1 ኡድ አበኮይ በዴሱኔ ቡሮ ከቶይ ኤ ዬቸ። ዬ ከቶን ዎንቶ ደኣ ኤ ዬቸ። ዬ ከቶን ዎንቶ ኤ ማቅቸ። 2 ኤስን ኡድ አበኮይ በዴሱኔ ቡሮ ዎንቶ ደኣ ኤ ዬቸ። 3 ኡድ አበኮይ ሜዹቶስ ኤሱነኮ። ሜዹተሳፈ ኡድ ብዝ አበኮን ኤሰ ባከ ሜዹተስ ባሶ። 4 ኤስን ዬሶነ ኩንዴሴሰ ማቁሱኔ ዬ ዬሶን አሡሴ ፎኤ ኤ ማቅቸ። 5 ዬ ፎኤን ጬንቻከኮ ፈቅየ ኤ ዬሴ። ጬንቸን ፎኤ ፌቶ ኢቹወሾ። 6 ብዝ ዮሀንሴ ሱንጌስ ዎንቶይ ዎሶ አሥ ኤ ዬቸ። 7 ኤ ኦሄቴ አሥት ቤ ኡድነ ፎኤ ኣዴሦሮሰ ፎኤይ አበ ማቄንኬ ኤ ግሸ ኦሄሴ ኤ ዮዶ። 8 ዮሀንሴይ ፎኤ ግሸ ኦሄሴ ኤ ዮዶሰ ባከ ቤሴ ፎኤ ማቁወድኮ ኤ ዬቸ። 9 ኤሰዎይ ኣዴ ፎኤ ማቄ ፎኤይ ኡድ አሡሴ ፎኤ እንጌስ ሀ ሰሀ ገረ ዮውየ ኤ ዬቸ። 10 ዬ ፎኤን ሀ ሰሀ ገረ ኤ ዬቸ። ሀ ሰሀይ ሜዹቶስ ቤሴ ኤሱነ ማዼሰኮን ሀ ሰሀ አሥት ኤሰ ኤሬ ኡ ዼዶ። 11 ኤስ ቤ አሥቱኮ ኤ ዮዶ። ዮዌሴ ባከ ኤ አሥት ኤሰ ኤፌ ኡ እንጸዾ። 12 ማቁወዬ ባከ ቤምበ ኤተስቱሴ ኡድ ዬይድ ህዮን ቤምበ ኣዴሳስቱሴ ዎንቶ ነይሼ ኡ ማቆሮንኬ ጎዶ ኤ እንዶ። 13 ዬ ኡስትን ዎንቶኮፈ ኡ ዬሉቶሰ ባከ አሥ ቦህየፈ አቾ መሦወፋረ ጮልአፋረ ዬሉቶ ባሶ። 14 ከቶይ አሤ ኤ ማዾ፥ ኑ ግደን ኤ ዬሶ። ዎንቶይ አሡሴ ኬንጌ መሦ ሞዼትየረ ኣድየረይ ኤሳከ ኩንድኔ ብዝ ዬሌይ ብየዴ ደኣ ኬንጌ ኩሠኬዎ ኤ ኩሠ ፉለን ኑ ቤዶ። 15 ዮሀንሴን ኤ ግሸ ዜርስኔ « ‹ተ ጌዴ ዮኔስ ታሜ ቡሮ ዬቸሼ ኤ ማቄ ግሸ ታሜ ገሮኮ ኤ ገሬ› ዬይድ ተ ኦቴቾሽ ሀይ ሀ ኤሰኮ» ዬይድ ቤ ከቶ ኬደይስ ኤ ኦቶ። 16 ዎንቶይ ቤሴ ኩንድ ገርዴሴሳፈ ኑሴ ኡድ በሴ ሀንት ሴኬ ኮስ ኮስ ሞዼ ኤ ሀንቶ። 17 ዎንቶ ዎገይ ሙሴ በዴነኮ ኤ እንጉቶ። ዎንቶይ አሡሴ ኬንጌ መሦ ሞዼትየረ ኣድየረመይ ዬሱስ ክርስቶሰ በዴነኮ ኤ ቤንቶ። 18 ዎንቶ ቤዴሴስ ኮሎነ ባሶ። ኤሳረ ዎለ ሽጵ ህዴሴ ዎንቶ ማቄ ብዝ ኤ ዬሌዎኮ ኤሰ አዱሰ። 19 አይሁደ አፈነ ማግት ዬሩሰሌሜ ከተማፈ ከህንታረ ሌወሥታረ ጸመቅቸ ዮሀንሴኮ ዎሶ አንስ «ኔን ኦኔወ?» ህድ ኡ ኦይጩሾ። 20 ዮሀንሴን «ተን ሜስሄ ማቁወሶ» ህድ ሴኬ ሀንኬ ህዶ በድ ቤ ኣዴ ኤ ኦቶ። 21 ዎሰሥትን «ህኔ ኔን ኤላስየ?» ህድ ኡ ኦይጮ። «ኦኦ፥ ተን ኤላሴ ማቁወሶ» ህድ ኤ መቶ። «ህኔ ‹ኤ ዮኔ› ህድ ህዩቴቸ ካየሥ ኔምበ?» ህድ ኡይዶ። «ኦኦ፥ ተን ካየሤ ማቁወሶ» ህድ ኤ ህዶ። 22 «ህኔ ኔን ኦኔነ? ዎሶ ኔኮ ኑ አንሰ ጌሩሴ ኑ ኦሆሮንኬ ኔን ኔሴ ኔምበ ኦኔይድን ኔ ህኔ?» ህድ ኡይኔ 23 ኤስን «ካየሥ እሰየሴይ ኦቶንኬ ‹ላሥ ኦጌ ነቁወይቴ ዬይድ ህስኔ ሰሀ ሜላ ኡወረ አሥ ከቶ› ዬይድ ህዩቴቸይ ተምበኮ» ዬይድ ኤ ህዶ። 24 ዎሶ ሀንዴቸሽት ፈረሰሥታፈኮ ኡ ማቅቸ። 25 ኡስን «ህኔ ሜስሄ ኦኦይኔ ኤላሴ ኦኦይኔ ካየሤ ኔ ማቁወሰ አሜ ኔ ጸመቄ?» ህድ ኡ ኦይጮ። 26 ኤስን «ተን ዋሡነኮ ጸመቄ። ማቁወዬ ባከ ህ ኤሩወሰኮ ህ ግዳከ ኤዼሰ። 27 ኤስን ታሜ ጌዴኮ ኤ ዮኔ፥ ተን ፌቶ ኤ ኮጰ ቱፌ ብርቼሼ ኤሌሴሰ ማቁወሶ» ዬይድ ኤ መቶ። 28 ሃንጽ ኡድ ዬይድ ኤ ማዾስ ዮሀንሴይ ኤሰ ጸመቅቾ ዮርደኖሴ ዋሡሴ ቆስ ኬሴ በዴ ዬሴ ቢተንየ ከተመኮ ኤ ማቅቸ። 29 ጌዴ ዎንቴ ዮሀንሴይ ዬሱሰይ ቤኮ ዮኔሰ ቤድ «ሀይ ሀ ሰሀ ገረ ዬሴ አሥ ጩቦ ዴንስ ኦሤ ዎንቶ ዶር ሀ ኤሰኮ። 30 ‹ተ ጌዴ ዮኔስ ታሜ ቡሮ ዬቸሼ ኤ ማቄ ግሸ ታሜ ገሮኮ ኤ ገሬ› ዬይድ ተ ኦቴቾሽ ሀ ኤሰኮ። 31 ተንን ኤሰ ኤሩወድኮ ዬቸ። ማቄ ባከ ኤስ እስረኤለሥቱሴ አዴዮሮንኬ ዮድ ዋሡነ ጸመቅየኮ ተ ዬሴ» ዬይድ ኤ ህዶ። 32 ዮሀንሴን ሴኬ አቴይስኔ «አያነ ጌሽ አፋፈ ሀዴ ዎየኬ ሆዽ ኤ ገረ ኡቱሱኔ ተ ቤዶ። 33 ተንን ታሴ ኤሰ ኤሩወድኮ ዬቸ። ማቄ ባከ ዋሡነ ተ ጸመቆሮንኬ ተምበ አንሰስ ኦህስኔ ‹አያነ ጌሽ ሆዽ ኤ ገረ ኡቱሱኔ ኔ ቤኔስ ኤሰኮ አያነ ጌሹነ ጸመቄስ› ዬይድ ታኮ ኦትኮ ኤ ዬቸ። 34 ዬይድ ኤ ማቁሱኔ ቤድኮ ተ ዬሴ። ዬ ኤ ግሸ ተን ዎንቶ ዬሌ ኤ ማቄንኬ ኤሱሴ አቶኮ» ዬይድ ኤ ህዶ። 35 ጌዴ ዎንቴ ዮሀንሴይ ቤ ኤሩስቾ ለምእ ጌርታረ ሴኬ ዬ ጎዶወ ኤ ዬቸ። 36 ዬሱሰይ ዬይነ ገሬሰ ቤድ «ሀይ ዎንቶ ዶር!» ዬይድ ኤ ህዶ። 37 ዬ ኤ ኤሩስቾ ለምእ ጌርት ኤ ኦቶሰ ሲድ ዬሱሰ ጌዴ ኡ ኣዾ። 38 ዬሱሰን ቤ ጌዴ ዬ ለምእ ጌርት ዮውየ ዬሴሰ ማዽ ቤድ ኡሶ «አም ህ ዎርጌ?» ህድ ኤ ኦይጮ። ኡስን «ረቤ! አየው ኔ ዬሴ?» ህድ ኡይዶ። (ረቤ ዬይድ ህዮይ ኤሩሴዮ ዬይድ ህዮኮ።) 39 ዬሱሰን «ሀነ ዮድ ቤወይቴ» ዬይድ ህዶ። ህኔ ኤሳረ ሀንድ አየ ኤ ዬሴሰ ኡ ቤዶ። ዬ ዎንቴ ዬንየ ኤሳረ ዎልኮ ኡ ዴጮ። ዬ ዎገን ተም ሳቴ ኤሌሰ ኤ ማቅቸ። 40 ዮሀንሴይ ኦቶሰ ሲድ ዬሱሳረ ሀንዴቸ ለምኡካፈ ብዝ ስሞኔ ሱንግቸ ጴጽሮሴሴ ኤስንዶ ነኤ እንድራሴኮ ኤ ማቅቸ። 41 ዬ እንድራሴይ ቡሮነ ቤይንዶ ነእ ስሞኔኮ ሀንድ «ሜስሄኮ ኑ ዴጌሶ» ህድ ኤ ኦቶ። (ሜስሄ ዬይድ ህዮይ ክርስቶሰ ትሹቴሴሰ ዬይድ ህዮኮ።) 42 ዬ ኤ ጌዴ እንድራሴይ ስሞኔ ዬሱሰኮ ኤ ኦዶ። ዬንየን ዬሱሰይ ስሞኔ ኣፍየ ጨድ ቤድ «ኔን ዮነ ነእ ስሞኔኮ፥ ሀ ኤ ጌዴ ሴኬ ኬፈኮ ኔ ሱንጌ» ዬይድ ኤ ህዶ። («ኬፈ» ዬይድ ህዮይ «ጴጽሮሴ» ኦኦይኔ «ሾሎ» ዬይድ ህዮኮ።) 43 ጌዴ ዎንቴ ገልለ ዉዴ ሀሜሴ ኤ ዎርዶ። ፍልጶስየረ ሙት «ታረ ዮወ» ህድ ኤ ህዶ። 44 ፍልጶሴን ሀዴ እንድራሴክየረ ጴጽሮሴክየረ ቤቴሰይደ ከተመ አሡኮ ኤ ማቅቸ። 45 ፍልጶሴን ነትነኤሌኮ ሀንድ «ሙሴይ ቤ ዎገ ፍሸሮወከ ካየሥት ቤ ካዮ ፍሸሮወ ዲዜቾሸኮ ኑ ዴጌሶ። ኤስን ዮሴፌ ነእ ነዝረቴ ከተመሥ ዬሱሰኮ» ዬይድ ኤ ህዶ። 46 ነትነኤሌን «ነዝረቴ ከተማፈ ሞዼ አበኮይ ቤንቴሴ ደንደኣ ደንደኤ?» ህድ ኦይጮ። ፍልጶሴን «ሀነ ዮድ ቤወ» ህድ ህዶ። 47 ዬሱሰይ ነትነኤሌይ ቤኮ ዮኔሰ ቤድ «ዶሜቴ ኬንጉወ ኣዴ እስረኤለሤ ህድ ህሶስ ሀ ኤሰኮ» ህድ ኤ ግሸ ኤ ህዶ። 48 ነትነኤሌን «አይ ታ ኔ ኤርቸ?» ህድ ኦይጮ። ዬሱሰን «ፍልጶሴይ ኔኮ ኦቶሱሜ ኤ ቡሮ ቤሌሴ ኦሞ ኔ ዬሱኔኮ ተ ቤዴቸ» ህድ ኤ ህዶ። 49 ዬንየን ነትነኤሌይ «ላሦ፥ ኔን ዎንቶ ዬሌኮ፥ ኔን እስረኤለሥቱሴ ኡ ካቱኮ» ህድ ኤ ህዶ። 50 ዬሱሰን «ተምበ ኔ ኣዴሶስ ‹ቤሌሴ ኦሞ ኔ ዬሱኔኮ ንየ ተ ቤዴቸ› ዬይድ ተ ህዶ ግሸ ማቁወዬ? ዬ ኤሰ ገሬ አበክተኮ ቡሮ ገረ ኔ ቤኔ። 51 ህኑሴ ተ ኦሄስ ፌቶ ኣዴኮ። አፈይ ዶኡቴሱኔ ዎንቶ ዎሰሥትን አሥ ዬሌ ህድ ህዩተስ ገረ ሆዾ ኬሶ ኡ ህሱኔኮ ህ ቤኔ» ህድ ኤ ህዶ።
1 ሀይሶ ዎንቴ ገልለ ዉድየ ዬሴ ቃነ ከተማከ ኩለይ ኤ ዬቸ። ዬሱሰይንዶይ የሀ እ ዬቸ። 2 ዬሱሳረ ኤ ኤሩስቾሽታረን ኩላከ ጼይጉት ዮድ የሀ ኡ ዬቸ። 3 ዬ ኩላከ ኡ ዬሱኔ ዌይኔ ዳነይ እቶ። ህኔ ዬሱሰይንዶይ ዬሱሰኮ «ሀይ ዌይኔ ዳነይ እቶሶ» ህድ እ ህዶ። 4 ዬሱሰን «ኑንዴ፥ አበ ሀንቱወይድን ኔ ህኔ? ተ ዎገይ ኤሎ በድኮ ኤ ዬሴ» ህድ ኤ ህዶ። 5 ኤስንዶን ዬንየ ዬ ኩለ ዘወ ሀንትቻሽቱኮ «ዬሱሰይ ኦሄንኬ ኡድ ሀንቱወይቴ!» ህድ እ ህዶ። 6 አይሁደሥት ቤምበ ጌሼ ዎገ ኡ ኬንግቾ ግሸ የሀን ኡሱሴ እዙፍ ሹች ድምቦይ ዬቸ። ዬ ድምቦን ቤ ብዝ ብዝነ ለምኤ ኦኦይኔ ሀይዝ ጎምቦ ዋሤ አይኬሰ ኤ ማቅቸ። 7 ዬሱሰን ዬ ዘወ ሀንትየ ዬቸሽተ «ሀ ድምብታ ዋሤ ኩንሡወይቴ!» ዬይድ ኤ ህዶ። ኡስን ዬ ድምብተ ኤ ኑነ ኣሎ ኡ ኩንሶ። 8 ዬ ኤ ጌዴ ዬሱሰይ ኡሶ «ዮነሴ ሾንእ ኩለሴ አዴ ማቄሱሴ እንጉወይቴ» ህድ ኤ ህዶ። ኡስን ሾንእ እንዶ። 9 ዬ ኩላዴን ዋሤ ማቅቸሽ ዌይኔ ዳናከ አርቶሰ ኡዽ ቤ ቤዶ ዎገ አየፈ ኤ ዮዶሰ ኤርዶ ባሶ። ዬንየን ዋሤ ሾንአስትመይ ኤረኮ ኡ ኤርቸ። ህኔ ዬ ኩላዴይ ኤኬ ነኤ (21) ቤኮ ጼይድ 10 «አሥት ቤ ኡድነ ቦርሰሴ ቡሮነ ኤ ኡቁሴስ ሶቄ ዌይኔ ዳነኮ፥ ኡ ጎዦ ጌዴኮ ሶቁወሰ ኤ ኡቁሴ። ኔንመይ ሀቴ ኣሎ ሶቄ ዌይኔ ዳነ አሜ እንጌ ኔ ዼዴቸ?» ዬይድ ኤ ህዶ። 11 ዬሱሰን ቤ ሀንቶ ምጩሼ ሀንትቱሜ አቸ ምጩሼ ሀንተ ኤ ሀንቶስ ገልለ ዉድየከ ዬሴ ቃነ ከተማከኮ ኤ ማቅቸ። ዬይስ ቤ ሀንቶሱነ ቤ ኩሠ ፉለ ኤ አዱስኔ ኤ ኤሩስቾሽት ኤሰ ኣዴሶ። 12 ዬ ኤ ጌዴ ዬሱሰይ ቤይንዶወረ ቤይንዶ ነአጽየረ ቤ ኤሩስቾሽታረ ዬኬ ቅፍርነሆሜ ከተማ ኤ ሀንዶ። ያከን ኦዼ ዎንተ ኣሎ ኡ ዴጮ። 13 ዬሱሰይ አይሁደ ገሮ መሰለይ ኡዼቾ ግሸ ዎኬ ዬሩሰሌሜ ኤ ዮዶ። 14 ዎንቶ ሀይለ ዘወ ቄይሽ ግዳከ መይደጼ፥ ዶርተ፥ ዎይታረይስ ዬ ኡስተ ዘልኤስት ዘልእየካረ ብሬ አርሤስት አርሥየካረ ኡ ዬሱኔ ኤ ቤዶ። 15 ዬንየን ገኔ ዎል ገረ ዙዽ ዥራፌ ነዽ ዶርተን መይደጽተን ኬሞ ኡድ ዎንቶ ሀይለ ዘወ ከራፈ (22) ጎድ ኤ ኬሶ። ኡ አርሥቾ ሚዤን ኤ ቡዶ። ኤ ገረ ገድ ኡ አርሥቾ ጸረጴዘን ኤ ጉፉንሶ። 16 ዎየ ዘልእቸ አሥተን «ሀ ኤሰ ሀየፈ ኦሡወይቴ! ኑወዴ ዘወ ገዼሰ መቶፍተ» ዬይድ ኤ ህዶ። 17 ዬንየከ ኤ ኤሩስቾሽት ዝንገሌ ፍሸሮወ «ኔ ዘወሴ ተ ኬንጌ ሞዼ ከርዶይ ሀዴ ተመኬኮ ተ ገዎ ኤ ሙኔ» ዬይድ ኤ ዲዙቴቾሸ ኡ ገጾ። 18 ዬ ኤ ጌዴ አይሁደሥቱሴ አፈነ ማግት «ሀ ኤሰ ዬይስ መሄሴ አዴቶ ኔ ኬንጌሰ ኤሱነ ኑ ኤሮሮሰ አበ ምጩሼ አበኮን ኑምበ ኔ ቤይሴ?» ህድ ኡ ኦይጮ። 19 ዬሱሰን «ሀ ዎንቶ ሀይለ ዘወ ዎዱሱወይቴ፥ ተን ሴኬ መትኮ ሀይዝ ዎንቴነ ተ ኬጼ» ህድ ኤ ህዶ። 20 ኡስን «ሀ ዎንቶ ሀይለ ዘወይ ኬጹትስኔ ኦይድ ተመ እዙፍ ቤረኮ ኤ አልሴቸ። ህኔ ኔን ‹ሀይዝ ዎንቴነኮ ሴኬ መት ተ ኬጼ› ህድ ኔ ህኔስ ዋክድነ?» ህድ ኡ ኦይጮ። 21 ዬሱሰመይ «ዎንቶ ሀይለ ዘወ» ህድ ኤ ዜርዶስ ቤ ግሸኮ ኤ ማቅቸ። 22 ዬሱሰይ ሀይቦወፈ ዴንዶስ ጌዴ ኤ ኤሩስቾሽት ዬ ኤ ዜርዴቾሸ ኡ ገጾ። ዬ ኤ ግሸ ሀይለ ፍሸሮወ ዜሩቴቸሻረ ዬሱሰይ ዜርዶሳረ «ኣዴኮ» ህድ ኡ ህዶ። 23 ዬሱሰይ ዬሩሰሌሜ ገሮ መሰላከ ዬሱኔ ኤ መቶ ምጩሼ አበኮ ቤድ ለገ አሥት ኤሰ ኣዴሶ። 24 ዬሱሰመይ አሥተ ኤ ኡድነ ቤ ኤርቾ ግሸ ቤ መሦ ኡድ ቤ ሙጹሮወፈ ኬስ ኡሱሴ ኦቶ ባሶ። 25 አሥ ሙጹሮወ ዬሴ በሴ ቤ ኤርቾ ግሸ ኦኔን አሥ ግሸ ኤሱኮ ኦሆሮሰ ዎርጉሱወድኮ ኤ ዬቸ።
1 ንቆዶሞሴ ሱንጌ ብዝ አዴይ ኤ ዬቸ። ኤስን ፈረሰሥታፈ ማቅስኔ አይሁደሥቱሴ አፈነ ማገፈ ብዞ ኤ ማቅቸ። 2 ብዝ ቀመ ዬሱሰኮ ዮድ «ላሦ፥ ዎንቶይ ኤሳረ ዬሴሰ ባከ ሀቴ ሀ ኔን ሀንትየ ዬሴ ምጩሼ ሀንተ ኦኔን ሀንቴሴ ደንደኡወሶ። ሀ ኤ ግሸ ዎንቶኮፈ ዮደ ላሤ ኔ ማቄንኬ ኤረኮ ኑ ኤሬ» ዬይድ ኤ ህዶ። 3 ዬሱሰን «ኔሴ ተ ኦሄስ ፌቶ ኣዴኮ፥ አሥ ሴኬ ቤ ዬሉቶ ባሰ ዎንቶ ካቴትየ ጌሌሴ ደንደኡወሶ» ዬይድ ኤ ህዶ። 4 ንቆዶሞሴን «ህኔ አሥ ቤ ጭንዶ ጌዴ ወይድ ዬሉቴሴ ኤ ደንደኤ? ሴኬ አስ ቤይንዶ ገዋ ጌል ዬሉቴሴ ደንደኣ ኤ ደንደኤ?» ህድ ኤ ኦይጮ። 5 ዬሱሰን «ኔሴ ተ ኦሄስ ፌቶ ኣዴኮ። አሥ ዋሡኮፋረ አያነ ጌሹኮፋረ ቤ ዬሉቶ ባሰ ዎንቶ ካቴትየ ጌሌሴ ደንደኡወሶ። 6 አሡኮፈ ዬሉተስ አሡኮ። አያነኮፈ ዬሉተስ አያነኮ። 7 ሀ ኤ ግሸ ‹ሴኬ ዬሉቴኮ ህኑምበ ኤ ዎርጉሴ› ህድ ተ ዜርዶሱነ ምጮፉነ። 8 አጌሥ ቤ ዎርጌ በዴኮ ኤ አጌቴ፥ ኤ ከቶን ኔ ሲኔ። ስወ ባከ አን በዴፈ ኤ ዮዶንክየረ አን በዴ ኤ ሀንጌንክየረ ኤሩወነኮ። አያነኮፈ ዬሉተስ ኡድ ዬ ኤሰኮ ኤ ብሼ» ህድ ኤ መቶ። 9 ንቆዶሞሴይ «ሀ ኤስ ወይድ ኤ ማቄ?» ህድ ኤ ኦይጮ። 10 ዬሱሰን «ኔን እስረኤለሥተ ኤሩሴሰ ማቅስኔ ሀ ኤሰ ኤሩወኑወ? 11 ኔሴ ተ ኦሄስ ፌቶ ኣዴኮ። ኑ ኤሬሰኮ ኑ ዜሬ፥ ኑ ቤዶሰኮ ኑ አቴይኔ፥ ህኑንመይ ኑ አቶ ‹ኣዴኮ› ህስኔ ኤቶበይተኮ። 12 ሀ ሰሀ ዜሬ ተ ዜሩሱኔ ‹ኣዴኮ› ህድ ህዬ ህ ዼዶ ጌዴ አፈ ዜሬ ተ ዜሩሱኔ ዋንድ ‹ኣዴኮ ኤ ዜርዶ› ህድ ህዬሴ ህ ደንደኣኔ? 13 አፋፈ ሆዸ አሥ ዬሌ ህድ ህዩቴሰ ባከ አፋከ ኬሰስ ኦኔን ባሶ። 14-15 አሥ ዬሌ ህድ ህዩቴሰ ኣዴሤስ ቤ ኡድነ ኮሎ መክነ ዬሶ ዴጌሦሮንኬ ሙሴይ ሰሀ ሜላከ ሾሼ ኬደይስ ሱጾንኬ ዬይድዎ ዬ አሥ ዬሌን ኬደይድ ሱጹቴኮ ኤሰ ኤ ዎርጉሴ። 16 ዎንቶይ ብዝ ቤ ዬሌ ቤ እንጎሮ መኮ ሀ ሰሀ ገረ ዬሴ አሥተ ኬደይስ ኤ ኤቶ። ዬ ኤ ግሸ ኤ ዬሌ ኣዴሤስ ኡድነ ኮሎ መክነ ዬሶ ኡ ዴጌሤሰ ባከ በዩቱወሶ። 17 ዎንቶይ ቤ ዬሌ ሀ ሰሀ ገረ ኤ አንሶስ ሀ ሰሀ ገረ ዬሴ አሥት ኤ ዬሌነ ሎሎሮንኬ ባከ ሀ ሰሀ ገረ ያኤሴ ማቁወሶ። 18 ኤሰ ኣዴሰስ ገረ ያኡቱወሶ። ኤ ዬሌ ኣዴሶ ባስመይ ብዞ ማቄ ዎንቶ ዬሌ ቤ ኣዴሶ ባ ግሸ ኦሎዎኮ ኤ ያኡቴሴ። 19 ፎኤይ ሀ ሰሀ ገረ ኤ ዮዶ። አሥት ኡ ሀንተይ ኢተ ማቅቾ ግሸ ፎኤሜ ጬንቸ ኡ ኤቶ። ዬ ኤስን ኡሱሴ ያአኮ። 20 ኢተ ሀንተ ሀንቴስ ቤ ኡድነ ፎኤኮ ኤ እንጸኤ፥ ኤ ሀንተ ኢተይ ትዽየ ኬሴሱሜ ፎእየከ ዮወሶ። 21 ኣዴ ሀንቴስመይ ኤ ሀንቴ ሀንተይ ዎንቶ መሦኬ ሀንቱቴሴሰ ኤ ማቄንኬ ኤ አዴዮሮሰኮ ፎእየከ ኤ ዮኔ» ዬይድ ኤ መቶ። 22 ዬ ኤ ጌዴ ዬሱሰይ ቤ ኤሩስቾሽታረ ዎልኮ ዸድ ይሁደ ዉዴ ሀንድ ኡሳረ ኦዼ ዎገሴ የሀ ኤ ዴጮ። አሥተን ኤ ጸመዾ። 23 ዮሀንሴን አስ ዬ ዎገ ሳሌሜ ኡኬ ዬሴ ሄኖኔ ሱንጌ ጎዶ ዋሥ ለገይ ዬቾ ግሸ አሤ ኤ ጸመቅቸ። አሥትን ጸመቁቴሴ ኡ ዮቸ። 24 ሀ ኤስ ዬይድ ኤ ማዾስ ዮሀንሴይ ቱፉቶሱሜ ቡሮኮ ኤ ማቅቸ። 25 ዮሀንሴይ ኤሩስቾሽታፈ ብዝ ብዝታረ ብዝ አይሁደሣረይ ቤምበ ጌሼ ዎገ ግሸ ዎልኮ ቤርሴ ኡ ጌሎ። 26 ዮሀንሴኮ ሀንኬ ኤ ኤሩስቾሽት ኡዽ «ላሦ! ዮርደኖሴ ዋሥ ሴምፈ ኔረ ዎልኮ ዬቸሽ ኔን ኤሱሴ አቴይዴቾሽ ዬ ኤስ ጸመቅየኮ ዬሴ። አሥትን ኡድ ኤሱኮ ሀምየኮ ዬሴ» ዬይድ ኡ ህዶ። 27 ዮሀንሴን «ኦኔን ዎንቶኮፈ ኤ እንጉቶ ባሰ አበን ኤት ሀንቴሴ ደንደኡወሶ። 28 ‹ሜስሄሜ ቡሮ ተ አንሡቶሰ ባከ ተን ኤሰ ማቁወሶ› ዬይድ ህኑኮ ተ ዜሬዴቾንኬ ህኑን ታሴ አቶኮ። 29 ጌሌ ቡሾይ ኤኬሱኮኮ እ ሀንጌ። ጋነመይ ዬ ኤኬ ነእ ከቶ ኤ ደኣ ኤዽ ቤ ሲኔንየከ ኬደይስኮ ኤ መጌ። ዬ መጌስ ሀቴ ታ ማቁሱኔ ብዝ ሙጹሮነ ኬደይስኮ ተ መጌ። 30 ኤስ ኬደ ኬደ ህኬቴ ተንመይ ኡለ ኡለ ህዮሮሰኮ ኤ ዎርጉሴ። 31 ዎነፈ ዮኔስ ኡድሜ አፈነኮ። ሀ ሰሃፈ ማቄስ ሀ ሰሀኮ ኤ ብሼ፥ ሀ ሰሀ ዜሬኮ ኤ ዜሬ። አፋፈ ዮኔስ ኡድሜ አፈነኮ። 32 ኤስ ቤ ሲዶሳረ ቤ ቤዶሳረ ኤ ኦትኔኮ፥ ኤ ኦቶሰ ሲድ ኤኬስ ዼዶ። 33 ኤ ኦቶሰ ‹ኣዴኮ› ህድ ህስኔ ኤኬስመይ ዎንቶይ ኣደሤ ማቄንኬኮ ኤ አዱሴ። 34 ዎንቶይ ቤ አያነ ኤሱሴ ለጉስ ኤ እንጌ ግሸ ኤ አንሶስ ዎንቶ ከቶኮ ኤ ኦሄ። 35 አዴይ ቤ ዬሌ ኤሀኮ ኤ ኤሄ። ኡድ አበኮ ኤ ኩችየኮ ኤ እንዴሴ። 36 ኤ ዬሌ ኣዴሤስ ኮሎ መክነኮ ኤ ዬሴ። ኤ ዬሌሴ ዎሱቱወስመይ ዎንቶይ ኤ ገረ ሁሌሰ ባከ ዬሶወ ጌሉወሶ» ዬይድ ኤ ህዶ።
