo sonu wo masaa ga sonu. 8 Indi nawe mndu ekyeambilyia wandu, akundi iwuta kyilya kyikyicha, awoṙe meena, awoṙe wusumganyi, mweele, aichi ichilyia lango tsa mrima okye. 9 Iiṙikyia chandu amloshe naiṙime ikarisha wandu kui malosho gawoṙe moo, na iwinga walya wekyekana ulogo-lo. 10 Cha kyipfa kuwoṙe wandu wafoi walawoṙe wuindi, wawoṙe mbonyi tsa wutondo, walembi, na ngoseṟa Wayuda waiṙikyie Yesu. 11 Wawaṟi iimo walaṙeṙe. Iwo wekyefoga-foga woose wa kanyi ko wandu, wechilosha shindo shilawawaṟi kyipfa kya ipfula masaa ga sonu. 12 Mndu awukyie kowo, moonguo shisuku owo wawenyi, nagambie, “Wakyirete nyi wandu wekyeṙeṙa wongo mfiri yoose, mando mawicho ga saka, wawang'anyie ndewu na wawaṙoko.” 13 Wuṟingyishi-wo nyi loi. Kyipfa kya ikyo uwaṙeṙie kui wulang'a, kundu wawe wandu wapfulukyie iiṙikyienyi; 14 walaaṙanyie malosho ga Kyiyuda, maa mawawaso ga wandu wekyekaa kuleshi na shilya shikyeri sha loi. 15 Shindo shoose shishicha ko walya wawecha; kyaindi kuwoṙe kyindo kyikyicha ko walya wafanyi kyimṟumoe-pfo, walya walawoṙe iiṙikyia; indi ngyuuṟango tsawo tsifanyi kyimṟumoe, na makusaṟo gawo taa. 16 Waigamba kye waichi Ruwa, indi mawuto gawo gaimkana. Wawoṙe shindo shekyesuiṟa, wawoṙe wuindi-pfo, maa wawoṙe kyiira kyindonyi kyoose-pfo.
1 Kyaindi iyoe onguo shindo shiwaṟi malosho galamasanze-sanze na shindo shingyi. 2 Kye wameeku wawe wandu wawoṙe meena, wawoṙe mkaṟo yechienenga wandu iwaindia, wawoṙe wuṟango, wapfulukyie kyiiṙikyia na ikundenyi na wusimirinyi. 3 Na wuṙo na wakyeku wawaṙe mkaṟo o wuele. Walawe wandu wekyeiria wandu shindo sha wongo, walawe wandu wekyenyo mpfinyo wufoi, indi wawe wandu wekyelosha shindo shicha. 4 Kundu waenengye waka wakoho wuṟango, wakunde wamii wawo, na ikunda wana wawo; 5 na iwa wandu wawoṙe meena, iṙa wuṟui, wekyeṟunda kanyi kowo, wekyewuta kyilya kyikyicha, iindia wamii wawo; kundu Ṙeṙo lya Ruwa lyilamino. 6 Na wuṙo na wanakye uwatutume iwa na meena; 7 shindonyi shoose, iyoe kumonyi ochiloṟa mfano o mawuto mecha, na maloshonyi gapfo ochiloṟa wuloi na kulawoṙe temo, 8 na mbonyi tsiwoṙe moo tsilechiiṙima igambo kye tsiwoṙe tewe, kundu ulya ekyekana narigo nyi sonu, cha kyipfa awoṙe kyindo eiṙima igamba kyipfa kyaṙu-pfo. 9 Walya wakyeri shisinga waindie wandumii wawo, wechiwachihiṟa shindonyi shoose. Walawe wandu wekyegaluo kyiyeri wawio kyindo. 10 Walawe wandu wekyeiwa; indi waafutsie kyilya wateṟia, kundu wachope malosho ga Mkyiṟa oṙu Ruwa shindonyi shoose. 11 Kyipfa isaṟia lya Ruwa lyekyekyiṟa wandu woose lyamloṟo. 12 Nalyo lyilulosha ilega wuwicho na lango tsa kyiwuyana; luiṙime iwaṙa moo na meena, na wusumganyi, na iowuo na ikunda Ruwa, kyiiṙi kya wuyana-wu wo wulalu. 13 Lochiambuya ikusuria lyiwoṙe mboṟa na iloṟo kyiṟumi kya Kristo Yesu, Ruwa ang'anyi na Mkyiṟa oṙu; 14 ulya alereka moo okye kyipfa kyaṙu, kundu nalukyiṟe lulaolokyio nyi mawicho ga mbaṟe tsoose, na iilyisha wandu wawe wakye oe amonyi, walya wawoṙe wuragari mawutonyi mecha. 15 Onguo shindo-sho, ikyimbia na iṟoṟoma kui wuchilyi woose; mndu oose alakumine.
1 Ukumbuṟe wandu ipfereria ko walya wawoṙe pfinya na wuchilyi, na iindia, na orio kyiyeri ikuṟeyeṟa ko orio iṟunda lyicha. 2 Walalahie mndu oose, walaluyane, wawe wandu wekyewuta kyilya kyikyicha, wechiloṟa wuhoo woose ko wandu woose. 3 Kyipfa mfiri ya ipfo numa maa soe luwewoṙe wuṟango-pfo. Luwewanyamaṟi, luwalembe, kunu lochiosha lango na shindo sha mamoona sha mbaṟe tsifoi, lochiwaṙa mkaṟo ya wuwicho na wunyeng'i, lochisuiṟana na isuana. 4 Kyaindi wucha wo Mkyiṟa oṙu Ruwa, na ikunda lyakye ko wandu, kyiyeri lyileloṟo, nalelukyiṟa. 5 Chi kyipfa kya mawuto ga wusumganyi lulewuta soe-pfo; indi kui isaṟia lyakye, kui isanjo na ifeo lya kawi na kui iwa wahya Mumuyonyi Mweele. 6 Ulya alelupusia kulawoṙe iehia, kui njia ya Yesu Kristo Mkyiṟa oṙu; 7 kundu lukotalyio wusumganyi kui isaṟia lyakye, luiṙime iwa weoṟa wa moo o mlungana, chandu ikusuria lyaṙu lyikyeri. 8 Nyi kyindo kya loi; na shindo-sho ngyikundi ushionguo na pfinya, kundu walya waleiṙikyia Ruwa wakumbuo ikaa mawutonyi mecha. Isho shishicha; lyingyi-se shiwoṙe kyiira ko wandu. 9 Kyaindi kushowe na maṙeṙo ga wutondo, shindo shileambilyio ko waku, shiluyano na ikapana kyipfa kya uwawaso. Kyipfa isho shiwoṙe kyiira-pfo. Lyingyi-se nyi shindo sha wulya. 10 Mndu ekyelosha shindo sha wongo komumṙeṙia lya kuwooka na lya kawi, mlege; 11 uichi kye mndu cha icho naṙekyie; lyingyi-se naiwuta kya wunyamaṟi, kyipfa nakuanduya oe amonyi. 12 Kyiyeri ngyechiṙuma Aritema kopfo ang'u Tikyiko, tambagana icha na koko kunu Nikopolyi; cha kyipfa ngyikusaṟie ikaa kunu kyiyeri kya mbeho. 13 Sena, ulya aichi mbonyi tsa iṙeṙa moondu, na Apolo, uwatarame kyaronyi kyawo, walauṟe kyindo kyoose. 14 Wandu waṙu nawo wakuloshe iwuta shindo shicha orio kyiyeri, ko shindo shilya shiwaṟi tikyi; walacheewa wandu waiṟunda wulya. 15 Wandu woose wakyeri hamwi na inyi wakuiṟikyiṟa. Luikanyie iiṟikyiṟa walya walukundi iiṙikyienyi. Isaṟia lyikae hamwi na nyoe moose.
1 Inyi Paulo, mpfungo o Kristo Yesu, na Timoteo akyeri mono-wama oṙu, ngaṟeia paruo-i ko Filemon, mkunde oṙu, mṟundi hamwi na soe, 2 na ko Afia, mono-wama oṙu, na ko Arikyipo, asikari oṙiaṙu, na ko siṟi ikyeri numbenyi yapfo. 3 Isaṟia lyikae konyu, na ufoṟo, shiwukyie ko Ruwa, Awu oṙu, na ko Mndumii Yesu Kristo. 4 Ngyiana Ruwa oko mfiri yoose, ngyechikukumbuo shiterewonyi shako; 5 ngyechiicho mbonyi tsa ikunda lyapfo na iiṙikyia uwoṙe ko Mndumii Yesu na ko wandu wa Ruwa woose; 6 kundu kui iwaṙana lya iiṙikyia lyaṙu na iyoe luṟunde iṟunda lyakye; kyiiṙi kya orio imanya kyindo kyicha kyikyeri koṙu, kyiiṙi kya Kristo. 7 Kyipfa ngyiwewoṙe sia ing'anyi na iwiyiṟio moo kyipfa kya ikunda lyapfo, cha kyipfa mrima ya wandu wa Ruwa ilewiyiṟio moo nyi iyoe, mono-wama oṙu. 8 Koikyo, maa chandu ngyiwoṙe wukari kyiiṙi kya Kristo ikuwia kyikuwaṟi; 9 kyaindi kyipfa kya ikunda ngyikuterewa, cha kyipfa nyi chandu ngyikyeri, Paulo ngyikyeri meeku, na wulalu mpfungo o Kristo Yesu taa. 10 Ngyikuterewa kyipfa kya mono-ko kyiiṙi kya Kristo, Onesimo; 11 akyeri kye kacha awewoṙe kyiira kopfo-pfo, indi wulalu nawoṙe kyiira mnu kopfo, iyoe na inyi taa. 12 Ngyilemṙuma kopfo, oe amonyi, kyipfa ngyimkundi mnu. 13 Inyi ngyiwekundi nakae koko, naiṙime ingyiṟundia handu hapfo kyiiṙi kya iwiko kyipfungonyi kyipfa kya ionguo Ndumi Ngyicha. 14 Kyaindi ngyilekunda iwuta kyindo kyoose ulakyikundi iyoe-pfo, kundu kye wuindi wopfo wulacheewa wuitiko, indi kui iiṙikyia kumonyi. 15 Kyipfa, kofia nyikyo kyitewe alewiko kuleshi na iyoe ko mfiri ngyaangu, kundu ukae na oe-se mlungana. 16 Wookyia wulalu, chi cha mtumo-pfo, indi ngoseṟa ya mtumo, mono-wama mkunde; koko inyi mnu, na kopfo iyoe ngoseṟa mnu, mmbiunyi na kyiiṙi kya Mndumii. 17 Kyasia kokooya ongyiwona inyi ngyiwoṙe iwaṙana na iyoe, ambilyia ichu kyimwi na inyi ngyimonyi. 18 Na kokooya nakuwutia kyindo kyiwicho, ang'u nuimrika kyindo, ungyiwese inyi. 19 Inyi Paulo ngaṟeia kui kuwoko koko ngyimonyi, inyi ngyechitaa. Ngyikuwia kye nuwoṙe sile yako kyipfa ngyilekukyiṟa kyimrima-pfo. 20 Yee, mono-wama oko, ngyiwone kyiira kopfo kyiiṙi kya Mndumii; uwiyiṟie moo mrima oko kyiiṙi kya Kristo. 21 Kyipfa kya ilyi ngyiiṙikyie wuindi wopfo ny'kyo kyimaṙuma ngakuṟeia, ngyiichi kye nochiwuta ngoseṟa ya isho ngyigamba. 22 Na hamwi na isho ungyiṟeyeṟie handu hekaa; kyipfa ngyikusurie kye kui shiterewo shanyu mochitaramo ingyiwona. 23 Epafura, ampfungye hamwi na inyi kyiiṙi kya Kristo Yesu, nakuiṟikyiṟa; 24 na Mariko, Aristariko, Dema, na Luka, wekyeṟunda hamwi na inyi. 25 Isaṟia lya Mndumii Yesu Kristo lyikae hamwi na mrima yanyu.
1 Kyiyeri kya kacha Ruwa naleṙeṙa na waku waṙu kafong'ui na kundu kufong'ui, iiṙia ko weonguo shisuku; 2 mafurumionyi ga mfiri-i naleṙeṙa na soe kyiiṙi kya Mono-kye alemmbika nawe mokyioṟa o shindo shoose, lyingyi-se kui oe nalegumba wuyana. 3 Oe nekyeloṟa chandu Ruwa awoṙe mng'ano, fana ya mrima okye, echiṙuo shindo shoose kui iwawaso lya wuiṙimi wokye, amwende ihooṟio lya ngyuunyamaṟi tsa wandu, naleṙamia ura lo kulyoe lo ulya ang'anyi kuta woose. 4 Ruwa nalesambuṟa Mono-kye nawe ang'anyi kuta malaika, chandu rina lyilya Ruwa alemwenenga lying'anyi kuta lya malaika. 5 Cha kyipfa nalewia malaika uha kyiyeri kyoose, “Iyoe nyi mono-ko, inyi inu ngakufee?” Na lyingyi-se, “Inyi ngyechiwa awu kokye, na oe nechiwa mana koko?” 6 Na lyingyi-se, kyiyeri aende Mono-kye o kuwooka na wuyanenyi nagamba, “Malaika woose wa Ruwa wampfirie ndi.” 7 Na ko mbonyi tsa malaika nagamba, “Ekyegaluo malaika wakye iwa cha shiwiṟi, na waṟundi wakye iwa cha moṙo mlang'a.” 8 Kyaindi ko mbonyi tsa Mana nagamba, “Kyitima kyapfo kya wuchilyi, hoi Ruwa, nyi kya mlungana na mlungana. Na upoi lo Wumangyi wopfo nyi upoi lo wusumganyi. 9 Nukundi wusumganyi nosuo shituṟu koikyo Ruwa, Ruwa opfo, nakushumbuo, kakuenenga kyiṟumi kying'anyi kuta woṙoo.” 10 Na lyingyi-se, “Iyoe, Mndumii, ipfo mawookyionyi nulewika ngyuurende tsa uruka, na ruwewu nyi iṟunda lya mawoko gapfo. 11 Isho shechinyamaṟika, Indi iyoe nochikaa mlungana. Na shoose shechikuo cha nguwo. 12 Na cha nguwo nochishilema-lema, natso tsechiilachika. Kyaindi iyoe nyi ulya ulya na mfiri yapfo yechisia-pfo.” 13 Ngyesa kuwoṙe malaika alemmbia kyiyeri kyoose “Uṙamie kuwoko koko ko kulyoe, mṟasa kyiyeri ngyechiwika washituwa wapfo wuchilyinyi wopfo?” 14 Ngyesa malaika nyi wakyi? Chi walya wekyeṙumo iṟundia walya wekyeoṟa wukyiṟo-pfoe?
1 Koikyo kyiluwaṟi iosha nawi shilya luleicho lulacheṙeko. 2 Cha kyipfa kokooya kyindo kyilya kyilegambo nyi malaika kyilawelolomie, na orio mndu alemina kyindo-kyo naleanduyo chandu kyiwaṟi, 3 ngyesa soe, loiṙima kuṙa ikyia ianduyo lukomina ulogo-lu lung'anyi kuṙi lo wukyiṟo? Ulogo lulegambo kuwooka nyi Mndumii, naaho lukomanyika koṙu na ko walya waleicho. 4 Ruwa na oe echiṟingyishia hamwi nawo kui ṟigo na shiṟiyisho na pfinya tsa mbaṟe tsifoi, na kui igawa shisumbo sha Mumuyo Mweele, chandu alekunda oe amonyi. 5 Kyipfa Ruwa alewika malaika wachilyie uruka lulya luicha na luionguo mbonyi tsalo-pfo, indi mndu umwi naleṟingyishia kuṙi handu halyiwe echigamba, 6 “Mndu nyi kyikyi tane omkumbuo? Ang'u mana o mndu mṟasa umwambuye? 7 Nulemgumba kawa mtutu kuta malaika, numwenengyie kyiṟumi na mng'ano, nummbikyie wuye ya maṟunda goose. 8 Na imgaluo mchilyi o shindo shoose.” Cha kyipfa kyiiṙi kya iwika shindo shoose wuchilyinyi wokye uletsugaṟa kyindo ulalekyiwika wuchilyinyi wokye-pfo. Kyaindi wulalu lulandewone shindo shoose shechiwiko wuchilyinyi wokye-pfo; 9 indi lowona ulya alegumbo kawa mtutu kuta malaika, Yesu, kyipfa kya mawawio ga upfu, amwenengye kyiṟumi na mng'ano, kundu kui isaṟia lya Ruwa napfe kyipfa kya orio mndu. 10 Cha kyipfa kyiwemmbaṟi oe, ulya kyipfa kyakye na kui oe shindo shoose shilegumbo, kundu naenengye wandu wafoi wekyemwosha wuiṙimi wo iwona kyiṟumi kyakye, iafutsia msongoru ang'anyi o wukyiṟo wowo kui njia ya ilya wukyiwa. 11 Kyipfa ulya ekyeilyisha na walya wekyeilyisho woose wawukyie ko mndu umwi. Kyipfa kya ikyo ekyerigo nyi sonu iwalaga wana wa wamae-pfo. 12 Nekyegamba, “Ngyechionguo mbonyi tsapfo ko wana wa wama wako, siṟinyi ngyechikuṟumisha.” 13 Na lyingyi-se, “Ngyechiwa ngyikumsurie oe.” Na lyingyi-se, “Inyi ngyikyeri iha na wana-wa ngyileenengo nyi Ruwa.” 14 Kyasia, cha kyipfa wana-wa nyi wandu wawoṙe mmbiu na samu, maa oe nalewewa wuṙo, kundu kui njia ya upfu nanyamaṟe ulya awewoṙe pfinya tsa upfu, Mokyiriinzi, 15 na kui iwuta kuṙo nalekyie walya wawei watumo kyipfa kya iowuo upfu moo yawo yoose. 16 Kyipfa nyi loi kye ekyetarama malaika-pfo indi nekyetarama walya wa kyishari kya Abrahamu. 17 Koikyo kyiwemmbaṟi ifananyisho na wana wa wamae shindonyi shoose, naiṙime iwa mkohanyi ang'anyi awoṙe isaṟia, ekyeafutsia kyilya ateṟia iṟundenyi lya Ruwa, nahooṟie wandu wakye ngyuunyamaṟi tsawo. 18 Na cha kyipfa oe amonyi nalelyiso wukyiwa kyiyeri aleyesho, neiṙima itarama walya wekyeyesho.
1 Koikyo wana wa wama mui wandu wa Ruwa, muleiṙikyia ndago ya ruwewu, kusaṟenyi mnu mbonyi tsa msu na Mkohanyi ang'anyi kuta woose o shilya lokyeṟingyishia. Yesu, 2 awekyeafutsia shilya ateṟia ko ulya alemsambuṟa naṟunde iṟunda lyakye, chandu Mose na oe awekyeri, kyiyeri alesongoya wandu wa Ruwa. 3 Kyipfa Yesu natalo kye nawaṟi kyiṟumi ngoseṟa kuta Mose, chandu ulya ekyewika numba awoṙe woguru kuta numba-yo. 4 Kyipfa orio numba ingyiwikye nyi mndu; indi ulya aleachikyia shindo shoose nyi Ruwa. 5 Na Mose loi naleafutsia shilya aleteṟia kyiyeri alesongoya wandu woose wa Ruwa cha mṟundi, nawe wuṟingyishi wo shindo shechigambo numa ya iho, 6 indi Kristo, cha mana ekyechilyia numba ya Ruwa; ulya numba yakye ikyeri nyi soe, kokooya loengyeṟa iwaṙa wuṟango na wukari na ikushela lya iweṙelyia lyaṙu mṟasa mafurumionyi. 7 Koikyo, chandu Mumuyo Mweele agamba, “Inu, kokooya moicho ṟui lyakye. 8 Maa mulaumiṟe mrima yanyu, chandu waku wanyu walelega Ruwa, kyiyeri kya iyesho kulya nukyenyi ngyuumu suwaa ilawoṙe maa mṟinga, 9 Kyiyeri-kyo waku wanyu walengyiyesha, wakawona mawuto gako maka makumi gaana. 10 Koikyo rika-lyi lyilengyipfulutsa nyashi, ngagamba, mfiri yoose nyi wandu wawoṙe mrima iṙekyie; walemanya mbonyi tsako-pfo. 11 Chandu ngyilelya nyamu kui nyashi, ‘Wechiiṙa na handu hako heonyonyia-pfo.’ ” 12 Ambuyenyi, wana wa wama, maa umwi onyu alawaṙe mrima mmbicho ulawoṙe iiṙikyia; kui ikuletsana na Ruwa ai na moo. 13 Kyaindi mututumane orio mfiri; kundu maa umwi onyu alawaṙe mrima muumu kui wulembi wo wunyamaṟi. 14 Cha kyipfa lowa wandu wekyekaa handu hamwi na Kristo, kokooya lokuwaṙa tapu na kyilya luleloṟa kyiyeri lulewooka iiṙikyia Yesu mṟasa mafurumionyi. 15 Iho-ndu kyekyegambo, “Inu kokooya moicho ṟui lyakye Maa mulaumiṟe mrima yanyu, cha kyiyeri kyilya kyelega Ruwa.” 16 Kyipfa nyi wakyi walengyipfulutsa nyashi, kyiyeri waleicho? Chi walya walewuka Misiri wechisongoyo nyi Mose-pfoe? 17 Lyingyi-se nyi wakyi walepfulutsa Ruwa nyashi maka makumi gaana? Chi walya waleṙeko, walya mnying'a yawo ileoloka nukyenyi ngyuumu suwaa ilawoṙe maa mṟinga? 18 Lyingyi-se nyi wakyi Ruwa alewalyiia nyamu kye wechiiṙa na handu hakye heonyonyia, sile walya walemlega? 19 Kyasia, lowona kye waleiṙima iiṙa na kulya urukyenyi-pfo kyipfa walelega iiṙikyia Ruwa.
1 Kyasia, kokooya kuwoṙe kyaasa kya iiṙa na handu ha Ruwa heonyonyia, luowuoe, maa umwi oṙu alechewono kye nawuṟa kyaasa-kyo. 2 Kyipfa nyi loi, maa soe taa luleongoyo mbonyi ngyicha chawo. Kyaindi mbonyi-tso wandu waleicho tsilewatarama kyindo-pfo kyipfa tsileṙuana na iiṙikyia lya mrimenyi ko walya waleicho-pfo. 3 Kyipfa soe luiṙikyie luiṙa na handu ho heonyonyia; chandu alegamba, “Chandu ngyilelya nyamu kui nyashi, wechiiṙa na handu hako heonyonyia-pfo.” Maa chandu maṟunda galya galemarisika wookyia kyiyeri ngyuurende tsa wuyana tsilewiko. 4 Cha kyipfa handu halyiwe nagambie kuṙi ko mbonyi tsa mfiri o mfungaaṙe, “Mfiri o mfungaaṙe naleonyonya, kaṙa maṟunda gakye goose.” 5 Na iho naho taa, “Wechiiṙa na handu hako heonyonyia-pfo.” 6 Kyasia kyipfa ṙeṙo-lyi lyatsugaa ho kye kuwoṙe wandu wechiiṙa na handu-ho heonyonyia, na walya waleongoyo mbonyi-tso kyiyeri kya kacha, walelemo iiṙa na handu ho heonyonyia kyipfa kya wunyamaṟi wowo, 7 nawika-se mfiri mlyiwe, echigamba, kyiiṙi kya Dawidi numa ya kyiyeri kyileshi kuṙi, “Inu; chandu kyikyigambe wookyia kacha, ‘Inu kokooya moicho ṟui lyakye, Maa mulaumiṟe mrima yanyu.’ ” 8 Kyipfa kokooya Yosua alewaenenga sia, awechiionguo-se mfiri ungyi kyiyeri kya numa-pfo. 9 Kyasia, hatsugae sia ya mfiri o onyonya ko wandu wa Ruwa. 10 Kyipfa oe aleiṙa na halya-ndu heonyonyia naonyonya amonyi iṟundenyi lyakye, chandu Ruwa aleonyonya iṟundenyi lyakye. 11 Kyasia, lupfuṟukane iiṙa na kyiiṙi kya sia-yo, kundu kye mndu oose alacheoloka cha wandu-wo walaleindia Ruwa. 12 Kyipfa Ṙeṙo lya Ruwa lyiwoṙe moo, lyingyi-se lyiwoṙe pfinya; lyingyi-se lyilyiohi kuta ushu loose lo mmbega kuwi; lyingyi-se lyekyekoṟa mṟasa lyikaiṙima iletsana mrima na ngoo, na shiwungo na mafuṙa gakyeri ipfo shiwungonyi; lyingyi-se lyilyianguhu imanya makusaṟo na kyilya mrima ukundi. 13 Maa kuwoṙe kyindo kyikyeri na moo kyilakyishukuoe mbele ya Ṙeṙo-lyo-pfo, kyaindi shindo shoose shikyeri kyiṟanguoe na shishishukuoe mesonyi gakye ulya awoṙe shindo shaṙu. 14 Kyasia, kokooya luwoṙe Mkohanyi ang'anyi kuta woose aleiṙa na ruwewu, Yesu Mono-Ruwa, luoshe mnu shilya lokyeṟingyishia. 15 Cha kyipfa luwoṙe mkohanyi alechiiṙima iṙuana na soe shindonyi shaṙu sha wufofo-pfo; kyaindi oe naleyesho kyimwi na soe shindonyi shoose, indi alewuta kya wunyamaṟi-pfo. 16 Kyasia, lutikyire kyitimenyi kya isaṟia kulawoṙe wuowu, kundu luenengo isaṟia, na iwona isaṟia lyelutarama kyiyeri lulawoṙe shindo shilushikyie.
1 Kyipfa orio Mkohanyi ang'anyi kuta woose amsambuṟe iwuka ko wandu nammbikye kyipfa kya wandu mbonyinyi tsa Ruwa, kundu nawute shienengo kyipfa kya ngyuunyamaṟi. 2 Echiiṙima iṙuana kui wuhoo na walya walaichi na walya waiṙeka, cha kyipfa oe amonyi nawoṙe mbaṟe ya wufofo; 3 na kyipfa kya ikyo kyimmbaṟi, cha kyipfa kya wandu, wuṙo kyipfa kya mrima okye amonyi, iwuta shienengo kyipfa kya ngyuunyamaṟi. 4 Na kuwoṙe mndu eiṙima ikuenenga amonyi kyiṟumi-kyi-pfo, sile ulya ekyelago nyi Ruwa, cha Aron. 5 Na wuṙo Kristo na oe alekuṙosa mrimenyi kokye na iṙuo kyiṟumi kya iwa Mkohanyi ang'anyi kuta woose-pfo, kyaindi nyi Ruwa alemmbia, “Iyoe nyi Mono-ko inu ngawa Awu opfo.” 6 Chandu agambie handu hengyi, “Nochiwa mkohanyi mlungana cha Melyikyisedekyi.” 7 Yesu, mfiri-yo awei na moo, naleeṟeṟia Ruwa, echifiiṟa na itonyitsa mcheṟeṟe, Ruwa echiiṙima imkyiṟa na immbuta upfunyi, kaaṙanyio chandu awekyeri mndu aowuye na ikunda Ruwa; 8 na, maa chandu akyeri Mana, nalekulosha iindia kui wukyiwa alelya. 9 Na oe amṟingyishio kye naafutsio, kawa ulya ekyekyiṟa wandu mlungana ko wandu woose wekyemwindia. 10 Numa ya iho namsende na Ruwa iwa Mkohanyi ang'anyi kuta woose cha Melyikyisedekyi. 11 Ulya luwoṙe shindo shifoi sheonguo kyipfa kyakye; na nyi kyindo kyuumu ishionguo cha kyipfa mowa wandu waṙoko iaṙanyia. 12 Cha kyipfa, kokooya kyimmbaṟi iwa walosha, (kyipfa kyiyeri kying'anyi kyamwiṙa), muwaṟi ilosho na mndu malosho ga kuwooka ga mbonyi tsa Ruwa. Na nyoe kyipfa mukyeri cha wana wanangu muwewaṟi maruwa maa chi kyelya kyikari-pfo. 13 Cha kyipfa orio mndu ekyenyo maruwa aichi mnu mbonyi tsa wusumganyi-pfo, cha kyipfa nyi mana mnangu. 14 Kyaindi kyelya kyikari nyi ko wandu wapfulukyie kyiiṙikyia, walya wekyeiṙima imanya kyicha na kyiwicho.
1 Kyipfa kya ikyo, lukoṙa ionguo malosho ga kuwooka ga Kristo, lupfuṟukane lushikye masiionyi ga kyaro. Maa lulaṙeṙe-se mbonyi tsa malosho-go ga kuwooka, lulaiwuta-se shindo shilawoṙe kyiiṙa na iiṙikyia Ruwa, 2 na ga malosho ga ngyuupatiso, na iyekyia mawoko, na iṟutso wapfu, na ianduyo lya mlungana. 3 Na isho lochishiwuta Ruwa kaluenenga wuiṙimi wo iwuta kuṙo. 4 Cha kyipfa walya walemuenengo ngyeela, na isonja kyisumbo kya ruwewu, na iambilyia ṙombo lya Mumuyo Mweele, 5 na isonja mbonyi ngyicha tsa Ruwa, na pfinya tsa shiyeri shiicha, 6 wakaṙa iiṙikyia numa ya iho, kyechiiṙimika-se iwagaluo waṙumbuye wunyamaṟi-pfo; cha kyipfa wakapia Mono-Ruwa msalabenyi lya kawi kui mrima yawo, na imriisa sonu na pata. 7 Kyipfa uruka lokyenyo mvuo yekyekapa ho kyiyeri kui kyiyeri, na iṙosa maṟa gawoṙe kyiira ko walya galeṙemo kyipfa kyawo, wekyewona mboṟa tsiwukyie ko Ruwa; 8 indi uruka-lo lukoṙosa msha na makacha lokyelego na ikyiṟeseso nyi Ruwa na mafurumionyi galo nyi irumatso. 9 Kyaindi, wakunde, maa chandu lokyeonguo isho, mbonyinyi tsanyu luleiṙikyia mbonyi ngyicha ngoseṟa, na tsiwoṙe wukyiṟo. 10 Cha kyipfa Ruwa ammbicho mṟasa nawaṙime iṟunda lyanyu-pfo, na ikunda lyilya mulelyiṟingyishia kui rina lyakye, cha kyipfa muleṟundia wandu wa Ruwa, na mṟasa wulalu muwaṟundia. 11 Na soe lukundi orio umwi onyu naṟingyishie wuragari wulya wulya, mṟasa mafurumionyi; 12 kundu mulaṙokuoe, indi muwe wandu wekyeosha walya wekyeoṟa shiteṟio kui iiṙikyia na wusimiri. 13 Cha kyipfa Ruwa, kyiyeri aleenenga Abrahamu kyaasa kyipfa alawewoṙe ang'anyi kuta ulya alemlyiia nyamu, nalelya nyamu kui mrima okye, 14 echigamba, “Ny'kyaloi ngyechikuwikyia mboṟa, na ikupfumbutsa.” 15 Na kuṙo kui isimiria kawona kyaasa kyilya. 16 Kyipfa wandu wekyelya nyamu kui ulya akyeri ang'anyi kuta wo; na kowo matsitsionyi ga iwingana kui maṙeṙo nyi nyamu, iloṟa kye maṙeṙo-go nyi ga loi, 17 kyiiṙi kya mbonyi-tso Ruwa, akundi iloṟa ngoseṟa mnu walya wekyeoṟa kyaasa kyilya, chandu shilya akundi shilechiiṙima iilachika. 18 Shilya kyiiṙi kyasho Ruwa alechiiṙima iṙeṙa wongo, luwone iwiyiṟio moo lyilalolomie, soe lulalekyelyio iosha na isimiria shilya shilewiko mbele yaṙu. 19 Lushiwoṙe cha kyindo kyetirimisha mrima ulakupaaye-paye, kyindo kyiwoṙe wuringyi wung'anyi, kyiwoṙe pfinya, na ulya lokyewika ikusuria lyaṙu nyi Yesu, ulya ekyeiṙa nguwonyi yeshingyia ya hekalu lya ruwewu na halya-ndu ha kyiiṙi haele. 20 Handu Yesu aleiṙa naho kyipfa kyaṙu, msongoru oṙu, nawa Mkohanyi ang'anyi kuta woose mṟasa mlungana cha Melyikyisedekyi.
1 Cha kyipfa Melyikyisedekyi-cho, mangyi o Salemu, mkohanyi o Ruwa ai wuye ruwewu, nalekarisana na Abrahamu kyiyeri aweiwuya ikapa wamangyi-wo, kammbikyia mboṟa. 2 Ulya Abrahamu alemgawia kyifunjoe kya ikumi kya shindo shoose; (rina lyakye lya kuwooka nyi mangyi o wusumganyi, lyingyi-se nyi mangyi o Salemu, kyimwi na igamba, mangyi o ufoṟo. 3 Awoṙe awu-pfo, awoṙe wamae-pfo, awoṙe wafee-pfo, awoṙe kyiyeri alefeo, maa kyiyeri alepfa-pfo, indi namfananyishe na Mono-Ruwa). Icho nyi mkohanyi mṟasa mlungana. 4 Kyasia, ambuyenyi chandu mndu-cho aweng'anyi, ulya Abrahamu, mku oṙu ang'anyi, alemwenenga kyifunjoe kya ikumi kya shilya aleende shiṙenyi. 5 Na kyiiṙi kya wana wa Lewi nawo, walya wekyeenengo wukohanyi, wawoṙe wuchilyi wo iṙuo kyifunjoe kya ikumi iwuka ko wandu wawo, wana wa wamawo, chandu mawawaso gagambie, maa chandu wakyeri wa kyishari kya Abrahamu. 6 Indi oe, ulya kyishari kyakye kyilaletalo kye kyiwukyie kowo, nalewuta kyifunjoe kya ikumi iwuka ko Abrahamu, kammbikyia mboṟa ulya awoṙe kyaasa-kyo. 7 Maa kyeiṙima ilego nakamwi kye mtutu nekyewikyio mboṟa nyi ang'anyi-pfo. 8 Na makohanyi wekyepfa wekyewuta kyifunjoe kya ikumi; indi iha Melyikyisedekyi ekyeambilyia kyifunjoe kya ikumi ekyepfa-pfo. 9 Lyingyi-se kyeiṙima igambo kye, kui njia ya Abrahamu, maa Lewi ekyeambilyia kyifunjoe kya ikumi naleenengyia kyifunjoe kya ikumi; 10 cha kyipfa alekoafeo kyiyeri-kyo Melyikyisedekyi alekarisana na oe-pfo. 11 Kyasia, kokooya kulawewoṙe wufofo wukohanyinyi wo Lewi; (kyipfa wandu waleenengo mawawaso kyipfa kya wukohanyi-wo), kuwewoṙe-se kyimaṙuma kya kyikyi kuwaṙe mkohanyi ungyi, ai cha Melyikyisedekyi, maa aletalo cha ilyi nai cha Aron? 12 Kyipfa wukohanyi wulya wukoilachika, kyiwaṟi na mawawaso gailachikye. 13 Kyipfa oe mbonyi tsakye tsilegambo kuṙo, nyi-we o wandu wa mbaṟe ingyi, mbaṟe kulawoṙe mndu o mbaṟe-yo aleṟunda alyitaṟenyi. 14 Kyipfa kyikyeri na pata kye Mndumii oṙu nalewuka kyisharinyi kya Yuda, mbaṟe ya wandu walya Mose alaleonguo kyindo kyawo kyoose ko mbonyi tsa wukohanyi. 15 Lyingyi-se isho luiṙeṙa shikyeri na pata mnu ngoseṟa, kokooya nawoneka mkohanyi ungyi ai cha Melyikyisedekyi; 16 alakyeri mkohanyi ko mawawaso ga kyimndu, indi kui pfinya tsa moo tsilekyesia. 17 Kyipfa namṟingyishie kye, “Iyoe nyi mkohanyi mlungana cha Melyikyisedekyi.” 18 Kyipfa kuwoṙe iilachika lya iwawaso lyilya lyilesonguo, kyipfa kya wufafa wolyo, na iuṟa kyiira lyayo; 19 (cha kyipfa iwawaso lyilya lyileafutsia kyindo-pfo); na hamwi na isho kulewiko ikusuria lyilyicha ngoseṟa, ikusuria lyekyeluenenga itikyiria Ruwa. 20 Na kyipfa nyamu ilaleuṟika, 21 (kyipfa walya walesambuṟo makohanyi kulawoṙe nyamu; indi oe, hamwi na nyamu, kui ulya alemmbia, “Mndumii nalya nyamu maa echiilacha nyamu-yo-pfo, iyoe nyi mkohanyi mlungana.”) 22 Kyasia, iṙuana na wuloi-wu Yesu nawa mloṟi o mma ulya mcha ngoseṟa. 23 Lyingyi-se walya walesambuṟo makohanyi wafoi, kyipfa waleshingyio nyi upfu walakae ho; 24 indi oe, kyipfa ekyekaa mlungana, nawoṙe wukohanyi wulekyewuka ho. 25 Na oe, kyipfa kya ikyo, neiṙima ikyiṟa nakamwi walya wekyecha na ko Ruwa kui oe; kyipfa nakyeri na moo mfiri yoose kundu nawaterewie. 26 Kyipfa luwewaṟi soe luwaṙe mkohanyi ang'anyi mbaṟe-i akyeri mweele, alawoṙe wuwicho, alawoṙe tewe lyoose, amletsane na walya wekyeṙeko, Ruwa alemwiria wuye ruwewu. 27 Ulya alakundi kyindo orio mfiri, cha makohanyi walya wengyi wang'anyi, kuwooka iwuta kyiṙaso kyipfa kya ngyuunyamaṟi tsakye amonyi, numa ya iho kyipfa kya ngyuunyamaṟi tsa wandu-wo; kyipfa oe nalewuta kuṙo lyimwi, kyiyeri alereka moo okye. 28 Kyipfa uwawaso luwikyie wandu wawoṙe wufafa iwa makohanyi wang'anyi; indi mbonyi-tso tsa nyamu ilecha numa ya uwawaso tsilemsambuṟa iwa Mana aafutsie mlungana na mlungana.
1 Kyasia, kyiiṙi kya isho luionguo, kyindo kying'anyi kuta shoose nyi ikyi, luwoṙe Mkohanyi ang'anyi kuta woose mbaṟe-i, aṙamie kuwoko ko kulyoe ko kyitima kya wuchilyi kya Ruwa Mopfinya. 2 Mṟundi o handu haele, na o tengo lyilya lya loi, lyilya Mndumii alelyiwika, maa chi mndu-pfo. 3 Kyipfa orio Mkohanyi ang'anyi kuta woose nekyesambuṟo kundu nawute shiṙaso, kyiwaṟi ichu na oe nawaṙe kyindo kyeṙasa. 4 Kokooya awekyeri urukyenyi, awechiwa mkohanyi-pfo; kyipfa kuwoṙe wekyewuta shienengo chandu mawawaso gagambie. 5 Wekyeṟundia kyindo kyikyeri cha kyirinje kya ruwewu; chandu Mose alewio nyi Ruwa nawute, kyiyeri awekuṟeyeṟie iwika tengo lyilya; kyipfa nagamba, “Achikyia shindo shoose kui mfano ulya uleloṟo kulya fumvunyi.” 6 Kyaindi wulalu nawona iṟunda lyicha ngoseṟa, chandu akyeri mndu aṙuṙe ndago ya mma mcha, Ruwa nagambie kye wandu wakye wechiwona shindo shicha kuta isho. 7 Kyipfa kokooya mma ulya o kuwooka ulawewoṙe tewe, mrima ya wandu iwechipfulo nyi ulya o kawi-pfo. 8 Kyipfa kyiyeri ekyegamba kye wawoṙe tewe, nekyegamba, “Mfiri iicha, Ruwa nagamba, na inyi ngyechiwika Mma Mhya na wandu wa numba ya Isiraelyi na wandu wa numba ya Yuda. 9 Ochiwa mma cha ulya ngyilewika na waku wawo mfiri iya ngyilewateteṟa ngyiwawute urukyenyi lo Misiri-pfo. Cha kyipfa walalekaa mmenyi oko, ngyilekulyisa wukyiwa kyipfa kyawo-pfo. 10 Kyipfa ichu nyicho mma ngyechiwika na wandu wa Isiraelyi numa ya mfiri iya, Ruwa nagamba, ‘Ngyechiwika mawawaso gako makusaṟonyi gawo, na ngyechigaṟeia mrimenyi kowo. Na inyi ngyechiwa Ruwa kowo, nawo wechiwa wandu wako.’ 11 Nawo wechiloshana orio mndu na momṟasa okye-pfo, Maa orio mndu na mono-wamae, echigamba, ‘Manya Mndumii-pfo.’ Cha kyipfa woose wechingyimanya, wookyia mtutu owo mṟasa ang'anyi. 12 Cha kyipfa ngyechiwahooṟia mawicho gawo, na ngyuunyamaṟi tsawo ngyechitsikumbuo-se-pfo.” 13 Kui igamba, “Mma Mhya” nagaluo lyilya lya kuwooka iwa lyiku. Kyaindi kyindo kyawooka ikuo nyi iwuka ho kyii.
1 Kyasia, maa mma o kuwooka uwewoṙe mawawaso ga mbonyi tsa iindia na iana Ruwa, na handu ha kyiwuyana heterewa Ruwa. 2 Kyipfa tengo lyileachikyio, lyilya lya ipfo kyanja, handu hawewoṙe handu heyekyia taa, na mesa, na mkate ngyiele; nyiho halelago “Haele.” 3 Na numa ya mkoṟoṟi o kawi o ishingyia handu, tengo lyilya lyekyelago “Haele ha haele,” 4 lyiwoṙe alyitaṟe ya sahapu, na sanduku ya mma ingyishikyie nyi sahapu ngyuura tsoose, sanduku iwewoṙe ikopo lya sahapu lyiwoṙe manna iya, na upoi lulya lo Aron lulekolooṟia maṟa, na shibau shilya sha mma; 5 na wuye yasho makyerubi ga kyiṟumi, gechiwikyia kyirinje halya-ndu Ruwa ekyehooṟia ngyuunyamaṟi. Kyasia luwoṙe ṙaawa wulalu lyeonguo mbonyi tsa shindo-shi kyimwi kyimwi-pfo. 6 Kyasia, shindo-shi shikamuachikyio kuṙo, makohanyi wekyeiṙa na ipfo tengonyi lya ipfo kyanja mfiri yoose, wechiwuta shindo sha iindia na iana Ruwa. 7 Kyaindi kyiiṙi kya tengo-lyo lya kawi Mkohanyi ang'anyi kuta woose nekyeiṙa napfo amonyi, lyimwi orio maka; aṙuṙe samu iwukyie kyindonyi kya kyiṙaso kyipfa kya wunyamaṟi wokye amonyi na wo wandu wengyi kyiyeri walalemanya kye kyilya waweiwuta nyi wunyamaṟi. 8 Mumuyo Mweele kaloṟa kyindo-kyi, kye njia ya iiṙa na halya-ndu haele ilekoyammanyika-pfo, kyiyeri-kyo tengo lya ipfo kyanja lyilalekolyammbuka ho. 9 Lyilya lyikyeri mfano o kyiyeri-kyi kyikyeri pfo wulalu; kyiyeri-kyo shienengo sheṙasa shiwuto, shilechiiṙima kui chandu mndu akuichuoe mrimenyi kokye iafutsia mndu aiindia na iterewa Ruwa. 10 Kyipfa nyi mawawaso ga mbaṟe ya mmbiu tupu, shelya na shindo shenyo na mbaṟe tsesamba kyimṟumoe, shilegambo kye shiṟundo mṟasa kyiyeri-kyo Ruwa echiilacha shindo shoose shiwe shihya. 11 Kyaindi Kristo kamcha, akyeri Mkohanyi ang'anyi kuta woose o mbonyi tsicha tsechicha, ko tengo lyilya lying'anyi ngoseṟa na lyiafutsie, lyilalyiachikyie nyi wandu, kyimwi na igamba lyilakyeri lya wuyana-wu, 12 maa chi kui samu ya mburu na magache-pfo, indi kui samu yakye ulya aleiṙa lyimwi tupu na handu Haele, na iluwuta wusingyenyi mlungana. 13 Cha kyipfa kokooya samu ya mburu na mapung'a na ifui lya igache lya umbe walya wafanyi kyimṟumoe walepusio yekyeilyisha mṟasa mmbiu ukowuka ukoe; 14 kyasia chi ngoseṟa samu ya Kristo, ulya kye kui Mumuyo o mlungana alereka moo ko Ruwa iwa kyienengo kyilawoṙe tewe, kyechisanja shilya mukusaṟie mrimenyi konyu na mṟumoe ilawoṙe kyiira, muiṙime iindia na iterewa Ruwa ai na moo? 15 Na kyipfa kya ikyo nyi ulya ekyeende Mma Mhya, Yesu ulya alepfa, na ipfa lyakye lyilewuta wandu maṙekonyi ga mma ulya o kuwooka, wandu walelago waambilyie kyaasa kya kyioṟa kya mlungana. 16 Kyipfa handu mma o kyioṟa ukyeri, hawaṟi hakae na upfu lo ulya alewika mma-cho. 17 Cha kyipfa mma o kyioṟa uwoṙe pfinya handu halewaṙa ipfa lya mndu; cha kyipfa lyiwoṙe pfinya maa ale kokooya ulya aleuwika ai na moo-pfo. 18 Koikyo maa mma ulya o kuwooka ulewooko kulawoṙe samu-pfo. 19 Kyipfa kyiyeri orio iwawaso lyilegambo nyi Mose ko wandu-wo woose, chandu mawawaso gawekundi, nalewuta samu ya magache na mburu, hamwi na mṟinga na kyiṙi kya hisopo kyikyipfungyie mamberi ga kyimaande ga moondo, kanyanyatsia kyitapu kyilya kya mawawaso, na wandu woose, 20 echigamba, “Iyi nyi samu yamlunga nyoe na mma ulya Ruwa alemmbia mumwindie.” 21 Na tengo lyilya nalyo na shindo shoose sha iindia na iterewa Ruwa aleshinyanyatsia samu wuṙo. 22 Na Uwawasonyi shindo shoose shilesanjo kui samu, na kulawoṙe ipusuo samu kuwoṙe iwuto wunyamaṟi-pfo. 23 Kyasia, kyiwewaṟi nakala tsa shindo shikyeri ruwewu tsisanjo chandu kyamugambo, kyaindi shindo sha ruwewu imonyi shisanjo kui shiṙaso shishicha kuta isho. 24 Cha kyipfa Kristo aleiṙa na handu haele haleachikyio nyi wandu-pfo, nyicho mfano o handu haele ha loi; indi naleiṙa na ruwewu ya loi nawono wulalu mbele ya Ruwa kyipfa kyaṙu. 25 Maa chi kye nakuwute kafoi, chandu Mkohanyi ang'anyi kuta woose ekyeiṙa na handu haele orio maka kui samu ilakyeri yakye-pfo. 26 Kokooya nyi wuṙo, kyiwemmbaṟi ilyiso wukyiwa kafoi wookyia wuyana wulagumbo. Kyaindi wulalu, lyimwi tupu, mafurumionyi ga shiyeri, nawoneka lya kuwooka na lya mafurumionyi, ihooṟia ngyuunyamaṟi kui kyiṙaso kya mrima okye. 27 Na chandu wandu wekyeṟeyeṟio ipfa lyimwi tupu, na numa ya ipfa ianduyo; 28 na wuṙo Kristo na oe, ammbuto iwa kyiṙaso lyimwi tupu na iṙuo ngyuunyamaṟi tsa wandu wafoi; nechicha-se lya kawi, kulawoṙe wunyamaṟi, ko walya waimmbeṙelyia nachewakyiṟa.
1 Kyasia uwawaso, kyipfa nyi kyirinje kya mecha gechicha, maa chi fana ya mecha-go-pfo, kui shiṙaso shilya shilya waleenengyia orio maka, shechiiṙima kyiyeri kyoose igaluo walya wekyecha iindia na iana Ruwa iwa wandu waafutsie-pfo. 2 Kokooya nyi wuṙo, ngyesa shiṙaso shechiṙa ienengyio; cha kyipfa waiindia na iana Ruwa wakamuilyisho lyimwi tupu, walawechikuwona-se wo wawenyi kye wawoṙe wunyamaṟi? 3 Kyaindi kyiiṙi kya shiṙaso-sho kuwoṙe ikumbuo lya wunyamaṟi orio maka. 4 Kyipfa kyeiṙimika samu ya mapung'a na mburu iwuta wunyamaṟi-pfo. 5 Koikyo ilyi echicha na wuyanenyi, nagamba, “Shiṙaso na shienengo ulekunda-pfo; kyaindi mmbiu nulengyiṟeyeṟia; 6 Shiṙaso shewuta alyitaṟenyi na shilya sheenengyia ngyuunyamaṟi ulechihiṟo nasho-pfo; 7 Nyi lyo-ndu ngyilegamba, ambuya, ngacha (ngyimṟeie kyitapunyi kya mawawaso) ngyiwute shilya ukundi, Ruwa.” 8 Iho mawookyionyi nalegamba, “Okyechihiṟo maa ikunda shiṙaso na shienengo shishienengyie alyitaṟenyi na shilya shewuta ngyuunyamaṟi-pfo” (shishienengyie chandu uwawaso lugambie). 9 Nyi lyo-ndu alegamba, “Ambuya, ngacha ngyiwute shilya ukundi.” Naienengyia kyiṙaso kya kuwooka, kundu nawikye ho kyiṙaso kya kawi. 10 Kyiiṙi kya shilya Ruwa akundi lowona iilyisho, kui iwuto mmbiu o Yesu Kristo lyimwi tupu. 11 Na orio mkohanyi nekyegoṟoka orio mfiri echiṟunda cha mkohanyi, na ienengyia shiṙaso shilya shilya kafong'ui; shiṙaso shilechiiṙima maa ale iwuta wunyamaṟi. 12 Kyaindi ichu, kyiyeri amwenengyie kyipfa kya wunyamaṟi kyiṙaso kyimwi kyechikaa mṟasa mlungana, naleṙamia kuwoko ko kulyoe ko Ruwa; 13 wookyia iho echiweṙelyia mṟasa nawingye washituwa wakye. 14 Kyipfa kui kyiṙaso kyakye kyimwi nalewagaluo wandu waafutsie mlungana walya waiilyisho maṙeko gawo. 15 Na Mumuyo Mweele na oe nailuṟingyishia; cha kyipfa numa ya igamba, 16 “Ichu nyi mma ngyechiwika nawo numa ya mfiri iya, Ruwa nagamba, ‘Ngyechiwika mawawaso gako mrimenyi kowo, na igaṟeia makusaṟonyi gawo.’ ” Nyi lyo-ndu ekyegamba, 17 “Ngyuunyamaṟi tsawo na mawuto gawo mawicho ngyechigakumbuo-se maa ale-pfo.” 18 Kyasia ihooṟio lya isho lyikacha, kuwoṙe kyiṙaso-se kyipfa kya iwuta ngyuunyamaṟi-pfo. 19 Kyasia, wana wa wama, kyipfa luwoṙe wukari wo iiṙa na handu Haele kui samu ya Yesu, 20 njia iya aleluwookyia ikyeri ngyihya, na ii na moo, njia iiṙie halya nguwonyi yeshingyia ikyeri nyi mmbiu okye; 21 na iwaṙa Mkohanyi ang'anyi kuta woose achilyie hekalu lya Ruwa lya ruwewu; 22 lutikyirie Ruwa luwoṙe mrima mmbaṙami; kui imwiṙikyia nakamwi, luwailyishe mrima luṙe makusaṟo mawicho; luwasanje mmbiu kui mṟinga mcha. 23 Lukuwaṙe tapu na ikusuria lyaṙu, lyilailachikye; kyipfa ulya aleteṟia nekyeafutsia shilya ateṟia. 24 Luambuye chandu lochitaramana na iwutiana shindo shicha na itutumana kui ikunda na iṟunda lyicha. 25 Maa lulaṙe isanzia handu hamwi, chandu kyikyeri kyiṙo kya wandu wengyi; indi luikyimbiane; na iengyeṟa iwuta kuṙo, kui chandu muwonyi kye mfiri ulya o Yesu ianduya ukyeri kufui. 26 Kyipfa kokooya lowuta wunyamaṟi lukomuambilyia wuṟango wo wuloi wulya, kuwoṙe-se kyimaṙuma kya kyiṙaso kyipfa kya ngyuunyamaṟi-pfo. 27 Indi kuwoṙe iweṙelyia ianduyo lyioweshie, na wulang'a wo moṙo ukuṟeyeṟie irumatsa walya wakyeri washituwa wa Ruwa. 28 Mndu alemina mawawaso ga Mose nekyewoogo kulawoṙe iwonio wukyiwa, kyiyeri waṟingyishi wawi ang'u waṟaaṟu wagamba kye nammbicho. 29 Muwonyi kuṙa? Kyiwemmbaṟi ngapo ing'anyi ngoseṟa mndu ulya alemina Mono-Ruwa, na igamba kye samu iya ya mma ilemuilyisha chi kyindo-pfo, na ilahia Mumuyo o isaṟia-pfoe? 30 Kyipfa lumwichi ulya alegamba, “Itaa kyiṟaache nyi iṟunda lyako, inyi ngyechitaa.” Na lyingyi-se, “Mndumii nechianduya wandu wakye.” 31 Nyi kyindo kyioweshie iolokyio nyi ngapo ya Ruwa ai na moo. 32 Kyaindi kumbuonyi mfiri ya mawookyionyi, iya kyiyeri mulewona ngyeela, mulekarishia iwingana lying'anyi lya fowa. 33 Shiyeri shingyi kulawoṙe iiṟikyiṟo mulekulunga na walya waweilahio na iwutio shindo shiwicho. 34 Kyipfa mulewonia wukyiwa walya wawewapfungye. Lyingyi-se mukoiṙikyia kui sia isoko masaa ganyu, muichi kye mrimenyi konyu kuwoṙe masaa gai mecha ngoseṟa, galekyesia. 35 Kyasia mulaṙe wukari maa wuṟango wonyu, cha kyipfa wuwoṙe wori wung'anyi. 36 Kyipfa muwaṟi iwaṙa wusimiri, kundu kye mukommbuta shilya Ruwa akundi muambilyie kyaasa kyilya. 37 “Cha kyipfa hatsugae kyiyeri kyifuhi mnu ulya aicha nechicha, maa echikyelyio-pfo. 38 Kyaindi msumganyi oko nechiwaṙa moo kui iiṙikyia. Na oe kaiya-iya mrima oko ochiwaṙa sia kyipfa kyakye-pfo.” 39 Kyaindi soe lukyeri kyiiṙi kya walya waiiya-iya na iṙeka-pfo, indi lukyeri kyiiṙi kya walya wawoṙe iiṙikyia na ikyiṟa mrima yaṙu.
1 Kyasia, iiṙikyia nyi iambilyia shindo shiweṙelyio kulawoṙe iiya-iya. Nyi iiṙikyia nakamwi shindo shilekyewono. 2 Kyipfa kui iiṙikyia waku waṙu waleṟingyishio. 3 Kui iiṙikyia luichi kye wuyana wulegumbo kui Ṙeṙo lya Ruwa, maa shindo shekyewono shilegumbo kui shindo shiwonio-pfo. 4 Kui iiṙikyia Abelyi naleenenga Ruwa kyiṙaso kyicha kuta kyilya kya Kaini. Koikyo naleṟingyishio kye namsumganyi; Ruwa kaṟingyishia shienengo shakye, na kyipfa kya iiṙikyia lyakye, Abelyi naiṙeṙa maa chandu alempfa. 5 Kui iiṙikyia Enokyi nalesamiṟo, kundu alapfe. Maa alewono-pfo, cha kyipfa Ruwa nalemsamiṟa, kyipfa alawendesamiṟo nalekoaṟingyishio kye nachihiṟa Ruwa. 6 Kyaindi kulawoṙe iiṙikyia kyeiṙimika imchihiṟa-pfo; cha kyipfa mndu ekyeyenda ko Ruwa kyiwaṟi naiṙikyie kye Ruwa nakyeri pfo, na kye nekyeenenga wori walya wekyempfula. 7 Kui iiṙikyia Noe amwikyimbio nyi Ruwa ko mbonyi tsa shindo shilandewonekye, kui chandu aleindia na iowuo Ruwa, naleachikyia safina, naiṙime ikyiṟa wandu wa kanyi kokye. Na kui kyilya alewuta naleloṟa wandu wa wuyana kye wawoṙe ṙeko, kawa mokyioṟa o wusumganyi wokyewono kui iiṙikyia. 8 Kui iiṙikyia Abrahamu naleiṙikyia kyiyeri alelago, nawukye nayende handu halya echihaenengo iwa kyioṟa; kafuma alaichi kundu aiyenda. 9 Kui iiṙikyia nalekaa wuyenunyi kulya urukyenyi lo kyaasa, cha urukyenyi lulai lokye, echikaa tengonyi hamwi na Isakyi na Yakobo, wai weoṟa hamwi na oe wa kyaasa kyilya kyilya. 10 Kyipfa Abrahamu naweiweṙelyia mṟi Ruwa aleukusaṟa na iuwika, mṟi ochikaa ho mlungana. 11 Kui iiṙikyia maa Sara amonyi naleambilyia wuiṙimi wo iira mana, ilyi kyiyeri kyakye kyilekokyamwiṙa; cha kyipfa naletala ulya aleteṟia kye nekyeafutsia kyilya ateṟia. 12 Na kyipfa kya ikyo wakafeo nyi mndu umwi, na oe nawei cha apfiie, wandu wafoi cha nyenyeri tsa ruwewu, na cha mlelya ukyeri mbai ya ipalyipalyi, uleiṙima italo. 13 Iwa woose wakapfiia iiṙikyienyi, walaambilyia shaasa shilya, indi wakashiwona wai kuleshi na ichihiyo kyipfa kyasho, na igamba kye wawekyeri wayenu, na wakyaro urukyenyi. 14 Cha kyipfa iwo wekyegamba mbonyi cha itso wailoṟa na pata kye waipfula uruka lowo wawenyi. 15 Na kokooya wawekumbuo uruka lulya walewuka, wawewona ṙaawa lyewuya. 16 Kyaindi wulalu wailanga uruka lucha ngoseṟa, uruka lo ruwewu. Koikyo Ruwa ekyerigo nyi sonu ilago Ruwa owo-pfo; kyipfa nalewawikyia mṟi. 17 Kui iiṙikyia Abrahamu kyiyeri aleyesho, nalewuta Isakyi nawe kyiṙaso; na oe aleambilyia shaasa-sho naweiwuta mono-kye, mana kyimuumwi. 18 Yee, ulya alewio, “Kui njia ya Isakyi kyishari kyapfo kyechilago,” 19 echiwona kye Ruwa neiṙima imṟutsa iwuka ko wapfu; Abrahamu kawona-se Isakyi iwuka upfunyi kui mfano. 20 Kui iiṙikyia Isakyi nalewikyia Yakobo na Esau mboṟa, maa ko mbonyi tsa shindo shechicha kyiyeri kya numa. 21 Kui iiṙikyia Yakobo, kyiyeri aweipfa, kawikyia mboṟa orio mana o Yosefu, kaana na iterewa Ruwa akuyekyie mṙoenyi o upoi lokye. 22 Kui iiṙikyia, Yosefu kyiyeri aleshika mafurumionyi gakye, naleonguo mbonyi tsa wana wa Isiraelyi iwuka Misiri, kagamba kyindo mmbiu okye ochiwutio. 23 Kui iiṙikyia, Mose kyiyeri alefeo, kaṟiko mori iṟaṟu na wafee wakye, cha kyipfa walewona kye nyi mana mcha, maa waleowuo iwawaso lya mangyi-pfo. 24 Kui iiṙikyia, kyiyeri Mose alewa mndu apfulukyie, nalelega ilago mana o mana o kyika o Farao. 25 Kawona nyi nanga ilyiso wukyiwa hamwi na wandu wa Ruwa kuta ipfula sia ya wunyamaṟi wo kyiyeri kyifuhi; 26 echiwona kye imino kyipfa kya Kristo kokye nyi wunjama wung'anyi kuta masaa ga Misiri; cha kyipfa naleweṙelyia wori-wo. 27 Kui iiṙikyia kawuka Misiri, alaowuoe nyashi ya mangyi, kyipfa nalekarishia cha mndu awonyi ulya alekyewono. 28 Kui iiṙikyia kaachikyia Pasaka, na kulya inyanyatsa samu, kundu ulya morumatsa wana wambele alawapaaye wo. 29 Kui iiṙikyia wakaiṙa ipalyipalyinyi lya Shamu, cha ilyi waiiṙa handu hagaṙutsu; kyiyeri Wamisiri waletambagana iwuta kuṙo wakaṙoo nyi mṟinga, wakapfa. 30 Kui iiṙikyia shiambasa sha Yeriko shileoloka, kyiyeri shileiṟiwio mfiri mfungaaṙe. 31 Kui iiṙikyia Rahabu, iṟai lyilya, alerumara hamwi na walya walenyamaṟa-pfo; cha kyipfa naleambilyia kui ufoṟo walya waleṙumo iowelyia mbonyi tsa uruka. 32 Na inyi ngyigambe kyi-se? Kyipfa kyiyeri kyiwengyishika ionguo mbonyi tsa Kyedion, Baraka, Samson, Yefuta, Dawidi, Samolyi na tsa weonguo shisuku-pfo. 33 Walya kui iiṙikyia walewinga ngyuuchilyi tsa wamangyi, walewuta sha wusumganyi, waleambilyia kyaasa, waleshinga maṙumbu ga simba, 34 walerumisha pfinya tsa moṙo, walekyia iwoogo nyi ngyuushu. Waleenengo pfinya numa ya iwa wafafa, walewaṙa wuragari shiṙenyi, walewinga wamesa wa wayenu. 35 Waka waleambilyia wapfu wawo waleṟutso. Kyaindi wengyi walekapo uwicho mṟasa iwoogo, wengyi wakagamba wakundi iwuto wusingyenyi-pfo, kundu wawone wuṟutsi wuwucha ngoseṟa. 36 Wengyi waleyesho kui imino na ikapo. Yee, kui shipfungo, na kui iwiko kyipfungonyi. 37 Walekapo na magoe, wakamanyo kui msemeno, waleyesho, walewoogo kui ushu; waletenga-tenga waṟee njonyi tsa moondo na tsa mburu. Waweuṟie shindo shifoi, wechilyiso wukyiwa, wechiwutio shindo shiwicho; 38 (wandu walya wuyana wulawewaṟi wakae pfo.) Wawetenga-tenga nguṙunyi na mafumvunyi na mbakonyi na mṟeshenyi ya urukyenyi. 39 Na wandu-wo woose wamṟingyishio kyipfa kya iiṙikyia lyawo, waleambilyia kyaasa-pfo; 40 cha kyipfa Ruwa naweisonguo iluṟeyeṟia soe kyindo kyicha, kundu soe lulakyeri ho walaiṙime iafutsio chandu Ruwa akundi wawe.
1 Kyasia na soe taa, cha kyipfa luwaiṟiwie nyi waṟingyishi wafoi mbaṟe-i, luwikyie mbai orio ṟio lyilemeri, na wunyamaṟi wulya wokyeluwaṙa tapu. Lupfuṟukane kui wusimiri kulya iṟundenyi lyilyiṙambikye koṙu, 2 lochiambuya Yesu, ulya ekyewooka na iafutsia iiṙikyia lyaṙu. Ulya alekarishia mawawio ga halya msalabenyi. Kyipfa kya sia iya iweimmbeṙa, alekusaṟa maa ale kya sonu ya iwoogo msalabenyi-pfo. Na wulalu naṙamie kuwokonyi ko kulyoe ko kyiṙi kya mng'ano kya Ruwa. 3 Kusaṟenyi mnu mbonyi tsa ulya alekarishia iwingana lying'anyi mbaṟe-i lya walya wekyewuta sha wunyamaṟi. Koikyo maa mulaiṙikyie iloloma na ipfiiyo nyi mṙoe. 4 Mulandekapane shiṙa mṟasa samu ipusuke, mochiwingana na wunyamaṟi-pfo. 5 Lyingyi-se mulewaṙima shilya muleikyimbio, shekyeṙeṙa na nyoe cha iṙeṙa na wana, “Mono-ko, ulamine kyiyeri Ruwa akugalutsa mkaṟo yapfo, Maa ulaṙe iaṙanyia kyiyeri oe akuṟoṟoma. Kyipfa ulya Ruwa amkundi nekyemwilacha mkaṟo yakye. 6 Na nekyekapa orio mndu amwiṙikyie cha mana.” 7 Muwaṟi kyipfa kya iilacho mkaṟo, Ruwa nammbutie nyoe cha wana; kyipfa nyi mana uha awuye alekyemwilacha mkaṟo? 8 Kyasia kokooya mulawoṙe iilacho mkaṟo, kukyeri ṙombo lya woose, nyi lyo-ndu mochiwa wana wa nja, maa chi wana wa mka o wolyi-pfo. 9 Hamwi na isho luwewoṙe waawu waṙu wa iha wuyanenyi waleluilacha mkaṟo, na soe lukowaindia. 10 Kyasia chi nanga mnu ikaa wuchilyinyi wo Awu o mrima na iwaṙa moo? 11 Orio ngapo ikyeri kyindo kyekyeende sia-pfo, indi kya fowa; kyaindi kyiyeri kya numa yekyeendie walya wawatoṟishe nyi ngapo-yo ndunda tsa wusumganyi tsiwoṙe ufoṟo. 12 Koikyo goṟuonyi mawoko gailoloma na ndi tsiluoe tsiṙeṙema, 13 muachikyie maṙende ganyu njia tsigoṟotsu, kundu kyindo kyikyeri kyileeta kyilaṙetso, indi kyikyiṟo. 14 Pfulenyi kui wuragari iwaṙa ufoṟo na wandu woose, na wuele, wulya kulawoṙe mndu echiwona Mndumii alauwoṙe, 15 mochiambuya mnu mndu alauṟe isaṟia lya Ruwa. Na mndu oose alawe cha iṟa lyekyewawa, namulyise nyoe wukyiwa na ifanyiṟa mkaṟo ya wandu. 16 Kulawaṙe mndu mṟui maa alaowuye na iindia Ruwa, cha Esau, alekumba kyioṟa kyakye kya mana mmbele kyipfa kya kyelya. 17 Kyipfa muichi kye maa lyilya kyiyeri kya numa alekunda ioṟa mboṟa nalelego (kyipfa alewona ṙaawa lyeṙumbuya wunyamaṟi-pfo), maa chandu alepfula ṙaawa-lyo kui mcheṟeṟe. 18 Maa mulekooya fumvu lyeiṙima ipooyo-pfo, lyileaka moṙo, maa ipuchi lya njuu, na meema, na kyiwiṟi, 19 na ṟui lya iganda na ṟui lya maṙeṙo; galya walya waleicho waleterewa walawio kyindo kyoose kyingyi. 20 Kyipfa waleiṙima ikarishia kyindo kyilya walewio, “Maa indo lya saka lyikapaaya fumvu-lyo lyekapo na magoe.” 21 Na isho shilewono chandu shiwekyeri shindo sheowesha, mṟasa Mose kagamba, “Ngawoṙo nyi wuowu na iṙeṙema.” 22 Indi nyoe mukokooya fumvu lya Sion, na mṟi o Ruwa ai na moo, Yerusalemu ya ruwewu, kundu kuwoṙe shiku sha malaika, 23 kyisanzionyi na siṟi ya wandu wakyeri cha wana wambele wa Ruwa wawaṟeie ruwewu, na Ruwa moṙumbuo moondu o wandu woose, na mrima ya wandu wasumganyi wamarisie kyaro, 24 na Yesu alewika Mma Mhya, na samu yakye ilepusuka, yekyeonguo shindo shicha kuta iya ya Abelyi. 25 Ambuyenyi mulalege ulya ekyeonguo. Kyipfa kokooya walalekyia walya walelega ulya alewaikyimbia urukyenyi, ngoseṟa mnu lochikyia soe lukokushowa na ulya ekyeluikyimbia ai ruwewu-pfo. 26 Ulya ṟui lyakye lyileṙeṙemsha uruka kyiyeri kyilya; kyaindi wulalu nateṟia egamba, “Lyimwi-se ngyechiṙeṙemsha, chi uruka tikyi-pfo, indi na ruwewu taa.” 27 Kyaindi ṙeṙo lyilya, “Lyimwi-se,” lyaṟingyishia isamiṟo shilya sheiṙima iṙeṙemsho, cha shindo shilegumbo, kundu shindo shilechiiṙima iṙeṙemsho shikae. 28 Kyasia, cha kyipfa luiambilyia Wumangyi wulechiiṙima iṙeṙemsho, luwaṙe isaṟia, lyilya kyipfa kya ikyo luterewe Ruwa na imwindia kui njia yechimchihiṟa, hamwi na wupfereri na wuowu; 29 kyipfa Ruwa oṙu nyi moṙo okyerumatsa.