1 ዬ ዎጋከ ፈረሰሥት ዬሱሰይ ዮሀንሴሜ ገርስ ቤ ገረ አሤ መህየ ኤ ዬሴንክየረ ኤ ጸመቄንክየረ ኡ ሲዶ። 2 ማቁወዬ ባከ ኤ ኤሩስቾሽት ጸመቅቾሸ ባከ ኤስ ቤሴ ጸመቁወድኮ ዬቸ። 3 ዬሱሰን ዬ ኤሰ ፈረሰሥት ሲዶሰ ቤ ኤርዶ ጌዴ ይሁደ ዉዴ ዸድ ሴኬ ገልለ ሀሜሴ ኤ ዴንዶ። 4 ገልለ ኣንጌ ኦጌይ ሰመርየ ዉድየነ ገርሤሰ ኤ ማቅቾ ግሸ ዬይነ ገሬይ ዎርጉሴሰ ኤ ማዾ። 5 ህኔ ስካሬ ሱንጌ ሰመርየ ከተመከ ኤ ዮዶ። ዬ ከተመይ የይቆቤይ ቤ ነእ ዮሴፌሴ እንዴቾ ሰሀሴ ኤ ደኣኮ ኤ ማቅቸ። 6 የሀን የይቆቤይ ቦት ዋሤ ኤሳፈ ሾንቅቾ ኤ ሆቦሎይ ዬቸ። ዬሱሰይ ኦጌ ቤ ዮዶ ግሸ ገት የሀ ኤ ኡቶ። ዬንየን ሰሀይ ዎንታፈ እዙፍ ሳቴ ኤሌሰ ኤ ማቅቸ። 7 ህኔ ብዝ ዬ ዉዴ እንዶይ ዋሤ ሾንቄሴ የሀ እ ዮዶ። ዬሱሰን እሶ «ዋሤ ታሴ እንጉወ ተ ኡሼሼ» ህድ ኤ ህዶ። 8 ዬ ዎገን ኤ ኤሩስቾሽት ከሠ ዎሜሴ ከተማከ ዸድ ኡ ሀንዴቸ። 9 አይሁደሥት ሰመረሥታረ ኡድ ኦጌነ ዎለ ሙሁወሰ ኡ ማቅቾ ግሸ ዬ እንዶን ዬሱሰኮ «ኔን አይሁደሤ ማቅስኔ ወይድዉ ሰመረጽዮ ማቄ ታኮፈ ዋሤ ኡሼሼ ኔ ገኤ?» ህድ እ ህዶ። 10 ዬሱሰይ «ዎንቶይ አበ ብሸ እንጎ ኔሴ እንጌሳረ ‹ዋሤ ታ ኡሹወ› ህድ ህኔስ ኦኔ ማቄሳረ ኤርደኮ ኤሰ ኔ ገኤሰኮ ዬቸ፥ ህደኮኮ ኤስ ኔሴ ኮሎነ ዬሶ እንጌ ዋሤ እንጋኔ» ህድ ኤ ህዶ። 11 እስን «ላሦ፥ ዋሤ ኤሱነ ኔ ሾንቄ ሚዤ ሀይ ኬንጉወነኮ፥ ዋሥን ዬዴነ ዘረኮ ሆቦሎወ ዬሴ። ህኔ ዬሶ እንጌ ዋሤ አየፈን ኔ ዴጌሤ? 12 ሀ ዋሥ ሆቦሎ ኑሴ እንደ ኑ ዬለ አዴ የይቆቤሜ ኔን ገሩወ ገሬ? ኤስን ኤ ነይሽን ኤ ኬሞን ሀ ሆቦሎወፈ ዋሤ ኡሽኮ ዬቸ» ህድ እ ህዶ። 13 ዬሱሰን «ሀ ዋሳፈ ኡሼሽ ቤ ኡድነ ሴኬኮ ዋሤ ኤ ሰዜ። 14 ተን እንጌ ዋሤ ኡሼሽመይ ኮሎ መክነ ሰዙወሶ። ዬ ኤስን ኤሱኮፈ ኮሎ መክነ ዬሶይ ፎልኤ ቱልቶኮ ኤ ማቄ» ዬይድ ኤ ህዶ። 15 ዬ እንዶን «ላሦ፥ ሴኬ ዋሤ ተ ሰዜሱሜ ሀየን ሾንቅየ ተ ዮኔሱሜ ሀ ኔ ኦሄ ዋሤ ኦዴ ታሴ እንጉወ!» ዬይድ እ ህዶ። 16 ዬሱሰን «ሀንድ ኔሶ አዴ ኤት ዮወ!» ህድ ኤ ህዶ። 17 እስን «ተን አዴ ኬንጉወሶ» ህድ እ መቶ። ዬንየን ዬሱሰይ « ‹ተን አዴ ኬንጉወሶ› ህድ ኔ ህዶስ ኣዴኮ። 18 እችች አድየጹኮ ኔ ጌሌቸ፥ ሀቴ ኔረ ዎልኮ ዬሴስ ኤሩቴሴ ኔ አዴ ማቁወሶ። ዬ ኤ ግሸ ኣዴኮ ኔ ዜርዶ» ህድ ኤ ህዶ። 19 ዬ እንዶን «ላሦ፥ ዮነሴ ካየሤ ኔ ማቄንኬ ሀቴሴ ኤርዱሶ። 20 ኑምበ ዬለ ኑወድየጽት ሀ በከ ገረኮ ኡ ድስቸ። ህኑን አይሁደሥትመይ ‹አሥት ድሶሮሰ ኤ ዎርጉሴስ ዬሩሰሌሜኮ› ህድኮ ሂኔ» ዬይድ እ ህዶ። 21 ዬሱሰን «ኑንዴ! ሀ ኔሴ ተ ዜሬ ዜሬ ‹ኣዴኮ› ህድ ኤኩወ። ሀ በከ ገረ ኦኦይኔ ዬሩሰሌሜ አዴ ማቄ ዎንቶሴ ድሴሴ ህ መዹንጉወ ዎንቴኮ ዮኔሰ። 22 ህኑን ህ ኤሩወሱሱኮ ህ ድሴ፥ ኑንመይ ሎሎይ አይሁደ በዴፈ ኤ ዮኔ ግሸ ኑ ኤሬ ዎንቶሱኮ ኑ ድሴ። 23 ማቄ ባከ ‹ኣዴነዎ ድሶኮ ኡ ድሴ› ዬይድ ህዩቴስት አዴ ማቄ ዎንቶሴ አያነነ ዱርኩትየረ ኣዴናረ ኡ ድሴ ዎገኮ ዮኔሰ። ፌቶ ሀቴን ዮድኮ ኤ ዬሴ። አዴ ማቄ ዎንቶን ኤሄስ ዬይድ ድሴስተኮ። 24 ዎንቶይ አያነኮ፥ ዎንቶሴ ድሴ ዎርጌስት አያነናረ ኣዴናረ ድሴኮ ኡሶ ኤ ዎርጉሴ» ዬይድ ኤ ህዶ። 25 ዬ እንዶን «ክርስቶሰ ህድ ህዩቴ ሜስሄይ ዮኔሰ ኤረኮ ተ ኤሬ። ኤስ ቤ ዮኔንየከ ኡድ አበኮኮ ኑኮ ኤ ኦሄ» ዬይድ እ ህዶ። 26 ዬሱሰን «ሀይ ንየ ዜሩስየ ዬሴ ተን ዬ ኔ ኦሄሰኮ» ህድ ኤ ህዶ። 27 ዬንየን ኤ ኤሩስቾሽት ቤ ሀንዴቾ ጎዶፈ ኡ ዮዶ። ዬሱሰይ ዬ እንዶወረ ዜሩሱኔ ቤድ ኡ ምጮ። ማቁወዬ ባከ ኦኔን ዬ እንዶ «አም ኔ ዎርጌ?» ህድ ኦኦይኔ ኤሰ «አበሱነ ሀ እንዶወረ ኔ ዜሬ?» ዬይድ ኦይጮ ባሶ። 28 ዬ ኤ ጌዴ ዬ እንዶይ ቤ ዋሥ ኦተ የሀ ደት ዸድ ከተማከ ሀንድ አሥቱኮ 29 «ብዝ አሡኮ ተ ሀንቶ ሀንተ ኤ ኡድነ ሀንኬ መት ታሴ ዜርደስ ዬሰ። ዬ ኤሰ ዮድ ቤወይቴ። ሀኖ ኤስ ሜስሄ ማዾ በድ ዼጉወሶ» ህድ እ ህዶ። 30 አሥትን ከተማፈ ኬስ ዬሱሰኮ ኡ ዮዶ። 31 እ ሀንዶንየከን ኤ ኤሩስቾሽት ዬሱሰኮ «ላሦ፥ ቦልቶ ሙወ!» ህድ ኡ ህዶ። 32 ኤስን ኡሱሴ «ህኑን ኤሩወሰኮ ተን ሙኔ ከሠይ ዬሰ» ህድ ኤ ህዶ። 33 ሀ ኤ ግሸ ኤ ኤሩስቾሽት «ኤ ሙኔ ከሣኔሶ ሀኖ አሥ ኤሱሴ ኦድ እንዶ?» ህድ ዎልኮ ኡ ህዶ። 34 ዬሱሰን «ተ ምዮይ ተምበ አንሰስ መሦ ሀንትየረ ኤ ሀንተ አልስየረኮ። 35 ህኑን ‹ከሠ ጵክሌሴ ኦይድ አጉነኮ ዮነ አቴሰ› ዬይድ ማቁወዬ ሂኔስ? ተንመይ ህኑሴ ህኔስ ከሠ ነዽ ቤወይቴ። ሜል ጵክሉቴሴ ኤልኮ ኤ ዬሴ። 36 ከሠ አጬሽ ዬ ቤ አጬሽ ዎመ ኤፈኮ ኤ ኤኬ። ኮሎ መክነ ዬሴሴ ደንደኤ ኣፌኮ ኤ ጵክሌ። ዬ ኤ ግሸ አይሌስን አጬሽን ዎልኮ መገኮ ኡ መጌ። 37 ሀ ኤሳፈ ዴንደሱነ ‹ሀ ኤስ አይሌ፥ ሴ ኤስ አጬ› ዬይድ ህዩተ ዜሬይ ኣዴኮ። 38 ህ ገቶ ባሰ ህ አጮሮንኬ ተ አንሶ። ፌድት ሀንተነ ኡ ገቶ፥ ህኑንመይ ኡ ገፈ ግዳ ጌል ህኑሴ ህ ኤቶ» ዬይድ ኤ ህዶ። 39 ዬ እንዶይ «ተ ሀንቶ ሀንተ ኡድ ሀንኬ ታኮ ኤ ኦቶ» ህድ እ ህዶሱነ ዬ ሰመርየ ከተማፈ ለገ አሥት ኤሰ ኣዴሶ። 40 ኡስን ኤሱኮ ቤ ዮዶ ዎገ ቤረ ኤ ዴጮሮንኬ ኤሰ ኡ ሽዾ። ኤስን ለምእ ዎንቴ ኣሎ የሀ ኡሳረ ኤ ፌይሾ። 41 ኤ ኦቶሰ ሲድ ፌዴ ለገ አሥት ኤሰ ኣዴሶ። 42 ኡስን ዬ እንዶኮ «ሀ ኤ ጌዴ ኤሰ ኑ ኣዴሤስ ኔን ኑኮ ኦቶሱነዎ ኤ ማዾ ባኔ ኑን ኑሴ ኑ ሲዶ ግሻረ ኣዴዎ ሀ ሰሀ ገረ ዬሴ አሤ ሎሉሴሰ ኤ ማቄንኬ ኑ ኤርዶ ግሻረኮ» ዬይድ ኡ ህዶ። 43 ዬሱሰይ ሰመርየከ ለምእ ዎንቴ ቤ ፌይሾ ጌዴ የሀፈ ዸድ ገልለ ኤ ሀንዶ። 44 ቤሴዎ «ካየሥ ቤ ዉድየ ኩሡቱወሶ» ዬይድ ኤ ዜርዴቸ። 45 ገልለ ኤ ሀንዶንየከ አሥት ገሮ መሰለሴ ዬሩሰሌሜ ቤ ሀንዴቾ ዎገ የሀ ኤ ሀንቶ ለገ ሀንተ ኡድ ቤ ቤዴቾ ግሸ ኤሰ ሞዹስ ኡ ሞቶ። 46 ዬ ኤ ጌዴ ዬ ዉድየ ዬሴ ቃነ ከተማከ አስ ኤ ሀንዶ። ዬ ከተመን ቡሮ ዋሤ ዌይኔ ዳነ ኤ መቴቾ ከተመኮ ኤ ማቅቸ። ዬንየከን ቅፍርነሆሜ ከተማከ ኤ ዬሌይ ሀርዴሴ ብዝ ካት ማገይ ኤ ዬቸ። 47 ዬ ማገን ዬሱሰይ ይሁደ ዉዴፈ ገልለ ኤ ዮዶሰ ሲድ ኤሱኮ ሀንድ «ታረ ቅፍርነሆሜ ኣዹወ! ተ ዬሌኮ የሀ ሀርድ ሉቦሴዎ ዬሰ። ኦዴ ታሴ ሎሉሴነ!» ህድ ኤ ሽዾ። 48 ዬሱሰን «ህኑን ምጩሼ አበኮወረ ዱኡሴ አበኮወረ ህ ቤዶ ባሰ ፌቶ ‹ሎሉሰኮ ኤ ሎሉሴ› ህድ ታ ጎቡወይቱወ?» ህድ ኤ ህዶ። 49 ዬ ማገን «ላሦ፥ ኦዴ፥ ተ ዬሌይ ሀይዾ ባኔ ኡኬነዎ ዬዴነ ኣዹወ» ህድ ኤ ህዶ። 50 ዬሱሰን «ዸድ ኔ ዘወ ሀንጉወ! ኔ ዬሌይ ሎልኮ ዬሴ ሀይኡወሶ» ህድ ኤ ህዶ። ዬ ማገን «ዬሱሰይ ኦቶሰ ኣዴዎኮ» ህድ ህስኔ ቤ ዘወ ዸድ ኤ ሀንዶ። 51 ኦግየ ሀምየ ኤ ዬሱኔ ኤ ማልት ኤሳረ ኦግየ ሙት «ኔ ዬሌይ ሎልኮ ዬሴ» ዬይድ ኡ ኦቶ። 52 ዬ ማገን ዬ ቤ ዬሌይ ሎሎ ሳቴ ኤ ኦይጮ። ኡስን «ዝኔ ላፍ ሳቴነኮ ምቸይ ቶይድኔ ኤ ሎሎ» ህድ ኡ ህዶ። 53 ዬ ዬልየዴን ዬሱሰይ «ኔ ዬሌይ ሎልኮ ዬሴ ሀይኡወሶ» ህድ ህዴቾ ሳቴ ኤ ማቅቾንኬ ኤ ኤርዶ። ዬ ዎንትየፈ አይት ኤሳረ ኤ ዘወ አሥታረይ ኡድ ዬሱሰ ኣዴሶ። 54 ይሁደፈ ገልለ ዮድ ኤ ሀንቱሱኔ ሀ ኤስ ለኩንሦ ምጩሼ ሀንተኮ።
1 ዬ ኤ ጌዴ ዬሱሰይ አይሁደ መሰላፈ ብዝ ኩሡትቾ ግሸ ዬሩሰሌሜ ኤ ሀንዶ። 2 የሀን ዬሩሰሌሜ ከተመ ቄይሽ ግዳ ጌልሴ ሱምታፈ ብዝ «ዶርት ሱመ» ህድ ህሶ ሱመይ ኤ ዬቸ። ዬ ሱመ ቡሮ እብረይስቴ ኑነነ «ቤቴሰይደ» (23) ዬይድ ህሶ ዋሥ ኤለይ ኤ ዬቸ። ዬ ዋሥ ኤለ ኑነ እችች ጎዶ ኬሥ ጸንጌ ኦሞይ ኤ ዬቸ። 3-4 ዬ ኬሥ ጸንጌ ኦሞን በልእት፥ ሀሜሴ ደንደኡወስት፥ ኤ ኩቼይ ኤ ቶኬይ ሲሌሴስት ለገ ሀርገሥት ዎይእየ ኡ ዬቸ። ብዝየ ብዝየ ዎንቶ ዎሰሥ አፋፈ ሆዽ ዬ ዋሤ ኤ ኤንኡስቸ። ዬ ዋሥ ኤለይ ኤንኦንኬዎ ቡሮነ ኤሳ ጌሌስ አበ ብሸ ሀርጌ ኤ ማዸኮን ቤ ገረ ዬሴ ሀርግየፈ ኤ ሎልቸ። ዬ ኤ ግሸ ዋሥ ኤንኤሰ ኡ ከክቸ። 5 የሀን ሀይዝ ተመ ሀዙፍ ቤረ ኣሎ ሀርዴሴ ሀርገሥን ኤ ዬቸ። 6 ዬሱሰን ዬ አሥ ዎይእየ ዬሴሰ ኤ ቤዶ። ለገ ቤረ ኣሎ ኤ ሀርዴሴሰ ኤርድ «ሎሌ ዎርጉወ ኔ ዎርጌ?» ህድ ኤ ኦይጮ። 7 ዬ ሀርገሥን «ላሦ፥ ዋሥ ኤንኤንየ ተምበ ኣንድ ዋሳ ጌልሴ አሤ ኬንጉወሶ። ጌሌሴ ሀገ ተ ህኔንየኮ ታሜ ቡሮ ፌደይ ጌሌ» ህድ ኤ ህዶ። 8 ዬሱሰን «ዴንድ ኤ ገረ ኔ ዎይእቾሸ ኤት ዸድ ኔ ቶኬነ ሀንት ሀንጉወ» ህድ ኤ ህዶ። 9 ዬ አዴን ዬንየዎ ኤ ሎሎ። ኤ ገረ ቤ ዎይእቾሸን ኤት ቤ ቶኬነ ሀንት ሀሜ ኤ ጌሎ። ዬ ዎንተን ሰንበተ ዎንቴ ኤ ማቅቸ። 10 ህኔ አይሁደ አፈነ ማግት ዬ ሎለ አዴ «ሀንዞይ ሰንበተኮ። ኤሰ ኔ ዎይእቾሸ ኔ እዱወንኬ ዎገይ ቱጭኮ ዬሴ» ህድ ኡ ህዶ። 11 ዬ አዴን «ሀ ተምበ ሎሉሰሱኮ ‹ዴንድ ኤ ገረ ኔ ዎይእቾሸ ኤት ዸድ ኔ ቶኬነ ሀንት ሀንጉወ!› ዬይድ ህደ» ህድ ኤ ህዶ። 12 ኡስን «ዬይድ ኔምበ ህደስ ኦኔነ?» ህድ ኡ ኦይጮ። 13 ዬ ሎለ አዴን ዬሱሰይ አሥ ግዳከ ጌሌቾ ግሸ ቤምበ ሎሉሰስ ኦኔ ኤ ማቅቾንኬ ኤሬይ ኤሰ ኢሾ። 14 ዬይድ ኤ ማዾ ጌዴ ዬሱሰይ ዎንቶ ሀይለ ዘወ ቄይሽ ግዳ ዬ አድየረ ሙት «ሀቴሴመ ሎልኮ ኔ ዬሴ። ሀ ኤሱሜ ገርዴሴ ዤቴይ ኔ ገረ ዮኔሱሜ ሀንዞወፈ ሴኬ ጩቦ ሀንቶፉነ!» ህድ ኤ ህዶ። 15 ዬ አዴን ቤምበ ሎሉሰስ ዬሱሰ ማቄሰ ኤርድ ሀንድ አይሁደሥት አፈነ ማግቱኮ ኤ ኦቶ። 16 ኡስን ዬሱሰይ ዬ ኤሱኬ ሰንበተ ዎንቴ አሥተ ኤ ሎሉስቾ ግሸ ኤሰ ኡ መዹንሥቸ። 17 ዬሱሰን «ኑወዴይ ኡድ ዎገኮ ሀቴ ኣሎ ሀንተ ኤ ሀንቴ፥ ተንን ሀንተኮ ሀንቴ» ህድ ኤ መቶ። 18 ዬ ኤሱነ አይሁደሥት ዬሱሰይ ሰንበተ ዎንቴ ዎገይ «ሀንቶፍተ» ህድ ቱጬቾሸ ኤ ሀንቶሱነዎ ኤ ማዾባኔ ዎንቶ ኑወዴ ህድ ህዬነ ቤምበ ዎንቶ መኮ ኣንድ ኤ መቶሱነ ምንስ ኤሰ ዎዼሴ ኡ ዎርግቸ። 19 ዬሱሰን «ህኑሴ ተ ኦሄስ ፌቶ ኣዴኮ። አዴይ ሀንቱሱኔ ቤ ቤዶሱሜ ፌደ ዬሌይ ቤሴ ቤ አዴቶነ ኤ ሀንቴስ ብዝን ባሶ። አዴይ ሀንቶሰኮ ዬሌን ዬይድዎ ሀንቴ። 20 አዴይ ዬሌ ኤሀኮ ኤ ኤሄ። ቤ ሀንቴሰን ኡድኮ ቤ ዬሌ ኤ ቤይሴ። ህ ምጮሮንኬ ሀ ኤሱሜ ገርዴሴ ሀንተኮ ሀንት ኤ ቤይሴ። 21 አዴይ ሀይዸስተ ዴንስ ዬሶ ኡሱሴ ኤ እንጌንኬ ዬይድዎ ዬሌን ኤሱሴ እንጌሴ ቤ ዎርጌ አሡሴ ዬሶኮ ኤ እንጌ። 22-23 አሥት አዴ ቤ ኩሤንኬ ዬሌን ኡ ኩሦሮሰ አዴይ ኡድየዴ ገረ ኤ ያኦሮንኬ አዴቶ ዬሌሴ ኤ እንዴሴሰ ባከ አዴይ ብዝ ገረን ያኡወሶ። ዬሌ ኩሡወስ ዬ ዬሌ አንሰ አዴን ኩሡወሶ። 24 ህኑሴ ተ ኦሄስ ፌቶ ኣዴኮ። ተ ከቶ ሲድ ተምበ አንሰሴ ኣዴሤስ ኮሎ መክነ ዬሶኮ ኤ ኬንጌ። ዬ ኤስ ሀይቦወፈ ዬሶወ ኤ ገርዶሰ ባከ ኤ ገረ ያኡቱወሶ። 25 ህኑሴ ተ ኦሄስ ፌቶ ኣዴኮ። ሀይዸስት ዎንቶ ዬሌ ከቶ ኡ ሲኔ ዎገኮ ዮኔሰ። ዬ ዎገን ሀይ ኤልኮ ዬሴ። ሲኔስት ቤ ኡድነ ዬሶወከኮ ኡ ገሬ። 26 ዬይድን ማቄሴ ኤ ደንደኤስ አዴይ ዬሶሴ ቱልቶ ማቄንኬ ዬይድዎ ዬሌን ዬሶ ቱልቶ ማቆሮንኬ መትኮ ኤ ዬሴ። 27 ዬሌይ አሥ ዬሌ ህድ ህዩተሴ ኤ ማቄ ግሸ ያአ ኤ ያኦሮሰ አዴቶ ኤሱሴ አዴይ እንድኮ ኤ ዬሴ። 28 ዬ ኤሱነ ምጮፍተ። ቦሳከ ዬሴስት ኡድ ዎንቶ ዬሌ ከቶ ኡ ሲኔ ዎገኮ ዮኔሰ። 29 ሞዼ ሀንተስት ሀይቦወፈ ዴንድኮ ዬሶ ዴጌስ ኡ ዬሴ። ኢተ ሀንተስት ሀይቦወፈ ኡ ዴንዴ፥ ኡ ገረ ኤ ያኡቴ። 30 ተን ታሴ ተ አዴቶነ አበን ሀንቴሴ ደንደኡወሶ። ማቄ ባከ አዴኮፈ ተ ሲዶንኬኮ ተ ያኤ። ተምበ አንሰስ መሦ አልሴሴ ተ ዎርጌሰ ባከ ተ መሦ አልሴሴ ተ ዎርጉወ ግሸ ተ ያኤ ያአይ ግዞኮ። 31 ተን ታሴ ተ ቅኖሴ ዜርደኮ ተ ዜርዶሰ ‹ኣዴኮ› ህድ ኤኬስ ባሶ። 32 ማቄ ባከ ተ ግሸ ዜሬሰኮ ፌደይ ዬሰ። ኤስ ተ ግሸ ዜሬስ ኣዴ ኤ ማቄንኬ ተን ኤረኮ ኤሬ። 33 ህኑን ዮሀንሴኮኮ አሤ ህ ዎሴቸ። ዮሀንሴን ኣዴ ግሸ ዜርድኮ ኤ ዬቸ። 34 ሀ ኤሰ ተ ህዶስ ህ ሎሎሮሰ ባከ ታሴ አሥ ዜሮሮሰ ኤ ዎርጉስኔ ማቁወሶ። 35 ዮሀንሴይ ሀዴ ኤጽየ ዬስኔ ፎኤ እንጌ ፈቄኬ ዬሴሰኮ። ህኑን ኦዼ ዎገሴ ኤ ፎኤነ መጌሱኮ ህ ኤቶ። 36 ተንመይ ዮሀንሴይ ኦኔ ተ ማቄንኬ ዜርዶሱሜ ገርስ ታሴ ዜሬሰ ኬመኮ ተ ኬንጌ። ተ አልሶሮንኬ አዴይ ታሴ እንዶ ሀንተ ሀንትየ ተ ዬሴሰኮ አዴይ ተምበ አንሶንኬ ቤይሴሰ። 37 ተምበ አንሰ አዴይ ተ ግሸ ኦትኮ ኤ ዬሴ። ብዝየን ኤ ከቶ ህ ወሼነ ሲዶበይተኮ፥ ኤ ኣፉሸን ቤዶበይተኮ። 38 አዴይ አንሶሰ ህ ኣዴሡወ ግሸ ኤ ከቶይ ህ ሙጹሮወ ኡቱወሶ። 39 ህኑን ሀይለ ፍሸሮወከ ኮሎ መክነ ዬሶይ ዬሴሰ ህኑምበ ኤ ብሽኔኮ ዴጌሤሴ ዎርግየ ህ ዬሴ። ሀይለ ፍሸሮመይ ተ ግሸ ኦሄሰኮ። 40 ማቁወዬ ባከ ህኑን ዬሶ ዴጌሤሴ ታኮ ዮዌ ዎርጉወይተኮ። 41 ተን ኩሠ አሡኮፈ ዎርጉወሶ። 42 ዎንቶ ህ ኤሁወንኬ ህኑምበ ኤረኮ ተ ኤሬ። 43 ኑወዴ ሱንሡነ ተ ዮኔ ተምበ ኤቶበይተኮ። ፌደይ ቤሴ ቤ ሱንሡነ ዮደኮ ኤፈኮ ህ ኤኬ። 44 ዎለ ሴኬ ሀንኬ ህ ኩሤ፥ ብዝ ዎንቶ ገረፈ ቤንቴ ኩሠ ዎርጌ ህ እንጸዾ ጌዴ ወይድን ተምበ ኣዴሤሴ ህ ደንደኤ? 45 ተን አዴ ቡሮ ህኑምበ ሉኬንኬ ህኑሴ ብሾፌ! ህኑምበ ሉኬስ ብዝ ዬሰኮ ኤ ዬሴ። ኤስን ኤሰ ጎቤ ህ መሄ ሙሴኮ። 46 ሙሴይ ተ ግሸ ዲዜሴ ግሸ ኤሱሴ ‹ኣዴኮ› ህድ ህ ኤተኮ ታሴን ‹ኣዴኮ› ህድ ኤፈኮ ህ ኤፋኔ። 47 ኤ ዲዞሰ ‹ኣዴኮ› ህድ ኤፌ ህ ዼዶ ጌዴ ተ ኦቶሰ ወይስ ‹ኣዴኮ› ህድ ኤፌሴ ህ ደንደኣኔ?» ዬይድ ኤ ህዶ።