1 Ikundana cha wana wa mka lyikae ho. 2 Mulawaṙime iambilyia wayenu; kyipfa kui iwuta kuṙo wandu wengyi waleambilyia malaika kulawoṙe imanya. 3 Kumbuonyi walya wakyeri kyipfungonyi cha ilyi muwapfungye hamwi nawo; na iwo wailyiiyo mbaka, chandu na nyoe muilyiiyo mbaka. 4 Wandu woose wawone kye wolyi nyi kyindo kyicha, na mii ang'u mka alakuwinishe na wandu wengyi; cha kyipfa waṟui Ruwa nechiwaolotsia ngapo. 5 Mulawaṙe mkaṟo o kunda heleri; wenyi cha wandu walauṟie kyindo. 6 Cha kyipfa oe amonyi nagambie, “Ruwa nyi oe ekyengyitarama ngyechiowuo-pfo, mndu nechingyiwutia kyi?” 7 Kumbuonyi walya wawekyemusongoya, walemuongoya Ṙeṙo lya Ruwa; lyingyi-se, kui iambuya mnu mafurumionyi ga mkaṟo owo, oshenyi iiṙikyia lyawo. 8 Yesu Kristo nyi oe ulya, ukou na inu na mṟasa mlungana. 9 Maa mulaṟaisho nyi malosho ga mbaṟe tsingyi, na mayenu; kyipfa nyi kyicha mrima ukarisho kui isaṟia, maa chi kui shelya shilya walya waleyenda nasho walalewona kyiira-pfo. 10 Luwoṙe alyitaṟe walya wekyeṟundia tengo lyilya walawoṙe momu o ilya shindo shayo. 11 Kyipfa shindo shilya samu yasho ileendo nyi Mkohanyi ang'anyi kuta woose na handu haele kyipfa kya wunyamaṟi, kyaindi nyama tsa shindo-sho tsekyeṙasio nja ya handu wandu wekyekaa. 12 Kyipfa kya ikyo, Yesu na oe, kundu nailyishe wandu kui samu yakye amonyi, nalelyiso wukyiwa nja ya mṟi. 13 Kyasia lufume luyende kokye nja ya handu wandu wekyekaa, na imino hamwi na oe. 14 Kyipfa iha luwoṙe mṟi ochikaa ho mlungana-pfo, indi luipfula mṟi ulya uicha. 15 Kyasia, kui njia yakye oe, luenengye Ruwa kyiṙaso kya kyiṟumi mlungana, maṙeṙo gaṙu nyi kyienengo kyaṙu. 16 Kyaindi mulawaṙime iwuta shindo shicha na ikaa handu hamwi; kyipfa shienengo cha isho nyisho shekyechihiṟa Ruwa. 17 Indienyi walya wekyemusongoya, na iwapfereria; kyipfa wo wekyelaa kyiṙombo kyipfa kya mrima yanyu. Kyipfa wechiwia Ruwa mbonyi tsa wuṟundi wowo, kundu kye wawute kuṙo kui sia maa chi kui fowa-pfo; kyipfa kyiwechimuenenga nyoe kyiira-pfo. 18 Luterewienyi; kyipfa luiṙikyie kye luwoṙe makusaṟo mecha mrimenyi, lukundi iwaṙa mkaṟo mcha shindonyi shoose. 19 Na inyi ngyimuterewa ngoseṟa mnu iwuta isho kundu ngyiwiyiṟo na konyu iwinyi. 20 Kyasia, Ruwa o ufoṟo aleende-se iwuka ko wapfu Mlyisi Ang'anyi o moondo, kui samu ya mma o mlungana, oe Mndumii oṙu Yesu, 21 namuenengye nyoe iafutsia kyaro orio iṟundenyi lyicha, muiṙime iwuta shilya akundi; na oe echiwuta mrimenyi koṙu kyilya kyichihiṟie mbele yakye, kui Yesu Kristo; kyiṟumi kyikae na oe mlungana na mlungana. Amen. 22 Kyaindi ngyimuterewa, wana wa wama, muaṙanyie necha ulogo-lu lo iikyimbiana; kyipfa ngamuṟeia paruo-i kui maṙeṙo maangu. 23 Manyenyi kye mono-wama oṙu Timoteo ammbuto kyipfungonyi; ulya, kacha iwinyi, ngyechiwonana na nyoe hamwi na oe. 24 Iṟikyiṟenyi woose wekyemusongoya nyoe, na wandu wa Ruwa woose; iwo wakyeri wa Italyia wamuiṟikyiṟa. 25 Isaṟia lyikae na nyoe moose.
1 Yakobo, mtumo o Ruwa, na o Mndumii Yesu Kristo, ko wandu woose wa Ruwa wanyanyaṟikyie ipfo na ipfo; ngamuiṟikyiṟa. 2 Wana wa wama wako, talenyi kye nyi sia tikyi, mukooloka shiyeshonyi sha orio mbaṟe; 3 mochimanya kye iyesho lya iiṙikyia lyanyu lyekyeende wusimiri. 4 Wusimiri wuwaṙe iṟunda lyiafukyie, muiṙime iwa wandu muafutsie kui maṟunda na wuyendelyi wucha. 5 Kyaindi mndu o konyu kauṟa wuṟango, naterewe ko Ruwa, ekyeenenga woose kui ilekyia, maa ekyeṟoṟoma-pfo; na oe nechienengo. 6 Indi naterewe kui iiṙikyia, kulawoṙe ikapa kawi maa ale, kyipfa mokapa kawi nyi kyimwi na mṟinga oiṙa ipalyipalyinyi ukoṙoo nyi mkuma, na iwiyitso kunu na kunu. 7 Kyipfa mndu cha icho alakusaṟe kye neambilyia kyindo ko Mndumii. 8 Mndu o makusaṟo galagoṟokyi nekyekapa kawi njienyi tsakye tsoose. 9 Kyaindi mono-wama alawoṙe kyiṟumi kya maṟunda nachihiyo cha kyipfa naenengo kyiṟumi; 10 na mnjama nachihiyo kyipfa nasotso; cha kyipfa nechiṙeka cha kyiwaṟo kya maṟa. 11 Kyipfa mnengyeṟi okyeṙo na mrikye, ukoumiṟa iṟa, na kyiwaṟo kya iṟa-lyo kyekyeoloka, na wucha wolyo woose wokyenyamaṟika. Nyi wuṙo mnjama echirumatso njienyi tsakye tsoose. 12 Agusu mndu ekyekarishia shiyesho; cha kyipfa kamwiṙikyio neambilyia wori wo moo, wulya Mndumii aṟeyeṟie walya wamkundi. 13 Kyiyeri mndu ayesho, alagambe, “Ngyiyesho nyi Mndumii;” kyipfa Ruwa eiṙima iyesho nyi wunyamaṟi, maa oe amonyi ekyeyesha mndu-pfo. 14 Kyaindi orio umwi nekyeyesho nyi lango tsakye amonyi na kunu tsechimkuruo na imlemba. 15 Numa ya iho lango ngyiwicho tsekyeende wunyamaṟi, na wunyamaṟi wukomng'ana wokyeende upfu. 16 Wana wa wama wako wakunde, mulalembo. 17 Orio ienengyia lyikyeri lyicha, na orio kyindo kyekyewuto kyiafutsie, kyekyewuka wuye, kyekyesoka ko Awu agumbie mnengyeṟi, mori na nyenyeri. Kokye kuwoṙe iilachika lyekyeende meema-pfo. 18 Kui ikunda lyakye amonyi nalelufee kui Ṙeṙo lya loi, luwe cha wana wawagumbe nyi oe. 19 Isho muichi, wana wa wama wako wakunde. Kyasia orio mndu nawe mwanguhu iaṙanyia indi chi mwanguhu iṙeṙa maa ikapo nyi nyashi-pfo; maa moṙeṙa-pfo. 20 Cha kyipfa nyashi ya mndu yekyeṟunda wusumganyi wo Ruwa-pfo. 21 Koikyo wikyienyi kuleshi ukoe loose na wuwicho wuingyikyie, na iambilyia kui wuhoo Ṙeṙo lyilya lyilewooyo konyu, lyechiiṙima ikyiṟa mrima yanyu. 22 Kyaindi wenyi wandu mokyewuta kyilya mokyeicho, maa chi wandu weaṙanyia tikyi kunu mochikulemba muwenyi-pfo. 23 Cha kyipfa mndu kawa moaṙanyia tikyi maa ekyewuta kyilya aiicho-pfo, mndu-cho nyi kyimwi na mndu aikuambuya kyiyewonyi. 24 Kyipfa nekyekuambuya, numa kayenda, cha ilyi kawaṙima chandu akyeri. 25 Kyaindi mndu moambuya mawawaso gaafutsie galakyeri ga wutumo, na ikaa kyiiṙi kyago, alawe mndu ekyeaṙanyia na iwaṙima indi mowuta kyilya aiicho, icho nechiwa agusu kyiiṙi kya iwuta lyakye. 26 Mndu kakusaṟa kye nawoṙe mwiṙikyie, indi ekyeringa ulumi lokye-pfo, kunu echilemba mrima okye, mwiṙikyie o mndu-cho chi kyindo-pfo. 27 Mwiṙikyie mcha ulawoṙe kyindo kyifanyi mbele ya Mndumii Ruwa nyi ichu: indesaia ngoṙa na wakusu wukyiwenyi wowo, na ikushowa na wuyana kulawoṙe wunyamaṟi.
1 Wana wa wama wako, iiṙikyia lya Mndumii oṙu Yesu Kristo, Mndumii o mng'ano, maa mulawe nalyo kui ikundia wandu. 2 Kyipfa mndu aṟee peti ya sahapu na nguwo ngyicha kaiṙa na sinagoginyi lyanyu na numa ya iho mkyiwa aṟee masaṟa kaiṙa; 3 na nyoe mukokundia ulya aṟee nguwo ngyicha, na immbia, “Ṙamia iha handu hecha;” na iwia mkyiwa ulya, “Goṟoka halya,” ang'u “Ṙamia maṙendenyi gako,” 4 ngyesa mowuta uwicho mrimenyi konyu mukowa weanduya wawoṙe makusaṟo mawicho-pfoe? 5 Wana wa wama wako wakunde, aṙanyienyi, “Ngyesa Ruwa alesambuṟa wakyiwa wa wuyana wawe wanjama wa iiṙikyia na weoṟa Wumangyi aleteṟia wamkundi-pfoe?” 6 Indi nyoe mulemina mkyiwa. Ngyesa wanjama chiwo waimulyisa wukyiwa na imuṙuo kyianduyonyi-pfoe? 7 Chiwo wailahia rina lyilya lyicha muleenengo-pfoe? 8 Kyaindi mukoafutsia iwawaso lyilya lya Wumangyi chandu kyikyiṟeie, “Kunda momṟasa opfo cha iyoe kumonyi,” muiwuta necha. 9 Indi mukokundia wandu, muiwuta wunyamaṟi na ianduyo nyi uwawaso kye mui wanyamaṟi. 10 Kyipfa mndu oose echiosha mawawaso goose, indi kakapa ṙende kyindonyi kyimwi, naṙeko kyiiṙi kya goose. 11 Cha kyipfa icho alegamba, “Ulaṟuguye na Ulaṟuguyo,” nalewegamba taa, “Ulawaage.” Kyasia kokooya ulaṟuguya ang'u iṟuguyo, kyaindi kowaaga, nofunja uwawaso. 12 Ṙeṙenyi na iwuta cha wandu wechianduyo kui uwawaso lulawoṙe wutumo. 13 Kyipfa Ruwa echiwoṙo nyi fowa mrimenyi kyiyeri aianduya mndu alekyewoṙo nyi fowa mrimenyi-pfo. Kyipfa iwoṙo nyi fowa mrimenyi lying'anyi kuta ianduya. 14 Wana wa wama wako, kuwoṙe kyiira kyiha, mndu kagamba nawoṙe iiṙikyia, kyaindi awoṙe mawuto-pfo? Ngyesa iiṙikyia lyilya lyechiiṙima imkyiṟa? 15 Kokooya mono-wama o kyisoṟo ang'u o kyika namkuuye na awoṙe kyindo kyelyio-pfo, 16 na mndu o konyu kawawia, “Yendenyi na ufoṟo, mundeoṙa moṙo na iiguṙa,” kyaindi alawaenengye sha mmbiu, kyawaṙa kyiira kyiha? 17 Nyi wuṙo na iiṙikyia, lyilandewaṙe mawuto, lyapfa kyiiṙi kyalyo. 18 Kyaindi mndu negamba, “Iyoe nuwoṙe iiṙikyia, na inyi ngyiwoṙe mawuto. Ngyiloṟa iiṙikyia lyapfo kulawoṙe mawuto, na inyi ngyekuloṟa iiṙikyia lyako kui mawuto gako.” 19 Iyoe nuiṙikyie kye Ruwa nyi umwi; nowuta necha. Masatana nago gaiṙikyie na iṙeṙema. 20 Kyaindi nukundi imanya, iyoe mndu ulai kyindo, kye iiṙikyia lyilawoṙe mawuto lyiwoṙe ndunda-pfo? 21 Ngyesa awu oṙu Abrahamu aletalyio kye nawoṙe wusumganyi kui mawuto, lyilya alewuta Isakyi mono-kye mesenyi ya Mndumii-pfoe? 22 Ommbona kye iiṙikyia lyilewuta maṟunda hamwi na mawuto gakye, na kye iiṙikyia lyilya lyileafutsio kui njia ya mawuto galya. 23 Shiṟeio shilya shikaafutsio; shiṟeio shilegamba, “Abrahamu naleiṙikyia Ruwa, kyikatalo kokye kye nyi wusumganyi;” na oe nalelago mbuya ya Ruwa. 24 Muwonyi kye mndu nekyetalo kye nawoṙe wusumganyi kui mawuto gakye; chi kui iiṙikyia lyimonyi-pfo. 25 Nyi wuṙo na Rahabu ulya awei iṟai. Ngyesa aletalo kye nawoṙe wusumganyi kui mawuto, lyilya aleambilyia wandu walya waweowelyia mbonyi tsa Waisiraelyi, kawafumiṟia nja kui njia ingyi-pfoe? 26 Kyipfa chandu kyikyeri kye mmbiu ulawoṙe mrima upfiie, nyi wuṙo na iiṙikyia lyilawoṙe mawuto lyipfiie.
1 Wana wa wama wako, mulawe walosha wafoi, muichi kye soe walosha lochiambilyia ianduyo lying'anyi kuta. 2 Kyipfa lokyekapa ṙende soe loose shindonyi shifoi. Mndu alekyekapa ṙende kyiiṙi kya iṙeṙa, icho nyi mndu aafutsie, echiiṙima itirimisha mmbiu okye oose cha kui kyindo kyilya kyekyetirimisha shindo. 3 Ambuyenyi, lokyewika kyindo kyetirimisha shindo maṙumbunyi ga farasi, kundu tsiluindie, na kuṙo lukoweṟuo mmbiu yatso yoose. 4 Lyingyi-se ambuyenyi ngalawa; maa chandu tsing'anyi cha kyikyi, na iṙoo nyi shiwiṟi shing'anyi, tsekyeweṟutso nyi kyindo kyitung'tu kyeweṟutsa shindo, tsikayenda kundu koose ulya ekyetsiṙuo akunda tsiyende. 5 Na wuṙo taa ulumi nyi kyiwungo kyitutu, nalo lokyekushela ikushela lying'anyi. Ambuyenyi chandu moṙo mtung'tu okyekoṟa nguṙu ing'anyi mnu. 6 Na ulumi nyi moṙo; wuyana wulya wo wunyamaṟi, ulumi lulya, lulewiko shiwungonyi shaṙu, nalo nyilo lokyefanyiṟa mmbiu oose. Lokyeatsa moṙo ulya uwukyie Ngyehenenyi na ilurumatsa piu. 7 Kyipfa orio mbaṟe ya indo lya saka, na ya shileye, na ya shindo shekyekukuruo na ndewu, na ya shindo shikyeri ipalyipalyinyi, shekyeiṙima ichilyio, nasho shilemchilyio nyi wandu. 8 Indi ulumi kuwoṙe mndu eiṙima iluchilyia-pfo; nyi wuwicho wulekyetsia, wuichuo wuṟoi wokyeende upfu. 9 Kui ulumi lokyeṟumisha Ruwa Awu oṙu, na kui ulumi lokyesesa wandu walegumbo kui fana ya Ruwa. 10 Kyiiṙi kya ṙumbu lyilya lyilya kokyewuka mboṟa na seso. Wana wa wama wako, kyiwaṟi mbonyi-tso tsiwe kuṙo-pfo. 11 Ngyesa, shoka ṟukonyi lyimwi yechiiṙima iwuta mṟinga okyeloṙa na mṟinga okyesuka? 12 Wana wa wama wako, ngyesa, mfumu ochiiṙima iwika seituni, ang'u msabibu iwika nduo? Nyi wuṙo shoka yechiiṙima iwuta mṟinga okyesuka na mṟinga okyeloṙa-pfo. 13 Nyi wui awoṙe wuṟango na imanya konyu? Naloṟe maṟunda gakye kui wuyendelyi wokye mcha, wuhoonyi wo wuṟango. 14 Kyaindi mukowaṙa wunyeng'i wo nyashi na maluyano mrimenyi konyu, maa mulakuiring'ishe, maa mulaṙeṙe wongo kui iwingana na loi. 15 Wuṟango-wo chi wulya wuwukyie wuye-pfo, indi nyi wo wuyana, wo mbaṟe ya kyimndu na Satana. 16 Kyipfa handu hawoṙe wunyeng'i na maluyano, nyi ho-ndu hawoṙe kyituṟu, na orio kyindo kyiwicho. 17 Kyaindi wuṟango wuwukyie wuye, kya kuwooka wuwucha, ngoseṟa nyi wo ufoṟo, nyi wo wuhoo, wukuṟeyeṟie iaṙanyia maṙeṙo ga wandu, wuichuo isaṟia na ndunda ngyicha, wuwoṙe wuṟiingyi maa wuwoṙe wukulembecheṟi-pfo. 18 Na ndunda tsa wusumganyi tsekyeṙongo ufoṟonyi na walya wekyewuta sha ufoṟo.
1 Shiṙa nyi kwi shiwuka, na ngapano tsikyeri konyu nyi kwi tsiwukyie? Chi kunu langonyi tsanyu tsekyeende shiṙa shiwungonyi shanyu-pfoe? 2 Muilanga maa muwoṙe kyindo-pfo; muiwaaga na inyeng'a, maa mochiiṙima iwona-pfo. Muiende shiṙa na ikapana, maa muwoṙe kyindo-pfo kyipfa muiterewa-pfo. 3 Muiterewa mulawone cha kyipfa muiterewa uwicho, kundu muṟunde nasho ko lango tsanyu. 4 Lanyoe waṟui, muichi kye iwaṙa mbuya na wuyana nyi iwaṙa kyituwa na Ruwa-pfoe? Kyasia orio mndu akundi iwaṙa mbuya na wuyana nekyewa nawaṙa kyituwa na Ruwa. 5 Ang'u mokusaṟa kye shiṟeio shiṙeṙa wulya? Mumuyo-cho ekyekaa mrimenyi koṙu chi nekyelulanga mṟasa iluwaṙia wunyeng'i-pfoe? 6 Kyaindi nekyelutarama soe isaṟia lyiengyeṟikyie; koikyo nekyegamba, “Ruwa nekyewingana na walya wekyekuṙosa, indi nekyeenenga isaṟia wekyekutitiṟa.” 7 Kyasia indienyi Ruwa. Legenyi Satana, na oe nemṙicha. 8 Tikyirenyi ko Ruwa, na oe netikyira kufuhi na nyoe. Sanjenyi mawoko ganyu kyimṟumoe, nyoe wanyamaṟi, na isanja mrima yanyu nyoe wakulembecheṟi. 9 Sokyionyi nyi fowa na ikapa ṟanyi na ifiiṟa. Iseka lyanyu lyiilachikye lyiwe ikapa ṟanyi, na ichihiyo lyanyu lyiilachikye lyiwe iwihiyo. 10 Kutitiṟenyi ushangunyi lo Ruwa kyiyeri muiterewa na oe nemuenenga kyiṟumi. 11 Wana wa wama, maa mulairiane wongo. Moiria mono-wamae wongo, ang'u ianduya mono-wamae, nekyeiria wongo na ianduya uwawaso. Kyaindi koanduya uwawaso, noṙa iindia na iwooka ianduya. 12 Nyi Ruwa amonyi tikyi ekyewika uwawaso na nyi oe moanduya wandu. Nyi oe echiiṙima ikyiṟa na irumatsa. Iyoe nyi wui uianduya mndu ungyi? 13 Kyasia-ng'u, nyoe mokyegamba, “Inu ang'u ngama luiṙa na mṟinyi mlyiwe na ikaa pfo maka umwi, na ikapa mbucha na iwona kyiira;” 14 kyaindi muichi kyindo kyiwutika ngama-pfo. Moo onyu nyi kyikyi? Nyoe nyi kyimwi na mtsu okyewono kyiyeri kyifuhi, numa ulawono-se. 15 Kyiwechia igamba, “Mndumii kakunda, lulandepfe lochiwika kuṙi ang'u kuṙi.” 16 Kyaindi wulalu muikuiring'isha makushelonyi ganyu. Ikushela lya mbaṟe-i iyi nyi lyiwicho. 17 Kyasia ulya aichi iwuta mecha, indi alawute kuṙo, icho nanyamaṟia Ruwa.
1 Kyasia-ng'u, nyoe wanjama! Fiiṟenyi, mugambe kyelewui kyipfa kya matuuro gaicha na konyu. 2 Masaa ganyu gamaporu, na nguwo tsanyu tsingyilye nyi mashinu. 3 Sahapu tsanyu na shindo shanyu sha woguru wung'anyi shikyindie ukoe, na ukoe-lo lomuṟingyishia, na mmbiu yanyu yechinyamaṟika cha ilyi nyi ikoṟo nyi moṙo. Mulekooma kyiseyesoe mfirinyi ya mafurumionyi. 4 Kumbuonyi wori wo waṟundi walesambuo shilyimu shanyu mulalewataa. Aṙanyienyi chandu waifiiṟa. Kyifiiṟo kyawo kyileaṙanyio nyi Ruwa. 5 Ikaa lyanyu wuyanenyi nyi lya ichihiyo na ikushela. Mulekuwegia cha mfiri ulya Ruwa echianduya wandu woose. 6 Muleanduya mndu msumganyi na immbaaga, maa chandu alaiwingana na nyoe. 7 Koikyo, wana wa wama, karishienyi, mṟasa icha lya Mndumii. Ambuyenyi chandu mṙemi ekyeweṙelyia shilyimu sha woguru wung'anyi. Nekyekarishia kyipfa kyasho mṟasa mvuo tsa kuwooka na tsefurumia tsikape. 8 Na nyoe karishienyi muṟingyishie mrima yanyu, cha kyipfa icha lya Mndumii lyatikyira kufuhi. 9 Wana wa wama, maa mulanunuwiane, mulacheanduyo. Ambuyenyi moanduya nagoṟokyi mbele ya moongo. 10 Wana wa wama wako, weonguo shisuku walya waleende ndumo ya Ruwa nyi mfano mcha o wandu walekarishia matuuro. 11 Ambuyenyi, lokyegamba wagusu walya walesimiria. Muleicho mbonyi tsa wusimiri wo Yobu, mulewona mafurumionyi ga Mndumii kye Mndumii nyi nawoṙe isaṟia na iwoṙo nyi fowa mrimenyi. 12 Kyaindi ngoseṟa ya shoose, wana wa wama wako, mulalye nyamu, kui Ruwewu maa kui uruka; maa kui mbaṟe ingyi yoose; indi yee yanyu iwe yee, na ote yanyu iwe ote, kundu Ruwa alamuanduye. 13 Kokooya mndu o konyu naolokyio nyi fowa naterewe ko Ruwa. Kokooya nawoṙe mrima mkyesi naimbe shiimbo sheana. 14 Kokooya mndu o konyu naluoe nalage wameeku wa siṟi; wamterewie na imshia mafuṙa kui rina lya Mndumii. 15 Kokooya wameeku-wo waiṙikyia kye Ruwa neaṙanyia kyiterewo kyawo, ulya aluoe nechikyiṟo. Ruwa nemmbiyiṟia pfinya maa kokooya anyamaṟie nechihooṟio. 16 Tochianenyi ngyuunyamaṟi tsanyu nyoe wenyi ko wenyi, na iterewiana, muiṙime ikyiṟo. Iterewa lya mndu msumganyi lyiwoṙe kyiira mnu. 17 Elyiya nawei mndu o mbaṟe imwi cha soe, kapfuṟukana iterewa ko loi kundu mvuo ilakape, na mvuo ilekapa ko maka iṟaṟu na mori iṟandaaṟu-pfo. 18 Katerewa-se na mvuo tsikakapa na shilyimu shikaṙo. 19 Wana wa wama wako, kokooya mndu o konyu aṙetsa njia ya wukyiṟo, na mndu ungyi kamtarama iwuya; 20 manyenyi kye ulya motarama mṙeko iwuka njienyi ya wuṙetsi, nechikyiṟa mrima okye na upfu, na ishikyia wuingyi wo ngyuunyamaṟi.
1 Inyi Petiro, ngyikyeri msu o Yesu Kristo, ngaṟeia paruo-i ko wasambuṟe wanyanyaṟikyie ipfo na ipfo, wekyekaa cha wayenu ngyuurukyenyi tsa Ponto, na Galatia, na Kapadokyia, na Asia, na Bitinia. 2 Chandu Ruwa Awu alesonguo imumanya kui imuilyisha nyi Mumuyo, mṟasa mukoiṙima iindia na inyanyatsio samu ya Yesu Kristo. Isaṟia na ufoṟo shiengyeṟo konyu. 3 Ruwa naṟumisho, Awu o Mndumii oṙu Yesu Kristo, ulya kui isaṟia lyakye alelufee lya kawi kundu luwone ikusuria lyiwoṙe moo kui iṟuka lya Yesu Kristo iwuka ko wapfu. 4 Luwone na kyioṟa kyilekyenyamaṟika, kyilawoṙe ukoe, kyilekyesia, kyilekoomo ruwewu kyipfa kyanyu. 5 Na nyoe mokyeringo nyi pfinya tsa Ruwa kui njia ya iiṙikyia mṟasa muiṙime iwona wukyiṟo wuwuṟeyeṟe wuloṟo kyiyeri kya mafurumionyi. 6 Muichihiyo mnu kyiyeri-kyo, maa chandu wulalu ko kyiyeri kyifuhi, kokooya kyiwaṟi iwa kuṙo, mowoṙo nyi fowa mrimenyi kui shiyesho sha mbaṟe tsifoi. 7 Kundu kye iyesho kui iiṙikyia lyanyu, lyilya lyiwoṙe woguru wung'anyi kuta sahapu yekyenyamaṟika, maa chandu sahapu-yo yekyeyeṟo kui moṙo; muambilyie iṟumisho na kyiṟumi mfiri ulya Yesu Kristo echiloṟo. 8 Na oe mumkundi, maa chandu mulammbonyi; ulya maa chandu mulammbonyi wulalu, mumwiṙikyie; na ichihiyo mnu, kui sia ilekyewono, iwoṙe kyiṟumi. 9 Kyiiṙi kya ichihiyo lyanyu wulalu Ruwa naimukyiṟa, ikyiṟo lyikyeri ndunda tsa iiṙikyia lyanyu lyikyeri kui Yesu Kristo. 10 Ko mbonyi tsa wukyiṟo-wo weonguo shisuku walepfula-pfula na isoruo-soruo, walya waleonguo shisuku ko mbonyi tsa isaṟia lyechimukooya nyoe. 11 Wakapfula nyi kyiyeri kyiha, na nyi kyiyeri kya mbaṟe iha kyileikyimbo nyi Mumuyo o Kristo awekyeri mrimenyi kowo, ulya alesonguo iṟingyishia matuuro Kristo echienengo, na kyiṟumi kyekokyikyeri pfo numa ya isho. 12 Wakaloṟo kye chi kyipfa kyawo wawenyi-pfo, indi kyipfa kyanyu waleṟunda ipfo shindonyi, shilya wulalu shalosho konyu na walya walemuongoya nyoe Ndumi Ngyicha kui Mumuyo Mweele aleṙumo iwuka ruwewu. Shindo-sho malaika walangyie ishimanya. 13 Koikyo kuṟeyeṟenyi na iwaṙa meena; mochiweṙelyia nakamwi isaṟia lyilya mochiwona kyiyeri Yesu Kristo echiloṟo. 14 Cha wana wa wuindi mulakufananyishe na lango tsanyu tsa mawookyionyi, tsa wutondo wonyu; 15 indi chandu ulya alemulaga nyoe ai mweele, nyoe na nyoe wenyi waele mkaṟonyi onyu oose. 16 Cha kyipfa kyikyiṟeie, “Mochiwa waele kyipfa inyi ngyimweele.” 17 Na kokooya mokyemlaga Awu, ulya ekyeanduya wandu kulawoṙe ikundia, iṙuana na iṟunda lyakye, chumienyi kui wuowu kyiyeri kya ikaa lyanyu iha cha wayenu. 18 Na nyoe manyenyi kye mulekyiṟo chi kui shindo shekyenyamaṟika cha heleri ang'u sahapu-pfo; muiṙime iwuka mkaṟonyi onyu ulawoṙe kyiira muleuambilyia ko waku wanyu; 19 indi kui samu ya woguru, cha ya kyiondo kyilawoṙe tewe, ya Kristo. 20 Na oe nalemanyika loi wookyia mawookyionyi, wuyana wulandegumbo; kyaindi naleloṟo mafurumionyi ga shiyeri kyipfa kyanyu. 21 Ulya kui oe mowa wandu waiṙikyie Ruwa, alemṟutsa iwuka ko wapfu kamuenenga kyiṟumi; mṟasa iiṙikyia lyanyu na ikusuria lyanyu lyiwe ko Ruwa. 22 Mukomuilyisha mrima yanyu kui iindia wuloi, mṟasa iwaṙa ikundana cha wana wa wama kulawoṙe wukulembecheṟi, kyasia pfuṟukanenyi ikundana kui mrima. 23 Cha kyipfa muwafee lya kawi; chi kui mbeu yekyenyamaṟika-pfo indi kui iya ilekyenyamaṟika; kui Ṙeṙo lya Ruwa lyiwoṙe moo, lyekyekaa ho mṟasa mlungana. 24 Kyipfa, “Mmbiu oose nyi cha maṟa, na mng'ano ocho nyi cha kyiwaṟo. Maṟa gekyeuma na shiwaṟo shekyeoloka. 25 Indi Ṙeṙo lya Mndumii lyechikaa mlungana.” Na Ṙeṙo-lyo nyi mbonyi tsilya ngyicha tsileongoyo konyu.