1 ዬ ኤ ጌዴ ዬሱሰይ ጽብርየዶሴ ህድ ህዩቴ ገልለ በገዴ ሴምፈ በዴ ኤ ፎቶ። 2 ለገ አሥት ሀርገሥተ ሎሉስ ኤ ሀንቶ ምጩሼ ሀንተ ቤ ቤዶ ግሸ ኤ ጌዴ ኡ ሀንዶ። 3 ኤስን በከ ገረ ኬስ ቤ ኤሩስቾሽታረ የሀ ኤ ኡቶ። 4 ዬንየን አይሁደ ገሮ መሰለይ ኡዽ ኤ ዬቸ። 5 ዬሱሰን ዬ ዎገ ለገ አሥት ቤኮ ዮኔሰ ኬደይድ ቤድ ፍልጶሴኮን «ሃንጽ አሤ ኡድ ኤሌ ከሠ አየፈው ኑ ዎሜ?» ህድ ኤ ኦይጮ። 6 ኤስን ፍልጶሴ ዬይድ ኦይጮሽ ኤ ኦሄሰ ስዬሜ ባከ ቤሴ ሀንቴሴ ቤ ህኔሰ ኤረኮ ኤ ኤርቸ። 7 ፍልጶሴን «ኡ ብዝ ብዝሴ ፌቶ ሜኦ ሜኦ ኤሉሴሴ ለገ ኩመ ሚዤነ (24) ዎንደኮን ኤሉወሶ» ህድ ኤ መቶ። 8 ኤ ኤሩስቾሽታፈ ብዝ ጴጽሮሴ ሱንደ ስሞኔሴ ኤስንዶ ነእ እንድራሴን 9 «እችች በቼ በንገ ቦራረ ለምእ ጉልጽየረ አይቴሴ ብዝ ዬሌኮ ሀየ ዬሰ። ህኔ ዋ ህሴቴወ ሀ ቦረይ ሃንጽ አሤ ኤሌሴ ኤ ደንደኤ?» ህድ ኤ ህዶ። 10 ዬሱሰን «አሥተ ኡቱሱወይቴ!» ህድ ኤ ህዶ። የሀን ሞዼ ሌዶይ ዬቾይኔ አሥትን ኡቶ። አሰንሥት ታፎን እችች ኩመ ኤሌሰኮ ኤ ማቅቸ። 11 ዬ ኤ ጌዴ ዬሱሰይ ቦረ ዴንስ ዎንቶ ገለት ዬ ኡቴቸ አሥቱሴ ኤ ተዶ። ዬይድዎ ጉልጼን ኤ ተዶ። (25) 12 አሥትን ቤ ኡድነ ቤ ዎርጌ መኮን ሙድ ኡ ምሾ። ዬሱሰይ ቤ ኤሩስቾሽቱኮ «አተ በሥ ላቀን አቱወንኬ ጵክሉወይቴ!» ህድ ኤ ህዶ። 13 ኡስን ጵክሎ። ዬ እችች በቼ በንገ ቦራፈ አሥት ሙሱኔ አተ በሤ ተመ ለምእ ኮፈ ኡ ኩንሶ። 14 አሥት ዬሱሰይ ሀንቶ ምጩሼ ሀንተ ቤ ቤዶንየ « ‹ሀ ሰሀ ገረ ኤ ዮኔ› ዬይድ ህዩትቸ ካየሥ ኣዴዎ ሀ ኤሰኮ» ዬይድ ኡ ህዶ። 15 ዬሱሰን አሥት ኤሰ ኦሰነ ካቴሤሴ ዎርዴሴሰ ቤ ኤርዶ ጌዴ ቤ ጎሼዎ ዸድ በከ ገረ አስ ኤ ኬሶ። 16 ሰሀይ ዸድ ቀሜሴ ህኔ ኤ ኤሩስቾሽት በገዴ ኑነ ዸድ ኡ ሀንዶ። 17 ዬሱሰይ ዮዶ ባኔ ሰሀይ ጬንዶ። ኤ ኤሩስቾሽት ዘጳ ጌል ዸድ ቅፍርነሆሜ ሀሜሴ ኡ ኣዾ። 18 አጌሥ ኢተነ በገዴ ገረ ዮኔ ዥረሆይ ዋሤ ሴኬ ሀንኬ ህሴ ኤ ጌሎ። 19 ኤ ኤሩስቾሽት እችቼ ኦኦይኔ እዙፍ ኪሎ ሜትሬ ኤሌሰ በገዴ ገረነ ሸርድ ኡ ሀንዴሱኔ ዬሱሰይ ዋሥ ገረነ ቶኬነ ሀንት ዮድ ዘጰ ኡዽ ኤ ዮሱኔ ቤድ ኡ ዠሾ። 20 ኤስን «ዠሾፍተ፥ ተምበኮ» ህድ ኤ ህዶ። 21 ኡስን መገነ «ኤሰ ዘጳ ኑ ኤፌሴ» ህድ ኡ ህዶ። ዘጰን እዝየዎ ኡ ሀንግቾ ጎዶወ ኤሎ። 22 በገዴ ሴምፈ አቴቸ አሥት ሰሀይ ዎንትኔ ብዝ ዘጰዎይ በገዴ ገረ ዬሱኔ ኡ ቤዶ። ፌዴ ዘጰነ ኤ ኤሩስቾሽት ዬሱሰይ ኤሳከ ባሰ ቤሴዎ ኡ ፎቴቾንኬ ኡ ኤርቸ። 23 ዬንየዎ ፌዴ ዘጵት ጽብርየዶስየፈ ዬሱሰይ ዎንቶ ገለት ለገ አሥተ ቦረ ሙሴቾ ጎዶሴ ኤ ደኣ ኡ ዮዶ። 24 አቴቸ አሥትን ዬሱሰን ማቄ ኤ ኤሩስቾሽት ቤረ ባሰ ቤ ኤርዶ ዎገ ዬ ዘጵታከ ጌል ዬሱሰ ዎርጌ ቅፍርነሆሜ ከተማ ዸድ ኡ ጌዴ ኡ ፎቶ። 25 በገዴ ሴምፈ በዴ ፎት ዬሱሰ ቤ ዴጌሶ ጌዴ ኡስን «ላሦ! አይዴነ ሀየ ኔ ዮዶ?» ህድ ኡ ኦይጮ። 26 ዬሱሰን «ህኑሴ ተ ኦሄስ ፌቶ ኣዴኮ። ተምበ ህ ዎርጌስ ቦረ ሙድ ህ ምሾ ግሸ ባከ ምጩሼ ሀንተ ህ ቤዶ ግሸ ማቁወሶ። 27 ባኔ ከሠሴ ሀንቶፍተ። ኮሎ መክነ ዬሶ እንጌ ከሠሴ ሀንቱወይቴ። ዬ ኤሰን አሥ ዬሌ ህድ ህዩተስ ህኑሴ እንገኮ ኤ እንጌ። አዴ ማቄ ዎንቶይ አሥ ዬሌ ህድ ህዩቴሱነ ቤ መሦ ቤ ሀንቴንኬ አዱስኮ ኤ ዬሴ» ህድ ኤ ህዶ። 28 አሥትን «ህኔ ዎንቶ ሀንተ ሀንቴሴ ዋ ህዬ ኑ ኤ ዎርጉሴ?» ዬይድ ኡ ኦይጮ። 29 ዬሱሰን «ዎንቶይ ህ ሀንቶሮንኬ ዎርጌስ ዎንቶይ አንሶሰ ህ ኣዴሦሮሰኮ» ዬይድ ኤ መቶ። 30 ኡስን «ህኔ ኑን ቤድ ኣዴሦሮንኬ አበ ምጩሼ ሀንተነ ኔ መሄ? አም ኔ ሀንቴ? 31 ‹ኡ ምዮሮሰ አፋፈ ቦረ ኡሱሴ ኤ እንዶ› ዬይድ ፍሸሮወ ኤ ዲዙቶንኬ ኦሎ ኑወድየጽት ሰሀ ሜላ ዬስኔ መነ ህድ ህዩቴ ቦረ ኡ ሙዶ» ዬይድ ኡ ህዶ። 32 ዬንየን ዬሱሰይ «ህኑሴ ተ ኦሄስ ፌቶ ኣዴኮ። አፋፈ ሆዸ ቦረ ህኑሴ እንደስ ሙሴ ማቁወሶ ኑወዴኮ። ኤስን ህኑሴ ኣዴ ቦረ ህድ ህዩቴ ቦረ አፋፈ እንገኮ ኤ እንጌ። 33 ዎንቶኮፈ እንጉተ ኣዴ ቦረይ አፋፈ ሆዽ ሀ ሰሀ ገረ ዬሴ አሥቱሴ ዬሶ እንጌሰኮ» ህድ ኤ ህዶ። 34 ዬ ኤ ግሸ አሥት «ላሦ! ዬ ኤሱኬ ዬሴ ቦረ ኡድ ዎገ ኑሴ እንጉወ» ህድ ኡ ህዶ። 35 ዬሱሰን «ዬሶ እንጌ ቦረይ ተምበኮ። ታኮ ዮኔስ ኮሎነ ናዩቱወሶ፥ ተምበ ኣዴሤስ ኮሎነ ሰዙወሶ። 36 ህኑሴ ተ ኦቶንኬ ህኑንመይ ተምበ ቤድ ታ ኣዴሶበይተኮ። 37 አዴይ ታሴ እንዶስ ታኮ ዮተኮ ኤ ዮኔ፥ ታኮ ዮኔሰ ተን ዉዴ ጎዱወሶ። 38 ዬ ኤስን ኤሱሜ አፋፈ ተ ሆዾስ ተምበ አንሰስ መሦ ሀንቴሴ ባከ ተ መሦ ሀንቴሴ ማቁወሶ። 39 ተምበ አንሰሱሴ ኤ መሦይ ታሴ ኤ እንዶሳፈ ኡድ ብዝን በዮሮሱሜ ከት ኣልጭረ ዎንቴ ሀይቦወፈ ተ ዴንሦሮሰኮ። 40 ኑወዴ መሦይ ዬሌ ቤድ ኤሰ ኣዴሤስ ኡድ ኮሎ መክነ ዬሶ ኤ ዴጌሦሮሰኮ። ተንን ኣልጭረ ዎንቴ ሀይቦወፈ ዬ ኤሰ ዴንሠኮ ተ ዴንሤ» ህድ ኤ ህዶ። 41 አይሁደሥትን «አፋፈ ሆዸ ቦረይ ተምበኮ» ህድ ኤ ህዶ ግሸ ኡምቡ ኡምቡ ህዬ ኡ አይቶ። 42 አስዎ «ሀ ኤስ ኤሰዴ ኤስንዶ ኑ ኤሬሰ ማቁወዬ? ሀ ዮሴፌ ነእ ዬሱሰ ማቁወዬ? ህኔ ወይድዉ ‹አፋፈኮ ተ ሆዾ› ህድ ኤ ህኔ?» ህድ ኡ ህዶ። 43 ዬሱሰን ኡሱሴ መህስኔ «ሴኬ ሀንኬ ዎልኮ ኡምቡ ኡምቡ ህዶፍተ። 44 ተምበ አንሰ አዴይ ታኮ ጎሾሸ ባከ ታኮ ዮዌሴ ኦኔን ደንደኡወሶ። ታኮ ዮኔሰ ተን ኣልጭረ ዎንቴኮ ሀይቦወፈ ኤሰ ተ ዴንሤ። 45 ካየሥት ፍሸሮወከ ‹አሥት ኡድ ዎንቶኮፈ ኤርዴሴሰኮ ኡ ማቄ› ዬይድኮ ኤ ዲዙቴሴ። ዬ ኤ ግሸ አዴኮፈ ሲድ ኤርዴሴስት ኡድነኮ ታኮ ኡ ዮኔ። 46 ዬይድ ተ ህሱኔ ‹አዴ ቤዴሴ አሡኮ ዬሰ› ህድ ህዬ ማቁወሶ። አዴ ቤዴሴስ ኤ ደኣፈ ዮደሴዎኮ። 47 ህኑሴ ተ ኦሄስ ፌቶ ኣዴኮ። ታ ኣዴሤስ ኮሎ መክነ ዬሶኮ ኤ ኬንጌ። 48 ተን ዬሶ እንጌ ቦረኮ። 49 ህነድየጽት ኦሎ ሰሀ ሜለ መነ ህድ ህዩቴ ቦረ ኡ ሙዶ። ማቄ ባከ ኡ ሀይዾ። 50 አፋፈ ሆዸ ቦረይ አሥ ሙድ ሀይኡወንኬ መሄ ቦረኮ። 51 አፋፈ ሆዸ ኤንአ ቦረይ ተምበኮ። ሀ ቦራፈ ሙኔስ ኦኔን ኮሎ መክነኮ ኤ ዬሴ። ሀ ሰሀ ገረ ዬሴ አሥ ዬሶ ኡ ኬሞሮንኬ ተ እንጌ ቦረይ ተ አቾኮ» ዬይድ ኤ ህዶ። 52 ዬንየከን አይሁደሥት «ሀ አሥ ኤ አቾ ኑ ምዮሮንኬ ዋክስን መሄሴ ኤ ደንደኤ?» ዬይድ ሴኬ ሀንኬ ዎልኮ ኡ ዜርቸ። 53 ዬ ኤ ግሸ ዬሱሰይ ኡሱሴ «ህኑሴ ተ ኦሄስ ፌቶ ኣዴኮ። አሥ ዬሌ ህድ ህዩቴስ አቾ ህ ሙዶ ባሳረ ኤ ሱሤ ህ ኡሾ ባሳረ ኮሎ መክነ ዬሶይ ህኑሴ ባሶ። 54-55 ተ አቾይ ኣዴ ከሠይድ ህዩቴ ከሠኮ፥ ተ ሱሥን ኣዴ ኡሼይድ ህዩቴ ኡሹኮ። ዬ ኤ ግሸ ተ አቾ ሙኔሳረ ተ ሱሤ ኡሼሻረይ ቤ ኡድነ ኮሎ መክነኮ ኤ ዬሴ። ተንን ኣልጭረ ዎንቴ ሀይቦወፈ ኤሰ ዴንሠኮ ተ ዴንሤ። 56 ተ አቾ ሙኔስ ተ ሱሤ ኡሼሽ ኤስን ታረ ብዞ ማዽኮ ኤ ዬሴ፥ ተንን ኤሳረ ብዞ ማዽኮ ዬሴ ህድኮ። 57 ኤንአ ማቄ አዴይ ተምበ አንሶንክየረ ተንን ኤሱነ ኤንአ ማዾንክየረ ዬይድዎ ተምበ ሙኔስ ኦኔን ታነ ኤንአኮ ኤ ማቄ። 58 ዮነሴ፥ አፋፈ ሆዸ ቦረይ ዬ ኤሰኮ። ኤስን ህነድየጽት ሙዶንኬ ዬሴሰ ማቁወሶ። ዬ ቦረ ሙደስት ሀይዽኮ ኡ ዬሴ። ሀ ቦረ ሙኔስመይ ኮሎ መክነኮ ኡ ዬሴ» ዬይድ ኤ ህዶ። 59 ዬሱሰይ ሀ ኤሰ ኤ ዜርዶስ ቅፍርነሆሜ ከተማከ አይሁደ ጵክሎ ዘዋ ቤ ኤሩስቾ ዎገኮ። 60 ዬሱሳረ ሀንግቸሽታፈ ለገይ ዬይድ ኤ ዜርዶሰ ቤ ሲዶ ዎገ «ሀ ዜሬይ ዴጸኮ ኤ ዴጼ፥ ኦን ኤፌሴ ደንደኤሰ?» ዬይድ ኡ ህዶ። 61 ዬሱሰን ኡምቡ ኡምቡ ኡይኔሰ ቤሴ ኤርድ ኡሱሴ «ሀ ዜሬይ ህኑምበ ዹሙሴሱወ? 62 አሥ ዬሌ ህድ ህዩቴስ ቤ ዬቾ ጎዶ ማዽ ዸድ ኤ ኬሱሱኔ ቤተአይኮ ዋ ህዬሴ ሂኔ? 63 ዬሶ እንጌስ ዎንቶ አያነኮ። አሥ ኦሰመይ አበን ጎኤሴ ደንደኡወሶ። ተን ህኑሴ ዜርዶ ከቶይ አያነ እንጌሰኮ፥ ዬሶን እንጌሰኮ። 64 ማቁወዬ ባከ ህ ግዳከ ብዝ ብዝ ኣዴሡወ ጌርተኮ ዬሰ» ዬይድ ኤ ህዶ። ዬሱሰይ ዬ ኤሰ ዜሬሴ ኤ ደንደዾስ ቡሮወፈ አይት ኣዴሡወስት ኦኔ ኡ ማቄንክየረ ቤምበ ገርስ እንጌስ ኦኔ ኤ ማቄንክየረ ቤ ኤርቾ ግሸኮ። 65 ሴኬን ዬሱሰይ « ‹ኑወዴይ «ዮወ!» ህድ ህዶሰ ባከ ታኮ ዮኔስ ባሶ› ህድ ህኑኮ ተ ኦቶስ ህ ግዳከ ኣዴሡወስት ዬሴ ግሸኮ» ዬይድ ኤ ህዶ። 66 ዬ ኤሱነ ኤሳረ ሀንግቸሽታፈ ለገይ ዸድ ቤ ጌዴ ኡ ማዾ። ዬ ዎጋፈ አይት ዬሱሳረ ሀሜ ኡ ዸዶ። 67 ህኔ ዬሱሰይ ቤ ኤሩስቾ ተመ ለምኡሴ «ህኑንን ዸድ ሀሜሱወ ህ ዎርጌ?» ዬይድ ኤ ኦይጮ። 68 ዬንየከን ጴጽሮሴ ሱንደ ስሞኔይ «ላሦ፥ ኦኔኮን ኑ ሀሜ? ኔን ኮሎ መክነ ዬሶ እንጌ ከቶኮ ኔ ዜሬ። 69 ኑንመይ ኔምበ ዎንቶ ሀይለ ኔ ማቄንኬ ‹ኣዴኮ› ህድ ኤትኮ ኑ ዬሴ፥ ኤርድኮ ኑ ዬሴ» ዬይድ ኤ ህዶ። 70 ዬሱሰን «ሀ ህኑምበ ተመ ለምኤ ጸርደስ ታ ማቁወዬ? ዬይ፥ ህኑካፈ ብዝ ሁምበዬኮ» ዬይድ ኤ ህዶ። 71 ዬይድን ኤ ዜርዶስ አስቆሮተሤ ማቄ ስሞኔ ነእ ይሁደ ግሸኮ። ዬ ይሁደይ ተመ ለምኡካፈ ብዞ ማዸኮን ዬሱሰ ቡሮ ገረ ገርስ እንጌሴ ህኔሰኮ።
1 ዬንጽ ኡድ ማዾ ጌዴ ዬሱሰ አይሁደ አፈነ ማግት ዎዼሴ ዎርዶ ግሸ ይሁደ ዉዴ ሴኬ ሀንኬ ሀንቴ እንጸዽ ገልለ ግደ ኤ ሀንትቸ። 2 ዬንየን አይሁደሥት ኩሥቾ አሸ መሰለይ ኡዾ። 3 ዬ ኤ ግሸ ዬሱሰይንዶ ነአጼይ ኤሱኮ «ኔረ ዬሴስት ኔ ሀንቴ ሀንተ ቤዮሮንኬ ሀየፈ ዴንድ ይሁደ ዉዴ ሀንጉወ! 4 ትዽስ ቤንቴሴ ዎርጌ አሥ ኣችያነ ቤ ሀንቴ ሀንተ ሀንቱወሶ። ኔን ሃንጽ አበኮ ሀንቴሰ ማቆአይኮ ኔምበ ኡድ አሡሴ አዱሱወ!» ዬይድ ኡ ህዶ። 5 ዬይድ ህዬሴን ኡ ደንደዾስ ፌቶ ኤስንዶ ነአጽታረይድ ኤሰ ኣዴሶ በዴቾ ግሸኮ። 6 ዬሱሰን «ተ ዎገይ ኤሎ በድኮ ኤ ዬሴ። ህ ዎገመይ ኡድ ዎገ ብሼሼሸኮ። 7 ሀ ሰሀ አሥት ህኑምበ እንጸኤሴ ደንደኡወሶ። ኡ ሀንተይ ኢተ ማቄሰ አዳ ተ ኬሴ ግሸ ተምበመ እንጸአኮ ኡ እንጸኤ። 8 ህኑን መሰላከ ዸድ ሀንጉወይቴ፥ ተንመይ ተ ዎገይ ኤሎ በድ ዬሴ ግሸ መሰላከ ሀንጉወሶ» 9 ዬይድ ህድ ኤስ ገልለ አቶ። 10 ዬሱሰይንዶ ነአጼይ አሸ መሰላ ሀንዴሱኔ ኤስ ትዽየነ ማዾ በድ ኤ ዬሱኔ ኣችያነ ዬ መሰላከ ኤ ሀንዶ። 11 አይሁደ አፈነ ማግት መሰላከ «ዬ አሥ አይ ኤ ዬሴ?» ህድ ዬሱሰ ዎርግየ ኡ ዬቸ። 12 የሀ ዬቸ አሥ ለገይ ኤ ግሸ ትዽየነ ማቁወሰ ሴኬ ሀንኬ ዎልኮ ጉጉንእየ ኡ ዬቸ። ብዝ ብዝት «ኤስ ሞዼኮ» ዬይድ ህየ ዬሱኔ ፌድት «ኦኦ፥ አሡኮ ኤ ሀሉሤ» ዬይድ ኡ ህቸ። 13 ማቁወዬ ባከ አይሁደ አፈነ ማግተ ቤ ዠሾሹነ ኤ ግሸ ኦኔን ትዽስ ዜሩወድኮ ዬቸ። 14 መሰለ ኩሥስኔ ኤ ግደ ዮድ አሥ ኤሉሱኔ ዬሱሰይ ዎንቶ ሀይለ ዘወ ሀንድ ኤሩሴ ኤ አይቶ። 15 አይሁደ አፈነ ማግት «ኤሰ ኤሩሰይ ባኔ አየፈነ ሀ አሥ ሀ ኤ ጌዴ ኤረ ኤ ዴጌሶ?» ዬይድ ኡ ምጮ። 16 ዬ ኤ ግሸ ዬሱሰይ «ተን ኤሩሴ ኤረይ ተምበ አንሰ አዴ ገረፈ ቤንተሱኮ ባከ ተ ገረፈ ማቁወሶ። 17 ተምበ አንሰስ መሦ ሀንቴሴ ዎርጌስ ዬሰአይኮ ሀ ኤረይ ዎንቶኮፈ ቤንተሴ ኦኦይኔ ታኮፈ ተ ዜርዶሰ ኤ ማቄንኬ ኤረኮ ኤ ኤሬ። 18 ቤሴ ቤ ቅኖሴ ዜሬስ ቤ ቅኖ ኩሠኮ ኤ ዎርጌ። አንሰስ ኩሠ ዎርጌስመይ ኣደሡኮ ዛዴን ኬንጉወሶ። 19 ሙሴይ ህኑሴ ዎገ ገዶ በድየ ኤ ዬቸ? ማቁወዬ ባከ ህ ግዳከ ኦኔን ዎገ ከኬስ ባሶ። ህኑን አሜ ተምበ ዎዼሴ ህ ዎርጌ?» ዬይድ ኤ ህዶ። 20 አሥትን «ጾዙኮ ኔ ገረ ዬሰ። ኦን ንየ ዎዼሴ ዎርጌሰ?» ዬይድ ኡ ህዶ። 21 ዬሱሰን «ተን ብዝ ሀንተኮ ሀንቶ ህኑን ኡድ ዬ ብዝ ሀንተነኮ ሁለነ ህ ምጬ? 22 ሙሴይ ህኑሴ ገደ ኡቴ ዎገ ዲዝኮ ኤ ገዴሴ። ዬ ዎገን ኤ ቤንቶስ ሙሴሜ ቡሮ ዬቸ ህነድየጽ ገረፈ ባከ ሙሴ ገረፈ ማቁወሶ። ህኔ ሰንበተ ዎንቴኮ ገደ ህ ኡቱሴ። 23 ዬቦ፥ ሙሴ ዎገ ከፌሜ ሰንበተ ዎንቴ ገደ ህ ኡቱሶ ጌዴ ህኔ ተን ሰንበተ ዎንቴ አሤ ኤ ቶክየፈ ኤ ቅኖ መኮ ተ ሎሉሶሱነ አሜ ህ ሁሌ? 24 ህ ያኤሰ ኤሳ ጌል ቤድ ግዞ ያኡወይቴ ባከ አፋፈ ያዾፍተ!» ዬይድ ኤ ህዶ። 25 ዬሩሰሌሜ ከተማፈ ብዝ ብዝ አሥት «ሀ አሤ ማቁወዬ ዎዼሴ ኡ ዎርግቾሽ? 26 ሀይ፥ ኤስ አዱስኮ ኤሩስየ ዬሴ፥ ኡስን አበኮይድ ኤ ገረ ህዩቶ ባሶ። ሀ አሥ ኣዴዎ ሜስሄ ማቄንኬ አፈነ ማግት ኤርድየ ኡ ህኔን? 27 ፌቶ ሀ አሥ አን በዴ አሤ ኤ ማቄንኬ ኤረኮ ኑ ኤሬ። ሜስሄይ ዮኔንየከ አን በዴፈ ኤ ዮዶንኬ ኤሬሴ ደንደኤስ ባሶ» ዬይድ ኡ ህዶ። 28 ዬ ዜርየፈ ዴንደሱነ ዬሱሰይ ዎንቶ ሀይለ ዘወ ከራ ኤሩስስኔ ቤ ከቶ ኬደይስ «ታ ኤረኮ ህ ኤሬ። አየፈ ተ ዮዶሰ ኤረኮ ህ ኤሬ። ህ ኤርደኮን ተን ታሴ ተ አዴቶነ ዮዶ ባሶ። ተምበ አንሰስ ቤሴ ኣደሡኮ። ኤሰ ኤሩወይተኮ። 29 ተንመይ ኤሱኮፈ ተ ዮዶ ግሻረ ኤስ ተምበ አንሶ ግሻረ ኤሰ ኤረኮ ተ ኤሬ» ዬይድ ኤ ህዶ። 30 ዬ ዎጋከ ኤሰ አይኬሴ ዎርድ ኡ ዬቸ። ዎርጉቱወዬ ባከ ኤ ዎገይ ኤሎ በዴቾ ግሸ ኦኔን ኤሰ አይኬሴ ደንደዾ ባሶ። 31 አሥታፈ ለገይ ኤሰ ኣዴሶ። ኡስን «ሜስሄይ ቤ ዮኔ ዎጋከ ሀ አሥ ሀንቶሱሜ ገሬ ምጩሼ ሀንተ ሀንታ ኤ ሀንቴ?» ዬይድ ኡ ህዶ። 32 አሥት ዬሱሰ ግሸ ዬይድ ጉጉንኡሱኔ ፈረሰሥት ኡ ሲዶ። ዬ ኤ ግሸ ከህንቱሴ አፈነ ማግታረ ፈረሰሥታረይ ዬሱሰ አይኬሴ ዎርድ ቤ ዬብተ ኤሱኮ ኡ አንሶ። 33 ዬሱሰን ዬንየከ «ህኑናረ ዎልኮ ኦዼ ዎገኮ ተ ዴጬ። ዬ ኤ ጌዴ ተምበ አንሰሱኮኮ ተ ሀንጌ። 34 ተምበ ዎርጎኮ ህ ዎርጌ፥ ዎርጉወይቴ ባከ ዴጌሡወይተኮ። ተን ዬሴ ጎዶ ሀሜሴ ደንደኡወይተኮ» ዬይድ ኤ ህዶ። 35 ህኔ አይሁደ አፈነ ማግት ዎልኮ ሴኬ ሀንኬ «ኑን ኤሰ ዴጌሤሱሜ ሀ አሥ አይን ሀሜሴ ኤ ህኔ? ሀኖ አይሁደ ማቁወስት ግዳከ አይሁደሥት ቡዱት ዬሴ ጎዶ ሀንድየ አይሁደ ማቁወስተ ኤሩሴሴ ኤ ህኔን? 36 ‹ተምበ ህ ዎርጌ ዎርጉወይቴ ባከ ዴጌሡወይተኮ። ተን ዬሴ ጎዶ ሀሜሴ ደንደኡወይተኮ› ዬይድ ኤ ህሱኔ አበይድ ህዮነ?» ዬይድ ኡ ህዶ። 37 ዎንተይ መሰለሴ ኣልጭረ ዎንቴ ማቅስኔ ኬደይዴሴ ዎንቴ ኤ ማቅቸ። ዬሱሰን አሥት ግዳ ዴንድ ኤዽ ቤ ከቶ ኬደይስ «ዋሤ ሰዘይ ዬሰአይኮ ታኮ ዮድ ኡሹወዬ! 38 ተምበ ኣዴሤሱሴ ሀይለ ፍሸሮይ ኦሄንኬ ዬሶ ዋሥ ቱልቶይ ኤ ገዋፈኮ ኤ ፎልኤ» ዬይድ ኤ ህዶ። 39 ዬ ኤሰን ኤ ዜርዶስ ኤሰ ኣዴሤስ ኤኬ አያነ ጌሽ ግሸኮ ኤ ማቅቸ። ዬንየ ዬሱሰይ ቤ ዎንቱንቴ ኩሠ ፉላከ አርቶ በድ ዬቾ ግሸ አያነ ጌሽ ሆዾ በድኮ ኤ ዬቸ። 40 አሥቱካፈ ብዝ ብዝት ዬ ኤሰ ቤ ሲዶንየ « ‹ዮተኮ ኤ ዮኔ› ህድ ህዩትቸ ካየሥ ሀ ኤሰኮ» ህድ ኡ ህዶ። 41 ፌድትን «ሀ ኤስ ሜስሄኮ» ህድ ኡ ህዶ። ፌድትን አስ «ሜስሄይ ዮኔስ ህኔ ገልላፈ? 42 ሜስሄይ ደውቴ ፍረ ፊጻፈ ኤ ዬሉቴንክየረ ደውቴ ከተማፈ ቤቴሌምየፈ ኤ ዮኔንክየረ ሀይለ ፍሸሮወከ ዲዙት በዬ?» ዬይድ ኡ ህዶ። 43 ሀ ኤ ግሸ ዬሱሰ ገረነ አሥት ዎለ ኡ ሸቶ። 44 ብዝ ብዝት አይኬሴ ዎርድኮ ኡ ዬቸ። ማቁወዬ ባከ ኦኔን ኤሰ አይቶ ባሶ። 45 ዬ ኤ ጌዴ ዬብት ከህንቱሴ አፈነ ማግቱኮወረ ፈረሰሥቱኮወረ ማዽ ኡ ዮዶ። ዎሴቸሽትን «አሜ ዬሱሰ አይት ኦዌ ህ ዼዶ?» ህድ ኡ ኦይጮ። 46 ዬብትን «ኤሱኬዎ ዜሬ አሥ ሀቴ ኣሎ ሀ ሰሀ ገረ ቤንት ኤሩወሶ» ህድ ኡ ህዶ። 47 ፈረሰሥትን «ህኑምበን አስ ሀሉስ? 48 ዬቦ፥ አፈነ ማግታፈ ኦኦይኔ ፈረሰሥታፈ ኤሰ ኣዴሰሴ ቤድየ ህ ዬሴ? 49 ሀ ኤ ጌዴ ሀምየ ዬሴ አሥት ሙሴ ዎገ ግሸ አም ኡ ኤሬ? ኡ ብሸ አሥት ኣጩቴሴስተኮ» ዬይድ ኡ ህዶ። 50 ቡሮ ዬሱሰኮ ሀንዴቸ ኡሳፈ ብዞ ማቄ ንቆዶሞሴይ 51 «ን ዎጋከ ብዝ አሥ ቤ ሉፉቶ ሉፎ ቡሩስ ሲዶ ባንየረ አበ ኤ ሀንቶስ ኤሩቶ ባንየረ ኤ ገረ ኤ ያኡቶሮንኬ ዬሳ ኤ ዬሴ?» ህድ ኤ ህዶ። 52 ኡስን «ኔንን ኤሱኬ ገልላፋን? ካየሥ ገልላፈ ዴንዱወንኬ ሀይለ ፍሸሮዋከ ነዽ ዎርድ ቤድ ኤሩወ!» ዬይድ ኡ ህዶ። 53 ዬንየን ቤ ብዝ ብዝነ ቤ ዘወ ዘወ ዸድ ኡ ቡዱቶ።
1 ዬ ኤ ጌዴ ዬሱሰይ ዘይቴ በከ ሀንዶ። 2 ጉተ ኬትየ ሾኤ አስ ዎንቶ ሀይለ ዘዋ ኤ ዮዶ። አሥትን ኡድነ ኤሱኮ ኡ ዮድኔ ኡትስኔ ኤሩሴ ኤ አይቶ። 3 ሙሴ ዎገ ኤሩሴስታረ ፈረሰሥታረይ ብዝ እንዶ እ ለጌትቾይኔ አይት ኦድ ለገ አሥት ቡሮ ኡ ኤሶ። 4 ኡስን «ላሦ! ሀ እንዶይ ለጌቶወፈኮ እ አይኩቴሴ። 5 ሀ ኤሰ ብሼሼ እንዶይ ሹቹነ እጩት እ ሀይኦሮንኬ ሙሴ ዎጋከ ኑሴ ኦሁትኮ ኤ ዬሴ። ኔንች? ሀ እሱሴ አም ኔ ኦሄ?» ህድ ኡ ኦይጮ። 6 ዬይድ ኤሱሜ ኡ ህዶስ ኤ ገረፈ ዜሬ ዴጌስ ኤሱነ ኤሰ ሉፌሴ ኦጌ ዎርግየ ቤ ዬቾ ግሸኮ። ዬሱሰን ዬኬ ሰሃ ኡለይድ ቤ ግልአነ ሰሀ ገረ ዲዜ ኤ አይቶ። 7 መት መት ኤሰ ኦይጬ ኡ ጌሎ ጌዴ ዎኬ ኬደ ህድ «ሀ ህ ግዳፈ ጩቦ ኬንጉወስ ቡሮነ ሹቼ ኤት እሶ እጩወዬ» ዬይድ ኤ ህዶ። 8 አስ ዬኬ ሰሃ ኡለይድ ሰሀ ገረ ዲዜ ኤ ጌሎ። 9 ኡስን ዬ ኤሰ ቤ ሲዶ ዎገ ጭማፈ አይት ቤ ኡድነ ብዞ ብዞይድ ያፈ ዸድ ኬስ ኡ ሀንዶ። ህኔ ዬሱሳረ ዬ እንዶወረዎይ የሀ ቤ ጎሼ ኡ አቶ። 10 ዬ ኤ ጌዴ ዬሱሰይ ዎኬ ኬደይድ «ኑንዴ! ንየ ሉክቸሽት አይ ዬሴ? ኔ ገረ ያዸይ ኦኔን በዬ?» ህድ ኤ ኦይጮ። 11 እስን «ላሦ! ኦኔን ባሶ» ህድ እ መቶ። ዬሱሰን «ተንን ኔ ገረ ያኡወሶ። ሀንጉወ፥ ሀንዞወፈ ሴኬ ጩቦ ሀንቶፉነ!» ህድ ኤ ህዶ። 12 ሴኬን ዬሱሰይ «ተን ሀ ሰሀሴ ፎኤኮ። ታረ ዬሴስ ኡድ ዬሶወ ኣንጌ ፎኤ ኤ ዴጌሤሰ ባከ ጬንቸ ግደ ሴኬ ሀንኬ ሀንቱወሶ» ዬይድ ኤ ህዶ። 13 ፈረሰሥት «ኔን ኔሴ ኔ ግሸ አቶ ማዸኮ ‹ኣዴኮ› ህድ ኤፉቴሰ ማቁወሶ» ህድ ኡ ህዶ። 14 ዬሱሰን «ተን ተ ግሸ ዜርደኮ አየፈ ተ ዮዶንኬ አየ ተ ሀንጌንኬ ተ ኤሬ ግሸ ተ ዜሬይ ኣዴኮ ህድ ኤፉቴሰኮ። ህኑንመይ አየፈ ተ ዮዶንክየረ አየ ተ ሀንጌንክየረ ኤሩወይተኮ። 15 አሥ ያኤንኬኮ ህ ያኤ፥ ተን ኦኔ ገረን ያኡወሶ። 16 ተን ያዸኮን ተ ያኤ ያአይ ኣዴኮ። ዬ ኤስን ተን ተ ጎሼዎ ያኡወሶ። ተምበ አንሰ አፋሴ አዴይ ታረ ዎልኮኮ ኤ ዬሴ። 17 ለምእ አሥ ብዝ ኑነዎ ዜርደኮ ‹ዬ ዜሬይ ኣዴኮ› ህድ ኤፉቶሮንኬ ህ ዎገ ፍሸሮወ ዲዙትኮ ኤ ዬሴ። 18 ሀይ፥ ተን ታሱኮ ዜሬ፥ ተምበ አንሰ ኑወዴን ተ ግሸኮ ዜሬ» ዬይድ ኤ መቶ። 19 ኡስን «ንየዴይ አይ ዬሴ?» ህድ ኡ ኦይጮ። ዬሱሰን «ተምበን ማቄ ኑወዴን ኤሩወይተኮ። ተምበ ኤርዴሴሰ ማዸኮ ኑወዴን ኤረኮ ህ ኤራኔ» ህድ ኤ ህዶ። 20 ዬ ኤሰ ኤ ዜርዶስ ዎንቶ ሀይለ ዘወ ከራ ሚዤ ኤሰ ደክቾ ሳጽኔ ደኣ አሥተ ኤሩስስኔኮ ኤ ማቅቸ። ኤ ዎገይ ኤሎ በዴቾ ግሸ ኤሰ ኦኔን አይቶ ባሶ። 21 ዬሱሰን አስ ዜርስኔ «ዸድኮ ተን ሀንጌ። ህኑን ተምበ ዎርጎኮ ህ ዎርጌ፥ ማቁወዬ ባከ ህ ጩቦወረ ዬስኔኮ ህ ሀይኤ። ተን ሀንጌ ጎዶ ህኑን ሀሜሴ ደንደኡወይተኮ» ዬይድ ኤ ህዶ። 22 አይሁደ አፈነ ማግትን « ‹ተን ሀንጌ ጎዶ ህኑን ሀሜሴ ደንደኡወይተኮ› ዬይድ ኤ ህኔስ ቤምበ ዎዼሱወ ኤ ህኔን?» ዬይድ ኡ ህዶ። 23 ኤስን «ህኑን ዬኬ ኦሞፈኮ፥ ተን ዎኬ አፋፈኮ። ህኑን ሀ ሰሀ ገረፈኮ፥ ተን ሀ ሰሀ ገረፈ ማቁወሶ። 24 ዬ ኤ ግሸኮ ‹ህ ጩቦወረ ዬስኔኮ ህ ሀይኤ› ዬይድ ተ ህዶስ። ‹ዬሴሰኮ› ህድ ህዩቴሰ ተ ማቄንኬ ‹ኣዴኮ› ህድ ኤፌ ህ ዼበአይኮ ተ ኦቶንኬ ህ ጩቦወረ ዬስኔኮ ህ ሀይኤ» ዬይድ ኤ ህዶ። 25 ዬንየ ኡስን «ህኔ ኔን ኦኔወ?» ዬይድ ኡ ኦይጮ። ኤስን «ኦኔ ተ ማቄንኬ ህኑሴ ቡሮወፈ አይት ኦትኮ ተ ዬሴ። 26 ህ ግሸ ተ ዜሬሳረ ተ ያኤሳረ ለገ ዜሬኮ ተ ኬንጌ። ዬ ኤስን የሀ ዬሱኔ ተምበ አንሰስ ቤሴ ኣደሡኮ። ተን ኤሱኮፈ ተ ሲዶሰኮ ዬ ኤሰዎ ሀ ሰሀ ገረ ዬሴ አሡሴ ተ ኦሄ» ዬይድ ኤ ህዶ። 27 አዴ ማቄ ዎንቶ ግሸ ኤ ዜርዶስ ኡሱሴ ጌሌ ኤ ዼዶ። 28 ዬ ኤ ግሸ ዬሱሰን «አሥ ዬሌ ህድ ህዩቴሰ ኬደይስ ህ ሱጾሮ ዎጋኮ ‹ዬሴሰኮ› ህድ ህዩቴሰ ተ ማቄንኬ ህ ኤሬ። ዬይድዎ አዴይ ተምበ ኤሩሶሰ ተ ዜሬንክየረ ታኮፈ አበን ተ ሀንቱወንክየረ ዬ ዎጋኮ ህ ኤሬ። 29 ተምበ አንሰስ ታረ ዎልኮኮ ኤ ዬሴ። ተንን ኤሰ መጉሴሴ ኡድ ዎገ ተ ሀንቴ ግሸ ኤስ ተ ጎሼ ተምበ ዸጉወሶ» ዬይድ ኤ ህዶ። 30 ዬይድ ኤ ዜርዶንየከ ለግት ኤሰ ኣዴሶ። 31 ዬሱሰን ቤምበ ኣዴሰ አይሁደሥቱሴ «ህኑን ተ ኤሩሴንኬ ዬሰአይኮ ኣዴዎ ታረ ዎልኮ ዬሴስተኮ። 32 ኣዴን ኤረኮ ህ ኤሬ፥ ዬ ኣዴኮ ህኑምበ ማኬቶወፈ ሸዎ ኬሴሰ» ዬይድ ኤ ህዶ። 33 ኡስን «ኑምበ ዬለ አዴይ አብረሃሜኮ። ፌቶ ኦኔሴን ማለ ማዽ ኤሩወንጽኮ። ‹ማኬቶወፈኮ ሸዎ ህ ኬሴ› ዬይድ ወይድን ኑምበ ኔ ህኔ?» ዬይድ ኡ ህዶ። 34 ኤስን «ህኑሴ ተ ኦሄስ ፌቶ ኣዴኮ። ጩቦ ሀንቴስ ቤ ኡድነ ዬ ጩቦሴ ኤ ማለኮ። 35 ማለይ ብዝ ዘወ ዬሰኮን ኮሎ መክነ ዬ ዘወሤ ማቁወሶ። ዬሌመይ ኮሎ መክነ ዬ ዘወሡኮ። 36 ዎንቶ ዬሌይ ህኑምበ ማኬቶወፈ ኬሰአይኮ ኣዴዎ ኬሴሴሰኮ ህ ማቄ። 37 አብረሃሜ ነይሼ ህ ማቄንኬመ ኤረኮ ተ ኤሬ። ማቁወይቴ ባከ ህኑሴ ተ ኦቶሰ ሲድ ኤፌ ህ ዼዶ ግሸኮ ተምበ ዎዼሴ ህ ዴንዶ። 38 ተን ኑወድየረ ዬስኔ ተ ቤዶሰኮ ተ ዜሬ፥ ህኑን ህነዴኮፈ ህ ሲዶሰኮ ህ ሀንቴ» ዬይድ ኤ ህዶ። 39 ኡስን «ኑምበ ዬለ አዴይ አብረሃሜኮ» ህድ ኡ ህዶ። ኤስን «አብረሃሜ ነይሼ ህ ማዸኮ አብረሃሜይ ሀንቶሰኮ ህ ሀንታኔ። 40 ሀቴመ ዎንቶኮፈ ተ ሲዶ ኣዴ ህኑሴ ዜርደ ተምበኮ ዎዼሴ ህ ዴንዴሴ። አብረሃሜይ ዬይስ ሀንቶ ባሶ። 41 ህኑን ህነዴይ ሀንትቾ ሀንተኮ ህ ሀንቴ» ዬይድ ኤ ህዶ። ኡስን «ኑን ለጌቶነ ዬሉተ ዎይሌይሰ ማቁወንጽኮ። ብዝ አዴኮ ኑ ኬንጌ፥ ኤስን ዎንቶኮ» ዬይድ ኡ ህዶ። 42 ዬሱሰን «ዎንቶይ ህነዴ ማዸኮ ተን ዎንቶ ደኣፈ ኬስ ተ ዮዶ ግሸ ተምበ ኤሀኮ ህ ኤሃኔ። ኤሰኮ ተምበ አንሶሰ ባከ ታሴ ዮዶ ባሶ። 43 አበሱወ ተ ዜሬስ ህኑሴ ኤ ጌሉዋኔ? ተ ዜሬሰ ኤፌሴ ህ ደንደኡወ ግሸኮ። 44 ህኑን ህነዴ ማቄ ሁምበዬ ነይሹኮ። ህ ዎርጌስ ህነዴ መሦ ሀንቴኮ። ኤስን አቻፈ ዴንስ አሤ ዎዼሴሰኮ። ኣዴ ቤ ኬንጉወ ግሸ ኣድየረ ዎልኮ ሙሁወሶ። ዛዴ ቤ ዜሬንየ ቤኮፈኮ ኤ ዛዴ። ኤስ ቤሴ ዛደሡኮ፥ ዛዴሴን ኤ ጸጶኮ። 45 ተንመይ ኣዴዎ ተ ዜሬ ግሸ ‹ኣዴኮ ኤ ዜሬ› ህድ ህወይተኮ። 46 ህኑካፈ ተምበ ‹ኔን ጩበሡኮ› ዬይድ ህኔስ ኦኔነ? ህኔ ኣዴ ዜሬሰ ተ ማዾ ጌዴ አበሱወ ተ ዜሬ ‹ኣዴኮ› ህድ ህ ኤኩዋኔ? 47 ዎንቶኮፈ ማቄስ ዎንቶይ ኦሄሰኮ ኤ ሲኔ። ህኑንመይ ዎንቶኮፈ ህ ማቁወ ግሸ ስወይተኮ» ዬይድ ኤ ህዶ። 48 ሴኬን መት አይሁደሥት « ‹ኔን ኢተ ሰመረሡኮ፥ ጾዙኮ ኔ ገረ ዬሰ› ዬይድ ኑ ህዶስ ኣዴ ማቁወዬ?» ህድ ኡ ህዶ። 49 ዬሱሰን «ተ ገረ ጾዝ ባሶ፥ ተንመይ ኑወዴኮ ኩሤ። ህኑን ተምበኮ ህ ኤርሴ። 50 ተን ታ ኩሦሮሰ ዎርጉወሶ። ተን ኩሡቶሮሰ ዎርጌሳረ ታሴ ያኤሳረይ ፌደይ ዬሰኮ ዬሴ። 51 ህኑሴ ተ ኦሄስ ፌቶ ኣዴኮ። ተ ኦሄንኬ ዬሴስ ዬሰአይኮ ኮሎ መክነ ሀይኡወሶ» ዬይድ ኤ ህዶ። 52 አይሁደሥትን «ሀቴመ ጾዝ ኔ ገረ ዬሴሰ ኤርድኮ ኑ ዬሴ። ፌቶ አብረሃሜን ሀይዽኮ ዬሴ፥ ካየሥትን ሀይዽኮ ዬሴ። ህኔ ኔን ወይድዉ ‹ተ ኦሄንኬ ዬሴስ ዬሰአይኮ ኮሎ መክነ ሀይኡወሶ› ዬይድ ኔ ህኔ? 53 ፌቶ ኔን ኑ ዬል ሀይዸ አዴ አብረሃሜሜ ገሩወ ኔ ገሬ? ኤስ ሀይዽኮ ዬሴ፥ ካየሥትን ሀይዽኮ ዬሴ። ህኔ ‹ተን ኦኔኮ› ህድን ንየ ኔ ህኔ?» ዬይድ ኡ ህዶ። 54 ዬሱሰን «ተን ታነ ታ ኩሠአይኮ ተ ኩሠይ ዎመ ኬንጉወሶ። ተምበ ኩሤስ ‹ኑ ዎንቶኮ› ህድ ሂኔ ኑወዴኮ። 55 ዬ ኑወዴ ህኑን ኤሩወይተኮ ባከ ተንመይ ኤረኮ ኤሬ። ተን ‹ኤሰ ኤሩወሶ› ህድ ህኔሰ ማዸኮ ሀዴ ህኑኬኮ ተንን ዛደሤ ማቃኔ። ማቁወዬ ባከ ተን ኤርድኮ ኤ ከቶን ተ ከኬ። 56 ህኑምበ ዬለ አዴ አብረሃሜይ ተ ዎንተ ቤዬሱኮ ኤ ጮልኤቸ፥ ቤድን ኤ መዶ» ዬይድ ኤ ህዶ። 57 አይሁደሥት ዬንየ «እችች ተም ቤረን ኩንዶ ባ ኔን ዋክድዉ ‹አብረሃሜ ተ ቤዶ› ህድ ኔ ህኔ?» ዬይድ ኡ ህዶ። 58 ዬሱሰን «ህኑሴ ተ ኦሄስ ፌቶ ኣዴኮ። አብረሃሜይ ዬሉቶ ባኔን ተን ዬሴሰዎኮ» ህድ ኤ ህዶ። 59 ህኔ ኡስን ሹቹነ ኤሰ እጬሼ ሹቼ ኡ ኤቶ። ዬሱሰይ ኡ ደኣፈ ብየ ኣሽ ዎንቶ ሀይለ ዘወ ከራፈ ኬስ ዸድ ኤ ሀንዶ።
1 ዬሱሰይ ኦጌ ገርችኔ በልአ ማዽ ዬሉቴቸ ብዝ አዴ ኤ ቤዶ። 2 ኤ ኤሩስቾሽት «ላሦ! ሀ አዴይ በልአ ማዽ ዬሉቶሮንኬ ጩቦ ሀንተስ ኦኔነ? ኤሰ ዬለ አድየረ እንዶወረን ኤሱወረ?» ዬይድ ኡ ኦይጮ። 3 ዬሱሰን «ዎንቶ ሀንተይ ኤሱነ አዳ ቤንቶሮሰ ባከ ኤሰ ዬለ ጌርተን ማቄ ኤስ ሀንቶ ጩቦነ ማቁወሶ። 4 ዎንተ ኤ ዬሱኔ ተምበ አንሰስ ዎሶ ሀንቴኮ ታ (26) ኤ ዎርጉሴ። ኦኔን ኤሳነ ሀንቴሴ ደንደኡወ ቀመኮ ዮኔሰ። 5 ሀ ሰሀ ገረ ዬስኔ ተን ሀ ሰሀሴ ፎኤኮ» ዬይድ ኤ ህዶ። 6 ዬ ኤ ጌዴ ጩቼ ዬኬ ሰሃ ጩት ጩቹነ ሰሀ ትሙስ ዬ ኡርቀነ ዬ አዴ ኣፌ ኤ ትሾ። 7 ዬ በልአ «ሀንድ ስሎሜ ኤላ ሾሁቱወ!» ዬይድ ኤ ህዶ። «ስሎሜ» ህድ ህዮይ አንሡተሴ ዬይድ ህዮኮ ኤ ማቅቸ። ህኔ ዬ አዴይ ሀንድ ሾሁት ቤስኔ ዮዶ። 8 ዶድተን ማቄ ቡሮ አበኮ ኤ ሽኡሱኔ ቤዴቻሽትን «ሀ አሥ ሀዴ ኡት ኤ ሽኡሱኔ ኑ ቤቾ አሤ ማቁወዬ?» ዬይድ ኡ ህዶ። 9 ብዝ ብዝት «ኤወ ኤሰኮ» ህድ ኡ ህዶ። ፌድትን አስ «ኤሰ ኤ ብሼሸ ባከ ኤሰ ማቁወሶ!» ህድ ኡ ህዶ። ኤስመይ «ተምበኮ» ህድ ኤ ህዶ። 10 አሥትን «ህኔ ኔ ኣፌይ ዋንድን ቤዬሴ ደንደዾ?» ህድ ኡ ኦይጮ። 11 ዬ አዴን «ዬሱሰ ሱንጌ አዴኮ ሰሀ ትሙስ ዬ ኡርቀነ ተ ኣፌ ትሽ ‹ሀንድ ስሎሜ ኤላ ሾሁቱወ› ህድ ኤ ህኔኮ ሀንድ ሾሁት ተ ቤዶ» ዬይድ ኤ ህዶ። 12 ኡስን «ህኔ አይ ዬ አሥ ዬሴ?» ህድ ኡ ኦይጮ። ኤስን «አየ ኤ ዬሴሰ ተን ኤሩወሶ» ህድ ኤ ህዶ። 13 ዬ ኤ ጌዴ አሥት ዬ በልአ ማቅችኔ ሎለ አዴ ፈረሰሥት ቡሮ ኡ ኣንዶ። 14 ዬሱሰይ ሰሀ ኡርቀ መት ዬ አዴ ኣፌ ኤ ሎሉሶ ዎንተይ ሰንበተኮ ኤ ማቅቸ። 15 ህኔ ፈረሰሥት ዬ አዴ «ዋክድን ቤዬሴ ኔ ደንደዾ?» ህድ ኡ ኦይጮ። ዬ አዴን «ተ ኣፌ ኡርቀነ ኤ ትሽኔኮ ሾት ሀይ ተ ቤዶ» ህድ ኤ ህዶ። 16 ዬንየን ፈረሰሥታፈ ብዝ ብዝት «ሀ አሥ ሰንበተሴ ዎገይ ኦቴሴሰ ቤ ከኩወ ግሸ ዎንቶኮፈ ማቁወሶ» ህድ ኡ ህዶ። ፌድትን አስ «ህኔ ጩበቼ ማቄ አሥ ሀ ኤ ብሸ ምጩሼ ሀንትተ ወይድ ሀንቴሴ ኤ ደንደኤ?» ዬይድ ኡ ህዶ። ዬ ኤሱነ ኡ ግዳከ ሸሆይ ጌሎ። 17 ዬ ኤ ግሸ ዬ በልአ ማቅቸ አዴ «ሀ ኔ ኣፌይ ቤዮሮሰ መተ አዴ ግሸ አም ኔን ኦሄ?» ህድ አስ ኡ ኦይጮ። ኤስን «ካየሡኮ» ህድ ኤ ህዶ። 18 አይሁደ አፈነ ማግት ኤሰ ዬለ ጌርተ ጼይድ ወይድ በልአ ኤ ማቅቾንክየረ ኤ ቤዶንክየረ ቤ ኦይጮሮ መኮ በልአ ኤ ማቅቾሸ «ኣዴኮ» ህድ ህዬ ኡ እንጸዾ። 19 ኡስን «ሀ ኤስ ህ ዬልየ? ኣፌ በልአ ማዽኮ ኤ ዬሉቶ ዬይድየ ሂኔ? ህኔ ሀቴ ወይድ ቤዬሴ ኤ ደንደዾ?» ህድ ኡ ኦይጮ። 20 ኤ ጌርትን «ሀ ኤስ ኑ ዬሌ ኤ ማቄንክየረ በልአ ማዽ ኤ ዬሉቶንክየረ ኤረኮ ኑ ኤሬ። 21 ሀቴ ወይስ ኤ ቤዶሳረ ኦኔይ ኤሰ ሎሉሶሳረ ኤሩወንጽኮ። ኤስ ቤሴ ኡጸኮ፥ ቤሴ ቤ ቅኖሴ ዜረኮ ኤ ዜሬ። ኤሰ ህኑሴ ኦይጩወይቴ» ዬይድ ኡ ህዶ። 22 ኤሰ ዬለ ጌርት ኤሱሜ ዬይድ ኡ ህዶስ አይሁደ አፈነ ማግተ ቤ ዠሾ ግሸኮ ኤ ማቅቸ። ኡ ዠሽቾሽን « ‹ዬሱሰይ ሜስሄኮ› ዬይድ ህኔስ ዬሰአይኮ ኑ ጵክሎ ዘዋፈ ጎደኮ ኑ ጎዴ» ህድ ኡ ህዴቾ ግሸኮ። 23 ህኔኮ ኤሰ ዬለ ጌርት «ኤስ ቤሴ ኡጸኮ፥ ኤሰ ኦይጩወይቴ» ህድ ህዬሴ ኡ ደንደዾ። 24 ዬ ኤ ግሸ ዬ በልአ ማቅቸ አሤ አስ ሀንኬ ቤኮ ጼይድ «ኔን ኔሴ ‹ሜዸ ዎንቶፈ› ህድ ጫዽ ኣዴ ዜሩወ (27)። ሀ አሥ ጩበቼ ማቄንኬ ኑን ኤረኮ ኑ ኤሬ» ህድ ኡ ህዶ። 25 ዬ አዴይ «ጩበቼ ኤስ ማቄ ኤስ ማቄ ዼቤ ተን ኤሩወሶ። ተ ኤሬስ ብዝ በሱኮ። ዬ ኤስን በልአ ተ ማቅቸ፥ ሀቴ ሀይ ቤየከ ተ ዬሴ» ህድ ኤ ህዶ። 26 ኡስን «አም ኔሴ ኤ ሀንቶ? ዋክስዉ ኔ ኣፌይ ቤዮሮንኬ ኤ መቶ?» ህድ ኡ ኦይጮ። 27 ኤስን «ቡሮች ተ ኦትኔ ስዬ ህ ዼዴቾሽ። ህኔ አስ አበሱወ ሴኬ ስዬሴ ህ ዎርጌ? ኤ በዴ ማቄሱወ ሂኔን?» ህድ ኤ ህዶ። 28 ኡስን «ኔንኮ ኔሴ ኤ በዴይ፥ ኑን ኑሴ ሙሴ በዴኮ። 29 ዎንቶይ ሙሴ ዜሩሶንኬኮ ኑን ኤሬ። ሀ ዬሱሰ ህሶስ አየፈ ኤ ማቄሰ ኤሩወንጽኮ» ህድ ህስኔ ኤ ገረ ኡ ሁሎ። 30 ዬ አዴን « ‹ሀ አሥ አየፈ ኤ ማቄንኬ ኤሩወንጽኮ ኑን› ዬይድ ሂዶስ ምጩሸኮ ኤ ምጩሼ። ህኑን ዬይድ ህወይቴ ባከ ተ ኣፌመ ሎሉሰስ ኤሰኮ። 31 ዎንቶይ ጩበችቱሴ ኤ ስወሰ ኤረኮ ኑ ኤሬ። ዎንቶይ ብየ ኩሤሱሳረ ቤ መሦኬ ሀንቴሱሳረኮ ኤ ሲኔ። 32 ሀ ሰሀይ ሜዹቶወፈ አይት ‹በልአ ማዽ ዬሉቴቸ አሤ ሎሉሰ አሡኮ ዬሰ› ዬይድ ህዩት ኤሩወሶ። 33 ሀ አሥ ዎንቶኮፈ ማቄ ዼደኮ አበን ሀንቴሴ ደንደኡወድኮ ኤ ዬቸ» ዬይድ ኤ ህዶ። 34 ኡስን «ኔን ጩበቼ ማዽ ዬሉቴሴ አሥ ኑምበ ኤሩሴሱወ ኔይኔን?» ዬይድ ህስኔ ጵክሎ ዘወፈ ዉዴ ኤሰ ኡ ኬሶ። 35 ዬ በልአ ማቅቸ አዴ ቤ ጵክሎ ዘወፈ ኡ ኬሶሰ ዬሱሰይ ኤ ሲዶ። ኤሰን ዴጌስ «አሥ ዬሌ ህድ ህዩተሴ ኣዴሠ ኔ ኣዴሤ?» ዬይድ ኤ ኦይጮ። 36 ዬ አዴን «ላሦ! ኤሰ ተ ኣዴሦሮንኬ ኤስ ኦኔወ?» ህድ ሴኬ ኤ መቶ። 37 ዬሱሰን «ሀዴ ቡሮ ኔ ቤዴቾሸኮ ሀ ንየ ዜሩሴስን ኤሰኮ» ዬይድ ኤ ህዶ። 38 ዬ አዴን «ላሦ! ንየ ኣዴሠኮ ተ ኣዴሤ» ዬይድ ህስኔ ኤ ድሶ። 39 ዬሱሰን «ቤወዴቸሽት ቤዮሮንኬ ቤየ ዬቸሽት በልአ ኡ ማቆሮንኬ ያኤሱኮ ሀ ሰሀ ገረ ተ ዮዶ» ዬይድ ኤ ህዶ። 40 ዬ ዎጋን ዬሱሰ ደኣ ዬቸ ብዝ ብዝ ፈረሰሥት «ህኔ ኑንን በልኣ?» ዬይድ ኡ ኦይጮ። 41 ዬሱሰን «በልአ ማዼሰኮመ ጩበቼ ማቁወድኮ ህ ዬቸ። ሀቴመ ‹ቤየኮ ኑ ዬሴ› ዬይድ ሂኔ ግሸ ጩበቼ ማቅስኔኮ የሀ ህ አቴ» ዬይድ ኤ መቶ።