1 Kyasia, ṙenyi wuwicho na ngyeṟo, na wukulembecheṟi na wunyeng'i na iiria wengyi shindo sha wongo. 2 Chandu wana waionga wakundi maruwa ga wamawo, muwaṟi orio mfiri ilanga kyelya kya mrima kyilakyisanze-sanze na kyindo kyingyi. Mukolya kyelya-kyo kya mrima moching'ana na ikyiṟo, 3 kokooya mosonja kye Mndumii nyi monyi isaṟia. 4 Yendenyi kokye oe, ai igoe lyiwoṙe moo, lyilelego nyi wandu, indi ko Ruwa nyi lyilyisambuṟe, lyiwaṟi iindio. 5 Na nyoe, cha magoe Ruwa agaenengyie moo, muwawikye muwe numba ya Mumuyo, wukohanyi wuele, muwute shiṙaso sha mrima, shichihiṟie Ruwa, kui njia ya Yesu Kristo. 6 Cha kyipfa kyikyiṟeie shiṟeionyi shiele, “Ngawika kulya Sion igoe lying'anyi lya ndumbenyi, lyilyisambuṟe, lyiwaṟi iindio, na orio mndu amwiṙikyie echirigo nyi sonu-pfo.” 7 Kyasia, iindio-lyi nyi konyu nyoe muiṙikyie. Indi ko walya walaiṙikyie kyikyiṟeie, “Igoe lyilelego nyi wewika numba, lyawa igoe lying'anyi lya ndumbenyi.” 8 Lyingyi-se, “Ilyi nyi igoe lyeenenga wandu ikapa ṙende, na iṟaṟa lyeolotsa wandu.” Cha kyipfa kui Ṙeṙo lyilya wekyekapa ṙende, walalyiiṙikyie nawo walewiko ho kundu waambilyie shindo sha mbaṟe-yo iyo. 9 Indi nyoe nyi kyishari kyisambuṟe, wukohanyi wo kyimangyi, isanga lyiele, wandu wa wuchilyi wo Ruwa, muiṙime ionguo mbonyi tsa mawuto gakye ga maṟiyisho. Ulya alemulaga muwukye meemenyi muiṙe na ngyeelenyi yakye ya maṟiyisho. 10 Nyoe ipfo mawookyionyi muwei chi isanga-pfo, kyaindi wulalu nyi isanga lya Ruwa; mukyeri wandu mulawoṙe isaṟia, indi wulalu mowona isaṟia. 11 Wakunde, ngyimuterewa cha wandu waiiṙa na wakyaro, lekanenyi na lango tsa mmbiu tsekyewingana na mrima. 12 Muwaṙe mkaṟo mcha kyiyeri mukyeri na walya walaiṙikyie Yesu, kundu kokooya wekyemuiria kye mowuta shindo shiwicho, wakaambuya mawuto ganyu mecha, waṟumishe Ruwa kyiyeri-kyo Yesu echicha lya kawi. 13 Oshenyi orio kyindo walya wawoṙe wuchilyi wagamba, kyipfa kya Mndumii. Kokooya nyi mangyi, muindienyi cha mndu awoṙe wuchilyi wung'anyi. 14 Kokooya nyi wasongoru waindienyi cha wandu Ruwa awaṙumie itaa kyiṟaache walya wekyewuta shindo shiwicho na iṟumisha walya wekyewuta shindo shicha. 15 Cha kyipfa nyisho shindo Ruwa akundi. Kye kui iwuta shindo shicha mushingye maṙumbu ya wutondo ga matondo. 16 Cha wandu walawachilyie nyi kyindo, kyaindi walekyekusuria ikyo kui iṟika wuwicho, indi cha waṟundi wa Ruwa. 17 Indienyi wandu woose. Kundenyi woose waiṙikyie Yesu. Terewenyi na iowuo Ruwa. Enengyenyi mangyi kyiṟumi. 18 Lanyoe waṟundi, indienyi wandumii wanyu kui wuowu wung'anyi. Chi walya wawecha na wahoo tupu-pfo, indi maa walya walang'a. 19 Kyipfa iwu nyiwo wucha wukundio, mndu echikarishia fowa kui ikumbuo Ruwa, kyiyeri alyiso wukyiwa kui ionio. 20 Cha kyipfa nyi kyiṟumi kyiha ikarishia? Nyi ilyi monyamaṟa na ikapo ngofi? Kyaindi ikarishia, kyiyeri mowuta shindo shicha na ilyiso wukyiwa, iwu nyiwo wucha wuwukunde mbele ya Ruwa. 21 Cha kyipfa nyiwo mulelagio; kyipfa Kristo na oe nalelyiso wukyiwa kyipfa kyanyu, kamuṙeea mfano, muoshe ndifo tsakye. 22 Oe alenyamaṟa, maa iwaṙa ngyeṟo-pfo. 23 Oe kyiyeri alelahio, alelahia-pfo; kyiyeri alelyiso wukyiwa, aletaa kyiṟaache-pfo; indi nalekuṙambika ko ulya ekyeanduya kui wusumganyi. 24 Oe amonyi naleṙuo ngyuunyamaṟi tsaṙu mmbiunyi kokye msalabenyi o wunyamaṟi na ikaa chandu Ruwa akundi; kyipfa Kristo alekapio msalabenyi nyoe mowaṙa moo o kyimrima. 25 Cha kyipfa muweiṙeka cha moondo; kyaindi wulalu mowiyilyia Mlyisi na Moambuya mrima yanyu.
1 Nyoe waka, indienyi wamii wanyu; kundu kokooya kuwoṙe walaiṙikyie Ṙeṙo, waiṙime ilyiiṙikyia kui mkaṟo ya waka wawo kulawoṙe igamba kyindo; 2 wechiambuya mkaṟo onyu mcha, na o wuowu. 3 Ikuchopa lyanyu, lyilawe ikuchopa lya kyanja, cha ioka njui, iṟaa sahapu na iṟaa nguwo. 4 Indi lyiwe wucha wo mrimenyi wulekyewono; shindonyi shekuchopa shilekyenyamaṟika; wucha wo mrima o wuhoo na wuramiri, wuwoṙe woguru wung'anyi ushangyunyi lo Ruwa. 5 Kyipfa kuṙo nyi wuṙo walekuchopa waka waele wa kacha, walekusuria Ruwa, na iindia wamii wawo. 6 Chandu Sara aleindia Abrahamu, kamlaga Mndumii; na nyoe nyi wana wakye, kyiyeri mowuta shindo shicha, maa muleowesho nyi wuowu woose-pfo. 7 Nyoe wasoṟo, kaenyi na waka wanyu kui wuṟango, muichi kye mka nyi kyiiya kyifafa; na muwe cha weoṟa hamwi na isaṟia lya moo, kundu iterewa lyanyu lyilashingyio nyi kyindo. 8 Ulogo lo furumia nyi ilu, muwaṙe makusaṟo gamwi, mukyeri wandu wekyewoniana wukyiwa, wakundanyi cha wana wa mka, mochiwihiyo kyipfa kya wukyiwa wo mndu ungyi, wapfereri. 9 Wandu mulekyetaa kyiṟaache ang'u ilahia ulya amulahia indi wandu wekyewikyia mboṟa; cha kyipfa isho nyisho mulelagio kundu muoṟe mboṟa. 10 Cha kyipfa, “Ulya akundi ikaa na sia, na iwaṙa mfiri ngyicha, naringye ulumi lokye lulaṙeṙe shindo shiwicho, na mshimbo yakye ilaṙeṙe ngyeṟo. 11 Na naṙe mawicho, nawute shicha, napfule ufoṟo mnu. 12 Kyipfa meso ga Mndumii gekyeambuya wasumganyi, na maṙwi gakye gekyeaṙanyia shiterewo shawo. Indi Ruwa akundi wekyewuta mawicho-pfo.” 13 Na nyi wui echimmbutia kyindo kyiwicho, kokooya mopfuṟukana iwuta shindo shicha? 14 Kyaindi kokooya molyiso wukyiwa kyipfa kya iwa wasumganyi muwoṙe sia ing'anyi. Maa mulaowuo iowesha lyawo, maa mulaiṟewe mrimenyi; indi ilyishenyi Kristo Mndumii mrimenyi konyu. 15 Mukuṟeyeṟe orio mfiri igaluo orio mndu ammbesa mbonyi tsa ikusuria lyikyeri mrimenyi konyu; kyaindi kui wuhoo na wuowu. 16 Na nyoe muwaṙe makusaṟo mecha mrimenyi, kundu orio kyindo mochiirio, warigo nyi sonu walya wekyegamba kye mkaṟo onyu ummbicho maa chandu mulandewute kyindo kyoose kyiwicho. 17 Kyipfa nyi nanga ilyiso wukyiwa kyipfa kya iwuta shindo shicha, kokooya isho nyisho Ruwa akundi, kuta ilyiso wukyiwa kyipfa kya iwuta shindo shiwicho. 18 Cha kyipfa Kristo na oe nalelyiso wukyiwa lyimwi tupu kyipfa kya wunyamaṟi woṙu, amsumganyi kyipfa kya walya walawasumganyi, kundu naluende na ko Ruwa; mmbiu okye ukowoogo, indi mrima okye ukoenengo moo. 19 Na kui mrima-cho kayenda ko mrima iwekyeri kyipfungonyi kawaongoya Ṙeṙo lya Ruwa; 20 wandu walawewoṙe wuindi kyiyeri kya ipfo numa, kyiyeri Ruwa alewaweṙelyia kulawoṙe iwina lyilya Noe aleachikyia safina; safina ileenenga wandu nyanya ikyia iwoogo nyi mṟinga. 21 Mfano o shindo-sho nyi wupatiso, wokyemukyiṟa nyoe taa mfiri ya wulalu; (chi kui iwikyia kuleshi ukoe o mmbiu-pfo, indi kyaasa kyilya lokyewikyia Ruwa kya iafutsia shilya loteṟia, lukyeri wandu wekyeosha Yesu), kui iṟuka lya Yesu Kristo. 22 Na oe nakyeri kuwoko ko kulyoe ko Ruwa, nayenda ruwewu, echichilyia malaika na shindo shingyi shoose shiwoṙe pfinya kulya ruwewu.
1 Kyasia kyipfa mmbiu o Kristo ulelyiso wukyiwa, na nyoe ṟaenyi shisha sha makusaṟo galya galya awewoṙe; cha kyipfa oe mmbiu okye ulelyiso wukyiwa nalekana na wunyamaṟi. 2 Wookyia wulalu mulaengyeṟe iosha lango tsa mmbiu, indi oshenyi shilya Ruwa akundi, kyiyeri kyanyu kyitsugai kyekaa iha wuyanenyi. 3 Kyipfa kyiyeri kya moo yaṙu kyileiṙa kyishikyie iwuta shilya wandu walaiṙikyie Ruwa wekyewuta; iwuta shindo shiwoṙe ukoe, na lango, na wunanzi, na shelya sha ilya na ielewetsa, na shindo shekyenanza, hamwi na iindia na iterewa mafano chandu kyilakyeri kya sungusinyi. 4 Shindo shekyeenenga wandu-wo walaiṙikyie iṟiyio chandu mulekyepfuṟukana iwuta shindo shilya shilya sha ukoe wung'anyi, wechimulahia. 5 Nawo wechionguo shindo walewuta ko ulya akuṟeyeṟie ianduya wai na moo na wapfu. 6 Kyipfa kya ikyo maa walya wapfiie waleongoyo Ndumi Ngyicha, kundu kye waanduyo kyimmbiu chandu wandu wekyeanduyo; indi wawaṙe moo kyimrima chandu Ruwa ai na moo. 7 Kyaindi mafurumionyi ga shindo shoose gakyeri kufuhi. Kyasia ṟanguonyi, mulae kyiṙombo mochiterewa. 8 Ngoseṟa ya isho shoose pfuṟukanenyi nakamwi ikundana; kyipfa ikunda lyekyeshikyia ngyuunyamaṟi tsifoi. 9 Muambilyiane nyoe wenyi ko wenyi kulawoṙe inuṟia; 10 orio umwi iṙuana na chandu aleambilyia kyisumbo, ṟundianenyi nakyo; cha waringyi wecha wa isaṟia lya mbaṟe tsifoi lya Ruwa. 11 Mndu kaṙeṙa, naṙeṙe chandu Ruwa akundi; mndu kaṟunda, naṟunde kui pfinya amwenengye nyi Ruwa; kundu Ruwa naṟumisho shindonyi shoose kui Yesu Kristo. Kyiṟumi na pfinya shikae na oe mlungana na mlungana. Amen. 12 Wakunde, mulaṟiyio kya wukyiwa wulya wukyeri konyu, wokyemukoṟa nyoe cha moṙo imuyesha, cha ilyi nyi kyindo kyiyenu kyacha na konyu. 13 Kyaindi chandu mulelya wukyiwa wo Kristo, chihiyonyi; kundu na kyiyeri kyiṟumi kyakye kyechiloṟo muchihiyo kui ikapa ngulyilyi na ngoru. 14 Mukowio kye mowuta shiwicho kyipfa kya rina lya Kristo nyi nanga; cha kyipfa Mumuyo o kyiṟumi na o Ruwa nakyeri na nyoe. 15 Mndu o konyu alalyiso wukyiwa cha mmbaagi, ang'u mbafu, ang'u mndu ekyewuta shindo shiwicho, ang'u cha mndu ekyekuwinisha na shindo sha wandu wengyi. 16 Kyaindi kyipfa nyi Mkristiano alarigo nyi sonu, indi naṟumishe Ruwa kui rina-lyo. 17 Cha kyipfa kyiyeri kyamshika kya ianduyo iwooka wandunyi wa Ruwa; na ianduyo lyikawooka koṙu soe, mafurumionyi ga walya walekyeaṙanyia Ndumi Ngyicha ya Ruwa gechiwa kuṙa? 18 Na kokooya kyechiwa kyuumu ko mndu msumganyi ikyia, ulya alaowuye na iindia Ruwa na mnyamaṟi nechiwono kwi? 19 Kyasia walya wailyiso wukyiwa kui shilya Ruwa akundi waṙambikye mrima yawo ko Ruwa, kyiiṙi kya iwuta shindo shicha, cha ilyi nyi ko ulya agumbie shindo, ekyeafutsia shilya ateṟia.
1 Ngyiterewa wameeku wa siṟi wakyeri konyu, inyi ngyikyeri meeku oṙiawo, na mṟingyishi o wukyiwa Kristo alelyiso, na ienengo kyiṟumi kyechiloṟo ipfo-ndu luiyenda; 2 lyisenyi poo lya Mndumii lyikyeri konyu, na ilyigoṟokyia. Chi kui iitiko-pfo, indi kulawoṙe iitiko, chandu Ruwa akundi, chi kui ikunda iwona heleri tsa sonu-pfo, indi kui ikuwuta nakamwi. 3 Maa chi cha wandu waikugaluo wandumii shikaṟonyi shawo-pfo, indi kui iloṟa mkaṟo mcha ko poo-lyo. 4 Na kyiyeri Mlyisi ang'anyi echiloṟo, mochiambilyia iṟikoso lya kyiṟumi, lyilya lyilekyenyamaṟika. 5 Na wuṙo nyoe wanakye, indienyi wameeku. Yee, nyoe moose waṙenyi wupfereri, muiṙime iṟundiana; cha kyipfa Ruwa nekyekapa walya wekyekuira, kyaindi nekyeenenga wapfereri isaṟia. 6 Kyasia pfererienyi wuchilyinyi wo Ruwa wuwoṙe pfinya, kundu namuṙose kui kyiyeri kyakye; 7 kunu mochimṙambika fowa tsanyu tsoose, cha kyipfa oe nekyekuwinisha mnu na shindo shanyu. 8 Muwaṙe meena na ilaa kyiṙombo; cha kyipfa mokyituwa onyu Mokyiriinzi, cha simba isepfuo, nekyetenga-tenga, echipfula mndu nammeṟe. 9 Na nyoe mmbingyenyi, mulailoloma iiṙikyienyi, muichi kye wukyiwa wulya wulya wukyeri ko wana wa wamanyu wakyeri wuyanenyi. 10 Na Ruwa o isaṟia lyoose, alemulaga nyoe iiṙa na kyiṟuminyi kyakye kya mlungana kyiiṙi kya Kristo, mukomlyiso wukyiwa kyiyeri kyitutu, oe amonyi nechimmbutia-se orio kyindo muwaṟi iwutio, na imuenenga pfinya. 11 Wuchilyi wo Ruwa wukae ho mlungana na mlungana. Amen. 12 Silyiwano, mono-wama ekyeafutsia shilya ateṟia, naṟeia paruo-i handu hako. Ngamuṟeia shindo shaangu, iikyimbia na iṟingyishia kye ilyi nyilyo isaṟia lya loi lya Ruwa. Goṟokyenyi isaṟienyi lya Ruwa kulawoṙe iloloma. 13 Oṙianyu msambuṟe iha Babelyi namuiṟikyiṟa, na Mariko, mono-ko. 14 Iṟikyiṟanenyi chandu walya waiṙikyie Yesu wekyeiṟikyiṟana. Ufoṟo lukae konyu nyoe moose, muwalungye na Kristo. Amen.
1 Inyi Simion Petiro, ngyikyeri mṟundi na msu o Yesu Kristo, ngaṟeia paruo-i ko walya walewona iiṙikyia lyimwi na soe, lyiwoṙe woguru, wusumganyinyi wo Ruwa oṙu, na Mkyiṟa Yesu Kristo. 2 Isaṟia lyikae konyu na ufoṟo luengyeṟo kyiiṙi kya imanya Ruwa na Yesu Mndumii oṙu. 3 Cha kyipfa wuiṙimi wokye wo kyiRuwa wuleluenenga shindo shoose shiwaṟi moo na iowuo hamwi na iindia Ruwa, kui immanya oe alelulaga kui mng'ano okye na wucha wokye amonyi. 4 Lyingyi-se ko isho naleluenenga shaasa shing'anyi mnu, sha woguru, kundu kye kui ikyo muiṙime iwa hamwi na walya wawoṙe mkaṟo o kyiRuwa, mochikyiṟo iwuka wunyamaṟinyi wukyeri wuyanenyi kyipfa kya lango. 5 Yee, na kyipfa kya ikyo mochipfuṟukana mnu ura lonyu, iiṙikyienyi lyanyu, wikyenyi ho na wucha, na wuchenyi wonyu wuṟango. 6 Na wuṟangonyi wonyu meena, na meenenyi onyu wusimiri; na wusimirinyi wonyu iowuo na iindia Ruwa. 7 Na kyiiṙi kya iowuo na iindia Ruwa, ikundana lya wana wa mka; na kyiiṙi kya ikundana lya wana wa mka, ikunda. 8 Kokooya shindo sha mbaṟe-i-iyi shakaa konyu na iingyikyi, shemuenenga nyoe iwaṙa wuragari na ikumbia ndunda ngyicha, kui imanya Mndumii oṙu Yesu Kristo. 9 Kyipfa ulya alawoṙe isho nyi kyipfupfuṟe, echiiṙima iwona shindo shikyeri kuleshi-pfo, nawaṙima kulya iyeṟemtso maṙeko gakye ga kacha. 10 Koikyo wana wa wama, pfuṟukanenyi ngoseṟa ikarisha ilago lyanyu na isambuṟo lyanyu; kyipfa mukowuta isho mochikapa ṙende-pfo. 11 Kyipfa kuṙi mochitaramo ienengo iiṙa na Wumangyinyi wo mlungana wo Mndumii oṙu, Mkyiṟa oṙu Yesu Kristo. 12 Koikyo ngyikusurie imukumbuṟa isho mfiri yoose, maa chandu mushiichi na iṟingyishio kyiiṙi kya loi mukyeri nayo. 13 Na inyi ngyiwonyi nyi sungusinyi, ko kyiyeri-kyi ngyikyeri na moo, iwapaaya-paya kui iwakumbuṟa. 14 Ngyiichi kye ipfa lyako lyiafukyia iwinyi, chandu Mndumii oṙu Yesu Kristo alengyiloṟa. 15 Kyaindi ngyechipfuṟukana, kye ngampfa inyi muiṙime ikumbuo mbonyi-tso. 16 Kyipfa luleosha shindo shileṟeio kui wuṟango na ngyeṟo kyiyeri lulemmanyisha nyoe pfinya tsa Mndumii oṙu Yesu Kristo na icha lyakye-pfo; indi lulekolowona luwenyi wung'anyi wokye. 17 Kyipfa naleambilyia iwuka ko Ruwa Awu kyiṟumi na mng'ano, iho-ndu aleendio ṟui lyilewuka mng'anonyi ung'anyi, “Ichu nyi Mana oko, mkunde oko, ngyimchihie kyipfa kyakye.” 18 Na ṟui-lyo soe lulelyiicho lyechiwuka Ruwewu kyiyeri luwekyeri na oe fumvunyi lyilya lyiele. 19 Na soe luiṙikyie necha shilya weonguo shisuku wagambie, shilya nyoe mukoshiambuya necha, cha taa ilyimika meemenyi, mowuta necha mṟasa kyiyeri kochikya na nyenyeri ya ngamenyi iwaa mrimenyi konyu. 20 Mochimanya ulogo-lu kuwooka kye kuwoṙe ionguo shisuku shiṟeionyi lokyetambuluo chandu mndu mlyiwe akunda tupu-pfo. 21 Kyipfa ionguo shisuku lyichie na handu hoose chandu mndu akundi-pfo; indi wandu waleṙeṙa mbonyi tsiwukyie ko Ruwa, wechisongoyo nyi Mumuyo Mweele.
1 Kyaindi kulewuka weonguo shisuku wa wongo kyiiṙi kya wandu walya, chandu na konyu kochiwuka walosha wa wongo, wechiende kui wuṟango wo wuṙetsi malosho mawicho, wechilega maa Mndumii ulya alewakyiṟa, wechikuendie inyamaṟo lyiwukyie ko Ruwa. 2 Wafoi waiṙikyie wewuta shindo shifananyi na walosha-wo wa wongo. Na walya walaiṙikyie wakawona kuṙo, weṙeṙa mawicho kyipfa kya iiṙikyia lya Kyikristiano. 3 Kui lango tsawo ngyiwicho wechiwona kyiira kyipfa kya imuongoya mbonyi tsa wongo. Wookyia kacha Ruwa alemuwaanduya na iṙumbuo kya inyamaṟo lyawo. Ruwa ekyelaa-pfo, nechiwaanduya chandu agambie. 4 Mukumburie kye Ruwa naleanduya malaika walya walenyamaṟa. Nalewawiyitsa moṙonyi, kawawika shipfungonyi sha meema, waringo mṟasa kuche mfiri ulya o ianduyo. 5 Maa Ruwa alehooṟia wuyana wulya wo kacha-pfo, indi naleende Mfu onyamaṟa wuyana wo walya walaiṙikyie Ruwa. Walekyiṟo nyi Noe amonyi awekyeri msumganyi, na wandu wengyi mfungaaṙe. 6 Lyingyi-se, kaanduya mṟi ya Sodoma na Gomora echiinyamaṟa kui moṙo, kaiwika iwe kyiṟingyishio ko wandu walechiiṙikyia Ruwa numa ya ishi, 7 kakyiṟa Loti, ulya msumganyi alesokyio nyi fowa mnu kyipfa kya wuwicho wo wanyamaṟi-wo. 8 Kyipfa mndu-chu msumganyi akyeri kyiiṙi kyawo, kui iwona na iicho, nalekutuura mrima okye uwoṙe wusumganyi, mfiri kui mfiri, kui mawuto gawo galawoṙe uwawaso. 9 Kyasia, Mndumii naichi ikyiṟa wandu waowuye na ikunda Ruwa iwuka shiyeshonyi, na ikooma walawoṙe wusumganyi kyiiṙi kya iweṙelyia ianduyo mṟasa mfiri ulya o ianduyo. 10 Na ngoseṟa walya wekyeosha mmbiu langonyi tsa mbonyi ngyiwicho na imina wawoṙe wuchilyi. 11 Walosha-wo wa wongo wawoṙe wukari na makushelo, wekyelahia malaika wa Ruwa maa wekyewaindia-pfo. Indi malaika wawoṙe pfinya kuta walosha-wo maa wekyegamba shindo shawo mbele ya Mndumii-pfo. 12 Kyaindi iwo kyimwi cha mando ga saka galawoṙe wuṟango, walefeo cha mando ga saka tikyi wakyeri nyi wewaṙa na iwoogo, wechilahia Ruwa shindonyi walashiichi, wechirumatso irumatsonyi lyawo. 13 Wechiwona mawicho gakyeri wori wo wuwicho wowo, wakusaṟie kye iosha lango tsa mmbiu kulawoṙe wuowu nyi ichihiyo. Wawa nyi wunyamaṟi na sonu, wechilosha lango tsa wuyana tsilawoṙe meena shelyenyi shawo sha ikunda, ilyi wekyeachikyia shelya hamwi na nyoe. 14 Wawoṙe meso gaichuo wuṟui, wandu walekyeṙa iwuta wunyamaṟi, wekyelemba mrima ilangyikarishe, wawoṙe mrima ingyiichiwiṟe ilanga, wana wa seso. 15 Wechiṙa njia ngyigoṟotsu, wakaṙeka; wechiosha njia ya Balaamu, mana o Beori, alekunda wori wo wuwicho; 16 kyaindi naleṙeṙio kyipfa kya wunyamaṟi wokye amonyi. Nzoi ilaichi iṙeṙa, yechiṙeṙa kui ṟui lya mndu, ileshingyia wusuko wo moonguo shisuku ulya. 17 Iwa nyi kyimwi na shoka tsilawoṙe mṟinga na mapuchi gaiṙoo nyi kyiwiṟi. Ruwa nawaṟeyeṟie handu mlungana meemenyi ung'anyi. 18 Kyipfa wekyeṙeṙa maṙeṙo gekushela na galawoṙe kyiira, na kui lango ngyiwicho tsa mmbiu yawo wekyelemba walya waleṙicha mawicho na lango tsa wuyana. 19 Wechienenga kyiteṟio kya wongo wandu wengyi nawo wawenyi nyi watumo wa wuwicho, kyipfa mndu kawingo nyi mndu ungyi nekyewa mtumo o mndu ulya. 20 Cha kyipfa walya walemṙicha mawicho ga wuyana kui imanya Mndumii na Mkyiṟa Yesu Kristo, kokooya wawoṙo-se na iwingo, mbaṟe yawo ya mafurumionyi gawo nyi ingyiwicho kuta iya ya kuwooka. 21 Kyipfa nyi-we nanga kowo walawechimanya njia ya wusumganyi, kuta iimanya, numa iṙa iwawaso lyilya lyiele waleenengo. 22 Kyaindi kyawa kowo kyimwi na mfano ulya o loi, kyite kyawiyilyia mṙeeko okyo kyimonyi, na nguwe ilesanjo yawuya ikufoga-foga toombonyi.
1 Wakunde, paruo-i nyi ya kawi ngyimuṟeia nyoe. Ipfo paruonyi tsiwi ngyilepfuṟukana iamtsa makusaṟo mecha mṙoenyi konyu kui imukumbuṟa mbonyi-tsi. 2 Ngyikundi muiṙime ikumbuo shindo shilya shileṙeṙo kacha nyi weonguo shisuku waele; na iwawaso lyilya lya Mndumii na Mkyiṟa lyileendo nyi wasu wanyu. 3 Mochimanya kuwooka kyindo-kyi kye mfirinyi yefurumia wandu wekyetaluo wechicha na italuo lyawo, wekyeosha lango tsawo wawenyi, 4 na igamba, “Nyi kwi kyikyeri kyaasa kyilya kya icha lyakye? Cha kyipfa wookyia kyiyeri-kyo waku waṙu walepfa, shindo shoose shikyeri chandu shiwei, wookyia wuyana wulegumbo.” 5 Kyipfa wekyeshinga meso gawo walawone kyindo-kyi kye kuwewoṙe ngyina wookyia kacha, na uruka taa, lulugumbe iwuka mṟingyenyi, kui Ṙeṙo lya Ruwa. 6 Ko isho wuyana wulya wo kyiyeri kyilya wulenyamaṟo nyi mṟinga, wukorumara. 7 Kyaindi ngyina tsa wulalu na uruka shingyikoome kyiseyesoe kui moṙo, kui Ṙeṙo-lyo ilyo, shechiringo mṟasa mfiri o ianduyo, na kui irumara lya wandu walaiṙikyie Ruwa. 8 Kyaindi, wakunde, mulawaṙime kyindo-kyi, kye ko Mndumii mfiri umwi nyi kyimwi na maka kyiku, na maka kyiku nyi kyimwi na mfiri umwi. 9 Mndumii ekyekyelyio iafutsia kyaasa kyakye, chandu wandu wengyi wekyekusaṟa kya ikyelyio-pfo, kyaindi nekyesimiria konyu, kyipfa akundi mndu oose naṙekye-pfo, indi woose waiṙime iwona iṙumbuya wunyamaṟi. 10 Kyaindi mfiri o Mndumii ochicha cha mbafu. Mfiri-cho ngyina tsechirumatso kui ndiṟimo tsing'anyi, na orio kyindo kya wuyana kyechikoṟo na irumatso, na wuyana na shoose shikyeri pfo shesenekyia. 11 Kyasia, cha kyipfa shindo-shi shoose sherumatso kuṙo, kyamukooya nyoe muwe wandu wa mkaṟo ya mbaṟe iha kyiiṙi kya ichumia lyanyu lya wuele na iowuo na ikunda Ruwa, 12 mochiweṙelyia mṟasa mfiri ulya o Ruwa uche, mochiuitika, na kyiiṙi kya mfiri-cho ngyina tserumatso tsechiunguo, na shindo sha wuyana shechisenekyia na isalaa? 13 Kyaindi chandu kyikyeri kyaasa kyakye, luiweṙelyia ruwewu ngyihya na uruka luhya, shikyeri kye wusumganyi wochikaa kyiiṙi kyasho. 14 Koikyo, wakunde, kyipfa muiweṙelyia mbonyi-tso, pfuṟukanenyi kundu muwono ufoṟonyi kye muwoṙe ṙeko maa sonu mbele yakye-pfo. 15 Na nyoe talenyi wusimiri wo Mndumii oṙu kye nyi wukyiṟo, chandu na mono-wama oṙu mkunde Paulo aleṟeia kui wuṟango aleenengo. 16 Na wuṙo paruonyi tsakye taa, echionguo pfo mbonyi-tso. Kyiiṙi kya paruo-tso kuwoṙe mbonyi tsikyeri kye nyi kyuumu itsimanya, na mbonyi-tso wandu walawoṙe wuṟango, walagoṟokyi sungusinyi, wekyetsionguo mbaṟe ingyi, chandu wekyeweonguo mbaṟe ingyi shiṟeio shingyi, kui irumatso lyawo wawenyi. 17 Kyasia, wakunde, mukosonguo imanya isho, kuringyenyi mrima yanyu, mulacheṙoo nyi maṙeko ga wanyamaṟi-wo, mukooloka na iṙa kyilya muiṙikyie. 18 Kyaindi ng'anenyi isaṟienyi, na kyiiṙi kya imanya Mndumii oṙu na Mkyiṟa Yesu Kristo. Mng'ano ui kokye wulalu na mlungana.
1 Lumuṟeia nyoe mbonyi tsa Ṙeṙo lyekyeende moo, lyiwekyeri pfo wookyia mawookyionyi. Ṙeṙo lyilya lulelyiicho, lulelyiwona kui meso gaṙu, lukolyiambuya, na mawoko gaṙu gakalyipaaya-paya. 2 (Na moo-cho uleloṟo, na soe luleuwona; lyingyi-se luiṟingyishia, na imuongoya nyoe moo ulya o mlungana, uwekyeri ko Awu, ukoloṟo koṙu.) 3 Lumuongoya nyoe Ṙeṙo lyilya lulelyiwona na ilyiicho, kundu na nyoe taa muiṙime ikaa hamwi na soe; na ikaa lyaṙu handu hamwi nyi hamwi na Awu, hamwi na Mono-kye Yesu Kristo. 4 Na ishi lushiṟeia, kundu sia yaṙu iafutsio. 5 Na itsi nyitso mbonyi luleicho ko Yesu, na itsionguo konyu, kye Ruwa nyi ngyeela, maa meema oose ukyeri kokye-pfo. 6 Lukogamba kye lukyeri handu hamwi na oe, kyaindi lukowaṙa mkaṟo ya meema, loṙeṙa wongo, maa luiwuta kyikyeri kya loi-pfo. 7 Indi lukowaṙa mkaṟo ya ngyeela, chandu oe akyeri ngyeelenyi, lokaa handu hamwi soe, na samu ya Kristo, Mono-kye, yalusanja wunyamaṟi woose. 8 Lukogamba kye luwoṙe wunyamaṟi-pfo, lokulemba luwenyi, maa kuwoṙe wuloi koṙu-pfo. 9 Lukotochia Ruwa ngyuunyamaṟi tsaṙu, oe nekyeafutsia shilya ateṟia na namsumganyi mṟasa naluwute ngyuunyamaṟi tsaṙu, na ilusanja wuwicho woose. 10 Lukogamba kye lunyamaṟie-pfo, lomgaluo oe mndu ekyeṙeṙa wongo, maa kyilya agamba kyikyeri koṙu-pfo.