1 ሴኬን ዬሱሰይ «ህኑሴ ተ ኦሄስ ፌቶ ኣዴኮ። ዶርት አንሠ ሱማነ ማቁወሰ ፌዴ ኦጌነ ጌሌስ ከይሶወረ ፉሎወረኮ። 2 ሱማነ ጌሌስመይ ዶርተ ዬንጌሰኮ። 3 ሱማ ከኬስ ኤሱሴ ገሰ ዶአኮ ኤ ዶኤ፥ ዶርትን ኤ ከቶኮ ኡ ሲኔ። ኤስን ቤ ዶርተ ኡ ሱንሡነ ሱንሡነኮ ጼይድ ኡሶን እሽ ዉዴ ኤ ኬሴ። 4 ቤ ዶርተ ኡድ ዉዴ ቤ ኬሶ ጌዴ ኡ ቡሮ ገርድኮ (28) ኤ ሀንጌ። ኡስን ኤ ከቶ ሸት ቤ ኤሬ ግሸ ኤ ጌዴኮ ኡ ሀንጌ። 5 ፌደሴ ኤ ከቶ ቤ ኤሩወ ግሸ ኤሱኮፈ ዸድ ኡ በኤሰ ባከ ኤ ጌዴ ሀሙቱወሶ» ዬይድ ኤ ህዶ። 6 ዬሱሰይ ሀ ዜሬ ዬይድ ኡሱሴ ኤ ዜርድኔ ዬ ኤ ብርቼይ ኡሱሴ ጌሌ ኤ ዼዶ። 7 ህኔ ዬሱሰይ ሴኬ «ህኑሴ ተ ኦሄስ ፌቶ ኣዴኮ። ዶርት ኤሳነ ጌሌ ሱመይ ተንኮ። 8 ታሜ ቡሮ ዮደስት ኡድ ከይስታረ ፉልታረኮ። ማቁወዬ ባከ ዶርት ኡሱሴ ስዩቶ ባሶ። 9 ሱመይ ተምበኮ፥ ታኮነ ጌሌስ ሎለኮ ኤ ሎሌ። ኤ ጌሌ ኤ ኬሴ፥ ኤሳከ ቤ ዬሙቴ ሞዼ ጎዶን ኤ ዴጌሤ። 10 ከይሶይ ኤሱሜ ኤ ዮኔስ ከይሴሴ፥ ሹፌሳረ በይሴሳረኮ። ተንመይ ዮዶስ ዬሶ ኡ ዴጌሦሮንክየረ ኡድ ኦጌነ ብዞን ፈጬቴ ኬንጉወ ዬሶ ኡ ኬሞሮንክየረኮ። 11 ሞዼ ዬመሥ ተምበኮ። ሞዼ ዬመሥ ቤ ዬሶኮ ቤ ዶርቱሜ ህስኔ ገርስ ኤ እንጌ። 12 ዶርተ አንበጼነ ዬንጌስ ሱዸም ዮሱኔ ቤ ቤኔ ዎጋከ ‹ሀ ኤስ ታሱኮ› ህድ ዬንጌሰ ቤ ማቁወ ግሸ ደትኮ ዸድ ኤ ዎጼ። ሱዸምን ዶርተ ሾድ ኤ ኤኬ፥ ዬ ዶርትን ኡ ቡዱቴ። 13 ዬ ኤስ ኤሱሜ ደት ኤ ዎጼስ አንበጼነ ቤ ዬንግቾ ግሻረ ዶርተ ቤ ህግሉወ ግሻረኮ። 14 ሞዼ ዬመሥ ተምበኮ። ተን ተ ዶርተ ኤሬ፥ ተ ዶርትን ታ ኤሬይድኮ። 15 ኑወዴይ ተምበ ኤሬንክየረ ተን ኑወዴ ኤሬንክየረኮ ተን ኡሶ ኤሬ። ተን ተ ዶርት ግሸኮ ተምበ ሀይቦሴ ገርስ እንጌ። 16 ሀ ዶርታረ ዎለ አቁወስተኮ ፌዴ ዶርተ ተ ኬንጌ። ኡሶ ሀንኬ ኦዌኮ ተምበ ኤ ዎርጉሴ፥ ኡስን ተ ከቶ ኡ ሲኔ፥ ሀ ዶርታረ ብዞ ኡ ማቄ፥ ኡሶ ዬንጌስን ብዞ ኤ ማቄ ህድኮ። 17 ሴኬ ተ ዬሶሮንኬ ተምበ ገርስ ተ እንጌ ግሸ ኑወዴይ ተምበ ኤሀኮ ኤ ኤሄ። 18 ተምበ ተ ኤሀነ ገርስ ተ እንጌሰ ባከ ተምበ ተ እንጎሮንኬ ኦሰነ መሄስ ባሶ። ተምበ ገርስ እንጌሳረ ሴኬ ተ ዬሶሮንኬ ታ መሄሳረ አዴቶ ኬመኮ ተ ኬንጌ። ሀ ዎሶ ተ ኤቶስ ኑወዴኮፈኮ» ዬይድ ኤ ህዶ። 19 ዬይድ ኤ ህዶሱነ ሴኬ አይሁደሥት ግደ ሸሆይ ጌሎ። 20 ኡ ግዳፈ ለግት «ሀ ኤ ገረ ጾዙኮ ዬሰ፥ ጎዥኮ ኤ ዬሴ፥ አበሱወ ኤሱሴ ህ ሲኔ?» ዬይድ ኡ ህዶ። 21 ፌድት አስ «ጾዜ ኬንጌ አሥ ዜሬንኬ ዜርየ ባሶ። ጾዝ በልአይ ቤዮሮንኬ መሄሴ ደንደኣ ኤ ደንደኤ?» ዬይድ ኡ ህዶ። 22 ዬሩሰሌሜ ዎንቶ ሀይለ ዘወ ክሎመ መሰለ (29) ኩሥቾ ዎንቴይ ኤሎ። ዬ ዎገን በርጎ ማቅቸ። 23 ዬሱሰይ ዎንቶ ሀይለ ዘዋ ሰለሞኔ ከረ ህድ ህዩቴ ጎዶነ ሴኬ ሀንኬ ኤ ሀንትቸ። 24 ዬንየን አይሁደሥት ሀንኬ ኤ ጎግየ ጵክሉት «አን ዎንቴ ኣሎነ ኑምበ ለምእ መሦ ገወ ኔ ገዴ? ኔን ሜስሄ ማኮ ትዽስ ኑሴ ኦሁወ!» ህድ ኡ ኦይጮ። 25 ዬሱሰን «ህኑኮ ኦትኮ ተ ዬሴ፥ ህኑንመይ ‹ኣዴኮ ኤ ዜርዶ› ህድ ህወይተኮ። ኑወዴ ሱንሡነ ተ ሀንቴ ሀንተኮ ታሴ አቶ ማቄሰ። 26 ህኑንመይ ተ ዶርቱከፈ ህ ማቁወ ግሸ ተምበ ‹ኣዴኮ ኤ ዜርዶ› ህድ ህወይተኮ። 27 ተ ዶርት ተ ከቶ ኡ ሲኔ፥ ተንን ኡሶ ኤረኮ ኤሬ። ኡስን ተ ጌዴኮ ታረ ዎልኮ ኡ ሀንጌ። 28 ኮሎ መክነ ኡ ዬሶሮንኬ ተ መሄ፥ ኮሎ መክነ በዬሴ ደንደኡቱወሶ። ኡሶ ኦኔን ተ ኩችየፈ ሾድ ኤኩወሶ። 29 ኡሶ ታሴ እንደ ኑወዴይ ኡድሜ ገሮኮ ኤ ገሬ። ኤ ኩችየፈ ኦኔን ኡሶ ሾድ ኤፌሴ ደንደኡወሶ። 30 ታረ ኑወድየረይ ብዝኮ» ዬይድ ኤ ህዶ። 31 ዬንየን አስ አይሁደሥት ኤሰ ሹቹነ እጬሼ ሹቼ ኡ ኤቶ። 32 ዬሱሰን «አዴይ ታኮ ‹ሀንቱወ!› ህድ ህዶሰ ለገ ሞዼ ሀንተኮ ህኑሴ ተ ሀንቶ። ህኔ ተምበ ኤሱሜ ህ እጬሽ አን ሀንተሜዉ?» ዬይድ ኤ ህዶ። 33 ኡስን «ኔምበ ኤሱሜ ሹቹነ ኑ እጬሽ ዎንቶ ኔ ጨሾ ግሸኮ ባከ ኔ ሀንቶ ሞዼቴ ሀንተ ግሸ ማቁወሶ። ዬ ኤስን ኔን አሤ ማቅችኔ ‹ዎንቶኮ ተን› ህድ ኔ ህዶ ግሸኮ» ህድ ኡ ህዶ። 34 ዬሱሰን «ህ ዎገ ፍሸሮወ ዎንቶይ ዜርስኔ ‹ህኑን ህ ብዝ ብዝነ «ዎንትተዎኮ» ህድኮ ተ ህዶ› ዬይድ ህኔስ ዲዙቶ በዬ? 35 አሥ ሀይለ ፍሸሮወ ዲዙቴሴሰ በይሴሴ ደንደኡወሶ። ዬቦ፥ ዎንቶ ከቶይ ኡሱኮ ዮዶስተ ኡድ ኡ ብዝ ብዞ ‹ዎንትተኮ› ዬይድ ህድኮ ኤ ዬሴ። 36 ህኔ ኑወዴይ ተምበ ሀንቴሰ መት ሱዝ ሀ ሰሀ ገረ ኤ አንስኔ ‹ዎንቶ ዬሌኮ ተን› ህድ ተ ህዶ ግሸ ‹ዎንቶኮ ኤ ጨሾ› ህድ አበሱነ ተምበ ሂኔ? 37 ተን ኑወዴይ ‹ሀንቱወ› ህድ ህዶሰ ሀንቱወሰ ተ ማቆአይኮ ተምበ ኣዴሶፍተ። 38 ኑወዴይ ተምበ ‹ሀንቱወ› ህድ ህዶሰ ሀንቴሰ ተ ማዾ ጌዴ ተምበ ኣዴሡወሰ ማቆአይኬቴን ተ ሀንቴ ሀንተ ‹ሀ ኤስ ዎንቶኮፈኮ› ህድ ኤኩወይቴ። ሀ ኤሱነኮ ኑወዴይ ታረ ብዞ ማዽ ተን ኑወድየረ ብዞ ማዼሴሰ ትዽስ ህ ኤሬ» ህድ ኤ ህዶ። 39 አስ ኤሰ አይኬሴ ኡ ዎርዴቾይኔ ኡ ኩችየፈ ዸድ ቱልጽ ኬስ ኤ ሀንዶ። 40 ዮርደኖሴ ዋሥ ሴምፈ በዴ ቡሮ ዮሀንሴይ ጸመቅቾ ጎዶ ዸድ ኤ ሀንዶ። የሀን ኤ ዴጮ። 41 ለገ አሥት ኤሱኮ ዮድ «ዮሀንሴይ ፌቶ ብዝ ምጩሼ ሀንተ ሀንቶ በድኮ ኤ ዬቸ። ቤሴ ሀንቴ ዼደኮን ሀ አሥ ግሸ ኤ ዜርዶ ዜሬይ ኡድ ኣዴኮ» ህድ ኡ ህዶ። 42 የሀን ለገ አሥ ኤሰ ኣዴሶ።
1 ብዝ አሥ ኣለዘሬ ሱንጌስ ቢተንየ ሱንጌ ከተማ ሀርድ ኤ ዬቸ። ዬ ቢተንየይ ማረምየረ እስንዶ ቡሾ መርታረይ ኤሳከ ዬቾ ከተመ ኤ ማቅቸ። 2 ዬ ማረሜይ ላሥ ቶኬ ሽቶነ ትሽ ቤ ቅኖነ ኡጬቸንዮኮ እ ማቅቸ። ሀርደ ኣለዘሬይ እስንዶ ነኡኮ ኤ ማቅቸ። 3 ዬ ኣለዘሬይንዶ ቡነይጬይ «ላሦ፥ ኔ ኤህቾ ኣለዘሬይ ሀርድኮ ዬሴ» ህድ ህስኔ ዬሱሰኮ ዎሶ ኡ አንሶ። 4 ኤስን ዬ ዎሶ ሲድ «ሀ ሀርጌይ ዎንቶ ዬሌይ ኤሱነ ኩሡቶሮሰ ዎንቶ ኩሠ ግሸ ባከ ሀይቦሴ ኤሉሴሰ ማቁወሶ» ህድ ኤ ህዶ። 5 ዬሱሰይ መርታረይስ እስንዶ ቡሾ ማረምየረይስ ኡስንዶ ነእ ኣለዘርየረይስ ሞዹስ ኤ ኤህቸ። 6 ኤሁወዬ ባከ ኣለዘሬይ ሀርዶሰ ሲዴስኔ ቤ ዬቾ ጎዶ ለምእ ዎንቴ ኤ ፌይሾ። 7 ዬ ኤ ጌዴ ቤ ኤሩስቾሽቱኮ «ዸድ ይሁደ ዉዴ ሴኬ ኑ ሀሜሴ» ህድ ኤ ህዶ። 8 ኤ ኤሩስቾሽት «ኑ ላሦ! ኦዼ ዎንተሜ ኤ ቡሮ አይሁደሥት ኔምበ ሹቹነ እጬሼ ህወድየ ኡ ዬቸ? ህኔ አስየ ሴኬ የሀ ኔ ሀንጌ?» ህድ ኡ ህዶ። 9 ዬሱሰን ኡሱሴ «ብዝ ዎንታፈ ፎኤይ ዬሴስ ተመ ለምእ ሳቴ ማቁወዬ? ዎንተነ ሀንቴስ ዬሰአይኮ ሀ ሰሀ ፎኤ ቤ ቤኔ ግሸ ዹሙቱወሶ። 10 ቀመ ሀንቴስመይ ፎኤይ ባ ግሸ ዹሙቶኮ ኤ ዹሙቴ» ዬይድ ኤ መቶ። 11 ዬ ኤሰ ቤ ዜርዶስ ጌዴ አስ «ን ለጌ ኣለዘሬይ ጌት ኤ ዬሴ ግሸ ብርኩስየኮ ተ ሀንጌ» ህድ ኤ ህዶ። 12 ኤ ኤሩስቾሽት «ላሦ፥ ጌት ዬሶ ሀርግየፈ ሎለኮ ኤ ሎሌ» ዬይድ ኡ ህዶ። 13 ዬሱሰይ ዜርዴቾሽ ኣለዘሬ ሀይቦ ግሸኮ ኤ ማቅቸ፥ ኡሱሴመ ጌሁንሥ ግሸ ኤ ዜርዶሰኮ ኤ ብሽቸ። 14 ህኔኮ ዬሱሰይ ትዽስ «ኣለዘሬይ ሀይዽኮ ዬሴ። 15 ተምበ ህ ኣዴሦሮሰ የሀ ተ ዼዶሱነ መገኮ ተ መጌ። ሀቴመ ኤሱኮ ኑ ሀሜሴ» ዬይድ ኤ ህዶ። 16 ዬንየን ድድሞሴ ሱንጌ ቶማሴን (30) ቤረ ዬቸ ኤ ኤሩስቾሽተ «ኑንን ኤሳረ ሀይኤሴ ኑ ሀሜሴ» ህድ ኤ ህዶ። 17 ዬሱሰይ የሀ ሀንድ ኤሎ ዎገ ኣለዘሬይ ሞጉቶወፈይ ኦይድ ዎንቴ ማዽ ኤ ዬቸ። 18 ቢተንየ ከተመይ ዬሩሰሌሜፈ ሀይዝ ኪሎ ሜትሬ ኣሎዎኮ ኤ ዘርቸ። 19 መርታረ ማረምየረ ኡስንዶ ነእ ሀይቦሴ ማሙሴሴ ለገ አይሁደሥት የሀፈ ዮድ ኡ ዬቸ። 20 መርተን ዬሱሰይ ዮዶ ኦዶ ሲድ ሞኬሴ እ ኬሶ። ማረሜይ ዬንየከ ዘወ እ ዬቸ። 21 መርተን ዬሱሰኮ «ላሦ! ሀየ ኔ ዬሰኮ ኑንዶ ነእ ሀይኡወድኮ ኤ ዬቸ። 22 ማቁወዬ ባከ ሀቴን ዎንቶይ አበን ኤ ማቆአይኮን ኔ ሽኤሰ ኤ ሲኔንኬ ኤረኮ ተ ኤሬ» ህድ እ ህዶ። 23 ዬሱሰን «ኔይንዶ ነእ ሀይቦወፈ ዴንደኮ ኤ ዴንዴ» ህድ ኤ ህዶ። 24 መርተን «ኣልጭረ ዎንቴ ኡድ አሥ ሀይቦወፈ ዴንዴ ዎገ ኤ ዴንዴንኬ ኤረኮ ተ ኤሬ» ህድ እ ህዶ። 25 ዬሱሰን «ሀይቦወፈ ዴንሤሳረ ዬሶ እንጌሳረይ ተምበኮ። ተምበ ኣዴሤስ ሀይኦአይኮን ኤንአኮ ኤ ማቄ። 26 ታነ ዬሴሳረ ተምበ ኣዴሤሳረይ ቤ ኡድነ ፌቶ ሀይኡወሶ። ‹ሀ ኤሰ ኣዴኮ ኤ ዜርዶ› ህድ ህተ ኔ ህኔ?» ህድ ኤ ኦይጮ። 27 እስን «ኤወ፥ ላሦ! ‹ሀ ሰሀ ገረ ኤ ዮኔ› ህድ ህቾ ዎንቶ ዬሌ ሜስሄይ ኔምበ ማቄንኬ ‹ኣዴኮ› ህድኮ ተ ህኔ» ህድ እ ህዶ። 28 መርተይ ዬ ኤሰ ቤ ዜርዶ ጌዴ ሀንድ ቤይንዶ ቡሾ ማረሜ ቤኮ ጽንቅስ ጼይድ «ላሥ ዮድኮ ኔምበ ዎርግየ ዬሴ» ህድ እ ኦቶ። 29 ማረሜይ ዬ ኤሰ ሲድ ኡኬነዎ ዴንድ ዬሱሰኮ እ ሀንዶ። 30 ዬሱሰይ መርተይ ኤሰ ሞቶ ጎዶዎኮ ሀገ ከተማ ጌሎ በድ ኤ ዬቸ። 31 እሶ ማሙሴሴ ዘወ ዬቸ አይሁደሥት ማረሜይ አሌይድ ኬሶሰ ቤ ቤዶ ዎገ «ኣለዘሬ ቦሰ ገረ ሀንድ ዬፌሱኮ ኢኔ» ህድ ህስኔ እ ጌዴ ኡ ኬሶ። 32 ማረሜይ ዬሱሰይ ዬቾ ጎዶ ዮድ ኤሰ ቤ ቤዶንየከ ኤ ቶኬ ገረ ኡንድ «ላሦ፥ ሀየ ኔ ዬሰኮ ኑንዶ ነእ ሀይኡወድኮ ዬቸ» ህድ እ ህዶ። 33 ዬሱሰን ማረሜይ ዬኩሱንየረ እሳረ ዮደ አይሁደሥት ዬኩሱንየረ ቤድ ቤ ገዋነ ኢተነ ህግል ኤ መዹንዶ። 34 «አይ ህ ሞዶ?» ህድ ኤ ኦይጮ። ኡስን «ላሦ፥ ዮድ ቤወ!» ህድ ኡ ህዶ። 35 ዬሱሰን ዬት ኣፉንሤ ኤ ጉሶ። 36 ህኔ አይሁደሥት «ቤወይቴ! ዋንድ ኤሰ ኤ ኤህቾሸ» ህድ ኡ ህዶ። 37 ኡሱካፈ ብዝ ብዝት «ዬ በልአ ማቅቸሼ ሎሉሴቸሽ ሀ አሥ ሀይኡወንኬ መሄሴ ደንደኡወድየ ኤ ዬቸ?» ህድ ኡ ህዶ። 38 ዬሱሰይ ሴኬ አስ ቤ ገዋነ ኢተነ ህግል ቦሳከ ኤ ሀንዶ። ቦሰይ መለ ሹቹነ ቱጩቴሴ ጎጎ ኤ ማቅቸ። (1) 39 ዬሱሰይ «ዬ ሹቼ ኦሡወይቴ» ህድ ኤ ህዶ። ዬ ሀይዼቸሽንዶ ቡሾ መርተይ «ላሦ! ኤ ሀይዾወፈይ ኦይድ ዎንቴ ማዽኮ ኤ ዬሴ፥ ሀቴ ጽንቀኮ ኤ ጽንቄ» ህድ እ ህዶ። 40 ዬሱሰን « ‹ኣዴሠአይኮ ዎንቶ ኩሠ ፉለኮ ኔ ቤኔ› ህድ ህዶ በድየ ተ ዬቸ?» ህድ ኤ ህዶ። 41 አሥትን ሹቼ ኡ ኦሶ። ዬ ኤ ጌዴ ዬሱሰይ ዎኬ አፋ ቤድ «ኑወዴ! ታሴ ኔ ሲዶ ግሸ ኔምበ ገለተኮ ተ ገለቴ። 42 ኡድ ዎገ ታሴ ኔ ሲኔሰ ኤረኮ ተ ኤሬ። ተምበ ኔ አንሶንኬ ‹ኣዴኮ› ህድ ኡ ህዮሮሰ ሀ ተ ጎጌ ኤኤ አሥቱሜ ህስኔኮ ዬይድ ኔምበ ተ ሽዾ» ዬይድ ኤ ህዶ። 43 ዬ ኤሰ ቤ ሽዾ ጌዴ ቤ ከቶ ኬደይስ «ኣለዘሬ! ኬሱወ!» ህድ ኤ ህዶ። 44 ሀይዼቸ ኣለዘሬይ ኤ ገረን ማኦይ ጻጹት ዬሴንኬ ኤ ኣፉሸን ፌዴ ማኦነ ቤ አይኩቴሴንኬ ቦሳፈ ኤ ኬሶ። ዬሱሰን «ብርቹወይቴ ዸድ ሀሜሴ» ህድ ኤ ህዶ። 45 ማረሜ ማሙሴሴ ዮዴቸ አይሁደሥታፈ ለገይ ኤ መቶሰ ቤድ ኤሰ ኡ ኣዴሶ። 46 ኡሱካፈ ብዝ ብዝት ዸድ ሀንድ ዬሱሰይ ሀንቶ ሀንተ ፈረሰሥቱኮ ኡ ኦቶ። 47 ከህንቱሴ አፈነ ማግታረ ፈረሰሥታረይ አይሁደ ገቴ አሄስተ ጵክል «ሀ አሥ ለገ ምጩሼ ሀንተ ኤ ሀንቴ ግሸ አም ኑ ሀንቶ? 48 ምኬ ን ዸበአይኮ ኡድ አሡኮ ኤሰ ‹ሜስሄኮ› ህድ ኣዴሤሰ። ህኬቴኮ ሮመ ቶረሥት ዮድ ን ሀይለ ዘወን ን አሥተን ኡ በይሴ» ዬይድ ኡ ህዶ። 49 ኡ ግዳፈ ቀያፈ ሱንጌ ዬ ቤራን ከህንቱሴ አፈነ አዴ ማቄስ ዜርስኔን «ህኑን ህ ኤሬ በስ ባሶ። 50 ን አሥ ኡድ ባኔሱሜ ብዝ አሥ ለገ ግሸ ሀይኤስ ብሼሸ ኤ ማቄንኬ ገጾ በይቱወ?» ህድ ኤ ህዶ። 51 ሀ ኤሰ ዬይድ ኤ ዜርዶስ ቤኮፈ ማቁወድኮ ኤ ዬቸ። ዬ ቤራ ከህንቱሴ አፈነ አዴ ኤ ማቁሱኔ ዬሱሰይ አይሁደሥት ግሸ ሀይኤሴ ቡሮ ገረ ህኔሰኮ ካዮ ኤ ዜርዶ። 52 ኤ ሀይኤስ አይሁደሴዎ ኤ ማዾ ባኔ ቤ ጎዶወ ጎዶወ ዬሴ ዎንቶ ነይሽተ ጵክል ብዝ ኦመ መሄሱኮ ኤ ማቅቸ። 53 ዬ ዎንትየፈ አይት ዬሱሰ ዎዼሴ ኡ ኩንዶ። 54 ዬንየፈ አይት ዬሱሰይ አይሁደሥት ግደ ትዽየነ ሀንቴ እንጸዽ የሀፈ ሰሀ ሜለ ደኣ ዬሴ ኤፍሬሜ ከተማ ሀንድ የሀ ቤ ኤሩስቾሽታረ ኤ ዴጮ። 55 አይሁደሥት ገሮ መሰለይ ኡዽ ኤ ዬቸ። ለገ አሥት ገሮ መሰለሜ ቡሮ ሙሴ ዎገኬ ቤምበ ጌሼ ዎገ (2) አልሴሴ ዬሩሰሌሜ ቤ ዉዴፈ ዉዴፈ ኡ ሀንዶ። 56 ኡስን ዎንቶ ሀይለ ዘወ ዬሱሰይ ዮኔሰ ኤዽ ከክስኔ «አም ህኑሴ ኤ ብሼ? ሀልየ ዬሱሰይ ሀ መሰላ ዮተ ኤ ዮኔ?» ዬይድ ዎለ ኡ ኦይጭቸ። 57 ቡሮ ከህንቱሴ አፈነ ማግታረ ፈረሰሥታረይ ዬሱሰ አይኬሴ ኤ ዬሴ ጎዶ ኤሬስ ዬሰአይኮ ኡሱኮ ኦሆሮሰ አሥቱኮ ኡድ ዎሶ ኡ ገርሴቸ።
1 አይሁደ ገሮ መሰለይ ኩሡቴሱሴ ዮድ እዙፍ ዎንቴይ አቴሱኔ ዬሱሰይ ቢተንየ ኤ ሀንዶ። ዬ ከተመይ ሀይቦወፈ ኤ ዴንሴቾ ኣለዘሬይ ኤሳከ ዬቾ ከተመኮ ኤ ማቅቸ። 2 የሀን ቀሜቴ ኤሱሴ ኡ ከሶ። መርተን ቦርሰሴ ሀንትየ እ ዬቸ። ኣለዘሬይ ዬሱሳረን ፌድታረን ቀሜቴ ምየ ኤ ዬቸ። 3 ዬንየከን ማረሜይ ፌደይ ኤሰ ዎርቁቶ ባ ኤ ዎመይ ኦርጄ ማቄ ሽቶ ኤት እ ዮዶ። ዬ ሽቶን ሞዼ ነርዶስየፈዎ ሀንቱቴሴ ብዝ ጸርሙሴ ኤሌሰኮ ኤ ማቅቸ። እስን ዬ ሽቶነ ዬሱሰ ቶኬ እ ትሾ ቤ ቅኖነን እ ኡጮ። ዘዋከ ሽቶይ ኢተነ ኤ ሰይዶ። 4 ኤ ኤሩስቾሽታፈ ብዝ አስቆሮተሥ ይሁደይ ዬሱሰ ገርስ እንገረስ 5 «ሀ ሽቶይ ኩመነ ታፉቴ ለገ ሚዤሼ ዘልኡት ዥእቱሴ አበሱወ እንጉቴ ኤ ዼዶ?» ህድ ኤ ህዶ። 6 ይሁደይ ዬ ኤሰ ኤ ዜርዶስ ዥእቱሴ ኣዴ ቤ ገዋፈ ህግል ማቁወሶ። ሚዤይ ኤሳከ ገዱቴ ስግሬ ቤ አይክቾ ግሸ ዬ ስግርየ ገዱቴ ሚዥየፈ ኤት ሎሴሴ ከይሶ ቤ ማቅቾ ግሸኮ። 7 ዬሱሰን «ሀ እንዶ ዸጉወ! ተ ሞጎ ዎንቴሱኮ ተምበ እ ነዾ። 8 ዥእት ኡድ ዎገ ህኑናረ ዎልኮኮ ኡ ዬሴ። ተንመይ ኡድ ዎገ ህኑናረ ዎልኮ ዬሱወሶ» ዬይድ ኤ ህዶ። 9 ዬንየከን ዬሱሰይ ቢተንየ ዬሴሰ ኤርድ ኢተነ ለገ አይሁደሥት ኡ ዮዶ። ኡስን ዬሱሰ ቤዬሴዎ ኤ ማዾ ባኔ ሀይቦወፈ ኤ ዴንሶ ኣለዘሬን ቤዬሱኮ ኤ ማቅቸ። 10-11 ከህንቱሴ አፈነ ማግት ኣለዘሬይ ሀይቦወፈ ዴንዶሱነ ለገ አይሁደሥት ኡሶ ዸድ ዬሱሰ ኣዴሥቾ ግሸ ኣለዘሬረን ዎዼሴ ኡ ኩንዶ። 12 ሰሀይ ዎንትኔ ገሮ መሰለ ኩሤሴ ዬሩሰሌሜ ዮደ ለገ አሥት ዬሱሰይ ዮውየ ዬሴሰ ኡ ሲዶ። 13 ኤሰ ሞኬሴ ቤ ኩችየ ኢሌ ወሼ አይት ኡ ኬሶ። ቤ ከቶ ኬደይስ «ኩሠይ ማቁወዬ ዎንቶሴ (3)፥ ሱሴ ኤሱሴ ላሥ ሱንሡነ ዮኔሱሴ፥ እስረኤሌ ካቱሴ» ህድ ኡ ኡውቸ። 14 ዬሱሰይ ሀሬ ደርሜ ዴጌስ ኤ ገረ ኤ ኡቶ። ኤ ኡቶስን 15 «ኔኖ ጽዮኔ ከተመ ዬሩሰሌሜ ዠሾፉነ! ሀይ፥ ኔ ካት ሀሬ ደርሜ ገረኮ ኡት ዮውየከ ኤ ዬሴ» ዬይድ ኤ ዲዙቴቾንኬኮ ኤ ማዾ። 16 ኤ ኤሩስቾሽቱሴ ዬ ማዸ አበክት ቡሮ ጌሎ በድ ኤ ዬቸ። ጌዴ ዬሱሰይ ኩሠ ፉለነ ዸድ አፋ ኬሶ ዎገ ዬንየ ዬ ኤስ ኤ ግሸ ኤ ዲዙቶንክየረ ኤሱሴ አሥት መቶንክየረ ኡ ገጾ። 17 ዬሱሰይ ኣለዘሬ ቦሳፈ ጼይድ ሀይቦወፈ ዴንሶንየከ ቤዴቸ አሥት ኡድ ኤ ግሸ ዜርየ ኡ ዬቸ። 18 ዬ ምጩሼ ሀንተ ኤ ሀንቶሰ ቤ ሲዴቾ ግሸ ለገ አሥት ኤሰ ሞኬሴ ኡ ኬሶ። 19 ዬንየከን ፈረሰሥት «ቤወይቴ! አሥት ቤ ኡድነ ኤሱኮኮ ማዾ። አም ሀ ኤ ጌዴ ኑ ሀንቴ?» ዬይድ ዎልኮ ኡ ህቸ። 20 ዬ መሰላከ ዎንቶ ኩሤሴ ዮደስታፈ ብዝ ብዝ ግርከሥት ኡ ዬቸ። 21 ኡስን ገልለ ዉዴ ዬሴ ቤቴሰይደ አሤ ማቄ ፍልጶሴኮ ዮድ «ኑ ላሦ! ኦዴ፥ ዬሱሰኮ ቤዬሴ ኑ ዎርጌ» ህድ ኡ ሽዾ። 22 ፍልጶሴን ዬ ኤሰ ዮድ እንድራሴኮ ኤ ኦቶ። እንድራስየረ ፍልጶስየረይ ሀንድ ዬሱሰኮ ዬ ኤሰ ኡ ኦቶ። 23 ዬሱሰን «አሥ ዬሌ ህድ ህዩተስ ኩሡቴ ዎገይ ኤልኮ ዬሴ። 24 ህኑሴ ተ ኦሄስ ፌቶ ኣዴኮ። ጎሰ ኣፌይ ሰሃ አይሉት ሀይኤ ዼደኮ ቤ ጎሼዎኮ ኤ አቴ። አይሉት ቤ ሀይዾ ጌዴመ ለገ ኣፌኮ ኤ ከጼ። 25 ቤ ዬሶ ኤሄስ ቤ ዬሶኮ ኤ በይሴ። ሀ ሰሀ ገረ ቤ ዬሶ እንጸኤስመይ ኮሎ መክነኮ ኤ ዬሴ። 26 ታሴ ሀንቴሴ ዎርጌስ ዬሰአይኮ ታረ ዮወዬ። ተን ዬሴ ጎዶኮ ኤስን አስ የሀ ኤ ዬሴ። ታሴ ሀንቴስ ዬሰአይኮ ኑወዴይ ኤሰ ኩሠኮ ኤ ኩሤ» ዬይድ ኤ ህዶ። 27 ዬሱሰን «ሀቴ ተ ሙጹሮይ ኢተነኮ ኤ ሆዴሴ። ‹ኑወዴ፥ ሀ ኤሳፈ ተምበ ኬሱወ!› ህድየ ተ ህዬን? ዬይድ ተ ህዮሮሜ ኤሱሜ ተ ዮዶስ ሀ መዸ ዎገሱኮ። 28 ኑወዴ! ዬቦ፥ ኔ ሱንሥ ኩሡቶሮንኬ መሁወ» ዬይድ ኤ ህዶ። ዬ ኤ ጌዴ አፋፈ «ተ ሱንሥ ኩሠ ፉለ ኬንጌንኬ ቤይስኮ ተ ዬሴ፥ ሀቴን አስ ቤይሰኮ ተ ቤይሴ» ዬይድ ህኔ ከቶይ ስንቶ። 29 ዬ ዎጋከን የሀ ዬቸ አሥት ዬ ኤሰ ሲድ በዴይ «ጎጉንሡኮ» ህድ ህዶ፥ ፌድት «ዎንቶ ዎሰሡኮ ኤሱኮ ዜርደ» ህድ ኡ ህዶ። 30 ዬሱሰን «ሀ ከቶይ ኤ ስንቶስ ህኑሜ ባከ ታሜ ማቁወሶ። 31 ሀ ሰሀይ ያኡቴስ ሀቴኮ፥ ሀ ሰሀሴ አፈነ ማገ ማቄ ሁምበዬይ ዉዴ ኬስ ኤ ደፉቴስ ሀቴኮ። 32 ተን ኬደይድ ተ ሱጹቴ ዎጋኮ ኡድ አሤ ሀንኬ ታኮ ተ ጎቼ» ዬይድ ኤ ህዶ። 33 ዬሱሰይ ዬይድ ኤ ዜርዶስ ዋኬይድ ቤ ሀይኤንኬ ኦሄኮ ኤ ማቅቸ። 34 አሥትን «ኑ ዎገ ፍሸሮወ ዲዙቴሴሰ ኑ ሲዴቾሽ ‹ሜስሄይ ኮሎ መክነኮ ኤ ዬሴ› ዬይድ ህኔሰኮ ኤ ማቅቸ። ህኔ ኔን አበሱወ ‹አሥ ዬሌ ህድ ህዩተስ ዎኬ አፋ ኬደይድ ሱጹቴኮ ኤሰ ኤ ዎርጉሴ› ህድ ኔ ህኔስ? ሀ ‹አሥ ዬሌ› ህድ ኔ ህኔስ ኦኔወ?» ህድ ኡ ኦይጮ። 35 ዬሱሰን «ሀቴ ህኑናረ ዎልኮ ፎኤይ ኤ ዬሴስ ኦዼ ዎገሴዎኮ። ጬንቸይ ህ ገረ ዮኔሱሜ ቡሮ ፎኤ ኤ ዬሱኔ ሴኬ ሀንኬ ሀንቱወይቴ። ጬንቻነ ሴኬ ሀንኬ ሀንቴስ አየ ቤ ሀንጌሰ ኤሩወሶ። 36 ፎኤ ነይሼ ህ ማቆሮንኬ ፎኤይ ህኑናረ ዬሱኔ ኤሰ ኣዴሡወይቴ» ዬይድ ኤ ህዶ። ዬሱሰይ ዬይድ ኡሱሴ ቤ ዜርዶ ጌዴ የሀፈ ሀንድ አሥት ደኣፈ ኤ አርቶ። 37 አይሁደሥት ዬሱሰይ ሀ ኤ ጌዴ ምጩሼ ሀንተ ኡ ቡሮ ኤ ሀንተኮን ኤሰ ኣዴሤ ኡ እንጸዾ። 38 ዬይድን ማቄሴ ኤ ደንደዾስ ካየሥ እሰየሴይ «ላሦ! ኔ ግሸ ኑ ኦቶሰ ኦኔነ ‹ኣዴኮ› ህድ ህደ? ዎንቶ ኦሰይ ኦኔሱነ አዴይዶ?» ዬይድ ኦቴቾ ከቶይ ኣሎሮንኬኮ። 39-40 እሰየሴይ አስ «ኡ ኣፌይ ቤወንኬ ኤ መቶ፥ ኡ ሙጹሮ ወሼይ ስወንኬ ኤ መቶ። ሀ ኤ ግሸ ኡ ኣፌይ ቤወሶ፥ ቤ ሙጹሮነን ገጹቱወሶ፥ ተ ሎሉሶሮሱሜ ሀንኬ ማቁቱወሴ» ዬይድ ኤ ህዶንኬ ኣዴሤሴ ደንደኡቶ ባሶ። 41 እሰየሴይ ኤሱሜ ዬይድ ህዬሴ ኤ ደንደዾስ ሜስሄ ኩሠ ፉለ ቤ ቤዶ ግሸኮ። ሜስሄሱኮ ኤ ዜርዶ። 42 ዬይድ ማቁወዬ ባከ ለገ አይሁደሥት አፈነ ማግት ዬሱሰ ኡ ኣዴሶ። ፈረሰሥት ጵክሎ ዘዋፈ ቤምበ ኡ ኬሴሱሜ ዠሽ ቤ ኣዴሶንኬ አዳ ዜሬ ኡ እንጸዾ። 43 ኡ እንጸዾስን ዎንቶኮፈ ማቄ ኩሠሜ አሡኮፈ ማቄ ኩሠ ቤ ኤቶ ግሸኮ። 44 ዬሱሰን ቤ ከቶ ኬደይስ «ተምበ ኣዴሤስ ተምበዎ ኤ ማዾ ባኔ ተምበ አንሰሴን ኣዴሠኮ ኤ ኣዴሤ። 45 ታ ቤየ ዬሴስ ተምበ አንሰሴን ቤየኮ ኤ ዬሴ። 46 ተምበ ኣዴሤስ ጬንቻ ኤ አቱወንኬ ተን ፎኤ ማዽ ሀ ሰሀ ገረ ዮድኮ ተ ዬሴ። 47 ሀ ሰሀ ገረ ዬሴ አሥተ ሎሉሴሴ ተ ዮዶሰ ባከ ያኤሴ ተን ዮዶ ባሶ። ተ ኦሄሰ ሲድ ኤሱነ ሀንቱወስ ዬሰአይኮ ዬ ኤ ገረ ያኤስ ተምበ ማቁወሶ። 48 ተምበ እንጸኤስ ገራረ ተ ኦቶሰ ኤኩወስ ገራረ ያኤሰኮ ዬሰ። ተ ኦቶ ከቶኮ ኤሰ ኣልጭረ ዎንቴ ያኤሰ። 49 ተን ታሴ ተ አዴቶነ ተ ዜርዶይ ባሶ። ‹ዬይድ ኦሁወ፥ ዬይድ ዜሩወ!› ህድ ተምበ ዎሰስ ተምበ አንሰ ኑወዴኮ። 50 ኤ ዎሴ ዎሶን ኮሎ መክነ ዬሶወ ኣንድ ኤሉሴንኬ ኤረኮ ተ ኤሬ። ሀ ኤ ግሸ ሀ ተ ዜሬሰ አፋሴ አዴይ ታኮ ኦቶንኬኮ ተ ዜሬ» ዬይድ ኤ ህዶ።
1 ገሮ መሰለይ ኡዽ ኤ ዬቸ። ዬሱሰይ ሀ ሰሀ ገረፈ ዸድ አፋሴ አዴኮ ቤ ሀንጌ ዎገይ ኤሎሰ ኤርድ ቤ ዬቾ ግሸ ሀ ሰሀ ገረ ዬቸሽተ ቤሴ ማዸስተ ኤህየ ኤ ዬቸ፥ ኣልጭረ መኮን ኡሶ ኤ ኤቶ። 2 ዬሱሳረ ኤ ኤሩስቾሽታረይ ቀሜቴ ምየ ኡ ዬቸ። አስቆሮተሤ ማቄ ስሞኔ ነእ ይሁደ ሙጹሮወ ገርስ ዬሱሰ ኤ እንጎሮንኬ ሁምበዬይ መሦ ጌልስ ኤ ዬቸ። 3 ዬሱሰን አፋሴ አዴይ ኤሱሴ ኡድ በስ ገረ አዴቶ እንዶንክየረ ዎንቶይ ኤሰ አንስኔ ቤ ዮዶንክየረ ዬይድዎ ኤሱኮ ቤ ሀንጌንክየረ ኤ ኤርቸ። 4 ህኔ ቀሜቴ ሙችኔ ዴንድ ቤ ማኦ ኤ ገዶ። ዱንገ ኤት ቤ ኤልፋ ኤ ጻጾ። 5 ዬ ኤ ጌዴ ሰንቅየ ዋሤ ጉስ ቤ ኤሩስቾሽት ቶኬ ሾሄ ኤ ጌሎ። ቤ ኤልፋ ጻጹቴቸ ዱንገነ ኡ ቶኬ ኤ ኡጮ። 6 ዬሱሰን ስሞኔ ሱንጌ ጴጽሮሴ ቡሮ ኤ ዮኔ «ሀሀኤ፥ ላሦ! ኔምባ ተ ቶኬ ሾሄሰ?» ህድ ኤ ህዶ። 7 ዬሱሰን «አበ ሀንትየ ተ ዬሴሰ ሀቴ ኔን ኤሩወነኮ፥ ቡሮ ገረመ ኤረኮ ኔ ኤሬ» ህድ ኤ ህዶ። 8 ጴጽሮሴን «ኔን ፌቶ ተ ቶኬ ሾሁወነኮ» ህድ ህዶ። ዬሱሰን «ተን ኔ ቶኬ ሾሄ ዼበአይኮ ታረ ዎልኮ ብዜቶ ኬንጉወነኮ» ህድ ኤ ህዶ። 9 ዬንየን ጴጽሮሴይ «ላሦ! ቶኬዎ ኤ ማዾ ባኔ ዬቦ ተ ኩቼን ተ ቅኖን ሾሁወ!» ህድ ኤ ህዶ። 10 ዬሱሰን «ሾሁቴሴ አሥ ኤ ገረይ ኡድነ ጌሼ ኤ ማቄ ግሸ ቶኬ ባከ ፌደ ሾሄ ዎርጉሱወሶ። ኡድ ማቄ ዼደኮን ህኑን ጌሹኮ» ዬይድ ኤ ህዶ። 11 ዬሱሰይ ቤምበ ገርስ እንጌስ ኦኔ ማቄንኬ ቤ ኤርቾ ግሸኮ «ኡድ ማቄ ዼደኮን ህኑን ጌሹኮ» ህድ ኤ ህዶስ። 12 ኡ ቶኬ ቤ ሾቶ ጌዴ ቤ ማኦ ማዽ ሴኬ ቤ ጎዶወ ኤ ኡቶ። ኡሶን «አበ ህኑሴ ተ ሀንቶሰ ኤርዶይቱወ? 13 ህኑን ‹ኤሩሴዮ! ኑ ላሦ!› ህድኮ ሂኔ። ተምበ ዬይድ ህ ጼይጌስ ኣዴኮ። ተን ኣዴ ህኑምበ ኤሩሴሰኮ፥ ኣዴ ህ ላሡኮ። 14 ዬቦ፥ ተን ህኑምበ ኤሩሴሳረ ህ ላሣረ ማቅችኔ ህ ቶኬ ተ ሾቶ ጌዴ ህኑንን ዎል ቶኬ ሾሄኮ ኤ ዎርጉሴ። 15 ተን ህኑሴ መቶንኬ ዬይድዎ ህኑንን ዎሉሴ መሆሮንኬ ህኑምበ ተ ሀንተነ ቤይስኮ ተ ዬሴ። 16 ህኑሴ ተ ኦሄስ ፌቶ ኣዴኮ። ማለይ ላሡሜ ገሩወሶ፥ ዎሱቴስ ዎሴሱሜ ገሩወሶ። 17 ሀ ኤሰ ኤርድ ኤት ሀንተ ገረ ህ ፌይሸኮ ሱዙቴሴስተኮ ህ ማቄ። 18 ሀ ዜሬ ተ ዜሬስ ህ ኡድ ግሸ ማቁወሶ። ኦኔ ተ ጸርዶንኬ ኤረኮ ተ ኤሬ። ተን ጸሬሴ ባከ ሀይለ ፍሸሮወከ ‹ተ ቦረ ሙደሱኮ ተ ገረ ኢል ዴንደ› ዬይድ ኤ ህዴቾሽ ኣሌኮ ኤ ዎርጉሴ። 19 ኤ ኣሎ ጌዴ ኦኔ ተ ማቄንኬ ኤርድ ታ ህ ኣዴሦሮንኬኮ ሀ ኤስ ማቄሱሜ ኤ ቡሮ ህኑሴ ተ ኦሄ። 20 ህኑሴ ተ ኦሄስ ፌቶ ኣዴኮ። ተ አንሶሰ ‹ኣዴኮ› ህድ ኤኬስ ተምበኮ ኤ ኤኬ፥ ተምበ ‹ኣዴኮ› ህድ ኤኬስ ተምበ አንሰሴን ኤፈኮ ኤ ኤኬ» ዬይድ ኤ ህዶ። 21 ዬሱሰይ ዬይድ ቤ ዜርዶ ጌዴ ቤ ገዋነ ኢተነ ሆድ «ህኑሴ ተ ኦሄስ ፌቶ ኣዴኮ። ህኑከፈ ብዝኮ ተምበ ገርስ እንጌሰ» ህድ አዱስ ኤ ኦቶ። 22 ኤ ኤሩስቾሽት ቤከፈ ኦኔሴ ኤ ዜርዶንኬ ኤሬ ዼድ ዎል ኣፍየ ኡ ቤዶ። 23 ዬሱሰይ ኤህቾ ብዝ ኤ ኤሩስቾሽታፈይ ዬሱሰ ደኣከ ኡትየ ኤ ዬቾይኔ 24 ስሞኔ ሱንጌ ጴጽሮሴይ ዬ ኤሰ ኦኔሴ ኤ ዜርዶንኬ ኤ ኦይጮሮሰ ቀንእ ኤ ኦቶ። 25 ህኔ ቤ ኑነ ዬሱሰ ወሼኮ ሺሽ «ላሦ፥ ኦኔነ?» ህድ ዬ አሥ ኦይጮ። 26 ዬሱሰን «ሀ ኡታከ ቦረ ጨድ ኤሰ ተ ባሩሤ አሡኮ» ዬይድ ኤ ህዶ። ዬ ኤ ጌዴ ቦረ ኡታ ጨድ አስቆሮተሤ ማቄ ስሞኔ ነእ ይሁደ ኤ ባሩሶ። 27 ይሁደን ባርዶ ጌዴ ሁምበዬይ ኤሱከ ኤ ጌሎ። ዬሱሰን ይሁደኮ «ሀንቴሴ ኔ መሴሴሰ ኡኬ ሀንቱወ» ህድ ኤ ህዶ። 28 ዬሱሰይ አበሴ ዜርዶንኬ የሀ ተቶወ ኡቴቸ ፌዴስቱሴ ጌሎ ባሶ። 29 ብዝ ብዝ ኤ ኤሩስቾሽት ይሁደይ ሚዤ አይኬሰ ማቅቾ ግሸ «ሀ መሰለሴ ዎርጉሴ አበኮ ዎንጉወ!» ኦኦይኔ «ዥእቱሴ ሚዤ እንጉወ!» ዬይድ ኤ ህዶሰኮ ኡሶ ኤ ብሼቸ። 30 ይሁደይ ዬ ቦረ ቤ ባርዶንኬዎ ኬስ ዸድ ሀንዶ። ሰሀን ቀመ ማቅቸ። 31 ይሁደይ ያፈ ኬስ ሀንዶ ጌዴ ዬሱሰይ «ሀቴ አሥ ዬሌ ህድ ህዩተስ ኩሡትኮ ኤ ዬሴ። ዬ አሥ ዬሌ በዴነ ዎንቶይ ኩሡትኮ ዬሴ። 32 ዎንቶይ ኤ በዴነ ኩሡቶአይኮ ቤሴ ኤሰ ኩሠኮ ኤ ኩሤ። ኤ ኩሤስን ዴጩወሾ። 33 ተ ነይሾ! ህኑናረ ዎልኮ ለገ ዴጩወሾ። ተምበ ዎርጎኮ ህ ዎርጌ፥ አይሁደ አፈነ ማግቱሴ ‹ተን ሀንጌ ጎዶ ህኑን ሀሜሴ ደንደኡወይተኮ› ዬይድ ተ ዜርዶንኬኮ ሀቴን ህኑሴ ዬይድዎ ተ ዜሬ። 34 ‹ዎለ ኤሁወይቴ› ህድኮ ህኑሴ ክሌ ዎሶ ተ ኦሄ። ተን ህኑምበ ኤቶንኬ ህኑንን ዎለ ኤሁወይቴ። 35 ዎለ ህ ኤሀአይኮኮ ተ ኦጌ ሀንጌስተ ህ ማቄንኬ አሥ ኡድ ኤሬ» ዬይድ ኤ ህዶ። 36 ዬ ኤ ጌዴ ስሞኔ ሱንጌ ጴጽሮሴይ ዬሱሰ «ላሦ፥ አይ ኔ ሀንጌ?» ህድ ኤ ኦይጮ። ዬሱሰን «ተ ሀንጌ ጎዶ ሀቴ ታረ ሀሜሴ ደንደኡወነኮ፥ ሀንነመ ተ ጌዴ ዮተኮ ኔ ዮኔ» ህድ ኤ ህዶ። 37 ጴጽሮሴን «ላሦ፥ አሜ ሀቴ ኔረ ሀሜሴ ተ ደንደኡዋኔ? ፌቶ ኔሜ ህድ ህስኔ ተምበ ገርስ እንገኮ ተ እንጌ» ህድ ኤ ህዶ። 38 ዬሱሰን «ኔን ታሜ ህስኔ ኔምበ ገርስ እንጋ ኔ እንጌ? ኔሴ ተ ኦሄስ ፌቶ ኣዴኮ፥ ሉኮይ ኦሎ ባኔኮ ሀይዝ ዎገ ታ ‹ተን ኤሰ ኤሩወሶ› ህድ ኔ ህኔ» ህድ ኤ ህዶ።
1 ዬሱሰን ሴኬ «ህ ሙጹሮይ ሆዶፌ! ዎንቶ ኣዴሡወይቴ ተምበን ኣዴሡወይቴ። 2 ኑወዴ ዘዋከ ኤሰ ዬሱሶ ለገ ጎዶኮ ዬሰ። ዬይድ ማቄ ኤ ዼደኮመ ‹ኤሰ ህ ዬሴ ጎዶኮ ነቅየ ተ ሀንጌ› ህድ ህወድኮ ተ ዬቸ። 3 ሀንድ ጎዶ ህኑሴ ተ ነዾ ጌዴ ተ ዬሴ ጎዶ ታረ ህ ዬሶሮንኬ አስ ዮድኮ ህኑምበ ተ ኣንጌ። 4 ኤሰ ተ ሀንጌ ጎዶ ኣንድ ኤሉሴ ኦጌ ኤረኮ ህ ኤሬ» ዬይድ ኤ ህዶ። 5 ቶማሴን «ላሦ! አየ ኔ ሀንጌሰ ኤሩወንጽኮ። ዋንስዉ ኦጌን ኤሬሴ ኑ ደንደኤ?» ዬይድ ኤ ኦይጮ። 6 ዬሱሰን «ኦጌይ፥ ኣዴይ፥ ዬሶይ ተምበኮ። ተ በዴነ ባከ ኑወዴኮ ዮኔስ ባሶ። 7 ተምበ ኤርዴሴሰ ማዸኮ ኑወዴን ኤረኮ ህ ኤራኔ። ሀትየፈ አይት ኤሰ ኤረኮ ህ ኤሬ፥ ቤድንኮ ህ ዬሴ» ዬይድ ኤ ህዶ። 8 ፍልጶሴን «ላሦ! አፋሴ አዴ ኑምበ ቤይሱወ፥ ኑሴ ኤለኮ ኤ ኤሌ» ህድ ኤ ህዶ። 9 ዬሱሰን «ዶ ፍልጶሴ! ሃንጽ ኣሎ ታረ ዎልኮ ኔ ዬሶ መኮ ተምበ ኤርዶ ባኑወ? ተምበ ቤደስ ኑወዴን ቤድኮ ኤ ዬሴ። ህኔ ወይ ኔን ‹አዴ ኑምበ ቤይሱወ!› ህድ ኔ ህኔ? 10 ተን ኑወድየከ ኑወዴይ ታካከ ዬሴሰ ‹ኣዴኮ› ህድ አሜ ኔ ህዋኔ? ህኑሴ ኦህየ ተ ዬሴሰ ታኮፈ ኦህየ ባሶ። ተ ኦሆሮንኬ መህየ ዬሴስ ታካ ዬስኔ ሀንትየ ዬሴ ኑወዴኮ። 11 ተን ኑወድየከ ኑወዴይ ታካከ ዬሴሰ ‹ኣዴኮ› ህድ ህዬኮ ህኑምበ ኤ ዎርጉሴ። ፌደይ አቶአይኮን ተ ሀንተነ ‹ኣዴኮ› ህድ ህወይቴ። 12 ህኑሴ ተ ኦሄስ ፌቶ ኣዴኮ። ተምበ ኣዴሤስ ተን ሀንቴ ሀንተ ኤስን አስ ሀንተኮ ኤ ሀንቴ። ተን ዸድ ኑወዴኮ ሀንጌ ግሸ ፌቶ ሀ ኤሱሜ ገሬሰን ሀንተኮ ኤ ሀንቴ። 13 ኑወዴ ኩሠ ፉለይ ዬሌነ ቤንቶሮንኬ ተ ሱንሡነ ህ ሽኤሰ ኤ ኡድነ መሆኮ ተ መሄ። 14 አበ ኤ ማቆአይኮን ተ ሱንሡነ ህ ሽኤሰ ተን መሆኮ ተ መሄ» ዬይድ ኤ ህዶ። 15 ዬሱሰን ሴኬ «ተምበ ኤሀአይኮኮ ተ ዎሶ ህ ከኬ። 16 ተን ኑወዴ ሽኦኮ ተ ሽኤ፥ ኤስን ህኑናረ ዎልኮ ኮሎ መክነ ዬሴ ህኑምበ ምንሠረሴ ፌደኮ ህኑሴ ኤ እንጌ። 17 ዬ ኤስን ኣዴ ኤሩሴ አያነ ጌሹኮ። ሀ ሰሀ አሥት ኤሰ ቤ ቤወ ግሻረ ቤ ኤሩወ ግሻረ ኤሰ ኤፌሴ ደንደኡወሶ። ህኑንመይ ህኑናረ ዎልኮ ኤ ዬሴ ግሻረ ህኑካከ ዬሶ ኤ መሄ ግሻረ ኤሰ ኤረኮ ህ ኤሬ። 18 ህኑምበ ሀዴ ባሎኬይስ ምኬ ዸጉወሶ፥ ህኑኮ ዮተኮ ተ ዮኔ። 19 ኦዼ ዎገ ጌዴ ሀ ሰሀ ገረ ዬሴ አሥት ሴኬ ተምበ ቤወሶ። ህኑንመይ ቤተኮ ህ ቤኔ፥ ተን ኤንአ ማቄ ግሸ ህኑንን ኤንአኮ ህ ማቄ። 20 ተን ኑወድየከ ህኑንን ታካከ ተንን ህኑካከ ዬሴንኬ ዬ ዎንቴኮ ህ ኤሬ። 21 ተ ዎሶ ኤት ሀንተ ገረ ፌይሼሽ ዬ ኤስ ተምበ ኤሄሰኮ። ተምበ ኤሄሰ ኑወዴን ኤሀኮ ኤ ኤሄ። ተንን ዬ ኤሰ ኤሀኮ ኤሄ። ኤሱሴ ተምበን ቤይሰኮ ተ ቤይሴ» ዬይድ ኤ ህዶ። 22 ብዝ አስቆሮተሤ ማቁወ ፌዴ ይሁደይ «ላሦ! ሀ ሰሀ ገረ ዬሴ አሥቱሴ ኤ ማዾ ባኔ ኑሴዎ ኔምበ ኔ ቤይሴስ አበሱወ?» ህድ ኤ ኦይጮ። 23 ዬሱሰን «ተምበ ኤሄስ ተ ኦሄሰኮ ኤ ከኬ፥ ኑወዴን ኤሰ ኤሀኮ ኤሄ። ኑንን ኤሱኮ ዮድኮ ኤሳረ ዎልኮ ኑ ዬሴ። 24 ተምበ ኤሁወስ ተ ኦሄሰ ከኩወሶ። ሀ ተ ኦሁሱኔ ስየ ህ ዬሴስ ታኮፈ ማቁወሶ ተምበ አንሰ ኑወዴኮፈኮ። 25 ሀቴን ህኑናረ ዬስኔ ሀ ኤሰ ህኑሴ ኦትኮ ተ ዬሴ። 26 ኑወዴይ ተ ሱንሡነ ህኑሴ አንሤ ህኑምበ ምንሤ አያነ ጌሹኮ ህኑምበ ኡድ ኤሩሴሰ። ህኑሴ ተ ዜርዶሰ ኤ ኡድነ ህኑምበ መሡሰኮ ኤ መሡሴ። 27 ሞዼቴይ ህኑካከ ዬሶሮንኬኮ ህኑሴ ተ ዸጌ። ታኮፈ ኬሴ ሞዼቴኮ ህኑሴ ተ እንጌ። ተን ህኑሴ እንጌ ሞዼቴይ ሀ ሰሀይ ህኑሴ እንጌ ሞዼቴ ብሸ ማቁወሶ። ህ ሙጹሮይ ሆዶፌ፥ ዬይድዎን ዠሾፍተ። 28 ‹ዸድኮ ተ ሀንጌ፥ ማዽኮ ህኑኮ ተ ዮኔ› ዬይድ ህኑኮ ተ ኦቴቾሸ ሲድኮ ህ ዬሴ። ተምበ ኤሄሰ ማዸኮ ኑወዴኮ ተ ሀንጌሱነ መገኮ ህ መጋኔ። ዬ ኤስን ኑወዴኮ ታሜ ገሬሰ። 29 ሀ ኤስ ማቆሮ ዎጋ ‹ኣዴኮ› ህድ ህዮሮ ግሸኮ ሀይ ኤ ማቄሱሜ ቡሮነ ህኑኮ ተ ዜርዶ። 30 ሀ ሰሀሴ አፈነ ማገ ማቄ ሁምበዬይ ዮኔ ግሸ ሀ ኤ ጌዴ ሴኬ ህኑናረ ዎልኮ ለገ ዜሩወሶ። ኤስን ተ ገረ አበን አዴቶ ኬንጉወሶ። 31 ተን ሀንቴስመይ ኑወዴይ ተምበ ዎሶንኬኮ። ዬ ኤሱነኮ ኑወዴ ተ ኤሄሰ ሀ ሰሀ ገረ ዬሴ አሥት ኤሬ። ዴንዱወይቴ ዸድ ኑ ሀሜሴ» ህድ ኤ ህዶ።
1 ሴኬን ዬሱሰይ «ኣዴ ዌይኔ ዙሴ ህድ ህዩቴ ዌይኔ ዙስ ተምበኮ፥ ዬ ዙሳዴይ ኑወዴኮ። 2 ተ ገረ ዬስኔ ኣፌ ከጹወ ሀንግተ ክርድኮ ዎረ ኤ ደኬ። ኣፌ ከጼስተመ ለጉስ ኤ ከጾሮንኬኮ ቡርስ ሀቱስ ኤ ነቄ። 3 ሀ ተ ዜርዶ ዜርየፈ ዴንደሱነ ሀቴ ህኑን ነቁቴሴ ጌሽተኮ። 4 ተ ገረፈ ሸሁቶፍተ፥ ተንን ህ ገረፈ ሸሁቱወሶ። ሀንጌይ ዌይኔ ገረ ዼደኮ ቤ ጎሼ ኣፌ ከጼሴ ደንደኡወሶ። ዬይድዎ ህኑን ተ ገረ ዼበአይኮ ኣፌ ከጼሴ ደንደኡወይተኮ። 5 ተን ዌይኔ ዙሱኮ፥ ህኑን ሀንግተኮ። ኦኔን ታከ ዬሰአይኮ ተንን ኤሱካከ ዬሰአይኮ ዬ ኤስ ለገ ኣፌኮ ኤ ከጼ። ዬ ኤስን ታረ ባከ አበን መሄሴ ደንደኡወይተኮ። 6 ታከ ዬሱወስ ኦኔን ሀዴ ሀንጌይ ዉዴ ደፉቴንኬ ደፉትኮ ኤ ሜሌ። ዬ ኤ ብሸ ሀንግት ሀንኬ ብዝ ጎዶ ጵክሉትኮ ተማ ደፉት ኤ ሜጉቴ። 7 ታከ ህ ዬሰአይኮ ተ ኦሄሰ ህኑከ ገዴሰ ህ ማቆአይኮ ህ ዎርጌ አበኮ አበን ኤ ማቆአይኮ ሽኡወይቴ። ህ ዎርጌንኬ ማቆኮ ኤ ማቄ። 8 ለገ ኣፌ ህ ከጸኮወረ ታረ ዬሴስተ ህ ማዸኮወረ ዬ ኤሱነኮ ኑወዴይ ኤ ኩሡቴ። 9 ኑወዴይ ተምበ ኤቶንኬዎኮ ተንን ህኑምበ ኤቶ። ተ ኤሀ ገረፈ ሸሁቶፍተ። 10 ተን ኑወዴ ዎሶ ከቶንኬ ኤ ኤሀነ ተ ዬሴንኬ ህኑን ተ ዎሶ ከፈአይኮ ተ ኤሀ ገረፈ ሸሁቱወይተኮ። 11 ሀ ኤሰ ህኑሴ ተ ኦቶስ ህኑሴ ተ እንዶ መገነ ህ መጎሮንክየረ ህ መገይ ፈጬቴ ኬንጉወሰ ማቆሮንክየረኮ። 12 ህኑሴ ተ ኦሄ ዎሶይ ተን ህኑምበ ኤቶንኬ ሴኬ ሀንኬ ዎለ ህ ኤሆሮንኬኮ። 13 ቤ ኤሄ አሥቱሜ ህስኔ ቤምበ ገርስ ሀይቦሴ እንጌሜ ገሬ ኤሀ ኬንጌስ ኦኔን ባሶ። 14 ተን ህኑምበ ዎሶሰ ኡድ ሀንተአይኮ ህኑምበ ‹ተ ኤሄ አሥተኮ› ህድኮ ተ ህኔ። 15 ማልት ላሥ አበ ኤ ሀንቴሰ ኤሩወ ግሸ ሀ ኤ ጌዴ ሴኬ ማልተ ህድ ህኑምበ ህወሶ። ኑወዴ ገረፈ ተ ሲዶሰ ኤ ኡድነ ህኑምበ ኤሩስ ተ ዬሴ ግሸ ህኑምበ ‹ተ አሥተ› ህድ ህድኮ ተ ዬሴ። 16 ተን ህኑምበ ጸርዶሰ ባከ ህኑን ተምበ ጸርዶበይተኮ። ሀንድ ኣፌ ህ ከጾሮንክየረ ዬ ህ ከጼ ኣፌይ ዬሴሰ ማቆሮንክየረኮ ህኑምበ ተ ማጌሶ። ዬ ኤ ግሸ ተ ሱንሡነ ኑወዴይ ህ ሽኤ አበኮ አበ ኤ ማቆአይኮን ህኑሴ እንገኮ ኤ እንጌ። 17 ህኑምበ ተ ዎሴስ ሴኬ ሀንኬ ዎለ ህ ኤሆሮንኬኮ» ዬይድ ኤ ህዶ። 18 ሴኬን ዬሱሰይ «ሀ ሰሀ አሥት ህኑምበ እንጸአይኮ ህኑሜ ቡሮ ተምበ ኡ እንጸዼቾንኬ ኤሩወይቴ። 19 ሀ ሰሃፈ ህ ማዸኮ ሰሀይ ቤሱኬኮ ህኑምበ ኤ ኤሃኔ። ሀ ሰሃፈ ህ ማቁወ ግሻረ ተን ህኑምበ ሀ ሰሀ ገረፈ ሸት ጸርዶ ግሻረኮ ሀ ሰሀ አሥት ህኑምበ ኡ እንጸኤ። 20 ‹ማለይ ላሡሜ ገሩወሶ› ህድ ተ ዜርዴቾሸ ገጹወይቴ። ተምበ ዋዬ ቤይሴሶ ህኑምበን ዋዬ ቤይሰኮ ኡ ቤይሴ። ተ ከቶ ከቴሶ ህ ከቶን ከፈኮ ኡ ከኬ። 21 ተምበ አንሰሴ ቤ ኤሩወ ግሸኮ ተምበ ህ ኣዴሤሱነ ሃንጾ ኡድ ህ ገረ ኡ ሀንቴ። 22 ተን ኡሱሴ ዮድ ዜሬ ዼደኮ ጩቦ ኡሱሴ ማቁወድኮ ኤ ዬቸ። ሀቴመ ቤ ጩቦሴ ኦት ቤ አቴሰ ኬሙቱወሶ። 23 ተምበ እንጸኤስ ኑወዴን እንጸአኮ ኤ እንጸኤ። 24 ፌዴ አሥ ሀንቶ ባ ሀንተ ኡ ግዳ ሀንቴ ተ ዼደኮ ጩቦ ኡሱሴ ማቁወድኮ ኤ ዬቸ። ሀቴመ ሃንጽ ምጩሼ ሀንተ ቤድ ገድ ኑወዴን ተምበን እንጸዽኮ ኡ ዬሴ። 25 ሀ ኤስን ዬይድ ማዾስ ኡ ዎገ ፍሸሮወ ‹ተ ሀንቶይ ባኔ ምኬዎ ተምበ ኡ እንጸዾ› ዬይድ ዲዙተ ከቶይ እቶሮሰኮ። 26 ኑወዴኮፈኮ ህኑምበ ኣዴ ኤሩሰረ አያነ ጌሼ ህኑሴ ተ አንሤ። ዬ ኑወዴኮፈ ኬስ ዮኔስ ህኑምበ ምንሤስ ቤ ዮኔ ዎጋከ ተ ግሸኮ ኤ ዜሬ። 27 ህኑን አስ ቡሮወፈዎ አይት ታረዎ ህ ዬቾሹነ ተ ግሸ ዜረኮ ህ ዜሬ» ዬይድ ኤ ህዶ።