1 Wana wako, ngyimuṟeia ishi kundu mulawute sha wunyamaṟi. Na kokooya mndu awuta kya wunyamaṟi luwoṙe Moluterewia ko Awu, Yesu Kristo awoṙe wusumganyi. 2 Na oe nyi oe moluwuta ngyuunyamaṟi tsaṙu; chi ngyuunyamaṟi tsaṙu tupu-pfo indi na tsa wandu wa wuyanenyi koose. 3 Na kyipfa kya ikyo luichi kye lomanya Ruwa, kokooya loosha shilya mawawaso gakye gagamba. 4 Ulya aigamba, “Ngyimwichi,” kyaindi alaoshe shilya mawawaso gakye gagamba, nekyeṙeṙa wongo, maa wuloi wukyeri mrimenyi kokye-pfo. 5 Kyaindi ulya ekyeosha malosho ga Ṙeṙo lyakye, icho mrimenyi kokye ikunda lya Ruwa lyikyeri pfo loi. Kyipfa kya ikyo luichi kye luwalungye na oe. 6 Ulya aigamba kye namlungye na Ruwa, kyimmbaṟi iwuta kuṙo chandu Yesu alewuta. 7 Wakunde, ngyimuṟeia iwawaso lyihya-pfo, kyaindi iwawaso lya kacha muwekyeri nalyo wookyia mawookyionyi. Na iwawaso-lyo lya kacha nyi mbonyi tsilya muleicho. 8 Lyingyi-se ngamuṟeia iwawaso lyihya; mbonyi tsikyeri loi kokye na konyu; kyipfa meema uiṙa na ngyeela iya ya loi yamlyimika. 9 Ulya aigamba kye nakyeri ngyeelenyi, na oe nasuuye mono-wama okye, nakyeri meemenyi mṟasa wulalu. 10 Ulya akundi mono-wama okye, nekyekaa ngyeelenyi, maa mrimenyi kokye kuwoṙe kyindo kyetewe-pfo. 11 Indi ulya asuuye mono-wama okye nakyeri meemenyi, lyingyi-se naichumia meemenyi, maa aichi kundu aiyenda-pfo, cha kyipfa meema omgaluo kyipfupfuṟe. 12 Ngyimuṟeia nyoe wana wako, cha kyipfa mohooṟio ngyuunyamaṟi tsanyu kyipfa kya rina lyakye. 13 Ngyimuṟeia nyoe waawu, cha kyipfa momanya ulya akyeri pfo wookyia mawookyionyi. Ngyimuṟeia nyoe wanakye, cha kyipfa mowinga ulya mmbicho. Ngamuṟeia nyoe wana, cha kyipfa momanya Awu. 14 Ngamuṟeia nyoe waawu, cha kyipfa muichi ulya akyeri pfo wookyia mawookyionyi. Ngamuṟeia nyoe wanakye, cha kyipfa muwoṙe pfinya, na Ṙeṙo lya Ruwa lyikeri mrimenyi konyu, na nyoe mowinga ulya mmbicho. 15 Maa mulakunde wuyana, maa shindo shikyeri wuyanenyi. Mndu kakunda wuyana, ikunda Ruwa kukyeri mrimenyi kokye-pfo. 16 Orio kyindo kyikyeri wuyanenyi, lango tsa mmbiu, na lango tsa meso, na moo okyeenenga wandu ikushela, shekyewuka ko Awu-pfo, indi shekyewuka wuyanenyi. 17 Na wuyana wuisia, hamwi na lango tsa wuyana-wo, indi ulya ekyewuta shilya Ruwa akundi nechikaa ho mṟasa mlungana. 18 Wana wako, nyi kyiyeri kya mafurumionyi; na chandu muleicho kye mowingana na Kristo naicha, maa wulalu wewingana na Kristo wafoi wamuwoneka. Kyipfa kya ikyo luichi kye nyi kyiyeri kya mafurumionyi. 19 Walewuka koṙu, indi wawei wa koṙu-pfo. Kyipfa kokooya wawei wa koṙu, wawekaa hamwi na soe. Kyaindi walecha kundu waloṟo kye chi woose wai wa koṙu-pfo. 20 Muwapusie Mumuyo Mweele na nyoe moose muichi. 21 Ngyilemuṟeia nyoe kyipfa mulaichi kyikyeri loi-pfo, indi cha kyipfa muichi kyilya kyikyeri loi, lyingyi-se kye kuwoṙe kyoose kya wongo kyekyewuka ipfo kyindonyi kyikyeri loi-pfo. 22 Nyi wui ai moṙeṙa wongo sile ulya ekyekana kye Yesu nyi Kristo? Icho nyi oe mowingana na Kristo, ulya ekyekana Awu na Mana. 23 Orio mokana Mana awoṙe Awu-pfo. Moiṙikyia Mana nawoṙe Awu taa. 24 Kyasia nyoe, ikyo mulekyiicho wookyia mawookyionyi, kyikae mrimenyi konyu. Kokooya ikyo mulekyiicho wookyia mawookyionyi kyikyeri mrimenyi konyu na nyoe mochikaa ko Mana, na ko Awu. 25 Na ikyi nyikyo kyaasa aleluenenga, moo o mlungana. 26 Ngamuṟeia ishi ko mbonyi tsa wandu walya wakundi imuṙetsa nyoe. 27 Na nyoe, Mumuyo Mweele muleambilyia kokye ukyeri mrimenyi konyu, maa kuwoṙe kyimaṙuma kya mndu imulosha nyoe-pfo; kyaindi chandu Mumuyo okye uimulosha mbonyi tsa shindo shoose, lyingyi-se nyi loi maa chi wongo-pfo, na chandu ulemulosha, kaenyi kokye. 28 Na wulalu, wana wako, kaenyi kokye, kundu ilyi echiloṟo, luwaṙe wukari na wuṟango, maa lularigo nyi sonu mbele yakye kyiyeri kya icha lyakye lya kawi. 29 Kokooya momanya kye oe nyi msumganyi, manyenyi kye orio mndu ekyewuta shindo sha wusumganyi namfee nyi oe.
1 Kumbuonyi nyi ikunda lya mbaṟe iha Awu aleluenenga, kye lulago wana wa Ruwa; na nyi wuṙo lukyeri. Kyipfa kya ikyo wandu wa wuyana waluichi-pfo, cha kyipfa walemanya Ruwa-pfo. 2 Wakunde, wulalu lukyeri wana wa Ruwa, maa kyilandemanyikye chandu lochiwa-pfo; kyaindi luichi kye kyiyeri Kristo echiloṟo, lochiwa cha oe; cha kyipfa lochimmbona chandu akyeri. 3 Na orio mndu awoṙe ikusuria-lyi kui Kristo nekyekuilyisha, chandu oe akyeri mweele. 4 Orio mndu ekyewuta sha wunyamaṟi, nawuta kyindo kyiwicho; cha kyipfa wunyamaṟi nyi kyindo kyiwicho. 5 Na nyoe muichi kye Kristo naleloṟo, kundu naluwute ngyuunyamaṟi; na wunyamaṟi wukyeri kokye-pfo. 6 Orio mndu ekyekaa kokye ekyewuta kyindo kya wunyamaṟi-pfo; orio mndu ekyewuta kyindo kya wunyamaṟi, ammbonyi maa amwichi-pfo. 7 Wana wako, mndu alamulembe. Mndu ekyewuta sha wusumganyi nawoṙe wusumganyi, chandu Kristo awoṙe wusumganyi. 8 Mndu ekyewuta sha wunyamaṟi nyi o Satana; cha kyipfa Satana nekyewuta sha wunyamaṟi wookyia mawookyionyi. Kyipfa kya ikyo Mono-Ruwa naleloṟo, kundu nanyamaṟe maṟunda ga Mokyiriinzi. 9 Orio mndu amfee nyi Ruwa ekyewuta sha wunyamaṟi-pfo, kyipfa kyishari kyakye kyikyeri kokye; maa echiiṙima iwuta sha wunyamaṟi-pfo kyipfa namfee iwuka ko Ruwa. 10 Kyipfa kya ikyo wana wa Ruwa waichio na pata, na wana wa Mokyiriinzi taa. Mndu oose alekyewuta sha wusumganyi awukyie ko Ruwa-pfo, maa ulya alakundi mono-wama okye. 11 Kyipfa itsi nyitso mbonyi muletsiicho wookyia mawookyionyi, kye lukundane. 12 Lulawe cha Kaini awekyeri o Satana, kawaaga mono-wama okye-pfo. Na oe nalemmbaaga kyipfa kya kyikyi? Cha kyipfa mawuto gakye gawemawicho, na galya ga mono-wamae gawei ga wusumganyi. 13 Wana wa wama wako, mulaṟiyio, wandu wa wuyana wakamusuo. 14 Soe luichi kye lomuiṙa iwuka upfunyi iiṙa na moonyi, cha kyipfa lukundi wana wa wama kyiiṙi kya Kristo. Ulya alakundi, nakyeri upfunyi. 15 Orio mndu mosuo mono-wama okye nyi mmbaagi; na nyoe muichi kye orio mmbaagi awoṙe moo o mlungana mrimenyi kokye-pfo. 16 Kui ikyo lomanya ikunda, cha kyipfa Kristo nalereka moo okye kyipfa kyaṙu. Kyiluwaṟi na soe ireka moo oṙu kyipfa kya wana wa wama-wo. 17 Kyaindi mndu kawaṙa kando ka kunu wuyanenyi, naaho kawona mono-wama okye alawoṙe kyindo, alamtarame, ngyesa ikunda lya Ruwa lyakaa kuṙa mrimenyi ko mndu-cho? 18 Wana wako, lulakunde kui ṙeṙo, maa kui ulumi-pfo, indi kui mawuto na wuloi. 19 Kyipfa kya ikyo lochimanya kye lukyeri wa loi, na soe lochiwiyiṟia mrima yaṙu moo mbele yakye, 20 kokooya mrima yaṙu iluanduya; cha kyipfa Ruwa nang'anyi kuta mrima yaṙu na oe naichi shoose. 21 Wakunde, mrima yaṙu ilandeluanduye, luwoṙe wukari na wuṟango ko Ruwa. 22 Na orio kyindo loterewa lochikyiambilyia kokye, cha kyipfa lokyeosha shilya mawawaso gakye gakundi, na iwuta shichihiṟie mbele yakye. 23 Na ilyi nyilyo iwawaso lyakye, kye luiṙikyie rina lya Mono-kye Yesu Kristo, na ikundana, chandu aleluenenga iwawaso. 24 Na oe ekyeosha shilya mawawaso gakye gagamba namlungye na Ruwa, na Ruwa namlungye na oe. Na kyipfa kya Mumuyo ulya Ruwa aleluenenga luichi kye Ruwa namlungye na soe.
1 Wakunde, mulaiṙikyie orio mndu agamba kye nawoṙe Mumuyo, indi wayeshenyi mumanye kokooya mumuyo-yo waigamba wawoṙe iwukyie ko Ruwa; cha kyipfa weonguo shisuku wa wongo wafoi wammboneka wuyanenyi. 2 Kui ikyo muichi Mumuyo o Ruwa, orio mndu aiṙikyie kye Yesu Kristo nalecha ai cha mndu nawoṙe mumuyo uwukyie ko Ruwa. 3 Na oṙio mndu alaiṙikyie Yesu awoṙe mumuyo uwukyie ko Ruwa-pfo. Na iyi nyiyo ngoo ya mowingana na Kristo, ngoo iya muleicho kye iicha; na wulalu yammbono wuyanenyi. 4 Nyoe, wana watutu, muwoṙe mumuyo uwukyie ko Ruwa; na nyoe mowawinga; cha kyipfa ulya akyeri mrimenyi konyu nang'anyi kuta ulya akyeri wuyanenyi. 5 Iwo nyi wa wuyana; koikyo wekyeṙeṙa shindo sha wuyana na wandu wa wuyana wekyewaaṙanyia. 6 Soe luwoṙe mumuyo uwukyie ko Ruwa. Ulya aichi Ruwa nekyeluaṙanyia; ulya alawoṙe mumuyo uwukyie ko Ruwa ekyeluaṙanyia-pfo. Kyipfa kya ikyo luichi Mumuyo o loi, na mumuyo o wuṙetsi. 7 Wakunde lukundane; cha kyipfa ikunda lyiwukyie ko Ruwa, na orio mndu awoṙe ikunda namfee nyi Ruwa; na oe naichi Ruwa. 8 Oe alawoṙe ikunda, aichi Ruwa-pfo, cha kyipfa Ruwa nyi ikunda. 9 Kyipfa kya ikyo ikunda lya Ruwa lyilewoneka koṙu, kye Ruwa naleṙuma Mono-kye kyimuumwi wuyanenyi, kundu luwaṙe moo kui oe. 10 Ilyi nyilyo ikunda, chi kye soe lulekunda Ruwa-pfo, indi kye oe nalelukunda soe kaṙuma Mono-kye iwa mndu moluhooṟia ngyuunyamaṟi tsaṙu. 11 Wakunde, kokooya Ruwa nalelukunda soe kuṙi, kyiluwaṟi na soe ikundana. 12 Kuwoṙe mndu alemmbona Ruwa kyiyeri kyoose-pfo. Lukokundana, Ruwa nekyekaa mrimenyi koṙu, na ikunda lyakye lying'anyi mnu mrimenyi koṙu. 13 Kyipfa kya ikyo luichi kye lukyeri kokye, na oe nakyeri koṙu, cha kyipfa naluenengyie Mumuyo okye. 14 Na soe lowona na iṟingyishia kye Awu naleṙuma Mana iwa Mkyiṟa o wuyana. 15 Orio mndu aiṙikyie kye Yesu nyi Mono-Ruwa, Ruwa nekyekaa kokye, na oe nekyekaa ko Ruwa. 16 Na soe lomanya ikunda Ruwa awoṙe koṙu soe, na ilyiiṙikyia. Ruwa nyi ikunda, na ulya ekyekaa ikundenyi, nekyekaa ko Ruwa, na Ruwa nekyekaa kokye. 17 Kyipfa kya ikyo ikunda lying'anyi lyikyeri koṙu, kundu luwaṙe wukari na wuṟango mfiri ulya o ianduyo; cha kyipfa, chandu oe akyeri, nyi wuṙo lukyeri na soe kunu wuyanenyi. 18 Ikundenyi kuwoṙe wuowu-pfo; kyaindi ikunda lya loi lyekyewiyitsa wuowu nja, cha kyipfa wuowu wuwoṙe ngapo; na awoṙe wuowu awoṙe ikunda lying'anyi-pfo. 19 Soe lukundi cha kyipfa oe nalelukunda soe kuwooka. 20 Mndu kagamba, “Ngyikundi Ruwa,” na oe nasuuye mono-wama okye, nai moṙeṙa wongo; cha kyipfa alakundi mono-wama okye ulya ammbonyi, eiṙima ikunda Ruwa ulya alandemmbone-pfo. 21 Na iwawaso-lyi luleenengo nyi Kristo, kye ulya akundi Ruwa, nakunde na mono-wama okye.
1 Orio mndu aiṙikyie kye Yesu nyi oe Kristo namfee nyi Ruwa. Na orio mndu akundi mfee, nakundi maa ulya amfee nyi mfee-cho. 2 Kyipfa kya ikyo luichi kye lukundi wana wa Ruwa kyiyeri lokunda Ruwa, na iosha shilya mawawaso gakye gagamba. 3 Cha kyipfa ipfo nyipfo ikunda Ruwa, kye luoshe shilya mawawaso gakye gagamba; maa mawawaso gakye gamalemeri-pfo. 4 Cha kyipfa orio mndu amfee nyi Ruwa nekyewinga wuyana; na kunu nyipfo iwinga lyiwingyie wuyana kui iiṙikyia-lyo lyaṙu. 5 Awingyie wuyana nyi wui, sile nyi ulya aiṙikyie kye Yesu nyi Mono-Ruwa? 6 Ichu nyi oe alecha kui mṟinga o wupatiso wokye na samu, Yesu Kristo; chi kui mṟinga tupu-pfo, indi kui mṟinga na kui samu. Na Mumuyo nyi oe ekyeṟingyishia, cha kyipfa Mumuyo nyi oe loi. 7 Wakyeri waṟaaṟu waiṟingyishia: 8 Mumuyo, mṟinga, na samu. Na ishi shoose shiwoṙe wuṟingyishi wulya wulya. 9 Lukoambilyia wuṟingyishi wo wandu, wuṟingyishi wo Ruwa nyi wung'anyi ngoseṟa; cha kyipfa wuṟingyishi wo Ruwa nyiwo iwu, kye naṟingyishia Mono-kye. 10 Ulya aiṙikyie Mono-Ruwa nawoṙe wuṟingyishi-wo mrimenyi kokye. Alaiṙikyie Ruwa namgaluo mndu ekyeṙeṙa wongo, cha kyipfa aiṙikyia wuṟingyishi-wo Ruwa aṟingyishia Mono-kye-pfo. 11 Na iwu nyiwo wuṟingyishi, kye Ruwa naleluenenga moo o mlungana; na moo-chu ukyeri ko Mono-kye. 12 Ulya awoṙe Mana mrimenyi kokye, nawoṙe moo; ulya alawoṙe Mana mrimenyi kokye awoṙe moo-cho-pfo. 13 Ngamuṟeia nyoe shindo-sho, kundu mumanye kye muwoṙe moo o mlungana, nyoe muiṙikyie Rina lya Mono-Ruwa. 14 Na iwu nyiwo wukari na wuṟango luwoṙe kokye, kye lukoterewa kyindo chandu akundi, nekyeluaṙanyia. 15 Na kokooya lomanya kye nekyeluaṙanyia, kyoose loterewa, luichi kye luwoṙe shilya lokyeterewa. 16 Mndu kawona mono-wama okye ewuta kyindo kyiwicho kyilekyeende upfu, neterewa Ruwa, na Ruwa nechimwenenga moo. Moo-cho nyi ko walya wekyewuta shindo shiwicho shilekyeende upfu. Kuwoṙe kyindo kyiwicho kyekyeende upfu. Ngyigamba kye nechiterewa Ruwa kyipfa kya ikyo-pfo. 17 Orio kyindo kyilakyeri kya wusumganyi nyi wunyamaṟi, na kuwoṙe wunyamaṟi wulekyeende upfu. 18 Luichi kye orio mndu amfee nyi Ruwa ekyewuta kyindo kya wunyamaṟi-pfo; indi ulya amfee nyi Ruwa nekyekuṟumaa, maa Satana ekyempaaya-pfo. 19 Luichi kye soe lukyeri wana wa Ruwa; na wandu wa wuyana woose taa wekyekaa ko Satana. 20 Na soe luichi kye Mono-Ruwa amcha, na oe naluenengyie wuṟango kye lumanye Ruwa o loi, na soe lokyekaa ko Ruwa ulya akyeri o loi. Kyimwi na igamba ko Mono-kye Yesu Kristo. Ichu nyi oe Ruwa o loi, na ichu nyi moo o mlungana. 21 Wana wako, wikyienyi mrima yanyu kuleshi na mafano.
1 Inyi meeku, ngyikuṟeia iyoe paruo-i, wama msambuṟe, na wana wakye ngyiwakundi kyiiṙi kya loi; maa chi inyi ngyimonyi-pfo, indi na woose waichi loi iya, 2 kyipfa kya loi-yo ikyeri mrimenyi koṙu, nayo yechikaa hamwi na soe mṟasa mlungana. 3 Isaṟia na iwonio wukyiwa, na ufoṟo, shiwukyie ko Ruwa Awu na ko Yesu Kristo Mana o Awu, shechikaa hamwi na soe kyiiṙi kya loi na ikunda. 4 Ngyilechihiyo mnu kyipfa kya ilyi ngyilewona wana wapfo waata wechichumia kyiiṙi kya loi, chandu luleambilyia iwawaso ko Awu. 5 Na wulalu, mama, ngyikuterewa, chi kye ngyikuṟeia iwawaso lyihya-pfo, indi lyilya luwei nalyo wookyia mawookyionyi, kye lukundane. 6 Na ilyi nyilyo ikunda, luchumie lochiosha mawawaso gakye. Ilyi nyilyo iwawaso lyilya, chandu muleicho wookyia mawookyionyi, kye muchumie kyiiṙi kya ilyo, 7 cha kyipfa walembi wafoi wammboneka wuyanenyi, walaiṙikyie kye Yesu Kristo naicha kyiiṙi kya mmbiu. Icho nyi oe mlembi ulya na mowingana na Kristo. 8 Ringyenyi mrima yanyu mulaṙetse shilya mulewuta, indi muambilyie wori wuafutsie. 9 Orio mndu alailosha na ikaa maloshonyi ga Kristo, indi nekyegalega, awoṙe Ruwa-pfo. Indi icho ekyekaa ipfo maloshonyi, nawoṙe Awu na Mana taa. 10 Mndu kacha na konyu, na oe aiende malosho-go-pfo, maa mulamwambilyie kanyi konyu, maa imwiṟikyiṟa. 11 Kyipfa icho momwiṟikyiṟa naoshana na oe mawutonyi gakye mawicho. 12 Cha kyipfa ngyiwoṙe shindo shifoi, ngyikundi ishiṟeia kui karitasi na wiino-pfo, kyaindi ngyikusurie icha na konyu, na iṙeṙa na nyoe ṙumbu kui ṙumbu, kundu sia yaṙu iafutsio. 13 Wana wa mono-wama opfo ai msambuṟe, wakuiṟikyiṟa.
1 Inyi meeku ngyikuṟeia paruo-i iyoe Gayo mkunde, ngyikukundi mnu. 2 Mkunde, ngyiterewa uwone kyiira shindonyi shoose na iwaṙa wukyesi wo mmbiu, chandu uwoṙe wukyesi wo mrima. 3 Kyipfa ngyilechihiyo mnu kyiyeri wana wa wama waiṙikyie Ruwa waleṟingyishia chandu okyeafutsia shilya oteṟia na chandu okyewuta shindo sha wuloi. 4 Ngyiwoṙe sia ing'anyi kuta iicho kye walya wakyeri cha wana wako waiwuta shindo sha wuloi-pfo. 5 Mkunde, kyindo-kyo uwutia wana wa wama-wo waiṙikyie Ruwa na wayenu taa nyi kyindo kyilawoṙe ngyeṟo; 6 wandu waleṟingyishia ikunda lyapfo mbele ya siṟi. Nochiwuta necha kokooya owatarama kyaronyi chandu kyiwaṟi ko Ruwa. 7 Cha kyipfa, kyipfa kya Rina-lyo, walefuma, walaambilyie kyindo ko walya walaiṙikyie Yesu. 8 Kyasia kyiluwaṟi soe iambilyia wandu cha iwo, kundu luwe waṟundi hamwi na wuloi. 9 Ngyileṟeia siṟi paruo, kyaindi Diotirefe, akundi iwa o kuwooka kyiiṙi kyawo, aleluaṙanyia-pfo. 10 Koikyo ngacha ngyechikumbuo mawuto gakye, chandu awoṙe maṙeṙo mawicho galawoṙe kyiira; maa isho shekyemshika-pfo, kyipfa oe amonyi ekyeambilyia wana wa wama-wo waiṙikyie Ruwa-pfo; na walya wakundi iwaambilyia nekyewashingyia, na iwawuta siṟinyi. 11 Mkunde, ulakunde wuwicho, indi kunda wucha. Ulya ekyewuta wucha nyi o Ruwa, indi ulya ekyewuta mawicho alandewone Ruwa-pfo. 12 Demetirio naṟingyishio nyi wandu woose, lyingyi-se na wuloi wulya wumonyi. Na soe taa loṟingyishia, na iyoe nuichi kye wuṟingyishi woṙu nyi loi. 13 Ngyiwewoṙe shindo shifoi shekuṟeia kyaindi ngyikundi ikuṟeia kui wiino na kalamu-pfo. 14 Kyaindi ngyikusaṟie ichekuwona mfiri ya kufuhi, na soe lochiṙeṙa ṙumbu kui ṙumbu. 15 Ufoṟo kopfo. Mbuya tsaṙu tsakuiṟikyiṟa. Iṟikyiṟa mbuya-tso tsaṙu, orio mndu kui rina lyakye.
1 Inyi Yuda, mṟundi o Yesu Kristo, na mono-wama o Yakobo, ngyimuṟeia paruo-i nyoe muwalage nyi Ruwa, mulekundo nyi Ruwa Awu, na ikoomo kyipfa kya Yesu Kristo. 2 Muengeṟio iwonio wukyiwa na ufoṟo na ikunda. 3 Wakunde, kyiyeri ngyiwepfuṟukana mnu imuṟeia mbonyi tsa wukyiṟo wukyeri nyi woṙu loose, ngyilewona kyangyikooya imuṟeia, kundu ngyimtutume kye mukapanie iiṙikyia lyileenengo wandu wa Ruwa lyimwi tikyi. 4 Kyipfa kuwoṙe wandu walekuwika pfo kui kyiṟika, wandu waleṟeio wookyia kacha ianduyo-lyi, mando mawicho, gekyegaluo isaṟia lya Ruwa oṙu lyiwe ukoe, nawo wekyemkana icho akyeri Ruwa amonyi tikyi, na Mndumii oṙu Yesu Kristo. 5 Lyingyi-se ngyikundi imukumbuṟa maa chandu mommanye isho shoose kye Mndumii, amkyiṟe wandu urukyenyi lo Misiri, nalewarumatsa numa ya iho walya walaiṙikyie. 6 Na malaika walaleringa wuchilyi wowo wawenyi, kyaindi wakaṙa kanyi kowo kuwewaṟi nalewawika shipfungonyi sha mlungana kundu ko meema ko ianduyo lya mfiri ulya ung'anyi. 7 Chandu kyiwei Sodoma na Gomora hamwi na mṟi iwekyeri mṟasenyi, waleosha wuṟui kui mbaṟe imwi na iwa, wakandeosha mbonyi tsa kyimmbiu tsilawaṟi wookyia kacha, kyilewiko kyiwe kyiṟingyishio, wechianduyo moṙonyi o mlungana. 8 Nyi wuṙo na iwa, ndoṙo tsawo tsekyewasongoya kyiiṙi kya ifanyiṟa mmbiu yawo wawenyi, imina wuchilyi wo Ruwa, na ilahia shigumbe shiwoṙe mng'ano sha Ruwa ai wuye. 9 Kyaindi Mikaelyi, malaika ang'anyi, kyiyeri alewingana na Mokyiriinzi, na igaluana na oe kyipfa kya mmbiu o Mose, alekaria imshitakyi-pfo, indi nalegamba, “Mndumii nakuṟoṟome.” 10 Kyaindi wandu-wa wekyelahia shindo walashiichi; shindo shilya shilya washiichi wookyia kacha nyisho shiwarumatsa cha mando ga saka. 11 Ochia lowo! Kyipfa waleosha njia ya Kaini, na iosha ṙeko lya Balaamu kyipfa kya heleri. Walenyamaṟa chandu na Kora alenyamaṟa, nawo walerumatso cha oe. 12 Wandu-wa nyi wandu wa ngataṟa, wekyefanyiṟa shelya shanyu mokyelya kyiyeri mosanzia handu hamwi, wechilya kulawoṙe wuowu. Nyi mapuchi galawoṙe mṟinga, gekyeṙoo nyi mkuma. Nyi mashiṙi galawoṙe maṟa, galawoṙe ndunda, gapfiie kawi, na gamakuluo piu. 13 Nyi shiwiṟi sha ipalyipalyinyi shilekyewa ishingyia, mawuto gawo ga sonu gakyeri cha iwia lyifanyi lya ipalyipalyi lyifoikyie. Nyi nyenyeri tsikyama-kyama, walya Ruwa awaṟeyeṟie handu mlungana meemenyi ung'anyi. 14 Na Enokyi, mndu o mfungaaṙe numa ya Adamu, naleonguo shisuku kyipfa kyawo, echigamba, “Ambuya, Mndumii nalecha na waele wakye, shiku kui shiku, 15 kundu naanduye wandu woose, na itoṟisha woose walaiṙikyie Ruwa, kyipfa kya mawuto gawo goose ga wuṙetsi, walewuta kulawoṙe iowuo na ikunda Ruwa na kyipfa kya maṙeṙo goose malemeri galeṙeṙo nyi iwo wanyamaṟi walekyeindia Ruwa.” 16 Wandu-wa wekyenunuwa, wekyeyenda kui lango tsawo, na maṙumbu gawo gekyeṙeṙa maṙeṙo gang'anyi ga tiri, wechikundia wandu wawoṙe kyiṟumi kyipfa kya iwona kyiira. 17 Indi nyoe, wakunde, kumbuonyi maṙeṙo galeṙeṙo kacha nyi wasu wa Mndumii oṙu Yesu Kristo, 18 kye walemmbia, “Kyiyeri kyefurumia kowaṙa wandu wetaluo, wechiosha lango tsawo wawenyi tsa wuṙetsi.” 19 Wandu-wo iwo nyiwo wekyeende nduutsano, wandu wa wuyana-wu tikyi, walawoṙe Mumuyo. 20 Indi nyoe, wakunde, mochikukarisha kui iiṙikyia lyanyu lyikyeri lyiele mnu, na iterewa Mumuyonyi Mweele, 21 kuringyenyi ikundenyi lya Ruwa, kunu mochiweṙelyia iwonio wukyiwa lya Mndumii oṙu Yesu Kristo, mṟasa muambilyie moo o mlungana. 22 Woṙonyi nyi wukyiwa mrimenyi kyipfa kya wengyi waikapa kawi, 23 na wengyi wakyiṟenyi kui iwarakuo iwuka moṙonyi; na wengyi woṙonyi nyi wukyiwa mrimenyi kyipfa kyawo kui wuowu; mochisuo maa nguwo ingyifanyiṟe nyi mmbiu. 24 Icho eiṙima imuringa nyoe mulakape ṙende, na imugoṟotsa mbele ya mng'ano okye kulawoṙe iteiya sienyi ing'anyi; 25 icho akyeri Ruwa amonyi kulawoṙe ungyi; Mkyiṟa oṙu kui Yesu Kristo Mndumii oṙu; mng'ano nyi okye, na wuchilyi, na wuiṙimi, na pfinya; wookyia mlungana, na wulalu, mṟasa mlungana. Amen.
1 Ishi nyi shindo Ruwa aleshukuya Yesu Kristo kundu nashiloṟe waṟundi wakye. Shindo shechiwutika iwinyi kyipfa Ruwa naṙumbuo shiwe kuṙo; na Yesu Kristo kashienenga malaika okye, malaika-cho kashishukuya Yohane na Yohane kashigamba ko wandu wa Ruwa. 2 Yohane aleṟingyishia Ṙeṙo lya Ruwa, na wuṟingyishi wo Yesu Kristo, wo shindo shoose alewona. 3 Agusu mndu ulya asomia wandu ulogo-lu luwukyie ko Ruwa, na walya waaṙanyia na iosha kyilya logamba wechichihiyo. Cha kyipfa hechiiṙa kyiyeri kyileshi shindo-shi shilaafukyia-pfo. 4 Inyi Yohane, ngaṙika shiiṟikyiṟo ko siṟi tsilya mfungaaṙe tsikyeri urukyenyi lo Asia. Isaṟia lyikae konyu na ufoṟo, shiwukyie ko ulya awekyeri pfo na akyeri pfo na echicha. Isaṟia na ufoṟo shiwukyie ko mumuyo iya mfungaaṙe ikyeri mbele ya kyitima kya Ruwa kya mng'ano. 5 Lyingyi-se shiwukyie ko Yesu Kristo, mṟingyishi ekyeafutsia shilya ateṟia, mmbele o wapfu, na ang'anyi o wamangyi wa wuyana. Ulya alukundi na ilusanja ngyuunyamaṟi tsaṙu samunyi yakye, 6 na ilugaluo iwa wumangyi na makohanyi wechichilyia na oe na iṟundia Ruwa okye na Awu. Kyiṟumi na mng'ano ukyeri na oe mṟasa mlungana na mlungana. Amen. 7 Kristo naicha iwinyi akyeri mapuchinyi; na orio riso lyechimmbona, na iwo walemmbaaga, na mbaṟe tsoose tsa wandu wa wuyana tsechikapa ṟanyi kyipfa kyakye. Yee. Amen. 8 Inyi nyi Alyifa na Omeka, mawookyionyi na mafurumionyi, Mndumii Ruwa nagamba, awekyeri pfo na akyeri pfo na echicha, Mopfinya. 9 Inyi Yohane, mono-wama onyu ekyelya wukyiwa hamwi na nyoe, na Wumangyi na iweṙelyia Yesu Kristo, ngyiwekyeri kyiṟingyitinyi kyekyelago Patimo, kyipfa ngyilekongaonguo Ṙeṙo lya Ruwa na wuṟingyishi wuleloṟo nyi Yesu. 10 Mumuyo nalecha na koko mfiri o Ruwa. Ngaicho ṟui lying'anyi numa yako, cha ṟui lya iganda, 11 lyechigamba, “Ṟeia kyitapunyi ishi ushiwonyi, ushiṙuo ipfo siṟinyi mfungaaṙe: Efeso, Simirina, Perigamo, Tiatira, Saridi, Filadelyifia na Laodikyia.” 12 Ngainduka ngyiwone ṟui-lyo lyaṙeṙa na inyi. Na kyiyeri ngyileinduka, ngyilewona shindo sheyekyia taa mfungaaṙe sha sahapu; 13 na halya shindonyi ngawona kyindo kyikyeri cha mndu, aṟee mkoṟoṟi ushikyie maṙendenyi gakye, na iinewo mkanda o sahapu maweenyi gakye. 14 Mṙoe okye na njui tsakye tsiwekyeri uwiṟo cha mberi ngyiilyi tsa ondo, cha koṟa; na meso gakye cha ulumi lo moṙo; 15 na maṙende gakye aṟeṟa ngyiilyiṟe mnu, cha ilyi ingyisanje nyi moṙo ung'anyi; na ṟui lyakye cha ṟui lya mṟinga ufoi. 16 Na oe nawewoṙe nyenyeri mfungaaṙe kuwokonyi kokye ko kulyoe; na ushu luohi, lo mmbega kuwi, lochiwuka ṙumbunyi kokye; na kyaam kyakye cha mnengyeṟi uiwaa na pfinya. 17 Na inyi kyiyeri ngyilemmbona, ngyileoloka maṙendenyi gakye cha mndu apfiie. Kayekyia kuwoko kokye ko kulyoe wuye yako, echigamba, “Molaowuoe. Inyi nyi o kuwooka na o mafurumionyi, 18 na ai na moo; na inyi ngyiwepfiie na wulalu ngyii na moo mṟasa mlungana na mlungana. Na inyi ngyiwoṙe ngyuupfunguo tsa upfu, na tsa halya-ndu wapfu wekyekaa. 19 Kyasia, uṟeie shindo-sho owona, na shilya shikyeri pfo, na shilya shechicha numa ya isho. 20 Wuṟikyi wo nyenyeri tsilya mfungaaṙe owona kuwokonyi koko ko kulyoe, na wuṟikyi wo shindo shilya mfungaaṙe sha sahapu. Nyenyeri tsilya mfungaaṙe nyi malaika wa siṟi tsilya mfungaaṙe; na shindo-sho mfungaaṙe nyi siṟi mfungaaṙe.”
1 “Ko malaika o siṟi ikyeri Efeso ṟeia: ‘Ishi nyisho agamba ulya awoṙe nyenyeri-tso mfungaaṙe kuwokonyi kokye ko kulyoe, ulya ekyechumia ipfo shindonyi mfungaaṙe sha sahapu. 2 Ngyiichi mawuto gapfo, na wukyiwa wopfo, na iweṙelyia lyapfo, na kye oiṙima ikaa na wandu wawicho-pfo. Lyingyi-se nuleyesha walya wekyegamba kye wo nyi wasu, nawo chi wasu-pfo, kowona kye wekyeṙeṙa wongo. 3 Lyingyi-se nuwewoṙe iweṙelyia na ikarishia kyipfa kya rina lyako, maa ulewina-pfo. 4 Kyaindi ngyiwoṙe ṙeṙo kyipfa kyapfo, kye noṙa ikunda lyilya lyapfo lya kuwooka. 5 Kyasia, kumbuo nyi hanga uleoloka; uṙumbuye wunyamaṟi, uwute mawuto ga mfiri ya numa. Kyaindi ulandewute kuṙo, ngyiicha na kopfo, na inyi ngyechiwuta kyindo kyapfo kyeyekyia taa iho-ndu kyikyeri, ulandeṙumbuye wunyamaṟi. 6 Kyaindi nuwoṙe kyindo-kyi, kye nusuuye mawuto ga Wanikolai, galya na inyi ngyigasuuye. 7 Ulya awoṙe kuṙwi, naicho mbonyi-tsi Mumuyo aiwia siṟi. Ulya mowinga, ngyechimwenenga ilya ndunda tsa ikyiṙi lya moo, lyikyeri bustanyinyi ya Ruwa.’ ” 8 “Na ko malaika o siṟi ikyeri Simirina ṟeia: ‘Ishi nyisho agamba ulya akyeri o kuwooka na o mafurumionyi, awepfiie, numa ya iho kawaṙa moo. 9 Ngyiichi wukyiwa wopfo na wufofo wopfo (kyaindi nui mnjama.) Ngyiichi na shilahio sha walya wekyegamba kye nyi Wayuda, nawo chi Wayuda-pfo, indi nyi sinagogi lya Satana. 10 Ulaowuoe shindo shechikukooya. Manya kye Mokyiriinzi-cho nechiṟukucha wengyi kyiiṙi kyanyu kyipfungonyi kundu muyesho, na nyoe mochilya wukyiwa mfiri ikumi. Uwe msimiri mṟasa ipfa, na inyi ngyechikuenenga oṟo ya moo. 11 Ulya awoṙe kuṙwi, naicho mbonyi-tsi Mumuyo aiwia siṟi. Ulya mowinga nechikyia iwiyitso kulya nduwenyi ya moṙo, kyindo kyikyeri nyi upfu lo kawi.’ ” 12 “Na ko malaika o siṟi ikyeri Perigamo ṟeia: ‘Ishi nyisho agamba ulya awoṙe ushu-lo luohi, lo mmbega kuwi. 13 Ngyiichi handu okyekaa. Nyi ho-ndu hawoṙe kyitima kya mng'ano kya Satana; na iyoe nuwoṙe mnu rina lyako, maa ulekana iiṙikyia lyako-pfo, maa mfiri ulya Antipa, mṟingyishi oko, mndu oko ekyeafutsia shilya ateṟia, alewoogo kyiiṙi kyanyu, halya-ndu Satana ekyekaa. 14 Kyaindi ngyiwoṙe mbonyi ngyaangu kyipfa kyapfo, cha kyipfa nuwoṙe pfo wandu wekyeosha malosho ga Balaamu, ulya alelosha Balakyi nawikye kyindo kyetewe Waisiraelyi, kye walye shindo shileṙasio mafano na iwuta shindo sha wuṟui. 15 Na wuṙo na iyoe nuwoṙe wandu wekyeosha malosho ga Wanikolai. 16 Kyasia ṙumbuya wunyamaṟi. Ulandeṙumbuye wunyamaṟi, ngyiicha na kopfo iwinyi, na inyi ngyechiwaṙa shiṙa nawo kui ushu lo ṙumbu lyako. 17 Ulya awoṙe kuṙwi naicho mbonyi-tsi Mumuyo aiwia siṟi. Ulya mowinga ngyechimwenenga ṙombo lya Manna ingyiṟikye, na inyi ngyechimwenenga igoe lya uwiṟo, na wuye ya igoe-lyo hahaṟeie rina lyihya mndu alalyiichi sile ulya ailyiambilyia.’ ” 18 “Na ko malaika o siṟi ikyeri Tiatira ṟeia: ‘Ishi nyisho agamba Mono-Ruwa, ulya awoṙe meso gakye cha ulumi lo moṙo na maṙende gakye mfano o aṟeṟa ngyiilyiṟe mnu. 19 Ngyiichi mawuto gapfo, ikunda, iiṙikyia, wuṟundi na iweṙelyia lyapfo. Lyingyi-se kye mawuto gapfo ga mafurumionyi gang'ana kuta galya ga mawookyionyi. 20 Kyaindi ngyiwoṙe ṙeṙo kyipfa kyapfo, kye okyelega kyindo mndu mka ulya ekyelago Yesebelyi akundi-pfo. Ulya ekyegamba kye nyi moonguo shisuku na ilosha waṟundi wako na iwaṙetsa, kundu wawute shindo sha wuṟui na ilya shindo shaṙasio mafano. 21 Na inyi ngamwenenga ṙaawa kundu naṙumbuye wunyamaṟi, maa akundi iṙumbuya wuṟui wokye-pfo. 22 Manya kye ngyechimṟukucha wuye ya ulyii, na iwo wekyewuta na oe shindo sha wuṟui, walye wukyiwa wung'anyi, walandeṙumbuye mawuto gakye. 23 Na inyi ngyewaaga wana wakye. Na siṟi tsoose tsechimanya kye inyi nyi oe aichi makusaṟo gakyeri mrimenyi ko wandu. Na inyi ngyechitaa orio umwi onyu iṙuana na mawuto gakye. 24 Kyaindi ngammbia nyoe mukyeri Tiatira, woose walawoṙe malosho-go, walaichi ngyeṟo tsa Satana, chandu wekyegamba, ngyechimṙika ṟio lyingyi-pfo. 25 Indi kyilya muwoṙe kyiwaṙenyi tapu, mṟasa ilyi ngyechicha. 26 Na ulya mowinga, na iringa mawuto gako mṟasa mafurumionyi, ngyechimwenenga ichilyia walya walaiṙikyie Ruwa. 27 Na oe nechiwachilyia kui upoi lo kyichakari, chandu shindo sha teri yeachikyia shinungu shekyeachikyio, chandu inyi ngyileshiambilyia ko Awu oko. 28 Na inyi ngyechimwenenga nyenyeri ya ngamenyi. 29 Ulya awoṙe kuṙwi, naicho mbonyi-tsi Mumuyo aiwia siṟi.’ ”
1 “Na ko malaika o siṟi ikyeri Saridi ṟeia: ‘Ishi nyisho agamba ulya awoṙe mumuyo-yo mfungaaṙe ya Ruwa, na nyenyeri tsilya mfungaaṙe. Ngyiichi mawuto gapfo, kye nuwoṙe rina lya iwaṙa moo, na iyoe nupfiie. 2 Uwe mndu molaa kyiṙombo, uikare shindo shilya shitsugae, shikyeri kufuhi na ipfa. Kyipfa ngyiwonyi kye mawuto ganyu nyi galya muwaṟi iwuta mbele ya Ruwa-pfo. 3 Kyasia kumbuo chandu uleambilyia, na chandu uleicho. Osha isho na iṙumbuya wunyamaṟi. Kyaindi ulandelae kyiṙombo, ngyechicha cha mbafu, maa ochimanya saa ngyechicha na kopfo-pfo. 4 Kyaindi nuwoṙe marina maangu ipfo Saridi, wandu walekyefanyiṟa nguwo tsawo na ukoe. Nawo wechiyenda hamwi na inyi waṟee nguwo ngyiilyi cha itso, cha kyipfa wawaṟi. 5 Ulya mowinga nechiṟiko nguwo-tso ngyiilyi, maa ngyechiwuta rina lyakye kyitapunyi kya moo-pfo, na inyi ngyechiṟingyishia rina-lyo mbele ya Awu oko, na mbele ya malaika wakye. 6 Ulya awoṙe kuṙwi, naicho mbonyi-tsi Mumuyo aiwia siṟi.’ ” 7 “Na ko malaika o siṟi ikyeri Filadelyifia ṟeia: ‘Ishi nyisho agamba ulya akyeri mweele, na akyeri o loi, awoṙe na upfunguo lo Dawidi, ulya mopfunguo maa kulawoṙe mopfunga, na oe nekyepfunga maa kuwoṙe ekyepfunguo-pfo. Ngyiichi mawuto gapfo. 8 Ngakuenenga moongo mpfunguoe mbele yapfo, moongo kulawoṙe mndu echiiṙima iushinga, cha kyipfa nuwoṙe pfinya kyitutu, na iyoe noosha mawawaso gako, maa ulekana rina lyako-pfo. 9 Ngakuenenga wandu wafoi wakyeri wa sinagogi lya Satana, wekyegamba kye nyi Wayuda, nawo chi Wayuda-pfo, indi wekyeṙeṙa wongo. Ngyechiwaitika wachepfiria ndi maṙendenyi gapfo, na imanya kye ngakukunda. 10 Cha kyipfa noosha mawawaso gako ga ikarishia, inyi ngyechikuringa, ulekane na kyiyeri kyilya kya iyesho kyikyiṟeyeṟe icha na wuyanenyi, iyesha walya wekyekaa urukyenyi. 11 Ngyiicha iwinyi. Waṙa mnu kyilya uwoṙe, kulache mndu nakusokye oṟo yapfo. 12 Ulya mowinga, ngyechimgaluo nawe ngoe hekalunyi lya Ruwa oko, maa echiwuka-se pfo maa ale-pfo. Na inyi ngyechiṟeia wuye yakye rina lya Ruwa oko, na rina lya mṟi o Ruwa oko, Yerusalemu-yo ngyihya, uisoka iwuka ruwewu ko Ruwa oko. Lyingyi-se ngyeṟeia wuye yakye rina lyako ngyimonyi, lyilya lyihya. 13 Ulya awoṙe kuṙwi, naicho mbonyi-tsi Mumuyo aiwia siṟi.’ ” 14 “Na ko malaika o siṟi ikyeri Laodikyia ṟeia: ‘Ishi nyisho agamba ulya akyeri Amen. Mṟingyishi ekyeafutsia shilya ateṟia na o loi, mawookyionyi ga shindo shoose Ruwa agumbie. 15 Ngyiichi mawuto gapfo, kye uichololyia maa uiha-pfo. Kyiwechichia kokooya uweichololyia ang'u uweiha. 16 Kyasia, cha kyipfa uwoṙe kyimrikye, maa uichololyia maa iha-pfo, ngyekuṙeeka, uwukye ṙumbunyi koko. 17 Cha kyipfa nuigamba, inyi nyi mnjama, ngyiwoṙe wunjama, maa ngyiuṟie kyindo kyoose-pfo; na iyoe uichi kye iyoe nyi mndu mfafa, na moilacha-ilacha makusaṟo, na mkyiwa, na kyipfupfuṟe, na mndu ukyeri kyiṟanguoe-pfo. 18 Ngyikuwia kyindo kya wuṟango, uwuṟe koko sahapu ingyisanje kui moṙo, uiṙime iwa mnjama; na nguwo ngyiilyi uiṙime iṟaa, sonu ya kyiṟanguoe kyapfo ilawono; na mṙi o meso oshia meso gapfo, uiṙime iwona. 19 Woose ngyiwakundi ngyekyewaṟoṟoma na iwatoṟisha. Kyasia waṙa wuragari, uṙumbuye wunyamaṟi. 20 Ngyigoṟokyi moongonyi, ngyikapa hodi. Mndu kaicho ṟui lyako, na iṟuguo moongo, ngyechiiṙa na kokye, na inyi ngyechilya hamwi na oe, na oe hamwi na inyi. 21 Ulya mowinga, ngyechimwenenga momu o iṙamia hamwi na inyi kyitimenyi kyako kya mng'ano, chandu na inyi ngyilewinga ngaṙamia hamwi na Awu oko kyitimenyi kyakye kya mng'ano. 22 Ulya awoṙe kuṙwi, naicho mbonyi-tsi Mumuyo aiwia siṟi.” ’
1 Numa ya iho ngaloṟo kyindo kyingyi, ngawona moongo uiṟuguka ruwewu, na ṟui lyilya lya kuwooka ngyilelyiicho cha ṟui lya iganda lyechiṙeṙa na inyi, lyechigamba, “Ṙo mṟasa kunu, na inyi ngyechikuloṟa shindo shiwaṟi icha numa ya isho.” 2 Na cha ilyi Mumuyo kacha na koko; na hakawoneka kyitima kya mng'ano kyikyiwikyie ruwewu na mndu umwi nawekyiṙamilyie. 3 Na ulya aweṙamie nawekyeri cha ngyeela ya kyimaṟamaṟa na kyimaande, cha ṟangyi ya magoe maata ga woguru wung'anyi, na mkoṟi o mvuo uleringyichia kyitima kyilya kya mng'ano, ukyeri cha igoe lyekyelago sumaridi. 4 Na shitima makumi gawi na shiina shileringyichia kyitima kyilya kya mng'ano, na wuye ya shitima shilya ngyilewona wameeku makumi gawi na waana, waṙamie, wawaṟikye nguwo tsa uwiṟo; na mṙoenyi kowo wawewoṙe oṟo tsa sahapu. 5 Na halya kyitimenyi kya mng'ano hakawuka mbawa na ṟui na ikuṟuṟuma. Na taa mfungaaṙe tsa moṙo tsileaka mbele ya kyitima kya mng'ano, nyiyo Mumuyo mfungaaṙe yekyeṟundia Ruwa. 6 Na mbele ya kyitima kyilya kya mng'ano hawewoṙe kyindo cha ipalyipalyi lya kyiyewo, cha koṟa; na halya kyitimenyi kya mng'ano, ngyuura tsoose tsa kyitima-kyo, hawewoṙe wandu waana wai na moo, waichuo meso mbele na numa. 7 Na icho o kuwooka ai na moo nawekyeri cha simba; na o kawi ai na moo nawekyeri cha igache; na o kaṟaaṟu ai na moo nawewoṙe kyaam kyikyeri cha kya mndu; na o kaana ai na moo nawekyeri cha mbeṟo irunduka. 8 Na iwa waana wai na moo, orio umwi nawewoṙe makungo gaṟandaaṟu; na ngyuura tsoose na kyanumba waweichuo meso, maa wekyeonyonya kyingoto maa kyio-pfo, wechigamba, “Mweele, Mweele, Mweele, Mndumii Ruwa Mopfinya, awekyeri pfo na akyeri pfo na echicha.” 9 Na iwo wai na moo kyiyeri waienenga kyiṟumi ulya aṙamie kyitimenyi kya mng'ano, na kyiṟumi, na iana, ulya ai na moo mṟasa mlungana na mlungana, 10 nyi lyo-ndu wameeku-wo makumi gawi na waana wekyeoloka mbele yakye oe aṙamie kyitimenyi kya mng'ano. Nawo wekyepfiria ndi ulya ai na moo mṟasa mlungana na mlungana. Nawo wekyewiyitsa oṟo tsawo mbele ya kyitima kyilya kya mng'ano, wechigamba, 11 “Nuwaṟi iyoe, Mndumii oṙu na Ruwa oṙu, iambilyia kyiṟumi na iindio na pfinya. Cha kyipfa nyi iyoe ulegumba shindo shoose, na nulekunda shindo-sho shiwe kuṙo, nasho shikagumbo.”
1 Kyasia ngawona kuwokonyi ko kulyoe ko ulya aṙamie kyitimenyi kya mng'ano kyindo kyikyeri cha kyichonyi kyikyiṟeie ngyuura tsoose, hahawikye shindo mfungaaṙe sheloṟa monyi o kyindo-kyo kyiwekyiṟeie. 2 Ngawona malaika awoṙe pfinya ailosha Ṙeṙo lya Ruwa na ṟui lying'anyi, echigamba, “Nyi wui awaṟi ifunja shindo-shi sheloṟa monyi okyo na itaṟahuo kyitapu-kyi?” 3 Maa kuwewoṙe mndu ruwewu, maa urukyenyi, maa wanda ya uruka, aleiṙima ipfunguo kyindo-kyo kyiwekyioṟoose maa ikyiambuya-pfo. 4 Na inyi ngafiiṟa mnu kyipfa halalewoneka mndu awaṟi ipfunguo kyindo-kyo, maa ikyiambuya. 5 Na umwi o wameeku walya kangyiwia, “Ulafiiṟe; kyewona Simba iya ya mbaṟe ya Yuda, Mchilyi o kyishari kya Dawidi, oe nawinga naiṙime itaṟahuo kyitapu-kyo, na shindo shilya shakyo mfungaaṙe sheloṟa monyi okyo.” 6 Ngawona halya kyitimenyi kya mng'ano na walya waana wai na moo, na makyiṙi-gawi gawo wameeku walya, Kyiondo kya Ruwa kyigoṟokyi, kyikyeri cha ilyi kyamshinjo, kyiwoṙe membe mfungaaṙe na meso mfungaaṙe, shikyeri nyi mumuyo mfungaaṙe yekyeṟundia Ruwa ingyiṙume wuyanenyi koose. 7 Kyiondo-kyo kyikacha, kyikaira kyitapu-kyo iwuka kuwokonyi ko kulyoe ko ulya aṙamie kyiṙinyi kya mng'ano. 8 Na kyiyeri amwambilyie kyitapu-kyo, iwo waana wai na moo na wameeku walya makumi gawi na waana wakaoloka mbele ya Kyiondo kyilya kya Ruwa, orio umwi owo awoṙe wuṙa wo ndusu, na pakulyi tsa sahapu tsiichuo shindo shekyepfaama necha, shikyeri nyi shiterewo sha wandu wa Ruwa. 9 Nawo waiimba kyiimbo kyihya, wechigamba, “Nuwaṟi iyoe iwaṙa kyitapu-kyo na ifunja shindo shakyo shaloṟa monyi okyo; cha kyipfa nuleshinjo, koguṟia Ruwa kui samu yapfo wandu wa orio mbaṟe na mṙeṙie na kyishari na isanga. 10 Kowagaluo iwa wumangyi na makohanyi ko Ruwa oṙu; nawo waichilyia urukyenyi.” 11 Ngawona na iicho ṟui lya malaika wafoi ngyuura tsoose tsa kyitima kyilya kya mng'ano, na ngyuura tsa walya wai na moo, na tsa wameeku walya, na itala lyawo lyiwei shiku ikumi ka shiku ikumi na kyiku ka kyiku, 12 wechigamba na ṟui lying'anyi, “Kyiondo kya Ruwa kyileshinjo kyiwaṟi iambilyia wuiṙimi, wunjama, wuṟango, pfinya, iindio, kyiṟumi na mboṟa.” 13 Na orio kyindo kyigumbe kyikyeri ruwewu na urukyenyi na wanda ya uruka na wuye ya ipalyipalyi, na shindo shoose shikyeri ipfo ipalyipalyinyi, ngyilechiicho shechigamba, “Mboṟa na iindio na kyiṟumi na wuiṙimi nyi wo ulya aṙamie kyitimenyi kya mng'ano, na Kyiondo kya Ruwa, mṟasa mlungana na mlungana.” 14 Na walya waana wai na moo wakagamba, “Amen.” Na wameeku walya waleoloka, wakapfiria ndi.
1 Numa ya iho ngawona Kyiondo kya Ruwa kyiyeri kyiweipfunguo kyimwi kya shindo shilya mfungaaṙe sheloṟa monyi o kyitapu kyilya, ngaicho umwi o walya waana wai na moo echigamba, cha ṟui lya ikuṟuṟuma, “Nnjo!” 2 Ngawona farasi ya uwiṟo, na ulya aweiṙamilyie nawoṙe uṙa, kaenengo oṟo, na oe kafuma, kundu nandewingana-se naiṙime iwinga. 3 Na kyiyeri alefunja kyindo kya kawi kyeloṟa monyi o kyitapu kyilya, ngaicho ulya o kawi ai na moo echigamba, “Nnjo!” 4 Farasi ingyi ikafuma, ya kyimaande tarii, na ulya aweiṙamilyie naleenengo iwuta ufoṟo urukyenyi, kundu wandu wawaagane, na oe kaenengo ushu lung'anyi. 5 Na kyiyeri alefunja kyindo kya kaṟaaṟu kya kyitapu kyilya, ngaicho ulya o kaṟaaṟu ai na moo echigamba, “Nnjo!” Ngawona farasi ya njuu, na ulya aiṙamilyie nawoṙe kyindo kyepima shindo kuwokonyi kokye. 6 Ngaicho cha ṟui kyiiṙi kya walya waana wai na moo, lyechigamba, “Kyipapa kya nganu ko rupia ingyigawe kawi, na shipapa shiṟaaṟu sha shayiri ko rupia ingyigawe kawi, maa ulanyamaṟe mafuṙa maa mpfinyo.” 7 Na kyiyeri alefunja kyindo kya kaana kyeloṟa monyi o kyitapu kyilya, ngaicho ṟui lya ulya o kaana ai na moo echigamba, “Nnjo!” 8 Ngawona farasi ifanyi ifui-ifui, na ulya aiṙamilyie ekyelago Upfu na Halya-ndu wapfu wekyekaa kaoshana na oe. Nawo wakaenengo ichilyia ura lumwi lo ngyuura tsiina tsa uruka, wawaage kui ushu, kui njaa, kui tauni na kui mando ga saka. 9 Na kyiyeri alefunja kyindo kya kataanu kyeloṟa monyi o kyitapu kyilya, ngawona wanda ya mesa ya Mndumii mrima ya walya walewoogo kyipfa kya Ṙeṙo lya Ruwa, na kyipfa kya wuṟingyishi wawewoṙe. 10 Wakafiiṟa na ṟui lying'anyi, wechigamba, “Ruwa, Mweele, Monyi wuloi, mṟasa indi ochikyelyio itaa kyiṟaache ko walya waleluwaaga?” 11 Nawo wakaenengo orio umwi nguwo ngyileshi ya uwiṟo, wakawio wachihiyo kyipfa hatsugai kyiyeri kyitutu, mṟasa kyiyeri kya iafukyia itala lya wangari wawo iṟundenyi na wana wa wama wawo, wechiwawaaga wuṙo chawo. 12 Na inyi ngawona, kyiyeri alefunja kyindo kya kaṟandaaṟu kyeloṟa monyi o kyitapu kyilya, hawewoṙe kyiriinza, mnengyeṟi ukofana njuu cha ikunyia lya mberi, mori oose ukowa cha samu, 13 na nyenyeri tsikaoloka urukyenyi chandu mfumu okyetonyitsa ndunda ngyiwishi, kyiyeri okumo nyi mkuma ung'anyi. 14 Ngyina ikawuto ho chandu ura lo kyitapu lokyeoṟooso, na orio fumvu na kyiṟingyiti shikawuto halya-ndu shiwekyeri. 15 Na wamangyi wa wuyana, na wawoṙe rina, na wasongoru wa shiṙa, na wanjama, na wawoṙe pfinya, na orio mtumo, na mndu alakyeri mtumo, wakakuṟiika mbakonyi na wanda ya maṟaṟa ga mafumvu, 16 wechiwia mafumvu na maṟaṟa, “Luolokyienyi, lushingyienyi, mbele ya ushangu lokye ulya aṙamie kyitimenyi kya mng'ano, na nyashi ya Kyiondo kya Ruwa. 17 Cha kyipfa mfiri o nyashi yawo ing'anyi omwafukyia; na nyi wui eiṙima ikyia?”
1 Numa ya iho ngawona malaika waana wagoṟokyi ngyuurenyi tsiina tsa uruka, wechishingyia mkuma ina ya uruka, mkuma ulakume urukyenyi, maa ipalyipalyinyi, maa ikyiṙinyi lyoose. 2 Ngawona malaika ungyi echiṙo iwuka ura lo ngamenyi, awoṙe kyindo kyeloṟa kye kyindo nyi kya Ruwa, kawakalagatsia na ṟui lying'anyi malaika walya waana waleenengo iṟunda lyenyamaṟa uruka na ipalyipalyi, 3 echigamba, “Maa mulanyamaṟe uruka, maa ipalyipalyi, maa mashiṙi, mṟasa kyiyeri lochimarisa iwikyia waṟundi wa Ruwa oṙu kyindo kyeloṟa kye nyi wa Ruwa ngyuushangunyi kowo.” 4 Ngaicho itala lya walya walewiko kyindo kyeloṟa kye nyi wa Ruwa orio mbaṟenyi ya Waisiraelyi, wandu shiku igana lyimwi makumi gaana na shiina. 5 Wa mbaṟe ya Yuda shiku ikumi na shiwi wawawikye kyindo kyeloṟa kye nyi wa Ruwa. Wa mbaṟe ya Ruben shiku ikumi na shiwi. Wa mbaṟe ya Kadi shiku ikumi na shiwi. 6 Wa mbaṟe ya Asheri shiku ikumi na shiwi. Wa mbaṟe ya Naftalyi shiku ikumi na shiwi. Wa mbaṟe ya Manase shiku ikumi na shiwi. 7 Wa mbaṟe ya Simion shiku ikumi na shiwi. Wa mbaṟe ya Lewi shiku ikumi na shiwi. Wa mbaṟe ya Isakari shiku ikumi na shiwi. 8 Wa mbaṟe ya Sabulon shiku ikumi na shiwi. Wa mbaṟe ya Yosefu shiku ikumi na shiwi. Wa mbaṟe ya Benyamen shiku ikumi na shiwi wawawikye kyindo kyeloṟa kye nyi wa Ruwa. 9 Numa ya iho ngawona kyisanzionyi kying'anyi mnu kulawoṙe mndu eiṙima itala wandu-wo. Wandu wa orio isanga, orio mbaṟe, na kyishari, na mṙeṙie, wagoṟokyi mbele ya kyitima kyilya kya mng'ano, na mbele ya Kyiondo kya Ruwa. Wawaṟikye nguwo tsa uwiṟo, wawoṙe maṟamba ya maṟa gakyeri cha makangachi mawokonyi gawo; 10 wechifiiṟa na ṟui lying'anyi, wechigamba, “Wukyiṟo wukyeri ko Ruwa oṙu aṙamie kyitimenyi kya mng'ano, na Kyiondo kya Ruwa.” 11 Na malaika woose wawegoṟokyi ngyuura tsoose tsa kyitima kyilya kya mng'ano, na ngyuura tsa wameeku-wo, na tsa walya waana wai na moo, nawo wakaoloka na ndewu mbele ya kyitima kyilya kya mng'ano, wakaindia Ruwa, 12 wechigamba, “Amen! Mboṟa, mng'ano, wuṟango, iana, iindio, wuiṙimi na pfinya shikae ko Ruwa oṙu mṟasa mlungana na mlungana. Amen. ” 13 Umwi o wameeku walya kagaluo, kangyiwia, “Ngyesa wandu-wa wawaṟikye nguwo tsa uwiṟo nyi wakyi? Nawo wawukyie kwi?” 14 Ngamgaluo, ngammbia, “Mndumii oko, nuichi iyoe.” Kangyiwia, “Iwo nyiwo wawukyie kulya wukyiwenyi wung'anyi, nawo wasanjie nguwo tsawo, na itsiilyiṟa peṟu samunyi ya Kyiondo kya Ruwa. 15 Koikyo wakyeri mbele ya kyitima kya mng'ano kya Ruwa, nawo waimṟundia kyingoto na kyio hekalunyi lyakye, na oe aṙamie kyitimenyi kya mng'ano nechiala hema lyakye wuye yawo. 16 Wechiwoṙo nyi njaa-se-pfo, maa nyoṙa-pfo, maa wechiwooyo nyi mmbaṟi maa mrikye oose-pfo. 17 Cha kyipfa Kyiondo-kyo kya Ruwa, kyikyeri kyitimenyi kya mng'ano, kyechimulyisa, nakyo kyechimusongoya iyenda shokyenyi tsa mṟinga uwoṙe moo, na Ruwa nechiwaanguo mcheṟeṟe yoose mesonyi gawo.”
1 Na kyiyeri alefunja kyindo kya mfungaaṙe kyeloṟa monyi o kyitapu-kyo, ruwewu kukotsia sau cha kyiyeri kya dakyika makumi gaṟaaṟu. 2 Na inyi ngawona malaika walya mfungaaṙe wekyegoṟoka mbele ya Ruwa, nawo wakaenengo maganda mfungaaṙe. 3 Na malaika ungyi kacha kagoṟoka mbele ya mesa ya Mndumii, awoṙe kyindo kya sahapu kyekoṟia uvumba, kaenengo uvumba lufoi, kundu naluwikyie hamwi na shiterewo sha wandu wa Ruwa woose mesenyi ya Mndumii ya sahapu, ikyeri mbele ya kyitima kya mng'ano. 4 Na mtsu o uvumba lulya ukoṙo mbele ya Ruwa hamwi na shiterewo sha wandu wa Ruwa, iwuka mawokonyi ga malaika. 5 Na malaika-cho kaira kyindo kyilya kyekoṟia uvumba, kakyiichuṟa moṙo o mesa ya Mndumii, kauwiyitsa urukyenyi, kukowaṙa ikuṟuṟuma na ṟui na mbawa na kyiriinza. 6 Na malaika walya mfungaaṙe wawoṙe maganda mfungaaṙe wakaloṟa cha ilyi wakuṟeyeṟie igakapa. 7 Malaika o kuwooka kakapa iganda, kukokapa mvuo ya magoe na moṙo shilonganyi na samu, shikawiyitso urukyenyi. Ura lumwi lo uruka kyiiṙi kya ngyuura tsiṟaaṟu lukosenekyia, na ura lungyi lo mashiṙi kyiiṙi kya ngyuura tsiṟaaṟu lukosenekyia, na maṟa mawishi goose gakasenekyia. 8 Malaika o kawi kakapa iganda, na kyindo kyikyeri cha fumvu lying'anyi lyiaka moṙo, kyikawiyitso ipalyipalyinyi. Ura lumwi kyiiṙi kya ngyuura tsiṟaaṟu tsa ipalyipalyi lukowa samu. 9 Kyifunjoe kyimwi kyiiṙi kya shifunjoe shiṟaaṟu sha shindo shii na moo sha ipalyipalyinyi shikapfa. Kyifunjoe kyimwi kyiiṙi kya shifunjoe shiṟaaṟu sha shindo shekyeiṙa mṟingyenyi cha melyi kyikanyamaṟo. 10 Malaika o kaṟaaṟu kakapa iganda, nyenyeri ing'anyi ikaoloka iwuka ruwewu, iweaka cha taa. Ikaoloka kyifunjoenyi kyimwi kyiiṙi kya shifunjoe shiṟaaṟu sha mapichi, na shokyenyi tsa mṟinga. 11 Na rina lya nyenyeri-yo nyi Isuka. Na kyifunjoe kyimwi kyiiṙi kya shifunjoe shiṟaaṟu sha mṟinga kyikasuka, na wandu wafoi walenyo mṟinga-cho wakapfa, cha kyipfa ulesuka. 12 Malaika o kaana kakapa iganda, kyifunjoe kyimwi kyiiṙi kya shifunjoe shiṟaaṟu sha mnengyeṟi kyikakapo, na kyifunjoe kyimwi kyiiṙi kya shifunjoe shiṟaaṟu sha mori, na kyifunjoe kyimwi kyiiṙi kya shifunjoe shiṟaaṟu sha nyenyeri, kundu kyifunjoe-kyo kyiwaṙe meema, kyingoto kyilawookye kyifunjoe kyacho kya kaṟaaṟu, maa kyio. 13 Numa ya iho ngawona na iicho mbeṟo irunduka ruwewu, yechigamba na ṟui lying'anyi, “Ochia, ochia, ochia walya wekyekaa urukyenyi! Kyipfa kya maṟui gatsugae ga maganda ga malaika gaṟaaṟu, wakuṟeyeṟie igakapa.”