1 ሴኬን ዬሱሰይ «ሃንጾ ኡድ ህኑሴ ዜሬሴ ተ ደንደዾስ ህ ኣዴሦ ገረፈ ኡንዶፍተ ህድኮ። 2 አሥት ኡሳረ ብዜቶ ህ ኬንጉወንኬኮ ጵክሎ ዘውታፈ ህኑምበ ኡ ኬሴ። ፌቶ ህኑምበ ዎዼስ ኡድ ሀዴ ዎንቶ መጉሴ ሀንተ ሀንቴኬይስ ኡ መሤ ዎገኮ ዮኔሰ። 3 ሃንጾ ኡድ ኡ ሀንቴስ ኑወዴ ኦኦይኔ ተምበ ቤ ኤርዶ ባ ግሸኮ። 4 ሀ ኤሰ ህኑሴ ተ ዜሬስ ዬ ኤስ ማቆሮንየከ ህኑሴ ተ ዜርዶሰ ገጽ ክሌ ኤ ማቄሱሜ ህ ኤሮሮሰኮ። ሀ ኤ ቡሮ ሃንጾ ህኑሴ ዜሬ ተ ዼዴቾሽ ህኑናረ ዎልኮ ተ ዬቾ ግሸኮ» ዬይድ ኤ ህዶ። 5 ሴኬን ዬሱሰይ «ሀቴመ ተምበ አንሴቻሹኮኮ ዸድ ተ ሀንጌ። ህ ግዳፈ ‹አይ ኔ ሀንጌ?› ህድ ተምበ ኦይጬሽ ባሶ። 6 ሀ ኤሰ ተ ዜርዶ ግሸመ ኢተነኮ ህ ህግሌሴ። 7 ተንመይ ህኑሴ ኦሄስ ኣዴኮ። ሀሜ ተ ዼደኮ ህኑምበ ምንሤስ ህኑኮ ዮዋ ግሸ ተ ሀሜይ ህኑሴ ገርዴሴ ሞዼኮ። ተ ሀንዶ ጌዴ ኤሰን ህኑኮኮ ተ አንሤ። 8 አያነ ጌሽ ቤ ዮዶ ጌዴ ጩቦ ኡ ኬንጌንኬ፥ ዎንቶ ቡሮ ግዞ ኡ ማቁወንኬ፥ ኡ ገረ ኤ ያኡቴንኬን ሀ ሰሀ ገረ ዬሴ አሤ ኤ ኤሩሴ። 9 ጩቦ ግሸ ኤ ኤሩሴስ ተምበ ኣዴሤ ኡ ዼዶስ ኡሱሴ ጩቦ ኤ ማቄንኬኮ። 10 ግዜቴ ግሸ ኤ ኤሩሴስ አዴኮ ተ ሀንጌሳረ ሀ ኤ ጌዴ ሴኬ ተምበ ህ ቤወሳረኮ። 11 ያአ ግሸ ኤ ኤሩሴስ ሀ ሰሀሴ አፈነ ማገ ማቄ ሁምበዬይ ያኡቶሰኮ። 12 ዬቦ ለገኮ ህኑሴ ተ ዜሬ ዜሬይ ዬቸ፥ ሀቴመ ህኑሴ ዴጸኮ ኤ ዴጼ። 13 ኣዴ ኤሩሴ አያነ ጌሽ ቤ ዮኔ ዎጋከ ኡድ ኣድየኮ ህኑምበ ኤ ዱርኬ። ዬ ኤስን አያነ ጌሽን ቤኮፈ ዜሩወሶ፥ ቤ ሲኔሰዎኮ ኤ ዜሬ። ቡሮ ገረ ማቄሰኮ ህኑኮ ኤ ኦሄ። 14 ተ መሦወፈ ኤት ህኑሴ ኤ ዜሬ ግሸ ተምበ ኩሠኮ ኤ ኩሤ። 15 ኑወዴሴ ማቄስ ኡድነ ታሱኮ። ‹ታሴ ማቄሳፈኮ ኤት ህኑኮ ኤ ዜሬ› ህድ ተ ህዶስ ዬ ኤ ግሸኮ» ዬይድ ኤ ህዶ። 16 ሴኬን ዬሱሰይ «ኦዼ ዎገ ጌዴ ተምበ ቤወይተኮ። ዬይድዎ ኦዼ ዎገ ጌዴን አስ ተምበ ቤተኮ ህ ቤኔ» ዬይድ ኤ ህዶ። 17 ኤ ኤሩስቾሽታፈ ብዝ ብዝት «ሀ ‹ኦዼ ዎገ ጌዴ ተምበ ቤወይተኮ። ዬይድዎ ኦዼ ዎገ ጌዴን አስ ተምበ ቤተኮ ህ ቤኔ› ዬይድ ኤ ህዶሳረ ‹ኑወዴኮኮ ዸድ ተ ሀንጌ› ህድ ሀ ኑሴ ኤ ዜርዶሳረይ አበን? 18 ሀ ‹ኦዼ ዎገ ጌዴ› ዬይድ ኤ ህዶ ዜሬይ አበን? ኤ ዜርዶስ ኑሴ ጌሎ ባሶ» ዬይድ ዎለ ሴኬ ሀንኬ ኡ ኦይጭቸ። 19 ዬሱሰን ቤምበ ኦይጬሼ ኡ ህኔሰ ኤርድ ኡሱኮ «ሴኬ ሀንኬ ዎለ ሀ ህ ኦይጬሽ ‹ኦዼ ዎገ ጌዴ ተምበ ቤወይተኮ። ዬይድዎ ኦዼ ዎገ ጌዴን አስ ተምበ ቤተኮ ህ ቤኔ› ዬይድ ህኑሴ ተ ህዶሱወን? 20 ህኑሴ ተ ኦሄስ ፌቶ ኣዴኮ። ህኑን ህ ዬኬ፥ ህ ቶሼ፥ ሀ ሰሀ አሥትመይ መገኮ ኡ መጌ። ህኑን ህ መዹንጌ፥ ህ ህግሌ፥ ህ ህግልሰመይ መጋኮ ኤ አርቴ። 21 ብዝ እንዶይ እ ዬሌ ዎገይ ኤሎይነ ዜርሶነ ኢተነኮ እ መዹንጌ። ቤ ዬሎ ጌዴመ ሀ ሰሀ ገረ ክሌ ዬሌይ ቤንቶ ግሸ መጋፈ ዴንደሱነ ቡሮ ቤ መዸ ቦተኮ እ ቦቴ። 22 ዬ ኤሱኬ ሀቴይ ህኑሴ መዻረ ህግልሳረኮ። ማቁወዬ ባከ ሴኬኮ ህኑናረ ተ ሙሄ፥ ዬንየን መገኮ ህ መጌ፥ ህ መገ በይሴሴ ደንደኤስ ባሶ። 23 ዬ ዎንቴ ተምበ ህ ሽኦሮንኬ ህኑምበ ዎርጉሱወሶ። ህኑሴ ተ ኦሄስ ፌቶ ኣዴኮ። ኑወዴይ ተ ሱንሡነ ህ ሽኤ አበኮ ኡድኮ ህኑሴ ኤ እንጌ። 24 ሀቴ ኣሎ ተ ሱንሡነ አበን ሽዾበይተኮ። ህ መገይ ፈጬቴ ኬንጉወሰ ማቆሮንኬ ዎንቶ ሽኡወይቴ፥ ኤፈኮ ህ ኤኬ። 25 ሃንጽ ዜሬ ህኑሴ ተ ዜርዶስ መመኮነዎኮ ኤ ማቅቸ። ሀ ኤ ጌዴ ሴኬ ኑወዴ ግሸ መመኮነ ኤ ማዾ ባኔ ትዽስ ህኑሴ ተ ዜሬ ዎገኮ ዮኔሰ። 26 ዬንየከ ተ ሱንሡነኮ ህ ሽኤ፥ ተንን ‹ኑወዴኮ ህ ግሸ ተ ሽኤ› ዬይድ ህወሶ። 27 ተምበ ህ ኤሄ ግሻረ ‹ዎንቶኮፈ ኤ ዮዶ› ህድ ተምበ ህ ኣዴሤ ግሻረ ኑወዴይ ቤሴ ህኑምበ ኤሀኮ ኤ ኤሄ። 28 ኑወዴ ደኣፈ ኬስኮ ሀ ሰሀ ገረ ተ ዮዴሴ፥ ሀቴመ ሀ ሰሀ ዸድኮ ኑወዴኮ ተ ሀንጌ» ዬይድ ኤ ህዶ። 29 ኤ ኤሩስቾሽት «ሀይ ሀቴ መመኮነ ኤ ማዾ ባኔ ትዽስኮ ኑሴ ኔ ዜርዶ። 30 ኡድ አበኮ ኔ ኤሬንክየረ ኦኔን ኔ ገረ ኦይቼ ኡቁሴሴ ኤ ዎርጉሱወንክየረ ሀቴ ኤርዱንጽኮ። ዬ ኤስን ዎንቶኮፈ ኬስ ኔ ዮዶስ ‹ኣዴኮ› ህድ ኑ ኤፎሮሰ መትኮ ኤ ዬሴ» ዬይድ ኡ ህዶ። 31 ዬሱሰን «ሀቴ ‹ኣዴኮ› ህድየ ህ ዬሴ? 32 ስወይቴ! ህ ብዝ ብዝነ ህ ጎዶዋነ ጎዶዋነ ህ ቡዱቴ ዎጋረ ተምበ ተ ጎሹነ ህ ዸጌ ዎጋረኮ ዬሰ ሀይ ኤልኮ ኤ ዬሴ። ኑወዴመይ ታረ ዬሴ ግሸ ተ ጎሼዎ ማቁወሶ ተ ዬሴስ። 33 ሀ ኤሰ ህኑሴ ተ ዜርዶስ ታረ ዬስኔ ሞዼቴ ህ ዴጌሦሮሰኮ። ሀ ሰሀ ገረ ዬስኔ መዸ ግዳኮ ህ ዬሴ። ብዞን ሆዶፍተ፥ ሀ ሰሀ ኢሽኮ ተ ዬሴ» ዬይድ ኤ ህዶ።
1 ዬሱሰይ ዬይድ ቤ ዜርዶ ጌዴ ዎኬ አፋ ቤድ ብየዴ ኤ ሽዾ። ሽእስኔን «ኑወዴ! ዎገይ ኤልኮ ዬሴ። ኔ ዬሌይ ኔምበ ኩሦሮንኬ ኔ ዬሌ ኩሡወ። 2 ዬ ኤስን ኤሱሴ ኔ እንዶ አሥቱሴ ኡድ ኮሎ መክነ ኡ ዬሶሮንኬ ኡድ አሥ ገረ ኤሱሴ አዴቶ እንድኮ ኔ ዬሴ። 3 ኮሎ መክነ ዬሶይ ኔ ጎሽዎይ ኣዴ ዎንቶ ህድ ህዩቴ ዎንቶ ማቄ ኔረ ኔ አንሶ ታ ዬሱስ ክርስቶሳረ ኤሬኮ። 4 ታሴ ኔ እንዶ ሀንተ አልስኮ ሀ ሰሀ ገረ ኔምበ ተ ኩሶ። 5 ዮነሴ ኑወዴ! ሀ ሰሀይ ሜዹቶ ባኔ ኔረ ዎልኮ ዬስኔ ተ ኬንግቾ ኩሠ ፉለ ሀቴን ኔ በድየ ተ ገረ አዱሱወ። 6 ሀ ሰሀ ገረፈ ታኮ ኔ እንዴሴ አሥቱሴ ኔ ኦኑንቴ አዱስ ኦትኮ ተ ዬሴ። ኔሴ ኡ ማቅቾይኔኮ ታኮ ኔ እንዴሴ። ኡስን ኔ ከቶ ከትኮ ዬሴ። 7 ታኮ ኔ እንዶስ ኡድ ኔኮፈ ኤ ማቄንኬ ሀቴ ኤረኮ ኡ ኤሬ። 8 ዬ ኤስን ታኮ ኔ እንዶ ከቶ ኡሱሴ ተ ኦትኔ ኤትኮ ኡ ዬሴ። ተንን ኔኮፈ ዮዶንኬ ሞዹስ ኤርድ ተምበ ኔ አንሶንኬ ‹ኣዴኮ› ህድኮ ኡ ዬሴ። 9 ተን ሽኤስ ኡሱሱኮ፥ ሀ ታኮ ኔ እንዶስት ኔሴ ኡ ማቄ ግሸ ኡሱሴ ባከ ሀ ሰሀ ገረ ዬሴ አሥ ግሸ ሽኡወሶ። 10 ታስ ቤ ኡድነ ኔሱኮ፥ ኔስ ቤ ኡድነ ታሱኮ። ተ ኩሠ ፉለይ ኡ በዴነ አዴይድኮ ኤ ዬሴ። 11 ዮነሴ ተን ሀ ሰሀ ገረ ዴጩወሾ። ኡስመይ ሀ ሰሀ ገረኮ ኡ ዬሴ። ተን ኔኮኮ ሀሜሴ ህኔ። ሀይለ ማቄ ኑወዴ! ንን ብዞ ማቄንኬ ኡስን ብዞ ማቆሮሰ ታሴ ኔ እንዴሴ ኔ ሱንሥ ኦሰነ ኡሶ ከኩወ። 12 ኡሳረ ዎልኮ ተ ዬቾ ዎገ ታሴ ኔ እንዴቾ ኔ ሱንሥ ኦሰነ ኡሶ ከትኮ ተ ዬሴ፥ ፈሽኮ ተ ዬሴ። ‹ባኔሰ› ህድ ህዩተሱሜ ፌደይ ባደይ ብዝን ባሶ። ዬ ኤስን ኤ ማዾስ ሀይለ ፍሸሮወ ኦሁቴቸይ እቶሮንኬኮ። 13 ሀቴ ተን ኔኮ ሀሜሱኮ ህኔ። ተ እንጌ መገይ ኡሱከ ኩንድ ዬሶሮንኬ ሀ ሰሀ ገረ ዬስኔ ለገ ዜሬኮ ኡሱሴ ዜርየ ተ ዬሴ። 14 ኔ ከቶ ኡሱሴ እንድኮ ተ ዬሴ። ተን ሀ ሰሃፈ ማቁወንኬ ኡስን ሀ ሰሃፈ ማቁቱወሶ። ሀ ኤ ግሸኮ ኣዴሡወ ሀ ሰሀ አሥት ኡሶ እንጸኤ። 15 ኢተ ማቄ ሁምበዬ ገረፈ ኡሶ ኔ ከፎሮንኬ ባከ ሀ ሰሀ ገረፈ ኡሶ አሬ ኔ ኬሶሮንኬ ሽኡወሶ። 16 ተን ሀ ሰሃፈ ማቁወንኬ ኡስን ሀ ሰሃፈ ማቁቱወሶ። 17 ኣዴ ኦጌነ ኡሶ ሀይሎንሡወ፥ ኣዴን ኔ ከቶኮ። 18 ኔን ተምበ ሀ ሰሀ ገረ ዬሴ አሥቱኮ አንሶንኬኮ ተንን ኡሶ ሀ ሰሀ ገረ ዬሴ አሥቱኮ ተ አንሶ። 19 ኡስ ኣዴነ ሀይሎንድ ዬሴሰ ኡ ማቆሮንኬ ተንን ኡ ግሸኮ ተምበ ተ ሀይሎንሤ። 20 ኔምበ ተ ሽኤስ ሀ ኡ ግሸዎ ኤ ማዾ ባኔ ኡ ኦቶሰ ሲድ ተምበ ኣዴሤስቱሴ ኡድኮ። 21 ኑወዴ፥ ኔን ታከ ተንን ኔከ ዬሴንኬ ኡስ ቤ ኡድነ ብዝ ሙጹሮናረ ብዝ መሦናረ ኡ ዬሶሮንኬኮ ኔምበ ተ ሽኤ። ኔን ተምበ አንሶንኬ ሀ ሰሀ ገረ ዬሴ አሥት ‹ኣዴኮ› ህድ ህዮሮሰ ኡስን አስ ኑከ ኡ ዬሶሮንኬኮ ንየ ተ ሽኤ። 22 ንን ብዞ ማቄንኬ ኡስን ብዞ ማቆሮሰ ታሴ ኔ እንዴቾ ኩሠ ፉለ ኡሱሴ እንድኮ ተ ዬሴ። 23 ተን ኔምበ ሽኤሽ ተን ኡሱካከ ኔንን ታካከ ማቄንኬ ኡስን አበን ሸሆይ ኤሰ ባ ብዜቶ ኡ ኬሞሮንኬኮ። ዬይድዎ ተምበ ኔ አንሶንክየረ ተምበ ኔ ኤቶ መኮ ኡሶን ኔ ኤቴሴንክየረ ሀ ሰሀ ገረ ዬሴ አሥት ኤሮሮሰኮ። 24 ኑወዴ! ሀ ሰሀይ ሜዹቶ ባኔ ተምበ ኔ ኤቶ ግሸ ታሴ ኔ እንዶ ኩሠ ፉለ ሀ ታኮ ኔ እንዴሴስት ቤዮሮንኬ ተን ዬሴ ጎዶ ታረ ኡ ዬሶሮሰኮ ተ ዎርጌ። 25 ግዞ ማቄ ኑወዴ! ሀ ሰሀ አሥት ኔምበ ኤሩወሶ። ተንመይ ኔምበ ኤረኮ ኤሬ። ሀ ኡስን ተምበ ኔ አንሶንኬ ኤረኮ ኡ ኤሬ። 26 ኔን ተምበ ኤቶ ኤሀይ ኡሳከ ኤ ዬሶሮንክየረ ተንን ኡሱከ ዬሶሮንክየረ ኔምበ ኡ ኤሮሮንኬ መትኮ ተ ዬሴ፥ አስን መሆኮ ተ መሄ» ዬይድ ኤ ህዶ።
1 ዬሱሰይ ዬይድ ቤ ሽዾ ጌዴ ቤ ኤሩስቾሽታረ ቄድሮኔ ሾሬ ሴምፈ በዴ ፎት የሀ ምሥ ቶፉቴሴ ጎዶወ (4) ኤ ጌሎ። 2 የሀ ዬሱሳረ ኤ ኤሩስቾሽታረይ ለገ ዎገ ጵክሉትቾ ግሸ ዬሱሰ ገርስ እንጌሴ ህኔ ይሁደይ ዬ ጎዶ ኤ ኤርቸ። 3 ህኔ ይሁደይ ከህንቱሴ አፈነ ማግታረ ፈረሰሥታረይ አንሶ ዬብታረ ካት ቶረሥታረ ኤት ኤ ዮዶ። ኡስን ኩራዜ፥ ቶምፌ፥ ቶረ ሚዤ ዬይስ ቤ ኩችየ አይቴሴሰ ኡ ማቅቸ። 4 ዬሱሰን ቤ ገረ ኤሌ አበኮ ቤ ኤርቾ ግሸ ኡሱኮ ኡዽ «ኦን ህ ዎርጌ?» ህድ ኤ ኦይጮ። 5 ኡስን «ነዝረተሥ ዬሱሰኮ ኑ ዎርጌ» ህድ ኡ ህዶ። ኤስን «ሀይ ተምበኮ» ህድ ኤ ህዶ። ኤሰ ኣስ እንጌሴ ዮደ ይሁደይ ኡሳረ ዎልኮ ኤእየ ኤ ዬቸ። 6 ዬሱሰይ «ሀይ ተምበኮ» ህድ ህዶ ዎገ ሴኬ ቤ ጌዴ ገረ ሽዽ ሰሃ ኡ ኡንዶ። 7 ሀቴን ሴኬ «ኦን ህ ዎርጌ?» ህድ ኤ ኦይጮ። ኡስን «ነዝረተሥ ዬሱሰኮ ኑ ዎርጌ» ህድ ኡ ህዶ። 8 ኤስን « ‹ተምበኮ› ህድ ህኑሴ ኦትኮ ተ ዬሴ። ዬቦ፥ ህ ዎርጌስ ታ ኤ ማዾ ጌዴ ሀ ኡስተ ዸጉወይቴ ዸድ ሀሙቶሴ» ህድ ኤ ህዶ። 9 ዬይድን ህዬሴ ኤ ደንደዾስ ቡሮ «ታኮ ኔ እንዴሴሳፈ ብዝን ተ ገረፈ ሸሁት ባዶ ባሶ» ዬይድ ቤ ህዴቾ ከቶይ እቶሮ ግሸኮ። 10 ስሞኔ ሱንግቸ ጴጽሮሴን ሰተተይ ኤ ገረ ዬቾይኔ ኤ ኮፍየፈ ኬስ ከህንቱሴ አፈነ አዴ ማለ ማቄ አዴ ገረ ዴንድ ኤ ኦሽች በዴ ወሼ ቡርስ ኤ ደቶ። ዬ ማለን መልኮሴኮ ኤ ሱንግቸ። 11 ዬሱሰን ጴጽሮሴሴ «ኔ ሰተተ ሴኬ ኤ ኮፍየ ጌልሱወ። ኑወዴይ ተ ገረ ኤ ዮዎሮንኬ መቴሴ ዴጾ መዸ ኤፌ ታ ዎርጉሱወዬ?» ህድ ኤ ህዶ። 12 ዬ ኤ ጌዴ ካት ቶረሥትን ኡ አፈነ ማገን አይሁደ ዬብትን ዬሱሰ አይት ኡ ቱቶ። 13 ቡሮነ ሃነኮ ኡ ኣንዶ። ሃነይ ዬ ቤራ ከህንቱሴ አፈነ አዴ ማቄ ቀያፈ መችየዴኮ ኤ ማቅቸ። 14 ዬ ቀያፈኮ ቡሮ «ብዝ አሥ ለገ ግሸ ሀይኤስ ብሼሸኮ» ዬይድ አይሁደ አፈነ ማግቱሴ ቤ መሦ ዜርዴቸሽ። 15 ስሞኔ ጴጽሮስየረ ዬሱሰይ ኤሩስቾ ብዝ ፌዴሳረይ ዬሱሰ ጌዴ ኡ ኣዾ። ዬ ፌደይ ከህንቱሴ አፈነ አድየረ ዎለ ኤሬሰ ቤ ማቅቾ ግሸ ዬሱሳረ ዎልኮ ከህንቱሴ አፈነ አዴ ቄይሽ ግደ ኤ ጌሎ። 16 ጴጽሮሴመይ ዉዴነ ቄይሽ ገሰ ጌዴ ኤእየ ኤ ዬቸ። ዬ ኤሩቴሴስ ሱማ ከክቸንዮ ሀንኬ ማዽ ዜሩስ ጴጽሮሴይ ጌሎሮንኬ ኤ መቶ። 17 ሱማ ከክቸን ጴጽሮሴ «ኔን ሀ አሥ ኤሩስቾሽታፈ ብዞ ማቁወኑወ?» ህድ እ ኦይጮ። ጴጽሮሴን «ኦኦ፥ ተን ኡሳፈ ማቁወሶ» ህድ ኤ ኣጩንቶ። 18 ዬንየ ቶየይ ቶይቾ ግሸ ማልታረ ዬብታረይ ተመ ኤስ ኤዽ ኡ ከሽቸ። ጴጽሮሴን ኡሳረ ዎልኮ ኤዽ ከሽየ ኤ ዬቸ። 19 ዬንየን ከህንቱሴ አፈነ አዴይ ዬሱሰ ኤሳረ ዬሴስት ግሻረ ኤሩስየ ኤ ዬሴ ኤረ ግሻረ ኤ ኦይጮ። 20 ዬሱሰን «ኡድ አሥ ቡሮ ትዽየነ ኦትኮ ተ ዬሴ። አይሁደሥት ጵክሉቴ ጎዶ ዬ ኤስን ኡ ጵክሎ ዘውታን ማቄ ዎንቶ ሀይለ ዘዋን ኡድ ዎገ ኡሶ ኤሩስኮ ተ ዬቸ፥ ኣችያነ ብዞን ተ ኤሩሶይ ባሶ። 21 ህኔ አበሱወ ተምበ ኔ ኦይጬ? ኡሱኮ ተ ዜሩሱኔ ሲደስተ ኦይጩወ። ተ ዜርዶ ዜሬ ኡስ ኤረኮ ኡ ኤሬ» ህድ ኤ ህዶ። 22 ዬሱሰይ ዬይድ ዜርዶ ጌዴ የሀ ኤእየ ዬቸ ዬብታፈ ብዝ «ከህንቱሴ አፈነ አዴሱወ ዬይስ ሴኬ ኔ መሃኔ?» ዬይድ ህስኔ ኤ አንቃ ኤ በዾ። 23 ዬሱሰን «ኢተ ተ ዜርዴሶ ‹ሀ ኤሰኮ ኢተ ኔ ዜርዶ› ህድ ህወ። ሞዼ ተ ዜርዴሶ ህኔ አሜ ተ አንቃ ኔ በቄ?» ህድ ኤ ህዶ። 24 ዬ ኤ ጌዴ ሃነይ ዬሱሰይ ቱፉት ዬሴንኬዎ ከህንቱሴ አፈነ አዴ ማቄ ቀያፈኮ ኤ አንሶ። 25 ዬንየ ስሞኔ ጴጽሮሴይ ኤዽ ተመ ኤ ከሽቸ። ፌዴ አሥትን «ኔን ሀ ኤሳረ ዬቸሼ ማቁወኑ?» ህድ ኡ ኦይጮ። ኤስን «ኦኦ፥ ተን ኤሳረ ዬቸሼ ማቁወሶ» ህድ ኤ ኣጩንቶ። 26 ጴጽሮሴይ ኤ ወሼ ቡርሴቾሽ እግነ ማቄ ከህንቱሴ አፈነ አዴ ማልታፈ ብዝ «ምሥት ቶፉቴ ጎዶወ ኤሳረ ዎልኮ ኔ ዬሱኔ ንየ ቤዶ ባንቡወ?» ህድ ኤ ህዶ። 27 ጴጽሮሴን ሴኬ አስ ቡሮኬዎ ኣጩንቶ። ዬንየከ ሉከል ኦሎ። 28 አይሁደሥት ቀያፈሶፈ ዬሱሰ ኤት ሮመ አፈነ ማገሶ ቄይሽ ግዳ ኡ ሀንዶ። ዬንየን ሰሀይ ሀገ ዎንቴቸ። አይሁደሥትን ገሮ መሰላከ ምዬሴ ቤ ህቾ ግሸ «ቱኔይዶፉንጽ!» ህድ ዬ ማገ ቄይሽ ግደ ጌሌ ኡ እንጸዾ። 29 ህኔ ጵላጾሴይ ኡሱኮ ዉዴ ኬስ «ሀ አሥ ገረ ህ ኡቁሴ ሉፎይ አም ኤ ማቅቸ?» ህድ ኤ ኦይጮ። 30 ኡስን «ሀ አሥ ኢተ ሀንቴ ዼደኮ አይት ኔ ቡሮ ኡቁሱወድኮ ኑ ዬቸ» ህድ ኡ ህዶ። 31 ጵላጾሴን «ህኑን ህኑሴ ኤት ሀንድ ህ ዎገኬ ኤ ገረ ያኡወይቴ!» ህድ ህዶ። አይሁደሥትን አፈነ ማግትን «ኑንመይ ኦኔ ገረን ኤ ሀይኦሮንኬ ኑ ያኡወንኬ ቱጩትኮ ኑ ዬሴ» ህድ ኡ ህዶ። 32 ዬይድን ኤ ማዾስ ዬሱሰይ ዋንድ ቤ ሀይኤንኬ ዜርዴቾ ከቶይ ኣሎሮንኬኮ። 33 ጵላጾሴይ ሴኬ ማዽ ቄይሽ ግዳ ጌል ዬሱሰ ሀንኬ ቤኮ ጼይድ «ኔን አይሁደ ካቱወ?» ህድ ኤ ኦይጮ። 34 ኤስን «ኔምበ ሀ ኤሰ ኔኮፈ ታ ኦይጬሸን አሡወረ ተ ግሸ ኔኮ ኦተ?» ህድ ኤ ህዶ። 35 ጵላጾሴን «ህኔ ተን አይሁደሡወ? ኔምበ ታኮ ገርስ እንደስ ኔ አይሁደሥታረ ከህንቱሴ አፈነ ማግታረኮ። አም ኔ ሀንቴቸ?» ህድ ኤ ኦይጮ። 36 ዬሱሰን ሴኬ ኤሱሴ «ተ ካቴቴይ ሀ ሰሀ ካቴቴ ማቁወሶ፥ ሀ ሰሀ ካቴቴ ኤ ማዸኮመ አይሁደሥት ተምበ አይኩወንኬኮ ተ ዬብት ኡሳረ ደርጉታኔ። ሀቴመ ተ ካቴቴይ ሀ ሰሀሴ ማቁወሶ» ህድ ኤ ህዶ። 37 ጵላጾሴን «ህኔ ኔን ካቱ?» ህድ ኤ ህዶ። ኤስን «ተን ካቴ ማቄንኬ ኔ ዜርዶስ ኣዴኮ። ተ ዬሉቶሳረ ሀ ሰሀ ገረ ተ ዮዶሳረይ ኣዴይ አበ ማቄንኬ ኦሄሱኮ። ኣዴ ኤሄስት ኡድኮ ተ ኦሄሰ ኡ ሲኔ» ዬይድ ኤ ህዶ። 38 ጵላጾሴን «ኣዴይ አም?» ህድ ኤ ኦይጮ። ዬ ኤ ጌዴ አስዎ አይሁደሥቱኮ ኬስ «ኤ ገረ ብዞን በይሶ ዴጌሶ ባሶ። 39 ብዝ ቱፈሤ ህ ገሮ መሰላነ ህኑሴ ተ ብርችቾንኬ ሎስኮ ህ ዬቸ። ሀ ኤ ግሸ ሀ አይሁደ ካቴ ብርሽ ተ ደፎሮሰ ኤሀ ህ ኤሄ?» ህድ ኤ ኦይጮ። 40 ኡስን ቤ ከቶ ኬደይስ «ኦኦ፥ ኦኦ! ኤሰ ማቁወሶ፥ በርባኔ ብርቹወ!» ህድ ኡ ህዶ። በርባኔይ ፉሎኮ ኤ ማቅቸ።