1 Malaika o kataanu kakapa iganda, ngawona nyenyeri yawuka ruwewu, iolokyi wuyanenyi. Na oe kaenengo upfunguo lo ṟungu lya halya-ndu wandu wapfiie wekyekaa. 2 Kaṟuguo ṟungu lyilya. Mtsu ukoṙo iwuka kulya ṟungunyi, cha mtsu o riko lying'anyi; mnengyeṟi na ngyina shikawaṙa meema kyipfa kya mtsu ulya o ṟungunyi. 3 Nzie tsikawuka kulya mtsunyi, tsikayenda urukyenyi, tsikaenengo pfinya cha pfinya tsa shisheshe sha urukyenyi. 4 Nzie-tso tsikawio tsilanyamaṟe maṟa ga urukyenyi, maa kyindo kyoose kyikyiwishi, maa ikyiṙi lyoose, sile wandu walawoṙe kyindo kyeloṟa kye wo nyi wa Ruwa ngyuushangunyi kowo. 5 Tsikawio kye tsilawawaage, indi walyiso wukyiwa mori itanu. Na iwawio lyawo lyiwei cha iumaṙo nyi kyisheshe, kyiyeri kyaumaṙa mndu. 6 Na mfiri iya wandu wechipfula upfu, indi wechiwona upfu maa ale-pfo. Nawo wechilanga ipfa, na upfu lochiwaṙicha. 7 Na nzie-tso tsiweng'anyi cha farasi tsingyiṟeyeṟe ko shiṙa, na mṙoenyi tsiwewoṙe kyindo cha oṟo, kyifananyi na sahapu, na shaam shatso shiwekyeri cha shaam sha wandu. 8 Natso tsiwewoṙe njui cha njui tsa waka. Na mayego gatso gawekyeri cha mayego ga simba. 9 Natso tsiweṟee ngawo shipootenyi cha ngawo tsa menya. Na ṟui lya makungo gatso lyiwei cha ṟui lya makari ga farasi tsifoi tsiyenda shiṙenyi tseṙicha. 10 Natso tsiwoṙe mshawa cha shisheshe, na msha; na pfinya yatso yefaṟa wandu mori itanu iwekyeri mshawenyi yatso. 11 Na wuye yatso tsiwewoṙe mangyi, na oe nyi malaika o halya-ndu wandu wapfiie wekyekaa, ekyelago Abadoni (kyimwi na igamba Mrumatsi) kui mṙeṙie o Kyiebrania, na Apolyioni kui mṙeṙie o Kyikyiṟikyi. 12 Ochia lo kuwooka lomwiṙa. Kyaindi kuwoṙe ochia tsiwi tsiicha ipfo-ndu luiyenda. 13 Malaika o kaṟandaaṟu kakapa iganda, ngaicho ṟui lyimwi, lyiwukyie ngyuurenyi tsa mesa ya Mndumii ya sahapu ikyeri mbele ya Ruwa, 14 lyechiwia malaika ulya o kaṟandaaṟu awewoṙe iganda, “Pfunguo malaika-wo waana wawapfungyie pichinyi lying'anyi lyekyelago Furati.” 15 Malaika walya waana wakapfungulyio, walya wawewaṟeyeṟe ko saa na mfiri na mori na maka, kundu wawaage kyifunjoe kyimwi kyiiṙi kya shifunjoe shiṟaaṟu sha wandu. 16 Na itala lya mapoo ga asikari wa shiṙa waweṙamilyie farasi lyiwekyeri shiku makumi gawi ka shiku ikumi; ngyileicho itala lyawo. 17 Kuṙo nyi wuṙo ngyilewona farasi-tso kulya shindonyi ngyileloṟo ngyikyeri cha mndu ailoṙo, na iwo wawetsiṙamilyie, waṟee ngawo shipootenyi, cha tsa moṙo, na tsa buluu na manjano; na mṙoe ya farasi-tso nyi-we cha mṙoe ya simba, na ipfo maṙumbunyi gatso kuwewuka moṙo o manjano na mtsu na kyipiriti. 18 Kyifunjoe kyimwi kyiiṙi kya shifunjoe shiṟaaṟu sha wandu wakawoogo kui ngapo-tso tsiṟaaṟu, kui moṙo-cho na mtsu-cho na kyipiriti-kyo, shilewuka maṙumbunyi gatso. 19 Cha kyipfa pfinya tsa farasi-tso tsiwei maṙumbunyi gatso, na mshawenyi yatso; kyipfa mshawa yatso ifananyi na njoka, iwoṙe mṙoe, natso tsekyefaṟa wandu kui mshawa-yo. 20 Na wandu walya waletsugaa, walaiwoogo kui ngapo-tso, walelekana na mafano walegaachikyia-pfo, wakaengyeṟa iindia masatana, na mafano ga sahapu, ga heleri, ga aṟeṟa, ga magoe na ga mashiṙi, galekyeiṙima iwona maa iicho maa ichumia. 21 Maa waleṙa wuwaagi wowo, maa wusawi wowo, maa wuṟui wowo, maa wuiwi wowo-pfo.
1 Numa ya iho ngawona malaika ungyi awoṙe pfinya echisoka iwuka ruwewu, amṟikye ipuchi; na mkoṟi o mvuo wuye ya mṙoe okye na kyaam kyakye kyiwekyeri cha mnengyeṟi, na maṙende gakye cha ngoe tsa moṙo. 2 Na kuwokonyi nawewoṙe kyitapu kyitutu kyikyipfunguoe. Kawikyia kuṙende kokye ko kulyoe wuye ya ipalyipalyi, na ko kumoso wuye ya uruka. 3 Na oe kafiiṟa na ṟui lying'anyi, chandu simba yekyesepfuo. Na kyiyeri alefiiṟa, makuṟuṟuma galya mfungaaṙe gakaṙeṙa. 4 Na makuṟuṟuma mfungaaṙe gamṙeṙe, ngyiwekuṟeyeṟie iṟeia. Na inyi ngaicho ṟui iwuka ruwewu, lyechigamba, “Wika mbonyi-tsi tsingyiṙeṙe nyi makuṟuṟuma galya mfungaaṙe kyindo kyeloṟa kye nyi tsako; ulatsiṟeie.” 5 Na malaika ulya ngyilemmbona, agoṟokyi ipalyipalyinyi na urukyenyi, kairia kuwoko kokye ko kulyoe ruwewu. 6 Kalya nyamu kye ulya ai na moo mṟasa mlungana na mlungana, ulya agumbie ruwewu na shindo shoose shikyeri pfo, na uruka na shindo shoose shikyeri pfo, na ipalyipalyi na shindo shoose shikyeri pfo, kye kochiwaṙa kyiyeri numa ya ishi-pfo; 7 sile mfiri iya ya ṟui lya malaika o mfungaaṙe kyiyeri echikuṟeyeṟa ikapa iganda. Iho nyilyo Ruwa echiafutsia wuṟikyi wokye, chandu aleongoya waṟundi wakye weonguo shisuku. 8 Na ṟui lyilya ngyilelyiicho iwuka ruwewu lyileṙeṙa na inyi-se, lyechigamba, “Yenda, uire kyitapu kyilya kyikyipfunguoe kuwokonyi ko malaika ulya agoṟokyi wuye ya ipalyipalyi na uruka.” 9 Ngayenda ko malaika ulya ngammbia nangyienengye kyitapu kyilya kyitutu. Kangyiwia, “Kyiire ukyilye, nakyo kyechikuenenga mawawio ndewunyi kopfo, indi ṙumbunyi kopfo kyechiloṙa cha wukyi.” 10 Ngaambilyia kyitapu kyilya iwuka kuwokonyi ko malaika ulya, ngakyilya. Nakyo kyikaloṙa cha wukyi ṙumbunyi koko, na ngamkyilye ndewu yako ikawawa. 11 Wakangyiwia, “Kyikuwaṟi ionguo shisuku-se ko wandu na isanga na mṙeṙie na wamangyi wafoi.”
1 Ngaenengo upoi lukyeri cha kyiwale; na umwi kangyiwia, “Amka, upime hekalu lya Ruwa, na mesa ya Mndumii, na iwo wekyeindia na iterewa ho Ruwa. 2 Na handu hesanzia hakyeri nja ya hekalu uhaṙe ulahapime, cha kyipfa iho hangyienengye walya walaiṙikyie Ruwa, nawo wechikapa na ichilyia mṟi mweele Yerusalemu kyiyeri kya mori makumi gaana na iwi. 3 Na inyi ngyechienenga momu waṟingyishi wako wawi, nawo wechionguo shisuku mfiri kyiku, magana gawi na makumi gaṟandaaṟu, wawaṟikye makunyia.” 4 Iyo nyiyo mseituni iya iwi na shindo shilya shiwi shikyeri mbele ya Mndumii o uruka. 5 Na mndu kakunda iwawutia kyindo kyiwicho, kuṙo nyi wuṙo awaṟi iwoogo. 6 Iwo wawoṙe pfinya yepfunga ruwewu, kundu mvuo ilakape mfirinyi ya ionguo shisuku lyawo. Nawo wawoṙe pfinya yegaluo mṟinga uwe samu, na iendie uruka orio ngapo, orio kyiyeri wakunda. 7 Na kyiyeri wechimarisa wuṟingyishi wowo, indo lyilya lya saka lyiwukyie halya-ndu wandu wapfiie wekyekaa lyechikapana shiṙa nawo, nalyo lyechiwawinga na iwawaaga. 8 Na mnying'a yawo yechikaa njienyi ya mṟi ulya ung'anyi, okyelago Sodoma kui mbaṟe ya mrima, na Misiri, lyingyi-se nyiho handu Mndumii owo alekapio msalabenyi. 9 Na wandu wa kyishari-kyo na mbaṟe na mṙeṙie na isanga wechiambuya mnying'a yawo mfiri iṟaṟu na kyitumbuṟe kyimwi kya mfiri umgawe kawi, maa wechilekyia mnying'a yawo iwiko kyilomenyi-pfo. 10 Na walya wekyekaa urukyenyi waichihiyo kyipfa kyawo na ikapa ngulyilyi na ngoru. Nawo wechiṙikyiana shindo shicha wo wenyi ko wenyi, cha kyipfa weonguo shisuku-wo wawi waleenenga ilya wukyiwa walya wekyekaa urukyenyi. 11 Na numa ya mfiri-yo iṟaṟu na kyitumbuṟe kyimwi kya mfiri umgawe kawi, Ruwa kawaumuya mṟufui okye o moo, wakagoṟoka kui maṙende gawo wawenyi; na wandu wawewaambuya wakawoṙo nyi wuowu wung'anyi. 12 Wakaicho ṟui iwuka ruwewu lyechiwawia, “Ṙonyi mṟasa kunu.” Wakaṙo na ruwewu wakyeri ipuchinyi, washituwa wawo wewaambuya. 13 Na kyiyeri kyilya hawewoṙe kyiriinza kying'anyi, na kyifunjoe kyimwi kyiiṙi kya shifunjoe ikumi sha mṟi kyikaoloka; wandu shiku mfungaaṙe wakawoogo nyi kyiriinza kyilya. Na walya waletsugaa wakawoṙo nyi wuowu, wakaṟumisha Ruwa o ruwewu. 14 Ochia lo kawi lomwiṙa; ochia lo kaṟaaṟu luicha iwinyi. 15 Malaika o mfungaaṙe kakapa iganda, kukowaṙa maṟui gang'anyi ruwewu, gechigamba, “Wumangyi wo wuyana wommba Wumangyi wo Mndumii oṙu na wo Kristo okye, na oe nechichilyia mṟasa mlungana na mlungana.” 16 Na wameeku walya makumi gawi na waana waṙamie mbele ya Ruwa shitimenyi shawo sha mng'ano wakaoloka na ndewu, wakaindia Ruwa, 17 wechigamba, “Lokuana iyoe, Mndumii Ruwa Mopfinya, uwekyeri pfo na ukyeri pfo, cha kyipfa nowuta wuiṙimi wopfo wung'anyi, na ichilyia. 18 Na wandu walaiṙikyie Ruwa walesuo, nyashi yapfo nayo ikacha, na kyiyeri kya wapfu ianduyo kyikacha, na kyiyeri kya ienenga wori wowo waṟundi wapfo weonguo shisuku na waele, na iwo wekyeowuo na iindia rina lyapfo, watutu na wang'anyi na irumatsa iwo wekyelyisa wandu wukyiwa na iwaaga wandu.” 19 Numa ya iho malaika kapfunguo Hekalu lya Ruwa lyikyeri ruwewu, na sanduku ya Ruwa ya mma ikawoneka kulya hekalunyi. Kukowaṙa mbawa, maṟui, makuṟuṟuma, kyiriinza na mvuo ya magoe ifoi mnu.
1 Na kyiṟiyisho kying'anyi kyikawoneka ruwewu; mndu mka amṟikye mnengyeṟi, na mori uwekyeri wanda ya maṙende gakye, na mṙoenyi kokye oṟo ya nyenyeri ikumi na tsiwi. 2 Na oe nawemnene, echifiiṟa, kunu awoṙe fowa na iwawio lying'anyi efee. 3 Kukowoneka kyiṟingyishio kyingyi ruwewu; na injoka lying'anyi lya kyimaande, lyiwewoṙe mṙoe mfungaaṙe na membe ikumi, na mṙoenyi kolyo maṟikoso mfungaaṙe. 4 Na mshawa olyo ukuruo kyifunjoe kyimwi kyiiṙi kya shifunjoe shiṟaaṟu sha nyenyeri tsa ruwewu, na itsiolotsa urukyenyi. Na injoka lyilya lyikagoṟoka mbele ya mndu mka ulya awekuṟeyeṟie ifee, kundu ilyi efee, lyilye mana-cho okye. 5 Na oe kafee mana o kyisoṟo, ulya echichilyia masanga goose kui upoi lo kyichakari. Na mana-cho okye malaika kamrakuo mṟasa ko Ruwa, na kyitimenyi kyakye kya mng'ano. 6 Mndu mka ulya kaṙicha na kundu ko nuka, handu awoṙe handu haachikyie nyi Ruwa, kundu wamlelyie pfo kyiyeri kya mfiri kyiku na magana gawi na makumi gaṟandaaṟu. 7 Kuwewoṙe shiṙa ruwewu; Mikaelyi na malaika wakye wakakapana na injoka lyilya. Injoka-lyo nalyo lyikakapana nawo hamwi na malaika walyo; 8 nawo walewinga-pfo, maa handu hawo halewono-se ruwewu-pfo. 9 Injoka lyilya lyikawiyitso, lyilya lying'anyi, njoka ya kacha, yekyelago Mokyiriinzi ang'u Satana, ekyelemba wuyana woose; kawiyitso mṟasa urukyenyi, na malaika wakye wakawiyitso hamwi na oe. 10 Ngaicho ṟui lying'anyi ruwewu, lyechigamba, “Wulalu kowaṙa wukyiṟo, na pfinya, na Wumangyi wo Ruwa oṙu, na wuchilyi wo Kristo okye; kyipfa ulya ekyelyisa wana wa wama waṙu wukyiwa nawiyitso wanda, ulya ekyelyisa wana wa wama waṙu wukyiwa mbele ya Ruwa oṙu, kyingoto na kyio. 11 Nawo wakammbinga kui samu ya Kyiondo kya Ruwa, na kui mbonyi tsa wuṟingyishi wowo; walya walalekunda moo yawo mṟasa ipfa. 12 Koikyo kapenyi ngulyilyi na ngoru, nyoe moose mokyekaa ruwewu. Ochia lonyu nyoe mokyekaa urukyenyi na ipalyipalyinyi! Cha kyipfa Mokyiriinzi ulya nasoka na konyu awoṙe nyashi ing'anyi, aichi kye nawoṙe kyiyeri kyifuhi tikyi.” 13 Na kyiyeri injoka lyilewona kye lyammbiyitso urukyenyi, lyileṙichilyia mndu mka ulya alefee mana ulya o kyisoṟo. 14 Mndu mka ulya kaenengo makungo gawi ga mbeṟo iya ing'anyi, kundu narundukye, nayende kundu ko nuka mṟasa handu hakye, iho-ndu ekyelelyio kui kyiyeri kya maka iṟaṟu na kyitumbuṟe kyimwi kya maka umgawe kawi, kuleshi na njoka-yo. 15 Njoka ikawuta ṙumbunyi koyo, numa ya mndu mka ulya, mṟinga cha pichi, kundu naṙoo nyi pichi-lyo. 16 Uruka lukotarama mndu mka ulya. Uruka lukowaṙa ṟungu lying'anyi na mṟinga oose ulewuka kulya ṙumbunyi ko injoka lyilya ukoṙekyia ipfo ṟungunyi. 17 Injoka lyikasuo kyipfa kya mndu mka ulya, lyikayenda lyikakapana shiṙa na wandu wa kyishari kya mndu mka-cho waletsugaa, wekyeosha shilya mawawaso ga Ruwa gakundi na iwaṙa wuṟingyishi wo Yesu, na oe kagoṟoka mlelyenyi o ipalyipalyi.
1 Numa ya iho ngawona indo lyiwuka ipalyipalyinyi, lyiwoṙe membe ikumi, na mṙoe mfungaaṙe, na iho membenyi tsalyo lyiwoṙe maṟikoso ikumi, na mṙoenyi yalyo marina gelahia Ruwa. 2 Na indo-lyo ngyilewona lyiwekyeri cha rung'wi, na maṙende galyo gawekyeri cha maṙende ga indo lyioweshie, na ṙumbu lyalyo cha ṙumbu lya simba. Injoka lyilya lyikaenenga indo-lyo pfinya tsalyo na kyitima kyalyo kya mng'ano na wuiṙimi wung'anyi. 3 Ngawona mṙoe umwi kyiiṙi kya mṙoe yalyo cha ilyi uwoṙe ifaṟo lya upfu, na ngapo yalyo ya upfu ikasia. Wandu wa wuyana woose wakaṟiyio kyipfa kya indo lyilya. 4 Wakaterewa na iindia injoka lyilya cha kyipfa lyileenenga indo-lyo wuiṙimi wolyo. Nawo wakaterewa na iindia indo lyilya, wechigamba, “Nyi wui afananyi na indo-lyi? Lyingyi-se nyi wui eiṙima ikapana shiṙa nalyo?” 5 Nalyo lyikaenengo ṙumbu lyeṙeṙa shindo shing'anyi, shelahia Ruwa. Lyikaenengo wuiṙimi wo ṟunda kyiyeri kya mori makumi gaana na iwi. 6 Lyikatambaṟuo ṙumbu lyalyo lyilahie Ruwa, na ilahia rina lyakye, na halya-ndu ekyekaa, na walya wekyekaa ruwewu. 7 Lyingyi-se lyikaenengo ikapana shiṙa na wandu wa Ruwa na iwawinga, lyikaenengo wuiṙimi wo chilyia orio mbaṟe ya wandu na kyishari na mṙeṙie na isanga. 8 Na wandu woose wekyekaa urukyenyi wechilyiterewa na ilyiindia, orio mndu rina lyakye lyilalyiṟeie kyitapunyi kya moo kya Kyiondo kya Ruwa, kyileshinjo wookyia wuyana wulagumbo. 9 Mndu awoṙe kuṙwi naicho. 10 Mndu kaende kyindo shiṙenyi na oe nechiwoṙo shiṙenyi. Mndu kawaaga kui ushu, nechiwoogo kui ushu. Iha nyiho hawoṙe wusimiri na iiṙikyia lya wandu wa Ruwa. 11 Numa ya iho ngawona indo lyingyi, lyechiṙo iwuka urukyenyi; nalyo lyiwewoṙe membe tsiwi cha tsa ondo, lyikaṙeṙa cha njoka. 12 Nalyo lyikaṟunda kui wuiṙimi woose wo indo lyilya lya kuwooka mbele yalyo. Nalyo lyekyegaluo wuyana na woose wekyekaa pfo waterewe na iindia indo lyilya lya kuwooka, lyilya ifaṟo lyalyo lya upfu lyilesia. 13 Nalyo lyikaloṟa kyiṟingyishio kying'anyi mṟasa lyikaenenga moṙo isoka iwuka ruwewu uche na urukyenyi mbele ya wandu. 14 Nalyo lyikatewe walya wekyekaa urukyenyi, kui shiṟingyishio shilya lyileenengo ishiloṟa mbele ya indo-lyo, lyechiwia walya wekyekaa urukyenyi ilyiachikyia ifano lya indo lyilya, lyiwewoṙe ifaṟo lya ushu, nalyo lyikawaṙa moo. 15 Lyikaenengo iwika mṟufui kulya ifanonyi lya indo, mṟasa ifano lyilya lya indo lyiṙeṙe, na ienenga iwo woose walaleterewa na iindia ifano lya indo-lyo iwoogo. 16 Nalyo lyikakunda wandu woose, watutu na wang'anyi, na wanjama na wakyiwa, na walawachilyie nyi kyindo na watumo, wawiko kyindo kuwokonyi kowo ko kulyoe, na ngyuushangunyi tsa shaam shawo. 17 Lyingyi-se kye mndu oose alaiṙime iwawuṟa maa iwakumba, sile awoṙe kyindo kyilya kyikyeri nyi rina lya indo lyilya, ang'u itala lya rina lyalyo. 18 Iha nyiho hawoṙe wuṟango. Ulya awoṙe wuṟango, natale itala lya indo-lyo; cha kyipfa nyi itala lya kyimndu. Na itala lyalyo nyi magana gaṟandaaṟu, makumi gaṟandaaṟu na shiṟandaaṟu.
1 Numa ya iho ngawona Kyiondo-kyo kya Ruwa kyigoṟokyi fumvunyi lya Sion, na wandu shiku igana na makumi gaana na shiina hamwi na oe, wawoṙe rina lyakye na rina lya Awu okye lyilyiṟeie ngyuushangunyi tsa shaam shawo. 2 Na inyi ngaicho ṟui iwuka ruwewu, cha ṟui lya mṟinga ufoi, na cha ṟui lya ikuṟuṟuma lying'anyi. Na ṟui-lyo ngyileicho lyiwei cha ṟui lya wekapa uṙa lo ndusu, wechikapa ngyuuṙa tsawo tsa ndusu; 3 na iimba kyiimbo kyihya mbele ya kyitima kyilya kya mng'ano, na mbele ya walya waana wai na moo, na wameeku walya. Maa kuwoṙe mndu aleiṙima ikulosha kyiimbo kyilya-pfo, sile walya shiku igana na makumi gaana na shiina, waleguṟo urukyenyi. 4 Iwa nyiwo walekyefanyiṟo nyi waka, cha kyipfa nyi wakyega. Iwa nyiwo wekyeosha Kyiondo kya Ruwa orio handu kyayenda. Iwa wawaguṟe ko wandu, kyilyimu kya kuwooka ko Ruwa na ko Kyiondo kya Ruwa. 5 Na maṙumbu gawo galeṙeṙa wongo-pfo; kyipfa wawoṙe tewe-pfo. 6 Numa ya iho ngawona malaika ungyi, echirunduka ruwewu, awoṙe Ndumi Ngyicha ya mlungana, naongoye iwo wekyekaa urukyenyi, na orio isanga na mbaṟe ya wandu na mṙeṙie na kyishari. 7 Kagamba kui ṟui lying'anyi, “Owuoenyi na iindia Ruwa, na imṟumisha, cha kyipfa saa ya ianduyo yamcha. Terewenyi na iindia ulya alegumba uruka na ipalyipalyi na shoka tsa mṟinga.” 8 Numa ya iho ngawona malaika ungyi o kawi, echiosha, echigamba, “Nooloka, nooloka, iyoe Babelyi, mṟi ulya ung'anyi, kyipfa nyicho ulerutsa masanga goose mpfinyo ya nyashi ya wuṟui.” 9 Na malaika ungyi, o kaṟaaṟu, kaosha walya wengyi, echigamba kui ṟui lying'anyi, “Mndu oose katerewa na iindia indo-lyo na ifano lyalyo, na iwiko kyindo ushangunyi lo kyaam kyakye, ang'u kuwokonyi kokye, 10 nechinyo mpfinyo o nyashi ya Ruwa ingyiṟeyeṟe, kulawoṙe isanzo-sanzo na mṟinga, kyiṙoonyi kya nyashi yakye; na oe nechilyiso wukyiwa kui moṙo na kyipiriti mbele ya malaika waele, na mbele ya Kyiondo kya Ruwa. 11 Na mtsu o mawawio gawo ochiṙo na wuye mṟasa mlungana na mlungana, maa wawoṙe sia kyingoto maa kyio-pfo, iwo wekyeterewa na iindia indo-lyo na ifano lyalyo, na orio mndu aambilyia kyindo kyikyiṟeie rina lyalyo. 12 Iha nyiho hawoṙe wusimiri wo wandu wa Ruwa, walya wekyeosha shilya mawawaso ga Ruwa gakundi, na iiṙikyia lya Yesu.” 13 Ngaicho ṟui iwuka ruwewu, lyechigamba, “Ṟeia. Wagusu wapfu wapfa wakuwoṙe na Mndumii wookyia wulalu. Yee, Mumuyo nagamba, waiṙime ionyonya numa ya ngyuukyiwa tsawo; cha kyipfa mawuto gawo gaioshana nawo.” 14 Numa ya iho ngawona ipuchi lya uwiṟo, na wuye ya ipuchi-lyo haṙamie umwi, ai cha mndu, awoṙe oṟo ya sahapu mṙoenyi kokye, na kuwokonyi kokye ko kulyoe nawoṙe ishami lyiohi. 15 Na malaika ungyi kawuka hekalunyi, echimfiiṟia kui ṟui lying'anyi ulya aweṙamie wuye ya ipuchi lyilya. “Ira ishami lyapfo, undesambuo; cha kyipfa kyiyeri kyesambuo kyamcha; kyipfa shilyimu sha urukyenyi shammba shesambuo.” 16 Na ulya aweṙamie ipuchinyi kawiyitsa ishami lyakye urukyenyi, kasambuo kyilyimu kya urukyenyi. 17 Numa ya iho malaika ungyi kawuka kulya hekalunyi lyikyeri ruwewu, na oe taa nawoṙe ishami lyiohi. 18 Na malaika ungyi kawuka halya mesenyi ya Mndumii, ulya awoṙe pfinya yechilyia moṙo; na oe kafiiṟia kui ṟui lying'anyi ulya awoṙe ishami lyilya lyiohi, echigamba, “Ira ishami lyapfo lyiohi, undehaa shiṙingo sha msabibu o urukyenyi, kyipfa sabibu tsa uruka tsiwiri mnu.” 19 Malaika ulya kawiyitsa ishami lyakye mṟasa urukyenyi, kahaa msabibu o uruka, kawiyitsa sabibu kulya indonyi lying'anyi lyekamia sabibu lya nyashi ya Ruwa. 20 Indo lyilya lyekamia sabibu lyikachumo-chumo nja ya mṟi, samu ikawuka pfo mṟasa handu hawoṙe shigowo shesongoya farasi, cha ichumia handu ha mailyi magana gawi.
1 Numa ya iho ngawona kyiṟingyishio kyingyi ruwewu, kying'anyi; malaika mfungaaṙe wawoṙe ngapo tsa mafurumionyi; kyipfa ipfo ngaponyi nyashi ya Ruwa yaafukyia. 2 Lyingyi-se ngawona kyindo kyikyeri cha ipalyipalyi lya kyiyewo lyilonganyi na moṙo, na walya wawingyie indo lyilya, na ifano lyalyo, lyilya rina lyalyo lyilyisende nyi itala lyilya, wawegoṟokyi mbai ya ipalyipalyi-lyo lya kyiyewo, wawoṙe ngyuuṙa tsa ndusu tsa Ruwa. 3 Nawo waiimba kyiimbo kya Mose, mṟundi o Ruwa, na kyiimbo kya Kyiondo kya Ruwa, wechigamba, “Mawuto gapfo nyi gang'anyi, na ga maṟiyisho, iyoe Mndumii Ruwa Mopfinya; njia tsapfo nyi tsa wusumganyi na tsa loi, iyoe Mangyi o masanga. 4 Nyi wui alekyekuowuo na ikuindia, Iyoe Mndumii, na iṟumisha rina lyapfo? Cha kyipfa iyoe kumonyi nukyeri Mweele; cha kyipfa masanga goose gechicha gaterewe na iindia mbele yapfo; cha kyipfa mawuto gapfo ga wusumganyi gamloṟo.” 5 Na numa ya iho ngawona hekalu lya hema lya wuṟingyishi ruwewu lyechiṟuguka. 6 Na malaika walya mfungaaṙe, wawoṙe ngapo mfungaaṙe, wakafuma hekalunyi, wawaṟikye nguwo ngyiilyi peṟu, tsiaka-aka, wawainewe mkanda ya sahapu shipootenyi shawo. 7 Na umwi o walya waana wai na moo kaenenga malaika walya mfungaaṙe pakulyi mfungaaṙe tsa sahapu, tsiichuo nyashi ya Ruwa, ai na moo mṟasa mlungana na mlungana. 8 Hekalu lyikaichuṟo mtsu ulewuka kyiṟuminyi kya Ruwa na mng'ano okye. Maa kuwoṙe mndu aleiṙima iiṙa na hekalunyi, mṟasa ngapo mfungaaṙe tsa malaika walya mfungaaṙe tsaafukyia-pfo.
1 Ngaicho ṟui lying'anyi iwuka hekalunyi, lyechiwia malaika mfungaaṙe, “Yendenyi mundeletsia urukyenyi pakulyi tsilya mfungaaṙe tsa nyashi ya Ruwa.” 2 Icho o kuwooka kayenda, kaletsia pakulyi yakye urukyenyi, hakawaṙa oṙe lyiwicho, lyilyiporu, ko wandu walya wawoṙe kyindo kyeloṟa kye wo nyi wa indo-lyo, na walya wekyeterewa na iindia ifano lyalyo. 3 Na icho o kawi kaletsia pakulyi yakye ipalyipalyinyi, lyikawa cha samu ya mndu mpfu, na shindo shoose shiwoṙe moo ipalyipalyinyi shikapfa. 4 Na icho o kaṟaaṟu kaletsia pakulyi yakye mapichinyi na shokyenyi tsa mṟinga, shikawa samu. 5 Na inyi ngaicho malaika o mṟinga echigamba, “Iyoe nuwoṙe wusumganyi, uwekyeri pfo na ukyeri pfo, Mweele, cha kyipfa noanduya kuṙo. 6 Kyipfa walewaaga wandu wa Ruwa na weonguo shisuku, na iyoe nulewaenenga samu wainyo; nawo wawaṟi.” 7 Ngaicho na mesa-yo ya Mndumii yechigamba, “Yee, Mndumii Ruwa Mopfinya, njia tsapfo tseanduya nyi tsa loi na tsa wusumganyi.” 8 Na icho o kaana kaletsia pakulyi yakye mnengyeṟinyi; na mnengyeṟi ukoenengo pfinya yekoṟa wandu kui moṙo. 9 Wandu wakakoṟo nyi moṙo ung'anyi, nawo wakalahia rina lya Ruwa achilyie ngapo-tso; maa waleṙumbuya wunyamaṟi maa ienenga Ruwa kyiṟumi-pfo. 10 Na icho o kataanu kaletsia pakulyi yakye kyitimenyi kya mng'ano kya indo lyilya; na wumangyi wolyo wukowiko meema; wandu wakaumaṙa ngyuulumi tsawo kyipfa kya mawawio. 11 Wakalahia Ruwa o ruwewu kyipfa kya mawawio gawo, na kyipfa kya maoṙe gawo; maa waleṙumbuya mawuto gawo-pfo. 12 Na ulya o kaṟandaaṟu kaletsia pakulyi kyakye kulya mfonyi ung'anyi okyelago Furati; mṟinga ocho ukouma, kundu njia iachikyio ko wamangyi waiwuka ura lo ngamenyi. 13 Ngawona mumuyo iṟaṟu ya wunyamaṟi ifananyi na shilo, yechiwuka ṙumbunyi lya injoka lyilya, na ṙumbunyi lya indo lyilya, na lya moonguo shisuku ulya o wongo. 14 Iyo nyiyo mumuyo ya masatana, yekyewuta shindo sheṟiyisha, yekyewuka na iyenda ko wamangyi wa wuyana woose; iwasania ko shiṙa sha mfiri ulya ung'anyi o Ruwa Mopfinya. 15 (Ngyiicha cha mbafu. Agusu ulya molaa kyiṙombo, na iringa nguwo tsakye, alachumie kyiṟanguoe mṟasa wandu wawone sonu yakye.) 16 Wakawasania mṟasa handu hekyelago Harimakyedoni kui mṙeṙie o Kyiebrania. 17 Na icho o mfungaaṙe kaletsia pakulyi yakye ngyinenyi. Ṟui lying'anyi lyikawuka hekalunyi, lyechigamba, “Mafurumionyi gamcha.” 18 Hakawaṙa mbawa na ṟui lya ikuṟuṟuma, na kuwewoṙe kyiriinza kying'anyi, kyilandewono wookyia kyiyeri wandu walewooka ikaa wuyanenyi. 19 Na mṟi ulya ung'anyi ukopaṟika shifunjoe shiṟaaṟu; na mṟi ya masanga ikaoloka; na kulawoṙe iwaṙima, Ruwa karutsa Babelyi kyiṙoonyi mpfinyo o nyashi yakye. 20 Orio kyiṟingyiti kyikaṙicha, maa mafumvu galewono-se-pfo. 21 Na mvuo ya magoe ing'anyi mnu, ya magoe malemeri cha shilo makumi gaana na shitaanu, ikaoloka wuye ya wandu iwuka ruwewu. Wandu wakalahia Ruwa kyipfa kya ngapo iya ya mvuo ya magoe; cha kyipfa ngapo yayo ing'anyi mnu.