1 ዬ ኤ ጌዴ ጵላጾሴይ ዬሱሰ ኤት ዱሩሶ። 2 ቶረሥትን አንኬ ጻጽ ኤ ቅኖወ ኡ ገዶ፥ ዞኦ ማኦን ኡ መይሶ። 3 ኤሱኮ ኡዽ «አይሁደ ካቶ፥ ሰዎይቴ፥ ሞዼይቴ!» ህድ ህስኔ ኤ አንቀን ኡ በቅቸ። 4 ጵላጾሴን ሴኬ አስ ዉዴ ኬስ አይሁደሥቱኮ «ኤ ገረ ብዝ በይሶን ተ ዼዶሰ ኤሱነ ህ ኤሮሮንኬ ሀቴ ኤሰ ህኑኮኮ ዉዴ ተ ኬሴ» ህድ ኤ ህዶ። 5 ህኔ ዬሱሰይ አንኬይ ኤ ቅኖወ ገዱት ዞኦ ማኦ ማዽ ቤ ዬሴንኬ ዉዴ ኤ ኬሶ። ጵላጾሴን «ሀይ ቤወይቴ!» ህድ ኤ ህዶ። 6 ከህንቱሴ አፈነ ማግታረ ዬብታረይ ኤሰ ቤ ቤዶንየ «ሱጹወ! ሱጹወ!» ህድ ኡ ኮይሶ። ጵላጾሴይ «ተን ተ በዴነ ኤ ገረ ብዝ በይሶን ተ ቤዶይ ባሶ። ኤሀአይኮ ህኑሴ ኣንድ ሱጹወይቴ» ህድ ኤ ህዶ። 7 «ኑን ዎገ ኬመኮ ኑ ኬንጌ። ‹ዎንቶ ዬሌኮ ተን› ዬይድ ህኔሰ ዬ ዎገይ ኤሁወሶ። ሀ ኤ ግሸ ሀ አሥ ሀይኡወዬ!» ዬይድ ኡ ህዶ። 8 ጵላጾሴይ ዬይድ ኡ ህዶሰ ቤ ሲዶ ጌዴ ቡሮሜ ገርስ ኢተነ ኤ ዠሾ። 9 ቄይሽ ግዳ አስ ሀንኬ ጌል «ዶ! ኔን አየፈን?» ህድ ዬሱሰ ኤ ኦይጮ። ኤስን ሀንኬ ኤሱሴ ብዞን መሄ ኤ ዼዶ። 10 ህኔ ጵላጾሴይ «ታረ ዜረሹነ? ተን ኔምበ ብርቼሼን ኔምበ ሱጼሴን አዴቶ ተ ኬንጌሰ ኤሩወኑ?» ህድ ኤ ህዶ። 11 ዬሱሰን «ዎንቶኮፈ አዴቶይ ኔሴ እንጉቴ ዼደኮ ተ ገረ አበ አዴቴን ፌቶ ኬንጉወድኮ ኔ ዬቸ። ኔ ኩችየ ተምበ ገርስ እንደ አሥ ኔሜ ገርዴሴ ጩቦኮ ኤ ኬንጌ» ህድ ኤ ህዶ። 12 ጵላጾሴይ ዬሱሰይ ዜርዶሰ ቤ ሲዶ ዎጋ ኤሰ ብርሽ ደፌሴ ኤ ዎርዶ። አይሁደሥት «ሀ አሤ ብርቼሸ ኔ ማቆአይኬቴሴ ሮመ ካቱሴ (5) ኡ በዴ ማቁወነኮ። ዬ ኤስን ቤምበ ካቴ መሄስ ሮመ ካቱሴ ኤ ኢለሡኮ» ዬይድ ህስኔ ኡ ኮይሶ። 13 ጵላጾሴን ዬ ኤሰ ቤ ሲዶ ጌዴ ዬሱሰ ዉዴ ኤ ኬሶ። ሹች ሎቼ ሱንጌ ጎዶ (6) ያኤሴ ኤ ኡቶ። ዬ ጎዶን እብረይስቴ ኑነነ ገበተኮ ኤ ሱንግቸ። 14 ዬ ዎንተይ ገሮ መሰለሴ አይሁደሥት ነቁቴ ዎንቴኮ ኤ ማቅቸ። ዎንታፈ እዙፍ ሳቴ ኤ ኤሌ ዎገ ጵላጾሴይ አይሁደሥተ «ሀይ ህ ካት!» ህድ ኤ ህዶ። 15 ኡስን «ሴነ ኦሡወ፥ ኦሡወ! ሱጹወ!» ህድ ኡ ኮይሶ። ጵላጾሴን «ህ ካቴ ሱጻ ተ ሱጼ?» ህድ ኤ ኦይጮ። ከህንቱሴ አፈነ ማግት «ሮመ ካቴ ባከ ፌዴ ካቴ ኑን ኬንጉወንጽኮ» ህድ ኡ ህዶ። 16 ዬንየን ጵላጾሴይ ዬሱሰይ ሱጹቶሮሰ ኡሱኮ ገርስ ኤ እንዶ። ኡስን አይት ኤት ዸድ ኡ ሀንዶ። 17 ዬ ኤ ጌዴ ዬሱሰይ ቤ ሱሥ ምሤ ቤሴዎ እድ «ቅኖ ቆጬ» ዬይድ ህዩቴ ጎዶ ኤ ኬሶ። ዬ ጎዶይ እብረይስቴ ኑነነ ጎልጎተኮ ኤ ሱንግቸ። 18 የሀን ኤሰ ኡ ሱጾ። ኤሳረ ዎልኮን ለምእ አሥተ ሴ በዴ ሀ በዴ ህስ ዬሱሰ ግዳ ገድ ኡ ሱጾ። 19 ጵላጾሴን «ነዝረተሥ ዬሱሰ አይሁደ ካቴ» ዬይድ ህኔ ዲዙቴሴሰ ኤሱነ ኤሮሮሰ ኤ ሱጹቶ ምሥ ገረ ኤ ገዱቶሮንኬ ኤ መቶ። 20 ኤሱነ ኤ ዲዙቶስን እብረይስቴ ኑነነ፥ ግርኬ ኑነነ፥ ሮመ ኑነነኮ ኤ ማቅቸ። ዬሱሰይ ሱጹቶስ ከተመሴ ኡኬ ኤ ማቅቾ ግሸ ለገ አይሁደሥት ዬ ኤሰ ኡ ዜሩስቸ። 21 ከህንቱሴ አፈነ ማግት ጵላጾሴ «ኔን ‹አይሁደ ካቱኮ› ህስኔ ዲዞፉነ፥ ኔ ዲዞሮስ ‹ኤስ «ተን አይሁደ ካቱኮ» ህድኮ ኤ ህዶ› ህድ ህኔሰ ዲዙወ» ህድ ኡ ህዶ። 22 ጵላጾሴን «ዬይ፥ ተ ዲዞሰ ዲዝኮ ተ ዬሴ» ህድ ኤ ህዶ። 23 ቶረሥት ዬሱሰ ቤ ሱጾ ጌዴ ኤ ማኦ ኤት ዎል ጌኖ ጌኖ ኤ ኤሎሮንኬ ኦይድ ጎዶ ኡ ሸቶ። ኤሳፈ ኤ ገረ ኩሜነ ማኡቴስ ኤ ዬቸ። ዬ ኤስን ኬልየፈ አይት ቅጨምልነ ብዞዎ ማዽ ሜዹቴሴሰ ኤ ማቅቸ። 24 ህኔ «ሀ ማኦ ፌዹወንጽኮ፥ ኦኔ ኤ ኤሌንኬ ህጸ ኦልኮ ኑ ኤፌ» ህድ ዎልኮ ኡ ኩንዶ። ዬይስን ኡ መቶሱነ «ተ ማኦ ዎሉሴ ኡ ሸቶ፥ ተ ማኦ ኤፌሴ ህጸ ኤ ገረ ኡ ኦሎ» ዬይድ ሀይለ ፍሸሮወ ኦሁቴቸ ካዮይ እቶ። ቶረሥት መቶስ ዬ ኤሰኮ። 25 ዬሱሰይ ሱጹት ዬሱኔ ኤ ደኣ ኤስንዶይ፥ ኤስንዶይንዶ ቡሾይ፥ ቄሌጰ መቾ ማቄ ማረሜይ፥ መግዶለጽ ማረሜይ ህድ ኤእየ ኡ ዬቸ። 26 ዬንየን ዬሱሰይ ኤስንዶወረ ኤ ኤህቾ ብዝ ኤ ኤሩስቾሻረይ የሀ ኤእየ ኡ ዬሴሰ ቤድ ቤይንዶ «ኑንዴ! ቤወ፥ ኤሰ ኔ ዬሌ መሁወ» ዬይድ ኤ ህዶ። 27 ዬ ቤ ኤሩስቾሹኮ «ቤወ፥ እሶ ኔይንዶ መሁወ» ህድ ኤ ህዶ። ዬንየፈ አይት ቤ ዘወ ኤት ሀንድ ኤ ገዶ። 28 ዬ ኤ ጌዴ ዬሱሰይ ኡድ አበኮይ እቶሰ ቤ ኤርዶ ጌዴ ሀይለ ፍሸሮወ ዲዙቴቸ ከቶይ ኣሎሮሰ «ዋሡኮ ተ ሰዞ» ህድ ኤ ህዶ። 29 የሀን ዾቆ አበኮይ ኤሳከ ኩንዴሴ ኦተይ ኤ ዬቸ። ህኔ የሀ ዬቸ አሥት ሁጸ ብሼሼሸ ኤት ዬ ዾቆወከ ጌልስ ህሶጴ ህድ ህሶ ምሥ ቅኖወ ገድ ኤ ኑና ኡ ኡቁሶ። 30 ዬሱሰን ዬ ዾቆ ላቅዮ ቤ ጹንጾ ጌዴ «ኡድ አበኮይ እቶሴ» ህድ ኤ ህዶ። ቤ ቅኖ ኡለይስ ከሤ ኤ ኬሶ። 31 ዬ ኤ ጌዴ አይሁደ አፈነ ማግት ዬ ሱጹተ ጌርት አሀይ ሱሥ ምሥ ገረ ኤ ዬሴሜ ኡ ፈሸኔ ሜይስ ኡ ሆሦሮንኬ ጵላጾሴ ኡ ሽዾ። ኤሱሜ ኡ ሽዾስን ዬ ዎንቴይ ሰንበተሴ ኡ ነቁትቾ ዎንተ ኤ ማቅቾ ግሻረ ሰንበታፈ ዬ ሰንበተይ ፌቶ ፌዴ ሰንበትቱሜ ኬደይዴሴሰ ኤ ማቅቾ ግሻረኮ። 32 ህኔ ቶረሥት ሀንድ ዬሱሳረ ሱጹቴቸ ጌርት ፈሸኔ ኡ ሜይሶ። 33 ዬሱሰኮ ኡ ኡዾንየ ቡሮነ ኤ ሀይዼሴሰ ቤድ ኤ ፈሸኔ ሜይሴ ኡ ዸዶ። 34 ሜይሴ ዸቡቱወዬ ባ ቶረሳፈ ብዝ ኤ ምልየነ ቶረነ ኤ ጨዶ። ዬ ኤ ጨዶንኬዎ ሱሣረ ዋሣረይ ኬሶ። 35 ህኑን «ኣዴኮ» ህድ ህዮሮሰ ዬ ኤሰ ቤደ አሥ አቶ ማዽ ዜርድኮ ኤ ዬሴ። ኤ አቶን ኣዴኮ፥ ኣዴ ቤ ዜሬንኬ ቤሴ ኤረኮ ኤ ኤሬ። 36 ዬይድን ኤ ማዾስ ሀይለ ፍሸሮወ «ኤ ሜቄትየፈ ብዝን ሜኡወሶ» ህድ ኦሁቴቸሽ እቶሮሰኮ። 37 ፌዴ ጎዶ አስ «ዬ ቤ ጨዴቾሸ ቤተኮ ኡ ቤኔ» ዬይድ ህኔስ ዬቾ ግሸኮ። 38 ዬ ኤ ጌዴ ብዝ ዮሴፌ ሱንጌ አርመትየሴ ከተመሥ አይሁደ አፈነ ማግተ ቤ ዠሾ ግሸ ኣችያነ ዬሱሰ በዴ ማቅቸሽ ጵላጾሴኮ ጌል ዬሱሰ አሀ ኤ እንጌቴ ኤት ሞጌሴ ኤ ኦይጮ። ጵላጾሴን «ኤኩወ!» ህድ ህዶ። ህኔ ዮሴፌይ ሀንድ አሀ ኤቶ። 39 ሀ ኤሱሜ ቡሮ ብዝ ቀመ ዬሱሰኮ ዮዴቸ ንቆዶሞሴይ ሀይዝ ተመ ኦይድ ኪሎ (7) ኤሌ ከረዋረ ጮልኤ ጭቻረይ ዎልኮ ዎርቁቴሴ ሽቶ ኤት ኤ ዮዶ። 40 ኡስን አሀ ኤት ሀዴ አይሁደሥት አሀ አይክቾንኬ አይት ሽቶነ ትሽ ተልባፈ ሜዹቴሴ ማኦነ ኡ አጮ። 41 ዬሱሰይ ሱጹቶስ ደኣ አበኮይ ቶፉቴ ጎዶይ ኤ ዬቸ። የሀ ኦኔን ኤሳከ ሞጉት ኤሩወዴቾ ክሌ ቦሰይ ኤ አይኩቴቸ። 42 አይሁደሥት ሰንበተሴ ነቁትቾ ዎንተ ኤ ማቄ ግሻረ ዬ ቦሰይ ኡኬ ማቅቾ ግሻረ ዬሱሰ አሀ ኦድ ቦሰ ጌልስ ኡ ዎይሶ (8)።
1 ሁዴ ዎንቴ ኬትየ ሾኤ ሰሀይ ጌዦ ባኔ መግዶለጽ ማረሜይ ዬሱሰ አሀይ ዬቾ ቦሳ እ ሀንዶ። ቦሰ ሱማፈ ሹች ኦሡት ዬሱኔ እ ቤዶ። 2 ህኔ እስን ስሞኔ ሱንግቸ ጴጽሮሴኮወረ ዬሱሰይ ኤህቾ ፌዴ ኤ ኤሩስቾሹኮወረ ዎጽ ሀንድ «ላሤ ቦሳፈ ኤት አየ ኡ ገዶሰ ኤሩወንጽኮ» ህድ እ ኦቶ። 3 ህኔ ጴጽሮስየረ ፌዴ ዬሱሰይ ኤሩስቾሻረይ ኬስ ቦሳከ ኡ ሀንዶ። 4 ኡስን ቤ ለምኡነ ዎጽየ ኡ ዬቸ። ዬ ፌዴ ኤ ኤሩስቾሽ ዎጽ ጴጽሮሴ ገርድ ሀንድ ኤሱሜ ቡሮ ቦሳ ኤ ኤሎ። 5 ቦሳከ ኡለይድ ኤ ቤዶንየ አጬቸ ማኦይ የሀ ዬቸ። ቦሳን ጌሎ ባሶ። 6 ስሞኔ ጴጽሮሴይ ኤ ጌዴ ዮድ ቦሳከ ጌሎ። ኤስን አጬቸ ማኦይ የሀ ዬሱኔ ኤ ቤዶ። 7 ዬሱሰ ቅኖወ ጻጹቴቸ ማኦይ አጬቸ ማኦሜ አሬ ደኩሱት ዬሱኔ ኤ ቤዶ። 8 ዬ ኤ ጌዴ ቡሮ ዮዴቸ ኤ ኤሩስቾሽ ዬ ቦሳ ጌል ቤ ቤዶንየ «ኣዴኮ» ህድ ኤ ህዶ። 9 ዬ ኤስን ሀይቦወፈ ዴንዴይ ኤሱሴ ዎርጉሴ በሴ ኤ ማቄንኬ ሀይለ ፍሸሮወ ኦሁቴቸሼ ዬንየ ገጾ በድኮ ኡ ዬቸ። 10 ዬ ኤ ጌዴ ኤ ኤሩስቾሽት ለምኤ ማዽ ዸድ ቤ ዘወ ኡ ሀንዶ። 11 መግዶለጽ ማረሜይ ዬክስኔ ቦሰ ሱማ ዉዴነ እ ኤእቸ። ዬክስኔን ዙድ ቦሳ እ ቤዶ። 12 ዬሱሰ አሀይ ዎይዼቾ ጎዶ ቦሥ ማኦ ማዼሴ ለምእ ዎንቶ ዎሰሥ ብዝ ቅንሦ በዴነ ብዝ ቶክሦ በዴነ ኡትየ ኡ ዬሱኔ እ ቤዶ። 13 ኡስን ማረሜ «ኑንዴ! አም ኔ ዬኬ?» ህድ ኡ ኦይጮ። እስን «ተ ላሥ አሀ ሀየፈ ኤት አየ ኡ ገዶሰ ኤሩወሶ» ህድ እ ህዶ። 14 ዬይድ ቤ ህዶ ጌዴ ቤ ጌዴ ማዽ እ ቤኔንየ ዬሱሰይ ኤኡሱኔ እ ቤዶ። ኤሰ ኤ ማቄሰ እ ሀሎ። 15 ዬሱሰን «ኑንዴ! አም ኔ ዬኬ? ኦን ኔ ዎርጌ?» ህድ ኤ ኦይጮ። እስን ዬ ገትየ ሀንቴሰ እሶ ኤ ብሽኔ «ተ ላሦ! ዬሱሰ አሀ ሀየፈ ኤቴሶ አን ጎዶ ኔ ገዴሴሰ፥ ኦዴ፥ ታሴ ኦሁወ፥ ተ ኤፌሴ» ህድ እ ህዶ። 16 ኤስን «ማረሜ!» ህድ ኤ ህዶ። እስን ኤሱኮ ማዽ እብረይስቴ ኑነነ «ረቡኔ!» ህድ እ ህዶ። ኤ ብርቼይ «ኤሩሴዮ!» ህድ ህዮኮ። 17 ዬሱሰን «ሀገ ኑወዴኮ ሀንዶ በድ ተ ዬሴ ግሸ ተምበ አይቶፉነ። ኑንዶ ነአጼኮ ሀንድ ‹ «ዸድኮ ታሴን አዴ ህኑሴን አዴ ታሴን ዎንቶ ህኑሴን ዎንቶ ማቄሱኮ ዎኬ ተ ሀንጌ» ዬይድ ኤ ህዶ› ህድ ሀንድ ኦሁወ!» ህድ ኤ ህዶ። 18 ህኔ መግዶለጽ ማረሜይ ኤ ኤሩስቾሽቱኮ ሀንድ «ላሡኮ ተ ቤዶ» ህድ እ ኦቶ። ዬ ኤ ጌዴ እሱኮ ኤ ኦቶሰን እ ኦቶ። 19 ዬ ዎንቴ ዬ ኤስን ዬ ሁዴ ዎንቴ ሰሀይ ቀንዶ። ዬንየ ኤ ኤሩስቾሽት አይሁደ አፈነ ማግተ ቤ ዠሾ ግሸ ቤ ገሰ አይስ ዘወ ኡ ጵክሉቴቸ። ዬሱሰይ ገሰይ አይኬ ዬሱኔ ኡ ግዳ ጌል ኤዽ «ሞዼቴይ ህኑሴ ማቁወዬ!» ህድ ኤ ህዶ። 20 ዬይድ ቤ ህዶ ጌዴ ቤ ኩችየረ ቤ ምልየረ ኡሶ ኤ ቤይሶ። ኤ ኤሩስቾሽት ላሤ ቤ ቤዶንየ ኦርጄነ ኡ መዶ። 21 ሴኬን አስ ዬሱሰይ «ሞዼቴይ ህኑሴ ማቁወዬ! ኑወዴይ ተምበ አንሶንኬኮ ተንን ህኑምበ አንሤ» ህድ ኤ ህዶ። 22 ዬይድ ዜርድ «ኡፉ» ቤይዶ ጌዴ «አያነ ጌሼ ኤኩወይቴ። 23 ህኑን አሥ ጩቦ ‹አቱወዬ› ህድ ሂተአይኮ ኡ ጩቦን ‹አቱወዬ› ህድኮ ኤ ህዩቴ። ህኑን አሥት ጩቦ ‹አቱወዬ› ህድ ህዬ ህ ዼበአይኮ ኡ ጩቦን ‹አቱወዬ› ህድ ህዩቱወሶ» ህድ ኤ ህዶ። 24 ዬሱሰይ ቤ ኤሩስቾሽቱኮ ዮዶንየከ ተመ ለምኡካፈ ብዞ ማቅቸ ድድሞሴ (9) ሱንጌ ቶማሴይ ዬንየ ኡሳረ በድኮ ኤ ዬቸ። 25 ህኔ ፌዴ ኤ ኤሩስቾሽት «ላሡኮ ኑ ቤዶ» ህድ ቶማሴኮ ኡ ኦቶ። ቶማሴይ «ኤ ኩችየነ ምስማሬይ ጨዴቾ ጎዶ ተ ቤዶ ባ ኣሎ ዬ ጎዶወከ ተ ኩቼ ግልአ ጌልስ ዬይድዎ ኤ ጨዱቴቾ ምልየነ ተ ኩቼ ተ ጌልሶ ባ ኣሎ ተን ሀ ህ ኦሄሰ ‹ኣዴኮ› ህድ ህወሶ» ህድ ኤ ህዶ። 26 ሀዙፍ ዎንተ ጌዴ ኤ ኤሩስቾሽት ሴኬ አስ ዘወ ጵክሉት ኡ ዬቸ። ዬንየን ቶማሴይ ኡሳረ ዎልኮ ኤ ዬቸ። ገሰይ አይኩት ዬሱኔ ዬሱሰይ ኡ ግደ ጌል ኤዽ «ሞዼቴይ ህኑሴ ማቁወዬ» ህድ ኤ ህዶ። 27 ዬ ኤ ጌዴ ቶማሴኮ «ኔ ግልአ ሀንኬ ኦድ ገደ ተ ኩቼ ቤወ! ኔ ኩቼን አንስ ተ ምሌ ጨሻነ ጌልሱወ! ኣዴሡወ ባከ ኤዞፉነ» ህድ ኤ ህዶ። 28 ቶማሴን «ተ ላሦ፥ ተ ዎንቶ!» ህድ ኤ ህዶ። 29 ዬሱሰይ ቶማሴኮ «ኔንመይ ተምበ ኔ ቤዶ ግሸኮ ኔ ኣዴሶ። ተምበ ቤዶ በዴስኔ ኣዴሠረስት ሱዙቴሴስተኮ» ህድ ኤ ህዶ። 30 ዬሱሰይ ሀ ፍሸሮወ ዲዙቶ ባ ለገ ምጩሼ አበኮ ቤ ኤሩስቾሽታረ ዬስኔ ኤ ሀንቴቸ። 31 ዬይድ ኤ ማዸኮን ሀ ፍሸሮይ ኤሱሜ ዲዙቶስ ዬሱሰይ ሜስሄ ማቄንክየረ ዎንቶ ዬሌ ኤ ማቄንክየረ ህ ኣዴሦሮሰኮ። ዬይድዎ ኣዴስ ኤ ሱንሡነ ኮሎ መክነ ዬሶ ህ ዴጌሦሮንኬኮ።
1 ዬ ኤ ጌዴ ዬሱሰይ ቤ ኤሩስቾሽቱሴ ጽብርየዶሴ በገዴ (10) ደኣ አስ ቤምበ ኤ ቤይሶ። ቤምበ ኤ ቤይሶስን ሀ ኤሱኬኮ። 2 ስሞኔ ሱንግቸ ጴጽሮሴይ፥ ድድሞሴ ሱንግቸ ቶማሴይ፥ ገልለ ቃነ ከተመሤ ማቄ ነትነኤሌይ፥ ዘብዶሴ ነአጽየረ ፌዴ ለምእ ኤ ኤሩስቾሽታረይ ዎልኮ ኡ ዬቸ። 3 ስሞኔ ሱንግቸ ጴጽሮሴይ «ተን ጉልጼ አይክየኮ ዸድ ሀንጌ» ህድ ኤ ህዶ። ኡስን «ኔረኮ ኑንን ሀንጌ» ህድ ህስኔ የሀፈ ኬስ ሀንድ ዘጳከ ኡ ጌሎ። ዬ ቀመ ብዞን ጉልጼ አይቶ በድ ኡ አዾ። 4 ሰሀይ ዎንቶ ጌዴ ዬሱሰይ ኤሩስቾሽት በገዴ ኑና ኤ ኤኡሱኔ ቤድ ኤሰ ኡ ሀሎ። 5 ዬሱሰን «ጌሬ! ህ አይቴሴ ጉልጼይ ዬሳ ዬሴ?» ህድ ኤ ኦይጮ። ኡስን «ብዝን ባሶ» ህድ ኡ ህዶ። 6 ኤስን «ማረቤ ዘጰሴ ኦሽች በዴነ ደኩወይቴ፥ አይኮኮ ህ አይኬ» ህድ ኤ ህኔ በገድየ ማረቤ ኡ ደቶ። ለገ ጉልጼ ኤ አይቴሴ ግሸ ማረቤ ጎሽ ኬሴይ ኡሶ ኢሾ። 7 ዬሱሰይ ኤህቾ ኤ ኤሩስቾሽ ስሞኔ ሱንግቸ ጴጽሮሴኮ «ላሤመ!» ህድ ኤ ህዶ። ጴጽሮሴን ዬ ኤሰ ቤ ሲዶንኬዎ ቤ ገረፈ አፈነ ማኦ ቤ ኬሴቾ ግሸ ሴኬ ቤ ማኦ ማዽ ዬሱሰኮ ዮዌሴ በገድየ ዶንድ ኤ ጌሎ። 8 ፌዴ ኤ ኤሩስቾሽት ብዝ ጺሥ ሜትሬ ኤሌሰዎ ሰሀሜ ዘርድ ቤ ዬቾ ግሸ ጉልጼይ ኤሳከ ኩንዴሴ ማረቤ ዘጰነ ጎሽ ኡ ዮዶ። 9 በገዴ ኑና ዮድ ዘጳፈ ቤ ኬሶ ጌዴ ቦራረ ተመ ኣአ ገረ ዬሴ ጉልጽየረ ኡ ቤዶ። 10 ዬሱሰን «ሀቴ ህ አይቶ ጉልጽየፈ ኦወይቴ!» ህድ ኤ ህዶ። 11 ህኔ ስሞኔ ሱንግቸ ጴጽሮሴይ ዘጳከ ኤ ጌሎ። ብዝ ጺሤ እችች ተመ ሀይዜ መለ መለ ጉልጼነ ኩንዴሴ ማረቤ ዋሳፈ ጎሽ በዴ ገረ ኤ ኬሶ። ማረቤይ ሃንጽ ጉልጼ አይተኮን ፌዹቶ በድኮ ኤ ዬቸ። 12 ዬሱሰን «ዮድ ሙወይቴ!» ህድ ኡሶ ህዶ። ላሥ ዬሱሰ ኤ ማቄንኬ ቤ ኤርዴቾ ግሸ ኡሳፈ ኦኔን «ኔን ኦኔው?» ህድ ኤሰ ኦይጬሼ ናሰይ ብዝን በድኮ ዬቸ። 13 ኤስን ሀንኬ ኡዽ ቦረ ኤት ኡ ምዮሮሰ ኡሱሴ ኤ እንዶ። ዬይድዎ ጉልጼን ኤ እንዶ። 14 ሀይቦወፈ ኤ ዴንዶ ጌዴ ኤ ኤሩስቾሽት ኤሰ ኡ ቤሱኔ ሀ ኤስ ሀይሶ ዎገኮ ኤ ማቅቸ። 15 ከሠ ኡ ሙዶ ጌዴ ዬሱሰይ ስሞኔ ሱንግቸ ጴጽሮሴኮ «ዮነ ዬሌ ስሞኔ! ሀ ኡሱሜ ገርስ ታ ኤሃ ኔ ኤሄ?» ህድ ኤ ኦይጮ። ኤስን «ኤወ ላሦ! ኔምበ ተ ኤሄንኬ ኔን ኤረኮ ኤሬ» ህድ ኤ ህዶ። ዬሱሰን «ተ ቀልንቸ ሙሱወ!» ህድ ኤ ህዶ። 16 ለኩንሦ አስ «ዮነ ዬሌ ስሞኔ! ታ ኤሃ ኔ ኤሄ?» ህድ ኤ ኦይጮ። ጴጽሮሴን «ኤወ ላሦ፥ ኔምበ ተ ኤሄንኬ ኔን ኤረኮ ኤሬ» ህድ ኤ ህዶ። ኤስን «ተ ዶርተ ዬንጉወ» ህድ ኤ ህዶ። 17 ሀይሶ አስ «ዮነ ዬሌ ስሞኔ! ተምበ ኤሃ ኔ ኤሄ?» ህድ ኤ ኦይጮ። ሀይሶ ዎገ «ተምበ ኤሃ ኔ ኤሄ?» ህድ ኤ ህዶሰ ጴጽሮሴይ ህግል «ላሦ! ኔን ኡድ በሱኮ ኔ ኤሬ። ኔምበ ተ ኤሄንኬን ኤረኮ ኔ ኤሬ» ህድ ኤ ህዶ። ዬሱሰን «ተ ዶርተ ሙሱወ! 18 ኔሴ ተ ኦሄስ ፌቶ ኣዴኮ። ሙለ ዬስኔ ኔሴ ኔ ማኦ ማዽ ኔ ኤቶ ዉዴ ኔ ሀንግቸ። ኔ ጭንዶ ጌዴመ ኔ ኩቼ ኔን ቤይሴ፥ ፌዴ አሥ ኔምበ መይስ ኔ ዎርጉወ ዉዴን ኤት ኤ ሀንጌ» ዬይድ ኤ ህዶ። 19 ሀ ኤሰ ኤሱሜ ኤ ዜርዶስን ጴጽሮሴይ አበኬይድ ሀይዽ ዎንቶ ኤ ኩሡሴሰ ኦሄሱኮ። ዬ ኤ ጌዴን ጴጽሮሴኮ «ታረ ዮወ!» ህድ ኤ ህዶ። 20 ጴጽሮሴን ቤ ጌዴ ማዽ ዬሱሰይ ኤህቾ ብዝ ኤ ኤሩስቾሽ ኡ ጌዴ ዮሱኔ ኤ ቤዶ። ዬ ኤስን ቡሮ ዬ ቀሜቴ ኡ ሙሱኔ ዬሱሰ ወሼኮ ኡዽ «ኔምበ ገርስ እንጌስ ኦኔወ?» ህድ ህስኔ ኦይጬቸሹኮ ኤ ማቅቸ። 21 ጴጽሮሴይ ዬ አሤን ቤድ ዬሱሰኮ «ላሦ፥ ሀ አሥች?» ህድ ኤ ኦይጮ። 22 ዬሱሰን «ተን ‹ተ ዮኔ ኣሎ ዬሱወዬ› ህድ ኤሰ ተ ህደኮ አም ኔምበ ኤሳከ ጌልሴሰ? ኔን ኔሴ ታረ ዮወ» ህድ ኤ ህዶ። 23 ዬ ኤ ግሸ ኣዴሤስት ግዳከ «ሀ አሥ ሀይኡወሶ» ዬይድ ህኔ ኦዶይ ኤ ቡዱቶ። ዬሱሰመይ «ተን ‹ተ ዮኔ ኣሎ ዬሱወዬ› ህድ ኤሰ ተ ህደኮ አም ኔምበ ኤሳከ ጌልሴሰ?» ህድ ኤ ህዶሰ ባከ «ሀይኡወሶ» ህድ ህዶ ባሶ። 24 ሃንጽ ዜሬ ቤድ ኦተሳረ ሀ ኤስተ ዲዜሳረይ ዬ ኤ ኤሩስቾሸኮ። ኤ ኦቶስን ኣዴ ማቄንኬ ኤረኮ ኑ ኤሬ። 25 ዬሱሰይ ሀንቶ ለገ አበክተኮ አስዎ ዬሰ። ታሴ ኤ ብሼንኬ ኤ ሀንቶ ሀንትት ኡድ ኤ ብዝ ብዝነ ዲዙቴሴሰ ማዸኮ ዬ ዲዙተ ፍሸሮ ቤሴ ሀ ሰሀይ አይኬሴ ደንደኡወድኮ ኤ ዬቸ።