1 Umwi o malaika walya mfungaaṙe kacha; malaika wawoṙe pakulyi mfungaaṙe, kaṙeṙa na inyi, echigamba, “Nnjo na kunu, ngyikuloṟe ianduyo lya iṟai lyilya lying'anyi mnu lyiṙamie mṟingyenyi ufoi. 2 Iṟai lyilya wamangyi wa uruka walelyiṟuguya, na walya wekyekaa urukyenyi walenanzo nyi mpfinyo ya wuṟui wolyo.” 3 Mumuyo kangyichilyia na malaika kangyiṙuo mṟasa kundu ko nuka kukuumu suwaa kulawoṙe maa mṟinga, ngawona mndu mka, aṙamie indonyi lya saka lya kyimaande tarii, mmbiu olyo oose uwoṙe marina gelahia Ruwa, lyiwoṙe mṙoe mfungaaṙe na membe ikumi. 4 Na mndu mka ulya nawemṟikye nguwo tsifanyi kyimaande-maande, na kyimaande, namchope nyi sahapu, na igoe lya woguru, na lulu, na oe nawewoṙe kyiṙoo kya sahapu kuwokonyi kokye, kyiichuo mawicho, na ukoe lo wuṟui wokye. 5 Na ushangunyi lo kyaam kyakye hawehaṟeie rina lyiwoṙe kyitambuluo kya wuṟikyi: “BABELYI ANG'ANYI, MAMA O MAṞAI NA MAWICHO GA URUKA.” 6 Ngawona mndu mka ulya amnanze kui samu ya wandu wa Ruwa, na kui samu ya waṟingyishi wa Yesu. Na inyi kyiyeri ngyilemmbona ngaṟiyio mnu. 7 Na malaika ulya kangyiwia, “Ny'kyilyi uiṟiyio? Ngyekuwia kya mndu mka-chu, na kyiṟika kya indo-lyi lyimṙuṙe, lyiwoṙe mṙoe iya mfungaaṙe na membe tsilya ikumi. 8 Indo lyilya olyiwona lyiwekyeri pfo, nalyo lyikyeri ho-pfo, nalyo lyikuṟeyeṟie iṙo iwuka halya-ndu wapfu wekyekaa na iyenda wunyamaṟinyi. Na iwo wekyekaa urukyenyi, marina gawo galamaṟeie kyitapunyi kya moo wookyia igumbo lya wuyana, wechiṟiyio kyiyeri wechiwona indo lyilya, kye lyiwekyeri pfo, nalyo lyikyeri ho-pfo, nalyo lyechicha. 9 Iho nyiho hawoṙe ikusaṟa kui wuṟango. 10 Mṙoe iya mfungaaṙe nyi mafumvu mfungaaṙe mndu mka-cho agaṙamilyie. Na mṙoe-yo nyi wamangyi mfungaaṙe. Wamangyi wataanu wampfa, na ungyi nakyeri ho na ungyi alandeche-pfo. Na oe kyiyeri echicha kyimmbaṟi ikaa kyiyeri kyifuhi. 11 Na indo lyilya lyiwekyeri pfo nalyo lyilakyeri ho, lyo nyilyo lya nyanya, nalyo nyi umwi o walya mfungaaṙe, na oe nainderumatso. 12 “Na membe tsilya ikumi ulewona nyi wamangyi ikumi, walya walandeambilyie wumangyi, kyaindi waambilyia wuchilyi cha wamangyi kyiyeri kyimwi hamwi na indo lyilya. 13 Iwa makusaṟo gawo nyi gamwi, nawo waienenga indo lyilya pfinya tsawo na wuchilyi wowo. 14 Iwa wechikapana shiṙa na Kyiondo kya Ruwa, na Kyiondo kya Ruwa kyechiwawinga, cha kyipfa kyo nyi Mndumii o wandumii na Mangyi o wamangyi; na iwo wakyeri hamwi na oe nyiwo wawalage na wasambuṟe, na wekyeafutsia shilya wateṟia.” 15 Numa ya iho kangyiwia, “Mṟinga ulya owona, handu iṟai lyilya lyiṙamie, nyi kyishari na wandu wa kyisanzionyi na masanga na mṙeṙie. 16 Na membe tsilya ikumi ulewona, na indo-lyo, iwo wechisuo iṟai lyilya, nawo wechilyigaluo mkyiwa na mndu ai kyiṟanguoe, wechilya nyama yalyo, wechilyirumatsa nakamwi kui moṙo. 17 Kyipfa wamangyi-wo ikumi wewuta kuṙo kyipfa Ruwa nawaenenga wuiṙimi wo wuta kyilya awekundi wawute. Koikyo woose wechiiṙikyia ienenga indo-lyo wuchilyi wowo wo kyimangyi. Wechiindia indo-lyo mṟasa shindo shoose Ruwa akundi shiafutsio. 18 Na mndu mka ulya ulemmbona, nyi mṟi ulya ung'anyi, uwoṙe wumangyi wuchilyie wamangyi wa uruka.”
1 Numa ya iho ngawona malaika ungyi, echisoka iwuka ruwewu, awoṙe wuchilyi wung'anyi; na uruka lukowaṙa ngyeela kyipfa kya kyiṟumi kyakye. 2 Kafiiṟa na ṟui lying'anyi, echigamba, “Nooloka, nooloka Babelyi ung'anyi, nowa kanyi ko masatana, na moombo o orio mumuyo mmbicho, na moombo o orio kyileye kyiwicho kyekyeenenga wandu isuo; 3 cha kyipfa masanga goose ganyo mpfinyo ya nyashi ya wuṟui wokye, na wamangyi wa uruka wamṟuguya, na wekapa mbucha wa uruka wawona masaa kui pfinya tsa wulanga wokye.” 4 Numa ya iho ngaicho ṟui lyingyi iwuka ruwewu, lyechigamba, “Wukyenyi kokye, lanyoe wandu wako, mulawute ngyuunyamaṟi tsakye, maa mulaambilyie ngapo tsakye. 5 Cha kyipfa ngyuunyamaṟi tsakye tsashika mṟasa ruwewu, na Ruwa nakumbuo mawicho ga Babelyi. 6 Taenyi chandu oe aletaa, mundemtaa kawi iṙuana na mawuto gakye. Ichuṟenyi kyiṙoo kyakye kawi na kyindo kyenyo kyiwoṙe pfinya cha kyilya alerutsa wandu wengyi. 7 Iṙuana na chandu alekuṙosa na iwuta shindo sha sia tsa wuyana, muenengyenyi mawawio na fowa wuṙo. Cha kyipfa nekyegamba mrimenyi kokye, ‘Ngyikyeri mangyi o kyika, maa chi mkusu-pfo, maa ngyechiwona fowa maa ale-pfo.’ 8 Kyipfa kya ikyo ngapo tsakye tsechicha mfiri umwi, upfu, na fowa, na njaa; na oe nechirumatso nakamwi kui moṙo. Cha kyipfa Mndumii Ruwa alemwanduya nyi monyi pfinya.” 9 Na wamangyi-wo wa uruka, walemṟuguya na iwuta shindo sha sia tsa wuyana hamwi na oe, wechifiiṟa na ikapa ṟanyi kyipfa kyakye; kyiyeri wawona mtsu o iunguo lyakye; 10 wechigoṟoka kuleshi kui wuowu wo mawawio gakye, wechigamba, “Ochia, ochia mṟi ulya ung'anyi, Babelyi, mṟi ulya uwoṙe pfinya! Cha kyipfa kui kyiyeri kyifuhi ianduyo lyapfo lyamcha.” 11 Na wekapa mbucha wa uruka waifiiṟa na ikapa ṟanyi kyipfa kyakye, cha kyipfa kuwoṙe mndu aiguṟa-se shindo shawo-pfo. 12 Shindo sha sahapu, heleri, igoe lyiwoṙe woguru wung'anyi, lulu, nguwo ngyicha ya uwiṟo, nguwo tsa kyimaande-maande, hariri, nguwo tsa kyimaande, orio ikyiṙi lya uudi, orio kyindo kya membe, orio kyindo kya ikyiṙi kya woguru wung'anyi, kya aṟeṟa, kya menya na kya marimari. 13 Na mdalasini, ilyikyi, uvumba, mafuṙa gekyepfaama necha, ubani, mpfinyo, mafuṙa ga mseituni, mso mcha, nganu, umbe, moondo, farasi, makari, mmbiu na mrima ya wandu. 14 Na ndunda tsilelango nyi mrima opfo tsammbuka kopfo; na shindo shoose shishiwiriwiri na shindo shoose sha wulole shamṙeka na iwuka kopfo; maa wandu wechishiwona-se maa ale-pfo. 15 Na wekapa mbucha ya shindo-sho, walewona heleri kokye, wechigoṟoka kuleshi, kui wuowu wo mawawio gapfo; wechifiiṟa na ikapa ṟanyi, 16 wechigamba, “Ochia, ochia, mṟi ulya ung'anyi, na ichopo nyi sahapu, na igoe lya woguru wung'anyi, na lulu, 17 cha kyipfa kyiyeri kyifui tupu wunjama wung'anyi kuṙi wowa wukyiwa.” Na orio mndu ekyeṙuo kyindo kyekyeiṙa ipalyipalyinyi cha ngalawa, na orio mndu ekyeyenda handu kui matanga, na waṟundi wa shindo shekyeiṙa mapalyipalyinyi, na woose wekyeṟunda mapalyipalyinyi, wakagoṟoka kuleshi, 18 wakafiiṟa mnu, kyiyeri walewona mtsu o iunguo lyakye, wechigamba, “Nyi mṟi uha ukyeri mfano o mṟi-chu ung'anyi?” 19 Wakawiyitsa kyilulyi wuye ya mṙoe yawo, wakafiiṟa, wechitonyitsa mcheṟeṟe na ikapa ṟanyi, wechigamba, “Ochia, ochia, mṟi ulya ung'anyi; ulya kyiiṙi kyacho woose wawoṙe ngalawa mapalyipalyinyi walewona masaa kui wunjama wo mṟi-cho; kyipfa kyiyeri kyifuhi tupu owa wukyiwa.” 20 Chihiyonyi kyipfa kyacho, lanyoe wandu mokyekaa ruwewu, na nyoe wandu wa Ruwa na wasu na weonguo shisuku; cha kyipfa Ruwa amwuuanduya kyipfa kya shindo ulemmbutia nyoe. 21 Na malaika umwi awoṙe pfinya kaira igoe, igoe lying'anyi cha ikyesa, kalyiwiyitsa ipalyipalyinyi, echigamba, “Kuṙi kui pfinya ing'anyi, mṟi o Babelyi ochiwiyitso; mṟi ulya ung'anyi, maa ochiwono-se maa ale-pfo. 22 Maa ṟui lya wekapa shinanda, lya wekapa zomari, lya wekapa mtoṟiṟo na lya wekapa maganda, kuwoṙe mndu echilyiicho-se kopfo-pfo. Maa mwaaria o iṟunda lyoose echiwono kopfo maa ale-pfo; maa ṟui lya ikyesa kuwoṙe mndu echilyiicho kopfo-pfo. 23 Maa ngyeela ya taa yechilyimika-se kopfo-pfo; maa ṟui lya monyi-wolyi na mpora okye kuwoṙe mndu echilyiicho-se kopfo-pfo. Kyipfa wekapa mbucha-wo wapfo wawei wang'anyi wa uruka, cha kyipfa masanga goose galelembo nyi wusawi wopfo.” 24 Na kokye kulewono samu ya weonguo shisuku, na ya wandu wa Ruwa, na ya woose walewoogo urukyenyi.
1 Numa ya isho ngaicho ṟui cha ṟui lya kyisanzionyi kya wandu wafoi, ṟui lying'anyi ruwewu, lyechigamba, “Haleluya; wukyiṟo na kyiṟumi na pfinya nyi sha Mndumii Ruwa oṙu. 2 Cha kyipfa njia tsakye tseanduya nyi tsa loi na tsa wusumganyi; kyipfa naanduya iṟai lyilya lying'anyi lyilenyamaṟa uruka kui wuṟui wolyo, na ilyiolotsia ngapo kyipfa lyilewaaga waṟundi wakye.” 3 Wakagamba lya kawi, “Haleluya. Na mtsu o mṟi-cho okyeṙo na wuye mṟasa mlungana na mlungana.” 4 Na wameeku walya makumi gawi na waana, na walya waana wai na moo, wakaterewa na iindia Ruwa, aṙamie halya kyitimenyi kya mng'ano, wechigamba, “Amen, Haleluya.” 5 Ṟui lyikawuka halya kyitimenyi kya mng'ano lyechigamba, “Ṟumishenyi Ruwa oṙu, lanyoe waṟundi wakye woose, nyoe mumwowuye na imwindia, watutu na wang'anyi.” 6 Ngaicho ṟui cha ṟui lya kyisanzionyi kying'anyi, na cha ṟui lya mṟinga ufoi, na cha ṟui lya ikuṟuṟuma lyiwoṙe pfinya, lyechigamba, “Haleluya; cha kyipfa Mndumii Ruwa oṙu, Mopfinya, nachilyia. 7 Luchihiyo, lukape ngulyilyi na ngoru, luenengye Ruwa kyiṟumi kyakye; cha kyipfa wolyi wo Kyiondo kya Ruwa womwafukyia, na mka okye amkuṟeyeṟa. 8 Na oe namṟikye nguwo tsa uwiṟo tsiaka-aka, cha kyipfa nguwo ngyicha nyi mawuto ga wusumganyi ga wandu wa Ruwa.” 9 Na oe kangyiwia, “Ṟeia, wagusu walya wawalage na shelyenyi sha wolyi wo Kyiondo kya Ruwa.” Kangyiwia, “Maṙeṙo-ga nyi mbonyi tsa loi tsa Ruwa.” 10 Na inyi ngaoloka mbele ya maṙende gakye, kundu ngyimterewe na imwindia. Kangyiwia, “Molawute kuṙi. Inyi nyi mongari opfo na o wana wa wama wapfo wawoṙe wuṟingyishi wo Yesu. Terewa na iindia Ruwa.” Cha kyipfa wuṟingyishi wo Yesu nyiwo mumuyo o ionguo shisuku. 11 Numa ya iho ngawona mapuchi gaseia, na farasi ya uwiṟo, na ulya aiṙamilyie, ekyelago Msimiri na O-loi, na oe kui wusumganyi nekyeanduya na ikapana shiṙa. 12 Na meso gakye gawei cha ulumi lo moṙo, na mṙoenyi kokye naweṟee maṟikoso gafoi; na oe nawoṙe rina lyilyiṟeie, kulawoṙe mndu alyiichi sile oe amonyi. 13 Na oe naṟee nguwo ingyilolomikye samunyi, na rina lyakye nyi Ṙeṙo lya Ruwa. 14 Na poo lya asikari wakyeri ruwewu wakamwosha, waṙamilyie farasi tsa uwiṟo na iṟaa nguwo ngyicha, ngyiilyi. 15 Na ushu luohi lokyewuka ṙumbunyi kokye kundu nakape nalo masanga. Na oe nechiwalyisa kui upoi lo kyichakari, na oe naichuma indo lyekamia mpfinyo ya nyashi ya Ruwa Mopfinya. 16 Na oe nawoṙe rina lyilyiṟeie nguwonyi yakye na uwahenyi lokye: “MANGYI O WAMANGYI, NA MNDUMII O WANDUMII.” 17 Numa ya iho ngawona malaika umwi agoṟokyi mnengyeṟinyi. Kafiiṟa na ṟui lying'anyi, echiwia shileye shoose shekyerunduka ruwewu, “Nnjonyi mukooyane na shelya shifoi sha Ruwa. 18 Muiṙime ilya nyama ya wamangyi, na nyama ya wasongoru wa asikari wa shiṙa, na nyama ya wandu waṟango, nyama ya farasi, na ya wandu waṙamilyie farasi-tso, na nyama ya wandu woose, watumo na walawachilyie nyi kyindo kyoose, watutu na wang'anyi.” 19 Numa ya iho ngawona indo-lyo, na wamangyi wa uruka na mapoo gawo ga asikari, wasanzie handu hamwi ikapana shiṙa na ulya aṙamilyie farasi iya ya uwiṟo, lyingyi-se na mapoo gakye ga asikari. 20 Indo lyilya lyikawoṙo, na moonguo shisuku ulya o wongo hamwi nalyo, ulya alewuta shindo-sho sha maṟiyisho mbele yalyo, shilya alelemba nasho wandu walya waleambilyia kyindo kyilya kyeloṟa kye wo nyi wa indo-lyo, na walya waleterewa na iindia ifano lyalyo. Wewawi wakawiyitso wai na moo iruwenyi lya moṙo lyekyeaka kui kyipiriti. 21 Na walya waletsugaa walewoogo kui ushu lo ulya aweṙamilyie farasi iya, ushu luwukyie ṙumbunyi kokye. Na shileye shoose shikaiguṙa kui nyama tsawo.
1 Numa ya iho ngawona malaika echisoka iwuka ruwewu, awoṙe upfunguo lo kundu kulya wandu wapfiie wekyekaa, na mshe ung'anyi kuwokonyi kokye. 2 Kawaṙa injoka lyilya, injoka lyilya lya kacha, Mokyiriinzi ang'u Satana, kalyipfunga maka kyiku. 3 Kalyiwiyitsa kundu kulya wandu wapfiie wekyekaa, kawika kyindo kyeloṟa rina lyakye wuye yalyo, lyilaiṙime ilemba-se masanga, mṟasa maka iya kyiku iafukyie; na numa ya iho lyiwaṟi iwuto kyipfungonyi ko kyiyeri kyaangu. 4 Numa ya iho ngawona shitima sha mng'ano, wakaṙamia wuye yasho, nawo wakaenengo wuiṙimi wo ianduya. Na inyi ngawona mumuyo ya wandu walya walewaṙumbuo mṙoe kyipfa kya wuṟingyishi wo Yesu, na kyipfa kya Ṙeṙo lya Ruwa, na iwo walekyeterewa na iindia indo lyilya, maa ifano lyalyo, maa walaleambilyia kyindo kyeloṟa kye wo nyi wa indo-lyo ngyuushangunyi tsa shaam shawo, maa mawokonyi gawo. Nawo wakawaṙa moo, wakachilyia hamwi na Kristo maka kyiku. 5 Wapfu-wo waletsugaa wawewoṙe moo-pfo, mṟasa maka iya kyiku iafukyie. 6 Iwo nyiwo wuṟutsi wo kuwooka. Ai nanga na mweele nyi ulya awoṙe ṙombo wuṟutsinyi wo kuwooka. Iwo upfu lo kawi luwoṙe pfinya yewawutia kyindo-pfo; indi wechiwa makohanyi wa Ruwa na wa Kristo, nawo wechichilyia hamwi na oe maka kyiku. 7 Na kyiyeri maka-yo kyiku yechisia, Satana nechiwuto kyipfungonyi. 8 Na oe nechifuma indelemba masanga galya gakyeri ngyuurenyi tsoose tsiina tsa uruka, Gogu na Magogu, iwasania ko shiṙa, walya itala lyawo lyikyeri cha mlelya o ipalyipalyi. 9 Wakayenda urukyenyi koose, wakaiṟiwia kambi ya wandu wa Ruwa, na mṟi-cho umkunde. Moṙo ukooloka iwuka ruwewu ukowarumatsa. 10 Na Mokyiriinzi ulya, ekyewalemba, kawiyitso iruwenyi lya moṙo na kyipiriti, kundu lyikyeri indo lyilya na moonguo shisuku ulya o wongo. Nawo wechilyiso wukyiwa kyio na kyingoto mṟasa mlungana na mlungana. 11 Numa ya iho ngawona kyitima kya mng'ano, kying'anyi kya uwiṟo, na oe akyiṙamilyie; ulya uruka na ruwewu shileṙicha iwuka mbele ya kyaam kyakye, na handu shiwekyeri halewono-pfo. 12 Ngawona wapfu, wang'anyi na watutu, wagoṟokyi mbele ya kyitima-kyo kya mng'ano; na shitapu shishipfunguoe; na malaika wakapfunguo kyitapu kyingyi, kyikyeri kya moo; na wapfu-wo wakaanduyo kui shindo shishiṟeie ipfo shitapunyi, iṙuana na mawuto gawo. 13 Ipalyipalyi lyikawuta wapfu wawekyeri kolyo; na Upfu na Halya-ndu wandu wapfiie wekyekaa shikawuta wapfu wawekyeri kosho. Wakaanduyo orio mndu iṙuana na mawuto gakye. 14 Upfu na Halya-ndu wapfu wekyekaa shikawiyitso iruwenyi lya moṙo. Ilu nyilo upfu lo kawi, iruwa-lyo lya moṙo. 15 Na kokooya mndu oose alalewono amṟeie kyitapunyi kya moo, nalewiyitso kulya iruwenyi lya moṙo.
1 Numa ya iho ngawona ruwewu ngyihya na uruka luhya. Cha kyipfa ruwewu ya kuwooka na uruka lo kuwooka shamuiṙa, maa kuwoṙe ipalyipalyi-se-pfo. 2 Na inyi ngawona mṟi ulya mweele, Yerusalemu ngyihya, ochisoka iwuka ruwewu ko Ruwa, umṟeyeṟe, cha mpora amchopo kyipfa kya mii okye. 3 Ngaicho ṟui lying'anyi iwuka kyiṙinyi kya mng'ano lyechigamba, “Handu ha Ruwa hekaa nyi hamwi na wandu, na oe nechikaa handu hamwi nawo, nawo wechiwa wandu wakye na oe nechiwa Ruwa owo. 4 Na oe nechianguo orio mcheṟeṟe mesonyi kowo, maa kochiwaṙa-se upfu-pfo; maa ikapa ṟanyi maa kyifiiṟo-pfo; maa kochiwaṙa-se mawawio-pfo; cha kyipfa shindo sha kuwooka shamuiṙa.” 5 Na oe aṙamie halya kyitimenyi kya mng'ano, kagamba, “Ngagaluo shindo shoose iwa shihya.” Kangyiwia, “Ṟeia kye maṙeṙo-ga nyi kyindo mndu eiṙima iiṙikyia; na nyi ga loi.” 6 Kangyiwia, “Shammarisika. Inyi nyi Alyifa na Omeka, mawookyionyi na mafurumionyi. Inyi ngyechienenga ulya awoṙo nyi nyoṙa ya shoka ya mṟinga o moo, kulawoṙe itaa kyindo. 7 Ulya mowinga nechioṟa ishi, na inyi ngyechiwa Ruwa okye, na oe nechiwa mono-ko. 8 Indi waowu, na walawoṙe iiṙikyia, na wekyewuta mawicho, na wawaagi, na waṟui, na wasawi, na iwo wekyeterewa na iindia mafano, na woose wekyeṙeṙa wongo, ṙombo lyawo nyi kulya iruwenyi lyekyeaka moṙo na kyipiriti. Ilu nyilo upfu lo kawi.” 9 Umwi o malaika walya mfungaaṙe kacha, walya wawewoṙe pakulyi tsilya mfungaaṙe tsiweichuo ngapo tsa mafurumionyi, na oe kaṙeṙa na inyi, echigamba, “Nnjo na kunu, na inyi ngyechikuloṟa Mpora, mka o Kyiondo kya Ruwa.” 10 Kangyiṙuo kui Mumuyo mṟasa fumvu lying'anyi, lyileshi, kangyiloṟa mṟi ulya mweele, Yerusalemu, ochisoka iwuka ruwewu ko Ruwa Mopfinya. 11 Uwoṙe kyiṟumi kya Ruwa, na ngyeela yakye iwekyeri cha igoe lya woguru wung'anyi cha igoe lya kyimaṟamaṟa, ingyiilyi cha kyiyewo. 12 Uwewoṙe kyiambasa kying'anyi, kyileshi, kyiwoṙe moongo ikumi na iwi, na iho moongonyi malaika ikumi na wawi; na marina gamaṟeie, nago nyi marina ga mbaṟe ikumi na tsiwi tsa wandu wa Isiraelyi. 13 Ura lo ngamenyi moongo iṟaṟu, ura lo kyawuye moongo iṟaṟu, ura lo kyaseri moongo iṟaṟu na ura lo kyukonyi moongo iṟaṟu. 14 Na kyiambasa kya mṟi kyiwewoṙe ngyuurende ikumi na tsiwi, na ipfo ngyuurendenyi marina ikumi na gawi ga wasu walya ikumi na wawi wa Kyiondo kya Ruwa. 15 Na oe aleṙeṙa na inyi nawewoṙe kyiwale kya sahapu, naiṙime ipima mṟi-cho, na moongo yacho, na kyiambasa kyacho. 16 Na mṟi ulya uwoṙe ngyuura tsiina tsilyingananyi. Kapima mṟi ulya kui kyiwale kyilya. Uwekyeri cha shilometa shiku shiwi na magana gaana, na ngyuura tsoose tsiwelyingananyi. 17 Kapima kyiambasa kya mṟi-cho, kyikawaṙa cha meta makumi gaṟandaaṟu, kui kyiyeṟo kya kyimndu. Kyimwi na igamba cha kya malaika. 18 Na kyiambasa-kyo kyiwekyiwikye nyi magoe ga kyimaṟamaṟa, na mṟi-cho uwei sahapu ngyiilyi, mfano o kyiyewo kyiilyi. 19 Na ngyuurende tsa kyiambasa kya mṟi tsiwengyichope nyi magoe ga woguru wung'anyi ga orio mbaṟe. Urende lo kuwooka luwei kyimaṟamaṟa; lo kawi igoe lya buluu; lo kaṟaaṟu igoe lya kyimaṟamaṟa; lo kaana sumaridi. 20 Lo kataanu lya kyimaande; lo kaṟandaaṟu akyikyi; lo mfungaaṙe lya manjano; lo nyanya lya buluu; lo kyenda lya manjano; lo ikumi lya kyimaṟamaṟa ang'u uwiṟouwiṟo; lo ikumi na lyimwi lya kyimaṟamaṟa kyilonganyi na buluu; na lo ikumi na kawi lya kyimaande-maande. 21 Na moongo iya ikumi na iwi nyi lulu ikumi na tsiwi; orio moongo nyi lulu imwi. Na njia ya mṟi nyi sahapu ngyiilyi cha kyiyewo kyiwaṙami. 22 Na inyi ngyilewona pfo hekalu-pfo; cha kyipfa Mndumii Ruwa Mopfinya na Kyiondo kya Ruwa, nyilyo hekalu lyakye. 23 Na mṟi ulya uwewoṙe kyimaṙuma kyepfula ngyeela ya mnengyeṟi maa mori-pfo, cha kyipfa kyiṟumi kya Ruwa kyekyeuenenga ngyeela, na taa ya mṟi-cho nyi Kyiondo kya Ruwa. 24 Na masanga gechichumia ngyeelenyi yacho. Na wamangyi wa uruka wechiende kyiṟumi kyawo na ipfo mṟinyi. 25 Na moongo yacho yechishingo maa ale kyingoto-pfo; cha kyipfa ipfo mṟinyi kuwoṙe kyio-pfo. 26 Nawo wechiende kyiṟumi na rina lya masanga na ipfo mṟinyi. 27 Na ipfo mṟinyi kochiwaṙa kyindo kyoose kyifafa-pfo, maa ulya ekyewuta shindo sha sonu ang'u iṙeṙa wongo-pfo, indi walya wawaṟeie kyitapunyi kya moo kya Kyiondo kya Ruwa.
1 Numa ya iho kangyiloṟa mfo o mṟinga o moo, uiaka-aka cha kyiyewo, ochiwuka kyitimenyi kya mng'ano kya Ruwa, na kya Kyiondo kya Ruwa, 2 makyiṙi-gawi ga njia yakye ing'anyi. Na ura-lu na ura-lu lo mfo ulya, kuwewoṙe ikyiṙi lya moo, lyekyekumbia ndunda, mbaṟe ikumi na tsiwi, lyekyekumbia ndunda tsalyo orio mori; na maṟa ga ikyiṙi-lyo nyi gekyiṟa masanga. 3 Maa kochiwaṙa kyiseso kyoose-se-pfo. Na kyitima kya mng'ano kya Ruwa na kya Kyiondo kya Ruwa kyechikaa pfo. Na waṟundi wakye wechimṟundia. 4 Nawo wechimmbona kyaam kyakye, na rina lyakye lyechikaa ngyuushangunyi tsa shaam shawo. 5 Maa kochiwaṙa-se kyio-pfo; maa wechipfula ngyeela ya taa maa ya mmbaṟi-pfo; cha kyipfa Mndumii Ruwa nechiwa ngyeela yawo, nawo wechichilyia mṟasa mlungana na mlungana. 6 Numa ya iho kangyiwia, “Maṙeṙo-ga nyi kyindo mndu eiṙima ikyiiṙikyia na nyi kya loi.” Na Mndumii, Ruwa ekyeenenga weonguo shisuku Mumuyo okye, naleṙuma malaika okye iloṟa waṟundi wakye shindo shilya shiwaṟi icha iwinyi. 7 Yesu nagamba, “Ngyiicha iwinyi. Agusu ulya aosha mbonyi tsa wuikyimbi wo kyitapu-kyi.” 8 Na inyi Yohane nyi oe ngyileicho na iwona mbonyi-tso. Na ilyi ngyiletsiicho na itsiwona ngyileoloka, kundu ngyiterewe na iindia mbele ya maṙende ga malaika ulya alengyiloṟa mbonyi-tso. 9 Na oe kangyiwia, “Ulawute kuṙi. Inyi nyi mongari opfo, na o wana wa wama wapfo, na o walya wekyeosha mbonyi tsa kyitapu-kyi. Terewa na iindia Ruwa.” 10 Kangyiwia, “Ulaṟikye mbonyi tsa wuikyimbi wo kyitapu-kyi, cha kyipfa kyiyeri kya wuikyimbi-wo kyamwafukyia. 11 Molya mbaka naengyeṟe ilya mbaka; na mowuta mando gafanyi naengyeṟe iwuta kuṙo. Na msumganyi naengyeṟe iwuta sha wusumganyi; na mweele naengyeṟe iilyisho.” 12 Yesu naigamba, “Ngyiicha iwinyi, na wori woko wukyeri hamwi na inyi, itaa orio mndu chandu iṟunda lyakye lyikyeri. 13 Inyi nyi Alyifa na Omeka, mawookyionyi na mafurumionyi, o kuwooka na o mafurumionyi.” 14 Wagusu walya wekyesanja nguwo tsawo, wawaṙe momu o yenda halya-ndu ikyiṙi-lyo lya moo lyikyeri, na iiṙa na mṟinyi kui moongo yalyo. 15 Ipfo nja kuwoṙe shite, na wasawi, na waṟui, na wawaagi, na iwo wekyeterewa na iindia mafano, na orio mndu akundi wongo na iṙeṙa wongo. 16 “Inyi Yesu ngaṙuma malaika oko imuṟingyishia nyoe shindo shoose siṟinyi. Inyi ngyikyeri Mshari na Mana o Dawidi; nyenyeri iya ya ngamenyi yekyewaa.” 17 Na Mumuyo na Mpora wagamba, “Nnjo! Ulya aichuoe nagambe, ‘Nnjo!’ Na awoṙo nyi nyoṙa nache; na akundi, nanyo mṟinga o moo kulawoṙe itaa kyindo.” 18 Ngaṟingyishia orio mndu aicho mbonyi tsa wuikyimbi wo kyitapu-kyi. Mndu oose katsiengyeṟa kyindo kyoose, Ruwa nechiengyeṟia mndu-cho ngapo-tso tsingyiṟeie kunu kyitapunyi. 19 Na mndu oose kawuta kyindo kyoose iwuka kunu mbonyinyi tsa wuikyimbi wo kyitapu-kyi, Ruwa nechisoka mndu-cho ṙombo lyakye halya ikyiṙinyi lya moo, na kulya mṟinyi mweele, mṟi ulya mbonyi tsacho tsingyiṟeie kunu kyitapunyi. 20 Ulya moṟingyishia ishi, nagamba, “Yee loi; ngyiicha iwinyi.” Amen. Nnjo Mndumii Yesu. 21 Isaṟia lya Mndumii Yesu lyikae na nyoe moose. Amen.